172-1-1a



172-1-1b

༄༅༅། །རྒྱ་གར་སྐད་དུ། བུདྡྷ་ཙ་རི་ཏ་མ་ཧཱ་ཀཱ་བྱ་ནཱ་མ། བོད་སྐད་དུ། སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ། སངས་རྒྱས་དང་བྱང་ཆུབ་སེམས་དཔའ་
ཐམས་ཅད་ལ་ཕྱག་འཚལ་ལོ། །དཔལ་ལྡན་ཡོན་ཏན་ཚོགས་ཀྱིས་གང་། །བདག་ཉིད་ཆེན་པོ་སེམས་ཅན་གྱི། །དོན་མཛད་ཡང་དག་སངས་རྒྱས་དང་། །ཆོས་དང་དགེ་འདུན་ལ་ཕྱག་
འཚལ། །བུ་རམ་ཤིང་པར་མཐུ་མཉམ་བུ་རམ་ཤིང་པའི་རྒྱུད། །ཐུབ་དཀའ་ཤཱཀྱ་རྣམས་ལ་སྤྱོད་པ་རྣམ་དག་པ། །འཕྲོག་བྱེད་ཟླ་བ་ལྟ་བུར་སྐྱེ་དགུ་རྣམས་ལ་སྡུག །རྒྱལ་པོ་ཟས་གཙང་
ཞེས་བྱའི་མིང་ཅན་བྱུང་བར་གྱུར། །དབང་པོ་དང་མཚུངས་དེ་ཡི་བདག་པོ་ལྡན་མ་ཡིན། །ནུས་མཐུ་རྗེས་མཚུངས་གཟི་བརྗིད་ལྷ་མོ་བདེ་སོགས་དང་། །པདྨོ་ཅན་འདྲ་ཕུན་སུམ་ཚོགས་པ་ས་
བཞིན་བརྟན། །སྒྱུ་མ་ཆེན་མོ་ཞེས་བྱ་དཔེ་མེད་སྒྱུ་འདྲ་བྱུང་། །མི་སྐྱོང་རྒྱལ་པོ་འདི་ནི་དེ་དང་ཐབས་ཅིག་ཏུ། །དགའ་བ་ཉེར་ལྡན་རྣམ་ཐོས་སྲས་ཀྱི་དཔལ་བཞིན་རོལ། །དེ་ནས་ཡང་དག་ཏིང་

172-1-2a

འཛིན་ལྡན་པའི་རིག་མ་བཞིན། །སྡིག་བྲལ་མ་དེ་མངལ་ནི་རྣམ་པར་གཟུང་བར་གྱུར། །མངལ་དང་ཉེ་བར་ལྡན་པ་ཉིད་ཀྱི་སྔོན་རོལ་དུ། །དེ་ནི་གཉིད་སོང་གླང་པོའི་དབང་པོ་དཀར་པོ་ཞིག །རང་ཉིད་ལ་
ནི་རབ་ཏུ་ཞུགས་སོགས་མཐོང་གྱུར་ལ། །དེ་ཡི་མཚན་མ་ཉམ་ཐག་པ་ནས་ཐོབ་མ་ཡིན། །ལྷ་དང་རབ་ཏུ་མཚུངས་པ་དེ་ཡི་ལྷ་མོ་དེ། །མངལ་གྱིས་རིགས་ཀྱི་དཔལ་ནི་རབ་ཏུ་འདྲེན་བྱེད་ཅིང་། །སྒྱུ་མ་ངལ་བ་དང་ནི་མྱ་ངན་
སྒྱུ་མེད་པར། །གཙང་ལ་ཉོན་མོངས་མེད་པའི་དགོན་པར་བློ་གྲོས་མཛད། །དེ་ནི་ལུམ་བི་ཞེས་བྱའི་ནགས་མཐར་གྱུར་པའི་ས། །སྣ་ཚོགས་ལྗོན་ཤིང་སྣ་ཚོགས་ཤིང་རྟ་མངོན་དགའ་བར། །བསམ་གཏན་ལ་བཟོད་དབེན་
པའི་ནགས་ཀྱི་མཐའ་བཞེད་མ། །འགྲོ་བའི་ཆེད་དང་གནས་ཕྱིར་མི་སྐྱོང་ལ་ཞུས་སོ། །དེ་ཡི་ཆོས་དང་ལྡན་ལ་འཕགས་པའི་ཞེ་འདོད་དག །རྣམ་པར་ཤེས་ནས་ཡ་མཚན་དགའ་བ་ཡིས་གང་སྟེ། །ཞི་བའི་གྲོང་ནས་ས་
ཡི་བདག་པོ་གཤེགས་གྱུར་ཏེ། །དེ་ཡི་དགའ་བའི་རྒྱུ་ཡིན་རྣམ་པར་རྒྱུ་ཕྱིར་མིན། །དཔལ་དང་ལྡན་པའི་ནགས་དེར་རྒྱལ་པོའི་བདག་ལྡན་མ། །རབ་ཏུ་བལྟམ་པའི་དུས་ནི་ཡང་དག་མངོན་གཟིགས་ཤིང་། །བླ་རེ་ཉེ་བར་

172-1-2b

ཕུལ་བའི་གཟིམས་མལ་རབ་ཐོབ་སྟེ། །མི་མོ་སྟོང་ཕྲག་དག་གིས་མངོན་པར་དགའ་བར་བྱེད། །དེ་ནས་སྐར་མ་རྒྱལ་རབ་ལྡན་པར་གྱུར་པའི་ཚེ། །བརྟུལ་ཞུགས་ལགས་པར་འདུས་བྱས་ལྷ་མོ་དེ་ཡི་ནི། །རྩིབ་ལོགས་དག་ནས་འཇིག་རྟེན་ཕན་ཕྱིར་སྲས་བལྟམས་ཏེ། །ཚོར་
བ་དང་ནི་བྲལ་ཞིང་ནད་དང་བྲལ་བ་ཉིད། །ཇི་ལྟར་བརླ་སྐྱེས་བརླ་ནས་རྒྱ་ཆེན་ལག་པ་ནས། །དབང་པོ་དང་མཚུངས་ང་ལ་ནུ་ནི་སྤྱི་བོ་ནས། །མཚན་ལྡན་ཉིད་ཀྱང་ལག་པའི་ཆ་ཤས་གསང་བ་ནས། །རྣམ་པ་དེ་ལྟར་དེ་ཡི་སྐྱེ་བ་བྱུང་བར་གྱུར། །མངལ་ནས་མངོན་པར་ངེས་པར་བྱུང་བ་གཟུགས་མཛེས་ཏེ། །ནམ་
མཁའ་དག་ལས་འཕྲོས་འདྲ་སྐྱེ་གནས་ལས་མ་སྐྱེས། །བསྐལ་པ་གཅིག་མིན་རྣམས་སུ་བསྒོམས་པའི་བདག་ཉིད་ནི། །གང་ཞིག་ཡང་དག་རབ་ཏུ་ཤེས་ན་སྐྱེས་གྱུར་བླུན་པོ་མིན། །ཉི་མ་གཞོན་ནུ་ས་ལམ་མངོན་པར་བབས་པ་བཞིན། །གསལ་བ་དང་ནི་བརྟན་པས་གང་ཞིག་མཛེས་པ་སྟེ། །དེ་ལྟར་
ཤིན་ཏུ་གསལ་ཡང་ངེས་པར་རྟོག་པ་ན། །རི་བོང་གིས་མཚན་ཇི་ལྟར་མིག་དག་འཕྲོགས་པར་གྱུར། །དེ་ནི་རང་གི་ལུས་ཀྱི་འོད་རབ་འབར་བ་ཡིས། །སྒྲོན་མའི་འོད་ཀྱང་གསལ་བར་བྱེད་པ་ལྟར་བཅོམ་སྟེ། །རིན་ཐང་ཆེན་པོ་འཛམ་བུ་ཆུ་གསེར་མཛེས་པའི་མདོག །ཕྱོགས་རྣམས་ཐམས་ཅད་རྣམ་
པར་སྣང་ཞིང་གསལ་བར་མཛད། །འཁྲུགས་པ་མ་ཡིན་ཡོན་པོའི་སྐྱོན་དག་རབ་བསལ་ཞིང་། །ཤིན་ཏུ་བརྟན་པ་དང་ལྡན་རྣམ་པར་ཡངས་པའི་འགྲོས། །དེ་ལྟར་མི་གཡོ་རབ་ཏུ་བརྟན་པའི་གོམ་པ་བདུན། །དྲང་སྲོང་སྐར་མ་བདུན་དང་རབ་མཉམ་གཤེགས་པར་གྱུར། །བྱང་ཆུབ་ཕྱིར་དང་འགྲོ་ལ་ཕན་
པའི་ཕྱིར་སྐྱེས་ཤིང་། །འདི་ནི་བདག་གི་སྲིད་པའི་སྐྱེ་བ་ཐ་མ་ཞེས། །སེང་གེའི་འགྲོས་འདྲ་ཕྱོགས་བཞི་དག་ཏུ་རྣམ་གཟིགས་ནས། །སྣོད་ལྡན་རྣམས་ཀྱི་དོན་བྱེད་དག་ཀྱང་སྨྲས་པར་གྱུར། །ནམ་མཁའ་དག་ལས་རབ་བབས་ཟླ་བའི་འོད་ཟེར་དཀར། །གྲང་དང་དྲོ་བའི་ཆུ་རྒྱུན་རྣམ་པ་གཉིས་ཀྱི་
ཤུགས། །ལུས་ལ་ཡང་དག་རེག་པས་བདེ་བ་བསྐྱེད་པའི་ཕྱིར། །མཛེས་ཤིང་ཡིད་འོང་དེ་ཡི་སྤྱི་བོར་བབས་པར་གྱུར། །དཔལ་ལྡན་བླ་རེ་བྲེས་པར་གསེར་གྱིས་འབར་ཞིང་མཚན། །བཻ་ཌཱུརྱ་ཡི་རྐང་པའི་གཟིམས་མལ་ལ་གཟིམས་པ། །དེ་ལ་གུས་ཕྱིར་གསེར་གྱི་པདྨའི་ཕྱག་མངའ་བའི། །

172-1-3a

གནོད་སྦྱིན་བདག་རྣམས་ཀུན་ནས་ཡོངས་སུ་བསྐོར་ནས་གནས། །མི་མངོན་གྱུར་པའི་ལྷ་རྣམས་ཀྱིས་ཀྱང་ནམ་མཁའ་ལ། །གང་གི་མཐུ་ལས་མགོ་བོ་ཡིས་ནི་རབ་བཏུད་ཅིང་། །ཀུན་ནས་གདུང་བ་སྐྱོབ་པའི་གདུགས་དཀར་རྣམས་བཟུང་སྟེ། །བྱང་ཆུབ་ཆེད་དུ་མཆོག་
གི་བསྔགས་པ་དག་ཀྱང་སྨྲས། །འདས་པའི་སངས་རྒྱས་རྣམས་ལ་ལྷག་པར་མཆོད་བྱས་པའི། །ལྟོ་འཕྱེ་ཆེ་རྣམས་ཁྱད་འཕགས་ཆོས་ལ་སྲེད་པའི་ཕྱིར། །གང་ལ་རླུང་གཡབ་ཀྱིས་གཡབ་གུས་པའི་མིག་གཟིར་ཅིང་། །མན་དཱ་ར་བའི་མེ་ཏོག་རྣམས་ཀྱིས་ཡང་དག་འཐོར། །དེ་བཞིན་གཤེགས་
པ་བལྟམས་པའི་ཡོན་ཏན་གྱིས་ཚིམ་པའི། །གཙང་མར་ལྷག་པར་གནས་པའི་རྣམ་དག་སེམས་ཅན་རྣམས། །སྡུག་བསྔལ་ཉིད་དུ་བྱིང་བའི་འགྲོ་ལ་ཕན་པའི་ཕྱིར། །ལྷ་རྣམས་འདོད་ཆགས་བྲལ་བ་ན་ཡང་དགའ་བར་གྱུར། །གང་གིས་རབ་ཏུ་བལྟམས་ཚེ་རི་རྒྱལ་ཕུར་བུ་ཉིད། །རླུང་གིས་
བསྣུན་པའི་གྲུ་ལྟར་ས་གཞི་གཡོས་གྱུར་ཞིང་། །ཙནྡན་དང་བཅས་ཨུཏྤལ་པདྨའི་སྙིང་པོ་ཡི། །ཆར་པ་དག་ནི་ནམ་མཁའི་སྤྲིན་དང་བྲལ་ལས་བབས། །ཡིད་འོང་རེག་ན་བདེ་བའི་རླུང་དག་བྱུང་གྱུར་ཏེ། །ལྷ་ཡི་ན་བཟའ་དག་ནི་མངོན་པར་འབེབས་བྱེད་ཅིང་། །ཉི་མ་དེ་ཉིད་ལྷག་པར་མངོན་པར་
གསལ་བ་སྟེ། །ཞི་བའི་འོད་ཟེར་འདུས་མ་བྱས་པའི་མེ་འབར་རོ། །ཤར་དང་བྱང་གི་མཚམས་ཀྱི་ཁང་པའི་ཕྱོགས་གཅིག་ན། །བསིལ་བའི་ཆུ་ཡི་ཁྲོན་པ་རང་བྱུང་གྱུར་པ་སྟེ། །ཕོ་བྲང་བཙུན་མོའི་འཁོར་རྣམས་ཡ་མཚན་གྱུར་རྣམས་ཀྱིས། །གང་ལ་བྱ་བ་རྣམས་ནི་སྟེགས་བཞིན་རབ་ཏུ་བྱས། །
ཆོས་དང་ལྡན་པའི་ལྷ་དང་འབྱུང་པོའི་ཚོགས་རྣམས་ཀྱིས། །དེ་ནི་ལྟ་བའི་དོན་དུ་ནགས་ཚལ་རབ་གང་སྟེ། །རྨད་བྱུང་ངོ་མཚར་གྱུར་པ་ཉིད་ཀྱི་ཤིང་ལོས་ཀྱང་། །མེ་ཏོག་རྣམས་ནི་དུས་མ་ཡིན་པར་ངེས་པར་བྲུལ། །འཚེ་བར་བྱེད་པའི་སེམས་ཅན་རྣམས་ཀྱང་དེ་ཡི་ཚེ། །ཕན་ཚུན་དག་ཏུ་ཕྱིན་ཏེ་གནོད་པ་མི་
བྱེད་ལ། །འཚོ་བའི་འཇིག་རྟེན་དག་ན་ནད་གང་ཇི་སྙེད་པ། །དེ་དག་རྣམས་ཀྱང་འབད་པ་མེད་པར་དེ་ཚེ་བཅོམ། །མཁའ་འགྲོའི་བྱ་ནི་མཐོ་མིན་སྒྲ་སྒྲོགས་རི་དགས་ཀྱང་། །ཆུ་ཀླུང་དག་ནི་ཆུ་ཡང་ཞི་བར་བབ་གྱུར་ལ། །ཕྱོགས་རྣམས་རབ་སྣང་དགེ་བའི་ནམ་མཁའ་རབ་མཛེས་ཤིང་། །ལྷ་ཡི་རྔ་རྣམས་མཁའ་

172-1-3b

ལ་རབ་ཏུ་གྲགས་པར་གྱུར། །རྒུད་པར་གྱུར་ལ་མགོན་ནི་ཉེ་བར་ཐོབ་ནས་བཞིན། །འཇིག་རྟེན་དག་ཀྱང་མཆོག་ཏུ་རབ་ཞི་ཐོབ་གྱུར་ལ། །འཇིག་རྟེན་རྣམས་ཀྱི་ཐར་པའི་བླ་མ་རབ་བལྟམས་ཚེ། །འདོད་པའི་ལྷ་ཉིད་ཁོ་ན་དགའ་བ་མེད་པར་གྱུར། །ཤིན་ཏུ་ངོ་མཚར་སྲས་ཀྱི་སྐྱེ་བ་མཐོང་གྱུར་ནས། །མི་བདག་བརྟན་པ་
ཡིན་ཡང་རྣམ་པར་འགྱུར་ནས་སོང་། །རབ་དགའ་སྐྱེས་པ་ཉིད་དང་ཡིད་མི་བདེ་སྐྱེས་ཏེ། །བརྩེ་བ་ལས་ནི་མཆི་མ་རྣམ་པ་གཉིས་བྱུང་ངོ་། །མི་མ་ཡིན་པའི་སྲས་པོ་ཉིད་ཀྱི་ནུས་པ་དང་། །མ་ཡི་རང་བཞིན་ཀྱང་ནི་སྟོབས་ཆུང་ཉིད་ཀྱི་ཕྱིར། །གྲང་དང་དྲོ་བའི་ཆུ་དག་འདྲེས་པའི་ཆུ་ཀླུང་བཞིན། །ལྷ་མོ་འཇིགས་པ་
དང་ནི་དགའ་བས་གང་བར་འགྱུར། །ལྷག་མ་སྤངས་ཏེ་འཇིགས་པ་ཉིད་ནི་ཤེས་བྱས་ནས། །ཡིད་འོང་འདོད་པའི་ཆེད་དུ་རྟོགས་པ་མ་ཡིན་པའི། །བུད་མེད་རྒན་མོ་རྣམས་ཀྱིས་བདེ་ལེགས་གྱུར་བྱས་ཤིང་། །གཙང་མར་བྱས་ཏེ་ལྷ་རྣམས་དག་ལ་ཕྱག་འཚལ་ལོ། །དེ་ཡི་མཚན་ཉིད་དག་ཀྱང་ཤེས་ཤིང་
ཐོས་གྱུར་ནས། །སྤྱོད་དང་ཐོས་དང་ཚིག་ལ་གྲགས་ཐོབ་བྲམ་ཟེ་རྣམས། །རྣམ་རྒྱས་ཞལ་ནི་ཡ་མཚན་དགའ་བ་ཡིས་གང་སྟེ། །དགའ་དང་འཇིགས་པར་གྱུར་པའི་མི་ཡི་ལྷ་ལ་སྨྲས། །མི་དག་ས་ལ་བུ་མ་གཏོགས་པའི་ཁྱད་འཕགས་པ། །གཞན་གང་ཅུང་ཟད་འདོད་མིན་ཞི་བ་དེ་ཡི་ཕྱིར། །ཁྱོད་
ཀྱི་སྒྲོན་མ་འདི་ནི་རིགས་ཀྱི་སྒྲོན་མ་སྟེ། །ཁྱོད་ཉིད་དགའ་བར་མཛོད་ཅིག་དགའ་སྟོན་ད་ལྟར་བགྱི། །དེ་ཕྱིར་བརྟན་པར་རྣམ་དཔྱོད་མེད་པར་དགར་མཛོད་དང་། །རིགས་ནི་ངེས་པ་ཉིད་དུ་མཆོག་ཏུ་འཕེལ་བར་འགྱུར། །འདི་ནི་ཁྱོད་ཀྱི་བུ་ཞེས་སྐྱེས་པར་གྱུར་པ་སྟེ། །འཇིག་རྟེན་སྡུག་བསྔལ་དག་
གིས་མངོན་པར་བཅོམ་པའི་མགོན། །མཆོག་གྱུར་འདི་ལ་མཆོག་གྱུར་གསེར་གྱི་འོད་མངའ་ཞིང་། །སྒྲོན་མའི་འོད་ཟེར་དག་གིས་མཚན་རྣམས་གང་གྱུར་པས། །དེ་ཉིད་རྟོགས་པར་གྱུར་པའི་ཐུབ་པར་འགྱུར་བའམ། །ཡང་ན་མི་བདག་ས་སྟེངས་འཁོར་ལོས་སྒྱུར་བར་འགྱུར། །ས་ཡི་བདག་པོ་ཉིད་ལ་
གལ་ཏེ་དགའ་འགྱུར་ན། །སྟོབས་དང་ཆོས་དག་གིས་ནི་དེའི་ཚེ་ས་སྟེངས་སུ། །རྒྱལ་པོ་ཀུན་གྱི་ཐོག་ཏུ་འདི་ནི་གནས་གྱུར་ཏེ། །སྐར་མའི་འོད་རྣམས་ལ་ནི་ཉི་མའི་འོད་བཞིན་ནོ། །དེ་ནི་གལ་ཏེ་ཐར་བཞེད་ནགས་སུ་གཤེགས་གྱུར་ན། །མཁྱེན་དང་དེ་ཉིད་ཀྱིས་ནི་དེ་ཚེ་ས་སྟེངས་སུ། །ལུགས་ཀུན་

172-1-4a

ཟིལ་གྱིས་མནན་ནས་འདི་ནི་གནས་འགྱུར་ཏེ། །མཐོ་བ་ཀུན་ལ་རི་རབ་རི་ཡི་རྒྱལ་པོ་བཞིན། །ཇི་ལྟར་ལྕགས་རྣམས་ལ་ནི་གསེར་དག་མཆོག་ཡིན་ལ། །རི་རྣམས་ལ་ནི་རི་རབ་ཆུ་བོ་རྣམས་ལ་མཚོ། །གཟའ་རྣམས་ལ་ནི་ཟླ་བ་གདུང་བྱེད་རྣམས་ལ་ཉི། །དེ་ལྟར་ཁྱོད་ཀྱི་
སྲས་ནི་རྐང་གཉིས་རྣམས་ཀྱི་མཆོག །གང་གི་སྤྱན་དག་མི་འཛུམས་མིག་གཟིར་རྣམ་པར་སྤངས་པ་སྟེ། །བརྟན་ཞིང་ཤིན་ཏུ་རིང་ལ་དཀར་མིན་རྫི་མ་དང་། །གཟི་བརྗིད་ལྡན་པ་ཡིན་ཡང་འོན་ཀྱང་ཞི་བ་ཉིད། །འདི་ནི་ཀུན་ནས་གཟིགས་པའི་སྤྱན་མངའ་ཅི་ལ་མིན། །དེ་ནས་གཉིས་སྐྱེས་
རྣམས་ལ་མི་བདག་གིས་སྨྲས་པ། །བདག་ཉིད་ཆེན་པོ་མི་སྐྱོང་སྔ་མས་མ་མཐོང་བ། །མཐོང་ཞེས་ཁྱད་འདི་གང་ཡིན་འདི་ལ་རྒྱུ་མཚན་ཅི། །དེ་ནས་བྲམ་ཟེ་རྣམས་ཀྱིས་དེ་ཉིད་ལ་སྨྲས་པ། །བློ་དང་ཐོས་པ་ལས་དང་གྲགས་པ་རྣམས་ལ་ནི། །མི་སྐྱོང་སྔོན་དང་ཕྱི་མ་ཉིད་ནི་ཚད་མ་ཡིན། །དངོས་པོའི་
ལུགས་ལ་འདིར་ནི་བྱ་བ་རྒྱུ་ཡིན་ལ། །འདིར་ཡང་དག་གི་དཔེར་བརྗོད་དག་ནི་མཁྱེན་པར་མཛོད། །གང་ཞིག་རྒྱལ་པོའི་བསྟན་བཅོས་ཤེས་ལྡན་ངན་སྤོང་དག །རིག་བྱེད་དྲང་སྲོང་དེ་གཉིས་ཀྱིས་ནི་མ་བྱས་པ། །དེ་དག་གི་སྲས་ཞི་བ་པ་ཝ་སངས་དང་ནི། །ཕུར་བུ་ཡིས་ནི་དུས་ཀྱིས་དེ་ཉིད་བསྐྱེད་པར་
གྱུར། །ཉམས་གྱུར་སྔ་མ་རྣམས་ཀྱིས་མ་མཐོང་རིག་བྱེད་གང་། །དབྱངས་ཅན་མ་ཡི་བུ་ཡིས་ཀྱང་ནི་སླར་སྨྲས་པ། །ནུས་མེད་གནས་འཇོག་གིས་ནི་མ་བྱས་གྱུར་པ་གང་། །རྒྱས་པ་ཡིས་ནི་དེ་ལྟར་རྣམ་པ་མང་པོར་བརྗོད། །འཕོ་བྱེད་དྲང་སྲོང་ཆེན་པོས་མ་བསྡེབས་གྱུར་པ་གང་། །ཚིག་གི་རྐང་པ་
གྲོག་མཁར་ས་ནི་དང་པོར་བསྐྱེད། །གསོ་བ་གང་ཡང་རྒྱུན་ཤེས་ཀྱིས་ནི་མ་མཐོང་བ། །ཕྱི་ནས་དེ་ནི་དྲང་སྲོང་རྒྱུན་ཤེས་བུ་ཡིས་བྱས། །གང་ཡང་གཉིས་སྐྱེས་ཉིད་ནི་ཀུན་ཤེས་མ་རྙེད་པ། །དེ་ནི་གཏིང་དཔོགས་བུ་ཡིས་རྒྱལ་པོ་ལ་ཐོབ་བོ། །བུ་རམ་ཤིང་པས་དང་པོར་མ་བསྡམས་གྱུར་པ་གང་། །
རྒྱ་མཚོ་ལ་ནི་དུག་བཅས་ཀྱིས་ཀྱང་མཚམས་བཟུང་ངོ་། །སློབ་དཔོན་ཉིད་དུ་བྲམ་ཟེའི་རྣལ་འབྱོར་ཆོ་ག་ལ། །གཞན་རྣམས་ཀྱིས་མ་ཐོབ་པ་སྐྱེད་བྱེད་གཤེགས་པར་གྱུར། །ཁྱབ་འཇུག་གི་ནི་གྲགས་པའི་ལས་རྣམས་གང་ཡིན་པ། །དེ་རྣམས་ལ་ནི་དཔའ་བོ་ལ་སོགས་སྟོབས་མེད་གྱུར། །དེ་ཕྱིར་ལང་ཚོ་དང་ནི་

172-1-4b

རིགས་དག་ཚད་མ་ཡིན། །ལ་ལ་ལ་ལར་མཆོག་ཉིད་ཉེར་ཐོབ་འཇིག་རྟེན་ན། །རྒྱལ་དང་དྲང་སྲོང་རྣམས་ཀྱིས་སྔ་མས་མ་བྱས་པ། །དེ་དང་དེ་དག་རྣམས་ནི་བུ་རྣམས་དག་གིས་བྱས། །དེ་ལྟར་གཉིས་སྐྱེས་དེ་རྣམས་ཀྱིས་ནི་ཡིད་ཆེས་ཏེ། །མི་སྐྱོང་དབུགས་འབྱིན་དང་ཡང་མངོན་པར་དགའ་གྱུར་ལ། །
མི་འདོད་ཐེ་ཚོམ་དག་ནི་ཡིད་ལས་རྣམ་བསྩལ་ཏེ། །རབ་ཏུ་དགའ་བ་ཉིད་ལ་ལྷག་པར་འཛེགས་པར་གྱུར། །དགའ་བ་ཡིས་ནི་གཉིས་སྐྱེས་དམ་པ་དེ་རྣམས་ལ། །བཀུར་སྟི་སྔོན་དུ་འགྲོ་བའི་ནོར་རྣམས་རབ་ཕུལ་ཏེ། །ཇི་སྐད་སྨྲས་བཞིན་འདི་ནི་ས་ཡི་བདག་པོར་གྱུར། །རྒས་པ་ཐོས་ནས་ནགས་རྣམས་
སུ་ནི་འགྲོ་བར་ཤོག །དེ་ནས་མཚན་མ་རྣམས་དང་དཀའ་ཐུབ་སྟོབས་ལས་ནི། །སྐྱེ་བ་མཐར་མཛད་བལྟམས་པ་དེ་ནི་རྟོགས་གྱུར་ནས། །དམ་པའི་ཆོས་ལ་གུས་པའི་ཤཱཀྱའི་དབང་ཕྱུག་གི། །གནས་སུ་དཀར་མིན་དྲང་སྲོང་ཆེན་པོར་གཤེགས་པར་གྱུར། །ཚངས་པའི་དཔལ་ཉིད་ཀྱིས་ཀྱང་དཀའ་ཐུབ་དཔལ་
གྱིས་ནི། །འབར་བའི་ཚང་རིག་རྣམས་ཀྱི་ཚང་རིག་དེ་ལ་ནི། །རྒྱལ་པོའི་བླ་མས་གུས་པ་དང་ནི་བཀུར་སྟིའི་ཕྱིར། །མི་དབང་ཕོ་བྲང་དུ་ནི་རབ་ཏུ་སྤྱན་དྲངས་སོ། །དེ་ནི་ས་བདག་བཙུན་མོའི་འཁོར་གྱི་ཉེ་ལོགས་སུ། །གཞོན་ནུ་བལྟམས་པ་ལ་ནི་དགའ་བའི་ཤུགས་ཀྱིས་འོངས། །དཀའ་ཐུབ་མཆོག་ལས་དང་
ནི་རྒས་པ་ལ་བརྟེན་ནས། །བརྟན་པ་ནགས་ཀྱི་འདུ་ཤེས་ཀྱིས་ལྟར་རྣམ་པར་ཞུགས། །དེ་ནས་ཐུབ་པ་གདན་ལ་གནས་པ་དེ་ལ་མི་སྐྱོང་གིས། །ཞབས་སིལ་མཆོད་ཡོན་སྔོན་འགྲོ་ཡང་དག་རབ་མཆོད་ནས། །སྔོན་ཚེ་གནས་མཆོག་ལ་ནི་མཐའ་ཅན་ལྷས་བཞིན་དེས། །ཇི་ལྟར་ཉེ་བར་སྤྱོད་ལ་སྙན་གསན་
ཕབ་པའོ། །བདག་གི་རིགས་ནི་རྗེས་སུ་བཟུང་ཕྱིར་ནོར་ལྡན་དེས། །གང་ཞིག་བདག་ལ་གཟིགས་ཕྱིར་བཅོམ་ལྡན་ཉེར་གཤེགས་ལ། །བཀའ་དྲིན་གནང་བར་མཛོད་ཅིག་ཞི་བ་ཅི་བགྱི་བགྱི། །ཁོ་བོ་སློབ་མ་ལགས་སོ་ཐུགས་རྗེས་མཛད་པར་རིགས། །དེ་ལྟར་མི་སྐྱོང་གིས་ནི་དངོས་པོ་ཐམས་ཅད་ཀྱིས། །
ཉེ་བར་གསོལ་བཏབ་གྱུར་པའི་ཐུབ་པ་ཇི་ལྟ་བཞིན། །རབ་རྒྱས་ཡངས་པའི་སྤྱན་ནི་ཡ་མཚན་དང་བཅས་པས། །ཟབ་པ་དང་ནི་བརྟན་པའི་ཚིག་རྣམས་སྨྲས་པའོ། །ཆོས་འདོད་གཏོང་བ་དང་ལྡན་འགྲོན་ལ་སྡུག་ཅིང་ཕངས། །བདག་ཉིད་ཆེན་པོ་ཁྱེད་ལ་འཐད་པ་འདི་ཡིན་ལ། །སེམས་

172-1-5a

པ་རྗེས་འགྲོ་ཡེ་ཤེས་ལང་ཚོ་རྗེས་མཐུན་པ། །ཁྱོད་ཀྱི་བློ་གྲོས་གཉེན་གང་དེ་ལྟར་བདག་ལ་ཡིན། །དེ་དང་དེ་ནི་གང་གིས་མི་སྐྱོང་དྲང་སྲོང་དེས། །ཕྲ་མོའི་ཆོས་ཀྱི་ནོར་རྣམས་རབ་ཏུ་ཐོབ་བྱས་ནས། །རྟག་པར་ཆོ་ག་བཞིན་དུ་མཆོད་སྦྱིན་བྱས་གྱུར་པ། །དཀའ་ཐུབ་རྣམས་
ཀྱིས་ཕྱུག་ཅིང་ནོར་རྣམས་དག་གིས་དབུལ། །བདག་གི་ཉེ་བར་འོངས་ལ་དགོས་པ་གང་ཡིན་པ། །བདག་གི་དེ་ནི་གསོན་མཛོད་དགའ་བར་ཉེར་སོང་ཁྱེད། །བྱང་ཆུབ་རྟོགས་པའི་ཆེད་དུ་ཁྱོད་ཀྱི་སྲས་བལྟམས་ཞེས། །ལྷ་ཡི་ངག་དག་བདག་གི་ཉི་མའི་ལམ་དུ་ཐོས། །ངག་དེ་ཐོས་ནས་དང་ནི་
ཡིད་ལ་བསྒོམས་ནས་དང་། །མཚན་མ་རྣམས་ཀྱིས་ཤེས་ནས་དེ་ནས་ཉེ་བར་འོངས། །བརྒྱ་བྱིན་གྱི་ནི་རྒྱལ་མཚན་ཡང་དག་བསྒྲེང་བ་བཞིན། །ཤཱཀྱའི་རིགས་ཀྱི་རྒྱལ་མཚན་བལྟ་བར་འདོད་པ་ཡིས། །ཞེས་པའི་ཚིག་འདི་དེ་ལྟར་ཐོས་པར་གྱུར་ནས་ནི། །མི་དབང་རབ་ཏུ་དགའ་བས་ཀུན་ནས་གཡོས་
གྱུར་ཏེ། །ཡུམ་གྱི་པང་དུ་སོན་ལས་གཞོན་ནུ་བླངས་ནས་ནི། །དཀའ་ཐུབ་ནོར་ཅན་ལ་ནི་ཡང་དག་བསྟན་པར་གྱུར། །དེ་ནས་དྲང་སྲོང་ཆེ་དེས་ཞབས་ལ་འཁོར་ལོས་མཚན། །ཕྱག་དང་ཞབས་ཀྱི་སོར་མོ་དྲ་བས་འབྲེལ་བ་དང་། །གླང་པོ་བཞིན་དུ་མདོམས་ནུབ་སྨིན་མ་མཛོད་སྤུར་བཅས། །
ཡ་མཚན་དང་བཅས་རྒྱལ་པོའི་སྲས་ནི་མཐོང་བར་གྱུར། །ལྷ་མོའི་པང་ན་ཞུགས་པ་མེ་ཡི་བུ་བཞིན་དུ། །མ་མའི་པང་དུ་བཞུགས་པ་མངོན་པར་མཐོང་ནས་ནི། །བྱུང་གྱུར་རྫི་མའི་མཐའ་རུ་མཆི་མ་རྣམས་བྱུང་སྟེ། །དབུགས་མེད་གྱུར་ནས་གྱེན་དུ་ལྟ་ལ་ཞལ་ཕྱོགས་གྱུར། །མིག་དག་མཆི་
མས་ཡོངས་གང་དཀར་མིན་མཐོང་ནས་ནི། །བུ་ལ་བརྩེ་བའི་ཕྱིར་ནི་མི་སྐྱོང་འདར་གྱུར་ཏེ། །མཆི་མ་དང་ནི་གྲེ་བ་ཁ་ཞིང་ལྡབ་ལྡིབ་བཅས། །ཐལ་མོ་སྦྱར་ཞིང་ཡན་ལག་བཏུད་དེ་དྲིས་པར་གྱུར། །གང་གི་ལུས་ནི་ལྷ་ལས་བར་ན་ཅུང་ཟད་ཅིག །རང་གི་སྐྱེ་བ་ངོ་མཚར་མང་པོའི་སྒྲོན་མ་སྟེ། །གང་
གི་དོན་ནི་མཆོག་ཏུ་འགྱུར་བར་སྨྲ་བ་སྟེ། །རབ་ཏུ་མཐོང་ནས་བརྟན་པ་གང་ཕྱིར་མཆི་མ་འོང་། །བཅོམ་ལྡན་གཞོན་ནུ་བརྟན་པའི་ཚེ་ཅན་ཡིན་སྙམ་མམ། །བདག་གི་མྱ་ངན་ཆེད་དུ་སྐྱེས་པ་མིན་ནམ་ཅི། །བདག་ལ་ཆུ་ཡི་སྙིམ་པ་ཅི་ཞིག་ལྟར་རྙེད་དེ། །འདི་ནི་དུས་ཀྱིས་འཐུང་ཕྱིར་ཉེ་བར་འོངས་མ་ཡིན། །

172-1-5b

བདག་གི་སྙན་གྲགས་གཏེར་ནི་མི་ཟད་ཡིན་སྙམ་མམ། །ངེས་པར་བདག་གི་རིགས་ཀྱི་ལག་ནོར་ཡིན་སྙམ་ཅི། །བདེ་བར་ཕ་རོལ་དུ་ནི་རབ་ཏུ་འགྲོ་སྙམ་མམ། །གཉིད་པར་གྱུར་ཀྱང་བུ་ནི་ཕྱེའི་མིག་གཅིག་ཡོད། །བདག་གི་རིགས་ཀྱི་མྱུ་གུ་སྐྱེས་པ་མ་རྒྱས་པར། །ཡོངས་སུ་སྐམས་པའི་སྐལ་བ་
ཅན་ཞིག་མིན་སྙམ་མམ། །ཁྱབ་བདག་མྱུར་བར་གསུངས་ཤིག་བདག་ལ་ཞི་བ་མེད། །གཉེན་འདུན་རྣམས་ཀྱིས་བུ་ལ་བརྩེ་བ་ཁྱེད་ཀྱིས་རིག །དེ་ལྟར་མི་འདོད་བློ་ཡིས་འཁྲུལ་བ་བྱུང་གྱུར་པ། །རིག་ནས་མི་དབང་རྒྱལ་ལ་ཐུབ་པ་དེས་སྨྲས་པ། །བདག་གིས་སྨྲས་པ་གང་དེ་ཐེ་ཚོམ་
མེད་པ་དེ། །མི་སྐྱོང་ཁྱེད་ཀྱི་བློ་གྲོས་གཞན་གང་མ་གྱུར་ཅིག །འདི་ཡི་གཞན་གྱུར་མཚོན་མིན་བདག་གི་རྣམ་འགྱུར་ཏེ། །འོན་ཀྱང་རང་ལ་སླུ་བར་རབ་མཚོན་རྣམ་པར་འཁྲུགས། །སྐྱེ་བ་ཟད་པའི་རྙེད་པར་བླ་མིན་རྟོགས་པ་པོ། །འདི་སྐྱེས་བདག་གི་འགྲོ་བ་ལ་ནི་དུས་ཡིན་ནོ། །རྒྱལ་སྲིད་རྣམ་
པར་སྤངས་ནས་ཡུལ་རྣམས་ལ་མི་གནས། །འབད་པ་དྲག་པོ་རྣམས་ཀྱིས་དེ་ཉིད་ཐོབ་བྱས་ནས། །འདི་ནི་འགྲོ་ལ་གཏི་མུག་མུན་པ་རྣམ་འཇོམས་ཕྱིར། །ཡེ་ཤེས་རང་བཞིན་ཉི་མ་རབ་ཏུ་འབར་བར་འགྱུར། །སྡུག་བསྔལ་རྒྱ་མཚོ་ནད་རྣམས་བཀྲམ་པའི་དབུ་བ་ཅན། །རྒ་བའི་དབའ་
རླབས་འཆི་བའི་ཤུགས་ནི་དྲག་པོ་ལས། །འགྲོ་བ་ཉམ་ཐག་བྱིང་བར་གྱུར་རྣམས་འདི་ཡིས་ནི། །ཡེ་ཤེས་གྲུ་བོ་ཆེན་པོ་ཡིས་ནི་སྒྲོལ་བར་བྱེད། །ཤེས་རབ་ཆུ་ཡི་ཤུགས་ལ་བརྟེན་པའི་ཚུལ་ཁྲིམས་ངོགས། །ཏིང་ངེ་འཛིན་ནི་བསིལ་བའི་བརྟུལ་ཞུགས་ངང་པ་འཕྱོ། །འདི་ཡི་མཆོག་གི་ཆོས་
ཀྱི་ཆུ་བོས་རབ་བསྐོར་ལ། །སྲེད་པས་ཉམ་ཐག་གསོན་པའི་འཇིག་རྟེན་འཐུང་བར་བྱེད། །སྡུག་བསྔལ་གྱིས་ཉམ་ཐག་དང་ཡུལ་གྱིས་བསྒྲིབས་རྣམས་དང་། །འཁོར་བའི་འབྲོག་དགོན་འཇིགས་པར་གནས་པ་རྣམས་ལ་ནི། །ལམ་རབ་ཆུད་ཟོས་རྣམས་ལ་ལམ་འགྲོ་རྣམས་བཞིན་དུ། །
འདིས་ནི་རྣམ་པར་དག་པའི་ལམ་དག་འཆད་པར་འགྱུར། །ཡུལ་གྱི་བུད་ཤིང་ཅན་གྱི་འདོད་ཆགས་མེ་ཡིས་ནི། །འཇིག་རྟེན་སྐྱེ་བོ་རྣམ་པར་བསྲེགས་པར་གྱུར་པ་ལ། །སོས་ཀའི་ཐ་མར་སྤྲིན་ཆེན་གྱིས་ནི་ཆར་བཞིན་དུ། །འདི་ཡི་ཆོས་ཀྱི་ཆར་གྱིས་རབ་ཏུ་སིམ་བྱེད་འགྱུར། །སྲེད་པའི་སྒོ་

172-1-6a

གཏན་མ་རིག་མུན་པའི་སྒོ་གླེགས་ཅན། །སྒོ་ལ་སྐྱེ་དགུ་རྣམས་ཀྱི་འཐོན་པའི་རྒྱུ་ལས་ནི། །འདི་ཡིས་མཆོག་རབ་ཀུན་ནས་རྙེད་པར་དཀའ་བ་ཡི། །དམ་པའི་ཆོས་ཀྱི་སྒྲས་ནི་རྣམ་པར་འབྱེད་པར་འགྱུར། །རང་གི་ལས་ཀྱི་ཞགས་པ་རྣམས་ཀྱིས་ཡོངས་དཀྲིས་ཤིང་། །
སྡུག་བསྔལ་དག་གིས་མངོན་པར་ཟིལ་ནོན་རྟེན་མེད་པའི། །འཇིག་རྟེན་རྣམས་ཀྱི་རྫོགས་པའི་བྱང་ཆུབ་བརྙེས་ནས་ཀྱང་། །ཆོས་ཀྱི་རྒྱལ་པོ་འདིས་ནི་འཆིང་བ་མཐར་མཛད་འགྱུར། །རྨོངས་སམ་འདོད་པའི་བདེ་བ་ཡིས་སམ་རྒྱགས་ལས་རུང་། །འདི་ཡི་མཐར་ཐུག་ཆོས་གང་ཐོས་པར་མི་
བྱེད་པ། །མི་ཡི་འཇིག་རྟེན་འདིར་དེ་མྱ་ངན་བྱ་བའི་གནས། །དེ་ཕྱིར་ཁྱེད་ཉིད་འདི་ལ་མྱ་ངན་མ་བྱེད་ཅིག །ཡོན་ཏན་རྒྱ་མཚོ་འདི་ལས་འཁྲུལ་གྱུར་བདག་གི་ནི། །བསམ་གཏན་རྣམས་ནི་ཐོབ་ཀྱང་དོན་བྱས་མེད་ཉིད་དེ། །དེ་ཡི་དམ་ཆོས་མ་ཐོས་པ་ལ་ཁོ་བོ་ནི། །མཐོ་རིས་དག་ན་
གནས་ཀྱང་ཕུན་ཚོགས་མེད་པ་སྙམ། །དེ་ལྟར་དོན་ཐོས་བཤེས་དང་བཅས་ཤིང་བཙུན་མོར་བཅས། །ཡིད་མི་བདེ་བ་དོར་ནས་མི་དབང་དགར་གྱུར་ལ། །རྣམ་པ་དེ་ལྟར་བདག་གི་བུ་ནི་འདིའོ་ཞེས། །དེས་ནི་བདག་ཉིད་ལ་ནི་སྙིང་པོ་ལྡན་པར་བསམས། །འཕགས་པའི་ཆོས་རྣམས་ཀྱིས་
ཀྱང་འགྲོ་བར་འགྱུར་རོ་ཞེས། །བསམ་པའི་རྣམ་པར་གཟུང་བྱ་སྙིང་ལ་བྱས་གྱུར་ཏེ། །ངེས་པར་འདི་ནི་མི་སྡུག་ཆོས་ཀྱི་ཕྱོགས་མིན་ལ། །རིགས་རྒྱུད་ཉམས་པ་ལས་ནི་འོན་ཀྱང་འཇིགས་པ་མཐོང་། །དེ་ནས་བུ་ལ་རྣམ་པར་འཁྲུགས་པའི་རྒྱལ་པོ་ལ། །བུ་ཡི་ངེས་པའི་དེ་ཉིད་རིག་པར་བྱས་
ནས་སུ། །གུས་བཅས་གྱེན་དུ་གཟུགས་མཐོང་དཀར་མིན་ཐུབ་པ་ནི། །རླུང་གི་ལམ་གྱིས་ཇི་ལྟར་འོངས་པར་གཤེགས་པར་གྱུར། །བློ་གྲོས་བྱས་པའི་སྲིང་མོའི་བུ་ཡང་མཐོང་ནས་ནི། །ཐུབ་པའི་གསུང་མཉན་པ་དང་དེ་ཡི་ལུགས་ལ་ནི། །རྣམ་མང་རྗེས་སུ་བརྩེ་བ་ཡིས་ནི་ལེགས་པ་དེས། །
སྡུག་པའི་བུ་བཞིན་དུ་ནི་སྦྱོར་བ་བྱེད་དུ་བཅུག །སྲས་པོ་སྐྱེས་པས་ཚིམ་པའི་མི་ཡི་བདག་པོ་ཡང་། །ཡུལ་ལ་སོང་བའི་འཆིང་བ་རྣམས་ནི་རྣམ་སྤངས་ཏེ། །སྲས་ཀྱི་ཡིད་འོང་སྲས་པོ་བལྟམས་པའི་ལས་དག་ནི། །རིགས་དང་འདྲ་བར་ཇི་ལྟ་བ་བཞིན་བྱེད་དུ་བཅུག །ཞག་བཅུ་ཡོངས་སུ་འདས་པར་

172-1-6b

གྱུར་པ་ཉིད་ཀྱི་ཚེ། །མཆོག་གི་དགའ་བ་རབ་ལྡན་སྙོམས་པར་གྱུར་པའི་ཡིད། །སྲས་ལས་མཆོག་ཏུ་འགྱུར་ཕྱིར་ལྷ་ཡི་མཆོད་པ་ནི། །བཟླས་བརྗོད་དང་ནི་སྦྱིན་སྲེག་བཀྲ་ཤིས་ལ་སོགས་བྱས། །གཞན་ཡང་བརྒྱ་དང་སྟོང་ཕྲག་ཡོངས་སུ་གང་བའི་གྲངས། །བརྟན་དང་སྟོབས་ལྡན་བུ་རྣམས་
གསེར་གྱི་རྭར་བཅས་ཤིང་། །རྒས་པ་ཉེ་བར་འོངས་མིན་སྭ་མ་ལྡན་པའི་བ། །རང་གི་སྲས་འཕེལ་ཕྱིར་ན་གཉིས་སྐྱེས་རྣམས་ལ་བྱིན། །དེ་ནས་སྙོམས་པའི་བདག་ཉིད་ཀྱིས་ནི་རྣམ་མང་ཡུལ། །རང་སེམས་ཚིམ་པར་བྱེད་པའི་བྱ་བ་རྣམས་བྱས་ནས། །ཡོན་ཏན་ལྡན་ཞིང་དགེ་བའི་ཡུད་ཙམ་ངེས་པ་ན། །
གྲོང་ཁྱེར་རབ་ཏུ་འཇུག་ལ་དགའ་བས་བློ་གྲོས་མཛད། །དེ་ནས་མཆེ་གཉིས་མཆེ་བ་ལས་བྱུང་རིན་ཐང་ཆེ། །དཀར་པོའི་མེ་ཏོག་གིས་སྤྲས་ནོར་བུའི་སྒྲོན། །ཁྲི་ལ་དགེ་བའི་ཕྱིར་ནི་ལྷ་མོ་སྲས་ལྡན་མ། །ལྷ་རྣམས་ལ་ནི་རབ་ཏུ་བཏུད་ནས་བསྙེན་པར་གྱུར། །དེ་ནས་གནས་བརྟན་སྐྱེ་མོ་
རྗེས་འབྲང་སྲས་མགོན་མ། །བདག་པོ་ལྡན་མ་གྲོང་ལ་མདུན་དུ་རབ་ཞུགས་ནས། །མཆོད་ལྡན་ལྷ་ན་ལྷ་རྣམས་ཀྱིས་ནི་བརྒྱ་བྱིན་བཞིན། །མི་བདག་ཉིད་ཀྱང་གྲོང་བའི་ཚོགས་ཀྱིས་གཤེགས་པར་གྱུར། །དེ་ནས་གདོང་དྲུག་སྐྱེས་པས་ཡིད་ཆེས་དབང་ཕྱུག་བཞིན། །ཤཱཀྱའི་རྒྱལ་པོས་གྲོང་
ཁྱེར་རྣམ་པར་ཁྱབ་མཛད་དེ། །ཞལ་ནི་དགའ་བས་རབ་གང་འདི་དང་འདི་ཞེས་པའི། །སྲིད་འཕེལ་རྒྱས་པ་དང་ནི་གྲགས་དང་སྙན་པ་མཛད། །དེ་ནས་མི་ཡི་བདག་པོའི་སྲས་བལྟམས་ཆེར་སྐྱེས་པས། །སེར་སྐྱ་ཞེས་པའི་གྲོང་ཁྱེར་ལྗོངས་དང་བཅས་པ་དེ། །གནོད་སྦྱིན་གྲོང་ན་ཕུན་ཚོགས་འདོད་
པ་སྐྱེས་པ་ན། །ལྷ་ཡི་བུ་མོ་རྣམས་ཀྱིས་བཀྲམ་བཞིན་དགའ་བར་གྱུར། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། གཞོན་ནུ་སྐུ་བལྟམས་པའི་ལེའུ་སྟེ་དང་པོའོ།།      །།སྐྱེ་དང་རྒ་བ་མཐོང་སོང་བདག་སྐྱེས་བདག་ཕམ་དེའི། །སྐྱེས་པ་ནས་
བརྩམས་མི་ཉིད་ཉི་མས་རྒྱལ་པོ་དེ། །ཆུ་ཡི་ཤུགས་རྣམས་ཀྱིས་ནི་ཆུ་བོ་སིན་དྷུ་བཞིན། །ནོར་དང་གླང་པོ་རྟ་དང་བཤེས་རྣམས་འཕེལ་བར་གྱུར། །ནོར་རྣམས་དང་ནི་རིན་པོ་ཆེ་དང་བཟང་པོའི་གསེར། །དེ་དང་དེ་ནི་བྱས་དང་མ་བྱས་པ་ཉིད་ཀྱང་། །ཡིད་ལ་རེ་བ་ཡི་རང་བཞིན་དུ་ཁུར་གྱུར་པ། །

172-1-7a

དེ་ལ་གཅིག་ཏུ་ཕན་པའི་ཆ་ཤས་གཏེར་རྙེད་གྱུར། །གང་ཞིག་པདྨ་དང་མཚུངས་གཉིས་འཐུང་རྣམས་ཀྱིས་ཀྱང་། །དཀྱིལ་འཁོར་འདི་ལ་ཉེ་བར་འོང་བར་མི་ནུས་པའི། །གངས་དང་ལྡན་པའི་གླང་ཆེན་ཆང་གིས་དྲེགས་དེ་རྣམས། །འབད་པ་ལས་ཀྱང་གཞན་དུ་དེ་ལ་ཉེ་
བར་གནས། །སྣ་ཚོགས་མཚན་མས་མཚན་ཞིང་གསར་བའི་གསེར་སྒ་དང་། །དེ་བཞིན་གཞན་རྣམས་དག་གིས་བརྒྱན་བྱས་རྔོག་མ་འཕྱང་། །སྟོབས་དང་བྱམས་པ་དང་ནི་ནོར་གྱིས་ཐོབ་པ་ཡི། །འདི་ཡི་མགྱོགས་འགྲོ་རྣམས་ཀྱིས་གྲོང་ཁྱེར་ཕྱེ་མར་བྱས། །དེ་བཞིན་འདི་ཡི་ཡུལ་འཁོར་
དུ་ནི་ཚིམ་དང་རྒྱས། །ལེགས་ལ་རྡུལ་ལྡན་ཡོན་ཏན་ལྡན་པ་འོ་མར་ལྡན། །རབ་མཆོག་བེའུ་རྣམས་དང་བཅས་པའི་བ་རྣམས་ནི། །འོ་མ་མང་པོ་འཇོ་བ་མང་པོ་བྱུང་བར་གྱུར། །འདི་ཡི་དགྲ་བོ་དབུས་གནས་ཉིད་དུ་སོང་གྱུར་པ། །དབུས་གནས་གྱུར་པ་མཛའ་བཤེས་ཉིད་དུ་རབ་ཏུ་སོང་། །
ཁྱད་པར་དུ་ནི་བཤེས་གཉེན་བརྟན་པོར་སོང་བ་སྟེ། །འདི་ཡི་ཕྱོགས་དག་གཉིས་ཏེ་དགྲ་ཡང་ཡོད་མ་ཡིན། །དེ་བཞིན་དུ་ནི་འདི་ཡི་འཇམ་རླུང་འབྲུག་གི་སྒྲ། །གློག་གི་ཕྲེང་བ་འཁྱིལ་བ་ཡིས་ནི་བརྒྱན་པའི་སྤྲིན། །རྡོ་ཆར་དང་ནི་ཐོག་ལྷུང་ཉེས་པ་རྣམས་ཀྱིས་གཞན། །ཡུལ་དུ་དུས་ལ་
ལྷ་ཡིས་ཆར་པ་ཕབ་པར་གྱུར། །ཞིང་གི་ལས་ཀྱིས་ངལ་དུབ་བྱེད་པ་ཉུང་ངུས་ཀྱང་། །འབྲུ་ནི་འབྲས་བུ་ལྡན་པ་དུས་སྦྱོར་བཞིན་སྐྱེས་ཏེ། །དེ་རྣམས་ཉིད་ཀྱང་འདི་ཡི་སྨན་དུ་བྱུང་གྱུར་ལ། །བཅུད་དང་སྙིང་པོ་ཡིས་ཀྱང་མངོན་པར་ལྷགས་པ་ཉིད། །གཡུལ་དུ་རབ་ཏུ་ཞུགས་ལ་ཀུན་དུ་འཇོམས་
པ་བཞིན། །ལུས་ལ་ཐེ་ཚོམ་ཟ་བར་བྱེད་པའི་དུས་ན་ཡང་། །རང་བཞིན་གནས་ཤིང་བདེ་བ་ཉིད་དུ་ནད་མེད་པར། །དུས་ཀྱི་དབང་གིས་མི་མོ་རྣམས་ནི་རབ་ཏུ་བཙས། །བརྟུལ་ཞུགས་ལྡན་རྣམས་མ་གཏོགས་ནོར་རྫས་དམན་ན་ཡང་། །མི་རྣམས་ཕ་རོལ་རྣམས་ལས་དོན་དུ་གཉེར་མི་བྱེད། །
མངོན་པར་དོན་དུ་གཉེར་ལ་འཕགས་པ་ནོར་འཕྲ་ཡང་། །དེ་ཚེ་འགའ་ཞིག་དག་ནི་རྒྱབ་ཀྱིས་ཕྱོགས་མ་གྱུར། །དེ་ཚེ་རྒྱལ་པོ་དེ་ཡི་རྒྱལ་སྲིད་ལ་ནི་དགའ། །གཉེན་ལ་ཞེ་ས་མེད་མིན་མི་སྟེར་བ་ཡང་མེད། །བརྟུལ་ཞུགས་མེད་པ་ཉིད་མིན་བརྫུན་མེད་འཚེ་མེད་པ། །སྒྲ་མི་བསྒྲགས་ཀྱི་སྲས་པོ་

172-1-7b

ལྟ་བུ་བྱུང་བར་གྱུར། །དེར་ཡང་སྐྱེད་མོས་ཚལ་དང་ལྷ་གནས་དཀའ་ཐུབ་གནས། །ཁྲོན་པ་རྫིང་དང་དགེ་བཅུ་འདུ་བའི་གནས་རྣམས་ཀྱི། །བྱ་བ་རྣམས་ནི་མཐོ་རིས་བཞིན་དུ་ཉེར་ཐོབ་ནས། །ཆོས་འདོད་རྣམས་ཀྱིས་མངོན་སུམ་དུ་ནི་རབ་ཏུ་མཛད། །མུ་གེ་དང་ནི་འཇིགས་དང་ནད་རྣམས་ལས་
གྲོལ་ཞིང་། །དགར་གྱུར་སྐྱེ་བོ་མཐོ་རིས་གཞན་དུ་མངོན་པར་དགའ། །བདག་མོས་བདག་པོ་ལ་འམ་མོ་ཡིས་བདག་པོར་རུང་། །ཕན་ཚུན་ལོག་པར་མངོན་པར་སྤྱོད་པ་དག་ཀྱང་མེད། །དགའ་བའི་ཆེད་དུ་འདོད་ལ་འགའ་ཞིག་གིས་མ་བསྙེན། །འདོད་པའི་དོན་དུ་ནོར་ནི་འགའ་ཞིག་
གིས་མ་བསྲུངས། །ནོར་གྱི་དོན་དུ་ཆོས་ལ་འགའ་ཞིག་གིས་མ་སྤྱད། །ཆོས་ཀྱི་དོན་དུ་འཚེ་བ་འགའ་ཞིག་གིས་མ་བྱས། །རྐུན་པོ་སོགས་དང་དགྲ་ཡང་ཉམས་པར་རང་གནས་མེད། །ཕ་རོལ་མྱ་ངན་མེད་པ་ཇི་ལྟ་བ་ཉིད་བཞིན། །རང་གི་འཁོར་ལོ་ཕ་རོལ་འཁོར་ལོ་ལས་གྲོལ་ཏེ། །རྒྱལ་པོ་
དེ་ལ་བདེ་དང་ལོ་ལེགས་བྱུང་བར་གྱུར། །དེ་ཡི་ཚེ་ན་རྒྱལ་པོ་དེ་ཡི་རྒྱལ་སྲིད་ལ། །དེ་སྐྱེས་པ་ན་ཉི་མའི་སྲས་པོའི་ཡིད་ཤེས་བཞིན། །དགའ་བར་སྤྱད་པར་གྱུར་ལ་སྡིག་པ་རབ་ཉམས་ཤིང་། །ཆོས་རྣམས་འབར་ཞིང་ཉོན་མོངས་རྣམས་ནི་ཞི་བར་གྱུར། །གང་ཕྱིར་རྣམ་པ་དེ་ལྟར་དོན་ཀུན་
གྲུབ་པ་དང་། །རྒྱལ་པོའི་རིགས་ཀྱི་ཕུན་སུམ་ཚོགས་པ་བྱུང་གྱུར་ཏེ། །དེ་ཕྱིར་མི་སྐྱོང་གིས་ནི་སྲས་པོ་དེ་ཡི་མཚན། །དོན་ཀུན་གྲུབ་པ་ཞེས་བྱ་འདི་ནི་རབ་ཏུ་མཛད། །ལྷ་མོ་སྒྱུ་མ་ཡང་ནི་ལྷ་ཡི་དྲང་སྲོང་མཚུངས། །བུ་ཡི་ནུས་མཐུ་རྣམ་པར་སྤངས་པ་མཐོང་ནས་ནི། །བལྟམས་ལ་རབ་ཏུ་
དགའ་མས་བཟོད་པར་མ་ནུས་ཏེ། །དེ་ནས་གནས་པའི་ཆེད་དུ་ལྟར་ནི་གཤེགས་པར་གྱུར། །དེ་ནས་ལྷ་ཡི་མངལ་དང་མཚུངས་པའི་གཞོན་ནུ་ལ། །བྱམས་པའི་རང་བཞིན་གྱིས་ཀྱང་ཁྱད་པར་མེད་པ་ཡི། །མ་ཡི་ནུ་མོ་མདངས་མཉམ་པ་ཡི་རང་བཞིན་ལ། །ཡང་དག་སྐྱེད་བཙུད་
བདག་ལས་སྐྱེས་པ་ལྟ་བུར་གྱུར། །དེ་ནས་ཉི་མ་གཞོན་ནུ་འཆར་རིར་གནས་འདྲ་དང་། །རླུང་གིས་རབ་ཏུ་བུས་པར་གྱུར་པའི་མེ་བཞིན་དང་། །སྐར་མའི་བདག་པོ་མུན་མིན་ཕྱོགས་ལ་གནས་པ་ལྟར། །གཞོན་ནུ་དེ་ནི་རིམ་གྱིས་ཡང་དག་འཕེལ་བར་གྱུར། །དེ་ནས་རིན་ཐང་ཆེན་པོའི་ཙནྡན་

172-1-8a

རྣམས་དང་ནི། །རིན་ཆེན་ཕྲེང་བ་སྨན་གྱི་སྙིང་པོར་བཅས་རྣམས་དང་། །རི་དགས་རབ་ཏུ་སྦྱར་བའི་གསེར་གྱི་ཤིང་རྟ་རྣམས། །འདི་ཡི་ཆེད་དུ་གཤེགས་ཀྱི་ཁྱིམ་རྣམས་དག་ནས་བླངས། །ལང་ཚོ་ཉིད་དང་རྗེས་སུ་མཐུན་པའི་རྒྱན་རྣམས་དང་། །གསེར་གྱི་རང་བཞིན་
རི་དགས་གླང་ཆེན་རྟ་རྣམས་དང་། །གསེར་དང་དངུལ་གྱིས་བྲིས་པའི་མི་ཆུང་གཟུགས་རྣམས་དང་། །ཤིང་རྟ་བ་གླང་བྱུང་དུས་ཡང་དག་སྦྱར་རྣམས་བླངས། །དེ་ནི་ལང་ཚོ་རྗེས་མཐུན་ཡུལ་ལ་ཉེ་སྤྱོད་པ། །དེ་རྣམས་ཀྱིས་ནི་ཡུལ་ལ་ཉེར་སྤྱད་ལ། །དཔའ་དང་བརྟན་པ་ཡིས་དང་བློ་དང་
དཔལ་གྱིས་ཀྱང་། །བྱིས་པ་ཡིན་ཡང་བྱིས་མིན་རབ་མཚུངས་བྱུང་བར་གྱུར། །ལང་ཚོ་གཞོན་ནུ་ཤིན་ཏུ་འདས་ནས་ཡང་དག་པར། །འདུ་བྱེད་ལས་ནི་རབ་ཏུ་ཐོབ་ནས་དུས་སུ་ནི། །ལོ་མང་དག་གིས་རྟོགས་བྱ་ཉིན་ཞག་ཉུང་ངུ་ཡིས། །རང་དང་རྗེས་སུ་མཐུན་པའི་རིགས་པ་
རྣམས་ནི་བླངས། །དྲང་སྲོང་ཆེན་པོ་དཀར་མིན་ལས་ནི་སྔོན་རོལ་དུ། །དེ་ཡི་ཉེས་ལེགས་དོན་གྱི་སྐལ་བ་ཐོབ་ནས་ནི། །ནགས་སུ་གཤེགས་པར་འགྱུར་ཞེས་ཤཱཀྱའི་རྒྱལ་པོ་ཡིས། །འདོད་པ་རྣམས་ལ་ཆགས་པ་སྐྱེད་དུ་བཅུག་པར་གྱུར། །བརྟན་པའི་ཚུལ་ཁྲིམས་སྤྱོད་པ་ཅན་གྱི་
རིགས་དེ་ལ། །ངོ་ཚ་དང་ནི་དུལ་བ་ཉེར་ལྡན་ལེགས་ལྡན་མ། །གྲགས་འཛིན་མ་ཞེས་གྲགས་པ་རྣམ་པར་ཡངས་པ་མ། །བཙུན་མོར་མངོན་པར་བརྗོད་པའི་དཔལ་མོ་འདི་ལ་བླངས། །ཀུན་འགྱེད་གཞོན་ནུ་དང་ནི་རབ་ཏུ་མཚུངས་པ་ཡིས། །མཆོག་གི་ལུས་ཀྱིས་སྣང་ཞིང་
གསལ་བ་དེ་ཉིད་ནི། །ཤཱཀྱའི་རྒྱལ་པོའི་མནའ་མ་དེ་དང་ཐབས་ཅིག་ཏུ། །བདེ་སོགས་མ་དང་མིག་སྟོང་ལྡན་བཞིན་མངོན་པར་དགའ། །ཡིད་ཀྱང་དཔྱོད་པར་བྱེད་ལ་ཅུང་ཞིག་རབ་ལོག་པ། །གང་གིས་མཐོང་མི་འགྱུར་ཞེས་རྗེས་སུ་བསམས་བྱས་ནས། །ས་ལ་རབ་ཏུ་སྤྱོད་
མིན་ལྡིང་ཁང་ལྟོ་ཉིད་དུ། །གནས་དག་མི་སྐྱོང་གིས་ནི་དེ་ལ་རྣམ་པར་བསྟན། །དེ་ནས་གཞལ་མེད་ནམ་མཁར་ས་ལ་སྤྱོད་པ་བཞིན། །སྟོན་ཁའི་དུས་ཀྱི་ཆུ་གཏེར་སྤྲིན་ནི་དཀར་པོ་ཡི། །དུས་སྦྱོར་ཀུན་དུ་བདེ་བའི་གཞི་ཡི་ལྡིང་ཁང་ལ། །བུད་མེད་རྣམས་ཀྱི་སིལ་སྙན་རྒྱ་ཆེན་རྣམས་ཀྱིས་རྣམ་

172-1-8b

པར་གཤེགས། །གསེར་གྱིས་གདམས་པའི་རྔ་ཤིང་ཅན་གྱི་རྫ་རྔའི་སྐད། །མི་མོའི་ལག་པའི་རྩེ་མོས་མངོན་པར་བརྡུངས་པ་ཡི། །ལྷ་མཆོག་མ་ཡི་གར་དང་མཉམ་པའི་གར་རྣམས་ཀྱིས། །ཏི་སེའི་གངས་ལྟར་དེ་ཡི་ཕོ་བྲང་མཛེས་པར་གྱུར། །ངག་དང་གཟོ་དང་རོལ་དང་རྣམ་
འགྱུར་རྣམས་ཀྱིས་ཀྱང་། །རྒྱགས་དང་རྩེ་དང་དགོད་པ་དངར་མོ་རྣམས་ཀྱིས་དང་། །སྨིན་མ་བསྐྱོད་པ་ཡིས་དང་ཕྱེད་མིག་ལྟ་རྣམས་ཀྱིས། །དེ་ལ་དེར་ནི་མི་མོ་རྣམས་ནི་དགའ་བར་གྱུར། །དེ་ནས་དེ་ནི་འདོད་པ་བསྟེན་པར་མཁས་པ་ཡི། །དགའ་བས་དྲེགས་པའི་བུད་མེད་རྣམས་
ཀྱིས་བཟུང་གྱུར་ལ། །གཞལ་མེད་ཁང་ནི་རྒྱབ་ནས་བསོད་ནམས་ལས་ཅན་བཞིན། །གཞལ་མེད་ཁང་ནི་རྒྱབ་ནས་ས་ལ་མ་གཤེགས་སོ། །མི་སྐྱོང་གིས་ཀྱང་དེ་ཉིད་བསྐྱེད་པའི་ཆེད་ལས་ནི། །དེ་ཡི་འབྱུང་བར་འགྱུར་བའི་དོན་གྱིས་བསྐུལ་གྱུར་ཏེ། །སྡིག་པ་ལས་ནི་དགའ་བྲལ་ཞི་ལ་
མངོན་དགའ་ཞིང་། །ལེགས་ལ་སྐལ་བར་བགོས་ཤིང་དུལ་ལ་བསྙེན་པར་གྱུར། །བརྟན་མིན་བཞིན་དུ་འདོད་པའི་བདེ་ལ་མ་ཞེན་ལ། །མ་རུངས་སྐྱེད་མ་ལ་ནི་ཡང་དག་ཆགས་མ་གྱུར། །བརྟན་པས་དབང་པོའི་རྟ་ནི་སྟོབས་ལས་རྣམ་ཐུལ་ཞིང་། །གཉེན་དང་གྲོང་ཁྱེར་པ་རྣམས་ཡོན་ཏན་རྣམས་ཀྱིས་
རྒྱལ། །གཞན་གྱི་སྡུག་བསྔལ་ཕྱིར་ནི་རིག་པ་མ་བརྗོད་ལ། །ཡེ་ཤེས་དགེ་བ་གང་ཡང་དེ་ལ་ལྷག་པར་བརྗོད། །དེས་ནི་རང་གི་སྐྱེ་དགུ་རྣམས་ལ་ཇི་ལྟ་བར། །དེ་ལྟར་སྐྱེ་དགུ་རྣམས་ལ་དགེ་བའི་བསྔགས་པ་མཛད། །སྐར་མ་རྒྱལ་སྣང་ཤེས་ལྡན་སྲས་པོ་ལྷག་པའི་ལྷ། །ཇི་ལྟ་བར་ནི་དེ་ཡི་ཚེ་རིང་ཕྱིར་མཆོད་དེས། །ཆུང་མིན་མེ་ལ་
བསྲེག་བྱ་རྣམས་ནི་བསྲེགས་གྱུར་ལ། །གཉིས་སྐྱེས་རྣམས་ལ་གསེར་དང་བ་ལང་རྣམས་ཀྱང་བྱིན། །འགྲམ་སྟེགས་ཆབ་རྣམས་ཀྱིས་དང་ཡོན་ཏན་ཆབ་རྣམས་ཀྱིས། །གཙང་སྦྲའི་ཆེད་དུ་ལུས་དང་ཡིད་ལ་ཁྲུས་བྱས་ཏེ། །རིག་བྱེད་དུ་ནི་ཉེ་བར་བསྟན་པའི་ཆང་རྣམས་དང་། །ཞི་བ་བདག་
སྐྱེས་སྙིང་ལ་ཞི་བའི་བདེ་ལ་འཐུང་། །གང་ཞིག་དོན་དང་མི་ལྡན་ཞི་བ་མ་སྨྲས་ལ། །གང་ཞིག་དགའ་བ་དང་བྲལ་དེ་ཉིད་མ་བརྗོད་དེ། །ཞི་བ་དེ་ཉིད་མེད་དང་རྩུབ་པའི་དེ་ཉིད་ཕྱིར། །ངོ་ཚ་བ་ཡིས་བདག་ཉིད་ཁོ་ན་བརྗོད་མ་ནུས། །དོན་ལྡན་འདོད་པ་རྣམས་དང་མི་འདོད་པ་རྣམས་ལ། །ཆགས་

172-1-9a

པའི་སྐྱོན་ལ་བརྟེན་ནས་རབ་ཏུ་འཐོབ་མིན་ཏེ། །དགེ་བའི་ཐ་སྙད་གཙང་མ་ལ་ནི་བསྙེན་གྱུར་ལ། །མཆོད་སྦྱིན་ལ་ཡང་མ་མོས་དེ་ལྟར་ཇི་ལྟ་བཞིན། །སྲེད་པ་དང་ལྡན་མངོན་པར་འོངས་པ་དེ་མ་ཐག །སྦྱིན་བྱ་ཆུ་འདྲ་རྣམས་ཀྱིས་སྐོམ་པ་བཅད་གྱུར་
ལ། །གཡུལ་ལས་མ་གཏོགས་ཡེ་ཤེས་ཀྱི་ནི་སྟ་རི་ཡིས། །དགྲ་བོ་རྣམས་ཀྱི་ང་རྒྱལ་ཆེན་པོ་བཅོམ་པར་གྱུར། །གཅིག་ནི་རྣམ་པར་དུལ་ལ་དེས་ནི་མདུན་བསྲུངས་ཤིང་། །བདུན་པོ་ཉིད་ནི་དོན་ལ་ལྔ་པོ་དག་ནི་བསྲུངས། །སྡེ་ཚན་གསུམ་པོ་ཐོབ་ལ་སྡེ་ཚན་གསུམ་རྟོགས་
ཤིང་། །སྡེ་ཚན་གཉིས་པོ་ཤེས་ལ་སྡེ་ཚན་གཉིས་པོ་སྤངས། །ཉེས་པ་བྱས་ཀྱང་རབ་ཏུ་བསྐྱངས་ནས་གཞོམ་བྱ་ལ། །འཚེ་བར་མི་བྱེད་ཁྲོ་བས་ཀྱང་ནི་གཟིགས་མ་ཡིན། །དེ་རྣམས་དག་ལ་འབྲས་བུ་ཞི་བས་བཅིངས་གྱུར་ལ། །དེ་རྣམས་དག་ནི་འདོར་བ་ཚུལ་མ་ཡིན་ཕྱིར་མཐོང་། །
དྲང་སྲོང་རྣམས་ཀྱིས་མཆོག་གི་བརྟུལ་ཞུགས་སྤྱད་གྱུར་ལ། །ཡུན་རིངས་ཡང་དག་བཟུང་བའི་ཤ་ཁོན་ཞུགས་རྣམས་དོར། །ཡོན་ཏན་དྲི་ལྡན་སྙན་དངགས་རྣམས་ནི་ཐོབ་གྱུར་ལ། །དྲི་མ་ཅན་དུ་བྱེད་པའི་རྡུལ་རྣམས་རྣམ་པར་དོར། །རབ་ཏུ་མི་གནས་གཏོར་མའི་དཔྱ་ནི་མ་བླངས་
ལ། །ཕ་རོལ་དངོས་པོ་རྣམས་ལ་མངོན་པར་རློམ་མ་བྱས། །དགྲ་རྣམས་ལ་ནི་ཆོས་མ་ཡིན་པ་མ་སྨྲས་ལ། །ཁྲོ་བ་རྣམས་ནི་སྙིང་གིས་གཟུང་བ་མ་ཡིན་ནོ། །ཞི་བའི་བདག་ཉིད་སེམས་ནི་རྣམ་པར་རབ་དང་ལ། །རྣལ་འབྱོར་རབ་ཏུ་ལྡན་པའི་དབང་པོ་རྣམས་ཅི་ལྟར། །དེར་ནི་
དེ་ལྟར་ས་བདག་རབ་ཏུ་སྒྱུར་བ་ཅན། །འབངས་དང་གྲོང་ཁྱེར་བ་རྣམས་དེ་ལྟ་ཉིད་དུ་བྱས། །དེ་ནས་མཛེས་པའི་འོ་མ་འཛིན་པ་དང་ལྡན་མ། །གྲགས་འཛིན་མ་ནི་རང་གི་གྲགས་པ་འཛིན་མ་ལ། །ཟས་གཙང་སྲས་པོའི་སྲས་པོ་སྒྲ་གཅན་སྒྲ་ཡི་ཞལ། །སྒྲ་གཅན་འཛིན་ཞེས་བྱ་བ་
དུས་སུ་སྐྱེས་པར་གྱུར། །དེ་ནས་འདོད་པའི་བུ་མངའ་མཆོག་གི་ཡིད་ཆེས་ཏེ། །རིགས་རྒྱུད་འཕེལ་བ་རབ་མཚོན་ས་སྐྱོང་རྒྱལ་པོ་ནི། །ཇི་ལྟ་ཉིད་དུ་སྲས་པོ་རབ་ཏུ་སྐྱེས་ལ་དགའ། །དེ་ལྟ་ཉིད་དུ་སྲས་པོའི་སྲས་པོ་སྐྱེས་ལ་དགའ། །བདག་གི་བུ་ཡི་བུར་གྱུར་པ་ལ་བརྩེ་བ་ནི། །བདག་

172-1-9b

བཞིན་གང་ལས་ཡིན་ཞེས་དགའ་བ་སྐྱེས་གྱུར་ཏེ། །དུས་སུ་དེས་ནི་ཆོ་ག་དེ་དང་དེ་དམིགས་ཤིང་། །བུ་ལ་དགའ་བ་མཐོ་རིས་བཞིན་དུ་འཛེགས་པར་གྱུར། །རྒྱལ་པོའི་ཁྱུ་མཆོག་གྲགས་དང་སྙན་པས་མཚན་རྣམས་ཀྱིས། །དང་པོའི་སྐལ་བ་རྣམས་ཀྱི་ལམ་ལ་གནས་ནས་ནི། །དཀར་
པོ་མ་དོར་དཀའ་ཐུབ་རྣམས་ལ་དཀའ་ཐུབ་དང་། །འཚེ་བ་དོར་བའི་མཆོད་སྦྱིན་རྣམས་ཀྱིས་མཆོད་པར་གྱུར། །རྒྱལ་པོའི་དཔལ་གྱིས་དང་ནི་དཀའ་ཐུབ་དཔལ་གྱིས་ཀྱང་། །བསོད་ནམས་ལས་ཅན་དེ་ནི་དེ་ནས་འབར་གྱུར་ལ། །རིགས་དང་བློ་དང་མཛད་སྤྱོད་ཀྱིས་ཀྱང་གསལ་བ་སྟེ། །
གཟི་བརྗིད་སྟོང་གི་འོད་ཟེར་བཞིན་དུ་རབ་ཏུ་འཕྲོ། །རང་བྱུང་ལས་བྱུང་མཆོད་བྱེད་སྔགས་ནི་མཆོད་བྱས་ནས། །སྲས་གནས་ཆེད་དུ་བརྟན་པའི་དཔལ་གྱིས་བཟླས་བྱས་ཤིང་། །དཀའ་ཐུབ་བྱེད་པའི་ལས་རྣམས་བྱས་གྱུར་སྐྱེ་དགུ་རྣམས། །སྐྱེད་འདོད་སྐྱེ་དགུའི་བདག་བཞིན་དང་པོའི་དུས་སུའོ། །
མཚོན་ཆ་སྤངས་ཤིང་བསྟན་བཅོས་རྣམ་པར་ཤེས་གྱུར་ལ། །ཉེ་བར་ཞི་ལ་བསྙེན་ཞིང་ངེས་ལ་རྣམ་པར་བཟོད། །དབང་ལྡན་བཞིན་དུ་ཡུལ་རྣམས་གང་ལ་མ་བསྙེན་ལ། །ཡབ་མེས་བཞིན་དུ་ཡུལ་རྣམས་ཀུན་ལ་གཟིགས་པར་གྱུར། །དེས་ཀྱང་བུ་ཡི་ཆེད་དུ་རྒྱལ་སྲིད་བཟུང་གྱུར་ལ། །བུ་ནི་
རིགས་ཀྱི་དོན་དུ་རིགས་ནི་གྲགས་པའི་ཕྱིར། །གྲགས་པ་མཐོ་རིས་ཆེད་དུ་མཐོ་རིས་བདག་ཉིད་ཕྱིར། །ཆོས་ཀྱི་དོན་དུ་བདག་ཉིད་གནས་ལ་འདོད་པར་འགྱུར། །དེ་ལྟར་དེས་ནི་དམ་པ་རྣམས་ཀྱིས་ངེས་ཐོབ་པའི། །ཐོས་པ་ལས་གྲུབ་ཆོས་ནི་རྣམ་པ་སྣ་ཚོགས་བྱས། །གང་ལས་བདག་
གི་བུས་ནི་བུ་ཡི་ངོ་མཐོང་ནས། །ནགས་ཚལ་ཉིད་དུ་འགྲོ་མི་འགྱུར་ཞེས་མགོན་བསླངས་སོ། །བདག་ལ་ཡང་དག་བླངས་པའི་དཔལ་ནི་སྲུང་འདོད་པའི། །ས་སྐྱོང་རྣམས་ཀྱིས་ས་ལ་བུ་ནི་བསྲུང་བ་སྟེ། །ཆོས་ནི་འདོད་པའི་མ་ཡི་དབང་པོ་དེ་ཡིས་ཀྱང་། །ཡུལ་རྣམས་འདོར་བ་
མེད་པར་བུ་ནི་ཆོས་ལས་བསྲུངས། །བྱང་ཆུབ་སེམས་དཔའ་ཡུལ་ལ་བདེ་བའི་རོ་ཤེས་ཐམས་ཅད་ཀྱང་། །སྲས་སྐྱེད་པ་ན་དཔེ་མེད་སེམས་པ་ནགས་སུ་གཤེགས་གྱུར་ཏེ། །དེ་ཕྱིར་ཉེ་བར་བསགས་པའི་ལས་ནི་རྩ་ནས་སྐྱེད་པའི་ཕྱིར། །དེ་ནི་ཞི་བ་མ་ཐོབ་དེ་སྲིད་དགའ་བ་བསྙེན་པར་གྱུར། །

172-1-10a

སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། བཙུན་མོའི་འཁོར་ན་གནས་པའི་ལེའུ་སྟེ་གཉིས་པའོ།།      །།དེ་ནས་རེ་ཞིག་དུས་ན་འཇམ་པོའི་རྩྭ་རྣམས་དང་། །ཁུ་བྱུག་ཕོ་ནི་གྱེན་དུ་སྐད་འདོན་རྐང་འཐུང་རྣམས། །གླུ་
རྣམས་དང་ནི་ངེས་ལྡན་སྐྱེད་མོས་ཚལ་རྣམས་ནི། །པདྨའི་འབྱུང་གནས་ཀྱིས་བརྒྱན་དེས་ནི་ཐོས་པར་གྱུར། །དེ་ནས་བུད་མེད་སྐྱེ་བོ་རྣམས་ནི་དགའ་བ་ཡི། །གྲོང་ཁྱེར་སྐྱེད་མོས་ཚལ་གྱི་ཡིད་འོང་དངོས་ཐོས་ཏེ། །ཁྱིམ་གྱི་ནང་དུ་མངོན་པར་བཀག་པའི་གླུ་བཞིན་དུ། །ཕྱི་རོལ་རབ་
ཏུ་འགྲོ་བའི་ཆེད་དུ་བློ་མཛད་དོ། །དེ་ནས་སྲས་སུ་མངོན་བརྗོད་ཡིད་འོང་དེ་ཡི་ནི། །དགོངས་པ་མི་སྐྱོང་གིས་ནི་ངེས་པར་ཐོས་གྱུར་ནས། །བརྩེ་བའི་ཕུན་སུམ་ཚོགས་པས་ལང་ཚོར་འོངས་པ་རུ། །ལྟད་མོ་དག་ལ་རྣམ་པར་གཤེགས་པར་བཀའ་སྩལ་ཏོ། །གཞོན་ནུ་ཤིན་ཏུ་གཞོན་ནུའི་
སེམས་དང་ལྡན་པ་ནི། །ཡང་དག་སྐྱོ་བའི་སེམས་སུ་མ་གྱུར་ཞེས་སེམས་ཞིང་། །ཉམ་ཐག་ཐ་དད་སྐྱེ་བོ་ཀུན་ནས་འདུས་པ་ནི། །རྒྱལ་པོའི་ལམ་དུ་ཕྱིར་ལ་རྣམ་པར་ཟློག་པ་སྟེ། །ཉིང་ལག་དམན་པ་རྣམས་དང་དབང་པོ་མ་ཚང་རྣམས། །འཁོགས་པ་ནད་པ་ལ་སོགས་བཀྲེན་རྣམས་ཕྱོགས་རྣམས་
སུ། །དེ་ནས་མཆོག་ཏུ་ཞི་བས་ཡང་དག་རབ་སྟོན་ནས། །རྒྱལ་པོའི་ལམ་རྣམས་དག་ནི་མཆོག་ཏུ་མཛེས་པར་བྱས། །དེ་ནས་དཔལ་ལྡན་རྒྱལ་པོའི་ལམ་ནི་བྱས་པ་ན། །དཔལ་ལྡན་རྣམ་པར་དུལ་བ་རྗེས་འབྲངས་གཞོན་ནུ་ནི། །གཞལ་ཡས་ཁང་པའི་ལོགས་ནས་དུས་སུ་མངོན་བབས་ནས། །
མངོན་པར་རྗེས་གནང་བྱས་པ་མི་སྐྱོང་ལ་མངོན་གཤེགས། །དེ་ནས་མི་དབང་བུ་ལ་མཆི་མ་བྱུང་གྱུར་ཏེ། །མགོ་ལ་ཉེ་བར་བསྣམས་ཏེ་ཡུན་རིངས་རྣམ་གཟིགས་ནས། །སོང་ཅིག་ཅེས་ནི་ཚིག་གི་བཀའ་དག་སྩལ་གྱུར་ལ། །བརྩེ་བ་དག་ལས་དེ་ནི་ཡིད་ཀྱིས་མ་བཏང་ངོ་། །དེ་ནས་དེ་
ནི་འཛམ་བུ་ཆུ་གསེར་སྒ་འཛིན་པའི། །ལེགས་པར་བསླབས་པའི་མགྱོགས་འགྲོ་བཞི་ཡིས་སྦྱར་བ་ཡི། །དབང་པོ་མ་ཉམས་མཁས་ཤིང་གཙང་ལ་འོད་ཟེར་འཆང་། །གསེར་གྱི་རང་བཞིན་ཤིང་རྟ་ལ་ནི་ཡང་དག་འཛེགས། །དེ་ནས་འབྲས་སྤོས་མེ་ཏོག་འབར་བ་རབ་བཀྲམ་ཞིང་། །ཕྲེང་བ་

172-1-10b

རྣམ་དཔྱངས་རབ་ཏུ་གཡོ་བའི་བ་དན་ཅན། །ཟླ་བ་སྐར་མ་དང་བཅས་བར་སྣང་ལ་བཞིན་དུ། །འདྲ་བ་རྗེས་འབྲང་ལམ་ནི་རབ་ཏུ་ཐོབ་པར་གྱུར། །ཡ་མཚན་གྱུར་ལས་རབ་ཏུ་རྒྱས་པའི་མིག་རྣམས་ནི། །ཨུཏྤལ་སྔོན་པོའི་ཕྱེད་འདྲ་རྣམས་ཀྱིས་བཀྲམ་པ་ནི། །རྒྱལ་པོའི་ལམ་ལ་དལ་བུ་
དལ་བུས་གཤེགས་གྱུར་ཏེ། །གྲོང་ཁྱེར་སྐྱེ་བོ་རྣམས་ཀྱིས་ཀུན་ནས་མངོན་པར་དགའ། །ཁ་ཅིག་དེ་ལ་ཞི་བའི་ཡོན་ཏན་གྱིས་བསྟོད་ལ། །དེ་བཞིན་གཞན་རྣམས་གསལ་བ་ཉིད་ཀྱིས་ཕྱག་འཚལ་ཞིང་། །ཁ་ཅིག་དག་ནི་འདི་ལ་མངོན་དུ་ཕྱོགས་ནས་ཀྱང་། །དཔལ་དང་ཚེ་ཡི་རྣམ་པར་རྒྱས་ལ་
ཤིས་པ་བརྗོད། །ཞར་བ་སྒུར་པོ་ནད་པ་མིའུ་ཐུང་རྣམས་ཀྱི་ས། །ཚོགས་པ་རྣམས་ནི་རིགས་ཆེན་རྣམས་ལ་ངེས་དྲལ་ནས། །མི་མོ་རྣམས་ནི་ངེས་པར་ཞུགས་གནས་ཕྲ་རྣམས་ལས། །ལྷ་ཡི་རྗེས་འགྲོ་རྒྱལ་མཚན་བཞིན་དུ་རབ་ཏུ་བཏུད། །དེ་ནས་གཞོན་ནུ་ངེས་པར་གཤེགས་ཞེས་
གཏམ་དག་ནི། །བསྒོ་བྱ་སྐྱེས་ལས་བུད་མེད་རྣམས་ཀྱིས་ཐོབ་གྱུར་ན། །བཀུར་འོས་སྐྱེ་བོས་མངོན་པར་རྗེས་གནང་བྱས་པ་རྣམས། །བལྟ་བར་འདོད་པས་ལྡིང་ཁང་ཤོང་དུ་སོང་བར་གྱུར། །ཡོན་ཏན་སྐ་རགས་བྲུལ་ཞིང་གེགས་བྱས་དེ་རྣམས་ནི། །གཉིད་ལོག་རབ་ཏུ་སད་པས་ལྟ་
བྱེད་འཁྲུགས་པ་རྣམས། །གནས་ལུགས་གཏམ་གྱིས་རྣམ་པར་བརྒྱན་རྣམས་རྣམ་གཞག་སྟེ། །ཡ་མཚན་གྱུར་པས་དོགས་མེད་པར་ནི་ཡོངས་སུ་སོང་། །གཞལ་ཡས་ཁང་གི་སྐས་ཀྱི་འོག་གི་སྒྲ་རབ་དང་། །དྲིལ་ཆུང་སྒྲ་རྣམས་དང་ནི་གདུ་བུའི་སྒྲ་རྣམས་ཀྱིས། །རྣམ་པར་སྐྲག་གྱུར་ཁྱིམ་གྱི་
བྱ་ཡི་ཚོགས་རྣམས་ནི། །ཕན་ཚུན་ཤུགས་རྣམས་ལས་ཀྱང་ཡང་དག་ཀུན་ནས་གཏོར། །གང་ཞིག་འདིར་ནི་ཡན་ལག་རབ་མཆོག་མ་རྣམས་ནི། །མྱུར་བ་རབ་ཏུ་སྐྱེས་གྱུར་ཙམ་ཙམ་སྐྱེས་རྣམས་ཀྱིས། །ལོ་མ་འཛིན་རྣམས་རྒྱས་ཤིང་སྐྱེད་སྨད་ཤིང་རྟ་ནི། །ཡངས་པ་རྣམས་ཀྱིས་ལྕི་བ་ཉིད་ཕྱིར་
འགྲོ་བ་བཟུང་། །མཐའ་གཅིག་ལེགས་པར་རབ་ཏུ་སྦྱར་བའི་རྒྱན་རྣམས་ནི། །རྣམ་པར་སྦས་པ་རྣམ་པར་གསལ་བས་ངོ་ཚ་བས། །སྐྱེན་པོར་འགྲོ་བར་ནུས་པ་ཡིན་ཡང་གཞན་མ་ཡིན། །འགྲོ་བ་ངེས་པར་བཟུང་སྟེ་མྱུར་མིན་སོང་བར་གྱུར། །ཕན་ཚུན་རབ་ཏུ་བཅེར་བས་རིལ་པོར་གྱུར་པ་

172-1-11a

རྣམས། །ཡང་དག་དྲུད་ལས་བསྐྱོད་གྱུར་རྣ་ལུང་འཁྱིལ་བ་ཅན། །དེ་དག་རྣམས་ཀྱི་དེ་ཚེ་སྒྲ་བཅས་རྒྱན་རྣམས་ནི། །རླུང་བགྲོད་སྐར་ཁུང་རྣམས་སུ་རབ་ཏུ་ཞི་བར་གྱུར། །རླུང་བགྲོད་སྐར་ཁུང་རྣམས་ལས་རྣམ་པར་འཐོན་པ་རྣམས། །ཕན་ཚུན་ཐང་ཆེན་གྱུར་པའི་རྣ་
ལུང་འཁྱིལ་བ་རྣམས། །བུད་མེད་རྣམས་ཀྱི་དམ་སྐྱེས་འདྲ་བའི་འདམ་སྐྱེས་ཞལ། །ལྡིང་ཁང་རྣམས་སུ་བཀོད་པ་རྣམས་ནི་རྣམ་པར་མཛེས། །དེ་ནས་ཁང་བཟངས་ལང་ཚོ་མ་རྣམས་ཀྱིས་ཁྱབ་ཅིང་། །ཡ་མཚན་ལ་ནི་རབ་ཕྱེ་སྐར་ཁུང་རྣམས་ཀྱིས་ནི། །ལྷ་མོ་དང་བཅས་གཞལ་མེད་
རྣམས་ཀྱི་ནམ་མཁའ་བཞིན། །དཔལ་དང་ལྡན་པའི་གྲོང་ཁྱེར་ཀུན་ནས་མཛེས་པར་གྱུར། །སྐར་ཁུང་རྣམས་ཀྱིས་རྣམ་པར་ཡངས་པ་མ་ཡིན་ལས། །ཕན་ཚུན་འགྲམ་པར་བཀོད་པའི་རྣ་ལུང་ཅན་རྣམས་ཀྱིས། །འདམ་སྐྱེས་པདྨ་རྣམས་ཀྱི་ཚོགས་རྣམས་བཅིངས་པ་བཞིན། །རབ་
མྱོས་མཆོག་མ་རྣམས་ཀྱི་ཞལ་ནི་མཛེས་པར་གྱུར། །གཞོན་ནུ་དེ་ལ་ལམ་དུ་རྣམ་པར་བལྟ་བ་ཡི། །བུད་མེད་དེ་རྣམས་ས་ལ་འགྲོ་འདོད་ལྟར་མཛེས་ཤིང་། །གྱེན་དུ་གདོང་ཕྱོགས་དེ་ལ་རབ་ཏུ་ལྟ་བ་ཡི། །མི་རྣམས་གནམ་ལ་འགྲོ་བར་འདོད་བཞིན་མཛེས་པར་གྱུར། །ལུས་དད་དཔལ་
གྱིས་མཆོག་ཏུ་འབར་བར་གྱུར་པ་ཡི། །རྒྱལ་པོའི་སྲས་དེ་མཐོང་ནས་བུད་མེད་དེ་རྣམས་ནི། །ངེས་པར་དགོངས་པ་གཞན་མིན་བསམ་པ་དག་པ་ཡིས། །འདི་ཡི་ཆུང་མ་སྐལ་བ་བཟང་ཞེས་དལ་བུས་སྨྲ། །གཟུགས་ཀྱི་དངོས་སུ་མེ་ཏོག་ཏོག་ཅན་དང་མཚུངས་ཤིང་། །རྣམ་པར་རིང་ཞིང་
རྒྱས་པའི་དཔུང་པ་ཅན་འདི་ནི། །དཔལ་ཉིད་དོར་ནས་ཆོས་ལ་ཉེ་བར་གཤེགས་ཞེས་ཏེ། །དེ་ལ་དེ་དག་རྣམས་ཀྱིས་ཞེ་ས་ཁོ་ན་བྱས། །རྣམ་པར་དུལ་ལ་གཙང་ཞིང་བརྟན་པའི་ཆ་ལུགས་ཅན། །གྲོང་པ་རྣམས་ཀྱིས་དེ་ལྟར་རྒྱལ་པོའི་ལམ་ཁྱབ་པ། །དེ་ནི་སྔོན་དུ་གཞོན་ནུས་མཐོང་ནས་
དགའ་བས་ཏེ། །བདག་གི་སྲིད་པ་གཞན་མ་ཅུང་ཞིག་བརྟགས་པ་འདྲ། །གྲོང་ཁྱེར་དེ་ཡང་མཐོ་རིས་བཞིན་དུ་རབ་དགའ་བ། །མངོན་པར་གཟིགས་ནས་གཙང་མར་གནས་པའི་ལྷ་རྣམས་ཀྱིས། །ས་གཞི་སྐྱོང་བའི་སྲས་པོ་ཡང་དག་བསྐུལ་དོན་དུ། །འཁོགས་པའི་མི་རྒན་རབ་ཏུ་འགྲོ་བར་

172-1-11b

སྤྲུལ་གྱུར་ཏོ། །དེ་ནས་གཞོན་ནུ་ཡིས་ནི་རྒ་བས་ཟིལ་ནོན་ཞིང་། །མི་རྣམས་ལས་ནི་ཐ་དད་དབྱིབས་ཅན་དེ་གཟིགས་ནས། །གཡོ་བ་མེད་ཅིང་དེ་ཉིད་དུ་ནི་ཞུགས་པའི་སྤྱན། །ཆགས་པར་གྱུར་ཅིང་ཁ་ལོ་འཛིན་པ་ལ་སྨྲས་སོ། །མངོན་པར་ཉེར་འོངས་མི་དེ་སུ་ཡིན་འདྲེན་པ་ཀྱེ། །སྐྲ་རྣམས་
དཀར་ཞིང་དབྱུག་པ་ལ་ནི་ལག་པས་བརྟེན། །སྨིན་མས་ཀུན་ནས་མིག་གཡོགས་འཁོགས་ཤིང་ཡན་ལག་དྲུད། །རྣམ་འགྱུར་འདི་ནི་ཐ་མལ་གང་འདོད་ཡིན་ནམ་ཅི། །དེ་སྐད་ཅེས་སྨྲ་ཤིང་རྟ་རབ་ཏུ་འདྲེན་པ་པོ། །ལྷ་མཆོག་དེ་རྣམས་ཉིད་ཀྱི་བློ་ནི་རྨོངས་བྱས་ཤིང་། །དོན་ནི་བསྲུང་བྱ་
ཡིན་ཡང་སྐྱོན་མེད་མཐོང་གྱུར་ཏེ། །དེ་ཡིས་ས་སྐྱོང་བདག་ཉིད་སྐྱེས་ལ་ངེས་པར་གསོལ། །གཟུགས་ཀྱི་གནོད་བྱེད་སྟོབས་ཀྱི་རྣམ་པར་ཟ་བ་པོ། །རྒན་པ་རྣམས་ཀྱི་འཇོམས་བྱེད་མྱ་ངན་རྣམས་ཀྱི་ས། །དྲན་པ་རྣམས་ཀྱི་ཉམས་བྱེད་དབང་པོ་རྣམས་ཀྱི་དགྲ། །འདི་ནི་རྒས་པ་ཞེས་བྱ་གང་གིས་
འདི་བཅོམ་མོ། །འདིས་ཀྱང་བྱིས་པ་ཉིད་དང་འོ་མ་འཐུང་གྱུར་ཅིང་། །དུས་ཀྱི་ས་ལ་ཡོངས་སུ་གཉིད་ལོག་གྱུར་པ་སྟེ། །རིམ་གྱིས་ལུས་རབ་ལྡན་པའི་ལང་ཚོར་གྱུར་ནས་ཀྱང་། །རིམ་གྱིས་དེ་ཉིད་ཁོ་ནས་རྒ་བར་ཉེ་བར་སོང་། །དེ་སྐད་ཅེས་སྨྲས་རྒྱལ་པོའི་བདག་ཉིད་སྐྱེས་པ་སྟེ། །ཅུང་ཞིག་འདར་
ལ་ཁ་ལོ་སྒྱུར་ལ་འདི་སྐད་སྨྲས། །སྐྱོན་འདི་ཁོ་བོ་ལ་ཡང་འབྱུང་བ་མིན་ནམ་ཅི། །དེ་བཞིན་འདི་ལ་ཁ་ལོ་སྒྱུར་བ་ཡིས་གསོལ་ཏོ། །འདི་ནི་ན་ཚོད་རབ་མཆོག་ཚེ་དང་ལྡན་པའི་ཡང་། །གདོན་མི་ཟ་བར་དུས་ཀྱི་དབང་གིས་འབྱུང་བར་འགྱུར། །དེ་བཞིན་རྒས་པ་གཟུགས་ཀྱི་རྣམ་པར་ཉམས་པ་
བོར། །འཇིག་རྟེན་པ་ཡི་ཤེས་པ་ཉིད་དང་མཐོང་བ་ཉིད། །དེ་ནས་སྔོན་གྱི་བསམ་པ་དག་པའི་བློ་མངའ་བ། །རྣམ་རྒྱས་བསྐལ་པར་བསགས་པའི་བསོད་ནམས་ལས་ཅན་དེ། །རྡོ་རྗེ་ཆེན་པོའི་སྒྲ་ལ་ཉེ་བར་བ་ལང་བཞིན། །རྒས་པ་ཐོས་ནས་གཞོན་ནུ་ཀུན་ནས་ཡི་མུག་གྱུར། །དབུགས་ནི་རིང་དུ་
བརྒྱུས་ནས་རང་གི་མགོ་བསྒུལ་ཞིང་། །འཁོགས་པ་དེ་ལ་སྤྱན་ནི་རྣམ་པར་ཞུགས་ནས་སུ། །རྒ་བ་དང་བཅས་སྐྱེ་བ་དེ་རྣམས་གཟིགས་གྱུར་ནས། །སེམས་ནི་ཁོང་དུ་ཆུད་པ་དེ་ཡིས་ཚིག་འདི་སྨྲས། །དྲན་པ་དང་ནི་གཟུགས་དང་ཕ་རོལ་གནོན་པ་ཡང་། །དེ་ལྟར་རྒས་པས་རྣམ་དཔྱོད་མེད་པར་

172-1-12a

འཇོམས་པས་ཏེ། །འདི་ལྟ་བུར་ནི་མངོན་སུམ་ཉིད་དུ་སོང་ན་ཡང་། །འཇིག་རྟེན་པ་དག་སྐྱོ་མེད་ཉེར་འགྲོ་ཁོ་ནའོ། །དེ་ལྟར་སོང་ལ་འདྲེན་པ་རྟ་རྣམས་ཕྱིར་ཟློག་ལ། །ཁྱོད་ནི་ཁྱིམ་ཉིད་དུ་ནི་སྐྱེས་པར་རབ་ཏུ་སོང་། །རྒས་པའི་འཇིགས་པའི་སེམས་སུ་གནས་པ་ཁོ་བོ་
ལ། །སྐྱེད་མོས་ཚལ་གྱི་ས་ལ་བདེ་བ་ག་ལ་ཡོད། །དེ་ནས་རྒྱལ་པོའི་སྲས་པོ་དེ་ཡི་བཀའ་ལུང་གིས། །ཁ་ལོ་སྒྱུར་བས་ཤིང་རྟ་ཕྱིར་ལ་བཟློག་པར་གྱུར། །དེ་ནས་གཞོན་ནུས་ཕོ་བྲང་དེ་ཉིད་ཁོ་ནར་ནི། །བསམ་པའི་དབང་གིས་སྟོང་པ་བཞིན་དུ་རབ་ཏུ་ཐོབ། །གང་གི་ཚེ་ན་དེ་ཡང་བདེ་བ་མ་ཡིན་ཏེ། །
རྒས་པ་རྒས་པ་ཞེས་ནི་རབ་ཏུ་ཡོངས་སུ་རྟོག །དེ་ནས་མི་དབང་གིས་ནི་རྗེས་གནང་དེ་ནི་སླར། །རིམ་གྱིས་དེ་ཉིད་ཁོ་ནས་ཕྱི་རོལ་གཤེགས་པར་གྱུར། །དེ་ནས་གཞན་ཡང་ལུས་ལ་ནད་དང་ཡོངས་ལྡན་པ། །ལྷ་མཆོག་དེ་རྣམས་ཉིད་ཀྱིས་བསྐྱེད་ཅིང་སྤྲུལ་པའི་མི། །ཟས་གཙང་རྒྱལ་པོའི་སྲས་
པོ་ཅན་དེར་སོང་ཉིད་ཀྱིས། །གཟིགས་ནས་ཁ་ལོ་སྒྱུར་བ་དེ་ཉིད་ལ་སྨྲས་པ། །གསུས་པ་སྦོམ་ཞིང་དབུགས་དག་སྐྱོད་པའི་ལུས་པོ་ཅན། །ལག་པ་ཆ་ཤས་ཞ་ཞིང་རིད་ལ་སྐྱ་བསེང་ལུས། །ཨ་མ་ཞེས་ནི་སྙིང་རྗེའི་ངག་དག་སྨྲ་བ་པོ། །གཞན་ལ་བརྟེན་ནས་གནས་པའི་མི་དེ་སུ་ཞིག་ཡིན། །
དེ་ནས་ཁ་ལོ་སྒྱུར་བས་སྨྲས་པ་ཞི་བ་ཀྱེ །འདི་ཡི་ཁམས་ནི་རབ་འཁྲུགས་རབ་སྟོབས་རབ་ཏུ་འཕེལ། །ནད་ཅེས་བྱ་བ་མངོན་བརྗོད་ཤིན་ཏུ་དོན་མེད་ཆེན་པོ་སྟེ། །ནུས་ཀྱང་གང་གིས་དེ་ནི་རབ་དབང་མེད་པར་བྱས། །རྗེས་སུ་བརྩེ་བཅས་མི་དེ་ལ་ནི་གཟིགས་བཞིན་དུ། །རྒྱལ་པོའི་
སྲས་དེས་སླར་ཡང་འདི་སྐད་ཅེས་སྨྲས་པ། །སྐྱེས་གྱུར་སྐྱོན་དེ་སོ་སོར་འདི་ཉིད་ཁོ་ནའི་འམ། །ནད་ཀྱི་འཇིགས་ལ་སྐྱེ་དགུ་རྣམས་ཀྱི་སྤྱི་ལ་ཡིན། །དེ་ནས་ཤིང་རྟ་རབ་ཏུ་འདྲེན་པ་དེས་སྨྲས་པ། །གཞོན་ནུ་ཉེས་པ་དེ་ནི་ཐུན་མོང་གྱུར་པ་སྟེ། །དེ་ལྟར་ནད་རྣམས་དག་ནི་ཡོངས་སུ་
གཙེར་བ་ནི། །ནད་མཐར་ཕྱིར་ན་འཇིག་རྟེན་དགའ་བར་ཉེ་བར་གཤེགས། །དེ་ལྟར་དོན་ཐོས་སེམས་ནི་ཁོང་དུ་ཆུད་པ་དེ། །ཆུ་རླབས་ནང་སོང་རི་བོང་ཅན་བཞིན་རབ་འདར་ཞིང་། །བརྩེ་བ་ཐུགས་རྗེ་མངའ་བས་གསུང་ངག་ཚིག་འདི་ནི། །ཅུང་ཞིག་དངར་བའི་དབྱངས་ཀྱིས་རབ་ཏུ་སྨྲས་

172-1-12b

པའོ། །སྐྱེ་དགུ་རྣམས་ལ་རྣམ་པར་ཞེན་པའི་ནད་འདི་ནི། །འཇིག་རྟེན་པ་དག་རང་བཞིན་གནས་ཤིང་བློ་གཏད་བྱེད། །མི་ཤེས་རྣམ་པར་རྒྱ་ཆེན་ཨེ་མ་མི་རྣམས་ཀྱིས། །གང་ཞིག་ནད་ལས་རྣམ་པར་གྲོལ་རྣམས་བཞད་གད་བྱེད། །འདྲེན་པ་ཕྱི་རོལ་རབ་ཏུ་འགྲོ་ལས་ཕྱིར་ལོག་ལ། །
མི་དབང་ཕོ་བྲང་ཉིད་དུ་ཤིང་རྟ་རབ་ཏུ་སོང་། །བདག་གི་ནད་ཀྱི་འཇིགས་པ་ཐོས་ནས་དགའ་བ་ལས། །སེམས་ནི་འཁུམས་པ་བཞིན་དུ་རབ་ཏུ་བཅོམ་པར་གྱུར། །དེ་ལྟར་ལན་གཉིས་ཕྱིར་ལོག་དེ་ནི་རབ་གཟིགས་ནས། །ས་ཡི་བདག་པོ་ཡིས་ཀྱང་ཡོངས་སུ་གྲོས་བྱས་སོ། །དེ་ཡི་ཕྱིར་ལོག་ངེས་
པའི་མཚན་མ་ཐོས་གྱུར་ནས། །བདག་ཅག་རྣམས་ནི་འདི་ཡིས་ཡང་དག་འདོར་སྙམ་སྟེ། །ལམ་རྣམས་གཙང་མར་ལྷག་པར་བྱེད་པ་པོ་རྣམས་ལ། །ཁྲོས་ཤིང་འཁྲུགས་ཀྱང་ཆད་པ་དྲག་པོས་གཅོད་པ་མེད། །སླར་ཡང་སྲས་པོ་དེ་ལ་ཁྱད་པར་འཕགས་པ་དང་། །ལྡན་པའི་ཡུལ་
ལ་རབ་ཏུ་དཔྱོད་པ་རྣམས་མཛད་ཅིང་། །དབང་པོ་གཡོ་བ་ཉིད་ཀྱི་ཕྱིར་ཡང་ཆགས་སྙམ་སྟེ། །བདག་ཅག་རྣམ་པར་མི་འདོར་ཞེས་ནི་མགོན་བླངས་སོ། །གང་གི་ཚེ་ན་སྒྲ་སྒྲོགས་དབང་པོའི་དོན་རྣམས་ཀྱིས། །སྲས་པོ་འདི་ལ་ཕོ་བྲང་འཁོར་ན་དགའ་བ་མེད། །དེ་ནས་རོ་གཞན་རོ་ལ་གྱུར་ཅིག་
ཞེས་སེམས་ཤིང་། །ཕྱི་རོལ་ལྟད་མོ་ལ་ནི་རྣམ་པར་བཀའ་སྩལ་ཏོ། །བརྩེ་བ་ལས་ནི་སྲས་པོའི་དགོངས་པ་རྟོགས་ནས་སུ། །དེ་ལ་ཆགས་པའི་སྐྱོན་རྣམས་འགའ་ཞིག་མ་བསམས་ནས། །སྒྱུ་རྩལ་རྣམས་ལ་མངོན་པར་ཤེས་ཞེས་རེས་མའི་གཙོ། །མཛངས་མ་རྣམས་ལ་དེས་ནི་ཡང་དག་བཀའ་
སྩལ་ཏོ། །དེ་ནས་ཁྱད་པར་དུ་ཡང་མི་ཡི་དབང་པོའི་ལམ། །ལེགས་པར་བརྒྱན་བྱས་ཉིད་དང་ཡོངས་སུ་བརྟགས་པ་ལ། །འདྲེན་པ་དང་ནི་ཤིང་རྟ་བརྗེས་ནས་རྒྱལ་པོ་ཡིས། །གཞོན་ནུ་ཕྱི་རོལ་དུ་ནི་རབ་ཏུ་གཤེགས་སུ་གཞུག །དེ་ནས་དེ་ལྟར་རྒྱལ་པོའི་བུ་ནི་གཤེགས་པ་ན། །ལྷ་
མཆོག་དེ་རྣམས་ཉིད་ཀྱིས་རྣམ་པར་སྤྲུལ་པ་ཡི། །སྲོག་སོང་ཤི་བའི་རོ་དེ་ལམ་དུ་བཏེག་པ་ནི། །འདྲེན་པ་དང་ནི་གཞོན་ནུས་མཐོང་སྟེ་གཞན་གྱིས་མིན། །དེ་ནས་འདྲེན་པ་རྒྱལ་པོའི་སྲས་པོ་དེས་སྨྲས་པ། །ཞན་ཞིང་སྟུག་པའི་མི་རྣམས་དག་ནི་རྗེས་འབྲང་ཞིང་། །རྒྱན་གྱིས་བརྒྱན་པ་ཡིན་ཡང་ཀུན་ནས་ངུ་བ་

172-1-13a

སྟེ། །མི་བཞི་རྣམས་ཀྱིས་བཏེག་པ་ཕ་གི་སུ་ཞིག་ཡིན། །དེ་ནས་གཙང་བའི་བདག་ཉིད་གཙང་མར་གནས་པ་ཡི། །ལྷ་རྣམས་དག་གིས་སེམས་ནི་ཟིལ་ནོན་འདྲེན་པ་པོ། །དེས་ནི་བརྗོད་པར་བྱ་བ་མིན་ཀྱང་དོན་འདི་ནི། །དོན་ལྡན་དབང་ཕྱུག་ལ་ནི་རབ་ཏུ་རྣམ་པར་གསོལ། །
བློ་དང་དབང་པོ་སྲོག་གི་ཡོན་ཏན་དང་བྲལ་ཞིང་། །གཉིད་ལོག་མིང་བྲལ་རྩྭ་དང་ཤིང་དུ་གྱུར་པ་སྟེ། །བརྩོན་འགྲུས་ལྡན་པ་རྣམས་ཀྱིས་བསྐྱེད་ནས་བསྲུངས་ནས་ཀྱང་། །སྡུག་པ་སྡུག་པ་རྣམས་ཀྱིས་སྤངས་པ་དེ་ནི་སུ་ཡིན་ནམ། །དེ་ལྟར་ཚིག་ནི་རབ་ཏུ་འདྲེན་པ་ལས་ཐོས་ནས། །ཅུང་ཞིག་
ཀུན་ནས་བསྐྱོད་ཅིང་དེ་ཉིད་ལ་སྨྲས་པ། །ཆོས་འདི་ཉིད་ནི་སྐྱེ་བ་འདི་ཉིད་ཀྱང་གི་འམ། །མཐར་གྱུར་འདི་འདྲ་སྐྱེ་དགུ་ཀུན་གྱི་ཡིན་ནམ་ཅི། །དེ་ནས་རབ་ཏུ་འདྲེན་པས་འདི་ཉིད་ལ་གསོལ་པ། །མཐར་གྱུར་ལས་འདི་སྐྱེ་དགུ་རྣམས་ནི་ཀུན་གྱི་སྟེ། །དམན་དང་འབྲིང་དང་བདག་ཉིད་ཆེན་པོ་
ཐམས་ཅད་ཀྱི། །འཇིག་རྟེན་དག་ནི་རྣམ་པར་ངེས་པར་རྣམ་པར་ཉམས་པར་འགྱུར། །དེ་ནས་མི་དབང་སྲས་པོ་དེ་ནི་བསྟན་ན་ཡང་། །འཆི་བ་ཐོས་ནས་དེ་མ་ཐག་ཏུ་ཡི་མུག་ཅིང་། །དཔུང་པས་ཤིང་རྟའི་ཤིང་གི་རྩེ་ལ་རབ་འཁྱུད་ནས། །གདངས་སྙན་དང་ལྡན་དབྱངས་ཀྱིས་རབ་ཏུ་སྨྲས་
པའོ། །འདི་ནི་ངེས་པར་སྐྱེ་དགུ་རྣམས་ཀྱི་མཐར་ཐུག་སྟེ། །འཇིག་རྟེན་པ་དག་འཇིགས་པ་སྤངས་ཤིང་བག་མེད་ལ། །མི་རྣམས་དག་གི་སེམས་རྣམས་སྲ་བ་སྙམ་པ་སྟེ། །ལམ་ལ་གནས་རྣམས་དེ་ལྟར་རང་བཞིན་ཉིད་དུ་གནས། །དེ་ཕྱིར་འདྲེན་པ་ཤིང་རྟའི་ཁ་ནི་ཕྱིར་བཟློག་དང་། །
བདག་ཅག་ས་ལ་རྣམ་པར་རྒྱུ་བའི་ཡུལ་དུས་མིན། །ཉམ་ཐག་དུས་སུ་རྣམ་པར་ཉམས་པ་ཤེས་ནས་ནི། །སེམས་དང་བཅས་པ་གང་འདྲ་འདི་ན་བག་མེད་ཡིན། །མི་བདག་བདག་སྐྱེས་ཀྱིས་ནི་དེ་སྐད་སྨྲས་ན་ཡང་། །དེ་ཡིས་ཤིང་རྟ་དེ་ནི་ཕྱིར་ལ་མ་བཟློག་སྟེ། །ཁྱབ་པར་ལྡན་པ་ཡིན་
ཡང་མི་དབང་བརྟེན་པ་ལ། །པདྨའི་ཚོགས་བཅས་ནགས་ཉིད་དུ་ནི་གཤེགས་པར་གྱུར། །དེ་ནས་མེ་ཏོག་རྒྱས་ལྡན་གཞོན་ནུའི་རྐང་འཐུང་ཞིང་། །ཡོངས་སུ་བསྐོར་ཞིང་རབ་དགའ་མྱོས་པའི་ཁུ་བྱུག་ཅན། །གཞལ་མེད་ཁང་ལྡན་པདྨ་དང་བཅས་མཛེས་པའི་རྫིང་། །དགའ་བའི་ཚལ་

172-1-13b

འདྲ་དགེ་བའི་ནགས་དེ་གཟིགས་པར་གྱུར། །ལྷ་མཆོག་མས་བསྐོར་གྲོང་ཁྱེར་བརྒྱན་བྱེད་བདག་པོའི་གཞིར། །བརྟུལ་ཞུགས་གསལ་ལྡན་ཐུབ་པ་བགེགས་ཀྱིས་འཇིགས་པ་བཞིན། །ཡན་ལག་མཆོག་མའི་ཚོགས་ཁྱབ་མི་སྐྱོང་བདག་སྐྱེས་སྲས། །དེ་ནས་སྟོབས་ལས་ནགས་
དེར་སྤྱན་དྲངས་སོ། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། ཐུགས་སྐྱོ་བ་སྐྱེས་པའི་ལེའུ་སྟེ་གསུམ་པའོ།།      །།དེ་ནས་སྐྱེད་མོས་ཚལ་དེ་ནས། །ཡ་མཚན་གྱིས་ནི་མིག་གཡོས་རྣམས། །བུད་མེད་རྣམས་ནི་ཁྱོ་ཐོབ་བཞིན། །མི་སྐྱོང་
སྲས་ལ་མདུན་དུ་འོངས། །འོངས་ནས་དེ་ལ་དེ་རྣམས་ཀྱིས། །ཡ་མཚན་རབ་རྒྱས་སྤྱན་མ་དྲངས། །པདྨའི་མཛོད་འདྲའི་ཕྱག་རྣམས་ཀྱིས། །ཕྲིན་ལས་ཡང་དག་སྤྱོད་པ་བྱས། །གཡོ་མེད་དགའ་བ་རྣམ་གསལ་བའི། །སྤྱན་མིག་རྣམས་ཀྱིས་འཐུང་བ་བཞིན། །ཡིད་དཀྲུགས་འདོད་
པས་སེམས་གཡེངས་རྣམས། །དེ་ལ་ཡོངས་སུ་བསྐོར་ནས་གནས། །ལྷན་སྐྱེས་རྒྱན་རྣམས་ཀྱིས་བཞིན་དུ། །མཚན་ནི་མཛེས་རྣམས་ཀྱིས་བརྒྱན་པ། །འདོད་ལྷ་ལུས་དང་ལྡན་ནོ་ཞེས། །དེ་ལ་མི་མོ་དེ་རྣམས་སྙམ། །ཞི་བ་ཉིད་ཕྱིར་བརྟན་ཉིད་ཕྱིར། །གསང་བའི་འོད་ཟེར་བླ་བ་ནི། །ས་ལ་
དངོས་སུ་བབས་པ་བཞིན། །དེ་ལ་ཁ་ཅིག་རྣམས་ཀྱིས་ཤེས། །དེ་ཡི་ལུས་ཀྱིས་གཡེངས་དེ་རྣམས། །ངེས་བཟུང་ལུས་ནི་རྣམ་འགྱུར་ཞིང་། །ཕན་ཚུན་མིག་རྣམས་ཀྱིས་བསྣུན་ནས། །དལ་བུས་དབུགས་ནི་རྣམ་པར་བརྒྱུས། །དེ་ལྟར་མི་མོ་དེ་རྣམས་ཀྱིས། །དེ་ནི་མིག་ཙམ་གྱིས་མཐོང་ཉིད། །
སྨྲ་བ་མེད་ཅིང་དགའ་མེད་པར། །འདི་ཡི་མཐུ་ཡིས་ནོན་པར་གྱུར། །དེ་ལྟར་དེ་རྣམས་རྩོམ་བྲལ་ཞིང་། །སྙིང་རྗེས་རྣམ་པར་འཁྲུགས་མཐོང་ནས། །བྲམ་ཟེ་མདུན་ན་འདོན་གྱི་སྲས། །བློ་ལྡན་འཆར་ཀས་ཚིག་སྨྲས་སོ། །ཀུན་གྱི་སྒྱུ་རྩལ་ཀུན་ཤེས་ཤིང་། །དགོངས་པ་ལེན་ལ་མཁས་མ་
རྣམས། །གཟུགས་དང་མཛངས་དང་ལྡན་པ་སྟེ། །རང་གི་ཡོན་ཏན་གཙོར་ཕྱིན་ནོ། །ལུས་ངན་གྱི་ཡང་སྐྱེད་ཚལ་དང་། །བྱང་གི་སྒྲ་མི་སྙན་ན་ཡང་། །ཡོན་ཏན་འདི་རྣམས་ཀྱིས་མཛེས་ཏེ། །ནོར་འཛིན་འདི་ན་སྔོན་ཉིད་དོ། །ཆགས་བྲལ་རྣམས་དང་དྲང་སྲོང་ཡང་། །ཁྱེད་ཅག་རྣམས་ཀྱིས་གཡོ་

172-1-14a

ནུས་ཤིང་། །ལྷ་མོ་རྣམས་ཀྱིས་ཤེས་པ་ཡིས། །ལྷ་རྣམས་ལ་ཡང་ལེན་པར་རོ། །དགོངས་པ་ཤེས་དང་རྩེད་འཇོ་དང་། །མཛངས་དང་གཟུགས་ནི་ཕུན་ཚོགས་པས། །བུད་མེད་རྣམས་ཀྱིས་ཆགས་ནུས་ན། །སྐྱེས་པ་རྣམས་ཀྱིས་སྨོས་ཅི་དགོས། །རྣམ་པ་དེ་ལྟར་རབ་སྦྱར་བ། །དེ་ཡི་རང་གི་སྤྱོད་ཡུལ་ལས། །རྣམ་པ་དེ་
ལྟར་སྤྱོད་པ་འདི། །ཁྱོད་ཀྱི་དྲང་པོའི་ཚིག་མ་གྱུར། །ཁྱོད་ཀྱི་འདི་ནི་ངོ་ཚ་བས། །མིག་འཁུམས་བག་མ་གསར་པ་ཡི། །སྤྱོད་པ་དང་མཚུངས་ཡང་ན་ནི། །བ་གླང་སྐྱོང་གི་ཆུང་མའི་འོས། །གང་ཡང་འདི་ནི་དཔའ་བ་སྟེ། །དཔལ་གྱི་མཐུ་ལས་ཆེན་པོ་ཡིན། །བུད་མེད་ཀྱི་ཡང་གཟི་ཆེ་སྟེ། །དེ་ཕྱིར་
འདི་ཡང་ངེས་པར་བྱ། །སྔོན་ཡང་ཀ་ཤིའི་མཛེས་མ་ནི། །སྨད་འཚོང་མ་ཡི་དྲང་སྲོང་ཆེ། །ལྷ་ཡིས་ཐུབ་པར་དཀའ་བ་ཡང་། །དྲང་སྲོང་རྒྱས་པས་རྐང་པས་བརྡུངས། །མཱན་ཐལ་གཽ་ཏམ་དགེ་སློང་ནི། །སྨད་འཚོང་གཙོ་མོ་བྱིན་མ་ཡིན། །དགའ་འདོད་དེ་ཡི་དོན་ཆེད་དུ། །སྔོན་གྱི་ཚེ་ན་རོ་རྣམས་
བཏོན། །གཽ་ཏ་མ་མུན་རིངས་མིང་། །དྲང་སྲོང་ཆེན་པོ་ཚེ་རིངས་པོ། །ཁ་དོག་དབྱིབས་མཆོག་མ་ཡིན་པའི། །བུད་མེད་ཀྱིས་ནི་ཚིམ་པར་བྱས། །དྲང་སྲོང་རྭ་སྐྱེས་ཐུབ་པ་མཆོག །བུད་མེད་ཡུལ་ལ་མི་མཁས་པ། །རྣམ་པ་སྣ་ཚོགས་ཐབས་རྣམས་ཀྱིས། །ཞི་མས་དེ་ལྟར་བླངས་ཤིང་ཕམ། །
སྣ་ཚོགས་བཤེས་གཉེན་དྲང་སྲོང་ཆེ། །བརྟུལ་ཞུགས་ཆེན་པོ་བརྟན་པ་ཡང་། །ལྷ་མོ་མར་སྲུང་མས་ཕྲོགས་ཏེ། །ལོ་བཅུ་རྣམས་ལ་ཉི་མར་ཤེས། །དྲང་སྲོང་དེ་རྣམས་དེ་རྣམས་སོགས། །བུད་མེད་ཀྱིས་སྒྱུར་བླངས་གྱུར་ན། །རོལ་ཞིང་ལང་ཚོ་སྔ་མ་ཡིས། །མི་བདག་སྲས་པོ་སྨོས་ཅི་དགོས། །
དེ་ལྟར་གྱུར་ན་ཡིད་ཆེས་ཤིང་། །འདི་ནི་མི་སྐྱོང་རིགས་ཀྱི་དཔལ། །འདི་ལས་ཕྱིར་ཕྱོགས་མ་ཡིན་པ། །ཇི་ལྟར་དེ་ལྟར་ནན་ཏན་མཛོད། །ལང་ཚོ་ལྡན་མ་འགའ་ཞིག་རྣམས། །མཚུངས་པའི་སྐྱེ་བོ་འཕྲོག་པ་སྟེ། །མཆོག་དང་མཆོག་མིན་དག་གི་སེམས། །ལེན་པ་གང་དེ་བུད་མེད་རྣམས། །
དེ་ལྟར་འཆར་ཀའི་ཚིག་ཐོས་ནས། །བུད་མེད་དེ་རྣམས་ཕུག་པ་བཞིན། །གཞོན་ནུ་ལེན་པར་རབ་མཚོན་ཏེ། །བདག་ཉིད་ཡང་དག་ཀུན་ནས་འཛེགས། །འཇིགས་ལས་འཇིགས་བཞིན་ཡན་ལག་མ། །དེ་རྣམས་སྨིན་དང་ལྟ་དང་སྒེག །དགོད་དང་རོལ་དང་འགྲོ་བ་ཡིས། །ཀུན་ནས་

172-1-14b

བསྐྱོད་པའི་སྤྱོད་པ་བྱས། །རྒྱལ་པོའི་བཀའ་ལུང་སྦྱར་ཕྱིར་དང་། །གཞོན་ནུ་ཉིད་ཀྱང་འཇམ་ཕྱིར་དང་། །རྒྱགས་པ་ཡིས་ནི་མྱོས་པའི་ཕྱིར། །ཡིད་མི་ཆེས་པ་མྱུར་བར་དོར། །གླང་མོའི་ཚོགས་དང་ཐབས་ཅིག་ཏུ། །གླང་པོ་གངས་ཅན་ནགས་ན་ལྟར། །དེ་ནས་མི་མོའི་སྐྱེ་བོ་
ཡིས། །གཞོན་ནུ་བསྐོར་ཞིང་ནགས་ན་སྤྱད། །རྣམ་པར་མཛེས་པའི་སྐྱེད་ཚལ་ན། །ལྷ་མོས་བསྐོར་བའི་ཉི་མ་བཞིན། །ཡིད་འོང་ནགས་དེར་གཞོན་ནུ་དེ། །བུད་མེད་རྣམས་ནི་མདུན་འགྲོ་བར། །རྣམ་པར་སྒེག་བཅས་གཞོན་ནུ་མ། །རྒྱགས་པས་མ་སྤངས་དེ་རྣམས་དགའ། །སྲ་ཞིང་
ཟླུམ་རྒྱས་ལྷན་ཅིག་པའི། །ནུ་མ་རྣམས་ཀྱིས་དེ་ལ་རེག །དཔུང་པ་ལས་བྲུལ་འཇམ་རིང་མཉེན། །ལག་པའི་ལྗོན་ཤིང་སྟོབས་མེད་མ། །ཁ་ཅིག་བདེན་མིན་འཁྲུལ་པ་རུ། །བྱས་ནས་དེ་ལ་སྟོབས་ལས་འཁྱུད། །ཁ་ཅིག་ཟངས་མཆུ་མ་མཆུ་ཅན། །ཁ་ཅིག་ཆང་གི་དྲི་ངག་གིས། །གཅིག་པུ་
དབེན་པར་སྡོད་ཅིག་ཅེས། །འདི་ཡི་རྣ་བར་ཤབ་ཤིབ་བྱེད། །ཁ་ཅིག་བཀའ་ལུང་སྩོལ་བ་བཞིན། །བྱུག་པ་གཤེར་མས་རབ་སྨྲས་ཏེ། །འདིར་ནི་གུས་པར་གྱིས་ཤིག་ཅེས། །དགོད་དང་འཁྱུད་དང་འདོད་པས་སོ། །ཁ་ཅིག་གསེར་གྱི་སྐ་རགས་ཀྱི །ཅལ་ཅོལ་མས་ཀྱིས་ཙམ་ཙོམ་དང་། །
ཕྲ་མོའི་དར་གྱི་གོས་གྱོན་ཞིང་། །འདི་ལ་རོ་སྨད་སྟོན་ཅིང་བསྐོར། །ཡང་དང་ཡང་དུ་མྱོས་མའི་རྒྱུས། །གཞན་མ་དར་སྔོན་ཉིལ་བ་སྟེ། །སྐ་རགས་ཕན་ཚུན་སྡུད་པ་ནི། །མཚན་མོ་གློག་ཕྲེང་བཞིན་དུ་མཛེས། །ཙཱུ་ཏའི་མེ་ཏོག་ཡལ་ག་རྒྱས། །བཟུང་ནས་གཞན་ནི་འཕྱང་གྱུར་ལ། །གསེར་
གྱི་བུམ་པར་མཚུངས་པ་ཡི། །འོ་མ་འཛིན་པ་སྟོན་པར་བྱེད། །ཁ་ཅིག་པདྨའི་ནགས་ཚལ་ནས། །འོངས་ནས་པད་བཅས་པདྨའི་སྤྱན། །པདྨའི་ཞལ་གྱི་ལོགས་གནས་ཤིང་། །པདྨའི་དཔལ་བཞིན་བསྡད་པར་གྱུར། །རང་གནས་དེ་ལ་བསྐུལ་བ་བཞིན། །བསླུས་པར་གྱུར་ཞེས་མིག་རྣམས་
ཀྱིས། །ཁ་ཅིག་མངོན་པར་འདྲེན་བཅས་ལག །དོན་ལྡན་དངར་བའི་གླུ་ལེན་ནོ། །དགེ་བའི་གདོང་གིས་གཞན་མས་ནི། །སྨིན་པའི་གཞུ་ནི་རྣམ་བཀང་སྟེ། །བསྐོར་གནས་བརྟན་དང་རོལ་པ་ཡིས། །འདི་ཡི་སྤྱོད་ལ་རྗེས་ཟློས་བྱས། །རྒྱས་ཟླུམ་ནུ་ལྡན་ཁ་ཅིག་ནི། །དགོད་པས་རྣ་ལུང་

172-1-15a

གཡོས་གྱུར་ཅིང་། །ཁྱོད་ནི་ཐོབ་པར་གྱུར་ཅིག་ཅེས། །མཐོན་པོ་རྣམས་ཀྱིས་བཞད་ཅིང་སྨྲས། །གཞན་ནི་དེ་བཞིན་འགྲོ་འདོད་པ། །མེ་ཏོག་ཕྲེང་བའི་ཚལ་གྱིས་བཅིངས། །ཁ་ཅིག་ཅོད་བཅས་དངར་མོ་ཡིས། །ངག་གི་ཞགས་པ་རྣམས་ཀྱིས་བཟུང་། །སོ་སོར་
བྲལ་བ་དོན་གཉེར་འགའ། །ཙཱུ་ཏའི་སྙེ་མ་བཟུང་ནས་ནི། །མེ་ཏོག་འདི་ནི་གང་གི་ཞེས། །རྒྱགས་པས་རྣམ་པར་འཁྲུགས་ཤིང་དྲིས། །ཁ་ཅིག་འགྲོས་དང་ཆ་ལུགས་ནི། །སྐྱེས་པ་བཞིན་དུ་བྱས་ནས་ནི། །ས་འདིར་རྒྱལ་བར་གྱུར་ཅིག་ཀྱེ། །བུད་མེད་ཀྱིས་འཕམ་དེ་ལ་སྨྲས། །དེ་ནས་
གཡོ་བའི་མིག་ཅན་འགས། །ཨུཏྤལ་སྔོན་པོ་སྣོམ་བྱེད་ཅིང་། །ཅུང་ཞིག་རྒྱགས་སྐད་ཚིག་རྣམས་ཀྱིས། །མི་སྐྱོང་བདག་སྐྱེས་ལ་སྨྲས་སོ། །གཟིགས་ཤིང་ཇོ་བོ་ཙཱུ་ཏའི་ཤིང་། །མེ་ཏོག་སྦྲང་རྩིའི་དྲིས་ཁྱབ་ལ། །ཁུ་བྱུག་འདིར་ནི་སྐད་འདོན་པ། །གསེར་གྱི་བུ་ན་བཀག་པ་འདྲ། །མྱ་ངན་
མེད་པའི་ཤིང་འདི་གཟིགས། །འདོད་པ་ཅན་གྱི་མྱ་ངན་འཕེལ། །བུང་བ་འདིར་ནི་སྒྲ་བསྒྲགས་པ། །མེ་ཡིས་ཚིག་པ་ཡིན་པ་འདྲ། །ཙཱུ་ཏའི་ཤིང་གིས་ཡང་དག་འཁྱུད། །གཟིགས་ཤིང་ཏི་ལ་ཀ་ཡི་ཤིང་། །བུད་མེད་ལུས་སེར་ཆགས་པ་ཡིས། །སྐྱེས་པ་གོས་དཀར་གོན་པ་འདྲ། །
རབ་རྒྱས་ཀུ་ར་བ་ཀ་གཟིགས། །མ་ཟོས་པ་ཡི་སྨུག་རྩིའི་འོད། །བུད་མེད་རྣམས་ཀྱི་སེན་འོད་ཀྱིས། །སྨ་ཕབ་གྱུར་ཏེ་དུད་པ་འདྲ། །གཞོན་ནུ་མྱ་ངན་མེད་འདི་གཟིགས། །འདབ་མ་རྣམས་ཀྱིས་སྤྲས་པ་གང་། །ཁོ་མོའི་ལག་པ་མཛེས་པ་ཡིས། །ངོ་མཚར་གྱུར་ཏེ་གནས་པ་འདྲ། །རྫིང་
བུ་གཟིགས་ཤིང་འགྲམ་སྐྱེས་པའི། །ལྕང་མ་རྣམས་ཀྱིས་རབ་ཏུ་བསྐོར། །དཀར་པོའི་དར་གྱི་གོས་གོན་པའི། །རབ་མྱོས་མ་རྣམས་ཉལ་བ་འདྲ། །བུད་མེད་རྣམས་ལ་བདག་ཉིད་ཆེ། །གཟིགས་ཤིག་ངང་པ་ཆུ་འདི་ལ། །རྒྱབ་ན་བསྒོ་བྱའི་བྲན་བཞིན་དུ། །ངང་མོ་རྗེས་འཇུག་རྗེས་
སུ་འགྲོ། །རབ་ཏུ་མྱོས་པའི་ཁུ་བྱུག་ནི། །སྐད་གྲག་སྒྲ་ནི་གསོན་མཛོད་ཅིག །ཁུ་བྱུག་གཞན་ནི་མངོན་སུམ་དུ། །ཀུས་འདེབས་བྲག་ཅའི་སྒྲ་བརྙན་འདྲ། །མཁའ་ལ་རྒྱུ་བ་རྣམས་ཀྱི་ཡང་། །རྒྱགས་པ་དཔྱིད་ཀྱིས་ཁྱེར་ཏེ་འོངས། །བསམ་བྱ་མིན་སེམས་སྐྱེ་བོ་ནི། །ཤེས་རབ་ཅན་དུ་

172-1-15b

རློམ་པ་མེད། །དེ་ལྟར་དར་ལ་བབ་པ་རྣམས། །ཡིད་དཀྲུགས་འདོད་པས་སེམས་དྲེགས་ཤིང་། །སྣ་ཚོགས་ཚུལ་ནི་དེ་དང་དེས། །གཞོན་ནུ་ལ་ནི་ཉེ་བར་བརྩམས། །དེ་ལྟར་ཀུན་ནས་གཡེངས་ན་ཡང་། །བརྟེན་པས་དབང་པོ་དཀྲིས་པ་དེ། །འཆི་བར་བྱ་ཞེས་སྐྱོ་བྱས་ཤིང་། །
དགའ་དང་འཇིགས་པ་མེ་དཔར་འགྱུར། །དེ་རྣམས་ཀྱི་ནི་གནས་སྐབས་དེ། །གཟིགས་ནས་སྐྱེས་མཆོག་དམ་པ་དེས། །མཉམ་ལ་སྐྱོ་དང་བརྟན་པ་ཡི། །ཐུགས་ཀྱིས་བསམས་པར་གྱུར་པའོ། །ཅི་ཞིག་བུད་མེད་འདི་རྣམས་ནི། །ལང་ཚོ་གཡོ་བར་རྟོགས་པ་མིན། །གང་
ཕྱིར་གཟུགས་ཀྱི་མྱོས་པ་ནི། །གང་ཞིག་དགའ་བས་ཉམས་པར་འགྱུར། །གང་གི་ནང་དུ་བྱིང་བ་རུ། །ངེས་པར་དེ་རྣམས་ཀྱིས་མི་མཐོང་། །འགྲོ་བ་ནད་ཀྱི་ཆོས་ཅན་ལ། །འཇིགས་པ་སྤངས་ཏེ་དེ་ལྟར་དགའ། །ཐམས་ཅད་འཕྲོག་བྱེད་འཆི་བ་ཡི། །ངེས་
པར་མངོན་པར་ཤེས་མིན་ཞིང་། །དེ་ལྟར་རང་གནས་སྐྱོ་མེད་པར། །རྩེད་མོ་དང་ནི་བཞད་གད་བྱེད། །རྒ་དང་ན་དང་འཆི་བ་ཡང་། །ཤེས་ལྡན་ཡིན་ན་སེམས་ལྡན་སུ། །རང་གནས་ལངས་དང་འདུག་པ་འམ། །ཉལ་བྱེད་རྒོད་པ་སྨོས་ཅི་དགོས། །ནད་དང་འཆི་བ་ཉིད་དང་ནི། །མཆོག་ཏུ་
འཁོགས་གང་དེ་མཐོང་ནས། །རང་གནས་གྱུར་ཞིང་སྐྱོ་མེད་པ། །ཇི་ལྟར་སེམས་མེད་དེ་ལྟར་དེ། །མེ་ཏོག་རྣམས་དང་འབྲས་བུ་ཡིས། །རྣམ་པར་སྤངས་པར་གྱུར་པའི་ཤིང་། །འགྱེལ་ལམ་ཡང་ན་བཅད་པ་སྟེ། །ཤིང་གཞན་མཛེས་པར་བྱེད་མ་ཡིན། །དེ་ལྟར་བསམ་གཏན་མཆོག་མཐོང་
ནས། །ཡུལ་རྣམས་ལ་ནི་འདོད་པ་ཐལ། །འཆར་ཀ་ཚུལ་ལུགས་བསྟན་བཅོས་ཤེས། །མཛའ་བོ་ཉིད་ཀྱིས་དེ་ལ་སྨྲས། །ཁོ་བོ་མི་སྐྱོང་གིས་བྱིན་ཏེ། །ཁྱོད་ལ་གྲོགས་སུ་ནུས་པ་ལོ། །གང་ཕྱིར་ཁྱེད་ལ་སྨྲ་འདོད་པ། །རབ་དགའ་ལྡན་པ་དེ་ཕྱིར་རོ། །ཕན་པ་མིན་ལས་རབ་འགེགས་ཤིང་། །ཕན་
པ་ལ་ཡང་རྗེས་རབ་འཇུག །སྡུག་པ་ན་ཡང་ཡོངས་མི་གཏོང་། །ཡོངས་རྫོགས་ཤེས་ཀྱི་མཚན་ཉིད་དོ། །བདག་དེ་བྱམས་པར་དམ་བཅས་ནས། །སྐྱེས་བུའི་དོན་ལ་ཕྱིར་ཕྱོགས་པ། །གལ་ཏེ་ཁྱོད་ལ་བཏང་སྙོམས་བྱེད། །གྲོགས་པོ་ཉིད་ཀྱང་མ་ཡིན་ནོ། །དེ་ཕྱིར་མཛའ་བོར་གྱུར་ནས་སྨྲས། །

172-1-16a

གཞོན་ནུའི་ལུས་དང་ལྡན་པ་ནི། །ཁྱོད་ཀྱིས་འདི་འདྲ་བུད་མེད་ཀྱིས། །ཡུལ་ལ་མཁས་པའི་གཟུགས་བརྙན་མིན། །དེ་ཡི་ངོ་ཚའི་རྒོད་དོན་དང་། །བདག་ཉིད་དགའ་བའི་དོན་ཉིད་དུ། །བདེན་མིན་གྱིས་ཀྱང་མི་མོ་ཡི། །རྗེས་སུ་འཇུག་པ་རིགས་པ་ཡིན། །ཡང་དག་འདུད་དང་
རྗེས་འཇུག་གི། །བུད་མེད་རྣམས་ཀྱིས་སེམས་འཆིང་སྟེ། །བརྩེ་བའི་ཡོན་ཏན་སྐྱེ་གནས་ཕྱིར། །ཡིད་ལ་འདོད་པ་བུད་མེད་ཡིན། །དེ་ཕྱིར་རྣམ་པར་སྤངས་པའི་སྤྱན། །སྙིང་ལ་གཞན་དུ་ཕྱིར་བལྟས་ཀྱང་། །འདི་ཡི་ཡུལ་དང་རྗེས་མཐུན་པར། །མཁས་པ་རྣམ་པར་དཔྱད་པར་འོས། །མཁས་པ་
སྨན་ཡིན་བུད་མེད་ལ། །མཁས་པ་རབ་མཆོག་རྒྱན་ཡིན་ནོ། །མཁས་པ་དང་བྲལ་གཟུགས་དག་ནི། །མེ་ཏོག་མེད་པའི་ནགས་དང་འདྲ། །ཡང་ན་མཁས་པའི་རང་བཞིན་གྱི། །བསམ་པ་རང་བཞིན་ཁས་ལེན་མཛོད། །ཡུལ་རྣམས་ཉེས་པར་དཀའ་ཐོབ་ནས། །ཕྱི་ཤོལ་བྱེད་པ་འོས་མ་ཡིན། །
སྔོན་ཚེ་ལྷ་ཡི་དབང་པོས་ཀྱང་། །འདོད་པ་མཆོག་ཅེས་ཤེས་བྱས་ནས། །གཽ་ཏམ་ཐུབ་པའི་དགའ་ལྡན་མ། །བཤོལ་མེད་མ་ལ་འདོད་པ་བྱས། །ཟླ་བའི་ཆུང་མ་སྣར་མ་ནི། །དྲང་སྲོང་རི་བྱིས་དོན་དུ་གཉེར། །དེ་ནས་དེ་དང་འདྲ་བ་ཡི། །བརྐམ་བྱ་མ་ནི་རྙེད་ཅེས་ཐོས། །ཨུ་བྷ་ཐྱ་ཡི་ཆུང་མ་ནི། །རླུང་
གི་བུ་མོ་མཐུན་མ་ལ། །དཀའ་ཐུབ་ཆེན་པོའི་ཕུར་བུ་ཡིས། །བ་ར་དྭ་ཛ་བསྐྱེད་པར་གྱུར། །དྲང་སྲོང་ཕུར་བུའི་ཆུང་མ་ནི། །སྦྱིན་སྲེག་མ་ལ་སྦྱིན་སྲེག་མཆོག །ཟླ་བ་ཡིས་ནི་ལག་པ་ཡི། །ལྷ་ཡི་ལས་བྱེད་བསྐྱེད་པར་གྱུར། །སྔོན་ཚེ་བུ་མོ་ནག་མོ་ནི། །ཆུར་སྐྱེས་མ་ལས་སྐྱེས་མ་ལ། །རྩིབ་
ལོགས་སྐྱེས་ནི་ཆགས་སྐྱེས་ཤིང་། །ཡ་ནུ་ནི་ཡི་གླིང་དུ་ཕྱིན། །གནོད་སྦྱིན་ཕྲེང་མ་རིགས་ངན་མ། །སྣོད་མ་ལ་ནི་དགའ་འདོད་པས། །གོང་མ་སྲེག་ནི་ཟ་བའི་བུ། །ཐུབ་པ་གནས་མཆོག་གིས་བསྐྱེད་དོ། །འགྲོ་མགྱོགས་རྒྱལ་པོ་དྲང་སྲོང་ཉིད། །ན་ཚོད་རྣམ་པར་སོང་བ་ཡི། །ལྷ་མོ་སྣ་ཚོགས་
མཆོད་མར་བཅས། །སྣ་ཚོགས་ཤིང་རྟའི་ནགས་སུ་དགའ། །བུད་མེད་འགྲོགས་མིན་ཞི་བ་ནི། །སྐྱ་བསེང་གིས་ནི་ཤེས་ནས་ཀྱང་། །དགའ་མའི་གཟུགས་ཡོན་གྱིས་བཀུག་སྟེ། །འདོད་ལས་སྐྱེས་པའི་བདེ་བ་བསྟེན། །སྐྱེད་མཛད་རྒྱལ་པོ་དམར་སེར་ཡང་། །བྲམ་ཟེའི་བུ་མོ་ཕྲོགས་ནས་ནི། །

172-1-16b

ན་བབས་ཐོབ་པ་ཉིད་ཡིན་ཀྱང་། །ཡིད་དཀྲུགས་འདོད་པ་མ་བསྟེན་མིན། །དེ་ལ་སོགས་པ་བདག་ཉིད་ཆེས། །ཡུལ་རྣམས་སྨད་པ་ཡིན་ན་ཡང་། །དགའ་བའི་ཆེད་དུ་ལོངས་སྤྱད་དེ། །ཡོན་ཏན་ལྡན་ལ་སྔོན་ཉིད་དོ། །ཁྱོད་ཀྱང་རིགས་པ་ལས་འཐོབ་ཅིང་། །སྟོབས་ལྡན་གཟུགས་ལྡན་དར་
ལ་བབ། །གང་དུ་སྐྱེ་འགྲོ་འདི་འཆགས་ན། །ཡུལ་རྣམས་ལ་ནི་ཕྱི་ཤོལ་བྱེད། །དེ་ལྟར་འཇམ་ཞིང་ལུང་དང་བཅས། །དེ་ཡིས་ཚིག་ནི་གསན་གྱུར་ནས། །འབྲུག་གི་སྒྲ་སྐད་དབྱངས་ཀྱིས་ནི། །གཞོན་ནུ་ཡིས་ནི་ལན་སྨྲས་སོ། །ངག་ཚིག་འདི་ནི་འཐད་པ་སྟེ། །ཁྱོད་ལ་མཛའ་བོ་ཉིད་དུ་གསལ། །
གང་དུ་བདག་ལ་ངན་པར་སེམས། །འདིར་ནི་ཁྱོད་ལ་རྗེས་ཞི་བགྱི། །ཡུལ་རྣམས་ལ་ནི་ཕྱི་ཤོལ་བྱེད། །འཇིག་རྟེན་དེའི་བདག་ཉིད་དུ་ཤེས། །འགྲོ་བ་མི་རྟག་པར་ཤེས་ནས། །འདིར་ནི་བདག་ཡིད་དགའ་བ་མིན། །རྒ་དང་ན་དང་འཆི་བ་སྟེ། །གལ་ཏེ་འདི་གསུམ་མ་ཡིན་ན། །ཡིད་དུ་འོང་བའི་ཡུལ་
རྣམས་ལ།  །ཁོ་བོ་ཡང་ནི་དགའ་བར་འགྱུར། །གལ་ཏེ་བུད་མེད་རྣམས་ཀྱི་ལུས། །དེ་ཉིད་རྟག་པར་འགྱུར་ན་ནི། །སྐྱོན་ལྡན་འདོད་པ་རྣམས་ལ་ཡང་། །ཁོ་བོའི་སེམས་ནི་འདོད་ལ་ཕྱོགས། །གང་ཚེ་འདི་དག་རྣམས་ཀྱི་གཟུགས། །རྒས་པས་འཐུང་བ་འབྱུང་འགྱུར་ཞིང་། །བདག་ཉིད་ཀྱི་ཡང་
འདོད་མེད་ན། །རྨོངས་ལས་དེར་ནི་དགའ་བར་འགྱུར། །རྒ་དང་ན་དང་འཆི་བའི་ཚེས། །རྒ་ན་འཆི་བའི་བདག་ཉིད་ཀྱིས། །སྐྱོ་བ་མེད་པར་རོལ་པ་ནི། །རི་དགས་དང་ནི་བྱ་དང་མཚུངས། །བདག་ཉིད་ཆེན་པོ་འདི་རྣམས་ཀྱང་། །འདོད་པའི་བདག་ཉིད་ཅེས་སྨྲས་གང་། །འདིར་ནི་སྐྱོ་བར་བྱ་བ་སྟེ། །གང་ཚེ་དེ་
རྣམས་ཀྱི་ཡང་ཚད། །གང་དུ་ཕྱི་ལས་ཟད་པ་སྟེ། །བདག་ཉིད་ཆེན་པོར་མི་སེམས་ཏེ། །ཡུལ་རྣམས་ལ་ནི་ཆགས་པ་འམ། །སྦྱོར་མིན་བདག་ཉིད་ལྡན་ཉིད་ཀྱིས། །མཁས་པ་ཡིས་ཀྱང་དཔེ་བརྗོད་ཅིང་། །བདེན་མིན་གྱིས་ཀྱང་བུད་མེད་ཀྱི། །སྐྱེ་ལ་ཞུགས་ཞེས་སྨྲས་པ་གང་། །བདེན་མིན་བདག་གིས་
ཤེས་མ་ཡིན། །གང་དུ་དྲང་མིན་རྗེས་འཇུག་པ། །དེ་ལ་བདག་གིས་སྲེད་པ་མེད། །དངོས་པོ་ཀུན་གྱི་ཚོགས་པ་དེ། །གལ་ཏེ་སྨོན་ན་མེད་པར་ཤོག །མི་བརྟན་པ་ཡི་དད་པ་དང་། །སྐྱོན་དུ་མཐོང་བའི་ནུས་པ་ཡིས། །ཆགས་པ་སྐྱེས་པར་གྱུར་པའི་སེམས། །སླུ་བར་བྱ་བ་ཅི་ཞིག་ཡིན། །བུད་

172-1-17a

མེད་སྐྱེས་པའི་ཆགས་སྐྱེས་ཤིང་། །བུད་མེད་སྐྱེས་པ་ཕན་ཚུན་དུ། །གལ་ཏེ་དེ་ལྟར་སླུ་ན་ནི། །ལྟ་བར་ནུས་པ་ཉིད་མ་ཡིན། །དེ་ལྟར་གྱུར་ན་སྡུག་བསྔལ་གྱིས། །ཉམ་ཐག་རྒ་འཆིའི་སྐལ་བ་ཅན། །བདག་ནི་འཕགས་མིན་འདོད་པ་ལ། །སླུ་བར་འོས་པ་མ་ཡིན་ནོ། །ཨེ་
མ་ཤིན་ཏུ་བརྟན་ལ་སྟོབས་ལྡན་ཁྱོད་ཀྱི་སེམས། །འདོད་པ་གཡོ་བ་རྣམས་སུ་སྙིང་པོ་མཐོང་གྱུར་ལ། །ཤིན་ཏུ་རྣོ་ཞིང་འཇིགས་པའི་ཡུལ་ལ་ཟོན་མཛད་ཅིང་། །རྒ་དང་རྒུད་པ་ནད་ཀྱི་འཇིགས་པ་རྣམ་སེམས་ཤིང་། །འགྲོ་བ་རྣམས་ནི་མེ་ཡིས་ཚིག་པ་བཞིན་ཐོས་ན། །ཞི་བ་འཐོབ་མིན་བརྟན་མིན་དགའ་
བ་ག་ལ་ཞིག །ཐེ་ཚོམ་མེད་པར་འཆི་ཞེས་རབ་ཏུ་ཤེས་པ་ཡི། །མི་རྣམས་གང་གི་སྙིང་ལ་ཆགས་པ་རབ་སྐྱེད་པ། །དེ་ཡི་སེམས་ནི་ལྕགས་ལས་གྱུར་པར་ཤེས་པ་སྟེ། །འཇིགས་པ་ཆེ་ལ་ཆགས་པ་གང་ཞིག་དུ་བ་མེད། །དེ་ནས་གཞོན་ནུ་ཡིས་ནི་འདོད་པ་རྣམས་ཀྱིས་བསྟེན། །འཇོམས་བྱེད་
གཏམ་ནི་རྣམ་པར་ངེས་པའི་བདག་ཉིད་མཛད། །སྐྱེ་བོ་རྣམས་ཀྱི་མིག་གི་འགྲོ་བྱ་གསལ་བྱེད་ཀྱི། །དཀྱིལ་འཁོར་ས་འཛིན་རི་བོ་ལ་ནི་ནུབ་པར་གྱུར། །དེ་ནས་རྒྱན་དང་མེ་ཏོག་ཕྲེང་བ་འབྲས་མེད་འཛིན། །སྒྱུ་རྩལ་ཡོན་ཏན་གྱིས་དང་རབ་དགས་འབྲས་མེད་རྣམས། །རང་གི་སེམས་ལ་ཡིད་དཀྲུགས་
འདོད་པ་རྣམས་སྨད་ནས། །ཡིད་ལ་རེ་ཉམས་བུད་མེད་རྣམས་ནི་གྲོང་དུ་ཐལ། །དེ་ནས་གྲོང་ཁྱེར་སྐྱེད་མོས་ཚལ་སོང་སྐྱེ་བོའི་དཔལ། །ལེགས་པར་བརྟགས་ནས་སྤྱོད་ལ་སོ་སོར་བརྟུལ་ཏེ་ཡང་། །ཐམས་ཅད་མི་རྟག་པར་གྱུར་རྣམ་པར་སེམས་བཞིན་དུ། །སླར་ཡང་མི་སྐྱོང་བདག་སྐྱེས་གྲོང་དུ་རྣམ་པར་
ཞུགས། །དེ་ནས་དེ་ཡི་ཡིད་ནི་ཡུལ་ལ་རྣམ་པར་ཕྱིར་ཕྱོགས་རྒྱལ་པོས་ཐོས་གྱུར་ནས། །སྙིང་ལ་སོང་བའི་ཟུག་ལ་གླང་ཆེན་བཞིན་དུ་མཚན་མོ་དེ་ལ་གཉིད་མ་ལོག །དེ་ནས་སྔགས་མང་རྣམ་པ་སྣ་ཚོགས་ལམ་རྣམས་དག་གིས་ཐང་ཆད་བློན་པོར་བཅས། །དེས་ནི་འདོད་པ་ལས་གཞན་སྲས་ཀྱི་བློ་ཡི་
ངེས་པ་གཟིགས་མ་གྱུར། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། བུད་མེད་ཀྱིས་གེགས་བྱས་པའི་ལེའུ་སྟེ་བཞི་པའོ།།      །།དེ་ལྟར་ཡུལ་རྣམས་དམ་པའི་མཆོད་པ་རྣམས་ཀྱིས་ནི། །སྲེད་དུ་བཅུག་ཀྱང་ཤཱཀྱའི་རྒྱལ་པོའི་སྲས་པོ་དེ། །དུག་

172-1-17b

བསྒོས་མདའ་ཡིས་སྙིང་ལ་ཕུག་པའི་སེང་གེ་བཞིན། །བདེ་བ་རྙེད་པ་མ་ཡིན་བརྟན་པར་གཤེགས་མ་གྱུར། །དེ་ནས་རེས་འགའ་ཞིག་ན་བློན་པོའི་བུ་མཁས་ཤིང་། །གྲོགས་གྱུར་སྣ་ཚོགས་གཏམ་གྱིས་རྗེས་སུ་འབྲངས་བྱས་པ། །ནགས་ཀྱི་ས་ལ་འགྲོ་འདོད་ལྟ་བར་འདོད་པ་ཡིས། །མི་ཡི་
ལྷ་ཡིས་རྗེས་གནང་ཕྱི་རོལ་རབ་ཏུ་གཤེགས། །གསར་བའི་གསེར་གྱི་སྲབ་དང་དྲིལ་བུ་ཆུང་ངུ་དང་། །རབ་ཏུ་གཡོ་བའི་རྔ་ཡབ་མཛེས་པའི་གསེར་སྒ་དང་། །སྟན་བཅས་དམ་པའི་རྟ་ལ་མངོན་པར་ཞོན་ནས་ནི། །ཏོག་ལ་ལྗོན་དང་ཆུ་སྐྱེས་ཏོག་ཅན་བཞིན་དུ་གཤེགས། །དེ་ནི་མཆོག་ཏུ་རྣམ་པར་
རྒྱང་རིང་ནགས་མཐའི་ས། །ནགས་ཚལ་འདོད་དང་ས་ཡི་ཡོན་ཏན་ལས་གཤེགས་ཏེ། །ཆུ་གཉེར་བཞིན་དུ་རྣམ་པར་བཀྲམ་པའི་གཤོལ་ལམ་ཅན། །ནོར་འཛིན་ས་ལ་ཞིང་དག་རྨོ་བ་གཟིགས་པར་གྱུར། །གཤོལ་གྱི་ཕྱ་ལས་རྣམ་བཀྲམ་རྩྭ་མྱུག་ཀུ་ཤ་དང་། །ཤི་གྱུར་འབུ་སྲིན་སྲོག་ཆགས་
ཕྲ་མོས་ཁྱབ་པ་སྟེ། །རྣམ་པ་དེ་འདྲའི་ས་དེ་ཡང་དག་མངོན་གཟིགས་ནས། །རང་གི་སྐྱེ་བོ་བསད་པ་ལ་བཞིན་མྱ་ངན་གྱུར། །ཞིང་དག་རྨོ་བའི་སྐྱེས་བུ་རྣམས་ནི་རྣམ་གཟིགས་པ། །རླུང་གིས་གཏོར་བའི་རྡུལ་གྱིས་རྣམ་འགྱུར་ཁ་དོག་ཅན། །ཁུར་བས་ཐང་ཆད་རྣམ་པར་འཁྲུགས་པའི་གླང་རྣམས་
ལ། །འཕགས་པ་མཆོག་གིས་མཆོག་ཏུ་བརྩེ་བའི་སྙིང་རྗེ་མཛད། །དེ་ནས་མགྱོགས་འགྲོའི་རྒྱབ་ནས་དལ་བུས་བབས་ནས་ནི། །ས་ལ་རྣམ་པར་རྒྱུ་ཞིང་མྱ་ངན་དང་ལྡན་པ། །སྐྱེ་བོ་དག་གི་སྐྱེ་དང་འགོད་པ་རྣམ་སེམས་ཞིང་། །ངེས་པར་བཀྲེན་པ་འདི་ཞེས་སྨྲས་ཤིང་ཉམ་ཐག་གྱུར། །བསམ་པ་ཡིས་
ཀྱང་རྣམ་པར་དབེན་པ་མངོན་བཞེད་ཅིང་། །རྗེས་སུ་འོངས་པའི་མཛའ་བཤེས་དེ་རྣམས་ཕྱིར་བཟློག་ནས། །ཀུན་ནས་མངོན་པར་གཡོ་ཞིང་མཛེས་པའི་ལོ་འདབ་ཅན། །འཛམ་བུའི་རྩ་བ་སྐྱེ་བོ་མེད་པར་དེ་གཤེགས་སོ། །རིན་ཆེན་བཻ་ཌཱུརྱ་དང་མཚུངས་པའི་རྩྭ་འཇམ་ཅན། །གཙང་མར་ལྡན་པའི་ས་གཞི་དེར་ནི་
དེ་ཞུགས་ཏེ། །འགྲོ་བའི་སྐྱེ་བ་དང་ནི་འགོད་པ་རྣམས་སེམས་ཤིང་། །ཡིད་ནི་བརྟན་པའི་ལམ་ལ་དམིགས་པའོ། །ཡུལ་ལ་འདོད་སོགས་སེམས་ཀྱི་ནད་ལས་རྣམ་གྲོལ་བའི། །སེམས་གནས་པ་ནི་དེ་མ་ཐག་ཏུ་ཐོབ་གྱུར་ལ། །བསམ་གཏན་དང་པོ་ཟག་པ་མེད་པའི་རབ་སྤྱོད་པ། །རྟོག་པ་དཔྱོད་པ་དང་

172-1-18a

བཅས་ཞི་བ་ཐོབ་པར་གྱུར། །རྣམ་པར་དབེན་པ་ལས་སྐྱེས་ཐོབ་ནས་དེ་ནས་ནི། །མཆོག་ཏུ་དགའ་བའི་བདེ་བ་སེམས་ཀྱི་ཏིང་ངེ་འཛིན། །ཡིད་ཀྱིས་འཇིག་རྟེན་འགྲོ་བ་ཡང་དག་རབ་བརྟགས་ནས། །འདི་ཉིད་དེ་ནས་གཞན་ནི་རབ་ཏུ་རྟོགས་པར་གྱུར། །ཀྱེ་མ་སྐྱེ་བོ་བཀྲེན་པ་
གང་ཞིག་རང་དབང་ནི། །ཡོད་མིན་རྒ་དང་ན་དང་རྣམ་པར་ཉམས་པའི་ཆོས། །ནད་པ་དང་ནི་ཤི་དང་རྒ་བས་ཉམ་ཐག་གམ། །གཞན་ལ་རྒྱགས་པས་ལོང་ཞིང་ཤེས་པ་མེད་པས་སྨོད། །འདིར་ནི་གལ་ཏེ་བདག་གིས་རང་དང་མཚུངས་གྱུར་པ། །གཞན་གྱི་རང་བཞིན་དག་ལ་དེ་ལྟར་སྨོད་པ་ནི། །མཆོག་གི་ཆོས་
འདི་རྣམ་པར་རྟོག་པ་ཁོ་བོ་ཡི། །མཚུངས་པར་གྱུར་པ་མ་ཡིན་ནུས་པའང་གཞན་མེད་དོ། །འགྲོ་བའི་རྒ་དང་ན་དང་རྒུད་པའི་ཉེས་པ་རྣམས། །དེ་ལྟར་ཇི་ལྟ་བ་བཞིན་རྣམ་པར་གཟིགས་དེ་ཡི། །སྟོབས་དང་ལང་ཚོ་དང་ནི་སྲོག་ལ་རབ་ཞུགས་པའི། །བདག་ཏུ་གྱུར་པའི་རྒྱགས་པ་སྐད་ཅིག་གིས་མེད་གྱུར། །
དེ་ནི་དགའ་བ་མེད་ཅིང་རྗེས་སུ་གདུང་མེད་ལ། །ཐེ་ཚོམ་སོམ་ཉིར་མ་གྱུར་གཉིད་དང་རྨུགས་པ་མེད། །འདོད་པའི་ཡོན་ཏན་རྣམས་ལ་ཡང་དག་མ་ཆགས་ཤིང་། །གཞན་ལ་རྣམ་པར་སྡང་བར་མ་གྱུར་ཕྱི་ཤོལ་མེད། །དེ་ལྟར་བདག་ཉིད་ཆེན་པོ་དེ་ཡི་རྡུལ་མེད་ཅིང་། །རྣམ་པར་དག་པའི་བློ་གྲོས་འདི་ནི་འཕེལ་
གྱུར་ལ། །སྐྱེས་བུ་གཞན་དག་རྣམས་ཀྱིས་མཐོང་བར་མ་གྱུར་པའི། །དགེ་སློང་ཆ་ལུགས་ལྡན་པའི་སྐྱེས་བུ་ཉེ་བར་འོངས། །སུ་ཞིག་ཡིན་པ་སྨྲོས་ཞེས་མི་ཡི་ལྷ་སྲས་ཀྱིས། །དེ་ལ་མངོན་པར་དྲིས་གྱུར་དེ་ལ་དེས་སྨྲས་པ། །མི་ཡི་སྐྱེས་མཆོག་སྐྱེ་དང་འཆི་བས་འཇིགས་པ་ཡི། །ཐར་པའི་ཕྱིར་ནི་རབ་ཏུ་
ཞུགས་པའི་དགེ་སྦྱོང་ཡིན། །བདག་ནི་འགྲོ་བ་ཟད་པའི་ཆོས་ནི་ཐར་འདོད་ཅིང་། །དགེ་ཞིང་འགྱུར་བ་མེད་པའི་གནས་དེ་ཚོལ་བ་སྟེ། །རང་གི་སྐྱེ་བོ་དང་ནི་སྐྱེ་བོར་མཉམ་པའི་བློ། །ཡུལ་རྣམས་ལ་ནི་ཆགས་པའི་ཉེས་པ་ཕྱིར་ལོག་པའོ། །སྐྱེ་བོ་མེད་པའི་གནས་ཁང་དང་ནི་རི་འམ་ནགས། །ཤིང་གི་རྩ་
བ་འགའ་ཞིག་ཏུ་ནི་གནས་པ་ཡི། །དོན་དམ་ཕྱིར་ནི་ཇི་ལྟར་ཉེར་ལྡན་སློང་མོ་པ། །སྲེད་བྲལ་ཡོངས་སུ་འཛིན་པ་མེད་པར་རྣམ་པར་རྒྱུ། །དེ་ལྟར་གཟིགས་པའི་རྒྱལ་པོའི་སྲས་པོ་དེ་ཉིད་ལ། །འདི་སྐད་སྨྲས་ནས་ནམ་མཁའ་ལ་ནི་གཤེགས་པར་གྱུར། །དེ་ནི་དེ་ཡི་ལུས་ཀྱིས་སངས་རྒྱས་གཞན་གཟིགས་

172-1-18b

ཤིང་། །ལྷ་ན་གནས་པ་དེ་ཡི་དྲན་པའི་ཆེད་དུ་འོངས། །མཁའ་ལ་མཁའ་འགྲོ་བཞིན་དུ་གཤེགས་པ་དེ་ལ་ནི། །མི་མཆོག་ཡང་དག་དགའ་བར་གྱུར་ཞིང་ཡ་མཚན་གྱུར། །དེ་ནས་ཆོས་ཀྱི་འདུ་ཤེས་ཉེ་བར་ཐོབ་གྱུར་ནས། །མངོན་པར་ངེས་འབྱུང་ཆོ་ག་ལ་ནི་བློ་གྲོས་མཛད། །དེ་ནས་དབང་པོ་
དང་མཉམ་དབང་པོའི་རྟ་ཐུལ་པ། །གྲོང་ལ་རབ་ཏུ་འཇུག་འདོད་རྟ་ལ་རབ་འཛེགས་ཤིང་། །འཁོར་གྱི་སྐྱེ་བོ་དག་ཀྱང་མངོན་པར་འདོད་པ་སྟེ། །དེ་ཉིད་ཕྱིར་ན་མངོན་འདོད་ནགས་ནི་མ་བསྙེན་ཏོ། །དེ་ནི་རྒ་དང་འཆི་བ་ཟད་པར་བྱེད་འདོད་པ། །ནགས་སུ་གནས་ཕྱིར་བློ་གྲོས་དྲན་པ་ལ་བཟུང་ནས། །
གཉིས་འཐུང་དབང་པོ་ནགས་ཀྱི་ས་ནས་གྲོང་དུ་ལྟར། །འདོད་པ་ལས་མིན་གྲོང་ལ་སླར་ཡང་རབ་ཏུ་ཞུགས། །དེ་ནི་ཡང་དག་མཐོང་ནས་ཤཱཀྱའི་བུ་མོ་ཞིག །རབ་ཞུགས་ལམ་ལ་ཐལ་མོ་སྦྱར་བ་དང་བཅས་ཤིང་། །ཀྱེ་མ་སྤྱན་དབང་གང་གི་བདག་པོ་འདི་འདྲ་འདིར། །མོ་དེ་བདེ་མ་མྱ་ངན་འདས་མ་ཞེས་
སྨྲས་སོ། །དེ་ནས་དབྱངས་འདི་སྤྲིན་ཆེན་དབྱངས་དང་ལྡན་པ་ཡིས། །ཡོངས་སུ་ཐོས་ནས་མཆོག་ཏུ་ཞི་བ་རྙེད་གྱུར་ལ། །མྱ་ངན་འདས་ཞེས་སྒྲ་སྐད་ཐོས་པ་དང་ལྡན་དེས། །ཡོངས་སུ་མྱ་ངན་འདའ་བའི་ཆོས་གར་བློ་གྲོས་མཛད། །དེ་ནས་གསེར་གྱི་རི་བོའི་རྩེ་མོའི་སྐུ་མངའ་ཞིང་། །གླང་ཆེན་ཕྱག་དང་
འབྲུག་གི་སྒྲ་དབྱངས་ཁྱུ་མཆོག་སྤྱན། །སེང་གེའི་སྟོབས་དང་རི་བོང་ཅན་གྱི་ཞལ་མངའ་བས། །མི་ཟད་ཆོས་ལ་ཆགས་སྐྱེས་ཕོ་བྲང་རབ་ཏུ་འཐོབ། །དེ་ནས་མཐོ་རིས་དག་ན་ལྷ་ཡི་འདུན་ས་རུ། །ལྷ་དབང་འབར་བ་ལ་ནི་བཀུག་འགྱེད་གཞོན་ནུ་བཞིན། །བློན་པོའི་ཚོགས་ཀྱིས་ཉེ་བར་བསྙེན་པའི་མི་
བདག་ལ། །རི་དྭགས་དབང་པོའི་འགྲོས་དང་ལྡན་པ་མངོན་པར་གཤེགས། །རབ་ཏུ་བཏུད་ནས་ཐལ་མོ་དང་བཅས་སྨྲས་གྱུར་པ། །མི་དབང་བདག་ལ་ལེགས་པར་རྗེས་སུ་གནང་བ་བྱིན། །ངེས་པར་སྐྱེ་བོ་འདི་ནི་རྣམ་པར་འབྲལ་བ་སྟེ། །ཐར་པའི་ཆེད་དུ་ཡོངས་སུ་རྣམ་པར་གཤེགས་པར་བགྱི། །དེ་ལྟར་
དེའི་ཚིག་ངེས་པར་ཐོབ་ནས་རྒྱལ་པོ་ནི། །ལག་ལྡན་གྱིས་ནི་མངོན་སྣུན་ལྗོན་པ་ལྟར་གཡོས་ཤིང་། །ཀ་མ་ལ་དང་རབ་མཚུངས་ཐལ་མོ་དག་བཟུང་ནས། །མཆི་མ་དང་ནི་གྲེ་བ་ཁ་ཞིང་ཚིག་འདི་སྨྲས། །བརྩེ་བའི་བློ་གྲོས་འདི་ནི་རབ་ཏུ་ཐོང་མཛོད་ཅིག །ཁྱེད་ཀྱི་ཆོས་ལ་བསྙེན་པའི་དུས་ནི་མ་ཡིན་ཏེ། །ན་ཚོད་དང་

172-1-19a

པོ་དང་ནི་བློ་གྲོས་གཡོ་བ་ན། །ཆོས་ཀྱི་སྤྱོད་པ་གསུངས་པ་རྣམས་ནི་སྐྱོན་མང་ངོ་། །ཡུལ་རྣམས་སུ་ནི་དབང་པོ་ཡ་མཚན་གློ་བུར་ཞིང་། །བརྟུལ་ཞུགས་གཡོ་བ་རྣམས་སུ་ངེས་པར་ནུས་མེད་ལ། །ཁྱད་པར་དུ་ནི་དབེན་པར་མངོན་པར་མི་ཤེས་པ། །དར་ལ་བབ་པའི་ཡིད་
ནི་དགོན་པ་ནས་གཡོའོ། །མཚོན་གྱུར་ཁྱོད་ལ་ཕུན་སུམ་ཚོགས་པ་གཏད་ནས་ནི། །ཁོ་བོ་ཡི་ཡང་ཆོས་དགའ་ཆོས་ཀྱི་དུས་ཡིན་ཏེ། །རྣམ་པར་གནོན་པ་བསྟན་པ་རྣམ་པར་གནོན་པ་ཡིས། །བླ་མ་སྤངས་ནས་ཁྱོད་ཀྱི་ཆོས་ཀྱིས་ཆོས་མ་ཡིན། །དེ་ཕྱིར་ཁྱོད་ཀྱིས་ནན་ཏན་ངེས་པ་འདི་དོར་ལ། །
ཁྱོད་ནི་རེ་ཞིག་ཁྱིམ་གནས་ཆོས་ལ་དགའ་བར་གྱིས། །དར་ལ་བབ་པས་བདེ་བ་རྣམས་ནི་ལོངས་སྤྱད་ནས། །སྐྱེས་བུའི་དཀའ་ཐུབ་ནགས་སུ་འཇུག་པ་ཉམས་དགའོ། །དེ་ལྟར་རྒྱལ་པོའི་ཚིག་འདི་རྣམ་པར་གསན་ནས་ནི། །ཀ་ལ་པིང་ཀའི་དབྱངས་ཀྱིས་ལན་ནི་སྨྲས་པ་སྟེ། །རྒྱལ་པོ་གལ་ཏེ་བདག་
གི་ཁས་ལེན་བཞི་རྣམས་སུ། །ཁྱེད་ཀྱིས་འགྱུར་ན་དཀའ་ཐུབ་ནགས་ནི་མི་བསྙེན་ཏོ། །བདག་གི་སྲོག་ནི་འཆི་བ་ཉིད་དུ་མི་འགྱུར་ཞིང་། །བདག་གི་རང་གནས་གྱུར་འདི་ནད་ཀྱིས་མི་འཕྲོགས་ལ། །བདག་གི་ལང་ཚོ་རྒས་པ་ཡིས་ནི་མི་གཡེང་ཞིང་། །ཕུན་སུམ་ཚོགས་པ་འདི་ནི་རྒུད་པས་
མ་གཏོར་ནའོ། །དེ་ལྟར་རྙེད་པར་དཀའ་བའི་དོན་སྨྲས་གྱུར་པ་ཡི། །སྲས་པོ་ལ་ནི་ཤཱཀྱའི་རྒྱལ་པོས་ཚིག་སྨྲས་པ། །ཤིན་ཏུ་རབ་ཏུ་ཞུགས་པའི་བློ་འདི་ཐོང་མཛོད་ཅིག །ཤིན་ཏུ་ཡིད་ལ་རེ་བ་འཕྱ་ཞིང་ཤ་ཐང་འཆད། །དེ་ནས་ལྷུན་པོ་ལྟར་ལྕིས་བླ་མ་ལ་སྨྲས་པ། །གལ་ཏེ་རིམ་པ་དེ་དག་མེད་
དེ་ཤོལ་མི་ཐེབས། །འབར་བའི་མེ་ཡིས་ཚིག་པའི་ཁང་པ་ནས། །ཕྱི་རོལ་འབྱུང་བར་འདོད་པ་འཛིན་པར་ནུས་མ་ཡིན། །གང་གི་ཚེ་ན་འགྲོ་བ་ངེས་པར་འབྲལ་བ་སྟེ། །ཆོས་ཕྱིར་མ་ཡིན་འདི་ནི་རྣམ་པར་འབྲལ་བ་མཆོག །འོ་ན་བདག་ལ་འཆི་བས་དབང་མེད་འབྲལ་བྱེད་ཅིང་། །རང་གི་དོན་
མ་བྱས་ཤིང་ཚིམ་པ་མ་ཡིན་ཉིད། །དེ་ལྟར་མཐར་བཞེད་སྲས་པོ་དེ་ཡིས་ངེས་པ་ནི། །ས་ཡི་བདག་པོ་ཡིས་ནི་ངེས་པར་ཐོས་ནས་ནི། །འགྲོ་བར་མི་བྱ་ཞེས་ནི་མངོན་པར་བརྗོད་ནས་སུ། །སླར་ཡང་བསྲུང་བ་དག་ནི་འདོད་པ་མཆོག་རྣམས་མཛད། །དགའ་ཞི་ཞི་བ་སྔོན་འགྲོ་བཀུར་སྟི་མང་པོ་ལས། །

172-1-19b

བློན་པོ་རྣམས་ཀྱིས་ཇི་ལྟ་བ་བཞིན་དཔེ་བསྟན་ཞིང་། །བླ་མས་མཆི་མ་ལྷུང་བ་རྣམས་ཀྱིས་ཤོལ་བཏབ་སྟེ། །དེ་ནས་དེ་ནི་མྱ་ངན་བཞིན་དུ་ཁྱིམ་ལ་ཞུགས། །རྣ་ལུང་འཁྱིལ་བ་གཡོ་བས་འོ་བྱས་གདོང་ལྡན་མ། །དབུགས་རླུང་སྟུག་པོས་རྣམ་པར་བསྐྱོད་པའི་ནུ་མ་ཅན། །བསྟན་པ་མིན་པའི་མིག་ལྡན་
བུད་མེད་རྣམས་ཀྱིས་ནི། །རི་དགས་མོ་རྣམས་ཀྱིས་བཞིན་མངོན་པར་གྱེན་དུ་ལྟ། །གསེར་གྱི་རི་བོ་དང་འདྲ་དཀར་སེར་མདོག་དེ་ནི། །ཡན་ལག་མཆོག་མ་རྣམས་ཀྱི་སྙིང་ནི་མྱོས་མཛད་ཅིང་། །ངག་དང་རེག་བྱ་དང་ནི་ལུས་དང་ཡོན་ཏན་གྱིས། །ཐོས་བྱེད་ལུས་དང་ལྟ་བྱེད་བདག་གི་དངོས་རྣམས་
ཕྲོགས། །ཉིན་མོ་རྣམ་པར་ཐལ་ཚེ་དེ་ནས་ཁང་བཟངས་ལ། །ལུས་ཀྱིས་ཉི་མ་བཞིན་དུ་མངོན་པར་གསལ་བ་ནི། །རབ་རིབ་རྣམ་པར་འཇོམས་འདོད་བདག་ཉིད་སྣང་བ་ཡིས། །ཉི་མ་ཤར་བ་ལྷུན་པོ་ལ་བཞིན་ཀུན་ནས་འཛེགས། །གསེར་གྱིས་འབར་ཞིང་གསལ་བའི་སྒྲོན་མའི་ཤིང་དང་ནི། །ཨ་ག་རུ་
མཆོག་ནག་པོའི་བདུག་པས་གང་བའི་ལྟོར། །མངོན་པར་འཛེགས་ནས་རྡོ་རྗེས་སྤྲས་ཤིང་སྣ་ཚོགས་པ། །རབ་མཆོག་གསེར་གྱི་བཞུགས་གདན་ལ་ནི་བསྙེན་པའོ། །ཟླ་བ་ལྟར་དཀར་གངས་དང་ལྡན་པའི་རྩེ་མོ་ན། །ནོར་དབང་བདག་ཉིད་སྐྱེས་ལ་ལྷ་མོའི་ཚོགས་འདུས་བཞིན། །དེ་ནས་ལུས་མཆོག་མ་
རྣམས་དབང་པོ་དང་མཚུངས་མཆོག །དེ་ལ་མཚན་མོར་སིལ་སྙན་རྣམས་ཀྱིས་ཉེ་བར་གནས། །མཆོག་རབ་ལྷ་ཡི་སིལ་སྙན་འདྲ་བ་རྣམས་ཀྱིས་ཀྱང་། །དེ་ཡང་དེ་ཡིས་བསྐྱེད་པར་མ་གྱུར་དགའ་བ་མེད། །དམ་པའི་དོན་གྱི་བདེ་ཕྱིར་ལེགས་པ་དེ་ཡི་ནི། །མངོན་པར་ངེས་པར་འབྱུང་འདོད་གང་ལ་དགའ་
མ་གྱུར། །དེ་ནས་དེར་ནི་བརྟུལ་ཞུགས་མཆོག་གྱུར་འོག་མིན་གྱི། །ལྷ་རྣམས་ཀྱིས་ནི་འདི་ཡི་ངེས་པ་རྟོགས་ནས་ནི། །ལུས་ཀྱི་རྣམ་འགྱུར་རྣམ་པར་འགྱུར་བྱས་དུས་གཅིག་ལ། །མྱོས་མའི་སྐྱེ་བོ་རྣམས་ནི་གཉིད་དུ་འགྲོ་བར་བྱས། །དེ་ལ་ཁ་ཅིག་དགའ་བ་ཡིན་ཡང་ཁྲོས་པ་བཞིན། །པང་དུ་སོན་པའི་
གསེར་གྱི་སྣོད་ནི་སྣ་ཚོགས་པའི། །པི་ཝང་རྣམ་པར་སྤངས་ནས་ལག་པ་གཡོ་བ་ལ། །འགྲམ་པ་རྣམ་པར་བཀོད་ནས་ཉལ་བར་གྱུར་པའོ། །འཁྱོག་མིན་བུང་བའི་ཕྲེང་བ་སྒྲ་སྒྲོགས་པདྨ་དང་། །ཆུ་བོའི་ངོགས་ན་ཆུ་སྦུར་རབ་ཏུ་རྒོད་པ་བཞིན། །གཞན་རྣམས་ནུ་མར་རྣམ་ཉིལ་དཀར་པོའི་དར་གོན་ཞིང་། །

172-1-20a

གླིང་བུ་ལག་པར་སྦྱར་ཞིང་གཉིད་ལོག་རྣམ་པར་མཛེས། །དེ་བཞིན་གཞན་རྣམས་པདྨ་གསར་པའི་སྙིང་པོ་ལྟར། །འཇམ་ཞིང་གདུང་བྱ་གསེར་གྱིས་འབར་བའི་དཔུང་རྒྱན་ནི། །འདུས་པའི་ལག་པ་དག་གིས་དགའ་བ་བཞིན་དུ་ནི། །རྫ་རྔ་ཉིད་ནི་ཡོངས་སུ་འཁྱུད་
ནས་གཉིད་ལོག་གྱུར། །དེ་བཞིན་གཞན་ནི་གསར་བའི་གསེར་གྱིས་རྣམ་བརྒྱན་ཞིང་། །བགོ་བའི་གོས་ནི་སེར་པོ་མཆོག་དག་གོན་པ་སྟེ། །ཀར་ནི་ཀ་རའི་ཡལ་ག་གླང་པོས་བསྒྱེལ་བ་བཞིན། །དབང་མེད་པར་ནི་སྡུག་མ་གཉིད་ཀྱིས་འགྱེལ་བར་གྱུར། །དེ་བཞིན་གཞན་ནི་སྐར་ཁུང་
ལོགས་ལ་སྔས་ནས་ནི། །ཉལ་བར་གྱུར་པའི་ལུས་ཀྱི་མཆོད་སྡོང་རྣམས་འཁྱོག་པ། །རྟ་བབས་ལ་ནི་ཤ་ལ་བྷཉྫ་ཀ་བཞིན་དུ། །མཛེས་པའི་དོ་ཤལ་རྣམ་པར་འཕྱང་བ་རྣམ་པར་མཛེས། །དེ་བཞིན་གཞན་གྱི་ཞལ་གྱི་པདྨ་རྣམ་རྒྱས་ཤིང་། །འགྲམ་པའི་ལོགས་ལ་ནོར་བུའི་རྣ་ལུང་གིས་
དམུགས་པ། །འདབ་མ་བརྒྱ་པའི་སྡོང་བུའི་ཕྱེད་ནི་འཁྱོག་པ་ལ། །གནས་པའི་ཀར་ཎི་ཌ་བས་བསྐྱོད་བཞིན་གཡོས་པར་གྱུར། །གཞན་ནི་ཇི་ལྟར་རྣམ་པར་ཞུགས་བཞིན་གཉིད་ལོག་ཅིང་། །ནུ་མའི་ཁུར་གྱིས་མངོན་པར་དུད་པའི་ལུས་པོ་རྣམས། །ལག་པའི་ཞགས་པ་གསེར་གྱི་གདུ་བུ་ཅན་རྣམས་ཀྱིས། །
ཕན་ཚུན་ཉེ་བར་འཁྱུད་ནས་རྣམ་པར་གནས་ཏེ་མཛེས་པའོ། །རྣམ་པར་གཡོ་ཞིང་བསྐྱོད་པའི་གསེར་གྱི་སྐུད་པ་ཅན། །རྣ་བའི་ཤོག་དྲིལ་ཀུན་ནས་འཁྲུགས་པའི་གདོང་གིས་ནི། །ཡོངས་སུ་སྨྲ་ལྡན་པི་ཝང་ཆེན་པོ་འཁྱུད་ནས་ནི། །བུད་མེད་ཁ་ཅིག་གྲོགས་མོ་བཞིན་དུ་གཉིད་ལོག་གོ། །ལང་ཚོ་མ་
གཞན་ལག་པའི་དཔུང་པའི་ཡུལ་ལས་ནི། །ཀུན་ནས་རྣམ་འཕྱང་མཛེས་པའི་ལོགས་ཅན་པ་ཎ་ཝ། །སྒྱེག་བཅས་དགའ་བའི་མཐར་ནི་ཐང་ཆད་སྡུག་པ་བཞིན། །བརླ་གཉིས་དག་ནི་དབུས་སུ་བླངས་ནས་ཉལ་བའོ། །རབ་ཏུ་ཡང་དག་འཁུམས་གྱུར་པདྨ་དམར་པོའི་མཛོད། །ཉི་མ་ནུབ་པར་
གྱུར་ཚེ་རྫིང་བུ་རྣམས་ཇི་ལྟར། །རྣམ་རྒྱས་མིག་དང་མཛེས་པའི་སྨིན་མ་ཡོད་ན་ཡང་། །གཞན་རྣམས་མིག་རྣམས་བཙུམས་ཤིང་མཛེས་པར་མ་གྱུར་ཏོ། །དེ་བཞིན་གཞན་ནི་མགོ་སྐྱེས་ལྷོད་པ་ལས་འཁྲུགས་ཤིང་། །རྒྱན་དང་དར་རྣམས་དཔྱི་ལ་རྣམ་ཉིལ་དེ་རྣམས་ནི། །ཡན་ལག་མ་ཡི་གཟུགས་

172-1-20b

བརྙན་གླང་པོས་བཅོམ་པ་བཞིན། །མགྲིན་པའི་སྐུད་པའི་དོ་ཤལ་རྣམ་པར་བཀྲམ་ཞིང་ཉལ། །བརྟན་ལྡན་ལུས་ནི་ཡོན་ཏན་རྣམས་དང་ལྡན་ན་ཡང་། །གཞན་རྣམས་ཀྱང་ནི་དབང་མེད་ངོ་ཚས་རྣམ་སྤངས་ཤིང་། །རྣམ་པར་འགྱུར་ཞིང་བསྐྱོད་པའི་ཡན་ལག་གྱ་གྱུ་དང་། །དབུགས་ནི་རྣམ་པར་རྒྱུ་
ཞིང་ལུས་པོ་གསལ་བར་གཉིད། །གཞན་གྱི་རྒྱན་དང་མེ་ཏོག་ཕྲེང་བ་རྣམ་བྲུལ་ཞིང་། །མདུད་པའི་གོས་རྣམས་རྣམ་པར་ཉིལ་གྱུར་འདུ་ཤེས་མེད། །བཙུམས་པ་མ་ཡིན་དཀར་པོ་གཡོ་བ་དང་བྲལ་མིག །སྲོག་སོང་རོ་ལྟར་ཉལ་བ་རྣམ་པར་མཛེས་མ་གྱུར། །ཁ་སྦྱར་རྣམ་པར་གདངས་ཏེ་
ལུས་པོ་རབ་བརྐྱང་ཞིང་། །ཁ་ཡི་ཆུ་ནི་རབ་འཛགས་གསང་བ་རྣམ་རབ་གསལ། །གཞན་མ་དག་ནི་ཆང་གིས་འཁྲུལ་པར་གྱུར་པ་ཉིད། །ལུས་རྒྱས་རྣམ་པར་འགྱུར་བར་གཉིད་ལོག་མཛེས་མ་གྱུར། །དེ་ལྟར་སེམས་པ་དང་ནི་རིགས་ཀྱི་རྗེས་འགྲོའི་གཟུགས། །རྣམ་པ་སྣ་ཚོགས་རབ་མྱོས་སྐྱེ་བོ་དེ་
ཉལ་བ། །རླུང་གིས་ཀུན་ནས་བསྐྱོད་གྱུར་གསེར་གྱི་པདྨ་ཡི། །རྫིང་བུ་དང་ནི་མཚུངས་པའི་གཟུགས་ནི་མཛེས་པར་གྱུར། །དེ་ལྟར་རྣམ་པར་འགྱུར་ལ་བརྟན་མིན་སྤྱོད་པ་ཅན། །དེ་ལྟར་ཉལ་བའི་ལང་ཚོ་ལྡན་མ་དེ་མཐོང་ནས། །ལུས་ཀྱི་ཡོན་ཏན་ལྡན་ཞིང་སྨྲ་བའི་ཡིད་འོང་ཡང་། །མི་སྐྱོང་སྲས་པོ་དེས་ནི་རྣམ་
པར་སྨད་པར་གྱུར། །མི་གཙང་རྣམ་པར་འགྱུར་བ་གསོན་པའི་འཇིག་རྟེན་ཏེ། །བུད་མེད་རྣམས་ཀྱི་རང་གི་ངོ་བོ་འདི་འདྲ་བ། །བགོ་བ་རྣམས་དང་རྒྱན་རྣམས་ཀྱིས་ཀྱང་སླུ་བ་སྟེ། །བུད་མེད་རྣམས་ཀྱི་ཡུལ་ལ་སྐྱེས་པ་ཆགས་པར་འགྲོ། །གལ་ཏེ་སྐྱེས་པས་བུད་མེད་རྣམས་ཀྱི་རང་བཞིན་ནི། །རྨི་ལམ་རྣམ་
པར་འགྱུར་བ་བཞིན་དུ་རྣམ་དཔྱད་ན། །ངེས་པར་འདིར་ནི་བག་མེད་འཕེལ་བ་མ་ཡིན་ལ། །འོན་ཀྱང་ཡོན་ཏན་རྟོག་པ་བཅོམ་སྟེ་ཆགས་པར་འགྲོ། །དེ་ལྟར་དེ་ཡི་གོ་སྐབས་རྣམ་པར་རིག་ནས་ནི། །མཚན་མོར་ཕྱི་རུ་འགྲོ་འདོད་ཡང་དག་སྐྱེས་པར་གྱུར། །འདི་ཡི་སེམས་ནི་ཀུན་ནས་རྟོག་ནས་དེ་ནས་ནི། །
ལྷ་རྣམས་དག་གིས་ཁང་པའི་སྒོ་ནི་ཕྱེ་བར་གྱུར། །དེ་ནས་ལང་ཚོ་ལྡན་མ་ཉལ་བ་དེ་རྣམས་ནི། །སྨད་ཅིང་དེ་ནི་ལྡིང་ཁང་ལོགས་ནས་བབས་པ་སྟེ། །མངོན་པར་བབས་ནས་དེ་ནས་སོམ་ཉི་རྣམ་བྲལ་བར། །ཁང་པའི་རིམ་པ་དང་པོར་ཕྱི་རུ་རྣམ་པར་གཤེགས། །དེ་ནི་མགྱོགས་འགྲོ་བསྲུངས་ལ་གོ་བར་

172-1-21a

བྱས་ནས་ནི། །སྐྱེན་པར་འདུན་པ་ལ་ནི་འདི་སྐད་ཅེས་སྨྲས་སོ། །བསྔགས་ལྡན་རྟ་ནི་ཁྱེར་ཤོག་མྱུར་བ་དང་ལྡན་པས། །བདུད་རྩི་ཐོབ་ཕྱིར་འདི་ལས་དི་རིང་བདག་སྐོམ་མོ། །བདག་གི་སྙིང་ལ་དེ་རིང་ཚིམ་པ་སྐྱེས་གྱུར་ཞིང་། །ངེས་པ་
ཡང་སྟེ་ཇི་ལྟར་བློ་གྲོས་ལ་ཞུགས་པ། །སྐྱེ་བོ་མེད་པ་ལ་ཡང་མགོན་དང་ལྡན་པ་སྟེ། །ངེས་པར་འདོད་པའི་དོན་ནི་མངོན་དུ་ཕྱོགས་པར་འདུ། །ངོ་ཚ་ཉིད་དང་ཡང་དག་འདུད་པ་སྤངས་ནས་ནི། །ལང་ཚོ་མ་རྣམས་བདག་གི་གདོང་དུ་ཇི་བཞིན་ཉལ། །སྒོ་ནི་རང་བཞིན་ཇི་ལྟར་རྣམ་པར་དབྱེ་བ་ལ། །ངེས་
པར་བདག་ནི་འདི་ནས་དི་རིང་འགྲོ་བའི་དུས། །མི་དབང་བརྟན་པའི་དོན་ནི་རྣམ་པར་རིག་ན་ཡང་། །ཇོ་བོ་བཀའ་ལུང་དེས་ནི་དེ་ནས་རབ་བཟུང་ནས། །ཡིད་ལ་ཕ་རོལ་པོ་ཡིས་ཡང་དག་བསྐུལ་བ་བཞིན། །མགྱོགས་འགྲོ་ཁྱེར་ཏེ་འོང་བ་ལ་ནི་བློ་གྲོས་བྱས། །དེ་ནས་གདོང་གི་གསེར་གྱི་སྲབ་ཀྱིས་གང་བ་སྟེ། །
རྒྱབ་ན་ཡང་བའི་སྟན་གཡོགས་དག་གིས་ཉེ་བར་གཡོགས། །སྟོབས་དང་སེམས་པ་མགྱོགས་དང་རྗེས་འགྲོ་ཉེར་ལྡན་པ། །དེ་ཡིས་རྟ་མཆོག་དེ་ལ་དེར་ནི་ཉེ་བར་འོངས། །སྔ་མའི་རྩ་བ་རྩིབ་ལོགས་གསུམ་ག་རབ་རྒྱས་ཤིང་། །རྒྱབ་དང་རྣ་བ་ལུས་སྐྱེས་སྤུ་ནི་ཐུང་ཞིང་དུལ། །རྒྱབ་ཀྱི་རྩིབ་མ་དག་ནི་དུད་ཅིང་
རྣམ་རྒྱལ་ལ། །མཆུ་དང་དབྲལ་བ་བྲང་དང་དཔྱི་ནི་རབ་རྒྱས་པའོ། །ཞི་ཞིང་ཀ་མ་ལ་དང་མཚུངས་པའི་ཕྱག་གིས་ཀྱང་། །སྐུ་སྟོང་རྣམ་པར་སྤངས་དེས་དེ་ལ་ཉེར་འཁྱུད་ནས། །རྒྱལ་མཚན་སྡེ་ལ་དམག་དཔོན་རབ་ཏུ་འཇུག་པ་བཞིན། །མངར་མོའི་ཡི་གེའི་ཚིག་གིས་ཞལ་ཏ་མཛད་པའོ། །གཡུལ་དུ་ཁྱོད་ལ་
མངོན་པར་ཞོན་ནས་ས་སྐྱོང་གིས། །དགྲ་བོ་རྣམས་ནི་ལན་གྲངས་མང་པོར་ངེས་པར་གཏོར། །བདག་ཀྱང་འཆི་མེད་གོ་འཕང་ཇི་ལྟ་བ་བཞིན་དུ། །མགྱོགས་འགྲོའི་གཙོ་བོ་ཉེ་བར་ཐོབ་པ་དེ་ལྟར་མཛོད། །ཡུལ་ཐོབ་བདེ་བ་ལ་དང་ནོར་བསྒྲུབ་པ་ལ་རུང་། །གཡུལ་འགྱེད་པ་ན་འཁོར་ནི་ངེས་པར་རྙེད་བླ་སྟེ། །བརྒྱུད་པར་
ལྷུང་བ་ལ་དང་ཆོས་ལ་བརྟེན་པར་རུང་། །སྐྱེས་བུ་ཡི་ཡང་འཁོར་ནི་རྙེད་པར་དཀའ་བའོ། །འདི་ཉིད་དུ་ཡང་གང་ཞིག་འཁོར་དུ་གྱུར་པ་ནི། །སྡིག་པའི་ལས་ལ་དང་ནི་ཆོས་དང་ལྡན་ལ་རུང་། །ཇི་ལྟར་བདག་གི་ནང་གི་བདག་ཉིད་ཀྱིས་རྟོགས་པ། །མི་དེ་རྣམས་ཀྱང་དེ་ཡི་ཆ་ཤས་སྐལ་བ་ཡི། །དེ་ཕྱིར་ཆོས་དང་ལྡན་པ་

172-1-21b

འདི་ནི་ཡོངས་ཤེས་ནས། །བདག་ནི་འདི་ལས་ངེས་འབྱུང་འགྲོ་ལ་ཕན་པའི་ཕྱིར། །མགྱོགས་འགྲོ་མཆོག་སྐྱེ་ཤུགས་དང་རྣམ་པར་གནོན་པ་ཡིས། །བདག་ཕན་ལ་དང་འགྲོ་ཕན་ལ་ནི་འབད་པར་གྱིས། །དེ་ལྟར་མཛའ་བཤེས་བཞིན་དུ་རྗེས་སུ་བསླབས་ནས་ནི། །མགྱོགས་འགྲོ་མཆོག་ལ་མི་མཆོག་
འགྲོ་འདོད་དེ། །དཀར་ལ་དཀར་མིན་འགྲོས་ཀྱི་འོད་ཟེར་ལུང་ལྡན་པ། །ཉི་མ་སྟོན་ཀའི་སྤྲིན་ལ་བཞིན་དུ་ཡང་དག་འཛེགས། །དེ་ནས་འཁོར་གྱི་སྐྱེ་བོས་གོ་བར་བྱེད་པའི་སྐད། །མཚན་མོར་གཏུམ་པ་དམ་པའི་རྟ་དེས་ཡོངས་བཀག་ཅིང་། །འགྲམ་པའི་སྒྲ་མེད་འཚེར་བའི་སྐད་ནི་རབ་ཞི་བར། །
འཇིགས་པའི་སྒྲ་ནི་དོར་བའི་གོམ་པའི་འགྲོས་ཀྱིས་གཤེགས། །གསེར་གྱི་གདུ་བུའི་རྒྱན་ནི་ལག་པའི་མཁྲིག་མ་ལ། །ཀ་མ་ལ་འདྲས་ཀ་མ་ལ་རྣམས་རྣམ་བྱས་ནས། །ལུས་འདུད་གནོད་སྦྱིན་རྣམས་ནི་དེ་ནས་འདི་ཡིས་ནི། །ཚིམ་གྱུར་ལག་པའི་རྩེ་མོས་རྨིག་པ་རྣམས་བཟུང་ངོ་། །ལྕི་མོའི་སྒོ་
གཏན་སྒོ་གླེགས་ཡང་དག་བཅད་པ་གང་། །བདེ་བར་གཉིས་འཐུང་གིས་ཀྱང་ཕྱེད་པ་མ་ཡིན་པ། །མི་སྐྱོང་སྲས་པོ་གཤེགས་ཚེ་སྐད་མེད་གྲོང་ཁྱེར་དང་། །སྒོ་ཁང་དེ་རྣམས་རང་ཉིད་རྣམ་པར་བྱེ་བར་གྱུར། །མངོན་པར་གདོང་ཕྱོགས་ཡབ་དང་སྲས་པོ་བྱིས་པ་དང་། །སྐྱེ་བོ་རྗེས་སུ་ཆགས་དང་ཕུན་
ཚོགས་མཆོག་དག་ནི། །བློ་གྲོས་བྱས་ཤིང་ལྟོས་པ་མེད་པར་དོར་ནས་ནི། །ཡབ་ཀྱི་གྲོང་ནས་དེ་ནི་དེ་ནས་རྣམ་པར་གཤེགས། །དེ་ནས་དེ་ནི་རྣམ་རྒྱལ་འདམ་སྐྱེས་ཡངས་པའི་སྤྱན། །གྲོང་ཁྱེར་ཀུན་ནས་གཟིགས་ནས་སེང་གེའི་སྒྲ་བསྒྲགས་པ། །སྐྱེ་དང་འཆི་བ་དག་གི་ཕ་རོལ་མ་མཐོང་བར། །
གྲོང་ཁྱེར་སེར་སྐྱ་ཞེས་བྱར་རབ་ཏུ་མི་འཇུག་གོ། །དེ་ལྟར་དེ་ཡི་གསུང་ནི་ངེས་པར་ཐོས་ནས་ནི། །ནོར་གྱི་བདག་པོའི་འཁོར་རྣམས་དག་ནི་དགའ་བར་གྱུར། །རབ་ཏུ་དགའ་བའི་ཡིད་ཅན་ལྷ་ཡི་ཚོགས་རྣམས་ནི། །ནན་ཏན་ཕ་རོལ་སོང་བ་དེ་ལ་བསྔགས་པ་བྱས། །མེ་ཡི་ལུས་ཅན་མཐོ་རིས་གནས་པ་
གཞན་རྣམས་ནི། །འདི་ཡིས་ངེས་པ་ཤིན་ཏུ་དཀའ་བ་རྣམས་རིག་ནས། །སྤྲིན་སྟུག་གསེབ་ནས་ཟླ་བའི་འོད་ཟེར་འཐོན་པ་བཞིན། །མཚན་མོའི་མུན་པའི་ལམ་ནི་རབ་ཏུ་གསལ་བར་བྱས། །ཉི་མའི་མགྱོགས་འགྲོ་ལྟ་བུའི་མགྱོགས་འགྲོ་དེ། །ཡིད་ཀྱིས་སྤྲུལ་པ་བཞིན་དུ་རྣམ་པར་རྒྱུ་བཞིན་དུ། །ཤིང་

172-1-22a

རྟ་འདྲེན་པས་གཟི་ཉམས་སྐར་ལྡན་བར་སྣང་ལ། །དེ་ནི་ཤིན་ཏུ་མང་པོའི་དཔག་ཚད་རྣམས་སུ་གཤེགས། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། ཕྱི་རོལ་དུ་མངོན་པར་བྱུང་བའི་ལེའུ་སྟེ་ལྔ་པའོ།།      །།དེ་ནས་འགྲོ་མིག་ཉི་མ་
ནི། །མངོན་པར་ཤེས་པའི་ཡུད་ཙམ་ན། །ངན་སྤོང་བུ་ཡི་དཀའ་ཐུབ་གནས། །མི་མཆོག་དེས་ནི་གཟིགས་པར་གྱུར། །བློ་ཕབ་གཉིད་ལོག་རི་དགས་དང་། །རང་གནས་གནས་པར་བྱ་གང་ཞིག །གཟིགས་ནས་ངལ་སོས་བཞིན་དུ་དང་། །དོན་ནི་བྱས་པ་བཞིན་དུ་གྱུར། །དེ་ནི་རྒྱགས་པ་མེད་
དོན་དང་། །དཀའ་ཐུབ་མཆོད་པའི་དོན་ཉིད་དང་། །རང་གི་རྗེས་སུ་སྲུང་བ་ལ། །རྟ་ཡི་རྒྱབ་ནས་བབས་པར་གྱུར། །མངོན་པར་བབས་ནས་ཀྱང་རེག་ཅིང་། །དགའ་ཞིང་མིག་གིས་འཁྲུ་བ་བཞིན། །ངེས་པར་འཁོར་ཞེས་རྟ་དང་ནི། །འདུན་པ་ལ་ནི་སྨྲས་པའོ། །འདི་ནི་མཁའ་ལྡིང་དཔེར་མགྱོགས་ལ། །
མགྱོགས་འགྲོ་ལ་ནི་རྗེས་སུ་འོངས། །འདིས་ནི་བདག་གི་སྟོབས་དང་ནི། །ཞི་བ་བདག་ལ་གུས་པ་བསྟན། །ཐམས་ཅད་ནས་དོན་གཞན་ཡིན་ཀྱང་། །ཁྱོད་ཀྱི་སྙིང་ལ་བཟུང་བ་སྟེ། །གང་གི་ཇོ་བོ་དག་ལ་དགའ། །འདི་ནི་དེ་འདྲ་དག་ལ་ཉིད། །གུས་པ་མེད་ལ་ནུས་པ་ཡོད། །ནུས་པ་མེད་ལ་གུས་
པ་ལྡན། །གུས་པ་ལྡན་དང་ནུས་པ་སྟེ། །ཁྱོད་འདྲ་ས་སྟེངས་རྙེད་པར་དཀའ། །དེ་ཕྱིར་སྐལ་བ་ཆེན་པོའི་ལས། །ཁྱོད་ཀྱི་འདིས་ནི་བདག་དགའོ། །གང་ཞིག་ཁྱོད་ཀྱིས་བསམས་པ་འདི། །འབྲས་བུ་ལས་ཀྱང་གཞན་དུ་ཕྱོགས། །སྐྱེ་བོ་འབྲས་བུ་ལ་གནས་པའི། །མཐུན་ཕྱོགས་སྐྱེ་བོ་གང་གིས་
མིན། །ཟློག་ལ་རང་གི་སྐྱེ་བོ་ཡང་། །ཕལ་ཆེར་ཕ་རོལ་སྐྱེ་བོར་གྱུར། །རིགས་ཀྱི་དོན་དུ་བུ་བཟུང་ཞིང་། །གསོས་པའི་དོན་དུ་ཕ་བསྐྱེད་ལ། །སྲེད་པའི་བསམ་པས་ཆགས་སྐྱེ་སྟེ། །བྱེད་པ་མེད་པར་རང་ཉིད་མེད། །མང་པོ་བརྗོད་ཅིང་མདོར་བསྡུས་ནས། །བདག་གི་དགའ་ཆེན་ལེགས་བྱས་ཏེ། །
རྟ་བླངས་ནས་ནི་ཕྱིར་ལོག་དང་། །བདག་ནི་འདོད་པའི་གནས་རབ་ཐོབ། །དེ་སྐད་སྨྲས་ནས་ཕྱག་ཆེན་ཏེ། །རྗེས་སུ་བསྔགས་པར་བྱེད་འདོད་པས། །རྒྱན་རྣམས་ཀུན་ནས་བཏོགས་ནས་ནི། །གདུང་སེམས་ལྡན་པ་འདི་ལ་བྱིན། །དབུ་རྒྱན་དག་ནས་ནོར་བུ་གསལ། །སྒྲོན་མའི་ལས་ལ་བླངས་ནས་ནི། །ཉི་མ་

172-1-22b

འབིགས་བྱེད་ལ་བཞིན་དེས། །ཚིག་འདི་སྨྲས་བཞིན་བཞུགས་པར་གྱུར། །འདུན་པ་ནོར་བུ་འདི་ལོང་ལ། །ལན་མང་བཏུད་ནས་མི་སྐྱོང་ནི། །ཀུན་ནས་གདུང་བ་ཟློག་པའི་ཕྱིར། །བློ་ཕེབས་པར་ནི་གསོལ་བར་བྱ། །སྐྱེ་དང་འཆི་བ་ཉམས་དོན་དུ། །དཀའ་ཐུབ་ནགས་ཚལ་རབ་ཐོབ་སྟེ། །མཐོ་རིས་
སྐོམ་པས་ངེས་མིན་ཞིང་། །བརྩེ་བ་མེད་མིན་ཁྲོས་པ་མིན། །དེ་ཕྱིར་དེ་ལྟར་མངོན་བྱུང་བ། །བདག་ལ་མྱ་ངན་འོས་མ་ཡིན། །ཡུན་རིངས་འདུས་པར་གྱུར་ནས་ཀྱང་། །དུས་ཀྱིས་འགྱུར་བ་མ་ཡིན་ནོ། །གང་ཕྱིར་ངེས་པར་འབྲལ་བ་སྟེ། །དེ་ཕྱིར་ཐར་ཕྱིར་བདག་གི་བློ། །སླར་ཡང་རང་གི་སྐྱེ་བོ་ལས། །
རྣམ་པར་འབྲལ་བ་གང་ལས་མིན། །མྱ་ངན་སྤོང་ཕྱིར་ངེས་འབྱུང་བ། །བདག་ལ་མྱ་ངན་འོས་མ་ཡིན། །མྱ་ངན་རྒྱུད་ནི་འདོད་ལ་ཆགས། །ཆགས་པ་ཅན་ལ་མྱ་ངན་བྱ། །འདི་ཡང་སྔ་མ་རྣམས་ལ་གྲགས། །ཁོ་བོ་ཅག་ལ་ངེས་པར་གནས། །དེ་ལྟར་སྟེར་བྱར་གྱུར་པ་ལས། །མྱ་ངན་འོས་མིན་ལམ་
གྱིས་འགྲོ། །སྐྱེས་བུ་རྣམས་ལ་ཕྱིན་ལོག་ཏུ། །ནོར་གྱིས་སྟེར་བྱར་གྱུར་པ་སྟེ། །ས་ལ་ཆོས་ཀྱི་བདག་པོ་ཡང་། །རྙེད་དཀའ་ཡང་ནི་མ་ཡིན་ནོ། །གང་ཡང་འདི་ནི་དུས་མིན་པར། །ནགས་སུ་སོང་བ་ཡིན་ཞེ་ན། །སྲོག་ཀྱང་གཡོ་བར་གྱུར་པ་ན། །ཆོས་ལ་དུས་ཡོད་མ་ཡིན་ནོ། །དེ་ཕྱིར་ད་ལྟ་ཉིད་དུ་
བདག །དགེ་བ་བསག་ཅེས་ངེས་པ་སྟེ། །འཆི་བའི་དགྲ་ནི་གནས་པ་ན། །གསོན་པ་ལ་ནི་བློ་གཏད་ཅིང་། །ཞི་བ་ཁྱོད་ཀྱིས་དེ་ལ་སོགས། །ས་འཛིན་བདག་ལ་ཞུ་བྱ་སྟེ། །ཇི་ལྟར་བདག་ནི་མི་དྲན་པ། །དེ་ལྟར་ཉིད་དུ་འབད་པ་གྱིས། །གཞན་ཡང་བདག་ལ་ཡོན་ཏན་མེད། །ཁྱོད་ཀྱིས་མི་
བདག་ལ་སྨྲ་བྱ། །ཡོན་ཏན་མེད་ལས་བརྩེ་བ་འདོར། །བརྩེ་བ་དོར་ལས་མྱ་ངན་མེད། །དེ་ལྟར་ཚིག་འདི་ཐོས་གྱུར་ནས། །འདུན་པ་གདུང་བས་རྣམ་འཁྲུགས་ཤིང་། །མཆི་མས་འདུད་པའི་ཚིག་ཉིད་ཀྱིས། །ཐལ་མོ་སྦྱར་ཏེ་ལན་གསོལ་བ། །ཇོ་བོ་ཁྱེད་ཀྱིས་དགོངས་པ་ནི། །གཉེན་ལ་ངལ་བ་སྟེར་བ་
འདིས། །ཆུ་བོའི་འགྲམ་ན་གཉིས་འཐུང་བཞིན། །བདག་གི་སེམས་འདི་སྒྱུར་བའོ། །ཁྱོད་ཀྱིས་ངེས་པ་འདི་ལྟ་བུས། །སུ་ཡིས་མཆི་མ་འབྱུང་བ་མེད། །ལྕགས་ལས་གྱུར་པའི་སྙིང་ལའང་སྟེ། །བརྩེ་བས་འཁྲུག་ལ་སྨོས་ཅི་དགོས། །གཞལ་མེད་ཁང་གི་མལ་འོས་པའི། །ཤིན་ཏུ་གཞོན་ནུ་འདི་གང་ན། །

172-1-23a

ཀུ་ཤའི་མྱུ་གུ་རྣོ་བ་ཅན། །དཀའ་ཐུབ་ནགས་ཀྱི་ས་གང་ན། །ཁྱོད་ཀྱི་འབད་པ་ཐོས་ནས་ཀྱང་། །རྟ་གང་བདག་གིས་བླངས་པ་འདི། །མགོན་པོ་དེ་ནི་སྟོབས་ཀྱིས་ནི། །ལྷ་ཡིས་བྱེད་དུ་བཅུག་པ་འདྲ། །ཁྱེད་ཀྱི་ནན་ཏན་ངེས་པ་འདི། །རང་དབང་ཤེས་ན་གང་གི་ཕྱིར། །ཉེ་
བར་ལེན་ཏེ་མགྱོགས་འགྲོའི་རྟ། །སེར་སྐྱའི་གཞི་ཡི་མྱ་ངན་གནས། །མེད་པ་པོ་ཡིས་དམ་ཆོས་བཞིན། །རྒྱལ་པོ་བརྩེ་བ་བགྲེས་པ་དང་། །སྲས་པོ་སྡུག་གོ་འདོར་བ་ནི། །ཕྱག་ཆེན་དེ་ནི་འོས་མ་ཡིན། །དམ་པའི་བྱ་བ་བྱེད་བཅོམ་ཡིན། །ཡང་དག་བསྐྱེད་པས་ཡོངས་སུ་ནི། །ཐང་ཆད་གཉིས་
པའི་མ་དེ་དང་། །ལྷ་མོ་བརྗོད་པར་འོས་མ་ཡིན། །མ་ནིང་གིས་ནི་དཔལ་ཐོབ་བཞིན། །སྲས་པོ་བྱིས་པ་ཡོན་ཏན་ལྡན། །རིགས་བཙུན་བདག་པོའི་བརྟུལ་ཞུགས་མ། །ལྷ་མོ་འདོར་བར་འོས་མ་ཡིན། །བསྔགས་འོས་སྲས་པོ་གྲགས་པ་འཛིན། །སྙན་གྲགས་ཆོས་ནི་འཛིན་པའི་མཆོག །ཞེན་
པ་ལྡན་པས་གྲོགས་མཆོག་བཞིན། །བྱིས་པ་འདོར་བར་འོས་མ་ཡིན། །ཅི་སྟེ་གཉེན་དང་རྒྱལ་སྲིད་དག །འདོར་བ་ཉིད་དུ་བློ་གྲོས་མཛད། །བདག་གི་འགྲོས་ནི་ཁྱོད་ཞབས་ལ། །ཁྱབ་བདག་བདག་འདོར་འོས་མ་ཡིན། །མ་གྷུའི་བུ་ནི་བཤེས་བཟང་བཞིན། །ཁྱོད་ནི་དགོན་པར་དོར་ནས་སུ། །མེ་
ཡིས་ཚིག་པའི་སེམས་ཀྱིས་ནི། །གྲོང་དུ་འགྲོ་བར་ནུས་པ་མེད། །ཁྱོད་འདིར་གྲོང་དུ་འགྲོ་བ་ཅན། །རྒྱལ་པོས་བདག་ལ་ཅི་ཞིག་གསུང་། །ཁྱེད་ཀྱི་བཙུན་མོའི་འཁོར་དུ་འམ། །འོས་པ་མཐོང་ན་ཅི་ཞིག་སྨྲ། །གང་ཡང་ཡོན་ཏན་མེད་པ་ཡང་། །མི་བདག་ལ་སྨོས་གསུང་བ་ཡང་། །སྐྱོན་མེད་ཐུབ་པའི་
བཞིན་ཁྱོད་ཀྱི། །མ་གྱུར་པ་དེ་ཅི་ཞིག་སྨྲ། །ངོ་ཚ་དང་བཅས་སེམས་ཀྱིས་ནི། །ལྕེ་ནི་ཐོགས་པར་གྱུར་པ་ཡི། །བདག་ནི་གལ་ཏེ་ཡང་སྨྲ་བ། །དེ་ལ་དད་པར་འོས་པ་སུ། །གང་ཞིག་ཟླ་བའི་འོད་རྣོ་བར། །སྨྲ་བར་དད་པར་འཛིན་པ་འམ། །ཁྱེད་ཀྱིས་སྐྱོན་ཤེས་དེས་སྐྱོན་ནི། །སྨྲ་བ་དད་པར་འཛིན་
པ་འམ། །རྟག་ཏུ་རྗེས་སུ་བརྩེ་བཅས་དང་། །རྟག་པར་སྙིང་རྗེ་ཤེས་པ་ཡི། །བརྩེ་བ་སྤོང་བ་ཚུལ་མིན་ཏེ། །ཕྱིར་ལོག་བདག་ལ་བཀའ་དྲིན་མཛོད། །དེ་ལྟར་མྱ་ངན་གྱིས་ནོན་པའི། །འདུན་པའི་ཚིག་འདི་གསན་གྱུར་ནས། །རང་གནས་མཆོག་ཏུ་བརྟན་པ་ཡིས། །སྨྲ་བའི་མཆོག་གིས་བཀའ་

172-1-23b

སྩལ་ཏོ། །འདུན་པ་བདག་དང་བྲལ་བ་ལ། །ཀུན་ནས་གདུང་བ་འདི་ཐོང་ཅིག །ལུས་ཅན་འགྲོ་བ་ཐ་དད་ལ། །དགོངས་པ་སྣ་ཚོགས་ངེས་པ་ཡིན། །གང་ཡང་བརྩེ་ལས་རང་གི་སྐྱེ། །བདག་གིས་རང་ནི་མི་འདོར་ཏེ། །འཆི་བས་ཕན་ཚུན་དབང་མེད་པར། །བདག་ཅག་རྣམས་ནི་
འདོར་བར་འགྱུར། །སྲེད་པ་ཆེན་པོའི་སྡུག་བསྔལ་གྱི། །མངལ་གང་གིས་ནི་བདག་བཟུང་སྟེ། །འབྲས་མེད་འབད་པ་མེད་དེ་ཡིས། །བདག་སུ་བདག་གི་དེ་སུ་ཡིན། །ཇི་ལྟར་སྒོང་སྐྱེས་གནས་ཤིང་ལ། །ཡང་དག་འདུས་ནས་རྣམ་པར་བྲལ། །དེ་ལྟར་འབྱུང་པོ་འདུས་པ་ནི། །
ངེས་པར་འབྲལ་བའི་མཐའ་ཡིན་ནོ། །ཇི་ལྟར་སྤྲིན་རྣམས་འདུས་ནས་ནི། །སླར་ཡང་རྣམ་པར་འབྱེད་པའོ། །དེ་ལྟར་འདུ་དང་འབྲལ་བ་ནི། །བདག་དང་སྲོག་ཆགས་རྣམས་ཀྱི་ལུགས། །གང་གི་ཕྱིར་ན་འཇིག་རྟེན་འདི། །སླུས་ནས་རྣམ་པར་འབྲལ་བ་དེ། །དེ་ཕྱིར་རྨི་ལམ་འདུས་གྱུར་ལ། །
བདག་གི་བ་ཉིད་བཟོད་མ་ཡིན། །ཤིང་རྣམས་འདབ་མ་དམར་པོ་དང་། །ལྷན་ཅིག་སྐྱེས་ཏེ་རྣམ་པར་འབྲལ། །གཞན་དང་གཞན་གྱི་འབྲལ་བ་ནི། །འགྱུར་བ་མ་ཡིན་སྨོས་ཅི་དགོས། །དེ་ཕྱིར་དེ་ལྟར་གྱུར་ན་ནི། །ཞི་བ་གདུང་བ་མ་བྱེད་སོང་། །གལ་ཏེ་ཡང་ནི་བརྩེ་བ་འབེབས། །སོང་ནས་ཀྱང་ནི་
སླར་ཡང་ཤོག །ཁོ་བོ་ཅག་ལ་ལྟོས་བྱས་པའི། །སེར་སྐྱའི་གཞི་ན་སྐྱེ་བོ་ལ། །དེར་སོང་བརྩེ་བ་ཐོང་ཅིག་དང་། །འདི་ཡི་ངེས་ལ་ཉོན་ཅིག་སྨོས། །རྒ་དང་འཆི་བ་ཟད་བྱས་ནས། །ཡང་ན་མྱུར་དུ་འོང་བའི་གཏམ། །རྩོམ་པ་ཉམས་ཤིང་དོན་མ་བྱས། །ཡང་ན་ཉམས་པར་འགྱུར་བ་སྨྲོས། །
དེ་ལྟར་འདི་ཡི་ཚིག་ཐོས་ནས། །བསྔགས་ལྡན་མགྱོགས་འགྲོའི་མཆོག་གིས་ནི། །ལྕེ་ཡིས་ཞབས་ལ་རབ་ལྡགས་ཏེ། །མཆི་མ་དྲོན་མོ་ཕྱུང་བར་གྱུར། །དྲ་བ་དང་ནི་བཀྲ་ཤིས་རྟགས། །འཁོར་ལོ་དབུས་ལྡན་ཕྱག་གིས་ནི། །གཞོན་ནུས་དེ་ལ་རེག་གྱུར་ཅིང་། །ན་ཚོད་བཞིན་དུ་རྣམ་པར་སྨྲས། །
བསྔགས་ལྡན་མཆི་མ་མ་འདོན་ཅིང་། །དམ་པའི་རྟ་ཉིད་འདི་བསྟན་ཏོ། །སྲོན་མཛོད་ཁྱོད་ཀྱི་ངལ་བ་འདིས། །མྱུར་དུ་འབྲས་བུ་བཅས་པར་འགྱུར། །དེ་ནས་རལ་གྲི་རྣོན་པོ་ནོར་བུའི་ཡུ་བ་ཅན། །གསེར་གྱི་ཕྲ་ནི་སྣ་ཚོགས་དང་ལྡན་འདུན་པ་ཡི། །ལག་ན་ཡང་དག་གནས་པ་བརྟན་པ་དེས་བསྣམས་

172-1-24a

ནས། །ཁུང་བུ་དག་ནས་སྦྲུལ་བཞིན་ཞུགས་ནས་རབ་ཏུ་དྲུངས། །ཨུཏྤ་ལ་ཡི་འདབ་མ་སྔོན་པོ་དེ་དྲངས་ནས། །སྣ་ཚོགས་དབུ་རྒྱན་དབུ་སྐྲར་བཅས་པ་རབ་བཅད་ཅིང་། །རྫིང་བུ་དག་ན་ངང་པ་བཞིན་དུ་རྣམ་བཀྲམ་པ། །འོད་ཟེར་དང་ལྡན་བར་སྣང་དག་ལ་དེ་གཏོར་རོ། །
མཆོད་པ་མངོན་པར་འདོད་ཕྱིར་རྣམ་མང་བཀུར་སྟིའི་ཕྱིར། །ལྷ་ནི་གནས་པས་རབ་ཏུ་བཀྲམ་པ་དེ་བཟུང་སྟེ། །ཇི་ལྟ་བ་བཞིན་དེ་ནི་ལྷ་ནི་ལྷ་ཚོགས་རྣམས། །ལྷ་ཡི་ཁྱད་པར་འཕགས་པ་རྣམས་ཀྱིས་མཆོད་པ་བྱས། །རྒྱན་ནི་བུད་མེད་ལྡན་པ་རྣམ་པར་སྤངས་ནས་ཀྱང་། །དབུ་ལས་དཔལ་ནི་རྣམ་པར་རྒྱང་རིང་
བྱས་ནས་ནི། །ནགས་སུ་གསེར་གྱི་ངང་པའི་མཚན་མ་གོས་གཟིགས་ནས། །བརྟན་པ་དེས་ནི་གོས་དག་མངོན་པར་འདོད་པར་གྱུར། །དེ་ནས་ལྷ་ནི་གནས་པར་རི་དགས་སྔོན་པོའི་ལུས། །དགོངས་པ་རྣམ་དག་འདི་ཡི་དགོངས་པ་རྣམས་རིག་ནས། །ཁ་བསྒྱུར་ངུར་སྨྲིག་གོས་ཅན་ཉེ་ལོགས་མངོན་པར་
འོངས། །དེ་ལ་ཤཱཀྱའི་རྒྱལ་པོ་སྐྱེས་ཀྱིས་མངོན་པར་སྨྲས། །ཁྱོད་ཀྱི་དགེ་ཡི་ངུར་སྨྲིག་དྲང་སྲོང་རྒྱལ་མཚན་དང་། །འཚེ་བ་བྱེད་པའི་གཞུ་འདི་རིགས་པ་མ་ཡིན་ཏེ། །དེ་ཕྱིར་ཞི་བ་གལ་ཏེ་འདིར་ནི་ཆགས་མེད་ན། །བདག་ལ་རབ་ཏུ་བྱིན་ལ་འདི་དང་འདི་སྣོམས་མཛོད། །རྔོན་པས་སྨྲས་པ་འདོད་སྦྱིན་
འདོད་པ་སྙིང་པོ་ལས། །འདི་ཡིས་བློ་ནི་ཕབ་ནས་རི་དགས་རྣམས་གསོད་དོ། །བརྒྱ་བྱིན་མཚུངས་པ་གང་དེ་འདིས་ནི་དོན་འགྱུར་ན། །ཨེ་མ་རབ་ཏུ་བཞེས་ལ་དཀར་པོ་དེ་གསོལ་མཛོད། །དེ་ནས་དེ་ནི་མཆོག་ཏུ་རབ་ཏུ་དགའ་བ་ཡིས། །ནགས་སུ་བྱུང་བའི་ན་བཟའ་བླངས་ཤིང་གོས་དོར་ལ། །
རྔོན་པ་ཉིད་ཀྱང་ལྷ་ཡི་ལུས་ཉིད་རྣམ་བཟུང་སྟེ། །དཀར་པོ་དེ་ཉིད་བླངས་ནས་ལྷ་ནི་གཤེགས་པར་གྱུར། །དེ་ནས་གཞོན་ནུ་དང་ནི་རྟ་མཆོག་སྐྱོང་བ་དེས། །དེ་ལྟར་གཤེགས་པ་དེ་ལ་ཡ་མཚན་སྐྱེས་གྱུར་ཏེ། །ནགས་ནས་བྱུང་བའི་ན་བཟའ་ཉིད་དང་དེ་ལ་ནི། །སླར་ཡང་རི་མོར་བྱ་བ་མང་
པོ་སྐྱེན་པར་མཛད། །གདོང་ནི་མཆི་མ་དང་བཅས་འདུན་པ་རྣམས་བཟློག་ནས། །བདག་ཉིད་ཆེན་པོ་བརྟན་དང་གྲགས་པ་འཆང་བ་སྟེ། །མཚམས་ཀྱི་སྤྲིན་གྱིས་གཡོགས་པའི་སྐར་མའི་རྒྱལ་པོ་བཞིན། །ངུར་སྨྲིག་གྱོན་ཞིང་གདུང་སེམས་གང་ཡིན་དེ་ནས་གཤེགས། །དེ་ནས་དེ་ལྟར་ཇོ་བོ་

172-1-24b

རྒྱལ་སྲིད་མི་བཞེད་པར། །དཀའ་ཐུབ་ནགས་སུ་གཤེགས་པ་མདོག་ཉམས་སྣང་བ་ན། །མགྱོགས་འགྲོ་འཆང་དེ་ཕྱག་རྒྱས་གྱེན་དུ་བསྐྱོད་བྱས་ནས། །ཤིན་ཏུ་རྣམ་པར་ངུ་ཞིང་ས་ལ་འགྱེལ་གྱུར་ཏོ། །རྣམ་པར་བལྟས་ནས་སླར་ཡང་སྒྲ་བཅས་པར་ངུ་ཞིང་། །བསྔགས་ལྡན་རྟ་ལ་ལག་
པ་དག་གིས་ཉེར་འཁྱུད་ནས། །དེ་ནས་ཁོ་ཆད་ཡང་དང་ཡང་དུ་ཟློག་བཞིན་དུ། །ལུས་ཀྱིས་སོང་བར་གྱུར་ཀྱང་སེམས་ཀྱིས་མ་ཡིན་ནོ། །ལ་ལར་རབ་ཏུ་སེམས་ཞིང་ལ་ལར་རྣམ་པར་དུ། །ལ་ལར་ས་ལ་རབ་ཏུ་འབྲད་ཅིང་ལ་ལར་འགྱེལ། །དེ་ནས་འགྲོ་བཞིན་གུས་པའི་དབང་གིས་སྡུག་བསྔལ་
ཞིང་། །དབང་མེད་ལམ་ན་བྱ་བ་མང་པོ་བྱས་པའོ། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། བསྔགས་ལྡན་ཕྱིར་ལ་བཟློག་པའི་ལེའུ་སྟེ་དྲུག་པའོ།།      །།དེ་ནས་འདུན་པ་ངུ་ཞིང་གདོང་ནི་མཆི་མ་ཅན། །བཟློག་ནས་ནགས་སུ་འདུན་པའི་དཀའ་
ཐུབ་ཆགས་མེད་པ། །དོན་ཀུན་གྲུབ་པའི་ལུས་ཀྱིས་མངོན་པར་ཟིལ་མནན་ནས། །དཀའ་ཐུབ་གནས་དེ་གྲུབ་པ་བཞིན་དུ་རབ་ཏུ་ཐོབ། །དེ་ནས་རི་དགས་རྒྱལ་པོའི་འགྲོས་ཅན་རྒྱལ་པོའི་སྲས་པོ་དེ། །རི་དགས་གནས་དེར་རི་དགས་བཞིན་དུ་རབ་ཞུགས་པ། །ཕུན་ཚོགས་རྣམས་དང་བྲལ་ཡང་
ལུས་ཀྱི་ཕུན་ཚོགས་ཀྱིས། །དཀའ་ཐུབ་གནས་ལྡན་ཀུན་གྱི་མིག་དག་ཕྲོགས་པར་གྱུར། །ཁུར་ལྡན་རྣམས་བཞིན་མགོ་བོ་རྣམས་ནི་ཕྱེད་དུད་པས། །ལག་ན་གཉའ་ཤིང་བཅས་པར་འགྲོ་གྱུར་ཡ་མཚན་ལ། །དེ་བཞིན་འཁོར་ལོས་སྒྱུར་བ་ཆུང་མ་དང་བཅས་པ། །དབང་པོ་དང་མཚུངས་དེ་
མཐོང་སོང་བར་མ་གྱུར་ཏོ། །སྦྱིན་སྲེག་བུད་ཤིང་ཕྱིར་ནི་བྲམ་ཟེ་རྣམས་ཕྱིན་ནས། །མེ་ཏོག་ལོ་འདབ་རྒྱས་པའི་ལག་པ་གཙང་མ་རྣམས། །དཀའ་ཐུབ་གཙོ་བོ་རྣམས་ནི་བློ་རྣམས་བྱས་ན་ཡང་། །གཤེགས་པ་མཐོང་སྟེ་ཀློག་གླར་སོང་བར་མ་གྱུར་ཏོ། །ཆུ་གཏེར་སྔོན་པོ་བཞིན་དུ་མཐོང་ནས་རྨ་བྱ་
རྣམས། །དགའ་ཞིང་གྱེན་དུ་དུད་ཅིང་སྐད་དག་འདོན་གྱུར་ལ། །རྒྱ་སྐྱེགས་རི་དགས་སྤྱོད་ལྡན་རྣམས་དང་རི་དགས་རྣམས། །འབྲུ་རྣམས་བོར་ནས་མངོན་པར་གདོང་ཕྱོགས་གནས་པར་གྱུར། །འོད་ཟེར་ལྡན་པ་ཤར་བ་ལྟ་བུར་འབར་བ་ཡིས། །བུ་རམ་ཤིང་པའི་རིགས་ཀྱི་སྒྲོན་མ་དེ་མཐོང་ནས། །

172-1-25a

སྦྱིན་སྲེག་འཇོ་རྣམས་བཞོས་པ་ཡིན་ན་ཡང་། །རབ་ཏུ་དགའ་བ་སྐྱེས་ཏེ་རབ་ཏུ་འཇོ་གྱུར་ཏོ། །འདི་ནི་ནོར་སྦྱིན་རྣམས་ཀྱི་བརྒྱད་པ་ཡིན་ནམ་ཅི། །ཐ་སྐར་དག་གི་ནང་ནས་གཅིག་ནི་འཕོས་སམ་ཞེས། །དེ་མཐོང་བ་ལ་ཡ་མཚན་སྐྱེས་པར་གྱུར་པ་ཡི། །ཐུབ་པ་རྣམས་ཀྱི་
ཚིག་དེར་མཐོན་པོར་སྒྲོགས་པར་གྱུར། །ལྷ་ཡི་ཁྱུ་མཆོག་གཉིས་པའི་ལུས་པོ་ལྟ་བུ་དང་། །འཇིག་རྟེན་རྒྱུ་དང་མི་རྒྱུའི་སྙིང་པོ་ལྟ་བུ་དང་། །གང་འདོད་པ་ཡིས་ཉི་མ་མངོན་པར་བབས་འདྲ་བ། །དེས་ནི་ནགས་ཚལ་མཐའ་དག་རབ་ཏུ་སྣང་བར་མཛོད། །དེ་ནས་གདུང་གནས་པ་དེ་རྣམས་ཀྱི་ཇི་ལྟ་
བཞིན། །ཉེ་བར་སྙན་གསན་ཕབ་ཅིང་མངོན་པར་མཆོད་གྱུར་ལ། །དེ་ནི་ཆུ་བཅས་ཆུ་འཛིན་ལྟ་བུའི་དབྱངས་ཀྱིས་ནི། །ཆོས་འཛིན་རྣམས་སླང་ཡང་རབ་ཏུ་མཆོད་པར་གྱུར། །དེ་ནས་རྣམ་པར་ཐར་བཞེད་བརྟན་པ་དེ་ཡིས་ནི། །དཀའ་ཐུབ་སྣ་ཚོགས་རྣམས་ལ་ངེས་པར་རྣམ་གཟིགས་ཤིང་། །མཐོ་
རིས་མངོན་འདོད་བསོད་ནམས་བྱས་པའི་སྐྱེ་བོ་ཡིས། །ཁྱབ་པའི་དཀའ་ཐུབ་གནས་དེར་རྗེས་སུ་དཔྱད་པར་གྱུར། །དཀའ་ཐུབ་ནོར་ཅན་རྣམས་ཀྱི་དཀའ་ཐུབ་ནགས་ཚལ་དེར། །དཀའ་ཐུབ་རྣམ་པར་འགྱུར་བ་རྣམས་ནི་ངེས་གནས་ནས། །རྗེས་སུ་གཤེགས་པའི་དཀའ་ཐུབ་ལྡན་པ་ཁ་ཅིག་ལ། །ཞི་བས་
དེ་ཉིད་རྣམ་པར་ཤེས་བཞེད་འདི་གསུངས་སོ། །གང་ཕྱིར་ཆོས་ཀྱི་ཆོ་ག་འདི་ནི་མི་ཤེས་པ། །བདག་གིས་དཀའ་ཐུབ་གནས་མཐོང་དེ་རིང་སྔ་མའོ། །དེ་ཕྱིར་ཁྱོད་ཀྱིས་བདག་ལ་སྨྲ་བར་འོས་མིན་ཏེ། །ངེས་པ་གང་ཞིག་གང་ལ་རབ་ཏུ་འཇུག་པའོ། །དེ་ནས་དཀའ་ཐུབ་རྣམ་པར་རྒྱུ་བའི་གཉིས་
སྐྱེས་དེས། །ཤཱཀྱའི་ཁྱུ་མཆོག་ཁྱུ་མཆོག་རྣམ་པར་གནོན་པ་པོ། །དེ་ལ་རིམ་གྱིས་དཀའ་ཐུབ་ཁྱད་པར་རྣམས་དང་ནི། །དཀའ་ཐུབ་འབྲས་བུ་དང་བཅས་གཏམ་དག་བྱས་པའོ། །གྲོང་བྱུང་བཟའ་བ་མ་ཡིན་ཆུ་ལ་རབ་སྐྱེས་པའི། །འདབ་མ་རྣམས་དང་ཆུ་དང་འབྲས་བུ་རྩ་བ་ཉིད། །
ཐུབ་པ་རྣམས་ཀྱི་སྤྱོད་པ་འདི་ནི་ལུང་ཇི་ལྟར། །དཀའ་ཐུབ་རྣམས་ཀྱི་རྣམ་རྟོག་ཐ་དད་དེ་དེའོ། །ཁ་ཅིག་རི་དགས་བཞིན་དུ་རྩྭ་རྣམས་ལ་སྤྱོད་ལ། །གཞན་རྣམས་བོར་བ་ཡིས་ནི་མཁའ་ལ་རྒྱུ་བའི་བྱ་ལྟར་འཚོ། །ཁ་ཅིག་ལག་འགྲོ་རྣམས་དང་ལྷན་ཅིག་འཚོ་བ་སྟེ། །གྲོག་མཁར་གྱུར་པ་

172-1-25b

རྣམས་ནི་ནགས་ན་རླུང་གིས་སོ། །རྡོ་ཡིས་རབ་འབད་བསྒྲུབ་པའི་སྤྱོད་པ་གཞན་རྣམས་ཏེ། །ཁ་ཅིག་རང་གི་སོ་ཡིས་ཉེ་བར་བླངས་ཤིང་ཟ། །དེ་བཞིན་གཞན་ནི་གཞན་གྱི་དོན་དུ་བཅོས་བྱས་ནས། །གལ་ཏེ་ལྷག་མ་ཡོད་ན་བྱ་བ་བྱེད་པའོ། །ཆུ་ཡིས་གཤེར་བའི་རལ་པའི་ཚོགས་ཅན་ཁ་
ཅིག་ནི། །གསང་སྔགས་སྔོན་འགྲོ་ལན་གཉིས་མེ་ལ་སྦྱིན་སྲེག་ཅིང་། །ཁ་ཅིག་ཉ་དང་མཉམ་པར་ཆུ་ལ་རྣམས་ཞུགས་ནས། །རུས་སྦལ་བཞིན་དུ་ལུས་རྣམས་རབ་ཏུ་བསྐུམ་པའོ། །དེ་ལྟར་དུས་སུ་བསགས་པའི་དཀའ་ཐུབ་ནགས་ཚོགས་ཀྱི། །མཆོག་གིས་ལྷར་འགྲོ་གཞན་གྱིས་མི་ཡི་འཇིག་
རྟེན་ཏེ། །སྡུག་བསྔལ་ལམ་གྱིས་བདེ་བ་ཉེ་བར་ཐོབ་ཕྱིར་དང་། །ཆོས་ཀྱི་རྩ་བ་བདེ་བ་ཉིད་དུ་གསུངས་ཕྱིར་རོ། །དེ་སྐད་ཅེས་སོགས་རྐང་གཉིས་དབང་པོའི་སྲས་པོ་ཡིས། །དཀའ་ཐུབ་ནོར་དང་ལྡན་པ་དེ་ཡི་ཚིག་གསན་ནས། །དེ་ཉིད་གཟིགས་པ་མིན་ཡང་ངོམས་པར་མ་གྱུར་ལ། །
བདག་ཏུ་སོང་བ་འདི་ནི་དལ་བུས་གསུངས་པར་གྱུར། །སྡུག་བསྔལ་བདག་ཉིད་དཀའ་ཐུབ་རྣམ་པ་དུ་མ་སྟེ། །དཀའ་ཐུབ་བདག་གི་འབྲས་བུ་མཐོ་རིས་གཙོ་བོའོ། །འཇིག་རྟེན་ཐམས་ཅད་ཡོངས་སུ་འགྱུར་བ་དང་ལྡན་ལ། །ཉུང་ངུ་ལ་ངལ་འདི་ནི་གདུང་གནས་རྣམས་ཀྱིའོ། །ཕངས་པ་རྣམས་
དང་གཉེན་དང་ཡུལ་རྣམས་བོར་ནས་ནི། །གང་ཞིག་མཐོ་རིས་ཕྱིར་ནི་རྣམ་པར་སྤྱོད་བྱེད་ལ། །དེ་རྣམས་རྣམ་པར་བྲལ་ཏེ་ངེས་པར་འགྲོ་འདོད་ལ། །སླར་ཡང་ཤིན་ཏུ་འཆིང་བ་ཆེན་པོ་ཉིད་ཡིན་ནོ། །ལུས་ཀྱི་ངལ་དུབ་གདུང་བའི་བྱ་བ་རྣམས་ཀྱིས་ནི། །འདོད་པའི་རྒྱུ་ལས་རབ་ཏུ་འཇུག་པར་འདོད་
པའོ། །འཁོར་བའི་རྒྱ་མཚོའི་སྐྱོན་རྣམས་ཡོངས་སུ་མི་རྟོག་པར། །སྡུག་བསྔལ་གྱིས་དེ་སྡུག་བསྔལ་ཁོ་ན་རྗེས་སུ་ཚོལ། །འཆི་བས་སྐྱེ་དགུ་རྣམས་ཀྱིས་རྟག་པར་འཇིགས་པ་སྟེ། །འབད་པ་ཡིས་ནི་སླར་ཡང་རབ་ཏུ་འཇུག་པར་འདོད། །རབ་ཏུ་ཞུགས་པར་གྱུར་ན་ངེས་པར་འཆི་བ་སྟེ། །འདི་ཉིད་དུ་ནི་
གང་ལས་འཇིགས་པ་རྣམས་ལྷུང་ངོ་། །འདི་ཡི་དོན་དུ་གཅིག་རྣམས་ངལ་བར་རབ་འཇུག་ཅིང་། །གཞན་རྣམས་མཐོ་རིས་དོན་དུ་ངལ་བ་འཐོབ་པ་སྟེ། །བདེ་བའི་དོན་དུ་སྲེད་པའི་བཀྲེན་པ་དོན་མ་བྱས། །གསོན་པའི་འཇིག་རྟེན་ངེས་པར་དོན་མེད་ཉིད་དུ་ལྷུང་། །གང་ཞིག་དམན་པ་དོར་ནས་ཁྱད་འཕགས་

