44-1-1a



44-1-1b

༄༅༅། །རྒྱ་གར་སྐད་དུ། ཤྲཱི་གུ་ཧྱ་ས་མཱ་ཇ་སཱ་དྷ་ནཾ་སིདྡྷི་སཾ་བྷ་བ་ནི་དྷི་ནཱ་མ། བོད་སྐད་དུ། དཔལ་གསང་བ་འདུས་པའི་སྒྲུབ་པའི་ཐབས་དངོས་གྲུབ་འབྱུང་བའི་གཏེར་ཞེས་བྱ་བ། 
དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཟབ་གསལ་གཉིས་མེད་དག་པའི་བདག་ཉིད་ཀྱིས། །བདག་དང་གཞན་དོན་ཕུན་སུམ་ཚོགས་པའི་སྐུ། །དཔལ་ལྡན་ཆོས་ཀྱི་དབྱིངས་ཀྱི་ཕྱག་རྒྱ་
ལ། །རྒྱལ་སྲས་རྒྱུ་དང་བཅས་པ་རབ་འབྱུང་ཞིང་། །རྟག་སོགས་རྒྱུ་འདྲས་ཁམས་ཀུན་རབ་བཀང་ནས། །ཇི་སྲིད་བར་དུ་དོན་མཛད་རྒྱུན་མི་འཆད། །ཁྱབ་བདག་རྡོ་རྗེ་སེམས་དཔའ་དེ་དང་ནི། །དེ་ཡི་
སྲས་རྣམས་ལ་ཡང་ཕྱག་འཚལ་ལོ། །ཁམས་གསུམ་རྒྱུ་དང་མི་རྒྱུ་ཀུན་ཁྱབ་པ། །སྙིང་གའི་དབུས་བསམ་དེ་ལ་བརྟན་སོགས་སྐྱེ། །ཆོས་བདག་ཁྲོས་པས་ཀྱང་ནི་མི་གནོན་པ། །མི་ཤིགས་ཐིག་ལེ་
གང་ཡིན་རྟོགས་པར་མོས། །བློ་དང་ལྡན་པ་རྣམས་ཀྱིས་པདྨ་ཁ་འབྱེད་པ། །རྨོངས་པ་སྲེག་བྱེད་སྙིང་གི་མུན་པ་སེལ་མཛད་པ། །ཡོན་ཏན་དག་པའི་མཁའ་ལ་རྒྱུ་ཞིང་འཇིགས་བྲལ་མཛད། །བླ་

44-1-2a

མ་དམ་པ་རྣམས་ཀྱི་ཞལ་སྔ་རྒྱལ་གྱུར་ཅིག །དཔལ་ལྡན་གསང་འདུས་མཚོ་ཆེན་ལས། །བླ་མའི་བརྒྱུད་རིམ་གྲུ་གཟིངས་ཀྱིས། །ཡིད་བཞིན་ནོར་བུ་རྣམ་པ་གསུམ། །སྨན་པའི་ཞབས་ཀྱིས་རྙེད་པའོ། །
དེ་རྙེད་དཔེ་མཁྱུད་སྤངས་བྱས་ཏེ། །འདི་ནི་ཐུན་མོང་ཅིག་ཤོས་ཀྱི། །དངོས་གྲུབ་འབྱུང་ཕྱིར་གཏེར་འདྲ་བ། །ཕན་ཕྱིར་བདག་གིས་བརྩམ་པར་བྱ། །གཞུང་གཞན་སྤངས་ཏེ་བླ་མའི་བརྒྱུད་རིམ་གྱིས། །དཔལ་དང་ལྡན་པའི་
མཉམ་འདུས་སྒྲུབ་པའི་ཐབས། །དམ་པས་གསོལ་བ་བཏབ་ཕྱིར་རབ་བྲོད་ཅིང་། །དད་པས་ཅི་ནུས་བདག་གིས་བཤད་པར་བྱ། །དེ་ལ་ཁ་ཅིག་ནི་ཡང་དག་པའི་མན་ངག་དང་བྲལ་བ་རྣམས་ནི་དམ་པ་མ་ཡིན་པར་མཁས་
པར་གྲགས་པ་རྣམས་ལ་བླ་མ་ཉིད་དུ་ཁས་བླངས་ནས་དེའི་ལམ་ལ་ཞུགས་ཏེ། དཀའ་ཐུབ་དང་སྨྱུང་བ་དང་། བརྟུལ་ཞུགས་ལ་སོགས་པས་དོན་དམ་པ་གཅིག་པོ་ལ་དཔྱོད་ཅིང་། འདི་སྙམ་དུ་བདག་གི་རྒྱུའི་འཁྲུལ་འཁོར་
ལ་སོགས་པ་དང་ལྷན་ཅིག་ཏུ་སྐྱེས་ཀྱང་། དེ་རྣམས་ཀྱིས་སྟོང་པའི་དངོས་པོ་ནི་ཡོད་དེ། དེ་ཙམ་ཞིག་བརྟགས་པས་མངོན་དུ་བྱེད་ཀྱང་། དངོས་པོ་ལ་དོན་དམ་པར་ཞེན་པས་སྟོང་པ་ཉིད་མི་ཤེས་ཏེ་གྲོལ་བ་དང་རྒྱང་རིང་དུ་

44-1-2b

འགྱུར་རོ། །ཇི་སྐད་དུ། སྟོང་པ་ཉིད་ནི་མ་ཤེས་པས། །ཀུན་ལ་འདས་པ་དེས་མི་ཤེས། །དངོས་དང་དངོས་མེད་རྣམ་འཇིགས་པས། །སྟོང་པ་ཉིད་ནི་ཤེས་པར་བྱ། །ཞེས་འབྱུང་བས་སོ། །ཡང་ཁ་ཅིག་དགེ་བའི་བཤེས་གཉེན་དང་ཕྲད་ཟིན་ཀྱང་། དམ་པ་མ་ཡིན་པས་དེའི་ལམ་
ལ་ཞུགས་ཏེ། བདག་ལ་སོགས་པ་དང་བྲལ་བའི་ཕུང་པོ་དང་སྐྱེ་མཆེད་དང་། ཁམས་རྣམས་མི་རྟག་པ་ལ་སོགས་པར་འཇིག་ཅིང་། སྡོམ་པའི་སྣོད་ལ་བརྟེན་ཏེ། ཞུགས་པ་ལ་སོགས་པའི་ལམ་གྱི་ཕུང་པོ་ལ་སོགས་པ་ལ་གྲོལ་ནས་ལྷག་མ་དང་བཅས་པ་དང་། ལྷག་མ་མེད་པའི་མྱ་ངན་
ལས་འདས་པ་མངོན་དུ་བྱེད་དོ། །འདི་ཡང་མ་རིག་པ་དང་འབྲེལ་པའི་ཕྱིར་འབྲས་བུ་ཕྱིར་ལྡོག་པ་ཅན་ཞེས་བྱ་སྟེ། དེ་ཡང་ཇི་སྐད་དུ། རྩ་བའི་རྣམ་ཤེས་ལོག་གྱུར་ནས། །ལྷག་བཅས་ལྷག་མ་མེད་གྱུར་པའི། །རྣམ་གྲོལ་འབྲས་བུ་ཐོབ་འགྱུར་ཡང་། །མངོན་དུ་རྒྱུ་བ་མེད་པ་ཡི། །མ་རིག་
བག་ཆགས་དང་འབྲེལ་ཕྱིར། །རྣམ་པར་སྣང་མཛད་གང་ཆེན་མཚོས། །དེ་ལ་ཐུགས་རྗེས་གཟུང་བའི་ཕྱིར། །དཔལ་ལྡན་གོ་ཆའི་འོད་ཟེར་དང་། །ཕྱག་གིས་དབུ་ལ་རེག་མཛད་ནས། །དེ་ཡི་རོ་མྱོང་ཟློག་མཛད་དེ། །ཡང་དག་ལམ་ལ་འཛུད་པར་མཛད། །ཅེས་གསང་བའི་རིམ་པ་ཕྱེ་
བ་ལས་གསུངས་སོ། །ཡང་ཁ་ཅིག་ནི་དགེ་བའི་བཤེས་གཉེན་དམ་པ་དང་ཕྲད་དུ་ཟིན་ཀྱང་། དེ་རྣམས་ཀྱིས་བརྒྱུད་རིམ་མཁྱུད་པས། སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་བཅུ་བསྐལ་པ་མི་ཉུང་བར་བསགས་ནས། སའི་དེ་བཞིན་ཉིད་དུ་མངོན་དུ་བྱེད་ཅིང་རིམ་གྱིས་ས་བཅུ་མངོན་དུ་མཐར་ཐུག་
པར་བྱེད་དོ། །དེའི་སྤྲུལ་པའི་སྦྱོར་བས་དགའ་ལྡན་གྱི་གནས་ཉིད་དུ་སྐྱེ་བ་ལེན་པ་དང་། གླིང་ལ་སོགས་པ་ལ་གཟིགས་པར་མཛད་ནས་ཡུམ་གྱི་ལྷུམས་སུ་འཇུག་པ་དང་། ལྷུམས་ནས་བལྟམ་པ་དང་། གཞོན་ནུ་རོལ་པ་མཛད་པ་དང་། ཁབ་བཞེས་པ་དང་། བཙུན་མོའི་འཁོར་གྱི་ནང་ནས་བྱུང་
བ་དང་། རབ་ཏུ་བྱུང་བ་དང་། དཀའ་བ་སྤྱད་པ་སྟོན་པ་དང་། དེའི་ཚེ་བདེ་བར་གཤེགས་པ་རྣམས་ཀྱིས་སྔོན་རང་ཉིད་མངོན་པར་རྫོགས་པར་སངས་རྒྱས་པའི་མན་ངག་རང་རིག་ཆོས་ཀྱི་སྐུ་མངོན་དུ་བྱེད་པ་བསྟན་པའི་ཕྱིར། ཏིལ་གྱི་གོང་བུ་བཞིན་དུ་ཆེད་དུ་ལོངས་སྤྱོད་རྫོགས་པའི་སྐུར་བསྟན་ཏེ།

44-1-3a

ཡེ་ཤེས་ཀྱི་ཕྱག་རྒྱ་གནང་ནས། སྙོམས་པར་འཇུག་པའི་ཆོ་གས་རྩ་བའི་ཡེ་ཤེས་དམིགས་པ་དང་བྲལ་བ། སྦྱོར་བ་གཉིས་ཀྱི་བདག་ཉིད་སྔོན་དང་ཕྱིས་ཀྱི་སྦྱོར་བ་མངོན་དུ་བྱས་ཏེ། བདུད་བཏུལ་ཆོས་ཀྱི་འཁོར་ལོ་བསྐོར་བ་ལ་སོགས་པ་མཛད་དོ། །དོན་
དེ་ལྟ་བུའི་སྣོད་དཀོན་པར་གཟིགས་ནས། སྦ་བར་མཛད་དེ་སངས་རྒྱས་པའི་ཚུལ་སོ་སོར་མཐོང་བར་མཛད་དོ། །བླ་མ་ཆེན་པོའི་ཞལ་ནས་ཇི་སྐད་དུ། ཅིའི་ཕྱིར་ཤཱཀྱ་ཐུབ་པ་ཡིས། །གྲངས་མེད་བར་དུ་ཚོགས་བསགས་ཀྱང་། །འདི་དོན་མ་རྟོགས་ནཻ་རཉྫར། །ཅི་ཡང་མ་ཡིན་
ཏིང་འཛིན་གནས། །དེ་ཚེ་བདེ་གཤེགས་ཀུན་གྱིས་ཀྱང་། །ཐལ་བྱུང་བློ་ཆགས་དེ་བཟློག་སྟེ། །ནམ་མཁའི་དབྱིངས་ལྟར་རྣམ་དག་པའི། །ཟབ་གསལ་གཉིས་མེད་རབ་བསྟན་ཏེ། །ནམ་ཕྱེད་དུས་སུ་རྒྱལ་བ་ལྟར། །དེ་ཉིད་བསྒོམས་པས་ཐོ་རངས་སུ། །སྐད་ཅིག་གིས་ནི་ཡང་
དག་རྟོགས། །བྱང་ཆུབ་སྙིང་པོར་ཞུགས་བྱས་ནས། །དཔུང་ཆེན་བདུད་རྣམས་རབ་བཅོམ་སྟེ། །སེམས་ཅན་གཟུང་བར་བྱ་བའི་ཕྱིར། །ཆོས་ཀྱི་འཁོར་ལོ་བསྐོར་བའོ། །དེ་ནས་བཟུང་སྟེ་དོན་མཆོག་འདི། །སྐལ་བ་ལྡན་པ་འགའ་ཞིག་ལ། །ཞལ་ནས་ཞལ་དང་སྙན་ནས་སྙན། །
བརྒྱུད་དེ་ངེས་པའི་དོན་བསྟན་པའོ། །ཞེས་གསུངས་སོ། །དེ་བས་ན་སངས་རྒྱས་ཐམས་ཅད་སངས་རྒྱས་པའི་ཚུལ་འདིས་ཤེས་པར་བྱའོ། །གལ་ཏེ་ལམ་གཞན་གྱིས་སངས་རྒྱས་པ་སྲིད་ན་ནི། དེའི་བླ་མ་དང་བཅས་པར་འགྱུར་རོ། །དེ་བས་ན་འབྲས་བུ་སྐུ་གསུམ་ནི་གཅིག་ཁོ་ན་སྟེ་
དེའི་ལམ་ནི་སྔགས་ཀྱི་སྤྱོད་པ་འདིའོ། །ཇི་སྐད་དུ་རྣམ་པར་སྣང་མཛད་བྱང་ཆུབ་པའི་རྒྱུད་ལས། སངས་རྒྱས་དུས་གསུམ་ལས་བྱུང་བ། །སྐུ་གསུང་ཐུགས་ཀྱི་རྡོ་རྗེ་ཅན། །གཞལ་མེད་ཡེ་ཤེས་ཐོབ་པ་ནི། །རྡོ་རྗེ་སྔགས་ཀྱི་དོན་སྒོམ་ཡིན། །ཞེས་འབྱུང་བས་སོ། །སྔགས་ཀྱི་སྤྱོད་པ་
ལ་མོས་པ་དེ་དག་ཀྱང་བཞིར་ཤེས་པར་བྱའོ། །ཁ་ཅིག་ནི་ཕྱིའི་གཙང་སྦྲ་ལ་སོགས་པ་དང་། བདག་གི་དེ་ཁོ་ན་ཉིད་ལ་སོགས་པས་ལྷག་པའི་ལྷ་མཉེས་པར་བྱས་པས་མངོན་པར་མཐོ་བའི་དཔལ་ཉམས་སུ་མྱོང་བར་བྱས་ནས། བསོད་ནམས་དང་ཡེ་ཤེས་ཀྱི་ཚོགས་རྫོགས་པར་བྱས་

44-1-3b

ནས་སངས་རྒྱས་ཀྱི་གོ་འཕང་ཐོབ་པར་འདོད་དོ། །ཡང་ཁ་ཅིག་ནི་ཕྱིའི་གཙང་སྦྲ་ལ་སོགས་པ་བྱ་བ་དང་བྱ་བ་མ་ཡིན་པ་སྤངས་ནས། མཚན་མ་དང་བཅས་པ་དང་། མཚན་མ་མེད་པའི་ཏིང་ངེ་འཛིན་གྱིས་མངོན་པར་མཐོ་བའི་དཔལ་ཉམས་སུ་མྱོང་ནས། ཚོགས་གཉིས་བསགས་
ནས་སངས་རྒྱས་ཀྱི་གོ་འཕང་ཐོབ་པར་འདོད་དོ། །ཡང་ཁ་ཅིག་ནི་གཙང་སྦྲ་ལ་སོགས་པ་སྨད་ཅིང་ནང་གི་རྣལ་འབྱོར་དམ་ཚིག་སེམས་དཔའ་དང་། ཕྱི་རོལ་གྱི་ཡེ་ཤེས་སེམས་དཔའ་ཕྱག་རྒྱ་བཞི་དང་ལྡན་པ་མཉེས་པར་བྱ་བ་ལ་སོགས་པའི་རིམ་པས་རང་གི་ལྷ་མཉེས་པར་བྱས་པས་
མངོན་པར་མཐོ་བའི་དཔལ་ཉམས་སུ་མྱོང་ནས། བསོད་ནམས་དང་ཡེ་ཤེས་ཀྱི་ཚོགས་རྫོགས་པར་བྱས་ནས་སངས་རྒྱས་ཀྱི་གོ་འཕང་ཐོབ་པར་འདོད་དོ། །དེ་དག་ཀྱང་བཅོམ་ལྡན་འདས་ཀྱིས་དེ་ལྟ་བུ་ལ་མོས་པའི་གདུལ་བྱ་གཟུང་བའི་ཕྱིར་ཐབས་གསུངས་པ་སྟེ། ཕྱག་རྒྱ་ཆེན་པོའི་ལྷན་ཅིག་བྱེད་པ་
ཡིན་པར་ཤེས་པར་བྱའོ། །ཕྱག་རྒྱ་ཆེན་པོའི་ལྷན་ཅིག་བྱེད་པ་ནི་འདི་ལྟ་སྟེ། གང་དག་སེམས་ཇི་ལྟ་བ་བཞིན་དུ་བརྟག་པའི་ཐབས་ལ། བརྩོན་འགྲུས་འབར་བ་དང་ལྡན་པ་རྣམས་ཀྱིས་བསྐྱེད་པ་དང་རྫོགས་པའི་རིམ་པས་སྐད་ཅིག་རེ་རེ་ལ་ཡང་སྣོད་དང་བཅུད་དང་ལམ་དང་འབྲས་
བུར་བཅས་པ་སྦྱོང་བར་བྱེད་ཅིང་། རྣལ་འབྱོར་དང་ཕྱག་རྒྱ་ལ་བརྟེན་ནས་ཚེ་འདི་ཉིད་ལས་རབ་དང་རབ་ཀྱི་མཐར་ཕྱིན་པར་འགྱུར་བ་ལ་སོམ་ཉི་མེད་པས་བླ་ན་མེད་པའོ། །དེ་སྟོན་པར་བྱེད་པའི་གཞུང་ནི་དཔལ་ལྡན་འདུས་པ་སྟེ། ཇི་ལྟ་བུ་ཞེ་ན། ཆོས་ཕུང་བརྒྱད་ཁྲི་བཞི་སྟོང་དག །འདུས་ཕྱིར་
སྣོད་ཡང་དམ་པའོ། །རྨོངས་པའི་མུན་ནག་སེལ་བས་ན། །སྒྲོན་མའི་མཆོག་ནི་འདི་ཡིན་ནོ། །རྟ་རྒོད་ལྟ་བུའི་སེམས་འདུལ་བས། །འཐད་པའི་སྲབ་སྐྱོགས་འདི་ཡིན་ནོ། །རྣམ་ཤེས་གླང་ཆེན་ཡན་ལྟ་བུ། །འགུགས་ཕྱིར་ལྕགས་ཀྱུ་དམ་པའོ། །རྣལ་འབྱོར་མཆོག་ཏུ་ངེས་
པ་ཡི། །དམ་སྡོམ་ཅན་གྱི་ཚོང་འདུས་སོ། །འཁོར་བའི་རྒྱ་མཚོ་ཆེན་པོ་ལས། །སྒྲོལ་བྱེད་གྲུ་ནི་ཆེན་པོའོ། །མངོན་མཐོ་ངེས་ལེགས་ཁང་བཟང་གི། སྟེང་དུ་ཕྱིན་བྱེད་ཐེམ་སྐས་སོ། །རྣམ་རྟོག་ལས་བྱུང་ཉོན་མོངས་ཀྱི། །གྲོང་ཁྱེར་འཇོམས་ཤིང་གྲོལ་བ་ཡི། །འཁོར་ལོ་

44-1-4a

སྐྱོང་ཕྱིར་རྒྱལ་པོའོ། །བཅོམ་ལྡན་རྡོ་རྗེ་འཆང་ཆེན་པོས། །ཉེ་བར་བསྟན་པའི་མདོ་སྡེ་དང་། །དེ་འདྲའི་ཚུལ་ལེན་རྒྱུད་འདི་ནི། །ཀུན་གྱི་ཕྱི་མ་གསུངས་པ་ནི། །དོན་རྣམས་དེ་རུ་གཏན་ལ་ཕབ། །འདི་དོན་སྒོམ་བྱེད་རྣལ་འབྱོར་པ། །མ་འོངས་རྡོ་རྗེ་འཆང་
བ་བས། །དགའ་དང་རྩོད་པ་མེད་པ་དང་། །སྲུང་བ་དང་ནི་དྲན་པ་དང་། །བག་ཡོད་པ་ཡིས་བརྩོན་བྱའོ། །དེ་ལྟ་བུའི་གཞུང་དེ་ལ་རྟོག་པ་མངོན་དུ་གཏོང་བའི་ཉན་པ་པོ་རྣམས་ཁས་ལེན་པའི་ཡན་ལག་དང་། གླེང་གཞི་ཕུན་སུམ་ཚོགས་པའི་རྣམ་པར་བཤད་པས། གང་ཟག་
གཞན་ཡིད་བརྟན་དུ་རུང་བར་བྱ་བ་ནི་བསྡུས་པའི་དོན་དུ་བཤད་པས་དེར་ཞེས་བྱའོ། །ཡེ་ཤེས་ལས་སྤྲུལ་པའི་འཁོར་དེ་བཞིན་གཤེགས་པ་ལ་སོགས་པ་རྣམས་ལ་རྒྱུད་ཀྱི་དོན་ཇི་ལྟར་བསྟན་པ་ཡང་དེར་ཤེས་པར་བྱ་སྟེ། དེའི་ཕྱིས་འབྱུང་བའི་དོན་རྗེ་བཙུན་རྣམས་ཀྱིས་སྣོད་དུ་རུང་བར་
བྱས་པའི་གང་ཟག་ལ་རྒྱུད་ཀྱི་དོན་ཇི་ལྟར་བསྡུས་ཏེ་བསྟན་པ་དེ་སྒྲུབ་ཐབས་ཀྱི་རིམ་པ་འདིར་རྒྱས་པར་བཤད་པར་བྱའོ། །དེ་ལ་དང་པོ་སྙིང་རྗེའི་སྟོབས་ལས་སྐྱེས། །བྱང་ཆུབ་སེམས་ལྡན་སྦྱིན་པ་ལ་སོགས་བརྒྱན། །དཔལ་ལྡན་འདུས་པའི་འཁོར་ལོར་ཆོ་ག་བཞིན། །དབང་
བསྐུར་གནང་བ་ཐོབ་པས་རིམ་འདི་བྱ། །གང་ཞིག་དགོན་པ་ཆེན་པོའི་ས་ཕྱོགས་སོགས། །གང་རུང་གནས་སུ་སྟེགས་བུ་གྲུ་བཞི་པ། །ཙནྡན་མཆོག་སོགས་བྱུགས་ནས་བདེ་བའི་སྟན། །རྡོ་རྗེ་སྐྱིལ་མོ་ཀྲུང་འདུག་བསམ་གཏན་བྱ། །དང་པོར་ཐོ་རངས་ཉི་དབུས་སུ། །སྟེང་
སོགས་ཀྱིས་དག་མཐིང་གའི་ཧཱུྃ། །འོད་ཟེར་གྱིས་མཐོང་ཡུལ་དམིགས་ཏེ། །སྙིང་རྗེ་ལ་སོགས་བསྒོམ་པར་བྱ། །འོད་ཟེར་གྱིས་གསལ་སངས་རྒྱས་དང་། །བླ་མ་ལ་སོགས་མདུན་དུ་དམིགས། །གཟུགས་རྡོ་རྗེ་ལ་སོགས་པ་ཡི། །མཆོད་པའི་སྤྲིན་སྤྲོ་ཕྱག་ཀྱང་འཚལ། །གང་
ཞིག་ཐོགས་མེད་དུས་ནས་སྲིད་པའི་ཆུ་རྒྱུན་ལ། །རྟོག་པས་རྣམ་པར་བསྒོས་པའི་སྡིག་པ་མ་ལུས་རྣམས། །ཐུགས་རྗེ་ཆེར་ལྡན་ཁྱོད་ཀྱི་མདུན་དུ་ཡང་། །གསུམ་དུ་དམིགས་པ་གསལ་ཏེ་བཤགས་པར་བགྱི། །སངས་རྒྱས་དང་ནི་བྱང་ཆུབ་སེམས་དཔའ་དང་། །འཕགས་པ་གཞན་

44-1-4b

རྣམས་ཀྱི་ཡང་དགེ་བ་གང་། །མ་ལུས་བདག་གིས་དེ་དག་ཡི་རངས་ནས། །བླ་མེད་ཡང་དག་བྱང་ཆུབ་ཕྱིར་བསྔོའོ། །སྤྲོས་མེད་ཐུགས་ནི་ཟླ་བ་ལྟ་བུ་སྟེ། །མཐའ་ཡས་དོན་དུ་ཐབས་ཀྱི་སྐུ་ཆེན་པོ། །རྟག་ཏུ་བདག་གི་ཡིད་དང་དབྱེར་མེད་པ། །བདེ་བར་གཤེགས་པ་རྟག་ཏུ་སྐྱབས་
སུ་མཆི། །རྟོག་པ་ཀུན་ལས་ངེས་པར་གྲོལ་བ་ཡི། །དམ་པ་མ་ལུས་ཀུན་གྱི་ཕུན་ཚོགས་རྟེན། །དངོས་པོ་ཀུན་གྱི་ངོ་བོ་གཅིག་པ་པོ། །ཆོས་ལ་བདག་ནི་རྟག་ཏུ་སྐྱབས་སུ་མཆི། །བཅིངས་པ་མ་ལུས་རྣམ་པར་སྤངས་པ་ཡི། །དཔལ་ལྡན་སྙིང་རྗེ་མཆོག་གིས་རབ་དྲངས་
པ། །རབ་ཏུ་དགའ་ལ་སོགས་པ་རབ་གནས་པའི། །འདུལ་བའི་དབང་པོའི་ཚོགས་ལ་ཕྱག་འཚལ་ལོ། །བསམ་པ་དག་པས་རྣམ་སྨིན་དག་པ་ཡིས། །སྒྲིབ་པའི་བག་ཆགས་མ་ལུས་ཀུན་བཅོམ་སྟེ། །མི་འཕྲོག་པ་ཡིས་བརྒྱན་པའི་
སེམས་ཀྱིས་ཀྱང་། །བྱང་ཆུབ་ཏུ་ནི་སེམས་ནི་བསྐྱེད་པར་བགྱི། །སྲས་དང་ལྡན་པའི་བདེ་བར་གཤེགས་པ་ཡི། །ཐུན་མོང་ལམ་སྟེ་ཕ་རོལ་ཕྱིན་པ་བཅུ། །རྫོགས་སངས་རྒྱས་ཀྱི་བདག་ཉིད་ཡིད་ཀྱིས་ནི། །ད་ལྟར་འདིར་ནི་བདག་གིས་བསྟན་པར་བྱ། །སྡུག་བསྔལ་
ལ་གནས་སེམས་ཅན་རྣམས། །སྙིང་རྗེས་ཡང་ནི་དམིགས་བྱས་ཏེ། །བྱང་ཆུབ་སེམས་ནི་དཔག་མེད་པ། །རིན་ཆེན་བདག་གིས་བསམ་པར་བྱ། །རང་བཞིན་མེད་ཕྱིར་སྟོང་པ་ཉིད། །རྒྱུ་མེད་པས་ན་མཚན་མ་མེད། །རྗེས་སུ་དཔག་པ་དང་བྲལ་བས། །སྨོན་མེད་ཉིད་དུ་ངེས་
པའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྔགས་དེས་བདག་གཞན་དངོས་པོ་ཀུན། །གཅིག་བྱས་དེ་ཉིད་གསུམ་མཚན་མ། །དགྱེས་མཛད་ཡས་མར་སྦྲེངས་པ་ཡི། །མདུན་གྱི་མཁའ་ལ་བསམ་པར་བྱ། །སྟོང་ལས་ཉི་དཀྱིལ་ཧཱུྃ་ནག་ལས། །རྡོ་རྗེ་ཟེར་འཕྲོས་ཕྱི་
རོལ་བཅད། །འོག་དང་ཕྱོགས་མཚམས་སྟེང་སྤྲོས་པས། །ས་གཞི་ར་བ་བླ་རེར་བསྐྱེད། །བྷྲཱུྃ་འཁོར་རྩིབས་བཅུ་འོད་ཟེར་དྲག །པད་ཉིར་ཁྲོ་བོ་འཁོར་ལོར་བསྒོམ། །དེ་དབུས་ཧཱུྃ་མཛད་རྟག་པ་སོགས། །གནས་འགྱུར་དེ་ལས་ཆོས་འབྱུང་བསྐྱེད། །གྲུ་གསུམ་དཀར་པོ་

44-1-5a

གྱེན་ལ་གནས། །སྣ་ཚོགས་འོད་ཟེར་ཕྱོགས་བཅུར་འཕྲོ། །ནམ་མཁའི་དཀྱིལ་དུ་པདྨ་དང་། །སྣ་ཚོགས་རྡོ་རྗེ་བསམ་པར་བྱ། །དེ་དབུས་ཟླ་སྟེང་བྷྲཱུྃ་ལས་སྐྱེས། །འཁོར་ལོ་བྷྲཱུྃ་མཚན་ལས་བྱུང་བ། །རིག་མ་དང་བཅས་སྣང་མཛད་ལས། །གྱུར་
པའི་ཁང་པ་བརྩེགས་པ་བསྒོམ། །གྲུ་བཞི་ལ་སོགས་ཡོན་ཏན་ལྡན། །སྣ་ཚོགས་པདྨ་བཅུ་དགུའི་སྟེང་། །ཉི་མའི་གདན་ནི་བདུན་དག་དང་། །ཟླ་བའི་གདན་ནི་བཅུ་གཉིས་བསྐྱེད། །དེ་ཉིད་གསུམ་གནས་སེམས་བབས་པས། །བདེ་གཤེགས་རྣམས་ཀྱིས་དེ་ལ་
གཟིགས། །རང་གི་ཁམས་སུ་ཤེས་རབ་ཐབས། །དབྱངས་ཡིག་བདེ་བའི་ཡི་གེར་འགྱུར། །དབུ་རྩེ་ལས་བྱོན་ཡེ་ཤེས་སེམས། །འདྲེས་གྱུར་རྟེན་བབས་ཟླ་གཉིས་གྱུར། །འདུ་ཞིང་འཕྲོ་བའི་སྦྱོར་བ་ལས། །གཅིག་ཏུ་གྱུར་པ་བསམ་པའོ། །དེ་ལས་ཧཱུྃ་དཀར་
ལས་བྱུང་བ། །རྡོ་རྗེ་རྩེ་ལྔ་མེ་ཤེལ་གཟུགས།  །ཕྱོགས་ཀུན་འོད་ཟེར་འཕྲོ་བསམས་ནས། །ཧཱུྃ་བཅས་ལྡན་པས་ང་རྒྱལ་བྱ། །ཨོཾ་བཛྲ་ཨཱཏྨ་ཀོ྅ཧཾ། དེ་ལས་འཕྲོས་པ་བདེ་གཤེགས་ཀྱིས། །འགྲོ་བ་སངས་རྒྱས་ཉིད་དུ་བྱས། །སླར་འདུས་ཐུགས་ཀྱི་རྡོ་རྗེ་ལས། །
བཙུད་ནས་བདག་ལ་ང་རྒྱལ་བྱ། །ཨོཾ་ཡ་ཐཱ་སརྦ་ཏ་ཐཱ་ག་ཏ་སྟ་ཐཱ་ཨ་ཧཾ། ས་བོན་གསང་གསུམ་རྡོ་རྗེར་གྱུར། །གཅིག་གྱུར་རྡོ་རྗེ་སེམས་དཔའ་མཆོག །འགྲོ་ཀུན་རོ་མཉམ་གཅིག་པ་པོ། །ཀུན་དུ་བཟང་པོ་བསྒོམ་པར་བྱ། །སྐུ་དང་དབུས་ཞལ་ཟླ་ནོར་འདྲ། །གཡས་གནག་
གཡོན་ནི་དམར་པོ་ལ། །རིན་ཆེན་སྣ་ཚོགས་རྒྱན་ལྡན་པའི། །ཕྱག་གཉིས་རང་སྣང་ཤེས་རབ་འཁྱུད། །གཡས་གཉིས་རྡོ་རྗེ་རལ་གྲི་སྟེ། །གཡོན་གཉིས་རིན་ཆེན་པདྨའོ། །མཚོན་བྱེད་མཚན་མ་དབུ་རྒྱན་ལ། །མི་བསྐྱོད་པ་ཡིས་བརྒྱན་པར་བསྒོམ། །དེ་ནས་འདོད་
ཆགས་ཆེན་པོ་ཡིས། །འདུས་པའི་འཇིག་རྟེན་གཟིགས་གྱུར་ནས། །སྦྱོར་བའི་སྒྲ་ཡིས་རང་ལུས་ལ། །རྣམ་སྣང་ལ་སོགས་གཞུག་པར་བྱ། །དེ་ནི་སྤྱན་མ་ལ་སོགས་དང་། །གཟུགས་ལ་སོགས་པ་ཡུལ་གྱི་བདག །རྣམ་པ་དགུ་ནི་སྤྲོ་བྱས་ནས། །རང་གི་ཤེས་རབ་

44-1-5b

ཉིད་ལ་ཐིམ། །ཤེས་རབ་དེ་ཡི་པད་དཀྱིལ་དུ། །བདེ་ལས་སྤྲུལ་པའི་འཁོར་ལོ་བསྐྱེད། །གཟིགས་གྱུར་འགྲོ་བ་མ་ལུས་པ། །སྣོད་དུ་རུང་ཕྱིར་གཞུག་པར་བྱ། །རང་གི་ས་བོན་འོད་ཟེར་གྱིས། །ནམ་མཁའ་ཁྱབ་པའི་བདེ་གཤེགས་རྣམས། །ཟླ་བ་ལྟ་བུར་ཞུ་བྱས་
པས། །དེ་རྣམས་དག་ཕྱིར་དབང་བསྐུར་བྱ། །དེ་ཡི་སྟོབས་ཀྱིས་དེ་དག་རྣམས། །བདེ་དང་ཡིད་བདེ་ཐོབ་པ་དང་། །ཐ་མལ་ཕུང་སོགས་བཤིགས་པའི་ཕྱིར། །ཟླ་བ་ལྟ་བུར་ཞུ་བའོ། །དེ་ལ་མིག་ལ་སོགས་པ་རྣམས། །ཀྵཾ་ཛཾ་ཁཾ་གཾ་སྐཾ་སཾ་གྱུར། །དེ་བཞིན་གཟུགས་
ལ་སོགས་པ་རྣམས། །ཛཿཧཱུྃ་བཾ་ཧོཿཁཾ་རཾ་གྱུར། །ས་ལ་སོགས་པའི་རང་བཞིན་དག །ལཾ་མཾ་པཾ་ཏཾ་དུ་ནི་གྱུར། །གཟུགས་སོགས་ཕུང་པོའི་བདག་ཉིད་རྣམས། །བུཾ་ཨཱཾ་ཛཾ་ཁཾ་ཧཱུྃ་དུ་གྱུར། །དེ་ལས་མཚན་མ་དེ་ཡིས་མཚན། །དེ་རྣམས་ས་སྙིང་ལ་སོགས་པར། །ཁམས་ཀུན་
འདས་པར་བྱས་ནས་སུ། །དྲིས་ཤིང་རྟོགས་ཕུལ་མི་སྨྲ་འདུག །དེ་ནི་པདྨའི་གཞལ་ཡས་ནས། །ཕྱི་རོལ་ཕྱུང་ནས་བསྟོད་ནས་ནི། །སྣ་ཚོགས་པ་ཡི་གཟུགས་ཀྱིས་སོ། །རང་རང་ཁམས་སུ་འཕྲོས་པར་བསམ། །དེ་ནས་བར་མའི་སེམས་ཅན་རྣམས། །སྐར་མ་ལྷུང་
ཞིང་ཞལ་ཞུགས་ནས། །རྡོ་རྗེར་ཕྱུང་ནས་པདྨར་གནས། །ཤེས་རབ་ཆགས་པས་དེ་ཞུ་བྱེད། །དེ་ཡི་འོད་ཟེར་དམར་འཕྲོས་པས། །ཡབ་ཡུམ་བྱང་ཆུབ་སེམས་སུ་ཞུ། །དེ་ལས་བྱུང་བའི་སྤྱན་ལ་སོགས། །གླུ་ཡིས་བསྐུལ་ནས་ཐིམ་པར་བྱེད། །སེམས་ཅན་ཁམས་ན་གནས་ཀྱི་
དབང་ཕྱུག་ཁྱོད་ནི་རྡོ་རྗེའི་ཐུགས། །དགའ་བའི་ཡིད་འོང་དོན་ཆེན་འདོད་པ་བདག་ལ་བསྐྱབ་ཏུ་གསོལ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །སེམས་ཅན་ཡབ་ཆེན་གཉེན་མཆོག་བདག་ལ་དགྱེས་པར་མཛད་དུ་གསོལ། །རྡོ་རྗེ་སྐུ་ཁྱོད་
བཀའ་ཡི་འཁོར་ལོས་སེམས་ཅན་ཀུན་ལ་ཕན། །སངས་རྒྱས་དོན་དུ་བྱང་ཆུབ་མཆོག་ཏུ་རབ་ཏུ་ཕན་པར་གཟིགས། །མགོན་པོ་གལ་ཏེ་བདག་ནི་དེ་རིང་གསོན་པར་མཆིས་བཞེད་ན། །སྤྱོད་པ་དྲི་མེད་ཀུན་དུ་བཟང་པོས་བདག་ལ་དགྱེས་པར་མཛོད། །ཁྱོད་ནི་རྡོ་རྗེ་གསུང་

44-1-6a

སྟེ་ཀུན་ལ་ཕན་ཞིང་ཐུགས་བརྩེ་བ། །འཇིག་རྟེན་དག་གི་དགོས་པའི་དོན་མཛད་པ་ལ་རྟག་ཏུ་བརྩོན། །མགོན་པོ་གལ་ཏེ་བདག་ནི་དེ་རིང་གསོན་པར་མཆིས་བཞེད་ན། །སྤྱོད་པ་དྲི་མེད་ཀུན་དུ་བཟང་པོས་བདག་ལ་དགྱེས་པར་མཛོད། །ཁྱོད་ནི་རྡོ་རྗེ་
འདོད་པ་དམ་ཚིག་མཆོག་གི་ཕན་ཡོན་ཆེ། །ཡང་དག་རྫོགས་སངས་རྒྱས་ཀྱི་གདུང་མཆོག་མཉམ་པ་ཉིད་གཟིགས་ལ། །མགོན་པོ་གལ་ཏེ་བདག་ནི་དེ་རིང་གསོན་པར་མཆིས་བཞེད་ན། །ཡོན་ཏན་རིན་ཆེན་མང་པོའི་གཏེར་གྱུར་བདག་ལ་དགྱེས་པར་མཛོད། །ཀླུ་འདི་
ཡིས་ནི་དོན་བྱས་ནས། །ཞུ་བ་ཕུན་སུམ་ཚོགས་བྲལ་བ། །ཟླ་ཉིར་གྱུར་ཏེ་ཡི་གེ་ཧཱུཾ། །རྡོ་རྗེ་སྔོན་པོ་ཅུང་ཟད་གདེངས། །དེས་མཚན་བཤེས་གཉེན་ཞུ་བྱས་པས། །སྐུ་དང་ཞལ་དབུས་མཐིང་ཀའི་མདོག །གཡས་དཀར་གཡོན་ནི་དམར་པོ་ལ། །དམ་པ་དང་
པོའི་མཚན་མར་ལྡན། །དམ་པ་མ་ཡིན་རྣམ་རྟོག་རྣམས། །སྟོང་པ་ཉིད་དུ་བསམ་བྱས་ཏེ། །མྱ་ངན་འདས་པ་ཞེན་སྤང་ཕྱིར། །ཆོས་ཀྱི་དབྱིངས་སུ་བྱིན་གྱིས་བརླབས། །ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། ས་སྙིང་རྡོ་རྗེ་ནམ་མཁའ་དང་། །དབང་ཕྱུག་སྒྲིབ་
སེལ་ཀུན་བཟང་རྣམས། །ཀྵིཾ་ལ་སོགས་པའི་རིམ་པ་ཡིས། །མིག་ལ་སོགས་པར་དགོད་པར་བྱ། །དེ་བཞིན་སྙིང་མགྲིན་མགོ་ཟླ་ལ། །ཧཱུཾ་ཨཱཿཨོཾ་ལས་སྐྱེས་པ་ཡི། །ལྟེ་བར་ཐུགས་རྡོ་རྗེ་སོགས་བསྐྱེད། །དེ་རྣམས་ཐུགས་ཀ་ནས་བྱུང་བའི། །གཟུགས་ཀྱི་
རྡོ་རྗེ་སོགས་འོད་ཀྱིས། །མ་ལུས་རྡོ་རྗེ་བསམ་མཆོད་ནས། །བྱིན་གྱིས་བརླབ་ཕྱིར་གསོལ་བ་བཏབ། །དཔལ་ལྡན་ཐུགས་ནི་རྡོ་རྗེ་འཆང་། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཅན་མཛད་དུ་གསོལ། །ཕྱོགས་
བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཅན་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་བཛྲ་ཨཱཏྨ་ཀོ྅ཧཾ། ཆོས་ཀྱི་གསུང་ལམ་དཔལ་དང་ལྡན། །རྡོ་རྗེ་

44-1-6b

མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་དང་འདྲ་བར་མཛོད། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་ཅན་མཛད་དུ་
གསོལ། །ཨོཾ་སརྦ་ཏ་ཐཱ་ག་ཏ་ཝཱ་ཀཱ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དཔལ་ལྡན་སངས་རྒྱས་སྐུ་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུ་དང་ལྡན་པར་མཛོད། །ཕྱོགས་བཅུར་བཞུགས་པའི་སངས་རྒྱས་རྣམས། །
རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུ་ཅན་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཡེ་ཤེས་སེམས་དཔའི་ས་བོན་གྱི། །འོད་ཀྱིས་ཕྱོགས་བཅུའི་མགོན་པོ་བསྐུལ། །དེ་ཡི་འོད་ཟེར་ལས་
བྱུང་བའི། །སྤྱན་ལ་སོགས་པ་མཆོག་རྣམས་ཀྱི། །བདུད་རྩི་ལྔ་ཡིས་ཆུས་གང་བའི། །བུམ་པས་དབང་བསྐུར་བཀྲ་ཤིས་སྒྲ། །རྔ་དུང་དྲིལ་སོགས་རོལ་མོའི་སྒྲ། །དབུ་རྒྱན་རྡོ་རྗེ་འཆང་ལྡན་བྱ། །དེ་བཞིན་ཟླ་བ་གཉིས་ལ་སོགས། །འགྲོ་བའི་དབང་བསྐུར་མ་
གཏོགས་པ། །ཐམས་ཅད་སྔོན་བཞིན་བཤེས་གཉེན་དང་། །གཟུགས་ཀྱི་ཁྱད་པར་ཤེས་བྱས་ནས། །བྱིན་གྱིས་བརླབ་ཅིང་མིག་ལ་སོགས། །ས་སྙིང་སོགས་བཀོད་རྡོ་རྗེ་གསུམ། །གནས་གསུམ་མཚན་ལས་དབུ་རྒྱན་ལ། །རྡོ་རྗེ་འཛིན་པས་མཚན་པའོ། །མགོ་
སྙིང་ལྟེ་བ་གསང་རྐང་པར། །ཨོཾ་ཧཱུྃ་སྭཱ་ཨ་ཧཱ་རྣམས་སམ། །ཆ་ཤས་ངོ་བོ་ཉིད་ཀྱིས་ནི། །སངས་རྒྱས་ལྔ་ཡིས་དགང་བར་བྱ། །ཧཱུྃ་ལས་རྡོ་རྗེ་ཆུ་སྐྱེས་ནི། །རྩེ་ལྔ་འདབ་བརྒྱད་བསམ་པར་བྱ། །ཨོཾ་ལས་ནོར་བུ་གེ་སར་བསྐྱེད། །ཕཊ་ཀྱིས་གཉིས་ཀྱི་ལམ་འགོགས་པའོ། །
མཚན་ཉིད་ལྔ་དང་ལྡན་བསམས་ནས། །བདེ་མཆོག་མྱོང་བར་བྱ་བའི་ཕྱིར། །རང་གི་ཤེས་རབ་ལ་ཞུགས་ནས། །དབང་པོ་གཉིས་སྦྱར་རྗེས་ཆགས་བྱས། །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་བཛྲ་སྭ་བྷཱ་བ་ཨཱཏྨ་ཀོ྅ཧཾ། སྦྱོར་བ་དང་པོའི་ཏིང་འཛིན་ནོ། །ཐུགས་ཀའི་ས་བོན་འོད་ལྕགས་

44-1-7a

ཀྱུས། །སངས་རྒྱས་འཁོར་ལོ་མཁའ་ཁྱབ་པ། །ཞལ་ཞུགས་ཞུ་གྱུར་རྡོ་རྗེར་ཕྱུང་། །པད་གནས་ཟླ་བ་ལྟ་བུའི་གཟུགས། །དེ་ལས་ས་བོན་ཧཱུྃ་བཅུ་དགུ། །མི་བསྐྱོད་པ་ཡི་འཁོར་ལོ་མཆོག །གསལ་བར་བསམས་ནས་འགྲོ་བ་ཀུན། །ཕན་
ཕྱིར་རིམ་གྱིས་དབྱུང་བར་བྱ། །བཛྲ་དྷཱྀཀ་གིས་རབ་བསྐུལ་ལ། །གོང་མ་ལྟ་བུའི་མི་བསྐྱོད་པ། །སངས་རྒྱས་མཛད་པ་བྱས་ནས་སུ། །འདུས་ནས་བདག་ལ་ཞུགས་པར་བསམ། །ཛི་ན་ཛིཀ་གིས་རྣམ་སྣང་དབྱུང་། །དཀར་ནག་དམར་པོ་ཕྱག་དྲུག་པ། །འཁོར་ལོ་
རལ་གྲི་རིན་ཆེན་པད། །འདུས་ནས་ཤར་གྱི་ཟླ་བར་བསམ། །རཏྣ་དྷྲྀཀ་གིས་རིན་ཆེན་དབྱུང་། །སེར་ནག་དཀར་པོ་ཕྱག་དྲུག་པ། །རིན་ཆེན་རལ་གྲི་འཁོར་ལོ་པད། །འདུས་ནས་ལྷོ་ཡི་ཉི་མར་བསམ། །ཨཱ་རོ་ལྀཀ་གིས་འོད་དཔག་མེད། །དམར་ནག་དཀར་པོ་
ཕྱག་དྲུག་པ། །པདྨ་རལ་གྲི་རིན་ཆེན་འཁོར། །སླར་འདུས་ནུབ་ཀྱི་ཉི་མར་བསམ། །པྲཛྙཱ་དྷྲྀཀ་གིས་དོན་ཡོད་གྲུབ། །ལྗང་ནག་དཀར་པོ་ཕྱག་དྲུག་པ། །རལ་གྲི་འཁོར་ལོ་རིན་ཆེན་པད། །འདུས་ནས་བྱང་གི་ཉི་མར་བསམ། །དང་པོ་རང་གི་རིག་མ་འཁྱུད། །རྒྱན་
ཀུན་བརྒྱན་པའི་ན་བཟའ་དང་། །རིན་ཆེན་སྣ་ཚོགས་དབུ་རྒྱན་ཅན། །གདན་ལྟར་འོད་ཀྱི་དཀྱིལ་འཁོར་ལོ། །མོ་ཧ་ར་ཏིས་སྤྱན་མ་དབྱུང་། །སྐུ་ཡི་རྡོ་རྗེ་དང་འདྲ་བ། །འཁོར་ལོ་རལ་གྲི་རིན་ཆེན་པད། །སླར་འདུས་ཤར་ལྷོར་ཟླ་བར་བསམ། །དྭེ་ཥ་ར་ཏིས་མཱ་མ་ཀཱི། །
ཐུགས་ཀྱི་རྡོ་རྗེ་དང་འདྲ་བ། །ཨུཏྤལ་རལ་གྲི་རིན་ཆེན་པད། །འདུས་ནས་ལྷོ་ནུབ་ཟླ་བར་བསམ། །རཱ་ག་ར་ཏིས་གོས་དཀར་མོ། །གསུང་གི་རྡོ་རྗེ་དང་འདྲ་བ། །པདྨ་རལ་གྲི་རིན་ཆེན་འཁོར། །འདུས་ནས་ནུབ་བྱང་ཟླ་བར་བསམ། །བཛྲ་ར་ཏིས་སྒྲོལ་མ་དབྱུང་། །རིན་
ཆེན་དབང་ཕྱུག་དང་འདྲ་བ། །ཨུཏྤལ་འཁོར་ལོ་རིན་ཆེན་པད། །སླར་འདུས་བྱང་ཤར་ཟླ་བར་བསམ། །ཨོཾ་ཨཱཿཧཱུཾ་གིས་ལྷ་མོ་དྲུག །གོ་རིམས་བཞིན་དུ་དབྱུང་བར་བྱ། །གཟུགས་ཀྱི་རྡོ་རྗེ་རྣམ་སྣང་འདྲ། །མེ་ལོང་རལ་གྲི་རིན་ཆེན་པད། །སྒྲ་ཡི་རྡོ་རྗེ་མི་བསྐྱོད་འདྲ། །

44-1-7b

པི་ཝཾ་རལ་གྲི་རིན་ཆེན་པད། །དྲི་ཡི་རྡོ་རྗེ་རིན་ཆེན་འདྲ། །དུང་དང་རལ་གྲི་རིན་ཆེན་པད། །རོ་ཡི་རྡོ་རྗེ་མཐའ་ཡས་འདྲ། །སྣོད་དང་རལ་གྲི་རིན་ཆེན་འཁོར། །རེག་གི་རྡོ་རྗེ་དོན་ཡོད་འདྲ། །གོས་དང་རིན་ཆེན་འཁོར་ལོ་པད། །ཆོས་དབྱིངས་རྡོ་རྗེ་སེམས་དཔའ་འདྲ། །ཆོས་
འབྱུང་རལ་གྲི་རིན་ཆེན་པད། །མེ་མཚམས་ལ་སོགས་གྲྭ་བཞི་དང་། །ཤར་སྒོ་གཡས་གཡོན་ཟླ་སྟེང་བསམ། །ཡ་མཱནྟ་ཀྲྀཏ་གཤིན་རྗེའི་གཤེད། །མི་བསྐྱོད་ལྟ་བུ་ཕྱག་དྲུག་པ། །ཐོ་བ་རལ་གྲི་རིན་ཆེན་པད། །ཤར་སྒོར་ཁྲོ་དཀྱིལ་ཉི་དབུས་དགོད། །པྲཛྙཱནྟ་ཀྲྀཏ་
ཤེས་མཐར་བྱེད། །སྣང་མཛད་ལྟ་བུ་ཕྱག་དྲུག་པ། །དབྱུག་པ་རལ་གྲི་རིན་ཆེན་པད། །ལྷོ་སྒོར་ཉི་དབུས་ཉི་འོད་འབར། །པདྨནྟ་ཀྲྀཏ་རྟ་མགྲིན་ནི། །མཐའ་ཡས་ལྟ་བུ་ཕྱག་དྲུག་པ། །པདྨ་རིན་ཆེན་རལ་གྲི་འཁོར། །ནུབ་སྒོར་ཉི་དཀྱིལ་ཁྲོ་དཀྱིལ་བསམ། །བིགྷྣནྟ་ཀྲྀཏ་
བདུད་རྩི་འཁྱིལ། །མི་བསྐྱོད་ལྟ་བུ་ཕྱག་དྲུག་པ། །རྡོ་རྗེ་རལ་གྲི་རིན་ཆེན་པད། །བྱང་སྒོར་ཉི་དབུས་ཁྲོ་དཀྱིལ་བསམ། །དེ་རྣམས་རྒོད་དང་གདངས་པ་དང་། །མཆེ་བ་གཙིགས་དང་བཞད་བྱེད་པ། །དབུ་སྐྲ་དམར་སེར་གྱེན་དུ་བརྫེས། །སྟག་སྤགས་སྨད་གཡོགས་དང་ལྡན་
པ། །གཏུམ་པའི་སྦྲུལ་གྱིས་བརྒྱན་པ་ཡི། །དང་པོས་རིག་མ་འཁྱུད་པ་དང་། །མེ་ཡི་འོད་ཀྱི་འཁོར་ལོ་ནང་། །གཏུམ་པོ་རབ་ཏུ་བསམ་པའོ། །དེ་ལྟར་དངོས་པོ་ཐམས་ཅད་ཀྱིས། །རྫོགས་པའི་དཀྱིལ་འཁོར་མཐོང་ནས་སུ། །ས་བོན་འོད་ཟེར་ལྕགས་ཀྱུ་ཡིས། །གཤིན་རྗེ་
གཤེད་བསྐུལ་འཁོར་ལོ་དགུག །དེ་དང་ལྷན་ཅིག་འོངས་པའི་བགེགས། །བསྐྲད་ནས་བསྲུང་བྱས་ཁྲོ་བོ་ཐིམ། །བདེ་བས་རྒྱས་པའི་དཀྱིལ་འཁོར་ནི། །མདུན་དུ་དམིགས་ལ་མཆོད་པར་བྱ། །དུང་གི་ཆུ་ཡིས་བསང་གཏོར་དང་། །ཀུན་དས་ཁ་བཀང་ཆུས་ཉེ་རེག །མཆོད་
ཡོན་སྣོད་ཀྱིས་མཆོད་ཡོན་དང་། །མཐའ་སོགས་དབྱེ་བས་ཞབས་བསིལ་ལོ། །དེ་བཞིན་ཁྲོ་བོ་གཞན་བསྐུལ་བས། །འོད་ཟེར་གྱིས་ནི་གཞུག་པ་དང་། །བཅིང་དང་རྗེས་སུ་དགྱེས་བསྐྱེ་དང་། །ཆོས་ཀྱི་དབྱིངས་སུ་བྱིན་གྱིས་བརླབ། །མོས་པས་མིག་ལ་སོགས་པ་རྣམས། །

44-1-8a

རྡོ་རྗེ་གསུམ་ནི་གནས་གསུམ་བཀོད། །སྔ་མ་བཞིན་དུ་དབང་བསྐུར་བས། །རིགས་ཀྱི་དབང་བསྐུར་གཞག་པའོ། །སངས་རྒྱས་བཞི་པོ་མི་བསྐྱོད་པ། །ལྷ་མོ་རང་རང་བདག་པོས་བརྒྱན། །རྣམ་སྣང་མི་བསྐྱོད་སྣང་མཐའ་ཡས། །མི་བསྐྱོད་སྒོ་སྲུང་
མཚན་མའོ། །ས་བོན་འོད་ཀྱིས་ལྷ་མོ་བཀུག །ཞལ་ཞུགས་ཞུ་གྱུར་རྡོ་རྗེར་ཕྱུང་། །པད་ནང་ལཾ་མཾ་པཾ་ཏཾ་དང་། །ཛཿཧཱུྃ་བཾ་ཧོཿཁཾ་རཾ་གྱུར། །དེ་ཡི་འོད་ཀྱིས་བཅུ་པོ་དགུག །རང་རང་ས་བོན་ལ་ཞུགས་པས། །ནུས་དང་ལྡན་པར་རབ་བྱས་ནས། །ཤེས་རབ་བ་སྤུའི་བུ་གར་སྤྲོ། །
འོད་རྩེ་གཟུགས་རྡོ་རྗེ་སོགས་ནི། །རང་རང་མཚན་མས་རྣམ་མཛེས་པའི། །དྲི་མེད་རྒྱན་གྱིས་བརྒྱན་པའི་སྐུ། །སྒྱུ་མ་ལྟ་བུར་སྤྲོ་བར་བྱ། །དེ་བཞིན་ཕྱི་ཡི་གདུགས་ལ་སོགས། །འོད་རྩེ་ལས་སྤྲོ་ནམ་མཁའི་ཁམས། །བཀང་སྟེ་བདག་དང་འཁོར་ལོ་ལ། །མཆོད་པར་བྱས་ཏེ་
མཆོད་པ་དང་། །མཆོད་པ་པོ་དང་མཆོད་གནས་གསུམ། །རྨི་ལམ་ལྟ་བུར་ཤེས་བྱའི་ཕྱིར། །ཐ་དད་ལས་ནི་གྲོལ་བྱས་ནས། །སྔགས་ཀྱིས་བྱིན་གྱིས་བརླབ་པར་བྱ། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་བྲག་ཅའི་སྒྲ་ལྟ་བུར། །སྒྲ་ཡུལ་ཐམས་ཅད་
རབ་བསམས་ནས། །རྡོ་རྗེ་དྲིལ་བུ་བདེ་དབྱངས་ཀྱིས། །རང་ཉིད་ལྷ་ཡིས་བསྟོད་པར་བསྒོམ། །མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །གསང་བའི་དབྱིངས་ལ་ཕྱག་འཚལ་བསྟོད། །རྣམ་པར་སྣང་མཛད་
དགའ་ཆེན་པོ། །རྡོ་རྗེ་ཞི་བ་དགའ་བ་ཆེ། །རང་བཞིན་གྱིས་ནི་འོད་གསལ་མཆོག །སྟོན་པ་རྡོ་རྗེ་ཕྱག་འཚལ་བསྟོད། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མ་མེད། །དངོས་ཉིད་དག་པས་གོས་པ་མེད། །རྡོ་རྗེ་སྐུ་ལ་ཕྱག་འཚལ་བསྟོད། །རྡོ་རྗེ་དཔག་མེད་རྒྱལ་པོ་ཆེ། །
མི་རྟོགས་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །རྡོ་རྗེ་གསུང་ལ་ཕྱག་འཚལ་བསྟོད། །དག་པ་རྡོ་རྗེ་གདོན་མི་ཟ། །བསམ་པ་ཐམས་ཅད་ཡོངས་རྫོགས་པ། །རང་བཞིན་དག་པ་ཉིད་ལས་བྱུང་། །རྡོ་རྗེ་སེམས་དཔའ་ཕྱག་འཚལ་བསྟོད། །རླུང་དང་

44-1-8b

མེ་ཡི་དཀྱིལ་འཁོར་ནས། །པདྨ་བྷནྡྷར་བདུད་རྩི་ལྔ། །ཟླ་བ་ཉི་མར་ཡི་གེ་ལྔ། །བསམས་ནས་འོད་ཟེར་སྤྲོ་བྱའོ། །རྟག་སོགས་བཀུག་ནས་ས་བོན་དགུག །བཞུ་ཞིང་བསྐོལ་བས་རླངས་ནས་ཧཱུྃ། །དེ་བྱུང་རྡོ་རྗེ་ཞུ་བྱས་ནས། །ཕྲེང་བའི་རྒྱུན་དུ་དབབ་པར་བྱ། །ཨོཾ་གྱིས་
བསིལ་བར་བྱས་ནས་སུ། །ལྷ་རྣམས་ཕྱག་ཏུ་སྤྲོས་བྱས་ལ། །ལྕེ་ཧཱུྃ་ལས་བྱུང་རྡོ་རྗེ་བཀོད། །སྙིང་ཟླའི་འཁོར་ལོ་ཚིམ་པར་བྱ། །དཀྱིལ་འཁོར་རྒྱལ་བ་མཆོག་ཅེས་བྱ་བའི་ཏིང་ངེ་འཛིན་ཏོ། །ཡེ་ཤེས་སེམས་དཔའི་ཐུགས་འོད་ཀྱིས། །ཐུབ་པའི་དབང་པོས་ཀུན་
རྟོག་སྤངས། །འགྲོ་ཀུན་སངས་རྒྱས་ཉིད་བྱས་ནས། །ས་བོན་ལ་ནི་ཐིམ་པར་བྱ། །ཐུགས་ཀའི་མཚན་མ་ནང་གནས་པ། །ཉི་མའི་དབུས་ཀྱི་ཡི་གེ་ཧཱུྃ། །འོད་ཟེར་རྣམ་པ་ལྔ་ལྡན་པའི། །ཅ་ནའི་འབྲུ་ཙམ་ཐིག་ལེར་བསམ། །དེ་ཡི་འོད་ཀྱིས་གནས་ལ་སོགས། །རྡོ་རྗེ་
མཆོག་གསུམ་གསལ་བྱས་ནས། །བཞག་སྟེ་ཐིག་ལེ་ལྟ་བུ་རུ། །རང་གི་སེམས་ཉིད་ཞུགས་པར་བྱ། །དེ་མ་ཐག་ཏུ་ཏིང་འཛིན་གསུམ། །གྲུབ་པ་རབ་ཏུ་བསམ་བྱས་ནས། །དེ་ཡི་གསུམ་པ་ལས་སྤྲོ་ཞིང་། །ཐིག་ལེ་ཡན་ཆད་གསལ་བར་བྱ། །གཞན་པ་
བ་སྤུ་ལས་སྤྲོ་ཞིང་། །དཀྱིལ་འཁོར་རྟེན་ལ་སོགས་པ་ནས། །ཁམས་ཀུན་བཀང་ནས་མཐའ་ལ་བསྡུ། །དེ་རིམ་ཡང་ནི་སྤྲོ་བསྡུ་བྱ། །ཡང་ནི་ས་བོན་འོད་ཀྱིས་ནི། །བདེ་གཤེགས་དགུག་གཞུག་ཞུ་གྱུར་ནས། །རྡོ་རྗེའི་ལམ་ནས་ཕྱུང་ནས་སུ། །ཟེའུ་འབྲུ་བུམ་
པའི་ནང་དུ་དབབ། །དེ་ལས་རྡོ་རྗེ་མཐིང་ཀ་ཆེ། །ནས་ཚད་ལྟེ་བར་རིན་པོ་ཆེ། །ཡུངས་ཀར་ཚད་ཙམ་དབུས་སུ་ཡང་། །རྟེན་བཅས་ཏིང་འཛིན་གསུམ་པོ་བསྒོམ། །རྡོ་རྗེ་རྩེ་ལྔ་ལྕགས་ཀྱུ་ཡིས། །ཕྱུང་སྟེ་སྣ་རྩེར་གནས་པར་བྱ། །རྡོ་རྗེ་ནང་ནས་ཐུར་སེལ་རླུང་། །ཕྱུང་སྟེ་
གནས་བྱ་རྣམ་པ་གཞན། །འདི་ཡི་ཏིང་འཛིན་གསུམ་པ་ལས། །སྤྲོ་བསྡུ་གོང་མ་བཞིན་དུ་བྱ། །དེ་ལ་བཟུང་བས་སྟོབས་ལྡན་ན། །བརྟན་པའི་མཚན་མ་སྐྱེ་བར་འགྱུར། །དེ་སྐྱེས་སྤྲུལ་པ་འཕྲོ་བ་ནི། །སངས་རྒྱས་བྱང་ཆུབ་སེམས་དཔའ་དང་། །རྣམ་པ་སྣ་ཚོགས་ཕྱག་མཚན་

44-1-9a

རྣམས། །ཡང་ནས་ཡང་དུ་སྤྲོ་བསྡུ་བྱ། །སྐུ་གསུང་ཐུགས་ཀྱི་རྡོ་རྗེ་དང་། །ཡེ་ཤེས་སེམས་དཔའི་ས་བོན་ལས། །གསང་སྔགས་བཟླས་བརྗོད་སྤྲོ་བྱེད་པ། །རིམ་པ་འམ་ནི་ཅིག་ཅར་བྱ། །ཨོཾ་སོགས་རེ་རེ་བརྗོད་སྐད་ཅིག །སྐུ་རྡོ་རྗེ་ལ་སོགས་འཁོར་
ལོ། །སྤྲོས་པས་ནམ་མཁའི་ཁམས་བཀང་ནས། །ཡན་ལག་བཅུ་གཉིས་གསུམ་ལྡན་མོས། །ཨོཾ་སོགས་རེ་རེ་བརྗོད་སྐད་ཅིག །མ་བསྐུལ་གཉིས་དང་གོང་མ་ལྟར། །དང་པོས་ཕྱུང་སྟེ་ནམ་མཁའ་ལ། །བཀོད་ནས་གཉིས་པ་གོང་མ་ལྟར། །མཆོད་པའི་ལྷ་མོ་སྤྲོ་བྱས་ནས། །
འཁྱུད་པའི་བདེ་བས་ཐུབ་དབང་རྣམས། །བདེ་ཆེན་དབང་དུ་གྱུར་བྱས་ལ། །གསུམ་པས་ནང་དུ་ཐིམ་པར་བྱ། །རྡོ་རྗེ་དང་ནི་གསལ་བ་དང་། །ལམ་བྱུང་ཆོས་ཀྱི་འཁོར་ལོ་ལས། །སྟེང་དུ་གཡས་གཡོན་གཉི་ག་ལས། །དྲག་དང་དལ་བར་ཤེས་པར་བྱ། །འབྱུང་བ་ཧཱུྃ་སྟེ་འཇུག་པ་ཨོཾ། །
གནས་པ་ཨཱཿསྟེ་དེ་ཉིད་བཟུང་། །ཡེ་ཤེས་ས་བོན་ངོ་བོ་སྟེ། །གཞི་རྣམས་གཅིག་ཏུ་བརྩི་བར་བྱ། །ཉིས་བརྒྱ་ཉི་ཤུ་རྩ་ལྔ་ལས། །བཞི་བསྡུས་བརྒྱ་ཕྲག་དགུ་ཉིད་དོ། །དེ་ནི་ཉི་ཤུ་རྩ་བཞི་རིམ། །ཉི་ཁྲི་ཆིག་སྟོང་དྲུག་བརྒྱའོ། །ཕྲ་མྱུར་རྣམས་ཀྱིས་ངལ་བ་བསལ། །སྤྱན་སོགས་གླུ་
ཡིས་བསྐུལ་བྱས་ནས། །སྔོན་བཞིན་འཁོར་ལོ་མཆོད་བྱ་སྟེ། །སེམས་ཀྱི་གཟེངས་ནི་བསྟོད་བྱ་སྟེ། །ཉམ་ཆུང་སྤྱི་བོར་མཐོ་གང་ཚད། །ཟླ་སྟེང་ཨོཾ་གྱི་བརླན་པ་ཡི། །བདུད་རྩི་ཆོ་ག་བཞིན་ཕབ་པས། །རྡོ་རྗེ་གསུམ་སོགས་ཚིམ་པར་བྱ། །བཾ་ལས་བྱུང་བའི་བུམ་པ་བཟང་། །ཟླ་
གམ་ཕྱེད་ཀྱིས་ཁ་བཅད་པ། །ཐིགས་པ་ཡིད་བཞིན་རིན་པོ་ཆེས། །བརྒྱན་པ་རྐན་གྱི་དབུས་སུ་བསྒོམ། །འོད་ཟེར་ལྔ་ནི་རབ་འབར་བའི། །ཨོཾ་ནི་ལྕེ་ཡི་རྩེ་ལ་བསམ། །དེ་གཟེར་རིམ་པས་དབབ་བྱས་པས། །ནུས་དང་ལྡན་པས་བཀྲེས་སྐོམ་གཞོམ། །བཀྲེས་སྐོམ་ལ་སོགས་
ཉོན་མོངས་ལ། །རྣལ་འབྱོར་དེ་ནི་ཀུན་བརྩམས་ནས། །རྡོ་རྗེ་ཐུགས་ཀྱི་བཀའ་བཞིན་དུ། །སྡུག་བསྔལ་ཐམས་ཅད་འབྱང་བར་འགྱུར། །ཅུང་ཟད་ངལ་སོས་ཡུལ་གཞན་འགྲོ། །གོང་མིའི་ཆོ་གས་བརྟན་བྱའི་ཕྱིར། །རྡོ་རྗེ་གསུམ་སྔགས་མ་ཞེན་པར། །གསང་སྔགས་བཟླས་

44-1-9b

བརྗོད་ཡང་བྱའོ། །ལྡང་བར་འདོད་ན་སྔགས་པ་ཡིས། །མཆོད་བསྟོད་བདུད་རྩི་མྱང་བྱས་ལ། །ཨོཾ་ཨཱཿཧཱུྃ་ཉིད་བརྗོད་བྱས་ལ། །དེ་ཉིད་གསུམ་ལ་འཁོར་ལོ་བསྡུ། །ལས་ཀྱི་རྒྱལ་བ་མཆོག་ཅེས་བྱ་བའི་ཏིང་ངེ་འཛིན་ཏོ། །དཔལ་ལྡན་གསང་བ་འདུས་པ་ཡི། །རིག་པའི་
ལྟ་བ་མ་ཐོབ་པའི། །སེམས་ཅན་ཐུགས་རྗེས་གཟུང་བའི་ཕྱིར། །སྨོན་ལམ་འདི་ནི་སྔོན་དུ་བྱ། །དཔལ་དང་ལྡན་པའི་མི་བསྐྱོད་མགོན། །རྣལ་འབྱོར་གྱིས་ཐོབ་དགེ་བ་གང་། །བདེ་ཆེན་ཡེ་ཤེས་རང་བྱུང་ནས། །སེམས་ཅན་ཀུན་མཁྱེན་སར་འགོད་ཤོག །གང་ཞིག་འདི་
མཐོང་འདོད་པའམ། །གང་ཞིག་ཞུ་བར་འདོད་པ་དེས། །ཐུགས་ཀྱི་དབང་ཕྱུག་གྲངས་མེད་པ། །མགོན་པོ་དེ་ནི་མཐོང་བར་ཤོག །ནམ་མཁའ་མཐའ་ཀླས་ཕྱོགས་བཅུ་རུ། །སེམས་ཅན་ཀུན་གྱི་དོན་སྤྱོད་ལ། །ཇི་ལྟར་ཐུགས་ཀྱི་དབང་ཕྱུག་བཞིན། །བདག་གིས་ཀྱང་
ནི་སྤྱོད་པར་ཤོག །ཇི་སྲིད་ཐོག་མ་མེད་པ་ནས། །འཁོར་བ་ཡི་ནི་མཐར་ཐུག་པར། །དེ་སྲིད་སེམས་ཅན་ཕན་པ་ཉིད། །སངས་རྒྱས་སྤྱོད་པ་བདག་སྤྱོད་ཤོག །ཇི་སྲིད་སངས་རྒྱས་སྣ་ཚོགས་རྣམས། །འཇིག་རྟེན་བཤེས་གཉེན་མྱ་ངན་འདས། །དེ་ཡི་བསྟན་པའི་དོན་དུ་ནི། །
བསྐལ་པའི་བསྐལ་པར་བྱེད་པར་ཤོག །རྡོ་རྗེ་འཆང་སོགས་གཟུགས་ཀྱིས་ནི། །བདག་གིས་ཕྱོགས་བཅུར་སྤྲུལ་གྱུར་ཅིག །སྔགས་ཀྱི་ཚུལ་གྱིས་སེམས་ཅན་རྣམས། །དེ་ཚེ་བདག་གིས་འདུལ་གྱུར་ཅིག །ཏིང་འཛིན་ལས་ནི་ལངས་ནས་ནི། །ལྷ་ཡི་ང་རྒྱལ་དང་
ལྡན་པས། །སྤྱོད་ཡུལ་སེམས་ཙམ་ཤེས་བྱས་ལ། །རང་གི་ལྷ་ཡི་གཟུགས་སུ་དམིགས། །ཡང་ན་སྤྱོད་ཡུལ་དེ་དག་ཉིད། །རང་རང་དག་པས་གནས་པའོ། །སོ་སོ་རང་རིག་ཆོས་ཉིད་པས། །རྣམ་སྣང་མཛད་ལ་སོགས་པར་སྣང་། །ཡང་ན་རྡོ་རྗེ་འཛིན་པ་སྟེ། །རང་
ཡིད་དགའ་བར་བྱེད་པའི་ཕྱིར། །དབུགས་རྟོག་སྤངས་ནས་རབ་བསྒོམས་ནས། །གསང་བ་ཆེན་པོ་མཆོད་པའོ། །རང་གི་ཁ་ཟས་ཟ་དུས་སུ། །སྙིང་ཁར་འཁོར་ལོ་རབ་བསྒོམས་ལ། །བདུད་རྩི་ཤ་ཡི་སྦྱོར་བ་ཡིས། །གོང་མ་ལྟ་བུར་སྦྱང་བྱས་ཏེ། །དེ་ཉིད་གསུམ་ནི་

44-1-10a

བཟླས་བྱས་ཏེ། །ལྕེ་དང་དབུ་རྒྱན་མཆོག་བསྒོམ་ལ། །ལྷ་རྣམས་མ་ལུས་ཚིམ་པ་ཡི། །བསམ་པས་ནང་གི་སྦྱིན་སྲེག་བྱ། །ཕྱི་རོལ་སྦྱིན་སྲེག་དཔག་པ་ཙམ། །ཡེ་ཤེས་མེ་ནི་འབར་བྱེད་པས། །ཕུང་སོགས་བླུན་པའི་བུད་ཤིང་བསྲེག །བླ་ན་མེད་པར་བཤད་པའོ། །ཇི་སྐད་གསུངས་པའི་སྡོམ་པར་ལྡན། །ཇི་ལྟར་མྱོང་བར་མཉམ་པར་སྤྱོད། །བློ་དང་ལྡན་པས་དམ་མེད་ལ། །དུས་རིག་བྱས་ལ་གསང་བར་བྱ། །སྙིང་རྗེར་གནས་པས་ལས་གཉིས་བྱེད། །འགྲོ་བའི་དོན་དང་སངས་རྒྱས་མཉེས། །ལུས་ངག་ཐ་མལ་ཁྱད་པར་ཅན། །ཕྱག་རྒྱ་སྔགས་ཀྱི་བདག་ཉིད་དོ། །ཆོས་ཅན་གཅིག་ལ་རྟོག་པ་ནི། །སྣ་ཚོགས་རྣམ་པར་སྣང་བ་ཡིན། །སྡུག་བསྔལ་བདེ་བ་གྲོལ་འབྱུང་བ། །ལས་ཀྱི་ཁྱད་པར་མང་གྱུར་ཡིན། །དེ་ཕྱིར་དགེ་དང་མི་དགེའི་ལས། །ལུས་ལ་སོགས་པའི་རྟོག་ལས་བྱུང་། །ཀུན་རྟོག་ཐམས་ཅད་ལས་གྲོལ་བ། །ནག་པོའི་ལས་སུ་གཟུགས་ལ་འགྱུར། །དམ་ཚིག་ཉམས་པ་བསྐང་དོན་དུ། །དོན་ཡོད་རྡོ་རྗེ་སྦྱོར་བསྒོམ་སྟེ། །ཐུགས་ཀའི་ཟླ་བར་ཁཾ་བསྐྱེད་པའི། །
སྣ་ཚོགས་རྡོ་རྗེ་བསམ་པར་བྱ། །གཟུགས་སོགས་ནམ་མཁའ་བཞིན་དག་ནས། །རང་བཞིན་འོད་གསལ་སེམས་བསྐྱེད་དེ། །བསྐུལ་བ་སྔོན་དུ་འགྲོ་བ་ཡིས། །དབང་བསྐུར་བྱས་པས་དག་པར་བྱ། །བླ་མ་བརྙས་པའི་སྐྱོན་བྱུང་ན། །ཡོན་དང་ལྡན་པའི་སྟོན་མོ་དབུལ། །སྡིག་བཤགས་ལ་སོགས་སྔོན་འགྲོ་བའི། །སྡོམ་པ་བཟུང་བས་བསྐང་བར་བྱ། །ཕྱི་ཡི་ཁྲུས་ཀྱི་ཆོ་ག་ལ། །རང་གི་ནལ་འབྱོར་དམིགས་བྱས་ནས། །དབང་བསྐུར་གོང་མ་བཞིན་བསྒོམས་ནས། །མཐའ་རུ་བདག་པོ་གཞག་པའོ། །དེ་ལྟར་ཉིན་ཕྱེད་དུས་དང་ནི། །ཕྱི་འབྱེད་དུ་ཡང་བསྒོམ་པར་བྱ། །ནམ་ཕྱེད་དུས་སུ་ས་བོན་ནས། །བཟླས་པའི་དུས་སུ་བསྐྱེད་པར་བྱ། །གཤེགས་སུ་གསོལ་འདོད་སྔགས་པ་ཡིས། །མཆོད་པ་བསྟོད་པ་བདུད་རྩི་མྱང་། །བྱས་ནས་མཐའ་རུ་མུ་བཞག་པའི། །ཡི་གེ་གསུམ་གྱིས་གཤེགས་སུ་གསོལ། །དེ་བཞིན་ཡི་གེ་གསུམ་བརྗོད་པས། །ཡེ་ཤེས་སེམས་དཔའི་འཁོར་ལོ་ལ། །ཕྱི་རོལ་འཁོར་ལོ་བཅུག་བྱས་ཏེ། །ཤེས་རབ་སྙིང་རྗེ་ལྡན་པས་ཉལ། །ལྡང་བའི་དུས་ན་ལྷ་མོ་ཡི། །དབྱངས་ཀྱིས་བསྐུལ་བསམ་ལངས་ནས་སུ། །སྔོན་བཞིན་དུས་བཞིར་ཏིང་འཛིན་གསུམ། །རྩེ་གཅིག་པ་ཡིས་ཐམས་ཅད་བསྒོམ། །བྲེལ་བ་བཅདཔའི་རྣལ་འབྱོར་པས། །དུས་དང་པོར་ནི་ཏིང་འཛིན་གསུམ། །མ་ལུས་པར་ནི་བསྒོམ་བྱས་ལ། །ཡན་ལག་རྣམས་ནི་སྔོན་བཞིན་བསམ། །དེ་ལས་གཞན་པའི་དུས་དག་ཏུ། །ལོ་བུར་རང་གི་ལྷ་བཞེངས་ལ། །ཐུགས་ལས་འཁོར་ལོ་
སྤྲོ་བྱས་ལ། །དབང་བསྐུར་བ་ནི་སྔོན་བཞིན་བླང་། །མཆོད་བསྟོད་བདུད་རྩི་མྱང་བྱས་ལ། །ཐིག་ལེ་འམ་ཡང་ན་ཕྲ་མོའམ། །སྔགས་ཀྱི་བཟླས་བརྗོད་ཡང་བྱས་ནས། །འཁོར་ལོ་བསྡུ་བ་སྔོན་བཞིན་བརྩམ། །དེ་ལྟར་ཞུགས་པ་རྣམ་པ་གཉིས། །རང་གི་ལམ་གྱི་མི་མཐུན་ཕྱོགས། །བཟློག་པས་བརྟན་པའི་རྟགས་རྙེད་པས། །ལས་དང་པོ་ཡི་རྣལ་འབྱོར་རོ། །དེ་ཡིས་སྐུ་ལ་དམིགས་པ་ཡིས། །མན་ངག་ཐོབ་པས་ཡེ་ཤེས་ཆེ། །འབེབས་ཐོབ་རང་དང་གཞན་མཐོང་ན། །ཅུང་ཟད་ཡེ་ཤེས་དབང་གྱུར་པའོ། །དུས་བཞིར་མིག་དང་ལུས་སོགས་རྣམས། །བྱིན་རླབས་དབང་བསྐུར་རབ་བྱས་ནས། །མཆོད་པ་སོགས་ཀྱིས་མཉེས་བྱས་ལ། །བཟླས་བརྗོད་སྦྱོར་བ་བརྩམ་པའོ། །སྔོན་བཞིན་དུ་ནི་བསྡུ་བྱས་ནས། །སྡོམ་པ་བསྐྱང་སོགས་སྔ་མ་བཞིན། །རྒྱུན་དུ་གོམས་རླབས་བཅུ་དང་གཅིག །མཐུ་ཆེན་སྟོབས་རྟོགས་དེས་དམིགས་སོ། །དེ་ཡི་གསུང་ལ་དམིགས་པ་ཡིས། །རླུང་གི་རང་བཞིན་རྟོགས་མཛད་ནས། །བདག་དང་གཞན་གྱིས་དཀྱིལ་འཁོར་མཐོང་། །ཡེ་ཤེས་དབང་དུ་གྱུར་པའོ། །དེ་ལ་ཉིན་མཚན་རྒྱུན་དུའམ། །ཡི་གེ་གསུམ་གྱི་ཏིང་ངེ་འཛིན། །ཀུན་དུ་སྤྱོད་ལས་ཆོས་ཐམས་ཅད། །དབྱེར་མེད་གོང་བཞིན་སྙེན་བྱེད་དོ། །འདི་ཡི་ཕྱག་རྒྱ་ཆེན་པོ་ཡི། །བསྒྲུབ་པའི་མཚན་མ་གསུམ་མཐོང་ནས། །བརྟུལ་ཞུགས་ལ་སོགས་རིམ་འདི་ཡིས། །སེམས་དམིགས་རྡོ་རྗེ་འཆང་བ་ཐོབ། །འདི་ལས་གཞན་པ་བཅུ་བཞི་ཡི། །བསྙེན་པའི་ཆོ་ག་འདི་བཞིན་ཏེ། །རང་རང་ལྷ་ཡི་སྦྱོར་བ་ཡིས། །འོག་ནས་འབྱུང་བའི་

44-1-10b

empty page

44-1-11a

དོན་བརྩོན་བྱ། །དེ་ཡན་ཆད་ནི་སྔོན་དུ་བསྙེན་པ་བྱ་བའི་ཆོ་ག་རྒྱས་པར་བཤད་ཟིན་ཏོ།།      །།ད་ནི་སློབ་མ་རྣམས་ལ་དབང་བསྐུར་བའི་ཆོ་ག་བཤད་པར་བྱའོ། །དེ་ལ་གང་གིས་དབང་བསྐུར་ཞེ་ན། དང་པོར་ཞུགས་དང་དང་པོ་པ། །ཐམས་ཅད་
ཀུན་གྱི་སློབ་དཔོན་ནོ། །ཅུང་ཟད་ཡེ་ཤེས་དབང་གྱུར་པ། །ནུས་དང་ལྡན་པའི་སློབ་དཔོན་ནོ། །ཡེ་ཤེས་དབང་དུ་གྱུར་པ་ནི། །སྦྱོར་བ་རྙེད་པའི་སློབ་དཔོན་ནོ། །དེ་རྣམས་ཅི་རིགས་མཉེས་བྱས་ནས། །དེ་ཡིས་དཀྱིལ་འཁོར་བརྩམ་པའོ། །གང་དག་གི་དོན་དུ་ཞེ་ན། དད་ལྡན་
གཏོང་ཕོད་བརྩོན་འགྲུས་ལྡན། །སྣོད་རུང་སྲོག་ལ་མི་ལྟ་བ། །ཚེ་འདིར་དངོས་གྲུབ་ཐོབ་འདོད་པས། །གཉིས་སམ་གསུམ་གྱི་བར་དུ་ཞུས། །སྐུ་གཟུགས་བྲིས་དང་ལྡེར་སོ་དང་། །གླེགས་བམ་རྡོ་རྗེ་ལ་སོགས་དང་། །མཆོད་རྟེན་ལ་སོགས་གནས་པའི་ཕྱིར། །གཉིས་
སམ་གསུམ་གྱི་བར་དུ་ཞུས། །གང་དག་སྡིག་པའི་ལས་དབང་གིས། །མངོན་དུའམ་རྨི་ལམ་དག་ཏུ་ནི། །ལྷ་འཁྲུག་པ་ཡིས་མཚན་མ་མཐོང་། །གཉིས་སམ་གསུམ་གྱི་བར་དུ་ཞུས། །མོས་དང་བརྟན་ལ་དད་པ་ཅན། །གཞན་ལ་ཕན་དགའ་མཐོང་ནས་ནི། །མ་ཞུས་ཀྱང་ནི་
དེ་བོས་ལ། །ཕན་འདོད་ཕྱིར་ནི་དཀྱིལ་འཁོར་བརྩམ། །དེ་ཅིའི་ཕྱིར་ཞེ་ན། བུམ་པའི་དབང་གིས་རབ་སྦྱོར་བས། །ས་བརྒྱད་པ་རུ་ཡང་དག་གནས། །གང་དག་གསང་བའི་དབང་གིས་ནི། །དགུ་པ་དང་ནི་བཅུ་པར་བྱེད། །ཤེས་རབ་ཡེ་ཤེས་དབང་གིས་ནི། །རྡོ་རྗེ་ལྟ་བུར་
རབ་གནས་པའི། །འབྲས་བུ་འབྱུང་བར་ནུས་མཐུ་ལྡན། །དང་པོ་བཞི་པར་ཤེས་པར་བྱ། །རབ་གནས་མ་བྱས་གཟུགས་བརྙན་ལ། །ཐལ་བར་བརླག་ཀྱང་འབྲས་བུ་མེད། །སྔགས་དང་བྲལ་བའི་སྦྱིན་སྲེག་བཞིན། །ལུས་ཉོན་མོངས་པ་ཁོ་ནར་ཟད། །དེ་བས་ཇི་སྲིད་
གནས་པའི་བར། །མཆོད་པའི་རྟེན་དུ་རུང་བྱ་དང་། །འཁོར་ལོས་སྒྱུར་བ་བཞིན་ཏེ་དག །བྱིན་གྱིས་བརླབ་ཕྱིར་བརྩམ་པའོ། །སྔོན་བསགས་སྡིག་པ་དཔག་མེད་རྣམས། །སྐད་ཅིག་གིས་ནི་ཟད་བྱེད་པ། །དཀྱིལ་འཁོར་ཞུགས་དང་དབང་བསྐུར་བ། །དེ་ཡིས་རབ་ཏུ་བྱེད་པ་

44-1-11b

ནས། །ཡེ་ཤེས་ཀྱིས་ཀྱང་འདེབས་པ་ཡི། །ཆོ་ག་ཟབ་མོས་སྡིག་པ་ཟད། །མཚན་མའི་འབྲས་བུ་མི་འབྱུང་ཞིང་། །གོང་གི་ཡོན་ཏན་ལྡན་པར་མཛད། །ཐབས་ཇི་ལྟར་ཞེ་ན། བདག་ཉིད་ཆེན་པོ་དེ་ལ་གོང་དུ་སྨོས་པས་ཞུ་བ་གསོལ་བ་དང་། ཁྱོད་ཀྱིས་སྤྲོ་བྱ་རྣམས་
ཚོགས་སམ་དྲི་བར་བྱའོ། །དེས་ཀྱང་ཁ་ཅིག་ནི་ཚོགས། ཁ་ཅིག་ནི་མ་ཚོགས་ཞེས་གསོལ་ནས། འཛབ་བཟླས་པ་བྱའོ། །འཕྲལ་དུ་དབེན་པར་འདུག་ནས་ནི། །ལྷ་ཡི་འཁོར་ལོ་བསྒོམ་བྱས་ལ། །ཚོགས་འཕེལ་བགེགས་ནི་ཞི་བའི་ཕྱིར། །སྔགས་ཀྱི་བཟླས་
བརྗོད་བྱས་པ་ཡིན། །དེ་ཉིད་གསུམ་པར་ཡི་གེ་གཞུག །ཡང་ན་དབྱུང་བ་བར་དུ་གཞུག །སྒྲུབ་པ་དེའམ་ཕྲེང་སྔགས་སམ། །རིག་པ་དང་བཅས་བཟླ་བར་བྱ། །དུ་མ་རབ་ཏུ་བཟླ་བའམ། །འཁོར་བདག་འབུམ་སྟེ་རང་ལྷའི་འབུམ། །གཞན་དག་ཁྲི་ཕྲག་བཟླ་བྱས་ཏེ། །
བསམ་མམ་དངོས་སུ་བཀའ་ཐོབ་བྲི། །གསུམ་པ་བསྲུངས་ནས་འཛབ་བྱ་བ། །ཆོ་ག་བཞིན་ཏེ་རང་གིས་སམ། །སྦྱོར་བ་དག་གིས་དག་བྱས་ནས། །རི་མོའི་དཀྱིལ་འཁོར་བྲི་བ་བརྩམ། །ལྷ་ཁང་གྲོང་ངམ་སྐྱེད་ཚལ་གྱི། །བྱང་ཤར་མཚམས་ནི་ཇི་ལྟ་བར། །ཤར་དང་བྱང་དུ་
དམའ་བ་ཡི། །མཁས་པས་ས་ནི་བཙལ་བར་བྱ། །དེར་ནི་བཅགས་ནས་ས་བརྐོས་ཏེ། །ལྷག་འགྱུར་ཡང་ན་རྫིང་འདྲ་བ། །ཆུས་བཀང་མི་གཡོ་གཡས་སུ་འཁྱིལ། །མ་རུང་འཁྱིལ་པའི་ཕུར་བུས་གཞོམ། །དེར་ནི་ས་བདག་ཕྱོགས་སྐྱོང་བ། །ཕྱོགས་སུ་བསྐྱེད་
ནས་སྔོན་བཞིན་དུ། །གཏོར་མ་བྱིན་བརླབས་དབུལ་བྱས་ནས། །ས་གསོལ་བྱས་ནས་གཤེགས་སུ་གསོལ། །ཏིང་འཛིན་རིམ་པ་གསུམ་པོས་ནི། །དཀྱིལ་འཁོར་ལ་སོགས་སྟ་གོན་ནས། །མཆོད་བསྟོད་བདུད་རྩི་མྱང་བ་དང་། །གཏོར་མ་ཡོན་དང་ཕྱི་མཆོད་འབུལ། །
སྦྱིན་སྲེག་གིས་ནི་ཚིམ་བྱས་ནས། །གསོལ་བ་བཏབ་སྟེ་ནམ་མཁའ་ལ། །ཁུང་བུ་བརྐོ་བའི་ཆེད་དུ་ཡང་། །བྱིན་གྱིས་བརླབ་ཕྱིར་དགོད་པར་བྱ། །ལས་ཀྱི་རྡོ་རྗེ་སློབ་མ་ཡིས། །ལྟོ་འཕྱེ་བརྟགས་ནས་འཇོར་གྱིས་ཀློག །མགྲིན་པ་ལྟེ་བ་པུས་མོ་ཙམ། །དངོས་གྲུབ་

44-1-12a

རིམ་པས་བརྐོ་བར་བྱ། །ཐོ་བས་བོང་བ་དག་དཀྲུགས་ནས། །ཞིབ་མོར་བཏགས་ནས་བཙགས་ནས་སུ། །ཤེས་པའི་ཕྱིར་དང་དགེ་བའི་ཕྱིར། །རིན་ཆེན་འབྲུ་སྨན་ནང་དུ་གཞུག །དེ་སྟེང་ས་གཙང་གཞན་ལས་ཀྱང་། །སྟེགས་བུ་ཁྲུ་གང་དཔངས་
བརྩིགས་ནས། །དམ་ཚིག་ལྔ་ཡིས་རབ་བྱུགས་ཏེ། །སྟེང་རྒྱན་སོགས་པས་མཛེས་པར་བྱ། །རང་གི་ལྷ་ཡི་རྣལ་འབྱོར་རམ། །ཡང་ན་བགེགས་དགྲའི་རྣལ་འབྱོར་གྱིས། །དབང་བསྐུར་བླངས་ནས་བགེགས་ཀྱི་ཚོགས། །བསྐྲད་པས་ནང་ཉིད་དག་པར་བསམ། །
ཨོཾ་བྷུ་ཁཾ་གི་སྔགས་ཀྱིས་ནི། །མཁའ་ལ་རི་རབ་བསྐྱེད་པར་བྱ། །ཧཱུྃ་ལཾ་ཧཱུྃ་ཞེས་རྡོ་རྗེའི་བདག །ས་གཞིར་བྱས་ནས་བརྟན་པར་བྱ། །ཨོཾ་མི་དི་ནཱི་བཛྲི་བྷ་བ་བནྡྷ་ཧཱུྃ། སྔོན་བཞིན་སྲུང་བའི་འཁོར་ལོ་ནས། །རྗེས་ཆགས་མཐའ་ཡི་སྦྱོར་དང་པོ། །དཀྱིལ་འཁོར་ཕྱུང་སྟེ་མཉེས་
མཛད་པ། །དཀྱིལ་འཁོར་རྒྱལ་བ་མཆོག་བདག་ཉིད། །འཁོར་ལོ་གོང་དང་འོག་ལས་བྱེད། །ལས་ཀྱི་རྒྱལ་མཆོག་སྦྱོར་བདག་ཉིད། །དེ་ཡི་དབང་ཕྱུག་མགོན་པོ་ནི། །ཏིང་འཛིན་གསུམ་གྱི་མཆོག་གྱུར་ཡིན། །དཔའ་བོ་རྡོ་རྗེ་དྲིལ་འཛིན་པས། །ཐམས་ཅད་དང་ནི་
བདག་མཉམ་མོ། །རང་བཞིན་གྱིས་ནི་བདག་དག་གོ། །རྡོ་རྗེའི་བདག་ཉིད་ང་རྒྱལ་བསྐྱེད། །འཁོར་ལོའི་དབུས་སུ་གནས་པ་ལ། །རྡོ་རྗེ་དྲིལ་བུ་འཛིན་པ་ཡི། །རྟག་སོགས་ལས་ཀྱི་རྡོ་རྗེ་ཡིས། །མཆོད་ནས་དཀྱིལ་འཁོར་གསོལ་བ་གདབ། །དེ་བཞིན་གཤེགས་པ་
ཀུན་ཞི་བའི། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་ཆོས། །དཀྱིལ་འཁོར་དམ་པ་བཤད་དུ་གསོལ། །མཚན་ཉིད་ཐམས་ཅད་ཡང་དག་རྫོགས། །མཚན་ཉིད་མེད་པ་ཐམས་ཅད་སྤངས། །ཀུན་དུ་བཟང་པོ་སྐུ་ཡི་མཆོག །དཀྱིལ་འཁོར་
དམ་པ་བཤད་དུ་གསོལ། །ཞི་བའི་ཆོས་མཆོག་ཡང་དག་བྱུང་། །ཡེ་ཤེས་སྤྱོད་ཡུལ་རྣམ་སྤྱོད་པ། །ཀུན་དུ་བཟང་པོ་གསུང་གི་མཆོག །དཀྱིལ་འཁོར་དམ་པ་བཤད་དུ་གསོལ། །སེམས་ཅན་ཀུན་གྱི་སེམས་ཆེན་པོ། །རང་བཞིན་དག་པས་དྲི་མ་མེད། །ཀུན་དུ་བཟང་

44-1-12b

པོ་ཐུགས་ཀྱི་མཆོག །དཀྱིལ་འཁོར་སྙིང་པོ་བཤད་དུ་གསོལ། །མི་བསྐྱོད་རྡོ་རྗེ་ཁྲོས་བྱས་ནས། །མ་དང་ཊ་ལས་རང་གི་མིག །ཉི་ཟླར་བསྐྱེད་ནས་མིག་འབྲས་ཧཱུཾ། །རྡོ་རྗེ་ལས་སྤྲོས་སྤྲུལ་པར་བྱ། །རྐང་མཐིལ་ཧཾ་ལས་རྡོ་རྗེ་བསྐྱེད། །གཡས་པ་རྡོ་རྗེ་གཡོན་པ་དྲིལ། །འགྱིང་
བག་མཆེ་གཙིགས་ཧཱུྃ་བརྗོད་ཅིང་། །ཕྱོགས་ཀུན་འབར་བར་བལྟ་བར་བྱ། །གཡས་བརྐྱང་གཡོན་བརྐྱང་ཟླུམ་པོ་དང་། །ས་ག་བཞི་སྟེ་མི་བསྐྱོད་པའི། །རྣལ་འབྱོར་གྱིས་ནི་ཕྱོགས་བཞི་རུ། །དང་པོར་རབ་ཏུ་བརྩམ་པའོ། །ཁྲོ་བོ་རེ་རེས་དྲུག་དྲུག་ཏུ། །ཕྱོགས་བཅུ་
རྣམས་སུ་བརྩམས་བྱས་པས། །འཁོར་ལོས་བགེགས་ཀྱི་ཚོགས་རྣམས་ནི། །བསྐྲད་པར་གདོན་མི་ཟ་བར་འགྱུར། །རུས་སྦལ་སྟོབས་དང་རྡོ་རྗེ་གར་དང་རྡོ་རྗེ་སྒྲ། །ལྕགས་ཀྱུ་ཐབས་དང་ཏིང་འཛིན་ཐབས་དང་མཐའ་ཡས་ཐབས། །གཤིན་རྗེ་གཤེད་ཀྱི་ང་རྒྱལ་གྱིས་
གནས་ནས། །ཤར་གྱི་ཕྱོགས་སུ་རྣལ་འབྱོར་པས་བྱའོ། །རྡོ་རྗེ་གདེངས་པ་དང་ནི་རྡོ་རྗེ་འཇིགས་སུ་རུང་བ་དང་། །རལ་གྲི་ཐབས་དང་ཕུབ་ཀྱི་ཚུལ་དག་དང་། །རྡོ་རྗེ་སྐྱིལ་ཀྲུང་རྣམ་པར་རྒྱལ་བའི་ཐབས། །ཤེས་རབ་མཐར་བྱེད་ཀྱིས་ནི་ལྷོ་ཕྱོགས་བརྩམ། །རྡོ་རྗེ་འཇོམས་ཚུལ་
དང་ནི་རྡོ་རྗེ་རོ་ལངས་དང་། །རྡོ་རྗེ་ཐབས་དང་མདུང་གི་ཐབས་དག་དང་། །པདྨོའི་འདུག་སྟངས་གསུས་པོ་ཆེ་ཡི་ཐབས། །རྟ་མགྲིན་གྱིས་ནི་ནུབ་ཀྱི་ཕྱོགས་སུ་བརྩམ། །རྐང་པ་ཡ་གཅིག་སྟངས་དང་རྡོ་རྗེ་ཐོ་བ་དང་། །འཁོར་ལོའི་ཐབས་དང་སེམས་དཔའི་སྐྱིལ་ཀྲུང་དང་། །སྤྲིན་
སྒྲ་དང་ནི་གཞུ་ཡི་ཐབས་དང་ནི། །བདུད་རྩི་འཁྱིལ་པས་བྱང་ཕྱོགས་ནས་བརྩམ་མོ། །སེང་གེ་ཐབས་དང་རྡོ་རྗེ་གདུ་བུ་དང་། །བ་དན་ཐབས་དང་ཐག་མདུང་བསྐོར་བའི་ཐབས། །བཟང་པོའི་འདུག་སྟངས་ཕུར་བུ་བརྡུང་བ་ཡི། །ཤར་ལྷོའི་མཚམས་སུ་འདོད་པའི་རྒྱལ་པོས་
བརྩམ། །སེང་གེ་གླལ་དང་བུད་མེད་སྒྱུ་འཕྲུལ་ཐབས། །ཞགས་པའི་ཐབས་དང་མཆོད་སྦྱིན་པ་ཡི་ཐབས། །ཙོག་བུའི་འདུག་སྟངས་དང་ནི་ར་བའི་ཐབས། །ལྷོ་ནུབ་མཚམས་ནས་དབྱུག་པ་སྔོན་པོས་བརྩམ། །རྡོ་རྗེ་སྒྲོག་དང་སྟོབས་པོ་ཆེ་གདེངས་དང་། །པདྨོའི་སྟབས་དང་

44-1-13a

མཚོན་རྩེ་གཅིག་པའི་ཐབས། །རྩེ་བའི་ཐབས་དང་མཚམས་བཅིང་པ་ཡི་ཐབས། །ནུབ་བྱང་མཚམས་དང་སྟོབས་པོ་ཆེས་བརྩམ་མོ། །བུང་བ་འཕུར་སྟབས་ཞལ་བཞིར་བྱིན་བརླབས་དང་། །གཏུན་ཤིང་ཐབས་དང་མདའ་འཕངས་པ་ཡི་ཐབས། །
དཔའ་བོ་འདུག་སྟངས་བཀྲ་ཤིས་རྒྱལ་མཚན་སྟངས། །བྱང་ཤར་མཚམས་ནས་མི་གཡོ་མགོན་པོས་བརྩམ། །རྡོ་རྗེ་གསོར་བ་དང་ནི་རྡོ་རྗེ་མཆེ་བ་དང་། །བེ་ཅོན་ཐབས་དང་ཐག་པའི་འཁོར་ལོའི་ཐབས། །ཕྱིར་འགྱེད་པ་དང་ཕྱོགས་བཅིང་བ་ཡི་ཐབས། །སྟེང་གི་ཕྱོགས་ནས་
འཁོར་ལོས་སྒྱུར་བས་བརྩམ། །རྡོ་རྗེ་སྒེག་པ་དང་ནི་རྡོ་རྗེ་གད་མོ་དང་། །མི་འཇིགས་པ་ཡི་ཐབས་དང་ཕྱག་འཚལ་བ་ཡི་ཐབས། །ཕུར་བུས་གནས་ལྔར་གདབ་དང་མཚོན་ཆ་ལྔ་ཡི་ཐབས། །འོག་གི་ཕྱོགས་ནས་གནོད་མཛེས་ཀྱིས་བརྩམ་མོ། །དེ་རྣམས་ཀྱིས་ནི་བགེགས་ཀྱི་ཚོགས། །
རུ་ཏྲའི་བི་བོ་ཤ་ན་དང་། །ཚངས་པའི་སྲིན་པོ་གཟའ་ཕུར་བུ། །གཙོ་བོ་དྲུག་ཅུ་རྩ་བཞི་སྐྲོད། །སྐུ་གསུང་ཐུགས་ཀྱི་རྡོ་རྗེ་ཅན། །སངས་རྒྱས་ཐམས་ཅད་བདག་ལ་གསོན། །བདག་ནི་དཔལ་ལྡན་རྡོ་རྗེ་འཛིན། །བཀའ་ཡི་འཁོར་ལོ་རབ་སྦྱོར་བས། །གལ་ཏེ་གང་གིས་བདག་
བཀའ་འགོམས། །རྡོ་རྗེ་འབར་བའི་གཟུགས་འདི་ཡིས། །འདོད་གསུམ་བསྐྱེད་ལུས་བཤིག་བྱེད་དེ། །འཇིགས་པར་འགྱུར་གྱི་གཞན་དུ་མིན། །བགེགས་བསལ་བྱ་ཕྱིར་ཕུར་བུ་ཡང་། །སྟོད་ནི་ཁྲོ་བོ་སྨད་ཟུར་གསུམ། །བདུད་རྩི་འཁྱིལ་པར་བསམས་ནས་སུ། །དཀྱིལ་འཁོར་
དབུས་སུ་གདབ་པར་བྱ། །ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྚན་ཕཊ། ཀཱི་ལ་ཡ་ཀཱི་ལ་ཡ། སརྦ་པཱ་པཾ་ཕཊ། ཧཱུྃ་ཧཱུྃ་ཧཱུྃ་བཛྲ་ཀཱི་ལ་ཡ། བཛྲ་དྷ་རོ་ཨཱཛྙཱ་པ་ཡ་ཏི། ཀཱ་ཡ་ཝཱཀ་ཙིཏྟ་བཛྲ་ཀཱི་ལ་ཡ་ཧཱུྃ་ཕཊ། དེ་ལས་འོད་ཟེར་འཁྲུགས་ཤིང་འབར། །ཕྱོགས་བཅུ་བདུད་བཅོམ་སླར་
འདུས་ནས། །མཚམས་དང་ར་བ་གུར་བཅིང་བས། །དཀྱིལ་འཁོར་ས་ནི་སྲུང་བའོ། །ས་གནོན་ཕྱག་རྒྱས་ས་ལ་མནན། །ས་ཡི་ལྷ་མོ་བཏོན་གྱུར་ནས། །མེ་ཏོག་སོགས་པས་མཆོད་ནས་ནི། །སྦྲན་ཕྱིར་གསོལ་བ་གདབ་པར་བྱ། །སྐྱོབ་པ་སངས་རྒྱས་ཐམས་ཅད་ཀྱིས། །སྤྱོད་པའི་ཚུལ་

44-1-13b

དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་པོར་གསོལ། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་སྟོབས་བཅོམ་པ། །དེ་ལྟར་བདག་གིས་བདུད་བཅོམ་ནས། །དཀྱིལ་འཁོར་ཀུན་དུ་བྲི་བར་བྱ། །དེ་སྐད་གསོལ་ནས་ཞལ་གྱིས་བཞེས། །དེ་ཉིད་
དུ་ནི་ཐིམ་པར་འགྱུར། །བདག་ཉིད་ཀྱིས་ནི་བསང་གཏོར་སོགས། །བྱས་ནས་དེ་རུ་ཉལ་བར་བྱ། །མཚན་མོ་གཉིས་པའི་ཆ་དང་པོར། །དྲི་ཞིམ་སོགས་ཀྱིས་རབ་བསྐུས་ལ། །མེ་ཏོག་སིལ་མ་ལ་སོགས་བཀྲམ། །ཙནྡན་མཆོག་སོགས་མཎྜལ་བྱ། །དེ་རུ་ཏིང་ངེ་འཛིན་གསུམ་
མམ། །ཡང་ན་ལྷག་པར་མོས་པ་ཡིས། །རྟེན་དང་བཅས་པ་དམ་ཚིག་གི། །དཀྱིལ་འཁོར་རབ་ཏུ་དགོད་པར་བྱ། །དེ་ནས་བདག་ཉིད་སྤྲོ་བསྐྱེད་ལ། །ཡེ་ཤེས་འཁོར་ལོ་བཀུག་ནས་ནི། །བྱིན་བརླབས་མཆོད་དང་བསྟོད་པ་དང་། །བདུད་རྩི་མྱང་བས་མཉེས་པར་བྱ། །བུམ་པ་
ནག་ནོག་མེད་པ་ལ། །མཆུ་འཕྱང་ཞབས་ནི་བརྟན་པ་དང་། །རྡོ་རྗེའི་ཆུས་བྱུགས་ཉི་ཤུ་གཅིག །ཡང་ན་དྲུག་ཏུ་སྟ་གོན་བྱ། །མགུལ་པ་དར་གྱི་ཅོད་པན་མཚན། །ཨ་མྲ་ལ་སོགས་ཁ་རྒྱན་ཅན། །སྤོས་བསྲེག་དྲི་ཞིམ་ཆུ་ཡིས་བཀང་། །རང་རང་སྔགས་ཀྱི་བཟླས་པའོ། །འབྲུ་
ལྔ་སྨན་ལྔ་རིན་ཆེན་ལྔ། །འཁོར་ལོ་དྲི་ཆུ་ཡོན་སྣོད་བསྡུ། །མཚན་མ་ལྔ་ཡིས་བརྒྱན་པ་ཡི། །རྣམ་རྒྱལ་བུམ་པ་བདག་པོས་བཟླ། །རྡོ་རྗེ་པདྨས་བཙིར་ནས་སུ། །མེ་ཏོག་དཀར་པོ་དེ་རུ་གཏོར། །བདག་གིས་སློབ་མ་ཐམས་ཅད་ལ། །དབང་བསྐུར་མཛོད་ཅིག་གསོལ་བ་
གདབ། །བདུད་རྩི་འཁྱིལ་བཟླས་བུམ་པ་ལ། །ཀུ་ཤའི་བེམ་པོར་བཅས་པ་ཡིས། །བདག་གིས་སློབ་མ་ཐམས་ཅད་ལ། །བགེགས་བཟློག་གསོལ་ཞེས་སྙན་གསན་དབབ། །དེ་རྣམས་བྱིན་གྱིས་བརླབས་བྱས་ལ། །ཐུན་གསུམ་གཏོར་མ་ཕུལ་ནས་ཀྱང་། །མཆོད་བསྟོད་
བདུད་རྩི་མྱང་བྱས་ལ། །སོ་སོའི་སྔགས་ཀྱིས་མཉེས་པར་བྱ། །འཁོར་ལོ་སྔོན་བཞིན་མཆོད་བྱས་ལ། །ལག་པར་པོག་པོར་ཐོགས་ནས་སུ། །པུས་མོ་བཙུགས་ནས་ཐལ་སྦྱར་བས། །དཀྱིལ་འཁོར་སོགས་ལ་སྙན་གསན་དབབ། །བཅོམ་ལྡན་མི་བསྐྱོད་རྡོ་རྗེ་ཡི། །རིག་

44-1-14a

སྔགས་རྒྱལ་ལ་ཕྱག་འཚལ་བསྟོད། །བདག་གིས་སྙིང་རྗེའི་དཀྱིལ་འཁོར་ནི། །མགོན་པོ་བྲི་བར་འདོད་པ་སྟེ། །སློབ་མ་རྣམས་ལ་ཕན་ཕྱིར་དང་། །ཁྱེད་ལ་མཆོད་པའི་དོན་དུ་ནི། །དེ་བས་བཅོམ་ལྡན་གུས་བདག་ལ། །བྱིན་རླབས་གནང་བར་མཛད་
པར་རིགས། །དགོངས་ཤིང་བདག་ལ་སངས་རྒྱས་དང་། །འགྲོ་བའི་འཁོར་ལོ་དོན་བྱེད་རྣམས། །འབྲས་གནས་བྱང་ཆུབ་སེམས་དཔའ་དང་། །གང་ཞིག་གཞན་ཡང་སྔགས་ཀྱི་ལྷ། །ལྷ་དང་འཇིག་རྟེན་སྐྱོང་བ་དང་། །འབྱུང་པོ་བྱང་ཆུབ་སྟོན་པ་རྣམས། །སེམས་ཅན་
བསྟན་ལ་མངོན་དགའ་བའི། །གང་ཞིག་རྡོ་རྗེའི་མིང་ཅན་རྣམས། །ཆེ་གེ་བདག་ནི་རྡོ་རྗེ་ཆེ། །དཀྱིལ་འཁོར་བྱང་ཆུབ་སེམས་འབྱུང་བ། །ཇི་ལྟར་ཉེར་སྤྱོད་ནུས་པ་ཡིས། །འགྲོ་དག་དོན་དུ་བྲི་བར་བྱ། །སློབ་མ་དང་བཅས་བདག་ལ་ནི། །ཐུགས་རྗེས་ཉེ་བར་བཟུང་ནས་ནི། །
ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབ་པར་མཛད་དུ་གསོལ། །སྙན་གསན་ལན་གསུམ་དུ་གསོལ་ནས། །མཆོད་པ་ལ་སོགས་རབ་སྦྱར་ནས། །མཚམས་ལ་སོགས་པ་བཅིངས་ནས་ནི། །ཕྱི་རོལ་བྱུང་ནས་སློབ་མ་གཟུང་། །ཤེས་རབ་ཆེན་པོ་
དགའ་ཆེན་པོ། །ང་རྒྱལ་མེད་ཅིང་དྲིན་ལན་ཤེས། །རིགས་ལྡན་ཡོན་ཏན་དད་པ་ཆེ། །གཟུགས་མདོག་གཞོན་པས་བརྒྱན་པའོ། །གསང་སྔགས་ཀྱི་ནི་གྲུབ་པ་མཆོག །འདོད་པ་རབ་ཏུ་ལྡན་འགྱུར་ན། །དམན་པའི་རིགས་དང་བྱད་ངན་དང་། །ཡོན་ཏན་མེད་ཀྱང་གཟུང་
བར་བྱ། །སློབ་དང་ཡིད་ཆེས་དད་ལྡན་དང་། །ཐེག་ཆེན་དགའ་བའི་བདག་ཉིད་དང་། །དཀྱིལ་འཁོར་མཐོང་དང་སྔགས་འགྲུབ་འདོད། །ཚོགས་འཕེལ་ཕྱིར་ནི་འཁོར་ལོར་གཟུང་། །སྣོད་ལྡན་འཁོར་ནི་བཞི་པོ་དང་། །འདི་དང་ཕ་རོལ་བསོད་ནམས་འདོད། །སྣོད་དང་སྣོད་
མིན་རབ་བསྒྲགས་ལ། །བདག་ཉིད་རང་གི་ནང་དུ་འགྲོ། །ཏིང་འཛིན་རྡོ་རྗེ་ཆུ་སྐྱེས་ཀྱིས། །སྦྱང་བའི་སློབ་མས་ཁང་པའི་སྒོར། །ཐལ་མོ་སྦྱར་བ་བྱས་ནས་ནི། །ཚིག་འདིས་གསོལ་བ་ལན་གསུམ་གདབ། །སྟོན་ཆེན་ཁྱོད་ལ་བདག་དགའ་བོ། །བརྟན་པོ་བྱང་ཆུབ་ཆེན་པོའི་

44-1-14b

ལམ། །མགོན་པོ་ཆེན་པོ་བདག་འདོད་དེ། །དེ་ཉིད་དམ་ཚིག་བདག་ལ་སྩོལ། །བདག་ལ་བྱང་ཆུབ་སེམས་ཀྱང་སྩོལ། །སངས་རྒྱས་ཆོས་དང་དགེ་འདུན་དང་། །སྐྱབས་སུ་འགྲོ་བ་བདག་ལ་སྩོལ། །ཐར་ཆེན་ཁང་པ་བརྩེགས་པ་རུ། །མགོན་པོས་བདག་ནི་གཞུག་པར་
མཛོད། །དེ་ལྟར་བརྗོད་པས་བླ་མ་ཡི། །སློབ་མ་གཅིག་ནི་གཙོར་བྱས་ནས། །དེ་སོགས་རྣམས་ལ་ཚིག་འདི་ཡིས། །གཞུག་ཕྱིར་བྲོད་པ་བསྐྱེད་པར་བྱ། །བུ་ཚུར་ཤོག་ཅིག་ཐེག་ཆེན་གྱི། །ཆོ་ག་སྔགས་ཀྱི་སྤྱོད་པའི་ཚུལ། །ཁྱོད་ལ་ཡང་དག་བསྟན་པར་བྱ། །ཚུལ་ཆེན་
ཁྱེད་ཀྱིས་བསྟེན་པར་གྱིས། །སངས་རྒྱས་དུས་གསུམ་ལས་བྱུང་བ། །སྐུ་གསུང་ཐུགས་ཀྱི་རྡོ་རྗེ་ཅན། །གཞལ་མེད་ཡེ་ཤེས་ཐོབ་པ་ནི། །རྡོ་རྗེ་སྔགས་ཀྱི་དོན་བསྒོམ་ཡིན། །ཅི་ཕྱིར་དཔག་མེད་སྔགས་རྣལ་འབྱོར། །ཤཱཀྱ་སེང་གེ་སོགས་རབ་ཀྱིས། །དྲག་པོ་ཆེན་པོ་
བདུད་ཀྱི་ཚོགས། །དཔུང་ཆེན་དེ་དག་གཞོམ་བྱས་ནས། །འཇིག་རྟེན་རྗེས་འཇུག་རྟོགས་ནས་སུ། །འཁོར་ལོ་བསྐོར་ནས་མྱ་ངན་འདས། །དེ་ཕྱིར་བློ་ལྡན་བུ་ཁྱོད་ཀྱིས། །ཐམས་ཅད་མཁྱེན་པ་ཐོབ་པར་གྱིས། །དེ་ལྟར་བགྱི་ཞེས་དེར་འདུག་ནས། །བླ་མས་ཚིག་གིས་
བྱང་ཆུབ་སེམས། །མ་བསྐྱེད་པ་ནི་བསྐྱེད་པར་བྱ། །བསྐྱེད་པ་ཡིན་ན་འཕེལ་བར་བྱ། །སྡིག་པ་བཤགས་པ་རྗེས་ཡི་རང་། །བསྔོ་དང་གསོལ་བ་སྐྱབས་འགྲོ་དང་། །བྱང་ཆུབ་སེམས་བསྐྱེད་ལམ་བསྟན་དང་། །སྨོན་ལམ་གདབ་པ་སྔོན་འགྲོ་བྱ། །འཁྱིལ་བཟླས་བསྲུངས་ནས་
གནས་གསུམ་དུ། །འཁོར་ལོ་རྡོ་རྗེ་པདྨ་ལས། །ཨོཾ་ཧཱུྃ་ཨཱཿནི་བཀབ་བྱས་ལ། །རྡོ་རྗེ་ཁུ་ཚུར་དྲི་ཆུས་བྱུག །སྤྱི་བོར་མེ་ཏོག་མདུན་དུ་སྤོས། །མར་མེ་དྲི་ནི་སྙིང་ག་རུ། །ལས་ཀུན་བྱེད་པའི་སྔགས་བཟླས་ནས། །མཆོད་པའི་དོན་དུ་སྦྱིན་པར་བྱ། །ཨ་ཤྭཏྠ་དང་ཨུ་དུམ་
བཱར། །མེ་ཏོག་རྩེ་མོ་སོར་བཅུ་གཉིས། །དྲང་པོ་དྲི་ཞིམ་གྱིས་བྱུགས་པ། །དངོས་གྲུབ་ལྟས་ཕྱིར་སྦྱིན་པར་བྱ། །ཧ་ཅང་རིང་མིན་ཐུང་བ་མིན། །ཀུ་ཤ་སྔོན་པོ་འབུས་མ་ཟོས། །རྨི་ལམ་མི་འཁྲུག་བཀྲ་ཤིས་ཕྱིར། །ཉག་མ་གཉིས་ནི་སྦྱིན་པར་བྱ། །སུམ་བསྒྲིལ་མདུད་

44-1-15a

པ་གསུམ་བྱས་ལ། །འཁྱིལ་པའི་སྔགས་བཟླས་ཕོ་ཡི་གཡོན། །མོ་ཡི་དཔུང་པ་གཡས་པ་རུ། །བསྲུང་བ་བྱ་ཕྱིར་བཅིང་བར་བྱ། །འཁྱིལ་བཟླས་ཆུ་གཙང་སྐྱོར་ཆུ་ཡིས། །ཁ་བཤལ་ལན་གསུམ་འཐུང་བཅུག་སྟེ། །བྱིན་ཆགས་གཙང་བར་བྱ་བ་དང་། །ངག་གི་ཉེས་པ་སྦྱང་ཕྱིར་སྦྱིན། །ཨོཾ་ཧྲཱིཿབི་ཤུདྡྷ་སརྦ་དྷརྨ་བོ་སོ་ད་ས་བོ་ཀལྤ་ཨ་ན་ཡ་ཧཱུྃ། ཕྱིར་མི་ལྡོག་དབང་དཀྱིལ་འཁོར་ལ། །བྱིན་ནས་མགོན་པོ་བདག་ལ་གསུངས། །དཀྱིལ་འཁོར་ལྷ་ཡི་དེ་ཉིད་དང་། །སློབ་དཔོན་གྱི་ནི་ཕྲིན་ལས་དང་། །སངས་རྒྱས་ཀུན་གྱི་དམ་ཚིག་དང་། །གསང་བ་མཆོག་གི་སྡོམ་པ་རྣམས། །རྟག་ཏུ་དབང་གི་སློབ་དཔོན་བགྱིད། །སེམས་ཅན་ཀུན་དོན་བྱེད་ཕྱིར་སྩོལ། །དེ་ནས་བླ་མས་ཐུན་མོང་སྡོམ། །བྱིན་ནས་སློབ་མ་དེ་ཡིས་ཀྱང་། །རིག་དབང་ཐོབ་ཕྱིར་ལན་གསུམ་དུ། །བཀའ་སྩལ་དེ་ནི་བླང་བྱའོ། །ཀུན་མཁྱེན་གང་དུ་འཇིག་རྟེན་དུ། །བདེ་བར་འབྱུང་ངམ་མི་འབྱུང་བ། །ཨུ་དུམ་བཱ་རའི་མེ་ཏོག་བཞིན། །གལ་ཏེ་བརྒྱ་ལམ་བརྒྱ་འགའ་འབྱུང་། །
བདེ་བས་ཐོབ་དཀའ་འབྱུང་བ་ནི། །གསང་སྔགས་སྤྱོད་པའི་ཚུལ་འདི་ནི། །ཅི་ཕྱིར་དཔག་མེད་སེམས་ཅན་དོན། །བླ་ན་མེད་པ་བྱེད་ནུས་པ། །ས་ཡང་བསྐལ་པ་དུ་མ་ཡི། །སྣོད་དུ་བྱས་པའི་སྡིག་པ་གང་། །དེ་ཀུན་ཟད་པར་འགྱུར་བ་ཡིན། །དཀྱིལ་འཁོར་འདི་འདྲ་མཐོང་བས་སོ། །གང་གཞུང་མཐའ་ཡས་གྲགས་པ་ཡི། །སྔགས་ཀྱི་སྤྱོད་པ་ལ་གནས་ནས། །བླ་མེད་གོ་འཕང་ཕྱིན་པ་ནི། །སྔགས་བཟླས་པ་ལས་སྐྱེ་བའོ། །གང་དག་སྤྱོད་པ་མཆོག་འདི་ལ། །བློ་གྲོས་གཏན་དུ་མི་གཡོ་བ། །སྡུག་བསྔལ་ཐམས་ཅད་འབྱུང་བ་ཡི། །ངན་འགྲོ་དེ་དག་གིས་གཅོད་དོ། །དེ་རིང་དཔག་མེད་རྙེད་པ་ནི། །བདག་ཆེན་ཁྱེད་རྣམས་ཀྱིས་ཐོབ་སྟེ། །སྲས་བཅས་རྒྱལ་བ་ཀུན་གྱིས་ཀྱང་། །བསྟན་པ་འདི་ལ་ཁྱེད་རྣམས་ཀུན། །
ཐམས་ཅད་ཡོངས་སུ་བཟུང་གནས་པའི། །སྐྱེ་བར་གྱུར་པ་བདག་ཆེན་གྱི། །དེ་ཕྱིར་ཁྱེད་ཀྱིས་བདག་ཆེན་ལ། །བདེ་བ་སྐྱེ་བར་འོང་འགྱུར་ཅིག །དཔལ་ལྡན་མཆོག་གི་ཐེག་པ་འདི། །ཆེན་པོར་འབྱུང་བ་ཐེག་ཆེན་པོ། །གང་གིས་ཁྱེད་ཆག་འགྲོ་འགྱུར་བ། །དེ་བཞིན་གཤེགས་རྣམས་འོང་འགྱུར་ལ། །ཞལ་བཟང་ཁྱེད་ནི་དེ་རིང་འོངས། །སང་ནི་འདུས་པའི་དཀྱིལ་འཁོར་ཆེ། །མཐོང་དཀའ་ང་ཡི་ཐུགས་རྗེ་ཡིས། །ཁྱེད་ཀྱིས་མཐོང་བར་འགྱུར་བའོ། །ཀྱེ་བུ་དག་ཉོན་ཅིག་དོ་ནུབ་ནི། །སེང་གེ་ཉལ་སྟབས་བཞིན་དུ་ཉོལ། །ཁྱོད་ཀྱིས་རྨི་ལམ་དགེ་མི་དགེ། མཐོང་བ་ཐོ་རངས་བདག་ལ་སྨྲོས། །དེ་ལྟར་བགྱི་ཞེས་རབ་གསོལ་ནས། །དེ་དག་ཉལ་བཅུག་འཁྱིལ་པ་ཡི། །སྔགས་བཟླས་དྲི་ཆུ་བྱུགས་ནས་སུ། །སྲུང་བ་བྱས་ཏེ་གནས་པར་བྱ། །ལྷག་པར་མོས་པས་དཀྱིལ་འཁོར་དམིགས། །མཆོད་བསྟོད་བདུད་རྩི་མྱང་བྱས་ཏེ། །བསྡུ་ཞིང་ཡེ་ཤེས་འཁོར་ལོ་ནི། །ཁ་སྦྱར་དབུས་སུ་མཁའ་ལ་བཞག །ཐོ་རངས་ལངས་ནས་ཤར་བལྟས་ཏེ། །སོ་ཤིང་འཆོས་ནས་སྟེང་དུ་བསྒྱུར། །བ་ལང་ཀོ་ཙམ་མཎྜལ་ལ། །ཞི་བ་ལ་སོགས་གྲུབ་པར་ལྟ། །སྦྱིན་དང་སྲུང་བ་ལ་སོགས་ལ། །འཁྱིལ་པའི་
སྔགས་ནི་མཆོག་ཉིད་ལས། །མཐོང་བའི་རྨི་ལམ་མི་དགེ་བས། །རང་ངམ་དེས་
བཟླས་གཞོམ་པར་བྱ། །མཚན་མོ་གསུམ་པའི་ཆ་དང་པོར། །སྐུད་པ་བརྟག་
པ་ལ་སོགས་འདྲ། །དེ་ཡི་ས་བོན་ལས་བྱུང་བ། །ཉི་ཤུ་རྩ་ལྔར་མོས་པའོ། །
མི་བསྐྱོད་རྡོ་རྗེ་མིག་གཉིས་ཀྱང་། །ཛ་ལ་ཉི་ཟླར་བསྐྱེད་དེས་མཚན། །རྫི་
མའི་རྦ་རླབས་ལྕགས་ཀྱུ་ཡིས། །མཁའ་ཡི་འཁོར་ལོ་ལས་དགུག་བྱ། །ཨོཾ་ཨཱཿ
རྣམ་པར་སྣང་མཛད་ཆེ། །རང་གི་འཁོར་ལོ་ལ་མཆོད་ཕྱིར། །ཁྱེད་ཀྱིས་སྐུད་
པ་བདག་ལ་སྩོལ། །དིཔྟ་དྲིཥྚ་བཛྲ་ཨཾ་གུ་ཤ་ཛ་ཧཱུྃ། དེ་ལྟར་མི་བསྐྱོད་པར་
བྱས་པས། །རང་རང་སྐུད་པ་རང་ལ་ཐིམ། །སོ་སོ་གནས་པའི་སྐུད་པ་ཀུན། །
ཆོས་ཉིད་སྔགས་ཀྱིས་བསྒྲིལ་བར་བྱ། །སརྦ་དྷརྨ་སྥ་ར་ཎ་ཨ་ནུ་པྲ་བིཥྚ་སརྦ་དྷརྨ་
ཨཏྱནྟ་ཨ་ནུ་པྲ་བིཥྚ་དྷརྨ། དཀྱིལ་འཁོར་ཉིས་འགྱུར་རིང་ཐུང་དང་། །སྒོ་ཡི་
ཉི་ཤུ་ཆས་སྦོམ་ཕྲ། །ཙནྡན་མཆོག་སོགས་དྲི་ཞིམ་གྱིས། །བྱུགས་ནས་གསེར་
དངུལ་སྣོད་དུ་བསྲུང་། །ཡི་གེ་གསུམ་གྱི་བར་བསམས་ལ། །ཁྲུས་བྱས་རང་
ལྷའི་ང་རྒྱལ་གྱིས། །དེ་ནས་སྐུད་པ་བསྡོགས་བྱས་ནས། །འཁོར་ལོ་ཐིག་ནི་
གདབ་པར་བྱ། །

44-1-15b

empty page

44-1-16a

བདག་ཉིད་མི་བསྐྱོད་ཤར་བལྟས་ནས། །སློབ་མ་སྣང་མཛད་བདུད་རྩི་འཁྱིལ། །ལྟེ་བར་ཁུ་ཚུར་གཡོན་བཟུང་ནས། །ནམ་མཁའི་ཐིག་ནི་མ་ལུས་གདབ། །ནམ་མཁའ་ལ་གནས་དེ་བཞིན་གཤེགས། །སེམས་ཅན་དོན་བྱེད་དུས་བབ་པས། །གནས་འདིར་
བྱོན་པའི་དོན་ཆེད་དུ། །ཐིག་གི་སྒྲ་ཡིས་བསྐུལ་བར་བྱ། །ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཡ་མ་ཧཱུྃ། གནོད་སྦྱིན་གཤིན་རྗེ་བརྒྱ་བྱིན་གླུ། །ཕྱོགས་སུ་ཁ་བལྟས་ཕྱོགས་བཞིར་གདབ། །མེ་མཚམས་བདེན་བྲལ་མཚམས་གནས་ནས། །གྲྭ་ཡི་ཐིག་ནི་རབ་ཏུ་གདབ། །དེ་ནས་ཚངས་
ཐིག་སོགས་གཅིག་ཏུ། །སུམ་ཆར་བྱས་ལ་མཐའ་གཉིས་དོར། །དང་པོ་ཆ་བཞིར་རབ་བྱས་ལ། །དེ་ཡི་དང་པོ་ཆ་གཉིས་སོ། །དེ་ཡི་གཉིས་པ་གཉིས་པ་བྱ། །རེ་རེ་ཡང་ནི་གཉིས་གཉིས་སོ། །གསུམ་པའི་དང་པོས་ཆ་ཆུང་གཉིས། །དེ་ནས་ཡང་ནི་ཆ་ཆུང་གཅིག །དེ་ནས་
ཆ་ཆུང་གཉིས་དོར་ནས། །ཆ་ཆེན་གཅིག་ནི་དོར་བྱས་ནས། །ཆ་ཆུང་གཅིག་ནི་བཅད་པའོ། །ཡང་ནི་གཉིས་དོར་གཅིག་བཅད་དོ། །གཉིས་དོར་གཅིག་བཅད་དེ་སྟེང་དུ། །ཆ་ཆུང་གཉིས་ནི་དོར་བར་བྱ། །དེ་ནས་ཆ་ཆེན་གསུམ་ནི་བཅད། །དེ་སྟེང་ཆ་ཆུང་གསུམ་དོར་ནས། །
ཡང་ནི་ཆ་ཆུང་གསུམ་དོར་བྱ། །ལྷག་མ་ཆ་ཆུང་གཅིག་ལུས་པའོ། །དེ་ནས་ཐིག་སྐུད་གཉིས་འགྱུར་བྱས། །ཙནྡན་ཕུར་བུས་དབུས་སུ་གཟུགས། །ཡང་ནི་རང་གི་ར་བ་དང་། །ཕྱི་རོལ་ར་བ་ཀུན་བསྐོར་བྱ། །ཆ་ཆེན་ལྔ་ནི་རབ་བསྐོར་ན། །ནང་གི་རྡོ་རྗེ་ར་བ་སྟེ། །ལྷ་ཡི་གནས་
ལ་ཆ་ཆུང་ལྔ། །བྱས་པའི་ཕྱེད་གཉིས་ཀ་བར་འགྱུར། །ཕྱི་ཡི་འཁོར་ལོ་ཆ་བརྒྱད་ལ། །ཆ་གཅིག་སྒོ་ཡི་དབུས་བྱའོ། །དེ་ཚད་ལྷ་ཡི་སྣམ་བུ་སྟེ། །དེ་ཕྱེད་འཁོར་ས་ཆུང་ངུའོ། །དེ་ཡི་ཚད་ཀྱི་ཁ་ཁྱེར་ས། །དྲ་བ་དྲ་བ་ཕྱེད་པ་དང་། །ཕྲེང་བཤལ་འཕྱང་བའི་སྣམ་བུ་དང་། །དེ་བཞིན་འགྲམ་པ་
གཤོག་པའོ། །ལོགས་ཀྱི་ཕྱི་རོལ་ཡ་ཕུགས་ཏེ། །དེ་ལྟར་ཀ་བ་ལ་ཡང་ངོ་། །དེ་ཕྱེད་རིན་ཆེན་ཕ་གུ་དང་། །ཚོན་སྣ་ལྔ་ཡི་ས་མཉམ་མོ། །དེ་བཞིན་འཁོར་ལོ་ཀ་སོགས་དང་། །རྡོ་རྗེ་ར་བའང་དེ་བཞིན་ནོ། །ཡ་ཕུགས་སྟེང་དུ་ཆ་ཆེན་གསུམ། །ཏ་ར་ཎ་ཡི་ས་རུ་འགྱུར།  །ཆ་ཆུང་དྲུག་ལ་

44-1-16b

པདྨ་དང་། །རྡོ་རྗེ་ར་བ་བསྐོར་བར་བྱ། །ཆ་ཆེན་གཅིག་ནི་འོད་དཀྱིལ་འཁོར། །བསྐོར་ནས་གཅིག་ནི་ཉེ་འཁོར་ལས། །ལྟས་ངན་གྱིས་ནི་འགྲུབ་མི་འགྱུར། །ཐིག་སྐུད་ཆད་ན་སློབ་དཔོན་འཆི། །ལྷག་ཆད་བྱུང་ན་འབྲས་སོགས་འབྱུང་། །ཕྱོགས་འཁྲུལ་སློབ་མ་སྨྱོ་བར་འགྱུར། །གྲུ་བཞི་
སྒོ་བཞི་རྟ་བབས་བཞིས། །བརྒྱན་ཅིང་དར་ཤམ་མེ་ཏོག་དང་། །འཕན་དང་རྒྱལ་མཚན་བ་དན་གྱིས། །བརྒྱན་པའི་འཁོར་ལོ་མཐོང་བར་བྱ། །གྲྭ་ཡི་ཆ་ནི་ཐམས་ཅད་དང་། །སྒོ་ཡི་ཟུར་ཀུན་ཆ་ལ་ཡང་། །ཟླ་བ་རིན་ཆེན་རྡོ་རྗེ་དགོད། །གམ་པའི་རི་སོགས་རབ་བརྒྱན་པ། །ཆོས་ཀྱི་འཁོར་ལོ་
རི་དྭགས་གཉིས།  །འཕན་སོགས་ཀྱིས་བརྒྱན་ཏྭ་ར་ཎ། །ཇི་ལྟར་མཛེས་ཤིང་བཀླུབས་པར་བྱ། །སེམས་ཅན་རྣམས་ཀྱི་བསམ་དབང་གི། །འདི་ནི་ཐུགས་ཀྱི་དཀྱིལ་འཁོར་བས། །བཅོམ་ལྡན་འདས་ཀྱི་རྒྱུད་འདི་རུ། །ཁྲུ་ནི་བཅུ་གཉིས་ཉིད་དུ་གསུངས། །དེ་ལ་ཁྲུ་བཅུ་གཉིས་ནི་བྱང་ཆུབ་
ཀྱི་སེམས་ལ་དགའ་བའི་རྡོ་རྗེ་སྒེག་མོ་དང་། གཟུགས་དང་ཡོན་ཏན་གྱི་རྡོ་རྗེ་ཕྲེང་བ་མ་དང་། ཆོས་འཆད་པའི་རང་བཞིན་རྡོ་རྗེ་གླུ་མ་དང་། སེམས་ཅན་ཐམས་ཅད་ཀྱི་དོན་བྱེད་པའི་རྡོ་རྗེ་གར་མ་དང་། གྲགས་པ་ཐམས་ཅད་འདུས་པའི་རྡོ་རྗེ་བདུག་པ་མ་དང་། བྱང་ཆུབ་ཀྱི་ཡན་ལག་གི་རྡོ་རྗེ་མེ་ཏོག་མ་
དང་། འགྲོ་བ་གཞན་དགའ་བར་བྱེད་པའི་རྡོ་རྗེ་མར་མེ་མ་དང་། ཚུལ་ཁྲིམས་ལ་སོགས་པའི་རྡོ་རྗེ་དྲི་ཆབ་མ་དང་། སྦྱིན་པའི་རང་བཞིན་རྡོ་རྗེ་ཀྱོ་བ་མ་དང་། སྙན་པར་སྨྲ་བའི་རང་བཞིན་རྡོ་རྗེ་གསོལ་ཀ་མ་དང་། དོན་མཐུན་པའི་རང་བཞིན་རྡོ་རྗེ་ཕོ་ཉ་མ་དང་། དོན་སྤྱོད་པའི་རང་བཞིན་རྡོ་རྗེ་འབེབས་
པ་མ་སྟེ། དེ་རྣམས་རྣམ་པར་དག་པའི་རང་བཞིན་ནོ། །དེ་བཞིན་དུ་སྐུའི་དཀྱིལ་འཁོར་ལ་ཁྲུ་བཅུ་དྲུག་ཏུ་གསུངས་པ་ནི། བྱང་ཆུབ་ཀྱི་སེམས་བརྟན་པར་བྱེད་པའི་རང་བཞིན་རྡོ་རྗེ་སེམས་དཔའ་དང་། ཐམས་ཅད་འགུགས་ནུས་པའི་རང་བཞིན་རྡོ་རྗེ་རྒྱལ་པོ་དང་། དེ་བཞིན་གཤེགས་པ་ཐམས་
ཅད་མཉེས་པར་བྱེད་པའི་ཡོན་ཏན་རྡོ་རྗེ་ཆགས་པ་དང་། གཟི་བརྗིད་བསྟོད་ཅིང་དགའ་བའི་ཡོན་ཏན་རྡོ་རྗེ་ལེགས་པ་དང་། ཆོས་ཀྱི་རྒྱལ་པོར་དབང་བསྐུར་བའི་རྡོ་རྗེ་རིན་ཆེན་དང་། གཟི་བརྗིད་གཞན་ལས་འཕགས་པའི་ཡོན་ཏན་རྡོ་རྗེ་གཟི་བརྗིད་དང་། རེ་བ་ཡོངས་སུ་རྫོགས་པའི་ཡོན་ཏན་རྡོ་རྗེ་

44-1-17a

དཔལ་རབ་དང་། འཛུམ་པས་ལུང་སྟོན་པའི་ཡོན་ཏན་རྡོ་རྗེ་བཞད་པ་དང་། ཆོས་ལ་དམིགས་ཤིང་སོ་སོར་རྟོག་པའི་ཡོན་ཏན་རྡོ་རྗེ་ཆོས་རབ་དང་། སྒྲིབ་པ་ཡོངས་སུ་གཅོད་པའི་ཡོན་ཏན་རྡོ་རྗེ་རྣོན་པོ་དང་། སྐུ་གསུང་ཐུགས་ཟད་མི་ཤེས་པར་ཀུན་ལ་ཁྱབ་པའི་ཡོན་
ཏན་རྡོ་རྗེ་རྒྱུ་དང་། གཞུང་གི་ཆོས་རབ་ཏུ་སྒྲོགས་པའི་ཡོན་ཏན་རྡོ་རྗེ་སྨྲ་བ་དང་། སེམས་ཅན་སྨིན་པ་དང་གྲོལ་བར་བྱེད་པའི་ཡོན་ཏན་རྡོ་རྗེ་ལས་རབ་དང་། མི་འཇིགས་པ་སྦྱིན་ཞིང་སྲུང་བའི་རང་བཞིན་རྡོ་རྗེ་སྲུང་བ་དང་། གདུལ་དཀའ་འདུལ་བར་བྱེད་པའི་ཡོན་ཏན་རྡོ་རྗེ་གནོད་སྦྱིན་དང་། རྡོ་རྗེ་གསུམ་
བསྡུས་ཤིང་དབྱེར་མེད་པའི་ཡོན་ཏན་རྡོ་རྗེ་སྡུད་པ་སྟེ། དེ་རྣམས་རྣམ་པར་དག་པའོ། །གསུང་གི་དཀྱིལ་འཁོར་ལ་ཁྲུ་ཉི་ཤུ་གསུངས་པ་ནི། དེ་རྣམས་དང་རྡོ་རྗེའི་རིགས་རྣམས་སྡུད་ཅིང་དམ་ཚིག་གི་ཕྱག་རྒྱ་བྱིན་གྱིས་རློབ་པའི་ཡོན་ཏན་སེམས་མ་རྡོ་རྗེ་མ་དང་། རིན་པོ་ཆེའི་རིགས་སྡུད་ཅིང་དབང་
བསྐུར་བའི་བྱིན་གྱིས་རློབ་པའི་རང་བཞིན་ཡོན་ཏན་རིན་ཆེན་རྡོ་རྗེ་མ་དང་།པདྨའི་རིགས་སྡུད་ཅིང་ཆོས་ཀྱི་ཕྱག་རྒྱ་བྱིན་གྱིས་རློབ་པའི་ཡོན་ཏན་ཆོས་ཀྱི་རྡོ་རྗེ་མ་དང་། ལས་ཀྱི་རིགས་སྡུད་ཅིང་ལས་ཀྱི་ཕྱག་རྒྱ་བྱིན་གྱིས་རློབ་པའི་ཡོན་ཏན་ལས་ཀྱི་རྡོ་རྗེ་མ་སྟེ། དེ་རྣམས་རྣམ་པར་དག་པའོ། །ཅིའི་ཕྱིར་
ཞེ་ན། དེ་རྣམས་ས་བཅུ་རྣམ་པར་དག་པ་སྟེ། ས་བཅུ་ནི་ཡེ་ཤེས་ལྔའི་རྟེན་དུ་གྱུར་པའི་ཕྱིར་རོ། །ཇི་སྐད་དུ་གསང་བའི་ཐིག་ལེ་ནོར་བུའི་རྒྱུད་ཕྱི་མ་ལས། འདི་ནི་སངས་རྒྱས་ཐམས་ཅད་ཀྱི། །ལམ་རྣམས་དག་སྟེ་རིམ་པ་བཞིན། །བཅུ་གཉིས་བཅུ་དྲུག་ཉི་ཤུ་རུ། །ཡེ་ཤེས་ལ་ནི་ཡེ་ཤེས་
གནས། །ཐོས་དང་བསམ་པ་ངོ་བོ་ནི། །ཀྱོ་བ་ལ་སོགས་རང་བཞིན་ནོ། །ཤེས་རབ་བརྩོན་འགྲུས་ཏིང་ངེ་འཛིན། །ཐར་ཆགས་སྡུག་པ་ལ་སོགས་སོ། །དྲོད་ལ་སོགས་པ་དང་པོར་སྦྱོར། །སྒེག་མོ་ལ་སོགས་ངོ་བོའོ། །ལྷག་མ་ཉི་ཤུ་གཉིས་གཉིས་ཀྱང་། །ས་རེ་རུ་ནི་རྣམ་དག་པས། །
ཡེ་ཤེས་རྟེན་དུ་ཡང་དག་མཚམས། །སྟེགས་བུ་འདི་ཡང་འཁོར་ལོ་ཡི། །རྟེན་དུ་ཡང་དག་གྱུར་པས་ན། །རྣམ་པར་དག་པ་མངོན་དུ་བྱའོ། །ཞེས་སོ། །མདོར་ན་ཟབ་གསལ་གཉིས་མེད་ལས། །གྲུབ་པའི་ཁྱད་པར་འབྱུང་བས་ན། །རིགས་དང་ཚད་སོགས་ངེས་མེད་པས། །ཁྲུ་གང་

44-1-17b

ནས་བརྩམས་སྟོང་ཕྲག་བརྒྱ། །རིན་ཆེན་ལྔ་ཡི་ཕྱེ་མའམ། །ཡང་ན་འབྱུང་ཁུངས་ནས་འབྱུང་དང་། །སཱ་ལུ་བཏགས་པའི་ཕྱེ་མ་ལ། །སྔ་མའི་རིམ་བཞིན་འཁོར་ལོས་དབབ། །བདེན་པའི་བྱིན་གྱི་རླབས་བརྗོད་དེ། །གསེར་སོགས་སྣོད་དུ་བདུག་པ་བསྲེག །གསལ་བར་བསམས་
ནས་གསང་སྔགས་འདིས། །མངོན་པར་བཟླས་པ་རབ་ཏུ་བྱ། །བཛྲ་ཙི་ཏྲ་ས་མ་ཡ་ཧཱུྃ། རྡོ་རྗེ་ཤུགས་ཀྱིས་ཞུགས་ནས་སུ། །ཆོས་དབྱིངས་ཀྱིས་ནི་འདི་ཉིད་དག །སེམས་ཅན་དབྱིངས་ནི་རབ་སྒྲོལ་མཛད། །རྒྱལ་བའི་མཆོག་ནི་མི་བསྐྱོད་མགོན། །བདེ་བར་གཤེགས་པ་ཀུན་གྱི་གནས། །
སྐྱོན་ཀུན་ལས་ནི་གྲོལ་བར་མོས། །བླ་མས་གཡོན་པའི་ཁུ་ཚུར་གྱིས། །དབང་ལྡན་མཚམས་ནས་ཕྱི་རོལ་ནས། །རི་མོ་ལྔ་ནི་བྲི་བའོ། །དཀར་པོ་སེར་པོ་དམར་པོ་དང་། །ལྗང་ཁུ་ནག་པོ་ནང་དུའོ། །གཡས་སུ་བསྐོར་ཅིང་ཆད་མེད་པས། །རྡུལ་ཚོན་རི་མོ་བྲི་བའོ། །སྦོམ་པོར་བྲིས་ན་
ནད་འབྱུང་སྟེ། །ཕྲ་བས་ནོར་ཟད་འཁྱོག་འཐབ་འབྱུང་། །ཆད་ན་སློབ་མ་བླ་མ་འཆི། །དེ་བས་ཕྱོགས་ཀུན་མཉམ་པར་འགྱུར། །གཡས་སྐོར་ཚུལ་དུ་མི་འདེབས་ན། །ཚོན་ལ་ཕུར་བུས་གདབ་པར་བྱ། །རྡོ་རྗེ་རྩེ་མོ་གཉིས་དཀར་མོ། །གཞན་ནི་སེར་པོར་ཤེས་པར་བྱ། པདྨ་རཱ་ག་འདྲ་བ་
གཞན། །མ་ར་ག་ཏ་ལྟ་བུ་སྟེ། །དབུས་ན་ནག་པོར་ཤེས་བྱས་ནས། །ཚོན་གྱི་རིམ་པ་དེ་ལྟར་རོ། །ཤར་གྱི་ཕྱོགས་སུ་དཀར་པོ་ཆེ། །ལྷོ་སེར་ནུབ་དམར་བྱང་ལྗང་ཁུ། །དབུས་མའི་ཆ་ཕྱོགས་ར་བས་བསྐོར། །ཨིནྡྲ་ནཱི་ལའི་ཁ་དོག་གོ། །དེ་དུས་རླུང་དང་སྦྲུལ་སོགས་སྤྲུལ། །བགེགས་
དགྲའི་ཕྱག་རྒྱ་དྲན་བྱས་ནས། །སྡང་བའི་དགྲ་ཡི་སྔགས་རྒྱལ་འདི། །བརྗོད་པས་དེ་དག་སེལ་བར་བྱ། །ན་མཿས་མནྟ་ཀཱ་ཡ་ཝཱ་ཀ་ཙིཏྟ་བཛྲ་ཎཱཾ། ན་མོ་བཛྲ་ཀྲོ་དྷཱ་ཡ། མ་ཧཱ་དཥྚོ་ཊ་ཀ་ཊ་བྷཻ་ར་བ་ཡ་ཨ་སི་མུ་ས་ལ་པ་ར་ཤུ་པཱ་ཤ་ཧསྟྭཱ་ཡ། ཨོཾ་ཨ་མྲྀ་ཏ་ཀུཎྜ་ལི་ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ། 
ཧ་ན་ཧ་ན། ད་ཧ་ད་ཧ། པ་ཙ་པ་ཙ། གརྫ་གརྫ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷ་ནན་བི་ནཱ་ཡ་ཀ། མ་ཧཱ་ག་ཎ་པ་ཏི། ཛཱི་བནྟི་ཨནྟ་ཀ་ར་ཡ་ཧཱུྃ་ཕཊ། དེ་ལྟར་རྡུལ་ཚོན་བཏབ་གྱུར་ནས། །པདྨའི་གདན་ལ་ཉི་མ་དང་། །ཟླ་བ་རབ་ཏུ་བཀོད་བྱས་ནས། །མཚན་མའི་ཕྱག་རྒྱ་དགོད་པའོ། །དབུས་

44-1-18a

སུ་རྡོ་རྗེ་རྩེ་ལྔ་པ། །ཨིནྡྲ་ནཱི་ལའི་ཁ་དོག་འདྲ། །ཤར་དུ་ལྕེ་བརྒྱད་འཁོར་ལོ་ནི། །ཟླ་བ་ལྟ་བུའི་འོད་ཟེར་དང་། །ལྷོ་རུ་རིན་ཆེན་ཟུར་དགུ་པ། །མརྒད་ལྟ་བུའི་འོད་ཟེར་ལྡན། །ནུབ་ཏུ་པདྨ་འདབ་བརྒྱད་པ། །དམར་པོ་འོད་ཟེར་དང་ལྡན་པ། །བྱང་དུ་རལ་གྲི་རིན་ཆེན་ཡུ། །
སྔོན་པོ་འོད་ཟེར་དང་ལྡན་པའོ། །མེ་མཚམས་སྤྱན་ནི་སྔོན་པོའོ། །བདེན་བྲལ་མཚམས་སུ་རྡོ་རྗེ་བྲི། །རླུང་མཚམས་པདྨ་སྡོང་བུར་བཅས། །དབང་ལྡན་ཨུཏྤལ་ལྗང་སེར་ཅན། །ཕྱི་རོལ་མེ་མཚམས་ལ་སོགས་དང་། །ཤར་སྒོ་གཡས་གཡོན་གྲུ་གཉིས་ལ། །མེ་ལོང་པི་ཝང་དུང་དང་སྣོད། །གོས་
དང་ཆོས་ཀྱི་འབྱུང་གནས་བྲི། །ཐོ་བ་འབར་བ་ཤར་སྒོར་བྲི། །རྡོ་རྗེ་དབྱུག་པ་ལྷོ་སྒོར་བྲི། །པདྨ་ནུབ་ཀྱི་སྒོ་རུ་བྲི། །རྡོ་རྗེ་ཁ་བྱེ་བྱང་དུ་བྲི། །ཤེས་རབ་ཐབས་སུ་རབ་ལྡན་པས། །རྟག་ཏུ་མཉམ་པར་གཞག་སྟེ་བྱ། །རང་རང་གི་ནི་ངོ་བོ་རྣམས། །འཕྲོ་བའི་སྔགས་ཀྱིས་གདབ་པར་བྱ། །དེ་ནས་ལྷ་
རྣམས་གནས་བྱའི་ཕྱིར། །སྨེ་ཤ་ཅན་གྱི་བདག་ཉིད་ཆེ། །བུ་མོ་ལོ་གྲངས་བཅུ་གཉིས་པ། །མཱ་མ་ཀཱི་རུ་བྱིན་གྱིས་བརླབས། །གཉིས་སྦྱོར་རྗེས་སུ་ཆགས་བསྐྱེད་ནས། །སངས་རྒྱས་རང་གི་ནང་དུ་གཞུག །ཆོ་ག་གསུམ་གྱིས་བསྒྲུབ་བྱས་ནས། །བཞི་པས་གཉིས་སུ་མེད་པར་བྱ། །རྡོ་རྗེ་པདྨའི་སྒྲ་
ཡིས་ནི། །སངས་རྒྱས་དཀྱིལ་འཁོར་རྣམ་པར་དགུག །བསྐྲད་ནས་སྲུང་བྱ་སྔོན་བཞིན་དུ། །མཆོད་ཡོན་ལ་སོགས་དབུལ་བར་བྱ། །མཆོད་བསྟོད་བདུད་རྩི་མྱང་བྱས་ནས། །ཤེས་རབ་མཐར་བྱེད་ཀྱིས་གཞུག་དང་། །བཅིངས་ཏེ་དགའ་བྱས་ཉེར་སྒྲུབ་དང་། །སྒྲུབ་པ་དབང་བསྐུར་གྱིས་
མཚན་པའོ། །སྔོན་བཞིན་མཆོད་པ་ཡང་བྱས་ཏེ། །དེ་བཞིན་བསྟོད་དང་བདུད་རྩི་མྱང་། །གསལ་བར་བསྒོམས་ནས་བཟླས་བརྗོད་དང་། །རེག་པའི་མཆོད་པས་མཉེས་བྱའོ། །དེ་བཞིན་ཕྱི་ཡི་དྲི་ལ་སོགས། །སྔགས་དང་ཕྱག་རྒྱ་དང་ལྡན་པས། །རང་གི་ས་བོན་ལས་སྤྲུལ་ཏེ། །འཁོར་ལོ་ཡང་
དག་མཆོད་པའོ། །འདི་ནི་ཡང་དག་བདུག་པ་སྟེ། །རང་བཞིན་དང་ནི་སྦྱར་བའི་དྲི། །བདག་གིས་དབུལ་བ་འདི་བཞེས་ལ། །བདག་ལ་བཀའ་དྲིན་སྩལ་དུ་གསོལ། །བཛྲ་དྷཱུཔྦེ་པཱུ་ཛ་སྥ་ར་ཎ། སྣ་ཚོགས་མེ་ཏོག་ཡིད་འོང་བ། །རབ་ཏུ་ཡིད་འོང་འབར་བ་ཡི། །བྱང་ཆུབ་ཡན་ལག་མེ་ཏོག་འདི། །

44-1-18b

བདག་ལ་བརྩེར་དགོངས་བཞེས་སུ་གསོལ། །བཛྲ་པུཥྤེ་པཱུ་ཛ་སྥ་ར་ཎ། ཏིང་འཛིན་མར་མེ་དགེ་བ་འདི། །སྲེག་བྱེད་ངན་འགྲོ་འཇིགས་ལས་སྐྱོབ། །ལྷ་ཡི་སྤྱན་ནི་ཐོབ་བྱེད་པ། །བདག་ལ་བརྩེར་དགོངས་བཞེས་སུ་གསོལ། །བཛྲ་ཨ་ལོ་ཀེ་པཱུ་ཛ་སྥ་ར་ཎ། ག་པུར་ལ་སོགས་བྱུག་པ་
ནི། །དྲི་ཞིམ་ལ་སོགས་མེ་ཏོག་རྒྱན། །ཧཱུྃ་དབྱངས་སྙན་པར་རོལ་འབྱུང་འདི། །བདག་ལ་བརྩེར་དགོངས་བཞེས་སུ་གསོལ། །བཛྲ་གནྡྷེ་པཱུ་ཛ་སྥ་ར་ཎ། སྣ་ཚོགས་བཟའ་བ་ཡིད་འོང་བ། །བཟའ་དང་བཅས་དང་བལྡག་དང་གཞིབ། །ཡིད་འོང་གདུང་བ་སེལ་བ་འདི། །བདག་ལ་བརྩེར་
དགོངས་བཞེས་སུ་གསོལ། །བཛྲ་ནཻ་བི་ཏྱེ་པཱུ་ཛ་སྥ་ར་ཎ། སྣ་ཚོགས་བཏུང་བ་ཡིད་འོང་བ། །འབྲུ་ཡི་ཆང་དང་བཅོས་པའི་ཆང་། །མྱོས་བྱེད་བདུད་རྩི་དཔའ་བོ་འདི། །བདག་ལ་བརྩེར་དགོངས་བཞེས་སུ་གསོལ། །བཛྲ་སུ་ར་པཱུ་ཛ་སྥ་ར་ཎ། རིན་ཆེན་རིའམ་རྒྱ་མཚོ་རིན་ཆེན་རྣམས། །བཞད་
དང་སྒེག་དགའ་རོལ་དང་བདེ་བ་དང་། །དཔག་བསམ་ཤིང་དང་ན་བཟའ་ཤིང་རྣམས་ཀུན། །འཁོར་ལོ་བླ་མར་བཅས་ལ་དབུལ་བར་བྱ། །བོ་དྷི་རཏྣ་ཨ་ལཾ་ཀ་ར། ས་ཧ་ལ་སེ་ར་ཏི་ཀྲི་ཧ་སཽ་ཁྱ་ཨ་ནུཏྟ་ར། ཨ་ནུཏྟ་ར་བོ་དྷྱཾ་ལཾ་ཀ་ར་བསྟྲ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཧཱུྃ་ཞེས་དབུལ་ལོ། །བསྲུངས་
ནས་ཕྱི་རོལ་བྱུང་ནས་ཀྱང་། །ཕྱོགས་སྐྱོང་རང་རང་རྣལ་འབྱོར་གནས། །སྡིག་མེད་ཤ་ཁྲག་ཆུ་ཟན་གྱི། །གཏོར་མ་ཕུལ་ནས་ནང་དུ་འགྲོ། །འདི་ནི་གཞན་དུ་བཤད་པས་དེར་ཤེས་པར་བྱའོ། །གོས་དང་རྒྱན་གྱིས་རབ་བརྒྱན་ཏེ། །རྡོ་རྗེ་ཧཱུྃ་མཛད་བདག་བསྒྱུར་ལ། །དཀྱིལ་འཁོར་བསྐོར་
བ་ཡང་བྱས་ཏེ། །ཕྱག་འཚལ་མེ་ཏོག་སྔོན་པོ་དོར། །བདག་པོས་བཅིང་བསམས་མགོ་རུ་བཅིངས། །དེ་ཡི་གོང་འོག་ཆོ་ག་རྣམས། །རྣམ་པར་དག་པར་འགྱུར་བས་ན། །དག་པའི་དག་པ་རྣམ་དག་པའོ། །དེ་ནས་ལྷ་རྣམས་ཚིམ་བྱའི་ཕྱིར། །ཐབ་ལ་སོགས་པ་དང་ལྡན་པའི། །
སྦྱིན་སྲེག་གནས་སུ་སོང་ནས་ཀྱང་། །སྦྱོར་བ་ལྡན་པས་མཉེས་པར་བྱ། །འདིའི་ཆོ་ག་ཡང་གཞན་དུ་བཤད་པས་དེར་ཤེས་པར་བྱའོ། །དཀྱིལ་འཁོར་མཆོད་པ་ཡང་བྱས་ཏེ། །ཤེས་པའི་ཕྱིར་ན་བཀྲ་ཤིས་གླུ། འཁོར་ལོ་བསྐོར་ནས་བདག་ཉིད་ཀྱིས། །ཕེག་རྡོབ་པ་ཡི་གར་གྱིས་

44-1-19a

ཀྱང་། །ཧཱུྃ་ཧཱུྃ་འཁོར་བ་འདོན་བྱེད་སྐུ་འཛིན་པ། །གཉིས་གཉིས་འཁྱུད་པའི་སྦྱོར་བའི་མཆོག །མི་བསྐྱོད་རྡོ་རྗེ་ཁྱོད་འབའ་ཞིག །ཏེ་ན་ཧཱུྃ་ཏེ་ན་ཧཱུྃ་ཏེ་ན་ཏེ་ཏེ་ཧཱུྃ། ཁྱོད་ཀྱི་ཞབས་ཀྱི་པདྨ་ལ། །ལྷ་དང་མི་ཡིས་འདུད་པའི་མཆོག །སྤྲུལ་པའི་མེ་ཏོག་སྣ་ཚོགས་དང་། །མི་
བསྐྱོད་རྡོ་རྗེ་ཁྱོད་འབའ་ཞིག །ཏེ་ན་ཧཱུྃ་ཏེ་ན་ཧཱུྃ་ཏེ་ན་ཏེ་ཏེ་ཧཱུྃ། དངོས་པོ་རྣམ་གྲོལ་རྣམ་པར་བསྙེན། །གསང་བའི་གསང་བ་འཛིན་པ་ཁྱོད། །བདུད་རྩི་མཐའ་མེད་གསོལ་བ་ཁྱོད། །ཁྱོད་ཀྱི་དགོངས་པ་པད་རྒྱས་ཡིན།  །ཏེ་ན་ཧཱུྃ་ཏེ་ན་ཧཱུྃ་ཏེ་ན་ཏེ་ཏེ་ཧཱུྃ། རྩོམ་སྤངས་སེམས་ཅན་དོན་མཛད་པ། །རྒྱུ་མེད་
གཟུགས་ལ་ཕྱག་འཚལ་ལོ། །ཏེ་ན་ཧཱུྃ་ཏེ་ན་ཧཱུྃ་ཏེ་ན་ཏེ་ཏེ་ཧཱུྃ། དུང་དང་ཀུ་མུ་ཏ་ཡི་གཟུགས། །རྒྱ་མཚོ་དངས་མ་ཟླ་གཟུགས་འདྲ། །ཏེ་ན་ཧཱུྃ་ཏེ་ན་ཧཱུྃ་ཏེ་ན་ཏེ་ཏེ་ཧཱུྃ། རོལ་པ་གཉིས་མེད་རྣལ་འབྱོར་མཛད། །རྡོ་རྗེ་དྲིལ་བུ་ཕྱག་རྒྱ་འཛིན། །ཏེ་ན་ཧཱུྃ་ཏེ་ན་ཧཱུྃ་ཏེ་ན་ཏེ་ཏེ་ཧཱུྃ། སྒྱུ་འཕྲུལ་ལས་ཀྱི་འགྲོ་བ་བཟུང་། །རྐྱེན་
གྱིས་མ་བྱས་གཟུགས་ཅན་ཡིན། །ཏེ་ན་ཧཱུྃ་ཏེ་ན་ཧཱུྃ་ཏེ་ན་ཏེ་ཏེ་ཧཱུྃ། དེ་ནས་འོག་ནས་འབྱུང་བའི་རིམ། །བདག་ཉིད་ཞུགས་བྱས་ལྷ་ཡིས་ཀྱང་། །ཆུ་ནས་བཀའ་སྩལ་བར་གྱི་དབང་། །བསྐུར་བསམས་འཁོར་ལོ་དེ་ལ་ནི། །སློབ་མ་རྣམས་ནི་གཞུག་པའི་ཕྱིར། །རྡོ་རྗེ་འཆང་བ་ལས་བྱུང་བའི། །
དཀྱིལ་འཁོར་རྟེན་དང་བཅས་པ་ཡི། །དེ་བཞིན་ཉིད་ནི་ལན་གསུམ་བརྗོད། །ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་མ་མེད་པའི་སེམས། །རྡོ་རྗེ་སེམས་དཔའ་ཆེ་རང་བཞིན། །མི་བསྐྱོད་རྡོ་རྗེ་དེང་གྲུབ་ཤོག །མཆོག་ཆེན་དངོས་གྲུབ་ཐམས་ཅད་དང་། །དབང་ཕྱུག་རྡོ་རྗེ་འཛིན་
པའི་ལྷ། །ཐམས་ཅད་རྡོ་རྗེ་འཛིན་པའི་གཟུགས། །དམ་པའི་ཡི་གེ་གྲུབ་པར་ཤོག །སྐྱོན་མེད་རྟག་པ་ལ་སོགས་པ། །འདོད་ཆགས་ཀུན་ལ་རྗེས་སུ་ཆགས། །འདོད་ཆགས་ཆེན་པོ་དགའ་བ་ཆེ། །དེ་ཉིད་བཅོམ་ལྡན་བདག་ལ་གྲུབ། །གཏན་དུ་དག་པ་ཀུན་གྱི་མཆོག །གདོད་མ་
ནས་གྲོལ་དེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སེམས་དཔའ་བདག་གྲུབ་བོ། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོའི་ཕྱག་རྒྱ་ཡིས། །རྡོ་རྗེ་སྙིང་གཙོ་བདག་ལ་ནི། །རྡོ་རྗེ་སྔགས་ཆེན་གྲུབ་པར་ཤོག །སེམས་ཅན་ཀུན་གྱི་ཡིད་ཁྱབ་པ། །

44-1-19b

སེམས་ཅན་ཀུན་གྱི་སྙིང་ལ་གནས། །སེམས་ཅན་ཀུན་གྱི་དེ་བཞིན་ཕ། །དམ་ཚིག་མཆོག་གི་འདོད་པའི་མཆོག །བདེན་པ་གང་གིས་ཡེ་ཤེས་ཀྱི། ཤེས་རབ་ཐབས་དག་དཀྱིལ་འཁོར་ནི། །མགོན་པོ་ཁྱོད་ཀྱི་བདེན་པ་དེས། །བདག་གིས་འདོད་པ་ཡོངས་སུ་སྐོངས། །གཟུགས་བརྙན་
དང་ནི་མཉམ་པའི་ཆོས། །དག་ཅིང་དང་བ་རྙོག་མེད་པ། །གཟུང་མེད་བརྗོད་དུ་མེད་པ་ཡང་། །རྒྱུ་དང་རྐྱེན་ལ་ཀུན་དུ་བྱུང་། །དེ་ཉིད་དེ་ཉིད་བསྐྱེད་པ་ནི། །དེ་དག་བདེན་པས་དཀྱིལ་འཁོར་ལ། །གཟུགས་བརྙན་གསལ་བར་སློབ་པ་ནི། །སྡིག་མེད་པས་ནི་བལྟ་བར་བགྱི། །ཐུན་མོང་སྡོམ་
པ་དང་ལྡན་པ། །བསྙེན་སྒྲུབ་གསུམ་གྱིས་བསྒྲུབས་ནས་སུ། །ཡོལ་བས་བར་དུ་བཅད་པ་ལ། །འཁྱིལ་བཟླས་ཆུ་ཡིས་གཏོར་བར་བྱ། །དམར་པོ་ཤམ་གྱིས་གདོང་གཡོགས་ནས། །དགའ་བ་ཁྱོད་གང་ཡིན་ཞེས་དྲི། །དགའ་བ་སྐལ་ལྡན་བདག་ཡིན་ཞེས། །འཇུག་པ་པོ་ཡིས་སྨྲ་
བར་བྱ། །དེ་ནས་མེ་ཏོག་སྙིམ་བཀང་ནས། །འཁོར་ལོས་བཞེས་ཞེས་གཏོར་ནས་ནི། །གཏོང་སེམས་བསྐྱེད་ནས་བླ་མ་ལ། །ཡོན་ནི་རབ་ཏུ་དབུལ་བར་བྱ། །ཡུལ་མཁར་ཁྱིམ་དང་གླང་པོ་རྟ། །བྲན་དང་བྲན་མོ་ཆུང་མ་དྲུག །བུ་མོ་ཤིན་ཏུ་ཡིད་འོང་དང་། །གང་གིས་རང་གི་ལུས་འདི་ཡང་། །
དེང་ནས་བརྩམས་ཏེ་དབུལ་བར་བྱ ། །ཅི་ཡི་ཕྱིར་ནི་དབུལ་བྱ་ན། །སློབ་དཔོན་དུ་ནི་ཉེར་གནས་ཕྱིར། །སྙིང་རྗེ་ཆེན་པོས་ཉེར་གནས་ཕྱིར། །སེམས་ཅན་ཐམས་ཅད་སྐྱོབ་དོན་དུ། །བདག་གི་ལུས་འདི་དབུལ་བར་བགྱི། །ཧཱུྃ་གིས་སྙིང་ཀར་རྡོ་རྗེ་བསྒོམ། །ཨོཾ་སརྦ་ཡོ་ག་ཙིཏྟ་ཨུཏྤཱ་ད་ཡ་མི། 
སུ་ར་ཏ་སྟྭཾ་སིདྡྷི་བཛྲ་ཡ་ཐཱ་སུ་ཁཾ། བརྗོད་པས་བྱང་ཆུབ་སེམས་བསྐྱེད་ལ། །ལུས་ཀྱི་འཁོར་ལོ་བསྐུལ་བར་བྱ། །དེ་རིང་ཁྱོད་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབ་པར་འགྱུར་རོ། །ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་མཆོག་གི་གསང་ཆེན་འདི། དཀྱིལ་འཁོར་དུ་མ་
ཞུགས་པ་རྣམས་ཀྱི་མདུན་དུ་སྨྲ་བར་མི་བྱའོ། །དད་པར་མི་བྱེད་པ་ཡང་མི་རུང་ངོ་། །ཞེས་བརྗོད་པར་བྱའོ། །གཤིན་རྗེ་གཤེད་ལ་སོགས་པའམ། །ཨ་ཁཾ་བཱི་ར་ཧཱུྃ་བརྗོད་ནས། །དྲངས་ནས་འཇུག་པའི་སྒོར་གནས་ཏེ། །སྔ་མའི་སྡོམ་པ་བརྟན་པར་བྱ། །དེ་རིང་ཁྱོད་དེ་བཞིན་གཤེགས་པ་

44-1-20a

ཐམས་ཅད་ཀྱི་རིགས་ལ་རབ་ཏུ་ཆུད་དོ། །དེ་བས་ངས་ཁྱོད་ལ་རྡོ་རྗེ་ཡེ་ཤེས་བསྐྱེད་པར་བྱའོ། །ཡེ་ཤེས་དེ་ཁྱོད་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས། དེའི་ཐབས་འདི་ཁྱོད་ཀྱིས་དཀྱིལ་འཁོར་མ་མཐོང་
བ་རྣམས་ཀྱི་མདུན་དུ་མ་སྨྲ་ཤིག །ཁྱོད་དམ་ཚིག་ལས་འདའ་བར་མི་རུང་བའི་ཕྱིར་རོ། །སྙིང་གར་རྡོ་རྗེ་བཞག་ནས་ནི། །དེ་རིང་རྡོ་རྗེ་སེམས་དཔའ་ཉིད། །ཁྱོད་ཀྱི་སྙིང་ལ་ཡང་དག་གནས། །གལ་ཏེ་ཚུལ་འདི་འདས་ན་ནི། །སྙིང་འགས་སྡུག་བསྔལ་དེ་ལྟར་འབྱུང་། །བཛྲ་སཏྭ་ཧཱུྃ། པདྨའི་བནྡྷར་
བདུད་རྩི་ལྔ། །ཡི་གེ་གསུམ་གྱིས་འབར་བྱས་ལ། །རྡོ་རྗེ་ཡིས་ནི་དེ་ཡི་ཁར། །མི་ལྡོག་ཕྱིར་ནི་བླུད་པར་བྱ། །འདི་ནི་ཁྱོད་ཀྱི་དམྱལ་བའི་ཆུ། །དམ་ལས་འདའ་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་པའི། །བདུད་རྩི་རྡོ་རྗེ་ཆུ་འཐུང་ཤིག །བཛྲོད་ཀ་ཋ། དེ་ནས་དེ་ཡིས་མི་འགྱུར་བྱས། །སེམས་
གཡོ་དོགས་ཕྱིར་བསྟན་པ་ཡི། །དམ་བཅས་འདི་ནི་བླ་མ་ཡིས། །ལན་གསུམ་དུ་ནི་བསྒྲགས་པར་བྱ། །དེ་རིང་ཕྱིན་ཆད་ཁྱོད་ཀྱིས་ཕྱག་ན་རྡོ་རྗེ་ང་ཡིན་གྱི། ངས་ཅི་སྨྲས་པའི་བྱ་བ་ཐམས་ཅད་ཁྱོད་ཀྱིས་བྱ་དགོས་སོ། །ཁྱོད་ཀྱིས་བདག་ལ་བརྙས་པར་མི་རུང་སྟེ། བརྙས་ན་ཡ་ང་བ་མ་སྤངས་པས་ཤི་
བའི་དུས་བྱས་ནས་དམྱལ་བར་ལྟུང་བས་མ་འགྲོ་ཤིག །དེ་ནས་སློབ་མ་དེ་ཡིས་ཀྱང་། །བརྟན་ནས་རང་ཉིད་དག་བྱའི་ཕྱིར། །གསོལ་བ་གདབ་པ་འདི་ཡི་མཆོག །སྨྲོས་ཤིག་ཅེས་ནི་བླ་མས་སྨྲས། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ་རྡོ་རྗེ་སེམས་དཔའ་བདག་
ཅག་ལ་དབབ་དུ་གསོལ་ལོ། །དེ་ཡི་སྙིང་ག་རུ་ནི་ཧཱུྃ། །ལཾ་བྱུང་དབང་ཆེན་དབུས་སུ་བསམ། །མགྲིན་པར་ཨ་ནི་པྃ་བྱུང་བའི། །ཆུ་ཡི་དཀྱིལ་འཁོར་དབུས་སུ་བསམ། །སྤྱི་བོར་ཧྃ་ནི་དཀར་པོ་ཆེ། །ཡཾ་བྱུང་རླུང་དབུས་བསམས་ནས་ནི། །སྐུལ་བྱེད་ཛྷཻཾ་ནི་རྐང་མཐིལ་གཉིས། །རླུང་གིས་
བསྐྱོད་པས་འབར་བྱས་དབབ། །ཨོཾ་ཨཱ་བེ་ཤ་ཡ་སྟཾ་བྷ་ཡ་ར་ར་ར་ར་ཙ་ལ་ཡ་ཙ་ལ་ཡ། ཧཱུྃ་ཨ་ཧ་ཛྷཻཾ། རྡོ་རྗེ་དྲིལ་བུ་སྒྲ་དང་བཅས། །འཇིགས་རུང་གར་གྱིས་སྨིན་རིང་བསྐྱོད། །མིག་བགྲད་སོ་གཙིགས་བཞད་བྱེད་པས། །སློབ་མ་དབབ་པ་རབ་ཏུ་བྱ། །ལྕེ་ལ་ཐིག་ལེའི་ཡི་གེ་ཨཱཿ། །བསམས་ནས་

44-1-20b

བཟླས་ཤིང་དགེ་མི་དགེ། བྲུ་ཧི་བཛྲ་ཞེས་བརྗོད་ནས། །དབབ་པ་བརྟན་པར་བྱ་བའོ། །པྲ་ཏི་བཛྲ་ཧོ་བརྗོད་ལ། །མེ་ཏོག་དཀྱིལ་འཁོར་དོར་དུ་གཞུག །དེ་ཡིས་བཅིངས་པར་རབ་བསམས་ལ། །བླངས་ནས་མགོ་རུ་བཅིང་བར་བྱ། །འདི་ནི་སྟོབས་ཆེན་སེམས་དཔའ་བས། །འདི་ཡི་མ་
འདྲེས་སོ་སོར་ཟུང་། །ཕྱག་མཚན་ཉེའམ་མི་ཉེ་བ། །རེའུ་ཆའི་གནས་ལས་ཤེས་པར་བྱའོ། །ཡང་ན་རང་གི་སྐལ་བ་ཡིས། །གདོང་ཕྱེ་མེ་ཏོག་དེ་ལ་གཏོར། །མིག་གཉིས་ཨོཾ་འབར་བསམས་ནས་ནི། །གདོང་ཕྱེ་ལས་ཀྱི་ཁ་དོག་བསྟན། །དེ་རིང་རྡོ་རྗེ་སེམས་དཔའ་ཉིད། །ནན་ཏན་བྱས་
ཏེ་ཁྱོད་མིག་ཕྱེ། །བླ་ན་མེད་པའི་རྡོ་རྗེས་མིག །ཐམས་ཅད་ལ་ནི་མིག་ཕྱེ་འགྱུར། །དཀྱིལ་འཁོར་གཙོ་བོ་ནས་བརྩམས་ནས། །བདུད་རྩི་འཁྱིལ་པར་བསྟན་པའམ། །ཡང་ན་བདུད་རྩི་འཁྱིལ་པ་ལས། །གཙོ་བོའི་བར་དུ་བསྟན་བྱའོ། །སློབ་མས་ཐལ་མོ་སྦྱར་བྱས་ལ། །རྡོ་རྗེ་དཀྱིལ་
འཁོར་ཆེན་པོ་ཡི། །དཀྱིལ་འཁོར་ཉིད་དུ་བདག་ཞུགས་སོ། །སྦྱོར་བའི་དཀྱིལ་འཁོར་ཆེན་པོ་ཡི། །དཀྱིལ་འཁོར་དེ་རིང་བདག་གིས་མཐོང་། །གསང་བའི་དཀྱིལ་འཁོར་ཆེན་པོ་ཡི། །དཀྱིལ་འཁོར་དུ་ནི་བདག་དབང་བསྐུར། །དེ་སྐད་ལན་གསུམ་བརྗོད་པར་བྱ། །བུམ་པ་རྣམས་ཆུ་
གཅིག་ཏུ་བྱས། །མི་བསྐྱོད་རྡོ་རྗེ་རབ་བསྐྱེད་ལ། །ཞུགས་ནས་སློབ་མའི་མགོ་བོ་རུ། །འཁོར་ལོས་སྒྱུར་བཞིན་དབང་བསྐུར་བྱ། །རིན་ཆེན་ལ་སོགས་དབུ་རྒྱན་ལ། །རིན་ཆེན་འབྱུང་ལྡན་གྱུར་བྱས་ཏེ། །དབུས་སུ་རང་གི་ལྷ་བཞག་པས། །ཅོད་པན་དང་ལྡན་དབང་བསྐུར་བྱ། །རྡོ་རྗེ་རྩེ་མོ་དགུ་
ལྔ་པ། །འོད་དཔག་མེད་བསྒོམས་ཡོངས་གྱུར་ཏེ། །བྱིན་ནས་སྙིང་གར་དེ་བཟུང་བ། །རྡོ་རྗེའི་དབང་ནི་བསྐུར་བར་བྱ། །དྲིལ་བུ་དོན་ཡོད་གྲུབ་པ་རུ། །བསྒོམས་ནས་ཡོངས་གྱུར་བྱིན་ནས་ནི། །རྡོ་རྗེ་དྲིལ་བུ་ལ་འཁྱུད་ཚུལ། །བདག་པོར་དབང་ནི་བསྐུར་བར་བྱ། །སྤྱི་གཙུག་ལྟག་པ་ལ་
བཅུག་སྟེ། །སྤྱི་བོར་ཕྱག་རེག་མིང་གི་དབང་། །ཆེ་གེ་རྡོ་རྗེ་ཞེས་བོས་ནས། །ཁྱད་པར་གཞན་ཡང་མཐོང་བར་བྱ། །གང་གང་སྣང་བ་ཀུན་བདག་སྟེ། །དེ་ཡི་གཙོ་བོ་མི་བསྐྱོད་མགོན། །ཆོས་རྣམས་རང་བཞིན་གྱིས་དག་པས། །ཆོས་ཀྱི་དབྱིངས་ཀྱི་ཡི་གེ་ཚུལ། །ཀུན་གྱི་གཙོ་བོ་ཡིན་པའི་

44-1-21a

ཕྱིར། །མིང་གོང་དཔལ་གྱི་སྒྲ་གཞུག་བྱ། །གོ་བ་ཉིད་དུ་བསྒྲགས་པའི་ཕྱིར། །དང་པོ་ཀྱེ་སྦྱོར་མཐའ་ཡི་བར། །ཧཱུྃ་བསྐྱེད་རྡོ་རྗེ་ལག་བྱིན་ནས། །འཆང་བས་རྡོ་རྗེ་ལན་གསུམ་གསོར། །བརྟུལ་ཞུགས་འདི་ནི་དང་པོ་རུ། །རྣལ་འབྱོར་པ་ཡིས་བླང་བར་བྱ། །
འདི་ནི་སངས་རྒྱས་ཐམས་ཅད་དང་། །རྡོ་རྗེ་སེམས་དཔའི་ཕྱག་ན་གནས། །རྟག་པར་ཁྱོད་ཀྱིས་ཀྱང་བཟུང་སྟེ། །ལག་ན་རྡོ་རྗེ་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་ཏྭཾ་དྷ་ར་ཡ་མི། ཧི་ཧི་ཧི་ཧི་ཧཱུྃ། དེ་ཡི་དེ་ཉིད་བཤད་པར་བྱ། །སྔོན་མཐའ་མེད་པའི་
སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་གྱི་བདག །རྡོ་རྗེ་སྙིང་པོའི་གཙོ་བོའི་གཙོ། །ཨ་ལས་བྱུང་བའི་དྲིལ་བུ་ནི། །ལག་གཡོན་བྱིན་ནས་ཕྱོགས་བརྒྱད་དཀྲོལ། །བརྟུལ་ཞུགས་འདི་ཡང་དང་པོ་རུ། །དེ་ཡི་གྲོགས་སུ་སྦྱིན་པའོ། །འདི་ནི་
སངས་རྒྱས་ཐམས་ཅད་ཀྱི། །ཤེས་རབ་དབྱངས་ཆེན་འཁྲོལ་བར་འདོད། །རྟག་པར་ཁྱོད་ཀྱིས་ཀྱང་བཟུང་སྟེ། །རྒྱལ་བ་བྱང་ཆུབ་མཆོག་ཏུ་འདོད། །དེ་ཉིད་བཤད་པར་བྱ་བ་ནི། །འདི་ནི་ཁྱོད་ཀྱིས་དཀྲོལ་བྱ་སྟེ། །སྲིད་པ་རང་བཞིན་གྱིས་དག་ཕྱིར། །རང་བཞིན་གྱིས་ནི་འབྱུང་བར་བྱེད། །
རང་བཞིན་དག་པས་སེམས་ཅན་ཀུན། །དམ་པའི་སྲིད་པ་བྱེད་པ་པོ། །སློབ་མ་རྡོ་རྗེ་དབྱིངས་ཕྱུག་དང་། །ལྡན་པར་བསམས་ནས་བཅོམ་ལྡན་འདས། །མངོན་བྱེད་འདས་པ་མཆོག་འདི་ཡིས། །ཕྱག་རྒྱའི་དམ་ཚིག་སྦྱིན་པའོ། །ཕྱག་རྒྱ་ཆེན་པོའི་བྱིན་བརླབས་ཏེ། །སྙིང་པོ་བསྙེན་པ་ལ་སོགས་
གྲགས། །དམ་ཚིག་འདོད་གཟུགས་སོགས་རྣམས་ཀྱིས། །སྔགས་ནི་དབུགས་སུ་རྟོགས་ནས་བཟླ། །རང་གི་རང་བཞིན་དེ་རྣམས་ཀྱིས། །ཕྱོགས་བཅུ་དུས་གསུམ་ཁྱབ་པ་ཡི། །མ་ལུས་གཙོ་བོ་མཆོད་བྱས་ནས། །བདག་དང་གཞན་ཡང་མཉེས་པར་བྱ། །དཀའ་ཐུབ་དམ་བཅས་དེ་དག་
གིས། །བསྟན་པར་བྱས་ཀྱང་འགྲུབ་པ་མེད། །མི་སྣང་མངོན་ཤེས་མཁའ་འགྲོ་མེད། །སྐུ་གསུང་ཐུགས་ལས་གྲུབ་སྐྱེས་སོ། །དེ་བས་སངས་རྒྱས་སེམས་ཅན་རྣམས། །སྔགས་ཀྱི་སྤྱོད་པ་མཆོག་བཟུང་སྟེ། །འདོད་པ་ཀུན་ལ་ལོངས་སྤྱོད་པས། །ཆོས་ཀྱི་ཡི་གེ་མཆོག་ཐོབ་འགྱུར། །

44-1-21b

བདེ་སྡུག་གཉིས་མེད་བདག་ཉིད་ཀྱིས། །འདོད་པའི་ཡོན་ཏན་ལྔ་བསྟེན་ཏེ། །ཆགས་ཆེན་ཡེ་ཤེས་དོན་སྦྱོར་ན། །དེ་ཁོ་ན་ཉིད་ཀུན་ཀྱང་འགྲུབ། །སྐུ་གསུང་ཐུགས་གྲུབ་ཡང་དག་སྟེ། །གང་གཞན་དམན་པ་ཡང་སྐྱེ་འདོད། །དེ་ཡང་སྐུ་གསུང་ཐུགས་བསྒོམས་ནས། །སྔགས་བཟླས་
པ་ཡིས་འགྲུབ་པའོ། །ཐུན་མོང་མ་ཡིན་སྡོམ་པར་ལྡན། །སྦྱོར་བ་མ་ཉམས་ཡོན་ཕུལ་ནས། །རྡོ་རྗེ་སློབ་དཔོན་དབང་ནོད་ཕྱིར། །དེ་ཡིས་ལན་གསུམ་གསོལ་བ་གདབ། །བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་བགྱིས་པ་བཞིན། །བདག་ཀྱང་རབ་ཏུ་བསྒྲལ་བའི་ཕྱིར། །
ནམ་མཁའ་རྡོ་རྗེ་བདག་ལ་སྩོལ། །འཇུག་པའི་སྒོ་རུ་ཁྲུ་དོ་བར། པདྨ་དཀར་པོ་འདབ་བརྒྱད་ལ། །ས་བོན་གྱིས་མཚན་དབང་སྟེགས་བྲི། །སེང་གེ་མཚན་པར་འདུག་ཏུ་གཞུག །དེ་ཉིད་ཏིང་འཛིན་གསུམ་ལྡན་པར། །བྱས་ནས་བླ་མའི་ལུས་དཀྱིལ་འཁོར། །སངས་རྒྱས་སོགས་སྤྲོ་
རྣམ་དགུག་ཅིང་། །ནམ་མཁའི་ཁམས་ཀུན་དགའ་བར་བྱ། །དེ་ཡིས་རྔ་དྲིལ་སིལ་སྙན་དང་། །རྒྱལ་མཚན་འཕན་སོགས་ཕེག་རྡོབ་ཅིང་། །བུམ་པ་གཙོ་སོགས་གཟུང་བྱས་ནས། །སྔོན་བཞིན་ཆུ་སོགས་དབང་བསྐུར་བསམ། །དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་ཀུན་གྱིས་
ཕྱག་བྱས་པ། །གསང་གསུམ་གནས་ལས་བྱུང་བ་ཡི། །སངས་རྒྱས་ཀུན་གྱིས་སྦྱིན་པ་ཡིན། །དེ་སྐད་ལན་གསུམ་བརྗོད་ནས་སུ། །དགེ་བའི་ཕྱིར་དང་ཤེས་པའི་ཕྱིར། །བུམ་པ་སྤྱི་བོར་རབ་བཟུང་སྟེ། །བཀྲ་ཤིས་དབྱངས་འདི་བརྗོད་པར་བྱ། །དཔལ་ལྡན་གསེར་གྱི་རི་བོ་ལྟར་འབར་བ། །
འཇིག་རྟེན་གསུམ་མགོན་དྲི་མ་གསུམ་དང་བྲལ། །བཅོམ་ལྡན་པད་རྒྱས་ལྟ་བུའི་སྤྱན་མངའ་བ། །བཀྲ་ཤིས་དེས་ནི་དེང་ཁྱོད་ཞི་བྱེད་ཤོག །དེ་ཡིས་བསྟན་པའི་དྲི་མེད་མཆོག་རབ་ནི། །འཇིག་རྟེན་གསུམ་གྲགས་ལྷ་དང་མིས་མཆོད་པ། །ཆོ་ག་སྐྱེ་དགུ་རྣམས་ནི་ཞི་བར་བྱེད། །བཀྲ་ཤིས་གཉིས་
པ་དེང་འདིར་ཁྱེད་ལ་ཤོག །དམ་པའི་ཆོས་ལྡན་ཐོས་གང་བཀྲ་ཤིས་ཤིང་། །དགེ་འདུན་ལྷ་དང་ལྷ་མིའི་མཆོད་འོས་པ། །ངོ་མཚར་དཔལ་རབ་མཆོག་རབ་ཚོགས་རྣམས་ཀྱི། །བཀྲ་ཤིས་གསུམ་པ་དེང་འདིར་ཁྱེད་ལ་ཤོག །དེ་ནས་དེ་དག་ཐམས་ཅད་ཀུན། །ཡེ་ཤེས་ངོ་བོར་ཞུགས་བསམས་

44-1-22a

པས། །དབུ་རྒྱན་ཡེ་ཤེས་སེམས་དཔའ་བསྐྱེད། །བསྐོར་བྱས་སློབ་དཔོན་གནས་པར་བྱ། །སྔོན་བཞིན་མཆོད་དང་བསྟོད་པ་དང་། །བདུད་རྩི་མྱང་བ་ཡང་བྱས་ནས། །དཀྱིལ་འཁོར་དེ་བཞིན་ཉིད་བསྟན་བྱ། །སངས་རྒྱས་མ་རྒྱས་མཉམ་པའི་ཕྱིར། །གྲུ་བཞི་
རུ་ནི་རབ་ཏུ་བསྟན། །དྲན་པ་ཉེར་བཞག་ཤར་གྱི་སྒོ། །ཡང་དག་སྤོང་བ་ལྷོ་ཡི་སྒོ། །རྫུ་འཕྲུལ་རྐང་པ་ནུབ་ཀྱི་སྒོ། །དབང་པོ་སྟོབས་ནི་བྱང་གི་སྒོ། །བསམ་གཏན་བཞི་ནི་ཏྭ་ར་ཎ། །ཏིང་འཛིན་རྣམས་ནི་ཁ་ཁྱེར་བརྒྱད། །གཟུངས་རྣམས་དེར་གནས་ལྷ་མོའོ། །བསམ་པ་བསྐང་ཕྱིར་
ལྷ་ཚོགས་རྒྱན། །གསུང་རབ་ཡན་ལག་འཕགས་སོགས་སོ། །བྱང་ཆུབ་ཡན་ལག་དྲ་བ་སོགས། །རྣམ་པར་ཐར་བརྒྱད་ཀ་བ་བརྒྱད། །སྔགས་ཚུལ་རྡོ་རྗེ་ཕྲེང་བ་ཟླུམ། །ཕྱི་ལོགས་རྣམ་དག་ཡོན་ཏན་ལྔ། །དྲི་མེད་སྟོབས་སོགས་མཆོད་པ་ལྔ། །བུམ་པ་ཆུས་གང་ཐུགས་རྗེ་དང་། །
ཚོགས་རྫོགས་སེར་པོ་ཡེ་ཤེས་གཏེར། །འགྲོ་བ་རྣམས་དང་དབྱེར་མེད་ཀྱང་། །དེ་ཡི་ཉེས་པས་མི་གོས་ཕྱིར། །སྣ་ཚོགས་པདྨ་བཅུ་དགུ་ནི། །སྡོང་བུ་དང་ནི་བཅས་པའོ། །མི་དགེ་འདམ་རྫབ་སྐམ་མཛད་ཕྱིར། །དགེ་བའི་མྱུ་གུ་གསོ་མཛད་པ། །ཉི་མའི་གདན་ནི་བདུན་རྣམས་སོ། །ཉོན་
མོངས་ཚ་བ་བསིལ་བྱེད་དང་། །མ་རིག་མུན་ནག་སེལ་བའི་ཕྱིར། །ཟླ་བ་བཅུ་གཉིས་དང་ལྡན་པའོ། །ཚོར་བ་གསོབ་ལ་སོགས་པ་དང་། །འཇུ་བ་ལ་སོགས་དུས་བཅུ་གཉིས། །ཟད་དུས་སྒྲོན་བདུན་རྣམ་དག་པས། །གྲངས་ནི་ངེས་པར་བསྟན་པའོ། །ཉོན་མོངས་ཐམས་ཅད་ལས་གྲོལ་
ཕྱིར། །གཞལ་ཡས་ཁང་དུ་བཏགས་པ་ཡིན། །སྙིང་པོ་ལ་ནི་འདུས་པའི་ཕྱིར། །དཀྱིལ་འཁོར་ཞེས་སུ་བཤད་པ་ཡིན། །རྣམ་པར་ཤེས་པ་ཞེ་སྡང་ཐུགས། །ཆོས་དབྱིངས་རྣམ་དག་མི་བསྐྱོད་པ། །གཟུགས་ཕུང་གཏི་མུག་ཆེ་དང་སྐུ། །མེ་ལོང་རྣམ་དག་རྣམ་སྣང་མཛད། །ཚོར་བའི་
ཕུང་པོ་མཉམ་པ་ཉིད། །ང་རྒྱལ་རྣམ་དག་རིན་ཆེན་འབྱུང་། །འདུ་ཤེས་ཕུང་པོ་འདོད་ཆགས་གསུམ། །སོ་སོར་རྟོག་པ་སྣང་མཐའ་ཡས། །འདུ་བྱེད་ཕུང་པོ་ནན་ཏན་དང་། །ཕྲག་དོག་རྣམ་དག་དོན་ཡོད་གྲུབ། །ས་དང་སྟོང་ཉིད་ཐབས་དང་ནི། །སྙིང་རྗེ་ཞི་བྱེད་སྤྱན་མའོ། །བྱམས་དང་མཚན་མེད་

44-1-22b

སྨོན་ལམ་དང་། །ཆུ་ཁམས་སྲུང་བྱེད་མཱ་མ་ཀཱི། །དགའ་དང་སྨོན་མེད་སྟོབས་དང་ནི། །མེ་ཁམས་རྒྱས་བྱེད་ན་བཟའ་དཀར། །བཏང་སྙོམས་ཡེ་ཤེས་རང་བཞིན་གསལ། །རླུང་ཁམས་སྒྲོལ་བྱེད་སྒྲོལ་མའོ། །སྦྱིན་པ་རྣམ་དག་གཟུགས་རྡོ་རྗེ། །ཚུལ་ཁྲིམས་རྣམ་དག་སྒྲ་རྡོ་རྗེ། །བཟོད་
པ་རྣམ་དག་དྲི་རྡོ་རྗེ། །བརྩོན་འགྲུས་རྣམ་དག་རོ་རྡོ་རྗེ། །བསམ་གཏན་རྣམ་དག་རེག་རྡོ་རྗེ། །ཤེས་རབ་རྣམ་དག་ཆོས་རྡོ་རྗེ། །ཕྱི་ཡི་ལོངས་སྤྱོད་ཀྱིས་མཆོད་ཕྱིར། །དབྱུང་སྔགས་ཏིང་འཛིན་གསུངས་པའོ། །མི་ལ་སོགས་པ་རྣམ་དག་ཕྱིར། །དེ་ཉིད་དུ་ནི་བཀོད་པར་གསུངས། །དབྱུང་
སྔགས་ཏིང་འཛིན་མ་གསུངས་པས། །ས་སྙིང་ལ་སོགས་ཕྱིར་མི་དགོད། །འཇིགས་སོགས་ཤེས་བྱ་ཕུང་པོའི་བདུད། །དད་དག་གཤིན་རྗེ་གཤེད་འགུགས་པ། །ཉོན་མོངས་དེ་བདུད་མཐར་འཛིན་ལྷ། །བརྩོན་དག་འཇུག་བྱེད་ཤེས་མཐར་བྱེད། །སྐྱེ་སྒྲིབ་འཆི་བདག་ལོག་པར་ལྟ། །
དྲན་དག་འཆིང་བྱེད་རྟ་མགྲིན་ནོ། །ལས་དང་ལྷ་བདུད་མཆོག་འཛིན་ལྷ། །ཏིང་འཛིན་མགུ་མཛད་བདུད་རྩི་འཁྱིལ། །ཆོས་དང་ལོངས་སྤྱོད་སྤྲུལ་པ་དང་། །ངོ་བོ་ཉིད་དེ་རྣམ་བཞི་ནི། །ཐུགས་སོགས་རྡོ་རྗེ་ཡེ་ཤེས་སེམས། །ཕྱག་རྒྱ་བཞི་ཞེས་བཤད་པ་ཡིན། །རྣམ་པར་རྟོག་པ་དང་བྲལ་
ཕྱིར། །གཏིང་དཔག་དཀའ་བས་ཟབ་མོ་སྟེ། །ཕྱག་རྒྱ་ཆེན་པོར་རབ་སྣང་བ། །རང་གཞན་སྨིན་བྱེད་གསལ་བ་པོ། །ཟབ་མོ་དང་ནི་ཡང་དག་གསལ། །ཤེས་རབ་ཐབས་ཀྱི་བདག་ཉིད་དེ། །མཐའ་གཉིས་སྐྱོན་ནི་རབ་བཀག་པས། །དུས་ཐམས་ཅད་དུ་དབྱེར་མེད་དོ། །དེ་བཞིན་སློབ་
མ་དབང་བསྐུར་དང་། །དངོས་གྲུབ་སྒྲུབ་པའི་དཀྱིལ་འཁོར་གྱི། །སྒྲུབ་པའི་ཐབས་ནི་རབ་བསྟན་པས། །གང་ཟག་གཉིས་སུ་ཤེས་པར་བྱེད། །གཟུགས་བརྙན་གླེགས་བམ་ལ་སོགས་པ། །ཡོད་ན་ཁྱོད་ཀྱིས་རབ་གནས་མཛོད། །དེ་ནི་ཇི་སྲིད་བར་དུ་ནི། །སེམས་ཅན་དོན་དུ་འགྱུར་
བའོ། །དེ་ལྟར་ལུང་བསྟན་དབུགས་དབྱུང་དང་། །བཀའ་སྩལ་པ་ཡིས་དབང་བསྐུར་ནས། །བསྐྱེད་པའི་རིམ་པ་ཀུན་བསྟན་ཏེ། །བཀའ་ལུང་གཡར་གྱི་བླང་བའོ། །བུམ་པའི་དབང་གི་ཆོ་གའོ། །ལོ་འམ་ཡང་ན་ཟླ་བ་རུ། །རིག་དང་སློབ་དཔོན་དབང་ཐོབ་པས། །ལུས་དང་

44-1-23a

ཟང་ཟིང་ཐབས་དང་བཅས། །སྤྱོད་པ་མཆོག་གིས་བླ་མ་བཀུར། །རིན་ཆེན་སྣ་བདུན་ལ་སོགས་པ། །རྗེས་སུ་མཐུན་པ་དབུལ་བྱ་སྟེ། །བླ་མ་དགྱེས་པར་བྱེད་པའི་ཆེད། །བུ་མོ་གཞོན་ནུ་གཟུགས་བཟང་བ། །རྒྱན་ལྡན་དམ་སྡོམ་དབང་བཅས་པ། །ལུས་རྒྱས་
མཛེས་པ་དབུལ་བྱས་ནས། །བླ་མའི་གཡོན་དུ་བུ་མོ་བཞག །རྒྱལ་པོ་མུ་སྟེགས་ཆོས་རྐུན་གྱིས། །གནོད་མེད་དབེན་པའི་ས་ཕྱོགས་སུ། །མཆོག་གི་དྲིས་བྱུགས་པད་སོགས་གདན། །བླ་རེ་རྒྱལ་མཚན་སོགས་ཀྱིས་བཀླུབས། །རོལ་མོ་སིལ་སྙན་སྣ་ཚོགས་སྒྲས། །གོང་གི་
འཁོར་རམ་ཡང་ན་སྐུ། །ཚོགས་ཀྱི་མཆོད་པ་ཆེན་པོ་ཡིས། །དབྱེར་མེད་འཁོར་ལོ་མཆོད་བྱས་ནས། །མེ་ཏོག་སྙིམ་བཀང་གསོལ་བ་གདབ། །ཀུན་མཁྱེན་ཡེ་ཤེས་ཕུང་པོ་སོགས། །པུས་བཙུགས་ཐལ་སྦྱར་མགྲིན་དམའ་བས། །གསང་བ་མཆོག་གི་སྡོམ་པ་ཆེ། །ཡང་དག་
བླངས་ནས་བསྲུང་བར་བྱ། །ཇི་ལྟར་དབང་བསྐུར་སོགས་ཚུལ་གྱིས། །སངས་རྒྱས་ལ་སོགས་ཐོབ་པ་བཞིན། །བྱང་ཆུབ་སྤྱོད་པ་གཞན་གྱིས་ནི། །འདུལ་བའི་དགེ་བ་དེ་བཞིན་མེད། །དེ་བས་དམ་ཚིག་བུས་སྲུངས་ཤིག །རྟག་ཏུ་སྡོམ་པ་ཡང་སྐྱོངས་ཤིག །ཤ་ལྔ་བདུད་རྩི་ལྔ་
བཟའ་སྟེ། །དེ་ལས་གཞན་ཡང་དམ་ཚིག་སྲུངས། །དཀོན་མཆོག་བླ་མ་བརྙས་བྱེད་གཞོམ། །གཞན་གྱི་བུད་མེད་སྤྱད་པ་དང་། །མ་བྱིན་པར་ཡང་བླངས་བྱས་ནས། །བརྫུན་གྱི་ཚིག་ཀྱང་སྨྲ་བར་བྱ། །རྣལ་འབྱོར་རྒྱུད་ལས་གསུངས་པ་བཞིན། །དེ་ནི་ཆོ་ག་བཞིན་དུ་སྲུངས། །དེ་ལྟར་བྱའོ་
ཞེས་གསོལ་ནས། །ཡང་ན་མེ་ཏོག་ཕྲེང་བ་གཏོར། །ཐལ་མོ་སྦྱར་ནས་གསང་བ་ཡི། །དབང་ནོད་ཕྱིར་ནི་གསོལ་བ་གདབ། །རྡོ་རྗེ་སེམས་ཁྱོད་ལ་སོགས་པ། །ཚིགས་བཅད་ལྔ་ཡིས་ལན་གསུམ་དུ། །ཞུགས་ནས་སློབ་མ་དམ་པ་ནི། །མཛེས་པའི་ཆས་ལྡན་གྱིས་བྱའོ། །དེ་ནས་བླ་
མ་ཡོན་ཏན་མཚོ། །མཆོག་གི་མཆོག་གིས་དེ་གསན་ནས། །ཞལ་ནི་མདངས་དང་ལྡན་བྱས་ནས། །སྙིང་རྗེ་དེ་ལ་བསྐྱེད་པར་བྱ། །གཟུགས་སོགས་ཕུན་སུམ་ཚོགས་ལྡན་པའི། །ལྷ་མོ་དེ་ནི་བྱིན་བརླབས་ནས། །ཐུབ་པའི་དབང་པོ་ཞུགས་བྱས་ནས། །རྡོ་རྗེ་ནང་དུ་གནས་པར་བྱ། །མཐེ་

44-1-23b

བོ་སྲིན་ལག་གིས་བཀབ་ནས། །སློབ་མ་དཔལ་ལྡན་སྣང་མཛད་ཁར། །སྤྲོ་བའི་སྔགས་ཀྱིས་ཕབ་ནས་སུ། །གཉི་གས་འདི་ནི་བརྗོད་པར་བྱ། །ཨ་ཧོ་ཨ་ཧོ་སུ་ཁ་ཧོ། །གཞན་ཡང་བློ་ཡི་བྱེ་བྲག་གིས། །དབང་བསྐུར་བྱས་ནས་མགྲིན་པ་རུ། །དེ་ཉིད་མྱོང་བར་བྱས་ནས་སུ། །དེ་
ནས་འདི་ཡིས་བསྔགས་པའོ། །དེ་འདི་རྡོ་རྗེ་ཐམས་ཅད་ཀྱི། དབང་བསྐུར་མཆོག་ཏུ་བསྔགས་པ་སྟེ། །ཐམས་ཅད་སྔགས་ནི་འགྲུབ་འགྱུར་ཏེ། །ལས་མཆོག་ཁྱད་པར་ཅན་ཡང་འགྲུབ། །ཟླ་བ་ཟ་བ་རབ་བྱུང་བ། །ལུང་བསྟན་དབུགས་དབྱུང་བཀའ་སྩལ་པ། །འོག་ནས་འབྱུང་
བཞིན་སྦྱིན་པར་བྱ། །རྡོ་རྗེ་བཟླས་པས་ཕྱི་ནང་ཚོགས། །སྒྱུ་མ་སྨིག་རྒྱུ་ལ་སོགས་པའི། །འདོད་དོན་ཕྱག་མཚན་མདོག་དང་དབྱིབས། །བསམ་མི་ཁྱབ་པའི་རྣམ་སྨིན་སྐུ། །བསྒོམ་པ་ལ་གནས་དེ་བསྒོམ་གཞུག །གསང་བའི་དབང་གི་ཆོ་གའོ། །དེ་བཞིན་གོང་མའི་རིམ་པ་ཡིས། །
མཚན་དང་ལྡན་པའི་རིག་པ་ཆེ། །བཙལ་ཏེ་བླ་མ་དག་ལ་ཡོན། །རྗེས་མཐུན་དང་བཅས་དབུལ་བར་བྱ། །སྔོན་བཞིན་གསོལ་བཏབ་སྡོམ་པ་བླངས། །སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་རང་རྒྱལ་དེ་བཞིན་ཏེ། །སྐུ་གསུང་ཐུགས་སུ་སྦྱོར་བ་ན། །ཕྱག་འཚལ་ན་ནི་མ་རུང་
འགྱུར། །ཀུན་དུ་རྡོ་རྗེ་སེམས་དཔའ་ཡི། །ལུས་ངག་ཡིད་ཀྱི་དཀྱིལ་འཁོར་ལ། །བསམ་གཏན་རྡོ་རྗེ་གསུམ་སྦྱོར་བས། །སྔགས་ཟློས་པས་ནི་བསམ་གཏན་བྱ། །མདོར་ན་སེམས་ཅན་ཐམས་ཅད་ནི། །བསམ་གཏན་རྡོ་རྗེ་བསྐུལ་བར་བྱ། །དེ་འདི་རྡོ་རྗེ་ཐམས་ཅད་ཀྱི། དམ་ཆོས་རབ་ཏུ་
བསྟན་པའོ། །དཀྱིལ་འཁོར་དག་ཀྱང་ཡང་མི་བྲི། །གླེགས་བམ་བཀླག་པར་མི་བྱ་ཞིང་། །མཆོད་རྟེན་དག་གི་ལས་མི་བྱ། །རྡོ་རྗེ་གསུམ་མཆོག་ཕྱག་མི་བྱ། །གལ་ཏེ་བྱང་ཆུབ་མཆོག་འདོད་ན། །ལག་པའི་ཕྱག་རྒྱ་མི་བཅིང་ངོ་། །དེ་ལྟར་བྱ་ཞེས་གསོལ་བར་བྱ། །ཡང་ནི་མེ་ཏོག་གཏོར་
བྱས་ནས། །མཆོད་སྦྱིན་རྡོ་རྗེ་ལ་སོགས་པའི། །ཚིགས་བཅད་ལན་གསུམ་གསོལ་བཏབ་ནས། །ཤེས་རབ་ཡེ་ཤེས་ཡང་དག་བླང་། །དེ་ནས་ལྷ་མོ་བདག་ཉིད་དང་། །དམ་ཚིག་སྡོམ་པའི་མཆོག་སྨྲས་ནས། །བདེ་ཆེན་ཟ་མ་ཏོག་གི་ནི། །ལྷ་མོའི་བསྔགས་པ་རབ་ཏུ་བརྗོད། །དེ་དག་

44-1-24a

མདུན་དུ་གནས་པའི་ལག །གཡས་གཡོན་འོག་དང་སྟེང་བཞག་ནས། །བྱིན་གྱིས་བརླབས་པའི་ལྷ་མོ་འདི། །སྔགས་འདི་ཡིས་ནི་སྦྱིན་པར་བྱ། །ཡིད་འོང་གཟུགས་མ་འདི་ཉིད་ནི། །སངས་རྒྱས་ཀུན་གྱི་སྤྱོད་དུ་གནང་། །དཀྱིལ་འཁོར་འཁོར་ལོ་རིམ་པ་ཡིས། །
དམ་པའི་བདེ་བ་ཁྱོད་ཀྱིས་མྱོང་། །དེ་ནས་རབ་མཉམ་བཞག་པ་ཡིས། །དལ་བའི་བྱ་བ་རྣམ་གསུམ་གྱིས། །རྡོ་རྗེ་སྐྱིལ་ཀྲུང་ནང་དུ་སེམས། །རིན་ཆེན་དཀྱིལ་དུ་རྟོགས་པ་བྱ། །རང་གི་ལྷ་ཡི་འཁོར་ལོར་ལྡན། །དབྱིངས་ཀྱི་དབང་ཕྱུག་དང་འབྲེལ་པ། །ཡོལ་བས་བཅད་དེ་བདེ་མྱོང་ལ། །
སྔོན་བཞིན་དབང་བསྐུར་བྱས་ནས་ཐིམ། །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་བཛྲ་སྭ་བྷཱ་བ་ཨཱཏྨ་ཀོ྅ ཧཾ། གཏི་མུག་རང་བཞིན་གཏི་མུག་སྦྱོར། །གཏི་མུག་དགའ་དང་ཡང་དག་ལྡན། །གཏི་མུག་རྒྱུན་གྱིས་དབང་བསྐུར་ན། །གཏི་མུག་རྡོ་རྗེའི་བདག་ཉིད་འགྱུར། །ཞེ་སྡང་རང་བཞིན་ཞེ་སྡང་སྦྱོར། །
ཞེ་སྡང་དགའ་མ་དང་ལྡན་པར། །ཞེ་སྡང་རྒྱུན་གྱིས་དབང་བསྐུར་ན། །ཞེ་སྡང་རྡོ་རྗེའི་བདག་ཉིད་འགྱུར། །འདོད་ཆགས་རང་བཞིན་འདོད་ཆགས་སྦྱོར། །འདོད་ཆགས་དགའ་དང་ཡང་དག་ལྡན། །འདོད་ཆགས་རྒྱུན་གྱིས་དབང་བསྐུར་ན། །འདོད་ཆགས་རྡོ་རྗེའི་བདག་ཉིད་འགྱུར། །
ཤེས་རབ་ཡེ་ཤེས་བདག་སྦྱར་ན། །རྡོ་རྗེ་དགའ་མ་དང་ལྡན་པར། །ཡེ་ཤེས་རྒྱུན་གྱིས་དབང་བསྐུར་ན། །ཤེས་རབ་ཡེ་ཤེས་བདག་ཉིད་འགྱུར། །ཤེས་རབ་ཡེ་ཤེས་སོ། །དེ་ནས་བླ་མས་གཡོན་པ་ཡི། །ཕྱག་ནི་སློབ་མའི་སྤྱི་བོར་བཞག །དེ་བཞིན་གཤེགས་ཀུན་དཔང་བྱས་ལ། །
རིག་པའི་བརྟུལ་ཞུགས་སྦྱིན་པའོ། །ཐབས་གཞན་གྱིས་ནི་སངས་མི་རྒྱ། །དེ་བས་རིག་མ་འདི་ནི་མཆོག །ཆོས་ཀུན་གཉིས་སུ་མེད་པ་ལ། །གཉིས་ཀྱིས་རྣམ་པར་མཚོན་པ་ཡིན། །དེ་བས་རྟག་ཏུ་འཁོར་བ་རུ། །ཁྱེད་ཀྱིས་འབྲལ་བར་མ་བྱེད་ཅིག །འདི་ནི་སངས་རྒྱས་ཐམས་ཅད་ཀྱི། །
རིག་པའི་བརྟུལ་ཞུགས་བླ་ན་མེད། །བླུན་ཆེན་གང་ཞིག་འདའ་བྱེད་ན། །མཆོག་གི་དངོས་གྲུབ་དེ་ལ་མེད། །དེ་ལྟར་དེ་བཞིན་གཞིར་ཡང་གྲགས། །སྔོན་བཞིན་གཉིས་ནི་རྒྱས་བཏབ་པས། །གསལ་ཞིང་རབ་དགའ་མཁའ་འདྲ་བའི། །མན་ངག་ཏུ་ནི་དེ་ཉིད་བརྟག །བླ་མ་དེ་བཞིན་

44-1-24b

གཤེགས་གྱུར་ན། །སྙིང་གར་ཁུ་ཚུར་ཆོས་གོས་གཡོན། །གཡས་པས་མཆོག་སྦྱིན་ཕྱག་རྒྱ་བྱ། །བདག་ཉིད་བཞེངས་ནས་ལུང་སྟོན་བྱ། །ཨོཾ་ཁྱོད་ལ་བདག་གིས་ལུང་འདི་སྟོན། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པའི་ངན་འགྲོ་ཐར་བྱས་ནས། །ཡང་དག་སྲིད་པ་
གྲུབ་པའི་ཕྱིར། །ས་བླ་ས་སྟེང་ས་འོག་ཏུ། །ཀྱེ་རྡོ་རྗེ་སེམས་དཔའ་ཞེས་བྱ་བ། །རང་བྱུང་རང་ཉིད་གྲུབ་གྱུར་ཅིག །སྔགས་པ་གང་ལ་ལུང་འདི་བསྟན། །དེ་ནི་འགྲོ་བ་ཀུན་གྱི་གཙོ། །བླ་ན་མེད་པའི་བྱང་ཆུབ་ལ། །བདེ་གཤེགས་ཀུན་གྱིས་ལུང་བསྟན་ཡིན། །ལུང་བསྟན་པའོ། །ཇི་
ལྟར་དབང་བསྐུར་ཐོབ་པ་ཡིས། །སློབ་མས་ཡོན་ཏན་བརྗོད་པར་མོས། །དམ་ཚིག་གསུམ་གྱིས་དབུགས་ཕྱུང་ནས། །འདི་ཡིས་བསྔགས་པ་བརྗོད་པའོ། །དམ་ཚིག་གསང་ཆེན་དཀྱིལ་འཁོར་ལ། །རབ་ཏུ་ཞུགས་ནས་མཐོང་བས་ན། །ཁྱོད་ནི་སྡིག་པ་ཀུན་ལས་གྲོལ། །དེ་རིང་ཤིན་ཏུ་
ཁོ་ནར་གནས། །བདེ་ཆེན་ཐེག་པ་འདི་ལ་ནི། །ཕྱིན་ཆད་ཤི་བ་ཡོང་མེད་དེ། །མི་ཐུབ་མི་ཤིགས་གཞན་གྱིས་ཀྱང་། །རོལ་ཞིང་འཇིགས་པར་ག་ལ་འགྱུར། །སྡུག་བསྔལ་སྲིད་ལས་མྱ་ངན་འདས། །སྲིད་པ་གཏན་དུ་དག་པའི་ཕྱིར། །ཡང་དག་འབྱུང་བ་སྟོན་པའི་མཆོག །སྲིད་པ་
གཏན་དུ་དངོས་གྲུབ་བོ། །དངོས་གྲུབ་དམ་ཚིག་སྡོམ་པ་འདི། །རིག་མ་རྟག་ཏུ་བསྲུང་བར་བྱ། །དམ་པའི་ཤེས་རབ་བསྟན་པ་ནི། །སངས་རྒྱས་ཀུན་དང་མཉམ་པར་གསུངས། །བྱང་ཆུབ་སེམས་ནི་སྤང་མི་བྱ། །གང་ཞིག་རྡོ་རྗེ་ཕྱག་རྒྱ་ཞེས། །དེ་ནི་བསྐྱེད་པ་ཙམ་གྱིས་ཀྱང་། །སངས་རྒྱས་
ཉིད་དུ་ཐེ་ཚོམ་མེད། །དམ་པའི་ཆོས་ནི་སྨད་མི་བྱ། །མ་རིག་པ་དང་གཏི་མུག་གིས། །དེ་ནི་བོར་བར་མི་བྱའོ། །རང་བདག་ཡོངས་སུ་སྤངས་པ་དང་། །དཀའ་ཐུབ་སྡུག་བསྔལ་གཟིར་མི་བྱ། །ཇི་ལྟར་བདེ་བ་འདི་བཟུང་ནས། །རྫོགས་སངས་རྒྱས་པ་འདི་ལས་འབྱུང་། །རྡོ་རྗེ་དྲིལ་བུའི་ཕྱག་
རྒྱ་རྣམས། །ནམ་ཡང་སྤང་བར་བྱར་མི་རུང་། །བླ་མ་སངས་རྒྱས་དང་མཉམ་ཕྱིར། །རྡོ་རྗེ་སློབ་དཔོན་སྨད་མི་བྱ། །དེ་ནི་སངས་རྒྱས་ཀུན་མཉམ་ཕྱིར། །སློབ་དཔོན་ལ་ནི་སྨོད་བྱེད་ན། །སངས་རྒྱས་ཐམས་ཅད་སྨད་པ་ཡིན། །དེས་ནི་རྟག་ཏུ་སྡུག་བསྔལ་ཐོབ། །རིམས་དང་འོར་དང་དུག་དང་ནད། །མཁའ་