172-1-26a

འགྲོ་བ་ཅན། །འབད་པ་འདི་ནི་ངེས་པར་སྨད་པ་མ་ཡིན་ལ། །ཤེས་ལྡན་རྣམས་དང་མཉམ་པའི་ཡོངས་སུ་གདུང་བ་ཡིས། །བྱ་བ་མ་ཡིན་དེ་འདིར་སླར་ཡང་བྱེད་པའོ། །ལུས་ཀྱི་གཙེར་བས་གལ་ཏེ་འདིར་ནི་ཆོས་ཡིན་ན། །ལུས་ཀྱི་བདེ་བ་ཆོས་མ་ཡིན་པར་འགྱུར་བ་སྟེ། །ཕ་རོལ་
དུ་ནི་བདེ་བ་ཆོས་ཀྱིས་ཀྱང་འཐོབ་ལ། །དེ་ཕྱིར་འདི་ཡིས་ཆོས་ཀྱི་ཆོས་མིན་འབྲས་བུའོ། །གང་གི་ཕྱིར་ན་བསམས་པའི་དབང་གིས་ལུས་ཡིན་ལ། །རབ་ཏུ་འཇུག་པ་དང་ནི་ཟློག་པ་དག་ཀྱང་ངོ་། །དེ་ཕྱིར་སེམས་ཀྱི་དུལ་བ་ཉིད་ནི་རིག་པ་སྟེ། །སེམས་ལས་གཞན་པའི་ལུས་ནི་ཤིང་དང་མཉམ་པའོ། །བཟའ་བ་གཙང་
བས་གལ་ཏེ་བསོད་ནམས་འདོད་ན་ནི། །དེ་ཕྱིར་རི་དགས་རྣམས་ཀྱང་བསོད་ནམས་ཡོད་པ་སྟེ། །ཕྱི་རོལ་སྐྱེས་བུ་གང་དག་མས་ཀྱང་འབྲས་བུ་ལས། །བསྐལ་པའི་ཉེས་པས་དོན་རྣམས་གཞན་དུ་ཁ་བལྟས་སོ། །བསོད་ནམས་ཕྱིར་ནི་སྡུག་བསྔལ་མངོན་པར་མཚམས་སྦྱོར་ན། །འོ་ན་སྡུག་བསྔལ་མངོན་པར་
མཚམས་སྦྱོར་ཚད་མ་མིན། །དེ་ལྟར་གང་དག་ལས་ནི་རྣམ་པར་དག་པའི་ཕྱིར། །སྟེགས་ཞེས་རབ་ཏུ་ཞུགས་ཏེ་ཆུ་ལ་རེག་པར་བྱེད། །དེ་ཡང་དེ་ཡི་སྙིང་ལ་ཚིམ་པ་ཙམ་ཡིན་ཏེ། །ཆུ་ཡིས་སྡིག་པ་དག་པར་བྱེད་པ་མ་ཡིན་ཕྱིར། །ཡོན་ཏན་ལྡན་པས་རིག་པའི་ཆུ་ནི་གང་དང་གང་། །དེ་དང་དེ་ནི་ས་ལ་གལ་
ཏེ་སྟེགས་འདོད་ན། །ཆུ་ཡང་ཐེ་ཚོམ་མེད་པར་ཆུ་ཉིད་ཁོ་ན་སྟེ། །དེ་ཕྱིར་ཡོན་ཏན་ལྡན་རྣམས་ཁོ་ན་སྟེགས་སུ་གོ། །དེ་ལྟར་རིགས་པ་མང་པོ་ལྡན་པ་དེ་དང་དེ། །སྨྲས་ཏེ་རྣམ་པར་མཛེས་པའི་ཉི་མ་ནུབ་པར་གྱུར། །དེ་ནས་སྦྱིན་སྲེག་དུ་བས་ཁ་དོག་འགྱུར་བའི་ཤིང་། །དཀའ་ཐུབ་རབ་ཏུ་ཞི་བའི་ཁྲུས་སར་
རྣམ་པར་ཞུགས། །མངོན་པར་བཏོན་པའི་རབ་ཏུ་འབར་བའི་མེ་ཡིས་ཐལ་བ་ནི། །དབང་བསྐུར་བྱས་པའི་དྲང་སྲོང་སྐྱེ་བོས་ཁྱབ་པ་སྟེ། །བཟླས་བྱའི་དབྱངས་ཀྱིས་ཀུན་ནས་སྐད་སྒྲོགས་ལྷ་ཡི་ཚོགས། །ཆོས་ཀྱི་ལམ་གྱི་ལས་ཀྱི་མཐའ་བཞིན་རབ་ཏུ་ཞུགས་པའོ། །དེ་ནི་མཚན་མོ་ཐང་འགའ་མཚན་མོར་
བྱེད་འོད་ཀྱིས། །དཀའ་ཐུབ་རྣམས་ལ་ཡོངས་སུ་རྟོག་ཅིང་ཞུགས་གྱུར་ལ། །དཀའ་ཐུབ་ཐམས་ཅད་ཡོངས་སུ་བརྟགས་ཤིང་མཁྱེན་གྱུར་ན། །དཀའ་ཐུབ་ཞིང་གི་ཐང་དེ་ལས་ནི་གཤེགས་པར་གྱུར། །དེའི་གཟུགས་བདག་ཉིད་ཆེན་པོར་སོང་བའི་ཡིད་རྣམས་ཀྱིས། །དཀའ་ཐུབ་གནས་ལྡན་རྣམས་ནི་དེ་ནས་དེ་

172-1-26b

རྗེས་གཤེགས། །འཕགས་མིན་སྡིག་པ་རྣམས་ཀྱིས་ཟིལ་ནོན་ཡུལ་ལས་ནི། །དྲང་སྲོང་ཆེན་པོ་རྣམས་ནི་ཆོས་བཞིན་ཕ་རོལ་གཤེགས། །དེ་ནས་རལ་པ་ཤིང་ཤུན་ཟུར་ཕུད་ཀྱིས་རོལ་བའི། །དཀའ་ཐུབ་ནོར་དང་ལྡན་པ་དེ་རྣམས་དེས་གཟིགས་ཤིང་། །དེ་དག་རྣམས་ཀྱིས་དཀའ་ཐུབ་རྣམས་
ལ་རྗེས་བརྟེན་ཏེ། །དཔལ་དང་ལྡན་ལ་དགེ་བའི་ཤིང་གི་རྩ་བར་གནས། །དེ་ནས་དཀའ་ཐུབ་གནས་ལྡན་རྣམས་ནི་ཉེར་འོངས་ནས། །མི་མཆོག་དེ་ལ་ཡོངས་སུ་བསྐོར་ནས་གནས་གྱུར་ལ། །དེ་དག་རྣམས་ཀྱི་རྒྱན་པོས་མཆོད་མ་སྔོན་བཏང་སྟེ། །དུས་ཀྱི་ཞི་བས་ཚིག་འདི་རབ་ཏུ་འདི་སྨྲས་སོ། །ཁྱོད་
ཀྱིས་བྱོན་ཚེ་གདུང་གནས་གང་བ་བཞིན་གྱུར་ལ། །རབ་ཏུ་གཤེགས་ཚེ་སྟོང་པ་བཞིན་དུ་རབ་ཏུ་ཐོབ། །དེ་ཕྱིར་བརྩེ་བ་འདི་ནི་འབོར་བར་འོས་མིན་ཏེ། །འཚོ་བར་འདོད་པའི་ཕངས་པའི་ཚེ་ཡིས་ལུས་བཞིན་ནོ། །ལྷ་ཡི་དྲང་སྲོང་ཚངས་པའི་དྲང་སྲོང་རྒྱལ་པོ་ཡིས། །དྲང་སྲོང་གིས་བསྙེན་བསོད་ནམས་ཉེ་བར་གང་
ལྡན་རི། །དཀའ་ཐུབ་ནོར་ལྡན་རྣམས་ཀྱི་དཀའ་ཐུབ་དེ་རྣམས་ནི། །གང་གི་ཉེ་ལོགས་དག་ནས་མང་པོར་འགྱུར་བའོ། །དེ་བཞིན་ཀུན་ནས་བསོད་ནམས་དག་གི་སྟེགས་གྱུར་ལ། །ནམ་མཁའི་འོག་གི་ཐེམ་སྐས་དག་ཏུ་གྱུར་པ་སྟེ། །ལྷ་ཡི་དྲང་སྲོང་རྣམས་དང་དྲང་སྲོང་ཆེན་པོ་ནི། །ཆོས་ཀྱི་བདག་ཉིད་བདག་ཉིད་
ཆེན་པོ་རྣམས་ཀྱིས་བསྙེན། །འདི་ནས་སླར་ཡང་ཁྱད་འཕགས་ཆོས་ཀྱི་ཆེད་ལས་ནི། །བྱང་གི་ཕྱོགས་ཉིད་ཁོ་ནར་བསྙེན་པར་ནུས་པ་སྟེ། །བློ་དང་ལྡན་པས་གོམ་པ་གཅིག་ཏུ་གྱུར་པ་ཡང་། །ལྷོ་ཡི་ཕྱོགས་སུ་འགྲོ་བར་ནུས་པ་མ་ཡིན་ནོ། །དཀའ་ཐུབ་ནགས་འདིར་ཇི་སྟེ་བྱ་བ་ངན་པ་འམ། །བསྲེ་མའི་
ཆོས་སམ་ལྟུང་བ་མིན་ནམ་མི་གཙང་བར། །ཁྱེད་ཀྱིས་མཐོང་སྟེ་གང་གིས་ཁྱེད་འདི་བཞུགས་འདོད་མིན། །དེ་ནི་གསུང་ལ་རེ་ཞིག་སྲེད་པར་བཞུགས་མཛོད་ཅིག །དཀའ་ཐུབ་གཏེར་དང་རབ་ཏུ་མཚུངས་པར་གྱུར་པ་ལ། །འདི་རྣམས་ཀྱིས་ནི་དཀའ་ཐུབ་གྲོགས་སུ་འདོད་པ་སྟེ། །དབང་པོ་དང་མཉམ་ཁྱེད་དང་
ལྷན་ཅིག་གནས་པ་ནི། །ཕུར་བུ་ཡི་ཡང་མངོན་པར་མཐོ་བ་འདྲེན་པ་ཡིན། །དཀའ་ཐུབ་ལྡན་པའི་གཙོ་བོས་དེ་སྐད་ཅེས་སྨྲས་ཏེ། །སྲིད་པ་རབ་ཏུ་ཉམས་ཕྱིར་དམ་བཅའ་བྱས་པ་ཡིས། །མཁས་པའི་གཙོ་བོ་དེས་ནི་དཀའ་ཐུབ་ལྡན་དབུས་སུ། །ནང་དུ་སོང་བའི་རང་བཞིན་སྨྲས་པར་གྱུར་པའོ། །འགྲོན་

172-1-27a

ལ་སྡུག་ཅིང་རང་གི་སྐྱེ་བོ་དང་མཚུངས་པའི། །དྲང་པོའི་བདག་ཉིད་ཆོས་འཛིན་ཐུབ་པ་རྣམས་ཀྱིས་ནི། །བདག་ལ་རྣམ་པ་དེ་ལྟར་བསམ་པ་སྐྱེས་པ་ཡིས། །བདག་གི་དགའ་བ་མཆོག་དང་བཀུར་སྟི་སྐྱེས་པར་གྱུར། །མདོར་བསྡུས་གྱུར་ན་བརྩེ་ཞིང་བསྙེན་པ་འདི་རྣམས་དག །སྙིང་ལ་
སོང་བའི་ངག་རྣམས་ངག་གིས་ཁྲུས་བྱས་བཞིན། །ཀུན་ནས་འཛིན་མེད་ཆོས་ཅན་བདག་གི་དགའ་བ་ནི། །དེ་རིང་སླར་ཡང་ཅུང་ཞིག་གཡོས་པར་གྱུར་པ་ཉིད། །དེ་ལྟར་རབ་ཏུ་ཞུགས་པའི་ཁྱེད་ཅག་སྐྱབས་འོས་རྣམས། །ཤིན་ཏུ་ཕྱོགས་སུ་ལྷུང་བ་ཡང་དག་བསྟན་པ་རྣམས། །བོར་ནས་འགྲོ་ཞེས་ཁོ་
བོ་ཡི་ཡང་སྡུག་བསྔལ་ཏེ། །ཇི་ལྟར་གཉེན་འདུན་རྣམས་ནི་སྤངས་པ་དེ་ལྟར་རོ། །ཁྱེད་ཅག་རྣམས་ཀྱི་ཆོས་འདི་མཐོ་རིས་ཆེད་དུ་སྟེ། །བདག་གི་མངོན་པར་མཐོ་བར་ཡང་སྲིད་མ་ཡིན་ཕྱིར། །ནགས་དེར་གང་གི་བདག་ནི་སྡོད་འདོད་མ་ཡིན་ཏེ། །ཆོས་ལས་ལྡོག་པ་རབ་ཏུ་འཇུག་པ་ཐ་དད་ཕྱིར། །
དེ་ཕྱིར་ནགས་འདི་དག་ན་གང་གིས་ཡོངས་འགྲོ་བ། །བདག་གི་མ་དགའ་མ་ཡིན་ཕ་རོལ་སྤྱོད་ལོག་མིན། །སྔོན་གྱི་དུས་ན་རྗེས་མཐུན་ཆོས་ལ་གནས་པ་ཡི། །དྲང་སྲོང་ཆེན་པོ་ཐམས་ཅད་རྣམས་དང་མཚུངས་པར་གྱུར། །དེ་ནས་དོན་དང་ལྡན་ལ་བདེ་ཞིང་ཡིད་དུ་འོང་། །ལེགས་མཐུན་མདངས་དང་ལྡན་
ལ་སྙིང་པོ་དང་ལྡན་པ། །གཞོན་ནུའི་ཚིག་ནི་དཀའ་ཐུབ་ལྡན་པ་དེ་རྣམས་ཀྱིས། །ཐོས་ནས་ཁྱད་འཕགས་དང་ལྡན་བཀུར་སྟི་མང་པོས་གཤེགས། །དེ་ནས་གཉིས་སྐྱེས་ཐལ་བ་ལ་ཉལ་ཁ་ཅིག་ནི། །ལུས་རིང་གཙུག་ཏོར་དང་ལྡན་ཤིང་ཤུན་གོས་གྱོན་ཞིང་། །མིག་ནི་ཅུང་ཟད་དམར་སེར་སྣ་ནི་ཕྲ་ལ་
རིངས། །ལག་གཅིག་སྤྱི་བླུགས་ལྡན་པས་ཚིག་འདི་སྨྲས་པའོ། །ཁྱོད་ཀྱིས་ངེས་པ་ཉིད་དུ་རྒྱ་ཆེན་བློ་ལྡན་ཞིང་། །གཞོན་ནུ་ཁྱེད་ཀྱི་སྐྱེ་བ་ལ་ནི་ཉེས་པ་གཟིགས། །མཐོ་རིས་དང་ནི་ཉེས་པ་ཡང་དག་རྣམ་སྤྱོད་ཕྱིར། །ཐར་པ་གང་གི་བློ་གྲོས་ཡོད་པ་དེ་ཡིན་ནོ། །མཆོད་སྦྱིན་དཀའ་ཐུབ་ངེས་པ་དེ་དང་དེ་
རྣམས་ཀྱིས། །ཆགས་པ་དང་ལྡན་མཐོ་རིས་ལ་ནི་འགྲོ་བར་འདོད། །དགྲ་བོ་བཞིན་དུ་ཆགས་དང་ལྷན་ཅིག་གཡུལ་སྤྲད་ནས། །སེམས་པ་རང་ལྡན་ཐར་པ་རུ་ནི་འགྲོ་བར་འདོད། །དེ་ཕྱིར་གལ་ཏེ་ཁྱོད་ཀྱི་བློ་གྲོས་འདི་ངེས་ན། །སྐྱེན་པར་ཁྱེད་ཉིད་འབིགས་བྱེད་ཕུག་པར་གཤེགས་མཛོད་

172-1-27b

ཅིག །གང་ཞིག་མཐར་ཐུག་ངེས་པར་ལེགས་པ་ཐོབ་པའི་མིག །ཐུབ་པ་འདི་ནི་དེ་རུ་མཚན་མོ་མིན་པར་གནས། །དེ་ཕྱིར་ཁྱོད་ཀྱིས་དེ་ཉིད་ལམ་ནི་ཐོབ་འགྱུར་ལ། །སྲེད་པར་གྱུར་ན་ཡང་དག་རབ་ཏུ་ཐོབ་པར་འགྱུར། །བདག་གི་མཐོང་བ་ཇི་ལྟར་བློ་གྲོས་དེ་དེ་ལྟར། །དེ་ཉིད་ཀྱི་ཡང་བློ་གྲོས་བོར་
ནས་འགྲོ་བར་འགྱུར། །གསལ་ཞིང་མཐོ་བའི་ཤངས་དང་རྣམ་རྒྱས་ཡངས་པའི་སྤྱན། །ཟངས་མདོག་ཡ་མཆུ་མ་མཆུ་རྣོ་དཀར་མཆེ་བ་ཅན། །ལྗགས་ནི་དམར་ཞིང་ཕྲ་བའི་ཞལ་དང་ལྡན་པ་འདི། །ཤེས་བྱའི་རྒྱ་མཚོ་མཐའ་དག་ལ་ནི་འགྲོ་བ་ཉིད། །ཁྱོད་ཀྱི་ཟབ་པ་དང་ནི་གཏིང་དཔག་དཀའ་གང་
དང་། །གང་ཞིག་སྒྲོན་མ་ཉིད་དང་མཚན་རྣམས་གང་ཡིན་པས། །སྔོན་གྱི་བསྐལ་པར་དྲང་སྲོང་གིས་ཀྱང་མ་མཐོང་བའི། །སློབ་དཔོན་ཉིད་དེ་ས་ལ་མངོན་པར་དགའ་ནས་གཤེགས། །དཀའ་ཐུབ་ལྡན་པ་དེ་རྣམས་ཀྱིས་ཀྱང་དེ་ལ་ཡང་། །ཆོ་ག་བཞིན་རྗེས་བྱས་ནས་དཀའ་ཐུབ་ནགས་དེར་
གཤེགས། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། །དཀའ་ཐུབ་ཀྱི་ནགས་སུ་ཞུགས་པའི་ལེའུ་སྟེ་བདུན་པའོ།།      །།དེ་ནས་མགྱོགས་འགྲོ་སྤྱོད་དེ་ཡིད་མི་བདེ་གྱུར་ཏེ། །དེ་ལྟར་ཇོ་བོ་ནགས་སུ་ང་མེད་པར་གཤེགས་ལ། །ལམ་དུ་མྱ་ངན་མེད་པ་འབད་
པ་བྱས་གྱུར་ཏེ། །དེ་ལྟ་ན་ཡང་དེ་ཡི་མཆི་མ་ཁོགས་མ་གྱུར། །གང་ལ་ཇོ་བོའི་བཀའ་ལ་མཚན་མོ་གཅིག་གིས་ནི། །མགྱོགས་འགྲོ་དེ་དང་གཤེགས་པར་གྱུར་པའི་ལམ། །ལམ་དེ་ཉིད་ལ་འགྲོ་ཞག་དག་ནི་བརྒྱད་རྣམས་ཀྱིས། །ཇོ་བོ་ཉིད་དང་བྲལ་བ་དེ་ཡིས་སེམས་ཤིང་འོངས། །འཐོན་པ་མེད་པས་རྒྱགས་
པ་མེད་པར་གྱུར་པ་ཡིས། །བསྔགས་ལྡན་མགྱོགས་འགྲོ་ཉིད་ཀྱང་མདངས་མེད་རྒྱུ་བ་སྟེ། །དེ་ལྟར་རྒྱན་དེ་རྣམས་ཀྱིས་བརྒྱན་པར་བྱས་ན་ཡང་། །དེ་ཡིས་དོར་བས་དཔལ་ནི་སོང་བ་བཞིན་དུ་གྱུར། །ཕྱིར་ལོག་ནས་ཀྱང་དཀའ་ཐུབ་ནགས་སུ་མངོན་ཕྱོགས་ཏེ། །སྙིང་རྗེ་བར་ནི་ཡང་དང་ཡང་དུ་དྲག་ཏུ་འཚེར། །
ལམ་ན་ལྟོགས་པ་ལྡན་པ་ཡིན་ཡང་བྲུ་དང་ཆུ། །ཇི་ལྟར་སྔོན་བཞིན་མངོན་པར་མ་དགའ་མ་བསླངས་སོ། །དེ་ནས་འགྲོ་ལ་ཕན་པའི་བདག་ཉིད་བདག་ཉིད་ཆེན་པོ་དེས། །སེར་སྐྱ་ཞེས་བྱའི་གྲོང་ཁྱེར་རྣམ་པར་དམན་པ་ལ། །ཉིན་མོར་བྱེད་པས་བོར་བའི་ནམ་མཁའ་འབྲས་མེད་བཞིན། །རིམ་གྱིས་དེ་གཉིས་

172-1-28a

སྟོང་པ་བཞིན་དུ་ཉེ་བར་སོང་། །པདྨ་དཀར་པོ་དང་བཅས་ཆུ་ཡིས་མཛེས་གྱུར་ཞིང་། །མེ་ཏོག་འཛིན་པའི་ཤིང་རྣམས་ཀྱིས་ནི་བརྒྱན་པ་ཡང་། །གྲོང་ཁྱེར་པ་རྣམས་རབ་ཏུ་དགའ་བ་སོང་གྱུར་ཏེ། །དེ་ཡི་ཉེ་བའི་ནགས་དེ་ནགས་ལྟར་མཛེས་མ་གྱུར། །དེ་ལྟར་ལྟ་བྱེད་མཆི་མས་བཅོམ་པའི་
མི་རྣམས་ནི། །རབ་ཏུ་འབར་མིན་ཞན་པའི་ཡིད་ཀྱིས་ཕྱོགས་སུ་སྐོར། །འོང་དུ་མི་སྟེར་བ་བཞིན་གཉིས་པོ་དེ་གྲོང་དུ། །དལ་བུས་ལོག་པའི་ཁྲུས་བཞིན་མངོན་པར་སོང་བར་གྱུར། །ཤཱཀྱའི་རིགས་ཀྱི་དྲང་སྲོང་དང་བྲལ་འོངས་པ་ཡིས། །ལུས་ཟགས་འགྲོས་དང་ལྡན་པ་དེ་གཉིས་མཐོང་ནས་ཀྱང་། །
སྔོན་ཚེ་ཤིང་རྟ་བཅུ་པའི་ཤིང་རྟ་འོངས་པ་བཞིན། །གྲོང་ཁྱེར་སྐྱེ་བོ་རྣམས་ནི་ལམ་དུ་མཆི་མ་ཕྱུང་། །དེ་ནས་མྱ་ངན་ཉེ་བར་ལྡན་པའི་སྐྱེ་བོ་དག །མཆི་མ་ཕྱུང་བ་རྣམས་ཀྱིས་འདུན་པ་ལ་སྨྲས་པ། །གྲོང་ཁྱེར་ཡུལ་འཁོར་དགའ་མཛད་རྒྱལ་པོའི་སྲས་པོ་དེ། །ཁྱེད་ཀྱིས་གང་དུ་བོར་ཞེས་རྒྱབ་ནས་རྗེས་སུ་
འགྲོ། །དེ་ནས་གུས་ལྡན་སྐྱེ་བོ་དེ་ལ་དེས་སྨྲས་པ། །མི་དབང་སྲས་པོ་བདག་གིས་ཡོངས་སུ་བོར་བ་མིན། །ངུ་བཞིན་སྐྱེ་བོ་མེད་པའི་ནགས་སུ་ཁོ་བོ་དང་། །ཁྱིམ་བདག་ཆ་ལུགས་དག་ཀྱང་དེ་ཡིས་རྣམ་པར་སྤངས། །དེ་ཡི་ཚིག་ནི་སྐྱེ་བོ་དེ་རྣམས་ཀྱིས་ཐོས་ནས། །ངེས་པར་ཤིན་ཏུ་དཀའ་བ་ཉིད་
ཅེས་ངེས་པར་སོང་གྱུར་ལ། །འགྱེལ་ཞིང་མིག་སྐྱེས་ཆུ་ནི་རྣམ་པར་འཐོར་བ་སྟེ། །ཡིད་ལ་སྨོད་ཅིང་བདག་ཉིད་ཀྱིས་ནི་འབྲས་བུ་ལོང་། །དེ་ནས་སྨྲས་པ་གཉིས་སྐྱེས་རྒྱལ་པོའི་ཤུགས་མངའ་སྟེ། །གང་དུ་གཤེགས་པའི་ནགས་དེར་དི་རིང་ཞུགས་པར་བགྱི། །ལུས་ཅན་དབང་པོ་མ་ཚང་རྣམས་
ཀྱི་ཇི་ལྟ་བར། །དེ་དག་བྲལ་བས་བདག་ཅག་འཚེ་བར་འདོད་པ་མེད། །དེ་དང་བྲལ་བའི་གྲོང་ཁྱེར་འདི་ནི་ནགས་ཡིན་ལ། །དེ་དང་ཡང་དག་ལྡན་པའི་ནགས་དེ་གྲོང་ཁྱེར་ཡིན། །ལྷ་ནི་ལྷ་མིན་གསོད་ཚེ་བརྒྱ་བྱིན་གྱིས་ཇི་ལྟར། །དེ་དག་བྲལ་བས་བདག་གི་གྲོང་ཁྱེར་མཛེས་མ་གྱུར། །དེ་
ནས་སླར་ཡང་གཞོན་ནུ་ཕྱིར་ལ་ལོག་ཅེས་ཏེ། །ཡན་ལག་མ་རྣམས་སྐར་ཁུང་ཕྲེང་རྣམས་རབ་ཐོབ་སྟེ། །མགྱོགས་འགྲོའི་རྒྱབ་ནི་རྣམ་པར་དབེན་པ་མཐོང་གྱུར་ནས། །སླར་ཡང་སྐར་ཁུང་རྣམས་ནི་རྣམ་པར་བཀག་ནས་ངུ་། །བརྟུལ་ཞུགས་དང་ནི་མྱ་ངན་ངག་གིས་ཡིད་དུབ་ཅིང་། །བརྟུལ་ཞུགས་ལ་རབ་ཞུགས་

172-1-28b

པས་སྲས་པོ་ཉེར་ཐོབ་ཕྱིར། །བཟླས་བྱས་ཤིང་གི་ལྷ་ཡི་ཁང་པར་མི་བདག་གིས། །བསམ་པ་ཇི་ལྟར་བྱ་བ་དེ་དང་དེ་རྣམས་བྱས། །དེ་ནས་མིག་དག་མཆི་མས་རབ་ཏུ་གང་བ་དེས། །མགྱོགས་འགྲོ་བླངས་ནས་མགྱོགས་འགྲོ་རྗེས་སུ་འགྲོ་བ་སྟེ། །གཡུལ་འགྱེད་པ་ན་དགྲ་བོས་ཇོ་བོ་ཁྱེར་བ་ལྟར། །མྱ་ངན་དག་གིས་
མངོན་བཅོམ་མི་སྐྱོང་ཁང་པར་ཞུགས། །མི་དབང་རྒྱལ་པོའི་ཁབ་ཏུ་རྣམ་པར་ཞུགས་པ་ན། །རྣམ་པར་བལྟ་ཞིང་མིག་དག་མཆི་མ་འབབ་པ་ཡིས། །སྐྱེ་བོ་ལ་ནི་སྡུག་བསྔལ་རབ་ཏུ་རྟོགས་འཇུག་བཞིན། །བསྔགས་ལྡན་མགྱོགས་འགྲོ་གསལ་བའི་དབྱངས་ཀྱིས་ངུས་པར་གྱུར། །དེ་ནས་ཁང་པའི་དབུས་ན་སྤྱོད་པའི་བྱ་
རྣམས་དང་། །ཉེ་བར་བརྟགས་པའི་མགྱོགས་འགྲོ་དམ་པར་བྱེད་རྣམས་ཀྱིས། །མི་དབང་སྲས་པོ་ལོག་པར་གཤེགས་ལ་ཐེ་ཚོམ་སྟེ། །མགྱོགས་འགྲོ་དེ་ཡི་དབྱངས་ལ་སོ་སོར་རམ་འདེགས་བྱས། །ཇི་ལྟར་བསྔགས་ལྡན་མགྱོགས་འགྲོ་འཚེར་བར་བྱེད་པ་སྟེ། །ངེས་པར་གཞོན་ནུ་ཁབ་ཏུ་རྣམ་པར་ཞུགས་སྙམ་
སྟེ། །དགའ་བ་ཕུལ་དུ་བྱུང་བས་བསླུས་པའི་སྐྱེ་བོ་རྣམས། །སྐྱེ་བོའི་བདག་པོའི་བཙུན་མོའི་འཁོར་གྱི་ཉེ་ལོགས་སོང་། །ཤིན་ཏུ་དགའ་བ་ལས་ནི་མྱ་ངན་གྱིས་བརྒྱལ་རྣམས། །གཞོན་ནུ་བལྟ་བ་ལ་ནི་གཡོ་བའི་སྤྱན་མ་རྣམས། །སྟོན་ཀའི་ཆུ་གཏེར་སྤྲིན་ལས་གློག་ནི་གཡོ་བ་བཞིན། །བུད་མེད་རྣམས་ནི་སྲེད་
པས་ཁྱིམ་ནས་ཕྱིར་ལ་འཐོན། །ལན་བུ་རྣམ་པར་འཕྱང་ཞིང་དར་གོས་དྲི་མ་ཅན། །མིག་རྩི་དང་བྲལ་མཆི་མས་མིག་བཅོམ་གདོང་རྣམས་ཀྱིས། །མཚན་མོ་ཟད་ཚེ་སྐྱ་རེངས་ཀྱིས་མཁར་སྐར་མ་བཞིན། །བྱི་དོར་དང་བྲལ་བུད་མེད་རིད་རྣམས་མཛེས་མ་གྱུར། །རྐང་པ་རྐང་གདུབ་དང་བྲལ་ཟངས་མདོག་མ་
ཆགས་རྣམས། །གདོང་པ་རྣ་ལུང་དང་བྲལ་མགྲིན་པ་དྲང་པོ་རྣམས། །རང་བཞིན་གྱིས་རྒྱས་བརླ་ནི་འོག་ཕབ་དང་བྲལ་རྣམས། །ནུ་མ་དོ་ཤལ་དང་བྲལ་སྟོད་གཡོགས་ཚད་རྣམས་སོ། །རྟེན་དང་བྲལ་བའི་འདུན་པ་དང་ནི་མགྱོགས་འགྲོ་ཉིད། །མིག་ནི་མཆི་མ་དང་ལྡན་དེ་རྣམས་ཀྱིས་མཐོང་ནས། །ནགས་མཐར་ཁྱུ་
མཆོག་དང་བྲལ་བ་གླང་རྣམས་བཞིན་དུ། །སེམས་ཁྲལ་གདོང་ལྡན་ཡན་ལག་མཆོག་མ་རྣམས་ནི་ངུས། །དེ་ནས་རྒྱལ་པོའི་བཙུན་མོ་མཆི་མ་དང་བཅས་པར། །བེའུ་ཉམས་པའི་མ་ཧེ་མོ་ལྟར་མཉེས་གཤིན་མ། །གསེར་གྱི་ཆུ་ཤིང་ལོ་འདབ་རྣམ་པར་གཡོ་བ་བཞིན། །གཽ་ཏམ་མས་ནི་ལག་པ་བཟུང་ནས་འགྱེལ། །

172-1-29a

དཔུང་པ་ལག་པ་མཉམ་ཞིང་གཟི་བརྗིད་བཅོམ་པ་ཡིས། །བུད་མེད་གཞན་རྣམས་ཡིད་མི་བདེ་བས་སེམས་མེད་བཞིན། །མཆི་མ་མ་བཏོན་འོ་དོད་འབོད་མིན་དབུགས་མེད་པར། །གཡོ་བྲལ་རི་མོ་བྲིས་པ་བཞིན་དུ་གནས་པར་གྱུར། །བརྟན་མིན་བདག་པོའི་མྱ་ངན་གྱིས་བརྒྱལ་
བུད་མེད་གཞན། །རྣམ་པར་ལྟ་བྱེད་ནས་འབབ་རྒྱུན་གྱི་གདོང་རྣམས་ཀྱིས། །ས་འཛིན་རི་བོ་ནས་འབབ་རྒྱུན་གྱི་རྡོ་བ་ལྟར། །ཙནྡན་རབ་བསྐུས་ནུ་མ་རྣམས་ལ་རྣམ་པར་འཐོར། །དེ་རྣམས་ཀྱིས་ནི་མིག་ཆུས་བཏབ་པའི་གདོན་རྣམས་ཀྱིས། །རྒྱལ་པོའི་ཁབ་དེ་དེ་ཚེ་མཛེས་པར་གྱུར་པ་ནི། །
ཆུ་གསར་དུས་ན་ཆུ་གཏེར་ཆར་གྱིས་བཏབ་པ་ཡི། །ཆུ་འཛིན་པདྨ་རྣམས་ཀྱིས་རྫིང་བུ་ཇི་ལྟར་རོ། །རྒྱས་ཤིང་བར་མེད་ལེགས་པར་ཟླུམ་པའི་སོར་མོ་ཅན། །རྒྱན་བྲལ་རྩ་མི་མངོན་པའི་ཡན་ལག་མཆོག་མ་རྣམས། །རླུང་གིས་གཡོས་པའི་ལྗོན་ཤིང་རང་གི་འདབ་མས་ལྟར། །པདྨ་ལྟ་བུའི་ལག་
པ་རྣམས་ཀྱིས་བྲང་རྣམས་བརྡུངས། །ནགས་རླུང་གིས་སྒུལ་པདྨ་ལྟ་བུར་གཡོས་པ་ཡིས། །ངང་པ་རྣམས་ཀྱི་འཁྲིགས་པ་རྣམས་ཀྱིས་ཆུ་ཀླུང་ལྟར། །བྲང་བརྡུངས་རབ་བསྐྱོད་འབྲེལ་མཐོའི་ནུ་མ་རྣམས་ཀྱིས་ནི། །དེ་ལྟ་ན་ཡང་མི་མོ་དེ་རྣམས་མཛེས་པར་གྱུར། །ཇི་ལྟར་བྲང་རྣམས་ལ་ནི་ལག་
པས་ཟུག་བྱས་པ། །དེ་ལྟར་ལག་པ་རྣམས་ལ་བྲང་ནི་ཟུག་བྱེད་ཅིང་། །ལེ་ལོ་ཅན་མ་བརྩེ་མེད་སྟོབས་མེད་མ་ཡིས་དེར། །ལག་པའི་རྩེ་དང་བྲང་རྣམས་ཕན་ཚུན་ཟུག་བྱས་སོ། །དེ་ནས་ཁྲོས་པས་རབ་ཏུ་དམར་བའི་སྤྱན་ལྡན་མ། །སེམས་ཁྲལ་གྱིས་སྦྲེལ་མགྲིན་པ་ཁ་ཞིང་ལྡབ་ལྡིབ་དང་། །ཤུགས་རིང་ཕྱུང་
བས་འོ་མ་འཛིན་གཡོ་བརྟན་པ་ཡི། །མྱ་ངན་མཆི་མ་འཛིན་པའི་གྲགས་འཛིན་མས་སྨྲས་པ། །མཚན་མོ་གཉིད་ལོག་དབང་མེད་བདག་ནི་རྣམ་སྤངས་ནས། །འདུན་པ་འདོད་པའི་ཤིང་རྟ་དེ་ནི་གང་དུ་ཐལ། །གསུམ་པོ་མཉམ་དུ་སོང་ལ་ཁྱོད་དང་བསྔགས་ལྡན་ནི། །ཉེ་བར་འོངས་པས་ཁོ་མོའི་ཡིད་ནི་གཡོས་པར་གྱུར། །ཁོ་
མོ་འཕགས་མིན་བརྩེ་མིན་བཤེས་མ་ཡིན་པའི་ལས། །ཕུལ་བྱུང་དེ་འདིར་བྱས་ནས་ད་ནི་ཅི་ལ་ངུ་། །མཆི་མ་མ་འདོན་ཁྱོད་ཀྱི་སེམས་ནི་སིམ་པར་འགྱུར། །ཁྱོད་ཀྱི་མཆི་མ་དང་ནི་ལས་དེ་གཏམ་མ་ཡིན། །དགའ་དང་དབང་དུ་སོང་དང་ཕན་དང་ལེགས་པ་དང་། །ཅི་ལྟ་བ་བཞིན་དོན་བྱེད་ཁྱོད་ཉིད་དང་འགྲོགས་ཤིང་། །

172-1-29b

སླར་མི་ལྡོག་པའི་ཆེད་དུ་ཇོ་བོ་སྲས་པོ་ཐལ། །ཁྱོད་ཀྱིས་ང་ལ་འབྲས་བཅས་སེམས་ནི་དགའ་བར་གྱིས། །མི་ཡི་དབང་པོའི་དགྲ་བོ་དག་ནི་མཆོག་ཡིན་ལ། །སྦྱོར་མིན་ལ་མཁས་ཤེས་རབ་མེད་པའི་བཤེས་མཆོག་མིན། །ངེས་པར་མཛའ་བཤེས་རྣམ་པར་མི་མཁས་ཁྱོད་ཀྱིས་ནི། །འདི་ཡི་རིགས་ཀྱི་ཉེ་བར་ནུབ་པ་
ཆེན་པོ་བྱས། །རབ་ཆགས་དྲི་མས་འདྲེས་ཤིང་དམར་བའི་མིག་ཅན་མ། །ཀུན་ནས་རྒྱན་དང་བྲལ་བ་འདི་རྣམས་མྱ་ངན་བྱེད། །གངས་ལྡན་རི་བོ་དང་མཉམ་བདག་པོ་གསན་ན་ཡང་། །བུད་མེད་རྣམས་ནི་ཡུགས་ས་མོ་བཞིན་མཛེས་པ་ཉམས། །འདི་དག་རྣམས་ཀྱང་བྱ་འདབ་ལག་པ་རྣམ་བསྐྱོད་ཅིང་། །
རྟག་པར་ཕུག་རོན་རྣམས་ཀྱི་རིང་བའི་སྐད་རྣམས་ནི། །དེ་དང་བྲལ་བས་འབྲས་མེད་ཕོ་བྲང་འཁོར་དང་བཅས། །གཞལ་མེད་ཁང་པའི་གཙང་རྣམས་ཤིན་ཏུ་ངུ་བ་འདྲ། །སྐྱེ་བོ་འདི་ནི་ཀུན་ནས་དོན་མེད་འདོད་པ་སྟེ། །བསྔགས་ལྡན་མགྱོགས་འགྲོ་དེ་ཡང་ངེས་པ་ཉིད་དུའོ། །མཚན་མོ་སྐྱེ་བོ་གཉིད་ཆེ་རྐུན་པོས་རིན་ཆེན་
བཞིན། །བདག་གི་འདི་ལྟར་འདི་ནས་ནོར་རྫས་ཐམས་ཅད་སྟོར། །མགྱོགས་འགྲོ་འདིས་ནི་མདའ་ཡི་རྨ་སྲོལ་བྱུང་རྣམས་ཀྱང་། །སྲོན་པར་ནུས་ཞེས་གྲགས་ན་ལྕགས་རྣམས་སྨོས་ཅི་དགོས། །བདག་གི་སྙིང་དང་འདྲ་བའི་དཔལ་ནི་བླངས་གྱུར་ནས། །འདིས་ནི་ལྕགས་ལྷུང་འཇིགས་ལས་སོང་བ་ཡིན་ནམ་
ཅི། །མི་དབང་ཕོ་བྲང་ཡོངས་སུ་གང་བ་བཞིན་དུ་ནི། །འཕགས་པ་མིན་ལས་ད་ལྟ་དྲག་ཏུ་འཚེར་བར་བྱེད། །གང་གི་ཚེ་ན་བདག་གི་དགའ་བ་ཕྱི་རོལ་གཤེགས། །དེ་ཡི་ཚེ་ན་མགྱོགས་འགྲོ་ལྐུགས་པ་ཐང་ཆད་གྱུར། །གལ་ཏེ་སྐྱེ་བོ་དག་ལ་གོ་བར་འཚེར་བྱེད་དམ། །ཡང་ན་རྨིག་པས་ས་
ལ་རྨིག་པའི་སྒྲ་བྱེད་དམ། །ཡང་ན་འགྲམ་པའི་སྒྲ་ནི་མཆོག་ཏུ་བསྐྱོད་ན་ནི། །བདག་ལ་སྡུག་བསྔལ་འདི་འདྲ་འབྱུང་བ་མ་ཡིན་ནོ། །དེ་ལྟར་འདིར་ནི་ལྷ་མོའི་སྨྲེ་སྔགས་ལ་བརྟེན་ཞིང་། །མཆི་མས་འདུད་པ་ཡི་གེའི་ཚིག་དག་ཐོས་གྱུར་ནས། །འོག་ཏུ་གདོང་ཕྱོགས་མཆི་མ་དང་བཅས་ཐལ་སྦྱར་ཏེ། །
འདུན་པས་ལན་འདི་དལ་བུས་སྨྲས་པར་གྱུར་པའོ། །ལྷ་མོ་བསྔགས་ལྡན་ལ་ནི་སྨོད་པར་འོས་མིན་ཞིང་། །ཁོ་བོ་ལ་ཡང་ཁྲོ་བར་མཛད་པ་འོས་མ་ཡིན། །ཁོ་བོ་ཅག་གི་སྐྱོན་མིན་ལྷ་མོ་མཁྱེན་པར་མཛོད། །མི་ཡི་ལྷ་དེ་ལྷ་བཞིན་བཀྲ་ཤིས་ཀུན་གྱིས་གཤེགས། །བདག་གིས་རྒྱལ་པོའི་བརྟན་པ་

172-1-30a

ཤེས་པ་ཡིན་ན་ཡང་། །ལྷ་ཉིད་གང་དག་གིས་ནི་སྟོབས་ལས་བྱས་པ་བཞིན། །བདག་གིས་མགྱོགས་འགྲོ་འདི་ནི་ཉེ་བར་འོངས་པ་དེ། །ལམ་ན་ངལ་བ་མེད་པར་དེ་ལྟར་རྗེས་སུ་སོང་། །མགྱོགས་འགྲོ་མཆོག་འདི་ཉིད་ཀྱང་གཤེགས་ཚེ་ས་ལ་ནི། །བར་སྣང་དག་ལ་
བཟུང་བཞིན་རྨིག་པས་མ་རེག་ཅིང་། །དེ་བཞིན་ལྷ་ཡི་ཆེད་དུ་གདོང་ནི་སྔོགས་བྱས་བཞིན། །འགྲམ་པའི་སྒྲ་ནི་བྱས་མིན་འཚེར་བ་དག་ཀྱང་མེད། །གང་ལས་ས་སྐྱོང་བདག་ཉིད་སྐྱེས་པ་གཤེགས་པ་ན། །དེ་ཚེ་སྒོ་ནི་རང་ཉིད་བྱེ་བར་གྱུར་པ་སྟེ། །མཚན་མོའི་མུན་པ་ཉི་མས་བཞིན་དུ་བསལ་གྱུར་ཏེ། །
དེ་ཡི་ཕྱིར་ཡང་ལྷ་ཡི་ཆོ་ག་དེ་ཟུང་ཤིག །གང་ཕྱིར་མི་དབང་བཀའ་ལས་སྐྱེ་བོ་སྟོང་ཕྲག་དག །ཁང་པ་དང་ནི་གྲོང་ཁྱེར་ཉིད་དུ་བག་ཡོད་ཀྱང་། །དེ་ཚེ་དེ་ནི་གཉིད་ཀྱིས་ཕྲོགས་ཤིང་མ་སད་དེ། །དེ་ཡི་ཕྱིར་ཡང་ལྷ་ཡི་ཆོ་ག་དེ་ཟུང་ཤིག །གང་ཕྱིར་ནགས་ན་གནས་ལ་མཐུན་པའི་གོས་དག་ནི། །ལྷ་ན་གནས་
པས་དུས་སུ་འདི་ལ་བྱིན་གྱུར་ལ། །རྒྱན་དག་མཁའ་ལ་རབ་ཏུ་གཏོར་བ་དེ་ཁྱེར་ཏེ། །དེ་ཡི་ཕྱིར་ཡང་ལྷ་ཡི་ཆོ་ག་དེ་ཟུང་ཤིག །དེ་ཕྱིར་དེ་ལྟར་ལྷ་མོ་ངེད་གཉིས་ལ་སྐྱོན་དུ། །ཇི་ལྟར་སོང་བ་དེ་ལ་རྟོག་པར་འོས་མ་ཡིན། །མགྱོགས་འགྲོ་འདི་དང་བདག་གི་འདོད་པ་མི་མཛད་པར། །དེ་ནི་ལྷ་རྣམས་དག་གིས་རྗེས་
འགྲོ་བྱས་ཤིང་གཤེགས། །དེ་ལྟར་བདག་ཉིད་ཆེན་པོ་དེ་ཡིས་རབ་གཤེགས་པ། །ལྷ་ཡི་མཚར་མང་བུད་མེད་དེ་རྣམས་ཀྱིས་ཐོས་ནས། །རབ་ཏུ་གཤེགས་ལས་ཡིད་ལ་འབར་བ་ཡང་འཐོབ་སྟེ། །མྱ་ངན་རབ་ཏུ་ཉམས་བཞིན་ངོ་མཚར་ལྡན་པར་ཐལ། །དེ་ནས་ཡིད་མི་བདེ་བས་ཡོངས་ལྡིང་མིག་ཅན་མ། །ཕྲུག་
གུ་རབ་ཏུ་ཉམས་པའི་འོལ་བ་སྡུག་བསྔལ་བཞིན། །རྨོངས་གྱུར་ཉིད་ཀྱང་མཆི་མ་དང་ལྡན་གདོང་གིས་སྨྲས། །རླབས་ཆེན་དང་ལྡན་འཇམ་ཞིང་དཀར་མིན་དགེ་བ་སྟེ། །སོ་སོ་སོ་སོར་རྩ་བ་ནས་འཁྲུངས་གྱེན་དུ་འཁྱིལ། །དེ་ཡི་དབུ་སྐྱེས་ས་ལ་འཐོར་བ་དེ་རྣམས་ནི། །མི་དབང་དབུ་རྒྱན་ལ་ནི་ཡོངས་སུ་དཀྲི་བར་འོས། །
ཕྱག་ནི་རབ་འཕྱང་རི་དགས་རྒྱལ་པོའི་སྟོབས་མངའ་ཞིང་། །ཁྱུ་མཆོག་ཆེན་པོའི་སྤྱན་ལྡན་གསེར་འབར་འོད་མངའ་བ། །འབྲུག་དང་རྔ་ཡི་སྒྲ་ལྡན་སྐུ་སྟོད་རྣམ་པར་ཡངས། །དེ་ལྟར་གྱུར་ཀྱང་དཀའ་ཐུབ་གནས་སུ་གནས་པར་འོས། །སོར་མོ་ལེགས་སྐྱེས་འཇམ་ཞིང་དྲ་བས་འབྲེལ་བ་དང་། །ལོང་བུ་མི་མངོན་པདྨའི་

172-1-30b

རྩ་བ་ལྟར་འཇམ་ལ། །དབུས་ན་འཁོར་ལོ་དང་བཅས་ཞབས་ནི་དེ་དག་གིས། །དྲང་སྲོང་རྣམས་ཀྱི་ནགས་མཐའི་ས་ལ་འགྲོ་འམ་ཅི། །ཁང་བཟངས་ལོགས་ན་ཁྲི་དང་གདན་ལ་འོས་པ་སྟེ། །རིན་ཆེན་ན་བཟའ་ལྕི་མིན་ཙནྡན་གྱིས་སྤྲས་ཤིང་། །དེ་ཡི་ལུས་ནི་མདངས་དང་ལྡན་པ་ནགས་དག་ཏུ། །གྲང་དང་དྲོ་དང་
ཆུ་འོད་རྣམས་སུ་བསྐོར་རམ་ཅི། །རིགས་དང་གཟུགས་དང་སྟོབས་དང་སེམས་པ་དག་དང་ནི། །ཐོས་དང་ཕུན་སུམ་ཚོགས་དང་ན་ཚོད་ཀྱིས་ཁེངས་ཤིང་། །སློང་བར་མ་ཡིན་སྟེར་བ་ཉིད་དུ་མངོན་འོངས་པ། །དེ་ནི་ཕ་རོལ་དག་ལ་སློང་མོ་རྒྱུ་འམ་ཅི། །གསེར་ཁྲི་དང་ཞིང་གཟིམས་མལ་དག་ལ་གཟིམས་ནས་ནི། །
མཚན་མོ་སིལ་སྙན་སྒྲ་རྣམས་དག་གིས་རབ་སློང་བ། །གོས་ཀྱི་ཕྱོགས་གཅིག་པར་ན་ས་ཡི་ལོགས་ལ་ནི། །བདག་གི་བརྟུལ་ཞུགས་ལྡན་དེ་དེ་རིང་ཇི་ལྟར་གཟིམས། །སྙིང་རྗེའི་སྨྲེ་སྔགས་རབ་ཏུ་ཟློས་པ་འདི་ཐོས་ནས། །བུད་མེད་དེ་རྣམས་ཕན་ཚུན་ལག་པས་ཡོངས་འཁྱུད་དེ། །ལྗོན་ཤིང་གཡོས་ལས་མེ་
ཏོག་ལས་ནི་སྦྲང་རྩི་བཞིན། །རྣམ་པར་ལྟ་བྱེད་དག་ནས་ཆུ་དག་འཐོར་བའོ། །དེ་ནས་ངང་པ་མེད་པའི་ངང་མོ་བཞིན་དུ་ནི། །གྲགས་འཛིན་མ་ནི་ནོར་འཛིན་ས་ལ་འགྱེལ་གྱུར་ལ། །རྣམ་པར་འཁྲུགས་ཤིང་ཡང་དང་ཡང་དུ་ལྡབ་ལྡིབ་ཀྱི། །སྐད་ཀྱིས་དེ་དང་དེ་དག་རྣམ་པར་སྨྲས་པའོ། །ཆོས་དང་ལྷན་
ཅིག་སྤྱོད་པ་མགོན་མེད་ཁོ་མོ་ནི། །དེ་ཡིས་དོར་ནས་གལ་ཏེ་ཆོས་ནི་བྱེད་འདོད་ཅིང་། །ཆོས་དང་ལྷན་ཅིག་སྤྱོད་མ་དང་བྲལ་དཀའ་ཐུབ་གང་། །ཡོངས་སུ་ལོངས་སྤྱོད་འདོད་འདིའི་ཆོས་ནི་ག་ལ་ཞིག །སྔོན་གྱི་ས་སྐྱོང་རྣམས་དེས་ངེས་པར་མ་མཐོང་སྟེ། །ལེགས་མཐོང་ཆེན་པོ་ལ་སོགས་མེས་པོ་ཆེན་
པོ་རྣམས། །བདག་པོ་ལྡན་མ་དང་བཅས་ནགས་སུ་གཤེགས་གྱུར་ལ། །ཁོ་མོ་དང་བྲལ་ཆོས་བྱེད་འདོད་པ་དེ་ལྟར་ལྟོས། །མཆོད་སྦྱིན་དུའམ་རིག་བྱེད་ཆོ་གས་འདུས་བྱས་ཤིང་། །ཕོ་མོ་གཉིས་ལ་དབང་བསྐུར་དེ་ཡི་འབྲས་བུ་ནི། །གཞན་དུ་མཉམ་པོར་ལོངས་སྤྱོད་འདོད་པ་མ་མཐོང་སྟེ། །དེ་ནས་
བདག་ལ་འདི་ཡི་ཆོས་ལ་སེར་སྣ་སྐྱེས། །བདག་ཉིད་ལ་ནི་སྡུད་དང་ཕན་ཚུན་ཕྲག་དོག་ཅིང་། །ཡང་ཡང་རྩོད་པར་ཆོས་འགའ་དེས་ནི་ངེས་པར་ཤེས། །ཁྲོ་བ་ཁོ་མོ་སྤངས་ནས་དབང་ཆེན་འཇིག་རྟེན་དུ། །འཇིགས་མེད་ལྷ་མོ་ལས་ནི་དགའ་བ་ལེན་པར་འདོད། །དེ་ལ་ལུས་ཀྱི་ཡོན་ཏན་བཟུང་བའི་

172-1-31a

བཙུན་མོ་དེ། །ཅི་འདྲ་ཞིག་གམ་འདི་ནི་བདག་གིས་བསམ་མནོ་སྟེ། །བདག་གི་གུས་པ་ཉིད་དང་བུད་མེད་བོར་ནས་ནི། །ནགས་སུ་གང་ཕྱིར་དེས་ནི་དཀའ་ཐུབ་རྣམས་ལ་གདུང་། །ངེས་པར་བདག་གི་འདོད་འདི་མཐོ་རིས་བདེ་ཕྱིར་མིན། །སེམས་ལྡན་སྐྱེ་བོ་དེ་ནི་རྙེད་པར་དཀའ་བ་མིན། །
སྡུག་པ་དེས་ཀྱང་བདག་ལ་འདི་འམ་གཞན་དུ་རུང་། །གང་གིས་མ་སྤངས་ཞེས་ནི་བདག་གི་ཡིད་ལ་རེ། །གལ་ཏེ་བདག་ནི་ཇོ་བོའི་གཟིགས་བྱེད་ཡངས་པའི་ཞལ། །གཙང་ཞིང་བཞད་པ་གྱེན་དུ་བལྟ་བའི་སྐལ་མེད་ན། །སྐལ་བ་དམན་པར་འོས་མིན་སྒྲ་གཅན་འཛིན་དེ་ཡང་། །ཕ་ཡི་པང་ན་
ཡོངས་སུ་གནས་པར་ནམ་ཞིག་འགྱུར། །ཨེ་མ་ཡིད་མངའ་འདི་ཡི་ལུས་ནི་ཤིན་ཏུ་གཞོན། །ཡིད་ནི་མི་རྣམས་ཀྱིས་བསྔགས་ཤིན་ཏུ་སྲ་བ་སྟེ། །ངག་གི་སྐད་གྲག་རབ་ཟོས་དགྲ་ཡང་དགའ་བ་ཡི། །བུ་ནི་བྱིས་པ་འདི་འདྲ་ཀྱེ་མ་སྤོང་བར་བྱེད། །བདག་གི་འདོད་པའི་སེམས་ཀྱང་ཤིན་ཏུ་སྲ་བ་
སྟེ། །རྡོ་ལས་གྱུར་རམ་ཡང་ན་ལྕགས་ལས་བྱས་པ་འམ། །བདེར་འོས་ཇོ་བོ་དཔལ་དོར་ནགས་སུ་སོང་བ་ལ། །མགོན་མེད་ལྡན་པ་གང་ཞིག་དུམ་བུར་མ་སོང་ངོ་། །དེ་ལྷར་ལྷ་མོ་བདག་པོའི་མྱ་ངན་གྱིས་བརྒྱལ་ཏེ། །སེམས་ཤིང་རྣམ་ཟློས་ལན་ཅིག་མ་ཡིན་འདི་དུས་ལ། །རང་བཞིན་བརྟན་ཡང་དམ་
པ་མོ་དེ་མྱ་ངན་གྱིས། །བརྟན་པ་དྲན་པ་མ་ཡིན་ངོ་ཚ་མ་བྱས་སོ། །དེ་ནས་དེ་ལྟར་མྱ་ངན་གྱིས་སྨྲ་རྣམ་འཁྲུགས་པའི། །གྲགས་འཛིན་མ་ནི་ས་ལ་འགྱེལ་བ་མཐོང་ནས་ནི། །ཆར་གྱིས་བཏང་བས་པདྨ་ཆེན་པོ་བཞིན་དུ་ནི། །མཆི་བཅས་གདོང་གིས་བུད་མེད་རྣམས་ནི་ཆོ་ངེས་འདེབས། །བཟླས་བརྗོད་
རྫོགས་ཤིང་སྦྱིན་སྲེག་བཀྲ་ཤིས་བྱས་གྱུར་ཏེ། །མི་སྐྱོང་ཉིད་ཀྱང་ལྟ་གང་དག་ནས་ཕྱིར་གཤེགས་པ། །རྡོ་རྗེའི་སྒྲ་ཡིས་གླང་པོ་ཇི་བཞིན་སྐྱེ་བ་ཡི། །ཉམ་ཐག་སྒྲ་དེས་ཀུན་ནས་བཅོམ་ཞིང་གཡོས་པར་གྱུར། །འདུན་པ་དང་ནི་བསྔགས་ལྡན་གཉིས་པོ་མཐོང་ནས་ཀྱང་། །སྲས་ཀྱི་ངེས་པར་བརྟེན་པ་
ཡང་དག་གསན་ནས་ནི། །བདེ་སོགས་བདག་པོའི་ལྟད་མོ་ཟིན་པའི་རྒྱལ་མཚན་བཞིན། །མྱ་ངན་གྱིས་བཅོམ་ས་ཡི་བདག་པོ་འགྱེལ་བར་གྱུར། །དེ་ནས་སྲས་པོའི་མྱ་ངན་གྱིས་རྨོངས་ཡུད་ཙམ་ཞིག །སྐྱེ་བོ་མཚུངས་མཉམ་མངོན་པའི་སྐྱེ་བོས་བཟུང་གྱུར་ལ། །ཆབ་ཀྱིས་གང་བའི་སྤྱན་གྱིས་མགྱོགས་

172-1-31b

བགྲོ་ལ་གཟིགས་ནས། །ས་ཡི་ལོགས་ནས་ས་སྐྱོང་གིས་ནི་སྨེ་སྔགས་བཏོན། །གཡུལ་འགྱེད་པ་ན་དགའ་ཆེན་མང་པོ་བྱས་ནས་ནི། །བསྔགས་ལྡན་ཁྱོད་ཀྱིས་བདག་གི་དགའ་བ་མ་ཡིན་བྱས། །བདག་གི་དགའ་བ་ཡོན་ཏན་དགའ་དེ་གང་གིས་ནི། །དགའ་བ་ཡིན་ཡང་དགའ་བ་མེད་བཞིན་ནགས་
སུ་བོར། །དེ་ཕྱིར་དེ་ཉིད་གང་དུ་གཤེགས་པ་དེར་བདག་ཁྱེར། །ཡང་ན་དེ་ནི་སླར་ཡང་སྐྱེན་པར་ཁྱེར་ལ་ཤོག །ཚབས་ཆེར་ན་བའི་སྨན་དང་བྲལ་བས་དེ་བཞིན་དུ། །དེ་དང་བྲལ་བས་བདག་གི་འཚོ་བ་མེད་པའོ། །རྒྱལ་བུ་གསེར་འབབ་འཆི་བས་ཕྲོགས་པར་གྱུར་པ་ན། །དཀའ་ཐུབ་གང་
ལས་ཡང་དག་རྒྱལ་བ་ཤི་མ་གྱུར། །བདག་ཀྱང་ཆོས་འཛིན་སྲས་པོ་གཤེགས་པར་གྱུར་པ་ན། །བདག་ཉིད་ཐར་འདོད་བདག་ཉིད་མེད་པ་ལྟ་བུར་གྱུར། །རྒྱལ་རིགས་བཅུ་བྱས་ཁྱབ་བདག་སྐྱེ་དགུའི་བདག་པོ་ནི། །མཆོག་དང་མཆོག་མིན་ཤེས་པ་ཉི་མའི་སྲས་པོ་ཡི། །བུ་ནི་ཕངས་ཤིང་སྡུག་བསྔལ་དམ་
པ་དང་བྲལ་ལ། །ཡིད་མི་བདེ་བྱས་ཡིད་ཀྱི་རྨོངས་པ་གང་ལས་མིན། །རྒྱལ་པོ་ཨ་ཛའི་སྲས་པོ་བློ་དང་ལྡན་པ་ནི། །མི་བདག་དབང་པོའི་གྲོགས་ལ་བདག་གི་འདོད་པ་སྟེ། །སྲས་པོ་ནགས་སུ་སོང་ལ་གང་ཞིག་ལྷར་སོང་ལ། །མཆི་མ་དོན་ཡོད་མ་ཡིན་བཀྲེན་པས་ཆོས་སོ་ཀྱེ། །
ཁྱོད་ཀྱིས་བདག་གི་ཆུ་ཡི་སྙིམ་པ་དེ་གང་དུ། །ཕྲོགས་པའི་དཀའ་ཐུབ་གནས་དེར་བཟང་པོ་བདག་ལ་སྨྲོས། །དེ་ལ་བདག་གི་སྐོམ་པ་འདིས་ནི་ཡོངས་འདོད་དེ། །བདག་གི་སྲོག་ནི་ཡི་དགས་འགྲོ་བར་འདོད། །དེ་ལྟར་སྲས་དང་བྲལ་བའི་སྡུག་བསྔལ་སྐྱེས་གྱུར་ཏེ། །ས་དང་འདྲ་བའི་
ལྷན་སྐྱེས་བརྟན་པ་རྣམ་སྤངས་ནས། །རཱ་མའི་མྱ་ངན་དག་གིས་ཤིང་རྟ་བཅུ་པ་བཞིན། །མི་སྐྱོང་འདུ་ཤེས་བྲལ་བཞིན་མང་པོ་རྣམ་པར་ལབས། །དེ་ནས་དེ་ལ་ཐོས་དང་དུལ་དང་ཡོན་ཏན་ལྡན། །རབ་བགྲེས་མདུན་ན་འདོན་དང་བློན་པོ་བློ་གྲོས་ཀྱིས། །མཉམ་པར་གཞག་འདི་ཇི་ལྟ་བ་བཞིན་
སྨས་གྱུར་ཏེ། །ཡོངས་སུ་གདུང་བའི་གདོང་མིན་མྱ་ངན་མེད་པའང་མིན། །མི་མཆོག་བརྟན་པ་མྱ་ངན་ཐོང་ལ་བརྟན་པར་གཤེགས། །མྱ་ངན་བཞིན་དུ་མཆི་མ་འདོན་པར་འོས་མ་ཡིན། །མེ་ཏོག་ཕྲེང་བ་རྙིང་བཞིན་ཕུན་ཚོགས་བོར་ནས་ནི། །ས་ན་མི་སྐྱོང་མང་པོ་ནགས་སུ་ཤིན་ཏུ་སོང་། །གཞན་ཡང་

172-1-32a

དེ་ཡི་དགོངས་པ་ངེས་པ་འདི་སྔོན་ཚེ། །དྲང་སྲོང་དཀར་མིང་དེ་ཡི་ཚིག་ནི་དྲན་པར་མཛོད། །མཐོ་རིས་སུ་ཡང་འཁོར་ལོས་སྒྱུར་བའི་རྒྱལ་སྲིད་ལ། །སྐད་ཅིག་ཀྱང་དེ་གནས་པར་བདེ་བས་ནུས་མ་ཡིན། །གལ་ཏེ་ཡང་དེ་མི་མཆོག་འབད་པས་བྱས་པ་སྟེ། །མྱུར་བར་བཀའ་ལུང་སྩོལ་
མཛོད་ཇི་སྙེད་འདིར་འགྲོ་བགྱི། །སྣ་ཚོགས་རྣམས་ཀྱི་ཁྱེད་ཀྱི་སྲས་པོ་དེ་ཡི་ནི། །སྣ་ཚོགས་མང་པོའི་འཐབ་མོ་དེ་རྙེད་དེར་བྱེད་ཤོག །དེ་ནས་དེ་གཉིས་ལ་ནི་མི་བདག་གིས་བསླབས་ལ། །དེ་ཕྱིར་ངེས་པར་འདི་ནས་ཁྱེད་གཉིས་མངོན་པར་སོང་། །བུ་ལ་ལྷག་པར་ཆགས་པའི་ནགས་ཀྱི་བྱ་ཡི་བཞིན། །བདག་
གི་སེམས་ནི་དགའ་བར་རབ་ཏུ་སོང་མ་ཡིན། །དམ་པ་ཞེས་ནི་མི་དབང་བསྟན་ལས་བློན་པོ་དང་། །མདུན་ན་འདོན་པ་དེ་གཉིས་ནགས་དེར་སོང་བར་གྱུར། །བྱས་ཞེས་གནའ་མའི་སྐྱེ་བོ་དང་བཅས་བཙུན་མོར་བཅས། །མི་སྐྱོང་གིས་ཀྱང་བྱ་བ་ལྷག་མ་རབ་ཏུ་མཛད། །སངས་རྒྱས་ཀྱི་སྤྱོད་པ་ཞེས་བྱ་
བའི་སྙན་དངགས་ཆེན་པོ་ལས། བཙུན་མོའི་འཁོར་སྨྲེ་སྔགས་བཏོན་པའི་ལེའུ་སྟེ་བརྒྱད་པའོ།།      །།དེ་ནས་དེའི་ཚེ་མདུན་ན་འདོན་དང་བློན་པོ་དེ། །མི་སྐྱོང་མཆི་མའི་ལྕག་གིས་མངོན་པར་བསྣུན་པ་དག །ཕུག་པའི་དམ་པའི་རྟ་བཞིན་འབད་པ་ཐམས་ཅད་ལས། །
བསམ་པ་བཟང་པོས་སྐྱེན་པར་ནགས་དེར་སོང་བར་གྱུར། །འདྲ་བའི་རྗེས་འབྲངས་ངལ་བ་སྐྱེས་པ་དེ་གཉིས་ནི། །དཀའ་ཐུབ་ནགས་དེར་དུས་སུ་ཉེ་བར་ཕྱིན་ནས་ནི། །རྒྱལ་པོའི་རྫུ་འཕྲུལ་དོར་དེ་དུལ་བའི་སྤྱོད་པ་ཡིས། །དྲང་སྲོང་ཤེས་ལྡན་བུ་ཡི་ཁང་པར་ཉེ་བར་སོང་། །དེ་དག་གིས་ནི་ཚུལ་
བཞིན་བྲམ་ཟེ་དེ་མཆོད་ནས། །དེ་ནི་དེ་དག་ལ་ཡང་རྗེས་མཐུན་མཆོད་པ་སྟེ། །གདན་བྱས་པ་དག་བདག་ཏུ་ལྟ་བ་བཅད་ནས་ནི། །ཤེས་ལྡན་སྲས་པོ་གདན་གནས་པ་ལ་གཏམ་སྨྲས་སོ། །མདངས་གཙང་གཙང་ཞིང་རྣམ་པར་གྲགས་པའི་ཡངས་པ་མངའ། །བུ་རམ་
ཤིང་པའི་རིགས་སུ་རབ་འཁྲུངས་རྒྱལ་པོ་ཡིས། །ཤྲུ་ཀ་རབ་ཏུ་འཛིན་དང་གསང་སྔགས་ཡོངས་འཛིན་ལ། །ནག་པོར་སྐྱེ་བོ་འདི་ནི་ཁྱོད་ཀྱིས་རིག་པར་མཛོད། །དབང་པོ་དང་མཚུངས་དེ་ཡི་རྒྱལ་བ་དང་མཚུངས་སྲས། །རྒ་དང་འཆི་བའི་འཇིགས་པ་དག་ནི་སྒྲོལ་འདོད་དེ། །

172-1-32b

འདི་ན་མངོན་པར་ཉེ་བར་འོངས་གྲག་དེ་ཡི་ཕྱིར། །བདག་ཅག་ཉེ་བར་འོངས་པར་བཅོམ་ལྡན་མཁྱེན་པར་མཛོད། །དེ་དག་ལ་དེས་སྨྲས་པ་ཕྱག་རིང་གྱུར་པ་དེ། །རབ་ཏུ་ཐོབ་གྱུར་གཞོན་ནུ་ཤེས་པ་མིན་པ་མིན། །ཆོས་འདི་འཁོར་བར་བྱེད་ཅེས་མངོན་པར་མཁྱེན་ནས་ནི། །
མངོན་པར་གདོང་ཕྱོགས་མ་ཡིན་ཐར་བཞེད་སྐྱེན་པར་གཤེགས། །དེ་ནས་དེ་ལས་དེ་ཉིད་དེ་དག་ཉེར་ཐོབ་ནས། །བྲམ་ཟེ་དེ་ལ་སྙན་དངགས་ཕབ་ནས་དེ་མ་ཐག །དུབ་ཀྱང་མ་དུབ་པ་བཞིན་རྒྱལ་པོ་ལ་གུས་པས། །དེ་ཉིད་གང་ནས་གཤེགས་པ་དེ་ནས་རབ་ཏུ་སོང་། །སོང་སྟེ་དེ་ནས་དེ་དག་
གི་ནི་རྔོན་པ་དང་། །རྣམ་པར་བྲལ་བའི་སྐུ་ལུས་རབ་ཏུ་འབར་བ་དེ། །ཉི་མ་སྟུག་པོའི་ལོངས་སྤྱོད་དག་ལ་ཞུགས་པ་ལྟར། །ལམ་ནི་ཤིང་གི་རྩ་བར་ཉེ་བར་བཞུགས་པ་མཐོང་། །དེ་ནས་དེ་ལ་མདུན་ན་འདོན་དང་སྔགས་འཛིན་བཅས། །ཐེག་པ་རྣམ་པར་སྤངས་ནས་ཉེ་བར་གཤེགས་པ་སྟེ། །
སླར་གནས་ཐུབ་པའི་བུ་ནི་གཡོན་གྱི་ལྷར་བཅས་པས། །ནགས་གནས་ལྷག་སྤྱོད་ལྟ་བར་འདོད་པ་ཇི་ལྟར་རོ། །ལྷ་ན་པ་བ་སངས་དང་ཕུར་བུས་དབང་ཆེན་བཞིན། །དེ་དག་གིས་ནི་དེ་ཉིད་བསྐྱེད་ཅིང་མཆོད་པའོ། །ལྷ་ན་པ་སངས་ཕུར་བུ་དག་ལ་དབང་ཆེན་བཞིན། །མཆོད་འོས་དེས་ནི་དེ་གཉིས་
དག་ལ་སླར་མཆོད་དོ། །སྦྱོར་བར་སོང་བའི་ཟླ་བ་ཉེ་སར་ནབ་སོ་བཞིན། །དེ་ནས་ཀུན་ནས་མངོན་པར་རྗེས་གནང་བྱས་པ་ནི། །དེ་དག་ཤཱཀྱའི་རིགས་ཀྱི་རྒྱལ་མཚན་དེ་ཡི་ནི། །ཉེ་ལོགས་དག་ཏུ་སོང་བ་རྣམ་པར་མཛེས་པར་གྱུར། །ཤིང་གི་རྩ་བར་གནས་པ་མངོན་པར་འབར་བ་ཡི། །རྒྱལ་པོའི་
སྲས་པོ་དེ་ལ་མདུན་ན་འདོན་གྱིས་སྨྲས། །ལྷ་ན་ཡོངས་འདུས་དག་ལ་བརྒྱ་བྱིན་སྲས་པོ་ནི། །རྒྱལ་བ་ཉེ་བར་གནས་ལ་ཕུར་བུ་ཇི་ལྟར་རོ། །ཁྱོད་ཀྱི་མྱ་ངན་ཟུག་རྔུ་སྙིང་ལ་བཏགས་པ་ན། །ས་ཡི་ལོགས་ལ་རྨོངས་ཤིང་བརྒྱལ་བར་གྱུར་པ་སྟེ། །གཞོན་ནུ་མིག་གི་ཆུ་ཡི་ཆར་ལྟར་རྒྱལ་པོ་ཡིས། །
གང་ཞིག་ཁྱོད་ལ་སྨྲས་པ་འདི་ནི་མཁྱེན་པར་མཛོད། །ཁྱོད་ཀྱིས་ཆོས་ལ་རབ་དམིགས་ངེས་པར་ཤེས་པ་སྟེ། །ཁྱོད་ཀྱི་འབྱུང་བར་འགྱུར་བའི་དོན་ནི་ཤེས་པའོ། །ཁྱོད་ཀྱི་དུས་མ་ཡིན་པར་ནགས་སུ་བསྙེན་ལས་བདག །མེ་དང་རབ་མཚུངས་མྱ་ངན་མེ་ཡིས་ཚིག་པའོ། །དེ་ཕྱིར་ཚུར་

172-1-33a

སྤྱོན་ཆོས་དགའ་དག་གི་དགའ་སྟོན་དུ། །ཆོས་ཀྱི་དོན་དུ་བློ་གྲོས་དེ་ཉིད་ཐོང་མཛོད་དང་། །ཆུ་བོའི་ཤུགས་ཀྱིས་འགྲམ་ངོགས་མངོན་པར་བཅོམ་པ་བཞིན། །བདག་ལ་མྱ་ངན་ཤུགས་འདིར་རབ་ཏུ་འཕེལ་བའོ། །རླུང་དང་ཉི་མ་མེ་དང་ཐོག་ཆེན་རྣམས་ཀྱི་ནི། །འཇུག་
པ་གང་ཞིག་སྤྲིན་དང་ཆུ་མེ་རི་རྣམས་སུ། །རྣམ་པར་འབྱེར་དང་སྐེམས་དང་སྲོག་དང་འབྱེད་རྣམས་ཀྱིས། །བདག་ཅག་རྣམས་ལ་མྱ་ངན་གྱིས་འཇུག་པ་དེ་བྱེད། །དེ་ཕྱིར་རེ་ཞིག་ནོར་འཛིན་བདག་ཉིད་ལོངས་སྤྱོད་ལ། །དུས་སུ་བསྟན་བཅོས་མཐོང་སྟེ་ནགས་སུ་གཤེགས་གྱུར་ཏེ། །འབྱུང་པོ་
ཐམས་ཅད་ལ་ནི་བརྩེ་བ་ཆོས་ཡིན་ཕྱིར། །མི་འདོད་གཉེན་འདུན་ཁོ་བོ་ལ་ནི་ལྟོས་པར་མཛོད། །ཆོས་དེ་ནགས་ཉིད་ཁོ་ནར་འགྲུབ་པ་མ་ཡིན་ཏེ། །སྡོམ་བརྩོན་རྣམས་ཀྱིས་ངེས་པར་གྲོང་ཁྱེར་ན་ཡང་འགྲུབ། །འདིར་ནི་བློ་དང་འབད་པ་དག་ནི་མཚན་མ་སྟེ། །ནགས་དང་སྟག་ནི་འཇིགས་པ་དག་གི་
མཚན་མའོ། །དབུ་རྒྱན་འཛིན་ཞིང་དཔུང་པར་རྣ་ཆ་དོ་ཤལ་དང་། །དཔུང་རྒྱན་རྣམ་པར་རེངས་པའི་ཕྱག་མངའ་མི་དབང་རྣམས། །ཕུན་ཚོགས་ཡན་ལག་དབུས་ན་ཡོངས་སུ་གནས་རྣམས་ཀྱིས། །ཁྱིམ་ན་གནས་ཀྱང་ཐར་པའི་ལམ་ནི་རབ་ཏུ་ཐོབ། །བསྟན་པའི་ནུ་བོ་
སྟོབས་དང་རྡོ་རྗེའི་ལག་པ་དང་། །རྣམ་མཛེས་བུ་དང་ཆུ་སྟོད་དེ་ནས་མཐར་གནས་ལྷ། །ལུས་འཕགས་རྒྱལ་པོ་སྐྱེས་བྱེད་དང་ནི་དེ་བཞིན་དུ། །གྲོང་དང་ལྗོན་ཤིང་ཅན་དང་སྡེ་རྒྱལ་རྒྱལ་པོ་རྣམས། །ཉེས་ལེགས་ཆོས་ཀྱི་ཆོ་ག་ལ་ནི་རྣམ་དུལ་བའི། །མི་བདག་ཁྱིམ་ན་གནས་པ་དེ་རྣམས་
མཁྱེན་མཛོད་ལ། །ནོར་གྱི་བདག་པོ་དང་ནི་མི་སྐྱོང་དཔལ་དག་སྟེ། །གཉིས་པོ་དག་ཀྱང་དེ་ཕྱིར་དུས་གཅིག་མཁྱེན་པར་མཛོད། །མངོན་པར་དབང་བསྐུར་བྱས་པའི་ཆུ་ཡིས་བརླན་པ་ཉིད། །གདུང་བ་སྐྱོབ་པའི་གདུགས་བཟུང་ཁྱེད་ལ་དྲག་ཏུ་ནི། །ཉེ་བར་འཁྱུད་ནས་ཀུན་ནས་གྱེན་དུ་ལྟ་བ་སྟེ། །དགའ་
བ་དེས་ནི་ནགས་སུ་རབ་ཏུ་འཇུག་པར་འདོད། །དེ་ལྟར་མཆི་མས་འདུད་པའི་ཡི་གེའི་ཚིག་གིས་ནི། །ཁྱེད་ཉིད་ལ་ནི་ས་ཡི་བདག་པོས་སྨྲས་པ་སྟེ། །ཐོས་ནས་དེ་ལ་བརྩེ་ཞིང་དེ་ལ་དགའ་དོན་དུ། །ཁྱེད་ཀྱི་བརྩེ་བས་རྗེས་སུ་འགྲོ་བར་འོས་པའོ། །ཁྱོད་ལས་བྱུང་བའི་མྱ་ངན་ཆུ་ནི་གཏིང་མེད་པའི། །

172-1-33b

སྡུག་བསྔལ་རྒྱ་མཚོར་ཤཱཀྱའི་རྒྱལ་པོ་ནུབ་གྱུར་ཏེ། །དེ་ཕྱིར་མགོན་པོ་རྒྱ་མཚོར་བྱིང་ལ་གྲུ་བཞིན་དུ། །དམན་ཞིང་རྟེན་དང་བྲལ་བ་དེ་ནི་སྒྲོལ་མཛོད་ཅིག །ཆུ་བོ་གང་གཱའི་ལྟོ་ནས་བྱུང་བ་འཇིགས་བྱེད་དང་། །ལྷག་སྤྱོད་དང་ནི་ངན་སྤོང་སྲས་པོ་ལྷག་སྤྱོད་ཀྱིས། །ཕ་ཡི་དགའ་བའི་དོན་དུ་
ལས་བྱས་ཐོས་ནས་ནི། །ཁྱེད་ཀྱང་ཡབ་ཀྱི་བཞེད་པ་མཛད་པར་འོས་པ་ལགས། །གཉེན་བཤེས་བེའུ་ཉམས་པར་གྱུར་པའི་བ་བཞིན་དུ། །རྒྱུན་མི་འཆད་པར་ཉམ་ཐག་སྙིང་རྗེར་ངུ་བ་མོ། །དྲང་སྲོང་རི་བྱི་བསྙེན་ཞིང་ཕྱོགས་སུ་མ་སོང་བ། །ཡང་དག་སྐྱེད་པར་བྱེད་པའི་ལྷ་མོ་མཁྱེན་པར་མཛོད། །
ངང་པ་རྣམ་པར་བྲལ་བའི་ངང་མོ་ལྟ་བུ་དང་། །ནགས་ན་གླང་པོ་དང་བྲལ་གླང་མོ་ལྟ་བུ་ནི། །མགོན་དང་བཅས་ཀྱང་མགོན་མེད་དམན་ཞིང་ཉམ་ཐག་པའོ། །བཙུན་མོ་གཟིགས་པ་ཡིས་ནི་སྐྱོབ་པར་འོས་པ་ཡིན། །སྲས་གཅིག་བྱིས་པ་སྡུག་བསྔལ་འོས་པ་མ་ཡིན་པ། །ཀུན་ནས་གདུང་
བ་མཐར་གྱུར་པ་ནི་འདྲེན་པ་སྟེ། །གང་བའི་ཟླ་བ་སྒྲ་གཅན་ཉེ་བར་བསྒྱུར་ལས་བཞིན། །སྒྲ་གཅན་འཛིན་དེ་གཉེན་གྱི་མྱ་ངན་ལས་ཐར་མཛོད། །ཕོ་བྲང་བཙུན་མོའི་འཁོར་དང་གྲོང་ཁྱེར་མཐའ་དག་ནི། །ཁྱེད་དང་བྲལ་བའི་བུད་ཤིང་ཅན་གྱི་མྱ་ངན་མེ། །ཕྱིར་འབྱུང་དབུགས་ནི་དུ་བ་མུན་པའི་
རྩེ་མོ་ཡིས། །ཚིག་པ་དག་ནི་ཁྱེད་ལ་ལྟ་བའི་ཆུ་འདོད་དོ། །མདུན་ན་འདོན་པ་དེ་ཡི་ཚིག་དག་གསན་གྱུར་ནས། །བྱང་ཆུབ་སེམས་དཔའ་ཡོངས་སུ་གང་བའི་སེམས་དཔའ་དེས། །ཡོན་ཏན་ལྡན་ཞིང་ཡོན་ཏན་ཤེས་པས་ཡུད་ཙམ་ཞིག །བསམ་གཏན་མཛད་ནས་རིགས་པའི་ལན་འདི་
སྨྲས་པའོ། །ཕ་རྣམས་ཀྱི་ནི་བུ་ལ་དགོངས་པ་ཤེས་པ་སྟེ། །གང་ཞིག་བདག་ལ་ས་སྐྱོང་གི་ནི་ཁྱད་པར་དུ། །ཤེས་པ་ཡིན་ཡང་ན་དང་རྒ་དང་རྒུད་པ་ལས། །འཇིགས་ཏེ་ནགས་སུ་ཕྱིན་ནས་རང་གི་སྐྱེ་བོ་དོར། །མཐར་ནི་གལ་ཏེ་དགའ་བ་དང་བྲལ་མ་ཡིན་ན། །རང་གི་སྐྱེ་བོ་དགའ་བ་ལྟ་འདོད་ཅིས་
མ་ཡིན། །གང་ཚེ་ཡུན་རིང་གྱུར་ཀྱང་རྣམ་པར་འབྲལ་བ་སྟེ། །དེ་ཕྱིར་བླ་མ་བརྩེ་བ་ཡིན་ཡང་འདོར་བར་བགྱི། །གང་ཡང་བདག་གི་ཆེད་དུ་མི་ཡི་བདག་པོ་ཡི། །མྱ་ངན་ཁྱོད་ཀྱིས་སྨྲས་དེས་བདག་ལ་དགའ་བ་མེད། །གང་ཕྱིར་རྨི་ལམ་ཡང་དག་འདུས་པར་གྱུར་རྣམས་སུ། །རྣམ་པར་འབྲལ་

172-1-34a

བར་འགྱུར་ལ་ཀུན་ནས་གདུང་བར་བྱེད། །འགྲོ་བའི་སྤྱོད་པ་རྣམ་པ་སྣ་ཚོགས་མཐོང་ནས་ནི། །དེ་བཞིན་དུ་ཡང་ཁྱོད་ཀྱི་བློ་གྲོས་ངེས་པར་སོང་། །བུ་མིན་གཉེན་མིན་ཀུན་ནས་གདུང་བའི་རྒྱུ་ཡིན་བཞིན། །འཆིང་བ་དེ་ནི་ཤེས་པ་མེད་པའི་མཚན་མ་ཉིད། །ལམ་དུ་འགྲོ་རྣམས་འདིར་ནི་
འདུས་པ་ཇི་ལྟ་བའི། །སྐྱེ་དགུ་རྣམས་ནི་དུས་སུ་ངེས་པར་འབྲལ་བ་སྟེ། །གཉེན་འདུན་དམ་འཆའ་སྐྱེ་བོས་རྣམ་པར་དམན་པ་ཡི། །ཤེས་རབ་ལྡན་པའི་སྐྱེ་བོས་མྱ་ངན་བསྙེན་ནམ་ཅི། །གཞན་དུ་རང་གི་སྐྱེ་བོ་དོར་ནས་འདིར་འོངས་ལ། །འདིར་ཡང་རབ་ཏུ་བསླུས་ནས་སླར་ཡང་འགྲོ་བ་སྟེ། །དེར་སོང་ནས་
ཀྱང་ཕ་རོལ་གཞན་དུ་འགྲོ་འགྱུར་ལ། །དེ་ལྟར་འདོར་ལྡན་སྐྱོ་ལ་རྗེས་སུ་བརྟེན་ནམ་ཅི། །གང་ཚེ་མངལ་ནས་བཟུང་སྟེ་གནས་སྐབས་ཐམས་ཅད་དུ། །གསོད་པའི་ཕྱིར་ནི་འཆི་བ་རབ་ཏུ་གནས་པ་སྟེ། །བུ་ལ་དགའ་བ་དེར་ནི་ཁྱེད་ཀྱིས་སྨྲས་པ་ཡི། །བདག་གི་ནགས་སུ་བརྟེན་པ་གང་ཕྱིར་དུས་མ་ཡིན། །
ཡུལ་ལ་མངོན་པར་ལྷུང་ཚེ་དུས་མ་ཡིན་པ་དེ། །དེ་བཞིན་ནོར་གྱི་ཆོ་གར་ཞུགས་པ་དུས་ཡིན་ནོ། །དུས་རྣམས་ཀུན་དུ་དུས་ཀྱི་འགྲོ་བ་ཁྱབ་པ་སྟེ། །དགེ་ལེགས་ངེས་པར་ཐོབ་པ་དུས་ཡོད་མ་ཡིན་ནོ། །གང་ཡང་རྒྱལ་པོས་བདག་ལ་རྒྱལ་སྲིད་འདིར་བཞད་ལ། །དེ་ཡང་ཡབ་ཀྱི་རྒྱ་
ཆེན་མཚུངས་ཤིང་འདྲ་བ་སྟེ། །སྲེད་པ་ལས་ནི་ནད་པའི་མི་འཕྲོད་ཟས་བཞིན་དུ། །བདག་གིས་རབ་ཏུ་འཛིན་པར་ནུས་པ་མ་ཡིན་ནོ། །གཏི་མུག་རྨོངས་པའི་གཞི་མ་མི་སྐྱོང་རྒྱལ་པོ་ཉིད། །རབ་ཏུ་འཐོབ་པར་མི་ནི་མཁས་པས་གང་ཕྱིར་ནུས། །གང་དུ་སྐྱོ་བ་དང་བཅས་རྒྱགས་དང་
ངལ་དུབ་དང་། །ཕ་རོལ་ལོག་པར་སྤྱོད་པས་ཆོས་ལ་གནོད་པའོ། །འཛམ་བུ་ཆུ་གསེར་བཞིན་དུ་གསལ་བའི་ལྡིང་ཁང་ནི། །དུག་དང་འདྲེས་པའི་ཁ་ཟས་བཟང་པོ་ལྟ་བུ་དང་། །གཟའ་ཡིས་འཁྲུགས་པའི་པདྨ་དང་བཅས་ཆུ་ལྟ་བུ། །རྒྱལ་སྲིད་དང་ནི་གསེར་དག་སྡུག་བསྔལ་དག་གི་
རྟེན། །དེ་ལྟར་རྒྱལ་སྲིད་ཆོས་མིན་བདེ་བ་མ་ཡིན་པ། །ཇི་ལྟར་མི་གཙང་སྐྱེས་ཏེ་མི་དབང་སྔ་མ་རྣམས། །སྡུག་བསྔལ་ཡོངས་སུ་སྤང་བྱ་ན་ཚོད་རབ་མཆོག་ཚེ། །རྒྱལ་སྲིད་ངེས་པར་དོར་ནས་ནགས་སུ་སོང་བར་གྱུར། །རིན་ཆེན་བཞིན་དུ་ཚིམ་པ་མཆོག་ནི་ཉེར་མཁྱུད་ནས། །འབྲོག་

172-1-34b

དགོན་དག་ན་རྩྭ་དག་ཟོས་པ་མཆོག་ཡིན་ལ། །སྦྲུལ་ནག་བཞིན་དུ་མཐོང་བ་མ་ཡིན་ཉེས་པ་ནི། །རྙེད་བླའི་དཔལ་དང་ལྷན་ཅིག་ཉལ་བ་མཆོག་མ་ཡིན། །རྒྱལ་སྲིད་རྣམ་པར་སྤངས་པ་རྒྱལ་པོ་རྣམས་ཀྱི་ཆོས། །མངོན་པར་འདོད་པས་ནགས་སུ་རབ་འཇུག་བསྔགས་པ་སྟེ། །ནགས་
ཚལ་ཡོངས་སུ་དོར་ནས་ཁྱིམ་དུ་རབ་འཇུག་པ། །དམ་བཅའ་ཉེ་བར་བཅོམ་པའི་འཐད་པ་མ་ཡིན་ནོ། །རིགས་སུ་སྐྱེས་ཤིང་སེམས་པ་དང་བཅས་མི་གང་གིས། །ཆོས་ནི་མངོན་པར་འདོད་པས་ནགས་སུ་རབ་ཞུགས་ལ། །ངུར་སྨྲིག་རབ་ཏུ་དོར་ནས་ངོ་ཚ་རྣམ་སྤངས་ནས། །གྲོང་ཁྱེར་འཇོམས་པ་ཡི་
ཡང་གྲོང་ལ་བསྙེན་མ་ཡིན། །སྲེད་དང་རྣམ་པར་རྨོངས་དང་ཡང་ན་འཇིགས་པ་ཡིས། །གང་ཞིག་སྐྱུགས་པའི་བཟའ་བ་སླར་ཡང་ལེན་བྱེད་ལ། །སྲེད་པ་དེ་ནི་རྨོངས་དང་ཡང་ན་འཇིགས་པ་ཡིས། །འདོད་པ་རྣམས་ནི་དོར་ནས་སླར་ཡང་ལེན་པར་བྱེད། །གང་ཞིག་རབ་འབར་ཁང་པ་དག་ནས་ཅི་ཞིག་
ལྟར། །བྱུང་ནས་སླར་ཡང་དེ་ཉིད་ཁོ་ནར་རབ་འཇུག་ལ། །ཉེས་པ་མཐོང་དེ་ཁྱིམ་ན་གནས་པ་དོར་ནས་ནི། །རྨོངས་པས་སླར་ཡང་ལེན་པར་མངོན་པར་འདོད་པའོ། །གང་ཡང་མི་སྐྱོང་ཁྱིམ་ན་གནས་པས་ཐར་པ་ནི། །འཐོབ་པ་དང་ལྡན་ཞེས་ཐོས་དེ་ནི་མེད་པ་སྟེ། །ཞི་བ་གཙོ་བོའི་ཐར་པའི་ཆོས་ནི་གང་ལ་ཡང་། །
ཆད་པ་གཙོ་བོའི་རྒྱལ་པོའི་ཆོས་ནི་གང་དུའོ། །ཞི་བ་དགའ་བ་གལ་ཏེ་རྒྱལ་སྲིད་དམན་པ་སྟེ། །རྒྱལ་སྲིད་ལ་བློ་གལ་ཏེ་ཞི་བ་རྣམ་པར་ཉམས། །གྲང་དང་དྲོ་དང་མེ་དང་ཆུ་ཡིག་གཅིག་ཉིད་བཞིན། །ཞི་བ་དང་ནི་རྣོ་ཉིད་འཐད་པ་མ་ཡིན་ནོ། །མེ་དང་ཆུ་ཡི་འདུ་བ་ཡོད་པ་མ་ཡིན་ལ། །ཁྲམ་དང་དྲང་
པོའི་འདུ་བ་ཡོད་པ་མ་ཡིན་ཞིང་། །འཕགས་དང་སྡིག་པའི་འདུ་བ་ཡོད་པ་མ་ཡིན་ཏེ། །ཞི་དང་ཆད་པའི་འདུ་བ་ཡོད་པ་མ་ཡིན་ནོ། །དེ་ཕྱིར་ས་འཛིན་བདག་པོ་དེ་རྣམས་ངེས་པས་སམ། །རྒྱལ་པོའི་སྲིད་རྣམས་སྤངས་ཏེ་ཞི་བ་ཐོབ་པ་ཅན། །རྒྱལ་སྲིད་དག་ལ་བསྙེན་ནམ་དབང་པོ་སྦས་ཉིད་ལས། །
མཐར་མ་ཐུག་པར་ཐར་པར་མངོན་པའི་ང་རྒྱལ་བྱས། །དེ་དག་རྣམས་ཀྱི་རྒྱལ་སྲིད་ལ་ཞི་ཇི་ལྟ་བཞིན། །བདག་ནི་ནགས་ཚལ་རབ་ཐོབ་ངེས་པས་མ་ཡིན་ཞིང་། །ཁྱིམ་དང་གཉེན་གྱི་འདུ་ཤེས་ཞགས་པ་བཅད་ནས་ནི། །ཐར་གྱུར་སླར་ཡང་རབ་ཏུ་འཇུག་པར་འདོད་མ་ཡིན། །དེ་ལྟར་བདག་

172-1-35a

ཉིད་རྣམ་ཤེས་ཡོན་ཏན་རྗེས་མཐུན་པ། །རེ་འདོད་སྤངས་ཤིང་གཏན་ཚིགས་ལྡན་པ་སྒྲོགས་པ་སྟེ། །མི་དབང་བདག་ཉིད་སྐྱེས་ཀྱི་སྨྲ་ལྡན་ཐོས་གྱུར་ནས། །གསང་སྔགས་འཛིན་པ་ཡིས་ཀྱང་ལན་ནི་སྨྲས་པའོ། །གང་ཞིག་ཆོས་ཀྱི་ཆོ་གར་ངེས་པ་ཁྱོད་ཀྱི་འདི། །
རིག་པ་མིན་པ་མ་ཡིན་འདི་ནི་དུས་རིག་མིན། །ན་ཚོད་ལ་གནས་ཡབ་མ་མྱ་ངན་ཕྱིར་བྱིན་ནས། །ཆོས་འདོད་ཁྱོད་ཀྱི་ཆོས་མ་ཡིན་པར་གྱུར་པའོ། །ངེས་པར་ཁྱེད་ཀྱི་བློ་ཡང་ཤིན་ཏུ་ཕྲ་མིན་པ། །ཡང་ན་ཆོས་དང་དོན་དང་འདོད་པར་མཁས་མ་མིན། །གང་ཞིག་མ་མཐོང་འབྲས་བུའི་དོན་དུ་ཁྱེད་ཉིད་
ཀྱིས། །མངོན་སུམ་དོན་ནི་ཡོངས་སུ་བརྙས་པར་མཛད་ནས་གཤེགས། །ཡང་སྲིད་ཡོད་ཅེས་ཁ་ཅིག་དག་ནི་སྨྲ་བ་སྟེ། །མེད་ཅེས་ཁ་ཅིག་དག་ནི་ངེས་པར་དམ་འཆའོ། །དེ་ལྟར་གང་ཚེ་དོན་འདི་ཐེ་ཚོམ་གྱུར་པ་སྟེ། །དེ་ཕྱིར་ལོངས་སྤྱོད་པར་ནུས་དཔལ་ནི་ཉེ་བར་གནས། །གལ་ཏེ་
སླར་ཡང་རབ་ཏུ་འཇུག་པ་གང་ཡང་ཡོད། །དེར་ནི་ཇི་ལྟར་འབད་པ་དག་ལ་དགའ་བར་བགྱི། །ཅི་སྟེ་གཞན་དུ་རབ་ཏུ་འཇུག་པ་གང་ཡང་མེད། །འགྲོ་བ་འདི་ཡི་འབད་རྩོལ་མེད་ལས་ཐར་པ་འགྲུབ། །ཁ་ཅིག་འཇིག་རྟེན་ཕ་རོལ་ཡོད་ཅེས་སྨྲ་བ་སྟེ། །ཐར་པའི་སྦྱོར་བ་ལ་ནི་བསྔགས་པ་བྱེད་
མ་ཡིན། །ཇི་ལྟར་མེ་ཡི་དྲོ་དང་ཆུ་ཡི་གཤེར་བ་ཉིད། །དེ་ལྟར་རབ་ཏུ་འཇུག་པར་རང་བཞིན་ཉིད་དུ་སྨྲ། །དགེ་དང་མི་དགེ་ཉིད་དང་སྲིད་དང་སྲིད་མིན་ལ། །ཁ་ཅིག་རང་བཞིན་ལས་ཞེས་བསྔགས་པ་བྱེད་པ་སྟེ། །གང་ཕྱིར་འདི་དག་ཐམས་ཅད་རང་བཞིན་ལས་ཡིན་ཏེ། །དེ་ཡི་ཕྱིར་
ཡང་རབ་ཏུ་འབད་པ་དོན་མེད་འགྱུར། །གང་ཞིག་དབང་པོ་རྣམས་ཀྱིས་ངེས་པར་རབ་སྤྱོད་པ། །ཡུལ་རྣམས་ལ་ནི་དགའ་བ་དང་ནི་མི་དགའ་ཉིད། །གང་ཞིག་དགའ་དང་ནད་རྣམས་དག་གིས་སྦྱོར་བྱེད་དེ། །དེ་ལ་གང་གིས་འབད་དམ་དེ་ནི་རང་བཞིན་ནོ། །ཆུ་རྣམས་ཀྱིས་ནི་མེ་རྣམས་
ཞི་བར་ཉེ་འགྲོ་ཞིང་། །འོད་ཟེར་རྣམས་ཀྱིས་ཆུ་ནི་སྐམས་པར་བྱེད་པ་སྟེ། །ལུས་ལ་ཡང་དག་གནས་པའི་འབྱུང་བ་ཐ་དད་རྣམས། །གཅིག་ཉིད་གྱུར་ནས་འགྲོ་བ་དག་ནི་འདྲེན་པར་བྱེད། །གང་ཞིག་ལག་པ་རྐང་པ་ལྟོ་རྒྱབ་མགོ་རྣམས་ཀྱིས། །མངལ་དུ་སོང་བའི་ངོ་བོ་ངེས་པར་སྒྲུབ་བྱེད་ལ། །

172-1-35b

གང་ཚེ་བདག་ཉིད་དེ་ཡི་དེ་ཡིས་སྦྱོར་བ་སྟེ། །རང་བཞིན་ལས་བྱུང་དེ་ཤེས་རྣམས་ཀྱིས་དེ་སྨྲའོ། །བྱ་དང་རི་དགས་རྣམས་ཀྱི་སྣ་ཚོགས་ངོ་བོ་དང་། །ཚེར་མའི་རྣོན་པོ་ཉིད་དུ་རབ་ཏུ་བྱེད་པ་སུ། །རབ་ཏུ་འཇུག་པ་འདི་ཀུན་རང་བཞིན་ལས་ཡིན་ལ། །འདོད་པ་བྱེད་པ་ཡོད་མིན་འབད་པ་གང་ལས་
སོ། །དེ་བཞིན་གཞན་རྣམས་དབང་ཕྱུག་ལས་སྐྱེས་སྨྲ་བ་སྟེ། །དེར་ནི་སྐྱེས་བུའི་རབ་ཏུ་འཇུག་པ་ལ་དོན་ཅི། །འགྲོ་བའི་རབ་ཏུ་འཇུག་ལ་གང་ཉིད་རྒྱུ་ཡིན་ཞིང་། །ལྡོག་པ་ལ་ནི་ངེས་པར་དེ་ཉིད་རྒྱུ་ཡིན་ནོ། །ཁ་ཅིག་བདག་གི་མཚན་མ་ཉིད་དུ་སྨྲ་བ་སྟེ། །རབ་ཏུ་སྐྱེ་བ་ཉིད་དང་སྲིད་པ་ཟད་
པ་ཡང་། །འབད་པ་མེད་ལས་རབ་ཏུ་སྐྱེ་བར་སྨྲ་བ་སྟེ། །འབད་པ་ཡིས་ནི་ཐར་པ་འཐོབ་པར་སྨྲ་བའོ། །ལྷ་ཡི་མཆོད་སྦྱིན་དྲང་སྲོང་རྣམས་ཀྱི་རིག་བྱེད་དང་། །ཕ་ཡི་བུ་ལོན་མེད་པ་བུ་རྣམས་ཀྱིས་ཏེ་མི། །གང་གི་གྲོལ་བ་ཡོད་པ་དེ་ཡི་ཐར་པ་ཞེས། །བུ་ལོན་གསུམ་པོ་དེ་དང་ལྷན་ཅིག་སྐྱེས་
པའོ། །དེ་ལྟར་ཆོ་གའི་བྱ་བའི་རིམ་པ་འདི་ཡིས་ནི། །འབད་རྩོལ་བཅས་པའི་ཐར་པ་དེ་ཤེས་རྣམ་སྨྲ་ལ། །འབད་རྩོལ་ལྡན་པ་ཡིན་ཡང་རྣམ་པར་གནོན་པ་ཡིས། །ཐར་པ་འདོད་པ་རྣམས་ནི་ངལ་བ་ཐོབ་པར་བྱེད། །དེ་ཕྱིར་ཞི་བ་གལ་ཏེ་ཐར་ལ་གུས་ཡོད་ན། །ཆོ་གར་བརྗོད་པ་ཇི་ལྟར་
རིགས་པས་བསྙེན་མཛོད་དང་། །འདི་ཡི་ཉེ་བར་འཐད་པ་དེ་ལྟར་གྱུར་པ་སྟེ། །མི་ཡི་བདག་པོའི་ཀུན་ནས་གདུང་བ་ཉམས་པར་འགྱུར། །དཀའ་ཐུབ་ནགས་ཚལ་དག་ནས་ཁང་པར་འཇུག་པ་ལ། །ཁྱོད་ཀྱི་སྐྱོན་གྱི་བློ་གྲོས་གང་ཞིག་རབ་ཞུགས་ཏེ། །ཡབ་གཅིག་དེར་ཡང་ཁྱོད་ཀྱི་བསམ་པར་མ་གྱུར་
དང་། །སྔ་མ་རྣམས་ཀྱང་ནགས་ནས་རང་གི་ཁང་པར་གཤེགས། །དཀའ་ཐུབ་ནགས་ན་གནས་པ་བུ་རྣམས་ཀྱིས་བསྐོར་ཏེ། །རྒྱལ་པོ་ཨ་མ་རི་ཥ་གྲོང་དུ་ཞུགས་གྱུར་ལ། །དེ་བཞིན་འཕགས་མིན་རྣམས་ཀྱིས་ས་ནི་རྣམ་བཅོམ་པ། །དཀའ་ཐུབ་ནགས་ནས་འོངས་ནས་རངས་བྱེད་ཀྱིས་གསུངས་
སོ། །དེ་བཞིན་རྡོ་བ་དང་བཅས་བདག་པོའི་ལྗོན་ཤིང་མིང་། །ནགས་གནས་བུ་དང་བཅས་པ་གྲོང་དུ་བཞུགས་པ་སྟེ། །ཚངས་པའི་དྲང་སྲོང་གྱུར་དང་ཐུབ་པ་གནས་འཇོག་ལས། །སྦྱིན་སྲེག་དང་བཅས་མཐའ་ཅན་ལྷ་ཡིས་དཔལ་བཟུང་ངོ་། །རྣམ་པ་དེ་ལྟར་ཆོས་དང་གྲགས་པར་རབ་བཞུགས་པ། །

172-1-36a

ནགས་རྣམས་བོར་ནས་ཁང་ཁྱིམ་རྣམས་སུ་སོང་བ་སྟེ། །དེ་ཕྱིར་དཀའ་ཐུབ་ནགས་ནས་ཆོས་ཀྱི་ཆེད་དུ་ཉིད། །ཁྱིམ་ན་རབ་ཏུ་འགྲོ་བ་སྐྱོན་ཡོད་མ་ཡིན་ནོ། །དེ་ནས་མི་སྐྱོང་རྒྱལ་པོའི་དགའ་དང་ཕན་པ་ཉིད། །བྱས་པའི་བློན་པོ་དེ་ཡི་ཚིག་དག་གསན་
ནས་ནི། །དམན་མིན་མ་འཁྲུགས་ཆགས་མིན་བརྟན་དང་གནས་པ་ལ། །མྱུར་མིན་ཚིག་ནི་རྒྱལ་པོ་སྲས་ཀྱིས་སྨྲས་པའོ། །འདིར་ནི་ཡོད་དང་མེད་ཅེས་ཐེ་ཚོམ་གང་དེ་ནི། །གཞན་གྱི་ཚིག་གིས་བདག་ལ་འདི་ན་ངེས་པ་མེད། །དཀའ་ཐུབ་དང་ནི་ཞི་བས་དེ་ཉིད་རྟོགས་གྱུར་ནས། །
གང་འདིར་ངེས་པར་བདག་ཉིད་ཀྱིས་ནི་གཟུང་བར་བགྱི། །ཕན་ཚུན་གནོད་ཅིང་མི་གསལ་ཐེ་ཚོམ་སྐྱེ་བ་ཡི། །ལྟ་བ་དག་ནི་ལེན་པར་བདག་གིས་ནུས་མ་ཡིན། །མུན་པར་ལོང་བས་ལོང་བའི་ལམ་མཁན་བྱེད་པ་བཞིན། །མཁས་པའི་སྐྱེ་བོ་སུ་ཞིག་གཞན་གྱི་རྐྱེན་གྱིས་འགྲོ། །དེ་ཉིད་
མ་མཐོང་གྱུར་ཀྱང་འོན་ཀྱང་ཁོ་བོ་ཡི། །དགེ་དང་མི་དགེར་ཐེ་ཚོམ་ན་དགེ་བློ་གྲོས་གྱུར། །འབྲས་བུ་མེད་ཕྱིར་ལ་ཡང་དགེ་བའི་བདག་ཉིད་མཆོག །སྨོད་པའི་བདག་ཉིད་དེ་ཉིད་ལ་ཡང་བདེ་བ་མེད། །རྣམ་གཞག་མེད་པའི་ལུང་འདི་ཡང་ནི་མཐོང་གྱུར་
ནས། །ཚད་ལྡན་རྣམས་ཀྱིས་གང་སྨྲས་དེ་ནི་ལེགས་རྟོགས་མཛོད། །ཉེས་ལ་རབ་དམན་ཚད་ལྡན་ཉིད་ནི་རྟོགས་མཛོད་དང་། །ཉེས་པ་རབ་ཏུ་དམན་པས་བདེན་མིན་སྨྲ་བ་ཡིན། །ཁྱིམ་ལ་འཇུག་པར་དམིགས་གང་བདག་ལ་ཁྱོད་ཀྱིས་ནི། །སྨྲས་ཤིང་རངས་བྱེད་ལ་སོགས་རྣམས་ནི་དཔེ་
བསྟན་ཏེ། །དེ་རྣམས་ཚད་མིན་ཆོས་ངེས་རྣམས་སུ་ནུས་མེད་ཅིང་། །ཚད་མའི་ཆེད་དུ་བརྟུལ་ཞུགས་རྣམས་ནི་ཡོངས་སུ་ཟད། །དེ་ལྟ་ན་ཡང་ཉི་མ་ས་ལ་ལྷུང་གྱུར་ལ། །གངས་དང་ལྡན་པའི་རི་བོས་བརྟན་ཉིད་འདོར་ན་ཡང་། །དེ་ཉིད་མ་མཐོང་ཡུལ་ལ་ཁ་བལྟས་དབང་པོ་ནི། །ཁྱིམ་རྣམས་
དག་ལ་སོ་སོ་སྐྱེ་བོ་མི་བསྙེན་ཏོ། །བདག་ནི་འབར་བར་གྱུར་པའི་མེ་ལ་འཇུག་པ་སྟེ། །དོན་མ་བྱས་པར་ཁྱིམ་གྱི་གཞི་ལ་རབ་མི་འཇུག །དེ་ལྟར་ཐུགས་རྒྱལ་ལྡན་དེས་དམ་བཅའ་མཛད་གྱུར་ཅིང་། །ཇི་ལྟར་འདོད་བཞིན་བཞེངས་ནས་ངར་འཛིན་མེད་པར་གཤེགས། །དེ་ནས་མཆི་མ་དང་བཅས་བློན་

172-1-36b

དང་གཉིས་སྐྱེས་གཉིས། །དེ་ཡི་བསྟན་པ་ཉིད་དང་ངེས་པ་ཐོས་གྱུར་ནས། །གཏི་མུག་བཞིན་ལྡན་རྗེས་སུ་སོང་ནས་སྡུག་བསྔལ་བ། །དལ་བུས་སོང་ནས་གྲོང་ཁྱེར་ཉིད་དུ་སོང་བར་གྱུར། །དེ་ནས་དེ་ལ་བརྩེ་དང་མི་སྐྱོང་ལ་གུས་ལས། །དེ་དག་ལྟོས་བྱས་རབ་ཏུ་སོང་ཞིང་གནས་གྱུར་
ལ། །གསལ་ཞིང་སྣང་བས་ཉི་མ་བལྟ་བར་དཀའ་བ་ལྟར། །དེ་ནི་ལམ་དུ་ལྟ་བར་མ་ནུས་འདོར་བར་མིན། །མཆོག་ཏུ་གཤེགས་ཏེ་གཤེགས་པ་ཤེས་ཕྱིར་དེ་དག་གིས། །སོ་པའི་སྐྱེས་བུ་གཙང་མ་སྦས་པ་རྣམས་བྱས་ནས། །དགའ་ཞིང་སྲས་པོ་འདོད་པའི་རྒྱལ་པོ་ལ་སོང་ནས། །ཇི་ལྟར་
བལྟའམ་ཞེས་ནི་ཇི་ལྟར་ཡང་སོང་ངོ་། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། གཞོན་ནུ་རྗེས་སུ་ཚོལ་བའི་ལེའུ་སྟེ་དགུ་པའོ།།      །།སྐུ་སྟོད་རྒྱས་ཤིང་རྒྱ་ཆེན་རྒྱལ་པོའི་སྲས་པོ་སྟེ། །བསྲེག་བྱ་དང་བསྔགས་བདག་པོ་དེ་དག་རྣམས་སྤངས་ཏེ། །དབའ་
རླབས་གཡོ་བའི་ཆུ་བོ་གང་གཱ་རྒལ་ནས་ནི། །དཔལ་དང་ལྡན་པའི་རྒྱལ་པོའི་ཁབ་ཏུ་གཤེགས་པར་གྱུར། །རི་རྣམས་དག་གིས་ལེགས་པར་སྦས་དང་བརྒྱན་པ་དང་། །དགེ་དང་དཀའ་ཐུབ་གཏེར་བས་གཟུང་དང་གཙང་བ་སྟེ། །ཞི་བ་རང་བྱུང་ཚངས་པ་མཐོ་རིས་ལོགས་སུ་བཞིན། །རི་
ལྔས་མཚན་པའི་གྲོང་ཁྱེར་རབ་ཏུ་ཐོབ་པར་གྱུར། །ཟབ་མོར་གྱུར་པའི་མདངས་དར་དེ་ཡི་ལུགས་གསལ་བ། །སྐྱེས་བུ་རྣམས་ནི་ཤིན་ཏུ་གནོན་པ་མཐོང་གྱུར་ནས། །ཁྱུ་མཆོག་རྒྱལ་མཚན་དེ་ཡི་བརྟུལ་ཞུགས་བརྟན་པ་བཞིན། །དེར་ནི་དེ་ཚེ་སྐྱེ་བོ་རྣམས་ནི་ཡ་མཚན་གྱུར། །དེ་རབ་
མཐོང་ནས་གཞན་གང་མ་སོང་དེ་གནས་ཤིང་། །དེར་ནི་གང་ཞིག་ལམ་ན་གནས་དེ་རྗེས་འགྲོ་ཞིང་། །གང་ཞིག་སྐྱེན་པོར་སོང་སྟེ་བརྟན་པོར་སོང་གྱུར་ལ། །ཁ་ཅིག་བསྡད་པ་གང་ཡིན་དེ་ནི་ལངས་པའོ། །སྐྱེ་བོ་ཁ་ཅིག་དེ་ལ་མཆོད་པའི་ལག་པ་ཡིས། །བསྟི་སྟང་བྱས་ནས་ཁ་ཅིག་
མགོ་བོས་ཕྱག་འཚལ་ཞིང་། །ཁ་ཅིག་གཉེན་པོའི་ཚིག་གིས་མངོན་པར་སྟོད་བྱེད་ཅིང་། །ཁ་ཅིག་དེ་ལ་རབ་ཏུ་མཆོད་ནས་སོང་བར་གྱུར། །དེ་རབ་མཐོང་ནས་སྣ་ཚོགས་ཆ་ལུགས་རྣམས་ངོ་ཚ། །རབ་བཀྲམ་ཚིག་ནི་ལམ་དུ་སྨྲ་བ་མེད་པར་སོང་། །དངོས་སུ་གཞན་དུ་ཆོས་རྣམས་

172-1-37a

དག་གི་ཉེ་ལོགས་སུ། །ཁ་ཅིག་ཚུལ་མ་ཡིན་པའི་བློ་གྲོས་མ་གྱུར་ཏོ། །ལྷ་དང་མཚུངས་པའི་མི་དབང་སྲས་པོ་དེ་མཐོང་ནས། །བྱ་བ་གཞན་མ་རྣམས་ཀྱང་རྒྱལ་པོའི་ལམ་དུ་ནི། །མཆོད་མང་བཀུར་སྟི་སྔོན་འགྲོ་བུད་མེད་རྣམས་ཀྱི་འམ། །སྐྱེས་པ་རྣམས་ཀྱིས་མིག་
དང་ངོམས་པར་མ་གྱུར་ཏོ། །དཔྲལ་བའམ་སྨིན་མ་དག་དང་ཞལ་ལམ་སྤྱན་དག་དང་། །སྐུ་འམ་ཕྱག་དག་དང་ནི་འགྲོས་སམ་ཞབས་དག་ནི། །གང་གིས་དེ་ཡི་གང་ཉིད་དེར་ནི་མཐོང་གྱུར་པ། །དེ་ཉིད་ཀྱིས་ནི་དེ་ཡི་མིག་དག་བཅིངས་པར་གྱུར། །སྨིན་མ་མཛོད་སྤུ་དང་བཅས་སྤྱན་དག་
ཡངས་པ་དང་། །སྐུ་ལུས་མཛེས་ཤིང་དགེ་བའི་དྲ་བ་དང་ལྡན་ཕྱག །ས་སྐྱོང་ཉིད་དུ་འོས་པའི་དགེ་སློང་ཆ་ལུགས་དེ། །མཐོང་ནས་རྒྱལ་པོའི་ཁབ་ཀྱི་ཕུན་ཚོགས་གཡོས་པར་གྱུར། །དེ་ནས་ཁང་པའི་ཕྱི་ནས་རྣམ་རྒྱས་སྐྱེ་བོའི་ཚོགས། །མ་ག་དྷཱ་ཡི་ཁྱིམ་གྱི་ངོ་བོ་བཟོ་སྦྱངས་ཀྱིས། །
མཐོང་བར་གྱུར་ཏེ་དེ་ཡི་རྒྱུ་མཚན་དྲིས་པ་སྟེ། །དེ་ནས་འདི་ལ་སྐྱེས་བུ་རྣམས་ཀྱིས་དེ་སྨྲས་སོ། །ཡེ་ཤེས་མཆོག་གམ་ཡང་ན་ས་ཡི་དཔལ་དག་ནི། །འཐོབ་པར་འགྱུར་ཞེས་བྲམ་ཟེ་རྣམས་ཀྱིས་གང་སྨྲས་པ། །རབ་ཏུ་གཤེགས་པར་སྐྱེ་བོས་ངེས་པར་མཐོང་བ་ཡི། །ཤཱཀྱའི་བདག་པོའི་སྲས་པོ་དེ་ནི་
འདི་ཡིན་ནོ། །དེ་ནས་དོན་ཐོས་ཡིད་ཀྱིས་ཆགས་ཤིང་ཞེན་གྱུར་པའི། །རྒྱལ་པོ་ཡིས་ནི་སྐྱེས་བུ་དེ་ཉིད་ལ་སྨྲས་པ། །དེ་ནི་གང་དུ་སོང་ཞེས་རྣམ་པར་ཤེས་པར་མཛོད། །དེ་ནས་དེ་ལྟར་བགྱི་ཞེས་སྐྱེས་བུ་རྗེས་སུ་སོང་། །གཡོ་མི་སྤྱན་ནི་གཉའ་ཤིང་གང་ཙམ་གཟིགས་པ་སྟེ། །གསུང་ནི་ཀུན་ནས་སྙོམས་
ཤིང་ཟབ་མོའི་འགྲོས་མངའ་བ། །གཡོ་བའི་སེམས་དང་ལུས་རྣམས་དག་ནི་ངེས་བསྡམས་ནས། །དགེ་སློང་མཆོག་ཉིད་དེ་ཡང་བསོད་སྙོམས་ལ་གཤེགས་སོ། །ཇི་ལྟར་ཉེ་བར་འཐད་པའི་བསོད་སྙོམས་བསྣམས་ནས་ནི། །རྣམ་པར་དབེན་ཞིང་ཆར་རབ་འབབ་པར་རབ་གཤེགས་ལ། །དེར་ནི་
ཚུལ་བཞིན་རིགས་པས་མངོན་པར་གསོལ་གྱུར་ནས། །དེ་ནི་ས་འཛིན་རི་བོ་སྐྱ་བསེང་ལ་འཛེགས་སོ། །རོ་དྷའི་ནགས་ཀྱིས་ཉེ་བར་སྦས་པའི་རི་བོ་དེར། །རྨ་བྱའི་སྐད་ཀྱིས་རབ་གང་ལོ་མའི་སྤྱིལ་བོ་ན། །འཆར་རིའི་སྟེང་ན་ཉི་མ་གཞོན་ནུ་ཇི་ལྟ་བར། །ངུར་སྨྲིག་གོས་ཀྱིས་ཉི་མའི་ཉི་མ་དེ་མཛེས་

172-1-37b

སོ། །དེར་ནི་དེ་ཉིད་རྒྱལ་པོའི་འཁོར་དེ་མཐོང་གྱུར་ནས། །བཟོ་སྦྱངས་རྒྱལ་པོ་ལ་ནི་གཏམ་དག་བྱས་པ་སྟེ། །ཐོས་ནས་རྒྱལ་པོ་དེས་ཀྱང་མཆོད་པ་མང་པོ་ལས། །དེར་ནི་སྦས་པའི་རྗེས་སུ་འབྲང་བས་རབ་ཏུ་སོང་། །སྐྱ་བསེང་རི་བོ་མཆོག་ལ་སྐྱ་བསེང་ན་དང་ནི། །བརྩོན་འགྲུས་མཉམ་
ཞིང་རི་བོ་དང་མཉམ་སྐུ་ལུས་ཅན། །མི་ཡི་སེང་གེའི་འགྲོས་ཅན་ཅོད་པན་འཛིན་པ་སྟེ། །རལ་པ་གཡོ་བའི་སེང་གེ་བཞིན་དུ་འཛེགས་པར་གྱུར། །དེ་ནས་དེ་ཡི་སྟེང་ན་རྩེ་མོར་གྱུར་པ་ཡི། །བྱང་ཆུབ་སེམས་དཔའ་དབང་པོ་ཉེ་བར་ཞི་བ་ནི། །རི་བོང་གིས་མཚན་སྤྲིན་གྱི་སྦུབས་ནས་བྱུང་བ་བཞིན། །
སྐྱིལ་མོ་ཀྲུང་གིས་བཞུགས་ནས་རྣམ་པར་མཛེས་པ་མཐོང་། །གཟུགས་དང་ཕུན་སུམ་ཚོགས་དང་ཉེ་བར་ཞི་བ་ཡི། །ཆོས་ཀྱི་སྤྲུལ་པ་བཞིན་དུ་ཉེ་བར་བཞུགས་དེ་ལ། །ཡ་མཚན་དང་བཅས་རབ་ཏུ་བསྙེན་ལྡན་མི་དབང་པོ། །རང་བྱུང་ལ་ནི་བརྒྱ་བྱིན་གྱིས་བཞིན་ཉེ་བར་གནས། །རིགས་པ་
ཡིས་ནི་རིགས་པ་རིག་པ་རྣམས་ཀྱི་མཆོག །ཁམས་མཉམ་གྱུར་པ་དེ་ལ་སོང་ནས་དྲིས་པ་སྟེ། །དེ་ཉིད་ཀྱིས་ཀྱང་མཚུངས་ཤིང་ཞི་བས་མི་སྐྱོང་ལ། །ཡིད་ནི་རང་བཞིན་གནས་དང་ནད་མེད་སྨྲས་པར་གྱུར། །དེ་ནས་གཙང་ལ་གླང་པོའི་རྣ་བ་ལྟར་སྔོ་བའི། །རྡོ་བའི་ལོགས་ལ་རྒྱལ་པོ་ཡང་
དག་ངེས་གནས་ཤིང་། །ཉེ་སར་ཉེ་བར་བསྡད་ནས་རྗེས་སུ་མཐུན་པ་ཡིས། །དེ་ཡི་དགོངས་པ་རྣམ་པར་ཤེས་འདོད་འདི་སྨྲས་སོ། །རིམ་པས་འོངས་པ་ཉིད་དང་ཡོངས་སུ་བརྟགས་པ་སྟེ། །ཁྱོད་ཀྱི་རིགས་ཀྱིས་བདག་གི་དགའ་བ་མཆོག་ཡིན་ལ། །གང་ཕྱིར་བདག་ལ་རང་གི་ན་ཚོད་སྨྲ་
འདོད་པ། །སྐྱེས་ཏེ་དེ་ཕྱིར་བརྩེ་བའི་ཚིག་འདི་མཁྱེན་པར་མཛོད། །ཁྱོད་ཀྱི་རིགས་ནི་རྣམ་རྒྱས་སྔོན་དུ་ཉི་མ་སྟེ། །ལུས་ཀྱང་ན་ཚོད་གསར་པ་གསལ་ལ་མཛེས་པ་འདི། །གང་ཕྱིར་འདི་ནི་ཁྱོད་ཀྱི་བློ་གྲོས་རིམ་མེད་པས། །སློང་མོ་ཉིད་ལ་མངོན་དགའ་རྒྱལ་སྲིད་ལ་མ་ཡིན། །ཁྱོད་ཀྱི་
ལུས་འདི་ཙནྡན་དམར་པོ་འོས་པ་སྟེ། །ངུར་སྨྲིག་གིས་དཀྲིས་དེ་ནི་འོས་པ་མ་ཡིན་ནོ། །ལག་པ་འདི་ནི་སྐྱེ་དགུ་སྐྱོང་བར་འོས་པ་སྟེ། །གཞན་གྱིས་བྱིན་པའི་བཟའ་བ་ཟ་བར་འོས་མ་ཡིན། །དེ་ཕྱིར་ཞི་བ་གལ་ཏེ་ཡབ་ཀྱི་རྒྱལ་སྲིད་ལ། །ཁྱོད་ཀྱི་ཡབ་ཀྱི་བརྩེ་ལས་སྟོབས་ཀྱིས་མི་འདོད་ཅིང་། །

172-1-38a

ཁྱོད་ཀྱི་བློ་གྲོས་རིམ་པར་བཟོད་པར་མ་གྱུར་ན། །སྐྱེན་པར་ཁོ་བོའི་ཡུལ་གྱི་ཕྱེད་ལ་ལོངས་སྤྱོད་མཛོད། །དེ་ལྟ་ན་ནི་རང་གི་སྐྱེ་ལ་གནོད་མིན་ཞིང་། །དུས་ཀྱི་རིམ་པ་ཡིས་ཀྱང་དཔལ་གང་བསྔགས་པ་སྟེ། །དེ་ཕྱིར་ཁྱོད་ཀྱིས་བདག་ལ་བརྩེ་བ་མཛོད་ཅིག་དང་། །
དམ་པ་རྣམས་དང་བཅས་པས་དམ་པའི་དཔལ་འཕེལ་ལོ། །ཅི་སྟེ་ད་ནི་རིགས་ཀྱིས་ཁེངས་པ་ཉིད་ལས་ནི། །བདག་ཅག་རྣམས་ལ་ཁྱོད་ལ་བློ་གཏད་ཡོན་ཏན་མེད། །སྡེ་རྒྱས་རྣམས་ནི་མདའ་ཡིས་རྣམ་པར་དཀྲུགས་བྱས་ནས། །བདག་དང་བཅས་པས་ཕ་རོལ་རྣམས་ནི་ཕམ་པར་མཛོད། །
དེ་ཕྱིར་འདིར་ནི་གཉིས་དབུས་གཅིག་བློ་ཚོལ་མཛོད་ལ། །ཆོས་དོན་འདོད་པ་རྣམས་ལ་ཆོ་ག་བཞིན་བསྙེན་མཛོད། །འདི་ན་སྡེ་ཚན་གསུམ་པོ་ཆགས་ལས་རྣམ་བཟློག་ནས། །འདི་དང་གཞན་དུ་ཕྱིན་ནས་ལྷུང་བ་ཀུན་ནས་ཐོབ། །གང་ཞིག་དོན་དང་ཆོས་ལ་གནོད་ནས་འདོད་པ་དང་། །ཆོས་དང་འདོད་པ་
ཡོངས་སུ་བརྙས་ནས་དོན་དང་ནི། །འདོད་དང་དོན་དག་ཉེ་བར་ཞི་བས་ཆོས་དེ་ནི། །དོན་བྱས་གལ་ཏེ་མཐའ་དག་འདོད་ན་དོན་ཡིན་ནོ། །དེ་ཕྱིར་སྡེ་ཚན་གསུམ་ལ་ངེས་པར་བསྙེན་པ་ཡིས། །ཁྱོད་ཀྱིས་གཟུགས་འདི་འབྲས་བུ་བཅས་པ་ཉིད་དུ་མཛོད། །ཆོས་དང་དོན་དང་འདོད་པ་དམན་མིན་ཐོབ་པ་ལ། །
མི་རྣམས་དག་གིས་དམན་མིན་སྐྱེས་བུའི་དོན་དུ་སྨྲ། །དེ་ཕྱིར་གཞུ་ནི་རྣམ་པར་འགེངས་འོས་རྒྱས་པའི་ཕྱག །འདི་དག་འབྲས་བུ་མེད་པར་བྱེད་པར་འོས་མིན་ཏེ། །ང་ལས་ནུ་བཞིན་འདིས་ནི་འཇིག་རྟེན་གསུམ་རྣམས་ཀྱང་། །ཕམ་པར་འོས་པ་ཡིན་ན་ས་འདིར་སྨོས་ཅི་དགོས། །བརྩེ་བས་ངེས་པར་དེ་ནི་
བདག་གིས་སྨྲ་བ་སྟེ། །ཡ་མཚན་གྱིས་མིན་དབང་ཕྱུག་ཉིད་ཀྱི་ཆགས་པས་མིན། །ཁྱོད་ཀྱིས་དགེ་སློང་ཉིད་ཀྱི་ཆ་ལུགས་འདི་མཐོང་ནས། །རྗེས་སུ་བརྩེ་བ་སྐྱེས་ནས་མཆི་མ་རང་བྱུང་ངོ་། །དེ་ཕྱིར་རང་རིགས་རབ་མཚུངས་ཁྱོད་ཀྱི་གཟུགས་ཇི་སྲིད། །རྒ་བས་ཟིལ་གྱིས་མནན་ནས་སླར་ཡང་མ་འོངས་པར། །
སློང་མོའི་གནས་འདོད་འདོད་པ་རྣམས་ལ་ལོངས་སྤྱོད་ལ། །དུས་སུ་ཆོས་ལ་དགའ་བ་ཆོས་ནི་གྱིས་མཛོད་ཅིག །འཁོགས་པས་ངེས་པར་ཆོས་ནི་འཐོབ་པར་ནུས་པ་སྟེ། །འདོད་པ་ཉེ་བར་སྤྱོད་ལ་རྒས་པའི་འགྲོ་བ་མེད། །དེ་ཕྱིར་དར་ལ་བབ་པའི་འདོད་པ་རྣམས་སྨྲ་སྟེ། །བར་མའི་ནོར་ཡིན་རྒན་པོ་རྣམས་

172-1-38b

ཀྱི་ཆོས་ཡིན་ནོ། །གསོན་པའི་འཇིག་རྟེན་དག་ན་ཆོས་དང་དོན་དག་ནི། །རྣམ་པར་འགལ་བར་གྱུར་པ་ཡིན་ཕྱིར་ལང་ཚོ་རྣམས། །ཡང་དག་སྲུང་བ་ཡིན་ཡང་ཐུབ་པར་དཀའ་བ་སྟེ། །གང་ཕྱིར་འདོད་པས་ལམ་དེ་ལས་ནི་འཕྲོག་པར་བྱེད། །ན་ཚོད་འཁོགས་པ་རྣམས་ནི་རྣམ་སྤྱོད་ལྡན་པ་སྟེ། །ཤིན་ཏུ་
བརྟན་པའི་གནས་སྐབས་མཆོག་ཏུ་སོང་བ་རྣམས། །ངོ་ཚ་བ་ཉིད་ཕྱིར་དང་སོང་བ་མ་ཡིན་ཕྱིར། །འབད་པ་ཉུང་ངུས་ཞི་བའི་བདག་ཉིད་གྱུར་པའོ། །དེ་ཉིད་ཕྱིར་ན་གཡོ་ཞིང་ཡུལ་ནི་གཙོ་བོ་དང་། །རབ་མྱོས་བཟོད་པ་མ་ཡིན་རིང་པོར་མཐོང་མིན་ལ། །འབྲོག་དགོན་དག་ལ་དེས་པར་ཐར་ནས་དབུགས་
ཕྱུང་བཞིན། །གཡོ་སྒྱུ་མང་པོའི་ལང་ཚོ་ཤིན་ཏུ་འདས་ནས་སོ། །དེ་ཕྱིར་མི་བརྟན་གཡོ་ལ་བག་མེད་ལྡན་པ་ཡི། །ན་ཚོད་གསར་པ་འདི་ནི་རེ་ཞིག་རྣམ་པར་འོང་། །འདོད་པའི་ལྷ་ཡི་སྔོན་དུ་ན་ཚོད་དབེན་ཡིན་ལ། །དབང་པོ་རྣམས་ལས་བསྲུང་བར་ནུས་པ་མ་ཡིན་ནོ། །ཅི་སྟེ་ཁྱོད་ཀྱི་ཆོས་ཉིད་
མཛད་པར་འདོད་པ་ནི། །མཆོད་སྦྱིན་གྱིས་ལྷ་མཆོག་མཛོད་འདི་ནི་རིགས་ཀྱི་ཆོས། །མཆོད་སྦྱིན་རྣམས་ཀྱིས་མཐོ་རིས་ལོགས་ནི་བྱིན་བརླབས་ནས། །ལྷ་དབང་ཉིད་ཀྱང་མཐོ་རིས་ལོགས་སུ་གཤེགས་པར་འགྱུར། །གསེར་གྱི་དཔུང་རྒྱན་རྣམ་པར་བཅིངས་པའི་ཕྱག་རྣམས་དང་། །ནོར་བུའི་སྒྲོན་མས་འབར་
བའི་དཔུང་རྒྱན་སྣ་ཚོགས་ཅན། །མི་སྐྱོང་དྲང་སྲོང་རྣམས་དང་དྲང་སྲོང་ཆེན་པོ་རྣམས། །ངལ་བས་གར་གཤེགས་གྲོས་དེར་མཆོད་སྦྱིན་རྣམས་ཀྱིས་གཤེགས། །དེ་ལྟར་མ་ག་དྷཱ་ཡི་བདག་པོས་ཚིག་སྨྲས་པ། །གང་ཞིག་དབང་པོའི་བཞིན་དུ་སྨྲ་བ་ཡང་དག་མཛེས། །སྣ་ཚོགས་དུ་མའི་ས་
ཕྱོགས་ཏི་སེའི་གངས་རི་ལྟར། །རྒྱལ་པོའི་སྲས་དེས་དེ་ཐོས་གྱུར་ནས་རྣམ་མ་གཡོས། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། བཟོ་སྦྱངས་སྔོན་དུ་སོང་བའི་ལེའུ་སྟེ་བཅུ་པའོ།།      །།དེ་ནས་བཤེས་ཀྱི་སྒོ་ནས་ཕན་པ་མིན་པའི་དོན། །དེ་ལྟར་མ་ག་དྷཱ་ཡི་
བདག་པོས་སྨས་པ་ཡིས། །རང་གནས་རྣམ་པར་འགྱུར་མི་ན་རིགས་གཙང་གཙང་པ་པོ། །ཟས་གཙང་རྒྱལ་པོའི་སྲས་ཀྱིས་ཚིག་འདི་སྨྲས་པའོ། །སེང་གེས་མཚན་པའི་ཡངས་པའི་རིགས་སུ་རབ་སྐྱེས་པ། །ཁྱེད་ཀྱི་ཆོ་ག་དེ་ནི་ངོ་མཚར་ཆེ་མ་ཡིན། །གང་ཕྱིར་བཤེས་གཉེན་ཕྱོགས་སུ་

172-1-39a

གཤེགས་འདོད་ཁྱོད་ཀྱི་ནི། །ཡོངས་སུ་དག་པའི་སྤྱོད་པས་སྤྱོད་པ་དེ་ཡིན་ནོ། །རང་རིགས་རྗེས་སུ་སྤྱོད་པས་དམ་པ་མིན་ལ་བྱམས། །དབང་པོ་མ་ཚང་བ་ལ་དཔལ་བཞིན་གནས་མིན་ལ། །སྔ་མས་བྱས་པའི་དགའ་བ་རིམ་རྣམས་ཀྱིས། །དེ་ནི་དམ་པ་རྣམས་
ཀྱིས་རྣམ་པར་འཕེལ་བར་བྱེད། །དོན་ནི་དཀའ་བ་རྣམས་སུ་མི་རྣམས་གང་ཞིག་གིས། །མཛའ་བོ་རྣམས་ཀྱིས་མཉམ་པའི་དོན་གྱུར་འཇིག་རྟེན་ན། །བཤེས་གཉེན་དེ་རྣམས་བློ་ཡིས་ཡོངས་སུ་ཤེས་བགྱི་སྟེ། །རང་གནས་དག་ནི་འཕེལ་བར་གང་གི་ཕྱིར་མ་ཡིན། །དེ་ལྟར་གང་གིས་རྫས་དག་ཐོབ་ནས་
འཇིག་རྟེན་ན། །བཤེས་རྣམས་དང་ནི་ཆོས་ལ་ངེས་པར་སྦྱོར་བྱེད་པ། །དེ་རྣམས་ཀྱིས་ནི་ནོར་གྱི་སྙིང་པོ་ཐོབ་པ་སྟེ། །མཐར་ནི་ཉམས་ལས་གདུང་བ་སྐྱེད་པར་བྱེད་མ་ཡིན། །རྒྱལ་པོ་མཛའ་བོ་ཉིད་དང་འཕགས་པ་ཉིད་ཀྱིས་ཀྱང་། །ཁྱོད་ཀྱི་ངེས་པ་གང་ཞིག་བདག་ལ་དམིགས་པ་འདི། །
མཛའ་བོ་ཉིད་ཀྱིས་འདིར་ནི་རྗེས་སུ་བསྙད་བགྱི་སྟེ། །རྒོལ་བ་གཞན་མིན་འདིར་ནི་བདག་གིས་སྨྲ་བར་བགྱི། །བདག་གིས་རྒ་དང་འཆི་བའི་འཇིགས་པ་རྣམ་རིག་ནས། །ཐར་པ་འདོད་པས་ཆོས་འདི་རབ་ཏུ་ཐོབ་པ་སྟེ། །གཉེན་འདུན་དགའ་བ་མཆི་མའི་གདོང་ལྡན་རྣམས་སྤངས་ནས། །མི་དགེའི་རྒྱུར་
གྱུར་འདོད་པ་རྣམས་ནི་སྔོན་ཉིད་དོ། །བདག་ནི་ཡུལ་རྣམས་དག་ལ་ཇི་ལྟར་འཇིགས་པ་ཉིད། །དེ་ལྟར་སྦྲུལ་གྱི་དུག་རྣམས་ལ་ནི་མི་འཇིགས་ཤིང་། །ནམ་མཁའ་དག་ལས་འཕོས་པའི་ཐོག་རྣམས་ལས་མིན་ལ། །རླུང་དང་བཅས་པའི་མེ་རྣམས་དག་ལས་མ་ཡིན་ནོ། །མི་རྟག་འདོད་པ་རྣམས་ཀྱིས་
དགེ་བའི་ནོར་རྐུ་ཞིང་། །སྟོང་པ་རྨི་ལམ་སྒྱུ་མ་དང་མཚུངས་འཇིག་རྟེན་ན། །ཡིད་ལ་སྨོས་པ་ཡིས་ཀྱང་རྨོངས་པར་བྱེད་པ་སྟེ། །མི་ཡི་སེམས་ནི་བདག་ཉིད་གནས་པ་སྨོས་ཅི་འཚལ། །ཀྱེ་མ་འདོད་པས་ཟིལ་གྱིས་ནོན་ན་མཐོ་རིས་སུ། །བདེ་བ་ཐོབ་མིན་འཆི་བའི་འཇིག་རྟེན་ན་སྨོས་ཅི། །རླུང་གྲོགས་
ལྡན་པའི་མེ་ཡིས་བུད་ཤིང་གིས་ཇི་ལྟར། །སྲེད་དང་བཅས་པའི་འདོད་པ་རྣམས་ཀྱིས་ཚིམ་པ་མེད། །འགྲོ་ན་འདོད་པ་རྣམས་དང་མཉམ་པའི་དོན་མེད་མེད། །རྨོངས་ལས་དེ་རྣམས་ཁོ་ནར་སྐྱེ་བོ་རབ་ཏུ་ཆགས། །དེ་ཉིད་ཤེས་ནས་དེ་ལྟར་དོན་མེད་འཇིགས་པ་སྟེ། །ཤེས་ལྡན་སུ་ཞིག་རང་གིས་དོན་

172-1-39b

མེད་མངོན་པར་འདོད། །རྒྱ་མཚོའི་གོས་ཅན་ས་ནི་ཀུན་ནས་ཐོབ་ནས་ཀྱང་། །རྒྱ་མཚོ་ཆེན་པོའི་ཕ་རོལ་རྒལ་བར་འདོད་པ་སྟེ། །རྒྱ་མཚོའི་ཆུ་བོ་རྣམས་དང་ཆུ་བྲན་རྣམས་ཀྱིས་ལྟར། །འཇིག་རྟེན་པ་ཡི་འདོད་པ་རྣམས་ཀྱིས་ངོམས་པ་མེད། །ལྷ་ཡིས་གསེར་གྱི་ཆར་པ་དག་ཀྱང་ཕབ་གྱུར་ལ། །
གླིང་རྣམས་བཞི་པོ་མཐའ་དག་ལ་ཡང་ལོངས་སྤྱད་དེ། །བརྒྱ་བྱིན་གྱི་ཡང་གདན་ཕྱེད་དག་ཀྱང་རབ་ཐོབ་ནས། །ང་ལས་ནུ་ནི་ཡུལ་རྣམས་དག་ལ་ངོམས་པ་མེད། །ལྷ་ན་ལྷ་རྣམས་ཀྱི་ཡང་རྒྱལ་སྲིད་ལོངས་སྤྱད་ནས། །མཆོད་སྦྱིན་བརྒྱ་པ་ལྷ་མིན་འཇིགས་ལས་རབ་ཉམས་ཚེ། །རྒྱགས་
ལས་དྲང་སྲོང་ཆེན་པོ་རྣམས་ལའང་ཁུར་བཅོམ་ནས། །འདོད་པ་རྣམས་ལ་ངོམས་མེད་སྒྲ་མེད་ལྷུང་བར་འགྱུར། །ཨེ་ལའི་རྒྱལ་པོས་མཐོ་རིས་རྣམས་ནི་རྣམ་དཀྲུགས་ཏེ། །བརླ་མཛེས་ལྷ་མོ་དེ་ཉིད་དབང་དུ་བླངས་ནས་ཀྱང་། །སྲེད་ཕྱིར་དྲང་སྲོང་རྣམས་ལས་གསེར་དག་ཕྲོགས་པ་སྟེ། །ཡུལ་
རྣམས་ལ་ནི་ངོམས་མེད་ཉམས་པར་སོང་བར་གྱུར། །ལྷ་མིན་ལས་ནི་དབང་ཆེན་དབང་ཆེན་ལས་དགྲ་མེད། །དགྲ་མེད་ལས་སླར་དབང་ཆེན་གང་དུ་ཉེར་སོང་སྟེ། །མཐོ་རིས་དང་ནི་ས་འམ་ཡུལ་ནི་དེ་རྣམས་སུ། །བསྐལ་པའི་ཚོགས་འཁྲུགས་རྣམས་ལ་སུ་ཞིག་བློ་གཏད་བྱེད། །ཤིང་ཤུན་གོས་ཅན་
རྩ་བ་འབྲས་བུ་ཆུ་ཟ་ཞིང་། །ལག་འགྲོའི་སྦྲུལ་ལྟར་རིང་བའི་རལ་པའི་ཁུར་རྣམས་ཀྱང་། །གང་གིས་དོན་གཞན་མ་ཡིན་ཐུབ་པ་ཡང་ཉམས་ཏེ། །འདོད་པ་ཞེས་བྱའི་དགྲ་བོ་རྣམས་ནི་སུ་ཡིས་ཚོལ། །རྣོ་བའི་མཚོན་ཆ་དང་ནི་རྣོ་འཛིན་མཚོན་ཆ་ཡང་། །གང་གི་དོན་དུ་འཇིགས་སྡེ་ལས་ནི་འཆི་ཐོབ་ལ། །
དེ་དག་རྣམས་ཀྱི་དགེ་མིན་སེམས་ཀྱང་སྤྱོད་རྣམས་ཀྱིས། །འཇོམས་ཕྱིར་དེ་ཕྱིར་བརྟུལ་ཞུགས་རྣམས་ཀྱིས་སྨོས་ཅི་དགོས། །ཡུལ་རྣམས་སུ་ནི་མྱ་ངན་ཉུང་ངུར་ཤེས་གྱུར་ནས། །ཀུན་ནས་སྦྱོར་ཞིང་མཆོག་ཏུ་ངོམས་པ་མེད་པ་ཉིད། །དམ་པ་རྣམས་ཀྱིས་སྨོད་ཅིང་ངེས་པར་སྡིག་པ་སྟེ། །འདོད་
པའི་མིག་ཅན་དུག་ནི་སུ་ཡིས་ལེན་པར་བྱེད། །ཞིང་གི་ལས་ལ་སོགས་པ་རྣམས་ཀྱིས་ཉམ་ཐག་ཅིང་། །འདོད་པ་རྣམས་ལ་མི་ཚར་རྣམས་ཀྱི་རང་གནས་དང་། །འདོད་པའི་བདག་ཉིད་རྣམས་ཀྱི་རང་གནས་ཐོབ་ནས་ནི། །འདོད་པ་རྣམས་ནི་སྤོང་བར་སེམས་ལྡན་རྣམས་ཀྱིས་ནུས། །གྲུབ་འགྱུར་

172-1-40a

འདོད་པ་རྣམས་སུ་རྒྱགས་པ་ཉེར་འཐོབ་ཕྱིར། །དོད་པ་ཅན་ལ་འདོད་འབྱོར་རྒུད་པ་ཤེས་བྱ་སྟེ། །རྒྱགས་ལས་བྱ་བ་མིན་བྱེད་བྱ་བ་མ་ཡིན་ལ། །གང་གིས་ཟད་ཅིང་ངན་འགྲོར་ཉེ་བར་འགྲོ་བར་འགྱུར། །གང་ལ་འབད་པས་ཐོབ་ཅིང་ཡོངས་སུ་བསྐྱངས་པ་རྣམས། །
རྣམ་པར་བསླུས་ནས་སླར་ཡང་སོ་སོར་འགྲོ་བ་སྟེ། །བདག་ཉིད་ལྡན་པས་གཡར་པོ་དང་མཚུངས་དེ་རྣམས་སུ། །འདོད་པ་རྣམས་ལ་འདི་ན་མཁས་པ་སུ་ཞིག་དགའ། །བཙལ་ནས་དང་ནི་བླངས་ནས་སྐོམ་པ་སྐྱེས་པ་ཡིན། །གང་རྣམས་མི་འདོད་སྡུག་བསྔལ་བར་ནི་ཡོངས་འགྲོ་ལ། །འཇིག་
རྟེན་དག་ན་རྩྭ་སྒྲོན་དང་མཚུངས་དེ་རྣམས་སུ། །འདོད་པ་རྣམས་ལ་སེམས་ལྡན་སུ་མི་དགའ་བ་ཡིན། །དགའ་ལྡན་མིན་པའི་སྙིང་ལ་གང་གིས་རྣམ་རྨུགས་ཏེ། །རྣམ་པར་ཉམས་པར་འགྲོ་འགྱུར་བདེ་བར་འགྲོ་མིན་ཞིང་། །ཀུན་ནས་ཁྲོས་པའི་སྦྲུལ་དང་རབ་མཚུངས་དེ་རྣམས་སུ། །འདོད་པ་
རྣམས་ལ་སེམས་ལྡན་སུ་ཡི་དགའ་བ་ཡིན། །ལྟོགས་པས་ཉམ་ཐག་ཁྱི་བཞིན་རུས་པ་ཟོས་ནས་ཀྱང་། །གང་རྣམས་ལ་ནི་ངོམས་པར་འགྱུར་བ་མ་ཡིན་ཉིད། །འཁོགས་པའི་ནུས་པའི་ཀེང་རུས་དང་མཉམ་དེ་རྣམས་སུ། །འདོད་པ་རྣམས་ལ་སེམས་ལྡན་སུ་ཡི་དགའ་བ་ཡིན། །
གང་གི་རྒྱལ་པོ་རྐུན་པོ་ཆུ་དང་མེ་རྣམས་ལས། །ཐུན་མོང་གྱུར་པ་ཉིད་ཕྱིར་སྡུག་བསྔལ་སྲེད་བྱེད་དེ། །རབ་ཏུ་གཏོར་བའི་ཤ་དང་མཚུངས་པ་དེ་རྣམས་སུ། །འདོད་པ་རྣམས་ལ་སེམས་ལྡན་སུ་ཡི་དགའ་བ་ཡིན། །དགྲ་བོ་དང་ནི་གཉེན་འདུན་འབྲེལ་པ་རྣམས་ལས་ཀྱང་། །གང་ལ་
གནས་པ་རྣམས་ནི་སྐྱེན་པར་རྒུད་པ་སྟེ། །སྐྱེ་མཆེད་དང་མཚུངས་ཉེ་བར་འཚེ་བ་དེ་རྣམས་སུ། །འདོད་པ་རྣམས་ལ་སེམས་ལྡན་སུ་ཡི་དགའ་བ་ཡིན། །རི་དང་ནགས་དང་ཆུ་དང་རྒྱ་མཚོ་རྣམས་སུ་ཡང་། །གང་ལ་རྣམ་པར་འཕྱོ་བ་རྣམས་ནི་ལྷུང་འགྱུར་ཏེ། །ལྗོན་ཤིང་རྩེ་མོའི་འབྲས་བུ་དང་
མཚུངས་དེ་རྣམས་སུ། །འདོད་པ་རྣམས་ལ་སེམས་ལྡན་སུ་ཡི་དགའ་བ་ཡིན། །རྣམ་པ་སྣ་ཚོགས་འབད་པ་དྲག་པོ་འཐོབ་པ་རྣམས། །གང་གིས་སྐད་ཅིག་གིས་འདིར་ཉམས་པར་འགྱུར་བ་སྟེ། །རྨི་ལམ་ཉེ་བར་ལོངས་སྤྱོད་དང་མཚུངས་དེ་རྣམས་སུ། །འདོད་པ་རྣམས་ལ་སེམས་

172-1-40b

ལྡན་སུ་ཡི་དགའ་བ་ཡིན། །གང་རྣམས་སྒྲུབས་ནས་དང་ནི་རྣམ་པར་སྤེལ་ནས་དང་། །ཡོངས་སུ་བསྐྱངས་ནས་དང་ནི་བདེ་བར་འགྲོ་མིན་ལ། །ལྕི་བའི་མེ་མ་མུར་དང་རབ་མཚུངས་དེ་རྣམས་སུ། །འདོད་པ་རྣམས་ལ་སེམས་ལྡན་སུ་ཡི་དགའ་བ་ཡིན། །གཏུམ་པོ་ལོང་བྱེད་
བཅོམ་བརླག་པ་དང་དཎ་ཌ་ཀ །གང་གི་དོན་དུ་སྒྲ་ངན་རྣམས་ནི་ཉམས་གྱུར་ལ། །རོ་བསྲེགས་ཤིང་དང་རབ་ཏུ་མཚུངས་པ་དེ་རྣམས་སུ། །འདོད་པ་རྣམས་ལ་བདག་ལྡན་སུ་ཡི་དགའ་བ་ཡིན། །ལྷ་མིན་མཛེས་སྦྱིན་དང་ནི་ཉེ་བའི་མཛེས་སྦྱིན་བདག །གང་གི་དོན་དུ་ཕན་ཚུན་དགྲར་
སོང་ཉམས་གྱུར་ལ། །མཛའ་བཤེས་གྱུར་ཅིང་རྣམ་པར་འབྲལ་བ་དེ་རྣམས་སུ། །འདོད་པ་རྣམས་ལ་སེམས་ལྡན་སུ་ཡི་དགའ་བ་ཡིན། །གང་དག་རྣམས་ཀྱི་དོན་དུ་ཆུ་དང་མེ་ལ་དང་། །ཤ་ཟ་རྣམས་ལ་བདག་ཉིད་འདིར་ནི་འདོར་བ་སྟེ། །དགེ་བ་མ་ཡིན་དགྲ་བོར་གྱུར་པ་དེ་རྣམས་སུ། །
འདོད་པ་རྣམས་ལ་སེམས་ལྡན་སུ་ཡི་དགའ་བ་ཡིན། །བཤེས་མེད་འདོད་པའི་དོན་དུ་བཀྲེན་པོར་བྱེད་པ་སྟེ། །གསོད་དང་འཆིང་བ་ལ་སོགས་སྡུག་བསྔལ་རབ་ཐོབ་ལ། །འདོད་པའི་དོན་དུ་སེམས་ནི་བཀྲེན་པའི་དཀའ་ཐུབ་ཅན། །གསོན་པའི་འཇིག་རྟེན་འཆིང་བ་དང་ནི་ངལ་བར་འགྲོ། །རི་དགས་རྣམས་
ནི་གསོད་ཕྱིར་གླུ་ཡིས་འཕྲོག་བྱེད་ལ། །གཟུགས་ཀྱི་དོན་དུ་ཕྱེ་མ་ལེབ་རྣམས་མེར་མཆོང་ཞིང་། །ཤ་དག་དོན་གཉེར་ཉ་ཡིས་ལྕགས་ནི་ཟ་བ་སྟེ། །དེ་ཕྱིར་ཡུལ་རྣམས་དོན་མེད་ཉིད་དུ་འབྲས་བུ་སྨིན། །འདོད་པའི་ལོངས་སྤྱོད་ཡིན་ཞེས་གང་གི་བློ་ཡིན་ལ། །ཁ་ཅིག་ལོངས་སྤྱོད་རྣམས་ནི་
ཡོངས་སུ་སྤྱོད་པ་སྟེ། །གོས་སོགས་རྫས་ཀྱི་ཡོན་ཏན་ཡིན་ཕྱིར་འཇིག་རྟེན་ན། །སྡུག་བསྔལ་ཞི་བར་བྱེད་ཅེས་རབ་ཏུ་གཟུང་བར་བྱ། །སྐོམ་པ་རབ་ཏུ་ཞི་ཕྱིར་ཆུ་དག་འདོད་པ་སྟེ། །བཀྲེས་པ་རྣམ་པར་ཉམས་ཕྱིར་བཟའ་བ་དེ་བཞིན་དུ། །རླུང་དང་གདུང་བ་སྒྲིབ་པའི་ཆེད་དུ་ཁང་པ་སྟེ། །
མདོམས་དང་གྲང་བ་སྒྲིབ་པའི་ཕྱིར་ནི་བགོ་བའོ། །དེ་བཞིན་ཉིད་ནི་རྣམ་པར་འཇོམས་ཕྱིར་གནས་ཡིན་ལ། །དེ་བཞིན་ལམ་ལ་ངལ་བ་ཉམས་ཕྱིར་ཐེག་པ་སྟེ། །དེ་བཞིན་གནས་ནི་རྣམ་པར་སྦྱོང་ཕྱིར་སྟན་ཡིན་ལ། །གཙང་དང་ནད་མེད་སྟོབས་ལ་བརྟེན་ཕྱིར་ཁྲུས་ཡིན་ནོ། །སྡུག་བསྔལ་རབ་ཏུ་ཞི་

172-1-41a

བའི་ཆེད་དུ་གྱུར་པ་སྟེ། །དེ་བཞིན་སྐྱེ་དགུ་རྣམས་ཀྱི་ཡུལ་ནས་ལོངས་སྤྱོད་མིན། །རབ་ཏུ་ཞི་བའི་ཆོ་གར་རབ་ཞུགས་ཤེས་རབ་ཅན། །ལོངས་སྤྱོད་རྣམས་ནི་བཟའ་ཞེས་སུ་ཡིས་ཁས་ལེན་བྱེད། །གང་ཞིག་འགྲོ་བའི་གདུང་བས་རྣམ་པར་གདུངས་པ་ནི། །
ལོངས་སྤྱོད་ཡིན་ཞེས་གྲང་བའི་བྱ་བར་ནན་ཏན་བྱེད། །སྡུག་བསྔལ་ཞི་བའི་བདག་ཉིད་ལ་ནི་རབ་འཇུག་ཅིང་། །དེས་ནི་འདོད་པ་རྣམས་ལ་ལོངས་སྤྱོད་འདུ་ཤེས་བྱེད། །གང་ཕྱིར་འདོད་པ་རྣམས་ལ་མཐའ་གཅིག་གྱུར་མིན་ཏེ། །དེ་ཕྱིར་བདག་གིས་དེ་ལ་ལོངས་སྤྱོད་འདུ་ཤེས་མེད། །
དངོས་པོ་གང་ཉིད་ཀྱིས་ནི་བདེ་བ་སྟེར་བྱེད་པ། །དེ་ཉིད་ཀྱིས་ནི་སླར་ཡང་སྡུག་བསྔལ་འདྲེན་པར་བྱེད། །བགོ་བ་ལྕི་མོ་དང་ནི་ལྕི་བ་མ་ཡིན་ཉིད། །གྲང་དང་དྲོ་བའི་ཚེ་ན་བདེ་དང་བདེ་མིན་ལ། །ཟླ་འོད་རྣམས་དང་ཙནྡན་ཉིད་ཀྱང་དྲོ་བ་ན། །བདེ་བའི་ཕྱིར་དང་སྡུག་བསྔལ་ཕྱིར་ཡིན་གྲང་
བ་ནའོ། །གང་ཕྱིར་རྙེད་དང་མ་རྙེད་ལ་སོགས་འཇིག་རྟེན་ན། །ཀུན་གྱི་གཉིས་སུ་འཛིན་པ་རྣམས་ནི་རབ་ཞུགས་ཏེ། །དེ་ཕྱིར་མཐའ་གཅིག་བདེ་བ་ཡོད་པ་མ་ཡིན་ཞིང་། །ས་ན་སྐྱེས་བུ་ཁ་ཅིག་མཐའ་གཅིག་སྡུག་བསྔལ་མིན། །བདེ་དང་སྡུག་བསྔལ་ཉིད་ནི་རྣམ་པར་
འདྲེས་མཐོང་ནས། །རྒྱལ་སྲིད་དང་ནི་བྲན་ཉིད་མཉམ་པ་བདག་གི་ལུགས། །རྒྱལ་པོ་ཉིད་ནི་རྟག་པར་རྒོད་པ་མ་ཡིན་ཞིང་། །བྲན་ནི་ཀུན་ནས་གདུང་བ་ཉིད་ཀྱང་མ་ཡིན་ནོ། །གང་ཕྱིར་མི་སྐྱོང་ཉིད་དུ་བཀའ་ལུང་ལྷག་པར་གྱུར། །དེ་ཕྱིར་རྒྱལ་པོའི་སྡུག་བསྔལ་དག་ནི་ཆེན་པོ་
ཉིད། །ཀུན་ནས་བརྟེན་པའི་ཤིང་དང་རབ་མཚུངས་རྒྱལ་པོ་ནི། །སྲིད་པའི་རྒྱུ་ལས་ཡོངས་སུ་ངལ་བར་འགྲོ་བ་ཉིད། །རྒྱལ་སྲིད་འདོར་ལྡན་བཤེས་མིན་མང་པོར་མི་སྐྱོང་གིས། །གལ་ཏེ་བློ་གཏད་འཆའ་བར་གྱུར་ན་རྒུད་པ་སྟེ། །ཅི་སྟེ་ཡང་ན་བློ་གཏད་ཉེ་བར་བྱེད་མིན་ན། །འདིར་
ནི་འཇིགས་ལྡན་རྒྱལ་པོའི་བདེ་བ་ཞེས་བྱ་ཅི། །གང་ཚེ་ས་ནི་མཐའ་དག་རྒྱལ་བར་གྱུར་ནས་ཀྱང་། །གནས་པའི་ཆེད་དུ་གྲོང་ཁྱེར་གཅིག་པུ་ཉིད་མཐོང་ཞིང་། །དེ་ཉིད་ལ་ཡང་ཕོ་བྲང་གཅིག་པུ་བསྙེན་བྱ་སྟེ། །རྒྱལ་པོར་གྱུར་པ་ཕ་རོལ་དོན་དུ་ངལ་ལམ་ཅི། །རྒྱལ་པོ་སྡོད་པའི་གནས་ཀྱང་

172-1-41b

གཉའ་ཤིང་གཅིག་ཉིད་དོ། །དེ་བཞིན་བཀྲེས་པ་འགེགས་ཕྱིར་བཟའ་བ་ཙམ་ཡིན་ལ། །དེ་བཞིན་ཉལ་ལམ་གཅིག་དང་སྟན་ནི་གཅིག་ཉིད་དེ། །ལྷག་དང་ལྷག་མིན་མི་སྐྱོང་གིས་ནི་རྒྱགས་ཕྱིར་རོ། །གལ་ཏེ་ཚིམ་པའི་དོན་དུ་འབྲས་བུ་དེ་འདོད་ན། །རྒྱལ་སྲིད་རྣམས་དང་བྲལ་ཡང་བདག་ནི་
ཚིམ་པ་ཡོད། །ཚིམ་པ་ཡོད་པར་གྱུར་ན་སྐྱེས་བུའི་འཇིག་རྟེན་ན། །ཁྱད་པར་མེད་པ་མ་ཡིན་ཐམས་ཅད་ཁྱད་པར་རོ། །དེ་ཕྱིར་དགེ་དང་ཞི་བའི་ལམ་ནི་རབ་ཐོབ་པ། །ཁོ་བོ་འདོད་པ་རྣམས་ལ་སླུ་བྱ་མ་ཡིན་ལ། །མཛའ་བཤེས་ཉིད་དུ་དྲན་པར་བྱས་ནས་ཡང་དང་ཡང་། །དམ་བཅའ་
ངེས་པར་སྐྱོངས་ཞེས་བདག་ལ་སྨྲས་པའོ། །བདག་ནི་ནགས་སུ་ཞུགས་པ་མི་བཟོད་པས་མིན་ལ། །དགྲ་བོའི་མདའ་རྣམས་ཀྱིས་ནི་མགོ་བོ་འདར་བ་མིན། །འབྲས་བུ་ལྷག་པ་རྣམས་ལས་རེ་བ་བྱས་མིན་ཏེ། །དེ་ཕྱིར་ཁྱེད་ཀྱི་ཚིག་དེ་བཟུང་བ་མ་ཡིན་ནོ། །གང་ཞིག་ཡང་ཡང་ཤིན་ཏུ་སོས་
འདེབས་ཁྲོས་པའི་སྦྲུལ། །སྤངས་ནས་སླར་ཡང་ལེན་པ་ལ་ནི་ནན་ཏན་བྱེད། །ཡང་ན་སྲེག་པའི་རང་བཞིན་འབར་བའི་རྩྭ་ཡི་མེ། །སྤངས་ནས་འདོད་པ་རྣམས་ནི་སླར་ཡང་དེ་ཡིས་བརྟེན། །གང་ཞིག་མ་ལོང་ལོང་བའི་ཕྱིར་ནི་འདོད་པ་སྟེ། །གྲོལ་བ་འཆིང་བའི་ཕྱིར་དང་ཕྱུག་པོ་ནོར་མེད་ཕྱིར། །
རང་བཞིན་གནས་པའི་སེམས་ནི་བསྙོན་པའི་སེམས་ཕྱིར་ལ། །ཡུལ་གྱི་བདག་ཉིད་ཕྱིར་ནི་འདོད་པར་དེ་ཡིས་བྱེད། །གང་ཞིག་འདིར་ནི་མཆོག་ཏུ་ཞི་བའི་བདེ་བ་དང་། །གཞན་དུ་སྡུག་བསྔལ་རྣམས་ནི་ཀུན་ནས་སྒྲིབ་པ་སྟེ། །བྱེད་ལྡན་རྒ་དང་འཆི་བའི་འཇིགས་ལས་སྒྲོལ་འདོད་པ། །སློང་མོ་ཉེ་
བར་རྒྱུ་ཞེས་རྗེས་སུ་བརྩེ་བྱ་མིན། །གང་ཞིག་འདིར་ནི་ཞི་བའི་བདེ་བ་འཐོབ་མིན་ལ། །གཞན་དུ་སྡུག་བསྔལ་རྣམས་ཀྱིས་རབ་ཏུ་འཛིན་བྱེད་ཅིང་། །ཕུན་ཚོགས་ཆེན་པོའི་བདག་ཉིད་ལ་ཡང་རྣམ་གནས་པའི། །སྲེད་པས་ཟིལ་གྱིས་གནོན་ལ་རྗེས་སུ་བརྩེ་བར་བྱས། །སེམས་པ་ཡི་དང་སྤྱོད་པ་ཡི་
དང་རིགས་ཉིད་ཀྱི། །ཁྱོད་ཀྱིས་བརྗོད་པ་ལ་ནི་རྗེས་སུ་མཐུན་པ་སྟེ། །སེམས་པ་ཡི་དང་སྤྱོད་པ་ཡི་དང་རིགས་ཉིད་ཀྱི། །ཁོ་བོ་ཡི་ཡང་དམ་བཅའ་འདྲེན་པར་མཚུངས་པའོ། །བདག་ཀྱང་འཁོར་བའི་རྒྱ་མཚོའི་མདའ་ཡིས་རྣམ་ཕུག་པ། །ཞི་བ་ཐོབ་པར་འདོད་པས་རྣམ་པར་ངེས་འབྱུང་སྟེ། །ནད་མེད་མཐོ་རིས་ན་

172-1-42a

ཡང་རྒྱལ་སྲིད་འཐོབ་པ་རུ། །འདོད་པ་མེད་ན་ཀྱེ་མ་མི་རྣམས་སུ་སྨོས་ཅི། །མི་སྐྱོང་གང་ཡང་སྡེ་གསུམ་མཐའ་དག་བརྟེན་པ་ནི། །རབ་མཆོག་མི་ཡི་དོན་ཞེས་ཁྱེད་ཀྱིས་བདག་ལ་སྨྲས། །དེ་ལྟར་དོན་མེད་ཅེས་ནི་བདག་གི་བསྟན་པ་འདིར། །མཛད་ལྡན་སྡེ་ཚན་གསུམ་
ནི་ཚིམ་བྱེད་ཀྱང་མ་ཡིན། །གང་དུ་དགའ་བར་འགྲོ་མིན་འཇིགས་མིན་ནད་མ་ཡིན། །སྐྱོང་མིན་ཉེ་བར་འདའ་མིན་སེམས་ཀྱི་ནད་རྣམས་མིན། །གང་ན་ཡང་དང་ཡང་དུ་བྱ་བ་ཡོད་མིན་པ། །དེ་ཉིད་སྐྱེས་བུའི་དོན་ནི་མཆོག་ཏུ་ཤེས་པའོ། །ཇི་སྲིད་ན་ཚོད་སོ་མ་རྣམ་པར་འགྱུར་བར་འགྲོ། །དེ་སྲིད་དགའ་བ་
ཡོངས་སུ་སྐྱོངས་མཛོད་ཞེས་སྨྲས་པ། །འདི་ནི་ངེས་པ་མ་ཡིན་གཡོ་བར་མཐོང་བ་སྟེ། །རྒ་བ་བརྟན་པ་མིན་དང་ལང་ཚོ་བརྟན་ལྡན་མཐོང་། །རང་གི་ལས་མཁན་མཐར་བྱེད་གང་གི་འགྲོ་བ་ནི། །ན་ཚོད་ཀུན་ལ་དབང་མེད་རྣམ་པར་འགུགས་པ་སྟེ། །རྣམ་གཞག་མ་ཡིན་རྣམ་པར་ཉམས་ཚེ་གང་ལྟར་
ནི། །ཞི་འདོད་མཁས་པ་དག་གིས་དགའ་བ་རྟོགས་པར་བྱེད། །གང་ཚེ་དགའ་བའི་གཞུ་དང་ནད་རྣམས་བཀྲམ་པའི་མདའ། །མཐར་བྱེད་དགེ་བ་མ་ཡིན་རྔོན་པ་བཞིན་གནས་པས། །སྐྱེ་དགུའི་རི་དྭགས་བསྐལ་པའི་ནགས་བརྟེན་རྣམས་གཏོར་ཏེ། །ན་ཚོད་རབ་མཆོག་ལ་དམིགས་ཡིད་ལ་རེ་བ་ཡི། །
དེ་ཕྱིར་གཞོན་ནམ་རྒན་དང་ཡང་ན་བྱིས་པ་ནི། །རབ་ཏུ་འཇུག་པར་འདོད་དམ་རྣམ་པར་ལྡོག་པ་ཉིད། །ཆོས་ལྡན་བདག་ཉིད་བྱས་པ་ཇི་ལྟ་བར་གྱུར་པ། །དེ་ལྟར་མྱུར་བ་ལྡན་པས་འདིར་ནི་བྱ་བར་འོས། །ཡང་ན་འདོད་པའི་འབྲས་བུ་རིགས་སུ་འོས་པ་རྣམས། །ཆོས་ཕྱིར་མཆོད་སྦྱིན་བྱ་བ་
གྱིས་ཞེས་གང་སྨྲས་པ། །གང་ཞིག་གཞན་གྱི་སྡུག་བསྔལ་བྱ་བས་འདོད་པ་སྟེ། །མཆོད་སྦྱིན་རྣམས་ལ་ཕྱག་འཚལ་བདེ་བ་འདོད་པ་མེད། །འབྲས་བུ་འདོད་པས་དབང་མེད་ཕ་རོལ་གསོད་པ་ལ། །སྙིང་རྗེའི་བདག་ཉིད་དམ་པ་རྣམས་ཀྱི་རིགས་ཚུལ་མིན། །གང་ཡང་མཆོད་སྦྱིན་དག་གི་འབྲས་
བུ་རྟག་གྱུར་པ། །སྙིང་རྗེའི་བདག་ཉིད་གང་གིས་དེ་ལྟར་བྱས་ནས་ཅི། །སེམས་ནི་ཞི་བ་ཡིས་སམ་ཚུལ་ཁྲིམས་བརྟུལ་ཞུགས་ཀྱིས། །གལ་ཏེ་ཆོས་ཚུལ་གཞན་གྱི་ཆོ་ག་མ་ཡིན་ལ། །དེ་ལྟ་ན་ཡང་མཆོད་སྦྱིན་བསྙེན་པར་འོས་མིན་ཏེ། །གང་དུ་གཞན་ལ་འཚེས་ནས་འབྲས་བུར་བརྗོད་པའོ། །འདི་

172-1-42b

ཉིད་དུ་ཡང་རེ་ཞིག་སྐྱེས་བུ་གནས་པ་ཡི། །བདེ་བ་གང་ཞིག་ཕ་རོལ་འཚེ་བས་རབ་ཞུགས་པ། །དེ་ཡང་བརྩེ་བཅས་བློ་དང་ལྡན་པའི་འདོད་མིན་ཏེ། །གང་ཞིག་སྲེད་པའི་མཐའ་མར་མི་མཐོང་ཀྱེ་མ་ཅི། །རྒྱལ་པོ་འཁོར་བར་བདག་གི་ཡིད་ནི་དགའ་མེད་ཅིང་། །འབྲས་བུར་རབ་ཏུ་འཇུག་ཕྱིར་བདག་
ནི་བསླུ་བྱ་མིན། །ཆུ་འཛིན་ཆར་གྱིས་བརྒྱབ་པའི་ལྗོན་ཤིང་བཞིན་དུ་ནི། །ཀུན་དུ་སོང་བའི་རབ་ཏུ་འཇུག་པ་རྣམས་ནི་གཡོ། །རྣམ་པར་ཐར་པ་སྨྲ་ལྡན་རྩིབས་ཕུར་ཐུབ་པ་ནི། །བལྟ་བར་འདོད་པས་བདག་ནི་འདིར་ཡོངས་དེ་ཡི་ཕྱིར། །མི་སྐྱོང་ཁོང་ལ་དགེ་བར་གྱུར་ཅིག་དེ་ནི་འགྲོ། །
བདག་གི་དེ་ཉིད་ལྟོས་མེད་དག་ནི་བཟོད་པར་མཛོད། །ལྷ་ན་དབང་པོ་བཞིན་སྲུངས་རྟག་པར་ཉི་བཞིན་སྲུངས། །ཡོན་ཏན་གྱིས་སྲུངས་ས་སྲུངས་འདིར་ནི་དགེ་ལེགས་སྲུངས། །ཚེ་སྲུངས་འཕགས་པ་ཡིས་སྲུངས་དམ་པའི་བུ་རྣམས་དང་། །དཔལ་སྲུངས་རྒྱལ་པོའི་བདག་ཉིད་ཀྱིས་ནི་
ཆོས་སྲུངས་ཤིག །ཁ་བའི་དགྲ་ཡི་རྡེག་ལས་སྐྱེས་པ་ལས་སྐྱེས་ནས། །ཇི་ལྟར་གཉིས་སྐྱེས་གང་ཞིག་ལུས་ནི་རྣམ་ཐར་འགྲོ། །ཁ་བའི་དགྲ་ཡི་དགྲ་ཡིས་ཁྱིམ་གྱི་དགྲ་འཇོམས་ནང་། །ནང་དུ་དེ་ལྟར་གང་ཞིག་ཡིད་ནི་རྣམ་པར་ཐར་གཤེགས་མཛོད། །ཐལ་མོ་དང་བཅས་རེ་ཐོབ་མི་སྐྱོང་གིས་སྨྲས་པ། །
ཁྱེད་ཀྱིས་ཇི་ལྟར་འདོད་པ་བགེགས་མེད་ཐོབ་པར་ཤོག །བྱ་བ་བྱས་པ་ཀུན་ནས་ཐོབ་པ་དུས་སུ་འདིར། །ཁོ་བོ་ཡི་ཡང་རྗེས་སུ་འཛིན་པ་ཁྱེད་ཀྱིས་མཛད་པའོ། །དེ་ལྟར་གྱུར་ཞེས་བརྟན་པའི་དམ་བཅའ་མཛད་ནས་ས་སྐྱོང་ལ། །དེ་ནས་དེ་ནི་ཐམས་ཅད་སྒྲོལ་གྱི་དཀའ་ཐུབ་གནས་སུ་གཤེགས། །ཡོངས་
སུ་གཤེགས་པ་དེ་མཐོང་ནས་ཀྱང་ཡ་མཚན་གྱུར་པ་ཡི། །མི་སྐྱོང་ཉིད་ཀྱང་རི་ཡི་ཚོགས་ཀྱི་གྲོང་ཁྱེར་ཉིད་དུ་སོང་། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། འདོད་པ་ལ་རྣམ་པར་སྨོད་པའི་ལེའུ་སྟེ་བཅུ་གཅིག་པའོ།།      །།དེ་ནས་ལུས་ཀྱིས་གང་བ་བཞིན། །
བུ་རམ་ཤིང་བའི་ཟླ་བ་ཡིས། །ཞི་བར་གནས་པའི་ཐུབ་པ་ཡིས། །རྩིབས་འཕུར་གྱིས་ནི་གནས་སུ་བསྙེན། །སྒྱུ་རྩལ་ཤེས་ཀྱི་རིགས་དེ་ཡིས། །རྒྱང་ནས་གཟིགས་ནས་མཐོན་པོ་ཡིས། །ལེགས་པར་འོངས་ཞེས་སྨྲས་པ་སྟེ། །དྲུང་དུ་ཉེ་བར་གཤེགས་པའོ། །དེ་གཉིས་ཕན་ཚུན་རིགས་པར་ནི། །

172-1-43a

ཁམས་ནི་སྙོམས་པར་དྲིས་ནས་སུ། །ཤིང་གཙང་བརྟུལ་ཞུགས་གདན་དག་ལ། །ས་ཕྱོགས་གཙང་བར་བཞུགས་པའོ། །བཀུར་མང་རྣམ་པར་ཡངས་པ་ཡིས། །ལྟ་བྱེད་དག་གིས་འཐུང་བ་བཞིན། །མི་སྐྱོང་སྲས་པོ་བཞུགས་དེ་ལ། །ཐུབ་པ་མཆོག་དེས་སྨྲས་པའོ། །
ཞི་བ་བདག་གི་ཤེས་པ་ལྟར། །ཁྱིམ་ནས་ངེས་པར་འབྱུང་བར་འགྱུར། །གཉིས་འཐུང་རྒྱགས་པས་ཞགས་པ་ལྟར། །བརྩེ་བའི་ཞགས་པ་བཅད་ནས་འོངས། །ཁྱོད་ཀྱི་ཡིད་ནི་ཤེས་རབ་དང་། །ཀུན་ནས་བརྟན་པ་ལྡན་པ་ཉིད། །དུག་གི་ལྗོན་པའི་འབྲས་བུ་བཞིན། །གང་ཁྱོད་དཔལ་དོར་ནས་
འོངས་སོ། །ལོངས་སྤྱད་ལྷག་མའི་ཕྲེང་བ་བཞིན། །བུ་རྣམས་དག་ལ་དཔལ་བྱིན་ནས། །ས་སྐྱོང་འཁོགས་པའི་ན་ཚོད་རྣམས། །གང་ཞིག་ནགས་འོངས་ངོ་མཚར་མིན། །བདག་གི་ལུགས་ནི་ངོ་མཚར་ཏེ། །སོ་མའི་ན་ཚོད་ལ་ཁྱོད་ཀྱིས། །ཡུལ་གྱི་སྤྱོད་ཡུལ་ལ་གནས་པ། །དཔལ་
ཉིད་ལོངས་མ་སྤྱད་ནས་འོངས། །དེ་ཕྱིར་ཆོས་འདི་ཤེས་པ་ལ། །ཁྱོད་ནི་དམ་པའི་སྣོད་ཡིན་ལ། །ཡེ་ཤེས་གྲུ་བོ་བྱིན་བརླབས་ནས། །སྐྱེན་པར་སྡུག་བསྔལ་རྒྱ་མཚོ་སྒྲོལ། །གང་ཡང་སློབ་མར་ཤེས་པ་ན། །དུས་ཀྱིས་བསྟན་བཅོས་ལ་འཇུག་སྟེ། །ཟབ་པ་ལས་དང་ནན་ཏན་ལས། །བདག་གི་ཡོངས་
རྟོག་ཁྱོད་མ་ཡིན། །དེ་ལྟར་རྩིབས་འཕུར་ཉིད་ཀྱི་ཚིག །མི་ཡི་དྲང་སྲོང་དེས་གསན་ནས། །མཆོག་ཏུ་དགའ་བར་གྱུར་པ་ཡིས། །ལན་གཉིས་རབ་ཏུ་སྨྲས་པའོ། །དོན་མ་བྱས་ཀྱང་འདི་ཡི་ནི། །དོན་བྱས་བཞིན་དུ་ད་ལྟ་ཉིད། །ཆགས་དང་བྲལ་བ་གང་འདི་ནི། །དམ་པ་ཁྱེད་ཀྱི་མངོན་དུ་གྱུར། །བལྟ་
བར་འདོད་པས་འོད་བཞིན་དང་། །སྒྲོལ་བར་འདོད་པས་གྲུ་བཞིན་དང་། །འགྲོ་བར་འདོད་པས་ལམ་མཁན་བཞིན། །ཁྱེད་མཐོང་བ་ལ་བདག་གིས་ཤེས། །རྒ་དང་འཆི་བའི་འཇིགས་རྣམས་ལས། །གལ་ཏེ་གསུང་བྱར་དགོངས་ནས་ནི། །དེ་ཕྱིར་གསུང་བར་འོས་པའོ། །དེ་ལྟར་རྩིབས་འཕུར་གྱིས་གཞོན་
ནུའི། །བདག་ཉིད་ཆེ་ལས་བསྐུལ་བ་ཉིད། །རང་ཉིད་ཀྱི་ནི་བསྟན་བཅོས་ཀྱི། །ངེས་པར་མདོར་བསྡུས་གསུངས་པའོ། །ཇི་ལྟར་འཁོར་བ་ཡིན་པ་ལ། །ཇི་ལྟར་ངེས་པར་ལྡོག་པ་ཉིད། །ཉན་པ་རྣམས་ཀྱི་མཆོག་གྲུབ་མཐའ། །ཁོ་བོའི་འདི་ནི་གསོན་མཛོད་ཅིག །རང་བཞིན་དང་ནི་རྣམ་འགྱུར་དང་། །

172-1-43b

སྐྱེ་དང་འཆི་དང་རྒ་བ་སྟེ། །རེ་ཞིག་སེམས་པ་ཞེས་བརྗོད་པ། །བརྟན་པའི་སེམས་པ་དེ་ཤེས་མཛོད། །དེ་ལ་རང་བཞིན་ཤེས་བྱ་བ། །རང་བཞིན་ཤེས་པ་ཤེས་པར་མཛོད། །འབྱུང་བ་ལྔ་ཡི་བདག་ཉིད་དང་། །བློ་དང་མི་གསལ་བ་ཉིད་དོ། །རྣམ་འགྱུར་ཞེས་བྱ་མཁྱེན་པར་མཛོད། །ཡུལ་
རྣམས་དང་ནི་དབང་པོ་རྣམས། །ལག་པ་རྐང་པ་དག་དང་ནི། །འཕོངས་དང་མདོམས་དང་དེ་བཞིན་ཡིད། །འདི་ཡི་ཞིང་ནི་ཤེས་པ་ལ། །ཞིང་ཤེས་པ་ཞེས་བྱ་བ་སྟེ། །ཞིང་ཤེས་པ་ཞེས་བདག་ཉིད་དུ། །བདག་ཏུ་བསམ་བྱེད་རྣམས་ཀྱིས་སྨྲས། །སློབ་མ་དང་བཅས་སེར་སྐྱ་ཡིས། །འདི་ནི་
རབ་ཏུ་རྟོགས་ཞེས་དྲན། །བུ་དང་བཅས་པའི་རྟོགས་པ་ཡང་། །སྐྱེ་དགུའི་བདག་པོར་འདི་བརྗོད་དོ། །སྐྱེ་བ་ཉིད་དང་རྒ་བ་དང་། །ན་བ་དང་ནི་འཆི་བ་དང་། །དེ་ནི་གསལ་ཞེས་རྟོགས་བྱ་སྟེ། །བཟློག་ལས་མི་གསལ་བ་ཡང་ངོ་། །མི་ཤེས་པ་དང་ལས་དང་སྲིད། །འཁོར་བའི་རྒྱུ་རྣམས་
ཤེས་བྱ་སྟེ། །གསུམ་པོ་འདིར་གནས་འགྲོ་བ་ནི། །སྙིང་སྟོབས་དེ་ནི་འདའ་བ་མེད། །ལོག་པ་ལས་དང་ངར་འཛིན་ལས། །ཐེ་ཚོམ་ལས་དང་མངོན་འཕྱོ་ལས། །ཁྱད་པར་མེད་ལས་ཐབས་མིན་ལས། །ཆགས་པ་ལས་དང་མངོན་ལྷུང་ལས། །དེ་ལ་ལོག་པ་ཞེས་བྱ་བ། །ཕྱིན་ཅི་ལོག་ཏུ་འཇུག་
པ་སྟེ། །བསམ་པར་བྱ་བ་གཞན་སེམས་ཤིང་། །བྱ་བ་གཞན་ནི་བྱེད་པའོ། །སྨྲ་བ་ང་དང་རིག་པ་དང་། །འགྲོ་བ་ང་དང་གནས་པ་ང་། །དེ་ལྟར་འདི་ནི་ངར་འཛིན་པ། །ངར་འཛིན་མེད་ཀྱི་འཇུག་པའོ། །གང་ཞིག་ཐེ་ཚོམ་མེད་དངོས་རྣམས། །གཅིག་ཏུ་གྱུར་པས་མཐོང་བ་སྟེ། །ཐེ་ཚོམ་མེད་
པས་འཇིམ་གོང་ལྟར། །དེ་འདིར་ཐེ་ཚོམ་དུ་བརྗོད་དོ། །གང་ཞིག་ང་ཉིད་དེ་ཉིད་འདི། །ཡིན་དང་བློ་དང་ལས་ཡིན་ལ། །གང་ཞིག་དྲངས་ཏེ་དེ་ཉིད་ང་། །ཞེས་གང་དེ་ནི་མངོན་པར་འཕྱོ། །རབ་རྒྱས་རབ་རྒྱས་མ་ཡིན་པའི། །ཁྱད་པར་མེད་པའི་ཁྱད་ཤེས་ཀྱི། །རང་བཞིན་རྣམས་ཀྱིས་གང་ཤེས་
པ། །དེ་ནི་ཁྱད་པར་མེད་ཅེས་དྲན། །ཕྱག་འཚལ་བ་དང་གཞི་མི་འགྲིབ། །བསང་གཏོར་དང་ནི་མངོན་འཐོར་སོགས། །ཐབས་མིན་ཞེས་ནི་ཤེས་ལྡན་གྱིས། །རབ་ཏུ་རྟོགས་བྱ་ཐབས་ཤེས་ཀྱི། །ཆགས་པ་མི་སྐྱེ་ཡུལ་རྣམས་ལ། །ཡིད་ངག་བློ་དང་ལས་རྣམས་ཀྱིས། །བློ་ངན་གང་གིས་

172-1-44a

ཆགས་བྱེད་པ། །དེ་ནི་མངོན་པར་ཆགས་ཞེས་དྲན། །བདག་གི་འདི་དང་འདི་བདག་ཅེས། །གང་ཞིག་སྡུག་བསྔལ་མངོན་སྙམ་སྟེ། །གང་ཞིག་འཁོར་བར་ལྷུང་ཤེས་བྱ། །དེ་ལྟར་མཁས་སྐྱེ་མ་རིག་པ། །གནས་སྐབས་ལྔ་ནི་རབ་ཐོབ་སྟེ། །མུན་པ་རྨོངས་པ་
རྨོངས་པ་ཆེ། །མུན་ལས་གྱུར་པ་གཉིས་ཉིད་དོ། །དེ་ལ་མུན་པ་ལེ་ལོར་དང་། །རྨོངས་པ་སྐྱེ་འཆིར་རྟོགས་པར་མཛོད། །རྨོངས་པ་ཆེན་པོ་འདོད་པ་ཞེས། །ཀུན་ནས་རྨོངས་མེད་མཁྱེན་པར་མཛོད། །གང་ཕྱིར་འདི་ན་འབྱུང་རྣམས་ཀྱིས། །ཆེན་པོར་ཡང་ནི་རབ་རྨོངས་བྱེད། །དེ་ཕྱིར་ཕྱག་ཆེན་
འདི་དག་ནི། །རྨོངས་པ་ཆེན་པོ་ཞེས་དྲན་ནོ། །མུན་ལས་གྱུར་པ་ཁྲོ་ཉིད་དུ། །ལྷག་པར་བྱེད་པའོ་ཁྲོ་མེད་ཀྱིས། །མི་ཤེས་མུན་ལས་གྱུར་པ་ནི། །སྐྱོ་བར་རབ་བཤད་སྐྱོ་མེད་ཀྱི། །མ་རིག་པ་འདིས་བྱིས་པ་འདི། །གནས་སྐབས་ལྔ་དང་ལྡན་པ་སྟེ། །འཁོར་བར་སྡུག་བསྔལ་གྱུར་པ་ཡི། །སྐྱེ་བ་
རྣམས་སུ་འབབ་པར་བྱེད། །ལྟ་བོ་ཉན་པོ་ཤེས་པ་པོ། །བྱ་བ་དང་ནི་རྒྱུ་ཉིད་དག །ད་ཞེས་དེ་ལྟར་འོངས་ནས་ནི། །འཁོར་བར་ཡོངས་སུ་འཁོར་བར་བྱེད། །བློ་ལྡན་རྒྱུ་འདི་རྣམས་ཀྱིས་འདི། །སྐྱེ་བའི་རྒྱུན་ལ་རབ་ཏུ་འཇུག །རྒྱུ་མེད་པ་ལས་འབྲས་བུ་མེད། །དེ་ལྟར་རྣམ་པར་ཤེས་པར་
འོས། །དེ་ལ་རྒྱུན་རབ་རབ་རྒྱས་མིག །གསལ་བ་དང་ནི་མི་གསལ་ཉིད། །ཐར་པ་འདོད་པ་བཞིན་མས་ཏེ། །ཡང་དག་འགྲོ་བ་རིགས་པར་མཛོད། །བཞི་པོ་དེ་དག་ཇི་ལྟ་བཞིན། །འགྱུར་མེད་གོ་འཕང་འཐོབ་པར་བྱེད། །དེ་ཕྱིར་འཇིག་རྟེན་ན་ཚངས་པ། །མཆོག་ཏུ་ཚངས་པར་སྨྲ་
བ་རྣམས། །ཚངས་པའི་སྤྱོད་པ་སྤྱོད་བྱེད་འདིར། །ཚངས་པ་རྣམས་ཀྱིས་གནས་པར་བྱེད། །མི་སྐྱོང་སྲས་ཀྱིས་ཐུབ་པ་དེའི། །ཚིག་འདི་དེ་ལྟར་གསན་ནས་ནི། །མཐར་ཐུག་གོ་འཕང་ཉིད་དང་ནི། །ཐབས་མངོན་པ་དག་དྲན་པའོ། །ཇི་ལྟར་ཇི་སྲིད་གང་དུ་ནི། །ཚངས་པའི་སྤྱོད་པ་འདི་
སྤྱད་ཅིང་། །ཆོས་འདི་ཡིས་ནི་མཐར་ཐུག་པ། །ཁྱོད་ཀྱིས་རྣམ་པར་བཤད་པར་འོས། །དེ་ལྟར་ཐུབ་པས་བསྟན་བཅོས་ལྟར། །རྣམ་གསལ་དོན་ནི་མདོར་བསྡུས་པས། །ཆོ་གའི་རྟོག་པ་གཞན་ཉིད་ཀྱིས། །ཆོས་དེ་དེ་ལ་སྨྲས་པའོ། །འདིས་ནི་དང་པོར་ཁྱིམ་སྤངས་ནས། །སློང་མོའི་

172-1-44b

རྟགས་ནི་བསྟེན་པ་སྟེ། །ཕྲིན་ལས་རྣམ་པར་རྒྱས་པ་ཡི། །ཚུལ་ཁྲིམས་བླངས་ནས་འཇུག་པར་བྱེད། །བྱེད་ལྡན་རྩོད་མེད་བསྟན་བཅོས་རིག །མཆོག་ཏུ་ཚིམ་པ་ལ་གནས་ནས། །གང་དང་དེ་ཡིས་གང་དང་དེར། །རྣམ་དབེན་གནས་ནི་བསྟེན་པའོ། །དེ་ནས་ཆགས་ལས་འཇིགས་
མཐོང་ནས། །ཆགས་པ་མེད་ལས་མཆོག་ཞི་ཡང་། །དབང་པོའི་གྲོང་ནི་ངེས་བཟུང་སྟེ། །ཡིད་ལ་ཞི་ནི་འབད་པ་བྱེད། །དེ་ནས་འདོད་པ་རྣམས་ལས་དང་། །གནོད་སེམས་སོགས་ལས་རྣམ་དབེན་ཉིད། །བསམ་གཏན་དང་པོ་རྣམ་དཔྱོད་ལྡན། །རྣམ་པར་དབེན་པ་ལས་སྐྱེས་ཐོབ། །
བསམ་གཏན་བདེ་བ་དེ་ཐོབ་ནས། །དེ་དང་དེ་ཉིད་རྣམ་དཔྱོད་ཅིང་། །སྔར་མེད་བདེ་བ་ཐོབ་པ་ཡིས། །བྱིས་པའི་སྐྱེ་བོ་འཕྲོག་པར་བྱེད། །འདོད་དང་སྡང་བ་རྣམ་སྨད་པའི། །ཞི་བའི་ཆོ་ག་དེ་འདྲ་འདིས། །ཚངས་པའི་འཇིག་རྟེན་ཐོབ་པ་སྟེ། །ཡོངས་སུ་ཚིམ་པས་གནས་པའོ། །རྣམ་དཔྱོད་
ཡིད་ནི་སྐྱོང་བྱེད་རྣམས། །མཁས་པར་རྣམ་པར་ཤེས་ནས་ཀྱང་། །དེ་ལས་རྣམ་པར་གྲོལ་བ་ནི། །བསམ་གཏན་དགའ་བའི་བདེ་ལྡན་ཐོབ། །གང་ཞིག་ཁྱད་པར་མ་མཐོང་ཞིང་། །དགའ་བ་དེ་ཡིས་ཕྲོགས་པ་དེ། །འོད་གསལ་བ་ཡི་ལྷ་རྣམས་སུ། །འོད་གསལ་བ་ཡི་གནས་འཐོབ་བོ། །གང་
ཡང་དགའ་བའི་བདེ་དེ་ལས། །ཡིད་ནི་རྣམ་པར་དབེན་བྱེད་པ། །དགའ་བའི་བདེ་བ་དང་བྲལ་བ། །བསམ་གཏན་གསུམ་པ་ཐོབ་པར་བྱེད། །དེ་འདྲའི་བདེ་བ་འདིར་ཐོབ་ནས། །གང་ཞིག་ཆགས་མིན་བཏང་སྙོམས་ཤིང་། །བདེ་དང་སྡུག་བསྔལ་རྣམ་སྤངས་པའི། །སམ་གཏན་བཞི་པ་ཐོབ་པར་
བྱེད། །བདེ་དང་སྡུག་བསྔལ་ཞི་ཕྱིར་དང་། །སེམས་ཀྱི་བྱ་བ་མེད་པའི་ཕྱིར། །ཐར་ཞེས་མངོན་པའི་ང་རྒྱལ་གྱིས། །དེར་ཡང་ཁ་ཅིག་འབད་པ་བྱེད། །བསམ་གཏན་དེ་ཡི་འབྲས་བུ་ནི། །འབྲས་བུ་ཆེ་བས་ལྷས་མཉམ་པར། །ལོངས་སྤྱོད་ཤེས་རབ་ཆེ་རྣམས་ཀྱིས། །ཆེན་པོའི་དུས་སུ་སྨྲ་བའོ། །
ཏིང་འཛིན་དེ་ལས་རྣམ་ལངས་ཤིང་། །ལུས་སྐྱེས་སྐྱོན་རྣམས་མཐོང་ནས་ནི། །ལུས་ལས་རྣམ་པར་ལྡོག་པའི་ཕྱིར། །ཤེས་ལྡན་བསམ་གཏན་ལ་འཇོག་གོ། །དེ་ནས་བསམ་གཏན་དེ་བོར་ནས། །ཁྱད་པར་ལ་ནི་ངེས་བྱས་པའི། །ཤེས་རབ་ལྡན་དེ་འདོད་ལས་བཞིན། །གཟུགས་རྣམས་ལས་

172-1-45a

ཀྱང་ཆགས་པ་མེད། །ལུས་འདི་ལ་ནི་ཁ་གང་དུ། །དེ་ལ་ཡོངས་སུ་རྟོག་པ་སྟེ། །དེ་ནས་རྫས་སྡུག་རྣམས་ལ་ཡང་། །ནམ་མཁར་ལྷག་པར་མོས་པར་བྱེད། །ནམ་མཁར་སོང་བའི་བདག་ཉིད་དུ། །བསྡུས་ནས་གཞན་དུ་བློ་ལྡན་གྱིས། །དེ་ཉིད་མཐའ་མེད་པར་མཐོང་
ཞིང་། །ཁྱད་པར་འཕགས་པ་ལྷག་པར་འཐོབ། །ནང་ན་མཁས་པ་གཞན་དག་ནི། །བདག་ཉིད་བདག་ཉིད་ཀྱིས་བཟློག་ནས། །ཅི་ཡང་མེད་ཅེས་མཐོང་བ་ནི། །ཅི་ཡང་མེད་པ་ཞེས་དྲན་ནོ། །དེ་ནས་གུར་ནས་བྱ་བཞིན་དང་། །གོང་བུ་དག་ནས་སྲིན་བལ་བཞིན། །ཞིང་ཤེས་ལུས་ལས་འཐོན་པ་ལས། །
ཐར་པ་ཞེས་ནི་མངོན་པར་བརྗོད། །དེ་ཉིད་ཤེས་པའི་མཁས་པ་ཡིས། །གང་ཞིག་ཐར་པ་ཞེས་བརྗོད་པ། །འདི་དེ་ཚངས་པ་དམ་པ་སྟེ། །རྟགས་མེད་རྟག་ཅིང་འགྱུར་བ་མེད། །དེ་ལྟར་ཐབས་དང་ཐར་པ་དག །བདག་གིས་ཁྱོད་ལ་བསྟན་པ་སྟེ། །གལ་ཏེ་ཤེས་ཤིང་གལ་ཏེ་སྲེད། །ཇི་ལྟ་བ་
བཞིན་རྟོགས་པར་མཛོད། །རྒྱལ་འདོད་བུ་དང་སྐྱེད་བྱེད་དང་། །གཞན་མི་འབྲལ་བ་རྒན་པོ་དང་། །ཐར་པ་འདོད་པ་གཞན་རྣམས་ཀྱང་། །ལམ་འདི་ཐོབ་ནས་གྲོལ་བར་འགྱུར། །དེ་ཡི་དམ་པའི་ཚིག་འདི་དང་། །རྣམ་པར་དཔྱོད་པ་ཡང་བཟུང་ནས། །སྔོན་དུ་རྒྱུ་ཡི་སྟོབས་ཐོབ་པས། །ལན་ནི་སྨྲས་པར་
གྱུར་པའོ། །གོང་ནས་གོང་དུ་ཞི་བ་ཡི། །ཡེ་ཤེས་ཕྲ་མོ་འདི་ཐོས་ཤིང་། །ཞིང་ཤེས་ཡོངས་སུ་མ་བཏང་ཕྱིར། །དེ་ནི་མཐར་ཐུག་མིན་པར་གོ། །རྣམ་གྱུར་དང་ནི་རང་བཞིན་ལས། །ཞིང་ཤེས་གྲོལ་བར་ཁོ་བོ་ཡིས། །རབ་ཏུ་སྐྱེ་བའི་ཆོས་སུ་དང་། །ས་བོན་ཆོས་སུ་སྙམ་པའོ། །གང་ཡང་རྣམ་དག་
བདག་ཉིད་ནི། །ངེས་པར་ཐར་ཞེས་རྟོག་པ་སྟེ། །སླར་ཡང་རྐྱེན་དག་ཡོད་པ་ལས། །དེ་ནི་གྲོལ་བར་མི་འགྱུར་རོ། །ཇི་ལྟར་དུས་སྦྱོར་ས་དང་ཆུ། །མེ་ལས་ས་བོན་སྐྱེ་མ་ཡིན། །དེ་བཞིན་རྐྱེན་ནི་དེ་རྣམས་ཀྱིས། །སྐྱེ་བ་དེ་ཡང་བདག་གི་ལུགས། །གང་ཞིག་མི་ཤེས་ལས་སྲེད་རྣམས། །སྤངས་ལས་
ཐར་པ་རྟོགས་བྱེད་པ། །དེ་ནི་མཆོག་ཏུ་ཡོངས་སྤོང་བ། །བདག་ཡོད་གྱུར་ན་ཡོད་མ་ཡིན། །སྤངས་ནས་སྤངས་ནས་གསུམ་པོ་འདི། །ཁྱད་པར་དུ་ཡང་ཉེར་འཐོབ་ཅིང་། །གང་དུ་བདག་ནི་གནས་གྱུར་པ། །དེར་ནི་གསུམ་པོ་འདི་ཕྲའོ། །སྐྱོན་རྣམས་ཕྲ་བ་ཉིད་ལས་དང་། །སེམས་ཀྱི་བྱ་བ་མེད་ལས་

172-1-45b

དང་། །ཚེ་ནི་རིང་བ་ཉིད་ལས་ཀྱང་། །ཐར་པར་ཀྱང་ནི་ཡོངས་སུ་རྟོག །ངར་འཛིན་པར་ནི་ཡོངས་སྤོང་བར། །གང་དེ་ཡོངས་སུ་རྟོག་བྱེད་ལ། །བདག་སྤྱོད་གྱུར་ནས་ངར་འཛིན་པ། །ཡོངས་སུ་སྤོང་བ་ཡོད་མ་ཡིན། །དྲང་སྲོང་རྣམས་ཀྱིས་མ་སྤངས་པ། །འདི་ནི་ཡོན་ཏན་མེད་མ་ཡིན། །དེ་ཕྱིར་ཡོན་ཏན་
མེད་གྱུར་ན། །འདི་ཡི་ཐར་པར་མི་བརྗོད་དོ། །ཡོན་ཏན་ཅན་གྱིས་ཡོན་ཏན་གྱི། །ལྡོག་པ་ཡོད་པ་མ་ཡིན་ཏེ། །གཟུགས་དང་འགྲོ་བ་དང་བྲལ་བའི། །མེ་ནི་ཉེ་བར་འཐོབ་མ་ཡིན། །ལུས་ལས་སྔོན་དུ་ལུས་ཅན་དང་། །ཡོན་ཏན་ལས་སྔར་ཡོན་ཏན་ཅན། །མ་ཡིན་དེ་ཕྱིར་དང་པོར་གྲོལ། །ལུས་བཞིན་སླར་
ཡང་འཆིང་བར་བྱེད། །ཞིང་ཤེས་ལུས་དང་མ་བྲལ་བ། །ཤེས་པ་ཡིན་ནམ་ཤེས་མིན་ཉིད། །གལ་ཏེ་ཤེས་འདི་ཤེས་བྱ་ཡོད། །ཤེས་བྱ་ཡོད་ན་མི་གྲོལ་ལོ། །ཅི་སྟེ་ཁྱོད་ལ་ཤེས་མི་འགྲུབ། །བདག་ཏུ་རྟོག་པས་ཅི་ཞིག་བྱ། །བདག་དང་བྲལ་ཡང་ཤེས་པ་ནི། །རབ་གྲུབ་ཤིང་དང་རྩིག་པ་བཞིན། །གང་
ཕྱིར་གོང་ནས་གོང་དུ་ནི། །དེ་ལྟར་རྩིབས་འཕུར་གྱི་ནི་ཆོས། །མཁྱེན་ནས་དེ་ནི་མ་ཚིམ་ཞིང་། །མཐའ་དག་མིན་ཞེས་ཤེས་ནས་སུ། །དེ་ནས་སོ་སོར་གཤེགས་པའོ། །དེ་ནས་ཁྱད་པར་ཆོས་འདོད་པ། །ལྷག་སྤྱོད་ཀྱི་ནི་གནས་སུ་གཤེགས། །དེ་ཡི་བདག་ཏུ་འཛིན་ལས་ཀྱང་། །དེས་ནི་ལྟ་བར་སྲེད་
མ་གྱུར། །འདུ་ཤེས་འདུ་ཤེས་མེད་པའི་སྐྱོན། །ཐུབ་པ་ལྷག་སྤྱོད་ཀྱིས་ཤེས་ནས། །འདུ་ཤེས་འདུ་ཤེས་མེད་བདག་མིན། །ཅུང་ཟད་མེད་ལས་གཞན་འགྲོ་ཐོབ། །གང་ཕྱིར་དམིགས་པ་ཕྲ་མོ་ནི། །འདུ་ཤེས་འདུ་ཤེས་མེད་ལས་གཞན། །འདུ་ཤེས་མེད་མིན་འདུ་ཤེས་མིན། །དེ་ཕྱིར་དེར་ནི་རེ་
འདོད་མིན། །གང་ཕྱིར་དེར་ནི་བློ་གནས་ཤིང་། །གཞན་དུ་རབ་ཏུ་རྒྱུ་བ་མེད། །ཕྲ་ཞིང་རྣོ་ལྡན་དེ་ཕྱིར་དེར། །འདུ་ཤེས་མེད་མིན་འདུ་ཤེས་མེད། །དེ་ཕྱིར་དེ་ཡང་རབ་ཐོབ་ནས། །སླར་ཡང་འགྲོ་བ་འཁོར་བ་སྟེ། །བྱང་ཆུབ་སེམས་དཔའ་མཆོག་འདོད་པས། །དེ་ཕྱིར་ལྷག་སྤྱོད་དོར་བའོ། །དེ་ནས་དེ་ཡི་
གནས་ཐོབ་ནས། །དགེ་ལེགས་དོན་གཉེར་ངེས་བྱས་ནས། །གང་ཡང་རྒྱལ་བའི་དྲང་སྲོང་གིས། །གྲོང་ཁྱེར་ཞེས་བྱའི་གནས་བསྙེན་ནོ། །དེ་ནས་ནཻ་རཉྫ་ནའི་འགྲམ། །གཙང་མར་གཙང་ཞིང་ཕ་རོལ་གནོན། །དབེན་པའི་གནས་ནི་མངོན་འདོད་པའི། །ཐུབ་པ་ཡིས་ནི་གནས་མཛད་དོ། །དེ་ནས་དེ་ནི་སྔར་བརྟེན་

172-1-46a

ཞིང་། །དབང་པོ་ལྔ་ཡི་དབང་ལས་ཁེངས། །མུན་པས་བསྙེན་པའི་བརྟུལ་ཞུགས་ཅན། །དགེ་སློང་ལྔ་རྣམས་དེས་གཟིགས་སོ། །བསོད་ནམས་ཀྱིས་བསྒྲུབས་ནོར་ནད་མེད། །དབང་དོན་རྣམས་ཀྱིས་དབང་ཕྱུག་བཞིན། །དགེ་སློང་དེ་རྣམས་ཀྱིས་ཀྱང་འདིར། །དེ་མཐོང་གྱུར་
ནས་ཉེ་བར་གནས། །དེའི་དབང་གིས་གནས་སློབ་མ་རྣམས། །དབང་པོ་གཡོས་པས་ཡིད་བཞིན་དུ། །རབ་ཏུ་དེ་རྣམས་ཀྱིས་མཆོད་ཅིང་། །རྣམ་པར་དུལ་ལས་རྗེས་སུ་འཇུག །འཆི་དང་སྐྱེ་བ་མཐར་བྱེད་ལ། །དེ་ནས་ཐབས་ནི་འདི་ཡིས་ཞེས། །བཟའ་བ་མེད་པར་ཤེས་པ་ཡིས། །དཀའ་ཐུབ་
གདུང་བ་རྣམས་བརྩམས་སོ། །བསྨྱུང་གནས་ཆོ་ག་དུ་མ་རྣམས། །མི་ཡིས་སྤྱོད་དཀའ་རྣམས་མཛད་ཅིང་། །ལས་ནི་ཐོབ་བཞེད་ལོ་དྲུག་ཏུ། །བདག་གི་སྐུ་ལུས་རིག་པར་མཛད། །ཕ་མཐའ་མེད་པའི་འཁོར་བ་ཡི། །ཕ་རོལ་ཐོབ་པར་འདོད་པ་དེས། །བཟའ་བའི་དུས་སུ་ཏིལ་དང་འབྲུ། །
རབ་ཤ་རྣམས་ནི་རེ་རེ་གསོལ། །དཀའ་ཐུབ་གདུང་བ་དེས་དེ་ཡི། །སྐུ་ལས་བྲི་བར་བྱས་པ་གང་། །སླར་ཡང་དེ་ཡི་གཟི་བརྗིད་ཀྱིས། །སྐུ་ལུས་ཉེ་བར་འཕེལ་བྱས་གྱུར། །སྟོན་ཀའི་དཀར་ཕྱོགས་དང་པོ་ཡི། །ཟླ་བས་ཀུ་མུ་ཏ་རྣམས་བཞིན། །རིང་ཀྱང་དཔལ་གྲགས་རིང་མིན་ཞིང་། །གཞན་གྱིས་
མིག་རྣམས་ཚིམ་པར་མཛད། །རུས་ལྤགས་ལྷག་མ་ལྷག་མེད་པར། །ཚིལ་དང་ཤ་དང་ཁྲག་རྣམས་ཀྱིས། །ཟད་ཀྱང་ཟབ་མོ་མ་ཟད་པར། །རྒྱ་མཚོ་ཞིན་དུ་དེ་མཛེས་སོ། །དེ་ནས་སངས་རྒྱས་ཉིད་འདོད་པས། །ངལ་དུབ་གདུང་བས་དོན་མེད་བསལ། །ཉོན་མོངས་ལུས་ཅན་ཐུབ་པ་
ནི། །སྲིད་ལས་འཇིགས་པ་བློ་མཛད་དོ། །ཆོས་འདི་ཆགས་བྲལ་ཕྱིར་མིན་ཞིང་། །རྟོགས་ཕྱིར་མ་ཡིན་ཐར་ཕྱིན་མིན། །དེ་ཚེ་འཛམ་བུའི་རྩ་བར་གང་། །བདག་གིས་ཐོས་ཏེ་ངེས་པ་ཡིན། །འདི་ནི་སྟོབས་ཆུང་གིས་ཐོབ་པར། །ནུས་པ་མིན་ཕྱིར་གུས་འོངས་ཤིང་། །སྐུ་ཡི་སྟོབས་ནི་འཕེལ་དོན་
དུ། །སླར་ཡང་འདི་ནི་རྗེས་སུ་བསམས། །བཀྲེས་དང་སྐོམ་པས་ཡོངས་གཙེར་ཞིང་། །ངལ་ལས་རང་གནས་མེད་པའི་སེམས། །ཡིད་ཀྱིས་ཐོབ་བྱའི་འབྲས་བུ་ནི། །ལྡོག་པ་མེད་པ་གང་ཞིག་འཐོབ། །རྟག་པར་དབང་པོ་ཚིམ་པ་ལས། །ཡང་དག་གནས་པ་འཐོབ་པ་སྟེ། །དབང་པོ་ཡང་

172-1-46b

དག་ཚིམ་ཉིད་ཀྱིས། །ཡིད་ནི་རང་བཞིན་གནས་པ་འཐོབ། །དང་ཞིང་རབ་དང་ཡིད་ཀྱིས་ནི། །ཏིང་འཛིན་ཉེ་བར་སྐྱེ་བ་སྟེ། །ཏིང་འཛིན་གྱིས་སྦྱར་སེམས་ཀྱི་ནི། །བསམ་གཏན་སྦྱོར་བ་རབ་ཏུ་འཇུག །བསམ་གཏན་རབ་ཏུ་ཞུགས་པ་ལས། །རྙེད་དཀའ་ཞི་ཞིང་དགའ་མེད་མཆོག །འཆི་མེད་གོ་འཕང་དེ་
ཆོས་རྣམས། །གང་གིས་ཐོབ་པ་རབ་ཐོབ་པོ། །དེ་ཕྱིར་བཟའ་བ་རྩ་བ་སྟེ། །འདི་ནི་ཐབས་ཞེས་ངེས་པ་ཡིན། །བཟའ་བ་བྱེད་ལ་བརྟན་པ་ནི། །དཔག་མེད་བློ་ཡིས་བློ་མཛད་ནས། །ཁྲུས་བྱས་ནཻ་རཉྫ་འགྲམ་ནས། །ལག་བྱིན་འགྲམ་གྱི་ལྗོན་ཤིང་ནི། །གུས་པ་ཡིས་དུད་ཡལ་གའི་རྩེས། །སྐུ་ལུས་རིད་
པ་དལ་བུས་དྲངས། །དེ་ནས་ལྷ་རྣམས་ཀྱིས་བསྐུལ་བའི། །བ་ལང་སྐྱོང་བདག་བུ་མོ་ནི། །སྙིང་ལ་དགའ་སྐྱེས་འགྱུར་བ་ཡི། །དགའ་སྟོབས་མ་ནི་དེར་འོངས་སོ། །དུང་དཀར་གྱིས་འབར་ལག་པ་ཅན། །ལ་བ་སྔོན་པོ་གོན་པ་མོ། །དབུ་བ་དང་བཅས་ཆུ་སྔོན་ཕྲེང་། །ཆུ་མཆོག་ཡ་མུ་ན་བཞིན་ནོ། །
སྤྱན་མིག་ཨུཏྤལ་རབ་རྒྱས་ཤིང་། །དད་པས་འཕེལ་བའི་དགའ་མ་དེས། །དེ་ལ་མགོ་ཡིས་རབ་བཏུད་ནས། །འོ་མ་དྲངས་པར་གྱུར་པའོ། །དེས་དེ་གསོལ་ནས་དེ་ལ་ནི། །སྐྱེ་བའི་འབྲས་བུ་ཐོབ་བྱས་ནས། །ཡང་དག་དབང་པོ་དྲུག་ཚིམ་སྟེ། །བྱང་ཆུབ་འཐོབ་པར་ནུས་པར་གྱུར། །ཕུལ་
བྱུང་རྒྱས་པའི་སྐུ་མངའ་ཞིང་། །རང་གི་གྲགས་བཅས་ཐུབ་པ་ནི། །ནུས་གྱུར་རྒྱ་མཚོ་གཉིས་དག་གིས། །མཛེས་དང་བསྟན་པ་གཅིག་པུས་བཟུང་། །བདག་ནི་ངེས་པར་གྲོལ་བ་ལ། །བློ་ལྡན་ཁམས་ལྔ་རྣམས་ཀྱིས་ལྟར། །ཀུན་ནས་འཇུག་ཅེས་རྣམ་ཤེས་ནས། །དགེ་སློང་ལྔ་རྣམས་ཀྱིས་དེ་དོར། །
དེ་ནས་འབད་རྩོལ་གཉིས་པ་ནི། །བྱང་ཆུབ་ཆེད་དུ་ངེས་མཛད་དེ། །རྩྭ་འཇམ་བཀྲམ་པའི་ས་གཞི་ལ། །ཨ་ཤད་ཐ་ཡི་རྩ་བར་གཤེགས། །དེ་ཚེ་གླང་པོའི་འགྲོས་མངའ་བའབའི། །དཔེ་མེད་ཞབས་ཀྱི་སྒྲ་ཡིས་སད་པར་བྱས་པ་ནི། །ཐུབ་པ་ཆེན་པོའི་བྱང་ཆུབ་ངེས་པར་རྟོགས་པ་ཡི། །གྲུབ་མཆོག་ནག་པོ་ཞེས་
བྱས་བསྟོད་པ་སྨྲས་པར་གྱུར། །ཇི་ལྟར་ཐུབ་པ་ཁྱོད་ཀྱིས་ཞབས་ཀྱིས་བརྫིས་པ་ནི། །ཡང་ནས་ཡང་དུ་ས་ནི་སྒྲ་སྐད་སྒྲོགས་པ་འདྲ། །ཇི་ལྟར་ཁྱོད་ཀྱི་འོད་ནི་ཉི་མར་སྣང་བ་སྟེ། །ཁྱོད་ཀྱིས་ངེས་པར་འདོད་པའི་གོ་འཕང་མཁྱེན་པ་ཉིད། །ཇི་ལྟར་མཁའ་ལ་ཁུག་རྟའི་ཕྲེང་བ་རྣམས་བསྐོར་ཞིང་། །པདྨའི་

172-1-47a

སྤྱན་མངའ་ཁྱེད་ལ་སྐོར་བ་བྱེད་པ་ཉིད། །ཇི་ལྟར་མཁའ་ལ་རླུང་རྣམས་ཞི་བར་འགྲོ་བ་སྟེ། །ཁྱོད་ཀྱིས་ངེས་པར་དེ་རིང་སངས་རྒྱས་འགྱུར་བ་ཉིད། །དེ་ནས་གླུ་མཆོག་གིས་ནི་ཡང་དག་བསྟོད་པ་ནི། །ལྕོ་ག་ལས་ནི་གཙང་མའི་རྩྭ་རྣམས་ཉེར་བླངས་ནས། །བྱང་ཆུབ་ཤིང་
ཆེན་རྩ་བ་དགེ་ལ་རབ་བརྟན་ཅིང་། །བྱང་ཆུབ་ཆེད་དུ་དམ་བཅའ་མཛད་ཅིང་བཞུགས་པའོ། །དེ་ནས་གཉིད་ལོག་ལྟོ་འཕྱེའི་གདེངས་ཀས་བསྡུས་པ་ལ། །དེས་ནི་རྡོ་རྗེའི་སྐྱིལ་ཀྲུང་གཡོ་མེད་མཆོག་བཅིངས་ཏེ། །ཇི་སྲིད་བྱ་བ་བྱས་པ་ཉིད་ནི་མ་ཐོབ་པར། །དེ་སྲིད་ས་ལས་གདན་དེ་འབྱེད་པར་མི་
བགྱིའོ། །དེ་ནས་ངེས་པའི་བདག་ཉིད་བཅོམ་ལྡན་གདན་མཛད་ཚེ། །ལྷ་ན་གནས་རྣམས་མཉམ་མེད་དགའ་བ་ཐོབ་གྱུར་ལ། །རི་དགས་ཚོགས་རྣམས་གནས་པར་མ་གྱུར་བྱ་རྣམས་དང་། །རླུང་གིས་བསྣུན་པའི་ནགས་ཀྱི་ལྗོན་ཤིང་སྒྲ་མེད་གྱུར། །སངས་རྒྱས་ཀྱི་སྤྱོད་པ་ཞེས་བྱ་བའི་
སྙན་དངགས་ཆེན་པོ་ལས། རིང་འཕུར་དང་ལྷག་སྤྱོད་ཀྱི་དྲུང་དུ་གཤེགས་པའི་ལེའུ་སྟེ་བཅུ་གཉིས་པའོ།།      །།དེར་ནི་རྣམ་པར་ཐར་ཕྱིར་དམ་བཅའ་མཛད་པ་ན། །རྒྱལ་པོའི་རིགས་ལས་རབ་འཁྲུངས་དྲང་སྲོང་ཆེན་པོ་ནི། །དེར་ནི་ཉེ་བར་ཞུགས་ཚེ་འཇིག་རྟེན་རབ་
དགའ་ཞིང་། །དེར་ནི་བདུད་ཀྱང་དམ་པའི་ཆོས་ཀྱི་དགྲར་གྱུར་ཏོ། །གང་ལ་འདོད་པའི་ལྷར་ནི་འཇིག་རྟེན་ན་སྨྲ་བ། །སྣ་ཚོགས་མཚོན་ཆ་མེ་ཏོག་མདའ་ཅན་དེ་བཞིན་དུ། །འདོད་པ་རབ་ཏུ་སྤྱོད་པའི་བདག་པོ་དེ་ཉིད་ལ། །ཐར་པའི་དགྲ་བོ་བདུད་དུ་དཔེ་རྗོད་བྱེད་པའོ། །དེ་ཡི་བུ་ནི་རོལ་པ་དགའ་བ་
རྒྱགས་པ་དང་། །བུ་མོ་དགའ་མ་དགེས་མ་སྲེད་མ་གསུམ་རྣམས་ཀྱིས། །དེ་ལ་སེམས་ཀྱི་རྣམ་པར་འགྱུར་བ་དྲིས་པ་སྟེ། །དེས་ནི་དེ་རྣམས་ལ་ཚིག་མངོན་པར་སྨྲས། །ཐུབ་པ་འདིས་ནི་ངེས་པའི་གོ་ཆ་རྣམ་བཟུང་ཞིང་། །སེམས་པའི་མཚོན་ཆ་བློ་ཡི་མདའ་ནི་བསྡོགས་བྱས་ནས། །བདག་ཅག་
ཡུལ་རྣམས་ལ་ནི་རྒྱལ་འདོད་བསྡད་པ་སྟེ། །གང་ཕྱིར་འདིས་ནི་བདག་གི་ཡིད་ནི་རྣམ་པར་གྱུར། །གལ་ཏེ་འདིས་བདག་ཟིལ་གྱིས་མནན་ནས་འགྲོ་བ་སྟེ། །འཇིགས་པ་ལ་ཡང་ཐར་པའི་ལམ་དག་འཆད་བྱེད་ཅིང་། །ལུས་འཕགས་ཇོ་བོ་སྤྱོད་ལས་ལྷུང་བའི་བཞིན་དུ་ནི། །དེ་ཕྱིར་འདི་

172-1-47b

ཡིས་བདག་གི་ཡུལ་ནི་དེ་རིང་སྟོངས། །དེ་ཕྱིར་ཇི་སྲིད་འདིས་ནི་སྤྱན་མིག་མ་ཐོབ་ཅིང་། །ཇི་སྲིད་བདག་གི་སྤྱོད་ཡུལ་དག་ན་གནས་པ་ཉིད། །ཆུ་བོ་ཤིན་ཏུ་འཕེལ་བའི་ཤུགས་ཀྱིས་ཟམ་པ་བཞིན། །དེ་སྲིད་འདི་ཡི་བརྟུལ་ཞུགས་འཇོམས་སུ་འགྲོ་བའོ། །དེ་ནས་མེ་ཏོག་ལས་བྱས་གཞུ་
ནི་བཟུང་ནས་དང་། །ཀུན་དུ་རྨོངས་པར་བྱེད་པའི་མདའ་ལྔ་རྣམས་བཟུང་ནས། །སྐྱེ་དགུ་རྣམས་ཀྱི་ཡིད་ཀྱི་རང་གནས་མི་བྱེད་པ། །དེ་ནི་བུར་བཅས་ཨ་ཤྭད་ཐ་ཡི་རྩ་བར་སོང་། །དེ་ནས་སྲིད་པ་འཁོར་བའི་ཕ་རོལ་རྒལ་འདོད་པའི། །ཐུབ་པ་རབ་ཏུ་ཞི་བར་གདན་ལ་བཞུགས་པ་ལ། །ལག་པ་
གཡས་པ་མཚོན་ཆའི་རྩེ་མོར་བདུངས་ནས་ནི། །མདའ་ཡིས་རོལ་ཞིང་བདུད་ཀྱིས་འདི་ནི་སྨྲས་པའོ། །ཀྱེ་ཧོ་རྒྱལ་རིགས་འཆི་བས་འཇིགས་པ་ལོངས་མཛོད་ཅིག །ཐར་པའི་ཆོས་ནི་སྤོངས་ལ་འཇིག་རྟེན་མཛོད། །མདའ་དང་མཆོད་སྦྱིན་རྣམས་ཀྱིས་འཇིག་རྟེན་ཕམ་བྱས་ནས། །འཇིག་
རྟེན་དག་ནས་དབང་པོའི་གོ་འཕང་འཐོབ་པར་མཛོད། །གང་ཞིག་མི་དབང་སྔ་མ་རྣམས་ཀྱིས་འདྲིམས་པ་སྟེ། །ངེས་པར་འབྱུང་ལ་འདི་ནི་གྲགས་པའི་ལམ་ཡིན་ཞིང་། །རྒྱལ་པོའི་དྲང་སྲོང་རྣམས་ཀྱང་རིགས་སུ་སྐྱེས་པ་ཡིས། །སློང་མོ་རབ་ཐོབ་ལ་ནི་འདི་ནི་བསྔགས་མ་ཡིན། །ཇི་སྲིད་ངེས་
པའི་བདག་ཉིད་དེ་རིང་མི་ལྡང་བ། །དམ་བཅའ་རྣམ་པར་མ་དོར་བརྟན་པར་གྱུར་ཅིག་དང་། །གང་ཞིག་ཉ་དགྲ་སཱུ་རྭ་ཀ་ལ་རྣམ་སྤངས་པའི། །དེ་ཉིད་བདག་གིས་མདའ་འདི་འབར་བར་བྱས་པའོ། །འདིས་ནི་ཅུང་ཞིག་རེག་པ་ཙམ་གྱིས་ཨེ་ལ་དེ། །ཟླ་བའི་ཚ་བོ་ཡིན་ཡང་སེམས་མེད་གྱུར་པ་
སྟེ། །ཞི་བའི་ལུས་ཞེས་བྱ་བ་དེ་ཡང་དེར་འགྱུར་ནས། །ཟད་པའི་དུས་སུ་ཀྱེ་མ་མི་གཞན་སྨོས་ཅི་དགོས། །དེ་ཕྱིར་སྐྱེན་པར་ལོངས་ལ་འདུ་ཤེས་ཐོབ་གྱིས་དང་། །ཡང་ཡང་ཤིན་ཏུ་རོ་མྱང་མདའ་ནི་མནན་པ་སྟེ། །དགའ་མའི་བྱར་འོས་དགའ་ཞིང་དགེས་པ་རྣམས་ལ་ནི། །གང་ཞིག་ངང་པ་
རྣམས་ལ་བཞིན་དུ་མི་འཕེན་ནོ། །གང་ཚེ་དེ་སྐད་བརྗོད་ཀྱང་ཆགས་པ་དང་བྲལ་བའི། །ཤཱཀྱ་ཐུབ་པས་གདན་ནི་བཤིག་པ་མ་ཡིན་ཉིད། །དེ་ནས་འདི་ལ་བདུད་ཀྱིས་མདའ་ནི་འཕངས་པ་སྟེ། །བུ་མོ་རྣམས་དང་བུ་རྣམས་བདུན་ནས་བྱས་ནས་སོ། །དེར་ནི་དེ་ཡིས་མདའ་ནི་རབ་ཏུ་འཕངས་ན་ཡང་། །

172-1-48a

ཆགས་པར་བྱས་པ་མེད་ཅིང་བརྟན་ལས་གཡོས་པ་མེད། །དེ་ལྟར་དེ་མཐོང་གྱུར་ནས་བདུད་ནི་ཡི་མུག་ཅིང་། །བསམ་མནོ་ཡོངས་སུ་ལྡན་པ་དལ་བུས་སྨྲས་པར་འགྱུར། །རི་དབང་བུ་མོ་ལ་དམིགས་གང་གིས་ཕུག་པ་ཡི། །བདེ་འབྱུང་ལྷ་ཡང་ཡོངས་སུ་གཡོས་པར་གྱུར་
པ་སྟེ། །འདིས་ནི་མདའ་དེ་ཉིད་ལ་སེམས་པར་མི་བྱེད་པ། །སེམས་མེད་ཡིན་ནམ་མདའ་འདི་དེ་མ་ཡིན་ནམ་ཅི། །དེ་ཕྱིར་མེ་ཏོག་མདའ་འདི་འོས་པ་མ་ཡིན་ཞིང་། །དགའ་བ་མ་ཡིན་དགའ་བར་སྦྱོར་བ་འོས་མ་ཡིན། །འདི་ནི་ཞི་བ་མ་ཡིན་འབྱུང་པོའི་ཚོགས་རྣམས་ཀྱིས། །འཇིགས་དང་
བསྡིགས་དང་རྡེག་པ་རྣམས་ནི་འོས་པའོ། །དེ་ནས་བདུད་ཀྱིས་རང་གི་སྡེ་ནི་དྲན་པ་སྟེ། །ཤཱཀྱ་ཐུབ་པའི་བགེགས་ནི་མཉམ་པོར་བྱེད་འདོད་པ། །རལ་གྲི་བེ་ཅོན་ཤིང་རྩེ་ལྗོན་ཤིང་རྩེ་གསུམ་མདུང་ལག་རྣམས། །སྣ་ཚོགས་བསམ་པ་དང་ལྡན་རྗེས་སུ་འབྲངས་རྣམས་འོངས། །ཕག་
དང་ཉ་དང་བོང་བུ་རྔ་མོའི་གདོང་ཅན་རྣམས། །སྟག་དང་དོམ་དང་སེང་གེ་གཉིས་འཐུང་གདོང་ཅན་རྣམས། །མིག་གཅིག་ཁ་ནི་དུ་མ་མགོ་བོ་གསུམ་ལྡན་རྣམས། །གསུས་པ་འཕྱང་བ་རྣམས་དང་གསུས་པ་ཆེ་བ་རྣམས། །བརླ་རྣམས་པུས་མོའི་བར་དུ་བུམ་པའི་པུས་མོ་རྣམས། །མཆེ་
བའི་མཚོན་ཆ་རྣམས་དང་སེན་མོའི་མཚོན་ཆ་རྣམས། །ཀེང་རུས་གདོང་ཅན་རྣམས་དང་གཟུགས་ནི་མང་པོ་རྣམས། །གདོང་ཕྱེད་གཞོམ་པ་རྣམས་དང་གདོང་ནི་ཆེན་པོ་རྣམས། །ཐལ་སྐྱ་རྣམས་དང་ཐིག་ལེ་དམར་པོ་སྣ་ཚོགས་རྣམས། །ཁ་ཊྭཱཾ་ག་རྣམས་དང་ནི་སྤྲེའུ་ལྟར་ངུད་སྒྲ་རྣམས། །
འཕོངས་འཕྱང་རྣམས་དང་གླང་པོའི་རྣ་བའི་རྣ་བ་རྣམས། །པགས་པའི་གོས་ཅན་རྣམས་དང་གོས་དང་བྲལ་བ་རྣམས། །གདོང་ཕྱེད་དཀར་པོ་རྣམས་དང་ལུས་ཕྱེད་ལྗང་གུ་རྣམས། །ཟངས་མདོག་དུང་མདོག་རྣམས་དང་ལྗང་གུ་དཀར་པོ་རྣམས། །སྦྲུལ་གྱི་ཤམ་ཐབས་རྣམས་དང་དེ་བཞིན་
ལག་པ་རྣམས། །རབ་ཏུ་སྒྲ་སྒྲོགས་དྲིལ་བུ་འཁྲུགས་པའི་སྐེ་རགས་རྣམས། །ཏ་ལའི་ཚད་མཉམ་རྣམས་དང་མདུང་རྣམས་བཟུང་བ་རྣམས། །བྱིས་པའི་ཚད་མཉམ་རྣམས་དང་མཆེ་བ་གཙིགས་པ་རྣམས། །ལུག་གི་གདོང་ཅན་རྣམས་དང་བྱ་ཡི་མིག་ཅན་རྣམས། །བྱི་ལའི་གདོང་ཅན་

172-1-48b

རྣམས་དང་མི་ཡི་ལུས་ཅན་རྣམས། །སྐྲ་བཀྲམ་རྣམས་དང་རལ་པ་ཅན་དང་བྱི་བོ་རྣམས། །གོས་དམར་རྣམས་དང་རྣམ་པར་འཁྲུགས་པས་དཀྲིས་པ་རྣམས། །རབ་དགའི་གདོང་ཅན་རྣམས་དང་གཉེར་མའི་གདོང་ཅན་རྣམས། །གཟི་བརྗིད་འཕྲོག་པ་རྣམས་དང་ཡིད་ནི་འཕྲོག་པ་རྣམས། །ཁ་ཅིག་
དག་ནི་འཕོ་ཞིང་དྲག་ཏུ་ཕན་ཚུན་དུ། །མཆན་ཁུང་འཁྱུད་ཅིང་དེ་བཞིན་གཞན་རྣམས་མཆོངས། །མཁའ་ལ་འགྲོ་བ་རྣམས་ནི་ཁ་ཅིག་རྩེ་བ་སྟེ། །ཁ་ཅིག་ཤིང་གི་རྩེ་མོ་རྣམས་ལ་ཞོན་པའོ། །ཁ་ཅིག་རྩེ་གསུམ་བསྐོར་ཞིང་གར་ནི་བྱེད་པ་སྟེ། །ཁ་ཅིག་དབྱུག་པ་གདེངས་ཤིང་ཐོག་སྒྲ་སྒྲོགས་པའོ། །ཁ་
ཅིག་དགའ་བས་ཁྱུ་མཆོག་བཞིན་དུ་སྐད་འདོན་ཞིང་། །ཁ་ཅིག་ལུས་འཕོས་རྣམས་ལས་རབ་ཏུ་འབར་བར་གྱུར། །འཛིན་པར་འདོད་པ་རྣམས་དང་འཇོམས་པར་འདོད་པ་རྣམས། །ཇོ་བོའི་བཀའ་ནི་རབ་ཏུ་སྐྱོང་བར་བྱེད་པ་སྟེ། །རྣམ་པ་དེ་ལྟར་འབྱུང་པོའི་ཚོགས་རྣམས་ཀུན་ནས་ནི། །བྱང་ཆུབ་སེམས་
དཔའ་དེ་ལ་ཡོངས་སུ་བསྐོར་ནས་གནས། །མཚན་མོ་སྔ་མ་ལ་ནི་ཤཱཀྱའི་ཁྱུ་མཆོག་དང་། །བདུད་ཀྱི་འཐབ་མོ་དུས་དེ་རབ་ཏུ་མཐོང་ནས་ནི། །ནམ་མཁའ་གསལ་བ་མ་ཡིན་ས་ནི་གཡོས་གྱུར་ལ། །ཕྱོགས་རྣམས་སྒྲ་དང་བཅས་པ་རབ་ཏུ་འབར་བར་གྱུར། །དྲག་པོའི་ཤུགས་ཅན་རླུང་ནི་ཀུན་དུ་
གཡོས་གྱུར་ལ། །སྐར་མ་རྣམས་ནི་མི་སྣང་ཟླ་བ་གསལ་མ་གྱུར། །སླར་ཡང་མཚན་མོར་མུན་པ་རྣམ་པར་རྒྱས་གྱུར་ལ། །རྒྱ་མཚོ་རྣམས་ནི་ཐམས་ཅད་ཀུན་དུ་གཡོས་པར་གྱུར། །ས་གཞི་འཛིན་ཅིང་ཆོས་དག་འཛིན་པའི་ཀླུ་རྣམས་ནི། །ཐུབ་པ་ཆེན་པོའི་བགེགས་ལ་བཟོད་པ་མ་ཡིན་ཞིང་། །བདུད་
ལས་ཁྲོས་པས་རྣམ་པར་ལོག་པའི་མིག་ཅན་རྣམས། །རྔམ་པ་བཏོན་ཞིང་ལུས་ནི་རྣམ་པར་འགྱུར་བའོ། །གཙང་མར་ལྷག་པར་གནས་པའི་ལྷ་ཡི་དྲང་སྲོང་ནི། །དམ་ཆོས་བསྒྲུབ་པའི་དོན་དུ་མངོན་པར་ཞུགས་པ་རྣམས། །བདུད་ལས་ཡིད་ཀྱིས་རྗེས་སུ་བརྩེ་བ་བྱས་པ་སྟེ། །ཆགས་དང་བྲལ་བ་
ལས་ཀྱང་ཁྲོས་པར་མ་གྱུར་ཏོ། །འཚེ་བའི་བདག་ཉིད་བདུད་ཀྱི་དཔུང་ནི་དེ་ཡིས་ནི། །བྱང་ཆུབ་རྩ་བ་དེ་ནི་ཁྱབ་པ་མཐོང་ནས་ནི། །ཆོས་ཀྱི་བདག་ཉིད་འཇིག་རྟེན་ཐར་པ་འདོད་རྣམས་ཀྱིས། །ནམ་མཁའ་དག་ལ་ཧཱ་ཧཱའི་སྒྲ་དག་བྱས་པར་གྱུར། །ཆོས་ཀྱི་ཆོ་ག་དེ་ནི་ཉེ་བར་ཉམས་བྱེད་པ། །བདུད་དཔུང་

172-1-49a

གནས་པ་དྲང་སྲོང་ཆེན་པོས་གཟིགས་ནས་ནི། །བ་ལང་རྣམས་ཀྱི་དབུས་སུ་སེང་གེ་གནས་པ་བཞིན། །གཡོ་འགུལ་མེད་ཅིང་རྣམ་པར་འགྱུར་བར་ཡང་མ་གྱུར། །དེ་ནས་དེ་ཡི་འཇིགས་པའི་ཆེད་དུ་བདུད་ཀྱིས་ནི། །འབྱུང་པོའི་སྡེ་ནི་དྲག་པོ་རྣམས་ལ་བཀའ་སྩལ་ཞིང་། །
དེ་ནས་འདི་ཡི་སྡེ་དེས་རང་རང་མཐུ་རྣམས་ཀྱིས། །དེ་ཡི་བསྟན་པ་དབྱེ་ཕྱིར་བློ་གྲོས་བྱས་པའོ། །ཁ་ཅིག་ལྕེ་རྣམས་གཡོ་ཞིང་དུ་མར་རྣམ་འཕྱང་ཞིང་། །མཆེ་བའི་རྩེ་མོ་རྣམས་རྣོ་མིག་རྣམས་ལྗང་སེར་ཟླུམ། །ཁ་རྣམས་གདངས་ཤིང་ཕུར་བུའི་རྣ་བ་རྣམས་བསྟན་ཞིང་། །ཀུན་ནས་སྐྲག་པར་བྱེད་
པ་སྙམ་དུ་གནས་ཞེས་གྲག །དེས་ནི་གཟུགས་དང་བསམ་པ་དག་གིས་མི་བཟད་པ། །རྣམ་པ་དེ་དག་ཉིད་དུ་གནས་པ་དེ་རྣམས་ལས། །རྩེད་མོ་བྱེད་པའི་བྱིས་པ་རྒྱགས་པ་རྣམས་ལས་ནི། །དྲང་སྲོང་ཆེན་པོ་ཟུག་མེད་སྐྱེ་བར་མ་གྱུར་ཏོ། །དེ་ནས་ཁ་ཅིག་ཁྲོས་པས་ལྟ་བྱེད་རྣམ་འགྱུར་ཞིང་། །འདི་
ལ་དབྱུག་པ་རྡེག་པར་འབད་པ་བྱ་བ་སྟེ། །སྔོན་ཚེ་གྲོང་ཁྱེར་འཇོམས་པའི་རྡོ་རྗེ་དང་བཅས་ལྟར། །དེ་ནས་འདི་ཡི་དབྱུག་པ་དང་བཅས་ལག་པ་རེངས། །ཁ་ཅིག་རྡོ་དང་ཤིང་རྣམས་གྱེན་དུ་འཕྱར་བ་ནི། །ཐུབ་པ་ལ་ནི་རྣམ་པར་འཕེན་པར་མ་ནུས་ཏེ། །འབིགས་བྱེད་རི་བྲགས་རྣམས་ནི་རྡོ་རྗེས་བཅོམ་པ་
བཞིན། །ཤིང་རྣམས་དང་བཅས་རྡོ་རྣམས་བཅས་པ་དེ་བཞིན་ལྷུང་། །ཁ་ཅིག་མཁའ་ལ་གྱེན་དུ་འཕུར་བས་རྡོ་རྣམས་དང་། །དགྲ་སྟ་རྣམས་དང་ཤིང་རྣམས་རྣམ་པར་འཕངས་པ་རྣམས། །ཁ་དོག་གཅིག་མིན་མཚམས་སྤྲིན་རྐང་པ་རྣམས་བཞིན་དུ། །མངོན་པར་ལྷུང་བ་མ་ཡིན་ནམ་མཁར་གནས་པར་
གྱུར། །གཞན་ནི་དེ་ཡི་སྟེང་དུ་འབར་བའི་ཁྱུ་མཆོག་གིས། །གླང་བུ་རི་བོ་ཙམ་པའི་རྭ་ཅན་འཕངས་པ་སྟེ། །དེ་ནི་འཕངས་པ་ཙམ་དུ་ནམ་མཁར་གནས་པ་ཉིད། །དེ་ཡི་མཐུ་ལས་རྣམ་པ་བརྒྱར་ནི་གས་པར་གྱུར། །འཇིག་རྟེན་འཇིག་ཚེ་ལྷུན་པོ་རབ་ཏུ་འབར་བ་ཡིས། །གསེར་གྱི་བྱ་སྐྱིབས་
རྣམས་ཀྱི་ཕྱེ་མ་རྣམ་བཞིན་དུ། །ཁ་ཅིག་ཉི་མ་ཤར་བ་བཞིན་དུ་འབར་བ་ཡི། །མེ་མདག་ཆར་པ་ཆེན་པོ་མཁའ་ལས་ཕབ་པར་གྱུར། །བྱང་ཆུབ་ཤིང་གི་རྩ་བར་རབ་ཏུ་རྣམ་འཕངས་པའི། །མེ་སྟག་འཕྲོ་བ་དང་བཅས་མེ་མདག་ཆར་པ་དེ། །དྲང་སྲོང་དམ་པ་མཆོག་གིས་བྱམས་པའི་གནས་པ་ལས། །

172-1-49b

ཨུཏྤལ་དམར་པོའི་འདབ་མའི་ཆར་པར་གྱུར་པའོ། །ལུས་དང་སེམས་ལ་རྣམ་པར་གནོད་པར་བྱ་བའི་ཕྱིར། །རྣམ་པ་དེ་ལྟར་ཕབ་པ་དེ་དང་དེ་རྣམས་ཀྱིས། །རང་གི་ངེས་པའི་གཉེན་འདུན་ཉེ་བར་འཁྱུད་ནས་བཞིན། །ཤཱཀྱ་ཐུབ་པ་གདན་ལས་གཡོས་པར་མ་གྱུར་ཏོ། །དེ་ནས་གཞན་
རྣམས་འཁོགས་པའི་ལྗོན་ཤིང་རྣམས་ནས་ལྟར། །ཁ་རྣམས་ལས་ནི་སྦྲུལ་རྣམས་རྣམ་པར་སྐྱུགས་པ་སྟེ། །སྔགས་ཀྱིས་བཅིངས་བཞིན་དེ་རྣམས་དེ་ཡི་དྲུང་དུ་ནི། །སོང་བ་མ་ཡིན་དབུགས་མིན་གཡོས་པར་མ་གྱུར་རོ། །གཞན་རྣམས་གློག་དང་བཅས་ཤིང་ཐོག་དང་བཅས་པ་ཡིས། །ཆུ་འཛིན་ཆེན་
པོ་གཏུམ་པའི་དབྱངས་ལྡན་རྣམས་གྱུར་ནས། །ལྗོང་ཤིང་དེ་ལ་རྡོ་བའི་ཆར་པ་ཕབ་པ་སྟེ། །དེ་ནི་མེ་ཏོག་ཆར་པ་མཛེས་པར་གྱུར་པའོ། །དབང་ཕྱུག་མ་ཡིན་སྲོན་པར་དཀར་བའི་མི་ཡི་ནི། །སྙིང་ལ་ཡོངས་སུ་གཡོས་པའི་ཁྲོ་བ་བཞིན་དུ་ནི། །དེ་ནས་གཞན་གྱིས་གཞུ་ལ་མདའ་དག་བཀང་བ་ནི། །དེ་ཉིད་
དུ་ནི་འབར་ཞིང་ལྷུང་བར་མ་གྱུར་ཏོ། །ཡུལ་ལ་རབ་ཏུ་འཇུག་ལ་འཁོར་བ་ལ་འཇིགས་པ། །ཡོངས་སུ་རྟོག་པ་པོ་ཡི་དབང་པོ་ལྔ་རྣམས་བཞིན། །གཞན་རྣམས་དག་གིས་མདའ་ལྔ་རབ་ཏུ་འཕངས་པ་རྣམས། །ནམ་མཁར་གནས་བཞིན་ཐུབ་པ་ལ་ནི་མ་ལྷུང་ངོ་། །གཞན་ནི་བརྡེག་པར་འདོད་པས་ཁྲོས་
ཤིང་རབ་བསྐོར་ཞིང་། །དབྱུག་པ་བཟུང་ནས་དྲང་སྲོང་ཆེན་པོའི་མངོན་དུ་ཕྱོགས། །དོན་མེད་བྱེད་པའི་ཉེས་པ་རྣམས་ལ་འཇིག་རྟེན་བཞིན། །དེས་ནི་འདོད་པ་མ་ཐོབ་དབང་མེད་འགྱེལ་བར་གྱུར། །བུད་མེད་སྤྲིན་པ་ནག་མོ་ལག་ན་ཐོད་པ་ཅན། །དྲང་སྲོང་ཆེན་པོའི་ཐུགས་ནི་རྨོངས་པར་བྱེད་ཅེས་གྲག །གཡོ་
བའི་བདག་ཉིད་ཅན་གྱི་བློ་ནི་ལུང་ལ་བཞིན། །དེར་ནི་ངེས་པ་མེད་པར་བསྐོར་ཞིང་གནས་མ་ཡིན། །ཁ་ཅིག་མིག་ནི་རབ་ཏུ་འབར་བར་བྱས་ནས་ནི། །མིག་གི་མེ་ཡིས་སྦྲུལ་གྱི་དུག་བཞིན་བསྲེག་འདོད་པས། །འདོད་པའི་བདག་ཉིད་ཅན་གྱིས་ཉེར་གནས་དཔལ་བཞིན་དུ། །དེར་ནི་དྲང་སྲོང་བཞུགས་
པ་མཐོང་བར་མ་གྱུར་ཏོ། །ཡེ་ཤེས་ཏིང་འཛིན་དག་གིས་འགྲོ་བྱ་ཉེས་ལེགས་ཆོས། །ལུས་ཀྱི་ངལ་བ་རྣམས་ཀྱིས་འཐོབ་པར་འདོད་པ་བཞིན། །དེ་བཞིན་གཞན་ནི་རྡོ་བ་ལྕི་མོ་བཏེག་པ་ནི། །རབ་ཏུ་འབད་པ་རྣམ་བཅོམ་དོན་མེད་ངལ་བར་གྱུར། །དེ་བཞིན་གཞན་རྣམས་དྲེད་དང་སེང་གེའི་རྣམ་པ་ཡིས། །

172-1-50a

ཆེན་པོའི་སྒྲ་རྣམས་མཐོན་པོ་རབ་ཏུ་སྒྲོགས་པ་སྟེ། །རྡོ་རྗེས་བསྣུན་པའི་ནམ་མཁའ་འགས་པ་ཞེས་སྙམ་ནས། །སེམས་ཅན་རྣམས་ནི་གང་གིས་ཀུན་ནས་འཁུམས་པར་གྱུར། །རི་དགས་གླང་པོ་རྣམས་ནི་ཉམ་ཐག་སྐད་འདོན་ཞིང་། །རྣམ་པར་འབྲོས་ཤིང་ཐིམ་པ་ཉིད་
དུ་གྱུར་པ་སྟེ། །དེ་ཡི་མཚན་མོར་ཕྱོགས་རྣམས་ལས་ནི་ཉིན་མོ་བཞིན། །ཉམ་ཐག་བྱ་རྣམས་སྐད་འདོན་ཡོངས་སུ་བབས་པར་གྱུར། །རྣམ་པ་དེ་ལྟར་དེ་རྣམས་ཀྱི་སྒྲ་དེ་རྣམས་ཀྱིས། །འབྱུང་པོ་ཐམས་ཅད་རྣམས་སུ་གཡོས་པ་ཡིན་ན་ཡང་། །ཁབ་རྣམས་དག་གི་སྒྲ་རྣམས་དག་གིས་མཁའ་
ལྡིང་ལྟར། །ཐུབ་པ་འཇིགས་པ་མ་ཡིན་འཁུམས་པར་མ་གྱུར་ཏོ། །འཇིགས་པ་འདྲོན་པ་ཡོངས་སུ་བསྐོར་བའི་ཚོགས་རྣམས་ལས། །ཇི་ལྟ་ཇི་ལྟར་ཐུབ་པའི་འཇིགས་པ་མ་ཡིན་པ། །དེ་ལྟ་དེ་ལྟར་ཆོས་འཛིན་རྣམས་ཀྱི་དགྲ་བོ་ཡི། །བདུད་རྣམས་མྱ་ངན་ལས་དང་ཁྲོས་ནས་བྱེར་བའོ། །དེ་
ནས་འབྱུང་པོ་ཅུང་ཞིག་གཟུགས་ནི་མཐོ་བ་མ་ཡིན་ཞིང་། །ཁྱད་པར་འཕགས་པར་གྱུར་པ་ནམ་མཁར་གནས་ཉིད་ཀྱིས། །དྲང་སྲོང་ལ་གནོད་དགྲ་མ་ཡིན་ལ་ཁྲོས་མཐོང་ནས། །བདུད་ལྷ་ཆེན་པོའི་དབྱངས་ཀྱིས་སྨྲས་པར་གྱུར་པའོ། །དོན་མེད་ངལ་བར་བྱེད་པར་འོས་པ་མ་ཡིན་བདུད། །
འཚེ་བའི་བདག་ཉིད་སྤོངས་ལ་བདེ་བར་སོང་མཛོད་དང་། །རི་བོ་ཆེན་པོ་ལྷུན་པོ་རྣམས་ཀྱི་ས་བཞིན་དུ། །ཁྱོད་ཀྱིས་བསྐྱོད་ཅིང་བསྒུལ་བར་ནུས་པ་མ་ཡིན་ནོ། །ས་ཡི་བརྟན་པ་ཉིད་དང་ཆུ་ཡི་གཤེར་བ་ཉིད། །མེ་ཡི་དྲོ་བ་ཉིད་ནི་རབ་ཏུ་འདོར་བ་ཡང་། །བསྐལ་པ་དུ་མར་བསྒྲུབ་པའི་བསོད་ནམས་ལས་
མངའ་བ། །འདིས་ནི་ནན་ཏན་ངེས་པར་འདོར་བ་མ་ཡིན་ནོ། །འདིས་ནི་ངེས་པ་གང་དང་ཕ་རོལ་གནོན་པ་དང་། །གཟི་བརྗིད་གང་དང་བརྩེ་བ་སྐྱེ་དགུ་རྣམས་ལ་བརྟེན། །འོད་ཟེར་སྟོང་གིས་མུན་རྣམས་མ་བཅོམ་གནས་བཞིན་དུ། །འདི་ནི་དེ་ཉིད་མ་ཐོབ་ནས་ནི་ལྡང་མ་ཡིན། །ཤིང་ལ་བསྲུབས་ནས་མེ་ནི་
རྙེད་པར་འགྱུར་བ་སྟེ། །ས་ལ་བརྐོས་ན་ཆུ་ཡང་འཐོབ་པར་འགྱུར་བ་ཉིད། །རིགས་པ་དང་ནི་ལྡན་པའི་ཐམས་ཅད་བྱས་པ་སྟེ། །བརྩོན་འགྲུས་ལྡན་པའི་བསྒྲུབ་བྱ་མ་ཡིན་ཅི་ཡང་མེད། །དེ་ཕྱིར་ཆགས་སོགས་ནད་རྣམས་དག་ལ་གནས་པ་ཡི། །འཇིག་རྟེན་ཉམ་ཐག་པ་ལ་ཐུགས་རྗེ་མངའ་བ་ནི། །

172-1-50b

ཡེ་ཤེས་དམན་གྱི་དོན་དུ་ཡོངས་སུ་ངལ་བ་པོ། །སྨན་པ་ཆེན་པོ་འདི་ལ་བགེགས་འོས་མ་ཡིན་ནོ། །ལམ་ངན་མང་པོ་རྣམས་ཀྱིས་འཇིག་རྟེན་སྟོར་བ་ལ། །གང་ཞིག་ཞི་བས་དམ་པའི་ལམ་ནི་རྗེས་ཚོལ་བ། །ཆུད་ཟོས་པ་ལ་ལེགས་པར་སྟོན་བྱེད་དེད་དཔོན་བཞིན། །སྟོན་མཛད་དེ་ནི་བསྐྱོད་པར་
རིགས་པ་མ་ཡིན་ནོ། །མུན་པ་ཆེན་པོ་སེམས་ཅན་ཆུད་ཟོས་རྣམས་ལ་ནི། །ཡེ་ཤེས་སྒྲོན་མ་རབ་ཏུ་གསལ་བར་མཛད་པ་འདི། །མུན་པ་ལ་ནི་རབ་ཏུ་འབར་བའི་སྒྲོན་མ་ཡིན། །འཕགས་པའི་མྱ་ངན་འདའ་བར་བྱེད་པར་འོས་མ་ཡིན། །འཁོར་བའི་རྣམ་འགྱུར་ཆུ་བོ་ཆེན་པོར་འགྲོ་བ་ནི། །ཕ་རོལ་
མ་ཐོབ་པར་ནི་བྱིང་བར་གཟིགས་ནས་ནི། །གང་གིས་དེ་ནི་སྒྲོལ་བར་བྱེད་ལ་རབ་ཞུགས་ཏེ། །དེ་ལ་སྡིག་པ་འཕགས་པ་སུ་ཡིས་སེམས་པར་བྱེད། །བཟོད་པའི་ཆུ་རྒྱུས་བསྟན་པའི་རྩ་བ་བརྟན་པ་སྟེ། །སྤྱོད་པའི་མེ་ཏོག་བློ་དང་དྲན་པའི་ཡལ་ག་ཅན། །ཡེ་ཤེས་ལྗོན་ཤིང་ཆོས་ཀྱི་འབྲས་བུ་སྟེར་བ་
པོ། །འཕེལ་བཞིན་པ་ནི་ཟློག་པར་འོས་པ་མ་ཡིན་ནོ། །གང་གི་སྙིང་ལ་རྨོངས་པའི་ཞགས་པ་སྲ་རྣམས་ཀྱིས། །བཅིངས་པའི་སྐྱེ་དགུ་རྣམས་ཀྱི་གྲོལ་ཕྱིར་བློ་མངའ་ཞིང་། །འགྲོ་བ་བཅིངས་པ་ཐར་པའི་ཆེད་དུ་འོ་བརྒྱལ་བ། །དེ་ལ་བརྡེགས་པ་ཁྱོད་ཀྱིས་འཐད་པ་མ་ཡིན་ནོ། །བྱང་ཆུབ་ཆེད་དུ་
ལས་གང་དག་ན་མཛད་པ་རྣམས། །དེ་རྣམས་ཀྱིས་ནི་ངེས་པར་དེ་རིང་དུས་ཡིན་ལ། །ཇི་ལྟར་ཐུབ་པ་སྔ་མ་རྣམས་ནི་དེ་བཞིན་དུ། །གནས་དེར་དེ་བཞིན་འདི་ནི་ཉེ་བར་བཞུགས་པའོ། །དབྱིག་འཛིན་གཞི་ཡི་ནི་ལྟེ་བ་འདི་ཡིན་ཞིང་། །སྙིང་པོ་དམ་པ་མཐའ་དག་དང་ནི་ལྡན་པ་ཉིད། །གང་ཞིག་འདི་ཡིས་
ཏིང་ངེ་འཛིན་གྱི་ཤུགས་བཟོད་པའི། །ས་ཡི་ཕྱོགས་དེ་འདི་ལས་གཞན་པ་ཡོད་མ་ཡིན། །དེ་ཕྱིར་ཁྲོ་བར་མ་བྱེད་ཞི་བར་ཉེར་སོང་ལ། །བདུད་ནི་ཁྱོད་ཀྱི་དྲགས་པས་ང་རྒྱལ་མ་གྱུར་ཅིག །དཔལ་ནི་མི་བརྟན་བློ་གཏད་པར་ནི་ནུས་མིན་ཞིང་། །གོ་འཕང་གཡོ་ལ་རྒྱགས་པར་མངོན་པར་ཉེར་འགྲོ་
ཞིང་། །དེ་ནས་དེ་ཡི་ཚིག་དེ་ཡང་དག་ཐོས་ནས་དང་། །ཐུབ་པ་ཆེན་པོའི་གཡོ་བ་མེད་པ་ཉིད་མཐོང་ནས། །གང་གིས་མདའ་ཡིས་འགྲོ་བའི་སྙིང་ལ་རྡེག་བྱེད་པའི། །བདུད་ནི་འབད་པ་བཅོམ་ཞིང་ཡིད་མི་བདེ་བར་སོང་། །དགའ་བ་མེད་ཅིང་འབྲས་མེད་ངལ་བ་བྱས་པ་རྣམས། །ཕ་བོང་རྣམས་ནི་ཁྱུ་

172-1-51a

མཆོག་ལྗོན་ཤིང་རྣམས་གཏོར་ཏེ། །དགྲར་གྱུར་དགྲ་བོའི་དཔུང་ནི་གཙོ་བོ་བསད་པ་ལྟར། །དེ་ནས་འདི་ཡི་དཔུང་ནི་ཕྱོགས་ཕྱོགས་བྲོས་པའོ། །མེ་ཏོག་ཏོག་ཅན་འཁོར་དང་བཅས་པ་བྲོས་ཤིང་ངེས་པར་འཕམ་པ་ནི། །དྲང་སྲོང་ཆེན་པོ་མུན་པ་འཕམ་ཞིང་རྡུལ་དང་
བྲལ་བ་རྒྱལ་བ་ན། །རྒོད་པ་དང་བཅས་ལང་ཚོ་མ་བཞིན་ཟླ་བ་དང་བཅས་མཁའ་གསལ་ཞིང་། །ཆུ་ཡི་སྙིང་པོ་ཅན་གྱི་དྲི་ཞིམ་མེ་ཏོག་ཆར་པ་བབ་པར་གྱུར་པའོ། །དེ་ལྟར་སྡིག་པ་ཅན་ནི་ངེས་པར་ཕམ་པ་ནི། །དེ་ཚེ་ཕྱོགས་ནི་རབ་སྣང་མཚན་མོར་བྱེད་པ་མཛེས། །མཁའ་ལས་མེ་ཏོག་ཆར་
རྣམས་ས་ལ་བབ་པ་སྟེ། །ལང་ཚོ་མ་བཞིན་ངལ་བ་མེད་པར་མཚན་མོ་གསལ། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། བདུད་ལས་རྣམ་པར་རྒྱལ་བའི་ལེའུ་སྟེ་བཅུ་གསུམ་པའོ།།      །།དེ་ནས་བརྟན་དང་ཞི་བ་ཡིས། །བདུད་ཀྱི་སྟོབས་ནི་ཕམ་མཛད་ནས། །
དོན་དམ་རྣམ་པར་མཁྱེན་བཞེད་པ། །བསམ་གཏན་མཁས་དེ་བསམ་གཏན་མཛད། །བསམ་གཏན་ཆོ་ག་ཐམས་ཅད་ལ། །དབང་ཕྱུག་དམ་པ་རབ་བརྙེས་ནས། །སྔོན་གྱི་སྐྱེ་བ་རིམ་པ་ནི། །དང་པོའི་ཐུན་ལ་དྲན་པའོ། །ཆེ་གེ་མོ་བདག་མིང་འདི་ནི། །དེ་ནས་འཕོས་ཏེ་འདིར་འོངས་པའོ། །ཞེས་
ནི་སྐྱེ་བ་སྟོང་ཕྲག་རྣམས། །རྗེས་སུ་མྱོང་བ་བཞིན་དུ་དྲན། །འཐད་པ་དེ་དང་དེ་རྣམས་སུ། །སྐྱེ་བར་འཆི་བ་དྲན་ནས་ནི། །དེ་ནས་སེམས་ཅན་ལ་ཐུགས་རྗེས། །ཐུགས་རྗེའི་བདག་ཉིད་ཅན་གྱིས་མཛད། །རང་གི་སྐྱེ་བོ་བོར་ནས་ནི། །སླར་ཡང་གཞན་དུ་བྱ་བ་རྣམས། །ངེས་པར་འཇིག་རྟེན་
མགོན་མེད་འདི། །འཁོར་ལོ་བཞིན་དུ་ཡོངས་སུ་འཁོར། །དེ་ལྟར་ངེས་པའི་བདག་ཉིད་ནི། །དེ་ཡི་དྲན་པར་གྱུར་པ་སྟེ། །ཆུ་ཤིང་སྙིང་པོ་སྙིང་པོ་མེད། །འཁོར་བ་དེ་ལྟར་ངེས་པར་རོ། །ཐུན་ནི་གཉིས་པ་བྱུང་བ་ན། །གཉིས་མེད་ཕ་རོལ་གནོན་པ་དེ། །མིག་དང་ལྡན་པ་ཀུན་གྱི་མཆོག །ལྷ་
ཡི་སྤྱན་ནི་ཐོབ་པར་གྱུར། །དེ་ནས་དེས་ནི་ལྷ་ཡི་སྤྱན། །ཡོངས་སུ་དག་པ་དེ་ཡིས་ནི། །མེ་ལོང་དྲི་མ་མེད་པ་ལྟར། །འཇིག་རྟེན་མཐའ་དག་ལ་གཟིགས་སོ། །མཆོག་དང་མཆོག་མིན་ལས་རྣམས་ཀྱིས། །སེམས་ཅན་རྣམས་ཀྱི་འཆི་འཕོ་དང་། །སྐྱེ་བ་གཟིགས་པ་དེ་ཡིས་ནི། །ཐུགས་རྗེའི་བདག་

172-1-51b

ཉིད་འཕེལ་བར་གྱུར། །འདི་རྣམས་སྡིག་པའི་ལས་ཅན་རྣམས། །སྲོག་ཆགས་རྣམས་ནི་ངན་འགྲོར་འགྲོ། །འདི་གཞན་དགེ་བའི་ལས་ཅན་རྣམས། །མཐོ་རིས་སུ་ནི་རབ་གནས་སོ། །ཤིན་ཏུ་མི་བཟད་དམྱལ་བ་རུ། །རབ་ཏུ་འཇིགས་པར་གྱུར་པ་རྣམས། །འདི་རྣམས་སྡུག་བསྔལ་སྣ་ཚོགས་
ཀྱིས། །ཀྱེ་མ་བཀྲེན་པས་གཙེར་པར་བྱེད། །ཁ་ཅིག་མེ་ཡི་ཁ་དོག་གི །ལྕགས་ཁུ་ཁོལ་མ་འཐུང་བར་བྱེད། །ལྕགས་ཀྱི་ཀ་བ་ཚན་མོ་ལ། །གཞན་རྣམས་ཆོ་ངེས་འདེབས་ཤིང་འཛེག །ལྕགས་ཟངས་རྣམས་སུ་ཁས་བུབ་རྣམས། །ཁ་ཅིག་ཐུག་པ་བཞིན་དུ་འཚེད། །མེ་མདག་ཕུང་པོ་
འབར་རྣམས་སུ། །ཁ་ཅིག་སྙིང་རྗེ་བར་སྲེག་གོ། །ཁ་ཅིག་ལྕགས་ཀྱི་མཆེ་རྣོ་ཅན། །མི་བཟད་ཁྱི་རྣམས་ཀྱིས་ཟ་ཞིང་། །ཁ་ཅིག་མ་རུངས་ལྕགས་མཆུ་ཅན། །ལྕགས་འདྲའི་བྱ་རོག་རྣམས་ཀྱིས་ཟ། །ཁ་ཅིག་གདུང་བས་ཡོངས་ངལ་རྣམས། །བསིལ་བའི་གྲིབ་མ་མངོན་འདོད་པས། །རལ་གྲིའི་
ལོ་མའི་ནགས་སྔོན་པོར། །འདི་རྣམས་བཅིངས་པ་བཞིན་དུ་ཞུགས། །ཁ་ཅིག་སྟ་རེ་རྣམས་ཀྱིས་ནི། །ལག་པ་བཏེག་རྣམས་ཤིང་ལྟར་འགེམས། །ལས་རྣམས་ཀྱིས་བཟུང་སྲོག་རྣམས་ནི། །སྡུག་བསྔལ་ན་ཡང་རྣམ་མི་སྨིན། །སྡུག་བསྔལ་ཟློག་པའི་དོན་ཆེད་དུ། །བདེ་བ་ཡིན་
ཞེས་ལས་གང་བྱས། །དེ་ཡི་འབྲས་དེ་དབང་མེད་ཀྱིས། །སྡུག་བསྔལ་ཁོ་ན་ཉེར་ལོངས་སྤྱོད། །བདེ་དོན་མི་དགེ་བ་བྱས་ནས། །གང་དེ་ཤིན་ཏུ་སྡུག་བསྔལ་རྣམས། །དེ་དག་རྣམས་ཀྱི་རོ་མྱང་དེས། །བདེ་བ་ཕྲ་མོ་ཡང་བྱེད་དམ། །སྡིག་པའི་བདག་ཉིད་རྒོད་རྣམས་ཀྱིས། །སྡིག་པའི་
ལས་ནི་བྱས་པ་གང་། །དེ་ནི་མངོན་དུ་གྱུར་པའི་ཚེ། །ཆོ་ངེ་རྣམས་ཀྱིས་རྗེས་སུ་མྱོང་། །གལ་ཏེ་དེ་ལྟར་སྡིག་ལས་ཅན། །ལས་ཀྱི་འབྲས་བུ་མཐོང་བ་སྟེ། །དམིགས་སུ་མངོན་པར་བསྣུན་པ་བཞིན། །སྐྱེན་པར་ཁྲག་ནི་སྐྱུགས་པ་ཉིད། །ལུས་ཀྱི་སྡུག་བསྔལ་རྣམས་ལས་དང་། །
དམྱལ་བའི་རྣམས་ལས་སེམས་ལྡན་གྱི། །འཕགས་མིན་རྣམས་དང་ལྷན་ཅིག་འགྲོགས། །ངལ་བ་མཆོག་ནི་བདག་གི་ལུགས། །གཞན་འདི་སེམས་ཀྱིས་རྣམ་གཡོ་ལས། །བྱུང་བའི་ལས་རྣམས་སྣ་ཚོགས་ཀྱིས། །བྱོལ་སོང་སྐྱེ་གནས་སྣ་ཚོགས་སུ། །ཉེ་བར་སྐྱེས་རྣམས་གདུང་བ་

172-1-52a

ཅན། །ཤ་ལྤགས་སྤུ་དང་སོ་ཡི་ཕྱིར། །ཆགས་པ་ལས་སམ་རྒྱགས་པ་ལས། །གཉེན་འདུན་རྣམས་ཀྱིས་མཐོང་ན་ཡང་། །གང་དུ་སྙིང་རྗེ་བར་གསོད་དོ། །ནུས་མེད་ལྡན་ཡང་དབང་མེད་རྣམས། །བཀྲེས་སྐོམ་ངལ་བས་གཙེར་བ་རྣམས། །ལྕགས་
ཀྱིས་བསྣུན་པའི་དབྱིག་ཅན་རྣམས། །རྟ་དང་བ་ལང་གྱུར་རྣམས་འཁོལ། །སྟོབས་ཅན་རྣམས་ཀྱང་སྟོབས་ཆུང་གི །གླང་པོར་གྱུར་པ་རྣམས་འཁོལ་ཏེ། །ལྕགས་ཀྱུས་ཉོན་མོངས་མགོ་བོ་རྣམས། །རྐང་པའི་རྟིང་པ་རྣམས་ཀྱིས་བཏགས། །ཕན་ཚུན་རྣམ་པར་རྩོད་ལས་དང་། །
གཞན་གྱི་དབང་དུ་གྱུར་ཉིད་ཀྱིས། །སྡུག་བསྔལ་གཞན་རྣམས་ལ་ཡོད་ཀྱང་། །གང་ལ་སྡུག་བསྔལ་ཁྱད་པར་ལྡན། །ཕན་ཚུན་དུ་ནི་རབ་ཕྲད་ནས། །མ་གནས་སྐམ་གནས་རྣམས་ཀྱིས་དང་། །ཆུར་གནས་ཆུར་གནས་རྣམས་ཀྱིས་དང་། །མཁར་གནས་མཁར་གནས་རྣམས་ཀྱིས་
འཇོམས། །སེར་སྣས་ནོན་པའི་སེམས་ལྡན་རྣམས། །ཡི་དགས་འཇིག་རྟེན་སྣང་མེད་དུ། །སྐྱེས་པ་འདི་རྣམས་དེ་བཞིན་དུ། །བཀྲེས་པ་འབྲས་བུ་ལ་ལོངས་སྤྱོད། །ཁབ་མིག་ལྟ་བུའི་ཁ་རྣམས་དང་། །རི་བོ་ལྟ་བུའི་ལྟོ་བ་རྣམས། །བཀྲེས་སྐོམ་གྱིས་བསྐྱེད་སྡུག་བསྔལ་གྱིས།
།སྡུག་བསྔལ་སྐལ་ཅན་རྣམས་གཙེར་ཏོ། །སེར་སྣའི་འབྲས་བུ་འདི་འདྲ་བ། །སྐྱེས་བུ་གལ་ཏེ་ཤེས་ན་ནི། །ལུས་ཀྱི་ཆ་ཤས་རྣམས་ཀྱང་ནི། །ཞི་བ་བཞིན་དུ་ཀུན་ནས་གཏོང་། །རང་གི་ལས་རྣམས་ཀྱིས་བཟུང་ཞིང་། །སྲེད་པས་ཤིན་ཏུ་ནོན་པ་རྣམས། །བོར་བའི་མི་གཙང་བ་རྣམས་
ཀྱང་། །ལོངས་སྤྱོད་པར་ནི་འདིས་མི་རྙེད། །འདི་གཞན་དམྱལ་བ་དང་མཚུངས་པའི། །མངལ་ཕྱིན་མི་གཙང་ཁུ་བ་རུ། །ཉེ་བར་སྐྱེས་རྣམས་མི་རྣམས་སུ། །འགྲོ་བ་རྣམས་ནི་སྡུག་བསྔལ་འཐོབ། །དེ་སྔོན་སྐྱེ་བ་ཙམ་ན་ཡང་། །ལག་པ་རྣོན་པོས་བཟུང་བ་རྣམས། །རལ་གྲི་རྣམས་
ཀྱིས་གཤེགས་པ་ལྟར། །གང་དུ་སྙིང་རྗེ་བར་ནི་ངུ་། །བྱམས་དང་བསྲུང་དང་སྐྱོང་རྣམས་ཀྱི། །གཉེན་འདུན་རྣམས་ཀྱིས་འབད་ནས་སོས། །སྡུག་བསྔལ་ལས་སླར་སྡུག་བསྔལ་དྲག །རང་རང་ལས་ཀྱིས་ཉོན་མོངས་སོ། །བྱ་བ་འདི་དང་བྱ་བ་འདི། །ཞེས་ནི་གང་དུ་ལྷག་པར་ལ། །

172-1-52b

སྲེད་དང་ཡོངས་ལྡན་བྱིས་རྣམས་ཀྱིས། །རྒྱུན་ཆད་མེད་པར་རྗེས་སུ་མྱོང་། །འདི་གཞན་བསོད་ནམས་ལས་རྣམས་ཀྱིས། །མཐོ་རིས་སུ་ནི་སྐྱེས་པ་རྣམས། །འདོད་ཆགས་མེ་ཡིས་དྲག་ཏུ་ནི། །མེ་ལྟར་རབ་ཏུ་སྲེག་པར་བྱེད། །ཡུལ་རྣམས་ཀྱིས་ནི་ངོམས་མེད་རྣམས། །གང་
ལས་འདི་རྣམས་གཟི་བཅོམ་སྟེ། །ཕྲེང་བ་ཡོངས་རྙིངས་ཞགས་པ་རྣམས། །གྱེན་དུ་མིག་ཕྱོགས་རྣམས་ལྷུང་ངོ་། །གང་དུ་ལྷ་མོ་རྣམས་ཀྱིས་ནི། །སྡུག་པ་དབང་མེད་ལྷུང་བ་ལ། །སྙིང་ལ་བརྩེ་བ་ལྟོས་རྣམས་ཀྱིས། །ལག་པ་རྣམས་ཀྱིས་གོས་རྣམས་འཛིན། །གང་ཞིག་ས་
ལ་ལྷུང་བ་བཞིན། །ལུས་འདུད་དོ་ཤལ་གཡོ་རྣམས་ཀྱིས། །སྡུག་རྣམས་གཞལ་མེད་ཁང་རྣམས་ནས། །སྙིང་རྗེ་དང་བཅས་ལྟུང་བ་ལྟ། །རྣམ་པ་སྣ་ཚོགས་རྒྱན་ཕྲེང་ཅན། །གཞན་འདིས་སྡུག་བསྔལ་ལྷུང་རྣམས་ལ། །གདུང་རྣམས་བརྩེ་དང་གཡོ་བ་ཡི། །ལྟ་བྱེད་རྣམས་ཀྱི་རྗེས་
སུ་འགྲོ། །འདོད་པ་ཅན་རྣམས་ལྷུང་བ་ལ། །ལག་པ་རྣམས་ཀྱིས་བྲང་བརྡུང་ཞིང་། །འཁྲུགས་ཆེན་གྱི་ལྟར་ཉམ་ཐག་པ། །ལྷ་མོའི་ཚོགས་རྣམས་ཀྱིས་བསྟན་ཏོ། །ཀྱི་ཧུད་ཤིང་རྟ་སྣ་ཚོགས་རྫིང་། །ཀྱི་ཧུད་སྡུག་པ་གང་ན་ཞེས། །ཉམ་ཐག་པ་རྣམས་རྣམ་ཟློས་ཤིང་། །ལྷ་ལ་
གནས་རྣམས་ས་ལ་ལྷུང་། །ལས་མང་རྣམས་ཀྱིས་ཐོབ་པ་ཡིས། །མཐོ་རིས་མི་བརྟན་གཡོ་བ་ལ། །འབྲལ་བས་བྱས་པའི་སྡུག་བསྔལ་ནི། །གང་དུ་འདི་འདྲ་ཐོབ་པར་འགྱུར། །ཀྱེ་མ་ངེད་ལས་ཁྱད་པར་དུ། །འཇིག་རྟེན་མཛད་པའི་ཆོས་ཉིད་དེ། །འདོད་ཆགས་བྲལ་བ་ཐོབ་ནས་
ཀྱང་། །གཞན་རྣམས་ལྷ་ནས་ངེས་པར་ལྷུང་། །འདི་ནི་རྟག་པར་གནས་པ་སྟེ། །ཞེས་ནི་ངེས་པའི་སེམས་ལྡན་རྣམས། །འཇིག་རྟེན་འདི་ཡི་རང་བཞིན་ནི། །འདི་ལྟ་བུར་ནི་མཐོང་མ་ཡིན། །དམྱལ་བ་རྣམས་སུ་སྡུག་བསྔལ་དྲག །དུད་འགྲོ་རྣམས་སུ་ཕན་ཚུན་ཟ། །བཀྲེས་
སྐོམ་སྡུག་བསྔལ་ཡི་དགས་སུ། །མི་ལ་ཚོལ་བའི་སྡུག་བསྔལ་ལོ། །ལྷ་ན་སྡུག་པ་དང་བྲལ་བས། །སྐྱེད་པའི་སྡུག་བསྔལ་ཕུལ་བྱུང་སྟེ། །བསྐོར་བ་གསོན་པའི་འཇིག་རྟེན་གྱིས། །གང་ན་ཞི་བ་ངེས་པར་བྱེད། །འཁོར་བའི་ཆུ་བོ་རྟེན་མེད་དུ། །འདི་ནི་འཆི་བས་བསྐོར་བ་

172-1-53a

སྟེ། །ཙམ་ཙོམ་དུ་ནི་བསྐོར་བ་ཡི། །འགྲོ་བས་གནས་ནི་ཐོབ་མ་ཡིན། །དེ་ལྟར་དེས་ནི་འགྲོ་བ་ལྔ། །ལྷ་ཡི་སྤྱན་གྱིས་གཟིགས་པ་སྟེ། །ཆུ་ཤིང་གཤགས་པ་བཞིན་དུ་ནི། །སྲིད་པར་སྙིང་པོ་རྙེད་མ་ཡིན། །དེ་ནས་དེ་ཡི་མཚན་མོའི་ཐུན། །གསུམ་
པ་ཉེ་བར་གནས་པ་ན། །འཇིག་རྟེན་འདི་ཡི་རང་བཞིན་ནི། །བསམ་གཏན་རིག་པ་མཆོག་གིས་བསྒོམས། །ཀྱེ་མ་འཇིག་རྟེན་ངལ་ཐོབ་གང་། །ཡང་དང་ཡང་དུ་སྐྱེ་བ་དང་། །འཁོགས་པ་དང་ནི་འཆི་བ་དང་། །འཕོ་བ་དང་ནི་སྐྱེ་བ་ཉིད། །ཡང་ན་སྡུག་བསྔལ་ཆེ་འདི་
ལས། །ཆགས་ལས་ལོང་མིན་གྱིས་བསྒྲིབས་པ། །སྐྱེས་ལོང་ཤིན་ཏུ་དོག་ས་ནས། །ཕྱི་རོལ་འགྲོ་བ་ཤེས་མ་ཡིན། །དེ་ལྟར་བསམས་པ་དེ་ཡིས་ནི། །ཐུགས་ཀྱིས་རྣམ་དཔྱོད་གྱུར་པ་སྟེ། །གང་དུ་གྱུར་ན་ངེས་སམ་ཞེས། །རྒ་བས་འཆི་བ་མངོན་པར་སོང་། །སྐྱེ་གནས་ནས་
དེ་ཉིད་བསྒོམས་པ། །དེ་ཡིས་མངོན་པར་རྟོགས་པར་གྱུར། །རྒ་དང་འཆི་བ་དག་གིས་ནི། །སྐྱེ་བ་ཡོད་ན་རྫོགས་པའོ། །མགོ་བོ་ཡོད་ན་མགོ་བོ་ཡི། །ནད་འདི་འབྱུང་བ་མཐོང་བ་སྟེ། །ཤིང་གི་སྐྱེ་བ་ཡོད་གྱུར་ན། །འགྱེལ་བ་འབྱུང་བར་འགྱུར་བའོ། །དེ་ནས་དེ་ཡི་སླར་གྱུར་པ། །
སྐྱེ་བ་འདི་སླར་གང་ལ་ཞེས། །དེ་ནས་ལས་སྲིད་ལས་སྐྱེ་བར། །སྐྱེ་བ་ཡང་དག་མཁྱེན་པའོ། །དེས་ནི་ལྷ་ཡི་སྤྱན་གྱིས་ནི། །ལས་ལས་འཇུག་པར་མཁྱེན་པ་སྟེ། །དབང་ཕྱུག་ལས་མིན་རང་བཞིན་མིན། །བདག་ལས་མ་ཡིན་རྒྱུ་མེད་མིན། །ཇི་ལྟར་རིག་པ་ལས་གླིང་བུ། །དང་པོའི་ཚིགས་
ནི་བཅད་པ་ན། །ཆོ་ག་བཞིན་དུ་ཀུན་མྱུར་འགྲོ། །དེ་ལྟར་ཡེ་ཤེས་གོ་རིམས་སོ། །དེ་ནས་སྲིད་པའི་སྐྱེ་བ་ནི། །མཁྱེན་ཕྱིར་ཐུབ་པས་བློ་གྲོས་མཛད། །དེ་ནས་སྲིད་པའི་སྐྱེ་བ་དེས། །ཉེ་བར་ལེན་ལས་བྱུང་བར་མཁྱེན། །ཚུལ་ཁྲིམས་བརྟུལ་ཞུགས་མཆོག་འཛིན་དང་། །འདོད་བློ་
བདག་ཏུ་ལྟ་རྣམས་ཀྱིས། །བུད་ཤིང་རྣམས་ཀྱིས་མེ་བཞིན་དུ། །འདི་ཡིས་ལས་ནི་ཉེ་བར་ལེན། །གང་གི་རྒྱུ་ལས་ལེན་པ་ཞེས། །དེ་ནས་དེ་ཡི་གྱུར་པ་སྟེ། །དེ་ནས་ཉེ་བར་ལེན་པའི་རྐྱེན། །སྲེད་པར་དེས་ནི་མཁྱེན་པའོ། །ཆུང་ངུའི་མེ་ཡིས་ནགས་ཀྱི་མེ། །རླུང་གིས་བུད་དེ་བསྐྱེད་པ་

172-1-53b

བཞིན། །འདོད་སོགས་ཉོན་མོངས་རྒྱ་ཆེན་རྣམས། །སྲེད་པ་ཡིས་ནི་སྐྱེད་པར་བྱེད། །དེ་ནས་དེ་ཡིས་བསམས་པ་ནི། །སྲེད་པ་གང་ལས་བྱུང་ཞེས་སོ། །ཚོར་བའི་རྐྱེན་གྱིས་སྲེད་པ་ཞེས། །དེ་ནས་རྣམ་པར་ངེས་པ་མཛད། །ཚོར་བས་མངོན་བཅོམ་སྐྱེ་དགུ་རྣམས། །གཉེན་པོར་བྱེད་ལ་
སྲེད་པ་སྟེ། །སྐོམ་པ་མེད་ན་ཆུ་ལ་ནི། །ཁ་ཅིག་མངོན་པར་དགའ་བ་ཡིན། །དེ་ནས་སླར་ཡང་ཚོར་བ་ཡི། །སྐྱེ་བའི་གནས་ནི་གང་ཞེས་བསམས། །ཚོར་བ་ཚོར་བ་མཐར་བྱེད་ཀྱིས། །རེག་པའི་རྒྱུ་ཅན་ཉིད་དུ་མཁྱེན། །ཡུལ་དང་དབང་པོ་བློ་རྣམས་ཀྱིས། །འདུས་པ་རེག་པར་བརྗོད་
བྱ་སྟེ། །གཙུབ་ཤིང་ལས་ནི་མེ་བཞིན་དུ། །གང་ལས་ཚོར་བ་སྐྱེ་བའོ། །དེ་ནས་རེག་པ་རྒྱུ་ཡིན་ཞེས། །དེ་ཡིས་བསམས་པར་གྱུར་པའོ། །དེ་ནས་སྐྱེ་མཆེད་དྲུག་གི་ནི། །རྒྱུ་ཅན་ཉིད་དུ་དེས་མཁྱེན་ཏོ། །ལོང་བས་གཟུགས་ནི་མི་རིག་ཅིང་། །མིག་ནི་བློ་ཡིས་མི་སྦྱོར་ཕྱིར། །མིག་ཡོད་
གྱུར་ན་དེས་སྦྱོར་ཏེ། །དེ་ཕྱིར་དབང་པོ་ཡོད་ན་རེག །དེ་ནས་སྐྱེ་མཆེད་དྲུག་གིས་ནི། །སྐྱེ་བ་མཁྱེན་ཕྱིར་བློ་གྲོས་མཛད། །དེ་ནས་དེའི་རྒྱུ་མིང་དང་གཟུགས། །རྒྱུ་ལ་མཁས་པས་མཁྱེན་པའོ། །ཇི་ལྟར་མྱུ་གུ་ཡོད་པ་ལས། །ལོ་མ་སྡོང་བུ་འབྱུང་བར་དྲན། །དེ་ལྟར་མིང་དང་གཟུགས་
ཡོད་ན། །སྐྱེ་མཆེད་དྲུག་ནི་འབྱུང་བའོ། །མིང་དང་གཟུགས་ནི་རྒྱུ་གང་ཞེས། །དེ་ཡི་དེ་ནས་གྱུར་དེ་ནས། །དེ་ཡི་སྐྱེ་བ་རྣམ་ཤེས་སུ། །ཡེ་ཤེས་ཕ་རོལ་སོན་པས་མཁྱེན། །རྣམ་པར་ཤེས་པ་འདས་པ་ན། །མིང་དང་གཟུགས་ནི་རབ་གནས་ཏེ། །ས་བོན་བསྐྲུན་པ་རྫོགས་པ་ན། །མྱུ་གུ་
རྣམ་པར་འཛིན་པའོ། །དེ་ནས་རྣམ་པར་ཤེས་པ་ནི། །གང་ལས་ཡིན་ཞེས་བསམས་པར་གྱུར། །མིང་དང་གཟུགས་ལ་བརྟེན་ནས་དེ། །དེ་ནས་དེ་ཡི་སྐྱེ་བ་མཁྱེན། །དེ་ནས་རྒྱུ་ཡི་གོ་རིམས་ནི། །མཁྱེན་ནས་དེ་ཡི་བློར་གྱུར་ཏེ། །སེམས་ནི་ལུགས་འབྱུང་བསྐོར་བ་སྟེ། །གཞན་དུ་ལུགས་
ལས་ཟློག་པར་མིན། །རྣམ་པར་ཤེས་པའི་རྐྱེན་ལས་ནི། །མིང་དང་གཟུགས་ལ་བརྟེན་ནས་ནི། །སླར་ཡང་རྣམ་པར་ཤེས་པ་སྐྱེ། །ཇི་ལྟར་གྲུ་ཡིས་མི་འདྲེན་ཞིང་། །དེ་བཞིན་རྣམ་པར་ཤེས་པ་དང་། །མིང་གཟུགས་ཕན་ཚུན་གྱི་རྒྱུའོ། །ཇི་ལྟར་ལྕགས་ནི་འབར་བ་ཡིས། །རྩྭ་རྣམས་

172-1-54a

འབར་བར་བྱེད་ན་ཡང་། །འབར་བ་དེ་ཡིས་དེ་གདུང་སྟེ། །དེ་བཞིན་ཕན་ཚུན་རྒྱུ་ཉིད་དོ། །དེ་ལྟར་རྣམ་པར་ཤེས་པ་ལས། །མིང་གཟུགས་འབྱུང་བ་མཁྱེན་གྱུར་པ། །དེ་ནས་དབང་པོ་འབྱུང་འགྱུར་ཞིང་། །དབང་པོ་ལས་བྱུང་རེག་པའོ། །རེག་པ་ལས་སྐྱེས་
ཚོར་བ་མཁྱེན། །ཚོར་བ་ལས་སྐྱེས་སྲེད་པའོ། །སྲེད་པ་ལས་སྐྱེས་ལེན་པའོ། །ལེན་པ་ལས་ནི་དེ་བཞིན་སྲིད། །སྲིད་པ་ལས་ནི་སྐྱེ་བ་དག །སྐྱེ་བས་རྒ་ཤི་འབྱུང་བར་མཁྱེན། །འགྲོ་བ་དག་ནི་རྐྱེན་རྣམས་ལས། །སྐྱེས་ཞེས་ཡང་དག་མཁྱེན་པའོ། །དེ་ནས་འདི་ཡི་
བློ་གྲོས་ངེས་པར་སོང་བ་ནི། །སྐྱེ་བ་ཟད་ལས་འཆི་དང་རྒ་བ་འགགས་པ་སྟེ། །སྲིད་པ་ཉམས་པ་ལས་ཀྱང་སྐྱེ་བ་ཉམས་པ་ཉིད། །ལེན་པ་འགགས་པ་ལས་ནི་སྲིད་པ་རྣམ་ལྡོག་ཅིང་། །དེ་ནས་སྲིད་འགགས་པ་ལས་དེ་ནི་འགག་པ་སྟེ། །ཚོར་བ་ཡོད་པ་མིན་ན་སྲེད་པ་ཡོད་མ་ཡིན། །
རེག་ལས་ཆུད་ཟོས་གྱུར་ན་ཚོར་བ་ཡོད་མིན་ཞིང་། །སྐྱེ་མཆེད་འཇུག་པ་མེད་ལས་རེག་པ་ཟད་པའོ། །དེ་བཞིན་མིང་དང་གཟུགས་ནི་ཡང་དག་འགགས་པ་ལས། །སྐྱེ་མཆེད་དྲུག་པོ་ཐམས་ཅད་རྣམ་པར་ཉམས་པར་བྱེད། །རྣམ་པར་ཤེས་པ་འགགས་ལས་དེ་དག་འགགས་
པ་སྟེ། །འདུ་བྱེད་འགགས་པ་ལས་ཀྱང་དེ་ནི་འགག་པའོ། །མ་རིག་པ་ནི་མཐའ་དག་མེད་ལས་དེ་བཞིན་དུ། །འདུ་བྱེད་འགག་པར་དྲང་སྲོང་ཆེན་པོས་མཁྱེན་པ་སྟེ། །འདི་ལས་མཁྱེན་བྱ་འདི་ནི་ཡང་དག་མཁྱེན་མཛད་ནས། །སངས་རྒྱས་ཞེས་ནི་འཇིག་རྟེན་ན་རབ་
གནས་པར་གྱུར། །ཡན་ལག་བརྒྱད་དང་ལྡན་པ་རབ་ཏུ་ཤར་བ་ཡི། །རྩེ་མོར་མྱུར་འགྲོ་དམ་པའི་ལྟ་བའི་ལམ་གྱིས་ནི། །སྲིད་རྩེའི་བར་ལས་མཆོག་གྱུར་བདག་མེད་རྣམ་གཟིགས་ནས། །བུད་ཤིང་ཚིག་པའི་མེ་བཞིན་ཞི་བར་གཤེགས་པར་གྱུར། །དེ་ནས་བདག་ཉིད་མཛད་པ་དེ་ཡི་
གྱུར་པ་ནི། །མཆོག་གི་དྲང་སྲོང་མཆོག་དང་མཆོག་མིན་མཁྱེན་པའི་ཚོགས། །གནའ་མ་རྣམས་ཀྱིས་དོན་དམ་རྒྱུ་ལས་གཤེགས་པ་ཡི། །སྙིང་པོའི་ལམ་འདི་བདག་གིས་ལྷག་པར་ཐོབ་པར་གྱུར། །ཐུན་ནི་བཞི་པའི་སྐྱ་རེངས་ཤར་བའི་ཡུད་ཙམ་ན། །རྒྱུ་དང་མི་རྒྱུའི་འབྱུང་པོ་རྣམས་ནི་ཞི་

172-1-54b

བ་ན། །དྲང་སྲོང་མཆོག་གིས་འགྱུར་བ་མེད་པའི་གོ་འཕང་དང་། །ཀུན་གྱི་མགོན་གྱིས་ཐམས་ཅད་མཁྱེན་པ་ཉིད་བརྙེས་སོ། །དེ་ཉིད་འདི་ནི་སངས་རྒྱས་ཉིད་ཀྱིས་མཁྱེན་པ་ན། །བུད་མེད་ཆང་གིས་མྱོས་བཞིན་ས་ནི་གཡོས་གྱུར་ལ། །གྲུབ་པ་རྣམས་ཀྱིས་མངོན་གང་ཕྱོགས་ནི་རབ་
སྣང་སྟེ། །མཁའ་ལ་རྔ་བོ་ཆེ་རྣམས་རབ་ཏུ་གྲག་པར་གྱུར། །དགེ་བའི་རླུང་རྣམས་རབ་ཏུ་ཞི་བར་གཡོས་གྱུར་ཞིང་། །སྤྲིན་མེད་འོ་མ་རྣམས་ནི་ལྷ་ཡིས་ཆར་ཕབ་སྟེ། །ལྗོན་ཤིང་རྣམས་ལ་དུས་མིན་མེ་ཏོག་འབྲས་བུ་རྣམས། །མཆོད་པ་རབ་ཏུ་སྦྱོར་བའི་ཆེད་བཞིན་བྲུལ་བར་
གྱུར། །མན་དཱ་ར་བའི་མེ་ཏོག་རྣམས་དང་པདྨ་དང་། །གསེར་དང་བཻ་ཌཱུརྱ་ཡི་རང་བཞིན་པདྨ་ནི། །མཁའ་ལས་བབ་པ་རྣམས་ཀྱིས་ཤཱཀྱ་ཐུབ་པའི་ས། །དེ་ཚེ་མཐོ་རིས་བཞིན་དུ་ཀུན་ནས་བཀྲམ་པར་གྱུར། །ཡུད་ཙམ་དེ་ནི་ཁ་ཅིག་ཁྲོ་བ་མེད་གྱུར་ལ། །ནད་མེད་གྱུར་ཞིང་མི་
དགའ་བར་ཡང་མ་སོང་སྟེ། །སྡིག་པ་བསྙེན་པ་མ་ཡིན་རྒྱགས་པར་མ་བྱས་ཤིང་། །གྲུབ་པ་བརྙེས་པ་བཞིན་དུ་འཇིག་རྟེན་ཞི་བར་གྱུར། །ཐར་པའི་འདོད་པའི་ལྷ་ཡི་ཚོགས་རྣམས་དགའ་བ་སྟེ། །སེམས་ཅན་འོག་ཏུ་སོང་བ་རྣམས་ཀྱང་དགའ་བར་གྱུར། །ཡོན་ཏན་ཕྱོགས་ཀྱིས་
འཕེལ་བས་ཆོས་ནི་རྒྱས་པ་སྟེ། །རྡུལ་དང་མུན་པ་དག་ལས་འགྲོ་བ་གྱེན་དུ་བྱུང་། །དེ་ཡི་ལས་ཀྱིས་ཡ་མཚན་དགའ་བས་གང་བ་ཡི། །བུ་རམ་ཤིང་པའི་རིགས་ཀྱི་མི་སྐྱོང་དྲང་སྲོང་རྣམས། །རྒྱལ་པོའི་དྲང་སྲོང་རྣམས་དང་དྲང་སྲོང་ཆེ་རྣམས་ཀྱིས། །ཡང་དག་མཆོད་རྣམས་
མཁའ་ལ་གཞལ་མེད་རྣམས་སུ་གནས། །མཐོང་མིན་འབྱུང་པོའི་ཚོགས་ཀྱིས་དྲང་སྲོང་ཆེན་པོ་ཡི། །སྟོན་པ་རྣམས་ནི་མཐོན་པོར་འཐོན་ཞིང་སྒྲོགས་པ་སྟེ། །གསོན་པའི་འཇིག་རྟེན་འཕེལ་བ་བཞིན་དུ་དགའ་གྱུར་ཞིང་། །ལྟུང་བ་མཆོག་ལ་བཞིན་དུ་བདུད་ནི་ཡི་མུག་ཅིང་། །དེ་ནས་
ནད་མི་མངའ་བ་ཞག་བདུན་བདག་ཉིད་ཀྱིས། །སེམས་ལ་གཟིགས་ཤིང་སྤྱན་མི་འཛུམས་པར་བཞུགས་པ་སྟེ། །ཁོ་བོས་འདིར་ནི་རྣམ་པར་ཐར་པ་བརྙེས་སོ་ཞེས། །ཐུབ་པས་ཡིད་ལ་རེ་བ་ཡོངས་སུ་རྫོགས་པར་གྱུར། །དེ་ནས་རྐྱེན་ཉིད་ཐོབ་པ་འདི་ནི་ཐུབ་པ་ཉིད། །བདག་མེད་

172-1-55a

ཆོ་གར་རྣམ་པར་གཞག་པས་གསན་ནས་ནི། །ཞི་ཕྱིར་འཇིག་རྟེན་དག་ལ་མཆོག་ཏུ་བརྩེ་བས་སོ། །སངས་རྒྱས་སྤྱན་གྱིས་རྣམ་པར་གཟིགས་པར་གྱུར་པའོ། །ལྟ་བ་ངན་པས་ཆུད་ཟོས་འབད་ལ་འཁྲུགས་པ་ཡི། །འགྲོ་བ་རྡུལ་ནི་རྒྱ་ཆེན་དང་ལྡན་
གཟིགས་ནས་དང་། །རྣམ་ཐར་ཆོས་ནི་མཆོག་ཏུ་ཕྲ་བ་ཉིད་གཟིགས་ནས། །གཡོ་བ་མེད་པ་ཉིད་ཕྱིར་ཐུགས་ནི་མཛད་པར་གྱུར། །དེ་ནས་སྔོན་གྱི་དམ་བཅའ་ཡང་དག་མཁྱེན་གྱུར་ནས། །ཞི་བའི་གདམས་པ་ལ་ནི་སོ་སོར་ངེས་པར་གཤེགས། །དེ་ནས་ཆེན་པོའི་རྡུལ་དང་
ཆུང་ངུའི་རྡུལ་ཉིད་དང་། །ལྡན་པའི་སྐྱེ་བོར་ཡིད་ནི་རྣམ་པར་དཔྱད་པའོ། །དེ་ནས་ཞི་བའི་དོན་དུ་གདམས་པའི་ཆེད་དུ་ངེས་པར་ནི། །གཟུང་བའི་བདེ་བར་གཤེགས་པའི་ཐུགས་ནི་ཤེས་གྱུར་ནས། །མངོན་པར་སྣང་ཞིང་འགྲོ་ལ་ཕན་པར་འདོད་པ་ཅན། །མཐོ་རིས་
གནས་པའི་གཙོ་བོ་ཉིད་ནི་ཉེ་བར་འོངས། །སྡིག་པ་སྤངས་ཤིང་དོན་མཛད་གདན་ལ་བཞུགས་པ་པོ། །མཆོག་གི་ཆོས་ནི་གཟིགས་པ་དེ་ལ་མཆོག་གཉིས་སོ། །མཆོག་ཏུ་ཞི་བས་རབ་ཏུ་བསྟོད་ནས་དེ་གཉིས་ཀྱིས། །འཇིག་རྟེན་ཕན་པའི་དོན་དུ་ཚིག་འདི་གསོལ་བའོ། །ཨེ་
མ་འགྲོ་བ་འདི་གང་ནོར་འོས་འདི་ལྟ་བུ། །སྐྱེ་དགུ་རྣམས་ལ་རྗེས་སུ་བརྩེ་མཛད་ཁྱེད་ཀྱི་ཐུགས། །འཇིག་རྟེན་ན་ཡོད་སྐྱེ་བོ་རྣམ་པར་བསྲེ་མའི་རྒྱུ། །ཆེན་པོའི་རྡུལ་དང་ཉུང་ངུའི་རྡུལ་ཉིད་ལྡན་པའོ། །ཐུབ་པ་སྲིད་པའི་མཚོ་ལས་རང་ཉིད་རབ་རྒལ་ནས། །འགྲོ་བ་སྡུག་བསྔལ་
བྱིང་བ་རབ་ཏུ་དྲོངས་མཛོད་ཅིག །ལེགས་པའི་དབང་ཕྱུག་གིས་ནི་ཕུན་སུམ་ཚོགས་པ་ཐོབ་ནས་བཞིན། །གཞན་རྣམས་ལ་ཡང་རང་གི་ཡོན་ཏན་གྱིས་སྦྱོར་མཛོད། །དོན་མཁྱེན་འདི་ནའི་དོན་དང་ཕ་རོལ་དུ་འམ་གང་། །སྐྱེ་བོ་ཁ་ཅིག་འདི་ན་བདག་གི་ཕན་པ་བྱེད། །གང་
ཞིག་འཇིག་རྟེན་དགེ་བའི་ཆེད་དུ་རབ་ཞུགས་དེ། །མི་ཡི་འཇིག་རྟེན་དང་ནི་མཐོ་རིས་སུ་རྙེད་དཀའ། །དེ་ལྟར་དྲང་སྲོང་ཆེ་ལ་ཚིག་འདི་གསོལ་ནས་ནི། །ལྷ་ན་གནས་པ་དེ་གཉིས་ཇི་ལྟར་འོངས་པར་གཤེགས། །ཐུབ་པ་ཡིས་ཀྱང་དེ་ཡི་ཚིག་དེ་རབ་མནོད་ནས། །འགྲོ་བ་རྣམ་པར་ཐར་

172-1-55b

ཕྱིར་ངེས་པར་རྒྱས་པར་མཛད། །དེ་ནས་བསོད་སྙོམས་དུས་སུ་ཕྱོགས་བཞིར་དྲང་སྲོང་ལ། །ལྷ་ན་གནས་པས་ལྷུང་བཟེད་རྣམས་ནི་ཕུལ་བ་སྟེ། །གཽ་ཏ་མས་བཞི་པོ་དེ་རྣམས་རབ་བཞེས་ནས། །དེ་ཡི་ཆོས་ཀྱི་ཆེད་དུ་གཅིག་ཉིད་མཛད་པའོ། །དེ་ནས་དེ་ཚེ་དོན་བཅས་རབ་སོང་
ཚོང་དཔོན་གཉིས། །མཛའ་བཤེས་ཉིད་ཀྱིས་ལྷ་ཡིས་རབ་ཏུ་བསྐུལ་བ་དག །རྒྱ་ཆེན་ཐུགས་མངའ་དྲང་སྲོང་ཆེ་ལ་ཐོག་མ་རུ། །དགའ་བ་དང་ལྡན་ཕྱག་བྱས་ནས་ནི་བསོད་སྙོམས་ཕུལ། །རྩིབས་འཕུར་དང་ནི་རངས་བྱེད་བུ་སྟེ་དེ་གཉིས་ནི། །ཆོས་འཛིན་ནུས་པའི་བློ་གྲོས་
ཐུབ་པས་གཟིགས་པ་སྟེ། །དེ་གཉིས་ལྷ་ན་གཤེགས་པར་ཐུགས་ཀྱིས་མངོན་གཟིགས་ནས། །དགེ་སློང་ལྔ་པོ་རྣམས་ལ་ཐུགས་ཀྱིས་གཤེགས་པའོ། །དེ་ནས་ཞི་བའི་གདམས་པ་ལས་ནི་གཽ་ཏ་མས། །ཉི་མ་ཤར་བས་མུན་བཞིན་མུན་པ་རྣམ་འཇོམས་ཕྱིར། །བཱ་རཱ་ཎ་སཱིས་
བརྒྱན་པའི་སྣ་ཚོགས་ནགས་ཚལ་ཅན། །འཇིགས་བྱེད་ཤིང་རྟས་བསྙེན་པའི་གྲོང་ཁྱེར་དགེ་བར་གཤེགས། །དེ་ནས་ཁྱུ་མཆོག་འདྲ་བའི་སྤྱན་མངའ་གླང་ཆེན་མྱོས་པའི་འགྲོས་ལྡན་པ། །འགྲོ་བ་མངོན་པར་རྣམ་པར་འདུས་ཕྱིར་ཀཱ་ཤི་ས་ལ་གཤེགས་བཞེད་པ། །གླང་ཆེན་བཞིན་དུ་
རང་གི་སྐུ་ལུས་མ་ལུས་ཕྱིར་ལ་རབ་ལོག་ནས། །ཐུབ་པས་སྤྱན་མིག་མི་འཛུམས་པར་ནི་བྱང་ཆུབ་ཤིང་གི་རྩ་བར་གཟིགས། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། མངོན་པར་རྫོགས་པར་བྱང་ཆུབ་པའི་ལེའུ་སྟེ་བཅུ་བཞི་པའོ།།      །།ཞི་
ཞིང་མདངས་ལྡན་མཛད་པ་ཀུན་ནས་བརྙེས་པ་དེ། །གཅིག་པུར་རབ་གཤེགས་མང་པོ་དང་ནི་ཐབས་ཅིག་བཞིན། །ལམ་ན་དགེ་སློང་ཆོས་ལྡན་ཁ་ཅིག་གིས་མཐོང་ནས། །ཡ་མཚན་དང་བཅས་ཐལ་མོར་བཅས་པས་འདི་སྐད་གསོལ། །དབང་པོའི་རྟ་ནི་གཡོ་བར་དབང་པོའི་རྟ་ཐུལ་ཞིང་། །
སེམས་ཅན་ཆགས་རྣམས་ཇི་ལྟར་ཆགས་མ་གྱུར། །ཤིན་ཏུ་རོ་ལྡན་གསར་པའི་ཤེས་རབ་རོ་ཡིས་ནི། །རི་བོང་གིས་མཚོན་དང་མཚུངས་ཚིམ་པར་གྱུར་པ་རྣམས། །བརྟན་པ་ཁྱོད་ཀྱི་ཞལ་ནི་ཇི་ལྟར་རབ་རྒྱས་ཤིང་། །འདིར་ནི་དབང་པོ་རྣམས་ཀྱི་དབང་ཕྱུག་མཛད་པ་སྟེ། །ཁྱུ་མཆོག་ཆེན་

172-1-56a

པོའི་སྤྱན་མངའ་ངེས་པར་དོན་མཛད་ཅིང་། །ཁྱོད་ཀྱི་བླ་མ་སུ་ལགས་གང་ལས་གྲུབ་པ་གསུངས། །དེ་རྣམས་ལ་དེས་སྨྲས་པ་བདག་ལ་སྟོན་པ་མེད། །བདག་ལ་མཆོད་བྱ་མེད་ཅིང་སྨད་བྱ་སུ་ཡང་མེད། །མྱ་ངན་འདས་པ་ཐོབ་ཅིང་གཞན་རྣམས་དང་མི་
མཉམ། །བདག་ནི་ཆོས་ལ་རང་བྱུང་དུ་ནི་ཤེས་པར་མཛོད། །གང་ཕྱིར་གཞན་རྣམས་ཀྱིས་མ་རྟོགས་པའི་རྟོགས་བྱ་ནི། །བདག་གིས་མཐའ་དག་རྟོགས་པ་དེ་ཕྱིར་སངས་རྒྱས་ཏེ། །གང་ཕྱིར་བདག་གི་ཉོན་མོངས་རྣམས་ནི་དགྲ་བཞིན་འཕམ། །དེ་ཕྱིར་ཞི་བ་དག་ནི་ཀུན་ནས་
ཤེས་པར་མཛོད། །སྡུག་བསྔལ་རྣམས་ཀྱིས་ཉམ་ཐག་གྲོགས་ལ་ཕན་དོན་དུ། །ཞི་བ་ཁོ་བོ་འདི་ཡང་བཱ་རཱ་ཎ་སཱིར་འགྲོ། །དེར་ནི་འཆི་མེད་ཆོས་ཀྱི་རྔ་དག་རྡུང་བ་སྟེ། །སྙན་གྲགས་བདེ་བའི་ཕྱིར་མིན་ང་རྒྱལ་ཕྱིར་མ་ཡིན། །རྒལ་བས་འགྲོ་བ་རྣམས་ནི་རྒལ་བར་འགྱུར་བགྱི་ཞིང་། །
གྲོལ་བས་སེམས་ཅན་རྣམས་ནི་ཡོངས་སུ་ཐར་བར་བགྱི། །དེ་ལྟར་གསོན་པའི་འཇིག་རྟེན་ཉམ་ཐག་པར་མཐོང་ནས། །སྔོན་དུ་བདག་གི་དམ་བཅའ་འདི་ནི་གྱུར་པའོ། །འདི་ན་ཁ་ཅིག་ནོར་ནི་ཐོབ་ནས་བདག་ཉིད་ནི། །གཅིག་ཏུ་ཉིད་ཀྱང་འཛིན་པར་བྱེད་པ་ངོ་མཚར་ཅིང་། །སྐྱེ་བོ་ཆེན་པོ་མ་
བཙུམས་མིག་ལ་གང་གིས་ཀྱང་། །ཁྱད་འཕགས་ཐོབ་ནས་རྣམ་པར་འཛིན་པ་དེ་དོན་ཡིན། །གང་ཞིག་སྐམ་ལ་གནས་པས་མི་ནི་ཆུས་ཁྱེར་བ། །འདྲེན་པར་འདོད་མིན་དེ་ནི་ལེགས་པའི་གཟུགས་མ་ཡིན། །གང་ཞིག་གཏེར་ནི་ཐོབ་ནས་སྐྱེ་བོ་དབུལ་པོ་ལ། །ནོར་གྱི་སྦྱོར་
བ་མེད་པ་དེ་ནི་སྤྱང་པོ་མིན། །རང་བཞིན་གནས་པས་ནད་ཀྱིས་མངོན་པར་བཅོམ་པ་ལ། །ལག་ཏུ་སོང་བའི་སྨན་གྱིས་གསོ་བར་རིགས་པ་སྟེ། །དེ་ལྟར་ལམ་ངན་སོང་བའི་ཆེད་དུ་ལམ་དག་ནི། །ངེས་པར་བྱང་བའི་ལམ་གྱིས་བཤད་པར་འཐད་པ་ཡིན། །ཇི་ལྟར་སྒྲོན་མ་རབ་ཏུ་གསལ་
བར་བྱེད་པ་སྟེ། །དེ་ཡི་རྒྱུ་ཅན་དམར་པོར་འགྲོ་བ་མ་ཡིན་ཉིད། །དེ་བཞིན་སངས་རྒྱས་ཉིད་ཀྱིས་ཡེ་ཤེས་རབ་གསལ་བར། །མཛད་དེ་དེ་ཕྱིར་ཆགས་པར་འགྲོ་བ་མ་ཡིན་ནོ།  །ཇི་ལྟར་ཤིང་རྣམས་ལ་ནི་མེ་དག་ངེས་པ་དང་། །མཁའ་ལ་རླུང་དང་ས་ལ་ཆུ་ནི་ངེས་པ་སྟེ། །དེ་བཞིན་

172-1-56b

གང་ཡང་རྣམས་སུ་ཐུབ་པ་རྣམས་ཀྱིས་ནི། །བྱང་ཆུབ་ངེས་ཤིང་ཀཱ་ཤི་རྣམས་དང་ཆོས་སྨྲ་དེས། །དེ་ནས་ཉེ་བར་འོངས་ནས་ཨ་ལ་ལ་ཞེས་པ། །རྣམ་པར་བརྗོད་ནས་ཇི་ལྟར་འདོད་བཞིན་རབ་སྤངས་ནས། །ཡང་དང་ཡང་དུ་ཡ་མཚན་མིག་ནི་གཡོ་བ་ཡིས། །རེ་འདོད་སྐྱེས་ཤིང་
སངས་རྒྱས་ལ་ནི་ལྟ་བཞིན་སོང་། །དེ་ནས་ཐུབ་པས་རིམ་གྱིས་ཀཱ་སིའི་གྲོང་ཁྱེར་ནི། །ནོར་གནས་སྙིང་པོ་དང་ནི་རབ་མཚུངས་གཟིགས་པ་སྟེ། །གྲོགས་མོ་བཞིན་དུ་འཁྱུད་ནས་ཡང་དག་འདུས་པ་ནི། །སྐལ་ལྡན་ཤིང་རྟ་དང་ནི་བཱ་རཱ་ཎ་སཱི་ཉིད། །མཐུ་དང་གཟི་བརྗིད་དག་གིས་མངོན་པར་
མཛེས་པ་དེས། །ཁུ་བྱུག་རྣམས་ཀྱིས་སྒྲ་སྒྲོགས་ཤིང་གི་ཚོགས་ལྡན་ཞིང་། །དྲང་སྲོང་ཆེན་པོས་བསྙེན་པའི་རི་དགས་ནགས་ཉིད་དུ། །རྣམ་པར་མཛེས་པས་ཉི་མ་བཞིན་དུ་རབ་འཐོབ་པོ། །ཀཽཎྜི་ནྱའི་རིགས་དང་དེ་ནས་མིང་ཆེན་དང་། །རླངས་པ་དང་ནི་རྟ་ཐུལ་དེ་བཞིན་བཟང་རྒྱལ་ཏེ། །དགེ་
སློང་ལྔ་ཡིས་དེ་ནི་རྒྱང་རིང་ནས་གཟིགས་ནས། །ཕན་ཚུན་དུ་ནི་ཚིག་འདི་སྨྲས་པར་གྱུར་པའོ། །བདེ་བའི་བདག་ཉིད་དགེ་སློང་གཽ་ཏ་མ་འདི། །དཀའ་ཐུབ་དེ་ལས་ཕྱིར་ལོག་མངོན་པར་འོངས་པ་སྟེ། །མངོན་དུ་འགྲོ་བྱ་མ་ཡིན་ངེས་པར་ཕྱག་འོས་མིན། །དམ་བཅའ་བཅོམ་པ་མཆོད་པར་
འོས་པ་མ་ཡིན་ནོ། །དེ་ནི་བརྒྱ་ལ་གལ་ཏེ་སྡོད་པར་འདོད་གྱུར་ན། །དེ་ཉིད་ལ་ནི་གཏམ་འདི་རབ་ཏུ་གསོལ་མཛོད་དང་། །འགྲོན་པོ་ཉེ་བར་འོངས་པ་གང་དང་སུ་ལ་ནི། །འཕགས་པ་རྣམས་ཀྱིས་མི་བྱེད་པར་ནི་འོས་མ་ཡིན། །དེ་ལྟར་བྱ་བ་བྱས་ནས་དགེ་སློང་དེ་རྣམས་ནི། །ཉེ་བར་
གནས་པའི་ཉེ་བར་སངས་རྒྱས་གཤེགས་པ་སྟེ། །ཇི་ལྟ་ཇི་ལྟར་དེ་རྣམས་ལ་ནི་ཉེ་བར་གཤེགས། །དེ་ལྟ་དེ་ལྟར་དེ་རྣམས་དམ་བཅའ་ཉམས་པར་གྱུར། །དེ་ནས་ཁ་ཅིག་འདི་ཡི་ན་བཟའ་བླངས་པ་སྟེ། །དེ་བཞིན་གཞན་ནི་ཕྱག་འཚལ་ནས་ནི་ལྷུང་བཟེད་བཟུང་། །ཁ་ཅིག་འདི་ལ་འོས་
པའི་གདན་ནི་ཕུལ་བ་སྟེ། །དེ་བཞིན་གཞན་གཉིས་ཞབས་བསིལ་ཉེ་བར་ཕུལ་བའོ། །དེ་ལྟར་རབ་བྱེད་མཆོད་པ་མང་པོ་ལྡན་པ་རྣམས། །འདི་ལ་ཐམས་ཅད་ཀྱིས་ནི་བླ་མར་སྤྱོད་པ་བྱས། །རིགས་སུ་མངོན་བརྗོད་དེ་རྣམས་ཀྱིས་ཀྱང་མ་སྤངས་ཤིང་། །དེ་རྣམས་ལ་རྗེས་བརྩེ་བཅས་

172-1-57a

བཅོམ་ལྡན་གྱིས་སྨྲས་པ། །མཆོད་འོས་དགྲ་བཅོམ་ལ་ནི་གུས་པ་མ་ཡིན་པས། །སྔར་གྱི་སྤྱོད་པས་དགེ་སློང་རྣམས་ཀྱེ་མ་སྨྲ་ཤིག །བསྟོད་དང་སྨད་པ་ངེས་པར་བདག་གིས་མཉམ་པ་སྟེ། །ཁྱེད་རྣམས་བསོད་ནམས་མིན་ལས་རྣམ་པར་བཟློག་པར་བགྱི། །སངས་
རྒྱས་འཇིག་རྟེན་ཕན་པའི་ཆེད་དུ་སངས་རྒྱས་ཤིང་། །འབྱུང་པོ་ཀུན་ལ་ཕན་པས་རབ་ཏུ་ཞུགས་པ་ལ། །བླ་མ་ཉེ་བར་འཇོམས་ལས་མིང་གིས་གང་སྨྲས་དེ། །མ་རུངས་པ་ཡི་ཕ་མ་བཞིན་དུ་ཆོས་འཆད་དོ། །དེ་ལྟར་དྲང་སྲོང་ཆེན་པོའི་ཐུགས་རྗེའི་བདག་ཉིད་ཅན། །སྨྲ་བ་རྣམས་ཀྱི་མཆོག་གིས་
དེ་སྐད་གསུངས་པ་སྟེ། །རྨོངས་ལས་སྙིང་པོ་མེད་པས་ཆུད་ཟོས་དེ་རྣམས་ཀྱིས། །གདོང་ནི་ཅུང་ཟད་བཞད་པ་དང་ལྡན་རྒོལ་བ་སྨྲས་པའོ། །གཽ་ཏ་མ་རེ་ཞིག་དཀའ་ཐུབ་མཆོག་དང་ནི། །དམ་པ་དེ་ཡིས་དེ་ཉིད་རྟོགས་པ་མ་ཡིན་ཏེ། །དོན་ནི་དགའ་བས་བསྒྲུབ་བྱ་བདེ་བས་གནས་པའོ། །
ཁྱེད་ཀྱིས་མཐོང་ཞེས་བྱ་བ་འདིར་ནི་གཏན་ཚིགས་གང་། །གང་ཚེ་དེ་ལྟར་དེ་བཞིན་གཤེགས་པའི་དེ་ཉིད་ལ། །དེ་ནས་དགེ་སློང་དེ་རྣམས་དད་པར་གྱུར་མིན་ཏེ། །བྱང་ཆུབ་པ་ཡི་ལམ་ནི་དེ་ལས་གཞན་དུ་ཤེས། །དེ་ནས་ལམ་མཁྱེན་པ་ཡིས་ལམ་ནི་བཀའ་སྩལ་པ། །བྱིས་པའི་སྐྱེ་བོ་
བདག་ཉིད་ངལ་བར་ལྡན་པ་དང་། །དབང་པོའི་སྤྱོད་ཡུལ་རྣམས་ལ་དེ་བཞིན་ཆགས་པ་སྟེ། །འཆི་བ་མེད་པའི་ལུང་གིས་ལམ་མ་ཡིན་པའི་ཕྱོགས། །སྐྱོན་དང་ལྡན་པ་གཉིས་པོ་དེ་ལ་ལྟོས་མཛོད་ཅིག །གདུང་བར་མངོན་པར་བརྗོད་པའི་ལུས་ཀྱི་ངལ་རྣམས་ཀྱིས། །ཡོངས་སུ་
འཁྲུགས་ཤིང་རྣམ་པར་གནོད་པའི་སེམས་ལ་ནི། །འཇིག་རྟེན་ཐ་སྙད་ཀྱང་ནི་བརྒྱ་ལ་ཤེས་མིན་ན། །དབང་པོ་ལས་འདས་དེ་ཉིད་ལམ་ནི་ཀྱེ་མ་ཅི། །ཇི་ལྟར་སྒྲོན་མས་མཚན་མོའི་མུན་པ་ཉམས་པ་རུ། །འདིར་ནི་མངོན་པར་ཉེར་འགྲོ་ཆུ་རྣམས་གཏོར་བས་མིན། །དེ་བཞིན་ཡེ་
ཤེས་མེ་ཡིས་མི་ཤེས་མུན་པ་ནི་། །ཉམས་པར་སྔོན་འགྲོ་ལུས་ཀྱི་ངལ་བ་རྣམས་ཀྱིས་མིན། །ཇི་ལྟར་མེ་ནི་འདོད་པས་ཤིང་ལ་འབིགས་པ་དང་། །རྣམ་པར་འགེམས་པས་མེ་ནི་ཐོབ་པ་མ་ཡིན་ལ། །དེ་ཉིད་མངོན་པའི་ཐབས་ལས་བསྲུབས་པས་ཐོབ་པ་སྟེ། །དེ་བཞིན་སྦྱོར་ལས་འཆི་

172-1-57b

བ་མེད་ཐོབ་ངལ་བས་མིན། །དེ་ལྟར་དོན་མེད་འདོད་པ་རྣམས་ལ་ཆགས་པ་ནི། །རྡུལ་དང་མུན་པ་དག་གིས་ཟིལ་ནོན་སེམས་ལྡན་རྣམས། །བསྟན་བཅོས་དོན་ལ་ནུས་ཀྱང་གྲུབ་པ་ཐོབ་མིན་ན། །ཆགས་བྲལ་འགོག་པའི་ཆོ་ག་ལ་ནི་སྔོན་ཉིད་དོ། །ཇི་ལྟར་ནད་ཀྱིས་མངོན་པར་བཅོམ་པའི་
སྲོག་ཆགས་ཀྱིས། །མི་ཕན་བཟའ་བ་ཟ་བའི་གསོ་བ་འདིར་ཡོད་མིན། །དེ་བཞིན་མི་ཤེས་ནད་ཀྱིས་མངོན་པར་བཅོམ་པ་ཡི། །འདོད་པ་རྣམས་ལ་ཆགས་པའི་ཞི་བ་གང་ལས་སོ། །ཇི་ལྟར་སྐམ་པའི་རྟེན་ལ་གནས་པའི་རླུང་གིས་ནི། །བུས་པའི་མེ་ཡི་ཞི་བ་ཡོད་པ་མ་ཡིན་ནོ། །
དེ་བཞིན་འདོད་པའི་རྟེན་ལ་གནས་པའི་ཆགས་པ་ཡིས། །རྗེས་སུ་སོང་བའི་སེམས་ཀྱི་ཞི་བ་ཡོད་མ་ཡིན། །མཐའ་འདི་གཉིས་པོ་དག་ཀྱང་རྣམ་པར་དོར་བྱས་ནས། །བདག་གིས་ལམ་གཞན་དབུ་མས་ལྷག་པར་རྟོགས་པ་སྟེ། །ཤིན་ཏུ་སྡུག་བསྔལ་ཉེ་བར་ཞི་བའི་འདྲེན་པ་པོ། །བདེ་
བ་དང་ནི་དགེ་བ་ཉིད་དང་བྲལ་བའོ། །ཡང་དག་ལྟ་བའི་ཉི་མས་རབ་ཏུ་གསལ་བྱས་ཤིང་། །རྣམ་དག་ཡང་དག་རྟོགས་པའི་ཤིང་རྟས་དྲངས་པ་སྟེ། །ཡང་དག་བརྗོད་པའི་ཡང་དག་དག་ནི་གཙུག་ལག་ཁང་། །དགེ་བའི་བྱ་བའི་སྐྱེད་ཚལ་བརྒྱ་ཕྲག་མངོན་པར་དགའ། །སྨད་པ་མེད་པའི་
འཚོ་བ་ལོ་ལེགས་ཆེན་པོ་སྟེ། །ཡང་དག་རྩོལ་བས་སྟོབས་རབ་རྗེས་སུ་འགྲོ་བ་ཅན། །ཀུན་དུ་ཡང་དག་དྲན་པའི་སྦས་པས་སྦས་པ་སྟེ། །ཏིང་འཛིན་གཟིམས་མལ་དང་ནི་གདན་དང་ཁྱབ་པ་ཡིས། །དེ་ལྟར་མཆོག་གི་ཡན་ལག་བརྒྱད་འདིར་འདི་ལམ་སྟེ། །འཆི་དང་རྒ་དང་ན་བ་
རྣམས་ལས་འདྲེན་པ་པོ། །གང་ལ་དྲངས་ནས་བྱ་བ་ཐམས་ཅད་བྱས་པ་སྟེ། །འདི་དང་ཆེ་གེ་མོར་ནི་སླན་ཆད་འགྲོ་བ་མེད། །འདི་ནི་སྡུག་བསྔལ་མཐའ་དག་འདི་ནི་མཚན་མ་སྟེ། །འདི་ནི་འགོག་པ་འདི་ཡི་ལམ་ནི་འདི་ཡིན་ཏེ། །དེ་ལྟར་མ་ཐོས་ཆོས་ཀྱི་ཆོ་ག་སྔར་མེད་པའི། །རྣམ་པར་མཐར་ཕྱིན་
བདག་གི་སྤྱན་མིག་སྐྱེ་བའོ། །སྐྱེ་དང་རྒ་དང་ན་དང་དེ་ནས་རྒུད་པ་དང་། །སྡུག་པ་དང་བྲལ་མི་སྡུག་པ་ལ་སྦྱོར་བ་དང་། །འདོད་པའི་དོན་ནི་རབ་ཏུ་འཐོབ་པ་མེད་པ་སྟེ། །རྣམ་པ་སྣ་ཚོགས་སྡུག་བསྔལ་འདི་ནི་ཡོངས་སུ་འཐོབ། །འདོད་པའི་བདག་ཅན་གྱི་འམ་བདག་རྒྱལ་ཅན་གྱི་འམ། །ལུས་

172-1-58a

ཅན་གྱིའམ་ཡང་ན་ལུས་ཅན་མ་ཡིན་པའི། །གང་ཞིག་ཡོན་ཏན་མེད་པ་གང་ལ་རབ་ཞུགས་ཀྱང་། །མདོར་བསྡུས་ནས་དེ་སྡུག་བསྔལ་དུ་ནི་ཤེས་པར་མཛོད། །དེ་ལྟར་འབར་བ་ཞི་བའི་མེ་ནི་ཆུང་ན་ཡང་། །ལྷན་ཅིག་སྐྱེས་པ་དྲོ་བའི་ངོ་བོ་སྤོང་མིན་ཉིད། །དེ་བཞིན་བདག་ཏུ་
འདུ་ཤེས་ཞི་སོགས་ཀྱིས་ཕྲ་ཡང་། །སྡུག་བསྔལ་བདག་ཉིད་ཅན་ཞེས་བདག་གི་ཤིན་ཏུ་ངེས། །ཇི་ལྟར་ས་ཆུ་ས་བོན་དུས་རྣམས་མྱུ་གུའི་བཞིན། །འདོད་ཆགས་ལ་སོགས་རྣམ་པ་སྣ་ཚོགས་སྐྱོན་རྣམས་དང་། །སྐྱོན་ལས་རབ་ཏུ་སྐྱེས་པའི་ལས་རྣམས་ཉིད་དག་ནི། །སྡུག་བསྔལ་དག་གི་རྒྱུར་ནི་
ངེས་པར་ཤེས་པར་མཛོད། །མཐོ་རིས་སུ་འམ་འོག་ཏུ་སྲིད་པའི་རྒྱུན་ལས་ནི། །འདོད་ཆགས་ལ་སོགས་སྐྱོན་གྱི་ཚོགས་རྣམས་རྒྱུ་ཡིན་ཞིང་།  །དམན་དང་འབྲིང་དང་མཆོག་སྟེ་སྣ་ཚོགས་ཉིད་ཀྱི་ནི། །དེ་དང་དེར་ནི་ལས་རྣམས་དག་ནི་རྩ་བའོ། །ཉེས་པ་ཟད་ལས་འཁོར་བའི་རྒྱུན་ནི་ཡོད་མིན་ཏེ། །ལས་
ཟད་པ་ལས་སྡུག་བསྔལ་དེ་ནི་ཡོད་མ་ཡིན། །གང་ཕྱིར་དོན་གང་ཡོད་པ་ལས་ནི་ཀུན་འབྱུང་སྟེ། །དེ་ཕྱིར་མེད་པ་ལས་ཏེ་སླར་ཡང་འབྱུང་བ་མེད། །གང་དུ་སྐྱེ་བ་མེད་ཅིང་རྒ་མེད་འཆི་བ་མེད། །མེ་མེད་ས་མེད་ཆུ་མེད་མཁའ་མེད་རླུང་མེད་ལ། །ཐོག་མ་བར་དང་མཐའ་མེད་འཕགས་པ་དབྲོག་བྱ་མིན། །
དགེ་ཞིང་འགྱུར་མེད་འགོག་པ་དེ་ནི་ཤེས་པར་མཛོད། །ཡན་ལག་བརྒྱད་ལྡན་གང་ཞིག་མངོན་བརྗོད་དེ་ལམ་སྟེ། །ལྷག་པར་རྟོགས་ཕྱིར་འདི་ཡི་ཐབས་དེའི་གཞན་མ་ཡིན། །ལམ་འདི་ཡིན་ན་མ་མཐོང་བ་ལས་འཇིག་རྟེན་རྣམས། །དེ་ཉིད་དང་ནི་ཉེ་དུ་རྣམས་ནི་ཡོངས་སུ་འཁོར། །སྡུག་བསྔལ་
ཡོངས་སུ་ཤེས་པར་བྱ་ཞིང་རྒྱུ་འདི་ནི། །སྤང་བྱ་འགོག་པ་ཡང་ནི་དབང་དུ་བྱ་བའོ། །དེ་བཞིན་ལམ་འདི་ཡང་ནི་བསྒོམ་པར་བྱ་བ་སྟེ། །དེ་ལྟར་འདི་ནི་བདག་གི་བློ་གྲོས་རབ་ཞུགས་སོ། །སྡུག་བསྔལ་འདི་ནི་ཡོངས་ཤེས་རྒྱུ་ནི་སྤངས་པ་སྟེ། །དེ་བཞིན་དུ་ནི་འགོག་པ་མངོན་དུ་བྱས་པའོ། །དེ་བཞིན་དུ་ནི་
འདི་ཡི་ལམ་འདི་བསྒོམས་པ་སྟེ། །དེ་ལྟར་འདིར་ནི་བདག་གི་སྤྱན་མིག་རབ་ཞུགས་སོ། །ཇི་སྲིད་དུ་ནི་ཡང་དག་འཕགས་པའི་བདེན་པ་ནི། །བཞི་པའི་རྐང་པ་འདི་རྣམས་མཐོང་བ་མ་ཡིན་པ། །དེ་སྲིད་བདག་འདིར་གྲོལ་བ་མེད་པ་ཞེས་བརྗོད་ཅིང་། །བདག་ཉིད་ལ་ནི་དོན་བྱས་ཉིད་དུ་ཡང་མ་

172-1-58b

མཐོང་། །གང་ཚེ་འཕགས་པའི་བདེན་པ་རྣམས་ནི་རྟོགས་པ་སྟེ། །རྟགས་བྱས་ཀྱང་ནི་དོར་བྱར་འོས་པ་བྱས་པའོ། །དེ་ཚེ་བདག་འདིར་རྣམ་པར་གྲོལ་ཞེས་བརྗོད་པ་སྟེ། །བདག་ཉིད་ལ་ནི་དོན་བྱས་ཉིད་དུ་ཡང་མཐོང་ངོ་། །དེ་ལྟར་དྲང་སྲོང་ཆེན་པོ་ཐུགས་རྗེ་མངའ་བ་ཡིས། །འདིར་
ནི་ཆོས་དག་དེ་སྐད་མངོན་པར་གསུངས་པ་ན། །ཀཽཎྜི་ནྱའི་རིགས་དང་ལྷ་ནི་བརྒྱ་ཕྲག་རྣམས། །གཙང་ཞིང་རྡུལ་དང་བྲལ་བའི་མིག་ནི་ཐོབ་པར་གྱུར། །བྱ་བ་ཐམས་ཅད་ངེས་པར་བྱས་ཤིང་ཞི་བ་དེ་ལ་ནི། །ཐམས་ཅད་མཁྱེན་པས་ཁྱུ་མཆོག་བཞིན་དུ་མཐོན་པོའི་དབྱངས་ཀྱིས་གསུངས། །
ཁྱོད་ཀྱིས་ཤེས་ཤེས་བདག་ཉིད་ཆེན་པོ་དེས་ནི་ཚིག་གསོལ་པ། །ལེགས་སོ་ཁྱོད་ཀྱི་བློ་གྲོས་མཆོག་ནི་བདག་གིས་ཤེས་པའོ། །ལེགས་སོ་བདག་གིས་ཤེས་ཤེས་དེ་ནས་དེས་ནི་འཇིག་རྟེན་ནི། །ཀཽཎྜི་ནྱས་དེ་ཡི་གོ་འཕང་རིགས་ནི་བཟུང་བ་སྟེ། །བླ་མ་དམ་པ་དེ་བཞིན་གཤེགས་
པའི་སློབ་མ་རྣམས་ཀྱིས་ནི། །གཙོ་བོ་ཉིད་དུ་ཆོས་ལ་ཡང་དག་ལྷག་པར་གཤེགས་པའོ། །སྒྲ་དེ་ས་ལ་རྒྱུ་བའི་གནོད་སྦྱིན་རྣམས་ཀྱིས་ཐོས་ནས་ནི། །རྣམ་པར་རྒྱས་པའི་དབྱངས་འདི་རབ་ཏུ་གསོལ་བར་གྱུར་པ་སྟེ། །འབྱུང་པོ་རྣམས་ཀྱི་འཆི་མེད་ཞི་བའི་ཆེད་དུ་ངེས་པར་ནི། །
དམ་པ་གཟིགས་པས་ཆོས་ཀྱི་འཁོར་ལོ་བསྐོར་བ་དེ་ལེགས་སོ། །ཚུལ་ཁྲིམས་རྩིབས་དང་ཞི་དང་དུལ་བའི་མུ་ཁྱུད་བློ་རྣམས་ཡངས། །དྲན་པས་བློ་གྲོས་བརྟན་པ་བརྩོན་འགྲུས་ལྟ་བ་ངོ་ཚའི་གཟེར། །ཟབ་པའི་ཕྱིར་དང་བརྫུན་མེད་ཕྱིར་དང་ལེགས་པར་བསྟན་ཉིད་ཕྱིར། །
འཇིག་རྟེན་གསུམ་ན་བརྟན་ཞིང་བསྟན་བཅོས་གཞན་རྣམས་ཀྱིས་མི་ལྡོག །ས་འཛིན་གནོད་སྦྱིན་རྣམས་ལས་སྒྲ་ནི་ཉེ་བར་ཐོབ་བྱས་ནས། །མཁའ་ལ་ལྷ་ཡི་ཚོགས་རྣམས་ཀྱིས་ནི་དབྱངས་བྱས་ཤིང་། །དེ་ལྟར་ཐོས་ནས་མཐོ་རིས་རིམ་དང་རིམ་རྣམས་ཀྱིས་མཐོན་པོར། །ཚངས་
པའི་འཇིག་རྟེན་བར་དུ་སྒྲ་ཡིས་ཉེ་བར་འཛེགས་པའོ། །མཐོ་རིས་དག་ན་གནས་པའི་བདག་ཉིད་ལྡན་པ་ཁ་ཅིག་གིས། །དྲང་སྲོང་ཆེ་ལས་འཇིག་རྟེན་གསུམ་ནི་གཡོ་ཞེས་ཐོས་ནས་ནི། །སྣ་ཚོགས་ཡུལ་རྣམས་ལ་ནི་ཆགས་པར་གཤེགས་པ་མ་ཡིན་ཞིང་། །ཡང་དག་སྐྱོ་ལས་

172-1-59a

སྲིད་པ་གསུམ་ན་ཞི་བ་ཉིད་དུ་གཤེགས། །དེ་ལྟར་འཇིག་རྟེན་རྣམས་ཀྱི་མཆོག་ཏུ་ཞི་བའི་ཆེད་དུ་ནི། །མཐོ་རིས་དང་ནི་ས་ན་ཆོས་ཀྱི་འཁོར་ལོ་བསྐོར་ཙམ་ན། །སྤྲིན་བྲལ་མཁའ་ལས་མེ་ཏོག་དང་བཅས་ཆུ་ཡི་ཆར་བབ་ཅིང་། །སྲིད་གསུམ་གནས་པ་
རྣམས་ཀྱིས་རྔ་བོ་ཆེ་རྣམས་མངོན་པར་བརྡུངས། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། ཆོས་ཀྱི་འཁོར་ལོ་བསྐོར་བའི་ལེའུ་སྟེ་བཅོ་ལྔ་པའོ།།      །།དེ་ནས་ཐམས་ཅད་མཁྱེན་པ་ཡིས། །རྟ་ཐུལ་ལ་སོགས་དགེ་སློང་རྣམས། །
རབ་སྙོམས་སེམས་ལྡན་དེ་རྣམས་ཀུན། །ཐར་པའི་ཆོས་ལ་བཀོད་པའོ། །ཉི་མ་དང་ལྡན་སྐར་མ་ལྔས། །ནམ་མཁར་ཟླ་བ་ལྡན་པ་བཞིན། །ལྔ་སྡེ་ཕམ་པའི་ལྔ་སྡེ་ཡིས། །ཀུན་ནས་བསྐོར་བ་དེ་མཛེས་སོ། །དེ་ནས་དེ་ཚེ་ཁ་ཅིག་ནི། །མོ་རྣམས་གློས་ཕབ་ཉལ་མཐོང་
ནས། །གྲགས་པ་ཞེས་བྱ་ཆེན་པོའི་བུ། །ཡང་དག་སྐྱོ་བར་ཉེ་བར་སོང་། །འདི་ཀུན་ཉེ་བར་མཛེས་པ་སྟེ། །ཞེས་ནི་ཚིག་དང་བརྗོད་བཞིན་དུ། །དཔལ་ལྡན་མཆོག་གི་རྒྱན་ལྡན་པ། །སངས་རྒྱས་ག་ལ་བ་དེར་སོང་། །སེམས་དང་ཉོན་མོངས་མཁྱེན་པས་དེ། །གཟིགས་
ནས་དེ་བཞིན་གཤེགས་པས་གསུངས། །མྱ་ངན་འདས་ལ་ཉེར་འཚེ་མེད། །ཚུར་ཤོག་དགེ་བ་ཐོབ་པར་གྱིས། །དེ་ལྟར་རྣམ་རྒྱས་གྲགས་པའི་གསུང་། །འདི་ནི་ཐོས་ནས་ཚ་བ་ཡིས། །ཉམ་ཐག་ཆུ་ལ་འཛུལ་ནས་དང་། །མཆོག་ཏུ་ཚིམ་པ་ཉེ་བར་འོང་། །སྔོན་གྱི་
རྒྱུ་ཡི་སྟོབས་བརྟེན་ནས། །དེ་ནས་ལུས་དེ་ཉིད་བཟུང་སྟེ། །ལུས་ཀྱིས་དང་ནི་སེམས་ཀྱིས་ནི། །དགྲ་བཅོམ་ཉིད་ནི་ཉེ་བར་ཐོབ། །སྟོན་ཀའི་ཆུ་ཡིས་བཀྲུས་པ་ཡི། །གོས་ལ་ཚོན་ནི་བཀོད་པ་བཞིན། །དཀར་པོའི་བློ་ཡིས་དམ་པའི་ཆོས། །ཐོས་ནས་རབ་ཏུ་རྟོགས་པ་
ཉིད། །ཆ་ལུགས་དེ་ཡིས་ངོ་ཚ་བཞིན། །གནས་པ་དེ་ནི་གཟིགས་གྱུར་ན། །དོན་མཛད་དམ་པའི་དོན་མཁྱེན་པ། །སྨྲ་བ་རྣམས་ཀྱི་མཆོག་གིས་སྨྲས། །རྟགས་ནི་ཆོས་ཀྱི་རྒྱུ་མིན་ཞིང་། །འབྱུང་པོ་རྣམས་ལ་སྙོམས་པ་སྟེ། །ཞི་ཞིང་དུལ་ལ་དབང་པོ་དུལ། །བརྒྱན་པ་ཡིན་

172-1-59b

ཡང་ཆོས་ལ་སྤྱོད། །གང་ཞིག་ལུས་ནི་འཐོན་པ་སྟེ། །སེམས་ཀྱིས་འཐོན་པ་མ་ཡིན་པ། །ནགས་ན་གནས་ཀྱང་ཆགས་པ་ཅན། །ཁྱིམ་ན་གནས་ཤེས་དེ་ཤེས་བྱ། །གང་ཞིག་སེམས་ནི་འཐོན་པ་སྟེ། །ལུས་ཀྱིས་འཐོན་པ་མ་ཡིན་པ། །ཁྱིམ་ན་གནས་ཀྱང་ང་མེད་
པ། །ནགས་ན་གནས་ཤེས་དེ་ཤེས་བྱ། །ཁྱིམ་ན་གནས་པར་གྱུར་པའི་ལམ། །རབ་ཏུ་བྱུང་བར་གྱུར་པའི་ཡང་། །གང་གིས་བསྒྲུབ་པ་ཡོད་ན་ནི། །དེ་ཡི་ཐར་པ་མངོན་པར་བརྗོད། །ཇི་ལྟར་རྒྱལ་འདོད་དགྲ་སྡེ་ལ། །རྒྱལ་ཕྱིར་གོ་ཆ་འཛིན་པ་སྟེ། །དེ་བཞིན་ཉོན་མོངས་དགྲ་
དེ་ལ། །རྒྱལ་ཕྱིར་རྟགས་ནི་འདྲེན་པའོ། །དེ་ནས་དགེ་སློང་ཚུར་ཤོག་ཅེས། །དེ་བཞིན་གཤེགས་པས་དེ་ལ་གསུངས། །དེས་ནི་དགེ་སློང་རྟགས་བཟུང་སྟེ། །སྐད་ཅིག་དེ་ཉིད་ཀྱིས་གྲོལ་ཏོ། །དེ་ནས་དེ་ཡི་རྗེས་ཆགས་པས། །དེ་ཡི་འཁོར་ནི་ལྔ་བཅུ་དང་། །གསུམ་རྣམས་
ཉིད་དང་གཅིག་ཉིད་དང་། །ཆོས་དེ་རབ་ཏུ་ཐོབ་པར་གྱུར། །འདག་ཆལ་གྱིས་བསྒོས་གོས་རྣམས་ནི། །ཆུ་ཡིས་ཡང་དག་རེག་པ་བཞིན། །སྔོན་ཚེ་བསྒོམས་པའི་ལས་ཅན་རྣམས། །དེ་རྣམས་མྱུར་དུ་དག་པར་གྱུར། །དེ་ནས་དེ་ཚེ་དགྲ་བཅོམ་སློབ་མ་ཡི། །དང་པོ་དོན་བྱས་
དྲུག་ཅུ་ཐམས་ཅད་ལ། །དགྲ་བཅོམ་རྣམས་ཀྱིས་མངོན་མཆོད་དགྲ་བཅོམ་པས། །ཇི་ལྟར་འོས་པར་ཡང་དག་བཀའ་སྩལ་ཏོ། །དགེ་སློང་རྣམས་ཀྱིས་སྡུག་བསྔལ་རྒལ། །རང་གི་བྱ་བ་ལེགས་ཆེན་བྱས། །ཕ་རོལ་སྡུག་བསྔལ་རྣམས་ལ་ཡང་། །རྗེས་སུ་འཛིན་པར་བྱེད་པའི་
རིགས། །དེ་ཕྱིར་རེ་རེ་ཐམས་ཅད་ཀྱིས། །ས་འདིར་ཡོངས་སུ་གཤེགས་མཛོད་ལ། །ཉམ་ཐག་འཇིག་རྟེན་ཆེད་དུ་ཆོས། །རྗེས་སུ་བརྩེ་བས་བསྟན་པར་བྱ། །གྲུབ་ཕྱིར་རྫུ་འཕྲུལ་ལྡན་པའི་སྤུན། །འོད་སྲུངས་དྲང་སྲོང་རྣམས་འདུལ་ཕྱིར། །རྒྱལ་པོའི་དྲང་སྲོང་གིས་བསྙེན་པའི། །ག་
ཡར་ཁོ་བོ་འདི་ཡང་འགྲོ། །དེ་ནས་དེ་ཉིད་མཐོང་དེ་རྣམས། །དེ་ཡི་བཀའ་ལས་ཕྱོགས་སུ་སོང་། །རྩོད་བྲལ་བདེ་བར་གཤེགས་པ་ནི། །དྲང་སྲོང་ཆེ་ཡང་ག་ཡར་གཤེགས། །དེ་ནས་དུས་སུ་དེར་གཤེགས་ནས། །ཆོས་ཀྱི་དགོན་པར་ཉེ་བར་གཤེགས། །དཀའ་ཐུབ་དངོས་སུ་གནས་

172-1-60a

པ་བཞིན། །དེར་ནི་འོད་སྲུངས་གཟིགས་པའོ། །རི་རྣམས་དང་ནི་ནགས་རྣམས་སུ། །གནས་རྣམས་ཡོད་པ་ན་ཡང་དེ། །རྣམ་པར་འདུལ་བཞེད་སྟོབས་བཅུ་པས། །རབ་ཏུ་བརྟེན་ནས་བསླངས་པའོ། །དེ་ནས་གྲུབ་པ་ཉམས་ཚད་ཕྱིར། །མེ་ཁང་ལྟོ་འཕྱེ་ཆེས་
བསྙེན་པར། །མ་རུངས་གནས་དེས་འདི་ལ་བྱིན། །དེར་གཟིམས་མཚན་མོར་རང་གནས་ཤིང་། །ལྟོས་བྲལ་ཐུབ་པ་ཆེན་པོ་ལ། །མཐོང་བའི་དུག་ཅན་ཁྲོས་པ་ཡི། །སྦྲུལ་དེས་མཐོང་ནས་དབུགས་ཕྱུང་ངོ་། །དེ་ཡི་ཁྲོ་བས་འབར་བ་ཡི། །མེ་ཡི་ཁང་པར་གྱུར་པ་དེས། །དྲང་སྲོང་
ཆེན་པོའི་སྐུ་ལུས་ལ། །འཇིགས་པ་བཞིན་དུ་མེས་མ་རེག །དུས་མཐའི་མེ་ཉེར་ཞི་བ་ན། །ཚངས་པ་བཞུགས་པ་མཛེས་པ་ལྟར། །མེ་ཡི་ཁང་པར་བསྲེགས་ན་ཡང་། །གཽ་ཏ་མ་རྣམ་འགྱུར་མེད། །གང་ཚེ་སངས་རྒྱས་དེར་བཞུགས་ཚེ། །གནོད་མེད་གཡོ་བ་མེད་པ་སྟེ། །དེ་ཚེ་
ཀླུ་དེ་ཡ་མཚན་ཞིང་། །དྲང་སྲོང་མཆོག་ལ་ཕྱག་འཚལ་ལོ། །རི་དགས་ནགས་དེར་སྐྱེ་བོ་ཡིས། །ཐུབ་པ་དེར་བཞུགས་ཤེས་གྱུར་ནས། །སྲུགས་པའོ་བརྒྱལ་འདི་འདྲ་བའི། །དགེ་སློང་ཚིག་ཅེས་རྗེས་སུ་བརྩེ། །དེ་ནས་མཚན་མོ་འདས་པ་ན། །རྣམ་པར་འདྲེན་པས་འོད་སྲུངས་ལ། །སྦྲུལ་
ནི་ཞི་བས་ལྷུང་བཟེད་ཀྱིས། །བླངས་ནས་དེ་ལ་བསྟན་པའོ། །དེ་ནས་སངས་རྒྱས་ཆེ་བདག་ཉིད། །ཐོས་ནས་དེ་ནི་ཡ་མཚན་གྱུར། །དེ་ལྟན་ཡང་བདག་ཉིད་ཀྱིས། །ཆེ་ཞིང་གོང་ན་མེད་པ་སྙམ། །དེ་ནས་དུས་སུ་རབ་སྦྱར་བའི། །སྣ་ཚོགས་རྫུ་འཕྲུལ་གཟུགས་རྣམས་ཀྱིས། །དེ་ཡི་སེམས་དེ་
མཁྱེན་ཉིད་ལས། །ཞི་ལྡན་ཐུབ་པས་ཐུགས་དགོངས་མཛད། །ཇི་ལྟར་བདག་ལས་རྫུ་འཕྲུལ་གྱིས། །སངས་རྒྱས་ཁྱད་པར་འཕགས་པ་སྙམ། །དེ་ཡི་ཆོས་ནི་རབ་སྒྲུབ་ཕྱིར། །དེ་ཚེ་ངེས་ནི་ངེས་པར་བྱས། །ཀུན་ནས་སླར་ལོག་གནས་པ་ཡིས། །ལྟེང་རྒྱས་འོད་སྲུངས་མཐོང་ནས་ནི། །སློབ་མ་རྣམས་
ཀྱི་ཚོགས་རྣམས་ཀྱང་། །ལྔ་བརྒྱས་དེ་ཡི་ཆོས་ལ་བསྙེན། །དེར་ནི་སྤུན་ཟླ་སློབ་མར་བཅས། །མཐར་ཕྱིན་ཤུན་ལྤགས་སྤངས་པ་ན། །ག་ཡ་ཆུ་ཀླུང་ཞེས་བྱས་ཀྱང་། །དེར་སོང་ལམ་ལ་བསྙེན་པའོ། །དེ་ནས་ཐུབ་པས་སློབ་མར་བཅས། །འོད་སྲུངས་གསུམ་པོ་དེ་རྣམས་ལ། །ས་འཛིན་ག་ཡའི་རྩེ་མོར་

172-1-60b

ནི། །ངེས་པར་མཐར་ཕྱིན་གཏམ་མཛད་དོ། །རྣམ་པར་རྟོག་པའི་སྐྱེ་གནས་དང་། །གཏི་མུག་རྣམ་བཀྲམ་དུ་བ་ཅན། །ཆགས་སྡང་མེ་ཡིས་འགྲོ་བ་ནི། །ཐམས་ཅད་དབང་མེད་པར་བསྲེག་གོ། །དེ་ལྟར་ཉོན་མོངས་མེས་ཚིག་ཅིང་། །རབ་ཏུ་མ་ཞི་མགོན་མེད་ཅན། །རྒ་ན་འཆི་བའི་མེ་རྣམས་
ཀྱིས། །སླར་ཡང་རྒྱུན་མི་ཆད་པར་སྲེག །རྣམ་པ་སྣ་ཚོགས་མེས་ཚིག་པའི། །འགྲོ་བ་སྐྱབས་མེད་འདི་མཐོང་ནས། །ཡིད་བཅས་དབང་པོ་དང་བཅས་པའི། །གཟུགས་ལ་བློ་ལྡན་སྐྱོ་བ་སྟེ། །སྐྱོ་བ་ལས་ནི་ཆགས་བྲལ་རོ། །ཆགས་བྲལ་ལས་ནི་རྣམ་གྲོལ་ཞིང་། །རྣམ་གྲོལ་དེ་ནས་ཐམས་ཅད་
ན། །རྣམ་པར་གྲོལ་ཞེས་ཤེས་པའོ། །སྐྱེ་བའི་རྒྱུན་ནི་ཡོངས་འཛད་ཅིང་། །ཚངས་པའི་སྤྱོད་པ་འདིར་གནས་ལ། །བྱེད་པ་ཐམས་ཅད་བྱས་པ་སྟེ། །སྲེད་པ་གཞན་ནི་ཡོད་མ་ཡིན། །བཅོམ་ལྡན་གྱི་གསུང་འདི་ཐོས་ནས། །དགེ་སློང་སྟོང་ཕྲག་དག་གི་སེམས། །ལེན་པ་མེད་ནས་ཟག་པ་ལས། །
དེ་མ་ཐག་ཏུ་རྣམ་པར་གྲོལ། །སྦྱིན་པ་ཚུལ་ཁྲིམས་དུལ་རྣམས་ཀྱིས། །ཆོས་ནི་ཡོངས་སུ་ཡོངས་བསྐོར་བཞིན། །དེ་ནས་ཤེས་རབ་རྒྱ་ཆེ་བའི། །འོད་སྲུངས་གསུམ་གྱིས་སངས་རྒྱས་མཛེས། །ཆོས་དོན་འདོད་པ་དང་བྲལ་བའི། །སེམས་ཅན་ངན་པའི་སྲོག་བཞིན་དུ། །བགྲེས་མཆོག་དེ་རྣམས་ཀྱིས་
བོར་བའི། །དཀའ་ཐུབ་ནགས་དེ་མཛེས་མ་གྱུར། །དེ་ནས་དེ་རྣམས་ཀྱིས་ཡོངས་བསྐོར། །ཐུབ་པ་རྒྱལ་པོའི་ཁབ་ཏུ་གཤེགས། །མ་ག་དྷཱ་ཡི་མི་དབང་ཕྱིར། །སྔོན་གྱི་དམ་བཅའ་དྲན་པའོ། །དེ་ནས་འོད་མའི་ཚལ་ཡུལ་ནི། །དེ་བཞིན་གཤེགས་པས་རབ་ཏུ་ཐོབ། །བློན་པོ་རྣམས་ནི་རྗེས་འགྲོ་བས། །
ཐོས་ནས་རྒྱས་པོ་སྔོན་དུ་སོང་། །དེ་ནས་རང་གི་སྐལ་མཚུངས་པའི། །རྐང་པ་བཞོན་པས་སྐྱེ་བོ་ནི། །ཡ་མཚན་གྱིས་ནི་རྣམ་ཡངས་མིག །རི་ཡི་ལམ་ནས་ཕྱི་རོལ་བྱུང་། །མ་ག་དྷཱ་ཡི་མི་དབང་གིས། །ཐུབ་མཆོག་རྒྱང་མ་ནས་མཐོང་ནས། །སྐྱེན་པ་དང་བཅས་མཆོད་པའི་ཕྱིར། །ཤིང་རྟ་
ལས་ནི་ས་ལ་བབས། །དེས་ནི་རྔ་ཡབ་རླུང་ཡབ་དང་། །རྗེས་སུ་འབྲང་བ་རྣམ་སྤངས་ནས། །ཚངས་པ་ལ་ནི་དབང་པོས་བཞིན། །ཐུབ་པ་རྒྱལ་པོ་སྔོན་དུ་སོང་། །ཅོད་པན་རབ་གཡོ་མགོ་བོ་ཡིས། །དྲང་སྲོང་མཆོག་ལ་ཕྱག་འཚལ་ནས། །ས་ཡི་ལོགས་ལ་རྩྭ་འཇམ་ལ། །མངོན་པར་རྗེས་གནང་

172-1-61a

བསྡད་པའོ། །དེར་མི་རྣམས་ཀྱིས་བསམས་པར་གྱུར། །ཨེ་མ་ཤཱཀྱ་ཐུབ་པའི་སྟོབས། །འོད་སྲུངས་བཅོམ་ལྡན་དྲང་སྲོང་ནི། །འདི་ཡི་སློབ་མ་ཉིད་དུ་སོང་། །དེ་ནས་དེའི་སེམས་སངས་རྒྱས་ཀྱིས། །མཁྱེན་ནས་འོད་སྲུངས་ལ་སྨྲས་པ། །འོད་སྲུངས་ཡོན་ཏན་གང་མཐོང་ནས། །
ཁྱེད་ཀྱིས་མེ་ནི་སྤངས་པའོ། །ཆུ་སྦྱིན་ཆེན་པོའི་དབྱངས་ཀྱིས་ནི། །བླ་མས་དེ་ལྟར་དེ་བསྐུལ་ཏེ། །མཐོན་པོས་སྐྱེ་བོ་ཀུན་ཁྱབ་པར། །ཐལ་མོ་སྦྱར་ཞིང་རྣམ་པར་གསོལ། །གང་ཕྱིར་མཆོད་དང་སྦྱིན་སྲེག་གི། །འབྲས་བུ་ཡོངས་སུ་འཁོར་བ་སྟེ། །སེམས་ནད་སྣ་ཚོགས་དང་ལྡན་ཏེ། །དེ་ཕྱིར་མེ་རྣམས་བདག་
གིས་སྤངས། །གང་ཕྱིར་ཡུལ་ལ་སྐོམ་པ་ཡིས། །བཟླས་དང་སྦྱིན་སྲེག་ལ་སོགས་འཇུག །ཡུལ་རྣམས་དག་གིས་སྐོམ་པ་མེད། །དེ་ཕྱིར་མེ་རྣམས་བདག་གིས་སྤངས། །གང་ཕྱིར་བཟླས་ནས་བསྲེགས་ནས་ཀྱང་། །སྐྱེ་བ་ལ་ནི་ཐར་མིན་ཞིང་། །སྐྱེ་བ་ཡི་ནི་སྡུག་བསྔལ་ཆེ། །དེ་ཕྱིར་མེ་རྣམས་བདག་གིས་
སྤངས། །གང་ཕྱིར་མཆོད་སྦྱིན་དཀའ་ཐུབ་ཀྱིས། །དགེ་ལེགས་ཡིན་ཞེས་ཡིད་གྱུར་པ། །དེ་ནི་བརྫུན་པ་ཉིད་ཡིན་ཏེ། །དེ་ཕྱིར་མེ་རྣམས་བདག་གིས་སྤངས། །གང་ཕྱིར་སྐྱེ་འཆི་ལས་གྲོལ་བ། །འགྱུར་མེད་གོ་འཕང་དགེ་བར་ནི། །བརྗོད་པ་བདག་གིས་ཤེས་པ་སྟེ། །དེ་ཕྱིར་མེ་རྣམས་བདག་གིས་སྤངས། །དེ་
ལྟར་དེའི་ཚིག་དད་སྐྱེད་ཅིང་། །དོན་དང་ལྡན་པས་གསན་གྱུར་ནས། །འདུལ་བའི་སློབ་དཔོན་གཽ་ཏ་མས། །དུལ་བའི་འོད་སྲུངས་ལ་གསུངས་སོ། །སྐལ་ཆེན་ཁྱོད་ནི་ལེགས་པར་འོངས། །འདི་ནི་ལེགས་བྱས་བྱས་མིན་མིན། །གང་ཁྱོད་ཐ་དད་ཆོས་རྣམས་སུ། །དགེ་ལེགས་གང་དེ་ཉེ་བར་ཐོབ། །དེ་ཕྱིར་
རེ་ཞིག་འཁོར་རྣམས་ནི། །རྣམ་རྒྱས་ཡང་དག་འཕེལ་བ་བཞིན། །སྣ་ཚོགས་སྡུག་བསྔལ་སྟོན་བཞིན་དུ། །ཡིད་ནི་ཡང་དག་སྐྱོ་བར་གྱིས། །དེ་ནས་མཆོག་ཅེས་སྨྲས་ནས་ནི། །བདག་ལ་བདག་ནི་ཡོངས་བསྡུས་ནས། །མཁའ་འགྲོའི་བྱ་ལྟར་འོད་སྲུངས་ནི། །རླུང་གི་ལམ་ལ་འཕུར་བའོ། །དེ་མཁར་སྡོང་
དུམ་བཞིན་གནས་ཤིང་། །ས་ལ་བཞིན་དུ་རྣམ་པར་རྒྱུ། །ཁྲི་ལ་བཞིན་དུ་བཞུགས་པ་དང་། །རྫུ་འཕྲུལ་མཁས་པ་གཟིམས་པའོ། །སླར་ཡང་མེ་བཞིན་འབར་བ་དང་། །སླར་ཡང་སྤྲིན་བཞིན་ཆར་འབབ་སྟེ། །སླར་ཡང་ཅིག་ཅར་ཤིན་ཏུ་ནི། །འབར་བ་དང་ནི་འབབ་པའོ། །གློག་གི་སྣང་བའི་འོད་ལྡན་པའི། །

172-1-61b

རབ་འབབ་ཆུ་གཏེར་སྤྲིན་བཞིན་དུ། །འབར་བ་དང་ནི་འབབ་པ་ཡིས། །རྒྱ་ཆེར་རྣམ་པར་གནོན་ཏེ་མཛེས། །དེར་ནི་མིག་རྣམས་ཆགས་བྱས་ནས། །ཡ་མཚན་གྱེན་ཕྱོགས་སྐྱེ་བོ་རྣམས། །མཆོད་མང་པོ་ལས་ཕྱག་འཚལ་ཞིང་། །སེང་གེའི་སྒྲ་ནི་སྒྲོགས་པའོ། །དེ་ནས་རྫུ་འཕྲུལ་བསྡུས་ནས་དེས། །བྱ་བ་
བྱས་པའི་སློབ་མ་ནི། །བདག་གི་སྟོན་པ་བཅོམ་ལྡན་ཞེས། །ཐུབ་ལ་མགོ་བོས་ཕྱག་འཚལ་ལོ། །དྲང་སྲོང་མཆོག་ལ་དེ་བཞིན་དུ། །ཕྱག་འཚལ་འོད་སྲུངས་རབ་མཐོང་ནས། །བདེ་བར་གཤེགས་ལ་ཀུན་མཁྱེན་ཞེས། །མ་ག་དྷཱ་པ་རྣམ་ངེས་སོ། །དེ་ནས་ཞིང་བྱས་མཁྱེན་ནས་ནི། །དགེ་ཕྱིར་དགེ་
ལེགས་ལ་གནས་པས། །ཆོས་ཐོས་པར་ནི་འདོད་པ་ཡི། །བཟོ་སྦྱངས་ལ་ནི་བཀའ་སྩལ་པ། །གཟི་ཆེན་ལྡན་པ་ཡིད་བཅས་ཤིང་། །དབང་པོ་ཐུལ་བ་དབང་པོར་བཅས། །ས་ཡི་བདག་པོ་གཟུགས་ཉིད་ནི། །སྐྱེ་བ་དང་ནི་རྣམ་པར་ཉམས། །ཡོན་ཏན་འཕེལ་ཕྱིར་འདི་ཡི་ནི། །སྐྱེ་དང་འགག་པ་ཤེས་བྱ་
སྟེ། །ཤེས་ནས་དེ་གཉིས་ཡང་དག་པར། །ལུས་ནི་ཡང་དག་རིག་པར་མཛོད། །སྐྱེ་དང་འགག་པའི་ཆོས་ཅན་དུ། །དབང་པོ་དང་བཅས་ལུས་ཤེས་ནས། །བདག་ལྡན་བདག་ཅེས་ཅུང་ཞིག་ནི། །ཉེ་བར་ལེན་མིན་ཉེར་འགྲོ་མིན། །ལུས་དང་དབང་པོ་བློ་རྣམས་ལས། །གཞན་ནི་དམིགས་པ་མ་ཡིན་ཏེ། །
སྡུག་བསྔལ་འདི་ནི་སྐྱེ་བ་སྟེ། །སྡུག་བསྔལ་ཉིད་ནི་འགག་པའོ། །གང་ཚེ་འདི་ཀུན་མངོན་པར་འགྲོ། །བདག་མེད་བདག་གི་བ་ཡང་མེད། །དེ་ཚེ་མཆོག་ཏུ་མི་གཡོ་བའི། །མྱ་ངན་འདས་པ་ཐོབ་པའོ། །ངར་འཛིན་ལ་སོགས་ཉོན་མོངས་ཀྱིས། །བདག་ཏུ་འཛིན་ལས་འཆིང་བ་སྟེ། །འཇིག་རྟེན་བདག་མེད་
པར་མཐོང་ན། །ཆགས་པ་རྣམས་ལས་རྣམ་པར་གྲོལ། །མི་བདེན་པར་མཐོང་འཆིང་བ་སྟེ། །བདེན་པར་མཐོང་བ་རྣམ་པར་གྲོལ། །བདག་ཡོད་ཅེས་ནི་འཇིག་རྟེན་འདིར། །རབ་ཏུ་འཇུག་འདི་བདེན་མིན་འཛིན། །གལ་ཏེ་བདག་ཡོད་གྱུར་ན་དེ། །རྟག་གམ་ཡང་ན་མི་རྟག་ཉིད། །ཕྱོགས་ནི་
གཉིས་པོ་འདི་དག་ལ། །ཉེས་པ་ཆེན་པོ་རབ་ཏུ་ཆགས། །གལ་ཏེ་རེ་ཞིག་མི་རྟག་གྱུར། །ལས་ཀྱི་འབྲས་བུ་མེད་པར་འགྱུར། །ཡང་སྲིད་ཡོད་པ་མ་ཡིན་ཞིང་། །ཐར་པ་འབད་པ་མེད་པར་འགྱུར། །ཅི་སྟེ་རྟག་ཅིང་ཁྱབ་བདག་འགྱུར། །སྐྱེ་བ་མེད་དང་སྐྱེ་བ་མིན། །ནམ་མཁའ་ཁྱབ་ཅིང་རྟག་པ་

172-1-62a

ནི། །འགོད་པ་མེད་ཅིང་སྐྱེ་བ་མེད། །གལ་ཏེ་བདག་འདི་ཁྱབ་བདག་འགྱུར། །གང་དུ་མི་གནས་པ་མ་ཡིན། །འདི་དང་སོང་ནས་དང་ཐར་པར། །ཐམས་ཅད་དུ་ནི་ཅིག་ཅར་འགྱུར། །ཁྱབ་བདག་ཉིད་ཕྱིར་བྱ་མེད་འདིའི། །ལས་ཀྱི་བྱ་བ་མེད་པར་འགྱུར། །ལས་རྣམས་མ་
བྱས་པ་ལས་ནི། །འབྲས་བུར་སྦྱོར་བར་གང་གིས་འགྱུར། །གལ་ཏེ་འདི་ཡི་བྱེད་པར་འགྱུར། །བདག་གི་སྡུག་བསྔལ་བྱེད་མ་ཡིན། །རང་དབང་གྱུར་ན་སྡུག་བསྔལ་ནི། །བདག་གིས་བདག་གི་བྱེད་པ་སུ། །བདག་ནི་རྟག་པ་ཉིད་ལས་ནི། །རྣམ་པར་འགྱུར་བ་སྐྱེ་མིན་ཞིང་། །བདེ་དང་སྡུག་བསྔལ་
ཐོབ་པ་ལས། །དེ་ཡིས་རྣམ་པར་འགྱུར་བ་མཐོང་། །ཡེ་ཤེས་ཐོབ་པས་དང་ཉོན་མོངས། །སྤངས་ལས་ཐར་པ་ཡོད་པ་སྟེ། །བྱ་བ་མེད་ཁྱབ་བདག་འདི་ཡིན། །དེ་ཕྱིར་ཐར་པ་ཡོད་མ་ཡིན། །ཡོད་མིན་གྱུར་ལས་དེ་ཉིད་ཀྱིས། །བདག་སྟེ་འདི་ནི་བརྗོད་མིན་ལ། །རྒྱུར་གྱུར་པས་ཀྱང་མ་ཡིན་ཞིང་། །
འདི་ནི་ཅུང་ཟད་བྱེད་མ་ཡིན། །བྱ་བ་ལས་ཀྱང་གསལ་མིན་ཞིང་། །གང་རྣམས་ཀྱིས་འདི་བྱས་མིན་ལ། །རྣམ་པ་དེ་ལྟར་གྱུར་མིན་སྨྲ། །དེ་ཕྱིར་བདག་གི་ཡོད་མ་ཡིན། །བྱེད་པ་པོ་མེད་འདིར་ནི་རིག་པ་པོ་ཡང་མེད། །བདག་པོ་མེད་པའི་ལུས་པོ་འདི་ནི་འདྲེན་པར་བྱེད། །ཇི་ལྟར་འཁོར་བའི་ཆུ་
བོ་རབ་ཏུ་བསྐོར་བ་སྟེ། །སྨྲ་བ་དེ་ནི་ཉོན་མཛོད་ཉན་པ་རྣམས་ཀྱི་མཆོག །དབང་པོ་དྲུག་དང་དབང་པོའི་སྤྱོད་ཡུལ་དྲུག་རྣམས་ལ། །བརྟེན་ནས་རྣམ་པར་ཤེས་པ་རྣམ་དྲུག་འཆར་བ་སྟེ། །གསུམ་པོ་སོ་སོར་རིག་པའི་ཆོ་ག་རབ་བསྐོར་ཞིང་། །གང་ལས་དྲན་དང་བློ་དང་ལས་ཀྱི་འཇུག་པར་ཡིན། །ནོར་བུ་བུད་
ཤིང་ཉི་མ་ཡང་དག་ཕྲད་པ་ལས། །ཇི་ལྟར་མེ་ནི་སྦྱར་བའི་དབང་གིས་སྐྱེ་བ་སྟེ། །དེ་བཞིན་བློ་དང་དབང་དོན་དབང་པོ་ལ་བརྟེན་ནས། །སྐྱེས་བུ་ལ་བརྟེན་བྱ་བ་རྣམས་ནི་ཐམས་ཅད་འགྱུར། །ཇི་ལྟར་ས་བོན་ལས་ནི་མྱུ་གུ་སྐྱེ་བ་སྟེ། །མྱུ་གུ་དེས་ན་ས་བོན་དེ་ནི་ཤེས་མིན་ཞིང་། །གཞན་ལས་གཞན་དུ་མ་ཡིན་དེ་
ལས་དེ་མ་ཡིན། །དེ་བཞིན་ལུས་དང་དབང་པོ་བློ་ཡི་རིམ་པའོ། །དེ་ལྟར་ཐུབ་པ་མཆོག་གི་གསུང་ནི་མཆོག་ཏུ་དགེ། །དམ་པའི་དོན་དུ་བསྔགས་པ་ཡང་དག་ཐོས་ནས་ནི། །དྲི་མ་མེད་པའི་རྡུལ་མེད་གཞལ་དུ་མེད་པའོ། །མ་ག་དྷཱ་ཡི་བདག་པོ་ཆོས་མིག་སྐྱེས་པར་གྱུར། །འཁོར་དེར་མ་ག་དྷཱ་ཡི་གྲོང་ན་

172-1-62b

གནས་པ་ཡི། །མི་ནི་དུ་མ་རྣམས་དང་ལྷ་ན་གནས་པ་རྣམས། །ཐུབ་པའི་གསུང་ཐོབ་པ་ལས་རྣམ་དག་བསམ་ལྡན་རྣམས། །འགྱུར་མེད་འཆི་བ་མེད་པའི་གོ་འཕང་ཐོབ་པར་གྱུར། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། སློབ་མ་མང་པོ་དང་ལྡན་པའི་ལེའུ་སྟེ་
བཅུ་དྲུག་པའོ།།      །།དེ་ནས་རྒྱལ་པོ་དེས་ནི་ཐུབ་ལ་རྣམ་གནས་ཕྱིར། །དཔལ་ལྡན་ནགས་ཚལ་འོད་མའི་ཚལ་ནི་རབ་ཕུལ་ནས། །དེ་ཉིད་ཁོང་དུ་ཆུད་ཕྱིར་ཀུན་ནས་དམིགས་པ་ནི། །མངོན་པར་རྗེས་གནང་བྱས་པ་གྲོང་ཁྱེར་ལ་ཞུགས་སོ། །དེ་ནས་གཙུག་ལག་ཁང་དེར་
འགྲོ་ལ་ཕན་པའི་ཕྱིར། །ཡེ་ཤེས་ལས་གྱུར་དགེ་བའི་སྒྲོན་མ་བསྣམས་པ་སྟེ། །ཚངས་དང་ལྷ་དང་དེ་བཞིན་འཕགས་པ་རྣམས་ཀྱི་ནི། །གནས་པ་དེ་དང་དེ་ཡིས་སངས་རྒྱས་རྣམ་པར་གནས། །དེ་ནས་རྟ་ཐུལ་དབང་པོའི་རྟ་ནི་ཀུན་བསྡམས་ཤིང་། །བསོད་སྙོམས་འདོད་པས་རྒྱལ་པོའི་ཁབ་
ནི་རབ་ཐོབ་སྟེ། །གཟུགས་ཀྱིས་དང་ནི་ཞི་བ་ཡིས་དང་རྣམ་འགྱུར་གྱིས། །སྐྱེ་བོ་ཆེན་པོ་རྣམས་ཀྱི་མིག་རྣམས་ཕྲོགས་པར་གྱུར། །སེར་སྐྱའི་རིགས་ཀྱི་དགེ་སློང་སློབ་མ་དུ་མ་ཅན། །ཤ་ར་དྭ་ཏིའི་བུ་ཞེས་རབ་ཏུ་གྲགས་པ་ཡིས། །དབང་པོ་ཞི་བར་འོངས་པ་དེ་ནི་མཐོང་བ་སྟེ། །ལམ་ན་རྗེས་སུ་གནས་
ནས་ཚིག་ནི་མངོན་པར་སྨྲས། །ཁྱོད་ཀྱི་གསར་པའི་རྟགས་མཚན་དང་ནི་ཞི་བ་ཉིད། །མཐོང་ནས་ཁོ་བོའི་བློ་གྲོས་ཡ་མཚན་མཆོག་གྱུར་ཏེ། །དེ་ཕྱིར་རེ་ཞིག་གལ་ཏེ་དེ་ཉིད་རིག་པ་དང་། །ཁྱོད་ཀྱི་སྟོན་པའི་མཚན་ཅི་སྨྲ་བ་གང་ཡིན་སྨྲོས། །དེ་ལྟར་མཆོད་མང་སྔོན་འགྲོ་བྲམ་ཟེ་དེ་ཡིས་ནི། །དེ་སྐད་
བརྗོད་ཅིང་རྟ་ཐུལ་གྱིས་ཀྱང་སྨྲས་པ་སྟེ། །བུ་རམ་ཤིང་པའི་རིགས་སུ་རབ་འཁྲུངས་ཐམས་ཅད་མཁྱེན། །བདག་གི་སྟོན་པ་བླ་ན་མེད་པ་ཤེས་པར་མཛོད། །བྱིས་པ་གསར་བུ་ཆོས་ལས་སྐྱེས་པར་གྱུར་པ་ཡིས། །ཁྱོད་ལ་སྟོན་པ་བརྗོད་པར་ནུས་པ་མ་ཡིན་ཏེ། །སྨྲས་པ་མཁྱེན་པའི་མཆོག་གྱུར་ཐུབ་པ་
ཆེན་པོའི་གསུང་། །ཉུང་ངུ་ཅུང་ཟད་ཙམ་ཞིག་ངེས་པར་རྟོགས་པར་མཛོད། །གང་ཞིག་ཆོས་རྣམས་མཚན་མ་ལས་ནི་བྱུང་བ་སྟེ། །དེ་དག་རྣམས་ཀྱི་མཚན་མ་བཅོམ་ལྡན་གྱིས་གསུངས་ཤིང་། །གང་ཞིག་དེ་དག་རྣམས་ཀྱིས་ངེས་པར་འགོག་པ་དང་། །ཡང་དག་འགོག་པ་དེ་ཡི་ཐབས་གང་གསུངས་

172-1-63a

པའོ། །དེ་ལྟར་རྟ་ཐུལ་གྱི་ནི་ཚིག་འདི་ཐོས་ནས་ནི། །གཉིས་སྐྱེས་ཉེར་རྒྱལ་ཞེས་བྱའི་མིང་ཅན་དེ་ཡི་ནི། །སྐྱེན་པར་ཆོས་ལ་མིག་ནི་རྡུལ་དང་བྲལ་བ་ནི། །དགེ་ཞིང་རྣམ་པར་དག་པར་ངེས་པར་གྱུར་པའོ། །རྒྱུ་མེད་པ་དང་བྱ་བ་མེད་དང་དབང་ཕྱུག་སྟེ། །ཞིང་ཤེས་པ་ནི་
ངེས་པར་དེ་ཡིས་སྔོན་རིག་ཅིང་། །རྒྱུ་ལས་འདི་རྣམས་རབ་ཏུ་འཇུག་པར་ཐོས་ནས་ནི། །བདག་མེད་གྱུར་པ་མཐོང་ནས་དམ་པའི་བདེན་པ་གཟིགས། །སྦོམ་པོའི་ཉོན་མོངས་ཚོགས་ཀྱིས་རྣམ་པར་ཉམས་པ་ནི། །གྲངས་ཅན་ལུས་ལས་ཆ་ཤས་དང་བཅས་མཐོང་བ་སྟེ། །སྦོམ་པོ་དང་ནི་ཕྲ་མོ་དེ་ཡིས་ཉམས་
པ་ནི། །སངས་རྒྱས་པ་ཡི་བསྟན་ལས་འགྱུར་ཞེས་སྙམ་པར་གྱུར། །བདག་ཏུ་འདུ་ཤེས་སྐྱེས་པ་ཉེ་བར་མཁྱུད་ནས་ནི། །ངར་འཛིན་སྤོང་བ་མ་ཡིན་དེ་ནས་ང་ཡི་ཉིད། །སྒྲོན་མ་དང་ནི་ཉིན་མོར་བྱེད་པ་ཡོད་པ་ན། །འོད་ཀྱི་རྣམ་པར་ཉམས་པར་གཏན་ཚིགས་ཤེས་བྱ་ཅི། །ཇི་ལྟར་པདྨའི་ཆུ་བ་ཆེ་བར་གྱུར་པ་
ཡི། །སྣལ་མ་ཕྲ་མོ་ཉིད་ནི་བཞིན་དང་འབྲེལ་པ་སྟེ། །ཐར་པའི་ཆོ་ག་མཐར་ཐུག་མིན་པར་དེ་སྙམ་ཞིང་། །སངས་རྒྱས་པ་ཡིས་རྡོ་བ་ཕྱེ་དང་མཉམ་པར་རྟོགས། །དེ་ནས་བྲམ་ཟེས་རྟ་ཐུལ་དེ་ལ་མངོན་མཆོད་ནས། །ཚིམ་ཞིང་རང་ཉིད་ཀྱི་ནི་ཁང་པར་རྣམ་སོང་ཞིང་། །བསོད་སྙོམས་རིམ་བཞིན་རྟ་ཐུལ་གྱིས་ཀྱང་
རབ་ཐོབ་ནས། །རང་བཞིན་གནས་ཤིང་མཁས་པ་འོད་མའི་ཚལ་དུ་སོང་། །དེ་བཞིན་རབ་ཏུ་དང་བས་མཆོག་དང་ལྡན་པ་ཡི། །ཉེ་རྒྱལ་ཀྱང་ནི་མངོན་དུ་ཞུགས་པ་མཐོང་ནས་ནི། །ཐོས་པ་དང་ནི་བསམ་པས་བྱ་བ་མཉམ་པ་ཡི། །མཽད་གལ་རིགས་སུ་རབ་ཏུ་སྐྱེས་པས་སྨྲས་པའོ། །དགེ་སློང་དེ་ཉིད་གང་
གིས་གཞན་བཞིན་གྱུར་པ་སྟེ། །བརྟན་པ་ཡིན་ཡང་ཡང་དག་དགའ་བཞིན་ཉེ་བར་སོང་། །ཁྱེད་ཀྱིས་འཆི་མེད་ཅི་ཞིག་དེ་རིང་ཐོབ་པ་སྟེ། །བཞིན་ནི་རབ་ཏུ་དང་འདི་གཏན་ཚིགས་མེད་མ་ཡིན། །དེ་ནས་འདི་ལྟར་བགྱི་ཞེས་འདི་ལ་ངེས་བདེན་སྨྲས། །དེ་ནས་དེས་ནི་བདག་ལ་སྨོས་པ་ཤེས་དེས་སྨྲས། །དེ་
ནས་ཚིག་དེ་ཉིད་ནི་དེ་ཡིས་སྨྲས་པ་སྟེ། །ཐོས་ནས་ཉིད་ཀྱི་ཡང་དག་མིག་ནི་སྐྱེས་པར་གྱུར། །ལས་དང་བསམ་པ་རྣམ་དག་བློ་ལྡན་དེ་གཉིས་ནི། །ལག་ནས་སྒྲོན་མ་བཞིན་དུ་དེ་ཉིད་མཐོང་བ་སྟེ། །ཤེས་པས་སྟོན་ལ་རྣམ་པར་གཡོ་མིན་བསམ་ལྡན་དག །དེ་ནི་ལྟ་བའི་དོན་དུ་ད་ལྟ་ཉིད་དུ་གཤེགས། །སློབ་

172-1-63b

མའི་སྡེར་བཅས་དེ་གཉིས་རྒྱང་མ་ནས་གཟིགས་ནས། །བཅོམ་ལྡན་དྲང་སྲོང་ཆེན་པོས་དགེ་སློང་རྣམས་ལ་གསུངས། །ཤེས་རབ་ཅན་དང་རྫུ་འཕྲུལ་ལྡན་པ་རྣམས་ཀྱི་གཙོ། །ཁོ་བོའི་མཆོག་གི་སློབ་མ་འདི་གཉིས་འདིར་འོངས་སོ། །དེ་ནས་ཟབ་དང་བརྟན་པའི་གསུང་ནི་ཞི་བ་ཡིས། །ཐུབ་པས་དེ་
གཉིས་ལ་ནི་གཏམ་དག་མཛད་པ་སྟེ། །དགེ་སློང་འདིར་ནི་མངོན་པར་ཉེར་འོངས་རབ་ཞིའི་ཕྱིར། །ཆོས་འདི་ཇི་ལྟ་བ་བཞིན་ཡང་དག་ཐོབ་པར་གྱིས། །དབྱུ་གུ་གསུམ་ལག་གཙུག་ཕུད་དང་ལྡན་གཉིས་སྐྱེས་ཏེ། །གཉིས་ལ་དེ་བཞིན་གཤེགས་པས་འདི་སྐད་ཅེས་གསུངས་ཏེ། །སངས་རྒྱས་མཐུ་
ཡིས་ངུར་སྨྲིག་གོས་དང་ལྡན་པ་ཡི། །དགེ་སློང་ཉིད་དུ་སྐད་ཅིག་གིས་ནི་གྱུར་པའོ། །སློབ་མའི་སྡེར་བཅས་ཆ་ལུགས་དེ་ཡིས་དེ་གཉིས་ཀྱིས། །མགོ་བོ་དག་གིས་ཐམས་ཅད་མཁྱེན་ལ་མཆོད་པ་སྟེ། །དེ་ནས་སངས་རྒྱས་ཀྱིས་ཆོས་དེ་གཉིས་ལ་གསུངས་ཤིང་། །དུས་ཀྱིས་དེ་གཉིས་ཀྱིས་ནི་ངེས་
ལེགས་ཐོབ་པར་གྱུར། །དེ་ནས་འོད་སྲུངས་རིགས་ཀྱི་སྒྲོན་མ་གཉིས་སྐྱེས་ཀྱིས། །ཁ་དོག་དང་ནི་གཟུགས་དང་ནོར་དང་ཉེར་ལྡན་ལས། །རྫུ་འཕྲུལ་དང་ནི་བདག་ལྡན་བཟང་མོ་རྣམས་སྤངས་ནས། །ཐར་པའི་ཆེད་དུ་ངུར་སྨྲིག་བཟུང་ཞིང་གཤེགས་པའོ། །མདོག་བཟངས་གསེར་གྱི་མཆོད་སྡོང་དང་
མཚུངས་འབར་བ་ནི། །བུ་མངས་མིང་བཅས་མཆོད་རྟེན་དུ་ནི་ངེས་མཐོང་ནས། །དངོས་པོ་ཐམས་ཅད་སྤངས་ཤིང་ཡ་མཚན་དང་བཅས་པས། །ཐམས་ཅད་མཁྱེན་ལ་ཐལ་མོ་རབ་སྦྱར་མངོན་པར་སོང་། །ཐུབ་པ་ལ་ནི་རྒྱང་ནས་མགོ་བོས་ཕྱག་འཚལ་ཞིང་། །ཕྱག་འཚལ་ནས་ནི་ཇི་ལྟ་བ་བཞིན་མཐོན་
པོར་གསོལ། །བདག་ནི་སློབ་མ་བཅོམ་ལྡན་བདག་གི་སྟོན་པ་ལགས། །མུན་པ་རྣམས་སུ་བསྟན་པ་བདག་གི་སྒྲོན་མར་གྱུར། །གཉིས་སྐྱེས་སྐོམ་པ་སྐྱེས་ཤིང་ཉེ་བར་འོངས་པར་ནི། །མཁྱེན་ནས་བསམ་པ་རྣམ་དག་ཐར་འདོད་དེ་ལ་ནི། །སེམས་ལ་གསུང་གི་ཆབ་ཀྱིས་རབ་ཏུ་ཚིམ་མཛད་པ། །དེ་བཞིན་
གཤེགས་པས་ལེགས་པར་འོངས་ཞེས་བཀའ་སྩལ་ཏེ། །གསུང་འདི་ཡིས་ནི་ངལ་བ་རྣམ་པར་སོས་བཞིན་ཏེ། །ངེས་པར་ལེགས་པར་རྟོགས་པའི་ཆེད་དུ་གནས་པ་སྟེ། །དེ་ནས་དག་པའི་བདག་ཉིད་འདི་ལ་ཐུགས་རྗེ་ཅན། །ཐུབ་པས་ཆོས་ནི་མདོར་བསྡུས་པ་ཡིས་གསུངས་པའོ། །གང་ཕྱིར་ཐུབ་

172-1-64a

པས་ཆོས་ནི་ཕྲ་མོར་གསུངས་ཙམ་ན། །དེ་ཡིས་དོན་ནི་མཐའ་དག་ཡང་དག་ཐོབ་གྱུར་ཏེ། །དེ་ཕྱིར་ཡང་དག་རིག་དང་ན་ཚོད་ཆེ་གཉིས་ལས། །དགྲ་བཅོམ་འོད་སྲུངས་ཆེན་པོ་ཉིད་དུ་མཚན་གྱུར་ཏོ། །གང་གིས་ལུས་ལས་གཞན་དང་ཡང་ན་ལུས་སུ་ནི། །བདག་དང་བདག་གི་
བ་ཞེས་བདག་ཏུ་རྟོགས་པ་སྟེ། །དེ་ཡིས་བདག་ཏུ་ལྟ་བ་དེ་ནི་ངེས་སྤངས་ཤིང་། །ཉི་ཚེ་བ་མིན་སྡུག་བསྔལ་འདི་ནི་མཐོང་བར་གྱུར། །ཚུལ་ཁྲིམས་བརྟུལ་ཞུགས་དག་གིས་དག་པར་བྱེད་ཅེས་གང་། །རྒྱུ་མེད་པ་དང་རྒྱུ་ལས་དེ་ཡིས་རྟོགས་པ་སྟེ། །སྡུག་བསྔལ་ཉིད་དང་ལམ་ནི་ཡང་དག་ཐོབ་ནས་ཏེ། །ཚུལ་
ཁྲིམས་དང་ནི་བརྟུལ་ཞུགས་མཆོག་ཏུ་མ་བཟུང་ངོ་། །ཕྱིན་ཅི་ལོག་ཏུ་གྱུར་པར་སོང་བ་གང་གིས་ནི། །མངོན་དུ་བསྐོར་ཞིང་མཆོག་ནི་རབ་ཏུ་ཐོབ་མ་ཡིན། །བདེན་པ་བཞི་པོའི་གོ་འཕང་རྣམས་ནི་མཐོང་གྱུར་ནས། །ཐེ་ཚོམ་སོམ་ཉིར་གྱུར་ཏེ་ཡང་དག་མཆོད་པར་གྱུར། །འདོད་པ་གང་རྣམས་སུ་ནི་ཡང་དག་
རྒྱར་ཉིད་དང་། །བརྒྱལ་བར་གྱུར་དང་བརྒྱལ་བར་འགྱུར་ཉིད་འཇིག་རྟེན་པ། །མི་གཙང་བདེན་པ་མ་ཡིན་དེ་རྣམས་དེས་ཤེས་ནས། །འདོད་ཆགས་ཤེས་བྱའི་ཡུལ་དེ་སྤངས་པར་གྱུར་པའོ། །དེ་བཞིན་དུ་ནི་བྱམས་པར་གྱུར་པའི་སེམས་ཀྱིས་དེས། །བཤེས་དང་བཤེས་མིན་རྣམས་སུ་ཁྱད་པར་མེད་པ་སྟེ། །
འབྱུང་པོ་ཀུན་ལ་རྗེས་སུ་བརྩེ་བ་བྱས་པ་ཡིས། །ནད་དུ་སོང་བའི་གནོད་སེམས་སྤངས་པར་གྱུར་པའོ། །གཟུགས་ལ་བརྟེན་པ་རྣམས་དང་གྲོང་ཁྱེར་བརྟེན་པ་རྣམས། །སྣ་ཚོགས་ཉིད་དང་ལྡན་པའི་འདུ་ཤེས་རྣམས་སྤངས་ནས། །དེས་ནི་གཟུགས་ཀྱི་ཁམས་སུ་ཆགས་པ་རྣམ་བཅོམ་སྟེ། །གཟུགས་ལ་
འཇུག་པའི་ཉེས་པ་རྣམས་ནི་རྟོགས་ནས་སོ། །རྨོངས་ལས་སྙོམས་འཇུག་རྣམས་སུ་ཐར་པའི་འདུ་ཤེས་དང་། །གཟུགས་མེད་མཛད་པ་ཅན་དུ་རྟོགས་ནས་ནི། །ཞི་ཞིང་མཚན་མ་མེད་པའི་སེམས་ནི་གཟུང་ནས་སུ། །གཟུགས་མེད་སྲེད་པ་ལས་ནི་ཆགས་དང་བྲལ་བར་སོང་། །ཆུ་བོ་སིན་དྷུའི་ཤུགས་
ཆེན་རབ་ཏུ་འཇུག་པ་བཞིན། །སེམས་ཀྱིས་གཡོ་ཞིང་སྐྱོད་པར་བྱེད་པ་ཤེས་ནས་ནི། །བརྟན་པའི་བརྟེན་ལས་རྒོད་པ་རྣམ་པར་སྤངས་པ་སྟེ། །ཞི་ཞིང་རྫིང་བུ་གང་བ་བཞིན་དུ་གནས་པར་གྱུར། །སྙིང་པོ་མེད་པའི་ཕྱིར་དང་འགོད་པའི་ཆོས་ཉིད་ཕྱིར། །བདག་མེད་ཉིད་ཕྱིར་དངོས་རྣམས་ཡང་དག་རབ་མཐོང་ནས། །

172-1-64b

ཁྱད་འཕགས་ཉིད་དང་མཉམ་དང་མཆོག་ཉིད་མཐོང་བ་སྟེ། །ང་རྒྱལ་རྣམ་པར་སྤངས་ནས་ཡོད་མ་ཡིན་ཞེས་རྟོགས། །ཡེ་ཤེས་མེ་ཡིས་མི་ཤེས་མུན་པ་རྣམས་བཅོམ་ནས། །ཟད་པ་ཅན་དང་ཟད་པ་མེད་པར་སྣ་ཚོགས་མཐོང་། །རྣལ་འབྱོར་གྱིས་ནི་རིག་པ་ཉིད་ནི་ཡོངས་བསྒོམས་ནས། །མ་རིག་པ་ནི་
མཐའ་དག་ཇི་ལྟ་བ་བཞིན་སྤངས། །མཐོང་དང་བསྒོམ་པ་དག་གིས་ཀུན་དུ་སྦྱོར་བ་ནི། །བཅུ་པོ་འདི་དག་མཐའ་དག་རྣམས་ཀྱིས་རྣམ་པར་གྲོལ་གྱུར་ཅིང་། །ཐལ་མོ་སྦྱར་བྱས་སངས་རྒྱས་ཉིད་ལ་ལྟ་བཞིན་དུ། །བྱ་བ་ཀུན་བྱས་རང་བཞིན་གནས་ཏེ་གནས་པར་གྱུར། །སྐར་མ་གསུམ་གྱིས་གནས་སྐབས་
གསུམ་སྐྱོང་རྗེས་སྐྱེས་ལྷ་དང་ནི། །ལྡན་པའི་ལྔ་གསུམ་ཚེས་ཀྱི་དུས་སུ་སྐར་མའི་རྒྱལ་པོ་བཞིན། །གསུམ་ནི་ཆུད་ཟོས་གྱུར་ཅིང་གསུམ་ནི་ལྷག་པར་ཐོབ་པ་ཡི། །གསུམ་རིག་སློབ་མ་གསུམ་གྱིས་བདེ་བར་གཤེགས་པ་རྣམ་པར་མཛེས། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས།
ཉན་ཐོས་ཆེན་པོ་རབ་ཏུ་གཤེགས་པར་མཛད་པའི་ལེའུ་སྟེ་བཅུ་བདུན་པའོ།།       །།དེ་ནས་འགའ་ཞིག་ཚེ་ན་ནོར་ལྡན་ཁྱིམ་བདག་ནི། །སྐལ་བ་མེད་པ་རྣམས་ལ་ནོར་ནི་རབ་སྦྱིན་པ། །བཟང་སྦྱིན་ཞེས་ནི་རབ་ཏུ་གྲགས་པའི་མིང་ལྡན་པ། །བྱང་ཕྱོགས་ཡུལ་ཀོ་ས་ལ་རྣམས་ནས་དེར་སོང་
གྱུར། །དེ་ཡིས་དེར་ནི་ཐུབ་པ་བཞུགས་པ་ཐོས་པ་སྟེ། །ཐོས་ནས་བལྟ་བར་འདོད་པས་མཚན་མོ་རབ་ཏུ་སོང་། །རྣམ་དག་སེམས་པ་དེས་ནི་རབ་སླེབ་རབ་མཁྱེན་ནས། །རབ་ཏུ་ཕྱག་བྱས་པ་ལ་བདེ་བར་གཤེགས་པས་བསྟན། །གང་ཕྱིར་ཆོས་ལ་བསྒོམས་པས་ཉིད་ནི་རྣམ་སྤངས་ནས། །བློ་ལྡན་
མཚན་མོར་བདག་ལ་ལྟ་འདོད་རབ་སླེབ་སྟེ། །ད་ལྟ་ཉིད་དུ་འོངས་པ་དེ་ཡི་དེ་མ་ཐག །ངེས་པར་ལེགས་པའི་མགྲོན་འདི་རབ་ཏུ་ལོང་མཛོད་ཅིག །གང་ཞིག་ཁྱོད་ཀྱིས་ལྷག་བསམ་གང་ཞིག་བསྟན་པ་དང་། །བདག་གིས་གྲགས་པ་ཉིད་ལས་གང་ཞིག་དང་བ་དང་། །གང་ཞིག་སྔོན་གྱི་རྒྱུ་ལས་བློ་གྲོས་རབ་
ཞུགས་ཏེ། །དེས་ནི་ཡོན་ཏན་ཆེན་པོ་རྣམས་ཀྱི་སྣོད་ཡིན་ནོ། །དེ་ཕྱིར་འཇིག་རྟེན་དག་ན་གྲགས་དང་གཞན་དུ་ནི། །འབྲས་བུ་སྦྱིན་པ་མཆོག་ལས་བྱུང་བར་རིག་ནས་ནི། །བཀུར་སྟི་བྱས་ནས་དུས་སུ་སྙོམས་པའི་བདག་ཉིད་ཀྱིས། །ཆོས་ལས་ཐོབ་པའི་ནོར་ནི་སྦྱིན་པར་བྱ་བའོ། །ཚུལ་ཁྲིམས་ཡང་དག་

172-1-65a

བླངས་ནས་སྤྱད་པར་བྱ་བ་སྟེ། །ཚུལ་ཁྲིམས་ཉིད་ནི་བསྲུང་བ་དང་ནི་རྒྱན་ཡིན་ཞིང་། །འོག་ཏུ་སོང་བ་རྣམས་ཀྱི་རྣམ་པར་ལྡོག་བྱེད་དོ། །ནམ་མཁའི་སྟེང་གི་ངེས་པར་རྫོགས་པ་པོ་ཉིད་ཡིན། །འདོད་པ་རྣམས་སུ་གཅིག་མིན་ཞེས་པས་རྗེས་བཅིངས་པའི། །ཡོངས་སུ་ཚོལ་བ་ལ་
སོགས་སྐྱོན་རྣམས་ཐོས་ནས་ནི། །ངེས་པར་འབྱུང་བའི་ཆོ་གར་ཡོན་ཏན་རྣམ་ཤེས་ནས། །རྣམ་དབེན་ལས་སྐྱེས་ཤི་བའི་བདེན་པ་བསྙེན་པར་མཛོད། །འཆི་བས་ཉེ་བར་གཟིར་ཞིང་རྒ་བས་ཟིལ་ནོན་པའི། །འཇིག་རྟེན་རབ་ཏུ་བསྐོར་བ་ཡང་དག་ཡོངས་ཤེས་ནས། །ཞི་བ་སྐྱེ་བ་མེད་ཕྱིར་འབད་པ་མཛོད་ཅིག་དང་། །
སྐྱེ་བ་བདེན་པ་མེད་ན་རྒ་མེད་འཆི་བ་མེད། །ཇི་ལྟར་མི་རྣམས་ལ་ནི་མི་རྟག་བདག་ཉིད་ཀྱིས། །རབ་ཆགས་སྡུག་བསྔལ་མངོན་སུམ་དུ་ནི་རིག་མཛོད་ལ། །དེ་བཞིན་ལྷ་རྣམས་ལ་ཡང་སྡུག་བསྔལ་རིག་མཛོད་དང་། །འཇུག་པ་རྟག་པ་ཉིད་ནི་སུ་ཡང་ཡོད་མ་ཡིན། །གང་དུ་མི་རྟག་པ་ཉིད་དེར་ནི་སྡུག་བསྔལ་ཞིང་། །
གང་དུ་རང་ཉིད་མེད་པ་དེར་ཡང་སྡུག་བསྔལ་ཏེ། །གང་དུ་བདག་ཅེས་པ་དང་བདག་གི་བ་ཞེས་པ། །དེ་ཚེ་མི་རྟག་སྡུག་བསྔལ་བདག་མེད་གང་ལ་ཡིན། །དེ་ཕྱིར་སྡུག་བསྔལ་ལས་ནི་སྡུག་བསྔལ་འདི་དང་ནི། །མཚན་མ་ལས་ནི་འདི་ཡི་མཚན་མ་ལྟོས་མཛོད་ལ། །རྣམ་པར་ཉེ་བར་ཞི་ལས་སྡུག་བསྔལ་ཞི་བ་
དང་། །ལམ་ལས་ཁྱོད་ཀྱི་ལམ་ནི་དགེ་བ་ཤེས་པར་གྱིས། །འགྲོ་བ་གཡོ་བ་སྡུག་བསྔལ་འདི་ནི་ཤེས་ནས་སུ། །མེ་དང་རབ་མཚུངས་དུས་ཀྱི་མེ་ཡིས་འཇིག་རྟེན་འདི། །མཐའ་དག་རབ་ཏུ་ཚིག་པར་ཡོངས་སུ་རྟོགས་བཞིན་དུ། །སྲིད་དང་སྲིད་མིན་རྣམས་སུ་སྨོན་པ་མེད་པར་གྱིས། །སྟོང་པ་ཉིད་དང་བདག་
མེད་བདག་གི་བ་མེད་པ། །སྒྱུ་མ་དང་མཚངས་འཇིག་རྟེན་འདི་ནི་ཤེས་བྱས་ནས། །འདུ་བྱེད་ཙམ་ཞིག་རབ་ཏུ་ཡོངས་སུ་རྟོགས་བཞིན་དུ། །ལུས་འདི་ལ་ནི་ཁམས་ཀྱི་འདུ་ཤེས་ཉིད་དུ་གྱིས། །སེམས་ནི་སྲིད་པ་གཡོས་ལས་ཡང་དག་གཡོས་ནས་དང་། །འཁོར་བའི་འགྲོ་བ་རྣམ་པ་སྣ་ཚོགས་མཐོང་ནས་
ནི། །རྟོག་པ་མེད་ཅིང་ཞི་ལ་བདེན་ཞིང་ཆགས་མེད་པར། །སེམས་ནི་སྙོམས་ཤིང་མཚན་མ་མེད་པ་བསྙེན་པར་གྱིས། །དེ་ནས་དྲང་སྲོང་ཆེན་པོའི་ཆོས་དེ་ཐོས་པ་ལས། །ཆོས་ཀྱི་ཆོ་གའི་སྔོན་གྱི་འབྲས་བུ་ཐོབ་གྱུར་ཞིང་། །གང་ཞིག་ཐོབ་ནས་འདི་ཡི་སྡུག་བསྔལ་ལས་ལྷག་མ། །རྒྱ་མཚོ་ཆེན་པོ་ལས་ནི་ཐིགས་པ་

172-1-65b

  གཅིག་བཞིན་གྱུར། །ཆགས་བྲལ་རྣམས་ཀྱི་དགོན་པར་ཡང་དག་གནས་ཀྱང་ངམ། །ལུས་མེད་རྣམས་ཀྱིས་སྲིད་རྩེར་ཡང་དག་གནས་ན་ཡང་། །ནགས་སམ་ལྷ་ན་དེ་ཉིད་མཐོང་མིན་མ་ཡིན་ལ། །ཁྱིམ་ན་གནས་པ་ན་ཡང་ལྟ་བས་དགེ་ལེགས་གྱུར། །རྣམ་པ་སྣ་ཚོགས་ལྟ་བའི་དྲ་བ་རྣམས་ཀྱིས་
དང་། །འཁོར་བའི་སྡུག་བསྔལ་རྣམས་ཀྱིས་དེ་རྣམས་རྣམ་མི་འགྲོལ། །དེ་ཕྱིར་རབ་ཏུ་ཉམས་ཤིང་དེ་ཉིད་མ་མཐོང་བར། །ཆགས་པ་རྣམ་པར་བསལ་ནས་ཁྱད་པར་འཕགས་པར་གཤེགས། །ལྟ་བ་ལེགས་སྐྱེས་དེས་ནི་ལྟ་བ་ངན་དེ་རྣམས། །སྟོན་ཀའི་སྤྲིན་གྱིས་རྡོ་ཡི་ཆར་བཞིན་སྤངས་པ་སྟེ། །དབང་ཕྱུག་ལ་
སོགས་མི་མཐུན་རྒྱུ་ལས་མ་ཡིན་ཞིང་། །དེས་ནི་འཇིག་རྟེན་རྒྱུ་མེད་པར་མིན་ཞེས་རྟོགས་སོ། །དེ་ཕྱིར་མི་མཉམ་རྒྱུར་ནི་འཐད་པ་མ་ཡིན་ཞིང་། །རྒྱུ་མེད་པར་ནི་འགལ་བ་ཆེན་པོ་ཡོད་པ་ཉིད། །འདིར་ཡང་རིགས་པ་ཤེས་པས་སོ་སོར་མཐོང་བ་སྟེ། །ཐེ་ཚོམ་མེད་པས་དེ་ཉིད་མཐོང་བ་ཀྱེ་མ་ཅི། །གལ་
ཏེ་དབང་ཕྱུག་གིས་ནི་འགྲོ་བ་སྐྱེད་གྱུར་ན། །འགྲོ་བ་རིམ་གྱིས་རབ་ཏུ་འཇུག་པ་མ་ཡིན་ལ། །སྐྱེ་དགུ་རྣམས་ཀྱི་འཁོར་བའི་འཁོར་ལོ་མ་ཡིན་ཞིང་། །གང་དུ་གང་ཞིག་བསྐྱེད་ནས་དེ་དང་དེ་ཉིད་འགྱུར། །ལུས་ཅན་རྣམས་ཀྱིས་མི་འདོད་ཐོབ་པ་མ་ཡིན་ཞིང་། །དེ་ཡི་བདག་ཉིད་རྣམས་ཀྱིས་འདོད་པའི་སྤྱོད་པ་
མེད། །གང་ཞིག་ལུས་ཅན་རྣམས་ཀྱི་དགེ་དང་མི་དགེར་གྱུར། །དེ་ནི་དབང་ཕྱུག་ཉིད་ཕྱིར་དབང་ཕྱུག་ལ་ཡིན་ནོ། །དེ་ཡི་དབང་ཕྱུག་ཉིད་ལ་ཐེ་ཚོམ་འགྱུར་མིན་ཞིང་། །དེར་ནི་མི་རྣམས་དག་གིས་བྱམས་པ་ཕ་བཞིན་འགྱུར། །དེ་ལ་ཉམ་ཐག་པས་ནི་སྨོད་པ་སྨྲ་ན་ཞིང་། །ལྷ་རྣམས་དེ་དང་དེ་ལ་འཇིག་རྟེན་མཆོད་མ་ཡིན། །
གལ་ཏེ་འདི་མི་བསྐྱེད་ལ་དགོངས་པར་གྱུར་ན་ནི། །བྱ་ལྡན་ཉིད་ཕྱིར་དེང་འདིར་དབང་ཕྱུག་མ་ཡིན་ཞིང་། །གལ་ཏེ་འདི་ཡིས་འཇུག་ལ་འདོད་པར་གྱུར་ན་ནི། །དེ་ཉིད་དབང་ཕྱུག་ཡོད་པ་ཉིད་ལ་བྱེད་པར་འགྱུར། །ཅི་སྟེ་འདི་ཡི་སྐྱེ་ལ་ནུས་པ་ཅུང་ཞིག་མེད། །བྱིས་པ་བཞིན་དུ་འདི་ཡིས་སྤྱོད་རྣམས་རྒྱུ་མེད་དོ། །གལ་
ཏེ་དབང་ཕྱུག་གི་ནི་བདག་ལ་མངའ་ཉིད་མེད། །འཇིག་རྟེན་བསྐྱེད་ལ་འདི་ཡི་སྟོབས་དེ་ཅི་ཞིག་ཡོད། །ཇི་ལྟར་འདོད་ལ་གལ་ཏེ་བདེ་སྡུག་ལ་བསྙེན་ན། །འབྱུང་པོ་རྣམས་ནི་འཇིག་རྟེན་ན་དེས་བྱས་པ་ཉིད། །གང་ཕྱིར་འདོད་ལ་ཆགས་པ་ཁོང་ཁྲོ་ལ་འཇུག་སྟེ། །དེ་ཕྱིར་དེ་ཡི་དབང་ཉིད་ཡོད་པ་མ་ཡིན་ནོ། །

172-1-66a

།དེའི་རྟེན་ཉིད་ལ་སེམས་མེད་རྣམས་ཀྱིས་གནས་བྱ་སྟེ། །སྐྱེས་བུའི་འབད་རྩོལ་ཚད་མར་གྱུར་པ་ཉིད་ཡིན་ནོ། །ལས་འབྲས་མེད་པར་འགྱུར་ཞིང་ལུང་ནི་བྱས་མིན་ལ། །ལས་ཀྱི་སྦྱོར་བ་རྣམས་ནི་དེ་ཡི་རྟེན་ཡིན་ན། །གལ་ཏེ་དབང་ཕྱུག་རང་གི་ལས་ཀྱིས་འགྱུར་ན་ནི། །ཐུན་མོང་གྱུར་པའི་ལས་
ལ་དབང་ཕྱུག་གྱུར་མ་ཡིན། །ཅི་སྟེ་དེ་ཡི་ཁྱབ་བདག་རྒྱུ་མེད་གྱུར་ན་ནི། །འགྲོ་བ་ཀུན་གྱི་དབང་ཕྱུག་ཉིད་ནི་རབ་ཏུ་གྲུབ། །ཅི་སྟེ་དེ་ཡི་དབང་ཕྱུག་ཉིད་གཞན་ལས་ཡིན་ཞིང་། །དེ་ཉིད་ཀྱི་ཡང་བྱེད་པོའི་དབང་ཕྱུག་གཞན་ཡིན་ལ། །དེ་ཡིས་གཞན་ཞེས་དེ་ལྟར་འདིར་ནི་རྣམ་གཞག་མེད། །དེ་ཕྱིར་འགྲོ་བ་སྐྱེད་པ་ཡོད་
པ་མ་ཡིན་ཉིད། །དབང་ཕྱུག་སྐྱེད་པོར་གྱུར་ན་རིགས་པས་ཐ་དད་དུ། །རྣམ་པར་འགལ་བ་རྣམ་པ་དུ་མ་མཐོང་བ་སྟེ། །དེ་ཡི་ཕྱིར་ཡང་རང་བཞིན་ལ་ནི་ཉེས་པ་དེ། །སླར་ཡང་རབ་ཏུ་ཆགས་པར་འགྱུར་བ་ཉིད་ཡིན་ནོ། །རྒྱུ་ཤེས་རྣམས་ཀྱི་རྟེན་ནི་ཅུང་ཟད་རྣམ་ལོག་པའོ། །རྒྱུ་ནི་བྱ་བའི་ཆོ་གར་སྨྲ་བ་མ་ཡིན་ཞིང་། །བྱ་
བའི་ཆོ་གར་ས་བོན་ལ་སོགས་དེ་དང་དེ། །ལྟོས་པ་ཡིན་ཏེ་དེ་ཕྱིར་རང་བཞིན་རྒྱུ་མ་ཡིན། །འབྲས་མི་རྫོགས་པར་བྱེད་པ་པོ་ནི་གཅིག་པ་ཉིད། །འགའ་ཞིག་གི་ཡང་རྒྱུ་ནི་ཅུང་ཟད་ཡོད་མ་ཡིན། །གཅིག་གི་བདག་ཉིད་ཅན་གྱི་རང་བཞིན་རབ་བསྟན་ཏེ། །དེ་ཕྱིར་རབ་ཏུ་འཇུག་ལ་རང་བཞིན་རྒྱུ་མ་ཡིན། །གང་གི་རང་
བཞིན་གྱིས་ནི་ཁྱབ་པ་ཉིད་འདོད་པ། །དེ་ཡི་བྱ་བ་མེད་པ་ཉིད་ཀྱང་རབ་ཆགས་ཤིང་། །བྱ་བ་མ་གཏོགས་འབྲས་བུའི་ཆོ་ག་མཐོང་མིན་ཏེ། །དེ་ཡི་ཕྱིར་ཡང་བསྐྱེད་ལ་རང་བཞིན་རྒྱུ་མ་ཡིན། །དེ་ཡི་ཁྱབ་པ་པོ་ཉིད་ལ་ནི་རྒྱུ་ཉིད་ཕྱིར། །ཐམས་ཅད་ལས་ནི་ཐམས་ཅད་རྒྱུན་མི་འཆད་པར་འགྱུར། །འབྲས་བུའི་རབ་ཏུ་
འཇུག་ལ་ངེས་པ་མཐོང་བ་སྟེ། །དེ་ཕྱིར་སྐྱེད་པ་ལ་ནི་རང་བཞིན་རྒྱུ་མ་ཡིན། །ཇི་ལྟར་འདི་ཡི་ཡོན་ཏན་མེད་ཉིད་གྲུབ་པ་སྟེ། །དེ་ལྟར་འབྲས་བུ་ལ་ནི་ཡོན་ཏན་མེད་ཉིད་འགྱུར། །རྣམ་འགྱུར་ཡོན་ཏན་ཅན་རྣམས་འཇིག་རྟེན་ན་མཐོང་སྟེ། །དེ་ཕྱིར་རབ་ཏུ་འཇུག་ལ་རང་བཞིན་རྒྱུ་མ་ཡིན། །རྟག་པའི་རྒྱུ་ལས་
ཁྱད་པར་འགྱུར་བ་མ་ཡིན་ཕྱིར། །རྣམ་འགྱུར་ལ་ནི་ཐ་དད་ཡོན་ཏན་ཉིད་མ་ཡིན། །རྣམ་འགྱུར་ལ་ནི་ཐ་དད་ཡོན་ཏན་ཞུགས་པ་སྟེ། །དེ་ཕྱིར་རང་བཞིན་ལས་ནི་སྐྱེད་པ་རིགས་མ་ཡིན། །རང་བཞིན་གྱིས་ནི་བསྐྱེད་པའི་བདག་ཉིད་ཅན་ཉིད་ལ། །འབྲས་བུ་རྣམས་སུ་ཉམས་པའི་རྒྱུ་ནི་གྲུབ་མ་ཡིན། །གང་

172-1-66b

ཕྱིར་རྣམ་འགྱུར་གྱི་ནི་ཉམས་པ་མཐོང་བ་སྟེ། །དེ་ཕྱིར་རྟོགས་པར་བྱ་བ་རྒྱུ་ནི་གཞན་ཉིད་དོ། །ནུས་པར་གྱུར་པའི་སྦྱོར་ལ་ཤིན་ཏུ་མཐར་ཐུག་པའི། །ཐར་པ་འདོད་པའི་སྡོམ་བརྩོན་རྣམས་ཀྱི་མ་ཡིན་ཞིང་། །སྐྱེ་དགུ་རྣམས་ཀྱི་རང་བཞིན་རབ་ཏུ་འཇུག་པའི་ཕྱིར། །གང་ལས་ཐར་པའི་ཆེད་དང་ཕ་རོལ་གནོན་
པར་གྱུར། །སྐྱེད་པའི་བདག་ཉིད་རང་བཞིན་གྱིས་ནི་ངེས་ཉིད་ཕྱིར། །དེ་ཡི་བདག་ཉིད་རྣམ་འགྱུར་ལ་ནི་ངེས་ཉིད་ཡིན། །འཇིག་རྟེན་དག་ན་རྣམ་འགྱུར་ལ་ནི་བརྟན་ཉིད་མེད། །དེ་ཕྱིར་རང་བཞིན་གྱིས་ནི་སྐྱེད་པར་རིགས་མ་ཡིན། །སེམས་ཀྱི་སྤྱོད་པ་མི་གསལ་རང་བཞིན་ཞེས་བྱ་ཞིང་། །རྣམ་འགྱུར་
གསལ་བ་འདི་ནི་དེ་ནས་གྲགས་པ་སྟེ། །དེ་ཕྱིར་རབ་ཏུ་འཇུག་ལ་རང་བཞིན་རྒྱུ་མིན་ཞིང་། །གསལ་བའི་རྒྱུ་ལ་འདིར་ནི་འབྲས་བུ་གྲུབ་པ་ཉིད། །སེམས་མེད་རང་བཞིན་ལས་ནི་སེམས་དང་བཅས་པ་ཡི། །རྟ་གླང་བོང་བུ་ལ་སོགས་འབྲས་བུ་རིགས་པ་མ་ཡིན་ཞིང་། །སེམས་དང་རྣམ་པར་བྲལ་བའི་རྒྱུ་
རྣམས་དག་ལས་ནི། །སེམས་དང་ལྡན་པ་ཅུང་ཟད་ཞིག་ནི་འཇུག་མ་ཡིན། །གལ་ཏེ་འགྲོ་བ་སྐྱེད་ཕྱིར་དུས་ནི་ངེས་པ་སྟེ། །དེ་ཕྱིར་ཡོངས་སུ་རྟོག་བྱེད་རྣམས་ཀྱིས་ཐར་པ་མེད། །གང་ཕྱིར་སྐྱེ་དགུ་རྣམས་ཀྱི་མཐའ་ནི་བྱས་མིན་ཏེ། །དེ་ཕྱིར་འཇིག་རྟེན་རྒྱུན་ཆད་མེད་པར་སྐྱེ་བར་འགྱུར། །གང་ཞིག་
ཡོན་ཏན་རྣམས་ཀྱི་གཅིག་དང་དུ་མས་བྱས། །རྗེས་རྣམས་སུ་ནི་རང་ཉིད་ངེས་པ་མཐོང་བ་སྟེ། །གལ་ཏེ་རྒྱུ་གཅིག་ཉིད་དུ་གནས་པར་གྱུར་པ་ན། །དེ་ཡང་ཐ་དད་ཁྱད་པར་གྱུར་པ་མ་ཡིན་ནོ། །གང་ཞིག་སྨིན་པ་ལས་སྐྱེས་རྫས་ཀྱི་ཆོ་གར་སར། །ཡོན་ཏན་ཤེས་པས་ཡོན་ཏན་ཐ་དད་ཉིད་དུ་མཐོང་། །གང་
ཕྱིར་རྒྱུ་ནི་ཁྱད་པར་མིན་པ་འདོད་པ་སྟེ། །སྟོང་པའི་རྫས་རྣམས་སུ་ཡང་ངེས་པར་གྱུར་པ་ཉིད། །གང་གི་མི་གསལ་བ་ལས་རྫས་ནི་འཆར་བ་སྟེ། །དེ་ཡི་རྗེས་སུ་དཔག་པ་ངེས་པར་གྲུབ་མ་ཡིན། །འབྲས་བུ་གསལ་བ་ཡི་ནི་ཡང་དག་རབ་འཇུག་པ། །མི་གསལ་བ་ལས་གང་གིས་མངོན་དུ་མཐོང་མ་
ཡིན། །གསལ་བ་གཉིས་པ་དག་ལས་རབ་ཏུ་འཇུག་པ་བཞིན། །མི་གསལ་བ་ལས་གང་གི་འབྲས་བུ་དང་པོར་གྱུར། །དེ་ཡི་འདོད་པ་ལས་འདིར་མི་འདོད་ཆེན་པོའོ། །རང་བཞིན་ཉིད་ཀྱིས་ཉེས་པ་གཉིས་ནི་རབ་ཏུ་ཆགས། །ཇི་ལྟར་གསེར་གྱི་ཕྲེང་བ་ཁྱད་པར་འཕགས་པ་སྟེ། །དེ་ལྟར་རང་བཞིན་

172-1-67a

གྱི་ནི་རྣམ་འགྱུར་ཁྱད་པར་འཕགས། །འབྲས་བུ་ཁྱད་པར་ཡིན་ཞིང་རྒྱུ་ཡི་མ་ཡིན་ཏེ། །དེ་ཕྱིར་སྐྱེད་ལ་རང་བཞིན་རིགས་པ་མ་ཡིན་ནོ། །གལ་ཏེ་བྱ་བར་སྐྱེས་བུ་དེ་ནི་རྒྱུ་ཡིན་ན། །གང་གིས་ངེས་པར་གང་འདོད་དེས་དེ་འཐོབ་པར་འགྱུར། །འདོད་ཀྱང་ཁ་ཅིག་དོན་ནི་
འཐོབ་པ་མ་ཡིན་ལ། །མི་འདོད་ན་ཡང་དབང་མེད་འདིར་ནི་འཐོབ་པར་འགྱུར། །གང་ཞིག་བ་གླང་རྟ་བོང་རྔ་མོའི་སྐྱེ་གནས་འགྲོ། །མངའ་བདག་ཉིད་དུ་གྱུར་ན་དེ་ནི་བསྙེན་མིན་ཞིང་། །དེ་རུ་འགྲོ་བའི་སྡིག་པའི་ལས་ནི་བྱེད་པ་དང་། །སྡུག་བསྔལ་མི་འདོད་སུ་ཡིས་སྡུག་བསྔལ་བྱེད་པར་འགྱུར། །གལ་ཏེ་འཇིག་རྟེན་
དག་ན་སྐྱེས་བུ་བྱེད་པར་གྱུར། །སྡུག་བསྔལ་བྱེད་པ་མ་ཡིན་བདེ་བ་ཁོ་ན་བྱེད། །འདོད་པ་བྱེད་པར་འདོད་ཀྱང་མི་འདོད་བྱེད་པ་སྟེ། །དབང་ཕྱུག་ཆེན་པོར་འགྱུར་ན་མི་འདོད་སུ་ཡིས་སྤྱོད། །གང་ཚེ་མི་ནི་ཆོས་མིན་པ་ལས་རྣམ་འཇིགས་ཤིང་། །འབད་པས་ཆོས་ནི་རབ་ཏུ་སོན་པར་བྱེད་པ་ཉིད། །སྣ་ཚོགས་
ཉོན་མོངས་རྣམས་ཀྱིས་དབང་མེད་འཕྲོག་པ་སྟེ། །དེ་ཕྱིར་འདི་ན་མི་ནི་ཕ་རོལ་རྒྱུད་དུ་གྱུར། །གྲང་དང་དྲོ་དང་ཆར་དང་ཐོག་དང་གློག་སོགས་ཀྱི། །བྱ་བ་རྣམས་ནི་མི་ལ་བཟློག་ནས་མཐོང་བ་སྟེ། །གང་ཕྱིར་རང་དབང་མ་ཡིན་མི་ནི་གཞན་ལྡན་ཏེ། །དེ་ཕྱིར་བྱ་བ་རྣམས་སུ་སྐྱེས་བུ་དབང་ཕྱུག་མིན། །གང་ཚེ་
ས་བོན་ལས་དང་ས་ཆུའི་རྟེན་ལས་ནི། །དུས་སྦྱོར་རབ་ཏུ་འཇུག་ལ་ལོ་ཐོག་ཕུན་ཚོགས་ཤིང་། །མར་མེ་དག་ལས་རབ་གསལ་ཤིང་ལས་མེ་ཡིན་ཏེ། །རྒྱུ་མེད་ལས་ཡིན་ཞེས་པ་རྒྱུ་མེད་མ་ཡིན་ནོ། །རྒྱུ་མེད་པ་ལས་གལ་ཏེ་འགྲོ་བའི་རབ་འཇུག་ན། །མི་ཡི་བྱེད་པ་ཡིས་ནི་མེད་པར་འགྱུར་བ་སྟེ། །
ཐམས་ཅད་ཀྱིས་ནི་ཐམས་ཅད་ངེས་པར་འཐོབ་བྱེད་ཅིང་། །རྟག་ན་འདི་ནི་ཐམས་ཅད་དུ་ནི་སོང་བར་གྲུབ། །བདེ་དང་སྡུག་བསྔལ་གལ་ཏེ་རྒྱུ་མེད་ལས་ཡིན་ན། །གང་ཆར་ཀུན་གྱི་བདེ་དང་སྡུག་བསྔལ་སྐལ་མིན་ཞིང་། །རྒྱུ་མེད་ལས་ཀྱང་བདེ་དང་སྡུག་བསྔལ་རྟོགས་མིན་ཏེ། །དེ་ཕྱིར་རྒྱུ་མེད་ལས་
ཤེས་འདི་ནི་རྒྱུ་མ་ཡིན། །དེ་སྐད་ཅེས་པ་ལ་སོགས་མི་མཉམ་རྒྱུ་རྣམས་དེས། །འཇིག་རྟེན་རབ་ཏུ་འཇུག་ལ་རྒྱུ་རྣམས་ཤེས་མ་ཡིན། །རྒྱུ་མེད་པར་ནི་འཇིག་རྟེན་མཐོང་བ་མ་ཡིན་ཞིང་། །ཉེས་པ་འདི་རྣམས་རྒྱུ་མེད་ལས་ནི་ཡང་དག་རྟོགས། །བརྟན་པ་དང་ནི་གཡོ་བའི་འབྱུང་པོ་རྣམས་སུ་ཡང་། །

172-1-67b

དེ་དང་དེ་ལ་བརྟེན་ནས་དེ་དང་དེ་འབྱུང་སྟེ། །འཇིག་རྟེན་དག་ན་རྒྱུ་མེད་ཅི་ཡང་ཡོད་མིན་ཞིང་། །ཀུན་གྱི་རྒྱུ་ནི་འཇིག་རྟེན་པ་ཡིས་ཤེས་མ་ཡིན། །དེ་ནས་སྦྱིན་པ་བཟང་པོར་བྱིན་པའི་བཟང་བྱིན་དེས། །རྒྱ་ཆེའི་ཆོས་ཀྱིས་དམ་པའི་ཆོས་ནི་རྣམ་ཤེས་ནས། །གཡོ་བ་མེད་པའི་བློ་གྲོས་ངེས་པར་རབ་
དང་བས། །དྲང་སྲོང་ཆེན་པོ་ལ་ནི་ཚིག་འདི་གསལ་བའོ། །མཉན་ཡོད་རྟ་ལྗང་རྟ་རིད་ཀྱིས་བསྙེན་གྲོང་ཁྱེར་ནི། །བདག་གི་གནས་ཀྱི་ས་ནི་བསོད་ནམས་གྲགས་པ་ཅན། །དེར་ནི་བདག་གིས་ཁྱེད་ཀྱི་གནས་ནི་བྱེད་འདོད་དེ། །སྡིག་མེད་གནས་མཆོག་དམ་པ་དེ་ནི་བསྙེན་པར་མཛོད། །གང་ལྟ་ན་ཡང་
ཐུབ་པ་ཁྱེད་ཀྱི་གནས་སུ་སྙོམས་པ་ནི། །གཞལ་ཡས་ཁང་གི་ལོགས་སམ་རྣམ་དབེན་ནགས་སུ་སྟེ། །བདག་ལ་རྗེས་སུ་བརྩེ་ཕྱིར་གནས་ཀྱི་ཆེད་དུ་ནི། །དགྲ་བཅོམ་རབ་ཏུ་གཞེས་པར་མཛད་པར་འོས་པ་ལགས། །དེ་ནས་གཏོང་བར་ལྷག་པར་མོས་པ་འདི་ཡིས་ནི། །རྣམ་པར་གྲོལ་བའི་སེམས་ནི་
རྣམ་པར་མཁྱེན་ནས་ནི། །ཆགས་པ་མེད་པའི་བློ་མངའ་བློ་གྲོས་མཁྱེན་པ་ཡིས། །མཆོག་ཏུ་ཞི་བས་བློ་གྲོས་ཡང་དག་བཀའ་སྩལ་ཏོ། །སེམས་དཔའ་བརྟན་ཀྱེ་གང་ཞིག་རྫས་གློག་གཡོ་རྣམས་སུ། །ཁྱོད་ཀྱི་སེམས་དཔའ་གཏོང་ལ་ལྷག་པར་མོས་པ་སྟེ། །རང་བཞིན་གྱིས་ནི་སྦྱིན་ལ་དགའ་ཞིང་ཆོས་
ལ་དགྱེས། །དེ་ཉིད་མཐོང་བ་ཁྱེད་ལ་དེ་ནི་ངོ་མཚར་མིན། །གང་ཞིག་ཁྱིམ་ནི་ཚིག་ལས་ཕྱི་རོལ་འཐོན་བྱེད་པ། །དེ་ཡི་དོན་དེ་འཚིག་པར་བྱེད་པ་མ་ཡིན་ཏེ། །དེ་བཞིན་དུས་ཀྱི་མེ་ཡིས་འགྲོ་བ་ཚིག་པ་ན། །གང་གིས་གང་ཞིག་སྦྱིན་པ་དེ་ཡིས་དེ་ཉེར་འཐོབ། །དེ་ཕྱིར་རྣམ་སྤངས་སེམས་དཔའ་
རྣམས་ཀྱིས་སྦྱིན་པར་དང་། །ཡུལ་རྣམས་ཡང་དག་ལོངས་སྤྱོད་པར་ནི་ཤེས་པ་ཉིད། །བཀྲེན་པ་འཇིག་རྟེན་དག་ན་ཟད་པའི་སྐྱོན་མཐོང་བས། །ཉེ་བར་ལོངས་སྤྱོད་མ་ཡིན་འཇིགས་ལས་སྦྱིན་མ་ཡིན། །དུས་སུ་སྨོད་ལ་དོན་ནི་རྣམ་པར་གཏོང་བ་དང་། །དཔལ་དང་ང་རྒྱལ་ལས་ནི་དེ་བཞིན་གཡུལ་
འགྱེད་པར། །སེམས་དཔའ་ལྷག་པ་ཉིད་ཀྱིས་ཤེས་ཏེ་གཞན་གྱིས་མིན། །སེམས་དཔའ་ཡིས་ནི་སྦྱིན་པ་ཉིད་དང་གཡུལ་འགྱེད་དོ། །སྦྱིན་བྱེད་དགའ་བ་ཉིད་དུ་འགྲོ་ལ་འགྲོ་བ་སྟེ། །སྙན་པ་དང་ནི་དམ་པར་གྲགས་པ་རབ་ཏུ་འཐོབ། །སྦྱིན་པ་པོ་ཡོད་གང་ཞེས་དམ་པ་རྣམས་སྦྱིན་ནས། །ཡང་

172-1-68a

དག་བཀུར་བ་དང་ནི་མངོན་དུ་འགྲོ་བར་བྱེད། །དེ་བཞིན་འཇིག་རྟེན་དག་ན་བློ་གཏད་ཉིད་འགྱུར་ཞིང་། །མི་བཟད་པ་རྣམས་ལས་ཀྱང་ཉེས་པ་འཐོབ་མ་ཡིན། །བསོད་ནམས་རྣམས་ནི་བདག་གིས་བྱས་ཞེས་ཚིམ་པ་སྟེ། །འཆི་བའི་དུས་སུ་སྐྲག་པར་མངོན་པར་འགྲོ་མ་ཡིན། །
སྦྱིན་པའི་འབྲས་བུ་འདིར་ནི་མེ་ཏོག་ཙམ་ཞིག་སྟེ། །སྦྱིན་པ་པོ་ཡི་འབྲས་བུ་གཞན་ཉིད་རབ་ཏུ་འཐོབ། །འཁོར་བའི་འཁོར་ལོ་ལ་ནི་འཁོར་བའི་སྐྱེ་བོ་ཡི། །གཏོང་བ་དང་མཉམ་གཉེན་ནི་ཡོད་པ་མ་ཡིན་ནོ། །མི་ཡི་འཇིག་རྟེན་ན་དང་ལྷ་ན་སྐྱེས་པ་རྣམས། །གཏོང་བ་ལས་དང་མཉམ་པ་རྣམས་ལས་ལྷག་
པར་འགྱུར། །རྟ་དང་གླང་པོའི་སྐྱེ་གནས་སུ་ཡང་གནས་པ་རྣམས། །འབྲས་བུ་དེ་ནི་གཙོ་བོ་ཐོབ་པར་འགྱུར་བའོ། །སྦྱིན་པས་ལོངས་སྤྱོད་རྣམས་ཀྱིས་ཡོངས་སུ་འཛིན་པ་སྟེ། །ཚུལ་ཁྲིམས་ཀྱིས་བསྲུངས་མཐོ་རིས་སུ་ནི་འགྲོ་བར་འགྱུར། །ཡེ་ཤེས་སྔོན་དུ་འགྲོ་བ་ཅན་གྱི་ཞི་བ་ཡིས་ཀྱང་ནི། །
རྟེན་དང་བྲལ་བ་གང་ན་གྲངས་སུ་འགྲོ་བ་འགྲོ་མ་ཡིན། །འཆི་མེད་བདུད་རྩི་དེ་ཡིས་འཐོབ་པའི་ཆེད་དུ་ཡང་། །སྡོམ་པར་གྱུར་པ་རབ་ཏུ་སྦྱིན་པ་ཡིན་པ་ཉིད། །སྦྱིན་པ་དྲན་ནས་རབ་ཏུ་དགའ་བར་གྱུར་པ་སྟེ། །ཡིད་ནི་རབ་ཏུ་དགའ་ལས་ངེས་པར་ཏིང་འཛིན་ཡིན། །མཉམ་པར་གཞག་ན་ཡང་
དག་མཐོ་བ་འདི་རུ་ནི། །སྐྱེ་དང་འགོད་པ་ཤེས་པར་རིམ་གྱིས་འགྱུར་བ་སྟེ། །གཞན་ལ་སྦྱིན་པ་སྦྱིན་པའི་སྦྱིན་པ་པོ་ཡིས་ནི། །སྙིང་ལ་གནས་པའི་ཉོན་མོངས་རྣམས་ནི་བསྲབས་པར་འགྱུར། །གང་ཞིག་སྦྱིན་པ་བྱིན་བྱེད་དེ་ཡི་དོན་རྣམས་སུ། །ཆགས་པར་གྲགས་པ་དེ་ནི་དང་པོར་ཆོད་པ་
ཉིད། །གང་ལ་རབ་ཏུ་བྱམས་པའི་སེམས་ཀྱིས་སྦྱིན་པ་སྟེ། །དེ་ཕྱིར་ཞེ་སྡང་དང་ནི་ང་རྒྱལ་སྤངས་པར་གྱུར། །རབ་ཏུ་ལེན་པ་པོ་ནི་བདེ་ལྡན་རྣམས་མཐོང་ནས། །གང་ཞིག་འགའ་སྟེ་དེས་ན་སེར་སྣ་ཡོད་མ་ཡིན། །སྦྱིན་པ་པོས་ནི་སྦྱིན་པའི་འབྲས་བུ་མངོན་རྟོགས་ནས། །མེད་པ་ཉིད་དང་
མི་ཤེས་མུན་པ་འཇོམས་པ་པོ། །དེ་ཕྱིར་ཞི་བ་འཕགས་མིན་གྱིས་བསྙེན་སེར་སྣ་དང་། །སྲེད་པ་གང་ལས་སྦྱིན་པ་བྱེད་པས་བཅོམ་པ་སྟེ། །དེ་ནས་ཐར་པའི་ཡན་ལག་གྱུར་པ་སྦྱིན་པ་ནི། །ཡིན་ཞིང་ཉེས་པ་རབ་ཏུ་ཐོབ་ཕྱིར་ཐར་པའོ། །ཇི་ལྟར་གཞན་རྣམས་གྲིབ་མའི་དོན་དུ་ཤིང་འདོད་

172-1-68b

ཅིང་། །ཁ་ཅིག་འབྲས་བུའི་དོན་དུ་གཞན་རྣམས་མེ་ཏོག་ཕྱིར། །དེ་ལྟར་སྦྱིན་པ་ཡོངས་སུ་སྦྱིན་པར་བྱེད་པ་སྟེ། །ཁ་ཅིག་ཞི་བའི་དོན་དུ་གཞན་རྣམས་ནོར་གྱི་ཕྱིར། །དེ་ཕྱིར་ཁྱད་པར་དུ་ནི་ཁྱིམ་ན་གནས་རྣམས་ཀྱིས། །སྦྱིན་པ་ཇི་ལྟར་ནུས་པ་མཆོག་ནི་གཏེར་ཡིན་ཞིང་། །སྦྱིན་པ་སྙིང་པོ་མེད་པའི་ནོར་
གྱི་སྙིང་པོ་སྟེ། །དམ་པ་རྣམས་ཀྱི་རྗེས་སུ་སོང་བ་ལམ་འདི་ཡིན། །བཟའ་བ་རབ་ཏུ་སྦྱིན་པར་སྟོབས་ནི་རབ་སྟེར་ཞིང་། །བགོ་བ་སྦྱིན་བྱེད་ལ་ཡང་ལུས་ནི་སྟེར་བའོ། །གང་གིས་དམ་པ་རྣམས་ལ་གནས་ནི་སྦྱིན་བྱེད་པ། །དེས་ཀྱང་འཇིག་རྟེན་དག་ན་ཐམས་ཅད་བྱིན་པ་ཡིན། །ཐེག་པ་སྦྱིན་བྱེད་
ལ་ཡང་བདེ་བ་བྱིན་པ་སྟེ། །མར་མེ་སྦྱིན་བྱེད་ལ་ནི་སྤྱན་མིག་སྦྱིན་པ་ཉིད། །དེ་ནས་དབྲོག་བྱ་མ་ཡིན་འཆི་མེད་རབ་སྦྱིན་ཞིང་། །གང་གིས་མཐར་ཐུག་གྱུར་པའི་ཆོས་ཀྱིས་སྟོན་པ་ཉིད། །ཁ་ཅིག་འདོད་པའི་ཆེད་དུ་སྦྱིན་པ་གཏོང་བ་སྟེ། །གཞན་ནི་དོན་གྱི་དོན་དུ་གཅིག་ནི་གྲགས་པའི་ཕྱིར། །
ཁ་ཅིག་མཐོ་རིས་དོན་དུ་གཞན་ནི་བརྩེ་བའི་ཕྱིར། །ཁྱོད་ཀྱི་སྦྱིན་པ་འདི་ནི་ཆགས་པ་མེད་པ་ཡིན། །དེ་ཕྱིར་ལེགས་སོ་ཁྱོད་ནི་སྲེད་པ་དེ་ལྟར་གྱུར། །གང་ཞིག་ཡང་དག་བསྒྲུབས་མཛོད་འདོད་པ་ཚིམ་པར་ཤོག །རྡུལ་བཅས་མུན་པ་དང་ལྡན་གང་ཁྱེད་འོངས་ནས་ནི། །ཡེ་ཤེས་རྣམ་དག་བློ་ནི་རབ་
ཏུ་འགྲོ་བར་འགྱུར། །དེ་ཉིད་དེ་བཞིན་གཤེགས་པས་ལམ་གྱི་ཡང་དག་པར། །དགའ་བ་བྱས་པ་དང་ཡང་གཞུག་པ་བྱས་པ་ནི། །གཙུག་ལག་ཁང་དེ་སྙིང་ལ་རྣམ་པར་བྱས་ནས་ནི། །ཉེ་རྒྱལ་དང་ནི་ལྷན་ཅིག་དུས་སུ་སོང་བར་གྱུར། །སོང་ནས་དེ་ན་ཀཽ་ཤཱམ་རྒྱལ་པོའི་ཁབ་དང་ནི། །གཙུག་
ལག་ཁང་གི་ས་ལ་སོ་སོར་ཡང་དག་རྒྱུས། །དཔལ་ལྡན་མཉམ་ཞིང་མཛེས་ལ་ཡིད་འོང་ཤིང་ལྡན་པ། །དེར་ནི་དེ་ཡིས་རྒྱལ་བྱེད་ཀྱི་ནི་ཚལ་མཐོང་ངོ་། །དེ་ནས་དེ་ཡི་དོན་དུ་རྒྱལ་བྱེད་ལ་ཞུས་ཏེ། །དེ་ཡིས་ཆགས་པ་ལས་ནི་དེ་ལ་མ་བྱིན་ནོ། །ཁྱོད་ཀྱིས་གལ་ཏེ་དོན་གྱིས་ཀུན་ནས་བཀྲམ་ན་ཡང་། །
ས་ནི་བདག་གིས་སྦྱིན་པ་མ་ཡིན་ཞེས་སྨྲས་སོ། །དེ་ནས་དེར་ནི་བཟང་སྦྱིན་གྱིས་དེ་ལ་སྨྲས་པ། །ཚལ་དེ་ལ་ནི་རིན་བྱས་ཤེས་ནི་མངོན་འདོད་དོ། །དེ་ནས་དེས་ནི་ནོར་གྱིས་ས་ནི་ཡོངས་གཡོགས་ནས། །ཆོས་ཀྱི་ཐ་སྙད་མཐོང་ཞིང་ཉོས་པར་གྱུར་པའོ། །དེ་ཡི་གཏོང་བ་དེ་ནི་མཐོང་ནས་རྒྱལ་བྱེད་ཀྱིས། །

172-1-69a

སངས་རྒྱས་ལ་ནི་མཆོག་ཏུ་རབ་ཏུ་དང་བ་བྱས། །ནགས་ཚལ་དེ་ཡི་ལྷག་མ་དག་ནི་ཀུན་ནས་ནི། །དེ་བཞིན་གཤེགས་པ་ལ་ནི་ཕུལ་བར་གྱུར་པའོ། །དེ་ནས་མགོན་མེད་ཟས་སྦྱིན་གྱིས་ནི་དྲང་སྲོང་ཆེན་པོ་ཡིས། །ཉེ་རྒྱལ་གྱིས་ནི་ངེས་པར་གཟིགས་པར་བྱ་བའི་དོན་
ལྡན་པར། །མྱུར་བའི་བློ་གྲོས་དང་ལྡན་མ་ཆགས་གྲོལ་བའི་སེམས་ཀྱིས་ནི། །མཛེས་ཤིང་དགེ་བ་མཆོག་གིས་གཙུག་ལག་ཁང་ནི་བྱེད་དུ་བཅུག །ནོར་གྱི་དབང་ཕྱུག་ཉིད་ཀྱི་གནས་ནི་འཕོས་པ་ལྟ་བུ་དང་། །བྱང་ཕྱོགས་ཀོ་ཤ་ལ་ཡི་ཁང་པའི་བདེ་བ་ལྟ་བུ་དང་། །དེ་བཞིན་གཤེགས་པ་
ཉིད་ཀྱི་གཞི་ནི་མཚུངས་པ་ལྟ་བུ་དང་། །རང་གི་ནོར་དང་སྟོབས་ཀྱི་དང་ནི་ལྟ་བ་ཡི་ཡང་ངོ་། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། མགོན་མེད་ཟས་སྦྱིན་ལ་རྗེས་སུ་སྟོན་པའི་ལེའུ་སྟེ་བཅོ་བརྒྱད་པའོ།།      །།དེ་ནས་ཐུབ་པ་སྣ་ཚོགས་ཐ་དད་བློ་ཅན་
གྱི། །སྟོན་པས་ཐམས་ཅད་ཡེ་ཤེས་ཀྱིས་ནི་ཟིལ་མནན་ནས། །བཅུ་ཕྱེད་ཕྲག་རི་ནས་དང་གྲོང་ཁྱེར་ནས་རིམ་གྱིས། །རྒྱལ་པོ་བུམ་པས་བསྙེན་པའི་གྲོང་ཁྱེར་དུ་གཤེགས་སོ། །དེ་ནས་སློབ་མ་སྟོང་ཕྲག་ཙམ་ནི་དུལ་བ་ན། །གཤེགས་སོ་དེས་ནི་ཡབ་ཀྱི་ཡུལ་ནི་རབ་ཏུ་ཐོབ། །དེ་
ནས་དེ་ལ་རྗེས་སུ་འཛིན་པ་མཛད་བཞེད་པ། །རང་གི་གྲོང་གི་གནས་ལ་མཐའ་རུ་བསྙེན་པའོ། །དེ་ནས་མདུན་ན་འདོན་དང་བློན་པོ་བློ་གྲོས་ཅན། །དགའ་བའི་གཏམ་ལ་དམ་པ་རྒྱུ་བ་དེ་རྣམས་ཀྱིས། །ཡོངས་སུ་རྫོགས་པའི་རབ་བརྙེས་འཕགས་པ་སྟེ། །ས་སྐྱོང་རྒྱལ་པོ་དེ་ལ་ཞུས་ཤིང་
གསོལ་བའོ། །དེ་ནས་དེ་ནི་འོངས་པ་ཐོས་ནས་ས་སྐྱོང་ནི། །དགའ་བ་ཡོངས་ལྡན་སེམས་ཀྱིས་བལྟ་བར་འདོད་པ་ཡིས། །གྲོང་ཁྱེར་བ་ནི་ཀུན་གྱིས་རྗེས་སུ་འགྲོ་བྱས་པ། །མྱུར་བས་བརྟན་པ་སྤངས་ཤིང་བསུ་བ་ལ་གཤེགས་སོ། །དྲང་སྲོང་དབུས་སུ་ཚངས་པ་བཞུགས་པ་བཞིན་དུ་
ནི། །སློབ་མས་བསྐོར་བ་དེ་ནི་རྒྱང་རིང་ནས་གཟིགས་ནས། །དྲང་སྲོང་ཆེན་པོའི་ཆོས་ལ་རྗེས་སུ་འགྲོ་བས་ནི། །ཤིང་རྟ་སྤངས་ནས་རྐང་པ་རྣམས་ཀྱིས་ཉེ་བར་གཤེགས། །མྱུར་བར་དེ་ཡི་ཉེ་ལོགས་སུ་ནི་ཡོངས་ཕྱིན་ནས། །ཐུབ་པ་མཐོང་བ་ཉིད་དེ་དེས་ནི་མ་སྨྲས་སོ། །དེ་ལ་བུ་ཞེས་སྨྲ་བར་

172-1-69b

ནུས་པ་མ་ཡིན་ཞིང་། །དེ་བཞིན་དགེ་སློང་ཞེས་ནི་ནུས་པ་མ་ཡིན་ནོ། །དེ་ནས་དེ་ཡི་དགེ་སློང་ཆ་ལུགས་དེ་མཐོང་ཞིང་། །བདག་ཏུ་སོང་བའི་སྣ་ཚོགས་དཔལ་ལ་བརྟགས་ནས་ནི། །དབུགས་རིང་བརྒྱུས་ནས་མཆི་མ་རྣམ་པར་བཏོན་པ་དེ། །དྲག་ཏུ་མུན་པར་གྱུར་ཅིང་རྣམ་པར་ཟློས་པ་ཉིད། །
ལམ་འགྲོ་སྐོམ་པར་གྱུར་པ་མངོན་པར་སོང་བ་ཡིས། །རྒྱང་རིང་དག་ནས་རྫིང་བུ་སྐམ་པོ་མཐོང་ནས་ལྟར། །རང་གནས་རྣམ་པ་དང་བྲལ་ཉེ་བར་ཉེར་བཞུགས་པ། །མཐོང་ནས་བདག་གི་ཉམ་ཐག་སྟོབས་ལྡན་མཆོག་ཏུ་གྱུར། །འཇིག་རྟེན་མཐའ་རུ་གནས་པའི་སེམས་གྱུར་ཐིམ་པ་ན། །སྡུག་པའི་
རྣམ་འགྱུར་རི་མོར་སོང་བ་ཇི་ལྟ་བར། །གཟུགས་དེ་ཉིད་ནི་མཐོང་བ་ན་ནི་བདག་ལ་ནི། །དགའ་བ་ཡོད་པ་མ་ཡིན་འདི་ལ་དགའ་བ་ཐལ། །གང་གིས་མཐའ་དག་རི་ཡིས་ཟླུམས་པས་ས་གཞི་ནི། །དང་པོའི་དུས་སུ་ང་ལས་ནུ་ནི་གནས་པ་བཞིན། །གང་ཞིག་དབང་པོ་ལ་ཡང་སློང་བར་འོས་མིན་པ། །
བདག་གི་དེ་ནི་ཕ་རོལ་རྣམས་ལ་སློང་མོས་འཚོ། །གངས་འདི་སྙིང་པོ་ལྷུན་པོ་ལས་ནི་ཁྱད་འཕགས་ཤིང་། །གསལ་བས་ཉི་མ་ལ་དང་མཛེས་པས་ཟླ་བ་ལ། །འགྲོས་ཀྱིས་གླང་པོ་ཆེ་ལ་དབྱངས་ཀྱིས་ཁྱུ་མཆོག་ལ། །དེས་ནི་སློང་མོ་ཟ་ཞིང་ས་ནི་རྫོགས་ལ་མིན། །དེ་ནས་བུ་ཡི་འདུ་ཤེས་ཀྱིས་ནི་འཕྱོ་
བ་ཉིད། །རྒྱལ་པོའི་བསམ་པ་འདི་ནི་རྣམ་པར་མཁྱེན་ནས་དང་། །འཇིག་རྟེན་ལྷག་མ་ལ་ཡང་རྗེས་སུ་བརྩེ་བ་སྟེ། །དེ་ཡི་དོན་དུ་སངས་རྒྱས་མཁའ་ལ་འཕུར་བར་གྱུར། །ཉི་མའི་ཤིང་རྟ་ཕྱག་གིས་རེག་པར་མཛད་ནས་ནི། །རླུང་གིས་བསྙེན་པའི་ལམ་ལ་ཞབས་དག་གིས་གཤེགས་ཤིང་། །སྐུ་ལ་
གཅིག་ཏུ་གྱུར་ཞིང་དུ་མར་གྱུར་པ་དང་། །མང་པོ་ཉིད་དུ་གྱུར་ནས་གཅིག་ཏུ་གྱུར་པའོ། །ས་ལ་ཆུ་བཞིན་དུ་ཡང་ཞུགས་ཤིང་ཐོགས་མེད་ལ། །ཆུ་ཡི་ལོགས་ལ་ས་ལ་བཞིན་དུ་སྤྱོད་པ་དང་། །ར་བ་དང་ནི་རི་ལ་ཐད་ཀར་མཛད་པ་དང་། །ཐོགས་པ་མེད་ཅིང་མཁའ་ལ་བཞིན་དུ་རབ་ཏུ་ཞུགས། །ལུས་ཀྱི་
ཕྱེད་ཀྱིས་ཆུ་ཡི་ཆར་པ་འབེབས་པ་དང་། །ཕྱེད་ཀྱིས་མེ་བཞིན་དུ་ནི་འབར་བར་གྱུར་པ་སྟེ། །རི་བོས་འབར་བའི་སྨན་དང་རབ་ཏུ་འབར་བ་བཞིན། །མཁའ་ལ་གང་ཞིག་འབར་དང་འབར་བས་མཛེས་པར་གྱུར། །དབང་ཕྱུག་མངོན་པར་འདོད་པའི་སྐྱེ་བོ་དེ་ཡི་ནི། །སེམས་ཀྱི་རབ་ཏུ་དགའ་བ་དེ་ལྟར་སྐྱེད་

172-1-70a

ནས་ནི། །ཉི་མ་གཉིས་པ་བཞིན་དུ་མཁའ་ལ་བཞུགས་ནས་སུ། །མི་སྐྱོང་ལ་ནི་ཆོས་དག་བགྲོ་བར་མཛད་པའོ། །མི་སྐྱོང་ཁྱེད་ཀྱིས་བདག་ལ་གང་ཞིག་ལྟོས་པ་དང་། །མྱ་ངན་རྗེས་སུ་ཞུགས་པ་སྙིང་རྗེའི་བདག་ཉིད་ཤེས། །བུ་ལ་དགའ་བ་དེ་ནི་ཆོད་མཛོད་ཞི་བར་གཤེགས། །
བདག་ལས་བུ་ཡི་འབྲས་བུ་གསར་པ་སྣོམས་མཛོད་ཅིག །གང་ཞིག་སྔོན་ཆད་བུ་ཡིས་ཕ་ལ་མ་བྱིན་ཞིང་། །སྔོན་ནི་ཕ་ཡིས་བུ་ལས་རབ་ཏུ་མ་ཐོབ་པ། །རྒྱལ་སྲིད་ལས་ཁྱད་འཕགས་ཤིང་མཐོ་རིས་ལས་ཁྱད་འཕགས། །རྒྱལ་པོ་མཆོག་གི་བདུད་རྩི་དེ་ནི་བཞེས་མཛོད་ཅིག །ས་སྐྱོང་ལས་ཀྱིས་བདག་ཉིད་ལས་
ཀྱི་སྐྱེ་གནས་དང་། །ལས་ཀྱི་རྟེན་དང་ལས་ཀྱི་རྣམ་སྨིན་སྐལ་བ་དང་། །ལས་ཀྱི་དབང་གིས་གནས་པར་འགྲོ་བ་ཤེས་ནས་ནི། །ཕན་པའི་ཆེད་དུ་ལས་གང་གྱུར་པ་དེ་བསྙེན་མཛོད། །འཇིག་རྟེན་དེ་ཉིད་རྟོགས་ནས་དང་ནི་བཙལ་ནས་སུ། །དམ་པའི་ལས་ནི་མི་ཡི་བཤེས་མིན་གཞན་མ་ཡིན། །
ཐམས་ཅད་བོར་ནས་ལས་དང་ལྷན་ཅིག་ཁྱོད་ཀྱི་ནི། །རྟེན་དང་བྲལ་ཞིང་གཅིག་པུར་འགྲོ་བར་བྱ་བའོ། །ལྷ་འམ་དམྱལ་བ་དུད་འགྲོ་མི་ཡི་འཇིག་རྟེན་དུ། །ལས་ཀྱི་རྟེན་ལས་སོན་པའི་འཇིག་རྟེན་འགྲོ་བ་སྟེ། །སྲིད་པའི་རྒྱུ་ནི་རྣམ་པ་གསུམ་དང་སྐྱེ་གནས་གསུམ། །སྣ་ཚོགས་ལས་ནི་འཇིག་རྟེན་པ་
ཡིས་རབ་ཏུ་བྱེད། །དེ་ཕྱིར་སྡེ་ཚན་གཉིས་ནི་ཡང་དག་འཇུག་པར་ཡང་། །ལུས་དང་ངག་གི་ལས་འདི་རྣམ་པར་དག་པ་དང་། །ཡིད་ཀྱིས་རབ་ཏུ་ཞི་ལ་འབད་པར་བྱ་བ་སྟེ། །དེ་ནི་བདག་གི་དོན་ཡིན་གཞན་དོན་མ་ཡིན་ནོ། །འགྲོ་བ་ཆུ་ཡི་དབའ་རླབས་གཡོ་བར་ཤེས་ནས་ནི། །བརྟགས་ནས་ཁྱོད་ཀྱིས་
སྲིད་པ་རྣམས་སུ་དགའ་མི་བྱ། །ལས་ནི་ཡོངས་སུ་ཟད་ཕྱིར་དམ་པའི་ལས་གང་དེ། །མཆོག་ཏུ་བདེ་བའི་དོན་དུ་གང་གྱུར་བསྙེན་པར་བྱ། །རྒྱུ་སྐར་འཁོར་ལོ་མཁའ་ལ་བཞིན་དུ་རྟག་པར་ནི། །འཇིག་རྟེན་ཡོངས་སུ་འཁོར་བར་ཤེས་པར་བྱས་ནས་ནི། །རྩེ་མོ་འདས་ནས་ལྷ་ནས་ལྷ་ཡང་ལྷུང་བ་
སྟེ། །ཀྱེ་མ་མིར་གྱུར་སྨོས་ཅི་བློ་གཏད་བྱེད་པ་སུ། །བདེ་བ་རྣམས་ལས་མཆོག་ཏུ་ཐར་པའི་བདེ་བ་དང་། །དགའ་བ་རྣམས་ལས་བདག་ཏུ་དགའ་བ་གཙོར་ཤེས་ནས། །ལག་འགྲོ་རྣམས་ཀྱིས་བྲང་ལ་བཞིན་དུ་བདག་ལྡན་ནི། །སུ་ཞིག་འཇིགས་པ་དུ་མའི་དཔལ་གྱིས་བདེ་ལ་དགའ། །དེ་ཕྱིར་

172-1-70b

བརྟེན་པ་ཁྱིམ་ལ་མེས་བཞིན་འཇིག་རྟེན་ནི། །འཇིགས་པ་ཆེན་པོ་དང་ནི་ཡོངས་ལྡན་མཐོང་ནས་ནི། །གང་ཞིག་སྐྱེ་འཆི་ངལ་བ་མྱ་ངན་དང་བྲལ་བ། །ཞི་ཞིང་བརྟན་པའི་གོ་འཕང་དེ་ནི་སློངས་མཛོད་ཅིག །དོན་གྱིས་མ་ཡིན་གཡུལ་གྱིས་མ་ཡིན་མཚོན་གྱིས་མིན། །གང་ལ་རྟ་དང་གླང་པོས་དོན་ནི་ཡོད་
མ་ཡིན། །སྐྱོན་ནི་དགྲ་བོ་རྣམས་ཀྱི་སྡེ་དེ་ཆོམས་མཛོད་དང་། །དེ་ལས་རྒྱལ་ན་རྣམ་པར་རྒྱལ་བ་གཞལ་དུ་མེད། །སྡུག་བསྔལ་དང་ནི་སྡུག་བསྔལ་གྱི་རྒྱུ་ཞི་བ་དང་། །ཞི་བ་ཡི་ཡང་མངོན་པའི་ཐབས་ནི་ཤེས་པར་མཛོད། །བཞི་པོ་འདི་ཡི་ཀུན་ནས་ཁོང་དུ་ཆུད་པ་ལས། །འཇིགས་པ་ཆེན་པོ་དང་
ནི་ངན་འགྲོ་རྣམས་འགོག་གོ། །དེ་ནས་བདེ་བར་གཤེགས་པས་རྫུ་འཕྲུལ་གྱི་སྔོན་དུ། །ཞིང་དུ་བྱས་པའི་སེམས་ལ་དགའ་བ་སྐྱེས་པ་སྟེ། །ཐོས་ནས་མི་སྐྱོང་དེ་ཡིས་ཆོས་ནི་རབ་ཐོབ་ཅིང་། །དགའ་བཞིན་ཐལ་མོ་སྦྱར་ནས་འདི་སྐད་ཅེས་གསོལ་ཏོ། །བློ་ལྡན་དང་བཅས་འབྲས་བུ་དང་བཅས་ཁྱེད་
དགྱེས་ཤིང་། །སྡུག་བསྔལ་ཆེན་པོ་ལས་ནི་རྣམ་གྲོལ་ཁྱེད་དགྱེས་སོ། །མྱ་ངན་ཆེད་དུ་དོན་མེད་ས་སྦྱིན་བདག་དགའ་ལ། །བུ་ཡི་འབྲས་བུ་དང་ལྡན་བདག་ནི་དགའ་བར་གྱུར། །ཕུན་ཚོགས་སྤངས་ནས་གཤེགས་པ་ཁྱེད་ནི་གནས་སུ་གྱུར། །ངལ་བ་ཆེན་པོས་དུབ་ལས་ཁྱེད་ནི་གནས་སུ་གྱུར། །
དགའ་བའི་གཉེན་འདུན་དགའ་བ་ཁྱོད་ཀྱིས་བོར་བ་རྣམས། །བདག་ཅག་རྣམས་ནི་སྙིང་རྗེ་བར་དུ་གནས་སུ་གྱུར། །ལྷ་ཡི་དྲང་སྲོང་རྣམས་སམ་རྒྱལ་པོའི་དྲང་སྲོང་རྣམས། །དེ་རྣམས་སྔོན་དུས་ན་ཡང་གང་ལ་མ་གཤེགས་པ། །ཉམ་ཐག་འཇིག་རྟེན་དག་གི་དགེ་བའི་ཆེད་དུ་ལམ། །ངེས་པར་
ལེགས་པ་འདི་དང་ཁྱེད་ཀྱིས་ལྷག་པར་ཐོབ། །ཁྱོད་ནི་འཁོར་ལོས་སྒྱུར་བར་གལ་ཏེ་གྱུར་ན་ནི། །བདག་གི་དགའ་བ་དེ་ལྟར་འགྱུར་བ་མ་ཡིན་ཞིང་། །རྣམ་པ་དེ་ལྟར་རྫུ་འཕྲུལ་འདི་དང་ཁྱོད་ཀྱི་ཆོས། །མཐོང་ནས་ཇི་ལྟར་བདག་གི་བསྟན་པ་དགའ་བར་འགྱུར། །འདིར་ནི་ཡང་སྲིད་ཉིད་དུ་སྦྱོར་
བའི་ཆོས་ལ་ནི། །འཁོར་ལོས་སྒྱུར་བས་སྐྱེ་དགུ་རྣམས་ནི་སྐྱོང་བ་སྟེ། །འཁོར་བའི་སྡུག་བསྔལ་ཆེན་པོ་རྣམས་ནི་འཇོམས་པ་ལ། །འཇིག་རྟེན་ཆེད་དུ་ཆོས་ཀྱང་ཐུབ་པ་ཁྱོད་ཀྱིས་གསུངས། །གང་གི་རྫུ་འཕྲུལ་འདི་དང་རྣམ་རྒྱས་བློ་གྲོས་དང་། །འཁོར་བའི་འཇིགས་པ་མཐའ་དག་ངེས་པར་

172-1-71a

ལོག་པ་ནི། །དཔལ་དང་བྲལ་ཡང་འཇིག་རྟེན་ན་ཁྱོད་དབང་ཕྱུག་སྟེ། །དཔལ་ནི་འཕེལ་ཡང་དབང་མེད་སྲེད་བཅས་མ་ཡིན་ནོ། །བརྩེ་བའི་ཆོས་ཀྱིས་བསྟན་པའི་འོས་གྱུར་པ། །ཤཱཀྱའི་རྒྱལ་པོས་མང་པོ་དེ་དག་སྨྲས་ནས་ནི། །རྒྱལ་པོ་ཉིད་དང་ཡབ་ཉིད་དུ་ནི་གནས་ན་ཡང་། །
སྲས་ལ་དེ་ཉིད་ཁོང་དུ་ཆུད་ཕྱིར་ཕྱག་བྱས་སོ། །ཐུབ་པའི་མཐུ་ནི་ལྷག་པར་ཐོབ་པ་མཐོང་ནས་དང་། །དེ་ཉིད་རབ་ཏུ་འབིགས་པའི་བསྟན་བཅོས་མཐོང་ནས་དང་། །བླ་མ་རྒྱལ་པོས་སྦྱར་བའི་མཆོད་པ་མཐོང་ནས་ནི། །དུ་མ་རྣམས་ཀྱིས་རབ་ཏུ་འབྱུང་ཕྱིར་རེ་འདོད་བྱས། །དེ་ནས་གཞོན་ནུ་མང་པོ་འབྲས་བུ་ལ་གནས་རྣམས། །ཆོས་ཀྱི་
ཆོ་ག་དེ་ཉིད་རབ་ཏུ་ཐོབ་གྱུར་ཏེ། །སྔགས་དང་འདོད་པ་ཆེན་པོ་རྣམས་ལ་ལྟོས་མེད་ནས། །བྱམས་པའི་གཉེན་འདུན་ངུ་བ་རྣམས་ནི་སྤངས་ནས་སོ། །ཀུན་དགའ་མཛེས་དགའ་ཀྲ་མི་ལ་དང་མ་འགགས་པ། །དགའ་བོ་ཉེ་དགའ་དག་དང་དེ་ནས་འཁྱིལ་པ་འཛིན། །སློབ་མའི་ལྐོག་ཏུ་སྟོན་པ་ཡིས་ནི་ལྷ་སྦྱིན་ཏེ། །ཐུབ་པས་རྗེས་སུ་
བསླབས་པ་དེ་རྣམས་བྱུང་བར་གྱུར། །དེ་ནས་མདུན་ན་འདོན་གྱི་བུ་ནི་བདག་ཉིད་ཆེ། །འཆར་ཀས་ལམ་དེ་ཉིད་ལ་རབ་ཏུ་སོང་བ་སྟེ། །དེ་ཡིས་ངེས་པ་རབ་ཏུ་མཐོང་ནས་དེ་བཞིན་དུ། །ཉེ་བ་འཁོར་དང་རྒྱུན་ཤེས་བུ་ཡི་བློ་བྱས་སོ། །རྒྱལ་པོ་ཡིས་ཀྱང་སྲས་ཀྱི་མཐུ་ནི་མཐོང་ནས་དང་། །མཆོག་གི་བདུད་རྩི་རྒྱུན་ནི་
རབ་ཏུ་ཐོབ་བྱས་ནས། །ཆགས་པ་མེད་པར་རྒྱལ་སྲིད་སྤུན་ཟླ་ལ་བྱིན་ཞིང་། །རྒྱལ་པོའི་དྲང་སྲོང་སྤྱོད་པས་ཁྱིམ་རྣམས་ལ་བསྙེན་ཏོ། །དེ་སྐད་ཅེས་པ་ལ་སོགས་ལེགས་པའི་གཉེན་རྣམས་དང་། །འཁོར་དང་གཉེན་རྣམས་རྗེས་སུ་བརྟུལ་ནས་སངས་རྒྱས་ནི། །མཆི་མ་དང་བཅས་གྲོང་ཁྱེར་པ་ཡིས་མངོན་
དགའ་བ། །རང་གནས་གྲོང་ཁྱེར་ལ་ནི་དུས་སུ་རབ་ཞུགས་པ། །དོན་ཀུན་གྲུབ་པ་ཞེས་པ་རྒྱལ་པོའི་སྲས་པོ་ནི། །དོན་མཛད་གྲུབ་པ་གྲོང་ཁྱེར་དུ་ནི་རབ་ཞུགས་པ། །ཞེས་ནི་དོན་ཐོས་ཁང་པ་རྣམས་སུ་མི་མོ་རྣམས། །སྒོ་རྣམས་དང་ནི་སྐར་ཁུང་རྣམས་ལ་མཉམ་པར་བརྟེན། །མཚམས་ཀྱི་སྤྲིན་གྱིས་ཕྱེད་
བཀག་འོད་ཟེར་ལྡན་པ་བཞིན། །ངུར་སྨྲིག་བསྣམས་ཤིང་མཛེས་པ་དེ་ནི་རབ་མཐོང་ནས། །བུད་མེད་དེ་རྣམས་མིག་ནས་མཆི་མ་ཕྱུང་བ་སྟེ། །པདྨ་དང་མཚུངས་ཐལ་མོ་རྣམས་ཀྱིས་ཕྱག་འཚལ་ལོ། །ཆོས་ཀྱིས་དང་ནི་གཟུགས་ཀྱིས་གསལ་བར་གྱུར་པ་ནི། །འོག་ཏུ་ཞལ་གཟིགས་གཤེགས་པ་

172-1-71b

དེ་ནི་མཐོང་གྱུར་ནས། །བརྩེ་བ་དང་ནི་གུས་པ་རྣམ་པར་སྟོན་པ་སྟེ། །མཆི་མས་རྙོགས་པའི་མིག་ཅན་རབ་མྱོས་མ་རྣམས་ཟློས། །ལེགས་སྐྱེས་དབུ་ནི་བཞར་བར་རྣམ་པར་མཛད་ནས་དང་། །ན་བཟའ་རྙིང་པ་ཡོངས་སུ་གསོལ་ནས་དང་། །སྐུ་ལ་གསེར་གྱི་ཁ་དོག་རབ་ཏུ་གཡོགས་ནས་
དང་། །དེས་ནི་སྤྱན་མིག་རབ་ཏུ་བཀོད་ནས་གཤེགས། །གང་ཞིག་གདུང་བ་སྐྱོབ་པའི་གདུགས་དཀར་བསྙེན་ཕྱིར་དང་། །སྲས་པོ་རྣམ་པར་དུལ་བ་བལྟ་བའི་ཕྱིར་འོངས་ཤིང་། །ཀུན་ནས་གནས་ཕྱིར་འོས་ཤིང་རྒྱལ་བའི་ཕྱིར་འོས་པ། །དེས་ནི་ལྷུང་བཟེད་ཡང་དག་ཡོངས་སུ་བཟུང་ནས་གཤེགས། །
འགྲམ་པར་ཏ་མ་ལ་ཡི་ལོ་མ་རྣམ་བཀོད་པའི། །མཛེས་མའི་གདོང་དང་གདུང་བ་སྐྱོབ་པའི་གདུགས་དཀར་ནི། །གང་གིས་བསྙེན་པར་འོས་ཤིང་མགྱོགས་འགྲོ་འོས་པ་སྟེ། །དེས་ནི་ལྷུང་བཟེད་ཡོངས་སུ་བཟུང་ནས་རྐང་པས་གཤེགས། །ས་སྐྱོང་བདག་སྐྱེས་རྣམས་ཀྱི་དགྲ་རྣམས་ཟད་པར་དང་། །དགའ་
བ་རྣམས་ཀྱི་ཆགས་དང་འགྲོ་བའི་རྗེས་ཆགས་པར། །བལྟ་བར་འོས་ཤིང་སྣ་ཚོགས་དབུ་རྒྱན་བསྣམས་པ་གང་། །དེས་ནི་ས་ཡི་གཉའ་ཤིང་གང་ཙམ་གཟིགས་ཤིང་གཤེགས། །འདི་ཡི་བལྟ་བ་ཅི་ཞིག་མཚན་ཉིད་དེ་ནི་ཅི། །དོན་གཉེར་ཅི་ཞིག་རོལ་པས་དགྲ་བོར་གྱུར་པ་ཅི། །གང་འདི་བརྟུལ་ཞུགས་
དང་ནི་ལྷན་ཅིག་རོལ་བ་སྟེ། །བུ་བྱིས་རྣམས་དང་མོ་བཙུན་མཛངས་མ་རྣམས་དང་ནི། །རྒྱལ་པོའི་མནའ་མ་ངེས་པར་མྱ་ངན་འཛིན་མའོ། །གྲགས་འཛིན་མ་དེ་ཤིན་ཏུ་དཀའ་ཐུབ་བྱེད་པ་སྟེ། །གང་གིས་ཇོ་བོའི་རབ་ཏུ་སྤྱོད་པ་འདི་ཐོས་ཤིང་། །ཐོས་ནས་ཀྱང་ནི་གནས་ཤིང་ཉམས་པར་འགྲོ་བ་མེད། །འདི་
ཡི་གཟུགས་ནི་ངེས་པར་རྗེས་སུ་མཐུན་པ་དང་། །ཁ་དོག་ངན་པའི་གཟུགས་འདི་སྣང་བ་མཐོང་ནས་ནི། །སྲས་འདོད་མི་དབང་རྒྱལ་པོ་ཇི་ལྟ་བུར་གྱུར་ཞིང་། །འཚེ་བའི་དགྲ་བོ་ལ་ཡང་ཇི་ལྟ་བུར་བྱེད་དམ། །མཆི་མས་གང་བའི་སྲས་པོ་སྒྲ་གཅན་འཛིན་མཐོང་ནས། །གལ་ཏེ་དེ་ལྟ་ཉིད་དུ་འདི་ནི་
ཆགས་མ་ཡིན། །བྱམས་པའི་གཉེན་རྣམས་ལས་ཀྱང་གཞན་དུ་ཁ་བལྟས་པ། །འདི་འདྲ་ངེས་པའི་བརྟུལ་ཞུགས་ལ་ནི་དགེ་ལེགས་ཤོག །གཟི་མདངས་དང་ནི་ལུས་ཀྱི་དབྱིབས་དང་འགྲོས་སམ་སྟེ། །བདེ་བའི་རབ་ཏུ་འཇུག་ལ་ངེས་པར་ཚད་མ་ཡིན། །ཡོན་ཏན་དེ་རྣམས་དག་གིས་

172-1-72a

འདི་ནི་མཛེས་པ་སྟེ། །ཞི་བས་ལྡན་ཞིང་ཡུལ་རྣམས་ཀྱིས་ནི་རྣམ་པར་བྲལ། །སྣ་ཚོགས་སྟོན་ནི་རང་མཚུངས་བསམ་པ་ཡང་དག་ཡོངས་བཟུང་ནས། །དེ་སྐད་ཅེས་སོགས་རབ་མྱོས་མ་རྣམས་མང་པོ་རྣམ་པར་ལབས། །སངས་རྒྱས་མ་ཆགས་ཐུགས་ཀྱང་རང་གི་གྲོང་ཁྱེར་
ལ་གཤེགས་ནས། །བསོད་སྙོམས་བརྙེས་ཤིང་ནྱ་གྲོ་དྷ་ཡི་མཚན་མའི་ནགས་སུ་གཤེགས། །ཉུང་ངུ་ཉུང་ངུའི་བསོད་སྙོམས་སྦྱིན་པ་རྣམས་ཀྱིས་ནོར་རྫས་ཕྲ་ཞིང་དགེ་བ་མ་བྱས་སྐྱེ་བོ་སྒྲོལ་བར་མཛད་བཞེད་པ། །སྤྱོད་པ་འདི་ཡིས་ཡང་དག་ཚིམ་པ་མ་ཡིན་དགེ་སྦྱོང་སྐྱེ་བོ་བསམ་པ་མ་ཐུལ་བ་ལ་
བརྟེན་པར་མཛད་བཞེད་ལ། །འཇིག་རྟེན་དག་ན་སྐྱིད་དེ་བ་ཞེས་རྒོལ་བ་ནུབ་པར་མཛད་བཞེད་དེ་བཞིན་ཡོངས་སུ་བྲིས་ཉིད་སྟོན་པར་མཛད་བཞེད་པ། །བརྟག་པར་སྙམ་ལ་བསོད་སྙོམས་ཕྱིར་ནི་ཡབ་ཀྱི་གྲོང་ཁྱེར་ལ་ནི་སྲེད་མེད་ཐུགས་མངའ་དེ་བཞིན་གཤེགས་པ་ཞུགས་པར་གྱུར། །སངས་རྒྱས་ཀྱི་
སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། ཡབ་དང་སྲས་མཇལ་བའི་ལེའུ་སྟེ་བཅུ་དགུ་པའོ།།      །།ང་རྒྱལ་ཉིད་ཀྱིས་སྐྱེ་བོ་དམ་པ་མ་སྨོད་ཅིག །བཤེས་གཉེན་འདུ་ཤེས་དཀའ་ཐུབ་རྣམས་ནི་མ་འཇོམས་ཤིག །ཉོན་མོངས་དབང་གིས་དམ་པའི་བརྟུལ་ཞུགས་མ་བྱེད་ཅིག །
དམ་པ་མིན་པའི་ལྟ་བ་ཅུང་ཟད་མ་བསྙེན་ཅིག །མཚར་ལ་མ་འགྲོ་མི་དགེའི་ལམ་ལ་མ་གནས་ཤིག །རྒྱགས་པར་མ་འགྲོ་དགའ་མིན་མི་བཟོད་མ་ཉན་ཅིག །སྙན་གྲགས་མི་བཟད་བརྫུན་ལ་བློ་གྲོས་མ་འཛིན་ཅིག །བསྟན་བཅོས་མཐོང་ལས་ལྷག་པར་གཏོར་མ་མ་འཕྲོག་ཅིག །བློ་ནི་མཉམ་
པར་ཞོག་ཅིང་ཆོས་ནི་གྱིས་མཛོད་ཅིག །དམ་པ་རྣམས་དང་སྦྲེལ་མཛོད་རི་མོ་ཁོད་མཛོད་ཅིག །ཇི་ལྟར་ཕུལ་བྱུང་འདི་ནི་ཐོབ་ནས་སླར་ཡང་ནི། །རྒྱ་ཆེར་མངོན་པར་འགྲོ་བ་དེ་ལྟར་གྱིས་མཛོད་ཅིག །བརྩོན་འགྲུས་བརྩམས་ནས་དང་ནི་བསྟན་པ་ཡོངས་བཟུང་ནས། །རིགས་པ་རྣམས་ནི་བསྐྱེད་
ནས་སྐྱོན་རྣམས་ཟིལ་མནན་ནས། །འཆི་བ་ཡང་དག་དྲན་ནས་འཕགས་པའི་བྱ་བ་གྱིས། །ཆེ་བའི་བདག་ཉིད་ཐོབ་ནས་ཞི་ལམ་ཐོབ་པར་གྱིས། །གང་གི་འབྲས་བུ་འདི་ནི་ཞི་བ་སྐྱོང་བ་ནི། །ལས་དེ་ཉིད་ནི་སླར་ཡང་བྱེད་པར་འོས་པ་སྟེ། །ཡིད་གཞུངས་ལྡན་པ་འདི་དང་བྱེད་པ་བྱས་པ་ཉིད། །འབྲས་བུ་

172-1-72b

གང་ཞིག་མཐོང་བས་ས་བོན་བསྐྲུན་པར་བྱེད། །འདི་ན་མཆོག་གྱུར་གང་ཞིག་སྡིག་པ་བྱེད་པ་སྟེ། །སྣང་བ་དེ་ནི་མུན་པར་གནས་པ་བདག་གི་ལུགས། །ཆོས་ནི་གཙོ་བོ་སྐྱེས་བུ་གཙོ་བོ་མ་ཡིན་པ། །མུན་པ་སྣང་བ་ལ་ནི་གནས་པ་བདག་གི་ལུགས། །ཁྱད་འཕགས་གང་ཞིག་ཆོས་ཀྱི་ཆོ་གར་འཇུག་པ་སྟེ།
དཀར་པོ་དཀར་པོར་མཆོག་ཏུ་འགྲོ་བ་བདག་གི་ལུགས། །དམན་པ་གང་ཞིག་སྡིག་པའི་ལས་ནི་བྱེད་པ་སྟེ། །དེ་ཡང་མུན་པ་མུན་པའི་མཐའ་རུ་འགྲོ་བ་ལུགས། །དེ་ཕྱིར་ཕུང་པོ་བཞི་པོ་དེ་རྣམས་ཤེས་བྱས་ནས། །རྒྱལ་པོ་འབད་པ་གྱིས་ཤིག་དེ་ལྟར་ཇི་ལྟར་འདིར། །བདེ་ནས་བདེ་བར་གལ་ཏེ་འགྲོ་བར་
འདོད་ན་ནི། །ཕྱོགས་ནི་གསུམ་པ་བསྙེན་ཞིང་སྔ་མ་མ་ཡིན་ནོ། །གཞན་གྱིས་གཞན་ལ་དགེ་བ་བྱེད་པ་མ་ཡིན་ཞིང་། །ཅི་སྟེ་བྱེད་ན་དེ་ལ་རྗེས་སུ་འགྲོ་མ་ཡིན། །བྱིས་པའི་ཉམས་པ་ཡོད་མིན་རང་ལ་འཐོབ་པ་སྟེ། །མ་བྱས་པ་ཡི་འོང་བ་འགྲུབ་པ་ཡོད་མ་ཡིན། །མ་བྱས་པ་ཡང་བརྒྱ་
ལ་བྱེད་པ་མ་ཡིན་ཞིང་། །མ་བྱས་པ་ནི་གཞན་དུ་དགེ་ལེགས་འགྱུར་མ་ཡིན། །དེར་ནི་འགྲོ་བ་ལ་ཡང་ནོར་ནི་ཡོད་མིན་ཏེ། །དེ་ཕྱིར་དགེ་བའི་ལས་ཀྱི་ཆོ་གར་འབད་པ་བགྱིས། །གང་ཞིག་སྡིག་པ་ལྷག་པར་སྤྱོད་པ་ལེགས་མིན་ཞིང་། །གསོན་པའི་འཇིག་རྟེན་ན་དེའི་བདག་ལ་དགའ་མ་ཡིན། །བདག་
གི་ཆེད་དུ་བདག་གིས་སྡིག་པ་བྱས་ནས་ནི། །གཞན་དུ་འབྲས་བུ་བདག་ཉིད་ཁོ་ནས་ལོངས་སྤྱོད་དོ། །རྒྱལ་པོ་ཆེན་པོ་རི་བོ་ཆེན་པོ་བཞི་རྣམས་ནི། །འོངས་པ་རྣམས་སུ་འགྲོ་བ་ཀུན་ནས་སྲུབ་པ་སྟེ། །ཆོས་ཀྱི་བྱ་བ་རྣམ་པ་སྣ་ཚོགས་བསྟེན་ལས་ནི། །ཇི་ལྟར་འཐད་པས་གཞན་ན་བྱ་བ་ཅི་ཞིག་
ཡོད། །རྒ་དང་རྒུད་པ་ནད་དང་དེ་ནས་འཆི་བ་སྟེ། །བཞི་པོ་འདི་རྣམས་དེ་བཞིན་དུ་ནི་འོངས་པ་སྟེ། །རི་བོ་རྣམས་ཀྱིས་ཀུན་ནས་བསྐོར་བ་བཞིན་དུ་ནི། །འཇིག་རྟེན་མཐའ་དག་དབང་མེད་འཁོལ་བར་བྱེད་པའོ། །དེ་ནས་འོངས་པ་རྣམས་སུ་དབང་མེད་སྡུག་བསྔལ་ཏེ། །རྟེན་ནི་ཡོད་མིན་མངོན་དུ་
འཐབ་མིན་སྲུང་བ་མེད། །དེར་ནི་བྱེད་པའི་ཆེད་དུ་ནོར་མེད་ཆད་པ་མེད། །ཆོས་ལས་མ་གཏོགས་སྨན་གཞན་ཡོད་མིན་ན། །དེ་ལྟར་མི་རྟག་གྱུར་ན་གསོན་པའི་འཇིག་རྟེན་ན། །གློག་ནི་གཡོ་བའི་ཡུལ་ལ་རབ་ཏུ་ཞུགས་པ་ན། །འཆི་བའི་ལག་པའི་རྩེ་ལ་ཡོངས་སུ་གནས་པ་སྟེ། །ཆོས་མ་ཡིན་པས་

172-1-73a

འབྲས་བུ་ལོངས་སྤྱོད་པར་འོས་མིན། །དབང་ཆེན་དང་མཚུངས་མི་དབང་དེ་དང་དེ་རྣམས་ནི། །གཡུལ་དུ་ལྷ་ཡི་མངོན་པར་འཐབ་ལ་ཕྱིན་ནས་ཀྱང་། །རབ་ཏུ་རྒྱས་པ་རྣམས་དང་ངེས་པར་ཟུམ་པ་རྣམས། །དུས་ཀྱི་དུས་སུ་བདེ་དང་སྡུག་བསྔལ་སྐལ་བའོ། །འབྱུང་པོ་འཛིན་
པའི་ས་ཡང་ཟད་པར་འགྲོ་བ་སྟེ། །འཇིག་པའི་མེས་ནི་ལྷུན་པོ་དེ་བཞིན་སྲེག་པར་བྱེད། །རྒྱ་མཚོ་ཆེན་པོ་ཡོངས་སུ་བསྐམས་པར་འགྲོ་བ་སྟེ། །དབུ་བ་དང་མཚུངས་མི་ཡི་འཇིག་རྟེན་ཀྱེ་མ་ཅི། །ཤུགས་བྱས་ནས་ཀྱང་རླུང་ནི་ཞི་བར་འགྲོ་བ་སྟེ། །འཇིག་རྟེན་གདུངས་ནས་ཀྱང་ནི་ཉི་མ་
ནུབ་པར་འགྲོ། །བསྲེགས་ནས་ཀྱང་ནི་མེ་ཉིད་འདའ་བར་ཉེར་འགྲོ་སྟེ། །གང་དེ་དེ་ལྟར་གནས་པར་འགྱུར་བ་ཡིན་སྙམ་མམ། །ལུས་པོ་འདི་ནི་ཡུན་རིངས་དུས་སུ་བསྲུངས་ཀྱང་ངམ། །སྣ་ཚོགས་ལོངས་སྤྱོད་རྣམས་ཀྱིས་ཉེ་བར་བསྐྱངས་ཀྱང་ནི། །དེ་ཡིས་འདིར་ནི་ཉིན་ཞག་འགའ་ཞིག་བཞུགས་
ནས་སུ། །སྐྱེ་བོ་ཆེན་པོའི་རྗེས་སུ་བརྩེ་བ་མཛད་ནས་ནི། །བདེ་བར་འཕམ་བྱེད་ཀྱིས་ནི་ཕྱག་གིས་མངོན་བསྲུངས་པའི། །གྲོང་ཁྱེར་ལ་ནི་ཆེན་པོའི་ཚོགས་ཀྱིས་རབ་ཏུ་དཔགས། །མེ་ཏོག་རབ་རྒྱས་མྱ་ངན་མེད་པས་གསལ་བྱས་ཤིང་། །ཡན་ལག་དམར་པོར་གྱུར་ཅིང་ཁུ་བྱུག་སྐད་སྒྲོགས་
པ། །ཏི་སེའི་གངས་ལྟར་མཐོ་བའི་ལྡིང་ཁང་ཕྲེང་བ་ཅན། །དཔལ་ལྡན་རྒྱལ་བྱེད་ཚལ་ནི་དེ་ནས་རབ་ཏུ་ཐོབ། །དེས་ནི་གཙང་མའི་ཆུས་གང་ཕྲེང་བ་དཀར་པོ་ཅན། །གསེར་གྱི་བུམ་པ་དང་བཅས་བུམ་པ་བླངས་ནས་ནི། །དེ་ནས་དུས་སུ་རྒྱལ་བྱེད་ཚལ་ནི་བཟང་སྦྱིན་གྱིས། །དེ་བཞིན་གཤེགས་པ་ལ་
ནི་རབ་ཏུ་ཕུལ་བར་གྱུར། །དེ་ནས་ཤཱཀྱ་ཐུབ་པ་ལྟ་འདོད་རྒྱལ་པོ་ནི། །སྡེ་རབ་འཕམ་བྱེད་རྒྱལ་བྱེད་ཚལ་དུ་སོང་བ་སྟེ། །སོང་ནས་དེ་ནས་བཀུར་སྟི་བྱས་ཏེ་ཐུབ་པ་ལ། །རབ་ཏུ་བཏུད་ཅིང་གདན་བྱས་ཚིག་འདི་གསོལ་བའོ། །ཐུབ་པ་གྲོང་ཁྱེར་འདིར་ནི་ཁྱེད་ཀྱི་གནས་བཞེད་པ། །ངེས་པར་རང་ནི་ཀོ་
ས་ལ་རྣམས་ཀྱི་དགེ་བའོ། །དེ་ཉིད་གཟིགས་པ་འདི་འདྲ་བརྟེན་པ་མེད་པ་ནི། །ཉེ་བར་འཚེ་བྱས་ཡུལ་ནི་སྐལ་བ་མེད་པའམ། །ཁྱེད་མཐོང་བ་འམ་ཡང་ན་མངོན་པར་ཕྱག་འཚལ་བ། །ཡང་དག་ཐོབ་པོ་བདག་ཅག་རྣམས་ཀྱི་རྗེས་བཟུང་ཕྱིར། །དམ་པ་རྣམས་ཀྱི་འདུས་པ་ཐོབ་ནས་འཇིག་རྟེན་ན། །ཚིམ་

172-1-73b

པ་མེད་ཀྱང་ཇི་ལྟར་ཚིམ་པ་ཉིད་ཡིན་ནོ། །གང་གིས་རྟེན་ཅན་རླུང་ནི་རབ་ཏུ་གཡོས་པ་སྟེ། །དེ་ཡི་བདག་ཉིད་ལས་ནི་ཉེ་བ་ལས་འགྲོ་སྟེ། །མཁའ་འགྲོའི་བྱ་རྣམས་ལྷུན་པོའི་འདུས་པ་ཉེར་ཐོབ་ནས། །རང་བཞིན་རྣམ་པར་སྤངས་ནས་གསེར་དུ་འགྱུར་བའོ། །དེ་ཕྱིར་འདི་དང་ཆེ་གེ་མོར་ནི་མགོན་གྱུར་
ཞིང་། །སྐྱེ་བོ་ལེགས་པའི་རྟེན་ལས་གཞན་མིན་བདག་གི་ནགས། །ག་དྷའི་སྲས་པོ་ཐུབ་པ་ཆེན་པོ་རབ་ཐོབ་ནས། །ཕུར་བུ་གསུམ་པའི་ཁྱིམ་ལྟར་ལྟ་ན་མཛེས་པར་གྱུར། །འཇིག་རྟེན་དག་ན་རྙེད་པ་རབ་རྙེད་སྣ་ཚོགས་པ། །ཚད་དང་ལྡན་པ་དག་ནི་མཛད་པ་ཅན་ཡིན་ལ། །ཁྱོད་ཀྱི་ཉེ་བ་ལས་ནི་དོན་གང་
ཡིན་པ་རྣམས། །དེ་དག་རྣམས་ཀྱི་གྲངས་མེད་ཉམས་པ་ཡོད་མ་ཡིན། །ལེགས་པ་ཁྱོད་ཀྱི་ངེས་པའི་ལྟ་བའི་ལྟ་བ་ལས། །འདི་ལས་གཞན་དུ་རྙེད་པ་ཤེས་པ་མ་ཡིན་ཞིང་། །ཁྱབ་བདག་བདག་ནི་གནོད་པ་རྙེད་བླ་སྡུག་བསྔལ་བ། །ཆགས་པ་དང་ལྡན་རྒྱལ་པོའི་ཆོས་ལ་སྤྱོད་པར་འགྱུར། །དེ་ལྟར་དབང་
པོ་དང་མཚུངས་རྒྱལ་པོ་དེ་ཡིས་ནི། །རྣམ་པ་དེ་ལྟར་མངོན་དུ་གྱུར་ཏེ་གསན་ནས་ནི། །དོན་དང་འདོད་པ་དག་གི་ཆགས་པ་མཁྱེན་ནས་སུ། །དེ་ཡི་བསམ་པ་ཡང་དག་བསྐུལ་བ་ཐུབ་པས་གསུངས། །མི་དབང་ཁྱོད་ཀྱི་ཚིག་འདི་ངོ་མཚར་ཆེ་མ་ཡིན། །ཁྱོད་ཀྱི་སྤྱོད་པ་འདི་ནི་ལེགས་པ་རྣམས་ལ་མིན། །འོག་
ནས་འཕོས་པ་འགྲོ་བར་འདོད་པ་རྣམས་ཀྱིས་ནི། །ཕན་པ་འདོད་པའི་དམ་པའི་སྐྱེས་བུ་རྣམས་ལ་སྡང་། །གང་ཕྱིར་ས་སྐྱོང་ཁྱེད་ཀྱི་དགོངས་པ་དེ་ཉིད་ནི།  །དེས་ན་ཁྱོད་ལ་འདིར་ནི་ཅུང་ཟད་སྨྲ་འདོད་དེ། །དེ་ནི་ཤེས་པར་གྱིས་ཤིག་བདག་གི་ལྟ་བ་ནི། །འབྲས་བཅས་ཇི་ལྟར་གྱུར་པ་ཁྱེད་ཀྱི་དེ་ལྟར་གྱིས། །མི་སྐྱོང་
རྒྱལ་པོའི་དུས་ཀྱིས་བཅིངས་ནས་བཀུག་པ་ན། །མཛའ་བཤེས་མ་ཡིན་གཉེན་མིན་ཕུན་ཚོགས་རྗེས་འགྲོ་མིན། །ཐམས་ཅད་ཀྱིས་ནི་དམན་ཞིང་དབང་མེད་འགྲོ་བ་ནི། །གྲིབ་མ་བཞིན་དུ་ལས་གཅིག་རྗེས་སུ་འགྲོ་བ་ཉིད། །དེ་ཕྱིར་མཐོ་རིས་དང་ནི་གྲགས་པ་དམ་པ་ནི། །མངོན་པར་འདོད་བཞིན་ཆོས་ཀྱི་རྒྱལ་
སྲིད་རྗེས་སུ་སྐྱོངས། །རྨོངས་པ་ལས་ནི་ཆོས་ལ་འཁྲུལ་པའི་རྒྱལ་པོ་ཡི། །རྒྱལ་སྲིད་དེ་ཉིད་མཐོ་རིས་ན་ཡང་མ་ཡིན་ནོ། །འདིར་ནི་རྒྱལ་སྲིད་ཡང་དག་ཡོངས་སུ་བསྐྱངས་ནས་ནི། །ཆོས་ལས་རིང་མིན་རྟ་རིད་མཐོ་རིས་རབ་འཐོབ་ནས། །འདིར་ནི་རྨོངས་ལས་མི་ཡི་བདག་པོ་ནི་ཀུམྦྷ། །ཆོས་ལས་