44-1-25a

འགྲོས་གཙེས་དང་བཟུང་བ་དང་། །བགེགས་དང་ཚོགས་བདག་དྲག་པོ་ཡིས། །བསད་ནས་དམྱལ་བར་འགྲོ་བར་འགྱུར། །དེ་བས་ནན་ཏན་ཐམས་ཅད་ཀྱིས། །མཆོག་གི་དགེ་བ་མངོན་འགྱུར་བའི། །རྡོ་རྗེ་སློབ་དཔོན་བླ་ཆེན་ལ། །ནམ་ཡང་བརྙས་པར་བྱར་མི་རུང་། །
གུས་པས་བླ་མ་ཡོན་དུ་ནི། །རྗེས་སུ་འཐད་པས་དབུལ་བར་བྱ། །དེས་ནི་རིམས་ནད་ལ་སོགས་པ། །ཕྱི་ནས་འབྱུང་བར་མི་འགྱུར་རོ། །རྟག་ཏུ་རང་གི་དམ་ཚིག་བསྒྲུབ། །རྟག་ཏུ་དེ་བཞིན་གཤེགས་པ་མཆོད། །རྟག་ཏུ་བླ་མ་ལ་ཡང་དབུལ། །སངས་རྒྱས་ཀུན་དང་དེ་མཉམ་ཕྱིར། །དེ་བྱིན་
སངས་རྒྱས་ཐམས་ཅད་ལ། །རྟག་ཏུ་བྱིན་པ་ཉིད་དུ་འགྱུར། །དེ་བྱིན་བསོད་ནམས་ཚོགས་ཡིན་པས། །ཚོགས་ལ་བྱང་ཆུབ་མཆོག་ཏུ་འགྱུར། །ཅི་ཕྱིར་ཤིན་ཏུ་འདིར་གནས་པས། །ཁྱེད་ཀྱི་ཚེ་འདི་འབྲས་བུར་བཅས། །དམ་ཚིག་ལྷ་དང་མཉམ་པ་རུ། །གནས་པར་ཐེ་ཚོམ་མེད་པའོ། །རྡོ་རྗེ་
དང་བཅས་སངས་རྒྱས་ཀྱིས། །དེ་རིང་ཁྱེད་རྣམས་དབང་བསྐུར་བས། །རྒྱལ་པོ་ཆེན་པོ་ཁམས་གསུམ་ན། །རྒྱལ་པོ་གཙོ་བོ་བརྟན་པར་འགྱུར། །དེ་རིང་བདུད་རྣམས་རྣམ་བཅོམ་ནས། །གཞལ་ཡས་ཁང་མཆོག་དུ་ཆུད་ཕྱིར། །སངས་རྒྱས་ཉིད་ཕྱིར་དེ་ཁོ་ནར། །ཁྱབ་བདག་གིས་ནི་
ཐེ་ཚོམ་མེད། །རབ་ཏུ་དང་བའི་ཡིད་ཀྱིས་ནི། །རྡོ་རྗེ་དེ་དག་ཀུན་མཛོད་ཅིག །ཟད་མེད་རང་གི་དམ་ཚིག་བདེ། །བདེ་བར་སེམས་བསྐྱེད་ལ་བསྙེན་ཅིང་། །མྱུར་བར་འགྲོ་བའི་བདེ་ཆུ་རུ། །རྡོ་རྗེ་སེམས་དཔའ་འདྲ་བ་ཡི། །མཉམ་པ་དེ་རུ་གྱུར་ནས་སུ། །ཁྱོད་རྣམས་དེ་ལ་འགྲོ་བར་ཤོག །
དབུགས་དབྱུང་བའོ། །དེ་ནས་སློབ་མས་ཕྱག་འཚལ་ཏེ། །བླ་མའི་ཞབས་ཀྱི་བཀའ་དྲིན་གྱིས། །སོགས་པའི་ཚིག་གིས་ཐམས་ཅད་ཀུན། །གནང་བའི་དབང་ནི་བླང་བར་བྱ། །ཇི་ལྟ་ཇི་ལྟར་འདུལ་འགྱུར་བ། །སེམས་ཅན་རང་བཞིན་དུ་འགྲོ་བགྱིས། །དེ་ལྟ་དེ་ལྟར་སེམས་ཅན་དོན། །འདོད་
ཆགས་ལ་སོགས་དག་པར་བྱ། །ཉིན་རེ་ཡི་ནི་མཚམས་གསུམ་ལ། །ཏིང་འཛིན་གསུམ་གྱི་སྦྱོར་ལྡན་ནི། །བསྒྲུབས་ནས་སྒྲུབ་པ་ཐུན་མོང་དང་། །ཅིག་ཤོས་དངོས་གྲུབ་བསྒྲུབ་པར་བྱ། །མི་སྣང་སྟོང་ནི་ཆུང་ངུ་ལ། །མངོན་ཤེས་ཉི་སྟོང་བར་མ་ལ། །རིག་འཛིན་དག་ནི་སྟོང་གསུམ་

44-1-25b

ལ། །རྡོ་རྗེ་འཛིན་པ་འགྲོ་ཀུན་གཙོ། །ཞི་བ་རྒྱས་པ་སོགས་ལས་གང་། །དེ་ལས་གཞན་ནམ་གང་འདོད་ལ། །དཀྱིལ་འཁོར་ཀུན་དུ་ཆགས་སྦྱོར་ན། །བསྒྲུབ་པ་མྱུར་དུ་འགྲུབ་པར་འོང་། །རྡོ་རྗེ་བདག་པོ་ཐམས་ཅད་ཀྱིས། །འདོད་ཆགས་དེ་ཉིད་དོན་བསམས་ཏེ། །སེམས་ཅན་ཐམས་
ཅད་ཕན་བྱེད་པའི། །བྱང་ཆུབ་འདོད་ཆགས་ལས་སྐྱེས་མཛད།  །དེ་བས་བྱང་ཆུབ་འདོད་བསྔགས་པས། །སྐུ་གསུང་ཐུགས་ནི་བསྒོམ་བྱས་ཏེ། །ཆོ་ག་བཞིན་དུ་ལས་བྱེད་ན། །དེ་ཀུན་རྟོགས་པར་འགྱུར་བ་ཡིན། །དེ་དག་བྱང་ཆུབ་ཐོབ་འདོད་ཀུན། །དགའ་བའི་སེམས་ཀྱིས་
ཐམས་ཅད་དབུལ། །གང་ཞིག་ཕོངས་པས་ཡིད་མི་བདེ། །དད་པའི་མཆོག་ལྡན་དེ་ཡིན་ནོ། །བཀའ་སྩལ་པའི་དབང་ངོ་། །དད་པ་མཆོག་ཏུ་གུས་ལྡན་པས། །བླ་མའི་ཞབས་ནི་སྤྱི་བོ་བླང་། །ཇི་ལྟར་རྗེ་བཙུན་བཀའ་སྩལ་ལྟར། །དེ་ལྟར་བྱ་ཞེས་སྤྱན་སྔར་གསོལ། །བཀྲ་
ཤིས་སྨོན་ལམ་དང་ལྡན་པར། །ཡང་དག་གནས་པར་གྱུར་ཅིག་བརྗོད། །སྣོད་རུང་བྱས་པའི་སློབ་མ་ལ། །བླ་མ་ཤིན་ཏུ་དགྱེས་པ་ན། །དེ་དག་ཀུན་ལས་གསང་བ་དང་། །རབ་གསང་ཤིན་ཏུ་གསང་བ་ཡི། །བསྒྲགས་མིན་མནའ་ཡིས་བཏབ་བྱས་ནས། །སོམ་ཉི་མེད་པར་བཤད་
པར་བྱ། །འབྱོར་ལྡན་སློབ་མ་ཀུན་ཚོགས་ནས། །སྦྱིན་སྲེག་གནས་སུ་གནས་བྱས་ནས། །བླ་མ་སློབ་མ་སྦྱོར་བར་ལྡན། །མར་ལ་སོགས་པ་རྒྱ་ཆེན་རྣམས། །སློབ་མས་གཡོན་པའི་མཐེ་བོང་ནི། །བླ་མའི་གཡས་པའི་མཐེ་བོང་དང་། །གུང་མོ་ཡིས་ནི་གཟུང་བྱས་ནས། །སྡིག་པ་
རྣམས་ནི་ཞི་བར་བྱ། །དེ་བཞིན་དེ་རུ་ས་བདག་དང་། །ཕྱོགས་སྐྱོང་རྒྱལ་པོ་ལ་སོགས་པ། །ཞི་བར་བྱ་ཕྱིར་བདུན་ནམ་ནི། །ཡང་ན་གསུམ་མམ་གཅིག་ཏུ་བྱའོ། །བདག་ཉིད་བཤད་དང་ཉན་པ་དང་། །བསམ་དང་བསྒོམ་དང་དངོས་གྲུབ་བསྒྲུབ། །ཐ་ན་འཇིག་རྟེན་ལས་གྲུབ་དང་། །ཁྱོད་ཀྱིས་
གྲོགས་ནི་མཛོད་ཅིག་ཅེས། །གསོལ་བ་བཏབ་ནས་གཤེགས་སུ་གསོལ། །སྔོན་བཞིན་མཆོད་པ་ཐམས་ཅད་དང་། །གླུ་གར་སིལ་སྙན་ལ་སོགས་དང་། །བཟའ་དང་བཏུང་བའི་མཆོག་རྣམས་ཀྱིས། །བདག་གཞན་འཁོར་ལོ་མཉེས་པར་བྱ། །དེ་ནས་པོག་སྣོད་ལག་ཐོགས་ཏེ། །

44-1-26a

དྲིལ་བུ་གསིལ་ནས་པུས་མོ་བཙུགས། །ཡེ་ཤེས་འཁོར་ལོ་ཐམས་ཅད་ཀུན། །སྔགས་འདིས་གཤེགས་སུ་གསོལ་བའོ། །ཨོཾ་སེམས་ཅན་ཀུན་དོན་མཛད་ནས་སུ། །དངོས་གྲུབ་སྩལ་ཏེ་རིགས་པ་བཞིན། །སངས་རྒྱས་ཡུལ་དུ་གཤེགས་སུ་གསོལ། །
ཡང་ནི་འབྱོན་པར་མཛོད་ཅིག་མུཿ། །དེ་བཞིན་ཨོཾ་དང་ཨཱཿདང་ཧཱུྃ། །བརྗོད་པས་ཏིང་འཛིན་འཁོར་ལོ་རྣམས། །རྡོ་རྗེ་གསུམ་ལ་བསྡུ་བྱས་ནས། །དེ་ཡང་ནམ་མཁའ་ལྟ་བུར་མོས། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱ་དྱ་ནུཏྤནྣ་ཏྭ་ཏ་ཨོཾ་ཨཱཿཧཱུྃ་སྭཱ་ཧཱ་ཞེས་བརྗོད་པས། གཟུགས་བརྙན་
སྟོང་པ་ཉིད་དམིགས་ལ། །སྣོད་གཙང་མ་རུ་བསྡུས་ནས་སུ། །འདོད་པ་ལ་ནི་ཉུང་ཤས་སྦྱིན། །ལྷག་མ་ཆུ་ཡི་སྐྱེ་བོ་སོགས། །ཕན་ཕྱིར་གདུགས་དང་རྒྱལ་མཚན་དང་། །འཕན་སོགས་སིལ་སྙན་རབ་ལྡན་པ། །དགེ་འདུན་ཚོགས་ཀྱིས་བཏེག་ནས་སུ། །ཆུ་བོ་ཆེན་པོར་བླུག་པར་བྱ། །
རྡོ་རྗེ་རྩེ་མོས་རི་མོ་དབྱི། །བུམ་པ་བླ་རེ་ལ་སོགས་པ། །སྤྱད་རུང་བླ་མས་བླང་བྱ་སྟེ། །ལྷག་མ་གོང་བཞིན་དོར་བར་བྱ། །དཀྱིལ་འཁོར་འདི་རུ་གཟུགས་བརྙན་དང་། །གླེགས་བམ་ལ་སོགས་རབ་གནས་ཀྱི། །ཆོ་ག་བྱ་བ་གཞན་དུ་བཤད། །མཁས་པ་རྣམས་ཀྱི་དེར་ཤེས་བྱ། །འདི་ནི་
དང་པོ་རྣལ་འབྱོར་པའི། །དཀྱིལ་འཁོར་ཆོ་ག་དང་པོར་གསུངས། །གཞན་དུ་ཁྱད་པར་མ་གཏོགས་པ། །ཆོ་ག་རྒྱས་པར་འདིར་ཤེས་བྱ། །ཅུང་ཟད་ཡེ་ཤེས་དབང་ཐོབ་པས། །འབེབས་པའི་ཆོ་གས་བྲི་བར་གསུངས། །ཁམས་གསུམ་སྐྱེ་བོས་སྨོན་འཇུགས་ཕྱིར། །རྣམ་པ་གཞན་དུ་
མི་བྱའོ། །རི་རྩེ་ཉམས་ནི་དགའ་བ་དང་། །ནགས་ཚལ་རབ་ཏུ་དབེན་པའམ། །མཆོད་རྟེན་ཀུན་དགའ་ར་བ་སོགས།  །དགོན་པའི་གནས་སུ་སྤྱད་བྱའོ། །བུ་མོ་ལོ་གྲངས་བཅུ་གཉིས་མ། །དེ་བཞིན་བཅུ་གཉིས་ལོན་པའི་ཁྱེའུ། །ཆོ་རིགས་བཙུན་ཞིང་དྲང་པོར་སྐྱེས། །རྨ་སོགས་སྤངས་
དང་བཞིན་མཛེས་ཤིང་། །སོ་ཡི་ཐགས་བཟང་རབ་གཙང་བ། །སྐྲ་གནག་མིག་དཀྱུས་རིང་བ་དང་། །རང་བཞིན་དུལ་བ་རིག་པ་ཆེ། །བཟུང་ནས་དབབ་པར་རབ་ཏུ་བརྟག །དེ་ལ་གོང་དུ་སྨོས་པ་དང་། །སྣོད་རུང་སོགས་ཀྱིས་ཞུས་ནས་སུ། །དེ་རྣམས་དོན་དུ་ཚོགས་སྐྱེད་ཕྱིར། །རྣམ་པར་

44-1-26b

དག་པའི་བཟླས་པ་བྱ། །དེ་བཞིན་ས་བཙལ་ལ་སོགས་ནས། །སྦྲན་པའི་ཆོ་གའི་བར་བྱས་ནས། །ལྷ་དང་བུམ་པ་སེམས་ཅན་རྣམས། །སྟ་གོན་དུ་ནི་གནས་པར་བྱ། །ཐིག་སྐུད་རྡུལ་ཚོན་བྱིན་བརླབས་ན། །གོང་གསུངས་སྣོད་ནི་ཁྲུས་བྱས་ཏེ། །གོས་དང་རྒྱན་གྱིས་རབ་བཀླུབས་ཏེ། །རི་སྐ་
ལ་སོགས་ཀྱིས་བདུག་བྱ། །དེ་ཡི་གནས་གསུམ་སྔ་མ་བཞིན། །དབང་ཆེན་ཆུ་དང་རླུང་དཀྱིལ་འཁོར། །ཡི་གེ་གསུམ་གྱི་བྱིན་བརླབས་ལ། །རྐང་མཐིལ་གཉིས་སུ་སྐུལ་བྱེད་པ། །རླུང་གིས་སྦར་བས་སྡིག་པ་བསྲེག །ཡེ་ཤེས་ཡང་དག་དབབ་པའི་ཕྱིར། །རིགས་གསུམ་བདག་
ཉིད་རྡོ་རྗེ་དྲིལ། །འཇིགས་རུང་གར་དང་བཅས་པ་ཡིས། །དེ་ཡི་སྙིང་ག་ཕྱེ་བྱས་ནས། །ཆུ་དང་མར་བཞིན་རོ་གཅིག་གྱུར། །གཟི་བྱིན་ལ་སོགས་ལྡན་གྱུར་ན། །བབས་པའི་རྟགས་ཀྱིས་ཤེས་པར་བྱ། །སྤྱན་དང་རྣམ་པར་སྣང་མཛད་ཞུགས། །ཁྲུ་གང་ཙམ་མམ་ཁྲུ་དོ་འམ། །ཁྲུ་ལྔ་
ཙམ་མམ་བརྒྱད་ཙམ་དུ། །འཇིགས་ཤིང་སྐྲག་ཚུལ་འབར་བར་འགྱུར། །སྣང་བ་མཐའ་ཡས་གོས་དཀར་ཞུགས། །ཕྲེང་བའི་སྔགས་དང་དབྱུང་བའི་སྔགས། །དེ་བཞིན་སྙིང་པོ་རིག་པ་སོགས། །མ་བསླབས་པར་ཡང་བརྗོད་པར་འགྱུར། །མི་བསྐྱོད་མཱ་མ་ཀཱི་བབས་པས། །འདས་
དང་མ་འོངས་དུས་དག་གི། །ཇི་ལྟར་བྱུང་འབྱུང་དངོས་པོ་རྣམས། །སྐད་ཅིག་གིས་ནི་ཡང་དག་སྟོན། །དེ་ནས་སྔགས་ཀྱིས་བསྟན་པར་བྱ། །དེ་གཉིས་བླ་མ་སློབ་མའི་ཚུལ། །ཐིག་འདེབས་དང་ནི་ཚོན་འགྱེད་དང་། །ཕྱག་རྒྱའམ་སྐུ་སོགས་འགོད་པར་བྱེད། །དེ་ནས་མདུན་དུ་འདུག་བྱས་
ནས། །ཇི་ལྟར་བགྱི་ཞེས་བཀའ་ནོད་བྱེད། །མཆོད་པ་སྣ་ཚོགས་རབ་བྱས་ལ། །ཡེ་ཤེས་ལྷ་ནི་གཤེགས་སུ་གསོལ། །སྣོད་གཉིས་ཟས་དང་སྐོམ་རྣམས་དང་། །ཡོན་གྱིས་མཉེས་པར་བྱས་ནས་སུ། །གྲངས་ལྷག་རུང་བར་བྱ་བ་སྟེ། །རང་གི་གནས་སུ་གཏང་བྱའོ། །དེ་ནས་འཁོར་ལོ་
གནས་བསམ་དང་། །མཆོད་དང་ཞུགས་དང་དབང་བསྐུར་བ། །བསྡུ་བ་དང་པོ་རྣལ་འབྱོར་བཞིན། །ཆོ་ག་རྒྱས་པར་བྱ་བའོ། །འདིའམ་གོང་དུ་སློབ་མའམ། །གཞན་དོན་རབ་ཏུ་བྱ་བའི་ཕྱིར། །བྲི་བའི་གསུང་གི་ཆོ་ག་ནི། །གཞན་དུ་བཤད་པས་དེར་ཤེས་བྱ། །འདི་ནི་ཅུང་ཟད་དབང་གྱུར་

44-1-27a

པའི། །བྲི་བའི་ཆོ་ག་གསུངས་པའོ། །སྒྲུབ་པ་ལ་ཡང་རི་མོ་ནི། །ཚུལ་འདི་དང་ནི་མཚུངས་ཞེས་བྱ། །ཡེ་ཤེས་དབང་སྒྱུར་རྣལ་འབྱོར་པས། །སྒྱུ་མ་ལྟ་བུའི་ཏིང་འཛིན་གྱིས། །དཀྱིལ་འཁོར་རྒྱལ་མཆོག་ལས་རྒྱལ་མཆོག །རྫོགས་པའི་བསམ་གཏན་
གྱིས་བསྒྲུབ་བྱ། །བླ་མའི་མན་ངག་རབ་ཐོབ་ཅིང་། །སྦྱོར་ཤེས་དེ་དག་ལྷུར་ལེན་པ། །རྟགས་ཤེས་དང་པོ་ཕ་རོལ་ཕྱིན། །ཡུལ་ལ་ཞེན་པ་དང་བྲལ་བའི། །བདག་ཉིད་ཆེན་པོ་ཉག་གཅིག་དེས། །དེ་འདྲའི་ས་བཅུ་མགོན་པོ་ཆེ། །རང་གི་ནུས་པ་དང་ཕྲད་པ། །མཉེས་བྱ་དེ་ཡིས་ཡང་དག་
བླང་། །མེ་ཏོག་ལ་སོགས་མཆོད་པའི་ཚོགས། །ཕྱི་རོལ་ནང་དུ་བཅས་སྔོན་སོང་། །ཐལ་སྦྱར་པུས་མོ་བཙུགས་ནས་ནི། །བླ་ཆེན་དེ་ལ་གསོལ་བ་བཏབ། །འཇིག་རྟེན་སྒྲོན་མཆོག་རྣལ་འབྱོར་ཀུན་ལ་འཕགས། །ཁྱོད་ནི་སྐྱོན་རྣམས་དག་པའི་ཕ་རོལ་ཕྱིན། །སྲིད་པའི་མཚོ་ལས་
སེམས་ཅན་ཀུན་སྒྲོལ་བ། །དེད་དཔོན་ཆེན་པོ་ཁྱེད་ལ་སྐྱབས་སུ་མཆི། །བདག་ཅག་ཐབས་བྲལ་འཁོར་བར་འཁྱམས་གྱུར་ཏེ། །མ་རིག་མུན་པས་བསྒྲིབས་པས་དམུས་ལོང་གྱུར། །སྡུག་བསྔལ་གྱིས་གཟིར་ཡང་དག་དོན་མ་རྙེད། །བདག་ཉིད་ཆེན་པོ་ཁྱོད་ཀྱིས་བསྐྱབ་ཏུ་གསོལ། །
དེ་སྐད་གསོལ་ནས་དེ་ཡི་ཚེ། །བླ་མ་བདག་ཉིད་ཆེན་པོ་དེས། །སྙིང་རྗེ་ཆེན་པོ་རབ་བསྐྱེད་ནས། །ཚིག་འདིས་གནང་བ་སྦྱིན་པའོ། །བུ་ཚུར་ཤོག་ཅིག་བསམ་གཏན་གྱི། །འཁོར་ལོ་ཆེན་པོ་ང་ཡིས་བསྟན། །ཁྱོད་ཀྱིས་ཀྱང་ནི་མཉམ་ཞོག་ལ། །ང་ཡི་བཀོད་པ་ལྟ་བར་གྱིས། །དེ་སྐད་
གསོལ་ནས་བསམ་གཏན་གྱི། །དཀྱིལ་འཁོར་རིམ་པ་འདི་ཡིས་བསྒོམ། །ལྷུན་གྱིས་གྲུབ་པའི་སྦྱོར་བ་ནི། །སྐད་ཅིག་ཡེ་ཤེས་ཀྱིས་རྫོགས་པའོ། །སངས་རྒྱས་འཁོར་ལོ་སྦྱར་བ་ཡིས། །བསམ་གཏན་འཁོར་ལོ་རབ་རྫོགས་བྱ། །ཡེ་ཤེས་འཁོར་ལོ་བསམ་གཏན་གྱིས། །འཁོར་
ལོ་ཅན་ཀུན་མངོན་སུམ་ཞུགས། །གོང་གསུངས་མཆོད་པའི་ཆོ་ག་ནི། །བསམ་གཏན་ལྡན་པས་མཉེས་པར་བྱ། །དེ་ཉིད་བརྗོད་པས་འཁོར་ལོ་བསྐུལ། །ཞུགས་སོགས་གོང་བཞིན་རབ་བྱས་ཏེ། །ཡེ་ཤེས་དབབ་པ་སྔོན་འགྲོ་བའི། །མཐོང་བའི་ཡུལ་བཞིན་རྣམ་པར་གནས། །

44-1-27b

ཡེ་ཤེས་ཀྱི་ནི་འཁོར་ལོ་ལ། །གཉིས་མེད་འཁོར་ལོ་གཞུག་པར་བྱ། །དེ་ནས་བྱིན་གྱིས་བརླབས་བརྗོད་ལ། །ས་བཅུའི་མགོན་པོའི་དཀྱིལ་འཁོར་ལ། །དངོས་གྲུབ་རྟགས་ནི་ཤེས་བྱའི་ཕྱིར། །མེ་ཏོག་འདོད་པར་བྱ་བ་སྟེ། །སྐུའམ་དབུས་སུ་ནུབ་གྱུར་ན། །ཕྱག་རྒྱ་ཆེན་པོ་བསྒྲུབ་
པར་བྱ། །ཞལ་གྱི་དཀྱིལ་འཁོར་ལ་བབས་ན། །སྔགས་ཀྱི་དངོས་གྲུབ་ཐོབ་པར་བཤད། །ལྟེ་བའི་དབུས་སུ་རབ་བབས་ན། །ཐུན་མོང་དངོས་གྲུབ་བརྒྱད་འགྲུབ་བོ། །སྐུ་སྨད་ཆ་ནི་གར་འབབ་ཀྱང་། །ཞི་སོགས་དངོས་གྲུབ་འབྱུང་བའོ། །རིང་ཞིང་ཐལ་བས་དངོས་གྲུབ་ཀྱང་། །ད་དུང་
རྒྱང་རིང་འགྱུར་བའོ། །ཕྱག་རྒྱ་ཆེན་པོ་ཇི་ལྟ་བཞིན། །བསྒྲུབ་པས་ཇི་བཞིན་དུས་ཐོབ་བོ། །ཡེ་ཤེས་བབས་པའི་མཐུ་ཉིད་ཀྱིས། །དམན་མཆོག་གསུམ་དང་རང་གི་ལས། །ཇི་སྐད་བཤད་བཞིན་གྱིས་རབ་ཐོབ། །དེ་ལས་གཞན་པ་ཇི་སྙེད་པ། །བླ་མའི་ཡེ་ཤེས་སྟོབས་ཀྱིས་ནི། །སྦྱར་
བ་ཡིས་ནི་རྙེད་པའོ། །དེ་ནས་མཁའ་དབྱིངས་ཐམས་ཅད་ཀུན། །སངས་རྒྱས་བྱང་ཆུབ་སེམས་དཔའ་དང་། །རིག་པའི་ལྷ་མོ་ཁྲོ་བོ་ཚོགས། །ཆུ་སོགས་རྐྱེན་བཟུང་གང་བར་བསམས། །དེ་དག་ཀུན་གྱིས་བུམ་པ་དང་། །གསང་དང་ཤེས་རབ་ཡེ་ཤེས་དང་། །བརྟུལ་ཞུགས་ལུང་
བསྟན་དབུགས་དབྱུང་དང་། །བཀའ་སྩལ་པ་རྣམས་རིམ་བཞིན་དབང་། །དེ་ཡིས་དེ་ཡི་བྱང་ཆུབ་ནི། །སྐུ་གསུང་ཐུགས་ཀྱི་བྱང་ཆུབ་ཆེ། །སེམས་ཅན་ཐམས་ཅད་ཕན་འདོད་པས། །ངོ་མཚར་ཆེན་པོ་རབ་ཏུ་གྲུབ། །བསམ་གཏན་དཀྱིལ་འཁོར་བསམ་གཏན་གྱིས། །མཆོད་དང་
དབང་བསྐུར་དེ་བཞིན་དུ། །བྱས་ནས་གཞན་ལ་འགའ་ཡི་དོན། །བསྒྲུབ་ཕྱིར་ལུང་འདི་བསྒོ་བའོ། །ང་ཡིས་ཁྱེད་ནི་དཀྱིལ་འཁོར་དུ། །བཅུག་ཟིན་དབང་བསྐུར་ཡང་ཟིན་གྱིས། །ཁྱོད་ཀྱིས་སློབ་དཔོན་སྒྲུབ་པོ་ལས། །འདོད་བཞིན་དུ་ནི་གྱིས་ཤིག་ཅེས། །གནང་ནས་བསྙེན་ལ་
སོགས་པ་ལ། །འཇུག་པར་གང་ཡིན་འགྱུར་བ་སྟེ། །དེ་ཡིས་ཀྱང་ནི་ཁྱོད་ཤེས་བྱ། །བསམ་གཏན་འཁོར་ལོས་སྦྱང་ཕྱིར་རོ། །གཉིས་པ་དེ་རུ་འཇུག་མི་ནུས། །མཐོང་བའི་ཡུལ་ལ་མངོན་ཞེན་ཞིང་། །བློ་གྲོས་ངན་ཞིང་སྦྱོར་བ་སྤངས། །དད་ལྡན་སྣོད་རུང་དེ་མཐོང་ནས། །དོན་རྣམས་

44-1-28a

ཡལ་བར་མི་འདོར་ཕྱིར། །སྙིང་རྗེ་ཆེན་པོ་རབ་བསྐྱེད་ནས། །དག་སོགས་ཆོ་ག་སྔོན་འགྲོ་བའི། །ཕྱི་ཡི་བྱ་བ་བསྟེན་བྱ་སྟེ། །ཡེ་ཤེས་ཅུང་ཟད་དབང་གྱུར་ལྟར། །རི་མོའི་དཀྱིལ་འཁོར་བྲིས་ནས་ནི། །དབང་བསྐུར་ཡང་དག་བརྩམ་བྱ་སྟེ། །གཉིས་མེད་མན་
ངག་གིས་སྦྱང་བྱ། །དེ་བཞིན་སྐུ་སོགས་འཁོར་ལོ་ལ། །ཆོ་ག་སྔོན་བཞིན་རྒྱས་བྱ་སྟེ། །ཀུན་ཁྱབ་ཆོས་ཀྱི་དབྱིངས་ཡེ་ཤེས། །ཐམས་ཅད་དེ་རུ་རྣམ་དག་པས། །བདེ་གཤེགས་གནས་སུ་མི་བསྐྱོད་དགོད། །གཞན་གྱི་གནས་སུ་གཞན་བཀོད་དེ། །གཉིས་ཤེས་རྡོ་རྗེ་མཚོན་ལ་སོགས། །
ཁྱད་པར་གཞན་ཡང་རྟོགས་པར་བྱ། །རྡོ་རྗེ་སློབ་དཔོན་སློབ་མ་སོགས། །གོང་དང་འོག་གི་ཆོ་ག་རྣམས། །སེམས་ཀྱི་འབའ་ཞིག་གཙོ་བོར་གསུངས།  །དམན་པ་ལས་ནི་མཆོག་མི་འགྱུར། །སེམས་ཉིད་གླང་པོ་ཡན་ལྟ་བུ། །གཟུགས་ལ་སོགས་ལ་འཕྱན་བྱེད་པས། །ངན་འགྲོ་གཡང་
སར་ལྟུང་བར་འགྱུར། །དེ་ཉིད་རབ་ཏུ་རྟོགས་བྱས་ལ། །དྲན་པའི་ཐག་པ་དམ་པོ་ཡིས། །དམིགས་པའི་ཀ་བ་ལ་བཏགས་ཏེ། །འདོད་བཞིན་བ་ཡི་ཡུལ་སྤྱོད་པས། །ཇི་ལྟ་བཞིན་དུ་འདུས་པར་བྱ། །ཇི་སྐད་དུ། སེམས་ཅན་ཀུན་གྱི་སེམས་གང་ནི། །བརྟན་པའི་ཕྱིར་ན་སེམས་དཔར་
བརྗོད། །མཉམ་པར་གཞག་ན་ཏིང་འཛིན་ཏེ། །དེ་བསྟན་པ་ལས་རྡོ་རྗེར་འགྱུར། །སེམས་དཔའི་བྱིན་རླབས་སྦྱོར་བ་ལས། །སླར་ཡང་རྡོ་རྗེ་སེམས་དཔར་འགྱུར། །ཞེས་སོ། །བསོད་ནམས་ཚོགས་ཀྱི་ཡན་ལག་ཕྱིར། །བཅོམ་ལྡན་འདས་ཀྱིས་ལུས་ངག་གི། །བྱ་བ་བསྟན་ཏེ་དྲང་སྲོང་ལྟར། །
དང་པོ་རབ་ཏུ་འདྲིད་པའོ། །ཁང་སྐས་ཡན་ལག་དང་པོ་བཞིན། །སྟེང་ཕྱིན་མ་ཡིན་དགོས་མེད་མིན། །དེ་ཡི་རྟེན་གྱིས་དེ་བཟུང་སྟེ། །དེ་ཉིད་འབའ་ཞིག་རྟོགས་པར་བྱ། །དེ་བས་སེམས་ལ་ཁྱད་པར་འབྱུང་། །ལོངས་སྤྱོད་རྫོགས་དང་སྤྲུལ་པའི་སྐུ། །དེ་ཡི་ཞིང་ཁམས་ཡོངས་དག་པ། །སེམས་ཉིད་
འབའ་ཞིག་ལས་འབྱུང་སྟེ། །མཚམས་ཀྱི་རྣམ་ཤེས་ཇི་ལྟ་དང་། །ཀླུ་ཁྲོས་པ་ཡི་སེམས་བཞིན་དུ། །མི་མཐུན་ལྟར་ཡང་སྣང་བ་སྟེ། །དེ་བས་སེམས་ཉིད་རྟོགས་པར་བྱ། །རྣལ་འབྱོར་པ་རྣམ་པ་གསུམ་གྱིས་སློབ་མ་རྣམས་དབང་བསྐུར་བའི་ཆོ་ག་རྒྱས་པར་བཤད་ཟིན་ཏོ།།      །།ད་ནི་དངོས་

44-1-28b

གྲུབ་སྒྲུབ་པའི་ཐབས་ཀྱི་ཆོ་ག་བཤད་པར་བྱའོ། །དེ་ལ་སྒྲུབ་པ་པོའི་གང་ཟག་ནི། །བརྟུལ་ཞུགས་སྡོམ་པ་སྔགས་ལྡན་པ། །མི་བརྟན་ལྷ་ཡི་ང་རྒྱལ་བྲལ། །ཅུང་ཟད་ཡེ་ཤེས་དབང་གྱུར་པ། །ཐུན་མོང་སྒྲུབ་པ་ཤེས་པར་བྱ། །རྒྱུ་དང་མི་རྒྱུར་བཅས་པ་རྣམས། །སྒྱུ་འདྲར་སེམས་ཅན་
དབྱེར་མེད་རྟོགས། །ཐུན་མོང་ཅིག་ཤོས་དངོས་གྲུབ་ཀྱི། །སྒྲུབ་པར་ཡེ་ཤེས་དབང་གྱུར་པའོ། །དེ་ཡི་ཡིད་དང་མཐུན་པའི་གནས། །ཤིན་ཏུ་དབེན་པའི་རི་དགོན་དང་། །རྣམ་པ་སྣ་ཚོགས་རི་བོ་དང་། །ཀླུང་དང་འབབ་ཆུ་རྣམས་དང་ནི། །དུར་གྱི་ཁྲོད་ལ་སོགས་པར་ཡང་། །བསམ་གཏན་
བསྡུས་པ་འདི་བསྒོམ་མོ། །དགོན་པ་ཆེན་པོའི་ས་ཕྱོགས་ནི། །མེ་ཏོག་འབྲས་བུ་སོགས་ཀྱིས་བརྒྱན། །རི་བོ་དབེན་པ་དག་ཏུ་ནི། །དངོས་གྲུབ་ཐམས་ཅད་བསྡུས་པས་འགྲུབ། །ལམ་གྱི་བཞི་མདོ་ཤིང་གཅིག་དྲུང་། །མཚན་མ་གཅིག་དང་ཞི་གནས་སུ། །རྡོ་རྗེ་དགུག་པའི་ཁྱད་པར་
གྱིས། །སྒྲུབ་པ་པོས་ནི་རྟག་ཏུ་བསྒྲུབ། །དགོན་པ་ཆེན་པོའི་ས་ཕྱོགས་སམ། །རབ་ཏུ་རྣམ་པར་དབེན་པའམ། །རི་བོ་ནགས་འདབ་ཆུ་ངོགས་སུ། །ཏིང་འཛིན་བྱས་ནས་ཏིང་འཛིན་འཐོབ། །རྡོ་རྗེ་འགུག་གནས་མིག་སྨན་དང་། །ཀ་པཱ་ལ་རུ་བསྒོམ་པར་བྱ། །ཡིད་དུ་འོང་དང་ཤིས་པའི་གནས། །
སྒྲུབ་པ་པོ་ཡིས་རབ་ངེས་བྱ། །རྗེས་སུ་མཐུན་པའི་ཤིས་པའི་ཟས། །ཉི་མ་དང་ནི་ཟླ་བ་དང་། །ཆུ་དང་ཤེལ་དང་སྨན་དང་དྲི། །ཕྱག་རྒྱ་ཆེན་པོ་རིག་འཛིན་གྱིས། །ལམ་ལ་མཁས་པ་རྣམས་ཀྱིས་སྔགས། །གླང་ཆེན་ཤ་ཡིས་མངོན་ཤེས་བསྒྲུབ། །རྟ་ཡི་ཤ་ཡིས་མི་སྣང་བསྒྲུབ། །འགུགས་པ་
བ་ལང་ཤ་ཡིས་བསྒྲུབ། །ཁྱི་ཤ་ཡིས་ནི་ཐམས་ཅད་བསྒྲུབ། །ནུས་པ་ཡིས་ནི་དགུག་པར་བྱ། །མེད་ན་བསམ་པས་རྣམ་པར་བརྟག། །ངོ་བོ་ཉིད་དང་མཐུན་དག་དང་། །རང་བཞིན་གྱིས་ནི་དེ་འགྲུབ་པའོ། །དེ་ལྟར་བྱས་ན་སངས་རྒྱས་དང་། །བྱང་ཆུབ་སེམས་དཔའ་གྲགས་ཆེན་མཉེས། །འདོད་
ཁམས་འཇིག་རྟེན་དབང་ཕྱུག་གི། །ལས་ཀྱི་གོ་འཕང་ཐོབ་པར་འགྱུར། །གཙོ་བོ་གཟི་ཆེན་སྟོབས་དང་ལྡན། །མདངས་བཟང་མཐོང་ན་ཡིད་དུ་འོང་། །མཐོང་བས་བསྐུལ་བ་མ་བྱས་ཀྱང་། །འཇིག་རྟེན་འདི་དག་དབང་དུ་འགྱུར། །འདི་ནི་སངས་རྒྱས་ཐམས་ཅད་ཀྱི། །གསང་བ་དམ་པ་བྱང་ཆུབ་སྟེ། །

44-1-29a

ཡང་དག་སྔགས་ཀྱི་གསང་བ་འདི། །རྨོངས་པའི་མན་ངག་སེམས་འདའོ། །མི་སྣང་སྟོབས་དང་བརྩོན་འགྲུས་དང་། །དམ་ཚིག་ཆེན་པོ་བསྒྲུབ་པ་དང་། །རྡོ་རྗེ་འགུགས་པ་མཆོག་དག་ཀྱང་། །དམ་ཚིག་འདི་ཡིས་རྣམ་པར་གྲུབ། །གྲུབ་པ་ཡི་ནི་མཚན་མ་ནི། །ཤིན་ཏུ་
འབེབས་པ་ཐོབ་པ་ཡིས། །གདོན་མི་ཟ་བར་འགྲུབ་འགྱུར་ཏེ། །བསོད་ནམས་ཚོགས་ཀྱི་ཡན་ལག་རྫོགས། །སྤྱི་ཡི་མཚན་མར་ཤེས་པར་བྱ། །བཟླས་དང་བསྒོམ་དང་རང་ལྷ་ཡི། །ཁྱད་པར་གང་ཡིན་རྟོགས་པར་མཛད། །རྨི་ལམ་བྱེ་བྲག་རབ་བྱེད་པས། །སོ་སོའི་མཚན་མ་ཤེས་པར་བྱ། །
བསམ་གཏན་ངག་གི་བཟླས་པ་ཡིས། །དུས་སམ་བྱིན་རླབས་རབ་སྡུད་དུ། །འདོད་པས་རྙེད་པའི་མཚན་མ་ནི། །རྨི་ལམ་དུ་ནི་ཤེས་པར་བྱ། །རྨི་ལམ་ན་སངས་རྒྱས་དང་བྱང་ཆུབ་སེམས་དཔའི་གཟུགས་ཐ་དད་པར་མཐོང་བ་དང་། རྨི་ལམ་ན་བདག་ཉིད་ཡེ་ཤེས་མཆོག་ཐོབ་ནས་སངས་
རྒྱས་ཐམས་ཅད་དང་མཐུ་མཉམ་པར་མཐོང་བ་དང་། རྨི་ལམ་ན་མཚན་དང་དཔེ་བྱད་དུ་ལྡན་པའི་ལོངས་སྤྱོད་རྫོགས་པའི་སྐུ་རྒྱུད་དག་པ་ལ་སྣང་བར་བདག་ཉིད་མཐོང་བ་དང་། རྨི་ལམ་ན་བརྒྱ་བྱིན་དང་ཚངས་པ་དང་དྲག་པ་སོགས་པས་བདག་ཉིད་ལ་མེ་ཏོག་ལ་སོགས་པས་མཆོད་པར་མཐོང་བ་དང་། 
རྨི་ལམ་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ཕྱི་ནང་གི་འདོད་པའི་ཡོན་ཏན་ལྔས་བདག་ལ་མཆོད་པར་མཐོང་བ་དང་། རྨི་ལམ་ན་བདག་ཉིད་རྡོ་རྗེ་འཆང་བའམ། རྟག་པ་ལ་སོགས་པའི་གཟུགས་སུ་མཐོང་བ་དང་། རྨི་ལམ་ན་རྡོ་རྗེ་གསུམ་མམ་སྤྱན་མ་ལ་སོགས་
པའམ། ཕྱོགས་བཅུའི་སངས་རྒྱས་ཐམས་ཅད་ཀྱིས་བདག་ལ་བཏུད་ཅིང་ཕྱག་འཚལ་བར་མཐོང་བ་དང་། རྨི་ལམ་ན་མངོན་དགའ་ལ་སོགས་པའི་ཞིང་དུ་མི་བསྐྱོད་པ་ལ་སོགས་པ་མཐོང་བ་དང་། དེ་དག་ཀྱང་ཐུགས་རབ་ཏུ་དགྱེས་ནས་ཆོས་ཀྱི་མཛོད་ཆེན་པོ་གཏད་པར་མཐོང་བ་དང་། རྨི་
ལམ་ན་བདག་ཉིད་ཤཱཀྱ་ཐུབ་པ་ལ་སོགས་པའི་གཟུགས་ལྷ་དང་ཀླུ་དང་གནོད་སྦྱིན་ལ་སོགས་པས་བསྐོར་ཞིང་ཆོས་བཤད་པར་མཐོང་བ་དང་། རྨི་ལམ་ན་བདག་ཉིད་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ནམ་མཁའ་ལ་གདུགས་དཀར་པོ་བཏེག་ཅིང་། སེང་གེའི་ཁྲི་ལ་

44-1-29b

བཞག་ནས་ཆོས་ཀྱི་རྒྱལ་པོར་དབང་བསྐུར་བར་མཐོང་བ་དང་། རྨི་ལམ་ན་གདོལ་པའི་བུ་མོའམ།ཁྱི་འམ། རྟ་རྒོད་མ་ལ་སོགས་པའམ། སྙོམས་པར་འཇུག་པ་དེ་དག་ཕྱག་རྒྱ་ཆེན་པོ་གྲུབ་པའི་མཚན་མའོ། །གཞན་ཡང་རྨི་ལམ་ན་ཁ་དོག་སྣ་ཚོགས་པའི་ཀུན་དགའ་ར་བ་དང་སྐྱེད་མོས་
ཚལ་ཡིད་དུ་འོང་བ་མཐོང་བ་དང་། རྨི་ལམ་ན་ལྷའི་བུ་མོ་གདུ་བུ་དང་། དཔུང་རྒྱན་དང་། སྙན་ཆ་དང་། མགུར་ཆུ་དང་། ནུ་འབུར་དང་། ཟུར་ཕུད་ལ་སོགས་པས་བརྒྱན་པ་དང་། མིའི་ཁྱེའུ་དང་བུ་མོ་ཡིད་དུ་འོང་བ་བཅུ་དྲུག་པ་རྒྱན་ཐམས་ཅད་ཀྱིས་བརྒྱན་པ་མཐོང་བ་ནི་ཐུན་མོང་གི་འགྲུབ་པའི་
མཚན་མའོ། །རིགས་འཛིན་ལ་སོགས་ཡོངས་སྨིན་ལས། །འཛམ་བུ་གསེར་འདྲའི་སངས་རྒྱས་འགྱུར། །དེ་བས་དེ་དག་ཐམས་ཅད་ཀུན། །ཅིག་ཤོས་མཚན་མར་ཤེས་པར་བྱ། །སྔོན་དུ་བྱ་བའི་ལས་ཀྱི་རྒྱལ་པོ་མཆོག་ནི། སྔགས་པ་རྣམ་པར་དག་པ་ཡིས། །དེ་དག་རབ་ཏུ་རྟོགས་
བྱས་ནས། །སྔོན་གྱི་ཕྱིར་ན་གཉིས་ཀྱིས་ཀྱང་། །ཅི་རིགས་གསང་སྔགས་བཟླས་བརྗོད་བྱ། །དབེན་པར་གཙང་གཏོར་བྱས་ནས་སུ། །བགེགས་བསྐྲད་ས་ལ་གསོལ་བ་བཏབ། །ཅིག་ཤོས་ལ་ཡང་གསོལ་བྱས་ནས། །བཀའ་སྩལ་ས་ནི་བརྐོ་བར་བྱ། །སྔོན་གྱི་རིམ་པ་ཤེས་བྱས་
ལ། །ས་སྟེངས་རྒྱན་དང་ལྡན་པ་དང་། །དག་བྱའི་ཕྱིར་ན་གོང་བཞིན་དུ། །དབང་བསྐུར་བླང་བས་ཡིད་སྦྱང་བྱ། །རྡོ་རྗེས་ཁྱད་པར་བྱས་པ་ཡིས། །ས་འཛིན་ལྟ་བུར་བྱིན་བརླབས་ལ། །བདག་ཉིད་ཏིང་འཛིན་གསུམ་གནས་པས། །དེ་དབུས་ང་རྒྱལ་གསུམ་ལྡན་བྱ། །སྔོན་བཞིན་རྟག་སོགས་
གསོལ་བཏབ་ནས། །བྱིན་བརླབས་སྟངས་ཐབས་བརྩམ་པའོ། །ཕུར་བུས་བཏབ་ནས་ས་སྲུང་སྟེ། །ནུབ་གཅིག་སྟ་གོན་གནས་པར་བྱ། །ལྷ་རྣམས་གནས་པར་བྱས་ནས་སུ། །བྲོད་བསྐྱེད་མཆོད་པ་སྣ་ཚོགས་བརྩམ། །དགོངས་པར་བྱ་ཕྱིར་གོང་མ་བཞིན། །འཁོར་ལོ་གསོལ་
བ་གདབ་པར་བྱ། །ལྷ་མོ་བཞི་དང་མི་བསྐྱོད་པ། །བདུད་རྩི་འཁྱིལ་པའི་བུམ་པ་ནི། །རྫས་དང་ལྡན་པར་སྟ་གོན་བྱ། །ཡོད་ན་བཅུ་དགུ་ངེས་པའོ། །སྐུད་པ་ཚོན་རྩི་འདུས་བྱས་ལ། །སྔོན་བཞིན་འབེབས་པའི་ཆོ་ག་བྱ། །དེ་ཡིས་ཐིག་དང་ཚོན་བཏབ་ནས། །ཞལ་སོགས་ལྡན་པའི་

44-1-30a

ཕྱག་རྒྱ་དགོད། །གཞན་ལ་མ་ཐོས་སེམས་ཅན་རྣམས། །གཟུང་བར་བྱ་ཕྱིར་སྔོན་བཞིན་བཤད། །གནས་རྣམས་སྟོང་པ་མི་མཛེས་པས། །དང་ཆུང་སྲིད་པས་དེ་མ་བསྔགས། །མི་རྣམས་ཀྱིས་ནི་ཕྱེ་མ་ཡིས། །ཞལ་ལ་སོགས་པ་རྫོགས་མི་འགྱུར། །ཡན་
ལག་མ་རྫོགས་བྱིན་མི་རློབ། །དེ་བས་ལྷ་ཡི་མཛེས་པ་བསྔགས། །རང་གི་ཕྱག་རྒྱའམ་སེམས་ཀྱིས་སུ། །ལྷ་རྣམས་རབ་ཏུ་གནས་བྱས་ནས། །བྱིན་རླབས་སྔོན་དུ་མཆོད་པ་སོགས། །བརྩམས་ཏེ་འབྱུང་གཏོར་ཁྱད་པར་དུ། །རྣམ་རྒྱལ་སྦྱོར་བས་སྐྱོན་བསལ་ནས། །ཚིམ་པར་
བྱ་ཕྱིར་ལྷ་རྣམས་ལ། །ཇི་སྲིད་རྫས་ཀྱི་ཐབ་རྣམས་སུ། །སྦྱིན་སྲེག་གིས་ནི་མཉེས་བྱའོ། །སློབ་མ་གཞུག་པའི་རིམ་པ་བཞིན། །བདག་ཉིད་འཁོར་ལོར་ཞུགས་པར་བྱ། །སྡིག་བཤགས་མེ་ཏོག་འདོར་བའི་བར། །བྱས་ནས་ལྷ་རྣམས་ཀྱིས་གནང་བའི། །སྔོན་བཞིན་བུམ་པ་གསང་བ་
དང་། །ཤེས་རབ་ཡེ་ཤེས་བརྟུལ་ཞུགས་དང་། །ལུང་བསྟན་དབུགས་དབྱུང་བཀའ་སྩལ་ཐོབ། །དེ་ཡིས་བསྒྲུབ་པ་བརྩམ་པའོ། །སྒྲུབ་པའི་ཐབས་གང་ཞེ་ན། དང་པོ་དེ་བཞིན་གཤེགས་པ་ཡི། །རིག་འཛིན་སྒྲུབ་ཐབས་བཤད་པར་བྱའོ། །ཇི་བཞིན་བྱས་པའི་སྔགས་པ་ཡིས། །ཐུན་
མོང་ཅིག་ཤོས་བགེགས་བསལ་ནས། །སྤྱི་གཟུགས་གྱུར་ནས་རྟག་པ་ལས། །བྱུང་བའི་གཞལ་ཡས་ཁང་པ་བསྒོམ། །ལྔ་དང་བཞི་ལས་མཆོག་དང་པོ། །རབ་བསྐྱེད་སྐྱེ་རིམ་བཞི་སྤངས་ནས། །དྲི་ཟ་རབ་ཏུ་ཞུགས་བྱས་པས། །དེ་ནི་ཆོ་ག་བཞིན་དུ་ཞུ། །རང་གི་ཚངས་པའི་སྤྱོད་པ་བཞི། །
མཱ་མ་ཀཱི་ལ་སོགས་གྱུར་ནས། །བསྐུལ་ཏེ་ཐིམ་གྱུར་ས་བོན་གྱུར། །ཕྱག་མཚན་དེས་མཚན་བཤེས་གཉེན་ཞུགས། །དེ་ལས་རྟག་པ་སྔོན་བཞིན་བསྐྱེད། །དེ་ཡི་ཐུགས་ཀར་ཟླ་བ་ལ། །ཨོཾ་ལས་འཁོར་ལོ་ཨོཾ་གྱིས་མཚན། །བསམས་ནས་སྔགས་ཀྱིས་བྱིན་གྱིས་བརླབ།  །ཨོཾ་དྷརྨ་དྷཱ་ཏུ་
སྭ་བྷཱ་ཝ་ཨཱཏྨ་ཀོ྅ཧཾ། གཉིས་སོགས་མ་གཏོགས་དེ་ཕྱག་རྒྱས། །གནས་ནས་སྔགས་འདི་བསྒོམ་པར་བྱ། །ཨོཾ་ཨཱཿཨོཾ་ཛི་ན་ཛི་ག་ཧཱུྃ། བརྗོད་པས་ཨོཾ་ལས་འོད་ཟེར་ཚོགས། །དཀར་བའི་རྒྱུན་གྱིས་ནང་གསལ་ཏེ། །བ་སྤུའི་བུ་ག་ནས་སྤྲོས་པའི། །འོད་རྩེ་རྟག་པའི་ཚོགས་རྣམས་

44-1-30b

ཀྱིས། །ནམ་མཁའི་ཁམས་ཀུན་བཀང་བྱས་ནས། །སངས་རྒྱས་རྟག་པ་སྤྱན་དྲངས་ནས། །རང་གི་བ་སྤུའི་བུ་གར་གཟུང་། །བརྟན་པའི་ངོ་བོས་ཕྱག་བྱས་ནས། །ཡང་ནས་ཡང་དུ་དུས་བཞིར་བསྒོམ། །དེ་ནས་ཞག་བདུན་ལ་སོགས་ནས། །ཉེ་བའི་མཚན་མ་མཐོང་ནས་ནི། །འབྱུང་
པོ་རྣམས་ལ་གཏོར་བྱིན་ནས། །ཡང་ནི་སྦྱིན་པ་དེར་ཞེན་བྱ། །འདི་ལྟ་བུ་ཡི་སྦྱོར་ལྡན་པས། །རྡོ་རྗེའི་སྐུ་ནི་རྒྱ་མཚོ་དག །ཟླ་བ་ཕྱེད་ན་ངེས་པ་རུ། །ཐེ་ཚོམ་མེད་པར་འགྲུབ་པར་འགྱུར། །ཡེ་ཤེས་ལྔ་ལྡན་བསྟེན་ནས་ནི། །རྣམ་པར་སྣང་མཛད་དང་འདྲ་བའི། །སངས་རྒྱས་སྐུ་ནི་འབར་
བའི་འོད། །རྡོ་རྗེ་བསྐལ་པ་གསུམ་དུ་གནས། །ཐམས་ཅད་སྔོན་བཞིན་རབ་བྱས་ཏེ། །འོད་དཔག་མེད་བསྒོམས་མགྲིན་པ་རུ། །ཨཱཿལས་པདྨ་ཨཱཿཡིས་མཚན། །བསམས་ནས་བཟླས་བརྗོད་ཡང་བྱའོ། །ཨོཾ་ཨཱཿཨཱ་རོ་ལྀ་ཀ་ཧཱུྃ། །དེ་ཡིས་སྔོན་བཞིན་འོད་དཔག་མེད། །སྤྲོས་ཏེ་བཀུག་
ནས་རང་ལ་བཙུད། །བརྟན་བྱས་སྔོན་བཞིན་རབ་བསྒྲུབས་ནས། །ཟླ་བ་ཕྱེད་ན་འགྲུབ་པར་ངེས། །ཡེ་ཤེས་ལྔ་དང་ལྡན་པ་ཡིས། །རྡོ་རྗེ་ཆོས་ནི་བསྟེན་བྱས་ནས། །དེ་དང་འདྲ་བའི་འོད་ཐོབ་སྟེ། །རྡོ་རྗེ་བསྐལ་པ་གསུམ་དུ་གནས། །སྔོན་བཞིན་མི་བསྐྱོད་རབ་བསྐྱེད་དེ། །ཐུགས་ཀར་ཧཱུྃ་
ལས་རྡོ་རྗེ་ལ། །ཧཱུྃ་གིས་མཚན་པ་རབ་བསམས་ལ། །སྔགས་ཀྱི་བཟླས་བརྗོད་བྱ་བའོ། །ཨོཾ་ཨཱཿཧཱུྃ་བཛྲ་དྷྲྀ་ཀ་ཧཱུྃ། སངས་རྒྱས་མི་བསྐྱོད་ཚོགས་རྣམས་ཀྱང་། །བཙུད་ནས་ཆགས་པར་བྱས་ནས་སུ། །སྔོན་བཞིན་ཉེ་མཚན་མཐོང་བསྒྲུབས་ནས། །ཟླ་ཕྱེད་འགྲུབ་པར་ཐེ་ཚོམ་མེད། །ཡེ་
ཤེས་ལྔ་ལྡན་བསྟེན་ན་ནི། །སྟོན་པ་རྡོ་རྗེ་ཐུགས་འདྲ་བ། །ཡེ་ཤེས་ཡོན་ཏན་རྒྱ་མཚོར་འགྱུར། །རྡོ་རྗེ་བསྐལ་པ་གསུམ་དུ་གནས། །ཐམས་ཅད་སྔོན་བཞིན་རབ་གནས་ཏེ། །མི་བསྐྱོད་ཆོ་ག་བཞིན་བསྐྱེད་ནས། །ཐུགས་ཀར་རྡོ་རྗེ་བུམ་པ་རུ། །ཨོཾ་བསམས་བཟླས་བརྗོད་བྱ་བའོ། །ཨོཾ་
དྷརྨ་དྷཱ་ཏུ་ཛྙཱ་ན་རསྟུ་ཧཱུྃ། མི་བསྐྱོད་ཚོགས་བཀུག་སྔོན་བཞིན་དུ། །ཞུགས་ནས་ཆགས་བྱས་ཉེ་བར་མཐོང་། །གཏོར་མ་བཏང་ནས་རབ་བསྒྲུབས་ནས། །ཟླ་ཕྱེད་མི་བསྐྱོད་འདྲ་བ་ཐོབ། །མི་བསྐྱོད་པ་ཡི་སྐུ་དག་དང་། །གསུང་དང་ཐུགས་མཆོག་འདྲ་བ་འཛིན། །འཇིག་རྟེན་ཁམས་རྣམས་

44-1-31a

ཐམས་ཅད་དུ། །མི་བསྐྱོད་རྡོ་རྗེ་མཆོད་པར་འགྱུར། །རིན་ཆེན་འབྱུང་ལྡན་སྔོན་བཞིན་བསྐྱེད། །ཐུགས་ཀར་མཚན་མ་ལ་གནས་པའི། །ཨོཾ་བཟླས་པ་ཡིས་འགྲུབ་པའོ། །དེ་དང་འདྲ་བར་བསྒྲུབ་པར་བྱ། །ཨོཾ་ཨཱཿཨོཾ་ས་མནྟ་ཛྙཱ་ན་རསྟུ་ཧཱུྃ། དེ་ཡིས་རིན་ཆེན་འབྱུང་
ལྡན་ཚོགས། །སྤྲོས་པ་བཀུག་ནས་རབ་ཏུ་བཙུད། །བརྟན་བྱས་གོང་བཞིན་རབ་བསྒྲུབས་ནས། །ཟླ་བ་ཕྱེད་ན་རབ་ཏུ་འགྲུབ། །ལུས་དང་ངག་སེམས་རྡོ་རྗེ་ཡི། །རིན་ཆེན་འབྱུང་བའི་འོད་དང་འདྲ། །དེ་ནི་བྱང་ཆུབ་བདག་མེད་དང་། །ཡེ་ཤེས་གསང་བའི་གནས་སུ་འགྱུར། །འོད་དཔག་
མེད་པ་བསྒོམ་བྱས་ལ། །དེ་ཡི་ཐུགས་ཀར་པདྨ་ལ། །གནས་པའི་ཨོཾ་ནི་བཟླས་བྱས་པས། །དཔག་མེད་འདྲ་བ་བསྒྲུབ་པར་བྱ། །ཨོཾ་ཨཱཿ་ཨོཾ་པྲ་ཏྱ་བེཀྵ་ཎ་ཛྙཱ་ན་རསྟུ་ཧཱུྃ། འོད་དཔག་མེད་པའི་ཚོགས་སྤྲོས་པས། །བཀུག་ནས་བརྟན་བྱས་ཆགས་བྱས་ནས། །གོང་མ་བཞིན་དུ་རབ་བསྒྲུབས་ནས། །
ཟླ་བ་ཕྱེད་ན་འགྲུབ་པར་ངེས། །སྐུ་དང་གསུང་ཐུགས་རྡོ་རྗེ་ཡི། །དཔག་མེད་པ་ཡི་འོད་དང་འདྲ། །འདི་ནི་སེམས་ཅན་ཐམས་ཅད་ཀྱི། །ཐེག་ཆེན་ལམ་གྱི་མཆོག་ཏུ་འགྱུར། །སྔོན་བཞིན་དོན་ཡོད་གྲུབ་བསྒོམས་ལ། །ཐུགས་ཀར་རལ་གྲིའི་ཡུ་བ་ལ། །ཟླ་བའི་དབུས་སུ་ཨོཾ་བསམས་ལ།  །
སྔགས་ཀྱི་བཟླས་བརྗོད་བརྩམ་པའོ། །ཨོཾ་ཨཱཿཨོཾ་ཀྲི་ཏ་ཨ་ནུཥྛ་ན་ཛྙཱ་ན་རསྟུ་ཧཱུྃ། དེ་ཡིས་དོན་ཡོད་གྲུབ་པའི་ཚོགས། །སྤྲོས་ཏེ་བཀུག་བྱས་ཞུགས་བྱས་ལ། །གནས་བརྟན་ངོ་བོར་ཆགས་བྱས་ན། །ཟླ་བ་ཕྱེད་ན་དེ་དག་འགྲུབ། །སྐུ་དང་གསུང་ཐུགས་རྡོ་རྗེ་ཡི། །རྡོ་རྗེ་ཐོགས་མེད་འདྲ་བ་འོང་། །དེ་ནི་
དཔལ་ལྡན་ཡེ་ཤེས་མཚོ། །སེམས་ཅན་དོན་ཀུན་འབྱུང་བར་འགྱུར། །དེ་བཞིན་སྣང་མཛད་བསྒོམ་བྱས་ཏེ། །སྔགས་ཀྱི་བཟླས་བརྗོད་བྱ་བའོ། །ཨོཾ་ཨཱཿཨོཾ་ཨཱ་དཪྴ་ཛྙཱ་ན་བཛྲ་རསྟུ་ཧཱུྃ། སྔོན་བཞིན་ཞུགས་སོགས་རབ་བྱས་ནས། །ཟླ་ཕྱེད་དེ་དང་འདྲ་བར་འགྲུབ། །ཐམས་ཅད་སྔ་མ་བཞིན་
བྱས་ཏེ། །སྣང་མཛད་མགོ་མགྲིན་ཐུགས་ཀ་རུ། །འཁོར་ལོ་པདྨ་རྡོ་རྗེ་ལ། །ཟླ་བའི་དབུས་ནས་ཨོཾ་གསུམ་གནས། །ཨོཾ་ཨཱཿཨོཾ་ཨོཾ་ཨོཾ་ཏྲི་ག་ཀ་ར་ཡ་རསྟུ་ཧཱུྃ། དེ་ཡིས་རྡོ་རྗེ་གསུམ་གྱི་ཚོགས། །བཀུག་ནས་གནས་གསུམ་དུ་བརྟན་པར། །བྱས་ནས་ཉེ་བའི་མཚན་མ་མཐོང་། །གོང་བཞིན་

44-1-31b

བྱས་ན་ཟླ་ཕྱེད་འགྲུབ། །སྐུ་དང་གསུང་ཐུགས་རྡོ་རྗེ་ཡི། །སངས་རྒྱས་སྣང་མཛད་འདྲ་བའི་མདོག །དེ་ནི་བྱང་ཆུབ་ཡེ་ཤེས་དང་། །སྐུ་གསུམ་ཡེ་ཤེས་འགྲུབ་པར་འགྱུར། །དེ་ཡི་རིམ་པས་མི་བསྐྱོད་སོགས། །རང་རང་ངོ་བོས་རབ་བསྒྲུབས་ན། །དཔལ་ལྡན་ཟླ་བ་ཕྱེད་གྲུབ་ནས། །
རྡོ་རྗེ་བསྐལ་པ་གསུམ་དུ་གནས། །དེ་བཞིན་དེ་ལྟར་དེ་གཉིས་སམ། །གཅིག་ལའང་གསུམ་དུ་གོམས་བྱས་ནས། །རྒྱལ་བའི་སྲས་པོ་མོས་པ་ཡིས། །ཉུང་ངམ་ལྷག་པར་གནས་པར་འགྱུར། །སྔོན་བཞིན་ཐམས་ཅད་རབ་བྱས་ལ། །རྣམ་པར་སྣང་མཛད་ཆོ་ག་བཞིན། །བསྐྱེད་
ནས་ཆོས་དབྱིངས་བྱིན་བརླབས་ནས། །ལག་པ་གཡས་པ་འཁོར་ལོ་བསྐྱེད། །འཁོར་ལོ་གསེར་སོགས་དངོས་བྱས་ལ། །ཨོཾ་བསྐྱེད་ལྟེ་བར་རྟག་པ་ཡི། །འཁོར་ལོ་ཆེན་པོ་རབ་བསྒོམས་ཏེ། །སྔགས་ཀྱི་བཟླས་བརྗོད་བརྩམ་པའོ། །ཨོཾ་ཨཱཿཛི་ན་ཛི་ཀ་ཙཀྲ་ཨརྠ་སིདྡྷི་ཧཱུྃ་སྭཱ་ཧཱ། འོད་
ཟེར་གྱིས་བཀུག་རྟག་དཀྱིལ་འཁོར། །བསྡུས་ཏེ་བཅུག་ནས་བརྟན་བྱས་པས། །དྲོད་དང་དུད་འཐུལ་འབར་བ་དང་། །ནམ་མཁའ་ལ་ནི་འཕར་བར་འགྱུར། །དེ་ཡི་སྟེང་དུ་སུ་བསམས་ནས། །ལག་ཏུ་བབས་ནས་སྤྱན་མས་བཟླ། །འབྱུང་པོ་རྣམས་ལ་གཏོར་སྦྱིན་ལ། །ཆགས་བྱས་ཟླ་
བ་ཕྱེད་ནས་འགྲུབ། །རི་རབ་སུམ་ཅུ་རྩ་དྲུག་གི། །རབ་ཏུ་ཕྲ་བའི་རྡུལ་སྙེད་ཀྱི། རྡོ་རྗེ་འཛིན་དང་འདྲ་བ་ཀུན། །དེ་ཡི་རྗེས་སུ་འབྲང་བར་འགྱུར། །སྔོན་བཞིན་མི་བསྐྱོད་རབ་བསྒོམས་ལ། །རྡོ་རྗེ་དངོས་བྱས་ཧཱུྃ་བསྐྱེད་དེ། །རྡོ་རྗེ་རིགས་ཀྱི་འཁོར་ལོ་བསྒོམ། །སྔགས་ཀྱི་བཟླས་བརྗོད་བྱ་
བའོ། །ཨོཾ་ཨཱཿབཛྲ་དྷྲྀཀ་བཛྲ་ཨརྠ་སིདྡྷི་ཧཱུྃ་སྭཱ་ཧཱ། རྡོ་རྗེ་རིགས་ཀྱི་སྤྲོ་དང་བསྡུ། །བརྟན་པར་བྱས་ལ་ཆགས་བྱས་ནས། །སྔོན་བཞིན་རབ་ཏུ་བསྒྲུབ་གྱུར་ན། །ཟླ་བ་ཕྱེད་ན་འགྲུབ་པར་ངེས། །རི་རབ་སུམ་ཅུ་རྩ་དྲུག་གི། །རྡུལ་ཕྲན་ཇི་སྙེད་ཡོད་པ་ཡི། །དེ་སྙེད་ཀྱི་ནི་བུད་མེད་རྣམས། །
ཡོན་ཏན་ཅན་གྱི་བདག་གིར་འགྱུར། །དྲག་པོ་དག་གིས་ཕྱག་བྱས་པས། །ཁམས་གསུམ་རྡོ་རྗེ་ཆེན་པོར་འགྱུར། །སྔོན་བཞིན་རྒྱས་པར་རིན་ཆེན་འབྱུང་། །བསྒོམས་ནས་སྭ་བསྐྱེད་རིན་ཆེན་དངོས། །རིན་ཆེན་རིགས་ཀྱི་ལྷ་བསྒོམས་ལ། །སྔགས་ཀྱི་བཟླས་བརྗོད་བྱ་བའོ། །ཨོཾ་

44-1-32a

ཨཱཿརཏྣ་དྷྲྀཀ་རཏྣ་ཨརྠ་སིདྡྷི་སྭཱ་ཧཱ། རིན་ཆེན་རིགས་ཀྱི་ལྷ་རྣམས་ཀུན། །སྤྲོ་ཞིང་བསྡུ་བས་བརྟན་བྱས་ནས། །ཉེ་བའི་མཚན་མཐོང་སྔོན་བཞིན་བསྒོམས། །ཟླ་བ་ཕྱེད་འགྲུབ་ཐེ་ཚོམ་མེད། །ཡེ་ཤེས་ལྔ་ལྡན་བསྟེན་ན་ནི། །བསྐལ་པ་གསུམ་གྱི་ཡུན་གནས་ཤིང་། །
ཕྱོགས་བཅུའི་སངས་རྒྱས་ཐམས་ཅད་ཀྱིས། །གསང་བ་གསུམ་ལ་བསྙེན་བཀུར་བྱེད། །དེ་བཞིན་དཔག་མེད་ཚེ་བསྒོམས་ལ། །གསེར་སོགས་པདྨ་ཨཱཿལས་སྐྱེས། །ལྟེ་བར་གསུང་རིགས་ལྷ་བསྒོམས་ལ། །བཟླས་བརྗོད་རབ་ཏུ་བྱ་བའོ། །ཨོཾ་ཨཱཿཨཱ་རོ་ལྀ་ཀ་ཀ་མ་ལ་ཨརྠ་སིདྡྷི་
སྭཱ་ཧཱ། དེ་སྤྲོས་གསུང་གི་རིགས་བཀུག་ནས། །བཅུག་ནས་བརྟན་བྱ་ཡང་ཡང་བསྒོམ། །མཚན་མ་ཐོབ་ནས་གཏོར་མ་བཏང་། །ཟླ་བ་ཕྱེད་ན་དེ་འགྲུབ་འགྱུར། །རི་རབ་སུམ་ཅུ་རྩ་དྲུག་གི། །རབ་ཏུ་ཕྲ་བའི་རྡུལ་སྙེད་ལ། །སངས་རྒྱས་རྡོ་རྗེའི་དཀྱིལ་འཁོར་ལ། །དག་པའི་བདག་ཉིད་
འཇོག་པར་བྱེད། །དོན་ཡོད་གྲུབ་པ་སྔོན་བཞིན་བསྒོམ། །རལ་གྲི་དངོས་བྱས་ཧ་ལས་བསྐྱེད། །ལས་ཀྱི་ལྷ་རྣམས་ཡུ་བར་བསྒོམ། །སྔགས་ཀྱི་བཟླས་པ་བརྩམ་པའོ། །ཨོཾ་ཨཱཿཔྲཛྙཱ་དྷྲྀཀ་ཁངྒ་ཨརྠ་སིདྡྷི་སྭཱ་ཧཱ། ལས་ཀྱི་རིགས་ཀྱི་ལྷ་རྣམས་སྤྲོ། །བསྡུ་ཞིང་བཅུག་ནས་ཆགས་
བྱས་ན། །དེ་མཚན་མཐོང་ནས་སྔོན་བཞིན་བསྒྲུབ། །ཟླ་ཕྱེད་ཀྱིས་ནི་ངེས་པར་འགྲུབ། །ཁམས་གསུམ་ཀུན་གྱིས་རབ་མཆོད་ཅིང་། །ཚངས་ལ་སོགས་པས་ཕྱག་ཀྱང་བྱས། །སྟོང་གསུམ་ན་ནི་མཆོག་ཏུ་དཔའ། །མི་མཆོག་གསང་བ་འཛིན་པར་འགྱུར། །གང་རྣམས་འདོད་
དང་བསམ་པ་དག །སྐུ་གསུང་ཐུགས་ཀྱི་རྡོ་རྗེ་འཛིན། །རྡོ་རྗེ་ཐུགས་ལས་རབ་བྱུང་བ། །དེ་ལྟ་བུ་ཡི་དངོས་གྲུབ་སྟེར། །འཁོར་ལོ་ལ་སོགས་གྲུབ་པའི་མཆོག །སངས་རྒྱས་སྐུ་དང་འདྲ་བར་འགྱུར། །གང་གཱའི་བྱེ་སྙེད་ཐམས་ཅད་དུ། །གྲུབ་པ་ཀུན་དུ་རྣམ་པར་སྤྱོད། །དམ་ཚིག་
དམ་པ་ཐམས་ཅད་ཀྱི། །རིག་པ་འཛིན་པའི་གཙོ་བོར་འགྱུར། །རྡོ་རྗེ་སྐུ་ནི་རབ་བསྒོམས་པས། །དེ་ནི་དམ་ཚིག་མཆོག་ཏུ་འགྱུར། །ཐམས་ཅད་སྔ་མ་བཞིན་བྱས་ཏེ། །འཇམ་དཔལ་བསྐྱེད་པའི་ཆོ་ག་རྫོགས། །ཐུགས་ཀར་རལ་གྲིའི་ཡུ་བ་ལ། །ཧཾ་གི་འོད་ལྡན་བཟླས་བརྗོད་བྱ།

44-1-32b

ཨོཾ་ཨཱཿཧཾ་མཉྫུ་ཤྲཱི་ཧཱུྃ་ཕཊ། དེ་ཡི་འོད་ཀྱིས་ནང་གསལ་ནས། །བ་སྤུ་ལས་བྱུང་འོད་ཟེར་ལྔས། །ཐམས་ཅད་འཇམ་དཔལ་སྐུར་བྱས་ཏེ། །བཀུག་ཅིང་བུ་གར་ཐིམ་པར་བྱ། །ཡང་ནས་ཡང་དུ་བརྟན་བྱས་པས། །བ་སྤུ་དབང་པོ་གཞུ་མཐོང་ནས། །འབྱུང་པོ་གཏོར་བྱིན་ཆགས་བྱས་
ན། །ཟླ་བ་ཕྱེད་ཀྱིས་ངེས་པར་འགྲུབ། །འཇམ་དཔལ་དམ་ཚིག་ལོངས་སྤྱོད་ལ། །སྐུ་གསུང་ཐུགས་ཀྱི་རྡོ་རྗེ་ཅན། །ས་བཅུ་དག་ལ་གནས་པ་ཡི། །བྱང་ཆུབ་སེམས་དཔའ་དེ་འགྱུར་རོ། །ཡང་ནི་འཇམ་དཔལ་དེ་བཞིན་བསྒོམ། །རལ་གྲི་ཡུ་བར་བཅུག་འཕན་གནས། །བཟླས་
བརྗོད་བྱས་ལ་གོང་བཞིན་དཔག །དེ་དང་འདྲ་བར་བསྒྲུབ་པར་བྱ། །ཨོཾ་ཨཱཿཐླིཾ་མཉྫུ་ཧཱུྃ་སྭཱ་ཧཱ། དེ་ནི་ཟླ་བ་ཕྱེད་ན་ཡང་། །འོད་ཟེར་འབར་བར་གྱུར་པ་ཡིན། །རྡུལ་ཕྲན་རྡོ་རྗེ་ལུས་ངག་གི། །རྡོ་རྗེ་སྐུ་དང་འདྲ་བར་འགྱུར། །སྔ་མ་བཞིན་དུ་ཀུན་ཤེས་བྱ། །གཤིན་རྗེ་གཤེད་ལ་སོགས་པ་བཅུ། །
ལོངས་སྤྱོད་དང་པོ་རྫོགས་པ་ལ། །མཚན་མ་ཡིས་ནི་དེ་འདྲ་འགྲུབ། །ཐོ་བ་དབྱུག་པ་པདྨ་དང་། །རྡོ་རྗེ་ལྕགས་ཀྱུ་དབྱུག་གསལ་ཞིང་། །རལ་གྲི་འཁོར་ལོ་རྡོ་རྗེ་རྣམས། །དངོས་བྱས་འཁོར་ལོ་གཅིག་བསྒོམ་བརྗོད། །ཨོཾ་ཨཱཿཡ་མཱནྟ་ཀྲྀཏ་མུདྷ་ར་སིདྡྷི་ཧཱུྃ། ཨོཾ་ཨཱཿཔྲཛྷཱནྟ་ཀྲྀཏ་བཛྲ་དྷ་ན་ད་སིདྡྷི་
ཧཱུྃ། ཨོཾ་ཨཱཿཔདྨཱནྟ་ཀྲོཏ་པདྨ་སིདྡྷི་ཧཱུྃ། ཨོཾ་ཨཱཿབིགྷྣཱནྟ་ཀྲྀཏ་བཛྲ་སིདྡྷི་ཧཱུྃ། ཨོཾ་ཨཱཿཊཱཀྐི་རཱ་ཛ་ཨཾ་ཀུ་ཤ་སིདྡྷི་ཧཱུྃ། ཨོཾ་ཨཱཿནཱི་ལ་དཎྜཱི་དཎྜ་སིདྡྷི་ཧཱུྃ། ཨོཾ་ཨཱཿམ་ཧཱ་བ་ལ་ཏྲི་ཤཱུ་ལ་སིདྡྷི་ཧཱུྃ། ཨོཾ་ཨཱཿཨ་ཙ་ལ་ཁཏྒ་སིདྡྷི་ཧཱུྃ། ཨོཾ་ཨཱཿཙཀྲ་ཝརྟི་ཙཀྲ་སིདྡྷི་ཧཱུྃ། ཨོཾ་ཨཱཿསུཾ་བྷ་བཛྲོ་སིདྡྷི་ཧཱུྃ། དེ་ཡིས་ཁྲོ་བོའི་
ཚོགས་བཀུག་སྟེ། །བཅུག་ནས་བརྟན་པར་བྱས་ནས་སུ། །སྔོན་བཞིན་གཏོར་སོགས་ཀྱིས་བསྒྲུབ་ན། །དེ་འདྲ་ཟླ་བ་ཕྱེད་ན་འགྲུབ། །ཡང་ན་རྟག་པ་འོད་དཔག་མེད། །མི་བསྐྱོད་པ་ཡི་མཚན་མ་རྣམས། །བསྒྲུབས་ཏེ་རང་གི་ལྷ་བཅུག་པས། །ཟླ་ཕྱེད་དེ་དང་འདྲ་བར་འགྱུར། །མི་སྣང་བ་
བསྒྲུབ་པའི་ཆོ་ག་བཤད་པར་བྱའོ། །སྔོན་དུ་སྤྱི་ཡི་ཆོ་ག་སོགས། །རྒྱས་པར་རབ་ཏུ་བཤད་འགྱུར་ཡང་། །བདེ་བླག་ཏུ་ནི་རྟོགས་བྱའི་ཕྱིར། །ཡང་ནི་ཐུགས་རྗེས་བསྡུས་ཏེ་བསྟན། །མཚན་མ་ཐོབ་པའི་རྣལ་འབྱོར་པས། །འཛབ་བཟླས་ཆོ་ག་ལ་སོགས་ནས། །ལྷས་དབང་བསྐུར་བའི་

44-1-33a

བར་ཞུགས་ལ། །བདེ་བའི་སྟན་ལ་འདུག་པར་བྱ། །བགེགས་བཟློག་ཆོ་ག་ནས་བརྩམས་ཏེ། །བརྒྱད་ཀྱིས་ནམ་མཁའ་སྙིང་པོ་བསྐྱེད། །ཆོས་དབྱིངས་བྱིན་རླབས་ལུས་ཀུན་ལ། །གནས་བཞི་མ་གཏོགས་ཁཾ་གིས་མཚན། །ཨོཾ་ཨཱཿཁཾ་ག་ན་ཁ་གརྦྷ་ཧཱུྃ། 
དེ་ཡི་འོད་ཀྱིས་སངས་རྒྱས་རྣམས། །ནམ་མཁའི་སྙིང་པོའི་སྐུར་བྱས་ལ། །བཀུག་སྟེ་ཁཾ་ཀུན་ལ་བསྟིམས་ལ། །ནམ་མཁའ་བཞིན་དུ་སྟོང་པར་བསམ། །བདག་གི་ཡན་ལག་མི་མཐོང་སོགས། །འབྱུང་པོ་གཏོར་མ་ཡང་བྱིན་ཏེ། །ཆགས་བྱས་ཡང་དུ་བསྒྲུབ་འགྱུར་ན། །ཟླ་བ་
ཕྱེད་ན་མི་སྣང་འགྱུར། །སངས་རྒྱས་བྱང་ཆུབ་སེམས་དཔའ་ཡིས། །ཡང་དང་ཡང་དུ་མཆོད་པ་དང་། །བསྐལ་པ་གཅིག་ཏུ་གནས་པ་དང་། །སངས་རྒྱས་ཀྱིས་ཀྱང་མི་གཟིགས་འགྱུར། །གཞི་ཡི་འབྲས་བུ་གཞན་ཡིན་ཕྱིར། །དེ་བཤད་གསང་བའི་ཐིག་ལེ་ལས། །རིམ་པ་འདི་
བཞིན་ཚིག་འགྲུབ་པ། །འཇིག་རྟེན་དབང་པོ་བསྒྲུབ་པ་བཤད། །ཐམས་ཅད་སྔོན་བཞིན་རབ་བྱས་ལ། །སྤྱན་རས་གཟིགས་དབང་བསྒོམ་པར་བྱ། །དེ་ལྕེ་ཧྲཱིཿལས་པདྨ་ནི། །འདབ་བརྒྱད་མདུན་དུ་རྡོ་རྗེ་ནི། །ཨོཾ་ཨཱཿ་ཧྲཱིཿལོ་ཀེ་ཤྭ་ར་བྷ་དྷ་ན་ཨརྠ་སིདྡྷི་ཧཱུྃ་སྭཱ་ཧཱ། བཟླས་པ་ཐོས་པས་སངས་
རྒྱས་རྣམས། །འཇིག་རྟེན་དབང་ནི་བསྐུར་བྱས་ཏེ། །བཀུག་སྟེ་ལྕེ་ལ་བཅུག་ནས་ནི། །གནས་བརྟན་ངོ་བོར་ཆགས་པར་བྱ། །ལྕེ་དེ་རྡོ་རྗེ་མཐོང་གྱུར་ནས། །གཏོར་མ་བྱིན་ཏེ་ཡང་ཡང་བསྒོམ། །ཟླ་བ་ཕྱེད་ན་ངེས་པ་རུ། །ཚིག་གི་དངོས་གྲུབ་ཐམས་ཅད་འགྲུབ། །བདེན་པ་རུ་ནི་སྨྲ་བ་
དང་། །ཤགས་དང་རྒོལ་བ་སུན་འབྱིན་དང་། །ཀུན་ཐོས་རྣམས་ནི་ཡིད་འོང་བར། །འགྱུར་བ་འདི་ལ་ཐེ་ཚོམ་མེད། །དེ་ལས་ཡང་ནི་སྒྲུབ་པའི་མཆོག །མཚོན་ཆ་རྣམས་ནི་འཇིག་འགྱུར་བ། །ཕྱི་མས་གསུངས་པ་འབྱུང་བའི་ཕྱིར། །དེ་ཡི་སྒྲུབ་པའི་ཆོ་ག་བཤད། །སྔོན་
གསུངས་རྒྱས་པར་བཤད་པ་ཡི། །ཆོ་ག་རྣམས་ནི་རྫོགས་བྱས་ལ། །ཀླུ་ཤིང་མེ་ཏོག་མཚན་པ་ཡི །།སྣང་མཛད་འདྲ་བའི་བྱམས་པ་བསྐྱེད། །ཐུགས་ཀར་མཚན་མ་ལ་གནས་པའི། །མེ་ནི་ཆོ་ག་བཞིན་བསྒོམས་ལ། །བཟླས་བརྗོད་བྱས་པས་བྱམས་པ་ཡི། །ཚོགས་ཀྱིས་

44-1-33b

ཁམས་གསུམ་དགང་པའོ། །ཨོཾ་ཨཱཿམེ་མ་ཧཱ་མེ་དྷ་ར་ས་ར་ཎ་ཧཱུྃ་སྭཱ་ཧཱ། དེ་ཡིས་སེམས་ཅན་ཐམས་ཅད་ལ། །བྱམས་པས་དམིགས་བྱས་སྙིང་རྗེ་སོགས། །ཁྲོ་དང་བྲལ་བར་རབ་བསམས་ལ། །སེམས་ཅན་དེ་དག་རབ་ཏུ་བསྡུ། །བརྟན་པར་རབ་ཏུ་ཆགས་བྱས་ལ། །རལ་གྲི་སོ་
སོགས་མ་གཏོགས་ཏེ། །འབྱུང་པོ་གཏོར་སྦྱིན་ཡང་བསྒོམས་ན། །ཟླ་ཕྱེད་མཚོན་ཆས་མི་ཚུགས་སོ། །འཕེན་དང་མི་འཕེན་ལ་སོགས་པ། །མཐོང་བ་ཙམ་གྱིས་འཇིག་པར་འགྱུར། །བཏབ་འགྱུར་འཐོར་རམ་མེ་ཏོག་འགྱུར། །གང་མཐོང་བྱམས་སེམས་དང་ལྡན་པའོ། །སྔོན་བཞིན་བྱ་བ་
ཐམས་ཅད་བྱ། །འཇམ་དཔལ་ཆོ་ག་བཞིན་བསྒོམས་ལ། །ཐུགས་ཀར་རལ་གྲིའི་ཡུ་བར་མཾ། །བསམས་ནས་བཟླས་བརྗོད་པར་བྱའོ། །ཨོཾ་ཨཱཿམཾ་མཉྫུ་ཤྲཱི་ཨརྠ་སིདྡྷི་ཧཱུྃ་སྭཱ་ཧཱ། འོད་ཟེར་སྟུག་པོས་ནང་གསལ་ཏེ། །བ་སྤུའིབུ་ག་ལས་བྱུང་བས། །སངས་རྒྱས་ཐམས་ཅད་འཇམ་
དཔལ་སྐུར། །བྱས་ཏེ་བཀུག་ནས་བ་སྤུ་ཡི། །བུ་གར་བཅུག་ནས་སྟོང་པ་ཉིད། །བསམས་པས་སྔོན་བཞིན་རྟོགས་འགྱུར་ན། །བར་ཆད་ཞི་བར་བྱས་ནས་སུ། །བསྒྲུབས་ན་ཟླ་བ་ཕྱེད་ན་འགྲུབ། །དཔག་ཚད་བརྒྱ་ཡི་ཁྱོན་ཙམ་དུ། །རྡོ་རྗེ་འཇམ་པའི་འོད་དག་གིས། །རྒྱན་རྣམས་ཀུན་
གྱིས་བརྒྱན་པ་ཡི། །གྲུབ་པའི་མཚན་མ་སྣང་བར་འགྱུར། །ཚངས་པ་དྲག་པོ་ལ་སོགས་ལྟས། །ནམ་ཡང་མཐོང་བར་མི་ནུས་སོ། །ཡང་ནི་སྔོན་བཞིན་ཐམས་ཅད་བྱ། །ཕྱག་རྒྱ་ཆེན་པོ་གང་ཡང་རུང་། །ཆོ་ག་བཞིན་དུ་དང་པོས་བསྒྲུབ། །དེ་ཡིས་བསྒྲུབ་པའི་རི་ལུ་གསུངས། །བདུད་རྩི་
ལྔའམ་རྟ་ཤར་སྦྱར། །ཁྱི་ཤའམ་ཤ་ཆེན་དག་དང་སྦྱར། །བ་ལང་ཤའམ་ཤང་སྲིན་བུ། །ག་བུར་ཙནྡན་དང་སྦྱར་བའམ། །གི་ཝཾ་ཨ་ཀ་རུར་སྦྱར་བའམ། །ག་བུར་གུར་ཀུམ་སྦྱར་བ་ཡི། །རིལ་བུ་སྐྲོད་བྱེད་ལྔ་སྦྱོར་ཙམ། །ཉི་མ་ཟླ་བ་སྲེད་བྱེད་ཀྱི། །ཉི་མ་མན་ཆ་བཞི་དང་ནི། །སྲེག་བྱེད་
གཅིག་སྟེ་ཟླ་བ་གཉིས། །བཀྲི་བ་ཙ་ནའི་འབྲུ་ཙམ་དུ། །ཨོཾ་འམ་ཨཱཿའམ་ཧཱུྃ་ལས་བསྐྱེད། །ཁར་བཅུག་ནས་ནི་དེ་དབུས་སུ། །རང་གི་འཁོར་ལོ་རབ་བསྒོམས་ལ། །དེ་ཡིས་དེ་ཡི་སངས་རྒྱས་ཚོགས། །བཀུག་སྟེ་བཅུག་ནས་བཟླས་བརྗོད་བྱ། །ཨོཾ་ཨཱཿཀུ་ལ་ཨརྠ་སིདྡྷི་ཧཱུྃ། །བརྟན་པའི་

44-1-34a

ངོ་བོར་ཆགས་བྱས་ནས། །འབར་སོགས་མཚན་མ་མཐོང་བར་འགྱུར། །འབྱུང་པོ་གཏོར་མ་ཡང་བྱིན་ནས། །བསྒོམས་ན་ཟླ་ཕྱེད་མི་སྣང་འགྱུར། །རྡོ་རྗེ་སྐུ་དང་རབ་འདྲ་ཞིང་། །ཉི་མ་ཤར་བའི་འོད་འདྲ་སྟེ། །འཛམ་བུ་ན་དའི་གསེར་འོད་ཀྱི། །བྱང་ཆུབ་ཡེ་
ཤེས་ཐོབ་པར་འགྱུར། །འདི་ནི་དཔལ་དང་ལྡན་པ་ཡི། །སངས་རྒྱས་འོད་དང་འདྲ་བར་འགྱུར། །དཔག་ཚད་བྱེ་བ་གང་གཱ་ཡི། །སྟེང་དུ་རྡོ་རྗེ་འགྲོ་བར་འགྱུར། །འདོད་ཁམས་གནས་པའི་བུ་མོ་ནི། །ལྷ་ཡི་ལོངས་སྤྱོད་བརྟུལ་ཞུགས་མ། །ཡང་ན་གཟུགས་ཁམས་གནས་པ་ལ། །
སྟོབས་ཆེན་གྱིས་ནི་འདོད་པ་སྤྱོད། །ཐམས་ཅད་སྔོན་བཞིན་རབ་བྱས་ཏེ། །རང་གི་ལྷ་ནི་དང་པོ་དམིགས། །དཀྱིལ་འཁོར་དབུས་སུ་མན་འཇིའི་སྟེང་། །ཐོད་པ་ཡིས་ནི་བརྒྱན་པར་བྱ། །བདུད་རྩི་ལྔ་ནི་གོ་རིམས་བཞིན། །གོང་གི་ཆོ་གས་དག་བྱས་ནས། །ཨོཾ་ཨཱཿཧཱུྃ་ཡིག་གསུམ་པོ་
ནི། །བརྒྱ་དང་བརྒྱད་དུ་བཟླས་པར་བྱ། །དེ་ཡིས་དྲོ་བ་ལ་སོགས་པ། །མཐོང་ནས་བར་ཆད་ཞི་བྱ་སྟེ། །ཡང་ནི་སྦྱོར་བས་བརྟན་བྱས་ན། །ཟླ་ཕྱེད་སངས་རྒྱས་ཀྱིས་མི་མཐོང་། །དེ་བཞིན་བཤད་པ་འབའ་ཞིག་གམ། །ཁྱི་ཤ་རྟ་ཤ་འབྲས་ཆན་ཤ །གོང་གི་ཆོ་གས་རབ་ཟོས་ནས། །
སངས་རྒྱས་ཉི་མས་མི་མཐོང་ངོ་། །མི་སྣང་གྱུར་པ་ཀུན་ལས་མཆོག །སྟོང་ཁམས་དག་ནི་སྣང་བར་བྱེད། །སངས་རྒྱས་ཀུན་ལ་འཕྲོག་པ་དང་། །ལྷ་ཡི་བུ་མོ་མཆོག་ལ་སྤྱོད། །མིག་སྨན་སྒྲུབ་པ་བཤད་པར་བྱའོ། །མཚན་མ་ཐོབ་པའི་རྣལ་འབྱོར་པས། །ཐམས་ཅད་སྔོན་
བཞིན་རབ་བྱས་ལ། །རང་གི་ལྷ་ཡི་སྦྱོར་བ་ནི། །ལོངས་སྤྱོད་དང་པོས་རྫོགས་པར་བྱ། །ཉ་ཡི་དུས་སུ་བརྩམས་ནས་ནི། །དྲོ་སོགས་རྒྱུ་ལས་རབ་བྱུང་བ། །བརྒྱད་ཀྱི་དུས་སུ་ཤེས་བྱས་ལ། །བཅུ་བཞིའི་དུས་སུ་བསྒྲུབ་པར་བྱ། །གོང་གི་གནས་སུ་སོང་ནས་ཀྱང་། །ཐོད་པ་གཉིས་
ཀྱི་སྟེང་འདུག་ནས། །མདུན་དུ་ཐོད་པའི་མན་འཇི་ལ། །སྐྱེས་པའི་ཐོད་པ་བཟང་པོ་བཞག །དེ་ཡི་ནང་དུ་ཚིལ་ཆེན་ལ། །ཁྲག་དང་བདུད་རྩི་ལྔ་ཡིས་དགང་། །པདྨའི་ཁོང་སྲོག་དུར་རས་དཀྲིས། །དེ་ལ་མེ་མར་འབར་བར་བྱ། །སྤྱད་མཁན་ཐོད་པས་སྟེང་བཀབ་ནས། །དེ་ཡི་དུད་པ་བླངས་

44-1-34b

ནས་སུ། །འུག་པའི་མགོ་ནི་བསྲེག་བྱས་ནས། །པདྨའི་རཀྟ་བསྲེ་བར་བྱ། །སྲོད་ཀྱི་དུས་སུ་བཏགས་ནས་སུ། །བྱ་རྒོད་རྗེ་ངར་ནང་བཀང་ལ། །པདྨའི་ཟིལ་པས་བརླན་པར་བྱ། །འོད་མེད་ཐུར་མས་མིག་ལ་བསྐུ། །དེ་ཡི་ཐོ་རངས་དུས་ནས་ནི། །གནོད་སྦྱིན་གཏེར་རྣམས་མཐོང་
བ་དང་། །འགྲོ་ཀུན་དབང་དུ་འགྱུར་བ་དང་། །གཟི་ཅན་ཀུན་གྱིས་མི་མཐོང་འགྱུར། །རིག་འཛིན་གྲུབ་པའི་རྣལ་འབྱོར་པ། །བསྐལ་པར་གསོ་བར་གནས་པའི་རྒྱུ། །བདུད་རྩི་སྨན་གྱི་ཆོ་ག་མཆོག །ཇི་བཞིན་དུ་ནི་བཤད་པར་བྱ། །ཐབས་དང་ཤེས་རབ་དབྱེ་བ་ཡིས། །དཀོན་མཆོག་
དཔལ་དང་འོད་དཔག་མེད། །དབུ་རྒྱན་ལ་ནི་བསམ་བྱས་ལ། །གཉིས་སུ་མེད་པའི་རོས་ཞུ་འགྱུར། །ཚིམ་པའི་ཆོ་ག་བཞིན་དྲངས་ནས། །རྩ་རྒྱུས་ཐམས་ཅད་ཁྱབ་པར་བྱས། །རླུང་དང་བད་ཀན་མཁྲིས་པ་ནི། །ཁྲོས་པར་གྱུར་ཀྱང་མི་ཐུབ་བོ། །སྐལ་དབང་རྣམ་པ་གསུམ་པོ་
ཡིས། །མོས་པའི་སེམས་ཅན་གཟུང་བའི་ཕྱིར། །མཐུན་པའི་ཆོ་ག་ལ་གནས་ནས། །རང་རང་དམ་ཚིག་གིས་གནས་བྱ། །ཐུགས་རྗེས་ནོན་པའི་སྔགས་པ་ཡིས། །ཉན་ཐོས་གཟུགས་ཀྱིས་གཉིས་མེད་སྤང་། །དགེ་བ་བཅུ་ལ་བཙུད་ནས་ནི། །རང་གི་ངོ་བོར་འགྱུར་བའོ། །དེ་
བཞིན་རང་སངས་རྒྱས་གཟུགས་ཀྱིས། །ལུས་ཀྱི་རྫུ་འཕྲུལ་དཔག་མེད་མཛད། །བཙུད་ནས་དེ་དོན་འདི་ལ་བཀོད། །སླར་ཡང་རང་གི་ངོ་བོར་འགྱུར། །དེ་བཞིན་སྐད་ཅིག་ཨོཾ་ལས་བསྐྱེད། །ཚངས་པ་ཆེན་པོ་ཞལ་བཞི་པ། །མཚན་དང་རྒྱན་རྣམས་ཀྱིས་བརྒྱན་པ། །ཚངས་
སྐུད་སེ་རལ་ཅོད་པན་ལ། །རྡོ་རྗེ་སེམས་དཔས་མཚན་པ་ཡི། །དང་པོ་དབྱུག་པ་རྩེ་གསུམ་གྱིས། །མཚན་པས་ཞི་བའི་ཀུ་ཙ་བཙིར། །གཉིས་ན་བགྲང་ཕྲེང་གུནྡྷེ་འཛིན། །དང་སྟེང་པདྨ་ཟླ་བར་གནས། །གཏི་མུག་ལམ་གྱིས་དམན་པ་རྣམས། །འཇིགས་པ་བསྐྱེད་ཅིང་
མོས་མ་ཐག །རང་གི་ལྷ་ཡི་སྐུར་འགྱུར་རོ། །ཨ་ལས་བསྐྱེད་པའི་དྲག་པོ་ནི། །ཐལ་མདོག་ཞལ་གཅིག་སྤྱན་གསུམ་པ། །ཟླ་ཕྱེད་དང་ལྡན་ཅོད་པན་ལ། །རྡོ་རྗེ་སེམས་དཔས་མཚན་པའོ། །ཁ་ཊྭཱཾ་མགུལ་པ་དྲིལ་མཚན་པའི། །ཕྱག་གཡས་ཀྱི་ནི་ཕྲག་པ་བརྟེན། །བདུད་རྩི་

44-1-35a

ལྔས་གང་ཐོད་པ་ནི། །གཡོན་པས་བསྣམས་ཤིང་འཁྱུད་པའོ། །ཨུ་མ་སྐུ་མདོག་སེར་པོ་སྟེ། །མེ་ཏོག་སྣ་ཚོགས་སྐུ་ལ་དཀྲིས། །རྒྱན་རྣམས་ཀུན་གྱིས་རབ་བརྒྱན་པ། །རྡོ་རྗེ་རྩེ་མོ་ནང་བལྟས་བསྣམས། །གཉིས་ཀྱིས་དེ་ཡི་ཀུ་ཙ་འཛིན། །སྟག་
ལྤགས་ཤམ་ཐབས་གླང་སྟེང་ན། །པདྨ་ཟླ་བ་ལ་གནས་ནས། །ཟླ་བའི་འོད་ཀྱིས་རྒྱན་དུ་མཚན། །དེ་ཡི་གཟུགས་ཀྱིས་འདོད་ཆགས་ཅན། །བུད་མེད་དངོས་པོ་གསུམ་སྤྱད་ན། །བཙུད་ནས་མོས་མ་ཐག་ཏུ་ནི། །རང་གི་ངོ་བོར་འགྱུར་བའོ། །ཧཱུྃ་ལས་བསྐྱེད་པའི་ཁྱབ་འཇུག་
གཟུགས། །ནག་པོ་རིན་ཆེན་དབུ་རྒྱན་ཅན། །རྡོ་རྗེ་སེམས་དཔའ་རལ་པ་མཚན། །ཕྱག་བཞི་འཁོར་ལོ་རྩེ་གསུམ་དང་། །འབུད་དུང་རིན་ཆེན་ལྡན་པའོ། །ལྷ་མོ་གསེར་སྐུའི་བདག་ཉིད་འདྲ། །ཐོད་དུ་མེ་ཏོག་སྣ་ཚོགས་དཀྲིས། །མཚན་མ་བདག་འདྲ་རྒྱན་རྣམས་བརྒྱན། །
དང་པོ་གཉིས་ཀྱིས་ལེགས་པར་འཁྱུད། །ཁྱུང་སྟེང་པདྨ་ཉི་མ་ལ། །ཉི་མའི་འོད་ཀྱིས་རྒྱབ་བརྟེན་མཛད། །དེ་ཡིས་གཟུགས་ཁམས་གསུམ་ན་གནས། །སྡང་བ་རྣམས་ནི་བསད་ནས་སུ། །ཡལ་བར་མི་འགྱུར་བརྩོན་བྱས་ནས། །སླར་ཡང་རང་གི་བདག་ཉིད་འགྱུར། །དེ་ལྟར་
དེ་བཞིན་ཤ་བཟའ་ཞིང་། །གཞན་གྱི་བུད་མེད་སྤྱོད་པ་ཡིས། །གནོད་སྦྱིན་ཕོ་མོ་བསྒྲུབས་ན་ནི། །དོན་བྱས་ཡང་ནི་གྲོལ་བར་འགྱུར། །འོ་མ་དང་ནི་ཕྲ་མ་དང་། །འདོད་ཡོན་ལྔ་དང་དྲི་རྣམས་ཀྱིས། །ཀླུ་ཡི་བུ་མོ་བསྟེན་བྱས་ན། །ཡང་ནི་གྲོལ་ནས་ངོ་བོར་གནས། ཁྲོ་ཞིང་ང་རྒྱལ་
གནོད་སེམས་ལྡན། །སྤོས་དང་མེ་ཏོག་སྤྱད་པ་ཡིས། །ལྷ་མིན་བུ་མོ་མཉེས་བྱས་ལ། །གྲོལ་ནས་རང་གི་སྐུར་འགྱུར་རོ། །ཐོས་རུང་བདུག་པ་འབྲུ་མར་གྱིས། །སྲིན་པོ་རྣམས་ནི་དགའ་བར་བྱ། །དེ་བཞིན་འབྱུང་པོ་རྣམས་ཀྱང་ངོ་། །དེས་ཀྱང་གཙང་བའི་དོན་ཆེན་བྱེད། །བདུད་རྩི་ལྔའམ་
ཁྲག་དག་གམ། །ཆང་ལ་སོགས་པ་འཐུང་བ་ཡིས། །གཽ་རཱི་ལ་སོགས་མཉེས་བྱས་ལ། །སྡང་བ་མ་ལུས་གསད་པར་བྱ། །དེ་བཞིན་བརྒྱ་བྱིན་ལ་སོགས་པའི། །ངོ་བོ་དམ་ཚིག་ལ་གནས་ནས། །དེ་འདྲའི་སེམས་ཅན་གདུལ་བྱའི་ཕྱིར། །གཟུགས་ཀྱིས་དེ་ཙམ་གནས་པའོ། །

44-1-35b

ངོ་བོ་ཉིད་ཀྱིས་ཀུན་འབྱུང་བ། །ཁམས་རྣམས་དག་ན་རྣམ་པར་སྤྱོད། །སེམས་ཅན་ཀུན་ལ་ཕན་འདོད་པས། །དམ་ཚིག་མ་ལུས་སྤྱད་པར་བྱ། །གང་དང་གང་གིས་བསམ་པ་ཡིས། །འདུལ་བར་འགྱུར་བའི་གཟུགས་ཅན་དེ། །ཐུགས་རྗེས་ནོན་པ་དེ་དང་དེར། །སྙིང་རྗེའི་བདག་
ཉིད་རྣམས་ཀྱིས་བསྟན། །ད་ནི་མངོན་པར་ཤེས་པ་ལྔ། །བསྒྲུབ་པའི་ཆོ་ག་བཤད་པར་བྱའོ། །མཚན་མ་ཐོབ་པའི་རྣལ་འབྱོར་པས། །སྔོན་བཞིན་བཟླས་པའི་ཆོ་ག་ནས། །རི་མོའི་དཀྱིལ་འཁོར་རྫོགས་བྱས་ནས། །ལྷ་ཡིས་དབང་བསྐུར་བར་ཞུགས་ཏེ། །བགེགས་དགྲ་
སྦྱོར་བ་ནས་བརྩམས་ཏེ། །ཆོས་ཀྱི་དབྱིངས་སུ་བྱིན་གྱིས་བརླབས། །གཉིས་ཀྱི་བསྒྲུབ་པ་རྣམ་པར་བཤད། །གཅིག་ལ་འབྲས་བུ་གཉིས་སུ་ཤེས། །མིག་གཉིས་དང་ནི་རྣ་བ་གཉིས། །དཔྲལ་བ་སྙིང་ག་ལྟེ་བ་རུ། །སྔོན་བཞིན་ཀྵིཾ་སོགས་མཐའ་གཉིས་ལས། །འཁོར་
ལོ་ལ་སོགས་དེ་ཡིས་མཚན། །དེ་ལས་བཞི་པོ་གཅིག་གཉིས་སྐྱེད། །དེ་རྣམས་ཐུགས་ཀྱི་འོད་ཟེར་གྱིས། །སངས་རྒྱས་རྣམས་བཀུག་ཞུགས་བྱས་པས། །རྡོ་རྗེ་སྔར་གྱུར་བཅུད་འཕན་མཚན། །ཨོཾ་ཨཱཿབཛྲ་དྷྲྀཀ་པཉྩ་བྷི་བྷྱིད་ཨརྠ་སིདྡྷི་ཧཱུྃ་སྭཱ་ཧཱ། དེ་བརྗོད་འོད་ཟེར་འཕྲོས་པ་
ཡིས། །སངས་རྒྱས་ས་སྙིང་སོགས་བྱས་པས། །བཀུག་སྟེ་གནས་བཅུག་བརྟན་བྱས་ནས། །བར་དུ་ཆོད་པའང་མཐོང་ལ་སོགས། །དངོས་གྲུབ་བར་ཆོད་ཉེར་ཞིའི་ཕྱིར། །འབྱུང་པོ་སོགས་ལ་གཏོར་བྱིན་ནས། །གོང་གི་སྦྱོར་བས་ཆགས་བྱས་ན། །ཟླ་བ་ཕྱེད་ན་འགྲུབ་
པར་འགྱུར། །དེ་བཞིན་རྟག་པ་རིན་ཆེན་འབྱུང་། །འོད་དཔག་མེད་དང་དོན་ཡོད་གྲུབ། །འཁོར་ལོ་རིན་ཆེན་པདྨ་དང་། །རལ་གྲི་གྱུར་པ་བཅུད་འཕེན་མཚན། །ཨོཾ་ཨཱཿཛི་ན་ཛི་ཀ་པཉྩ་ཨ་བྷི་བྷྱིད་ཨརྠ་སིདྡྷི་ཧཱུྃ་སྭཱ་ཧཱ། ཨོཾ་རཏྣ་དྷྲྀཀ་པཉྩ་ཨ་བྷི་བྷྱིད་ཨརྠ་སིདྡྷི་ཧཱུྃ་སྭཱ་ཧཱ། ཨོཾ་ཨཱ་རོ་ལྀཀ་
པཉྩ་ཨ་བྷི་བྷྱིད་ཨརྠ་སིདྡྷི་ཧཱུྃ་སྭཱ་ཧཱ། ཨོཾ་པྲཛྙཱ་དྷྲྀཀ་པཉྩ་ཨ་བྷི་བྷྱིད་ཨརྠ་སིདྡྷི་ཧཱུྃ་སྭཱ་ཧཱ། བརྗོད་ཅིང་སྤྲོས་པས་གོང་མ་ལྟར། །ས་སྙིང་ལ་སོགས་བཅུག་བྱས་ཏེ། །མཚན་མཐོང་བར་ཆད་ཞི་བྱས་ནས། །ཟླ་བ་ཕྱེད་ན་ངེས་པར་འགྲུབ། །གང་གཱའི་བྱེ་སྙེད་སངས་རྒྱས་རྣམས། །ཉིད་ཀྱི་རྡོ་རྗེ་

44-1-36a

གདན་བཞུགས་པ། །ཤིང་ཏོག་ལག་ཏུ་བཞག་པ་བཞིན། །རྡོ་རྗེ་མིག་གིས་མཐོང་བར་འགྱུར། །གང་གཱའི་བྱེ་སྙེད་ཞིང་དག་ན། །རྣ་བའི་དྲུང་ན་འཁོད་པ་བཞིན། །སྒྲ་གྲགས་པ་ཡི་ཇི་སྙེད་པ། །མངོན་ཤེས་རྣ་བས་ཐོས་པའོ། །གང་གཱའི་བྱེ་སྙེད་ཞིང་དག་
གི། །སེམས་ཅན་ཀུན་གྱི་སེམས་རྣམས་ནི། །སྐུ་དང་གསུང་དང་ཐུགས་ཀྱིས་མཚན། །གར་མཁན་ལ་སོགས་རིག་པར་འགྱུར། །བསྐལ་པ་གང་གཱའི་བྱེ་སྙེད་དུ། །འཁོར་བ་དག་ན་གནས་པ་ཡི། །སྔོན་གྱི་གནས་ཀྱི་གཏན་ཚིགས་བརྟག། །ཞག་གསུམ་འདས་པ་
བཞིན་དུ་དྲན། །གང་གཱའི་བྱེ་སྙེད་ཞིང་དག་ཏུ། །སངས་རྒྱས་སྤྲིན་གྱིས་བརྒྱན་པའི་སྐུ། །བསྐལ་པ་གང་གཱའི་བྱེ་སྙེད་དུ། །རྡོ་རྗེ་རྫུ་འཕྲུལ་མཆོག་གིས་འགེངས། །སངས་རྒྱས་མངོན་ཤེས་རྒྱུ་ཡི་ཕྱིར། །ཕུལ་དུ་འབྱུང་བར་བཤད་པ་སྟེ། །གྲངས་དང་ཚད་དུ་རབ་ལྡན་
པའི། །མངོན་པར་ཤེས་པ་རྟོགས་པར་བྱ། །གང་གཱའི་བྱེ་སྙེད་གྲངས་མེད་པའི། །འཁོར་གྱིས་ཡོངས་སུ་བསྐོར་ནས་སུ། །རྡོ་རྗེ་སྐུ་དང་གསུང་ཐུགས་ཀྱིས། །འཇིག་རྟེན་ཁམས་ཀུན་བགྲོད་པར་འགྱུར། །ད་ནི་དགུག་པའི་ཆོ་གའི་ལས་འགའ་ཞིག་བཤད་པར་བྱའོ། །
མཚན་མ་ཐོབ་པའི་རྣལ་འབྱོར་པས། །གང་གསུངས་གནས་སུ་ཇི་ལྟ་བཞིན། །རི་མོའི་དཀྱིལ་འཁོར་བྲི་བྱས་ནས། །ལྷ་ཡི་དབང་བསྐུར་བྱས་ནས་ཞུགས། །བཀའ་ཡི་འཁོར་ལོ་སོགས་སྦྱོར་བས། །རྡོ་རྗེ་སེམས་དཔའི་སྔོན་འགྲོ་བའི། །འདོད་པའི་ལྷ་རུ་དམིགས་བྱས་ལ། །
མིག་ལ་སོགས་པ་བྱིན་གྱིས་བརླབས། །ལྕགས་ཀྱུ་གནས་ནི་བསྒྲུབ་པའི་ཕྱིར། །རྡོ་རྗེ་གསུམ་གྱིས་བྱིན་གྱིས་བརླབས། །ཡི་གེ་གསུམ་པར་རང་རང་སྔགས། །རིག་པ་དང་བཅས་བཟླས་པར་བྱ། །རྡོ་རྗེ་གསུམ་ལས་འཕྲོས་པ་ཡི། །ལྕགས་ཀྱུས་མཚན་པའི་ལྷ་རྣམས་
སྤྲོ། །སྐྱེས་པ་བུད་མེད་ལ་སོགས་པ། །སེམས་ཅན་མ་ཡིན་པ་ཡང་རུང་། །རླུང་གི་དཀྱིལ་འཁོར་ཐོག་གནས་པ། །ལྕགས་ཀྱུས་སྙིང་གར་སྦྱར་བར་བྱ། །རིམ་བཞིན་འོངས་ཏེ་ལམ་བྱུང་གིས། །ཕབ་སྟེ་མདུན་དུ་ཟླ་གནས་ལ། །འོག་འབྱུང་ཆོ་གས་མཱ་མ་ཀཱི། །སྤྱན་མ་ཞི་