172-1-74a

འཕོས་ཤིང་ཀ་ཤི་རྣམས་སུ་ས་ལ་ཞུགས། །འཕགས་པ་ཡི་དང་སྡིག་པ་ཡི་ནི་ལས་ཀྱི་ནི། །ཁྱོད་ལ་དཔེར་བསྟན་ཞི་བ་བདག་གིས་དེ་སྨྲས་ཏེ། །རང་གི་སྐྱེ་དགུ་རྣམས་ནི་རྟག་ཏུ་ལེགས་བསྲུངས་ཤིང་། །དཔྱད་ནས་དེ་ཕྱིར་བརྟན་པ་དགེ་ལ་འབད་པ་གྱིས། །ཇི་ལྟར་སྲོག་ཆགས་
རྣམས་ནི་གཙེ་བར་མ་བྱེད་ཅིག །རྟག་པར་དབང་པོ་རྣམས་ནི་རོལ་པར་མ་བྱེད་ཅིག །འཕགས་མིན་གྱིས་བསྙེན་ཁྲོ་བ་འཛིན་པར་མ་བྱེད་ཅིག །ཕྱོགས་མིན་བྱ་བར་སེམས་ནི་གཡོ་བར་མ་བྱེད་ཅིག །ང་རྒྱལ་དང་ནི་རྒྱགས་པ་ཁུར་ནས་དུས་སུ་ནི། །རབ་ཏུ་འཐོར་ཞིང་ཤིན་ཏུ་གྱུར་པ་གཉིད་ལོག་གྱུར། །
རྣམ་པ་དེ་ལྟར་འཇིག་རྟེན་འགྲོ་བ་ཤེས་ནས་སུ། །དེ་ལ་མ་ཉལ་དགེ་བ་ལ་ནི་གཉིད་མ་ལོག །འཁོར་བའི་ཕྱོགས་ནི་གཡོ་བར་འཛེགས་ནས་སུ། །ངེས་པར་ལྟུང་ན་ས་གཞི་བག་མེད་འགྱུར་བའོ། །གང་ཞིག་བདེ་བ་འབྲེལ་མིན་དེ་ནི་བསྙེན་བྱ་མིན། །གང་གིས་འབྲས་བུ་ལེགས་མིན་གང་དེ་བྱ་
བ་མིན། །གང་ཞིག་དགེ་ལ་སྦྱོར་མིན་དེ་ནི་བཤེས་མ་ཡིན། །སྡུག་བསྔལ་རྣམ་པར་འཇོམས་མིན་གང་དེ་ཡེ་ཤེས་མིན། །གལ་ཏེ་ཡེ་ཤེས་མིན་ན་ཡང་སྲིད་མ་ཡིན་ཞིང་། །སྲིད་པར་གྱུར་ན་ལུས་མེད་ཉིད་ལ་ཡིན་པ་སྟེ། །ལུས་སུ་གྱུར་ན་ཡུལ་ལས་ཐར་པ་མ་ཡིན་ཞིང་། །ཉི་ཚེ་མ་ཡིན་འདོད་
པའི་སྲིད་པ་དོན་མེད་དོ། །གང་ཕྱིར་ལྷ་ན་གནས་རྣམས་དུས་ཀྱི་དབང་གིས་ནི། །གཟུགས་མེད་རྣམས་ཀྱང་མཛད་པ་ཅན་ཕྱིར་མི་རྟག་སྟེ། །དེ་བཞིན་འཇུག་པ་མིན་ལ་བློ་གྲོས་ཞུགས་བྱ་ཞིང་། །གལ་ཏེ་འཇུག་པ་མེད་ན་སྡུག་བསྔལ་ཡོད་མ་ཡིན། །གང་ཕྱིར་ལུས་ནི་འགྲོ་དང་གནས་པ་ལ་སོགས་པའི། །
སྣ་ཚོགས་རྟེན་གྱི་སྡུག་བསྔལ་དག་གི་རྩ་བ་སྟེ། །དེ་ཕྱིར་ལུས་མེད་དུ་ནི་ཡེ་ཤེས་ནུས་པ་གང་། །དེ་ཡོད་ལུས་ཀྱི་བུ་ལོན་ཡོད་པ་མ་ཡིན་ནོ། །གང་ལས་འགྲོ་བས་འདོད་པའི་ཆེད་དུ་བསྐྱེད་པ་ཡིས། །སྡུག་བསྔལ་ཆེན་པོ་དུ་མ་རྣམས་ལ་ཉེར་འགྲོ་སྟེ། །འདི་ལས་འདོད་པའི་སྲིད་ལས་རྣམ་པར་
དབེན་ནུས་ཤིང་། །སྡུག་བསྔལ་རྣམས་ལས་ཆགས་མེད་ཉམ་ཐག་ཡོད་མ་ཡིན། །དེ་ཕྱིར་གཟུགས་དང་བྲལ་བའི་ལྷ་རྣམས་ན་ཡང་ངམ། །འདོད་པ་རྣམས་དང་ལྡན་པའི་གཟུགས་ལྡན་རྣམས་ན་ཡང་། །སྐོར་བ་ཉིད་ཕྱིར་འཇུག་པ་ཞི་བ་མ་ཡིན་ན། །འདོད་པ་སྤྱོད་པ་དྲུག་པོ་རྣམས་སུ་སྔོན་ཉིད་དོ། །

172-1-74b

རྣམ་པ་དེ་ལྟར་མི་རྟག་སྡུག་བསྔལ་དེ་མེད་ཅིང་། །རྟག་པར་འབར་བའི་འཇིག་རྟེན་གསུམ་པོ་ཉིད་མཐོང་ནས། །བྱ་ཚང་ཤིང་ལ་སྒོང་སྐྱེས་རྣམས་ཀྱིས་གདུང་བ་ལྟར། །གང་དུ་འཇུག་ལ་སྨོན་ལམ་རིགས་པ་མ་ཡིན་ནོ། །མཆོག་དེ་རིག་པར་བྱ་ཞིང་གཞན་ནི་རིག་བྱ་མིན། །མཆོག་
དེ་བློ་གྲོས་ཡིན་ཞིང་གཞན་ནི་བློ་གྲོས་མིན། །མཆོག་དེ་བྱ་བ་ཡིན་ཞིང་གཞན་ནི་གྲུབ་པ་མིན། །ཆོས་འདི་ཁྱིམ་དང་ལྡན་པའི་སྐྱེ་བོ་རྣམས་ཀྱིས་ཏེ། །ཡོད་པ་མིན་ཞེས་དེ་ལྟར་ངེས་པར་རིག་བྱ་མིན། །ནགས་སམ་ཁྱིམ་ན་གནས་པ་དག་གི་ཞི་བ་ནི། །གང་གིས་སྒྲུབ་པ་ཡོད་པ་དེ་ཡིས་
ཡོད་པའོ། །ཚད་པས་མངོན་པར་གདུངས་པ་ཆུ་ལ་རྣམ་ཞུགས་ཏེ། །སྤྱི་ལས་ཐམས་ཅད་ཚིམ་པ་ཉེ་བར་འགྲོ་བ་ཉིད། །སྒྲོན་མ་དང་ལྡན་མུན་པ་རུ་ནི་མཐོང་བ་སྟེ། །རྣལ་འབྱོར་ཚད་མའོ་ན་ཚོད་མ་ཡིན་རིགས་མ་ཡིན། །ཁ་ཅིག་ནགས་ན་གནས་ཀྱང་ན་ཚོད་ལ་མི་སྦྱོར། །བརྟུལ་ཞུགས་ཟད་
ཅིང་ངན་འགྲོ་ལ་ནི་བསྙེན་པ་ཉིད། །ཁ་ཅིག་ཁྱིམ་ན་གནས་ཀྱང་རྣམ་དག་ལས་ཅན་ནི། །བག་དང་ལྡན་པ་ངེས་ལེགས་ལ་ནི་བསྙེན་པའོ། །མུན་པའི་རྒྱ་མཚོ་ལ་ནི་ལྟ་ངན་དབའ་རླབས་ཅན། །སྲེད་པའི་ཆུ་ལ་སྲོག་ཆགས་རྣམ་པར་འཕྱོ་རྣམས་སུ། །ཤེས་རབ་གྲུ་བོ་དྲན་དང་བརྩོན་འགྲུས་སྐྱེ་བ་
ནི། །གང་གིས་ཡོད་པ་དེ་ནི་དེ་ལ་སྒྲོལ་བ་ཡོད། །དེ་ལྟར་ཡུལ་ལ་མཆོག་ཏུ་སོང་བའི་རྒྱལ་པོ་དེ་ཡིས་ནི། །ཐམས་ཅད་མཁྱེན་ལས་ཆོས་ཀྱི་དེ་ཉིད་འདི་ནི་ཉེར་ཐོབ་ནས། །རྒྱལ་སྲིད་ངན་པ་མི་རྟག་གཡོ་ཞེས་ཉེར་སྐྱེས་བློ་ཅན་ནི། །མྱོས་པ་དང་བྲལ་གཉིས་འཐུང་བཞིན་དུ་མཉན་ཡོད་ཉིད་དུ་ཞུགས། །
ས་དབང་བཏུད་པ་དེ་ནི་ཤེས་ནས་མུ་སྟེགས་ཅན་གཞན་རྣམས། །དེར་ནི་སྟོབས་བཅུ་པ་ལ་རྫུ་འཕྲུལ་གྱིས་ནི་འགྲན་བཙུགས་གྱུར། །ས་སྐྱོང་ལས་ནི་རྣམ་པར་གསོལ་ནས་དེ་ནས་བདག་འཕམ་པའི། །དྲང་སྲོང་གིས་ནི་རྫུ་འཕྲུལ་ཆེད་དུ་སྡུག་པས་གནས་པ་བྱས། །དེ་ནས་གསལ་ཞིང་འོད་ཟེར་འཕྲོ་
བ་དང་བཅས་དཀྱིལ་འཁོར་ཅན། །སྐར་མ་རྣམས་ནི་འབར་བར་གྱུར་པའི་ཉི་མ་ཤར་བ་བཞིན། །ཡང་དག་དགའ་ཞིང་རྣམ་པ་སྣ་ཚོགས་བློ་ཅན་སྟོན་པ་རྣམས། །དེར་ནི་ཐུབ་པས་རྫུ་འཕྲུལ་རྣམ་པ་མང་པོས་ཕམ་པར་མཛད། །དེ་ནས་མཉན་ཡོད་ཀྱི་ནི་དེ་ལས་སྐྱེས་པའི་གྲགས་པ་དང་། །བཀུར་

172-1-75a

སྟི་ངེས་པ་མཆོག་གི་དཔལ་གྱིས་ཡོངས་སུ་སྤངས་པར་གྱུར། །དེ་ཉིད་ཀྱིས་ནི་སྲིད་པ་གསུམ་ལས་གྱེན་དུ་འཛེགས་པ་སྟེ། །དེའི་ཕྱིར་ཆོས་དག་གསུང་བར་བཞེད་ཅིང་ཡུལ་ལ་ཕན་ཕྱིར་རོ། །དེ་ནས་ཐུབ་པ་མཐོ་རིས་གནས་པའི་ཡུལ་ནི་ཡེ་ཤེས་ཀྱིས། །རྣམ་པར་བཏུལ་ནས་
མཐོ་རིས་གཤེགས་པ་ལོ་ནི་རྣམ་ཕུལ་དེས། །མཁའ་ལ་ལྷ་ཡི་རྒྱལ་པོའི་བསོད་སྙོམས་ཆོ་ག་བཞིན་བཞེས་ནས། །ལྷ་ཡི་འཇིག་རྟེན་དག་ནས་སཱམ་ཀ་པར་ནི་ཡང་དག་བབས། །དེ་ལ་གཞལ་མེད་གནམ་སའི་ལོགས་ལ་བབས་པ་ཡི། །ཞི་བ་ཐོབ་ཅིང་ལྟོས་པ་དང་བཅས་ལྷ་རྣམས་རྗེས་སུ་འོངས། །སར་གནས་ནམ་
མཁའི་ལོགས་ལ་གྱེན་དུ་གདོང་ཕྱོགས་རྒྱལ་པོ་ནི། །དེ་དང་དེ་རྣམས་མགོ་བོ་རྣམས་ཀྱིས་བཏུད་ཅིང་རབ་ཏུ་བཟུང་། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། རྒྱལ་བྱེད་ཀྱི་ཚལ་རབ་ཏུ་བཞེས་པའི་ལེའུ་སྟེ་ཉི་ཤུ་པའོ།།      །།ཐར་འདོད་ལྷ་ན་གནས་རྣམས་དང་། །སྐྱེད་མ་
མཐོ་རིས་སུ་བཏུལ་ནས། །ཐུབ་པས་གདུལ་བྱ་རྣམས་འདུལ་ཞིང་། །དེ་ནས་དེ་ནི་འཇིག་རྟེན་རྒྱུས། །རི་ལྔའི་དབུས་ཀྱི་གྲོང་ཁྱེར་དུ། །འོད་ལྡན་འཚོ་བྱེད་དབང་པོ་དང་། །གྲོ་བཞིན་སྐྱེས་དང་ཡན་ལག་སྦྱིན། །རྣམ་པར་འདྲེན་པས་དེ་ནས་བཏུལ། །རྒྱལ་པོའི་བུ་ནི་འཇིགས་མེད་དང་། །དཔལ་
སྦས་དང་ནི་ཉེ་བ་འཁོར། །ནྱ་གྲོ་དྷ་སོགས་མཐར་ལྡན་རྣམས། །སྔ་མའི་ལྟ་བ་ལས་ཟློག་གོ། །ཆོས་ཀྱི་ཐོས་པ་ཉིད་ལས་ནི། །མི་སྐྱོང་དཔལ་ནི་ཡངས་པ་ཅན། །སྤོས་འཛིན་གྱི་ནི་དབང་ཕྱུག་འདིར། །པདྨ་ཞེས་བྱ་རྣམ་པར་བཏུལ། །དེ་ནས་གནོད་སྦྱིན་གངས་ལྡན་དང་། །རྩེ་མོ་བརྒྱ་པ་དེ་ནས་ནི། །རྣམ་
རྒྱས་ཕ་རོལ་གནོན་པ་ཡིས། །རྣམ་རྒྱས་རི་བོར་བཏུལ་བའོ། །ཡོན་ཏན་གཟིགས་པས་མི་སྐྱོང་ནི། །ལྟ་བྱེད་བཙུན་མོའི་འཁོར་བཅས་ལ། །འཚོ་བྱེད་ཨ་མྲའི་ནགས་ཚལ་དུ། །མཚན་མོ་དད་པས་སྦྱར་བར་མཛད། །དེ་ནས་ཕ་རོལ་འགྲོ་བ་ཅན། །བྲམ་ཟེ་ཞི་བར་འགྲོ་རྣམས་དེས། །རྡོ་བའི་
རི་བོར་ཕྲ་མོ་ཡི། །ཚིགས་བཅད་དོན་རྣམས་ཀློག་ཏུ་བཅུག །དེ་ནས་དམ་པ་དྲན་མཛད་པས། །དངོས་སུ་ནོར་སྦྱིན་མཐོང་བ་མོ། །དགའ་བའི་སྐྱེད་མ་ལེགས་ལྡན་མ། །འོད་མའི་ཚེར་མ་ཅན་དུ་བཏུལ། །དེ་ནས་བརྟན་ལྡན་གྲོང་ཁྱེར་དུ། །བརྩེགས་སྦྱིན་གཉིས་སྐྱེས་དམ་པ་ནི། །མཆོད་

172-1-75b

སྦྱིན་རྣམ་པ་སྣ་ཚོགས་ཀྱིས། །མཆོད་འདོད་ཐར་པའི་ཆོས་ལ་བཙུད། །དེ་ནས་ལུས་འཕགས་རི་བོ་རུ། །བཙུད་ཕྱེད་རྩེ་མོ་ཉིད་དང་ནི། །ལྷ་མིན་སྐྱེས་མ་དང་ལྷ་རྣམས། །ངེས་པར་འཛིན་དུ་བཙུད་པར་གྱུར། །དེ་ནས་ཨངྒའི་གྲོང་ཁྱེར་དུ། །གནོད་སྦྱིན་གང་བ་བཟང་པོ་དང་། །མཆོག་དང་དབྱུག་པ་
དཀར་དམར་དང་། །གཏུམ་པོ་ལྟོ་འཕྱོ་ཆེ་རྣམས་བཏུལ། །ཨ་པ་ཎ་ཡི་གྲོང་ཁྱེར་དུ། །བྲམ་ཟེ་ཀེ་བྱ་ཤེ་ལ་དག །དཀའ་ཐུབ་ཐོབ་པ་ཐར་པར་སྦྱར། །འཚོ་ཕྱེད་སོར་མོའི་ཕྲེང་བ་ཅན། །བྲན་བཟངས་དང་མཚུངས་གཉིས་སྐྱེས་ནི། །བཅོམ་ལྡན་རྫུ་འཕྲུལ་ཕུན་ཚོགས་ཀྱིས། །ཕྲ་མོ་རྣམས་སུ་
བཏུལ་བ་མཛད། །གང་བ་བཟང་པོ་དང་མཚུངས་རྫས། །ལུག་ཅེས་བྱ་བ་བཟང་པོས་འཚོ། །ནོར་སྦྱིན་བཟང་དང་བཟང་པོའི་བུ། །བཟང་པོར་ཡང་དག་རྟོགས་པར་མཛད། །དེ་ནས་ཚངས་པའི་ཚེ་ལྡན་མིང་། །རྣམ་རྒྱས་ཚངས་པའི་ཚེ་ལྡན་པ། །གང་གི་སྨྲ་བ་སྨྲ་མཆོག་གིས། །ལུས་འཕགས་པོ་
ཡི་གྲོང་དུ་ཕམ། །ཡངས་པ་ཅན་གྱི་རྫིང་བུ་རུ། །སྲིན་བུ་ཤ་ཟ་དང་སེང་གེ། །ལ་སོགས་ལི་ཙྪ་བཱི་རྣམས་དང་། །མཆོག་དང་བདེན་བྱེད་ཉིད་བཏུལ་ཏོ། །དེ་ནས་ལས་བཟང་པོས་གནོད་སྦྱིན། །བཟང་པོ་བཟང་པོའི་སེམས་ལྡན་པ། །རྒྱན་བྱེད་དང་མཚུངས་གྲོང་ཁྱེར་དུ། །ཆོས་ཀྱི་ལམ་ལ་བཙུད་
པའོ། །དེ་ནས་བློ་དང་ལྡན་པ་ཡིས། །ཤིན་ཏུ་མི་བཟད་འབྲོག་ཏུ་ནི། །གནོད་སྦྱིན་འབྲོག་གནས་ཞེས་བྱ་དང་། །གཞོན་ནུ་ལེགས་འོངས་ལ་སྟོན་ཏོ། །དེ་ནས་གནོད་སྦྱིན་སྡིག་མེད་ལ། །གནོད་སྦྱིན་བདག་པོས་ཕྱག་བྱས་པས། །བདེ་དགའི་གྲོང་དུ་ཐར་པ་ནི། །ཐར་པ་གཟིགས་པས་གདམས་པ་
མཛད། །ཐུབ་པ་གྲགས་པ་ཡངས་རྣམས་དང་། །གནོད་སྦྱིན་དྲག་པོའི་ལས་ཅན་དང་། །ཁ་སྤུ་ལྡན་པ་གཉིས་ལ་ནི། །ག་ཡར་དྲང་སྲོང་གིས་བསྟན་ཏོ། །དེ་ནས་དྲང་སྲོང་དཀར་མིན་གྱི། །ཚ་བོ་ཀཱ་ཏྱཱ་ཡ་ན་ནི། །བཱ་རཱ་ཎ་སཱིའི་གྲོང་དུ་སྔོན། །གཉིས་སྐྱེས་སྟོབས་བཅུ་ལྡན་པས་བཏུལ། །མཚོ་འོབས་
བདེ་བར་ཕ་རོལ་འགྲོའི། །གྲོང་ལ་རྫུ་འཕྲུལ་གྱིས་གཤེགས་ནས། །དུས་སུ་ཚངས་པ་རྣ་བསྟོད་ལ། །དེ་ནས་དེས་ནི་རྗེས་སུ་བསྟན། །རྗེས་སུ་བསྟན་དེ་རབ་དང་བས། །དྲང་སྲོང་མཆོག་གི་གཙུག་ལག་ཁང་། །རྟག་པར་དྲི་ལྡན་ཁ་ལ་རེག །ཙནྡན་རང་བཞིན་བྱེད་དུ་བཅུག །དེ་ནས་གང་དུ་

172-1-76a

ཐུབ་པའི་ཞབས། །རྡོ་ལས་འཁོར་ལོའི་མཚན་མཐོང་བས། །སེར་སྐྱ་དཀའ་ཐུབ་ལྡན་པ་ནི། །འོད་ཟེར་ལྡན་པ་དེས་བཏུལ་ལོ། །དེ་ནས་གནོད་སྦྱིན་གླང་པོ་ལ། །གླང་པོ་ལྡན་པར་བསྟན་པ་སྟེ། །དེ་བཞིན་དྲག་པོ་བོང་བུ་ནི། །བཅོམ་བརླག་ཏུ་ནི་བཏུལ་བའོ། །
ཡུལ་འཁོར་སྐྱོང་དང་རྫས་མཉམ་པ། །ཡུལ་འཁོར་སྐྱོང་ཞེས་དྲན་པ་ནི། །གྲོང་རྡལ་རགས་པའི་མཛོད་ལྡན་དུ། །སྟོན་པས་དེ་ནས་རྣམ་པར་བཏུལ། །ཚངས་པ་དང་འདྲ་སྐྱེ་བོ་མཆོག །དགྲ་ཅན་དུ་ནི་བཏུལ་བ་སྟེ། །མཁས་པ་རྒྱ་ཆེན་སྐྱེས་བུ་ཅན། །ཉོན་མོངས་དུལ་བར་དེ་
བཞིན་ནོ། །འཇིགས་བཅས་ཀྱི་དང་མཚམས་བཟངས་ཀྱི། །བུའི་བུ་མོས་འཇུག་བུ་དག་དང་། །མུ་སྟེགས་གཞན་རྣམས་ཀྱི་མུན་པ། །མཉན་ཡོད་ཉིད་དུ་ཐུབ་པས་བཅོམ། །འདིར་ནི་བྲམ་ཟེ་མཆོད་སྦྱིན་ཅན། །དགེ་སོགས་རྣམས་དང་རིགས་གཙང་དང་། །ཀོ་ས་ལ་ཡི་དབང་ཕྱུག་ནི། །
སངས་རྒྱས་ཉིད་ཀྱིས་དད་པས་སྦྱར། །དེ་ནས་བྲམ་ཟེ་མཁས་པ་ནི། །བྲམ་ཟེ་སུ་ཀ་སཱ་རི་དང་། །ཤེ་ཏ་བི་ཀའི་འབྲོག་ཞི་བར། །བསྟན་པ་མཆོག་གིས་བསྟན་པའོ། །དེ་ནས་འཐབ་པའི་གྲོང་ཁྱེར་དུ། །གྲོང་ཁྱེར་གཙོ་དང་དུས་བྱེད་དང་། །འཇིགས་པའི་ལས་ཅན་ཆུ་སྲིན་ཀླུ། །རབ་
ཏུ་མ་ཞི་ཞི་བར་མཛད། །དེ་ནས་བྷར་ག་རྣམས་སུ་དེས། །གནོད་སྦྱིན་འཇིགས་བྱེད་བཏུལ་མཛད་ཅིང་། །རིགས་མེད་ཀྱི་ནི་བླ་མ་གཉིས། །རྒན་པོ་དེ་བཞིན་རྗེས་སུ་བཟུང་། །ནོར་ལྡན་གྱི་མཆོག་དབྱངས་ལྡན་དང་། །བུད་མེད་སྒུར་མཆོག་སོགས་རྣམས་
དང་། །སྐྱེས་ཆེན་དེ་རྣམས་དེ་རྣམས་ནི། །ཀཽ་ཤཱམ་བཱིར་ནི་རྗེས་སུ་བཟུང་། །དེ་ནས་སྤོས་འཛིན་ཡུལ་ཉིད་དང་། །ཀླུ་ཆེན་སོག་མ་མེད་པ་ནི། །དུལ་བའི་བདག་ཉིད་དུལ་བ་ལ། །ནང་གི་ཕ་རོལ་སོན་པར་ཤིགས། །འབར་ཞིང་འཇིགས་པའི་ལས་ཅན་ནི། །མཐར་བྱེད་བཞིན་དུ་སྲེག་འདོད་པ། །རྣམ་པར་བཏུལ་ནས་མཁས་
པ་དེས། །དུས་སུ་དེ་ནས་གདམས་ངག་བསྟན། །དེ་ལ་སོགས་པའི་འབྱུང་པོ་རྣམས། །ས་པ་རྣམས་དང་མཁའ་འགྲོ་རྣམས། །བཏུལ་ནས་ཚིགས་སུ་རྒྱ་མཚོ་བཞིན། །སངས་རྒྱས་གྲགས་པ་འཕེལ་བར་གྱུར། །ཆེ་བའི་བདག་ཉིད་དེ་མཐོང་ནས། །ལྷ་སྦྱིན་རློམ་སེམས་བྱས་པ་སྟེ། །བསམ་

172-1-76b

གཏན་རྣམས་ལས་འཁྲུལ་ཐོབ་ཅིང་། །འདྲ་བ་མིན་པ་མང་པོ་བྱས། །ཉེ་བར་བཅོམ་པའི་སེམས་ལྡན་དེས། །ཐུབ་པ་དགེ་འདུན་དབེན་བྱས་ཤིང་། །འཕྱེ་ལས་འདོད་པ་མ་བྱས་ཏེ། །དེ་ལ་གནོད་པའི་ཕྱིར་བརྩམས་སོ། །དེ་ནས་བྱ་རྒོད་ཕུང་པོའི་རིར། །རྡོ་བའི་འཁྲུལ་འཁོར་བྱས་པ་སྟེ། །
ཐུབ་པའི་སྟེང་དུ་གང་འཕངས་པ། །ལྟུང་བ་མ་ཡིན་གཉིས་སུ་གྱུར། །འཇིག་རྟེན་དུས་སུ་ཆུ་འཛིན་སྔོན་པོ་སྒྲ་སྒྲོགས་པ། །ཟླ་བ་འགོག་པ་ལ་ནི་མཁའ་ལ་རླུང་བཞིན་དུ། །དེ་བཞིན་གཤེགས་པ་ལ་ནི་མངོན་དུ་གདོང་ཕྱོགས་པར། །གླང་པོའི་དབང་པོ་རྒྱལ་པོའི་ལམ་ལ་གཏད་པའོ། །ལུས་ཀྱིས་སྣུན་
པས་ཡན་ལག་མཆོག་ནི་ཉེར་བླངས་ཤིང་། །མཆེ་བས་ཕུག་པས་རྒྱུ་མའི་དྲ་བ་རབ་བཀྲམ་པའི། །ལུས་པོ་རྣམས་ཀྱིས་རྒྱལ་པོའི་ཁབ་ཀྱི་ལམ་རྣམས་ནི། །རྒྱུ་བར་དཀའ་བར་བྱེད་ལ་མངོན་པར་རབ་ཏུ་ཞུགས། །ཤ་ནི་འདོད་པས་མི་ཡི་བརླ་ལ་རྨུགས་པ་སྟེ། །མཆེ་བའི་རྩེ་མོས་རེག་ཅིང་གཡོ་
བའི་རྒྱུ་མའི་ཕྲེང་། །ཁྲག་གིས་གཤེར་བའི་མགོ་བོ་སྣ་ལྗགས་དྲག་པོ་ཡིས། །འཕེན་པའི་དོན་དུ་རྡོ་རྣམས་བཞིན་དུ་གྱེན་དུ་འཕེན། །གསུམ་དུ་རབ་དགའི་ཆང་གིས་འཐོར་མའི་དྲི་ལྡན་ཞིང་། །རུལ་བའི་ཁྲག་དང་ཞག་གི་དྲི་ཡིས་བསྒོས་རྣམས་ཀྱིས། །དེ་ཚེ་བསྐོར་ཞིང་མཐའ་མེད་ཁྲོ་
བ་དང་ལྡན་པ། །གྲོང་ཁྱེར་སྐྱེ་བོ་དེ་ལ་སྐྱོ་བས་འཇིགས་པར་བྱེད། །གཉིས་འཐུང་མྱོས་པ་དུས་ཀྱི་དབྱུག་པ་འཇིགས་འདྲ་བ། །ཁེངས་ལས་གདོང་ནི་བཅོས་ཤིང་སྒྲ་སྐད་འཐོན་པ་སྟེ། །ཁྲོས་པས་རྣམ་པར་ལོག་པའི་མིག་ཅན་དེ་མཐོང་ནས། །ཧཱ་ཧཱ་བྱེད་པ་རྒྱལ་པོའི་ཁབ་ནས་བྱུང་བར་
གྱུར། །ཁ་ཅིག་ཡིད་མི་བདེ་བས་ཕྱོགས་སུ་བྲོས་པ་སྟེ། །གཞན་ནི་མཐོ་བ་མིན་པའི་ཡུལ་རྣམས་ལ་ཐིམ་ཞིང་། །དེ་བཞིན་འཇིགས་པ་ལས་གཞན་འཇིགས་པ་མ་བཟུང་ནས། །གཞན་རྣམས་གཞན་རྣམས་དག་གི་ཁྱིམ་རྣམས་ལ་ཞུགས་སོ། །ཁ་ཅིག་རྣམ་པར་འདུག་པའི་སེང་གེའི་
སྒྲ་རྣམས་ནི། །རང་གི་སྲོག་ལ་ཐེ་ཚོམ་ཡང་དག་མ་བསམས་ཤིང་། །སངས་རྒྱས་ལ་ནི་མངོན་པར་འཚེ་བ་མ་བྱེད་ཅེས། །རབ་ཏུ་བཟུང་ནས་གཉིས་འཐུང་དེ་ལ་རྒྱབ་ནས་འབོད། །དེ་བཞིན་གཞན་རྣམས་གླང་པོ་སྐྱོང་ལ་འབོད་པ་སྟེ། །གཞན་རྣམས་འདི་ལ་ཐལ་མོ་དག་གིས་ཕྱག་འཚལ་ལོ། །དེ་ནས་

172-1-77a

དེ་ལ་གཞན་རྣམས་བསྡིགས་པར་བྱེད་པ་སྟེ། །ཁ་ཅིག་ནོར་གྱིས་སྲེད་ཅིང་འདོད་པར་བྱེད་པའོ། །རླུང་འགྲོ་སྐར་ཁུང་དག་ནས་རྣམ་པར་ལྟ་བཞིན་དུ། །ལང་ཚོ་མ་རྣམས་ལག་པ་གཡོ་ཞིང་ངུ་བ་སྟེ། །འཇིགས་མ་གཞན་རྣམས་གསེར་གྱི་གདུ་བུ་དག་དང་ལྡན་པ་ཡིས། །
ཟངས་མདོག་ལག་པ་རྣམས་ཀྱིས་མིག་རྣམས་འགེབས་པའོ། །ཡོངས་སུ་རོ་མྱང་གླང་པོས་འཇོམས་པར་འདོད་པ་ན། །གྱེན་དུ་ལག་བཏེག་སྐྱེ་བོ་ངུ་བར་གྱུར་ན་ཡང་། །གཤེགས་པ་འབྱེད་པ་མེད་ཅིང་གནོད་པ་མི་མངའ་བར། །བདེ་བར་གཤེགས་པ་རང་གནས་རྣམ་འགྱུར་མེད་པར་གཤེགས། །
བྱམས་པས་འབྱུང་པོ་རྣམས་ལ་རྗེས་སུ་བརྩེ་བ་ནི། །གུས་པས་ལྷ་རྣམས་ཀྱིས་ནི་རྗེས་སུ་འགྲོ་བ་སྟེ། །དེ་ལ་དབང་པོའི་གླང་པོ་ཆེས་ཀྱང་རེག་པ་རུ། །ནུས་པ་མ་ཡིན་གང་ཕྱིར་ཐུབ་པ་བརྟན་པར་གཤེགས། །གང་ཕྱིར་སངས་རྒྱས་ལ་ནི་རྗེས་འགྲོ་དགེ་སློང་སྟེ། །དེས་ནི་རྒྱང་ནས་གླང་ཆེན་མཐོང་ནས་
བྲོས་པ་སྟེ། །སྣ་ཚོགས་བདག་ཉིད་འཇིག་རྟེན་རང་བཞིན་གྱིས་བཞིན་དུ། །ཀུན་དགའ་བོ་གཅིག་སངས་རྒྱས་ལ་ནི་རྗེས་སུ་སོང་། །དེ་ནས་གླང་ཆེན་ཁྲོས་པ་དེ་ནི་ཉེར་འོངས་ནས། །ཐུབ་པའི་མཐུ་ལས་འདུ་ཤེས་ཉེ་བར་ཐོབ་པ་སྟེ། །མིག་སྨན་རི་བོ་རྡོ་རྗེས་ཕྱེ་མར་བཅོམ་པ་བཞིན། །ལུས་པོ་
རབ་ཏུ་ཟེགས་ཤིང་སྤྱི་བོས་འགྱེལ་བར་གྱུར། །དེ་ལ་ཤིན་ཏུ་མཛེས་ཤིང་འདམ་སྐྱེས་འཇམ་པོ་ཡིས། །ལེགས་སྐྱེས་སོར་མོའི་དྲ་བའི་ཕྱག་གིས་མགོ་བོ་ལ། །ཟླ་བ་ཆུ་འཛིན་ལ་ནི་འོད་ཟེར་གྱིས་བཞིན་དུ། །གཉིས་འཐུང་དབང་པོ་ལ་ནི་ཐུབ་པས་རེག་པར་གྱུར། །ཆུ་ཡི་ཤིན་ཏུ་ཁུར་ལས་
དུས་ཀྱི་སྤྲིན་བཞིན་དུ། །ཞབས་ཀྱི་རྩ་བར་གཉིས་འཐུང་དེ་ནི་བསྡད་པ་སྟེ། །ཐུབ་པས་རྣ་བའི་ཏ་ལ་གཡོ་མེད་ལ་གཟིགས་ཤིང་། །དེ་ལ་སེམས་ཅན་མ་འོས་ཞི་བས་བསྟན་པའོ། །སྡིག་མེད་དང་བཅས་རྣམ་པར་འཇོམས་པ་སྡུག་བསྔལ་ཏེ། །སྡིག་མེད་ཉིད་ལ་གླང་ཆེན་གནོད་པ་
མ་བྱེད་ཅིག །སྲིད་པ་སྲིད་པར་སྡིག་མེད་བཅོམ་པའི་སྲོག་ཆགས་ཀྱིས། །བདེ་འགྲོ་བརྒྱད་ལ་གླང་ཆེན་འགྱུར་བ་མ་ཡིན་ནོ། །འདོད་ཆགས་དང་ནི་ཞེ་སྡང་དེ་བཞིན་གཏི་མུག་སྟེ། །གླང་ཆེན་གསུམ་པོ་བཟོད་པར་དཀའ་བའི་ཆང་ཡིན་ལ། །ཆང་གསུམ་རྣམས་དང་ཐུབ་པ་རྣམས་ནི་བྲལ་བ་སྟེ། །

172-1-77b

རིམས་ནད་མེད་ཅིང་མྱ་ངན་འདས་པ་མངོན་པར་བརྙེས། །དེ་ཕྱིར་མུན་པར་འདོད་པ་འདི་ནི་སྤོངས་འདོད་པ། །ཆང་ནི་སྤངས་ལ་རང་གཞན་འདུ་ཤེས་ཐོབ་པར་གྱིས། །འཁོར་བའི་རྒྱ་མཚོའི་འདམ་ནི་རྒྱས་པར་ཆགས་པ་སྟེ། །སླར་ཡང་དེ་ལྟར་གཉིས་འཐུང་དབང་པོ་མ་ལྟུང་ཅིག །དེ་ནས་
གླང་པོ་དེས་ནི་གསུང་འདི་ཐོས་ནས་སུ། །ཆང་ནི་སྤངས་ཤིང་ཡང་དག་རིག་པར་སོང་བ་སྟེ། །བདུད་རྩི་འཐུངས་ནས་ནད་རྣམས་དག་ལས་གྲོལ་བ་བཞིན། །ནང་དུ་སོང་བའི་བདེ་བ་དམ་པ་ཐོབ་པར་གྱུར། །སློབ་མ་བཞིན་དུ་ཐུབ་ལ་རབ་བཏུད་དེ་མ་ཐག །ཆང་ནི་ཡོངས་
སྤངས་གླང་པོའི་དབང་པོ་དེ་མཐོང་ནས། །ཁ་ཅིག་ཆོས་རྣམས་བསྐོར་ཞིང་གཡུག་པར་གྱུར་པ་སྟེ། །གཞན་རྣམས་ལག་པ་རྣམས་ནི་རྡེབས་ཤིང་སྐད་འདོན་ཏོ། །གཞན་རྣམས་ཀྱིས་ནི་མགོ་བོས་ཐུབ་ལ་ཕྱག་འཚལ་ཞིང་། །དེ་ནས་དེ་ལ་གཞན་རྣམས་བསྐོར་བ་བྱས་པ་སྟེ། །གཞན་
རྣམས་འཕགས་པ་ཉིད་ལས་གླང་ཆེན་ལ་བསྟོད་ཅིང་། །ཡ་མཚན་དང་བཅས་གཞན་རྣམས་རིག་པར་གྱུར་པའོ། །ལྡིང་ཁང་ལ་གནས་བུད་མེད་གཞན་རྣམས་དེ་ལ་ནི། །གཙང་ཞིང་རིན་ཐང་ཆེན་པོའི་གོས་རྣམས་ཀྱིས་མཆོད་ཅིང་། །གཞན་རྣམས་གསར་བའི་ཕྲེང་བ་
ཡོན་ཏན་ཡིད་འོང་དང་། །རྒྱན་ནི་དེ་དང་དེ་དག་རྣམས་ཀྱིས་མངོན་པར་འཐོར། །དུས་དང་མཚུངས་པའི་གླང་པོ་དུལ་བར་གནས་པ་ན། །སྐྱེ་བོ་དད་པ་མེད་པ་དབུས་ནས་སོང་བ་སྟེ། །དབུས་གནས་ཁྱད་པར་ལས་ནི་དང་བར་རབ་སོང་ཞིང་། །དད་པ་རྣམས་ཀྱང་གང་དེ་བསྟན་པར་ཉེ་བར་
སོང་། །དད་པ་ལ་གནས་མ་སྐྱེས་དགྲ་ནི་ཐུབ་པ་ཡིས། །གླང་ཆེན་དབང་པོ་དེ་ནི་བརྟུལ་བ་མཐོང་ནས་ནི། །ཡ་མཚན་གྱུར་ཞིང་དེ་ནས་དགའ་བ་སྐྱེས་པ་སྟེ། །སངས་རྒྱས་ལ་ནི་མཆོག་ཏུ་དད་པ་བྱས་པའོ། །ཉོན་མོངས་རྩོད་ལྡན་དུས་ནི་ངེས་པར་ལོག་པ་ན། །རྫོགས་ལྡན་
དུས་ནི་འོངས་ནས་སླར་ཡང་ཆོས་དོན་བཞིན། །དེ་ལྟར་རྫུ་འཕྲུལ་དང་ལྡན་སྙན་གྲགས་མཆོག་རྣམས་ཀྱིས། །རབ་ཏུ་གནས་པའི་དཀའ་ལྡན་ཐུབ་པ་མཆོག་འཕེལ་ཏོ། །མི་དགེ་བ་དང་ཡོངས་སུ་ལྡན་པའི་ལྷ་སྦྱིན་ནོ། །ཉོན་མོངས་སྡིག་པའི་ལས་ནི་མང་པོ་བྱས་ནས་ནི། །མི་སྐྱོང་

172-1-78a

སྟེ་ན་རྒུ་བ་གཉིས་སྐྱེས་དྲང་སྲོང་གི །དམོད་པ་ལས་བཞིན་ས་ཡི་འོག་ཏུ་བྱིང་བར་གྱུར། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། ལས་ཀྱི་རྒྱུན་གྱི་ལེའུ་སྟེ་ཉི་ཤུ་རྩ་གཅིག་པའོ།།      །།དེ་ནས་འཇིག་རྟེན་རྗེས་བཟུང་ནས། །
དུས་ཀྱི་སྨྲ་བ་རྣམས་ཀྱི་མཆོག །ཆོས་ཀྱིས་ས་ནི་ཁྱབ་མཛད་ནས། །མྱ་ངན་འདའ་བ་དང་མཚུངས་དགོངས། །དེ་ནས་དུས་སུ་རྒྱལ་ཁབ་ན། །པ་ཊཱ་ལི་ཡི་གྲོང་དུ་གཤེགས། །མཆོད་རྟེན་པ་ཊཱ་ལི་མཚོན་པ། །དེར་ནི་འཕགས་པ་དེ་བཞུགས་སོ། །དུས་ནི་དེ་ཚེ་གྲོང་ཁྱེར་གྱི། །ལི་ཙྪ་
བཱི་ནི་ཞི་བའི་ཕྱིར། །མ་ག་དྷཱ་ཡི་རྒྱལ་པོ་ཡི། །བློན་པོ་ཆར་དབྱིབས་ཀྱིས་བྱས་སོ། །ལྷ་རྣམས་ཀྱིས་དེར་རང་གི་ནོར། །ཉེ་བར་ལེན་པ་རབ་གཟིགས་ནས། །གྲོང་དེ་འགྲོ་ན་ཕུལ་བྱུང་དུ། །དེ་བཞིན་གཤེགས་པས་རྣམ་པར་གསུངས། །དེ་ཚེ་ཆར་པའི་རྣམ་པ་ཡིས། །བཀུར་
བྱས་བྱེད་པ་རྣམས་ཀྱི་མཆོག །རྒྱ་མཚོའི་ཆུང་མ་གཙོ་བོ་ལ། །མངོན་ཕྱོགས་སློབ་མ་དང་བཅས་གཤེགས། །གངྒཱའི་འགྲམ་དུ་དེ་གཤེགས་ནས། །ཇི་ལྟར་རྙེད་གྲུ་དེ་དང་དེས། །སྐྱེ་བོ་རྣམས་ནི་སྒྲོལ་བ་གཟིགས། །དེ་རྣམས་གཟིགས་ནས་ཐུགས་མཛད་དོ། །འབད་པས་ཆུ་བོ་སྒྲོལ་
བ་ལ། །བདག་གི་དེ་ལྟར་འདྲ་བ་ཡིན། །དེ་ཕྱིར་རྫུ་འཕྲུལ་མཐུ་ཡིས་ནི། །བདག་གི་གྲུ་མེད་རབ་ཏུ་འགྲོ། །དེ་ལྟར་དེར་ནི་སློབ་མར་བཅས། །ལྷ་མི་རྣམས་ལ་མི་སྣང་ཞིང་། །རླུང་གིས་འགྲོས་ཀྱང་ཕན་མཛད་ནས། །སྐད་ཅིག་གིས་ནི་ཕ་རོལ་གྱུར། །སྡུག་བསྔལ་མཚོ་ཡི་ཕ་རོལ་
སྔོན། །ཡེ་ཤེས་གྲུ་བོས་དེ་མཁྱེན་ནས། །སླར་ཡང་གྲུ་འདི་མ་དམིགས་ནས། །ཐུབ་པས་གངྒཱ་བསྒྲལ་བའོ། །བཅོམ་ལྡན་ཉི་མ་མཛེས་པ་ནི། །གང་གི་སྒོ་ལས་ངེས་འབྱུང་བ། །དེ་ནི་དེ་ཚེ་གཽ་ཏམ་སྒོར། །དེ་ལ་མཆོད་དོན་ཉིད་དུ་བྱས། །འགྲམ་གང་དག་ལས་རྣམ་འདྲེན་པ། །གངྒཱའི་
ཕ་རོལ་དུ་གཤེགས་པ། །དེ་ནི་སྟེགས་སུ་འགྲོ་ལ་གྲགས། །དེ་ཡི་རིགས་ཀྱིས་མངོན་པར་བརྗོད། །དེ་ནས་སྒྲོལ་འདོད་མི་རྣམས་དང་། །རྒལ་བ་རྣམས་དང་སྒྲོལ་བ་རྣམས། །ཡ་མཚན་རྣམ་རྒྱས་གདོང་རྣམས་ཀྱི། །མིག་རྣམས་དེ་ལ་བཏུང་བར་གྱུར། །དེ་ནས་གངྒཱའི་འགྲམ་ནས་ནི། །

172-1-78b

སངས་རྒྱས་ཀུ་ཌའི་གྲོང་དུ་གཤེགས། །དེར་ནི་ཆོས་ལྡན་གཏམ་མཛད་ནས། །ནཱ་དཱའི་ཀར་ནི་མངོན་པར་གཤེགས། །དུས་ནི་དེ་ཚེ་དེ་ན་ནི། །སྐྱེ་བོ་ཆེན་པོ་རྒུད་པ་སྟེ། །གང་གིས་གང་དུ་གང་འགྲོ་བ། །དེ་རྣམས་ལ་དེར་ཐུབ་པས་གསུངས། །དེར་ནི་མཚན་མོ་གཅིག་ཕུལ་ནས། །ཡངས་པ་
ཅན་གྱི་གྲོང་དུ་གཤེགས། །དེ་ནས་ཨ་མྲ་སྐྱོང་བའི་ས། །དཔལ་ལྡན་ཚལ་དུ་དཔལ་སྟུག་གཤེགས། །ཨ་མྲ་སྐྱོང་མ་རེས་མའི་གཙོ། །རྣམ་པར་འདྲེན་པ་དེར་ཐོས་ནས། །རྣམ་དུལ་ཐེག་པ་ལ་གནས་ནས། །མཆོག་ཏུ་དགའ་བས་རབ་ཏུ་སོང་། །ཕྲ་བའི་གོས་དཀར་འཛིན་
པ་མོ། །ཕྲེང་བ་མེད་ཅིང་དབྱུག་བྲལ་མ། །ལྷ་ཡི་བྱ་བའི་དུས་སུ་ནི། །ལེགས་མ་རིགས་ཀྱི་མནའ་མ་འདྲ། །རང་གི་གཟུགས་ཀྱིས་ཁེངས་པ་ཡི། །དམ་པ་ལི་ཙྪ་བཱི་རྣམས་ཀྱི། །སེམས་རྣམས་དང་ནི་ནོར་རྣམས་དང་། །ཡོན་ཏན་མཐའ་དག་རྣམས་ཀྱིས་ཕྲོགས། །དཔལ་
དང་མཛེས་པ་བརྟན་པ་ཡིས། །ནགས་ཀྱི་ལྷ་མོའི་གཟུགས་འདྲ་བ། །དེ་ནི་ཐེག་པ་ལ་བབས་ནས། །སྐྱེན་པར་ནགས་དེར་རབ་ཏུ་ཞུགས། །རིགས་ཀྱི་མོ་བཙུན་གདུང་བ་མོ། །མིག་རབ་གཡོ་བ་དེ་གཟིགས་ནས། །བདེ་བར་གཤེགས་པས་རྔ་དབྱངས་ཀྱིས། །དགེ་སློང་རྣམས་ལ་
བཀའ་སྩལ་པ། །སྟོབས་ཆུང་རྣམས་ཀྱི་ཡིད་ཀྱི་རིམ། །ཨ་མྲ་སྐྱོང་མ་འདི་མངོན་འོངས། །དྲན་ལྡན་བདུད་རྩིའི་སེམས་ལྡན་རྣམས། །ཡེ་ཤེས་ཀྱིས་ནི་ཁྱེད་རྣམས་གནས། །ཉེ་སར་སྦྲུལ་ནི་མཆོག་ཡིན་ཞིང་། །རལ་གྱི་གདེངས་པའི་དགྲ་བོ་མཆོག །དྲན་དང་ཡེ་ཤེས་རྣམས་
བྲལ་བའི། །ཉེ་སར་བུད་མེད་རྣམས་མ་ཡིན། །བསྡད་པ་འམ་ནི་ཉལ་བ་འམ། །འགྲོ་འམ་ཡང་ན་གནས་པ་འམ། །བུད་མེད་རི་མོར་བྲིས་པས་ཀྱང་། །མི་རྣམས་ཀྱི་ནི་ཡིད་འཕྲོག་གོ། །འདི་རྣམས་ཞེན་པས་ཉམ་ཐག་གམ། །གྱེན་དུ་ལག་བཏེག་ངུ་ན་ཡང་། །སྐྲ་བཀྲམ་རྣམས་
ཀྱིས་བསྲེག་པ་རུ། །ནུས་ན་མོ་བཙུན་རྣམས་སྔོན་ཉིད། །ཕ་རོལ་པོ་འབྲེལ་རྣམ་མང་པོའི། །དབྲོག་བྱ་ཡོན་ཏན་གྱིས་བསླུས་རྣམས། །དེ་ཡི་རང་བཞིན་མ་མཐོང་སྟེ། །བུད་མེད་རྣམས་ལ་བྱིས་རྣམས་རྨོངས། །མི་རྟག་སྡུག་བསྔལ་བདག་མེད་དང་། །མི་དགེ་བ་ཞེས་མཐོང་ནས་ནི། །

172-1-79a

ལྟ་ཞིང་སྒོམ་པ་པོ་རྣམས་ཀྱི། །སེམས་ནི་ཟིལ་གྱིས་ནོན་མ་ཡིན། །གནས་དེ་རྣམས་སུ་ལེགས་གོམས་བློ། །སྤྱོད་ཡུལ་རྣམས་སུ་བ་ལང་བཞིན། །ལྷ་ཡི་ཡུལ་རྣམས་ཀྱིས་འཇོམས་པར། །ནུས་མིན་མི་རྣམས་ཀྱིས་ཅི་སྨྲོས། །དེ་ཕྱིར་ཤེས་རབ་མདའ་
འཛིན་ཞིང་། །བརྩོན་འགྲུས་གཞུ་ནི་ལག་པ་ན། །དྲན་པའི་གོ་ཆ་ཡོངས་བགོས་ཤིང་། །ཡུལ་གྱི་འདུ་ཤེས་ཅན་དུ་མནོས། །ལྕགས་ཀྱི་ཐུར་མ་ཚ་མོ་ཡིས། །མིག་ལ་རེག་པ་མཆོག་ཡིན་ཞིང་། །གཡོ་བའི་མིག་ཅན་བུད་མེད་ལ། །མ་རུངས་དྲན་པས་ལྟ་ཕྱིར་མིན། །གལ་
ཏེ་དུས་ནི་དེ་ཡི་ཚེ། །ཆགས་པའི་སེམས་ཀྱིས་དུས་བྱེད་ན། །དུད་འགྲོ་འམ་ནི་འོག་ཉིད་དུ། །དབང་མེད་ཅིངས་ནས་ཁྲིད་པར་བྱེད། །དེ་ཕྱིར་འཇིགས་པ་འདི་ཤེས་ནས། །མཚན་མར་སྤྲོས་པ་མི་བྱ་ཞིང་། །ལུས་པོ་ལ་ནི་གཟུགས་ཙམ་དུ། །གང་གིས་མཐོང་བ་དེ་མཐོང་ངོ་། །
དབང་པོས་འཇིག་རྟེན་ན་ཡུལ་རྣམས། །འཆི་མིན་དབང་པོ་རྣམས་དེས་མིན། །གང་ཞིག་དེ་རྣམས་ལ་ཆགས་གྱུར། །དེ་ནི་དེ་རྣམས་ལས་འཆིང་ངོ་། །བ་ལང་གཉིས་ཀྱི་སྦྱོར་བའི་ཕྱིར། །སྦྱོར་བ་ལ་གཅིག་ཇི་ལྟར་གྱུར། །ཡུལ་དང་དབང་པོ་དེ་དག་ནི། །ཆགས་པ་
ཕན་ཚུན་དེ་ལྟར་མིན། །མིག་གིས་གཟུགས་ནི་འཛིན་པ་སྟེ། །སེམས་ཀྱིས་རྣམ་པར་རྟོག་པར་བྱེད། །རྣམ་པར་རྟོག་ལས་དེར་སྐྱེ་ཞིང་། །ཆགས་དང་ཆགས་བྲལ་ཉིད་ཀྱང་ངོ་། །རྣམ་པར་མ་བརྟགས་དབང་པོའི་དོན། །གལ་ཏེ་དོན་མེད་ཆེད་གྱུར་ན། །དབང་པོའི་
སྤྱོད་ཡུལ་ལ་སྤྱོད་པ། །ཐམས་ཅད་དོན་མེད་ཀྱིས་སྦྱོར་ཏོ། །དེ་ཕྱིར་མ་དོར་དྲན་པས་དང་། །བག་ཡོད་མཆོག་ཏུ་འགྲོ་བས་དང་། །རང་དོན་རྗེས་སུ་མཐོང་བས་དང་། །གདུང་མེད་སེམས་ཀྱིས་བསྒོམ་པར་བྱ། །དེ་ལྟར་དོན་མཐར་མ་གྱུར་པའི། །དགེ་སློང་རྣམས་ལ་དེ་རྗེས་
བསྟན། །ལྟོས་བྱས་ཨ་མྲ་སྐྱོང་མ་ནི། །ཐལ་མོ་སྦྱར་བྱས་ཉེ་བར་འོངས། །དེས་ནི་ཐུགས་ཞི་དྲང་སྲོང་མ། །ཤིང་དྲུང་གནས་པ་མཐོང་ནས་ནི། །ནགས་ཀྱི་ཡོངས་སུ་ལོངས་སྤྱོད་ཀྱིས། །མཆོག་ཏུ་རྗེས་སུ་འཛིན་པ་སྙམ། །དེ་ནས་བཀུར་སྟི་མང་པོ་ལས། །གཡོ་ཡང་ལྟ་

172-1-79b

བྱེད་རབ་བཀོད་ནས། །མེ་ཏོག་ཙམ་པ་ཀ་རྒྱས་ལྟར། །མགོ་བོས་ཐུབ་པ་ལ་ཕྱག་འཚལ། །ཀུན་མཁྱེན་གྱིས་ཀྱང་རྗེས་གནང་མ། །དེ་ནས་ས་ལ་སྡད་པ་སྟེ། །དེ་ཡིས་བློ་ལ་བཟོད་གསུང་གིས། །ཐུབ་པས་དེ་ལ་བཀའ་སྩལ་ཏོ། །བསམ་པ་འདི་ནི་ཡོན་ཏན་ལྡན། །
རྣམ་དག་སེམས་དཔའ་ཉིད་བསྟན་ཏོ། །བུད་མེད་བྱིས་པ་ཕུལ་གནས་པ། །ཆོས་ལ་འདོད་པ་རྙེད་པར་དཀའ། །གལ་ཏེ་ཆོས་ཀྱི་བདག་ཉིད་གྱུར། །ཞེན་པས་བཅོམ་པའི་སེམས་ལྡན་པའི། །ན་རབ་མི་མོ་རྣམས་ཀྱིས་དང་། །བློ་ལྡན་མི་རྣམས་ཀྱིས་མཚར་ཅིང་། །རང་བཞིན་
གྱིས་ནི་བློ་ཆུང་ཞིང་། །གཡོ་བའི་སེམས་ལྡན་ལང་ཚོ་མ། །ཡུལ་གཅིག་རོ་ཡིས་འཇིག་རྟེན་ན། །ཆོས་ཤེས་ཤེས་པ་ཡ་མཚན་ནོ། །ཁྱོད་ཀྱི་ཆོས་ལ་ཡིད་གྱུར་པ། །དེ་ནི་ཁྱོད་ཀྱིས་བདག་ཉིད་དོན། །མི་རྟག་གསོན་པའི་འཇིག་རྟེན་ན། །ཆོས་ལས་གཞན་ན་ནོར་ཡོད་མིན། །ནད་ཀྱིས་
ནད་མེད་འཇོམས་པ་སྟེ། །རྒ་བས་ལང་ཚོ་གཅོད་པ་ཉིད། །འཆི་བས་སྲོག་ནི་ལེན་པ་སྟེ། །ཆོས་ཀྱིས་རྒུད་པ་ཡོད་མ་ཡིན། །གང་ཕྱིར་དགའ་བ་རྣམས་དང་བྲལ། །མི་དགའ་བ་རྣམས་དང་སྦྱོར་ཞིང་། །མངོན་པར་འདོད་པ་ཐོབ་པ་ན། །དེ་ཕྱིར་ཆོས་ནི་མཆོག་ཏུ་འགྲོ། །གཞན་དབང་
སྡུག་བསྔལ་ཆེན་པོ་སྟེ། །རང་དབང་མཆོག་ཏུ་བདེ་བ་ཉིད། །མ་ནུའི་རིགས་སུ་སྐྱེས་ན་ཡང་། །བུད་མེད་ཐམས་ཅད་གཞན་དབང་ངོ་། །གང་ཕྱིར་གཞན་དབང་ཉིད་ཕྱིར་དང་། །དེ་བཞིན་ཕྲུ་གུ་འཛིན་པའི་ཕྱིར། །བུད་མེད་རྣམས་ཀྱི་སྡུག་བསྔལ་ལ་ལྷག །དེ་ཕྱིར་ཡང་དག་ངེས་པར་འོས། །དེ་
ལྟར་ཐུབ་པ་ཆེན་པོའི་གསུང་། །རང་བཞིན་གྱིས་དང་མཁས་ལས་དང་། །བརྟན་ལས་བྱིས་ཀྱང་བྱིས་མིན་བཞིན། །ཐོས་ཤིང་མངོན་པར་དགའ་བའོ། །དེ་བཞིན་གཤེགས་པའི་ཆོས་ཀྱི་སྨྲ་བ་ཡིས། །འདོད་པའི་བདག་ཉིད་ཅན་གྱིས་སེམས་ལ་བྲབས་པ་ནི། །བུད་མེད་ཉིད་ནི་སྨད་
ཅིང་ཡུལ་ལས་ལོག་པ་སྟེ། །གང་གི་སྐྱེ་བོའི་རྟེན་ལ་བཙོག་པར་བྱས་པའོ། །དེ་ནས་མེ་ཏོག་ཁུར་ལས་ཙུ་ཏའི་མཆོད་སྡོང་བཞིན། །ཡང་དག་ཀུན་ནས་དུད་པའི་ལུས་ཀྱི་མཆོད་སྡོང་ཅན། །ཐུབ་པ་ཆེན་པོ་ལ་ནི་གུས་པས་མིག་ཞུགས་ཤིང་། །ཡང་ཡང་ཆོས་ནི་རྣམ་པར་དག་པའི་ལྟ་བས་

172-1-80a

གནས། །རང་བཞིན་གྱིས་ནི་ངོ་ཚ་དང་ལྡན་བུད་མེད་དེ། །ཆོས་ནི་མངོན་པར་འདོད་པས་ཡང་ཡང་བསྐུལ་བ་ནི། །འདམ་སྐྱེས་མཛོད་དང་འདྲ་བས་ཐལ་མོ་སྦྱར་ནས་ནི། །དལ་བུས་སྨྲ་བའི་སྐད་ཀྱི་གདངས་ཀྱིས་གསོལ་བའོ། །བཅོམ་ལྡན་དོན་མཛད་བདག་ལ་
གསུང་དོན་དུ། །ནང་པར་བསོད་སྙོམས་དུས་སུ་དགེ་སློང་སྡེར་བཅས་པ། །སྡུག་བསྔལ་ཉེ་བར་ཞི་བའི་མཛད་པོ་འཇིག་རྟེན་ན། །འབྲས་བུར་གྱུར་པའི་བདག་ལ་འབྲས་བུར་མཛད་དུ་གསོལ། །དེ་ནས་དེ་ཡི་གུས་པ་དེ་ལྟར་གཟིགས་ནས་དང་། །སེམས་ཅན་རྣམས་ནི་བཟའ་བའི་དབང་
ཉིད་མཁྱེན་ནས་ནི། །གསུང་མ་ཕྱེ་ནས་བདེ་བར་གཤེགས་པས་དེ་ལྟར་ཞེས། །དེ་ལ་ངེས་པར་རྣམ་འགྱུར་བརྡ་ཡིས་མཛད་པའོ། །སྐད་ཅིག་མཛད་པ་དང་ལྡན་སྤྱན་ཡངས་མཆོག་གི་ཆོས་མངའ་ཞིང་། །ཆོས་ཀྱི་སྣོད་ལ་དེས་ནི་དགའ་ཞིང་མགུ་ལ་རུངས་པ་སྟེ། །གུས་པས་རྙེད་པ་
མཆོག་ནི་རྣམ་པར་ངེས་ཤིང་བསྟོད་པར་གྱུར། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། ཨ་མྲ་སྐྱོང་མའི་ནགས་གཟིགས་པའི་ལེའུ་སྟེ་ཉི་ཤུ་རྩ་གཉིས་པའོ།།      །།དེ་ནས་ཐུབ་པའི་ཐུགས་རིག་ནས། །ཕྱག་འཚལ་ནས་ཀྱང་གྲོང་དུ་སོང་། །དེ་
ནི་ལི་ཙྪ་བཱིས་ཐོས་ནས། །ལྟ་འདོད་སངས་རྒྱས་ལ་སོང་ངོ་། །དཀར་པོའི་རྟ་དང་ཤིང་རྟ་གདུགས། །ཕྲེང་བ་རྒྱན་དང་བགོ་བ་རྣམས། །ཁ་ཅིག་ཁ་ཅིག་དེ་རྣམས་དང་། །དམར་སེར་རྣམས་དང་དེ་བཞིན་གཞན། །ཁ་ཅིག་བཻ་ཌཱུརྱ་ལྗང་དང་། །གཞན་རྣམས་རྨ་བྱའི་མཇུག་མ་སྟེ། །དེ་ལྟར་ཆ་
ལུགས་རྒྱ་ཆེན་པོ། །བདག་གིས་དགའ་བྱེད་རྣམས་དང་སོང་། །རི་བོ་རྣམ་རྒྱས་རོ་སྟོད་ཅན། །གསེར་གྱི་གཉའ་ཤིང་ལག་པ་རྣམས། །དཔལ་ལྡན་བོང་རིང་དངོས་སུ་ནི། །དེ་རྣམས་མཐོ་རིས་བཞིན་དུ་མཛེས། །མཚམས་སྤྲིན་རྐང་ལ་སྣ་ཚོགས་རྣམས། །གློག་ནི་རབ་ཏུ་
སྣང་བ་བཞིན། །ཤིང་རྟ་རྣམས་ལས་བབས་འདོད་པས། །དེ་རྣམས་གནས་པ་རྣམ་པར་མཛེས། །དབུ་རྒྱན་རྣམ་གཡོ་རྣམ་བཏུད་པའི། །བརྟན་རྣམས་ཐུབ་ལ་ཕྱག་འཚལ་ནས། །ང་རྒྱལ་ལྡན་རྣམས་རྒྱགས་མེད་བཞིན། །ཆོས་ལ་དགའ་བས་དེ་རྣམས་གནས། །ཉི་མ་སྤྲིན་

172-1-80b

དང་བྲལ་བ་ཡི། །ལོགས་སུ་ཁྱེར་འཇིགས་གཞུ་བཞིན་དུ། །ཐུབ་པའི་དྲུང་དེར་དེ་རྣམས་ཀྱི། །ཆགས་བྲལ་དཀྱིལ་འཁོར་མཛེས་པའོ། །ས་ལ་སེང་གེ་གནས་པ་རྣམས། །གསེར་གྱིས་སྤྲས་པའི་སེང་གེའི་གདན། །སེང་གེ་ལ་སོགས་དེ་རྣམས་ལ། །མི་ཡི་སེང་གེས་དེ་
ནས་གསུངས། །གཟུགས་དང་དཔལ་དང་སྟོབས་ལ་སོགས། །བཀུར་མང་རྣམས་དང་ལྡན་པ་ནི། །ཁྱེད་ཀྱི་ཆོས་ལ་གུས་འདི་གང་། །དེ་ལས་ལྷག་པར་མཛེས་པ་ཉིད། །ཚུལ་ཁྲིམས་ལ་སོགས་ཡོན་ཏན་གྱིས། །ཇི་ལྟར་འཇིག་རྟེན་མཛེས་དེ་ལྟར། །ལུས་ནི་སྣ་ཚོགས་གོས་
སམ་རྒྱན། །ཕྲེང་བ་རྣམས་ཀྱིས་མ་ཡིན་ནོ། །གང་དུ་ཁྱེད་ཅག་བདག་པོ་རྣམས། །ཆོས་ཤེས་འདུལ་བ་འདོད་པ་རྣམས། །སྤོང་བྱེད་པ་རྣམས་རྗེས་བཟུང་ཞིང་། །སྐལ་བ་བཅས་རྣམས་བདག་གི་ལུགས། །འཕགས་སྐྱེས་རྙེད་པར་དཀའ་དུས་སུ། །ཆོས་ལ་གནས་རྣམས་སྲུང་
བྱེད་གྱུར། །ཕྱིས་འབྱུང་མ་ཡིན་ཡུལ་རྣམས་ཀྱི། །སྐལ་བས་དམན་པ་རྣམས་ཀྱིས་མིན། །དཔལ་ལྡན་སྐལ་བ་ཆེན་པོ་རྣམས། །ཆོས་ཤེས་སྲུང་བར་བྱེད་རྣམས་ཀྱིས། །བསྲུང་བ་ཉིད་ཀྱིས་ཡུལ་འདི་ནི། །ཆོས་ཀྱིས་ཀྱང་ནི་རྗེས་སུ་འཛིན། །རླུང་རྣམས་རྒལ་འདོད་པ་ལ་རྣམས། །
ཁྱུ་མཆོག་རྒལ་བ་རྣམས་ཀྱི་བཞིན། །རྒྱལ་པོ་རྣམས་ཀྱིས་གང་བཟུང་བའི། །ཡུལ་ལ་དེ་ནས་སྐྱེ་དགུ་འགྲོ། །ཁྱེད་ཅག་རྣམས་ལ་ཚུལ་ཁྲིམས་དེ། །རྟག་པར་འགྱུར་བར་འོས་པ་སྟེ། །བདག་གི་དོན་ནི་འདོད་རྣམས་ཀྱི། །འདིར་དང་སོང་ནས་དབྲོག་བྱ་མིན། །ཡིད་ནི་ཚིམ་ཞིང་
བཀུར་མང་དང་། །རྙེད་དང་གྲགས་དང་ཡིད་ཆེས་ཉིད། །དགའ་བ་ཉིད་དང་སོང་ནས་བདེ། །ཚུལ་ཁྲིམས་ཀྱི་ནི་འབྲས་བུ་ཆེ། །འབྱུང་པོ་རྒྱུ་དང་མི་རྒྱུ་ཡི། །རྟེན་ནི་ཇི་ལྟར་ས་ཡིན་པ། །དེ་ལྟར་ཡོན་ཏན་ཐམས་ཅད་ཀྱི། །རྟེན་ནི་ཚུལ་ཁྲིམས་དམ་པའོ། །འཕུར་འདོད་གཤོགས་
པ་མེད་པ་དང་། །རྒལ་འདོད་གྲུ་མེད་ཇི་ལྟ་བར། །མི་ནི་ཚུལ་ཁྲིམས་རྣམ་སྤངས་པར། །དགེ་ལེགས་འདོད་པ་དེ་ལྟར་ཤེས། །མེ་ཏོག་འབྲས་བུས་ཁྱབ་པའི་ཤིང་། །ཚེར་མ་ཅན་གྱུར་ཇི་ལྟ་བར། །ཐོས་དང་གཟུགས་དོན་ཕུན་ཚོགས་པ། །ཚུལ་ཁྲིམས་འཆལ་པ་དེ་ལྟར་རོ། །

172-1-81a

སྣ་ཚོགས་གོས་དང་རྒྱན་ལྡན་ཞིང་། །ཁང་བཟངས་རྣམས་སུ་གནས་ན་ཡང་། །ཚུལ་ཁྲིམས་དང་ལྡན་སྐྱེ་བོ་གང་། །དེ་ཡི་དྲང་སྲོང་དང་མཉམ་འགྲོས། །ངུར་སྨྲིག་ཤིང་ཤུན་ཟུར་ཕུད་དང་། །གཙུག་ཕུད་སྤྱི་བོ་རལ་པ་རྣམས། །ཚུལ་ཁྲིམས་ཉམས་པ་ཀུན་རྣམས་
ཀྱི། །བཅོས་མ་ཉིད་དུ་ཤེས་པར་བྱ། །སྟེགས་ལས་དུས་གསུམ་ཁྲུས་བྱས་ནས། །མེ་ལ་ལན་གཉིས་བསྲེགས་ནས་དང་། །གདུང་བ་དྲག་པོར་གདུངས་ནས་ཀྱང་། །ཚུལ་ཁྲིམས་མེད་ན་བདག་མ་ཡིན། །ཤ་ཟ་རྣམས་ལ་ལུས་བྱིན་ནས། །རི་ཡི་ལོགས་ནས་བོར་ནས་སམ། །མེ་འམ་
ཆུར་ནི་བདག་མཆོངས་ན། །ཚུལ་ཁྲིམས་མེད་ན་བདག་མ་ཡིན། །འབྲས་བུ་རྩ་བ་ཆུ་ཟ་ཞིང་། །རི་དགས་བཞིན་དུ་རྩྭ་ཟ་འམ། །རླུང་གི་བཟའ་བ་འདོད་པ་ཡང་། །ཚུལ་ཁྲིམས་མེད་ན་བདག་མི་འགྱུར། །མི་གང་ཚུལ་ཁྲིམས་ཀྱིས་དམན་པ། །དེ་ནི་བྱ་དང་རི་དྭགས་མཚུངས། །རྡོལ་
བའི་སྣོད་ནི་ཆུ་ཡིས་བཞིན། །དེ་ནི་ཆོས་ཀྱི་སྣོད་མ་ཡིན། །འཇིགས་པ་དང་ནི་གཏམ་ངན་དང་། །ཡིད་མི་ཆེས་དང་མི་དགའ་ཉིད། །མངོན་སུམ་འདིར་ནི་ཐོབ་པ་སྟེ། །སོང་ནས་དོན་མེད་ཟ་བར་འགྱུར། །དེ་ཕྱིར་ཚུལ་ཁྲིམས་གཞོམ་མི་བྱ། །འབྲོག་དགོན་དག་ན་ལམ་མཁན་བཞིན། །རང་
དབང་དག་ནི་རྙེད་དཀའ་བའི། །ཚུལ་ཁྲིམས་མཐོ་རིས་དག་ན་གྲུ། །སྐྱོན་རྣམས་ཀྱིས་བཅོམ་སེམས་ཀྱིས་ནི། །ཐམས་ཅད་བཅོམ་ནས་འཇུག་པ་སྟེ། །ཚུལ་ཁྲིམས་རབ་ཏུ་གནས་བྱས་ནས། །ཉོན་མོངས་འཇོམས་ལ་འབད་པ་གྱིས། །དེ་ཕྱིར་དང་པོར་ང་སྙམ་པ། །བརྒྱན་པར་འདོད་
པས་སྤང་བར་བྱ། །བསྲེག་བྱ་ཟ་བའི་དུ་བ་བཞིན། །ཡོན་ཏན་རྣམས་ཀྱིས་ང་སྙམ་ཉིད། །སྐར་མ་ཉི་མ་ཟླ་བ་རྣམས། །སྤྲིན་གྱི་དྲ་བ་ཆེན་པོས་བཞིན། །ང་རྒྱལ་གྱིས་བཅོམ་ཡོན་ཏན་རྣམས། །ཡོད་པར་གྱུར་ཀྱང་མཛེས་མ་ཡིན། །དྲེགས་པ་ངོ་ཚ་འཇོམས་པ་སྟེ། །མྱ་ངན་གྱིས་
གཏན་དགའ་བས་ལུས། །ཡོན་ཏན་རྣམས་ཀྱི་རྩ་བ་ནས། །འཇོམས་ཕྱིར་ངའོ་སྙམ་པ་སྐྱེ། །འགྲན་པ་དང་ལྡན་ང་རྒྱལ་ལས། །ལྷ་མིན་ལྷ་རྣམས་ཀྱིས་བཅོམ་ཞིང་། །མི་སྐྱོང་ཏ་ལའི་བྱིན་པ་དང་། །དོང་གསུམ་པ་རྣམས་ཟད་པར་གྱུར། །གང་ཞིག་མི་རྟག་དངོས་རྣམས་སུ། །མཆོག་

172-1-81b

ནི་ང་ཡིན་སྙམ་པ་དང་། །མི་དམན་པ་ནི་ང་ཞེས་སྙམ། །དེ་ནི་མཁས་པ་མིན་པར་རྟོགས། །གཟུགས་ནི་བརྟན་པ་མ་ཡིན་ཞིང་། །འཇིག་པའི་ཆོས་ཅན་གཡོ་བ་ཡིས། །ང་ཞེས་གང་ཞིག་ང་རྒྱལ་ཏེ། །ཡོངས་སུ་རྟོག་པ་མིན་གཞན་ཅི། །འདོད་པའི་འདོད་ཆགས་སྟོབས་ལྡན་
པ། །རབ་གབ་ལྷན་སྐྱེས་དགྲ་བོ་སྟེ། །བཤེས་མིན་ནང་ན་སྤྱོད་པ་བཞིན། །གང་ཞིག་བཤེས་ཀྱི་སྒོ་ནས་འཇོམས། །འདོད་ཆགས་མེ་དང་མེ་ཉིད་ནི། །སྲེག་པའི་བདག་ཉིད་ཀྱིས་མཉམ་སྟེ། །འདོད་ཆགས་མེ་ནི་འབར་བ་ན། །མཚན་མོ་དེ་ཉིད་རིང་བར་འགྱུར། །འདོད་ཆགས་མེའི་
སྟོབས་ཇི་འདྲ་བ། །མེ་ཡི་སྟོབས་ནི་དེ་འདྲར་སྨིན། །མེ་ནི་ཆུ་རྣམས་ཀྱིས་ཤེས་ཏེ། །འདོད་ཆགས་མེ་ནི་མཚོས་ཀྱང་མིན། །དུས་སུ་ནགས་སུ་མེས་ཚིག་རྣམས། །ནགས་ཀྱི་ཤིང་རྣམས་སྐྱེ་བ་སྟེ། །འདོད་ཆགས་མེས་ཚིག་བློ་མེད་རྣམས། །ཆོས་ལ་སྐྱེ་བ་མ་ཡིན་ནོ། །ཆགས་ལས་
བདེ་བ་ཚོལ་བ་སྟེ། །བདེ་ཕྱིར་མི་དགེ་བ་བྱེད་ཅིང་། །མི་དགེ་བ་ལས་དམྱལ་བར་འགྲོ། །ཆགས་པ་དང་མཉམ་དགྲ་བོ་མེད། །ཆགས་ལས་སྲེད་པ་སྐྱེ་བ་སྟེ། །སྲེད་ལས་འདོད་པ་རྣམས་ལ་ཆགས། །འདོད་པ་རྣམས་ལས་སྡུག་བསྔལ་འཐོབ། །ཆགས་པ་དང་མཉམ་ཡུལ་མེད་དོ། །ཆགས་པ་ཞེས་བྱའི་
ནད་ཆེན་པོ། །དེ་ནི་བྱིས་པས་རྟོགས་མ་ཡིན། །མི་རྟག་ཉིད་ལས་མི་གཙང་ལས། །སྡུག་བསྔལ་ཉིད་ལས་བདག་མེད་ལས། །གལ་ཏེ་མཐོང་ན་མི་ཆགས་ཏེ། །ལོག་པའི་བློ་ཡིས་ཆགས་པའོ། །དེ་ཕྱིར་དངོས་པོ་ལ་ཆགས་པ། །གང་དུ་ཉེ་བར་སྐྱེ་བ་ན། །དེར་ནི་ཇི་ལྟར་འགྱུར་བརྟག་
སྟེ། །གྱུར་པ་མཐོང་བ་ཞེས་བརྗོད་དོ། །ཡོན་ཏན་ཡོངས་སུ་རྟོགས་པ་ན། །ཇི་ལྟར་ཆགས་པར་ཉེ་བར་འགྲོ། །ཡོན་ཏན་མེད་ན་ཡོངས་རྟོགས་ན། །དེ་བཞིན་ཁྲོ་བ་འགུགས་པར་བྱེད། །དེ་ཕྱིར་ཁྲོ་བ་སྤོང་འདོད་པས། །ཞེ་སྡང་ཡོངས་སུ་བརྟག་མི་བྱ། །དཀར་མིན་འགྲོས་
ལས་ངུ་བ་བཞིན། །ཁྲོ་བ་ལས་ནི་ཞེ་སྡང་འཛག །ཁྲོ་བ་གཟུགས་ལྡན་རྣམས་ཀྱི་དགའ། །མིག་ལྡན་རྣམས་ཀྱི་མུན་པ་ཡང་། །ཆོས་དོན་འདོད་པ་རྣམས་ཀྱི་གཤེད། །མོས་པའི་མི་མཐུན་པ་ཉིད་དོ། །ཁྲོ་བ་བློ་ཡི་མུན་པ་མཆོག །མཛའ་བཤེས་གྱུར་པའི་དགྲ་བོ་མཆོག །

172-1-82a

བཀུར་སྟི་མང་པོའི་གཅོད་པ་པོ། །ཟིལ་གྱིས་ནོན་པའི་བྱེད་པ་པོ། །དེ་བཞིན་ཁྲོ་བ་མི་བྱ་ཞིང་། །བྱས་ནས་ཀྱང་ནི་དོར་བར་བྱ། །དམུག་པའི་རང་བཞིན་ལྟོ་འཕྱེ་བཞིན། །ཁྲོ་བའི་རྗེས་སུ་འཇུག་མི་བྱ། །སྐོར་བའི་ཤིང་རྟ་བཞིན་གང་གིས། །ཁྲོ་བ་བརྟན་པས་ཐག་
པས་བཟུང་། །དེ་བདག་ཁ་ལོ་སྒྱུར་སྙམ་སྟེ། །ཅིག་ཤོས་སྐྱེ་བོ་ཐག་པ་འཛིན། །གང་ཞིག་ཁྲོ་བ་འདོད་པ་སྟེ། །སྐྱེ་བ་འགོག་པ་འདོད་མ་ཡིན། །ཕྱིས་དེ་ཁྲོ་བ་མེད་པ་ན། །མེ་ལ་རེག་པ་བཞིན་དུ་བསྲེག །ཁྲོ་བ་སྐྱེས་པས་སྔོན་རོལ་དུ། །བདག་ཉིད་ཀྱིས་ནི་སེམས་བསྲེག་སྟེ། །རྣམ་པར་
འཕེལ་ཞིང་ཕྱིན་པ་ནི། །གཞན་ནི་སྲེག་གམ་མི་སྲེག་གམ། །ནད་སོགས་ཉེ་བར་འཚེ་རྣམས་ཀྱི། །གང་ཚེ་འཇིག་རྟེན་བརྩེ་བ་རྣམས། །ལུས་ཅན་བཤེས་མ་ཡིན་རྣམས་ལ། །གནོད་སེམས་བྱས་ནས་ཡོན་ཏན་ཅི། །དེ་ཕྱིར་འཇིག་རྟེན་སྡུག་བསྔལ་བ། །ཤེས་ནས་ཁྲོ་བ་ཟློག་
པའི་ཕྱིར། །འབྱུང་པོ་ཀུན་ལ་བྱམས་པ་དང་། །སྙིང་རྗེ་ཉིད་ནི་བསྒོམ་པར་བྱ། །དེ་ལྟར་ཉོན་མོངས་ལྷག་པ་གང་། །དེ་ཡི་དེ་ཚེ་གཟིགས་པ་སྟེ། །དེ་ལ་བརྩེ་བས་སངས་རྒྱས་ཀྱིས། །དེ་རྣམས་ལ་གསུངས་སྨད་པའོ། །སེམས་ཅན་ཉམ་ཐག་རྣམས་ལ་ནི། །ཇི་ལྟར་རང་བཞིན་གྱིས་
མཁས་པའི། །སྨན་པས་སྨན་ནི་གསུངས་པ་སྟེ། །ནད་རྣམས་ཉེ་བར་ཞི་ཕྱིར་རོ། །དེ་བཞིན་ཆགས་དང་རྒ་སོགས་ཀྱི། །ནད་ཀྱིས་འབྱུང་པོ་ཉམ་ཐག་ལ། །ཐུབ་པས་བསམ་པ་མཁྱེན་ནས་ནི། །དེ་ཉིད་ཤེས་པའི་སྨན་བྱིན་ཏོ། །དེ་ལྟར་ཐུབ་པའི་གསུང་ལ་ནི། །ལི་ཙྪ་བཱི་རྣམས་
མངོན་དགའ་སྟེ། །རབ་འཕྱང་གཙུག་གི་ནོར་བུ་ཅན། །མགོ་བོ་རྣམས་ཀྱིས་ཕྱག་འཚལ་ལོ། །དེ་ནས་ཐལ་མོ་རྣམ་སྦྱར་ནས། །ཅུང་ཞིག་དུད་པའི་ལུས་རྣམས་ཀྱིས། །ཕུར་བུ་ལ་ནི་ལྷ་རྣམས་བཞིན། །སངས་རྒྱས་ལ་ནི་བྱོན་པར་ཞུས། །དང་པོ་ཨ་མྲ་སྐྱོང་མའི་རིགས། །ཐུབ་པས་
དེ་རྣམས་ལ་གསུངས་ཤིང་། །དམ་པ་རྣམས་ཀྱིས་ཐོག་མར་ནི། །སྙན་མནན་འདོར་བྱ་མིན་པར་གསུངས། །དེ་རྣམས་བུད་མེད་དེ་ཡིས་ནི། །བདག་ལ་བསླུས་པར་ཤེས་པ་སྟེ། །དེ་བཞིན་གཤེགས་ལ་མཆོད་མང་པོ། །ཉིས་འགྱུར་ཉིད་དུ་བྱས་པའོ། །ལེགས་བརྗོད་དྲང་སྲོང་སྔགས་

172-1-82b

རྣམས་ཀྱིས། །སྦྲུལ་རྣམས་ཀྱི་ནི་དུག་བཞིན་དུ། །ཀུན་མཁྱེན་གྱིས་བསྟན་དེ་རྣམས་ནི། །རབ་ཏུ་ཞི་བའི་ཡིད་རྣམས་སོང་། །དེ་ཡི་མཚན་མོ་འདས་ནས་ནི། །ཨ་མྲ་སྐྱོང་མས་བཀུར་བྱས་ཏེ། །འོད་མ་ལྡན་པའི་གྲོང་དུ་ནི། །དབྱར་རྣམས་རྣམ་པར་འདས་པ་ན། །ཡངས་པ་ཅན་ཉིད་
དུ་གཤེགས་ཤིང་། །སྤྲེའུ་རྫིང་གི་འགྲམ་དུ་ནི། །ཐུབ་པ་ཆེན་པོ་བཞུགས་པའོ། །ཤིང་གི་རྩ་བར་དེ་བཞུགས་སོ། །དེ་བཞིན་དུ་ནི་འབར་བ་ལ། །ནགས་ཚལ་དེ་ནི་སྣང་བྱས་ཤིང་། །ཉེ་བར་འོངས་ནས་བདུད་ཀྱིས་སྨྲས། །ནཻ་རཉྫ་ནའི་འགྲམ་དུ་སྔོན། །ཐུབ་པ་ཁྱོད་ལ་བདག་གིས་
སྨྲས། །བྱ་བ་བྱས་པ་མྱ་ངན་ཟློས། །ཞེས་འདིར་ཁྱོད་ཀྱིས་ལན་སྨྲས་སོ། །ཉམ་ཐག་པ་རྣམས་འཇིགས་མེད་ཅིང་། །ཉན་ཐོས་རྣམས་ནི་དོན་བྱས་པར། །བདག་གི་ཇི་སྲིད་མ་གྱུར་པ། །དེ་སྲིད་མྱ་ངན་མི་འདའ་ཞེས། །དེ་འདི་མང་པོ་རྣམས་གྲོལ་ཞིང་། །དེ་བཞིན་གྲོལ་བར་
འདོད་རྣམས་དང་། །གྲོལ་བར་གྱུར་པ་རྣམས་ཉིད་དེ། །དེ་ཕྱིར་མྱ་ངན་འདའ་བར་འོས། །དེ་ནས་ཚིག་འདི་གསན་གྱུར་ནས། །ཟླ་བ་གསུམ་ན་མྱ་ངན་འདའ། །མི་བརྟན་པ་ནི་དོར་ཅིག་ཅེས། །དགྲ་བཅོམ་རྣམས་ཀྱི་མཆོག་གིས་གསུངས། །དེ་ནས་དམ་བཅའ་འདི་ཤེས་ནས། །ཡིད་ལ་རེ་
བ་གང་བ་སྟེ། །རབ་ཏུ་དགའ་ཞིང་མགུ་བ་ནི། །དེ་ཉིད་དུ་ནི་མི་སྣང་གྱུར། །དེ་ནས་དྲང་སྲོང་ཆེན་པོའི་ཐུགས་ཀྱི་ཏིང་ངེ་འཛིན། །རྣམ་པ་དེ་ལྟར་རྣལ་འབྱོར་སྟོབས་ལས་མཛད་པ་ཉིད། །སྐུ་ཚེ་ཇི་ལྟར་གྱུར་པ་སྔོན་དུ་བཏང་བ་སྟེ། །རྫུ་འཕྲུལ་མཐུ་ལས་མཚུངས་པ་མེད་པ་འཚོ་བར་གྱུར། །
དེས་ནི་སྐུ་ཚེ་བཏང་བའི་ཡུད་ཙམ་དེ་ལ་ནི། །བུད་མེད་མྱོས་མ་བཞིན་དུ་ས་ནི་གཡོས་གྱུར་ལ། །མ་ཡིས་ཚོས་པའི་ལྷུན་པོའི་རྡོ་བ་རིམ་བཞིན་དུ། །ཕྱོགས་རྣམས་དག་ལས་སྒྲོན་མ་ཆེན་པོ་རྣམས་ལྷུ་དང་། །དེ་བཞིན་ཀུན་ནས་དབང་པོའི་རྡོ་རྗེ་མི་བཟད་རྣམས། །གློག་དང་བཅས་ཤིང་མེ་ཡི་སྙིང་པོ་
ཅན་གཡོས་ཤིང་། །བསྐལ་པ་འཇིག་ཆེ་འཇིག་རྟེན་བསྲེག་པར་འདོད་པ་བཞིན། །ཕྱོགས་རྣམས་ཐམས་ཅད་རྣམས་སུ་མེ་དག་འབར་བར་གྱུར། །ཤིང་རྣམས་ཀྱིས་ནི་ཕུང་པོ་འཁོགས་པ་རྣམས་བོར་ཞིང་། །རི་རྣམས་ཀྱིས་ནི་རྩེ་མོ་རྣམས་ནི་དོར་བ་སྟེ། །རླུང་གིས་མངོན་པར་གང་བའི་རྡོ་བའི་ཕུག་

172-1-83a

བཞིན་དུ། །མཁའ་ལ་རྔ་རྣམས་ཀྱི་ནི་མ་རུངས་སྒྲ་རྣམས་བསྒྲགས། །དེ་ནས་དེ་ལྟར་ཀུན་དུ་བསྐྱོད་ཚེ་ཡུད་ཙམ་ལ། །མི་ཡི་འཇིག་རྟེན་ན་དང་ལྷ་དང་ནམ་མཁའ་ལ། །ཏིང་འཛིན་ཆེན་པོ་དེ་ལས་རྣམ་པར་བཞེངས་མཛད་ནས། །ཐུབ་པ་ཆེན་པོས་གསུང་ནི་འདི་ཉིད་
གསུངས་པའོ། །ཤིང་རྟ་སྲོག་ཤིང་རྣམ་པར་ཉམས་པ་དང་འདྲ་བའི། །ཚེ་བཏང་ལུས་པོ་ནང་གི་སྟོབས་ལས་འདྲེན་བགྱི་ཞིང་། །སྒོ་ངའི་སྐྱེ་གནས་པ་རྣམས་སྒོ་ང་ཕྱེ་ནས་བཞིན། །སྲིད་པའི་འཆིང་ལས་ཚེ་དང་ལྷན་ཅིག་འགྲོལ་བར་བགྱི། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་
ཆེན་པོ་ལས། སྐུ་ཚེའི་འདུ་བྱེད་བྱིན་གྱིས་བརླབས་པའི་ལེའུ་སྟེ་ཉི་ཤུ་རྩ་གསུམ་པའོ།།      །།དེ་ནས་བསྐྱོད་པ་དེ་མཐོང་ནས། །ཀུན་དགའ་བོ་ནི་སྤུ་ལངས་ཤིང་། །ཅི་ཞིག་གྱུར་ཞེས་ཤུགས་འོངས་ཏེ། །འདར་བར་གྱུར་ཅིང་དགའ་མ་གྱུར། །ཀུན་མཁྱེན་གཏན་ཚིགས་
མཁས་པ་ལ། །དེས་དེར་གཏན་ཚིགས་དྲིས་པ་སྟེ། །དེ་ནས་དེ་ལ་ཐུབ་པས་ནི། །ཁྱུ་མཆོག་མྱོས་པའི་དབྱངས་ཀྱིས་གསུངས། །རྒྱུ་མཚན་གང་གིས་གཡོས་པ་འདི། །བདག་གི་ཚེ་འདི་བཏང་བ་ལ། །ཟླ་བ་གསུམ་ནི་ཡོངས་བགྲངས་པར། །བྱིན་གྱིས་བརླབས་ནས་དེ་ནི་འཚོ། །དེ་
ལྟར་ཐོས་ནས་ཀུན་དགའ་བོ། །ཙནྡན་ལྗོན་པའི་ཐང་ཆུ་ནི། །གླང་པོ་ཆེ་ཡིས་བྲབས་པ་བཞིན། །མཆི་མ་ཕྱུང་ཞིང་གཡོས་པར་གྱུར། །དེས་གཉེན་ཉིད་ཕྱིར་བླ་མའི་ཕྱིར། །ཆགས་བྲལ་མིན་ཕྱིར་སྡུག་བསྔལ་ཞིང་། །སྙིང་རྗེ་བར་ནི་རྣམ་ཟློས་ཏེ། །ཡོངས་སུ་དགའ་བ་མེད་པར་
ངུས། །མགོན་གྱི་ངེས་པ་ཐོས་གྱུར་ནས། །བདག་གི་ལུས་ནི་ལྷུང་བ་བཞིན། །བདག་གི་ཕྱོགས་རྣམས་སྤོབས་པ་མེད། །བདག་གིས་ཆོས་རྣམས་ཐོས་པ་རྨོངས། །གངས་ཀྱིས་གཙེར་རྣམས་ལ་མེ་བཞིན། །རྒ་བ་རྙིངས་པའི་ཆོས་རྣམས་སུ། །ཀྱི་ཧུད་མིས་བསྔགས་སྐྱེན་པར་ནི། །
དེ་བཞིན་གཤེགས་པ་མྱ་ངན་འདའ། །ཉོན་མོངས་འབྲོག་དགོན་ཆེན་པོ་རུ། །ཆུད་ཟོས་ལུས་དང་ལྡན་རྣམས་ལ། །ལམ་མཁྱེན་ཤིན་ཏུ་སྐྱེན་པ་རུ། །ལམ་མཁན་ངེས་པར་ཉམས་པར་འགྱུར། །ཐག་རིང་ལམ་ལ་རབ་ཞུགས་པའི། །སྲིད་པ་ཡོངས་ལྡན་བདག་རྣམས་ཀྱི། །ལམ་

172-1-83b

ན་རྫིང་བུ་བསིལ་བའི་ཆུ། །ཤིན་ཏུ་མྱུར་བར་བསྐམ་པར་གྱུར། །བློ་ནི་རྫི་མ་ཞི་བ་སྨིན། །འདས་དང་མ་འོངས་ད་ལྟར་གཟིགས། །ཡེ་ཤེས་རྣམ་སྤངས་འཇིག་རྟེན་གྱི། །མིག་ནི་ངེས་པར་ཟུམ་པར་འགྱུར། །ངེས་པར་ལོ་ཐོག་སྐྱེད་རྣམས་སུ། །ཆུ་ནི་དོན་གཉེར་ངལ་རྣམས་ལ། །ཆར་
བབ་གྱུར་ནས་སྐྱེན་པ་རུ། །ཆུ་སྦྱིན་སྤྲིན་ནི་ནུབ་པར་འགྱུར། །མི་ཤེས་མུན་པས་ཕྲོགས་རྣམས་སུ། །སེམས་ཅན་ལམ་གོལ་བ་རྣམས་ལ། །རབ་ཏུ་གསལ་བའི་སྒྲོན་མ་ནི། །ཤིན་ཏུ་སྐྱེན་པར་ཞི་བར་འགྱུར། །དེ་ནས་དེ་ལྟར་མྱ་ངན་གྱིས། །སེམས་གཟིར་ཀུན་དགའ་བོ་གཟིགས་ནས། །
ཞི་བྱེད་མགོན་པོས་དེ་ཉིད་ནི། །དེ་ཉིད་རིག་པའི་མཆོག་གིས་གསུངས། །འགྲོ་བའི་རང་བཞིན་ཤེས་ནས་ནི། །མྱ་ངན་མ་བྱེད་ཀུན་དགའ་བོ། །འདུས་བྱས་ངོ་བོ་མི་རྟག་ཅིང་། །འགྲོ་བ་འདི་ཀུན་འཛད་པ་ཉིད། །ལུས་ཅན་རྩོད་པའི་སྐྱེད་ཚལ་དུ། །སྡུག་པ་ཀུན་དང་བྲལ་བ་སྟེ། །བརྩེ་
བ་ཀུན་ནས་ཐང་ཅིག་ཅེས། །སྔོན་དུ་བདག་གིས་སྨྲས་པ་ཉིད། །འདུས་བྱས་གཡོ་བ་སྐྱེས་པ་གང་། །རྟེན་ནས་འབྱུང་བ་དབང་མེད་དེ། །བདག་གིས་རྟག་པར་གྱུར་ཅིག་ཅེས། །འདི་ནི་རྙེད་པར་མི་ནུས་སོ། །ས་སྟེངས་འབྱུང་པོ་རྟག་གྱུར་ན། །འཇུག་པ་གཡོ་བ་མ་ཡིན་ཞིང་། །ཐར་
པས་བྱ་བ་སུ་ཡིས་འགྱུར། །དེ་ཕྱིར་མཐར་ཐུག་འདོད་པའོ། །ཅི་སྟེ་ཁྱོད་དམ་སྐྱེ་བོ་གཞན། །བདག་ལ་ཁྱོད་ཀྱི་སྲེད་པ་ཅི། །གང་ཕྱིར་ངལ་བ་སྐྱེས་པ་འདི། །ཁྱོད་ཀྱིས་བདག་དང་བྲལ་བས་བྱས། །ལམ་ནི་མཐའ་དག་ཁྱེད་ཅག་ལ། །བདག་གིས་བསྟན་ཅིང་བཤད་པ་སྟེ། །སངས་
རྒྱས་རྣམས་དང་སློབ་དཔོན་གྱི། །དཔེ་མཁྱུད་མེད་ཅེས་གཟུང་མཛོད་ཅིག །བདག་གི་གནས་སམ་ཉེར་ཞི་ན། །དོན་ནི་དེ་ཙམ་ཉིད་ཡིན་ཏེ། །དེ་བཞིན་གཤེགས་རྣམས་ཆོས་ཀྱི་སྐུ། །ལུས་ཀྱིས་ཁྱེད་ཅག་ལ་དོན་ཅི། །དེ་ཕྱིར་དང་ངམ་བདག་འདས་ཚེ། །སྐྱོ་བ་ཡིས་དང་བག་ཡོད་
དང་། །བདག་གི་སྒྲོན་མས་གསལ་བྱས་ཏེ། །ཆོས་ཀྱི་སྒྲོན་མ་རྟག་པར་རོ། །དེར་ཞུགས་བརྩོན་འགྲུས་བརྟན་པ་དང་། །རྩོད་མེད་བདག་གི་དོན་ལ་མཁས། །བློ་ནི་གཞན་དབང་མ་ཡིན་པ། །བདག་གི་སྒྲོན་མ་ཞེས་ཤེས་བྱ། །རིག་པ་དང་ལྡན་མཁས་པ་ནི། །གང་གི་སྒྲོན་མས་

172-1-84a

མུན་པ་བཞིན། །ཤེས་རབ་སྒྲོན་མས་འཇོམས་པ་སྟེ། །ཆོས་ཀྱི་སྒྲོན་མར་ཤེས་པར་བྱ། །དགེ་ལེགས་ཉེ་བར་ཐོབ་བྱའི་ཕྱིར། །དེ་དག་རྣམས་ཀྱི་སྤྱོད་ཡུལ་ཞི། །ལུས་དང་ཚོར་བ་ཉིད་དང་ནི། །སེམས་དང་བདག་མེད་པ་ཉིད་དོ། །རུས་ལྤགས་ཁྲག་དང་རྒྱུས་
པ་དང་། །ཤ་དང་སྤུ་སོགས་རྣམས་ཀྱིས་དཀྲིས། །མི་གཙང་ལུས་སུ་མཐོང་བས་ནི། །ལུས་ལ་ཆགས་པ་མ་ཡིན་ནོ། །དེ་ལྟ་དེ་ལྟར་རྐྱེན་རྣམས་ཀྱིས། །འཇུག་པའི་ཚོར་བ་རྣམས་སུ་ནི། །སྡུག་བསྔལ་ཞེས་དེ་ལྟར་མཐོང་བའི། །བདེ་བའི་ཤེས་རབ་རབ་ཏུ་འཇོམས། །སྐྱེ་བ་དང་ནི་
གནས་པ་དང་། །ཆོས་ཀྱི་འགོད་པ་ཉིད་དག་ནི། །ཞི་བའི་སེམས་ཀྱིས་མཐོང་བ་ཡིན། །རྟག་པར་འཛིན་པ་ལྡོག་པའོ། །རྐྱེན་རྣམས་ལས་ནི་སྐྱེས་པ་རྣམས། །ཕུང་པོ་རྣམས་ནི་མཐོང་བ་ཡི། །ངར་འཛིན་ས་ནི་སྐྱེད་པ་པོ། །བདག་ཏུ་འཛིན་པ་འཇུག་མ་ཡིན། །སྡུག་བསྔལ་ཉེ་བར་
ཞི་བའི་ཕྱིར། །བགྲོད་པ་གཅིག་པའི་ལམ་འདི་ནི། །ལམ་ནི་བཞི་པོ་དེ་རྣམས་སུ། །དེ་ལྟར་དྲན་པ་ཉེ་བར་གཞག །དེ་ལྟར་རམ་ནི་བདག་འདས་ཚེ། །གང་རྣམས་འདི་ལ་གནས་འགྱུར་བ། །དེ་རྣམས་འགོད་མེད་གོ་འཕང་མཆོག །ངེས་པར་ལེགས་པ་ཐོབ་པར་འགྱུར། །དེ་ལྟར་ཀུན་
དགའ་བོ་ལ་གཏམ། །དེ་རྣམས་རྣམ་པར་འདྲེན་པས་མཛད། །ལི་ཙྪ་བཱི་རྣམས་ཀྱིས་ཐོས་ནས། །དེ་ལ་གུས་ཕྱིར་སྐྱེན་པར་སོང་། །ཐུབ་ལ་བརྩེ་དང་གུས་པའི་ཕྱིར། །གདུང་བས་ཕྲོག་པའི་སེམས་ཅན་རྣམས། །སྤྱོད་མཐས་བཀོད་པའི་དོན་རྣམས་ཀུན། །མྱུར་ལས་རྫུ་འཕྲུལ་དོན་
རྣམས་སོ། །སྟོན་པ་ལ་ནི་སྨྲ་འདོད་པ། །དེ་རྣམས་བཏུད་ནས་ཉེ་བར་གནས། །སྨྲ་བར་འདོད་རྣམས་སྟོན་པ་ཡིས། །མཁྱེན་ནས་ཐུབ་པས་ཚིག་གསུངས་སོ། །གང་འདི་བདག་ལ་སོང་བའི་སེམས། །ཁྱེད་ཅག་རྣམས་ཀྱིས་དེ་ཀུན་ཤེས། །དེ་ཉིད་གཞན་བཞིན་མྱ་ངན་གྱིས། །དེ་རིང་ཁྱེད་
ཀྱིས་སྤོབས་པར་གྱུར། །དཔལ་གྱི་བདེ་རྣམས་ལ་གནས་ཀྱང་། །ཁྱེད་ཅག་རྣམས་ཀྱིས་ཐམས་ཅད་ནས། །མངོན་པར་ཞུགས་པ་འདི་ཡིས་ནི། །གསལ་བ་ཉིད་དང་ཆོས་མཁན་ཉིད། །གལ་ཏེ་ཡེ་ཤེས་བདག་ལས་ཀྱང་། །ཅུང་ཞིག་ཐོས་ཤིང་ཤེས་པ་ན། །བདག་གི་ཞིང་བ་རབ་དམིགས་ཏེ། །

172-1-84b

གདུང་བ་མ་བྱེད་བརྟན་པར་སོང་། །མི་རྟག་འདུས་བྱས་དངོས་པོ་རྣམས། །གཡོ་ཞིང་ཡོངས་སུ་གྱུར་པ་ཅན། །སྙིང་པོ་དང་བྲལ་བློ་གཏད་མིན། །ཅུང་ཞིག་བརྟན་པར་གནས་པ་མེད། །གནས་འཇོག་རྒྱུན་ཤེས་ལ་སོགས་དང་། །གང་གཞན་ཐིག་ལེ་གཞན་རྣམས་དང་། །དུས་ཀྱི་དབང་
དུ་སོང་བ་སྟེ། །སྲིད་པ་འདི་ནི་མ་རུངས་ཉིད། །ས་འཛིན་ང་ལས་ནུ་དང་ནི། །བརྒྱ་བྱིན་དང་མཚུངས་དབྱིག་ནོར་དང་། །སྐལ་བ་ཆེ་དང་སྐལ་མེད་མིན། །འབྱུང་པོར་མཉེས་གཤིན་འབྱུང་བའོ། །འགྲོ་མགྱོགས་དེ་ནས་འགྲོ་བྱར་འགྲོ། །སྐལ་ལྡན་ཤིང་རྟ་ཤིང་རྟ་བཟང་། །སྒྲ་ངན་གྱིས་སྨད་སྒྲ་ངན་
རྫོགས། །རངས་བྱེད་རི་མོ་རྡུལ་མ་སྐྱེས། །མི་སྐྱོང་དྲང་སྲོང་བདག་ཉིད་ཆེ། །དེ་རྣམས་དང་གཞན་མང་པོ་རྣམས། །དབང་ཆེན་དང་མཚུངས་ཉམས་པ་སྟེ། །མི་ཉམས་པ་ནི་ཡོད་མ་ཡིན། །ཉི་མ་གནས་ལས་འཕོས་པ་སྟེ། །ནོར་ལྷ་རྣམས་ནི་ས་ལ་སོང་། །དབང་པོ་བརྒྱ་
རྣམས་འདས་པ་སྟེ། །རྟག་པ་ཅི་ཡང་ཡོད་མ་ཡིན། །གང་གཞན་ཡང་དག་སངས་རྒྱས་རྣམས། །འགྲོ་བའི་སྣང་བ་མཛད་ནས་སུ། །མར་མེ་སྣུམ་ཟད་བཞིན་དུ་ནི། །དེ་རྣམས་མྱ་ངན་འདས་པར་གྱུར། །གང་གཞན་བདག་ཉིད་ཆེན་པོ་རྣམས། །འབྱུང་འགྱུར་དེ་བཞིན་གཤེགས་རྣམས་
ཀྱང་། །བུད་ཤིང་ཚིག་པའི་མེ་བཞིན་དུ། །དེ་རྣམས་མྱ་ངན་འདའ་བར་འགྱུར། །ཐར་འདོད་དཀའ་ཐུབ་ནགས་སུ་བཞིན། །དེ་ཕྱིར་བདག་ཀྱང་འགྲོ་བར་བགྱི། །བདག་གི་དོན་མེད་ལུས་མིང་ནི། །འགྲན་པ་ལ་ནི་རྒྱུ་མཚན་མེད། །གང་དུ་གདུལ་བྱ་འགའ་ཞིག་ཡོད། །གང་ཕྱིར་འདི་ནས་
འགྲོ་བར་བློ། །ཉམས་དགའ་ཡངས་པ་ཅན་ལ་ནི། །ཁྱེད་ཅག་བློ་གཞན་མ་གྱུར་ཅིག །དེ་ཕྱིར་འཇིག་རྟེན་སྐྱབས་མེད་ཅིང་། །དབང་མེད་གཡོ་བར་ཤེས་ནས་སུ། །ཆགས་བྲལ་ལ་ནི་འགྲོ་བར་དང་། །སྐྱོ་བ་ཐོབ་པར་འོས་པའོ། །དེ་ལྟར་གཏམ་བཅད་ནས་དུས་སུ། །ལྟོས་མེད་
དེ་བཞིན་གཤེགས་པ་ནི། །སྟོན་གྱི་ཟླ་བ་སྣང་བྱེད་བཞིན། །ལུས་ངན་ཕྱོགས་སུ་རབ་ཏུ་གཤེགས། །དེ་ལ་མཆི་མས་ཡོངས་གང་མིག །ལི་ཙྪ་བཱི་རྣམས་རྗེས་སོང་ཞིང་། །རྒྱན་བཅས་ལག་པ་རྒྱས་རྣམས་ཀྱིས། །ཐལ་མོ་སྦྱར་ནས་རྣམ་པར་སྨྲས། །ཀྱི་ཧུད་འོ་བརྒྱལ་གསེར་

172-1-85a

མཚུངས་ཤིང་། །སུམ་ཅུ་རྩ་གཉིས་མཚན་མངའ་བ། །སྟོན་པའི་སྐུ་ལུས་དབྱེ་འགྱུར་ཞིང་། །ཐུགས་རྗེ་མངའ་བ་མི་རྟག་ཉིད། །སྲིད་ཅིང་འོ་མ་མེད་པ་ཡི། །སེམས་མ་ཐོབ་པའི་བེའུ་ནི། །བཀྲེན་རྣམས་ཡེ་ཤེས་འཇོ་བའི་བས། །ཀྱེ་མ་ཤིན་ཏུ་སྐྱེན་པར་འབོར། །
འགྲོ་ན་མིག་ལྡན་མི་རྣམས་ཀྱིས། །རྨོངས་པའི་མུན་པ་བཅོམ་མཛད་ནས། །ཡེ་ཤེས་འོད་ཟེར་སྐྱེན་པ་རུ། །ཐུབ་པ་ཉི་མ་ནུབ་པར་འགྱུར། །མི་ཤེས་རྒྱུན་གྱིས་འཇིག་རྟེན་ན། །དེ་ལས་དེ་ལས་ཁྱེར་བ་ལ། །རྣམ་ཡངས་ཆོས་ཀྱི་ཟམ་པ་ནི། །ཤིན་ཏུ་མྱུར་བར་ཆག་པར་འགྱུར། །བརྩེ་ལྡན་
སྨན་པ་ཆེན་པོ་ནི། །ཡེ་ཤེས་མཆོག་གི་སྨན་མངའ་བས། །སེམས་ནད་ཀྱིས་ན་འཇིག་རྟེན་ནི། །བོར་ནས་ངེས་པར་གཤེགས་པར་འགྱུར། །སེམས་ཀྱིས་གཟེར་བུའི་ཡོ་བྱད་དང་། །ཤེས་རབ་རྒྱན་གྱིས་བརྒྱན་པ་སྟེ། །ལྟད་མོ་ལ་ནི་སྐོམ་རྣམས་ཀྱིས། །དབང་པོའི་ཏོག་ནི་འགྱེལ་བར་འགྱུར། །
འགྲོ་བ་སྡུག་བསྔལ་སྐལ་བ་ཅན། །འཁོར་བའི་འཆིང་བས་བཅིངས་པ་ལ། །གལ་ཏེ་ཐར་པའི་སྒོ་འདི་ནི། །དུས་ཀྱིས་སྡོམ་པར་འགྱུར་བའོ། །དེ་ལྟར་རྣམ་ཟློག་ལི་ཙྪ་བཱི། །མིག་རྣམས་མཆི་མས་རྣམས་འཁྲུགས་པ། །རྗེས་སུ་འོངས་པ་དེ་རྣམས་ནི། །ཐུབ་པས་སླར་ལ་ཟློག་
པར་མཛད། །དེ་ནས་ཐུབ་པས་བཅད་ཤེས་ནས། །བསྟན་པ་རབ་ཏུ་བཟུང་ནས་སུ། །ཕྱིར་ལ་ལྡོག་ཕྱིར་ངེས་པ་ནི། །སྡུག་བསྔལ་སྡུག་བསྔལ་གྱིས་བྱས་སོ། །རླུང་གིས་བསྐྱོད་པའི་མེ་ཏོག་རྣམས། །ཀར་ནི་ཀ་རའི་ལྗོན་ཤིང་བཞིན། །གསེར་གྱི་རི་ལྟར་དཀར་དེ་རྣམས། །
ཐུབ་པའི་ཞབས་ལ་ཕྱག་འཚལ་ཏེ། །དེ་ལ་སེམས་རྣམས་ཀྱིས་ཆགས་ཤིང་། །རྐང་པ་རྣམས་ཀྱང་འཁྱར་བ་སྟེ། །གཉེན་པོའི་རླུང་ལ་ཆུ་གཉེར་བཞིན། །འགྲོ་བ་མེད་པར་དེ་རྣམས་ལོག །ཞེ་ས་ཡིན་ཞིང་དགའ་མ་ཡིན། །དགའ་བ་ཡིན་ཞིང་ཞེ་ས་མིན། །ཐུབ་པ་ལ་ནི་དེ་དག་
གིས། །དགའ་དང་ཞེ་ས་གཡོ་བ་མེད། །འབྲོག་མཐའ་ནས་འཐོན་ཁྱུ་མཆོག་ཆེ། །ཁྱུ་མཆོག་ཆེན་པོ་རྣམས་ཀྱིས་བཞིན། །གནས་ན་གནས་ཀྱང་དེ་རྣམས་ཀྱིས། །ཡང་ཡང་སྟོབས་བཅུ་ལྡན་ལ་ལྟ། །དེ་བཞིན་གཤེགས་པར་སེམས་སོང་བ། །ལུས་དང་ལྡན་ཡང་འོད་མེད་

172-1-85b

རྣམས། །རྐང་པས་དེ་ནས་མྱ་ངན་འདས། །ལོག་པའི་འཁྲུས་བཞིན་རྗེས་སུ་འོངས། །རྣམ་པར་མ་འཁྲུགས་མདའ་གཞུ་རྣམས་ཀྱི་སྒྲ་རྣམས་ཟིལ་མནན་ནས། །དེ་རྣམས་ང་རྒྱལ་ལྡན་ཡང་སྟོབས་དང་ལྡན་ཡང་འགུགས་ལྡན་ཡང་། །འགྲོ་ན་དཔལ་འདོད་ལི་ཙྪ་བཱི་ནི་འདོད་པ་ཆེན་པོ་རྣམས། །མྱ་ངན་
གྱིས་འཁྲུགས་གདོང་རྣམས་རང་གི་ཁང་པ་རྣམས་སུ་འོངས། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། ལི་ཙྪ་བཱི་རྣམས་ལ་ཐུགས་བརྩེ་བའི་ལེའུ་སྟེ་ཉི་ཤུ་རྩ་བཞི་པའོ།།      །།སྣང་བྱེད་འཛིན་པར་གྱུར་པ་ན། །མུན་བཅས་ཀྱིས་འཁྲུགས་ནམ་མཁའ་ཞིན། །
ཐུབ་པ་འདའ་ཕྱིར་གཤེགས་པ་ན། །དེ་ཕྱིར་ཡངས་པ་ཅན་མ་མཛེས། །དཔལ་ལྡན་དྲེགས་པ་མི་ལྡན་ཞིང་། །ཐམས་ཅད་དུ་ནི་ཉམས་དགའ་ཡང་། །བདག་པོ་ཉམས་ལས་བུད་མེད་བཞིན། །ཀུན་ནས་གདུངས་པས་མཛེས་མ་གྱུར། །ཐོས་པས་དམན་པའི་གཟུགས་བཞིན་དང་། །ཡོན་ཏན་
དང་བྲལ་རིག་པ་བཞིན། །ངག་གིས་དམན་པའི་བློ་བཞིན་དང་། །འདུ་བྱེད་དང་བྲལ་ངག་བཞིན་ནོ། །སྤྱོད་པས་དམན་པའི་དཔའ་བཞིན་དང་། །དང་པོ་དང་བྲལ་བྱམས་པ་བཞིན། །རྣམ་གནོན་ཕུན་སུམ་ཚོགས་པ་བཞིན། །ཆོས་ཀྱིས་དམན་པའི་བྱ་བ་བཞིན། །སྟོན་ཀར་ཆར་ནི་ལོག་པ་ན། །
ཤ་ལི་བསྐམས་པས་ནོར་འཛིན་བཞིན། །དེ་ཚེ་མྱ་ངན་ལས་མ་མཛེས། །གང་དུ་དེར་ནི་མ་བཙོས་ཤིང་། །ཟོས་པ་མ་ཡིན་མྱ་ངན་དེས། །ཀུན་དུ་ངུ་ཞིང་ཐམས་ཅད་ཀྱིས། །གྲགས་ལྡན་ཐུབ་པ་གྲགས་པ་བྱས། །གཞན་ནི་མ་གཏམས་མ་བྱས་ཤིང་། །སུས་ཀྱང་བསམས་པ་མ་ཡིན་ལ། །མྱ་
ངན་དང་ནི་ངུ་བ་སྟེ། །གྲོང་ཁྱེར་པ་ཀུན་བྱ་བ་གཅིག །དེ་ནས་དགའ་འདུན་གཙོ་བོ་ལ། །བརྟན་ཀྱང་མྱ་ངན་གྱིས་ཉམ་ཐག །སྡེ་ཆེན་བདག་པོ་སེང་གེ་ནི། །བསམས་ཤིང་རྣམ་པར་ཟློས་པའོ། །ལམ་ལོག་མུ་སྟེགས་རྣམས་འཕམ་ནས། །འདི་འདྲའི་ལམ་ལ་གཤེགས་ནས་སུ། །གང་
གིས་དམ་པའི་ལམ་བསྟན་ཏེ། །སླར་མི་ལྡོག་ཕྱིར་གཤེགས་པ་ཉིད། །ཉམ་ཐག་ཉམས་པར་གྱུར་པ་ཡི། །སྣང་མེད་འཇིག་རྟེན་བོར་ནས་སུ། །སྐྱེ་དགུ་མགོན་མེད་མཛད་ནས་ནི། །མགོན་པོ་དེ་ནི་ཞི་ཕྱིར་གཤེགས། །རྣལ་འབྱོར་གཙོ་བོ་བླ་མ་མཆོག །མཐར་ཐུག་ཞི་ལ་མངོན་ཕྱོགས་ནས། །

172-1-86a

ཚེ་ཟད་པ་ལས་གཟི་མདངས་བཞིན། །བདག་གི་བརྟན་པ་ཉམས་པར་འགྱུར། །མི་སྐྱོང་སྒྲ་ངན་མཐོ་རིས་ལས། །རྫུ་འཕྲུལ་དང་ལྡན་ལྷུང་བ་བཞིན། །དེ་དང་བྲལ་བ་རྩེ་བྱར་གྱུར། །ས་ལ་མི་ཤེས་བྱ་བ་ཅི། །ཚ་བས་དུབ་པ་ཆུར་བཞིན་དང་། །གྲང་བས་ཉམ་ཐག་མེ་
ལ་བཞིན། །ཐེ་ཚོམ་གཅོད་ལ་སྐྱེ་བོ་རྣམས། །ད་ནི་སུ་ལ་བརྟེན་པར་འགྱུར། །མེ་ནི་འཕེལ་ཕྱིར་སྦུད་པ་བཞིན། །གང་གིས་སྦུད་པ་དགེ་ལེགས་ཕྱིར། །འཇིག་རྟེན་སློབ་དཔོན་ཐུབ་པ་དེར། །ཉམས་ཚེ་ཆོས་ནི་ཉམས་པར་འགྱུར། །ཚུལ་མེད་ཚུལ་ངན་གྱིས་བཅིངས་པའི། །རྒ་ཤི་དབང་བདག་
རྣམས་ཀྱི་ནི། །སྡུག་བསྔལ་འཁྲུལ་འཁོར་ཆེན་པོ་ཡི། །བཤིག་བྱེད་དེ་འདྲ་སུ་ཞིག་ཡོད། །སིན་དྷུར་ཤིང་ནི་སྐམས་པ་རྣམས། །དཔྱིད་མཐར་ཆུ་གཏེར་གྱིས་བཞིན་དུ། །ཆགས་སྐྱེས་རྒོད་པའི་མི་རྣམས་ནི། །གསུང་གིས་ཚིམ་མཛད་སུ་ཞིག་ལགས། །གང་དུ་བླ་མ་ལྷུན་པོའི་སྙིང་། །ཀུན་མཁྱེན་
ཉིད་ཀྱང་རྒུད་འགྱུར་ན། །བློ་གྲོས་ལྡན་པ་འཇིག་རྟེན་ན། །བློ་གཏད་ལ་འགྲོ་འོས་པ་སུ། །ཇི་ལྟར་གསང་བྱ་བསྐྱངས་བྱས་ནས། །འཆི་བའི་ཆེད་དུ་འཁྲིད་པར་བྱེད། །དེ་བཞིན་གསོན་པའི་འཇིག་རྟེན་སྡུག །འཆིང་བའི་ཆེད་དུ་སྐྱེ་བར་བྱེད། །ཇི་ལྟར་ཤིང་ནི་རྣོ་བ་ཡི། །སོག་ལེ་ཡིས་ནི་
གཤེགས་པར་བྱེད། །དེ་བཞིན་འགྲོ་འདི་ཉམས་པ་ཡི། །སོག་ལེ་ཡིས་ནི་གཤེགས་པར་བྱེད། །ཉོན་མོངས་མཐའ་དག་བསྲེགས་ནས་ཀྱང་། །ཡེ་ཤེས་ཀྱི་ནི་སྟོབས་ལྡན་ཀྱང་། །འགྲོ་བའི་མཆོག་གི་སློབ་དཔོན་ནི། །རབ་ཏུ་ཉམས་ཕྱིར་གཤེགས་པར་གྱུར། །ལྟ་ངན་སྲོག་ཆགས་ངན་པ་
ཆུ། །སྲིད་པའི་དབའ་རླབས་རྡུལ་ནི་ཉ། །ཡེ་ཤེས་གྲུ་པོ་ཆེན་པོ་ཡིས། །གང་གི་སྲིད་པའི་མཚོ་ལས་རྒལ། །རྒ་བའི་ཡལ་ག་ནད་མེ་ཏོག །འཆི་བའི་རྩ་བ་སྲིད་མྱུ་གུ། །ཡེ་ཤེས་མཚོན་ཆ་ཆེན་པོ་ཡིས། །གང་གིས་སྲིད་པའི་ལྗོན་ཤིང་བཅད། །མ་རིག་གཙུབ་ཤིང་ལས་སྐྱེས་ཤིང་། །
འདོད་ཆགས་མེ་ལྕེ་ཡུལ་བུད་ཤིང་། །གང་གིས་ཡེ་ཤེས་བསིལ་བའི་ཆུས། །སྐྱོན་གྱི་མེ་ནི་ཞི་བར་མཛད། །གང་གིས་ཞི་བའི་ལམ་ལ་གཤེགས། །གང་གིས་མུན་པ་ཆེན་པོ་སྤངས། །གང་གིས་དགེ་ལེགས་མཆོག་མཁྱེན་ཞིང་། །མཁྱེན་ནས་བྱམས་པ་ཡིས་བསྟན་ཏོ། །ངེས་ཀྱང་ཉོན་མོངས་ཀུན་

172-1-86b

མཐར་ཕྱིར། །ཀུན་དུ་ཞི་བ་གཟིགས་པ་སྟེ། །ཀུན་མཁྱེན་ཀུན་ལ་ཕན་པ་མཛད། །ཀུན་སྤངས་ཆེད་དུ་གཤེགས་པ་ཉིད། །མཉེན་ཞིང་རྣམ་ཡངས་དབྱངས་མངའ་བའི། །ཕྱག་རིང་ཐུབ་པ་ཆེན་པོ་དེའི། །གལ་ཏེ་མཐའ་ན་སུ་ཡི་མཐའ། །འབྱུང་འགྱུར་མ་ཡིན་འབྱུང་འགྱུར་མིན། །འབྲོག་
དགོན་དག་ན་ཆུ་མཐོང་ནས། །ལམ་འགྲོ་དོན་བཅས་འཁྲུལ་བ་བཞིན། །མྱུར་བ་དང་ལྡན་མཁས་པས་ནི། །དེ་ཕྱིར་ཆོས་ལ་བསྙེན་པར་འོས། །ཉམས་ཕྱིར་ཁྱད་པར་མེད་པ་ཡི། །སྡིག་པ་མི་རྟག་ཉིད་ཤེས་ནས། །གང་ཞིག་ཆོས་ལ་གཉིད་མ་ལོག །དེ་ནི་ཉལ་ཡང་གཉིད་མ་
ལོག །དེ་ནས་མི་ཡི་སེང་གེ་ཡི། །ཡེ་ཤེས་ཟ་ཕོད་སེང་གེ་དེས། །སྐྱེ་བའི་ཉེས་པ་རྣམས་སྨད་ཅིང་། །སྲིད་པ་ཟད་པའི་བསྟོད་པ་ཉིད། །སྲིད་པའི་རྩ་བ་འདོར་འདོད་ཅིང་། །བརྟུལ་ཞུགས་དམ་པ་ལེན་འདོད་ལ། །གཡོ་བའི་སེམས་ནི་ཐུལ་འདོད་དེ། །དགེ་བའི་ལམ་ལ་གནས་པར་
འདོད། །ཞི་བའི་ལམ་ལ་འགྲོ་འདོད་ཅིང་། །སྲིད་པའི་མཚོ་ལས་རྒལ་འདོད་ལ། །རྟག་པར་སྦྱིན་པ་གཏོང་འདོད་དེ། །ཡང་སྲིད་གཅོད་པར་འདོད་པའོ། །སྦྱིན་པ་བྱིན་ཞིང་ང་རྒྱལ་སྤངས། །ཆོས་ནི་བསམས་ཤིང་ཞི་བར་སོང་། །ཐུབ་པ་མྱ་ངན་འདའ་བཞེད་ཚེ། །དེ་ཡིས་ས་ནི་སྟོང་པར་
གོ། །དེ་ནས་སྐུ་ལུས་ཐམས་ཅད་ཀྱིས། །གཉིས་འཐུང་རྒྱལ་པོ་བཞིན་བཟློག་ནས། །གྲོང་ཁྱེར་ལ་ནི་གཟིགས་བཞིན་དུ། །ཐུབ་པས་འདི་སྐད་བཀའ་སྩལ་ཏོ། །ཡངས་པ་ཅན་གྱི་བདག་གི་འདི། །ཁྱོད་ལ་ལྟ་བའི་ཕྱི་མ་ཡིན། །གྱད་གནས་ཀྱི་ཚེ་ཚོང་དུས་སུ། །མྱ་ངན་
འདའ་ཕྱིར་འགྲོ་བར་གྱིས། །དེ་ནས་གུས་ལྡན་ཆོས་འདོད་པ། །ཉེ་བར་འོངས་པ་རྣམས་གཟིགས་ནས། །དེ་ཡི་རབ་སྤྱོད་ལས་རྣམས་ལ། །ཐུབ་པས་མངོན་པར་རྗེས་གནང་མཛད། །དེ་ནས་རིམ་གྱིས་རྣམ་འདྲེན་པ། །ལོངས་སྤྱོད་གྲོང་ལ་བསྙེན་པ་སྟེ། །དེར་བཞུགས་
ཐམས་ཅད་མཁྱེན་པ་ཡིས། །དགེ་སློང་རྣམས་ལ་མངོན་པར་གསུངས། །ད་ལྟར་རམ་ནི་བདག་འདས་ནས། །ཆོས་ལ་མཆོག་ཏུ་གཞོལ་བར་བྱ། །དེ་ནི་ཁྱོད་ཀྱི་དོན་མཆོག་སྟེ། །གང་གཞན་དེ་ནི་ངལ་བར་འགྱུར། །གང་ཞིག་མདོ་སྡེར་མ་ཞུགས་ཤིང་། །འདུལ་བ་ན་ཡང་མི་སྣང་

172-1-87a

ལ། །རིགས་པར་སོ་སོར་གནོད་པ་སྟེ། །དེ་ནི་ཅིས་ཀྱང་གཟུང་མི་བྱ། །དེ་ནི་ཆོས་མིན་འདུལ་བ་མིན། །དེ་ནི་བདག་གི་ཚིག་མ་ཡིན། །མང་པོ་རྣམས་ཀྱི་ཚིག་ཡིན་ཀྱང་། །ནག་པོའི་གདམས་པ་དེ་དོར་བྱ། །དག་པའི་གདམས་པ་གཟུང་བྱ་ཞིང་། །གང་
ལ་ཡོད་མིན་ཟློག་པ་སྟེ། །དེ་ནི་ཆོས་ཡིན་འདུལ་བ་སྟེ། །དེ་ནི་བདག་གི་ཚིག་ཡིན་ནོ། །དེ་ཕྱིར་བདག་གིས་མདོར་བསྡུས་ནས། །ཚད་མ་འདི་རྣམས་བཤད་པ་སྟེ། །གང་ཞིག་བྱེད་དེ་ཚད་མ་ཡིན། །འདི་ལས་གཞན་དུ་ཚད་མ་མིན། །བདག་གི་དགོངས་པ་ཕྲ་མོ་དེ། །རྣམ་པར་མ་
བཞག་མ་ཤེས་ནས། །རྨོངས་ལས་ཆོས་མ་ཡིན་པ་ལ། །ཆོས་ཀྱི་བློ་རྣམས་འབྱུང་བར་འགྱུར། །མུན་པ་དང་བཅས་ལྟ་བས་སམ། །ཁྱད་པར་རྣམས་ནི་ཤེས་མིན་ལས། །གསེར་དང་རབ་ཏུ་མཚུངས་པ་ཡི། །ཇི་ལྟར་ཟངས་ཀྱིས་སླུ་བར་བྱེད། །ཤེས་རབ་ཁྱབ་པ་མེད་པས་སམ། །
དེ་ཉིད་འཛིན་པ་མ་ཡིན་པས། །དམ་པའི་ཆོས་ཀྱི་གཟུགས་བརྙན་གྱི། །དེ་ལྟར་ཆོས་མ་ཡིན་པས་སླུ། །བརྡར་ལས་གཅད་ལས་བསྲེགས་པ་ལས། །མཁས་པ་རྣམས་ཀྱིས་གསེར་བཞིན་དུ། །འདུལ་བ་མདོ་ལས་རིགས་པ་ལས། །དེ་ཕྱིར་ཡོངས་སུ་རྟོག་པར་རིགས། །བསྟན་
བཅོས་རྣམ་པར་མི་ཤེས་པས། །མཁས་པ་རྣམས་ནི་མ་ཡིན་ཞིང་། །ཚུལ་མིན་ལ་ཚུལ་བློ་གྲོས་དང་། །ཚུལ་ལ་ཚུལ་མིན་མཐོང་བ་ཉིད། །དེ་ཕྱིར་དོན་དང་ཚིག་གིས་ནི། །ཡང་དག་ཐོས་པས་གཟུང་བྱ་སྟེ། །བསྟན་བཅོས་ལོག་པར་གཟུང་བ་ཡིས། །མཚོན་ཆ་བཞིན་དུ་རྣམ་པར་འཇོམས། །
སྔར་མེད་ལྡན་པས་འཁྱོག་མང་པོའི། །མཚན་མོའི་འོད་བྱེད་ཁྱིམ་ལ་བཞིན། །ཚིག་ནི་ལོག་པར་བརྗོད་པ་ཡི། །དོན་ལ་སྡུག་བསྔལ་གྱིས་འཇུག་གོ། །དོན་ཉམས་པ་ལས་ཆོས་ཉམས་ཤིང་། །ཆོས་ཉམས་པ་ལས་ནུས་པ་སྟེ། །དེ་ཕྱིར་མ་ལོག་དོན་ལ་ནི། །གང་གི་བློ་དེ་བློ་ལྡན་ནོ། །དགེ་
མང་དེ་སྐད་གསུངས་ནས་ནི། །དུས་སུ་སྡིག་པའི་གྲོང་ལ་གཤེགས། །དེར་ནི་འདི་ལ་མཁྱེན་རྣམས་ཀྱིས། །བསྙེན་བཀུར་དམ་པ་བྱས་པའོ། །དེ་ནས་དེར་ནི་གུས་ལྡན་པ། །སྐུལ་བྱེད་ལེགས་པའི་ཁྱིམ་ཉིད་དུ། །བཅོམ་ལྡན་འདས་ཀྱིས་ཟས་མཛད་དེ། །དེ་ཡི་ཕྱིར་ཡིན་རྒྱས་ཕྱིར་

172-1-87b

མིན། །དེ་ནས་ཉན་ཐོས་ཚོགས་བཅས་ཏེ། །དེ་བཞིན་གཤེགས་པས་ཟས་མཛད་ནས། །སྐུལ་བྱེད་ལ་ནི་ཆོས་གསུངས་ཏེ། །ཀུ་ཤ་ལྡན་པའི་གྲོང་དུ་གཤེགས། །དེ་བཞིན་ནོར་ལྡན་ཞེས་པའི་ཀླུང་། །སྐུལ་བྱེད་བཅས་པ་དེ་རྒལ་ནས། །གྲོང་ཁྱེར་དེར་ནི་ཞི་བ་ཡི། །པད་མའི་ནགས་
བཅས་ནགས་སུ་བསྙེན། །གསེར་དང་འདྲ་བའི་འོད་མངའ་དེས། །གསེར་ལྡན་ལ་ནི་ཁྲུས་མཛད་ནས། །ཀུན་དགའ་བོ་ནི་དགའ་མེད་ལ། །འཇིག་རྟེན་དགའ་བས་བཀའ་སྩལ་ཏོ། །ཀུན་དགའ་གཤིན་རྗེའི་ར་བ་ཡི། །དབུས་སུ་བདག་གི་ཁྲི་ཤོམས་ཤིག །དེ་རིང་ནམ་གྱི་ཆ་སྨད་ལ། །
དེ་བཞིན་གཤེགས་པ་མྱ་ངན་འདའ། །ཞེས་གསུངས་ཀུན་དགའ་བོས་ཐོས་ནས། །མཆི་མས་ཞག་ངན་མིག་ལྡན་པས། །ཐུབ་པའི་གཟིམས་མལ་བཤམས་པ་སྟེ། །བཤམས་ནས་བསྟོད་ཅིང་ཀྱི་ཧུད་དོ། །དེ་ནས་གཟིམས་མལ་བསྟབས་པ་ལ། །རྐང་གཉིས་རྣམས་ཀྱི་མཆོག་བྱོན་ཏེ། །
ཡང་ཡང་སད་པ་མེད་ཕྱིར་དང་། །སྡུག་བསྔལ་ཐམས་ཅད་ཟད་ཕྱིར་རོ། །དེ་ནི་རྩིབ་ལོགས་གཡས་ཀྱི་ནི། །ཕྱག་ལ་དབུ་ནི་རྣམ་གཞག་ནས། །ཞབས་ལ་ཞབས་ནི་བཀོད་ནས་སུ། །སློབ་མས་མདུན་བདར་གཟིམས་པའོ། །དེ་ནས་ཡུད་ཙམ་དེ་ན་དེར། །བྱ་རྣམས་སྐད་ནི་མི་སྒྲོགས་ཏེ། །
ཟགས་ཤིང་སྙོམས་པའི་ལུས་རྣམས་ཀྱིས། །བསམ་གཏན་ལ་ནི་གཞོལ་བཞིན་གནས། །དེ་ཚེ་འདབ་མ་གཡོ་རྣམས་ལས། །རླུང་རྣམས་ཀྱིས་ཀྱང་མ་གཡོས་པའི། །ལྗོན་ཤིང་རྣམས་ཀྱི་མཆི་མ་བཞིན། །མདོག་ངན་མེ་ཏོག་རྣམས་གཏོར་ཏོ། །ནུབ་རིའི་རྩེ་ལ་ཉིན་མོར་བྱེད། །གནས་ལ་
ལམ་འགྲོ་རྣམ་པ་བཞིན། །ཁྲི་ལ་ཐུབ་པ་ལྟ་བཞིན་དུ། །དོན་དམ་མཐོང་རྣམས་སྐྱེན་པར་གྱུར། །དེ་ནས་མཐར་ཐུག་གཟིམས་མལ་ལ། །ཐམས་ཅད་མཁྱེན་པ་གཟིམས་པ་ཡིས། །མཆི་མས་རྣམ་འཁྲུག་ཀུན་དགའ་ལ། །རྗེས་སུ་བརྩེ་བས་བཀའ་སྩལ་ཏོ། །བདག་ནི་མྱ་ངན་འདའ་བའི་
དུས། །གྱད་རྣམས་ལ་སྨྲོས་ཀུན་དགའ་བོ། །མྱ་ངན་འདའ་བ་མ་མཐོང་ན། །ཕྱིས་ནས་བདག་ལ་གདུང་བར་འགྱུར། །དེ་ནས་གསུང་ནི་རབ་བཟུང་ནས། །མཆི་མས་བརྒྱལ་བའི་ཀུན་དགའ་བོས། །ཐུབ་པའི་གཟིམས་མལ་མཐར་ཐུག་པ། །གྱད་རྣམས་ལ་ནི་སྨྲས་པའོ། །དེ་ནས་དེའི་ཚེ་ཀུན་

172-1-88a

དགའ་བོ་ཡི་ཚིག་ཐོས་ནས། །མིག་ནས་ཆུ་ཡི་ཆར་ལྡན་དེ་རྣམས་ངུ་བཞིན་དུ། །སེང་གེའི་འཇིགས་ལས་ས་འཛིན་དག་ནས་ཁྱུ་མཆོག་ལྟར། །བརྟན་མིང་རྣམ་པར་གནོན་རྣམས་གྲོང་ཁྱེར་ནས་འཐོན་ཏོ། །ཞེན་པ་མེད་པས་གོས་རྣམས་གཡེངས་ཤིང་རྣམ་བཀྲམ་
སྟེ། །འགྲོས་ཀྱིས་ཀུན་ནས་བསྐྱོད་པས་ཅོད་པན་གཡོ་བ་རྣམས། །ལྷ་ན་གནས་རྣམས་བསོད་ནམས་ཡོངས་སུ་ཟད་ལས་བཞིན། །དེ་ན་ཉམ་ཐག་འོངས་པ་རྣམས་ནི་ནགས་དེར་སོང་། །དེ་ལྟར་འོངས་པ་རྣམས་ཀྱིས་ཐུབ་པ་མཐོང་བ་སྟེ། །མཐོང་ནས་མཆི་མའི་གདོད་ལྡན་རྣམས་
ཀྱིས་ཕྱག་འཚལ་ཞིང་། །ཕྱག་འཚལ་ནས་ནི་ཡོངས་གདུང་སེམས་རྣམས་གནས་པ་སྟེ། །གནས་པ་དེ་རྣམས་ལ་ནི་ཐུབ་པས་བཀའ་སྩལ་ཏོ། །དགའ་བའི་དུས་སུ་མྱ་ངན་བྱེད་པར་རིགས་མིན་ཞིང་། །ཡིད་མི་བདེ་བས་དོན་མེད་བསྟན་པ་བསྙེན་པར་གྱིས། །བསྐལ་པ་དུ་མ་རྣམས་སུ་
བདག་གི་འདོད་པ་གང་། །ཤིན་ཏུ་རྙེད་དཀའི་དོན་དེ་བདག་ལ་ཉེ་བར་གནས། །ས་དང་ཆུ་དང་མེ་དང་རླུང་དང་མཁའ་མེད་པའི། །དགེ་ཞིང་འགྱུར་མེད་དབང་པོའི་དབང་དོན་ལས་འདས་པ། །ཞི་ཞིང་དབྲོག་བྱ་མ་ཡིན་མཆོག་དེ་གང་ཐོབ་ནས། །སྐྱེ་བ་མེད་ཅིང་འཕོ་བ་མེད་ལ་མྱ་ངན་མེད། །
ག་ཡ་རྣམས་སུ་བྱང་ཆུབ་ཚེ་ན་བདག་གིས་སྔོན། །དགེ་མིན་སྲིད་པའི་རྒྱུ་རྣམས་སྦྲུལ་བཞིན་དོར་བ་སྟེ། །སྔོན་ཚེ་བསགས་པའི་ལུས་ཀྱིས་རྣམ་པར་གནས་པ་འདི། །ལུས་འདི་ཉིད་ནི་དེ་རིང་ཉེ་བར་འགྲོ་བར་འགྱུར། །སྡུག་བསྔལ་གྱི་ནི་གཏེར་ཆེན་ཕུང་པོ་སོང་བ་ན། །འཇིགས་པ་ཆེན་པོ་
ཡང་སྲིད་ཉེ་བར་ཞི་བ་ན། །གང་ཚེ་སྡུག་བསྔལ་ཆེན་པོ་ལས་ནི་བྱུང་བ་སྟེ། །གང་གིས་ངུ་བ་བདག་ལ་མྱ་ངན་འོས་ཅི་ཡོད། །རབ་ཏུ་ཞི་བའི་དུས་ཡིན་ན་ཡང་འབྲུག་གི་དབྱངས། །ཤཱཀྱ་ཐུབ་པའི་གསུང་ནི་དེ་རྣམས་ཀྱིས་ཐོས་ནས། །དེ་ནས་ཁ་རྣམས་བྱེ་ཞིང་སྨྲ་འདོད་གྱུར་པ་སྟེ། །དེ་དག་
རྣམས་ཀྱི་ཚིག་དེ་གནས་བརྟན་གྱིས་གསོལ་ཏོ། །གང་གིས་ངུ་བ་ཁྱོད་ཀྱི་མྱ་ངན་འོས་ཅི་ཡོད། །མེ་ནི་ཁང་པ་འབར་ལས་རྣམ་པར་འཐོན་པ་ལྟར། །དེ་ལྟར་ཐུབ་པ་དེ་ནི་ལྷ་གཙོ་རྣམས་ཀྱིས་ཀྱང་། །ངེས་པར་བསྙེན་བྱ་ཡིན་ན་མི་རྣམས་ཀྱིས་སྨྲོས་ཅི། །ཁྱབ་བདག་སྐྱེ་བོ་གང་འདི་དེ་བཞིན་

172-1-88b

གཤེགས་པ་ནི། །མྱ་ངན་འདས་འདི་མཐོན་མིན་དེས་ན་མྱ་ངན་བྱེད། །འབྲོག་དགོན་དག་ན་སོང་བའི་ལམ་མཁན་བཟང་པོ་ནི། །རྣམ་པར་ཉམས་ཚེ་ཀུན་ནས་འཁྲུལ་བར་ཅིས་མ་འགྱུར། །བླ་མ་དྲང་སྲོང་ཆེན་པོ་ཐམས་ཅད་གཟིགས་པ་ནི། །དངོས་སུ་མཐོང་ནས་གལ་ཏེ་ཁྱད་པར་མ་ཐོབ་ན། །
གསེར་གྱི་འབྱུང་གནས་དག་ནས་དབུལ་པོ་སོང་རྣམས་བཞིན། །དེ་ཚེ་འདི་ན་བཞད་གད་ཉིད་དུ་འགྲོ་བ་ཉིད། །དེ་ལྟར་དོན་ལྡན་མང་པོ་དེ་དེ་སྨྲ་བ་རྣམས། །བུ་རྣམས་ལ་བཞིན་གུས་ལྡན་ཐལ་མོ་སྦྱར་བ་རྣམས། །དགེ་ཞིང་ཞི་ལ་དམ་པའི་དོན་ནི་བསྔགས་པ་ཡིས། །གྱད་རྣམས་དག་ལ་
མཆོག་བདག་རྣམས་ཀྱི་མཆོག་གིས་གསུངས། །དེ་ལྟར་ངེས་པ་དེ་ནི་ཁོ་བོ་མཐོང་བ་ལས། །རྣལ་འབྱོར་ཆོ་གར་འབད་རྩོལ་མེད་པར་གྲོལ་མིན་ཏེ། །བདག་གི་ཆོས་འདི་གང་ཞིག་རྗེས་སུ་རྟོག་བྱེད་པ། །སྡུག་བསྔལ་དྲ་བ་ལས་དེ་མ་མཐོང་ན་ཡང་གྲོལ། །ཇི་ལྟར་སྨན་ནི་བསྙེན་པར་མི་བྱེད་
སྐྱེས་བུ་ཡིས། །སྨན་པ་མཐོང་བ་ལས་ཀྱང་ནད་ནི་འཇོམས་མིན་ཏེ། །དེ་བཞིན་བདག་གིས་ཡེ་ཤེས་འདི་ནི་མ་བསྒོམས་ན། །བདག་ནི་མཐོང་བ་ལས་ཀྱང་སྡུག་བསྔལ་འཇོམས་མ་ཡིན། །འདི་ནི་བདག་ལྡན་གང་ཞིག་བདག་གི་ཆོས་མཐོང་བ། །རྒྱང་རིང་དག་ན་གནས་ཀྱང་དེས་ནི་བདག་
མཐོང་སྟེ། །གང་ཞིག་དགེ་ལེགས་ལ་ནི་གཞོལ་ཞིང་མི་འཇུག་པ། །བདག་གི་ཉེ་བར་གནས་ཀྱང་དེ་ནི་རྒྱང་རིང་ཉིད། །དེ་ཕྱིར་བརྩོན་འགྲུས་མ་སྤངས་བསྡམས་པའི་སེམས་རྣམས་ཀྱིས། །དགེ་བའི་ལས་རྣམས་ལ་ནི་བག་དང་ལྡན་པར་གྱིས། །སྡུག་བསྔལ་དུ་མ་ཉེ་བར་འདུས་ཤིང་གཡོ་བ་
སྟེ། །སྲོག་ནི་ཐོ་རངས་མར་མེ་དང་ནི་མཚུངས་པ་ཉིད། །དེ་ལྟར་ཐུབ་པའི་སྐྱེས་མཆོག་གིས་བསྟན་དེ་རྣམས་ནི། །མིག་ནས་ཆུ་ནི་རྣམ་བྱུང་ཉམ་ཐག་ཡིད་རྣམས་ཀྱིས། །ཆུ་བོའི་གཞུང་ནི་སོ་སོར་སྒྲོལ་བར་བྱེད་པ་བཞིན། །ཀུ་ཤ་ཞེས་བྱའི་གྲོང་ལ་དལ་བུས་དབང་མེད་ཞུགས། །སངས་རྒྱས་
ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། མྱ་ངན་ལས་འདའ་བར་གཤེགས་པའི་ལེའུ་སྟེ་ཉི་ཤུ་རྩ་ལྔ་པའོ།།      །།དེ་ནས་བཟང་པོས་ཡང་དག་ཉེར་ལྡན་ལེགས་བཟང་ནི། །དབྱུ་གུ་གསུམ་འཛིན་འབྱུང་པོའི་ཚོགས་སུ་མི་མཆོད་པ། །བདེ་བར་གཤེགས་པ་ལྟ་འདོད་

172-1-89a

དགེ་སློང་ཐར་འདོད་པས། །ཀུན་དགའ་བྱེད་པའི་ཀུན་དགའ་བོ་ལ་སྨྲས་པའོ། །ཐུབ་པ་མྱ་ངན་འདའ་བའི་དུས་ནི་བདག་གིས་ཐོས། །གང་གི་ཆེད་དུ་བདག་གིས་ལྟ་འདོད་སྐྱེས་པ་སྟེ། །འཇིག་རྟེན་དག་ན་མཆོག་གི་ཆོས་ཀྱི་རྟོགས་པ་པོ། །ཟླ་བ་གནམ་སྟོང་ལ་བཞིན་མཐོང་
བར་ཟླ་བ་མིན། །སྡུག་བསྔལ་མཐའ་དག་རྣམས་ཀྱི་ཐ་མར་གཤེགས་བཞེད་པ། །ཁྱོད་ཀྱི་འདྲེན་པ་དེ་ནི་ལྟ་བར་འདོད་པ་སྟེ། །སྤྲིན་གྱིས་མངོན་པར་བཀག་པའི་མཁའ་ལ་ཉི་མ་བཞིན། །བདག་གིས་མ་མཐོང་བར་དེ་ནུབ་པར་འགྲོ་མ་ཡིན། །དེ་ནས་ཡོངས་སུ་འགྲོ་བ་པོ་ནི་འོངས་པ་སྟེ། །སྨྲ་
བར་འདོད་ཅིང་ཆོས་འདོད་པ་ནི་དེས་ཤེས་ནས། །ངལ་བ་དང་ནི་ལྡན་པའི་སེམས་ལྡན་ཀུན་དགའ་བོས། །དུས་མ་ཡིན་ཞེས་མཆི་མའི་གདོང་གིས་སྨྲས་པའོ། །དེ་ནི་ཟླ་བའི་འོད་མངའ་བསམ་པ་མཁྱེན་པ་པོ། །འདབ་མ་རྒྱས་པའི་སྤྱན་ཡངས་རྣམ་པར་མཁྱེན་ནས་སུ། །གང་ཕྱིར་ཁོ་བོ་འཇིག་
རྟེན་ཕན་ཕྱིར་སྐྱེས་པ་སྟེ། །ཀུན་དགའ་བོ་ཀྱེ་གཉིས་སྐྱེས་མ་འགོགས་ཞེས་གསུངས་སོ། །དེ་ལས་ལེགས་བཟང་མཆོག་ཏུ་དགའ་ཞིང་ཡིད་ཆེས་ཤིང་། །དཔལ་སྟུག་དགེ་ལེགས་མཛོད་ལ་མངོན་དུ་སོང་བ་སྟེ། །དེ་ནས་དུས་ཀྱི་རྗེས་སུ་མཐུན་པས་ཞི་བ་ཡི། །གསུང་ནི་མངོན་པར་གསུངས་
ནས་སླར་ཡང་དེ་གསོལ་ཏོ། །ཁོ་བོ་ལྟ་བུའི་ཡོངས་སུ་རྟོག་པ་པོ་རྣམས་ལས། །ཐར་པའི་ལམ་གཞན་ལྷག་པར་ཁྱེད་ཀྱིས་ལྷག་པར་ཐོབ་ཅེས་གྲག །དེ་ཕྱིར་བདག་ལ་གསུང་མཛོད་བདག་ལ་འཛིན་འདོད་ཡོད། །བདག་གིས་ལྟ་འདོད་རྩེ་བར་འདོད་པའི་ཕྱིར་མ་ཡིན། །དེ་ནས་གཉིས་
སྐྱེས་མངོན་པར་འོངས་པ་དེ་ལ་ནི། །ཡན་ལག་བརྒྱད་ཀྱི་ལམ་ནི་སངས་རྒྱས་ཀྱིས་གསུངས་ཤིང་། །རབ་ཏུ་ཆུད་ཟོས་ལམ་ནི་ཡང་དག་དྲན་པ་བཞིན། །ཐོས་ནས་གང་ནི་གང་གིས་ཡང་དག་རྟོགས། །དེས་ནི་སྔོན་དུ་མཐོང་བར་གྱུར་པའི་ལམ་གཞན་ལ། །དེས་ནི་མཐར་ཐུག་དམ་པ་ཉེ་བར་མ་ཐོབ་
སྟེ། །སྔོན་དུ་མ་མཐོང་ལམ་ནི་ལྷག་པར་ཐོབ་ནས་སུ། །སྙིང་ལ་མུན་པ་དང་བཅས་ལམ་དེ་དོར་བར་གྱུར། །རྡུལ་དང་ལྷན་ཅིག་མུན་པ་རབ་ཏུ་འཕེལ་བ་སྟེ། །དེ་དག་རྣམས་ཀྱི་མི་དགེའི་ལས་ནི་སོགས་ཞེས་གྲགས། །སྙིང་སྟོབས་དང་བཅས་རྡུལ་ནི་རབ་ཏུ་འཕེལ་བ་སྟེ། །དེ་དག་རྣམས་

172-1-89b

ཀྱི་དགེ་བའི་ལས་ནི་རྒྱས་ཞེས་གྲགས། །ཐོས་དང་བློ་དང་འབད་པས་སྙིང་སྟོབས་འཕེལ་བ་ན། །རྡུལ་དང་མུན་པ་ནག་ནི་རྣམ་པ་མེད་པའི་ཕྱིར། །ལས་ཉམས་པ་ལས་ལས་ནི་ཟད་པར་འགྲོ་བ་སྟེ། །དེ་དག་རྣམས་ཀྱི་ལས་དེ་འཐད་པ་ཡིན་ཞེས་གྲགས། །ཡིད་ནི་རྨོངས་པར་བྱེད་
པ་རྡུལ་དང་མུན་པ་དག །རང་བཞིན་པར་ནི་འཇིག་རྟེན་དག་ན་སྨྲ་བ་སྟེ། །དེ་ཕྱིར་དེ་གཉིས་ཟད་པ་ཡོད་མིན་བརྟན་ཉིད་ཕྱིར། །རང་བཞིན་པར་ནི་བརྟན་པ་ཉིད་དུ་རབ་ཏུ་གྲུབ། །སྙིང་སྟོབས་སྦྱོར་ལས་དེ་དག་བདེ་བར་གྱུར་ན་ཡང་། །དུས་ཀྱི་དབང་གིས་སླར་ཡང་འབྱུང་བར་འགྱུར་བ་
སྟེ། །བསིལ་བའི་ཆུ་ནི་ཚན་མོ་བཞིན་དུ་རིམ་གྱིས་ནི། །དུས་ཀྱི་རིམ་ལས་རང་བཞིན་དུ་ནི་འགྲོ་བར་འགྱུར། །རྟག་པའི་བདག་ཉིད་སྙིང་སྟོབས་དེ་ལྟར་འཕེལ་བ་རུ། །ཐོས་པ་བློ་དང་འབད་པ་རྣམས་ཀྱིས་མི་ནུས་ཏེ། །དེ་མ་འཕེལ་ན་དེ་དག་ཉམས་པ་ཡོད་མིན་ཞིང་། །དེ་དག་མ་
ཉམས་པ་ལས་ཞི་བ་ཡོད་མ་ཡིན། །སྔོན་དུ་དེས་ནི་རང་བཞིན་ལས་ནི་སྐྱེས་སྙམ་སྟེ། །དེས་ཀྱང་དེར་ནི་ཐར་པ་མཐོང་བ་མ་ཡིན་ཞིང་། །མེ་ཡི་འབར་བའི་འོད་ཀྱི་ཉམས་པ་ཇི་ལྟ་བར། །རང་བཞིན་ལ་ནི་གནས་ན་མཐར་ཐུག་གང་ལས་ཡིན། །སངས་རྒྱས་པ་ཡི་ལམ་གྱིས་དེ་ཉིད་མཐོང་བ་
སྟེ། །སྲིད་པ་ལ་ནི་བརྟེན་ནས་འཇིག་རྟེན་དེས་རྟོགས་ཤིང་། །དེ་ཡི་རྣམ་པར་ཉམས་པས་ཞི་བ་རིགས་པ་སྟེ། །རྒྱུ་ནི་རབ་ཏུ་ཉམས་ཕྱིར་འབྲས་བུ་ཉམས་པའོ། །གསལ་བ་འདི་ཡིན་རྣམ་པར་འགྱུར་བ་མེད་པའི་བདག །ལུས་ལས་གཞན་ནི་དེ་ཡིས་སྔོན་དུ་རྟོགས་པ་སྟེ། །ཐུབ་པའི་
གསུང་ནི་ཡོངས་སུ་ཐོབ་ནས་འཇིག་རྟེན་ནི། །བདག་མེད་པ་དང་བདག་ཏུ་བྱ་བ་མེད་པར་ཤེས། །ཆོས་ནི་དུ་མ་སོ་སོར་བརྟེན་ནས་སྐྱེས་པ་སྟེ། །རང་ཉིད་དབང་མེད་ཡོངས་སུ་ཤེས་ནས་ནི། །དེས་ནི་རབ་ཏུ་འཇུག་པ་སྡུག་བསྔལ་ཉིད་དུ་དང་། །ངེས་པར་ལྡོག་སྟེ་སྡུག་བསྔལ་ཉིད་དུ་ཀྱེ་མ་མཐོང་། །
ཇི་ལྟར་འཇིག་རྟེན་དག་ནི་སྐྱེ་བ་རྟོགས་ནས་སུ། །དེས་ནི་ཆད་པའི་ལྟ་བ་རྣམ་པར་སྤངས་པ་སྟེ། །འཇིག་རྟེན་དག་གི་ནུབ་པར་འགྲོ་བ་ཤེས་ནས་སུ། །རྟག་པའི་ལྟ་བ་བརྟན་པོ་སྐྱེན་པར་སྤངས་པའོ། །དྲང་སྲོང་ཆེན་པོའི་གསུང་ནི་ཐོས་ནས་བཟུང་བ་སྟེ། །དེ་ལྟར་འདི་ན་དེས་ནི་སྔོན་གྱི་ལྟ་བ་དང་། །

172-1-90a

དེ་ཡིས་སྔོན་དུ་ཡོངས་སུ་ལས་ནི་བྱས་པས་ཏེ། །གང་གིས་སྐྱེན་པར་དམ་པའི་ཆོས་ལ་རྗེས་སུ་སོང་། །ཡིད་ནི་རབ་ཏུ་དང་བས་མཆོག་དང་ལྡན་པ་དེས། །ཞི་ཞིང་འགྱུར་མེད་གོ་འཕང་དེ་ནི་རབ་ཐོབ་ནས། །ཐུབ་པ་གཟིམས་པ་ལ་ནི་བསྔགས་པ་བྱས་པ་སྟེ། །ལྟ་བཞིན་འདི་
ལས་བློ་འདི་རྣམས་ནི་བྱས་པའོ། །མཆོད་འོས་དམ་པ་མྱ་ངན་འདའ་བར་འོས་པ་ཡི། །མགོན་པོ་མཐོང་ནས་བདག་ནི་གནས་པར་འོས་མ་ཡིན། །སྟོན་པ་ཐུགས་རྗེ་ལྡན་པ་མྱ་ངན་འདའ་བ་ཡི། །སྔོན་དུ་རེ་ཞིག་བདག་ནི་མཐར་ཐུག་ལ་འགྲོའོ། །དེ་ནས་དེས་ནི་ཐུབ་པ་ལ་ནི་ཕྱག་འཚལ་ནས། །
སྦྲུལ་བཞིན་གཡོ་བ་མེད་པའི་གདན་ནི་བཅིངས་ནས་སུ། །སྤྲིན་རླུང་གིས་ནི་ཕྲ་མོའི་ཕྲ་མོར་བྱེད་པ་བཞིན། །དེ་མ་ཐག་ཏུ་ཞི་བ་མྱ་ངན་འདའ་བར་གཤེགས། །དེ་ནས་དེ་ཕྱིར་གདུང་གི་འདུ་བྱེད་ཆོ་ག་ནི། །ཆོ་ག་མཁྱེན་པའི་ཐུབ་པས་རྣམ་པར་བཀའ་སྩལ་པ། །མཐར་གྱུར་དེ་ནི་སྐྱེ་
བ་མཐར་མཛད་དྲང་སྲོང་ཆེ། །རྒྱ་ཆེན་སློབ་མ་མངའ་བའི་སློབ་མར་གྱུར་པའོ། །དེ་ནས་ནམ་གྱི་ཐུན་ནི་འདས་པ་ན། །ཟླ་བས་སྐར་མ་རྣམས་ཀྱི་འོད་ནི་ཕྲོགས་པ་ན། །ནགས་རྣམས་ཉལ་བ་བཞིན་དུ་སྒྲ་མེད་གྱུར་པ་ན། །དགེ་སློང་རྣམས་ལ་ཐུགས་རྗེ་ཆེན་པོ་མངའ་བས་བསྟན། །སློབ་དཔོན་
བཞིན་དུ་སྒྲོན་མ་བཞིན་དུ་དོན་བཞིན་དུ། །བདག་འདས་ཚེ་ན་སོ་སོར་ཐར་པ་བསྟན་བྱ་སྟེ། །ཁྱེད་ཀྱི་སྟོན་པ་དེ་ཡིན་དེའི་དབང་གིས་འགྱུར་བྱ། །ཁོ་བོ་གནས་པ་ན་ཡང་དེ་ཙམ་ཉིད་སྨྲའོ། །ལུས་དང་ངག་གི་ལས་ནི་རྣམ་པར་དག་འདོད་པས། །དེ་བཞིན་འཇིག་རྟེན་ཐ་སྙད་ཐམས་ཅད་འདོར་
བ་དང་། །ས་དང་སྲོག་ཆགས་ས་བོན་རྫས་ལ་སོགས་རྣམས་ཀྱིས། །རབ་ཏུ་འཛིན་པ་ལས་ནི་མེ་བཞིན་ལྡོག་པའོ། །ས་ལ་སྐྱེ་བ་གཅོད་དང་འབྱེད་པ་དག་ལས་དང་། །ས་ཡི་ལོགས་ལ་རྐོ་དང་རྨོ་བ་དག་ལས་དང་། །གསོ་བ་དང་ནི་སྐར་རྩིས་མཚན་ཉིད་རྣམས་ལས་ནི། །ངེས་པར་
ལྡོག་པ་བཟའ་བའི་ཆོ་ག་དུས་ཡིན་ནོ། །ཕོ་ཉའི་རིགས་པ་སྨན་དང་སྔགས་ནི་བསྙེན་རྣམས་ལ། །སྦྱོར་མིན་ཉིད་དང་འཆབ་པ་ཉིད་ནི་མེད་པ་ཉིད། །ཆོས་ལས་མ་བཀག་པ་ཡི་སྒྲུབ་པ་རྣམས་ལ་ནི། །ཆོད་ཤེས་ཉིད་དང་ཚིམ་དང་སོགས་པ་མ་ཡིན་ནོ། །རྣམ་པ་དེ་ལྟར་ཚུལ་ཁྲིམས་

172-1-90b

ཡང་དག་བསྡུས་པ་འདི། །ཐར་པའི་རྩ་བ་ཞེས་པ་སོ་སོར་ཐར་པ་སྟེ། །འདི་ལས་ཏིང་ངེ་འཛིན་རྣམས་རབ་ཏུ་སྐྱེ་བ་སྟེ། །ཡེ་ཤེས་ཐམས་ཅད་རྣམས་དང་མཐར་ཐུག་རྣམ་འདའོ། །དེ་ཕྱིར་མ་རལ་མ་ཉམས་དབྲོག་བྱ་མ་ཡིན་པའི། །གང་གིས་ཚུལ་ཁྲིམས་གཙང་མ་ཡོད་པ་དེ་ཡི་
ཆོས། །དེ་མེད་གལ་ཏེ་འདི་ཡི་ཐམས་ཅད་མེད་པ་སྟེ། །ཚུལ་ཁྲིམས་ཡོན་ཏན་དམ་པ་རྣམས་ཀྱི་རྟེན་ཡིན་ནོ། །ཚུལ་ཁྲིམས་མ་ཉམས་རྣམ་པར་དག་པ་གནས་པ་ན། །དབང་པོ་སྤྱོད་ཡུལ་རྣམས་ལ་འཇུག་པ་མ་ཡིན་ཞིང་། །དབྱུག་པས་བ་ལང་ཚོགས་རྣམས་ལོ་ཐོག་ལ་
བཞིན་དུ། །བརྟན་ལས་དབང་པོ་དྲུག་རྣམས་བསྒྲིབ་པར་བྱ་བའོ། །དབང་པོའི་རྟ་རྣམས་ཡུལ་རྣམས་ལ་གྲོལ་གང་ཞིག་གཞན། །ལེན་ཞིང་དེ་རྣམས་ལས་ནི་དེ་ཙམ་ཉིད་མ་ཡིན། །གཡོ་བའི་རྟ་རྣམས་ཀྱིས་ཕྲོགས་ལམ་ངན་ལ་བཞིན་དུ། །དེས་ནི་དེ་ཡི་ཆེད་དུ་དོན་མེད་ཐོབ་པར་
འགྱུར། །དགྲ་བོ་ཆེན་པོ་རྣམས་ཀྱི་དབང་དུ་སོང་བ་རྣམས། །འདི་ན་ཁ་ཅིག་སྡུག་བསྔལ་འཐོབ་པར་འགྱུར་བ་སྟེ། །རྨོངས་པས་ཡུལ་རྣམས་དག་གི་དབང་དུ་སོང་ནས་ནི། །སོང་ནས་དེང་འདིར་དབང་མེད་རྣམས་ནི་སྡུག་བསྔལ་འོས། །དེ་ཕྱིར་དགྲ་བོ་མ་རུངས་དབང་པོ་རྣམས་ཀྱི་
བཞིན། །དབང་པོ་རྣམས་ཀྱི་འགྲོ་བ་འགྲོ་བྱ་མ་ཡིན་ཞིང་། །དབང་པོ་རྣམས་ཀྱི་དགའ་བོ་འཇིག་རྟེན་ན་བྱས་ནས། །དབང་པོ་རྣམས་ཀྱི་གཤེད་མ་འཇིག་རྟེན་ན་མཐོང་ངོ་། །རང་གི་གཡོ་བའི་སེམས་ལས་འཇིགས་པ་ཇི་ལྟ་བར། །སྟག་རྣམས་ལས་དང་སྦྲུལ་དང་འབར་བའི་མེ་
ལས་དང་། །དགྲ་བོ་ལས་ནི་དེ་ལྟར་འཇིགས་པར་མི་བྱ་སྟེ། །གང་གིས་སྦྲང་རྩི་དང་ནི་ཡང་དག་རྟོག་པ་མེད། །ལྕགས་ཀྱུ་མེད་པའི་གཉིས་འཐུང་མྱོས་པ་ལྟ་བུ་དང་། །ཡལ་གའི་རི་དགས་ཤིང་ལ་རབ་ཏུ་མ་ཞི་ལྟར། །སེམས་ནི་ཇི་ལྟར་འདོད་བཞིན་ཕྱོགས་སུ་སྐོར་བ་སྟེ། །གཡོ་ཞིང་
བསྐྱོད་པ་དེ་ལ་གོ་སྐབས་སྦྱིན་མི་བྱ། །དེ་ནི་རང་དབང་ཡིན་ན་ཞི་བ་ཡོད་མིན་ཞིང་། །དེ་ཡི་གནས་པ་ཡིན་ན་བྱེད་པ་བྱས་པ་ཉིད། །དེ་ཕྱིར་སེམས་འདི་ཇི་ལྟར་རྣམ་པར་མི་གཡོ་བ། །དེ་ལྟར་རབ་ཏུ་འབད་པ་ཡིས་ནི་གྱིས་མཛོད་ཅིག །བཟའ་བ་ཙམ་ནི་སྨན་བཞིན་ངེས་པར་བསྟེན་

172-1-91a

བྱ་སྟེ། །འདིར་ནི་ཁོང་ཁྲོ་བྱ་བ་མ་ཡིན་ཆགས་པ་མིན། །ཇི་སྲིད་བཀྲེས་པ་ཉིད་ནི་ལྡོག་པའི་ཆེད་དུ་དང་། །ལུས་ཀྱི་འཁྲུལ་འཁོར་གྱིས་འཛིན་པ་ཡི་ཆེད་དུའོ། །ཇི་ལྟར་ནགས་སུ་བུང་བ་རྣམས་ཀྱིས་མེ་ཏོག་རོ། །འཐུང་སྟེ་མེ་ཏོག་རྣམས་ནི་ཉམས་པར་བྱེད་
མ་ཡིན། །དེ་བཞིན་དུས་ཀྱི་དབང་ལས་བསོད་སྙོམས་རྒྱུ་བ་སྟེ། །ཕ་རོལ་དད་པ་རྣམས་ནི་ཉམས་པར་བྱེད་མ་ཡིན། །དྲང་པོས་རྟག་པར་ཁུར་བར་བྱེད་ཅེས་ཁུར་བྱ་དང་། །སྐྱེ་བོ་སྦྱིན་པ་པོ་ཡང་ཡོད་པ་མ་ཡིན་ཏེ། །འདི་ན་སྦྱོར་བ་མིན་ལས་ཁུར་བ་ལྟུང་བ་སྟེ། །ཇི་ལྟར་ཁུར་བུ་དེ་
ལྟར་སྦྱིན་པ་པོ་ཡིན་ནོ། །རྣལ་འབྱོར་རིམ་ལས་ཉིན་མོ་མཐའ་དག་ཕུལ་ནས་དང་། །མཚན་མོའི་དང་པོའི་ཐུན་དང་ཅིག་ཤོས་དག་ཀྱང་སྟེ། །དྲན་པ་དང་བཅས་སྔ་མའི་ཅིག་ཤོས་ལ་ཉོལ་ལ། །གཉིད་ཀྱི་ཚེ་ནི་དོན་མེད་བྱེད་པ་མ་ཡིན་ནོ། །དུས་ཀྱི་མེ་ཡིས་འདི་ན་འགྲོ་བ་སྲེག་པ་ན། །
མཚན་མོ་མཐའ་དག་ལ་ནི་གཉིད་པར་འོས་པ་སུ། །ཉོན་མོངས་དགྲ་བོ་དང་མཚུངས་འཇོམས་པ་པོ་རྣམས་ནི། །སྙིང་ལ་གནས་པ་ཡིན་ན་སུ་ཡི་གཉིད་ལོག་འགྱུར། །དེ་ཕྱིར་ཁྱིམ་ན་ནག་པོའི་སྦྲུལ་རྣམས་ཉལ་བ་ལྟར། །ཡིད་ལ་ཉེས་སྐྱོན་སྦྲུལ་རྣམས་རབ་ཏུ་ཉལ་བ་རྣམས། །རིགས་པ་དང་ནི་
རྐང་པ་སྨན་གྱིས་སྟོན་ནས་སུ། །གཉིད་ལོག་པར་འོས་འདི་ལས་གཞན་དུ་ངོ་ཚའོ། །ངོ་ཚ་རྒྱན་ཉིད་དང་ནི་མཆོག་གི་གོས་ཡིན་ཞིང་། །ངོ་ཚ་ལམ་ལས་འཁྱོག་པ་རྣམས་ཀྱི་ལྕགས་ཀྱུས་ཏེ། །ངོ་ཚ་ལྡན་པས་དེ་ལྟར་གྱུར་ན་འཇུག་བྱ་ཞིང་། །ངོ་ཚས་རྣམ་པར་སྤངས་པའི་ཡོན་ཏན་
རྣམས་ཀྱིས་སྤངས། །ཇི་སྲིད་པ་ལ་སྐྱེས་བུ་ངོ་ཚ་དང་བཅས་པ། །དེ་སྲིད་དེ་ཡི་མི་ཡི་ངོ་ཚ་ཉིད་ཡིན་ཏེ། །དོན་དང་དོན་མིན་རྣམས་ལ་རྣམ་དཔྱོད་མེད་པ་ནི། །ངོ་ཚས་རྣམ་པར་དམན་པ་ཕྱུགས་དང་མཉམ་པའོ། །གང་ཡང་ཡན་ལག་ཉིང་ལག་རྣམས་ནི་རལ་གྲིས་གཅོད། །དེར་ཡང་
ཡིད་ཀྱིས་ཉེས་པ་བྱ་བ་མ་ཡིན་ཞིང་། །ཞི་བ་མ་ཡིན་དག་ནི་བརྗོད་པར་མི་བྱ་སྟེ། །བདག་གི་དེ་ཡིས་ཁྱེད་ཅག་རྣམས་ཀྱི་བར་ཆོད་ཡིན། །བཟོད་པ་དང་མཉམ་དཀའ་ཐུབ་ཡོད་པ་མ་ཡིན་ཞིང་། །གང་གི་བཟོད་པ་དེ་ཡིས་སྟོབས་དང་བརྟན་པ་སྟེ། །གང་རྣམས་ཕ་རོལ་རྣམས་ལས་

172-1-91b

རྩུབ་མོ་མི་བཟོད་པ། །དེ་རྣམས་ཆོས་བྱེད་རྣམས་ཀྱི་ལུགས་མིན་གྲོལ་བ་མིན། །ཆོས་ཀྱི་འབྱེད་པ་པོ་དང་གྲགས་པའི་འཇོམས་པ་པོ། །གཟུགས་ཀྱི་དགྲ་བོ་དང་ནི་སྙིང་གི་མེ་ཡིན་ཏེ། །ཁྲོ་བ་དེ་ཡིས་གོ་སྐབས་རབ་འབྱམ་མི་སྦྱིན་ཞིང་། །ཡོན་ཏན་རྣམས་ཀྱི་དགྲ་བོ་དེ་འདྲ་གཞན་མ་ཡིན། །
ཡོངས་སུ་བསིལ་བའི་ཆུ་ལས་གློག་གི་མེ་བཞིན་དུ། །ཇི་ལྟར་རབ་བྱུང་ལས་ནི་ཁྲོ་བ་འགལ་བ་སྟེ། །དེ་ལྟར་ཁྱིམ་པ་རྣམས་ཀྱི་སྐྱེས་པ་མི་འགལ་ཏེ། །ཆགས་ལྡན་དེ་རྣམས་དེ་ལ་དམ་བཅའ་མ་ཡིན་ནོ། །མཛེས་པའི་སྐྲ་ནི་རྒྱང་རིང་མགོ་ལ་རེག་ནས་དང་། །རྣམ་པར་འགྱུར་བའི་གོས་དང་
ལྷུང་བཟེད་མཐོང་ནས་དང་། །གཞན་ལས་མཐར་གྱུར་སྤྱོད་པ་རྣམ་པར་བསམས་ནས་སུ། །སྙིང་ལ་སྐྱེས་པའི་ང་རྒྱལ་རབ་ཏུ་སྤང་བར་བྱ། །ཁྱིམ་ལ་བརྟེན་པ་ཁེངས་པ་ལྡན་པ་རྣམས་ཀྱི་ཡང་། །ང་རྒྱལ་རྣམ་པར་འཕེལ་བ་འཇོམས་པའི་ཕྱིར་ཡིན་ན། །སློང་མོ་ཟ་བས་བདག་ཉིད་
ཡོངས་སུ་རྟོག་པ་པོ། །ཐར་པ་ལ་དམིགས་སྐྲ་བཞར་རྣམས་ཀྱི་སྔོན་ཉིད་དོ། །ངན་གཡོ་དང་ནི་ཆོས་ཀྱི་མཚམས་སྦྱོར་ཡོད་མིན་ཏེ། །གང་ཕྱིར་འདི་ལས་འཁྱོག་པོ་ཉིད་ནི་བསྙེན་མི་བྱ། །ངན་གཡོ་ཉིད་དང་སྒྱུ་ནི་སླུ་བའི་དོན་དུ་སྟེ། །ཆོས་ཀྱི་བདག་ཉིད་རྣམས་ཀྱི་བསླུ་བྱ་ཡོད་མ་ཡིན། །
གང་ཞིག་རྒྱ་ཆེན་རྣམས་ལས་སྡུག་བསྔལ་འོངས་པ་སྟེ། །ཉུང་ངུ་འདོད་ལ་འོང་བ་མ་ཡིན་དེ་དང་བྲལ། །དེ་ཡི་ཕྱིར་ཡང་ཉུང་ངུ་འདོད་ཉིད་བསྙེན་བྱ་སྟེ། །གང་ཞིག་ཡོན་ཏན་རྣམས་ཀྱིས་རྫོགས་བྱེད་ཀྱེ་མ་ཅི། །དེ་ནི་བཀྲེན་པའི་ལྟ་བ་རྣམས་ལ་མི་འཇིགས་ཤིང་། །དབང་པོ་
རྣམས་ལས་གང་ཞིག་ཅུང་ཟད་འཇིགས་མིན་ལ། །གང་ཞིག་ཐོས་ནས་མེད་ཅེས་མྱ་ངན་མེད་པ་སྟེ། །གང་གིས་ཉུང་ངུ་འདོད་དེ་ཡི་ཐར་པ་མིན། །གལ་ཏེ་གྲོལ་བར་འདོད་ན་ཚིམ་པ་བསྙེན་མཛོད་དང་། །ཚིམ་པ་ན་ནི་འདིར་བདེ་དེ་འདི་ཆོས་ཡིན་ཞིང་། །ཚིམ་པ་རྣམས་ནི་སར་ཡང་བདེ་བར་
གཉིད་ལོག་སྟེ། །ཚིམ་མེད་རྣམས་ནི་མཐོ་རིས་ན་ཡང་རྣམ་པར་སྲེག །ཕྱུག་ཀྱང་ཚིམ་པ་མེད་པ་རྟག་ཏུ་དབུལ་པོ་སྟེ། །དབུལ་ཡང་ཚིམ་པ་དང་ལྡན་རྟག་ཏུ་ཕྱུག་པོ་ཉིད། །ཚིམ་པ་མེད་པ་སྡུག་པའི་ཡུལ་རྣམས་དང་འབྱེ་ཞིང་། །ཚིམ་པས་འགྲོ་བ་ངལ་བ་ལྡན་ལ་མྱ་ངན་བྱེད། །ཞི་

172-1-92a

བའི་བདེ་བ་དམ་པ་ཐོབ་པར་འདོད་རྣམས་ཀྱིས། །དེ་ལྟར་ཚོགས་ལ་དགའ་བ་རྣམས་སུ་འགྱུར་མི་བྱ། །ཞི་བའི་བདག་ཉིད་གཅིག་ཏུ་རྒྱུ་ཕྱིར་འཇིག་རྟེན་ན། །བརྒྱ་བྱིན་ལ་སོགས་ལྷ་རྣམས་ཀྱིས་ཀྱང་རེ་འདོད་བྱེད། །ཆགས་པོ་སྡུག་བསྔལ་གྱི་ནི་གནས་པའི་ཤིང་ཡིན་
ཏེ། །རང་གི་སྐྱེ་བོ་ལ་འམ་སྐྱེ་ལ་ཆགས་པ་སྤངས། །ཆགས་པ་རྣམ་རྒྱས་སྡུག་བསྔལ་ལ་ནི་འཇིག་རྟེན་ན། །གཉིས་འཐུང་འཁོགས་པ་འདམ་ལ་བཞིན་དུ་ཆགས་པར་འགྱུར། །རྟག་པར་རབ་ཞུགས་ཆུ་ཡི་རྒྱུན་ནི་མཉེན་ན་ཡང་། །རྡོ་ཡི་ལོགས་ལ་དུས་སུ་རྣམ་པར་འབིགས་པ་སྟེ། །བརྩོན་
འགྲུས་ཀྱིས་ནི་རྙེད་པར་དཀའ་བ་ཅི་ཡང་མེད། །དེ་ཕྱིར་ཁུར་རྣམས་མི་འབོར་བར་ནི་བཟོད་བགྱིས་དང་། །གང་ཞིག་ཡང་ཡང་ངལ་བསོ་ནས་ནི་སྲུབ་བྱེད་པ། །དེ་ཡི་ཤིང་ལ་མེ་ནི་རྙེད་པར་སླ་མིན་ཞིང་། །བརྩོན་འགྲུས་བརྩམས་པས་རྙེད་པར་སླ་བར་འགྱུར་བ་སྟེ། །དེ་ཕྱིར་སྦྱོར་བ་ཡོད་ན་བྱ་བ་
འགྲུབ་པ་ཉིད། །དྲན་པ་ཡོད་ན་སྐྱོན་རྣམས་འཇུག་པ་མ་ཡིན་ཏེ། །དྲན་པ་དང་མཉམ་མཛའ་བོ་མེད་ཅིང་བསྲུང་བ་མེད། །དྲན་པ་ཉམས་ལས་ངེས་པར་ཐམས་ཅད་ཉམས་པ་སྟེ། །དེ་ཕྱིར་ལུས་ལ་སོང་བའི་དྲན་པ་སྤང་མི་བྱ། །ཇི་ལྟར་དཔའ་བོ་རྣམས་ནི་གོ་ཆ་བཟུང་ནས་སུ། །དགྲ་བོའི་
སྡེ་ལ་འཇིགས་པ་མེད་རྣམས་འཇུག་བྱ་སྟེ། །དེ་བཞིན་ལུས་ལ་དྲན་པའི་གོ་ཆ་བགོས་ནས་སུ། །བརྟན་པ་རྣམས་ནི་ཡུལ་གྱི་གཡུལ་རྣམས་ལ་སྤྱོད་དོ། །མཉམ་པར་གཞག་པའི་བློ་དང་སེམས་ནི་ཡོངས་བསྡམས་ཤིང་། །འཇིག་རྟེན་དག་གི་སྐྱེ་དང་འགོད་པ་ཤེས་པ་སྟེ། །དེ་ཕྱིར་ཏིང་ངེ་
འཛིན་ལ་ཡོངས་སུ་འཇུག་བྱ་སྟེ། །ཏིང་འཛིན་རབ་ཏུ་ཐོབ་པའི་སེམས་ནད་ཡོད་མ་ཡིན། །རྣམ་པར་འཐོར་བའི་ཆུ་ནི་རྣམ་པར་འཛིན་དོན་དུ། །ཇི་ལྟར་འབད་པས་དོང་དང་འོབས་ནི་བྱེད་པ་སྟེ། །ཡེ་ཤེས་ཆུ་ནི་གནས་པའི་དོན་དུ་ཏིང་ངེ་འཛིན། །དེ་ལྟར་དོང་དང་འོབས་དང་མཚུངས་པར་རབ་
ཏུ་བསྟན། །ཤེས་རབ་ལྡན་པ་ཡོངས་སུ་འཛིན་པ་བཏང་བ་ཡི། །ཆོས་འདི་ནང་ལ་མཆོག་ཏུ་གཞོལ་བ་དག་གིས་ཏེ། །དེ་ལྟར་གནས་པའི་གྲོལ་བ་ཡོད་ཅིང་འདི་ཡི་ནི། །ཕྱིན་ཅི་ལོག་ནི་ཁྱིམ་པ་མ་ཡིན་དགེ་སློང་མིན། །ཤེས་རབ་དགའ་དང་འཆི་བའི་མཚོ་ཆེན་དག་ལ་གྲུ། །རྨོངས་

172-1-92b

པའི་མུན་པ་རྣམས་ལ་ཇི་ལྟར་སྒྲོན་མ་སྟེ། །ནད་རྣམས་ཐམས་ཅད་འཇོམས་པ་དག་གི་སྨན་ཡིན་ཞིང་། །ཉོན་མོངས་ལྗོན་ཤིང་འཇོམས་བྱེད་མཚོན་ཆ་རྣོན་པོ་ཡིན། །དེ་ཕྱིར་ཐོས་པ་བསམ་པ་བསྒོམ་པ་རྣམས་ཀྱི་ནི། །ཤེས་རབ་རྣམ་པར་འཕེལ་ལ་རབ་ཏུ་འཇུག་པར་བྱ། །གང་གི་ཤེས་
རབ་རང་བཞིན་ལྟ་བྱེད་མིག་ཡོད་པ། །དེ་ནི་མིག་དང་བྲལ་ཡང་མིག་དང་ལྡན་པ་ཉིད། །སེམས་ལ་རྒྱུ་བའི་སྤྲོས་པ་དེ་དང་དེ་རྣམས་ཀྱིས། །ཁྱིམ་ན་གནས་པ་སྤངས་ནས་ཀྱང་ནི་གྲོལ་མིན་ཉིད། །མཆོག་ཏུ་ཞི་བ་ཐོབ་པར་འདོད་པ་རྣམས་ཀྱིས་འདི། །ཤེས་ནས་སྤྲོས་པ་མེད་པ་རྣམས་སུ་
འགྱུར་བར་བྱ། །དེ་ཕྱིར་བག་ཡོད་བླ་མ་བཞིན་དུ་བསྙེན་མཛོད་ལ། །བག་མེད་དགྲ་བོ་བཞིན་དུ་རྣམ་པར་སྤོངས་མཛོད་དང་། །བག་ཡོད་པ་ལས་བརྒྱ་བྱིན་གྱི་ན་དཔལ་ཐོབ་ཅིང་། །བག་མེད་པ་ལས་ལྷ་མིན་ཁེངས་རྣམས་རྣམ་པར་ཉམས། །ཕན་པ་དང་ལྡན་རྗེས་སུ་བརྩེ་བ་མངའ་བ་ཡི། །
སྟོན་པ་ཐུགས་རྗེ་མངའ་བས་མཛད་བྱ་གང་ཡིན་པ། །དེ་ནི་བདག་གིས་བྱས་ཤིང་དང་ནི་རབ་བསྡམས་པ། །ཁྱེད་ཅག་རྣམས་ཀྱི་སེམས་ནི་ཞི་བས་བྱས་པའོ། །ཅི་སྟེ་རི་རྣམས་དང་ནི་ཁང་པ་སྟོང་པ་དང་། །དགོན་པ་དེ་རྣམས་གང་དང་དེར་ནི་ཡོད་པ་ན། །རབ་ཏུ་སྦྱོར་ལ་རྟག་ཏུ་འབད་པ་བྱ་བ་སྟེ། །
ཕྱི་ནས་ཡོངས་སུ་གདུང་བ་ལྡན་པར་མ་གྱུར་ཅིག །སྨན་པ་རང་བཞིན་ཡང་དག་ལེགས་པར་ཤེས་ནས་ནི། །ནད་པ་རྣམས་ལ་དམ་པའི་སྨན་ནི་བརྗོད་བྱ་སྟེ། །དེ་ཡི་དུས་ཀྱིས་སྦྱར་བར་ངེས་པར་བསྟེན་པ་ལ། །ནད་པ་གང་དེ་བདག་པོ་ཡིན་ཏེ་སྨན་པ་མིན། །དཔལ་ལྡན་དྲང་ཞིང་མཉམ་ལ་འཇིགས་
པ་མེད་པ་ཡི། །ལམ་ནི་ལམ་མཁན་གྱིས་ནི་རྣམ་པར་བསྟན་པ་ན། །ཐོས་ནས་གང་ཞིག་མི་འགྲོ་དེ་ཡི་ཉམས་པ་སྟེ། །བསྟན་པས་འདྲེན་པ་པོ་ནི་བུ་ལོན་ཡོད་མ་ཡིན། །སྡུག་བསྔལ་ལ་སོགས་བདེན་པ་བཞི་པོ་ཁོ་བོ་ཡིས། །བསྟན་པ་རྣམས་ལ་འདི་ནི་གང་གི་འདོད་པ་ཡོད། །དེ་ནི་མྱུར་ཞིང་
སྤོབས་པར་བདག་ལ་སྨྲོས་ཤིག་དང་། །ཐེ་ཚོམ་ཤིན་ཏུ་རྣམ་པར་དཔྱད་བྱ་བཅད་པར་བགྱི། །དེ་ལྟར་མཐོན་པོར་གསུངས་པའི་དྲང་སྲོང་ཆེན་པོ་ལ། །ཐེ་ཚོམ་མེད་པ་དེ་རྣམས་ཅི་ཡང་མ་གསོལ་ཏོ། །སེམས་ཀྱིས་དེ་དག་རྣམས་ཀྱི་སེམས་ཀྱི་གཏིང་དཔགས་ནས། །བྱེད་ལྡན་མ་འགགས་པས་

172-1-93a

ཀྱང་ཚིག་འདི་སྨྲས་པའོ། །རླུང་ནི་གཡོ་བ་མ་ཡིན་ཉི་མ་བསིལ་བ་དང་། །རི་བོང་མཚན་མ་ཅན་ནི་དྲོ་བ་ཉིད་ན་ཡང་། །འཇིག་རྟེན་དག་ན་རྐང་པ་བཞི་པོ་དེ་རྣམས་ནི། །བདེན་པ་མིན་པར་བྱེད་པར་ནུས་པ་མ་ཡིན་ནོ། །གང་ཞིག་སྡུག་བསྔལ་བརྗོད་པ་དེ་ནི་བདེ་བ་མིན། །
འདི་ཡི་རྒྱུ་གང་རབ་ཏུ་སྐྱེ་བོ་དེ་གཞན་མིན། །རྒྱུ་ནི་འགགས་པ་ལས་ནི་ངེས་པར་ཐར་པ་སྟེ། །གང་ཞིག་འདི་ཡི་ལམ་ནི་ཐབས་མ་ཡིན་པ་མིན། །དེ་ཕྱིར་བདག་ཉིད་ཆེན་པོ་བདེན་པ་བཞི་རྣམས་ལ། །དགེ་སློང་སྐྱེ་བོ་དེས་འདི་གཏམ་ཅི་ཡོད་མ་ཡིན། །སྟོན་པ་མྱ་ངན་འདའ་བརྙེད་པར་འགྱུར་
ཞེས་ཏེ། །གང་ཞིག་དོན་ནི་རྫོགས་པ་མ་ཡིན་སྡུག་བསྔལ་ཏེ། །གང་ཞིག་ཚོགས་པ་འདི་ནི་བརྟུལ་ཞུགས་གཞོན་ཉིད་ལས། །སྔོན་དུ་དོན་ནི་མཐོང་བར་གྱུར་པ་མ་ཡིན་པ། །དེ་ཡང་ཁྱེད་ཀྱི་གསུང་འདིས་ད་ནི་དེ་མ་ཐག །གློག་གི་འོད་ཀྱིས་ལམ་བཞིན་ཡང་དག་མཐོང་བར་གྱུར། །གང་
གི་དོན་གྱི་ལྷག་མ་ཡོད་པ་མ་ཡིན་ཞིང་། །གང་ཡང་སྲིད་པའི་མཚོ་ཡི་ཕ་རོལ་ཕྱིན་པ་སྟེ། །མགོན་པོ་ཤིན་ཏུ་སྐྱེན་པར་ངེས་པར་གཤེགས་ཐོས་ཏེ། །དེ་དག་གི་ཡང་སྙིང་ལ་བསམས་པར་གྱུར་པ་ཉིད། །དེ་ལྟར་འཕགས་པ་མ་འགགས་པ་ཡི་ཚིག་དེ་ཡིས། །དོན་ནི་རྣམ་པར་ཤེས་ཀྱང་
ཤེས་ནས་སླར་ཡང་ནི། །གུས་ལྡན་རྣམས་ཀྱི་བློ་གྲོས་བརྟན་པོ་མཛད་བཞེད་པ། །བྱམས་པས་སླར་ཡང་སངས་རྒྱས་ཀྱིས་ནི་བཀའ་སྩལ་ཏོ། །གང་ཕྱིར་སྐལ་བར་གནས་ཀྱང་དེ་ནི་ཉམས་པ་སྟེ། །ཕན་ཚུན་དུ་ནི་འདུ་བ་ངེས་པར་ཡོད་མ་ཡིན། །བདག་ཉིད་ཀྱི་དང་གཞན་གྱི་དོན་ནི་བྱས་ནས་
ནི། །ཁོ་བོ་གནས་པ་ལ་ནི་དགོས་པ་ཡོད་མ་ཡིན། །གང་རྣམས་མཁར་དང་ས་ན་བདག་གི་གདུལ་བྱ་རྣམས། །དེ་རྣམས་ཐར་པར་བྱས་ཤིང་རྒྱུན་ལ་བཅུག་པ་སྟེ། །འདི་ལས་གཞན་དུ་སློབ་མ་རིམ་དང་རིམ་རྣམས་ཀྱིས། །ང་ཡི་ཆོས་འདི་སྐྱེ་དགུ་རྣམས་ལ་གནས་པར་འགྱུར། །དེ་
ཕྱིར་འགྲོ་བའི་རང་བཞིན་རྣམ་པར་ཤེས་བྱས་ནས། །བསམ་མནོ་མ་བྱེད་ངེས་པར་རྣམ་པར་འབྲལ་བ་སྟེ། །རྣམ་པ་དེ་ལྟར་འགྲོ་བ་ཤེས་ནས་སུ། །ཇི་ལྟར་འདི་ལྟར་མ་ཡིན་དེ་ལྟར་གྱིས་མཛོད་ཅིག །ཡེ་ཤེས་སྒྲོན་མས་མུན་པ་རྣམ་པར་བསལ་བྱས་ནས། །སྲིད་པ་རྣམས་ལ་སྙིང་པོ་

172-1-93b

མེད་པར་མཐོང་ནས་སུ། །ཇི་ལྟར་ནད་ནི་ཉེ་བར་ཞི་བ་དེ་ལྟར་ནི། །ཚེ་ནི་རྣམ་པར་འགགས་ན་ཚིམ་པ་ཉིད་ཡིན་ནོ། །དོར་བར་བྱ་ཞིང་རྩོད་ལྡན་ལུས་ཞེས་བྱ་བ་ནི། །སིད་པའི་མཚོ་ཡི་རྒྱུན་ནི་རྣམ་པར་འགགས་པ་ན། །དོན་མེད་བྱེད་པའི་དགྲ་བོའི་རྣམ་པར་ཉམས་ལས་བཞིན། །ཚེ་ནི་ཉེ་བར་
ཞི་བས་ཚིམ་པ་མ་ཡིན་སུ། །རྒྱུ་དང་མི་རྒྱུ་ཐམས་ཅད་རྣམ་པར་འགོད་པ་སྟེ། །དེ་ཕྱིར་ཁྱེད་ཅག་རྣམས་ནི་ལེགས་པར་བག་ཡོད་གྱིས། །མྱ་ངན་འདའ་བའི་དུས་ནི་ཡོངས་སུ་གྱུར་པ་སྟེ། །ཁྱེད་ཅག་མ་སྨྲ་འདི་ནི་བདག་གི་ཕྱི་མའི་ཚིག །དེ་ནས་བསམ་གཏན་རིག་པ་རྣམས་ཀྱི་མཆོག་
གིས་ནི། །ཡུད་ཙམ་དེ་ལ་བསམ་གཏན་དང་པོ་ཐོབ་མཛད་ནས། །དེ་ལས་རྣམ་པར་བཞེངས་ནས་གཉིས་པར་གཤེགས་པ་སྟེ། །རིམ་གྱིས་མ་ཚང་མེད་པར་ཐམས་ཅད་ལ་གཤེགས་སོ། །དེ་ནས་རྗེས་སུ་རིམ་པས་རབ་ཏུ་བྱེད་པ་དགུ། །སྙོམས་པར་འཇུག་པའི་ཚོགས་ནི་མཐའ་དག་
བསམ་གཏན་མཛད། །དེ་ནས་དྲང་སྲོང་ཆེན་པོས་སླར་ཡང་རིམ་གྱིས་ནི། །བསམ་གཏན་དང་པོ་དེ་ཉིད་ལ་ནི་བབ་པའོ། །དེ་ལས་རྣམ་པར་བཞེངས་ནས་ཀྱང་ནི་རིམ་གྱིས་ནི། །བསམ་གཏན་བཞི་པ་ལ་ནི་སླར་ཡང་འཛེགས་པ་སྟེ། །བསམ་གཏན་བཞི་པའི་ཆོ་ག་ལས་དེ་རྣམས་
བཞེངས་ཤིང་། །མངོན་སུམ་ཉིད་དུ་ཉེ་བར་ཞི་བ་ལ་གཤེགས་སོ། །དེ་ནས་ཐུབ་པ་མྱ་ངན་འདའ་བར་གཤེགས་པ་ན། །ཆར་གྱིས་སྣུན་པའི་བ་ལང་བཞིན་དུ་ས་གཡོས་ཤིང་། །ཕྱོགས་ཀྱི་གླང་པོ་རྣམས་ཀྱིས་སྦྱངས་པ་བཞིན་དུ་ནི། །ནམ་མཁའ་ལས་ཀྱང་སྒྲོན་མ་རྣམས་ནི་ལྷུང་བར་གྱུར། །
ལྷ་ཡི་ནགས་ཚལ་སྣ་ཚོགས་ཤིང་རྟ་སྲེག་འདོད་པའི། །ནགས་ཀྱི་མེ་ནི་བར་སྣང་དག་ལ་བྱུང་བ་བཞིན། །བུད་ཤིང་མེད་ཅིང་རླུང་མེད་དུ་བ་མེད་པའི་མེ། །ཕྱོགས་ནི་སྲེག་པར་བྱེད་པ་བྱུང་བར་གྱུར་པ་ཉིད། །ལྷ་མིན་འཇོམས་པར་འདོད་པ་གཡུལ་དུ་འཇུག་པ་ན། །ཁྲོ་བ་བརྒྱ་བས་ཁྲོ་བ་
རྣམ་པར་གཏོང་བ་བཞིན། །དེ་བཞིན་མེ་སྟག་བརྒྱ་པའི་མེ་ནི་སྐྱུག་པ་ཡི། །དབང་པོའི་རྡོ་རྗེ་མི་བཟད་པ་རྣམས་ལྷུང་བར་གྱུར། །འཇིག་པའི་རླུང་རྣམས་དག་གིས་བཏགས་པ་རྣམས་ཀྱི་བཞིན། །འཛིན་པ་འཛིན་པ་རྣམས་ཀྱི་རྩེ་མོ་རྣམས་ལྷུང་ཞིང་། །འཁྲི་ཤིང་ཤིང་རྣམས་དག་ནི་

172-1-94a

ཟུག་རྔུ་བྱེད་པ་ཡི། །ཕྱག་དར་ཁུར་བའི་རླུང་ནི་དྲག་ཏུ་གཡོས་པར་གྱུར། །འདམ་གྱི་ཆུས་བསྒོས་སྡོང་དུ་གཞོན་ནུ་རྣམས་ཀྱིས་ནི། །ལུས་ནི་ཡོངས་སུ་དཀྲིས་པའི་ངང་པའི་རྒྱལ་པོ་བཞིན། །ཅུང་ཞིག་འོད་ཟེར་ཁ་དོག་ངན་པ་དེ་རྣམས་ཀྱིས། །འོད་ནི་བཅོམ་སྟེ་ཟླ་
བ་མངོན་པར་གསལ་བར་གྱུར། །སྤྲིན་དང་བྲལ་ཡང་མཁའ་ལ་ཟླ་བ་གནས་ན་ཡང་། །མུན་པ་མི་བཟད་རྣམས་ཀྱིས་ཕྱོགས་རྣམས་རྒྱས་པ་སྟེ། །ཡུད་ཙམ་དེ་ལ་མྱ་ངན་གྱིས་ནི་ཟིལ་ནོན་བཞིན། །ཆུ་བོ་རྣམས་ནི་དེ་མ་ཐག་ཏུ་ཆུ་དྲོན་འབབ། །དེ་ནས་ཉེ་སར་སྐྱེས་པའི་ཤ་ལའི་ཤིང་དག་གིས། །
རང་གིས་མེ་ཏོག་མཛེས་པ་འཇུག་པ་དུས་མིན་ལ། །རྣམ་པར་བཏུད་ནས་དྲང་སྲོང་ཆེན་པོའི་སྐུ་ལུས་ནི། །གསེར་གྱི་སྟེགས་བུའི་གཟུགས་བརྙན་ལ་ནི་ཡང་དག་གཏོར། །མཁའ་ལ་མགོ་བོ་ལྔ་རྣམས་མི་གཡོའི་ཀླུ་རྣམས་ནི། །མྱ་ངན་གྱིས་སླར་སོ་སོར་དམར་བའི་མིག་ཅན་རྣམས། །རབ་
ཏུ་གཉིད་ལོག་གདེངས་ཀ་སྟོད་པའི་ལུས་རྣམས་ཀྱིས། །ཐུབ་པ་ལ་ནི་གུས་པས་ལྟ་བཞིན་གནས་པར་གྱུར། །ནང་དུ་སོང་བའི་ཀུན་ནས་གདུང་བ་རྣམས། །དེ་རྣམས་ཤིན་ཏུ་དྲོན་པོའི་དབུགས་ནི་བརྒྱུས་པ་སྟེ། །འགྲོ་བའི་རང་བཞིན་མི་རྟག་པ་ནི་རྟོགས་ནས་སུ། །མྱ་ངན་འོངས་པ་མིན་རྣམས་
མྱ་ངན་སྨད་པར་གྱུར། །ངེས་པར་ལེགས་པའི་ཆོས་ཀྱིས་ཆོ་གར་རབ་ཞུགས་པ། །རྒྱལ་པོ་རྣམ་ཐོས་སྲས་ཀྱི་འདུས་པ་དམ་པ་དེ། །ཆོས་ལ་མངོན་པར་ཆགས་པས་མྱ་ངན་མ་བྱས་ཤིང་། །ལྷ་ཡི་རྟེན་ལ་མཆི་མ་ཕྱུང་བར་མ་གྱུར་ཏོ། །གཙང་མར་ལྷག་པར་གནས་པའི་བྱེད་ལྡན་ལྷ་རྣམས་
ཀྱང་། །དྲང་སྲོང་ཆེན་པོའི་ཡང་དག་ཤིན་ཏུ་གུས་ལྡན་རྣམས། །རང་གནས་གྱུར་ཞིང་རྣམ་པར་འགྱུར་བ་མ་སོང་སྟེ། །འཇིག་རྟེན་དག་ནི་རང་བཞིན་རྣམ་པར་སྨད་པའོ། །དྲི་ཟའི་རྒྱལ་པོ་རྣམས་དང་དེ་ནས་ཀླུ་ཡི་རྒྱལ་པོ་རྣམས། །གནོད་སྦྱིན་རྣམས་དང་དམ་ཆོས་ལ་དགའ་ལྷ་རྣམས་ནི། །མྱ་
ངན་བྱེད་ཅིང་མྱ་ངན་མཆོག་ལ་གཞོལ་རྣམས་ཀྱིས། །རིགས་ཆེན་པོ་ཡི་ཉམ་ཐག་བཞིན་དུ་ཁ་ལ་གྱུར། །ཡིད་ལ་རེ་བ་ཐོབ་པའི་བདུད་ཀྱི་སྡེ་རྣམས་ནི། །རབ་ཏུ་དགའ་བས་སྐད་ནི་འཐོན་ཞིང་དགོད་པ་སྟེ། །འཕྱོ་ཞིང་གླུ་དབྱངས་གར་བྱས་དགའ་བར་གྱུར་པ་རྣམས། །རྔ་བོ་ཆེ་དང་རྫ་རྔ་པ་ཊ་

172-1-94b

ཧ་རྣམས་བརྡུངས། །དེ་ནས་རྡོ་རྗེ་རྩེ་མོ་བཅོམ་པའི་རི་བོ་བཞིན། །ཆང་དང་བྲལ་བའི་གཉིས་འཐུང་དགའ་བ་མེད་པ་བཞིན། །ནོག་གིས་རྣམ་པར་དམན་པའི་དབྱིབས་ཅན་ཁྱུ་མཆོག་བཞིན། །ཐུབ་པའི་ཁྱུ་མཆོག་ནུབ་པ་ན་ནི་འཇིག་རྟེན་གྱུར། །ཉིན་མོར་བྱེད་པས་རབ་ཏུ་དམན་པའི་ནམ་མཁའ་
བཞིན། །བ་མོས་བསྲེགས་པའི་པདྨ་དང་ལྡན་རྫིང་བུ་བཞིན། །ནོར་དང་བྲལ་ཞིང་བྱ་བ་མེད་པའི་རིགས་བཞིན་དུ། །སྲིད་པ་ཉམས་མཛད་རབ་ཏུ་ཉམས་ལས་འགྲོ་བར་གྱུར། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། ཡོངས་སུ་མྱ་ངན་ལས་འདའ་བ་ཆེན་པོའི་ལེའུ་སྟེ་ཉི་
ཤུ་རྩ་དྲུག་པའོ།།      །།དེ་ནས་ངང་པ་སྟོང་དང་ལྡན་པའི་ལྷ་ཡི་ནི། །གཞལ་མེད་ཁང་ནས་གདོང་ནི་ཅུང་ཞིག་རབ་བཏུད་ནས། །ཡུད་ཙམ་ཐམས་ཅད་མཁྱེན་པ་ལ་ནི་བལྟས་ནས་སུ། །ལྷ་ན་གནས་པ་ཆེན་པོ་གཞན་ཞིག་གིས་སྨྲས་པའོ། །ཀྱེ་མ་འགྲོ་ན་དངོས་པོ་ཐམས་ཅད་
མི་རྟག་ཅིང་། །སྐྱེ་བའི་ཆོས་ཅན་དང་ནི་འཛད་པའི་ཆོས་ཅན་ལ། །སྐྱེ་བ་རྣམས་ནི་སྡུག་བསྔལ་སྐྱེད་པར་བྱེད་པ་སྟེ། །དེ་དག་རྣམས་ནི་ལྷག་མེད་ཞི་བས་ཞི་བ་ཉིད། །སྐྱེ་བའི་བུད་ཤིང་ཚད་མ་མིན་པ་བསྲེགས་མཛད་ནས། །ཡེ་ཤེས་མེ་ལྕེ་གྲགས་པས་རྣམ་ཁྱབ་དུ་བ་ཅན། །ཆུ་ཡིས་
མེ་བཞིན་དུ་ནི་དུས་ཀྱི་ཆུ་ཡིས་ནི། །དེ་བཞིན་གཤེགས་པའི་མེ་དེ་མྱ་ངན་འདའ་བར་བྱ། །དེ་ནས་མཆོག་གི་དྲང་སྲོང་དང་མཚུངས་དྲང་སྲོང་གཞན། །མཐོ་རིས་གནས་ཀྱང་འབྲས་བུ་རྣམས་ལ་མ་ཆགས་པས། །རབ་ཏུ་ཞི་བའི་དགྲ་བཅོམ་དྲང་སྲོང་མཐོང་ནས་སུ། །རི་དབང་བརྟན་པས་ཚིག་
ནི་རྣམ་པར་སྨྲས་པའོ། །འཇིག་རྟེན་དག་ན་འགའ་ཞིག་ཉམས་པར་མི་འགྲོ་མེད། །དེ་ལྟར་འགྲོ་བ་མེད་ཅིང་སོང་བ་མེད་པ་སྟེ། །མཆོག་དང་མཆོག་མིན་མཁྱེན་པ་མཆོག་གི་དོན་རིག་པ། །སྟོན་པ་མཚུངས་མེད་གང་དུ་རབ་ཏུ་ཞི་བར་གྱུར། །ཤེས་རབ་རྣམ་པར་དག་ཅིང་མཆོག་གི་སྤྱན་མངའ་
བ། །ཡོངས་སུ་འདྲེན་པ་པོ་ཉིད་འདི་ཡིས་དམན་པ་ནི། །རྨོངས་པ་ངེས་པར་མིག་ལོང་གསོན་པའི་འཇིག་རྟེན་ནི། །འདུ་ཤེས་ཉམས་ཤིང་ལམ་ངན་ལ་ནི་གནས་པར་འགྱུར། །དེ་ནས་འགྲོ་བའི་འགལ་བ་མ་ཡིན་མ་འགགས་པ། །རྗེས་སུ་ཆགས་པ་ཉམས་ཤིང་སྐྱེ་བ་འགགས་བྱས་

172-1-95a

པས། །འཇིག་རྟེན་སྣང་བས་དམན་པ་མཐོང་ནས་སུ། །ཐུབ་པ་ཞི་བ་ན་ནི་ཞི་བའི་ཡིད་ཀྱིས་སྨྲས། །ཤེས་རབ་ལྡན་པ་འདུ་བྱེད་ཆོ་ག་ལ་གནས་པ། །དུས་འདིར་ངེས་པར་བློ་གཏད་བྱ་བ་མ་ཡིན་ཞིང་། །མི་རྟག་ཉིད་ཀྱི་རྡོ་རྗེ་ངེས་པར་བཏུང་བ་ཡིས། །གང་དུ་ཐུབ་
པ་རི་བོ་ཆེན་པོ་བཅོམ་པར་འགྱུར། །སྙིང་པོ་མེད་ཅིང་ང་མེད་རྣམ་པར་ཉམས་པའི་ཆོས། །འཇིག་རྟེན་གསོན་པའི་འཇིག་རྟེན་ཀྱེ་མ་སྨོད་པར་ཤོག །གང་དུ་ཐུབ་དཀའ་དྲང་སྲོང་ཆེན་པོ་སེང་གེ་ཡང་། །ཉེས་པའི་གཉིས་འཐུང་རྣམས་ནི་ཉམས་པར་མཛད་ནས་ཉམས། །འདོད་ཆགས་བྲལ་བ་
མིན་པའི་འགྲོ་བ་འཇུག་པ་ལ། །ད་ནི་འཇིགས་པ་ཆེན་པོ་མ་ཡིན་སུ་ཡི་ལགས། །ཐུན་མོང་ལས་ནི་གང་དུ་དེ་བཞིན་གཤེགས་པ་ཡང་། །གསེར་གྱི་ཀ་བ་ལྟ་བུ་ཀུན་ནས་ཆག་པར་གྱུར། །ས་བོན་དྲུག་དང་མྱུ་གུ་གཅིག་དང་ལོ་མ་གཅིག །རྩ་བ་དྲུག་དང་འབྲས་བུ་ལྔ་དང་ཡལ་ག་གཉིས། །
ཕུང་པོ་གསུམ་དང་བདག་ཉིད་གཅིག་ལ་ཉོན་མོངས་ཀྱི། །སྡོང་པོ་འདི་ནི་བཅག་ནས་ཐུབ་པ་གཉིས་འཐུང་གཟིམས། །འགྲོ་རྒྱལ་མདའ་བཞིན་དགྲ་བོ་རྣམས་ནི་བཅོམ་ནས་སུ། །ཆུ་མེད་པ་ན་རྨ་བྱ་བཞིན་དུ་ཆགས་བྲལ་ཞིང་། །མགྱོགས་འགྲོ་རྟ་བཞིན་དུ་ནི་རྣམ་རྒྱལ་ལམ་སོང་བ། །མེ་བཞིན་
ཐུབ་པ་སྐྱེ་བ་མེད་ཅིང་ཞི་བར་གྱུར། །མཐོ་རིས་དབང་ཕྱུག་རྡོ་རྗེ་འཛིན་པ་མིག་འཕེལ་ན། །རབ་ཏུ་ཚིམ་བྱེད་རྒྱུན་བཞིན་གསུང་རྣམས་བཏང་ནས་སུ། །འོད་ཀྱིས་ཉམ་ཐག་བ་ལང་བཞིན་སར་རྣམ་བརྒྱུས་ནས། །གྲགས་པས་ཕྱོགས་ནི་མངོན་པར་བཀང་ནས་བླ་མ་གཟིམས། །སྙན་གྲགས་
ལྡན་པ་ཉིད་དང་འོད་ཟེར་ལྡན་པ་སྟེ། །ཆུ་བོ་སིན་དྷུ་བཞིན་དུ་གསེར་སྐྱུག་ཤུགས་ལྡན་པ། །རྣམ་ཐོས་བུ་ཡི་རྫུ་འཕྲུལ་མི་སྐྱོང་སྡེར་བཅས་པ། །ལམ་ལ་བཅུག་ནས་མི་ཡི་ཉི་མ་ནུབ་པར་གྱུར། །རྨུག་པའི་དོ་ཤལ་གྱི་ནི་ཕྱོགས་རྣམས་དཀྲིས་པ་བཞིན། །རྒྱ་ཆེན་སྤྲིན་རྣམས་ཀྱིས་དཀྲིས་ཉི་མའི་འོད་རྣམས་
བཞིན། །མཆོད་སྦྱིན་རྫོགས་ཚེ་མར་གྱིས་སྨན་པའི་མེ་བཞིན་དུ། །ཐུབ་པ་ཞི་ཚེ་དེ་རིང་འཇིག་རྟེན་གསལ་མ་གྱུར། །མདུད་པ་མེད་པ་བདེན་པའི་ལམ་ནི་བསྙེན་ནས་སུ། །མདུད་པ་མེད་པ་ཞི་བའི་ཆོས་འདི་བརྙེས་ནས་ནི། །རྫུ་འཕྲུལ་གྱིས་ནི་སྐུ་ལུས་འདྲེན་པར་ནུས་ན་ཡང་། །སྡུག་བསྔལ་

172-1-95b

དག་གི་གཏེར་ནི་ལུས་ཡིན་ཞེས་སྤངས་སོ། །མུན་པ་མུན་པ་ཉི་མས་བཞིན་དུ་ཟིལ་མནན་ནས། །རྡུལ་ནི་རྡུལ་ནི་ཆར་པ་བཞིན་དུ་མངོན་བཅོམ་ནས། །སླར་ཡང་སླར་ཡང་སྡུག་བསྔལ་འཁྲུལ་འཁོར་མི་ལེན་ཏེ། །ཐུབ་པ་ཐུབ་པ་སྐར་རྒྱལ་བཞིན་དུ་མངོན་པར་གཤེགས། །གང་ཞིག་སྐྱེ་བའི་
སྡུག་བསྔལ་འཇོམས་ཕྱིར་སྐྱེས་པ་སྟེ། །གང་ལ་འཇིག་རྟེན་པས་ནི་ཞི་བའི་ཆེད་དུ་བསྙེན། །གང་ཞིག་འོད་ཟེར་མཆོག་གིས་རྣམ་པར་གསལ་བ་དང་། །ཁྱད་པར་འཕགས་པའི་བློ་ཡིས་རྣམ་པར་གསལ་བར་གྱུར། །གང་གིས་སྐྱེ་དགུ་རྣམས་ནི་དགེ་ལེགས་ལ་བཅུག་སྟེ། །ཡོན་ཏན་རྒྱ་ཆེན་རྣམས་ཀྱིས་ས་
ལ་རྒྱས་པ་ཉིད། །འདོད་པའི་སྙན་གྲགས་གསལ་བ་རྣམས་ཀྱིས་འཕེལ་བ་སྟེ། །ཁྱིམ་ན་གནས་པ་ཡིན་ཀྱང་གྲགས་པས་འཕེལ་བ་ཉིད། །གང་གིས་མཁྱེན་ཞིང་སྨོད་པས་འོ་དོད་མ་བོས་ཤིང་། །མི་ནི་ཉམ་ཐག་རྣམས་ལ་བརྩེ་བས་བོས་པ་སྟེ། །བཟའ་བ་ངན་པ་རབ་ཏུ་འཇོམས་ཤིང་མ་གསོལ་ལ། །བཟའ་
བ་ལེགས་པ་རྗེས་སུ་འགྲོ་ཞིང་མ་གསོལ་ཏོ། །མི་གནས་དབང་པོ་ཞི་བ་གང་ཞིག་ཡུལ་རྣམས་ལ། །སྟོབས་རབ་དབང་པོ་ཉིད་ལས་ཡང་དག་མི་གནས་ཤིང་། །གཞན་རྣམས་ཀྱིས་མ་ཐོབ་པའི་ལམ་བཟངས་ཐོབ་པ་སྟེ། །རོ་མཁྱེན་པས་ནི་ངེས་པར་འབྱུང་བའི་རོ་གསོལ་ཏོ། །
གང་གིས་སྔར་མ་བྱིན་པའི་སྦྱིན་པ་བྱིན་པ་སྟེ། །འབྲས་བུ་འདོད་པས་ཅུང་ཟད་ཞིག་ནི་མི་བྱིན་ལ། །མཉམ་ཉིད་རྗེས་མཐུན་ཕུན་སུམ་ཚོགས་པ་དོར་བ་སྟེ། །དམ་པ་རྣམས་ཀྱི་ཡིད་རྣམས་ཡོན་ཏན་རྣམས་ཀྱིས་ཕྲོགས། །བརྟན་པ་རྣམས་ཀྱི་གཡོ་བའི་སྤྱན་ནི་བསྲུངས་པ་སྟེ། །
བརྟན་པར་གཤེགས་ཤིང་སེམས་ནི་བསྲུང་དུ་བཅུག་གྱུར་ལ། །དགེ་ལེགས་རྣམས་ནི་བསྲུངས་ཤིང་འཕེལ་བར་མཛད་པ་སྟེ། །ཆོས་སྐྱེས་པ་ནི་ཅུང་ཞིག་འདོད་པར་མ་མཛད་དོ། །བརྟན་པས་མི་དགེ་བ་ལས་མི་དགེ་རྣམ་སྤངས་ནས། །དགེ་ལེགས་ཀྱི་ནི་དགྲ་བོ་སྐྱོན་རྣམས་སྤངས་པ་
སྟེ། །གང་ཞིག་བློ་ཡིས་ཉེས་པ་རྣམས་ནི་ཀུན་སྤངས་ལ། །དེ་ནི་འཕགས་མིན་མི་རྟག་ཉིད་ཀྱིས་ནུབ་པར་གྱུར། །གང་ལ་ཆོས་ནི་འདོད་པ་ཡང་དག་རྗེས་སོང་ཞིང་། །དགའ་བས་མཆོག་ཏུ་ངེས་པ་རྣམ་པར་བཟུང་བ་སྟེ། །མེ་ཡིས་ནོར་ནི་ཟོས་པ་ཇི་ལྟ་བ་བཞིན་དུ། །ཁྱབ་བདག་ཡེ་

172-1-96a

ཤེས་ནོར་ཅན་དེ་ཡང་སྲོག་སོང་ངོ་། །བརྒྱད་པོ་རྣམས་ལ་མཆོག་ཏུ་སྡེ་ཚེན་ལྔ་ཐུལ་ཞིང་། །གསུམ་གཟིགས་སྤྱོད་པ་གསུམ་ནི་ཟད་བྱེད་སྤྱན་གསུམ་པ། །གཅིག་ནི་བསྲུངས་ནས་གཅིག་ནི་ཐོབ་ནས་གཅིག་རྟོགས་ནས། །ལྕི་བ་བདུན་རྣམས་སྤངས་ནས་
བླ་མ་གཟིམས་པར་གྱུར། །གང་གི་ཞི་བའི་ཆེད་དུ་ལམ་ནི་གསལ་མཛད་དེ། །ལེགས་པའི་སྐྱེ་བོ་ཞི་བས་རབ་ཏུ་དང་མཛད་ཅིང་། །ཉོན་མོངས་ལྗོན་ཤིང་རབ་ཏུ་ཆགས་པ་བཅད་པ་སྟེ། །སྲིད་པ་རྣམས་ལས་གུས་པ་ལྡན་པ་རྣམས་བསྒྲལ་ཏོ། །གསུང་གི་བདུད་རྩིས་འཇིག་རྟེན་ཤིན་ཏུ་ཚིམ་
མཛད་ཅིང་། །བཟོད་པ་ཡིས་ནི་ཁྲོ་བ་ཡོངས་སུ་བཟུང་བ་སྟེ། །སློབ་མའི་སྡེ་ནི་དགེ་ལེགས་ལ་ནི་རོལ་མཛད་ལ། །དགེ་ལེགས་དོན་དུ་གཉེར་རྣམས་ཕྲ་མོ་རྟོགས་སུ་བཅུག །ལེགས་པ་རྣམས་ལ་ཆོས་ཀྱི་ས་བོན་སྐྱེད་མཛད་ཅིང་། །རྒྱུ་ཡི་བདག་ཉིད་འཕགས་པའི་ལམ་ནི་ཐོབ་མཛད་ལ། །
འཇིག་རྟེན་འདས་པས་འཕགས་པ་མིན་པ་མ་བརྟེན་ཞིང་། །ཆོས་ལས་མ་གཏོགས་གཞན་ལ་སྦྱར་བ་མ་ཡིན་ནོ། །ཀཱ་ཤི་གནས་སུ་ཆོས་ཀྱི་འཁོར་ལོ་བསྐོར་བ་སྟེ། །བློ་དང་ལྡན་པ་ཉིད་ཀྱིས་འཇིག་རྟེན་ཚིམ་མཛད་ཅིང་། །གདུལ་བྱ་རྣམས་ནི་ཆོས་ཀྱི་ཆོ་གར་སྤྱད་མཛད་ལ། །བདག་ཅག་
རྣམས་ལ་ཕན་པའི་ཆེད་དུ་དགེ་བར་མཛད། །གཞན་རྣམས་ཀྱིས་མ་མཐོང་བའི་དེ་ཉིད་མཐོང་མཛད་ཅིང་། །ཡོན་ཏན་རྣམས་ཀྱིས་ཆོས་བྱེད་རྣམས་ལ་སྦྱར་བ་སྟེ། །གཞན་གྱི་ལུགས་རྣམས་ཚར་བཅད་ནས་ནི་སྐུལ་གྱུར་ལ། །རྟོགས་པར་དཀའ་བའི་དོན་ནི་རྣམ་པར་ཤེས་པར་མཛད། །
ཐམས་ཅད་མི་རྟག་པ་དང་བདག་མེད་པར་གསུངས་ཤིང་། །སྲིད་པ་རྣམས་སུ་བདེ་བ་ཅུང་ཟད་མ་བསྲུངས་ལ། །སྙན་པའི་བ་དན་གྱེན་དུ་རྣམ་པར་བསྒྲེངས་པ་སྟེ། །ང་རྒྱལ་ཀ་བ་མཐོན་པོ་རྣམ་པར་བསྒྱེལ་བ་མཛད། །སྨད་ཀྱང་རང་གི་ཐུགས་ནི་བསྐྱོད་པ་མ་ཡིན་ཞིང་། །ཐམས་ཅད་
ལ་ནི་འཇུག་པ་རྣམས་ལ་སྲེད་མ་མཛད། །རང་ཉིད་རྒལ་ཞིང་བྱིང་བ་བསྒྲལ་བར་མཛད་པ་སྟེ། །ཞི་ཞིང་ཕ་རོལ་འཁྲུལ་པ་ཞི་བར་མཛད་གྱུར་ལ། །གྲོལ་ཞིང་ཕ་རོལ་བཅིངས་པ་གྲོལ་བར་མཛད་པ་སྟེ། །རྟོགས་ཤིང་ཕ་རོལ་རྨོངས་པས་རྟོགས་པར་མཛད་པའོ། །ཐུབ་པ་ཐུབ་པས་ཚུལ་དང་

172-1-96b

ཚུལ་མིན་མཁྱེན་འདི་དེས། །སེམས་ཅན་རྣམས་ནི་ཡང་དག་གཏམ་གྱིས་རྗེས་བཟུང་ནས། །ཚུལ་མིན་ལ་དགའ་ཚུལ་མིན་འབྱུང་པོ་རྣམས་ལ་ནི། །བསྐལ་པ་འཇིག་པའི་ཚེ་ན་ཆོས་བཞིན་རབ་ཏུ་གཟིམས། །ཆུ་ལྡན་སྤྲིན་བཞིན་ས་འཛིན་རི་བོ་ནགས་ཚལ་བཞིན། །འོད་ལྡན་རྒན་པོ་
བཞིན་དུ་འོད་ལྡན་གཞོན་ནུ་བཞིན། །འཇིག་རྟེན་དག་གི་ལྟ་བྱེད་བཅོམ་ནས་འཇིག་རྟེན་གྱི། །ལྟ་བྱེད་ཉེ་བར་ཕྲོགས་ནས་འགྲོས་སུ་འདི་གཤེགས་སོ། །དབང་ཕྱུག་དམ་པ་གང་ལ་ལྟུང་བས་མེ་རེག་ཅིང་། །གང་གིས་མཆོག་ཏུ་ཞི་བའི་ལམ་ནི་བརྙེས་པ་སྟེ། །ཞི་བ་བརྙེས་པ་དེ་ནི་གུས་
པས་མཐོང་ནས་སུ། །དེ་རིང་འཇིག་རྟེན་གཉེན་འདུན་མེད་ཅིང་རྒུད་པ་འདྲ། །འཇོམས་པར་འདོད་ཅིང་སྟོབས་ནི་རབ་ཞུགས་བདུད་ཀྱང་ནི། །སྡེ་དང་བཅས་པས་གང་ནི་ཐུབ་པར་མ་ནུས་པ། །འཇོམས་པར་འདོད་ཅིང་སྟོབས་ཞུགས་བདུད་ཀྱིས་དེ་རིང་ནི། །དེ་ནི་དུས་ཀྱི་སྦྱོར་ལས་འཇོམས་
པར་ནུས་པར་གྱུར། །འབྱུང་པོ་རྣམས་ནི་ཐམས་ཅད་རྣམས་ནི་འདུས་པ་རྣམས། །སྡུག་བསྔལ་རྣམས་ཀྱིས་ཟིལ་ནོན་ལྷ་དང་བཅས་པ་རྣམས། །འཁོར་བའི་འཇིགས་པ་གང་རྣམས་ཟད་པ་མ་ཡིན་ཞིང་། །དེ་ལྟར་མཆོག་ཏུ་མྱ་ངན་འདས་པ་ཐོབ་མ་ཡིན། །སྐྱེ་དགུ་རྣམས་ཀྱི་སྣང་མཛད་
གང་གིས་འཇིག་རྟེན་ནི། །ཉེ་བར་སྐྱེ་བ་མེ་ལོང་བཞིན་དུ་གཟིགས་པ་སྟེ། །རྒྱང་རིང་དུ་འམ་ཉེ་བར་མཐོ་རིས་སུ་འམ་མཐར། །ལྷ་ཡི་རྣ་བས་སྒྲ་ནི་རྣམ་པར་ཐོས་པའོ། །བར་སྣང་དག་ལ་སྐར་མའི་ཁང་པར་འཛེགས་པ་སྟེ། །ས་ལ་རབ་ཏུ་ཞུགས་ཀྱང་ཐེག་པ་མ་ཡིན་ཞིང་། །ཆུ་ལ་རབ་
ཏུ་གཤེགས་ཀྱང་ནུབ་པ་མ་ཡིན་ལ། །སྐུ་ཡིས་རྣམ་པར་འགྱུར་བ་མང་པོ་རྣམས་མཛད་དོ། །དེ་རྣམས་དེ་རྣམས་གནས་རྣམས་ལམ་འགྲོས་ལམ་ན་བཞིན། །གང་གིས་སྐྱེ་བ་དུ་མ་རྣམས་ཀྱང་དྲན་པ་སྟེ། །ཡིད་ཀྱིས་ཕ་རོལ་རྣམས་ཀྱི་ཡིད་ཀྱི་སྤྱོད་པ་རྣམས། །དབང་པོ་ལས་འདས་སྣ་
ཚོགས་རྣམས་ཀྱང་མཁྱེན་པའོ། །ཐམས་ཅད་མཉམ་པར་རབ་ཞུགས་ཐམས་ཅད་མཁྱེན་པ་དེས། །ཟག་པ་ཐམས་ཅད་བཅད་ཅིང་བྱ་བ་ཐམས་ཅད་མཛད། །ཡེ་ཤེས་ཀྱིས་ནི་ཉོན་མོངས་ཐམས་ཅད་རྣམ་སྤངས་ནས། །ཡེ་ཤེས་དེ་ཉིད་ཀུན་ནས་བརྙེས་ནས་གཟིམས་པར་གྱུར། །སྐྱེས་བུ་

172-1-97a

རྣམས་ཀྱི་རྣོ་བའི་སེམས་རྣམས་བཏུལ་བ་སྟེ། །རྣོ་བ་མ་ཡིན་བློ་རྣམས་རིམ་གྱིས་དྲག་པར་མཛད། །རིགས་ལས་ཆོས་ཀྱི་ཉེས་པ་སྤང་བར་མཛད་པ་སྟེ། །འཆི་མེད་ཆེད་དུ་ཆོས་ནི་སུ་ཡིས་སྟོན་པར་འགྱུར། །རྟེན་དང་བྲལ་བའི་འཇིག་རྟེན་ཉམ་ཐག་པ་ལ་
ནི། །ཞི་བའི་ཆེད་དུ་ཆོས་ཀྱི་འཐོར་མ་སུ་ཡིས་སྟེར། །ཐུགས་རྗེའི་བདག་ཉིད་ལྡན་ལ་རང་གི་དོན་མཛད་ནས། །གཞན་གྱི་ཉོན་མོངས་དྲ་བ་སུ་ཡིས་འབྱེད་པར་འགྱུར། །འཁོར་བའི་རྒྱ་མཚོར་གཞོལ་བའི་འཇིག་རྟེན་དག་གི་ནི། །ཞི་བའི་ཆེད་དུ་ཡེ་ཤེས་དམ་པ་སུ་ཡིས་སྨྲ། །ཤེས་
པ་མེད་པར་གཞོལ་བའི་འཇིག་རྟེན་དག་གི་ནི། །དགེ་བའི་ཆེད་དུ་ཡེ་ཤེས་དམ་པ་སུ་ཡིས་སྨྲ། །ཇི་ལྟར་ཉིན་མོར་བྱེད་པ་འོད་ཟེར་མེད་པ་དང་། །ཇི་ལྟར་ཆུ་བོ་སིན་དྷུ་འབབ་པ་མེད་པ་དང་། །ས་བདག་རྒྱལ་སྲིད་དང་ནི་རྣམ་པར་བྲལ་བའམ། །དེ་ཕྱིར་འཇིག་རྟེན་འཇིག་རྟེན་མཁྱེན་
པས་རྣམ་པར་དམན། །བློ་ཡིས་རིག་པ་བཞིན་དུ་བདེ་བས་དབྱངས་བཞིན་དུ། །དཔལ་གྱིས་མི་སྐྱོང་བཞིན་དུ་བཟོད་པས་ཆོས་བཞིན་དུ། །དེ་བཞིན་སྐྱེས་བུ་མཆོག་གིས་རྣམ་པར་དམན་པ་ནི། །འགྲོ་བ་དེ་ནི་ཡོད་པ་དང་ནི་མེད་པ་ཉིད། །ཇི་ལྟར་ཁ་ལོ་སྒྱུར་བས་ཤིང་རྟ་དོར་བ་
དང་། །སྐྱ་བ་འཛིན་པས་གྲུ་དང་ཚུལ་གྱིས་སྡེ་དང་ནི། །ཚོང་དཔོན་གྱིས་ནི་ཚོང་པ་སྨན་པས་ནད་པ་སྟེ། །དེ་བཞིན་འཇིག་རྟེན་བདེ་བར་གཤེགས་པས་རྣམ་པར་སྨན། །དབྱར་ཐ་དང་ནི་སྟོན་རར་མཁའ་ལ་སྤྲིན་མེད་ན། །རླུང་གིས་ཀྱང་ནི་མཁའ་ལ་བསྙེན་པ་མེད་པ་ན། །འཚོ་བར་
འདོད་པ་རྣམས་ཀྱི་སྡུག་བསྔལ་ཇི་ལྟ་བ། །དེ་ལྟར་ཐར་འདོད་རྣམས་ཀྱི་ང་ནི་ཉམ་ཐག་འདི། །དེ་ལྟར་དམ་པའི་དོན་མཛད་དགྲ་བཅོམ་ཡིན་ན་ཡང་། །བྱེད་པ་ཤེས་པ་ཉིད་ཀྱིས་བླ་མ་ལ་ཞུགས་པ། །དེ་ནི་ཆགས་བྲལ་ཡིན་ཀྱང་སྲིད་པའི་སྐྱོན་རྣམས་དང་། །སྟོན་པའི་ཡོན་ཏན་རྣམས་
ནི་མང་པོ་རྣམས་སྨྲས་སོ། །དེ་ནས་ཆགས་བྲལ་མིན་རྣམས་མཆི་མ་འཐོན་པ་སྟེ། །བརྟན་པ་བཏང་ནས་དགེ་སློང་ཚོགས་ནི་མྱ་ངན་དང་། །འཇིག་རྟེན་འགོད་པའི་བདག་ཉིད་ཅན་ཞེས་བྱར་བཟུང་ནས། །བྱ་བའི་འཁོར་ལོ་རྣམས་ནི་བརྟན་ལས་མ་གཡོས་སོ། །དེ་ནས་དུས་ཀྱི་དབང་གིས་

172-1-97b

གྱད་རྣམས་ཀྱིས་ཐོས་ནས། །གུས་པའི་དབང་གིས་སྐྱེན་པར་འཐོན་ཞིང་སོང་བ་སྟེ། །ཁྲ་ཡི་སྟོབས་ཀྱིས་ལ་མནན་ཁྲུང་ཁྲུང་རྣམས་བཞིན་དུ། །ཀྱི་ཧུད་འོ་བརྒྱལ་ཞེས་ནི་ཉམ་ཐག་འཐོན་པའོ། །མུན་པ་རབ་ཏུ་རྒྱས་ཕྱིར་ཐུབ་པ་རབ་གཟིམས་པ། །ཉི་མ་འོད་མེད་བཞིན་དུ་དེ་
རྣམས་ཀྱིས་མཐོང་ནས། །སེང་གེས་ཁྱུ་མཆོག་རྨུགས་ཚ་བ་ལང་རྣམས་བཞིན་དུ་། །གུས་པས་དྲག་ཏུ་ཆོ་ངེས་བཏབ་ཅིང་ངུས་པའོ། །ཆོས་དགའ་ཆོས་ཀྱི་བླ་མ་རབ་ཏུ་ཞི་བ་ན། །གུས་པས་ཇི་ལྟ་བ་དང་བསམ་པ་ཇི་ལྟ་བར། །འོ་དོད་འབོད་ཅིང་མཆི་མས་མིག་བཅོམ་དེ་
རྣམས་ཀྱི། །དཔལ་ལྡན་དམ་པ་འགའ་ཞིག་འདི་ནི་སྨྲས་པའོ། །གང་ཞིག་གསོན་པའི་འཇིག་རྟེན་གཉིད་ཚེ་རབ་སད་པ། །འདི་དེ་མཐར་ཐུག་གཟིམས་མལ་ལ་ནི་གཟིམས་པ་སྟེ། །ཆོས་ནི་རྣམ་པར་འཛིན་པའི་རྒྱལ་མཚན་འདི་དེ་ནི། །མཆོད་སྦྱིན་མཐའ་ན་དབང་པོའི་རྒྱལ་
མཚན་བཞིན་དུ་བཏུལ། །དེ་བཞིན་གཤེགས་པའི་ཉི་མ་ངེས་པར་བློ་གསལ་ཞིང་། །བརྩོན་འགྲུས་ཚད་གདུང་ཡེ་ཤེས་འོད་ཟེར་སྟོང་ལྡན་པ། །ནུབ་པར་གྱུར་ཚེ་མི་ཤེས་མུན་པ་རྣམས་བཅོམ་ནས། །འཇིག་རྟེན་དག་ན་སླར་ཡང་མུན་པ་འདི་མཛད་དོ། །འདས་དང་མ་འོངས་
པ་དང་ད་ལྟར་གཟིགས་ནས་སུ། །ད་ནི་ངེས་པར་འཇིག་རྟེན་མིག་ནི་སྒྲིབ་པ་སྟེ། །སྡུག་བསྔལ་རྒྱ་མཚོ་ཆེན་པོ་རྒོད་པའི་དབའ་རླབས་ལས། །འདྲེན་མཛད་ཟམ་པ་འདི་ནི་ངེས་པར་དེ་ནི་རྒུད། །དེ་ལྟར་འདི་ན་ཁ་ཅིག་སྙིང་རྗེ་བར་ཟློས་ཤིང་། །གཞན་རྣམས་ཤིང་རྟའི་རྟ་རྣམས་དུད་
པ་བཞིན་དུ་སེམས། །གཞན་རྣམས་སྐད་བཏོན་གཞན་རྣམས་ས་ལ་འགྱེལ་བ་སྟེ། །བྱ་བ་དེ་རྣམས་དེ་རྣམས་སེམས་ཅན་དབང་གིས་བྱས། །དེ་ནས་དུས་སུ་གསེར་གྱིས་སྤྲས་ཤིང་སྣ་ཚོགས་པ། །མཆེ་བ་རིན་ཐང་ཆེན་པོ་ལོངས་མ་སྤྱད་པའི་ཁྱོགས། །གྱད་རྣམས་ངུ་བཞིན་
དྲང་སྲོང་ལ་ནི་གླང་ཆེན་གྱི། །ལག་པ་དང་མཚུངས་ལག་པ་རྣམས་ནི་བཙུགས་པའོ། །དེ་ནས་དུས་དང་མཐུན་པའི་ཆོ་ག་བྱས་ནས་སུ། །དེ་ལ་ཕྲེང་བ་ཡིད་འོང་རྣམ་པ་སྣ་ཚོགས་དང་། །དྲི་མཆོག་དམ་པ་རྣམས་ཀྱིས་དེ་རྣམས་ཀྱིས་མཆོད་ཅིང་། །དེ་ནས་དགའ་དང་གུས་པས་

172-1-98a

མཐའ་དག་བཟུང་བའོ། །དེ་ནས་ཤིང་གཞོན་ལུས་ཅན་གཞོན་ནུ་མ་རྣམས་ཀྱིས། །གདུ་བུ་རབ་འཁྲོལ་ཟངས་མདོག་ལག་པ་རྣམས་ཀྱིས་ནི། །གློག་གི་འཕན་རྣམས་དག་གིས་སྤྲིན་ནི་དཀར་པོ་བཞིན། །འདི་ལ་རིན་ཐང་མཆོག་གི་བླ་རེ་བཟུང་བའོ། །དེ་བཞིན་
མི་རྣམས་ཁ་ཅིག་དག་གིས་གདུགས་རྣམས་ནི། །ཕྲེང་བ་དཀར་པོ་ལྡན་རྣམས་ཀུན་ནས་བཟུང་བ་སྟེ། །ཁ་ཅིག་དག་གིས་གསེར་གྱི་ཡོ་བྱད་དང་ལྡན་པའི། །རྔ་ཡབ་དཀར་པོ་རྣམས་ནི་རྣམ་པར་གཡབས་པའོ། །དེ་ནས་ཁྱུ་མཆོག་རྣམས་ཀྱིས་བཞིན་དུ་ངལ་བ་ཡིས། །མིག་
དམར་གྱད་རྣམས་དག་གིས་ཁྱོགས་ནི་བཟུང་བ་སྟེ། །སིལ་སྙན་རྣམས་ནི་རྣ་བའི་ཡིད་དུ་འོང་བ་རྣམས། །དབྱར་དུས་ཆུ་གཏེར་བཞིན་དུ་མཁའ་ལ་རབ་ཏུ་གྲགས། །ཕྱོགས་ཀྱི་གླང་པོའི་དབང་པོ་རྣམས་ཀྱི་བསྐུལ་བ་ཡིས། །མཛེས་པ་དང་ནི་རྩུབ་འགྱུར་ཤིང་རྣམས་ལས་བཞིན་དུ། །མེ་ཏོག་
པདྨ་ལ་སོགས་དེ་རྣམས་དེ་རྣམས་ནི། །ལྷ་ཡི་མེ་ཏོག་རྣམས་ནི་ལྷ་ནས་ལྷུང་བར་གྱུར། །དབང་པོའི་གླང་པོ་ལས་སྐྱེས་གླང་པོ་ཆེ་རྣམས་ཀྱིས། །ནོར་གནས་སྙིང་པོའི་ཆུ་སྐྱེས་པདྨ་རྣམས་དང་ནི། །མན་དཱ་ར་ཡི་མེ་ཏོག་འདབ་བཅས་ཆགས་པ་རྣམས། །ཆུ་ཐིགས་ཟེར་མས་འཐོར་
བ་རྣམས་ཀྱིས་མངོན་པར་འཐོར། །དེ་ནས་དགའ་བའི་ཚལ་སྐྱེས་ལུས་མཆོག་ལྡན་པ་ཡི། །ཙནྡན་དམར་པོའི་རོ་ནི་རྣམ་པར་དུལ་བ་དང་། །འབད་པས་མ་བསྒྲུབས་བགོ་བ་རྣམས་ནི་དཀར་པོ་རྣམས། །དྲི་ཟའི་བུ་མོ་རྣམས་ཀྱིས་ཡང་དག་འཐོར་བའོ། །རབ་ཏུ་གཡོ་བའི་བ་དན་རྣམས་ནི་
བཟུང་བ་སྟེ། །ཕྲེང་བ་རྣམ་པ་སྣ་ཚོགས་རྣམས་ཀྱིས་བཀྲམ་པ་སྟེ། །སིལ་སྙན་རྒྱ་ཆེན་རྣམས་ཀྱིས་རྗེས་སུ་འགྲོ་བ་སྟེ། །ཞི་བའི་ཆེད་དུ་ཞི་བའི་ལམ་ལས་ཁྱོགས་ཏེ་དྲངས། །གུས་པ་དང་ལྡན་གྱད་རྣམས་ཀྱིས་དེ་ཡོངས་བཟུང་ནས། །ཐུབ་པའི་མཐུ་ལས་ལན་བརྒྱར་མངོན་
པར་ཕྱག་འཚལ་ཞིང་། །དེ་ཡི་རྣམ་པར་ཉམས་ལས་ཀུན་ནས་ངུ་བ་སྟེ། །གྲོང་ཁྱེར་གྱི་ནི་དབུས་ནས་ཡོངས་སུ་དྲངས་པའོ། །ཀླུ་ཡི་སྒོ་ནས་ཞུགས་ཏེ་ཕྱི་རོལ་བྱུང་ནས་ནི། །ཆུ་བོ་གསེར་ལྡན་ཞེས་པ་ཡང་དག་རྒལ་ནས་སུ། །ཅོད་པན་ཞེས་བྱའི་མཆོད་རྟེན་གྱི་ནི་རྩ་བ་རུ། །གྲགས་

172-1-98b

པས་བསགས་ཕྱིར་བསགས་པ་དེ་རྣམས་ཀྱིས་བྱས་སོ། །དེ་ནས་ཤུན་པ་འདབ་མ་དྲི་བཟངས་ཨ་ཀ་རུ། །ཙནྡན་ཨེ་ལ་ཀླུ་རྣམས་ཀྱིས་བསགས་བསགས་པ་རུ། །མྱ་ངན་ལས་ནི་སྦྲུལ་བཞིན་དབུགས་རྒྱུ་དེ་རྣམས་ནི། །བརྟན་མིན་མིག་ཅན་རྣམས་ཀྱིས་ཐུབ་པའི་སྐུ་བཞུས་སོ། །
དེ་ནས་ལན་གསུམ་བཀོད་ཀྱང་མེ་ཡི་སྒྲོན་མ་ཡིས། །དེ་ཚེ་དྲང་སྲོང་ཆེན་པོའི་བསགས་པ་མ་འབར་ཏེ། །བག་མེད་ལྡན་པ་གཞུ་ནི་རྣམ་པར་འཁྲུགས་པ་ཡིས། །མདའ་ནི་རང་བཞིན་ས་ཡི་བདག་པོའི་དཔལ་བཞིན་ནོ། །ལམ་དག་ཏུ་ནི་རྣམ་པར་འོང་བའི་འོད་སྲུངས་ནི། །རྣམ་
པར་དག་པའི་སེམས་ཀྱིས་སེམས་ནི་གྱུར་པ་སྟེ། །བཅོམ་ལྡན་འདས་ཀྱི་སྐུ་གདུང་ཚང་བ་ལྟ་འདོད་དེ། །གང་གི་མཐུ་ལས་མེ་ཡི་འབར་བ་མ་ཡིན་ནོ། །དེ་ནས་དེ་ཚེ་བླ་མ་བལྟ་བའི་དོན་དུ་ནི། །དེར་ནི་དགེ་སློང་སྐྱེན་པར་ཉེ་བར་སོང་བ་ན། །ཐུབ་པ་མཆོག་ལ་རབ་ཏུ་བཏུད་པ་བྱས་པ་ན། །
དེ་མ་ཐག་ཏུ་མེ་ནི་རང་ཉིད་འབར་བར་གྱུར། །ཉོན་མོངས་རྣམས་ཀྱིས་མ་ཚིག་ཐུབ་པའི་སྐུ་གདུང་ལ། །པགས་པ་ཤ་དང་སྤུ་དང་ཆ་ཤས་རྣམས་ཚིག་ནས། །མར་དང་རླུང་དང་བུད་ཤིང་ཡོངས་སུ་རྒྱས་ན་ཡང་། །མེ་ཡིས་རུས་པ་ཚིག་པར་ནུས་པ་མ་ཡིན་ནོ། །དེ་ནས་བདག་ཉིད་ཆེན་
པོ་འདས་པའི་དེ་རྣམས་ནི། །ཆུ་མཆོག་གིས་ནི་དང་བར་བྱས་ནས་དུས་སུ་ནི། །མངོན་པར་བསྟོད་ཅིང་གྱད་རྣམས་དག་གིས་གྲོང་ཁྱེར་དུ། །གསེར་གྱི་བུམ་པ་རྣམས་ཀྱིས་རབ་ཏུ་སྤྱན་དྲངས་སོ། །འདི་ནི་རི་བོ་ཆེན་པོའི་རིན་ཆེན་ཁམས་བཞིན་ནོ། །དགེ་ལེགས་གང་བ་ཆེན་པོ་རྣམས་ནི་
འཛིན་པ་སྟེ། །མཐོ་རིས་དག་ན་ལྷ་ཡི་གཙོ་བོའི་ཁམས་བཞིན་དུ། །ཁམས་ནི་མེ་ཡིས་ལོག་པར་སྦྱོར་བ་མ་ཡིན་ཉིད། །བྱམས་པས་ཡོངས་སུ་རྣམ་པར་བསྒོམས་པ་འདི་རྣམས་ནི། །འདོད་ཆགས་མེ་ཡིས་ཚིག་པས་རྣམ་པར་སྤངས་པ་སྟེ། །དེ་ཡི་གུས་པའི་དབང་གིས་གཟུང་
བའི་གདུང་རུས་རྣམས། །བསིལ་བ་ཡིན་ཀྱང་བདག་ཅག་རྣམས་ཀྱི་ཡིད་རྣམས་བསྲེགས། །སྲེད་པ་འཇོམས་མཛད་གང་གི་མཐུ་ལས་ཁྱབ་འཇུག་གི །མཁའ་ལྡིང་གིས་ཀྱང་ཁུར་བར་ནུས་པ་མ་ཡིན་པ། །འཇིག་རྟེན་དག་ན་མཚུངས་མེད་དེ་ཡི་རུས་པ་རྣམས། །མི་རུས་གྱུར་