44-1-36b

དང་བསྲུང་བར་བྱ། །དེ་ལྟར་བྱས་པས་ཇི་ཙམ་དུ། །འདོད་པའི་ལས་ནི་བྱེད་ནུས་པས། །ཆོ་གའི་མཆོག་ནི་འདི་ཉིད་ནི། །དགུག་པ་ཀུན་ལ་སྤྱི་རུ་སྦྱར། །དེ་བཞིན་བདུད་རྩི་འཁྱིལ་པ་ཡང་། །རྡོ་རྗེ་གསུམ་གྱིས་མཚན་པ་བསྒོམ། །སྔོན་བཞིན་རླུང་དཀྱིལ་ལ་གནས་པའི། །མི་ཡི་
བུ་མོ་མཆོག་རྣམས་དགུག །ཨོཾ་ཨཱཿ་བིགྷྣནྟ་ཀྲྀཏ་བུ་མོ་ཆེ་གེ་མོ་ཨཱ་ཀཪྵ་ཡ་ཛ་ཧཱུྃ་ཛ། བརྒྱ་རྩ་ལྔ་བཅུར་བརྗོད་པར་བྱ། །སྔོན་བཞིན་འདོད་པའི་རྒྱལ་པོ་ཡང་། །རྡོ་རྗེ་གསུམ་གྱིས་བྱིན་བརླབས་ལ། །རླུང་གི་དཀྱིལ་འཁོར་ལ་གནས་པའི། །ནམ་མཁའི་བུ་མོ་དགུག་པར་བྱ། །
ཨོཾ་ཨཱཿཊཀྐི་རཱ་ཛ་ནམ་མཁའི་བུ་མོ་ཨཱ་ཀཪྵ་ཡ་ཛ་ཧཱུྃ་ཛ། སྦྱོར་བ་དེ་ལྟར་གནོད་མཛེས་ཀྱང་། །རྡོ་རྗེ་གསུམ་གྱིས་མཚན་བསྒོམས་ལ། །ལྷ་མ་ཡིན་གྱི་བུ་མོ་མཆོག །རླུང་དཀྱིལ་ཏྲི་ཤཱུ་ལྕགས་ཀྱུས་དགུག །ཨོཾ་ཨཱཿ་སུམྦྷ་རཱ་ཛ་ལྷ་མ་ཡིན་གྱི་བུ་མོ་ཨཱ་ཀཪྵ་ཡ་ཛ་ཧཱུྃ་ཛ། སྔོན་བཞིན་
འཇམ་དཔལ་རྡོ་རྗེ་བསྐྱེད། །རྡོ་རྗེ་གསུམ་གྱིས་བྱིན་བརླབས་ལ། །རླུང་གི་དཀྱིལ་འཁོར་ལ་གནས་པའི། །གནོད་སྦྱིན་བུ་མོའི་ཅོད་པན་ལ། །མནན་ཕྱིར་ཁྲོ་བོ་གཤིན་རྗེ་གཤེད། །བསྐལ་པའི་བསྲེགས་པ་ལྟར་བསམས་ལ། །ལྕགས་ཀྱུ་ཞགས་པས་སྙིང་གར་སྦྱར། །
མངག་བཞུག་དོན་དུ་དགུག་པར་བྱ། །རང་རང་སྔགས་ཀྱི་ཁྱད་པར་དང་། །ཕྱག་རྒྱའི་ཁྱད་པར་ཐམས་ཅད་ཀྱིས། །དགུག་པར་རང་རང་ཐབས་སུ་གསུངས། །གཞན་དུ་བྱས་ན་མི་འགྲུབ་འགྱུར། །རྡོ་རྗེ་སེམས་དཔའ་རྒྱལ་པོ་ཆེ། །ཡང་དང་ཡང་དུ་བསྐུལ་བར་བྱ། །དེ་ཉིད་ལྷ་
རྣམས་ཐམས་ཅད་དང་། །རྒྱལ་པོ་རབ་ཏུ་བརྟན་པའོ། །རྡོ་རྗེ་རྒྱ་མཚོ་རྐང་པས་གནོན་པའི་ཆོ་ག་བཤད་པར་བྱའོ། །མཚན་མ་ཐོབ་པའི་རྣལ་འབྱོར་པས། །རི་མོའི་ཆོ་ག་སྔོན་བསྟན་བཞིན། །ཆུ་ཡི་དྲུང་སོགས་བྲིས་ནས་ཀྱང་། །ལྷ་ཡི་དབང་བསྐུར་བར་གྱིས་ཞུགས། །
བཀའ་ཡི་འཁོར་ལོ་ལ་སོགས་པ། །རྡོ་རྗེ་སེམས་དཔའ་བསྐྱེད་ནས་ཀྱང་། །དྲི་ཟ་འཇུག་པ་ལ་སོགས་པས། །བྱང་ཆུབ་སེམས་སུ་ཞུ་བར་འགྱུར། །དེ་ལས་ཕྱོགས་བཞི་དབུས་ལྔའི་ཆུ། །བྷྲཱུཾ་ཨཱཾ་ཛྲཱིཾ་ཁཾ་ཧཱུཾ་དུ་གྱུར། །དེ་ལ་མཚན་མ་དེ་ཡིས་མཚན། །སྤྲོ་བསྡུ་ལས་ནི་རིགས་

44-1-37a

ལྔར་གྱུར། །མིག་ལ་སོགས་པ་བྱིན་གྱིས་བརླབས། །རྡོ་རྗེ་གསུམ་ནི་གནས་གསུམ་བཀོད། །དེ་རྣམས་ཀྱི་ནི་ཡེ་ཤེས་ཀྱིས། །བསྐུལ་སོགས་སྔོན་འགྲོ་དབང་བསྐུར་བྱ། །དེ་ཡི་དབུ་ལ་བདག་ཉིད་ནི། །རྡོ་རྗེ་འཆང་བ་རིག་མར་བཅས། །མི་བསྐྱོད་
དབུ་གནས་ཞབས་བཞི་ཡི། །སངས་རྒྱས་བཞི་ཡི་སྤྱི་བོར་བསྒོམ། །ཨོཾ་ཨཱཿསརྦ་བུདྡྷ་མ་ཀུ་ཨཱཏྨ་ཧཾ་ཧཱུྃ། ང་རྒྱལ་དེ་ཡིས་བརྟན་པར་གནས། །ཆུ་ལ་སོགས་པ་རེག་རུང་སྟེ། །འབྱུང་པོ་མཉེས་པར་བྱས་ནས་སུ། །ཆགས་བྱས་ཟླ་བ་ཕྱེད་ན་འགྲུབ། །དེ་ནས་རྟག་པ་ལ་སོགས་
པའི། །རྣལ་འབྱོར་ལྡན་པས་ཆུ་ཡི་རྡུལ། །སྤྱན་ལ་སོགས་པ་བསྒོམ་བྱས་ནས། །དུས་དེ་ཉིད་དུ་འགྲུབ་པར་འགྱུར། །འཇམ་དཔལ་རྡོ་རྗེ་ལ་སོགས་པས། །ཆུ་རྣམས་རང་གི་གནས་སུ་བསྒོམ། །གོང་བཞིན་བརྟན་པར་རབ་བྱས་ནས། །ཟླ་བ་ཕྱེད་ན་འགྲུབ་པར་འགྱུར། །གྲུབ་
ནས་རྒྱ་མཚོ་བཞི་ལ་སོགས། །ཐམས་ཅད་ཀུན་དུ་འཆག་འགྱུར་ཏེ། །ཐང་ལ་བྱ་བ་ཇི་བཞིན་དུ། །རྣལ་འབྱོར་པ་ནི་སྤྱོད་པར་བྱེད། །ཐམས་ཅད་སྔོན་བཞིན་རབ་བྱས་ཏེ། །རྡོ་རྗེ་སེམས་དཔའ་སྔོན་འགྲོ་བའི། །བཾ་དང་རྡོ་རྗེ་སེར་པོ་ལས། །དཔའ་བོ་རྡོ་རྗེ་བསྒྲུབ་པར་བྱ། །ཅུང་
ཟད་སེར་ལ་གཡས་གཡོན་ཞལ། །གནག་དང་དཀར་པོ་བསྒོམ་པར་བྱ། །དང་པོས་འཁྱུད་ཅིང་ལྷག་མ་ན། །རྡོ་རྗེ་རལ་གྲི་ནོར་བུ་པད། །རྒྱན་རྣམས་ཐམས་ཅད་ཡོངས་རྫོགས་པ། །མིག་དང་ལུས་རྫོགས་བྱིན་བརླབས་ནས། །བསྐུལ་བ་ལ་སོགས་སྔོན་འགྲོ་བའི། །མི་བསྐྱོད་
པ་ཡིས་དབུ་བརྒྱན་བསམ། །ཨོཾ་ཨཱཿབི་བི་ར་བཛྲ་ཧཱུྃ་ཕཊ་སྭཱ་ཧཱ། བཟླས་པ་སྔོན་བཞིན་རབ་བྱས་པས། །སངས་རྒྱས་ཐམས་ཅད་དེ་རུ་བྱས། །བཀུག་སྟེ་བཅུག་ནས་བརྟན་བྱས་པས། །ཟླ་བ་ཕྱེད་ན་བཀའ་ཉན་ཏེ། །དགུག་དང་དབང་དུ་བྱ་བ་སོགས། །སྨན་དང་སྔགས་ཀྱི་
དངོས་གྲུབ་རྣམས། །སྒྲུབ་པ་པོ་ནི་ཅི་འདོད་པའོ། །དེ་དག་ཐམས་ཅད་སྦྱིན་པར་བྱེད། །ཡང་ནི་སྔོན་བཞིན་ཐམས་ཅད་བྱ། །རྡོ་རྗེ་སེམས་དཔའ་ལས་བྱུང་བའི། །ཙུཾ་དང་པདྨ་དཀར་པོ་ལས། །ཙུཾ་གྱིས་མཚན་པ་བསམ་པར་བྱ། །དེ་ཡི་འོད་འཕྲོས་སངས་རྒྱས་ཀྱིས། །ཕྱོགས་བཅུ་ལ་

44-1-37b

གནས་སངས་རྒྱས་སོགས། །སྐུལ་བྱེད་པ་ཡི་གཟུགས་བྱས་ནས། །བཀུག་སྟེ་དེ་རུ་གཞུག་པར་བྱ། །དེ་ལ་སངས་རྒྱས་རྡོ་རྗེ་མ། །དཀར་མོ་གཡས་གཡོན་གནག་དང་དམར། །དང་པོས་ཐབས་ལ་འཁྱུད་པ་དང་། །པད་སྣོད་རལ་གྲི་ནོར་བུ་འབར། །རྒྱན་རྣམས་ཀུན་གྱིས་
བརྒྱན་པ་ཡི། །མིག་དང་ལུས་སོགས་བྱིན་བརླབས་ལ། །བསྐུལ་བ་སྔོན་དུ་འགྲོ་བ་ཡི། །མི་བསྐྱོད་པ་ཡིས་དབུ་བརྒྱན་བྱ། །དེ་ཡི་ཡེ་ཤེས་སེམས་མ་ཡི། །ཐུགས་ཀར་ཟླ་བ་ཙུཾ་བཀོད་དེ། །སྤྲོ་བསྡུ་གཞུག་པ་སྔ་མ་བཞིན། །སྔགས་ཀྱི་བཟླས་པ་བྱ་བའོ། །ཨོཾ་ཨ་ཙ་ལེ་ཙུ་ལེ་
ཙུནྡ་ལེ་སྭཱ་ཧཱ་ཧཱུྃ་སྭཱ་ཧཱ། དེ་ཡིས་ཟླ་བ་ཕྱེད་ན་ནི། །ཞི་བ་ལ་སོགས་གང་ཡང་རུང་། །སྒྲུབ་པོའི་ཡིད་ལ་འདོད་པ་ཡི། །དངོས་གྲུབ་རྣམས་ནི་སྟེར་བར་འགྱུར། །ཁྱད་པར་དུ་ནི་བུམ་བཟང་དང་། །ཡིད་བཞིན་ནོར་དང་དཔག་བསམ་ཤིང་། །རྣལ་འབྱོར་པ་ནི་གང་འདོད་པ། །སྒྲུབ་པ་པོ་
ལ་སྦྱིན་པར་བྱེད། །སྔ་མ་བཞིན་དུ་ཐམས་ཅད་བྱ། །རྡོ་རྗེ་སེམས་ལས་བྱུང་བ་ཡི། །ཛཾ་དང་རལ་གྲི་འབྲས་བུ་ནི། །ཛཾ་གིས་མཚན་པ་བསམ་པར་བྱ། །དེ་ཡི་འོད་ཀྱིས་སངས་རྒྱས་རྣམས། །གནོད་གནས་ཀྱི་ནི་སྐུར་བྱས་ནས། །བཀུག་ནས་དེ་ལ་ཐིམ་པར་བྱ། །དེ་ལ་གནོད་སྦྱིན་
དབང་པོ་ཆེ། །གསུས་ཆེ་རྐང་པ་ཐུང་བ་སྟེ། །གསེར་འདྲ་གཡས་གཡོན་གནག་དང་དཀར། །དང་པོས་འཕགས་མ་ནོར་རྒྱུན་འཁྱུད། །ལྷག་མས་པི་ཛ་པཱུ་ར་དང་། །སྲེ་མོ་རིན་ཆེན་སྐྱུག་བྱེད་དང་། །རིན་ཆེན་རལ་གྲི་འཛིན་པའོ། །ཞབས་གཡས་རྡོ་རྗེ་མཚན་པ་ཡི། །བུམ་པ་བཟང་
ལ་རབ་བཞག་སྟེ། །གཡོན་པ་བཙན་དཀྱིལ་དུ་གནས་པ། །ཟླ་སྟེང་དེ་ཡི་འོད་ཀྱིས་མཚན། །ནོར་རྒྱུན་དེ་འདྲ་དང་པོ་ན། །མཆོག་སྦྱིན་འབྲས་ཀྱི་སྙེ་ལྡན་པ། །སྐུ་འཇམ་དབུ་ལ་མེ་ཏོག་གི། །སྣ་ཚོགས་ཐོད་བཅིངས་ཞི་བའོ། །གཞན་གྱི་སྤྱན་ཟླུམ་ཡིད་དགའ་བའོ། །སྦྱི་བོ་སྙིང་
ག་ལྟེ་བ་དང་། །གསང་བ་དང་ནི་རྐང་མཐིལ་དུ། །ཟླ་བ་ཉི་མར་གོ་རིམས་བཞིན། །རྟག་པ་མི་འཁྲུགས་རིན་ཆེན་ཆེ། །འོད་དཔག་མེད་དང་དོན་གྲུབ་བསྒོམ། །སྐུ་སོགས་བྱིན་གྱིས་བརླབ་བྱས་ནས། །བསྐུལ་བ་སྔོན་དུ་འགྲོ་བ་ཡི། །མི་བསྐྱོད་པ་ཡིས་དབུ་བརྒྱན་བྱ། །དེ་ཡི་ཡེ་ཤེས་

44-1-38a

སེམས་དཔའ་ཡི། །ཐུགས་ཀར་ཟླ་བར་ཛཾ་བཀོད་དེ། །སྔོན་བཞིན་ནོར་གྱི་ཆར་འབེབས་པ། །རྩོམ་པ་བཅུག་སྟེ་བཟླས་བརྗོད་བྱ། །ཨོཾ་ཨཱཿཛམྦྷ་ལ་ཛ་ལེནྡྲཱ་ཡ་ཧཱུྃ་ཕཊ་སྭཱ་ཧཱ། དེ་ཡིས་ཟླ་བ་ཕྱེད་ན་ནི། །ཉིན་རེ་གསེར་སྲང་སྟོང་སྟོང་གི། །སྒྲུབ་པ་པོ་ལ་རབ་
སྦྱིན་པར། །འགྱུར་བ་འདི་ལ་ཐེ་ཚོམ་མེད། །ཡང་ནི་རང་འདོད་སྦྱོར་བ་ཡིས། །ཡན་ལག་བརྒྱད་ནི་རྫོགས་བྱས་ཏེ། །རྡོ་རྗེ་པདྨ་སྦྱར་བརྩམས་ནས། །བདེ་གཤེགས་རང་གི་ཞལ་དུ་གཞུག །ཞུ་ནས་རྡོར་ཕྱུང་པད་ནང་དུ། །བྱང་ཆུབ་སེམས་ལ་ཛཾ་བཅུ་དགུ། །དེ་ལས་གཙོ་བོ་
གནོད་གནས་ཀྱིས། །འབྲེལ་པའི་འཁོར་ལོ་བརྟན་པར་བྱ། །དེ་ཡི་མིག་ལ་སོགས་པ་དང་། །སྐུ་གསུང་ཐུགས་ནི་བྱིན་གྱིས་བརླབས། །ཡང་ན་རང་གི་ས་བོན་གྱི། །འོད་ཀྱིས་བདེ་གཤེགས་དགུག་པར་བྱ། །ཞལ་ཞུགས་ཞུ་གྱུར་རྡོ་རྗེར་ཕྱུང་། །དེ་ཡི་ལྕི་ལ་ཛཾ་བཀོད་ནས། །
འོད་ཀྱིས་དྲངས་ནས་སྔགས་འདི་ཡིས། །ཞལ་དུ་དབབ་པར་བྱས་ནས་དབུལ། །ཨོཾ་ཨཱཿཛ་ད་ན་དེ་ཧི་དེ་ཧི་ཧི་ཧཱུྃ། དེ་ཡིས་ཚིམ་ནས་དབུ་རྒྱན་ལ། །རྡོ་རྗེ་སེམས་དཔའ་མཆོག་བསྒོམ་ཞིང་། །ཟླ་བ་ཕྱེད་དུ་དུས་བཞི་རུ། །དེ་འདྲའི་ཆུ་རྒྱུན་བྱིན་ནས་འགྲུབ། །ཇི་ཙམ་འདོད་པའི་ནོར་ལྡན་ཞིང་། །
འབྲུ་ཡི་ཆར་ནི་འབེབས་པར་མཛད། །སྦྱིན་པའི་ཕ་རོལ་ཕྱིན་རྫོགས་པའི། །ཡིད་བཞིན་ནོར་བུ་འདྲ་བར་འགྱུར། །ཐམས་ཅད་སྔ་མ་བཞིན་བྱས་ལ། །རང་འདོད་ལྷ་ཡི་རྣལ་འབྱོར་རམ། །འཇམ་དཔལ་རྡོ་རྗེ་རྣལ་འབྱོར་གྱིས། །གནོད་སྦྱིན་མོ་ནི་བསྒྲུབ་པར་བྱ། །ཅི་གསུངས་གཞལ་
ཡས་ཁང་བསྒོམས་ལ། །དེ་ཡི་སྦྱོར་བས་དབུས་སུ་གནས། །མདུན་དུ་གསེར་མདོག་ཟླ་བ་ལ། །ཟླ་གམ་ཐིག་ལེ་རྩེ་ལྡན་པ། །ཀྵིཾ་བསྒོམས་དེ་ལས་འོད་ཟེར་སྤྲོ། །ཁ་དོག་སྣ་ཚོགས་འཕྲོས་པ་ཡིས། །སྤྱན་སོགས་ལྷ་མོ་བཀོད་པ་ལ། །ཕོག་པས་གནོད་སྦྱིན་མོ་རུ་འགྱུར། །བཀུག་
སྟེ་དེ་ལ་ཐིམ་གྱུར་ནས། །དེ་གཟུགས་གནས་གྱུར་གནོད་སྦྱིན་མོ། །རྒྱུད་གཞན་ལས་ནི་གསུངས་པ་བཞིན། །སྒྲུབ་པོའི་མདུན་དུ་རྣམ་པར་བསམ། །གསེར་མདོག་མཛེས་པའི་ཆ་ལུགས་ཅན། །བུད་མེད་གཞོན་ནུའི་སྐྲ་ཚུལ་ལྡན། །དར་གྱི་ན་བཟས་སྟོད་སྨད་དཀྲིས། །རྒྱན་རྣམས་

44-1-38b

ཀུན་གྱིས་རྣམ་པར་བརྒྱན། །གཡས་པས་གདུགས་ནི་དཀར་པོ་ཐོགས། །གཡོན་པས་དཔག་བསམ་ཤིང་ལ་བརྟེན། །ཅུང་ཟད་འཛུམ་ཞིང་ཞལ་མཛེས་ཤིང་། །ཁ་དོག་ལྔ་པའི་མེ་ཏོག་ལས། །མེ་ཏོག་ཕྲེང་བ་སོགས་ཀྱིས་མཛེས། །བྱས་པའི་ཕྱེད་ཀྲུང་ཐོར་ཚུགས་ཅན། །རིན་
པོ་ཆེ་ཡི་རི་ཕུག་ན། །གནས་པར་རབ་ཏུ་བསམ་པའོ། །དེ་ཡི་གཟུགས་ལ་སོགས་པ་ལྔ། །ཤྲཱི་བུདྡྷ་ཧ་བྷ་ལྔ་ཡིས། །ལྷ་མོར་བསྐྱེད་ནས་གནས་གསུམ་དུ། །ཡི་གེ་གསུམ་གྱིས་བྱིན་གྱིས་བརླབས། །བསྐུལ་བ་སྔོན་དུ་འགྲོ་བ་ཡི། །དབང་བསྐུར་བྱས་པས་དབུ་རྒྱན་ལ། །གཤིན་
རྗེ་གཤེད་པོ་རྣམ་བསྒོམས་ཏེ། །དེ་ཡང་ངར་འཛིན་མནན་པར་བྱ། །དེ་ནས་རང་གི་ས་བོན་གྱི། །འོད་ཀྱིས་ཡེ་ཤེས་སེམས་དཔའ་བཀུག །ཐུགས་ཀར་བཅུག་སྟེ་སྙན་ཚིག་གིས། །བཞམས་ཏེ་བསྒོ་བས་བསྒྲུབ་པར་བྱ། །དེ་ནས་དེ་ཡི་ཡེ་ཤེས་སེམས། །རང་གི་སེམས་དཔར་རབ་བཅུག་
པས། །རང་བཞིན་གཅིག་ཏུ་གྱུར་བྱས་ནས། །སྔགས་ཀྱི་བཟླས་པས་འགྲུབ་པར་འགྱུར། །དེ་ནས་ཤ་དང་ཁྲག་དང་ནི། །ཏིལ་ཕྱེ་སྒུར་གདོང་ལ་སོགས་པའི། །གཏོར་མས་མཉེས་པར་བྱས་ནས་སུ། །ཞི་བའི་སྦྱོར་བས་བསྒྲུབ་པར་བྱ། །ཡང་ནི་དེ་ཡིས་མ་གྲུབ་ན། །དྲག་
ཤུལ་གྱིས་ནི་བསྒྲུབ་པར་བྱ། །ཡེ་ཤེས་སེམས་དཔའ་དེར་བཅུག་ལ། །རྡོ་རྗེ་སྦྱོར་བ་བརྩམ་པར་བྱ། །གནོད་སྦྱིན་མོ་ལ་འཁྱུད་བྱས་ནས། །རྡོ་རྗེ་རྩེ་ལྔ་འོད་ཟེར་འབར། །པདྨར་སྩལ་ནས་སྔགས་བཟླས་པས། །ནང་དུ་འོད་ཟེར་སྤྲོ་བར་བྱ། །ཨོཾ་ཨཱཿཡ་མཱནྟ་ཀྲྀཏ་ཡཀྵིཾ་ཡཀྵིཾ་ཛྭ་ལ་
ཛྭ་ལ་ཧཱུྃ་ཕཊ། འོད་ཟེར་མེ་ལྟར་འབར་བ་ཡིས། །ཡེ་ཤེས་སེམས་དཔའ་གདུང་བྱས་པས། །ཚ་སྟེ་སྐྲག་ནས་སྒྲུབ་པོ་ལ། །ཟླ་ཕྱེད་འཕྲལ་དུ་དངོས་གྲུབ་སྟེར། །སྒྲུབ་པོའི་མདུན་དུ་ཐལ་སྦྱར་ནས། །རྗེ་གཅིག་བདག་ལ་བཀའ་སྩོལ་ཞེས། །འཛུམ་པའི་བཞིན་བལྟས་བཀའ་ལེན་
ཏེ། །སྒྲུབ་པོས་དེ་ལ་བཀའ་སྩལ་པ། །མ་དང་སྲིང་མོ་ཆུང་མ་དང་། །གཡོག་མོའི་བྱ་བ་གྱིས་ཞེས་བྱ། །དེ་ནས་དེ་ཡིས་རྗེ་གཅིག་གི། །བཀའ་ནི་སྤྱི་བོས་ནོད་ཅེས་ལེན། །གལ་ཏེ་མ་ཡི་བྱ་བ་བྱེད། །ཐོ་རངས་སྲོད་ལ་འོངས་བྱས་ནས། །གསེར་སྲང་བཅུ་དང་མུ་ཏིག་གི། །ཧ་ར་

44-1-39a

བདུན་ནི་བཞག་ནས་འགྲོ། །སྲིང་མོ་ཡི་ནི་བྱ་བ་བྱེད། །ཉི་མའི་གུང་ལ་དྲུང་འོངས་ཏེ། །གསེར་སྲང་བདུན་དང་ཧ་ར་བདུན། །ཕུལ་ཏེ་མིང་པོ་སང་འོང་ཟེར། །གལ་ཏེ་ཆུང་མའི་བྱ་བྱེད་ན། །ཡིད་ཀྱི་འདོད་པའི་དུས་སུ་ནི། །འཕྲལ་དུ་དྲུང་དུ་འོང་བར་བྱེད། །
ཅང་མི་སྨྲ་བར་འདོད་པ་སྤྱད། །གསེར་སྲང་ལྔ་དང་ཧ་ར་གཅིག །བཞག་སྟེ་རང་གི་གནས་སུ་འགྲོ། །གལ་ཏེ་གཏམ་སྨྲས་གྱུར་ན་ནི། །ཕྱིན་ཆད་ཅི་ཡང་མི་སྟེར་རོ། །གཡོག་མོའི་བྱ་བ་བྱེད་པ་ཡིས། །ཟས་དང་གོས་དང་གསེར་ལ་སོགས། །བཞོན་པ་ལ་སོགས་ཅི་འདོད་པ། །
བཀའ་ཙམ་གྱིས་ནི་སྦྱོར་བར་བྱེད། །གཞན་ནི་ན་ཆུང་ཡིད་དུ་འོང་། །བཀུག་ནས་བྱིན་ཏེ་རང་གནས་སྐྱེལ། །དེ་སོགས་གནོད་སྦྱིན་མོ་རྣམས་ཀྱི། །ཡོན་ཏན་བསམ་གྱིས་མི་ཁྱབ་ཐོབ། །སྔགས་ཀྱི་ཁྱད་པར་རྣམས་ཀྱི་སྒྲུབ་པ་ཁྱད་པར་བཤད་ཟིན་ཏོ། །ད་ནི་ཞི་བའི་ལས་ཀྱི་རིམ་
པ་བཤད་པར་བྱའོ། །སྤྱན་གྱི་ཚུལ་གྱི་རྣལ་འབྱོར་གྱིས། །བསམ་གཏན་འདི་ནི་བརྟག་པར་བྱ། །ཡང་ན་མོས་པའི་རྣམ་པ་ཡིས།  །རྣལ་འབྱོར་རབ་ཏུ་བརྩམ་པའོ། །གྲོང་ངམ་ཡང་ན་གྲོང་ཁྱེར་རམ། །ལྗོངས་རྣམས་གང་བའི་ནད་ལ་སོགས། །ཞི་བར་བྱ་ཕྱིར་བསམ་གཏན་
མཆོག །འདི་ནི་རྟག་ཏུ་སྦྱར་བར་བྱ། །ཐམས་ཅད་སྔ་མ་བཞིན་བྱས་ལ། །ཞི་བའི་སེམས་ཀྱིས་ཤར་བལྟས་ཏེ། །རྡོ་རྗེ་རྩེ་མོ་ལྔ་པ་མཆོག །ཏ་ལ་བདུན་ཙམ་ནམ་མཁའ་ལ། །ཕྱོགས་དེ་འགྲེང་བུར་རྣམ་པར་བསམ། །དེ་ཡི་བུམ་པ་གཞལ་ཡས་ཁང་། །གདན་དང་བཅས་པ་རྣམ་བསམས་ཏེ། །དེ་ནང་
རྟག་པའི་འཁོར་ལོ་ནི། །དཀར་པོ་སྔོན་བཞིན་ཉི་ཤུ་བསྒོམ། །མཆོད་བསྟོད་བདུད་རྩི་མྱང་བྱས་ལ། །སྔགས་ཀྱི་བཟླས་པ་ལས་བྱུང་བའི། །འོད་ཟེར་རྣམ་པར་སྤྲོ་བར་བྱ། །ཨོཾ་ཨཱཿབྲུཾ་ཛི་ན་ཛི་ཀ་ཆེ་གེ་མོའི་ནད་ཛྭ་ལ་ཛ་ཧཱུྃ་སྭཱ་ཧཱ། དེ་བརྗོད་ལྷ་དང་རྡོ་རྗེ་ཡི། །ལུས་ལས་འཕྲོས་པའི་འོད་ཟེར་
གྱིས། །ཟད་དུས་མེ་འདྲར་འགྲོ་ཀུན་གྱི། །ནད་རྣམས་རབ་ཏུ་བསྲེག་འགྱུར་རོ། །ཤེལ་ལྟར་རབ་ཏུ་གནས་པ་ལ། །མི་ལྡོག་བྱ་ཕྱིར་རྒྱས་བྱའི་ཕྱིར། །གསང་སྔགས་འདི་ནི་བརྗོད་པ་ཡིས། །སྤྱན་ལ་སོགས་པ་སྤྲོ་བར་བྱ། །ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ནི་སརྦ་ཨརྠ་སཱ་དྷ་ནི་ནད་

44-1-39b

ཤཱནྟིཾ་ཀུ་རུ་སྭཱ་ཧཱ། མཁའ་དབྱིངས་ཡོངས་སུ་བཀང་བྱས་ནས། །བདུད་རྩི་ལྔས་གང་བུམ་པ་ཡིས། །དེ་རྣམས་སྤྱི་བོར་བཀྲ་ཤིས་སྒྲ། །ལྡན་པར་བླངས་ནས་དབང་བསྐུར་སྩོལ། །ཨོཾ་ཀཱ་ཡ་བཛྲ་ནད་ཤཱནྟིཾ་ཀུ་རུ་སྭཱ་ཧཱ། ཨོཾ་ཝཱ་ཀ་བཛྲ་ནད་ཤཱནྟིཾ་ཀུ་རུ་སྭཱ་ཧཱ། ཨོཾ་ཙིཏྟ་བཛྲ་ནད་ཤཱནྟིཾ་ཀུ་རུ་སྭཱ་ཧཱ། དེ་རྣམས་
བརྗོད་པས་རྡོ་རྗེ་གསུམ། །བ་སྤུའི་བུ་ག་ལས་སྤྲོས་པས། །སྔོན་བཞིན་དབང་བསྐུར་རབ་བྱིན་ན། །ངེས་པའི་ནད་ཀྱང་ཞག་བདུན་འཇིག །རྡོ་རྗེ་བསམ་གཏན་འདི་ཡིས་ནི། །གང་དཀའ་བའང་རབ་ཏུ་འགེངས། །དེ་ནི་སྦྱིན་པ་རབ་གྲུབ་ཅིང་། །ཡིད་བཞིན་ནོར་བུ་དཔལ་འདྲར་
འགྱུར། །བསྐལ་པ་གསུམ་གྱི་ཡུན་གནས་ཤིང་། །སངས་རྒྱས་ཐམས་ཅད་བྱིན་གྱིས་རློབ། །འདི་ནི་སངས་རྒྱས་ཐམས་ཅད་ཀྱི། །གསང་བའི་སྐུ་སྟེ་སྐྱོན་མེད་པའོ། །ཡང་ན་འགའ་ཞིག་དོན་གྱི་ཕྱིར། །ཐམས་ཅད་སྔ་མ་བཞིན་བྱས་ལ། །ཆུ་ཟླའི་དཀྱིལ་འཁོར་དབུས་སུ་ནི། །
རྟག་པའི་འཁོར་ལོ་ཉི་ཤུས་བསྐྱེད། །མཆོད་བསྟོད་བདུད་རྩི་མྱང་བྱས་ལ། །དེ་ཡི་ཡེ་ཤེས་སེམས་དཔའ་ཡི། །ཐུགས་ཀར་ཟླ་བའི་སྟེང་དུ་ནི། །ཞི་བར་འདོད་པ་གཞག་པར་བྱ། །དེ་ནས་གོང་དུ་གསུངས་པ་ཡི། །སྤྱན་མའི་སྔགས་ནི་རིག་མར་བཅས། །བཟླས་བརྗོད་བྱས་པས་བ་སྤུ་ཡི། །
བུ་ག་ལས་ནི་སྤྱན་ཚོགས་སྤྲོ། །དེ་རྣམས་འོད་ཟེར་ལྔ་འབར་བའི། །འོད་ཟེར་ཚུལ་གྱིས་ནད་པ་ལ། །ཞི་བར་བྱ་ཕྱིར་རྒྱས་བྱའི་ཕྱིར། །དེ་ལ་གཟི་བརྗིད་དབབ་པར་བྱའོ། །ཡང་ན་མི་ལྡོག་བྱ་བའི་ཕྱིར། །གོང་གི་དབྱུང་བའམ་ས་བོན་ནམ། །ཡི་གེ་གསུམ་པར་རིག་པར་བཅས། །
བཟླས་པས་རྟག་པའི་ཚོགས་སྤྲོ་བྱ། །དེ་རྣམས་སྤྱན་དང་བཅས་པ་ཡིས། །བདུད་རྩིས་གང་བའི་བུམ་པ་བཟུང་། །དབྱངས་དང་བཅས་པས་དབང་བསྐུར་བྱ། །ནད་ནི་ཞག་བདུན་གྱིས་ཞི་བྱེད། །རྡོ་རྗེ་བསམ་གཏན་འདི་ཡིས་ནི། །དགང་དཀའ་བའང་རབ་ཏུ་འགེངས། །དེ་ནི་དེ་མ་ཐག་ཏུ་
ཡང་། །དཔལ་ལྡན་རྡོ་རྗེ་འདྲ་བར་འགྱུར། །ཐམས་ཅད་སྔ་མ་བཞིན་བྱས་ལ། །སྤྱན་མའི་དཀྱིལ་འཁོར་འཁོར་ལོ་མཆོག །ཆོ་ག་ཉི་ཤུས་རྫོགས་བྱས་ལ། །མཆོད་བསྟོད་བདུད་རྩི་མྱང་བ་བྱ། །དེ་ཡི་ཡེ་ཤེས་སེམས་མ་ཡིས། །ཤི་བའི་རོ་ནི་གཞག་བྱས་ན། །སྔགས་འདི་རྣམ་

44-1-40a

པར་བརྗོད་པར་བྱ། །ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷི་ལོ་ཙ་ནི་སརྦ་ཨརྠ་སཱ་དྷ་ནི་ཤི་བ་སོས་པར་གྱུར་ཅིག་སྭཱ་ཧཱ། དེ་ཡིས་དེ་ནས་ལྃ་འཕྲོས་པའི། །ལྕགས་ཀྱུའི་གཟུགས་སུ་ཕྱུང་བྱས་ཏེ། །དེ་ཡིས་ཤི་བའི་རྣམ་པར་ཤེས། །བར་མ་དོ་ན་གནས་པའམ། །ཡང་ན་སྐྱེ་
གནས་ཆུད་ཀྱང་རུང་། །དྲི་མེད་མར་མེའི་ཚུལ་གནས་པའི། །བཀུག་སྟེ་རོ་ཡི་སྙིང་ག་རུ། །བཅུག་ནས་དབྱུང་སྔགས་དེ་ལ་དགོད། །དེ་ཡི་ཟེར་གྱིས་རོ་བསྲེགས་ཏེ། །རང་མིན་ཐ་མས་སྤྱན་མ་ཡི། །གཟུགས་སུ་བསྐྱེད་ནས་ཕུང་པོ་དང་། །ཁམས་དང་སྐྱེ་མཆེད་ཀྱིས་དག་བྱ། །
དེ་ལུས་གང་བའི་ཕྲེང་སྔགས་ཀྱིས། །ཕྱི་ནང་བར་མཚམས་མེད་པར་གཏམས། །སྔགས་ལས་སྔོན་བཞིན་སྤྱན་མ་སྤྲོ། །བསྡུས་ནས་འོད་ཟེར་སྤྲོ་བར་བྱ། །བསྐལ་པའི་བར་དུ་གནས་བྱའི་ཕྱིར། །སངས་རྒྱས་རྟག་པའི་ཚོགས་སྤྲོས་པའི། །དབང་བསྐུར་བྱས་པ་ལས་སྐྱེས་པའི། །
ཤི་བ་ཞག་ནི་བདུན་ནས་འཚོ། །འཚོ་ནའང་ལྔ་བརྒྱའམ་སྟོང་གི་བར། །འདི་ཉིད་དུ་ནི་གནས་པར་འགྱུར། །སྤྱན་གྱི་ཡེ་ཤེས་ཀྱིས་བཏབ་ཕྱིར། །རིམ་གྱིས་སངས་རྒྱས་ཐོབ་པའོ། །ཐམས་ཅད་སྔ་མ་བཞིན་བྱས་ཏེ། །རྣམ་པར་སྣང་མཛད་རྣལ་འབྱོར་པས། །ལྟ་བ་རྡོ་རྗེ་དུག་
ལ་སོགས། །མི་བཟད་དུག་ནི་དབྲོག་པར་བྱ། །བདག་ཉིད་གཡས་པའི་བར་མ་རུ། །འཁོར་ལོ་དཀར་པོ་རྩིབས་བརྒྱད་པ། །ལྟེ་བར་ཨོཾ་དཀར་པོ་ཡིས་མཚན། །འོད་ཟེར་དཀར་པོ་སྤྲོས་ནས་བརྩམ། །ནད་པ་མདུན་དུ་གཞག་བྱས་ལ། །སྒྲུབ་པོས་སྤྱི་བོ་ལ་བཞག་སྟེ། །དུག་
རྣམས་དབྲོག་པའི་ཆེད་དུ་ནི། །སྔགས་འདི་བརྗོད་ལ་འོད་ཟེར་སྤྲོ། །ཨོཾ་ཨཱཿཛི་ན་ཛི་ཀ་ཆེ་གེ་མོའི་དུག་ཞི་བར་མཛོད་ཅིག་ཧཱུྃ་སྭཱ་ཧཱ། བརྗོད་པས་འོད་ཟེར་དཀར་པོ་ནི། །སྤྱི་བོར་ཞུགས་པས་ནག་པོ་དབྱུང་། །འོད་ཟེར་དེ་ཡིས་ནམ་མཁའི་ཁམས། །ཕྱོགས་བཅུ་ཀུན་དུ་གཏོར་བར་བྱ། །
དེ་ཡི་ཤུལ་དུ་འོད་ཟེར་ནི། །དཀར་ཞིང་བསིལ་བ་ཕབ་བྱས་པས། །ཞག་བདུན་ན་ནི་ནམ་མཁའ་ཀུན། །གང་བའི་དུག་ཀྱང་མེད་པར་བྱེད། །ཡང་ནི་སྔོན་བཞིན་ཐམས་ཅད་བྱ། །མི་བསྐྱོད་འཁོར་ལོ་དང་ལྡན་པས། །ཧ་ལ་ཧ་ལ་ལ་སོགས་པ། །སྦྱོར་བ་འདི་ཡིས་གསོ་བར་བྱ། །

44-1-40b

བསྒྲུབ་བྱ་མདུན་དུ་རབ་བཞག་ལ། །དེ་ཡི་ཐུགས་ཀར་ཧཱུྃ་བྱུང་བའི། །རྡོ་རྗེ་དཀར་པོ་རྩེ་ལྔ་པ། །འོད་ཟེར་དཀར་པོ་འབར་བ་བསམ།  །དེ་ཡང་ཟླ་འོད་ལྟར་བསིལ་ཞིང་། །བསིལ་བས་ལུས་ཀུན་ཁྱབ་པའི་དུག །སྙིང་ག་ལྐོག་མ་དཔྲལ་བ་དང་། །མགོ་བོའི་གནས་སུ་ཡང་དག་
བསྡུ། །དེ་ལྟར་ལན་གསུམ་པར་བསམས་ལ། །ཐམས་ཅད་སྙིང་གའི་དབུས་སུ་བསྡུ། །དེ་ནས་འདི་ནི་བརྗོད་པ་ཡིས། །ནག་པོ་སྐྱུག་པའི་ཚུལ་དུ་བསམ། །ཨོཾ་ཨཱཿབཛྲ་དྷྲྀཀ་ཆེ་གེ་མོའི་དུག་སོས་པར་གྱུར་ཅིག་སྭཱ་ཧཱ། དེ་ལྟར་བྱས་པས་ཞག་བདུན་ན། །ནམ་མཁའི་ཁམས་ཀུན་
གང་བ་ཡི། །དུག་རྣམས་ཀྱང་ནི་ཟད་བྱེད་ན། །བསྒྲུབ་བྱའི་ལུས་ནི་སྨོས་ཅི་དགོས། །སྔོན་བཞིན་ཐམས་ཅད་རབ་བྱས་ལ། །འོད་དཔག་མེད་ཀྱི་རྣལ་འབྱོར་གྱིས། །འབྲས་དང་ཕོལ་མིག་འབྲུམ་ཕྲན་སོགས། །ཉེ་བའི་དུག་རྣམས་དབྱུང་བར་བྱ། །གཡས་ཀྱི་བར་མས་ཨས་བསྐྱེད་
པའི། །པདྨ་དཀར་པོ་འདབ་བརྒྱད་པའི། །ལྟེ་བར་འོད་ཟེར་ལྔ་འབར་བའི། །ཨ་བསམས་ནས་ནི་བྱབ་པར་བྱ། །བསྒྲུབ་བྱ་མདུན་དུ་རབ་བཞག་ལ། །ཨ་ཡི་འོད་ཟེར་གྱིས་བསྡུས་ནས། །ནག་པོའི་མདོག་ནི་རྣམ་པ་རུ། །བསྒྲུབ་བྱའི་ལུས་ལས་བྱུང་བར་བསམ། །དེ་ཡིས་
ཀུན་དུ་རབ་སྤྲོས་པས། །དུག་སྤངས་ཁ་དོག་དཀར་པོ་བསམ། །དེ་ལྟར་དུས་བཞིར་གསང་སྔགས་འདི། །བཟླས་པས་ཞག་བདུན་དུག་རྣམས་འབྱང་། །ཨོཾ་ཨཱ་རོ་ལྀཀ་ཆེ་གེ་མོའི་ཉེ་བའི་དུག་ཞི་བར་གྱུར་ཅིག་ཧཱུྃ་སྭཱ་ཧཱ། དེ་ཡིས་ལས་སྐྱེས་སྙིང་འབར་བའི། །དུག་རྣམས་ཐམས་ཅད་
ཟད་བྱེད་ན། །བསྒྲུབ་བྱའི་ལུས་གཅིག་ལ་གནས་པའི། །ཉེ་བའི་དུག་རྣམས་སྨོས་ཅི་དགོས། །ཐམས་ཅད་སྔ་མ་བཞིན་བྱས་ལ། །ཁྲོ་བོའི་རྒྱལ་པོ་རྟ་མགྲིན་ནི། །ཁ་དོག་དཀར་པོ་རབ་བསྒོམས་ཏེ། །དུག་རྣམས་ཐམས་ཅད་བསལ་བར་བྱ། །བསྒྲུབ་བྱ་མདུན་དུ་གཞག་བྱས་ལ། །དེ་ཡི་
སྙིང་གར་ཟླ་བ་ལ། །ཧཱུྃ་དཀར་འོད་ཟེར་དཀར་པོ་འབར། །འོད་ཟེར་དེ་ཡིས་ལུས་ཀུན་གྱི། །དུག་རྣམས་རབ་ཏུ་སྦར་བྱས་ལ། །གཡས་པའི་བར་མར་ཧཱུྃ་དཀར་པོ། །དེ་བསྐྱེད་པདྨ་འདབ་མ་བརྒྱད། །དཀར་པོའི་ལྟེ་བར་ཧཱུྃ་བསམ་མོ། །རང་མིང་ཡི་གེ་དང་པོ་ཡིས། །བསྒྲུབ་

44-1-41a

བྱ་རྣམ་པར་བསམས་ནས་ནི། །གསང་སྔགས་འདི་ཡིས་དེ་ཡི་ནི། །དུག་རྣམས་ཀུན་དུ་བསལ་བར་བྱ། །ན་མཿས་མནྟ་ཀཱ་ཡ་ཝཱཀ་ཙིཏྟ་བཛྲཱ་ཎཱཾ། ཨོཾ་ཧཱུྃ་ཧཱུྃ་ཧཱུྃ་ཏུ་རུ་ལ་བི་རུ་ལ། སརྦ་བི་ཤ་ག་ཏ་ཡ། ཛ་ལི་ཏ། བི་སྥུ་ལིང་ག་ཏ་ཏ། ཧ་ས་ཀེ་ས་རི་ས་ཏ་
ཏོ་པ། བཛྲ་ཁུ་ར་ནི་ར་ག་ཏ། ཙ་ལི་ཏ་བ་སུ་ཏཏ་ལ་ནིཤྩ་ས་མ་རུ་ཏོད་ཀྵི་བི་ད་ད་ར་ནི་ད་ར། བི་ཤ་ན་ཏ་ཧ་ས། ཨ་པཱ་ར་མི་ཏཱ། པ་ལ་པ་ར་ཀྲ་མ། ཨཱརྱ་བེ་ག་སྟེ་བྷུ་ཏ་ག་ན། བྷཱུ་ཏ་བྷུ་ཏ། ཧ་ཡ་གྲཱི་བ་ཁ་ད་ཁ་ད། པ་ར་མནྟྲ་ན་ཚིནྡྷ་ཚིནྡྷ། སིདྡྷི་མེ་དེ་མ་མེ་ད་ད་བི་ཤ །ཨཱ་བེ་ཤ་ཡ་རཀྵ་ཛ། 
བི་ཤ་ཙ་ནན། སརྦ་གྲ་ཧེ་ཤྩ་བྱ། པྲ་ཏི་ཏ་ཏོ་ཏ་བྷ་བ་བཛྲ་དཾཥྚ་ཀི་ཙ་མཱ་ར་ཡ་སི། ཨི་དཾ་དུཥྚ། གྲ་ཧ་ན་དུཥྚ་སརྦཱ་ན། དུ་ན་དུ་ན། མ་ཐ་མ་ཐ། མ་ཏ་མ་ཏ། བནྡྷ་བནྡྷ། བུདྡྷ་ར་མ་སངྒ་ནུ་ཛྙཱ་ན་ཏ་ཀ་ར་ནཾ། ཀུ་རུ་སྲི་བན་ཧ་ཡ་གྲཱི་བ་ཡ་ཕཊ། བཛྲ་ཡ་ཕཊ། བཛྲ་ག་ཏ་ཡ་ཕཊ། བཛྲ་ནཻ་ཏྲ་ཡ་
ཕཊ། བཛྲ་དཾཥྚ་ཡ་ཕཊ། བཛྲ་ཁུ་ར་ཡ་ཕཊ། བཛྲ་ཁུ་ར་ནིར་ག་ཏ་ཡ་ཕཊ། པ་ར་མནྟ་བི་ནཱ་ཤ་ན་ཡ་ཕཊ། ཏྲཻ་ལོ་ཀྱ་ཏ་བ་ཡི་ཀ་ར་ཡ་ཕཊ། སརྦ་ཀརྨཤྠ་པྲ་ཏི་ཧ་ཏ་ཡ་ཕཊ། བཛྲ་ཀུ་ལ་ཏ་པ་ན་ཕཊ། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། སྭཱ་ཧཱ། ཧཱུྃ་ལས་འོད་ཟེར་དཀར་པོ་ཡི། །བདུད་རྩི་བབས་
པས་བསྒྲུབ་བྱ་ཡི། །ལུས་ལས་ནག་པོའི་དུག་བླངས་ཏེ། །ས་ལ་སོགས་པར་སྤྲོ་བར་བྱ། །ཤུལ་དུ་བདུད་རྩི་དཀར་པོ་ཡི། །འོད་ཟེར་བབ་པར་བྱས་ནས་སུ། །དེ་བཞིན་ཐུན་བཞིར་བྱབས་གྱུར་ན། །ཞག་བདུན་ན་ནི་ནམ་མཁའི་དབྱིངས། །དུག་གིས་ཡོངས་སུ་གང་བ་ཡི། །
རྡོ་རྗེ་མི་བཟད་པ་ཡི་དུག །སྦྱར་བ་ཙམ་གྱིས་སེལ་བར་བྱེད། །སྔོན་བཞིན་ཐམས་ཅད་རབ་བྱས་ལ། །ཡང་ནི་དུག་རྣམས་ཟད་བྱའི་ཕྱིར། །སྦྱོར་བ་རྣམས་ལ་བརྒྱད་ལྡན་པར། །གཙུག་ཏོར་འཁོར་ལོས་སྒྱུར་བ་བསྒོམ། །གསེར་འདྲ་གཡས་གནག་གཡོན་དཀར་ཏེ། །དང་པོས་
རང་འོད་རིག་མ་འཁྱུད། །གཡས་པས་འོག་འབྱུང་འཁོར་ལོ་འཛིན། །ལྷག་མས་རལ་གྲི་རིན་ཆེན་པད། །འདི་ལ་རྣམ་སྣང་ལྟ་བུར་སྦྱར། །བྲུཾ་ལས་འཁོར་ལོ་རྩིབས་བརྒྱད་ནི། །དཀར་པོ་བྲུཾ་གྱིས་མཚན་པ་བསམ། །བསྒྲུབ་བྱ་མིང་གི་དང་པོར་བསྐྱེད། །སྒྲུབ་པོའི་མདུན་དུ་

44-1-41b

རབ་བཞག་ལ། །སྦྱོར་བ་གསུམ་གྱིས་སྤང་བྱའི་ཕྱིར། །གསང་སྔགས་འདི་ནི་བརྗོད་པས་སུ། །བྲུྃ་ལས་འོད་ཟེར་དཀར་པོ་སྤྲོ། །ན་མཿས་མནྟ་ཀཱ་ཡ་ཝཱཀ་ཙིཏྟ་བཛྲཱ་ཎཱཾ། ཨོཾ་ཨཱཿསརྦ་ལ་བུ་ཏི། ལོ་ཀ་དཪྴི། ཡནྟྲ་མནྟྲ་ཏནྟྲ། ཙཱུརྞ་པྲ་ཡོ་གི་ཏི། མ་མ་ཀྲྀ་ཏི་ཡེ་ན་ཀེ་ན་ཙི་ཏ་ཀྲྀ་ཏི། རྐཱ་
ནི་སརྦ་ནྟུ། ཚིནྡྷ་ཚིནྡྷ། བིནྡྷ་བིནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། ཀཾ་པ་ཡ་ཀཾ་པ་ཡ། བདྷྭིཾ་ས་ཡ། ཤ་ཏ་ས་ཧ་སྲཱ། བི་ཙཱུརྞ་ཡ། ཨོཾ་ཨུཥྞཱི་ཥ་བཛྲ་ཙཀྲ་ཝརྟི། བྷྲཱུྃ་བྷྲཱུྃ་བྷྲཱུྃ། ཧཱུྃ་ཧཱུྃ་ཧཱུྃ། ཕཊ་སྭཱ་ཧཱ། དེ་ནས་འོད་ཟེར་ཚོགས་སྤྲོས་པས། །སྤྱི་བོ་ནས་ནི་ཕུལ་བྱས་ཏེ། །རྐང་པའི་
མཐིལ་དུ་ཕྱུང་བྱས་ལ། །ས་ཡི་གཏིང་དུ་མནན་པར་བྱ། །ཡང་ནི་འོད་ཟེར་དེ་ཡིས་ཀྱང་། །མདུན་དུ་བསྣུན་པས་དུག་རྣམས་ཀུན། །རྒྱབ་ཏུ་ཕྱུང་བས་ས་ལ་སོགས། །འབྱུང་བ་རྣམས་སུ་སྤྲོ་བར་བྱ། །དེ་བཞིན་འོད་ཟེར་གྱིས་བསྡུས་ནས། །ཕྱུང་སྟེ་གཏོར་ནས་དེ་ཤུལ་དུ། །
བདུད་རྩི་དཀར་པོ་རབ་འབབ་པས། །དུག་ནི་རྣམ་པར་སྤང་བར་བྱ། །དཀར་པོ་དང་ནི་སེར་པོ་དང་། །ནག་པོ་བསམ་གཏན་འདི་ཡིས་ནི། །རྡོ་རྗེ་གསུམ་གྱི་སྤྲུལ་པ་ཡིས། །དུག་རྣམས་ཀྱང་ནི་ཞག་བདུན་འབྱིན། །ཡང་ནི་སྔོན་བཞིན་ཐམས་ཅད་བྱ། །རྣམ་པར་སྣང་མཛད་
འཁོར་ལོ་ཆེ། །ཁ་དོག་དཀར་པོ་བསམ་བྱས་ཏེ། །འདོན་པའི་སྔགས་ཀྱིས་ནད་རྣམས་བསལ། །ནད་པ་མདུན་དུ་གཞག་བྱས་ཏེ། །བདག་ཉིད་ཁྲོས་ནས་གསང་སྔགས་འདི། །བརྗོད་པས་འོད་ཟེར་ཚོགས་སྤྲོས་པས། །བསྒྲུབ་བྱའི་ལུས་ལ་གཞུག་པར་བྱ། །ཨོཾ་ཨཱཿ
ཛི་ན་ཛི་ཀ་ཆེ་གེ་མོའི་ནད་ཨ་པ་ན་ཡ་ཧཱུྃ། དེ་ཡིས་ནད་རྣམས་བསྐུལ་བར་བྱ། །རླུང་མཁྲིས་བད་ཀན་ལས་བྱུང་བའི། །སྤྲེའུའི་གཟུགས་བརྙན་ལྟ་བུའམ། །དེ་བཞིན་ཁྱི་ནི་རྐང་པ་གསུམ། །ཡི་དགས་གཅེར་བུའི་གཟུགས་དག་ཏུ། །བསྒྲུབ་བྱའི་ལུས་ལས་ཕྱུང་ནས་སུ། །
ཕྱོགས་བཅུ་དག་ཏུ་རབ་རྒྱུག་ཅིང་། །འབྲོས་པར་གྱུར་པར་རྣམ་པར་བསམ། །ཨོཾ་ཨཱཿཛི་ན་ཛི་ཀ་ཆེ་གེ་མོའི་ནད་མཱ་ར་ཡ་ཧཱུྃ་ཕཊ། བརྗོད་པས་ཐུགས་ལས་འཕྲོས་པ་ཡི། །ཁྲོ་བོའི་འཁོར་ལོས་མཚན་པ་ཡི། །སྤྲེའུ་ལ་སོགས་པའི་ནད་རྣམས་ཀུན། །མཚན་མས་ཕྱེ་མར་རླག་

44-1-42a

པར་བྱེད། །བཀུག་སྟེ་འོངས་པ་རང་གནས་ཀྱི། །མཚན་མས་ཕྱེ་མར་བརླག་འགྱུར་ཏེ། །བསྒྲུབ་བྱ་ནད་དང་རྣམ་བྲལ་བས། ཤེལ་འདྲའི་ཁ་དོག་ལྟ་བུར་བསམ། །དེ་ནས་བདག་ཉིད་འཁོར་ལོ་ཆེ། །ཁ་དོག་དཀར་པོ་རྣམ་བསམས་ལ། །སྔོན་
བཞིན་སྤྱན་མའི་སྔགས་བརྗོད་པས། །འོད་ཟེར་འབབ་པས་ལུས་དགང་བྱ། །ཨོཾ་ཨཱཿཛི་ན་ཛི་ཀ་ནད་པ་ཆེ་གེ་མོ་ལ་ཨ་བྷི་ཥིཉྩ་ཧཱུྃ་སྭཱ་ཧཱ། ཞེས་བརྗོད་སྔོན་བཞིན་རྟག་པའི་ཚོགས། །སྤྱན་དང་བཅས་པས་བུམ་པ་འཛིན། །དབང་བསྐུར་བྱས་ཏེ་བརྒྱ་རྩ་བརྒྱད། །ཞག་བདུན་
བར་དུ་དུས་བཞིར་བྱ། །དེ་ལྟར་བྱས་ན་ཕྱི་ནང་གི། །མྱོང་བར་ངེས་པའི་ནད་ཀུན་ཡང་། །རྡོ་རྗེ་འཛིན་པའི་བཀའ་བཞིན་དུ། །ཐེ་ཚོམ་མེད་པར་འབྱང་བར་འགྱུར། །དེ་བཞིན་མི་བསྐྱོད་རིན་ཆེན་དཔལ། །འོད་དཔག་མེད་དང་དོན་ཡོད་གྲུབ། །ཡི་གེའི་ཚིག་ནི་གང་མོས་པ། །དད་པ་
བསྐྱེད་དེ་ནད་རྣམས་བསལ། །ཨོཾ་ཨཱཿབཛྲ་དྷྲྀཀ་ཆེ་གེ་མོའི་ནད་ཨ་པ་ན་ཡ་ཧཱུྃ། ཨོཾ་ཨཱཿརཏྣ་དྷྲྀཀ་ཆེ་གེ་མོའི་ནད་ཨ་པ་ན་ཡ་ཧཱུྃ། ཨོཾ་ཨཱཿཨཱ་རོ་ལྀཀ་ཆེ་གེ་མོའི་ནད་ཨ་པ་ན་ཡ་ཧཱུྃ། ཨོཾ་ཨཱཿཔྲཛྙཱ་དྷྲྀཀ་ཆེ་གེ་མོའི་ནད་ཨ་པ་ན་ཡ་ཧཱུྃ། ཨོཾ་ཨཱཿབཛྲ་དྷྲྀཀ་ཆེ་གེ་མོའི་ནད་མཱ་ར་ཡ་ཕཊ་ཧཱུྃ། ཨོཾ་
ཨཱཿརཏྣ་དྷྲྀཀ་ཆེ་གེ་མོའི་ནད་མཱ་ར་ཡ་ཕཊ་ཧཱུྃ། ཨོཾ་ཨཱཿཨཱ་རོ་ལྀཀ་ཆེ་གེ་མོའི་ནད་མཱ་ར་ཡ་ཕཊ་ཧཱུྃ། ཨོཾ་ཨཱཿཔྲཛྙཱ་དྷྲྀཀ་ནད་པ་ཆེ་གེ་མོའི་ནད་མཱ་ར་ཡ་ཕཊ་ཧཱུྃ། ཨོཾ་ཨཱཿབཛྲ་དྷྲྀཀ་ནད་པ་ཆེ་གེ་མོ་ལ་ཨ་བྷི་ཥིཉྩ་ཧཱུྃ་སྭཱ་ཧཱ། ཨོཾ་ཨཱཿརཏྣ་དྷྲྀཀ་ནད་པ་ཆེ་གེ་མོ་ལ་ཨ་བྷི་ཥིཉྩ་ཧཱུྃ་སྭཱ་ཧཱ། ཨོཾ་ཨཱཿཨཱ་རོ་
ལྀཀ་ནད་པ་ཆེ་གེ་མོ་ལ་ཨ་བྷི་ཥིཉྩ་ཧཱུྃ་སྭཱ་ཧཱ། ཨོཾ་ཨཱཿཔྲཛྙཱ་དྷྲྀཀ་ནད་པ་ཆེ་གེ་མོ་ལ་ཨ་བྷི་ཥིཉྩ་ཧཱུྃ་སྭཱ་ཧཱ། དེ་ཡིས་ནད་རྣམས་ཕྱུང་བྱས་ཏེ། །རང་རང་མཚན་མས་སྔོན་བཞིན་བསད། །སྟོབས་དང་དབང་བསྐུར་སོགས་པ་ཡི། །སྔ་མ་བཞིན་དུ་རབ་ཏུ་བྱ། །སྦྱོར་བས་ཟློས་པས་ཞག་
བདུན་དུ། །མྱོང་བར་ངེས་པའི་ནད་རྣམས་ཀུན། །རྡོ་རྗེ་བསམ་གཏན་ཆོ་ག་དེས། །ཕྱི་དང་ནང་དུ་བཅས་པ་སེལ། །ད་ནི་རྒྱས་པའི་ལས་ཀྱི་ལམ་གྱི་རིམ་པ་རྒྱས་པར་བཤད་པར་བྱའོ། །སྔོན་བཞིན་བཟླས་པའི་ཆོ་ག་ནས། །དབང་བསྐུར་ཡན་ཆད་རྫོགས་བྱས་ཏེ། །རྡོ་རྗེ་པདྨོ་ཅན་

44-1-42b

གྱི་ནི། །སྦྱོར་བས་རྒྱས་པའི་ལས་བརྩམ་མོ། །སྟོབས་ལ་སོགས་པའི་ཆོས་རྣམས་དང་། །ལྷག་མའི་ཚེར་འགྱུར་འདོད་པ་དང་། །མཛོད་པོ་ཆེ་ནི་རྒྱས་བྱས་ཕྱིར། །རྒྱས་པའི་སེམས་ཀྱིས་བྱ་བའོ། །བཀའ་ཡི་འཁོར་ལོ་སྦྱོར་བ་ཡིས། །སྔོན་བཞིན་ཁང་པ་བརྩེགས་པའི་
དབུས། །རྡོ་རྗེ་སེམས་དཔའ་ལས་བྱུང་བ། །དབང་ཆེན་དཀྱིལ་འཁོར་སེར་པོའི་དབུས། །ཉི་མའི་དཀྱིལ་འཁོར་བསམས་ནས་ནི། །གསེར་ཞུན་ལྟ་བུའི་འོད་དཔག་མེད། །འཁོར་ལོར་བཅས་པ་བསམ་བྱས་ལ། །མཆོད་བསྟོད་བདུད་རྩི་མྱང་བ་བྱ། །དེ་ཡི་ཡེ་ཤེས་སེམས་
དཔའ་ཡི། །ཐུགས་ཀར་ཟླ་བའི་སྟེང་དུ་ནི། །འདོད་པ་རྣམ་གསུམ་བཞག་ནས་ནི། །ཐམས་ཅད་གསང་སྔགས་འདི་ནི་ཟློས། །ཨོཾ་ཀ་ཊེ་བི་ཀ་ཊེ་ནི་ཀ་ཊེ་ཀ་ཊཾ་ཀ་ཊེ་ཀ་རོ་བ་རེ་ཆེ་གེ་མོ་པུཥྚིཾ་ཀུ་རུ་ཧཱུྃ། ན་བཟའ་དཀར་མོ་ལ་སོགས་ཚོགས། །མངོན་པར་འདོད་པའི་དོན་ཆར་འབེབས། །ནམ་
མཁའི་ཁམས་ཀུན་རབ་བཀང་ནས། །རྗེས་སུ་འོད་ཟེར་བསྡུ་བར་བྱ། །དེ་ནི་འོད་ཟེར་རྣམ་པ་ལྔ། །འདོད་པའི་སྤྱི་བོ་མགྲིན་པ་དང་། །ཐུགས་ཀའི་གནས་ནི་གསུམ་པོ་རུ། །འདོད་པ་གསུམ་གྱི་ཚུལ་དུ་བཞག །དེ་རྣམས་མི་བཟད་བྱ་བའི་ཕྱིར། །ཐམས་ཅད་ཀྱི་ནི་གསང་སྔགས་
འདི། །བརྗོད་ནས་འོད་དཔག་མེད་པའི་ཚོགས། །བུམ་པ་གང་བ་གཟུང་བར་བྱ། །ཨོཾ་ཨཱཿཛི་ཨཱ་རོ་ལྀཀ་ཆེ་གེ་མོ་པུཥྚིཾ་ཀུ་རུ་ཧཱུྃ། བཀྲ་ཤིས་གླུ་དབྱངས་ཚིགས་བཅད་ཀྱི། དབང་བསྐུར་བ་ནི་སྩོལ་བར་བསམ། །དེ་ལྟར་དུས་བཞིར་ཞག་བདུན་དུ། །སྦྱོར་བས་ཐམས་ཅད་རྒྱས་པར་
འགྱུར། །རྡོ་རྗེ་བསམ་གཏན་འདི་ཡིས་ནི། །དགང་དཀའ་བ་ཡང་རབ་ཏུ་འགེངས། །དེ་ནི་སྦྱིན་པ་རབ་བསྒྲུབ་ཅིང་། །ཡིད་བཞིན་ནོར་བུ་དཔལ་འདྲར་འགྱུར། །ཡང་ན་འདི་ལྟར་གོས་དཀར་བའི། །འཁོར་ལོ་ལྡན་པའི་སྦྱོར་བ་བསྒོམ། །ཡེ་ཤེས་སེམས་མའི་ཐུགས་ཀ་རུ། །
འདོད་པ་དག་ནི་གཞུག་པར་བྱ། །ཨོཾ་ཀ་ཊེ་བི་ཀ་ཊེ་ནི་ཀ་ཊེ་ཀ་ཊཾ་ཀ་ཊེ་ཀ་རོ་བ་རེ་ཆེ་གེ་མོ་པུཥྚིཾ་ཀུ་རུ་ཧཱུྃ། བརྗོད་པས་དེ་མཐའ་དབུས་ཡིག་ལ། །ནམ་མཁའི་ཁམས་ནི་དཀར་མོས་གང་། །དེ་ཉིད་གཟི་བརྗིད་ཚུལ་གྱིས་སུ། །རྗེས་སུ་འོད་ཟེར་སྔོན་བཞིན་དབབ། །གོང་གི་སྔགས་ཀྱིས་

44-1-43a

འོད་དཔག་མེད། །སྤྲོས་ནས་དབང་བསྐུར་སྩལ་བར་བསམ། །དེ་ལྟར་དུས་བཞིར་ཞག་བདུན་དུ། །བྱས་པས་བསྒྲུབ་བྱ་རྒྱས་པར་འགྱུར། །བསམ་གཏན་སྔགས་ཀྱི་སྦྱོར་བ་འདིས། །རྟག་པར་ཆོས་ཀྱིས་རྒྱས་པར་མཛད། །རྟག་ཏུ་མཛོད་པོ་ཆེ་དང་
ལྡན། །ནད་རྣམས་མེད་ཅིང་ཚེ་རྒྱས་འགྱུར། །ད་ནི་དབང་གི་ལས་ཀྱི་རིམ་པ་བཤད་པར་བྱའོ། །ཐམས་ཅད་སྔོན་བཞིན་རབ་བྱས་ལ། །རི་མོའི་དཀྱིལ་འཁོར་བྲི་བར་བྱ། །དོན་ཡོད་གྲུབ་པའི་རྣལ་འབྱོར་པས། །དབང་དུ་བྱ་བ་བརྩམ་པའོ། །སངས་རྒྱས་རྡོ་རྗེ་སྡེ་ཆེན་དང་། །སེམས་
ཅན་ཁམས་རྣམས་མ་ལུས་པ། །དབང་དུ་བྱེད་དམ་བྱེད་འདོད་ཕྱིར། །ཆགས་པའི་ཡིད་ཀྱིས་བྱ་བའོ། །བཀའ་ཡི་འཁོར་ལོ་རབ་བསྐོར་བས། །ཁང་པ་བརྩེགས་པའི་དབུས་སུ་ནི། །རྡོ་རྗེ་སེམས་དཔའ་ལས་བྱུང་བའི། །ཉི་མའི་དཀྱིལ་འཁོར་ཟླ་གམ་ལ། །ཇི་བཞིན་སྦྱོར་བས་
བནྡུ་ཀ། །དོན་ཡོད་གྲུབ་པའི་འཁོར་ལོ་ཆེ། །བསྒོམས་ནས་མཆོད་པ་བསྟོད་པ་དང་། །བདུད་རྩི་མྱང་བས་མཉེས་པར་བྱ། །དེ་ཡི་ཡེ་ཤེས་སེམས་དཔའ་ཡི། །ཐུགས་ཀར་ཟླ་བའི་སྟེང་དུ་ནི། །གོང་གི་གཉིས་པོ་བཞག་ནས་ནི། །ཐམས་ཅད་ཀྱི་ནི་གསང་སྔགས་བརྗོད། །ཨོཾ་ཨཱཿ
ཁཾ་པྲཛྙཱ་དྷྲྀཀ་ཆེ་གེ་མོ་བ་ཤཾ་རཾ་རཱ་ག་ཡ་ཧོ། དེ་བརྗོད་ཐམས་ཅད་བ་སྤུ་ཡི། །སྒོ་ལས་སངས་རྒྱས་ཐམས་ཅད་དང་། །བྱང་ཆུབ་སེམས་དཔའ་ཐམས་ཅད་ཀྱིས། །མཁའ་དབྱིངས་ཡོངས་སུ་དགང་བར་བསམ། །དེ་རྣམས་འོད་ཟེར་རྣམ་ལྔ་ཡི། །ཚུལ་གྱིས་ཐམས་ཅད་འདུས་བྱས་ལ། །
ཐུགས་ཀར་འདོད་པ་དེ་ལུས་ལ། །རྗེས་སུ་སྟོབས་ནི་དབབ་པར་བྱ། །གོང་གི་སྔགས་བརྗོད་སྔོན་བཞིན་དུ། །དབང་བསྐུར་དེ་ལ་སྩོལ་བར་བསམ། །དེ་ལྟར་སྦྱོར་བས་དུས་བཞི་རུ། །བཟླས་པས་ཞག་བདུན་འགྲུབ་པར་འགྱུར། །དེ་ནི་དེ་མ་ཐག་ཏུ་ཡང་། །སངས་རྒྱས་ཀུན་གྱི་ཐུགས་སུ་
བྱོན། །འཇམ་དཔལ་དང་ནི་གཟི་བརྗིད་མཉམ། །ལས་ཐབས་བྱེད་པར་དེ་འགྱུར་རོ། །དགའ་བས་མྱོང་བའི་དབང་པོ་དང་། །དགྱེས་ནས་ཅི་འདོད་རབ་ཏུ་སྩོལ། །བསྐུལ་བ་ཆེན་པོ་མ་བྱས་ཀྱང་། །འགྲོ་བ་འདི་ཀུན་དབང་དུ་འགྱུར། །ཡང་ནི་དེ་ལྟར་སྒྲོལ་མ་ཡི། །འཁོར་ལོ་ལྡན་

44-1-43b

པ་རབ་བསྒོམས་ལ། །དེ་ཡི་ཡེ་ཤེས་སེམས་དཔའ་ཡི། །ཐུགས་ཀར་ཟླ་བའི་སྟེང་དུ་ནི། །དབང་དུ་བྱ་བ་བཞག་ནས་ནི། །དབུས་སུ་ཡི་གེ་ཏཱཾ་དམར་པོ། །མཐའ་མ་ཕྲེང་སྔགས་དམར་པོ་ནི། །གྱེན་དུ་འགྲེང་བས་བསྐོར་བར་བསམ། །དམར་བའི་མཚན་མ་རྣམས་དང་ནི། །ཏཱྃ་
ལས་འོད་ཟེར་དམར་པོའི་ཚོགས། །གསང་སྔགས་འདི་ནི་བརྗོད་ནས་སུ། །བསྒྲུབ་བྱ་བསྐུལ་ཕྱིར་དབྱུང་བར་བྱ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཆེ་གེ་མོ་པ་ཤཾ་ཀུ་རུ་ཧོ། སྐྱེས་པའི་སྙིང་དང་མགྲིན་པར་བསྐུལ། །བུད་མེད་གསང་བ་ནས་བསྐུལ་བྱ། །ཕྲེང་བའི་སྔགས་ལས་འོད་ཟེར་དམར། །
རང་གི་སྐྱེ་གནས་ནས་ཕྱུང་བྱ། །གོང་གི་སྒོ་རུ་རབ་ཞུགས་པས། །བསྒྲུབ་བྱའི་སེམས་ནི་བཀག་འདྲ་བ། །ཟླ་བའི་དབྱིབས་འདྲ་བཀུག་ནས་ནི། །རིམ་པ་གཉིས་སུ་ཆུད་པར་བྱ། །གལ་ཏེ་ལྷ་མོ་མདའ་ཅན་མ། །འོག་ནས་འབྱུང་བཞིན་བྱིན་བརླབས་ལ། །བསྐུལ་བ་ལ་སོགས་དེ་
བཞིན་བྱ། །དེས་ཀྱང་དབང་དུ་བྱེད་པའོ། །གཞན་ཡང་སྔ་མ་བཞིན་དུ་འདོད། །དེ་ནི་ཐུགས་ཀར་རབ་བཞག་ལ། །དཔའ་བོ་བཏང་སོགས་ཆོ་ག་ཡིས། །གཞན་ལ་སྟོབས་ནི་དབབ་པར་བྱ། །དེ་ལྟར་སྦྱོར་བས་དུས་བཞི་རུ། །ཞག་བདུན་བར་དུ་རབ་བྱས་ན། །སངས་རྒྱས་རྡོ་རྗེ་སྡེ་
ཅན་དང་། །སེམས་ཅན་ཁམས་རྣམས་མ་ལུས་པ། །དེ་མ་ཐག་ཏུ་བྲན་བཞིན་དུ། །ཐམས་ཅད་ཡོད་མེད་དབང་དུ་བྱེད། །ཐམས་ཅད་སྔ་མ་བཞིན་བསྒོམས་ལ། །རྡོ་རྗེ་སེམས་དཔའ་ལས་བྱུང་བའི། །འཇམ་དཔལ་རྡོ་རྗེ་འཁོར་ལོ་ཡིས། །དབང་དུ་བྱ་བ་བརྩམས་པའོ། །སྔགས་
བྱེད་དང་ནི་དལ་བྱེད་དང་། །འདོད་བྱེད་དང་ནི་རྨོངས་བྱེད་དང་། །དབང་གི་རང་བཞིན་མདའ་ལྔ་ནི། །ཆོ་ག་འདི་ཡིས་བྱིན་བརླབ་བྱ། །སྨྱུག་མ་ཨ་ཡིས་བྱིན་བརླབས་ཏེ། །མདེའུ་ནི་ཧཱུྃ་གིས་བྱིན་བརླབས་ལ། །གཡོན་གྱིས་ལྃ་བསྐྱེད་གཞུ་བཟུང་ནས། །དབུ་རྒྱན་རྩེ་མོར་སྦྱར་བྱས་ལ། །
དྲངས་ཏེ་རྣ་དྲུང་དུ་བཀང་ནས། །སྔགས་ཀྱིས་རབ་ཏུ་གདབ་པའོ། །ཨོཾ་ཨཱཿམཾ་མཉྫུ་ཤྲཱི་ཆེ་གེ་མོ་པ་ཤཾ་ཀུ་རུ་ཧོ། དེ་ཡིས་སྤྲོས་པས་བསྒྲུབ་བྱ་ཡི། །མགོ་དང་སྙིང་ག་ལྟེ་བ་དང་། །གསང་བ་དང་ནི་རྐང་མཐིལ་དུ། །ཁྲོ་བོའི་ཚིག་གིས་རབ་ཏུ་གདབ། །སྔགས་ཀྱི་འོད་ཟེར་དམར་པོ་

44-1-44a

ཡི། །རྡོ་རྗེ་གཉིས་ལས་ཕྱུང་ནས་ཀྱང་། །ཟླ་བ་སྤྱད་ལྡན་ལྟ་བུའི་སེམས། །འོད་ཟེར་གྱིས་ནི་དགུག་པར་བྱ། །བདག་ནི་སྐྱེ་གནས་ནས་བཅུག་སྟེ། །ཡེ་ཤེས་སེམས་དཔའ་དེ་བཞིན་ནོ། །དངངས་ཤིང་བརྒྱལ་བར་རབ་བསྒོམས་ཏེ། །སྡོང་པོ་བཅད་བཞིན་ཞབས་
འོག་འགྱེལ། །སྦྱོར་བ་དེ་ཡིས་དུས་བཞི་རུ། །ཟླ་བ་ཕྱེད་དུ་རབ་བསྒོམས་ན། །བྱིས་པའི་བློ་ནི་གྲགས་ཆེན་པོས། །གསང་བའི་བསྐུལ་བ་བསྒོམ་བྱས་པས། །རྡོ་རྗེ་ཀུན་གྱིས་རབ་གསང་བའི། །རྡོ་རྗེ་དོན་ནི་ཆུད་པར་གསུངས། །དེ་ནས་མངོན་སྤྱོད་ལམ་གྱི་རིམ་པ་བཤད་པར་བྱའོ། །
སྔོན་བཞིན་བཟླས་པ་ལ་སོགས་པའི། །དབང་བསྐུར་ཡན་ཆད་རྫོགས་བྱས་ཏེ། །རྡོ་རྗེ་ཁྲོ་བོ་རྣལ་འབྱོར་གྱིས། །ལས་འདི་རབ་ཏུ་བརྩམ་པའོ། །དཀོན་མཆོག་གནོད་བྱེད་མ་ཆགས་པ། །གདུག་པའི་སེམས་ཅན་རྣལ་འབྱོར་གཅོད། །བླ་མ་སྨོད་བརྩོན་མ་རུངས་པ། །གཏུམ་པའི་
ཡིད་ཀྱིས་བསྒྲུབ་པའོ། །དེ་རྣམས་བསྐྲད་པ་འཇིགས་འཇིགས་ལྟ། །སྟ་གྲི་གཏུན་ཤིང་ལག་ན་འཛིན། །གནོད་པར་བྱེད་པ་རབ་བརྩོན་ལ། །བསམས་ནས་བསམ་གཏན་རབ་ཏུ་བྱ། །མཁའ་དབྱིངས་སེམས་ཅན་སངས་རྒྱས་ཀྱིས། །ཡོངས་སུ་གང་བར་རབ་ཏུ་བསམ། །གདུག་
པའི་སྟ་གྲི་གཏུན་ཤིང་གིས། །གསད་པར་རབ་ཏུ་བསམ་པའོ། །དེ་བཞིན་བྱང་ཆུབ་སེམས་དཔའ་ཡིས། །མཁའ་དབྱིངས་ཡོངས་སུ་གང་བར་བསམ། །སྟ་གྲི་གཏུན་ཤིང་གིས་གསད་པར། །བསམས་ནས་དགྲ་རྣམས་མྱུར་དུ་འཆི། །དེ་ཡིས་དྲན་རྙེད་མཚོན་ཆ་བོར། །སྐྱབས་
མེད་སྐྲག་ཅིང་འཇིགས་པས་དཀྲུགས། །སྡུག་བསྔལ་དང་ལྡན་གཟིགས་བྱས་ལ། །སྙིང་རྗེ་ཆེན་པོའི་ཁྲོ་བ་བསྐྱེད། །རང་ལྷ་གོམས་པའི་ཕྱག་རྒྱ་ཡིས། །རྣལ་འབྱོར་བྱས་ནས་གསུམ་པ་རུ། །ཡེ་ཤེས་སེམས་དཔའི་འོད་ཟེར་གྱིས། །སངས་རྒྱས་ཚོགས་སྤྲོ་བཀའ་ལུང་བླང་། །
ཁམས་བཞུགས་མགོན་པོ་རྣམས་ཀྱིས་ནི། །བདག་རྩོམ་ལས་འདི་གཟིགས་མཛད་ཕྱིར། །གྲོ་བ་ཙནྡན་དཀར་པོ་སོགས། །ལས་བརྩམ་བྲིས་པ་སྙན་དུ་གསོལ། །ཕན་མཛད་ཁྱེད་ཅག་རྣམས་ལ་ནི། །འདི་ཡི་ཐབས་འདི་མ་བརྩམས་ན། །འདི་ནི་མནར་མེད་སྐྱི་གཡའ་བའི། །

44-1-44b

བུད་ཤིང་དུ་ནི་འགྱུར་བར་ངེས། །སྙིང་རྗེར་ལྡན་པའི་རྣལ་འབྱོར་པ། །ཁྱོད་ཀྱི་བཀའ་ལུང་བདག་ཅག་བྱེད། །དེ་བས་ལས་ནི་བགྱིད་པ་ལ། །རྡོ་རྗེ་ཅན་རྣམས་བདག་བཀའ་སྩོལ། །བདག་ཅག་ཁྱད་པར་མ་མཐོང་བར། །དད་པ་ཁོ་ན་དང་ལྡན་པས། །སྙིང་རྗེ་འདི་ལ་ཕན་པའི་
ཕྱིར། །ཁྱེད་ཀྱི་བཀའ་སྩོལ་བྱེད་པའོ། །གོང་བཞིན་ཁྲོ་བོའི་ཚོགས་སྤྲོས་པས། །དེ་དག་སྙན་དུ་རིག་པ་དང་། །སྔོན་བཞིན་དུ་དང་གལ་བཅུ་ཡིས། །སྙན་གསན་དབབ་པར་བསམ་པའོ། །ལས་མཛད་འདི་ལ་ཁྱོད་ཀྱིས་ནི། །གྲོགས་པོ་མཛད་པ་རིགས་པ་ཡིན། །དེ་ལྟར་མིན་ན་ཁྱེད་
ཅག་འདིར། །དམ་ཚིག་འགལ་བར་གྱུར་པའོ། །དེ་ནས་དེ་དག་ཐམས་ཅད་ཀྱང་། །ཞལ་གྱིས་བཞེས་པར་བསམ་བྱས་ནས། །འཁོར་ལོ་དང་བཅས་ནག་པོར་བསྒྱུར། །ཁྲོས་ནས་བཀའ་ཡི་འཁོར་ལོ་སྤྲོ། །བགེགས་ཀྱི་ཚོགས་ཀུན་ཉན་པར་བྱོས། །སྐུ་གསུང་ཐུགས་ལ་གནས་
པ་ཡི། །དཔལ་ལྡན་བདག་ནི་ཆེ་གེ་མོ། །བཀའ་ཡི་འཁོར་ལོ་བྱེད་པའོ། །གལ་ཏེ་ང་ཡི་བཀའ་འགོམ་ན། །རྡོ་རྗེ་འབར་བའི་གཟུགས་འདི་ཡིས། །འདོད་གསུམ་བསྐྱེད་ལུས་འཇིག་བྱེད་དེ། །འགས་པར་འགྱུར་ཏེ་གཞན་དུ་མིན། །དེ་ནས་ས་བོན་འོད་ཟེར་གྱིས། །མཁའ་ཁྱབ་
སངས་རྒྱས་ཞལ་བཅུག་སྟེ། །ཞུ་གྱུར་རྡོ་རྗེ་པདྨ་རུ། །ཆོ་ག་བཞིན་གྱིས་བསྐྱེད་བྱས་ལ། །མི་བསྐྱོད་ལྟ་བུ་དང་པོས་འཁྱུད། །རྡོ་རྗེ་ལྕགས་ཀྱུ་རལ་གྲི་ཞགས། །འཛིན་པའི་ཁྲོ་བོ་སུམྦྷའི་གཟུགས། །དེ་ཡི་སྲུང་མ་དགུག་དོན་བསྐྱེད། །སྙིང་རྗེ་ལྡན་པའི་རྣལ་འབྱོར་པས། །དབྱངས་
ཡིག་འོག་ལ་ཧཱུྃ་ཡིག་སྟེང་། །རྡོ་རྗེ་རྒྱ་གྲམ་ཁ་སྦྱོར་ཕྱིར། །སྔགས་འདིས་སྲུང་མ་དགུག་པའོ། །ཨོཾ་ཨཱཿཧེ་སུམྦྷ་ནི་ཆེ་གེ་མོའི་སྲུང་མ་ཁུག་ཅིག་ཛཿཧཱུྃ། དེ་ཡིས་དགུག་ལ་གཡོན་དུ་བཞག །གནོད་མཛེས་དེ་ལ་བཅུག་བྱས་ཏེ། །དེ་ཡི་ལུས་གནས་འཁོར་ལོ་ལ། །དེ་ཡི་ཉེས་པ་
བསྒོ་བའི་ཕྱིར། །དཔལ་ལྡན་གནོད་མཛེས་མདུན་དུ་གནས། །རིག་པའི་ཚོགས་ཀྱིས་གསོལ་གདབ་བྱ། །ལས་ཀུན་རྣམ་པ་གང་གིས་ནི། །ད་ལྟ་མཐུ་ནི་ཡོད་འགྱུར་བ། །མ་འོངས་བདེ་བ་འདོད་པས་ན། །ཁྱོད་ཀྱིས་འདི་ཉིད་སྤང་བར་བྱ། །སངས་རྒྱས་གསོད་བྱེད་མ་ཆགས་པ། །

44-1-45a

བླ་མ་སྨོད་པར་བྱེད་པའོ། །འདི་ཡི་སྲུང་དང་བྱིན་རླབས་ཀྱིས། །ད་ལྟ་རུ་ནི་སྤང་བར་གསོལ། །དེ་ལྟར་མིན་ན་ཁྱེད་ཅག་ཀུན། །རང་གི་བསྟན་པ་འདི་ལ་ནི། །བརྫུན་གྱིས་སྒྲུབ་པོ་བསླུས་འགྱུར་བས། །ཁྱེད་རྣམས་དམ་ཚིག་འགལ་བའོ། །དེ་དག་ཐམས་
ཅད་མགྲིན་གཅིག་ཏུ། །བདག་གིས་སྤངས་ཀྱི་འདོད་བཞིན་གྱིས། །དགྱེས་ཏེ་བསད་དབྱུང་རང་ལྷ་ཡི། །འཁོར་ལོ་རུ་ནི་གཞུག་པར་བྱ། །བསྲུང་བ་ལ་སོགས་རྣམས་དང་ཡང་། །དེ་ཡི་ལྷ་རྣམས་མནན་བྱའི་ཕྱིར། །སངས་རྒྱས་རྣམས་ཀུན་བགེགས་དགྲའི་གཟུགས། །སྔོན་
བཞིན་ཕུར་བུས་བསྐྱེད་བྱས་ནས། །གཡས་པས་ཐོ་བ་གཟུང་བྱས་ནས། །གཡོན་པས་མགུལ་པ་བརྟེན་བྱས་ཏེ། །སྟོང་པ་དྲན་པར་བྱ་བའི་ཕྱིར། །སྔགས་འདིས་རབ་ཏུ་བཏབ་པའོ། །ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ་སརྦ་དུཥྚྲཱན་ཕཊ། ཀཱི་ལ་ཡ་ཀཱི་ལ་ཡ་སརྦ་དུཥྚྲཱན་ཡེ་ཤེས་སྲུང་མ་ཕཊ། 
ཧཱུྃ་ཧཱུྃ་ཧཱུྃ་བཛྲ་ཀཱི་ལ་ཡ། བཛྲ་དྷ་རོ་ཨཱཛྙཱ་པ་ཡ་ཏི། སརྦ་དུཥྚྲཱན་ཡེ་ཤེས་སེམས་དཔའི་ཀཱ་ཡ་ཝཱཀ་ཙིཏྟ་བཛྲ་ཀཱི་ལ་ཡ་ཧཱུྃ་ཕཊ། དེ་ཡིས་རང་གི་ཡེ་ཤེས་སེམས། །གཉིས་སུ་མེད་པར་འགྱུར་བར་བསམ། །སྐྲ་བཤིག་གཅེར་བུ་འབྲུ་མར་བྱུགས། །འཇིགས་བཅས་དྲན་ཉམས་སྲོག་མེད་པ། །
མེ་ལ་གནས་ཤིང་གཟི་བརྗིད་བྲལ། །སྐྱབས་བྱེད་སྲུང་མས་རྣམ་སྤངས་པས། །ཁང་སྟོང་ལྟ་བུར་བསམས་ནས་ནི། །ལས་ཀྱི་དངོས་གཞི་ལ་འཇུག་བྱ། །སྔོན་བཞིན་ཐམས་ཅད་རབ་བྱས་ལ། །དང་པོ་མགོན་པོ་ལས་བྱུང་བ། །ས་བོན་ལས་སྐྱེས་ཁ་བཞི་པའི། །རྩེ་ལྔ་མགོན་པོས་
བྱིན་གྱིས་བརླབས། །འོད་ཟེར་བདེ་གཤེགས་ཐམས་ཅད་ལ། །བསྒྲུབ་བྱའི་སྐྱོན་བརྗོད་དེ་དག་ཀུན། །མི་བསྐྱོད་ངོ་བོར་ཁྲོར་གྱུར་ནས། །ཞུགས་བཞིན་དེ་ལ་ཐིམ་པར་འགྱུར། །དེ་གཉིས་ཞུ་བར་གྱུར་པ་ལས། །གཡས་བསྐུམ་གཡོན་བརྐྱང་མི་བསྐྱོད་པ། །དྲག་པོ་སྦྲུལ་གྱི་སྐེ་
རགས་ཅན། །མགོན་པོ་རྟེན་སོགས་ཀྱིས་མཚན་པ། །དང་པོ་སྦྱོར་བས་རྣམ་བསྒོམས་ཏེ། །དེ་ཁོ་ན་བཞིན་རྟག་པ་སོགས། །སྦྱོར་བ་གཉིས་པས་བསྒོམ་བྱས་ཏེ། །མཆོད་པ་སོགས་ཀྱིས་མཉེས་པར་བྱ། །དེ་ནས་བཛྲ་དྷྲྀཀ་སོགས་ནི། །ཡིད་ཀྱིས་བརྗོད་པས་རབ་བསྐུལ་ལ། །

44-1-45b

སངས་རྒྱས་ཞི་བའི་ཚུལ་སྤྲོས་པས། །སྐྲག་པ་སྤང་ཕྱིར་དང་པོ་དགྲ། །འོད་ཀྱི་གོང་བུའི་ཚུལ་དུ་ནི། །ཤ་གླན་ཕྱིར་ན་གནས་གསུམ་དུ། །བཙུད་དེ་རང་སྔགས་བརྗོད་པ་ཡིས། །ཇི་ལྟར་གཟུགས་བཞིན་སྤྲོ་བར་བྱ། །ཨོཾ་ཨཱཿབཛྲ་དྷྲྀཀ་ཆེ་གེ་མོ་མཱ་ར་ཡ་ཕཊ་ཧཱུྃ། སེམས་ལུས་ཁྲོས་པའི་
ཁྲོ་བོ་ཆེ། །མི་སྡུག་འཇིགས་སུ་རུང་བའི་གཟུགས། །གསོད་པའི་དོན་རྣམས་སེམས་པའི་ཕྱིར། །སྟ་གྲི་ཐོ་བ་སོགས་འཛིན་སྤྲོ། །གཞན་ཡང་གྲི་དང་ཀ་པཱ་ལ་འཛིན། །སྐྲ་འགྲེང་སྲིན་པོའི་ཚོགས་རྣམས་དང་། །རིང་དུ་སྒྲ་འབྱིན་པ་ཡི་ཚོགས། །ཁྭ་དང་བྱ་རོག་སྣ་ཚོགས་སྤྲོ། །བྱ་
རྒོད་ལྕགས་ཀྱི་མཆུ་ཅན་དང་། །ལྕགས་ཀྱི་མཆེ་བ་ཅན་གྱི་ཁྱིས། །ནམ་མཁའི་ཁམས་ཀུན་གང་བར་བསྒོམ། །བསྐལ་པའི་མེ་བཞིན་འབར་བ་ཡིས། །གྲུ་གསུམ་ལ་གནས་སྔོན་བཞིན་དུ། །གནས་པའི་བསྒྲུབ་བྱ་དེ་དག་གིས། །ཁྲོས་ནས་རྟོག་ཅིང་འཐབ་པའི་ཚུལ། །དྲག་པོའི་
ཚིག་གིས་བསྐུལ་བར་བྱ། །ཤ་རྣམས་གཅོད་ཅིང་རྒྱུས་རྐང་དྲངས། །རུས་འཆོས་ཁྲག་འཐུངས་རབ་བསྒོམས་ཏེ། །དུས་བཞིར་རབ་ཏུ་བརྟན་བྱས་ཏེ། །ཉི་མ་བདུན་དུ་བསྒྲུབ་པར་བྱ། །དེ་ལྟར་བསྒོམས་ན་དགྲ་རྣམས་འཆི། །སྙིང་རྗེའི་དབང་གིས་འོག་བཞིན་བརྩམ། །གལ་ཏེ་
རྨོངས་པས་འགྲུབ་མི་འགྱུར། །རྡོ་རྗེ་འཛིན་ཡང་ཟླ་ཕྱེད་འཆི། །སྔོན་བཞིན་ཐམས་ཅད་རབ་བྱས་ལ། །གཤིན་རྗེ་གཤེད་ཀྱི་འཁོར་ལོ་ཆེ། །རང་གི་རྡོ་རྗེ་རབ་བརྟན་ལ། །གསུམ་པས་ལས་འདི་བརྩམ་པའོ། །ཨོཾ་ཨཱཿཡ་མཱནྟ་ཀྲྀཏ་ཧཱུྃ་ཕཊ། དེ་ཡིས་བ་སྤུ་བུ་ག་ལས། །ཞི་བའི་ཚུལ་
སྤྲོས་སངས་རྒྱས་ཀྱིས། །སེམས་ཅན་བསྡུ་བར་བྱས་ནས་སུ། །རང་གི་སྐུ་གསུང་འཁོར་ལོ་གཞུག །ཨོཾ་ཧྲཱིཿཥྚྲཱིཿཝཱི་ཀྲི་ཏཱ་ན་ན་ཆེ་གེ་མོ་ན་ཤ་ཡ་སྟྭཾ་བྷ་ཡ་མཱ་ར་ཡ་ཧཱུྃ་ཕཊ། བརྗོད་པས་དེ་དག་སྤྲོ་བར་བྱ། །གཤིན་རྗེ་གཤེད་གཟུགས་འབའ་ཞིག་ཏུ། །སྤྲོས་པས་གདུག་སེམས་དགྲ་བོ་རྣམས། །
སྔོན་བཞིན་གཅོད་པར་བྱེད་པར་བསམ། །ཐུན་མཚམས་བཞི་རུ་ཞག་བདུན་དུ། །བརྟན་པས་རབ་ཏུ་ཆགས་བྱས་ནས། །མ་མོའི་བདག་གཤེད་ཡང་འཆི་ན། །གདུག་སེམས་ལྡན་པ་སྨོས་ཅི་དགོས། །རྩེ་གཅིག་མ་གྱུར་པ་ཡིས་ཀྱང་། །བསྲུང་བའི་དམ་ཚིག་བསྒྲུབ་པའི་ཕྱིར། །ཉིན་མཚན་

44-1-46a

བཟླས་པ་ལ་སོགས་བརྩོན། །བདུད་རྩི་འཁྱིལ་པས་གདུག་པ་གཞོམ། །ཐམས་ཅད་སྔ་མ་བཞིན་བྱས་ལ། །རྡོ་རྗེ་སེམས་དཔའ་ལས་བྱུང་བའི། །གདུག་པའི་དགྲ་བོ་འབའ་ཞིག་གམ། །འཁོར་ལོར་བཅས་པ་བསམ་བྱས་ནས། །མཆོད་པ་སོགས་ཀྱིས་
མཉེས་པར་བྱ། །ཨོཾ་ཨཱཿ་བིགྷྣཱནྟ་ཀྲྀཏ་ཆེ་གེ་མོ་མཱ་ར་ཡ་ཧཱུྃ་ཕཊ། བརྗོད་པས་བ་སྤུའི་བུ་ག་ལས། །གོང་མ་ལྟ་བུའི་སྲིན་པོ་དང་། །གཏུམ་ཞིང་མི་བཟད་ཁྲོ་བོ་སྤྲོས། །མེ་སྟེང་གནས་པའི་བསྒྲུབ་བྱ་ནི། །བཅིངས་ཤིང་བརྡེགས་པ་ལ་སོགས་པས། །དེ་ནི་སྐྲག་པར་བྱས་པར་བསམ། །དེ་
བཞིན་འུག་པ་ཁྭ་ཏ་དང་། །རིང་དུ་སྒྲ་འབྱིན་པ་སྤྲོས་པས། །མིག་དང་རྣ་བ་ལ་སོགས་པར། །རྩེ་ཞིང་དེང་བར་རབ་བསམས་ཏེ། །སྐྲག་ཅིང་འཇིགས་པར་བསམས་གྱུར་ནས། །དགྲ་བོ་དེ་ཡི་མོད་ལ་འཆི། །དེ་བཞིན་སྦྲུལ་ནག་མགོ་བརྒྱ་པ། །རེ་རེ་ལྕེ་གཉིས་མཆེ་ཕྲེང་ཅན། །རྒྱུད་དང་
གནས་དུག་བདག་ཉིད་སྤྲོ། །དཔྲལ་བར་དུག་བསམས་གདུག་པ་འཆི། །ཡང་ན་བདག་གི་ལག་པ་རུ། །ཐོ་བ་རབ་ཏུ་དྲག་པོ་བསམ། །བསྒྲུབ་བྱ་གོང་མས་མདུན་བཀུག་ལ། །འོག་མའི་སྔགས་ཀྱིས་སྙིང་གར་བརྡེག །དེ་བཞིན་ལག་ན་གནས་པ་ཡི། །རྡོ་རྗེ་སྟ་གྲི་གཏུན་ཤིན་
སོགས། །བསྒྲུབ་བྱ་བཤིག་ཅིང་གཏུབ་བསམས་ན། །རྡོ་རྗེ་སེམས་དཔའ་འང་འཆི་བར་འགྱུར། །སྔགས་ཀྱི་ཆ་ལུགས་དྲན་བྱས་ནས། །ཕྱག་འཚལ་ལ་སོགས་སྦྱོར་བ་ཡིས། །སྤྲོས་པ་རྣམས་ཀྱིས་བསྒྲུབ་པའི་ཕྱིར།།སྔགས་འདི་བརྗོད་པར་བྱ་བའོ། །ན་མཿས་མནྟ་ཀཱ་ཡ་
ཝཱཀ་ཙིཏྟ་བཛྲཱ་ཎཱཾ། ཨོཾ་ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། གརྫྫ་གརྫྫ། བི་སྥོ་ཊ་ཡ་བི་སྥོ་ཊ་ཡ། ཆེ་གེ་མོའི་སྲོག་ཛཱི་བི་ཏཱ་ན་ཀ་ར་ཡ་ཕཊ། སྔགས་རྒྱུད་སྦྱིན་སྲེག་ལས་རྣམས་ལ། །འདི་ཡི་ལས་ལ་དེ་མཆོག་ཡིན། །ཕྱོགས་བཅུ་སེམས་ཅན་ཐམས་
ཅད་ལ། །འཚེ་ཞིང་གནོད་པ་འབྱུང་བ་ཡི། །དགྲ་རྣམས་འཇིག་པར་བྱེད་པ་ལ། །བསྐུལ་བ་དམ་པ་འདི་མཆོག་ཡིན། །སྔ་མ་བཞིན་དུ་ཐམས་ཅད་ལ། །སྐུ་གསུང་ཐུགས་ཀྱི་སྙིང་པོ་མཆོག །རྡོ་རྗེ་སེམས་དཔའ་ལས་བྱུང་བའི། །དང་པོ་ལས་བྱུང་ཧྲི་བསྐྱེད་དོ། །དེ་ལ་ཏྲི་ཤཱུལ་ཧྲི་

44-1-46b

ཡིས་མཚན། །དེ་ཡིས་སངས་རྒྱས་ཐམས་ཅད་ཀུན། །མཁའ་འགྲོའི་གཟུགས་བྱས་ཧྲི་ལ་ཞུགས། །དེ་གཉིས་རྡོ་རྗེ་མཁའ་འགྲོར་བསྐྱེད། །དྲག་པོ་མི་སྡུག་ཁྲོས་པ་ནི། །ཨུཏྤལ་སྔོན་པོ་ལྟ་བུ་ལ། །གཡས་དཀར་གཡོན་དམར་ཕྱག་དྲུག་པ། །དང་པོ་རྡོ་རྗེ་མཁའ་འགྲོ་
འཁྱུད། །གཡས་པ་ཏྲི་ཤུལ་རྡོ་རྗེ་བསྣམས། །གཡོན་པ་ཐོད་པ་རིན་ཆེན་འཛིན། །ཉི་མའི་གདན་ལ་བརྐྱང་བསྐུམ་དུ། །ཁྲོ་བོའི་རྒྱན་གྱིས་བརྒྱན་པ་བསྐྱེད། །དཀོན་མཆོག་གཞོམ་པ་ལ་སོགས་པའི། །བསྒྲུབ་བྱ་ནམ་མཁའི་དབུས་སུ་ནི། །ཁཾ་བསྐྱེད་དམར་གྱིས་རྒྱལ་བ་
ལྟར། །བརྒྱངས་པའི་ཡེ་ཤེས་དྲང་བྱས་ནས། །མི་བསྐྱོད་པ་རུ་བསྐྱེད་བྱས་ཏེ། །ལུས་དེ་ཁང་སྟོང་ལྟ་བུར་བསམས། །བདག་གི་ལྕེ་ལ་ཧྲཱིཿབསམས་ཏེ། །དེ་ནི་འོད་ཟེར་མཐིང་ག་དང་། །དཀར་སེར་དམར་པོ་ལྗང་ཁུའི་ཚོགས། །ལུས་དང་ཡན་ལག་བཞི་རུ་བསམ། །རང་གི་
མཚན་མ་ཏྲི་ཤུལ་དང་། །རྡོ་རྗེ་རིན་ཆེན་ཕུར་བུ་ཡིས། །གོང་མ་རབ་ཏུ་ཕུག་བྱས་ཏེ། །བསམ་གཏན་སྔགས་ཀྱི་སྦྱོར་བ་ཡིས། །འོད་ཟེར་ལྔ་ཡིས་ཐོད་པ་རུ། །ཁྲག་དྲང་པ་ནི་བསམ་པར་བྱ། །ཧཱུྃ་ཧྲི་ཁཾ་བཛྲ་དྷྲྀཀ་ནི་ཨ་ནུ་ཀ་ས་མ་ཡ་རཀྟ་ཨཱ་ཀཪྵ་ཡ་ཙུ་ཤ་ཡ་ཧཱུྃ། བརྟན་པར་ཞག་བདུན་
ཐུན་བཞི་རུ། །བྱས་པས་སངས་རྒྱས་ཆོས་སྐུ་ཡང་། །སྐམས་པར་འགྱུར་ན་གདུག་པ་ཀུན། །སྨོས་ཅི་དགོས་ཏེ་དེ་ལྟ་ཡིན། །ཐམས་ཅད་སྔ་མ་བཞིན་བྱས་ཏེ། །བརྒྱུད་ཀྱིས་དབྱུག་སྔོན་འོག་བཞིན་བསྐྱེད། །མཆོད་པ་བཟླས་པ་མཉེས་བྱས་ལ། །སྔགས་རྒྱུད་ལྡན་པའི་ལས་བརྩམ་མོ། །
ཤ་ཆེན་དུར་ཁྲོད་སོལ་བ་དང་། །བལ་མི་ཁམ་ས་ཁྲེ་ཙི་ཕུག །བསྒྲུབ་བྱའི་རྐང་རྗེས་རྣམས་དང་ནི། །བོང་བུའི་གཅིན་གྱིས་གཟུགས་བརྙན་བྱ། །དེ་ཡི་སྙིང་གར་དུར་རས་ལ། །སྣ་ཚོགས་རྡོ་རྗེ་རྒྱ་གྲམ་ལ། །གནས་པའི་མེ་ཡི་དཀྱིལ་འཁོར་ཏེ། །བསྒྲུབ་བྱའི་མིང་དང་ཕྲེང་སྔགས་སྤེལ། །ཞི་བའི་
ས་བོན་བཏོན་ནས་སུ། །ཧཱུྃ་ཕཊ་ལྡན་པར་མི་དགུག་པར། །དུག་ཁྲག་རམས་གྱིས་བྲི་བྱས་ལ། །དེ་ཡི་སྙིང་གར་གཞུག་པར་བྱ། །བསྒྲུབ་བྱ་བཀུག་སྟེ་བཅུག་བྱས་ན། །རབས་ཆད་ཐོད་པ་ཁ་སྦྱར་གཞག །ཤིན་ཏུ་ཁྲོས་པའི་གཡོན་པ་ཡིས། །མནན་ཏེ་བརྒྱ་དང་བརྒྱད་དུ་ནི། །ཉི་མའི་

44-1-47a

གུང་དང་ནམ་བྱེད་དུ། །བཟླས་ཏེ་རྡོ་དང་རུས་པ་དང་། །ནིམ་པའི་ལོ་མ་རྣམས་ཀྱིས་ནི། །གཟུགས་བརྙན་དེ་ནི་མནན་པར་བྱ། །ན་མཿས་མནྟ་ཀཱ་ཡ་ཝཱ་ཀ་ཙིཏྟ་བཛྲཱ་ཎཱཾ། ཨོཾ་ཨེ་ཧྱེ་ཧི་བྷ་ག་བཱན་ནཱི་ལ་བཛྲ་དཎྜ། ཀུ་རུ་ཀུ་རུ། ལ་ཧུ་ལ་ཧུ། ཧཱ་ཧཱ། ཀུ་ལ་ཀུ་ལ། ཀུ་ལ་
པཱ་ཡ་ཀུ་ལ་པཱ་ཡ། ཀྲ་མ་ཀྲ་མ། བྷ་ག་བཱན། བ་ཡུ་བེ་གེ་ན། བུ་དན་ཤི་ཀྲན། ད་ཧ་ད་ཧ། ཧ་ར་ཧ་ར། བ་ཧ་བ་ཧ། ཧ་ན་ཧ་ན། པ་ཙ་པ་ཙ། མ་ཏ་མ་ཏ། མ་ཏ་པཱ་ཡ་མ་ཏ་པཱ་ཡ། སརྦ་ཀརྨ་ནི་ཚིནྡྷ་ཚིནྡྷ། བིནྡྷ་བིནྡྷ། བཀྵ་ཡ་བཀྵ་ཡ། མེ་ཏེ་མཾ་སརྦ་རུ་དྷི་ར། མ་མ་ས་མེ་ད་མཛྫ་རུ་ཏི་པྲི་ཡ།
ཨེ་ཧྱེ་ཧི་བྷ་ག་བཱན་སརྦ་བིགྷྣཱཾ། མཱུ་ལ་ཀརྨ་ནི། སརྦ་མཱུ་ལ་གྲ་ཧ་ན། ཧ་ན་ཧ་ན། བཉྫ་བཉྫ།མརྡ་མརྡ། ཨི་དཾ་མེ་གཉྱ་སྱ་ད་ཡ། ཧཱུྃ་ནཱི་ལ་ཡ་ནཱི་ལ་ཡ་བཛྲ། དྷ་ན་དྷ་ན། དུ་རུ་དུ་རུ། བིགྷྣཱཾ་བི་ནཱ་ཡ་ཀ་ནཱ་ཤ་ཡ། ཧུ་དྲུཾ་ཧུ་དྲུཾ། དཱིཔྟ་དྷ་དྷ་ཡ། སརྦ་མནྟྲ་ན་ཤ་ཏྲུ་ནཱན། ཧྲྀ་ད་ཡ་ནི། པྲི་ད་ཡ།
ཚིནྡྷ་ཚིནྡྷ། བིདྱ་ནཱན། ཏིཥྛ་ཨ་ནུ་སྨཱ་ར་ཡ་ས་མ་ཡ་བཛྲ་ད་ར་པ་ཙ་ནཱན། ད་ར་མ་ནི་ནི་ཀྲིནྟ་ཧཱུྃ། ཧ་ན་ཧ་ན། ད་ཧ་ད་ཧ། དུ་རུ་དུ་རུ། ཀུ་རུ་ཀུ་རུ། ཕཊ་ཕཊ། ཧཱུྃ་ཧཱུྃ། ཀྲི་དནྟ་ཡ། དཻ་བ་རྀ་ཥི་བིརྱ་ཀ་པ་ཡ། བཛྲ་དན་ཏེ་ན་ཆེ་གེ་མོ་མཱ་ར་ཡ་ཧཱུྃ་ཕཊ། གཡེལ་མེད་པ་ཡིས་ཞག་བདུན་དུ། །མཚན་
མ་མནན་ནས་བཟླས་བྱས་པས། །དེ་ཡི་ཉི་མ་ཁོ་ན་ལ། །གདུག་པ་རྣམས་ནི་གསོད་པར་བྱེད། །དེ་རུ་གལ་ཏེ་མ་གྲུབ་ན། །ནམ་ཕྱེད་དུས་སུ་དུར་ཁྲོད་དུ། །གང་གི་གཟུགས་བརྙན་ཁྱེར་ནས་ནི། །མི་རོ་བསྲེགས་པའི་ཐལ་བ་ལ། །མངོན་སྤྱོད་ཧོམ་ཁུང་གཞུང་བཞིན་བྱས། །ནིམ་པའི་
མེ་ནི་སྦར་བྱས་ནས། །ཞལ་དང་སྤྱན་རྣམས་འགྱུར་བ་ཡི། །དབྱིག་སྔོན་ཁ་གདངས་དབུས་བསམས་ལ། །གཟུགས་བརྙན་མཚོན་ཆ་རྣོན་པོ་ཡིས། །གཡོན་པའི་རྐང་ནས་བཅད་གཏུབས་ནས། །གོང་གི་སྔགས་བཟླས་སྦྱིན་སྲེག་བྱ། །དེ་ཡི་མཚན་མོ་འཆི་བར་ངེས། །ཡང་ནི་ཁྲོ་བོ་གང་རུང་
གི། །བཟླས་པས་སྔགས་པ་དག་བྱས་ལ། །རབ་ཏུ་དབེན་པའི་གནས་དག་ཏུ། །འབུམ་ཕྲག་ཏུ་ནི་རང་སྔགས་བཟླས། །མ་མོའི་གནས་སམ་དུར་ཁྲོད་དམ། །ཁང་སྟོང་དང་ནི་བཞི་མདོ་དང་། །ལིང་ག་གཅིག་པ་ཤིང་གཅིག་དྲུང་། །མངོན་སྤྱོད་ལས་ནི་བརྩམ་པའོ། །དབྱུག་སྔོན་ཅན་བསྲུང་རྫས་