172-1-99a

པ་ཁོ་བོ་ཅག་གིས་ཁུར་བར་གྱིས། །ཨེ་མ་འཇིག་རྟེན་ཆོས་ནི་ངེས་པར་སྟོབས་ལྡན་ཏེ། །ཆོས་ལ་ནུས་ཀྱང་ནུས་པས་གང་གིས་མ་བཟློག་ཅིང་། །གང་ཞིག་སྙན་པས་འགྲོ་བ་མཐའ་དག་ཁྱབ་པ་སྟེ། །དེ་ཡི་སྐུ་ཡི་ཆ་ཤས་འདི་ནི་བུམ་པར་གནས། །གང་ཞིག་བདག་གི་སྣང་བས་ཉི་མ་གཞན་སྣང་ཞིང་། །དེ་ཡི་
ས་ནི་སྣང་བས་རྣམ་པར་མཛད་པ་སྟེ། །གསེར་གྱི་མདོག་དང་ལྡན་པ་དེ་ཡི་སྐུ་ལུས་ནི། །མེ་རྣམས་ཀྱིས་ནི་རུས་པ་ལྷག་མར་བྱས་པའོ། །གང་གིས་ཉོན་མོངས་རི་བོ་རྒྱས་པ་རྣམས་ཕྱེ་སྟེ། །སྡུག་བསྔལ་ཐོབ་པ་ན་ཡང་བསྟན་པ་མ་ཕྱེ་ཞིང་། །སྡུག་བསྔལ་མཐའ་དག་རྣམས་ནི་བཀག་པར་གྱུར་པ་སྟེ། །དྲང་སྲོང་དེ་ཡི་སྐུ་ལུས་
མེ་ཡིས་བསྲེགས་པའོ། །གཡུལ་དུ་དགྲ་བོ་རྣམས་ཀྱིས་མཆི་མ་ཕྱུང་ནས་སུ། །སྐྱབས་འོངས་རྣམས་ཀྱི་མཆི་མ་རྣམ་པར་བཏུལ་ནས་སུ། །སྡུག་པ་ན་ཡང་མཆི་མ་བསྟན་པས་མ་བཏོན་པ། །ལམ་དུ་མཆི་མ་འཐོན་ཞིང་དེ་རྣམས་རྣམ་པར་ཟློས། །དེ་རྣམས་ང་རྒྱལ་ལྡན་ཞིང་ལག་པ་སྟོབས་དང་ལྡན་ན་ཡང་། །དེ་ལྟར་
མྱ་ངན་བྱེད་ཅིང་ནགས་བཞིན་གྲོང་ཁྱེར་དེར་ཞུགས་ཤིང་། །ལམ་རྣམས་སུ་ནི་གདུང་དེ་རྣམས་ནི་སྐྱེ་བོས་མཆོད་པ་སྟེ། །མཆོད་པའི་དོན་དུ་གཞལ་ཡས་ཁང་པར་མཛེས་པར་བྱས་པའོ། །སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། མྱ་ངན་ལས་འདའ་བ་བསྔགས་པའི་ལེའུ་སྟེ་ཉི་ཤུ་རྩ་བདུན་པའོ།།      །།
ཇི་ལྟ་བ་བཞིན་ཉིན་ཞག་འགའ་ཞིག་དེ་རྣམས་ཀྱིས། །དེ་རྣམས་མཆོད་པ་དམ་པ་རྣམས་ཀྱིས་མཆོད་པ་སྟེ། །ཆབ་འོག་རྒྱལ་ཕྲན་ཕོ་ཉ་བདུན་རྣམས་རིམ་གྱིས་ནི། །དེ་ཡི་ཆེད་དུ་གྲོང་ཁྱེར་དེར་ནི་ཉེ་བར་འོངས། །དེ་ནས་དེའི་ཚེ་གང་རྣམས་ཐོས་ནས་དུས་སུ་ནི། །ང་རྒྱལ་ལས་དང་དེ་ཡི་གུས་པའི་དབང་ལས་ནི། །
གྱད་རྣམས་འཐབ་མོ་ལ་ཡང་ངེས་པར་སོང་བ་སྟེ། །སྦྱིན་པ་ལ་ནི་ཡིད་རྣམས་བྱས་པ་མ་ཡིན་ནོ། །དེ་ནས་དེ་དག་རྣམས་ཀྱིས་རྣམ་གཞག་འདི་རྟོགས་ནས། །རླུང་བདུན་བཞིན་དུ་མི་དབང་བདུན་པོ་དེ་རྣམས་ནི། །གྱེན་དུ་ཞུགས་པའི་གང་གཱའི་ཤུགས་འདྲ་སྟོབས་ཚོགས་ནི། །ཤིན་ཏུ་དྲག་པོ་རྣམས་ཀྱིས་ཀུ་ཤ་
ཞེས་བྱར་འོངས། །དེ་ནས་གྲོང་པའི་སྐྱེ་བོ་ནགས་མཐའ་ནས་སྐྱེན་པར། །མི་སྐྱོང་དེ་དག་རྣམས་ཀྱི་མགྱོགས་འགྲོའི་སྒྲ་ཡིས་ནི། །ཁྲོས་པ་ལས་ནི་མགོ་བོ་རྣམས་ལ་བཟུང་བ་བཞིན། །འཇིགས་པས་རྒྱས་པའི་གདོང་རྣམས་གྲོང་ཁྱེར་ལ་ཞུགས་སོ། །དེ་ནས་མི་སྐྱོང་དེ་རྣམས་གྲོང་ཁྱེར་དེ་བཀག་ནས། །གླང་

172-1-99b

པོའི་དབང་པོ་རྣམས་བཅིངས་རྩེད་མོའི་ནགས་རྣམས་སུ། །གྱད་མཆོག་རྣམས་ཀྱིས་མི་མཐུན་སྤྱད་དུ་གྱུར་པ་རྣམས། །རིགས་ཀྱི་རྗེས་མཐུན་ཆ་ལུགས་ལྡན་རྣམས་ལ་གསོས་སོ། །དེ་ནས་མདའ་ཡབ་མཛེས་ཤིང་རིང་པའི་སྨིན་མ་དེ། །སྒོ་ཡི་མིག་ནི་རྣམ་པར་བཙུམས་ཤིང་གྲོང་ཁྱེར་དེ། །མི་དགའ་བ་དང་འདུས་པའི་ཡན་
ལག་མ་བཞིན་དུ། །དཔུང་པའི་ཁྱོགས་ནི་བཏེག་པ་ཉམ་ཐག་པར་གྱུར་ཏོ། །རྒྱལ་པོ་བདུན་པོ་རྣམས་ནི་བྱ་བ་གཅིག་པ་སྟེ། །དཔལ་གྱིས་འབར་ཞིང་ཤུགས་ཀྱིས་འཕྲོ་བ་རྣམས་ཀྱིས་ནི། །མཉམ་དུ་དུས་གཅིག་ལ་ནི་གཟའ་བདུན་རྣམས་ཀྱི་ནི། །འཇིགས་པ་དང་བཅས་ནམ་མཁའ་བཞིན་དུས་གྱུར་ཏོ། །
སྣ་རྣམས་གཉིས་འཐུང་མྱོས་པའི་ཆང་དྲི་རྣམས་ཀྱིས་དང་། །མིག་རྣམས་དཔུང་གིས་བསྣུན་པའི་རྡུལ་རྣམས་དག་གིས་དང་། །རྣ་བ་རྣམས་ནི་རྟ་གླང་རྔ་ཡི་དབྱངས་རྣམས་ཀྱིས། །མི་མོའི་སྐྱེ་བོ་ཡི་ཡང་དེར་ནི་བཅོམ་པར་གྱུར། །དེ་ནས་སྐྱོགས་རྣམས་ནང་དུ་ཁུ་བ་འབབ་པ་ནི། །མདུན་དུ་བདར་རྣམས་བསྡོགས་བྱས་
རྟ་བའི་ཚོགས་རྣམས་དང་། །གླང་པོ་རྣམས་ཀྱིས་ཡོངས་བསྐོར་སྒོ་ནི་ཕྱེད་བཀག་སྟེ། །འགེགས་ཤིང་གཡུལ་ལ་ཕྱོགས་རྣམས་ཀྱིས་བྱས་སོ། །དེ་ནས་ཤག་ཏི་རལ་གྲི་མདའ་ལག་གྲོང་ཁྱེར་པ། །སྐྲག་པས་ད་ནི་དཔའ་བས་ངོ་ཚ་བཏང་བ་རྣམས། །ཁྲ་རྣམས་བཞིན་དུ་དགྲ་བོ་རྣམས་ལ་ལྟ་བཞིན་དུ། །ཉེ་བའི་འཐབ་ར་རྣམས་སུ་ཀུན་
ནས་གནས་པའོ། །བརྟན་མིན་ལྡན་པ་ཁ་ཅིག་འོ་དོད་འབོད་པ་སྟེ། །དེ་བཞིན་གཞན་རྣམས་ཚོགས་ནས་དུང་ནི་རབ་ཏུ་སྒྲོགས། །དྲག་ཏུ་དྲེགས་རྣམས་ཁ་ཅིག་རབ་ཏུ་འཕེན་པ་སྟེ། །དེ་བཞིན་གཞན་རྣམས་རལ་གྲི་སྔོན་པོ་རྣམས་འདེབས་སོ། །དེ་ནས་རྒྱལ་བའི་ཆེད་དུ་གྱད་རྣམས་འཐབ་འདོད་ཅིང་། །གྱད་རྣམས་བཞིན་དུ་མཚན་རྣམས་སྒྲོགས་
པ་མཐོང་ནས་ནི། །གཡུལ་འགྱེད་ཡན་ལག་མ་རྣམས་དག་གི་སེམས་རྣམས་དང་། །སྨན་རྣམས་དང་མཉམ་མཆོད་ཡོན་རྣམས་ནི་གཡོས་པར་གྱུར། །གཡུལ་དེར་ཐོག་མར་འགྲོ་བར་འདོད་པའི་བུ་ལ་ནི། །གཡུལ་འགྱེད་ཡན་ལག་མ་རྣམས་དེར་ནི་ཡོངས་འདར་ཞིང་། །གོ་ཆ་བཅིངས་ནས་ཞི་བའི་ཤེས་པ་བྱེད་པ་སྟེ། །སེམས་ཁྲལ་གདོང་
རྣམས་མཆི་མ་བཏོན་པ་མ་ཡིན་ནོ། །སེམས་ཁྲལ་གདོང་ལས་གཞན་རྣམས་རི་དགས་མོ་བཞིན་དུ། །ཁྱིམ་ཐབ་འགྲོ་བར་འདོད་པའི་གཞུ་ལ་འཕྱངས་པ་སྟེ། །གང་གི་གདོང་ནི་འཐབ་ལ་དཔའ་བ་དེ་མཐོང་ནས། །བཅིངས་པའི་འཕྲོ་སྤོང་སོང་བ་མ་ཡིན་གནས་མ་ཡིན། །བུམ་པའི་ནང་དུ་ཡང་དག་བཀག་པའི་སྦྲུལ་རྣམས་བཞིན། །སྟོབས་

172-1-100a

ཀྱིས་དེ་ལྟར་རབ་ཏུ་འཕྲོ་བ་དེ་རྣམས་ནི། །དེ་ལྟར་རྣམ་པར་གཞག་པའི་གྱད་རྣམས་མཐོང་ནས་ནི། །མི་དབང་རྣམས་ཀྱིས་གཡུལ་གྱི་ཆེད་དུ་བློ་བསམས་སོ། །ཤིང་རྟ་གླང་པོ་རྟ་དང་རྐང་ཐང་དྲེགས་པ་ནི། །གཡུལ་ལ་ཀུན་ནས་ཉེ་བར་གཞོལ་བ་མཐོང་ནས་ནི། །
མཁས་པ་ཉིད་ཀྱིས་དང་ནི་མཛའ་བོ་ཉིད་ཀྱིས་ནི། །གཉིས་སྐྱེས་བྲེ་བོས་ཚིག་ནི་འདི་སྐད་ཅེས་སྨྲས་སོ། །གཡུལ་དུ་དགྲ་བོ་རྣམས་ཀྱི་སྲོག་དང་དྲེགས་པ་ནི། །ཁྱེད་ཅག་རྣམས་ཀྱི་མདའ་ཡིས་འཇོམས་པར་ནུས་པ་སྟེ། །རྫོད་པ་ཐ་དད་གནས་རྣམས་བདེ་བར་
མི་ནུས་ན། །ཕ་རོལ་བྱ་བ་གཅིག་པ་རྣམས་ནི་སྨོས་ཅི་དགོས། །ཅི་སྟེ་ཀུན་ནས་བཀག་པས་ཕ་རོལ་འཇོམས་པ་ལ། །བློ་ནི་བྱས་རྣམས་དེ་ནི་རྣམ་པར་ཟློག་མཛོད་དང་། །ཉེས་པ་མེད་པའི་གྲོང་པའི་སྐྱེ་བོ་འགེགས་པ་ཡི། །གཙེ་བར་བྱེད་པ་དེ་ནི་ཆོས་ནི་ཅི་ཞིག་ཡིན། །དོང་དུ་ཞུགས་
པའི་ནག་པོའི་སྦྲུལ་རྣམས་བགྲོད་པ་ནི། །གཅིག་ལ་གནས་པ་རྣམས་ཀྱིས་དུས་སུ་རྨུགས་པ་བཞིན། །བཀག་ནས་རྒྱལ་བ་མཐའ་གཅིག་ཡོད་པ་མ་ཡིན་ཞིང་། །བརྒྱ་ལ་བཀག་པ་རྣམས་ཀྱིས་རྒྱལ་བ་འཐོབ་པར་འགྱུར། །གྲོང་གི་ནང་དུ་བཀག་པའི་གཏད་རྣམས་
ཞུགས་པ་རྣམས། །ཡིད་དང་ལྡན་པ་ཉིད་ལས་མི་རྣམས་ཀྱིས་ཐོས་ནས། །བསྲེག་བྱ་རྣམས་ཀྱིས་འཐོར་བའི་ཆུང་ངུའི་མེ་བཞིན་དུ། །གཟི་བརྗིད་དམན་ཀྱང་ལེགས་པ་ཆེན་པོར་འགྲོ་བར་འགྱུར། །ཆོས་ཀྱི་བདག་ཉིད་ཅན་རྣམས་གྲོང་དུ་བཀག་ན་ཡང་། །འཇོམས་འདོད་
ཐོབ་པ་རྣམས་ནི་དཀའ་ཐུབ་ཀྱིས་གཏོར་ཏེ། །དཔུང་ནི་ཟད་པར་གྱུར་ཀྱང་ཀཱ་ཤའི་གྲོང་ཁྱེར་དུ། །ལག་པ་སྒྲ་བྱེད་ཆོས་ཀྱི་སྟོབས་ལས་རྣམ་པར་རྒྱལ། །སྙན་གྲགས་ཆེད་དམ་ཡུལ་ནི་འཐོབ་པའི་ཆེད་དུ་ས། །མཐའ་དག་གང་རྣམས་ཀྱིས་ཀྱང་མངོན་པར་ཐོབ་པ་སྟེ། །བ་ལང་
རྣམས་ཀྱིས་ཆུ་གནས་ནས་ཆུ་འཐུངས་ནས་བཞིན། །བོར་ནས་ནོར་འཛིན་བདག་པོ་དེ་རྣམས་ས་ལ་སོང་། །དེ་ཕྱིར་ཆོས་དང་དོན་ནི་ཡང་དག་མཐོང་ནས་སུ། །ཁྱེད་ཅག་རྣམས་ཀྱིས་ཞི་བས་འབད་པ་མཛོད་ཅིག་དང་། །མདའ་ཡིས་འཕམ་པ་རྣམས་ནི་སླར་ཡང་འབར་བ་སྟེ། །ཞི་བས་

172-1-100b

འཕམ་པ་རྣམས་ཀྱི་རྣམ་འགྱུར་ཡོད་མ་ཡིན། །འདི་ཀུན་ཁྱེད་ཅག་རྣམས་ཀྱི་ཚད་མ་མ་ཡིན་ཏེ། །ཁྱེད་ཀྱི་སྟོབས་ཀྱི་དགྲ་ཡི་སྟོབས་ལས་འགྲོ་བར་ནུས། །ཤཱཀྱ་ཐུབ་པ་གང་ལ་མཆོད་པར་བློ་ཡོད་ན། །དེ་ཉིད་ཀྱི་ནི་གསུང་ལ་བཟོད་པས་བསྙེན་མཛོད་ཅིག །དེ་སྐད་ཅེས་སོགས་འདོད་པ་
རྣམ་པར་ངེས་པ་ནི། །བྲམ་ཟེའི་དྲང་པོས་དང་ནི་རབ་ཏུ་དགའ་བ་ཡིས། །རྒྱལ་པོ་ཡིན་ཡང་རྗེས་སུ་བསྟན་ནས་ལེགས་པ་དེས། །དགེ་ལེགས་སྨྲས་ཤིང་དེ་ནས་དེ་རྣམས་ཀྱིས་སྨྲས་སོ། །དུས་དང་སྦྱར་ཏེ་མཁས་ཤིང་ཕན་ལ་བཤེས་ཀྱིས་ནི། །ཚིག་གང་འདི་དེ་ཁྱེད་ཀྱིས་རྣམ་པར་སྨྲས་པ་སྟེ། །
ཆོས་ལ་དགའ་བ་ཉིད་དང་སྟོབས་ལ་བརྟེན་པ་ལས། །རྒྱལ་པོ་རྣམས་ཀྱིས་བསམ་པ་ངེས་པར་ཤེས་པར་མཛོད། །འདོད་པའི་ཕྱིར་དང་ཁྲོ་ཕྱིར་སྟོབས་ཕྱིར་འཆི་བའི་ཕྱིར། །ཕལ་ཆེ་བར་ནི་བྱ་བར་སོང་ཞིང་འགྲོ་བ་སྟེ། །མངོན་པའི་ང་རྒྱལ་དང་བཅས་ཁོ་བོ་ཅག་རྣམས་ཀྱིས། །སངས་རྒྱས་ཉིད་ལ་
མཆོད་པ་ལ་ནི་གཞུ་རྣམས་བཟུང་། །ང་རྒྱལ་དོན་དུ་མཆོད་ཡོན་བླངས་ལ་རྩོད་པ་ནི། །བྱིས་པ་སྐྱོང་དང་དྲག་པོ་དག་གིས་ཁྱབ་འཇུག་བྱུང་། །ང་རྒྱལ་སྤང་ཕྱིར་མཆོད་པའི་དོན་དུ་ངེད་རྣམས་ཀྱིས། །ཚེ་རྣམས་དག་ཀྱང་འདོར་བར་མི་བགྱི་གང་ལས་ཡིན། །བུ་མོ་ལ་ནི་ས་སྐྱོང་དག་གི་རྒྱལ་
པོ་རྣམས། །གཏུམ་པོ་ལོང་བྱེད་རྣམས་ནི་རྩོད་པར་སོང་བ་སྟེ། །འདོད་པ་འཇོམས་ཕྱིར་མཆོད་པའི་དོན་དུ་ངེད་རྣམས་ཀྱིས། །ཚེ་རྣམས་དག་ཀྱང་འདོར་བར་མི་བགྱིད་གང་ལས་ཡིན། །རྒྱལ་རིགས་ཟད་ཕྱིར་དྲང་སྲོང་དྲག་ཏུ་ཁྲོས་པ་ནི། །ངན་སྤོང་བུ་ཡིས་གཡུལ་དུ་མཚོན་རྣམས་བཟུང་
བ་སྟེ། །ཁྲོ་བ་འཇོམས་ཕྱིར་མཆོད་པའི་དོན་དུ་ངེད་རྣམས་ཀྱིས། །ཚེ་རྣམས་དག་ཀྱང་འདོར་བར་མི་བགྱིད་གང་ལས་ཡིན། །ལྷ་མོ་སཱི་ཏར་མངོན་བརྗོད་འཆི་བ་ཡོངས་བཟུང་ནས། །སྲིན་པོ་ཤིན་ཏུ་དྲེགས་པ་ཡང་ནི་ཉམས་པ་སྟེ། །ཡོངས་འཛིན་སྤོང་ཕྱིར་མཆོད་པ་དོན་དུ་ངེད་རྣམས་
ཀྱིས། །ཚེ་རྣམས་དག་ཀྱང་འདོར་བར་མི་བགྱིད་གང་ལས་ཡིན། །ཨེ་ཌི་ལམ་ནི་པ་ཀ་ཞེས་ནི་དགྲ་འཕེལ་ཞིང་། །རྒྱལ་རིགས་བྱེ་བ་རྣམས་ནི་དེ་ལྟར་ཉམས་པ་སྟེ། །རྨོངས་མུན་གཏོར་ཕྱིར་མཆོད་པའི་དོན་དུ་ངེད་རྣམས་ཀྱིས། །ཚེ་རྣམས་དག་ཀྱང་འདོར་བར་མི་བགྱིད་གང་ལས་ཡིན། །

172-1-101a

དེ་སྐད་ཅེས་སོགས་འཇིག་རྟེན་དག་ན་འཐབ་མོ་ནི། །སྐྱོན་ལས་སྐྱེས་པ་མང་པོ་རྣམས་ནི་བྱུང་གྱུར་ཏེ། །སྟོན་པ་བླ་ན་མེད་པའི་གུས་པས་འཆི་བ་དང་། །བཅས་པ་ཡིན་ཀྱང་འཐབ་མོ་མི་བགྱིད་གང་ལས་ཡིན། །དེ་ལྟ་ན་ཡང་བདག་ཅག་རྣམས་ཀྱི་ངེས་པ་འདི། །
ཁྱེད་ཀྱི་ཕོ་ཉར་གྱུར་ཅིག་སྐྱེན་པར་གཤེགས་མཛོད་ལ། །ཇི་ལྟར་དོན་ནི་འཐབ་མོ་མིན་པས་འགྲུབ་པ་ཅིག །དེ་ལྟར་བདག་ཉིད་ཀུན་གྱིས་འབད་པ་གྱིས་མཛོད་ཅིག །ཁྱེད་ཀྱིས་ཆོས་ལྡན་ཚིག་རྣམས་ཀྱིས་ནི་ངེད་ཅག་རྣམས། །འཐབ་པར་འདོད་ཅིང་མདའ་ཡི་མཆེ་བ་རྣོན་པོ་ཅན། །
ནང་དུ་རབ་ཏུ་འཕེལ་བའི་དུག་ནི་འཐུངས་པ་རྣམས། །སྔགས་རྣམས་ཀྱིས་ནི་སྦྲུལ་རྣམས་བཞིན་དུ་བཀག་པའོ། །དེ་ལྟར་བགྱི་ཞེས་རྒྱལ་པོ་རྣམས་ཀྱི་ཚིག་བཟུང་ནས། །བྲམ་ཟེ་དེ་ནི་གྲོང་ཁྱེར་དེ་ལ་རབ་ཞུགས་ཤིང་། །ཇི་ལྟར་རིམ་གྱིས་གྱད་རྣམས་དག་ནི་མཐོང་བ་སྟེ། །མཐོང་ནས་
དུས་སུ་ཚིག་ནི་འདི་སྐད་ཅེས་སྨྲས་སོ། །གཞུ་རྣམས་ལག་ན་གནས་པའི་མི་དབང་འདི་རྣམས་ནི། །ཉི་ལྟར་བྱི་དོར་གོ་ཆ་འབར་རྣམས་ཀྱིས། །ཁྱེད་ཅག་རྣམས་ཀྱིས་གྲོང་འདིར་ངེས་པར་རོ་མྱང་ཞིང་། །སེང་གེ་བཞིན་དུ་རྣམ་པར་འགྱིང་ཞིང་གནས་པའོ། །དེ་རྣམས་ཀྱི་ནི་ཤུབས་སུ་བཀོད་
པའི་རལ་གྲི་དང་། །གསེར་གྱི་རྒྱབ་ལྡན་གཞུ་རྣམས་ངེས་པར་རྟོགས་པ་སྟེ། །གྲུབ་པའི་ཆོས་དྲན་ནས་ནི་ཆོས་མིན་གྱིས་འཇིགས་ཤིང་། །ཞུ་བ་གསོལ་བར་བྱེད་དེ་གཡུལ་ལ་འཇིགས་རྣམས་མིན། །དེ་རྣམས་མངོན་པར་འོངས་རྣམས་ས་ཡི་ཕྱིར་མིན་ཞིང་། །ནོར་ཕྱིར་མ་ཡིན་
རྒྱགས་ཕྱིར་མ་ཡིན་དགྲ་ཕྱིར་མིན། །ཐུབ་པའི་གུས་པས་ངེད་ཅག་རྣམས་ཀྱི་ཞེ་ས་འདི། །དེ་ཕྱིར་ཁྱེད་ཅག་རྣམས་ཀྱི་བྱ་བས་བཀུར་སྟི་མཛད། །ཐུབ་པ་དེ་ལ་ཁྱེད་ཅག་གི་དང་ངེད་ཅག་གི །བླ་མ་ཉིད་དུ་མཉམ་སྟེ་འདི་ལས་ངལ་བ་འདི། །དེ་ཕྱིར་སྤུན་གྱི་ཚོགས་ནི་འདུས་ནས་
འོངས་པ་སྟེ། །བླ་མའི་གདུང་རྣམས་མཆོད་པ་ལ་ནི་བྱ་བ་གཅིག །ཇི་ལྟར་ཆོས་ཀྱི་ཆོ་ག་ལ་ནི་སེར་སྣ་ཉིད། །ནོར་རྣམས་ལ་ནི་སེར་སྣ་དེ་ལྟར་སྐྱོན་མ་ཡིན། །སེར་སྣ་སྨྲ་བ་ངེས་པ་ཉིད་དུ་སྐྱོན་ཡིན་ཞིང་། །སྐྱོན་ནི་ཆོས་ཀྱི་དག་བོར་གྱུར་པ་ཉིད་ཡིན་ནོ། །གལ་ཏེ་མི་སྦྱིན་པར་ནི་ཁྱེད་

172-1-101b

རྣམས་ཀྱིས་དས་ན། །རྫོང་ནས་འཐོན་ནས་འགྲོན་པོ་རྣམས་ལ་བསྙེན་པར་མཛོད། །གང་རྣམས་ཀྱིས་སྟོབས་མངའ་རྣམས་མ་ཡིན་སྒོ་གླེགས་རྣམས། །དེ་རྣམས་རིགས་སུ་སྐྱེས་པའི་རྒྱལ་རིགས་མ་ཡིན་ནོ། །བྱམས་པ་དང་ནི་གཟི་བརྗིད་སྟོན་པར་བྱེད་བཞིན་དུ། །མི་དབང་རྣམས་
ཀྱིས་ཁྱེད་ཅག་རྣམས་ལ་དེ་སྐད་སྨྲས། །བདག་གི་སྨྲ་འདོད་གང་ཡང་རང་གིས་རྟོགས་ནས་སུ། །དགའ་ལས་བདག་གི་དེ་ནི་ཁྱེད་ཅག་རྣམས་ཀྱིས་ཉོན། །འགའ་ཞིག་རྩོད་པ་དགེ་བ་མ་ཡིན་ཆོས་མིན་ཏེ། །རྣམ་པར་འགྲས་པར་མ་འགྲོ་ཞི་བ་བསྙེན་པར་མཛོད། །ཐུབ་པ་དེས་ནི་བཟོད་
པ་རབ་ཏུ་བསྔགས་པ་སྟེ། །གང་གིས་གུས་པས་མེ་ནི་ཀུན་ནས་འཕེལ་བར་འགྱུར། །ནོར་དང་འདོད་པ་དག་གི་གཅིག་གི་ཆེད་དུ་ནི། །རྣམ་པར་རྩོད་པ་ཚུལ་ནི་ཉེ་བར་འགྱུར་བ་སྟེ། །ཆོས་ཀྱི་ཆེད་དུ་སླར་ཡང་འཕགས་པར་གྱུར་པ་ནི། །ཞི་བ་དང་ནི་དགྲ་བོ་རྣམ་པར་རྩོད་པར་སྨྲ། །གང་ཞིག་ཉེ་
བར་ཞི་ཞིང་བྱམས་པའི་ཐུགས་ཀྱིས་ནི། །སེམས་ཅན་ཐམས་ཅད་རྣམས་ལ་བརྩེ་བ་གསུངས་པ་སྟེ། །ཐུགས་རྗེ་ཆེན་པོ་མངའ་བ་དེ་ལ་མཆོད་པ་ནི། །འཚེ་བ་བྱས་ནས་བདག་གི་ལུགས་དང་མཚུངས་མ་ཡིན། །དེ་ཕྱིར་གདུང་ནི་རབ་ཏུ་སྦྱིན་ལས་འདི་རྣམས་ལ། །གྲགས་པ་དང་ནི་ཆོས་ཀྱིས་
ཡང་དག་བགོ་བ་མཛོད། །དེ་ལྟར་གྱུར་ན་ཁྱེད་ཀྱིས་རྩོད་མིན་དེ་དག་དང་། །དེ་དག་གིས་ཀྱང་ཆོས་དང་གྲགས་པ་འཐོབ་པར་འགྱུར། །ཆོས་ལྡན་སྐྱེས་བུ་རྣམས་ཀྱིས་ཆོས་ལས་གཡོས་པ་ནི། །ཆོས་ལ་འབད་པ་ལས་ཀྱང་ངེད་རྣམས་ཀྱིས་སྦྱོར་ན། །གང་བདག་རྣམས་ཀྱིས་གཞན་དག་ཆོས་ལ་སྦྱོར་
བྱེད་པ། །དེ་དག་རྣམས་ཀྱིས་ཆོས་ནི་གནས་པའི་ཆེད་དུ་འཇུག །དྲང་སྲོང་དམ་པ་མཆོག་གིས་ཆོས་ཀྱི་སྦྱིན་པ་ནི། །སྦྱིན་པ་ཐམས་ཅད་ཀྱི་ནི་ཁྱད་པར་འཕགས་པར་གསུངས། །གང་ཞིག་ལ་ལས་ནོར་ལ་སྦྱོར་བར་བྱེད་པ་སྟེ། །ཆོས་ཀྱི་སྦྱིན་པ་པོ་ནི་རྣམ་པར་བསགས་པ་ཡིན། །དེ་ནས་
སྙན་གྲགས་དང་ནི་བདེ་བ་འདྲེན་པ་དང་། །ཆོས་ཀྱི་ཚིག་ནི་དེ་ལས་ཉེ་བར་ཐོབ་ནས་ནི། །ངོ་ཚ་དང་བཅས་ཕན་ཚུན་ལྟ་བ་དེ་རྣམས་ཀྱིས། །བྲེ་བོའི་རིགས་མཉམ་བྲམ་ཟེ་ལ་ནི་སྨྲས་པའོ། །ཨེ་མ་མཛའ་བོའི་དགེ་ལ་ཁྱོད་ཀྱིས་ངེས་པ་སྟེ། །ཡོན་ཏན་རྣམས་ལ་བྲམ་ཟེའི་རྗེས་སུ་མཐུན་པས་

172-1-102a

ཆགས། །ལམ་གཞན་གྱིས་ནི་འཁྲུལ་བའི་རྟ་ངན་རྣམས་བཞིན་དུ། །གང་གིས་ལེགས་པར་བསྙེན་པའི་ལམ་ལ་བཀོད་པར་འགྱུར། །ཇི་ལྟར་སྨྲས་པ་དེ་ལྟར་དེ་ནི་ལྡན་འགྱུར་ཞིང་། །བརྩེ་ཞིང་མཉེན་པའི་ཚིག་འདི་འཛིན་པར་རིགས་པ་སྟེ། །མཛའ་བོའི་སྐྱེ་བོའི་ཚིག་ལ་
ཤིན་ཏུ་འདས་ནས་སུ། །ཕྱི་ནས་སྡུག་བསྔལ་ཉིད་དུ་ལྷུང་རྣམས་མྱ་ངན་འགྱུར། །དེ་ནས་འགྲོ་བའི་ཁམས་རིག་གདུང་ནི་གྱད་རྣམས་ཀྱིས། །དེ་རྣམས་བརྒྱད་དུ་གུས་པས་ཡོན་ཏན་ལས་བགོས་སོ། །དེ་ནས་རང་ཉིད་ཀྱིས་ནི་ཆ་ཤས་བཟུང་ནས་ནི། །བདུན་པོ་སོ་སོ་སོ་སོར་གཞན་རྣམས་ལ་བྱིན་ཏོ། །
གྱད་རྣམས་དག་གིས་མངོན་མཆོད་ས་སྐྱོང་དེ་རྣམས་ཀྱང་། །དགའ་ཞིང་དོན་བྱས་རྣམས་ནི་རང་ཡུལ་རྣམས་སུ་གཤེགས། །དེ་ནས་དྲང་སྲོང་གིས་གདུང་དེ་རྣམས་ཆོ་ག་བཞིན། །རང་གྲོང་རྣམས་སུ་མཆོད་རྟེན་རབ་གནས་རྣམས་དེ་བྱས། །དེ་ནས་རང་གི་ཡུལ་དུ་ཐུབ་པའི་མཆོད་རྟེན་ནི། །བྱེད་འདོད་
བྲེ་བོས་སོ་སོར་བགོས་པའི་བུམ་པ་བླངས། །སོལ་བ་ལྷག་མ་རྣམས་ཀྱང་པི་ས་ལ་ཞེས་པའི། །གུས་པས་རྗེས་སུ་རབ་ལྡན་རྣམས་ཀྱིས་བསླངས་པར་གྱུར། །དེ་ནས་གདུང་གི་སྙིང་པོ་ཅན་གྱི་སྔོན་དུ་བརྒྱད། །བྲག་རི་དཀར་པོ་དང་མཚུངས་མཆོད་རྟེན་རྣམས་གྱུར་ཞིང་། །དེ་ཡི་བུམ་པས་
བསྙེན་པ་བྲམ་ཟེའི་དགུ་པ་སྟེ། །སོལ་བའི་སྙིང་པོ་དང་ལྡན་བཅུ་པ་བྱུང་བར་གྱུར། །ཐུབ་པའི་མཆོད་རྟེན་སྣ་ཚོགས་བ་དན་གཡོ་བ་རྣམས། །ཏི་སེའི་གངས་རིའི་རྩེ་མོ་དང་མཚུངས་དེ་རྣམས་ལ། །རང་གི་སྐྱེ་བོ་དང་བཅས་མི་སྐྱོང་དེ་རྣམས་དང་། །སྐྱེ་དགུ་དང་བཅས་བྲམ་ཟེ་རྣམས་ཀྱིས་
ས་ན་མཆོད། །ཕྲེང་བ་མངོན་སྦྱར་རྣམས་དང་དྲི་བཟངས་མཆོག་རྣམས་དང་། །ཕྲེང་བ་དགེ་བ་རྣམས་དང་སིལ་སྙན་དབྱངས་རྣམས་ཀྱིས། །མཆོད་པ་དམ་པ་མི་སྐྱོང་དེ་རྣམས་དེ་རྣམས་ཀྱིས། །རྒྱལ་བའི་གདུང་ནི་འཛིན་པ་དེ་རྣམས་ལ་བྱས་སོ། །དེ་ནས་དུས་སུ་དགྲ་བཅོམ་རྣམས་ཀྱི་ལྔ་བརྒྱ་
རྣམས། །རི་བོ་ལྔས་མཚན་གྲོང་ཁྱེར་དུ་ནི་ཡོངས་འདུས་ནས། །སླར་ཡང་ཇི་ལྟ་བ་བཞིན་ཆོས་ནི་གནས་པའི་ཕྱིར། །ཐུབ་པའི་གསུང་ནི་རི་ཡི་ལོགས་སུ་ཡང་དག་བསྡུས། །གནས་སྐབས་ཀུན་དུ་དྲང་སྲོང་ཆེ་ལས་ཐོས་པ་ནི། །ཀུན་དགའ་བོ་ཉིད་ཡིན་ཞེས་ངེས་པར་གྱུར་པ་ཡི། །དགེ་

172-1-102b

སློང་དེ་རྣམས་ཀྱིས་ནི་འདུས་པ་མཐུན་པ་རུ། །གསུང་བར་ཞུ་ཞེས་ལུས་འཕགས་ཐུབ་པ་ལ་ཞུས་སོ། །དེ་ནས་དེ་དག་རྣམས་ཀྱི་དབུས་སུ་དེ་བཞུགས་ནས། །སྨྲ་བ་རྣམས་ཀྱི་མཆོག་གིས་ཇི་ལྟར་གསུངས་པའི་ཚིག །གང་དུ་གང་ལ་གང་གི་ཚེ་ན་གང་ཞིག་དང་། །འདི་སྐད་བདག་
གིས་འདི་ནི་ཐོས་ཞེས་གསུངས་པར་གྱུར། །དེ་ཕྱིར་དགྲ་བཅོམ་རྣམས་ཀྱིས་རྗེས་སུ་བཅིངས་པ་དེས། །ཐུབ་པ་ཆེན་པོའི་ཆོས་ཀྱི་བསྟན་བཅོས་གནས་པ་སྟེ། །གང་ཞིག་འབད་པས་ཡང་དག་རབ་ཏུ་ཐོབ་པ་ནི། །མྱ་ངན་འདས་ཤིང་འདའ་ལ་མྱ་ངན་འདའ་བར་འགྱུར། །དགྲ་བོ་ཁེངས་
པ་རྣམས་ཀྱི་མྱ་ངན་སྟེར་བ་པོ། །སྐྱེ་དགུ་སྡུག་བསྔལ་རྣམས་ཀྱི་མྱ་ངན་གཅོད་པ་པོ། །མེ་ཏོག་འབྲས་ལྡན་མྱ་ངན་མེད་ལྟར་བལྟ་ན་སྡུག །དུས་སུ་དེ་གུས་ས་བདག་མྱ་ངན་མེད་པ་བྱུང་། །འཕགས་པ་མཽ་རྒྱའི་དཔལ་དེས་སྐྱེ་དགུར་ཕན་དོན་དུ། །འཇིག་རྟེན་ཀུན་ལ་མཆོད་རྟེན་མཚན་མ་
བྱེད་དུ་བཅུག །གཏུམ་པོ་མྱ་ངན་མེད་ཉིད་ཐོབ་ནས་ས་ལ་ནི། །ཆོས་རྒྱལ་མྱ་ངན་མེད་ཉིད་ལས་དེ་ཐོབ་པར་གྱུར། །མངོན་དུ་བྱས་པའི་མཆོད་རྟེན་བདུན་པོ་དེ་རྣམས་ལས། །དྲང་སྲོང་དེ་ཡི་གདུང་རྣམས་མཽ་རྒྱ་དེས་བླངས་ནས། །དཔལ་ལྡན་མཆོད་རྟེན་སྟོན་ཀའི་སྤྲིན་གྱི་འོད་རྣམས་ཀྱི།
སྟོང་ཕྲག་བརྒྱད་ཅུར་བབས་པ་དུས་སུ་ཞག་གིས་བྱས། །དགའ་བྱེད་གྲོང་གནས་མཆོད་རྟེན་བརྒྱད་པ་དང་པོ་ནི། །དེ་ཡི་དུས་སུ་གུས་ལྡན་ཀླུ་རྣམས་ཀྱིས་བསྲུངས་ཏེ། །དེ་ཕྱིར་གདུང་རྣམས་ཐོབ་པ་མ་ཡིན་རྒྱལ་པོ་དེས། །དེར་བྱས་པ་ལ་མ་དད་རྒྱ་ཆེན་གྱུར་པའོ། །དེའི་ཕྱིར་ཡིད་ཀྱིས་
དགྲ་བོ་འབྲས་བུ་རྣམས་ལ་ནི། །ཀུན་ནས་གནས་ཤིང་གཡོ་བའི་དཔལ་ནི་བསྲུངས་ན་ཡང་། །མི་སྐྱོང་དེས་ནི་ངུར་སྨྲིག་གོན་པ་ལས་གཞན་དུ། །ལྟ་བ་རྣམ་པར་དག་ཅིང་འབྲས་བུ་དང་པོ་ཐོབ། །དེ་ལས་གཞན་དུ་གཞན་གྱིས་ཐུབ་པའི་མཆོད་པ་ནི། །གང་གིས་བྱས་ཤིང་བྱེད་ལ་བྱེད་
པར་འགྱུར་བ་སྟེ། །དམ་པའི་སྐྱེ་བོས་བསྙེན་པའི་འབྲས་བུ་བླ་ན་མེད། །དེ་ཡིས་ཐོབ་ཅིང་འཐོབ་ལ་འཐོབ་པར་འགྱུར་བ་ཉིད། །དྲང་སྲོང་བཞུགས་པ་ལ་ནི་མཆོད་པ་སྦྱར་ནས་སམ། །ཡོངས་སུ་མྱ་ངན་འདས་པའི་གདུང་ལ་ཕྱག་བྱས་ནས། །ཡིད་ཀྱི་དང་བ་མཉམ་ན་འབྲས་བུ་མཉམ་པ་

172-1-103a

སྟེ། །སངས་རྒྱས་ཡོན་ཏན་རྣམས་ནི་མཁས་རྣམས་ཤེས་པར་མཛོད། །དེ་ཕྱིར་རྟག་ཏུ་མཆོག་གི་ཆོས་ནི་མཁྱེན་པའོ། །མཆོག་ཏུ་མི་འགྱུར་འཕོ་བ་མེད་པ་བརྙེས་ལྡན་པ། །བརྩེ་བ་དང་བཅས་ཐུབ་པ་བློ་གྲོས་ཆེན་པོ་ནི། །མཆོད་འོས་མཆོག་ལ་མཆོད་ལ་དམ་
པ་འོངས་པའོ། །མཆོག་ཏུ་ཐུགས་རྗེ་དང་ལྡན་མཆོག་གི་ཐུགས་མཁྱེན་པ། །གཞན་ལ་ཕན་ཕྱིར་མཆོག་ཏུ་ངལ་བར་བྱོན་པ་དེ། །མཛད་པ་མཁྱེན་པ་ཉིད་ཀྱིས་དམ་པ་མཁས་རྣམས་ཀྱི། །འདི་ན་གཏང་རག་མཆོད་པ་གང་ཕྱིར་འོས་མ་ཡིན། །ས་ན་འཆི་དང་རྒ་བ་དང་མཉམ་
འཇིགས་པ་དང་། །མཐོ་རིས་དག་ན་འཕོ་བ་དང་མཉམ་ཡོད་མིན་ཏེ། །འགྲོ་བའི་དེ་གཉིས་མཁྱེན་ནས་གང་ཞིག་གནས་པ་སྟེ། །དེ་ཕྱིར་མཆོད་པར་བྱ་བ་དམ་པ་སུ་འདྲ་ཡོད། །སྐྱེ་བ་ཡོད་ན་བདེ་བ་མིན་པ་འབྱུང་བ་སྟེ། །ཡང་སྲིད་མེད་ལས་ཤིན་ཏུ་བདེ་བས་བདེ་བ་མེད། །དེ་
ནི་བརྙེས་ཤིང་གང་གིས་འགྲོ་ལ་བྱིན་པ་སྟེ། །དེའི་ཕྱིར་མཆོད་པར་བྱ་བ་དམ་པ་འདྲ་ཡོད། །དེ་ལྟར་ཐུབ་པའི་སྐྱེས་མཆོག་དེ་ཡི་གུས་པ་ཡིས། །མཁས་ཉིད་ཡོན་ཏན་ལས་མིན་སྙན་དངགས་ནུས་པས་མིན། །ཐུབ་པའི་ལུང་གི་རྗེས་སུ་བྲངས་ནས་འདི་བརྩམས་ཏེ། །སྐྱེ་དགུ་
རྣམས་ཀྱི་ཕན་དང་བདེ་བའི་ཕྱིར་གྱུར་ཅིག །ཡུལ་ཤཱ་སེ་ཏ་ཀའི་གསེར་མིག་མའི་བུ་དགེ་སློང་སློབ་དཔོན་སྙན་དངགས་མཁན་ཆེན་པོ། སྨྲ་བ་དང་ལྡན་པ་ཕྱོགས་སུ་རྣམ་པར་གྲགས་པ། བཙུན་པ་རྟ་དབྱངས་ཀྱིས་མཛད་པའི། སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་
ལས་སྐུ་གདུང་རྣམ་པར་བགོ་བའི་ལེའུ་སྟེ་ཉི་ཤུ་རྩ་བརྒྱད་པ་ཡོངས་སུ་རྫོགས་སོ།།      །།ས་སྟེངས་རྒྱ་མཚོའི་མཐར་ཐུག་བསྟན་པའི་བདག་པོ་མཆོག །ཡོན་ཏན་མཚུངས་མེད་ཕུལ་བྱུང་དུ་མའི་གཏེར་ཆེན་པོ། །མཁས་པ་རྣམས་ཀྱི་བླ་མ་སྐྱེ་དགུ་རྣམས་ཀྱི་དཔལ། །
བླ་མ་དམ་པ་ཆོས་ཀྱི་རྒྱལ་པོའི་བཀའ་ལུང་གིས། །འཇིག་རྟེན་ཀུན་ན་ཟླ་བྲལ་སྐྱེས་མཆོག་དེ་ཉིད་ཀྱི། །ཕྲིན་ལས་སྒྲུབ་པ་སྙེ་བའི་ཐུགས་གོངས་རྣམ་དག་དང་། །མི་རྗེ་ལྷ་སྲས་གུང་ཐང་རྒྱལ་མོ་ཡུམ་སྲས་དང་། །ཆོས་ལ་གཅིག་ཏུ་དཀར་བའི་ལྷ་གཅིག་ཀུན་དགའ་འབུམ། །མང་ཡུལ་

172-1-103b

སྐྱི་རོང་བཟང་མོ་ཡོན་ཏན་སྐྱིད་ལ་སོགས། །ཆོས་ལྡན་དམ་པ་རྣམས་ཀྱིས་སྦྱིན་བདག་བགྱིས་པའི་ངོར། །འཕགས་པ་རྟ་དབྱངས་ཀྱིས་མཛད་ཐུབ་པའི་མཛད་པ་འདི། །ས་དབང་བཟང་པོ་དང་ནི་བློ་གྲོས་རྒྱལ་པོས་བསྒྱུར། །འདི་བསྒྱུར་བསོད་ནམས་རྒྱལ་པོ་གང་དེས་ཕ་མ་དང་། །འགྲོ་
རྣམས་ལམ་གྱི་རྒྱལ་པོ་དམ་པ་འདིར་ཞུགས་ཏེ། །ཉེས་ཚོགས་ཚང་ཚིང་ཀུན་དང་བདུད་བཞིའི་རྒྱལ་པོ་རྣམས། །བཅོམ་ནས་ཆོས་ཀྱི་རྒྱལ་པོ་དམ་པ་ཐོབ་པར་ཤོག།      །། ༄༅༅། །རྒྱ་གར་སྐད་དུ། བོ་དྷི་སཏྭ་ཛཱ་ཏ་ཀ་སྱ་དྷརྨྨ་གཎྜཱི། བོད་སྐད་དུ།
བྱང་ཆུབ་སེམས་དཔའི་སྐྱེས་པའི་རབས་ཀྱི་ཆོས་ཀྱི་གཎྜཱི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །རབ་མཐོ་བྲག་རིའི་རྩེ་ཡི་ཡུལ་ངོས་རབ་ཞི་བདེ་བའི་ལོངས་སྤྱོད་འདུག་འདུག་པས། །དེ་འོག་སྟག་མོ་བཀྲེས་པས་གནམ་གཡོས་མཐའ་དག་ཕྱོགས་
སུ་མཆི་མར་ལྡན་ཞུམ་མིག་བལྟ་བ། །བདག་ཉིད་བུ་ཡང་གསད་འདོད་དེ་ལ་དེར་ནི་ཐུགས་བརྩེས་རང་གི་ལུས་བྱིན་མཛད་པ་གང་། །དེ་ནི་འཇིག་རྟེན་གསུམ་གྱིས་ཕྱག་བྱས་འདོད་ལྷའི་སྟོབས་འཇོམས་ཆོས་ཀྱི་གཎྜཱིའི་སྒྲ་བསྒྲགས་སོ། །རབ་ཏུ་དབང་འབྱོར་བདག་པོ་ཤི་བའི་མི་བདག་དུས་
རྣམས་ཐམས་ཅད་དུ། །འཇིག་རྟེན་གཅིག་ཏུ་ཐུགས་བརྩེས་བསྐུལ་ཏེ་རྒྱས་པར་སྦྱིན་པའི་ཆུ་ཡི་ཆར་གྱིས་ཚིམ་མཛད་ལ། །ལོང་བའི་བྲམ་ཟེས་སྤྱན་ནི་གཅིག་བླངས་པ་ལས་གཉིས་ཀ་ཡང་ནི་བྱིན་པར་འགྱུར། །རང་དགའི་མཆོག་བརྙེས་དེས་ནི་སྲིད་པ་གསུམ་པོའི་འཇིགས་བཅོམ་
ཆོས་ཀྱི་གཎྜཱིའི་སྒྲ་བསྒྲགས་སོ། །གྲོང་ཁྱེར་འདིར་ནི་དམན་པའི་གླ་མིས་རང་ཉིད་ཟས་བཅད་དོན་གཉེར་རང་སངས་རྒྱས་ཞིག་ལ། །ལྷད་ཟན་ཆངས་པས་ཡང་དག་བཀུར་བྱས་མཆོད་པ་དེ་ཡིས་གྲོང་ཁྱེར་དེར་ནི་ཀོ་ས་ལའི། །དབང་ཕྱུག་ཉིད་ཐོབ་དགེ་ཡོངས་གྱུར་རྨད་དུ་བྱུང་བའི་རྒྱལ་
པོར་གྱུར་ཏེ་དེ་ལ་འདིར། །འཇིག་རྟེན་གསུམ་དུ་ངོ་མཚར་སྒྲ་བསྒྲགས་འདིར་ནི་ཐུབ་པའི་ཆོས་ཀྱི་གཎྜཱིའི་སྒྲ་བསྒྲགས་སོ། །བསོད་སྙོམས་དོན་གཉེར་འདོད་ཆགས་བྲལ་ལ་བདག་ཉིད་སྔོན་སྐྱིད་བསོད་སྙོམས་སྦྱིན་པ་ལས། །རབ་ཏུ་རབ་འཇིགས་དམྱལ་བ་སྤྲུལ་ཏེ་མངོན་པར་ལོག་བརྗོད་ལྷ་

172-1-104a

ཡི་བུ་ཡིས་བཀག་པ་ལས། །དེ་དག་མ་མཉན་དམྱལ་སྐྱེས་པདྨའི་སྡོང་བུ་མཛེས་ལ་རིམ་གྱིས་གོམ་པ་དོར་ནས་ནི། །དེ་འདིར་བདུད་ལས་རྒྱལ་གྱུར་ལྷ་མིའི་བླ་མ་དེ་ཡི་ཆོས་ཀྱི་གཎྜཱིའི་སྒྲ་བསྒྲགས་སོ། །སྦྱིན་ལ་གོམས་པས་རབ་ཏུ་ཕུལ་བྱུང་མཐའ་དག་རྟོག་
པའི་ཚོང་དཔོན་གང་གི་ནོར། །ལྷ་ཡི་དབང་པོ་དེ་ཡི་ནོར་སྦས་ན་ཡང་ཟད་པར་མ་ནུས་དེ་ནི་སྦྱིན་པའི་ཆོས་དང་ལྡན། །འདི་ལྟར་དེས་ནི་ཕོངས་པ་ཟིལ་མནན་ཉམས་པར་བྱེད་བཅོམ་པ་དེ་ཡི། །ཉོན་མོངས་རབ་ཟད་སྟོབས་བཅུའི་སྟོབས་མངའ་སྟོན་པའི་ཆོས་ཀྱི་གཎྜཱིའི་སྒྲ་བསྒྲགས་སོ། །
རི་བོང་ལུས་འཛིན་བརྒྱ་བྱིན་ལུས་གཞན་བསྒྱུར་བ་གང་དེ་རྣམ་སྤྲུལ་དུ་མེད་པ་ཡི་མེ། །རབ་གསལ་གསེར་གྱི་འོད་འཚེར་མེ་སྟག་ཚོགས་འཕྲོ་མི་བཟད་པར་ནི་མཆོངས་ནས་བྱིན་པར་གྱུར། །དེ་ནི་དབང་པོས་མངོན་པར་གསལ་བར་བསྟན་པའི་དོན་དུ་སྦྱིན་པ་འདི་ནི་ངོ་མཚར་ཚུལ། །ཟླ་བའི་དཀྱིལ་
འཁོར་ལ་མཚན་དེ་རྗེས་ཐུབ་པ་མཆོག་གི་ཆོས་ཀྱི་གཎྜཱིའི་སྒྲ་བསྒྲགས་སོ། །བྲམ་ཟེ་ཨ་ག་སྟི་ཞེས་བྱ་བ་གང་བྱུང་རྒྱས་པའི་ཁྱིམ་སྐྱེས་རྩྭ་དང་འདྲ་བར་ནི། །བདེ་བས་ཡིད་བྱུང་རབ་ཞི་ངེས་པར་བྱུང་བའི་གླིང་ནི་ཉེ་གྱུར་ཏེ། །འདབ་མ་བཙོས་པ་ཙམ་ཞིག་གིས་ཚིམ་དེ་ཡང་དབང་པོས་སྦས་བྱས་
མཐའ་དག་རིག་མོད་ཀྱི། །གང་འདུག་ངེས་ཚིམ་བསྟན་པས་ཕུན་ཚོགས་མཐའ་དག་རྩོད་རྒྱལ་ཆོས་ཀྱི་གཎྜཱིའི་སྒྲ་བསྒྲགས་སོ། །ས་ཡི་བདག་པོའི་བླ་མ་བྱམས་པའི་སྟོབས་ནི་བྱུང་གྱུར་གང་གི་ཡང་དག་དོན་གྱི་མིང་། །བདག་ཉིད་ལུས་ནི་བདག་གིས་བཅད་ཅིང་ཕུག་སྟེ་ཤ་དང་ཁྲག་
དག་ཟོས་ཤིང་འཐུང་གྱུར་གང་། །གནོད་སྦྱིན་ལྔ་ནི་ཐོག་མར་མངོན་པར་བྱུང་བས་དེ་ཁོ་ན་ཉིད་ཐོབ་པས་ཚིམ་མཛད་རྒྱལ་བ་ཉིད། །གཅིག་པུ་རྗེས་བརྩེ་དྲི་མ་མེད་པའི་རྒྱ་མཚོའི་ཆོས་ཀྱི་གཎྜཱིའི་སྒྲ་བསྒྲགས་སོ། །རང་གི་སྲོག་དང་མཉམ་པའི་བུ་ནི་གསར་པའི་ལུས་དང་ཡིད་འོང་བཙུན་མོ་
རྗེས་སུ་མཐུན་པ་དག །སྡུག་བསྔལ་ཟུག་རྔུར་ལྡན་པའི་མུན་སྦྲུལ་བྲམ་ཟེས་རབ་འགྱེད་བཞིན་ཡང་རབ་དགས་ལེགས་པར་བྱིན། །ཡང་དག་རྫོགས་པའི་བྱང་ཆུབ་ཏུ་ནི་སྨོན་ལམ་མི་གཡོ་གང་གིས་ཐམས་ཅད་སྒྲོལ་དེ་ཡིས། །སྲིད་གསུམ་དམན་པའི་འདོད་ལས་རྣམ་པར་

172-1-104b

རྒྱལ་བར་གྱུར་པའི་ཆོས་ཀྱི་གཎྜཱིའི་སྒྲ་བསྒྲགས་སོ། །མཆོད་སྦྱིན་བརྩམས་ཕྱིར་རང་གི་འཇིག་རྟེན་དག་ལ་འདི་སྐད་སྨྲས་ཏེ་སྐྱེས་བུ་དག །འདི་ལྟར་སྐྱེ་བོ་སྡིག་པས་མཆོད་སྦྱིན་བྱེད་རྣམས་མྱུར་དུ་རླག་པར་འགྱུར་རོ་ཞེས་ཐོས་ཀྱི། །འདིར་ནི་སྐྱེ་བོའི་ཚོགས་རྣམས་སྡིག་པ་ལས་
ལྡོག་དགེ་བ་བཅུ་ཡི་ལམ་ཉིད་ལ་གཞག་ཅིང་། །འཕེལ་བར་བྱེད་པ་གང་ཡིན་ཐུབ་དེའི་རྗེས་སུ་སྙན་པའི་ཆོས་ཀྱི་གཎྜཱིའི་སྒྲ་བསྒྲགས་སོ། །ལྷ་མིན་གྲོང་ཁྱེར་ཚལ་དུ་ལྷ་རྣམས་ཕམ་གྱུར་ལྷན་ཅིག་བྲོས་ཚེ་བརྒྱ་བྱིན་གཟུགས་འཛིན་གྱིས། །མཁའ་ལྡིང་ཕྲུ་གུ་ཤིང་རྟའི་ལམ་
གནས་ཉམས་པར་མཐོང་སྟེ་ལྷ་རྣམས་ལྷ་སྨྲ་བརྩེ་བ་ཡིས། །བདག་ཉིད་གཅིག་པུའི་ཤིང་རྟ་ཕྱིར་ལོག་གྲོང་ཁྱེར་ས་གཞིར་ཞུགས་ཏེ་གང་གིས་ལྷ་མིན་ལས། །རྒྱལ་གྱུར་དེ་ཡི་རྗེས་བརྩེས་འགྲོ་བ་གསུམ་ལས་རྣམ་རྒྱལ་ཆོས་ཀྱི་གཎྜཱིའི་སྒྲ་བསྒྲགས་སོ། །བྲམ་ཟེ་གང་ཞིག་ལེགས་
པར་སྤྱོད་དང་ཡུལ་གཞན་བརྟན་ཞིང་ཟབ་མོའི་ཤེས་དང་ལྡན་དབུལ་བོར། །རང་གི་རྣམ་གསལ་བྱས་ནས་སུས་ཀྱང་མ་ཚོར་བར་ནི་བརྐུར་རུང་ཞེས། །མཁན་པོའི་ཆོ་གས་གཞན་ནོར་བརླག་བསྟན་འགོག་པར་བྱེད་ལྡན་དེ་ནི་སློབ་མས་མ་མཉན་ཏེ། །གཞན་གྱི་ནོར་བརླག་མི་བྱེད་རྙོག་
པ་མེད་པའི་ཆོས་ཀྱི་གཎྜཱིའི་སྒྲ་བསྒྲགས་སོ། །བུད་མེད་རིན་ཆེན་གང་ཞིག་ཇི་བཞིན་དོན་མིང་མཐའ་དག་འཇིག་རྟེན་མྱོས་བྱེད་བྱུང་བར་གྱུར། །ས་ཡི་བདག་པོ་ཤིན་ཏུ་གཞོན་སྡུག་དེ་ལས་སྐྱེས་པའི་འདོད་ཆགས་ཐོབ་གྱུར་ན་འང་གང་དེ་ལ། །དེ་ལས་བྱུང་བའི་མེ་ཡིས་བདག་གི་
སྲོག་བསྲེགས་ཀྱང་ནི་ཚུལ་ཁྲིམས་ལྷོད་ཅིང་ཉམས་མ་གྱུར། །དེ་ལྟའི་ཚུལ་ཁྲིམས་ཕུང་པོས་གསལ་ཞིང་རབ་ཏུ་སྙན་པའི་ཆོས་ཀྱི་གཎྜཱིའི་སྒྲ་བསྒྲགས་སོ། །གང་ཞིག་གྲུ་བོའི་ཚོང་པས་འགྲོན་བསྒྲུབས་འདོད་པས་གསོལ་བཏབ་དེ་དག་བལྟས་ནས་གྲུ་བོར་ནི། །དཀའ་བས་བདག་
ཉིད་ཞུགས་གྱུར་རླུང་ཆེན་ཤུགས་རླབས་ཀྱིས་ནི་རྒྱ་མཚོར་བྱིང་བར་གྱུར་པའི་ཚེ། །བདེན་པའི་ཚིག་བརྗོད་པས་ནི་རླུང་གིས་གྲུ་བོ་ཕྱིར་ལོག་དགའ་མཐའི་ངོས་སུ་ཁྱེར་སོང་གྱུར། །རབ་མཐོ་བསྟེན་པའི་བདེན་པའི་ཚིག་དེས་ཆོས་ཀྱི་གཎྜཱིའི་སྒྲ་བསྒྲགས་སོ། །ལྟེང་ཀ་ཉི་མའི་ཟེར་གྱིས་སྐམས་

172-1-105a

གཉེན་ཚོགས་དང་བཅས་ཉ་དག་ལ་ནི་ཁྭ་ལ་སོགས། །བྱ་ཚོགས་རྒྱགས་པས་ཕྱོགས་ཀུན་ནས་བསྐོར་ཟ་བར་འདོད་པ་རྣམས་ལ་བདེན་པའི་ཚིག་དག་གིས། །བྱིན་རླབས་གང་བརྗོད་མྱུར་བར་ལྷ་ཡི་བདག་པོས་ཆར་གྱི་རྒྱུན་ཕབ་སྲོག་ཆགས་རྣམས་ལ་ཡིད་མཐུན་པས། །
རྗེས་སུ་སྲུང་བྱེད་རབ་ཞིའི་རང་བཞིན་བློ་གྲོས་ཅན་དེས་ཆོས་ཀྱི་གཎྜཱིའི་སྒྲ་བསྒྲགས་སོ། །གང་ཞིག་ཆུ་འཛིན་གཞན་གྱི་ཟེར་ལས་རྒྱལ་བའི་མེ་ཡིས་བསྲེགས་ཏེ་དེ་དག་རླུང་གིས་བསྐྱོད་པ་ཡི། །མེ་རྣམས་ཀྱིས་ནི་ནམ་མཁའ་ཁྱབ་པར་བྱས་ཏེ་སྲེག་པ་ཕྲུ་གུ་ཟ་བར་འདོད་འདྲ་ལ། །དེས་ནི་ཞི་
བྱེད་བདེན་པའི་ཚིག་གིས་བྱིན་གྱིས་བརླབས་བརྗོད་པ་ལས་ཞི་བ་ཐོབ་པར་གྱུར། །བརྫུན་གྱི་ཚིག་ལས་སླར་ལོག་བཟོད་པ་ལྡན་དེ་ཡི་ཆོས་ཀྱི་གཎྜཱིའི་སྒྲ་བསྒྲགས་སོ། །མི་ཡི་བདག་པོ་ཐམས་ཅད་བཤེས་གཉེན་ཆང་འཐུང་བ་ལས་མངོན་པར་དགའ་བ་ཉིད་གྱུར་དབང་པོས་ནི། །སྐྱེས་བུ་དེ་
དག་མཐོང་སྟེ་བྲམ་ཟེའི་གཟུགས་བསྒྱུར་ཆང་གིས་གང་བའི་བུམ་པ་གང་ཞིག་ཐོགས། །མི་བདག་སྐྱེ་ཚོགས་བཅས་པ་དེ་དག་མདུན་དུ་ཆང་གི་ཉེས་པ་གང་དག་བསྟན་པ་ཡིན། །དེ་ལས་དེས་ནི་ཐམས་ཅད་རྣམ་པར་བཏུལ་ཏེ་སྐྱོན་སྤངས་པ་ཡི་མཐུ་ལྡན་ཆོས་ཀྱི་གཎྜཱིའི་སྒྲ་བསྒྲགས་སོ། །
བདག་ཉིད་རིགས་དང་ལྡན་པ་འགའ་ཞིག་བྱུང་གྱུར་འདོད་པ་རྒྱས་པའི་ཁྱིམ་ལས་ཡིད་ཕྱུང་ནས། །ཞི་བདེ་འདོད་པས་ཞི་བའི་ནགས་མཐར་སོང་སྟེ་རབ་ཏུ་བྱུང་གྱུར་ཕ་མཚུངས་དེས། །ཉེ་བར་འདོད་པའི་ཡིད་ལས་གཉེན་གཅིག་དེ་ལ་རང་ཁྱིམ་ཉེས་པ་མངོན་པར་བསྟན་ནས་ཀྱང་། །འདོད་བྱ་མིན་
བློས་རབ་མཆོག་གནས་ཀྱི་བདེ་རྙེད་དེ་ཡི་ཆོས་ཀྱི་གཎྜཱིའི་སྒྲ་བསྒྲགས་སོ། །ཕ་མ་དུས་འདས་ཁྱིམ་གྱི་བདེ་ལས་སྐྱོ་བར་གང་གྱུར་བས་མཐའི་ནགས་སུ་གནས་བཅས་ཏེ། །དེས་ནི་དྲན་གཞག་བི་ས་ལ་ཡི་འདབ་མ་རྟག་ཏུ་རུང་བ་ཁམ་གྱི་ཟས་ཀྱིས་འཚོ་བྱེད་དེ། །བརྟན་ཏེ་ཉམས་སད་བྱ་
ཕྱིར་ལྷ་ཡི་དབང་པོ་དེར་སོང་གང་གི་སྐལ་བའི་འདབ་མ་ནི། །ཉིན་ལྔ་བརྐུས་ནའང་བསམ་གཏན་བརྟན་པ་བདུད་རྩིའི་རོས་འཚོ་དེ་ཡི་ཆོས་ཀྱི་གཎྜཱིའི་སྒྲ་བསྒྲགས་སོ། །རྒྱལ་པོའི་གནང་ཆེན་གྱུར་ནས་ནོར་གྱི་བདག་པོ་ན་ཚོད་ཐོག་མ་ནད་མེད་པ་ཡི་ལུས་ལྡན་ཞིང་། །གཉེན་ཚོགས་རྣམས་

172-1-105b

ལ་བྱམས་དང་ལྡན་པའི་འཇིག་རྟེན་དག་གི་དེད་དཔོན་མཆོག་ཏུ་གྱུར་པ་གང་། །རབ་ཏུ་བྱུང་བར་གྱུར་ཅེས་འདི་ལྟར་མི་བདེན་པར་ཡང་ཡོན་ཏན་བསྒྲགས་པས་བསྐུལ་ནས་ནི། །ལེགས་པར་རབ་བྱུང་མཐའ་དག་ཡོན་ཏན་གཏམ་གྱི་འབྲས་བཅས་དེ་ཡི་ཆོས་ཀྱི་གཎྜཱིའི་སྒྲ་བསྒྲགས་སོ། །ཁྱིམ་
གནས་དགའ་ཡང་ཉེ་བར་སྤངས་གྱུར་གང་འགར་བརྩེ་བ་ཁོ་ནས་ཆུང་མ་གཅིག་ཡོད་ལས། །བས་མཐའ་གང་དུ་གནས་བཅས་རབ་ཞི་དགའ་བས་གནས་ལས་དེར་ནི་རྒྱལ་པོ་གང་གིས་དེ། །བརྟག་ཕྱིར་བརྟུལ་ཞུགས་ལེགས་ཞེས་བསྟོད་ནས་ཁྱིམ་ཐབ་ཕྲོགས་ཀྱང་རབ་ཏུ་ཁྲོ་བ་ངེས་བཅོམ་སྟེ། །དེ་ལ་སླར་
ཡང་ཆོས་བསྟན་རྣམ་རྒྱལ་དེ་ཡི་རྗེས་སུ་ཆོས་ཀྱི་གཎྜཱིའི་སྒྲ་བསྒྲགས་སོ། །སྣ་ཚོགས་ཡིད་བཞིན་མཚོ་ནི་དྲི་མ་མེད་པར་བཞིན་བཟངས་མདུན་བདར་ངང་པའི་རྒྱལ་པོ་ནི། །རྒྱལ་པོ་ཐོབ་གྱུར་བློན་པོར་བཅས་བཟུང་ནས་ནི་ཚངས་པས་བྱིན་གྱིས་རྒྱལ་པོ་ཐོབ་གྱུར་ཏེ། །ཆོས་བསྟན་ཀུན་ནས་ཉོན་མོངས་
སྲ་བའི་བྱ་རྙི་ལས་གྲོལ་གང་གྱུར་འགྲོ་བ་གསུམ་པོ་ཡི། །ཉོན་མོངས་རྙི་རྣམས་རབ་ཏུ་བཅོམ་པའི་མཁས་པ་དེ་ཡི་ཆོས་ཀྱི་གཎྜཱིའི་སྒྲ་བསྒྲགས་སོ། །རྒྱལ་པོ་གང་གི་གནས་ན་གཅིག་ཏུ་བྱམས་དང་ལྡན་པའི་ཀུན་དུ་རྒྱུ་ཞིག་ཡོད་གྱུར་ལ། །དེ་ཡི་བཀའ་རིག་ནས་ནི་བདག་ཉིད་དེ་གནས་ལས་སོང་
གང་ཞིག་གཅིག་ཏུ་ཞི་བའི་ནགས་མཐར་གནས། །དེར་ནི་མངོན་ཤེས་ཡེ་ཤེས་ཐོབ་བྱས་སླར་ཡང་མི་བདག་དེ་ཡི་ལོག་ལྟའི་དྲ་བ་ལས། །རབ་ཏུ་བསྲུངས་ཏེ་ལྟ་བ་སྤངས་གྱུར་སྨན་པ་དེ་ཡི་ཆོས་ཀྱི་གཎྜཱིའི་སྒྲ་བསྒྲགས་སོ། །བས་མཐའ་གང་དུ་སྤྲེའུའི་བདག་ཉིད་གྱུར་ནས་མི་ཡི་ཡོན་ཏན་ལས་རྒྱལ་
ལེགས་པའི་ཡོན་ཏན་ཅན། །དེར་ནི་མི་ཞིག་སྡོང་པོ་མཆོག་ཆག་གཡང་ས་ཆེར་ལྷུང་ཁུང་བུར་ཆོ་ངེས་འདོན་པ་མཐོང་བར་གྱུར། །མཐོང་ནས་ཀྱང་ནི་འདི་ལྟར་སྙིང་ལ་རྗེས་བརྩེ་ཡོངས་ལྡན་གང་དེས་མཆོངས་ནས་ཕྱུང་སྟེ་བརྟས། །མི་བདེ་རྣམས་ལས་སྲིད་གསུམ་ཕན་པར་མཛད་པ་དེ་ཡི་ཆོས་ཀྱི་
གཎྜཱིའི་སྒྲ་བསྒྲགས་སོ། །མི་བདག་གང་ཞིག་དངོས་སུ་རི་དགས་ཤ་ར་བྷ་ཡི་རི་དགས་གསད་ཕྱིར་རྟ་ལ་ཞོན་ནས་ནི། །མགྱོགས་བརྒྱུགས་པ་ལས་ཁྲོན་པར་ལྷུང་ནས་དེ་མངོན་སོང་སྟེ་གཡང་ས་ལས་གང་ཕྱུང་གྱུར་པ། །མི་ཤེས་པ་དང་བུ་ཡང་མཚུངས་ཉིད་ལྟ་བུ་ཁོ་ནར་བྱས་ཏེ་རྗེས་སུ་བརྩེ་བ་

172-1-106a

ཡིས། །སེམས་ཅན་རྣམས་ཀྱི་སྡུག་བསྔལ་ཀུན་ཟད་མཛངས་པར་གྱུར་དེས་ཆོས་ཀྱི་གཎྜཱིའི་སྒྲ་བསྒྲགས་སོ། །མི་གང་ཆུ་བོས་ཁྱེར་གྱུར་སྣ་ཚོགས་མཛེས་པའི་རུ་རུའི་རི་དགས་ཀྱིས་ནི་ཕྱུང་ནས་སུ། །འདི་སྐད་མངགས་ཏེ་འཇིག་རྟེན་སུ་ལའང་མ་སྨྲ་ཁོ་བོ་གནས་ཀྱང་མ་
བརྗོད་ཞེས་པ་ལས། །དེས་ནི་ས་འཛིན་ལ་ནི་ལག་པས་མི་རྣམས་ལ་བསྟན་མཁྲིག་མ་གཅིག་ནི་ཆད་པར་གྱུར། །མི་དེའང་སྐྱབས་ཤིང་མི་ཡི་དབང་པོ་ལ་ནི་གདམས་བྱས་དེ་ཡི་ཆོས་ཀྱི་གཎྜཱིའི་སྒྲ་བསྒྲགས་སོ། །གནས་གང་ཞིག་ན་ལྗོན་པའི་རི་དང་ལྡན་པའི་འབྲས་བུ་ལྷུང་གྱུར་ཆུ་བོས་ཁྱེར་བ་
ཞིག །རྒྱལ་པོ་དེ་ཡི་མཐུ་རྩལ་རྗེས་སུ་འཚོལ་བས་རང་གི་གཉེན་རྣམས་གསད་འདོད་རི་བོའི་རྩེར། །རང་གི་རྐང་པ་གཉིས་ཆར་རབ་ཏུ་སྲ་བར་བཅིངས་ཏེ་སྲ་བར་བྱས་ནས་མཐར་ཕྱུང་ནུས། །ངལ་བས་དེར་ནི་བདག་ཉིད་དོར་གྱུར་དེ་ཡི་རྗེས་སུ་ཆོས་ཀྱི་གཎྜཱིའི་སྒྲ་བསྒྲགས་སོ། །བརྫུན་
པས་རབ་ཏུ་བརྟགས་པའི་སྐྱོན་གྱིས་ཉམས་པར་འོས་པའི་བློ་གྲོས་ཅན་ཡིད་རང་གི་ལུས། །འདར་ཞིང་ཁྲོ་བས་མི་བདག་འཇིགས་བྱེད་མིག་ནི་དམར་ཞིང་ཉོན་མོངས་རལ་གྲི་ས་རབ་ཏུ་བཅོམ། །བདེན་པའི་དོན་ཅན་བཟོད་པར་སྨྲ་བས་རང་ལུས་ལྟོས་དོར་གང་ཞིག་འགར་ཡང་མི་བཟོད་པས། །
རབ་ཏུ་གནོད་པར་བྱེད་ལ་གནོད་བཟོད་ཡིད་ལ་བྱེད་པའི་ཆོས་ཀྱི་གཎྜཱིའི་སྒྲ་བསྒྲགས་སོ། །མི་ཡི་བདག་པོ་ཡན་ལག་བྱིན་ནི་མི་དགེ་ཆད་ལྟ་རབ་ཏུ་བསྐྱེད་ལ་ཚངས་པར་གྱུར་པ་ཡིས། །མདུན་གྱི་ནམ་མཁར་གནས་ཏེ་རབ་ཏུ་གསལ་བའི་ཚིག་གིས་སུན་ཕྱུང་འཇིག་རྟེན་གཞན་པ་ནི། །ཐུགས་
བརྩེས་བསྲུངས་ཏེ་མི་ཤེས་པ་ཡི་མུན་པ་མཐའ་དག་རབ་ཏུ་བཅོམ་ནས་མི་བདེན་པའི། །ལྟ་བའི་དྲ་བ་གཅོད་བྱེད་བློ་གྲོས་ལྡན་པ་དེ་ཡི་ཆོས་ཀྱི་གཎྜཱིའི་སྒྲ་བསྒྲགས་སོ། །ཤིན་ཏུ་མཐུག་པའི་ནགས་སུ་གནས་ནས་ཕྱུང་ཚེ་མི་ནི་བདུན་བརྒྱ་མཐོང་ནས་ཉེ་བ་ཡི། །རི་བོའི་སྟེང་ན་གླང་ཆེན་མཆོག་ནི་ཤི་
བའི་ཤ་ཡོད་སོང་ལ་ལམ་བརྒྱགས་བྱོས་ཞེས་སྨྲས། །གླང་པོའི་རྒྱལ་པོ་གང་ཞིག་བརྩེ་བར་ལྡན་བྱའི་རི་བོའི་རྩེ་ནས་བདག་ཉིད་ལུས་མཆོངས་དོར། །སྲོག་ཆགས་རྣམས་ལ་བྱམས་ལྡན་རྡུལ་རྣམས་སྤངས་པ་དེ་ཡི་ཆོས་ཀྱི་གཎྜཱིའི་སྒྲ་བསྒྲགས་སོ། །གང་ཞིག་ཤིན་ཏུ་དུལ་བས་ཚ་གདུང་མི་ཡི་སྒྱུ་

172-1-106b

མ་དང་ནི་ཤ་ཚིལ་གློ་བས་མངོན་གང་བར། །སུ་ད་ས་ནི་ཆོས་ཀྱི་དབྱི་གུས་དཔེ་མེད་བརྩེ་བ་བརྩོན་འགྲུས་བདེན་པ་རབ་ཏུ་འཁྲུངས། །དེ་ཐབས་སྨོན་པས་སྲོག་ཆགས་སྨན་པ་དང་ནི་བདེ་བའི་ཆོ་གས་སྲིད་པའི་གནས། །སྡུག་བསྔལ་རྒྱུ་དང་སྡུག་བསྔལ་སླར་ཟློག་པ་ཡི་དོན་བྱས་ཆོས་ཀྱི་གཎྜཱིའི་སྒྲ་
བསྒྲགས་སོ། །ན་དང་སྐྱེ་བ་ལ་སོགས་ཟུག་རྔུ་འཇིགས་པ་མང་པོ་མཐོང་སྟེ་འབར་བའི་མེ་སྟག་རབ་འཕྲོ་བའི། །ཁང་པ་ཉེ་བར་ཞི་བྱའི་ཕྱིར་ནི་འགྲོ་འདི་མཐའ་དག་སྐྱོ་བའི་སེམས་གྱུར་ཅིང་། །རྒྱལ་པོའི་ཕུན་ཚོགས་ཇི་ལྟར་རྩྭ་བཞིན་གང་སྤངས་ལྕགས་ཁྱིམ་ཆེན་པོར་བསྲུངས་ན་ཡང་། །
ནགས་མཐར་རབ་ཏུ་སོང་གྱུར་དེ་ཡི་རྗེས་སུ་ལེགས་པའི་སྤྱོད་ལྡན་ཆོས་ཀྱི་གཎྜཱིའི་སྒྲ་བསྒྲགས་སོ། །རྟག་ཏུ་མང་པོའི་རྣམ་པས་རྣམ་པར་གནོད་བྱེད་ཡལ་ག་རི་དགས་འདུག་པ་འཁྲུགས་པས་ནི། །གང་འདོད་མཆོག་གི་ལུས་ཅན་ལང་ཚོ་ལྡན་པའི་མ་ཧེ་ལ་ནི་གནོད་སྦྱིན་གྱིས་བསྐུལ་ནས། །
གང་བརྗོད་མཐའ་དག་ཤིན་ཏུ་བཟོད་པའི་ཡོན་ཏན་གཏེར་གྱུར་ཐར་པའི་ལམ་གྱི་གཙོ། །བཟོད་པའི་འབྱུང་གནས་དང་མཚུངས་པ་ཡི་མི་གཡོ་དེ་ཡི་ཆོས་ཀྱི་གཎྜཱིའི་སྒྲ་བསྒྲགས་སོ། །གང་ཞིག་འདབ་གཤོག་རྒྱས་པ་ཡོན་ཏན་བརྒྱ་ཕྲག་རབ་མཆོག་ཡང་དག་བརྒྱན་པའི་བདག་ཉིད་ཀྱི། །
བྱ་ཞིག་བྱུང་གྱུར་རི་དགས་དགྲ་ཡི་མགྲིན་པར་རུས་པའི་དུམ་བུ་རིང་པོར་ཟུག་པ་ཕྱུང་བྱས་ཏེ། །རི་དགས་དེས་སླར་བསད་ཅིང་ཟ་ཕྱིར་བརྙས་ཐོབ་གྱུར་མོད་དེ་ནི་ནུས་ནའང་ཁྲོ་མ་གྱུར། །བཟོད་པའི་ཞིང་དེའི་འཆི་མེད་རང་བཞིན་འབྲས་བུ་བཅས་གྱུར་ཆོས་ཀྱི་གཎྜཱིའི་སྒྲ་བསྒྲགས་སོ། །ཇི་
སྲིད་རི་རབ་ཉི་མ་ཟླ་བས་རབ་གསལ་རྩེ་ནས་འོད་ཆེན་འཕྲོས་པས་སྣང་བར་བྱས་ལྗོངས་དང་། །ཇི་སྲིད་ཆུ་བོ་འཛིན་ཁྲི་ཉ་དང་ཆུ་སྲིན་རླུང་རྣམས་ཀྱིས་དཀྲུགས་གནས་ནི་ལན་ཚྭའི་རྒྱ་མཚོ་དང་། །ཇི་སྲིད་ས་ནི་རི་དང་གྲོང་དང་ལྗོན་ཤིང་ནགས་ཚལ་གྲོང་ཁྱེར་ལྗོངས་དང་ལྟང་རྒྱུན་འབབ་བཅས་
གནས། །དེ་སྲིད་མདོར་ན་སྟོན་པའི་བཀའ་ཡིས་སྲིད་པའི་ཁང་པ་མི་བཟད་ལྷུང་གྱུར་འགྲོ་བ་མཐའ་དག་རབ་ཞི་ཤོག །བྱང་ཆུབ་སེམས་དཔའི་སྐྱེས་པའི་རབས་ཀྱི་ཆོས་ཀྱི་གཎྜཱིའི་སྒྲ་བསྒྲགས་པ་སྙན་དངགས་མཁན་ཆེན་པོ་སློབ་དཔོན་དཔའ་བོས་མཛད་པ་རྫོགས་སོ།།      །།དཔལ་

172-1-107a

ཆོས་ཀྱི་རྗེ་སའི་སྟེང་ན་འགྲན་ཟླ་དང་བྲལ་བའི་པཎྜི་ཏ་ཆེན་པོ་ཁ་ཆེ་ཤཱཀྱ་ཤྲཱི་བཟང་པོ་དང་། ལོ་ཙཱ་བ་དགེ་སློང་བྱམས་པའི་དཔལ་གྱིས་བསྒྱུར།།      །།༄༅༅། །རྒྱ་གར་སྐད་དུ། རཱ་ཛ་པ་རི་ཀ་ཐཱ་རཏྣ་མཱ་ལཱི། བོད་སྐད་དུ། རྒྱལ་པོ་ལ་གཏམ་
བྱ་བ་རིན་པོ་ཆེའི་ཕྲེང་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཉེས་པ་ཀུན་ལས་རྣམ་གྲོལ་ཞིང་། །ཡོན་ཏན་ཀུན་གྱིས་བརྒྱན་པ་པོ། །སེམས་ཅན་ཀུན་གྱི་གཉེན་གཅིག་པོ། །ཐམས་ཅད་མཁྱེན་ལ་བདག་ཕྱག་འཚལ། །རྒྱལ་པོ་ཁྱོད་ལ་ཆོས་
སྒྲུབ་ཕྱིར། །ཅིག་ཏུ་དགེ་བའི་ཆོས་བཤད་དེ། །དམ་པའི་ཆོས་ཀྱི་སྣོད་ལ་ནི། །ཆོས་འགྲུབ་འགྱུར་ཏེ་གང་ཞིག་ལ། །དང་པོར་མངོན་པར་མཐོ་བའི་ཆོས། །ཕྱིས་ནི་ངེས་པར་ལེགས་འབྱུང་བ། །གང་ཕྱིར་མངོན་པར་མཐོ་ཐོབ་ནས། །རིམ་གྱིས་ངེས་པར་ལེགས་པ་འོང་། །
དེ་ལ་མངོན་མཐོ་བདེ་བ་སྟེ། །ངེས་པར་ལེགས་པ་ཐར་པར་འདོད། །དེ་ཡི་བསྒྲུབ་པ་མདོར་བསྡུ་ན། །མདོར་ན་དད་དང་ཤེས་རབ་བོ། །དད་ཅན་ཉིད་ཕྱིར་ཆོས་ལ་བརྟེན། །ཤེས་རབ་ལྡན་ཕྱིར་ཡང་དག་རིག །འདི་གཉིས་གཙོ་བོ་ཤེས་རབ་སྟེ། །འདི་སྔོན་འགྲོ་བ་དད་པ་ཡིན། །འདུན་དང་
ཞེ་སྡང་འཇིགས་པ་དང་། །རྨོངས་པས་གང་ཞིག་ཆོས་མི་འདའ། །དེ་ནི་དད་པ་ཅན་ཞེས་བྱ། །ངེས་པར་ལེགས་པའི་སྣོད་མཆོག་ཡིན། །གང་ཞིག་ལུས་ངག་ཡིད་ཀྱི་ལས། །ཐམས་ཅད་ལེགས་པར་ཡོངས་བརྟགས་ཏེ། །བདག་དང་གཞན་ལ་ཕན་ཤེས་ནས། །རྟག་ཏུ་བྱེད་པ་དེ་
མཁས་པ། །མི་གསོད་པ་དང་རྐུ་སྤོང་དང་། །གཞན་གྱི་ཆུང་མ་སྤོང་བ་དང་། །ལོག་དང་ཕྲ་མ་རྩུབ་ཉིད་དང་། །མ་འབྲེལ་སྨྲ་བ་ཡང་དག་སྡོམ། །ཆགས་དང་གནོད་སེམས་མེད་པ་ལ། །ཉིད་ཀྱི་ལྟ་བ་ཡོངས་སྤོང་བ། །འདི་དག་ལས་ལམ་དཀར་བཅུ་སྟེ། །བཟློག་པ་དག་ནི་ནག་པོ་
ཡིན། །ཆང་མི་འཐུང་དང་འཚོ་བ་བཟང་། །རྣམ་མི་འཚེ་དང་གུས་སྦྱིན་དང་། །མཆོད་འོས་མཆོད་དང་བྱམས་པ་སྟེ། །མདོར་ན་ཆོས་ནི་དེ་ཡིན་ནོ། །ལུས་གདུང་བྱེད་པ་འབའ་ཞིག་ལས། །ཆོས་མེད་འདི་ལྟར་དེ་ཡིས་ནི། །གཞན་ལ་གནོད་པ་སྤོང་མེད་ཅིང་། །གཞན་ལ་ཕན་འདོགས་

172-1-107b

ཡོད་མ་ཡིན། །སྦྱིན་དང་ཚུལ་ཁྲིམས་བཟོད་གསལ་བ། །དམ་ཆོས་ལམ་པོ་ཆེ་ལ་གང་། །མ་གུས་ལུས་གདུང་གནག་ལམ་ལྟའི། །ལམ་གོལ་དག་ནས་འགྲོ་བ་དེ། །འཁོར་བའི་འབྲོག་ནི་མི་བཟད་པའི། །མཐའ་ཡས་སྐྱེ་བོ་ཤིང་ཅན་དུ། །ཉོན་མོངས་གདུག་པས་འཁྱུད་པའི་ལུས། །
ཤིན་ཏུ་ཡུན་རིང་འཇུག་པར་འགྱུར། །གསོད་པ་ཡིས་ནི་ཚེ་ཐུང་འགྱུར། །རྣམ་པར་འཚེ་བས་གནོད་པ་མང་། །རྐུ་བ་ཡིས་ནི་ལོངས་སྤྱོད་ཕོངས། །བྱི་བོ་བྱེད་པས་དགྲ་དང་བཅས། །བརྫུན་དུ་སྨྲ་བས་སྐུར་བ་སྟེ། །ཕྲ་མ་ཡིས་ནི་བཤེས་དང་འབྱེ། །ཚིག་རྩུབ་ཉིད་ཀྱིས་མི་སྙན་ཐོས། །མ་
འབྲེལ་བ་ཡིས་ཚིག་མི་བཙུན། །བརྣབ་སེམས་ཡིད་ལ་རེ་བ་འཇོམས། །གནོད་སེམས་འཇིགས་པ་སྦྱིན་པར་བྱེད། །ལོག་པར་ལྟ་བས་ལྟ་ངན་ཉིད། །ཆང་འཐུངས་པས་ནི་བློ་འཁྲུལ་ཏེ། །སྦྱིན་པ་མ་བཏང་དབུལ་བ་ཉིད། །ལོག་པར་འཚོ་བས་བསླུས་པ་སྟེ། །ཁེངས་པ་ཡིས་ནི་
རིགས་ངན་ཉིད། །ཕྲག་དོག་གིས་ནི་གཟི་ཆུང་ཉིད། །ཁྲོ་བས་ཁ་དོག་ངན་པ་ཉིད། །མཁས་ལ་མི་འདྲི་བླུན་པ་ཉིད། །མི་ཉིད་ལ་ནི་འབྲས་བུ་འདི། །ཀུན་གྱི་དང་པོ་ངན་འགྲོར་རོ། །མི་དགེ་ཞེས་བྱ་དེ་དག་གི། །རྣམ་སྨིན་བསྒྲགས་པ་གང་ཡིན་པ། །དགེ་བ་དག་ནི་ཐམས་ཅད་
ལ། །འབྲས་བུ་དེ་ནི་བཟློག་སྟེ་འབྱུང་། །ཆགས་དང་ཞེ་སྡང་གཏི་མུག་དང་། །དེས་བསྐྱེད་ལས་ནི་མི་དགེ་བ། །མ་ཆགས་ཞེ་སྡང་གཏི་མུག་མེད། །དེས་བསྐྱེད་ལས་དེ་དགེ་བ་ཡིན། །མི་དགེ་བ་ལས་སྡུག་བསྔལ་ཀུན། །དེ་བཞིན་ངན་འགྲོ་ཐམས་ཅད་དོ། །དགེ་ལས་
བདེ་འགྲོ་ཐམས་ཅད་དང་། །སྐྱེ་བ་ཀུན་དུ་བདེ་བ་དག །ཡིད་དང་ལུས་དང་ངག་གིས་ནི། །མི་དགེ་ཀུན་ལས་ལྡོག་བྱ་ཞིང་། །དགེ་ལ་རྟག་ཏུ་འཇུག་བྱ་བ། །ཆོས་འདི་རྣམ་པ་གཉིས་སུ་བཤད། །ཆོས་འདིས་དམྱལ་བ་ཡི་དགས་དང་། །དུད་འགྲོ་དག་ལས་རྣམ་གྲོལ་ཞིང་། །
ལྷ་དང་མི་ཡི་ནང་དག་ཏུ། །བདེ་དཔལ་རྒྱལ་སྲིད་རྒྱས་པ་འཐོབ། །བསམ་གཏན་ཚད་མེད་གཟུགས་མེད་ཀྱི། །ཚངས་སྩོགས་བདེ་བ་མྱོང་བར་བྱེད། །དེ་ལྟར་མངོན་མཐོའི་ཆོས་འདི་དང་། །དེ་ཡི་འབྲས་བུ་མདོར་བསྡུས་པའོ། །ངེས་པར་ལེགས་པའི་ཆོས་དག་ཀྱང་། །ཕྲ་ཞིང་

172-1-108a

ཟབ་པར་སྣང་བ་དང་། །བྱིས་པ་ཐོས་དང་མི་ལྡན་ལ། །སྐྲག་པར་བྱེད་པར་རྒྱལ་བས་གསུངས། །བདག་ཡོད་མ་ཡིན་ཡོད་མི་འགྱུར། །བདག་གི་ཡོད་མིན་མི་འགྱུར་ཞེས། །བྱིས་པ་དག་ནི་དེ་ལྟར་སྐྲག །མཁས་པ་ལ་ནི་སྐྲག་པ་ཟད། །སྐྱེ་དགུ་འདི་ནི་མ་ལུས་
པ། །ངར་འཛིན་པ་ལས་བྱུང་བ་དང་། །ང་ཡིར་འཛིན་ལྡན་སྐྱེ་དགུ་ལ། །ཕན་པ་གཅིག་ཏུ་གསུང་བས་གསུངས། །བདག་ཡོད་བདག་གིར་ཡོད་ཅེས་པ། །འདི་ནི་དམ་པའི་དོན་དུ་ལོག །གང་ཕྱིར་ཡང་དག་ཇི་ལྟ་བ། །ཡོངས་སུ་ཤེས་པས་གཉིས་མི་འབྱུང་། །ངར་འཛིན་ལས་བྱུང་ཕུང་
པོ་རྣམས། །ངར་འཛིན་དེ་ནི་དོན་དུ་བརྫུན། །གང་གིས་ས་བོན་བརྫུན་པ་དེའི། །སྐྱེ་བ་བདེན་པ་ག་ལ་ཞིག །ཕུང་པོ་དེ་ལྟར་མི་བདེན་པར། །མཐོང་ནས་ངར་འཛིན་སྤོང་བར་འགྱུར། །ངར་འཛིན་པ་དག་སྤངས་ནས་ནི། །ཕྱིས་ནི་ཕུང་པོ་འབྱུང་མི་འགྱུར། །ཇི་ལྟར་མེ་ལོང་བརྟེན་ནས་སུ། །
རང་བཞིན་གཟུགས་བརྙན་སྣང་མོད་ཀྱི། །དེ་ནི་ཡང་དག་ཉིད་དུ་ན། །ཅུང་ཟད་ཀྱང་ནི་ཡོད་མིན་པ། །དེ་བཞིན་ཕུང་པོ་རྣམས་བརྟེན་ནས། །ངར་འཛིན་པ་ནི་དམིགས་པར་འགྱུར། །རང་གི་བཞིན་གྱི་གཟུགས་བརྙན་བཞིན། །ཡང་དག་ཉིད་དུ་དེ་འགའ་མེད། །ཇི་ལྟར་མེ་ལོང་མ་བརྟེན་
པར། །རང་བཞིན་གཟུགས་བརྙན་མི་སྣང་ལྟར། །ཕུང་པོ་རྣམས་ལ་མ་བརྟེན་པར། །ངར་འཛིན་པ་ཡང་དེ་དང་འདྲ། །འཕགས་པ་ཀུན་དགའ་བོ་ཡིས་ནི། །དེ་ལྟ་བུ་ཡི་དོན་ཐོས་ནས། །ཆོས་ལ་མིག་འཐོབ་བདག་ཉིད་ཀྱིས། །དགེ་སློང་རྣམས་ལ་བཟླས་ཏེ་སྨྲས། །ཇི་སྲིད་ཕུང་པོར་
འཛིན་ཡོད་པར། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །དེ་ལས་ཡང་ནི་སྐྱེ་བ་ཡིན། །ལམ་གསུམ་ཐོག་མཐའ་དབུས་མེད་པ། །འཁོར་བའི་དཀྱིལ་འཁོར་མགལ་མེ་ཡི། །དཀྱིལ་འཁོར་ལྟ་བུར་ཕན་ཚུན་གྱི། །རྒྱུ་ཅན་འདི་ནི་འཁོར་བར་འགྱུར་། །དེ་ནི་རང་གཞན་
གཉིས་ཀ་དང་། །དུས་གསུམ་ཉིད་དུའང་མ་ཐོབ་ཕྱིར། །ངར་འཛིན་པ་ནི་ཟད་པར་འགྱུར། །དེ་ནས་ལས་དང་སྐྱེ་བ་ཡང་། །དེ་ལྟར་རྒྱུ་འབྲས་སྐྱེ་བ་དང་། །དེ་དག་ཟད་པ་ཉིད་མཐོང་ནས། །ཡང་དག་ཉིད་དུ་འཇིག་རྟེན་ལ། །ཡོད་མེད་ཉིད་དུ་མི་སེམས་སོ། །སྡུག་བསྔལ་ཐམས་ཅད་ཟད་པ་ཡིས། །

172-1-108b

ཆོས་འདི་ཐོས་ནས་རྟོག་མེད་པ། །མི་འཇིགས་གནས་ལ་སྡར་བ་དག །ཡོངས་སུ་མི་ཤེས་ཕྱིར་སྐྲག་གོ། །མྱ་ངན་འདས་ལ་འདི་དག་ཀུན། །མེད་པར་གྱུར་ན་ཁྱོད་མི་འཇིགས། །འདིར་ནི་མེད་པར་བཤད་པ་ལ། །ཁྱོད་ནི་ཇི་སྟེ་འཇིགས་པར་བྱེད། །ཐར་ལ་བདག་མེད་ཕུང་པོ་
མེད། །གལ་ཏེ་ཐར་པ་དེ་འདྲར་འདོད། །བདག་དང་ཕུང་པོ་གསལ་བ་ལ། །འདིར་ནི་ཁྱོད་ཀོ་ཅིས་མི་དགའ། །མྱ་ངན་འདས་པ་དངོས་མེད་པའང་། །མིན་ན་དེ་དངོས་ག་ལ་ཡིན། །དངོས་དང་དངོས་མེད་དེར་འཛིན་པ། །ཟད་པ་མྱ་ངན་འདས་ཤེས་བྱའོ། །མདོར་ན་མེད་པར་ལྟ་བ་
ཉིད། །ལས་ཀྱི་འབྲས་བུ་མེད་ཅེས་པ། །བསོད་ནམས་མ་ཡིན་ངན་སོང་བ། །དེ་ནི་ལོག་པར་ལྟ་ཞེས་བཤད། །མདོར་ན་ཡོད་པར་ལྟ་བ་ཉིད། །ལས་ཀྱི་འབྲས་བུ་ཡོད་ཅེས་པ། །བསོད་ནམས་བདེ་འགྲོ་རྒྱུ་མཐུན་པ། །ཡང་དག་ལྟ་བ་ཞེས་བཤད་དོ། །ཤེས་པས་མེད་དང་ཡོད་
ཞིའི་ཕྱིར། །སྡིག་དང་བསོད་ནམས་ལས་འདས་པ། །དེ་ཡིས་ངན་འགྲོ་བདེ་འགྲོ་ལ། །དེ་ནི་ཐར་པར་དམ་པས་བཤད། །རྒྱུ་དང་བཅས་པས་སྐྱེ་མཐོང་བས། །མེད་པ་ཉིད་ལས་འདས་པ་ཡིན། །རྒྱུ་དང་བཅས་པས་འགག་མཐོང་བས། །ཡོད་པ་ཉིད་དུའང་ཁས་མི་ལེན། །སྔར་
སྐྱེས་པ་དང་ལྷན་ཅིག་སྐྱེས། །རྒྱུ་མིན་དོན་དུ་རྒྱུ་མེད་དོ། །བཏགས་དང་ཡང་དག་ཉིད་དུ་ན། །སྐྱེ་བའང་རབ་ཏུ་མ་གྲགས་ཕྱིར། །འདི་ཡོད་པས་ན་འདི་འབྱུང་དཔེར། །རིང་པོ་ཡོད་པས་ཐུང་ངུ་བཞིན། །འདི་སྐྱེས་པས་ན་འདི་སྐྱེ་དཔེར། །མར་མེ་བྱུང་བས་འོད་བཞིན་ནོ། །
རིང་པོ་ཡོད་ན་ཐུང་ངུ་ཉིད། །རང་གི་ངོ་བོ་ལས་མ་ཡིན། །མར་མེ་བྱུང་བ་མེད་པའི་ཕྱིར། །འོན་ཀྱང་འབྱུང་བ་མེད་པ་བཞིན། །དེ་ལྟར་རྒྱུ་འབྲས་སྐྱེ་མཐོང་ཞིང་། །འཇིག་རྟེན་འདི་ན་ཇི་བཞིན་དུ། །སྤྲོས་ལས་བྱུང་བར་ཁས་བླངས་ནས། །མེད་པ་ཉིད་དུ་ཁས་མི་ལེན། །འགོག་
པ་སྤྲོས་ལས་མ་བྱུང་བ། །ཡང་དག་ཇི་བཞིན་ཉིད་གྱུར་པ། །ཁས་ལེན་ཡོད་པ་ཉིད་མི་འགྱུར། །དེས་ན་གཉིས་མི་བརྟེན་པ་གྲོལ། །ཐག་རིང་ནས་ནི་མཐོང་བའི་གཟུགས། །ཉེ་བ་རྣམས་ཀྱིས་གསལ་བར་མཐོང་། །སྨིག་རྒྱུ་གལ་ཏེ་ཆུ་ཡིན་ན། །ཉེ་བ་རྣམས་ཀྱིས་ཅིས་མི་མཐོང་། །

172-1-109a

ཇི་ལྟར་རིང་བ་རྣམས་ཀྱིས་ནི། །འཇིག་རྟེན་འདི་ནི་ཡང་དག་མཐོང་། །དེ་ལྟར་དེ་དང་ཉེ་རྣམས་ཀྱིས། །མི་མཐོང་མཚན་མེད་སྨིག་རྒྱུ་བཞིན། །ཇི་ལྟར་སྨིག་རྒྱུ་ཆུ་འདྲ་བ། །ཆུ་མིན་དོན་དུ་མ་ཡིན་པ། །དེ་བཞིན་ཕུང་པོ་བདག་འདྲ་བ། །དེ་དག་བདག་མིན་དོན་
དུ་མིན། །སྨིག་རྒྱུ་ལ་ནི་འདི་ཆུ་ཞེས། །བསམ་དེ་དེ་ནི་སོང་བ་ལས། །གལ་ཏེ་ཆུ་དེ་མེད་དོ་ཞེས། །འཛིན་པ་དེ་ནི་བླུན་པ་ཉིད། །དེ་བཞིན་སྨིག་རྒྱུ་ལྟ་བུ་ཡི། །འཇིག་རྟེན་ཡོད་པའམ་མེད་པ་ཞེས། །འཛིན་པ་དེ་ནི་རྨོངས་པ་སྟེ། །རྨོངས་པ་ཡོད་ན་མི་གྲོལ་ལོ། མེད་པ་
པ་ནི་ངན་འགྲོར་འགྲོ། །ཡོད་པ་པ་ནི་བདེ་འགྲོར་འགྲོ། །ཡང་དག་ཇི་བཞིན་ཡོངས་ཤེས་ཕྱིར། །གཉིས་ལ་མི་བརྟེན་ཐར་པར་འགྱུར། །ཡང་དག་ཇི་བཞིན་ཡོངས་ཤེས་པས། །མེད་དང་ཡོད་པར་མི་འདོད་པ། །དེ་ཕྱིར་མེད་པ་པར་འགྱུར་ན། །ཅི་ཕྱིར་ཡོད་པ་པར་མི་འགྱུར། །
གལ་ཏེ་ཡོད་པ་སུན་ཕྱུང་བས། །དོན་གྱིས་འདི་ནི་མེད་པར་བསླན། །དེ་བཞིན་མེད་པ་སུན་ཕྱུང་བས། །ཡོད་པར་ཅི་ཡི་ཕྱིར་མི་བསླན། །གང་དག་དོན་གྱི་མེད་ཉིད་དུ། །དམ་མི་འཆའ་ཞིང་མི་སྤྱོད་པ། །བྱང་ཆུབ་རྟེན་ཕྱིར་སེམས་མེད་ན། །དེ་དག་ཇི་ལྟར་མེད་པར་བཤད། །གང་
ཟག་ཕུང་པོར་སྨྲ་བ་ཡི། །འཇིག་རྟེན་གྲངས་ཅན་འུག་ཕྲུག་དང་། །གོས་མེད་བཅས་ལ་གལ་ཏེ་ཞིག །ཡོད་མེད་འདས་པ་སྨྲ་ན་དྲིས། །དེ་ཕྱིར་སངས་རྒྱས་རྣམས་ཀྱི་ནི། །བསྟན་པ་འཆི་མེད་ཡང་མེད་ལས། །འདས་པ་ཟབ་མོ་འདི་བཤད་པ། །ཆོས་ཀྱི་ཁུད་པ་ཡིན་
ཞེས་གྱིས། །ཞིག་ནས་འགྲོ་མེད་འོང་མེད་ཅིང་། །སྐད་ཅིག་ཀྱང་ནི་མི་གནས་པ། །དེ་ལྟར་དུས་གསུམ་འདས་པའི་བདག །འཇིག་རྟེན་དོན་དུ་ཅི་ཡོད་དམ། །གང་ཕྱིར་གཉིས་ཀའང་ཡང་དག་ཏུ། །འགྲོ་དང་འོང་དང་གནས་མེད་པ། །དེ་ཕྱིར་འཇིག་རྟེན་མྱ་ངན་
འདས། །དོན་དུ་ཁྱད་པར་ཇི་ལྟ་བུ། །གནས་པ་མེད་ཕྱིར་སྐྱེ་བ་དང་། །འགག་པ་ཡང་དག་ཉིད་མིན་ན། །སྐྱེ་བ་དང་ནི་གནས་པ་དང་། །འགག་པ་དོན་དུ་ག་ལ་ཞིག །གལ་ཏེ་རྟག་ཏུ་འགྱུར་ན་ནི། །ཇི་ལྟར་སྐད་ཅིག་མ་ཡིན་དངོས། །གལ་ཏེ་འགྱུར་བ་མེད་ན་ནི། །དོན་

172-1-109b

དུ་གཞན་ཉིད་ག་ལ་འགྱུར། །ཕྱོགས་གཅིག་གམ་ནི་ཐམས་ཅད་དུ། །ཟད་པས་སྐད་ཅིག་འགྱུར་གྲང་ན། །མི་འདྲ་བ་ཉིད་མི་དམིགས་ཕྱིར། །དེ་རྣམས་གཉིས་ཀའང་རིགས་ལྡན་མིན། །སྐད་ཅིག་ཡིན་ན་རིལ་མེད་ཕྱིར། །རྙིང་པ་འགའ་ལྟ་ག་ལ་ཞིག །ཇི་ལྟར་སྐད་ཅིག་མཐའ་
ཡོད་པ། །དེ་བཞིན་ཐོག་མ་དབུས་བརྟག་གོ། །དེ་ལྟར་སྐད་ཅིག་གསུམ་བདག་ཕྱིར། །འཇིག་རྟེན་སྐད་ཅིག་གནས་པ་མིན། །ཐོག་མ་དབུས་དང་ཐ་མ་ཡང་། །སྐད་ཅིག་བཞིན་དུ་བསམ་པར་བྱ། །ཐོག་མ་དབུས་དང་ཐ་མ་ཉིད། །རང་བཞིན་ལས་ཀྱང་མ་ཡིན་ནོ། །ཐ་དད་
ཕྱོགས་ཕྱིར་གཅིག་པུ་མིན། །ཕྱོགས་མེད་པ་ནི་འགའ་ཡང་མེད། །གཅིག་མེད་པར་ནི་དུ་མའང་མེད། །ཡོད་པ་མེད་ཕྱིར་མེད་པའང་མེད། །ཞིག་པ་འམ་ནི་གཉེན་པོ་ཡིས། །ཡོད་ཉིད་མེད་པར་འགྱུར་གྲང་ན། །ཡོད་པ་སྲིད་པ་མ་ཡིན་ཕྱིར། །འཇིག་པའམ་གཉེན་པོར་ཇི་ལྟར་
འགྱུར། །དེ་ཕྱིར་མྱ་ངན་འདས་པ་ཡིས། །འཇིག་རྟེན་དོན་དུ་འགྲིབ་མི་འགྱུར། །འཇིག་རྟེན་མཐའ་དང་ལྡན་ནམ་ཞེས། །ཞུས་ན་རྒྱལ་བ་མི་གསུང་ཕྱིར། །དེ་ལྟར་ཟབ་མོའི་ཆོས་རྣམས་ནི། །སྣོད་མིན་འགྲོ་ལ་མི་གསུང་བ། །དེ་ཉིད་ཕྱིར་ན་མཁས་རྣམས་ཀྱིས། །ཀུན་མཁྱེན་ཐམས་ཅད་མཁྱེན་
པར་ཤེས། །དེ་ལྟར་ངེས་པར་ལེགས་པའི་ཆོས། །ཟབ་མོ་ཡོངས་སུ་འཛིན་མེད་ཅིང་། །གནས་མེད་ཅེས་ནི་རྫོགས་སངས་རྒྱས། །ཐམས་ཅད་གཟིགས་པ་རྣམས་ཀྱིས་གསུངས། །གནས་མེད་ཆོས་འདིས་སྐྲག་པ་ཡིས། །སྐྱེ་བོ་གནས་ལ་མངོན་དགའ་ཞིང་། །ཡོད་དང་མེད་ལས་མ་
འདས་པ། །མི་མཁས་རྣམས་ནི་ཕུང་བར་འགྱུར། །འཇིགས་མིན་གནས་འཇིགས་དེ་དག་ནི། །ཕུང་ལ་གཞན་ཡང་ཕུང་བར་བྱེད། །རྒྱལ་པོ་ཕུང་བ་དེ་དག་གིས། །ཅི་ནས་མི་ཕུང་དེ་ལྟར་གྱིས། །རྒྱལ་པོ་ཁྱོད་ནི་མི་ཕུང་བར། །བགྱི་སླད་འཇིག་རྟེན་འདས་ཀྱི་ཚུལ། །གཉིས་ལ་མི་
བརྟེན་ཡང་དག་པ། །ཇི་བཞིན་ལུང་གི་དབང་གིས་བཤད། །སྡིག་དང་བསོད་ནམས་བྱ་བ་འདས། །ཟབ་མོ་བཀྲོལ་བའི་དོན་དང་ལྡན། །མུ་སྟེགས་གཞན་དང་རང་གི་ཡང་། །གནས་མེད་འཇིགས་པས་མ་མྱངས་པའོ། །སྐྱེས་བུ་ས་མིན་ཆུ་མ་ཡིན། །མེ་མིན་རླུང་མིན་ནམ་

172-1-110a

མཁའ་མིན། །རྣམ་ཤེས་མ་ཡིན་ཀུན་མིན་ན། །དེ་ལས་གཞན་དོན་སྐྱེས་བུ་གང་། །སྐྱེས་བུ་ཁམས་དྲུག་འདུས་པའི་ཕྱིར། །ཡང་དག་མ་ཡིན་ཇི་ལྟ་བ། །དེ་བཞིན་ཁམས་ནི་རེ་རེ་ལའང་། །འདུས་ཕྱིར་ཡང་དག་ཉིད་དུ་མིན། །ཕུང་པོ་བདག་མིན་དེར་དེ་མིན། །དེ་ལ་
དེ་མིན་དེ་མེད་མིན། །ཕུང་བདག་མེ་ཤིང་ལྟར་འདྲེས་མིན། །དེ་ཕྱིར་བདག་ནི་ཇི་ལྟར་ཡོད། །འབྱུང་གསུམ་ས་མིན་འདི་ལ་མིན། །དེ་ལ་འདི་མིན་དེ་མེད་མིན། །རེ་རེའང་དེ་བཞིན་དེ་ཡི་ཕྱིར། །འབྱུང་བ་རྣམས་ཀྱང་བདག་བཞིན་བརྫུན། །ས་ཆུ་མེ་དང་རླུང་རྣམས་ནི། །རེ་རེའང་ངོ་བོ་ཉིད་དུ་
མེད། །གང་གསུམ་མེད་པར་རེ་རེ་མེད། །གཅིག་མེད་པར་ཡང་གསུམ་མེད་དོ། །གལ་ཏེ་གསུམ་མེད་རེ་རེ་མེད། །གཅིག་མེད་པར་ཡང་གསུམ་མེད་ན། །སོ་སོར་ཡོད་པ་མ་ཡིན་ཏེ། །ཇི་ལྟར་འདུས་པ་སྐྱེད་པར་འགྱུར། །འོན་ཏེ་སོ་སོར་རང་ཡོད་ན། །བུད་ཤིང་མེད་པར་མེ་ཅིས་
མེད། །གཡོ་དང་ཐོགས་དང་སྡུད་པ་དང་། །ཆུ་དང་རླུང་དང་ས་དེ་བཞིན། །འོན་ཏེ་མེ་འདི་གྲགས་ཡིན་ན། །ཇི་ལྟར་ཁྱོད་ཀྱིས་གསུམ་གཞན་རང་། །གསུམ་པོ་རྟེན་ཅིང་འབྱུང་བ་དང་། །ཆོས་མི་མཐུན་པར་རུང་བའང་མིན། །སོ་སོར་རང་ཡོད་དེ་དག་ནི། །ཇི་ལྟ་བུར་ན་ཕན་ཚུན་ཡོད། །སོ་སོར་
རང་ཡོད་མ་ཡིན་པ། །དེ་དག་ཇི་ལྟར་ཕན་ཚུན་ཡོད། །སོ་སོ་རང་གི་ཡོད་ཅེ་ན། །གང་ན་གཅིག་དེར་ལྷག་མ་རྣམས། །མ་འདྲེས་པ་རྣམས་གཅིག་གནས་མེད། །འདྲེས་པ་སོ་སོར་རང་ཡོད་མིན། །སོ་སོར་རང་མེད་འབྱུང་བ་རྣམས། །སོ་སོའི་རང་མཚན་ག་ལ་ཡོད། །སོ་སོ་རང་མེད་ཤས་
ཆེར་འང་མེད། །མཚན་ཉིད་དག་ནི་ཀུན་རྫོབ་བཤད། །ཁ་དོག་དྲི་རོ་རེག་པ་དག །དེ་དག་ལ་ཡང་ཚུལ་འདི་ཡིན། །མིག་དང་རྣམ་ཤེས་གཟུགས་རྣམས་དང་། །མ་རིག་ལས་དང་སྐྱེ་བ་དང་། །བྱེད་པོ་ལས་དང་བྱ་བ་གྲངས། །ལྡན་དང་རྒྱུ་འབྲས་དུས་དང་ནི། །ཐུང་དང་རིང་སོགས་
ཤེས་བྱ་དང་། །མིང་དང་མིང་ཅན་དེ་བཞིན་ནོ། །ས་དང་ཆུ་དང་མེ་དང་རླུང་། །རིང་ཐུང་ཕྲ་དང་སྦོམ་ཉིད་དང་། །དགེ་སོགས་ཉིད་ནི་རྣམ་ཤེས་སུ། །འགག་པར་འགྱུར་ཞེས་ཐུབ་པས་གསུངས། །རྣམ་ཤེས་བསྟན་མེད་མཐའ་ཡས་པ། །ཀུན་དུ་བདག་པོ་དེ་ལ་ནི། །ས་དང་ཆུ་དང་

172-1-110b

མེ་དང་ནི། །རླུང་གིས་གནས་ཐོད་འགྱུར་མ་ཡིན། །འདིར་ནི་རིང་དང་ཐུང་བ་དང་། །ཕྲ་སྦོམ་དགེ་དང་མི་དགེ་དང་། །འདིར་ནི་མིང་དང་གཟུགས་དག་ཀྱང་། །མ་ལུས་པར་ནི་འགག་པར་འགྱུར། །གང་མ་ཤེས་ཕྱིར་རྣམ་ཤེས་ལ། །སྔོན་ཆད་འབྱུང་བ་དེ་ཀུན་ནི། །དེ་ཤེས་ཕྱིར་ན་རྣམ་
ཤེས་སུ། །ཕྱིས་ནི་དེ་ལྟར་འགག་པར་འགྱུར། །རྣམ་ཤེས་མེ་ཡི་བུད་ཤིང་ནི། །འགྲོ་ཆོས་འདི་ཀུན་ཡིན་པར་འདོད། །དེ་དག་ཇི་བཞིན་རབ་འབྱེད་པའི། །འོད་དང་ལྡན་པས་བསྲེགས་ནས་ཞི། །མི་ཤེས་པ་ནི་སྔོན་བརྟགས་པ། །ཕྱིས་ནི་དེ་ཉིད་ངེས་པ་དང་། །གང་ཚེ་དངོས་པོ་མི་
རྙེད་པ། །དེ་ཚེ་དངོས་མེད་ག་ལ་འགྱུར། །གཟུགས་ཀྱི་དངོས་པོ་མིང་ཙམ་ཕྱིར། །ནམ་མཁའ་ཡང་ནི་མིང་ཙམ་མོ། །འབྱུང་མེད་གཟུགས་ལྟ་ག་ལ་ཡོད། །དེ་ཕྱིར་མིང་ཙམ་ཉིད་ཀྱང་ཡིན། །ཚོར་དང་འདུ་ཤེས་འདུ་བྱེད་དང་། །རྣམ་ཤེས་འབྱུང་བ་ལྟ་བུ་དང་། །བདག་ཉིད་དུ་ནི་བསམ་
བྱ་སྟེ། །དེ་ཕྱིར་ཁམས་དྲུག་བདག་མེད་དོ། །རིན་པོ་ཆེའི་ཕྲེང་བ་ལས་མངོན་པར་མཐོ་བ་དང་ངེས་པར་ལེགས་པ་བསྟན་པ་སྟེ་ལེའུ་དང་པོའོ།།      །།ཇི་ལྟར་ཆུ་ཤིང་ཡན་ལག་དག །མ་ལུས་བཅས་ཏེ་བཤིག་བྱས་ན། །ཅི་ཡང་མེད་ལྟར་སྐྱེས་བུ་ཡང་། །ཁམས་
བཅས་བཤིག་ན་དེ་དང་འདྲ། །ཆོས་རྣམས་ཐམས་ཅད་བདག་མེད་ཅེས། །དེ་ཕྱིར་རྒྱལ་བ་རྣམས་ཀྱིས་གསུངས། །ཁམས་དྲུག་དེ་ཀུན་བདག་མེད་པར། །ཁྱོད་ལ་གཏན་ལ་ཕབ་པ་ཡིན། །དེ་ལྟར་བདག་དང་བདག་མེད་པར། །ཡང་དག་ཇི་བཞིན་དམིགས་སུ་མེད། །བདག་
དང་བདག་མེད་ལྟ་བ་དག །དེ་ཕྱིར་ཐུབ་པ་ཆེན་པོས་བཟློག །མཐོང་དང་ཐོས་སོགས་ཐུབ་པ་ཡིས། །བདེན་མིན་བརྫུན་པ་མིན་པར་གསུངས། །ཕྱོགས་ལས་མི་མཐུན་ཕྱོགས་འགྱུར་ན། །དེ་ནི་གཉི་ག་དོན་དུ་མིན། །དེ་ལྟས་དམ་པའི་དོན་དུ་ན། །འཇིག་རྟེན་འདི་ནི་
བདེན་བརྫུན་འདས། །དེ་ཉིད་ཕྱིར་ན་ཡང་དག་ཏུ། །ཡོད་ཅེས་མེད་ཅེས་ཞལ་མི་བཞེས། །གང་ཞིག་དེ་ལྟར་རྣམ་ཀུན་དུ། །ཡོད་མིན་དེ་ནི་ཀུན་མཁྱེན་གྱིས། །མཐའ་ཡོད་མཐའ་མེད་གཉི་ག་དང་། །གཉིས་མ་ཡིན་ཞེས་ཇི་སྐད་བསྟན། །སངས་རྒྱས་གྲངས་མེད་གཤེགས་དེ་

172-1-111a

བཞིན། །བྱོན་གྱུར་པ་དང་ད་ལྟར་བཞུགས། །སེམས་ཅན་མཐའ་ནི་དུས་སུམ་སྐྱེས། །བྱེ་བ་དེ་དག་ལས་འདོད་ཅིང་། །འཇིག་རྟེན་འཕེལ་བའི་རྒྱུ་མེད་ལ། །ཟད་པ་དུས་གསུམ་དུ་སྲིད་ན། །ཐམས་ཅད་མཁྱེན་པས་ཇི་ལྟར་དེའི། །ཕྱིན་ཆད་ལུང་མ་བསྟན་
པར་མཛད། །སོ་སོའི་སྐྱེ་བོ་ལ་གསང་བ། །གང་ཡིན་དེ་ནི་ཟབ་མོའི་ཆོས། །འཇིག་རྟེན་སྒྱུ་མ་ལྟ་བུ་ཉིད། །སངས་རྒྱས་བསྟན་པ་བདུད་རྩི་ཡིན། །ཇི་ལྟར་སྒྱུ་མའི་གླང་པོ་ལ། །སྐྱེ་དང་འཇིག་པ་ཉིད་སྣང་ཡང་། །དེ་ལ་དོན་གྱི་ཡང་དག་ཏུ། །སྐྱེ་དང་འཇིག་པ་ཉིད་མེད་ལྟར། །དེ་
བཞིན་སྒྱུ་འདྲའི་འཇིག་རྟེན་ལ། །སྐྱེ་དང་འཇིག་པ་ཉིད་སྣང་ཡང་། །དམ་པའི་དོན་དུ་སྐྱེ་བ་དང་། །འཇིག་པ་ཉིད་ནི་ཡོད་མ་ཡིན། །ཇི་ལྟར་སྒྱུ་མའི་གླང་པོ་ནི། །གང་ནས་མ་འོངས་གར་མི་འགྲོ། །སེམས་རྨོངས་ཙམ་དུ་ཟད་པས་ན། །ཡང་དག་ཉིད་དུ་གནས་པ་མེད། །དེ་བཞིན་སྒྱུ་
མའི་འཇིག་རྟེན་ནི། །གང་ནས་མ་འོངས་གར་མི་འགྲོ། །སེམས་རྨོངས་ཙམ་དུ་ཟད་པས་ན། །ཡང་དག་ཉིད་དུ་གནས་པ་མེད། །དེ་ལྟར་དུས་གསུམ་འདས་བདག་ཉིད། །ཐ་སྙད་གདགས་པ་མ་གཏོགས་པར། །གང་ཞིག་ཡོད་དམ་མེད་འགྱུར་བའི། །འཇིག་རྟེན་དོན་དུ་ཅི་ཞིག་ཡོད། །
སངས་རྒྱས་ཀྱིས་ནི་རྒྱུ་འདི་ལས། །མཐའ་ཡོད་པ་དང་མཐའ་མེད་དང་། །གཉིས་དང་གཉིས་མིན་རྣམ་པ་བཞི། །ལུང་བསྟན་མ་མཛད་གཞན་ལས་མིན། །རེ་ཞིག་ལུས་འདི་མི་གཙང་ཉིད། །རགས་ཤིང་མངོན་གསུམ་སྤྱོད་ཡུལ་བ། །རྟག་ཏུ་སྣང་བ་གང་གི་ཚེ། །སེམས་ལ་
གནས་པ་མ་ཡིན་པ། །དེ་ཚེ་དམ་ཆོས་གནས་མེད་པ། །ཕྲ་རབ་མངོན་སུམ་མ་ཡིན་པ། །ཟབ་མོ་དེ་གོ་ཇི་ལྟ་བུར། །སེམས་ལ་བདེ་བླག་འཆར་བར་འགྱུར། །ཆོས་འདི་ཟབ་ཕྱིར་སྐྱེ་བོ་ཡིས། །ཤེས་པར་དཀའ་བར་ཐུགས་ཆུད་དེ། །དེས་ན་ཐུབ་པ་སངས་རྒྱས་ནས། །ཆོས་བསྟན་
པ་ལས་ལོག་པར་གྱུར། །ཆོས་འདི་ལོག་པར་ཤེས་གྱུར་ན། །མི་མཁས་རྣམས་ནི་ཆུད་ཀྱང་ཟ། །འདི་ལྟར་མེད་པར་ལྟ་བ་ཡི། །མི་གཙང་དེར་ནི་བྱིང་བར་འགྱུར། །གཞན་ཡང་དེ་ནི་ལོག་བཟུང་ནས། །བླུན་པ་མཁས་པའི་ང་རྒྱལ་ཅན། །སྤོང་བས་མ་རུངས་བདག་ཉིད་ཅན། །མནར་

172-1-111b

མེད་པར་ནི་སྤྱིའུ་ཚུགས་འགྲོ། །ཇི་ལྟར་ཁ་ཟས་བཟའ་ཉེས་པས། །ཕུང་བ་དག་ཏུ་འགྱུར་བ་དང་། །བཟའ་ལེགས་ཚེ་དང་ནད་མེད་དང་། །སྟོབས་དང་བདེ་བར་འགྱུར་བ་ལྟར། །དེ་བཞིན་ལོག་པར་བཟུང་བ་དེས། །ཕུང་བ་དག་ནི་ཐོབ་འགྱུར་ཞིང་། །ལེགས་པར་ཤེས་པས་བདེ་བ་དང་། །
བྱང་ཆུབ་བླ་ན་མེད་པ་ཐོབ། །དེ་ཕྱིར་འདི་ལ་སྤོང་བ་དང་། །མེད་པའི་ལྟ་བ་སྤངས་ནས་ནི། །དོན་ཀུན་བསྒྲུབ་ཕྱིར་ཡང་དག་པའི། །ཤེས་ལ་ནན་ཏན་མཆོག་མཛོད་ཅིག །ཆོས་འདི་ཡོངས་སུ་མ་ཤེས་ན། །ངར་འཛིན་པ་ནི་རྗེས་སུ་འཇུག །དེ་ལས་དགེ་དང་མི་དགེའི་ལས། །དེ་ལས་
སྐྱེ་བ་བཟང་དང་ངན། །དེ་ཕྱིར་ཇི་སྲིད་ངར་འཛིན་པ། །སེལ་བའི་ཆོས་འདི་མ་ཤེས་པ། །དེ་སྲིད་སྦྱིན་དང་ཚུལ་ཁྲིམས་དང་། །བཟོད་པའི་ཆོས་ལ་གུས་པར་མཛོད། །ལས་རྣམས་སྔོན་དུ་ཆོས་གཏོང་ཞིང་། །བར་དུ་ཆོས་ལྡན་ཐ་མར་ཡང་། །ཆོས་ལྡན་བསྒྲུབ་པའི་ས་བདག་ནི། །
འདི་དང་གཞན་དུ་གནོད་མི་འགྱུར། །ཆོས་ཀྱིས་འདིར་གྲགས་བདེ་བ་དང་། །འདི་དང་འཆི་ཀར་འཇིགས་པ་མེད། །འཇིག་རྟེན་གཞན་དུ་བདེ་བ་རྒྱས། །དེ་བས་རྟག་ཏུ་ཆོས་བརྟེན་མཛོད། །ཆོས་ནི་ལུགས་ཀྱི་དམ་པ་སྟེ། །ཆོས་ཀྱིས་འཇིག་རྟེན་མངོན་དགར་འགྱུར། །འཇིག་
རྟེན་དགའ་བར་གྱུར་པས་ཀྱང་། །འདི་དང་གཞན་དུ་བསླུས་མི་འགྱུར། །ཆོས་མིན་པས་ནི་ལུགས་འདོད་གང་། །དེ་ཡིས་འཇིག་རྟེན་མི་དགར་འགྱུར། །འཇིག་རྟེན་མི་དགའ་ཉིད་ཀྱི་ཕྱིར། །འདི་དང་གཞན་དུ་དགའ་མི་འགྱུར། །དོན་མེད་རིག་པ་ངན་འགྲོའི་ལམ། །གཞན་བསླུ་
ལྷུར་ལེན་མི་བཟད་པ། །ཤེས་རབ་འཆལ་པ་རྣམས་ཀྱིས་ནི། །ཇི་ལྟར་དོན་གྱིས་རིག་པར་བྱས། །ཕ་རོལ་སླུ་བ་ལྷུར་ལེན་པ། །དོན་དུ་ཇི་ལྟར་ལུགས་ལྡན་ཡིན། །དེས་ནི་ཚེ་རབས་སྟོང་ཕྲག་ཏུ། །བདག་ཉིད་ཁོ་ན་བསླུས་པར་འགྱུར། །དགྲ་ལ་གནོད་པ་བྱ་ན་ཡང་། །སྐྱོན་རྣམས་
བཏང་སྟེ་ཡོན་ཏན་བསྟེན། །དེས་ནི་ཁྱོད་ཀྱིས་རང་ཕན་འཐོབ། །དགྲ་བོ་ཡང་ནི་མི་དགར་འགྱུར། །སྦྱིན་དང་སྙན་པར་སྨྲ་བ་དང་། །ཕན་དང་དོན་གཅིག་སྤྱོད་པ་སྟེ། །དེ་དག་རྣམས་ཀྱིས་འཇིག་རྟེན་དང་། །ཆོས་ཀྱང་བསྡུ་བ་ཉིད་དུ་མཛོད། །རྒྱལ་པོ་དག་ལ་ཇི་ལྟ་བུར། །བདེན་གཅིག་ཡིད་

172-1-112a

ཆེས་བརྟན་བསྐྱེད་པ། །དེ་ལས་བཟློག་སྟེ་བརྫུན་པ་ནི། །ཡིད་མི་ཆེས་པར་བྱེད་པའི་མཆོག །སླུ་བ་མེད་ལྡན་བདེན་མིན་ཏེ། །སེམས་པས་བསྒྱུར་བ་དོན་དུ་མིན། །གཞན་ལ་གཅིག་ཏུ་ཕན་པས་བདེན། །མི་ཕན་ཕྱིར་ནི་ཅིག་ཤོས་མིན། །ཇི་ལྟར་
རྒྱལ་པོའི་ཉེས་པ་དག །སྦྱིན་གསལ་གཅིག་གིས་སྦེད་པ་ལྟར། །དེ་བཞིན་འཇུངས་པའང་དེ་དག་གི །ཡོན་ཏན་བདོག་པ་ཐམས་ཅད་འཇོམས། །ཉེ་བར་ཞི་བ་ཟབ་པའི་ཕྱིར། །མཆོག་ཏུ་གུས་པ་བྱེད་པར་འགྱུར། །གུས་པས་བརྗིད་ལ་བཀའ་ཡང་བཙན། །དེ་བས་ཉེ་བར་ཞི་བ་
བསྟེན། །ཤེས་རབ་ལྡན་པས་བློ་མི་འཕྲོགས། །གཞན་གྱི་དྲིང་མི་འཇོག་ཅིང་བརྟན། །སླུ་བས་མི་ཚུགས་རྒྱལ་པོ་སྟེ། །དེ་བས་ཤེས་རབ་ལྷུར་བླང་མཛོད། །བདེན་གཏོང་ཞི་དང་ཤེས་རབ་དང་། །བཟང་པོ་བཞི་ལྡན་མི་དབང་ནི། །ཆོས་བཟངས་རྣམ་པ་བཞི་ལྟ་བུར། །ལྷ་མི་རྣམས་
ཀྱིས་བསྟོད་པར་འགྱུར། །ཕེབས་པར་སྨྲ་ཞིང་དག་གྱུར་པ། །ཤེས་རབ་སྙིང་རྗེ་དྲི་མེད་དང་། །ལྷན་ཅིག་འགྲོགས་ན་རྟག་ཏུ་ཡང་། །ཤེས་རབ་དང་ནི་ཆོས་ཀྱང་འཕེལ། །ཕན་པར་སྨྲ་བ་དཀོན་པ་སྟེ། །ཉན་པར་བྱེད་པ་ཤིན་ཏུ་དཀོན། །དེ་དག་བས་ཀྱང་མི་སྙན་ཡང་། །ཕན་
པའི་རྗེས་སུ་བྱེད་པ་དཀོན། །དེ་ལྟ་བས་ན་མི་སྙན་ཡང་། །ཕན་པར་མཁྱེན་ནས་མྱུར་དུ་སྤྱད། །ནད་གསོའི་དོན་དུ་བདག་བྱམས་པ། །མི་བཟད་ང་བའི་སྨན་ཡང་འཐུང་། །སྲོག་དང་ནད་མེད་རྒྱལ་སྲིད་དག །མི་རྟག་ཉིད་ནི་རྟག་དགོངས་ཏེ། །དེ་ནས་ཡང་དག་བརྩོན་ལྡན་པར། །
ཆོས་ལ་གཅིག་ཏུ་ནན་ཏན་མཛོད། །གདོན་མི་ཟ་བར་འཆི་འགྱུར་ཞིང་། །ཤི་ནས་སྡིག་པས་སྡུག་བསྔལ་བ། །གཟིགས་ཏེ་འཕྲལ་དུ་བདེ་ན་ཡང་། །སྡིག་པ་བགྱི་བར་མི་རིགས་སོ། །ལ་ལར་འཇིགས་པ་མེད་མཐོང་ཞིང་། །དུས་འགར་འཇིགས་པ་མཐོང་གྱུར་པ། །གལ་ཏེ་
གཅིག་ལ་ཡིད་རྟོན་ན། །གཅིག་ལ་ཁྱོད་ཀོ་ཅིས་མི་འཇིགས། །ཆང་གིས་འཇིག་རྟེན་བརྙས་འགྱུར་ཞིང་། །དོན་ཡལ་ནོར་ཡང་ཟད་པར་འགྱུར། །རྨོངས་པས་བྱ་བ་མ་ཡིན་བྱེད། །དེ་བས་ཆང་ནི་རྟག་ཏུ་སྤོངས། །རྒྱན་པོ་ཆགས་དང་མི་དགའ་དང་། །ཞེ་སྡང་གཡོ་སྒྱུ་དགོད་

172-1-112b

པའི་གནས། །བརྫུན་དང་ཀྱལ་པ་ཚིག་རྩུབ་རྒྱུ། །དེ་བས་རྟག་ཏུ་སྤང་བར་མཛོད། །བུད་མེད་ཆགས་པ་ཕལ་ཆེར་ནི། །བུད་མེད་གཟུགས་བཟང་སེམས་ལས་བྱུང་། །བུད་མེད་ལུས་ལ་དོན་དུ་ནི། །གཙང་བ་ཅུང་ཟད་ཡོད་མ་ཡིན། །ཁ་ནི་ཁ་ཆུ་རུལ་པ་དང་། །སོ་སྐྱག་མི་གཙང་
སྣོད་ཡིན་ཏེ། །སྣ་ནི་རྣག་སྣབས་སྣ་ཆུའི་སྣོད། །མིག་ནི་མིག་རྔུལ་མཆི་མའི་སྣོད། །ལྟོ་བའི་ཁོང་ནི་བཤང་གཅི་དང་། །གློ་བ་མཆིན་སྩོགས་སྣོད་ཡིན་པར། །རྨོངས་པས་བུད་མེད་མ་མཐོང་བ། །དེ་ཡི་ལུས་ལ་ཆགས་པར་བྱེད། །མི་ཤེས་འགའ་ཞིག་མི་གཙང་བའི། །བུམ་པ་
རྒྱན་ལ་ཆགས་པ་ལྟར། །འཇིག་རྟེན་མི་ཤེས་རྨོངས་པ་ཡིས། །བུད་མེད་རྣམས་ལ་དེ་བཞིན་ནོ། །ལུས་ཡུལ་ཤིན་ཏུ་དྲི་ང་བ། །ཆགས་བྲལ་རྒྱུ་ནི་གང་ཡིན་པ། །དེ་ལའང་འཇིག་རྟེན་ཆེས་ཆགས་ན། །གང་གི་འདོད་ཆགས་བྲལ་བར་བཀྲི། །ཇི་ལྟར་བཤང་དང་གཅི་གཞི་
ལ། །ངན་སྐྱུགས་ཕག་རབ་ཆགས་པ་ལྟར། །དེ་བཞིན་བཤང་དང་གཅི་གཞི་ལ། །འདོད་ཆགས་ངན་སྐྱུགས་ཕག་རྣམས་ཆགས། །ལུས་ཀྱི་གྲོང་ཁྱེར་མི་གཙང་བ། །འབྱུང་བའི་བུ་ག་དོད་པ་གང་། །དེ་ནི་སྐྱེ་བོ་བླུན་པ་ཡིས། །དགའ་བའི་དོན་དུ་ཉེ་བར་བརྟགས། །ཁྱོད་བདག་ཉིད་ཀྱིས་
བཤང་གཅི་སྩོགས། །སོ་སོར་མི་གཙང་མཐོང་ནས་ནི། །དེ་འདུས་ལུས་ལ་ཇི་ལྟ་བུར། །ཡིད་དུ་འོང་བ་ཉིད་དུ་གྱུར། །ཁྲག་དང་ཁུ་བ་འདྲེས་པ་ཡི། །ས་བོན་མི་གཙང་སྙིང་པོས་བསྐྱེད། །མི་གཙང་ངོ་བོར་ཤེས་བཞིན་དུ། །འདི་ལ་འདོད་ཅན་གང་ཞིག་ཆགས། །མི་གཙང་ཕུང་པོ་དེའི་
རླན་གྱིས། །བརླན་པའི་པགས་པས་གཡོགས་པ་གང་། །ཉལ་བ་དེ་ནི་བུད་མེད་ཀྱི། །ཆུ་སོའི་ཁོང་ནས་ཉལ་བར་ཟད། །གཟུགས་བཟང་བ་དང་གཟུགས་ངན་ནམ། །རྒན་ནམ་ཡང་ན་གཞོན་ཡང་རུང་། །བུད་མེད་གཟུགས་ཀུན་མི་གཙང་ན། །ཁྱོད་ཆགས་ཁྱད་པར་གང་ལ་བསྐྱེད། །
གལ་ཏེ་མི་གཙང་ཁ་དོག་བཟང་། །ཤིན་ཏུ་གསར་ལ་དབྱིབས་ལེགས་ཀྱང་། །དེ་ལ་ཆགས་པར་མི་འོས་ལྟར། །བུད་མེད་གཟུགས་ལའང་དེ་བཞིན་ནོ། །ཁོང་རུལ་ཕྱི་རོལ་པགས་པས་གཡོགས། །རོ་མྱགས་འདི་ཡི་རང་བཞིན་ནི། །ཤིན་ཏུ་མི་བཟད་སྣང་བཞིན་དུ། །ཇི་ལྟ་བུར་ན་

172-1-113a

མཐོང་མ་གྱུར། །པགས་པ་འདི་ཡང་མི་གཙང་མིན། །རལ་གུ་བཞིན་དུ་འདུག་ཅེ་ན། །མི་གཙང་ཕུང་པོའི་པགས་པ་ལྟར། །ཇི་ལྟ་བུར་ན་གཙང་མར་འགྱུར། །མི་གཙང་གང་བའི་བུམ་པ་ནི། །ཕྱི་རོལ་བགྲ་ཡང་སྨད་པ་ཡིན། །མི་གཙང་བ་ཡི་རང་བཞིན་
ལུས། །མི་གཙང་གང་བ་ཅིས་མི་སྨད། །གལ་ཏེ་ཁྱོད་ནི་མི་གཙང་སྨོད། །དྲི་དང་ཕྲེང་བ་བཟའ་བཏུང་ནི། །གཙང་མའང་མི་གཙང་བྱེད་པ་གང་། །ལུས་འདི་ཅི་ཡི་ཕྱིར་མི་སྨད། །ཇི་ལྟར་རང་ངམ་གཞན་དག་གི། །མི་གཙང་སྨད་པར་བྱ་བ་གང་། །དེ་བཞིན་རང་དང་གཞན་དག་གི། །
མི་གཙང་གཟུགས་ཀོ་ཅིས་མི་སྨད། །ཇི་ལྟར་བུད་མེད་གཟུགས་མི་གཙང་། །ཁྱོད་ཀྱི་རང་ལུས་དེ་དང་འདྲ། །དེ་བས་ཕྱི་དང་ནང་ཉིད་ལ། །འདོད་ཆགས་བྲལ་བར་རིགས་མིན་ནམ། །རྨ་དགུ་དག་ནས་འཛག་པ་ཅན། །བདག་ཉིད་མངོན་སུམ་འཁྲུ་བྱེད་ཀྱང་། །ལུས་མི་གཙང་
བར་མི་རྟོགས་ན། །ཁྱོད་ལ་བཤད་པས་ཅི་ཞིག་ཕན། །གང་དག་མི་གཙང་ལུས་འདི་ལ། །སྟེག་ཆོས་སྙན་དངགས་བྱེད་པ་ནི། །ཨེ་མའོ་གཟུ་ལུམས་ཨེ་མའོ་བླུན། །ཨེ་མའོ་སྐྱེ་བོས་ཁྲེལ་དུ་རུང་། །མི་ཤེས་མུན་པས་བསྒྲིབས་པ་ཡི། །སེམས་ཅན་འདིར་ནི་ཕལ་
ཆེར་ཡང་། །འདོད་པའི་དོན་དུ་རྩོད་འབྱུང་བ། །མི་གཙང་དོན་དུ་ཁྱི་རྣམས་བཞིན། །གཡན་པ་ཕྲུགས་ན་བདེར་འགྱུར་བ། །དེ་བས་གཡན་པ་མེད་ན་བདེ། །དེ་བཞིན་འཇིག་རྟེན་འདོད་ལྡན་བདེ། །འདོད་པ་མེད་པ་དེ་བས་བདེ། །གལ་ཏེ་དེ་ལྟར་བརྟགས་ན་ཁྱོད། །འདོད་
ཆགས་བྲལ་བ་མ་གྲུབ་ཀྱང་། །འོན་ཀྱང་འདོད་ཆགས་བསྲབས་པ་ཡིས། །བུད་མེད་ཆགས་པར་མི་འགྱུར་རོ། །ཚེ་ཐུང་འཇིགས་དང་སྡུག་བསྔལ་དང་། །དམྱལ་བའི་རྒྱུ་ནི་མི་བཟད་པ། །རི་དགས་ལིངས་ཏེ་དེ་ལྟ་བས། །རྟག་ཏུ་གསོད་མེད་བརྟན་པོར་མཛོད། །ཡན་ལག་
ཐམས་ཅད་མི་གཙང་བས། །བསྐུས་པའི་སྦྲུལ་གདུག་འཇིགས་པ་ལྟར། །གང་ལ་བརྟེན་ནས་ལུས་ཅན་རྣམས། །སྐྲག་པར་འགྱུར་བ་དེ་རེ་ངན། །ཆར་སྤྲིན་ཆེན་པོ་ལངས་པ་ན། །ཞིང་པ་རྣམས་ནི་ཇི་ལྟ་བར། །གང་ལ་བརྟེན་ནས་ལུས་ཅན་རྣམས། །དགའ་བར་འགྱུར་

172-1-113b

བ་དེ་རེ་བཟང་། །དེ་བས་ཆོས་མིན་སྤང་བྱ་སྟེ། །གཡེལ་བ་མེད་པར་ཆོས་ལ་བརྟེན། །བདག་ཉིད་དང་ནི་འཇིག་རྟེན་འདིས། །བླ་མེད་བྱང་ཆུབ་ཐོབ་འདོད་ན། །དེ་ཡི་རྩ་བ་བྱང་ཆུབ་སེམས། །རི་དབང་རྒྱལ་པོ་ལྟར་བརྟན་དང་། །ཕྱོགས་མཐས་གཏུགས་པའི་སྙིང་རྗེ་དང་། །གཉིས་
ལ་མི་བརྟེན་ཡེ་ཤེས་ལགས། །རྒྱལ་པོ་ཆེན་པོ་སྐྱེས་ཆེན་གྱི། །མཚན་ནི་སུམ་ཅུ་རྩ་གཉིས་ཀྱིས། །ཇི་ལྟར་ཁྱོད་སྐུ་བརྒྱན་གྱུར་པ། །དེ་ལྟ་བུ་དག་གསན་པར་མཛོད། །མཆོད་རྟེན་མཆོད་བྱ་འཕགས་པ་དང་། །རྒན་རབས་རྣམས་ནི་ལེགས་བཀུར་བས། །དཔལ་ལྡན་ཕྱག་
ཞབས་འཁོར་ལོ་ཡིས། །མཚན་པའི་འཁོར་ལོས་སྒྱུར་བར་འགྱུར། །རྒྱལ་པོ་ཆོས་ལ་རྟག་པར་ནི། །ཡང་དག་བླངས་པ་བརྟན་པར་མཛོད། །དེས་ནི་ཤིན་ཏུ་ཞབས་གནས་པའི། །བྱང་ཆུབ་སེམས་དཔར་འགྱུར་བ་ལགས། །སྦྱིན་དང་སྙན་པའི་ཚིག་དང་ནི། །ཕན་དང་དོན་
གཅིག་སྤྱོད་པ་ཡིས། །དཔལ་ལྡན་ཕྱག་སོར་དྲ་བ་ཡིས། །འབྲེལ་བའི་ཕྱག་རིས་ཅན་དུ་འགྱུར། །བཟའ་བ་དང་ནི་བཏུང་བའི་མཆོག །རབ་ཏུ་མང་པོ་བྱིན་པ་ཡིས། །དཔལ་ལྡན་ཕྱག་དང་ཞབས་མཉེན་ཞིང་། །སྐུ་ཚེ་བདུན་ཡང་མཐོ་བར་འགྱུར། །འཚེ་མེད་གསད་པ་ཐར་བྱས་
པས། །སྐུ་མཛེས་དྲང་ཞིང་ཆེ་བ་དང་། །ཚེ་རིང་སོར་མོ་རིང་བ་དང་། །རྟིང་པ་ཡངས་པ་དག་ཏུ་འགྱུར། །ཡང་དག་བླངས་པའི་ཆོས་རྣམས་ནི། །སྤེལ་བས་དཔལ་ལྡན་མདོག་བཟང་ཞིང་། །ཞབས་ཀྱི་ལོང་བུ་མི་མངོན་དང་། །བ་སྤུ་གྱེན་དུ་ཕྱོགས་མཚན་འགྱུར། །རིག་དང་བཟོ་ལ་
སོགས་པའི་གནས། །གུས་པས་ལེན་དང་སྦྱིན་པས་ཁྱོད། །ཨེ་ན་ཡ་ཡི་བྱིན་པ་དང་། །ཡིད་རྣོ་ཤེས་རབ་ཆེན་པོར་འགྱུར། །རང་གི་ནོར་བདོག་བླངས་གྱུར་ན། །མྱུར་དུ་བཏང་བའི་བརྟུལ་ཞུགས་ཀྱིས། །ཕྱག་རྒྱ་བདེ་དང་འཇིག་རྟེན་གྱི། །རྣམ་པར་འདྲེན་པ་ཉིད་དུ་འགྱུར། །གཉེན་
བཤེས་ཕན་ཚུན་བྱེ་བ་དག །ཡང་དག་བསྡུམ་པར་བྱས་པ་ཡིས། །དཔལ་ལྡན་མདོམས་ཀྱི་སྦ་བ་ནི། །སྦུབས་སུ་ནུབ་པའི་དམ་པར་འགྱུར། །ཁང་བཟངས་གདིང་བ་རྒྱན་དག་ནི། །བདེ་ཞིང་བཟང་བ་རབ་འབྱིན་པས། །གསེར་ནི་བཙོ་མ་དྲི་མེད་པ། །ཤིན་ཏུ་འཇམ་པའི་མདོག་

172-1-114a

འདྲར་འགྱུར། །བླ་ན་མེད་པའི་དབང་བྱིན་ཞིང་། །རིགས་པར་བླ་མའི་རྗེས་འཇུག་པ། །དཔལ་ལྡན་བ་སྤུ་ཉག་རེ་དང་། །ཞལ་ནི་མཛོད་སྤུས་བརྒྱན་པར་འགྱུར། །སྙན་ཅིང་དགའ་བར་སྨྲས་པ་དང་། །ལེགས་པར་སྨྲས་དང་མཐུན་བྱས་པས། །ཁྱོད་ནི་དཔུང་མགོ་
ཟླུམ་པ་དང་། །རོ་སྟོད་སེང་གེའི་འདྲ་བར་འགྱུར། །ནད་པ་རྣམས་ལ་རིམ་གྲོ་དང་། །གསོས་པས་ཐལ་གོང་རྒྱས་པ་དང་། །བདག་ཉིད་རྣལ་དུ་གནས་པ་དང་། །རོ་བྲོ་བ་ཡི་མཆོག་ཏུ་འགྱུར། །ཆོས་དང་མཐུན་པའི་བྱ་བ་ལ། །ཐོག་དྲངས་ཁྱོད་ཀྱི་དབུ་གཙུག་ཏོར། །ལེགས་གནས་ནྱ་གྲོ་དྷ་
ལྟ་བུར། །ཆུ་ཞེང་གབ་པ་དག་ཏུ་འགྱུར། །ཚིག་ནི་བདེན་པ་འཇམ་པོ་དག །ཡུན་རིངས་དུས་སུ་བརྗོད་པ་ཡིས། །མི་ཡི་དབང་པོ་ལྗགས་ཡངས་ཤིང་། །ཚངས་པ་ཡི་ནི་དབྱངས་ལྡན་འགྱུར། །རྟག་ཏུ་རྒྱུན་མི་འཆད་པ་རུ། །བདེན་པའི་ཚིག་ནི་བརྗོད་པ་ཡིས། །འགྲམ་པ་སེང་གེའི་ལྟ་བུ་དང་། །
དཔལ་ལྡན་ཐུབ་པ་དགའ་བར་འགྱུར། །ལྷག་པར་གུས་དང་བཀུར་སྟི་དང་། །ཇི་ལྟར་རིགས་པར་རྗེས་འཇུག་པས། །ཚེམས་ནི་ཤིན་ཏུ་དཀར་བ་དང་། །མདོག་ལྡན་མཉམ་པའི་ཚེམས་སུ་འགྱུར། །དབྱེན་དང་ཕྲ་མ་མེད་པ་ཡི། །ཚིག་ནི་ཡུན་རིངས་གོམས་པ་ཡིས། །དཔལ་ལྡན་ཚེམས་
ནི་བཞི་བཅུ་ཐམ། །མཉམ་པར་ཐགས་ཀྱང་བཟང་བར་འགྱུར། །ཆགས་དང་སྡང་དང་རྨོངས་མེད་ཅིང་། །བྱམས་པས་སེམས་ཅན་བལྟས་པ་ཡིས། །སྤྱན་ནི་བཀྲག་ཅན་མཐོན་མཐིང་ལ། །རྫི་མ་བ་ཡི་ལྟ་བུར་འགྱུར། །དེ་ལྟར་མདོར་ན་རྒྱུར་བྱས་པའི། །སུམ་ཅུ་རྩ་གཉིས་དེ་དག་ནི། །སྐྱེས་བུ་
སེང་གེ་ཆེན་པོ་ཡི། །མཚན་རྣམས་ལེགས་པར་མཁྱེན་པར་མཛོད། །དཔེ་བྱད་བཟང་པོ་བརྒྱད་ཅུ་ནི། །བྱམས་པའི་རྒྱུ་མཐུན་ལས་བྱུང་བ། །གཞུང་ནི་མངས་སུ་དོགས་པ་ཡིས། །རྒྱལ་པོ་ཁྱོད་ལ་མ་བཤད་དོ། །འཁོར་ལོས་སྒྱུར་བ་ཐམས་ཅད་ལ། །འདི་དག་ཡོད་པར་འདོད་མོད་ཀྱི། །དག་
དང་མཛེས་དང་གསལ་བ་ནི། །སངས་རྒྱས་རྣམས་ཀྱི་ཆར་མི་ཕོད། །འཁོར་ལོས་སྒྱུར་བའི་མཚན་དང་ནི། །དཔེ་བྱད་བཟང་པོ་གང་དག་གཅིག །ཐུབ་དབང་པོ་ལ་སེམས་དང་བའི། །ཡན་ལག་གཅིག་ལས་འབྱུང་བཤད་པའི། །བསྐལ་པ་བྱེ་བ་བརྒྱ་ཕྲག་ནི། །གཅིག་ཏུ་བསགས་པའི་དགེ་

172-1-114b

བས་ཀྱང་། །སངས་རྒྱས་བ་སྤུ་ཉག་གཅིག་ཀྱང་། །བསྐྱེད་པར་ནུས་པ་མ་ཡིན་ནོ། །ཉི་མ་རྣམས་ཀྱི་འོད་བྱེད་པ། །མེ་ཁྱེར་རྣམས་དང་བག་འདྲ་ལྟར་། །སངས་རྒྱས་རྣམས་ཀྱི་མཚན་ཡང་ནི། །འཁོར་ལོས་སྒྱུར་བ་རྣམས་དང་འདྲ། །རིན་པོ་ཆེའི་ཕྲེང་བ་ལས་སྤེལ་མ་ཞེས་བྱ་བ་སྟེ་
ལེའུ་གཉིས་པའོ།།      །།བསོད་ནམས་བསམ་གྱིས་མི་ཁྱབ་ལས། །ཇི་ལྟར་སངས་རྒྱས་མཚན་འབྱུང་བ། །ཐེག་པ་ཆེན་པོའི་ལུང་ཆེན་ལས། །རྒྱལ་པོ་ཆེན་པོ་དེ་བཞིན་གསོན། །རང་སངས་རྒྱས་ཀུན་ལས་བྱུང་དང་། །སློབ་དང་མི་སློབ་ལས་བྱུང་བ། །འཇིག་
རྟེན་མ་ལུས་ཀུན་བསོད་ནམས། །འཇིག་རྟེན་བཞིན་དུ་དཔག་མེད་གང་། །དེ་བཅུར་བསྒྲེས་པར་གྱུར་པ་ཡིས། །བ་སྤུའི་བུ་ག་གཅིག་འགྲུབ་སྟེ། །སངས་རྒྱས་བ་སྤུའི་བུ་ག་ནི། །ཐམས་ཅད་དེ་དང་འདྲ་བས་འབྱུང་། །བ་སྤུའི་བུ་ག་ཐམས་ཅད་ནི། །སྐྱེད་པར་བྱེད་པའི་བསོད་ནམས་
གང་། །དེ་དག་བརྒྱར་ནི་བསྒྱུར་བ་ཡིས། །དཔེ་བྱད་བཟང་པོ་གཅིག་ཏུ་བཞེད། །བསོད་ནམས་དེ་སྙེད་དེ་སྙེད་ཀྱིས། །རྒྱལ་པོ་དཔེ་བྱད་བཟང་པོ་ནི། །གཅིག་མཐར་ཕྱིན་ཏེ་དེ་ལྟ་བུར། །བརྒྱད་ཅུའི་བར་དུ་འབྱུང་བར་འགྱུར། །དཔེ་བྱད་བཟང་པོ་བརྒྱད་ཅུ་དག །འགྲུབ་པའི་བསོད་
ནམས་ཚོགས་གང་ཡིན། །དེ་དག་བརྒྱར་ནི་བསྒྱུར་བ་ཡིས། །སྐྱེས་བུ་ཆེན་པོའི་མཚན་གཅིག་གོ། །མཚན་ནི་སུམ་ཅུ་འགྲུབ་པའི་རྒྱུ། །བསོད་ནམས་རྒྱ་ཆེན་གང་ཡིན་པ། །དེ་དག་སྟོང་དུ་བསྒྱུར་བ་ཡིས། །ཟླ་བ་ཉ་འདྲའི་མཛོད་སྤུའོ། །མཛོད་སྤུ་ཡི་ནི་བསོད་ནམས་དག །སྟོང་
ཕྲག་བརྒྱར་ནི་བསྡོམས་པ་ཡིས། །སྤྱི་གཙུག་བལྟར་ནི་མི་སྣང་བ། །སྐྱོབ་པའི་གཙུག་ཏོར་སྐྱེད་པར་བྱེད། །གཙུག་ཏོར་བསོད་ནམས་བྱེ་བ་ནི། །འབུམ་ཕྲག་བརྒྱར་ནི་བསྒྱུར་བ་ལས། །སྟོབས་བཅུ་མངའ་བའི་ཆོས་ཀྱི་དུང་། །གཅིག་འབྱུང་བར་ནི་ཤེས་པར་བྱ། །དེ་ལྟར་བསོད་ནམས་
ཚད་མེད་ཀྱང་། །ཇི་ལྟར་འཇིག་རྟེན་ཕྱོགས་ཀུན་དུ། །བཅུར་བསྒྲེས་མ་ལུས་བརྗོད་པ་ལྟར། །ཚད་དང་ལྡན་པར་བག་ཙམ་བརྗོད། །གང་ཚེ་སངས་རྒྱས་གཟུགས་སྐུ་ཡི། །རྒྱུ་ཡང་དེ་ལྟར་འཇིག་རྟེན་བཞིན། །གཞལ་མེད་དེ་ཚེ་ཆོས་སྐུ་ཡི། །རྒྱུ་ལྟ་ཇི་ལྟར་གཞལ་དུ་ཡོད། །

172-1-115a

ཐམས་ཅད་ཀྱི་ནི་རྒྱུ་ཆུང་ལས། །འབྲས་བུ་རྒྱ་ཆེན་སྐྱེད་འགྱུར་ན། །སངས་རྒྱས་རྒྱུ་ནི་དཔག་མེད་ལས། །འབྲས་བུ་དཔག་ཡོད་བསམ་ཐག་ཆད། །སངས་རྒྱས་རྣམས་ཀྱི་གཟུགས་སྐུ་ནི། །བསོད་ནམས་ཚོགས་ལས་བྱུང་བ་སྟེ། །ཆོས་ཀྱི་སྐུ་ནི་མདོར་བསྡུ་ན། །
རྒྱལ་པོ་ཡེ་ཤེས་ཚོགས་ལས་འཁྲུངས། །དེ་ལྟ་བས་ན་ཚོགས་འདི་གཉིས། །སངས་རྒྱས་ཉིད་ནི་ཐོབ་པའི་རྒྱུ། །དེ་ལྟར་མདོར་ན་བསོད་ནམས་དང་། །ཡེ་ཤེས་འདི་ནི་རྟག་བརྟེན་མཛོད། །རིགས་པ་དང་ནི་ལུང་བསྟན་པ། །དབུགས་འབྱིན་བྱེད་པའི་རྒྱུ་འདི་ཡིས། །བྱང་ཆུབ་བསྒྲུབ་པའི་བསོད་
ནམས་ནི། །འདི་ལ་སྒྱིད་ལུག་མི་བྱའོ། །ཕྱོགས་རྣམས་ཀུན་དུ་ནམ་མཁའ་དང་། །ས་དང་ཆུ་དང་མེ་དང་རླུང་། །ཇི་ལྟར་མཐའ་ཡས་དེ་བཞིན་དུ། །སྡུག་བསྔལ་སེམས་ཅན་མཐའ་ཡས་འདོད། །སེམས་ཅན་མཐའ་ཡས་དེ་དག་ནི། །བྱང་ཆུབ་སེམས་དཔའི་སྙིང་བརྩེ་བས། །སྡུག་
བསྔལ་དག་ལས་དྲང་བྱས་ཏེ། །སངས་རྒྱས་ཉིད་ལ་འགོད་པར་ངེས། །དེ་ལྟར་བརྟན་པར་གནས་དེ་ནི། །མི་ཉལ་བ་འམ་ཉལ་ཡང་རུང་། །ཡང་དག་བླངས་པ་ནས་བཟུང་སྟེ། །བག་མེད་གྱུར་ཀྱང་སེམས་ཅན་རྣམས། །མཐའ་ཡས་ཕྱིར་ན་སེམས་ཅན་བཞིན། །བསོད་ནམས་མཐའ་ཡས་རྟག་
སོགས་འགྱུར། །མཐའ་ཡས་དེས་ན་སངས་རྒྱས་ཉིད། །མཐའ་ཡས་ཐོབ་མིན་དཀའ་ཞེས་བྱ། །གང་ཞིག་དཔག་མེད་དུས་གནས་ཏེ། །ལུས་ཅན་དཔག་ཏུ་མེད་དོན་དུ། །བྱང་ཆུབ་དཔག་ཏུ་མེད་འདོད་ཅིང་། །དགེ་བ་དཔག་ཏུ་མེད་འདོད་པ། །དེས་ཀོ་བྱང་ཆུབ་དཔག་མེད་ཀྱང་། །དཔག་
ཏུ་མེད་པ་རྣམ་བཞི་ཡི། །ཚོགས་ཀྱིས་རིང་པོ་མི་ཐོགས་པར། །ཅི་ཡི་ཕྱིར་ན་འཐོབ་མི་འགྱུར། །བསོད་ནམས་མཐའ་ཡས་ཞེས་པ་དང་། །ཡེ་ཤེས་མཐའ་ཡས་ཞེས་པ་དེས། །ལུས་དང་སེམས་ཀྱི་སྡུག་བསྔལ་དག །མྱུར་བ་ཉིད་དུ་སེལ་བར་བྱེད། །སྡིག་པས་ངན་འགྲོར་ལུས་ཀྱིས་ནི། །
སྡུག་བསྔལ་བཀྲེས་སྐོམ་ལ་སོགས་འབྱུང་། །དེས་སྡིག་མ་བྱས་བསོད་ནམས་ཀྱིས། །སྲིད་པ་གཞན་ན་དེ་མེད་དོ། །རྨོངས་པས་ཡིད་ཀྱི་སྡུག་བསྔལ་ནི། །ཆགས་སྡང་འཇིགས་དང་འདོད་ལ་སོགས། །དེས་རྟེན་མེད་པའི་ཤེས་པ་ཡིས། །དེ་ནི་མྱུར་བ་ཉིད་དུ་སྤོང་། །ལུས་དང་ཡིད་

172-1-115b

ཀྱི་སྡུག་བསྔལ་གྱིས། །དེ་ལྟར་ཤིན་ཏུ་མ་སྨས་ན། །གལ་ཏེ་འཇིག་རྟེན་མཐས་གཏུགས་པར། །འཇིག་རྟེན་འདྲེན་ཀྱང་ཅིས་ཏེ་སྐྱོ། །སྡུག་བསྔལ་བ་ལ་ཡུན་ཐུང་ཡང་། །བཟོད་དཀའ་ཡུན་རིང་སྨོས་ཅི་དགོས། །སྡུག་བསྔལ་མེད་ཅིང་བདེ་བ་ལ། །མཐའ་ཡས་དུས་ཀྱང་ཇི་ཞིག་གནོད། །
དེ་ལ་ལུས་ཀྱི་སྡུག་བསྔལ་མེད། །ཡིད་ཀྱི་སྡུག་བསྔལ་ག་ལ་ཡོད། །དེ་ནི་སྙིང་རྗེས་འཇིག་རྟེན་སྡུག །དེ་ཉིད་ཀྱིས་ནི་ཡུན་རིང་གནས། །དེ་བས་སངས་རྒྱས་རིང་ཐོགས་ཤས། །བློ་དང་ལྡན་པ་སྒྱིད་མི་ལུག །ཉེས་ཟད་ཡོན་ཏན་དོན་དུ་ནི། །འདི་ལ་རྟག་ཏུ་འབད་པར་བྱ། །ཆགས་དང་
ཞེ་སྡང་གཏི་མུག་དག །ཉེས་པར་མཁྱེན་ནས་ཡོངས་སུ་སྤོངས། །མ་ཆགས་མི་སྡང་གཏི་མུག་མེད། །ཡོན་ཏན་མཁྱེན་ནས་གུས་པས་བརྟེན། །ཆགས་པས་ཡི་དགས་འགྲོ་བར་འགྲོ། །ཞེ་སྡང་གིས་ནི་དམྱལ་བར་འཕེན། །རྨོངས་པས་ཕལ་ཆེར་དུད་འགྲོར་འགྲོ། །བཟློག་
པས་ལྷ་དང་མི་ཉིད་དོ། །སྐྱོན་སྤངས་ཡོན་ཏན་འཛིན་པ་ནི། །མངོན་པར་མཐོ་བ་པ་ཡི་ཆོས། །ཤེས་པས་འཛིན་པ་སྤངས་ཟད་པ། །ངེས་པར་ལེགས་པ་པ་ཡི་ཆོས། །སངས་རྒྱས་སྐུ་གཟུགས་མཆོད་རྟེན་དང་། །གཙུག་ལག་ཁང་དག་གུས་ཚུལ་དུ། །ཤིན་ཏུ་རྒྱ་ཆེན་གནས་
མལ་སོགས། །རྒྱ་ཆེན་ཕྱུག་པ་བསྒྲུབ་པར་མཛོད། །རིན་ཆེན་ཀུན་ལས་བགྱིས་པ་ཡིས། །སངས་རྒྱས་སྐུ་གཟུགས་དབྱིབས་མཛེས་ཤིང་། །ལེགས་པར་བྲིས་པ་པདྨ་ལ། །བཞུགས་པ་དག་ཀྱང་བགྱིད་དུ་སྩོལ། །དམ་ཆོས་དགེ་སློང་དགེ་འདུན་དག །ནན་ཏན་ཀུན་གྱིས་
བསྐྱང་བར་མཛོད། །གསེར་དང་རིན་ཆེན་དྲ་བ་དག །ཉིད་ཀྱིས་མཆོད་རྟེན་རྣམས་ལ་ཐོགས། །གསེར་དང་དངུལ་གྱི་མེ་ཏོག་དང་། །རྡོ་རྗེ་བྱི་རུ་མུ་ཏིག་དང་། །ཨནྡ་རྙིལ་དང་བཻ་ཌཱུརྱ། །མཐོན་ཀ་ཆེན་པོས་མཆོད་རྟེན་མཆོད། །དམ་ཆོས་སྨྲ་ལ་མཆོད་པ་ནི། །རྙེད་དང་བཀུར་སྟི་
དང་ལྡན་པ། །དགའ་བར་འགྱུར་བ་རྣམས་བགྱི་ཞིང་། །ཆོས་དྲུག་གུས་པར་བསྟེན་པར་མཛོད། །བླ་མ་རིམ་གྲོ་གུས་ཉན་དང་། །ཞམ་རིང་དང་ནི་མདོངས་གསོལ་དང་། །བྱང་ཆུབ་སེམས་དཔའ་རྣམས་ལ་ཡང་། །རྟག་ཏུ་གུས་པས་མཆོད་པར་མཛོད། །མུ་སྟེགས་གཞན་

172-1-116a

ལ་གུས་པ་ཡིས། །མཆོད་དང་ཕྱག་ཀྱང་མི་བགྱི་སྟེ། །མི་ཤེས་པ་རྣམས་དེའི་རྐྱེན་གྱིས། །སྐྱོན་དང་བཅས་པ་ཆགས་འགྱུར་གདའ། །ཐུབ་དབང་གསུང་དང་དེས་བྱུང་བའི། །གཞུང་རྣམས་བྲི་དང་གླེགས་བམ་ནི། །སྣག་ཚ་དག་དང་སྨྱུ་གུ་དག །སྔོན་དུ་འགྲོ་
བ་སྦྱིན་པར་མཛོད། །ཡུལ་དུ་ཡི་གེ་གྲྭ་ཁང་དུ། །སློབ་དཔོན་འཚོ་བའི་བྱ་བ་དག །ཞིང་སྩལ་བ་ཡི་ངེས་པ་ནི། །ཡེ་ཤེས་སྤེལ་བའི་སླད་དུ་མཛོད། །རྒན་དང་བྱིས་པ་ནད་པ་དང་། །སེམས་ཅན་སྡུག་བསྔལ་བསལ་སླད་དུ། །ཡུལ་དུ་སྨན་པ་འདྲེག་མཁན་དག །ཞིང་གི་རྔན་པ་
འཇོག་ཏུ་སྩོལ། །འགྲོན་གནས་ཀུན་དགའ་ཆུ་ལོན་དང་། །རྫིང་དང་མདུན་ཁང་ཆུ་ར་དག །མལ་ཟས་རྩྭ་དང་ཤིང་ལྡན་པ། །ཤེས་རབ་བཟང་པོ་བགྱིད་དུ་སྩོལ། །གྲོང་དང་གཙུག་ལག་ཁང་དག་དང་། །གྲོང་ཁྱེར་ཀུན་དུ་འདུན་ཁང་དང་། །ཆུ་དཀོན་ལམ་རྣམས་ཐམས་
ཅད་དུ། །ཆུ་ར་དག་ནི་བགྱིད་དུ་སྩོལ། །ནད་པ་མགོན་མེད་སྡུག་བསྔལ་གྱིས། །ཉམ་ཐག་དམན་དང་ངན་པ་དག །སྙིང་རྗེས་རྟག་ཏུ་ཡོངས་བཟུང་ཞིང་། །དེ་དག་གསོ་ཕྱིར་གུས་བསྟེན་མཛོད། །དུས་སུ་འབྱུང་བའི་ཟས་སྐོམ་དང་། །བཅའ་བ་འབྲུ་དག་ཤིང་
ཏོག་དང་། །དེ་དག་སློང་བའི་སྐྱེ་བོ་ལ། །མ་སྩོལ་བར་དུ་གསོལ་མི་རིགས། །ལྷམ་དག་གདུངས་དང་ཆུ་ཚགས་དང་། །ཚེར་མ་དབྱུང་བའི་ཆ་སྟ་དང་། །ཁབ་དང་སྐུད་དང་བསིལ་ཡབ་དང་། །ཆུ་ར་ཡི་ནི་གནས་སུ་བཞག །འབྲས་བུ་གསུམ་དང་ཚ་བ་
གསུམ། །མར་དང་སྦྲང་རྩི་མིག་སྨན་དང་། །དུག་སེལ་ཆུ་རར་བཞག་བགྱི་ཞིང་། །གྲུབ་པའི་སྨན་དང་སྔགས་ཀྱང་བྲི། །ལུས་དང་རྐང་པ་མགོ་བསྐུ་དང་། །བལ་དང་ཁྲིའུ་དང་སྐྱོ་མ་དང་། །བུམ་པ་ཟངས་དང་དགྲ་སྟ་སོགས། །ཆུ་ར་དག་ཏུ་འཇོག་ཏུ་སྩོལ། །ཏིལ་དང་འབྲས་དང་འབྲུ་
དང་ཟས། །བུ་རམ་སྣུམ་དང་ལྡན་པ་ཡི། །ཆུ་ར་ཆུང་ངུ་བསིལ་གྲིབ་ཏུ། །རུང་བའི་ཆུས་བཀང་བགྱིད་དུ་སྩོལ། །གྲོག་སྦུར་ཚང་གི་སྒོ་དག་ཏུ། །ཟས་དང་ཆུ་དང་བུ་རམ་དང་། །འབྲུ་ཡི་ཕུང་པོ་རྟག་པར་ནི། །ཐུགས་བརྟན་མི་རྣམས་བགྱིད་དུ་སྩོལ། །བཤོས་གསོལ་སྔོན་དང་

172-1-116b

འོག་དག་ཏུ། །ཡི་དྭགས་ཁྱི་དང་གྲོག་སྦུར་དང་། །བྱ་ལ་སོགས་པ་ཅི་བདེ་བར། །རྟག་ཏུ་ཟས་དག་སྩལ་བར་མཛོད། །གཙེས་པ་དང་ནི་ལོ་ཉེས་དང་། །གནོན་པ་དང་ནི་ཡམས་ནད་དང་། །ཕམ་གྱུར་ཡུལ་དུ་འཇིག་རྟེན་པ། །རྗེས་སུ་བཟུང་བ་རྒྱ་ཆེན་མཛོད། །ཞིང་པ་ཉམ་ཐག་གྱུར་
རྣམས་ལ། །ས་བོན་ཟས་ཀྱིས་རྗེས་སུ་ཟུང་། །ནན་གྱིས་དཔྱ་ཁྲལ་བཏང་བ་དང་། །ཤས་རྣམས་ཀྱང་ནི་བསྐྱུང་བ་དང་། །ཆགས་ཉེན་པ་ལས་ཡོངས་བསྐྱབ་དང་། །ཤོ་གམ་བཏང་དང་ཤོ་གམ་དབྲི། །དེ་དག་སྒོ་ན་སྡོད་པ་ཡི། །ཉོན་མོངས་ལས་ཀྱང་བཟློག་པར་མཛོད། །རང་གི་ཡུལ་དང་ཡུལ་
གཞན་གྱི། །ཆོམ་རྐུན་རྣམས་ཀྱང་ཞི་བར་མཛོད། །དབྱིག་གི་སྤོབས་ནི་མཉམ་པ་དང་། །རིན་ཐང་རིགས་པར་བགྱིད་དུ་སྩོལ། །བློན་པོས་ཅི་དང་ཅི་གསོལ་པ། །ཉིད་ཀྱིས་ཀུན་དུ་མཁྱེན་མཛོད་ལ། །འཇིག་རྟེན་སྨན་པ་གང་དང་གང་། །དེ་དང་དེ་ཀུན་རྟག་ཏུ་མཛོད། །བདག་ཕན་ཅི་
དང་ཅི་བྱ་ཞེས། །ཇི་ལྟར་ཁྱེད་ལ་གུས་ཡོད་པ། །གཞན་ཕན་ཅི་དང་ཅི་བྱ་ཞེས། །དེ་བཞིན་ཁྱོད་ནི་གུས་པར་མཛོད། །ས་དང་ཆུ་དང་མེ་དང་རླུང་། །སྨན་དང་ནགས་ཀྱི་ཤིང་བཞིན་དུ། །བདག་ཉིད་ཡུད་ཙམ་གཅིག་ཏུ་ཡང་། །འདོད་དགུར་སྤྱད་པ་ཉིད་དུ་མཛོད། །གོམ་པ་བདུན་པའི་དུས་སུ་
ཡང་། །བདོག་པ་ཀུན་གཏོང་སེམས་འཆང་བའི། །བྱང་ཆུབ་སེམས་དཔའ་རྣམས་ལ་ནི། །བསོད་ནམས་མཁའ་འདྲ་དཔག་མེད་སྐྱེ། །བུ་མོ་གཟུགས་བཟང་ལུས་མཛེས་ལ། །དེ་དོན་གཉེར་བ་རྣམས་སྩལ་ན། །དེས་ནི་དམ་ཆོས་ཡོངས་འཛིན་པའི། །གཟུངས་ནི་སོ་སོར་ཐོབ་པར་འགྱུར། །
རྒྱན་རྣམས་ཀུན་དང་ལྡན་པ་ཡི། །བུ་མོ་སྟོང་ཕྲག་བརྒྱད་ཅུ་དག །ཡོ་བྱད་ཀུན་དང་ལྷན་ཅིག་ཏུ། །ཐུབ་པ་ཡིས་ནི་སྔོན་སྩལ་ཏོ། །སྣ་ཚོགས་པ་དང་འོད་གསལ་བའི། །བགོ་བ་དག་དང་རྒྱན་རྣམས་དང་། །དྲི་དང་ཕྲེང་བ་ལོངས་སྤྱོད་དག །སློང་བ་རྣམས་ལ་བརྩེ་བས་སྩོལ། །གང་
ལ་ཆོས་དོན་གང་མེད་ན། །ཤིན་ཏུ་ཉམ་ཐག་གྱུར་པ་དེ། །དེ་ཡི་མོད་ལ་བདེ་སྩལ་ན། །དེ་ལས་སྦྱིན་མཆོག་མ་མཆིས་སོ། །གང་ལ་དུག་ནི་ཕན་འགྱུར་ན། །དེ་ལ་དུག་ཀྱང་སྦྱིན་པར་བགྱི། །ཁ་ཟས་མཆོག་ཀྱང་མི་ཕན་ན། །དེ་ལ་དེ་ནི་སྦྱིན་མི་བགྱི། །སྦྲུལ་གྱིས་ཟིན་ལ་ཇི་ལྟ་བུར། །སོར་

172-1-117a

མོ་བཅད་ལ་ཕན་བཤད་པ། །དེ་བཞིན་ཐུབ་པས་གཞན་ཕན་པ། །མི་བདེ་བ་ཡང་བྱ་བར་གསུངས། །དམ་པའི་ཆོས་དང་ཆོས་སྨྲ་ལ། །ཉིད་ཀྱིས་བཀུར་སྟི་མཆོག་དང་ནི། །གུས་པར་བྱས་ཏེ་ཆོས་ཉན་ཞིང་། །ཆོས་ཀྱི་སྦྱིན་པ་དག་ཀྱང་མཛོད། །འཇིག་རྟེན་གཏམ་
ལ་དགའ་མ་མཛད། །འཇིག་རྟེན་འདས་ལ་དགྱེས་པར་མཛོད། །བདག་ལ་ཇི་ལྟར་དེ་བཞིན་དུ། །གཞན་ལ་ཡོན་ཏན་བསྐྱེད་པར་མཛོད། །གསན་པའི་ཆོས་ཀྱིས་མི་ངོམས་ཤིང་། །དོན་བཟུང་རྣམ་པར་དབྱེ་བ་དང་། །བླ་མ་དག་ལ་ཡོན་དབུལ་བ། །རྟག་ཏུ་གུས་པར་མཛད་དུ་གསོལ། །
འཇིག་རྟེན་རྒྱང་པན་སོགས་མི་གདོན། །རྩོད་པའི་དོན་གྱི་ང་རྒྱལ་སྤང་། །རང་གི་ཡོན་ཏན་མི་བསྔགས་ཤིང་། །དགྲ་ལའང་ཡོན་ཏན་བརྗོད་པར་མཛོད། །གནོད་ལ་དབབ་པར་མི་བགྱི་ཞིང་། །ངན་སེམས་ཀྱིས་ནི་གླེང་མི་བགྱི། །གཞན་རྣམས་ཀྱི་དང་བདག་ཉིད་ཀྱི། །འཁྲུལ་པ་
སོ་སོར་བརྟག་པར་བྱ། །ཉེས་པ་གང་གིས་གཞན་དག་ལ། །མཁས་པས་རྟག་ཏུ་ཁ་བྱ་བ། །དེ་ནི་རང་གིས་ཡོངས་སྤང་ཞིང་། །ནུས་པས་གཞན་ཡང་བཟློག་པར་མཛོད། །གཞན་གྱིས་གནོད་པ་བགྱིས་པ་ལ། །སྔོན་གྱི་ལས་དགོངས་ཁྲོ་མི་བགྱི། །སྡུག་བསྔལ་ཡང་འབྱུང་
མི་འགྱུར་བར། །རང་གི་ཉེས་པ་མེད་པར་བགྱི། །ལན་ལ་རེ་བ་མ་མཆིས་པར། །གཞན་དག་ལ་ནི་ཕན་པར་མཛོད། །སྡུག་བསྔལ་གཅིག་པུས་གནག་བགྱི་ཞིང་། །བདེ་བ་སློང་དང་ལྷན་ཅིག་སྤྱད། །ལྷ་ཡི་ཕུན་སུམ་ཚོགས་པས་ཀྱང་། །ཁེངས་པ་ཉིད་དུ་མི་བྱ་ཞིང་། །ཡི་དགས་
བཞིན་དུ་དབུལ་བ་ཡི། །རྒུད་པས་ཀྱང་ནི་ཞུམ་མི་བགྱི། །བདེན་པ་གང་གིས་རང་དོན་ལ། །རྒྱལ་སྲིད་ཉམས་པར་གྱུར་ན་ཡང་། །རང་གི་དོན་ལ་རྟག་བརྗོད་ཅིང་། །དེ་ལས་གཞན་སྨྲ་མི་བགྱིའོ། །ཇི་སྐད་གསུངས་པ་དེ་བཞིན་དུ། །མཛད་པའི་བརྟུལ་ཞུགས་རྟག་བརྟེན་མཛོད། །དེས་
ན་དཔལ་ལྡན་ས་སྟེངས་སུ། །ཚད་མ་ཡི་ནི་དམ་པར་འགྱུར། །ཁྱོད་ནི་རྟག་ཏུ་ཐམས་ཅད་ལ། །ལེགས་པར་བརྟགས་ཏེ་མཛད་པ་དང་། །ཡང་དག་ཇི་བཞིན་དོན་གཟིགས་པས། །གཞན་གྱི་དྲིང་མི་འཇོག་པར་མཛོད། །ཆོས་ལས་རྒྱལ་སྲིད་བདེ་བ་དང་། །ཕྱོགས་རྣམས་ཀུན་དུ་གྲགས་

172-1-117b

པ་ཡི། །བླ་རེ་རྒྱ་ཆེན་འབྱུང་འགྱུར་ཞིང་། །བློན་པོ་རྣམས་ཀྱང་ཀུན་དུ་འདུན། །འཆི་བའི་རྐྱེན་ནི་མང་བ་སྟེ། །གསོན་པ་ཡི་ནི་ཉུང་ཟད་ཅིག །དེ་དག་ཉིད་ནི་འཆི་བ་ཡིན། །དེ་བས་རྟག་ཏུ་ཆོས་མཛོད་ཅིག །འདི་ལྟར་རྟག་ཏུ་ཆོས་མཛད་ན། །འཇིག་རྟེན་ཀུན་དང་བདག་ཉིད་ལ། །ཉམས་
བདེར་འགྱུར་བ་གང་ལགས་པ། །དེ་ཉིད་རེ་ཞིག་ལྟོག་མོ་ལགས། །ཆོས་ཀྱིས་བདེ་བར་གཉིད་ལོག་ཅིང་། །བདེ་བར་སད་པ་དག་ཏུ་འགྱུར། །ནང་གི་བདག་ཉིད་སྐྱོན་མེད་པས། །རྨི་ལམ་དག་ཀྱང་བདེ་བ་མཐོང་། །ཕ་མ་སྲི་ཞུ་ལྷུར་ལེན་དང་། །རིགས་ཀྱི་གཙོ་ལ་རིམ་གྲོ་དང་། །ལོངས་
སྤྱོད་ལེགས་སྤྱོད་བཟོད་གཏོང་དང་། །ཚིག་འཇམ་ཕྲ་མ་མེད་བདེན་པའི། །བརྟུལ་ཞུགས་རྩེ་གཅིག་བྱས་པ་དེས། །ལྷ་ཡི་དབང་པོ་ཉིད་ཐོབ་ནས། །ད་དུང་དུ་ཡང་ལྷ་དབང་བགྱིད། །དེ་བས་དེ་འདྲའི་ཆོས་བསྟེན་མཛོད། །རྗེའུ་ཆོས་སུམ་བརྒྱའི་ཁ་ཟས་དག །ཉིན་རེ་དུས་གསུམ་བྱིན་
པ་བས། །བྱམས་པ་ཡུད་ཙམ་ཐང་ཅིག་གི། །བསོད་ནམས་དག་ལ་ཆར་མི་ཕོད། །ལྷ་མི་བྱམས་པར་འགྱུར་བ་དང་། །དེ་དག་ཀྱང་ནི་བསྲུང་བ་དང་། །ཡིད་བདེ་བ་དང་བདེ་མང་དང་། །དུག་དང་མཚོན་གྱིས་གནོད་མེད་དང་། །འབད་པ་མེད་པར་དོན་ཐོབ་དང་། །ཚངས་པའི་འཇིག་
རྟེན་སྐྱེ་འགྱུར་ཏེ། །གལ་ཏེ་གྲོལ་བར་མ་གྱུར་ཀྱང་། །བྱམས་ཆོས་ཡོན་ཏན་བརྒྱད་འཐོབ་པོ། །སེམས་ཅན་རྣམས་ནི་བྱང་ཆུབ་ཏུ། །སེམས་བསྐྱེད་བཅུག་ཅིང་བརྟན་བྱས་ན། །རི་དབང་རྒྱལ་པོ་ལྟར་བརྟན་ཞིང་། །བྱང་ཆུབ་སེམས་ནི་རྟག་ཏུ་འཐོབ། །དད་པས་མི་ཁོམ་འགྲོ་མི་འགྱུར། །
ཁྲིམས་ཀྱིས་འགྲོ་བ་བཟང་པོར་འགྲོ། །སྟོང་པ་ཉིད་ལ་གོམས་པ་ཡིས། །ཆོས་རྣམས་ཀུན་ལ་ཆགས་མེད་འཐོབ། །གཡོ་མེད་པས་ནི་དྲན་ལྡན་འཐོབ། །སེམས་པར་བྱེད་པས་བློ་གྲོས་འཐོབ། །བཀུར་སྟི་བྱེད་པས་དོན་རྟོགས་ལྡན། །ཆོས་སྲུང་ཤེས་རབ་ཅན་དུ་འགྱུར། །ཆོས་མཉན་པ་དང་
སྦྱིན་པ་དག །སྒྲིབ་པ་མེད་པར་བྱས་པ་ཡིས། །སངས་རྒྱས་རྣམས་དང་འགྲོགས་པ་ཉིད། །འདོད་པ་མྱུར་དུ་འཐོབ་པར་འགྱུར། །མ་ཆགས་པས་ནི་དོན་འགྲུབ་སྟེ། །སེར་སྣ་མེད་པས་ལོངས་སྤྱོད་འཕེལ། །ང་རྒྱལ་མེད་པས་གཙོ་བོར་འགྱུར། །ཆོས་ལ་བཟོད་པས་གཟུངས་འཐོབ་པོ། །སྙིང་

172-1-118a

པོ་ལྔ་རྣམས་བྱིན་པ་དང་། །འཇིགས་ལ་མི་འཇིགས་བྱིན་པ་ཡིས། །བདུད་རྣམས་ཀུན་གྱིས་མི་ཚུགས་ཤིང་། །སྟོབས་པོ་ཆེ་ཡི་མཆོག་ཏུ་འགྱུར། །མཆོག་རྟེན་མར་མེ་ཕྲེང་བ་དང་། །མུན་པ་དག་ཏུ་སྒྲོན་མ་དང་། །མར་མེ་འབྲུ་མར་བྱིན་པ་ཡིས། །ལྷ་ཡི་མིག་ནི་འཐོབ་
པར་འགྱུར། །མཆོད་རྟེན་མཆོད་པ་རོལ་མོ་དང་། །དྲིལ་བུ་དག་ནི་ཕུལ་བ་དང་། །དུང་དང་རྔ་ནི་རབ་ཕུལ་བས། །ལྷ་ཡི་རྣ་བ་འཐོབ་པར་འགྱུར། །ཞན་གྱི་འཁྲུལ་བ་མི་གླེང་ཞིང་། །ཡན་ལག་ཉམས་པ་རྣམས་མི་བརྗོད། །སེམས་ནི་རྗེས་སུ་བསྲུངས་པས་ན། །གཞན་གྱི་སེམས་ནི་
ཤེས་པ་འཐོབ། །ལྷམ་དང་བཞོན་པ་བྱིན་པ་དང་། །ཉམ་ཆུང་བཀུར་བ་བྱས་པ་དང་། །བཞོན་པས་བླ་མ་བཀུར་བ་ཡིས། །མཁས་པས་རྫུ་འཕྲུལ་ཐོབ་པར་འགྱུར། །ཆོས་ཀྱི་ཆེད་དང་དེ་བཞིན་དུ། །ཆོས་གཞུང་དོན་དག་དྲན་པ་དང་། །ཆོས་ཀྱི་སྦྱིན་པ་དྲི་མེད་པས། །ཚེ་རབས་དྲན་པ་
འཐོབ་པར་འགྱུར། །དངོས་རྣམས་ངོ་བོ་ཉིད་མེད་པར། །ཡང་དག་ཇི་བཞིན་ཡོངས་ཤེས་པས། །མངོན་ཤེས་དྲུག་པ་ཟག་པ་ཀུན། །ཟད་པ་མཆོག་ནི་འཐོབ་པར་འགྱུར། །སེམས་ཅན་ཐམས་ཅད་དགྲོལ་བའི་ཕྱིར། །དེ་བཞིན་ཉིད་ཤེས་མཉམ་ལྡན་པ། །སྙིང་རྗེས་བརླན་པ་བསྒོམས་
པ་ཡིས། །རྣམ་པའི་མཆོག་ལྡན་རྒྱལ་བར་འགྱུར། །སྨོན་ལམ་སྣ་ཚོགས་དག་པ་ཡིས། །སངས་རྒྱས་ཞིང་ནི་དག་པར་འགྱུར། །ཐུབ་དབང་རིན་ཆེན་ཕུལ་བ་ཡིས། །མཐའ་ཡས་འོད་ནི་རྣམ་པར་འཕྲོ། །དེ་བས་དེ་ལྟར་ལས་འབྲས་དག །མཐུན་པར་མཁྱེན་མཛད་དོན་དུ་ནི། །འགྲོ་
ལ་ཕན་པ་རྟག་ཏུ་མཛོད། །དེ་ཉིད་ཁྱོད་ལ་ཕན་པ་ལགས། །རིན་པོ་ཆེའི་ཕྲེང་བ་ལས་བྱང་ཆུབ་ཀྱི་ཚོགས་བསྡུས་པ་ཞེས་བྱ་བ་སྟེ་ལེའུ་གསུམ་པའོ།།      །།གང་ཕྱིར་བཟོད་དམ་མི་བཟོད་པ། །ཤེས་པར་དཀའ་བས་རྒྱལ་པོ་ནི། །ཆོས་མིན་རིགས་པ་མིན་སྤྱོད་ཀྱང་། །རྗེས་
སུ་འཚོ་བ་ཕལ་ཆེར་སྟོད། །རེ་ཞིག་གཞན་སུའང་རུང་བ་ལའང་། །མི་སྙན་ཕན་པ་བརྗོད་དགའ་ན། །ས་ཆེན་མངའ་བའི་རྒྱལ་ཁྱོད་ལ། །དགེ་སློང་བདག་ལྟ་སྨོས་ཅིད་གོས། །ཁྱོད་ཀྱིས་དགྱེས་པ་མཛད་སླད་དང་། །འགྲོ་བ་ལ་ཡང་བརྩེ་སླད་དུ། །ཁྱོད་ལ་མི་སྙན་ཡང་སྨན་པ། །བདག་ལྟ་

172-1-118b

གཅིག་པུས་ཏེ་པོར་གསོལ། །བདེན་འཇམ་དོན་ལྡན་འཕྲོད་པ་ནི། །བརྩེ་བས་དུས་སུ་སློབ་མ་ལ། །བརྗོད་པར་བྱ་ཞེས་བཅོམ་ལྡན་གསུང་། །དེ་ལྟ་བས་ན་དེ་སྐད་བརྗོད། །བརྟན་པ་ཁྲོ་བ་མེད་གྱུར་པ། །བདེན་པའི་ཚིག་ནི་བསྒྲགས་པ་ན། །ཁྲུས་བྱེད་བཟང་པོའི་ཆུ་བཞིན་དུ། །མཉན་འོས་ཉམས་
སུ་ལེན་པར་བགྱིད། །ཁྱོད་ལ་བདག་གིས་འདི་དང་ནི། །གཞན་དུ་ཕན་པ་བརྗོད་བགྱིད་པ། །མཁྱེན་པར་མཛོད་དེ་བདག་ཉིད་དང་། །གཞན་ལ་སྨན་པར་འགྱུར་དེ་མཛོད། །སློང་ལ་སྔོན་ཆད་སྦྱིན་བགྱིས་པས། །དོན་བརྙེས་གྱུར་ན་མི་སྦྱིན་ན། །བྱས་མི་གཟོ་དང་ཆགས་པ་ཡིས། །ཕྱི་ནས་དོན་རྣམས་
འཐོབ་མི་འགྱུར། །འཇིག་རྟེན་འདི་ནི་ལས་བྱེད་པ། །བླ་མེད་ལམ་བརྒྱགས་ཁྱེར་མི་བཏུབ། །སློང་བ་དམན་པ་མ་དྲན་པར། །ཕྱི་མའི་ཚེ་ན་བརྒྱ་འགྱུར་ཏེ། །རྟག་ཏུ་ཐུགས་རྗེ་ཆེན་པོ་དང་། །མཛད་པ་རྒྱ་ཆེན་ལས་དགྱེས་མཛོད། །རྒྱ་ཆེན་ལས་ལས་འབྲས་བུ་ནི། །ཐམས་ཅད་རྒྱ་ཆེན་འབྱུང་བར་འགྱུར། །
རྒྱལ་པོ་དམན་པ་རྣམས་ཀྱིས་ནི། །ཡིད་ལའང་བསམས་པར་མ་གྱུར་པའི། །ཆོས་བཞིན་དཀོན་མཆོག་གསུམ་གྱི་རྟེན། །གྲགས་པ་དཔལ་དང་ལྡན་པའི་མཛོད། །ཆོས་བཞིན་གང་ཞིག་ཀུན་འབྱོར་པའི། །རྒྱལ་པོ་བ་སྤུ་མི་ལྡང་བ། །ཤི་ནའང་སྙན་པར་མི་འགྱུར་བས། །རྒྱལ་པོ་དེ་ནི་མ་བྱས་བླ། །
རྒྱ་རབ་ཆེ་ཕྱིར་རྒྱ་ཆེན་རྣམས། །སྙེམས་བྲལ་སྤྲོ་བ་སྐྱེད་བྱེད་ཅིང་། །དམན་རྣམས་སྤྲོ་བ་འཇོམས་བྱེད་པ། །བདོག་པ་ཐམས་ཅད་གཏུགས་ཏེ་མཛོད། །ཁྱོད་ནི་བདོག་པ་ཀུན་བོར་ནས། །དབང་མེད་ག་ཤེད་གཤེགས་འཚལ་བས། །ཆོས་ཀྱི་སླད་དུ་སྤྱད་པ་ཀུན། །ཁྱོད་ཀྱི་མདུན་དུ་འདོར་བ་
ཉིད། །མི་དབང་སྔ་མའི་བདོག་པ་ཀུན། །སར་པ་ཡིས་ནི་དབང་གྱུར་ན། །སྔ་མའི་ཆོས་སམ་བདེ་བ་འམ། །གྲགས་པ་དག་ཏུ་འགྱུར་རམ་ཅི། །ནོར་སྤྱད་པ་ཡིས་འདི་ལ་བདེ། །བྱིན་པས་གཞན་དུ་བདེ་བར་འགྱུར། །མ་སྤྱད་མ་སྦྱིན་ཆུད་ཟོས་པས། །སྡུག་བསྔལ་འབའ་ཞིག་ག་ལ་བདེ། །
འཆི་ཁར་བློན་པོ་རྗེས་ངན་ཅན། །གཅེས་པར་མི་འཛིན་རྒྱལ་པོ་གསར། །བྱམས་པར་འདོད་པ་རྣམས་ཀྱིས་ཀྱང་། །དབང་མེད་བྱས་པས་སྦྱིན་མི་སྤྱོད། །དེ་བས་རྣལ་གནས་མྱུར་དུ་ནི། །བདོག་པ་ཀུན་གྱིས་ཆོས་གཞི་མཛོད། །འཆི་བདག་རྐྱེན་གྱི་ནང་གནས་པ། །རླུང་དམར་ནང་འདུག་མར་

172-1-119a

མེ་བཞིན། །སྔོན་གྱི་རྒྱལ་པོས་ཆོས་ཀྱི་གཞི། །ལྷ་ཁང་ལ་སོགས་གཞན་བགྱིས་པ། །གང་དག་ལགས་པ་དེ་དག་ཀྱང་། །སྔ་ལུགས་བཞིན་དུ་སྐྱོང་བར་མཛོད། །དེ་དག་འཚེ་མེད་དགེ་སྤྱོད་ཅིང་། །བརྟུལ་ཞུགས་ལ་གནས་གློ་བུར་བྱམས། །བདེན་བཟོད་འཐབ་
ཀྲོལ་མ་མཆིས་པ། །རྟག་ཏུ་བརྩོན་རྣམས་སྤྱོད་དུ་གསོལ། །ལོང་བ་ནད་པ་དམན་པ་དང་། །མགོན་མེད་སྡུག་ཕོངས་ཡན་ལག་ཉམས། །དེ་དག་ཀྱང་ནི་ཟས་དང་སྐོམ། །དགག་པ་མེད་པར་སྙོམས་ཐོབ་མཛོད། །ཆོས་ལྡན་དོན་དུ་མི་གཉེར་བ། །རྒྱལ་པོ་གཞན་ཡུལ་གནས་རྣམས་
ལའང་། །རྗེས་སུ་གཟུང་བར་བགྱིད་པ་དང་། །ཅི་རིགས་པ་ནི་རབ་ཏུ་མཛོད། །ཆོས་ཀྱི་གཞི་ནི་ཐམས་ཅད་དུ། །ཆོས་འཁོར་སྣ་བོས་མི་གཡེལ་བ། །མི་གཟན་མཁས་ཤིང་ཆོས་མཐུན་པ། །དེ་དག་རྣམས་ལ་མི་གནོད་སྐོས། །ལུགས་ཤེས་ཆོས་དང་ལྡན་ལ་འབྱར། །གཙང་ཞིང་སྙིང་ཉེ་མི་
སྡང་བ། །རིགས་བཟང་ངང་ཚུལ་ཕུན་སུམ་ཚོགས། །བྱས་པ་གཟོ་བའི་བློན་པོ་སྐོས། །གཏོང་ཕོད་མ་ཆགས་དཔའ་བ་དང་། །འཇམ་ཞིང་རན་སྤྱོད་བརྟན་པ་དང་། །རྟག་ཏུ་བག་ནི་ཡོད་པ་དང་། །ཆོས་དང་ལྡན་པའི་དམག་དཔོན་སྐོས། །ཆོས་ཀྱི་ངང་ཚུལ་གཙང་ལ་གཟོ། །དོན་ཤེས་
གཙུག་ལག་ལ་མཁས་པ། །ཚུལ་ལྡན་སྙོམས་ཤིང་ངང་འཇམ་པ། །རྒན་རབས་རྣམས་ནི་སྣ་བོར་སྐོས། །ཟླ་རེ་ཞིང་ནི་དེ་དག་ལས། །ཉིད་ཀྱིས་འདུ་འགོད་ཀུན་གསོན་ཏེ། །གསན་ནས་ཆོས་ཀྱི་གཞི་སོགས་ཀྱི། །དོན་ཀུན་ཉིད་ཀྱིས་བཀའ་སྩོལ་ཅིག །ཁྱོད་ཀྱི་རྒྱལ་སྲིད་ཆོས་དོན་དུ། །
གྲགས་དོན་འདོད་སླད་མ་ལགས་ན། །དེ་ནི་ཤིན་ཏུ་འབྲས་བུར་བཅས། །དེ་ལས་གཞན་དུ་འགྱུར་མ་མཆིས། །མི་དབང་ད་ལྟ་འཇིག་རྟེན་ན། །ཕལ་ཆེར་ཕན་ཚུན་ལྟོར་འཛུད་པས། །ཇི་ལྟར་ཁྱོད་ཀྱིས་རྒྱལ་སྲིད་དང་། །ཆོས་སུ་འགྱུར་བ་དེ་བཞིན་གསོན། །ཤེས་པས་རྒན་ཞིང་རིགས་
བཟང་བ། །རིག་པ་ཤེས་ལ་སྡིག་ལ་འཛེམ། །ནང་གཤིན་དགོས་པ་མཐོང་འགྱུར་བ། །མང་པོ་རྟག་ཏུ་ཁྱོད་ཀྱིས་སོགས། །ཆད་པ་གཟུང་དང་བརྡེག་ལ་སོགས། །རིགས་པའང་ཁྱོད་ཀྱིས་མི་བགྱི་སྟེ། །སྙིང་རྗེས་བརླན་པར་བགྱིས་ནས་ནི། །རྟག་ཏུ་རྗེས་སུ་གཟུང་བར་མཛོད། །མི་

172-1-119b

བཟད་སྡིག་པ་བྱེད་པ་ཡི། །ལུས་ཅན་དག་ནི་ཐམས་ཅད་ལའང་། །རྒྱལ་པོ་ཁྱོད་ཀྱིས་རྟག་པར་ཡང་། །སྙིང་རྗེས་ཕན་སེམས་ཁོ་ན་སྐྱེད། །མི་བཟད་སྡིག་ཅན་གསོད་བྱེད་ལ། །ཁྱད་པར་དུ་ཡང་སྙིང་རྗེ་བགྱི། །བདག་ཉིད་ཉམས་པ་དེ་བདག་ཉིད། །བདག་ཉིད་ཆེན་པོའི་སྙིང་རྗེའི་གནས། །
ཉིན་གཅིག་བཞིན་ནམ་ཞག་ལྔ་བར། །ཉམ་ཆུང་བཙོན་རྣམས་གཏོང་བར་མཛོད། །ལྷག་མ་རྣམས་ཀྱང་ཅི་རིགས་མཛོད། །འགའ་ཡང་མི་དགྲོལ་མིན་པར་མཛོད། །ཁྱོད་ནི་འགའ་ལའང་གཏང་སེམས་མེད། །དེ་ལས་སྡོམ་པ་མིན་པ་སྐྱེ། །སྡོམ་པ་མ་ཡིན་དེ་ལས་ནི། །རྒྱུན་མི་འཆད་
པར་སྡིག་པ་སོགས། །བཙོན་ནི་ཇི་སྲིད་མ་བཏང་བ། །དེ་ཡི་བར་དུ་འདྲེག་མཁན་དང་། །ཁྲུས་དང་བཟའ་དང་བཏུང་བ་དང་། །སྨན་དང་ལྡན་པས་བདེ་བར་བགྱི། །སྣོད་མེད་པ་ཡི་བུ་དག་ལ། །སྣོད་དུ་རུང་བར་བྱ་འདོད་ལྟར། །སྙིང་རྗེ་ཡིས་ནི་ཚར་གཅད་
བྱའི། །སྡང་བས་མ་ཡིན་ནོར་ཕྱིར་མིན། །རབ་སྡང་གསོད་པར་བྱེད་པའི་མི། །བརྟགས་ཏེ་ལེགས་པར་ཤེས་བགྱིས་ནས། །མི་གསད་གནོད་པར་མི་བགྱི་བར། །ཡུལ་ནས་བསྐྲད་པ་དག་ཏུ་མཛོད། །རང་དབང་ཡོད་པར་ཡུལ་ཀུན་ཡང་། །བྱ་མ་རྟ་ཡི་སྤྱན་གྱིས་གཟིགས། །རྟག་ཏུ་བག་ཡོད་
དྲན་ལྡན་པས། །ཆོས་དང་མཐུན་པའི་དོན་མཛོད་ཅིག །ཡོན་ཏན་གནས་ལ་བདག་ཉིད་ཀྱིས། །རབ་སྦྱིན་བཀུར་སྟི་རིམ་གྲོ་དག །རྒྱ་ཆེ་རྗེས་སུ་མཐུན་སྦྱར་ཞིང་། །ལྷག་མ་རྣམས་ལའང་ཅི་རིགས་བགྱི། །རྒྱལ་པོའི་ལྗོན་ཤིང་བཟོད་གྲིབ་ཅན། །བཀུར་སྟིའི་མེ་ཏོག་རྒྱས་གྱུར་ཅིང་། །
རབ་སྦྱིན་འབྲས་བུ་ཆེ་ལྡན་ལ། །དམངས་ཀྱི་བྱ་རྣམས་བསྟེན་པར་འགྱུར། །རྒྱལ་པོ་གཏོང་བའི་ངང་ཚུལ་ཅན། །བརྗིད་དང་ལྡན་ན་དགའ་འགྱུར་ཏེ། །སུག་སྨེལ་ན་ལེ་ཤམ་རྩུབ་པའི། །ཤ་ཁ་ར་ཡི་ལ་དུ་བཞིན། །དེ་ལྟར་རིགས་པས་དཔྱད་ན་ནི། །ཁྱོད་ཀྱི་རྒྱལ་སྲིད་འགོད་མི་
འགྱུར། །རིགས་པ་མ་ཡིན་མི་འགྱུར་ཞིང་། །ཆོས་མིན་མ་ཡིན་ཆོས་སུ་འགྱུར། །རྒྱལ་སྲིད་འཇིག་རྟེན་ཕ་རོལ་ནས། །བསྣམས་ཏེ་མ་བྱོན་བསྣམས་མི་འགྱུར། །ཆོས་ཀྱིས་སྙེམས་པས་དེའི་སླད་དུ། །ཆོས་མིན་ཁྱོད་ཀྱིས་བགྱི་མི་རིགས། །འཚོག་ཆས་ཟོང་ནི་རྒྱལ་སྲིད་ཀྱིས། །སྡུག་

172-1-120a

བསྔལ་འཚོག་ཆས་བརྒྱུད་པ་དག །ཅི་ནས་བསྒྲུབ་པར་མི་འགྱུར་བར། །རྒྱལ་པོ་དེ་ལྟར་ནན་ཏན་མཛོད། །འཚོག་ཆས་ཐོང་ནི་རྒྱལ་སྲིད་ཀྱིས། །རྒྱལ་སྲིད་འཚོག་ཆས་བརྒྱུད་པ་དག །རྒྱལ་པོ་ཅི་ནས་མཉེས་འགྱུར་བ། །དེ་ལྟ་བུར་ནི་ནན་ཏན་མཛོད། །གླིང་བཞི་པ་
ཡི་ས་ཐོབ་ཀྱང་། །འཁོར་ལོས་སྒྱུར་བའི་བདེ་བ་ནི། །ལུས་ཀྱི་དག་དང་སེམས་ཀྱི་སྟེ། །འདི་གཉིས་ཁོ་ནར་ཟད་པར་འདོད། །ལུས་ཀྱི་ཚོར་བ་བདེ་བ་ནི། །སྡུག་བསྔལ་ཕྱིར་ན་བཅོས་མ་ཙམ། །སེམས་ཀྱི་འདུ་ཤེས་རང་བཞིན་ཏེ། །རྟོག་པས་བྱས་པ་ཁོ་ནར་ཟད། །འཇིག་རྟེན་
བདེ་བས་བདོག་པ་ཀུན། །སྡུག་བསྔལ་ཕྱིར་ནི་བཅོས་ཙམ་དང་། །རྟོག་པ་ཙམ་ཉིད་ཡིན་དེའི་ཕྱིར། །དེ་ནི་དོན་དུ་དོན་མེད་དོ། །གླིང་དང་ཡུལ་དང་གནས་དང་ཁྱིམ། །ཁྱོགས་དང་སྟན་དང་གོས་རྣམས་དང་། །མལ་ཆ་བཟའ་བཏུང་གླང་པོ་རྟ། །བུད་མེད་སྤྱད་བྱ་རེ་རེར་ཟད། །གང་ཚེ་
གང་ལ་སེམས་འཇུག་པ། །དེ་ཚེ་དེ་ཡིས་བདེ་ཞེས་གྲག །ལྷག་མ་ཡིད་ལ་མི་བྱེད་པས། །དེ་ཚེ་དོན་དུ་དོན་མེད་ཉིད། །མིག་ལ་སོགས་པའི་དབང་པོ་ལྔས། །ཡུལ་ལྔ་འཛིན་ཚེ་གང་གི་ཕྱིར། །རྟོག་པར་མི་བྱེད་དེ་ཡི་ཕྱིར། །དེ་ཚེ་དེ་ལ་བདེ་བ་མེད། །གང་ཚེ་ཡུལ་ནི་གང་དང་གང་། །
དབང་པོ་གང་གིས་ཤེས་གྱུར་པ། །དེ་ཚེ་ལྷག་མས་ལྷག་མ་མིན། །གང་ཚེ་དེ་ཕྱིར་དོན་མེད་ཉིད། །དབང་པོ་ཡིས་ནི་མིག་གྱུར་པ། །འདས་པའི་ཡུལ་གྱི་རྣམ་པ་ལ། །ཡིད་ཀྱིས་དམིགས་ནས་རྟོགས་པ་ན། །བདེའོ་སྙམ་དུ་རློམ་པར་བྱེད། །འདི་ནི་དབང་པོ་གཅིག་གིས་ནི། །དོན་གཅིག་ཤེས་
པ་གང་ཡིན་པ། །དེ་ཡང་དོན་མེད་པར་དོན་མེད། །དོན་ཡང་དེ་མེད་པར་དོན་མེད། །ཇི་ལྟར་ཕ་དང་མ་དག་ལ། །བརྟེན་ནས་བུ་ནི་འབྱུང་བཤད་པ། །དེ་བཞིན་མིག་དང་གཟུགས་བརྟེན་ནས། །རྣམ་པར་ཤེས་པ་འབྱུང་བར་བཤད། །ཡུལ་ནི་འདས་དང་མ་འོངས་རྣམས། །དབང་པོ་དང་བཅས་
དོན་མེད་ལ། །དེ་གཉིས་ལས་ཐ་དད་མེད་ཕྱིར། །གང་དག་ད་ལྟར་ཡང་དོན་མེད། །ཇི་ལྟར་མིག་ནི་འཁྲུལ་པ་ཡིས། །མགལ་མེའི་འཁོར་ལོ་འཇིག་བྱེད་པ། །དེ་བཞིན་དབང་པོ་རྣམས་ཀྱིས་ནི། །དེ་ལྟའི་ཡུལ་དག་འཛིན་པར་བྱེད། །དབང་པོ་རྣམས་དང་དབང་དོན་རྣམས། །འབྱུང་

172-1-120b

བ་རྣམས་ཀྱི་རང་བཞིན་འདོད། །འབྱུང་བ་སོ་སོར་དོན་མེད་པས། །འདི་དག་དོན་དུ་དོན་མེད་དོ། །འབྱུང་རྣམས་སོ་སོར་ཐ་དད་ན། །བུད་ཤིང་མེད་པའི་མེར་ཐལ་འགྱུར། །འདུས་ན་མཚན་ཉིད་མེད་འགྱུར་ཏེ། །ལྷག་མ་ལ་ཡང་དེ་ལྟར་ངེས། །དེ་ལྟར་འབྱུང་རྣམས་རྣམ་གཉིས་སུའང་། །དོན་
མེད་པས་ན་འདུས་དོན་མེད། །འདུས་པ་དོན་མེད་ཉིད་ཀྱི་ཕྱིར། །གཟུགས་ཀྱང་དོན་དུ་དོན་མེད་དོ། །རྣམ་ཤེས་ཚོར་དང་འདུ་ཤེས། །འདུ་བྱེད་རྣམས་ཀྱང་ཐམས་ཅད་དུ། །སོ་སོར་བདག་ཉིད་དོན་མེད་ཕྱིར། །དམ་པའི་དོན་དུ་དོན་མེད་དོ། །ཇི་ལྟར་སྡུག་བསྔལ་ཕྱིར་བཅོས་ལ། །དོན་དུ་བདེ་
བར་ང་རྒྱལ་བྱེད། །དེ་བཞིན་བདེ་འཇོམས་འབྱུང་བ་ལ། །སྡུག་བསྔལ་དུ་ཡང་ང་རྒྱལ་བྱེད། །ད་ལྟར་ངོ་བོ་ཉིད་མེད་ཕྱིར། །བདེ་དང་ཕྲད་པའི་སྲེད་པ་དང་། །སྡུག་བསྔལ་བྲལ་བའི་སྲེད་པ་སྤོང་། །དེ་ཕྱིར་དེ་ལྟར་མཐོང་བ་གྲོལ། །གང་གིས་སེམས་མཐོང་འགྱུར་ཞེ་ན། །ཐ་སྙད་དུ་ནི་
སེམས་བརྗོད་དེ། །སེམས་བྱུང་མེད་པར་སེམས་མི་འབྱུང་། །དོན་མེད་ལྷན་ཅིག་མི་འདོད་དོ། །དེ་ལྟར་ཡང་དག་ཇི་བཞིན་དུ། །འགྲོ་བ་དོན་མེད་ཤེས་ནས་ནི། །རྒྱུ་མེད་པ་ཡི་མེ་བཞིན་དུ། །གནས་མེད་ལེན་མེད་མྱ་ངན་འདའ། །དེ་ལྟར་བྱང་ཆུབ་སེམས་དཔས་ཀྱང་། །མཐོང་ནས་
བྱང་ཆུབ་ངེས་པར་འདོད། །དེ་ནི་སྙིང་རྗེ་འབའ་ཞིག་གིས། །བྱང་ཆུབ་བར་དུ་སྲིད་མཚམས་སྦྱོར། །དེ་བཞིན་གཤེགས་པས་ཐེག་ཆེན་ལས། །བྱང་ཆུབ་སེམས་དཔའི་ཚོགས་བསྟན་ན། །དེ་ལ་ཀུན་དུ་རྨོངས་པ་དང་། །རབ་ཏུ་སྡང་བས་སྨོད་པར་བྱེད། །ཡོན་ཏན་སྐྱོན་དག་མི་ཤེས་
པའམ། །ཡོན་ཏན་སྐྱོན་དུ་འདུ་ཤེས་པའམ། །ཡང་ན་ཡོན་ཏན་སྡང་བ་ཞིག །ཐེག་པ་ཆེ་ལ་སྨོད་བྱེད་གྲང་། །གཞན་ལ་གནོད་པ་སྐྱོན་དང་ནི། །གཞན་ལ་ཕན་པ་ཡོན་ཏན་དུ། །ཤེས་ན་ཐེག་པ་ཆེན་པོ་ལ། །སྨོད་བྱེད་ཡོན་ཏན་སྡང་ཞེས་བརྗོད། །རང་གི་དོན་ལ་མི་ལྟ་ཞིང་། །གཞན་
དོན་རོ་གཅིག་དགའ་བ་གང་། །ཡོན་ཏན་འབྱུང་གནས་ཐེག་ཆེན་ཏེ། །དེས་ན་དེས་སྡང་བསྲེག་པར་འགྱུར། །དད་པ་ཅན་ནི་བཟུང་ཉེས་པས། །ཅིག་ཤོས་སྡང་ཞིང་ཁྲོས་པ་ཡིས། །དད་པ་ཅན་ཡང་བསྲེག་བཤད་ན། །སྡང་བས་ཕྱིར་ཕྱོགས་སྨོས་ཅི་དགོས། །དུག་གིས་དུག་ནི་བསལ་བྱ་

172-1-121a

བར། །ཇི་ལྟར་སྨན་དཔྱད་ལས་བཤད་བཞིན། །སྡུག་བསྔལ་གྱིས་ཀྱང་མི་ཕན་པ། །བསལ་བར་བྱ་བ་ཅི་ཞིག་འགལ། །ཆོས་རྣམས་སྔོན་དུ་ཡིད་འགྲོ་ཞིང་། །ཡིད་ནི་གཙོ་བོ་ཞེས་གྲགས་པས། །སྡུག་བསྔལ་གྱིས་ཀྱང་ཕན་ཡིད་ཀྱིས། །ཕན་པར་བྱེད་པ་ཅིས་མི་
ཕན། །མི་བདེའང་ཕྱིས་རྗེས་ཕན་འགྱུར་བ། །བྱ་ན་བདག་དང་གཞན་དག་ལ། །བདེ་ཕན་ལྟ་ཞིག་ཅི་སྨོས་ཏེ། །ཆོས་འདི་གནའ་ཡི་ལུགས་ཡིན་ནོ། །གལ་ཏེ་བདེ་ཆུང་ཡོངས་བཏང་བས། །བདེ་བ་རྒྱ་ཆེན་ཐོང་འགྱུར་ན། །བརྟན་པས་བདེ་ཆེན་ཡངས་གཟིགས་ལ། །བདེ་བ་ཆུང་ངུ་
བཏང་བར་མཛོད། །གལ་ཏེ་དེ་ཡང་མི་བཟོད་ན། །དེས་ན་སྨན་པ་ལ་སོགས་པ། །མི་ཞིག་སྨན་ནི་སྦྱིན་བྱེད་པ། །བཅོམ་འགྱུར་འདི་ནི་རྟད་མ་ཡིན། །གནོད་པར་འགྱུར་བ་གང་ཡིན་ཏེ། །ལ་ལར་མཁས་པས་ཕན་པར་མཐོང་། །སྤྱིར་བཏང་དམིགས་ཀྱིས་བསལ་བ་དག །བསྟན་
བཅོས་དག་ནི་ཀུན་ལ་བསྔགས། །ཐེག་པ་ཆེན་པོ་གང་ཞིག་ལས། །སྙིང་རྗེ་སྔོན་བཏང་སྤྱོད་ཡུལ་དང་། །ཡེ་ཤེས་དྲི་མ་མེད་བཤད་པ། །སེམས་ཡོད་སུ་ཞིག་དེ་ལ་སྨོད། །ཤིན་ཏུ་རྒྱ་ཆེ་རབ་ཟབ་ལ། །སྒྱིད་ལུག་བདག་ཉིད་མ་སྦྱངས་པས། །བདག་གཞན་དགྲ་རྣམས་རྨོངས་པ་ཡིས། །
འདི་ནི་ཐེག་པ་ཆེ་ལ་སྨོད། །སྦྱིན་དང་ཚུལ་ཁྲིམས་བཟོད་རྩོན་འགྲུས། །བསམ་གཏན་ཤེས་རབ་སྙིང་རྗེའི་བདག །ཐིག་ཆེན་ཡིན་ན་དེ་ཡི་ཕྱིར། །འདི་ལ་ཉེས་བཤད་ཅི་ཞིག་ཡོད། །ཚུལ་ཁྲིམས་སྦྱིན་པས་གཞན་གྱི་དོན། །བརྩོན་འགྲུས་བཟོད་པས་བདག་ཉིད་ཀྱི། །བསམ་
གཏན་ཤེས་རབ་ཐར་པའི་རྒྱུ། །ཐེག་ཆེན་དོན་ནི་བསྡུས་པ་ཡིན། །བདག་དང་གཞན་ཕན་ཐར་པའི་དོན། །མདོར་སངས་རྒྱས་བསྟན་དེ་དག་ནི། །ཕ་རོལ་ཕྱིན་དྲུག་ཁོ་ན་ཡིན། །དེ་བས་འདི་ནི་སངས་རྒྱས་བཀའ། །བྱང་ཆུབ་ལམ་ཆེན་བསོད་ནམས་དང་། །ཡེ་ཤེས་རང་བཞིན་སངས་
རྒྱས་ཀྱིས། །གང་ལས་བསྟན་པའི་ཐེག་ཆེན་དེ། །མི་ཤེས་ལྡོངས་རྣམས་མི་བཟོད་དོ། །ཡོན་ཏན་མཁའ་ལྟར་བསམ་ཡས་པས། །རྒྱལ་པོའི་ཡོན་ཏན་བསམ་ཡས་གསུངས། །གང་ཕྱིར་སངས་རྒྱས་བདག་ཉིད་ཆེ། །ཐེག་ཆེན་ལས་བཤད་འདིར་བཟོད་ཀྱི། །འཕགས་པ་

172-1-121b

ཤ་ར་དྭ་ཏིའི་བུས། །ཚུལ་ཁྲིམས་ཙམ་ཡང་མི་ཤེས་པས། །དེས་ན་སངས་རྒྱས་བདག་ཉིད་ཆེ། །དེ་བསམ་ཡས་པར་ཅི་མི་བཟོད། །ཐེག་པ་ཆེ་ལས་སྐྱེ་མེད་བསྟན། །གཞན་གྱི་ཟད་པ་སྟོང་པ་ཉིད། །ཟད་དང་མི་སྐྱེ་དོན་དུ་ནི། །གཅིག་པས་དེ་ཕྱིར་བཟོད་པར་གྱིས། །སྟོང་ཉིད་
སངས་རྒྱས་ཆེ་བདག་ཉིད། །དེ་ལྟར་རིགས་པས་རྗེས་བལྟས་ན། །ཐེག་ཆེན་ཅིག་ཤོས་ལས་གསུངས་པ། །མཁས་པ་རྣམས་ལ་ཅིས་མི་མཉམ། །དེ་བཞིན་གཤེགས་དགོངས་གསུངས་པ་རྣམས། །ཤེས་པར་བླ་མིན་དེ་ཡི་ཕྱིར། །ཐེག་གཅིག་ཐེག་པ་གསུམ་གསུངས་པས། །
བཏང་སྙོམས་ཀྱིས་ནི་བདག་བསྲུང་བྱ། །བཏང་སྙོམས་ཀྱིས་ནི་སྡིག་མི་འགྱུར། །སྡང་བས་སྡིག་འགྱུར་དགེར་མི་འགྱུར། །དེ་བས་ཐེག་ཆེན་ཞེ་སྡང་བ། །བདག་ལེགས་འདོད་པས་བྱར་མི་རིགས། །ཉན་ཐོས་ཐེག་པ་དེ་ལས་ནི། །བྱང་ཆུབ་སེམས་དཔའི་
སྨོན་ལམ་དང་། །སྤྱོད་པ་ཡོངས་བསྔོ་མ་བཤད་དེས། །བྱང་ཆུབ་སེམས་དཔར་ག་ལ་འགྱུར། །བྱང་ཆུབ་སེམས་དཔའི་བྱང་ཆུབ་ཕྱིར། །བྱིན་རླབས་སངས་རྒྱས་ཀྱིས་མ་བཤད། །དོན་འདི་ལ་ནི་རྒྱལ་བ་ལས། །ལྷག་པའི་ཚད་མ་གཞན་སུ་ཡོད། །བྱིན་རླབས་འཕགས་པའི་བདེན་དོན་དང་། །
བྱང་ཆུབ་ཕྱོགས་མཐུན་ལྡན་པ་ཡི། །ལམ་ནི་ཉན་ཐོས་ཐུན་མོང་ལས། །སངས་རྒྱས་འབྲས་བུ་གང་གིས་ལྷག་། བྱང་ཆུབ་སྤྱོད་ལ་གནས་པའི་དོན། །མདོ་སྡེ་ལས་ནི་བཀའ་མ་སྩལ། །ཐེག་པ་ཆེ་ལས་བཀའ་སྩལ་པས། །དེ་ཕྱིར་མཁས་པ་རྣམས་ཀྱིས་བཟུང་། །བརྡ་སྤྲོད་པ་དག་
ཇི་ལྟ་བུར། །ཡི་གེའི་ཕྱི་མོའང་ཀློག་འཇུག་ལྟར། །དེ་བཞིན་སངས་རྒྱས་གདུལ་བྱ་ལ། །ཇི་ཙམ་བཟོད་པའི་ཆོས་སྟོན་ཏོ། །ཁ་ཅིག་ལས་ནི་སྡིག་པ་ལས། །རྣམ་པར་བཟློག་ཕྱིར་ཆོས་སྟོན་ཏེ། །ཁ་ཅིག་བསོད་ནམས་འགྲུབ་བྱའི་ཕྱིར། །ཁ་ཅིག་ལ་ནི་གཉིས་བརྟེན་པ། །ཁ་ཅིག་
ལ་ནི་གཉིས་མི་བརྟེན། །ཟབ་མོ་ཁུ་འཕྲིགས་ཅན་འཇིགས་པ། །སྟོང་ཉིད་སྙིང་རྗེའི་སྙིང་པོ་ཅན། །བྱང་ཆུབ་སྒྲུབ་པ་ཁ་ཅིག་ལ། །དེ་ལྟར་མཁས་པས་ཐེག་ཆེན་ལ། །ཁོང་ཁྲོ་བ་ནི་ཟད་བྱ་ཞིང་། །རྫོགས་པའི་བྱང་ཆུབ་འགྲུབ་བྱའི་ཕྱིར། །ལྷག་པར་རབ་ཏུ་དང་བར་བྱ། །ཐེག་པ་ཆེ་

172-1-122a

ལ་རབ་དང་ཞིང་། །དེ་ལས་བཤད་པ་སྤྱད་པ་ཡིས། །བླ་མེད་བྱང་ཆུབ་ཐོབ་འགྱུར་ཞིང་། །བདེ་བ་ཀུན་ཀྱང་ཞར་ལ་འགྲུབ། །དེར་ནི་སྦྱིན་དང་ཚུལ་ཁྲིམས་དང་། །བཟོད་པའི་ཆོས་ནི་ཁྱད་པར་དུ། །ཁྱིམ་པ་ལ་བཤད་སྙིང་རྗེ་ཡི། །སྙིང་པོ་ཅན་
དེ་བསྟན་གོམས་མཛོད། །འོན་ཏེ་འཇིག་རྟེན་མི་སྲུན་ཕྱིར། །ཆོས་ཀྱི་རྒྱལ་སྲིད་བགྱིད་དཀའ་ན། །དེས་ན་ཆོས་དང་གྲགས་དོན་དུ། །ཁྱོད་ཀྱིས་རབ་བྱུང་ཐོབ་མཛད་རིགས། །རིན་པོ་ཆེའི་ཕྲེང་བ་ལས་རྒྱལ་པོའི་ཚུལ་བསྟན་པ་སྟེ་ལེའུ་བཞི་པའོ།།      །།དེ་ནས་
རབ་ཏུ་བྱུང་བ་ཡིས། །དང་པོར་བསླབ་ལ་རབ་གུས་བྱ། །སོ་སོར་ཐར་པ་འདུལ་བཅས་དང་། །མང་ཐོས་དོན་གཏན་དབབ་ལ་བསྒྲིམ། །དེ་ནས་ཉེས་པ་ཕྲན་ཚེགས་ཤེས། །ཉེས་པའི་གཞི་རྣམས་སྤང་བར་བྱ། །ལྔ་བཅུ་རྩ་བདུན་བསྒྲགས་པ་རྣམས། །འབད་དེ་ངེས་
པར་བརྟག་པར་བྱ། །ཁྲོ་བ་སེམས་ཀྱི་འཁྲུགས་པ་སྟེ། །དེ་དང་རྗེས་འབྲེལ་ཁོན་དུ་འཛིན། །འཆབ་པ་སྡིག་པ་འཆབ་པ་སྟེ། །འཚིག་པ་སྡིག་ལ་ཞེན་པའོ། །གཡོ་ནི་ཤིན་ཏུ་སླུ་བ་སྟེ། །སྒྱུ་ནི་སེམས་རྒྱུད་གྱ་གྱུ་ལ། །ཕྲག་དོག་གཞན་གྱི་ཡོན་ཏན་གདུང་། །སེར་སྣ་གཏོང་
བས་འཇིགས་པ་ཉིད། །ངོ་ཚ་མེད་དང་ཁྲེལ་མེད་པ། །རང་དང་གཞན་ལ་མི་འཛེམ་པའོ། །ཁེངས་པ་འདུད་པར་མི་བྱེད་པ། །ཉེས་རྩོམ་ཁྲོས་པས་བསླད་པའོ། །རྒྱགས་པ་དྲེགས་པ་བག་མེད་པ། །དགེ་བ་རྣམས་ལ་མི་སྦྱོར་བའོ། །ང་རྒྱལ་རྣམ་པ་བདུན་ཡིན་ཏེ། །དེ་ནི་
རབ་ཏུ་ཕྱེ་སྟེ་བཤད། །དེ་ལ་མངོན་པར་རློམ་བྱེད་པ། །དམན་པ་དམན་ཞིང་མཉམ་དང་མཉམ། །མཉམ་པས་ལྷག་པ་མཉམ་སྙམ་པ། །བདག་ཉིད་ང་རྒྱལ་ཞེས་པའོ། །ཆོས་གང་བདག་ཉིད་ཁྱད་འཕགས་དང་། །མཉམ་པར་རློམ་པ་གང་ཡིན་དེ། །ལྷག་པའི་ང་རྒྱལ་
ཁྱད་འཕགས་པས། །ཁྱད་པར་འཕགས་པར་རློམ་པ་གང་། །ཤིན་ཏུ་མཐོ་བས་མཐོ་སྙམ་པ། །ང་རྒྱལ་ལས་ཀྱང་ང་རྒྱལ་ཏེ། །འབྲས་ཀྱི་སྟེང་དུ་ཕོལ་མིག་དག །བྱུང་བ་བཞིན་དུ་ཐུ་བ་ཡིན། །ཉེ་བར་ལེན་པ་ཞེས་བྱ་བ། །ལྔ་པོ་སྟོང་པ་དེ་དག་ལ། །རྨོངས་པས་ང་

172-1-122b

སྙམ་འཛིན་པ་གང་། །དེ་ནི་ངའོ་སྙམ་པར་བཤད། །འབྲས་མ་ཐོབ་པར་ཐོབ་སྙམ་པ། །གང་ཡིན་མངོན་པའི་ང་རྒྱལ་ཏེ། །སྡིག་ལས་བྱེད་ལ་བསྟོད་པ་ནི། །མཁས་པས་ལོག་པའི་ང་རྒྱལ་རྟོགས། །བདག་དགོས་མེད་པ་ཉིད་དོ་ཞེས། །བདག་ཉིད་སྨོད་པ་གང་ཡིན་དེས། །དམན་
པའི་ང་རྒྱལ་ཞེས་བྱ་སྟེ། །དེ་དག་མདོར་བདུན་བཤད་པའོ། །ཚུལ་འཆོས་རྙེད་དང་བཀུར་སྟིའི་ཕྱིར། །དབང་པོ་སྡོམ་པར་བྱེད་པ་སྟེ། །ཁ་གསག་རྙེད་དང་བཀུར་སྟིའི་ཕྱིར། །ཚིག་འཇམ་སྔར་ནི་སྨྲ་བའོ། །གཞོགས་སློང་དེ་ནི་ཐོབ་བྱའི་ཕྱིར། །གཞན་གྱི་རྫས་ལ་བསྔགས་བྱེད་པའོ། །
ཐོབ་ཀྱིས་འཇལ་བ་རྙེད་པའི་ཕྱིར། །མངོན་སུམ་གཞན་ལ་སྨོད་བྱེད་པ། །རྙེད་པས་རྙེད་པ་རྣམ་འདོད་པ། །སྔར་ཐོབ་པ་ལ་བསྔགས་བྱེད་པའོ། །སྐྱོན་ཟློས་གཞན་གྱི་འཁྲུལ་གྱུར་པ། །དེ་དང་དེ་ནི་གང་ཟློས་པའོ། །སྦུངས་མེད་སོ་སོར་མ་བརྟགས་པར། །ནད་ལས་གྱུར་པའི་སློང་
བའམ། །བདག་གི་ཡོ་བྱད་ངན་པ་ལ། །ཆགས་ངན་ལེ་ལོ་ཅན་གྱི་ཡིན། །ཐ་དད་འདུ་ཤེས་འདུ་ཤེས་གང་། །ཆགས་སྡང་མུན་གྱིས་བསྒྲིབས་པའོ། །ཡིད་ལ་མི་བྱེད་གང་ཡིན་དེ། །སེམས་ལ་ལྟ་བ་མེད་པར་བཤད། །མཐུན་པར་བྱ་བ་རྣམས་ལ་ནི། །ལེ་ལོས་བཀུར་སྟི་ཉམས་
པ་གང་། །བླ་མར་བཅོས་ལྡན་ཚུལ་མིན་ཏེ། །སྐྱ་བོ་ངན་པ་ཡིན་པར་འདོད། །ཞེན་པས་ཀུན་ནས་དཀྲིས་པ་ཆུང་། །འདོད་པའི་འདོད་ཆགས་ལས་བྱུང་བའོ། །ཡོངས་ཞེན་འདོད་པ་ལས་བྱུང་བའི། །ཀུན་ནས་དཀྲིས་པ་ཆེ་རབ་ཡིན། །ཆགས་པ་རང་གི་རྫས་ལ་ནི། །ཆགས་པས་
འདོད་ཆགས་ལྡན་པའི་ཡིད། །གཞན་གྱི་རྫས་ལ་ཞེན་པ་ནི། །མི་རིགས་ཆགས་པ་ཞེས་བྱའོ། །སྤང་བྱ་བུད་མེད་ཆགས་སྟོན་པ། །ཆགས་པ་མ་ཡིན་འདོད་ཆགས་སོ། །སྡིག་འདོད་ཡོན་ཏན་མེད་བཞིན་དུ། །ཡོན་ཏན་ལྡན་པར་ཚུལ་འཆོས་པའོ། །འདོད་ཆེན་ཤིན་ཏུ་བརྐམ་
པ་སྟེ། །ཆོག་ཤེས་དཔལ་ལས་འདའ་བའོ། །ཐོབ་འདོད་བདག་ཉིད་ཅི་ནས་ཀྱང་། །ཡོན་ཏན་ཡང་དག་ལྡན་ཤེས་འདོད། །མི་བཟོད་གནོད་པ་བྱེད་པ་དང་། །སྡུག་བསྔལ་དག་ཀྱང་མི་བཟོད་པའོ། །ཚུལ་མེད་སློབ་དཔོན་བླ་མ་ཡི། །བྱ་བ་རྣམས་ལ་མ་གུས་པའོ། །བཀའ་

172-1-123a

བློ་བདེ་བ་མ་ཡིན་གང་། །ཆོས་མཐུན་ཚིག་སྨྲས་མ་གུས་པའོ། །ཉེ་དུ་དང་འབྲེལ་རྣམ་རྟོག་ནི། །ཉེ་དུ་ལ་བྱམས་ཆགས་པའོ། །དེ་བཞིན་ཡུལ་སྲེད་དེ་དོན་དུ། །དེ་ཡི་ཡོན་ཏན་བརྗོད་པའོ། །དེ་བཞིན་མི་འཆི་རྟོགས་པ་གང་། །འཆི་བའི་འཇིགས་
པས་མི་དོགས་པའོ། །རྗེས་རྣམ་རིག་དང་ལྡན་རྟོག་ནི། །བདག་ཉིད་ཅི་ནས་གཞན་དག་གི། །ཡོན་ཏན་བདོག་པའི་རྣམ་པ་ཡིས། །བླ་མར་བྱེད་པར་འགྱུར་སྙམ་པའོ། །གཞན་རྗེས་ཆགས་དང་ལྡན་པ་ཡི། །རྣམ་རྟོག་གང་ཡིན་གཞན་དག་ལ། །ཆགས་དང་གནོད་སེམས་རེག་
པ་ཡིས། །ཕན་དང་མི་ཕན་རྣམས་སེམས་པའོ། །མི་དགའ་བརྟན་པ་མེད་པ་ཡི། །ཕྲག་དོག་རྙོགས་པའི་ཡིད་ཡིན་ནོ། །སྙམ་པ་བརྩོན་པ་མེད་པའི་ལུས། །སྒྱིད་ལུག་དོན་ནི་ཉེས་པ་ཡིན། །འགྱུར་བ་ཉོན་མོངས་དབང་གིས་ནི། །ལུས་དང་ཁ་དོག་འགྱུར་བའོ། །ཟས་མི་
འདོད་པ་བཟའ་དྲགས་པས། །ལུས་མི་བདེ་བ་ཡིན་པར་བཤད། །སེམས་ནི་ཤིན་ཏུ་དམའ་བ་ཉིད། །སེམས་ཞུམ་ཡིན་པ་ཉིད་དུ་བསྟན། །འདོད་འདུན་ཡོན་ཏན་ལྔ་དག་པ། །འདོད་པ་དོན་དུ་གཉེར་བ་ཉིད། །གནོད་སེམས་དག་དང་གྲོགས་དང་དགྲའི། །ཕྱོགས་ལ་དུས་
གསུམ་དོན་མིན་པ། །གནོད་བྱས་གནོད་པ་གནོད་དོགས་ཕྱོགས། །དོགས་པའི་གཞན་ལ་གནོད་པའི་སེམས། །རྒྱུ་དགུ་ལས་ནི་བྱུང་བ་ཡིན། །ལུས་སེམས་ལྕི་ཕྱིར་ལས་བྲལ་བ། །གང་ཡིན་པ་ནི་རྨི་བའོ། །གཉིད་ནི་གཉིད་ཉིད་རྒོད་པ་ནི། །ལུས་སེམས་རབ་ཏུ་མ་ཞི་བའོ། །
འགྱོད་པ་ངན་པར་བྱས་ལ་འགྱོད། །ཕྱིས་གདུང་བ་ལས་བྱུང་བའོ། །བདེན་དང་དཀོན་མཆོག་གསུམ་སྩོགས་ལ། །བློ་རྣམ་གཉིས་ནི་ཐེ་ཚོམ་མོ། །དེ་དག་བྱང་ཆུབ་སེམས་དཔས་སྤང་། །སྡོམ་བརྩོན་ཅན་གྱིས་ལྷག་པར་སྤང་། །ཉེས་པ་དེ་རྣམས་དང་བྲལ་བ། །ཡོན་ཏན་རྣམས་
ལ་བདེ་བླག་བསྟེན། །དེ་ལ་བྱང་ཆུབ་སེམས་དཔའ་ཡི། །ཡོན་ཏན་མདོར་བསྟན་བྱ་བ་ནི། །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་སྙིང་བརྩེ་སོགས། །སྦྱིན་པ་རང་ནོར་ཡོངས་གཏོང་བ། །ཚུལ་ཁྲིམས་གཞན་ཕན་བྱ་བའོ། །བཟོད་པ་ཁྲོ་བ་སྤངས་པ་

172-1-123b

སྟེ། །བརྩོན་འགྲུས་དགེ་ལ་སྤྲོ་བ་ཉིད། །བསམ་གཏན་རྩེ་གཅིག་ཉོན་མོངས་མེད། །ཤེས་རབ་བདེན་དོན་གཏན་ལ་འབེབས། །སྙིང་བརྩེས་སེམས་ཅན་ཐམས་ཅད་ལ། །སྙིང་རྗེ་རོ་གཅིག་བློ་གྲོས་སོ། །སྦྱིན་པས་ལོངས་སྤྱོད་ཁྲིམས་ཀྱིས་བདེ། །བཟོད་པས་མདངས་ལྡན་
བརྩོན་པས་བརྗིད། །བསམ་གཏན་གྱིས་ཞི་བློ་ཡིས་གྲོལ། །སྙིང་བརྩེ་བས་ནི་དོན་ཀུན་འགྲུབ། །བདུན་པོ་འདི་དག་མ་ལུས་པར། །ཅིག་ཅར་ཕ་རོལ་ཕྱིན་པ་ཡིས། །ཡེ་ཤེས་བསམ་གྱིས་མི་ཁྱབ་ཡུལ། །འཇིག་རྟེན་མགོན་པོ་ཉིད་ཐོབ་འགྱུར། །ཇི་ལྟར་ཉན་ཐོས་ཐེག་པ་
ལ། །ཉན་ཐོས་ས་ནི་བརྒྱད་བཤད་པ། །དེ་བཞིན་ཐེག་པ་ཆེན་པོ་ལ། །བྱང་ཆུབ་སེམས་དཔའི་ས་བཅུའོ། །དེ་དག་དང་པོར་རབ་དགའ་བ། །བྱང་ཆུབ་སེམས་དཔའ་དགའ་བྱེད་ཕྱིར། །ཀུན་དུ་སྦྱོར་བ་གསུམ་སྤངས་ཤིང་། །དེ་བཞིན་གཤེགས་པའི་རིགས་སྐྱེས་ཕྱིར། །
དེ་ཡི་རྣམ་པར་སྨིན་པས་ན། །སྦྱིན་པའི་ཕ་རོལ་ཕྱིན་མཆོག་འགྱུར། །འཇིག་རྟེན་ཁམས་ནི་བརྒྱ་གཡོ་ཞིང་། །འཛམ་གླིང་དབང་ཕྱུག་ཆེན་པོར་འགྱུར། །གཉིས་པ་དྲི་མ་མེད་ཅེས་བྱ། །ལུས་དང་ངག་དང་སེམས་ཀྱི་ལས། །བཅུ་ཆར་དྲི་མ་མེད་པའི་ཕྱིར། །ངང་གིས་དེ་
དག་ལ་གནས་ཕྱིར། །དེ་ཡི་རྣམ་པར་སྨིན་པས་ན། །ཚུལ་ཁྲིམས་ཕ་རོལ་ཕྱིན་མཆོག་འགྱུར། །དཔལ་ལྡན་རིན་ཆེན་བདུན་གྱི་བདག །འགྲོ་ཕན་འཁོར་ལོས་སྒྱུར་བར་འགྱུར། །སེམས་ཅན་རྣམས་ཀྱི་འཆལ་བའི་ཁྲིམས། །སྤོང་བར་བྱེད་ལ་མཁས་པར་འགྱུར། །
ས་གསུམ་པ་ནི་འོད་བྱེད་པ། །ཡེ་ཤེས་ཞི་བའི་འོད་འབྱུང་ཕྱིར། །བསམ་གཏན་མངོན་ཤེས་སྐྱེ་བ་དང་། །འདོད་ཆགས་ཞེ་སྡང་ཡོངས་ཟད་ཕྱིར། །དེ་ཡི་རྣམ་པར་སྨིན་པས་ནི། །བཟོད་དང་བརྩོན་འགྲུས་ལྷག་པར་སྤྱོད། །ལྷ་ཡི་དབང་ཆེན་མཁས་པ་སྟེ། ། འདོད་པའི་
འདོད་ཆགས་ཟློག་པ་ཡིན། །བཞི་པ་འོད་འཕྲོ་ཅན་ཞེས་བྱ། །ཡང་དག་ཡེ་ཤེས་འོད་འབྱུང་ཕྱིར། །བྱང་ཆུབ་ཕྱོགས་མཐུན་མ་ལུས་པ། །ཁྱད་པར་དུ་ནི་བསྒོམས་པ་ཡིས། །དེ་ཡི་རྣམ་པར་སྨིན་པས་ནི། །རབ་འཐབ་བྲལ་གནས་ལྷ་རྒྱལ་འགྱུར། །འཇིག་ཚོགས་ལྟ་བ་

172-1-124a

རབ་བྱུང་བ། །ཀུན་ནས་འཇོམས་བྱེད་མཁས་པ་ཡིན། །ལྔ་པ་ཤིན་ཏུ་སྦྱང་དཀའ་བདུད། །ཀུན་གྱིས་ཤིན་ཏུ་ཐུབ་དཀའི་ཕྱིར། །འཕགས་པའི་བདེན་སོགས་ཕྲ་མོའི་དོན། །ཤེས་ལ་མཁས་པ་འབྱུང་བའི་ཕྱིར། །དེ་ཡི་རྣམ་པར་སྨིན་པས་ནི། །དགའ་ལྡན་གནས་
ཀྱི་ལྷ་རྒྱལ་འགྱུར། །མུ་སྟེགས་བྱེད་པ་ཐམས་ཅད་ཀྱི། །ཉོན་མོངས་ལྟ་གནས་ཟློག་བྱེད་པའོ། །དྲུག་ལ་མངོན་ཕྱོགས་ཤེས་བྱ་སྟེ། །སངས་རྒྱས་ཆོས་ལ་མངོན་ཕྱོགས་ཕྱིར། །ཞི་གནས་ལྷག་མཐོང་གོམས་པ་ཡིས། །འགོག་པ་ཐོབ་པས་རྒྱས་པའི་ཕྱིར། །དེ་ཡི་རྣམ་པར་སྨིན་
པས་ནི། །ལྷ་ཡི་རྒྱལ་པོ་རབ་འཕྲུལ་འགྱུར། །ཉན་ཐོས་རྣམས་ཀྱིས་མི་འཕྲོགས་པ། །ལྷག་པའི་ང་རྒྱལ་ཅན་ཞི་བྱེད། །བདུན་པ་རིང་དུ་སོང་བ་སྟེ། །གྲངས་ནི་རིང་དུ་སོང་ལྡན་ཕྱིར། །གང་ཕྱིར་སྐད་ཅིག་སྐད་ཅིག་ལ། །དེར་ནི་འགོག་ལ་སྙོམས་པར་འཇུག །དེ་
ཡི་རྣམ་པར་སྨིན་པས་ནི། །དབང་སྒྱུར་ལྷ་ཡི་བདག་པོར་འགྱུར། །འཕགས་པའི་བདེན་མངོན་རྟོགས་ཤེས་པའི། །སློབ་དཔོན་ཁྱུ་མཆོག་ཆེན་པོར་འགྱུར། །དེ་བཞིན་བརྒྱད་པ་གཞོན་ནུའི་ས། །མི་གཡོ་བ་དེ་མི་རྟོག་ཕྱིར། །མི་གཡོ་དེ་བཞིན་ལུས་དང་ནི། །ངག་སེམས་སྤྱོད་ཡུལ་
བསམ་མི་ཁྱབ། །དེ་ཡི་རྣམ་པར་སྨིན་པས་ནི། །སྟོང་གི་བདག་པོའི་ཚངས་པར་འགྱུར། །དགྲ་བཅོམ་རང་སངས་རྒྱས་སོགས་ཀྱིས། །དོན་གཏན་འབེབས་ལ་འཕྲོགས་པ་མེད། །ས་དགུ་པ་ནི་ལེགས་པ་ཡི། །བློ་གྲོས་ཞེས་བྱ་རྒྱལ་ཚབ་བཞིན། །གང་ཕྱིར་སོ་སོ་ཡང་དག་
རིག །ཐོབ་པས་འདི་ལ་བློ་གྲོས་བཟང་། །དེ་ཡི་རྣམ་པར་སྨིན་པས་ནི། །སྟོང་གཉིས་བདག་པོ་ཚངས་པར་འགྱུར། །སེམས་ཅན་བསམ་པ་དྲིས་པ་ལ། །དགྲ་བཅོམ་སོགས་ཀྱིས་འཕྲོགས་པ་མེད། །བཅུ་པ་ཆོས་ཀྱི་སྤྲིན་ཡིན་ཏེ། །དམ་པ་ཆོས་ཀྱི་ཆར་འབེབས་ཕྱིར། །བྱང་ཆུབ་སེམས་
དཔའ་སངས་རྒྱས་ཀྱིས། །འོད་ཟེར་དག་གིས་དབང་བསྐུར་ཕྱིར། །དེ་ཡི་རྣམ་པར་སྨིན་པས་ན། །གནས་གཙང་ལྷ་ཡི་བདག་པོར་འགྱུར། །བསམ་ཡས་ཡེ་ཤེས་ཡུལ་གྱི་བདག །དབང་ཕྱུག་ཆེན་པོ་མཆོག་ཡིན་ནོ། །དེ་ལྟར་བཅུ་པོ་དེ་དག་ནི། །བྱང་ཆུབ་སེམས་དཔའི་ས་བཅུར་བསྒྲགས། །

172-1-124b

སངས་རྒྱས་རྣམས་ཀྱི་ས་གཞན་ཏེ། །རྣམ་པ་ཀུན་དུ་གཞལ་ཡས་པར། །རྒྱ་ཆེ་དེ་ནི་སྟོབས་བཅུ་དང་། །ལྡན་པ་ཡིན་པ་ཙམ་ཞིག་བརྗོད། །དེ་ཡི་སྟོབས་ནི་རེ་རེ་ཡང་། །འགྲོ་བ་ཀུན་བཞིན་དཔག་ཏུ་མེད། །སངས་རྒྱས་རྣམས་ཀྱི་ཚད་མེད་ཉིད། །ཕྱོགས་རྣམས་ཀུན་གྱི་ནམ་མཁའ་དང་། །
ས་ཆུ་མེ་རླུང་ཇི་ལྟ་བ། །དེ་ཙམ་ཞིག་ཏུ་བརྗོད་པ་བས། །གལ་ཏེ་རྒྱུ་ནི་དེ་ཙམ་དུ། །ཚད་མེད་ཉིད་དུ་མ་མཐོང་ན། །སངས་རྒྱས་རྣམས་ཀྱི་ཚད་མེད་པ། །དེ་ལ་ཡིད་ཆེས་མི་འགྱུར་བས། །དེ་ཕྱིར་སྐུ་གཟུགས་མཆོད་རྟེན་གྱི། །སྤྱན་སྔའམ་ཡང་ན་གཞན་ཡང་རུང་། །ཚིགས་སུ་བཅད་པ་
ཉི་ཤུ་འདི། །ཉིན་གཅིག་བཞིན་ཡང་དུས་གསུམ་བརྗོད། །སངས་རྒྱས་ཆོས་དང་དགེ་འདུན་དང་། །བྱང་ཆུབ་སེམས་དཔའ་རྣམས་ལ་ཡང་། །རྣམ་ཀུན་བཏུད་དེ་སྐྱབས་མཆིས་ནས། །མཆོད་འོས་རྣམས་ལ་ཕྱག་འཚལ་ལོ། །སྡིག་པ་ལས་ནི་ལྡོག་བགྱིད་ཅིང་། །བསོད་ནམས་ཐམས་
ཅད་ཡོངས་སུ་བཟུང་། །ལུས་ཅན་ཀུན་གྱི་བསོད་ནམས་དག །ཀུན་ལ་རྗེས་སུ་ཡི་རང་ངོ་། །བདག་ནི་སྤྱི་བཏུད་ཐལ་སྦྱར་ཏེ། །ཆོས་ཀྱི་འཁོར་ལོ་བསྐོར་སླད་དང་། །འགྲོ་གནས་བར་དུ་བཞུགས་སླད་དུ། །རྫོགས་པའི་སངས་རྒྱས་རྣམས་ལ་གསོལ། །དེ་ལྟར་བགྱིས་པའི་
བསོད་ནམས་དང་། །བདག་གིས་བགྱིས་དང་མ་བགྱིས་གང་། །དེས་ནི་སེམས་ཅན་ཐམས་ཅད་ཀྱང་། །བླ་མེད་བྱང་ཆུབ་སེམས་ལྡན་ཤོག །སེམས་ཅན་ཐམས་ཅད་དྲི་མེད་དབང་། །ཡོངས་རྫོགས་མི་ཁོམ་ཀུན་འདས་ཤིང་། །སྤྱོད་པ་རང་དབང་ཡོད་པ་དང་། །འཚོ་བ་བཟང་དང་
ལྡན་པར་ཤོག །ལུས་ཅན་དག་ནི་ཐམས་ཅད་ཀྱང་། །ལག་ན་རིན་ཆེན་ཉིད་ལྡན་ཞིང་། །ཡོ་བྱད་ཐམས་ཅད་མཐའ་ཡས་པ། །འཁོར་བ་སྲིད་དུ་མི་ཟད་ཤོག །བུད་མེད་ཐམས་ཅད་དུས་ཀུན་དུ། །སྐྱེས་མཆོག་ཉིད་དུ་འགྱུར་བར་ཤོག །ལུས་ཅན་ཐམས་ཅད་རིག་པ་དང་། །རྐང་པར་
ལྡན་པ་ཉིད་དུ་ཤོག །ལུས་ཅན་ཁ་དོག་ལྡན་པ་དང་། །གཟུགས་བཟང་གཟི་བརྗིད་ཆེ་བ་དང་། །བལྟ་ན་སྡུག་ཅིང་ནད་མེད་དང་། །སྟོབས་ཅན་ཚེ་དང་ལྡན་པར་ཤོག །ཐམས་ཅད་ཐབས་ལ་མཁས་གྱུར་ཏེ། །སྡུག་བསྔལ་ཀུན་ལས་ཐར་པ་དང་། །དཀོན་མཆོག་གསུམ་ལ་གཞོལ་

172-1-125a

བ་དང་། །སངས་རྒྱས་ཆོས་ནོར་ཆེ་ལྡན་ཤོག །བྱམས་དང་སྙིང་རྗེ་དགའ་བ་དང་། །ཉོན་མོངས་བཏང་སྙོམས་གནས་པ་དང་། །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་ཀྱིས་བརྒྱན་ཅིང་། །ཚོགས་རྣམས་ཐམས་ཅད་ཡོངས་
རྫོགས་ཏེ། །མཚན་དང་དཔེ་བྱད་གསལ་བ་དང་། །བསམ་གྱིས་མི་ཁྱབ་ས་བཅུ་དག །རྒྱུན་མི་འཆད་པར་བགྲོད་པར་ཤོག །བདག་ཀྱང་ཡོན་ཏན་དེ་དག་དང་། །གཞན་ཀུན་གྱིས་ཀྱང་བརྒྱན་ལྡན་ཏེ། །ཉེས་པ་ཀུན་ལས་གྲོལ་བ་དང་། །སེམས་ཅན་ཀུན་མཆོག་
བྱམས་པ་དང་། །སེམས་ཅན་ཀུན་ཡིད་རེ་བ་ཡི། །དགེ་བ་ཐམས་ཅད་རྫོགས་བགྱིད་ཅིང་། །རྟག་ཏུ་ལུས་ཅན་ཐམས་ཅད་ཀྱི། །སྡུག་བསྔལ་སེལ་བར་བགྱིད་པར་ཤོག །འཇིག་རྟེན་ཀུན་ན་སྐྱེ་བོ་གང་། །སུ་དག་འཇིགས་པས་སྐྱེ་བོ་ཀུན། །བདག་གི་མིང་ཙམ་ཐོས་
པས་ཀྱང་། །ཤིན་ཏུ་འཇིགས་པ་མེད་པར་ཤོག །བདག་ནི་མཐོང་དང་དྲན་པ་དང་། །མིང་ཙམ་ཐོས་པས་སྐྱེ་བོ་རྣམས། །རབ་དང་འཁྲུག་མེད་རྣལ་མ་དང་། །རྫོགས་པའི་བྱང་ཆུབ་ངེས་པ་དང་། །ཚེ་རབས་ཀུན་དུ་རྗེས་འབྲང་བའི། །མངོན་ཤེས་ལྔ་པོ་ཐོབ་པར་ཤོག །
སེམས་ཅན་ཀུན་ལ་རྣམ་ཀུན་དུ། །རྟག་ཏུ་ཕན་བདེ་བགྱིད་པར་ཤོག །འཇིག་རྟེན་ཀུན་ལ་སྐྱེ་བོ་གང་། །སྡིག་པ་བྱེད་པར་འདོད་གྱུར་པ། །དེ་དག་ཐམས་ཅད་གནོད་མེད་པར། །རྟག་ཏུ་ཅིག་ཅར་ཟློག་གྱུར་ཅིག །ས་དང་ཆུ་དང་མེ་དང་རླུང་། །སྨན་དང་དགོན་པའི་ཤིང་བཞིན་
དུ། །རྟག་ཏུ་སངས་རྒྱས་ཐམས་ཅད་ཀྱིས། །རང་དགར་དགག་མེད་སྤྱོད་པར་ཤོག །སེམས་ཅན་རྣམས་ལ་སྲོག་བཞིན་ཕངས། །བདག་ལས་དེ་དག་ཆེས་ཕངས་ཤོག །བདག་ལ་དེ་དག་སྡིག་སྨིན་ཅིང་། །བདག་དགེ་མ་ལུས་དེར་སྨིན་ཤོག །ཇི་སྲིད་སེམས་ཅན་
འགའ་ཞིག་ཀྱང་། །གང་དུ་མ་གྲོལ་དེ་སྲིད་དུ། །དེ་ཕྱིར་བླ་ན་མེད་པ་ཡི། །བྱང་ཆུབ་ཐོབ་ཀྱང་གནས་གྱུར་ཅིག །དེ་ལྟར་བརྗོད་པའི་བསོད་ནམས་གང་། །གལ་ཏེ་དེ་ནི་གཟུགས་ཅན་གྱུར། །གང་གཱའི་བྱེ་མ་སྙེད་ཀྱི་ནི། །འཇིག་རྟེན་ཁམས་སུ་ཤོང་མི་འགྱུར། །དེ་ནི་

172-1-125b

བཅོམ་ལྡན་འདས་ཀྱིས་གསུངས། །གཏན་ཚིགས་ཀྱང་ནི་འདི་ལ་སྣང་། །སེམས་ཅན་ཁམས་ནི་ཚད་མེད་ལ། །ཕན་འདོད་དེ་ནི་དེ་འདྲའོ། །དེ་ལྟར་བདག་གིས་ཁྱོད་ལ་ནི། །མདོར་བསྡུས་ཆོས་བཤད་གང་ཡིན་དེ། །ཁྱོད་ལ་ཇི་ལྟར་རྟག་ཏུ་སྐུ། །ཕངས་པ་བཞིན་དུ་ཕངས་
པར་མཛོད། །གང་ལ་ཆོས་དེ་ཕངས་གྱུར་པ། །དེ་ལ་དོན་དུ་བདག་ལུས་ཕངས། །ཕངས་ལ་ཕན་པ་བྱ་དགོས་ན། །དེ་ནི་ཆོས་ཀྱི་བྱེད་པར་འགྱུར། །དེ་བས་ཆོས་ནི་བདག་བཞིན་བསྟེན། །ཆོས་བཞིན་དུ་ནི་བསྒྲུབ་པ་དང་། །སྒྲུབ་པ་བཞིན་དུ་ཤེས་རབ་དང་། །ཤེས་རབ་
བཞིན་དུ་མཁས་པ་བསྟེན། །གཙང་ཞིང་བྱམས་ལ་བློ་ལྡན་པ། །ཕེབས་པས་ཕན་པ་སྨྲ་བ་ལ། །གང་ཞིག་བདག་ངན་དོགས་བྱེད་པ། །དེ་ནི་རང་དོན་ཆུད་ཀྱང་གསོན། །གཙང་ཞིང་བྱམས་ལ་བློ་ལྡན་པ། །སྤོབས་ལ་ཕན་པར་སྨྲ་བ་ལ། །བདག་ནི་མགོན་དང་བཅས་འགྱུར་ཞེས། །
མི་དབང་བདག་ཐུལ་ཐུགས་དམ་མཛོད། །དགེ་བའི་བཤེས་གཉེན་དེ་དག་གི། །མཚན་ཉིད་མདོར་བསྡུས་མཁྱེན་པར་མཛོད། །ཆོག་ཤེས་སྙིང་རྗེ་ཚུལ་ཁྲིམས་ལྡན། །ཉོན་མོངས་སེལ་བའི་ཤེས་རབ་ཅན། །དེ་དག་གིས་ནི་ཁྱོད་བསྟེན་ན། །ཁྱོད་ཀྱིས་མཁྱེན་གྱི་གུས་པར་མཛོད། །
ལུགས་ནི་ཕུན་སུམ་ཚོགས་པ་འདིས། །གྲུབ་པ་ཡི་ནི་མཆོག་ཐོབ་འགྱུར། །བདེན་དང་སེམས་ཅན་འཇམ་སྨྲ་ཞིང་། །བདེ་བའི་ངང་ཚུལ་བསྙེན་དཀའ་བ། །ཚུལ་ལྡན་ཁྱད་དུ་གསོད་མི་འདོད། །རང་དབང་ལེགས་པར་སྨྲ་བར་མཛོད། །ལེགས་བཏུལ་བག་ལ་ཉལ་གཏོང་དང་། །བརྗིད་
བག་ལྡན་ཞིང་སེམས་ཞི་བ། །རྒོད་པ་མེད་ཅིང་མཐའ་མི་རིང་། །གཡོ་བ་མེད་དང་ངེས་པར་མཛོད། །ཟླ་བ་ཉ་བཞིན་ངེས་པ་དང་། །སྟོན་གྱི་ཉ་བཞིན་གཟི་ལྡན་དང་། །རྒྱ་མཚོ་བཞིན་དུ་ཟབ་པ་དང་། །རི་རབ་བཞིན་དུ་ཆེས་བརྟན་མཛོད། །ཉེས་པ་ཀུན་ལས་རྣམ་གྲོལ་ཞིང་། །ཡོན་ཏན་
ཀུན་གྱིས་བརྒྱན་གྱུར་ཏེ། །སེམས་ཅན་ཀུན་གྱི་ཉེར་འཚོ་དང་། །ཐམས་ཅད་མཁྱེན་པ་ཉིད་དུ་མཛོད། །ཆོས་འདི་རྒྱལ་པོ་འབའ་ཞིག་ལ། །བསྟན་པ་ཁོ་ནར་མ་བས་ཀྱི། །སེམས་ཅན་གཞན་ལའང་ཅི་རིགས་པར། །ཕན་པར་འདོད་པས་བསྟན་པ་ལགས། །བདག་དང་གཞན་རྣམས་

172-1-126a

ཡང་དག་པར། །རྫོགས་པའི་སངས་རྒྱས་འགྲུབ་བགྱི་སླད། །རྒྱལ་པོ་གཏམ་དུ་བགྱི་བ་ནི། །གདུགས་རེ་ཞིང་ཡང་བསམ་པའི་རིགས། །ཚུལ་ཁྲིམས་སྐྱེ་བོ་བླ་མ་མཆོག་བཀུར་བཟོད་དང་དེ་བཞིན་ཕྲག་དོག་མེད། །སེར་སྣ་དང་བྲལ་རེ་བ་མེད་པར་བྱས་ནས་
གཞན་དོན་ནོར་ཅན་དང་། །ཕོངས་པར་གྱུར་ལ་ཕན་བྱེད་མཆོག་དང་མཆོག་མིན་ཡོངས་བཟུང་དོར་བ་དང་། །དོན་ཆོས་ཡོངས་བཟུང་བྱང་ཆུབ་དོན་ཕྱིར་གཉེར་བ་རྣམས་ཀྱིས་རྟག་ཏུ་བྱ། །རིན་པོ་ཆེའི་ཕྲེང་བ་ལས་བྱང་ཆུབ་སེམས་དཔའི་སྤྱོད་པའི་ལེའུ་སྟེ་ལྔ་པའོ།།      །།རྒྱལ་
པོ་ལ་གཏམ་བྱ་བ་རིན་པོ་ཆེའི་ཕྲེང་བ་ཞེས་བྱ་བ་སློབ་དཔོན་ཆེན་པོ་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།།       །།རྒྱ་གར་གྱི་མཁན་པོ་ཛྙཱ་ན་གརྦྷ་དང་། བོད་ཀྱི་ལོ་ཙཱ་བ་དགེ་སློང་ཀླུའི་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །སླད་ཀྱིས་རྒྱ་གར་གྱི་མཁན་པོ་ཀ་
ན་ཀ་ཝརྨ་དང་། བོད་ཀྱི་ལོ་ཙཱ་བ་པ་ཚབ་ཉི་མ་གྲགས་ཀྱིས་རྒྱ་དཔེ་གསུམ་ལ་གཏུགས་ནས་ལེགས་པར་བཅོས་པའོ།།      །།༄༅༅། །རྒྱ་གར་སྐད་དུ། རཏྣཱ་བ་ལི་ཊཱི་ཀཱ། བོད་སྐད་དུ། རིན་པོ་ཆེའི་ཕྲེང་བའི་རྒྱ་ཆེར་བཤད་པ། སངས་རྒྱས་དང་བྱང་ཆུབ་སེམས་དཔའ་
ཐམས་ཅད་ལ་ཕྱག་འཚལ་ལོ། །བསྐལ་པ་བྱེ་བ་བརྒྱ་ཕྲག་དག །གང་ཞིག་མཐོང་བ་རྙེད་དཀའ་བ། །དོན་རྣམས་ཀུན་ལ་ཐོགས་མེད་ཐུགས། །ཐུབ་པ་ཆེ་ལ་ཕྱག་འཚལ་ནས། །བདག་ནི་བསོད་ནམས་འདོད་པ་ཡིས། །རིན་ཆེན་ཆོས་ཀྱི་ཕྲེང་བ་གང་། །བདེན་པ་གཟིགས་པས་
མཛད་པ་དེའི། །དོན་ནི་གཏན་ལ་དབབ་པར་བྱ། །བསྡུས་ལ་དགའ་བའི་སེམས་ཅན་གྱི། །དོན་ཕྱིར་བདག་ཉིད་ཆེན་པོ་ཡིས། །ཟབ་ཅིང་རྒྱ་ཆེའི་མདོ་རྣམས་ཀྱི། །དོན་ནི་ཡང་དག་བསྡུས་ཏེ་བསྟན། །དེ་ལ་འདིར་བཙུན་པ་འཕགས་པ་ཀླུ་སྒྲུབ་འཇིག་རྟེན་མཐའ་དག་ལ་ཕན་པར་
བཞེད་པས་རྒྱལ་པོ་བདེ་སྤྱོད་ཀྱི་དབང་དུ་མཛད་ནས་དམ་པའི་ཆོས་རིན་པོ་ཆེའི་ཕྲེང་བ་དགོད་པའི་ངེས་པ་མཛད་དེ་དམ་པའི་སྤྱོད་པ་དང་མཐུན་པར། ཉེས་པ་ཀུན་ལས་ཞེས་བྱ་བ་ལ་སོགས་པས་རྗེ་བཙུན་སངས་རྒྱས་བཅོམ་ལྡན་འདས་ཡོན་ཏན་བརྗོད་པ་སྔོན་དུ་འགྲོ་བའི་ཕྱག་

172-1-126b

འཚལ་བ་དང་དགོས་པ་དང་བཅས་པ་རྩོམ་མོ། །འདི་ལ་དགོས་པ་གང་ཞིག་ཡིན་ཞེ་ན། བཅོམ་ལྡན་འདས་ཡོན་ཏན་ཚད་མེད་པ་ལ་ཡོན་ཏན་བརྗོད་པ་སྔོན་དུ་འགྲོ་བའི་ཕྱག་བྱས་པའི་རྒྱུས་བསོད་ནམས་ཤིན་ཏུ་རྒྱ་ཆེན་པོར་འགྱུར་ལ་དེས་ན་བརྗོད་པར་འདོད་པའི་དོན་སྒྲུབ་པ་འབད་མི་དགོས་
པར་འགྲུབ་པར་འགྱུར་ཏེ། རེ་ཞིག་འདི་ནི་གཅིག་ཡིན་ནོ། །འདི་ན་ཉན་པའི་སྐྱེ་བོ་ཡང་རྣམ་པ་གཉིས་དམིགས་ཏེ། དེ་ལ་དད་པས་རྗེས་སུ་འབྲང་བ་རྣམས་ནི་ཡོན་ཏན་བརྗོད་པ་སྔོན་དུ་འགྲོ་བའི་ཕྱག་འཚལ་བ་དམིགས་ནས་འདི་ནི་བདེ་བར་གཤེགས་པས་བྱས་སོ་ཞེས་དད་པ་ཁོ་ནས་འདི་
ཉན་པ་ལ་སོགས་པ་ལ་འཇུག་གོ། །ཆོས་ཀྱི་རྗེས་སུ་འབྲང་བ་སྟོན་པ་གྲགས་པ་གང་དག་ཡིན་པ་དེ་དག་ཀྱང་ཕྱག་འཚལ་བ་ཁྱད་པར་དང་བཅས་པ་དམིགས་འདི་སྙམ་དུ་སེམས་ཏེ། གཞན་ལ་ཁྱད་པར་འདི་མི་སྲིད་པའི་ཕྱིར་འདི་ནི་འཇིག་རྟེན་མཐའ་དག་གི་སྒྲོན་མ་ལ་ཕྱག་འཚལ་བ་
ཡིན་ནོ་སྙམ་མོ། །དེ་ལྟར་ངེས་པའི་ཡིད་ཅན་རྣམས་ལ་རབ་ཏུ་དགའ་བ་སྐྱེ་ཞིང་ཚིག་དེ་ལྟ་བུ་ལ་མཁས་པ་རྣམས་འདི་སྙམ་དུ་སེམས་ཏེ། རེ་ཞིག་དད་པ་ཅན་གཞན་ཡང་གསུམ་ལ་སྐྱབས་སུ་འགྲོ་བ་ཉམས་པའི་འཇིགས་པས་གཞན་དག་ལ་ཕྱག་འཚལ་བའི་ངལ་བ་མི་བྱེད་ན་འཕགས་པ་
ཀླུ་སྒྲུབ་བདེན་པ་གཟིགས་པ་མི་ཕྱེད་པའི་དད་པ་བརྙེས་པ་ལྟ་སྨོས་ཀྱང་ཅི་དགོས། དེ་ལྟ་བུ་འདི་ནི་མུ་སྟེགས་ཅན་གྱི་གཞུང་ལུགས་ཀྱིས་ཀུན་བརྟགས་པའི་ཆོས་ཕན་ཚུན་འགལ་བ་མི་གསུང་སྟེ། དེ་སྐད་དུ་མཇུག་ཐོགས་ནས། གཅིག་ཏུ་དགེ་བའི་ཆོས་བཤད་དེ་ཞེས་འཆད་པར་
འགྱུར་རོ། །དེ་ལྟ་བས་ན་འདི་ནི་གདོན་མི་ཟ་བར་སྐྱེས་བུའི་དོན་མཆོག་ཐོབ་པ་དང་མཐུན་པ་ཡིན་ནོ་སྙམ་མོ། །དེ་ནས་འདི་ཉན་པ་ལ་སོགས་པ་ལ་འཇུག་པར་འགྱུར་རོ། །རྟོག་པ་སྔོན་དུ་གཏོང་བ་སྟོན་པར་མ་གྲགས་པ་གང་དག་ཡིན་པ་དེ་དག་ཀྱང་ཕྱག་འཚལ་བ་ལ་ཡོན་ཏན་བསྙད་པ་ཐོས་
ནས་ངོ་མཚར་དང་མཐུན་པར་སད་པས་དཔྱོད་པའམ་ཉན་པར་བྱེད་དོ། །དེ་ནས་ནི་དེ་དག་གིས་འདིའི་དོན་བཟང་པོ་དམིགས་ནས་འདི་ལྟ་བུའི་དོན་ལེགས་པར་གསུངས་པ་ནི་དེས་གསུངས་སོ་ཞེས་སངས་རྒྱས་བཅོམ་ལྡན་འདས་ལ་དད་པ་ཐོབ་ནས་སྟོན་པ་ཉིད་དུ་ཁས་ལེན་པས་དེ་དག་ལ་སྟོན་པ་

172-1-127a

རབ་ཏུ་གྲུབ་པར་བྱ་བའི་ཕྱིར་རོ། །དེ་ལྟར་ན་ཡོན་ཏན་བརྗོད་པ་སྔོན་དུ་འགྲོ་བའི་ཕྱག་འཚལ་བ་འདི་ནི་དེ་གཉི་ག་ལ་དགོས་པ་དང་བཅས་པ་ཡིན་པའི་ཕྱིར་བྱས་ཏེ། དམ་པ་རྣམས་ཀྱང་དེ་ཁོ་ན་ལྟར་ཞུགས་སོ་ཞེས་བརྗོད་པར་བྱའོ། །ད་ནི་ཇི་ལྟར་ནུས་པ་བཞིན་
དོན་དགྲོལ་བར་བྱ་སྟེ། དེ་ལ་ཉེས་པ་ནི་ཡོན་ཏན་གྱི་མི་མཐུན་པའི་ཕྱོགས་སུ་གྱུར་པ་འདོད་ཆགས་ལ་སོགས་པ་ལ་བྱ་སྟེ། ལུས་དང་སེམས་ཀྱི་རྒྱུད་མ་རུང་བར་བྱེད་པས་སོ། །ཀུན་ཞེས་པའི་སྒྲ་ནི་བརྗོད་པར་འདོད་པའི་དབང་གིས་མཐའ་དག་ལ་བྱའོ། །དེ་དག་ནི་ཉེས་པ་ཡང་ཡིན་ལ་ཀུན་
ཀྱང་ཡིན་པས་དེ་ལྟ་བུའོ། །རྣམ་གྲོལ་ཞེས་པ་ནི་མི་ལྡན་པ་སྟེ་བྲལ་བ་ཞེས་བྱ་བའི་དོན་ཏོ། །ཡོན་ཏན་ནི་ཤེས་རབ་ལ་སོགས་པ་སྟེ། ལེགས་པ་དོན་དུ་གཉེར་བ་རྣམས་ཀྱིས་འདྲིས་པར་བྱ་ཞིང་གོམས་པར་བྱ་བ་ཡིན་པས་སོ། །འདིར་ཡང་ཀུན་ཞེས་བྱ་བའི་སྒྲ་ནི་གོང་མ་བཞིན་དུ་ཤེས་
པར་བྱའོ། །དེ་དག་གིས་བརྒྱན་པ་པོ་ཞེས་བྱ་བ་སྤུད་པའོ། །འདི་དག་ནི་སྐྱེས་བུ་རྣམས་ཀྱི་རྒྱན་གྱིས་འབྱོར་པ་སྟོན་པར་བྱེད་པ་གདུ་བུ་རྒྱན་ཅན་དང་དཔུང་རྒྱན་དང་ལག་རྒྱན་ལ་སོགས་པ་ནི་མ་ཡིན་ཏེ། དེ་སྐད་དུ་གཞན་ནས། ལྗོན་ཤིང་རྣམས་ནི་མེ་ཏོག་དག་གིས་བརྒྱན། །ཆར་སྤྲིན་རྣམས་
ནི་གློག་གི་ཕྲེང་བ་ཡིས། །མཚོ་རྣམས་བུང་བ་རྒྱགས་ལྡིང་པདྨ་ཡིས། །ལུས་ཅན་ཁྱད་པར་ཐོབ་པའི་ཡོན་ཏན་གྱིས། །ཞེས་བཤད་དོ། །དེ་ལྟ་ཡིན་ན་གོ་རིམས་ཟློག་པའི་ཉེས་པར་འགྱུར་བ་མ་ཡིན་ནམ། ཉེས་པ་རྣམས་ནི་མུན་པ་ལྟ་བུ་ཡིན་ལ། དེ་དག་ཀྱང་ཡོན་ཏན་གྱི་སྣང་བ་འབྱུང་
བ་མེད་པར་རྟེན་མི་གཏོང་ངོ་། །དེའི་ཕྱིར་ཉེས་པ་ལས་རྣམ་པར་གྲོལ་བ་ཉིད་ཀྱིས་ཡོན་ཏན་གནས་པར་གྲུབ་ན་འདིས་ཅི་ཞིག་བྱ་ཞེ་ན། དེ་ནི་བདེན་ན་འོན་ཀྱང་དབང་པོ་རྟུལ་པོ་བློ་ཞན་པ་ཚིག་ལྷུར་ལེན་པ་གང་དག་ཡིན་པ་དེ་དག་གིས་ཉེས་པ་ཐམས་ཅད་ལས་རྣམ་པར་གྲོལ་བ་ཉིད་ནི་ཉེས་པ་
ལས་རྣམ་པར་གྲོལ་བ་འབའ་ཞིག་ཡིན་པར་རྟོགས་ཀྱི། ཤུགས་ཀྱིས་འཕངས་པའི་དོན་ནི་མ་ཡིན་པས་དེ་དག་གིས་གསལ་བར་རྟོགས་པར་བྱ་བའི་ཕྱིར་རོ། །ཡང་དབང་པོ་རྣོན་པོ་མགོ་སྨོས་པས་གོ་བ་དེ་དག་ལ་ཡང་དེ་སྐད་དུ་བརྗོད་པར་བྱ་སྟེ། རེ་ཞིག་སྲིད་པ་ཙམ་དུ་བྱ་ན་ཉེས་པ་

172-1-127b

ཐམས་ཅད་དང་བྲལ་ལ་ཡོན་ཏན་ཐམས་ཅད་ཀྱིས་བརྒྱན་པ་མ་ཡིན་པ་ཡང་ཡོད་དེ། དཔེར་ན་ཤེལ་དང་ཨནྡ་རྙིལ་དང་མརྐཏ་ལ་སོགས་པ་ལྟ་བུའོ། །དེ་བས་ན་ཁྱད་པར་འདི་གཉི་ག་བརྗོད་དོ། །དེ་ལྟ་བུའི་ཐམས་ཅད་མཁྱེན་པ་གང་ཡིན་པ་དེ་ལ་བདག་ཕྱག་འཚལ་ནས་ཆོས་
བཤད་དོ་ཞེས་བྱ་བར་སྦྱར་རོ། །ཕྱག་འདི་སུ་ལ་འཚལ་བ་ཡིན་ཞེ་ན། སངས་རྒྱས་བཅོམ་ལྡན་འདས་ལའོ། །དེ་ཡིན་པར་ཅི་མངོན་ཞེ་ན། ཡོན་ཏན་ཐུན་མོང་མ་ཡིན་པ་བསྟན་པའི་ཕྱིར་ཏེ། ས་མཐའ་དག་གི་རྒྱན་ཉེས་པ་མ་ལུས་པ་དང་བྲལ་བ་ཡོན་ཏན་གྱི་ཚོགས་མི་གཡོ་བ་
དམ་པ་མཆོག་གི་མཐར་ཕྱིན་པ་ནི་སངས་རྒྱས་བཅོམ་ལྡན་འདས་མ་གཏོགས་པ་གཞན་ཐམས་ཅད་མཁྱེན་པར་ཡོད་པར་སྲིད་པ་མེད་དོ། །མུ་སྟེགས་ཅན་གཞན་རྣམས་ཀྱང་རང་རང་གི་སྟོན་པ་ཡོན་ཏན་འདི་དག་དང་ལྡན་པར་སེམས་པ་མ་ཡིན་ནམ། དེ་དག་ཡོད་ན་ཇི་ལྟར་ཁྱད་པར་ལ་གནས་
ཤེ་ན་དེའི་ཕྱིར། སེམས་ཅན་ཀུན་གྱི་གཉེན་གཅིག་པོ། །ཞེས་བྱ་བ་སྨྲས་སོ། །དེ་རྣམས་ནི་སེམས་ཅན་ལ་གནོད་པ་བྱེད་པ་ཡིན་པར་གྲགས་ཏེ། འདི་ལྟ་སྟེ་དྲག་པོས་ནི་གྲོང་ཁྱེར་སུམ་བརྩེགས་བསྲེགས་སོ། །ཁྱབ་འཇུག་གིས་ནི་དམག་སྡེ་ཆེན་པོ་བཅོ་བརྒྱད་རྨེག་མེད་པར་
བྱས་སོ། །ཕྱོགས་ཀྱི་གོས་ཅན་རྣམས་ཀྱང་སྐྱེ་བོ་ཕྲ་མོ་རིག་པ་ཙམ་གྱིས་འཇིགས་པ་རྣམས་ཀྱིས་ནམ་མཁའ་གང་བར་སེམས་ཤིང་སློབ་མ་རྣམས་གནས་ནས་ཕྱིར་འབྱུང་བའི་ཚེ་བསླབ་པ་དབུལ་བར་སྨྲའོ། །དྲང་སྲོང་རྣམས་ཀྱང་ཡིད་ཁྲོ་བའི་མེས་བསྲེགས་ནས་དཔུང་གི་ཚོགས་ཡན་
ལག་བཞི་པ་རྒྱལ་པོ་དང་བཅས་པ་ཡང་སྐད་ཅིག་ཏུ་དམོད་པའི་མེའི་བུད་ཤིང་དུ་བྱེད་དོ། །འོན་ཏེ་དེ་དག་གི་དེ་ནི་སེམས་ཅན་གདུལ་བའི་ཐབས་ཡིན་ནོ་ཞེ་ན། དེ་ལྟ་ཡིན་དུ་ཟད་དེ་བརྩད་པ་མེད་དོ། །སངས་རྒྱས་ཞེས་བྱ་བའི་སྒྲ་ནི་རིགས་མི་མཐུན་པ་ལས་ལོག་པས་དོན་དེ་ལྟ་བུ་ཁོ་ན་
བརྗོད་དོ། །བཅོམ་ལྡན་འདས་དེ་ལྟ་བུ་ལ་ཕྱག་འཚལ་ནས་ཅི་ཞིག་བྱ་ཞེ་ན། གཅིག་ཏུ་དགེ་བའི་ཆོས་ཞེས་བྱ་བ་ལ་སོགས་པ་སྨོས་སོ། །ངན་སོང་དུ་ལྟུང་བ་ལས་འཛིན་པའི་ཕྱིར་རམ་རྒུད་པར་ལྟུང་བ་ལས་འཛིན་པའི་ཕྱིར་ཆོས་ཏེ། ཆོས་ནི་སྦྱིན་པ་ལ་སོགས་པའི་སེམས་པའམ་དེས་

172-1-128a

བཅུག་པ་ལུས་དང་ངག་གི་སྦྱོར་བ་ཡིན་ནོ། །ཆོས་དེ་གཅིག་ཏུ་ཡོངས་སུ་དགེ་བ་སྟེ། ཐོག་མ། བར་དང་། ཐ་མར་དགེ་བ་ཞེས་བྱ་བའི་དོན་ཏོ། །ཁྱད་པར་དུ་བྱ་བ་དོན་མེད་དེ་སྔར་བཤད་པའི་ཁྱད་པར་ཅན་གྱི་ཆོས་གང་ཡིན་པ་དེ་ཇི་ལྟར་གཞན་དུ་འགྱུར་
ཞེ་ན། དེ་ནི་བདེན་ན་འོན་ཀྱང་ཆོས་གང་ཡིན་པ་གདུང་བ་ལྔ་ལ་སོགས་པ་ལ་ཡང་ཆོས་ཀྱི་བསམ་པས་འཇུག་པར་སྣང་ངོ་། །འོན་ཏེ་སྡུག་བསྔལ་དང་དུ་ལེན་པ་དེ་ལས་བཟོད་པར་འགྱུར་ལ། སྦྱོར་བ་དེ་འདྲ་བ་ནི་ཉོན་མོངས་པ་སྐྱེ་བའི་གེགས་བྱེད་པ་ཡང་ཡིན་ནོ་ཞེ་ན། དེ་ལྟར་ཡང་
རིགས་པ་མ་ཡིན་ཏེ། བཟོད་པའི་རྒྱུ་ནི་བྱམས་པ་དང་སྙིང་རྗེ་དག་ཡིན་ལ། ཉོན་མོངས་པ་སྐྱེ་བའི་གཉེན་པོ་ཡང་མི་སྡུག་པ་ལ་སོགས་པ་བསྒོམ་པའི་ངོ་བོ་ཡིན་པས་སོ། །སྦྱིན་པ་ལ་སོགས་པའི་སེམས་པ་དང་དེས་བཅུག་པའི་སྦྱོར་བའི་མཚན་ཉིད་ཀྱི་ཆོས་ཀྱང་ཐབས་ཤེས་
རབ་དང་བྲལ་བས་དུག་དང་བཅས་པའི་ཟས་བཞིན་དུ་དགེ་བ་མ་ཡིན་པར་འགྱུར་བས་སྡུག་བསྔལ་དུ་ཡང་བྱེད་པས་དོན་དང་བཅས་པ་ཡིན་ཏེ། ཆོས་དེ་ལྟ་བུ་བཤད་དོ་ཞེས་བྱ་བར་སྦྱར་རོ། །རྒྱལ་པོ་ཞེས་བྱ་བ་ནི་བོད་པ་སྟེ། རང་གི་འཁོར་དང་ཡུལ་ཟིལ་གྱིས་མནན་ནས་མཆོག་
ཏུ་དཔའ་བས་ན་རྒྱལ་པོའོ། །བཤད་པ་ལ་དགོས་པ་ཅི་ཡོད་ཅེ་ན། ཆོས་འགྲུབ་ཕྱིར་ཞེས་བྱ་བ་སྨོས་ཏེ། འགྲུབ་པ་ནི་མངོན་པར་འཕེལ་བའོ། །ཆོས་ཀྱི་འགྲུབ་པ་ལ་དེ་སྐད་ཅེས་བྱ་སྟེ། དེ་ཡང་ཕུལ་དུ་དབྱུང་དུ་ཡོད་པ་དང་། དེ་ལས་གཞན་པ་དང་རྣམ་པ་གཉིས་སོ། །
དེ་ཡང་རྣམ་པ་གཉིས་ཏེ། མངོན་པར་མཐོ་བ་དང་ངེས་པར་ལེགས་པའོ། །དེ་དག་ཁྱོད་ལ་བཤད་དོ་ཞེས་བྱ་བ་ནི་བསྟན་པར་བྱ་བའོ། །རྒྱལ་པོ་ཁོ་ན་ལ་ཅིའི་ཕྱིར་བཤད་ཅེ་ན། དམ་པའི་ཆོས་ཀྱི་སྣོད་ལ་ནི། །ཆོས་ཞེས་བྱ་བ་ལ་སོགས་པ་སྨོས་ཏེ། ནི་ཞེས་བྱ་བ་ནི་གང་གི་ཕྱིར་
གྱི་དོན་ཡིན་ཏེ། གང་དང་དེ་ནི་རྟག་ཏུ་འབྲེལ་པའི་ཕྱིར་དེའི་ཕྱིར་ཞེས་བྱ་བ་ཁོང་ནས་དབྱུང་བར་བྱའོ། །འགྲུབ་པ་ནི་འགྲུབ་པ་སྟེ། རིག་སྔགས་དང་འབྲས་ཆན་གྲུབ་པ་བཞིན་ནོ། །རིག་སྔགས་གྲུབ་པ་ལ་ནི་འབྲས་བུ་གྲུབ་གྲུབ་པ་ཡིན་ལ། འབྲས་ཆན་གྲུབ་པ་ལ་ཡང་དེ་ཉིད་

172-1-128b

འབྲས་བུ་ཉིད་དུ་བརྗོད་པར་འདོད་པས་དེ་གྲུབ་གྲུབ་པ་ཞེས་བྱ་བ་མ་ཡིན་ནམ། ཆོས་ནི་ངོ་བོ་གཅིག་པ་ཡིན་པའི་ཕྱིར་ནམ་ཡང་འགྲུབ་པའི་གྲུབ་པ་མེད་དོ་ཞེ་ན། དེ་ནི་ཉེས་པ་མེད་དེ་ཆོས་འགྲུབ་པ་ཕུལ་དུ་དབྱུང་དུ་ཡོད་པ་དང་། དེ་ལས་གཞན་པ་དང་རྣམ་པ་གཉིས་སུ་བཤད་པ་ལ་རེ་ཞིག་ཕུལ་
དུ་དབྱུང་དུ་ཡོད་པ་གང་ཡིན་པ་ནི་དེ་ཉིད་འབྲས་བུ་ཉིད་དུ་བརྗོད་པར་འདོད་པས་ཉེས་པ་མེད་དོ། །འགྲུབ་པ་དེ་ཡང་གང་ལ་ཆོས་བཤད་ན་འགྱུར་ཞེ་ན་དམ་པའི་ཆོས་ཀྱི་སྣོད་ལ་སྟེ། དམ་པའི་ཆོས་མཉན་པ་དང་གཟུང་བ་ལ་སོགས་པའི་སྣོད་དུ་གྱུར་པ་ལའོ། །གཞན་ལ་ནི་མི་འགྲུབ་པ་འབའ་
ཞིག་ཏུ་མ་ཟད་ཀྱི་རང་གི་ངོ་བོ་ཡང་མི་འཐོབ་པོ། །དེ་ལྟ་བས་ན་བསྡུས་པའི་དོན་ནི་འདི་ཡིན་ཏེ། དེ་གང་གི་ཕྱིར་དམ་པའི་ཆོས་ཀྱི་སྣོད་ལ་ཆོས་བཤད་ན་འགྲུབ་པར་གྱུར་བ་དེའི་ཕྱིར་དམ་པའི་ཆོས་ཀྱི་སྣོད་ཁྱོད་ལ་ཆོས་དེ་ལྟ་བུ་བཤད་དོ་ཞེས་བྱ་བ་ཡིན་ཏེ། དྲུག་པ་དང་བདུན་པ་དག་
ཁྱད་པར་མེད་པའི་ཕྱིར་རོ། །ཡང་ན་ཁྱོད་ལ་ཆོས་འགྲུབ་པར་བྱ་བའི་ཕྱིར་བཤད་དོ་ཞེས་བདུན་པའི་དོན་ཁོ་ན་ཡིན་པར་ཁོང་དུ་ཆུད་པར་བྱའོ། །གང་གིས་ཕུལ་དུ་དབྱུང་དགོས་པ་དེའི་ཚེ་ནི་མངོན་པར་མཐོ་བ་པ་འབྲས་བུའི་ངོ་བོ་ཕུལ་དུ་དབྱུང་དུ་མེད་པ་དང་ངེས་པར་ལེགས་པ་འགྲུབ་པར་
འགྱུར་ཞིང་འཐོབ་པོ་ཞེས་བརྗོད་པར་བྱའོ། །ཆོས་བཤད་དོ་ཞེས་བཤད་པའི་ཆོས་དེ་ཡང་ལུང་གི་མཚན་ཉིད་དང་། རྟོགས་པའི་མཚན་ཉིད་དོ། །དེ་ལ་རྟོགས་པའི་མཚན་ཉིད་ནི། སོ་སོ་རང་གིས་རིག་པར་བྱ་བ་སྟེ། དེ་ཡང་ལུང་གི་མཚན་ཉིད་ཀྱི་ཆོས་གོམས་པས་རྟོགས་པར་བྱ་བ་
ཡིན་པས་དེ་ཉིད་བརྗོད་པར་བྱའོ། །དེ་ཡང་རྣམ་པ་གཉིས་ཏེ་མངོན་པར་མཐོ་བ་དང་ངེས་པར་ལེགས་པའོ། །དེ་ལ་ངེས་པར་ལེགས་པ་ནི་མཆོག་ཏུ་ཟབ་པ་ཕྲ་བ་ཤེས་རབ་ཀྱི་སྤྱོད་ཡུལ་ཡིན་པས་དེ་དང་པོར་བསྟན་ན་སེམས་ཅན་བློ་མ་བྱང་བ་གང་དག་ཡིན་པ་དེ་དག་གིས་གཏིང་མི་སླེབས་
པས་སྤོང་བ་ལྷུར་བླངས་ནས་མཚམས་མེད་པའི་འགྲོ་བ་དམྱལ་བ་ལ་སོགས་པར་འགྲོ་བར་འགྱུར་ཏེ། ཇི་སྐད་དུ་འདིས་འདི་ཉིད་ལས། སྤོང་བས་མ་རུང་བདག་ཉིད་ཅན། །མནར་མེད་པར་ནི་སྤྱིའུ་ཚུགས་འགྲོ། །ཞེས་འཆད་པར་འགྱུར་རོ། །ཁ་ཅིག་ནི་དོན་ངེས་པར་མ་ཟིན་

172-1-129a

པས་ཆད་པར་ལྟ་བར་ལྟུང་སྟེ། རང་དང་གཞན་རླག་པར་བྱེད་ཅིང་སེམས་ཅན་གྱི་འདྲོན་པོ་རབ་ཏུ་མང་པོ་དེད་ནས་འཁོར་བའི་འབྲོག་དགོན་པར་ཞུགས་ཏེ་སྡུག་བསྔལ་ལ་གཞོལ་བར་འགྱུར་རོ། །དེ་ལྟ་ན་ནི་ཆོས་བཤད་དེ་ཞེས་སྨྲས་ནས། དེ་དག་ལ་ཆོས་མ་ཡིན་
པ་བཤད་པར་འགྱུར་རོ། །རྒྱལ་པོ་ཞེས་བཤད་པ་འདི་ཡང་སྤྱིར་བསྟན་པ་ཡིན་ཏེ། དེ་སྐད་དུ་མ་བྱང་བ་ལ་དང་པོར་བསྟན་པ་ནི་བཟང་པོ་མ་ཡིན་ནོ་ཞེས་བྱ་བ་ནས་དེ་བཞིན་དུ། སྟོང་པ་ཉིད་ལ་ལྟ་ཉེས་ན། །ཤེས་རབ་ཆུང་ལྡན་ཕུང་བར་འགྱུར། །ཞེས་བཤད་དོ། །རྩ་བའི་ལྟུང་
བའི་སྐབས་ནས་ཀྱང་། །བློ་མ་སྦྱངས་པའི་སེམས་ཅན་ལ། །སྟོང་པ་ཉིད་ནི་སྟོན་པ་དང་། །ཞེས་བཤད་དོ། །དེ་ལྟ་བུ་ལ་དགོངས་ནས་འཕགས་པ་ཆོས་ཀྱི་གྲལ་རིམས་ཤོམ་པར་མཛད་པ་ན་སེམས་ཅན་སྣོད་དུ་གྱུར་པ་རྣམས་ལ་ཐབས་མི་ཉམས་པར་བྱ་བའི་ཕྱིར། གང་ཞིག་ལ།
དང་པོ་མངོན་པར་མཐོ་བའི་ཆོས། །ཞེས་བྱ་བ་ལ་སོགས་པ་ཆོས་ཀྱི་གོ་རིམས་སྟོན་པར་མཛད་དོ། །གང་ཞིག་ལ་ཞེས་པ་ནི་མངོན་པར་མཐོ་བའི་ཆོས་གང་ཞིག་ལ་གནས་ན་ཐོས་དང་བསམ་པ་ལ་སོགས་པའི་རིམ་གྱིས་དུས་ཕྱིས་ངེས་པར་ལེགས་པ་འབྱུང་བ་བསམ་གཏན་དང་ཤེས་རབ་ཀྱི་མཚན་
ཉིད་འབྱུང་ཞིང་སྲིད་པའོ། །དང་པོར་ཞེས་པ་ནི་སྔར་རོ། །མངོན་པར་མཐོ་བའི་རྒྱུ་ཡིན་པའི་ཕྱིར་མངོན་པར་མཐོ་བ་སྟེ། རྒྱུ་ལ་འབྲས་བུ་བཏགས་པའི་ཕྱིར། །དཔེར་ན་ཚེ་ནི་མར་ཡིན་ནོ། །ཞེས་པ་ལྟ་བུའོ། །འདི་ག་ལས་ཤེ་ན། དེ་ལ་མངོན་མཐོ་བདེ་བས་ཏེ། །ཞེས་འབྱུང་བའི་
ཕྱིར་རོ། །བདེ་བ་ནི་ཆོས་ཡིན་པར་རིགས་པ་མ་ཡིན་ཏེ། དེའི་འབྲས་བུ་ཡིན་པའི་ཕྱིར་རོ། །ངེས་པར་ལེགས་པ་ལ་དེ་བཞིན་དུ་བརྗོད་པར་བྱའོ། །ཆོས་ནི་བཤད་པའི་མཚན་ཉིད་འཇིག་རྟེན་པའི་ཕུན་སུམ་ཚོགས་པ་ལ་གནས་པའི་བདེ་བ་ཐོབ་པ་དང་མཐུན་པའི་སྦྱིན་པ་དང་། ཚུལ་ཁྲིམས་
ལ་སོགས་པའི་མཚན་ཉིད་དོ། །ཆོས་རྣམ་པ་གཉི་གའི་ཡང་འབྲས་བུ་འབྲེལ་པ་མི་སླུ་བ་སྟོན་པ་ན་འབྲས་བུ་སྒྲུབ་པར་བྱེད་པ་ཁོ་ནའི་ཆོས་སྟོན་པར་མཛད་དོ། །མངོན་པར་མཐོ་བ་དང་ངེས་པར་ལེགས་པ་སྔར་བཤད་པའི་དགོངས་པ་ཚིགས་སུ་བཅད་པས་བཤད་པ་དེ་མ་ཤེས་

172-1-129b

པའི་ཕྱིར་གལ་ཏེ་འགའ་ཞིག་འདི་སྐད་ཅེས་ཅིའི་ཕྱིར་རིམ་པ་འདི་ལ་བརྟེན་ཞེས་སྨྲ་ན། དེའི་ཕྱིར་རྒྱུ། གང་ཕྱིར་མངོན་པར་མཐོ་ཐོབ་ནས། །ཞེས་བྱ་བ་ལ་སོགས་པ་སྨོས་ཏེ། རྒྱུ་གང་གི་ཕྱིར་ཐོབ་ཅིང་རྙེད་ནས་སོ། །རིམ་ནི་རིམ་པའོ། །རིམ་གྱིས་ཞེས་བྱ་བ་ནི་རིམ་པ་ལ་བརྟེན་ནས་
ཏེ། ནས་ཞེས་བྱ་བ་ནི་མི་མངོན་པར་བྱས་པའི་ལྔ་པ་ཡིན་ནོ། །ཡང་ན་རིམ་གྱིས་ཞེས་བྱ་བ་རིམ་པས་ཞེས་གསུམ་པའི་དོན་ཡིན་ནོ། །འོང་བར་ནི་འོང་བར་འགྱུར་བའོ། །བཟློག་པ་ནི་སྔར་བཤད་པ་ཡིན་ནོ། །ད་ནི་མངོན་པར་མཐོ་བ་དང་ངེས་པར་ལེགས་པ་དག་མི་ཤེས་པ་རྣམས་
ལ། དེ་ལ་མངོན་མཐོ་ཞེས་པ་སྟེ། །ཞེས་བྱ་བ་ལ་སོགས་པས་བྱེ་བྲག་ཏུ་སྟོན་པར་བྱེད་དོ། །གོང་མ་བཞིན་དུ་བདེ་བའི་རྒྱུ་ཡིན་པའི་ཕྱིར་བདེ་བ་སྟེ། མངོན་པར་མཐོ་བའི་ཆོས་གང་ཡིན་པ་དེ་ནི་འཇིག་རྟེན་པའི་ཕུན་སུམ་ཚོགས་པའི་བདེ་བ་མཐའ་དག་འཐོབ་པ་དང་མཐུན་པའི་ཕྱིར་
བདེ་བ་ཞེས་བྱའོ། །ཐར་པ་འཐོབ་པ་མཐུན་པའི་ཆོས་ནི་ཐར་པའོ། །འདོད་པ་ནི་བཞེད་པ་སྟེ། བདེ་བ་ལ་ཡང་དེ་བཞིན་དུ་བརྗོད་པར་བྱའོ། །དེའི་ཞེས་བྱ་བ་ནི་བསྟན་མ་ཐག་པ་རྣམ་པ་གཉི་གའི་སྒྲུབ་པ་གང་ཡིན་པ་དེའི་མདོར་བསྡུས་པ་དང་རྒྱས་པ་ནི་མི་མཐུན་པའི་ཕྱོགས་ཏེ་
བརྗོད་པ་ཉུང་བའོ། །དད་པ་ནི་ལས་དང་འབྲས་བུ་དང་བདེན་པ་དང་དཀོན་མཆོག་དག་ལ་མངོན་པར་ཡིད་ཆེས་པའི་རྣམ་པ་ཅན་གྱི་སེམས་རབ་ཏུ་དང་བའོ། །དོན་ཕྱིན་ཅི་མ་ལོག་པར་རབ་ཏུ་ཤེས་པས་ན་ཤེས་རབ་སྟེ་བློའི་ཁྱད་པར་རོ། །དད་པ་དང་ཤེས་རབ་ལ་དེ་སྐད་ཅེས་བྱ་
སྟེ། མདོར་ན་དེ་གཉིས་ཡིན་ནོ། །མདོར་བསྡུས་ན་ཞེས་བྱ་བ་དང་། མདོར་ན་ཞེས་བྱ་བ་དག་ལ་ཁྱད་པར་ཅི་ཡོད་ནས་འདི་ལྟར་གཉིས་སྨོས་ཤེ་ན། སྔ་མ་ནི་སྒྲུབ་པའི་ཁྱད་པར་རོ། །གཞན་ནི་དད་པ་ལ་སོགས་པའི་ཡིན་པས་ཉེས་པ་མེད་དོ། །ཡང་ན་སྒྲ་རྣམས་ཀྱི་དོན་དུ་མ་
ཡིན་པའི་ཕྱིར་སྔ་མ་ནི་བསྟན་པའི་ཚིག་ཡིན་ནོ། །འདི་ལྟར་དོན་གཉིས་ཀྱིས་བསྒྲུབ་པ་ཡིན་ཞེ་ན། དད་ཅན་ཉིད་ཕྱིར་ཆོས་ལ་བརྟེན། །ཞེས་བྱ་བ་ལ་སོགས་པ་སྨོས་ཏེ། གང་ལ་དད་པ་ཡོད་པ་དེ་ནི་དད་པ་ཅན་ཡིན་ནོ། །དེའི་ངོ་བོ་ནི་དད་པ་ཅན་ཉིད་དོ། །དེའི་ཕྱིར་དད་པ་

172-1-130a

ཅན་ལ་བརྟེན་ནས་ཞེས་བྱ་བ་རྣམ་པར་དབྱེ་བ་སྔ་མ་བཞིན་ནོ། །རྟེན་པར་བྱེད་པ་ནི་བྱེད་པའོ། །དོན་ནི་འདི་ཡིན་ཏེ་གལ་ཏེ་ཆོས་དེ་ལ་ཡིད་ཆེས་པ་སྐྱེས་པར་གྱུར་ན་དེའི་འོག་ཏུ་མཉན་པ་ལ་སོགས་པའི་རིམ་གྱིས་ཆོས་དེ་ལ་བརྟེན་པར་འགྱུར་གྱི་གཞན་དུ་ནི་མ་ཡིན་ནོ། །
ཤེས་རབ་ལྡན་ཕྱིར་ཞེས་བྱ་བ་ལ་ཡང་དེ་བཞིན་དུ་བརྗོད་པར་བྱའོ། །ཡང་དག་ཅེས་བྱ་བ་ནི་ཡང་དག་པ་ཇི་ལྟ་བ་བཞིན་དུའོ། །རིག་ཅེས་བྱ་བ་ནི་ཤེས་པའོ། །དད་པ་ཡང་བརྒྱུད་པས་ངེས་པར་ལེགས་པའི་རྒྱུར་འགྱུར་བ་ཉིད་དེ། ཇི་སྐད་དུ་དཀོན་མཆོག་ཏ་ལ་ལ་ལས་འབྱུང་བ་ལྟ་བུ་ཡིན་མོད་
ཀྱི་འོན་ཀྱང་དེ་ཁོ་ན་ཉིད་རྟོགས་པར་བྱེད་པ་ནི་ཤེས་རབ་ཁོ་ན་ཡིན་ནོ་སྙམ་དུ་ཐུགས་ལ་དགོངས་ནས་འདི་སྐད་དུ། དེ་གཉིས་གཙོ་བོ་ཤེས་རབ་སྟེ། །ཞེས་བྱ་བ་ལ་སོགས་པ་སྨོས་སོ། །གཙོ་བོ་ནི་གཙོ་བོ་སྟེ་གཅེས་པ་ཞེས་བྱ་བའི་ཐ་ཚིག་གོ། །འདིའི་ཞེས་བྱ་བ་ནི་བསྒྲུབ་པ་རྣམ་པ་གཉིས་ཀྱིའོ། །སྔོན་
དུ་དང་པོར་འགྲོ་ཞིང་འཇུག་པས་ན་སྔོན་དུ་འགྲོ་བའོ། །ཡིན་ཞེས་བྱ་བ་ནི་ངེས་པར་གཟུང་བ་སྟེ། ཤེས་རབ་ཁོ་ན་ཡིན་ནོ་ཞེས་བྱ་བར་དགོངས་པའི་ཕྱིར་རོ། །དེ་བཞིན་དུ་གཉིས་པ་ཡང་དད་པ་ཁོ་ནི་ཡིན་ནོ་ཞེས་བྱ་བ་ཡིན་ནོ། །དད་པ་ཅན་ཡང་གང་ཞིག་ཡིན་ཞེ་ན། འདུན་དང་ཞེས་བྱ་བ་
ལ་སོགས་པ་སྨོས་ཏེ། འདུན་པ་ནི་ཆགས་པའོ། །ཞེ་སྡང་ནི་ཀུན་ནས་མནར་སེམས་ཀྱི་བསམ་པའོ། །འཇིགས་པ་ནི་བྲེད་པ་སྟེ་སེམས་ཀུན་ནས་འཁྲུགས་པའོ། །རྨོངས་པ་ནི་མི་ཤེས་པ་སྟེ། རིགས་པ་དང་མི་རིགས་པ་དཔྱོད་མི་ནུས་པ་ཉིད་དོ། །གང་ཞིག་རྒྱུ་དེ་རྣམས་ཀྱིས་ཆོས་
ལས་མི་འདའ་ཞིང་མི་འདོར་བ་དེ་ནི་དད་པ་ཅན་ཡིན་ནོ་ཞེས་བྱ་བར་ཤེས་པར་བྱ་ཞིང་ཁོང་དུ་ཆུད་པར་བྱའོ། །ངེས་པར་ལེགས་པ་ཐར་པའི་སྣོད་ནི་གཞིའོ། །མཆོག་ནི་དམ་པའོ། །དད་པ་ཅན་གྱི་མཚན་ཉིད་བཤད་ཟིན་ཏོ། །གང་ཞིག་ལུས་ངག་ཅེས་བྱ་བ་ལ་སོགས་པས་ནི་ཤེས་རབ་ཀྱི་
མཚན་ཉིད་སྟོན་ཏོ། །ལུས་ནི་བསགས་པ་སྟེ་ལག་པ་ལ་སོགས་པའི་ཚོགས་སོ། །ངག་ནི་ཚིག་གོ། །ལུས་དང་ངག་དང་ཡིད་ནི་ལུས་དང་ངག་དང་ཡིད་དོ། །དེ་དག་གིས་བྱས་པའི་ལས་ནི་ལུས་དང་ངག་དང་ཡིད་ཀྱི་ལས་ཏེ། འདི་ནི་དགེ་བའོ། །འདི་ནི་མི་དགེ་བའོ། །འདི་ནི་

172-1-130b

ལུང་དུ་མ་བསྟན་པའོ་ཞེས་ཕྱིན་ཅི་མ་ལོག་པའི་ཐབས་ཀྱིས་ཡོངས་སུ་བརྟགས་ཤིང་དཔྱད་དེ། དེ་ལ་མི་དགེ་བ་དང་ལུང་དུ་མ་བསྟན་པ་དག་ཡོངས་སུ་ཤེས་ནས་དགེ་བ་བྱེད་པའོ། །དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་པའི་ཕྱིར། བདག་དང་གཞན་ལ་
ཕན་པ་སྟེ། བདག་དང་གཞན་ནི་བདག་དང་གཞན་དག་གོ། །འདི་ནི་དེ་དག་གིའམ་དེ་དག་ལ་ཕན་པའོ་ཞེས་བྱ་བར་ཤེས་ནས་ཏེ་ཤེས་པར་བྱས་ནས་སོ། །རྟག་ཏུ་བྱེད་པ་ཞེས་བྱ་བ་ནི་དུས་ཐམས་ཅད་དུའོ། །དེ་མཁས་པ་སྟེ་དེ་ནི་ཤེས་རབ་དང་ལྡན་པ་ཡིན་ནོ། །དེ་ལྟར་ཆོས་བཤད་
པའི་ཕྱིར་ཅི་ལ་མ་རེག་པའི་ཆ་བ་བྱས་ནས། ད་ནི་མི་གསོད་པ་དང་རྐུ་སྤོང་ཞེས་བྱ་བ་ལ་སོགས་པས་ཆོས་སྟོན་པར་མཛད་དེ། གསོད་པ་ནི་སྲོག་ཆགས་གསོད་པའོ། །མི་ཞེས་བྱ་བ་ནི་གསོད་པ་མེད་པ་ཁོ་ནའོ་ཞེས་མེད་པར་དགག་པ་ཡིན་པས་མི་གསོད་པ་ནི་སྲོག་གཅོད་པ་སྤངས་པ་
ཡིན་ནོ། །རྐུ་བ་ནི་མཐུའམ་འཇབ་བུས་གཞན་གྱི་ནོར་རང་གིར་བྱེད་པའོ། །དེ་སྤོང་བ་ནི་བསམ་པ་ཐག་པ་ནས་ལོག་པ་སྟེ་མ་བྱིན་པར་ལེན་པ་སྤངས་པ་ཡིན་ནོ། །བདག་ལ་ལྟོས་ནས་སྐྱེ་བོ་གཞན་ནི་གཞན་ཏེ་དེའི་ཆུང་མ་དག་གོ། །དེ་དག་སྤོང་བ་ནི་ཡོངས་སུ་སྤོང་བ་སྟེ། །
འདོད་པས་ལོག་པར་གཡེམ་པ་སྤོང་བ་ཡིན་ནོ། །འདིས་ནི་ལུས་ཀྱི་ཉེས་པ་སྤོང་བ་བཤད་དོ། །ལོག་དང་ཕྲ་མ་ཞེས་བྱ་བ་ལ་སོགས་པས་ནི་ངག་གི་ཉེས་པ་སྤོང་བ་སྟོན་ཏེ། ལོག་པ་ནི་མི་བདེན་པའོ། །ཕྲ་མ་ནི་དབྱེན་སྨྲ་བའོ། །རྩུབ་པ་ནི་བརླང་བ་སྟེ། མི་འདོད་པའོ། །དེའི་ངོ་
བོ་ནི་རྩུབ་པ་ཉིད་དོ། །མ་འབྲེལ་བ་ནི་ཆོས་ཀྱི་དོན་ལ་སོགས་པ་དང་མ་འབྲེལ་བ་སྟེ་ཚིག་ཀྱལ་པའོ། །ལོག་པ་དང་། ཕྲ་མ་དང་། ཚིག་རྩུབ་པོ་དང་། མ་འབྲེལ་བ་ནི། ལོག་དང་ཕྲ་མ་རྩུབ་ཉིད་དང་། །མ་འབྲེལ་བ་དག་གོ། །སྨྲ་བ་ནི་སྨྲ་བར་བྱེད་པ་སྟེ། དེ་དག་ནི་ལོག་པར་ལྟ་
བ་ལ་སོགས་པ་ཡང་ཡིན་ལ་སྨྲ་བ་ཡང་ཡིན་པས་ཞེས་ཚིག་རྣམ་པར་སྦྱར་ནས་ཚིག་བསྡུའོ། །དེ་དག་ཡང་དག་པར་སྡོམ་པ་ནི་སེམས་ཀྱིས་བག་བྱ་བ་སྟེ་སྤོང་བའོ། །འདིས་ནི་ངག་གི་ཉེས་པ་སྤོང་བ་བཤད་དོ། །ཡིད་ཀྱི་ཉེས་པ་སྤོང་བའི་དབང་དུ་མཛད་ནས་ཆགས་དང་

172-1-131a

ཞེས་བྱ་བ་ལ་སོགས་པ་སྨོས་ཏེ། ཆགས་པ་ནི་གཞན་གྱི་རྙེད་པ་ལ་སྲེད་པའོ། །གནོད་སེམས་ནི་སེམས་ཅན་ལ་རྣམ་པར་སྡང་བའོ། །གང་ལ་འཇིག་རྟེན་ཕ་རོལ་ལ་སོགས་པ་མེད་དོ་སྙམ་པའི་བློ་ཡོད་པ་དེ་ནི་མེད་པ་པའོ། །དེའི་ངོ་བོ་ནི་མེད་པ་པ་ཉིད་
དོ། །དེའི་ལྟ་བ་ནི་མེད་པའི་རྣམ་པ་ཅན་གྱི་མཐོང་བའོ། །ཆགས་པ་དང་གནོད་སེམས་དང་མེད་པ་པ་ཉིད་ཀྱི་ལྟ་བ་ནི་ཞེས་བྱ་བར་ཚིག་རྣམ་པར་སྦྱར་ནས་གཉིས་པ་ཞེས་བྱ་བའི་ཚིག་བསྡུ་བ་ཡིན་ནོ། །དེ་རྣམས་ཡོངས་སུ་སྤོང་བ་ནི་ཀུན་ནས་སྤོང་བ་སྟེ། ཉེས་པའི་བསམ་པ་རྣམ་
པ་བཅུ་ཆར་ཡང་མི་ལེན་པའི་ཕྱིར་རོ། །འདི་དག་ཅེས་བྱ་བ་ནི་མི་གསོད་པ་ལ་སོགས་པ་ལ་སྙེགས་སོ། །ལས་ནི་གསོད་པ་ལ་སོགས་པ་སྤོང་བའི་མཚན་ཉིད་ཀྱིས་བྱ་བའོ། །དེ་ཉིད་ལམ་ཡིན་ཏེ། གནས་གཞན་དུ་འགྲོ་བའི་ཐབས་ཡིན་པའི་ཕྱིར་རོ། །དེ་དང་འདྲ་བར་ལས་
ཉིད་ལམ་ཡིན་པས་ན་ལས་ཀྱི་ལམ་མོ། །དཀར་པོ་ནི་ཉེས་པའི་དྲི་མ་དང་བྲལ་བའི་ཕྱིར་རོ། །བཅུ་ཞེས་བགྲང་བ་ནི་བདེ་བླག་ཏུ་རྟོགས་པར་བྱ་བའི་ཕྱིར་རོ། །དེ་དག་ལས་བཟློག་ཅིང་མི་མཐུན་པ་ནི་སྡིག་པའི་དྲི་མས་དྲི་མ་ཅན་དུ་བྱས་པ་ཡིན་པའི་ཕྱིར་ནག་པོ་བཅུའོ། །ཅི་
ཆོས་དེ་དག་ཁོ་ན་ཙམ་དུ་ཟད་དམ་ཞེ་ན། ཆང་མི་འཐུང་ཞེས་བྱ་བ་ལ་སོགས་པ་སྨོས་སོ། །མྱོས་པར་འགྱུར་བས་ན་ཆང་སྟེ། ལུས་དང་སེམས་རང་དབང་མེད་པར་བྱེད་པའོ། །རང་དབང་མེད་པས་ནི། མི་བྱ་བ་ཅི་ཡང་མེད་པས་མེད་པར་དགག་པའི་
ཚུལ་གྱིས་ཞེས་བྱ་བ་ནི་དགག་པ་ཡིན་ནོ། །འཐུང་བ་ནི་མིད་པའོ། །ཆང་ལ་འཐུང་བ་ནི་ཆང་ལ་འཐུང་བ་སྟེ། དེ་ལྟ་བུ་མིད་པའོ། །དེ་བཞིན་དུ་འདིས་འཚོ་བར་བྱེད་པས་ན་འཚོ་བ་སྟེ་འཚོ་བ་ཉིད་འཚོ་བའོ། །འདིར་ཡང་རྒྱུ་ལ་འབྲས་བུ་བཏགས་པ་ནི་སྔ་མ་བཞིན་ནོ། །འཚོ་བ་བཟང་
པོ་ནི་ཚུལ་འཆོས་པ་ལ་སོགས་པའི་ཉེས་པ་དང་བྲལ་བའི་ཕྱིར་རོ། །རྣམ་པར་འཚེ་བ་ནི་རྣ་བ་དང་སྣ་གཅོད་པ་དང་རྡེག་པ་དང་། འཆིང་བ་ལ་སོགས་པའོ། །དེ་ལྟ་བུ་མེད་པས་ན་རྣམ་པར་མི་འཚེ་བའོ། །མི་གསོད་པ་དང་ཞེས་བྱ་བ་ནས་བཟུང་སྟེ། རྣམ་མི་འཚེ་དང་ཞེས་བྱ་བའི་བར་

172-1-131b

འདིས་ནི་ལྡོག་པའི་མཚན་ཉིད་ཀྱི་ཆོས་བཤད་དོ། །གུས་སྦྱིན་དང་ཞེས་བྱ་བ་ལ་སོགས་པས་ནི་འཇུག་པའི་མཚན་ཉིད་ཀྱི་ཆོས་བཤད་དོ། །གུས་པ་ནི་བཀུར་སྟི་དང་དུས་ཇི་ལྟ་བ་བཞིན་ལ་སོགས་པ་དང་ལྡན་པའི་ཕྱིར་ཏེ། ཇི་སྐད་དུ། དད་པའི་ཆུ་ཀླུང་དྲི་མེད་བྱས་པ་ཡིད་ཀྱིས་ནི། །རང་གི་
ལག་ནས་དུས་སུ་གཞན་ལ་གནོད་མེད་པར། །གུས་དང་བཀུར་སྟི་ལྷུར་བླངས་སྦྱིན་པ་སྦྱིན་པ་ནི། །མཚན་ཉིད་ཀུན་རྫོགས་ཡོན་ཏན་ལྡན་ཞེས་ཐུབ་རྣམས་གསུང་། །ཞེས་བཤད་པ་ལྟ་བུའོ། །སེམས་པའི་ཁྱད་པར་གང་གིས་སྦྱིན་པ་དང་། དེས་བཅུ་པ་དོན་ཡོངས་སུ་གཏོང་བ་ནི་སྦྱིན་
པའོ། །དེ་ནི་རང་གི་དོན་ལ་སོགས་པའི་རྒྱུ་མཚན་ཏེ། དེ་ཡང་ཟང་ཟིང་དང་། མི་འཇིགས་པ་དང་། ཆོས་ཀྱི་བྱེ་བྲག་གིས་རྣམ་པ་གསུམ་མོ། །དང་ཞེས་བྱ་བའི་སྒྲ་ནི་བསྡུ་བ་ཡིན་ནོ། །མཆོད་འོས་ནི་མཆོད་པར་འོས་པས་ཏེ། སངས་རྒྱས་བཅོམ་ལྡན་འདས་ལ་སོགས་པའོ། །དེ་རྣམས་
མཆོད་པ་སྟེ། དེ་ཡང་ཟང་ཟིང་དང་། སྒྲུབ་པའི་བྱེ་བྲག་གིས་རྣམ་པ་གཉིས་སོ། །དང་ཞེས་བྱ་བའི་སྒྲ་ནི་སྔ་མ་བཞིན་ནོ། །བྱམས་པ་ནི་སེམས་ཅན་ཐམས་ཅད་ལ་ཕན་པ་ཉེ་བར་བསྒྲུབ་པའི་བསམ་པ་འདོད་པའི་འདོད་ཆགས་དང་། ལན་དུ་ཕན་འདོགས་སུ་རེ་བ་སྤངས་པའོ། །ཆོས་ནི་
འཇུག་པ་དང་ལྡོག་པའི་མཚན་ཉིད་དོ། །གདུང་བ་ལྔ་ལ་སོགས་པས་ཀྱང་ལུས་གདུང་བར་བྱེད་པའི་ཕྱིར་གཞན་ནས་ཆོས་སུ་བཤད་པ་མ་ཡིན་ནམ། དེ་ཅིའི་ཕྱིར་འདིར་མ་བསྡུས་ཤེ་ན་དེའི་ཕྱིར། ལུས་གདུང་བྱེད་པ་འབའ་ཞིག་ལ། །ཞེས་བྱ་བ་ལ་སོགས་པ་སྨོས་ཏེ། ལུས་ནི་ཁོག་
པའོ། །གདུང་བ་ནི་གདུང་བར་བྱེད་པ་སྟེ། གནོད་པར་བྱེད་པ་ཞེས་བྱ་བའི་ཐ་ཚིག་གོ། །ཡང་དག་པའི་ཐབས་དང་བྲལ་བ་དེ་འབའ་ཞིག་ལ་ནི་ཆོས་མེད་ཅིང་ཡོད་པ་མ་ཡིན་ཏེ། འདི་ལྟར་ལུས་གདུང་བ་དེ་ནི་འབའ་ཞིག་པས་ནི་གཞན་ལ་གནོད་པ་སྟེ་གནོད་པར་བྱེད་པ་སྤོང་བར་བྱེད་ཅིང་
ལྡོག་པ་ཡང་མེད་ལ།གཞན་དག་ལ་ཕན་འདོགས་པ་སྟེ། ཟང་ཟིང་དང་མི་འཇིགས་པ་དང་། ཆོས་ཀྱི་སྦྱིན་པའི་བྱེ་བྲག་གིས་ཕན་པ་ཉེ་བར་བསྒྲུབ་པ་ཡང་ཡོད་པ་མ་ཡིན་པས་གཉི་གའི་མཚན་ཉིད་ཀྱི་ཆོས་ནི་ཁོ་བོས་གཉིས་ཀྱི་མཚན་ཉིད་ཅན་བཤད་པ་གང་ཡིན་པ་འདི་ཁོ་ན་ཡིན་ནོ། །

172-1-132a

གང་ཞིག་མི་ཤེས་པས་ཆོས་འདི་ལ་མ་གུས་ཏེ། ལམ་ངན་པའི་རྗེས་སུ་འགྲོ་ཞིང་མུ་སྟེགས་ཅན་གྱི་ཆོས་ཀྱི་ལམ་ལུས་ལ་གནོད་པ་བྱེད་པའི་མཚན་ཉིད་དུ་འགྲོ་བ་འཁོར་བ་པ་དེ་ནི་ཤིན་ཏུ་ཡུན་རིང་པོར་སྡུག་བསྔལ་གྱི་སྣོད་ཡིན་ནོ་ཞེས་བསྟན་པའི་ཕྱིར། སྦྱིན་དང་ཞེས་བྱ་བ་
ལ་སོགས་པ་སྨོས་ཏེ། སྦྱིན་པའི་མཚན་ཉིད་བཤད་ཟིན་ཏོ། །ལུས་དང་སེམས་བསིལ་བར་བྱེད་པའི་ཕྱིར་སྤོང་བ་བདུན་གྱི་མཚན་ཉིད་ཀྱི་དོན་ནི་ཚུལ་ཁྲིམས་སོ། །བརྣབ་སེམས་མེད་པ་ལ་སོགས་པ་ནི་འདི་ཉིད་དུ་འདུས་ཏེ། གང་ཞིག་མ་བྱིན་པར་ལེན་པ་སྤངས་པ་དེ་ཇི་ལྟར་བརྣབ་སེམས་
སྐྱེད་པར་འགྱུར། གསོད་པ་སྤངས་པ་ཡང་ཇི་ལྟར་གནོད་སེམས་སྐྱེད་པར་འགྱུར། ཡང་དག་པའི་ལྟ་བ་ཅན་ནི་ཚུལ་ཁྲིམས་ཀྱིས་བརྒྱན་པ་ཡིན་པས་ལོག་པར་ལྟ་བ་སྤངས་པ་ཡིན་ནོ། །བཅུ་པ་སྤངས་པར་གསུངས་པ་ནི། །སེམས་ཅན་བླུན་པོས་ཁོང་དུ་ཆུད་པར་བྱ་བའི་དོན་དུ་ཟད་དོ། །
བཟོད་པ་ནི་ཁྲོ་བ་བཟོད་པའོ། །བཟོད་པ་དེ་ཡང་ཐེག་པ་ཆེན་པོས་འགྲོ་བའི་འཕགས་པ་རྣམས་ཀྱི་རྣམ་པ་གསུམ་དུ་འགྱུར་ཏེ། སྒྲའི་རྗེས་སུ་འགྲོ་བ་ནི་ས་ལྔ་པའོ། །རྗེས་སུ་མཐུན་པ་ནི་ས་གཉིས་པ་ལའོ། །མི་སྐྱེ་བའི་ཆོས་ལ་བཟོད་པ་ཐོབ་པ་ནི་ས་བརྒྱད་པ་ལའོ། །ཡང་རྣམ་པ་
གསུམ་སྟེ། སྡུག་བསྔལ་དང་དུ་ལེན་པའི་བཟོད་པ་དང་། གནོད་པ་བྱས་པ་ལ་ཇི་མི་སྙམ་པའི་བཟོད་པ་དང་། ཆོས་ལ་ངེས་པར་རྟོགས་པའི་བཟོད་པའོ། །སྦྱིན་པ་དང་ཚུལ་ཁྲིམས་དང་བཟོད་པ་དག་ནི་སྦྱིན་པ་དང་ཚུལ་ཁྲིམས་དང་བཟོད་པ་དག་སྟེ། དང་ཞེས་བྱ་བའི་དོན་ནི་
བ་གཉིས་པ་ཡིན་པས་བ་གཉིས་པའི་ཚིག་བསྡུ་བ་ཡིན་ནོ། །དེ་དག་གི་མཚན་ཉིད་གསལ་བ་ནི་ཤིན་ཏུ་གསལ་ཞིང་ཐིབས་པོ་མ་ཡིན་པའོ། །དམ་པ་བཅོམ་ལྡན་འདས་དང་བྱང་ཆུབ་སེམས་དཔའ་རྣམས་ཀྱི་ཆོས་ནི་དམ་པའི་ཆོས་སོ། །ཡང་ན་ཉེས་པ་ཐམས་ཅད་དང་བྲལ་བའི་ཕྱིར་
བཟང་པོ་ཡིན་ནོ། །འདི་ནི་ལམ་ཡང་ཡིན་ལ་ཆེན་པོ་ཡང་ཡིན་པས་ན་ལམ་པོ་ཆེའོ། །གང་གིས་འདི་ཆེན་པོ་ཉིད་ཡིན་ཞེ་ན། གྲངས་ལས་འདས་པའི་རྒྱལ་བ་རྣམས་གཤེགས་ཤིང་རྗེས་སུ་གཤེགས་པའི་ཕྱིར་རོ། །ཡང་ན་ཆེན་པོ་བཅོམ་ལྡན་འདས་རྣམས་ཀྱི་ལམ་ཡིན་ལ། དེ་དག་

172-1-132b

གི་ཚུལ་ཁྲིམས་ལ་སོགས་པའི་ཡོན་ཏན་ཆེ་བའི་ཕྱིར་ཆེ་བ་ཉིད་དོ། །དམ་པའི་ཆོས་ཉིད་ལམ་པོ་ཆེ་ཡིན་ནོ། །འདི་ལ་ལམ་དང་ཆོས་མཐུན་པ་ཉིད་གང་ཡིན་ཞེ་ན། བརྗོད་པར་འདོད་པའི་ཐམས་ཅད་མཁྱེན་པའི་གྲོང་ཁྱེར་དུ་ཕྱིན་པའི་རྒྱུ་མཚན་ཉིད་ཡིན་པའོ། །གང་ཞིག་གཏི་མུག་པས་དམ་
པའི་ཆོས་ཀྱི་ལམ་པོ་ཆེ་དེ་ལྟ་བུ་ལ་མ་གུས་ཤིང་ཁྱད་དུ་བསད་དེ་བརྙས་པའི་བསམ་པས་འདི་ནི་ཆོས་མ་ཡིན་ནོ་ཞེས་ཡོངས་སུ་བོར་ནས་འགྲོ་ཞིང་འགྲོ་བར་བྱེད་པའོ། །གང་དག་ཏུ་ཞེ་ན། གནག་གི་ལམ་ལྟ་བུའི་ལམ་གོལ་བ་དག་ཏུའོ། །གནག་རྣམས་ཀྱི་ལམ་སྟེ་ལམ་གོལ་
བའི་ངོ་བོ་དག་གོ། །དེ་དག་ཏུ་སྟེ་འདི་སྐད་དུ་བཤད་པ་ཡིན་ནོ། །དཔེར་ན་གནག་གི་ཁྱུ་ནས་གནག་གཙོ་བོ་ལ་མ་གོལ་བ་གང་དུ་འགྲོ་བ་དེར་གཞན་དག་ཀྱང་རུང་བ་དང་ཡང་བ་ཡོངས་སུ་མི་ཤེས་པས་འགྲོ་བར་བྱེད་པ་དེ་བཞིན་དུ་མུ་སྟེགས་ཅན་ཕྱུགས་འདི་དག་ཀྱང་། ཆོས་
ཀྱི་ལམ་ལ་མ་གུས་ནས་ཆོས་མ་ཡིན་པའི་ལམ་ལམ་གོལ་བའི་ངོ་བོ་ལུས་གདུང་བ་ལ་སོགས་པའི་མཚན་ཉིད་དུ་འཁོར་བའི་སྡུག་བསྔལ་ལས་ཐར་པའི་བསམ་པས་འགྲོའོ་ཞེས་བྱ་བ་ཡིན་ནོ། །དེ་གང་དུ་འཇུག་ཅིང་། གནས་གང་དུ་འགྲོ་ཞེ་ན། འཁོར་བའི་འབྲོག་དགོན་པར་རོ། །
འཁོར་བ་ནི་འཁོར་བར་འགྱུར་བ་སྟེ། ཕུང་པོའི་ཚོགས་འགྲོ་བ་གཞན་ནས་འགྲོ་བ་གཞན་དུ་ཕྱིན་པའོ། །འཁོར་བ་ཞེས་བྱ་བ་དེ་ལས་གཞན་ནི་ཡོད་པ་མ་ཡིན་གྱི། ཕུང་པོ་དེ་དག་ཉིད་འཁོར་བས་ན་དེ་སྐད་ཅེས་བྱ་སྟེ། དཔེར་ན་བྱ་རོག་གི་ནག་པོ་དང་། ཆུ་སྐྱར་གྱི་དཀར་པོ་
ཞེས་བྱ་བ་ལྟ་བུའོ། །དེ་ཉིད་འབྲོག་ཡིན་ཏེ། བྱ་དང་། རི་དགས་དང་། རྩྭ་དང་ཤིང་གིས་གང་ཞིང་སྐྱེས་བུ་དམ་པས་སྤངས་པའི་ཡུལ་ལ་ནི་འབྲོག་ཅེས་བྱའོ། །དེ་ཡང་མི་དགེ་བའི་གྲོགས་པོ་བྱ་དང་། རི་དགས་དང་། རྩྭ་དང་། ཤིང་ལྟ་བུས་གང་ཞིང་དགེ་བའི་བཤེས་གཉེན་
དང་བྲལ་བ་ཡིན་ནོ། །འབྲོག་དེ་ནི་སེམས་ཅན་དམྱལ་བ་ལ་སོགས་པའི་སྡུག་བསྔལ་མང་བའི་ཕྱིར་མི་བཟད་ཅིང་བགྲོད་དཀའ་བ་ཡིན་ནོ། །མཐའ་ཡས་སྐྱེ་བོའི་ཤིང་ཅན་དུ། །ཞེས་བྱ་བ་ནི་ཆོས་མཐུན་པ་སྟོན་པ་ཡིན་ནོ། །དེ་དག་ནི་སྐྱེ་བོ་ཡང་ཡིན་ལ་མཐའ་ཡས་པ་ཡང་ཡིན་

172-1-133a

པས་ཞེས་ཚིག་བསྡུ་སྟེ། གྲངས་དང་ཚད་དག་གིས་མཐའ་མི་ཟིན་པས་མཐའ་ཡས་པའོ། །གང་ལ་ཤིང་དེ་དག་ཉིད་ཡོད་པ་དེ་ལ་དེ་སྐད་ཅེས་བྱའོ། །དམ་པའི་ཆོས་དང་བྲལ་ཞིང་ལྟ་བ་ངན་པའི་ཐིབས་པོར་ལྷུང་བ་དེ་གང་དག་དང་གནས་པར་གྱུར་པ་དེ་དག་ནི་ཤིང་
ལྟ་བུ་ཡིན་ཏེ། དམ་པའི་ཆོས་སེམས་པ་དང་བྲལ་བས་ན་དེ་སྐད་ཅེས་བྱའོ། །འདོད་ཆགས་ལ་སོགས་པ་ནི་ལུས་དང་སེམས་ཀྱི་རྒྱུད་ཉོན་མོངས་པར་བྱེད་པས་ན་ཉོན་མོངས་ཞེས་བྱའོ། །དེ་དག་ཉིད་གནོད་པར་བྱེད་པའི་ཕྱིར་གདུག་པའོ། །དེ་དག་གི་ལུས་འཁྱུད་པ་ནི་འཁྱུད་
པའི་ལུས་ཏེ། ཉོན་མོངས་དང་ཉེ་བའི་ཉོན་མོངས་པར་རང་དབང་མེད་པས་ཤིན་ཏུ་ཡུན་རིང་དུ་ཞེས་བྱ་བ་མཐའ་མེད་པར་འཇུག་པར་འགྱུར་ཞིང་། རབ་ཏུ་འཇུག་པར་འགྱུར་རོ་ཞེས་བྱ་བའི་དོན་ཏོ། །མི་གསོད་པ་དང་ཞེས་བྱ་བ་ནས། བྱམས་པ་ཞེས་བྱ་བའི་བར་ལྡོག་པ་དང་འཇུག་པའི་
མཚན་ཉིད་ཅན་གྱི་ཆོས་མདོར་བཤད་པ་གང་ཡིན་པ་དེའི་མི་མཐུན་པ་ནི་ཕྱོགས་གསོད་པ་ལ་སོགས་པ་གང་དག་ཡིན་པ་དེ་དག་གི་རྣམ་པར་སྨིན་པ་ནི་མི་འདོད་པ་ཡིན་པའི་ཕྱིར་དེ་དག་དང་འདྲ་བ་རྣམས་བསྟན་ན་དེ་རྣམས་རྒྱས་པར་བསྟན་པར་འགྱུར་བས་དང་པོར་གསོད་པ་ཡིས་ནི་ཞེས་
བྱ་བ་ལ་སོགས་པས་རྒྱུ་མཐུན་པའི་འབྲས་བུ་རྒྱུ་དང་འདྲ་བ་སྟོན་པར་མཛད་དེ། བཤད་པའི་མཚན་ཉིད་ཅན་གྱིས་གསོད་པས་སོ། །འདི་ལ་ཚེ་ཐུང་བ་ཡོད་པས་ན་ཚེ་ཐུང་བ་སྟེ། འཇིག་རྟེན་གྱི་ཁམས་གང་དུ་ཚེ་ཇི་སྲིད་པར་གསུངས་པ་དེ་སྲིད་དུ་ཐམས་ཅད་མི་འཐོབ་པའོ། །ཅིའི་ཕྱིར་
ཞེ་ན། ཇི་ཙམ་དུ་འདིས་གཞན་གྱི་སྲོག་གཅོད་པ་དེ་ཙམ་དུ་གཞན་དག་གིས་སྲོག་གཅོད་པར་འགྱུར་རོ། །དེ་ལ་མཚོན་ལ་སོགས་པས་གཅོད་ཅིང་ལུས་ལ་གནོད་པ་སྟེ་གནོད་པ་ཡང་ཡིན་ལ་མང་པོ་ཡང་ཡིན་ཞེས་བྱ་བར་ཚིག་བསྡུའོ། །རྐུ་བ་ནི་མ་བྱིན་པར་ལེན་པ་སྟེ། དེ་
ཀུན་དུ་བསྟེན་ནས་ལོངས་སྤྱོད་ཀྱིས་ཕོངས་སོ། །སྤྱད་པར་བྱ་བས་ན་ལོངས་སྤྱོད་དེ། ནོར་དང་འབྲུ་ལ་སོགས་པའོ། །དེ་རྣམས་ཀྱིས་ཕོངས་པ་ནི་བྲེལ་བ་དང་ཉམས་པའོ། །དེ་འདི་ལ་ཡོད་པས་ན་ལྡན་པའི་དོན་ཡིན་ནོ། །གཞན་གྱི་ཆུང་མ་འཕྲོག་པས་ན་བྱི་བོ་བྱེད་པའོ། །དགྲ་དང་

172-1-133b

བཅས་པར་འདུག་པས་ན་དགྲ་དང་བཅས་པ་སྟེ། གང་གིས་དེའི་ཆུང་མ་རང་གིར་བྱས་པ་དེ་ལ་མི་མཐུན་པར་སྤྱོད་པས་ན་དགྲ་སྟེ། ཇི་ལྟར་འདིས་གཞན་ལ་དགྲ་ཉིད་བྱས་པ་དེ་བཞིན་དུ་འདི་ལ་ཡང་འབྱུང་བས་རྒྱུ་དང་འདྲ་བའི་འབྲས་བུ་ཡིན་ནོ། །དེ་ལྟར་ལུས་ཀྱི་ཉེས་པའི་རྒྱུ་མཐུན་པའི་
འབྲས་བུ་བཤད་ནས། བརྫུན་དུ་སྨྲ་བས་སྐུར་པ་སྟེ། །ཞེས་བྱ་བ་ལ་སོགས་པས་ངག་གི་སྟོན་ཏེ། སྐུར་པ་ནི་ཡང་དག་པའི་དོན་རྗོད་པ་ཆུད་གསོན་པའོ། །གང་གིས་དེར་འགྱུར་ཞེ་ན་བརྫུན་དུ་སྨྲ་བ་སྟེ། འདུ་ཤེས་གཞན་དུ་བསྒྱུར་བའི་ཚིག་གིས་དོན་གོ་བ་ལ་བརྫུན་སྨྲ་བས་སོ། །ཕྲ་མས་ནི་
གཞན་དབྱེ་བའི་ཕྱིར་ཉོན་མོངས་པ་ཅན་གྱི་ཚིག་སྨྲ་བས་ཏེ། དེས་ནི་ཕན་པར་འདོད་པའི་བཤེས་དང་འབྱེ་ཞིང་འབྲལ་བར་འགྱུར་རོ། །རྩུབ་པོ་ནི་འཇམ་བག་མེད་པ་སྟེ་བརླང་བའོ། །དེའི་ངོ་བོ་ནི་རྩུབ་པ་ཉིད་དེ་དེས་སོ། །མི་སྙན་པ་ནི་མི་མཐུན་པའོ། །དེ་ཐོས་པ་ནི་གྲག་པའོ། །མ་
འབྲེལ་པ་ནི་ཚིག་ཀྱལ་པ་སྟེ་དེས་སོ། །མི་བཙུན་པ་ནི་མི་འདོད་པ་སྟེ། དེ་ཙམ་ནི་ངག་གི་ཉེས་པའི་འབྲས་བུ་ཡིན་ནོ། །བརྣབ་སེམས་ཡིད་ལ་རེ་བ་འཇོམས། །ཞེས་བྱ་བ་ལ་སོགས་པས་ནི་ཡིད་ཀྱི་ཉེས་པའི་འབྲས་བུ་བཤད་དོ། །ཡིད་ཀྱིས་བསམས་ཤིང་མངོན་པར་འདོད་པའི་དོན་དེ་
དོན་མེད་ཅིང་འབྲས་བུ་མེད་པར་བྱེད་དོ་ཞེས་བྱ་བའི་ཐ་ཚིག་གོ། །འཇིགས་པ་སྟེར་བས་ན་འཇིགས་པ་སྦྱིན་པའོ། །བཤད་པ་ནི་གསུངས་པའོ། །འཇིག་རྟེན་ཕ་རོལ་ལ་སོགས་པ་མེད་པའི་རྣམ་པ་ཅན་གྱི་ལྟ་བ་ནི་ལོག་པར་ལྟ་བ་སྟེ། དེ་ནི་ལྟ་བ་ངན་པ་ཉིད་དོ། །སྨད་པའི་ལྟ་བ་ནི་ལྟ་
བ་ངན་པ་སྟེ། ལྟ་བ་ལོག་པ་ཡིན་ནོ། །དེའི་ངོ་བོ་ཉིད་ནི་ལྟ་བ་ངན་པ་ཉིད་དོ། །དེ་ཐོབ་པར་འགྱུར་ཏེ། ཡང་ལོག་པར་ལྟ་བ་ཁོ་ནར་འགྱུར་རོ་ཞེས་བྱ་བའི་དོན་ཏོ། །བློ་འཁྲུལ་པ་ནི་སྨྱོན་པ་ཉིད་དུ་འགྱུར་རོ་ཞེས་བྱ་བ་ལྷག་མ་ཡིན་ནོ། །ལོག་པའི་མཚན་ཉིད་ཅན་གྱི་ཆོས་ཀྱི་མི་མཐུན་པའི་
ཕྱོགས་ཀྱི་འབྲས་བུ་བརྗོད་ནས་འཇུག་པའི་མཚན་ཉིད་ཅན་གྱི་ཆོས་ཀྱི་མི་མཐུན་པའི་ཕྱོགས་ཀྱི་འབྲས་བུ་བརྗོད་པར་བཞེད་དེ། མ་བྱིན་ལེན་པས་ཞེས་བྱ་བ་ལ་སོགས་པ་སྨོས་སོ། །དབུལ་བ་ནི་ནོར་མི་བདོག་པ་སྟེ། དེའི་ངོ་བོ་ནི་དབུལ་བ་ཉིད་དོ། །ཚུལ་འཆོས་པ་ལ་སོགས་པའི་

172-1-134a

སྐྱོན་གྱིས་བསྒྲུབས་པའི་འཚོ་བ་ནི་ལོག་པར་འཚོ་བ་སྟེ། བཤད་པའི་དོན་ལས་ཟློག་པས་འཚོ་བའི་ཕྱིར་རོ། །དེ་ཀུན་དུ་བསྟེན་པས་ན་བསླུས་པ་སྟེ་འཐོབ་པར་འགྱུར་ཞེས་བྱ་བ་ལྷག་མ་ཡིན་ནོ། །ཁེངས་པ་ཡིས་ཞེས་བྱ་བ་ནི་མཆོད་གནས་མཆོད་པའི་མི་མཐུན་
པའི་ཕྱོགས་ཡིན་ནོ། །ཁེངས་པ་ནི་གྱོང་ཞིང་འགྱིང་བ་སྟེ་བརྗིད་འཆོས་པའི་ང་རྒྱལ་གྱིས་ཟིན་པའོ། །འདིའི་ཤིང་ཚལ་དང་མཐུན་པ་ཉིད་གང་ཡིན་ཞེ་ན། མི་འདུད་པ་སྟེ་ཇི་ལྟར་ཤིང་ཚལ་གང་ལ་ཡང་མི་འདུད་པ་ལྟར་ང་རྒྱལ་གྱིས་ཟིལ་གྱིས་ནོན་པ་ཡང་དེ་དང་འདྲའོ། །ངན་པ་ནི་སྨད་པ་
ཡིན་པས་རིགས་སྨད་པའོ། །དེར་འབྱུང་བས་ན་རིགས་ངན་པའོ། །དེའི་ངོ་བོ་ནི་རིགས་ངན་ཉིད་དོ། །འདི་ལ་གཟི་སྟེ་བརྗིད་བག་ཆུང་བ་ཡོད་པས་གཟི་ཆུང་བའོ། །དེའི་ངོ་བོ་ནི་གཟི་ཆུང་བ་ཉིད་དོ། །གང་གིས་དེར་འགྱུར་ཞེ་ན། ཕྲག་དོག་ཀུན་དུ་བསྟེན་པས་ཏེ། །ཕྲག་དོག་ནི་
གཞན་གྱི་ཕུན་སུམ་ཚོགས་པ་ལ་སེམས་ཁོང་ནས་འཁྲུགས་པའོ། །འདི་སྐད་དུ་བཤད་པ་ཡིན་ཞེ་ན། གང་ཞིག་མཆོད་གནས་མཆོད་པར་མི་བྱེད་པ་དེ་ནི་ཉེས་པ་གཉིས་ཀྱིས་ཏེ། ང་རྒྱལ་དང་ཕྲག་དོག་དག་གིས་སོ། །དེ་གཉིས་ཀྱི་འབྲས་བུ་ནི་མི་འདོད་འདི་གཉིས་ཡིན་
པར་དམིགས་ནས་སྤང་བར་རིགས་སོ་ཞེས་བྱ་བ་ཡིན་ནོ། །གནོད་པ་གསར་གྱིས་བསྐྱེད་པའི་སེམས་ཀྱིས་འཁྲུག་པ་ནི་ཁྲོ་བ་སྟེ། དེ་ནི་བྱམས་པའི་མི་མཐུན་པའི་ཕྱོགས་ཡིན་ནོ། །དེས་ཅིར་འགྱུར་ཞེ་ན། ཁ་དོག་ངན་པ་ཉིད་དོ། །ཁྲོས་ན་མཁས་པ་རྣམས་ལ་ཆོས་འདོད་པས་
ཡོངས་སུ་མི་འདྲིའོ། །མི་འདྲི་བ་དེས་ན་བླུན་པ་ཉིད་དེ་ཤེས་ཉེན་མེད་པ་ཉིད་དུ་འགྱུར་རོ། །མི་དགེ་བའི་འབྲས་བུ་འདི་དག་འགྲོ་བ་གང་ལ་ཡོད་ཅེ་ན། མི་ཉིད་ལ་ཞེས་བྱ་བ་སྨོས་སོ། །དེ་ཅི་མི་དགེ་བ་འདི་རྣམས་ཀྱི་འབྲས་བུ་རྒྱུ་མཐུན་པ་ཙམ་དུ་ཟད་དམ་ཞེ་ན་མ་ཡིན་ཏེ། ཀུན་
གྱིས་ཞེས་བྱ་བ་ལ་སོགས་པ་སྨོས་སོ། །འདི་དག་ཐམས་ཅད་ཀྱིས་དང་པོར་ངན་འགྲོའོ། །སྨད་པའི་འགྲོ་བ་ནི་ངན་འགྲོ་སྟེ།དམྱལ་བ་དང་ཡི་དགས་རྣམས་ཀྱི་འགྲོ་བ་རྣམས་སོ། །གང་དག་ལ་གསོད་པ་ལ་སོགས་པ་བཤད་མ་ཐག་པ་འདི་དག་གི་གསོད་པ་ལ་སོགས་

172-1-134b

པའི་མཚན་ཉིད་ཀྱི་བྱ་བ་བདེ་བ་མ་ཡིན་པའི་དོན་ཏམ། གཟུགས་ངན་པ་འགྲུབ་པའི་ཕྱིར་མི་དགེ་བ་ཞེས་བྱ་བ་མིང་ཡོད་པ་དེ་དག་ལ་དེ་སྐད་ཅེས་བྱའོ། །རྣམ་སྨིན་ནི་ཡོངས་སུ་གྱུར་པའོ། །བསྒྲགས་པ་གང་ཡིན་པ་ནི་བཤད་པ་གང་ཡིན་པ་སྟེ། གསོད་པ་ཡིས་ནི་ཚེ་ཐུང་འགྱུར། །ཞེས་བྱ་
བ་ནས། མཁས་ལ་མི་འདྲི་བླུན་པ་ཉིད། །ཅེས་བྱ་བའི་བར་ཡིན་ནོ། །གཉིས་ཀའི་མཚན་ཉིད་ཅན་གྱི་ཆོས་ཀྱང་བདེ་བའི་དོན་ཏམ། གཟུགས་བཟང་པོ་འགྲུབ་པའི་ཕྱིར་དགེ་བ་ཞེས་བྱ་སྟེ། དེ་རྣམས་ལ་ནི་འབྲས་བུ་དེ་ཉིད་ཟློག་ཅིང་མི་མཐུན་པ་ཡིན་ནོ། །འབྲས་བུ་འབྱུང་བ་ནི་འབྲས་བུ་
འབྱུང་བའོ། །དེ་ལྟར་དགེ་བ་དང་མི་དགེ་བ་འབྲས་བུ་དང་བཅས་པ་དག་བསྟན་པ་མཛད་ནས། ཆགས་དང་ཞེས་བྱ་བ་ལ་སོགས་པས་ལུང་ལས་གྲགས་པའི་དགེ་བ་དང་མི་དགེ་བ་འབྲས་བུ་དང་བཅས་པ་དག་སྟོན་པ་མཛད་དོ། །གཟུགས་དང་སྒྲ་དང་དྲི་དང་རོ་དང་རེག་བྱ་རྣམས་ཀྱིས་
འཇིག་རྟེན་ཆགས་པར་འགྱུར་བས་ན་ཆགས་པ་སྟེ། སྲིད་པའི་འདོད་ཆགས་ཞེས་བྱ་བའི་དོན་ཏོ། །ཞེ་སྡང་ནི་གསོད་པར་བྱེད་པའི་བདག་ཉིད་དོ། །གཏི་མུག་ནི་མི་ཤེས་པའོ། །དང་ཞེས་བྱ་བའི་སྒྲ་ནི་ཆགས་པ་ལ་སོགས་པ་ངོ་བོ་ཉིད་ཀྱི་མི་དགེ་བ་ཡིན་པ་འབའ་ཞིག་ཏུ་མ་ཟད་ཀྱི་
དེས་བསྐྱེད་པའི་ལས་ཀྱང་མི་དགེ་བ་ཡིན་ནོ་ཞེས་བསྡུས་པ་ཡིན་ནོ། །དེ་དག་གིས་བསྐྱེད་པ་ནི་དེས་བསྐྱེད་པའོ། །ལུས་དང་ངག་དང་ཡིད་ཀྱི་བྱ་བ་ནི་ལས་སོ། །དོན་གང་གིས་ན་མི་དགེ་བ་ཡིན་ཞེ་ན། འགྲོ་བ་དེ་དང་དེ་དག་ཏུ་ལུས་དང་སེམས་ཀྱི་རྒྱུད་མི་བཟང་བར་བྱེད་པས་ན་མི་
དགེ་བ་སྟེ། འདོད་ཆགས་ཀྱིས་ཟིལ་གྱིས་ནོན་པ་ནི་འདི་དང་གཞན་དུ་མདོག་ཤིན་ཏུ་མི་བཟད་པར་འགྱུར་ལ། དེ་བཞིན་དུ་ཞེ་སྡང་གིས་ཟིལ་གྱིས་ནོན་པ་དང་། གཏི་མུག་གིས་ཟིལ་གྱིས་ནོན་པ་ཡང་དེ་དང་འདྲའོ། །ཆགས་པའི་གཉེན་པོ་འདོད་ཆགས་དང་བྲལ་བ་ནི་མ་ཆགས་པའོ། །
ཞེ་སྡང་གི་གཉེན་པོ་བྱམས་པ་ནི་ཞེ་སྡང་མེད་པའོ། །གཏི་མུག་གི་གཉེན་པོ་ཤེས་པ་ནི་གཏི་མུག་མེད་པ་སྟེ། ངོ་བོ་ཉིད་ཀྱི་དགེ་བ་འདི་དག་དང་། དེ་དག་གིས་བཅུག་པའི་ལས་ནི་འདི་དང་གཞན་དུ་ལུས་དང་སེམས་ཀྱི་རྒྱུད་བཟང་པོར་བྱེད་པས་ན་དགེ་བ་ཡིན་ནོ། །དེ་ཞེས་བྱ་

172-1-135a

བའི་སྒྲ་ནི་མ་ཆགས་པ་ལ་སོགས་པ་དང་ལས་ལ་སྙེགས་སོ། །མི་དགེ་བ་ལས་ཞེས་བྱ་བ་ལ་སོགས་པས་ནི་དེ་གཉིས་ཀྱི་འབྲས་བུ་སྟོན་ཏེ། སྡུག་བསྔལ་ནི་རྡེག་པ་ལ་སོགས་པའི་ཚོར་བའོ། ཀུན་ནི་འདི་དང་འཇིག་རྟེན་ཕ་རོལ་དུ་འབྱུང་བ་རྣམས་སོ། །ངན་
འགྲོ་ནི་དམྱལ་བ་ལ་སོགས་པའི་འགྲོ་བ་དག་གོ། །བདེ་འགྲོ་ནི་ལྷ་ལ་སོགས་པའི་འགྲོ་བ་དག་གོ། །འཛམ་བུའི་གླིང་ལ་སོགས་པའི་བྱེ་བྲག་གམ། ཡང་དང་ཡང་དུ་སྐྱེ་བའི་བྱེ་བྲག་གིས་སྐྱེ་བ་ཀུན་དུ་བདེ་བ་དག་ཅེས་མང་པོའི་ཚིག་སྨོས་སོ། །དེ་ལྟར་བསམས་ནས་ཅི་ཞིག་བྱ་
ཞེ་ན་མི་དགེ་ཀུན་ལས་ཞེས་བྱ་བ་ལ་སོགས་པ་སྨོས་ཏེ། ཀུན་ལས་ཞེས་བྱ་བ་ནི་སྨོས་པ་དང་མ་སྨོས་པ་མཆོད་རྟེན་འཇིག་པ་དང་། དམ་པའི་ཆོས། དགེ་འདུན་དང་། ཕ་མ་དང་། སློབ་དཔོན་དང་། བླ་མ་དང་། མཆོད་གནས་དང་། རིགས་ཀྱི་ནང་ན་རྒན་རབས་སྤོང་བ་ལ་
སོགས་པའི་མཚན་ཉིད་ལས་སོ། །ལྡོག་བྱ་ཞེས་བྱ་བ་ནི་ཕྱིར་ལྡོག་པའོ། །ལྡོག་པ་དང་འཇུག་པའི་བྱེ་བྲག་གིས་འདི་ནི་རྣམ་པ་གཉིས་སོ། །དེ་ལྟ་ཡིན་ན་ཕན་ཡོན་ཅི་ཞིག་ཡོད་ཅེ་ན། དེ་སྟོན་པར་མཛད་དེ། བདེ་བ་ནི་ཚིམ་པར་བྱེད་པའི་ཚོར་བའོ། །དེ་ཕུལ་དུ་དབྱུང་བ་ནི་བདེ་དཔལ་ལོ། །ཡང་
ན་དཔལ་ཞེས་བྱ་བའི་སྒྲ་ནི་ཕུན་སུམ་ཚོགས་པའི་རྣམ་གྲངས་སོ། །དེ་ལས་མ་གཏོགས་པ་གཞན་ནི་བདེ་བའོ། །རྒྱལ་སྲིད་ནི་དབང་ཕྱུག་གི་ཁྱད་པར་ཏེ་བདག་པོ་ཉིད་དོ། །རྒྱས་པ་ཞེས་བྱ་བའི་སྒྲ་ནི་ཐམས་ཅད་ལ་བརྗོད་པར་བྱའོ། །བསམ་གཏན་ནི་སེམས་རྩེ་གཅིག་པའི་མཚན་ཉིད་དོ། །
དེ་ཡང་རྣམ་པ་བཞི་སྟེ། རྟོག་པ་དང་བཅས་ཤིང་དཔྱོད་པ་དང་བཅས་པ་དང་། རྟོག་པ་མེད་ཅིང་དཔྱོད་པ་ཡང་མེད་པ་དང་། དེ་ཉིད་དགའ་བ་མེད་པའི་བདེ་བ་ཅན་དང་། བཞི་པ་སྡུག་བསྔལ་ཡང་མེད་བདེ་བ་ཡང་མེད་པ་བཏང་སྙོམས་དང་དྲན་པ་ཡོངས་སུ་དག་པའི་ཡིད་བདེ་བ་དང་ཡིད་
མི་བདེ་བ་དང་བྲལ་བའོ། །ཚད་མེད་པ་ནི་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཀྱི་མཚན་ཉིད་དེ། སེམས་ཅན་ཚད་མེད་པ་ལ་དམིགས་པའི་ཕྱིར་རོ། །གཟུགས་མེད་པ་ནི་ནམ་མཁའ་མཐའ་ཡས་སྐྱེ་མཆེད་ལ་སོགས་པ་སྙོམས་པར་འཇུག་པ་བཞི་སྟེ། སེམས་མཉམ་པ་ཉིད་དུ་བསྒྲུབ་

172-1-135b

པའི་ཕྱིར་རམ། འབྱུང་བ་ཆེན་པོ་མཉམ་པ་ཉིད་དུ་བསྒྲུབ་པའི་ཕྱིར་རོ། །ནི་ཞེས་བྱ་བའི་སྒྲ་ནི་དེ་ཁོ་ན་ཞེས་བྱ་བ་ངེས་པར་བཟུང་བ་ཡིན་ནོ། །ཚངས་སོགས་བདེ་བ་ཞེས་བྱ་བ་ནི་གང་ལ་ཚངས་པའི་བདེ་བ་དང་པོ་ན་ཡོད་པའི་བདེ་བའོ། །མྱོང་བར་བྱེད་པ་ནི་ཉམས་སུ་མྱོང་བར་བྱེད་པའོ། །
དེ་ལྟར་ན་མངོན་པར་མཐོ་བའི་རྒྱུ་དང་། མངོན་པར་མཐོ་བ་དེའི་འབྲས་བུ་མདོར་བསྡུས་ཏེ་བཤད་པ་ཡིན་ནོ་ཞེས་བྱ་བའི་ཐ་ཚིག་གོ། །དང་པོར་མངོན་པར་མཐོ་བའི་ཆོས། །ཕྱིས་ནི་ངེས་པར་ལེགས་འབྱུང་བ། །ཞེས་བཤད་པ་དེ་ལ་མངོན་པར་མཐོ་བའི་ཆོས་ནི་བཤད་ཟིན་ཏོ། །
དེའི་འོག་ཏུ་ངེས་པར་ལེགས་པའི་ཆོས་བཤད་པར་བཞེད་ནས། ངེས་པར་ལེགས་པའི་ཆོས་དག་ཀྱང་། །ཞེས་བྱ་བ་ལ་སོགས་པ་སྨོས་སོ། །འདི་ལས་ངེས་པར་ལེགས་ཤིང་དགེ་བ་ཐར་པ་འགྲུབ་པས་ན་ངེས་པར་ལེགས་པ་སྟེ། དེ་ཉིད་ངེས་པར་ལེགས་པ་ཡིན་ནོ། །ཀྱང་
ཞེས་བྱ་བའི་སྒྲ་ནི་ནི་ཞེས་བྱ་བའི་སྒྲའི་དོན་ཡིན་ནོ། །ཕྲ་ཞེས་བྱ་བ་ནི་ཕྲ་བ་སྟེ་རྣམ་པར་ཤེས་པར་དཀའ་བ་ཡིན་ནོ། །ཟབ་པ་ནི་གཏིང་དཔག་དཀའ་བའོ། །སྣང་བ་ནི་མཐོང་བ་སྟེ་ཡེ་ཤེས་ཟབ་མོས་མཐོང་བ་ལ་དེ་སྐད་ཅེས་བྱའོ། །ཡང་ན་སྣང་བ་ནི་དམིགས་པ་སྟེ། གང་ལ་ཟབ་
པར་སྣང་བ་ཡོད་པ་དེ་ལ་དེ་སྐད་ཅེས་བྱའོ། །བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་རྣམས་ཏེ། ཐོས་པ་ནི་འདིར་ཆོས་རྣམ་པ་གསུམ་ཐོས་པ་ཡིན་པར་བརྗོད་དོ། །སྐྲག་པ་ནི་འཇིག་པའོ། །གང་དག་གིས་བདུད་བཞི་ལས་རྒྱལ་བའམ་སྡིག་པ་ཐམས་ཅད་ལས་རྒྱལ་བ་དེ་དག་ནི་
རྒྱལ་བའོ། །ཡོད་ཅེས་བྱ་བའི་སྒྲ་ནི་ཚིག་གི་ཕྲད་ཡིན་ཏེ། ཇི་ལྟར་ཀུན་རྒྱལ་ཟེར་བ་བཞིན། །བདག་ལ་བུ་ནི་ཡེ་ཡོད་མིན། །ཞེས་བྱ་བ་ལྟ་བུའོ། །འཇིག་རྟེན་འདིར་ནི་བདག་ཡོད་པ་མ་ཡིན་ལ། འཇིག་རྟེན་ཕ་རོལ་དུ་ནི་ཡོད་པར་མི་འགྱུར་རོ་སྙམ་པ་སྟེ། འདི་ནི་ངའོ་སྙམ་དུ་འཛིན་
པའི་དབང་གིས་བཤད་པ་ཡིན་ནོ། །ང་ཡིར་འཛིན་པས་ནི་འདི་ན་བདག་གི་ནོར་ལ་སོགས་པ་ཡོད་པ་མ་ཡིན་ལ། ཚེ་རབས་གཞན་དུ་ཡོད་པར་མི་འགྱུར་རོ་སྙམ་པ་སྟེ། དེ་ལྟར་རྣམ་པར་རྟོག་པའི་བྱིས་པ་བླུན་པོ་ནི་སྐྲག་པར་འགྱུར་རོ། །མཁས་པ་ཤེས་རབ་ཅན་ནི་ཆོས་

172-1-136a

དེ་ལྟ་བུ་ཐོས་པས་དེ་ཐམས་ཅད་ནི་ཡང་དག་པ་མ་ཡིན་ཞེས་མངོན་པར་ཞེན་པ་ལས་བྱུང་བའི་སྐྲག་པ་གང་ཡིན་པ་དེ་ཟད་ཅིང་འཇིག་པར་འགྱུར་ཏེ། དེ་མི་འབྱུང་ངོ་ཞེས་བྱ་བའི་ཐ་ཚིག་གོ། །ངར་འཛིན་པ་དང་ང་ཡིར་འཛིན་པ་དག་ནི་འཁོར་བར་འཇུག་པའི་རྒྱུ་ཡིན་ནོ། །ཇི་སྲིད་དུ་འཁོར་
བ་དེ་སྲིད་དུ་སྡུག་བསྔལ་བ་ཡིན་ནོ། །དེ་རབ་ཏུ་ཞི་བའི་རྒྱུ་ནི་ཆོས་འདི་ཡིན་ནོ་ཞེས་བྱ་བར་བསམས་ནས་སྐྲག་པ་ཟད་པར་འགྱུར་རོ། །དེ་ལྟར་ཡང་ཅི་མངོན་ཞེ་ན། ལུང་ཉེ་བར་འགོད་པར། སྐྱེ་དགུ་འདི་ནི་མ་ལུས་པ། །ངར་འཛིན་པ་ལས་ཞེས་བྱ་བ་ལ་སོགས་པ་སྨོས་སོ། །སྐྱེ་དགུ་འདི་ཞེས་བྱ་
བར་སྦྱར་ཏེ་འགྲོ་བ་ལྔར་ཡང་དང་ཡང་དུ་སྐྱེ་བས་ན་སྐྱེ་དགུའོ། །མ་ལུས་པ་ནི་མཐའ་དག་གོ། །ངའོ་སྙམ་དུ་འཛིན་པས་ན་ངར་འཛིན་པ་སྟེ་བདག་ཏུ་ལྟ་བའོ། །དེ་ལས་བྱུང་བ་ནི་སྐྱེས་པའོ། །འདི་ནི་ངའི་འོ་སྙམ་དུ་འཛིན་པས་ན་ང་ཡིར་འཛིན་པའོ། །དེ་དང་ལྡན་པ་ནི་ཉེ་བར་འབྲེལ་པ་སྟེ། ཡང་
དག་པར་ལྡན་པ་ཞེས་བྱ་བའི་དོན་ཏོ། །སྐྱེ་དགུའི་དེ་ཉིད་ལ་ཕན་པ་ལ་དེ་སྐད་ཅེས་བྱའོ། །འདི་ལ་དེ་གཅིག་ཏུ་ངེས་པར་གསུང་བའི་ངང་ཚུལ་ཡོད་པས་ན་དེ་གསུང་བའོ། །ཡང་ན་གསུང་བ་ནི་བཀའ་སྩལ་པ་སྟེ། གཅིག་ཏུ་གསུང་བ་ལ་དེ་སྐད་ཅེས་བྱའོ། །དེ་འདི་ལ་ཡོད་པས་ན་གཅིག་ཏུ་གསུང་
བའོ། །སྐྱེ་དགུ་ལ་ཕན་པ་ཁོ་ན་བྱའོ་ཞེས་གཅིག་ཏུ་གསུང་བ་དེས་གསུང་ཞིང་བཀའ་སྩལ་ཏོ། །ཡང་ཇི་ལྟར་ངར་འཛིན་པ་དང་ང་ཡིར་འཛིན་པ་དག་མི་བདེན་པ་ཡིན་ཞེ་ན། དེ་དག་མི་བདེན་པ་ཉིད་དུ་བསྟན་པའི་ཕྱིར། བདག་ཡོད་ཅེས་བྱ་བ་ལ་སོགས་པ་སྨོས་སོ། །ཡོད་ཅེས་བྱ་བའི་སྒྲ་
ནི་སྔ་མ་བཞིན་ནོ། །འདི་ནི་ཞེས་བྱ་བ་ནི་བཤད་མ་ཐག་པའོ། །དམ་པའི་དོན་དུ་ཞེས་བྱ་བ་ནི་དོན་དམ་པ་ལ་བརྟེན་ནས་ཞེས་བྱ་བ་སྟེ་གོང་མ་བཞིན་དུ་ལྔ་པ་ཡིན་ནོ། །ཐ་སྙད་དུ་ནི་མ་ཡིན་ནོ། །དོན་དམ་པ་ཡང་གང་ཞིག་ཡིན་ཞེ་ན། མུ་བཞི་དང་བྲལ་བའི་དོན་ཡིན་ནོ། །དེ་ལ་འཇུག་པའི་
ཐབས་སྐྱེ་བ་མེད་པའི་དོན་ཅན་ཡང་དོན་དམ་པ་ཡིན་ནོ། །ལོག་ཅེས་བྱ་བ་ནི་བརྫུན་པ་སྟེ་མི་བདེན་པ་ཞེས་བྱ་བའི་ཐ་ཚིག་གོ། །འདི་གཉི་ག་ཡང་ལོག་པ་ཡིན་ནོ་ཞེས་བྱ་བར་ཅིས་མངོན་ཞེ་ན། གང་ཕྱིར་ཡང་དག་ཇི་ལྟ་བ། །ཞེས་བྱ་བ་ལ་སོགས་པ་སྨོས་ཏེ། ཡང་དག་པ་ཇི་ལྟ་བ་ནི་བདེན་

172-1-136b

པའོ། །འདི་སྐད་དུ་བཤད་པ་ཡིན་ཏེ། གལ་ཏེ་འདི་གཉི་ག་བདེན་པ་ཞིག་ཏུ་གྱུར་ན་བདེན་པ་མཐོང་བའི་དུས་ན་ཡང་འདི་གཉིས་ཡོད་པར་འགྱུར་བ་ཞིག་ན་ཡོད་པ་ཡང་མ་ཡིན་ནོ། །དེ་ལྟ་བས་ན་འདི་དག་ནི་ལོག་པའོ་ཞེས་བྱ་བ་ཡིན་ནོ། །དེ་ལྟར་འཁོར་བའི་རྒྱུར་གྱུར་པ་འདི་དག་བདེན་
པ་མ་ཡིན་པ་ཉིད་དུ་བསྟན་ནས། ད་ནི་ངར་འཛིན་ལས་ཞེས་བྱ་བ་ལ་སོགས་པས་དེ་ལས་བྱུང་བའི་ཕུང་པོ་རྣམས་མི་བདེན་པ་ཉིད་དུ་སྟོན་ཏེ། གང་དག་ལ་ངར་འཛིན་པ་ལས་སྐྱེ་ཞིང་འབྱུང་བ་ཡོད་པ་དེ་དག་ལ་དེ་སྐད་ཅེས་བྱའོ། །ཕུང་པོ་ནི་ལྔ་སྟེ། གཟུགས་དང་། ཚོར་བ་དང་། འདུ་ཤེས་དང་། འདུ་
བྱེད་དང་། རྣམ་པར་ཤེས་པ་ཞེས་བྱ་བ་དག་གོ། །དོན་དུ་ཞེས་བྱ་བ་ནི་སྔར་བཤད་པའི་ཚུལ་གྱིས་དོན་དམ་པར་རོ། །བརྫུན་པ་ནི་མི་བདེན་པར་རོ། །ས་བོན་ནི་རྒྱུའོ། །སྐྱེ་བ་ནི་འབྱུང་བའོ། །ག་ལ་ཞིག་ཅེས་བྱ་བ་ནི་གོང་དུ་བཤད་པའི་ཚུལ་གྱིས་ན་མེད་པ་ཁོ་ན་ཡིན་ནོ། །ཕུང་པོ་རྣམས་ནི་
དེའི་ཡུལ་ཡིན་པས་དེ་རྣམས་མེད་པའི་ཕྱིར་དེ་ཡང་སྤོང་བར་འགྱུར་ཏེ། དེས་ན་རྒྱུ་མེད་པའི་ཕྱིར་ཕྱིས་འབྲས་བུ་མི་འབྱུང་ངོ་ཞེས་བྱ་བའི་དོན་ཏོ། །འདི་སྐད་དུ་བཤད་པ་ཡིན་ཏེ། སྔོན་ནི་ང་ཡིར་འཛིན་པས་བསྐྱེད་པའི་ཕུང་པོ་རྣམས་ལ་བརྟེན་ནས་ཡང་ངར་འཛིན་པ་སྐྱེ་བར་འགྱུར་གྱི། དེ་མེད་
པའི་ཕྱིར་དེ་རྣམས་ཡང་སྐྱེ་བར་འགྱུར་རོ་ཞེས་བྱ་བ་ཡིན་ནོ། །དོན་འདི་ནི་ཚད་མས་གྲུབ་པ་ཡིན་པར་བསྟན་པའི་ཕྱིར། ཇི་ལྟར་ཞེས་བྱ་བ་ལ་སོགས་པ་སྨོས་སོ། །མོད་ཀྱི་ཞེས་བྱ་བ་ནི་སྲིད་པའོ། །འདི་སྐད་དུ་བཤད་པ་ཡིན་ཏེ། གང་ཞིག་རྟེན་ཅིང་འབྲེལ་པར་འབྱུང་བ་དེ་ནི་དོན་དམ་པར་
ན་བརྫུན་ཏེ། རྟེན་ཅིང་འབྲེལ་པར་འབྱུང་བའི་ཕྱིར་གཟུགས་བརྙན་བཞིན་ནོ། །གང་བདེན་པ་དེ་ནི་རྟེན་ཅིང་འབྲེལ་པར་འབྱུང་བ་མ་ཡིན་ཏེ། དཔེར་ན་འཕགས་པ་རྣམས་ཀྱི་སྤྱོད་ཡུལ་དེ་བཞིན་ཉིད་ལྟ་བུའོ། །ཆོས་ཐམས་ཅད་བདག་མེད་པ་ཙམ་ཞིག་བརྗོད་པར་འདོད་པའི་ཕྱིར་དཔེ་
བསྒྲུབ་བྱས་སྟོང་པ་མ་ཡིན་ནོ། །ཇི་ལྟར་གཟུགས་བརྙན་བརྫུན་པ་ལྟར་ངར་འཛིན་པ་ཡང་དེའདྲའོ་ཞེས་མཇུག་ཐོགས་ཀྱི་ཚིགས་སུ་བཅད་པས་སྟོན་ཏོ། །དེ་ལྟ་བུའི་ཞེས་བྱ་བ་ལ་སོགས་པ་ལ། དེ་ལྟ་བུའི་ནི་བཤད་མ་ཐག་པ་ལྟ་བུ་སྟེ། དོན་ནི་དོན་མ་ཡིན་པ་ཡོངས་སུ་སྤང་བའི་

172-1-137a

ཕྱིར་རོ། །ཆོས་རྣམས་ལ་མིག་ནི་བདེན་པ་མཐོང་བའོ། །བཟླས་ཏེ་ཡང་དང་ཡང་དུ་སྨྲས་སོ། །ཇི་སྲིད་ཕུང་པོར་འཛིན་ཡོད་པ། །ཞེས་བྱ་བ་ལ་སོགས་པས་ནི་དེ་སྟོན་པར་བྱེད་དེ། ཆུ་སྲིན་འཛིན་ཁྲི་དང་འདྲ་བར་འཛིན་ཅིང་མངོན་པར་ཞེན་པ་སྟེ་ཕུང་པོའི་རྒྱུ་ཡིན་པའི་ཕྱིར་རོ། །ཕུང་
པོར་འཛིན་པ་དེ་ལས་ངར་འཛིན་པའོ། །ངར་འཛིན་པ་ཡོད་ན་ལས་སོ། །དེ་ལས་ནི་སྐྱེ་བ་སྟེ་ངར་འཛིན་པ་དང་། ལས་སྐྱེ་བའི་མཚན་ཉིད་རྣམ་པ་དེ་གསུམ་མོ། །དེ་ཉིད་རྒྱུན་ཆགས་སུ་འཇུག་པའི་ཕྱིར་ལམ་ཡིན་ཏེ། འདི་ལ་ལམ་རྣམ་པ་གསུམ་ཡོད་པས་ན་ལམ་གསུམ་མོ། །གང་ལ་
ཐོག་མ་དང་ཐ་མ་དང་དབུས་མེད་པ་ཡོད་པ་དེ་ལ་དེ་སྐད་ཅེས་བྱའོ། །ཐོག་མ་དང་ཐ་མ་དང་དབུས་ཞེས་བྱ་བ་འདི་ཅི་ཡིན་ཞེ་ན། གཞན་ཡོད་ལ་གང་ལས་སྔ་མ་མེད་པ་དེ་ནི་ཐོག་མའོ། །གཞན་ཡོད་ལ་གང་ལས་གཞན་མེད་པ་དེ་ནི་ཕྱི་མའི་མཐའོ། །དེ་གཉིས་ཀྱི་བར་ནི་དབུས་སོ། །འཁོར་
བ་ཉིད་དཀྱིལ་འཁོར་ཡིན་པས་ན་འཁོར་བའི་དཀྱིལ་འཁོར་རོ། །འདི་དཀྱིལ་འཁོར་དང་ཆོས་མཐུན་པ་ཉིད་གང་ཞིག་ཡིན་ཞེ་ན། ཀུན་ནས་འཁོར་བའོ། །མགལ་མེ་ནི་ཤིང་ཕྱེད་ཚིག་པའོ། །དེ་དང་འདྲ་བས་ན་དེ་ལྟ་བུ་སྟེ་དེ་དང་མཚུངས་སོ། །འདི་སྐད་དུ་བཤད་པ་ཡིན་ཏེ། ཇི་ལྟར་
མགལ་མེ་བསྐོར་བ་མེད་བཞིན་དུ་འཁྲུལ་པས་ཀོར་ཀོར་པོར་དམིགས་པ་དེ་བཞིན་དུ། འཁོར་བའི་དཀྱིལ་འཁོར་འདི་ཡང་མེད་བཞིན་ཤེས་རབ་ཀྱི་མིག་ཟུམ་པ་དང་། ལྟ་བ་ངན་པར་ལྷུང་བས་དམིགས་སོ་ཞེས་བྱ་བ་ཡིན་ནོ། །འདི་ནས་ཞེས་བྱ་བ་ནི་འཁོར་བའི་དཀྱིལ་
འཁོར་ཏེ། ཕུང་པོ་ལ་བརྟེན་ནས་ངར་འཛིན་པ་དེ་ལ་བརྟེན་ནས་ཕུང་པོ་ཞེས་བྱ་བ་ཕན་ཚུན་གྱི་རྒྱུ་ཅན་འགྲོ་བ་ལྔར་འཁོར་བར་འགྱུར་རོ། །འཁོར་བའི་དཀྱིལ་འཁོར་འདི་ཇི་ལྟར་མགལ་མེའི་དཀྱིལ་འཁོར་ལྟ་བུ་ཡིན་ཞེ་ན། དེ་ནི་རང་གཞན་ཞེས་བྱ་བ་ལ་སོགས་པ་ཚིགས་སུ་
བཅད་པ་འོག་མས་སྟོན་ཏོ། །རང་ལས་སྐྱེ་བ་མེད་པའི་ཕྱིར་རང་ལས་མ་ཐོབ་པ་སྟེ། སྔ་ན་མེད་པ་དངོས་པོ་མེད་པའི་ཕྱིར་དང་། རང་གི་བདག་ཉིད་ལ་བྱེད་པ་འགལ་བའི་ཕྱིར་རོ། །གཞན་ལས་ཀྱང་མ་ཡིན་ཏེ་དེ་ནི་རྒྱུ་མ་ཡིན་པའི་ཕྱིར་རོ། །ཇི་ལྟར་རྒྱུ་མ་ཡིན་ཞེ་ན། འདི་ལྟར་རྒྱུ་

172-1-137b

ཉིད་ནི་འབྲས་བུ་ལ་ལྟོས་པ་ཡིན་པས་ཇི་སྲིད་དུ་འབྲས་བུ་མ་བྱུང་བ་དེ་སྲིད་དུ་ནི་རྒྱུ་མ་ཡིན་ནོ། །གང་གི་ཚེ་རྒྱུ་མ་ཡིན་པ་དེའི་ཚེ་ནི་འབྲས་བུ་ཡང་མི་སྐྱེད་པ་སྔ་མ་ཁོ་ན་བཞིན་ནོ། །གཉི་ག་ལས་ཀྱང་མ་ཡིན་ཏེ་ཕྱོགས་གཉི་ག་ལ་བཤད་པའི་ཉེས་པར་ཐལ་བའི་ཕྱིར་རོ། །དང་ཞེས་བྱ་བའི་
སྒྲ་ནི་བསྡུ་བའོ། །དུས་གསུམ་པོ་ཉིད་དུས་གསུམ་ཉིད་དོ། །འང་ཞེས་བྱ་བ་ནི་མ་ཐོབ་པ་སྲིད་དོ་ཞེས་སྲིད་པ་ཡིན་ནོ། །ཇི་ལྟར་དུས་གསུམ་ཉིད་དུ་མ་ཐོབ་ཅེ་ན། འདི་ལྟར་འདས་པས་ནི་མི་བསྐྱེད་དེ། དེ་ཉིད་ཀྱི་ཕྱིར་ས་བོན་རུལ་བ་བཞིན་ནོ། །མ་འོངས་པས་ཀྱང་མི་སྐྱེད་དེ། དེ་ཉིད་ཀྱི་ཕྱིར་
མོ་གཤམ་གྱི་བུ་བཞིན་ནོ། །ད་ལྟར་གྱིས་ཀྱང་མི་སྐྱེད་དེ། སྐད་ཅིག་མ་བཞིན་དུ་མི་གནས་པའི་ཕྱིར་རོ། །དེ་ཉིད་དུས་མཉམ་པ་ཉིད་ཡིན་ན་བསྐྱེད་པར་བྱ་བ་དང་སྐྱེད་པར་བྱེད་པའི་ངེས་པ་མི་རུང་བའི་ཕྱིར་རོ། །སྲང་མདའི་མཐོན་དམན་བཞིན་ཞེས་བྱ་བ་ཡང་རྒྱུ་སྔ་བར་འགྱུར་རོ། །ཕྲ་བའི་ཕྱིར་
དུས་མི་རྟོགས་པར་ཟད་དོ། །དེ་ལྟར་བརྟགས་ན་ངར་འཛིན་པ་ནི་ཟད་པར་འགྱུར། དེ་ཟད་པ་ལས་སོ། །དེ་ནས་སྐྱེ་བའོ། །དེ་ལྟར་བཤད་མ་ཐག་པའི་རིགས་པས་བརྟགས་ན་རྒྱུ་ནི་ངར་འཛིན་པའི་མཚན་ཉིད་ཀྱི་གཏི་མུག་གོ། །གཏི་མུག་ནི་ཕྱིན་ཅི་ལོག་གི་ཤེས་པའོ། །ཕྱིན་ཅི་ལོག་
གི་ཤེས་པ་ཡང་ངར་འཛིན་པའི་རྣམ་པ་ཅན་ནོ། །དེ་ཡི་སྟོབས་ཀྱིས་ནི་ཡང་སྲིད་པ་ལ་སྲེད་པ་དང་བཅས་པའི་ལས་འཁོར་བ་དང་མཐུན་པའོ། །དེ་ལས་ནི་ཕུང་པོ་ལྔ་འབྱུང་བའི་མཚན་ཉིད་ཀྱི་སྐྱེ་བའོ། །རྒྱུ་དང་འབྲས་བུ་ནི་རྒྱུ་དང་འབྲས་བུ་དག་སྟེ་དེ་དག་གི་སྐྱེ་བའོ། །འཇིག་པས་ན་འཇིག་
རྟེན་ཏེ་དེ་ལའོ། །སྡུག་བསྔལ་ཐམས་ཅད་ཟད་པའི་ཞེས་བྱ་བ་ལ་སོགས་པས་ནི་ཕན་ཡོན་སྟོན་ཏེ། འདིས་འཇིགས་པ་མེད་པས་ན་མི་འཇིགས་པ་སྟེ་མྱ་ངན་ལས་འདས་པ་དངོས་པོ་མེད་པ་མར་མེ་ཤི་བ་ལྟ་བུའོ། །ཕུང་པོ་མེད་པའི་མྱ་ངན་ལས་འདས་པ་དེ་ལའོ། །འདིར་ཞེས་བྱ་བ་ནི་ད་
ལྟར་རོ། །དེ་ཞེས་བྱ་བ་ནི་རྒྱུ་དང་འབྲས་བུའི་ངོ་བོའི་འཁོར་བའོ། །ཁྱོད་ཅེས་བྱ་བ་ནི་ཁྱོད་དེ། ཅི་སྟེ་ཅིའི་ཕྱིར་འཇིགས་པར་བྱེད་ཅེས་བྱ་བ་ཡིན་ནོ། །གང་ཞིག་དེ་ལྟ་བུ་མི་འདོད་པ་དེའི་ཕྱིར་བསམ་པ་མ་ཡིན་གྱི། གང་ཞིག་འདོད་པ་དེ་ལ་བྱ་བ་ཡིན་ནོ། །གལ་ཏེ་ཞེས་བྱ་བ་ནི་ཅི་སྟེ་ཞེས་

172-1-138a

བྱ་བའི་དོན་ཏོ། །བསལ་བ་ནི་མེད་པའོ། །འདིར་ཞེས་བྱ་བ་ནི་དུས་འདི་ཉིད་དོ། །གལ་ཏེ་དམིགས་པ་ཅན་ལ་ལ་ནི་འདི་སྙམ་དུ་མྱ་ངན་ལས་འདས་པ་དངོས་པོ་ཡོད་པའོ་སྙམ་དུ་སེམས་ན། དེ་དགག་པའི་ཕྱིར། མྱ་ངན་འདས་པ་དངོས་མེད་པའང་། །ཞེས་བྱ་བ་ལ་སོགས་
པ་སྨོས་སོ། །འང་ཞེས་བྱ་བའི་སྒྲ་ནི་སྔ་མ་བཞིན་ཏེ། དངོས་པོ་ཡིན་པར་མི་སྲིད་པ་འབའ་ཞིག་ཏུ་མ་ཟད་ཀྱི་འོ་ན་ཅི་ཞེ་ན། དངོས་པོ་མེད་པ་ཡང་ངོ་། །འོ་ན་མྱ་ངན་ལས་འདས་པའི་མཚན་ཉིད་ཇི་ལྟ་བུ་ཡིན་ཞེས་བྱ་བ་ནི་བཤད་པའི་ལྷག་མ་ཡིན་ནོ། །འཛིན་པ་ནི་རེག་པ་སྟེ་དེ་དག་གིས་མ་རེག་
ཅིང་ཡུལ་དུ་མ་བྱས་པའོ། །དེ་ཟད་པ་ནི་འགོག་པ་སྟེ། སོ་སོར་མ་བརྟགས་པའི་འགོག་པའི་མཚན་ཉིད་ཡིན་ནོ། །གལ་ཏེ་རྣམ་པ་ཐམས་ཅད་དུ་ཡོད་པ་མ་ཡིན་ནོ་ཞེས་སྨྲ་ན་མེད་པར་ལྟ་བ་ལ་བརྟེན་པར་འགྱུར་རོ་ཞེ་ན། དེའི་མཚན་ཉིད་ནི་མ་ཡིན་ནོ། །དེའི་མཚན་ཉིད་ནི་ཇི་ལྟ་བུ་ཡིན་ཞེ་ན།
མཇུག་ཐོགས་ཀྱི་ཚིགས་སུ་བཅད་པས་དེ་སྟོན་ཏེ། མདོར་བསྡུ་ན་མཚན་ཉིད་འདི་ཡིན་ནོ། །རྒྱས་པར་བྱ་ན་ནི་བདེ་བ་དང་། དཀོན་མཆོག་དང་། ལས་དང་འབྲས་བུ་འབྲེལ་པ་དང་། ཏིང་ངེ་འཛིན་དང་བསམ་གཏན་ལ་སོགས་པ་མེད་དོ་ཞེས་ལྟ་བ་ནི་མེད་པར་ལྟ་བ་སྟེ། འབྲས་བུ་ནི་མི་འདོད་
པ་ཡིན་པས་དེའི་ཕྱིར་ཡོངས་སུ་སྤང་བར་བྱ་བ་ཡིན་ནོ། །བསོད་ནམས་མ་ཡིན་ཞེས་བྱ་བ་ལ་སོགས་པས་དེའི་འབྲས་བུ་སྟོན་ཏེ། ངན་སོང་རྣམས་ལས་སྲུང་ཞིང་སྐྱོབ་པས་ན་བསོད་ནམས་སོ། །དེ་ལྟ་བུ་མ་ཡིན་པས་ན་བསོད་ནམས་མ་ཡིན་པའོ། །རང་གི་ངོ་བོ་ངན་སོང་གི་རྒྱུ་མཚན་ཡིན་
པས་ན་ངན་སོང་བའོ། །ཡང་ན་ངན་སོང་དུ་འབྱུང་བ་ཡིན་པས་ན་ངན་སོང་བའོ། །ལོག་པར་ལྟ་བ་ནི་ཕྱིན་ཅི་ལོག་གི་ཤེས་པའོ། །གང་ལ་ཤེས་པ་ཡོད་པ་དེ་ན་གཟུགས་ཅན་མ་ཡིན་པའི་ཕུང་པོ་བཞི་ཡང་ཡོད་ལ། དེ་ལ་རྟེན་གཟུགས་ཀྱི་ཕུང་པོ་ཡང་གདོན་མི་ཟ་བར་ཡོད་དོ། །སེམས་ཅན་
ནི་དེ་ཙམ་དུ་ཟད་པས་དེའི་འབྲས་བུ་ངན་སོང་གི་འགྲོ་བ་དེ་ཡིན་ནོ་ཞེས་བྱ་བར་ཤེས་པར་བྱས་ནས་དེ་ལ་སྲིད་པ་ཞེས་བྱའོ། །མྱ་ངན་ལས་འདས་པ་དངོས་པོ་དང་དངོས་པོ་མེད་པར་ཡང་མེད་དོ་ཞེས་དེ་སྐད་དུ་སྨྲ་བས་ཡང་དག་པའི་ལྟ་བ་བསལ་ནས་མེད་པར་ལྟ་བ་ལ་བརྟེན་པའི་ཕྱིར་ལོག་པར་ལྟ་

172-1-138b

བ་ཁོ་ན་ལ་ཡང་དག་པར་བརྟེན་པར་འགྱུར་རོ་ཞེས་དེ་དགག་པའི་ཕྱིར་མེད་པ་དང་། ཡོད་པ་དང་མྱ་ངན་ལས་འདས་པ་གསུམ་ཆར་གྱི་མཚན་ཉིད་མདོར་བསྟན་པ་ཡིན་ཏེ། འདི་ལས་བདེ་འགྲོ་རྒྱུ་མཐུན་པར་འགྱུར་ཞིང་འབྱུང་བར་འགྱུར་བས་འབྲས་བུ་བདེ་འགྲོ་ཅན་ཡིན་ནོ་ཞེས་བྱ་བའི་ཐ་ཚིག་གོ། །
ཡང་དག་པ་ཕྱིན་ཅི་མ་ལོག་པའི་ལྟ་བ་ནི་བློ་གྲོས་དང་འདོད་པ་ཡིན་ཏེ། དེ་ཡང་ཁོ་བོ་ཅག་ལ་ཐ་སྙད་དུ་ཡོད་ན་ཇི་ལྟར་དེ་བསལ་བ་ཡིན། མྱ་ངན་ལས་འདས་པ་ཡང་ཐར་པ་འཆིང་བ་དང་བྲལ་བ་ཡིན་ལ། དེ་ཡང་དོན་འགའ་ཡང་མ་ཡིན་ན་དེ་བཞིན་དུ་བརྗོད་པ་ལ་ཉེས་པ་ཅི་ཞིག་ཡོད། མྱ་ངན་
འདས་པ་ནི་རྣམ་པ་གཉིས་ཏེ། ཕུང་པོའི་ལྷག་མ་དང་བཅས་པ་དང་ཅིག་ཤོས་སོ། །རེ་ཞིག་ཕུང་པོའི་ལྷག་མ་མེད་པ་གང་ཡིན་པ་དེ་ལ་ནི་དངོས་པོ་ལ་སོགས་པའི་རྣམ་པར་རྟོག་པ་ཤིན་ཏུ་མི་སྲིད་དོ། །ཕུང་པོའི་ལྷག་མ་དང་བཅས་པ་ལ་ཡང་མེད་དོ་ཞེས་བསྟན་པའི་ཕྱིར། ཤེས་པས་མེད་དང་ཡོད་ཞིའི་
ཕྱིར། །ཞེས་བྱ་བ་ལ་སོགས་པ་སྨོས་སོ། །ཤེས་པ་ནི་འདིར་བསྒོམས་པའི་རབ་ཀྱི་མཐའ་ལས་སྐྱེས་པ་རྣམ་པར་རྟོག་པའི་ཚོགས་མ་ལུས་པར་བསལ་བ་ཉམས་སུ་མྱོང་བའི་རྣམ་པར་ཞུགས་པ་དོན་ཕྱིན་ཅི་མ་ལོག་པར་དམིགས་པ་ཡིན་པར་བཤད་དོ། །མེད་པ་དང་ཡོད་པར་ལྟ་བ་
ཉེ་བར་ཞི་བའི་བོ་དེའི་ཕྱིར་རོ། །བསྲུང་ཞེས་བྱ་བའི་སྒྲ་ནི་བསོད་ནམས་དང་གཞན་ལ་བྱ་སྟེ། བསོད་ནམས་དང་གཞན་བསྲུང་བས་དེའི་ཕྱིར་བསྲུང་བ་ཞེས་བྱ་བའི་སྒྲས་ནི་བསོད་ནམས་བརྗོད་དོ། །གསོད་པ་ལ་སོགས་པའི་མཚན་ཉིད་ཀྱི་བྱ་བ་ནི་བསོད་ནམས་བསྲུང་བ་ཐུང་ཞིང་
མི་སྣང་བར་བྱེད་པས་ན་སྡིག་པ་ཞེས་བྱའོ། །འདས་པ་ནི་རྒལ་བ་སྟེ། སྡིག་པ་དང་བསོད་ནམས་དང་ལས་འདས་པ་དེ་ཡིས་རྒྱུ་མེད་པའི་ཕྱིར་ངན་འགྲོ་དང་བདེ་འགྲོ་ལས་འདས་པ་ཞེས་བྱ་བ་ཚིག་ལྷག་མ་ཡིན་ནོ། །དེ་ལྟ་བུ་དེ་ནི་ཐར་པ་ཡིན་པར་དམ་པ་མཁས་པ་རྣམས་
ཀྱིས་བཤད་དོ། །དེ་ལྟར་ཐར་པ་ནི་ངན་འགྲོ་དང་བདེ་འགྲོ་ལས་འདས་པ་ཡིན་པར་བཤད་ལ། འདས་པ་ཞེས་བྱ་བའི་དོན་ཡང་འགའ་ཡང་ཡོད་པ་མ་ཡིན་ན་ཇི་ལྟར་དངོས་པོ་ལ་སོགས་པའི་ངོ་བོ་ཡིན་པར་འགྱུར། གཞན་ལ་ལྟོས་ཏེ་ཡང་མེད་པར་བརྗོད་པར་བྱ་བ་མ་ཡིན་

172-1-139a

ཏེ། ཡང་དག་པར་ན་དེ་ཡང་མ་གྲུབ་པའི་ཕྱིར་རོ། །ད་ནི། སྐྱེ་བ་རྒྱུ་དང་བཅས་མཐོང་བས། །ཞེས་བྱ་བ་ལ་སོགས་པས་ཆད་པ་དང་རྟག་པར་ལྟ་བ་མི་སྲིད་པར་སྟོན་ཏེ། སྐྱེ་བ་ནི་འབྱུང་བའོ། །འགྲོ་བས་ན་རྒྱུའོ། །རྒྱུ་ནི་འགྲོ་བས་ཏེ། འབྲས་བུ་ལ་འགྲོ་ཞིང་སྒྲུབ་པར་
བྱེད་པ་ཞེས་བྱ་བའི་ཐ་ཚིག་གོ། །རྒྱུ་དང་བཅས་པར་འཇུག་པས་ན་དེ་སྐད་ཅེས་བྱའོ། །མཐོང་བ་རྟོགས་པའོ། །འགོག་པ་ནི་ཉེ་བར་ཞི་བ་སྟེ། སྔར་བཤད་པ། ངར་འཛིན་ཡོད་ན་ཡང་ལས་ཏེ། །དེ་ལས་ཡང་ནི་སྐྱེ་བ་ཡིན། །ཞེས་བྱ་བ་དེས་ནི་སྐྱེ་བ་དང་རྒྱུ་དང་བཅས་པ་བཤད་དོ། །དེ་ནི་
རང་གཞན་གཉི་ག་དང་། །ཞེས་བྱ་བ་དང་། ངར་འཛིན་པ་ནི་ཟད་པར་འགྱུར། །དེ་ནས་ལས་དང་སྐྱེ་བ་ཡང་། །ཞེས་བྱ་བ་དེས་ནི་འགོག་པའོ། །ཚེགས་སུ་བཅད་པ་འདིས་སྐྱེ་བ་རྒྱུ་དང་བཅས་པ་དེ་ཀུན་རྫོབ་པ་ཡིན་གྱི། ཡང་དག་པ་མ་ཡིན་ནོ་ཞེས་བྱ་བར་སྔར་སྐྱེས་པ་དང་ཞེས་བྱ་བ་ལ་
སོགས་པས་སྟོན་པར་བྱེད་དེ། འབྲས་བུ་བས་སྔར་སྐྱེས་ཤིང་བྱུང་བ་ལ་དེ་སྐད་ཅེས་བྱའོ། །ལྷན་ཅིག་སྐྱེས་པ་ནི་དུས་མཉམ་དུ་སྐྱེས་པའོ། །རྒྱུ་མིན་ཞེས་བྱ་བ་ནི་རྒྱུ་མ་ཡིན་པ་སྟེ་དེ་ཉིད་དུ་རྒྱུ་མེད་པའོ། །དོན་དུ་ཞེས་བྱ་བ་ནི་དོན་དམ་པར་རོ། །དོན་ནི་རིགས་པས་བསམས་པ་ལས་བྱུང་
བའི་ཤེས་རབ་ཕྱིན་ཅི་མ་ལོག་པར་དོན་འཛིན་པ་ལ་བྱ་སྟེ། དེ་ལ་འཇུག་པའི་ཐབས་ཡིན་པའི་ཕྱིར་རོ། །དེས་རྒྱུ་མ་ཡིན་པ་ཉིད་དུ་དཔྱད་ན་རྣམ་པ་གཉི་ག་ལ་ཡང་རྒྱུ་མེད་དོ་ཞེས་བྱ་བའི་ཐ་ཚིག་སྟེ། རྒྱུ་མ་ཡིན་པ་ཉིད་ནི་འབྲས་བུ་བས་སྔར་སྐྱེས་པའི་གནས་སྐབས་ཀྱི་རྒྱུ་ཅན་ཡིན་ནོ། །འབྲས་བུ་བྱུང་བ་ཡིན་
ན་དེའི་རྟེན་སྐྱེད་པར་བྱེད་པ་རྒྱུ་ཡིན་ལ། དེ་མེད་ན་གོ་ཇི་ལྟར་རྒྱུ་ཡིན། ལྷན་ཅིག་བྱུང་བ་ཡང་སྐྱེད་པར་བྱེད་པ་མ་ཡིན་པས་རྒྱུ་མ་ཡིན་ཏེ། ད་ལྟར་འབྱུང་ན་ངེས་པ་མེད་པའི་ཡང་ཕྱིར་རོ། །དོན་འདི་ནི་འདི་ལྟ་བུར་གྲགས་པ་མ་ཡིན་ནོ་ཞེས་བསྟན་པའི་ཕྱིར། བཏགས་དང་ཡང་དག་ཉིད་
དུ་ན། །ཞེས་བྱ་བ་ལ་སོགས་པ་སྨོས་སོ། །བཏགས་པ་ནི་འདོགས་པ་སྟེ་ཐ་སྙད་དོ། །གྲགས་པ་ནི་རབ་ཏུ་གྲགས་པ་སྟེ་ཐ་སྙད་མེད་པའི་ཕྱིར་རོ་ཞེས་བྱ་བའི་ཐ་ཚིག་གོ། །ཡང་དག་པ་ཉིད་ཀྱི་དབང་དུ་མཛད་ནས་ཡང་དག་པ་ཉིད་དུ་སྐྱེ་བ་ནི་འབྱུང་བའོ། །དེ་ཡང་རབ་ཏུ་མ་གྲགས་པའི་

172-1-139b

ཕྱིར་ཏེ། འདི་ནི་རང་གཞན་གཉི་ག་དང་ཞེས་བྱ་བ་དེར་སྐྱེ་བ་མེད་པ་ཡང་བསྟན་ཟིན་ཏོ། །དེ་ལྟར་ཡང་དག་པ་ཉིད་དུ་སྐྱེ་བ་བཀག་པ་བྱས་པ་དང་། གང་ལ་ལ་འོ་ན་རྐྱེན་ཉིད་འདི་པ་ཙམ་ཡང་བཀག་གོ་ཞེས་ཟེར་དེ་ལ་བརྗོད་པར་བྱ་སྟེ། རྐྱེན་ཉིད་འདི་པ་ཙམ་ནི་འདི་ལྟ་སྟེ། འདི་ཡོད་པས་
ན་འདི་འབྱུང་ཞེས་བྱ་བ་འདི་ཡིན་ནོ། །འདི་ཞེས་བྱ་བ་ནི་རྒྱུའོ། །ཡོད་པས་ན་ཞེས་བྱ་བ་ནི་ཡོད་ནའོ། །འདི་ཞེས་བྱ་བ་ནི་འབྲས་བུའོ། །འདི་ཇི་ལྟ་བུ་ཞིག་ཅེ་ན་དཔེར་ན་རིང་པོ་ཡོད་ན་ཐུང་ངུ་བཞིན་ནོ། །དོན་དེ་ཉིད་དཔེ་གཞན་གྱིས་སྒྲུབ་པར་བྱེད་དེ། འདི་ཞེས་བྱ་བ་ནི་རྒྱུའོ། །འདི་ཞེས་
བྱ་བ་ནི་འབྲས་བུའོ། །ལྷག་མ་ནི་གོ་སླའོ། །འདི་མཇུག་ཐོགས་པ་ནི་སུན་འབྱིན་ཏེ། སྔར་ཐ་སྙད་དུ་རིང་པོ་ལ་ལྟོས་ནས་ཐུང་ངུར་བཤད་པ་གང་ཡིན་པ་དེ་ཉིད་ཡང་དག་པར་ན་རིང་པོ་མེད་པའི་ཕྱིར་ལ། ཐུང་ངུའི་རང་གི་ངོ་བོ་མེད་པའི་ཕྱིར་དེ་ལ་ལྟོས་པ་ཅན་གྱི་རིང་པོ་ཡང་མེད་དོ། །འོན་
ཏེ་ཐུང་ངུའི་མིང་མེད་ཀྱང་མིང་ཅན་ནི་ཡོད་པ་ཁོ་ནའོ་ཞེ་ན། དེ་ཡང་རུང་བ་མ་ཡིན་ཏེ། ཡང་དག་པར་ན་སྐྱེ་བ་མེད་པའི་ཕྱིར་ཏེ། གཉི་ག་ཡང་མི་སྲིད་དོ། །དེ་བཞིན་དུ་འདི་སྐྱེས་པས་ན་འདི་སྐྱེ་སྟེ། དཔེར་ན་མར་མེ་བྱུང་ན་འོད་བྱུང་བ་བཞིན་ནོ་ཞེས་བྱ་བ་མར་མེ་ལ་ཡང་བརྗོད་པར་
བྱའོ། །དེ་ལྟ་ཡིན་དང་རྒྱུ་དང་འབྲས་བུ་སྐྱེ་བ་ནི་ཡང་དག་པ་མ་ཡིན་ནོ། །འོ་ན་ཅི་ཞེ་ན་ཐ་སྙད་པ་ཡིན་ནོ་ཞེས་མཇུག་ཐོགས་པས་སྟོན་པར་བྱེད་དེ། རྒྱུ་དང་འབྲས་བུ་ནི་རྒྱུ་དང་འབྲས་བུ་དག་སྟེ་དེ་དག་གི་སྐྱེ་བའོ། །མཐོང་ཞིང་ཞེས་བྱ་བ་ནི་ཤེས་ཤིང་ངོ་། །ཇི་བཞིན་ཞེས་བྱ་བ་ནི་རང་གི་ངོ་བོ་
ཇི་ལྟ་བ་བཞིན་ནོ། །རང་གི་ངོ་བོ་ཅི་ཡིན་ཞེ་ན། སྤྲོས་ལས་བྱུང་བར་ཞེས་བྱ་བ་སྨོས་ཏེ། སྤྲོས་པ་ནི་རྣམ་པར་རྟོག་པའི་མངོན་པར་བརྗོད་པས་རྒྱས་པར་ཐ་སྙད་འདོགས་པའོ་ཞེས་བྱ་བའི་དོན་དེ་དེ་ལས་བྱུང་བའོ། །ཡང་དག་པར་སྐྱེ་བ་མེད་ཀྱང་མེད་པ་ཉིད་དུ་ཁས་མི་ལེན་ཅིང་ཉེ་བར་ནི་འགྲོ་སྟེ་མེད་
པ་ཉིད་ཀྱི་ལྟ་བ་མི་འཛིན་ཏོ། །ཡང་དག་ཇི་བཞིན་ཞེས་བྱ་བ་ནི་ཕྱིན་ཅི་མ་ལོག་པ་སྟེ་དེའི་ངོ་བོ་ལ་དེ་སྐད་ཅེས་བྱའོ། །དེ་ཡོངས་སུ་ཤེས་པ་དེས་ན་འཆིང་བ་ཐམས་ཅད་དང་སྡུག་བསྔལ་དག་ལས་གྲོལ་བར་འགྱུར་རོ། །ཡོད་པ་དང་མེད་པའི་ལྟ་བ་གཉིས་ཉིད་གཉིས་སོ། །གཉིས་པོ་དེ་ལ་མི་

172-1-140a

བརྟེན་པ་སྟེ། དེ་ལ་མི་གནས་ཤིང་གཉིས་ཀྱི་འདུ་ཤེས་དག་བྲལ་བ་ཡིན་ནོ། །སོ་སོའི་སྐྱེ་བོའི་གནས་སྐབས་ན་མི་ཤེས་པའི་དབང་གིས་ཕྱིན་ཅི་ལོག་པའི་བློ་ཅན་ལ་རྟག་པ་དང་ཆད་པའི་རྣམ་པར་ཡོད་པ་དང་མེད་པར་ལྟ་བ་དག་འབྱུང་ངོ་། །མྱ་ངན་ལས་འདས་པ་དང་
བར་ཆད་མེད་པར་གནས་པ་ལ་མི་ཤེས་པ་ཆུང་ངུའི་ཆུང་ངུ་ཡང་འགག་པ་ལ་མངོན་དུ་ཕྱོགས་སོ། །དེ་བས་ན་ཕྱིན་ཅི་ལོག་རུ་འཛིན་པ་མིད་པའི་ཕྱིར་དེ་ལྟར་མ་གྱུར་པ་ནི་དེ་ལ་མི་བརྟེན་པ་སྟེ། དེའི་ཕྱིར་གྲོལ་ཞེས་བཤད་དོ། །ཐག་རིང་ནས་ཞེས་བྱ་བ་ལ་སོགས་པས་ནི་དོན་དེ་ཉིད་དཔེས་
གསལ་བར་བྱེད་དེ། ཐག་རིང་པོ་ན་གནས་པའི་མིས་ཆུ་མ་ཡིན་པ་ལ་ཆུའི་རྣམ་པར་མཐོང་བས་ན་མི་གསལ་བ་ལྟར་ཡུལ་དང་དུས་ཀྱི་དབང་གིས་འཁྲུལ་པའི་མིག་གིས་ཐག་རིང་པོ་ནས་མཐོང་བའི་གཟུགས་ཀྱང་མི་གསལ་ལོ། །ལག་པ་དང་བོང་བ་དང་དབྱུག་པ་ལ་སོགས་པས་
གཟུགས་སུ་རུང་ཞིང་གནོད་པ་བྱར་རུང་བས་ན་གཟུགས་སོ། །མཐོང་ན་གོ་ཇི་ལྟར་མི་གསལ་བ་ཡིན་ཞེ་ན། ཆུ་མ་ཡིན་པ་ལ་ཆུའི་རྣམ་པར་མཐོང་བས་སོ། །དེ་དང་ཉེ་བ་རྣམས་ཀྱིས་ནི་གཟུགས་ཉིད་གསལ་ཞིང་མངོན་པར་མཐོང་གི་ཆུའི་རྣམ་པར་ནི་མ་ཡིན་ཏེ། ཇི་ལྟར་ཐག་རིང་པོ་
ནས་མཐོང་བའི་སྨིག་རྒྱུའི་གཟུགས་མི་གསལ་བ་ཞེས་བྱ་བ་ནི་ཚིག་ལྷག་མ་ཡིན་ནོ། །དེ་བཞིན་དུ་ཇི་ལྟར་མྱ་ངན་ལས་འདས་པ་དང་ཐག་རིང་བ་ཉེས་པ་ཐམས་ཅད་ཀྱི་གཞིར་གྱུར་པ་རྣམས་ཀྱིས་འཇིག་རྟེན་འཁོར་བ་ལ་ཡང་དག་པའི་ངོ་བོར་མཐོང་བ་དེ་ལྟར་དེ་དང་ཉེ་བ་རྣམས་ཀྱིས་དེ་མྱ་ངན་ལས་
འདས་པ་དང་ཉེ་བ་ཡོན་ཏན་ཐམས་ཅད་ཀྱི་གཞིར་གྱུར་པ་རྣམས་ཀྱིས་ནི་མ་ཡིན་ནོ། །འཇིག་རྟེན་ཇི་ལྟ་བུ་ཞིག་ཅེ་ན། མཚན་མེད་ཅེས་བྱ་བ་སྨོས་ཏེ། མཚན་མ་ནི་བུད་མེད་ལ་སོགས་པ་སྟེ་དེ་དག་ཏུ་བརྗོད་པ་དང་ཤེས་པའི་རྒྱུ་ཡིན་ནོ། །གང་ལ་མཚན་མ་མེད་པ་ཡོད་པ་དེ་ནི་མཚན་མ་མེད་པ་སྟེ་
སྟོང་པ་ཞེས་བྱ་བའི་ཐ་ཚིག་གོ། །ཇི་ལྟ་བུ་ཞིག་ཏུ་མཚན་མ་མེད་ཅེ་ན། སྨིག་རྒྱུ་བཞིན་ཞེས་བྱ་བ་སྨོས་ཏེ། ཇི་ལྟར་སྨིག་རྒྱུ་ཆུའི་རྣམ་པས་སྟོང་པ་དེ་བཞིན་དུ་འཇིག་རྟེན་འདི་ཡང་གང་དང་གང་གི་རྣམ་པར་སྣང་བ་དེས་ཐམས་ཅད་སྟོང་ངོ་། །ཇི་ལྟར་སྨིག་རྒྱུ་ཆུ་འདྲ་བར་མཐོང་བ་ཡང་དག་པར་

172-1-140b

བརྟགས་ན་ཆུའི་ངོ་བོ་ཉིད་ཀྱང་མ་ཡིན་ལ་སྨིག་རྒྱུ་ཡང་ངོ་བོ་ཉིད་དང་བཅས་པ་ཡིན་པ་དེ་བཞིན་དུ་ཕུང་པོ་ཆུ་དང་འདྲ་བ་རྣམས་ཀྱང་དོན་དམ་པར་ན་བདེན་པ་མ་ཡིན་ནོ། །དེའི་ཕྱིར་བདག་གི་རང་བཞིན་མ་ཡིན་ལ། ཕུང་པོའི་རང་བཞིན་ཡང་མ་ཡིན་ནོ། །དེ་ལྟ་བུའི་ཆོས་རྣམས་ལ་གང་དག་
མངོན་པར་ཞེན་པ་ཡོད་པ་དེ་དག་ནི་ཤིན་ཏུ་བླུན་པ་སྟེ་འཁོར་བ་པ་ཡིན་ནོ་ཞེས་མཇུག་ཐོགས་ཀྱི་ཚིགས་སུ་བཅད་པ་གཉིས་ཀྱིས་སྟོན་ཏོ། །སྨིག་རྒྱུ་ལ་འདི་ནི་ཆུ་ཡིན་ནོ་ཞེས་བྱ་བའི་རྣམ་པར་བསམས་ནས་ཏེ། དེར་ཞེས་བྱ་བ་ནི་སྨིག་རྒྱུ་དེར་རོ། །སྨིག་རྒྱུ་དང་ཉེ་བ་ལ་སྨིག་རྒྱུའི་སྒྲར་བརྗོད་དེ་དཔེར་ན།
གངྒཱའི་གནག་ལྷས་ཞེས་བྱ་བ་ཡིན་ནོ། །སྨིག་རྒྱུའི་ཕྱོགས་དང་ཉེ་བར་སོང་བ་ལས་གལ་ཏེ་ཆུ་དེ་འདི་ན་མེད་དོ་ཞེས་འཛིན་པའོ། །འདི་སྐད་དུ་བཤད་པ་ཡིན་ཏེ། གལ་ཏེ་ལན་འགའ་ཞིག་སྨིག་རྒྱུ་དེ་ལ་ཡོད་པར་མཐོང་བར་གྱུར་ན་ནི་ལ་ལར་ཡོད་པར་མཐོང་བས་འདི་ན་མེད་དོ་ཞེས་བྱ་བར་རུང་ངོ་། །གང་
གི་ཚེ་ཐམས་ཅད་ན་དེ་གཏན་མེད་པ་དེའི་ཚེ་ཆུ་དེ་མེད་དོ་ཞེས་འཛིན་པ་དེ་ནི་བདག་ཉིད་ཤིན་ཏུ་བླུན་པར་སྒྲོགས་པ་ཡིན་ནོ་ཞེས་བྱ་བ་ཡིན་ནོ། །དེ་བཞིན་དུ་སྨིག་རྒྱུ་ལྟ་བུའི་ཞེས་བྱ་བ་ནི་ཡང་དག་པར་ན་སྨིག་རྒྱུ་དང་འདྲའོ། །འདི་སྐད་དུ་བཤད་པ་ཡིན་ཏེ། ཐ་སྙད་དུ་ནི་དེ་ལྟ་མ་ཡིན་ནོ་ཞེས་བྱ་བ་ཡིན་ནོ། །
གལ་ཏེ་དངོས་པོའི་སྟོབས་ཀྱིས་ཡོད་པ་ཉིད་སྤངས་པའི་ཕྱིར་མེད་པ་པར་འགྱུར་ན་མེད་པ་ཉིད་སྤངས་པའི་ཕྱིར་ཡོད་པ་པར་ཡང་ཅིའི་ཕྱིར་མི་འགྱུར། གལ་ཏེ་འདི་སྙམ་དུ་རེ་ཞིག་མྱ་ངན་ལས་འདས་པའི་གནས་སྐབས་ན་ནི་རྣམ་པར་མི་རྟོག་པའི་ཡེ་ཤེས་ཡོད་པས་དེ་ལྟར་ཡང་འགྱུར་གྲང་ན། སོ་སོའི་
སྐྱེ་བོའི་གནས་སྐབས་ན་དེ་འཐོབ་པའི་ཐབས་ཀྱི་ལམ་མམ། གཞན་ལ་ཡོད་པ་གང་ཡིན་པ་སུན་ཕྱུང་བ་བྱས་པ་གང་ཡིན་པ་དེ་ཉིད་དངོས་པོའི་སྟོབས་ཀྱི་དོན་གྱིས་མེད་པར་བསླན་དགོས་ཞེས་བྱ་བར་སེམས་ན་དེ་དྲང་བའམ་འཐོབ་པོ་ཞེས་བྱ་བའི་ཐ་ཚིག་གོ། །དེ་ལྟར་ཐབས་དེས་མེད་པ་པ་ཉིད་ཀྱི་
དོན་རྒྱས་པར་བཀག་པས་ན། གང་དག་དོན་གྱི་མེད་ཉིད་དུ། །དམ་མི་འཆའ་ཞིང་ཞེས་བྱ་བ་ལ་སོགས་པ་སྨོས་པ་ཡིན་ཏེ། དོན་གྱི་སྟོབས་ཀྱིས་མེད་པ་ཉིད་དུ་བསྒྲུབ་པར་བྱ་བར་རོ། །ཡང་ན་དམ་འཆའ་བ་ལ་སོགས་པ་མེད་པ་པ་ཞེས་བྱའི་གཞན་དུ་ནི་མ་ཡིན་ན་དེ་དག་ཐམས་ཅད་ནི་འདི་ལ་

172-1-141a

མེད་དོ་ཞེས་བྱ་བ་སྟོན་པ་ཡིན་ནོ། །དམ་འཆའ་བ་ནི་འཇིག་རྟེན་ཕ་རོལ་ལ་སོགས་པ་མེད་དོ་ཞེས་ཁས་ལེན་པ་ཡིན་ན་ཐ་སྙད་དུ་ཐམས་ཅད་ཁས་ལེན་པ་ཁོ་བོ་ཅག་ལ་ནི་དེ་མེད་དོ། །འོན་ཏེ་འཇིག་རྟེན་ཁ་ཟེར་བས་འཇིགས་པས་དེ་མི་བྱེད་དོ་ཞེ་ན། འོ་ན་ནི་ལུས་དང་ངག་
གི་ཉེས་པར་སྤྱོད་པའི་མཚན་ཉིད་ཀྱི་སྤྱོད་པ་ཡོད་པར་འགྱུར་བ་ཞིག་ན། དེ་ཡང་བསམ་གཏན་དང་འདོན་པ་ལྷུར་ལེན་པའི་ཚངས་པར་སྤྱོད་པ་ལ་སོགས་པའི་ཡོན་ཏན་གྱིས་བརྒྱན་པ་ལ་མེད་དོ། །འོན་ཏེ་རྙེད་པ་དང་བཀུར་སྟི་རྣམ་པར་ཆད་ཀྱིས་དོགས་པས་ཉེས་པར་སྤྱོད་པ་བོར་ནས་ལེགས་པར་སྤྱད་པ་
སྤྱོད་དུ་ཟད། སེམས་ནི་མེད་པར་ལྟ་བས་གནས་སོ་ཞེ་ན། བྱང་ཆུབ་རྟེན་ཕྱིར་སེམས་མེད་ནི། །ཞེས་བྱ་བ་སྨོས་སོ། །བྱང་ཆུབ་ནི་བླ་ན་མེད་པའི་ཡེ་ཤེས་ཏེ། །དོན་འདི་ལ་ནི་སྡེ་པ་མི་འཇུག་པའི་ཕྱིར་རོ། །ཇི་ལྟར་ཞེས་བྱ་བ་ནི་རྒྱུ་གང་གིས་ནའོ། །དམིགས་པའི་གདོན་གྱིས་ཟིན་པ་རྣམས་ཀྱིས་
བཤད་ཅིང་སྨྲས་ཞེས་བྱ་བ་ཡིན་ནོ། །ཆོས་འདི་ནི་དམིགས་པ་ཅན་ཐམས་ཅད་དང་ཐུན་མོང་མ་ཡིན་ནོ་ཞེས་བྱ་བར་ཚིགས་སུ་བཅད་པ་གཉིས་ཀྱིས་སྟོན་ཏོ། །ཡང་ན། གཉིས་ལ་མི་བརྟེན་ཐར་བར་འགྱུར། །ཞེས་བྱ་བའི་དོན་འདི་སུ་ཞིག་གིས་མ་སྨྲས་ན་གང་གི་ཕྱིར་བཤད་ཅེས་བྱ་བའི་ཕྱོགས་སྔ་མ་
འདི་ལ་མཇུག་ཐོགས་ཀྱི་ཚིགས་སུ་བཅད་པ་སྨོས་སོ། །འདི་ལ་གང་ཟག་དང་ཕུང་པོར་སྨྲ་བའི་ངང་ཚུལ་ཡོད་པས་ན་དེ་དག་ནི་དེ་དག་ཏུ་སྨྲ་བའོ། །དྲང་སྲོང་སེར་སྐྱ་ནི་བགྲང་བར་བྱེད་པས་ན་གྲངས་ཅན་ཞེས་བྱ་ལ། དེའི་སློབ་མ་སེར་སྐྱ་བ་རྣམས་ལ་ཡང་གྲངས་ཅན་ཞེས་བྱའོ། །འུག་པ་ནི་གཟེགས་ཟན་
ཏེ་གཟེགས་མ་ཟ་ཞིང་འུག་པ་ལྟར་སྤྱོད་པས་སོ། །དེའི་སློབ་མ་རྣམས་ནི་བུ་དང་འདྲ་བས་ན་འུག་ཕྲུག་གོ། །གོས་ནི་བགོ་བའོ། །འདི་དག་གོས་དང་བྲལ་བས་ན་དེ་སྐད་ཅེས་བྱ་སྟེ་གཅེར་བུ་ཞེས་བྱ་བའི་དོན་ཏོ། །གྲངས་ཅན་དང་འུག་ཕྲུག་དང་གོས་མེད་པ་རྣམས་ལ་དེ་སྐད་ཅེས་བྱའོ། །འདི་དག་དང་
བཅས་པས་ན་གྲངས་ཅན་འུག་ཕྲུག་དང་གོས་མེད་བཅས་པའོ། །གལ་ཏེ་དྲིས་ན་ཡོད་པ་དང་མེད་པ་ལས་འདས་པ་གཉིས་དང་བྲལ་བ་སྨྲ་ན་དེ་ལ་དྲིས་ཤིག་ཅེས་བྱ་བའི་ཐ་ཚིག་གོ། །གྲངས་ཅན་ལ་སོགས་པ་ཇི་ལྟར་མི་སྨྲ་ཞེ་ན། འདི་ལྟར་རེ་ཞིག་གྲངས་ཅན་རྣམས་ནི་སྐྱེས་བུ་དང་གང་ཟག་ལ་ནི་

172-1-141b

ཡོད་པ་ཉིད་དུ་ཤེས་སོ། །ས་ལ་སོགས་པ་ལ་ནི་བསྐལ་པ་ཆེན་པོའི་བར་དུའོ། །འདས་པ་དང་མེད་པ་དག་ལ་ནི་མེད་པ་ཉིད་དུའོ། །འགྱུར་བའི་ཚོགས་ལ་ནི་ཡང་དག་པར་ན་མེད་པ་ཉིད་དུ་ཤེས་ཏེ། དེ་ལྟར་ལ་ལ་ནི་ཡོད་པ་ལ་ནི་མེད་པས་ན་ཡོད་པ་དང་། མེད་པ་ལས་འདས་པ་ཡིན་ནོ་ཞེས་
སྨྲ་བ་ལ་དགོངས་ནས་དྲིས་ཞེས་བྱ་བ་སྨོས་སོ། །བྱེ་བྲག་པ་རྣམས་ཀྱང་རྡུལ་ཕྲ་རབ་རྣམས་དང་རྡུལ་གཉིས་པ་ལ་སོགས་པས་བརྩམས་པ་བུམ་པ་ལ་སོགས་པ་ལ་ཡོད་པ་དང་མེད་པ་ཉིད་དུ་ཤེས་སོ། །གོས་མེད་པ་རྣམས་ཀྱང་ཡིན་པར་སྨྲ་བ་སྟེ། ཡོད་པ་ཡང་ཡིན་མེད་པ་ཡང་ཡིན་ཞེས་
བྱ་བ་དང་། དེ་བཞིན་དུ་སྲོག་ལ་ནི་ཡོད་པ་ཉིད་དང་། ལྷག་མ་ལ་ནི་མེད་པ་ཉིད་དུ་ཤེས་སོ། །གང་ཟག་དང་ཕུང་པོར་སྨྲ་བ་གང་ཡིན་པ་དེ་དག་ཀྱང་གང་ཟག་ལ་ནི་ཡོད་པ་ཉིད་དུ། ས་ལ་སོགས་པ་ལ་ནི་བསྐལ་པ་ཆེན་པོའི་བར་དུ། འདས་པ་དང་མ་འོངས་པ་དག་ལ་ནི་མེད་པ་ཉིད་དུ་ཤེས་ཏེ། དེ་
ལྟར་ལ་ལ་ནི་ཡོད་ལ། ལ་ལ་ནི་མེད་པས་ན་ཡོད་པ་དང་མེད་པ་ལས་འདས་པ་ཡིན་ནོ་ཞེས་སྨྲ་བ་ལ་དགོངས་ནས་དྲིས་ཞེས་བྱ་བ་སྨོས་སོ། །དེ་ལྟར་བཤད་མ་ཐག་པའི་རྒྱུ་དེའི་ཕྱིར་སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་ནི་བྱ་བ་དང་བྱ་བ་མ་ཡིན་པ་བླང་བ་དང་དོར་བ་སྟོན་པའོ། །འཆི་མེད་
ཅེས་བྱ་བ་ལ། འཆི་བ་མེད་པ་ནི་མྱ་ངན་ལས་འདས་པ་ལ་སྟེ་འདི་ལ་འཆི་བ་མེད་པས་ན་འཆི་བ་མེད་དོ། །དེ་འཐོབ་པའི་ཐབས་ཡིན་པས་ན་དེ་སྐད་ཅེས་བྱའོ། །ཇི་སྐད་སྨོས་པའི་རིགས་པས་ཡོད་པ་དང་མེད་པ་ལས་འདས་པར་བཤད་པ་ཟབ་མོ་གཏིང་དཔག་དཀའ་བ་དེ་ཁོ་ན་ཆོས་ཀྱི་ཁུད་པ་ཡིན་
ནོ་ཞེས་བྱ་བར་ཤེས་ཤིང་ཁོང་དུ་ཆུད་པར་གྱིས་ཤིག །སྒོ་རིས་དང་འདྲ་བས་ན་ཁུད་པ་སྟེ་ཐུན་མོང་མ་ཡིན་པ་ཞེས་བྱ་བའི་དོན་ཏོ། །གོང་དུ་ནི། དེ་ནི་རང་གཞན་གཉི་ག་དང་། །དུས་གསུམ་ཉིད་དུའང་མ་ཐོབ་ཕྱིར། །ཞེས་སྐྱེ་བ་མེད་པར་བཤད་དོ། །ད་ནི་སྐྱེ་བ་ཁས་བླངས་ནས་འཇིག་རྟེན་ཞེས་བྱ་བ་འགའ་ཡང་
མེད་དོ་ཞེས་མཇུག་ཐོགས་པས་སྟོན་ཏོ། །སྐྱེ་བ་ནི་འབྱུང་བའོ། །འཇིག་པ་ནི་ཉམས་པ་སྟེ་འཇིག་ཅིང་ཉམས་པ་ན་ཡང་འགྲོ་བ་མེད་ཅིང་གང་དུ་ཡང་འཕོ་བ་མེད་ལ། སྐྱེ་བ་ན་ཡང་གནས་གང་ནས་ཀྱང་འོང་བ་མེད་དོ། །སྐྱེས་པ་ཡང་སྐད་ཅིག་ཀྱང་མི་གནས་པ་སྟེ། དེ་ལྟ་ཡིན་དང་འདས་པའི་དུས་

172-1-142a

ན་ཡང་མེད། མ་འོངས་པ་ན་ཡང་མེད། ད་ལྟར་ཡང་མེད་པ་ཡིན་ནོ། །གང་ལས་དུས་གསུམ་ཆར་ལས་འདས་ཤིང་རྣམ་པར་འདས་པའི་བདག་སྟེ། ངོ་བོ་ཉིད་ཡོད་པ་དེ་ལ་དེ་སྐད་ཅེས་བྱའོ། །དམ་ཞེས་བྱ་བའི་སྒྲ་ནི་རྣམ་པར་རྟོག་པ་སྟེ། དེ་ལྟ་བུ་ཡང་ཐ་སྙད་དུ་ནི་ཡོད་
དོ་སྙམ་དུ་དགོངས་པ་ཡིན་ནོ། །འདས་མ་ཐག་པས་འགྲོ་བ་དང་འོང་བ་དགག་པ་མཛད་ནས། གང་ཕྱིར་གཉི་ག་འོང་ཞེས་བྱ་བ་ལ་སོགས་པས་འཇིག་རྟེན་དང་མྱ་ངན་ལས་འདས་པ་དག་དོན་དམ་པར་ན་ཁྱད་པར་མེད་པར་སྟོན་ཏེ། གང་ཕྱིར་ཞེས་བྱ་བའི་སྒྲ་ནི་གང་གི་ཕྱིར་ཞེས་བྱ་བའི་དོན་ཏོ། །
གཉི་ག་ཞེས་བྱ་བ་ནི་འཇིག་རྟེན་དང་མྱ་ངན་ལས་འདས་པ་དག་གོ། །གལ་ཏེ་འགའ་ཞིག་གནས་པ་ཡོད་ན་ནི་འདི་གཉིས་རུང་བ་ཞིག་ན་མ་སྐྱེས་པ་ལ་གནས་པ་དེ་མེད་པའི་ཕྱིར་དེ་ནི་མེད་དོ། །དེ་མེད་པ་ཉིད་ཀྱིས་འགག་པ་ཡང་མེད་དེ། འདི་ཐམས་ཅད་ཡང་དག་པར་ཡོད་པ་མ་ཡིན་ནོ། །ཐ་སྙད་
དུ་ནི་རྒྱུན་གྱིས་འཇུག་པ་ཡོད་དོ་ཞེས་བྱ་བར་གཟུང་ངོ་ལྷག་མ་ནི་གོ་སླའོ། །དེ་ལྟར་སྐྱེ་བ་ལ་སོགས་པ་དགག་པ་མཛད་པ་དང་། རྒོལ་བ་ལ་ལ་འདི་སྙམ་དུ་གང་དག་དངོས་པོ་ཐགས་ཅད་སྐྱེ་ཞིང་དགག་པར་འདོད་ན་དེ་དག་ཁོ་ན་ལ་ཉེས་པ་འདིར་འགྱུར་གྱི། ཁོ་བོ་ཅག་ནི་སྐྱེ་བ་མེད་པ་དང་འགག་པ་མེད་པ་
དང་སྐད་ཅིག་མ་མ་ཡིན་པར་འདོད་དེ། དེའི་ཕྱིར་ཁོ་བོ་ཅག་ལ་ཉེས་པ་འདི་མེད་དོ་སྙམ་དུ་སེམས་པ་དེའི་ཕྱིར། གལ་ཏེ་རྟག་པར་འགྱུར་ན་ནི། །ཇི་ལྟར་ཞེས་བྱ་བ་ལ་སོགས་པ་སྨོས་ཏེ། གཞན་ཡང་འཇིག་པར་མི་འགྱུར་རོ་ཞེས་བྱ་བ་དེ་ལྟ་བུ་ལ་སོགས་པའི་སུན་དབྱུང་བ་ཞིག་ཀྱང་ཡོད་ན་གཞན་དུ་
བཤད་ཟིན་པས་འདིར་མི་བརྗོད་དོ། །དེ་ཇི་ལྟར་སྐད་ཅིག་མ་མ་ཡིན་ཞེས་བྱ་ཞེས་དྲེ་བ་སྟེ། རྣམ་པ་གང་གིས་ཡིན་པ་སྨྲོས་ཤིག་ཅེས་བྱ་བར་དགོངས་པ་ཡིན་ནོ། །ཅིའི་ཕྱིར་མ་ཡིན་ཞེ་ན། གལ་ཏེ་རྟག་པར་འགྱུར་ན་ནི། །ཞེས་བྱ་བ་སྨོས་ཏེ། གལ་ཏེ་ཞེས་བྱ་བ་ནི་ཁས་ལེན་པའམ། གང་
གི་ཕྱིར་ཞེས་བྱ་བའི་དོན་ཏོ། །རྟག་པར་ཞེས་བྱ་བ་ནི་དུས་ཐམས་ཅད་དུའོ། །འགྱུར་བ་ནི་ཡོངས་སུ་འགྱུར་བ་སྟེ་གནས་སྐབས་གཞན་འཐོབ་པའོ། །དོན་ནི་རྟག་པའི་དོན་དཔྱད་པ་ཉིད་ཀྱིས་གནས་སྐབས་དཔྱད་པ་ཡིན་ནོ་ཞེས་བྱ་བ་འདི་ཡིན་ནོ། །སྐད་ཅིག་མ་མ་ཡིན་པའི་དངོས་པོ་ནི་མེད་

172-1-142b

དེ། རྟག་ཏུ་འགྱུར་བའི་ཕྱིར་བློ་དང་སྒྲ་དང་མེ་ལྕེ་བཞིན་ནོ། །གང་ཞིག་སྐད་ཅིག་མ་མ་ཡིན་པ་དེ་ལ་ནི་འགྱུར་བ་ཡང་མེད་དེ་དཔེར་ན་ནམ་མཁའ་ལྟ་བུའོ། །འོན་ཏེ་དེས་འཇིག་པར་འགྱུར་བར་མི་འདོད་ན་དེའི་ཚེ་ཉེས་པ་གཞན། གལ་ཏེ་འགྱུར་བ་མེད་ན་ནི། །ཞེས་བྱ་བ་ལ་སོགས་པ་སྨོས་ཏེ།  གལ་ཏེ་
ཞེས་བྱ་བ་ནི་གལ་ཏེ་ན་ཞེས་བྱ་བའི་དོན་ཏོ། །དོན་དུ་གཞན་ཉིད་དུ་མི་འདྲ་བ་ཉིད་དུ་ག་ལ་འགྱུར་ཏེ། དེ་ལྟ་བུར་སྣང་བའི་ཕྱིར་མེད་དོ་ཞེས་བྱ་བ་བརྗོད་པར་ཡང་མི་ནུས་སོ། །འོན་ཏེ་ཉེས་པ་འདིར་འགྱུར་དུ་འོང་ཞེས་ཏེ། རྟག་པའི་ཕྱོགས་གཅིག་ཟད་པར་སྐད་ཅིག་མ་ཉིད་དུ་འདོད་ལ། ཕྱོགས་གཅིག་དང་ལྡན་པ་
འགའ་ཞིག་ནི་འགྱུར་གྱི་ཐམས་ཅད་དུ་ནི་ཁས་མི་ལེན་ཏེ། བྱེ་བྲག་པ་རྣམས་ཀྱི་ལྟར་ན་བུམ་པ་ལ་སོགས་པ་རྡུལ་ཕྲ་རབ་ཀྱི་ཕྱོགས་གཅིག་ཡིན་གྱི་རྡུལ་ཕྲ་རབ་ནི་སྐད་ཅིག་མ་མ་ཡིན་ནོ་ཞེ་ན། དེའི་ཕྱིར་དེ་རྣམས་གཉི་གའང་ཞེས་བྱ་བ་ལ་སོགས་པ་སྨོས་སོ། །རིགས་པ་ནི་འཐད་པའོ། །དེ་འདི་ལས་
ཡོད་པས་ན་རིགས་པ་དང་ལྡན་པའོ། །དེ་ལྟ་བུ་མ་ཡིན་པས་ན་རིགས་ལྡན་མིན་ཞེས་བྱའོ། །དེ་ཅིའི་ཕྱིར་ཞེ་ན། རྒྱུ་མི་འདྲ་བ་ཉིད། མི་དམིགས་ཕྱིར་ཞེས་བྱ་བ་སྨོས་སོ། །འདྲ་བ་ནི་མཚུངས་པ་སྟེ་མཉམ་པའོ། །དེ་ལྟ་བུ་མ་ཡིན་པས་ན་མི་མཉམ་པའོ། །དེའི་ངོ་བོ་ནི་མི་མཉམ་པ་ཉིད་དེ། དེ་མི་
དམིགས་ཤིང་མི་སྣང་བའི་ཕྱིར་རོ། །བསྟན་བཅོས་དང་འགལ་བའི་ཡང་ཕྱིར་ཏེ། བསྟན་བཅོས་ནི་འགའ་ལས་ཀྱང་ཕྱོགས་གཅིག་ཟད་པས་སྐད་ཅིག་མར་མི་འདོད་དོ། །ཐམས་ཅད་དུ་ཟད་པས་སྐད་ཅིག་མ་ཡིན་པར་ཡང་རྟག་པར་སྨྲ་བ་རྣམས་མི་འདོད་པས་རྣམ་པ་གཉི་ག་ཡང་རིགས་པ་དང་ལྡན་པ་ཡིན་
ནོ། །རྟག་པ་ཉིད་དུ་ཡང་རུང་བ་མ་ཡིན་ཏེ། གཞན་དུ་གྱུར་པ་སྣང་བའི་ཕྱིར་རོ། །རྡུལ་ཕྲ་རབ་རྣམས་རྡུལ་གཉིས་ལ་སོགས་པའི་རིམ་གྱིས་འབྲས་བུ་རས་ཡུག་ལ་སོགས་པ་བྱེད་པ་ན་སྔོན་གྱི་ངོ་བོ་དབང་པོ་མི་གསོད་པས་བྱེད་པ་ནི་མ་ཡིན་ཏེ། དེ་དང་འདྲ་བ་ཁོ་ནར་རས་ཡུག་ལ་སོགས་པ་ཡང་མི་
དམིགས་པར་ཐལ་བར་འགྱུར་བའི་ཕྱིར་རོ། །དེའི་ཕྱིར་གདོན་མི་ཟ་བར་འགྱུར་བས་ཁས་བླངས་དགོས་སོ། །ཡང་ན་རང་གི་སྡེ་པ་དག་ཁོ་ན་སྐད་ཅིག་མ་དགག་པ་མཛད་པ་དང་། འདི་སྐད་ཅེས་སྐད་ཅིག་མ་མ་ཡིན་པ་ནི་འགའ་ཡང་མེད་དེ། འོ་ན་ཅི་ཞེ་ན། སྐད་ཅིག་མ་ཁོ་ནའོ་ཞེས་ཟེར་བ་དེའི་

172-1-143a

ཕྱིར་འདི་བཤད་དེ། ཐ་སྙད་དུ་ཡང་མི་འདྲ་བ་ཉིད་མི་དམིགས་པའི་ཕྱིར་དང་། ཡང་དག་པར་ན་མི་འཐད་པའི་ཕྱིར་དེ་ལྟར་སྐད་ཅིག་མ་མ་ཡིན་ནོ། །ཡང་འདི་ལ་ཁྱབ་འཇུག་པ་ལ་ལ་ཁོ་བོ་ཅག་གི་ཁྱབ་འཇུག་ནི་སྐྱེ་བ་ཐོག་མ་དང་ཐ་མ་མེད་པས་རྟག་པ་རྙིང་པ་ཡིན་ནོ་ཞེས་ཟེར་ཏེ།
དེ་ལ་ཉེས་པ་དེ་དག་མེད་ཀྱང་སྐད་ཅིག་མ་མ་ཡིན་པའི་ཕྱོགས་ལ་ཉེས་པ་གང་དག་བཤད་པ་དེ་དག་གོ། །ཇི་ལྟར་མེད་ཅེས་བརྗོད་པར་བྱ། །གཞན་ཡང་དངོས་པོ་སྐད་ཅིག་མ་ཡིན་ན་རིལ་གྱིས་མེད་པའི་ཕྱིར་ག་ལ་ཞིག་ཡོད་དེ་མེད་པ་ཁོ་ནའོ། །བརྟེན་ཕྱིར་ཞེས་བྱ་བ་ནི་རྟག་པའི་ཕྱིར་རོ། །རྟག་པ་ནི་ཁོ་ན་ཉིད་
གཅིག་པ་ཡིན་པའི་ཕྱིར་རྟག་ཏུ་སར་པ་ཁོ་ན་ཡིན་ནོ། །དེའི་ཕྱིར་རྙིང་པ་ཉིད་མི་རིགས་ཏེ། རྙིང་པ་ནི་རྒས་པ་ཉིད་ཡིན་ནོ། །ཕྱི་ནང་གི་དངོས་པོ་རྣམས་ལ་རྙིང་པ་ཉིད་སྣང་བ་མ་ཡིན་ནམ། དེ་ཇི་ལྟར་རྙིང་པ་མེད་ཅེ་ན། ཐ་སྙད་དུ་ལྟ་སྐྱེ་བ་དང་། གནས་པ་དང་འཇིག་པ་ཅི་སྟེ་མི་སྣང་ན། འདི་ནི་དེ་ཁོ་ན་ཉིད་བསམ་
པར་བརྗོད་པ་ཡིན་ནོ། །དེ་ལྟ་བུའི་ཞར་ལ་འོངས་པ་བཞག་ནས་ཡང་། ཇི་ལྟར་ཞེས་བྱ་བ་ལ་སོགས་པས་དཀྱུས་མ་རྩོམ་སྟེ་མཐའ་ནི་ཐ་མའོ། །ཐོག་མ་ནི་གང་ལས་སྔོན་རོལ་ན་མེད་པའོ། །དབུས་ནི་མཐའ་གཉིས་ཀྱིས་ཡོངས་སུ་བཅད་པའོ། །བརྟག་དགོས་ཞེས་བྱ་བ་འདིས་ནི་འདི་རྟོག་པས་ཀུན་
ནས་བསླང་བ་ཐ་སྙད་པ་ཡིན་གྱི་ཡང་དག་པ་ནི་མ་ཡིན་ནོ་ཞེས་སྟོན་པར་བྱེད་དོ། །དེ་ལྟར་ཞེས་བྱ་བ་ནི་བཤད་མ་ཐག་པའི་ཚུལ་གྱིས་སོ། །གང་ལ་གསུམ་གྱི་བདག་ཉིད་ཀྱིས་རང་གི་ངོ་བོ་ཡོད་པ་དེ་ནི་གསུམ་བདག་གོ། །འཇིག་རྟེན་ནི་སེམས་ཅན་དང་སྣོད་དུ་བགྲང་བའོ། །སྐད་ཅིག་མ་སྐྱེས་མ་ཐག་
ཏུ་འཇིག་པའི་དུས་སོ། །ཇི་ལྟར་སྐད་ཅིག་མའི་ཐ་མ་ལ་སོགས་པ་ལ་བསམ་པ་བྱས་པ་དེ་བཞིན་དུ་ཐོག་མ་ལ་སོགས་པ་ལ་ཡང་བྱའོ། །དེ་ལྟ་ཡིན་ན་གནས་མེད་པའི་ཕྱིར་ངོ་བོ་མང་པོ་ཁོ་ནར་འགྱུར་གྱི་སྐད་ཅིག་ཅེས་བྱ་བ་གཅིག་ནི་ཡོད་པ་མ་ཡིན་ནོ། །བརྒྱ་ལ་གལ་ཏེ་སྐད་ཅིག་མ་གཅིག་མེད་ན་
འོ་ན་ཐོག་མ་ལ་སོགས་པ་ཡོད་དོ་སྙམ་དུ་སེམས་ན། རང་བཞེན་ལས་ཀྱང་མ་ཡིན་ནོ། །ཞེས་བྱ་བ་ལ་སོགས་པ་དེ་དགག་པ་མཛད་དོ། །འདི་སྐད་དུ་བཤད་པ་ཡིན་ཏེ། ཅུང་ཟད་ཅིག་སྐྱེ་ན་རང་ངམ་གཞན་ལས་རང་གི་ངོ་བོ་ཐོབ་གྲང་ན། དེ་ལ་རེ་ཞིག་རང་ལས་ནི་མ་ཡིན་ཏེ་འགལ་བའི་ཕྱིར་རོ། །

172-1-143b

གཞན་ལས་ཀྱང་མ་ཡིན་ཏེ། རྒྱུ་ཁྱད་པར་མེད་པ་ལས་འབྲས་བུ་ཐ་དད་པ་མེད་པར་ཐལ་བར་འགྱུར་བའི་ཕྱིར་རོ། །དེ་ལྟར་ན་རང་དང་གཞན་ལས་ཀྱང་མ་ཡིན་པས་གསུམ་ཆར་ཡང་དེ་ལྟ་བུ་ཉིད་དུ་མི་འགྱུར་རོ། །དེ་ལྟར་ན་དུ་མའི་བདག་ཉིད་ཡིན་པའི་ཕྱིར་གཅིག་ཅེས་བྱ་བ་མེད་
དོ། །གལ་ཏེ་དེ་ལྟར་ཕྱོགས་ཐ་དད་པའི་ཕྱིར་གཅིག་པ་མེད་ན་གང་ཞིག་ཕྱོགས་མེད་ཅིང་ཆ་ཤས་མེད་པ་གང་ཡིན་པ་དེ་དེ་འདྲ་བ་ཡིན་ན་འགྱུར་རོ། །དེ་གང་ཞིག་ཡིན་སེམས་རེ་ཞིག་དེ་ནི་གཅིག་པ་མ་ཡིན་ཏེ། སྐྱེ་བ་དང་གནས་པ་དང་། འཇིག་པ་དུས་མང་པོ་དང་ལྡན་པ་ཉིད་ཀྱིས་
གསུམ་གྱི་བདག་ཉིད་ཡིན་པའི་ཕྱིར་རོ། །འོ་ན་རྡུལ་ཕྲ་རབ་དག་ཡིན་ནོ་ཞེ་ན། དེ་དག་ཀྱང་ཆ་ཤས་དང་བཅས་པ་ཉིད་དུ་བརྒྱ་པ་དང་བདུན་བརྒྱ་པ་ལས་རབ་ཏུ་བསྒྲུབས་ཟིན་ཏོ། །འོ་ན་བརྡ་སྤྲོད་པ་པས་བརྟགས་པ་སྒྲ་གསལ་ཞེས་བྱ་བའི་སྒྲ་ཡིན་པར་འགྱུར་རོ་ཞེ་ན། དེ་ཡང་ཆ་ཤས་མེད་པ་ཉིད་
ཡིན་ན་ང་རོ་བཞིན་གསལ་བར་བྱེད་པ་མ་ཡིན་པས་ཆ་ཤས་དང་བཅས་པ་ཡིན་ནོ། །དེ་དག་ཐམས་ཅད་ཀྱང་སྐད་ཅིག་མ་ཡིན་པའི་ཕྱིར་ཆ་ཤས་དང་བཅས་པ་ཡིན་ཏེ། དེས་ན་སུན་དབྱུང་བ་དེ་ཉིད་ཡིན་ནོ། །དེའི་ཕྱིར་དེ་ལྟར་ན་ཕྱོགས་མེད་པ་ནི་འགའ་ཡང་མེད། གལ་ཏེ་འདི་སྙམ་དུ་
གཅིག་པ་མ་ཡིན་དུ་ཟད། མ་ཡིན་པར་འགྱུར་རོ་སྙམ་དུ་སེམས་ན། དེའི་ཕྱིར་གཅིག་མེད་པར་ནི་ཞེས་བྱ་བ་ལ་སོགས་པ་སྨོས་ཏེ། དུ་མ་ནི་གཅིག་ལ་ལྟོས་ནས་ཡིན་གྱི་དེ་མེད་པར་ནི་མ་ཡིན་པས་གཅིག་ཀྱང་མེད་ལ་དུ་མ་ཡང་མེད་དོ། །མེད་པ་ཉིད་ཁོ་ནར་འགྱུར་རོ་ཞེ་ན། དེ་ལྷག་མས་
འགག་གོ། །དོན་ནི་འདི་ཡིན་ཏེ། གལ་ཏེ་ཡོད་པ་ཉིད་གཅིག་ཁས་བླངས་པར་གྱུར་ན་ནི་དེ་ལ་ལྟོས་ནས་དེར་འགྱུར་རོ་ཞེས་བྱ་བ་ཡིན་ནོ། །གལ་ཏེ་ཇི་ལྟར་དེ་ལྟ་བུ་ཡིན་ཞེ་ན། དོན་དེ་མཇུག་ཐོགས་ཀྱི་ཚིགས་སུ་བཅད་པས་སྟོན་ཏོ། །ཡོད་པ་ཉིད་དང་ལྡན་པ་ན་ཡོད་པ་ཉིད་དེ། དཔེར་ན་བྱ་རོག་ནག་པོ་
ཉིད་ཅེས་བྱ་བ་ལྟ་བུའོ། །དེ་ཞིག་ཅིང་ཟད་པའམ་གཉེན་པོ་སྟེ་དཔེར་ན་འདི་ན་སྦྲུལ་ཡོད་དོ་ཞེས་སྦྲུལ་གྱི་དུག་གིས་འཇིགས་པར་གྱུར་པ་ལས་དེའི་གཉེན་པོ་ནེའུ་ལེ་ཡོད་པས་མེད་དོ་ཞེས་བྱ་བ་ལྟ་བུས་སོ། །མེད་པ་ཉིད་ནི་དེ་ལྟ་ཡིན་པར་འགྱུར་གྲང་ན། ཡོད་པ་སྲིད་པ་མ་ཡིན་ཕྱིར། །ཡོད་

172-1-144a

པ་ཉིད་མི་སྲིད་ཅིང་ཁས་མ་བླངས་པའི་ཕྱིར་གཉི་ག་མི་རིགས་སོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་དེ་མྱ་ངན་ལས་འདས་པའི་རྒྱུས་སེམས་ཅན་ཞེས་བྱ་བའི་འཇིག་རྟེན་དོན་དུ་དོན་དམ་པར་འགྲིབ་ཅིང་འབྲི་བར་མི་འགྱུར་ཉེ་བར་མི་འགྲོའོ། །དེའི་ཕྱིར་འཇིག་རྟེན་འདི་མཐའ་དང་
ལྡན་ནམ་ཅི་ལགས་ཞེས་ཞུས་ན། བཅོམ་ལྡན་འདས་ཅང་མི་གསུང་བར་བཞུགས་ཏེ། སྐྱེ་བ་ཡོད་ན་ཡོད་པ་ཉིད་ཡོད་ལ། །དེའི་མཐའ་མ་ནི་མཐའ་ཡིན་ན་དེ་མེད་པའི་ཕྱིར་དེ་ནི་མེད་ལ། འདི་ཡང་ཆོས་དེ་ལྟ་བུ་མཉན་པར་བྱ་བའི་སྐལ་བ་ཅན་མ་ཡིན་པས་དེ་ཡོངས་སུ་སྤང་བར་བཞེད་ནས་ཅང་མི་
གསུང་བར་བཞུགས་པ་ཡིན་ནོ། །དོན་དེ་ཉིད་གསལ་བར་མཛད་པ་དང་། ཕན་ཡོན་བསྟན་པར་མཇུག་ཐོགས་པས་སྨོས་ཏེ་རྒྱུ་གང་གི་ཕྱིར་རོ། །ཟབ་མོའི་ཆོས་ནི་འདི་ཟབ་པ་ཡང་ཡིན་ལ་ཆོས་ཀྱང་ཡིན་པས་སོ། །མི་གསུང་བ་ནི་བཀའ་མི་སྩོལ་པའོ། །གང་ལ་ཞེ་ན། སྣོད་མིན་ཞིང་སྣོད་དུ་མ་གྱུར་
པའི་འགྲོ་བའོ། །རྒྱུ་དེ་ཉིད་ཀྱི་ཕྱིར་མཁས་པ་ཤེས་ཉེན་ཅན་རྣམས་ཀྱིས་ཀུན་མཁྱེན་པའི་ངོ་བོར་ཐམས་ཅད་མཁྱེན་པའོ་ཞེས་བྱ་བར་ཤེས་ཤིང་རྟོགས་སོ། །འདི་སྐད་དུ་བཤད་པ་ཡིན་ཏེ། ཡང་དག་པར་ན་ངོ་བོ་ཉིད་མེད་པ་ཡིན་པས་ཆོས་ཐམས་ཅད་ནི་གཉིས་སུ་མེད་པ་ཡིན་ལ། དེ་དག་ཀྱང་
བཅོམ་ལྡན་འདས་ཀྱིས་མདོ་སྡེ་དེ་དང་དེ་དག་ལས་དེ་ཁོ་ན་བཞིན་དུ་གསུངས་ཏེ། འདི་སྐད་དུ། ཆོས་ཀུན་རྟག་ཏུ་ངོ་བོ་ཉིད་ཀྱིས་སྟོང་། །རྒྱལ་བའི་སྲས་རྣམས་དངོས་པོ་རྣམ་པར་འཇིག །སྲིད་པ་ཐམས་ཅད་རྣམ་པ་ཀུན་དུ་སྟོང་། །ཉི་ཚེའི་སྟོང་ཉིད་མུ་སྟེགས་ཅན་རྣམས་ཀྱིས། །ཞེས་
གསུངས་པ་དང་། ཡང་། གང་ཞིག་སྟོང་ཉིད་ཤེས་པ་དེ་བག་ཡོད། །ཅེས་གསུངས་པ་ལྟ་བུའོ། །བརྗོད་པ་ནི་ཤེས་པའི་འབྲས་བུ་ཡིན་ནོ་ཞེས་གཞན་ནས་རྒྱས་པར་བསྟན་ཟིན་ཏོ། །དོན་འདི་ནི་འཇིག་རྟེན་ཐམས་ཅད་ཀྱིས་ཉམས་སུ་མྱོང་བས་གྲུབ་པ་ཡང་ཡིན་ཏེ། རྣམ་པར་བསམས་ནས་དེ་
བཞིན་དུ་སྨྲ་བའི་ཕྱིར་རོ། །གང་ལ་ཤེས་པ་སྣང་བར་གྱུར་པ་ཡོད་པ་དེ་ལ་མི་ཤེས་པ་མུན་པར་གྱུར་པ་འགག་སྟེ་སྣང་བ་དང་མུན་པ་བཞིན་ནོ། །གང་ལ་ཡུལ་ཐམས་ཅད་པའི་ཡེ་ཤེས་ཡོད་པ་དེ་ནི་ཐམས་ཅད་མཁྱེན་པ་ཞེས་བྱའོ། །དེ་ལྟར་ཞེས་བྱ་བ་ནི་དེ་ལྟར་ཇི་སྐད་བཤད་པའི་རིམ་པས་ཞེས་

172-1-144b

མཇུག་སྡུད་པ་སྟོན་པ་ཡིན་ནོ། །གང་ལ་ཡོངས་སུ་འཛིན་པ་སྟེ་རང་གིར་བྱེད་པ་ཡོད་པ་དེ་ལ་དེ་སྐད་ཅེས་བྱའོ། །གནས་ནི་རྟེན་ནོ། །འདི་ལ་གནས་ཡོད་པ་མ་ཡིན་པས་ན་གནས་མེད་པའོ། །རྫོགས་སངས་རྒྱས་ནི་ཀུན་ནས་མཁྱེན་པ་ཅན་ནོ། །ཐམས་ཅད་གཟིགས་པ་རྣམས་ཀྱིས་ཞེས་བྱ་བ་ལ་གཟིགས་
པ་ནི་གཟིགས་པར་བྱེད་པ་སྟེ་སྤྱན་གྱི་རྣམ་པར་ཤེས་པའོ། །ཐམས་ཅད་དུ་གཟིགས་པས་ཐམས་ཅད་གཟིགས་པའོ། །ཐམས་ཅད་དུ་འགྲོ་བའི་སྤྱན་གྱིས་རྣམ་པར་ཤེས་པ་ཅན་རྣམས་ཀྱིས་ཏེ་ལྷའི་སྤྱན་ཅན་རྣམས་ཀྱིས་ཞེས་བྱ་བའི་ཐ་ཚིག་གོ། །ཡང་དང་ཡང་དུ་བཀའ་སྩལ་པ་ནི་གསུངས་པའོ། །ཆོས་
འདིས་སྐྲག་པར་ཞེས་བྱ་བར་སྦྱར་རོ། །ཁྱད་པར་ཇི་ལྟ་བུ་ཅན་ཞིག་གིས་ཤེ་ན་གནས་མེད་པས་སོ། །ཅིའི་ཕྱིར་སྐྲག་ཅེ་ན། གནས་ལ་མངོན་དགའ་ཞེས་བྱ་བ་སྨོས་ཏེ། དེ་དང་དེར་སྐྱེ་བས་ན་སྐྱེ་བའོ། །གནས་དང་བཅས་པ་ཁོ་ནའི་ཆོས་ལ་མངོན་པར་དགའ་ཞིང་ཆགས་པ་ཞེས་བྱ་བའི་ཐ་ཚིག་གོ། །སྐྲག་
པའི་རྒྱུ་གཞན་ནི་འདེ་ཡིན་ཏེ། མ་འདས་པ་ནི་དེ་ཉིད་ལ་གནས་པ་ཞེས་བྱ་བའི་དོན་ཏོ། །མི་མཁས་པ་ནི་ཤེས་རབ་ཅན་མ་ཡིན་པའོ། །དེ་ལྟ་བུ་དེ་དག་ཅིར་འགྱུར་ཞེ་ན་ཕུང་བར་འགྱུར་ཏེ། མྱ་ངན་ལས་འདས་པ་དང་བདེ་འགྲོ་ལ་ལན་མང་དུ་ནི་སྣང་ཞིང་ཉམས་པར་འགྱུར་རོ། །དེ་ལྟ་བུ་དེ་དག་བདག་ཉིད་
ཕུང་བ་ཡིན་ནོ་ཞེས་དེ་ལྟར་བསམས་ནས་ཅི་ཕུང་བར་མི་འགྱུར་བ་དེ་ལྟར་སྔར་བཤད་པའི་དོན་དེ་ལ་སེམས་བརྟན་པོར་གྱིས་ཤིག །ཁྱོད་ཆོས་ཀྱི་སྣོད་ཡིན་ནོ་ཞེས་ཁྱོད་མི་རུང་ཞིང་ཡོངས་སུ་ཉམས་པར་མི་འགྱུར་བར་བྱ་བའི་ཕྱིར་རོ། །འཇིག་རྟེན་འཁོར་བ་ལས་འདས་པ་ནི་མཆོག་གོ། །འདིས་ལན་
ཅིང་འཐོབ་པས་ན་དེ་སྐད་ཅེས་བྱའོ། །ཡང་ན་ཁྱེར་བར་བྱེད་པས་ན་ཚུལ་དེ་ཡང་དག་པའི་གདམས་ངག་གོ། །གཉིས་པ་རྟེན་ཅིང་འབྲེལ་པ་མེད་པ་དེ་ལ་དེ་སྐད་ཅེས་བྱའོ། །ཡང་དག་པ་ཇི་ལྟ་བུ་བཞིན་ནི་བདེན་པའོ། །ལུང་ནི་ཡིད་ཆེས་པའི་བཀའ་སྟེ། དེའི་དབང་གིས་ཞེས་བྱ་བ་ནི་དེ་
གསུངས་པའི་ལུགས་ཀྱིས་རྗེས་སུ་འབྲངས་ནས་ཡིན་གྱི་རང་གི་བློ་ནི་མ་ཡིན་ནོ་ཞེས་བྱ་བ་ཡིན་ནོ། །སྡིག་དང་ཞེས་བྱ་བ་ལ་སོགས་པ་ནི་སྡིག་པ་ལ་སོགས་པ་མི་སྲིད་པར་སྟོན་ཏེ། སྡིག་པ་དང་བསོད་ནམས་ནི་སྡིག་དང་བསོད་ནམས་དག་སྟེ་དེ་དག་ཉིད་བྱ་བ་ཡིན་ཏེ། དེ་དག་ནི་ལུས་དང་ངག་དང་

172-1-145a

ཡིད་རབ་ཏུ་འཇུག་པའི་མཚན་ཉིད་ཡིན་པའི་ཕྱིར་རོ། །གང་ལ་དེ་དག་འདས་ཤིང་རྒལ་བ་ཡོད་པ་དེ་ལ་དེ་སྐད་ཅེས་བྱའོ། །ཚུལ་དེ་ཞེས་བྱ་བར་སྦྱར་རོ། །དེ་ནི་བཀྲོལ་ཞིང་རབ་ཏུ་བསྟན་པ་ཡང་ཡིན་ལ་དོན་ཡང་ཡིན་པས་བཀྲོལ་བའི་དོན་ཏོ། །དེ་འདི་ལ་ཡོད་པས་ན་བཀྲོལ་བའི་
དོན་དང་ལྡན་པའོ། །ཆུ་བོ་དང་རྒྱ་མཚོར་འཇུག་པའི་ལམ་ནི་མུ་སྟེགས་ཏེ། གྲུབ་པའི་མཐའ་ཐམས་ཅད་ཀྱང་འཁོར་བ་དང་མྱ་ངན་ལས་འདས་པའི་རྒྱ་མཚོའི་རང་གི་ངོ་བོ་ལ་འཇུག་པའི་ཕྱིར་རབ་ཏུ་སྦྱར་བ་ཡིན་པས་མུ་སྟེགས་ཡིན་པར་བརྟག་གོ། །དེ་འདི་ལ་ཡོད་པས་ན་མུ་སྟེགས་ཅན་ནོ། །གསུང་
རབ་འདི་ལས་གཞན་པ་འདི་དག་གིས་མ་མྱངས་ཤིང་རོ་མྱངས་པ་སྟེ་བྱེ་བྲག་ཏུ་མ་ཤེས་པ་ཞེས་བྱ་བའི་དོན་ཏོ། །གནས་ནི་དམིགས་པའོ། །འདི་ལ་བརྟེན་པས་ན་དེ་སྐད་ཅེས་བྱ་སྟེ། དེས་འཇིགས་ཤིང་སྐྲག་པ་རྣམས་ཀྱིས་སོ། །འཇིག་རྟེན་འདས་ཀྱི་ཚུལ་བཤད་ཅེས་སྨོས་པ་སྟེ། དེ་སྐྱེས་བུས་མིན་
ཞེས་བྱ་བ་ལ་སོགས་པས་སྟོན་ཏོ། །འདི་སྐད་དུ་བཤད་པ་ཡིན་ཏེ། འཇིག་རྟེན་ཞེས་བྱ་བའམ་འཁོར་བ་ཞེས་བྱ་བ་ནི་གཟུགས་ལ་སོགས་པའི་ཕུང་པོ་འདི་དག་ཁོ་ན་ལ་བྱའོ། །དེ་ལ་གཟུགས་ཀྱི་ཕུང་པོ་ནི་འབྱུང་བ་དང་འབྱུང་བ་ལས་གྱུར་པའི་ཚོགས་ཡིན་ནོ། །ཚོར་བ་ལ་སོགས་པའི་ཕུང་པོ་
ཡང་སེམས་དང་སེམས་ལས་བྱུང་བའི་ངོ་བོ་ཡིན་ནོ། །འདི་ལ་ནི་འཇིག་རྟེན་ཕོ་དང་མོ་ཞེས་བྱ་བར་མངོན་པར་ཞེན་པས་དེ་དཔྱད་པར་མཛད་དེ། རེ་ཞིག་འབའ་ཞིག་ནི་སྐྱེས་བུ་མ་ཡིན་ནོ། །ལྷག་མ་རྣམས་ཀྱང་འབའ་ཞིག་ནི་དེ་དང་འདྲའོ། །ཀུན་འདུས་པ་ཡང་མ་ཡིན་ཏེ། དེ་ལྟ་བས་
ན་སྐྱེས་བུ་ནི་དེ་ལྟར་ངོ་བོ་ཉིད་མེད་དོ། །དེའི་ཕྱིར་སྐྱེས་བུ་ནི་མེད་པ་ཁོ་ན་སྟེ། ཁམས་དྲུག་ལ་སྐྱེས་བུ་ཞེས་བཤད་ཀྱི་གཞན་ནི་མ་ཡིན་ན་དེ་དག་ཀྱང་དེ་ལྟར་དཔྱད་ན་ཁམས་དྲུག་ཅར་ཡང་སྐྱེས་བུ་མ་ཡིན་ནོ། །གལ་ཏེ་འདི་སྙམ་དུ་སྐྱེས་བུ་མ་ཡིན་དུ་ཟད། ཁགས་རྣམས་ནི་ཡོད་དོ་སྙམ་
དུ་སེམས་ན། མཇུག་ཐོགས་ནས་འབྱུང་བས་དེ་འགོག་སྟེ། ཁམས་དྲུག་ལ་བཏགས་པར་ཟད་པས་ཁམས་དྲུག་སྐྱེས་བུ་འདུས་པའི་ཕྱིར་དེའི་ངོ་བོ་ཡིན་པ་ཇི་ལྟ་བ་ཡིན་པ་དེ་བཞིན་ཁམས་ལ་སོགས་པའི་མཚན་ཉིད་ཀྱང་ཚུལ་འདི་ཉིད་ཀྱིས་སོ། །འདི་སྐད་དུ་བཤད་པ་ཡིན་ཏེ། ས་ལ་སོགས་

172-1-145b

པ་ཡང་རྡུལ་ཕྲ་རབ་འདུས་པ་ཡིན་པ་དེའི་ཕྱིར་དེ་དག་ཀྱང་ཡང་དག་པར་ན་ས་ལ་སོགས་པའི་ངོ་བོ་ཉིད་དུ་མི་འགྱུར་རོ། །གལ་ཏེ་བདག་ཏུ་སྨྲ་བ་རྣམས་འདི་སྙམ་དུ་སེམས་ཏེ། སྐྱེས་བུ་དང་ཁམས་རྣམས་ལྟ་མེད་དུ་ཟད་བདག་ནི་ཡོད་དོ་ཞེ་ན། མཇུག་ཐོགས་ནས་འབྱུང་བས་དེ་འགོག་སྟེ།
རེ་ཞིག་ཕུང་པོ་རྣམས་ནི་བདག་མ་ཡིན་ཏེ། དེའི་ངོ་བོ་ཉིད་མ་ཡིན་ནོ་ཞེས་བྱ་བའི་དོན་ཏོ། །བདག་དེར་ཕུང་པོ་དེ་རྫ་མ་དང་རྒྱ་ཤུག་གི་ཚུལ་དུ་ནི་མ་ཡིན་ཏེ། གལ་ཏེ་ཡིན་པར་གྱུར་ན་སོ་སོ་རང་གི་ངོ་བོ་དམིགས་པར་འགྱུར་བ་ཞིག་ན་དེ་ལྟ་ན་ཡང་མ་ཡིན་ནོ། །འོན་ཏེ་ལུས་ཅན་མ་ཡིན་པའི་ཕྱིར་ད་
ལྟར་མི་འགྱུར་རོ་ཞེས་ལུས་ཅན་མ་ཡིན་པ་ནམ་མཁའ་དང་འདྲ་བ་ལྟ། རྟེན་ཀྱང་ཇི་ལྟ་བུ་ཞིག་ཡིན་པར་འགྱུར། །ཆུ་ལ་སོགས་པ་རླུང་གི་དཀྱིལ་འཁོར་ལ་གནས་པ་ཞེས་བྱ་བ་དཔེར་བྱར་ནི་མི་རུང་ངོ་། །ཕུང་པོ་དེ་ལ་བདག་དེ་ཡང་མ་ཡིན་ནོ། །དེ་མེད་པར་ཏེ་ཕུང་པོ་དེ་མེད་པར་ཡང་རིགས་
པའི་སྒོ་ནས་དམིགས་པ་མ་ཡིན་ནོ། །ཕུང་པོ་དག་དང་ལྷན་ཅིག་མེ་དང་བུད་ཤིང་ལྟར་འདྲེས་ཤིང་གཅིག་ཏུ་གྱུར་པ་ཡང་མ་ཡིན་ཏེ། དེ་ལྟ་ཡིན་ན་ནི་འདི་ནི་བདག་གོ། །འདི་དག་ནི་ཕུང་པོ་ཞེས་བྱ་བར་ཕྱེད་པར་མི་འགྱུར་ཏེ་ཆུ་དང་འོ་མ་བཞིན་ནོ། །དེའི་ཕྱིར་ཇི་ལྟར་ན་ཡོད་ཅེས་བྱ་བར་ཤེས། ཇི་ལྟར་
བདག་དང་སྲོག་མེད་པ་ལྟར་ས་ལ་སོགས་པ་ཡང་དེ་དང་འདྲའོ་ཞེས་བྱ་བར་བསྟན་པའི་ཕྱིར་འབྱུང་གསུམ་ས་མིན་ཞེས་བྱ་བ་ལ་སོགས་པ་སྨོས་སོ། །རེ་ཞིག་ས་འདི་འབྱུང་བ་གསུམ་མ་ཡིན་ཏེ། དེའི་ངོ་བོ་ཉིད་མ་ཡིན་ནོ། །ས་འདི་ལ་འབྱུང་བ་གསུམ་ཡང་མ་ཡིན་ཏེ་སྔ་མ་ཡིན་ཏེ་སྔ་མ་བཞིན་ནོ། །
འབྱུང་བ་གསུམ་ལ་ཡང་ས་འདི་མ་ཡིན་ནོ། །དེ་མེད་པར་ཏེ་འབྱུང་བ་གསུམ་མེད་པར་མ་ཡིན་ནོ། །ས་ཇི་ལྟ་བར་ལྷག་མ་གསུམ་ཡང་དེ་དང་འདྲ་བའོ། །ཡིན་ཞེས་བྱ་བའི་སྒྲ་ནི་དེ་ལྟ་བས་ན་ཞེས་པའི་དོན་ཡིན་ཏེ། གཏན་ཆིས་དེའི་ཕྱིར་རོ། །ས་ལ་སོགས་པ་འབྱུང་བ་རེ་རེ་ཡང་ངོ་བོ་ཉིད་མེད་དོ་ཞེས་
བྱ་བའི་གཏན་ཚིགས་སུ་གང་ཞེས་བྱ་བའི་སྒྲ་སྨོས་ཏེ། གང་གི་ཕྱིར་གསུམ་མེད་པར་རེ་རེ་མེད་ལ། གཅིག་མེད་པར་ཡང་གསུམ་མེད་པ་ཞེས་བྱ་བ་ནི་ཚིག་ལྷག་མ་ཡིན་ནོ། །གལ་ཏེ་ཞེས་བྱ་བའི་སྒྲ་ནི་ཅི་སྟེ་ཞེས་བྱ་བའི་དོན་ཡིན་ཏེ། ཅི་སྟེ་གསུམ་མེད་པར་ཡང་རེ་རེ་མེད་ལ། གཅིག་མེད་

172-1-146a

པར་ཡང་གསུམ་མེད་ན། ས་ལ་སོགས་པ་སོ་སོར་རང་ཡོད་པ་མ་ཡིན་ནོ། །སོ་སོ་རང་སྟེ་རང་གི་ངོ་བོ་ཞེས་བྱ་བའི་ཐ་ཚིག་གོ། །ཡོད་པ་ནི་མེད་པ་སྟེ། འདི་སྐད་དུ་རང་རང་གི་ངོ་བོར་ཡོད་པ་རྣམས་འདུས་པ་ནི་འདྲེས་པ་ཡིན་ནོ་ཞེས་བཤད་པ་ཡིན་ནོ། །འོན་ཏེ་
སོ་སོ་རང་སྟེ་རང་རང་གི་ངོ་བོར་སོ་སོར་ལོགས་ཤིག་ན་ཡོད་ནའོ། །ཅིས་མེད་དེ། དེ་ཅིའི་ཕྱིར་མེད། གཡོ་བ་ནི་རླུང་ངོ་། །ཐོགས་པ་ནི་རྡུགས་པ་སྟེ་སའི་ཁམས་སོ། །སྡུད་པ་ནི་འབྱར་བའི་ངོ་བོ་སྟེ་ཆུའི་ཁམས་སོ། །དེ་དག་མེད་པར་ཆུ་དང་རླུང་དང་ས་རེ་རེ་ཡང་དེ་བཞིན་ནོ། །འོན་ཏེ་མེ་འདི་བུད་ཤིང་
མེད་ན་མི་དམིགས་པའི་ཕྱིར། ལོགས་ཤིག་ཏུ་རང་གི་ངོ་མེད་ན་ཇི་ལྟར་ཐབས་གང་གིས་ཁྱོད་ཀྱི་ལྷག་མ་གསུམ་པོ་རང་བཞིན་ཏེ། དེ་དག་ཕན་ཚུན་མ་འདྲེས་པར་ལོགས་ཤིག་ན་སོ་སོའི་རང་གི་ངོ་བོར་ཡོད་དོ་སྙམ་དུ་དགོངས་པ་ཡིན་ནོ། །དེ་ལྟ་བས་ན་དེ་ནི་འདྲ་བར་བལྟ་བར་བྱའོ། །འདི་ལ་
གཏན་ཚིགས་ཅི་ཡོད་སྙམ་ན། ལྷག་མས་གཏན་ཚིགས་སྨོས་ཏེ། གསུམ་པོ་ནི་མེ་མ་གཏོགས་པ་ལྷག་མ་རྣམས་སོ། །རྒྱུ་ལ་བརྟེན་ཅིང་གནས་ནས་འབྱུང་བ་ནི་སྐྱེ་བའོ། །ཆོས་མི་མཐུན་པ་ནི་མི་འདྲ་བའོ། །འང་ཞེས་བྱ་བའི་སྒྲ་ནི་གང་གི་ཕྱིར་ཞེས་བྱ་བའི་དོན་ཏོ། །འདི་སྐད་དུ་བཤད་པ་ཡིན་
ཏེ། རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་བྱ་བ་དེ་ལ་གཟུགས་ཞེས་བྱ་བ་ནི་འབྱུང་བ་ཆེན་པོ་བཞི་དང་འབྱུང་བ་ཆེན་པོ་བཞི་རྒྱུར་བྱས་པ་དག་ཡིན་ནོ། །གལ་ཏེ་མེ་ལོགས་ཤིག་ཏུ་རང་གི་ངོ་བོར་ཡོད་པར་གྱུར་ན་གསུམ་ཁོ་ན་ལྷན་ཅིག་འབྱུང་བས་རྟེན་ཅིང་འབྲེལ་པར་འབྱུང་བ་དང་
ཆོས་མི་མཐུན་པར་འགྱུར་ཏེ། དེ་ལྟར་ནི་རུང་བ་མ་ཡིན་ནོ། །ཡང་ན་ཉེས་པ་གཞན་འདི་ཡང་ཡོད་དོ་ཞེས་བྱ་བ་ཚིག་ལྷག་མ་ཡིན་ཏེ། འང་ཞེས་བྱ་བའི་སྒྲ་ནི་བསྡུ་བའི་དོན་དུ་བྱའོ། །སོ་སོ་རང་ཡོད་ཀྱང་རུང་མེད་ཀྱང་རུང་ཕན་ཚུན་བསྟེན་པ་ཡང་སྐྱོན་ཡིན་པར་ནི་མཇུག་ཐོགས་ནས་འབྱུང་བས་
སྟོན་ཏོ། །གལ་ཏེ་ཉེས་པ་དེར་འགྱུར་དུ་འོང་ཞེས་ཏེ། གང་ན་འབྱུང་བ་གཅིག་ཡོད་པ་དེ་ན་ལྷག་མ་རྣམས་ཡོད་དོ་ཞེས་བྱ་བར་ཁས་ལེན་ན་གཅིག་ཏུ་གནས་པ་ཉིད་ལ་གཞན་དུ་གྱུར་པ་མི་འཐད་པས་དེ་ལྟ་ན་གཅིག་ཏུ་གནས་པ་ཉིད་དུ་ཁས་བླངས་པར་འགྱུར་རོ། །གྱུར་དུ་ཟད་མོད་ཉེས་པ་ཅི་ཡོད་ཅེ་ན།

172-1-146b

མ་འདྲེས་པ་རྣམས་གཅིག་གནས་མེད། །ཞེས་བྱ་བ་ལ་སོགས་པ་སྨོས་ཏེ། འདྲེས་པ་རྣམས་ནི་སོ་སོ་ལོགས་ཤིག་གི་རང་གི་ངོ་བོ་ཉམས་པར་འགྱུར་ཏེ། སྦྲང་རྩི་དང་མར་དང་འོ་མ་དང་ཆུ་བཞིན་ནོ། །འབྱུང་བ་རྣམས་ཀྱི་མཚན་ཉིད་ཀྱང་རུང་བ་མ་ཡིན་ནོ་ཞེས་མཇུག་ཐོགས་ནས་འབྱུང་བས་སྟོན་ཏེ་
ཤས་ཆེ་བ་ནི་ལྷག་པའོ། །འོ་ན་མཚན་ཉིད་ཇི་ལྟར་བཀའ་སྩལ་ཞེ་ན། མཚན་ཉིད་དག་ནི་ཀུན་རྫོབ་བཤད། །ཞེས་བྱ་བ་སྨོས་ཏེ། ཀུན་རྫོབ་ཏུ་ཐ་སྙད་དུ་ཡིན་ལ། འདི་ནི་དེ་ཁོ་ན་ཉིད་བསམ་པ་ཡིན་པས་ཉེས་པ་མེད་དོ། །འབྱུང་བ་ཆེན་པོ་མེད་པར་བསྟན་པའི་ཚུལ་ཏེ། ཐབས་
བཤད་པ་གང་ཡིན་པའི་ཐབས་དེ་ཉིད་ཁ་དོག་ལ་སོགས་པའི་ཡང་ཡིན་ནོ། །འབྱུང་བ་དགག་པ་འདས་མ་ཐག་པས་བརྟེན་པ་ཡང་བཀག་ཟིན་པ་ཉིད་ཡིན་མོད་ཀྱི་གསལ་བར་བྱ་བའི་ཕྱིར་འདིར་སྨོས་པར་ཟད་དེ། ཁ་དོག་ནི་གཟུགས་སོ། །འདི་སྐད་དུ་བཤད་པ་ཡིན་ཏེ། འདི་
དག་ཀྱང་འདྲེས་པར་འགྱུར་བར་འདོད་དོ། །ཕྲ་རབ་རྡུལ་ནི་རྫས་བརྒྱད་དོ། །ཞེས་བྱ་བས་སོ། །དེ་ལྟ་བས་ན་དེ་དག་ཀྱང་འབྱུང་བ་བཞིན་མེད་པར་སྒྲུབ་པ་ལ་རིགས་པ་ནི་དེ་ཉིད་ཡིན་ནོ། །དེ་ལྟར་འབྱུང་བ་དང་འབྱུང་བ་ལས་གྱུར་པ་རྣམས་ཡོད་པ་མ་ཡིན་པར་བསྟན་ནས། ད་ནི་མིག་ཅེས་
བྱ་བ་ནས་བཟུང་སྟེ། མིང་དང་མིང་ཅན་ཞེས་བྱ་བའི་བར་སྤྱིར་གཟུགས་ཅན་མ་ཡིན་པའི་དོན་རྣམས་ལ་ཡང་ཚུལ་ནི་འདི་ཉིད་ཡིན་ནོ་ཞེས་བྱ་བར་དེ་བཞིན་ནོ་ཞེས་བྱ་བའི་སྒྲས་སྟོན་ཏོ། །མིག་གིས་མཚོན་པ་རྣ་བ་ལ་སོགས་པ་དང་། གཟུགས་ཀྱིས་མཚོན་པ་སྒྲ་ལ་སོགས་པ་དང་། མིག་གི་
རྣམ་པར་ཤེས་པས་མཚོན་པ་རྣ་བའི་རྣམ་པར་ཤེས་པ་ལ་སོགས་པ་ལ་ཡང་ངོ་། །ཡང་ན་གཟུགས་ཞེས་བྱ་བ་ངོ་བོ་ཉིད་ཀྱི་རྣམ་གྲངས་སུ་བྱས་ནས་མིག་གི་ངོ་བོ་ཉིད་ཀྱི་རྣ་བ་ལ་སོགས་པ་འབྱུང་བ་ལས་གྱུར་པའི་ངོ་བོ་ཉིད་ལ་བརྟེན་པ་དང་། དེ་བཞིན་དུ་རྣམ་པར་ཤེས་པའི་ངོ་བོ་ཉིད་རྣ་བའི་
རྣམ་པར་ཤེས་པ་ལ་སོགས་པ་རྣམ་པར་ཤེས་པའི་ངོ་བོ་ཉིད་ལ་བརྟེན་ནས་སོ། །མིག་ལ་སོགས་པའི་གཟུགས་རྣམས་ངོ་བོ་ཉིད་ཡིན་པ་ནི་དེ་དག་ཀྱང་བསགས་པའི་ངོ་བོ་ཉིད་ཡིན་པའི་ཕྱིར་རོ། །རྣམ་པར་ཤེས་པ་ལ་སོགས་པ་ཡང་ཚོགས་པའི་ངོ་བོར་འབྱུང་བའི་ཕྱིར་དེ་དང་འདྲ་

172-1-147a

བར་བསམ་པར་བྱ་བ་ཡིན་ནོ། །མ་རིག་པ་ཡང་ཉོན་མོངས་པ་དང་ཉེ་བའི་ཉོན་མོངས་པ་དག་དང་འདྲ་བ་ཡིན་པས་དེ་དང་འདྲ་བ་ཉིད་དོ། །རྣམ་པར་ཤེས་པ་སྨོས་པས། སེམས་ལས་བྱུང་བ་ཡིན་པའི་ཕྱིར་མ་རིག་པ་ཡང་སྨོས་པ་ཉིད་མ་ཡིན་ནམ། ཡང་ཅི་སྟེ་སྨོས་ཤེ་ན།
དེ་ནི་བདེན་ན་འོན་ཀྱང་དེ་ནི་གཙོ་བོ་ཡིན་པའི་ཕྱིར་ཡང་སྨོས་ཏེ། འདི་ལྟར་དེའི་སྟོབས་ཀྱིས་ནི་ཉོན་མོངས་པ་དང་ཉེ་བའི་ཉོན་མོངས་པ་གཞན་དག་ཀྱང་རབ་ཏུ་འཇུག་ལ་འཁོར་བ་ཡང་དེ་ལས་འབྱུང་ངོ་། །ལས་གཉིས་སྨིས་པའི་ཕྱིར་འདི་གང་གིས་ཡིན་པར་བཟུང་ངོ་། །ལས་ཞེས་བྱ་བའམ་བྱ་
བ་ཕུང་པོ་ལ་མ་གཏོགས་པ་དོན་གྱི་ཁྱད་པར་གཞན་དུ་བརྗོད་པའམ་དམིགས་པ་ནི་མ་ཡིན་ཏེ། རྒྱུ་མ་རིག་པ་ལ་སོགས་པ་སྔ་མ་ལ་བརྟེན་ནས་ཕུང་པོའི་ཚོགས་ཕྱི་མ་ཕྱི་མ་ལ་ལས་ཞེས་བྱ་བར་ཟད་དོ། །མ་རིག་པ་དང་སྲེད་པ་དང་ལེན་པའི་རྒྱུ་ཅན་གྱི་ཕུང་པོ་འབྱུང་བ་ཚོགས་པའི་ངོ་བོ་ནི་སྐྱེ་
བའོ། །མ་རིག་པ་དང་ལས་དང་སྐྱེ་བ་ནི་མ་རིག་པ་དང་ལས་དང་སྐྱེ་བ་རྣམས་ཏེ་དེ་རྣམས་ལའོ། །བྱེད་པས་ན་རང་དབང་ཅན་གྱི་བྱེད་པ་ནི་བྱེད་པ་པོ་སྟེ་ཕུང་པོ་ལྔའི་ངོ་བོ་ཉིད་ཡིན་ནོ། །དེའི་བྱ་བས་ཁྱབ་པ་ནི་ལས་ཏེ་འདོད་པའམ་མི་འདོད་པ་ཡིན་ནོ། །ཡང་ན་འགའ་ཡང་མི་འདོད་ཡང་མི་འདོད་པ་དུག་འཐུང་བའམ།
གཡང་སར་མཆོང་བ་མེད་པས་གང་གིས་མི་འདོད་པ་དེ་རེས་འགའ་དེ་ཉིད་ཀྱི་འདོད་པ་ཡིན་པའི་ཕྱིར་ཏེ། དེ་ཡང་ཕུང་པོ་འདུས་པའི་ངོ་བོ་ཡིན་པའི་ཕྱིར་རོ། །དེ་དག་ཉིད་ཚོགས་པའི་སྟོབས་ཀྱིས་དེ་དང་དེར་སྐྱེ་བ་ན་ཞེས་བྱ་བའི་མིང་འཐོབ་པོ། །གྲངས་ནི་གཅིག་ལ་སོགས་པ་སྟེ། །དེ་ཡང་
བགྲང་བར་བྱ་བ་ལས་མ་གཏོགས་པ་གཞན་ནི་མེད་དོ། །རྫས་དང་རྫས་གཞན་དུ་སྦྱོར་བ་ནི་ལྡན་པ་སྟེ། དེ་ཡང་དེ་ལས་གཞན་པ་ནི་མ་ཡིན་ནོ། །འོན་ཏེ་བསམ་གཏན་གྱི་མཚན་ཉིད་ཡིན་ན་ཡང་དེའི་ཚེ་བསམ་གཏན་ནི་སེམས་རྩེ་གཅིག་པའི་ཚོགས་ཀྱི་ངོ་བོ་ཡིན་ནོ། །རྒྱུ་ནི་ཕྱིའི་ས་བོན་ནོ། །འབྲས་བུ་ནི་
དེ་ལས་སྐྱེས་པ་འབྲུ་ལ་སོགས་པའོ། །དུས་ནི་འདས་པ་ལ་སོགས་པའི་ངོ་བོ་གསུམ་མོ། །དེ་དག་ཀྱང་ཕུང་པོ་ལས་མ་གཏོགས་པ་གཞན་ནི་མ་ཡིན་ཏེ། དེ་སྐད་དུ། དེ་དག་ཉིད་དུས་གཏམ་གཞི་དང་། །ངེས་པར་འབྱུང་བཅས་གཞིར་བཅས་པ། །ཞེས་བཤད་པས་སོ། །རིང་པོ་བས་ཐུང་

172-1-147b

བ་ནི་ཐུང་ངུའོ། །དེ་བས་སྲིད་དུ་ལྷག་པ་ནི་རིང་བའོ། །སྩོགས་ཞེས་སྨོས་པ་ནི་གྲུ་བཞི་དང་ཟླུམ་པོ་ལ་སོགས་པ་བསྡུའོ། །གང་དག་ལ་ཐུང་ངུ་དང་རིང་པོ་ཞེས་བྱ་བ་ལ་སོགས་པའི་མིང་ཡོད་པ་དེ་དག་ནི་དེ་དག་ཅེས་བྱའོ། །དེ་དག་ཐམས་ཅད་ཀྱང་འདུས་པའི་ངོ་བོ་ཡིན་པས་ཚུལ་ནི་དེ་ཉིད་ཡིན་ཏེ། བདག་
བཞིན་དུ་བརྫུན་པའི་ཆོས་ཡིན་ནོ་ཞེས་བྱ་བའི་ཐ་ཚིག་གོ། །དེ་ལྟར་རྒྱས་པར་བརྗོད་ནས། ཡང་མིང་དང་ཞེས་བྱ་བ་ལ་སོགས་པས་མདོར་བསྡུ་བ་མཛད་དེ་མིང་ཞེས་བྱ་བའི་སྒྲ་ནི་མིང་གི་རྣམ་གྲངས་ཡིན་ནོ། །འདི་ལ་མིང་དུ་བཏགས་པ་ཡོད་པས་ན་མིང་ཅན་ཏེ་དེ་དག་ལའོ། །ཇི་ལྟར་འབྱུང་བ་དང་འབྱུང་བ་
ལས་གྱུར་པ་རྣམས་འདུས་པའི་ངོ་བོ་ཡིན་པའི་ཕྱིར་བརྟགས་ན་བདག་བཞིན་དུ་བརྫུན་ཏེ་བདེན་པ་མ་ཡིན་པ་ལྟར་འདི་དག་ཀྱང་དེ་བཞིན་ནོ་ཞེས་བྱ་བའི་ཐ་ཚིག་གོ། །བཅོམ་ལྡན་འདས་ཀྱིས་དེ་དང་དེ་ནས་ས་ལ་སོགས་པ་བཤད་པ་མ་ཡིན་ནམ། དེ་ཇི་ལྟར་དེ་སྐད་ཅེས་བྱ་ཞེ་ན། དེ་ནི་ཐ་
སྙད་དུ་གསུངས་ཀྱི་དོན་དམ་པར་ནི་མ་ཡིན་ནོ། །འདི་ལྟར་ཡང་དག་པར་བསྒོམས་པའི་མཐར་ཕྱིན་པ་ལས་སྐྱེས་པའི་རྣམ་པར་ཤེས་པ་དེ་འགག་པར་གྱུར་ཏེ་མི་དམིགས་སོ་ཞེས་བྱ་བའི་དོན་ཏོ། །རྒྱས་པར་སྟོན་ཏེ་བྱེ་བྲག་ཏུ་ཤེས་པས་ན་རྣམ་པར་ཤེས་པའོ། །འདི་ནི་འདི་ནའོ། །ཕ་བི་ནི་ཕ་བི་ནའོ་
ཞེས་བྱ་བར་བསྟན་པར་མི་ནུས་པས་ན་བསྟན་དུ་མེད་དོ། །གཞི་མཐའ་ཡས་པ་ལ་དམིགས་པས་ན་མཐའ་ཡས་པ་སྟེ། ཐམས་ཅད་མཁྱེན་པའི་ཡེ་ཤེས་ཡོན་ཏན་མཐའ་ཡས་པ་དང་ལྡན་པ་ཞེས་བྱ་བའི་ཐ་ཚིག་གོ། །དེའི་སྟོབས་ཀྱིས་ཐམས་ཅད་རབ་ཏུ་འཇུག་སྟེ། དེ་བས་ན་ཀུན་དུ་ཆོས་ཐམས་
ཅད་ལ་བདག་པོ་དང་དབང་སྒྱུར་བ་ཡིན་ནོ། །ཇི་སྐད་བཤད་པའི་རྣམ་པར་ཤེས་པ་དེ་ལ་ནི་གནས་ཐོད་པར་འགྱུར་བ་མ་ཡིན་ཏེ། གནས་སྐབས་རྙེད་པར་མི་འགྱུར་རོ། །རེ་རེ་ལ་བརྟེན་ནས་གཅིག་གི་ཚིག་ཏུ་བྱས་ཏེ་བསྟན་དུ་མེད་པ་ལ་དེ་དག་གི་གནས་མེད་དོ་ཞེས་བྱ་བའི་ཐ་ཚིག་གོ། །འོ་ན་དེ་
དག་ལྟ་མེད་དུ་ཟད། གཞན་དག་ཡོད་པར་འགྱུར་རོ་ཞེ་ན། འདིར་ནི་ཞེས་བྱ་བ་ལ་སོགས་པས་སྟོན་ཏོ། །གང་ཞེས་བྱ་བ་ནི་གང་གི་ཕྱིར་རམ། གང་འདི་ཞེས་བྱ་བར་ཐམས་ཅད་ཀྱི་ཁྱད་པར་ཡིན་ཏེ། སྔོན་སོ་སོའི་སྐྱེ་བོའི་གནས་སྐབས་ཀྱི་རྣམ་པར་ཤེས་པ་ལས་བྱུང་ཞིང་སྐྱེས་པ་དེ་ཐམས་ཅད་