44-1-47b

ལ་ནི། །གཟུགས་བརྙན་མིང་དང་བཅས་བྱས་ནས། །གན་རྐྱལ་དུ་ནི་གཞག་བྱས་ཏེ། །དགུག་པ་སྔོན་འགྲོ་ཁ་སྦྱར་དབྱེ། །དེ་ནས་ཁྲོ་བོ་གང་རུང་གི། །རྣལ་འབྱོར་ཁྲོས་བྱས་ཁྲག་ཆུ་ཡིས། །གཤེར་བའི་གོས་ནི་གྱོན་པའམ། །བཤང་གཅིས་གཤེར་བའི་གོས་གྱོན་བྱ། །གཟུགས་
བརྙན་རྐང་པས་མནན་ནས་ནི། །མངོན་སུམ་བཞིན་དུ་བསམས་བྱས་ནས། །རང་སྔགས་བརྒྱ་རྩ་བརྒྱད་དུ་བཟླ། །དེ་བཞིན་ཆུ་དྲོན་འབའ་ཞིག་གམ། །བཤང་གཅིས་གཤེར་བར་བྱས་པའི་གོས། །ངན་པ་རུལ་པ་དྲི་མནམ་པ། །བགོས་ཏེ་སྔོན་བཞིན་བཟླས་པ་བྱ། །དེ་བཞིན་ཐལ་
བའི་སྐྱོ་མ་ཡིས། །གཤེར་བའི་གོས་གྱོན་ལུས་ངན་འཁྲུགས། །སྔོན་བཞིན་བརྒྱ་རྩ་བརྒྱད་བཟླས་ན། །རྡོ་རྗེ་སེམས་དཔའ་འང་འཇིག་པར་འགྱུར། །ཡང་ན་གཅེར་བུར་རབ་ཕྱུང་སྟེ། །སྐྲ་བཤིག་ཐུར་དུ་འཕྱང་བྱས་ཏེ། །མཆེ་གཙིགས་མིག་ནི་བསྒྱུར་བྱས་ལ། །རྐང་པས་གཟུགས་
བརྙན་མནན་ནས་ནི། །སྔོན་བཞིན་བརྒྱ་རྩ་བརྒྱད་བཟླས་ཏེ། །ལུས་ངག་ཡིད་གསུམ་ཁྲོ་བྱས་ནས། །ཐུན་བཞིར་ཞག་བདུན་སོགས་སྦྱར་བས། །ནམ་མཁའི་དབྱིངས་ཀྱང་འཇིག་པར་ནུས། །ཡང་ན་གོང་མའི་གནས་དེ་རུ། །རྣལ་འབྱོར་དེར་གནས་ཕུར་བུས་གདབ། །རོ་བསྲེགས་
སོལ་དང་ཐལ་བ་དང་། །ཆུ་ངོགས་པ་དང་ཕུབ་མ་དང་། །རྐང་རྗེས་དང་ནི་བཤང་གཅིས་བརྫིས། །བསྒྲུབ་བྱའི་གཟུགས་བརྙན་སྙིང་ག་རུ། །སྐེ་ཚེ་དུག་དང་ལན་ཚྭ་དང་། །ཉུངས་མར་སྣག་ཚས་དུར་རས་ལ། །ཁྲོ་བོ་རྡོ་རྗེ་རྩེ་ལྔ་པའི། །ལྟེ་བར་སྔགས་དང་མིང་སྤེལ་བའི། །རང་རང་
སྔགས་ལྡན་མི་དགུག་པར། །བྲིས་ནས་སྙིང་གར་གཞུག་པའོ། །ཁ་སྦྱོར་དབྱེ་བ་སྔོན་འགྲོ་བའི། །དགུག་པས་གཟུགས་ལ་ཕབ་ནས་སུ། །མི་ཡི་རུས་པ་ལས་བྱས་པའི། །སོར་བརྒྱད་པ་ཡི་ཕུར་བུ་ལ། །རང་སྔགས་བརྒྱ་རྩ་བརྒྱད་དུ་བཟླས། །གཟུགས་བརྙན་སྙིང་གར་བཏབ་
ནས་ནི། །དགྲ་ཡི་ཁྱིམ་མམ་སྒོའམ་ནི། །གྲོང་ལ་སོགས་པར་སྦ་བར་བྱ། །སངས་རྒྱས་སྐུ་གསུམ་མཆོག་སྦྱིན་པ། །ཤེས་དང་མི་ཤེས་རྣམ་སྤངས་པ། །ཟླ་བ་ཕྱེད་ནི་ཚུན་ཆད་ཀྱིས། །སྐམས་སམ་ཡང་ན་འཇིགས་པར་འགྱུར། །རྡོ་རྗེ་གསུམ་གྱི་རྣལ་འབྱོར་གྱིས། །མངོན་སྤྱོད་ལས་

44-1-48a

ལ་བགེགས་དགྲས་སྦྱར། །དཀྱིལ་འཁོར་གསུམ་དང་རིགས་ལྔའི་ལས། །ཏིང་འཛིན་དག་པས་བྱེད་ཕྱིར་རོ། །དེ་ཡི་རྣལ་འབྱོར་སྔོན་བཞིན་བྱ། །གཟུགས་བརྙན་གོང་མ་བཞིན་བྱས་ལ། །དགུག་པ་སྔོན་དུ་འགྲོ་བ་ཡིས། །རྟག་པའི་སྦྱོར་བས་ལས་འདི་
བྱ། །མི་ཡི་རུས་པའི་ཕུར་བུ་ལ། །སོར་བརྒྱད་རྩེ་མོར་འཁོར་ལོ་བསམ། །མེ་ཏོག་སྔོན་པོས་མཆོད་ཅིང་ནི། །འཁྱིལ་པའི་སྔགས་ནི་རིག་བཅས་བཟླ། །དེ་ཡིས་སྤྱི་བོར་བཏབ་གྱུར་ན། །རྟག་པ་ཡང་ནི་ཀླད་གཟེར་ཅན། །འགྱུར་ན་བདག་སེམས་ལྡན་པ་ཡི། །དགྲ་བོ་དག་ནི་སྨོས་ཅི་
དགོས། །དེ་བཞིན་སེང་ལྡེང་རྩེ་མོ་ལས། །བྱས་པའི་ཕུར་བུས་པདྨ་ཅན། །བྱིན་གྱིས་བརླབས་བཟླས་སྔོན་བཞིན་མཆོད། །སྙིང་གར་བཏབ་ནས་ལིང་ག་དེ། །ཐོད་པ་ཁ་སྦྱར་ནང་བཅུག་སྟེ། །དུར་ཁྲོད་མེ་ལ་གདུང་བྱས་ན། །ཚ་བའི་ནད་ཀྱིས་འདེབས་བྱེད་པས། །དཔག་མེད་རྣལ་
འབྱོར་གྱིས་བྱའོ། །དེ་བཞིན་མི་བསྐྱོད་རྣལ་འབྱོར་པས། །གསོད་བྱེད་ལྕགས་བྱས་ཕུར་བུ་ལ། །རྡོ་རྗེ་རྩེ་མོར་བྱིན་བརླབས་ལ། །མཆོད་ཅིང་སྔགས་བཟླས་སྙིང་གར་གདབ། །མེ་འབར་ནང་དུ་དེ་བཅས་བསྐུར། །དེ་ཡི་མོད་ལ་གང་སྦྱར་བའི། །སྐུ་གསུམ་འཇིག་པར་བྱེད་པ་སྟེ། །
བདག་སེམས་ལྡན་པ་སྨོས་ཅི་དགོས། །བདུད་རྩི་འཁྱིལ་པའི་རྣལ་འབྱོར་གྱིས། །སྔོན་བཞིན་གཟུགས་བརྙན་རབ་བྱས་ལ། །དེ་མནན་ཁྲོ་བོ་བཀའ་ནོད་བསྒོ། །དེ་ནས་བཏང་ནས་བཀུག་སྟེ་གཞུག །སྔོན་མའམ་ཡམས་ནད་འཚེ་བའམ། །ཡུལ་དུ་སྣ་ཚོགས་འབྱུང་བྱེད་པ། །
གཟུགས་བརྙན་དེ་ལ་ཕབ་ནས་ནི། །སྙིང་ག་ནས་ནི་རྐང་པའི་བར། །དེ་བཞིན་དུ་ནི་སྤྱི་བོའི་བར། །རྡོ་རྗེ་གསུམ་གྱི་སྔགས་བརྗོད་ཅིང་། །གདུག་དང་སྡིག་པ་བསལ་བྱས་ནས། །ཆེ་གེ་ལུས་ངག་ཡིད་གསུམ་ལ། །རྡོ་རྗེ་ཕུར་བུས་ཐོབ་ཅེས་པའི། །སྔགས་ནི་གོང་མ་བཞིན་དུ་བརྗོད། །
ཐུན་བཞིར་གཡེལ་མེད་ཞག་བདུན་དུ། །ཕུར་བུའི་རྣམ་འཕྲུལ་འདི་བྱའོ། །བསམ་གཏན་རྡོ་རྗེའི་སྦྱོར་བ་ཡིས། །སངས་རྒྱས་དག་ཀྱང་ངེས་པར་འབེབས། །རྡོ་རྗེ་སེམས་དཔའ་རྒྱལ་པོ་ཆེ། །ཕུར་བུ་བཏབ་ནའང་མྱུར་དུ་འཆི། །དེ་བཞིན་བདུད་རྩི་འཁྱིལ་པ་ཡི། །རྣལ་འབྱོར་སྔོན་

44-1-48b

བཞིན་རབ་བྱས་ཏེ། །ཁ་སྦྱོར་དབྱེ་བ་སྔོན་འགྲོ་བའི། །སྦྱོར་བ་བདུན་གྱིས་བསྒྲུབ་པར་བྱ། །དུར་ཁྲོད་ཐལ་བ་ལ་སོགས་ལ། །སྔོན་བཞིན་གཟུགས་དང་མིང་བཅས་པ། །དགུག་པ་སྔོན་འགྲོ་དུར་ཁྲོད་དུ། །སྐྲ་བཤིག་གཅེར་བུར་ཕྱུང་བྱས་ཏེ། །མཚན་མ་མནན་ནས་སྔོན་མ་
ཡི། །སྔགས་ནི་བརྒྱ་དང་རྩ་བརྒྱད་བཟླ། །ཞག་ནི་བདུན་དུ་ཐུན་བཞི་རུ། །སྦྱོར་བ་དེ་ཡིས་ཁམས་གསུམ་འཇིག །རོ་བསྲེགས་ཐལ་བ་འབའ་ཞིག་ལ། །གཟུགས་བརྙན་ལ་སོགས་སྔོན་བཞིན་བྱས། །གོང་ལྟར་སྟོང་རྩ་བརྒྱད་བཟླས་ན། །སྦྱོར་བ་ཡིས་དེ་མོད་ལ་འཆི། །ཆུ་
འགྲམ་གཉིས་ཀྱི་ས་བསོགས་ལ། །བསྒྲུབ་བྱའི་གཟུགས་བརྙན་རབ་བྱས་ཏེ། །སྐེ་ཚེ་ལན་ཚྭ་འབྲུ་མར་དང་། །དུག་དང་ད་དུར་སྣག་ཚར་སྦྱར། །དུར་ཁྲོད་རས་ལ་དེ་ཡི་མིང་། །སྔགས་སྤེལ་བྲིས་ནས་མིང་བཅུག་སྟེ། །གན་རྐྱལ་མགོ་ནི་བྱང་དུ་བསྟན། །སྲང་ཀོ་ཙ་དང་འབྱི་ཙེ་ཀ །
གཞན་མ་བཙོས་པས་དེའི་ལུས་ལ། །ཏིལ་འབྲུ་ཙམ་དུ་བཙགས་བྱས་ལ། །བསྐུལ་བའི་ཚིག་དང་སྔགས་བཅས་པ། །དགང་ཞིང་ཐུན་བཞིར་ཞག་བདུན་བྱས། །སྦྱོར་བ་དེ་ཡིས་སངས་རྒྱས་ཀྱང་། །འཇིག་པར་འགྱུར་ན་གནོད་སྦྱིན་ཀུན། །སྨོས་ཅི་དགོས་ཏེ་དེ་ལྟ་ཡིན། །རུས་ཕྱེ་
དུག་དང་ཁྲག་རྣམས་ལ། །གཟུགས་བརྙན་མིང་དང་བཅས་བྱས་ལ། །སོལ་ཁུར་སྦངས་པའི་གོས་གོན་ལ། །ཁྲོས་ནས་རྐང་པས་མནན་ཏེ་བཟླས། །ཆེ་གེ་མོ་རཀྵ་སེང་ཀྲ་ཧ་ཡ། བསྐུལ་བའི་ཚིགས་བཅད་ཐུན་བཞི་རུ། །ཞག་བདུན་བཟླས་པས་དགྲ་བོ་དེ། །སྲིན་པོས་ཁྱེར་བར་
གདོན་མི་ཟ། །སྐེ་ཚེ་མར་དང་བཤང་གཅིར་སྦྱར། །གཟུགས་བརྙན་ཡོག་པར་བླུགས་བྱས་ལ། །བདུད་རྩི་འཁྱིལ་པའི་རྐང་པ་མཆོག །མེ་ཡི་འཁོར་ལོར་བྱིན་གྱིས་བརླབ། །པྲ་ཤ་ཛ་ལ་ཆེ་གེ་མོ་མཱ་ར་ཡ་ཧཱུྃ་ཕཊ། གོང་གི་སྔགས་སྤེལ་ཐུན་བཞི་རུ། །ཞག་བདུན་གཡེལ་མེད་
སེམས་ཀྱིས་བསྒྲུབ། །ཚ་བའི་ནད་ཀྱིས་འདེབས་པར་བྱེད། །གང་ཡང་རུང་བའི་རྣལ་འབྱོར་པས། །ཐམས་ཅད་སྔ་མ་བཞིན་བྱས་ལ། །ཕྲན་ཚེགས་རྡོ་རྗེ་གསང་བ་ཡི། །གསང་བའི་ལས་འདི་བསྒྲུབ་པའོ། །རྡོ་རྒྱུས་སམ་དུར་ཁྲོད་སོལ་བ་ལ། །དེ་ཉིད་གསུམ་གྱི་བར་བཅུག་

44-1-49a

པའི། །ཁྃ་ནི་བརྒྱ་རྩ་བརྒྱད་བཟླས་ན། །དུར་ཁྲོད་ས་ལ་སྦྲུལ་གཟུགས་བྲི། །ནག་པོ་མི་སྡུག་འཇིགས་བྱེད་པ། །འོད་འབར་སེམས་འཁྲུགས་མཆེ་ཕྲེང་གཏམས། །ལྕེ་གཉིས་མྱུག་པ་མིག་བགྲད་པ། །མཇུག་མ་རྡེབ་པའི་ཚུལ་ཅན་ནོ། །དེ་ཡི་ཁ་རུ་མི་བཟད་
དུག །སྲེག་བྱེད་ལྟ་བུ་དམར་ནག་ཏུ། །གནས་པའི་ཡི་གེ་ཁཾ་བསམས་ཏེ། །དེ་ཡིས་སྦྲུལ་དེ་གནས་ལས་བསྐྱོད། །དེ་ཡི་ལྕེ་ཡི་རྩེ་མོ་ལ། །ཧྲཱི་ལྗང་ཁུ་ཡི་ལྕགས་ཀྱུ་ཡིས། །རྒྱུ་བ་དང་ནི་གནས་པའི་དུག །ཧ་ལ་ཧ་ལ་ལ་སོགས་ཀུན། །བཀུག་སྟེ་བསྡུས་ནས་ཁྱེར་འོངས་ནས། །
ལྕེ་ཡི་རྩེ་ལ་གཞུག་པར་བྱ། །དེ་ཡིས་ཁམས་གསུམ་དུག་བླངས་ནས། །དེ་ཉིད་དུག་གིས་གང་བར་བསམ། །ཨོཾ་ཀྲིཥྞ་སརྦ་ཆེ་གེ་མོའི་དཔྲལ་གྲིཧྣ་ན་ཁཾ་ཧྲི་ཕཊ། བརྗོད་པས་དེ་སོད་དཔྲལ་བར་བཟུང་། །མཆེ་བས་ཕུག་སྟེ་ལྕེས་རེག་པས། །རྡོ་རྗེ་འཆང་བ་ཆེན་པོ་ཡང་། །དུག་གིས་
འཆི་ངེས་དོགས་པ་མེད། །དེ་ཁོ་ན་བཞིན་སྡིག་པ་དང་། །སྲེ་མོང་ལྟ་བ་ཨེ་ན་པ། །ཆུ་སྦྲུལ་རླུང་སྦྲུལ་ལ་སོགས་པ། །ས་ཡི་ཟས་ཅན་སྦལ་པ་ལས། །བསྒྲུབ་བྱ་འཛིན་དུ་གཞུག་པའི་ཕྱིར། །བྲི་བའི་རྫས་དང་གཟུགས་དང་བསྐུལ། །གདུག་པ་ཀུན་ནས་རྦད་བཏང་བས། །དེ་ཡིས་
མི་འཆི་དོགས་པ་མེད། །གཤིན་རྗེ་གཤེད་ཀྱི་སྦྱོར་ལྡན་པས། །ཐམས་ཅད་སྔ་མ་བཞིན་བྱས་ལ། །དཀོན་མཆོག་གནོད་བྱེད་གཞོམ་པའི་ཕྱིར། །སྦྱོར་བ་བཞི་ཡིས་བསྒྲུབ་པར་བྱ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཆེ་གེ་མོ་པ་ཏ་ཡ་ཧཱུྃ་ཕཊ། དེ་ཡིས་དུར་ཁྲོད་སོལ་བ་ལ། །སྟོང་རྩ་བརྒྱད་ནི་
བཏབ་ནས་ཀྱང་། །རོ་བསྲེགས་ཤུལ་གྱི་ས་ལ་ཡང་། །བསྒྲུབ་བྱའི་གཟུགས་བྲིས་བཀུག་སྟེ་གཞུག །བཀས་པའི་བསམ་པས་སོལ་བ་དེ། །གོང་གི་སྔགས་བཟླས་སྤུ་གྲི་ལྟར། །བསམས་ཏེ་མགུལ་པའམ་སྤྱི་བོ་ནས། །དེ་ལྟར་ཐུན་བཞིར་ཞག་བདུན་སྦྱར། །སྤྱི་བོ་འགས་སམ་
མགོ་འཆད་པར། །འགྱུར་བར་འདི་ལ་སོམ་ཉི་མེད། །དེ་བཞིན་དེ་འདྲའི་རྣལ་འབྱོར་པས། །དེ་ཉིད་ལག་པ་གཡས་པར་འགྱུར། །མདུན་དུ་བསྒྲུབ་བྱའི་ལུས་བསམས་ལ། །སྔགས་འདི་ཉིད་ཀྱིས་བསྣུན་ཞིང་བརྒྱབ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཆེ་གེ་མོ་མུ་ཧྐ་ར་ཨ་ཏ་ཡ་ཧཱུྃ་ཕཊ། དེ་ཡིས་

44-1-49b

ཐུན་བཞིར་ཞག་བདུན་དུ། །བསྣུན་ཞིང་བརྡུངས་པས་བསྒྲུབ་བྱ་དེ། །གཡང་དུ་ལྟུང་ནས་འཆི་བར་ངེས། །ཡང་ན་དེ་ཡི་རྣལ་འབྱོར་གྱིས། །གཡས་པར་དུ་ལས་བྱུང་བ་ཡི། །རྡོ་རྗེ་རྩེ་ལྔས་བསྒྲུབ་བྱ་ཡི། །ལུས་ལ་བསྣུན་ཞིང་འདི་བརྗོད་དོ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཆེ་གེ་མོ་བཛྲ་ཨ་ཀོ་ཊ་ཡ་
ཧཱུྃ་ཕཊ། དེ་ཡིས་ཐུན་བཞིར་ཞག་བདུན་དུ། །ཁ་ཕྱེ་བསྣུན་པས་བསྒྲུབ་བྱ་དེ། །སྲིན་པོ་ལ་སོགས་འཇིགས་པར་བྱེད། །དེ་ལྟར་དེ་ཡི་རྣལ་འབྱོར་གྱིས། །སྔོན་བཞིན་སྔགས་བཏབ་རྡོ་རྒྱུས་སམ། །སོལ་བས་དུར་ཁྲོད་ས་གཞི་ལ། །བསྒྲུབ་བྱ་ཕོ་མོའི་གཟུགས་བྲིས་ལ། །ཧཱུྃ་བསྐྱེད་སྟ་
གྲི་ལག་པར་བསམ། །ཁྲོས་ཏེ་མགུལ་པར་སྔགས་བཟླས་ནས། །མིད་པ་བཅད་པར་བསམ་པ་ནི། །སྦྱོར་བ་ཐུན་བཞིར་ཞག་བདུན་དུ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཆེ་གེ་མོ་ཝཱཀ་ཏི་པ་ཏ་ཧཱུྃ་ཕཊ། བརྗོད་ཅིང་གཡེལ་བ་མེད་པ་ཡིས། །བཟླས་པས་བསྒྲུབ་བྱ་མགུལ་འགགས་ནས། །ཁ་ཟས་
མི་ཐར་ནད་ཀྱིས་འཛིན། །དེ་བཞིན་བགེགས་དགྲའི་སྦྱོར་བ་ཡིས། །རོ་བསྲེགས་ཐལ་བ་རུས་ལ་སོགས། །ཁྲོ་བོ་ཉི་ཤུའམ་དེ་ཕྱེད་ཀྱིས། །མེ་ཐབ་དཀྱིལ་འཁོར་གྲུ་གསུམ་བྱ། །མར་ཆེན་དུད་པས་ཁ་དོག་བསྒྱུར། །ཁ་ཕྱེ་རྡོ་རྗེ་རྩེ་གསུམ་པས། །དབུས་སུ་ཁ་ཁྱེར་གསུམ་བྱས་ཏེ། །
ཚེར་མའི་མེ་ནི་ཁྲོས་ནས་སྦར། །བཤད་པའི་ཆོ་གས་མེ་ལྷ་བསྐྱེད། །གོང་གསུངས་རྫས་བྱས་གཟུགས་བརྙན་གཏུབ། །དེ་ཡི་ཞལ་དུ་ལན་གསུམ་དུ། །གང་བའི་སྦྱིན་སྲེག་དབུལ་བར་བྱ། །དེ་ཡི་ཡེ་ཤེས་སེམས་དཔའ་རུ། །བདུད་རྩི་འཁྱིལ་པ་ཞལ་གདངས་པ། །ཧཱུྃ་ལྗགས་མཆེ་བ་
རྣོན་པོ་ཅན། །ཁྲོ་དང་ལྡན་པ་སྔོན་བཞིན་བསམ། །སྲོག་སོང་སྟེང་ངམ་སྲ་བའམ། །ཡང་ན་ཅི་ཡང་མེད་པ་རུ། །རྐང་པས་རྐང་པ་མནན་ནས་སུ། །སོས་ནི་སོ་ཡང་འཆའ་བར་བྱེད། །བ་ལང་ཤ་དང་ཁྱི་ཡི་ཤ། །ཟངས་ཕུད་ཅན་སོགས་ཤ་རྣམས་ནི། །བསྒྲུབ་བྱའི་ཡན་ལག་ཏུ་བསམས་
ལ། །གོང་མའི་སྔགས་ཀྱིས་སྦྱིན་སྲེག་བྱ། །ཤ་ཆེན་འབའ་ཞིག་ཁོ་ན་ལ། །དགྲ་ཡི་གཟུགས་བརྙན་བྱས་ནས་ནི། །དེ་ཡི་ཞལ་དུ་སྦྱིན་སྲེག་བྱས། །རྡོ་རྗེ་ལས་བྱུང་འཇིག་པར་བཤད། །སྔོན་བཞིན་དགྲ་ཡི་གཟུགས་བརྙན་ལ། །བཤང་གཅི་འབྲུ་མར་བཅས་བྱུགས་ནས། །སྔོན་

44-1-50a

གསུངས་སྔགས་དང་བསྐུལ་བར་བྱ། །ཚེར་མའི་མེ་ལ་ཁྲོས་ཏེ་བསྲེག །ཐུན་བཞིར་ཞག་བདུན་བརྒྱ་རྩ་བརྒྱད། །བཟླས་པས་སངས་རྒྱས་ཀྱིས་སྦྱར་བའི། །ལས་ཀྱང་འཇིག་ན་དགྲ་བོ་ཡི། །སྦྱར་བའི་ལས་ནི་སྨོས་ཅི་དགོས། །བསད་པས་དེ་དག་ཐམས་ཅད་
ཀུན། །ཐུགས་རྗེས་བཟུང་ཕྱིར་རྣལ་འབྱོར་ཆེས། །གཉིས་བྲལ་འདས་པའི་དེ་མ་ཐག །འཇུག་པའི་ལས་འདི་བརྩམ་པའོ། །དེ་དག་རྣམས་ཀྱིས་དངོས་པོ་རྣམས། །མ་སྐྱེས་པར་ནི་གཞི་གནས་ཀྱང་། །འབྲས་བུ་མྱོང་བར་ངེས་པའི་ཚུལ། །ཡེ་ཤེས་རང་རིག་ཆེན་པོ་མཆོག །
ས་བོན་འོད་ཟེར་གྱིས་བཀུག་ནས། །ཞལ་དུ་ཞུགས་ནས་ཞུ་གྱུར་ཏེ། །རྡོ་རྗེ་ལམ་བྱུང་པདྨར་གནས། །ཡེ་ཤེས་བདུད་རྩིའི་གཟུགས་གྱུར་ལ། །སྤྱན་སོགས་ལྷ་མོས་བསྐུལ་བ་ལ། །ཧཱུྃ་ལས་རྡོ་རྗེ་ཧཱུྃ་གིས་མཚན། །སྤྲོ་བསྡུས་མི་བསྐྱོད་རྡོ་རྗེར་བསྐྱེད། །ཆོས་ཀྱི་དབྱིངས་སུ་བྱིན་གྱིས་
བརླབ། །རང་ལས་དགུ་གཉིས་དྲུག་ཕྱུང་ནས། །གཉིས་དང་གསུམ་དུ་རྫོགས་བྱས་ལ། །དང་པོ་རྟོག་པ་ཡོངས་དག་ཕྱིར། །སྔགས་ཀྱིས་ཕུར་བུ་དབྱུང་བར་བྱ། །ཨོཾ་ཨཱཿབཛྲ་ཀཱི་ལི་ཀི་ལཱ་ཡ་ཧཱུྃ། ཕྱུང་ནས་དེ་ཡི་གནས་སུ་ཡང་། །རང་གི་ཡེ་ཤེས་འཁོར་ལོ་ཅན། །གནས་བཅས་
བསམས་ནས་འོད་ཟེར་གྱིས། །སྔོན་བཞིན་རང་སྒྲ་སངས་རྒྱས་སུ། །བསྐྱེད་དང་དེས་བསྐྱེད་ལྷ་མོའི་ཚོགས། །བདུད་རྩི་ལྔས་གང་བུམ་པ་ཡིས། །དབང་བསྐུར་དེ་དང་བླ་མར་བཅས། །ཞུགས་པས་རྡོ་རྗེ་སེམས་དཔར་བསྐྱེད། །ཨོཾ་བཛྲ་དྷྲྀཀ་སྔགས་ཀྱིས་ཕྱུང་སྟེ། །མདུན་དུ་རླུང་གི་
དཀྱིལ་འཁོར་སྟེང་། །འཁོར་ལོ་བཅས་པ་མོས་བྱས་ལ། །མཆོད་བསྟོད་བདུད་རྩི་མྱང་བ་བྱ། །ཨ་ཧོ་ཡཾ་གི་སྔགས་བརྗོད་པས། །རླུང་གིས་བཏེག་ནས་མངོན་དགའ་རུ། །གཤེགས་སུ་གསོལ་བའི་སྔགས་འཕངས་པས། །དེ་དག་སྲས་སུ་སྐྱེ་བར་ངེས། །རང་རང་ལྷ་ཡི་སྦྱོར་
བའམ། །དེ་ཡི་གནས་པ་གང་རུང་དུ། །བློ་གྲོས་ལྡན་པའི་རྣལ་འབྱོར་པས། །སྦྱོར་བ་དེ་ཁོ་ན་ཡིས་བྱ། །གཉིས་པོ་རང་ཞུགས་དེ་མ་ཐག །དེ་ཡི་ཡེ་ཤེས་རང་ལྷའམ། །ཞེ་སྡང་དག་པའི་སྦྱོར་ཁོ་ནས། །གོང་མ་བཞིན་དུ་རབ་ཏུ་བརྩམ། །བདག་མེད་སེམས་མེད་བེམས་པོ་ནི། །

44-1-50b

ལན་གསུམ་གྱིས་ནི་གཞིག་བྱས་པས། །གོང་གི་སྦྱོར་བས་འབྲས་བུ་ཆེ། །མཇུག་ཏུ་བརྩམ་མི་དགོས་པར་འབྱུང་། །དེ་ལྟར་ཐབས་དང་སྔགས་ལྡན་པས། །འཁོར་བའི་འོག་མའི་རྒྱུ་ལྡན་པ། །བསད་པས་རང་དང་གཞན་དག་པས། །མ་འཁྲུལ་པ་རུ་གསུངས་པའོ། །སྲེད་པ་
ཞེ་སྡང་གིས་བསླང་བའི། །སེམས་ཀྱིས་གསོད་པའི་གཏི་མུག་ཅན། །ཐབས་མེད་ཡེ་ཤེས་དང་བྲལ་བས། །ཐུར་དུ་བལྟས་ཏེ་དམྱལ་བར་འགྲོ། །ད་ནི་གནས་ནས་སྤྲོ་བའི་ཆོ་ག་བཤད་པར་བྱའོ། །རང་གི་ལྷ་ཡི་སྦྱོར་བ་ཡིས། །ཐམས་ཅད་སྔ་མ་བཞིན་བྱས་ལ། །གཉིས་ཀྱི་རབ་
ཏུ་བསྒྲུབ་བྱས་པ། །གསུམ་པ་ལས་འདི་བརྩམ་པའོ། །ཐོད་པ་སྲུབས་ནི་གང་བ་དག །ཕོ་དང་མོ་ཡི་བསྐྲད་པ་ལ། །དེ་ཡི་རིགས་པས་བཙལ་བྱས་ལ། །གནོད་བྱེད་ཡུལ་གཞན་དབྱུང་བར་བྱ། །ཨ་རི་ལོ་མའི་ཁུ་བ་དང་། །རྐང་པ་གཡོན་པའི་སྲིན་ལག་ཁྲག །སྣག་ཚར་
བྱས་ཏེ་བྱ་རྒོད་ཀྱི། །སྒྲོ་རྩའི་སྨྱུ་གུས་བྲི་བར་བྱ། །མགར་བའི་དུར་ཁྲོད་རས་མ་ལ། །གཞུ་འདྲ་རླུང་གི་དཀྱིལ་འཁོར་སྟེང་། །རལ་གྲི་ཡིས་ནི་མཚན་པ་བྲི། །དེ་སྟེང་བསྒྲུབ་བྱའི་གཟུགས་གཞག་ལ། །གོང་གི་རས་ལ་དེ་ཡི་མིང་། །སྔགས་ཀྱི་བར་བཅུག་ཆེ་གེ་མོ། །ཨུཙྪ་ཏ་ཡ་ཕཊ་
བྲིས་ལ། །དེ་ཡི་སྙིང་གར་གཞུག་པར་བྱ། །བཀུག་སྟེ་བཅུག་ནས་དེ་དཀྲིས་ལ། །ཐོད་པ་རུ་ནི་བཅུག་བྱས་ཏེ། །ཁྲོ་བོའི་ཚིག་གི་རང་རང་སྔགས། །རིག་དང་བཅས་པར་བརྒྱ་རྩ་བརྒྱད། །ཐུན་བཞིར་ཞག་བདུན་བཟླས་བྱས་ནས། །ཁྱིམ་མམ་གྲོང་ངམ་སྒོ་དག་ཏུ། །སྦས་ཏེ་བཞག་
ན་དུས་དེ་རུ། །སངས་རྒྱས་དཔུང་ཡང་སྐྲོད་པར་འགྱུར། །དེ་བཞིན་ཏཱ་ལའི་ལོ་མ་ལ། །གྲོ་གའམ་ཤོག་ཤོག་རས་ལ་སོགས། །སྣོད་མེད་ཆོ་གས་གོང་མ་ལྟར། །སྟོང་རྩ་བརྒྱད་ནི་རིག་བཅས་བཟླས། །དགྲ་ཡི་ཁྱིམ་མམ་སྒོ་དག་ཏུ། །སྦས་ཏེ་བཞག་ན་མྱུར་བ་རུ། །དཀོན་
མཆོག་འཇོམས་པའི་དགྲ་བོ་ཆེ། །སྐམས་སམ་འཆི་འམ་སྐྲོད་པར་ངེས། །ལས་དེ་བདུད་རྩི་འཁྱིལ་པ་ཡི། །སྦྱོར་བ་ཡིས་ཀྱང་རབ་ཏུ་བསྒྲུབ། །ཐམས་ཅད་སྔ་མ་བཞིན་བྱས་ལ། །ཆོ་ག་འདི་ནི་རབ་ཏུ་བརྩམ། །རྒྱལ་མཚན་རས་ནི་ཆག་གང་ལ། །གྲུ་བཞི་ལྷམ་པར་ཁ་ཏི་དང་། །ཨ་རི་

44-1-51a

ཤ་ཡི་ལོ་མ་དང་། །རོ་བསྲེགས་སྨྱོ་བྱེད་སོལ་བ་དང་། །མུ་ཟིའི་དུག་དང་རྐང་གཡོན་གྱི། །མིང་མེད་ཁྲག་ལ་སྣག་ཚར་བྱས། །ཁྭ་ཡི་གཤོག་པའི་སྨྱུ་གུ་ཡིས། །རླུང་གི་དཀྱིལ་འཁོར་གཞུ་འདྲ་ལ། །ཕྱོགས་བཞི་མཚམས་བརྒྱད་རྩེ་བསྟན་པའི། །རལ་
གྲི་བརྒྱད་པའི་འཁོར་ལོ་ལ། །དེ་དབུས་བསྒྲུབ་བྱའི་གཟུགས་བྲིས་ལ། །དེ་ཡི་སྙིང་གར་ཕྲེང་སྔགས་ནི། །གོང་གི་རིག་པ་དང་བཅས་པ། །དགུག་མེད་བྲིས་ནས་སྙིང་གར་གླན། །བཀུག་སྟེ་བཅུག་ནས་རྐང་གཡོན་གྱིས། །མནན་ཏེ་བརྒྱ་དང་རྩ་བརྒྱད་བཟླས། །ན་མཿས་མནྟ་ཀཱ་ཡ་
ཝཱཀ་ཙིཏྟ་བཛྲཱ་ཎཱཾ། ན་མོ་བཛྲ་ཀྲོ་དྷཱ་ཡ། མ་ཧཱ་དཾཥྚྲཱོ་ཊ། ཀ་ཊ་བྷེ་ར་བ་ཡ། ཨ་སི་མུ་ས་ལ་པ་ར་ཤུ། བཱ་ཤ་ཧསྟཱ་ཡ། ཨོཾ་ཨ་མྲྀ་ཏ་ཀུཎྜ་ལི་ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། པ་ཙ་པ་ཙ། གརྫ་གརྫ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷྣཱཾ། བི་ནཱ་ཡ་ཀ་ནཾ། ཆེ་གེ་མོ་ཨུ་ཙྪ་ཏ་ཡ་
ཕཊ། དེ་ཡང་ཕྱག་འཚལ་མཇུག་ཏུ་ཡང་། །བསྐུལ་བ་འདི་ནི་བྱ་བ་དང་། །ཕྱག་འཚལ་བསྐུལ་དང་བོད་པ་དང་། །ལས་བརྒྱད་དེ་དག་ཏུ་ཤེས་བྱ། །དེ་ལྟར་བསྔགས་ནས་རས་མ་དེ། །མ་མོ་ལ་སོགས་གནས་སུ་སྦ། །སངས་རྒྱས་དཔུང་ཡང་སྐྲོད་བྱེད་ན། །བགེགས་ཀྱི་གནོད་པ་སྨོས་
ཅི་དགོས། །ད་ནི་བསྒྲུབ་བྱ་སྲིན་པོ་ལ་སོགས་པས་འཛིན་དུ་གཞུག་པའི་ཆོ་ག་བཤད་པར་བྱའོ། །ཐམས་ཅད་སྔ་མ་བཞིན་བྱས་ལ། །གཞན་གྱིས་མི་ཐུབ་རྣལ་འབྱོར་གྱིས། །གསུམ་པའི་དུས་སུ་རྫས་ལྡན་པར། །ཆོ་ག་འདི་ཡིས་ལས་འདི་བྱེད། །རྒྱལ་མཚན་དང་ནི་མཚོན་བསྣུན་དང་། །
ཤི་བའི་ཐོད་པ་གཉིས་བཙལ་ལ། །དུར་ཁྲོད་ཀྱི་ནི་སོལ་བ་ལ། །ཁྲོ་བོའི་སྔགས་ནི་རིག་བཅས་བཟླས། །དེ་ཡི་ཐོད་པར་སྲིན་པོའི་གཟུགས། །འཇིགས་རུང་གྱེན་བརྫེས་མཆེ་གཙིགས་པ། །ཤ་རློན་ཟ་ཞིང་ཁྲག་འཛག་པ། །གཡས་གཡོན་རོ་ལངས་གྲི་དང་ནི། །སྡིགས་འཛུབ་བྱེད་
པ་ཧཱུྃ་བསྐྱེད་བྲི། །དེ་ཡི་སྙིང་གར་རུས་ཕྱེ་དང་། །དུག་དང་མཐེའུ་ཆུང་ཁྲག་གིས་ནི། །ཆེ་གེ་མོ་ནི་ཟུང་ཤིག་བྲི། །ཡང་ནི་ཐོད་པ་གཉིས་པ་ལ། །བསྒྲུབ་བྱའི་རྐང་རྗེས་ས་དང་ནི། །རོ་བསྲེགས་ས་དང་ཐལ་བ་དང་། །སོལ་བ་གཅིན་གྱིས་སྦྲུས་བྱས་ལ། །དེ་ཡི་གཟུགས་བརྙན་བྱས་

44-1-51b

ནས་སུ། །དུག་དང་རུས་ཕྱེ་མཛུབ་མོའི་ཁྲག །མིང་དང་སྔགས་བཅས་ཏ་ལེར་བྲིས། །དེ་ཡིས་སྙིང་གར་གཞུག་པར་བྱ། །གཉི་ག་བཀུག་སྟེ་བཅུག་བྱས་ནས། །དེ་ནི་འོག་བཞག་གོང་མ་སྟེང་། །སྲིན་པོ་དེ་ཡིས་བསྒྲུབ་བྱ་རྣམས། །བཟུང་བར་བསམས་ནས་ཁྲོས་བྱས་ཏེ། །ནག་
པོ་གཉིས་ལ་དུར་ཁྲོད་དུ། །ནམ་ཕྱེད་སོང་ནས་བསྒྲེང་བྱས་ཏེ། །སྔགས་བཟླས་སྲིན་པོའི་འཛིན་པར་འགྱུར། །ན་མཿས་མནྟ་ནཾ། ཀཱ་ཡ་ཝཱཀ་ཙིཏྟ་བཛྲ་ཎཱཾ། ཨོཾ་ཧཱུྃ་ཛི་ན་རི་ཏ་ཆེ་གེ་མོ་རཀྵ་གྷི་ཧ་ནཾ་ཧཱུྃ་ཕཊ། དེ་བཞིན་སྦྲུལ་དང་སེངྒེ་དང་། །འབྱུང་པོ་སྡིག་ལ་སོགས་པ་རྣམས། །ཆོ་ག་གོང་
བཞིན་གཉིས་པར་བྲི། །གོང་གི་སྔགས་དེ་རིགས་བཅས་བཟླ། །གཡེང་མེད་གཉིས་ཀྱི་མཚན་དུས་སུ། །ཁྲོས་ནས་བསྒྲེང་ཞིང་བཟླས་བྱས་པས། །གལ་ཏེ་མི་བསྐྱོད་ཡིན་ན་ཡང་། །དེ་དག་རྣམས་ཀྱིས་འཛིན་པར་འགྱུར། །དེ་དག་ཐར་བར་བྱེད་འདོད་པས། །འཛིན་བྱེད་དེ་དག་ཐམས་
ཅད་ཀུན། །བསྒྲུབ་བྱའི་ལུས་ལ་བསྡུས་བྱས་ལ། །རྐང་པ་གཉིས་ཀྱིས་མཉེ་བར་བྱ། །ལག་གཉིས་འབར་བའི་རྡོ་རྗེར་བསྐྱེད། །དེ་ཡིས་དབྱུག་པས་བརྡུང་བར་བྱ། །རྡོ་རྗེ་འབར་བས་བརྡུང་བ་དང་། །སྔོན་གྱི་སྔགས་བཟླས་ལྕུག་མས་གདབ། །ཆེ་གེ་མོ་རཀྵ་ས་འདི་ཕྱི་མོ་ཙ་ཡི། །སྲིན་
མོ་མ་རུངས་གཏུམ་མོ་དང་། །འཇིགས་པ་ཆེན་པོས་འཁྲུགས་པ་ལ། །སྦྱོར་བ་དེ་ཡིས་རབ་སྦྱར་ན། །ཆོ་ག་བཞིན་དུ་གྲོལ་བར་བྱེད། །ད་ནི་དགུག་པའི་ཆོ་ག་རྒྱས་པར་བཤད་པར་བྱའོ། །རི་མོའི་དཀྱིལ་འཁོར་བྲིས་ནས་སུ། །ལྷ་ཡིས་དབང་བསྐུར་ཡན་ཆད་ནི། །ཐམས་ཅད་གོང་
མ་བཞིན་བྱས་ལ། །བསམ་གཏན་འཁོར་ལོས་དགུག་པར་བསྒྲུབ། །རྣམ་པར་སྣང་མཛད་སྦྱོར་བ་ཡིས། །འཁོར་ལོ་ཆེན་པོ་རྣམ་པར་བསམས། །མཆོད་བསྟོད་བདུད་རྩི་མྱང་བྱས་ལ། །ལྕགས་ཀྱུ་གནས་ནི་བསྒོམ་པར་བྱ། །ཨོཾ་ཨཱཿཛི་ན་ཛི་ཀ་ཆེ་གེ་མོ་སེམས་ཅན་ནམ་སེམས་
ཅན་མ་ཡིན་པ་ཨཱ་ཀཪྵ་ཡ་ཛཿ། བརྗོད་པས་དེ་ལས་རབ་འཕྲོས་པས། །ལྕགས་ཀྱུ་ཞགས་པས་མཚན་པ་ཡི། །ལྷ་ཡི་སྐུ་ནི་མང་པོ་དག །བསྒྲུབ་བྱ་འགུགས་ཕྱིར་སྤྲོ་བར་བྱ། །དགུག་བྱ་མིང་གི་ཡི་གེས་བསྐྱེད། །ཡཾ་བྱུང་རླུང་དཀྱིལ་ལ་བཞག་སྟེ། །ལྕགས་ཀྱུས་སྙིང་བཏབ་ཞགས་

44-1-52a

པས་བཅིངས། །རླུང་གིས་བཏེག་ནས་འོང་བར་བསམ། །རྡོ་རྗེ་པདྨ་འཁོར་ལོ་སོགས། །མཚན་མའི་ལྷ་རྣམས་སྤྲོས་བྱས་ནས། །དེ་ཡིས་བཏབ་པས་དེ་བཞིན་དུ། །དགུག་པར་ཐེ་ཚོམ་མེད་པའོ། །ལཾ་གིས་ཕབ་སྟེ་མདུན་བཞག་ནས། །སྔོན་བཞིན་ལྷ་མོ་
གཉིས་ཀྱིས་ནི། །འཚེ་བ་བཟློག་ནས་བཀའ་ནོད་བསམ། །དེ་ལྟར་སྦྱོར་བས་ཞག་བདུན་དུ། །ཐུན་བཞིར་རབ་ཏུ་སྦྱར་བྱས་ནས། །དགུག་ལས་མི་འདའ་ཀུན་གྱིས་ཀྱང་། །སྒྲུབ་པོ་ལས་ཐབས་བྱེད་པར་འགྱུར། །དེ་བཞིན་མི་བསྐྱོད་རྡོ་རྗེ་དང་། །རྣམ་པར་སྣང་མཛད་འོད་དཔག་མེད། །
འཁོར་ལོ་ཆེན་པོའི་སྦྱོར་བ་ཡིས། །ལྕགས་ཀྱུས་གནས་བསམ་རང་སྔགས་བརྗོད། །ཨོཾ་ཨཱཿབཛྲ་དྷྲྀཀ་ཆེ་གེ་མོ་ཨཱ་ཀཪྵ་ཡ་ཛཿ། ཨོཾ་ཨཱཿཨ་རོ་ལྀཀ་ཆེ་གེ་མོ་ཨཱ་ཀཪྵ་ཡ་ཛཿ། གཞན་ཀུན་སྔོན་བཞིན་དཔག་བྱས་ལ། །ཐུན་བཞིར་ཞག་བདུན་སྦྱོར་བ་ཡིས། །རྡོ་རྗེ་གསུམ་གྱི་ནུས་པ་ཡང་། །
འགུགས་འགྱུར་བསྒྲུབ་བྱ་སྨོས་ཅི་དགོས། །སེམས་ཀྱི་སྤྱོད་པ་གཞན་བྲལ་བས། །རྫོགས་ཆེན་རྟོགས་པའི་རྣལ་འབྱོར་པས། །དེ་ཡི་བསམ་གཏན་འབའ་ཞིག་གིས། །དགུག་པ་དག་ནི་ཐབས་སུ་གསུངས། །དགའ་དང་དགའ་བ་རབ་དགའ་ཡི། །སྐྱེད་པ་གོང་དུ་མངོན་བྱས་ལ། །
བསྒྲུབ་བྱ་ཡེ་ཤེས་ངོ་བོ་རུ། །བྱས་ཏེ་གཉིས་པར་ཆུད་བྱས་ཏེ། །མ་འཕྲོས་རྩེ་གཅིག་པ་ཡིས་གཟུང་། །ཡེ་ཤེས་གསུམ་གྱིས་སྐུ་གསུམ་མཆོག །དེ་ཡི་རྒྱུད་ལ་འགུགས་འགྱུར་ན། །སྔགས་རྒྱུད་ལ་སོགས་བསྒྲུབ་བྱ་ནི། །སྨོས་ཅི་དགོས་ཏེ་དེ་མཆོག་ཡིན། །དེ་བས་རྣམ་པ་ཐམས་
ཅད་དུ། །ལས་རྣམས་ཀུན་འདི་བསྟན་པ་ཡིན། །ལུས་སོགས་མེད་པའང་དགུག་སོགས་འགྱུར། །གཤིན་རྗེ་གཤེད་ཀྱི་རྣལ་འབྱོར་པས། །ཐམས་ཅད་སྔ་མ་བཞིན་བྱས་ལ། །རང་གི་སྔགས་ཀྱི་རིག་པ་མཆོག །གྲངས་མེད་བཟླས་པ་རབ་ཏུ་བྱ། །དེ་ནས་ལུས་རྩལ་ཐོབ་པ་ཡིས། །
འབུམ་ཕྲག་གཅིག་ནི་བཟླས་པ་བྱ། །རི་མོའི་དཀྱིལ་འཁོར་བྲིས་བྱས་ལ། །ལྷ་ཡིས་དབང་བསྐུར་བར་གྱིས་ཞུགས། །བུད་མེད་གཞོན་ནུའི་ཐོད་པ་ནི། །མ་ཆག་ཅིང་ནི་མ་གས་པ། །པདྨ་ལྟར་མཛེས་ཡིད་དུ་འོང་། །དུམ་བུ་གཅིག་པ་བླངས་བྱས་ནས། །གི་ཝང་ལ་ནི་སྔགས་བཟླས་

44-1-52b

ནས། །རླུང་གི་དཀྱིལ་འཁོར་སྟེང་དུ་ནི། །པདྨ་འདབ་མ་བརྒྱད་བྲིས་ཏེ། །ལྟེ་བར་དགུག་པར་བྱ་བ་ནི། །གུར་གུམ་གོ་རོ་ཙ་ནས་བྲི། །གྲོ་ག་ཤོག་ཤོག་ལ་སོགས་ལ། །ཕྲེང་སྔགས་འདི་ནི་མི་དགུག་པར། །སྭཱ་ཧཱ་བཏོན་ཏེ་ཛ་བཅུག་ནས། །བསྐུལ་བ་དང་བཅས་བྲིས་ནས་ནི། །དེ་ཡི་
སྙིང་གར་གླན་པར་བྱ། །ཐོད་པ་དེ་ཡང་ཁ་སྦུབས་ནས། །གཤིན་རྗེ་གཤེད་ཀྱི་ཞབས་གཡས་བརྐྱང་། །གཡོན་པ་བསྐུམ་པས་མནན་བྱས་ལ། །ཁྲོ་དང་བཅས་པས་གསང་སྔགས་འདི། །རྡོ་རྗེ་གསུམ་དང་བཅས་བསམས་པས། །ལན་གསུམ་དྲག་ཏུ་བརྗོད་པར་བྱ། །ན་མཿས་མནྟ། 
ཀཱ་ཡ་ཝཱཀ་ཙིཏྟ་བཛྲཱ་ཎཱཾ། ཨོཾ་ཁ་ཁ་ཁཱ་ཧི་ཁཱ་ཧི། སརྦ་དུཥྚྲཱན་སཏྭ་ད་མ་ཀ །ཨ་སི་མུ་ས་ལ་པ་ར་ཤུ་པཱ་ཤ་ཧ་སྟཱ་ཡ། ཙ་ཏུརྦྷུ་ཛ་ཙ་ཏུརྨུ་ཁ། ཥོ་ཌ་ཤ་ཙ་རཱ་ཡ། ཨཱ་གཙྪ་ཨཱ་གཙྪ། སརྦ་དུཥྚྲཱན་པྲཱ་ཎཱ་ཨ་ཧ་རི་ཎི། མ་ཧཱ་བིགྷཱན་བི་ནཱ་ཡ་ཀ །བི་ཀྲྀ་ཏཱ་ན་ན་སརྦ་བྷཱུ་ཏ་བྷ་ཡ་ཀ་ར་ཡ། ཨཱ་གཏྟ་ཧ་ས་ད་དི་
ནི། བྱཱ་གྷྲ་ཙརྨ་ཎི་བ་ས་ན། ཀུ་རུ་ཀུ་རུ། སརྦ་ཀརྨ་ཚིནྡྷ་ཚིནྡྷ། སརྦ་མནྟྲཾ་བྷིནྡ་བྷིནྡ། པ་ར་མུ་ཏྲཾ། བུ་མོ་ཆེ་གེ་ཨཱ་ཀཪྵ་ཡ་ཨཱ་ཀཪྵ་ཡ། སརྦ་བྷཱུ་ཏཱཾ། ནིར་མ་ཐ་ཡ་ནིར་མ་ཐ་ཡ། སརྦ་དུཥྚྲཱན། པྲ་བེ་ཤ་ཡ་པྲ་བེ་ཤ་ཡ། མཎྜལ་མ་བི་བི་བེ་བ་སྭཱ་ཧཱ། ཛཱི་བི་ཏཱནྟ་ཀ་པྲི་ཡ། ཀུ་རུ་ཀུ་རུ། 
མ་མ་ཀརྱ། ད་ཧ་ད་ཧ། པ་ཙ་པ་ཙ། མ་བི་ལམྦ་མ་བི་ལམྦ། ས་མ་ཡ་མ་ནུ་སྨ་ར་ཧཱུྃ་ཧཱུྃ་ཕཊ་ཕཊ། སྥོ་ཊ་ཡ་སྥོ་ཊ་ཡ། སརྦ་ནཱ་ཤ་ཡ་ནི་སུཾ་ཀ་ར་ཀ་ར། ཧེ་ཧེ་བྷ་ག་བཱན། ཀཉྩི་ར་ཡ་སི་མ་མ་ཨརྠ་སཱ་དྷ་ཡཛྫ། དེ་ལས་འཕྲོས་པའི་གཤིན་རྗེ་གཤེད། །ལྕགས་ཀྱུ་ཐོགས་པ་མང་པོ་ཡིས། །
སྔོན་བཞིན་རླུང་དཀྱིལ་ལ་གནས་པའི། །བསྒྲུབ་བྱ་བུད་མེད་དགུག་པར་བྱེད། །སྐྲག་པས་འཚེ་བ་བཟློག་པའི་ཕྱིར། །སྤྱན་མའི་སྔགས་ཀྱིས་སྔོན་བཞིན་དུ། །རིང་དུ་གནས་པར་བྱ་བའི་ཕྱིར། །མཱ་མ་ཀཱི་ནི་སྦྱོར་བས་སྲུང་། །དེ་བཞིན་སྐྱེས་པའི་ཐོད་པ་ལ། །གཡོན་བརྐྱང་གཡས་
བསྐུམ་པས་མནན་ཏེ། །ཆོ་ག་སྔོན་བཞིན་རབ་བྱས་ཏེ། །སྐྱེས་པ་རྣམས་ཀྱང་དགུག་པར་བྱེད། །བསམ་གཏན་སྔགས་རྒྱུད་སྦྱོར་བ་ཡི། །ཞག་བདུན་ཐུན་བཞིར་རབ་བརྩམས་ནས། །གཤིན་རྗེ་གཤེད་ཀྱི་ཡོན་ཏན་ཡང་། །འགུགས་འགྱུར་གཞན་ལྟ་སྨོས་ཅི་དགོས། །ཐམས་ཅད་

44-1-53a

སྔ་མ་བཞིན་བྱས་ལ། །འདོད་པའི་རྒྱལ་པོ་ཁྲོ་བོ་ཆེ། །འོག་ནས་འབྱུང་བའི་ཆོ་གས་བསྒོམ། །བུ་མོ་རྣམས་ནི་དགུག་པའི་མཆོག །གཤིན་རྗེ་གཤེད་ཀྱི་རྒྱུད་གསུངས་པའི། །ཆོ་གས་བསྒྲུབ་བྱ་བཀུག་བཅུག་ནས། །གཡོན་བརྐྱང་གཡས་བསྐུམ་གྱིས་མནན་
ན། །སྔགས་འདིས་རིག་བཅས་བཟླས་བརྗོད་བྱ།  །ན་མཿས་མནྟ། ཀཱ་ཡ་ཝཱཀ་ཙིཏྟ་བཛྲཱ་ཎཱཾ། ཏ་ཀི་བུ་མོ་ཆེ་གེ་མོ་ཧཱུྃ་ཨཱ་ཀཪྵ་ཡ་ཛཿ། བརྗོད་པས་སྔགས་བྱུང་ཁྲོ་བོ་ཡིས། །ལྕགས་ཀྱུས་སྔོན་བཞིན་བཀུག་བྱས་ནས། །ཞི་བ་སྲུང་བའི་ཆོ་ག་ཡིས། །ལྷ་རྣམས་ལ་སོགས་འགུགས་པར་བྱེད། །
སྔོན་བཞིན་ཐམས་ཅད་རབ་བྱས་ལ། །རྡོ་རྗེ་ལས་བྱུང་མི་གཡོ་ནི། །འོག་ནས་འབྱུང་བཞིན་རབ་བསྒོམས་ལ། །ལྷ་ཆེན་ཆུང་མར་བཅས་པ་དགུག །སྐྱེས་པའི་ཐོད་པ་མ་གས་པ། །མཛེས་ཤིང་སྲུབ་མེད་མ་གས་པ། །འཐབ་ཚེ་གཡུལ་དུ་ཤི་བ་ཡི། །སྐྱོན་མེད་པ་དེ་བཙལ་བར་བྱ། །
རྐང་པ་གཡས་པའི་སོར་མོའི་ཁྲག །ལན་ཚྭ་ཡུངས་ཀར་སྐེ་ཚེ་ལ། །སྣག་ཚ་བྱས་ལ་བྱ་རྒོད་རྐང་། །ལྷ་ཆེན་ཆུང་མར་བཅས་པ་ཀུན། །ཐོད་པ་དེ་ལ་བྲི་བར་བྱ། །དེ་ཡི་སྙིང་གར་གོང་མ་ལྟར། །རིག་བཅས་སྔགས་ནི་དགུག་པར་བྱ། །བྲིས་ནས་སྙིང་གར་གླན་པར་བྱ། །བཀུག་སྟེ་བཅུག་
ནས་ཁ་སྦུབས་ལ། །གཡོན་བསྐུམ་གཡས་བརྐྱང་པས་མནན་ན། །སྔགས་འདི་ཐུན་བཞིར་ཞག་བདུན་དུ། །རིག་པ་དང་བཅས་བཟླས་དགུག་བྱ། །ན་མཿས་མནྟ། ཀཱ་ཡ་ཝཱཀ་ཙིཏྟ་བཛྲཱ་ཎཱཾ། ཨ་ཙ་ལ་ག་ན་ཙེ་ཏ། ན་ཌཱ་ན་ཌཱ། མོ་ཊ་མོ་ཊ། སྤོ་ཏ་སྤོ་ཏ། ད་ཧ་ད་ཧ། མོ་ཧ་མོ་ཧ། ས་ཧ་ས་ཧ། 
ཧ་ན་ཧ་ན། ཏིཥྛ་ཏིཥྛ། ཨ་བི་ཤ་ཨ་བི་ཤ །མ་ཧཱ་མཏྟ་པ་ལ་ཀ །དྷུ་ན་དྷུ་ན། ཉི་ནི་ཉི་ནི། ཁ་ད་ཁ་ད། བིགྷྣཱཾ་མ་ར་མ་ར་དུཥྚ་ནཱན། བྷཀྵ་བྷཀྵ། སརྦཾ་ཀུ་རུ་ཀུ་རུ། ཀི་རི་ཀི་རི། མ་ཧཱ་བི་ཤ་བཛྲ།སྥོ་ཊ་ཡ་སྥོ་ཊ་ཡ། ཧཱུྃ་ཧཱུྃ་ཧཱུྃ། ཏྲི་བ་ལི་བཾ་ག་ནརྟ་ཡ། ཨཾ་ཧཾ་ཨཾ་ཧཾ། ཨ་ཙ་ལ་ཙེ་ཏ། སྤོ་ཏ་ཡ་
སྤོ་ཏ་ཡ། ཧཱུྃ་ཧཱུྃ། ཨ་ས་མནྟི་ཀ །ཏྲ་ཏ་མ་ཧཱ་བ་ལ། ས་མ་ཡ་མནྟྲ་ནཾ། ཏཾ་མ་ཤུ་ཏ་བུ་ལོ་ཀ་དུ་ཤྱ་དུ། བཛྲ་ན་མ་སྟ་པྲི་ཏི་ཧ་ཏ་བ་ལ་བྱ། ཛ་ལ་ཡ་ཏྲ་ཏ་ཨ་ཧ་ས་ན་ན་མ། ལྷ་ཆེན་པོ་བུད་མེད་དང་བཅས་པ་ཨཱ་ཀཪྵ་ཡཛྫ། སྔགས་ལས་བྱུང་བའི་ཁྲོ་བོ་ཆེ། །ལྕགས་ཀྱུ་ཐོགས་པས་འགུགས་

44-1-53b

བསམས་ནས། །སྔོན་བཞིན་རབ་མཆོད་བསྲུང་བ་ཡིས། །གཡོག་དང་ཆུང་མའི་བྱ་བ་བྱེད། །དེ་བཞིན་ལྷ་མིན་ལ་སོགས་ཀྱང་། །སྦྱོར་བ་དེ་ཡིས་རབ་བསྒྲུབས་ན། །སྐྲག་ཅིང་འཇིགས་པ་གོང་མས་བསྲུང་། །ཁ་སྦྱར་ལུས་སུ་བཅས་པ་འགྲུབ། །ཐམས་ཅད་སྔ་མ་བཞིན་བྱས་
ལ། །འོག་ནས་འབྱུང་བའི་ཆོ་ག་ཡིས། །གནོད་མཛེས་རྒྱལ་པོ་བསྒོམས་བྱས་ཏེ། །བུ་མོ་རྣམས་ནི་དགུག་པར་བྱ། །མཚན་རྣམས་ཀུན་གྱིས་རྣམ་བརྒྱན་པ། །རྒྱལ་མཚན་གྱུར་པའི་ཐོད་པ་ལ། །རྐང་པ་གཡོན་པའི་མིང་མེད་ཁྲག །སྣག་ཚ་བྱས་ནས་ནེ་ཙོའི་སྒྲོས། །བསྒྲུབ་བྱའི་
བུ་མོའི་གཟུགས་བྲིས་ལ། །དེ་ཡི་སྙིང་གར་གོང་མ་ལྟར། །རིག་བཅས་སྔགས་བྲི་གླན་བྱས་ལ། །དེ་ཡི་བྷ་གར་གནོད་མཛེས་ཀྱི། རྐང་པ་གཡོན་པའི་མཐེ་བོས་མནན། །ཐུན་བཞིར་ཞག་བདུན་གསང་སྔགས་འདི། །བསྐུལ་དང་བཅས་པས་ཁྲོས་བྱས་ནས། །བརྒྱ་རྩ་བརྒྱད་དུ་
བཟླས་པའོ། །ཨོཾ་སུམྦྷ་ནི་སུམྦྷ་བུ་མོ་ཆེ་གེ་མོ་ཧཱུྃ། གྲྀཧྞ་གྲྀཧྞ་བུ་མོ་ཆེ་གེ་མོ་ཧཱུྃ། གྲྀཧྞཱ་པ་ཡ་གྲྀཧྞཱ་པ་ཡ། བུ་མོ་ཆེ་གེ་མོ་ཧཱུྃ། ཨཱ་ན་ཡ་ཧོཿབྷ་ག་བཱན་བིདྱ་རཱ་ཛ་བུ་མོ་ཆེ་གེ་མོ་ཧཱུྃ་ཕཊ་ཛྫ། དེ་ནས་དེ་བཞིན་གཤེགས་པ་ཀུན། །གནོད་མཛེས་གྱུར་པ་ལྕགས་ཀྱུ་ཞགས། །ཐོགས་པ་འཕྲོས་པས་
རླུང་དཀྱིལ་ལ། །གནས་པའི་བུ་མོ་སྙིང་ག་ཕུག །ཞགས་པས་སྐེ་ནས་བཅིངས་ནས་ནི། །འོངས་པའི་ཚེ་ན་བཟློག་པའི་ཕྱིར། །ཞིང་དང་བསྲུང་བས་བརྟན་བྱས་པས། །ཇི་ལྟར་འདོད་པའི་ལས་རྣམས་བྱེད། །གང་ཡང་རུང་བའི་རྣལ་འབྱོར་པས། །སྔ་མ་བཞིན་དུ་ཐམས་ཅད་བྱ། །
ཁ་ཏི་ལ་སོགས་བསྒྲུབ་བྱས་ལ། །སྐྱེས་པ་བུད་མེད་དགུག་པ་བསྒྲུབ། །ཟླ་བ་སྤྱང་ཀིས་ཟིན་པའི་ཚེ། །བཅག་གམ་རྡོ་རྒྱུས་ལ་སོགས་པ། །རང་གི་ཁ་རུ་བཅུག་ནས་ཀྱང་། །དེ་ཉིད་གསུམ་བསྐྱེད་ལྷ་རུ་བསམ། །དེ་བར་རང་སྔགས་བཅུག་ནས་ནི། །སྥ་ར་ཎ་ཡིས་སྤྲོ་བྱས་པས། །
དེ་ལས་བྱུང་བའི་ལྷ་རྣམས་ནི། །ལྕགས་ཀྱུས་མཚན་པས་ནམ་མཁའ་དགང་། །བསྡུ་བའི་སྦྱོར་བས་ཀུན་བསྡུས་ནས། །རྫས་ཀྱིས་ལྷ་ལ་བསྟིམ་པར་བྱ། །བརྟན་པའི་ངོ་བོས་ཡང་དང་ཡང་། །ཟླ་བ་གྲོལ་གྱི་བར་དུ་གཟུང་། །དེ་ནས་བརྩམས་ཏེ་ཐུན་བཞི་རུ། །ཞག་བདུན་གོམས་

44-1-54a

བྱས་དེ་བཏོན་ལ། །ཚངས་པ་དྲག་པོ་ལ་སོགས་ལྷ། །གང་གི་མིང་རྣམས་བྲིས་འགྱུར་ན། །རྡོ་རྗེ་ཐུགས་ཀྱི་བཀའ་བཞིན་དུ། །སྐྲག་ཅིང་འཇིགས་ནས་འོང་འགྱུར་ན། །ཐ་མལ་སྐྱེས་པ་བུད་མེད་སོགས། །སྨོས་ཅི་དགོས་པར་འོང་བར་འགྱུར། །སྔོན་བཞིན་
བཟླས་པ་ལ་སོགས་ནས། །དབང་བསྐུར་ཡན་ཆད་ཞུགས་བྱས་ཏེ། །རྡོ་རྗེ་འཛིན་པ་ལས་བྱུང་བའི། །ཐོར་ཚུགས་གཅིག་མ་བསྒོམ་པར་བྱ། །གཡས་དཀར་གཡོན་དམར་དབུ་མ་སྔོ། །དང་པོས་རང་གི་ཐབས་ལ་འཁྱུད། །གཡས་གཉིས་གྲི་དང་རལ་གྲི་དང་། །གཡོན་གཉིས་
ཐོད་པ་ནོར་བུ་བསྣམས། །རྒྱན་རྣམས་ཀུན་གྱིས་རྣམ་བརྒྱན་པ། །རྣམ་པར་སྨིན་སོགས་མོས་པ་ཡིས། །རྔ་སྒྲ་དང་ནི་ལྡན་བྱས་ནས། །ཅུང་ཟད་མཆེ་གཙིགས་དམིགས་པར་བྱ།  །མཚམས་ཐུང་མི་སྨྲར་གྱུར་པ་ཡི། །ཐོད་པ་ཀླུ་ཤིང་མེ་ཏོག་དང་། །རྐང་པ་གཡོན་པའི་མིང་མེད་ཁྲག །
བསྲེས་ཏེ་འོ་མར་སྦྱར་བྱས་ལ། །དེ་ཡི་སྐྲ་ཡི་པིར་གྱིས་ནི། །རླུང་གི་དཀྱིལ་འཁོར་ལ་གནས་པ། །ནོར་རྒྱས་ལ་སོགས་བུ་མོ་བྲི། །དེ་ཡི་སྙིང་གར་རིག་སྔགས་ནི། །བསྐུལ་བ་དང་བཅས་བྲིས་ཏེ་གླན། །བཀུག་སྟེ་བཅུག་ནས་གཡས་བརྐྱང་སྟེ། །གཡོན་བསྐུམ་པ་ཡིས་གནས་བྱས་ལ། །
སྔགས་འདི་བརྒྱ་དང་རྩ་བརྒྱད་བཟླས། །ཨོཾ་ཨཱཿབཛྲ་ཤུ་ལི་ནི་ཀླུའི་བུ་མོ་ཆེ་གེ་མོ་ཨཱ་ཀཪྵ་ཡ་ཛྫ། བརྗོད་པས་གསུམ་ལས་བྱུང་བ་ཡི། །མདུད་ཅན་མ་ནི་ལྕགས་ཀྱུས་མཚན། །རླུང་དཀྱིལ་ལ་གནས་བསྒྲུབ་བྱ་ནི། །བཅུག་སྟེ་སྔོན་བཞིན་འཚེ་བ་བཟློག །དེ་ལྟར་ཞག་བདུན་ཐུན་བཞི་རུ། །
སྔགས་རྒྱུད་དེ་ཡིས་རབ་སྦྱར་ཏེ། །ཀླུ་ཡི་བུ་མོ་མིག་བཟང་དག །བཀུག་ནས་ཉེ་བར་སྤྱད་པར་བྱ། །ཐམས་ཅད་སྔ་མ་བཞིན་བྱས་ལ། །རྡོ་རྗེ་འཛིན་པ་ལས་བྱུང་བའི། །ཁྲོ་གཉེར་མ་ཡི་སྦྱོར་བ་ཡིས། །ནམ་མཁའི་རིག་འཛིན་བུ་མོ་དགུག །དམར་སྐྱ་གཡས་སྔོ་གཡོན་དཀར་བ། །
དང་པོ་རང་གི་ཐབས་ལ་འཁྱུད། །གཡས་གཉིས་པདྨ་རལ་གྲི་འཛིན། །གཡོན་གཉིས་རིན་ཆེན་འཁོར་ལོ་འཛིན། །གསུམ་པོ་མོས་པས་དཔག་མེད་མཚན། །སེར་ལ་ཐོད་པའི་ཕྲེང་བ་བརྒྱན། །རྒྱན་ཀུན་བརྒྱན་པའི་ན་བཟའ་བཀླུབས། །མཆེ་བ་ཅུང་ཟད་གཙིགས་པ་བསྒོམ། །རྒྱལ་

44-1-54b

པོ་འདྲ་བའི་བུ་མོ་ཡི། །ཐོད་པར་རིག་འཛིན་བུ་མོའི་གཟུགས། །རླུང་གི་དཀྱིལ་འཁོར་ལ་གནས་པ། །གོང་གི་རྫས་ཀྱིས་བྲི་བར་བྱ། །སྙིང་གར་སྔོན་བཞིན་མིང་བྲིས་ནས། །བཀུག་སྟེ་བཅུག་ནས་གཡས་བརྐྱང་དང་། །གཡོན་བསྐུམ་པ་ཡིས་མནན་བྱས་ལ། །འདི་ནི་བརྒྱ་དང་རྩ་
གཅིག་བཟླ། །ཨོཾ་ཨ་པ་ཡ་ན་ཤ་ནི་ཏྲ་ས་པྲ་བྷེ་ནི་ཏྲཱ་ས་ཡ་ཏྲཱ་ས་ཡ། བེ་ཏི་བེ་ར་ཏི། ཤྠེ་པ་ཏི་ཤྠེ་བེ་ཏ། ཛ་ཏི་ནི་རིག་པ་འཛིན་པའི་བུ་མོ་ཆེ་གེ་མོ་ཨཱ་ཀཪྵ་ཡ་ཛྫ། བརྗོད་པས་སྔགས་ལས་བྱུང་བ་ཡི། །ཁྲོ་གཉེར་ལྕགས་ཀྱུས་མཚན་པ་ཡིས། །རླུང་གི་དཀྱིལ་འཁོར་ལ་གནས་པའི། །
རིག་པ་འཛིན་པའི་བུ་མོ་མཆོག །གསེར་གྱི་རྣ་རྒྱན་འཕྱང་བརྣམས། །བཀུག་སྟེ་འོང་བ་རྒྱས་བཏབ་པོ། །ལྷུན་གྱིས་གྲུབ་པ་གཉིས་མི་དགོས། །ཐུན་བཞིར་ཞག་བདུན་སྦྱར་ན་འགྲུབ། །གཤིན་རྗེ་གཤེད་ཀྱི་རྣལ་འབྱོར་པས། །སྔོན་བཞིན་ཐམས་ཅད་རབ་བྱས་ལ། །མར་ངོ་བཅུ་
བཞི་ཚེས་བརྒྱད་ལ། །རོ་བསྲེགས་སོལ་བ་བླངས་ནས་ནི། །སྔགས་འདི་བརྒྱ་རྩ་བརྒྱད་དུ་ནི། །བཟླས་ནས་སྲིན་པོ་ལ་སོགས་པ། །མིང་བཅས་གྲོ་ག་ལ་སོགས་ལ། །བྲིས་ནས་དེ་ཡིས་དགུག་པར་བྱེད། །ཨོཾ་ཧྲཱིཿཥྚྲཱིཿཝཱི་ཀྲྀ་ཏཱ་ན་ན་སྲིན་པོ་ལ་སོགས་པ་ཆེ་གེ་མོ་སྐྱེས་པའམ་བུད་མེད་འདི་
བདག་ལ་བྱིན་ཞིག་སྟམྦྷ་ཡ་ཧཱུྃ་ཕཊ་ཛྫ། བརྗོད་ཅིང་དེ་མནན་ཐུན་བཞི་རུ། །བདུན་སྦྱར་སྲིན་པོ་ལ་སོགས་པས། །རང་གིས་བཀའ་སྩལ་གང་ཡང་རུང་། །ཁྲིད་ནས་ངེས་པར་འབུལ་བར་བྱེད། །འདས་མ་ཐག་པའི་སྦྱོར་བ་ཡིས། །ཐམས་ཅད་སྔ་མ་བཞིན་བྱས་ལ། །ཇི་སྐད་བཤད་པའི་
ཕྱག་རྒྱ་མཆོག །བསྒྲུབ་ཕྱིར་སྦྱིན་སྲེག་ཆོ་ག་བྱ། །དུར་ཁྲོད་ཐལ་བ་སོལ་བ་ལ། །ཧོམ་ཁུང་གྲུ་གསུམ་ཁྲུ་དོ་པ། །ཟབས་སུ་ཁྲུ་གང་ཁ་ཁྱེར་ནི། །སོར་མོ་བརྒྱད་པའི་ཚད་དུ་བྱ། །རྡོ་རྗེ་རྩེ་གསུམ་སོར་བཅུ་གཉིས། །རྩེ་དབུས་ལྕགས་ཀྱུ་ལྟར་བྱས་ནས། །དབུས་དང་ཁ་ཁྱེར་ལ་བཀོད་དེ། །
དམར་ནག་ཁ་ཁྱེར་རམས་ཀྱིས་བྱུག །ཇི་སྐད་གསུངས་པའི་གཤིན་རྗེ་གཤེད། །ཧཱུྃ་བསྐྱེད་རྡོ་རྗེ་ལྕེ་ལྡན་པའི། །ཞལ་དུ་ངེས་པར་བསྐྱུར་བྱས་ལ། །པོ་སོན་ཆ་སོགས་མེ་སྦར་རོ།  །དུག་གི་ཁྲག་དང་རབ་ཏུ་སྦྱར། །ལན་ཚྭ་སྐེ་ཚེ་དེ་བཞིན་སྦྱར། །དྷ་དུ་ཨ་ཡི་འབྲས་བུ་ཡིས། །ཞལ་དུ་བསྲེག་

44-1-55a

ཅིང་ལུས་དང་ངག །ཁྲོ་ཞིང་བསྒྲུབ་བྱའི་མིང་བཅས་པའི། །སྔགས་འདི་སྟོང་དང་རྩ་བརྒྱད་དུ། །བློ་དང་ལྡན་པས་གཡེལ་མེད་པས། །བཟླ་ཞིང་སྦྱིན་སྲེག་བརྩམ་པའོ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་བུ་མོ་ཆེ་གེ་མོ་སྟམྦྷ་ཡ་ན་ཤཱ་ཡ་ཧཱུྃ་ཧཱུྃ་ཕཊ་ཛྫ། དེ་ལས་འཕྲོས་པའི་གཤིན་རྗེ་
གཤེད། །ལྕགས་ཀྱུ་ཐོགས་པ་འཕྲོས་བྱས་པས། །རླུང་དཀྱིལ་ལ་གནས་བུ་མོ་ཡི། །སྙིང་གར་སྦྱར་ཏེ་དགུག་པར་བསམ། །ཉི་མའི་གུང་དང་ནམ་ཕྱེད་ན། །འདི་ནི་ཤེས་པའི་དུས་ཡིན་པས། །བློ་དང་ལྡན་པས་སྦྱོར་བ་དེས། །ཉི་མ་གསུམ་དང་དྲུག་ཏུ་བྱ། །འོངས་པས་འཚེ་བ་
བཟློག་པའི་ཕྱིར། །སྔོན་བཞིན་ཞི་དང་བསྲུང་བ་བྱ། །བསྐལ་པ་གྲངས་མེད་གསུམ་དུའང་། །དེ་ཡིས་རྟག་ཏུ་འདུལ་བར་འགྱུར། །སངས་རྒྱས་སམ་ནི་ཆོས་འཛིན་ནམ། །རྡོ་རྗེ་སེམས་དཔའ་གང་ཡང་རུང་། །གལ་ཏེ་རྨོངས་པས་འདས་ན་ནི། །དི་ཡི་ཚེ་ནི་དེར་ཟད་འགྱུར། །ད་ནི་ཀླུ་
སྐམས་པས་ཆར་གཅད་པར་བྱ་བའི་ཆོ་ག་བཤད་པར་བྱའོ། །སྔོན་བཞིན་བྱས་པའི་རྣལ་འབྱོར་པས། །རྡོ་རྗེ་འཛིན་པ་ཆེན་པོ་ཉིད། །ཁ་དོག་སེར་པོ་བསྒོམས་བྱས་ལ། །ཆར་མི་བཅད་པ་འགོག་པར་བྱ། །ཡུལ་ཡུལ་ཀུན་ནས་ཕྱོགས་གཅིག་སྟེ། །ཧཱུྃ་བསྐྱེད་སྣ་ཚོགས་རྡོ་རྗེ་ནི། །རབ་འབར་
མེ་སྟག་འཕྲོ་བ་ནི། །འདོད་པའི་ཕྱོགས་ནི་གཡོགས་པར་བསམ། །དེ་ཡི་ལྟེ་བར་ཧཱུྃ་བསྐྱེད་པའི། །རྡོ་རྗེ་རྩེ་ལྔ་འགྲེང་བུ་ནི། །ཏཱ་ལའི་ཚད་ཙམ་མེ་འབར་བའི། བུམ་པར་རྟེན་གྱི་དཀྱིལ་འཁོར་བསམ། །དེ་རུ་གོང་གི་སྦྱོར་བ་ནི། །འཁོར་ལོ་དང་བཅས་དེ་བཞིན་བསྒོམ། །བདག་ཅི་འདྲ་
བར་འཁོར་རྣམས་ཀྱང་། །བརྗོད་པར་བསམས་ཏེ་སྔགས་འདི་བཟླས། །ཨོཾ་ཨཱཿཧཱུྃ་མ་ཧཱ་བ་ར་ཤ་ཧ་ན་ཧ་ན་ཧཱུྃ་ཕཊ། དེ་རྣམས་བ་སྤུའི་བུ་ག་ལས། །འཕྲོས་པའི་འོད་ཟེར་སེར་པོ་ཡིས། །འདོད་པའི་ཕྱོགས་ནི་ཁྱབ་བསམས་པས། །སྣ་ཚོགས་རྡོ་རྗེ་མེ་ཡིས་ནི། །ས་གཞི་ཐམས་ཅད་བསྲེགས་
ནས་ནི། །ཀླུ་སྐམས་གྱུར་ཞིང་འབྲོས་བསམས་ན། །རང་འདོད་གནས་ལས་ཕྱི་རོལ་དུ། །འབབ་བམ་འོན་ཏེ་མི་འབབ་འགྱུར། །ཡང་ན་སྦྱོར་བ་ངེས་གནས་ལ། །སྐེ་ཚེ་ལན་ཚྭ་འབྲུ་མར་དང་། །དུག་དང་དྷ་དུ་ར་དག་གིས། །དུར་ཁྲོད་རས་ལ་འཁྲུལ་འཁོར་བྲི། །དང་པོ་པདྨ་འདབ་བརྒྱད་

44-1-55b

ལ། །ཀླུ་བརྒྱུད་རྣམས་ཀྱི་ས་བོན་ནམ། །རང་རང་སྙིང་པོ་བྲི་བའོ། །ཕུ་ཕཾ་ཕེ་ཕོ་ཕ་ཕི་ཕཾ། །སྙིང་པོ་ཕཊ་གཉིས་བར་དུ་ནི། །ཆུ་ཡི་སྙིང་པོ་བཱ་བྲིས་ལ། །དེ་རྣམས་བཀུག་སྟེ་ས་བོན་ལ། །བཅུག་སྟེ་གསལ་བར་བསྒོམ་པར་བྱ། །ཡང་ནི་རས་མ་གཉིས་པ་ལ། །ལས་ཀྱི་རྡོ་རྗེ་སེར་པོ་ནི། །
འོད་ཟེར་འབར་བ་བྲི་བྱས་ལ། །ལྟེ་བར་རྡོ་རྗེ་རྩེ་ལྔ་པ། །ཧཱུྃ་གིས་མཚན་པ་བྲི་བར་བྱ། །གོང་གི་སྦྱོར་བས་བྱིན་བརླབས་ལ། །དང་པོ་རས་མ་བཀན་ཏེ་བཞག །རས་མ་གཉིས་པ་ཁ་སྦུབས་ནས། །རྡོ་ལ་སོགས་པས་མནན་བྱས་པས། །གོང་མའི་སྔགས་ནི་བཟླས་བརྗོད་བྱ། །ཀླུ་རྒྱལ་
འབུམ་ནི་ཁྲོས་གྱུར་ཡང་། །ཆར་པ་འགོག་པའི་མཆོག་ཡིན་ནོ། །ད་ནི་ཕ་རོལ་གྱི་ངག་དང་དཔུང་གནོན་པའི་ཆོ་ག་བཤད་པར་བྱའོ། །སྔ་མ་བཞིན་དུ་ཐམས་ཅད་བྱས། །ཏིང་འཛིན་འདི་ཡིས་ཞག་བདུན་དུ། །ཐུན་བཞིར་གཟུགས་བརྙན་གཅིག་སྦྱར་བྱ། །འཕྲལ་དུ་མངོན་དུ་ཕྱིས་བྱེད་
འགྱུར། །གང་ཡང་རུང་བའི་སྦྱོར་ལྡན་པས། །གཅེར་བུ་ལ་སོགས་ཕྱིར་རྒོལ་རྣམས། །མིང་གི་ཡི་གེ་དང་པོས་བསྐྱེད། །སྤོབས་པ་མནན་ཕྱིར་དེ་ཡི་མགོར། །ལཾ་ལ་དབང་ཆེན་སེར་པོ་ལ། །གྲྭ་བཞིར་རྡོ་རྗེས་མཚན་པར་བསམ། །དེ་སྟེང་ཧཾ་བྱུང་ལས་རྡོ་རྗེ། །དེ་སྟེང་པཾ་བསྐྱེད་པདྨ་
ལ། །གཞལ་ཡས་ཁང་པ་ཇི་བཞིན་བསམ། །དེ་དབུས་ཁྲོ་བོའི་འཁོར་ལོ་ཆེ། །ཁ་དོག་སེར་པོ་བསྒོམས་བྱས་ནས། །དེ་ནི་གནོན་པ་རྣམ་པར་བསམ། །རྐན་གྱི་དབུས་སུ་ཧཾ་བསྐྱེད་པའི། །སྣ་ཚོགས་རྡོ་རྗེ་ཁ་བཞི་ཡིས། །གསུམ་པོས་སྤྱི་བོ་རྣ་བ་གཉིས། །ལྐོག་མར་ཕུག་བསམ་
སྔགས་བཟླའོ། །དེ་ཉིད་གསུམ་པར་རང་རང་སྔགས། །ཆེ་གེ་པ་ཤ་པ་ཡ་ཧཱུྃ། །བརྗོད་ཅིང་བལྟས་པས་བསྒྲུབ་བྱ་དེ། །མིག་མི་ལྟ་ཞིང་སྨྲ་མི་ནུས། །གང་ཡང་རུང་བའི་རྣལ་འབྱོར་པས། །འདི་ཡང་སྔོན་བཞིན་རབ་སྦྱར་ནས། །གང་ཚེ་དཔུང་ཚོགས་མཐོང་བ་ཡི། །དེ་ཚེ་ལས་ལ་ཡང་
དག་སྦྱར། །དཔུང་རྣམས་ཀུན་གྱི་སྤྱི་བོ་རུ། །ས་སོགས་རྟེན་ནི་སྔོན་བཞིན་བསྐྱེད། །འཁོར་ལོ་ཐམས་ཅད་ཁྲོ་བོ་ཆེ། །པདྨོ་སེར་པོའི་མདོག་ལྟར་བསྒོམ། །རི་ཡི་རྒྱལ་པོ་ཙམ་བསམས་ཏེ། །དེ་ཉིད་གསུམ་པར་རང་རང་སྔགས། །བ་ཧུ་པ་ཡ་ཧཱུྃ་ཞེས་བརྗོད། །དཔུང་རྣམས་ས་འོག་འབྱིང་

44-1-56a

བར་འགྱུར། །ཁྲོ་བོ་རྣམས་ནི་ཕར་བལྟས་བསམ། །བ་ཧུ་བི་ར་ཧཱུྃ་ཞེས་བརྗོད། །དེ་དག་ཕྱིར་ནི་མི་ལྡོག་པར། །འབྲོས་པར་རབ་ཏུ་གྱུར་པའོ། །གལ་ཏེ་ཁྲོ་བོ་རང་མདུན་བལྟས། །བ་ཧུ་གྲྀཧྞ་ཧཱུྃ་ཞེས་བརྗོད། །དེ་ནི་འབྲོས་པར་བྱེད་འདོད་ཀྱང་། །མདུང་བཞིན་དུ་
ནི་རེངས་པར་འགྱུར། །ཚུ་རོལ་ཕམ་པར་བྱེད་འདོད་པས། །གཉི་ག་མདུན་གྱི་ཕྱོགས་བྱས་པས། །བ་ཧུ་ཨེ་ཧི་ཧཱུྃ་བརྗོད་པས། །ཕ་རོལ་རྒྱལ་བར་འགྱུར་བའོ། །དེ་ལྟར་སྦྱོར་བའི་རྣམ་པ་ཡིས། །གཡེལ་བ་མེད་པར་སྦྱར་འགྱུར་ན། །སངས་རྒྱས་དཔུང་ཡང་གནོན་བྱེད་ན། །མི་དབང་
ལ་ནི་དོགས་པ་མེད། །ཡང་ནི་སྔོན་བཞིན་རབ་བྱས་ལ། །གང་ཚེ་དཔུང་ཚོགས་མཐོང་འགྱུར་ནས། །དེ་རྨོངས་བྱ་ཕྱིར་ཕུར་བུ་ཡི། །བསམ་གཏན་འདི་ནི་སྦྱར་བར་བྱ། །ཧཱུྃ་ལས་བསྐྱེད་པའི་ཕུར་བུ་ནི། །སྟེང་ནི་རྩེ་ལྔ་འོག་རྩེ་གཅིག །སོར་བརྒྱད་ཚད་ཙམ་རབ་བསམས་ལ། །དེད་དཔོན་
དང་པོས་དཔུང་རྣམས་བསྐྱེད། །ཐམས་ཅད་སྙིང་ནི་ཕྱོགས་བསམས་ནས། །དེ་ནི་རྡོ་རྗེ་ཐོ་བ་ཡིས། །ཁྲོས་ཤིང་ཐམས་ཅད་ཕོག་བསམས་ལ། །སྔགས་འདིས་རབ་ཏུ་གདབ་པའོ། །ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། དཔུང་ཐམས་ཅད་ཕཊ། ཀཱི་ལ་ཡ་ཀཱི་ལ་ཡ། དཔུང་ཐམས་ཅད་ཕཊ། 
ཧཱུྃ་ཧཱུྃ་ཧཱུྃ་བཛྲ་ཀཱི་ལ་ཡ། བཛྲ་དྷ་རོ་ཨཱཛྙཱ་པ་ཡ་ཏི། དཔུང་ཐམས་ཅད་ཀཱ་ཡ་ཝཱཀ་ཙིཏྟ་བཛྲ་ཀཱི་ལ་ཡ་ཧཱུྃ་ཕཊ། ཁྲོས་པས་བཟླ་ཞིང་བཏབ་འགྱུར་ན། །སངས་རྒྱས་དག་གི་དཔུང་དག་ཀྱང་། །ཏིང་འཛིན་དེ་ཡིས་འཇིག་འགྱུར་ན། །མི་ཡི་དབང་པོ་སྨོས་ཅི་དགོས། །ད་ནི་ཆར་དབབ་པའི་ཆོ་ག་རྒྱས་
པར་བཤད་པར་བྱའོ། །འོག་འབྱུང་བ་ཡི་རིམ་པ་ཡིས། །སྟོབས་པོ་ཆེ་ཡི་རྣལ་འབྱོར་པས། །གྲངས་མེད་བཟླས་པས་བཀའ་ལུང་ཐོབ། །འབུམ་ཕྲག་གཅིག་ནི་བཟླས་པ་བྱ། །ཐམས་ཅད་དམར་པོར་རབ་བསམས་ལ། །རྫ་ཕོར་སོ་ནི་མ་བཏང་ལ། །རལ་གྲི་རྩེ་བརྒྱད་འཁོར་ལོ་ལ། །
པདྨ་འདབ་མ་བརྒྱད་པོ་བྲི། །དེ་ལ་རམས་ཀྱི་ཁུ་བ་ཡིས། རྡོ་རྗེ་ཐོར་ཚུགས་གཅིག་མ་ཡི། །སྔགས་ཀྱི་སྙིང་པོ་འདི་བྲིའོ། །ཨོཾ་ཤུ་ལི་ནི་ནན་སྭཱ་ཧཱ་བྲི། །དེ་དང་འདྲ་བའི་ཁམ་ཕོར་གཞག །ཁ་སྦྱར་སྐུད་པ་སྔོན་དམར་དཀྲི། །དེ་དང་དེ་འདུལ་རབ་བཀུག་སྟེ། །འཁོར་ལོ་འདི་ལ་གནས་

44-1-56b

པར་བསམ། །དེ་ནི་ཇི་བཞིན་གཞན་ཐལ་སྦྱར། །མཆོད་པའི་ཚོགས་ཀྱིས་མཆོད་བྱས་ནས། །ཀླུ་གནས་མཚོ་དང་རྫིང་བུ་སོགས། །གཞན་ལ་གསང་ནས་གཞུག་པའོ། །བདག་ཉིད་གནས་དགོན་དབེན་པ་རུ། །ས་སོགས་ཆོ་ག་སྔོན་འགྲོ་བས། །མེ་ཡི་དཀྱིལ་འཁོར་གྲུ་
གསུམ་སྟེང་། །རླུང་གི་དཀྱིལ་འཁོར་ཟླ་གམ་བྲི། །ཆུ་ཡི་དཀྱིལ་འཁོར་ཟླུམ་པོ་སྟེ། །པདྨ་འདབ་མ་བརྒྱད་པོ་ནི། །ཕྱོགས་དང་མཚམས་ནི་མ་འཁྲུལ་བར། །སྦྲུལ་བརྒྱད་ཕྱི་རོལ་བསྣོལ་མར་བྲི། །དབུས་སུ་ཆུ་བདག་དཀར་པོ་ཆེ། །སྦྲུལ་མགོ་བདུན་པ་ཞབས་ཀླུ་གཅིག །སྐྱེས་བུའི་
གདོང་ཅན་སྦྲུལ་ཞགས་བསྣམས། །ལྟོ་འཕྱེ་མཁའ་འགྲོ་ཞོན་པ་བྲི། །ཤར་གྱི་འདབ་མར་མཐའ་ཡས་ལྗང་། །ཨུཏྤལ་ཐོགས་པ་བྲི་བར་བྱ། །ལྷོ་ཡི་འདབ་མར་ནོར་རྒྱས་དཀར། །རིན་ཆེན་བུམ་ཐོགས་བྲི་བར་བྱ། །ནུབ་ཀྱི་འདབ་མར་འཇོག་པོ་དམར། །དགྲ་སྟ་ཐོགས་པ་བྲི་བར་
བྱ། །བྱང་དུ་ཀརྐོ་ཊ་ནག་པོ། །སྦྲུལ་ཤོག་ཐོགས་པ་བྲི་བར་བྱ། །ནུབ་ཕྱོགས་འདབ་མར་པདྨ་དཀར། །པདྨ་ཐོགས་པ་བྲི་བར་བྱ། །བདེན་བྲལ་འདབ་མར་པད་ཆེན་དཀར། །པད་དཀར་ཐོགས་པ་བྲི་བར་བྱ། །རླུང་མཚམས་འདབ་མར་དུང་སྐྱོང་སེར། །དུང་ཕོར་ཐོགས་པ་བྲི་བར་
བྱ། །དབང་ལྡན་རིགས་ལྡན་སྣ་ཚོགས་པ། །རྒྱལ་བུ་འཛིན་པ་བྲི་བར་བྱ། །དེ་དག་ཀུན་ཀྱང་སྦྲུལ་མགོ་གདེངས། །ཞབས་ཀྱང་སྦྲུལ་འཁྱིལ་སྤྲིན་གྱི་ནི། །གདན་ལ་བཞུགས་པ་བྲི་བར་བྱ། །གཡོ་བ་དྲག་པོ་ལ་སོགས་པ། །རང་རང་ཕྱོགས་སུ་བརྒྱད་པོ་ནི། །ཟུར་དང་སྒོ་རུ་གཉིས་འཁྱིལ་
ནས། །སྒོ་ཟུར་གཉིས་སུ་མགོ་མཇུག་བསྣོལ། །དེ་ལྟར་དཀྱིལ་འཁོར་བྲིས་ནས་ནི། །བུམ་པ་འོ་མ་གང་བ་དགུ། །ཕྱོགས་མཚམས་རྣམས་སུ་བཞག་ནས་ནི། །རྒྱན་རྣམས་ཀྱིས་ཀྱང་མཛེས་པར་བྱ། །དེ་ཡི་རྟོག་པ་ལས་བཤད་པའི། །ཆོ་གས་ཀླུ་རྣམས་ནཾ་གིས་བསྐྱེད། །སྲོག་དང་
བཅས་པ་བཞིན་དུ་ནི། །གོང་མ་ལྟ་བུ་བསྒོམ་པར་བྱ། །དེ་རྣམས་ཛ་ནཾ་ཛ་ཞེས་བརྗོད། །དེ་ནས་བཀུག་ལ་བསང་གཏོར་སོགས། །བྱས་ནས་དེ་ལ་ཞུགས་པར་བསམ། །དེ་ནས་གཏོར་མ་འོ་མར་བཅས། །བུ་རམ་ལ་སོགས་ལྷ་བཤོས་ཆེ། །ཕུལ་ནས་རང་རང་སྔགས་འདི་ནི། །བརྒྱ་རྩ་བརྒྱད་

44-1-57a

ཀྱིས་དགའ་བར་བྱ། །ཨོཾ་བཾ་བ་རུ་ཎ་ཡ་གཱ་ཏི་པ་ཏ་ཡེ་ན་ག་ནཾ་པཪྵ་ཡ་ཧཱུྃ་ནཾ་ཧཱུྃ་སྭཱ་ཧཱ། ཨོཾ་ཨཾ་ཨ་ནནྟ་ཡ་ཧཱུྃ་ནཾ་ཧཱུྃ་སྭཱ་ཧཱ། ཨོཾ་བཾ་བ་སུ་ཀེ་ཧཱུྃ་ནཾ་ཧཱུྃ་སྭཱ་ཧཱ། ཨོཾ་ཏཾ་ཏཀྵ་ཀ་ཧཱུྃ་ནཾ་ཧཱུྃ་སྭཱ་ཧཱ། ཨོཾ་ཀཾ་ཀརྐོ་ཊ་ཧཱུྃ་ནཾ་ཧཱུྃ་སྭཱ་ཧཱ། ཨོཾ་པཾ་པདྨ་ཧཱུྃ་ནཾ་ཧཱུྃ་སྭཱ་ཧཱ། ཨོཾ་མཾ་མ་ཧཱ་པདྨ་ཧཱུྃ་ནཾ་ཧཱུྃ་སྭཱ་ཧཱ། ཨོཾ་སཾ་ཤཾ་
ཁ་བ་ལ་ཧཱུྃ་ནཾ་ཧཱུྃ་སྭཱ་ཧཱ། ཨོཾ་ཨ་ན་པ་ཏ་ཧ་ཧཱུྃ་ནཾ་ཧཱུྃ་སྭཱ་ཧཱ། དེ་ནས་པོག་སྣོད་བཟུང་བྱས་ཏེ། །གཏོར་མ་སོགས་ཀྱིས་མཉེས་བྱས་ལ། །སྟོབས་ཆེན་སྦྱོར་བ་དེ་ཉིད་ཀྱིས། །བཞག་སྟེ་ཚིག་གིས་གསོལ་བ་གདབ། །ཀླུ་ཆེན་པོ་ནི་ཁྱེད་རྣམས་ཀྱིས།  །བདག་ལ་ཡང་དག་དགའ་བ་དང་། །བཅོམ་
ལྡན་འདས་ཀྱི་བཀའ་ཡིས་ནི། །ཆར་གྱི་རྒྱུན་ནི་དབབ་ཏུ་གསོལ། །ལན་གསུམ་བརྗོད་པས་ཀླུ་རྣམས་ཀྱིས། །དགའ་བས་ཆར་པ་འབེབས་བསམས་ནས། །རང་གི་སྦྱོར་བ་མ་ཉམས་པར། །ཇི་བཞིན་རང་གི་སྔགས་བཟླའོ། །ན་མཿས་མནྟ་ཀཱ་ཡ་ཝཱཀ་ཙིཏྟ་བཛྲཱ་ཎཱཾ། ཨོཾ་
ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། ཨོཾ་ཨུ་གྲ་ལ་ཤུ་ལ་བ་ནི་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། ཨོཾ་ཛོ་ཏི་ད་ནི་ད་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། ཨོཾ་ཨོཾ་ཨོཾ། མ་ཧཱ་པ་ལཱ་ཡ་སྭཱ་ཧཱ། དེ་ཡི་དབང་དུ་རབ་བྱས་ནས། །ས་གཞི་ཐམས་ཅད་ཆར་གྱི་ནི། །རྒྱུན་གྱིས་ངོམས་པར་བྱས་ནས་ནི། །ཐམས་ཅད་བདེ་ལ་གནས་པར་བྱེད། །
དེ་ཡིས་ཕེབས་པར་མ་གྱུར་ན། །སྟོབས་པོ་ཆེ་ཡི་རྣལ་འབྱོར་པས། །ཐམས་ཅད་དཀར་པོས་བསམས་བྱས་ཏེ། །ཞི་བའི་སྦྱིན་སྲེག་གིས་ནི་བསྒྲུབ། །ཧོམ་ཁུང་ཟླུམ་པོ་ཁྲུ་གང་པར། །ཁྲུ་ཕྱེད་ཟབས་སུ་ཁ་ཁྱེར་ལ། །སོར་བཞི་ཚད་ཙམ་དེ་ཙམ་འཕགས། །པདྨའི་འདབ་མས་
བསྐོར་བར་བྲི། །འཁོར་ལོ་འཁོར་ལོ་ཕྲེང་བསྐོར་ལ། །རྡོ་རྒྱུས་སོགས་ཀྱིས་བྱུགས་བྱས་ཏེ། །ཇི་བཞིན་པ་ཡི་ཆོ་ག་ཡིས། །མེ་ལྷ་ལ་སོགས་མཆོད་པར་བྱ། །དེ་ཡི་དབུས་སུ་སྟོབས་པོ་ཆེ། །འོག་ནས་འབྱུང་བ་བཞིན་དུ་བྱ། །ཕྱོགས་དང་མཚམས་སུ་ཀླུ་བརྒྱད་ཀྱང་། །དེ་ཡི་ཞལ་
བལྟས་ཐལ་སྦྱར་བསམ། །གོང་གི་སྔགས་ཀྱིས་སྤྱན་དྲངས་ནས། །བསང་གཏོར་ཞབས་བསིལ་ལ་སོགས་པ། །བྱས་ནས་དེ་ལ་ཐིམ་པར་བསམ། །དེ་རྣམས་ལྕེ་ཡི་དབུས་སུ་ནི། །ཡི་གེ་ནཾ་ནི་བསམ་བྱས་ཏེ། །བླུགས་གཟར་དགང་གཟར་ཆོ་ག་བཞིན། །བྱས་ནས་བསང་གཏོར་ལ་

44-1-57b

སོགས་པ། །ཡང་ནི་བྱས་ནས་སྦྱིན་སྲེག་དབུལ། །འོ་མ་དང་ནི་འབྲས་ཆན་དང་། །བུར་རམ་སྦྲང་རྩི་ལི་ཁ་ར།  །དབང་པོ་ལ་སོགས་སྨན་རྣམས་ནི། །དང་པོར་གསུམ་གསུམ་དབུལ་བར་བྱ། །གོང་གི་སྔགས་ལ་ཞི་བ་ཡི། །རིག་པ་དང་བཅས་བཟླས་ན་ནི། །ཀླུ་རྣམས་ཀུན་
ལ་ཅི་འདོད་པའི། །གོང་གི་རྫས་ནི་སྦྱིན་སྲེག་བྱ། །ཚིམ་པར་བྱས་ནས་རང་གི་སྔགས། །གོང་མ་བཞིན་དུ་རབ་བརྗོད་པས། །ཇི་ལྟར་འདོད་པའི་ཕྱོགས་རྣམས་སུ། །ཆར་གྱི་རྒྱུན་ནི་འབེབས་པར་བྱེད། །དེ་ཡིས་ཕེབས་པར་མ་གྱུར་ན། །སྟོབས་ཆེན་ཁྲོ་བོའི་རྣལ་འབྱོར་པས། །
ཐམས་ཅད་ནག་པོར་བསམས་བྱས་ཏེ། །འཁྲུལ་འཁོར་ཆོ་ག་བསྒྲུབ་པར་བྱ། །ཆུ་བོའི་ངོས་གཉིས་ས་དང་ནི། །གྲོག་མཁར་ས་དང་བཤང་གཅི་བསྲེས། །ཀླུ་ཡི་གཟུགས་བརྙན་མཐོ་གསུམ་པའི། །སྙིང་གར་འཁོར་ལོ་འདི་ནི་གཞུག །དུར་ཁྲོད་ཅི་ནི་རས་མ་ལ། །སྐེ་ཚེ་ལན་ཚྭ་
ཡུངས་མར་དང་། །ཁྲག་དུག་རམས་ཀྱི་སྣག་ཚ་ཡིས། །རལ་གྲི་རྩེ་བརྒྱད་འཁོར་ལོ་བྲི། །དེ་སྟེང་པདྨ་འདབ་བརྒྱད་ལ། །ཕུ་སོགས་བརྒྱད་ནི་བྲི་བ་དང་། །སྙིང་པོར་ཡི་གེ་བཱ་བྲིས་ལ། །སྔོན་བཞིན་བསམས་ཏེ་དགུག་གཞུག་བྱ། །གཟུགས་བརྙན་ཡན་ལག་ཐམས་ཅད་
ཀུན། །ཚ་བ་གསུམ་དང་སྐེ་ཚེ་དང་། །དྷ་དུ་ར་དང་ཡུངས་མར་དང་། །བྱུགས་ནས་མེ་ལ་གདུང་བྱ་ཞིང་། །གོང་གི་སྔགས་ནི་བརྗོད་བྱ་ཞིང་། །ཀླུ་རྣམས་གཟུགས་ནི་རབ་ཚ་བས། །བྱེ་མ་མེ་ཡི་འཇིགས་པ་ཡིས། །འཇིགས་ནས་ཆར་རྒྱུན་འཇམ་པོ་ཡི། །མངོན་པར་འདོད་པའི་
ཕྱོགས་ནི་འབེབས། །དེ་ཡིས་ཆར་ནི་མི་འབེབས་ན། །སྔོན་བཞིན་ཀླུ་ཡི་དཀྱིལ་འཁོར་བྲི། །སྟོད་གཡོགས་སེར་པོ་སྨད་གཡོགས་དམར། །ཟེའུ་ཁ་སྔོན་པོ་བཅིངས་ནས་ནི། །གོས་ནི་དམར་པོ་བགོ་བའམ། །ཡང་ན་གཅེར་བུར་བྱུང་བྱས་ལ། །སྐྲ་བཤིག་སོ་ནི་གཙིགས་བྱས་
ནས། །རྐང་པར་ཉི་མའི་དཀྱིལ་འཁོར་ལ། །རྡོ་རྗེ་འབར་བར་བྱིན་བརླབས་ལ། །ཀླུ་ནི་གན་རྐྱལ་གནས་པར་བསམ། གཡོན་པས་དེ་ཡི་དཀྱིལ་འཁོར་མནན། །སྐྲག་སྟེ་གདེངས་ཀ་གཡོ་བར་བསམ། །གྱེན་བལྟས་ཁ་ལས་ཕུས་འདེབས་ཤིང་། །དེ་ཡི་ཁྲག་གིས་མཁའ་