172-1-148a

ནི་ཟག་པ་དང་བཅས་པའི་རྣམ་པར་ཤེས་པས་བརྟགས་པ་ཡིན་ནོ་ཞེས་བྱ་བའི་ཐ་ཚིག་གོ། །ཡོད་པ་མ་ཡིན་པ་ལས་བརྟགས་པ་དེ་ཤེས་པའི་ཕྱིར་ཏེ་འདི་ལ་བདེན་པ་གང་ཡིན་ཞེས་དེ་ལྟར་བརྟགས་ན་ཡང་དག་པ་ཇི་ལྟ་བ་བཞིན་ཡོངས་སུ་ཤེས་པའི་ཕྱིར་བྱིས་པ་སོ་སོའི་སྐྱེ་
བོའི་གནས་སྐབས་ཀྱི་འོག་རོལ་ཏུ་རྣམ་པར་ཤེས་པ་ཁོ་ནར་འགག་པར་འགྱུར་ཞིང་དེ་ལ་མི་སྣང་བར་འགྱུར་རོ། །རྣམ་པར་ཤེས་པ་མེར་གྱུར་པ་དེ་ལྟ་བུ་ནི་བུད་ཤིང་མེད་ན་ཡོད་པར་མི་འགྱུར་རོ་ཞེས་བྱ་བར་རྣམ་ཤེས་མེའི་ཞེས་བྱ་བ་ལ་སོགས་པས་སྟོན་ཏོ། །སྐྱེས་ནས་འགྲོ་བ་གཞན་དེ་དང་དེར་འགྲོ་བས་
ན་འགྲོ་བའོ། །དེའི་ཆོས་ནི་སྐྱེ་བ་ལ་སོགས་པའི་མཚན་ཉིད་དོ། །ཕྱིན་ཅི་མ་ལོག་པར་རྟོག་པ་ནི་ཇི་བཞིན་རབ་འབྱེད་པའོ། །འདི་ལ་འོད་ཟེར་དེ་ཉིད་ཡོད་པས་ན་དེ་ལྟ་བུ་སྟེ། གང་གི་ཚེ་རང་གི་ངོ་བོ་ཉིད་ཀྱང་མི་མཐོང་བ་དེའི་ཚེ་ཉེ་བར་ཞི་བ་ཞེས་བྱའོ། །དེ་ལྟར་ན་ཐམས་ཅད་མེད་པར་ཁས་བླངས་པའི་ཕྱིར་
དེ་ཉིད་དངོས་པོ་མེད་པར་སྨྲ་བ་ཁས་བླངས་པ་ཡིན་ནོ་ཞེ་ན། མཇུག་ཐོགས་ནས་འབྱུང་བས་དེ་འགོག་སྟེ། ངེས་པ་ནི་དེ་གཏན་ལ་ཕབ་པའོ། །གལ་ཏེ་ནམ་མཁའ་དངོས་པོར་ཡོད་པར་འགྱུར་རོ་ཞེ་ན། གཟུགས་ཀྱི་ཞེས་བྱ་བ་ལ་སོགས་པས་དེ་འགོག་གོ། །འོ་ན་གཟུགས་ཀྱི་ཞེས་སྨོས་
པས་དེ་ནི་ཡོད་དོ་ཞེ་ན། འབྱུང་མེད་ཅེས་བྱ་བས་དེ་འགོག་གོ། །འབྱུང་བ་མེད་པའི་གཟུགས་མེད་དེ་དེའི་ཕྱིར་མིང་ཅན་མེད་པས་མིང་ཡང་མེད་པའི་ཕྱིར་མིང་ཙམ་མེད་དོ། །སྔར་ནི་ཁྱད་པར་དུ་མིག་དང་། རྣམ་པར་ཤེས་པ་དང་། གཟུགས་དང་མ་རིག་པ་མེད་པར་སྟོན་ཏོ། །ད་ནི་སྤྱིར་
ཚོར་བ་དང་། འདུ་ཤེས་དང་། འདུ་བྱེད་དང་ཞེས་བྱ་བ་ལ་སོགས་པའི་འབྱུང་བ་བཞིན་དང་། བདག་བཞིན་དུ་མེད་པའི་ངོ་བོ་ཞེས་སྟོན་ཏོ། །དེའི་ཕྱིར་ཁམས་དྲུག་བདག་མེད་དོ་ཞེས་བྱ་བ་ནི་ངོ་བོ་ཉིད་མེད་དོ་ཞེས་བྱ་བའི་དོན་ཏོ། །དེ་ལྟར་མངོན་པར་མཐོ་བ་དང་ངེས་པར་ལེགས་པའི་རྒྱུའི་
ཆོས་སོ་སོར་རྣམ་པར་ཕྱེ་སྟེ་བསྟན་ནས་ཡང་། ཇི་ལྟར་ཆུ་ཤིང་ཡན་ལག་དག །ཅེས་བྱ་བ་ལ་སོགས་པས་རིགས་པ་གཞན་གྱིས་བསྒྲེས་ཏེ་བསྟན་པ། ཇི་ལྟར་ཡན་ལག་ཇི་སྙེད་ཀྱིས་ཆུ་ཤིང་བཞིན་དུ་བསྒྲུབས་པའི་ཡན་ལག་དེ་དག་ཐམས་ཅད་མ་ལུས་པ་དང་བཅས་ཏེ་བཤིག་ཅིང་སོ་སོར་ཕྱེ་ན་དེ་

172-1-148b

ལ་ཆུ་ཤིང་ཞེས་བྱ་བ་ཅི་ཡང་མེད་པ་དེ་བཞིན་དུ་ཁམས་ཇི་སྙེད་ཀྱི་སྐྱེ་བུར་བརྗོད་པ་དེ་དག་མ་ལུས་པ་དང་བཅས་ཏེ་བཤིག་ཅིང་དཔྱད་ན་མི་དམིགས་སོ། །ཅི་ཡང་ཞེས་བྱ་བ་ནི་རྫས་ལ་ལྟོས་ནས་སོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་རྒྱལ་བ་སངས་རྒྱས་བཅོམ་ལྡན་འདས་ཀྱིས་ཆོས་
ཐམས་ཅད་བདག་མེད་པར་གསུངས་ཏེ། སྐྱེས་བུ་མེད་དོ་ཞེས་བྱ་བར་བལྟ་བར་བྱའོ། །ཁམས་དྲུག་ཡོད་པར་འགྱུར་རོ་ཞེ་ན། ལྷག་མས་དེ་འགོག་གོ། །གཏན་ལ་ཕབ་པས་ན་མེད་དོ་ཞེས་ངེས་པར་བྱ་སྟེ། ཁམས་དྲུག་པོ་དེ་ཡང་གཏན་ལ་ཕབ་པ་དེས་ན་མེད་དོ། །དེ་ལྟར་ཡང་དག་
པར་ན་ཆོས་ཐམས་ཅད་བདག་མེད་པ་ཡིན་དང་། དེ་ལ་ལྟོས་ནས་དངོས་པོར་ཡོད་པ་མ་ཡིན་ནོ་ཞེས་ལྷག་མས་སྟོན་ཏེ། རྒྱུ་དེའི་ཕྱིར་སྐྲུ་དང་གསུང་དང་ཐུགས་ཐུབ་ཅིང་ཡང་དག་པར་བསྡོམས་པས་ཐུབ་པ་ཆེན་པོ་སྟེ་བཅོམ་ལྡན་འདས་སོ། །བཟློག་པ་ནི་ཟློག་པར་གྱུར་པའོ། །དེ་ལྟར་མཐོང་
བ་དང་ཐོས་པ་ལ་སོགས་པ་སྟེ། སྩོགས་པ་ནི་དང་པོའོ། །བྱེ་བྲག་ཕྱེད་པ་དང་རྣམ་པར་ཤེས་པ་གང་ལ་དང་པོ་མཐོང་བ་དང་ཐོས་པ་ཡོད་པ་དེ་ནི་མཐོང་བ་དང་ཐོས་པ་ལ་སོགས་པ་སྟེ། དེ་ཐུབ་པས་བདེན་པ་མ་ཡིན་པ་སྟེ། འདི་ནི་དེ་ཁོ་ན་ཉིད་ལ་བརྟེན་ནས་གསུངས་སོ། །བརྫུན་པ་མ་ཡིན་པ་
ནི་ཐ་སྙད་དུའོ། །འདི་གཉི་ག་བདེན་པ་མ་ཡིན་པ་ལ་བརྟེན་ནས་ཅི་སྟེ་མ་གསུངས་ཤེ་ན་ཕྱོགས་ལས་ཞེས་བྱ་བ་ལ་སོགས་པས་དེ་འགོག་སྟེ། མངོན་ཞིང་གསལ་བར་བྱེད་པས་ན་ཕྱོགས་སོ། །གལ་ཏེ་དོན་འགའ་ཞིག་སྔར་ཕྱོགས་སུ་བྱས་པར་གྱུར་ན་དེ་ལ་ལྟོས་ནས་འགལ་བའི་ཕྱོགས་མི་
མཐུན་པའི་ཕྱོགས་སུ་འགྱུར་རོ། །དེ་ལྟ་བས་ན་ཐབས་འདིས་ཡོད་པ་ཉིད་དང་མེད་པ་ཉིད་དུ་ཞལ་གྱིས་བཞེས་པར་མི་མཛད་དེ་དེའི་ངོ་བོ་ཉིད་དུ་མ་ཡིན་ནོ་ཞེས་བྱ་བའི་དོན་ཏོ། །འཇིག་རྟེན་གང་ཞིག་དེ་ལྟར་བཤད་པའི་ལུགས་ཀྱིས་རྣམ་པ་ཐམས་ཅད་དུ་ངོ་བོ་ཉིད་ཡོད་པ་མ་ཡིན་པའི་འཇིག་རྟེན་
དེ་ལྟ་བུ་དེ་ལ་མཐའ་ཡོད་ཅེས་བྱ་བ་ལ་སོགས་པར་ཇི་སྐད་བསྟན། ཅི་སངས་རྒྱས་བཅོམ་ལྡན་འདས་ཀྱང་ཐ་སྙད་དུ་ཡོད་པ་དང་མེད་པའི་ཞལ་གྱིས་མི་བཞེས་སམ་ཞེ་ན། དུས་གསུམ་དུ་གནས་པར་ཞལ་གྱིས་མི་བཞེས་ཏེ། དེ་ཁོ་ན་ཉིད་དུ་ཅུང་ཟད་ཀྱང་ཡོད་པ་མ་ཡིན་ནོ་ཞེས་དོན་དེ་མཇུག་

172-1-149a

ཐོགས་ཀྱི་ཚིགས་སུ་བཅད་པས་སྟོན་ཏོ། །གང་དག་ལ་གྲངས་ལེའུ་དྲུག་ཅུ་ལས་འདས་པ་ཡོད་པ་དེ་དག་ནི་གྲངས་མེད་པའོ། །གཤེགས་པ་ནི་འདས་པའོ། །དེ་བཞིན་ཞེས་བྱ་བ་སྤྱིར་བརྗོད་པར་བྱའོ། །བྱོན་པར་འགྱུར་བ་ནི་མ་འོངས་པའོ། །དང་ཞེས་བྱ་བ་ནི་སྐབས་གཞན་
ནོ། །ཡང་ན་དེ་བཞིན་ཞེས་བྱ་བ་ནི་མགོན་པོ་རྣམས་ཇི་ལྟ་བ་བཞིན་དུ་སེམས་ཅན་རྣམས་སོང་བ་དང་། འོང་བར་འགྱུར་བ་དང་འགྲོའོ་ཞེས་སེམས་ཅན་རྣམས་དང་སྦྱར་བ་ཡིན་ནོ། །ཡང་ན་མང་པོ་ཞེས་བཤད་པ་ཡིན་ནོ། །སྐྱེས་ནས་འཇིག་པའམ་རོ་མྱང་བའི་དངོས་པོ་དེ་དང་། དེ་དག་ལ་ཆགས་པས་ན་
སེམས་ཅན་རྣམས་སོ། །བྱེ་བར་གྱུར་ཅེས་བྱ་བ་ལ་གྱུར་ཅེས་བྱ་བ་ནི་ལྷག་པའོ། །བྱེ་བ་པས་གྱུར་པ་ནི་དེ་བས་ཆེས་མང་བ་ཞེས་བྱ་བའི་ཐ་ཚིག་གིས་འདི་ནི་ཐ་སྙད་ལ་བརྟེན་ནས་བསྟན་པ་ཡིན་ནོ། །ལྷག་མས་ནི་དེ་ཁོ་ན་ཉིད་ལ་བརྟེན་པའོ། །དེ་དག་ལས་དུས་གསུམ་དུ་གནས་པ་དགོངས་ཤིང་བཞེད་དེ། ཆོས་ཐམས་
ཅད་བདག་མེད་པ་ཡིན་པས་འདོད་པ་ལ་བརྟེན་པ་མེད་དོ་སྙམ་དུ་དགོངས་པ་ཡིན་ནོ། །དོན་དེ་ཉིད་མཇུག་ཐོགས་ནས་འབྱུང་བ་ཟད་པ་ཞེས་བྱ་བ་ལ་སོགས་པས་གསལ་བར་བྱེད་དེ། འཕེལ་བ་ནི་སྐྱེ་བའོ། །དེའི་རྒྱུ་དེ་བྱེད་རྒྱུ་མ་ཡིན་ནོ། །གང་གི་ཞེ་ན། འཇིག་རྟེན་གྱི་སྟེ་འཁོར་བའོ། །མ་ཡིན་པ་དེ་གང་
ཞེ་ན། ཟད་ཅིང་མི་སྐྱེ་བ་སྟེ་ཟད་པ་དང་འདྲ་བས་སོ། །ངོ་བོ་ཇི་ལྟ་བུ་ཞིག་ཅེ་ན། དུས་གསུམ་དུ་གནས་པའོ། །འདི་སྐད་དུ་བཤད་པ་ཡིན་ཏེ། གང་གི་ཚེ་དངོས་པོ་འདི་རྣམས་རྟག་ཏུ་བདག་མེད་པ་དེའི་ཚེ་གང་ཞིག་ནི་སྐྱེ་ལ་གང་ཞིག་ནི་སྐྱེད་ཅེས་བྱ་བ་ཡིན་ནོ། །དེ་ལྟར་མཁྱེན་ནས་ཀྱང་བཅོམ་ལྡན་
འདས་ཐམས་ཅད་མཁྱེན་པས་ཇི་ལྟར་རྒྱུ་གང་གིས་འཁོར་བ་དེའི་སྔོན་དང་མཐའི་ལུང་མ་བསྟན་ཅིང་ལུང་བསྟན་པར་བྱ་བ་མ་ཡིན་པར་མཛད་ཅིང་བསྟན་ཞེ་ན། འདི་ནི་མུ་བཞི་དང་བྲལ་བ་ཡིན་པས་དེའི་ཕྱིར་དེ་ལྟར་མཛད་དོ་སྙམ་དུ་དགོངས་པ་ཡིན་ཏེ། འདི་ནི་འོག་ནས་སྟོན་པར་གྱུར་རོ། །ཆོས་
འདི་ཁོ་ན་སངས་རྒྱས་ཀྱི་གོ་འཕང་ཐོབ་པའི་རྒྱུ་ཡིན་གྱི་གཞན་ནི་མ་ཡིན་ནོ་ཞེས་བསྟན་པའི་ཕྱིར། སོ་སོའི་སྐྱེ་བོ་ལ་གསང་བ་ཞེས་བྱ་བ་ལ་སོགས་པ་སྨོས་ཏེ། སོ་སོའི་སྐྱེ་བོ་ལ་གསང་བ་གང་ཡིན་པ་དེ་ནི་ཞེ་བྱ་བ་ནི་ངེས་པར་ལེགས་པའི་ཆོས་ཀྱི་སྐབས་སུ་དོན་དམ་པར་ཅུང་ཟད་ཀྱང་མེད་དོ་ཞེས་བཤད་

172-1-149b

པ་གང་ཡིན་པ་དེ་སྟེ། ཆོས་དེ་ལྟ་བུ་ནི་ཐོས་པ་ལ་སོགས་པ་དང་བྲལ་བའམ། ལོག་པར་འཛིན་པ་ལ་མངོན་པར་ཞེན་པའི་དམིགས་པ་ཅན་ལ་གསང་ཞིང་བསྟན་པར་བྱ་བ་མ་ཡིན་པའོ། །སྒྱུ་མའི་རིག་སྔགས་ལ་ལེགས་པར་གོམས་པས་འཇིམ་པའི་དུམ་བུ་བླངས་ཏེ་གསང་སྔགས་ཀྱི་སྟོབས་ཀྱིས་
བསྒྲུབས་པའི་གླང་པོ་ཆེ་ལ་སོགས་པའི་གཟུགས་ནི་སྒྱུ་མའོ། །འཇིག་རྟེན་གང་ལ་སྒྱུ་མ་ལྟ་བུ་སྟེ། །མཚུངས་པ་ཡོད་པ་དེ་ནི་འཇིག་རྟེན་སྒྱུ་མ་ལྟ་བུའོ། །དེའོ་ངོ་བོ་ནི་དེ་ཉིད་དེ། འདི་ཁོ་ན་སངས་རྒྱས་བཅོམ་ལྡན་འདས་རྣམས་ཀྱིས་བསྟན་པ་བདུད་རྩི་ཡིན་གྱི་དམིགས་པའི་གདོན་གྱིས་ཟིན་པས་བརྟགས་པ་
གཞན་ནི་མ་ཡིན་ནོ། །འདི་ཇི་ལྟར་སྒྱུ་མ་དང་འདྲ་ཞེ་ན། མཇུག་ཐོགས་ནས་འབྱུང་བས་སྟོན་པར་བྱེད་དོ། །སྒྱུ་མའི་ངོ་བོའི་གླང་པོ་ཆེ་སྟེ་སླུ་བའི་གླང་པོ་ནི་སྒྱུ་མའི་གླང་པོ་སྟེ་སླུ་བའི་བདག་ཉིད་ཡིན་པའི་ཕྱིར་རོ། །དེ་ལ་སྐྱེ་ཞིང་འབྱུང་བ་དང་འཇིག་ཅིང་འགག་པ་ཇི་ལྟར་སྣང་ཞིང་ཇི་ལྟར་དམིགས་ཀྱང་ངོ་། །སྐྱེ་བ་
ཉིད་དུ་སྣང་གི་མི་སྐྱེ་བར་ནི་མ་ཡིན་ལ། འཇིག་པ་ཉིད་དུ་སྣང་གི་ཐེར་ཟུག་ཏུ་མ་ཡིན་ཏེ། ཉིད་ཅེས་བྱ་བའི་དོན་ནི་དེ་ཡིན་ནོ། །དོན་གྱི་ཡང་དག་ཏུ་ཞེས་བྱ་བ་ནི་དོན་དམ་པར་ཏེ། དེ་ནི་དོན་ཡང་ཡིན་ལ་ཡང་དག་པ་ཡང་ཡིན་པས་སོ། །སྐྱེ་བ་ཉིད་དང་འཇིག་པ་ཉིད་དོ། །དཔེ་འདི་བརྗོད་
ནས་དོན་དེ་བཞིན་སྒྱུ་འདྲའི་ཞེས་བྱ་བ་ལ་སོགས་པས་དངོས་དང་སྦྱོར་བར་བྱེད་དོ། །སྒྱུ་མའི་གླང་པོ་ཆེ་རྒྱུ་དང་རྐྱེན་ལས་བྱུང་བ་ཡིན་ཡང་ཇི་ལྟར་དེ་ཁོ་ན་ཉིད་དུ་མ་ཡིན་ནོ་ཞེས་ན། ཇི་ལྟར་ཞེས་བྱ་བ་ལ་སོགས་པས་དེ་སྟོན་ཏེ། བདེན་པའི་ངོ་བོར་མ་སྐྱེས་པའི་ཕྱིར་སྐྱེ་བ་ན་ཡང་གང་ནས་ཀྱང་
མ་འོངས་ལ་མཇུག་བརྟུལ་བ་ན་ཡང་གང་དུ་མི་འགྲོའོ། །སེམས་རྨོངས་ཙམ་དུ་ཟད་པས་ན། །ཞེས་བྱ་བ་རྨོངས་པ་ནི་ནོར་བའོ། །ཙམ་ཞེས་སྨོས་པ་ནི་ལྷག་པའི་དོན་དགག་གོ། །ཡང་དག་ཉིད་དུ་སྟེ་བདེན་པའི་ངོ་བོར་གནས་པ་མེད་དོ། །དེ་ལྟར་ཞེས་བྱ་བ་ནི་ཇི་སྐད་བཤད་པའི་རིགས་པས་
སོ། །ཐ་སྙད་གདགས་པ་མ་གཏོགས་པར། །གང་ཞིག་ཡོད་པའམ་མེད་པར་འགྱུར་བ་སྟེ། །ཅི་ཞིག་ཡོད་ཅེས་བྱ་བ་ནི་རྟོག་པའོ། །ད་ནི། སངས་རྒྱས་ཀྱིས་ནི་རྒྱུ་འདི་ལས། །ཞེས་བྱ་བ་ལ་སོགས་པས། ཐམས་ཅད་མཁྱེན་པས་ཇི་ལྟར་དེའི། །སྔོན་མཐའ་ལུང་མ་བསྟན་པར་མཛད། །

172-1-150a

ཅེས་གང་བཤད་པ་དེའི་རྒྱུ་སྟོན་ཏོ། །འདི་ལས་ཞེས་བྱ་བ་ནི་རྒྱུའོ། །འཇིག་རྟེན་གང་ལ་མཐའ་ཡོད་པ་ལ་སོགས་པ་རྣམས་བྱེ་བྲག་བཞི་ཡོད་པ་དེ་ནི་རྣམ་པ་བཞི་སྟེ། འཆད་པར་འགྱུར་བའི་ཚུལ་གྱིས་དེ་ལྟ་བུ་ལ་དགོངས་ནས་ཞེས་བྱ་བ་ནི་ཚིག་ལྷག་མ་ཡིན་ནོ། །གལ་ཏེ་ཆོས་
རྣམས་དེ་ལྟར་བདག་མེད་པ་ཡིན་ན་འཇིག་རྟེན་འདིས་དེ་ལྟར་ཅི་སྟེ་མི་རྟོགས་ཤེ་ན། དེའི་ཕྱིར་མཇུག་ཐོགས་ཀྱི་ཚིགས་སུ་བཅད་པ་སྨོས་སོ། །མི་གཙང་ཉིད་ནི་མི་གཙང་བའི་ངོ་བོ་ཉིད་དོ། །རགས་པ་ནི་ཆེ་ལོང་ངོ་། །མངོན་སུམ་སྤྱོད་ཡུལ་བ་ནི་རྗེས་སུ་དཔག་པར་བྱ་བ་མ་ཡིན་ནོ། །སེམས་ལ་བདེ་བླག་
ཏུ་ཚེགས་མེད་པར་འཇུག་པར་འགྱུར་ཏེ། དེའི་སྤྱོད་ཡུལ་དུ་མི་འགྱུར་རོ། །སྐྱེ་བོ་རྣམས་ཀྱིས་ཤེས་པར་དཀའོ་ཞེས་ཤེས་པར་དཀའ་བར་ཐུགས་སུ་ཆུད་པ་དེ། རྒྱུ་དེས་ན་སངས་རྒྱས་ནས་ཏེ། ཐམས་ཅད་མཁྱེན་པའི་ཡེ་ཤེས་བརྙེས་ནས་ཆོས་བསྟན་པའི་དགོངས་པ་ལོག་ཅིང་སྤྲོ་བ་ལོག་པར་གྱུར་ཏོ། །
ཅིའི་ཕྱིར་ལོག་པར་གྱུར་ཞེ་ན། འདིར། ཆོས་འདི་ལོག་པར་ཤེས་གྱུར་ན། །ཞེས་བྱ་བ་ལ་སོགས་པ་སྨོས་ཏེ། ལོག་པར་ཤེས་པ་ནི་ཐ་སྙད་དུ་ཡང་ཅི་ཡང་མེད་དོ་ཞེས་ལོག་པར་ཤེས་པའོ། །མི་མཁས་པ་ནི་མཁས་པ་མ་ཡིན་ཏེ་མི་ཤེས་པའོ། །ཇི་ལྟར་ན་ཆུད་ཟ་ཞིང་ཕུང་བའི་རྒྱུར་འགྱུར་ཞེ་ན།
འདི་ལྟར་ཞེས་རྒྱུ་སྨོས་སོ། །མེད་པ་ཉིད་དུ་ལྟ་བ་ཉིད་མི་གཙང་བ་སྟེ་སྨེ་ཞིང་བཙོག་པ་ཡིན་ནོ། །དེར་བྱིང་བར་གྱུར་པ་ནི་ལྟུང་བར་འགྱུར་བའོ། །དེར་ཞེས་བྱ་བ་ནི་ལེགས་པར་ཤེས་པ་སྟེ་ཡོད་ནའོ། །ཡང་ན་ལྟ་བ་མི་གཙང་བ་དེར་རོ། །དེ་ལྟར་རེ་ཞིག་ལ་ལ་ནི་ཅི་ཡང་མེད་དོ་སྙམ་ནས་ལོག་པར་ཤེས་པས་ལོག་
པར་ལྟ་བར་ལྟུང་བར་འགྱུར་རོ། །གཞན་གཉིས་པ་ཡང་ཆོས་འདི་ལ་མེད་དོ་སྙམ་དུ་ཤེས་པས་ལོག་པར་བཟུང་ནའོ། །བླུན་པོ་ནི་གཞན་གྱི་བསྟན་བཅོས་ཐོས་པ་དང་ལྡན་ཡང་ཆོས་འདི་མི་ཤེས་པའི་ཕྱིར་རམ། དྲང་བའི་དོན་ལ་ངེས་པའི་དོན་ཏོ་ཞེས་ཤེས་པ་མི་ཤེས་པ་སྟེ། བླུན་པོ་དང་འདྲ་བར་བླུན་པོ་
ཡིན་ནོ། །མཁས་པའི་ང་རྒྱལ་ཅན་ཞེས་བྱ་བ་ནི་ཡོད་པ་དང་མེད་པ་ཇི་ལྟ་བ་བཞིན་ཤེས་པའི་ཕྱིར་མཁས་པ་ཞེས་བྱ་ན། དེ་ལྟ་བུ་མ་ཡིན་པ་བཞིན་དུ་ང་ནི་མཁས་པའོ་སྙམ་དུ་ང་རྒྱལ་སྐྱེད་པའོ། །ཆོས་འདི་ལ་བརྙས་པའི་བསམ་པས་ཚིག་ངན་པ་འབྱིན་པའམ། ལས་བཟང་པོ་མ་ཡིན་པ་ལ་སྤྱོད་པ་ནི་སྤོང་བ་

172-1-150b

སྟེ། གང་ལ་དེས་མ་རུངས་པའི་བདག་ཉིད་ཀྱི་སེམས་ཡོད་པ་དེ་ལ་དེ་སྐད་ཅེས་བྱའོ། །མ་རུངས་པའི་དོན་ཅི་ཞེ་ན། བསོད་ནམས་སམ་རང་གི་དོན་ཕུན་ཕུན་སུམ་ཚོགས་པ་ལ་མི་སྣང་བས་ན་མ་རུངས་པ་ཡིན་ནོ། །ཡང་ན་རང་དང་གཞན་གྱི་དོན་གྱི་ནུས་པ་དང་བྲལ་བས་ཤི་བ་དང་འདྲ་བར་ཤི་བ་ཡིན་ཏེ། དགེ་
བ་ཆད་པ་ནི་ངན་སོང་ལ་མངོན་དུ་ཕྱོགས་པས་སོ། །དེ་ཉིད་ལྷག་མས་སྟོན་པར་བྱེད་དོ། །དོན་དེ་ཉིད། ཇི་ལྟར་ཁ་ཟས་བཟའ་ཉེས་པས། །ཞེས་བྱ་བ་ལ་སོགས་པས་དཔེ་གསལ་བར་བྱེད་དོ། །ཉེས་ཞེས་བྱ་བའི་སྒྲས་ནི་སྨད་པའི་དོན་ཏེ་མི་འཕྲོད་པ་བརྗོད་པའོ། །མི་འཕྲོག་པ་ཟོས་པ་ནི་ཁ་ཟས་
བཟའ་ཉེས་པ་སྟེ་དེས་སོ། །ལེགས་ཞེས་བྱ་བའི་སྒྲ་ནི་བསྔགས་པའི་དོན་ཏེ་འཕྲོད་པ་བརྗོད་པའོ། །བདེ་བ་ནི་ལུས་དང་སེམས་ཀྱིའོ། །འགྱུར་བ་ནི་འཐོབ་པའོ། །ལེགས་པ་ནི་ཇི་ལྟ་བ་བཞིན་དུའོ། །བདེ་བ་ནི་ལྷ་དང་མིའོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་ཆོས་འདི་ལའོ། །མེད་པའི་ལྟ་བ་ནི་
མེད་པའི་རྣམ་པ་ཅན་ནོ། །དོན་ཀུན་ནི་འཇིག་རྟེན་པ་དང་འཇིག་རྟེན་ལས་འདས་པ་སྟེ། དེ་རྣམས་གྲུབ་ཅིང་གྲུབ་པར་བྱ་བའི་ཕྱིར་རོ། །ཇི་སྲིད་དུ་ཆོས་འདི་ཉམས་སུ་མྱོང་བའི་རྣམ་པར་མི་ཤེས་པ་དེ་སྲིད་དུ་འཁོར་བར་འཇུག་གོ་ཞེས་མཇུག་ཐོགས་ནས་འབྱུང་བས་སྟོན་ཏེ། ཡོངས་སུ་མ་ཤེས་
པ་ལས་དམིགས་པའོ། །དེ་ལས་ངར་འཛིན་པའོ། །དེ་ལས་དགེ་བ་དང་མི་དགེ་བའི་ལས་ཏེ། དགེ་ལེགས་དང་དགེ་ལེགས་མ་ཡིན་པའོ། །དེ་ལས་སྐྱེ་བ་ནི་བཟང་པོ་དང་ངན་པ་སྟེ། བདེ་འགྲོ་དང་ངན་འགྲོའི་མཚན་ཉིད་འདོད་པ་དང་མི་འདོད་པའོ། །ཆོས་འདི་ཤིན་ཏུ་མྱུར་བར་ཡང་མི་འཐོབ་སྟེ།
གང་གི་ཕྱིར་དེ་ལྟ་ཡིན་པ་དེའི་ཕྱིར་རོ། །སེལ་བ་ནི་འཇིག་པའོ། །གུས་པ་ནི་དེའི་གཞི་ལས་ཡིད་རབ་ཏུ་དང་བའི་ལུས་དང་ངག་དང་ཡིད་ཀྱིས་བརྩོན་པའི་འབད་པ་སྟེ། དེ་དང་ལྡན་པར་མཛོད་ཅིག་ཅེས་བྱ་བའི་ཐ་ཚིག་གོ། །རྟག་ཏུ་སྦྱིན་པ་ལ་སོགས་པའི་སེམས་པ་ལ་གཞོལ་བའི་རྒྱལ་པོའི་བྱ་བ་
རྣམས་ཇི་ལྟ་བུ་སྙམ་དུ་དོགས་པ་ལ། དེ་དག་ཀྱང་ཐོག་མ་དང་བར་དང་ཐ་མར་ཆོས་དང་ལྡན་པར་གྱིས་ཤིག་ཅེས་མཇུག་ཐོགས་ནས་འབྱུང་བས་སྟོན་ཏོ། །སྔོན་ཞེས་བྱ་བའི་སྒྲ་ནི་ཐོག་མའི་རྣམ་གྲངས་ཡིན་གྱི་ཕྱོགས་བརྗོད་པ་ནི་མ་ཡིན་ནོ། །འདི་སྐད་དུ་བཤད་པ་ཡིན་ཏེ། ལས་འདིས་ཆོས་འདི་འགྲུབ་

172-1-151a

པར་འགྱུར་རོ་ཞེས་ཐོག་མར་ཆོས་ལ་བརྟེན་པ་བྱས་ནས་ལས་རྩོམ་པར་བྱེད་པའི་ལས་དེ་ནི་ཆོས་སྔོན་དུ་བཏང་བ་ཡིན་ནོ། །ཁ་ཅིག་ཆོས་ལ་བརྟེན་ཏེ་བརྩམས་ན་ཕྱིས་སྡིག་པ་དང་འདྲེས་མར་བྱེད་པ་སྣང་བས་དེ་བཟློག་པའི་ཕྱིར་བར་མ་དང་ཐ་མར་ཞེས་བྱ་བ་སྨོས་ཏེ། ཐ་མ་
ནི་མཇུག་གོ། །སྒྲུབ་པ་ནི་སྒྲུབ་པར་བྱེད་པའོ། །ས་བདག་ནི་སའི་དབང་ཕྱུག་གོ། །འདི་ནི་འཇིག་རྟེན་འདིར་རོ། །དེ་ལྟར་སེམས་ཅན་རྣམས་རྗེས་སུ་དགའ་བར་བྱེད་པས་ཆོས་ཀྱིས་སྤགས་པའི་ཡོན་ཏན་དང་ལྡན་པ་ཡིན་ཏེ། དེ་སྐད་དུ། ལྷ་ཡི་བདག་པོའི་དཔལ་ཡང་ཡོན་ཏན་རྣམས་ལ་ལྟ། །
ཡོན་ཏན་ལྡན་རྣམས་ཉིད་ལ་ཡང་དག་འདུད་པར་འགྱུར། །ཡོན་ཏན་རྣམས་ལ་གྲགས་པ་རབ་ཏུ་འབྱུང་བ་ཉིད། །དེ་ལྟས་མཐུ་ཡི་བདག་ཉིད་ཆེན་པོ་ཡོན་ཏན་བརྟེན། །ས་ཡི་བདག་པོའི་ལས་མཆོག་སྐྱེས་བུ་ལ་ཕན་པ། །དེ་ནི་འདི་ཕྱི་གཉི་གར་འབྱོར་བྱེད་ལམ་ཡིན་ཏེ། །དེ་ཡང་ཆོས་ལ་
དགའ་བའི་རྒྱལ་པོ་དག་ལ་འབྱུང་། །མི་དབང་སྤྱོད་པའི་རྗེས་སུ་སྐྱེ་བོ་འཇུག་པར་འགྱུར། །ཞེས་འབྱུང་བ་དང་། དེ་བཞིན་དུ། དུལ་བི་སྒྲུབ་པ་དབང་པོ་ཐུལ་བ་ཉིད་ཡིན་ཏེ། །དུལ་བས་ཡོན་ཏན་ཕུལ་དུ་ཕྱིན་པ་འཐོབ་པར་འགྱུར། །ཡོན་ཏན་སྤགས་པའི་མི་ལ་སྐྱེ་བོ་རྗེས་སུ་དགའ། །སྐྱེ
བོ་རྗེས་སུ་དགའ་བས་ཕུན་སུམ་ཚོགས་རབ་འབྱུང་། །ཞེས་བཤད་པ་ཡིན་ནོ། །གཞན་ཚེ་རབས་གཞན་དུ་གནོད་པར་མི་འགྱུར་ཞིང་ཉམ་ང་བར་གནས་པར་མི་འགྱུར་རོ། །སྔར་ནི་ལྟ་བའི་སྐབས་ཀྱི་ཆོས་དང་ཆོས་མ་ཡིན་པ་དག་གི་ཡོན་ཏན་དང་སྐྱོན་བརྗོད་པ་ཡིན་ནོ། །ཆོས་ཀྱིས་ཞེས་བྱ་བ་
ལ་སོགས་པ་ལ། གྲགས་པ་ནི་སྙན་པའོ། །འཆི་ཁ་ནི་འཆི་བར་འདོད་པའོ། །ཅིའི་ཕྱིར་འཆི་ཞེ་ན། དེ་ནི་འཆི་བ་ལ་མངོན་དུ་ཕྱོགས་པ་ཞེས་བྱ་བའི་ཐ་ཚིག་གོ། །སྡིག་པ་བྱེད་བྱེད་པ་ནི་འཆི་ཁར་འཇིག་རྟེན་ཕ་རོལ་དུ་སྡུག་བསྔལ་གྱིས་དོགས་པས་འཇིགས་པར་འགྱུར་གྱི་བསོད་ནམས་
ཅན་ནི་མ་ཡིན་ནོ། །རྒྱས་པ་ནི་རྒྱས་པར་འགྱུར་བ་སྟེ་ཆེན་པོ་ཞེས་བ་བའི་ཐ་ཚིག་གོ། །བརྟེན་མཛོད་ཅེས་བྱ་བ་ནི་རྟེན་ཅིག་པའོ། །གང་དག་འཇིག་རྟེན་སྡིག་པའི་རྒྱུའི་དོན་གྱི་རིགས་པའི་ལུགས་ལ་འཇུག་པར་བྱེད་པ་དེ་དག་གིས་གལ་ཏེ་ན་ཁྱོད་ཀྱང་ཁྲིད་དུ་འོང་ངོ་ཞེས་དེ་དགག་པའི་དོགས་པ་

172-1-151b

བསུ་བར་མཇུག་ཐོགས་ཀྱི་ཚིགས་སུ་བཅད་པ་སྨོས་ཏེ། ལུགས་ནི་ཚུལ་དེ་བདེ་བ་འཐོབ་པའི་ཐབས་སོ། །དམ་པ་ནི་མཆོག་གོ། །ཀྱང་ཞེས་བྱ་བའི་སྒྲ་ནི་རྒྱུའོ། །ནི་ཞེས་བྱ་བའི་སྒྲ་ནི་ངེས་པར་བཟུང་བ་སྟེ་ཁོ་ནས་ཞེས་བྱ་བ་ཡིན་ནོ། །མི་དགར་འགྱུར་ཞེས་བྱ་བ་ནི་ཕུན་སུམ་ཚོགས་པས་
བྱས་པའི་ཡིད་བདེ་བ་མི་འཐོབ་པའོ། །འདིས་ཆོས་མ་ཡིན་པ་དང་མཐུན་པའི་ལུགས་སྨད་པ་ཉིད་དུ་བསྟན་ནས། དེ་ལ་ཕན་པའི་རྒྱུར་སེམས་པ་གང་ཡིན་པ་དེ་སྨད་པ་ཉིད་དུ་མཇུག་ཐོགས་ནས་འབྱུང་བས་སྟོན་ཏོ། །དོན་མེད་པ་སྒྲུབ་པས་ན་དོན་མེད་པའི་རིག་པའོ། །དོན་མེད་པའི་ཤེས་པ་
སྟེ། དོན་མེད་པ་ཁོ་ན་ཤེས་པས་ན་དེ་སྐད་ཅེས་བྱའོ། །སླུ་ཞིང་འདྲིད་པ་ལྷུར་ལེན་པ་ནི་དེ་གཅེས་སུ་བྱེད་པའོ། །མི་བཟད་པ་ནི་ངན་པ་སྟེ། དོན་ངན་པ་སྒྲུབ་པས་སོ། །ཇི་ལྟར་དེ་སྐད་ཅེས་བྱ་ཞེ་ན། འདི་ལྟར་དེ་ནི་ངན་འགྲོའི་ལམ་སྟེ་སྲོལ་ཡིན་པས་སོ། །ཤེས་རབ་འཆལ་པ་རྣམས་ཀྱིས་
ཞེས་བྱ་བ་ནི་འཁྲུལ་པ་རྣམས་ཀྱིས་སོ། །དོན་གྱིས་རིག་པ་ནི་དོན་རབ་ཏུ་སྒྲུབ་པའི་རིག་པའོ། །ཇི་ལྟར་ཞེས་བྱ་བ་ནི་རྒྱུ་གང་གིས་སོ། །བྱས་ཞེས་བྱ་བ་ནི་བསྒྲུབ་པའམ་བཤད་པའོ། །བདག་གིས་དེ་ཤེས་སོ་ཞེས་རློམ་པ་གང་ཡིན་པ་དེ་ཡང་ཕྱིན་ཅི་ལོག་པ་ཁོ་ན་ཡིན་ནོ་ཞེས་མཇུག་ཐོགས་
ནས་འབྱུང་བས་སྟོན་ཏེ། ཆོས་དང་མཐུན་པ་ལ་ཡང་གལ་ཏེ་འགའ་ཞིག་རང་གི་ཉེས་པས་དགྲ་བྱེད་ན་ཆོས་དང་མཐུན་པས་དེ་ལ་བྱམས་པ་ཁོ་ན་བྱ་དགོས་པས། གལ་ཏེ་དགྲ་མི་དགའ་བར་བྱ་བར་འདོད་ཅིང་དོན་དུ་གཉེར་ན་ཡང་ཡོན་ཏན་ལ་བརྟེན་ཅིང་རྟེན་ཅིག །ཡོན་ཏན་ལ་བརྟེན་ན་ཇི་ལྟར་
དགྲ་མི་དགའ་བར་འགྱུར་ཞེ་ན། འདི་ལྟར་ཡོན་ཏན་དེ་དག་དང་ལྡན་ན་སྐྱེ་བོ་དགའ་བར་འགྱུར་ཏེ། དེས་ན་ཕུན་སུམ་ཚོགས་པར་འགྱུར་ལ། དེ་ལྟ་བུ་ནི་ཟིལ་གྱིས་གནོན་པར་མི་ནུས་ཀྱི་དེ་ཉིད་ཀྱིས་ཟིལ་གྱིས་གནོན་པས་དེ་མི་དགའ་བར་འགྱུར་རོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་
འཇིག་རྟེན་གཉི་གར་ཡང་འབྱོར་པ་འདོད་པས་བསྡུ་བའི་དངོས་པོ་རྣམས་ཀྱིས་འཇིག་རྟེན་སྡུས་ཤིག་ཅེས། སྦྱིན་དང་ཞེས་བྱ་བ་ལ་སོགས་པས་སྟོན་ཏེ། སྦྱིན་པ་ཞེས་བྱ་བ་ནི་ཟང་ཟིང་དང་། མི་འཇིགས་པ་དང་ཆོས་ཀྱི་མཚན་ཉིད་དོ། །དེ་ནི་སྨྲ་བར་བྱ་བ་ཡང་ཡིན་ལ་སྙན་པ་ཡང་ཡིན་པས་དེ་

172-1-152a

སྐད་ཅེས་བྱའོ། །ཕན་པ་ཞེས་བྱ་བ་ནི་དོན་སྤྱོད་པའོ། །དོན་གཅིག་སྤྱོད་པ་ནི་དོན་མཐུན་པར་སྤྱོད་པ་སྟེ། འདི་ཡང་སྦྱིན་པའི་ཁྱད་པར་གནོད་པའི་སྦྱིན་པ་དུག་དང་མཚོན་ལ་སོགས་པ་སྤོང་བའོ། །དེ་བཞིན་དུ་དོན་མེད་པའི་རྒྱུ་གཞན་གང་ཡིན་པ་ཡང་སྤོང་སྟེ། འདི་ལྟ་སྟེ་
འདོད་པ་ཅན་ནི་གཞན་གྱི་བུད་མེད་དག་ལ་རྗེས་སུ་ཆགས་ནས་འདོད་པ་དང་ལྡན་པའི་ཚིག་སྙན་པ་སྨྲ་ལ། དེ་བཞིན་དུ་དགྲ་ལ་ཡང་སྨྲ་བས་དེ་འགོག་གོ། །བསྡུ་བ་ནི་སེམས་དད་པར་བྱའོ། །ད་ནི་རྒྱལ་པོ་དག་ལ་ཇི་ལྟ་བུར་ཞེས་བྱ་བ་ལ་སོགས་པས་རྒྱལ་པོའི་ལུགས་ཆོས་དང་མཐུན་པ་སྟོན་ཏོ། །
ཚིག་ཅེས་བྱ་བ་ནི་གཞིའོ། །དེ་ཅི་ཞེ་ན་བདེན་པའོ། །ཡིད་ཆེས་ཞེས་བྱ་བ་ནི་བག་ཕེབས་པའོ། །བརྟན་པ་ཞེས་བྱ་བ་ནི་མི་སླུ་བའམ་བག་ཕེབས་པའི་ཁྱད་པར་ཏེ། བརྟན་པ་ནི་གཏན་དུ་བ་དང་མི་ཕྱེད་པའོ། །བདེན་པ་དང་ཅིག་ཤོས་ཀྱི་ཡོན་ཏན་དང་སྐྱོན་བརྗོད་ནས། དེ་གཉིས་ཀྱི་མཚན་ཉིད་སྟོན་ཏེ།
སྨྲས་པ་ལས་གཞན་དུ་སྣང་བ་ནི་སླུ་བའོ། །སེམས་པ་ནི་བསམ་པའོ། །དེས་སྒྱུར་བ་ནི་འབྱུང་བ་སྟེ། བདེན་པ་ལྟར་སྣང་ལ་དོན་དུ་བདེན་པ་མ་ཡིན་པའོ། །དོན་ནི་ཐ་སྙད་ཀྱི་བདེན་པ་སྟེ་དེར་མ་ཡིན་ནོ། །ཕན་པ་ཁོ་ན་བྱེད་པས་ན་གཅིག་ཏུ་ཕན་པ་བདེན་པ་ཡིན་ནོ། །བདེན་པ་དང་གཏོང་བ་
དག་རྒྱལ་པོའི་དོན་ཐམས་ཅད་སྒྲུབ་པ་ཡིན་པ་ལས་དེ་ལ་བདེན་པ་ནི་བཤད་ཟིན་ཏོ། །གཏོང་བ་སྟོན་ཏེ་ཉེས་པ་ནི་ང་རྒྱལ་ལ་སོགས་པའིའོ། །སྦྱིན་པ་ནི་སྦྱིན་པའི་སེམས་པ་དང་རབ་ཏུ་ལྡན་པའི་ནོར་གཏོང་བའོ། །གསལ་བ་ནི་དད་པ་ལ་སོགས་པ་དང་ལྡན་པའི་ཕྱིར་དང་ཆེ་བའི་ཕྱིར་རོ། །སྦེད་པ་ནི་
མི་མངོན་པར་བྱེད་པའོ། །འཇུངས་པ་ནི་སེར་སྣའོ། །ཡོན་ཏན་ནི་ཤེས་རབ་ལ་སོགས་པའི་རང་གི་ངོ་བོ་ཐམས་ཅད་དོ། །དེ་དག་ཉིད་དམ་པ་རྣམས་ཀྱི་བདོག་པ་ཐམས་ཅད་དེ་ནོར་ཐམས་ཅད་ཡིན་ནོ། །ཡོན་ཏན་དེ་རྣམས་འཇོམས་པ་ནི་འཇིག་པར་བྱེད་པའོ། །རྒོད་པ་ལ་སྐྱེ་བོས་བཀུར་སྟི་ལ་སོགས་
པ་ཐོག་འདྲེན་པར་མི་བྱེད་དེ། དེ་བས་ན་ཉེ་བར་ཞི་བའི་རིགས་སོ་ཞེས་སྟོན་ཏེ། ཉེ་བར་ཞི་བ་ནི་དབང་པོ་ཡང་དག་པར་བསྡམས་པའོ། །ཟབ་པ་ནི་བསམ་པའི་གཏིང་དཔག་དཀའ་བའོ། །དེས་ན་གུས་པ་ནི་བླ་མར་བྱེད་པའོ། །རྒོད་པ་ནི་རྩབ་ཀྲོལ་བྱེད་པས་སྤོང་ངོ་། །དེས་ན་བརྗིད་པ་ནི་

172-1-152b

བསྙེན་པར་དཀའ་བའོ། །དེས་ན་བཀའ་བརྩན་པ་ཕུན་སུམ་ཚོགས་སོ། །གང་གི་ཕྱིར་ཡོན་ཏན་དེ་དག་ཉེ་བར་ཞི་བས་འཐོབ་པོ་དེའི་ཕྱིར་དེ་རྟེན་ཅིག །ཤེས་རབ་དང་བྲལ་བའི་བླུན་པོ་ནི་གཞན་དག་གིས་བློ་འཕྲོགས་པའི་ཕྱིར་སླུ་ཞིང་བྲིད་པར་འགྱུར་བས་ཤེས་རབ་ཐོབ་པ་ལ་འབད་པར་བྱའོ་ཞེས་མཇུག་
ནས་འབྱུང་བས་སྟོན་ཏོ། །རང་གི་དོན་ལ་གཞན་དུ་བཀྲི་བར་ནུས་པས་ན་འཕྲོགས་པའོ། །དེ་ལྟ་བུ་མ་ཡིན་པས་ན་མི་འཕྲོགས་པའོ། །གང་ཡང་རུང་བ་ཞིག་གིས་དོན་འགའ་ཞིག་ལ་བློ་གཏད་པ་ལས་གལ་ཏེ་ཤེས་རབ་དང་བྲལ་བར་གྱུར་ན་དེའི་བློ་དེ་གཡོན་ཅན་གཞན་དག་གིས་དེ་ནས་
ཕྲལ་ཏེ་གཞན་དུ་ཁྲིད་དོ། །དེས་ན་གཞན་གྱི་དྲིང་འཇོག་པ་ནི་བསླུས་པ་ཡིན་ནོ། །དེ་ལྟ་བས་ན་རྒྱལ་པོས་ཤེས་རབ་ཅན་དུ་བྱ་དགོས་སོ་ཞེས་སྟོན་པར་བྱེད་དོ། །ཇི་ལྟར་ན་བློ་མི་འཕྲོགས་པར་འགྱུར་ཞེ་ན། ཤེས་རབ་དང་ལྡན་པས་སོ། །ཇི་ལྟར་ན་ཤེས་རབ་དང་ལྡན་ཞེ་ན། དེ་བཞིན་དུ་སྒྱུ་
སྨོས་པ་འདི་ལྟར་དེ་ནི་གཞན་གྱི་དྲིང་མི་འཇོག་གོ། །གཞན་དག་ལ་དྲིང་འཇོག་ཅིང་བག་ཕེབས་པ་ནི་དེའི་སྟོབས་ཀྱིས་ཕན་ཚུན་འཁྲིད་པ་ཞིག་ན་དེ་ལྟ་བུ་མ་ཡིན་ནོ། །ཅིའི་ཕྱིར་ཞེ་ན། ཤེས་རབ་དང་ལྡན་པས་སོ། །དེའི་ཕྱིར་ན་བརྟན་ཞིང་མི་གཡོ་སྟེ། གང་གིས་ཀྱང་གཞན་དུ་བཀྲི་
བར་མི་ནུས་སོ། །བདེན་པ་ལ་སོགས་པའི་ཆོས་བཞི་པོ་ཕན་ཡོན་དང་བཅས་པར་བཤད་པ་གང་ཡིན་པ་དེ་དང་ལྡན་པའི་ཕན་ཡོན་གཞན་ཡང་བདེན་གཏོང་ཞེས་བྱ་བ་ལ་སོགས་པས་བསྟན་ཏེ། བཟང་པོའི་དོན་བསྒྲུབ་པའི་ཕྱིར་བདེན་པ་ལ་སོགས་པ་ཡོན་ཏན་བཞི་དང་ལྡན་པ་ནི་
བཟང་བ་ཡིན་ནོ། བདེན་པ་ལ་སོགས་པ་བཞིས་བཟང་ན་ཅིར་འགྱུར་ཞེ་ན། བསྟོད་ཅིང་བསྔགས་པར་འགྱུར་རོ་ཇི་ལྟར་བུར་ཞེ་ན། ཆོས་བཞི་པོ་འདི་བཟང་བ་ཇི་ལྟ་བུར་ཏེ། རྣམ་པར་བཞི་ཡང་ཡིན་ལ་བཟང་བ་ཡང་ཡིན་པས་དེ་སྐད་ཅེས་བྱའོ། །མཇུག་ཐོགས་ནས་འབྱུང་བས་ཤེས་རབ་དང་ཆོས་
འཕེལ་བའི་ཐབས་བསྟན་ཏོ། །གང་དག་ལ་ལུས་ལ་གནོད་པ་བྱས་ནས་ཕེབས་པར་སྨྲ་བའི་ངང་ཚུལ་ཡོད་པ་དེ་དག་ནི་ཕེབས་པར་སྨྲ་བས་ཏེ། དེ་སྐད་དུ། དབང་ཕྱུག་ཕལ་ཆེར་འདོད་པ་ལ་ཆགས་པས་ཆོས་མ་ཡིན་པའི་ལམ་ལ་ཡང་འཇུག་ལ། དེ་དག་དེ་ལས་བཟློག་ན་མི་དགའ་བས་

172-1-153a

སེམས་ལ་གནོད་པར་འགྱུར་རོ་ཞེས་བཤད་དོ། །དེ་སྐད་དུ་སྨྲ་བ་ཐམས་ཅད་ཀྱི་ངག་བཞིན། བྱར་མི་རུང་བས་དག་གྱུར་པ། །ཞེས་སྨོས་སོ་བསམ་པ་དག་པ་སྟེ། ཆགས་པ་ལ་སོགས་པའི་དྲི་མ་དང་བྲལ་པའི་ཕྱིར་གོས་དག་པ་ལྟ་བུའོ། །ཇི་ལྟར་ན་དག་པ་ཡིན་ཞེ་ན།
ཤེས་རབ་ཅེས་བྱ་བ་ལ་སོགས་པ་སྨོས་ཏེ། དེ་ལ་ཡང་དག་པ་ཇི་ལྟ་བ་བཞིན་གྱི་དོན་འཛིན་པ་ནི་ཤེས་རབ་པོ། །སྙིང་རྗེ་ནི་སྙིང་རྗེ་ཉིད་དོ། །དེ་དག་དང་ལྡན་པའི་ཕྱིར་དྲི་མ་མེད་པ་ཡིན་ཏེ། དེ་དག་གི་མི་མཐུན་པའི་ཕྱོགས་ཀྱི་དྲི་མ་དང་བྲལ་བའི་ཕྱིར་རོ། །ལྷན་ཅིག་འགྲོགས་པ་ནི་རིགས་པ་དང་ཅིག་ཤོས་
དཔྱོད་པའི་དུས་ན་ཉེ་བར་འཁོད་པའོ། །གལ་ཏེ་ང་ལ་དེ་སྐད་དུ་སྨྲ་བ་མང་དུ་ཡོད་པས་འདིས་ཅི་ཞིག་བྱ་སྙམ་དུ་སེམས་ན། དེའི་ཕྱིར། །ཕན་པར་སྨྲ་བ་དཀོན་པ་སྟེ། །ཞེས་བྱ་བ་ལ་སོགས་པ་སྨོས་སོ། །འཕྲོད་པ་དང་འདྲ་བར་ཕན་པ་སྟེ། ཇི་ལྟར་འཕྲོད་པའི་ཟས་ཕན་པར་འགྱུར་བ་ལྟར་
འདི་ཡང་དེ་དང་འདྲའོ། །འདི་དག་ལ་ཕན་པར་སྨྲ་བའི་ངང་ཚུལ་ཡོད་པས་ན་དེ་དག་ལ་དེ་སྐད་ཅེས་བྱའོ། །རྙེད་ཅིང་ཕྲག་པར་དཀའ་བས་ན་དེ་ལྟ་བུ་ཡིན་ནོ། །ཉན་པའི་སྐྱེ་བོ་ཡང་ཕལ་འཕྲོད་པར་མི་བྱེད་པས་དེ་དགག་པར་ཚིག་སྨོས་ཏེ། གང་དག་འདི་ཉན་པར་འགྱུར་བ་དེ་དག་ཀྱང་ཤིན་ཏུ་
དཀོན་ནོ་ཞེས་བྱ་བའི་དོན་ཏོ། །ཕན་པ་ཉན་པ་དེ་དག་པས་ཀྱང་ངོ་། །མི་སྙན་པ་ནི་མི་མཐུན་པའོ། །ཕན་པ་ནི་འཕྲོད་པའོ། །གང་གི་ཕྱིར་ཕན་པར་འདོད་པ་ཡིན་པ་དེའི་ཕྱིར་མི་སྙན་པ་ཡང་ཕན་པར་སྤྱད་ཅིང་བྱའོ། །བདག་བྱམས་པ་ཞེས་བྱ་བ་ནི་བདག་ལེགས་སུ་དགའ་བ་སྟེ། སེམས་
དང་བཅས་པ་ཞེས་བྱ་བའི་ཐ་ཚིག་གོ། །གང་ཞིག་བདག་འདི་ནི་བསོད་ནམས་ཀྱིས་འཐོབ་པོ་ཞེས་བདག་ཉིད་ཤེས་པ་དེ་ལ་བདག་སྟེ། སེམས་ཡོད་པས་ན་དེ་སྐད་ཅེས་བྱའོ། །གལ་ཏེ་འདི་སྙམ་དུ་སྲོག་ལ་སོགས་པ་རྟག་པ་དེའི་ཕྱིར་བགས་ཀྱིས་བྱའོ་སྙམ་དུ་སེམས་ན།
དེའི་ཕྱིར་མཇུག་ཐོགས་ནས་འབྱུང་བས་སྟོན་ཏོ། །སྲོག་དང་ནད་མེད་པ་དང་རྒྱལ་སྲིད་དེ། དེ་དག་ལ་འཁོར་བ་ན་གནོད་པ་མི་བཟད་པ་རྣམ་པ་སྣ་ཚོགས་འབྱུང་བར་མཐོང་ནས་སོ། །དེ་ནས་སྐྱོ་བའི་འབྲས་བུ་ཡིན་པས་ཡང་དག་བརྩོན་པ་སྟེ། ཡང་དག་བརྩོན་པ་ནི་ཡང་དག་པའི་བརྩོན་འགྲུས་

172-1-153b

སོ། །དཔེར་ན་གཞན་དུ་བརྩོན་པ་མྱུར་དུ་འགྲོ་བ་ལ་བྱ་བ་ལྟར་ཆོས་ལ་ཡང་དེ་དང་འདྲའོ། །འདི་ནི་ཡང་དག་པ་ཡང་ཡིན་ལ་བརྩོན་པ་ཡང་ཡིན་པས་ཡང་དག་བརྩོན་པ་སྟེ། ཡང་དག་པའི་བརྩོན་འགྲུས་ཞུམ་པ་དང་རྒོད་པ་ལ་སོགས་པ་དང་བྲལ་བའོ། །དེ་ཉིད་དེ་ནས་ཞེས་བྱ་བ་ལ་སོགས་པ་
ཐམས་ཅད་ཀྱང་སྟོན་ཏེ། གཅིག་ཏུ་ཞེས་བྱ་བ་ནི་དེ་ལ་གཏོང་བ་དང་ལུས་དང་ངག་དང་ཡིད་ཀྱིས་ངེས་པར་རོ། །ཡང་དག་པར་བརྩོན་པའི་རྒྱུ་གཞན་གདོན་མི་ཟ་བར་ཞེས་བྱ་བ་འདི་ཡང་སྨོས་ཏེ། གདོན་མི་ཟ་བ་ནི་ངེས་པར་རོ། །འཆི་བ་ནི་ཚེ་ཟད་པའོ། །གཟིགས་ཏེ་ཞེས་བྱ་བ་ནི་བློས་རྟོགས་
ཏེའོ། །བདེན་ཡང་ཞེས་བྱ་བ་ནི་འདོད་པ་ལ་ལོག་པར་སྤྱོད་པ་ལ་སོགས་པས་སོ། །གལ་ཏེ་འདི་སྙམ་དུ་སྡིག་པ་སྤྱོད་པ་ཁ་ཅིག་ལ་ནི་འཇིགས་པ་མ་མཐོང་སྟེ། དཔེར་ན་བྱ་ལ་སོགས་པ་གསོད་པ་ལྟ་བུའོ། །ཁ་ཅིག་ལ་ནི་འཇིགས་པ་ཡོད་དེ། དཔེར་ན་སྐྱ་བསེང་དང་བརྩོན་པ་རྣམ་པ་སྣ་
ཚོགས་ལ་སོགས་པ་རི་དགས་ཤོར་བ་ལྟ་བུའོ། །མི་གསོད་པ་ཡང་དེ་དང་འདྲའོ་སྙམ་དུ་སེམས་ན། དེའི་ཕྱིར་ལ་ལར་ཞེས་བྱ་བ་ལ་སོགས་པ་སྨོས་སོ། །ཆང་གི་འབྲས་བུ་མི་འདོད་པ་བཤད་ཟིན་མོད་ཀྱི་ཡང་ཆང་གི་ཞེས་བྱ་བ་ལ་སོགས་པས་དེའི་ཉེས་པ་ཚེ་འདི་ལ་རྒྱས་པར་བསྟན་ཏོ། །
རྒྱན་པོ་ནི་ཕུང་བའི་འབྱུང་གནས་ཡིན་པས་དེ་དགག་པ་སྟོན་ཏོ། །གཡོ་ནི་རྔན་ཐབས་སུའོ། །སྒྱུ་ནི་སེམས་གྱ་གྱུ་བའོ། །རྒོད་པ་ནི་དབང་པོ་རྣམས་ཉེ་བར་མ་ཞི་བའོ། །གནས་ནི་འབྱུང་བའི་གནས་སོ། །ཡུལ་རྣམས་ནི་ཆགས་པའི་གནས་ཡིན་ལ་དེ་རྣམས་ཀྱི་ནང་ན་ཡང་བུད་མེད་ཀྱི་གཟུགས་ནི་
ཆགས་པའི་གནས་ཡིན་པས་དེ་ལ་འདོད་ཆགས་དང་བྲལ་བ་སྐྱེད་པའི་ཕྱིར་མི་གཙང་བའི་གཏམ་བྱ་བར་བཞེད་ནས། བུད་མེད་ཆགས་པ་ཕལ་ཆེར་ནི། །ཞེས་བྱ་བ་ལ་སོགས་པ་གསུངས་སོ། །ཆགས་པ་ནི་ལྷག་པར་ཞེན་པ་སྟེ་འཛིན་པ་དམ་པའོ། །སྡུག་བསྔལ་གྱི་ཆགས་པ་ནི་དེའི་རྒྱུ་ཅན་ཡིན་
པའི་ཕྱིར་རོ། །བུད་མེད་ལ་ཆགས་པ་ནི་བསྟེན་པ་ཡིན་ཏེ། དེ་ཡང་ཕལ་ཆེར་མང་དུ་བུད་མེད་ལས་བྱུང་ཞིང་བུད་མེད་ཀྱི་ཕྱིར་ཡིན་པས་དེས་སྐྱེད་པ་ཡིན་ནོ་ཞེས་བྱ་བའི་ཐ་ཚིག་གོ། །དེ་ཇི་ལྟར་འབྱུང་ཞེ་ན། བུད་མེད་ཀྱི་གཟུགས་གཙང་བ་མ་ཡིན་པ་ལ་ཡང་གཙང་བའི་སེམས་ཏེ། གཙང་མར་རྟོག་པ་

172-1-154a

ཡིན་པས་འཆད་པར་འགྱུར་བའི་རང་གི་ངོ་བོས་ནི་མ་ཡིན་ནོ། །དོན་དུ་ཞེས་བྱ་བ་ནི་ཐ་སྙད་ཀྱི་བདེན་པ་ལ་བརྟེན་ནས་སོ། །གཙང་བ་ཅུང་ཟད་ཅེས་བྱ་བ་ལ་སོགས་པས་ནི་ཇི་ལྟར་གཙང་བ་མེད་པ་དེ་ལྟར་སྟོན་ཏོ། །ཁ་ཆུ་རུལ་བ་ནི་མཆིལ་མའོ། །སྣོད་ནི་གཞིའོ། །སྣབས་ནི་བད་ཀན་མ་
སྨིན་པའོ། །དེ་ཡང་མི་གཙང་བའི་ཁྱད་པར་རོ། །མིག་རྡུལ་ནི་མིག་གི་དྲི་མའོ། །མཆི་མ་ནི་མིག་ཆུའོ། །ལྟོ་བ་ཉིད་ཁོང་ཡིན་ཏེ། ངན་པའི་ཕྱིར་རམ། ངན་པ་བཟུང་བས་ན་དེ་སྐད་ཅེས་བྱའོ། །ཡང་ན་ལྟོ་བ་དང་ཁོང་པ་ནི་ལྟོ་བའི་ཁོང་པ་སྟེ། གཉིས་ཀ་ཡང་མི་གཙང་བས་སོ། །གློ་མཆིན་ནི་སྙིང་ག་དང་
གློ་རོལ་ན་ཡོད་པའི་མི་གཙང་བའོ། །རྨོངས་པ་ནི་བློ་གྲོས་ཕྱིན་ཅི་ལོག་པའོ། །ཤིན་ཏུ་དྲིང་བ་ནི་ཁ་དང་རྐེད་པ་ལ་སོགས་པའོ། །ཡན་ལག་གང་གིས་སམ་ཐབས་གང་གིས་སོ། །གལ་ཏེ་དེ་ལྟ་ཡིན་ན་ཇི་ལྟར་འདི་ལ་འཇིག་རྟེན་དམན་པ་ལ་སོགས་པ་ཆགས་ཤེ་ན། དེའི་ཕྱིར་ཇི་ལྟར་ཞེས་བྱ་བ་ལ་སོགས་
པ་སྨོས་ཏེ། ཡུལ་འདིར་བཅེར་ཞིང་བསགས་པས་ན་བཅེར་བའོ། །ངན་སྐྱུགས་པའི་ཕག་རྣམས་ལ་དེ་སྐད་ཅེས་བྱའོ། །ཆགས་པ་ནི་ཞེན་པའོ། །དེ་བཞིན་དུ་བཤང་གཅི་བཅེར་ཞིང་དེ་དག་བསམས་པའི་གནས་ལ་འདོད་པ་ཅན་ངན་སྐྱུགས་ཀྱི་ཕག་ལྟ་བུ་རྣམས་ཆགས་སོ། །སེམས་ཅན་
དུ་མའི་ཚོགས་ཀྱི་རྟེན་ལ་གྲོང་ཁྱེར་ཞེས་བྱ་བ་དེ་བཞིན་དུ་ལུས་འདི་ཡང་སྲིན་བུའི་རིགས་བརྒྱད་ཁྲིའི་རྟེན་ཡིན་པས་གྲོང་ཁྱེར་ཞེས་བཤད་དོ། །དེ་དང་མཆོག་སྟེ་དངོས་པོ་བཟང་པོ་དང་བྲལ་བས་ན་དུག་སྟེ། །བུང་བུ་ངན་པ་ཞེས་བྱ་བའི་ཐ་ཚིག་གོ། །གཞན་ལ་ཡང་དོན་ནི་དེ་ཁོ་ན་ཡིན་པར་བལྟ་བར་
བྱ་སྟེ། དག་པ་རྣམས་ཀྱིས་ནི་རྣམ་པ་ཐམས་ཅད་དུ་མཛེས་པའི་ཕྱིར་དེ་ལྟ་བུ་མ་ཡིན་ནོ། །དགའ་བ་ནི་ཉམས་དགའ་ཞིང་ལྷག་པར་ཞེན་པ་སྟེ། དབང་པོས་ཡོངས་སུ་ལོངས་སྤྱོད་པའི་ཆེད་དུའོ། །ཇི་ལྟ་བུར་ཞེས་བྱ་བ་ནི་ཡ་མཚན་དུ་བརྩི་བའོ། །འདྲེས་པ་ཉིད་ས་བོན་ནོ། །འདོད་པ་གང་
གིས་ཏེ། གཙང་བའི་འདུ་ཤེས་ཀྱི་འདོད་ཆགས་པར་འགྱུར་ན་དེ་ལྟ་བུ་ནི་མ་ཡིན་ནོ། །དེའི་རླན་གྱིས་ཞེས་བྱ་བ་ནི་དེའི་ཞག་དང་ཆུ་སེར་གྱི་རླན་གྱིས་སོ། །གཞོན་ཞིང་སྡུག་པ་ལ་སོགས་པ་དང་ལྡན་པས་འདོད་ཆགས་ཀྱི་གཞིར་འགྱུར་རོ་ཞེ་ན། རྒན་ནམ་ཞེས་བྱ་བ་ལ་སོགས་པས་དེ་འགོག་གོ། །

172-1-154b

ཇི་སྐད་དུ་ཇི་ལྟར་མི་གཙང་བ་རྙིང་བའམ། བར་མ་འམ། གསར་བ་ལ་ཡང་རུང་འདོད་ཆགས་མི་འབྱུང་བ་ལྟར་འདི་ལ་ཡང་དེ་བཞིན་དུ་རུང་བ་མ་ཡིན་ནོ་ཞེས་བཤད་པ་ཡིན་ནོ། །སྣང་བཞིན་དུ་ཇི་ལྟར་བུར་ཞེས་བྱ་བ་ནི་ཡ་མཚན་ཆེ་བར་སྟོན་པ་ཡིན་ནོ། །ལུས་ཀྱང་གཞན་ཡིན་ལ་རལ་ག་ཡང་གཞན་
ཡིན་ནོ། །མི་གཙང་གང་བའི་བུམ་པ་ཞེས་བྱ་བ་ལ་སོགས་པས་ནི་དཔེས་དོན་ཉིད་གསལ་བར་བྱེད་པ་ཡིན་ནོ། །མི་གཙང་བའི་རང་བཞིན་ཏེ་དེའི་ངོ་བོ་ཉིད་དེས་གང་བའོ། །ཕྱི་ནི་བུད་མེད་ཀྱི་ལུས་ལའོ། །ནང་ནི་རང་གི་ལུས་ལའོ། །འཛག་པ་ནི་ཟག་པ་སྟེ་གང་ལ་རྨའི་སྒོ་དགུ་ནས་འཛག་པ་དེ་ནི་རྨ་
དགུ་དག་ནས་འཛག་པ་ཅན་ནོ། །ཅི་ཞིག་ཕན་ཞེས་བྱ་བ་ནི་དོན་མེད་དོ་ཞེས་བྱ་བའི་ཐ་ཚིག་གོ། །བུད་མེད་ཀྱི་ལུས་རྒྱན་གྱིས་བརྒྱན་པ་ལ་སོགས་པ་ལ་སྟེག་ཆོས་ཚིག་ཏུ་སྡེབས་པ་ནི་སྟེག་ཆོས་ཀྱི་སྙན་དངགས་བྱེད་པའོ། །ཨེ་མའོ་ཞེས་བྱ་བ་ནི་ཡ་མཚན་དུ་བརྩི་བའོ། །གཟུ་ལུམས་ནི་ངོ་ཚ་དང་བྲལ་བའོ། །
བླུན་པ་ནི་རང་གི་ངོ་བོ་ཡོངས་སུ་མི་ཤེས་པས་སོ། །ཁྲེལ་དུ་རུང་བ་ནི་སྨད་པར་བྱ་བ་ལ་སྟོད་པར་བྱེད་པས་སོ། །དེ་བཞིན་དུ་ཕལ་ཆེར་ཞེས་བྱ་བ་ནི་མང་དུ་སྟེ། རྒྱུ་གཞན་གྱིས་ཀྱང་འབྱུང་མོད་ཀྱི་འདི་ནི་འཇིག་རྟེན་འདི་ན་ཕལ་ཆེར་རྩོད་པ་འབྱུང་བའི་རྒྱུའི་གཙོ་བོ་ཡིན་ལ། དེ་ཡང་བདེ་བ་ལ་ལྷག་པར་ཞེན་
པའི་ཕྱིར་ཡིན་ན་འདི་ལ་དོན་དུ་ནི་བདེ་བ་ཅུང་ཟད་ཀྱང་མེད་དོ་ཞེས་སྟོན་ཏོ། །གཡན་པ་ཕྲུགས་ན་ཞེས་བྱ་བ་ལ་སོགས་པ་ནི་གཡན་པའི་རྨ་ཕྲུག་ན་མཐའ་སྡུག་བསྔལ་བའི་བདེ་བ་འཐོབ་ཀྱི་གདུང་བའི་རྗེས་ལ་བདེ་བ་མ་ཡིན་པས། དེ་བས་དེ་ནི་དོན་དུ་བདེ་བ་མ་ཡིན་པ་ཉིད་དུ་ཤེས་པར་བྱའི། དེ་
བས་གཡན་པ་མེད་པས་ནི་གདུང་བ་མེད་པས་བདེ་བ་དེ་བཞིན་དུ་འདོད་པའི་བདེ་བ་འགྱུར་བའི་སྡུག་བསྔལ་ཅན་བས་གང་ཞིག་འདོད་པ་མེད་པས་དེ་ཉེ་བར་ཞི་བའི་བདེ་བ་ཞི་བས་རྟག་ཏུ་བདེ་བའོ། །གལ་ཏེ་འདི་སྙམ་དུ་ཁྱོད་ལ་བཤད་པས་ཅི་ཞིག་ཕན་ཞེས་སྨྲས་པ། གལ་ཏེ་བཤད་པས་ཅུང་ཟད་ཀྱང་
མི་ཕན་ན་ངལ་བས་ཅི་ཞིག་བྱ་སྙམ་དུ་སེམས་ན་དེའི་ཕྱིར་མཇུག་ཐོགས་ནས་འབྱུང་བས་སྟོན་ཏོ། །གལ་ཏེ་ཞེས་བྱ་བ་ནི་ཁས་ལེན་པའོ། །ཆགས་པ་ནི་ལྷག་པར་ཞེན་པའོ། །རི་དྭགས་ཤོར་བས་ན་རི་དྭགས་ལིངས་ཏེ་རྔོན་པ་བྱེད་པའམ། ལིངས་འདེབས་བའོ། །རི་དགས་རྣམས་ལ་

172-1-155a

གནོད་པས་ནི་བདེ་འགོག་སྟེ། ཚེ་ཐུང་ཞིང་ཞེས་བྱ་བ་ལ་སོགས་པས་ནི་རྒྱུ་མཐུན་པའི་འབྲས་བུ་སྟོན་ཏོ། །ཇི་ལྟར་གཞན་ལ་བྱས་པ་དེ་བཞིན་དུ་ཚེ་ཐུང་བ་དང་། ཇི་ལྟར་འཇིགས་པར་བྱས་པ་དེ་བཞིན་དུ་འཇིགས་པ་དང་། ཇི་ལྟར་སྡུག་བསྔལ་བར་བྱས་པ་དེ་བཞིན་དུ་སྡུག་བསྔལ་
བའོ། །དམྱལ་བའི་རྒྱུ་ནི་མི་བཟད་པ་ཞེས་བྱ་བ་ལ་སོགས་པས་ནི་རྣམ་པར་སྨིན་པའི་འབྲས་བུ་བསྟན་ཏོ། །དེ་ཐམས་ཅད་གང་ལས་འགྱུར་ཞེ་ན། རི་དགས་ལིངས་ཞེས་བྱ་བ་ལ་སོགས་པ་སྨོས་སོ། །གསོད་པ་ནི་སྲོག་ཆགས་གསོད་པའི་བསམ་པ་སྟེ། འདིས་སེམས་ཅན་རྣམས་གསོད་པས་སོ། །དེ་
ལྟ་བུ་མ་ཡིན་པས་ན་གསོད་མེད་དེ། དེ་བརྟན་ཞིང་མི་བྱེ་བར་མཛོད་ཅིག་པའོ། །རེ་ངན་ཞེས་བྱ་བ་ནི་སྨད་པ་སྟེ། མི་གཙང་བ་དང་འཇིགས་སུ་རུང་བ་ཞེས་བྱ་བའི་ཐ་ཚིག་གོ། །འདི་དག་ལ་ཞིང་ལས་ཁོ་ན་བྱེད་པ་ཡོད་པས་ན་ཞིང་པ་སྟེ། གཙོར་དེ་ཙམ་གྱིས་འཚོ་བར་འགྱུར་བ་ཞེས་བྱ་བའི་ཐ་ཚིག་
གོ། །བཟང་བ་ནི་དགེ་བ་སྟེ་མཛེས་པའོ། །རི་དགས་ལིངས་ཞེས་བྱ་བ་ནི་ཁྱད་པར་དུ་ཉེ་བར་མཚོན་པར་མཛད་པ་ཡིན་ཏེ། འདིས་ནི་སྤྱིར་སྡིག་པ་བྱེད་པ་དང་སྨད་པ་བཤད་པ་ཡིན་ནོ། །ད་ནི་དེ་བས་ཞེས་བྱ་བ་ལ་སོགས་པས་ཆོས་མ་ཡིན་པ་སྤྱིར་འགོག་སྟེ། གཡེལ་བ་མེད་པར་ཞེས་བྱ་བ་ནི་
བག་ཡོད་པར་ཏེ། བག་མེད་པ་ནི་བྱ་བ་བཟང་པོ་དང་བཟང་པོ་མ་ཡིན་པ་རྣམ་པར་དབྱེ་བ་ལ་གསལ་བར་མི་འགྱུར་རོ། །རང་དང་གཞན་དག་བླ་ན་མེད་པའི་བྱང་ཆུབ་འཐོབ་པར་འདོད་ནའོ། །འདོད་ན་དེ་ཇི་ལྟར་འཐོབ་པར་འགྱུར་ཞེ་ན། དེའི་རྩ་བ་ཞེས་བྱ་བ་ལ་སོགས་པ་སྨོས་ཏེ། རྩ་བ་དང་
འདྲ་བས་ན་རྩ་བའོ། །རྩ་བ་ནི་གཙོ་བོའི་རྒྱུ་སྟེ། ཇི་ལྟར་ཤིང་གི་རྩ་བ་ལ་ཡལ་ག་ལ་སོགས་པ་ཐམས་ཅད་བརྟེན་པ་དེ་བཞིན་དུ་འདི་ལ་བཅོམ་ལྡན་འདས་ཀྱི་སངས་རྒྱས་ཀྱི་ཆོས་ཐམས་ཅད་བརྟེན་ཏོ། །རྩ་བ་དེ་ཅི་ཞིག་ཡིན་ཞེ་ན་བཤད་པ། བྱང་ཆུབ་བླ་ན་མེད་པའི་ཡེ་ཤེས་ཀྱི་སེམས་བརྟན་
ཞིང་མི་གཡོ་བ་སྟེ། སྩོགས་པའམ་རྒྱས་པར་འགྱུར་བས་ན་སེམས་སོ། །ཇི་ལྟ་བུར་བརྟན་པ་ཞེ་ན། རི་དབང་རྒྱལ་པོ་ལྟར་ཏེ་རི་རབ་བཞིན། །ཞེས་བྱ་བའི་དོན་ཏོ། །ཕྱོགས་མཐའ་གཏུགས་པ་ནི་མཐའ་ཡས་པ་ཞེས་བྱ་བའི་ཐ་ཚིག་གོ། །མཆོད་རྟེན་ནི་སྐུ་གདུང་གི་སྙིང་པོ་ཅན་ནམ་ཆོས་ཀྱི་དབྱིངས་

172-1-155b

ཀྱི་སྙིང་པོ་ཅན་གྱི་ཕྱིར་རམ། རི་གང་ཡིན་པ་དེ་ཉིད་འདི་ཉིད་ཡིན་ནོ་ཞེས་བཅོམ་ལྡན་འདས་ཀྱིས་བྱིན་གྱིས་བརླབས་པའི་ཕྱིར་མཆོད་པར་འོས་པ་ཡིན་ནོ། །དེ་བས་ན་འདི་སྐད་ཅེས། དཀར་པོའི་ཆོས་རྣམས་བསགས་ཕྱིར་དང་། །སྡིག་པའི་ལས་རྣམས་སྤངས་པའི་ཕྱིར། །སངས་རྒྱས་བཅོམ་
ལྡན་འདས་ཉིད་ལ། །མཆོད་རྟེན་ཞེས་ཀྱང་མངོན་པར་བརྗོད། །ཅེས་འབྱུང་ངོ་། །མཆོད་རྟེན་དང་མཆོད་པར་བྱ་བ་རྣམས་དང་འཕགས་པ་རྣམས་སོ། །ལེགས་པར་རྗེས་སུ་མཐུན་པར་ཀུན་ནས་ཡོངས་སུ་བཀུར་བ་སྟེ། །གནོད་པ་དང་ཕོངས་པ་རྣམས་ལས་སྲུང་བ་དང་། ཡོ་བྱད་སྦྱར་བ་དང་།
ཅི་རིགས་པར་ཕྱག་བྱ་བ་དང་། བསྙེན་བཀུར་དང་། མཆོད་པ་ལ་སོགས་པ་བྱ་བའོ། །དཔལ་ནི་བརྗིད་པ་སྟེ་ཟིལ་གྱིས་མི་ནོན་པའོ། །མཚན་མ་ནི་རྟགས་ཅན་ནོ། །འཁོར་ལོས་གླིང་བཞི་ན་གནས་པའི་སྐྱེ་བོའི་དཀྱིལ་འཁོར་དགེ་བའི་ལས་ལ་སྒྱུར་ཞིང་འཇུག་པར་བྱེད་པས་ན་དེ་སྐད་
ཅེས་བྱའོ། །ཡང་དག་བླངས་པ་ནི་འདི་མ་བྱས་པར་བདག་གིས་ཟས་བཟའ་བར་མི་བྱའོ་ཞེས་ངེས་པར་བྱ་བའི་ཁྱད་པར་རོ། །རྐང་མཐིལ་ས་ལ་མཉམ་པར་འབབ་པས་ན་ཤིན་ཏུ་ཞབས་གནས་པའོ། །འབྲེལ་པ་ནི་འབྲེལ་པ་ཉིད་དོ། །མཉེན་པ་ནི་འཇམ་པ་ཉིད་དོ། །ཕྱག་དང་ཞབས་
བཞི་དང་། ཐལ་གོང་གཉིས་དང་། ལྟག་པ་དང་བདུན་མཐོ་ཞིང་རྒྱས་པའོ། །མཛེས་པ་ནི་བལྟ་ན་སྡུག་པའོ། །དྲང་བ་ནི་མ་ཡོ་བའོ། །ཞབས་ཀྱི་ལོང་བུ་མི་མངོན་པ་ནི་ཞབས་ཀྱི་ལོང་བུ་མ་འབུར་བའོ། །ཨེ་ནེ་ཡའི་བྱིན་པ་ནི་བྱིན་གྱིས་ཕྲ་བའོ། །ལེན་པ་ནི་ལེན་པར་བྱེད་པའོ། །གཞུང་
མྱུར་དུ་འཛིན་པས་ན་ཡིད་རྣོ་བའོ། །རྒྱས་པ་ནི་རིང་བའམ་རྒྱས་པའོ། །བདེ་བ་ནི་ཟོ་མདོག་མི་བདེ་བ་མ་ཡིན་པའོ། །ཡང་དག་བསྡུམ་པ་བྱས་པ་ནི་ཀུན་ནས་སྤྲད་པའོ། །བདེ་བའི་རྒྱུ་ཡིན་པས་ན་བདེ་བའོ། །ཤིན་ཏུ་འཇམ་པ་ནི་ལེགས་པར་བྱི་དོར་བྱས་པའོ། །བླ་ན་མེད་པའི་དབང་
བྱིན་པ་ནི་རྒྱལ་སྲིད་བྱིན་པ་སྟེ། དབང་ནི་ཁྱོད་ཀྱིས་འདི་དག་ལྟོས་ཤིག་ཅེས་དབང་དུ་བསྐོས་པའོ། །འདི་ལ་རོ་སྟོད་དེ། ལུས་ཀྱི་སྟོད་སེང་གེའི་ལྟ་བུར་འཕེལ་ཀ་ཆེ་བ་ཡོད་པས་ན་དེ་སྐད་ཅེས་བྱའོ། །རིམ་གྲོ་ནི་བཀུར་སྟིའོ། །རྒྱས་པ་ནི་རྒྱས་པར་འགྱུར་བའོ། །རྣལ་དུ་གནས་པ་ནི་

172-1-156a

ཁྲལ་ཁྲུལ་མེད་པའམ་བརྟན་པའོ། །ཐོག་དྲངས་པ་ནི་གཙོ་བོའོ། །ལེགས་གནས་ནི་གནས་ན་གནས་པའོ། །ནྱ་གྲོ་དྷ་ལྟར་ཆུ་ཞེང་གབ་པ་ནི་སྲིད་དུ་ཇི་ཙམ་པ་ཞེང་དུ་ཡང་ཇི་ཙམ་པའོ། །རྟག་ཏུ་མཉན་ཀྱང་སྙན་ལ། ཡོན་ཏན་མཐའ་ཡས་པ་དང་ལྡན་པའི་སྒྲ་ནི་ཚངས་
པའིའོ། །དེ་དང་ལྡན་པས་ན་ཚངས་པའི་དབྱངས་དང་ལྡན་པའོ། །ཡང་ན་ཚངས་པ་ནི་མྱ་ངན་ལས་འདས་པ་སྟེ། དེ་ཐོབ་པ་དང་མཐུན་པའི་སྒྲ་ལ་དེ་སྐད་ཅེས་བྱའོ། །ཇི་སྐད་བཤད་པའི་བདེན་པའི་མཚན་ཉིད་མཁྱེན་པར་བགྱིས་ནས་སོ། །ཇི་ལྟར་རིགས་པ་ནི་གང་ལ་གང་འོས་པའོ། །སེང་
གེ་དང་འདྲ་བར་འགྲམ་སླང་ཆེ་བས་ན་འགྲམ་པ་སེང་གེའི་ལྟ་བུའོ། །ཐུབ་པར་དཀའ་བ་ནི་བདུད་ལ་སོགས་པས་ཐུབ་པར་དཀའ་བའོ། །ལྷག་པར་གུས་པ་ནི་གུས་པ་ཁྱད་པར་ཅན་ནོ། །བཀུར་སྟི་ནི་དེ་ལས་དག་པའོ། །མདོག་ལྡན་ནི་སྤ་བའོ། །མཉམ་པ་ནི་མཐོན་དམན་མེད་པའོ། །རྫི་
མ་གནག་པས་ན་རྫི་མ་བའི་ལྟ་བུའོ། །དག་པ་ནི་དྲི་མ་མེད་པའོ། །མཛེས་པ་ནི་སྡུག་ཅིང་ཡིད་དུ་འོང་བ་ཉིད་དོ། །གསལ་བ་ནི་བརྗིད་པའོ། །འདྲེན་མའི་དོན་སྟོན་པའི་ཕྱིར་སྤེལ་མའོ། །ལུས་དང་ངག་གི་ལས་དེ་ལྟ་བུ་དང་ལྡན་ན་སངས་རྒྱས་ཀྱི་གོ་འཕང་ཐོབ་ནས་མཚན་དེ་ལྟ་བུ་ཅན་དུ་འགྱུར་རོ་ཞེས་
བཤད་ཀྱི་བསོད་ནམས་ཇི་ཙམ་གྱིས་དེ་དག་ཏུ་འགྱུར་བ་ནི་མ་བཤད་པས། བསོད་ནམས་བསམ་གྱིས་མི་ཁྱབ་ལས། ཞེས་བྱ་བ་ལ་སོགས་པས་སྟོན་ཏོ། །བསྒྲེས་པ་ནི་ཆ་དང་ཤས་ཆས་ཏེ། གང་གིས་དེར་གྱུར་པ་དེ་ལ་དེ་སྐད་ཅེས་བྱའོ། །གང་ནས་བ་སྤུ་བྱུང་བ་དེ་ནི་བ་སྤུའི་བུ་གའོ། །མཐར་
ཕྱིན་པ་ནི་བརྒྱན་པ་སྟེ་གྲུབ་པའི་ཕྱིར་རོ། །སྟོབས་བཅུ་དང་མི་འཇིགས་པ་ལ་སོགས་པའི་མཚན་ཉིད་ཀྱི་ཆོས་ཡེ་ཤེས་ཀྱི་ངོ་བོ་ནི་དོན་ཐམས་ཅད་སྒྲུབ་པའི་ཕྱིར་ལུས་དང་འདྲ་བར་སྐུ་ཡིན་ནོ། །དེའི་རྒྱུ་ནི་ཡེ་ཤེས་ཀྱི་ཚོགས་ཡིན་ལ། དེའི་དངོས་པོའི་ཚོགས་གཞན་ཐམས་ཅད་ཀྱི་ཡིན་ནོ། །
བསྟན་པ་ནི་ངེས་པའོ། །དབུགས་འབྱིན་བྱེད་པ་ནི་དགའ་བའམ་ཡིད་བདེ་བའོ། །རྒྱུ་ནི་བསོད་ནམས་དང་ཡེ་ཤེས་ཀྱི་ཚོགས་ཀྱི་མཚན་ཉིད་དོ། །སྒྱིད་ལུག་པ་ནི་སུས་ནུས་ཞེས་ཞུམ་པ་ཉིད་དོ། །མི་མཉམ་པའི་ཕྱིར་བརྟན་པའོ། །བསོད་ནམས་སོགས་པར་འགྱུར་ཞེས་བྱ་བར་སྦྱར་རོ། །

172-1-156b

སེམས་ཅན་མཐའ་ཡས་པའི་ཕྱིར་མཐའ་ཡས་པ་རྟག་པར་རོ། །རྣམ་བཞི་ནི་བདེན་པ་དང་གཏོང་བ་དང་། དུལ་བ་དང་། ཤེས་རབ་ཀྱི་མཚན་ཉིད་དག་གོ། །ཡང་ན་དུས་དང་། སེམས་ཅན་དང་། བྱང་ཆུབ་འདོད་པ་དང་། དགེ་བ་ཚད་མེད་པའི་མཚན་ཉིད་དག་གོ། །ཡང་མཐའ་
ཡས་པ་ཉིད་ཐོས་ནས་འགའ་ཞིག་གི་སྒྱིད་ལུག་པར་འགྱུར་ན་དེའི་ཕྱིར། ལུས་དང་སེམས་ཀྱི་སྡུག་བསྔལ་མྱུར་བར་སེལ། །ཞེས་བྱ་བ་སྨོས་སོ། །དགོངས་པ་ནི་འདི་ཡིན་པར་སྣང་སྟེ། བྱང་ཆུབ་མ་ཐོབ་ཀྱང་ས་དང་པོ་ཐོབ་ནས་སྤྱིའི་མཚན་ཉིད་རྟོག་པའི་ཕྱིར་སྡུག་བསྔལ་གཉི་ག་མྱུར་དུ་
སེལ་ཏོ་ཞེས་བྱ་བ་མ་ཡིན་ནོ། །འདོད་པ་ལ་གེགས་བྱེད་པ་གསད་པ་དང་བཅིངས་པ་ལ་སོགས་པས་སྡུག་བསྔལ་བའོ། །ཆོས་ཐམས་ཅད་རྟེན་མེད་པའོ་ཞེས་ཤེས་པ་ལ་དེ་སྐད་ཅེས་བྱའོ། །གང་དག་དུས་རིང་པོར་འཁོར་བས་འཇིགས་པས་བྱང་ཆུབ་ཀྱི་སེམས་མི་སྐྱེད་པ་དེ་དག་གི་
ཕྱིར། མཇུག་ཐོགས་ནས་འབྱུང་བ་སྨོས་ཏེ། དེ་ལྟར་སྔར་བཤད་པའི་ཚུལ་དང་ལྡན་ན་མ་སྨྲས་པ་ཡིན་ནོ། །འཇིག་རྟེན་མཐས་གཏུགས་པ་ནི་འཁོར་བའི་མཐས་གཏུགས་པའོ། །ས་དང་པོ་ནས་བཟུང་སྟེ་ལུས་ཀྱི་སྡུག་བསྔལ་ནི་མེད་པ་ཉིད་དོ། །མི་སྙན་པ་ཐོས་པ་ལ་སོགས་
པས་ཡིད་ཕྱུང་བ་གང་ཡིན་པ་དེ་ཡང་བརྟན་པའི་སྟོབས་ཀྱིས་མེད་དོ། །གལ་ཏེ་དེ་ལ་སྡུག་བསྔལ་གཉིས་མེད་ན་ཅིའི་ཕྱིར་འཁོར་བར་འགྱུར་ཞིང་གནས་ཤེ་ན། དེའི་ཕྱིར། སྙིང་རྗེས་འཇིག་རྟེན་སྡུག་བསྔལ་ཞེས་བྱ་བ་ལ་སོགས་པ་སྨོས་སོ། །འཇིག་རྟེན་ན་སྡུག་བསྔལ་བ་ལ་དེ་སྐད་
ཅེས་བྱ་སྟེ། དེ་ཡང་སྙིང་རྗེས་ཡིན་ནོ། །འཇིག་རྟེན་སྡུག་བསྔལ་བ་དེ་ཉིད་ཀྱིས་ཏེ། དེ་ཐར་པར་བྱ་བའི་བསམ་པས་སོ། །དེ་བས་ཞེས་བྱ་བ་ནི་སྡུག་བསྔལ་གཉིས་དང་བྲལ་བས་སོ། །སེམས་ཅན་རྣམས་ཀྱི་སྡུག་བསྔལ་སེལ་བར་འདོད་པ་སོ་སོའི་སྐྱེ་བོའི་གནས་སྐབས་པས་ཉེས་
པ་ཟད་པར་བྱ་བའི་ཕྱིར་དང་། ཡོན་ཏན་འགྲུབ་པར་བྱ་བའི་ཕྱིར་ཇི་སྐད་བཤད་པའི་ཆོས་འདི་ལ་འབད་པར་བྱའོ། །ཉེས་པ་རྣམས་སྔར་ཡང་བཤད་ཟིན་མོད་ཀྱི་ཡང་སྐབས་ཀྱིས་ཆགས་དང་ཞེས་བྱ་བ་ལ་སོགས་པས་བསྟན་ཏོ། །གོང་དུ་ཉེས་པ་རྣམས་ཀྱིས་ངན་འགྲོར་འགྲོ་བ་ཙམ་ཞིག་

172-1-157a

བཤད་དེ། །དེ་ནི་བྱེ་བྲག་ཏུ་ཕྱེ་ནས་སྟོན་ཏོ། །འཕེན་པ་ནི་འཐོབ་པའམ་འགྲོ་བའོ། །ཕལ་ཆེར་ཞེས་བྱ་བ་ནི་མང་དུ་སྟེ་དེས་གཞན་དུ་ཡང་མི་འགྲོའོ། །བཟློག་པ་ནི་མི་མཐུན་པ་སྟེ་ཆགས་པ་ལ་སོགས་པ་ལས་བཟློག་པ་མ་ཆགས་པ་ལ་སོགས་པ་ཞེས་བྱ་བའི་ཐ་ཚིག་གོ། །
མངོན་པར་མཐོ་བ་དང་ངེས་པར་ལེགས་པའི་ཆོས་མདོར་བསྡུས་ནས་སྟོན་ཏོ། །ཆུ་སྲིན་འཛིན་ཁྲི་དང་འདྲ་བར་འཛིན་པ་སྟེ། སྡིག་པའི་ལུས་ལ་ཟ་བའི་ཕྱིར་རོ། །ཤེས་པ་ནི་ཕྱིན་ཅི་མ་ལོག་པས་སོ། །འཛིན་པ་ནི་མངོན་པར་ཞེན་པས་སོ། །ལོག་པར་ཞེས་བྱ་བ་འདི་ནི་རི་མོར་བྲི་བའི་ཁྱད་པར་
ཡིན་ནོ། །ནན་ཏན་ཀུན་གྱིས་བྱ་བ་ནི་འབད་པ་ཀུན་གྱིས་ཏེ་ནུས་པ་ཐམས་ཅད་ཀྱིས་སོ། །དགའ་བར་འགྱུར་བ་ཞེས་བྱ་བའི་སྒྲ་ནི་མཆོད་པའི་ཁྱད་པར་རམ། ཆོས་ཀྱི་ཁྱད་པར་ཡིན་ནོ། །བླ་མ་རྣམས་ལ་རིམ་གྲོའོ། །དེ་དག་ལས་མཉན་པར་འདོད་པ་ནི་གུས་པར་ཉན་པའོ། །དེ་དག་གི་བྱ་
བ་བྱེད་པ་ནི་ཡོངས་སུ་སྤྱད་པའོ། །ལྷ་ཁྱབ་མཇུག་དང་ལྷ་ཆེན་པོ་ལ་སོགས་པས་བཤད་པའི་གྲུབ་པའི་མཐའ་ནི་མུའོ། །དེ་ལ་བརྟེན་པས་ན་མུ་སྟེགས་སོ། །ཡང་ན་མུ་ནི་ཆུ་བོ་གངྒཱའི་མཆོད་སྦྱིན་ལ་སོགས་པ་སྐྱོན་མི་ཤེས་པ་རྣམས་སོ། །ལྷ་ལ་སོགས་པ་སྐྱོན་དང་བཅས་པ་ལ་ཡང་ངོ་། །ཐུབ་
པའི་དབང་པོའི་གསུང་དང་། གསུང་དེ་ལས་བྱུང་བ་ནི་རིན་པོ་ཆེའི་ཕྲེང་བ་ལ་སོགས་པའི་མཚན་ཉིད་དོ། །སྔོན་དུ་འགྲོ་བ་ནི་བཅས་པའམ་ཐོག་དྲངས་པའོ། །ཡི་གེའི་གྲྭ་ཁང་ནི་སློབ་དཔོན་གྱི་གྲྭ་ཁང་ངོ་། །འཚོ་བ་ནི་རྔན་པའི་འཚོ་བའོ། །དེ་ཡང་། ཞི་བཙལ་བ་ཡི་ངེས་པ་ནི། །ཚད་
དམ་བརྟན་པར་བྱས་པའོ། །སེམས་ཅན་རྣམས་དང་བདག་ཉིད་ཀྱི། །ཡེ་ཤེས་སྤེལ་བའི་སླད་དུའོ། །ཞིང་གི་རྔན་པ་ནི་གླ་བྱས་པའམ་གསོས་པའམ། བཟུང་བའོ། །ཆུ་ལོན་ནི་ཆུའི་གནས་སོ། །རྫིང་ནི་ཆུ་རིངས་སམ་ཆུའི་གནས་ཀྱི་ཁྱད་པར་རོ། །སྤྱིའི་འདུན་ས་ནི་འདུན་
ཁང་ངོ་། །ཆུར་ནི་ཆུའི་གནས་ཏེ། འདིར་ཆུ་རབ་ཏུ་འཐུང་བས་སོ། །མལ་ཆ་ལ་སོགས་པ་དང་ཡང་ལྡན་པས་སོ། །ཤེས་རབ་བཟང་པོ་ནི་མ་ཆགས་པ་ལ་སོགས་པའི་ཡོན་ཏན་དང་ལྡན་པའོ། །འདུན་ཁང་ལ་སོགས་པ་གང་དུ་བྱ་ཞེ་ན། གྲོང་དང་ཞེས་བྱ་བ་ལ་སོགས་པས་དེ་སྟོན་ཏེ།

172-1-157b

རིགས་བཞི་དང་ཚོང་པ་དང་། མཁས་པ་དང་ཡང་ལྡན་ལ། ར་བ་དང་ཡང་ཐོག་དང་རྟ་བབས་ལ་སོགས་པ་དང་ཡང་ལྡན་པའི་གནས་ནི་གྲོང་ཁྱེར་རོ། །འདི་ལ་མགོན་སྐྱབས་མེད་པས་ན་མགོན་མེད་པ་སྟེ། གང་སུ་ཡང་རུང་བའོ། །གཞན་ནི་སྡུག་བསྔལ་ལ་སོགས་པའི་མྱ་ངན་
གྱིས་ཉམ་ཐག་པའོ། །དམན་པ་ནི་རིགས་ལ་སོགས་པས་སོ། །ངན་པ་ནི་བརྗིད་བག་མེན་པ་སྟེ་སྦུངས་དང་བྲལ་བའོ། །སྙིང་རྗེས་ཡིན་གྱི་ཆགས་པས་ནི་མ་ཡིན་ནོ། །ཡོངས་བཟུང་ནི་ཡོངས་སུ་བསྐྱོར་བའོ། །དུས་ནི་དཔྱིད་ལ་སོགས་པའི་མཚན་ཉིད་དེ་དྲུག་གོ། །དེར་འབྱུང་
བས་ན་དུས་སུ་འབྱུང་བའོ། །ཆུ་ཚགས་ནི་ཆུ་བཙག་པའི་ཐབས་ཀྱི་ཁྱད་པར་རོ། །ཚེར་མ་དབྱུང་བའི་ཆ་སྟ་ནི་ཚེར་གཟུངས་སོ། །གྲོག་སྦུར་ལ་སོགས་པའི་ཆེད་ཀྱི་ཆུའི་གནས་སུ་ཆུང་ངུ་ནི་ཆུ་ར་ཆུང་ངུའོ། །རྟག་པར་ནི་རྟག་ཏུའོ། །ཐུགས་བརྟན་པ་ནི་ཡིད་བརྟན་དུ་རུང་བའོ། །ཅི་བདེ་ཞེས་བྱ་
བ་ནས་སོ། །གཙེས་པ་ནི་རྒྱལ་པོ་ལ་སོགས་པས་བྱས་པའོ། །གནོད་པ་ནི་སྤྱིར་གནོད་པའོ། །ཡམས་ནད་ནི་འདྲ་བར་འབྱུང་བའི་ནད་དོ། །བཏང་བ་ནི་ཡོངས་སུ་བཏང་བའོ། །ཆགས་ཉེན་པ་ལས་ཡོངས་སུ་བསྐྱབས་པ་ནི་བུ་ལོན་པས་ཉམ་ཐག་པ་རྣམས་སོ། །ཤོ་གམ་བཏང་བ་ནི་གང་ལ་དེ་
ཉིད་ཀྱིས་གནོད་པ་ལ་ཤོ་གམ་བཏང་བའོ། །ལ་ལར་ནི་ཤོ་གམ་དབྲི་སྟེ། ཤོ་གམ་ཆེ་བས་འཇིགས་པ་རྣམས་ལའོ། །དབྱིག་ལ་སོགས་པ་ཉོ་ཚོང་བྱེད་པས་འཚོ་བའི་སྤོགས་ཏེ། མཉམ་པ་དང་། རན་ཆེ་བ་སྤངས་པ་དང་། རིན་ཐང་རིགས་པ་སྟེ། རིན་ཆུང་བ་སྤངས་པ་བགྱིད་དུ་གསོལ་ཅིག་པའོ། །
འདོད་དགུ་ནི་ཅི་བདེར་རོ། །ཁ་ཅིག་བུ་མོ་སྦྱིན་པ་ནི་བཀག་གོ་སྙམ་པ་དེའི་ཕྱིར། རྒྱན་རྣམས་ཀུན་དང་ལྡན་པ་ཡི། །ཞེས་བྱ་བ་ལ་སོགས་པ་སྨོས་སོ། །སྩོལ་ཅེས་བྱ་བ་ནི་བྱིན་ཅིག་པའོ། །འཇིག་རྟེན་པའི་གཏམ་ནི་གཡེང་བར་བྱེད་པས་དགའ་བར་མ་མཛད་ཅིག་པའོ། །རྣམ་པར་དབྱེ་བ་
ནི་རབ་ཏུ་བསྟན་པའོ། །བསྔགས་པ་ནི་བདག་ནི་འདྲའོ་ཞེས་ངོམ་པའོ། །གནད་ལ་དབབ་པ་ནི་གསང་བ་རབ་ཏུ་སྒྲོགས་པ་སྟེ། གནད་འཆི་བའི་གནས་རྣམས་སུ་འབེབས་ཤིང་བསྣུན་པས་ན་གནད་དུ་དབབ་པའོ། །མངོན་སུམ་དུ་དོན་གཞན་གྱིས་གསང་བ་བརྗོད་པ་ནི་གླེང་བའོ། །དེ་ངན་

172-1-158a

སེམས་ཀྱིས་ཏེ། མི་ཕན་པའི་སེམས་ཀྱིས་མི་བྱའོ་ཞེས་བྱ་བའི་ཐ་ཚིག་གོ། །གཞན་རྣམས་ཀྱི་ཞེས་བྱ་བ་ནི་གོང་དུ་སྦྱར་རོ། །ནུས་པས་ཞེས་བྱ་བ་ནི་ཅི་ནུས་ཀྱིས་སོ། །ཉེས་པ་མེད་པ་ཉིད་དུ་བགྱི་བའོ། །རེ་བ་ནི་འདོད་པའོ། །ཁེངས་པ་ནི་ང་རྒྱལ་ལོ།།      །།།ཡི་
དྭགས་དང་འདྲ་བར་རོ། །ཞུམ་པ་ནི་ཡི་ཤི་བ་སྟེ་ཡིད་མི་བདེ་བའོ། །བརྗོད་པ་ནི་སྨྲ་བའོ། །གཞན་དུ་ཞེས་བྱ་བ་ནི་གཞན་གྱི་དོན་ལའོ། །རང་གི་དང་ས་གཞན་པའི་བློན་པོ་རྣམས་ཀྱང་ཀུན་དུ་འདུད་ཅིང་མང་པོས་བཀུར་བ་སྟེ། དེ་ཐམས་ཅད་ནི་ཆོས་སྤྱད་པ་ལས་འགྱུར་རོ། །ཉམས་
བདེ་བ་ནི་ཡིད་བདེ་བའོ། །ལྟོག་མོ་ནི་ཆོག་པ་སྟེ་ཏེ་པོར་མང་བའོ། །ནང་གི་བདག་ཉིད་ནི་སེམས་སོ། །ལོངས་སྤྱོད་རུང་བ་ཐུན་མོང་དུ་སྤྱོད་པའོ། །འཇམ་པ་ནི་རད་རུད་མེད་པའམ་མུར་འཇམ་པའོ། །བྱམས་པ་ནི་སེམས་སོ། །ཆ་ནི་ཤིན་ཏུ་ཉུང་བའི་ཆའོ། །གལ་ཏེ་གྲོལ་བར་མ་གྱུར་
ཀྱང་ཞེས་བྱ་བ་ནི་གལ་ཏེ་ཐར་པར་མ་གྱུར་ཀྱང་ངོ་། །བརྒྱད་ནི་ལྷ་མི་བྱམས་པར་འགྱུར་བ་དང་ཞེས་བྱ་བ་ནས་བཟུང་སྟེ། ཚངས་པའི་འཇིག་རྟེན་སྐྱེ་འགྱུར་ཏེ། །ཞེས་བྱ་བའི་བར་རོ། །གཡོ་ནི་ཡོན་པོའོ། །དེ་ལྟ་བུ་མ་ཡིན་པས་ན་གཡོ་མེད་པ་སྟེ་དྲང་བའོ། །དེ་ནི་དད་པ་ཅན་ཞེས་བྱ་བའི་
དོན་ཏེ། ལྷག་པའི་བསམ་པས་མཉན་པ་དེའི་དོན་ཉམས་སུ་མྱོང་བ་གསལ་བར་འགྱུར་རོ། །དེ་ལས་ནི་དྲང་བའོ། །བཀུར་སྟི་ནི་ཆོས་རྣམས་ལའོ། །རྟོགས་པ་ནི་ཁོང་དུ་ཆུད་པའོ། །སྒྲིབ་པ་མེད་པ་ནི་མཉམ་པར་ཆོས་སྟོན་པས་སློབ་དཔོན་གྱིས་དཔེ་མཁྱུད་མེད་པའོ། །འདོད་པ་
ནི་དོན་གྲུབ་པའོ། །སྙིང་པོ་ལྔ་ནི་བུ་རམ་དང་། ཞུན་མར་དང་། སྦྲང་རྩི་དང་། ཏིལ་མར་དང་། ལན་ཚཱའོ། །གང་ལ་སྟོབས་ཅེན་པོའོ་མཆོག་གཙོ་བོ་ཡོད་པ་དེ་ལ་དེ་སྐད་ཅེས་བྱ་སྟེ། བཅོམ་ལྡན་འདས་ཞེས་བྱ་བའི་ཐ་ཚིག་གོ། །མཆོད་པར་ཞེས་བྱ་བ་ནི་མཆོད་པའི་ཆེད་དུའོ། ཡན་ལག་ཉམས་
པ་ནི་ཡན་ལག་དང་བྲལ་བ་སྟེ། ཡན་ལག་དམན་པ་ཞེས་བྱ་བའོ་ཐ་ཚིག་གོ། །སེམས་རྗེས་སུ་བ་སྲུངས་པ་ནི་གཞན་དག་གིའོ། །གཞོན་པས་བླ་མ་བཀུར་བའི་ཕྱིར་རོ། །དྲིན་མེད་པ་ནི་ལན་ལ་རེ་བ་དང་བྲལ་བའི་ཕྱིར་རོ། །མཉམ་ལྡན་པ་ནི་དངོས་པོ་ཐམས་ཅད་ལའོ། །བརླན་པ་ནི་མེད་པ་

172-1-158b

སྟེ། རླན་དང་བཅས་ཤིང་མི་རླང་བའོ། །དེ་ཁོ་ན་ཉིད་ལ་འཇུག་པའི་ཐབས་བསྒོམས་པ་སྟེ། ཡང་དང་ཡང་མངོན་དུ་བྱས་པས་སོ། །སྣ་ཚོགས་ནི་རྣམ་པ་སྣ་ཚོགས་སོ། །དག་པ་ནི་སེམས་ཅན་ཐམས་ཅད་དང་ཐུན་མོང་དུ་བླ་ན་མེད་པའི་བྱང་ཆུབ་ཏུ་ཡོངས་སུ་བསྔོས་པའོ། །འཇིག་རྟེན་གྱི་
ཁམས་ཇི་སྙེས་ནས་སངས་རྒྱས་གང་གིས་གདུལ་བར་བྱ་བའི་ཕྱིར་སེམས་ཅན་རྣམས་འདུས་པ་དེ་སྙེད་ཀྱི་འཇིག་རྟེན་གྱི་ཁམས་དེ་ནི་སངས་རྒྱས་ཀྱི་ཞིང་ཡིན་ཏེ། དེར་དེ་འབྱུང་བའི་ཕྱིར་རོ། །རྣམ་པར་དག་པའི་སེམས་ཅན་འབྱུང་བའི་ཕྱིར་དག་པར་འགྱུར་རོ། །དེ་བས་ཞེས་བྱ་བ་ནི་
བརྗོད་པར་འདོད་པའི་དོན་མཇུག་བསྡུ་བའོ། །དེ་ལྟར་ཞེས་བྱ་བ་ནི་རྒྱུ་དང་འབྲས་བུ་བརྗོད་པའི་ཚུལ་བཤད་མ་ཐག་པའི་རྒྱུས་སོ། །མཐུན་པ་ནི་འདྲ་བ་སྟེ། རྒྱུ་དང་མཐུན་པའི་བྲས་བུ་ཞེས་བྱ་བ་ཡིན་ནོ། །དོན་དུ་ཞེས་བྱ་བ་ནི་དོན་གྱི་སྒོ་ནས་ཏེ། དོན་གྱི་སྒོ་ནས་རྒྱུ་བསྒྲུབ་པར་བྱའོ་ཞེས་བྱ་བའི་ཐ་
ཚིག་གོ། །དཀའ་བ་ནི་མི་ནུས་པའོ། །ཆོས་མིན་ནི་ཆོས་དང་བྲལ་བའོ། །འདི་ལྟར་དེ་ནི་རིགས་པ་མིན་སྟེ་རིགས་པ་དང་བྲལ་བའོ། །རྗེས་སུ་འཚོ་བ་ནི་འབངས་སོ། །རྒྱལ་པོ་ལ་བསྟོད་པ་ནི་བསྔགས་པའོ། །ཆོས་མ་ཡིན་པ་སྤྱོད་བཞིན་དུ་ཅིའི་ཕྱིར་བསྟོད་ཅེ་ན། འཇིགས་པའི་ཕྱིར་ཏེ་བཟློག་
ན་གལ་ཏེ་ན་ཁྲོས་ནས་གནོད་པ་བྱེད་པར་འགྱུར་རོ་སྙམ་པས་སོ། །རྒྱལ་པོ་ལྟ་ཞོག་གི་དེ་ལས་གཞན་པའི་ཕྱི་མའི་ཕལ་པ་སུ་ཡང་རུང་བ་ལ་ཡང་ངོ་། །བརྗོད་དཀའ་བ་ནི་སྨྲ་དཀའ་བའོ། །མོ་སྙན་པ་ཇི་ལྟ་བུ་ཞིག་ཅེ་ན་བསྟད་པ་སྟེ་རིགས་པའོ། །ས་ཆེན་མངའ་བ་ནི་ས་ཆེན་པོའི་དབང་ཕྱུག་སྟེ།
དབང་ཕྱུག་དམ་པ་ཆེན་པོའོ། །དགེ་སློང་ནི་སློང་བའི་ངང་ཚུལ་ཅན་ཏེ། སློང་མོ་ཟ་བ་ཞེས་བྱ་བའི་དོན་ཏོ། །ཁྱོད་ཀྱིས་བདག་ལ་དགྱེས་པར་མཛད་པ་དེའི་སླད་དུའམ། བདག་གིས་ཁྱོད་ལ་དགའ་བར་བགྱིས་པ་གང་ཡིན་པ་དེའི་སླད་དུའོ། །མི་སྙན་ནི་ཡིད་ལ་མི་འབབ་པའི་ཕྱིར་རོ། །དེ་པོར་
ཞེས་བྱ་བ་ནི་ཤིན་ཏུའོ། །དོན་ལྡན་ནི་འདོད་པའི་དོན་དང་ལྡན་པའོ། །དེ་ལྟ་བས་ན་དེ་སྐད་ཅེས་བྱ་བ་ནི་དེ་བས་ན་དེ་སྐད་དུའོ། །འདི་སྐད་དུ་བཤད་པ་ཡིན་ཏེ། དགྱེས་པ་འབའ་ཞིག་གི་ཕྱིར་ནི་མ་ཡིན་ནོ། །འོ་ན་ཅིའི་ཕྱིར་ཞེ་ན། བཅོམ་ལྡན་འདས་ཀྱི་བཀའ་ལས་འབྱུང་བས་ཀྱང་ངོ་། །ད་ནི་

172-1-159a

བརྗོད་པར་བྱ་བ་གང་ཡིན་པ་དེ་བརྟན་པ་ཁྲོ་བ་མེན་པའི་ཞེས་བྱ་བ་ལ་སོགས་པས་སྟོན་ཏེ། ཁྲོ་བ་མེད་པ་ནི་བྱམས་པའོ། །བསྟད་པ་ནི་རིགས་པ་སྟེ་ཕན་པའོ། །བརྗོད་བགྱི་བ་ཞེས་བྱ་བ་ལ་སོགས་པས་བརྗོད་པར་འོས་པའོ། །བདག་ནི་ཚིག་འདི་གཉི་གར་བསྟད་དམ་མི་
བསྟད་པའི་ཚིག་གི་དོན་མཁྱེན་པར་མཛོད་དེའོ། །སྦྱིན་པ་གང་བྱས་པ་དེ་མི་ཤེས་པས་ན་བྱས་པ་མི་གཟོ་བའོ། །སློང་བ་ནི་ཕན་འདོགས་པའི་དམ་པ་ཡིན་ནོ་ཞེས་འཇིག་རྟེན་འདི་ན་ཞེས་བྱ་བ་ལ་སོགས་པས་སྟོན་ཏོ། །ལས་བྱེད་པ་ནི་གླ་མིའོ། །གླ་མེད་པ་ནི་མ་བ་རྔན་པར་རོ། །ལམ་
དུ་བཟའ་ཞིང་བཅའ་བ་གང་ཡིན་པ་དེ་ནི་ལམ་བརྒྱགས་ཏེ་ལམ་གྱི་བརྒྱགས་སོ། །དམན་པ་ནི་འགྲོ་བ་དམན་པར་སོང་བ་སྟེ། དུད་འགྲོའམ་མི་ངན་པའོ། །ཁྱེར་བ་ནི་ཁྱེར་བར་བྱེད་པའོ། །རྒྱ་ཆེན་པོ་ནི་ཡངས་པ་དང་ཆེ་བའོ། །དམན་པ་ནི་ཕྲ་མོའམ་བསམ་པ་དམན་པའོ། །ཡིད་ལའམ་
ཞེས་བྱ་བ་ནི་འདོད་པའོ། །བསམ་པར་མ་གྱུར་པ་ནི་མ་མྱངས་པའམ་མི་འདོད་པའོ། །ཆོས་བཞི་ཞེས་བྱ་བ་ནི་སྤྱིའོ། །དེའི་ཁྱད་པར་ནི་དཀོན་མཆོག་གསུམ་གྱི་རྟེན་ཏེ། རྟེན་ནི་གཞིའོ། །ཀུན་ནས་རྣམ་པ་ཐམས་ཅད་དུ་ལོངས་སྤྱད་འབྱོར་པ་ནི་ཀུན་འབྱོར་པའོ། །དེའི་ཁྱད་པར་ནི་རྒྱལ་པོ་
ཞེས་བྱ་བའི་སྒྲ་ཡིན་ཏེ། རྒྱལ་པོའི་ཡང་རྒྱལ་པོའོ་ཞེས་བྱ་བའི་ཐ་ཚིག་གོ། །སྙན་པ་ལ་ཕན་པ་ནི་སྙན་པར་མི་འགྱུར་བའོ། །རྒྱ་ཆེ་ནི་སེམས་ཅན་རྒྱ་ཆེན་པོ་རྣམས་སོ། །སྙེམས་བ་དང་བྲལ་བས་ན་སྙེམས་བྲལ་ཏེ་ང་རྒྱལ་ཆགས་པའོ། །སྤྲོ་བ་ནི་བརྩོས་འགྲུས་སོ། །དམན་པ་ནི་རྒྱ་མི་ཆེ་བའམ་སེམས་ཞུམ་པའོ། །
རྒྱལ་པོ་སར་པའི་གང་ཡིན་པ་དེའིའོ། །འདི་དག་ལ་བྱམས་ཤིང་དགའ་བར་འདོད་པའི་ངང་ཚུལ་ཡོད་པས་ན་དེ་སྐད་ཅེས་བྱའོ། །རྣལ་གནས་ནི་མ་ཉམས་པའོ། །ཆོས་ཀྱི་གཞི་ནི་ས་གཞི་ཕུལ་བ་ལ་སོགས་པས་སྤགས་པའོ། །ལྷ་ཁང་ནི་ལྷའི་གནས་ཏེ་ལྷའི་ཁབ་པོ། །སྔ་ལུགས་
བཞིན་དུ་ཞེས་བྱ་བ་ནི་ལྷག་ཆད་མེད་པར་རོ། །དེ་དག་ནི་ལྷ་ཁང་ལ་སོགས་པའོ། །འཚེ་མེད་ནི་སེམས་ཅན་དང་རྫས་ལའོ། །དགེ་སྤྱོད་ནི་བསོད་ནམས་བྱེད་པའོ། །བརྟུལ་ཞུགས་ལ་གནས་པ་ནི་སྲོག་གཅོད་པ་ལ་སོགས་པ་སྤངས་པའོ། །གང་ལ་འོང་བའི་དུས་ངེས་པ་མེད་པ་ཡོད་པ་

172-1-159b

དེ་ནི་གློ་བུར་བ་སྟེ། འཕྲལ་ལ་འོངས་པའོ། །གང་དག་ལ་བདེན་པ་ལ་བཟོད་པ་ཡོད་པ་དེ་དག་ནི་བདེན་བཟོད་དོ། །རྟག་ཏུ་བརྩོན་པ་ནི་བརྩོན་འགྲུས་བརྩམས་པའོ། །དམན་པ་ནི་མོར་མེད་པའམ་སློང་མོ་བའོ། །སྡུག་ཕོངས་ནི་ལམ་དུ་ཞུགས་པའོ། །དགག་པ་མེད་པ་ནི་བཟློག་པ་མེད་
བའོ། །སྙོམས་པ་ནི་བྱེ་བྲག་མེད་པའོ། །དོན་དུ་གཉེར་བ་རྣམས་ནི་བཤད་ཟིན་ཏོ། །དོན་དུ་མི་གཉེར་བ་ནི་ཆོག་ཤེས་པའོ། །ཅི་རིགས་པ་ནི་སྦྱིན་པ་ལ་སོགས་པའི་བྱ་བ་སྟེ། ཆོས་ཀྱི་དོན་གྱི་དབང་དུ་བྱས་པ་ལ་དེ་སྐད་ཅེས་བྱའོ། །མི་གཡེལ་བ་ནི་སྙོམ་ལས་མི་བྱེད་པའོ། །དེ་དག་
རྣམས་ལ་ཞེས་བྱ་བ་ནི་ཆོས་ཀྱི་གཞི་ན་གནས་པ་རྣམས་ལའོ། །ལུགས་ནི་རྒྱལ་པོའི་བསྟན་བཅོས་ཏེ། དེ་ཤེས་པས་ན་ལུགས་ཤེས་པའོ། །དེ་ནི་སྡིག་པ་དང་ལྡན་པ་ལ་ཡང་ཡོད་པས་དེའི་ཕྱིར་ཆོས་དང་ལྡན་པ་ཞེས་བྱ་བ་སྨོས་སོ། །རྒྱལ་པོ་ལ་འཇར་བ་སྟེ་སེམས་མི་རྩུབ་པའོ། །གཙང་
བ་ནི་འདོད་ཆེན་མེད་པ་སྟེ། ཆགས་པ་ལ་སོགས་པའི་རྩ་བ་དང་བྲལ་བས་དཀར་བའོ། །རན་པར་སྤྱོད་པ་ནི་ལེགས་པར་སྤྱོད་པ་སྟེ། དྲོད་ཟིན་པར་སྤྱོད་པའམ་བགོ་བཤའ་བྱས་ཏེ་སྤྱོད་པའོ། །བག་ཡོད་པ་ནི་བྱ་བ་ཐམས་ཅད་ལའོ། །དམག་ནི་དཔུང་གི་ཚོགས་སོ། །དེའི་དཔོན་པོ་ནི་གཙོ་བོའོ། །
གང་དག་ཆོས་ཁོ་ན་བྱེད་པའི་ངང་ཚུལ་ཡོད་པ་དེ་དག་ནི་ཆོས་ཀྱི་ངང་ཚུལ་ལོ། །སྙོམས་པ་ནི་བསམ་པ་མཉམ་པའོ། །སྣ་བོ་ནི་སྣ་ལ་གཏོགས་པའོ། །ཕན་ཚུན་ལྟོར་འཇུད་པ་ནི་མ་རུང་བར་བྱེད་པ་སྟེ། སྔར་ནི་ཆོས་ཉི་ཚེ་བ་བསྟན་ཏོ། །ད་ནི་རྒྱལ་སྲིད་དང་ལྷན་ཅིག་སྟོན་ཏོ། །ནང་གཤིན་པ་ནི་
ནང་འཕྲོད་པ་སྟེ་ནང་མཐུན་པའོ། །གསོད་བྱེད་པ་ནི་གསོད་པའི་ངང་ཚུལ་ཅན་ཏེ། གསོད་པར་བྱེད་པའོ། །སྡོམ་པ་མིན་པ་ནི་སྡོམ་པའི་མི་མཐུན་པའི་ཕྱོགས་སོ། །རྒྱུན་མི་འཆད་པ་ནི་རྟག་པར་རོ། །ཚར་གཅད་པ་ནི་ཚིག་དག་གིས་སམ་གཟུང་བས་སོ། །བརྟགས་ཏེ་ཞེས་བྱ་བ་ནི་དཔྱད་
དེའོ། །བག་ཡོད་པ་ནི་ཡུལ་རྣམས་ཀྱིས་འཇིགས་པའོ། །ཡོན་ཏན་གནས་དེ་ཡོན་ཏན་ཅན་རྣམས་ལ་སྦྱར། །ཞེས་བྱ་བ་ཡིན་ཏེ། ང་རྒྱལ་གྱིས་ཉམས་པ་རྣམས་ལ་ནི་བཀུར་སྟིའོ། །ལྷག་མ་རྣམས་ལ་ནི་ཚིག་གི་རིམ་གྲོའོ། །ལྷག་མ་ནི་ཡོན་ཏན་ལ་གནས་པ་མ་ཡིན་པའོ། །རྒྱས་པ་ནི་མང་བ་

172-1-160a

སྟེ། རྒྱལ་པོ་མེ་ཏོག་དང་འབྲས་བུ་ཕུན་སུམ་ཚོགས་པའི་ལྗོན་ཤིང་མངོན་དུ་འགྲོ་བར་བྱ་བ་ལྟ་བུ་བྱའོ་ཞེས་བྱ་བའི་དོན་ཏོ། །གསར་དང་ལྡན་པ་ནི་ཉེས་པ་མི་བཟོད་པའོ། །དེ་ལྟར་ཞེས་བྱ་བ་ནི་སྔར་བཤད་པའི་ཚུལ་དུའོ། །འཇིག་རྟེན་ན་གྲགས་པའི་རིགས་པ་མ་ཡིན་པར་མི་
འགྱུར་རོ། །དེའི་ཞེས་བྱ་བ་ནི་རྒྱལ་སྲིད་ཀྱིའོ། །འཚོག་ཆས་ཟོང་ནི་ཉོ་ཚོང་བྱ་བ་ལ་དགོས་པ་ཡིན་པར་བལྟ་བར་བྱ་སྟེ། འཚོག་ཆས་ཉོ་བར་བྱ་བའི་རིན་ཡིན་པས་སོ། །རྗེད་འགྱུར་བ་སྟེ་འགྱུར་བར་འབོད་ཅིག་པའོ། །འཁོར་ལོས་སྒྱུར་བའི་རྒྱལ་པོའིའོ། །འདུ་ཤེས་རང་བཞིན་ནི་རྣམ་པར་
རྟོག་པས་བྱས་པའོ། །བདེ་བའི་བདོག་པ་ཀུན་ནི་མདོར་ན་འདི་ཁོ་ནར་ཟད་དེ། བདེ་བ་ཉིད་བདོག་པ་ཀུན་ཡིན་ནོ། །དེ་ལ་ལུས་ཀྱི་ནི་སྡུག་བསྔལ་ཕྱིར་བཅོས་པ་ཙམ་ཡིན་ལ། སེམས་ཀྱི་ཡང་རྟོག་པ་ཙམ་དུ་ཟད་ན་དེ་དག་ཀྱང་དོན་མེད་དེ་བདེ་བའི་དོན་མེད་པའི་ཕྱིར་ཐམས་ཅད་ལ་དབང་
ཡང་སྤྱོད་པར་བྱ་བ་ནི་དེའི་ཚེ་རེ་རེར་ཟད་དོ། །གྲག་ཅེས་བྱ་བ་ནི་མ་དད་པར་སྟོན་པའོ། །ཡུལ་རྣམས་ལ་ཡིད་གཏོད་པ་ནི་ཡིད་ལ་བྱེད་པའོ། །དེ་མེད་པ་ནི་ཡིད་ལ་མི་བྱེད་པའོ། །འདིར་ཇི་སྐད་ཡོངས་སུ་བསྒྲགས་པ་དེ་རྣམས་ནི་དོན་མེད་དེ་དགོས་པ་མེད་པ་ཉིད་དོ། །གང་གི་
ཕྱིར་ཞེས་བྱ་བ་ནི་གང་གི་ཕྱིར་ཏེ། འདི་ནི་ཡིད་ཀྱི་དབང་དུ་བྱས་པ་ཡིན་ནོ། །དབང་པོ་ལྷག་མ་རྣམས་ཀྱིས་མ་ཡིན་ནོ། །གང་ཕྱིར་ཞེས་བྱ་བ་ནི་གང་གི་ཕྱིར་དེ་ལྟར་ཡིན་པས་སོ། །རྣམ་པ་རང་གི་ངོ་བོ་ལ་ཕྱིས་ཡིད་ཀྱིས་དམིགས་ནས་ཏེ། དེ་ཡང་རྟོག་པ་ཙམ་དུ་ཟད་པའི་ཕྱིར་བདེ་བ་མ་
ཡིན་ནོ་སྙམ་དུ་དགོངས་པ་ཡིན་ནོ། །ད་ནི་འདི་ན་དབང་པོ་གཅིག་གིས་ནི་ཞེས་བྱ་བ་ལ་སོགས་པས་དབང་པོ་དང་དོན་དག་མེད་པ་ཉིད་དུ་སྟོན་ཏོ། །གང་ཡང་དབང་པོ་དང་ཡུལ་ལ་བརྟེན་ནས་རྣམ་པར་ཤེས་པ་དང་། དེས་དྲངས་པ་རྣམ་པར་རྟོག་པ་སྐྱེ་ལ་དེ་རྣམ་པར་རྟོག་པ་དང་བཅས་པ་དེའི་
ཚེ་ཡང་བདེ་བ་ནི་དོན་མེད་པ་ཉིད་དེ། དེ་གཉི་ག་དོན་མེད་པའི་ཕྱིར་རོ། །རྣམ་པར་ཤེས་པ་གཉིས་ལ་བརྟན་པ་ཉིད་ནི་ཇི་ལྟར་ཞེས་བྱ་བ་སོགས་པས་སྟོན་ཏེ། མིག་གི་རྣམ་པར་ཤེས་པ་ནི་མཚོན་པར་ཟད་དོ། །སྔར་ནི་ཡན་ལག་གཅིག་མ་ཚང་བ་ལས་དབང་པོ་དང་དོན་དག་དོན་མེད་པ་ཉིད་དུ་

172-1-160b

བཤད་དོ། །ད་ནི་ཡུལ་ནི་འདས་དང་ཞེས་བྱ་བ་ལ་སོགས་པ་དུས་ཀྱིས་བྱས་པ་སྟོན་ཏོ། །དེ་གཉིས་ལས་ནི་མ་འདས་ཕྱིར། །ཞེས་བྱ་བ་ནི་འདས་པ་དང་མ་འོངས་པའི་དུས་གཉིས་ལས་མ་འདས་པའི་ཕྱིར་རོ། །འདས་པ་དེ་དག་ནི་མེད་དོ། །མ་འོངས་པ་རྣམས་ནི་མ་བྱུང་ངོ་། །གང་གི་ཚེ་ད་
ལྟར་གྱུར་པ་དེ་ལ་ཡང་ཉེས་པ་བཤད་ཟིན་ཏོ། །ཡང་ན་གཏན་ཚིགས་མཇུག་ཐོགས་ནས་འབྱུང་བ་འདི་ཡིན་ཏེ། ཇི་ལྟར་མགལ་མེའི་འཁོར་ལོ་མ་ཡིན་པ་འཁོར་ལོའི་ངོ་བོར་སྣང་བ་དེ་བཞིན་དུ་ཡུལ་ད་ལྟའི་ངོ་བོ་མ་ཡིན་པ་ཡང་ད་ལྟ་ཉིད་དུ་སྣང་སྟེ། སོ་སོར་རེ་རེའི་ངོ་བོར་ཉམས་པའི་ཕྱིར་
རོ། །འདི་དག་ཅེས་བྱ་བ་ནི་རྟེན་དང་དབང་པོ་དང་དོན་རྣམས་སོ། །སོ་སོར་ཐ་དད་ན་ཞེས་བྱ་བ་ནི་རྣམ་པ་གཉིས་ལྟ་བུར་སོ་སོར་ཐ་དད་ན་སྟེ། ཡང་དག་པར་རང་གི་ངོ་བོ་སོ་སོ་བ་ཡིན་ནའོ། །གཟུགས་ཀྱི་མཚན་ཉིད་ནི་འདུས་པ་ཡིན་ནོ་ཞེས་བྱ་བའི་ཐ་ཚིག་གོ། །གཟུགས་ཀྱི་ཕུང་པོ་དོན་མེད་
པ་ཉིད་དུ་བརྗོད་ནས། མཇུག་ཐོགས་ནས་འབྱུང་བས་རྣམ་པར་ཤེས་པ་ལ་སོགས་པའི་ཕུང་པོ་སྟོན་ཏེ། ཐམས་ཅད་དུ་ཞེས་བྱ་བ་ནི་རྣམ་པ་ཐམས་ཅད་དུའོ། །བདག་ཉིད་དོན་མེད་ཕྱིར་ཞེས་བྱ་བ་ནི་དོན་དམ་པར་བདག་མེད་པའི་ཕྱིར་རོ། །དེའི་ཕྱིར་ཞེས་བྱ་བ་ནི་བདེ་བ་དང་སྡུག་བསྔལ་གྱིས་རྣམ་
པར་རྟོག་པ་མེད་པའི་ཕྱིར་རོ། །དེ་ལྟར་རིགས་པས་ཇི་སྐད་པའི་ཚུལ་དུ་མཐོང་བའོ། །གལ་ཏེ་ལ་ལ་དེ་ལྟར་ངོ་བོ་ཉིད་མེད་པ་ཡིན་ན་སུ་ཞིག་གིས་མཐོང་ཞེ་ན། དེའི་ཕྱིར་ཐ་སྙད་དུ་ཞེས་བྱ་བ་སྨོས་སོ། །དེའི་ཕྱིར་ཡང་དག་པ་ཉིད་དུ་མ་ཡིན་ཞེ་ན། འདི་སྐད་དུ་བཤད་པ་ཡིན་ནོ། །བདེ་
བ་དང་ཕྲད་པར་འདོད་པའི་སེམས་འབྱུང་བ་གང་ཡིན་པ་དེ་བརྟན་པ་ཞིག་ཏུ་གྱུར་ན་ནི་དེའི་ཚེ་གཉིས་པ་ཕྱིས་འབྱུང་བས་མཐོང་བར་འགྱུར་གྱི། དེ་མེད་ན་ཅི་ཞིག་མཐོང་བར་འགྱུར། དོན་མེད་པའི་ཕྱིར་སེམས་གཉིས་ལྷན་ཅིག་འབྱུང་བར་མི་འདོད་དེ། ལྷན་ཅིག་བྱུང་བ་དག་ནི་དེ་མ་ཐག་ཏུ་འཇིག་པའི་ཕྱིར་
དམིགས་པར་བྱ་བ་དང་། དམིགས་བར་བྱེད་པའི་ངོ་བོ་མེད་དོ། །དོན་མེད་ཅེས་བྱ་བ་ནི་ངོ་བོ་ཉིད་མེད་པའོ། །གནས་མེད་ཅེས་བྱ་བ་ནི་རྟེན་མེད་པའོ། །ལེན་མེད་ཅེས་བྱ་བ་ནི་རྒྱུ་མེད་པ་སྟེ། ལེན་པ་ནི་རྒྱུ་ཡིན་པའོ། །དེ་ལྟར་ངོ་བོ་ཉིད་མེད་པར་མཐོང་བའི་མཐུས་རྫོགས་པའི་བྱང་ཆུབ་ཏུ་ངེས་པར་འགྱུར་

172-1-161a

རོ། །འདོད་པ་ནི་བཞེད་པའོ། །གལ་ཏེ་ཆོས་དེ་ལྟ་བུ་ཤེས་ན་ཅིའི་ཕྱིར་འཁོར་བར་འཁོར་ཞེ་ན། དེ་ནི་སྙིང་རྗེ་འབའ་ཞིག་གིས་ཞེས་བྱ་བ་ལ་སོགས་པ་སྨོས་ཏེ། དེ་ནི་རང་གི་དོན་ལ་མི་ལྟ་བར་སྙིང་རྗེ་འབའ་ཞིག་གིས་སྲིད་པར་མཚམས་སྦྱོར་ཞིང་སྲིད་པ་རྒྱུན་ཆགས་པར་བྱེད་
དོ། །གང་དག་ཐེག་པ་ཆེན་པོ་ལ་སངས་རྒྱས་ཀྱི་བཀའ་མ་ཡིན་ནོ་སྙམ་དུ་བསམས་ནས་སྤོང་བར་བྱེད་པ་དེ་དག་ལ་ཐེག་པ་ཆེན་པོ་སངས་རྒྱས་ཀྱི་བཀའ་ཡིན་པར་བསྒྲུབ་པའི་ཕྱིར། དེ་བཞིན་གཤེགས་པས་ཞེས་བྱ་བ་ལ་སོགས་བ་སྨོས་སོ། །ཀུན་དུ་རྨོངས་པ་ནི་གཏི་མུག་གིས་ལྡོངས་པ་སྟེ་
དོན་མི་ཤེས་པའོ། །ཇི་ལྟ་བུ་ཞེ་ན། མཇུག་ཐོགས་ནས་འབྱུང་བས་དེ་སྟོན་ཏེ། ཡོན་ཏན་སྡང་བ་ཞེས་བྱ་བ་ནི་འདི་ནི་གཞན་ལ་ཕན་འདོགས་པ་ནི་ཡོན་ཏན་ཞེས་བྱ་ན། དེ་ལ་སྡང་བས་ན་དེ་སྐད་ཅེས་བྱའོ། །སྡང་བས་ཕྱིར་ཕྱོགས་ནི་ཞེ་སྡང་གིས་ཕྱིར་ཕྱོགས་པ་སྟེ་སྙིང་རྗེ་མེད་པའོ། །ཇི་ལྟར་སེལ་
བར་བཤད་ཅེ་ན། དུག་གིས་ཞེས་བྱ་བའི་དཔེའི་ངོ་བོ་སྨོས་ཏེ། ཇི་ལྟར་སྙིང་རྗེས་སྨན་དཔྱད་ལས་བཤད་པ་བཞིན་འདི་ལ་ཡང་དེ་དང་འདྲའོ། །ཕན་པའི་བསམ་པས་ཕན་པར་བྱེད་པ་ལ་འཇིག་རྟེན་གྱི་གནོད་པ་ཡང་མེད་དོ་ཞེས་མཇུག་ཐོགས་ནས་འབྱུང་བས་སྟོན་ཏོ། །གྲགས་པས་ཞེས་བྱ་བ་ནི་གྲགས་པས་
སོ། །ཕྱི་རྗེས་ཕན་འགྱུར་བ་ནི་མ་འོངས་དུས་ན་ཕན་པའོ། །བདེ་བ་ནི་ཕྱི་རྗེས་སུ་ཕན་པ་ལྟ་ཅི་སྨོས་ཏེ། དཔེར་ན་བྲམ་ཟེའི་བུ་སྐར་མཁན་ལ་བྱང་ཆུབ་སེམས་དཔས་རེག་པའི་མཐུས་བདེ་བ་དང་ཕན་པར་གྱུར་པ་ལྟ་བུའོ། །གནའི་ལུགས་ནི་གནའི་ལམ་ཡོངས་སུ་དག་པ་སྟེ། སྨན་དཔྱད་ལ་སོགས་པ་
ལས་དེ་བསྟན་པའི་ཕྱིར་རོ། །དོན་ཁ་ཅིག་ལ་གནོད་པར་མཐོང་བ་གང་ཡིན་པ་དེ་ཉིད་ལ་ལར་མཁས་པ་རྣམས་ཀྱིས་ཕན་པར་མཐོང་ངོ་། །སྤྱིར་བཏང་བ་ནི་འདི་ནི་གནོད་པའོ་ཞེས་སྤྱིར་བཏང་བ་སྟེ་དཔེར་ན་དུག་ལྟ་བུའོ། །དམིགས་ཀྱིས་བསལ་བ་ནི་བྱེ་བྲག་ཏུ་བྱ་བ་སྟེ། སྔ་མ་ཅུང་ཟད་སེལ་བས་
སོ། །བདག་ཉིད་མ་སྦྱངས་པ་ནི་མི་མཁས་པའོ། །སྐྱེ་བ་མེད་པ་དང་སྐད་ཅིག་མ་ལ་དོན་གྱི་ཁྱད་པར་འགའ་ཡང་མེད་དོ། །ཇི་ལྟར་ཞེ་ན། ཐེག་པ་ཆེ་ལས་སྐྱེ་མེད་ཅེས་བྱ་བ་ལ་སོགས་པ་གང་སྨོས་ཏེ། སྐྱེ་བ་མེད་པ་ནི་སྟོང་པ་ཉིད་དོ། །གཞན་དག་ནི་མི་ཟད་པ་སྟེ། བསྐལ་པར་གནས་པ་མ་གྲུབ་པ་ཁོ་

172-1-161b

ནའོ་སྙམ་དུ་དགོངས་པ་ཡིན་ནོ། །དེ་ལྟར་བཤད་པའི་ལུས་སུའོ། །དགོངས་ཏེ་གསུངས་པ་ནི་དགོངས་པ་ཅན་གྱི་བཀའོ། །གཞུང་ལས་ཐེག་པ་གཅིག་དང་ཐེག་པ་གསུམ་གསུངས་པས་སོ། །བཏང་སྙོམས་ནི་མི་འཇུག་པའོ། །སངས་རྒྱས་ཀྱི་བཀའ་ལ་བཏང་སྙོམས་བྱས་པས་ནི་ཉེས་པར་མི་འགྱུར་
རོ། །དེའི་ཕྱིར་མཇུག་ཐོགས་ནས་འབྱུང་བ་སྨོས་སོ། །དགེ་བ་ནི་བསོད་ནམས་སོ། །གལ་ཏེ་འདི་སྙམ་དུ་ཉན་ཐོས་ཀྱི་ཐེག་པ་ཁོ་ནས་སངས་རྒྱས་ཉིད་འཐོབ་པས་གླགས་གླགས་པ་འདིས་ཅི་ཞིག་སྙམ་དུ་སེམས་ན། དེའི་ཕྱིར་མཇུག་ཐོགས་ནས་འབྱུང་བ་སྨོས་ཏེ། བྱང་ཆུབ་སེམས་
དཔའི་སྨོན་ལམ་དུ་བྱ་བ་གང་དག་ཡིན་པའི་འགྲོ་བའི་དོན་འདི་ལྟ་བུ་དང་འདི་ལྟ་བུ་བྱའོ་ཞེས་བྱ་བ་དེ་ལས་མ་བཤད་དོ། །སྤྱོད་པ་ནི་ཕ་རོལ་ཏུ་ཕྱིན་པ་གོམས་པའི་མཚན་ཉིད་དོ། །ཡོངས་སུ་བསྔོ་བ་ནི་སེམས་ཅན་ཐམས་ཅད་དང་ཐུན་མོང་དུ་བླ་ན་མེད་པའི་བྱང་ཆུབ་ཏུ་བསྔོ་བའོ། །བྱིན་རླབས་ནི་སངས་རྒྱས་
རྣམས་ཀྱིས་བྱང་ཆུབ་སེམས་དཔའ་རྣམས་ལའམ། དེ་དག་གིས་སེམས་ཅན་གྱི་དོན་གྲུབ་པར་བྱ་བའི་ཕྱིར་བྱ་བ་གང་དག་ཡིན་པའོ། །གཞན་དག་གིས་བཤད་དོ་སྙམ་ན་དེའི་ཕྱིར་ལྷག་པ་སྨོས་ཏེ། བྱང་ཆུབ་ཀྱི་ཕྱོགས་ཀྱི་དོན་ནམ་སྨོན་ལམ་གྱི་དོན་འདི་ལའོ། །ཚད་མ་ནི་མི་སླུ་བའོ། །གཞན་ནི་བཅོམ་ལྡན་འདས་རྣམས་
ལས་སོ། །བྱིན་རླབས་ནི་བྱིན་གྱི་རླབས་གང་གིས་ཉན་ཐོས་ཉིད་འཐོབ་པའོ། །བདེན་པའི་དོན་ནི་དེའི་རང་གི་ངོ་བོའོ། །བྱང་ཆུབ་ཕྱོགས་མཐུན་ནི་དྲན་པ་ཉེ་བར་གཞག་པ་དང་། ཡང་དག་པར་སྤོང་བ་ལ་སོགས་པ་སུམ་ཅུ་རྩ་བདུན་ནོ། །ལྡན་པ་ནི་ཉེ་བར་འགྲེལ་པའོ། །ཉན་ཐོས་རྣམས་དང་ཐུན་མོང་མ་
ཡིན་པ་ལས་སོ། །ཐབས་གང་གིས་ཏེ། རྒྱུ་ཐ་དད་པ་ལས་འབྲས་བུ་ཐ་དད་པར་འགྱུར་ན་དེ་མེད་པའི་ཕྱིར་ཇི་ལྟར་སྙམ་དུ་དགོངས་པ་ཡིན་ནོ། །བྱང་ཆུབ་ཀྱི་སྤྱོད་པ་ལ་གནས་པ་ནི་བརྟེན་ཅིང་གནས་པའོ། །མདོ་སྡེ་ནི་ཉན་ཐོས་ཀྱི་ཐེག་པས་བསྡུས་པའོ། །ཅིའི་ཕྱིར་ཆོས་གཞན་དང་གཞན་དུ་བསྟན་ཅེ་ན། དེའི་
ཕྱིར་མཇུག་ཐོགས་ནས་འབྱུང་བ་སྨོས་ཏེ། སྣ་ཚོགས་དང་ཁྱད་པར་བྱེད་པ་སྟེ་འདོད་པས་ན་བརྡ་སྤྲོད་པའོ། །ཡི་གེའི་ཕྱི་མོ་ཀློག་ཏུ་འཇུག་གི་ཐམས་ཅད་དུ་བརྡ་སྤྲད་པ་པ་ཡིན་ཏེ། རྒྱས་པར་ནི་མི་སྟོན་ཏོ། །སྡིག་པ་དག་ལས་རྣམ་པར་བཟློག་པའི་ཕྱིར་ཏེ། དཔེར་ན་དགའ་བྱེད་ལ་སོགས་པའི་མདོ་ལས་

172-1-162a

འབྱུང་བ་ལྟ་བུའོ། །བསོད་ནམས་འགྲུབ་བྱའི་ཕྱིར་ཞེས་བྱ་བ་ནི། འཕགས་པ་སྡོང་པོ་བཀོད་པ་ལ་སོགས་པ་ལས་འབྱུང་བ་ལྟ་བུའོ། །སྔར་བཤད་པ་རྣམས་བསོད་ནམས་བསྒྲུབ་པ་མ་ཡིན་ནམ་ཅི་ཞེ་ན། སྡིག་པ་བྱེད་པ་རྣམས་ནི་དེ་ལས་ཟློག་པའི་སྒོ་ནས་སོ། །བསོད་ནམས་བྱེད་
པ་རྣམས་ནི་བསོད་ནམས་ཁོ་ན་འགྲུབ་པར་བྱ་བའི་ཕྱིར་རོ། །གཉིས་བརྟེན་པ་ནི་ཉན་ཐོས་ལ་སོགས་པའི་ཐེག་པ་བ་རྣམས་ལའོ། །གཉིས་མི་བརྟེན་པ་ནི་ཐེག་པ་ཆེན་པོ་པ་ལའོ། །ཁུ་འཕྲིགས་ཅན་དེ་དམིགས་པ་ཅན་རྣམས་འཇིགས་པ་སྟེ་འཇིགས་པར་བྱེད་པའོ། །གང་ལ་སྙིང་པོ་སྟེ་འབྱུང་བའི་
གནས་སྟོབ་པ་ཉིད་དང་སྙིང་རྗེའི་བདག་ཡོད་པ་དེ་ལ་དེ་སྐད་ཅེས་བྱའོ། །དེ་ལྟ་བས་ན་ཞེ་འགྲས་པ་རྣམས་ཀྱིས་དེ་ལྟར་བསམས་ནས་སོ། །ཞེ་མ་འགྲས་པ་ཡེ་ཤེས་མཐའ་ཡས་པ་འདོད་པ་གང་དག་ཡིན་པ་དེ་དག་གིས་ནི་རབ་ཏུ་དང་བའོ། །ཐོབ་པ་ནི་རྙེད་པའམ་རྟེན་པའོ། །སོ་སོར་ཐར་པ་ནི་འདུལ་བ་མདོར་
བསྡུས་པ་དེ་རྒྱས་པའོ། །འདུལ་བ་ནི་འདུལ་བ་གཞིའོ། །མང་དུ་ཐོས་པ་ནི་མདོ་ལ་སོགས་པའོ། །དོན་གཏན་ལ་དབབ་པ་ནི་དེ་དག་ཉིད་ཀྱིའོ། །དེ་དང་ཞེས་བྱ་བ་ནི་ཁྲོ་བ་དང་ངོ་། །སྡིག་ལ་ཞེན་པ་ནི་ཆགས་པའོ། །ཁྲོས་པས་བསླད་པ་ནི་ཀུན་ནས་དཀྲུགས་པའོ། །ཁྱད་པར་འཕགས་པ་དག་དང་
བདག་ཉིད་མཉམ་པར་རོ། །ཁྱད་འཕགས་ནི་མཆོག་སྟེ། དེ་བས་ཀྱང་མཆོག་གོ་སྙམ་པ་ལ་དེ་སྐད་ཅེས་བྱའོ། །མཆོག་པས་ཀྱང་མཆོག་གོ་སྙམ་པ་དེ་ཇི་ལྟ་བུ་ཞིག་ཅེ་ན། མཇུག་ཐོགས་ནས་འབྱུང་བས་སྨོས་ཏེ། འབྲས་ཀྱི་ཐོག་ཏུ་ཕོལ་མིག་བྱུང་བ་བཞིན་ནོ། །ཉེ་བར་ལེན་ཞེས་བྱ་བ་ཟག་པ་དང་
བཅས་པའི་ཕུང་པོ་རྣམས་སོ། །དགོས་པ་མེད་པ་ནི་མི་ནུས་པའོ། །ཚིག་འཇམ་པ་ནི་ཁ་སྙན་པའོ། །དེ་སྔར་སྨྲ་བ་ནི་ཇེ་སྨྲ་བའམ། གཙོར་བྱེད་པའོ། །མཚན་མས་ཐ་སྙད་འདོགས་བ་དེ་ལ་གནས་པ་ན་གཞོགས་སློང་བྱེད་པའོ། །སྨོད་བྱེད་པ་ནི་སྐྱོན་བརྗོད་པའོ། །རྙེད་པས་རྙེད་པ་འདོད་པ་
རྣམས་ཞེས་བྱ་བར་སྦྱར་བར་བྱའོ། །ཟློས་པ་ནི་ཉེས་པ་ཡང་དང་ཡང་དུ་བརྗོད་པའོ། །མགུ་བ་ནི་རངས་པའོ། །དེ་ལྟ་བུ་མ་ཡིན་པས་ན་དེ་སྐད་ཅེས་བྱའོ། །སློང་བ་ནི་སེམས་སོ། །ཡང་ན་སྦུངས་མེད་པ་ནི་འདི་ལྟ་བུ་ཡིན་ཏེ། ཆགས་པ་ནི་ཞེན་པའོ། །དེའི་ཕྱིར་སྦུངས་མེད་པ་ནི་ཆགས་ཅན་གྱི་ཡིད་དེ།

172-1-162b

བརྩོན་འགྲུས་མེད་པའི་ཞེན་པ་ཡིན་ནོ། །ཐ་དད་པ་ཉིད་ཀྱི་འདུ་ཤེས་ནི་བདག་དང་གཞན་ནོ་སྙམ་པ་སྟེ། དེས་ན་ཐམས་ཅད་དུ་བདག་ཅེས་བྱ་བའི་དོན་སྒྲུབ་པའོ། །ལྟ་བ་མེད་པ་ནི་ཆགས་པའམ་སྡང་བའམ་རྨོངས་པ་ཞིག་ཅེས་དཔྱོད་པ་མེད་པའོ། །བཀུར་སྟི་དང་ལྡན་པའི་ཚུལ་ནི་བཅོམ་
ལྡན་འདས་ཀྱི་ཚུལ་ཡིན་ཏེ། བཅོམ་ལྡན་འདས་རྣམས་ལ་བྱ་བ་དང་འདྲ་བས་སོ། །ཡང་ན་རབ་ཏུ་འབད་པ་དང་ལྡན་པའི་ཚུལ་ལ་དེ་སྐད་ཅེས་བྱའོ། །ལུས་དང་ངག་ཡོན་ཏན་དང་ལྡན་པ་ལྟར་སྟོན་པ་དེ་ནི་ཚུལ་འཆོས་པ་དེ་སྒྲུབ་པ་ཡིན་ནོ། །དམ་པ་རྣམས་མགུ་བ་ནི་ཆོས་ཤེས་པ་
སྟེ་དེ་ཉིད་དཔལ་ཡིན་ནོ། །རྗེས་རྣམ་རིག་ནི་ཕྱིས་ཤེས་པར་འདོད་པའོ། །འདོད་པ་ནི་རེ་བའོ། །བརྙོགས་པ་ནི་སེམས་ཡོངས་སུ་ཉམས་པའོ། །བརྩོན་པ་མེད་པ་ནི་བརྩོན་འགྲུས་མེད་པའོ། །སྒྱིད་ལུག་པ་ནི་བྱ་བ་རྣམས་ལ་སྒྲིམ་པ་མེད་པའོ། །ལུས་འགྱུར་བ་ནི་མི་ཐུབ་པའོ། །འདོད་
པ་ནི་དགའ་བའོ། །དེ་ལྟ་བུ་མ་ཡིན་པས་ན་མི་འདོད་པའོ། །ཡོན་ཏན་ལྔ་དག་ལ་འདོད་པ་ནི་དོན་དུ་གཉེར་བ་གང་ཡིན་པའོ། །གནོད་དོགས་ཞེས་བྱ་བ་ནི་དེ་སེམས་པར་བྱེད་པ་ཞེས་བྱ་བའི་ཐ་ཚིག་གོ། །དགུ་ནི་འདིས་བདག་ལ་ཞེས་བྱ་བ་ལ་སོགས་པའོ། །རྨྱ་བ་ནི་ལུས་དང་སེམས་ལྕི་བ་
ཉིད་དེ། ལུས་ལས་སུ་མི་རུང་བ་ཉིད་དང་། སེམས་ལས་སུ་མི་རུང་བ་ཉིད་དོ། །ལས་བྲལ་བ་ནི་བྱ་བ་མེད་པའོ། །གཉིད་ནི་སེམས་མངོན་པར་སྡུད་པའོ། །འགྱོད་པ་ནི་ཡིད་མི་བདེ་བའོ། །བྱང་ཆུབ་སེམས་དཔའ་ཞེས་བྱ་བ་ནི་ཁྱིམ་པས་སོ། །སྡོམ་བརྩོན་ཅན་གྱིས་ཞེས་བྱ་བ་ནི་རབ་ཏུ་
བྱུང་བས་སོ། །སྙིང་རྗེ་རོ་གཅིག་པ་ནི་སྡུག་བསྔལ་དང་བྲལ་བར་རོ་གཅིག་པའོ། །མདངས་ནི་མཛེས་པ་ཉིད་དོ། །དགེ་བས་ཞེས་བྱ་བ་ནི་བརྩོན་འགྲུས་ཀྱི་མཚན་ཉིད་ཀྱིས་སོ། །བརྗིད་པ་ནི་སྦ་བ་སྟེ་ཟིལ་གྱིས་མི་ནོན་པ་ཉིད་དོ། །ཞི་བ་ནི་ཉེ་བར་ཞི་བའོ། །ཅིའི་ཕྱིར་འདི་ཁོ་ན་ལས་རྣམ་པར་གཞག་ཅེ་
ན། མཇུག་ཐོགས་ནས་འབྱུང་བ་སྨོས་ཏེ། ས་དང་པོ་ལ་ཀུན་དུ་སྦྱོར་བ་གསུམ་པོ་རྗེས་སུ་ཆགས་པ་དང་། ཁོང་ཁྲོ་བ་དང་ཐེ་ཚོམ་རྣམས་སྤངས་པའི་ཕྱིར་རོ། །སྐྱེས་ཕྱིར་ཞེས་བྱ་བ་ནི་འཁྲུངས་པའི་ཕྱིར་རོ། །ངང་གིས་རང་བཞིན་གྱིས་དགེ་བ་བཅུའི་ལས་ཀྱི་ལམ་དེ་དག་ལ་གནས་པའི་ཕྱིར་རོ། །

172-1-163a

འདོད་ཆགས་དང་ཞེ་སྡང་ཆེན་པོ་དང་འབྲིང་ཡོངས་སུ་ཟད་པའི་ཕྱིར་རོ། །བཟོད་པ་དང་བརྩོན་འགྲུས་ལྷག་པར་སྤྱོད་པ་ནི་བཟོད་པ་དང་བརྩོན་འགྲུས་ཀྱི་མཆོག་ཅེས་བྱ་བའི་དོན་ཏོ། །དབང་ཆེན་ནི་མང་པོའི་དཔོན་པོ་སྟེ་ལྷའི་ཚོགས་ཆེན་པོའི་བདག་པོའོ། །འདོད་པ་ནི་
གཟུགས་ལ་སོགས་པའོ། །དེ་དག་ལ་འདོད་ཆགས་པ་ནི་འདོད་ཆགས་པའོ། །ཟློག་པ་ནི་ཟློག་པར་བྱེད་པའོ། །གང་ལ་འོད་འཕྲོ་བ་ཡོད་པ་དེ་ལ་ནི་དེ་སྐད་ཅེས་བྱའོ། །ས་དང་པོ་ལ་གནས་པ་ལ་སོགས་པ་ཡང་དེ་དག་སྒོམ་པར་བྱེད་པས་ཁྱད་པར་དུ་ཞེས་བྱ་བ་སྨོས་སོ། །འཇིག་ཚོགས་ལ་ལྟ་བ་
རབ་ཏུ་འབྱུང་བ་ནི་རྒྱུ་ཡིན་ཏེ། འདི་ལས་རབ་ཏུ་འབྱུང་བས་ན་མ་རིག་པའོ། །དེ་ལས་ནི་ངར་འཛིན་པ་རབ་ཏུ་འབྱུང་སྟེ། མ་རིག་པ་སྲབས་པའི་ཕྱིར་དེ་སྤོང་ངོ་། །ཀུན་ནས་འཇོམས་པ་ནི་དྲུངས་འབྱིན་པའོ། །ཆོས་བདག་མེད་པའམ་རྣམ་པར་ཐར་པ་ལ་སོགས་པ་གང་ལ་དང་པོ་འཕགས་པའི་
བདེན་པ་རྣམས་ཡོད་པ་སྟེ་དེ་རྣམས་ཤེས་པའོ། །དེ་ལ་མཁས་པ་ནི་ཁོང་གཟོ་བ་སྟེ་དེ་བྱུང་བའི་ཕྱིར་རོ། །མུ་སྟེགས་བྱེད་པ་ཐམས་ཅད་ཀྱི་ཉོན་མོངས་པ་ནི་ལུས་ཀྱི་གདུང་བ་ལྔ་ལ་སོགས་པའོ། །འདིས་ཐར་རོ་སྙམ་པའི་ལོག་པར་ལྟ་བའོ། །སངས་རྒྱས་ཀྱི་ཆོས་ཐོབ་པར་བྱ་བ་ལ་མངོན་དུ་
ཕྱོགས་ཤིང་མཐུན་པའི་ཕྱིར་རོ། །ཞི་གནས་ནི་ཏིང་ངེ་འཛིན་ཏོ། །ལྷག་མཐོང་ནི་ཤེས་རབ་པོ། །དེ་དག་གོམས་པ་ཡིས་ཞེས་བྱ་བ་ནི་ཡང་དང་ཡང་དུ་མངོན་དུ་བྱེད་པས་སོ། །འགོག་པ་ནི་སྙོམས་པར་འཇུག་པའི་མཚན་ཉིད་དམ་ཉོན་མོངས་པའི་འགོག་བའོ། །དེ་ཐོབ་པས་རྒྱས་པའི་ཕྱིར་རམ།
ཡོངས་སུ་དག་པའི་ཕྱིར་རམ། ཡོངས་སུ་རྒྱས་པའི་ཕྱིར་རམ། གང་ལ་སྤྲུལ་པ་བཟང་པོ་ཡོད་པ་དེ་ལ་དེ་སྐད་ཅེས་བྱའོ། །མི་འཕྲོགས་པ་ནི་ཟིལ་གྱིས་མི་ནོན་པའོ། །ང་རྒྱལ་ལྷག་པ་ནི་ལྷག་པའི་ང་རྒྱལ་ཏེ། དེ་གང་དག་ལ་ཡོད་པ་དེ་དག་ལ་དེ་སྐད་ཅེས་བྱའོ། །དེ་དག་ཞི་བར་བྱེད་པ་
ནི་ཉེ་བར་ཞི་བར་བྱེད་པའོ། །འདི་ནི་གྲངས་ཀྱང་ཡིན་ལ་རིང་དུ་སོང་བ་ཡང་ཡིན་པས་ན་གྲངས་རིང་དུ་སོང་བ་སྟེ། དེ་དང་ལྡན་ཞིང་རྗེས་སུ་འབྲེལ་ལ་པའི་ཕྱིར་རོ། །རིང་དུ་སོང་བ་ཉིད་ཀྱི་རྒྱུ་སྨོས་པ། གང་གི་ཕྱིར་ས་འདི་ཐོབ་ནས་སྐད་ཅིག་ལ་འགོག་པ་ལ་སྙོམས་པར་འཇུག་པ་དེའི་ཕྱེར་ས་དེ་དུས་

172-1-163b

དང་ཡོན་ཏན་གྱི་གྲངས་ཀྱིས་རིང་དུ་སོང་བའི་ཕྱིར་རོ། །འདི་སྐད་དུ་བཤད་པ་ཡིན་ཏེ། གང་ལ་གྲངས་དང་ཡོན་ཏན་གྱི་སྒོ་ནས་རིང་དུ་སོང་བ་ཡོད་པ་དེ་ནི་འགོག་པའི་སྙོམས་པར་འཇུག་པ་ལ་དབང་བར་འགྱུར་གྱི་གཞན་ནི་མ་ཡིན་ནོ། །དབང་སྒྱུར་ནི་ཉོན་མོངས་པ་རྣམས་སམ་འགོག་པ་ལའོ། །
དེ་ཉིད་ཀྱི་ཕྱིར་འདིའི་མིང་ནི་དེ་ཁོ་ན་ཉིད་དོ། །བྱང་ཆུབ་སེམས་དཔའ་མཚན་དང་རྩོལ་བའི་རྣམ་པར་རྟོག་པ་དག་གིས་མི་གཡོ་བས་ན་མི་གཡོ་བ་སྟེ། དེ་ཉིད་མི་གཡོ་བ་ཞེས་བྱ་བས་བསྟན་ཏོ། །ཇི་ལྟར་མི་གཡོ་ཞེ་ན་མི་རྟོག་པའི་ཕྱིར་རོ། །མི་གཡོ་བ་ཇི་ལྟ་བ་དེ་བཞིན་དུ་ལུས་དང་ནི་ཞེས་བྱ་བ་
ལ་སོགས་པ་སྨོས་སོ། །ས་གང་ལ་གནས་པའི་ལུས་ལ་སོགས་པའི་སྤྱོད་ཡུལ་བསམ་པར་མི་ནུས་པ་ལ་དེ་སྐད་ཅེས་བྱའོ། །ཇི་ལྟར་འཇིག་རྟེན་ན་བྱིས་པའི་གནས་སྐབས་ལས་འདས་པ་ལ་གཞོན་ནུ་ཞེས་བྱ་བ་དང་འདྲ་བར་ཐེག་པ་ཆེན་པོ་འདིར་ཡང་ཉོན་མོངས་པའི་གནས་སྐབས་ལས་འདས་
པ་ལ་གཞོན་ནུ་ཞེས་བྱ་བ་སྟེ། ཉོན་མོངས་པ་རྣམས་ཀྱིས་ནི་བྱིས་པར་འགྱུར་རོ། །དེ་བཞིན་དུ་ནར་སོན་པ་ལ་རྒྱལ་ཚབ་ཅེས་བྱ་བ་དང་འདྲ་བར་འདིར་ཡང་ཆོས་ཀྱི་ནར་སོན་པ་ལ་རྒྱལ་ཚབ་ཅེས་བྱའོ། །གང་ལ་བློ་གྲོས་ས་འོག་མ་པ་དག་ལས་ཁྱད་པར་དུ་འཕགས་པར་བཟང་བ་ཡོད་པ་དེ་
ནི་ལེགས་པའི་བློ་གྲོས་སོ། །སོ་སོ་ཡང་དག་པར་རིག་པ་ནི་དོན་ལ་སོགས་པའི་མཚན་ཉིད་གཞིའོ། །སྤྲིན་ཞེས་བྱ་བའི་སྒྲ་ནི་མང་པོ་ཉིད་ཉེ་བར་མཚོན་པའོ། །གང་ལ་དེ་བཞིན་གཤེགས་པ་རྣམས་ལས་ཆོས་ཀྱི་སྤྲིན་འཐོབ་པ་ཡོད་པ་དེ་ལ་དེ་སྐད་ཅེས་བྱའོ། །དེ་ཉིད་དམ་པའི་ཆོས་ཀྱི་
ཆར་ཞེས་བྱ་བ་ལ་སོགས་པས་སྟོན་ཏོ། །དབང་ཕྱུག་ཆེན་པོ་ནི་མིང་ངོ་། །གནས་དང་གནས་མ་ཡིན་པ་ལ་སོགས་པའི་མཚན་ཉིད་ཀྱི་སྟོབས་བཅུ་དང་ངོ་། །སྟོབས་ལ་སོགས་པ་སངས་རྒྱས་རྣམས་ཀྱིས་ཚད་མེད་པ་ཉིད་དོ། །རྒྱུ་ཚད་མེད་པ་དེ་ལྟ་བུ་ལ་འབྲས་བུ་སྣ་ཚོགས་ཚད་
མེད་པར་འགྱུར་རོ་ཞེས་ཚད་མེད་པ་ཉིད་ལ་ཡིད་ཆེས་པར་གྱུར་པས་ཚད་མེད་པ་དེ་ལྟ་བུ་སྣ་ཚོགས་མེད་པ་སངས་རྒྱས་ཉིད་འཐོབ་པར་བྱ་བའི་ཕྱིར་རོ། །ཐབས་འདིས་ཚོགས་ཚད་མེད་པར་འགྱུར་རོ་ཞེས་བྱ་བ་ཡིན་ཏེ། རྒྱུ་ཚད་མེད་པ་ཅན་དེ་ནི་ཚད་མེད་པར་འགྱུར་རོ། །བསོད་ནམས་

172-1-164a

ཐམས་ཅད་ཡོངས་སུ་བཟུང་བ་ཉིད་ནི་བསོད་ནམས་ཐམས་ཅད་ཁས་བླང་ཞིང་ཡོངས་སུ་གཟུང་བ་སྟེ། བྱ་བ་དང་རྗེས་སུ་ཡི་རང་བའི་སྒོ་ནས་བསོད་ནམས་ཐམས་ཅད་ཡོངས་སུ་གཟུང་བ་ཡིན་ནོ། །གསོལ་བ་ནི་བཀུར་སྟི་དང་ལྡན་པས་དོན་དུ་གཉེར་བའོ། །མ་བགྱིས་
པ་ནི་མ་འོངས་པའོ། །མི་ཁོམ་པ་ནི་ལོག་པར་འཛིན་པ་ལ་སོགས་པ་བརྒྱད་དོ། །དེ་དག་ལ་འདས་པ་ནི་རྒལ་བའོ། །སྤྱོད་པ་རང་དབང་ཡོད་པ་ནི་བཅོམ་ལྡན་འདས་རྣམས་དང་། དེ་དག་གི་ཉན་ཐོས་ཟག་པ་ཟད་པ་རྣམས་ཏེ། ཉོན་མོངས་བ་དག་གིས་ནི་གཞན་དབང་དུ་འགྱུར་རོ། །ལྡན་པ་
ནི་ལྡན་པར་འགྱུར་བའོ། །སྐྱེས་མཆོག་ནི་སངས་རྒྱས་ཉིད་དེ། སེམས་ཅན་ཐམས་ཅད་པས་མཆོག་ཏུ་གྱུར་པའི་ཕྱིར་རོ། །ཡང་ན་དེས་མ་བསྡུས་པ་སྐྱེས་བུའི་མཆོག་གཞན་ནོ། །རིག་པ་ནི་ཡང་དག་པའི་ལྟ་བའོ། །ཡན་ལག་ལྷག་མ་རྣམས་ནི་རྐང་པའོ། །ཡང་ན་རིག་པ་ནི་ལྷའི་
མིག་དང་། ལྷའི་རྣ་བ་དག་གོ། །ལྷག་མ་ནི་རྐང་པའོ། །ཡང་ན་རིག་པ་ནི་ལྷག་པའི་སེམས་སོ། །ལྷག་མ་ནི་རྐང་པའོ། །ཁ་དོག་ལྡན་པ་ནི་འཛམ་བུ་ཆུ་བོའི་གསེར་གྱི་ཁ་དོག་ལྟར་བཟང་བའོ། །གང་དག་ལ་བལྟ་ན་སྡུག་པ་ཡོད་པ་དེ་དག་ལ་དེ་སྐད་ཅེས་བྱའོ། །སྟོབས་ཅན་ནི་སྲེད་མེད་
ཀྱི་བུ་ལ་སོགས་པའི་སྟོབས་དང་ལྡན་པའམ། ཐ་མལ་པའི་སྟོབས་དང་ལྡན་པའོ། །དགའ་བ་ནི་མགུ་བ་སྟེ་ཡིད་དགའ་བ་ཞེས་བྱ་བའི་ཐ་ཚིག་གོ། །གསལ་བ་ནི་སྤ་བ་དང་ལྡན་པའོ། །རྒྱུན་མི་འཆད་པ་ནི་བར་ཆད་མེད་པའོ། །གཞན་ནི་སྟོབས་བཅུ་ལ་སོགས་པའོ། །སེམས་ཅན་ཀུན་
གྱི་མཆོག་ནི་གཙོ་བོའོ། །གང་ལ་བྱམས་པ་སྟེ་འཇམ་ཞིང་བྱམས་པའི་མཚན་ཉིད་ཡོད་པ་ལ་དེ་སྐད་ཅེས་བྱའོ། །གང་དག་ལ་སེམས་རབ་ཏུ་དང་བ་སྟེ། དྲི་མ་མེད་པ་ཡོད་པ་དེ་དག་ནི་རབ་དང་ངོ་། །དེའི་ཕྱིར་འཁྲུག་པ་དང་བྲལ་བས་ན་འཁྲུག་མེད་དོ། །རྣལ་མ་ནི་ཁྲལ་ཁྲུལ་མེད་པའོ། །ཇི་ལྟར་རབ་ཏུ་དང་
བ་ལ་སོགས་པ་ཡིན་ཞེ་ན། མཐོང་བ་དང་དྲན་པ་དག་དང་མིང་ཙམ་ཐོས་པས་སོ། །ཕན་པ་དང་བདེ་བ་བགྱིད་པ་སྟེ། བདེ་བ་ཁོ་ནས་ཕན་པ་ཞེས་བྱ་བའི་དོན་ཏོ། །ཅིག་ཅར་སྤྲུལ་པའི་སྤྲིན་རྣམས་ཀྱིས་སོ། །རང་དགའ་ནི་ཅི་བདེར་རོ། །གང་ལ་དགག་པ་སྟེ་སྒྲིབ་པ་མེད་པ་ཡོད་པ་དེ་ལ་དེ་

172-1-164b

སྐད་ཅེས་བྱའོ། །སྲོག་ནི་གསོན་པ་སྟེ་དེ་དང་འདྲ་བར་རོ། །དེ་ནི་བཅོམ་ལྡན་འདས་ཀྱིས་མདོ་གཞན་དག་ལས་གསུངས་ཏེ། སེམས་ཡོངས་སུ་སྦྱོང་བའི་ཕྱིར་དང་། བསོད་ནམས་ཀྱི་ཚོགས་བསགས་པའི་ཕྱིར་ཞེས་བྱ་བ་ལྷག་མ་ཡིན་ནོ། །ཁྱིམ་བདག་དཔས་བྱིན་གྱིས་ཞུས་པ་ལས་ནི་
བྱང་ཆུབ་ཀྱི་སེམས་ཀྱི་བསོད་ནམས་ཡོངས་སུ་བསྒྲགས་པའི་ཕྱིར་རོ། །དེ་བཞིན་དུ་ཏིང་འཛིན་རྒྱལ་པོའི་མདོ་ལས་ནི་བྱམས་པའི་ཡོན་ཏན་བསྟན་པའི་ཕྱིར་རོ། །འཕགས་པ་བློ་གྲོས་མི་ཟད་པའི་མདོ་ལས་ནི་ཕ་རོལ་ཏུ་ཕྱིན་པ་བསྟན་པའི་ཕྱིར་རོ། །དེ་ནི་ཆོས་ཀྱི་བྱེད་པར་འགྱུར། །གང་
གི་ཕྱིར་ཆོས་ཀྱིས་ཕན་པར་འགྱུར་བ་དེའི་ཕྱིར་ཇི་ལྟར་ཁྱོད་ལ་བདག་ཉིད་ཕངས་པ་དེ་བཞིན་དུ་ཆོས་ལ་ཡང་གྱིས་ཤིག་པའོ། །ཇི་ལྟར་ཤེས་རབ་ལས་འདོད་པ་ཐམས་ཅད་འབྱུང་བ་དེ་བཞིན་དུ་མཁས་པ་རྣམས་ལས་ཀྱང་དེ་འབྱུང་ངོ་ཞེས་མཇུག་ཐོགས་ནས་འབྱུང་བས་སྟོན་ཏོ། །གཙང་བ་ནི་དབེན་ཞིང་དྲི་
མ་མེད་པ་སྟེ། ཆགས་པ་ལ་སོགས་པའི་མི་གཙང་བ་དང་བྲལ་བའི་ཕྱིར་རོ། །བྱམས་པ་ནི་བྱམས་པ་དང་ལྡན་པའོ། །གང་ཞིག་དེ་འདྲ་བ་ལ་དོགས་ཤིང་བག་ཚ་བ་སྐྱེད་པར་བྱེད་པའོ། །ཆོག་ཤེས་པ་ནི་རྙེད་པས་ཆོག་པར་འཛིན་པའོ། །སྙིང་རྗེ་ནི་ཕ་རོལ་སྡུག་བསྔལ་བས་སྡུག་བསྔལ་བར་
འགྱུར་རོ། །ཚུལ་ཁྲིམས་ནི་སྤོང་བ་བདུན་གྱིས་བདག་ཉིད་དམ། སེམས་ཅན་གྱི་དོན་བྱ་བ་དང་། དགེ་བ་ཆོས་སྡུད་པའི་མཚན་ཉིད་དོ། །ཤེས་རབ་ནི་མཉམ་པར་གཞག་པའི་གནས་སྐབས་དེ་དེ་ཁོ་ན་ཉིད་ཡོངས་སུ་དཔྱོད་པའོ། །གང་གི་ཕྱིར་ཆོས་དེ་དག་སྒོམ་པར་བྱེད་པ་ནི་རྟག་ཏུ་བག་ཡོད་པ་
ཡིན་པ་དེའི་ཕྱིར་དེ་དག་ཉིད་སྟོན་པའོ་ཞེས་བྱ་བ་སྟེ། དེ་དག་གི་རང་བཞིན་མཁྱེན་པར་བགྱིས་ནས་རྗེས་སུ་མཐུན་པའི་དོན་སྒྲུབ་པར་མཛོད་ཅིག་པའོ། །འདོད་པའི་གནས་ཐོབ་པར་བྱེད་པས་ན་ལུགས་ཏེ། རྒྱས་པ་དང་མདོར་བསྡུས་ཏེ་ཇི་སྐད་བཤད་པ་འདིས་སོ། །གྲུབ་པའི་མཆོག་ནི་སེམས་
ཅན་རྣམས་ཀྱི་ནང་ནའམ། སེམས་ཅན་རྣམས་ཀྱི་ནང་དུ་སངས་རྒྱས་ཉིད་དོ། །བདེན་པའི་ངང་ཚུལ་ནི་འགྲོགས་ན་བདེ་བའམ་བདེ་བའི་རང་བཞིན་ཏེ། བདེ་བ་སྐྱེ་བའི་རྒྱུ་ཡིན་པས་ན་བདེ་བའོ། །བསྙེན་དཀའ་བ་ནི་བརྡ་ཕྲད་པར་དཀའ་བ་སྟེ་ཟབ་པའི་ཕྱིར་རོ། །ཁྱད་དུ་གསོད་པ་ནི་གཞན་དག་

172-1-165a

ལ་བརྙས་པའོ། །དེའི་ཆེད་དུ་བྱས་པའི་གཞུང་གང་ཡིན་པ་དེ་ལ་ཡང་དེ་སྐད་ཅེས་བྱ་སྟེ། ཚུལ་དང་ལྡན་པ་ནི་ཚུལ་ཤེས་པ་ཡིན་གྱི་གཞན་ནི་མ་ཡིན་ནོ་ཞེས་བྱ་བ་ཡིན་ནོ། །རང་དབང་ནི་ཤེས་རབ་རྣོ་བའི་ཕྱིར་རང་ལ་དབང་བའོ། །ལ་ལ་བྱམས་ཀྱང་ཉེས་པ་སྨྲ་བ་སྨྲ་
བས་དེའི་ཕྱིར་ལེགས་པར་སྨྲ་བ་ཞེས་བྱ་བ་སྨོས་ཏེ། ལེགས་པར་སྨྲ་བ་བརྗོད་པའོ། །ཅི་རིགས་པར་ཞེས་བྱ་བ་ནི་རྒྱལ་པོའི་བྱ་བ་མ་གཏོགས་པའོ། །ཕན་པར་འདོད་པས་ཞེས་བྱ་བ་ནི་ཕན་པར་འདོད་པ་ཉིད་ཀྱིས་སོ། །ཚུལ་ཁྲིམས་ནི་སྲུང་བའམ་བསྟེན་པར་བྱ་བའོ། །ཕྲག་དོག་མེད་
པ་ནི་གཞན་གྱི་ཕུན་སུམ་ཚོགས་པ་ལའོ། །དོགས་པ་མེད་པ་ནི་དགེ་བ་དག་ལ་འཇིགས་པ་མེད་པའོ། །གང་ལ་གཞན་དོན་གྱི་ནོར་ཡོད་པ་དེ་ལ་དེ་སྐད་ཅེས་བྱའོ། །ཕོངས་པར་གྱུར་པ་ནི་ཉམ་ཐག་པར་གྱུར་པའོ། །ཡོངས་གཟུང་ནི་ཀུན་ནས་གཟུང་བའོ། །དོར་བ་ནི་གཏོང་བའོ། །
རིན་ཆེན་ཕྲེང་བའི་ཚིག་དོན་རྣམས། །བདག་གིས་རྣམ་པར་དབྱེ་བྱས་ནས། །བསོད་ནམས་ཅུང་ཟད་གང་བསྒྲུབས་དེས། །འཇིག་རྟེན་ཐམས་ཅད་མཁྱེན་པར་ཤོག །རིན་པོ་ཆེའི་ཕྲེང་བའི་རྒྱ་ཆེར་བཤད་པ་སློབ་དཔོན་མི་ཕམ་བཤེས་གཉེན་གྱིས་མཛད་པ་རྫོགས་སོ།།      །།
རྒྱ་གར་གྱི་མཁན་པོ་བིདྱཱ་ཀ་ར་པྲ་བྷཱ་དང་། ཞུ་ཆེན་གྱི་ལོ་ཙཱ་བ་བནྡེ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།       །།༄༅༅། །རྒྱ་གར་སྐད་དུ། སྭཔྣ་ཙིནྟ་མ་ཎི་པ་རི་ཀ་ཐཱ། བོད་སྐད་དུ། རྨི་ལམ་ཡིད་བཞིན་ནོར་བུའི་གཏམ། དཀོན་
མཆོག་གསུམ་ལ་ཕྱག་འཚལ་ལོ། །གང་ཞིག་རྟོགས་པའི་ཕྱིར་ན་རྨི་ལམ་མཐར། །བྱང་ཆུབ་སེམས་དཔའ་རྣམས་ལས་རིགས་རྙེད་དེ། །ཕན་ཕྱིར་སེམས་ཅན་དགའ་བ་འགའ་ཞིག་ནི། །སྐྱེ་དགུ་རྣམས་ལ་འདོམས་པར་བྱེད་པ་ཡིན། །བདག་དང་སེམས་ཅན་ཐམས་ཅད་བདེ་སྡུག་
མཚུངས། །བདེ་སྡུག་མཚུངས་པ་ཅན་ནི་གཉེན་ཡིན་ན། །བདག་གིས་དེ་དག་རབ་ཏུ་སྤངས་ནས་ཀྱང་། །མྱ་ངན་འདས་པར་འཇུག་པ་མི་རིགས་སོ། །སྐྱེ་བོ་འདི་དག་དང་ནི་ལྷན་ཅིག་ཏུ། །ངན་སོང་དག་ཏུ་སྡུག་བསྔལ་དྲག་པོ་དང་། །བདེ་འགྲོ་དག་ཏུའང་བདེ་བ་མང་པོ་མྱོང་། །

172-1-165b

གཅིག་ཏུ་གནས་པས་བདག་ལ་འདི་དག་དགའ། །གང་གི་མངལ་དུ་ལན་ཅིག་མིན་པར་བདག །མ་གནས་པའམ་བདག་ལ་གང་མ་གནས། །སེམས་ཅན་དེ་ན་འདི་ནི་གང་ཡང་མེད། །དེའི་ཕྱིར་ཐམས་ཅད་གཉེན་དུ་གྱུར་པ་ཡིན། །གཞན་ཡང་བཅོམ་ལྡན་འདས་ལ་བདག་དགའ་
སྟེ། །གང་ཕྱིར་འདི་དག་ཆེད་དུ་བཅོམ་ལྡན་འདས། །ཤིན་ཏུ་ཡུན་རིང་བར་ནི་སྐྱོ་གྱུར་ན། །དེས་ཀྱང་བདག་ནི་སེམས་ཅན་རྣམས་ལ་དགའ། །འདི་ལྟར་ཕན་དང་གནོད་པ་བྱས་པ་ལས། །བདེ་བ་དང་ནི་སྡུག་བསྔལ་ཚད་མེད་པ། །གཉིས་ཀའི་རྒྱུ་རུ་འགྱུར་བ་དེ་ཕྱིར་ཡང་། །སེམས་
ཅན་རྣམས་ནི་བདག་གི་བླ་མ་ཡིན། །འདི་ཉིད་ལ་ནི་གསོད་དང་འཆིང་བ་དང་། །རྡེག་དང་སྡིག་སོགས་སྡུག་བསྔལ་མྱོང་བ་གང་། །དེ་ནི་སེམས་ཅན་འཚེ་བའི་འབྲས་བུ་ཞེས། །བདེ་བར་གཤེགས་པ་རྣམས་ཀྱིས་བཀའ་སྩལ་ཏོ། །གཟུགས་དང་ནད་མེད་དག་གིས་གནོད་པ་དང་། །
ཕོངས་དང་རིགས་ངན་ཚེ་ནི་ཐུང་བ་དང་། །ཆུང་མ་ཤི་དང་ལོང་བར་གྱུར་པ་ཉིད། །སེམས་ཅན་གནོད་པ་བྱས་པའི་འབྲས་བུ་ཡིན། །མནར་མེད་པ་ཡི་བར་གྱི་ངན་སོང་གི། །གནས་སུ་སྡུག་བསྔལ་སྣ་ཚོགས་མྱོང་བ་གང་། །དེ་དག་ཐམས་ཅད་རང་ཉིད་ཉེས་པ་ཡིས། །སེམས་ཅན་རྣམས་
ལ་གནོད་པ་བྱས་པས་ཡིན། །གང་ཞིག་འདི་ཉིད་ལ་ནི་མཆོད་བྱས་མཆོད། །གྲགས་དང་ཡིད་འོང་ནོར་རྣམས་ཐོབ་པ་དག །ཡིད་འོང་ཡིད་དུ་མི་འོང་སེམས་ཅན་ལ། །མངོན་པར་ཕན་དང་འཚེ་བའི་སྒོ་ནས་སོ། །ནད་མེད་པ་དང་རིགས་ནི་ཕུན་སུམ་ཚོགས། །གཟུགས་མཛེས་པ་དང་ཚེ་རིང་
དབང་ཕྱུག་དང་། །ནོར་ལ་སོགས་དང་ཆུང་མ་སྦས་པ་ནི། །སེམས་ཅན་ཕན་པ་བྱེད་པའི་འབྲས་བུ་ཡིན། །སེམས་ཅན་རྣམས་ལ་དགའ་བར་བྱེད་པ་ཡིས། །རྒྱལ་སྲིད་རྒྱལ་སྲིད་ཆེ་དང་ཡང་དག་གི། །རྒྱལ་སྲིད་འཁོར་ལོས་སྒྱུར་བ་མཆོག་ཉིད་དང་། །དབང་པོའི་གནས་ནི་འཐོབ་པར་
འགྱུར་བ་ཡིན། །སྐྱེས་བུ་སེམས་ཅན་ཕན་པར་བྱེད་པ་ཡིས། །སངས་རྒྱས་གོ་འཕང་ཡང་ནི་ཐོབ་འགྱུར་ན། །གང་ཞིག་སྙིང་པོ་མེས་པ་དམན་པའི་ལྷ། །ཐོབ་པ་འདི་ལ་ངོ་མཚར་ཅི་ཞིག་ཡོད། །གལ་ཏེ་སེམས་ཅན་དེ་དག་མེས་གྱུར་ན། །འདི་ནི་གང་གི་ཆེད་དུ་སྦྱིན་པ་གཏོང་། །གལ་ཏེ་

172-1-166a

ལུས་ཅན་རྣམས་ནི་མེད་གྱུར་ན། །གང་ལས་འདུལ་བའི་ཚུལ་ཁྲིམས་ཐོབ་པར་འགྱུར། །ཉེས་པ་བྱེད་པ་ཡང་ནི་གང་ཞིག་ཡིན། །གང་གི་ཆེད་དུ་དཔའ་བོ་བཟོད་པ་སྒོམ། །གང་ཞིག་མངོན་པར་འདོད་པ་ཐོབ་བྱའི་ཕྱིར། །སུ་ཡི་ཆེད་དུ་བརྩོན་འགྲུས་དེ་དེ་བྱེད། །
གལ་ཏེ་ལུས་ཅན་རྣམས་ནི་མེད་གྱུར་ན། །ཇི་ལྟར་བྱམས་དང་སྙིང་རྗེ་དགའ་བ་དང་། །བཏང་སྙོམས་དག་ལ་ཡང་དག་བརྟེན་ནས་ནི། །བསམ་གཏན་སྙོམས་འཇུག་བདེ་བ་ཐོབ་པར་འགྱུར། །ཐར་པའི་བདེ་བ་དངོས་དང་དངོས་མེད་ཤེས། །ཁམས་དང་བསམ་པ་བག་ལ་ཉལ་དུ་བརྗོད། །
ཀུན་ནས་ཉོན་མོངས་རྣམ་པར་བྱང་བ་དག །གལ་ཏེ་དེ་དག་མེད་ན་ཇི་ལྟར་ཤེས། །བྱང་ཆུབ་ཕྱོགས་དང་མཐུན་པའི་ཆོས་རྣམས་ཀྱི། །རྒྱུ་ནི་ཇི་ལྟར་སེམས་ཅན་རྣམས་ཡིན་ལ། །དེ་ཕྱིར་རྫོགས་པའི་བྱང་ཆུབ་འདོད་པ་ཡིས། །སེམས་ཅན་རྣམས་ནི་བླ་མ་བཞིན་དུ་ལྟ། །དེ་ལྟར་འབྱུང་པོ་
རྣམས་ནི་བདེ་ཆེན་གྱི། །སྒོ་རུ་སེམས་བཞིན་པར་ནི་བྱེད་པ་ལ། །འགྲོ་བ་ན་ནི་དཀའ་བའི་རྣམ་པ་ནི། །མི་བཟོད་གང་ཡིན་དེ་ལ་ཅུང་ཟད་མེད། །གང་གི་སེམས་ལ་སེམས་ཅན་རྣམས། །བདག་ཉིད་ཡིན་པ་དེ་ལྟར་གནས། །དེ་ལ་ཕྱི་རོལ་དངོས་ཚོགས་དང་། །ཆུང་མ་དག་ཀྱང་མངོན་ཞེན་
མེད། །བདག་ཉིད་དང་ནི་ཕ་མ་དང་། །བུ་དང་ཆུང་མ་དག་ལ་ཡང་། །གནོད་པ་དེ་འདྲ་ཁས་བླང་གི། །སེམས་ཅན་རྣམས་ལ་གནོད་མི་བྱ། །ཉེས་པ་དྲག་པོ་བྱེད་པ་ཡི། །སེམས་ཅན་ལ་བཟོད་ཕན་སེམས་ལྡན། །སེམས་ཅན་རྣམས་ལ་གུས་བརྟན་པ། །ཉེས་པ་ཆུང་ངུའང་མི་བྱེད་དོ། །
འདི་དག་ཉིད་ལ་ཕན་འདོད་པའི། །བརྩོན་འགྲུས་གོ་ཆ་གྱོན་པ་ནི། །འབྲས་བུ་ཆེ་ལ་བསྐལ་སྟོང་དུ། །དམྱལ་བའི་མེར་ཡང་གནས་པར་སྤྲོ། །བདག་གི་སྐྱེ་དང་འཇིག་དང་རྟོགས་པ་ལ། །ཇི་ལྟ་བ་དང་ཇི་སྙེད་གནོད་པ་ཡི། །སེམས་ཅན་དེ་དག་བསམ་གཏན་དབང་གིས་ནི། །བླ་མ་
དང་ནི་བླ་མར་རབ་ཏུ་སྒོམ། །དེ་ལྟར་ཆོས་ལྔ་པོ་དག་ཡོད་ན་ནི། །ལེགས་སྐྱེས་རྩ་ཅན་བྱང་ཆུབ་སེམས་དཔའ་ནི། །འཕགས་པ་ཤེས་རབ་ཕ་རོལ་ཕྱིན་པ་ཡིས། །ངེས་པར་གང་བ་ཡིན་པར་བརྗོད་པར་བྱ། །གང་ཞིག་བརྟེན་པས་ཆེན་པོ་ཉིད་ཐོབ་ཅིང་། །གནོད་པས་དཀའ་བའི་

172-1-166b

ལོག་པར་ལྟུང་བ་ཐོབ། །སྲོག་ཀྱང་ཡོངས་བཏང་བར་བྱས་ནས་ཀྱང་། །དེ་དག་དགའ་བར་བྱས་པ་ཉིད་དུ་རིགས། །མང་པོ་གང་དག་བརྟེན་པས་གྲུབ་པ་ནི། །ཐོབ་པ་དེ་ལྟར་སེམས་ཅན་དེ་དག་ཡིན། །སེམས་ཅན་དེ་དག་ལས་ནི་ཞིང་གཞན་པའི། །གྲུབ་པའི་ཞིང་ནི་འགྲོ་བ་ན་
ཡོད་མིན། །འདི་དག་ཡིད་བཞིན་ནོར་བུ་སྟེ། །བུམ་པ་བཟང་ཡིན་འདོད་འཇོའི་བ། །དེའི་ཕྱིར་ལྷ་དང་བླ་མ་བཞིན། །དེ་དག་སྟན་པར་བྱེད་པ་ཡིན། །ལུང་དང་རིགས་པས་ཡོངས་སུ་བལྟས་ནས་ནི། །སེམས་ཅན་ཀུན་གྱི་བདག་གི་སྙམ་རློམ་པའི། །དམ་པའི་ལག་ཏུ་དགེ་
ལེགས་ཐམས་ཅད་ནི། །ཡུན་མི་རིང་བར་འབྱུང་བར་འགྱུར་བ་ཡིན། །འདི་ནི་ཐུབ་པ་ཆེན་པོའི་སྤྱོད་པ་སྟེ། །དཔང་བཅས་འདི་ལ་དཔྱད་པ་མི་བྱའོ། །ཇི་སྲིད་འདི་ནི་མངོན་དུ་མ་བྱས་པ། །དེ་སྲིད་གྲུབ་པ་སྲིད་པ་མ་ཡིན་ནོ། །རེ་ཞིག་བརྟག་པར་བྱ་ཕྱིར་ཇི་སྐད་དུ། །བཤད་
པ་འདི་ལ་འབད་པ་གྱིས་ཤིག་དང་། །ཆེན་པོ་ཉིད་ནི་རྒྱུ་མཚན་དུ་གྱུར་པ། །ཡོན་ཏན་རང་ཉིད་ཀྱིས་ནི་ཐོབ་པར་འགྱུར། །འདི་ནི་ཆེན་པོ་ཉིད་ཀྱི་ལམ། །རིགས་ནི་སེམས་ཅན་ཆེན་པོས་བསྟེན། །སེམས་ཅན་ཀུན་ལ་བདེ་སྟེར་བའི། །འཕགས་འདི་ཡིད་བཞིན་ནོར་བུ་ཡིན། །
རྨི་ལམ་ཡིད་བཞིན་ནོར་བུའི་གཏམ་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།།      །།ཁ་ཆེའི་པཎྜི་ཏ་ཤྲཱི་ར་ཐ་དང་། ལོ་ཙཱ་བ་དགེ་སློང་གྲགས་འབྱོར་ཤེས་རབ་ཀྱིས་བསྒྱུར།།      །།༄༅༅། །རྒྱ་གར་སྐད་དུ། དཱ་ན་པ་རི་ཀ་ཐཱ། བོད་སྐད་
དུ། སྦྱིན་པའི་གཏམ། དཀོན་མཆོག་གསུམ་ལ་ཕྱག་འཚལ་ལོ། །སྦྱིན་པ་གཏེར་ཆེན་ཕྱི་བཞིན་འབྲངས་པ་ཡིན་ཏེ་ཆོམ་རྐུན་ལ་སོགས་དབྲོག་མི་ནུས། །སྦྱིན་པ་སེམས་ཀྱི་སེར་སྣ་དང་ནི་ཆགས་པའི་སྐྱོན་གྱི་རྡུལ་རྣམས་འཁྲུ་བར་བྱེད། །སྦྱིན་པ་འཁོར་བའི་ལམ་དང་ངལ་བསེལ་
བ་ཡིན་ཏེ་བཞོན་པ་བདེ་བླག་ཅན། །སྦྱིན་པ་བདེ་དགུར་སྦྱོར་བ་དུ་མ་དག་གི་སྒོ་བཟང་གཏན་གྱི་མཛའ་བོ་མཆོག །འབྱོར་ཅིང་དག་པ་ཕུན་སུམ་ཚོགས་དང་ཀུན་དུ་བཀའ་ཉན་ཡོན་ཏན་རྣམས་དང་ནི། །སུམ་ཅུ་རྩ་གསུམ་ལྷ་ཡུལ་གྲོང་ཁྱེར་ལ་གནས་བྱད་གཟུགས་མཛེས་པའི་ཡོན་ཏན་རྣམས། །ཅི་དང་

172-1-167a

ཅི་འདོད་དེ་དག་ཐམས་ཅད་སྦྱིན་པ་དག་གིས་ངེས་པར་ཐོབ་འགྱུར་ཏེ། །དེ་ལྟར་དོན་ནི་ཡོངས་སུ་བརྟགས་པར་གྱུར་ནས་སུ་དག་སྦྱིན་པ་སྦྱིན་མི་བྱེད། །སྦྱིན་པ་མེ་དང་ཆུ་དང་ཆོམ་རྐུན་འཇིགས་པའི་འཁྲུག་པ་རྣམས་ཀྱིས་བསྐྱོད་མི་ནུས། །སྦྱིན་པ་སྒྲིབ་པ་ཟད་བྱེད་
སྲིད་པའི་འགྲོ་བ་ཕྱི་བཞིན་འབྲང་བའི་མཛའ་ཆེན་ཡིན། །སྦྱིན་པ་འགྲོ་བའི་རྒྱུན་གི་ཡུལ་རྣམས་ཀུན་དུ་སྲོག་ཆགས་རྣམས་ཀྱི་འཇུག་པ་ཡིན། །སྦྱིན་པ་ཚེ་རབས་བགྲང་བ་དག་ཏུ་ཕྱི་བཞིན་འབྲངས་ཏེ་བ་ཕྱིར་བེའུ་འབྲང་བ་བཞིན། །ནོར་རྣམས་ཀུན་གྱི་སྙིང་པོ་བླང་བ་དབང་ཕྱུག་རྣམས་ཀྱི་གཞི་ནི་
སྦྱིན་པ་ཡིན་ཞེའོ། །བློ་ཅན་ལེགས་པར་འདོད་པ་ཡིས། །ལེགས་པར་བསྒྲིམས་ཏེ་སྦྱིན་པ་སྦྱིན། །འཁོར་བར་ཡོངས་སུ་འཁྱམ་པ་ན། །སྦྱིན་པ་མ་གཏོགས་གཉེན་མེད་དོ། །སྦྱིན་པ་འཇིག་རྟེན་རྒྱན་ཡིན་ཏེ། །སྦྱིན་པ་ངན་འགྲོ་ཟློག་པ་ཡིན། །སྦྱིན་པ་མཐོ་རིས་སྐས་ཡིན་ཏེ། །སྦྱིན་
པ་ཞི་བྱེད་ཤིས་པ་ཡིན། །འཇིག་རྟེན་དག་ན་རྒྱལ་པོའི་མཆོག །དཔའ་བརྟུལ་དྲེགས་ཤིང་མཐུ་ཆེ་ལ། །རྒྱལ་སྲིད་རྒྱས་ལ་དབང་བྱེད་པ། །བདེ་འབྱུང་སྦྱིན་པ་བྱིན་ལས་བྱུང་། །སུམ་ཅུ་རྩ་གསུམ་གནས་རྣམས་ན། །བརྒྱ་བྱིན་ལྷ་ཡི་དབང་བྱེད་པ། །དེ་ཡང་ཕྱིན་པའི་འབྲས་བུ་
མཆོག། །དམ་པ་ཡིན་ཞེས་མཁས་རྣམས་སྨྲ། །མཚན་མཆོག་སུམ་ཅུ་གཉིས་མངའ་བ། །དྲི་མེད་གཟི་བརྗིད་མཚུངས་མེད་པ། །འཁོར་བའི་རྒྱ་མཚོ་རྒལ་བ་ཡང་། །སྦྱིན་པ་ལ་ནི་བརྟེན་ཏེ་འབྱུང་། །ལྷ་ཡི་འཇིག་རྟེན་སྐས་ཀྱང་ཡིན། །ཐར་པའི་མཐར་གྱི་སྒོ་ཡང་ཡིན། །
ངན་སོང་རྣམས་ལས་བཟློག་པ་ཡིན། །ཕུན་སུམ་ཚོགས་ཀུན་རྒྱུ་ཡང་ཡིན། །དེ་ཡི་ཕྱིར་ན་མི་རྣམས་ཀྱིས། །ལེགས་པར་བསྒྲིམས་ཏེ་སྦྱིན་པ་སྦྱིན། །ཆགས་དང་ཕྲག་དོག་ལ་སོགས་པ། །མེད་པར་བསོད་ནམས་བསགས་པར་གྱིས། །སངས་རྒྱས་འདྲ་བའི་སྟོན་པ་མེད། །ཆོས་དང་
འདྲ་བའི་སྐྱོབ་པ་མེད། །དགེ་འདུན་འདྲ་བའི་ཞིང་མེད་དེ། །དེའི་ཕྱིར་གསུམ་ལ་དབུལ་བར་གྱིས། །ཕྲན་པར་གྱུར་པའི་མཐའ་ནི་འབྲལ་བར་འགྱུར། །ཕུན་སུམ་ཚོགས་པའི་མཐའ་ནི་ངན་ཅིང་རྒུད། །ཚེ་འདི་གློག་ལྟར་འགྱུར་ཞིང་འཇིག་ལ་གཡོ། །དེ་ཡི་ཕྱིར་ན་བག་ཡོད་བརྟན་པོར་གྱིས། །

172-1-167b

འཇིག་རྟེན་འདི་ཀུན་བདེ་བ་མངོན་པར་འདོད། །སྐྱེས་བུ་བདེ་ལ་ལོངས་སྤྱོད་མེད་པར་མིན། །ལོངས་སྤྱོད་སྦྱིན་ལས་བྱུང་བར་མཁྱེན་ནས་ནི། །ཐུབ་པས་དང་པོར་སྦྱིན་པའི་གཏམ་དག་མཛད། །སློབ་དཔོན་ཀླུ་སྒྲུབ་ཀྱིས་མཛད་པ་སྦྱིན་པའི་གཏམ་རྫོགས་སོ།།      །།༄༅༅། །རྒྱ་གར་
སྐད་དུ། བྷཱ་བ་སཾ་ཀྲཱན་ཏ་པ་རི་ཀ་ཐཱ། བོད་སྐད་དུ། སྲིད་པ་ལས་འདས་པའི་གཏམ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དངོས་མེད་དངོས་ལས་མི་སྐྱེ་སྟེ། །དངོས་མེད་ལས་ཀྱང་སྐྱེ་མ་ཡིན། །དངོས་པོ་རྟག་ཏུ་སྐྱེ་བ་སྟེ། །དངོས་འཁྲུལ་ནམ་མཁའི་མེ་ཏོག་བཞིན། །
མཁའ་དང་འདྲ་བའི་ཆོས་ཡོད་ན། །གཞན་ནི་མཁའ་དང་འདྲ་བ་སྐྱེ། །བརྟེན་ནས་ཐམས་ཅས་མཁའ་དང་འདྲ། །དེ་ནས་སྲིད་པ་མེད་པ་ཅན། །ངོ་བོ་ཉིད་ཀྱིས་ལས་མེད་ཅིང་། །རྒྱུ་མེད་འབྲས་བུ་ཡོད་མ་ཡིན། །འདི་དག་ཐམས་ཅད་མེད་པ་སྟེ། །འཇིག་རྟེན་པ་མེད་འཇིག་པ་མེད། །མ་སྐྱེས་
པ་ཡི་དངོས་པོ་གང་། །ཇི་ལྟར་གཞན་ཞིག་སྐྱེད་པར་འགྱུར། །འཇིག་རྟེན་དང་པོར་མ་བྱུང་སྟེ། །འགའ་ཞིག་གིས་ཀྱང་སྤྲུལ་པ་མིན། །ཟླ་བ་སེང་གེའི་གྲོང་ཁྱེར་བཞིན། །འཇིག་རྟེན་དོན་མེད་གྱི་ན་འཁྱམས། །འཇིག་རྟེན་རྣམ་པར་རྟོག་ལས་འབྱུང་། །རྣམ་རྟོག་སེམས་ལས་ཡང་དག་
འབྱུང་། །སེམས་ནི་ལུས་ལ་བརྟེན་པ་སྟེ། །དེ་ཕྱིར་ལུས་ནི་རྣམ་དཔྱད་དོ། །གཟུགས་ནི་སྟོང་པ་ཚོར་བ་རང་བཞིན་མེད། །འདུ་ཤེས་མེད་དེ་འདུ་བྱེད་ཡོད་མ་ཡིན། །འབྱུང་བ་སྤངས་ནས་སེམས་དང་སེམས་བྱུང་མེད། །དེ་ཕྱིར་ལུས་ནི་རྟོག་བྲལ་ངོ་བོ་ཡིན། །སེམས་མེད་ཆོས་རྣམས་དེ་དག་
མེད། །ལུས་མེད་ཁམས་རྣམས་ཡོད་མ་ཡིན། །གཉིས་སུ་མེད་པའི་ལས་འདི་ནི། །དེ་ཉིད་རིག་པ་རྣམས་ཀྱིས་བསྟན། །འདི་དག་ཐམས་ཅད་དམིགས་མེད་པར། །གཉིས་སུ་མེད་པར་བསྟན་པ་ཡིན། །བློ་ནི་དམིགས་པ་མེད་བྱས་ནས། །དམིགས་པ་མེད་པར་འབྱུང་བར་འགྱུར། །སྦྱིན་དང་ཚུལ་ཁྲིམས་བཟོད་བརྩོན་
འགྲུས། །བསམ་གཏན་ལ་སོགས་བརྟེན་བྱས་ནས། །ཡུན་མི་རིང་བའི་དུས་ཀྱིས་ནི། །བྱང་ཆུབ་དམ་པ་ཐོབ་པར་འགྱུར། །ཐབས་དང་ཤེས་རབ་ལ་གནས་ཏེ། །སེམས་ཅན་རྣམས་ལ་བརྩེ་བར་བྱ། །མྱུར་བ་ཁོ་ནར་ཐམས་ཅད་མཁྱེན། །ཐོབ་པར་འགྱུར་བར་ཐེ་ཚོམ་མེད། །འདི་དག་ཐམས་

172-1-168a

ཅད་མིང་ཙམ་སྟེ། །འདུ་ཤེས་ཙམ་ལ་རབ་ཏུ་གནས། །རྗོད་པར་བྱེད་ལས་ཐ་དད་པའི། །བརྗོད་པར་བྱ་བ་ཡོད་མ་ཡིན། །ཆོས་རྣམས་ཐམས་ཅད་མིང་མེད་དེ། །བདག་མེད་པར་ཡང་ཡོངས་སུ་གསལ། །ཡང་དག་མིན་པའི་ཆོས་འདི་དག །རྣམ་པར་རྟོག་པས་ཀུན་ནས་བསླང་། །གང་
གིས་སྟོང་པ་ཞེས་བརྟགས་པའི། །རྟོག་པ་དེ་ཡང་འདིས་སྟོང་ངོ་། །མིག་གིས་གཟུགས་རྣམས་མཐོང་བར་ནི། །དེ་ཉིད་གསུངས་པས་གང་བཤད་པ། །ལོག་པར་ཞེན་པའི་འཇིག་རྟེན་ལ། །ཀུན་རྫོབ་བདེན་པར་བརྗོད་པ་ཡིན། །གང་དུ་ཚོགས་པར་མཐོང་བ་ནི། །འདྲེན་པས་སྟོན་པར་བྱེད་པ་ཡིན། །བློ་དང་
ལྡན་པས་དོན་དམ་གྱི། །ཉེ་བར་བརྟགས་པའི་ས་དེ་གསུངས། །མིག་གིས་གཟུགས་ནི་མི་མཐོང་སྟེ། །ཡིད་ཀྱིས་ཆོས་རྣམས་མི་རིག་གོ། །འཇིག་རྟེན་པ་ཡི་ཡུལ་མིན་གང་། །འདི་ནི་མཆོག་ཏུ་བདེན་པའོ། །མིག་མེད་གཟུགས་ཀྱང་ཡོད་མིན་ཞིང་། །སྣང་བ་ཡིད་ལ་བྱེད་པ་མེད། །སེམས་ནི་རྨི་ལམ་བཞིན་
དུ་འཁྲུལ། །ཐམས་ཅད་ཡོད་མིན་མེད་པའང་མིན། །སྲིད་པ་ལས་འདས་པའི་གཏམ་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།།      །།ཁ་ཆེའི་པཎྜི་ཏ་ཤྲཱི་ར་ཐ་དང་། ལོ་ཙཱ་བ་དགེ་སློང་གྲགས་འབྱོར་ཤེས་རབ་ཀྱིས་བསྒྱུར་བའོ།།      །། ༄༅༅། །རྒྱ་གར་སྐད་དུ། སཔྟ་གུ་
ཎ་པ་རི་བ་ད་ནཱ་ཀ་ཐཱ། བོད་སྐད་དུ། ཡོན་ཏན་བདུན་ཡོངས་སུ་བརྗོད་པའི་གཏམ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ལས་ནི་དུ་མ་ལ་བརྟེན་པའི། །སྣ་ཚོགས་ཡོན་ཏན་འདོད་པ་ཡིས། །འབད་བྱས་ས་བོན་མེད་པར་ནི། །མྱུ་གུ་སྐྱེ་བ་ཡོད་མ་ཡིན། །ཉེས་མེད་ཡོན་ཏན་བསྡུ་བ་ནི། །སྣ་ཚོགས་
པ་དག་རྣམ་བྱ་སྟེ། །ཉེས་པ་དག་ནི་གཅིག་པུ་ཡིས། །ཡོན་ཏན་མང་པོ་འཇོམས་པར་བྱེད། །ཚེ་རིང་དེ་བཞིན་ནད་མེད་དང་། །གཟུགས་དང་སྐལ་བ་བཟང་དང་རིགས། །ནོར་དང་ཤེས་རབ་དག་དང་བདུན། །ཡོན་ཏན་མདོ་སྡེ་དག་ལས་གསུངས། །དེ་ལས་བཟློག་པ་ཉེས་པ་ཡིན། །དེ་དག་རེ་རེས་ཇི་ལྟར་
ན། །ཡོན་ཏན་ཐམས་ཅད་འབྱུང་འགྱུར་བ། །དེ་ལྟར་ད་ནི་བཤད་པར་བྱ། །ནད་མེད་གཟུགས་དང་སྐལ་བ་བཟང་། །རིགས་ནོར་ཤེས་རབ་ཕུན་སུམ་ཚོགས། །ཚེ་རིང་བ་ནི་མེད་གྱུར་ན། །གསད་པར་ཕྱིན་པའི་རྒྱན་དང་འདྲ། །ཚེ་དང་གཟུགས་སོགས་ཡོན་ཏན་ནི། །འདི་དག་ནད་མེད་མི་ལྡན་ན། །

172-1-168b

དོན་མེད་པར་ནི་ཉམས་འགྱུར་ཏེ། །མ་ནིང་བུད་མེད་མཆོག་ཡོད་མཚུངས། །ཡོན་ཏན་ལྡན་པ་མཐོང་ན་ཡང་། །གཟུགས་ངན་སྐྱོ་བ་སྐྱེ་འགྱུར་ཏེ། །ཡོན་ཏན་ཕུན་ཚོགས་རྒྱས་པར་ནི། །རྒྱལ་པོའི་བཙུན་མོ་མཐོང་དང་མཚུངས། །སྔར་བཤད་ཡོན་ཏན་ཕུན་སུམ་ཚོགས། །སྐལ་བ་ངན་པས་
མདོངས་འཕྲོག་པ། །སྡང་བའི་གནས་སུ་གྱུར་པའི་ཕྱིར། །དྲང་སྲོང་བྲན་དང་མཚུངས་པར་འདོད། །ཡོན་ཏན་དཔལ་ལྡན་དྲི་མ་མེད། །རིགས་ངན་ལ་བརྟེན་མྱ་ངན་གཞི། །བྲམ་ཟེའི་ཆུང་མ་ཡོན་ཏན་ཅན། །རིགས་ངན་ལག་ན་གནས་དང་མཚུངས། །ཚེ་དང་ནད་མེད་ལ་སོགས་པ། །སྔར་བཤད་
ཡོན་ཏན་འདི་དག་ནི། །དབུལ་པོ་ལ་གནས་བཀུར་འོས་མིན། །དུར་ཁྲོད་གནས་ཀྱི་མི་དང་མཚུངས། །ཡོན་ཏན་ཇི་སྐད་བཤད་ཕུན་ཚོགས། །གླེན་པ་བདག་ཉིད་བརླག་དོན་འགྱུར། །འོད་མ་སྨྱུག་མའི་ཆུ་ཤིང་གི། །འབྲས་བུ་ཕུན་ཚོགས་ལྟ་བུ་ཡིན། །དེ་ལྟར་ཇི་སྐད་བཤད་ཡོན་ཏན། །ཡན་ལག་རེ་རེ་
མ་ཚང་ཉམས། །ཡི་གེ་གཅིག་ནི་མ་ཚང་བའི། །རིག་པ་འབྲས་བུ་མེད་འགྱུར་མཚུངས། །ཡོན་ཏན་ཡོངས་རྫོགས་མཛེས་པ་ནི། །ཡི་གེ་ཚང་པའི་རིག་པ་འདྲ། །སྦྱོར་བ་གྲུབ་ལས་འབྲས་བུ་འཐོབ། །མ་ཚང་མེད་པ་འབྱུང་བར་འགྱུར། །དེ་བས་ལེགས་མཛེས་རྫོགས་པ་ཡི། །ཡོན་ཏན་ལ་ནི་འབད་
པར་གྱིས། །འདི་དག་རྒྱུ་ནི་གང་ཡིན་པ། །མདོ་བཤད་པ་ལས་རྟོགས་པར་གྱིས། །གསོད་པར་ཆུད་པ་ལེགས་བཏང་དང་། །དེ་བཞིན་སྲོག་གིས་ཕན་བཏགས་ཤིང་། །སྲོག་ཆགས་འཚེ་བ་ལས་ལྡོག་པས། །ཚེ་རིང་པ་ནི་ཐོབ་པར་འགྱུར། །ནང་པའི་བསྙེན་བཀུར་བྱས་སྨན་པ། །སྨན་ནི་རབ་ཏུ་
བྱིན་པ་དང་། །སྲོག་ཆགས་བོང་བ་དབྱིག་སོགས་ཀྱིས། །འཚེ་བ་མེད་ལས་ནད་མེད་ཡིན། །ཁྲོ་བོ་མེད་ལ་བརྟེན་པ་དང་། །བརྒྱ་བྱིན་པས་ནི་གཟུགས་བཟང་ཉིད། །ཕྲག་དོག་མེད་པའི་འབྲས་བུ་ཉིད། །སྐལ་བ་བཟང་པོར་ཡོངས་སུ་བཤད། །དམ་པ་མཆོད་ཅིང་བསྙེན་བཀུར་བྱས། །ང་རྒྱལ་
སྤངས་པས་རིགས་མཐོར་འགྱུར། །སྦྱིན་བྱེད་རྐུ་བ་ལས་ལྡོག་པས། །ལོངས་སྤྱོད་ཕུན་སུམ་ཚོགས་ཐོབ་འགྱུར། །དགེ་དང་སྡིག་པ་གང་ཡིན་ཞེས། །ཡང་དག་དྲི་ལ་བཙོན་པ་དང་། །ཆོས་ཀྱི་བསྟན་བཅོས་བྱིན་པ་ཡིས། །བློ་གྲོས་རྒྱ་ཆེན་ཐོབ་པར་འགྱུར། །ཡོན་ཏན་བདུན་ཡོངས་སུ་

172-1-169a

བརྗོད་པའི་གཏམ། སློབ་དཔོན་དབྱིག་གཉེན་གྱིས་མཛད་པ་རྫོགས་སོ།།      །།རྒྱ་གར་གྱི་མཁན་པོ་པཎྜི་ཏ་གངྒཱ་ཏ་ར་དང་། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །།༄༅༅། །རྒྱ་གར་སྐད་དུ། ཤཱི་
ལ་པ་རི་ཀ་ཐཱ། བོད་སྐད་དུ། ཚུལ་ཁྲིམས་ཀྱི་གཏམ། དཀོན་མཆོག་གསུམ་ལ་ཕྱག་འཚལ་ལོ། །རྒྱ་མཚོ་དང་ནི་གླང་རྗེས་ཀྱི། །ཁྱད་པར་དག་ནི་གང་ཡིན་པ། །སྦྱིན་པ་དང་ནི་ཚུལ་ཁྲིམས་ཀྱི། །ཁྱད་པར་དག་ནི་དེ་ཡིན་ནོ། །གང་ཞིག་དད་པའི་སེམས་ཀྱིས་ནི། །ལོ་བརྒྱར་སྦྱིན་པ་བྱིན་པ་བས། །
གང་ཞིག་ཉིན་གཅིག་ཚུལ་ཁྲིམས་ནི། །བསྲུང་བ་དེ་ལས་ཁྱད་པར་འཕགས། །སྦྱིན་པ་ཤན་པ་རྣམས་དང་ནི། །རིགས་ངན་དག་ཀྱང་སྦྱིན་པར་བྱེད། །གང་ཡང་རུང་བས་ཚུལ་ཁྲིམས་ནི། །ཡོངས་སུ་བསྲུང་བར་མི་ནུས་སོ། །སྦྱིན་པ་རབ་ཏུ་འབྱོར་གྱུར་ཀྱང་། །དེ་ནི་སྦྱིན་བདག་ཆེན་པོ་མིན། །ཚུལ་
ཁྲིམས་རྣམ་པར་དག་པ་ཡིས། །སྦྱིན་བདག་ཆེན་པོ་ཡིན་པར་བཤད། །མགོ་བྲེགས་པའམ་གཙུག་ཕུད་ལྡན་པར་རྒྱུ། །ཚུལ་ཁྲིམས་ཆུ་ཡིས་རལ་པ་ཁྱབ་པར་འཆང་། །ཆ་ལུགས་སྣ་ཚོགས་དག་གིས་སྤྱོད་གྱུར་ཀྱང་། །གལ་ཏེ་ཚུལ་ཁྲིམས་མེད་ན་རྒྱུ་སྤྱོད་ཡིན། །གངྒཱ་བགྲོད་པ་ཆུ་བོ་ན་དར་སོང་
བའམ། །དབྱངས་ཅན་ཆུའམ་རྫིང་བུར་སོང་བའམ། །ནེ་ལེ་ཤར་ནི་སྟེན་པར་བྱེད་པ་ཡང་། །གལ་ཏེ་ཚུལ་ཁྲིམས་ཀྱིས་རྒུད་ལ་དོན་མེད། །ཇི་ལྟར་ཚུལ་ཁྲིམས་བླ་མེད་ལྡན་པའི་དྲི། །དམ་པ་མཐོ་རིས་འདི་ན་མི་ཟད་ལྡན། །དེ་ལྟར་ཕྲེང་བའི་དྲི་ནི་ཁྱབ་མིན་ཅིང་། །དེ་བཞིན་བྱུག་པའི་དྲི་ཡང་འབྱུང་མི་
འགྱུར། །འདི་ན་བདག་དགའ་གཞན་དུ་འགྲོ་བ་བདེ། །གྲགས་དང་དགའ་ཞིང་ཀུན་གྱིས་བཀུར་བ་སྟེ། །ཆོས་ལྡན་འབྲས་བུ་དེ་དེ་མང་པོ་མཐོང་། །ཚུལ་ཁྲིམས་འབྲས་བུ་དྲང་སྲོང་ཆེན་པོས་གསུངས། །ཚུལ་ཁྲིམས་ནད་ལ་སྨན་པའི་མཆོག་ཡིན་ཞིང་། །མུན་པའི་སྒྲོན་མ་ཉམ་ཐག་ལ་
སྐྱབས་དང་། །འཇིགས་ལ་སྲུངས་དང་ཕོངས་ལ་ཉེ་དུ་དང་། །འཆི་བའི་རྒྱ་མཚོ་མཐའ་མེད་གཟིངས་གྱུར་ཡིན། །གང་ཞིག་འདུལ་བའི་ཚུལ་ཁྲིམས་རྣམ་འཇིག་ཚེ། །སྐྲག་ཞུགས་ཚུལ་ཁྲིམས་ལྡན་པ་ཡོད་མ་ཡིན། །དེ་བས་འཇིག་རྟེན་གཞན་མཐའ་རྒལ་སེམས་ཀྱིས། །གང་ཞིག་འགྲོ་

172-1-169b

འདོད་དེས་ནི་ཚུལ་ཁྲིམས་སྲུངས། །ཚུལ་ཁྲིམས་དྲི་མེད་མ་ལུས་ཇི་བཞིན་གཞག །ཤེས་རབ་ཞི་བས་ཡིད་ནི་ཡོངས་སྨིན་འགྱུར། །དེ་བས་རྒ་ཤི་ནད་འཇིགས་རྣམ་ཐར་པ། །གང་ཞིག་ཐོབ་འདོད་དེས་ནི་ཚུལ་ཁྲིམས་སྲུངས། །ཚུལ་ཁྲིམས་ཀྱི་གཏམ་སློབ་དཔོན་དབྱིག་གཉེན་གྱིས་མཛད་
པ་རྫོགས་སོ།།      །།རྒྱ་གར་གྱི་མཁན་པོ་ཛ་རནྡྷ་ན་དང་། ཞུ་ཆེན་གྱི་ལོ་ཙཱ་བ་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།    །༄༅༅། །རྒྱ་གར་སྐད་དུ། ཤཱི་ལ་ཀ་ཐཱ་བྲྀ་ཏྟི། བོད་སྐད་དུ། ཚུལ་ཁྲིམས་ཀྱི་གཏམ་གྱི་འགྲེལ་པ། དཀོན་མཆོག་
གསུམ་ལ་ཕྱག་འཚལ་ལོ། །གང་ཞིག་བདུད་ལས་རྒྱལ་ཞིང་ཕ་རོལ་ཕྱིན་དྲུག་རྫོགས། །བརྩེ་བས་གཞན་དོན་མཛད་པ་དེ་ལ་ཕྱག་འཚལ་ལོ། །གཞན་དག་དྲང་བས་མིན་ལ་རང་ཉིད་དྲང་ཕྱིར་ནི། །དམ་པའི་རྗེས་སུ་འབྲངས་ལ་ཚུལ་ཁྲིམས་འདི་ཉིད་བཤད། །དེ་བཞིན་དུ་སྤྱིའི་དོན་ནི་ཕ་རོལ་ཏུ་ཕྱིན་
པའི་ནང་ནས་ཚུལ་ཁྲིམས་ནི་ས་གཞི་ལྟ་བུ་ཡིན་པར་དགོངས་ནས། དེ་ཉིད་སྦྱིན་པ་ལས་ཁྱད་པར་དུ་འཕགས་པར་བསྒྲུབ་པའི་ཕྱིར། དཔེའི་སྒོ་ནས་བསྟན་པ་ནི། རྒྱ་མཚོ་དང་ནི་གླང་རྗེས་ཀྱི། །ཁྱད་པར་དག་ནི་གང་ཡིན་པ། །སྦྱིན་པ་དང་ནི་ཚུལ་ཁྲིམས་ཀྱི། །ཁྱད་པར་དག་ནི་དེ་ཡིན་
ནོ། །ཞེས་བྱ་བ་འདིས་སྨོས་སོ། །ནི་ཞེས་བྱ་བ་ནི་ངེས་པར་གཟུང་བའོ། །དེ་ཞེས་བྱ་བ་ནི་འདས་མ་ཐག་པའོ། །ཡིན་ནོ་ཞེས་བྱ་བ་ནི་ངག་རྫོགས་པ་སྟེ་གོ་བར་ཟད་དོ། །དེ་ཉིད་ཚུལ་ཁྲིམས་ཀྱི་སྒོ་ནས་རྒྱས་པར་བསྟན་པའི་ཕྱིར། གང་ཞིག་ཅེས་བྱ་བ་ལ་སོགས་པ་སྨོས་སོ། །དེ་ཇི་ལྟར་མངོན་ཞེ་ན་
ལུང་དང་རིགས་པ་སྟེ། དེ་ལ་ལུང་ནི་ཟླ་བ་སྒྲོན་མ་ལས། བསྐལ་པ་བྱེ་བ་གངྒཱའི་བྱེ་སྙེད་དུ། །སངས་རྒྱས་དག་ནི་གངྒཱའི་བྱེ་སྙེད་ལ། །གདུགས་དང་བ་དན་མར་མེའི་ཕྲེང་བ་དང་། །ཟས་དང་སྐོམ་གྱིས་དད་སེམས་མཆོད་བྱས་པས། །གང་གིས་དམ་པའི་ཆོས་ནི་འཇིག་པའི་ཚེ། །དེ་བཞིན་གཤེགས་
པའི་བསྟན་པ་དགག་པ་ནི། །ཉིན་ཞིག་གཅིག་ཏུ་བསླབ་པ་གཅིག་བཟུང་ན། །དེ་བས་བསོད་ནམས་འདི་ནི་ཁྱད་པར་འཕགས། །ཞེས་འབྱུང་སྟེ། རྒྱས་པར་ནི་མདོ་ཉིད་ལ་བལྟ་བར་བྱའོ། །གཞན་ཡང་ཚུལ་ཁྲིམས་ཀྱི་འབྲས་བུ་ནི་མཐོ་རིས་ཡིན་ལ་སྦྱིན་པའི་འབྲས་བུ་ནི་འབྱོར་པ་ཡིན་       

172-1-170a

ཏེ། །རྒྱུ་དེ་ལོག་ན་ཅིག་ཤོས་དང་ལྡན་དུ་ཟིན་ཀྱང་ངན་སོང་གི་འགྲོ་བ་དག་ནི་བསོད་ནམས་བསགས་པའི་རྟེན་དུ་རུང་ངོ་སྙམ་དུ་བསམས་པ་ཡིན་ནོ། །གང་ཞིག་དད་བའི་སེམས་ཀྱིས་ནི། །ཞེས་བྱ་བ་ལ་གང་ཟག་གི་ཡིད་ཆེས་པ་ལ་སོགས་པའི་སྒོ་ནས་སོ། །ལོ་བརྒྱར་སྦྱིན་པ་བྱིན་པ་
བས། །ཞེས་བྱ་བ་ནི་མཚོན་པ་སྟེ། དུས་ཡུན་རིང་པོར་འབད་པ་བྱས་ཀྱང་ཞེས་བྱ་བའི་དོན་ཏོ། །གང་ཞིག་ཉིན་གཅིག་ཚུལ་ཁྲིམས་ནི། །ཞེས་བྱ་བ་ནི་ཚད་འཇོག་པ་སྟེ། དུས་མཉམ་པར་ནི་མ་ཡིན་ཏེ། ཐ་ན་ཉིན་གཅིག་ཙམ་ཞེས་ངེས་པར་བཟུང་བའོ། །བསྲུང་བ་དེ་ལས་ཁྱད་པར་
འཕགས། །ཞེས་བྱ་བ་ནི་བསྲུང་བའམ་འབད་པའམ་ཆེད་དུ་གཉེར་བསྟེ། དེ་གང་ལ་ཡོད་པ་དེ་ལ་དེ་སྐད་ཅེས་བྱའོ། །ད་ནི་དེ་ལས་ལྷག་པའམ་ཁྱད་པར་འཕགས་པ་སྟེ། མི་མཚུངས་པ་ཞེས་བྱ་བའི་ཐ་ཚིག་གོ། །གཞན་ཡང་སློབ་དཔོན་གྱིས་དེ་ཉིད་ཀྱི་རྒྱུ་མཚན་བསྟན་པའི་ཕྱིར་རོ། །སྦྱིན་
པ་ཤན་པ་རྣམས་དང་ནི། །ཞེས་བྱ་བ་ལ་སོགས་པ་སྨོས་ཏེ། རྣམས་ཞེས་བྱ་བའི་སྒྲ་ནི་དུ་མ་སྟེ། །ཤན་པ་དང་ཉ་པ་དང་ཚོང་པ་ལ་སོགས་པ་ཐམས་ཅད་ལ་བྱའོ། །རིགས་ངན་རྣམས་ཀྱང་སྟེར་བར་བྱེད། །ཅེས་བྱ་བ་ནི་འཇིག་རྟེན་ན་ཐ་ཆད་དུ་གྱུར་པ་གདོལ་བ་དེ་དག་ཚུལ་ཁྲིམས་ཀྱིས་དབེན་ལ་སྦྱིན་
པ་གཏོང་བར་བྱེད་དོ། །གང་ཡང་རུང་བས་ཚུལ་ཁྲིམས་ནི། །ཞེས་བྱ་བས་ནི་སྐྱེས་བུ་དམ་པ་སེམས་པ་ལུས་ངག་དུལ་བ་གཉེན་པོ་སྟོབས་དང་ལྡན་པ་དག་གིས་ཀྱང་སྟེ། གཞན་ལྟ་ཅི་སྨོས་ཞེས་བྱ་བའི་དོན་ཏོ། །ཡོངས་སུ་སྲུང་བར་མི་ནུས་སོ། །ཞེས་བྱ་བ་ལ་དེའི་ཕྱིར་ཚུལ་ཁྲིམས་ཁྱད་པར་དུ་
འཕགས་ཞེས་བྱ་བའི་ཐ་ཚིག་གི་ལྷག་མའོ། །ཇི་ལྟ་ཞེ་ན་སྐྱེས་བུ་དམ་པས་ཀྱང་ཚུལ་ཁྲིམས་རིན་པོ་ཆེ་དང་འདྲ་བར་དྲི་མས་དབེན་པ་རྡུལ་ཕྲ་མོ་དག་གིས་མ་གཙེས་པ་དེ་ལྟ་བུ་མ་བྱུང་བར་དུ་དཀའ་སྟེ། བར་ཆད་མང་བའི་ཕྱིར་དང་། སྙིགས་མའི་སེམས་ཅན་དག་གིས་ག་ལ་ནུས་སྙམ་དུ་
བསམས་པ་ཡིན་ནོ། །ཡོངས་སུའི་སྒྲ་ནི་ལུང་དུ་སྟེ་ཁྱབ་པའམ་ཆུབ་པར་བསྒྲུབ་པའི་མཐུ་མེད་དེ་ཞེས་བྱ་བའི་དོན་ཏོ། །རྒྱུ་མཚན་གཉིས་པ་བསྟན་པའི་ཕྱིར། སྦྱིན་པ་རབ་ཏུ་འབྱོར་གྱུར་ཀྱང་། །ཞེས་བྱ་བ་ལ་དོན་འདི་ཡིན་ཏེ། ད་ལྟ་སྦྱིན་པ་ལ་གནས་པའམ་དེའི་འབྲས་བུ་ལ་སྤྱོད་པ་སྟེ་ལྡན་

172-1-170b

ཞེས་བྱ་བའི་ཐ་ཚིག་གོ། །ཡང་ན་སྦྱིན་པས་ཞེས་གསུམ་པའི་སྒྲར་བལྟ་བར་བྱའོ། །དེ་ནི་སྦྱིན་བདག་ཆེན་པོ་མིན། །ཞེས་བྱ་བ་སྨོས་པ་ཡིན་ཏེ། ཚུལ་ཁྲིམས་ཀྱིས་ལུས་དག་པའི་ཕྱིར་རྟ་ཅང་ཤེས་ལ་སོགས་པ་དག་ཡིན་ནོ། །ཚུལ་ཁྲིམས་རྣམ་པར་དག་པ་ཡིས། །ཞེས་བྱ་བ་ནི་དེ་ལྟར་
ཚུལ་ཁྲིམས་ལ་གནས་པས་དེའི་འབྲས་བུ་ལ་སྤྱོད་པ་སྟེ། རྣམ་པར་དག་པ་དང་ལྡན་ཞེས་བྱ་བའི་ཐ་ཚིག་གོ། །སྦྱིན་བདག་ཆེན་པོ་ཡིན་པར་བཤད། །ཞེས་བྱ་བ་ནི་བདག་ཉིད་ཆེན་པོ་སྟེ། ཚུལ་ཁྲིམས་ཀྱིས་འཕངས་པའི་ཕྱིར་ལྷའི་དབང་པོ་ལ་སོགས་པ་བཞིན་ནོ། །གལ་ཏེ་འོ་ན་སྦྱིན་པ་དང་
ལྡན་པ་སྦྱིན་བདག་མ་ཡིན་ན། འོ་ན་མདོ་ལས་ཚུལ་ཁྲིམས་དང་མི་ལྡན་པ་ཡང་སྦྱིན་པའི་ས་ཅན་དེ་ལ་སྦྱིན་བདག་ཅེས་པ་ཇི་ལྟ་བུ་ཞེ་ན། དེ་ནི་སྦྱིན་བདག་ཙམ་ཡིན་ཡང་སྦྱིན་བདག་ཆེན་པོ་ནི་མ་ཡིན་ཏེ། ཕ་རོལ་ཏུ་ཕྱིན་པ་གཞན་གྱིས་མ་ཟིན་པའི་ཕྱིར་རོ་ཞེས་བྱ་བའི་དོན་ཏོ། །ཇི་ལྟར་སྦྱིན་
པ་དེ་མཆོག་ཡིན་ཡང་ཚུལ་ཁྲིམས་ལ་ལྟོས་ཤིང་དམན་པར་བསྟན་ནས། ད་ནི་ཚུལ་གཞན་གྱི་སྒོ་ནས་ཚུལ་ཁྲིམས་དེ་ཉིད་ཁྱད་པར་དུ་འཕགས་པ་བསྟན་པའི་ཕྱིར། མགོ་བོ་བྲེགས་པའམ་གཙུག་ཕུད་ལྡན་པར་རྒྱུ། །ཞེས་བྱ་བ་ལ་སོགས་པ་སྨོས་ཏེ། མགོ་བོ་བྲེགས་
པ་ནི་སྐྲ་བྲེགས་པའམ་ཞེས་བྱའོ། །གཙུག་ཕུད་ཅན་ནི་ཐོར་གཙུག་སྟེ་ཀུན་དུ་རྒྱུའི་རྟགས་ཡིན་ནོ། །དེ་ཉིད་ལྡན་པར་ཞེས་བྱ་བའི་སྒྲར་སྦྱར་ཏེ་དེས་རྒྱུ་ཞིང་གནས་པར་བྱེད་ཅེས་བྱ་བའི་ཐ་ཚིག་གོ། །ཚུལ་ཁྲིམས་ཆུ་ཡིས་རལ་པ་ཁྱབ་པར་འཆང་། །ཞེས་བྱ་བ་ནི་སྤྱོད་པའི་ཚུལ་གཞག་
པ་སྟེ། །ཚུལ་ཁྲིམས་ཀྱི་ཆེད་དུ་ཞེས་བྱའོ། །དེ་ཉིད་ཁྱབ་པའི་རལ་པའམ་རལ་པས་ཁྱབ་པ་སྟེ། དེ་འཆང་བ་གང་ཡིན་པ་དེ་ལ་དེ་སྐད་ཅེས་བྱའོ། །ཆ་ལུགས་སྣ་ཚོགས་དག་གིས་སྤྱོད་གྱུར་ཀྱང་། །ཞེས་བྱ་བ་ནི་ཆ་བྱད་དུ་མ་དག་གི་སྒོ་ནས་དཔའ་བ་བྱས་ཀྱང་ཞེས་ལྷག་མ་དང་ལྡན་
པར་སྟོན་པ་ཡིན་ནོ། །དེ་ལྟར་འབད་ན་དོན་དང་ལྡན་ནམ་སྙམ་དུ་བསམས་ན། གལ་ཏེ་ཚུལ་ཁྲིམས་མེད་ན་གཡོ་སྒྱུས་སྤྱོད། །ཅེས་སྨོས་ཏེ། གལ་ཏེ་རྟག་པའི་མཐའ་བཟུང་ནས་དེ་ཡང་ཚུལ་ཁྲིམས་མེད་ན་སྟེ། ཐོག་མ་ནས་མ་ཐོབ་པའམ། ཐོབ་ཀྱང་ཉམས་ཤིང་ཞིག་ནས་བདག་ཉིད་སླུ་བ་སྟེ་འབད་

172-1-171a

པ་འབྲས་བུ་མེད་ཅེས་བྱ་བའི་དོན་ཏོ། །དེ་ལྟར་ཅི་མངོན་ཞེ་ན། དགེ་སློང་ལ་རབ་ཏུ་གཅེས་པའི་མདོ་ལས། དཔེར་ན་སྡོང་པོ་བཟང་པོ་ལ། །ཡུན་རིངས་ཡལ་ག་འཁྲུངས་པ་བཞིན། །མི་དེ་རྟགས་ཙམ་ཡུན་རིངས་ན། །ཁ་ན་མ་ཐོ་རྟག་འཕེལ་དང་། །སྡིག་པའི་
ལས་རྣམས་འཕེལ་བར་བཤད། །ཅེས་འབྱུང་བའི་དོན་ནི་འདི་དག་ཡིན་ཏེ། རྒྱས་པར་ནི་མདོ་ཉིད་དུ་ལྟའོ། །དེ་ཙམ་དུ་ཟད་དམ་ཞེ་ན། ཚུལ་ཁྲིམས་ཉིད་ཁྱད་པར་དུ་འཕགས་པ་སྒྲུབ་པ་དེའི་འཐད་པ་གཉིས་པ་བསྟན་པའི་ཕྱིར། གངྒཱ་བགྲོད་པ་ཆུ་བོ་ན་དར་སོང་བའམ། །ཞེས་བྱ་བ་ལ་
སོགས་པ་སྨོས་ཏེ། འདི་དག་ནི་མཚོན་པ་ཙམ་སྟེ། དེས་ནི་འམ་ཞེས་བསུ་བ་མཛད། །དེ་བཞིན་དུ། དབྱངས་ཅན་ཆུའམ་རྫིང་བུར་སོང་བའམ། །ཞེས་བྱ་བ་ནི་དབྱངས་ཅན་གྱི་ཆུ་བོའམ་རྫིང་བུར་འཇུག་པ་ལ་སོགས་པ་དག །ནེ་ལེ་ཤ་ནི་སྟེན་པར་བྱེད་པ་ཡང་། །ཞེས་བྱ་བ་ནི་གང་ལ་ནེ་
ལེ་ཤ་ཡོད་པ་དེར་རོ། །ཡང་ཞེས་བྱ་བ་ནི་དེ་དག་ཀྱང་དེ་བཞིན་དུ་ཆུར་འཇུག་པ་དང་། མེར་འཇུག་པ་དང་། ཉི་མ་ལ་ལྟ་བ་དང་། ཟླ་བ་ལ་ལྟ་བ་དང་། གཡང་ལ་མཆོང་བ་དང་། གསལ་ཤིང་ལ་སོགས་པ་ལ་ཞོན་པ་འདི་དག་དོན་དང་བཅས་པ་ཡིན་ནམ་སྙམ་པ་ལ་གལ་ཏེ་ཚུལ་ཁྲིམས་ཀྱིས་
རྒུད་ལ་དོན་མེད་ཅེས་གསུངས་ཏེ་འབད་པ་འབྲས་བུ་མེད་ཅེས་བྱ་བར་སྙེགས་སོ། །དེས་ན་བག་ཆགས་ངན་པ་ལ་བདག་ཕྱིན་ཅི་ལོག་གི་དབང་གིས་ལམ་གོལ་པར་འཇུག་ཅིང་བདེ་བར་གཤེགས་པའི་བཀའ་ལ་ཡང་ཡིད་མི་ཆེས་ཤིང་ལམ་དྲང་པོ་ལ་འགྲོར་མི་བཏུབ་པའི་སྙིང་རྗེའི་གནས་ཡིན་ནོ། །
དེ་བས་ན་ཚུལ་ཁྲིམས་ཀྱི་ནོར་འདི་ནི་གྲུ་དང་འདྲ་བ་ལ་འཕགས་པའི་ནོར་གང་གི་ནོར་ལས་མཆོག་ཡིན་ལ་ཕ་རོལ་ཏུ་ཕྱིན་པ་དྲུག་གི་ནང་ན་ཡང་གཙོ་བོ་ཡིན་ཏེ། རིན་པོ་ཆེ་འདི་གསུམ་གྱིས་སངས་རྒྱས་རྣམས་ཀྱིས་བསྔགས་སོ་སྙམ་དུ་བསམས་པ་ཡིན་ནོ། །དེ་ལྟར་ཚུལ་ཁྲིམས་ཁྱད་པར་དུ་འཕགས་
པ་བསྒྲུབས་ཟིན་ནས། ད་ནི་འདིའི་ཡོན་ཏན་སྟོན་པ་དེ་ཉིད་དཔེའི་སྒོ་ནས་བསྟན་པའི་ཕྱིར། ཇི་ལྟར་ཚུལ་ཁྲིམས་བླ་མེད་ལྡན་པའི་དྲི། །ཞེས་བྱ་བ་ལ་སོགས་པ་སྨོས་ཏེ། ཇི་ལྟར་ཞེས་པ་ནི་དྲི་བ་བཀོད་པ་སྟེ། དེ་ལྟར་ཞེས་འོག་མ་དང་འབྲེལ་ལོ། །ཚུལ་ཁྲིམས་དེ་བསླབ་པ་ཡིན་པའི་