44-1-58a

ཁྱབ་ནས། །རྒྱ་མཚོ་ལྟ་བུར་གྱུར་བསམས་ནས། །སྔགས་འདི་གཡེང་བ་མེད་པར་བཟླ། །ན་མཿས་མནྟ། ཀཱ་ཡ་ཝཱཀ་ཙིཏྟ་བཛྲཱ་ཎཱཾ། ཨོཾ་ནཾ་ཧཱུྃ་ནཾ་ཧཱུྃ་ནཾ་ཧཱུྃ། ཕཊ་ནཾ་ཕཊ་ནཾ་ཕཊ། ཨོཾ་ཨུ་གྲ་ལ་ཤུ་ལ་པ་ནི་ནཾ། ཧཱུྃ་ནཾ་ཧཱུྃ་ནཾ་ཧཱུྃ། ཕཊ་ནཾ་ཕཊ་ནཾ་ཕཊ། ཨོཾ་ཛོ་ཏི་ནི་རྣ་ཏ། 
ཧཱུྃ་ནཾ་ཧཱུྃ་ནཾ་ཧཱུྃ། ཕཊ་ནཾ་ཕཊ་ནཾ་ཕཊ། ཨོཾ་མ་ཧཱ་པ་ལ་ནཾ་ཕཊ། དེ་ཡིས་ཀླུ་རྣམས་སྟོབས་ཆེན་ལ། །སྐྲག་ནས་ས་གཞི་རྒྱས་པ་རུ། །དམ་ཚིག་དབང་གིས་དེ་དག་གིས། །ཆར་གྱི་རྒྱུན་ནི་འབེབས་པར་བྱེད། །དེས་ཀྱང་ཆར་ནི་མི་འབབ་ན། །སྔོན་བཞིན་མངོན་སྤྱོད་ཧོམ་ཁུང་དུ། །པོ་སོན་ཆ་
ཡི་ཚེར་མས་དགང་། །སྨེ་ཤ་ཅན་གྱི་མེ་སྦར་བྱ། །མེ་ལྷ་སྔོན་བཞིན་མཆོད་བྱས་ནས། །དེ་དབུས་སྟོབས་པོ་ཆེ་བསམས་ནས། །ཞལ་གདངས་རྡོ་རྗེ་རྩེ་ལྡན་པ། །མཆེ་བ་གཙིགས་པ་བསམ་པར་བྱ། །སྔོན་གཟུགས་ཀླུ་ཡི་གཟུགས་བརྙན་ནི། །དུག་དང་ལན་ཚྭ་དྷ་དུ་ར། །སྐེ་ཚེ་སོགས་པ་
རབ་བྱས་ལ། །ཕུཿས་བསྐྱེད་དགུག་ཅིང་གཞུག་པར་བྱ། །དེ་ནི་བཤང་བ་གཅི་བས་བྱུགས། །གདུག་པའི་དགྲ་ཡི་གཡོན་པ་ཡིས། །དེ་ཡི་མཇུག་མའི་རྩེ་མོ་ནས། །གཏུབ་ཅིང་གོང་མའི་སྔགས་ཟློ་ཞིང་། །ཀླུ་རྣམས་མཱ་ར་ཡ་ཕཊ་ཅེས། །བརྗོད་ཅིང་སྦྱིན་སྲེག་བརྒྱ་རྩ་བརྒྱད། །
བྱིན་པས་ཀླུ་རྣམས་ཐམས་ཅད་ཀྱང་། །ཚ་སྟེ་སྐྲག་ནས་ཆར་འབེབས་བྱེད། །གལ་ཏེ་དེ་ལྟར་བྱེད་པ་ལ། །ཆར་ནི་འབེབས་པར་མི་བྱེད་ན། །སྟོབས་པོ་ཆེ་ཡི་འགལ་བའི་ཕྱིར། །དེ་གནོན་པ་ཡི་ཆོ་ག་བྱ། །ཆུ་ངོགས་ས་ལ་སོགས་པ་ཡི། །སྔོན་གསུངས་རྫས་ལ་ཁྲོ་བོ་ཆེ། །
གཟུགས་བརྙན་ཞལ་གསུམ་ཕྱག་དྲུག་པ། །བྱས་ཏེ་གན་རྐྱལ་གཞག་པར་བྱ། །བདག་ཉིད་དཔལ་ལྡན་གསུམ་པ་ཡི། །རྣལ་འབྱོར་འོག་ནས་འབྱུང་བཞིན་བསྐྱེད། །དེ་ནི་བཀུག་ནས་གཟུགས་བརྙན་བཅུག །གཡོན་པས་མནན་ཏེ་སྔགས་བཟླའོ། །ཨོཾ་སུམྦྷ་ནི་སུམྦྷ། མ་ཧཱ་བ་
ལ་བཪྵ་ཤཱི་གྷྲཾ་ཧཱུྃ་ཕཊ། གྲྀཧྞ་གྲྀཧྞ་མ་ཧཱ་བ་ལ་བཪྵ་ཤཱི་གྷྲཾ་ཧཱུྃ་ཕཊ། གྲིཧྞཱ་པ་ཡ་གྲྀཧྞཱ་པ་ཡ་མ་ཧཱ་བ་ལ་བཪྵ་ཤཱི་གྷྲཾ་ཧཱུྃ་ཕཊ། ཨཱ་ན་ཡ་ཧོཿབྷ་ག་བཱན་བིདྱཱ་རཱ་ཛ་མ་ཧཱ་བ་ལ་བཪྵ་ཤཱི་གྷྲཾ་ཧཱུྃ་ཕཊ། དེ་ཡང་ཇི་བཞིན་ཁྲི་ཕྲག་གཉིས། །བཟླས་བརྗོད་བྱས་ནས་གོང་མ་ཡི། །ཧོམ་ཁུང་དབུས་སུ་གནོད་

44-1-58b

མཛེས་ཆེ། །ཞལ་གདངས་ཧཱུྃ་གི་ལྕེ་ཅན་བསམ། །བསྐུལ་བའི་ཚིག་དང་བཅས་པ་ཡིས། །གཟུགས་བརྙན་གཏུབ་ཅིང་ཁྲི་ཕྲག་གཅིག །དེ་ཡི་ཞལ་དུ་སྦྱིན་སྲེག་བྱ། །སྟོབས་པོ་ཆེ་ཡིས་ཆར་ཕབ་ནས། །འཛམ་གླིང་འདི་དང་ཐམས་ཅད་ཀུན། །ཆར་གྱིས་ངོམས་པར་
བྱས་པ་ཡིས། །ལོ་ལེགས་འབྲུ་རྣམས་འཕེལ་བར་འགྱུར། །འཁྲུལ་འཁོར་རྒྱུད་ནི་ཀུན་ལ་གྲགས། །དེ་ནས་ཞི་བའི་ཧོམ་ཁུང་ནི། །སྔོན་བཞིན་དུ་ནི་རབ་བྱས་ནས། །སྤྱན་མ་དཀར་མོ་བསམས་ནས་ནི། །དེ་ཡི་སྔགས་དང་དེའི་ཆོ་གས། །མར་དང་འོ་མ་འབྲས་ཆན་སོགས། །
དེ་ཡི་ཞལ་དུ་དབབ་བྱས་ནས། །སྲེག་བླུགས་ཁྲི་ཕྲག་གཅིག་དབུལ་བས། །ཀླུ་དང་ཁྲོ་བོ་སྟོབས་པོ་ཆེ། །ཚར་བཅད་དེ་ཡིས་ཞི་བར་བྱེད། །དེས་ན་དེ་ཡིས་དགའ་འགྱུར་ཏེ། །གཞན་དུ་སྦྱར་བ་ཙམ་གྱིས་ནི། །མོད་ལ་ཆར་གྱི་རྒྱུན་འབེབས་བྱེད། །ལས་ཀྱི་ཚོགས་ནི་དེ་དག་གམ། །
གཞན་ལ་སྒྲུབ་པོ་བསྲུང་བའམ། །ཡང་ན་བདག་གིས་གཞན་བསྲུང་ཕྱིར། །སྦྱོར་བ་འདི་ནི་བརྩམ་པའོ། །རྡོ་རྗེ་འཛིན་པ་ལས་བྱུང་བའི། །མཱ་མ་ཀཱི་ནི་སྔོན་བཞིན་བསམ། །ཡེ་ཤེས་སེམས་དཔའི་ཐུགས་ཀ་རུ། །བསྒྲུབ་བྱ་བཞག་ནས་སྔགས་འདི་བཟླ། །ཨོཾ་ཨཱཿཤངྐ་རེ་ཤནྟིཾ་
ཀ་རེ་གྷུཊྚ་གྷུཊྚ་གྷུཊྚི་ནི་གྷུཊྚི་ནི་གྷ་ཏ་ཡ་སྭཱ་ཧཱ་ཆེ་གེ་མོ་རཀྵ་རཀྵ་ཧཱུྃ། བརྗོད་པས་སྔོན་བཞིན་སྟོབས་དབབ་དང་། །དབང་བསྐུར་བྱས་ནས་བསྒྲུབ་བྱ་དེ། །རྡོ་རྗེ་སེམས་དཔའི་སྤྲུལ་པ་ཡང་། །སྲུང་ན་གཞན་སྦྱར་སྨོས་ཅི་དགོས། །གལ་ཏེ་ཁྱིས་གཙེས་ལ་སོགས་ལ། །མཚོན་ཆ་ནོར་ནི་གཞན་ལྟ་
བསྒྲུབ། །དེ་ཚེ་ས་གསུམ་སྒྲས་འགེངས་ཚེ། །རྣལ་འབྱོར་འདི་ཡིས་བསྲུང་བ་བྱ། །རང་གི་ལྷ་ཡི་སྦྱོར་བ་ཡི། །སྤྱི་བོར་ཧཱུྃ་ལས་རྡོ་རྗེ་བསྐྱེད། །དེ་ཡི་ལྟེ་བར་ཟླ་བ་ལ། །མཱ་མ་ཀཱི་ནི་སྔོན་བཞིན་བསམ། །དེ་ཡི་ཡེ་ཤེས་ལྷ་མོ་ནི། །ཐུགས་ཀར་མཾ་ལ་བཟླས་པའི་སྔགས། །ཡང་འགྲེང་རིག་
བཅས་བསྐོར་བར་བསམ། །དེ་ཉིད་བཟླས་པས་འོད་ཟེར་འཕྲོས། །དེ་ཡིས་སྤྱི་བོ་ནས་བརྩམས་ཏེ། །རྐང་མཐིལ་བར་གྱི་རྡོ་རྗེ་ཡི། །གོ་ཆས་བར་མཚམས་མེད་གཏམས་ཏེ། །འབྱི་ལོ་ཀ་ནི་ཆུར་བླུགས་བཞིན། །སྦྱོར་བ་ཡང་དང་ཡང་བསམས་ཏེ། །བདག་དང་གཞན་ནི་སྲུང་བར་བྱེད། །

44-1-59a

འཇིགས་པ་སྟོང་གསུམ་གང་བ་ཡང་། །སྲུང་བྱེད་སྟོབས་སུ་འགྱུར་བར་བཤད། །མངོན་རྟོགས་ཉེ་བའི་རྣལ་འབྱོར་པས། །ལས་ནི་བཞི་སྟེ་གཅིག་ལ་གསུམ། །བསྒྲུབ་ཕྱིར་ཉེ་དང་མི་ཉེ་བས། །བསམ་གཏན་རི་མོ་བསྲུང་བའི་ཕྱིར། །རང་བཞིན་དག་པའི་ཆོས་
རྣམས་ཀྱི། །དོན་དང་འབྲས་བུར་བཅས་པ་རྣམས། །དག་པའི་ཁྲོ་བོ་རྣམས་ཀྱི་ནི། །བསྒོམ་པའི་ཆོ་ག་བཤད་པར་བྱ། །སྔོན་བཞིན་རྟེན་གྱི་དཀྱིལ་འཁོར་དང་། །དང་པོ་མགོན་པོ་བསྐྱེད་བྱས་ནས། །སེམས་ཅན་སྐྱེ་རིམ་བཞི་སྤངས་ནས། །བར་མའི་སེམས་ཀྱིས་དང་པོར་
འགྱུར། །བསྐུལ་བས་ཧཱུྃ་ལྔ་བྷྲཱུཾ་དུ་བྱུང་། །ཧཱུྃ་ལྔ་ལྕགས་ཀྱུ་དབྱུག་ཏོ་དང་། །རྩེ་གསུམ་རལ་གྲི་རྡོ་རྗེར་འགྱུར། །བྷྲཱུཾ་ནི་འཁོར་ལོ་རྩིབས་བརྒྱད་འགྱུར། །དེ་ཡང་དེ་དག་རྣམས་ཀྱིས་མཚན། །འོད་ཀྱི་ཁམས་བཞུགས་སངས་རྒྱས་རྣམས། །རང་དང་འདྲ་བས་བསྐུལ་བྱས་ཏེ། །
བཅུག་སྟེ་ས་བོན་ནང་དུ་ཐིམ། །ཊཱཀྐི་རྒྱལ་པོ་ཁྲོ་བོ་ཆེ། །སྐུ་དང་དབུ་ཞལ་མཐིང་ག་ལ། །གཡས་དཀར་གཡོན་དམར་ཕྱག་དྲུག་པ། །གཡས་གཉིས་ལྕགས་ཀྱུ་རལ་གྲི་འཛིན། །གཡོན་གཉིས་རིན་ཆེན་པདྨའོ། །དབྱུག་སྔོན་ཅན་ནི་ཁྲོ་བོ་ཆེ། །སྐུ་མདོག་དེ་འདྲ་ཕྱག་དྲུག་
པ། །གཡས་གཉིས་དབྱུག་ཏོ་རལ་གྲི་འཛིན། །གཡོན་གཉིས་རིན་ཆེན་པདྨའོ། །སྟོབས་པོ་ཆེ་ནི་ཁྲོ་བོ་ཆེ། །ཞལ་གསུམ་དེ་འདྲ་ཕྱག་དྲུག་པ། །གཡས་གཉིས་རྩེ་གསུམ་རལ་གྲི་འཛིན། །གཡོན་གཉིས་རིན་ཆེན་པདྨའོ། །མི་གཡོ་མགོན་པོ་ཁྲོ་བོ་ཆེ། །ཞལ་གསུམ་དེ་འདྲ་
ཟུར་གྱིས་ལྟ། །གཡས་གཉིས་རལ་གྲི་འཁོར་ལོ་འཛིན། །གཡོན་གཉིས་རིན་ཆེན་པདྨའོ། །གནོད་མཛེས་རྒྱལ་པོ་ཁྲོ་བོ་ཆེ། །སྐུ་དང་དབུ་ཞལ་དེ་འདྲ་སྟེ། །གཡས་གཉིས་རྡོ་རྗེ་རལ་གྲི་དང་། །གཡོན་གཉིས་རིན་ཆེན་པདྨའོ། །གཙུག་ཏོར་འཁོར་ལོས་སྒྱུར་རྒྱལ་ཆེ། །སྐུ་དང་
དབུ་ཞལ་གསེར་བཙོ་འདྲ། །གཡས་གནག་གཡོན་དཀར་ཕྱག་དྲུག་པ། །གཡས་གཉིས་འཁོར་ལོ་རྡོ་རྗེ་འཛིན། །གཡོན་གཉིས་རིན་ཆེན་པདྨ་འཛིན། །དེ་དག་དང་པོས་རིག་མ་འཁྱུད། །སྟག་ལྤགས་ཤམ་ཐབས་དང་ལྡན་པ། །འགྱིང་བག་ཏུ་ནི་རབ་ཁྲོ་བ། །མཆེ་བ་ཅུང་ཟད་

44-1-59b

གཙིགས་པ་སྟེ། །རིན་ཆེན་སྣ་ཚོགས་རྒྱན་གྱིས་བརྒྱན། །པདྨ་ཉི་མའི་དཀྱིལ་འཁོར་ལ། །སྦོམ་པོ་གཡས་བསྐུམ་གཡོན་བརྐྱང་བའོ། །མེ་ཡི་འོད་ཀྱི་དཀྱིལ་འཁོར་ནང་། །འཁོར་ལོ་འབར་བས་གཙུག་ཏོར་བསྐོར། །མི་བསྐྱོད་ཅོད་པན་མཚན་མ་བསྒོམ། །དེ་དག་དྲན་པ་གཅིག་པ་
སྟེ། །ལས་ཀྱི་ཁྱད་པར་སྒྲུབ་བྱེད་པས། །འདི་ནི་འཁོར་ལོར་ལྡན་པ་ཡི། །ཞར་ལ་དེ་ཡི་སྒྲུབ་པ་གསུངས། །དགུག་དང་དབང་གི་དང་པོ་དང་། །ཆོས་ཚེ་རྒྱས་མཛད་མང་པོ་ཞི། །མ་ཡིན་ལས་ཀྱི་ཁྱད་པར་རྣམས། །དང་པོ་གཉིས་པས་ཡང་བྱ་སྟེ། །དུས་ཀྱི་བྱེ་བྲག་ངེས་མེད་པས། །
འགྲུབ་སྟེ་དང་པོ་ཐུན་མོང་ལུང་། །ཁྱད་པར་གཞུང་འདིས་ཟློས་བྱས་ཏེ། །དད་པས་དེ་རྣམས་ནན་ཏན་བྱ། །གཏི་མུག་ཉེས་པའི་འདོད་ཆགས་དང་། །སྒྲིབ་པ་ལས་ནི་རྣམ་དག་པའི། །རང་བཞིན་གཟུང་དང་དགའ་བ་དང་། །ཚུལ་དང་མི་གཡོ་རྒྱུ་ཉིད་དང་། །འབྲས་བུར་དག་སྟེ་
དེ་རྣམས་ཀྱི། །སྤྱི་ཡི་མཚན་ཉིད་རྣམ་དག་པ། །ཁམས་གསུམ་རྣམ་པར་རྒྱལ་བ་ཡི། །བསྒྲུབ་པའི་མཚན་ཉིད་བཤད་པར་བྱ། །གང་ཕྱིར་རི་མོའི་བརྟུལ་ཞུགས་ཀྱིས། །གཞུང་དུ་ངེས་པར་གསུངས་པས་ན། །ལས་ཀྱི་རིམ་པ་བསྐང་བའི་ཕྱིར། །གསང་བའི་ཐིག་ལེ་
རྒྱུད་ལས་གསུངས། །དེ་ཕྱིར་སྒྲུབ་ཐབས་རིམ་པ་ནི། །རྫོགས་པར་བྱ་ཕྱིར་བླ་མས་ཀྱང་། །སྒྲུབ་པོ་རྣམས་ལ་ཕན་གདགས་ཕྱིར། །འདུས་པའི་ཆོ་གར་གསུངས་པ་ཡི། །སྔོན་བཞིན་ཐམས་ཅད་རབ་བྱས་ལ། །རྡོ་རྗེ་ཧཱུྃ་མཛད་རྣལ་འབྱོར་གནས། །དབུས་ཞལ་སྐུ་ནི་མཐིང་ཀ་
ལ། །གཡས་དཀར་གཡོན་དམར་ཕྱག་དྲུག་པ། །དང་པོས་རང་གི་རིག་མ་འཁྱུད། །གཡས་གཉིས་རྡོ་རྗེ་ལྕགས་ཀྱུ་བསྣམས། །གཡོན་གཉིས་པདྨ་ཞགས་པ་བསྣམས། །མཆེ་བ་ཅུང་ཟད་གཙིགས་པ་སྟེ། །རིན་ཆེན་སྣ་ཚོགས་རྒྱན་དང་ལྡན། །དབུ་སྐྲ་སེར་པོ་གྱེན་དུ་
བརྫེས། །གཏུམ་པོའི་ཧཱུྃ་གི་ང་རོ་སྒྲོགས། །སྟག་ལྤགས་སྨད་གཡོགས་དང་ལྡན་པ། །དྲག་པོ་གཡས་བསྐུམ་གཡོན་བརྐྱང་གིས། །ལྷ་ཆེན་ཆུང་མར་བཅས་པ་ཡི། །གདན་གཡོན་སྲ་བའི་ནུ་མར་མནན། །ཅོད་པན་མི་བསྐྱོད་མཚན་པ་བསྒོམ། །དེ་ལྟར་བསྒོམས་ནས་དེ་ཡི་

44-1-60a

སྔགས། །ཧཱུྃ་བཞིའམ་དེར་གསུངས་བཅུ་བདུན་པོ། །རྩེ་གཅིག་ལས་རྣམས་ཀུན་ལ་ནི། །སྔར་བཅས་ཆོ་ག་བཞིན་དུ་བཟླས། །ཨོཾ་ཨཱཿཀྲོ་དྷེ་ཧཱུྃ་ཀ་ར་ན་ཧ་ན་མ་ཐ་བྷཉྫ་ཧཱུྃ་ཕཊ། རྩ་བའི་རིག་པའོ། །ཨོཾ་ཧྲི་ད་ཡ་ཧཱུྃ། སྙིང་གའོ། །ཨོཾ་ཀ་པཱ་ལ་ཧཱུྃ་ཕཊ། 
མཚོག་མ་ལའོ། །ཨོཾ་ཨཱཿཧཱུྃ་ཀ་ར་ཀེ་ཀ་བེ་ར་ཧཱུྃ་ཕཊ། སྤྱི་གཙུག་ཏུའོ། །ཨོཾ་ཛྭ་ལ་ཛྭ་ལ་ལི་ཏ་བཱི་ཏྲ་ཧ་ཧཱུྃ་ཕཊ། གོ་ཆ་ལའོ། །ཨོཾ་བེ་བས་སྭ་ཏནྟ་ཀ་ཧཱུྃ་ཕཊ། མཚོན་ཆ་ལའོ། །སྦྱོར་བ་དེ་ཡིས་བ་དན་དང་། །ཐལ་བ་སྣག་ཚ་བཙག་སོར་གཏུབ། །སྐྲོད་བྱེད་དག་གི་ལས་རྣམས་
དག །ཇི་བཞིན་དུ་ནི་བསྒྲུབ་པར་བྱ། །དུར་ཁྲོད་རས་ལ་བ་དན་ནི། །ཁ་དོག་མཐིང་ག་སོར་བཅུ་དྲུག །སྨྱུག་མའི་ཡུ་བ་ཁྲུ་གང་ལ། །བཏགས་ཏེ་དུར་ཁྲོད་གནས་སུ་བསྒྲུབ། །དེ་ནི་ལག་ཏུ་གཟུང་བྱས་ནས། །ཞག་བདུན་སྔགས་བཟླས་ནམ་ལངས་ན། །དེ་ཐོགས་དགྲ་
དཔུང་ལ་གཡབས་པས། །ཐེ་ཚོམ་མེད་པར་གནོན་པར་འགྱུར། །མཚོན་ཐོགས་བདག་ལ་གནོད་བྱེད་གཞན། །སྒྲུབ་པ་པོ་ནི་མཐོང་ཙམ་གྱིས། །དེ་དག་མདུང་བཞིན་རེངས་པར་འགྱུར། །དེ་བཞིན་གླང་རྒྱལ་མྱོས་པ་དང་། །ཤིང་རྟ་རྟ་དང་སྲོག་ཆགས་རྔམ། །རྐང་ཐང་འཁྲུགས་
པ་མང་བཅས་པ། །མཐོང་བ་ཙམ་གྱིས་རེངས་པར་འགྱུར། །མཚན་མོ་མི་རོ་བསྲེགས་པ་ཡི། །གནས་སོང་སྐྲ་བཤིག་གཅེར་བུར་ཕྱུང་། །བཟླས་པ་བསྐོར་ཞིང་རབ་བྱས་ནས། །ནམ་ལངས་ཐལ་བ་སྤར་གང་བླང་། །ལག་པ་གཡོན་པས་བླངས་ནས་ནི། །རང་གི་ཁྱིམ་དུ་འགྲོ་བར་
བྱ། །ཡང་ན་ལྷ་ཁང་སྟོང་པར་འགྲོ། །ཕྱིར་ནི་བལྟ་བར་མི་བྱའོ། །དེ་ནས་དེར་ཡང་ཐལ་བ་དེ། །ཞག་བདུན་སྔགས་བཟླས་བསྲུང་བར་བྱ། །སྣོད་སར་ནང་དུ་རབ་བཞག་སྟེ། །ས་ལ་གཞག་པར་མི་བྱའོ། །དེ་ཡིས་གང་གི་དཔུང་གི་ཚོགས། །མཐོང་ན་ལན་ཅིག་
གཏོར་ཙམ་གྱིས། །རེངས་པར་འདོད་ན་རེངས་པར་འགྱུར། །རླུང་ཕྱོགས་དག་ཏུ་སྦྱར་བ་ན། །ལྡོག་པར་འདོད་ན་ལྡོག་པར་འགྱུར། །མདུན་དུ་སྐེམ་སྟེ་གཏོར་བྱས་ནས། །མྱོས་པར་འགྱུར་ཏེ་མཚོན་ཆ་རྔམ། །དེ་ཁོ་ན་བཞིན་འདོར་བར་འགྱུར། །ཚིལ་ཆེན་སྣུམ་ལ་མར་མེ་ནི། །

44-1-60b

ཐོད་པ་བཟང་པོར་སྦར་བར་བྱ། །སྟེང་གི་ཐོད་པར་དུ་བ་བསྒོ། །སྣག་ཚར་བྱས་ཏེ་དེ་བླངས་ལ། །ཞག་བདུན་སྔགས་བཟླས་ནམ་ལངས་ན། །དུ་བའི་སྣག་ཚ་མིག་ལ་བསྐུ། །དེ་ཡིས་གང་མཐོང་ཐམས་ཅད་ཀུན། །ཅི་བགྱི་ཞེས་ནི་བཀའ་ཉན་འགྱུར། །ཡུག་སྣམ་བཙག་ནི་
དགེ་བ་དག །བསྲེག་པའི་གནས་འགྲོ་ཁར་བཅུག་ལ། །དེ་ཕྱེད་ཚིག་པའི་དུས་སུ་ནི། །གྲོགས་མེད་པར་ནི་མཚན་མོ་བླང་། །ལྷ་ཡི་ཁང་སྟོང་དུ་ཁྱེར་ནས། །གོང་གི་སྔགས་ནི་ཞག་བདུན་བཟླ། །དེ་ཚེ་བགེགས་ཀྱང་སྣ་ཚོགས་འང་། །མི་འཇིགས་འདུག་ཅིང་དེ་ལ་བཟླ། །དེ་ནས་
ནམ་ལངས་གྱུར་པ་ན། །རས་ནི་དམར་པོས་དཀྲི་བྱས་ལ། །མཆོད་ཅིང་བསྲུངས་ནས་གཞག་པར་བྱ། །དེ་ཡིས་སེམས་དང་ལྡན་པའམ། །མི་ལྡན་གང་གི་མིང་བྲིས་པས། །བསྐུལ་ནས་དོགས་པ་མེད་པ་ཡང་། །རྡོ་རྗེ་འཆང་བའི་བཀའ་བཞིན་དུ། །འོངས་ནས་ལས་རྣམས་
ཐམས་ཅད་བྱེད། །སྲོག་སོང་དུར་ཁྲོད་ཁྱེར་བ་ན། །གསེར་གྱི་སོར་གདུབ་དེ་ཡི་ཁར། །བཅུག་ནས་བདག་ཉིད་གཅིག་པུ་ནི། །ཁྲོ་བོའི་སྔགས་ནི་ཟློས་ཤིང་འདུག །རོ་དེ་མེ་ཡིས་ཚིག་འགྱུར་ན། །ཁ་ཡི་སོར་གདུབ་སྒྲུབ་པ་པོའི། །ལག་པ་གཡོན་པས་བླང་བྱས་ལ། །ཞག་
བདུན་བར་དུ་བཟླ་བར་བྱ། །དེ་ནས་སོར་གདུབ་བཟང་པོ་དེ། །ལག་པ་གཡོན་པའི་མཛུབ་མོ་ལ། །བཅུག་སྟེ་ལག་པ་དེ་ཡིས་ནི། །གང་དང་གང་དུ་རེག་འགྱུར་བ། །དེ་དང་དེ་ཡིས་ལས་ཀུན་བྱེད། །ཕྱི་བཞིན་དུའང་རྟག་ཏུ་འབྲང་། །རྟེན་འབྲེལ་བསམ་གྱིས་མི་ཁྱབ་པ། །འདི་
ལ་དཔྱད་པར་ཡོད་མི་བྱ། །སིང་ཏའི་ཤིང་ལ་གབ་ཚེ་ཡང་། །བཟང་པོ་སོར་ནི་བརྒྱད་པ་བྱ། །དེ་ཡི་ནང་དུ་སྐྲོད་བྱེད་ཀྱང་། །དངོས་གྲུབ་སྦྱིན་པར་བྱེད་པར་བླུགས། །ཟླ་བ་གཟས་ནི་ཟིན་པའི་ཚེ། །མ་གྲོལ་བར་དུ་དེ་ལ་བཟླ། །དེ་ནས་སྔོན་བཞིན་འཁོར་ལོ་བྲི། །འབྱུང་པོ་གཏོར་
མ་སྦྱིན་བྱས་ལ། །གབ་ཚེ་ནང་གི་སྐྲོད་བྱེད་ཀྱང་། །སྒྲ་འབྱུང་ཡང་ན་གས་ཀྱི་བར། །དེ་སྲིད་ཞག་བདུན་དེ་ལ་ནི། །ཁྲོ་བོའི་སྔགས་ཀྱི་བཟླས་པར་བྱ། །དེ་ཚེ་སྐྲོད་བྱེད་གྲུབ་མ་ཐག །བླངས་ནས་གང་ཡང་རུང་བ་རུ། །ཆོ་ག་བཞིན་དུ་སྦྱར་ན་ནི། །དེ་ཡིས་མི་ནུས་གཅིག་

44-1-61a

ཀྱང་མེད། །ས་ཡང་འགས་བྱེད་ཆུ་ཡང་སྐེམས། །རིན་ཆེན་ཕྱེ་མ་བཞིན་དུ་རློག །རི་རྩེར་སྦྱར་ན་བསྙིལ་བར་བྱེད། །ཁྲག་དང་སོལ་བའི་སེལ་འབེབས་བྱེད། །གནམ་ལྕགས་དག་ནི་འཐོར་བ་དང་། །ས་གཡོས་སྤྲིན་ནི་གཏོར་བ་དག །རྣལ་འབྱོར་
པ་ཡིས་རབ་སྦྱར་ན། །གློ་བུར་དུ་ནི་ཐོགས་མེད་འགྲུབ། །མཚོ་གཡོ་ཀླུ་རྣམས་སྐྲག་པ་དང་། །ཤིང་རྣམས་འབྲས་བུ་གློ་བུར་འབྱིན། །གཞན་ཡང་སྒྲུབ་པོ་ཅི་བསམ་པའི། །ལས་རྣམས་ཐམས་ཅད་དེ་ཡིས་བྱེད། །འདི་ནི་རྡོ་རྗེ་ཧཱུྃ་མཛད་ཀྱི། །སྔགས་རྒྱུད་ལྡན་པའི་ལས་རྣམས་དེ། །
གཞན་ཡང་དེ་ལས་གསུངས་པ་ཡི། །ལས་རྣམས་མཁས་པས་ཤེས་པར་བྱ། །ད་ནི་ཐུན་མོང་གི་དངོས་གྲུབ་ཀྱི་མཇུག་ཏུ་མངག་གཞུག་བསྒྲུབ་པའི་ཆོ་ག་བཤད་པར་བྱའོ། །རྡོ་རྗེ་བཟླས་གནས་རྣལ་འབྱོར་པས། །རང་གི་དགོས་པ་རྫོགས་པའི་ཕྱིར། །བདག་གི་རིགས་ཀྱི་ཁྲོ་
བོ་མཆོག །མངག་གཞུག་པ་རུ་བསྒྲུབ་པར་བྱ། །འདོད་པའི་ལྷ་ཡི་རྣལ་འབྱོར་པས། །ཐམས་ཅད་སྔ་མ་བཞིན་བྱས་ལ། །ཧྲི་ནི་འོད་ཟེར་ལྔ་འབར་བ། །ནམ་མཁའི་དབུས་སུ་བསམ་པར་བྱ། །མཁའ་དབྱིངས་བདེ་གཤེགས་བྱང་ཆུབ་སེམས། །རིག་པའི་ལྷ་དང་ཁྲོ་
བོའི་ཚོགས། །གང་བར་བསམས་ནས་སྔགས་འདི་ཡིས། །སྐུ་གསུང་ཐུགས་ལ་གནས་ལ་གདབ། །ཨོཾ་ཨཱཿཧྲི་ཨ་མོ་གྷ་སིདྡྷི་ནན་བྷཀྵ་ཨཱ་ཀཱཪྵ་ཡ་ཧཱུྃ། ཕབ་པས་གནས་དེ་རིགས་ཀྱི་རིམ། །མི་བསྐྱོད་པ་ཡི་ཨ་གྱུར་ཏེ། །ཚེ་དཔག་མེད་པའི་ཁཾ་དུ་གྱུར། །རྣམ་པར་སྣང་མཛད་
དེང་གྱུར་ཏོ། །ཆོ་ག་དེ་ལ་སྐད་ཅིག་གིས། །ཆོ་ག་གཉིས་པ་བསྒྲུབ་པར་བྱ། །ཨ་དེ་བདུད་རྩི་འཁྱིལ་པར་གྱུར། །ཐལ་སྦྱར་གཞན་ལ་སྔོན་བཞིན་བསམ། །ཁཾ་དེ་པདྨ་མཐར་བྱེད་གྱུར། །དེ་ནི་གཤིན་རྗེ་གཤེད་གྱུར་ཏེ། །དེ་དག་སྔོན་བཞིན་ཉི་མ་ལ། །གནས་ཏེ་དང་པོ་ཐལ་
སྦྱར་བསམ། །ལྷ་མོ་སྤངས་པའི་ཕྱག་མཚན་ཡང་། །གཡས་ཀྱི་ཐ་མར་དཔའ་བོ་དང་། །ལྕགས་ཀྱུས་བཀང་བའི་སྣོད་བཟུང་ནས། །སྒྲུབ་པ་པོ་ལ་སྟོབས་བྱེད་བསྒོམ། །དེ་དག་གནས་གསུམ་གོང་མ་ཡིན། །ཨ་ཁཾ་དེ་ནི་བཀོད་བྱས་ནས། །དེ་ནས་བསྐུལ་བ་ལ་སོགས་པས། །

44-1-61b

དོན་ཡོད་གྲུབ་པས་དབུ་བརྒྱན་ཏེ། །བདུད་རྩི་འཁྱིལ་པའི་ཐུགས་ཀ་རུ། །ཉི་མའི་དཀྱིལ་འཁོར་ལ་གནས་པའི། །མི་བསྐྱོད་པ་ནི་བསྒོམ་པར་བྱ། །པདྨ་མཐར་བྱེད་ཐུགས་ཀ་རུ། །དེ་གནས་ཚེ་དཔག་མེད་པར་བསྒོམ། །གཤིན་རྗེ་གཤེད་ཀྱི་ཐུགས་ཀ་རུ། །ཟླ་བའི་དཀྱིལ་
འཁོར་ལ་གནས་པའི། །རྣམ་པར་སྣང་མཛད་རབ་ཏུ་བསྒོམ། །དེ་ནས་རིགས་གསུམ་ཕྱག་གནས་པའི། །མདུང་རྩེ་གསུམ་དང་ཀྱོ་བ་དང་། །རྡོ་རྗེ་དང་ནི་གཏུན་ཤིང་གིས། །གསང་བའི་གནས་ལ་བརྡབ་ཅིང་བསྐུལ། །ཨོཾ་མི་བསྐྱོད་པ་ནི་རྡོ་རྗེ་མཆོག །ཁྱོད་ཀྱི་རིགས་ཀྱི་ཁྲོ་
བོ་ཆེ། །ང་ཡི་རེ་བ་རྫོགས་བྱའི་ཕྱིར། །ཁྱོད་ཀྱི་མངག་གཞུག་པ་རུ་བསྐུལ། །ཚེ་དཔག་མེད་དང་སྣང་མཛད་ཀྱང་། །དེ་བཞིན་དུ་ནི་བསྐུལ་བྱས་ཏེ། །ཉམས་དགའ་བ་ཡི་རི་དག་དང་། །ཆུ་གླིང་རྣམ་པ་སྣ་ཚོགས་སུ། །བསམ་གཏན་འདི་ནི་ཟླ་ཕྱེད་བསྒོམ། །རི་རབ་སུམ་ཅུ་
རྩ་དྲུག་གི། །རབ་ཏུ་ཕྲ་བའི་རྡུལ་སྙེད་དང་། །འཁོར་ལོ་ཅན་གྱི་བྱང་ཆུབ་འགྲུབ། །དེས་ཁྲིད་སངས་རྒྱས་ཞིང་དུ་འགྲོ། །ཟབ་ཅིང་རྒྱ་ཆེའི་ཆོས་ཐོབ་འགྱུར། །དེ་ནི་གཉིད་སོགས་དང་བྲལ་ཡང་། །བདེ་གཤེགས་ཀུན་གྱིས་བྱིན་བརླབས་ནས། །གཉིད་འོད་དེ་རུ་གོང་གསུངས་
པའི། །མཚན་མ་རྣམས་ནི་ཡང་དང་ཡང་། །འབྱུང་བར་འགྱུར་བར་ཐེ་ཚོམ་མེད། །ལྷ་ཡི་བཀའ་ཡིས་བརྟན་པར་བྱེད། །ནམ་མཁའ་ཆོས་རྣམས་སྤངས་པ་ཡང་། །རྟ་དང་གླང་ཆེན་ལ་སོགས་པ། །སྒྲུབ་པ་པོ་ཡིས་བསྐུལ་བ་ཡིས། །མངག་གཞུག་དེ་ཡིས་བྱེད་པར་འགྱུར། །
གོང་གསུངས་འོག་ནས་འབྱུང་བ་ལ། །སྒྲུབ་པའི་ཐབས་ནི་ཇི་སྙེད་པ། །ནུས་དང་ལྡན་པས་དེ་རྣམས་ལས། །ལྷ་སོགས་རྣམས་ཀྱིས་ཁྱད་ཤེས་གྱུར། །འདྲོན་པོའི་དང་པོའི་གནས་བཞིན་དུ། །ཐམས་ཅད་བརྗོད་པས་ལུང་རྔོ་ཐོགས། །དེ་བས་དང་པོ་སྔོན་འགྲོ་བས། །གཞུང་གི་དོན་ལ་
བརྟན་པར་བྱ། །ད་ནི་ཕྱག་རྒྱ་ཆེན་པོའི་དངོས་གྲུབ་སྒྲུབ་པའི་ཐབས་ཀྱི་ཆོ་ག་རྒྱས་པར་བཤད་པར་བྱའོ། །སྔོན་གསུངས་ཡང་དག་རིམ་གནས་ལ། །དགོས་དང་དོན་བྱེད་མ་གཏོགས་པ། །བྱ་བ་ཐམས་ཅད་མཆིལ་ཐལ་བཞིན། །སྤངས་ནས་རྡོ་རྗེ་འཆང་བ་ཡི། །སྦྱོར་བ་ཐོབ་ཕྱིར་དུས་

44-1-62a

རྟག་ཏུ། །སངས་རྒྱས་མཆོད་དང་འགྲོ་དོན་ལ། །དད་པས་བརྩོན་འགྲུས་ཀྱིས་སྦྱོར་བྱེད། །ཐབས་ཤེས་སྦྱོར་བས་སྐྱོན་ཀུན་བསལ། །ཐོབ་པའི་ཟས་ནི་ཟ་བར་བྱེད། །ཆགས་པ་སྡང་བ་རྣམས་དང་བྲལ། །འཇིག་རྟེན་ཆོས་བརྒྱད་མ་གཏོགས་པའི། །འདོད་
པའི་ལོངས་སྤྱོད་ཐོབ་བཞིན་སྤྱོད། །བཀའ་ཡི་གཞུང་ལུགས་འཇིགས་སྤངས་ནས། །ལུས་གནས་པ་ཡི་ཆོག་ཤེས་ཏེ། །བྱ་བ་གསུམ་གྱི་མཐའ་ལ་སྤྱོད། །དགོས་པ་འགྲུབ་པ་དེས་བསྒྲུབ་བྱ། །ཅི་གསུང་མཚན་མ་མཐོང་འགྱུར་ནས། །རང་གི་རིགས་ཀྱི་ཕྱག་རྒྱ་མཆོག །གོང་
དུ་བསྟན་པའི་ཆོ་ག་ཡིས། །བཀུག་སྟེ་བདག་གིར་བྱ་བའོ། །དེ་དང་ལྷན་ཅིག་ཡིད་འོང་དགོན། །རང་ཉིད་མ་གཏོགས་གཞན་གྱིས་ནི། །མི་ཕྱེད་གནས་སུ་ཟླ་དྲུག་ཏུ། །གསང་བའི་བརྟུལ་ཞུགས་སྤྱོད་པ་བྱ། །བརྒྱུད་པའི་མན་ངག་ལས་གསུངས་པའི། །ལུས་ངག་
ཡིད་ཀྱི་སྤྱོད་པའི་མཆོག །ཕྱག་རྒྱ་དག་ཕྱིར་ཉིན་མཚན་དུ། །རྣལ་འབྱོར་དབང་ཕྱུག་བརྩོན་པར་བྱ། །དེ་ཡིས་ཟླ་བ་གཅིག་གིས་ནི། །སྐལ་ལྡན་གྱུར་པར་ཐེ་ཚོམ་མེད། །དེ་དང་ལྔ་ཡི་བར་དུ་ནི། །རྗེས་མཐུན་ཤེས་པའི་ཟས་ལོངས་སྤྱོད། །རང་གི་ཁམས་ན་རང་གནས་པའི།  །བདེ་
གཤེགས་རྣམས་ཀྱིས་ཐུགས་གདུངས་ནས། །དེ་རུ་བྱོན་ནས་སྒྲུབ་པོ་ལ། །འཕྲལ་དུ་བཀའ་སྩལ་སྟེར་བར་གྱུར། །དེ་ནས་བཀའ་སྩལ་ཐོབ་མ་ཐག །རང་གི་མཐུ་སྟོབས་རྟོགས་བྱའི་ཕྱིར། །གོང་དང་ལྷན་ཅིག་ཟླ་དྲུག་ཏུ། །ཕྱི་ཡི་རིག་པའི་བརྟུལ་ཞུགས་སྤྱད། །ཡིད་འོང་
དབེན་པར་ཆོ་ག་བཞིན། །འདུས་པའི་འཁོར་ལོ་བྲི་བྱས་ལ། །མཆོད་པ་སོགས་ཀྱིས་མཉེས་བྱས་ཏེ། །བསོད་ནམས་ཚོགས་ནི་རྫོགས་པར་བྱ། །དེ་ནས་བདག་ཉིད་དེ་དང་ནི། །བཅོས་མའི་གདོང་ལ་སོགས་པས་མཚན། །ཡང་ན་ཕྱོགས་གོས་འབའ་ཞིག་གིས། །མཚན་ཏེ་ཀུན་དུ་རྒྱུ་
བར་བྱ། །རི་ཡི་གཅོང་རོང་ནགས་ཚལ་གནས། །གླང་ཆེན་སེངྒེ་སྦྲུལ་དང་སྟག །གདུག་པའི་སེམས་ཅན་འཇིགས་པའི་སར། །བདག་རྒྱུ་དེ་དག་རྩེ་བར་བྱེད། །རྡོ་ལེབ་རྒྱ་མཚོར་བདག་ཉིད་འདུག །རི་དགས་ལྟེ་བའི་དྲི་བྲོ་སྟེ། །ཨིནྡྲ་ནཱི་ལའི་ཁ་དོག་འདྲ། །སྣུམ་དང་མིག་སྟོང་

44-1-62b

གདན་བཞིན་ནོ། །ཚེར་མང་ཆུ་མིག་གྲོག་རལ་མང་། །མི་སྡུག་གནས་སུ་བདག་རྒྱུ་བས། །མེ་ཏོག་འབྲས་བུ་བཟང་པོ་དང་། །དྲི་ཞིམ་ཆུ་ནི་མདོངས་དང་ལྡན། །གཞན་གསུངས་ཕྱག་རྒྱ་རྣམས་ཀྱི་མཚན། །གར་བྱེད་གླ་བླང་བརྐམ་ཚིག་སྨྲ། །མི་ཤེས་བླུན་པའི་གཟི་ཅན་རྣམས། །འདུལ་
ཞིང་ལུས་ཀྱི་རྒྱུ་མཐུན་པས། །གསོ་བར་བྱེད་ཅིང་སྟོབས་མཐོང་བས། །ནགས་ཚལ་དག་ཏུ་བསོད་སྙོམས་བསླང་། །བསྒྲུབ་དབང་དེ་ཡི་གཟི་བརྗིད་ཀྱིས། །ནགས་ཚལ་ལྷ་རྣམས་སྐྲག་ནས་ནི། །ཁ་ཟས་བཟང་པོ་སྟེར་བ་དག །སྒྲུབ་པ་པོ་ལ་རབ་ཏུ་སྦྱོར། །ཕུན་སུམ་ཚོགས་པ་མ་སྦྱར་
ན། །དམ་ཚིག་སྟོབས་ཀྱིས་དེ་རྣམས་འཆི། །དེ་ལྟར་སྤྱི་དང་དངོས་གཞི་ཡི། །མཚན་ཐོབ་པ་ཡི་རྣལ་འབྱོར་པས། །རང་གི་ཁམས་ནི་དག་བྱའི་ཕྱིར། །འོག་ནས་བཤད་པའི་རིམ་པ་བཞིན། །དུས་མཚན་བཞི་རུ་ཞག་བདུན་དུ། །བསྒོམ་པའི་དབང་བསྐུར་རྣམ་དག་པས། །ཉི་ཤུ་རྩ་
ལྔའི་བདག་ཉིད་ཅན། །འཁོར་ལོའི་བདག་ཉིད་དྲི་མེད་བྱ། །རང་གི་ས་བོན་འོད་ལྕགས་ཀྱུ། །རྟག་དང་སྦྱོར་བའི་སྤྱན་མའི་ཚོགས། །འོག་མིན་ནས་ནི་བཀུག་བྱས་ནས། །ནམ་མཁའི་ཁམས་ཀུན་གང་བཞུགས་བསྒོམ། །དེ་ཉིད་བདེ་ཆེན་རོ་ཞུ་བས། །འོ་མའི་རྒྱུན་ལྟར་དེ་དག་གིས། །
སྤྱི་བོ་ནས་ནི་མདུན་རྒྱབ་དང་། །ལྔ་སྟོང་དག་ནི་ཞུགས་པར་བྱ། །དེ་བཞིན་བདེ་བ་ཅན་ཞིང་ནས། །དཔག་མེད་དང་སྦྱོར་གོས་དཀར་དགུག །སྔོན་བཞིན་བསམས་ནས་དེ་ཡི་དུས། །དེ་དག་རྣམས་ནི་ལྕེ་ལ་གཞུག །མངོན་དགའ་ལས་བྱུང་མི་བསྐྱོད་དང་། །མཱ་མ་ཀཱི་ནི་གཉིས་
མེད་དུ། །དེ་དག་རྣམས་ཀྱི་ཐུགས་ཀ་རུ། །ལྔ་སྟོང་བདུན་བརྒྱའི་བར་དུ་ཞུགས། །འོད་དེས་ཁ་ཏི་ཀ་ནས་ཀྱང་། །དོན་ཡོད་གྲུབ་དང་སྒྲོལ་མ་ཡང་། །བདེ་ཆེན་གཞན་གྱི་དབང་གྱུར་ནས། །ལྟེ་བར་དེ་དུས་ཞུགས་བྱས་ནས། །ནམ་མཁའ་ལྟ་བུར་དེ་བཞིན་ཉིད། །ཡང་དང་
ཡང་དུ་བརྩོན་པར་བྱ། །གང་ཕྱིར་དེ་ཉིད་ཡང་བསྒོམས་པས། །དངོས་པོ་དག་པར་བྱེད་པའི་ཕྱིར། །རྒྱལ་བ་རྣམས་ཀྱིས་དེ་ཉིད་བསྔགས། །དེ་དང་དེ་ཡི་རྣལ་འབྱོར་གྱིས། །རྡོ་རྗེ་གསུམ་གྱིས་མཚན་པ་ནི། །ཁྱུ་མཆོག་དེ་ནི་མཉེས་པར་འགྱུར། །དེ་ལྟར་སྤྱོར་བ་གསུམ་ལྡན་

44-1-63a

པས། །དངོས་གཞིའི་ལས་ལ་འཇུག་དོན་དུ། །གོང་གསུངས་ལས་ཀྱི་ཕྱག་རྒྱ་ཆེ། །རིགས་གསུམ་བྱེ་བྲག་གིས་གཟུང་བྱ། །མི་བསྐྱོད་རྡོ་རྗེ་རྣལ་འབྱོར་པས། །སྨེ་ཤ་ཅན་གྱི་མཐུ་ཆེན་གྱི། །བུ་མོ་ལོ་གྲངས་བཅུ་དྲུག་པ། །ཨུཏྤ་ལ་ཡི་མདོག་འདྲ་
བསྒྲུབ། །དེ་བཞིན་རྟག་པའི་སྦྱོར་བ་ཡི། །བཙོ་བཟླག་མཁན་གྱི་བུ་མོ་དཀར། །ལོ་གྲངས་ཉི་ཤུ་ལྔ་ལོན་པ། །སྤྱན་མའི་ངོ་བོར་བསྒྲུབ་པར་བྱ། །ཚེ་དཔག་མེད་ཀྱི་རྣལ་འབྱོར་པས། །གར་མཁན་བུ་མོ་རབ་མཛེས་ཤིང་། །དམར་པོ་བཞིན་སྡུག་མིག་དཀྱུས་རིང་། །ཉི་ཤུ་ལོན་པ་གོས་
དཀར་བསྒྲུབ། །ཡང་ན་བྲམ་ཟེ་རྒྱལ་རིགས་དང་། །རྗེའུ་རིགས་དམངས་རིགས་གཞན་བུད་མེད། །གང་གི་རྣལ་འབྱོར་གྱིས་གནས་སྒྲུབ། །དེ་ཡིས་གསང་བའི་སྐུ་གསུམ་ཐོབ། །འདིས་ནི་རང་བྱུང་བཅོམ་ལྡན་འདས། །གཅིག་པུ་རབ་ཏུ་ཆེ་བའི་ལྷ། །རྡོ་རྗེ་སེམས་དཔའ་བདེ་
བའི་མཆོག །ལྷག་པའི་བྱ་བ་བྱ་ཞེས་བསྒྲུབ། །ཆགས་མིན་ཆགས་དང་བྲལ་བའང་མིན། །དབུ་མར་ཡང་ནི་མི་དམིགས་སོ། །འདི་ནི་གཉིས་མེད་ཐེག་པའི་མཆོག །བུད་མེད་སྒྱུ་མའི་རྒྱུ་འདི་ཡིས། །སྒྱུ་མ་དག་ནི་ཐམས་ཅད་པས། །བུད་མེད་སྒྱུ་མ་ཁྱད་པར་ཆེ། །ངོ་བོ་ཉིད་ཀྱི་
མཐུ་དག་གིས། །རང་བཞིན་གྱིས་ནི་དེ་འགྲུབ་པའོ། །འཇིག་རྟེན་གསུམ་འདིར་བུད་མེད་འདིས། །གུས་པ་བྱེད་པ་དག་ཏུ་འགྱུར། །རྙེད་དང་བདེ་བ་དགའ་ཀུན་གྱིས། །ནང་སྤྱོད་རྣམས་ཀྱང་འགྲུབ་པར་འགྱུར། །རང་གི་ངོ་བོ་ཡོངས་བསྒྱུར་ནས། །བུད་མེད་ཀུན་གྱི་སྒྱུ་མ་འགྲུབ། །ངོ་མཚར་སྒྱུ་
མའི་ཕྱག་རྒྱ་འདི། །མཁའ་འགྲོ་མ་ཡི་བརྡར་བསྟན་ཏོ། །དེ་བས་དེ་དང་ལྷན་ཅིག་ཏུ། །ཡིད་འོང་གནས་སུ་སྔོན་བཞིན་དུ། །རི་མོའི་དཀྱིལ་འཁོར་བྲིས་ནས་ཀྱང་། །བྱིན་བརླབས་ལ་སོགས་སྔོན་བཞིན་བྱ། །དེ་རུ་སྟེགས་བུ་གྲུ་བཞི་ནི། །བདུད་རྩི་ལྔ་ལ་སོགས་པས་བྱུག །བདེ་བའི་སྟན་ལ་དེ་
དང་ནི། །ལྷན་ཅིག་སྒྱུ་འདྲའི་ཏིང་འཛིན་རོལ། །བསྲུང་བ་ལ་སོགས་རྟེན་བསྒྲུབས་ལ། །དང་པོའི་མགོན་པོས་བདག་ཉིད་བསྒྲུབ། །གོང་མ་རིག་མའི་འདུ་བྱེད་པས། །རབ་ཏུ་བསྒྲུབས་ཏེ་པདྨར་བཞག །ཕྲིན་ལས་ལ་གནས་བདེ་ཆེན་པོ། །དེ་ཡིས་སྐུ་གསུམ་གོམས་བྱའི་ཕྱིར། །ཡང་

44-1-63b

དང་ཡང་དུ་ཉིན་མཚན་དུ། །ཟླ་བ་དྲུག་ཏུ་བསྒྲུབ་པར་བྱ། །དེ་ཡིས་སྒྲུབ་པོ་བདག་ཉིད་ཀྱིས། །ཕྱི་ནང་དུས་སུ་སངས་རྒྱས་ཀྱི། །མཚན་གྱིས་བརྒྱན་པར་མ་གྱུར་ན། །ཡང་ནི་ཆོ་ག་དེ་ཁོ་ནས། །དེ་ཡི་འདོད་པ་ལོངས་སྤྱོད་ཅིང་། །གསང་བའི་མཆོད་པ་དང་བཅས་པས། །ས་བཅུ་དེ་ལ་
གནས་བཅས་ཏེ། །ཟླ་བ་དྲུག་ཏུ་ཡང་བསྒྲུབ་བྱ། །གལ་ཏེ་དེ་རུ་སྒྲུབ་པ་པོས། །གོང་གསུངས་མཐོང་བར་མ་གྱུར་ན། །ཇི་སྐད་བཤད་པའི་ཆོ་ག་ཡིས། །ཡང་ནི་ཟླ་དྲུག་རབ་ཏུ་བརྩམས། །དྲུག་གསུམ་བཅོ་བརྒྱད་ཆོ་ག་བཞིན། །བསྒྲུབ་པས་རྡོ་རྗེ་གསུམ་གྱིས་ནི། །དངོས་གྲུབ་
སྟེར་ཏེ་ཕྱིས་འབྱུང་བའི། །ཕྱག་རྒྱ་ཆེན་པོ་རབ་ཏུ་འཐོབ། །དེ་ལྟར་བྱས་པའི་སྒྲུབ་པ་པོས། །བསྒོམས་པས་དངོས་གྲུབ་མཆོག་མ་མཐོང་། །སྙན་ཚིག་ཞི་བའི་བསྐུལ་བ་ཡིས། །དངོས་གྲུབ་བསླང་བར་བྱ་བའོ། །སྔོན་གྱི་འཁོར་ལོ་ཁང་པའམ། །གཞན་ཡང་གང་ཡང་རུང་བ་
རུ། །བགེགས་བསྐྲད་ཕུར་བུས་བཏབ་ནས་སུ། །སྔོན་བཞིན་གཙང་གཏོར་ས་གསོལ་བཏབ། སངས་རྒྱས་ལ་སོགས་སྔ་མ་བཞིན། །གསོལ་བཏབ་སྟེགས་བུ་འདུས་བྱས་ཏེ། །བྱིན་བརླབས་ཏིང་འཛིན་གསུམ་གནས་ལ། །སྐྱེ་གཅིག་ཐོགས་བསམ་གསོལ་བ་གདབ། །
དྲུག་ཅུ་རྩ་བཞིས་བགེགས་བསྐྲད་ནས། །ས་བསྲུངས་ས་ཡི་ལྷ་མོ་ཡང་། །མཆོད་པ་སོགས་ཀྱིས་མཉེས་བྱས་ལ། །དབང་པོར་ཞལ་གྱིས་བཞེས་པར་བྱ། །དེ་ནས་མེ་ཏོག་སྣ་ཚོགས་དང་། །དྲི་ཞིམ་ལ་སོགས་ལྡན་པ་ཡི། །མཎྜལ་སྔོན་བཞིན་འདུས་བྱས་ལ། །དེ་
ན་གནས་པ་དམིགས་པར་བྱ། །རང་གི་ས་བོན་འོད་ཟེར་ལས། །ལྕགས་ཀྱུ་རྡོ་རྗེ་གསལ་ཤིང་སོགས། །མཚན་པའི་ཁྲོ་བོ་སྤྲོ་བྱས་ལ། །དེ་དག་མཆོད་སོགས་ཀྱིས་མཉེས་བྱ། །སྒྲུབ་པོས་འོག་ནས་འབྱུང་བ་ཡི། །ཚིགས་བཅད་སྔགས་ཀྱི་ཁྱེད་རྣམས་ཀྱིས།  །སངས་རྒྱས་
བྱང་ཆུབ་སེམས་དཔའ་རྣམས། །བསྐུལ་ཅིག་ཅེས་ནི་སྨྲ་བར་བྱ། །དེ་ནས་ཞལ་གྱིས་བཞེས་ནས་ནི། །སོང་སྟེ་འཇིག་རྟེན་ཁམས་གནས་པའི། །སངས་རྒྱས་སོགས་ལ་ཕྲ་མོ་དང་། །སྙན་ཚིག་འཇེབས་པའི་དབྱངས་ཀྱིས་བསྐུལ། །ཆེ་གེ་ཞེས་བྱ་རྡོ་རྗེ་ཆེ། །འདི་ཡི་གནས་

44-1-64a

སུ་དམ་སྡོམ་ཅན།  །རིག་མའི་བརྟུལ་ཞུགས་སྤྱོད་པ་ཡིས། །ཚོགས་ནི་རྫོགས་པར་འགྱུར་བའོ། །བསྒོམ་པ་བཟླས་བརྗོད་ཡོངས་རྫོགས་ནས། །ཕྱག་རྒྱ་ཆེན་པོ་བསྒྲུབ་པའི་ཕྱིར། །བརྟུལ་ཞུགས་སྤྱོད་པ་ཡང་གནས་ནས། །ཁྱེད་ཀྱིས་བསྒྲུབ་
པའི་དཀྱིལ་འཁོར་བྲི། །ཁྱེད་ཅག་དེ་རུ་བྱོན་ནས་སུ། །དེ་ཡི་འཁོར་ལོ་བྱིན་བརླབས་ལ། །མཆོད་པ་ལ་སོགས་བཞེས་ནས་ཀྱང་། །ཕྱག་རྒྱ་ཆེན་པོ་གནང་བར་མཛོད། །དེ་ལྟར་བརྗོད་པས་དེ་དག་ཀྱང་། །རབ་ཏུ་དགྱེས་ནས་ཁྲོ་བོ་ལ། །དེ་ལྟར་བྱ་ཞེས་བསམས་ནས་ཀྱང་། །ལྷན་
ཅིག་བྱོན་བསམས་གནས་སུ་དགོད། །ཁྲོ་བོས་སྒྲུབ་པ་པོ་ལ་སྨྲས། །བདག་ཅག་རྣམས་ཀྱིས་གསོལ་བ་བཏབ། །དེ་དག་ཀྱང་ནི་འདི་སྐད་གསུངས། །རྡོ་རྗེ་ཆེ་གེ་ཞེས་བྱ་ལ། །བདག་ཅག་ཕྱག་རྒྱ་ཆེན་པོ་བཞིན། །གསུངས་ནས་འདི་རུ་བྱོན་པ་ལགས། །ཁྱེད་ཀྱིས་མཆོད་པའི་
ཚོགས་རྣམས་ཀྱིས། །མཉེས་པར་བྱས་ཏེ་དམ་ཚིག་བསྐུལ། །དེ་ནས་སྒྲུབ་པོས་སངས་རྒྱས་དང་། །ཁྲོ་རྒྱལ་ལྷ་མོ་མཉེས་བྱའི་ཕྱིར། །དེ་བཞིན་གཤེགས་པ་རྣམས་བཀུག་ནས། །རང་གི་བ་སྤུའི་བུ་གར་བཅུག །དེ་ཉིད་ལྷ་མོ་སྒེག་པས་བརྒྱན། །སྤྲོས་ནས་སངས་རྒྱས་བྱང་ཆུབ་
སེམས། །ཁྲོ་བོ་དང་བཅས་འཁོར་ལོ་ལ། །བདེ་བ་ཆེན་པོའི་རོས་མཆོད་པ། །བྱས་ནས་བསྟོད་ལ་བདུད་རྩི་མྱང་། །སྣ་ཚོགས་ཀྱིས་ནི་མཉེས་བྱས་ནས། །སྲོག་དང་བཅས་པ་བསམས་ནས་ཀྱང་། །བདག་ཉིད་ཀྱིས་ནི་སྙན་གསོན་གསོལ། །སངས་རྒྱས་ཀུན་བདག་དངོས་
གྲུབ་ཀྱི། །དཀྱིལ་འཁོར་བདག་གིས་བྲི་བར་འཚལ། །སང་ནི་དེ་རུ་བྱོན་ནས་ཀྱང་། །བདག་གི་མཆོད་པ་ལ་སོགས་བཞེས། །བཞེས་ནས་བདག་ལ་དངོས་གྲུབ་སྩོལ། །གལ་ཏེ་མ་སྩལ་ཁྱེད་རྣམས་ཀུན། །རང་ཉིད་ཀྱི་ནི་བསྟན་པ་ལ། །བརྫུན་དུ་སྨྲ་བར་གྱུར་པའོ། །དེ་
ལྟར་སྙན་གསན་ལན་གསུམ་དུ། །གསོལ་ནས་དེ་དག་ཞལ་བཞེས་ནས། །མཆོད་པ་སོགས་ཀྱིས་མཉེས་པར་བྱ། །སྟེང་གི་གནས་སུ་གཤེགས་སུ་གསོལ། །ཡང་ནི་མཆོད་པའི་བུམ་པ་རྣམས། །སྔོན་བཞིན་སྟ་གོན་གནས་བྱས་ནས། །མེ་ཏོག་སྤོས་ལ་སོགས་པ་ཡིས། །

44-1-64b

མཆོད་ནས་ཇི་བཞིན་གནས་སུ་དགོད། །དེ་ནས་ཕྱི་དེ་ཉིན་པར་ཡང་། །སྐུད་པ་ཚོན་རྩི་སྔོན་བཞིན་བསྒྲུབ། །གོས་དང་རིན་ཆེན་རྒྱན་ལྡན་པའི། །ཁྱེའུ་དང་བུ་མོ་དབབ་བྱས་ནས། །དེ་ཡིས་དངོས་གྲུབ་དཀྱིལ་འཁོར་མཆོག །ཡང་དག་སྦྱིན་བྱེད་བྲིས་ནས་ཀྱང་། །དབྱེ་བ་བྱས་
ནས་དེ་ཉིད་ཀྱང་། །མཆོད་ནས་རང་གི་གནས་སུ་བཏང་། །དེ་ནས་ཕྱག་རྒྱ་དང་ལྷན་ཅིག །འཁོར་ལོ་བསྒྲུབ་པའི་ཆོ་ག་བཞིན། །གཉིས་འདྲེས་བྱས་ནས་སྟེང་ནས་དབབ། །སྔོན་བཞིན་དཀྱིལ་འཁོར་དབྱེར་མེད་བྱ། །བདག་པོ་ལྔ་ལྔ་བཞི་པའི་དུས། །བདག་པོ་གཉིས་
པས་ཡང་མཚན་བྱ། །ཡང་ན་དེ་དག་ཀླད་རྒྱས་དང་། །ལྐོག་མ་སྙིང་ག་ལྟེ་བ་དང་། །གསང་བར་རྒྱུ་ཡི་སྐྱེས་བུ་དགོད། །རྡོ་རྗེ་མི་ཕྱེད་གསུམ་ལས་སྐྱེས། །སྒྲུབ་པ་པོ་ནི་བློ་ལྡན་ལ། །འཇིགས་ཤིང་སྐྲག་གནས་བྱིན་གྱིས་རློབ། །དེ་དག་གསང་བའི་མཆོག་སོགས་པ། །སྔོན་
གསུངས་མཆོད་པ་ཉི་ཤུས་ཀྱང་། །མཆོད་ནས་འོད་ཟེར་རྩེ་མོ་ལས། །ཡིད་དགའི་རིན་ཆེན་སྣ་བདུན་སྤྲོ། །གསེར་མདོག་ལྟ་བུའི་རྒྱན་རྣམས་ཀྱིས། །བརྒྱན་པའི་བདེ་བའི་ལོངས་སྤྱོད་འཛིན། །པདྨའི་སྟེང་ན་གནས་པ་ཡི། །བུད་མེད་རིན་ཆེན་དབུལ་བར་བྱ། །གནོད་སྦྱིན་ལྟ་
བུའི་གཟུགས་འཛིན་པ། །གོས་སྔོན་བསྒོས་པ་རིན་ཆེན་གཏེར། །གཟུང་བའི་ཁྱིམ་བདག་རིན་པོ་ཆེ། །སྒྱུ་མ་ལྟ་བུས་སྤྲུལ་པ་བྱ། །མཆེ་བ་དྲུག་ལྡན་གླང་པོ་དཀར། །གསེར་གྱིས་བརྒྱན་པ་སྤྲོ་བར་བྱ། །ཨུཏྤལ་མཐིང་གའི་འདབ་འདྲའི་རྟ། །རིན་ཆེན་ཆས་བརྒྱན་སྤྲོས་ཏེ་
དབུལ། །ཆང་ཟུངས་རིན་ཆེན་སྣ་བདུན་གྱིས། །སྤྲས་པའི་རལ་གྲི་རིན་པོ་ཆེ། །འོད་ཟེར་དང་ལྡན་པདྨ་ལ། །གནས་པ་སྤྲོས་ཏེ་དབུལ་བར་བྱ། །ལྷ་ཡི་གོས་ཀྱིས་རབ་བརྒྱན་པ། །འོད་ཟེར་སྣ་ཚོགས་སྤྲོ་བ་ཡི། །གསེར་གྱི་འཁོར་ལོ་རྩིབས་བརྒྱད་པ། །སྦྱོར་བ་ཤེས་
པས་སྤྲོ་བར་བྱ། །མཁའ་ཀུན་གསལ་བར་བྱེད་པ་ཡི། །འོད་ཟེར་མཐའ་ཡས་རབ་སྤྲོ་བ། །བློན་པོ་རིན་ཆེན་སྤྲོས་ནས་ཀྱང་། །དེ་དག་ཕྱིར་རྒོལ་བརྒྱན་པར་བསྒོམ། །དེ་ལྟར་ལྷ་སོགས་བུ་མོ་དང་། །རིག་འཛིན་རྣམས་ཀྱིས་བསྒྱུར་བ་ཡི། །གླུ་དང་གར་དང་གླིང་བུ་དང་། །དུང་དང་

44-1-65a

རྫ་རྔ་ལ་སོགས་པས། །ནམ་མཁའི་ཁམས་ཀུན་གཡོས་པར་བསྒོམ། །ཤིན་ཏུ་ཞི་བའི་སྒྲ་སྒྲོགས་པའི། །ཁུ་བྱུག་བུང་བ་ངང་པ་སོགས། །མདངས་དགའ་རྣམས་ཀྱིས་གང་བར་བསམ། །མེ་ཏོག་ཤིང་གིས་མཐའ་བརྒྱན་པའི། །མཛེས་པའི་
རྫིང་བུ་སྣ་ཚོགས་དང་། །དཔག་བསམ་ཤིང་གི་ནགས་ཚལ་ནི། །འཁོར་ལོའི་ཕྱོགས་བཞི་ནས་འབྱུང་ངོ་། །དེ་བཞིན་བཟའ་བཅའ་ཁ་ཟས་དཀར། །ཚལ་དང་ཐེག་པ་གདན་རྣམས་དང་། །མྱོས་བྱེད་བཏུང་བའི་ཚོགས་རྣམས་ཀྱང་། །འཁོར་ལོ་མཉེས་ཕྱིར་སྤྲོ་བར་
བྱ། །རང་བཞིན་དག་པའི་ཆོས་ཉིད་ལ། །ཆོས་ཀྱི་དབྱིངས་ནི་གནས་མེད་དེ། །རྡོ་རྗེ་ལས་བྱུང་རྟོག་པ་ནི། །གསུངས་པ་ཉིད་ཀྱང་མ་གྲུབ་བོ། །དེ་ལྟར་སྣ་ཚོགས་མཆོད་པ་ཡིས། །མཉེས་བྱས་སྔོན་བཞིན་རང་ཉིད་ཞུགས། །བདག་པོ་ང་རྒྱལ་དང་ལྡན་པར། །འཁོར་ལོ་བདག་
ལ་ཞུགས་བྱས་ཏེ། །དགའ་བའི་ཡེ་ཤེས་རབ་གནས་ནས། །ཞག་བདུན་སོགས་པར་ཡང་དུ་བརྟག །དེ་ལྟར་དེ་རུ་ཕྱག་རྒྱ་ཆེ། །ཇི་སྐད་གསུངས་པ་ཐོབ་པར་འགྱུར། །དེ་ལྟར་བྱས་ཀྱང་ཕྱག་རྒྱ་ཆེ། །སྒྲུབ་པོས་ཀྱང་ནི་ཐོབ་མ་གྱུར། །སྔོན་བཞིན་ཉམས་པ་སྣ་ཚོགས་དང་། །དབྱེ་
བའི་སྒོ་ནས་བསྒྲུབ་པར་བྱ། །རང་གི་འདོད་བཞིན་གསོལ་བཏབ་ནས། །བྲིས་པའི་འཁོར་ལོ་གཤེགས་སུ་གསོལ། །སྨོན་ལམ་རྣམས་ནི་བྱས་ནས་སུ། །བྱང་ཆུབ་ཆེན་པོར་བསྔོ་བར་བྱ། །རྟོག་པ་ལས་བྱུང་ཇི་སྙེད་པ། །རྗེ་བཙུན་རྣམས་ཀྱི་སྤྱན་སྔར་བཤགས། །ཅི་བཞིན་བྱིན་
གྱིས་བརླབས་བྱས་ནས། །རང་གི་རྗེས་སུ་མཐུན་པས་བསྒྲུབ། །འཁོར་ལོ་གང་དང་གང་བསྟན་པ། །སྣ་ཚོགས་ཕྱག་རྒྱ་མཆོད་པ་ཡིས། །སློབ་མའི་ཚོགས་ཀུན་དེ་དང་དེས། །མཆོད་པ་བྱས་ནས་དེ་བསྒྲུབ་པོ། །རང་གི་འཁོར་ལོ་ཚོགས་ལྡན་པའི། །རང་གི་བླ་མ་ལ་སོགས་གཞན། །ཡིད་
དགའ་གནས་སུ་སྤྱན་དྲངས་ནས། །དངོས་གྲུབ་རྣམ་པར་འཕྲུལ་འདི་བྱ། །བདེ་བར་གཤེགས་པའི་ལྷ་རྣམས་མཆོག །རིན་ཆེན་སྣ་ཚོགས་ཀྱིས་སྤྲས་པ། །དྲིལ་བུ་རྒྱལ་མཚན་མཆོད་སོགས་ལྡན། །བླ་རེ་དམ་པ་བྲེས་པ་རུ། །རྡོ་རྗེ་སྔགས་དང་མཆོད་ལ་སོགས། །གླུ་དང་སིལ་སྙན་རྣམ་

44-1-65b

པར་འབུལ། །མེ་ཏོག་བདུག་སོགས་རབ་སྦྱོར་བས། །དག་པའི་གདན་ཆེན་བཤམ་པར་བྱ། །དེར་ནི་དེ་དག་ཐམས་ཅད་ཀུན། ཇི་ལྟའི་གནས་སུ་ཇི་བཞིན་འདུག །བསྐལ་བཟང་རང་གི་ཕྱག་རྒྱ་དང་། །དངོས་གྲུབ་ཕྱིར་ནི་རྣམ་པར་རོལ། །ཤ་དང་ཆང་ལ་སོགས་པ་ཡི། །བཟའ་
བཅའ་བཏུང་བའི་ཚོགས་རྣམས་དང་། །ལུས་དང་ངག་གི་སྤྱོད་པ་ཡིས། །དེ་ཀུན་མཉེས་པར་བྱ་དགོས་སོ། །དེ་བཞིན་ཕྱོགས་སྐྱོང་ལ་སོགས་ཀུན། །གཞན་བཞིན་འཁོར་ལོར་བསྒྲུབ་བྱས་ལ། །གོང་གསུངས་གཏོར་མའི་ཚོགས་རྣམས་ཀྱིས། །དེ་དག་ཚིམ་པར་ཡང་བྱའོ། །
སྒྱུ་འདྲའི་ཏིང་འཛིན་ལྷ་རྣམས་དམིགས། །འཁོར་ལོ་ཡང་དང་ཡང་དུ་མཆོད། །བླ་མས་མདུན་དུ་བཞག་ནས་ནི། །ཉམས་པར་དོགས་པ་ཐམས་ཅད་བསལ། །དེ་ལྟར་གོམས་པ་བརྟན་བྱ་ཞིང་། །མ་ཉམས་སྐྱོན་མེད་སྤྱོད་པར་ལྡན། །མཆོག་གི་དངོས་གྲུབ་ལམ་ལ་གནས། །
དམ་པའི་རིག་མ་མ་འཁྲུལ་པས། །ཞག་བདུན་དང་ནི་ཟླ་ཕྱེད་དང་། །ཟླ་གཅིག་ཟླ་བ་ཕྱེད་དང་གཉིས། །རྡོ་རྗེ་དམ་ཚིག་བསྐྱེད་བྱས་ནས།  །མྱུར་དུ་དངོས་གྲུབ་ཐོབ་པར་འགྱུར། །དེ་ལྟར་ཡང་དང་ཡང་བསྒོམས་པས། །བདེ་གཤེགས་རྣམས་ཀྱི་དངོས་གྲུབ་མཆོག །མི་འགྲུབ་
འཁྲུལ་པའི་རྒྱུ་ཡིས་ནི། །སྒྲུབ་པ་པོ་ལ་བཀག་གྱུར་ན། །དེ་ཉིད་དུ་ནི་སྒྲུབ་པ་པོས། །གོ་སྐབས་གཞན་ནི་མེད་པའི་ཕྱིར། །ཐུགས་རྗེ་ཆེ་བའི་གསང་བ་ཀུན། །དེ་ལ་ཁྲོས་པར་རིག་པ་ཡིན། །རྟོག་པའི་དབང་གིས་དེ་དག་རྣམས། །རང་རང་ཚོགས་དང་རང་ཁམས་དང་། །སྒྲུབ་པ་
པོ་ལ་མི་གཟིགས་ཏེ། །བཏང་སྙོམས་ཆེན་པོར་གནས་པའོ། །བཀའ་ཡིས་འཇིགས་མེད་འཁྲུལ་བསལ་དང་། །ཐུབ་པས་སྤྱན་རས་གཟིགས་བྱའི་ཕྱིར། །དམ་པའི་གཞུང་ལས་གསུངས་པ་ལྟར། །དེ་དག་རྣམས་ཀྱི་སྙིང་པོ་བསྐུལ། །བདག་དང་འཁོར་ལ་དམིགས་བྱས་ནས། །དེ་
དག་རྣམས་ཀྱི་སྤྱི་བོ་དང་། །མགྲིན་པ་དེ་འོག་ཐུགས་ཀ་རུ། །སྔོན་བཞིན་ཕྱག་རྒྱ་བཞིའི་རྒྱས་གདབ། །དེ་བཞིན་ཕྲ་མོའི་འཁོར་ལོ་ལ། །ས་བོན་སོགས་པས་ཡང་མཚན་ཏེ། །དེ་ཉིད་བརྗོད་པས་དེ་དག་ལས། །དེ་དག་རྣམས་ནི་སྤྲོ་བར་བྱ། །སྤྲོས་ཏེ་མདུན་དུ་རབ་གཡེང་བའི། །ཤིང་རྟ་དེ་

44-1-66a

དག་བཀའ་ནོད་པ། །གནས་ཤིང་ཁྲོས་པ་བསམ་བྱས་ཏེ། །སྒྲུབ་པོས་དེ་ལ་བཀའ་ཡིས་བསྒོ། །ང་ནི་དཔལ་ལྡན་ཆེ་གེ་མོ། །ཁྱོད་ཀྱི་རྟག་ཏུ་བསྒྲུབ་ལ་གནས། །དམ་སྡོམ་ལམ་ལ་རྟག་བརྩོན་པས། །བདག་ལ་དངོས་གྲུབ་སྩལ་དུ་གསོལ། །
ཨོཾ་ཤྲཱི་བན་ཙཀྲ་ཨཾ་གུ་ཤ་ག་ཏེ། དེ་བཞིན་གཤེགས་པ་ཐམས་ཅད་ཧྲི་ད་ཡ་ཙུནྡེ་ཨཱ་ཀཱཪྵ་ཡ་ཕཊ་ཛ། ཨོཾ་ཤྲཱི་བན་པདྨ་ཨཾ་གུ་ཤ་ག་ཏེ། གོང་གི་བསྒྲུབ་བྱ་ཧྲི་ད་ཡ་ཙུནྡེ་ཨཱ་ཀཱཪྵ་ཡ་ཕཊ་ཛ། ཨོཾ་ཤྲཱི་བན་ཁརྒ་ཨཾ་གུ་ཤ་ག་ཏེ། བསྒྲུབ་བྱ་ཧྲི་ད་ཡ་ཙུནྡེ་ཨཱ་ཀཱཪྵ་ཡ་ཕཊ་ཛ། ཨོཾ་ཤྲཱི་བན་
བཛྲ་ཨཾ་གུ་ཤ་ག་ཏེ། བསྒྲུབ་བྱ་ཙུནྡེ་ཨཱ་ཀཱཪྵ་ཡ་ཕཊ་ཛ། རིན་ཆེན་ལ་སོགས་རང་སྔགས་ཀྱིས། །རང་རང་མཚན་མས་མཚན་པ་ཡི། །ཡེ་ཤེས་སེམས་དཔའ་ལ་སོགས་པ། །དེ་དག་ཀུན་ཏུ་སྤྲོ་བར་བྱ། །སྤྲོས་ཏེ་ཕྱོགས་བཅུར་སོང་ནས་ཀྱང་། །རང་གི་ཞིང་ན་གནས་པ་ཡི། །བདེ་
གཤེགས་རིགས་བཅས་བཏང་སྙོམས་གནས། །ལྕགས་ཀྱུ་ཐུགས་ཀར་བརྡེག་ཅིང་བསྐུལ། །ཆེ་གེ་ཞེས་བྱ་རྡོ་རྗེ་ལ། །ཁྱེད་ཀྱིས་དངོས་གྲུབ་དམ་པ་སྩོལ། །གལ་ཏེ་མ་སྩལ་ཁྱེད་རྣམས་བརྫུན། །སྨྲས་པས་རང་ཉིད་བསླུས་པའོ། །དེ་བཞིན་ལུས་ཀྱི་དཀྱིལ་འཁོར་དང་། །སྐུ་
ཡི་བུ་ག་ཀུན་ནས་ཀྱང་། །དེ་འདྲ་བསམ་གྱིས་མི་ཁྱབ་པ། །འཕྲོས་པའི་མཚན་མ་རྣམས་ཀྱིས་བསྐུལ། །མི་གཟིགས་མངོན་པར་གྱུར་པའི་དོན། །ཐབས་དེ་ཞག་བདུན་བར་དུ་བྱ། །དེ་ཡིས་རྒྱུ་ཀུན་རྫོགས་པས་ན། །དེ་དག་རྣལ་འབྱོར་པ་ལ་འཇུག །དེ་ཡི་འོག་འབྱུང་མཆོག་
བཞིའོ། །རྡོ་རྗེ་ཚུལ་མཆོག་འདི་བརྩམས་པས། །ཡེ་ཤེས་རྡོ་རྗེ་ཅན་གྱི་གསང་། །མཆོག་སྩོལ་ཞིང་ནི་རྣམ་པར་གཟིགས། །ཡིད་ནི་འཇིགས་ཤིང་སྐྲག་གྱུར་ནས། །ཡིད་ལ་མགུ་ཞིང་དགར་འགྱུར་བའི། །དངོས་གྲུབ་དམ་པ་དེ་དུས་ཏེ། །དེ་ལ་རོལ་མོ་འབྱུང་བའོ། །གལ་
ཏེ་གཉིས་ཀྱི་བདག་ཉིད་རྨོངས། །དེ་ཡི་སྲོག་ནི་དེར་ཟད་འགྱུར། དེ་ཡིས་སྔོན་དུ་མ་བྱས་ན། །དེ་དག་ཆད་པས་གཅད་པར་བྱ། །རང་ཉིད་འཁོར་ལོར་བཅས་པ་ཁྲོས། །ནག་པོ་མེ་དཔུང་དཀྱིལ་ན་བཞུགས། །བསྙེན་པ་ལ་སོགས་དང་ལྡན་པས། །ཕྱག་རྒྱ་ལྷན་ཅིག་གཉིས་མེད་

44-1-66b

བྱ། །སྔོན་གསུངས་འཕྲོས་པ་རྣམས་ཀྱིས་ཀྱང་། །རང་ཁམས་གནས་པའི་རྟག་པ་སོགས། །རང་རང་ཁ་དོག་དང་ལྡན་པ། །ལྕགས་ཀྱུས་བཀུག་པར་བྱས་ནས་སུ། །ཕྱག་རྒྱའི་གསང་བར་ཉི་མའི་སྟེང་། །མེ་ཡི་དཀྱིལ་འཁོར་གྲུ་གསུམ་དུ། །བཞག་སྟེ་དེ་དག་དམ་ཚིག་གིས། །
བསྙེངས་པས་འདར་བར་བསམ་པའོ། །དེ་ནས་རང་གི་རིགས་ཅན་ཉིད། །ཉི་མ་བྱེ་བ་ཕྲག་བརྒྱའི་འོད། །ལྡན་པའི་པདྨ་ཁ་བྱེ་བའི། །ནང་དུ་བཅུག་ནས་ཕན་ཚུན་དཀྲི། །དེ་བཞིན་གཤེགས་པའི་རིགས་འབྱུང་གནས། །གཤིན་རྗེ་མཐར་བྱེད་སྟོད་སྔོན་བཞིན། །འོད་ལྡན་སྨད་ནི་རྩེ་
གཅིག་གཟུགས། །རྡོ་རྗེ་ལས་ནི་དབྱུང་བར་བྱ། །དེ་ཡིས་དེ་དག་རྟག་པ་ཡི། །སྤྱི་བོ་ནས་ནི་སྔགས་འདི་ཡིས། །བཏབ་པས་རླུང་གིས་ཐལ་བ་ལྟར། །སྔགས་ཀྱི་ལུས་ནི་མི་སྣང་བྱས། །ཨོཾ་ཙྪིནྡྷ་ཙྪིནྡྷ། ཧ་ན་ཧ་ན། ད་ཧ་ད་ཧ། དཱིཔྟ་བཛྲ་ཙཀྲ་ཧཱུྃ་ཕཊ། དེ་བཞིན་པདྨའི་རིགས་འབྱུང་བའི། །
པདྨ་མཐར་བྱེད་སྤྲོས་ནས་ཀྱང་། །སྔོན་བཞིན་སྣང་བ་མཐའ་ཡས་ཀྱི། །ཁ་རུ་སྔགས་འདིས་གདབ་པར་བྱ། །ཨོཾ་ཧྲཱིཿཕུར་པ་ཧཱུྃ་ཕཊ། རྡོ་རྗེ་རིགས་ལས་བྱུང་བ་ཡི། །ཤེས་རབ་མཐར་བྱེད་དེ་བཞིན་སྤྲོ། །དེ་ཡིས་མི་བསྐྱོད་ཐུགས་ཀ་རུ། །སྔགས་འདི་ཡིས་ནི་གདབ་པའོ། །ཨོཾ་ཨཱཿ
བཛྲ་ར་ཙ་ཧཱུྃ་ཕཊ། ཡི་གེ་གསུམ་གྱི་བར་བཅུག་པའི། །སྔགས་འདི་བསྐུལ་ནས་དེ་ཡིས་བཏབ། །རྟོག་པ་ལས་བྱུང་ཇི་སྙེད་པ། །བསལ་བས་ཤེས་བྱའི་སྒྲིབ་སོགས་བཅོམ། །ཏཏ་ཀུ་ལ་ན་ཤྭ་ཀཱི་ལ་ཡ་ཧཱུྃ་ཕཊ། བཏབ་པ་ཙམ་གྱིས་རྡོ་རྗེ་གསུམ། །སྐུ་གསུམ་དྲི་མེད་ལས་བྱུང་
བའི། །དམ་ཚིག་མཆོག་གིས་ལྡང་བར་འགྱུར། །ཡང་ན་འཆི་བའི་གནས་སུ་འགྱུར། །སྐུ་གསུང་ཐུགས་ཀྱི་སྦྱོར་བ་ཡིས། །ཆོ་ག་ལེགས་པར་བྱས་ནས་ནི། །མཁའ་དབྱིངས་རྡོ་རྗེ་མཐའ་ཀླས་པར། །འདེབས་པར་གྱུར་པ་གདོན་མི་ཟ། །བསྒྲུབ་བྱ་དེ་དག་ཞི་བའི་ཕྱིར། །བསྡུ་དང་
སྤྲོ་བའི་སྒོ་ནས་ཀྱང་། །ཕུར་བུ་སྔགས་ཀྱིས་ཕྱུང་ནས་ནི། །ཡེ་ཤེས་ཙམ་དུ་གནས་པར་བྱ། །ཨོཾ་ཨཱཿབཛྲ་དྷ་རོ་ཨཱཛྙཱ་ཨུད་ཀཱི་ལ་ཡ་ཧཱུྃ། ཨོཾ་བཛྲ་དྷ་རོ་ཨཱཛྙཱ་ཨུད་ཀཱི་ལ་ཡ་ཧཱུྃ། ཨོཾ་ཨཱཿསརྦ་ཀཱི་ལ་ཡ་ཀ་ན་བུདྡྷ་ས་ཏེ་ན་བཛྲ་དི་ཏ་ཨ་བཛྲ་ཡ་ཧཱུྃ། ཨོཾ་ཨཱཿསརྦ་ཀཱི་ལ་ཡ་ཀ་ན་དྷརྨྨཱ་ས་ཏེ་བཛྲ་དི་ཏ་ཨ་བཛྲ་

44-1-67a

ཡ་ཧཱུྃ། ཨོཾ་ཨཱཿསརྦ་ཀཱི་ལ་ཡ་ཀ་ན་སཾ་གྷ་ས་ཏེ་ན་བཛྲ་དི་ཏ་ཨ་བཛྲ་ཡ་ཧཱུྃ། ཡེ་ཤེས་མར་མེ་ལྟ་བུའི་ཚུལ། །རང་གི་མི་ཤེས་དབྱེར་མེད་བྱས། །དབུགས་འབྱིན་མཆོག་དང་ལྷན་ཅིག་ཏུ། །ཆོ་ག་འདི་ནི་མ་ལུས་བརྩམ། །དཔུང་བརྐྱང་མགུལ་པ་ནས་འཁྱུད་
པས། །མི་གཡོ་སྐྲ་བཟུང་བརླ་གཉིས་བར། །བལྟས་ཏེ་སིང་སྒྲའི་གླུ་བླངས་ནས། །བུང་བ་ལྟ་བུར་རྩེ་བར་བྱ། །འགྱིང་བག་སྟབས་ཀྱིས་འཁྱུད་ནས་ནི། །གཡོན་གྱི་སྤྱི་བོ་ནས་བཟུང་ནས། །གཡས་ཀྱི་ཀོ་སྐོ་བསྟེན་ནས་ནི། །མ་མཆུ་སྦྲང་རྩི་གཞིབ་པར་བྱ། །གཞིབ་ཅིང་
སིད་ཅེས་རབ་བརྗོད་པས། །འགྲམ་གཉིས་སུ་ནི་འོ་བྱ་ཞིང་། །དཔུང་པའི་བར་དུ་རབ་བྱས་ལ། །ཁ་ཡིས་དེ་ལ་རྩེ་བར་བྱ། །རྣ་བ་དེ་བཞིན་མཆན་ཁུང་དང་། །མགྲིན་པའི་ལོ་དང་སུམ་མདོ་རྣམས། །སེན་མོས་རེ་མོས་གདབ་བྱ་ཞིང་། །ཡང་དང་ཡང་དུ་བྱུག་པར་བྱ། །གཡོན་གྱིས་
པདྨ་མཉེ་བ་དང་། །ལག་གཉིས་སྦྱོར་བའི་དཀྱིལ་འཁོར་ལ། །རྡོ་རྗེ་གཡོན་གྱི་སོར་མོ་གསུམ། །ཆོས་འབྱུང་ནང་དུ་བྲུད་ཅིང་རྩེ། །བསྙེན་དང་ཉེར་བསྒྲུབ་སྒྲུབ་པ་ཡིས། །འདི་ལྟར་བསྐྱོད་པ་ཙམ་གྱིས་ནི། །སྙིང་འདར་དྲན་པ་ཉམས་པར་འགྱུར། །སྤྱི་བོ་སྐྲ་བཀྲོལ་གོས་འདོར་
བྱེད། །དངུལ་ཆུ་ཐིགས་པས་ཀུན་དུ་ཁྱབ། །བརྟན་པའི་ངང་ཚུལ་ཤོར་ནས་ནི། །བ་སྤུ་རྣམས་ཀྱང་གཡོ་བར་བྱེད། །དམར་བའི་མིག་ནི་ཕྲ་བས་བལྟ། །བདག་ཉིད་བསྒྲུབ་པ་ལ་གནས་ན། །ཟླ་བ་ལྟ་བུའི་རིགས་ཅན་འཆར། །རྩེ་གཅིག་ཡིད་ཀྱིས་མ་སྤྲོས་པར། །ཡང་དང་ཡང་
དུ་བརྟག་པར་བྱ། །མཁའ་འགྲོ་མ་གཏོགས་ཕྱག་རྒྱ་ཡིས། །ལྷན་ཅིག་དུས་ནི་བདུན་དུ་བརྟག །བྱིན་བརླབས་དེའམ་དེ་སྔོན་དུ། །མངོན་དུ་བྱེད་པར་ཐེ་ཚོམ་མེད། །རྡོ་རྗེ་ཉི་མ་ནུབ་ནས་ནི། །བསྒྲུབ་པ་ཀུན་དུ་བརྩམ་པར་བྱ། །ཉི་མ་བདུན་གྱིས་འགྲུབ་འགྱུར་བ། །སྐྱ་རེངས་འཆར་བའི་དུས་
ནའོ། །དེ་རུ་སངས་རྒྱས་ཀུན་གྱི་བདག །རྡོ་རྗེ་འཆང་ཆེན་ཀུན་གྱི་གནས། །ཆོས་རྣམས་ཀུན་གྱི་ཆོས་ཉིད་དེ། །སངས་རྒྱས་ཀུན་གྱི་ཐབས་བྱས་ཐོབ། །དེ་ནི་སྐུ་གསུམ་མཆོག་སྦྱིན་པ། །སངས་རྒྱས་མཚན་གྱིས་མཚན་པར་འགྱུར། །དཔག་ཚད་བྱེ་བའི་ཚད་ཙམ་དུ། །དེ་ཡི་འོད་ཀྱང་

44-1-67b

སྣང་བར་བྱེད། །དེ་ཉིད་ཡང་དག་ཡེ་ཤེས་ཐོབ། །གཟུགས་བརྙན་བདག་ཉིད་སྤྱི་གཟུགས་ཀྱིས། །འཁོར་ལོ་གསུམ་པོ་མཐའ་ཡས་ཁམས། །འགྲོ་བའི་ཕན་དོན་མཛད་པའོ། །འཁོར་བ་ཇི་སྲིད་གནས་ཀྱི་བར། །སྦྱོར་བ་བདུན་ལྡན་རྡོ་རྗེ་སེམས། །རོ་མྱང་མཚན་ཉིད་བརྒྱན་
བརྙེས་ནས། །བླ་ན་མེད་པར་གྱུར་པའོ། །རྣལ་འབྱོར་པ་རྣམ་པ་གཉིས་ཀྱི་དངོས་གྲུབ་བསྒྲུབ་པའི་ཆོ་ག་རྒྱས་པར་བཤད་ཟིན་ཏོ།།      །།གང་ཕྱིར་རྒྱུ་དང་བཅས་པ་ཡིས། །དངོས་པོ་དེ་དག་ངོ་བོ་ནི། །བྱང་ཆུབ་སེམས་ཡིན་དེ་ཡི་ཕྱིར། །དེ་ཡི་རང་བཞིན་བརྗོད་པར་རིགས། །
ཐོག་དང་ཐ་མ་མེད་ཞི་བ། །དངོས་པོ་དངོས་མེད་ཟད་པའི་གཙོ། །སྟོང་ཉིད་སྙིང་རྗེ་མི་ཕྱེད་པ། །བྱང་ཆུབ་སེམས་སུ་གསུངས་པའོ། །བྱང་ཆུབ་སེམས་དེའི་ནང་དུ་ནི། །བདག་པོ་འགའ་ཡང་མི་དམིགས་སོ། །དེ་ཡི་གཉེན་པོ་རྣམ་གསུམ་ལ། །ཐ་དད་དབྱེ་བར་རྣམ་པར་རྟོག །དེ་
ཡང་རང་བཞིན་ལ་མི་དམིགས། །འོད་གསལ་སེམས་ནི་དག་པ་ལ། །གཅིག་དང་དུ་མ་བྲལ་བའི་ཕྱིར། །དོན་གཞན་འགྱུར་བ་ཡང་མི་དམིགས། །སྒྱུ་མ་ཙམ་གྱི་སེམས་དེ་ནི། །དག་དང་མ་དག་གཉིས་མི་རུང་། །དེ་བས་རང་བཞིན་རྣམ་དག་པའི། །བྱང་ཆུབ་སེམས་སུ་
ངེས་པའོ། །དེ་ཡི་དེ་བཞིན་ཉིད་ངོ་བོ། །གང་དང་འབྲེལ་པ་མ་ཡིན་ནོ། །མ་འབྲེལ་པ་ཡང་མ་ཡིན་ནོ། །ཀུན་རྟོག་ཡང་ནི་སྙམ་མི་སེམས། །ནམ་མཁའ་རྟག་མེད་བལྟར་མི་སྣང་། །ཆོས་རྣམས་ཀུན་ཀྱང་དེ་བཞིན་ནོ། །ཆོས་རྣམས་སྐུ་གསུམ་མཉམ་པ་སྟེ། །གང་ཡིན་སེམས་
ཀྱི་ངོ་བོའོ། །སེམས་དེ་དེ་བཞིན་ཉིད་གནས་ལ། །དེ་ནི་ཁམས་གསུམ་གནས་མ་ཡིན། །མི་གནས་དེ་ནི་ཀུན་བརྟགས་ཀྱི། སྐྱེ་མེད་ངོ་བོ་མེད་པའོ། །ཡིན་ཡང་བདེ་གཤེགས་ཐམས་ཅད་ཀྱི། ཡེ་ཤེས་འབྱུང་བའི་རྒྱུ་ཉིད་དེ། །རྒྱུ་གསུམ་མི་གནས་ཆོས་དེ་ནི། །སྐྱེ་མེད་ཡེ་
ཤེས་འབྱུང་བའི་གནས། སད་དང་རྨི་ལམ་དབྱེར་མེད་པས། །འདས་པ་རྨི་ལམ་ལྟ་བུ་སྟེ། །ད་ལྟར་བྱུང་བ་རྨི་ལམ་འདྲ། །མ་འོངས་རྨི་ལམ་ལས་བྱུང་བའོ། །བདེ་གཤེགས་བྱང་ཆུབ་སེམས་དཔའ་དང་། །སེམས་ཅན་རྣམས་ནི་ཇི་སྙེད་པ། །རྨི་ལམ་ལྟ་བུར་བདག་མེད་

44-1-68a

དེ། །སྒྱུ་མ་ལྟ་བུར་དེ་བཞིན་ནོ། །དཔེར་ན་ཡིད་བཞིན་རིན་པོ་ཆེ། །རྟོག་པ་ཐམས་ཅད་རབ་བྲལ་ཡང་། །སྐལ་བ་ལྡན་པའི་སེམས་དབང་གིས། །འདོད་པ་ཐམས་ཅད་འབྱུང་བར་འགྱུར། །དེ་བཞིན་བྱང་ཆུབ་སེམས་དེ་ལས། །ཆོས་རྣམས་ཐམས་ཅད་
འབྱུང་བས་ན། །ནམ་མཁའ་རྗེས་འབྲང་ཆོས་རྣམས་ལ། །སངས་རྒྱས་ཆོས་རྣམས་རྗེས་སུ་འབྲང་། །དེ་བས་དངོས་གྲུབ་ཐམས་ཅད་དང་། །སངས་རྒྱས་ཆོས་རྣམས་ཐམས་ཅད་ཀྱི། །ལུས་དང་ངག་དང་སེམས་ལ་གནས། །དེ་ནི་ཁམས་གསུམ་མི་གནས་སོ། །ནམ་མཁའ་
བཞིན་དུ་དག་པའི་ཕྱིར། །དེ་བཞིན་གཅིག་ལ་གཅིག་མི་གནས། །དེ་དག་དེ་བཞིན་ཉིད་གནས་པས། །དེ་ནི་སྨྲ་བརྗོད་ཡུལ་ལས་འདས། །དེ་འདྲའི་དེ་བཞིན་ཉིད་ལ་ནི། །རང་གི་ཡེ་ཤེས་རབ་སྦྱོར་ཞིང་། །གཞན་ཡང་བདག་པོ་འདི་སྙམ་དུ། །སྐུ་མི་འགྱུར་བ་འདི་སྙམ་དུ། །
གསུང་དང་ཐུགས་ཀྱི་བདག་ཉིད་མེད། །ནམ་མཁའ་རྡོ་རྗེ་རྟོག་ལས་བྱུང་། །ལོག་པ་དག་ཏུ་འཛིན་སྙམ་ནས། །བདག་གཅིག་སྟོན་པ་མི་གསུང་བཞུགས། །དེ་ནས་འཇམ་པའི་དབྱངས་ལ་སོགས། །དེ་ཡི་གཉིས་པ་དགག་པའི་ཕྱིར། །བདེ་བར་གཤེགས་ལ་ཡང་ཞུས་པ། །གསུང་
ལ་ལོག་འབྱུང་མི་བརྟག་གསོལ། །ཅི་ཕྱིར་སྔོན་གྱི་རྒྱལ་བ་ལྟར། །རྡོ་རྗེ་འཆང་བས་མཛད་པར་རིགས། །ཡོད་དེ་ཚངས་པ་ལ་སོགས་པ། །ཡང་དག་མངོན་ཤེས་མ་ཐོབ་པས། །ཀུན་རྫོབ་རྒྱུན་ལ་འཁྲུལ་པས་ན། །བདག་པོ་འདི་ཡིས་ཤེས་ནས་སམ། །ཡང་ན་མི་སེམས་འཆད་དོ་
སེམས། །དེ་བས་ལོག་འབྱུང་བཀག་པའོ། །སྐྱེ་མེད་རྡོ་རྗེ་མངོན་བྱང་ཆུབ། །ངོ་བོ་མེད་པ་མི་འགྱུར་བ། །བདེ་གཤེགས་རྣམས་ཀྱིས་ཀྱང་མི་ཤེས། །དེས་ནི་སེམས་ཅན་ཀུན་ལ་ཁྱབ། །དེས་ན་དེ་དག་ཐམས་ཅད་ཀུན། །བྱང་ཆུབ་རྡོ་རྗེའི་གནས་ཐོབ་པས། །སངས་རྒྱས་རྡོ་རྗེ་རྫུ་
འཕྲུལ་ཆེ། །དེ་བླངས་དེ་ནི་ཐོབ་པའོ། །དེ་བས་ཆོས་འདི་ཐམས་ཅད་ཀུན། །ངོ་བོ་ཉིད་བདག་གནས་མེད་ལ། །ཆོས་དབྱིངས་ཤེས་རབ་གནས་སུ་རྟོག །རྡོ་རྗེ་ལས་བྱུང་ལྟར་སྨྲས་པ། །སྨྲ་སྟེ་སྨྲ་བ་ཡང་མ་ཡིན། །སྔོན་བཞིན་ཐམས་ཅད་མཁའ་ལ་གནས། །ནམ་མཁའ་གང་དུ་

44-1-68b

མི་གནས་པས། །དེ་ནི་རང་བཞིན་འོད་གསལ་དབྱིངས། །དེ་རུ་ཡང་དག་ཀུན་རྫོབ་རྒྱན། །དབྱེར་མེད་པ་ཡིས་རྣམ་པར་བསྒོམ། །དེ་ནི་སངས་རྒྱས་ཐམས་ཅད་ཀྱི། །བྱང་ཆུབ་སེམས་ནི་བསྒོམ་པའོ། །དེ་ལྟར་བྱང་ཆུབ་སེམས་བསྒོམ་པས། །རྣམ་དག་གསང་བའི་ཡི་གེ་
གསུམ། །ཆོས་དང་ལོངས་སྤྱོད་སྤྲུལ་པའི་སྐུ། །དད་པའི་འབྲས་བུ་རྫོགས་པར་འགྱུར། །གང་ཕྱིར་བུད་མེད་སྐྱེས་པ་དང་། །མ་ནིང་གསལ་བྱེད་ཐམས་ཅད་ནི། །ཡི་གེ་གསུམ་སྡུད་དེ་ཡི་ཕྱིར། །དེ་ནི་ཀུན་གྱི་གཙོ་བོའོ། །དངོས་པོ་གཟུགས་ཅན་ཐམས་ཅད་དང་། །སྒྲ་
གྲག་པ་ནི་ཇི་སྙེད་དང་། །བསམ་རྟོག་མ་ལུས་ཐམས་ཅད་ཀུན། །རྡོ་རྗེ་གསུམ་གྱི་སྡུད་པའོ། །དེ་འདྲའི་དེ་ཉིད་གསུམ་པོས་ནི། །ཀུན་ཁྱབ་གཞན་གྱི་སྤྱོད་ཡུལ་མིན། །ཉག་གཅིག་རྟོགས་པའི་སྤྱོད་ཡུལ་པས། །དེ་ནི་གསང་བའི་ཡི་གེའོ། །དེ་བས་རྫོགས་ལྡན་ལ་
སོགས་པར། །དེ་ནི་སྣོད་ནི་མ་གཟིགས་པས། །རྡོ་རྗེ་འཆང་བ་དེ་ཡི་ཚེ། །དེ་འགྱུར་གསང་བའི་དོན་མ་བཤད། །ཕ་རོལ་ཕྱིན་པ་ལ་སོགས་པས། །བསྐལ་པར་འབད་ཀྱང་མི་བརྙེས་པ། །གསང་བའི་དོན་འདིས་ཚེ་འདི་ལ། །སྐད་ཅིག་ཐང་ཅིག་ཡུད་ཙམ་གྱིས། །སངས་
རྒྱས་ཀུན་གྱི་བྱང་ཆུབ་ཆེ། །སྐུ་གསུམ་དབྱེར་མེད་སངས་རྒྱས་མཆོག །རྡོ་རྗེ་འཆང་བ་ཀུན་གྱི་གནས། །བླ་ན་མེད་པ་དེས་འགྱུར་རོ། །གོང་གསུངས་སེམས་ཅན་དེ་དག་ཀུན། །འདི་ཡི་སྣོད་མ་ཡིན་ཐོས་ནས། །བྱང་ཆུབ་སེམས་དཔའ་སེམས་དཔའ་ཆེ། །སྙིང་རྗེ་གར་གྱིས་
དེ་དག་དུས། །དོན་དེ་ཟབ་མོར་བསྟན་པའི་ཕྱིར། །གསང་བའི་ཡི་གེ་རྣམ་དག་པས། །ཐུན་མོང་གི་ནི་སྡུག་བསྔལ་ཏེ། །དེ་བས་བདེ་གཤེགས་རྣམས་ཀྱིས་བཀག །དུས་འདིར་བདག་ཅག་སྣོད་དུ་གྱུར། །དེ་ཡི་ཆོས་ཉིད་ཉེར་བླངས་པས། །སྐུ་གསུམ་རྡོ་རྗེའི་ཆོས་ཉིད་
དེ། །འགའ་འགས་རྟོགས་པར་འགྱུར་བའོ། །དེ་ལྟར་བསྟན་པའི་དངོས་པོ་རྣམས། །རྣམ་པ་བཞི་རུ་ཡང་དག་དབྱེ། །སྐྱེས་བུ་ལམ་དང་དེ་སྔོན་འགྲོ། །ལམ་གྱིས་བསྒྲུབ་པའི་འབྲས་བུའོ། །སྐྱེས་བུ་གསུམ་དེ་དང་པོ་དང་། །ཅུང་ཟད་ཙམ་དང་ཡེ་ཤེས་ཐོབ། །བསྙེན་པ་ཐུན་

44-1-69a

མོང་ཅིག་ཤོས་ཀྱི། །བསྒྲུབ་ལ་འཇུག་པའི་སྐྱེས་བུའོ། །རྡོ་རྗེ་ཅན་གྱིས་བསྟན་པ་ཡི། །ལམ་གྱི་རིམ་པ་རྣམ་གཉིས་ཏེ། །བསྐྱེད་པ་ཡི་ནི་རིམ་པ་དང་། །རྫོགས་པའི་རིམ་པ་ཁོ་ནའོ། །བསྐྱེད་པའི་རིམ་པ་བསྙེན་པ་དང་། །ཐུན་མོང་ཐུན་མིན་སྒྲུབ་
པ་ལ། །སྣོད་དག་སྐྱེ་བའི་རིམ་པ་གསུམ། །བསྒོམ་པའི་རིམ་པ་ཇི་སྙེད་པའོ། །རྫོགས་པའི་རིམ་པ་རྣལ་འབྱོར་དང་། །ཕྱག་རྒྱ་ལས་སྐྱེས་ཆོས་ཐམས་ཅད། །སྒྱུ་མ་ལ་སོགས་འདྲར་བསྒྲུབ་པ། །རང་བཞིན་གནས་པའི་རྣལ་འབྱོར་རོ། །དེ་ཡི་སྔོན་འགྲོ་རྣམ་གསུམ་སྟེ། །
དཀྱིལ་འཁོར་དང་ནི་དམ་ཚིག་དང་། །དེ་ཡི་བསྒྲུབ་པའི་ངོ་བོ་ཉིད། །རྡོ་རྗེ་འཆང་བས་རབ་ཏུ་གསུངས། །དཀྱིལ་འཁོར་བཞི་སྟེ་རི་མོ་དང་། །ལུས་དང་བྱང་སེམས་བྷ་ག་སྟེ། །ཡེ་ཤེས་ལྔ་ལ་སོགས་པ་ཡི། །ཐོབ་བྱེད་གནས་སུ་ཡང་དག་བཤད། །དམ་ཚིག་ལ་ནི་རྣམ་གཉིས་
ཏེ། །ཐུན་མོང་སྡོམ་པར་བསྟན་པ་དང་། །ཐུན་མོང་མ་ཡིན་སྡོམ་པའོ། །ཐུན་མོང་མ་ཡིན་རྣམ་གསུམ་སྟེ། །སྤང་བའི་དམ་ཚིག་སྡོམ་པ་དང་། །བཟའ་དང་བསྲུང་བའི་དམ་ཚིག་དང་། །རྣལ་འབྱོར་སྙིང་པོ་སྡོམ་པ་སྟེ། །སྣོད་སོགས་རྐྱེན་དུ་ཡང་དག་བཤད། །དབང་གི་རྣམ་
པ་གསུམ་དག་སྟེ། །བུམ་པའི་དབང་གི་དང་པོ་དང་། །གཉིས་པ་ལ་ནི་གསང་བའི་དབང་། །ཤེས་རབ་ཡེ་ཤེས་གསུམ་པའོ། །དེ་ལྟར་དེ་བཞིན་བཞི་པ་ཡང་། །བླ་མ་དམ་པའི་ཞལ་ལས་ནི། །ཐོབ་པ་ཡིན་ཏེ་རྣམ་པ་གསུམ། །ཀུན་ལ་རབ་ཏུ་ཁྱབ་པའོ། །འབྲས་བུ་
ལ་ནི་རྣམ་གཉིས་ཏེ། །ཐུན་མོང་གི་ནི་གྲུབ་པ་དང་། །ཕྱག་རྒྱ་ཆེན་པོའི་གྲུབ་པའོ། །ཐུན་མོང་གྲུབ་པ་རྣམ་པ་བརྒྱད། །རིག་འཛིན་མངོན་པར་ཤེས་པ་ལྔ། །མངག་གཞུག་སྔགས་ཀྱི་ཁྱད་པར་དང་། །ཨ་ཛ་ལས་ཀྱི་དབྱེ་བའོ། །ཅིག་ཤོས་རྡོ་རྗེ་གསུམ་ཡིན་ཏེ། །དེ་དང་
དེ་རུ་རབ་བསྟན་པའི། །སངས་རྒྱས་ཉིད་གྲུབ་དངོས་གྲུབ་ནི། །ཡང་དག་ཡེ་ཤེས་དབང་ཐོབ་པའོ། །རྣལ་འབྱོར་ཆེན་པོའི་རྒྱུད་རྣམས་ཀུན། །ཚུལ་འདི་ལས་ནི་མ་འདས་པས། །ཤེས་རབ་ལྡན་པ་རྣམས་ཀྱིས་ཀྱང་། །འདི་རྣམས་ཁོ་ན་བསྒྲེ་བར་བྱ། །གསང་དང་རབ་གསང་

44-1-69b

ཤིན་ཏུ་གསང་། །གསང་བ་འདུས་པ་ཞེས་བྱའི་རྒྱུད། །ཕྲ་ཞིང་ཤེས་དཀའ་བདེ་གཤེགས་རྣམས་ཀྱི་ཡུལ་འདི་རྟོག་བྲལ་དཔྱད་ལས་འདས། །འོན་ཀྱང་སངས་རྒྱས་ཡེ་ཤེས་ཞབས་ཀྱི་བླ་མེད་ཐུགས་རྗེ་ཉི་ཟེར་གྱིས། །བསྐལ་པར་འདུས་བྱས་པ་ཡི་མུན་པ་ཀུན་བསལ་བདེ་གཤེགས་
སྤྱོད་ཡུལ་བསྟན། །བདག་གིས་ཅུང་ཟད་རྟོགས་ནས་དང་པོ་གྲོགས་མཆོག་བཟང་པོ་གསང་བ་དང་། །ཀོ་ས་ལ་ཡི་གྲོགས་མཆོག་དྲི་མེད་པ་ཡི་བཟང་པོ་ཞེས་བྱ་དང་། །ཤེས་རབ་ལྷ་ཞེས་བྱ་བའི་གྲོགས་མཆོག་པཉྩ་ལ་ཡི་དུར་ཁྲོད་གནས། །ལེགས་པའི་ཚུལ་མང་ཤྲི་ན་ལེནྡྲ་ཡི་
གཙུག་ལག་ཁང་གནས་ཏེ། །དགེ་བའི་སྤུན་གྱིས་གསོལ་བཏབ་རྒྱུད་ཀྱི་རྒྱལ་པོ་དེ་ལ་བློ་དམན་པས། །ཚོགས་ནི་ཆུང་ངུས་རྟོགས་པར་བྱ་ཕྱིར་ང་རྒྱལ་མ་ཡིན་དད་པ་ཡིས། །བསྡུས་པའི་དོན་དང་སྒྲུབ་པའི་ཐབས་འདི་འབད་པས་སེམས་ཁྲལ་ཆེར་བྱས་ལ། །སངས་རྒྱས་ལ་
སོགས་དཔའ་བོ་མཁས་པ་རྣམས་ཀྱིས་བདག་ལ་བཟོད་པར་མཛོད། །དེ་ལྟར་བྱས་པ་ལས་བྱུང་དགེ་བ་དྲི་མེད་དེ་ཡིས་འགྲོ་བ་རྣམས། །འདི་གཞུང་རིམ་པས་ཚོགས་ནི་རབ་རྫོགས་རིག་འཛིན་ལ་སོགས་གསུམ་གྱིས་ནི། །ཐ་མལ་པ་ཡི་སྐད་ཅིག་སོགས་བསྒྲེས་དེ་འགག་དེ་ཡིས་
བཟློག་བྱ་སྟེ། །རང་གི་ཕྱག་རྒྱས་རྡོ་རྗེ་འཆང་བ་ཐོབ་ནས་བདུད་ལས་རྒྱལ་གྱུར་ཅིག །དཔལ་གསང་བ་འདུས་པ་སྒྲུབ་པའི་ཐབས་དངོས་གྲུབ་འབྱུང་བའི་གཏེར་ཞེས་བྱ་བ། སློབ་དཔོན་ཆེན་པོ་བི་ཏ་པཱ་དས་མཛད་པ་རྫོགས་སོ།།      །།རྒྱ་གར་གྱི་མཁན་པོ་ཀ་མ་ལ་གུ་ཧྱ་དང་། 
བོད་ཀྱི་ལོ་ཙཱ་བ་ལྷ་བཙན་པོ་མངའ་བདག་ལྷ་ཡེ་ཤེས་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།༄༅༅། །རྒྱ་གར་སྐད་དུ། ཡོ་ག་སཔྟ་ནཱ་མ་ཙ་ཏུ་ར་བྷི་ཥེ་ཀ་ར་ཎ། བོད་སྐད་དུ། སྦྱོར་བ་བདུན་པ་ཞེས་བྱ་བ་དབང་བཞིའི་རབ་ཏུ་བྱེད་པ། 
ཐམས་ཅད་མཁྱེན་པ་ལ་ཕྱག་འཚལ་ལོ། །གང་ཞིག་དཔེ་མེད་ཚུལ་ལྡན་པ། །གཉིས་མེད་བདེ་ཆེན་རང་བཞིན་མེད། །ཐུགས་རྗེས་རྒྱས་ཤིང་བར་ཆད་མེད། །འགོག་མེད་སངས་རྒྱས་དེ་ལ་འདུད། །རྒྱུ་དང་མི་རྒྱུ་ཀུན་ཁྱབ་པ། །གང་གི་སྙིང་གི་པད་དབུས་སུ། །མི་ཤིགས་

44-1-70a

ཐིག་ལེ་དབུས་གནས་པ། །གཞོམ་མེད་ཆོས་ལ་ཕྱག་འཚལ་ལོ། །དེ་འདྲ་རབ་ཏུ་སྟོན་བྱེད་པ། །སེམས་ནི་དེ་ཉིད་ལ་བཞག་པ། །གཡང་སའི་ལམ་སྒྲོལ་དགེ་འདུན་ཆེ། །བླ་མ་དམ་པའི་ཞབས་ལ་འདུད། །ལམ་གྱི་རིམ་པ་སྔོན་འགྲོ་བ། །དཀྱིལ་འཁོར་
དམ་ཚིག་དབང་སོགས་ཏེ། །བུམ་པ་ལ་སོགས་རིམ་པ་ཡིས། །དབང་གི་དབྱེ་བ་ཅུང་ཟད་བརྗོད། །དཀྱིལ་འཁོར་ལ་སོགས་རིམ་པ་ཡིས། །ཐར་ཆེན་ཡང་དག་སླུ་བ་སྟེ། །དེ་ཉིད་མེད་པས་མིའགྲུབ་པས། །བཞི་པའི་དོན་ནི་ཡང་དག་བཤད། །ཐམས་ཅད་མཁྱེན་པས་ཇི་སྐད་
དུ། །རྣལ་འབྱོར་ཆེན་པོའི་རྒྱུད་བསྟན་ལ། །དབང་ནི་རྣམ་པ་གསུམ་དག་ཏུ། །རྒྱུད་འདི་ལས་ནི་རབ་ཏུ་བཤད། །བུམ་པའི་དབང་ནི་དང་པོ་སྟེ། །གཉིས་པ་ལ་ནི་གསང་བའི་དབང་། །གསུམ་པ་ཤེས་རབ་ཡེ་ཤེས་དབང་། །དེ་ལྟར་དེ་བཞིན་བཞི་པ་ཡང་། །བླ་མའི་བཀའ་ལས་
ཤེས་པར་བྱ། །དབང་ནི་དང་པོ་དབྱེ་བ་ཡང་། །ཅུང་ཟད་ཀྱང་ནི་བཤད་བྱ་སྟེ། །རྒྱུ་ཡི་སློབ་དཔོན་ཆེན་པོ་ཡིས། །དེ་ནི་ཡང་དག་བསྐུར་བར་འདོད། །ཡུལ་མཁར་ཁྱིམ་དང་གླང་པོ་སོགས། །རྗེས་མཐུན་དེ་ལ་དབུལ་བར་བྱ། །དེ་ཡི་ཐུན་མོང་གཞན་པ་ཡི། །སྡོམ་པ་སྣོད་དུ་
རུང་ཕྱིར་སྦྱིན། །རི་མོ་དང་ནི་ལུས་ཀྱི་ནི། །དཀྱིལ་འཁོར་དུ་ནི་དེ་ཉིད་ཐོབ། །རིག་དང་འདི་རྒྱུ་སློབ་དཔོན་དབང་། །ཆོ་གའི་རིམ་པ་བཞིན་དུ་བཤད། །དེ་ཡི་རང་གི་ངོ་བོ་ནི། །སྐུ་ཡི་རྡོ་རྗེའི་རང་བཞིན་ནོ། །སྲོག་གཅོད་ལ་སོགས་སྔ་ཕྱི་ཡི། །དག་དང་ཉེས་པར་མི་འགྱུར་རོ། །ཐབས་
ཀྱིས་ཁྱད་པར་འཕགས་པའི་ཕྱིར། །ས་བརྒྱད་པ་རུ་ཡང་དག་བཤད། །སྦྱོར་གསུམ་ཡན་ལག་བཅས་པ་རུ། །དེ་ལ་ཡང་དག་བསྟན་པར་བྱ། །གཟུགས་ལ་སོགས་པའི་ཡུལ་རྣམས་ཀྱི། །སྣང་སྲིད་དབེན་པར་རྟོགས་པའོ། །སྣོད་དུ་རུང་ཕྱིར་བུམ་པ་སྟེ། །བླུགས་གཏོར་
དག་པར་བྱེད་པས་དབང་། །འདི་ནི་ཡང་དག་རྒྱུ་རིམ་པའི། །ལུང་གིས་ངེས་པར་བཤད་པའོ། །དང་པོའི་དབྱེ་བ་བསྟན་ནས་ནི། །གཉིས་པ་ཡང་ནི་བཤད་བྱ་སྟེ། །རྒྱུ་དང་རྐྱེན་གྱི་སློབ་དཔོན་གྱིས། །དབང་བསྐུར་དེ་ནི་ཡང་དག་ཐོབ། །གསེར་དང་དངུལ་ལ་སོགས་པ་

44-1-70b

ཡི། །རྗེས་མཐུན་དེ་ལ་དབུལ་བར་བྱ། །སྲོག་གཅོད་ལ་སོགས་ཐུན་མོང་བའི། །ལྡོམ་པ་སྣོད་དུ་རུང་ཕྱིར་སྦྱིན། །ལྷག་པ་བྱང་སེམས་ཞེས་བྱ་བའི། །དཀྱིལ་འཁོར་དུ་ནི་དེ་ཉིད་ཐོབ། །བློ་ཡི་བྱེ་བྲག་གིས་བསྐུར་བའི། །ཆོ་གའི་རིམ་པ་བཞིན་དུ་བཤད། །དེ་ཡི་རང་
གི་ངོ་བོ་ནི། །གསུང་གི་རྡོ་རྗེའི་རང་བཞིན་ནོ། །བརྫུན་ལ་སོགས་པ་སྔ་ཕྱི་ཡི། །ངག་དང་ཉེན་པར་མི་འགྱུར་རོ། །ཐབས་ཀྱིས་རབ་ཏུ་ཕྱེ་བའི་ཕྱིར། །དགུ་དང་བཅུ་ལ་ཡང་དག་གནས། །རྡོ་རྗེ་བཟླས་པའི་ངོ་བོ་ཡིས། །སྒྱུ་འདྲའི་ཏིང་འཛིན་བསྟན་པར་བྱ། །མིག་སོགས་ནང་
གི་ཆོས་རྣམས་ཀྱི། །སྣང་སྲིད་དབེན་པར་རྟོགས་པའོ། །བསྒྲགས་མིན་ཕྱིར་ན་གསང་བ་སྟེ། །བླུགས་གཏོར་དག་པར་བྱེད་པས་དབང་། །འདི་ཡང་བརྒྱུད་པའི་རིམ་པ་ཡི། །ལུང་གིས་ཡང་དག་བཤད་པའོ། །གཉིས་པའི་དབྱེ་བ་བསྟན་ནས་སུ། །གསུམ་པ་ཡང་ནི་བསྟན་
པར་བྱ། །རྒྱུ་དང་རྐྱེན་དང་ལྷན་ཅིག་བྱེད། །སློབ་དཔོན་གསུམ་གྱིས་ཐོབ་པའོ། །པདྨ་རཱ་ག་པུར་ཤ་སོགས། །རྗེས་མཐུན་དེ་ལ་དབུལ་བར་བྱ། །དཀྱིལ་འཁོར་བྲི་བ་ལ་སོགས་འགོག །སྡོམ་པ་མཆོག་ནི་སྦྱིན་པའོ། །བྷ་ག་རྣམ་དག་ཅེས་བྱ་ཡི། །དཀྱིལ་འཁོར་དུ་ནི་དེ་ཉིད་
ཐོབ། །ཤེས་རབ་དབང་དང་ཡེ་ཤེས་དབང་། །ཆོ་གའི་རིམ་པ་གཞན་དུ་བཤད། །དེ་ཡི་རང་གི་ངོ་བོ་ནི། །ཐུགས་ཀྱི་རྡོ་རྗེའི་རང་བཞིན་ནོ། །བརྣབ་སེམས་ལ་སོགས་སྔ་ཕྱི་ཡི། །ངག་དང་ཉེ་བར་མི་འགྱུར་རོ། །ཐབས་ཀྱི་ཁྱད་པར་ཕྱེ་བའི་ཕྱིར། །རྡོ་རྗེ་ལྟ་བུར་ཡང་དག་གནས། །
མཆོག་གི་དངོས་གྲུབ་སྒྲུབ་པའི་ཕྱིར། །བརྟུལ་ཞུགས་ཆོ་ག་དེ་ལ་བསྟན། །གཟུང་དང་འཛིན་པའི་ངོ་བོ་ཡིས། །ཆོས་ཀུན་དབེན་པར་རྟོགས་པའོ། །ཤེས་རབ་ལས་ཀྱི་ཡེ་ཤེས་ཏེ། །མ་རྟོགས་རྟོགས་ཕྱིར་དབང་ཡིན་ནོ། །འདི་ཡང་བརྒྱུད་པའི་རིམ་པ་ཡི། །ལུང་གིས་ཡང་
དག་བཤད་པའོ། །ད་ནི་ཡང་དག་བཤད་བྱ་བ། །བཞི་པ་མངོན་པར་བྱང་ཆུབ་པ། །བླ་མའི་ཞལ་ནས་ངེས་ཐོབ་པ། །སྦྱོར་བ་བདུན་གྱི་དེ་ཉིད་བཤད། །རང་བཞིན་གནས་ཕྱིར་སློབ་དཔོན་མེད། །རིན་ཐང་མེད་ཕྱིར་ཡོན་མེད་དེ། །སྡོམ་པ་པས་ནི་སྡོམ་པ་མེད། །དེ་ཉིད་དཀྱིལ་

44-1-71a

འཁོར་དཀྱིལ་འཁོར་མེད། །སྟོབས་ཀྱིས་ཐོབ་ཕྱིར་དབང་མེད་དེ། །སྤྱི་པས་རང་གི་ངོ་བོ་མེད། །ཆོས་ཀུན་གཉེན་པོ་གཉེན་པོ་མེད། །རྡོ་རྗེ་འཛིན་གནས་ས་མེད་དེ། །རང་བཞིན་མེད་ཕྱིར་ཆོ་ག་དང་། །ལྟ་བ་ངེས་ཚིག་མེད་པ་རུ། །བླ་མ་ཡིས་ནི་ཡང་
དག་བཤད། །ཤེས་རབ་ལས་སྐྱེས་ཡེ་ཤེས་ནི། །བཞི་པ་ཡིན་པར་ཤེས་པར་བྱ། །མཁའ་གཉིས་རབ་ཏུ་སྦྱོར་བ་ཡིས། །མན་ངག་ཏུ་ནི་དེ་ཉིད་བརྟག །ལེགས་པར་གོམས་པའི་ཕྱག་རྒྱ་ལས། །འབད་པའི་བྱ་བས་རྟོགས་པ་ན། །འདོད་ཆགས་ཆགས་བྲལ་བར་མ་
སྟེ། །སྦྱོར་བ་བདུན་གྱི་མཚན་ཉིད་དོ། །ནམ་མཁའི་ཁམས་ནི་རྡོ་རྗེ་སྦྱོར། །ཡང་དག་སྤྱན་ཅན་བདེ་ཆེན་འབྱུང་། །གང་གང་ཡང་དག་དགའ་བྱེད་ཆགས། །དགའ་གཉིས་རབ་ཏུ་དབེན་ཉིད་མཐོང་། །པདྨའི་དཀྱིལ་དུ་རྡོ་རྗེ་ནོར། །པད་སྙིང་ལ་ནི་འབྱོར་པ་སྟེ། །རྡོ་རྗེའི་སྐྱིལ་མོ་ཀྲུང་
ནང་སེམས། །ནོར་བུ་རབ་ཏུ་མཐོང་བྱས་པས། །གང་དེ་ཉིད་ནི་ཡེ་ཤེས་ཏེ། །འདི་ཉིད་རྫོགས་པའི་རིམ་པ་རུ། །བླ་མའི་ཞལ་སྔ་ནས་ཀྱིས་བཤད། །དེ་ལ་སྦྱོར་བ་བདུན་གྱིས་ནི། །རིམ་པ་བཞིན་པ་ཤེས་པར་བྱ། །ཅི་ལྟ་ཞེ་ན། ལེགས་པར་བསྒོམས་དང་ལྷན་ཅིག་ཏུ། །ཇི་
སྐད་བཤད་པའི་ཆོ་ག་ཡིས། །ནང་ནས་འཁོར་ལོ་གསལ་བྱ་སྟེ། །སོར་མོ་ཅུང་ཟད་གོ་བྱས་ཏེ། །སྙིང་འདིར་དྲན་པ་ཉམས་པ་དང་། །སྤྱི་བོར་སྐྲ་གྲོལ་གོས་ཀྱང་འདོར། །རྔུལ་ཆུ་ཐིགས་པས་ལུས་ཀུན་ཁྱབ། །བརྟན་པའི་ངང་ཚུལ་ཤོར་ནས་ནི། །རང་གི་བ་སྤུ་ཀུན་ཀྱང་གཡོ། །
མིག་དམར་ཕྲ་བས་རབ་བལྟས་པའི། །དགའ་བའི་ཡེ་ཤེས་ཡང་དག་འབྱུང་། །རྟག་པའི་མདོག་གིས་ཡང་དག་བརྒྱན། །དེ་ནི་དཔེ་མེད་བདེ་རྫོགས་སོ། །ནམ་མཁའ་ལྟ་བུའི་སྐུ་ལ་ནི། །མཚན་དང་དཔེ་བྱད་ཀྱིས་བརྒྱན་པ། །འཇའ་ཚོན་ལྟ་བུར་རབ་གསལ་བ། །གསལ་
བ་ཉིད་ནི་མ་སྐྱེས་པའི། །སྐུ་ཆེན་དང་དུ་བླངས་གྱུར་ན། །ཆོས་ཀྱི་སྐུ་དང་སྤྲུལ་སྐུ་ཡང་། །སྟོབས་ཀྱིས་འབྱུང་བར་འགྱུར་བའོ། །རྡོ་རྗེ་འཛིན་པ་ཆེན་པོ་ཡི། །སྐུ་ཆེ་བལྟ་བས་མི་ངོམས་པའི། །ཞལ་གསུམ་ཕྱག་དྲུག་ལྟར་སྣང་བ། །མཆོག་ཀུན་ལྡན་པས་རིག་མས་འཁྱུད། །

44-1-71b

ཤེས་རབ་ཡེ་ཤེས་དབང་དུས་སུ། །མཚན་ཉིད་དེ་ཡི་ཚུལ་དུ་གནས། །ཡེ་ཤེས་དབང་དུ་གྱུར་པ་ཡིས། །བརྟུལ་ཞུགས་ལ་སོགས་རིམ་པ་ཡིས། །གནས་ནས་དེ་ཡི་དོན་སྒྲུབ་ཚེ། །དེ་ཡི་དུས་སུ་དེ་འཐོབ་པའོ། །དཔེ་མེད་བདེ་རྫོགས་ཀྱི་ལེའུ་སྟེ་དང་པོའོ།།      །།
ད་ནི་རབ་ཏུ་བཤད་བྱ་བ། །དཔེ་མེད་བདེ་རྫོགས་སྐུ་དེ་ཡང་། །ཕ་རོལ་ཕྱིན་པའི་རྫོགས་སྐུ་ལས། །ཁྱད་པར་མཐོང་བར་བྱ་བའི་ཕྱིར། །རང་འོད་རིག་མ་དང་ལྡན་པས། །སྦྱོར་བ་གཉིས་པ་བཤད་པར་བྱ། །གཉིས་མེད་དང་བྲལ་སྐུ་དེ་ནི། །ལོངས་སྤྱོད་རྫོགས་པ་ཙམ་ཡིན་ལ། །
དེ་དང་མཉམ་པ་དག་པའི་ཕྱིར། །རང་གི་རིག་མས་འཁྱུད་པའོ། །དེ་ལ་གཉིས་ཀྱི་སྤྲོས་མེད་པས། །དངོས་པོ་ཀུན་ལ་མ་ཟིན་པའི། །རྒྱུ་ནི་དེ་ལ་ཡོད་པའོ། །དེ་འདྲ་མ་ཡིན་འདི་ལ་ནི། །གཉིས་སུ་མེད་པ་དང་ལྡན་པའོ། །འདོད་ཆགས་ཆེན་པོའི་བདེ་བ་ཡིས། །འདོད་པའི་འབྲས་
ཆན་རབ་སྦྱིན་པས། །དེ་བས་རྒྱུད་ཆེན་འདི་ལས་ནི།  །སྦྱོར་བ་འདི་ནི་བཤད་པ་ཡིན། །ཡེ་ཤེས་དང་ནི་ཆོས་ཉིད་དང་། །དོན་དམ་དང་ནི་ཀུན་རྫོབ་དང་། །ཐབས་ཆེན་དང་ནི་ཤེས་རབ་དང་། །བདེ་བ་དང་ནི་བྱང་སེམས་སོགས། །དེ་ལྟར་གཉིས་ཀྱི་རྣམ་པ་ཀུན། །དབྱེར་མེད་
མཚོན་ཕྱིར་གཉིས་མེད་དེ། །སྒྱུ་མའི་སྐྱེས་བུ་བུད་མེད་ལས། །ཤེས་རབ་ཡེ་ཤེས་དབང་དུས་སུ། །དགའ་བའི་ཡེ་ཤེས་དུས་སུ་ནི། །ཁྱད་པར་གཉིས་མེད་རང་འབྱུང་བ། །གཉིས་སུ་མེད་པར་དེ་ལ་བཤད། །རྣལ་འབྱོར་གསུམ་པས་བརྟུལ་ཞུགས་ཀྱི། །སྤྱོད་པའི་ཚེ་ནི་དེ་བཞིན་དུ། །
གཉིས་མེད་འགྱུར་བར་འགྱུར་བ་རུ། །ངེས་པ་ཉིད་དུ་བཤད་པ་ཡིན། །གཉིས་སུ་མེད་པའི་སྦྱོར་བ་སྟེ་གཉིས་པའོ།།      །།ད་ནི་རབ་ཏུ་བཤད་བྱ་བ། །དགའ་བ་བར་མའི་ཡེ་ཤེས་མཆོག །ཆོས་སྐུར་ཡང་དག་ངེས་པ་ཡི། །ལུས་སེམས་གཉིས་མེད་བྱེད་བཤད་པ། །བདེ་བ་དེ་ནི་
མ་ལུས་ཀྱིས། །སེམས་ཅན་ཀུན་ལ་གནས་གྱུར་ཀྱང་། །དེ་ལས་འདི་ནི་ཁྱད་མཐོང་ཕྱིར། །ཆེན་པོ་རུ་ནི་རབ་ཏུ་འདོད། །རྒྱས་པ་དང་ནི་སིམ་པ་དང་། །ཉོན་མོངས་མེད་དང་བར་ཆད་མེད། །ཁྱབ་ཅིང་འགོག་པ་ཡོད་མེད་པར། །ཇི་སྲིད་འཁོར་བ་གནས་ཀྱི་བར། །རྒྱུན་མི་འཆད་པའི་

44-1-72a

ཚུལ་གྱིས་སུ། །དེ་ཉིད་དུ་ནི་རབ་ཏུ་འཇུག །དེ་འདྲའི་བདེ་ཆེན་ཁྱད་པར་ནི། །ཤེས་རབ་ཡེ་ཤེས་ལ་ཡང་མེད། །ལེགས་གོམས་ཕྱག་རྒྱ་རྟོགས་པ་དང་། །མི་རྟག་ཞིང་ནི་ཉོན་མོངས་དང་། །རྡོ་རྗེ་པདྨ་བསྐྱོད་དུས་སུ། །རྡུལ་ནི་ཚ་བ་དྲག་པ་དང་། །ཀུན་ལ་མ་
ཁྱབ་ཕྱིར་དང་ནི། །ལུས་ཀུན་ལ་ནི་མ་རྒྱས་དང་། །ནོར་བུ་ཙམ་ལ་གནས་པས་དང་། །ཡུད་ཙམ་གྱིས་ནི་འགོག་པ་སྟེ། །དེ་ཕྱིར་ཆེན་པོ་ཞེས་མི་བྱ།  །འོན་ཀྱང་ཤེས་རབ་ཡེ་ཤེས་ལ། །བདེ་ཆེན་མཚན་ཉིད་གཟུགས་སུ་གནས། །དེ་བས་ལེགས་གོམས་ཕྱག་རྒྱ་ལས། །ཨུ་
དུམྺཱ་རའི་མེ་ཏོག་ལྟར། །རླུང་དང་རང་གི་བྱ་བ་ཡིས། །སྐྱེས་བུ་གང་ལ་ཐང་ཅིག་ཏུ། །བདེ་བ་དེ་ཉིད་རྡོ་རྗེ་རུ། །འདུག་བྱས་འདར་བའི་དུས་སུ་ནི། །སྐྱེས་བུ་དེ་ཡིས་རབ་ཏུ་བརྟག །མི་གནས་ཀྱང་ནི་མི་སླུའི་ཕྱིར། །བདེ་བ་ཆེན་པོ་ཞེས་སུ་བཤད། །འདི་ནི་དངོས་པོ་ཐམས་ཅད་ཀྱིས། །
མཐའ་ཡི་དེ་བཞིན་ཉིད་ཡིན་པར། །བླ་མ་མཆོག་རྣམས་ཀུན་གྱིས་བཤད། །སྦྱོར་བ་གཞན་ཀུན་སྦྱོར་བ་འདིའི། །ཡན་ལག་ཏུ་ནི་ཤེས་པར་བྱ། །རྣལ་འབྱོར་ཡེ་ཤེས་དབང་གྱུར་པས། །བརྟུལ་ཞུགས་ལ་སོགས་རིག་མ་ཡིས། །གནས་ནས་དེ་ཡི་དོན་སྒྲུབ་ཚེ། །དེ་ཡི་དུས་སུ་
དེ་ཐོབ་པའོ། །བདེ་བ་ཆེན་པོའི་སྦྱོར་བ་སྟེ་གསུམ་པའོ།།      །།ད་ནི་རབ་ཏུ་བཤད་བྱ་བ། །དངོས་པོ་ཀུན་ལ་རྣལ་འབྱོར་གྱིས། །ཕྱིན་ལོག་རབ་ཏུ་བཟློག་པའི་ཕྱིར། །སྦྱོར་བ་བཞི་པ་བཤད་པར་བྱ། །རང་བཞིན་མེད་ཕྱིར་རང་བཞིན་མེད། །གཅིག་དང་དུ་མའི་རང་བཞིན་དང་། །
བྲལ་ཕྱིར་སྟོང་པ་ཉིད་དུ་གསུངས། །དངོས་པོ་ཀུན་ལ་མུ་སྟེགས་དང་། །ཉན་ཐོས་གཉིས་དང་རྣམ་ཤེས་སྨྲ། །དབུ་མ་པ་ཡི་གཞུང་གིས་སུ། །ཐ་དད་སོ་སོར་རྟོག་པ་ཡང་། །འདི་ཉིད་ལ་ནི་ཡོངས་འཁྲུལ་ཏེ། །སོ་སོར་ཀུན་དུ་རྟོག་པའོ། །དེ་དག་ཀུན་ཀྱང་དོན་དམ་པ། །རྟོགས་པ་
མིན་པས་བླ་དང་བཅས། །དེ་བས་དེ་ཡི་རང་བཞིན་ཀུན། །མེད་པས་འདི་ཀུན་སྒྱུ་མ་དང་། །སྨིག་རྒྱུ་སོགས་པའི་དཀྱིལ་འཁོར་གྱི། །འཁོར་ལོ་རུ་ནི་ཡང་དག་བཤད། །དེ་བས་དེ་ལ་བདག་པོ་དང་། །གཟུང་བ་དང་ནི་འཛིན་པའི་ཆོས། །དངོས་པོའི་ངོ་བོར་འཛིན་པ་དང་། །འཁོར་བ་དང་ནི་

44-1-72b

མྱ་ངན་འདས། །གཉིས་སུ་འཛིན་པ་ཡོད་པ་མེད། །འདི་ཀུན་མྱ་ངན་འདས་པ་ཡི། །འཁོར་ལོ་འདི་ནི་ངེས་པ་ཡིན། །དེ་ལ་རང་བཞིན་མེད་པ་དང་། །བསྲེས་པའི་དོན་ནི་མཆོག་ཏུ་གསུང་། །དངོས་པོ་ཀུན་གྱི་ནང་ནས་ཀྱང་། །རང་བཞིན་མེད་པ་གཙོ་བོར་བཤད། །ཅི་ཕྱིར་རྒྱལ་བའི་
སྲས་རྣམས་ཀྱིས། །འདི་བསྒོམས་པས་ནི་སངས་རྒྱས་ཀྱི། །ཕུན་སུམ་ཚོགས་པ་ཐམས་ཅད་འགྲུབ། །ཁ་ཅིག་གིས་ནི་གཞུང་དག་གི། །ཆད་པའི་སྟོང་པ་སྟོང་པ་མིན། །རང་བཞིན་མེད་པ་མ་ཡིན་ནོ། །དེ་ཡི་རང་བཞིན་དེ་ཡིན་ནོ། །དེ་ནི་ལུང་སྐལ་ཅན་ཡིན་པས། །དེ་ལྟར་གང་
བསྒོམ་རྣལ་འབྱོར་པས། །བཟུང་སྒྲུབ་མ་ལེགས་སྦྲུལ་སོགས་བཞིན། །དེ་བས་རང་བཞིན་མེད་པ་འདི། །བདེ་བ་ཆེན་པོའི་སྐད་ཅིག་ལ། །དངོས་པོ་ཐམས་ཅད་དང་བྲལ་བ། །གང་མིན་བསལ་བ་བསལ་བ་ནི། །རང་བཞིན་མེད་པར་བཤད་པ་སྟེ། །རང་བཞིན་མེད་དང་དེ་བཞིན་ཉིད། །
ཆོས་ཉིད་དང་ནི་ཆོས་མཉམ་པ། །དོན་དམ་ལ་སོགས་རྣམ་གྲངས་ཀྱང་། །རང་བཞིན་མེད་པ་འདི་ཉིད་ལས། །དེར་ནི་གཞན་དག་མ་གསུངས་སོ། །དངོས་པོ་ཀུན་ནི་གཞིག་པ་དང་། །གཞོམ་པ་ཡིས་ནི་སྟོང་པ་མིན། །དེ་འདྲའི་སྟོང་པ་ལ་སེམས་ཀྱིས། །དུས་གསུམ་དུ་ནི་གཏད་པ་ཡི། །
སྟོབས་ཀྱིས་རང་བཞིན་མེད་པར་འགྱུར། །མེད་པ་ཉིད་ནི་རྒྱུ་སོགས་ཀྱིས། །དཀྱིལ་འཁོར་ཡང་དག་འགོག་མི་འགྱུར། །མི་འགོག་དུས་ན་རང་བཞིན་མེད། །རྣལ་འབྱོར་གསུམ་པས་བརྟུལ་ཞུགས་ཀྱིས། །སྤྱོད་པ་དེ་དོན་སྒྲུབ་པ་ནི། །དེ་ཡི་དུས་སུ་དེ་ཐོབ་པའོ། །རང་བཞིན་མེད་པའི་
སྦྱོར་བ་སྟེ་བཞི་པའོ།།      །།ད་ནི་རབ་ཏུ་བཤད་བྱ་བ། །རང་བཞིན་མེད་པའི་སྦྱོར་བ་ཡིས། །བཀྲ་ཤིས་མེད་པ་དགག་དོན་དུ། །སྦྱོར་བ་ལྔ་པ་བཤད་པར་བྱ། །ཐུགས་རྗེས་རྒྱས་པ་འདི་མེད་པར། །རྣམ་པ་ཀུན་གྱི་སེམས་ཅན་དོན། །བྱེད་པར་ནུས་པ་མ་ཡིན་ཏེ། །དེ་བས་ཐམས་ཅད་
མཁྱེན་པ་རྣམས། །ཐུགས་རྗེས་གང་བས་རྒྱས་པ་སྟེ། །ཁམས་གསུམ་གྱི་ནི་སེམས་ཅན་རྣམས། །སྡུག་བསྔལ་རྒྱུ་དང་བཅས་པ་ལས། །གྲོལ་བར་འདོད་པར་ཐུགས་རྗེའོ། །ཐུགས་རྗེ་དེ་ཡང་རྣམ་གསུམ་སྟེ། །སེམས་ཅན་མ་ལུས་ཐམས་ཅད་ཀུན། །སྡུག་བསྔལ་དེ་རྒྱུ་

44-1-73a

ལས་འགོག་པར། །རྩེ་གཅིག་དམིགས་པ་གཏོང་བ་ནི། །ལས་དང་པོ་ཡིས་ཤེས་པར་བྱ། །ཁམས་གསུམ་འདི་ནི་ཆོས་དབྱིངས་ཙམ། །དེ་ལ་སེམས་ཅན་མིང་ཡང་མེད། །དོན་དམ་པར་ཡང་མིང་ཡང་མེད། །དོན་དམ་པར་ཡང་མི་དམིགས་ལ། །ས་གནས་
བྱང་ཆུབ་སེམས་དཔའོ། །དམིགས་པ་ཐམས་ཅད་དང་བྲལ་བ། །ཇི་ལྟར་ནམ་མཁའི་ཁམས་སུ་ཡང་། །སྤྲིན་བྱུང་ལྟ་བུར་སྣང་བ་ནི། །སངས་རྒྱས་བཅོམ་ལྡན་འདས་རྣམས་ཀྱི། །ཐུགས་རྗེ་ཆེན་པོ་ཡིན་པར་གསུངས། །དེ་འདྲའི་སྙིང་རྗེས་རྗེ་བཙུན་ཆེ། །རྡོ་རྗེ་འཛིན་པ་རྒྱས་པས་
ན། །ཐུགས་རྗེས་རྒྱས་པ་ཞེས་བཤད་དོ། །འཁོར་བ་ཇི་སྲིད་ཡོད་ཀྱི་བར། །དཀྱིལ་འཁོར་འཁོར་ལོའི་རིམ་པ་དང་། །ཤཱཀྱ་ཐུབ་པ་ལ་སོགས་པའི། །གཟུགས་ཀྱིས་གདུལ་བྱའི་རྒྱུད་ལ་ནི། །ཇི་ལྟར་འདུལ་བ་དེར་སྣང་སྟེ། །ཀུན་དོན་བྱེད་པར་ཤེས་པར་བྱ། །སྤྲུལ་སྐུ་འདི་ནི་དང་པོ་རུ། །
དགའ་བྲལ་ཤེས་པའི་དུས་སུ་ནི། །ཐིག་ལེ་འགོག་པར་འགྱུར་བ་སྟེ། །ནམ་མཁའི་ཁམས་ཀུན་གང་འགྱུར་བའི། །གཟུགས་ཀྱིས་རབ་ཏུ་གནས་པའོ། །ཇི་ལྟར་ཡིད་བཞིན་ནོར་བུ་ནི། །མི་རྟོག་བཞིན་དུ་སྐལ་ལྡན་ལ། །དོན་རྣམས་བྱེད་དེ་དེ་བཞིན་དུ། །བདེ་ཆེན་རང་བཞིན་མེད་པ་
ལས། །དམིགས་པ་མེད་ཀྱང་དོན་འབྱུང་བའོ། །ཡེ་ཤེས་དབང་དུ་གྱུར་པ་ཡིས། །བརྟུལ་ཞུགས་ལ་སོགས་རིམ་པ་ཡིས། །གང་ཚེ་དེ་དོན་བསྒྲུབ་པ་ན། །དེ་ཡི་དུས་སུ་དེ་ཐོབ་པའོ། །ཐུགས་རྗེས་རྒྱས་པའི་སྦྱོར་བ་སྟེ་ལྔ་པའོ།།      །།ད་ནི་རབ་ཏུ་བཤད་བྱ་བ། །དཔེ་མེད་བདེ་
རྫོགས་ཆོས་སྐུ་དང་། །ཐུགས་རྗེ་སྐུ་ཡི་ངོ་བོ་སྟེ། །རེས་འགའ་བ་ཉིད་དགག་པའི་ཕྱིར། །སྦྱོར་བ་དྲུག་པ་བཤད་པར་བྱ། །དཔེ་མེད་བདེ་རྫོགས་སྐུ་ཆེན་ཡང་། །མི་གནས་མྱ་ངན་འདའ་ཚུལ་གྱིས། །རྒྱུན་མི་འཆད་པའི་ཚུལ་གྱིས་ནི། །རྒྱུད་དག་རྣམས་ལ་རྟག་ཏུ་སྣང་། །དེ་བཞིན་
བདེ་ཆེན་ཆོས་སྐུ་ཡང་། །ཁྱབ་དང་རྒྱས་པའི་ཚུལ་གྱིས་སུ། །ནམ་མཁའ་ཇི་སྲིད་གནས་ཀྱི་བར། །རྒྱུན་མི་འཆད་པའི་ཚུལ་གྱིས་འཇུག །ཐུགས་རྗེའི་རང་བཞིན་སྐུ་དེ་ཡང་། །གདུལ་བྱ་ཇི་ལྟར་མོས་པ་ལྟར། །སྲིད་པ་སྲིད་དུ་གནས་ནས་ནི། །བར་ཆད་མེད་པར་རྒྱུན་དུ་འཇུག །

44-1-73b

དེ་འདྲའི་རྒྱུན་མི་འཆད་པའི་སྐུ། །མི་གནས་མྱ་ངན་འདས་པ་སྟེ། །བསྒྲུབ་པར་བྱ་བའི་མཚན་ཉིད་དོ། །ཤེས་རབ་ཡེ་ཤེས་དབང་དུས་སུ། །དགའ་བ་གསུམ་གྱི་གནས་སྐབས་སུ། །སྐད་ཅིག་གཉིས་སོགས་ཆུ་ཚོད་དང་། །ཉིན་གཅིག་ཟླ་བ་ལོ་ལ་སོགས། །གནས་པ་
རྒྱུན་མི་འཆད་ཅེས་བྱ། །ཕྱིས་ཀྱི་འབྲས་བུ་མི་སླུ་ཕྱིར། །དེ་ལ་ཡང་ནི་དེ་སྐད་དུ། །བླ་མའི་ཞལ་ནས་བཤད་པ་ཡིན། །ཡེ་ཤེས་དབང་དུ་གྱུར་པ་ཡིས། །བརྟུལ་ཞུགས་ཆོ་ག་དེ་བསྒྲུབ་ཚེ། །དེ་ཡི་དུས་སུ་དེ་ཐོབ་ནས། །དེ་ནས་འཁོར་བའི་མཐའ་ཡི་བར། །རྒྱུན་གྱི་རྟག་ཏུ་
གནས་པའོ། །རྒྱུན་མི་འཆད་པའི་སྦྱོར་བ་སྟེ་དྲུག་པའོ།།      །།ད་ནི་རབ་ཏུ་བཤད་བྱ་བ། །དཔེ་མེད་བདེ་རྫོགས་སྐུ་ཆེན་དང་། །བྲལ་བ་དགག་པར་བྱ་བའི་ཕྱིར། །སྦྱོར་བ་བདུན་པ་བཤད་པར་བྱ། །གོང་དུ་ཡང་དག་གསུངས་པ་ཡི། །དགའ་བའི་ཡེ་ཤེས་དུས་བྱུང་བའི། །
དཔེ་མེད་བདེ་རྫོགས་རིགས་ལྡན་སྐུ། །ལན་ཅིག་བྱུང་ནས་མེད་པ་ནི། །འགོག་པ་ཞེས་ནི་་རབ་ཏུ་བྱ། །འགོག་པ་དེ་ལས་བྱུང་བ་ན། །ཕྱིས་ཀྱི་འབྲས་བུ་མཆོག་གྱུར་པ། །འགོག་པ་མེད་པར་ཤེས་པར་བྱ། །སྙིང་རྗེ་ཆེ་བའི་དབང་གིས་ནི། །འཁོར་བ་ཇི་སྲིད་བར་དུ་ནི། །དབང་ཕྱུག་
བརྒྱད་ཀྱི་བཅོམ་ལྡན་འདས། །མི་གཡོ་གཞུག་ཕྱིར་འགོག་མེད་དང་། །གནས་ལ་ཡང་ནི་དེ་བཞིན་དུ། །མཁས་པ་རྣམས་ཀྱིས་ཤེས་པར་བྱ། །སྐལ་ལྡན་རྣམས་ཀྱི་སྔོན་དུ་ཡང་། །ཤེས་རབ་ཡེ་ཤེས་དབང་དུས་སུ། །བླ་མའི་ཞལ་ལས་ངེས་ཐོབ་པ། །དགའ་དང་དགའ་
བ་བར་མ་དང་། །དགའ་བྲལ་དགའ་བ་འགོག་པ་ལས། །དེ་འདྲའི་སེམས་རྒྱུན་མྱོང་བ་སྟེ། །འགོག་པ་མེད་པ་ཞེས་བཤད་དོ། །ཡེ་ཤེས་དབང་དུ་གྱུར་པ་ཡིས། །བརྟུལ་ཞུགས་ལ་སོགས་སྤྱོད་པ་ལ། །གནས་ནས་དེ་ཡི་དོན་བསྒྲུབ་ཚེ། །དེ་ཡི་དུས་སུ་དེ་ཐོབ་པའོ། །བྱ་བ་བྱས་
པའི་དབང་ཕྱུག་ཆེ། །མཐའ་ཡི་ཕ་རོལ་ཕྱིན་པའི་མཆོག །མི་གནས་མྱ་ངན་འདས་པ་སྟེ། །རྡོ་རྗེ་འཛིན་པ་ཆེན་པོའོ། །འགོག་པ་མེད་པའི་སྦྱོར་བ་སྟེ་བདུན་པའོ།།      །།དེ་ལྟར་སྦྱོར་བདུན་ལྡན་པ་ཡི། །བཞི་པ་མངོན་པར་བྱང་ཆུབ་པ། །རྣམ་པ་ཀུན་གྱི་མཆོག་ལྡན་པའི། །ཐམས་

44-1-74a

ཅད་མཁྱེན་པར་འགྱུར་བའོ། །དཔལ་ལྡན་སངས་རྒྱས་ཀུན་གྱི་བདག །རྡོ་རྗེ་འཆང་བ་ཀུན་གྱི་གནས། །ཆོས་རྣམས་ཀུན་གྱི་ཆོས་ཉིད་ནི། །སངས་རྒྱས་ཀུན་གྱི་ཐབས་བྱའོ། །དེ་ནི་འཁོར་བ་ཇི་སྲིད་ཀྱི། །བར་དུ་གནས་པས་རྟག་པའོ། །སངས་རྒྱས་
སེམས་ཅན་ཐམས་ཅད་ཀྱི། །ངོ་བོར་གྱུར་པས་གཅིག་པའོ། །དེ་ལ་སྒྲིབ་པ་བཞི་ཡི་ནི། །ཚ་བ་མེད་པས་བསིལ་བའོ། །འཁོར་དང་མྱ་ངན་འདས་པ་ནི། །གཅིག་ཏུ་གྱུར་པས་བདེ་བའོ། །གཟུགས་ལ་སོགས་པ་རྟོག་པ་ཡིས། །མ་གོས་ཕྱིར་ནི་མི་གདུང་བའོ། །ཕྱིན་ལོག་འཁྲུལ་
རྟོག་དང་བྲལ་བས། །དག་ཅིང་དྲི་མ་མེད་པའོ། །ཟབ་གསལ་བྱང་ཆུབ་ལས་མི་ལྡོག །གཞན་དོན་མཛད་པས་དགའ་བའོ། །ཆོས་ཉིད་དང་ནི་སེམས་ཅན་ལ། །སེམས་མཉམ་གཞག་པས་ཡིད་དང་བ། །འདི་ནི་བདེ་བ་ཆེན་པོ་ཡི། །རོ་མྱང་བ་ཡི་མཚན་ཉིད་བརྒྱད། །རྫོགས་པའི་
རིམ་པའི་རྣལ་འབྱོར་པ། །བཞི་པའི་དོན་ནི་བླ་མེད་པའོ། །དངོས་པོ་ཀུན་ལ་ཆེར་གནས་དང་། །གང་མི་གསལ་བའི་དངོས་པོ་རུ། །དེ་ཉིད་བླ་མ་དམ་པ་ཡི། །ཞལ་ནས་ངེས་པར་ཐོབ་པ་ལ། །སོམ་ཉི་ཡིད་གཉིས་མི་བྱའོ། །དེ་ཡི་ངོ་བོ་བཤད་ནས་ནི། །རྣམ་གྲངས་དག་དང་
བཤད་པར་བྱ། །འདོད་ཆགས་དང་ནི་བར་མ་དང་། །ཆགས་བྲལ་དུ་ནི་ཤེས་པར་བྱ། །དགའ་དང་དགའ་བ་བར་མ་དང་། །དགའ་བྲལ་གྱི་ནི་དགའ་བའོ། །བདེ་རྫོགས་སྐུ་དང་ཆོས་སྐུ་དང་། །སྤྲུལ་སྐུ་རུ་ནི་ཤེས་པར་བྱ། །སྐུ་དང་གསུང་དང་ཐུགས་དང་ནི། །སྟོང་དང་མཚན་མེད་སྨོན་
པ་མེད། །གསང་དང་གསང་ཆེན་ཤིན་ཏུ་གསང་། །རྣལ་འབྱོར་ལྷག་པའི་རྣལ་འབྱོར་དང་། །རྣལ་འབྱོར་ཆེན་པོ་ཞེས་བྱའོ། །བདག་དང་གཞན་དང་ལྷན་ཅིག་བྱེད། །དཔལ་གསུམ་དུ་ནི་ཤེས་པར་བྱ། །དང་པོ་རྣལ་འབྱོར་ལས་རྒྱལ་མཆོག །དཀྱིལ་འཁོར་རྒྱལ་མཆོག་ཤེས་པར་བྱ། །
ཐིག་ལེ་ཕྲ་མོ་གསང་སྔགས་བཟླས། །རྣམ་པ་གསུམ་དུ་ཤེས་པར་བྱ། །དམ་ཚིག་གསུམ་དང་ཏིང་འཛིན་དང་། །ཡེ་ཤེས་སེམས་དཔའ་ཤེས་པར་བྱ། །ལུས་དང་བྷ་ག་བྱང་སེམས་ཀྱི། །དཀྱིལ་འཁོར་གསུམ་དུ་ཤེས་པར་བྱ། །བུམ་པ་དང་ནི་གསང་བ་དང་། །ཤེས་རབ་ཡེ་ཤེས་ཤེས་པར་

44-1-74b

བྱ། །དེ་ལ་སོགས་པའི་དམ་ཚིག་གི། །བཞི་པ་ཡི་ནི་ཚིག་གི་ནི། །དེ་འདྲའི་རང་བཞིན་མི་ཤེས་ལ། །དེ་ཉིད་སྔགས་ཀྱི་སྐུ་རུ་བཤད། །དཔེ་མེད་བདེ་རྫོགས་ཡེ་ཤེས་སྐུ། །ཧཱུྃ་སོགས་བསྐྱེད་པའི་ལྷ་ཡི་གཟུགས། །བཞིས་བསྒྲུབ་སྐུ་རུ་རབ་ཏུ་གནས། །གང་གི་བཞི་ལ་གནས་
བྱེད་ཕྱིར། །བར་ཆད་མེད་ཅིང་འགོག་པ་མེད། །དེ་ལྟར་དཔལ་ལྡན་གསང་འདུས་སུ། །རྟོག་པ་ཡི་ནི་རྣལ་འབྱོར་པས། །བསྐྱེད་པའི་རིམ་པ་ལ་བརྟེན་ཏེ། །བཞི་པའི་དོན་ལ་སྤྱོད་པར་འགྱུར། །དེ་འདྲའི་དོན་རྣམས་མི་ཤེས་པས། །ཕྱི་རོལ་དོན་ལ་མངོན་ཞེན་ཏེ། །རིན་ཆེན་སེམས་
ནི་དྲི་ཅན་བྱས། །དེས་ན་དགེ་དང་མི་དགེ་བའི། །ལས་བྱས་པས་ནི་མཐོ་རིས་དང་། །དམྱལ་ལ་སོགས་པར་འཚོད་འགྱུར་བ། །ཆོས་འདི་རང་བཞིན་གྱིས་དག་པས། །རྣམ་རྟོག་དྲ་བས་བླུན་བྱས་ལ། །དགེ་སྡིག་ཕུང་པོ་གཉིས་སུ་བརྟགས། །དེ་སྤངས་ནས་ནི་སྐྱེ་མེད་པའི། །རང་བཞིན་
དོན་ནི་རྟོགས་པར་བྱ། །ཡང་དག་དོན་དུ་དགེ་སྤངས་ན། །དགེ་བ་སྨིན་པས་སྨོས་ཅི་དགོས། །དཔེར་ན་མི་གང་ཆུ་ཀླུང་གི། ཕ་རོལ་ཏུ་ནི་འགྲོ་བ་དག །རྩྭ་ཤིང་ལ་སོགས་བསྡུས་བྱས་པས། །ཆུ་ལས་རྒལ་བའི་གཟིངས་བྱས་ཏེ། །དེ་ལ་འཇུག་སྟེ་རབ་བརྒལ་ནས། །བོར་ཏེ་བདེ་བར་
འགྲོ་བ་ལྟར། །དེ་བཞིན་བཞི་པོའི་ངོ་བོ་ཡི། །དོན་རྟོགས་པས་ན་འབད་རྩོལ་གྱིས། །བྱ་བ་དེ་ལ་ཅི་ཞིག་བྱ། །དེ་ཕྱིར་བླ་མ་དམ་པ་ཉིད། །མཉེས་བྱས་དབང་གི་དོན་མཆོག་གི། བདུད་རྩི་མཆོག་འདི་གང་ཟག་གང་། །བདག་གཞན་དོན་དུ་འཐུང་བྱེད་པ། །གང་དེ་རྒྱལ་བའི་སྲས་ཞེས་
བྱ། །དེ་ཕྱིན་ཆད་ནི་གང་ཅུང་ཟད། །འདོད་ཆགས་ལ་སོགས་དངོས་པོ་རྣམས། །བདུད་རྩིར་ཟིན་ཕྱིར་དེ་ལ་དབུལ། །སྐྱོན་གྱིས་གོས་པར་མི་འགྱུར་རོ། །བསྒོམ་པར་ལྡན་པ་སྨོས་ཅི་དགོས། །དེ་ནི་མ་འོངས་རྫོགས་སངས་རྒྱས། །དེ་ནི་ཡང་དག་རྐང་གཉིས་མཆོག །དེ་ནི་འཁོར་བའི་
ཕ་རོལ་སོན། །དེ་ནི་ཕྱིན་ལོག་ཁུར་ཆེན་པོར། །དེ་ནི་བྱ་བ་ཐམས་ཅད་བྱས། །དེ་ནི་ཀུན་གཟིགས་རྣམས་ཀྱིས་བཞག །དེ་ནི་གང་དུ་གནས་གྱུར་ཀྱང་། །སངས་རྒྱས་ཀྱི་གདུང་མ་ཆད་པས། །བསྟན་པ་རིན་ཆེན་གནས་པ་ཡི། །གཙོ་བོ་རུ་ནི་དེ་གནས་སོ། །དེ་ནི་གང་དུ་འདུག་ཀྱང་རུང་། །

44-1-75a

དེ་དང་དེ་རུ་འཇིག་རྟེན་མགོན། །བཞུགས་དང་བཞུད་པར་ཤེས་པར་བྱ། །རྣལ་འབྱོར་དེ་ལ་ཐམས་ཅད་ཀྱིས། །དངོས་པོ་ཀུན་གྱིས་ཕྱག་བྱར་འོས། །སྲིད་གསུམ་བདག་པོ་ཀུན་གྱིས་ཀྱང་། །དཀྱིལ་འཁོར་མཆོད་པ་འོས་པ་ཡིས། །དེ་བཞིན་གཤེགས་པ་
ཀུན་གྱིས་ཀྱང་། །ཉིན་རེ་ལན་གསུམ་བྱོན་ནས་ནི། །ཕྱག་བྱེད་ཅིང་ནི་བསྔགས་བརྗོད་ན། །གཞན་མ་རྣམས་ནི་སྨོས་ཅི་དགོས། །དེ་བས་ཀུན་ནས་འབད་པ་ཡིས། །བླ་མ་ཡང་དག་མཉེས་བྱས་ཏེ། །བཞི་པའི་དོན་མཆོག་བླང་བྱས་ནས། །དགོན་པའམ་ཡང་ན་གྲོང་གི་མཐར། །
གང་རུང་ཅི་རུང་དེ་ལྟ་རུང་། །གནས་ནས་བླ་མའི་ཞལ་སྔ་ཡི། །བསྐྱེད་པའི་རིམ་པ་བསྙེན་བྱ་སྟེ། །རྫོགས་པའི་རིམ་པ་རྟོགས་པར་བྱ། །དངོས་པོ་ཐམས་ཅད་དངོས་མེད་པས། །རྒྱུ་སོགས་དོན་ནི་རྟོགས་པ་དང་། །རྡོ་རྗེ་པདྨ་སྤྱད་པ་དང་། །བདུད་རྩི་ལྔས་ནི་རང་དགར་བྱེད། །འདོད་པའི་
ཡོན་ཏན་ལྔ་ལ་ནི། །རྣལ་འབྱོར་ཅི་དགར་སྤྱོད་བྱེད་ཅིང་། །གསང་བར་བྱ་བའི་ཆོས་གསང་བས། །གསང་ཞིང་སྦས་ཏེ་སྤྱད་པར་བྱ། །ལོངས་སྤྱོད་ཆེན་པོ་དཀའ་ཐུབ་དང་། །བསམ་གཏན་སྨྱོན་པའི་ཚུལ་གྱིས་སུ། །དེ་འདྲའི་ངོ་བོ་མ་ཤེས་པས། །ལག་པ་དང་ནི་རྐང་པ་དང་། །
མིག་སོགས་སྦྱིན་པ་བཏང་བས་ཀྱང་། །བསྐལ་པ་ཆེན་པོ་བརྒྱ་རུ་ཡང་། །བདུད་རྩིའི་རོ་ཐོབ་མི་འགྱུར་རོ། །དེ་བས་དངོས་པོ་འདི་གཅིག་གིས། །དམ་པ་རྟོག་པ་ཐམས་ཅད་སྤངས། །ཟབ་ཅིང་ལེགས་པར་གསལ་བའི་སྐུ། །ཀུན་ནས་འོད་ཟེར་འཕྲོ་ལྡན་པ། །ཀུན་དུ་བཟང་པོར་རང་
གི་ཡིད། །རྣལ་འབྱོར་གང་གིས་སྒོམ་མི་བྱེད། །དེ་བསྒོམས་པས་ནི་ཚེ་འདི་ལ། །ཟླ་བ་དྲུག་གིས་དངོས་གྲུབ་མཆོག །ཐེ་ཚོམ་མེད་པར་འགྲུབ་པ་སྟེ། །སུ་ཡིས་དངོས་པོ་དེ་བཟློག་འགྱུར། །འཁོར་ལོ་གཅིག་པའི་ཤིང་རྟ་ལ། །རྟ་བདུན་སྦྲུལ་གྱི་ཐག་པས་སྦྲེལ། །ཁ་ཁྲིད་རོ་
སྨད་མེད་པ་ཡིས། །མཁའ་ལ་ཁྲིད་ནས་མཐའ་རུ་ཕྱིན། །རང་དང་གཞན་དོན་བྱེད་པ་ལྟར། །དངོས་པོ་ཡི་ནི་ཆོས་ཀུན་དང་། །མཛེས་གྱུར་མིན་ལྟར་སྣང་གྱུར་ཀྱང་། །རང་དང་གཞན་གྱི་དངོས་གྲུབ་པས། །སྐྱེས་བུས་འདི་ནི་བླང་བར་འོས། །དལ་འབྱོར་འདི་ནི་གཡོ་བས་ན། །དྲག་

44-1-75b

པོའི་རླུང་གིས་མར་མེ་ལྟར། །སྐད་ཅིག་དུ་ནི་མི་སྣང་འགྱུར། །དེ་བས་དེ་ཉིད་བསམ་པར་འོས། །དེ་འདྲའི་རང་བཞིན་ངོ་བོ་ལ། །སྒོམ་པས་རྟག་ཏུ་མཉམ་ཞོག་ལ། །ཁྱབ་བདག་རིམ་བཞིན་རྟོགས་གྱུར་ཅིང་། །བདག་ནི་རྟག་ཏུ་གསོལ་བ་འདེབས། །དཔལ་ལྡན་འདུས་པའི་རྒྱ་
མཚོ་ལས། །བླ་མའི་ཞལ་སྔས་བསྒྲུབ་པས་ན། །སྦྱོར་བ་བདུན་གྱི་བདུད་རྩི་མཆོག །སྨན་པའི་ཞབས་ཀྱིས་ཐོབ་པའོ། །དེ་འདྲའི་བདུད་རྩི་དེ་ལ་ནི། །འཐུང་བྱེད་དེ་ནི་ལོག་པ་ཡིན། །རྟོག་པ་ཡིས་ནི་རབ་འཆིང་བའི། །ནད་ནི་ཀུན་ནས་མེད་གྱུར་ཅིག །དེ་མེད་པས་ན་སེམས་ཅན་
ཀུན། །ཡང་དག་ཕུང་པོ་རྒྱས་འགྱུར་ཏེ། །སྦྱོར་བ་བདུན་གྱི་རང་བཞིན་མཆོག །འབྲས་བུ་དེ་ཉིད་རྟོགས་པར་ཤོག །སྦྱོར་བ་བདུན་པོ་ཞེས་བྱ་བ་དབང་བཞིའི་རབ་ཏུ་བྱེད་པ་སློབ་དཔོན་ཆེན་པོ་བི་ཏ་པཱ་དས་མཛད་པ་རྫོགས་སོ།།      །།རྒྱ་གར་གྱི་མཁན་པོ་ཀ་མ་ལ་གུ་ཧྱ་དང་།
བོད་ཀྱི་ལོ་ཙཱ་བ་མངའ་བདག་ལྷ་ཡེ་ཤེས་རྒྱལ་མཚན་གྱིས་བསྒྱུར་བའོ།།༄༅༅། །རྒྱ་གར་སྐད་དུ། མ་ཧཱ་བ་ལིཾ་བི་དྷི། བོད་སྐད་དུ། གཏོར་མ་ཆེན་པོའི་ཆོ་ག །ཐམས་ཅད་མཁྱེན་པ་ལ་ཕྱག་འཚལ་ལོ། །གང་ཞིག་ཤེས་བྱའི་སྒྲིབ་སོགས་རབ་སྤངས་
ནས། །མེ་ལོང་ལ་སོགས་ཡེ་ཤེས་ཡང་དག་ལྡན། །གསུམ་གྱི་འཁོར་ལོ་དོན་བྱེད་རབ་མཆོག་གཙོ། །འཇམ་དབྱངས་དེ་ལ་འདུད་ཅིང་བླ་མ་ལའང་། །རྣལ་འབྱོར་རྣམས་ཀྱི་བར་ཆད་ཞི་བྱས་ནས། །མངོན་པར་དོན་ནི་རབ་བསྒྲུབ་ཕྱིར། །སངས་རྒྱས་ཡེ་ཤེས་ཞལ་སྔའི་
རིམ་འོངས་པ། །མ་ལུས་བསྟན་པའི་གཏོར་མ་བཤད་པར་བྱ། །མཆོད་སྦྱིན་རྣམས་ནི་ཐམས་ཅད་ཀྱི། །གཙོ་བོ་གཏོར་མའི་ལས་ཡིན་ཏེ། །རྣལ་འབྱོར་རྣམས་ནི་དེ་བསྒྲུབ་འདོད། །ཆོ་ག་འདི་ལ་འབད་པར་བྱ། །གང་ཕྱིར་གཞན་དོན་གཉེར་བའམ། །དངོས་གྲུབ་བསྒྲུབ་བྱའི་
ལས་བྱེད་ན། །བཟླས་དང་སྦྱིན་སྲེག་གཉིས་ཀ་བས། །གཏོར་མའི་ལས་འདི་མཆོག་ཏུ་གསུངས། །དེ་ཡི་ལས་ནི་འདི་ལྟ་སྟེ། །བདག་ཉིད་བསྒྱུར་དང་དེ་མགྲོན་དང་། །དེ་ཡི་ཡོ་བྱད་བསྔོ་བ་དང་། །གསོལ་གདབ་གཤེགས་སུ་གསོལ་བའོ། །དང་པོར་བདག་ཉིད་ཡི་དམ་

44-1-76a

ལྷར། །སྐུ་དང་མཁྱེན་པ་བྱ་བ་དབང་། །རིམ་པས་ཐམས་ཅད་རྫོགས་བསྒོམས་ནས། །ཞི་ཕྱིར་དོན་གྲུབ་གཏོར་མ་གཏང་། །འཁོར་ལོ་ལ་སོགས་ཁང་པ་ཡིས། །ཕྱོགས་བཞི་མཚམས་བཞིར་སྟེགས་བུ་བརྒྱད། །བརྒྱ་བྱིན་དབང་ལྡན་བར་དུ་གཅིག །ཆུ་དང་
བདེན་བྲལ་བར་དུ་གཅིག །དམ་པའི་དྲི་ཡིས་བཅུ་པོ་བྱུག །མཛེས་པའི་མེ་ཏོག་རྣམས་ཀྱིས་བརྒྱན། །གླུ་དང་གར་དང་གདུགས་སོགས་པས། །ནུས་པ་ཇི་སྙེད་ཀྱིས་བརྒྱན་བྱ། །དེ་ནས་རང་ཉིད་རྣལ་འབྱོར་པས། །དངོས་གྲུབ་མྱུར་དུ་མི་འཐོབ་ཕྱིར། །འཁོར་ལོར་བཅས་པའམ་
ཡང་ན་ནི། །ཁྲོས་པའི་ཐམས་ཅད་ནག་པོར་བསྒྱུར། །དེ་ཡི་ཡེ་ཤེས་སེམས་དཔའ་ལས། །འོད་ཟེར་ལྕགས་ཀྱུ་ནག་འཕྲོས་པས། །ཕྱོགས་སྐྱོང་རང་རང་ཕྱོགས་གནས་པས། །ཆུང་མ་འཁོར་བཅས་དགུག་པར་བྱ། །བརྒྱ་བྱིན་སེར་པོ་སྤྱན་སྟོང་པ། །རྡོ་རྗེ་འཛིན་པ་ཤ་ཙིར་བཅས། །གླང་
ཆེན་རབ་ཏུ་བརྟན་པ་ལ། །ཆིབས་པ་ཤར་གྱི་ས་སྟེགས་དབུས། །དགུག་བྱ་དེ་གཡོན་མཁའ་ལྡིང་ལ། །ཞོན་པའི་ཁྱབ་འཇུག་ནག་པོ་སྟེ། །གཡས་པ་རྩེ་གསུམ་འཁོར་ལོ་འཛིན། །གཡོན་དུ་དུང་དང་ནོར་བུ་འཛིན། །དེ་སྟེང་དགུག་བྱ་ཤར་ལྷོ་ཡི། །སྟེགས་སྟེང་ར་ཞོན་མེ་ལྷ་ཡི། །
རལ་པའི་དབུ་རྒྱན་དམར་མདོག་ཅན། །སྐྱབས་སྦྱིན་ཕྲེང་འཛིན་གཡོན་དུ་ནི། །དབྱུག་པ་གུནྡྷེ་འཛིན་པ་དགུག །དེ་བཞིན་ལྷོ་ཡི་སྟེགས་སྟེང་དུ། །དགུག་བྱ་མ་ཧེ་ལ་ཞོན་པ། །གཤིན་རྗེ་ནག་པོ་བརྐྱང་བསྐུམ་ཚུལ། །རྒྱན་འབར་ཕྱག་ན་དབྱུག་པ་དང་། །སྡིགས་མཛུབ་འཛིན་པ་གནས་
པར་བྱ། །ལྷོ་ནུབ་སྟེགས་སྟེང་ལ་དགུག་པ། །མི་རོ་ལ་ཞོན་བརྐྱང་བསྐུམ་ཚུལ། །གཅེར་བུ་མཆེ་གཙིགས་སྐྲ་བཞིན་གནག །བདེན་བྲལ་གྲི་དང་ཀ་པཱ་ལ་འཛིན། །ནུབ་ཀྱི་སྟེགས་བུའི་སྟེང་དགུག་པ། །མཁའ་འགྲོ་ལྟོ་འཕྱེ་ཞོན་པ་ཡི། །ཆུ་ལྷ་དཀར་པོ་ཀླུ་ཞགས་འཛིན། །ཀླུ་
མགོ་བདུན་པ་ཞབས་ཀླུ་གཅིག །དེ་བཞིན་ནུབ་བྱང་སྟེང་དགུག་པ། །དགོ་བ་སེར་ཞོན་རླུང་ལྷ་ལྗང་། །ཕྱག་གཉིས་རླུང་གི་གོས་འཛིན་ཅིང་། །ནམ་མཁའི་ཁམས་སུ་བརྐྱང་པའོ། །བྱང་གི་སྟེགས་བུ་ལ་དགུག་པ། །མི་ཞོན་གནོད་སྦྱིན་སེར་པོ་སྟེ། །བི་ཛ་པཱུ་ར་ས་བོན་

44-1-76b

གང་། །ནེའུ་ལེ་བཙིར་ནས་འཛིན་པའོ། །དེ་སྟེང་བྱི་བ་ལ་ཞོན་པ། །ལོག་འདྲེན་དཔོན་པོ་གླང་ཆེན་མགོ། །དཀར་པོ་ལ་ཕུག་ཕྲེང་བ་དང་། །མངར་བསྲེས་དབྱུག་འཛིན་དགུག་པའོ། །བྱང་ཤར་སྟེགས་བུ་ལ་དགུག་པ། །གླང་ལ་ཞོན་པའི་དབང་ཕྱུག་དཀར། །རལ་ཅན་
རུས་པའི་ཕྲེང་བ་ཅན། །ཁ་ཊྭཱཾ་རྔེའུ་ཆུང་འཛིན་པའོ། །བརྒྱ་བྱིན་དབང་ལྡན་བར་དགུག་པ། །རྟ་བདུན་ཤིང་རྟ་ལ་ཞོན་པ། །ཉི་མ་དམར་པོ་ཟེར་བཅས་པ། །ཕྱག་མཚན་པདྨ་དམར་པོ་འཛིན། །དེ་གཡོན་ཨུཏྤ་ལ་གནས་པ། །ཟླ་བ་དཀར་པོ་ལ་གནས་པ། །ཕྲེང་བ་འཛིན་པ་འཁོར་དང་བཅས། །བཀུག་
ནས་དེ་རུ་གནས་པའོ། །དེ་ཉིད་དབུས་སུ་དེ་སྟེང་དགུག །ངང་པ་ཞོན་པ་ཚངས་པ་ཆེ། །ཐུང་ངུ་ཞལ་བཞི་ཚངས་སྐུད་ཅན། །ཚོན་པོ་ཕྲེང་བ་དབྱུག་པ་འཛིན། །ཀླུ་དང་ཅིག་ཤོས་གཉིས་པར་སྟེང་། །ཤིང་རྟ་ལ་ཞོན་ཐགས་ཟངས་གནག །དགུག་བྱ་རལ་གྲི་འཛིན་པའོ། །ལྷ་
མིན་ཚོགས་དང་བཅས་པའོ། །དེ་ཡི་གཡོན་དུ་དེ་སྟེང་དུ། །པདྨ་ལ་བཞུགས་དགུག་བྱ་བ། །ས་ཡི་ལྷ་མོ་སེར་མོ་ཡི། །བུམ་པ་འཛིན་པ་བསམ་པར་བྱ། །འདི་རྣམས་རིན་ཆེན་དབུ་རྒྱན་ཅན། །རིན་ཆེན་རྣམ་པ་སྣ་ཚོགས་ཀྱིས། །རབ་ཏུ་སྤྲས་པའི་རྒྱན་གྱིས་བརྒྱན། །ཕྱོགས་སྐྱོང་
ཤིན་ཏུ་ཆེ་བ་རྣམས། །རང་འདྲ་བ་ཡི་ཚོགས་བསྐོར་བ། །རྣམ་སྨིན་འོད་དང་སྐུ་མདོག་གིས། །མུན་པ་ཐམས་ཅད་སེལ་བྱེད་པ། །རང་གི་ལྷ་ཡིས་དགུག་བྱས་དགོད། །དེ་ལྟར་རབ་ཏུ་བཀུག་བྱས་ནས། །ཆོ་གའི་རིམ་པ་འདི་ཡིས་ནི། །ཤེས་བྱའི་སྒྲིབ་མུན་བསལ་ནས་ནི། །དེ་རྣམས་
རབ་ཏུ་སྦྱར་བར་བྱ། །ཐུགས་ཀྱི་འོད་ཟེར་ལས་བྱུང་བ། །གཤིན་རྗེ་གཤེད་སོགས་ཁྲོ་བོ་བཅུ། །སྐུ་སྟོད་ཞལ་གསུམ་ཕྱག་དྲུག་བལྟ། །སྨད་ནི་གསལ་ཤིང་གཟུགས་གནས་པ། །གཡས་པས་མགུལ་བ་བརྟན་བྱས་ནས། །རི་རབ་ལས་གྲུབ་ཐོ་བ་ཡིས། །གཡོན་པས་བརྡབ་ཅིང་
གོང་མ་རྣམས། །རིམ་པ་བཞིན་དུ་གདབ་པར་བྱ། །ཨོཾ་ཨཱཿ་བིགྷྣཱནྟ་ཀྲིཏ་སརྦ་དུཥྚཱན། ཀུ་བེ་ར་ག་ཎ་པ་ཏི་ས་པ་རི་ཝཱ་ར་ཎ་ཀཱི་ལ་ཡ་ཧཱུྃ་ཕཊ། ཨོཾ་ཨཱཿཊཀྐི་རཱ་ཛ་སརྦ་དུཥྚཱན། ཨགྣི་ས་པ་རི་ཝཱ་ར་ཎ་ཀཱི་ལ་ཡ་ཧཱུྃ་ཕཊ། ཨོཾ་ཨཱཿནཱི་ལ་དཎྜ་སརྦ་དུཥྚཱན། ནཻ་རྀ་ཏི་ས་པ་རི་ཝཱ་ར་ཎ་ཀཱི་ལ་ཡ་ཧཱུྃ་ཕཊ། ཨོཾ་མ་ཧཱ་བ་ལ་

44-1-77a

སརྦ་དུཥྚཱན། བཱ་ཡུ་ན་ས་པ་རི་ཝཱ་ར་ཎ་ཀཱི་ལ་ཡ་ཧཱུྃ་ཕཊ། ཨོཾ་ཨཱཿཨ་ཙ་ལ་སརྦ་དུཥྚཱན། ཨཱི་ཤ་ན་ས་པ་རི་ཝཱ་ར་ཎ་ཀཱི་ལ་ཡ་ཧཱུྃ་ཕཊ། ཨོཾ་བྷྲཱུཾ་ཙཀྲ་སརྦ་དུཥྚཱན། ཨརྐ་ཙནྡྲ་པྲ་ཏི་མ་ཧཱ་ས་པ་རི་ཝཱ་ར་ཎ་ཀཱི་ལ་ཡ་ཧཱུྃ་ཕཊ། ཨོཾ་ཨཱཿསུམྦྷ་སརྦ་དུཥྚཱན། ཙ་མ་རི་པ་ཏི་དེ་བ་བྲ་ཎ་ས་པ་
རི་ཝཱ་ར་ཎ་ཀཱི་ལ་ཡ་ཧཱུྃ་ཕཊ། སྔགས་དེ་དག་ནི་བརྗོད་བྱས་ནས། །གདབ་བྱ་འདེབས་བྱེད་བཏབ་པ་རྣམས། །སྒྲིབ་པ་མཉམ་ཉིད་ཤེས་པ་ཡིས། །བརྩལ་ཕྱིར་རིམ་བཞིན་ཕུར་པས་གདབ། །དེ་དག་ལུས་འདི་ཕུར་བཏབ་ནས། །ཐལ་བ་ཉིད་གྱུར་བརླག་བྱས་ནས། །རྣམ་པར་ཤེས་
པ་མར་མེ་ལྟར། །གནས་པ་ས་བོན་གྱིས་བཀུག་ལྟར། །ཞལ་བཞུགས་བྱང་ཆུབ་སེམས་གྱུར་ནས། །རྡོ་རྗེའི་ལམ་བྱུང་མཚོ་སྐྱེས་ནང་། །བབས་པ་བསམ་པའི་གནོད་སེམས་རྣམས། །བསལ་ཕྱིར་སྔགས་འདིས་བྱིན་གྱིས་རླབ། ཨོཾ་ཨཱཿཨོཾ་ཤྲཱི་ཧེ་རུ་ཀ་བཛྲ་ས་མ་ཡ་མུ་དྲ་
སརྦ་དུཥྚཱན་ས་མ་ཡ་མུ་དྲ་པྲ་བན་ཙཀྲ་ཨེ་ཥཱ་མ་ཨ་ཤ་ཡ་དོ་ཥཾ་ཨ་བ་ན་ཡ་ཧཱུྃ་ཕཊ། རྡོ་རྗེ་ཧེ་རུ་ཀ་ཡིས་ནི། །སྔགས་ཀྱིས་ཤེས་བྱའི་སྒྲིབ་མུན་བསལ། །དེ་ནས་བདུད་རྩི་འཁྱིལ་པ་ཡི། །ཕྲེང་བ་བཟླས་པས་ཉོན་མོངས་བསལ། །ན་མཿས་མནྟ་ཀཱ་ཡ་ཝཱཀ་ཙིཏྟ་བཛྲཱ་ཎཱཾ། ན་མོ་བཛྲ་
དཾཥྚོཏ་ཀ་ཊ་བྷཻ་ར་བ་ཡ་ཨ་སི་མུ་ས་ལ་པ་ར་ཤུ་པཱ་ཤ་ཧསྟ་ཡ། ཨོཾ་ཨ་མྲི་ཏ་ཀུཎྜ་ལི། ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། གརྫ་གརྫ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷྣཱན་བི་ནཱ་ཡ་ཀཱ་ནཱཾ། མ་ཧཱ་ག་ཎ་པ་ཏི་ཇཱི་བི་ཏཱནྟ་ཀ་རཱ་ཡ། སརྦ་ཥྚཾ་ཨ་ཤ་ཡ་དོ་ཥ་ཨ་པ་ན་
ཡ་ཧཱུྃ་ཕཊ། དེ་ཡིས་སྒྲིབ་མུན་བསལ་ནས་སུ། །མཚོ་སྐྱེས་ནང་གནས་ཁུ་བ་ལས། །ཆོ་ག་གསུམ་གྱིས་ལེགས་བསྒྲུབས་པའི། །སྐུ་རྣམས་ཕྱོགས་སུ་དགོད་པར་བྱ། །བཛྲཾ་ཧཱུྃ་རུཾ་ཀཾ་མུཾ་བཾ་ཡཾ་བྷཾ་སཾའུ་མཾ་ཨ་བྷེ་མ་མཾ་ལཾ། བྱ་བའི་ས་བོན་རྣམས་སུ་གྱུར། །དེ་ལས། རྡོ་རྗེ་འཁོར་
ལོ་གུནྡྷེ་དང་། །དབྱུག་པ་གྲི་དང་ཀླུ་ཞགས་དང་། །རླུང་གོས་བི་ཛ་པཱུ་ར་དང་། །པདྨ་རྩེ་གསུམ་པདྨ་དང་། །ཨུཏྤལ་པདྨ་རལ་གྲི་དང་། །པདྨ་མཚན་མ་རྣམས་ཀྱི་ནང་། །རང་རང་ས་བོན་མཚན་པར་བསམ། །ས་བོན་ཕྱག་མཚན་དེ་ཉིད་ལས། །བརྒྱ་བྱིན་རྡོ་རྗེ་མཚན་དུ་གྱུར། །སེར་

44-1-77b

པོ་ཞལ་གསུམ་ཕྱག་དྲུག་པ། །རྡོ་རྗེ་རལ་གྲི་ཕྱག་གཡས་ལ། །འཁོར་ལོ་པདྨ་གཡོན་དུ་འཛིན། །ཐུགས་རིགས་ཟླ་བའི་སྟེང་དུ་དགོད། །ཁྱབ་འཇུག་སྒྱུ་མ་རྡོ་རྗེ་གྱུར། །ནག་པོ་ཞལ་གསུམ་ཕྱག་དྲུག་པ། །འཁོར་ལོ་རལ་གྲི་ཕྱག་གཡས་ལ། །དུང་དང་པདྨ་གཡོན་དུ་འཛིན། །འདི་
ཡང་ཐུགས་རིགས་ཉི་མར་དགོད། །དྲང་སྲོང་རྡོ་རྗེ་མེ་རུ་གྱུར། །དམར་སེར་ཞལ་གསུམ་ཕྱག་དྲུག་པ། །སྐྱབས་སྦྱིན་དང་ནི་ཕྲེང་བ་གཡས། །གུནྡྷེ་དབྱུག་པ་གཡོན་དུ་འཛིན། །འདི་ཡང་ཐུགས་རིགས་ཟུར་གསུམ་དང་། །ཉི་མའི་གདན་ལ་དགོད་པའོ། །གཤིན་རྗེ་རྡོ་རྗེ་ཚེ་ཟད་
གྱུར། །ནག་པོ་སྐྲ་འགྲེང་ཞལ་གསུམ་པ། །ཕྱག་དྲུག་དབྱུག་པ་རལ་གྲི་དང་། །ནོར་བུ་པད་འཛིན་བརྐྱང་བསྐུམ་ཚུལ། །ཐུགས་རིགས་ཉི་མའི་གདན་ལ་དགོད། །བདེན་བྲལ་རྡོ་རྗེ་གཏུན་དུ་གྱུར། །བུང་འདྲ་ཞལ་གསུམ་ཕྱག་དྲུག་པ། །གྲི་གུག་རལ་གྲི་ཕྱག་གཡས་པ། །ཀ་པཱ་ལ་
རིན་ཆེན་གཡོན་དུ་འཛིན། །ཐུགས་རིགས་ཉི་མའི་གདན་ལ་དགོད། །དེ་རྣམས་དབུ་རྒྱན་མི་བསྐྱོད་པས། །ཅོད་པན་ལ་ནི་མཚན་པའོ། །ཆུ་ལྷ་ཀླུ་ཡི་རྡོ་རྗེར་གྱུར། །ཞལ་གསུམ་དཀར་པོ་ཀླུ་གདོང་དང་། །ཀླུ་ཡི་ཞབས་ཅན་ཕྱག་དྲུག་པ། །ཀླུ་ཞབས་རལ་གྲི་ཕྱག་གཡས་ལ། །རིན་
ཆེན་པདྨ་གཡོན་དུ་འཛིན། །གསུང་རིགས་ཟླ་བའི་གདན་ལ་དགོད། །ཚེ་དཔག་མེད་ཀྱིས་དབུ་བརྒྱན་པའོ། །རླུང་ལྷ་རྡོ་རྗེ་རླུང་དུ་གྱུར། །མརྒད་ལྟར་ལྗང་ཞལ་གསུམ་པ། །ཕྱག་དྲུག་རླུང་གོས་རལ་གྲི་གཡས། །ནོར་བུ་པདྨ་གཡོན་དུ་འཛིན། །ལས་ཀྱི་རིགས་ཏེ་ཟླ་བར་དགོད། །རྔ་སྒྲ་ཡིས་
ནི་དབུ་བརྒྱན་པའོ། །ལུས་ངན་རྡོ་རྗེ་འཇིགས་བྱེད་གྱུར། །གསེར་འདྲ་ཞལ་གསུམ་ཕྱག་དྲུག་པ། །བི་ཛ་པཱུ་ར་རལ་གྲི་གཡས། །པདྨ་དུང་ནི་གཡོན་དུ་འཛིན། །གསུང་རིགས་ཉི་མ་ལ་དགོད་བྱ། །ལོག་འདྲེན་རྡོ་རྗེ་མཆུ་རིངས་གྱུར། །དཀར་པོ་ཞལ་གསུམ་ཕྱག་དྲུག་པ། །
རྡོ་རྗེ་མཆུ་ཅན་ལ་ཕུག་དང་། །རལ་གྲི་གཡས་སུ་འཛིན་པའོ། །རིན་ཆེན་པདྨ་གཡོན་དུ་འཛིན། །འདི་ཡང་གསུང་རིགས་ཉི་མར་དགོད། །དབང་ལྡན་རྡོ་རྗེ་ཁྲོ་བོར་གྱུར། །དཀར་པོ་ཞལ་གསུམ་ཕྱག་དྲུག་པ། །རྩེ་གསུམ་རལ་གྲི་གཡས་ན་འཛིན། །གཡོན་དུ་རིན་ཆེན་པདྨ་འཛིན། །

44-1-78a

གསུང་རིགས་ཟླ་བ་ལ་བཀོད་དེ། །ཚེ་དཔག་མེད་ཀྱིས་གསུམ་པོ་བརྒྱན། །ཉི་མ་རྡོ་རྗེ་འཁྱིལ་པར་གྱུར། །དམར་པོ་ཞལ་གསུམ་ཕྱག་དྲུག་པ། །པདྨ་རལ་གྲི་ཕྱག་གཡས་ལ། །གཡོན་དུ་འཁོར་ལོ་རིན་པོ་ཆེ། །རིན་ཆེན་རིགས་ཏེ་ཉི་མར་དགོད། །རིན་
ཆེན་འབྱུང་ལྡན་གྱིས་བརྒྱན་པའོ། །ཟླ་བ་རྡོ་རྗེ་འོད་དུ་གྱུར། །ཞལ་གསུམ་ཕྱག་དྲུག་དཀར་པོའི་མདོག །ཨུཏྤལ་རལ་གྲི་ཕྱག་གཡས་ལ། །རིན་ཆེན་པདྨ་གཡོན་དུ་འཛིན། །སྐུ་ཡི་རིགས་ཏེ་ཟླ་བར་དགོད། །ཚངས་པ་ཐུབ་པའི་རྡོ་རྗེར་གྱུར། །སེར་པོ་ཞལ་གསུམ་ཕྱག་དྲུག་
པ། །པདྨ་རལ་གྲི་ཕྱག་གཡས་ལ། །ནོར་བུ་འཁོར་ལོ་གཡོན་དུ་འཛིན། །སྐུ་རིགས་འདི་ཡང་ཟླ་བར་དགོད། །ལྷ་མིན་རྡོ་རྗེ་ཐགས་བཟངས་གྱུར། །ནག་པོ་ཞལ་གསུམ་ཕྱག་དྲུག་པ། །གཡས་སུ་རལ་གྲི་འཁོར་ལོ་འཛིན། །གཡོན་དུ་རིན་ཆེན་ཆུ་སྐྱེས་འཛིན། །སྐུ་ཡི་
རིགས་ནི་ཉི་མར་དགོད། །ས་གནས་རྡོ་རྗེ་སར་གྱུར་ཏེ། །སེར་པོ་ཞལ་གསུམ་ཕྱག་དྲུག་པ། །པདྨ་རལ་གྲི་ཕྱག་གཡས་ལ། །གཡོན་དུ་རིན་ཆེན་ཆུ་སྐྱེས་ཏེ། །སྐུ་རིགས་འདི་ཡང་ཟླ་བར་དགོད། །བཞི་པོ་རྟག་པས་བརྒྱན་པའོ། །སྒྱུ་མ་རྡོ་རྗེ་བྱིན་ཟ་དང་། །མ་བདག་ཤ་
རློན་ཟ་བ་དང་། །ལུས་ངན་ལོག་པར་འདྲེན་པ་དང་། །ལྷ་དམག་ཟློག་པར་བྱེད་པ་རྣམས། །ཉི་མ་མེ་ཡི་འོད་ཀྱིས་འཁོར། །རྟེན་པའི་རྒྱབ་ན་གནས་པའོ། །ལྷག་མ་ཟླ་བའི་རྒྱབ་རྟེན་ཅན། །དང་པོ་རང་འོད་རིག་མ་འཁྱུད། །རྡོ་རྗེ་སྐྱིལ་མོ་ཀྲུང་གནས་པ། །ཟབ་མོ་ཡང་དག་
གསལ་བའི་སྐུ། །རིན་ཆེན་སྣ་ཚོགས་རྒྱན་ལྡན་པ། །མཚན་དང་དཔེ་བྱད་ཀྱིས་འོད་གསལ། །རང་རང་ཕྱོགས་ཀྱི་ནམ་མཁའ་གང་། །རང་རང་དང་འདྲ་འཁོར་ཚོགས་རྣམས། །ཞལ་གསུམ་ཕྱག་དྲུག་རིག་མར་ལྡན། །ཡང་དག་བསྐྱེད་ནས་ཉེར་སྒྲུབ་སོགས། །ཡིད་འོང་གསང་བ་འདུས་
པ་ཡི། །གཞུང་གིས་བྱིན་བརླབས་སྦྱང་བར་བྱ། །དེ་བཞིན་ནམ་མཁའ་མཉམ་པ་ཡི། །འགྲོ་བ་མ་ལུས་ས་བོན་གྱིས། །བཀུག་ནས་ཞལ་ཞུགས་ཞུ་བར་གྱུར། །རྡོ་རྗེའི་ལམ་བྱུང་མཚོ་སྐྱེས་ནང་། །ཡེ་ཤེས་རིམ་པ་ལྔ་ལས་བྱུང་། །རྡོ་རྗེ་སེམས་དཔའི་མོས་པ་ཡིས། །ཞུ་གྱུར་

44-1-78b

པདྨའི་ནང་གནས་པ། །སྤྱན་སོགས་ལྷ་མོ་གླུ་དབྱངས་ཀྱིས། །བསྐུལ་བས་ཀྵི་ལ་སོགས་པ་ཡིས། །ས་བོན་ཉི་ཤུ་གཅིག་ཏུ་གྱུར། །དེ་ལས་མཚན་མ་ས་བོན་མཚན། །ས་བོན་ཕྱག་མཚན་ལས་བྱུང་བའི། །ས་སྙིང་ལ་སོགས་གཟུགས་བསྐྱེད་ནས། །སྐུ་མདོག་ཞལ་དང་ཕྱག་
མཚན་རྣམས། །སྒྲུབ་པའི་ཐབས་གསུངས་གྲགས་པ་རྣམས། །ནམ་མཁའི་ཁམས་ཀུན་སྤྲོས་པས་གང་། །དེ་ལྟར་མགྲོན་རྣམས་ཀུན་སྦྱང་ནས། །ཡོ་བྱད་རྣམས་ནི་སྟ་གོན་གནས། །གསེར་དང་དངུལ་དང་ཟངས་མའི་སྣོད། །ལྕགས་དང་ཉ་ཕྱིས་ལ་སོགས་པའི། །སྣོད་མཆོག་ནང་དུ་
ཁུར་བ་དང་། །ཟན་དང་སྡིག་མེད་ཤ་ཁྲག་དང་། །མཛེས་པའི་ལྷ་བཤོས་ཉ་ཤ་དང་། །མོན་སྲན་གྲེའུ་འོ་མ་དང་། །ཆུ་དང་མར་མེ་དྲི་མེ་ཏོག །བལྡག་རྒྱུ་བཏུང་རྒྱུ་བཟའ་རྒྱུ་སོགས། །རྒྱས་པ་མདུན་དུ་མཐོང་བྱ་སྟེ། །གླུ་དང་གར་དང་རོལ་མོ་དང་། །གདུགས་དང་རྒྱལ་མཚན་བ་དན་དང་། །
བླ་རེ་ལ་སོགས་མཆོད་པའི་ཚོགས། །དེ་བཞིན་ཕྱི་རོལ་ཀུན་བསྐོར་བཀོད། །མེད་ན་ཁམ་ཕོར་ལ་སོགས་ལ། །མོན་སྲན་གྲེའུ་ཆུ་ཟན་དང་། །གཞན་མ་དག་ཀྱང་རྙེད་པ་བཞིན། །ཆོ་ག་བཞིན་དུ་དབུལ་བར་བྱ། །འཁོར་ལོ་སྔ་མ་བཞིན་དུ་བསྒྲུབས། །པདྨ་ས་བོན་བཅུ་པོ་ལས། །
བ་སྤུའི་བུ་ག་ལས་བྱུང་བའི། །གཟུགས་སོགས་ལྷ་མོ་སྤྲོས་པ་ཡིས། །ནམ་མཁའི་ཁམས་ཀུན་རབ་བཀང་ནས། །མགྲོན་རྣམས་སོ་སོར་འཁྱུད་བྱས་ཏེ། །དེ་བཞིན་མེ་ཏོག་ལ་སོགས་པ། །ས་བོན་གྱིས་བསྐུལ་སོ་སོར་ཐེངས། །མཆོད་པ་མཉམ་ཉིད་བྱ་བའི་ཕྱིར། །སྔགས་ཀྱིས་བྱིན་
གྱིས་བརླབ་པར་བྱ། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ནས་རྡོ་རྗེ་དྲིལ་བུ་ནི། །གསོར་གསིལ་བསྐོར་བའི་བདེ་བས་ཀྱང་། །ལྷ་རྣམས་ཐམས་ཅད་དགེས་བྱའི་ཕྱིར། །ཆོས་ཐམས་ཅད་ཀྱིས་བསྟོད་པར་བྱ། །རྡོ་རྗེ་མི་བསྐྱོད་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་
པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་སྒྲོགས་ལ་ཕྱག་འཚལ་ལོ། །རྣམ་པར་སྣང་མཛད་དག་ཆེན་པོ། །རྡོ་རྗེ་ཞི་བ་དགའ་བ་ཆེ། །རང་བཞིན་འོད་གསལ་མཆོག་གི་མཆོག །སྟོན་པ་རྡོ་རྗེ་ཕྱག་འཚལ་ལོ། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མ་

44-1-79a

མེད། །རང་བཞིན་དག་པས་གོས་པ་མེད། །རྡོ་རྗེ་སྐུ་ལ་ཕྱག་འཚལ་ལོ། །རྡོ་རྗེ་དཔག་མེད་འདོད་ཆགས་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་ཐོབ། །འོད་གསལ་རྡོ་རྗེ་ཕྱག་འཚལ་ལོ། །དངོས་གྲུབ་རྡོ་རྗེ་རྫོགས་སངས་རྒྱས། །བསམ་
པ་ཐམས་ཅད་ཡོངས་རྫོགས་པ། །རང་བཞིན་དག་པས་རྡོ་རྗེ་སེམས། །རྡོ་རྗེ་སེམས་དཔའ་ཕྱག་འཚལ་ལོ། །དེ་ནས་ཡཾ་བྱུང་གཞུ་འདྲ་དང་། །རཾ་བྱུང་གྲུ་གསུམ་མེ་དཀྱིལ་དུ། །ཨ་བྱུང་པདྨ་འདབ་བརྒྱད་ལ། །རྫས་རྣམས་མི་འཆི་ལྔ་རུ་དམིགས། །དེ་སྟེང་ཟླ་བ་ཉི་མ་ལ། །བྲུཾ་
སོགས་བསམས་ནས་དེའི་འོད་ཀྱིས། །རིགས་ལྔའི་སངས་རྒྱས་བཀུག་བྱས་ཏེ། །ས་བོན་ལས་ནི་ཐིམ་གྱུར་སྟོབས། །རླུང་གིས་མེ་བུས་པད་ནང་གི། །བདུད་རྩི་ཁོལ་བས་གཅིག་གྱུར་ཏེ། །རླངས་པ་ཧཱུྃ་བྱུང་རྡོ་རྗེ་དཀར། །ལྟེ་བར་ཧཱུྃ་བསམས་ཞུ་གྱུར་པས། །པད་ནང་བདུད་རྩི་ལ་བབས་
ཏེ། །ཟླ་བ་ཤེལ་ལྟར་དག་བསམས་ནས། །སྟེང་དུ་ཨོཾ་བསམས་ཞུ་གྱུར་པས། །ནང་དུ་ཐིམ་བྱས་གསལ་བྱས་ཏེ། །འོད་ཟེར་ལྔ་ནི་རབ་འབར་བསམ། །དེ་ཉིད་གསུམ་གྱི་གསང་སྔགས་ཉིད། །རབ་ཏུ་བཟླས་པས་བྱིན་བརླབས་ཏེ། །དེ་ལྟར་སྦྱང་བྱས་གཏོར་མ་རྣམས། །ས་བོན་
གྱིས་བསྐུལ་པདྨ་ཡིས། །ནམ་མཁའི་ཁམས་ཀུན་བཀང་བྱས་ཏེ། །ལྷ་རྣམས་ཇི་སྙེད་ཕྱག་གཡོན་བཏེག །ཐེངས་པར་བྱས་ནས་སོ་སོ་ཡི། །ལྕེ་ནི་ཧཱུྃ་ལས་རྡོ་རྗེ་ཡི། །བུམ་པར་ཧཱུྃ་བསམ་དེ་འོད་ཀྱིས། །ལྕེ་འུས་ཆུ་ནི་འཐུངས་བཞིན་དུ། །བདུད་རྩི་འཐུངས་པས་ཟད་མེད་
དེ། །དེ་ཡི་སྟོབས་ཀྱིས་གཉིས་མེད་ཀྱི། །ཡེ་ཤེས་ཡོངས་སུ་མྱོང་བར་བསམ། །དེ་ནས་ཚིགས་བཅད་འདི་རྣམས་ཀྱིས། །རབ་ཏུ་བརྗོད་དེ་དབུལ་བར་བྱ། །ཨོཾ་ཕྱོགས་བཅུའི་འཇིག་རྟེན་ཁམས་གནས་པ། །དུས་གསུམ་ལས་ནི་བྱུང་བ་ཀུན། །མཁའ་དང་རྒྱ་མཚོ་སྤྲིན་གྱི་
ཚོགས། །ཤིན་ཏུ་རྒྱ་ཆེ་ཕྲ་རབ་ཀྱི། །རྡུལ་གྱི་དཀྱིལ་འཁོར་སོ་སོ་ཡི། །ནང་དུ་གནས་པའི་ཚོགས་ཆེན་པོ། །ནམ་མཁའི་དབྱིངས་དང་མཉམ་པ་ཡི། །ཆོས་ཀྱི་དབྱིངས་ཀྱི་རང་བཞིན་ཅན། །ཕྱོགས་བཅུ་སྐྱོང་བ་ཐམས་ཅད་དང་། །སེམས་ཅན་ཁམས་རྣམས་མ་ལུས་པའི། །སོ་

44-1-79b

སོ་སྦྱོར་བའི་ཚུལ་གནས་པ། །དེ་དག་ཀྱང་ནི་འདི་ལྟ་སྟེ། །རྡོ་རྗེ་མཚོན་ཆ་སྒྱུ་མ་རྡོ་རྗེ་དང་། །རྡོ་རྗེ་མེ་དང་རྡོ་རྗེ་ཟད་དུས་དང་། །རྡོ་རྗེ་གཏུན་དང་ཀླུ་ཡི་རྡོ་རྗེ་དང་། །རྡོ་རྗེ་རླུང་དང་རྡོ་རྗེ་འཇིགས་བྱེད་དང་། །རྡོ་རྗེ་མཆུ་རིངས་རྡོ་རྗེ་ཁྲོ་བོ་དང་། །རྡོ་རྗེ་འཁྱིལ་པ་རྡོ་རྗེ་འོད་ཆེན་དང་། །ཐུབ་པའི་རྡོ་རྗེ་རྡོ་རྗེ་ཐགས་
བཟངས་དང་། །ས་ཡི་རྡོ་རྗེ་འཁོར་དང་སོ་སོར་བཅས། །ས་སྙིང་ཕྱག་ན་རྡོ་རྗེ་ནམ་སྙིང་དང་། །འཇིག་རྟེན་དབང་དང་སྒྲིབ་སེལ་ཀུན་དུ་བཟང་། །གཟུགས་དང་སྒྲ་དང་དྲི་ཡི་རྡོ་རྗེ་མ། །རོ་དང་རེག་བྱ་ཆོས་དབྱིངས་རྡོ་རྗེ་དང་། །སྤྱན་མ་དང་ནི་མཱ་མ་ཀཱི་དང་ནི། །ན་བཟའ་དཀར་མོ་དམ་ཚིག་སྒྲོལ་
མ་དང་། །རྣམ་སྣང་མཛད་དང་རིན་ཆེན་དབང་ཕྱུག་དང་། །སྣང་མཐའ་ཡས་དང་དོན་ཡོད་གྲུབ་པ་རྣམས། །མི་བསྐྱོད་པ་ཡི་ཚོགས་ཆེན་ཐམས་ཅད་ལ། །བདག་གིས་མེ་ཏོག་དང་ནི་སྤོས་དང་ནི། །མར་མེ་དྲི་ཞིམ་ཞལ་ཟས་དམ་པ་དབུལ། །རོལ་མོ་ལ་སོགས་དག་དང་ལྡན་པ་ཡི། །གཏོར་
མའི་ཡོ་བྱད་འདི་ནི་ཐུགས་རྗེ་ཡིས། །བཞེས་ཤིང་དགོངས་ཤིག་བདག་ལ་རབ་ཏུ་དགོངས། །བདག་ལ་གསེར་དང་དངུལ་དང་འགྲོན་བུ་དང་། །ནོར་ཕྱུག་ཚེ་རིང་བ་དང་བཞོན་པ་དང་། །ན་ཚ་མེད་དང་དམ་ཚིག་བདེ་བ་ཀུན། །འཕྲོག་པར་བྱེད་པ་བགེགས་ཀྱི་སྡེ་དཔོན་དང་། །གདུག་དང་ཤིན་ཏུ་
གདུག་པ་ཅན་དག་དང་། །མི་དང་མི་མ་ཡིན་པ་ཐམས་ཅད་དག །རྨུགས་པར་གྱིས་ཤིག་རབ་ཏུ་རྨུགས་པར་གྱིས། །ཆིངས་ཤིག་ཆིངས་ཤིག་ཁྱེད་ཀྱིས་ཡང་དག་ཆོམ། །དེ་བས་ང་ཡི་འགྲོན་བུ་གསེར་དངུལ་དང་། །ནོར་གྱི་དབྱིག་དང་ཚེ་ནི་རིང་བ་དང་། །བཞོན་པ་དང་ནི་ན་ཚ་མེད་ལ་
སོགས། །བདེ་བ་ཆེན་པོ་རབ་ཏུ་འཕེལ་བར་མཛོད། །བདག་ནི་བྱང་ཆུབ་སྙིང་པོ་མ་ཐོབ་བར། །ཁྱེད་རྣམས་བདག་གི་གྲོགས་ལ་རྟག་ཏུ་སྤྱོན། །བདག་གི་ནད་རྣམས་དག་ནི་ཞི་བ་དང་། །བདག་ལ་བགེགས་ཀྱི་གནོད་པ་ཞི་བར་གྱིས། །ཀྱེ་བཅོམ་ལྡན་འདས་ནི་རྡོ་རྗེ་འཛིན་པ་མཆོག །
སྐྱོན་ཅན་ཀུན་གྱི་ཕྱག་རྒྱ་བཤིག་པ་པོ། །བདག་གིས་གཏོར་ཕུལ་བདག་ལ་ཞི་བ་དང་། །དུས་འདི་ནས་ནི་བསྲུང་བར་མཛད་དུ་གསོལ། །དེ་ལྟར་འདོད་བཞིན་གསོལ་བཏབ་ནས། །དེ་དག་རྣམས་ཀྱང་མཐུན་པ་རུ། །བདག་ལ་དངོས་གྲུབ་གནང་བསམས་ནས། །མགྲིན་གཅིག་ཏུ་

44-1-80a

ནི་ལེགས་སོ་ཞེས། །གསུངས་པའི་ཀུ་ཅོས་ཁམས་བཀང་བའི། །སྒྲ་ཀུན་གྲག་པར་དམིགས་ནས་སུ། །ཚིགས་བཅད་འདི་ཡིས་བཤགས་པར་བྱ། །འཇིག་རྟེན་འདི་ན་འཁོད་པའི་མགྲོན་རྣམས་ཀུན། །ཕྱོགས་སྐྱོང་སེམས་ཅན་ཀུན་དང་ལྷ་ཡི་ལྷ། །རང་
བཞིན་གྱིས་གྲུབ་སྦྱོར་བས་སྦྱངས་པ་རྣམས། །བདག་ནི་བརྩོན་དང་མི་ལྡན་བཀྲེན་ཆེན་ཏེ། །མཆོག་གཞན་ཅི་ཡང་བདག་ལ་མ་མཆིས་ན། །གཞན་དོན་དགོངས་པའི་མགོན་པོ་ཁྱེད་རྣམས་ཀྱིས། །ཐུགས་དང་མི་འགལ་རང་གི་མཐུས་བཞེས་ཤིག །བདག་ནི་རྣམ་གཡེང་རྨུགས་དང་
ལེ་ལོ་ཡིས། །སེམས་མ་འདུས་དང་མི་གསལ་མ་བསྒྲུབས་པས། །མགོན་པོ་ཁྱེད་རྣམས་ཐུགས་དང་འགལ་བ་གང་། །རང་བཞིན་བདག་གིས་ཆོས་གཟིགས་བཟོད་པར་མཛོད། །དེ་ལྟར་བརྗོད་པས་དགའ་འགྱུར་ཏེ། །འགལ་བ་དག་ནི་སོས་པར་དམིགས། །ཡང་ན་ཨ་ཡིས་
དང་པོར་རྫོགས། །བརྗོད་པ་བྱིན་བརླབས་གཏོར་མ་དབུལ། །དེ་ནས་རྡོ་རྗེ་དྲིལ་བུ་དང་ལྡན་པའི། །བདེ་བའི་དབྱིངས་རབ་བརྗོད་བྱ་སྟེ། །བསྐོར་ནས་པདྨའི་ལག་བསྐོར་ལྔ། །བྱས་ནས་སྔགས་འདིས་གཤེགས་སུ་གསོལ། །ཨོཾ་སེམས་ཅན་དོན་ཀུན་བྱས་ནས་སུ། །རང་གི་ཡུལ་དུ་
གཤེགས་སུ་གསོལ། །ཡང་ནི་བྱོན་པར་མཛོད་ཅིག་མུཿ། །གཤེགས་གསོལ་ཡི་གེ་བརྒྱ་པ་ཡིས། །ལས་ཀྱི་སྐྱོན་ཀུན་བསལ་བར་བྱ། །ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྠ་དྲྀ་ཌྷོ་མེ་བྷ་བ། ཨ་ནུ་རཀྟོ་མེ་བྷ་བ། སུ་ཏོཥྱོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷི་
མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུྃ་ཧ་ཧ་ཧ་ཧ་ཧོ། བྷ་ག་བཱན་སརྦ་ཏ་ཐཱ་ག་ཏ། བཛྲ་མཱ་མེ་མུཉྩ། བཛྲི་བྷ་བ་མ་ཧཱ་ས་མ་ཡ་སཏྭ་ཨཱཿ། དེ་ལྟར་བརྗོད་ནས་གཏོར་མ་རྣམས། །མངོན་སུམ་དུས་སུ་ཕྱོགས་བཅུར་གཏོར། །གཞན་མ་ས་ཕྱོགས་གཙང་སར་སྤུང་། །ཆུ་གནས་སེམས་
ཅན་རྣམས་དང་ནི། །མི་ནི་དབུལ་བ་རྣམས་ལ་སྦྱིན། །ཁྱི་དང་བྱ་རོག་ལ་སོགས་ལ། །ནན་ཏན་གྱིས་ནི་སྦྱིན་མི་བྱ། །དེ་བཞིན་དེ་ཡིས་རིམ་པ་ཡིས། །ཞི་བ་ལ་སོགས་ཇི་བཞིན་དུ། །རང་འདོད་ཕྱོགས་སུ་ཁ་བལྟས་ཏེ། །དེ་ཡིས་ཁ་དོག་འཁོར་ལོར་ལྡན། །སྔོན་བཞིན་ཕྱོགས་བཅུར་

44-1-80b

སྐྱོང་བ་རྣམས། །བཀུག་ནས་བསམ་པའི་ཉོན་མོངས་བསལ། །ཤེས་བྱའི་སྒྲིབ་པ་ཡང་བསལ་ནས། །དེ་དག་སྟོང་བྱས་ས་བོན་ལས། །བསྲེགས་ནས་རྗེ་དཔོན་དུ་གྱུར་པ། །ཡི་དམ་ལྷ་ཡི་ཕྱག་མཚན་སོགས། །སྦྲོ་དང་བསྡུ་བ་བྱས་ནས་སུ། །སྔ་མའི་རྟེན་ནི་གྱུར་བྱས་ནས། །ཐམས་
ཅད་ཀུན་མཁྱེན་སྐུ་ཐོབ་བྱ། །འཕྲོ་བའི་ཟེར་བྱུང་ཐུགས་དབང་གིས། །ཕྱོགས་བཅུའི་ཁམས་ཀུན་ཁྱབ་པར་བྱས། །སྐུ་དང་མཁྱེན་པ་བྱེད་པ་དབང་། །རྒྱས་བཏབ་མཚན་ཉིད་ཤེས་བྱས་ནས། །མྱུར་བ་ས་བོན་སོགས་ཚུལ་གྱིས། །མཆོད་བྱས་དགེས་བྱས་ཚིམ་པར་བྱས། །གཏོར་མ་
སྔོན་བཞིན་བྱིན་བརླབས་ནས། །ཕུལ་ཏེ་ཚིམ་བྱས་གཉིས་མེད་ཀྱི། ཡེ་ཤེས་ཡོངས་སུ་མྱོང་བར་བསམ། །ཡིད་ཀྱིས་རྡོ་རྗེ་དྲིལ་བཟུང་ནས། །མི་བསྐྱོད་ལ་སོགས་ཚིགས་བཅད་ཀྱིས། །བསྟོད་པས་དགྱེས་ཏེ་ལན་ཅིག་གསུངས། །དེ་ནས་ཕྲིན་ལས་བསྒྲུབ་པ་རྣམས། །བསྒྲུབ་
བྱའི་དོན་དུ་གསོལ་བ་བཏབ། །འདི་ཡིས་གཏོར་མ་བྱིན་བརླབས་སྔགས། །ཨོཾ་ཨཱཿབཛྲ་དྷྲྀཀ་སརྦ་དུཥྚཱ་ན་ས་མ་ཡ་མུ་དྲཾ་པྲ་བྷཾ་ཛ་ཀ་མ་མ་ཤནྟིཾ་ཀུ་རུ་སྭཱ་ཧཱ་ཧཱུྃ། དེ་བཞིན་རྒྱས་པའི་མཐའ་རུ་ཨོཾ། །པུཥྚིཾ་ཀུ་རུ་ཞེས་བྱའོ། །དབང་གི་མཐའ་རུ་ཆེ་གེ་མོ། །བ་ཤཾ་ཀུ་རུ་ཞེས་བྱའོ། །མངོན་སྤྱོད་
ལ་ནི་ཧཱུྃ་དང་ཕཊ། །མཱ་ར་ཡ་ནི་ཞེས་བྱའོ། །དགུག་པའི་མཐའ་རུ་ཛཿཞེས་བྱའོ། །བསྐྲད་པ་ལ་ནི་ཕཊ་མཐར་བཞག །ཨུཙྪ་ཏ་ཡ་ཞེས་པའོ། །དེ་བཞིན་ལས་ཀྱི་བྱེ་བྲག་གིས། །ཇི་ལྟར་འདོད་པ་བཞིན་དུ་སྦྱར། །སྔོན་དུ་གསུངས་པའི་སྔགས་རྣམས་བརྗོད། །དེ་དག་རབ་ཏུ་དགྱེས་
བསམས་ནས། །རང་གི་གནས་སུ་གཤེགས་སུ་གསོལ། །དེ་ལྟར་མ་ལུས་བསྟན་པ་ཡི། །གཏོར་མའི་ཆོ་ག་མཆོག་འདི་ནི། །བླ་མ་མཆོག་གིས་ལེགས་སྦྱངས་པའི། །སེམས་དུལ་དང་ལྡན་བརྩོན་འགྲུས་ཅན། །གསང་ཤེས་དེ་ཉིད་རིག་པ་པོ། །དཀྱིལ་འཁོར་ལ་སོགས་རྟོག་
པའི་ཚོགས། །ཤེས་ཤིང་སྒྲུབ་པར་ལྷུར་ལེན་པ། །དེ་ལ་འདི་ནི་སྦྱིན་པར་བྱ། །གང་ཞིག་བླ་མ་ལ་མི་གུས། །དད་མེད་འཇུངས་པ་རྣམ་གཡེངས་པ། །ལེ་ལོས་སེམས་སྦྱོང་རྣམ་སྤངས་པ། །བླུན་ཆེན་དེ་ལ་སྦྱིན་མི་བྱ། །བདག་གིས་གཏོར་མའི་ཆོ་ག་འདི་བྱས་དགེ་བ་ཡིས། །རྣལ་