172-1-171b

ཕྱིར་རོ། །བླ་མེད་ལྡན་པའི་དྲི་ཞེས་བྱ་བ་ནི་གོང་ན་མེད་པ་དེ་ལྡན་པའམ་དེ་ལ་གནས་པའི་དྲི་ནི་དེའི་དྲི་སྟེ་རྗེད་པ་ཞེས་བྱ་བའི་དོན་ཏོ། །དམ་པ་མཐོ་རིས་འདི་ན་མི་ཟད་ལྡན། །ཞེས་བྱ་བ་ལ་དམ་པ་ནི་མཆོག་ཡིན་ལ་མཐོ་རིས་ནི་གནས་བཅུ་ལ་སོགས་པའོ། །དེ་ཉིད་ལ་བདེ་འགྲོ་ཞེས་ཀྱང་བྱ་སྟེ། དེའི་
གནས་སམ་རྟེན་འདི་ནི་ཚུལ་ཁྲིམས་ཀྱི་དྲི་མི་ཟད་པ་སྟེ། དྲག་ཅིང་མུ་མེད་པར་སྨིན་ཞེས་བྱ་བའི་ཐ་ཚིག་གོ། །དེ་ལྟར་ཕྲེང་བའི་དྲི་ནི་ཁྱབ་མིན་ཞིང་། །ཞེས་བྱ་བ་ནི་སྡོམ་བརྩོན་གྱི་དྲི་དེ་ལྟར་མེ་ཏོག་ཕྲེང་བ་ལ་སོགས་པའི་དྲིས་ནི་ཁྱབ་མི་ནུས་ཏེ། དམན་ཞིང་མཐུ་མེད་པའི་ཕྱིར་རོ། །འོ་ན་སྨན་སྣ་
ཚོགས་ཀྱི་སྦྱོར་བའི་བྱུག་པ་དག་གིས་ནུས་སམ་ཞེ་ན། དེ་བཞིན་བྱུག་པའི་དྲི་ཡང་ཁྱབ་མི་འགྱུར། །ཞེས་བྱ་བ་སྨོས་ཏེ། ཚུལ་ཁྲིམས་ཀྱི་འཁོར་ལོ་སྐྱེ་བ་དུ་མར་མཐོ་རིས་ཀྱི་སྐས་ལ་རྒྱུ་བ་བཞིན་དུ། བྱུག་པ་དང་དཔག་བསམ་གྱི་ཤིང་ལ་སོགས་པའི་དྲིས་ནི་ག་ལ་ནུས་ཞེས་བྱ་བའི་དོན་
ཡིན་ནོ། །དེ་ལྟར་ཡོན་ཏན་བསྟན་ནས་དེའི་འབྲས་བུ་བསྟན་པའི་ཕྱིར་སློབ་དཔོན་གྱིས། འདི་ན་བདག་དགའ་གཞན་དུ་འགྲོ་བ་བདེ། །ཞེས་བྱ་བ་ལ་སོགས་པ་སྨོས་ཏེ། འདི་ན་ཞེས་བྱ་བ་ནི་སྡོམ་བརྩོན་གྱི་གཞི་འདི་ནའོ། །བདག་དགའ་ཞེས་བྱ་བ་ནི་མཚོན་པ་སྟེ། གང་ཟག་ལ་ལ་དག་གོ། །
གཞན་དུ་འགྲོ་བ་བདེ་ཞེས་བྱ་བ་ནི་གནས་གཞན་དུ་སྟེ། འཇིག་རྟེན་ཕ་རོལ་ལ་སོགས་པར་འགྲོ་བ་ན་སེམས་བདེ་བར་འགྲོ་བ་སྟེ་དེ་ཉིད་རྒྱས་པར་མདོ་དག་ལས་བལྟ་བར་བྱའོ། །གྲགས་དང་དགའ་ཉིད་ཀུན་གྱིས་བཀུར་བ་སྟེ། །ཞེས་བྱ་བ་ལ་གྲགས་པ་དེ་ནི་འཇིག་རྟེན་དུ་གྲགས་པའོ། །དགའ་
བ་ནི་བདག་ཉིད་དགའ་བ་སྟེ། ཚུལ་ཁྲིམས་ཀྱི་དབང་གིས་ནི་སྙིང་པོར་མཐོང་ཞེས་བྱ་བ་སྨོས་ཏེ། ཆོས་ལྡན་ཞེས་བྱ་བ་ནི་ཁྲིམས་ལྡན་ཅན་ཡིན་པའི་ཕྱིར་རོ། །ཀུན་གྱིས་བཀུར་བ་སྟེ་ཞེས་བྱ་བ་ནི་གང་ཟག་དེ་ལ་སེམས་ཅན་མང་པོ་དག་གིས་བཀུར་ཞིང་རིམ་གྲོ་བྱེད་པའོ། །དེ་བཞིན་
དུ་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཀྱང་དགོངས་པར་འགྱུར་ཏེ། དེ་སྐད་དུ་སློབ་དཔོན་ཙནྡྲ་གོ་མིས། དེ་ཚེ་དེ་ལ་དགེ་བའི་ཕྱིར། །རྒྱལ་བ་སྲས་དང་བཅས་རྣམས་ཀྱིས། །དགེ་བའི་ཐུགས་ཀྱིས་རྟག་པར་ཡང་། །བུ་སྡུག་འདྲ་བར་དགོངས་པར་འགྱུར། །ཞེས་གསུངས་

172-1-172a

པ་འདི་ཉིད་ཡིན་ཏེ། དེ་ཙམ་དུ་ཟད་དམ་ཞེ་ན། ཆོས་ལྡན་འབྲས་བུ་དེ་དེ་མང་པོར་མཐོང་། །ཞེས་བྱ་བ་སྨོས་ཏེ། ཆོས་ལྡན་ཞེས་བྱ་བ་ནི་ཁྲིམས་ལྡན་ནོ། །འབྲས་བུ་ནི་འབྲས་བུ་སྟེ་འདོད་པའི་དོན་ཡིན་པའི་ཕྱིར་རོ། །དེ་དེ་མང་པོར་མཐོང་ཞེས་བྱ་བ་ནི་དེ་དང་དེ་
དག་སྟེ། གཞན་དཔག་ཏུ་མེད་དོ་ཞེས་བྱ་བའི་དོན་ཏོ། །ཇི་ལྟར་ཞེ་ན། ཚུལ་ཁྲིམས་འབྲས་བུ་དྲང་སྲོང་ཆེན་པོས་གསུངས། །ཞེས་བྱ་བ་སྟོན་ཏེ་དེའི་འབྲས་བུ་ནི་ལྷག་པར་ཡང་དྲང་སྲོང་ཆེན་པོས་གསུངས་ཏེ། དེ་ནི་ཆེ་བའི་བདག་ཉིད་ཡིན་པའི་ཕྱིར་རོ། །དེ་ནས་དེ་ཉིད་རྒྱས་པར་ནི་སྡང་བ་
དོར་ཞིང་གུས་པ་སྐྱེས་པས་བསྟན་བཅོས་དང་མདོ་སྡེ་ལ་བལྟ་བར་བྱའོ། །ད་ནི་འབྲས་བུ་དེ་ཉིད་གཉེན་པོའམ་དཔེ་རྣམ་པ་དྲུག་གི་སྒོ་ནས་བསྟན་པའི་ཕྱིར། ཚུལ་ཁྲིམས་ནད་ལ་སྨན་པའི་མཆོག་ཡིན་ཞིང་། །ཞེས་བྱ་བ་སྨོས་ཏེ། དཔེར་ན་ཤིན་ཏུ་ཡུན་རིངས་ནད་ཀྱིས་གདུངས་པ་དེ་དག་ལ་
སྨན་པ་མཁས་པ་དག་གིས་ནད་ཀྱི་རྒྱུ་ལས་ཕྱེ་ནས་སྨན་བཟང་པོ་དག་གིས་སྦྱོར་བ་བཞིན་དུ། ངན་འགྲོ་སྡུག་བསྔལ་ནད་དང་འདྲ་བ་དུ་མ་དག་གིས་གཟིར་བ་དེ་དག་ལ་ཚུལ་ཁྲིམས་ནི་སྨན་པའི་མཆོག་ཡིན་ཏེ། ནད་དེ་དག་ལས་ཐར་པར་བྱེད་པའོ། །མུན་པའི་སྒྲོན་མ་ཉམ་ཐག་ལ་སྐྱབས་དང་། །ཞེས་བྱ་བ་
ལ་གཞན་ཡང་མུན་པའི་ཚོགས་ཤིན་ཏུ་ཆེན་པོ་དག་ལ་མར་མེ་ལ་སོགས་པ་ཆུང་ངུ་དག་གིས་དེ་དག་ཐམས་ཅད་སེལ་བ་དེ་བཞིན་དུ་མ་རིག་པའི་མུན་པའི་ཚོགས་དཔག་ཏུ་མེད་པ་དག་ལ་ཚུལ་ཁྲིམས་ཀྱིས་དངོས་སམ་བརྒྱུད་པའི་སྒོ་ནས་སྒྲོན་མའི་མཆོག་ཡིན་ནོ། །དེ་བཞིན་དུ་སྡུག་བསྔལ་སྣ་ཚོགས་ཀྱིས་ཉམ་ཐག་
པ་དེ་དག་ལ་ཚུལ་ཁྲིམས་ནི་སྐྱབས་ཀྱི་མཆོག་ཡིན་ནོ་ཞེས་བྱ་བའི་དོན་ཏེ། འཇིགས་ལ་བསྲུང་དང་ཕོངས་ལ་ཉེ་དུ་དང་། ཞེས་བྱ་བ་ལ་མི་དང་མི་མ་ཡིན་པས་འཇིགས་པ་བསྲུང་བའི་མཆོག་ཡིན་ཞིང་ཕོངས་ཤིང་རྒུད་པ་ལ་ཉེ་དུ་ལ་སོགས་པ་ལྟ་བུ་སྟེ། ཚུལ་ཁྲིམས་ཞེས་སྦྱར་རོ། །འཆི་
བའི་རྒྱ་མཚོ་མཐའ་མེད་གཟིགས་གྱུར་ཡིན། །ཞེས་བྱ་བ་ནི་དཔེར་ན་རྒྱ་མཚོ་ལས་འགྲོ་བ་ན་གཟིངས་ལ་བརྟེན་ནས་འགྲོ་བ་བཞིན་དུ་ཚུལ་ཁྲིམས་ནི་འཁོར་བའི་རྒྱ་མཚོ་ཆེན་པོ་ལ་གཟིངས་དང་འདྲ་བའོ། །དེ་དག་ལ་སོགས་པ་ཕན་ཡོན་དཔག་ཏུ་མེད་པ་མདོ་ལས་བཤད་དེ། ཚུལ་ཁྲིམས་ 

172-1-172b

ཡང་དག་པའི་མདོ་ལས། དེ་ཕྱིར་སྟོན་པས་ཚུལ་ཁྲིམས་རབ་བསྔགས་བཤད། །ཚུལ་ཁྲིམས་ལྡན་པ་སངས་རྒྱས་འབྱུང་དང་ཕྲད། །ཚུལ་ཁྲིམས་ལྡན་པ་རྒྱན་རྣམས་ཀུན་གྱི་མཆོག །ཚུལ་ཁྲིམས་ལྡན་པ་དྲི་དང་བྱུག་པ་ཡིན། །ཞེས་འབྱུང་སྟེ་རྒྱས་པར་ནི་མདོ་ཉིད་ལ་བལྟའོ། །
དེ་ལྟར་ཚུལ་ཁྲིམས་རྣམ་པར་དག་པས་སེམས་ལ་འགྱོད་པ་མེད། སེམས་ལ་འགྱོད་པ་མེད་པས་སེམས་དབེན་ཞིང་ཏིང་ངེ་འཛིན་ལས་སུ་རུང་སྟེ། དེ་བས་ན་རིན་པོ་ཆེ་དང་འདྲ་བ་འདི་ནི་ལམ་གྱི་མཆོག་ཡིན་ནོ་སྙམ་དུ་བསམས་པ་ཡིན་ནོ། །ད་ནི་འབྲས་བུའི་སྒོ་ནས་གང་ཟག་གི་ཁྱད་པར་
བསྟན་པའི་ཕྱིར། གང་ཞིག་འདུལ་བའི་ཚུལ་ཁྲིམས་རྣམ་འཇིག་ཚེ། །སྐྲག་ཞུགས་ཚུལ་ཁྲིམས་ལྡན་པ་ཡོད་མ་ཡིན། །ཞེས་བྱ་བ་སྨོས་ཏེ་གང་ཞིག་ཅེས་བྱ་བ་ནི་གང་ཟག་གོ། །འདུལ་བའི་ཚུལ་ཁྲིམས་ཞེས་བྱ་བ་ནི་འདུལ་བ་ལས་གསུངས་པའི་ཚུལ་ཁྲིམས་སོ། །རྣམ་འཇིག་ཚེ་ཞེས་པ་ནི་
བཏང་བའི་ཚེ་སྟེ་མེད་པར་འགྱུར་ཞེས་བྱ་བའི་དོན་ཏོ། །སྐྲག་ཞུགས་ཞེས་བྱ་བ་ནི་དེའི་དབང་གིས་ཏེ་འཇིགས་པའོ། །ཚུལ་ཁྲིམས་ལྡན་པ་ཞེས་པ་མ་ཉམས་པ་སྟེ། གང་ལ་ཡོད་པ་དེ་ལ་དེ་སྐད་ཅེས་བྱའོ། །ཡོད་མ་ཡིན་ཞེས་བྱ་བ་ནི་འཇིགས་པའམ་བག་ཁུམས་པ་མེད་པ་ཡིན་ཏེ། ཚུལ་ཁྲིམས་
དེའི་དབང་གིས་བདག་ཉིད་དགའ་བར་མ་བཤད་ན་འཇིགས་པ་ལྟ་ག་ལ་སྲིད་ཅེས་བྱ་བའི་དོན་ཏོ། །དེ་ལྟར་འབྲས་བུ་བཤད་ཟིན་ནས་དེ་ཉིད་བསྲུང་བར་གདམས་པར་འདོད་ནས། །དེ་བས་འཇིག་རྟེན་གཞན་མཐའ་རྒལ་སེམས་ཀྱིས། །གང་ཞིག་བགྲོད་འདོད་དེས་ནི་ཚུལ་ཁྲིམས་བསྲུང་། །ཞེས་
སྨོས་ཏེ་དེ་བས་ཞེས་བྱ་བ་ནི་དེ་བས་ནའོ། །འཇིག་རྟེན་གཞན་མཐའ་ཞེས་བྱ་བ་མཐའ་གཞན་ཏེ། དེ་དག་ཀྱང་སྡུག་བསྔལ་གྱི་གཞི་ཡིན་པའི་ཕྱིར་རོ། །རྒལ་སེམས་ཀྱིས་ཞེས་བྱ་བ་ནི་དེ་ལས་འདའ་བར་འདོད་པ་སྟེ། གོ་ཆ་བགོས་ནས་ཞེས་བྱ་བའི་དོན་ཏོ། །གང་ཞིག་ཅེས་བྱ་བ་ནི་གང་ཟག་སྟེ་སྐྱེས་
བུའོ། །བགྲོད་འདོད་དེས་ཞེས་བྱ་བ་ནི་འགྲོ་བར་འདོད་པ་དེས་སོ། །ནི་ཞེས་བྱ་བའི་སྒྲ་ནི་ངེས་པར་གཟུང་བ་སྟེ་གང་ཞེ་ན་ཚུལ་ཁྲིམས་ཏེ། དེ་གནས་པའི་ཆེད་དུ་སྲུངས་ཤིག་ཅེས་བརྩེ་བའི་ཚུལ་གྱིས་བསྒོ་བར་མཛད་དོ། །ད་ནི་ཚུལ་ཁྲིམས་དེ་ཉིད་བྱེ་བྲག་ཏུ་བསྟན་པ་དང་། ཞར་ལ་ཤེས་

172-1-173a

རབ་ཀྱི་འབྲས་བུའི་སྒོ་ནས་གདམས་པ་ནི། ཚུལ་ཁྲིམས་དྲི་མེད་མ་ལུས་ཇི་བཞིན་གཞག །ཤེས་རབ་ཞི་བས་ཡིད་ནི་ཡོངས་སྨིན་འགྱུར། །ཞེས་བྱ་བ་སྨོས་ཏེ། ཐམས་ཅད་ཡིན་ནམ་ཞེ་ན། ཚུལ་ཁྲིམས་དྲི་མེད་ཅེས་བྱ་བ་ནི་རིགས་བདུན་ལ་སོགས་པ་སེམས་པ་ངོ་བོ་སྤོང་བ་
བདུན་འཁོར་དང་བཅས་པ་དེ་ཉིད་སྲུང་ཞིང་དག་པའོ། །མ་ལུས་པ་ནི་ལུས་པ་མེད་པ་སྟེ། ལྟུང་བ་ཕྲ་མོ་ཙམ་ལ་འཛེམ་པའི་ཕྱིར་རོ། །ཇི་བཞིན་གཞག་ཅེས་བྱ་བ་ནི་ཇི་སྐད་བཤད་པ་བཞིན་དུ་གཞག་ཅིང་གདམས་པའོ། །ཚུལ་ཁྲིམས་ཁོ་ནར་ཟད་དམ་ཅེ་ན། ཤེས་རབ་ཞི་ཞེས་བྱ་བ་སྨོས་ཏེ།
ཤེས་རབ་ཞི་བ་ནི་ཞི་གནས་དང་ལྷག་མཐོང་ཡིན་ནོ། །ཡིད་ཅེས་བྱ་བ་ནི་ཡིད་ཀྱི་རྣམ་པར་ཤེས་པ་སྟེ། ཆོས་མངོན་པ་ལས་རབ་ཏུ་གྲགས་པའི་ཕྱིར་རོ། །ཡོངས་སུ་སྨིན་འགྱུར་ཞེས་བྱ་བ་ནི་ལས་སུ་རུང་བ་སྟེ་ཁྱད་པར་ཅན་ནོ། །འདི་དག་ཀྱང་མཚོན་པ་སྟེ་དེ་བཞིན་དུ་གཞན་དུ་ཡང་ཡིན་ནོ། །ཇི་སྐད་དུ་སློབ་དཔོན་
ཤཱན་ཏ་དེ་བས། བཟོད་བྱ་ཐོས་པ་བཙལ་བར་བྱ། །དེ་ནས་གནས་ལུགས་གནས་པར་བྱ། །འདི་དག་ལེགས་པར་བཤད་པ་ཡིན་ནོ། །ད་ནི་དེ་དག་ཚུལ་ཁྲིམས་ལ་རག་ལུས་པས་མཇུག་བསྡུ་བའི་ཚུལ་གྱིས་བསྟན་པ་ནི། དེ་བས་རྒ་ཤི་ནད་འཇིགས་རྣམ་ཐར་པ། །གང་ཞིག་ཐོབ་འདོད་དེས་ནི་ཚུལ་ཁྲིམས་
སྲུངས། །ཞེས་བྱ་བ་སྨོས་ཏེ། དེ་བས་ཞེས་བྱ་བ་ནི་དེ་བས་ནའོ། །རྒ་འཆི་ནད་འཇིགས་ཞེས་བྱ་བ་ནི་མ་རིག་པ་ལ་སོགས་པ་སྟེ། རྟེན་འབྲེལ་ཡན་ལག་བཅུ་གཉིས་སྲིད་པ་ལེན་པའི་ཚུལ་ལོ། །རྣམ་ཐར་ཞེས་བྱ་བ་ནི་དེ་ལས་ལྡོག་སྟེ་སྤོང་བར་བྱེད་ཅེས་པའི་ཐ་ཚིག་གོ། །གང་ཞིག་ཅེས་བྱ་བ་ནི་སྔ་མ་བཞིན་
ནོ། །ཐོས་འདོད་ཞེས་བྱ་བ་ནི་དོན་དུ་གཉེར་ཏེ། བཟོད་པ་ཅན་གྱི་སྐྱེས་བུ་ཐབས་ལ་མཁས་པ་དེས་སོ། །ཇི་སྟེ་ངེས་པ་ཁོ་ནར་ཚུལ་ཁྲིམས་སྲུངས་ཏེ། དེ་བས་ནི་ཞེས་བྱ་བའི་སྒྲ་སྨོས་ཏེ། དོན་དག་བསྟན་པ་ཡིན་ནོ་སྙམ་དུ་བསམས་པ་ཡིན་ནོ། །བདག་འདྲ་མཁས་པའི་དོན་ལ་མཁས་པར་བསམ་
པར་མི་ནུས་ཀྱང་། །ཅུང་ཟད་དམན་ལ་ཕན་ཕྱིར་འཕགས་པའི་རྗེས་འབྲངས་ཏེ། །ལོ་བརྒྱ་བརྩེ་བ་ཅན་གྱི་གཏམ་ལ་རྣམ་བཤད་པས། །ཉེས་པ་མང་ཡོད་མཁས་པ་རྣམས་ལ་བཟོད་པར་གསོལ། །འདི་ལ་བསོད་ནམས་ཅུང་ཟད་བདག་གིས་བསྐྲུན་དེས་ནི། །འགྲོ་བ་རྒྱལ་བ་ཐོབ་ནས་

172-1-173b

དེ་བཞིན་གཞན་དག་ཀྱང་། །མྱུར་དུ་དབང་ཕྱུག་ཐོབ་ནས་ས་ལ་གནས་པ་དང་། །ཕ་རོལ་ཕྱིན་དྲུག་ཐོབ་ནས་འགྲོ་བའི་དོན་བྱེད་ཤོག །ཚུལ་ཁྲིམས་ཀྱི་གཏམ་གྱི་འགྲེལ་པ་སློབ་དཔོན་གསལ་གྲགས་ཀྱིས་མཛད་པ་རྫོགས་སོ།།      །། ༄༅༅། །རྒྱ་གར་སྐད་དུ། སཾ་བྷཱ་ར་པ་
རི་ཀ་ཐཱ། བོད་སྐད་དུ། ཚོགས་ཀྱི་གཏམ། གསུང་གི་མངའ་བདག་འཇམ་པའི་དབྱངས་ལ་ཕྱག་འཚལ་ལོ། །བདག་གིས་དེ་རིང་བསོད་ནམས་དང་། །ཡེ་ཤེས་ཚོགས་ནི་གང་ཞིག་གམ། །གཞན་ལ་ཕན་པ་གང་བྱ་ཞེས། བྱང་ཆུབ་སེམས་དཔའ་ཡང་ཡང་བསམ། །བསོད་ནམས་རང་བཞིན་
ཡེ་ཤེས་ཆེ། །ཚོགས་ནི་གང་གིས་རྫོགས་འགྱུར་དང་། །ཇི་ལྟར་གཞན་ཕན་བྱེད་འགྱུར་བ། །དེ་ནི་ལེགས་པར་བཤད་པར་བྱ། །གང་གིས་ལུས་དང་སྲོག་དག་ནི། །སེམས་ཅན་ཀུན་ལ་གཏང་བར་བྱ། །ལུས་ཅན་ཀུན་ལ་བྱམས་པ་དང་། །སྙིང་རྗེ་ཉིད་ཀྱིས་ཁྱབ་པར་བྱ། །སྡིག་པ་ཀུན་
གྱི་རྣམ་སྨིན་ནི། །རང་གི་རྒྱུད་ལ་མངོན་འདོད་ཅང་། །བསོད་ནམས་ཀུན་ལ་ཡི་རང་དང་། །སངས་རྒྱས་བདག་ཉིད་ཆེ་ལ་བསམ། །དེ་ལྟར་ཡང་དང་ཡང་བྱ་བ། །འདི་ནི་ཆོ་ག་གཞན་ཡིན་ནོ། །བྱང་ཆུབ་སེམས་ནི་སྔོན་འགྲོ་བས། །རྩོམ་པ་ཀུན་ཀྱང་བྱ་བ་ཡིན། །དེ་ལྟ་བུ་ཡི་ཐབས་དེ་
ཡིས། །རྩོམ་པའི་ངལ་བ་མེད་པར་ཡང་། །བསོད་ནམས་ཡེ་ཤེས་ཚད་མེད་པ། །ཡང་དང་ཡང་དུ་སོགས་པར་འགྱུར། །སེམས་ཅན་རྣམས་ཀྱི་ལོངས་སྤྱོད་དང་། །ཡོངས་སུ་བསྐྱབ་པའི་ཕྱིར་དང་ནི། །རང་གི་ལུས་དང་སྲོག་ཉིད་ནི། །ཡིད་ཀྱི་རྗེས་བཞིན་གཏང་བར་བྱ། །
བཀྲེས་སྐོམ་ངལ་དང་ཚ་གྲང་དང་། །རླུང་དང་ཆར་གྱི་གཉེན་པོ་བཞིན། །མཆོག་མཆོད་པ་ལས་བདག་ཉིད་ནི། །འདི་ནི་བདེ་མྱོང་གང་ཡིན་དང་། །ཉམས་དགའ་ཁང་བཟངས་གཞིར་གནས་དང་། །གཙང་ཞིང་ཞི་བའི་གནས་གཏོགས་དང་། །བདེ་བ་ཐོབ་པ་གང་ཡིན་དང་། །བསམ་གཏན་བདེ་བ་
ཐོབ་པ་ཡིས། །བདེ་བའི་གནས་སྐབས་ཐོབ་གང་དང་། །སངས་རྒྱས་བྱང་ཆུབ་སེམས་དཔའ་དང་། །དགྲ་བཅོམ་ཤིན་ཏུ་སྦྱངས་ཞི་ཉིད། །དེ་ནི་སེམས་ཅན་ཐམས་ཅད་ལ། །བྱེ་བྲག་མེད་པར་ཉེ་བར་བསྟབས། །ཕལ་ཆེར་མཉམ་པར་མ་བཞག་ཚེ། །དེ་ལྟར་བྱམས་པ་ཉེར་བསྟེན་ལ། །

172-1-174a

མཉམ་པར་གཞག་ཚེ་བདག་གིས་རྟོགས། །དགའ་དང་ཤིན་ཏུ་སྦྱངས་པ་ཉིད། །ཉི་ལྟར་ཉམས་སུ་མྱོང་བ་དག །དེ་བཞིན་གཞན་ལ་ལྷག་མོས་བྱས། །སྐྱེ་དགུ་འདི་ནི་སྡུག་བསྔལ་གྱི། །ཆུ་བོར་ནུབ་དང་དེ་རྒྱུ་ཅན། །ངན་འགྲོ་དང་ནི་བདེ་འགྲོ་དག །བརྩེ་ལ་འབད་
པས་བརྟག་པར་བྱ། །དེ་ལས་ཀྱང་ནི་དམྱལ་བ་དག །སྡུག་བསྔལ་མི་བཟད་མང་པོ་དང་། །དུས་རིང་རྒྱུ་མི་འཆད་པ་ཡི། །གཅད་གཤེག་མེ་ཡིས་གདུངས་པ་དང་། །འཚེད་ཅིང་བཏགས་པ་ལས་བྱུང་བའི། །ཤིན་ནུ་ཉམ་ཐས་རབ་ཏུ་འཕེལ། །ཐལ་ཆུ་ལྟ་བུར་རབ་འཚེད་པའི། །
བསྲེག་ཅིང་ཚ་རིམས་འདྲ་ཉམ་ཐག །དུད་འགྲོ་ཕན་ཚུན་སྡང་དང་སྲོག །རང་དབང་མེད་པར་གསད་སོགས་ཀྱིས། །རྟག་ཏུ་སྡུག་བསྔལ་གྱིས་གདུངས་པས། །ཕལ་ཆེར་དམྱལ་བ་དག་དང་མཚུངས། །ཡི་དགས་མེ་ལྕེའི་ཕྲེང་བ་ཡིས། །བསྐོར་ཞིང་སྐད་གསང་མཐོན་པོར་སྒྲོགས། །ལ་
ལ་ཁ་ན་མེ་འབར་གཞན། །མགྲིན་པ་ཁབ་མིག་ལྟོ་རི་ཙམ། །རྟག་ཏུ་བཀྲེས་སྐོམ་ལ་སོགས་པས། །བསྲེག་ཅིང་ལུས་ནི་སྐམས་པ་དང་། །ཁ་ཅིག་སྐྱུག་པ་ཟ་བ་དང་། །གཞན་དག་དེ་ཡང་རབ་རྙེད་དཀའ། །ངན་འགྲོའི་སྡུག་བསྔལ་མ་ལུས་པ། །མི་རྣམས་ལ་ཡང་ཡོད་པར་སྣང་། །སྡུག་
བསྔལ་གཟིར་བ་དམྱལ་བ་མཚུངས། །དབུལ་བས་གཤིན་རྗེའི་འཇིག་རྟེན་པ། །འདི་ཡི་དུད་འགྲོའི་སྡུག་བསྔལ་ཡང་། །མཐུ་ལྡན་སྟོབས་ཀྱིས་མཐུ་མེད་པ། །རྣམ་པར་གནོན་ཅིང་འཚེ་བ་དག །ཆུ་བོ་ལྟ་བུ་ཉིད་ཡིན་ནོ། །ཁ་ཅིག་དབུལ་བ་ལས་
གྱུར་དང་། །གཞན་དག་ཆོག་མི་ཤེས་ལས་བྱུང་། །ཡོངས་ཚོལ་སྡུག་བསྔལ་མི་བཟད་དང་། །ཐམས་ཅད་འཁུ་ཞིང་གསོད་པ་ཡིན། །འདོད་སྤྱོད་ལྷ་ནི་གང་ཡིན་པ། །དེ་ལའང་བདེ་བའི་སེམས་མེད་དེ། །འདོད་པའི་འདོད་ཆགས་རིམས་བཏབ་པའི། །ནང་གི་མེ་ཡིས་བསྲེགས་འགྱུར་
ལས། །གང་ཞིག་སེམས་གཡེང་གྱུར་པ་དག །དེ་ལ་བདེ་བ་ག་ལ་ཡོད། །གཡེངས་མེད་སེམས་ལ་སྐད་ཅིག་ཀྱང་། །དབང་མེད་པ་ནི་མ་ཡིན་པས། །རྣམ་གཡེང་དཀྲུགས་པའི་བདག་ཉིད་ཅན། །ནམ་ཡང་ཞི་བར་མི་འགྱུར་ཏེ། །རླུང་བཅས་འབར་བས་ཁྱབ་པ་ཡིས། །མེ་ནི་ཤིང་

172-1-174b

དང་བཅས་དང་མཚུངས། །ཤིན་ཏུ་ངོམས་མེད་ཐ་མར་ནི། །དབང་མེད་ཤིན་ཏུ་མྱ་ངན་བྱེད། །ལྷ་དང་མི་ནི་ལྷ་ལ་དག །སྡུག་པའི་ཆགས་པ་དམ་དུ་ཞེན། །བསོད་ནམས་སྔོན་བྱས་དེ་དང་དེས། །འདོད་པ་རྨོངས་པས་གདུངས་པར་འགྱུར། །དེ་ཡང་ཉོན་མོངས་སྣ་ཚོགས་དང་། །སྡིག་པའི་ལས་ནི་
རྒྱུན་མི་འཆད། །རྣམ་པར་ལྟུང་བའི་མཐར་གནས་པས། །བག་མེད་གྱུར་ལ་བརྩེ་བྱའི་རིགས། །ནད་སོས་ཡུན་རིངས་མ་ལོན་པའི། །ནད་པས་མི་འཕྲོད་ཟོས་དང་མཚུངས། །གང་ཞིག་གཟུགས་ཅན་གཟུགས་མེད་པ། །སྡུག་བསྔལ་སྡུག་བསྔལ་ལས་འདས་ཤིང་། །ཏིང་འཛིན་བདེ་བའི་བདག་ཉིད་
ཅན། །བསྐལ་པར་གཡོ་བ་མེད་པར་གནས། །དེ་ཡང་ཤིན་ཏུ་ངེས་གྲོལ་མིན། །དེ་ཡང་སླར་ཡང་ལྟུང་བར་འགྱུར། །ངན་འགྲོའི་སྡུག་བསྔལ་རྦ་ཀློང་ལས། །འདས་པ་ལྟ་བུར་འབྱུང་འགྱུར་བ། །འབད་ཀྱང་ཇི་ལྟར་རིང་མོ་གནས། །མཁའ་ལ་ལྡིང་བ་བྱ་དང་མཚུངས། །བྱིས་པའི་སྟོབས་ཀྱིས་
མདའ་འཕངས་ལྟར། །དེ་ནི་ལྟུང་བའི་མཐའ་ཅན་ཡིན། །མར་མེ་རིང་དུ་འབར་བ་དག །སྐད་ཅིག་རེ་རེ་འཇིག་པ་ལྟར། །འདུ་བྱེད་ཡོངས་འགྱུར་ཞེས་བྱ་ཡི། །སྡུག་བསྔལ་དག་གིས་ཉེ་བར་གཙེས། །རྒ་ཤི་ན་བའི་ཆོས་ཅན་གྱིས། །ཉོན་མོངས་ནད་ན་རྒྱུ་སོགས་ཀྱིས། །གང་ཕྱིར་ཐམས་ཅད་
གདུངས་བས་ན། །དེ་ཕྱིར་ཤིན་ཏུ་བརྩེ་བྱ་རིགས། །སྲོག་ཆགས་ཀུན་གྱི་སྡིག་པ་རྣམས། །ཐམས་ཅད་བདག་ལ་སྨིན་པར་ནི། །དེ་ལྟར་སྡིག་པ་ལེན་བྱེད་ཅིང་། །འགྲོ་བའི་ཕོངས་པས་སྡུག་བསྔལ་བྱས། །སངས་རྒྱས་བྱང་ཆུབ་སེམས་དཔའ་དང་། །འཕགས་པ་དག་དང་འགྲོ་བ་ཡི། །
དུས་ནི་ཐམས་ཅད་དག་གི་ཡང་། །བསོད་ནམས་ཀུན་ལ་ཡི་རང་བྱ། །ཚོགས་ནི་ཤིན་ཏུ་བྱ་དཀའ་དང་། །སངས་རྒྱས་ཆོས་ནི་བླ་མེད་པ། །འགྲོ་བའི་དོན་གྱི་བྱ་བ་ཉིད། །སངས་རྒྱས་རྣམས་ཀྱིས་རྗེས་སུ་བསམ། །མང་དུ་ཐོས་ལ་མངོན་བརྩོན་དང་། །ཇི་བཞིན་དོན་ནི་སེམས་པ་དང་། །འགྲོ་
བའི་ཤེས་པ་ཉེ་བསྡུས་པའང་། །རྟེན་འབྲེལ་ཡིད་ལ་བྱེད་པ་ཡིས། །འདུ་བྱེད་ཙམ་ལ་སྐད་ཅིག་མ། །བྱ་བ་མེད་ལ་འཇུག་པར་བྱ། །ཐམས་ཅད་རྟེན་འབྲེལ་ལ་བསམས་ལ། །རྟག་ཏུ་བདག་མེད་གོམས་པ་ཡི། །ཐམས་ཅད་མཁྱེན་པའི་ཡེ་ཤེས་ཚོགས། །དོན་དམ་པར་ནི་འཕེལ་བར་

172-1-175a

འགྱུར། །བྱང་ཆུབ་སེམས་ནི་ཉེར་འཕེལ་བས། །ཚོགས་ནི་ཐམས་ཅད་རྫོགས་པར་འགྱུར། །དེ་ལྟར་བསོད་ནམས་ཡེ་ཤེས་ཀྱིས། །རང་བཞིན་ཆུ་བོས་འགེངས་པ་དག །འགྲོ་བའི་ཐར་ལ་གཅིག་ཏུ་མཁས། །བྱང་ཆུབ་ལག་པའི་མཐིལ་ན་གནས། །སྦྱིན་དང་
སྙན་པར་སྨྲ་བ་དང་། །དོན་སྤྱོད་དོན་ནི་མཐུན་པ་ཉིད། །དེ་ལྟར་བསྡུ་བའི་དངོས་པོ་རྣམས། །འགྲོ་ལ་ཕན་པར་བྱེད་པ་ཉིད། །དེ་ནི་གང་ལ་སྦྱིན་པ་བྱིན། །གང་ཞིག་ལ་ནི་སྙན་སྨྲ་བའམ། །དོན་སྤྱོད་པ་ནི་བྱས་འགྱུར་བ། །གང་ལ་དོན་མཐུན་བྱས་འགྱུར་ཞེས། །དེ་ལྟར་རྟག་ཏུ་བརྩོན་པ་ཡིས། །
འགྲོ་བའི་དོན་ནི་ཅི་ནུས་བྱ། །གཞན་ཀུན་བདག་གིར་བྱ་བ་དང་། །རང་ལ་གནས་པ་གཞན་གྱིར་བྱ། །ཚོགས་ཀྱི་གཏམ་སློབ་དཔོན་དབྱིག་གཉེན་གྱིས་མཛད་པ་རྫོགས་སོ།།      །།རྒྱ་གར་གྱི་མཁན་པོ་གང་གཱ་ཏ་ར་དང་། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་
ཅིང་ཞུས་ཏེ་གཏན་ལ་ཕབ་པའོ།།      །།༄༅༅། །རྒྱ་གར་སྐད་དུ། ཨཥྚ་ཨཀྵ་ཎ་ཀ་ཐཱ། བོད་སྐད་དུ། མི་ཁོམ་པ་བརྒྱད་ཀྱི་གཏམ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །འདིར་བཅོམ་ལྡན་འདས་ཀྱིས་གསུངས་པའི་ཆོས་གུས་པར་མཉན་པར་བྱ་སྟེ།
ཕྱིས་ནི་རྗེས་སུ་རྙེད་པར་མི་འགྱུར་རོ། །དེ་ཅིའི་ཕྱིར་ཞེ་ན། གང་གི་ཚེ་འདིར་མི་ཁོམ་པ་བརྒྱད་ལས་གྲོལ་བའི་མི་ནི་ཤིན་ཏུ་དཀོན་ནོ། །མི་ཁོམ་པ་བརྒྱད་པོ་དག་གང་ཞེ་ན་འདི་ལྟ་སྟེ། དམྱལ་བ་དང་། དུད་འགྲོ་དང་། ཡི་དགས་དང་། མཐའ་ཁོབ་ཏུ་སྐྱེས་པ་དང་། ལྷ་ཚེ་རིང་པོ་དང་། དབང་པོ་མ་
ཚང་བ་དང་། ལོག་པར་ལྟ་བ་དང་། དེ་བཞིན་གཤེགས་པ་མི་འབྱུང་བ་སྟེ། དེ་ལྟར་མི་ཁོམ་པ་བརྒྱད་པོ་འདི་དག་ལྡན་ན། མི་མ་ཐོབ་པས་གྲོལ་བའི་ཆོས་དང་ལྡན་པར་མི་འགྱུར་རོ། །དེ་དག་ཇི་ལྟ་ཞེ་ན་བརྗོད་པར་བྱ་སྟེ། དམྱལ་བ་དང་། དུད་འགྲོ་དང་། ཡི་དགས་དང་། ཤ་ཟའི་ལམ་ལ་
ཕལ་ཆེར་གནས་པས།འདིར་འགའ་ཞིག་མིའམ་ལྷར་འགྱུར་གྱི་ཕམ་ཆེར་ནི་མི་འགྱུར་རོ། །དགེ་བའི་རྩ་བའི་ཚོགས་བསགས་པ་ནི་དཀོན་པ་ཉིད་དེ། དེ་འགའ་ཞིག་གི་གཉའ་ཤིང་གི་བུ་གར་རུས་སྦལ་གྱི་མགྲིན་པ་ཆུད་པ་བཞིན་ནོ། །རིན་པོ་ཆེའི་ཚོགས་ཐམས་ཅད་ཀྱི་གླིང་དུ་གྱུར་པ། བཀྲ་མི་

172-1-175b

ཤིས་པའི་དྲི་མ་ཐམས་ཅད་འཁྲུད་པ། དམ་པའི་ཆོས་ཀྱི་མཐར་ཐུག་པ། བསྐལ་པ་གྲངས་མེད་པར་ངེས་པར་འབྱུང་བ། སྣ་ཚོགས་པ་ལ་མཁས་པར་བྱས་པ། སངས་རྒྱས་ཉིད་ཀྱི་གོ་འཕང་ཐོབ་ཅིང་ངེས་པར་ལེགས་པ་ནི་ཐོབ་པ་མཆོག་ཏུ་དཀའོ། །བདག་ཉིད་ཀྱིས་དགེ་བ་མདུན་དུ་སྙིང་པོར་བྱས་
ཏེ། མི་དགེ་བའི་ཆོས་ཞེ་སྡང་གིས་སྐྱེད་པས་གཉེན་པོ་དགེ་བའི་ཆོས་གཙོར་བྱའོ། །རིའི་ཆུ་ལྟར་གཡོ་བ་དང་། རླུང་ལྟར་མི་གནས་པ་དང་། ཀཱ་ཤིའི་མེ་ཏོག་ལྟར་འཐོར་ཞིང་། གཡོ་བ་དང་། སྟོན་ཀའི་སྤྲིན་དང་། གློག་དང་། ཐོ་རངས་ཀྱི་མར་མེ་དང་། པདྨའི་འདབ་མའི་ཆུ་ཐིགས་
དང་། དྲི་ཟའི་གྲོང་ཁྱེར་དང་། དར་ལ་བབ་པའི་སེམས་ལྟར་གཡོ་བས་མི་རྣམས་ལ་ཡིད་བརྟན་པར་མི་བྱའོ། །དེ་བས་ན་འདི་ལྟར་བསྒྲུབ་པར་བྱ་སྟེ། མེའི་ནང་དུ་ཞུགས་པ་ལྟར་བདག་ལེགས་སོ་འདོད་པས་མྱུར་དུ་ངེས་པར་སྐྱབས་སུ་འགྲོ་བར་བྱའོ། །དེ་ཅིའི་ཕྱིར་ཞེ་ན། འདི་ལྟར་གནས་
སྐབས་ཐམས་ཅད་དུ་དགེ་བའི་བཤེས་གཉེན་དུ་མ་རྙེད་པ་ནེ་དཀོན་ནོ། །གང་གི་ཚེ་ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པའི་སེམས་ཅན་དམྱལ་བ་ཆེན་པོ་འདི་རྣམས་སུ་སྐྱེས་ཤིང་འཁྲུགས་
པས་སྐྱུར་ཞིང་འདོན་པ་དང་། རྡེག་པ་དང་། སྲེག་པ་དང་། འཚེད་པ་དང་། འདོན་ཅིང་གཏུབ་པ་དང་། ཟ་བ་དང་། གསོད་པ་དང་། འཆིང་བ་དང་། ངུ་ཞིང་ང་རོ་འདོན་པས་སྨྲེ་ཞིང་སྡུག་བསྔལ་སྣ་ཚོགས་ཤིང་སྡུག་བསྔལ་དུ་མར་བྱིང་སྟེ། ཆུ་བོ་རབ་མེད་དུ་ནུབ་ཅིང་། ལོ་མ་རལ་གྲིའི་ནགས་ཚལ་
དང་། ཚེར་མ་རྣོན་པོའི་ཚལ་དང་། སྤུ་གྲིས་གཏམས་པའི་ལམ་དང་། རིམ་པ་མེད་པར་འགྲོ་བ་དང་། ལྕགས་ཀྱི་ཐུ་ལུམ་འབར་བ་ཟ་བ་དང་། ཁྲོ་ཆུ་འཐུང་བ་དང་། ས་གཞི་འབར་བར་འདུག་པ་དང་། མེའི་ཕྲེང་བས་ལུས་སྲེག་པ་ནི་བུད་ཤིང་རབ་ཏུ་འབར་བ་བཞིན་ནོ། །ཡོངས་སུ་སྐྱུར་
ཞིང་འབྲོས་པ་དང་། བརྒྱལ་བ་དང་། སྨྲེ་བ་དང་། རྣམ་པར་འཇོམས་པ་དང་། ཉོན་མོངས་པས་ང་རོ་འདོན་ཅིང་མྱ་ངན་བྱེད་ཅིང་ངུ་བ་དང་། རྣམ་པ་སྣ་ཚོགས་པའི་གཟུགས་དུ་མས་སྡུག་བསྔལ་བརྒྱ་སྟོང་ཕྲག་མང་པོ་མྱོང་ངོ་། །དེ་དག་གང་དུ་ཇི་ལྟར་ཞི་བར་འགྱུར་ཞེས་ཀྱང་གསུངས་སོ། །ཀྱི་ཧུད་

172-1-176a

ཟེར་བ་དང་། ཨ་ཆུ་ཟེར་བ་དང་། སྙིང་རྗེ་རྗེ་སྐད་ཟེར་བ་དང་། རལ་གྲི་རྣོན་པོ་ཐོགས་པའི་གཤིན་རྗེ་གཏུམ་པོས་རྡེག་ཅིང་གཏུབ་པ་དང་། མནར་མེད་པར་སྐྱེས་ནས་འབར་བའི་མེས་བསྲེགས་པར་དེ་དག་རབ་ཏུ་སྤངས་ནས་ཆོས་ཀྱི་འདུ་ཤེས་ཇི་ལྟར་སྐྱེ་བར་འགྱུར། དེ་
བས་ན་གུས་པས་ཆོས་མཉན་པར་བྱ་སྟེ། ཕྱིས་རྗེས་སུ་རྙེད་པར་མི་འགྱུར་རོ་ཞེས་བྱའོ། །ཡང་གང་དག་འདི་ལྟར་ཕན་ཚུན་ཟ་བ་དང་། དེད་པ་དང་སྐྲག་པར་བྱེད་པ་དང་། འཇོམས་པ་དང་བཅས་ཤིང་ཟ་བ་དང་། མ་ལ་འཁྲིག་པ་སྤྱོད་པ་དང་འདི་ལྟ་སྟེ། སྲེ་མོ་དང་། ཀུ་ར་དང་། རི་དགས་
དང་། ཕག་དང་། རུ་རུ་དང་། སྨི་ཤི་དྷ་དང་། གནག་དང་། སྤྲེའུ་དང་། སྲིན་བུ་དང་། ཕྱེ་མ་ལེབ་དང་། ཆུ་སྲིན་དང་། མ་ཧེ་དང་། གླང་པོ་དང་། གླང་དང་། འུག་པ་དང་། བྱ་རོག་དང་། ཁྲུང་ཁྲུང་དང་། བྱ་རྒོད་དང་། ཁྱི་དང་། ཝ་དང་། ཅེ་སྤྱང་དང་། རྔ་མོ་དང་། བོང་བུ་ལ་སོགས་པར་
སྐྱེས་ནས།ཕན་འདོགས་པ་དང་། བློ་གྲོས་དང་རྟོགས་པ་དང་། དྲན་པ་མེད་ཅིང་བླུན་པོར་སྤྱོད་པ་དང་། བགྲོད་པར་བྱ་བ་དང་། བགྲོད་པར་མི་བྱ་བ་ལ་ལྟོས་པ་མེད་ཅིང་། དགྲ་དང་དགྲ་མ་ཡིན་པ་མི་ཤེས་ཤིང་། སྨྲ་བ་དང་བྲལ་ཞིང་རིགས་པ་མི་བྱེད་པ། དཔལ་དང་བྲལ་བའི་ལུས་དང་
ལྡན་པ་དེ་བས་ན། དེ་དག་ལ་ཡང་ཆོས་ཀྱི་འདུ་ཤེས་ཇི་ལྟར་སྐྱེ་བར་འགྱུར། མགོ་དང་མགྲིན་པ་དང་ཁ་དང་རྒྱབ་ལ་ལྕགས་ཀྱུ་དང་། རྡོ་བ་དང་། དབྱིག་པ་དང་། གཉའ་ཤིང་ལ་སོགས་པས་ཉེ་བར་སྡུག་བསྔལ་ཞིང་། སྐྲག་ཅིང་འབྲོས་པ་དང་། རྣམ་པར་འཐོར་བ་དང་། རྡེག་འཆོས་པ་
དང་། འགྲེད་པ་དང་། རྣམ་པ་སྣ་ཚོགས་པའི་ངོ་བོ་དུ་མས་སྡུག་བསྔལ་བརྒྱ་ཕྲག་དུ་མ་ཉམས་སུ་མྱོང་བ། དེ་དག་གང་དུ་ཇི་ལྟར་ཞི་བར་འགྱུར་ཞེས་གསུངས་སོ། །དགུན་གྱི་དུས་སུ་རླུང་དྲག་པོ་དང་བ་མོ་མི་བཟད་པས་འཇོམས་ཤིང་། དབྱར་གྱི་དུས་སུ་ཉི་མའི་འོད་ཟེར་ཚ་བས་གདུངས་
པར་བྱེད་པ་དང་། ཕན་ཚུན་བསྙེམས་ཤིང་འཆི་བའི་འཇིགས་པས་འཇིག་རྟེན་རྣམས་ལ་རྟག་པར་སྐྲག་པའི་དུད་འགྲོ་ལོག་པར་ལྟུང་བའི་སྲོག་ཆགས་ལ། འདི་ཇི་ལྟར་ཆོས་ཀྱི་འདུ་ཤེས་སྐྱེ། དེ་བས་ན་གུས་པར་ཆོས་མཉན་པར་བྱ་སྟེ། ཕྱིས་རྗེས་སུ་རྙེད་པར་མི་འགྱུར་ཞེས་བྱའོ། ཡང་གང་གི་

172-1-176b

ཚེ་བཀྲེས་པ་དང་། སྐོམ་པས་གདུངས་ཤིང་ལུས་བསྲེགས་པའི་རྣམ་པ་ལྟ་བུ་དང་། མགྲིན་པ་དང་། རྐན་དང་། ལྕེ་དང་། མཆུ་རྣམས་སྐམས་ཤིང་། སྙིང་དང་། མིག་དང་། ལག་པ་དང་། རྐང་པ་དང་། ཁྲག་དང་། ཤ་དང་། རུས་པ་དང་། གཞུངས་པ་དང་། རྒྱུ་མ་དང་།
ནང་ཁྲོལ་རྣམས་ཕྱུང་བ་ལྟ་བུར་སྐམས་པ་དང་། མཆིལ་མ་དང་། སྐྱུག་པ་ཟས་སུ་ཟ་བ་མེས་བསྲེགས་པ་ལྟ་བུའི་ལུས་ཀྱི་རྣམ་པ་དང་ལྡན་པ། སྣང་བ་མེད་པའི་མུན་པར་གནས་པ།མི་གཙང་བ་ཟོས་པས་གོས་ཤིང་སྤགས་པ་ལོ་བརྒྱ་ཕྲག་དུ་མར་ཟས་སྐོམ་དང་བྲལ་བ། ཉོན་མོངས་
པ་རབ་ཏུ་འབར་ཞིང་གཅིག་ལ་གཅིག་གནོད་པས་སྐྲག་ཅིང་སྡུག་བསྔལ་བ། ཤིང་དང་བོང་བ་དང་དབྱིག་པས་རྡེག་པས་སྐོམ་བཞིན་དུ་བསྲུངས་པས། རིམ་པར་དབང་མེས་པར་སྐོམ་པས་སྡུག་བསྔལ་བ། བསོད་ནམས་དམན་པ། གདོང་རང་གི་སྐྲས་གཡོགས་པ། དུར་ཁྲོད་མི་
བཟད་པར་གནས་པ། ལོ་བརྒྱ་སྟོང་ཕྲག་དུ་མར་སྡུག་བསྔལ་བརྒྱ་སྟོང་ཕྲག་དུ་མ་ཉམས་སུ་མྱོང་བ། དེ་དག་དུས་གང་དུ་ཇི་ལྟར་ཞི་བར་འགྱུར་ཞེས་ཀྱང་གསུངས་སོ། །བཀྲེས་པ་དང་སྐོམ་པས་སྐམས་ཤིང་། ལུས་མེ་འབར་བ་དྲག་པོའི་རྣམ་པ་དང་ལྡན་པ། སྒལ་བུ་རྣམས་
ནང་ཁྲོལ་གྱིས་སྟོངས་པས་རིའི་ཁྲོད་ལྟ་བུ། ནང་ཁྲོལ་ཉམས་པས་གཡོ་བ་དང་བྲལ་བ། ཁ་ཁབ་ཀྱི་མིག་ལྟར་ཕྲ་བ། སྐྲའི་ཚོགས་ཆེན་པོ་རྩུབ་ཅིང་གྱེན་དུ་བརྫེས་པ། དགེ་བ་ཅུང་ཟད་ཀྱང་མེད་པས། མི་དགེ་བས་ཡི་དགས་ཀྱི་འཇིག་རྟེན་དུ་སྐྱེ་སྟེ། དེ་བས་ན་གུས་པར་ཆོས་
མཉན་པར་བྱ་སྟེ། ཕྱིས་རྗེས་སུ་རྙེད་པར་མི་འགྱུར་རོ་ཞེས་བྱའོ། །ཡང་གང་གི་ཚེ་མཐའ་ཁོབ་ཏུ་སྐྱེས་པར་གྱུར་པ་དེ་དག་ཀྱང་རབ་ཏུ་དྲན་པ་དང་། གཅུགས་པ་དང་། བློ་གྲོས་དང་། རྟོགས་པ་དང་བྲལ་བས་སྤྱོད་ཅིང་ལོ་བརྒྱར་ཡང་ལྟོས་པ་མེད་དོ། །དེ་དག་དུས་གང་
གི་ཚེ་ཞི་བར་འགྱུར་ཞེས་ཀྱང་གསུངས་སོ། །ཡང་གང་གི་ཚེ་མཐའ་ན་གནས་པ་དང་། གླེ་ན་གནས་པ་དང་། རི་ཁྲོད་དང་། ཤུལ་ས་དང་། པར་སིག་པ་དང་། དྷ་ཀ་བ་དང་། མུ་ཁ་འཇབ་པ་དང་། ཀུར་པ་པ་དང་། ཁ་ཤ་བ་དང་། ར་མ་ཐ་བ་དང་། བུག་ན་བ་དང་། ཅི་ར་

172-1-177a

ཐ་བ་དང་། ཏང་ཀ་ན་བ་དང་། ལ་ཤ་བ་ན་དང་། ཧོར་དང་། ཧ་དས་ག་བ་དང་། ནད་ལྡན་པ་དང་། ཡ་མ་ན་བ་དང་། ཨ་ཏྲ་པ་དང་།དྲ་ཅི་ལ་བ་དང་། རྣ་ཅན་པ་དང་། ཙིན་པ་ན་དང་། མི་ཚངས་པ་ལ་སོགས་པའི་ཡུལ་དུ་སྐྱེས་པས། གང་དུ་བཅོམ་ལྡན་
འདས་ཀྱིས་ཉན་ཐོས་དུས་ཐམས་ཅད་དུ་མི་རྒྱུ་བར་འདི་ལྟར་དེ་དག་ནི་སྐྱེས་བུའི་གཟུགས་ཙམ་རྟེན་པ་ཡིན་ཏེ། དུད་འགྲོའི་སྐྱེ་གནས་སུ་སོང་བ་ལྟར་བྱ་བ་དང་བྱ་བ་མ་ཡིན་པ་ནི་མི་ཤེས་སོ། །ཁྱི་ལྟ་བུར་ཟ་བ་དང་། སྐྲག་པ་དང་། འདོད་པ་སྤྱོད་པ་མཁས་པའི་འདུ་ཤེས་ཙམ་མོ། །གཞན་
ཡང་སྤོང་པའི་རྟོག་པ་ཙམ་དང་ལྡན་པ་དང་། རྐྱེན་གྱིས་ཁྲོ་བ་དང་། ང་རྒྱལ་དང་། ཕྲག་དོག་དང་ལྡན་པར་སྤྱོད་པ་དེ་དག་དུས་གང་གི་ཚེ་ཞི་བར་འགྱུར་ཞེས་གསུངས་སོ། །མཐའ་ཁོབ་པའི་ཡུལ་ན་གནས་པ་གང་ཡིན་པ་མཐའ་ཁོབ་ཏུ་སྐྱེས་པ་དགེ་བ་དང་མི་དགེ་བའི་སེམས་
མི་ཤེས་པའི་མུན་པ་དང་ལྡན་པ་མཐའ་ཁོབ་པའི་ཡུལ་ན་གནས་པ་གང་ཡིན་པ། ཐོས་པ་དང་། དུལ་བ་དང་། དཀའ་ཐུབ་པ་དང་། ཤེས་པ་དང་། སྦྱིན་པ་དང་རབ་ཏུ་སྤྱོད་པ་མེད་པས། དུད་འགྲོ་རྣམས་དང་འདྲ་བར་ཤེས་པར་བྱའོ། །འདི་ལྟར་འདི་ལྟ་བུ་དང་བྲལ་ཞིང་མིའི་གཟུགས་
ཙམ་དུ་ཟད་དེ་ཆོས་མཉན་པར་ཇི་ལྟར་ནུས། ལེགས་པའི་བློ་གྲོས་དང་བྲལ་ཞིང་མི་བཟད་པའི་མུན་པ་དང་ལྡན་པ་ཡིན་ནོ། །དེ་བས་ན་ཆོས་མཉན་པ་ལ་གུས་པར་བྱ་སྟེ། ཕྱིས་རྗེས་སུ་རྙེད་པར་མི་འགྱུར་རོ་ཞེས་བྱའོ། །ཡང་གང་གི་ཚེ་འདི་ལྟར་མནྡ་ར་བའི་རྩེ་མོར་གནས་ཤིང་ལུས་
རྒྱས་ཤིང་དགའ་བ་དང་། མཛེས་ཤིང་གསལ་བ་འདོད་པ་གྲུབ་ཅིང་ཕུན་སུམ་ཚོགས་པ་བསྡུས་པ་མཆོག་ཏུ་གྱུར་པ། པདྨ་དང་ཨུཏྤ་ལ་སྣ་ཚོགས་པའི་མཆོག་དང་། ཤིང་སྣ་ཚོགས་པའི་མཆོག་དང་། ཤིང་སྣ་ཚོགས་པའི་དྲི་མ་བསིལ་བ་སྣ་ཚོགས་པའི་བྱ་དང་། དུང་བའི་སྐད་སྙན་
པ་སྒྲོགས་པ་དང་། ཆུའི་རྒྱུན་དུ་དྲག་ཏུ་འབབ་པ། སྐྱེད་མོས་ཚལ་ཉམས་དགའ་བས་བརྒྱན་པ། འདོད་པའི་ཁམས་ཀྱི་མཐར་ཐུག་པ་འདོད་པ་རྩེ་གཅིག་ཏུ་བྱེད་པའི་བྱ་བས་རྟག་ཏུ་གཡེངས་པས་ཕྱག་འཚལ་ཞིང་རབ་ཏུ་འཁོད་པ་ནི་རོལ་ཞིང་རྩེད་མོའི་སྤྱོད་པ་སྣ་ཚོགས་པ་བྱེད་ཅིང་། ལྟ་

172-1-177b

བའི་བདེ་བ་དུ་མ་ཉམས་སུ་མྱོང་བ་དེ་དག་དུས་གང་གི་ཚེ་ཞི་བར་འགྱུར་ཞེས་ཀྱང་གསུངས་སོ། །མཐོ་རིས་ཀྱི་བུད་མེད་དང་དགའ་བས་མཚམས་སྦྱོར་ཞིང་། གཡེང་བ་དེ་དང་དེ་དག་གིས་རྩེ་ཞིང་། མནྡཱ་རའི་ལྷ་མོ་དང་རོལ་ཅིང་གླང་པོ་དང་དཔའ་བོའི་པདྨའི་རྟེན་པ་ལ་ཞོན་ནས་སུམ་ཅུ་རྩ་གསུམ་
པའི་ལྷའི་དབང་པོ་དང་སྐྱེད་མོས་ཚལ་དུ་དགའ་བས་བག་མེད་པས་ཆགས་པའི་ཕྱིར། སངས་རྒྱས་ཀྱི་གསུང་བདུད་རྩི་ལ་མྱོང་བར་ཇི་ལྟར་བྱེད་དེ་དེ་བས་ཆོས་ཉན་པ་ལ་གུས་པར་བྱ་སྟེ། ཕྱིས་རྗེས་སུ་རྙེད་པར་མི་འགྱུར་རོ་ཞེས་བྱའོ། །དེ་ཡུལ་དབུས་སུ་སྐྱེས་ཀྱང་ལྟ་བ་དང་མཉན་པ་
དང་། མྱང་བ་དང་དབང་པོ་མ་ཚང་བས། གླང་པོ་ལྟ་བུར་བརྡས་མཚོན་པ་དང་། འཇིག་རྟེན་པའི་བྱ་བ་རྣམས་ལ་ཡང་བྱ་བའི་བློ་དང་བྲལ་བ། གང་འཇིག་རྟེན་ལས་འདས་པའི་ཞི་བར་དུས་གང་གི་ཚེ་ཡང་འགྱུར་ཞེས་ཀྱང་གསུངས་ཏེ། ཐུབ་པའི་དབང་པོའི་གསུང་ཇི་ལྟར་དབང་པོ་དང་བྲལ་
བས་ཉན་པར་ནུས། ཐོས་པའི་སྒོ་མེད་བས་བྱམས་པ་དང་། སྙིང་རྗེ་དོན་དུ་གཉེར་བ་ལས་ལོག་པར་གྱུར་པ། མིའི་བརྗོད་པ་དང་བྲལ་བར་གྱུར་པ། རང་ཉིད་ཀྱིས་ཉེས་པར་སྤྱོད་པས་བསླུས་པ། སེམས་ཀྱི་གླང་པོ་ལྕགས་ཀྱུ་མེད་པས་དྲེགས་པ་མ་ཐུལ་བས་ཡན་པ་ཡིན་ཏེ། དེ་བས་ན་
ཆོས་གུས་པར་མཉན་པར་བྱ་སྟེ་ཕྱིས་རྗེས་སུ་རྙེད་པར་མི་འགྱུར་རོ་ཞེས་བྱའོ། །གལ་ཏེ་ཡུལ་དབུས་སུ་སྐྱེས་སུ་ཟིན་ཀྱང་། ཡང་དག་པའི་ལྟ་བའི་མིག་ལོག་པར་ལྟ་བས་གཡོགས་པའི་བློས་སངས་རྒྱས་ཡོངས་སུ་སྤངས་ཤིང་། རྒྱུ་དང་འབྲས་བུ་ཐམས་ཅད་ལ་སྐུར་པ་འདེབས་པ་དགེ་བའི་རྩ་
བའི་ཆོས་ཐམས་ཅད་ལ་མངོན་པར་དགའ་བ་དང་བྲལ་བ། ཉེས་པ་ཐམས་ཅད་ཀྱི་སྟོབས་ཀྱིས་ནད་ལ་གསོ་བ་མི་བྱེད་པ་ལྟ་བུའི་བསམ་པ་ཕྱིན་ཅི་ལོག་གི་བྱ་བ་བྱེད་པས་དམྱལ་བ་ཉིད་དོ། །དེ་དག་དུས་གང་གི་ཚེ་ཉེ་བར་ཞི་བར་འགྱུར་ཞེས་ཀྱང་གསུངས་སོ། །ཐམས་ཅད་མཁྱེན་པ་ཉིད་མ་ཡིན། །
འགྲོ་བ་ཐར་པར་སྨིན་མཛད་པས། །གང་དག་ཡིད་ཀྱི་ཕུག་གནས་པའི། །རྨོངས་པའི་མུན་ཆེན་མི་སེལ་བ། །མེ་ཁྱེར་དང་འདྲའི་མུ་སྟེགས་རྣམས། །ལོག་ལྟའི་ཡིད་ལྡན་དེ་དག་གིས། །སེལ་བར་ནུས་པ་མ་ཡིན་ཏེ། །ཉི་བདུན་གྱིས་ཀྱང་སེལ་མི་འགྱུར། །དེ་བས་ན་གུས་པར་ཆོས་མཉན་

172-1-178a

པར་བྱ་སྟེ། ཕྱིས་རྗེས་སུ་རྙེད་པར་མི་འགྱུར་རོ་ཞེས་བྱའོ། །བཅོམ་ལྡན་ཐུགས་ནི་རྣམ་རྒྱས་པ། །སངས་རྒྱས་ཉི་མ་མ་བྱུང་བར། །ཉི་མ་མེད་པར་པདྨ་བཞིན། །ཟླ་བ་མ་ཤར་བར་དུ་ནི། །ཀུ་མུ་ད་ཡི་ནགས་བཞིན་དུ། །གདུལ་བྱ་ཡི་ནི་པདྨ་རྣམས། །རབ་ཏུ་
རྒྱས་པར་འགྱུར་མ་ཡིན། །མུན་པ་ཡིས་ནི་མིག་བསྒྲིབས་པས། །རྒྱལ་པོ་ཡི་ནི་ལམ་བཞིན་དང་། །གྲུ་སྐྱ་མེད་པའི་གྲུ་བཞིན་དང་། །ཚོང་དཔོན་སྤངས་པའི་ཟོང་ཐོགས་བཞིན། །བྱང་ཆུབ་ཕྱོགས་ཀྱི་ཆོས་རྣམས་ཀྱི། །གྲུ་ལ་ཀུན་ནས་མ་ཞོན་པར། །དེ་ནི་རྩེ་གཅིག་སེམས་ཀྱིས་
སུ། །རྣམ་པར་གྲོལ་བའི་དགའ་མི་མྱོང་། །ཁྲོ་བྲལ་བླ་མ་ཐར་ལ་མོས། །འཆི་མེད་གྲོང་ཁྱེར་མཆོག་ལྟ་བ། །ཉོན་མོངས་ཀུན་གྱི་གཉེན་པོ་ནི། །སྐད་ཅིག་གཅིག་ལ་དམིགས་པ་ཡིས། །ཞི་བའི་བདེ་བའི་ལམ་ལ་སྦྱོར། །འགྲོ་བའི་ནམ་མཁའི་ཆེ་དཀྱིལ་དུ། །སངས་རྒྱས་ཉི་མ་མ་ཤར་
བར། །བསྒོམ་སྤངས་གདུལ་བྱའི་པདྨ་ལ། །ཡེ་ཤེས་ཉི་མས་རྒྱས་མ་ཡིན། །ངན་འགྲོའི་དུས་ནི་ཐམས་ཅད་དུ། །ཆོས་སྨྲ་བ་ཡིས་གསལ་བྱས་པས། །གང་ཞིག་འདི་ལ་བརྟེན་པ་ཡི། །འགྲོ་དེ་དགེ་བའི་བཤེས་ཀྱིས་ཐུལ། །མི་རྣམས་ཐོབ་པར་གྱུར་པ་ནི། །རི་རྩེ་གློག་འགྱུ་ལྟར་
གཡོ་ཞིང་། །ཁྱོགས་ལྟ་བུར་ནི་གཡོ་བ་དང་། །མི་བཟད་མི་ཁོམ་བརྒྱད་ཀྱི་རྩེར། །རབ་ཏུ་འཇིགས་པའི་གཟའ་ཡིས་ནི། །མེད་པ་ལས་ནི་ཐར་གྱུར་ཅིང་། །འཁོར་བའི་རྒྱ་མཚོར་གནས་པ་ཡིས། །སངས་རྒྱས་གསུང་ནི་རང་བཞིན་གྱི། །དམ་ཆོས་གྲུ་ལ་མ་ཞོན་པར། །གང་ཞིག་ཕ་
རོལ་འགྲོ་འདོད་པ། །བློ་གྲོས་ཤིན་ཏུ་དམན་པ་ཡིན། །མི་ཡི་སྐྱེ་བ་འབྲས་བུ་མེད། །མི་ཁོམ་པ་བརྒྱད་ཀྱི་གཏམ་སློབ་དཔོན་རྟ་དབྱངས་ཀྱིས་མཛད་པ་རྫོགས་སོ།།      །།རྒྱ་གར་གྱི་མཁན་པོ་ཤྲཱི་ཨ་ཛི་ཏ་བྷ་དྲ་དང་། ཞུ་ཆེན་གྱི་ལོ་ཙཱ་བ་དགེ་སློང་ཤཱཀྱ་འོད་ཀྱིས་
བསྒྱུར།།      །།༄༅༅། །རྒྱ་གར་སྐད་དུ། སུ་བྷཱ་ཥི་ཏ་རཏྣ་ཀ་ར་ཎྜ་ཀ་ཀ་ཐཱ། བོད་སྐད་དུ། ལེགས་པར་བཤད་པ་རིན་པོ་ཆེ་ཟ་མ་ཏོག་ལྟ་བུའི་གཏམ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །གང་གིས་གླང་ཆེན་མཆོག་འདྲའི་སེམས་ནི་ལྕགས་ཀྱུས་

172-1-178b

མ་ཡིན་ཡེ་ཤེས་ལྕགས་ཀྱུས་བཏབ་ནས་ཐུལ། །འདོད་ཆགས་མུན་པའི་དམག་ཚོགས་མེ་ཡིས་མ་ཡིན་ཡེ་ཤེས་མེ་ཡིས་མ་ལུས་བསྲེགས། །བདུད་ཀྱི་སྟོབས་རྣམས་མཚོན་ཆས་མ་ཡིན་བློ་གྲོས་རབ་ཞི་བཟོད་པའི་མཚོན་གྱིས་ཟློག །གུས་ལ་བསྒོམ་པ་ཞི་མཛད་སངས་རྒྱས་མཁྱེན་པ་རབ་རྒྱས་ཐུབ་
དབང་དེ་ལ་ཕྱག་འཚལ་ལོ། །དཀའ་བ་བརྒྱ་ཡིས་རྙེད་པ་ཡི། །མི་རྣམས་ཐོབ་པའི་ཁོམ་པ་དཀོན། །ཟློག་པ་མེད་པའི་འཆི་བདག་ནི། །རྟག་ཏུ་མདུན་ན་གནས་པས་ན། །གང་གིས་དུལ་སྦྱིན་ཡང་དག་སྡོམ། །རྒྱགས་ཚགས་མང་པོ་མ་བསྡོགས་པ། །མི་བཟད་འཁོར་བའི་མྱ་ངན་དུ། །
འགྲོ་བ་དེ་དག་སྡུག་བསྔལ་ཐོབ། །མི་རྣམས་ཐོབ་པ་རྙེད་དཀའ་བ། །བར་སྣང་གློག་འགྱུ་ལྟ་བུ་ཡིན། །སྲིད་པ་ཟད་བྱེད་མཁས་པ་ཡིས། །སྲིད་པ་རྣམས་སུ་ཕན་པ་བྱས། །ཡང་དག་མི་ཉིད་ཐོབ་པ་ནི། །གློག་དང་རྦབ་ལྟར་མི་བརྟན་པས། །ཡིད་བཞིན་ནོར་བུ་ལྟ་བུ་ཡི། །བསོད་ནམས་རྗེས་སུ་
སྐྱེས་བུས་བསྟན། །ད་ལྟར་མི་རྣམས་ཐོབ་པ་ལྟར། །གང་གི་མཐུ་ཡིས་ཕྱིས་ཀྱང་ཐོབ། །བསོད་ནམས་མཆོག་ནི་གང་ཡིན་པ། །དེ་ནི་བདེ་བའི་རྒྱུ་ཡིན་ཏེ། །གཟུགས་དང་གཏོང་བ་རིགས་མཐོ་སོགས། །ཡོན་ཏན་སྣ་ཚོགས་ལྡན་པར་འགྱུར། །བསོད་ནམས་དེ་ཉིད་མཛའ་བོ་གཅིག  །
འཁོར་བ་ཀུན་དུ་འགྲོ་བ་གཉེན། །དེ་ལྟར་འདིར་ནི་བསོད་ནམས་ཀྱིས། །ཕྱི་ཕྱིར་ཡོན་ཏན་ཕུན་སུམ་ཚོགས། །གང་ཚེ་དཔལ་གནས་ཐོབ་བསྟེན་པས། །དེ་བསྔགས་འཇིག་རྟེན་བདག་པོ་ཉིད། །ཕན་པའི་ཕྱོགས་སུ་འདྲེན་བྱེད་པ། །བསོད་ནམས་དེ་ཉིད་སྤེལ་བར་གྱིས། །བསོད་ནམས་ཆེ་
གྱིས་སྡིག་དགའ་སྤོངས། །ཡུལ་ལ་གཡོ་བ་ཡིད་ཀྱི་རྟ། །རྟག་ཏུ་ཕྱིན་ཅི་ལོག་ཞི་གྱིས། །དུག་སྟོབས་མི་བཟད་འཆི་སྦྲུལ་གྱིས། །སོས་མ་བཟུང་བའི་བར་དུ་ནི། །རྟག་ཏུ་ཁྱེད་ཀྱིས་ཐུབ་དབང་བཞིན། །གཞན་ཕན་ལ་ནི་མངོན་དགའ་གྱིས། །བསོད་ནམས་ལ་སྤྲོ་བ་བསྐྱེད་པའི་གཏམ་སྟེ་དང་
པོའོ།།      །།རྒྱ་མཚོ་གཉའ་ཤིང་བུ་ག་རུ། །རུས་སྦལ་མགྲིན་པ་ཆུད་པ་བཞིན། །ཡུད་ཙམ་འཛོམ་པ་ངོ་མཚར་ཆེ། །མི་བརྟན་འདི་ལ་ཡང་དག་སོམས། །རབ་ཏུ་ཞི་བའི་གྲོང་ཁྱེར་ལམ། །ངན་སོང་འཇིགས་པ་འཇོམས་བྱེད་པ། །དེ་ནི་ཐུབ་པའི་དབང་པོས་གསུངས། །སྐད་ཅིག་ཙམ་

172-1-179a

ཡང་ཐོས་པར་དཀའ། །མི་ཁོམ་བརྒྱད་ཀྱི་ཉེས་སྤངས་མི། །གང་ཞིག་དཀོན་ལ་བསྐལ་པ་བརྒྱས། །དེ་ལྟར་བདེ་ཐོབ་མཁས་པ་ཡིས། །དམ་ཆོས་མཉན་ལ་འདིར་འབད་བྱ། །དམྱལ་བ་ཡི་དགས་འགྲོ་བ་དང་། །དུད་འགྲོ་དབང་པོ་མ་ཚང་བ། །འཆི་མེད་བླ་མ་མཐའ་ཁོབ་
སྐྱེས། །ལོག་པར་ལྟ་བ་སེལ་བ་དང་། །ཐུབ་དབང་གསུང་རབ་བདུད་རྩི་ནི། །སྐྱེས་བུ་མཁས་པས་འཐུང་ནུས་པ། །ཤེས་རབ་འོད་མངའ་ཐུབ་དབང་ནི། །མ་ཤར་བར་དུ་ཡོད་མ་ཡིན། །དེ་ཕྱིར་བྱ་མིན་སྤངས་ནས་ནི། །བདག་གི་བྱ་བ་ཀུན་ཤེས་པས། །འཕགས་མཆོག་དམ་ཆོས་
མཉན་པར་བྱ། །ཆོས་འདི་ལ་ནི་གང་འབད་པ། །དེ་ལ་ཡོན་ཏན་ཀུན་ཡོད་འགྱུར། །ཐུབ་དབང་གསུང་ལས་རིན་ཆེན་འབྱུང་། །མཁས་པ་འདི་ཡིས་ཐོག་མར་དགའ། །དེ་ནི་གང་གིས་ཐོས་པས་ཀྱང་། །རྟག་ཏུ་སྟོབས་ལྡན་བརླིང་པ་ཡིས། །མུན་པའི་ཚོགས་ནི་འཇོམས་པར་བྱེད། །
བསམས་ཤིང་བསྒོམས་ན་མཐར་ཐུག་གསལ། །འཇིགས་བཅས་སྐྱེ་བ་འཁོར་བའི་རྒྱུན། །ཉོན་མོངས་མ་ལུས་རིམ་གྱིས་སྤོངས། །ཐམས་ཅད་ཕུན་ཚོགས་རྟག་པའི་གཏེར། །མི་བཟད་འཁོར་བའི་རྒྱུན་འཇོམས་ཤིང་། །བླ་ན་མེད་པའི་དགའ་བདེ་ཐོབ། །ཐོས་པས་འདིར་ཡིད་དྲི་མ་མེད། །
དེ་ལྟར་ཐུབ་དབང་གསུང་འདི་སོམས། །ཆོས་ཉན་པ་ལ་སྤྲོ་བ་བསྐྱེད་པའི་གཏམ་སྟེ་གཉིས་པའོ།།      །།གང་ཞིག་ཐོབ་ནས་འཁོར་བ་ཡི། །ཕ་རོལ་ཕྱིན་པའི་ས་བོན་བསྐྲུན། །བྱང་ཆུབ་དཔལ་གྱི་ས་བོན་མཆོག །ཡིད་བཞིན་ནོར་བུ་ལས་ལྷག་པའི། །ཡོན་ཏན་རྒྱུན་གྱི་མི་རྣམས་ནི། །
སུ་ཞིག་འདིར་དེ་འབྲས་མེད་བྱེད། །གང་ཞིག་དགེ་བས་ཕྱུག་པའི་མི། །བསྐལ་པ་གྲངས་མེད་ཀྱིས་ཐོབ་ནས། །འདིར་ནི་རྨོངས་པས་བསོད་ནམས་གཏེར། །ཅུང་ཟད་ཙམ་ཡང་མི་སོགས་པ། །དེ་དག་འཇིག་རྟེན་ཕ་རོལ་དུ། །མི་བཟད་མྱ་ངན་ཁང་པར་འཇུག །རིན་ཆེན་གླིང་ཕྱིན་ཚོང་པ་ནི། །ལག་
པ་སྟོང་པར་རང་ཁྱིམ་བཞིན། །དགེ་བཅུ་ལས་ཀྱི་ལམ་མེད་པར། །ཕྱི་ནས་ཡང་ནི་ཐོབ་མ་ཡིན། །མི་མ་ཐོབ་པར་དེ་བར་ནི། །ཅི་ལྟར་དེ་བདེ་སྡུག་བསྔལ་ཉིད། །དེ་ལས་ཕ་རོལ་སླུས་ཡོད་མིན། །དེ་ལས་མཆོག་ཏུ་རྨོངས་པ་མེད། །འདི་འདྲའི་ཁོམ་པ་ཐོབ་ནས་ནི། །བསོད་ནམས་

172-1-179b

ཚོགས་ནི་མི་སོགས་པ། །སྐད་ཅིག་གཅིག་ལས་སྡིག་སྤྱད་ནས། །མནར་མེད་པར་ནི་བསྐལ་པར་གནས། །སྐྱེ་བ་དུ་མར་སྡིག་སྤྱད་པས། །བདེ་འགྲོ་དཀའ་ལྟ་ཅི་ཞིག་སྨོས། །རྒྱ་མཚོ་ཆེར་གཡེང་གཉའ་ཤིང་གི། །བུ་གར་རུས་སྦལ་མགྲིན་ཆུད་ལྟར། །མི་ནི་ཤིན་ཏུ་ཐོབ་དཀའ་བར། །
དེ་སྐད་བཅོམ་ལྡན་འདས་ཀྱིས་གསུངས། །མིའི་སྐྱེ་བོ་དཀོན་པའི་གཏམ་སྟེ་གསུམ་པའོ།།      །།ཟས་སྐོམ་མལ་སྟན་གོས་མཆོག་དང་། །ཕྲེང་བ་གནས་དང་རྒྱན་རྣམས་དང་། །གྲགས་པ་ཡོན་ཏན་ཁྱད་འཕགས་པ། །དེ་ཀུན་སྦྱིན་ལས་འབྱུང་བར་གསུངས། །ངག་
སྙན་མཛེས་དང་ལོངས་སྤྱོད་ལྡན། །ཁྱད་པར་འཕགས་གཟུགས་ཡངས་པ་དང་། །ཚིག་སྙན་གཟི་ལྡན་ཡིད་འོང་དག །གྲགས་དང་ནད་མེད་ཚེ་དག་སྟེ། །ཡིད་འོང་སྡུག་པ་དེ་དང་དེ། །སྦྱིན་པ་རྣམས་ཀྱི་འབྲས་བུ་སྟེ། །རྟ་དང་དར་དང་གླང་པོ་དང་། །རྔ་ཡབ་གདུགས་དང་མེ་ཏོག་ཚོགས། །
ཁང་བཟངས་མཛེས་དང་རོལ་མོར་བཅས། །སྒྲ་སྙན་རོལ་མོ་དང་ལྡན་ཞིང་། །མེ་ཏོག་ཕྲེང་ལྡན་བུད་མེད་དང་། །ཟས་དང་རིན་ཆེན་ཕྲེང་བ་གནས། །གུར་གུམ་གྲོང་ཡུལ་ལྷ་ཡི་གནས། །རྫོགས་སངས་ཉིད་དང་སངས་རྒྱས་ཏེ། །སྦྱིན་པ་དཔག་བསམ་ལྗོན་ཤིང་གི། །འདི་དག་འབྲས་བུ་ཡིན་
པར་གསུངས། །ཨུཏྤལ་སྔོན་པོའི་འདབ་མ་འཇམ། །དཀྱུས་རིང་དྲི་མ་མེད་པ་དང་། །བུད་མེད་གང་ཞིག་མིག་འགྲུབ་ཅིང་། །རྐེད་པ་འོག་པག་གཡོ་བར་ལྡན། །དམར་ཞིང་མཛེས་པའི་གོས་ལྡན་ཞིང་། །ནུ་འབུར་རྒྱས་པར་རྣམ་པར་གཡོ། །སྨིན་མ་མཛེས་དང་ལྡན་དེ་དག །དེ་
དག་སེར་སྣའི་སྒོ་ཕྱེ་ནས། །སྦྱིན་པ་བཏང་ལས་རྒྱས་པར་འགྱུར། །མགུལ་བ་རྔ་མས་བརྒྱན་པའི་རྟ། །བཞོན་པ་ཁ་ལོ་སྲབས་ཀྱི་སྐྱོགས། །མི་དབང་གླང་ཆེན་དྲེགས་ཞོན་ནས། །གདུགས་བསྒྲེང་རྒྱན་ལྡན་འཁོར་བཅས་དང་། །འགྲོ་བ་ཐལ་མོ་སྦྱར་བྱས་ནས། །རྟག་ཏུ་མཆོད་ཅིང་གསོལ་
འདེབས་པ། །སྔ་མར་འདི་འདྲ་སྦྱིན་པ་ཡི། །འབྲས་བུ་ཡིན་པར་ཐུབ་པས་གསུངས། །གསེར་གྱི་གདུ་བུ་རྡོ་རྗེས་སྤྲས། །དཔུང་རྒྱན་ཅོད་པན་རིན་ཆེན་བཀོད། །ས་བདག་མུ་ཏིག་ཕྲེང་བས་བརྒྱན། །རྟག་ཏུ་སེང་གེའི་ཁྲི་ལ་གནས། །འབངས་སོགས་བཙུན་མོའི་འཁོར་བསྟེན་ཅིང་། །

172-1-180a

རྩེད་མོ་རྩེ་བས་རྣམ་རོལ་པ། །སེང་གེ་ལྟ་བུའི་རྣམ་རོལ་དེ། །སྦྱིན་འབྲས་ཡིན་པར་ཐུབ་པས་གསུངས། །ཁང་བཟངས་གསེར་དང་རིན་ཆེན་སྤྲས། །གདུགས་དང་རྒྱལ་མཚན་བསྒྲེང་བས་བརྒྱན། །པི་ཝང་རྫ་རྔ་རིག་བྱད་སྒྲོགས། །རིན་ཆེན་རྣམས་ཀྱིས་འོད་འབར་
བ། །བརྒྱ་བྱིན་བདེ་སོགས་དགའ་སྤྱོད་ཅིང་། །ལྷ་མོའི་ཚོགས་ཀྱི་འཁོར་ལྡན་དེ། །སྔ་མར་འདི་འདྲ་བྱིན་པ་ཡི། །འབྲས་བུ་ཡིན་པར་ཐུབ་པས་གསུངས། །སྦྱིན་པ་སྐྱེ་བོའི་ཡིད་དུ་འོང་། །མཁས་པའི་ཚོགས་ཀྱིས་རྟག་ཏུ་བརྟེན། །ཕྱོགས་རྣམས་དྲི་མེད་ཕྲེང་བས་ཁྱབ། །སྙན་པས་གནས་ནི་དེ་
དང་དེར། །འདིར་ནི་དྲི་མེད་ཉེ་བར་གནས། །ལུས་དང་བྲལ་ནས་ལྷ་རྣམས་སུ། །རྙོག་བྲལ་སྣ་ཚོགས་བཏུང་བ་བསིལ། །མེ་ཏོག་སྣ་ཚོགས་མགོ་ལྕོགས་རྒྱས། །དཔག་བསམ་གྱི་ནི་ཤིང་རྣམས་སྐྱེས། །ཙནྡན་ལ་སོགས་ཀྱིས་གང་བའི། །སྐྱེད་མོས་ཚལ་ནི་མཆོག་རྣམས་སུ། །ཡུན་རིང་དུ་
ནི་སྡེ་སྤྱོད་ཅིང་། །ལྷ་མོ་གཟུགས་མཆོག་ལྡན་པ་ཡིས། །བསྙེན་བཀུར་མཆོག་ཏུ་བྱེད་པ་འཐོབ། །སྦྱིན་པ་ཞེས་བྱ་གཏེར་ཆེན་དེ། །རྐུན་སོགས་མི་འཁྱེར་རྗེས་སུ་འབྲང་། །སྦྱིན་པས་སེམས་ཀྱི་སེར་སྣ་དང་། །ཆགས་པའི་རྡུལ་གྱི་དྲི་མ་འཁྲུ། །འཁོར་བའི་ལམ་གྱིས་དུབ་པ་སེལ། །
སྦྱིན་པ་བཞོན་པ་བདེ་བ་སྟེ། །སྦྱིན་པ་བདེ་བ་དུ་མའི་རྟེན། །ཡང་དག་གྲོགས་མཆོག་བདེ་བའི་སྒོ། །རྐེད་པ་གསེར་གྱི་སྐ་རགས་ལྡན། །ངག་འཇམ་ཟུར་མིག་བཞིན་སྐྱོབ་མཛེས། །མིག་གི་དཀྱུས་རིང་རྣ་དྲུང་གསན། །མེ་ཏོག་ཕྲེང་བས་སྐྲ་བཅིངས་མཛེས། །གང་ཞིག་རང་འཁོར་ཡན་ལག་
དང་། །རྐང་གཉེས་འགྲོ་བ་མཛེས་པ་ཡི། །ཟས་གཙང་གི་ནི་ཕུན་སུམ་ཚོགས། །དེ་དག་སྦྱིན་པའི་འབྲས་ཡིན་ཞེས། །བདག་ཉིད་ཆེན་པོས་བཀའ་སྩལ་ཏེ། །ས་ས་ཀ་རིའི་དུམ་བུ་དང་། །ཨུཏྤལ་གྱིས་བསྒོས་དྲི་ཞིམ་ལ། །བཀྲ་ཤིས་གསེར་གྱི་སྣོད་དུ་བླུགས། །བན་དུ་ཀ་དང་ཟངས་མདོག་
འདྲ། །བཏུང་བ་ཆུང་མ་མནའ་སྐྱེལ་ཞིང་། །ཆུང་མ་དང་བཅས་ཡང་ཡང་འཐུང་། །དགའ་བའི་བསམ་པས་སྨྲ་བ་དེའི། །རྒྱུ་ནི་སྦྱིན་མཆོག་བཀྲ་ཤིས་ཡིན། །ཞི་བའང་སྦྱིན་པའི་ཡོན་ཏན་ཏེ། །མཛེས་པ་འདོད་པ་བདག་ཅག་གིས། །སྦྱིན་པ་འདི་ལ་འབད་པར་གྱིས། །སྲིད་གསུམ་མི་བཟད་

172-1-180b

འཇིགས་ཆེན་ལ། །སྦྱིན་ལས་གཞན་པའི་གཉེན་མཆོག་མེད། །སྦྱིན་པའི་གཏམ་སྟེ་བཞི་པའོ།།      །།འགྲོ་བ་གང་ཞིག་མཛེས་ཡིད་འོང་། །གཟུགས་དང་རིགས་དང་གཉེན་དང་སྟོབས། །བདེ་བར་མཐོང་བ་གང་ཡིན་པ། །བསོད་ནམས་བཟོ་བོས་དེ་བྱེད་པར། །འདི་སྐད་
མཁས་པ་རྣམས་ཀྱིས་བཤད། །གཞན་ཕན་བྱེད་པའི་སྐྱེས་བུ་ཡིས། །བསོད་ནམས་དང་མཉམ་ཡོད་མ་ཡིན། །རིམ་པ་སྣ་ཚོགས་ཀྱིས་བརྒྱན་པའི། །རྒྱལ་མཚན་དཀར་པོ་མངོན་མཐོ་བཙུགས། །རྟ་གླང་རྐང་ཐང་ཤིང་རྟ་ཡི། །དཔུང་གི་ཚོགས་ཀྱིས་ངེས་འཁྲུག་ཅིང་། །ཡུ་བ་སྣ་ཚོགས་
མཛེས་པ་ཡི། །རྔ་ཡབ་རྣམས་ཀྱིས་གཡོབ་བྱེད་ལ། །བསོད་ནམས་ལྷག་པ་དབང་སྒྱུར་ཞིང་། །ས་རྣམས་ལ་ནི་སྤྱོད་བྱེད་དེ། །དར་དང་ཀཱ་ཤི་དུ་གུ་ལ། །སྣ་ཚོགས་གོས་དང་མུ་ཏིག་ཕྲེང་། །གསེར་དང་ནོར་བུས་ཡན་ལག་བརྒྱན། །གང་དག་ལྷ་འདྲའི་སྐྱེས་བུ་དཔལ། །
བསོད་ནམས་བཞོན་པ་ལ་ཞོན་ནས། །དེ་བས་ཡིན་པར་ཤེལ་པར་གྱིས། །ཤིན་ཏུ་ཚེ་རིང་རིགས་བཙུན་ཞིང་། །ལུས་མཛེས་ནད་ཀྱི་འཇིགས་པ་མེད། །ནོར་མང་གཡོག་འཁོར་ཕུན་སུམ་ཚོགས། །བསོད་ནམས་རྣམ་སྨིན་ཆེན་པོ་ཡིན། །གང་ཡང་འཁོར་ལོས་སྒྱུར་བ་མཆོག །བུ་ནི་དཔའ་བོ་སྟོང་
དང་ལྡན། །རྒྱ་མཚོའི་མཚམས་ཀྱི་ས་ལ་དབང་། །དེ་དག་བསོད་ནམས་རིན་པོ་ཆེའི། །འབྲས་བུ་ཡངས་པ་ཆེན་པོ་ཡིན། །སྣ་ཚོགས་པདྨའི་སྟན་ལ་འདུག །ལྷ་དང་ལྷ་དབང་རྟག་ཕྱག་འཚལ། །བརྗིད་ཀྱིས་འཁོར་རྣམས་ཟིལ་གྱིས་གནོན། །ཚངས་པའི་འཇིག་རྟེན་སྣང་བྱེད་པ། །དེ་དག་ཉིད་ཀྱང་
བསོད་ནམས་ལས། །གང་ལ་ལྷ་ཀླུ་ལྷ་མིན་གྲུབ། །དྲི་ཟ་གནོད་སྦྱིན་མི་འམ་ཅི། །མཆོག་ཏུ་གྱུར་པའི་ཚོགས་རྣམས་ནི། །རྟག་ཏུ་ལྷ་དབང་མཆོད་བྱེད་པ། །དེ་ནི་བསོད་ནམས་རིན་པོ་ཆེའི། །འབྲས་བུ་ཡངས་པ་ཆེན་པོ་ཡིན། །གཟུགས་དང་བརྩོན་འགྲུས་བཟོ་རྣམས་ནི། །དབང་མེད་སྤངས་ནས་
མི་རྣམས་ནི། །ལས་ཀྱི་རླུང་གིས་མངགས་ནས་ནི། །འཇིག་རྟེན་ཕ་རོལ་འགྲོ་བ་ན། །བསོད་ནམས་གཅིག་པུ་མཆོག་ཡིན་ཏེ། །རྗེས་སུ་འགྲོ་ཞིང་བདེ་བ་འཆར། །བསོད་ནམས་གཞན་གྱིས་འཕྲོག་མི་ནུས། །དེ་ཕྱིར་བསོད་ནམས་གཏེར་གྱི་མཆོག །གང་གི་སྟོབས་ཀྱིས་རི་རབ་ཀྱང་། །ཕྱོགས་དང་

172-1-181a

ཕྱོགས་སུ་རྣམ་འཐོར་བའི། །འཇིག་པའི་བསྐལ་པའི་རླུང་རྣམས་ཀྱིས། །དེད་ཀྱང་བསོད་ནམས་འཇིག་མི་ནུས། །འཇིག་པའི་བསྐལ་པའི་ཆུ་ཡིས་ནི། །ལྕགས་ཀྱང་དབང་མེད་འཇིག་བྱེད་པ། །རྒྱ་མཚོ་བཞི་ཡི་ཆུ་རྣམས་ཀྱིས། །བསོད་ནམས་བཞུ་བར་ནུས་མ་ཡིན། །འོད་
ཟེར་རབ་ཚ་གསལ་བ་ཡི། །ཉི་མ་བདུན་ཤར་མེ་རྣམས་ཀྱིས། །ས་རྣམས་སྲེག་པར་བྱེད་མོད་ཀྱི། །བསོད་ནམས་གཅིག་པུ་སྲེག་མ་ཡིན། །བསོད་ནམས་ཀྱི་གཏམ་སྟེ་ལྔ་པའོ།།      །།སངས་རྒྱས་སྐུ་གཟུགས་བཞེངས་གསོལ་པ། །དང་པོར་མྱ་ངན་སེལ་བར་བྱེད། །རྩོད་པ་
ཀུན་སྤངས་མཐོང་ན་དགའ། །སྐལ་ལྡན་གཏེར་ཚོགས་དཔལ་དང་ལྡན། །ལུས་སྟོབས་ལྡན་ཞིང་སྙན་པ་དང་། །གཟི་བརྗིད་ལྡན་ཞིང་གཟུགས་མཛེས་ལ། །གསུང་རབ་ཀུན་ལ་མཁས་གྱུར་ཅིང་། །དབང་པོའི་རྟ་ནི་ཐམས་ཅད་ཐུལ། །བློ་ལྡན་སྟོང་དང་ལྡན་པར་འགྱུར། །བཅོམ་ལྡན་
སྐུ་གཟུགས་མཆོད་རྟེན་ལ། །ཕྲ་རབ་རྡུལ་ནི་ཇི་སྙེད་སོང་། །དེ་སྙེད་ས་འོག་ས་སྟེང་འདིར། །དེ་སྙེད་རྒྱལ་པོར་ངེས་པར་འགྱུར། །གཟུགས་དང་གཟུགས་མེད་ཏིང་འཛིན་འགྲུབ། །ཐམས་ཅད་བདེ་བར་མ་ལུས་སྤྱོད། །ཐ་མར་སྐྱེ་རྒའི་རྒུད་སྤངས་ནས། །དེ་དག་བྱང་ཆུབ་གོ་འཕང་ཐོབ། །
བདེ་གཤེགས་སྐུ་གཟུགས་བཞེངས་གསོལ་བ། །མཚན་བཟང་གིས་མཚན་འཁོར་ལོས་སྒྱུར། །སུམ་ཅུ་གཉིས་ལྡན་ལུས་མཛེས་ཐོབ། །ཉེས་པའི་དགྲ་འཇོམས་རྒྱལ་བར་འགྱུར། །དབང་པོ་རྣམས་ནི་མ་ཚང་མེད། །དཔལ་ལྡན་ངན་འགྲོ་རྣམས་ལས་རིང་། །མི་ཡི་རིགས་སུ་སྐྱེ་འགྱུར་
ཞིང་། །ངག་ནི་བཙན་པ་ཉིད་དུ་འགྱུར། །སྐྱེ་བར་ཐོས་དང་དྲན་ལྡན་བརྟན། །མངོན་པར་འདོད་པར་འབྱུང་འགྱུར་ཞིང་། །གནས་ལ་མངོན་པར་དད་པ་དང་། །འདོད་ཆགས་སོགས་ཀྱིས་གནོད་པ་མེད། །འདི་རྒྱལ་རྫོགས་པའི་བྱང་ཆུབ་ཀྱིས། །ཁྱད་འཕགས་ལེགས་པའི་གཞུང་
ལ་བརྟེན། །གང་འདི་རྒྱལ་བའི་སྐུ་གཟུགས་བཞེངས། །སངས་རྒྱས་སྐུ་འམ་མཆོད་རྟེན་ནམ། །བཞེངས་བྱེད་སྲོག་དང་ལྡན་པ་དེ། །བྲན་དང་དབུལ་པོར་མི་སྐྱེ་ཞིང་། །མངག་གཞུག་པར་མིན་རིགས་དམན་མིན། །དབང་པོ་རྣམས་ནི་ཚང་བར་འགྱུར། །སྐུ་གཟུགས་ཀྱི་གཏམ་སྟེ་དྲུག་

172-1-181b

པའོ།།      །།དྲི་ཞིམ་སྣ་ཚོགས་ཀྱིས་བསྒོས་པས། །བདེ་བར་གཤེགས་ལ་ཁྲུས་གསོལ་བ། །མེ་ཏོག་དྲི་ཡིས་ཡན་ལག་མཛེས། །རབ་ཏུ་དགའ་བའི་ཡིད་ཀྱིས་སུ། །རོལ་མོའི་སྒྲ་ནི་སྙན་པ་ཡིས། །དལ་གྱིས་འབབ་དང་སྟེགས་འགྲུན་བརྗིད། །གསེར་གྱི་རང་བཞིན་པདྨ་ཡི། །
གེ་སར་རྡུལ་གྱིས་ཁྱབ་པ་རུ། །ཁྱུས་གསོལ་གང་ཞིག་མཆོད་བྱེད་པ། །དེ་དག་རྙོག་པ་ཐམས་ཅས་ཀྱི། །དྲི་མ་བཀྲུས་ནས་ཐར་པ་ཐོབ། །ལྷ་ཡི་བུ་མོ་ནུ་འབུར་རྒྱས་མཐོང་ཞིང་། །རྐེད་པ་ཡངས་བ་ལ་འབབ་གཡོ་བ་དང་། །འཛམ་བུའི་གསེར་འདྲའི་པདྨའི་གེ་སར་གྱི། །རྡུལ་རྣམས་
གཏོར་བ་ཡིས་ནི་དྲི་ཞིམ་ལ། །དལ་གྱིས་འབབ་པའི་ནང་དུ་ལྷ་ཡི་ཚོགས། །རྒྱུན་དུ་ཆུ་རྣམས་ལ་ནི་རྩེ་བྱེད་པ། །གང་ཞིག་དགའ་བ་སྣ་ཚོགས་དྲི་ཞིམ་ཆུས། །རྗེ་བཙུན་ཁྲུས་གསོལ་པ་ཡི་འབྲས་དེ་ཡིན། །གླ་རྩི་ག་བུར་ཙནྡན་གུར་ཀུམ་བསྒོས། །དྲི་ཞིམ་ཆུ་ནི་ཡིད་འོང་བ། །ཁ་དོག་དཀར་སེར་
བྱེ་བྲག་གིས། །ཡིད་འོང་ཐུབ་པ་ཁྲུས་གསོལ་འདིར། །སེམས་ཀྱི་དྲི་མ་སྤངས་ནས་ནི། །དེ་ནི་འགྲོ་བའི་བླ་མར་འགྱུར། །ཁྲུས་ཀྱི་གཏམ་སྟེ་བདུན་པའོ།།      །།ཁྲུས་བྱེད་ལྷ་ཡི་བུ་མོ་མཆོག །རྐེད་ལྡན་བརླ་དང་ནུ་མ་རྒྱས། །འདབ་སྐྱེས་མགོ་ལྕོགས་རྒྱས་འཐོར་ཞིང་། །ལྷ་
དབང་དལ་འབབ་ཁྲུས་བྱེད་ཅིང་། །མཛེས་ཤེས་འདོད་པས་གཡོ་བ་ནི། །འགྲོ་མཆོག་ཡང་ཡང་མཉེས་བྱས་ཡིན། །དེ་ནི་སྤོས་ཆུ་རོལ་མོ་དང་། །བདུག་པ་དང་ནི་མེ་ཏོག་ཕྲེང་། །སྦྱིན་པ་བཏང་བའི་འབྲས་བུ་ཡིན། །གང་ཞིག་འཁོར་ལོས་སྒྱུར་རྒྱལ་ལ། །མཁའ་ལ་གུར་ཀུམ་སྤྲིན་ཚོགས་དང་། །
ག་བུར་བྱི་ནི་ཆུ་རྒྱུན་དང་། །མ་ལ་ཡ་ཡི་ཙནྡན་བཞིན། །རྫ་རྔ་པི་ཝང་རྔ་མཆོག་གི། །བདེ་བར་གཤེགས་མཆོག་མཆོད་བྱེད་པ། །ལྷ་དང་མི་ཡི་སྒྲ་རྣམས་ཐོས། །ཁྱད་འཕགས་ལྷ་ཡི་རྣ་བ་ཐོབ། །གུར་ཀུམ་ལ་སོགས་པའི་གཏམ་སྟེ་བརྒྱད་པའོ།།      །།རྟ་གླང་རྐང་ཐང་ཤིང་རྟ་དང་། །རིན་ཆེན་
སྣ་བདུན་རྣམས་དང་ནི། །དཔའ་བོ་བུ་སྟོང་དང་བཅས་པར། །མཁའ་ལ་འཁོར་ལོས་སྒྱུར་འགྲོ་ཞིང་། །ཟླ་བ་ལྟ་བུའི་གདུགས་ཀྱིས་ནི། །ཉི་མའི་འོད་ཟེར་སྒྲིབ་བྱེད་ཅིང་། །འབྲས་བུ་མང་ལ་རྒྱ་ཆེ་བ། །གདུགས་ཕུལ་བ་ལས་བྱུང་བ་ཡིན། །བུང་བ་ཡིད་འོང་སྒྲ་ཡིས་བསྐྱོད། །མེ་ཏོག་གཡོ་བ་

172-1-182a

འཁོར་བར་བཀོད། །ཁ་དོག་སྣ་ཚོགས་དྲི་ཞིམ་པའི། །མེ་ཏོག་ཚོགས་ཀྱིས་རི་མོར་བྲིས། །གདུགས་མཛེས་སྣ་ཚོགས་དར་གྱིས་བརྒྱན། །མཆོད་རྟེན་རྣམས་ལ་ཕུལ་བ་ཡིས། །འཁོར་ལོས་སྒྱུར་བ་ས་སྐྱོང་བ། །གླིང་བཞིའི་དབང་ཕྱུག་དེ་ཡིས་འཐོབ། །ཉི་
མའི་འོད་ཟེར་གསེར་གདུགས་ཐོགས། །དཔལ་ལྡན་དུལ་བའི་གླང་པོ་མཆོག །རིན་ཆེན་དུ་མས་བརྒྱན་པ་ཞོན། །རྫུ་འཕྲུལ་བརྒྱ་བྱིན་དང་འགྲན་པའི། །གླིང་བཞི་ཡི་ནི་འཁོར་ལོས་སྒྱུར། །ས་རྣམས་མ་ལུས་སྐྱོང་བར་བྱེད། །དེ་དག་བདེ་གཤེགས་སྐུ་གདུང་ལ། །མེ་ཏོག་གདུགས་
ཕུལ་འབྲས་བུ་ཡིན། །གདུགས་ཕུལ་བའི་གཏམ་སྟེ་དགུ་པའོ།།      །།བདེ་བར་གཤེགས་པའི་འཁྲུངས་གནས་དང་། །དེ་ཡི་ཡིད་ཙམ་བཞུགས་པའི་གནས། །རབ་ཏུ་གསལ་བའི་འགྲམ་གྱུར་པ། །ནུས་པ་ཀུན་གྱིས་གདུང་སྣོད་སྐུ། །ཤིན་ཏུ་ཁྱད་འཕགས་གཙུག་ཏོར་
མཐོ། །སྐུ་གཟུགས་བཞེངས་ནས་ལེགས་སྦྱངས་ལ། །སྐྱེ་བོ་གང་གིས་སྐུ་བཞེངས་པའི། །ནང་དུ་རིང་བསྲེལ་བཅུག་བྱས་ན། །ཀུན་ནས་བརྒྱ་བྱིན་ལས་འཕགས་པའི། །མི་དབང་གླིང་བཞི་རྣམས་སུ་ནི། །དཔལ་དང་ལྡན་པས་ལོངས་སྤྱོད་ནས། །མཐའ་རུ་རྣམ་དག་གོ་འཕང་ཐོབ། །རྒྱལ་
བའི་སྐུ་གདུང་བཅུག་ལས་ཡིན། །ཟླ་བ་དང་འདྲ་བལྟ་ན་སྡུག །སྨིན་མ་ལེགས་ཤིང་མིག་དཀྱུས་རིང་། །མིར་སྐྱེས་གསེར་དང་ནོར་བུར་ལྡན། །བཟོད་ཅིང་དེས་པ་དང་ལྡན་པ། །རྒྱ་མཚོས་གཏུགས་པའི་ས་རྣམས་ནི། །སྐྱོང་བྱེད་འཁོར་ལོས་སྒྱུར་རྒྱལ་ཡང་། །དེ་དག་སངས་རྒྱས་སྐུ་གཟུགས་
ནི། །རིང་བསྲེལ་དང་བཅས་གུས་པས་འཐོབ། །རིང་བསྲེལ་གྱི་གཏམ་སྟེ་བཅུ་པའོ།།      །།བདེ་བར་གཤེགས་པ་མཆོག་རྣམས་ཀྱི། །ཕོ་བྲང་མཆོག་ནི་བརྒྱན་བྱེད་པ། །གསེར་གྱི་མདོག་དང་ལྡན་འགྱུར་ཞིང་། །ནད་རྣམས་ཀུན་ལས་གྲོལ་བར་འགྱུར། །ལྷ་དང་མི་
ལས་ཁྱད་འཕགས་ཤིང་། །ཉི་མའི་འཁོར་ལོ་ལྟ་བུར་མཛེས། །ནོར་དང་གསེར་ནི་མང་བ་དང་། །རྒྱལ་པོའི་རིགས་ཀྱི་རྒྱལ་བར་འགྱུར། །འཇིག་རྟེན་གསུམ་གྱིས་མཆོད་པ་ཡི། །སངས་རྒྱས་ལ་ནི་གང་ཞིག་འདིར། །མཎྜལ་མེ་ཏོག་བཅས་བྱེད་པ། །འགྲོ་བའི་བདག་པོ་ཚེ་རིང་ཞིང་། །

172-1-182b

སྣ་ཚོགས་ནད་ཀྱི་འཇིགས་ལས་གྲོལ། །གང་ཡིན་དེ་ཡིས་སྐད་ཅིག་ཐོབ། །བདེ་གཤེགས་མཎྜལ་བྱེད་དེ་དག །ཕ་རོལ་ཕྱིན་དྲུག་ཐོབ་འགྱུར་ཏེ། །ཆུ་དང་ས་བསྲེས་བཏང་སྦྱིན་པ། །གྲོག་མོ་སོགས་སེལ་ཚུལ་ཁྲིམས་ཏེ། །བསྲེས་ནས་ཉེས་པ་བཟོད་པ་ཡིན། །འབད་པ་བྱེད་པ་བརྩོན་འགྲུས་
ཡིན། །སྐད་ཅིག་དེ་ལས་རྩེ་གཅིག་ཏུ། །སེམས་འཛིན་བྱེད་པ་བསམ་གཏན་ཡིན། །ལེགས་པར་གཟོབ་པ་ཤེས་རབ་པོ། །སྣ་ཚོགས་བསོད་ནམས་ཀྱིས་བརྒྱན་ལ། །ས་གཞི་བྲིས་པ་འབུལ་བྱེད་པ། །ལྷ་ཡི་བདེ་བ་ཐམས་ཅད་དང་། །ལོངས་སྤྱོད་མཆོག་དང་ལྡན་འགྱུར་ཞིང་། །མིར་སྐྱེས་གསེར་
ལས་ལྷག་པ་ཡི། །ཁ་དོག་དང་ལྡན་མཛེས་པ་དང་། །པདྨའི་མདོག་ལྟར་ཡན་ལག་ཚང་། །མིག་ནི་དཀྱུས་རིང་མཛེས་པར་འགྱུར། །མཎྜལ་གྱི་གཏམ་སྟེ་བཅུ་གཅིག་པའོ།།      །།པངྨའི་འདབ་འདྲའི་ལག་པ་མཛེས། །འོད་གསལ་ཁ་དོག་དྲི་བཟང་ལྡན། །རོ་ཞིམ་རེག་ན་བདེ་བ་
དང་། །ལྷ་དང་མི་ཡི་ཁང་བཟངས་ན། །འོད་གསལ་སེར་གྱི་གཞོང་པ་རུ། །ལྷ་ཡི་བདུད་རྩིས་བཀང་ཟ་བ། །དེ་དག་སངས་རྒྱས་ལ་སོགས་པའི། །དགེ་འདུན་ཡུལ་དུ་ལྷགས་པ་ལ། །ཞལ་ཟས་དྲངས་པའི་འབྲས་བུ་ཡིན། །རྡོ་རྗེ་གདན་ལ་བཞུགས་ནས་ནི། །འདོད་པའི་དགྲ་དང་བཅས་པ་ཡི། །
ཚོགས་ནི་བྱམས་པས་ངེས་འཕམ་མཛད། །གང་ཞིག་མཐར་ཐུག་དཀའ་བའི་ཡུལ། །མཐའ་མེད་པར་ནི་སྤྱོད་འགྱུར་བའི། །ཉོན་མོངས་དཀའ་བའི་དགྲ་ལས་རྒྱལ། །ཕུང་པོའི་བདུད་ཀྱང་རབ་བཅོམ་ནས། །འཆི་བདག་བདུད་ལ་མངའ་བརྙེས་པ། །ཞལ་ཟས་ཕུལ་བར་གྱུར་པས་ཡིན། །རོ་རྣམས་
བྲོ་བའི་མཆོག་དང་ནི། །ཡན་ལག་ཚང་ཞིང་ཡོངས་རྫོགས་ལྡན། །བདེ་ཞིང་དཔལ་ལྡན་སྟོབས་དང་ལྡན། །ཚེ་དང་སྟོབས་དང་ཁ་དོག་དང་། །གཟུགས་བཟང་བ་དང་ལྡན་པ་ནི། །མཁས་པས་ཟས་མཆོག་བཏང་ལས་བྱུང་། །སྟོབས་དང་བརྩོན་འགྲུས་ལྡན་པ་ཡི། །རྣམ་གྲངས་ལས་ནི་ངེས་
པར་རྒྱལ། །ཡང་དག་དཔལ་ཐོབ་མི་དབང་གིས། །རོ་ལྡན་ཁ་ཟས་ལོངས་སྤྱོད་པ། །རྟག་ཏུ་ཟས་མཆོག་སྦྱིན་དེས་ཡིན། །ཟས་ཀྱི་གཏམ་སྟེ་བཅུ་གཉིས་པའོ།།      །།གཡོ་ཞིང་ཨུཏྤལ་གྱིས་བསྒོས་པ། །དྲི་མེས་པདྨ་རཱ་ག་བཞིན། །ཡིད་འོང་གསེར་གྱི་སྣོད་དུ་བླུགས། །

172-1-183a

དྲི་ཞིམ་ཙནྡན་གྱིས་བསྒོས་མངར། །ཡིད་དུ་འོང་དང་བདར་ཞིང་འཐུང་། །ཅུང་ཟད་མིག་ནི་ཟངས་མདོག་འདྲ། །གླུ་ལེན་སྒྲ་དང་དེས་ལྡན་པའི། །མི་མཆོག་དེ་རྣམས་སྐོམ་རྣམས་ནི། །སྦྱིན་པ་བྱིན་པའི་འབྲས་བུ་ཡིན། །ཨིནྡྲ་ནཱི་ལ་བཻ་ཌཱུརྱ། །རིན་ཆེན་མཆོག་རྣམས་
ཀྱིས་སྤྲས་པའི། །གསེར་གྱི་སྣོད་ནི་གང་ཡིན་པར། །ལྷ་གང་ལྷ་ཡི་བུ་མོ་ནི། །བྲང་གི་དཀྱིལ་ན་ནུ་མ་ནི། །བུམ་པ་ལྟ་བུའི་འབུར་ལྡན་པའི། །རབ་མཛེས་གཅུགས་དང་ལྷན་ཅིག་ཏུ། །སྦྲང་རྩི་ལྟར་མངར་བཏུང་འཐུང་བ། །ཡོན་ཏན་ལྡན་པའི་ཚོགས་ལ་ནི། །བཏུང་བ་ཡིད་འོང་བྱིན་པ་ཡི། །
འབྲས་བུ་ཡིན་པར་མཁས་རྣམས་གསུངས། །གང་ཞིག་ཁ་དོག་དྲི་ཞིམ་སོགས། །ཚོགས་ལྡན་སྐོམ་པའི་སྡུག་བསྔལ་སེལ། །བད་ཀན་རླུང་དྲག་རབ་ཞི་བྱེད། །ཁ་ར་པི་པི་ལིང་བསྲེས་ཚོད། །ཙནྡན་ལྟ་བུར་ཚ་བ་སེལ། །ཟླ་བའི་འོད་ཟེར་དང་ལྡན་པའི། །སྣོད་དུ་བླུགས་ནས་དེ་དག་གིས། །གུས་
པར་དགེ་འདུན་ལ་ཕུལ་བས། །ཕ་རོལ་གྱི་ནི་སྐྱེ་གནས་སུ། །ལྷ་ཡི་བཏུང་བ་ཐོབ་པར་འགྱུར། །མངར་ཞིམ་མངར་མཆོག་གུས་པ་ཡིས། །བཏུང་བ་ཚོགས་མཆོག་ལ་ཕུལ་བས། །ལྷ་དང་མི་ཡི་གནས་རྣམས་སུ། །ལྷ་ཡི་བུ་མོ་མཆོག་རྣམས་དང་། །ཡུན་རིང་བཏུང་བ་ལྷན་ཅིག་འཐུང་། །གང་ཞིག་
ས་གནས་མི་རྣམས་ཀྱིས། །དང་བའི་དད་པའི་ཡིད་ཀྱིས་ནི། །དགེ་འདུན་ལ་ནི་བཏུང་བ་མཆོག །དུས་ལ་བབ་པར་དྲངས་པ་ཡིས། །འཁོར་བའི་རི་ཁྲོད་གནས་པ་ནི། །རྟག་ཏུ་བཏུང་བའང་ཞིམ་བཟང་ཐོབ། །བཏུང་བའི་གཏམ་སྟེ་བཅུ་གསུམ་པའོ།།      །།གང་ཞིག་སྔོ་སེར་ལྗང་དམར་
དཀར། །སྣ་ཚོགས་ཁ་དོག་འོད་བཟང་བ། །མཛེས་གསལ་གོས་ཀྱི་ཕྲེང་བ་ནི། །ཡོན་ཏན་མཆོག་དང་ལྡན་པ་ཡི། །འཇིག་རྟེན་བླ་མ་ལ་ཕུལ་བས། །བསྔགས་པའི་གོས་མཆོག་ཐོབ་པར་འགྱུར། །གང་ཞིག་དགེ་འདུན་མཆོག་སོགས་ལ། །གང་ཞིག་དད་དང་གུས་པ་ཡིས། །གོས་ཀྱི་ཕྲེང་བ་འབུལ་
བྱེད་པ། །དེ་ནི་ངོ་ཚ་ཤེས་གོས་དང་། །མཆོག་ཏུ་གྱུར་པའི་ཆོས་ཀྱི་གོས། །ཉོན་མོངས་གཉེན་པོའི་ཆོས་གོས་འཐོབ། །ཁ་དོག་སྣ་ཚོགས་ཀྱིས་སྤྲས་པའི། །སྔོན་པོ་སེར་པོ་དཀར་པོ་དང་། །གཞན་ཡང་དམར་པོ་ཡིད་འོང་བ། །ཤིན་ཏུ་མཛེས་པའི་གོས་དག་དང་། །ཆོས་གོས་ཕྲེང་བ་འབུལ་བྱེད་པ། །

172-1-183b

བདེ་འགྲོ་ཡི་ནི་བདེ་བར་འགྲོ། །གཟུགས་དང་ལྡན་ཞིང་ཡིད་འོང་ལ། །ལྷ་ཡི་གོས་ནི་ཟད་མེད་དང་། །ངོ་ཚ་ཤེས་པའི་གོས་ཀྱིས་བརྒྱན། །བདག་བློ་ངང་གིས་མཁས་པ་དང་། །དེ་ནི་ཆོས་ཀྱི་དབང་ཕྱུག་འགྱུར། །གོས་ཀྱི་གཏམ་སྟེ་བཅུ་བཞི་པའོ།།      །།མེ་ཏོག་བཟང་པོ་དགེ་འདུན་ལ། །
རབ་ཏུ་འཐོར་ཞིང་མཆོད་བྱེད་པ། །བརྒྱ་བྱིན་ལས་ལྷག་ལོངས་སྤྱོད་ལྡན། །པདྨའི་དབང་པོ་ལྟ་བུར་མཛེས། །མཆོག་ཏུ་གྲགས་པ་དང་ལྡན་ཞིང་། །རྟག་ཏུ་དེ་ནི་སྐད་ཅིག་གིས། །དགྲ་ལས་རྣམ་པར་རྒྱལ་བར་འགྱུར། །ས་རྣམས་ལ་ནི་སྤྱོད་བྱེད་པའི། །རིན་ཆེན་མཆོག་གི་མིར་གྱུར་པས། །
སྤོས་མཆོག་དང་ནི་དྲི་བཟངས་ཀྱིས། །རྒྱལ་བ་རྣམས་ལ་འབུལ་བྱེད་པ། །ལུས་ཀྱི་གྲགས་པའི་དྲི་ཡིས་ཁྱབ། །ཨུཏྤལ་སྔོ་དང་མཉམ་པ་ཡི། །མིག་ནི་དྲི་མེད་དཀྱུས་རིང་མཛེས། །བཻ་ཌཱུརྱ་དང་མུ་ཏིག་དང་། །རིན་པོ་ཆེ་ཡིས་ཡན་ལག་བརྒྱན། །ལུས་ཀུན་ཀུ་ཤའི་གོས་ཀྱིས་གཡོགས། །སྐྱེ་བ་ཀུན་
དུ་མི་ཡི་མཆོག །གཟུགས་དང་ལྡན་པར་གྱུར་པ་ནི། །དགེ་འདུན་དྲི་བཟང་ཕུལ་བ་ཡིན། །སྣ་ཚོགས་པ་ཡི་སྨན་རྣམས་ནི། །དེ་དག་དགེ་འདུན་ལ་ཕུལ་བས། །མཛེ་ལ་སོགས་པའི་ནད་རྣམས་ཀྱི། །སྡུག་བསྔལ་མི་བཟད་པ་ལས་གྲོལ། །བཞིན་ནི་མཛེས་ཤིང་གསེར་རྣམས་དང་། །མཉམ་ཞིང་ཁ་དོག་
ཡིད་དུ་འོང་། །རྒྱལ་པོ་ཡི་ནི་འཚེ་བ་རྣམས། །གང་ཡིན་པ་དང་བྲལ་བ་ཐོབ། །མེ་ཏོག་ལ་སོགས་པའི་གཏམ་སྟེ་བཅོ་ལྔ་པའོ།།       །།ས་བདག་འཁོར་ལོས་སྒྱུར་གང་ལ། །ཐལ་མོ་སྦྱར་བ་བྱས་ནས་ནི། །མཁུར་བ་རྣ་རྒྱན་མཛེས་ལྟུང་བས། །གུས་ལྡན་ལེགས་པར་སྤྱི་བོ་ཡིས། །ལན་མང་དུ་ནི་
ཕྱག་བྱེད་པ། །དེ་དག་སངས་རྒྱས་ཕྱག་བྱེད་པའི། །འབྲས་བུ་ཡིན་ཞེས་མཁས་རྣམས་སྨྲ། །སྐྱེས་པ་ཙམ་གྱིས་གཙོར་འགྱུར་བའི། །རྟག་ཏུ་མཐོན་པོའི་རིགས་སྐྱེ་ཞིང་། །རྟ་དང་གླང་པོས་རྒྱུ་བྱེད་པ། །དེ་དག་བླ་མ་འཕགས་པ་ལ། །ལེགས་པར་ཕྱག་ནི་བྱས་པས་ཡིན། །སྙན་པ་ཡིས་ནི་ཁྱབ་འགྱུར་
ཞིང་། །ངེས་པར་ལེགས་པར་འཛིན་པ་དང་། །གསལ་བར་བྱེད་པའི་འོད་ཀྱིས་ནི། །སྡུག་བསྔལ་ཐམས་ཅད་སྤོང་བྱེད་ཅིང་། །ནད་ནི་ཐམས་ཅད་འཇོམས་པར་བྱེད། །འཇིག་རྟེན་དུ་ནི་བདེ་འགྲོར་ངེས། །མི་དབང་གིས་ནི་རྒྱུན་དུ་འགྱུར། །འབྲས་བུ་དཔལ་དང་ལྡན་པ་ཡང་། །ཐུབ་དབང་ཕྱག་བྱས་

172-1-184a

པ་ལས་ཡིན། །འཁོར་ལོས་སྒྱུར་རྒྱལ་སྟོབས་གྲགས་ལྡན། །ཡན་ལག་སུམ་ཅུ་གཉིས་མཚན་ལྡན། །རྒྱལ་འགྱུར་ས་སྟེངས་གཙོ་བོ་དེ། །སངས་རྒྱས་ལ་ནི་ཕྱག་བྱས་པའི། །འབྲས་བུ་ཡིན་པར་བློ་ལྡན་གསུང་། །དེ་ལྟར་ཡོན་ཏན་ཚོགས་ཤེས་པས། །ལུས་འདི་འཇིག་
པར་ཤེས་ནས་ནི། །མཁས་པས་སངས་རྒྱས་ཕྱག་བྱ་ཞིང་། །ལུས་ཀྱི་ལས་ནི་ལེགས་པར་སྤྱད། །ཕྱག་གཅིག་འཚལ་བར་གྱུར་པ་ཡིས། །འཁོར་བ་སྤོང་བའི་རྒྱུ་ཐོབ་ཅིང་། །འཁོར་བའི་འཇིགས་མཐོང་གུས་པ་ཡིན། །དེ་ལྟར་སུ་ཞིག་ཕྱག་མི་བྱེད། །ཕྱག་གི་གཏམ་སྟེ་བཅུ་དྲུག་པའོ།།    །།
ཀྲྀཥྞ་ས་ར་ལྟར་མཛེས་གཟུགས། །སྟོབས་ལྡན་འཇམ་ཞིང་ཤིན་ཏུ་སྣུམ། །དགུན་དུས་བསྲོ་ཁང་གོས་བཟང་བགོས། །ཡིད་འོང་མཛེས་མ་ལ་འཁྱུད་ནས། །མི་དབང་གང་ཞིག་རྩེ་བྱེད་ཅིང་། །རོ་མཆོག་སྣ་ཚོགས་ལྡན་པ་ནི། །རིན་ཆེན་སྣོད་བླུགས་འཐུང་བ་ནི། །དེ་དག་སྒྲོན་མ་ཕུལ་བ་ཡིས། །ཤིན་ཏུ་
འབྲས་བུ་མངོན་ཡིན་པར། །ཡང་དག་རྫོགས་སངས་རིན་ཆེན་གསུངས། །འབར་ཞིང་མེ་ལྕེ་རྒྱས་དང་ལྡན། །ཁང་པའི་ནང་དུ་མེ་འབར་གསལ། །དགུན་དུས་གྲང་བ་སེལ་བྱེད་པ། །སྣང་བ་ཐུབ་པའི་དབང་པོ་ནི། །མཆོག་ཏུ་གྱུར་ལ་ཕུལ་བ་ཡིས། །ལྷ་དང་མི་ཡི་འཇིག་རྟེན་ན། །གསལ་ཞིང་རབ་ཏུ་
འབར་གྱུར་དང་། །དྲི་ཟ་ལྷ་མིན་མི་འམ་ཅི། །བྱད་བཞིན་མཛེས་དང་ལྷན་ཅིག་ཏུ། །སྟོན་ཟླ་དང་འདྲ་རབ་མཛེས་པ། །སྡུག་པ་པང་བར་འཁྱུད་ནས་ནི། །ལུས་ནི་ཡིད་དུ་འོང་བ་དང་། །མཐོ་རིས་སུ་ནི་སྤྱོད་བྱེད་པ། །དེ་དག་གང་ཚེ་འཕགས་ཚོགས་ལ། །སྣང་བ་དང་བས་ཕུལ་བ་ཡིན། །རྐུན་མ་ལས་
རྒྱལ་བཞོན་པར་ལྡན། །ས་རྣམས་མ་ལུས་རྗེས་སུ་སྐྱོང་། །བྱད་བཟང་གསེར་གྱིས་ཡན་ལག་བརྒྱན། །དེ་དག་གིས་ནི་སྣང་བ་རྣམས། །ཕུལ་བའི་འབྲས་བུ་འདོ་དག་ཡིན། །སྣང་བའི་གཏམ་སྟེ་བཅུ་བདུན་པའོ།།      །།རི་རྣམས་ཀྱིས་ནི་བསྒྲིབས་པ་དང་། །མཆོག་ཏུ་རིང་ན་གནས་
པ་དང་། །ཤིན་ཏུ་ཕྲ་བའི་དངོས་པོ་དང་། །མཚན་མོ་སྨག་གིས་བསྒྲིབས་པ་དག །གང་ཚེ་ལག་མཐིལ་གནས་པ་ལྟར། །དགེ་སློང་མ་འགགས་པ་ཡིས་མཐོང་། །དེ་ནི་བདེ་བར་གཤེགས་པ་ལ། །ཞུགས་མར་ཕུལ་བའི་འབྲས་བུ་ཡིན། །སྤྱན་གྱིས་དངོས་ཀུན་གཟིགས་པའི་ཕྱིར། །བདེ་གཤེགས་

172-1-184b

མར་མེ་ཕུལ་བ་ཡིས། །སངས་རྒྱས་ཉིད་ནི་མཉེས་ཞེས་གྲགས། །ཕུལ་བ་བཅོམ་ལྡན་གང་ཞེ་ན། །ཐུབ་དབང་དྲི་མེད་སྤྱན་ལ་ཕུལ། །རིང་དང་ཕྲ་དང་བསྒྲིབས་པ་དང་། །དཔག་ཚད་ཀྱིས་ཆོད་མཐོང་ལ་ལྟོས། །རྒྱལ་ལ་ཞུགས་མར་ཕུལ་བ་ཡི། །དེ་འབྲས་ཡིན་པར་ཐུབ་པས་གསུངས། །ས་
བདག་རྒྱལ་པོ་གང་ཡིན་པ། །ཟླ་བ་ལྟ་བུའི་གཟུགས་ལྡན་པ། །ཨུཏྤལ་ལྟ་བུར་མིག་དཀྱུས་རིང་། །གང་ཞིག་ལྷ་ཡི་འཇིག་རྟེན་ན། །གསེར་མདོག་འོད་ཀྱིས་སྣང་བ་ལྟར། །རང་གི་འོད་ཀྱིས་སྣང་བྱེད་པའི། །འཁོར་ལོས་སྒྱུར་བའི་རྒྱལ་པོ་ནི། །ནོར་བུ་བརྒྱ་ཕྲག་འོད་གཟེར་གྱིས། །ས་རྣམས་རྒྱུ་ཞིང་
སྣང་བྱེད་པ། །དེ་དག་ཤཱཀྱ་སེང་གེ་ལ། །གུས་པར་མར་མེ་ཕུལ་བ་ཡིས། །རྒྱ་ཆེར་འཕེལ་བར་འགྱུར་བ་ཡིན། །ལྷ་གང་འཇིག་རྟེན་གསལ་བྱེད་ཅིང་། །ཨུཏྤལ་ལྷ་ཡི་མིག་ལྡན་ལ། །སྨིན་མ་ལེགས་ཤིང་གསེར་མཆོག་ལྟར། །མིག་སྟོང་དང་ནི་ལྡན་པ་ཡི། །བརྒྱ་བྱིན་ལྷ་ཡི་བདག་པོ་ཉིད། །ལྷ་ཡི་
སྟན་ལ་འདུག་པ་དང་། །གང་ཞིག་འདོད་བྲལ་ཚངས་པ་ནི། །འོད་གསལ་ལྷ་མཆོག་ཕྱག་བྱེད་ཅིང་། །ལྷ་ཡི་ཤིང་རྟ་གཡོ་བྱེད་པ། །སྟོན་པ་ཡི་ནི་རིང་བསྲེལ་ལ། །མར་མེའི་ཕྲེང་བ་མིས་ཕུལ་བའི། །འབྲས་བུ་རྒྱ་ཆེན་གྱུར་པ་ཡིན། །མར་མེའི་གཏམ་སྟེ་བཅོ་བརྒྱད་པའོ།།      །།མི་དབང་དུས་
ནི་ཐམས་ཅད་དུ། །ཉམས་དགའ་བ་ཡི་ཁང་བཟངས་མཆོག །རོལ་མོའི་གནས་ཀྱི་ཉམས་དགའ་བར། །འཚོ་ཞིང་རྒྱལ་བའི་སྒྲ་སྒྲོགས་པར། །བཙུན་མོའི་འཁོར་དང་རོལ་བྱེད་པ། །གྲང་བ་སེལ་བའི་ཁང་པ་ནི། །ཕྱོགས་བཞི་ནས་ནི་བྱོན་པ་ཡི། །དགེ་འདུན་བཞུགས་གནས་ཕུལ་བ་ཡིན། །
ཐུབ་པ་འཕགས་པའི་དགེ་འདུན་བཅས། །གཙུག་ལག་ཁང་གི་དོན་དུ་ནི། །ཚིག་གིས་རབ་ཏུ་བསྐུལ་བ་དང་། །ཚོགས་པ་ཡིས་ནི་གྲོགས་བྱེད་ཅིང་། །ངེས་པར་དུས་སུ་འགྲོ་བྱེད་པ། །གཉིད་ལོག་པ་འམ་ལངས་པ་ན། །བསོད་ནམས་རྒྱུན་ནི་ཚད་མེད་འཕེལ། །ཤེས་རབ་རྡོ་རྗེའི་མཚོན་ཆ་ཡིས། །
ཕྱིན་ཅི་ལོག་གི་རི་བཅོམ་ནས། །ས་དང་བཅས་པའི་ཁང་བཟངས་འགྱུར། །དགེ་འདུན་ལ་ནི་ཡོ་བྱད་དང་། །ལོངས་སྤྱོད་བཟང་པོ་དང་བཅས་པ། །གཙུག་ལག་ཁང་ནི་གང་ཞིག་བྱེད། །རྣམ་པར་རྒྱལ་བའི་ཁར་བཟངས་ནི། །རིན་ཆེན་མཆོག་གི་རང་བཞིན་གྱི། །རྩིག་པ་ཀ་བ་དང་ལྡན་པའི། །རིན་ཆེན་མཆོག་གི་རང་བཞིན་གྱི། །རྩིག་པ་ཀ་བ་དང་ལྡན་པའི། །མཛེས་

172-1-185a

ལྡན་ལྷན་ཅིག་དུས་ཀུན་དུ། །དེ་ནི་ལྷ་ཡི་འཇིག་རྟེན་འདིར། །ཡུན་རིང་དུ་ནི་མངོན་པར་དགའ། །དཔལ་དང་ལྡན་པའི་བླ་རེ་དང་། །སྣ་ཚོགས་ཀྱི་ནི་གོས་ཀྱིས་སྤྲས། །ཁང་བཟངས་མཆོག་ནི་འོད་འཕྲོ་བ། །ཡང་དག་གནས་པར་གྱུར་པ་ནི། །ཡོན་ཏན་ཚོགས་ལྡན་ཕུལ་བ་
ཡིས། །བརྒྱ་བྱིན་གྱི་ནི་ཁང་བཟངས་མཆོག །རྣམ་པར་རྒྱལ་བྱེད་ཐོབ་པ་ཡིན། །གཙུག་ལག་ཁང་བཞེངས་པའི་གཏམ་སྟེ་བཅུ་དགུ་པའོ།།      །།ཁྱོགས་དང་སྟན་ནི་མཉམ་པ་རུ། །འབོལ་སྟན་ལ་ནི་ཆུང་མ་ནི། །ནུ་མ་རྒྱས་དང་ལྷན་ཅིག་ཏུ། །མལ་སྟན་ལ་ནི་ས་བདག་
ཉལ། །ཉེས་པའི་ཚོགས་སྤངས་དམ་པ་ལ། །དེ་ཡིས་མལ་སྟན་ཕུལ་བ་ཡིན། །རྐང་རྟེན་དང་བཅས་ཁྲི་ལ་ནི། །སྣ་ཚོགས་གོས་ཀྱིས་བརྒྱན་ལ་འདུག །དབྱངས་སྙན་རོལ་མོ་དང་མགྲིན་བསྡེབས། །རིན་ཆེན་རང་བཞིན་སྟན་ལ་ནི། །དྲི་ཞིམ་པས་ནི་བྱུགས་པ་ཡི། །དད་ལྡན་མལ་སྟན་
ཆེན་པོ་ལ། །དཔུང་པ་ལ་ནི་མགོ་བརྟེན་ནས། །ཡུན་རིང་ལྷ་ཡི་ཁང་པ་རུ། །འཇིགས་པ་མེད་པར་བདེ་བར་ཉལ། །དེ་དག་མལ་ཆ་སྟན་རྣམས་ནི། །དགེ་འདུན་རྣམས་ལ་ཕུལ་བ་ཡི། །འདི་ནི་འབྲས་བུ་ཡིན་པར་བཤད། །ག་པུར་ཙནྡན་ཨ་ཀ་རུ། །ལུས་བྱུགས་པ་ཡི་ལྷ་མོ་ནི། །ནུ་མ་ཟུང་ལྡན་ལུས་བརྟེན་ནས། །གོས་
མཆོག་འབོལ་སྟན་ལ་རྟག་ཉལ། །དེ་དག་མཆོད་རྟེན་རྣམས་ལ་ནི། །གདུགས་དང་གོས་ཁྲི་ཕུལ་བས་ཡིན། །མལ་ཆ་དང་སྟན་གྱི་གཏམ་སྟེ་ཉི་ཤུ་པའོ།།      །།གླིང་བཞི་ལས་ནི་རྣམ་རྒྱལ་ནས། །སྟོབས་ལྡན་བརྒྱ་བྱིན་གནས་ཡིན་ཏེ། །ང་ལས་ནུ་ཡིས་སུམ་ཅུ་གསུམ། །བདག་
པོའི་སྟན་ཕྱེད་དབང་བྱས་ནས། །འདོད་པའི་བདེ་བའི་དགའ་བ་མྱོང་། །ཞག་བདུན་བར་དུ་དབྱིག་རྣམས་ཀྱི། །ཆར་ནི་ཁང་པར་དཔག་མེད་ཕབ། །དེ་དག་ལྷུང་བཟེད་དུ་གཏོར་བའི། །སྦྱིན་པ་ཆེན་པོ་དེ་ཡི་ནི། །འབྲས་བུ་ངོ་མཚར་ཆེན་པོ་ཡིན། །སྣོད་ནི་དེ་དང་དེག་གིས། །རྒྱུ་བཞི་དག་
ལ་བརྟེན་པ་ཡི། །སྡུག་བསྔལ་ལ་སོགས་བྱེ་བྲག་གི། །འབྲས་བུ་ཐ་དད་ཐ་དད་འགྱུར། །དེ་ཕྱིར་མི་དབང་ཁྱད་འཕགས་རྒྱལ། །ཟླ་བ་ལྟ་བུའི་བཞིན་དང་ནི། །ཨུཏྤལ་ལྟ་བུའི་ཁ་དོག་དང་། །མི་རྣམས་ནང་དུ་རྟག་པར་ནི། །དྲི་མེད་མིག་ལྡན་རོ་སྟོད་ཡངས། ། དགའ་ཞིང་སྟན་དང་མལ་ཆ་

172-1-185b

དང་། །ཟས་དང་སྣོད་དུ་ལྡན་པ་ནི། །མི་རྣམས་སྦྱིན་པས་ཡང་དག་འཐོབ། །མི་མཆོག་གིས་ནི་ནད་པ་དང་། །དམན་པ་དང་ནི་དབུལ་བ་རྣམས། །སྙིང་རྗེ་ཅན་གྱིས་སྦྱིན་བཏང་བས། །དཔལ་ལྡན་ཡང་དག་ཁྱད་འཕགས་འགྲོ། །མི་དབང་བརྒྱ་བྱིན་དང་མཉམ་རྩེ། །དགའ་ཞིང་བུ་དང་བྲན་
གཡོག་བཅས། །ཟླ་བ་དང་འདྲ་བཞིན་གྱི་མཆོག །མིག་ཡངས་ལུས་ནི་ཉི་མ་བཞིན། །གྲགས་པ་སྙན་པ་དག་དང་ལྡན། །དེ་ཡིས་རང་གི་བླ་མ་དང་། །ཕ་མ་རྣམས་ལ་སྦྱིན་ཐམས་ཅད་ཐོབ་པ་ནི། །དེ་ཡིས་རང་གི་བླ་མ་དང་། །ཕ་མ་རྣམས་ལ་སྦྱིན་ལས་བྱུང་། །གར་ཞིག་རྟ་དང་ཤིང་རྟ་གླང་། །ཞོན་
ལ་སྐྱེ་བོའི་ཚོགས་ཕྱིག་འཚལ། །གསེར་གྱི་ཡུ་བ་དང་ལྡན་པ། །ཟླ་བའི་དབྱིབས་དང་ལྡན་པ་ཡི། །ཉི་མའི་འོད་ཟེར་ཟློག་བྱེད་ཐོགས། །མི་དབང་མཆོག་ཏུ་གྱུར་པ་སྟེ། །འཁོར་ལོས་སྒྱུར་བའི་རྒྱལ་པོ་ནི། །ས་རྣམས་དབང་ཕྱུག་དང་བཅས་པའི། །གང་ཞིག་རྒྱལ་པོར་གྱུར་པ་ནི། །ཡང་དག་ཞིང་
ལ་དེ་དག་གིས། །སྦྱིན་པའི་ས་བོན་སྦྱངས་པ་ཡི། །ཡོན་ཏན་མཆོག་གི་འབྲས་དེ་ཡིན། །དམན་པའི་སྣོད་ལ་སྦྱིན་པ་ཡིས། །མང་དུ་བྱིན་ཡང་འབྲས་བུ་ཉུང་། །ཡུར་མཚོར་མའི་སྐྱོན་བཅས་དང་། །རྡོ་བའི་སྟེང་གི་ཞིང་རྣམས་ལ། །ས་བོན་མང་པོ་བཏབ་པ་བཞིན། །འདོད་ཆགས་ཞེ་སྡང་གཏི་
མུག་སྤངས། །ཡོན་ཏན་གྱིས་བརྒྱན་ཞིང་ལ་སྦྱིན། །ཉུང་ངུ་བྱིན་ཡང་མང་དུ་འབྱུང་། །ནྱ་གྲོ་དྷ་ཡི་ས་བོན་བཞིན། །ཞིང་གི་གཏམ་སྟེ་ཉི་ཤུ་གཅིག་པའོ།།      །།གང་གིས་ཆོས་ཀྱི་སྦྱིན་བྱིན་ཞིང་། །བྲི་བ་དང་ནི་ཉན་པ་དང་། །རྟག་ཏུ་དེ་དག་སེམས་ཉིད་དང་། །གལ་ཏེ་ཡང་དག་སྒོམ་བྱེད་
ན། །སྐྱེ་བ་དྲན་པ་རྟག་ཏུ་འཐོབ། །གང་ཞིག་ལྷ་ཡི་འཇིག་རྟེན་ན། །དཔག་བསམ་གྱི་ནི་ཤིང་གི་མཆོག །དོན་རྣམས་ཐམས་ཅད་འགྲུབ་བྱེད་པ། །ལྷ་ཚོགས་བདེ་བའི་མཆོག་གྱུར་པ། །དེ་ནི་བ་མཆོག་བྱིན་པ་ཡི། །རྒྱ་ཆེ་བ་ཡི་འབྲས་བུ་ཡིན། །གང་ཞིག་མངལ་དུ་རྫོགས་པར་ནི། །གཙང་ཞིང་ཡིད་འོང་རོ་མྱང་ལ། །མར་དང་སྦྲང་
རྩི་སྟོབས་དང་ནི། །གང་ཞིག་འོ་མ་འཐུང་ཚེ་ཡང་། །པདྨའི་གེ་སར་མདངས་ལྡན་པ། །ཁུ་འཇོའི་དུས་གང་ཡིན་པར་འཐུང་། །སྐྱེད་རྫོགས་ནས་ཀྱང་དེ་བཞིན་ཏེ། །བདུད་རྩིའི་མཆོག་ཀྱང་འཐུང་བྱེད་པ། །དེ་ནི་བ་མཆོག་བཏང་ལས་བྱུང་། །སེང་གེའི་ཁྲི་ནི་རབ་དགའ་ཞིང་། །མཛེས་པ་གུས་

172-1-186a

པས་ཆོས་ལ་ནི། །རིམ་པ་བཞིན་དུ་དེས་ཕུལ་བས། །གཞིག་པར་མི་ནུས་རྡོ་རྗེའི་གནན། །རབ་མཆོག་སེང་གེའི་ཁྲི་ལ་གཞུགས། །ལྷ་ཀླུ་གྲུབ་པ་ཕྱག་འཚལ་འགྱུར། །གསེར་གྱི་སྣོད་དུ་རྟག་ཏུ་དེར། །རོ་ལྡན་འོ་མ་བླུགས་ནས་ནི། །མི་ཡི་མཆོག་ནི་འཐུང་བྱེད་ཅིང་། །དཔལ་ལྡན་
ཕུན་སུམ་ཚོགས་པ་དང་། །པདྨའི་མདོག་ལྡན་བུད་མེད་རྙེད། །དེ་ནི་མ་ཧེ་མཆོག་བཏང་ཡིན། །རྟག་ཏུ་ནད་པ་ཉམ་ཆུང་ལ། །བཞོན་པ་མཆོག་ནི་སྦྱིན་པ་དང་། །བླ་མ་རྣམས་ནི་མཉེས་བྱས་ནས། །བཙུན་ཞིང་མི་རྣམས་ཀྱིས་བསྟོད་འགྱུར། །གསེར་གྱི་ཆས་ཀྱིས་བརྒྱན་པ་ཡི། །རྟ་ནི་ཡིད་དུ་འོང་བ་ལ། །
མི་མཆོག་རྟག་ཏུ་ཞོན་ནས་རྒྱུ། །ཤིན་ཏུ་རིང་བའི་ཡུལ་རྣམས་སུ། །རྫུ་འཕྲུལ་གྱིས་ནི་འགྲོ་བྱེད་པ། །བཞོན་པ་མཆོག་ནི་ཕྱིན་པ་ཡིས། །དེ་ལྟ་བུ་ཡི་མི་རུ་འགྱུར། །དོ་ཤལ་དང་ནི་དོ་ཤལ་ཕྱེད། །འོག་པག་དང་ནི་ལྡན་པ་ཡི། །ཡིད་འོང་ལྷ་མོ་རྣམས་ལ་རྩེ། །སུམ་ཅུ་གསུམ་བདག་དང་འགྲན་པ། །
ལྟོས་པ་མེད་པར་བྱིན་པ་ལས། །བྱུང་བར་མཁས་རྣམས་རབ་ཏུ་བཤད། །བདུད་ཀྱིས་ཟིལ་གྱིས་མི་ནོན་ཅིང་། །ལེགས་པར་གསུངས་པ་རྟག་ཏུ་ནི། །བདུད་རྩི་ལྟ་བུར་མཉན་པར་གྱིས། །ས་གཞི་ལྟ་བུར་ཆོས་ཀྱི་ཡུམ། །ཉོན་མོངས་དགྲ་ནི་སྤོང་བར་བྱེད། །འཁོར་བའི་བདེ་བ་ཉམས་མྱོང་ཞིང་། །
ཕུན་སུམ་ཚོགས་པ་ཐམས་ཅད་ཀྱི། །རབ་མཆོག་ཉིད་ནི་ཐོབ་པར་འགྱུར། །དུབ་པའི་དུས་ནི་ཐམས་ཅད་དུ། །མཁས་པས་གནས་ནི་ཕུལ་བ་ཡིས། །མཐོ་རིས་ཕྱིན་ནས་རྟོག་ཏུ་དགའ། །བརྒྱ་བྱིན་དང་ནི་ལྷན་ཅིག་ཏུ། །རྟག་ཏུ་དགའ་བ་མྱོང་བར་བྱེད། །འདིར་ནི་སྐྱེད་མོས་ཚལ་ཕུལ་བས། །སྣ་
ཚོགས་པ་ཡི་ཤིང་རྣམས་ལ། །མེ་ཏོག་དྲི་ཞིམ་དང་ལྡན་ཞིང་། །མངོན་པར་མཐོ་བའི་མི་ཐོབ་ནས། །སྐྱེད་མོས་ཚལ་རྣམས་ལོངས་སྤྱོད་ལྡན། །ཆུ་བོ་རྒལ་བར་དཀའ་བ་ཡི། །གནས་སུ་ཟམ་པ་འཛུགས་བྱེད་པ། །མི་དེ་ལོངས་སྤྱོད་དང་ལྡན་པའི། །མཐོ་རིས་གནས་སུ་འགྲོ་བར་འགྱུར། །གསེར་
མདོག་ལྟ་བུའི་ལུས་དང་ལྡན། །ཉམས་དགའ་རྫིང་བུ་བྱེད་པའི་མི། །མཐོ་རིས་གནས་ནི་ཐོབ་པར་འགྱུར། །འཇིག་རྟེན་འདི་རུ་མིར་གྱུར་ནས། །རྒྱལ་པོ་ཡི་ནི་དགའ་བདེ་ཐོབ། །ཁྲོན་པ་དང་ནི་བུ་ཉེན་ཁང་། །སེམས་ཅན་རྣམས་ནི་རྟེན་པ་དང་། །ཐན་པ་གྲང་བ་སྐྱོབ་གྱུར་པ། །བྱེད་པའི་

172-1-186b

མི་མཆོག་གང་ཡིན་པ། །ལྷ་ཡི་བདེ་བ་མྱོང་བར་འགྱུར། །ཉི་མའི་འོད་ཟེར་ཚ་བ་ཡིས། །ཤིན་ཏུ་སྡུག་བསྔལ་ལྡན་པ་ལ། །གང་ཞིག་གདུགས་ནི་སྦྱིན་བྱེད་པ། །གདུགས་དང་འདྲ་བར་དེ་དག་ནི། །དགྲ་ཡི་ཚོགས་ལས་རྒྱལ་འགྱུར་ཞིང་། །རྟག་ཏུ་བདེ་བ་མཆོག་དང་ལྡན། །མཆིལ་ལྷམ་
རྒྱན་གྱིས་བརྒྱན་པ་ནི། །སེམས་ཅན་ཐམས་ཅད་དག་ལ་ནི། །གུས་པ་ཡིས་ནི་སྦྱིན་བྱེད་པ། །དེ་དག་བཞོན་པ་མཆོག་རྣམས་ལ། །ལྷ་དང་མི་ཡི་འཇིག་རྟེན་དུ། །ཡུན་རིང་ཞོན་པར་སྐྱེ་བར་འགྱུར། །ཡོན་ཏན་རྣམས་ནི་སྒྲོགས་པ་ཡིས། །རྒྱལ་བ་མཆོག་གི་སྟོད་བྱེད་པ། །ཐམས་ཅད་
དག་ནི་བཏུད་པ་ཡིས། །ལུས་ཀྱིས་ཕྱག་ནི་འཚལ་བྱེད་པ། །བླ་མར་བརྟེན་པའི་རིགས་སྐྱེ་ཞིང་། །དེ་དག་སོ་སོར་རིག་པ་འཐོབ། །རྫ་རྔ་པི་ཝང་པ་ཊ་ཧས། །བདེ་བར་གཤེགས་མཆོག་མཆོད་བྱེད་པ། །མིར་གྱུར་ནས་ནི་དབྱངས་སྙན་ལ། །སྒྲ་ནི་ཤིན་ཏུ་སྙན་པར་འོས། །ཡིད་དུ་འོང་བའི་
གཟུགས་དང་ལྡན། །བདེ་བར་གཤེགས་པའི་མཆོད་རྟེན་ལ། །དགའ་བས་སྲོག་དང་འཛུགས་བྱེད་ཅིང་། །གདུགས་དང་དྲིལ་བུ་རྣམས་དང་ནི། །གདུགས་ཀྱི་ཕྲེང་བ་འབུལ་བྱེད་པ། །དེ་དག་མིར་ནི་རྒྱ་ཆེ་ཞིང་། །དཔལ་ནི་ཕུན་སུམ་ཚོགས་པ་འཐོབ། །མིར་གྱུར་པ་ནི་མ་ལུས་པའི། །བདག་
པོ་ཉིད་ནི་སྟོབས་དང་ལྡན། །དཔུང་རྒྱན་མུ་ཏིག་རྒྱན་ལྡན་པ། །ས་རྣམས་སྦྱིན་པར་བཏང་བ་ལས། །ཡིན་པ་རུ་ནི་མཁས་པ་འཆད། །མཆོད་རྟེན་དང་ནི་རྒྱལ་བ་ཡི། །སྐུ་མཆོག་རྣམས་ནི་བཞེངས་བྱེད་པ། །གདུགས་ལྡན་སྐུ་གདུང་འཛུག་བྱེད་པ། །མཐོ་རིས་ཡང་དག་འདིར་ཐོབ་ནས། །མི་
རྣམས་ཀྱིས་ནི་བསྟོད་པར་འགྱུར། །གང་ཞིག་དང་པོར་སངས་རྒྱས་ལ། །ས་དང་ལྕི་བས་བྱུགས་ནས་ནི། །མེ་ཏོག་འབྲས་བུ་ཟས་སྐོམ་ཕུལ། །རྟག་ཏུ་མཆོད་པ་བྱེད་པ་ནི། །རྒྱལ་པོའི་མཆོག་ནི་ཐོབ་པར་འགྱུར། །རྒྱ་ཆེན་མར་མེ་སྣ་ཚོགས་དང་། །དྲི་ཞིམ་མེ་ཏོག་བདུག་པ་དང་། །བུ་རམ་
ལ་སོགས་བཏུང་བ་རྣམས། །དགེ་འདུན་ལ་ནི་འབུལ་བྱེད་པ། །དེ་ཡང་ནོར་དང་ལྡན་འགྱུར་ཞིང་། །ལྷ་མིའི་བདེ་བ་དག་དང་ལྡན། །མཆོད་རྟེན་གདུང་བཅས་གཙུག་ལག་ཁང་། །མི་གང་འབད་པས་ཉེན་འཁོར་འཕྱག །ཀུན་ནས་དྲི་མ་མེད་བྱེད་པ། །གསེར་གྱི་ཁ་དོག་འདྲ་བར་འགྱུར། །རྟག་

172-1-187a

ཏུ་སྣང་བ་འདུལ་བྱེད་ཅིང་། །གྲང་དུས་གོས་དང་ཁང་པ་དང་། །རྒྱན་དང་བུ་མོ་བཏུང་བ་བྱིན། །སྐྱེ་གནས་རྣམས་སུ་བདེ་ལྡན་འགྱུར། །ས་སྟེངས་སུ་ནི་ཚེ་རིང་ཞིང་། །ཐམས་ཅད་ནད་ལས་གྲོལ་བར་འགྱུར། །མཉམ་པ་མེད་བའི་བདེ་བ་ཐོབ། །དེ་དག་རྟག་ཏུ་བདེ་དང་ལྡན། །
ལྷ་ཡི་བདེ་བ་སྣ་ཚོགས་པ། །ཉམས་སུ་མྱོང་ཞིང་འབྱུང་འགྱུར་བ། །སྲོག་གཅོད་སྤངས་པ་ལས་ཡིན་པར། །ངེས་པར་མཁས་པ་རྣམས་ཀྱིས་བསྟན། །གཞན་མཐོང་བརྣབ་སེམས་མི་བྱེད་པ། །ཆོམ་རྐུན་ལས་ནི་དབེན་གྱུར་ཅིང་། །རྫས་ནི་ཡོངས་སུ་སྲུང་བར་བྱེད། །གསེར་དང་དཔག་མེད་ཕུན་
ཚོགས་ཐོབ། །རྐུན་མ་བརྒྱ་ཕྲག་དག་གིས་ནི། །མི་དབང་ལས་ནི་འབྲལ་མི་ནུས། །ཆུང་མ་གཞན་ལ་མི་འཕྱོ་ཞིང་། །ལེགས་སྲུང་ཆུང་མ་མཉམ་མེད་རྙེད། །སྐྱེ་བར་དགྲར་གྱུར་ཅུང་ཟད་མེད། །འདིར་ནི་འཇིག་རྟེན་ཡིད་རྟོན་ཅིང་། །དེ་ལ་ཡིད་མི་ཆེས་ཡོད་མིན། །དེ་དང་དེར་ནི་སྐྱེ་བ་ན། །
ཨུཏྤལ་སྔོན་པོ་ལྟ་བུར་ནི། །དྲི་ལྡན་ཡིད་དུ་འོང་བའི་གཟུགས། །དེ་ནི་མི་འགྱུར་ཁ་དྲི་ཞིམ། །བརྫུན་གྱི་ཚིག་ཀྱང་སྨྲ་མ་ཡིན། །དམ་པ་ཡི་ནི་གྲོགས་ལྡན་ཞིང་། །མི་དབང་གིས་ནི་གུས་པས་མཆོད། །བུ་དང་ཆུང་མ་བྲན་དང་ནི། །ལོངས་སྤྱོད་རྒྱ་ནི་ཆེན་པོ་ཡིས། །དཔག་ཏུ་མེད་པའི་བདེ་ཐོབ་པ། །
རྟག་ཏུ་ཕྲ་མ་སྤངས་པས་ཡིན། །ཡིད་དུ་འོང་ཞིང་སྒྲ་སྙན་ལ། །ངག་ནི་སྙན་པར་འོས་པ་དང་། །རྟག་ཏུ་ཤིན་ཏུ་མཛེས་པ་དང་། །མི་རྣམས་དང་ནི་ལྷ་རྣམས་སུ། །དེ་རྒྱལ་ཚིག་ནི་རྩུབ་མོ་དག །མི་དེ་ཡིས་ནི་སྤངས་པས་ཡིན། །ཆོས་དོན་དབེན་པ་དགའ་བ་ཡིས། །སྨྲ་བ་དེ་ནི་འཇིག་རྟེན་གྱི། །རྟག་
ཏུ་མཆོག་ཏུ་ཡིད་འོང་འགྱུར། །ཡང་ཡང་མཆོད་པ་དེ་ཡིས་ཐོབ། །རིན་ཆེན་མང་དང་བཞོན་པས་ཕྱུག །མངོན་མཐོ་འཇིག་རྟེན་སྣ་ཚོགས་པའི། །བདེ་བ་མཐའ་ཡས་མྱོང་བར་འགྱུར། །བདག་གཞན་ཆགས་པ་སྤངས་པ་ཡིས། །དེ་འདིར་འདོད་ཆགས་ཆུང་འགྱུར་ཞིང་། །རྟག་ཏུ་ལོངས་
སྤྱོད་རྒྱ་ཆེན་ལྡན། །ངག་ལ་དབང་ཞེས་གྲགས་ལྡན་འགྱུར། །རབ་ཏུ་མཛེས་པ་ཉིད་ཐོབ་ཅིང་། །དེ་ནི་རྟག་ཏུ་ཕྱུག་ཅིང་བདེ། །རྒྱལ་སྲིད་ཀྱིས་མཐོ་འཇིག་རྟེན་གྱི། །ཚངས་པ་ཉིད་ནི་ཐོབ་འགྱུར་ཞིང་། །ཡང་དག་བྱམས་པའི་སེམས་ལྡན་པ། །དབང་པོ་ཡོད་པའི་མི་རུ་སྐྱེ། །མཐོ་རིས་ཐར་འབྲས་

172-1-187b

བདེ་བ་ཐོབ། །ཡང་དག་རྫོགས་དང་མི་དེ་ལྡན། །གང་ཕྱིར་འདི་དག་ཐམས་ཅད་ནི། །ཡང་དག་ལྟ་བ་མཆོག་ཏུ་ནི། །དགེ་བའི་རྩ་བའི་འབྲས་བུ་ཡིན། །དད་དང་བློ་གྲོས་དང་ལྡན་པའི། །བསོད་ནམས་ཀྱི་ནི་ཞིང་མཆོག་ལས། །ས་གསུམ་བདེ་བ་རྒྱ་ཆེན་སྐྱེ། །དེ་ལྟའི་ཁྱད་པར་མི་ཤེས་པས། །
ཡོན་ཏན་རིན་ཆེན་ཐམས་ཅད་ཀྱི། །གཏེར་དུ་གྱུར་པའི་དད་པ་ནི། །རྟག་ཏུ་དེ་ཡིས་བརྟན་པར་བྱ། །དད་པ་ཡིས་ནི་མ་བཞིན་དུ། །བདེ་བ་རྣམས་ནི་བསྐྱེད་པར་བྱ། །དེ་བས་ཐོག་མར་སྐྱེས་བུ་ཡི། །ཡིད་ཀྱིས་ལེགས་པར་བསྟེན་པར་བྱ། །འབྱུང་གནས་དད་པ་སྤངས་པ་ཡིས། །དམ་ཆོས་རིན་
ཆེན་བྱང་ཆུབ་མཆོག །ངེས་པར་གཟུང་བར་ནུས་མ་ཡིན། །རྒྱལ་པོ་ལས་ནི་ཉམས་པ་ཡིས། །ལོངས་སྤྱོད་འབྲས་ལས་ཉམས་པ་ལྟར། །དད་པའི་དབང་པོ་ལས་ཉམས་ན། །དེ་བཞིན་འབྲས་རྣམས་ཐོབ་མ་ཡིན། །དེ་ཕྱིར་སྐྱེས་བུ་མཁས་པ་ནི། །འཇིག་རྟེན་བདེ་གཤེགས་བྱེད་འདོད་པས། །
ཡིད་ནི་རབ་ཏུ་དད་པ་ཡིས། །རྟག་ཏུ་ཕན་པ་ཉིད་དུ་གྱིས། །ལྷག་མས་ཉེས་པ་ཞི་མ་ཡིན། །གཞན་དུ་དད་པ་དང་ལྡན་པའི། །ཉེས་པའི་ཚོགས་ནི་ཐམས་ཅད་བསྲེག །དམན་ཞིང་གོས་མེད་རྨོངས་པ་དང་། །ལག་པ་ན་ནི་ཐོད་པ་ཐོགས། །འཇིག་རྟེན་འདི་ན་སློང་བ་སྣང་། །སྦྱིན་པ་མེད་པའི་
འབྲས་ལ་ལྟོས། །ཐ་དད་ཁྱིམ་དུ་སློང་ཞིང་རྒྱུ། །རྟག་ཏུ་བཀྲེས་པར་ཀུན་དུ་འཁོར། །གང་ཞིག་ལུས་ལས་ལག་རྐྱོང་ལ། །ཁྱི་དང་འདྲ་བར་རིང་ན་གནས། །ཀུན་དུ་འཇུག་ཅིང་སློང་བ་ལ། །ཕྱིར་ལོག་ཉུང་ཤས་ཆ་གཅིག་ཀྱང་། །གང་ཞིག་ཁ་ཟས་མི་སྟེར་བ། །ཁ་ནི་ཁབ་ཙམ་ལྟོ་བ་རི། །ལུས་
སྐམ་སྐྲ་ཡི་གོས་ཀྱིས་ནི། །ཉི་མའི་འོད་ཟེར་སྣང་མིན་ལ། །ཡི་དགས་སྐོམ་གྱིས་གདུངས་པ་རྣམས། །འབྲས་དེ་ལག་གིས་མ་བྱིན་ཅིང་། །དུས་མ་བྱིན་པའི་འབྲས་བུར་གསུངས། །སྣ་ཚོགས་བསྡུས་པའི་གཏམ་སྟེ་ཉི་ཤུ་གཉིས་པའོ།།      །།བསོད་ནམས་སྤྲོ་བ་བསྐྱེད་པ་མཉན་པར་
གྱིས། །གཏོང་དང་བསོད་ནམས་དཀོན་པ་སྟེ། །བདེ་བར་གཤེགས་པའི་སྐུ་གཟུགས་ལ། །སྐུ་གདུང་རྣམས་ནི་བཅུག་བྱས་ན། །ཁྲུས་གསོལ་གདུགས་ནི་འདེགས་པ་དང་། །མཎྜལ་ཟས་དང་སྐོམ་རྣམས་དང་། །གོས་དང་མེ་ཏོག་ལ་སོགས་དང་། །སྣང་བ་དང་ནི་མར་མེ་དང་། །གཙུག་

172-1-188a

ལག་ཁང་དུ་མལ་སྟན་དང་། །ཞིང་དང་སྣ་ཚོགས་ཕུལ་ནས་ནི། །བསྟོད་ཅིང་ཕྱག་ནི་འཚལ་བྱེད་པ། །འདི་འདྲ་དུ་མ་ཕུན་སུམ་ཚོགས། །གཏམ་ནི་ཉི་ཤུ་རྩ་གཉིས་ཀྱིས། །ཡང་ཡང་སྦྱིན་པའི་བསྔགས་པ་བརྗོད། །མཚོ་ནི་སྦྲུལ་གྱིས་གང་བཞིན་དུ། །མེ་ཏོག་ལོ་མ་
རྒྱས་པ་ཡི། །ལྗོན་ཤིང་ཚེར་མ་དང་བཅས་བཞིན། །ཐོས་དང་དཔྱོད་དང་རིགས་ལྡན་ཞིང་། །དེ་ལྟ་བུ་ཡི་བྱེ་བྲག་ཅན། །ཚུལ་ཁྲིམས་ལ་ནི་རྒྱབ་ཕྱོགས་ཡིན། །དབུལ་ཡང་ཁྲིམས་ལྡན་མཆོག་ཡིན་གྱི། །ཡོན་ཏན་རྒྱན་དང་བྲལ་བ་ཡི། །ནོར་ལྡན་རྣམས་དང་མཚུངས་མ་ཡིན། །དབུལ་ཡང་
སྐྱེས་བུ་དམ་པ་རྣམས། །དེ་དག་ཡོན་ཏན་རོ་མྱང་བས། །བདུད་རྩི་ལྟ་བུར་ཁྱད་པར་འཕགས། །ཡང་དག་དྲན་བྱ་བླ་མ་བཞིན། །ཡོན་ཏན་ལྡན་འཕགས་གཟི་བརྗིད་ལྡན། །ནོར་རྣམས་དང་ནེ་རྒྱན་དང་ནི། །དེ་དག་རྒྱལ་པོ་རྣམས་ཀྱིས་ནི། །དྲུང་དུ་ཉེ་བར་མཆོད་འདོད་པས། །ཚུལ་ཁྲིམས་
འདི་ནི་བསྲུང་བར་གྱིས། །འཇིག་རྟེན་བདེ་བ་རྣམས་རྒྱལ་བའི། །འཇིགས་དང་ཞེ་སྡང་བཅས་པ་ལ། །ཆོས་ཀྱི་བདག་ཉིད་བློ་བྱས་ཏེ། །བདེ་བ་མཆོག་ནི་སྐྱེས་བུ་ཡིས། །བདེ་བ་རྒྱ་ཆེན་མི་འཕྲོགས་པ། །ཐོབ་པར་འདོད་པ་དེ་ཡིས་ནི། །ཚུལ་ཁྲིམས་ཉིད་ནི་སྲུང་བར་གྱིས། །ཚུལ་ཁྲིམས་ལས་
ཉམས་འདུལ་ཞིང་འཚེ། །དེ་ཡིས་འཇིགས་བཅས་ཉམས་སུ་མྱོང་། །ཚུལ་ཁྲིམས་ལྡན་ལ་དེ་དག་མེད། །དེ་ནས་འཇིག་རྟེན་ཕ་རོལ་དུ། །མཐའ་ཡིས་གཏུགས་ཤིང་འགྲོ་བ་ན། །བདེ་བའི་ཡུལ་རྣམས་འདོད་པ་ཡིན། །དེ་ཡི་ཞུལ་ཁྲིམས་འདི་ཉིད་སྲུང་། །ཚུལ་ཁྲིམས་བརྟེན་དང་ངེས་ལྡན་ན། །
བདེ་འགྲོ་ཉོན་མོངས་བདག་ཉིད་མིན། །ལོག་པར་ལྟ་བས་ལམ་གོལ་ཕྱིར། །དེ་ཕྱིར་ཐར་པ་རབ་བྱུང་ཞིང་། །རྟགས་ལྡན་མཐོ་རིས་འདོད་པ་ཡིས། །དེ་ཡིས་ཚུལ་ཁྲིམས་འདི་ཉིད་སྲུངས། །མི་འཇིག་དབྲོག་ཏུ་མེད་པའི་རྒྱན། །ཚུལ་ཁྲིམས་འདི་ཡིན་བསྲུང་བར་གྱིས། །ཚུལ་
ཁྲིམས་ནོར་གྱི་མཆོག་ཡིན་ཏེ། །གཞན་གྱིས་དབྲོག་ཅིང་རྐུར་མི་ཚུགས། །ཚུལ་ཁྲིམས་བརྟན་ཏེ་འཆི་བ་ན། །གཞན་དུ་རྗེས་འབྲང་ལུས་མ་ཡིན། །ཚུལ་ཁྲིམས་རྗེས་སུ་འབྲང་བའི་གྲོགས། །ཚུལ་ཁྲིམས་རྒྱན་གྱི་མཆོག་ཡིན་ཏེ། །རྒྱན་དེ་ལ་ནི་སྟོར་བ་མེད། །ཡིད་གཅུགས་

172-1-188b

པ་ཡི་གྲོགས་པོ་ཡིན། །ཚུལ་ཁྲིམས་ལྟ་བུའི་ཕན་བྱེད་མེད། །ཚུལ་ཁྲིམས་ཡང་དག་ངེས་པའི་གཉེན། །ཕ་དང་མ་དང་བུ་ཡིན་ཏེ། །འདོད་པ་སྟེར་བ་ཚིལ་ཁྲིམས་ཏེ། །མཐུ་ཡིས་འབྲས་བུ་འདི་སྦྱིན་བྱེད། །ཚུལ་ཁྲིམས་ཀྱི་གཏམ་སྟེ་ཉི་ཤུ་གསུམ་པའོ།།      །།བསྐལ་པ་
སྟོང་དུ་བསགས་པ་ཡི། །སྦྱིན་དང་བདེར་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཡང་། །ཁོང་ཁྲོ་གཅིག་གིས་འཇོམས་པར་བྱེད། །ཞེ་སྡང་དང་མཉམ་སྡིག་པ་མེད། །བཟོད་དང་མཉམ་པའི་དཀའ་ཐུབ་མེད། །དེ་ཕྱིར་འབད་པས་བཟོད་པ་སྒོམས། །སྣ་
ཚོགས་པ་ཡི་ཚུལ་གྱིས་ནི། །ཞི་བའི་ཡིད་ཀྱིས་མ་བཟུང་ན། །དགའ་དང་བདེ་བ་མྱོང་མ་ཡིན། །སྡོང་བའི་ཟུག་རྔུ་ཡིད་གནས་ལ། །གཉིད་མེད་བརྟན་པ་ཡོད་མ་ཡིན། །ཞེ་སྡང་བྲལ་བར་མ་གྱུར་ན། །ཇི་སྲིད་འཚོ་བར་གནོད་དང་བཅས། །ཁྲོ་བ་གཅིག་པུ་བཅོམ་པ་ཡིས། །རྣམ་པར་སྡང་བ་
ཐམས་ཅད་བཅོམ། །རྟོག་པའི་བུད་ཤིང་ལ་མཆེད་པའི། །ཁྲོ་བའི་མེ་ཡིས་འགྲོ་བ་བསྲེག །དང་པོར་བདག་ཉིད་སྲེག་བྱེད་ལ། །གཞན་དག་སྲེག་པའམ་ཡང་ན་མིན། །རྒས་པ་ཡིས་ནི་གཟུགས་བཞིན་དང་། །ཁྲོས་དང་མུན་པས་མིག་དང་ནི། །བློ་དང་བྲལ་བས་འདོད་དོན་ལྡན། །དེ་
བས་ཁྲོ་བ་འཇོམས་པར་བྱེད། །དགེ་བའི་ལས་ལ་འདི་སྦྱར་བྱ། །བདག་ལ་གནོད་བྱེད་འབྱུང་བ་དང་། །དེ་ལས་བཟློག་པར་བྱ་སྙམ་ན། །སྡིག་ལྡན་སེམས་ཡིན་ཁྲོར་ཅི་ཡོད། །མཚོན་སོགས་བྱེད་པ་སྤངས་ནས་ནི། །འཕེན་པ་ཅི་ཞིག་ཁྲོ་རུ་ཡོད། །རྩོད་བྱེད་ཞེ་སྡང་ཡིན་པས་ན། །དེ་ཕྱིར་
ཞེ་སྡང་ལ་སྡང་བསྔགས། །བཟོད་པའི་གཏམ་སྟེ་ཉི་ཤུ་བཞི་པའོ།།      །།ཡོན་ཏན་རིན་ཆེན་ཐམས་ཅད་ཀྱི། །གཏེར་དུ་གྱུར་པ་བརྩོན་འགྲུས་ཏེ། །ཉོན་མོངས་རྒྱ་མཚོ་ཀུན་སྒྲོལ་བའི། །རྒྱ་ཆེན་མཆོག་ནི་བརྩོན་འགྲུས་ཡིན། །བརྩོན་འགྲུས་ཤིང་རྟ་གང་ཞོན་པ། །དངོས་པོ་
བསམས་པས་མི་ཐོབ་པ། །དེ་འདྲ་འགྲོ་ན་ཡོད་མ་ཡིན། །གླང་པོ་རྟ་དང་རྐང་ཐང་དང་། །མདའ་དང་མདའ་ཆེན་དགྲ་སྟ་དང་། །མཚོན་ཆ་ཡིས་ནི་གཡུལ་འགྱེད་ཅིང་། །དགྲ་བགེགས་མཐར་ནི་རྒྱལ་བྱེད་པ། །འདི་དེ་སྟོབས་དང་ལྡན་པ་ཡི། །བརྩོན་འགྲུས་དཔའ་བོ་ཆེན་པོ་ཡིན། །རྒྱ་

172-1-189a

མཚོ་ཆུ་སྲིན་ཚོགས་གནས་ཤིང་། །ཆུ་རླབས་མཐོན་པོར་རིམ་རྒྱུ་བ། །བརྩོན་འགྲུས་ལྡན་པའི་དཔའ་བོ་ཡིས། །བ་ལང་རྗེས་བཞིན་འགོམ་པར་བྱེད། །རིན་ཐང་མེད་པའི་རིན་ཆེན་གྱི། །གཏེར་ནི་ལེན་པར་བྱེད་པ་ཡིན། །འདོད་ཆགས་ལ་སོགས་སྦྲུལ་གདུག་རྣམས། །ལུས་ལ་བརྩོན་
འགྲུས་ཅན་གྱིས་སྤོངས། །ཁྲིམས་ལྡན་སྐྱེ་བོ་དམ་པ་ནི། །སེམས་ནི་དྲི་མེད་ཁྱད་འཕགས་པས། །མིར་ནི་ཡང་དག་མཉམ་གཞག་འཛིན། །རི་རབ་མཛེས་པའི་རྩེ་མོ་རུ། །བལྟ་ན་སྡུག་པའི་ལྷ་མོ་ལ། །པང་དུ་ལག་པས་འཁྱུད་པ་ཡི། །བདེ་དང་ལྡན་ཞིང་དགའ་བར་བྱེད། །མཁའ་གནས་ལྷ་ནི་གང་ཡིན་
པས། །གཉིས་གཉིས་ལྡན་པ་ངེས་སྤངས་ནས། །ཡང་དག་ཉིད་ཀྱི་བདེ་བ་མྱོང་། །ཤིན་ཏུ་འབྲས་བུ་རྒྱ་ཆེ་བའི། །བསྐྱེད་པའི་རྒྱུ་ནི་བརྩོན་འགྲུས་ཏེ། །བསྟན་པ་ལ་སྦྱོར་དེ་སྦྱོར་བྱེད། །བརྩོན་འགྲུས་ཀྱི་གཏམ་སྟེ་ཉི་ཤུ་ལྔ་པའོ།།      །།ཉོན་མོངས་དགྲ་ཡི་སྡེ་ཚན་རྣམས། །བསམ་གཏན་
ལྡན་པས་ཟིལ་མནན་ནས། །ཡང་དག་བྱང་ཆུབ་དཔལ་རྣམས་ཐོབ། །བྱང་ཆུབ་ཡན་ལག་རབ་སྦྱིན་ཞིང་། །འཆི་མེད་སྐྱེ་བའི་རྒྱུར་གྱུར་པ། །འདོད་ཆགས་ཞེ་སྡང་ལ་སོགས་པ། །ཉེས་པ་ཐམས་ཅད་སེལ་བ་ཡི། །རྒྱུ་ནི་བསམ་གཏན་ཡིན་པ་རུ། །བློ་ལྡན་དེ་ཡིས་རབ་ཏུ་གསུངས། །ནམ་མཁའ་
དང་ནི་སེམས་མཉམ་ལ། །གསེར་དང་བོང་བར་མཉམ་པ་ཡི། །བསམ་གཏན་སྒོམ་བྱེད་སྐྱེས་བུ་ཡི། །ཡོན་ཏན་རྣམས་ཀྱི་རྒྱུ་རུ་གསུངས། །ཉོན་མོངས་དགྲ་ཚོགས་ལས་རྒྱལ་བའི། །དགེ་བའི་སྟོབས་ཀྱིས་བསྒྲུབ་པ་ལས། །མཚན་ནི་ཐམས་ཅད་ལྡན་པ་ཡི། །ཡང་དག་རྫོགས་པའི་བྱང་
ཆུབ་དཔལ། །ཡོན་ཏན་རབ་མཆོག་བདག་ཉིད་ཅན། །དཀོན་པའི་རིགས་པ་ཐོབ་པར་འགྱུར། །སེམས་ལ་ཡེ་ཤེས་ཆེན་པོ་ཡིས། །དགྲ་ཡི་འཇིགས་པ་རྣམས་སྤངས་ནས། །གང་གིས་མི་ཡི་དབང་པོ་བསྐྱེད། །བསམ་གཏན་གཅིག་པུ་དེ་རྒྱུ་སྟེ། །ཡོན་ཏན་ཀུན་གྱི་གཏེར་ཡིན་པས། །འཕགས་
པའི་ཡོན་ཏན་གྱིས་ཕྱུག་གསུང་། །རྨོངས་པའི་མུན་པ་སེལ་མཛད་ཅིང་། །རྒྱུན་གྱིས་རྟག་པའི་ཡེ་ཤེས་ཀྱིས། །རྫོགས་སངས་རྒྱས་ཀྱི་ཉི་མ་དང་། །མི་རྣམས་དང་ནི་ལྷ་རྣམས་ཀྱི། །བདེ་རྒྱུ་བསམ་གཏན་རབ་མཆོག་ཡིན། །བསམ་གཏན་གྱི་གཏམ་སྟེ་ཉི་ཤུ་དྲུག་པའོ།།      །།ཤེས་རབ་

172-1-189b

སྟོབས་དང་བྲལ་ན་ཡང་། །སྐྱེས་བུའི་གཟུགས་བརྙན་འབའ་ཞིག་སྟེ། །སྙིང་པོ་སྤངས་པའི་མཐར་ཐུག་པར། །རི་མོ་བྲིས་པའི་གཟུགས་དང་མཚུངས། །བློ་ལྡན་བརྩོན་འགྲུས་ཡང་ལྡན་པའི། །བློ་ལྡན་དེ་ལ་འབྲས་འདོད་འབྱུང་། །བླ་མེད་བདག་གསོད་པ་ཡི་དགྲ། །སྐྱེ་བ་དུ་མས་གང་ཆོད་དང་། །བདག་
ཉིད་སྐྱེ་བར་འགྱུར་བ་ཡིས། །རིགས་དང་མིང་དང་རུས་རྣམས་དང་། །དབུས་བཞིན་དུ་ནི་མཐའ་བཟུང་ལ། །རྣལ་འབྱོར་པ་ཡི་ཤེས་པ་འཇུག །ཤེས་རབ་སྟོབས་ཀྱིས་དེ་ཤེས་གསུངས། །འཇིག་རྟེན་རྣམས་ནི་དྲི་མི་ཡི། །རབ་རིབ་ཚོགས་ནི་སེལ་བྱེད་པས། །དེ་བས་བློ་དེ་ཆོས་མཆོག་ཡིན། །ཡེ་ཤེས་
སྣང་བ་སྐྱེད་པ་ཡིས། །མི་རྣམས་ཀྱི་ནི་ཉེས་པའི་ཚོགས། །རྟག་ཏུ་སྟོངས་པར་བྱེད་པ་ཡིན། །དང་པོར་དབང་པོ་འདི་བསྒྲུབ་བྱ། །ཡིད་ཀྱིས་ཕྲ་རབ་རྣམ་ཤེས་ཤིང་། །རིག་པ་ཐམས་ཅད་གསལ་བྱེད་ཡིན། །ཤེས་རབ་དེ་ཡང་རྟག་པར་ནི། །སྟོབས་ཀྱིས་དགེ་བ་སྐྱེད་བྱེད་པའི། །རྒྱུ་ཡིན་
པར་ནི་རྟག་ཏུ་གྲགས། །བྱ་བའི་རྒྱ་མཚོའི་ནང་དུ་ནི། །གདོན་མི་ཟ་བར་ནུབ་པ་དང་། །གཡུལ་གྱི་ནང་དུ་ཤེས་རབ་གཙོ། །ཤེས་རབ་སྟོབས་ཀྱིས་རྣམ་རྒྱལ་ཐོབ། །ཐོས་པའི་ཤེས་རབ་གང་ཡིན་དེ། །དགེ་བ་རྣམས་ཀྱི་རྒྱུ་རུ་འགྱུར། །དེ་ལྟར་ཡོན་ཏན་ཐམས་ཅད་ནི། །སྒྲུབ་པར་བྱེད་པ་
ཡིན་པའི་ཕྱིར། །གདོན་མི་ཟ་བར་ཤེས་རབ་སྒྲུབས། །ཤེས་རབ་མེད་པའི་སྐྱེས་བུ་ནི། །མི་གསལ་ཐོ་རངས་མར་མེ་བཞེན། །ཤེས་རབ་ཀྱི་གཏམ་སྟེ་ཉི་ཤུ་བདུན་པའོ།།      །།མཐོ་རིས་ཐར་པའི་ཡོན་ཏན་ནི། །རིན་པོ་ཆེ་ཡི་གཏེར་གྱུར་པ། །ཕ་རོལ་ཕྱིན་པ་དྲུག་འདི་ཉིད། །ས་
གཞི་བཞིན་དུ་ཤེས་པའི་མིས། །བདག་ཕན་བསྒྲུབས་པ་དེ་ཡིས་ནི། །གཞན་ལ་ཕན་པར་བྱ་བའི་ཕྱིར། །མྱུར་བར་རྟག་པར་རྒྱུན་དུ་འབབ། །ཕ་རོལ་ཕྱིན་པའི་གཏམ་སྟེ་ཉི་ཤུ་བརྒྱད་པའོ།།       །།ལེགས་པར་བཤད་པ་རིན་པོ་ཆེ་ཟ་མ་ཏོག་ལྟ་བུའི་གཏམ་སྙན་དངགས་
མཁན་ཆེན་པོ་སློབ་དཔོན་དཔའ་བོས་མཛད་པ་རྫོགས་སོ།།      །།རྒྱ་གར་གྱི་མཁན་པོ་རུ་དྲ་དང་། དགེ་སློང་ཤཱཀྱ་འོད་ཀྱིས་བསྒྱུར།།      །།༄༅༅། །རྒྱ་གར་སྐད་དུ། ཙ་ཏུརྦི་པརྱ་ཀ་ཐཱ། །བོད་སྐད་དུ། ཕྱིན་ཅི་ལོག་བཞི་སྤང་བའི་གཏམ། འཇམ་དཔལ་

172-1-190a

གཞོན་ནུར་གྱུར་པ་ལ་ཕྱག་འཚལ་ལོ། །སྐྱེས་བུ་དམ་པ་ཡིད་འོང་ཡུལ་རྣམས་ཡོངས་སྨོད་སྨྲ་བར་གྱུར་པ་ན། །དེ་ལ་ཡིད་འབྱུང་སྐྱོ་བར་བྱེད་ན་ཁྱེད་ཡིད་སྐྱོ་བར་ཅིས་མི་བྱེད། །ཁྱེད་ཀྱི་ལུས་སྡུག་དེ་ཡང་ཉེས་མང་དེ་ལ་སྨད་པར་བྱས་པ་ནི། །ཡོན་ཏན་མང་ཡོད་དེ་ཕྱིར་བདག་གི་
ཚིག་ནི་ཅུང་ཟད་མཉན་པར་གྱིས། །འདི་ནི་རྟག་པར་གྱུར་ཏམ་མི་རྟག་གྱུར་ཀྱང་ཇི་སྲིད་གྱུར་པ་འདི་ནི་བདེ་བའི་དོན་གྱུར་ཏམ། །དེར་མ་གྱུར་ཀྱང་གཙང་བར་གྱུར་ཏམ་དེ་མེད་གྱུར་ཀྱང་དབང་ཡོད་གྱུར། །རྟག་མིན་བདེ་བའི་རྒྱུ་མིན་གཙང་བ་མ་ཡིན་རང་དབང་ཅན་མིན་ན། །ཅི་ཕྱིར་བློ་གྲོས་རབ་ཉམས་ཁྱེད་ལུས་
ཉེས་བརྒྱར་བཅས་ལ་ཆགས་བྱེད་སྨྲོས། །རི་བོ་མཐོན་པོའི་རྩེ་མོའི་སྟེང་ནས་ས་ལ་ལྷུང་བར་གྱུར་པ་ཡིས། །ཞིག་པར་གྱུར་ཚེ་ཅི་འདི་བར་སྣང་ལ་ནི་བདེ་བ་མྱོང་གྱུར་རམ། །སྐྱེས་ནས་བརྩམས་ཏེ་འཆི་བ་ཉིད་ཕྱིར་རྟག་ཏུ་རབ་ཏུ་རྒྱུགས་པ་ན། །སེམས་ཅན་རྣམས་ནི་བར་སྐབས་གང་དུ་བདེ་བ་ཇི་ལྟར་ཐོབ་
པར་འགྱུར། །གང་གིས་ས་འོག་འཛུལ་ཏེ་ཀླུ་ཡི་དབང་པོ་པདྨའི་རྩ་བ་ལྟར་འབྱིན་བྱེད། །གང་གིས་མཐོ་རིས་འཛེགས་ཏེ་དབང་པོར་བཅས་པའི་ལྷ་ཚོགས་མེད་པར་བྱེད་པ་དང་། །གང་གིས་ས་སྟེངས་འཕྱན་འཕྱིན་ནི་ག་དང་ནི་ར་གུ་ན་ལ་བཏུས་འགྱུར་བའི། །འཆི་བདག་དེས་མི་ཚུགས་པར་གང་དུ་གནས་ནས་
ཁྱེད་ནི་འཇིགས་མེད་འགྱུར། །ཡུན་རིང་འཚོ་ཡང་ལུས་ནི་རྒས་པས་རབ་ཏུ་རྙིངས་པ་ཉིད་དུ་འགྱུར། །ཚེ་ནི་ཐུང་འགྱུར་ཚེ་ནི་མོད་ལ་འཆི་བདག་ཁར་ནི་འགྲོ་བར་འགྱུར། །རྒ་དང་འཆི་བའི་བར་ན་ཕོངས་པར་བཅས་པར་གནས་པར་གྱུར་པའི་མི། །ཉམ་ངར་ལྷུང་བས་འདི་དང་འདི་ལས་བདེ་བ་ཐོབ་པར་ཡོད་
མི་འགྱུར། །བྱིས་པ་རྣམས་ལ་བརྩེ་མེད་རྒན་ལ་གུས་པར་གྱུར་པ་ཅུང་ཟད་མེད། །གཞོན་ནུ་མ་ལ་ངོར་ལྟ་ཕྲ་མོ་མེད་ཅིང་ཉམ་ཐག་རྣམས་ལ་བརྩེ་མེད་པ། །དེ་ལྟར་གཞུང་ལུགས་མེད་པའི་འཆི་བདག་གང་ཡིན་དེ་ནི་བདག་ལ་ནི། །དུས་ལ་སྡོད་ཅེས་གཞོན་ལུས་ཤ་རྒྱས་སྲ་བར་ཁྱེད་ཡིད་མ་སེམས་ཅིག །
ཁྱིམ་དྲང་གནས་པའི་ནོར་ནི་ཅུང་ཟད་རྐུས་ཞེས་ཐོས་པར་གྱུར་པ་ན། །རང་གི་ཁྱིམ་དག་བསྲུང་བར་བྱ་སྙམ་སེམས་པ་འདི་ནི་རིགས་པ་ཡིན། །མི་ནི་ཁྱིམ་ཁྱིམ་དག་ནས་ཉིན་རེ་དྲངས་ཏེ་ཁྱེར་བར་བྱེད་པ་ན། །གཤིན་རྗེ་ལ་ཅི་དོགས་མེད་གྱུར་ཏམ་འགྲོ་བ་མེལ་ཚེ་ཅིས་མི་བྱེད། །ཇི་ལྟར་གསད་བྱའི་མེ་ཏོག་ཕྲེང་

172-1-190b

བཏགས་སིལ་ཀྲོལ་མིས་བསྐོར་ཏེ། །གསོད་སར་ཁྲིད་ལ་གོམ་པ་རེ་རེ་བོར་བས་འཆི་ཉེའི་སྡུག་བསྔལ་འགྱུར། །དེ་བཞིན་ལོངས་སྤྱོད་ལ་གནས་ཉིན་རེ་འཆི་བདག་དྲུང་དུ་འགྲོ་བྱེད་ཀྱིས། །ཀྱེ་ཁྱེད་འབྱོར་པ་དག་གིས་ཡིད་ནི་དྲེགས་པ་དག་ཏུ་མ་བྱེད་ཅིག །འདི་ནི་མི་རྣམས་ཚེ་ནི་མཆོག་ཏུ་རིང་ཡང་ལོ་
བརྒྱ་ཁོ་ནར་ཟད། །དེ་ལས་ཀྱང་ནི་དང་པོ་བྱིས་ཐ་མར་རྒས་པས་དོན་མི་བྱེད། །གཉིད་དང་ནད་སོགས་དག་གིས་དེ་དུས་མེད་པར་ཀུན་ནས་རེ་བ་འཇོམས། །བདེ་བར་གནས་པའི་མི་ནང་འགྲོ་བའི་ཚེ་ཡི་ལྷག་མ་ཇི་ཙམ་ཡོད། །སུམ་ཅུ་རྩ་གསུམ་བདག་པོའི་གཡུལ་ལས་རྒྱལ་བའི་རྒྱལ་པོ་དེ་རྣམས་ནི། །
ཤེས་པའི་སྣང་བས་མུན་པ་ཟད་བྱས་དྲང་སྲོང་དེ་ཡང་ཤི་བར་འགྱུར། །གཤིན་རྗེས་ཟིན་པར་གྱུར་ཚེ་ལོངས་སྤྱོད་ཀྱིས་མིན་བཤེས་བ་དག་གིས་མིན། །སྐྱེས་བུ་རྩོལ་བས་ཟློག་མི་བྱེད་ན་འདིར་ནི་མི་རྣམས་སུ་ལ་ཇི་ལྟར་སྐྱབས་སུ་འགྲོ། །བསྟན་བཅོས་ཀླགས་དང་བཅས་ཤིང་རིག་དང་བཟོ་ཡི་བྱ་བ་དང་
བཅས་དང་། །ཡིད་རྟོན་གྲོགས་བཅས་སྡུག་པའི་ཆུང་མ་དང་བཅས་དྲུང་གནས་འཁོར་བཅས་པའི། །མི་རྣམས་འཆི་བདག་སྙིང་རྗེ་མེད་པས་ས་སྟེངས་འདིར་ནི་ཁྱབ་འགྱུར་བས། །མེད་པར་བྱེད་ན་ཀུན་གྱིས་ཅི་བྱ་མ་ཡོངས་དགེ་བ་ལེགས་པར་གྱིས། །ཨེ་མའོ་སྐྱེས་བུ་རྨོངས་རྣམས་འདི་ན་བདེ་འགྲོར་སྐྱེས་
པ་བཟང་ཞེས་གྲགས། །རྒ་དང་འཆི་དང་ན་རྣམས་ཀྱིས་ཀྱང་འདི་ལ་བརྩེ་བ་མེད་པར་གྲགས། །གཞན་ལས་སྐྱེས་པའི་སྡུག་བསྔལ་བརྒྱ་ཕྲག་འདི་དག་སྐྱེས་པ་ཉིད་བྱེད་དེ། །རང་གིས་བསྐྱེད་ནས་བུ་ནི་གསོད་པའི་དོན་དུ་དེ་དག་ལ་སྟོད་བྱེད། །ཤ་མའི་རྐྱལ་པར་ཤིན་ཏུ་བསྡམས་ཤིང་དབུགས་མ་ཕྱིན་
པར་ཉམ་ངར་གནས། །མི་གཙང་ཁྲོན་པར་ལྟོ་བའི་མེ་ཡི་ཚ་བ་མི་བཟད་པས་བསྲེགས་ནས། །སྨྲ་མི་ནུས་ཤིང་ཐོས་མིན་བསྐྱོང་བའི་དབང་མེད་ཉལ་བ་མ་ཡིན་པར། །མི་ནི་མངལ་དུ་ཟླ་བཅུ་ཉེ་བའི་བར་དུ་སྡུག་བསྔལ་ཉམས་མྱོང་འགྱུར། །དཀའ་བ་དག་གིས་བྱུང་ནས་ཉི་མའི་ཟེར་རྣོས་མོད་ལ་སྲེག་
པ་དང་། །ཚད་པའི་རླུང་གིས་བུད་ཤིང་སྦྲང་བུ་མཆུ་སྦྲང་དག་གིས་གནོད་པ་དང་། །ཉེ་དུ་དགྲ་བོ་དག་གིས་ལྟེ་བ་བཅད་པས་ན་ཚ་སྐྱེད་བྱེད་དང་། །མངལ་ན་གནས་ཀྱང་བླ་ཡི་སྣང་བ་དག་ཏུ་གནས་པ་འདི་མི་རུང་། །ལུས་ཀྱི་བྱ་བ་ལག་པ་དག་དང་རྐང་པ་བསྐྱོད་པ་ཙམ་དུ་ཟད། །སྨྲ་བའི་ཡུལ་གྱུར་

172-1-191a

ཐམས་ཅད་ལ་ཡང་ཁྱད་པར་མེད་པར་དུ་བར་བྱེད། །ཉལ་བའི་ཚེ་ན་གན་རྐྱལ་གནས་པས་ཉིན་དང་མཚན་མོ་འདའ་བར་བྱེད། །ས་སྟེངས་དག་ན་ཁུ་འཇོ་བ་ལྟར་སྡུག་བསྔལ་ཉམ་ཐག་ངས་མ་མཐོང་། །འདུག་པ་དག་ལས་ལྡང་བར་མི་ནུས་ཉལ་དང་འགྲེང་དང་འགྲོ་བར་བསྐྱོད་མི་ནུས། །
འདུག་སྟེ་གནས་དང་ལུས་མི་བརྟན་པས་གོམ་གཅིག་འགྲོ་བར་ནུས་མ་ཡིན། །ཚིག་གིས་རང་དོན་བསྟན་པར་མི་ནུས་བྱེད་འཁྲུལ་ལུས་དང་ངག་ལ་ནི། །དབང་བྱར་མེད་པར་སྲོག་འཛིན་བྱེད་པས་ཀྱི་ཧུད་ན་ཚོད་འདས་སྡུག་བསྔལ། །མངལ་ན་སྡུག་བསྔལ་མང་པོ་ཡུན་རིངས་རྗེས་མྱོང་གྱུར་ཀྱང་མི་
མཐོང་ལ། །འཆི་བའི་དུས་ཀྱི་གནས་སྐབས་སྐྱེ་བོ་འདྲིས་པའི་མིག་གི་ཡུལ་མ་ཡིན། །དྲེགས་ལྡན་དགའ་བས་བཅོམ་པ་ཚོགས་སར་སྐྱེས་པ་བུད་མེད་བརྒྱ་ཕྲག་གིས། །མིག་ནི་འབེན་དུ་གྱུར་པ་མདའ་ཆར་འབབ་པས་ཉམ་ཐས་ལྟ་བུ་ཡིན། །སྐོམ་པས་ཁ་སྐམས་ཚེ་ན་བསིལ་ཞིང་དྲི་ཞིམ་ཆུ་ནི་འཐུང་བ་
དང་། །བཀྲེས་པས་ཉམ་ཐག་པ་ན་འབྲས་ཆན་ཤ་དང་བཅས་པ་ཟ་བ་དང་། །འདོད་ཆགས་མེ་འབར་གྱིས་གདུངས་ཚེ་ན་ཆུང་མ་དམ་དུ་འཁྱུད་ནས་བྱད་པ་ཡི། །ནད་སེལ་བྱེད་པ་བདེ་བ་ཡིན་ཞེས་སྐྱེ་བོ་ཕྱིན་ཅི་ལོག་པར་འགྱུར། །སྐྱེས་བུ་ཟས་ཉུང་དག་གིས་རིང་གྱུར་ཟས་མང་དག་ལ་མངོན་དགའ་བས། །དབུགས་
མི་ཐོན་ཅིང་སྡུག་བསྔལ་གྱུར་ལ་མི་མཐུན་ཟས་ཀྱིས་འཆི་བར་བྱེད། །ཟས་མི་འཇུ་བས་ནད་སྐྱེད་འགྱུར་ཞིང་ཞུ་བས་བཀྲེས་པ་ཉིད་དུ་འགྱུར། །ཀྱེ་མ་ཟས་ཟོས་གྱུར་ན་སྡུག་བསྔལ་མི་སྐྱེད་སྐབས་དེ་ཡོད་མ་ཡིན། །ཤིང་ལག་དག་ནི་རབ་ཏུ་འབར་བའི་སྐབས་སུ་མེ་ལས་ཐ་དད་མིན། །དེ་ནི་འཇིག་རྟེན་དག་གིས་ཀྱི་
ཧུད་མེ་ཞེས་ཟེར་ཞིང་ཡོངས་སུ་སྤོང་། །དེ་བཞིན་ལུས་ལ་སྡུག་བསྔལ་ཤིན་ཏུ་ཆེན་པོ་ཉམས་མྱོང་གནས་སྐབས་སུ། །འདི་ནི་སྡུག་བསྔལ་ལུས་འདི་མྱོང་ཞེས་ཁྱད་པར་མེད་ལ་འཇུག་མི་བྱེད། །མི་གཙང་སྣོམ་ཞིང་སྲིན་བུའི་ཚོགས་ནི་བརྒྱ་ཡིས་ཡོངས་སུ་བསྐོར་གྱུར་ལ། །སླད་སའི་དྲོད་ཀྱི་དུགས་ཀྱིས་མཚུངས་པ་
མེད་པའི་སྡུག་བསྔལ་ཉམས་མྱོང་ཞིང་། །སྣང་བ་མེད་པའི་བཙོན་རའི་ཁྱིམ་ནང་ལྟ་བུའི་མ་ཡི་ལྟོ་ན་གནས། །དེ་བསྐྱེད་པ་ན་དེ་ཡང་དེ་ལྟར་མིན་ནམ་ཅི་ཕྱིར་ཁྱོད་རིག་བྱེད། །ཇི་ལྟར་ཁྱི་དག་རུས་སྐམ་སྲ་ལ་རོ་མེད་པ་ལ་བརྐམ་པར་འཆའ། །རང་གི་ཁ་ཆུ་ཁྲག་གིས་གོས་ལ་རྙི་ཞིང་ཞིམ་པ་ཡིན་སྙམ་སེམས། །དེ་

172-1-191b

བཞིན་ལུས་ཞེས་བྱ་བ་ཤིན་ཏུ་འཇིགས་སུ་རུང་བའི་ཚོགས་དེ་ལ། །རྨོངས་རྣམས་རང་གི་རྟོག་པས་ཡོན་ཏན་བརྒྱ་ཡིས་སྒྲོ་བཏགས་དགའ་བར་བྱེད། །ཤ་རྒྱས་མཐོ་ཞིང་ཟླུམ་ལ་ནུ་མའི་བློ་ཡིས་ཀུན་ནས་འཁྱུད་པ་དང་། །ཁ་ནི་ཁ་ཆུས་གང་བ་ཆང་བཅས་སྣོད་ལྟར་འཐུང་བར་བྱེད་པ་དང་། །རེག་པའི་སྲེད་པས་
མི་གཙང་རླན་པའི་ལམ་ལ་ཆགས་པས་ན། །འགྲོ་བ་རྨོངས་པ་ཆེན་པོས་ལྡོངས་པ་དག་ལ་ཡིད་དུ་མི་འོང་ཅི་ཞིག་ཡོད། །འཁྲུ་བས་དྲི་མས་སྦགས་དང་དྲི་ཞིམ་སྐུད་པས་མི་རོའི་དྲི་འདྲ་དང་། །སོ་རྩི་འཆའ་ལ་བརྩོན་པར་བྱེད་པས་ཁ་ནི་དྲི་མི་ཞིམ་པ་ཉིད། །གོས་ཀྱིས་ཀུན་ནས་དཀྲིས་པས་ཤིན་ཏུ་མི་སྡུག་ཡིན་
པར་འདི་བྱེད་དེ། །ལུས་འདི་འཇིགས་སུ་རུང་བས་བདག་ནི་གཞོན་ནུ་མ་ལ་སྨྲ་ཞིང་རྟོན། །ཡིད་བརྟན་རུང་ལས་ཉན་པར་མི་བྱེད་བདག་ཉིད་ཀྱིས་ཀྱང་རྟོག་མེད་པས། །ཁྱེད་ལ་རྣ་བ་དང་ནི་སྙིང་མེད་པ་ཞེས་བྱ་བར་ཤིན་ཏུ་རིགས། །རློན་བྱེད་འཇིགས་སུ་རུང་ཞིང་མི་སྡུག་ལུས་ཀྱི་དྲི་ནི་མ་ཚོར་བ། །ཁྱེད་ལ་འགྲོ་བ་
སྣ་མེད་ཡིན་ཞེས་ཀྱང་ནི་ཅི་ཡི་ཕྱིར་མི་སྨྲ། །ཤིན་ཏུ་གཙང་བའི་དར་དང་དྲི་ཞིམ་མེ་ཏོག་སྦྲང་རྩི་གུར་ཀུམ་ལ། །དེ་དང་དེ་ནི་གང་དུ་རེག་ན་སྐད་ཅིག་གིས་ནི་མི་གཙང་འགྱུར། །རྨ་ཡི་སྒོ་དགུ་དག་ནས་མི་གཙང་དྲི་ངའི་ལྗན་ལྗིན་འཛག་འགྱུར་གང་། །དེ་ལ་ཁྱེད་ནི་སྐལ་བཟང་ཡིན་ཞེས་འདིར་ནི་རློམ་སེམས་ཇི་ལྟར་བྱེད། །
ཕུང་པོ་ལྔ་པོ་འདི་ལ་ཡུལ་དང་ཡུལ་ཅན་ཉིད་དུ་བརྟགས་ནས་ནི། །བདག་དང་བདག་གིར་མེད་པ་དག་ལ་ང་དང་ང་ཡི་ངེས་བྱས་པ། །འཇིག་རྟེན་རྨོངས་པ་འདི་ནི་འཇིག་རྟེན་སྐོམ་གྱིས་གདུངས་པ་མྱ་ངམ་དུ། །སྨིག་རྒྱུའི་ཆུ་ཡི་ཆུ་བུར་ལས་བྱུང་སྣོད་དུ་འཐུང་སྙམ་སེམས་དང་མཚུངས། །བདག་ནི་རྟག་པ་ཡིན་ཞིང་བདེ་
དང་སྡུག་བསྔལ་ཉམས་སུ་མྱོང་འགྱུར་ལ། །ལུས་ཀྱི་ཡུལ་ནི་གཅིག་པུ་དག་ལ་བདག་གི་ཞེས་བློ་བསྐྱེད་དུ་ཟད། །བུ་དང་ཆུང་མ་ཕྱུགས་རྣམས་ཞེས་བྱ་འདི་དག་ལས་གཞན་གྱིས་བསྐྱེད་པ། །དེ་ལ་ཇི་ལྟར་བདག་གི་ཞེས་རྩི་འདིར་ནི་གཏི་མུག་སྟོབས་ཅན་ཡིན། །དེ་ནི་རྒྱུ་ལས་བྱུང་ཞིང་གནས་པའང་རང་གི་རྐྱེན་གྱི་
དབང་ལས་བྱུང་། །དུས་ཀྱིས་རྒས་ཤིང་ཚེ་དང་བསོད་ནམས་ཟད་ལ་སོགས་པས་འཆི་བར་འགྱུར། །སྐྱེ་ལ་དབང་བྱར་མ་ཡིན་རྒས་ལ་མ་ཡིན་ཤི་ལ་དབང་མེད་ན། །བདག་གི་ཆུང་མ་ཞེས་སྨྲ་ངོ་ཚ་བར་ནི་ཇི་ལྟར་དེ་མ་གྱུར། །གང་ཞིག་རྟག་ཏུ་རང་དབང་གྱུར་དང་གང་ཞིག་བདེ་བ་ཉིད་གྱུར་པ། །གང་ཞིག་

172-1-192a

སྐད་ཅིག་ཙམ་ཡང་འདོར་མི་འགྱུར་བ་དེ་ནི་བདག་གིར་བཤད། །ལུས་འདི་དབང་བྱར་མེད་ཅིང་སྡུག་བསྔལ་དག་ཀྱང་སྐྱོ་བར་འདོར་གྱུར་ན། །འདི་ལ་རིམ་པ་གང་ཞིག་མཐོང་ན་འདི་ལ་གང་ཞིག་མངོན་ཞེན་འགྱུར། །མི་རྟག་པ་ལ་རྟག་སྙམ་སེམས་ལ་སྡུག་བསྔལ་བ་ལ་བདེར་མངོན་དགའ། །མི་གཙང་ལུས་
ལ་གཙང་བ་ཉིད་དུ་ཤས་ཆེར་ཞེན་པར་བྱེད་པ་དང་། །བདག་མེད་པ་ལ་བདག་ཅེས་འཛིན་པའི་རྡུལ་རྣམས་རྣམ་པར་བསལ་ནས་ནི། །སྐྱེ་མེད་འགག་མེད་འཆི་བ་མེད་ཅིར་རྟག་པའི་གནས་ནི་འབད་པས་མངོན་དུ་གྱིས། །ཕྱིན་ཅི་ལོག་བཞི་འགག་པར་བྱེད་པའི་གཏམ། །འདི་བྱས་པ་ལས་བདག་གིས་དགེ་བསགས་པ། །
གང་ཡོད་དེས་ནི་འགྲོ་གསུམ་མ་ལུས་པ། །ཕྱིན་ཅི་ལོག་བཞི་ལས་ནི་ཡིད་གྲོལ་ཤོག །ཕྱིན་ཅི་ལོག་བཞི་སྤང་བའི་གཏམ་སློབ་དཔོན་མ་ཏི་ཙི་ཏྲས་མཛད་པ་རྫོགས་སོ།།      །།རྒྱ་གར་གྱི་མཁན་པོ་བུདྡྷ་བྷ་དྲ་དང་། །ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།    །
༄༅༅། །རྒྱ་གར་སྐད་དུ། ཀ་ལཱི་ཡུ་ཀ་པ་རི་ཀ་ཐཱ། བོད་སྐད་དུ། རྩོད་པའི་དུས་ཀྱི་གཏམ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཚུལ་ཁྲིམས་ལས་ཉམས་ཐོས་པའི་ནོར་བྲལ་འདོད་པས་འདི་ཉིད་ཅུང་ཟད་མཆོད་པར་བྱེད། །ཉེས་མེད་ཚུལ་ཁྲིམས་ལྡན་ལ་ཡོན་ཏན་རོ་ལ་རྒྱབ་
ཕྱོགས་ཞེ་སྡང་ཅུང་ཟད་ཉེས་པ་རྒོད། །རབ་བྱུང་རྣམས་ལ་ཁྱིམ་པས་ལས་བསྒོ་དེ་ནས་རབ་བྱུང་དེས་ཀྱང་ཁྱིམ་པ་མགུ་བར་བྱེད། །ཅི་སྤྱད་འགྲོ་བ་འདིར་ནི་འགྲོ་བའི་ཁྱིམ་དུ་མ་ལུས་དུས་ཀྱི་སྙིགས་མ་ཞུགས་པ་ཡིན། །ད་ལྟར་ལེགས་པར་སྤྱོད་པའི་སྐྱེ་བོ་ངོ་ཚ་སྡིག་པ་ཅན་བསྔགས་དགའ་བར་འགྱུར། །སློབ་དཔོན་ནོར་
རྣམས་མཆོག་ཏུ་སེམས་པས་འཇོམས་ཕྱིར་སློབ་མ་རྣམས་ནི་ཞུམ་པར་གནས། །འདི་ན་བྱིས་པའི་ཉེ་དུའི་འཁྲུལ་འཁོར་གྱིས་བཅིངས་པ་ནི་སུན་འབྱིན་བྱེད་པ་བཞིན། །ད་ལྟར་རྩོད་པའི་དུས་ན་འཇིག་རྟེན་རྣམས་ལ་གཡོ་སྒྱུའི་མཚོན་དྲག་སྟོབས་དང་ལྡན། །བཅུད་རྣམས་སས་འཐུང་དངོས་རྣམས་སྟོབས་ཆུང་ལྷ་རྣམས་ཆར་ནི་
འབེབས་མི་བྱེད། །རླུང་རྣམས་རབ་ཏུ་དྲག་ལྡང་ལོ་ཏོག་རྣམས་ནི་མི་སྨིན་སྐྱེ་མི་འགྱུར། །སྐྱེས་ལ་སེར་འབབ་ས་རྣམས་རྩོད་པའི་དུས་ཀྱིས་དབང་སྒྱུར་འབྲས་བུ་མེད། །དངོས་རྣམས་མཐུ་མེད་དགོས་པ་སྒྲུབ་རྣམས་ཉམས་པ་ཐོབ་ལ་བརྟག །འགྲོ་ལ་ནད་འཕེལ་ས་ནི་དེ་དག་སྐྱེ་བོ་རྣམས་ཀྱིས་སྟོངས། །ལྗོན་པའི་ནགས་ཚལ་

172-1-192b

སྐོམ་པས་ཡལ་གའི་ལག་པ་གྱེན་དུ་འགྲེང་བྱེད་དེ། །རྩོད་པའི་དུས་ཀྱིས་བཅོམ་བྱས་བཟང་པོའི་དུས་ནུབ་རི་བོ་ཆོ་ངེས་འདེབས། །ཡུལ་བཟང་ཆགས་པ་རྣམ་སྤངས་ས་རྣམས་སུ་ནི་དུས་བཟང་ཡོངས་ཟད། །ཡོན་ཏན་མཁས་ལ་མི་བཀུར་ནོར་ལྡན་རྣམས་ལ་མཆོད་བྱ་མིན་པར་མཆོད། །སྐྱེ་རྨོངས་མཆོད་བྱེད་གཤིན་རྗེས་འཇིག་རྟེན་སྡུག་
བསྔལ་དེས་ཁྲིད་གང་གིས་བཟློག །ཚུལ་ཁྲིམས་འཆལ་བ་སྟོབས་ལྡན་ཚུལ་ཁྲིམས་ལྡན་པ་བསྡིགས་ཤིང་ཚར་གཅོད་བྱེད། །སྡིག་པ་དགའ་བའི་སྟོབས་ལྡན་གཡོན་ཅན་རྣམས་ཀྱིས་དམ་ཆོས་བསྣུབ་པར་འགྱུར། །གང་ཞིག་སྡོམ་པ་ལ་གནས་བརྟན་པའི་མཆོག་ལ་འཇུག་པར་བྱེད་པ་ཉུང་། །ཐེ་ཚོམ་ཡོད་མིན་དྲང་སྲོང་བསྟན་པ་རིང་པོ་
མི་ཐོགས་ནུབ་པར་འགྱུར། །གཡུལ་འགྱེད་རྩོད་པ་དུ་མས་གོས་ལྟར་ས་གཡོགས་ལོ་ཏོག་སྐྱེས་ལ་འདོད་མི་འབྱུང་། །རླུང་རྣམས་མི་བཟད་ལྡང་ཞིང་དེ་བཞིན་སྐྱེ་བོ་དམ་པ་ཡང་དག་མཆོད་མི་བྱེད། །རྒྱལ་པོ་དགྲ་དང་རྐུན་མའི་འཇིགས་པས་མི་དག་བག་ཕེབས་ནོར་རྣམས་ལོངས་མི་སྤྱོད། །ད་ལྟར་སྐྱེ་བོ་སྡུག་བསྔལ་བཅས་འཚོ་འགྲོ་བ་རྣམས་
ལ་འཇིགས་པ་འབྱུང་། །གང་ཞིག་དུས་སུ་ཆར་མེད་གང་དུ་ལམ་ཞུགས་སེར་བ་མི་མཐུན་དུ་མ་འབབ། །གང་ཞིག་བ་རྣམས་འོ་མ་མི་འབྱུང་དུས་རྣམས་འཁྲུགས་ཤིང་ས་ལས་འབྲུ་མི་སྐྱེ། །སྨན་རྣམས་གང་ཡིན་ནུས་མེད་དེ་བཞིན་ཁྱད་པར་རྣམས་ནི་རབ་ཏུ་ཉམས། །ཡིད་ནི་ངེས་བཅོམ་ཆོས་མིན་རྩོད་པས་དངོས་པོ་འདི་རྣམས་ཉེས་དང་
བཅས། །རྩོད་པའི་དུས་འདིང་ཆོས་སྤངས་མི་བཟད་པ་ལ་ཡང་དག་ཞུགས་པས་ན། །གང་དུ་དབང་པོས་ཆར་ཕབ་ལྗོན་ཤིང་ཡལ་ག་དག་ལས་མེ་ཏོག་འབྲས་བུ་ཅུང་ཟད་སྣང་། །ས་གཞི་རླན་པ་དང་བཅས་ས་རྣམས་གང་ཡིན་པ་ལས་ལོ་ཏོག་སྨིན་གྱུར་པ། །དེ་ཀུན་ཚུལ་ཁྲིམས་བརྟུལ་ཞུགས་ཡང་དག་སྡོམ་ལྡན་ཆོས་དང་ལྡན་པའི་
མཐུ། །དུས་རྣམས་འཁྲུལ་ཞིང་ས་ལ་བཅུད་རྣམས་ནུབ་འགྱུར་ཉི་ཟླ་ལོག་པར་རྒྱུ། །ཆུང་མ་ཁྱོ་ལ་གཅུགས་པས་འབྲེལ་པའི་སེམས་མེད་དམན་པ་རྣམས་ནི་མཐོན་པོར་འགྱུར། །རྒྱལ་པོ་ཆོས་སྤངས་ནོར་རྣམས་མཆོག་ཏུ་དོན་གཉེར་བུ་རྣམས་ཕ་ལ་སྡང་། །ཀྱི་ཧུད་སྡུག་བསྔལ་རྩོད་པའི་དུས་ནི་ཉེར་གནས་བསོད་ནམས་གཉེར་བ་ནགས་སུ་
སོང་། །ཆོས་དང་རབ་བྱུང་དཀའ་ཐུབ་རྣམས་འབྲོས་བདེ་བ་རྣམས་ནི་རིང་དུ་སོང་བར་གྱུར། །ས་རྣམས་འབྲས་བུ་ཉུང་ཞིང་རྒྱལ་པོ་འཁྲུག་བྱེད་མཚོན་གྱིས་རྒྱལ་བྱེད་རྣམ་པར་གནོན། །འཇིག་རྟེན་བུད་མེད་ལ་དད་བུད་མེད་ཀྱང་གཡེམ་བྲམ་ཟེ་རྣམས་ནི་འདོད་ཆེན་བཅས། །ལེགས་པ་རྣམས་ནུབ་སྐྱེ་ངན་སྟོབས་ལྡན་དུ་མ་རྩོད་པའི་དུས་

172-1-193a

སུ་བཟང་པོ་ཡི། །དུས་སོང་བདེ་བ་རྣམས་འདས་དུས་དེར་སྦྱོར་བའི་སྐྱེས་བུ་རྣམས་ཀྱང་འདས། །འདིར་ཡང་དུས་མཐའ་དེ་རྣམས་མུན་བཅས་ཕུག་བཞིན་ཤེས་མ་ཡིན། །ལེགས་སྤྱད་བརྒྱ་ཕྲག་དྲི་ཡིས་བསྒོས་པ་ཡི། །སྐལ་ལྡན་ནུབ་ཅིང་དུས་ནི་འདས་པར་འགྱུར། །པད་གཞོན་རྩ་བའི་སྐུད་པ་བཞིན། །
དཀར་པོའི་ཆོས་རྣམས་ཕྲ་བར་འགྱུར། །བློ་ལྡན་སྐྱེས་བུ་གཏམ་མཁས་དྲི་མས་རྒོད། །འགྲོ་འདི་དགའ་མེད་དགའ་སྟོན་ཟིན་པ་བཞིན། །བདག་ཉིད་ཆེན་པོ་འདི་ནི་ཡང་དག་འགགས། །གང་ན་ཡོན་ཏན་རྣམས་ཀྱི་སྟོབས་ཕྲ་ལ། །ཡོན་ཏན་ལ་བདུད་འབབ་པས་གཅོད་བྱེད་ཅིང་། །སྐྱེ་བོ་སྨྲ་བ་ལ་བརྟེན་འཚོ་བར་
བྱེད། །རྩོད་པའི་དུས་ཀྱི་གཏམ་སློབ་དཔོན་མ་ཏི་ཙི་ཏྲས་མཛད་པ་རྫོགས་སོ།།      །།རྒྱ་གར་གྱི་མཁན་པོ་ཨ་ཛི་ཏ་ཤྲཱི་བྷ་དྲ་དང་། །ཞུ་ཆེན་གྱི་ལོ་ཙཱ་བ་དགེ་སློང་ཤཱཀྱ་འོད་ཀྱིས་བསྒྱུར་བའོ།།      །།༄༅༅། །རྒྱ་གར་སྐད་དུ། །བི་བེ་ཀ་ཀ་ཐཱ། །བོད་སྐད་དུ། །དབེན་པའི་གཏམ། བྱང་ཆུབ་
སེམས་དཔའ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དཀའ་ཐུབ་རྙེད་པའི་བདེ་བ་འདོད་རྣམས་ཀྱིས། །འཆོལ་བར་སྤྱོད་པ་རྣམས་ནི་མཐོང་གྱུར་པ། །རབ་ཏུ་དབེན་པ་ཡང་དག་བསྟེན་པ་ཡི། །དགེ་སློང་འདི་སྐད་ཚིག་ཏུ་བརྗོད་པས་སྨྲ། །ཕོངས་པ་སྤང་ཕྱིར་དེ་བཞིན་གཤེགས་པ་ཡིས། །རབ་བསྔགས་ཞི་བའི་
དབང་བསྐུར་ཉེར་བླངས་ནས། །དཀའ་ཐུབ་ཁྱིམ་དང་འདྲིས་པས་རབ་ཆགས་པའི། །ཕོངས་ཉིད་རྒལ་དཀའ་བྱིང་བ་ཇི་ལྟ་བུར། །འཕགས་པ་འགྲན་མེད་ཤིང་དྲུང་གནས་ནས་ནི། །འགྲོ་བ་སྐྱེ་དང་འགག་པ་མཐོང་བས་ན། །ཞི་བའི་བདེ་བ་ཡོངས་སྨིན་ཚེ་དགེ་བ། །མི་ལས་ཤིན་ཏུ་འཕགས་པ་ཐོབ་པར་འགྱུར། །སེམས་ཀྱི་རྣམ་པར་འཆིང་
བ་གཉེན་པོ་ཡི། །སྟོབས་ཀྱིས་བསལ་བས་སྐྱེ་བྲལ་ནགས་དག་ཏུ། །རྣལ་འབྱོར་ཉེར་ཞིའི་བདུད་རྩིས་ཚིམ་གྱུར་པས། །བདེ་བར་གཉིད་ལོག་པ་དང་སད་པར་འགྱུར། །མཚན་མོ་ཟླ་བའི་སྣང་དང་རབ་གསལ་བའི། །སྐར་མའི་མེ་ཏོག་བཀྲམ་པར་ཉེར་མཆོད་ནས། །དགོན་པར་བརྟེན་པའི་ཡིད་ནི་ངེས་ཞི་བའི། །ལྷག་པར་དགའ་བ་དག་ནི་སྐྱེ་བར་འགྱུར། །གང་
དུ་དགེ་སློང་དབེན་པའི་རྒྱུ་མཚན་གྱིས། །ཁ་ན་མ་ཐོ་མེད་པ་ཞི་འགྱུར་བདེ། །གང་དུ་ཡོ་བྱད་ཡང་དག་བསྟེན་ཆགས་པས། །སེམས་ནི་སྣ་ཚོགས་ཕོངས་པས་གདུངས་པར་འགྱུར། །ཇི་ལྟར་ཆུ་ཤིང་སྨྱུག་མ་འོད་མདག །འབྲས་བུ་འབྱིན་ནས་རང་ཉིད་འཇིག་པ་སྟོན། །དེ་བཞིན་དཀའ་ཐུབ་ཁྱིམ་ལས་རྣམ་གྲོལ་ནས། །བདག་ཉིད་ཟིལ་གྱིས་གནོན་ལ་

172-1-193b

ཆགས་མཐོང་འགྱུར། །ས་ཡི་རྡུལ་གྱིས་གོས་པའི་རི་དགས་དག །རྩྭ་དང་འདབ་ནས་ཙམ་ཞིག་སྒྲུབ་བྱེད་ལྟར། །སེམས་ནི་དབེན་པར་གཞོལ་བ་འདོད་འགྱུར་གྱི། །གླིང་བཞིའི་ཕུན་ཚོགས་རྒྱ་ཆེན་དག་ལའང་མིན། །ཤིང་དྲུང་འབབ་ཆུ་བསྟན་པའི་དཀའ་ཐུབ་དག །ཡོངས་སུ་འཛིན་པ་དག་ནི་རྣམ་སྤངས་ནས། །རང་སེམས་ཙམ་དང་རབ་ཏུ་འབྲེལ་པ་
ཡི། །བདེ་འབྱུང་གང་དེ་རྒྱལ་པོ་རྣམས་ལ་མེད། །ལྗོན་ཤིང་སྔོན་པོའི་རྩེ་མོ་རླུང་དག་གིས། །རྣམ་གཡོ་ཕྲ་ལ་སྙོམས་པའི་ཆར་འབབ་པའི། །མི་གཡོ་རྣམ་བརྟགས་རི་ཡི་སུལ་གནས་ནི། །དགེ་སློང་མཚན་མོ་དགེ་བ་སྐྱེད་པར་བྱེད། །རྙོག་ཅན་འདོད་ལ་འདྲིས་པས་འཕོས་པ་ཡི། །བདག་བསྙེན་པ་ཡི་ཆགས་སྤངས་ལྟོས་མེད་ཅིང་། །སྐྱེ་བྲལ་ནགས་གང་
ཡིན་པར་དགའ་བྱ་ཡི། །དགེ་སློང་གྱུར་ནས་དོན་མེད་འགྱུར་མི་བྱ། །དགེ་སློང་རྟགས་ནི་བདག་ཉིད་གནོད་མེད་པར། །ཉེར་བླངས་གང་ཞིག་སྒྲུབ་པར་མི་བྱེད་ཅིང་། །དམན་ལ་ཡོངས་སུ་འཛིན་པའི་འདམ་བྱིང་བ། །དེ་ནི་འཚོ་བའི་འཇིག་རྟེན་སླུ་བྱེད་ཡིན། །ཆུ་དང་རྡོ་ཁུ་རྩ་བ་མེད་པ་ཡི། །ས་དབང་འཛེགས་ནས་མི་བཟད་ཡང་དག་ཏུ། །རྟོག་དང་ལྡན་
པས་ཤི་བ་བཟོད་བྱ་ཡི། །བསླབ་པ་ཡོངས་སུ་ཉམས་པས་འཇུག་མི་བྱ། །རྒྱ་མཚོ་རྣམ་པར་འཁྲུགས་པའི་རླབས་ཚོགས་སུ། །རིན་ཆེན་ཁུར་གྱིས་གྲུ་དག་ནུབ་པ་བཞིན། །ཁྱིམ་དང་འདྲིས་པའི་རྙེད་ཆགས་ཁུར་དག་གིས། །གང་དག་མཆོག་བརྟེན་རྒྱ་ཆེན་སྣུབ་པར་བྱེད། །ནགས་ན་བརྟེན་པའི་ཞི་བའི་རི་དགས་ནི། །གཞོན་ནུ་མ་ཡི་འགྲོ་བས་
དཀྲུགས་མཚོན་པ། །གཉེན་པོ་ཇི་བཞིན་བདག་ཉིད་ཞི་འདོད་རྣམས། །སྡོམ་ཅན་རབ་ཏུ་དབེན་ཉིད་ཡང་དག་རྩོམ། །ཡུལ་གྱི་རོ་ཡི་དུག་གིས་ཉེར་གདུང་བློ་ཅན་དག །ཆགས་པ་ཉུང་ངུ་དག་གིས་གདུང་གྱུར་ན། །དེ་དག་ཡོངས་སུ་སྤོང་ལ་རྩོད་མེད་པའི། །དཀའ་ཐུབ་ཀྱི་ཧུད་ཨེ་མའོ་རབ་ཉམས་འགྱུར། །སྡོམ་ཅན་རྐང་པས་འགྲོ་ཞིང་འཇོག་པ་
ལྟར། །དེ་ལྟར་འདྲིས་པ་འདོད་པ་འཕེལ་འགྱུར་ཏེ། །རང་རླབས་ཆབ་ངོགས་མངོན་བརྡབས་འཇིགས་རུང་བས། །སྤྲིན་ཆེན་ཆར་གྱིས་ཡ་མུ་ན་བཞིན་ནོ། །དཀའ་ཐུབ་ཇི་ལྟར་དམན་པ་དག་ལ་ཡང་། །འདོད་ལྷའི་དབང་གིས་རྗེས་སུ་ཞུགས་གྱུར་པ། །དེ་ལྟར་རང་ལག་གིས་དྲང་ཕུན་སུམ་ཚོགས། །རྒྱལ་ཆེན་ཁྱིམ་ལ་ཁྱིམ་པ་ཆགས་པ་མེད། །རང་གི་
ཁྱིམ་དང་གདོང་དག་མཆི་འཛག་པས། །བརླན་པའི་གཉེན་དག་སྤངས་པར་གྱུར་ནས་ནི། །དམན་པ་གཞན་གྱི་ཁྱིམ་ལ་ཆགས་པ་ཡི། །རབ་བྱུང་འདི་ལ་ཤིན་ཏུ་ངོ་ཚ་མེད། །ཐར་པ་འདོད་གང་རང་ཁྱིམ་སྤངས་ནས་ནི། །མི་ཤེས་གཞན་གྱི་ཁྱིམ་དག་འདོད་བྱེད་པ། །རྒྱ་མཚོ་རྣམ་པར་འཁྲུགས་པའི་རླབས་ཚོགས་ལས། །བདག་ཉིད་རྒལ་ནས་གླང་རྗེས་

172-1-194a

བྱིང་དང་མཚུངས། །སྡིག་པ་སྤོང་བྱེད་དེ་བཞིན་གཤེགས་པ་ཡིས། །གནང་བའི་སྒྲུབ་པ་དག་གིས་འདི་བརྟགས་གང་། །དམན་པའི་ནོར་ལ་འདོད་པའི་སྲེད་པ་ཡིས། །གཞན་ཁྱིམ་ལ་ཆགས་དྲི་མ་ཅན་དུ་འགྱུར། །ཆུ་བོ་ནི་ལུ་ཚ་ཡི་མེ་ཏོག་ལྷུང་བའི་དུམ་བུས་མཐའ་མར་བྲིས། །བྱེ་མ་དཀར་པོའི་ངོགས་དང་ངང་པ་ཀ་དམ་པ་
དག་གནས། །ནགས་ཀྱི་གླང་ཆེན་ཁྱུ་དག་རྩེ་བས་ཐ་དད་འཐོར་རླབས་ཅན། །དགོན་གནས་བརྟུལ་ཞུགས་ཅན་ལ་དགའ་བ་རབ་ཏུ་སྐྱེད་པར་བྱེད། །སྲིད་པའི་ལོངས་སྤྱོད་དོན་དུ་གཉེར་བའི་ཡི་དགས་རྣམས་བསལ་ནས། །མ་བརྩམས་ཡིད་འོང་བདེ་བ་བསྟེན་པ་རྣམས་ཀྱི་གནས་སྐབས་ནི། །པདྨ་ཁ་བྱེ་བཞིན་དུ་དཀའ་ཐུབ་རང་གི་གྲགས་པ་ཡིས། །
འཇིག་རྟེན་ཡོངས་སུ་དགའ་བ་རབ་སྐྱེད་ཀུན་དུ་དཔེ་ལས་འདས། །དཀའ་ཐུབ་རི་དང་ཉེ་བའི་ཤིང་རྩ་རབ་ཡངས་དང་འབྲེལ་བར། །གནས་པའི་ཚོམ་བུ་མི་སྙོམས་ལྷོད་པའི་སྲུབས་བར་ལ་ཆགས་པའི། །བ་མོའི་དུམ་བུས་གོས་པ་ཐོ་རངས་ཉི་མའི་འོད་ཟེར་གྱིས། །ལག་པ་དག་གིས་ཉུལ་བ་བཞིན་དུ་རྣམ་པར་སྐེམས་པར་བྱེད། །ཁང་སྟོང་ཤིང་དྲུང་
རླུང་ནི་རྒྱུ་གྱུར་ཁ་བའི་ཚོགས་ཆེན་འབབ། །མདངས་ཟད་རབ་རྩུབ་ལོ་མ་དག་གིས་གདུ་བུ་བཞིན་བསྐོར་བའི། །འདོད་པ་ཀུན་སྤངས་ཤེས་རབ་རྣོ་བའི་བརྟུལ་ཞུགས་ཅན་དག་ལ། །མཚན་མོ་རྣམ་པར་སྐྱོ་བ་དག་ནི་སྐྱེད་པར་ཟད་མི་བྱེད། །ཤིང་གི་ལོ་མའི་ཐ་མ་ལ་ཆགས་བ་མོའི་ཆུ་དག་གི །དུམ་བུ་ཉི་མ་འཆར་ཚེ་མདོག་ནོར་བུ་དང་འདྲ། །
ཐིགས་པ་དག་ནི་ཤིང་དྲུང་གནས་པའི་དགེ་སློང་ལ། །འགྲོ་བའི་སྐྱེ་དང་འཇིག་ཇི་བཞིན་རབ་ཏུ་སྟོན་པར་བྱེད། །རབ་ཞིའི་བདེ་རོ་ཤེས་པས་འཁོར་ལོས་སྒྱུར་བའི་དཔལ་འབྱོར་ཀྱང་། །ཡོངས་སུ་དཔྱད་པས་རྙིངས་པའི་མེ་ཏོག་ཕྲེང་བཞིན་རྣམ་སྤངས་ནས། །ལང་ཚོ་རང་བཞིན་གྱིས་གཡོ་ངང་ཚུལ་ཅན་དག་ཡོལ་བྱས་ཏེ། །དགོན་པར་རི་
དགས་འདྲར་འཆི་ཞི་བའི་སེམས་ནི་བརྟན་པར་བྱ། །འདོད་པ་ལ་འཇེན་ཕྱིན་ཅི་ལོག་པའི་སེམས་ལ་ཀུ་མུ་ཏའི། །དུམ་བུ་ལྟར་དཀར་མི་ཐོད་སོ་དང་འབྲེལ་པས་ཉེར་དགོད་དང་། །རླུང་གིས་བུད་པའི་རོ་བསྲེགས་མེ་ཡིས་ཉེ་འཁོར་ཤིང་བསྲེགས་པའི། །དུར་ཁྲོད་དཀའ་ཐུབ་གཅིག་པུ་ལ་ནི་མཚན་མོ་དགའ་བ་སྐྱེད་པར་བྱེད། །ལྗོན་
ཤིང་ཚོགས་དང་རྒྱ་ཆེས་རི་ཡི་རྩ་བ་སྔོར་གྱུར་ཅིང་། །རྡོ་བས་ཁྱབ་དང་བསིལ་ལ་རབ་དང་བ་ཡི་ཆུ་འཛག་འབབ། །རྨ་བྱ་རབ་དགའ་སྒྲ་ཡིས་ཁྱབ་པའི་རི་སུལ་ནང་དུ་ནི། །ཁྱིམ་དུ་འཆི་བའི་སྐྱོ་བའི་སེམས་ནི་རབ་ཏུ་དགའ་བར་བྱེད། །འགྲོ་བའི་དོན་མ་བྱས་པའི་འཆི་བར་འགྱུར་བ་ཁྱིམ་དག་ལ། །དགའ་བ་དག་ལ་དབེན་པ་མཆོག་ལ་སློབ་

172-1-194b

བྱེད་སེམས་ཅན་མཆོག །རྫོགས་པའི་བྱང་ཆུབ་སེམས་ནི་རྙེས་གྱུར་ཕ་རོལ་ཚོགས་འཐོབ་པ། །སྲིད་པའི་དུག་གི་སྡོང་པོའི་རྩ་བ་བརྟན་པོ་འབྱིན་པར་བྱེད། །ནགས་ཚིག་པ་ཡི་བྱ་དང་འདྲ་བར་སྡུག་བསྔལ་བརྒྱ་ཡི་གཞིར་གྱུར་པའི། །ཁྱིམ་གང་ཡིན་པ་ཡོངས་སུ་སྤངས་ནས་ནགས་སུ་འགྲོ་བྱེད་པ། །དེས་ནི་སྲིད་པའི་གཉིད་རབ་བསལ་
བ་འགྲོ་བ་ཀུན་གྱི་མགོན། །སངས་རྒྱས་རབ་ཏུ་མཉེས་བར་བྱེད་པ་ཡིན་ཞེས་དེ་སྐད་གྲགས། །མརྒད་སྔོན་པོ་དང་འདྲ་ནེའུ་གསེང་ཚོགས་དག་ནི། །ཤིང་རྩ་ཉེ་བར་བཀོད་དང་ཡལ་ག་མེ་ཏོག་གིས་བསྐོར་བའི། །ཞི་བའི་ནགས་མཐའ་ཀྱེ་མའོ་དགེ་སློང་མཆོག་གིས་སྤོང་བྱེད་པ། །གསད་ཕྱིར་རྔོན་པའི་གླུ་ཡིས་དྲངས་པར་གྱུར་པའི་རི་དགས་
མཚུངས། །འཕགས་པའི་བཞེད་པ་བདེ་བར་གཤེགས་པའི་ལམ་གྱི་རྗེས་འབྲངས་ནས། །ནགས་དང་འདྲ་བར་ཁྱིམ་གྱི་རང་གི་དོན་དག་སྒྲུབ་བྱེད་ཀྱང་། །རྣམ་པར་འཚེ་བ་རང་བཞིན་གྱིས་མེད་ནགས་ནི་དབེན་པ་ཡིས། །སེམས་ཀྱི་འཆིང་བ་དག་ནི་འབད་པ་མེད་པར་གཅོད་པར་བྱེད། །འདོད་ཆགས་གང་དག་དེ་ལ་དགོས་པར་འགྱུར་བས་ཀུན་འཕེལ་ཞིང་། །ལེགས་
སྤྱད་ཐུབ་པའི་བསྟན་པ་དག་ཀྱང་ཉམས་བྱས་ནས། །མེ་དཔུང་རབ་ཏུ་འབར་བ་རྒལ་དཀའི་ཁོངས་ནི་མཐར་ཐུག་པའི། །ངན་སོང་དག་ཏུ་དགེ་སློང་བདེ་ཆུང་ལ་ཆགས་འགྲོ་བར་འགྱུར། །གང་ཞིག་ཉེས་པ་མ་ལུས་གདུང་བ་ཟད་བྱེད་སངས་རྒྱས་པའི། །ལེགས་པར་བཤད་པ་ཁས་བླངས་ནས་ནི་ངན་འགྲོར་ངན་འབྱིན་པ། །ཨུཏྤལ་སྔོན་པོའི་སྙིང་
པོའི་དྲི་མཆོག་དག་དང་ཆུ་དུམ་བུ། །སར་ལ་བསིལ་ལྡན་རླུང་གིས་དེ་དག་ཇི་ལྟར་ཚིམ་པར་འགྱུར། །ས་ར་ས་ཡི་སྒྲ་ནི་རང་བཞིན་སྙན་པའི་གླུ་དབྱངས་དག །ལྡོག་པ་མེད་པར་སྒྲོགས་པར་གྱུར་པས་མཆོག་རྣམས་ཁྱབ་གྱུར་པས། །བརྟུལ་ཞུགས་ཅན་གྱིས་འགྲོ་དང་གནས་པ་དག་ལས་དུབ་སྐྱེས་དང་། །ལུས་ལྷོད་གྱུར་པའི་
མཚན་གྱི་གུང་ཐུན་གཉིད་དག་སད་པར་བྱེད། །རང་གི་འོད་ཀྱི་དཀྱིལ་འཁོར་གྱིས་སྤྲས་ཡོངས་སུ་གནས་པ་ཡིས། །ཟླ་བའི་འོད་ཟེར་ཚོགས་ཀྱི་དཔལ་འཇོམས་ཤིན་ཏུ་ཟིལ་གནོན་པས། །དགེ་བའི་རྩ་བ་ཉེར་བསགས་སྐལ་ལྡན་འཇིག་རྟེན་ལ་གཟིགས་ཤིང་། །རང་བྱུང་འཕགས་པ་མཆོག་ནི་དགོན་པ་དེ་ཡང་སྟེན་པར་
མཛད། །ཅི་སྟེ་གང་ཞིག་ནང་གི་དགྲ་ལས་ངེས་རྒྱལ་བྱ་བ་བྱས་པ་ཡི། །སྟོན་པ་འཇིག་རྟེན་མཐའ་གཟིགས་དེ་ཡས་ནགས་དག་སྟེན་མཛད་ན། །ཡང་དག་མི་རྟོགས་སྐྱེ་བོ་མི་གཙང་འདམ་དུ་བྱིང་གྱུར་པའི། །སྡོམ་ཅན་ཞི་འདོད་བདེ་གཤེགས་རྗེས་སུ་ཅི་ཕྱིར་འཇུག་མི་བྱེད། །བདག་ཏུ་ལོག་པར་འཛིན་པར་གྱུར་པས་ཉིན་དང་མཚན། །སྲིན་བུས་ཇི་

172-1-195a

བཞིན་རྣམ་རྟོག་སྡིག་ཅན་དག་གིས་ཟོས་པས་ན། །ཉོན་མོངས་རྣག་གིས་ཉེར་གོས་ཞི་བའི་ཆུ་ཡི་བུམ་པ་ཡིས། །བཀྲུས་པ་བཞིན་དུ་སེམས་ནི་སྐྱེ་བ་མེད་ནགས་བསྟེན་པར་གྱིས། །འབྲས་བུའི་ལྕིད་ཀྱིས་ཡལ་ག་གུག་པའི་ཐ་མ་ལོ་མ་ཡིས། །གསལ་གྱུར་ལྕུག་མ་མེ་ཏོག་ཁ་བྱེའི་དགའ་བྱེད་རྒྱུ་ལྡན་པའི། །ནགས་ཀྱི་ཤིང་ནི་
དགེ་སློང་ཕོངས་བྲལ་བསྟེན་པ་ལ། །མཛའ་བོ་བཞིན་དུ་ཤིན་ཏུ་དབུགས་ནི་འབྱིན་པར་བྱེད། །ཟླ་བ་ཤར་བ་ཁ་བ་འབབ་པ་བསྒྲིགས་པས་འགོག་འགྱུར་བའི། །དགུན་གྱི་མཚན་མོ་དག་ནི་རབ་ཞི་བདེ་བ་འདོད་རྣམས་ཀྱི། །རྣལ་འབྱོར་རྩྭ་ཡི་སྟན་ལ་དགའ་བ་དག་ལ་ཐོ་རངས་དག །ནགས་ཀྱི་ཤིང་ན་ཡིབ་པའི་བྱ་རྣམས་འདྲ་བར་བྱེད། །ཤིང་དང་
ཉེ་བའི་རི་ཡི་རྐེད་དུ་མི་གཡོ་སྐྱིལ་ཀྲུང་བཅས། །མེ་ཏོག་གིས་བསྐོར་རབ་དགའི་རླུང་གིས་གཡོ་བར་བྱེད་པ་ན། །འགྲོ་གཉེན་སྲིད་གསུམ་རྣམ་རྒྱལ་དུས་ན་བྱང་ཆུབ་སྙིང་པོ་ཡི། །གདན་ལ་བཞུགས་བཞིན་སྡོམ་ཅན་མཚན་མོ་རྗེས་སུ་སྒྲུབ་པར་བྱེད། །དམན་པའི་འགྲོ་བའི་སེམས་ཀྱིས་རེག་བྱས་དྲེགས་པའི་ཆགས་པ་དག །འདོད་བྱ་དོན་དུ་
གཉེར་བ་རྣམས་ཀྱིས་ཁྱད་པར་སྤངས་ནས་ནི། །འཕགས་བས་རྗེས་ཆགས་བརྟན་པ་མི་སྣང་འཆིང་བ་འཇིགས་པ་ཡི། །འདོད་པ་ལྷག་མ་མེད་པར་དགའ་བཞིན་ནགས་སུ་ཞི་བར་བྱ། །སྐྱེ་དང་འཆི་དང་ན་བའི་སྡུག་བསྔལ་མཐར་ནི་མ་བྱས་པར། །སྲིད་པའི་རྒྱ་མཚོ་དག་ཏུ་བྱིང་འགྱུར་བག་མེད་མ་བྱེད་ཅིག །མཐར་བྱེད་ཀུན་གྱི་སྲོག་ཀྱང་འཕྲོག་པར་
བྱེད་པ་གང་འདི་ནི། །རྒྱུན་མི་ཆད་པར་འགྲོ་ལ་སྟ་རེའི་སོ་དག་འདར་བར་བྱེད། །ས་འཛིན་པ་ཡི་ཆུ་བོའི་ཚོགས་དག་འབབ་པ་ལྟ་བུ་ནི། །ཆོས་ཀུན་གནས་པའི་རང་བཞིན་རྗེས་སུ་ཤེས་ནས་ནི། །རོ་ལ་སེམས་ལྡན་གཞན་ལས་དམ་པས་ལེགས་པར་འགྲོ་བ་ཡིས། །སྲིད་ལ་ཆགས་བྲལ་རབ་ཞི་དགའ་བ་དག་ལ་བརྟེན་པར་གྱིས། །སྨྲ་བ་ཙམ་ནི་
ནུས་སུ་ཟིན་ཀྱང་ཚིག་ལ་གནས་པའང་གྲུབ་མེད་དེ། །སྐྱེས་བུ་ཚིག་དང་སྙིང་པོར་བྱེད་པ་སྟོན་གྱི་ཆུ་བྲལ་སྤྲིན་དང་མཚུངས། །གང་ཕྱིར་དེ་བཞིན་གཤེགས་པའི་བསྟན་པ་འདི་ལ་སྒྲུབ་པ་སྙིང་པོ་ཉིད། །དེ་ཕྱིར་དེ་ཉིད་ལ་འཇུག་བློ་གྲོས་ཡིན་བཟོའི་ཚིག་ལ་མཁས། །ཀུན་ནས་ཉོན་མོངས་དགྲ་འདི་ཡི། །བདག་ཉིད་བྲན་དུ་གྱུར་པ་སྟེ། །དེ་
བས་བདག་སེམས་ཞི་བྱེད་ཅིང་། །རང་ཉིད་ཡོངས་སུ་སྨྲ་བར་བྱེད། །དབེན་པའི་གཏམ་སློབ་དཔོན་ཆེན་པོ་ས་འཚོ་བྱིན་གྱིས་མཛད་པ་རྫོགས་སོ།།      །།རྒྱ་གར་གྱི་མཁན་པོ་དཱི་པཾ་ཀ་ར་དང་། ཞུ་ཆེན་གྱི་ལོ་ཙཱ་བ་དགེ་སློང་དགེ་བའི་བློ་གྲོས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །།

172-1-195b