44-1-81a

འབྱོར་འདི་སྒྲུབ་བར་ཆད་ཞི་ཞིང་འདོད་དོན་གྲུབ། །གཙུག་ལག་ཚད་མས་རྣལ་འབྱོར་ཆེན་པོའི་ལམ་བགྲོད་དེ། །བཅུ་གསུམ་དགེ་བ་རྡོ་རྗེ་འཛིན་པའི་སར་འགྲོ་ཤོག །སློབ་དཔོན་ཆེན་པོ་བི་ཏ་པཱ་དས་མཛད་པ་རྫོགས་སོ།།      །།རྒྱ་གར་གྱི་མཁན་པོ་ཀ་མ་ལ་གུ་ཧྱ་
དང་། བོད་ཀྱི་ལོ་ཙཱ་བ་ཆེན་པོ་མངའ་བདག་ལྷ་ཡེ་ཤེས་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།།      །།༄༅༅། །རྒྱ་གར་སྐད་དུ། རཏྣ་མ་ཏི་ནཱ་མ་སཱ་དྷ་ནཾ། བོད་སྐད་དུ། མི་ཤིགས་པའི་རིན་པོ་ཆེ་ཞེས་བྱ་བའི་སྒྲུབ་ཐབས། ཐམས་ཅད་མཁྱེན་པ་
ལ་ཕྱག་འཚལ་ལོ། །གང་ཞིག་དྲི་མེད་གཟི་བརྗིད་ལྡན། །སྤྲོས་པའི་རྣམ་པ་ཀུན་བྲལ་ཏེ། །མཐའ་ཡས་རིགས་ཀྱི་སྤྲུལ་འཕྲོ་བ། །འཇམ་དབྱངས་དེ་བཏུད་བླ་མ་ལའང་། །བློ་གྲོས་གཞན་ཡང་དད་པ་ཡིས། །འདུས་པའི་དོན་གྱིས་དེ་བཞིན་ཉིད། །རང་གཞན་དྲན་པར་བྱེད་པའི་དོན། །
མི་ཤིགས་རིན་ཆེན་བཤད་པར་བྱ། །དེ་ལ་ཡང་དག་པའི་མན་ངག་དང་བྲལ་བ་རྣམས་ནི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་སྟོན་ཅིང་ཤེས་ཀྱང་། བསྐལ་པ་བྱེ་བ་ཁྲག་ཁྲིག་གི་བར་དུ་བསྒྲུབས་ཀྱང་བླ་ན་མེད་པའི་སངས་རྒྱས་རྡོ་རྗེ་འཛིན་པའི་གོ་འཕོང་ཐོབ་པར་མི་ནུས་སོ། །དེའི་ཕྱིར་བདག་
གིས་ཀྱང་བདག་ཅག་གི་བླ་མ་ཆེན་པོ་སངས་རྒྱས་ཡེ་ཤེས་ཀྱི་ཞལ་སྔ་ནས་ཀྱི་རིམ་པ་ནས་འོངས་པའི་རླུང་གི་དེ་ཉིད་ཀྱི་སྒོ་ནས་མི་ཤིགས་པའི་རིན་པོ་ཆེ་སྒྲུབ་པའི་ཐབས་ཅུང་ཟད་སྟོན་པས་སྐྱེས་བུ་ཆེན་པོ་རྣམས་ཀྱིས་འབད་དེ་གཟུང་བར་བྱའོ། །དེ་ལ་དངོས་པོ་ཐམས་ཅད་ཀྱི་མཐའི་དེ་
བཞིན་ཉིད་ནི་ཟབ་མོ་དང་གསལ་བ་གཉིས་སུ་མེད་པའི་དེ་བཞིན་ཉིད་དེ། དེ་ཡང་ཆོས་ཀྱི་དབྱིངས་སྤྲོས་པའི་མཐའ་ཐམས་ཅད་དང་བྲལ་བ་ནམ་མཁའི་དཀྱིལ་ལྟར་རྣམ་པར་དག་པའི་ངོ་བོ། །དེ་ལྟ་བུའི་རྣམ་པར་དག་པའི་ངོ་བོ་ལ་ཐོག་མ་མེད་པའི་དུས་ནས་སེམས་ཅན་རྣམས་ཀྱིས་ཕྱིན་ཅི་
ལོག་ཏུ་བརྟགས་པས་རླུང་གི་ཁམས་བསྒྲུབས་ཏེ། དེ་ལས་མེ། དེ་ལས་ཆུ། དེ་ལས་སའི་ཁམས་བསྒྲུབས་པས་ཕུང་པོ་དང་སྐྱེ་མཆེད་དང་ཁམས་སུ་སྣང་ཞིང་འཁོར་བའི་ཆོས་ཀྱིས་རྣམ་པར་སྣང་ངོ་། །དེ་ལྟར་སྣང་བའི་དུས་ཉིད་ན་ཡང་རྣམ་པར་དག་པའི་དོན་ལ་ནི་གཡོ་བ་རྡུལ་ཙམ་

44-1-81b

ཡང་མེད་དོ། །དེ་ལྟ་བུའི་དོན་དེ་སེམས་ཅན་ཐམས་ཅད་ལ་ཀུན་རྫོབ་ཀྱི་རྣམ་པའི་གཟུགས་ཀྱི་གནས་སུ་རྣམ་པར་གནས་ཀྱང་བླ་མའི་ཞལ་ལས་བསྟན་པ་མེད་པར་རྟོགས་པར་མི་འགྱུར་རོ། །དེ་བས་ན་ལྷན་ཅིག་བྱེད་པའི་སློབ་དཔོན་གྱི་བྱིན་གྱིས་བརླབས་པས་རླུང་གི་སྒོ་ནས་
སྤྲོས་པ་དང་བྲལ་བའི་ངོ་བོ་གནས་དང་ངལ་སོ་བའི་དེ་ཁོ་ན་ཉིད་བླ་མའི་ཞལ་ལས་རྟོགས་པར་འགྱུར་རོ། །རྟོགས་པ་དེ་བསྒོམས་པས་ཕྱིན་ཅི་ལོག་ཏུ་སྣང་བའི་ཕུང་པོ་ལ་སོགས་པ་རིམ་གྱིས་ལོག་པས་ཡང་དག་པའི་ཕུང་པོ་ལ་སོགས་པ་ཟབ་པ་དང་གསལ་བ་དབྱེར་མེད་པའི་ངོ་བོ་འཐོབ་
པའི་རྟགས་རྣམས་རྙེད་པར་འགྱུར་རོ། །དེ་རྙེད་པས་བསྒོམ་པ་ལ་སོགས་པ་དང་བཅས་པས་མི་གནས་པའི་མྱ་ངན་ལས་འདས་པ་ཐོབ་པར་འགྱུར་ཏེ། དེ་བས་ན་ཇི་སྐད་བཤད་པའི་བྱ་བས་དེ་རྟོགས་པར་བྱ་སྟེ། དེ་ཕྱིན་ཆད་དགོན་པའམ་གང་ཡང་རུང་བའི་གནས་སུ་རྣམ་པར་གནས་
ནས། སྔོན་དུ་བྱ་བར་འོས་པ་ཐམས་ཅད་ཚོགས་པར་བྱས་ཏེ། ཐབས་འདིར་ནི་རིམ་པ་གཉིས་པའི་དོན་བསྒོམ་པར་བྱའོ། །དེ་ཡང་དང་པོ་སེམས་ཅན་ཐམས་ཅད་ལ་མི་བཏང་བའི་སྙིང་རྗེ་ཆེན་པོའི་སེམས་བསྐྱེད་དེ། དེ་ནས་རང་གི་ཐུགས་ཀ་ནས་ཡེ་ཤེས་སེམས་དཔའི་ས་བོན་དེ་
བཞིན་གཤེགས་པ་ཐམས་ཅད་ཀྱི་ཡེ་ཤེས་རིམ་པ་དང་པོ་རྣམས་ལ་ཡི་གེའི་གཟུགས་སུ་སྣང་བ་གཞོམ་དུ་མེད་པ་དེ་ལས། ཡི་གེ་ཁ་དོག་ལྔའི་འོད་ཟེར་སྟེང་གི་སྒོའི་གཡས་ནས་བྱུང་སྟེ། དེའི་རྩེ་ལས་དཀྱིལ་འཁོར་དང་ལྡན་པའི་དེ་བཞིན་གཤེགས་པ་སྤྲོས་པས་ཕྱོགས་བཅུའི་
སེམས་ཅན་ཐམས་ཅད་ཀྱི་ཀུན་དུ་རྟོག་པ་རླུང་གི་བཞོན་པ་དང་ལྡན་པ་རྣམས། དེ་རྣམས་བླ་མ་ལྟ་བུར་གྱུར་པ་ལ་ཐིམ་པས་རྣམ་པར་དག་པར་བྱས་ཏེ། དེ་ཉིད་སླར་བསྡུས་ཏེ་ཡེ་ཤེས་ཀྱི་ངོ་བོར་གྱུར་ཏེ་གཡོན་ནས་ཞུགས་ཏེ། མཚན་མའི་དབུས་ཀྱི་བུམ་པའི་ས་བོན་ལ་ཐིམ་པས། དེ་སངས་
རྒྱས་ཐམས་ཅད་ཀྱི་ཡོན་ཏན་བསྐྱེད་པའི་རིན་པོ་ཆེ་དངོས་པོ་ཐམས་ཅད་ལ་ཁྱབ་པའི་རང་བཞིན་མི་ཤིགས་པའི་ཐིག་ལེ་འོད་ཟེར་ལྔ་དང་ལྡན་པ་ཙ་ན་ཀའི་འབྲུ་ཚད་ཙམ་དུ་གྱུར་པར་བསམ་མོ། །དེའི་འོད་ཟེར་གྱིས་གནས་དང་ཡེ་ཤེས་སེམས་དཔའ་ལ་སོགས་པ་གསལ་བར་བྱས་ནས། བདག་

44-1-82a

གི་མཐེ་བོའི་རྩ་བ་དང་། རྗེ་ངར་དང་། བརླ་གཉིས་དང་། གསང་བའི་གནས་དང་། ལྟེ་བ་དང་། གསུས་པ་དང་། ནུ་མ་གཉིས་དང་། ལག་རྩེ་དང་། མགྲིན་པ་དང་། མཆུ་དང་། འགྲམ་པ་དང་། མིག་གཉིས་དང་། རྣ་བའི་རྩ་དང་། སྤྱི་བོ་དང་། ལུས་ཀུན་གྱི་
ནང་གསལ་བར་བྱས་ཏེ། དེ་དག་ན་གནས་པའི་བྱང་ཆུབ་ཀྱི་སེམས་སྒྲ་ཡིག་བཅུ་དྲུག་གི་གཟུགས་སུ་སྣང་བ་བཀུག་སྟེ། ཐིག་ལེར་ཞུགས་པར་བསམ་མོ། །དེ་བསམས་པ་ཙམ་གྱིས་དེའི་ནང་དུ་ལྷ་བཅུ་དགུ་རྟེན་དང་བརྟེན་ཅན་ལྷག་པར་མོས་པས་བསྒོམས་ཏེ། དེའི་དབུས་ཀྱི་གཙོ་
བོའི་ཐུགས་ཀར་གོང་མ་ལྟར་ཡེ་ཤེས་ཀྱི་ཐིག་ལེ་བསྒོམས་ནས། དེའི་འོད་ཀྱི་རིམ་པས་རྟེན་གྱི་ཐིག་ལེའི་བར་གསལ་བར་བྱའོ། །དེ་ནས་གནས་བཅུ་དྲུག་ནས་འོད་ཟེར་གཞག་པ་ཕྱུང་སྟེ། དེས་དཀྱིལ་འཁོར་གྱི་འཁོར་ལོ་ལ་སོགས་པ་གསལ་བར་བྱས་ནས། ཕྱོགས་བཅུའི་འཇིག་རྟེན་
གྱི་ཁམས་ན་བཞུགས་པའི་དེ་བཞིན་གཤེགས་པ་ཐམས་ཅད་ཀྱི་ཞལ་དུ་ཞུགས་ནས་མི་ཤིགས་པའི་ཐིག་ལེར་སོང་ནས་ཡེ་ཤེས་ཀྱི་བདུད་རྩི་བླངས་ཏེ། རྡོ་རྗེའི་ལམ་ནས་བྱུང་སྟེ། འོ་མའི་རྒྱུན་ལྟར་འདུ་ཞིང་ཐབས་དང་ཤེས་རབ་ཀྱི་དབྱེ་བས། སྣ་བུག་གཡས་གཡོན་དུ་ཞུགས་ཏེ་ཡེ་
ཤེས་ཀྱི་ཐིག་ལེ་ལ་ཐིམ་པས། དེ་འཛག་པའི་ངང་ཚུལ་དང་ལྡན་པ་དེ་ལ་སེམས་བཟུང་སྟེ། ཡང་གོང་གི་རིམ་པས་སྤྲོ་བ་དང་བསྡུ་བ་དང་གཟུང་བ་བྱས་པས་རྟགས་རྣམས་གདོན་མི་ཟ་བར་རྙེད་པར་འགྱུར་རོ། །དེ་རྙེད་པས་སངས་རྒྱས་རྡོ་རྗེ་མཆོག་འཛིན་པ་དང་འདྲ་བར་འགྱུར་རོ། །མི་
ཤིགས་པའི་ཐིག་ལེ་བསྒོམ་པའི་ཆོ་གའོ། །གལ་ཏེ་དེས་རྟགས་རྙེད་པར་མ་གྱུར་ན་དེའི་ཚེ་མི་ཤིགས་པའི་ཐིག་ལེ་དེ་ཉིད་རིམ་པ་འདིས་བསྒོམ་པར་བྱའོ། །དེ་ཡང་དང་པོར་རང་གི་ཡེ་ཤེས་སེམས་དཔའི་ས་བོན་གྱི་འོད་ཟེར་གྱི་ལྕགས་ཀྱུས་དཀྱིལ་འཁོར་འཁོར་ལོ་དང་ལྡན་པའི་དེ་
བཞིན་གཤེགས་པ་རྣམས་བསྡུས་ཏེ། རང་གི་སྙིང་གར་བཙུད་པས་ཐམས་ཅད་ཞུ་སྟེ་འཛག་པའི་ངང་ཚུལ་དང་ལྡན་པས་ཡང་རྡུལ་དང་མུན་པ་དང་སྙིང་སྟོབས་ཀྱི་ཚུལ་དུ་སྙིང་གའི་པདྨ་ལ་བབས་ནས། རང་གི་རྡོ་རྗེའི་བུམ་པའི་དཀྱིལ་དུ་གནས་པ་ལས་དེ་འབྱུང་བ་ལྔ་དང་ཡེ་ཤེས་ལྔའི་ངོ་བོའི་

44-1-82b

རང་གི་མཚན་མ་ཕྲ་མོ་འོད་ཟེར་ལྔ་དང་ལྡན་པར་བསམས་ནས། དེའི་བུམ་པ་ལ་ལྷག་པར་མོས་པས། རྟེན་དང་བརྟེན་ཅན་གྱི་འཁོར་ལོ་ཐིག་ལེ་དང་བཅས་པ་བསྒོམ་པར་བྱའོ། །གལ་ཏེ་དེར་སེམས་བྱིང་བར་སོང་བས་སྐྱོ་བར་གྱུར་ན་ནང་གི་གསང་བའི་རྡོ་རྗེ་ལས་ཕྱུང་སྟེ། ལྷ་མོའི་པདྨའི་གེ་
སར་ལ་བཞག་ནས་བསྒོམ་པར་བྱའོ། །དེའི་ཐིག་ལེ་ལས་གོང་གི་རིམ་པ་ལྟར་འོད་ཟེར་སྣ་ལྔ་པ། སྟེང་གི་སྒོ་ནས་བྱུང་བ་དང་སླར་བདུད་རྩི་བཀུག་ནས་སླར་འཇུག་པའི་རིམ་པ་བྱེད་པའོ། །དེ་དབུགས་དགག་སྟོང་གི་ཡན་ལག་གོ། །དེ་ནས་དེ་ལྟ་བུའི་གསང་བའི་ཐིག་ལེ་ལ་གོང་གི་རིམ་པ་
ལྟར་སེམས་དལ་བུའི་བཟུང་བས་དངོས་པོ་མེད་པའི་གནས་སུ་འགྱུར་རོ། །དེ་ཡང་བཟུང་བ་ཡང་དང་ཡང་དུ་གོམས་པའི་སྟོབས་ཀྱིས་ཕྱིན་ཅི་ལོག་གིས་རྣམ་པར་ལོག་པས་སྨིག་རྒྱུ་ལྟ་བུ་བྱུང་བ་ནི་རྟགས་དང་པོའོ། །ཆུ་རྣམ་པར་ལོག་པས་དུ་བ་ལྟ་བུ་བྱུང་བ་ནི་རྟགས་གཉིས་པའོ། །མེ་རྣམ་
པར་འགྱུར་བས་སྲིན་བུ་མེ་ཁྱེར་ལྟ་བུ་བྱུང་བ་ནི་རྟགས་གསུམ་པའོ། །རླུང་རྣམ་པར་ལོག་པས་མར་མེ་ལྟར་འབར་བ་ནི་རྟགས་བཞི་པའོ། །རྣམ་པར་ཤེས་པ་ལོག་པས་ཟབ་མོ་དང་གསལ་བ་གཉིས་སུ་མེད་པའི་ནམ་མཁའ་ལྟར་གསལ་བ་ནི་རྟགས་ལྔ་པའོ། །གཟུང་བའི་ཡན་ལག་
གོ། །དེ་ལྟར་མཚན་མ་ལྔ་ཐོབ་ནས་དེ་ཀུན་ཁྱབ་པར་བྱ་བའི་ཕྱིར། རྡོ་རྗེའི་ལམ་ནས་ནམ་མཁའི་ཁམས་སུ་ཇི་སྐད་གསུངས་པའི་ཆོ་གས་སྤྲོ་བར་བྱའོ། །སྤྲོ་བ་དེ་ལས་སྔོན་དུ་མཐོང་བའི་དོན་རྗེས་སུ་དྲན་པ་བསྐྱེད་དེ། དེ་ཡང་སངས་རྒྱས་རྗེས་སུ་དྲན་པ་དང་། ཆོས་རྗེས་སུ་དྲན་པ་དང་། 
རྡོ་རྗེ་རྗེས་སུ་དྲན་པ་དང་། རིགས་རྗེས་སུ་དྲན་པ་དང་། ཁྲོ་བོ་རྗེས་སུ་དྲན་པ་དང་། ལྷ་རྗེས་སུ་དྲན་པ་ནི། དཀྱིལ་འཁོར་གྱི་འཁོར་ལོ་རེ་རེའི་དབང་དུ་བྱས་པ་ཡིན་ནོ། །གཅིག་པ་ལ་ཡང་རྟོགས་པར་བྱའོ། །ལྷ་རྗེས་སུ་དྲན་པ་ཀུན་ལ་ཡང་རྟོགས་པར་བྱའོ། །དེ་ཡང་རྗེས་སུ་དྲན་པ་ལྔ་ནི། 
སྐུ་ལ་སོགས་པའི་དཀྱིལ་འཁོར་གྱི་འཁོར་ལོ་སྔོན་དུ་བསྟན་པ་དེ་སྤྲོ་བ་དང་བསྡུ་བས་གསལ་བར་བྱའོ། །དམ་ཚིག་རྗེས་སུ་དྲན་པ་ནི་དེ་དང་སྤྲོ་བ་ལས་སྔགས་བརྗོད་པ་དང་། ཆོ་ག་དང་པོའི་དོན་རྗེས་སུ་དྲན་པའོ། །དཀྱིལ་འཁོར་རྗེས་སུ་དྲན་པ་ནི་ཆོ་ག་གཉིས་པ་ལ་སོགས་པའི་དཀྱིལ་

44-1-83a

འཁོར་དེ་དང་དེ་སྤྲོ་བ་ལས་དྲན་པའོ། །སྐུ་དང་གསུང་དང་ཐུགས་རྗེས་སུ་དྲན་པ་དང་སེམས་ཅན་རྗེས་སུ་དྲན་པ་ནི། སྐུ་དང་གསུང་དང་ཐུགས་རྡོ་རྗེ་བསྒོམ་པ་རྣམ་པར་སྨོན་པ་སྟེ། སྤྲོས་པ་ལས་རྗེས་སུ་དྲན་པའོ། །སྔགས་ཐམས་ཅད་ཀྱི་སྤྱི་གཟུགས་རྗེས་སུ་དྲན་པ་ནི་
རྡོ་རྗེ་སེམས་དཔའ་དང་རང་གི་ལྷའི་གཟུགས་ལོངས་སྤྱོད་བཞིས་བརྒྱན་པ་སྤྲོས་པ་ལས་རྗེས་སུ་དྲན་པའོ། །དམ་ཚིག་རྗེས་སུ་དྲན་པ་ནི་བདུད་རྩིས་བྱིན་གྱིས་བརླབ་པ་ལ་སོགས་པ་ལས་རྗེས་སུ་དྲན་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་དང་། མ་སྐྱེས་པ་རྗེས་སུ་དྲན་པ་ནི། སྤྲོས་པ་དེ་དག་
ཀྱང་ཅི་ཡང་མེད་ཅེས་བྱ་བ་དང་། དེ་གཉིས་སུ་མེད་པའི་ངོ་བོ་ཡིན་པས་རྗེས་སུ་དྲན་པའོ། །ཞེ་སྡང་གི་རིགས་ལ་སོགས་པའི་མཆོད་པ་རྗེས་སུ་དྲན་པ་ནི། རང་གི་རིགས་ཀྱི་བུ་མོ་འབྲིང་གི་ཡན་ལག་བཞིས་དག་པ་ནི། རྗེས་སུ་ཆགས་པས་མཉེས་པར་བྱས་པའི་དོན་རྗེས་སུ་དྲན་པའོ། །གང་
དག་གཟུང་བ་ལས་བློ་ཉམས་པའི་བློ་གྲོས་དམན་པ་རྣམས་ཀྱིས་བཅུ་དྲུག་པོ་འདི་བྱའོ་ཞེས་གཞན་དག་འཆད་དོ། །རྗེས་སུ་དྲན་པ་བཅུ་དྲུག་པོ་འདི་ཕྲ་མོའི་རྣལ་འབྱོར་པས་གཞན་དང་གཞན་དུ་སྤྲོས་པ་ལས་གྲུབ་པར་ཤེས་པར་བྱའོ། །དེ་བཞིན་བསྡུ་བ་ཡང་ཤེས་པར་བྱའོ། །རྗེས་སུ་དྲན་པའི་
ཡན་ལག་གོ། །གསང་བའི་ཐིག་ལེ་བསྒོམ་པའི་ཆོ་གའོ། །དེ་ལྟར་དེས་རྟགས་རྙེད་པར་གྱུར་ནས་རིམ་པ་འདིས་སྤྲུལ་པའི་ཐིག་ལེ་སྤྲོ་བསྡུ་བྱའོ། །དེ་ཡང་སྤྱི་བོའི་གནས་སུ་རླུང་གི་དཀྱིལ་འཁོར་དུད་ཀ་ལ་ཨོཾ་དཀར་པོ་འོང་བའི་རང་བཞིན་བསམ་མོ། །མགྲིན་པའི་གནས་སུ་ཆུའི་དཀྱིལ་འཁོར་
དཀར་པོ་ལ་ཨཱཿ་དམར་པོ་གནས་པའི་རང་བཞིན་བསམ་མོ། །ཐུགས་ཀྱི་གནས་སུ་མེའི་དཀྱིལ་འཁོར་དམར་པོ་ལ་ཧཱུྃ་ནག་པོ་འགྲོ་བའི་རང་བཞིན་བསམ་མོ། །ནུ་མའི་བར་དུ་དབང་ཆེན་གྱི་དཀྱིལ་འཁོར་ལ་རང་གི་ལྷའི་ས་བོན་འབྱུང་བ་དང་འཇུག་པ་དང་། གནས་པ་ལས་གྲོལ་བའི་ངོ་
བོའོ། །དེ་ཉིད་ལས་གཡས་ནས་འབྱུང་བའི་རླུང་གི་དཀྱིལ་འཁོར་དུད་ཀ་ལས། ཧཱུྃ་གི་རང་བཞིན་འགྲོ་བ་སྣང་སྲིད་ཀྱི་ཆོས་ཀུན་ཁྱབ་ཅིང་དག་པར་བྱས་ནས་བདུད་རྩིའི་རང་བཞིན་ཨོཾ་གྱི་ངོ་བོ་འོང་བས་ནང་གི་ཆོས་ཀུན་དག་པར་བྱས་ནས་ཞུགས་ཏེ། ཨཱཿའི་ངོ་བོས་ཅུང་ཟད་གནས་པར་བྱས་

44-1-83b

ཏེ། དེ་ལ་རང་གི་ལྷའི་དེ་ཉིད་དལ་བུ་དལ་བུས་དངོས་པོ་མེད་པའི་གནས་སུ་འགྱུར་རོ། །དེ་བཞིན་དུ་གཡོན་པ་ནས་བྱུང་བའི་ཆུའི་དཀྱིལ་འཁོར་དཀར་པོ་ལས། ཧཱུྃ་གི་རང་བཞིན་སྤྲོ་བ་དང་། ཨོཾ་གྱི་རང་བཞིན་བསྡུ་བ་དང་། ཨཱཿའི་རང་བཞིན་གནས་པ་ལ་རང་གི་དེ་བཞིན་བཟུང་བ་
གོང་མ་བཞིན་ནོ། །དེ་ལྟར་གཉི་ག་ལས་དྲག་ཏུ་འབྱུང་བ་མེའི་དཀྱིལ་འཁོར་དམར་པོ་ལས།  ཧཱུྃ་གི་ངོ་བོ་སྤྲོ་བ་དང་། ཨོཾ་གྱི་ངོ་བོ་བསྡུ་བ་དང་། ཨཱཿའི་ངོ་བོ་གནས་པ་ལས་རང་གི་ངོ་བོ་དེ་ཉིད་བཟུང་བ་གོང་མ་བཞིན་ནོ། །དེ་བཞིན་དུ་གཉི་ག་ལས་དལ་བུས་འབྱུང་བའི་དབང་ཆེན་གྱི་
དཀྱིལ་འཁོར་སེར་པོ་ལས། ཧཱུྃ་གི་ངོ་བོ་སྤྲོ་ཞིང་། ཨོཾ་གྱི་ངོ་བོ་བསྡུ་ཞིང་། ཨཱཿའི་ངོ་བོ་གནས་པ་ལས་འབྱུང་བ་དང་། འཇུག་པ་དང་། གནས་པ་ལས་གྲོལ་བའི་ཡེ་ཤེས་རྙེད་པར་བྱེད་པར་སོམ་ཉི་མི་བྱའོ། །དེ་ལྟར་ཕྱག་རྒྱ་བཞིའི་དབྱེ་བས་རེ་རེ་ལ་ཉིས་བརྒྱ་ཉི་ཤུ་རྩ་ལྔར་རྣམ་པར་ཟློ་སྟེ། 
དེ་འཕོ་བ་རེ་རེ་ལ་དགུ་བརྒྱར་རྣམ་པར་བསྒྲེས་པའི་ཉི་ཤུ་རྩ་བཞིས་ཁྲི་ཁྲག་གཉིས་དང་། སྟོང་ཕྲག་གཅིག་དང་དྲུག་བརྒྱར་དབང་ཕྱུག་ཆེན་པོའི་རྣལ་འབྱོར་པས་ཉིན་མཚན་དུ་བཟླས་པ་བྱེད་དོ། །བཟླས་པ་དེས་ཆོས་ཐམས་ཅད་སྒྱུ་མའམ། སྨིག་རྒྱུ་དང་། བྲག་ཅ་དང་། མགལ་མེའི་འཁོར་ལོ་
དང་། དྲི་ཟའི་གྲོང་ཁྱེར་དང་། སྤྲུལ་པ་དང་། མིག་འཕྲུལ་དང་། གཟུགས་བརྙན་དང་། ཆུ་ཟླ་ལ་སོགས་པའི་སྐུའི་ངོ་བོར་ཐམས་ཅད་རྟོགས་ཤིང་ཤེས་ནས་རྣམ་པར་གནས་ཏེ། དེ་ས་བཅུའི་དབང་ཕྱུག་རྣམས་དང་སྐལ་བ་ལྷག་པར་མཉམ་སྟེ། རྣལ་འབྱོར་རྣམས་ཀྱིས་དོན་དེ་ལ་རབ་ཏུ་
འབད་དེ་ནན་ཏན་བྱའོ། །དེ་ལྟ་བུའི་རང་བཞིན་གྱིས་བཟླས་པ་ལ་སེམས་ཅན་ཐམས་ཅད་ཐོག་མ་མེད་པའི་དུས་ནས་བཟླས་པ་བྱེད་ཀྱང་གང་བླ་མའི་མན་ངག་མེད་པར་ཡང་དག་པར་མི་ཤེས་སོ། །དེ་བས་ན་བླ་མ་ཡང་དག་པར་མཉེས་པར་བྱས་ཏེ། དགའ་བྲལ་གྱི་ངོ་བོ་རྟོགས་པར་བྱས་ནས། གོང་
གི་རིམ་པས་བསྒོམས་ན་ཇི་སྐད་དུ་གསུངས་པའི་ཡོན་ཏན་དུ་འགྱུར་རོ། །དེ་བས་ན་དེ་ཡོངས་སུ་ཤེས་པས་རྣལ་འབྱོར་པའི་བར་ཆད་ཀྱི་ངག་གི་བཟླས་པ་རྣམས་ཡོངས་སུ་སྤང་བར་བྱའོ། །འོན་ཀྱང་དེ་ལ་གནས་པ་ནི་གལ་ཏེ་ཅུང་ཟད་ཀྱང་ཡོད་པ་མ་ཡིན་ནོ། །དེ་མི་ཤིགས་པས་འདིའི་དོན་རྡོ་རྗེ་འཆང་

44-1-84a

ཆེན་པོའི་ངོ་བོ་གང་གིས་ཇི་ལྟར་བཟླས་ཏེ། གླང་པོ་རྙེད་ན་གླང་པོའི་རྗེས་ཚོལ་བ་ལྟ་བུའོ། །དེ་བས་ན་རྡོ་རྗེ་འཆང་གི་བཟླས་པ་འདི་ལ་རྣལ་འབྱོར་པས་འབད་པར་བྱས་པས་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་པའི་གཉིད་ཅུང་ཟད་འོང་བས་བཞི་པར་འགྱུར་
བའི་རྟགས་ལན་གྲངས་མང་དུ་རྙེད་པར་འགྱུར་རོ། །དེ་སྐད་དུ་ལེའུ་བཅོ་ལྔ་པ་ལས། བསམ་གཏན་བཟླས་ལ་འབད་པ་ཡིས། །སྒྲུབ་པ་པོས་ནི་རྟག་ཏུ་མཐོང་། །ཞེས་སོ། །དེ་མཐོང་བས་ཇི་སྐད་གསུངས་པའི་ཆོ་ག་ལ་གནས་པས། རྣམ་པ་ཐམས་ཅད་མཁྱེན་པའི་བྱང་ཆུབ་ཚེ་འདི་ཉིད་ལ་སྐད་ཅིག་
གིས་ཐོབ་ནས། རོ་མྱང་བའི་མཚན་ཉིད་བརྒྱད་དང་ལྡན་པར་སྲིད་པ་ཇི་སྲིད་ཀྱི་བར་དུ་བཞུགས་པར་མཛད་དོ། །སྤྲུལ་པའི་ཐིག་ལེ་བསྒོམ་པའི་ཆོ་གའོ། །དེ་བས་ན་གཞུང་འདི་ལས་རིམ་པ་གཉིས་སྟོན་ཏེ། བསྐྱེད་པའི་རིམ་པ་དང་། རྫོགས་པའི་རིམ་པའོ། །བསྐྱེད་པའི་རིམ་པ་དེ་ལ་གཉིས་
ཏེ། བསྐྱེད་པའི་རིམ་པ་དང་། རྫོགས་པའི་རིམ་པའོ། །རྫོགས་པའི་རིམ་པ་ལ་ཡང་དེ་བཞིན་ཏེ། བསྐྱེད་པའི་རིམ་པ་ནི་ཐིག་ལེ་གསུམ་པའི་ཆོ་གའོ། །རྫོགས་པའི་རིམ་པ་ནི་དེས་མཚོན་པའི་ཇི་བཞིན་པའི་དོན་ཏོ། །རིམ་པ་གཉིས་ཀྱི་བྱེ་བྲག་གིས་ལྷའི་སྐུ་ཡང་རྣམ་པ་གཉིས་ཏེ། སྔགས་
ཀྱི་སྐུ་དང་ཡེ་ཤེས་ཀྱི་སྐུའོ། །ཡེ་ཤེས་ཀྱི་སྐུ་ལ་ཡང་རྣམ་པ་གཉིས་ཏེ། ཡེ་ཤེས་ཅུང་ཟད་དག་པའི་སྐུ་དང་། ཤིན་ཏུ་རྣམ་པར་དག་པའི་སྐུའོ། །ཤིན་ཏུ་རྣམ་པར་དག་པའི་སྐུ་མཚན་ཉིད་ཀྱི་ཚུལ་དུ་གནས་པས་མི་སླུ་བའི་སྐུ་དང་། ཇི་བཞིན་པའི་འབྲས་བུའི་སྐུའོ། །དེ་ཡང་སྦྱོར་བ་བདུན་ཏེ། དཔེ་མེད་
བདེ་རྫོགས་ཀྱི་སྐུ་དང་། གཉིས་སུ་མེད་པ་དང་། བདེ་བ་ཆེན་པོ་དང་། རང་བཞིན་མེད་པ་དང་། ཐུགས་རྗེ་རྒྱས་པ་དང་། བར་ཆད་མེད་པ་དང་། འགོག་པ་མེད་པའི་སྦྱོར་བ་སྟེ། བླ་མ་མཉེས་པར་བྱ་བ་ལས་ཡང་དག་པར་ཤེས་པར་བྱའོ། །ཉག་གཅིག་རྟོགས་པའི་སྤྱོད་ཡུལ་མཆོག། །ཇི་
བཞིན་པ་ཡི་དེ་ཁོ་ན། །བདག་འདྲ་བླུན་པོས་མི་དཔོགས་པས། །གཞག་པར་བྱ་བར་འོས་པ་ཡིན། །འོན་ཀྱང་ཡང་དག་ལམ་སྟོར་ལ། །ཕན་སྙམ་ནས་ནི་དད་ཙམ་གྱིས། །ཅུང་ཟད་ཙམ་དུ་བསྡུས་པ་ལ། །དཔའ་བོ་མཁས་པས་བཟོད་པར་མཛོད། །འགྲོ་བ་ཐམས་ཅད་དངོས་པོ་ཡིས། །

44-1-84b

གཉིས་མེད་དེ་ཉིད་རབ་རྟོགས་ནས། །འབྲས་བུ་རྡོ་རྗེ་འཆང་བར་ཤོག །མི་ཤིགས་པའི་རིན་པོ་ཆེ་ཞེས་བྱ་བའི་སྒྲུབ་ཐབས། སློབ་དཔོན་ཆེན་པོ་བི་ཏ་པཱ་དས་མཛད་པ་རྫོགས་སོ།།      །།རྒྱ་གར་གྱི་མཁན་པོ་ཀ་མ་ལ་གུ་ཧྱ་དང་། བོད་ཀྱི་ལོ་ཙཱ་བ་ཆེན་པོ་མངའ་བདག་ལྷ་ཡེ་ཤེས་རྒྱལ་མཚན་གྱིས་
བསྒྱུར་ཅིང་ཞུས་ཏེ་གཏན་ལ་ཕབ་པའོ།།༄༅༅། །རྒྱ་གར་སྐད་དུ། ཨཱཏྨ་ཨརྠ་སིདྡྷ་ཀ་ར་ནཱ་མ་ཡོ་ག་ཀྲི་ཡ་ཀྲ་མ། བོད་སྐད་དུ། བདག་གི་དོན་གྲུབ་པར་བྱེད་པ་ཞེས་བྱ་བ་རྣལ་འབྱོར་གྱི་བྱ་བའི་རིམ་པ། དཔལ་རྡོ་རྗེ་སེམས་དཔའ་ཡེ་ཤེས་ཀྱི་སྐུ་ཅན་ལ་ཕྱག་འཚལ་
ལོ། །འཇིག་རྟེན་སྤྱོད་ལས་ངེས་གྲོལ་ནམ་མཁའ་དང་མཉམ་ངོ་བོ་ཉིད། །སྤྲོས་ལས་རྣམ་དབེན་རྒྱ་ཆེ་རང་བཞིན་འདི་ཡིས་མ་ལུས་དོན་མཛད་པ། །སྲིད་དང་ཞི་ལ་མི་གནས་གནས་ཏེ་ཡོངས་རྫོགས་དཔེ་མེད་བདེ་བའི་སྐུ། །དཔལ་ལྡན་འཇམ་པའི་རྡོ་རྗེ་ལ་བཏུད་རྒྱུད་དོན་འཛིན་བདག་
བླ་མ་ལའང་། །སངས་རྒྱས་ཡེ་ཤེས་ཞབས་ལ་སོགས་པའི་རིམ་པའི་མན་ངག་རང་ཉིད་ཀྱིས་དྲན་ཕྱིར། །དེ་ལ་བློ་བླུན་རྣམས་ཀྱི་ཉི་མ་ལྟ་བུར་འདི་ནི་བདག་གིས་བཤད། །འདི་ལ་ལོག་པར་རྟོགས་པ་དག་ནི་གཉིས་ཏེ། ཕྱི་རོལ་གྱི་དོན་ལ་ལོག་པར་རྟོགས་པ་དང་། ནང་གི་རྣམ་པར་
ཤེས་པ་ལ་ལོག་པར་རྟོགས་པའོ། །དེ་ལ་ཕྱི་རོལ་གྱི་དོན་ལ་ལོག་པར་རྟོགས་པ་ནི་གཉིས་ཏེ། མུ་སྟེགས་པ་དང་། ཉན་ཐོས་པ་དག་གོ། །དེ་དག་ནི་ཕྱི་རོལ་གྱི་དོན་རྣམ་པར་ཤེས་པ་ལ་སོགས་གཅིག་ན་ཡོད་པར་འདོད་ཅིང་། སྣ་ཚོགས་སུ་ཡོངས་སུ་རྟོག་གོ། །དེ་ཡང་ཇི་ལྟར་ཡོངས་
སུ་རྟོག་ཅེ་ན། མུ་སྟེགས་པ་དག་ནི་ཕྱི་རོལ་གྱི་དོན་འདས་པའི་རྒྱུན་ངོ་བོ་ད་ལྟར་དང་མ་འོངས་པའི་དུས་སུ་ཡང་རྣམ་པར་གནས་ཤིང་། དེ་ཡང་ཆ་ཤས་ཅན་རགས་པ་གཅིག་པའི་ངོ་བོར་ཡོངས་སུ་རྟོག་གོ། །དེ་ཉན་ཐོས་པ་དག་ལས་ཁ་ཅིག་ནི་དོན་རྣམས་རྡུལ་ཕྲ་རབ་ལས་གྲུབ་ཅིང་། དེ་དག་
ཀྱང་ཆ་ཤས་བྲལ་ཞིང་མུན་པ་དང་སྣང་བའི་སྐབས་མི་འབྱེད་ཅིང་། རིགས་མཐུན་པའི་སྐབས་དང་བཅས་པར་ཡོངས་སུ་རྟོག་གོ། །ཁ་ཅིག་ནི་དེ་དག་ཡང་དག་པར་འདུས་ནས་རིགས་མཐུན་པའི་གོ་སྐབས་ཀྱང་མི་འབྱེད་ཅིང་འབྱར་ནས་དམིགས་པ་མེད་པར་ཡོངས་སུ་རྟོག་གོ། །དེ་དག་ལས་

44-1-85a

ཕྱོགས་དང་པོ་མ་གྲུབ་ཅིང་རིག་པ་མི་བཟོད་པར་བསྟན་པའི་ཕྱིར། བླ་མ་ཆེན་པོའི་ཞལ་སྔ་ནས། དཀར་པོ་ལ་སོགས་གང་ཞིག་དང་པོ་རུ། །མཐོང་བ་དེ་ཉིད་དུས་གཞན་མཐོང་བ་མིན། །དེ་གཉིས་ཕན་ཚུན་མི་མཐུན་ཕྱིར་ན་ཡང་། །རྟག་ཏུ་བདེ་བ་ལ་སོགས་དག་དང་
མཚུངས། །གཟུགས་ལ་སོགས་པ་གཅིག་པ་མ་ཡིན་ཏེ། །ཐོག་མཐའ་ལ་སོགས་དབྱེ་བ་ཡིས་མཐོང་ངོ་། །ཞེས་གསུངས་ཏེ། དེ་ཡང་ཡུལ་དཀར་པོ་ལ་སོགས་པ་རྣམ་པར་ཤེས་པས་སྐད་ཅིག་མ་དང་པོར་མཐོང་བ་དེ་ཉིད་སྐད་ཅིག་མ་གཉིས་པ་ལ་སོགས་པར་མཐོང་བ་མ་ཡིན་ནོ། །
འབྲས་བུ་སྐད་ཅིག་མ་ཡན་པའི་ཕྱིར་རོ། །དེ་བས་ན་དང་པོ་ཉེ་བར་རྙེད་པ་དང་། ཕྱི་ནས་ཉེ་བར་རྙེད་པ་ནི་འགགས་པ་དང་ཡོད་པ་ཉིད་ཡིན་པས། བདེ་བ་དང་སྡུག་བསྔལ་ལྟར་དུས་གཅིག་ཏུ་ཡོད་པ་མ་ཡིན་ནོ། །དེ་ལྟར་མ་ཡིན་ན་ནི་འབྲས་བུ་རྟག་པར་ཐལ་བར་འགྱུར་རོ། །དེ་ཅིའི་ཕྱིར་ཞེ་ན།
རྒྱུ་རྟག་པ་ཡིན་པའི་ཕྱིར་རོ། །དེ་བས་ན་འབྲས་བུ་རིམ་གྱིས་འབྱུང་བར་སྣང་བས། རྒྱུ་རྣམས་ཀྱང་རིམ་གྱིས་འབྱུང་བར་ཤེས་པར་བྱའོ། །དེ་བས་ན་རྒྱུ་རྣམས་རྟག་པར་གཟུགས་ལ་འགྱུར། དེ་སྐད་དུ་འཕགས་པ་བྱམས་པས་ཀྱང་། འབྲས་བུ་རིགས་ཅན་ཉེར་སྦྱོར་བས། །རྒྱུ་རྣམས་
རྟག་པའི་བདག་ཉིད་མིན། །ཞེས་གསུངས་པ་དང་། སློབ་དཔོན་དབྱིག་གཉེན་གྱིས་ཀྱང་། དེ་ཡང་གང་ཚེ་དེ་ཡིས་ཚེ། །ཁྱོད་ཀྱིས་དོན་དེ་མི་སྣང་ན། །དེ་ནི་མངོན་སུམ་ཇི་ལྟར་འདོད། །ཅེས་པའི་ཕྱིར་རོ། །དེ་བཞིན་དུ་དོན་ཐམས་ཅད་གཅིག་པ་མ་ཡིན་ཏེ། སྟེང་དང་འོག་ལ་
སོགས་པའི་ཆ་སྣ་ཚོགས་སུ་སྣང་བས། ཟིན་པ་དང་མ་ཟིན་པ་འདྲ་བར་སྣང་བས། གོམ་པ་རིམ་གྱིས་ཀུན་དུ་ཕྱིན་པ་དང་། ཕྲ་བ་མི་མཐོང་ཞིང་རགས་པ་མཐོང་བ་དང་། རྟ་དང་གླང་པོ་ཆེ་ལ་སོགས་པ་དུ་མར་སྣང་བའི་ཕྱིར་རོ། །དེ་བཞིན་དུ་སློབ་དཔོན་ཆེན་པོ་དབྱིག་གཉེན་གྱིས་ཀྱང་། 
གཅིག་ན་རིམ་གྱིས་འགྲོ་བ་མེད། །ཟིན་པ་མ་ཟིན་ཅིག་ཅར་མེད། །རིས་ཆད་དུ་མར་སྣང་བ་དང་། །མིག་གིས་མི་སོད་ཕྲ་བའང་མེད། །ཅེས་གསུངས་པ་དང་། སློབ་དཔོན་པྲཛྙཱ་སམྦྷ་བ་གུ་ཧྱས་ཀྱང་། ཀ་བ་ལ་སོགས་དངོས་པོ་ལ། །སྟེང་འོག་ལ་སོགས་དབྱེ་བ་ཡིས། །དེ་ལ་དུ་མར་

44-1-85b

ཕྱེ་གྱུར་ན། །གཅིག་ཏུ་དམིགས་པ་མི་འཁྲུལ་བའོ། །ཞེས་གསུངས་སོ། །ཕྱོགས་གཉིས་པ་ཡང་མ་གྲུབ་པར་བསྟན་པའི་ཕྱིར། བླ་མ་ཆེན་པོའི་ཞལ་སྔ་ནས། རྡུལ་ཕྲན་རྣམས་ཀྱི་ཆ་ཡང་མ་མཐོང་སྟེ། དུ་མའི་གཟུགས་ཀྱང་མ་ཡིན་ཞེས་པ་ཡང་དེ་བཞིན་ནོ་ཞེས་གསུངས་
ཏེ། དེ་ཡང་དོན་རྣམས་རྡུལ་ཕྲ་རབ་མ་ཡིན་ཏེ། རྡུལ་ཕྲ་རབ་མི་དམིགས་ཤིང་རགས་པ་ལ་དམིགས་པའི་ཕྱིར་རོ། །རགས་པ་ནི་ཆ་ཤས་ཀྱི་ངོ་བོར་སྣང་བས་རྡུལ་ཕྲ་རབ་མ་ཡིན་ནོ། །སློབ་དཔོན་པྲཛྙཱ་སམྦྷ་བ་གུ་ཧྱས་ཀྱང་། ཕྲ་རབ་རེ་རེ་བློས་མི་དམིགས། །བློས་ནི་སྦོམ་པོ་ལ་དམིགས་
ཏེ། །སྦོམ་པོ་ཆ་ཤས་བཅས་པས་ན། །རྡུལ་ཕྲན་ཡུལ་དུ་མ་གྲུབ་བོ། །ཞེས་གསུངས་སོ། །ཕྱོགས་གསུམ་པ་མ་གྲུབ་པར་བསྟན་པའི་ཕྱིར། བླ་མ་ཆེན་པོའི་ཞལ་སྔ་ནས། དབུས་ཀྱི་ཆ་ཤས་མེད་པའི་རྡུལ་ཕྲན་ལ། །དུ་མའི་རྡུལ་ཕྲན་རྗེས་འབྲང་མེད་ཕྱིར་དང་། །ས་ཡི་དཀྱིལ་
འཁོར་ལ་སོགས་གཟུགས་ཀྱི་ཚོགས། །རགས་པའི་དཔུང་དུ་འགའ་ཡང་མི་འགྱུར་རོ། །ཞེས་གསུངས་ཏེ་དེ་ཡང་ཡུལ་དུ་གྲུབ་པ་མ་ཡིན་ཏེ། རྡུལ་ཕྲ་རབ་འདུས་པའི་ཕྱིར་རོ། །དེ་ཡང་རྡུལ་ཕྲ་རབ་འདུས་པ་ནི་ཕྱོགས་དྲུག་ནས་སམ། ཕྱོགས་གཅིག་ནས་འདུས་གྲང་ན། དེ་ལ་དང་པོ་
ནི་རིགས་པ་མ་ཡིན་ཏེ། དབུས་ན་གནས་པའི་རྡུལ་ཕྲ་རབ་ཆ་ཤས་དྲུག་ཏུ་འགྱུར་བའི་ཕྱིར་རོ། །དེ་ལྟ་ན་ནི་རྡུལ་ཕྲ་རབ་ཉིད་ཉམས་པར་འགྱུར་རོ། །གཉིས་པ་ལྟར་ན་ཡང་མ་ཡིན་ཏེ། རང་བཞིན་གཅིག་པའི་ཕྱིར་གཅིག་གི་གོ་གང་ཡིན་པ་དེར་གཞན་ཐིམ་པས་སའི་དཀྱིལ་འཁོར་ལ་
སོགས་པ་གོང་བུར་སྣང་བར་མི་འགྱུར་རོ། །དེ་བས་ན་རྡུལ་ཕྲ་རབ་འདུས་ཞེས་བྱར་མི་རུང་ངོ་། །དེ་ལས་མ་གཏོགས་པ་འདུས་པ་ཞེས་བྱ་བའི་གཏན་ཚིགས་ཅུང་ཟད་ཀྱང་མི་སྣང་བས་འདུས་པ་ཡུལ་མ་ཡིན་ནོ། །དེ་སྐད་དུ། སློབ་དཔོན་དབྱིག་གཉེན་གྱིས་ཀྱང་། དྲུག་གིས་ཅིག་ཅར་
སྦྱར་བ་ན། །ཕྲ་རབ་རྡུལ་ཆ་དྲུག་ཏུ་འགྱུར། །དྲུག་པོ་དག་གི་གོ་གཅིག་ན། །གོང་བུ་རྡུལ་ཕྲན་ཙམ་དུ་འགྱུར། །རྡུལ་ཕྲན་སྦྱོར་བ་མེད་ན་ནི། །དེ་འདུས་ཡོད་པ་དེ་གང་གི། །ཞེས་གསུངས་སོ། །སློབ་དཔོན་ཀཱ་མ་ལས་ཀྱང་། རྡུལ་ཕྲན་འདུས་པ་མེད་ན་ནི། །གཞན་གྱི་འདུས་

44-1-86a

པ་བརྗོད་དགོས་སོ། །གཏན་ཚིགས་ཅུང་ཟད་མི་སྣང་བས། །འདུས་པ་ཡུལ་དུ་མ་གྲུབ་བོ། །ཞེས་གསུངས་སོ། །དེ་ལྟར་གཟུགས་ཅན་གྱི་ཡུལ་མ་གྲུབ་པར་བསྟེན་ནས། ད་ནི་གཟུགས་ཅན་མ་ཡིན་པ་རྣམས་མ་གྲུབ་པར་བསྟན་པའི་ཕྱིར། བླ་མ་ཆེན་པོའི་ཞལ་སྔ་
ནས། བདེ་བ་ལ་སོགས་རང་གི་ལས་གང་ནི། །འགའ་ཡང་མ་མཐོང་དེ་ནི་ཡོངས་བཟུང་བས། །དུས་གཅིག་འབྲེལ་བར་འགྱུར་བ་མེད་པས་ན། །གཟུགས་ལ་སོགས་པ་བཞིན་དུ་གཟུང་འཛིན་མེད། །ཅེས་གསུངས་སོ། །དེ་ཡང་ཚོར་བ་ལ་སོགས་པ་རྣམས་ཡུལ་དུ་གྲུབ་པ་མ་ཡིན་ཏེ། དེ་ཅིའི་ཕྱིར་
ཞེ་ན། ཚོར་བ་ལ་སོགས་པ་འདས་པ་དང་མ་འོངས་པ་དག་ནི། འགགས་པ་དང་མ་སྐྱེས་པའི་ཕྱིར་དོན་གཞན་དུ་འགྱུར་བ་ལ་ནི་འབྲས་བུ་བསྐྱེད་པའི་ནུས་པ་ཡོད་པ་མ་ཡིན་པའི་ཕྱིར་དང་། ད་ལྟར་བྱུང་བ་ལ་ཡང་སྐྱེ་བ་ཞིག་ཡུལ་དུ་གྱུར་པའམ། སྐྱེས་ཟིན་པ་ཞིག་ཡུལ་དུ་འགྱུར་གྲང་ན། དང་པོ་ནི་རིགས་པ་
ཅན་མ་ཡིན་ཏེ། རང་ཉིད་སྐྱེས་པའི་དུས་སུ་མ་བྱུང་བའི་ཕྱིར་རོ། །གཉིས་པ་ཡང་རིགས་པ་ཅན་མ་ཡིན་ཏེ། ཤེས་པ་ཡང་དེའི་རྣམ་པར་སྐྱེས་ཟིན་པ་ཚོར་བ་ལ་སོགས་པས་ཕན་བཏགས་པ་ཅུང་ཟད་ཀྱང་ཡོད་པ་མ་ཡིན་པས་ཚོར་བ་ལ་སོགས་པ་ཡུལ་དུ་གྲུབ་པ་མ་ཡིན་ནོ། །དེ་སྐད་དུ། སློབ་དཔོན་ཆེན་པོ་
མཆེ་བའི་སྡེས་ཀྱང་། སིམ་པ་ལ་སོགས་འདས་དང་མ་འོངས་པ། །མ་སྐྱེས་པ་དང་འགག་པ་དང་། །ནུས་མེད་འབྲས་བུ་སྐྱེས་པ་ཡི། །སྐྱེ་བའི་ཚེ་ན་མེད་པ་དང་། །སྐྱེས་པ་ན་ནི་སྐྱེས་ཟིན་ཕྱིར། །སིམ་སོགས་ཡུལ་དུ་མ་གྲུབ་བོ། །ཞེས་གསུངས་སོ། །དེ་ལས་གཞན་པའི་ཆོས་ནམ་
མཁའ་ལ་སོགས་པ་ཡུལ་དུ་གྲུབ་པོ་ཞེ་ན། དེ་ནི་རིགས་པ་མ་ཡིན་ཏེ། བཏགས་པ་ཙམ་དུ་ཡོད་པས་འབྲས་བུ་སྐྱེད་པར་མི་ནུས་པ་དང་། ཡང་ན་འབྲས་བུ་དང་རིགས་མཐུན་ཞིང་དེ་དག་ཉིད་མི་རྟག་པར་འགྱུར་བ་དང་། ཡང་ན་དུས་ཐམས་ཅད་པ་ཉིད་ལས་འབྲས་བུ་དུས་གཅིག་ཏུ་འབྱུང་བའི་ཕྱིར་
རོ། །དེ་སྐད་དུ་སློབ་དཔོན་མ་ཆེ་བའི་སྡེས་ཀྱང་། ནམ་མཁའ་ལ་སོགས་རྫས་མེད་པས། །ནུས་མེད་འབྲས་བུ་སྐྱེད་པ་མིན། །སྐྱེད་ན་འབྲས་ལྟར་མི་རྟག་འགྱུར། །དེ་དག་རྟག་ཚང་དེ་བས་ན། །འབྲས་བུ་རྣམས་ཀྱང་ཚང་བར་འགྱུར། །དེ་བས་དེ་དག་ཐམས་ཅད་ཀུན། །ཡུལ་དུ་

44-1-86b

དམིགས་པ་འཁྲུལ་པའོ། །ཞེས་གསུངས་སོ། །དེ་བས་ན་ཡུལ་རྣམས་ཡོད་པ་མ་ཡིན་པས་ན། དེས་སྐྱེས་པའི་འཛིན་པའི་ཤེས་པ་རྣམས་ཀྱང་ཡོད་པ་མ་ཡིན་ཏེ། གཟུང་བ་འགའ་ཡང་མེད་པའི་ཕྱིར་རོ། །དེ་སྐད་དུ་འཕགས་པ་བྱམས་པས་ཀྱང་གསུངས་པ། 
དོན་དང་སེམས་ཅན་བདག་རྣམ་རིག །རྣ་བའི་རྣམ་པར་ཤེས་པ་ནི། །རབ་ཏུ་སྐྱེའོ་དེ་དོན་མེད། །དེ་མེད་པས་ན་དེ་ཡང་མེད། །ཅེས་གསུངས་སོ། །དེ་བས་ན་འདི་དག་ཐམས་ཅད་རྣམ་པར་ཤེས་པར་སྣང་བ་ཁོ་ན་ཉིད་དོ། །མདོ་ལས་ཀྱེ་རྒྱལ་བའི་སྲས་དག །ཁམས་
གསུམ་པ་འདི་དག་ནི་སེམས་ཙམ་མོ་ཞེས་གསུངས་པའི་ཕྱིར་རོ། །དེ་ལ་ཡང་ལོག་པར་རྟོགས་པ་དག་ནི་རྣམ་པ་གཉིས་ཏེ། ཁ་ཅིག་དོན་དམ་པ་ཡོད་པ་ཉིད་དུ་རྟོག་ཅིང་རྫས་ཉིད་དུ་སེམས་པ་དང་། དེ་ལས་གཞན་པ་ནི་ཀུན་རྫོབ་ཏུ་ཡོད་པ་ཉིད་ལ་གཉིས་སུ་སྣང་བར་སེམས་སོ། །དེ་དག་
ཀྱང་རིགས་པ་མ་ཡིན་ཏེ་རྣམ་པར་ཤེས་པ་ནི་དོན་དམ་པར་མེད་ཅིང་ཀུན་རྫོབ་ཉིད་དོ། །དེ་ཅིའི་ཕྱིར་ཞེ་ན། རྣམ་པར་ཤེས་པ་རང་བཞིན་མེད་པའི་གཏན་ཚིགས་རྒྱས་པ་ནི། སློབ་དཔོན་ཀླུ་སྒྲུབ་ལ་སོགས་པས། དབུ་མའི་བསྟན་བཅོས་སུ་བྲིས་པས་འདིར་འབད་པར་མི་བྱའོ། །དེ་སྐད་དུ་
སྐྱེ་བ་མེད་པ་བསྟན་པའི་མདོ་ལས། ལྷའི་བུ་ཆོས་ཐམས་ཅད་ནི་སེམས་ཙམ་མོ། །དེ་ཡང་ཀུན་རྫོབ་ཉིད་དེ། དོན་དམ་པར་མི་དམིགས་སོ་ཞེས་འབྱུང་བ་དང་། དེ་ཉིད་ལས་དེ་བས་ན་གང་ངེས་པར་ལེགས་པའི་གྲོང་ཁྱེར་དུ་འཇུག་པར་འདོད་པས་རྣམ་པར་ཤེས་པ་ཀུན་རྫོབ་ཉིད་དུ་ཤེས་
པར་བྱའོ་ཞེས་གསུངས་སོ། །དེ་བཞིན་དུ་མདོ་གཞན་དག་ལས་ཀྱང་། རང་བཞིན་མེད་དེ་རྣམ་རིག་མེད། །དངོས་པོ་ཡང་མེད་གཞི་ཡང་མེད། །རོ་དང་འདྲ་བའི་མི་མཁས་པ། །བྱིས་པས་འདི་དག་བརྟགས་པའོ། །ཞེས་པ་ལ་སོགས་པའོ། །བཅོམ་ལྡན་
འདས་ཀྱིས་ལང་ཀར་གཤེགས་པ་ལས་ཀྱང་། དེའི་ཕྱིར་དངོས་པོ་ཐམས་ཅད་རང་བཞིན་མེད་པར་གྲུབ་པོ་ཞེས་གསུངས་སོ། །དེ་ཉིད་ལས་ཡང་གསུངས་པ། གཞན་བརྗོད་པ་ཡི་དོན་དམ་པ། །དངོས་པོ་འདི་དག་རང་བཞིན་མེད། །གཅིག་དང་དུ་མའི་རང་བཞིན་གྱིས། །

44-1-87a

འབྱོར་པ་མེད་པ་གཟུགས་བརྙན་འདྲ། །ཞེས་པ་ལ་སོགས་པ་དེ་དང་དེ་ལ་རྣམ་པ་མང་པོ་གསུངས་སོ། །དེ་ལྟར་རྣམ་པར་ཤེས་པ་ཀུན་རྫོབ་ཉིད་དུ་ཤེས་ན་ཡང་འཁོར་བ་དང་མྱ་ངན་ལས་འདས་པ་གཉིས་སུ་རྟོག་པ་ནི་རིགས་པ་མ་ཡིན་ཏེ། དེ་ཅིའི་ཕྱིར་ཞེ་ན། འཁོར་
བའི་ཆོས་ནི་མེད་པའི་ཕྱིར་རོ། །རྩ་བའི་རྒྱུད་ལས་ཀྱང་། མདོར་ན་ཕུང་པོ་ལྔ་རྣམས་ནི། །སངས་རྒྱས་ལྔར་ནི་རབ་ཏུ་གྲགས། །རྡོ་རྗེ་སྐྱེ་མཆེད་ཉིད་དག་ཀྱང་། །བྱང་ཆུབ་སེམས་དཔའི་དཀྱིལ་འཁོར་རོ། །ཞེས་གསུངས་པ་དང་། ས་ནི་སྤྱན་ཞེས་བྱ་བ་དང་། །ཆུ་ཡི་ཁམས་ནི་
མཱ་མ་ཀཱི། །དཀར་དང་སྒྲོལ་མ་ཞེས་བྱ་བ། །མེ་དང་རླུང་དུ་རབ་ཏུ་གྲགས། །ཞེས་གསུངས་སོ། །འོ་ན་སྲིད་པར་སྣང་ཞིང་བྱ་བ་བྱེད་ནུས་པའི་དངོས་པོ་འདི་འཁོར་བ་མ་ཡིན་ནམ་དེ་མེད་ན་མྱ་ངན་ལས་འདས་པ་ཡང་གང་ལ་ཡོད་ཅེ་ན། དེའི་ཕྱིར་བླ་མ་ཆེན་པོའི་ཞལ་སྔ་ནས། བདག་ཏུ་
འཛིན་དང་བདག་གིར་འཛིན་པ་ཡིས། །འཁོར་བ་འདི་ནི་བཏགས་པ་ཙམ་དུ་ཡང་། །དེ་ཡི་ངོ་བོ་ལོག་པའི་རང་བཞིན་གྱིས། །ཀུན་ལས་འདས་པའི་ངོ་བོར་ཤེས་པར་བྱ། །ཞེས་གསུངས་ཏེ། དེ་བས་ན་སྲིད་པའི་ཆོས་ནི་གཏན་ནས་ཡོད་པར་མི་འདོད་ཀྱི། འོན་ཀྱང་ལོག་པར་
བཏགས་པ་ཙམ་ཉིད་དོ། །དེ་ཡང་གང་ཞེ་ན། རྟག་པ་ལ་སོགས་པར་འཁྲུལ་པ་ནི་སྲིད་པའི་སྡུག་བསྔལ་ཡིན་ནོ། །དཔེར་ན་ཐག་པའི་སྦྲུལ་བཞིན་དུ་སྣང་བ་མེད་པ་ཉིད་དོ། །བླ་མ་ཆེན་པོའི་ཞལ་སྔ་ནས་ཀྱང་། སྒྱུ་ལྟར་སྣང་བའི་རྣམ་པར་རྟོག་པ་ལས། །སྲིད་པའི་སྡུག་བསྔལ་
གཞན་ན་ཡོད་པ་མིན། །ཞེས་གསུངས་སོ། །དེ་བས་ན་དེ་ཟློག་པར་བྱེད་པའི་ཐབས་སུ་འདིར་ཟབ་མོ་དང་ཡང་དག་པར་གསལ་བའི་དཀྱིལ་འཁོར་དེ་གསུངས་པ་ཡིན་ནོ། །དེ་སྐད་དུ་དཔལ་ཡེ་ཤེས་རྡོ་རྗེ་ཀུན་ལས་བཏུས་པ་ཞེས་བྱ་བ་རྣལ་འབྱོར་ཆེན་པོའི་རྒྱུད་ལས། གསང་བའི་
བདག་པོ་ཐག་པའི་སྦྲུལ་གང་ཡིན་པ་དེ་ནི་ཡོད་པ་མ་ཡིན་ནོ། །འོན་ཀྱང་རབ་རིབ་ཀྱིས་དེ་ལྟར་སྣང་བ་ཡིན་ནོ། །སྐྱེས་བུ་གང་གིས་རབ་རིབ་སྤངས་ཏེ་བརྟགས་ན་ཐག་པར་མཐོང་ཞིང་དོན་གཞན་མེད་དོ། །གསང་བའི་བདག་པོ་དེ་བཞིན་དུ་རྟག་པ་ལ་སོགས་པ་ལ། གཟུགས་ལ་སོགས་པར་

44-1-87b

སྣང་བ་གང་ཡིན་པ་དེ་ནི་ཡོད་པ་མ་ཡིན་ནོ། །འོན་ཀྱང་གཟུགས་ལ་སོགས་པར་ཞེན་པའི་བག་ཆགས་ཀྱི་ཕྱིར་རོ། །སྐྱེས་བུ་ལ་ལ་ཞིག་གིས་ངས་བསྟན་པའི་ལམ་ལ་གཞོལ་ཞིང་བག་ཆགས་དེ་བཟློག་ནས་རྟག་པ་ལ་སོགས་པར་མཐོང་ཞིང་གཞན་ཅི་ཡང་མི་དམིགས་སོ་ཞེས་གསུངས་
པའི་ཕྱིར་རོ། །དེ་བས་ན་དེ་མེད་པའི་ཕྱིར་འདི་ཐམས་ཅད་ཟབ་མོ་དང་ཡང་དག་པར་གསལ་བའི་དཀྱིལ་འཁོར་རོ། །དེ་ལ་ཟབ་མོ་གང་ཞེ་ན། རང་འབྱུང་བར་བྱེད་པའི་རྒྱུ་ཉོན་མོངས་པ་ལ་སོགས་པ་དང་། གདོད་མ་ནས་བྲལ་བ་མི་དམིགས་ཤིང་མི་འགྱུར་བའོ། །ཡང་དག་པར་གསལ་བ་གང་ཞེ་
ན། དེའི་སྒོ་ནས་ཕུན་སུམ་ཚོགས་པ་ཡོད་པ་གཞན་ལ་སྟོན་པའི་རྐྱེན་འཇིག་རྟེན་དང་འཇིག་རྟེན་ལས་འདས་པ་ཐོབ་པར་བྱེད་པའི་ཕྱག་རྒྱ་ཆེན་པོར་སྣང་བ་ཐམས་ཅད་དོ། །དེ་བས་ན་དེའི་ངོ་བོར་གསལ་བར་འདོད་པའི་སྐྱེས་བུ་དམ་པ་ཞིག་གིས་གསང་བ་འདུས་པ་ཞེས་བྱ་བ་རྣལ་འབྱོར་ཆེན་པོའི་
རྒྱུད་ལས་གསུངས་པའི་ལམ་གྱི་རིམ་པ་ལ་ཉེ་བར་གནས་ནས་རྣལ་འབྱོར་བཞིའི་རིམ་གྱིས་འཇུག་ཅིང་རྟོགས་པར་བྱའོ། །དེའི་རིམ་པ་བླ་མའི་ཞལ་སྔ་ནས་བརྒྱུད་ཅིང་འབྱུང་བ་ཅུང་ཟད་བདག་གིས་དབྱེ་བར་བྱའོ། །དེའི་རིམ་པ་ནི་འདི་ལྟ་སྟེ། དེ་ལ་དང་པོར་འཇིག་རྟེན་གྱི་ཆོས་བརྒྱད་སྤངས་པའི་
རྣལ་འབྱོར་པས་ཚོགས་ལ་འཇིགས་པའི་སྐྱོན་མེད་པ། སྙིང་རྗེ་ཆེན་པོ་དང་དེ་ལས་བྱུང་བའི་ཡོན་ཏན་དང་ལྡན་པས་བླ་མ་དམ་པ་རྣམས་ལས་གང་ཡང་རུང་བ་ཅིག་མཉེས་པར་བྱས་ཏེ། ཆོ་ག་མ་ཚང་བ་མེད་པའི་དཀྱིལ་འཁོར་གཉིས་གང་ཡང་རུང་བར་ཞུགས་ནས། བུམ་པ་དང་གསང་བ་དང་།
ཤེས་རབ་ཡེ་ཤེས་ཀྱི་དབང་རྣམས་ཐོབ་པས་གསང་བ་དང་མཆོག་ཏུ་གསང་བ་ལ་སོགས་པ་རིམ་པར་བྱ་སྟེ། ཇི་ལྟར་གསུངས་པའི་གནས་སུ་དང་པོར་བྱ་བར་འོས་པ་རྣམས་ཚོགས་པར་བྱ་སྟེ། དེས་མཚམས་བཞིའི་དང་པོ་ཐོ་རངས་ལ་སྒོ་དག་པར་བྱ་བ་ལ་སོགས་པ་ནས། རྗེས་སུ་
ཆགས་པའི་མཐའ་ལ་ཐུག་པ་བྱས་ནས་དཀྱིལ་འཁོར་གྱི་འཁོར་ལོ་རྫོགས་པའི་རྣལ་འབྱོར་པས། ཐིག་ལེ་དང་ཕྲ་མོ་དང་བཟླས་བརྗོད་བྱས་ནས་འཁོར་ལོ་བསྡུ་བ་བརྩམ་མོ། །དེ་ལྟར་ཏིང་ངེ་འཛིན་གསུམ་རྫོགས་པའི་རྣལ་འབྱོར་པས་དེའི་ཡན་ལག་གཞན་སྨོན་ལམ་བཏབ་པ་དང་།

44-1-88a

སྡོམ་པ་བསྐྱང་བ་དང་། ཁ་ཟས་སྦྱང་བ་དང་། ལས་གཉིས་ཀྱི་སྒོ་ནས་སེམས་ཅན་གྱི་དོན་བྱ་བ་དང་། བརྗེད་པ་ལ་སོགས་པའི་དབང་གིས་དམ་ཚིག་ཉམས་པ་བསྐང་བའི་ཆོ་ག་བྱས་ནས། བརྟགས་པའི་མཚན་ཉིད་ལས་དབེན་པར་བྱ་ཞིང་རང་གི་སེམས་
ཉིད་དག་པར་བྱའོ། །དེ་ཁོ་ན་བཞིན་དུ་ཉི་མའི་གུང་དང་། ཕྱི་འབྲེད་ཀྱི་དུས་སུ་ཡང་དེ་ཐམས་ཅད་མ་ལུས་པར་བརྩམ་པར་བྱའོ། །ནམ་ཕྱེད་ལ་ཡང་དེ་བཞིན་དུ་བཟླས་པའི་མཐར་ཐུག་པའི་བར་བྱས་ནས། ཉལ་བར་འདོད་ན་གཤེགས་སུ་གསོལ་བ་དང་། སྙིང་གའི་གནས་སུ་ཡེ་
ཤེས་སེམས་དཔའི་འཁོར་ལོ་ལ་ཕྱི་རོལ་འཁོར་ལོ་བསྡུས་ནས་ཤེས་རབ་ཀྱང་སྙིང་རྗེར་ལྡན་པས་ཉལ་བར་བྱའོ། །ཐོ་རངས་ལངས་ནས་ཡང་གོང་མ་ཁོ་ན་བཞིན་དུ་དང་པོའི་ལས་ལ་ཞུགས་པས་ཐམས་ཅད་བྱ་ཞིང་། དུས་མཚམས་གཞན་ལ་ཡང་དེ་བཞིན་དུ་བསྒོམ་པར་བྱའོ། །དེ་སྐད་
དུ་བླ་མའི་ཞལ་སྔ་ནས་ཀྱང་། ཐོ་རངས་ལངས་ནས་གོང་མ་ལྟར། །གདོད་མ་གཏོགས་པས་བཟླས་པ་བྱ། །ཞེས་བྱའོ། །དེ་ལྟར་ཉིན་རེ་དུས་བཞིར་ཏིང་ངེ་འཛིན་ཡན་ལག་དང་བཅས་པ་ལ་གཞོལ་ཞིང་མཚན་མ་མ་ཐོབ་ཀྱི་བར་དུ་བསྒོམ་པར་བྱའོ། །དེ་ལྟར་རྒྱུན་རིང་དུ་བསྒོམས་
པས་ཕྲ་མོ་དང་ཐིག་ལེས་སེམས་བརྟན་པར་གྱུར་ནས། ཕྲ་མོའི་ཏིང་ངེ་འཛིན་གསུམ་པ་ལས་སྤྲོ་བསྡུ་སྔོན་དུ་འགྲོ་བ་མ་བཏང་ཞིང་བཟུང་བས་བརྟན་པར་གྱུར་པའི་མཚན་མ་ལྔ་པོ་འདི་ཐོབ་པར་འགྱུར་རོ། །དེ་ཡང་གང་ཞེ་ན། ཡེ་ཤེས་ལྔ་ཡི་ངོ་བོ་ཉིད། །ཁ་དོག་ལྔ་ཡི་ཐིག་
ལེ་གཟེར། །གསལ་བ་དང་ནི་མི་གསལ་བ། །དང་པོ་སྨིག་རྒྱུ་ལྟ་བུ་དང་། །གཉིས་པ་དུ་བ་ལྟ་བུ་སྟེ། །གསུམ་པ་མེ་ཁྱེར་ལྟ་བུ་དང་། །བཞི་པ་མར་མེ་ཉེར་འབར་བ། །ལྔ་པ་སྤྲིན་མེད་ནམ་མཁའ་སྟེ། །ལྷ་དང་ཕྱག་མཚན་ལ་སོགས་པའོ། །དེ་རྣམས་ནི་
འོག་ནས་བཤད་པའི་རྣལ་འབྱོར་པ་རྣམས་སུ་འགྱུར་བའི་མཚན་མའོ། །དེ་ནས་སྤྲོ་བསྡུའི་སྒོ་ནས་རྗེས་སུ་དྲན་པ་བསྒོམ་ཞིང་། ཕྱིས་གནས་དང་གནས་པའི་བདག་ཉིད་སྤྲོས་ནས་བཟླས་བརྗོད་ཀྱི་སྦྱར་བ་བརྩམ་པར་བྱའོ། །རྩ་བའི་རྒྱུད་ལས་ཀྱང་། སངས་རྒྱས་བྱང་ཆུབ་གནས་

44-1-88b

རྣམས་ནི། །དེ་རུ་མདོར་ན་སྤྲོ་བར་བྱ། །སྐུ་གསུང་ཐུགས་ཀྱི་མཚན་མ་ཡི། །སྔགས་ཀྱི་ཚིག་རྣམས་རབ་ཏུ་བརྗོད། །ཅེས་འབྱུང་བས་སོ། །དེ་ལྟར་བརྟན་པར་འགྱུར་བའི་མཚན་མ་རྣམ་པ་ལྔ་མངོན་དུ་གྱུར་པ་དེ་ལ་ནི་ལས་དང་པོ་པའི་རྣལ་འབྱོར་པ་ཞེས་གསུངས་སོ། །རྣལ་འབྱོར་
པ་དེ་མཚན་མ་མཐོང་ཡང་རུང་མ་མཐོང་ཡང་རུང་སྟེ། དད་པ་དང་ལྡན་ཞིང་སྣོད་དུ་རུང་བས་ཞུས་པའམ། གཟུགས་བརྙན་གླེགས་བམ་ལ་སོགས་པ་བསྒོམ་པར་འདོད་པས་ཞུས་པའམ། དེ་ལས་གཞན་པའི་སེམས་ཅན་སྡིག་པའི་དབང་གིས་མཚན་མ་ངན་པ་མཐོང་བས་ཞུས་
པའམ། སྣོད་དུ་རུང་ཞིང་ངང་ཚུལ་བཟང་པོ་དང་ལྡན་པ་རྣམས་ཀྱིས་མ་ཞུས་ཀྱང་བཙུད་དེ། དེ་རྣམས་ཀྱི་དོན་དུ་གོང་ནས་གསུངས་པའི་བསྙེན་པའི་ཆོ་ག་ལ་གནས་ནས་འཛབ་ཏུ་མ་བཟླས་པའམ། འཛབ་འབུམ་ལ་སོགས་པ་བཟླས་པ་བྱས་ནས། རི་མོའི་དཀྱིལ་འཁོར་བྲི་བ་
བརྩམ་པར་བྱའོ། །དེ་སླད་དུ་སློབ་དཔོན་ཛ་བ་དི་བའི་ཞལ་སྔ་ནས། ལས་དང་པོ་ཡི་རྣལ་འབྱོར་གྱིས། །གོང་གསུངས་མཚན་མ་མ་མཐོང་མཐོང་། །དེ་ཡིས་འདི་དག་དོན་གྱི་ཕྱིར། །དཔག་མེད་བཟླས་པ་བྱས་པའམ། །བཟླས་བརྗོད་གྲངས་ཚང་ངེས་བྱས་ནས། །སྣོད་དུ་རུང་ཞིང་དད་ལྡན་
དང་། །གཟུགས་བརྙན་པུ་སྟི་ལ་སོགས་དང་། །སྡིག་པའི་དབང་གིས་མཚན་ངན་མཐོང་། །སྣོད་ལྡན་རྣམས་ཀྱིས་མ་ཞུས་ཀྱང་། །རི་མོའི་དཀྱིལ་འཁོར་བྲི་བ་བརྩམ། །ཞེས་འབྱུང་བས་སོ། །དེས་དཀྱིལ་འཁོར་བྲི་བ་ཡང་བདག་ཉིད་སློབ་དཔོན་དང་སློབ་མ་གཉིས་ཀྱིས་བྲི་
བར་བྱས་ནས། སློབ་མ་གཞུག་པ་ལ་སོགས་པ་བྱས་ནས་དབང་རྣམས་བསྐུར་བར་བྱའོ། །རྩ་བའི་རྒྱུད་ལས་ཀྱང་། ཐིག་གདབ་པ་ཡི་ཆོ་ག་འདི། །བདག་ཉིད་ནམ་ཞིག་སྤྱོད་པ་ན། །རྣམ་པར་སྣང་མཛད་རབ་བསྒོམས་ཏེ། །རྡོ་རྗེ་སེམས་དཔའ་བསྒོམ་པའམ། །སློབ་མ་
རྡོ་རྗེ་འོད་པོ་ཆེ། །རྡོ་རྗེ་མི་འཆི་བསྒོམ་པར་བྱ། །ཞེས་གསུངས་སོ། །དཀྱུས་མ་བརྗོད་དེ། ལས་དང་པོ་པ་དེ་བརྟན་པར་གྱུར་པའི་མཚན་མ་ལན་གྲངས་མང་དུ་མཐོང་ནས་སེམས་བརྟན་པར་ཤེས་ནས་གཉིས་པར་འགྱུར་བར་བྱ་བའི་ཕྱིར་སྦྱོར་བ་འདི་ལ་འབད་པར་བྱའོ། །དེའི་སྦྱོར་

44-1-89a

བ་ནི་འདི་ལྟ་སྟེ། སྒོ་དག་པར་བྱ་བ་ལ་སོགས་པ་ནས་རྗེས་སུ་ཆགས་པར་བྱ་བའི་བར་གྱིས་དང་པོའི་རྣལ་འབྱོར་རྫོགས་པར་བྱས་ཏེ། དེ་བཞིན་གཤེགས་པ་ཐམས་ཅད་རྗེས་སུ་ཞུགས་པ་སྔོན་དུ་བྱས་ནས་རིག་པའི་ཆོས་ཀྱི་དབྱིངས་ཀྱི་པདྨའི་ནང་དུ་སྟོང་པ་ཉིད་དམ་ས་
བོན་དང་ལྷའི་ངོ་བོ་བསྒོམ་པར་བྱའོ། །དེ་ལ་མི་གཡོ་ཞིང་བརྟན་པར་གྱུར་པ་ལས། རིགས་ཀྱི་བདག་པོའི་གནང་བ་ཐོབ་པའི་དུས་སུ་རྣལ་འབྱོར་པ་གཉིས་པར་གྱུར་པ་ཡིན་ནོ། །དེ་སྐད་དུ་བླ་མའི་ཞལ་སྔ་ནས། པདྨ་ལ་གནས་བརྟན་བྱས་ཏེ། །རིགས་བདག་གནང་བ་ཐོབ་
ནས་སུ། །རང་གི་སྦྱོར་བས་འཕྲོ་བ་ཡིན། །ཞེས་པའོ། །དེ་ལྟར་ལས་དང་པོ་པའི་ཆོ་ག་ཅུང་ཟད་བསྟན་པ་ཡིན་ནོ། །དེ་ནས་རྣལ་འབྱོར་པ་དེ་ཡེ་ཤེས་འགའ་ཞིག་དབང་དུ་གྱུར་པ་ནི་སྣོད་རྣམ་པ་གཉིས་ལ་ཡེ་ཤེས་ཀྱི་ལྷ་གཉིས་འབེབས་པར་ནུས་པ་ཐོབ་པས་དེ་སྐད་བརྗོད་དོ། །
བླ་མའི་ཞལ་ནས་ཀྱང་། ཡེ་ཤེས་ཤིན་ཏུ་འབེབས་ཐོབ་པས། །འབེབས་པའི་ཆོ་ག་གསུངས་པའོ།  །ཞེས་སོ། །དེས་ཐུན་མཚམས་བཞིར་མིག་ལ་སོགས་པ་བྱིན་གྱིས་བརླབ་པ་དང་། སྐུ་གསུང་ཐུགས་བྱིན་གྱིས་བརླབ་པ་དང་། དབང་བསྐུར་བ་རྫོགས་པར་བྱས་ནས། 
དེའི་རྗེས་ལ་མཆོད་པ་ལ་སོགས་པ་བརྩམས་ཏེ། ཐིག་ལེ་དང་ཕྲ་མོ་ནི་མི་བརྟན་པའི་ལྷའི་ང་རྒྱལ་དང་བྲལ་བས་ནན་ཏན་དུ་བྱ་བ་ནི་མ་ཡིན་ནོ། །དེ་གོང་ནས་གོང་དུ་ནུས་པ་མཐུ་ཅན་དུ་བྱ་ཞིང་གྲུབ་པའི་མཚན་མ་མཐོང་བར་བྱ་ཞིང་བཟླས་བརྗོད་ཀྱི་ཆོ་ག་ལ་འབད་པར་བྱའོ། །དེ་ནས་
འཁོར་ལོ་བསྡུས་ནས་གོང་མ་བཞིན་དུ་སྡོམ་པ་བསྐྱེད་པ་ལ་སོགས་པ་ཐམས་ཅད་བྱའོ། །དེ་སྐད་དུ་བླ་མ་ཆེན་པོའི་ཞལ་སྔ་ནས། བརྟུལ་ཞུགས་ཚུལ་ཁྲིམས་སྔགས་ལྡན་པས། །མིག་དང་སྐུ་སོགས་བྱིན་བརླབས་ནས། །ཡེ་ཤེས་འགའ་ཞིག་དབང་གྱུར་པས། །
མཚམས་བཞིར་འཁྲུལ་མེད་བཟླས་བརྗོད་བྱ། །ཞེས་གསུངས་སོ། །རྣལ་འབྱོར་པ་དེ་དེ་ལྟར་བསྙེན་པའི་ཆོ་ག་ལ་གནས་ནས་གོང་དུ་སྨོས་པའི་སྣོད་དུ་རུང་ཞིང་། དད་པ་དང་ལྡན་པ་ལ་སོགས་པའི་དོན་དུ། ཁྱེའུ་དང་བུ་མོ་ལོ་བཅུ་གཉིས་ལོན་པ་ལ་ཡེ་ཤེས་ཀྱི་ལྷ་གཉིས་ཕབ་ལ།

44-1-89b

དེ་གཉིས་ཀྱིས་ཐིག་དང་རྡུལ་ཚོན་ལ་སོགས་པ་བྱའོ། །རྩ་བའི་རྒྱུད་ལས་ཀྱང་། བུ་མོ་ལོ་གྲངས་བཅུ་གཉིས་པ། །ལོ་གྲངས་བཅུ་གཉིས་ལོན་པའི་ཁྱེའུ། །བཟུང་ནས་དབབ་པ་རབ་ཏུ་བརྟག། །ཆོ་ག་ཐམས་ཅད་བྱས་ནས་ནི། །དེ་ནས་ལས་རྣམས་རབ་ཏུ་བསྒོམ། །རྣམ་པ་
གཞན་དུ་བྱས་ན་ནི། །ཁམས་གསུམ་སྐྱེ་བོས་དཔྱས་པར་འགྱུར། །ཞེས་གསུངས་སོ། །དེ་ནས་བདག་ཉིད་ཞུགས་པ་ལ་སོགས་པའི་ཆོ་ག་ནི་ལས་དང་པོ་པའི་རྣལ་འབྱོར་བཞིན་དུ་ཐམས་ཅད་བྱའོ། །རྩ་བའི་རྒྱུད་ལས་ཀྱང་། སྔ་མ་བཞིན་དུ་ཐམས་ཅད་འགྱུར། །ཞེས་པ་དང་། 
བླ་མའི་ཞལ་སྔ་ནས་ཀྱང་། །སློབ་དཔོན་སློབ་མའི་ཆོ་ག་ནི། །སྔོན་དུ་གོམས་པ་ལ་གནས་པའོ། །ཞེས་གསུངས་སོ། །དེ་བཞིན་དུ་རྣལ་འབྱོར་པ་དེས་དངོས་གྲུབ་ཐ་མལ་པའི་གྲུབ་པའི་མཚན་མ་མཐོང་ཞིང་ལྷའི་ལུང་ཐོབ་ནས། འཛབ་བཟླས་པ་སྔོན་དུ་འགྲོ་བའི་སྣོད་ལ་ཕབ་པའི་ལྷ་
གཉིས་ཀྱིས་བྲིས་པའི་རི་མོའི་དཀྱིལ་འཁོར་དུ་ལྷས་དབང་བསྐུར་བའི་ཆོ་ག་ཡན་ཆད་ཀྱིས་ཞུགས་ནས། ཇི་ལྟར་རྩ་བའི་རྒྱུད་ལས་གསུངས་པའི་ལམ་གྱི་རིམ་པ་དཀྱིལ་འཁོར་ཆེན་པོ་ལ་སོགས་པ་ལ་གནས་ནས། ཟླ་བ་ཕྱེད་དང་ཞག་བདུན་གྱི་བར་དུ་བཟླས་པས་ཇི་སྐད་གསུངས་པའི་
ཐ་མལ་པའི་དངོས་གྲུབ་གང་ཡང་རུང་བ་འགྲུབ་པར་འགྱུར་རོ། །དེ་སྐད་དུ་རྩ་བའི་རྒྱུད་ལས་ཀྱང་། དབེན་ཞིང་རབ་ཏུ་ཉམས་དགའ་བར། །སྦྱོར་བ་འདི་ནི་ཀུན་བརྩམས་ན། །རྡོ་རྗེ་སྐུ་དང་གསུང་དང་ཐུགས། །ཟླ་བ་ཕྱེད་ཀྱིས་འགྲུབ་པར་འགྱུར། །ཞེས་གསུངས་སོ། །དཀྱུས་མ་བརྗོད་
དེ། དེ་ལྟ་བུའི་རྣལ་འབྱོར་པ་དེ་གོང་དུ་གསུངས་པའི་ཆོ་ག་རྒྱུན་རིང་དུ་བརྩམས་ནས། རྣལ་འབྱོར་པ་གསུམ་པར་གྱུར་པ་ནི་ཟབ་མོ་དང་ཡང་དག་པར་གསལ་བའི་དཀྱིལ་འཁོར་རྨི་ལམ་ལྟར་རང་འབའ་ཞིག་ཏུ་མ་ཟད་དེ། གཞན་ལ་ཡང་སྟོན་པར་ནུས་པ་ཐོབ་པས་དེ་སྐད་ཅེས་བྱའོ། །བླ་མའི་
ཞལ་སྔ་ནས་ཀྱང་། དེ་བྱིན་རླབས་ཀྱིས་དཀྱིལ་འཁོར་རྣམས། །བདག་གཞན་གྱིས་ནི་མཐོང་བ་དེ། །གསལ་བ་རྨི་ལམ་བཞིན་དུ་འདོད། །ཅེས་སོ། །རྣལ་འབྱོར་པ་དེས་རྒྱུ་བ་དང་མི་རྒྱུ་བའི་བདག་ཉིད་ཡི་གེ་གསུམ་གྱི་ཏིང་ངེ་འཛིན་ཀུན་དུ་སྤྱོད་པ་ཅན་གྱི་སེམས་ཅན་གྱི་སེམས་ལས་

44-1-90a

ལྷན་ཅིག་དབྱེར་མེད་པ་རྟོགས་པས། བཟླས་བརྗོད་ཀྱི་སྤྲོ་བསྡུ་ཁོ་ནའི་སྒོ་ནས་རྫོགས་པའི་ཏིང་ངེ་འཛིན་བསྒོམ་པ་ནི་ཁ་ཅིག་ཉིན་མཚན་དུ་སྦྱོར་བ་ལ་བརྟེན་པ་ཡིན་ནོ། །དེ་སྐད་དུ་གསུངས་པ། ཡེ་ཤེས་དབང་དུ་གྱུར་པ་ཡིས། །སྤྲོ་དང་བསྡུ་བ་བྱེད་པ་ནི། །ཉིན་
མཚན་སྦྱོར་བ་བརྟན་པར་བྱ། །ཞེས་སོ། །དེ་ལྟར་བསྙེན་པའི་ཆོ་ག་ལ་གནས་ནས། དེས་འདི་ལྟ་སྟེ། སློབ་མ་སྣོད་དུ་རུང་ཞིང་དད་པ་དང་ལྡན་པ། སྔོན་དུ་དཀྱིལ་འཁོར་མཐོང་ཞིང་དབང་ཐོབ་ནས་སྦྱོར་བའི་ཁྱད་པར་ཤེས་ཤིང་དེ་ལ་གཞོལ་བ་རྣམས་ཀྱི་དོན་དུ་རྣལ་འབྱོར་རྣམ་པ་གསུམ་
རྫོགས་པའི་ཏིང་ངེ་འཛིན་གྱིས་བསྒོམས་ཏེ། དེར་བཅུག་ནས་ཁྱད་པར་ཅན་གྱི་སློབ་མ་དེ་ལ་བཀའ་སྩལ་པའི་དབང་གིས་མཐར་ཐུག་པའི་བར་གྱིས་དབང་བསྐུར་བར་བྱའོ། །རྩ་བའི་རྒྱུད་ལས་ཀྱང་། ནམ་མཁའི་དབྱིངས་ཀྱི་དབུས་བསམ་པ། །གྲུ་བཞི་ལྷམ་པ་རབ་ཏུ་བཟང་། །སངས་
རྒྱས་དཀྱིལ་འཁོར་སྦྱོར་བ་ཡིས། །བསམ་གཏན་རྡོ་རྗེ་བསྒོམ་པར་བྱ། །རྡོ་རྗེ་དཀྱིལ་འཁོར་བསམ་གཏན་གྱིས། །འཁོར་ལོ་ཅན་ཀུན་ཞུགས་པར་བྱ། །མཆོད་པའི་ཆོ་ག་དེ་ཉིད་ཀྱིས། །བློ་དང་ལྡན་པས་རབ་ཏུ་བྱ། །སློབ་དཔོན་སྙིང་གར་བསྒོམས་ན་ནི། །དབང་བསྐུར་བ་ནི་བརྩམ་
པར་བྱ། །སངས་རྒྱས་ཀུན་གྱིས་ནམ་མཁའི་ཁམས། །ཡོངས་སུ་གང་བར་རྣམ་པར་བསམ། །དབང་བསྐུར་བ་ནི་གནས་གསུམ་གྱིས། །ཐམས་ཅད་ཆོ་ག་བཞིན་དུ་དབབ། །དེ་ཡིས་བྱང་ཆུབ་ཐོབ་པ་ནི། །སེམས་ཅན་ཀུན་ལ་ཕན་འདོགས་པ། །སྐུ་དང་གསུང་ཐུགས་དངོས་
གྲུབ་ནི། །ངོ་མཚར་ཆེན་པོ་ཐམས་ཅད་འགྲུབ། །བྱང་ཆུབ་སེམས་དཔའ་ཐམས་ཅད་ཀྱི་འཁོར་ལོ་ཞེས་བྱ་བ་བསམ་གཏན་གྱི་དཀྱིལ་འཁོར་རྫོགས་སོ་ཞེས་བྱ་བ་གསུངས་སོ། །དེ་ནས་བླ་མའི་ཞལ་སྔ་ནས། །དཀྱིལ་འཁོར་རྒྱལ་མཆོག་ལས་རྒྱལ་མཆོག། །རྣམ་པ་ཀུན་ལ་རྫོགས་
བྱས་ཏེ། །ཞེས་སོ། །དེ་ནི་སློབ་མ་གཞུག་པ་དང་། སྒྲུབ་པའི་དོན་དུ་དགོངས་པའོ། །དེ་ལས་གཞན་པའི་སློབ་མ་དེར་འཇུག་པར་མི་ནུས་པའི་མཚན་ཉིད་ཅན་གྱི་ཕྱིའི་བྱ་བ་ལ་མངོན་པར་ཞེན་ཅིང་བློ་དམན་པ་རྣམས་ལ་ནི། རྣལ་འབྱོར་པ་དེས་ཡེ་ཤེས་འགའ་ཞིག་ལ་དབང་ཐོབ་པའི་

44-1-90b

ཚུལ་དུ་ཡང་། རི་མོའི་དཀྱིལ་འཁོར་བྲིས་ནས་དབང་བསྐུར་བར་བྱའོ་ཞེས་སློབ་དཔོན་ཆེན་པོའི་ཞལ་སྔ་ནས་གསུང་བར་མཛད་དོ། །དེ་བས་སློབ་དཔོན་ཌོམྤི་པའི་ཞལ་སྔ་ནས་ཀྱང་། ཡེ་ཤེས་དབང་དུ་གྱུར་པས་ནི། །སློབ་མ་སྣོད་རུང་དད་ལྡན་དང་། །དཀྱིལ་འཁོར་མཐོང་བ་དབང་
བསྐུར་བ། །སྦྱོར་བ་ཤེས་ཤིང་དེ་དོན་སྒོམ། །ཁྱད་པར་ཅན་ཤེས་དོན་གྱི་ཕྱིར། །རྫོགས་པའི་དཀྱིལ་འཁོར་བསམ་གཏན་གྱིས། །དབང་བསྐུར་བ་ནི་བརྩམ་པར་བྱ། །གཉིས་པ་དེ་རུ་འཇུག་མི་ནུས། །མཐོང་བའི་ཆོས་ལ་མངོན་ཞེན་ནས། །བློ་གྲོས་དམན་ཞིང་སྦྱོར་སྤངས་པ། །དེ་
ཡིས་དེ་ཡི་དོན་གྱི་ཕྱིར། །རྣལ་འབྱོར་འོག་མའི་ཆོ་ག་ལྟར། །རི་མོའི་དཀྱིལ་འཁོར་བྲིས་ནས་ནི། །དབང་བསྐུར་བ་ནི་བརྩམ་པར་བྱ། །དེ་ལས་གཞན་པ་རྣལ་འབྱོར་པ་དེས་ཐ་མལ་པའི་དངོས་གྲུབ་ཀྱི་མཚན་མ་རྣམས་ཐོབ་ཅིང་ལྷའི་བཀའ་ཐོབ་ནས། བཟླས་པའི་ཆོ་ག་སྔོན་དུ་
འགྲོ་བས་སྣོད་ལ་ཕབ་པའི་ལྷས་བྲིས་པའི་རི་མོའི་དཀྱིལ་འཁོར་དུ་ཞུགས་ནས། ལམ་གྱི་སྦྱོར་བའི་མཚན་མ་གང་མཐོང་བའི་བྱེ་བྲག་གིས་གནས་ཏེ་བསྒྲུབས་ན་ཇི་ལྟར་གསུངས་པའི་ཡོན་ཏན་ཟླ་བ་ཕྱེད་ལ་སོགས་པས་འགྲུབ་པར་འགྱུར་རོ། །དེ་བས་ན་དེ་སྒྲུབ་པའི་དཀྱིལ་
འཁོར་ནི་རི་མོར་བྱའོ། །དེ་ཡང་གང་ལྟར་བྱ་ཞེ་ན། ལས་དང་པོ་ལྟར་བདག་ཉིད་ཀྱིས་བྱ་བ་མ་ཡིན་ཏེ་ཡེ་ཤེས་འགའ་ཙམ་པའི་ལྟར་སྣོད་ལ་ཕབ་པའི་ལྷས་བྱའོ། །དེ་བས་ན་རྩ་བའི་རྒྱུད་ལས་ཀྱང་། རྡོ་རྗེ་ཐིག་ནི་གདབ་པ་དང་། །ཚོན་རྩི་དག་ནི་དགྱེ་བ་དག། །སྔགས་ཀྱི་སེམས་
པས་མི་བྱ་སྟེ། །བྱས་ན་བྱང་ཆུབ་རྙེད་པར་དཀའ། །དེ་བས་དམ་ཚིག་ཚུལ་ཤེས་པས། །སྔགས་ཀྱི་ལྷ་རྣམས་གནས་གནས་སུ། །བྱིན་གྱིས་བརླབ་པ་ཡང་བྱས་ཏེ། །དཀྱིལ་འཁོར་རྣམས་ནི་རྣམ་པར་བརྟག། །རྒྱལ་ཆེན་རྣམ་པར་སྣང་མཛད་དམ། །ཡང་ནི་སྤྱན་ནི་དབབ་པར་
བྱ། །སྐུ་ཡི་ཁ་དོག་གོ་འཕང་མཆོག། །རྡོ་རྗེ་སྐུ་ཡི་ཡོན་ཏན་འབྱུང་། །རྡོ་རྗེ་ཆོས་ནི་རྒྱལ་པོ་ཆེ། །བདག་གི་རིག་པས་དབབ་པར་བྱ། །འདི་ནི་སྔགས་རྣམས་ཐམས་ཅད་ཀྱི། །གསང་བ་རབ་ཏུ་བརྟག་པ་ཡིན། །རྡོ་རྗེ་སེམས་དཔའ་རྒྱལ་ཆེན་དང་། །མཱ་མ་ཀཱི་ཡང་དབབ་པར་བྱ། །

44-1-91a

འདི་ནི་སྔགས་རྣམས་ཐམས་ཅད་ཀྱི། །གསང་བ་རྨད་དུ་བྱུང་བའོ། །དེ་ལྟར་བྱས་ན་བྱིན་གྱིས་རློབ། །སེམས་ལ་དབང་བ་ཉིད་ཤེས་ཏེ། །གསང་བ་དག་ནི་མཆོག་སྩོལ་ལོ། །ཞེས་སོ། །དེ་ནས་ཐ་མལ་པའི་དངོས་གྲུབ་གྲུབ་པའི་རྣལ་འབྱོར་པ་དེས་
གྲུབ་པའི་མངག་གཞུག་བསྐུལ་ནས་དེས་སངས་རྒྱས་ཐམས་ཅད་ཀྱི་ཞིང་དུ་ཁྲིད་ནས་ཟབ་ཅིང་རྒྱ་ཆེ་བའི་ཆོས་ཐོས་པར་བྱས་ནས། རྣལ་འབྱོར་པ་བཞི་པར་འགྱུར་བའི་མཚན་མ་རྣམས་འབྱུང་བར་འགྱུར་རོ། །དེ་བས་ན་རྩ་བའི་རྒྱུད་ལས་ཀྱང་། སངས་རྒྱས་ཞིང་དུ་འགྲོ་བར་འགྱུར། །
ཟབ་མོའི་ཆོས་ཀྱང་ཐོས་པར་འགྱུར། །སངས་རྒྱས་ས་ཡང་ཐོབ་པར་འགྱུར། །ཞེས་པ་སྟེ། འདིར་སངས་རྒྱས་ས་ཡང་ཐོབ་པར་འགྱུར་ཞེས་པ་ནི། སངས་རྒྱས་ཉིད་ཐོབ་པར་འགྱུར་བ་ལ་དགོངས་པའོ། །དེ་ཡང་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པའི་གཉིད་
ཅུང་ཟད་འོང་བར་འགྱུར་ཏེ། དེའི་དུས་སུ་མཚན་མ་ནི་འདི་དག་སྟེ། རྩ་བའི་རྒྱུད་ལས་ཀྱང་། བསམ་གཏན་བཟླས་ལ་འབད་པ་ཡིས། །སྒྲུབ་པ་པོས་ནི་རྟག་ཏུ་མཐོང་། །དེ་ལ་འདིར་ནི་རྨི་ལམ་དམ་ཚིག་ཆེན་པོའི་ཚིག་གོ། །སངས་རྒྱས་བྱང་ཆུབ་སེམས་དཔའ་ནི། །རྣམ་པའི་
དབྱེ་བ་གཉིས་སུ་སྣང་། །ཆོས་ཀྱི་ཡེ་ཤེས་མཆོག་ཐོབ་པས། །སངས་རྒྱས་མཐུ་དང་འདྲ་བར་མཐོང་། །སངས་རྒྱས་རྫོགས་ལོངས་སྤྲུལ་པའི་སྐུ། །དཔག་མེད་པ་ནི་མྱུར་དུ་མཐོང་། །སེམས་དཔའ་ཆེན་པོ་ཁམས་གསུམ་པ། །མཆོད་པར་བྱས་པར་དེ་མཐོང་ངོ་། །
ཡེ་ཤེས་ཆེན་པོ་འདི་འདྲའི་གཟུགས། །སངས་རྒྱས་བྱང་ཆུབ་སེམས་དཔའ་ཡིས། །འདོད་པའི་ཡོན་ཏན་ལྔ་རྣམས་ཀྱིས། །རྟག་ཏུ་མཆོད་པ་བྱས་པར་མཐོང་། །རྡོ་རྗེ་སེམས་དཔའ་གཟུགས་ཆེན་དང་། །གྲགས་ཆེན་རྡོ་རྗེ་མཆོག་དག་ཏུ། །རྨི་ལམ་དག་ན་རང་གཟུགས་
མཐོང་། །གྲགས་ཆེན་རྡོ་རྗེ་གསང་བ་དང་། །བྱང་ཆུབ་སེམས་དཔའ་འཁོར་ལོ་ཅན། །སངས་རྒྱས་ཆེན་པོས་ཕྱག་འཚལ་བའི། །རྨི་ལམ་འདི་འདྲ་མཐོང་བར་འགྱུར། །ལུས་ངག་སེམས་ཀྱི་མཐུ་ལས་སྐྱེས། །རྒྱན་རྣམས་ཐམས་ཅད་ཡོངས་རྫོགས་པའི། །ལྷ་ཡི་བུ་མོ་

44-1-91b

ཡིད་འོང་དང་། །ཁྱེའུ་བུ་མོ་དག་མཐོང་ན། །དེས་ནི་དངོས་གྲུབ་ཐོབ་པར་འགྱུར། །ཕྱོགས་བཅུ་སངས་རྒྱས་མང་པོ་རྣམས། །ཞིང་ན་གནས་པ་ངེས་པར་མཐོང་། །ཐུགས་ནི་དགྱེས་པར་གྱུར་ནས་ཀྱང་། །ཆོས་མཛོད་ཡིད་དུ་འོང་བ་སྩོལ། །ཆོས་ཀྱི་འཁོར་ལོ་སྒྱུ་མའི་སྐུ། །
སེམས་ཅན་ཀུན་གྱིས་ཡོངས་བསྐོར་བ། །བསམ་གཏན་རྡོ་རྗེ་ལ་གནས་པའི། །དམ་ཚིག་སྦྱོར་བས་མཐོང་བར་འགྱུར། །སྣ་ཚོགས་ཀུན་དགའ་སྐྱེད་མོས་ཚལ། །ལྷ་ཡི་བུ་མོ་ལ་སོགས་རྒྱན། །སངས་རྒྱས་ཀུན་གྱིས་བྱིན་བརླབས་པས། །བསམ་གཏན་དམ་ཚིག་ཅན་
གྱིས་མཐོང་། །སངས་རྒྱས་བྱང་ཆུབ་སེམས་དཔའ་ཡིས། །དེ་ནི་དབང་བསྐུར་མངོན་པར་མཐོང་། །རིག་འཛིན་རྒྱལ་པོ་ཆེན་པོ་ཡིས། །མཆོད་པ་བྱས་པར་དེ་མཐོང་ངོ་། །རྡོ་རྗེ་ལས་བྱུང་སྣ་ཚོགས་པའི། །རྨི་ལམ་དྲི་མ་མེད་མཐོང་ན། །སྐུ་གསུང་ཐུགས་ཀྱི་རྡོ་རྗེ་ལས། །སྐྱེས་
པ་བླ་ན་མེད་པ་འགྲུབ། །གདུལ་བྱའི་སྦྱོར་ཐེ་ཚོམ་ལ་སོགས། །རྡོ་རྗེ་འཛིན་པས་མཐོང་ནས་ནི། །བློ་ལྡན་རྡོ་རྗེ་སེམས་དཔའ་ཡིས། །སེམས་ཀྱི་གནས་ནི་འགྲུབ་པར་འགྱུར། །ཞེས་བྱ་བ་གསུངས་ཏེ། དེ་དག་ལས་ཀྱང་། རྒྱན་རྣམས་ཐམས་ཅད་ཡོངས་རྫོགས་པའི། །ལྷ་
ཡི་བུ་མོ་ཡིད་འོང་དང་། །ཁྱེའུ་དང་བུ་མོ་དག་མཐོང་ན། །དེ་ཡིས་དངོས་གྲུབ་ཐོབ་པར་འགྱུར། །ཞེས་པ་དང་། སྣ་ཚོགས་ཀུན་དགའ་སྐྱེད་མོས་ཚལ། །ལྷ་ཡི་བུ་མོ་ལ་སོགས་བརྒྱན། །ཞེས་བྱ་བ་དང་། ཐ་མལ་པའི་དངོས་གྲུབ་ཀྱི་མཚན་མའོ། །ཐ་མལ་པ་ཉིད་དངོས་
གྲུབ་ཆེན་པོའི་མཚན་མའོ། །དེ་བས་ན་གྲུབ་པའི་མཚན་མ་ཐམས་ཅད་ནི་བཞི་སྟེ། དབབ་པ་དང་། རྨི་ལམ་དང་། ལྷའི་ལུང་དང་། ཐ་མལ་པ་ཐམས་ཅད་ནི་མཚན་མའོ། །དེ་རྣམས་ནི་ཅི་རིགས་པར་ཐོབ་པའི་རྣལ་འབྱོར་པས་ཅི་རིགས་པར་དངོས་གྲུབ་བསྒྲུབ་པར་བྱའོ། །བླ་མ་ཆེན་པོའི་
ཞལ་སྔ་ནས་ཀྱང་། གྲུབ་པའི་མཚན་མ་ཐོབ་པའི་རྣལ་འབྱོར་པས། །དེ་ཉིད་གསུམ་གྱི་ཆོ་གའི་གཞི་སྔགས་པས། །གོང་དུ་གསུངས་པའི་དཀྱིལ་འཁོར་ཆོ་ག་ཡིས། །མངོན་པར་འདོད་པའི་དངོས་གྲུབ་རབ་ཏུ་འགྲུབ། །ཅེས་གསུངས་སོ། །དེ་ལྟར་མཚན་མ་མཐོང་ཞིང་

44-1-92a

ལྷའི་བཀའ་ཐོབ་པ་དེས་བཞི་པར་གྱུར་པར་བྱ་བའི་ཕྱིར་དགུག་པའི་ཆོ་གའམ། གདོན་གནས་པའི་ཆོ་གས་ཇི་ལྟར་གསུངས་པའི་རིགས་སྨེ་ཤ་ཅན་ལ་སོགས་པའི་བུ་མོ་བཀུག་སྟེ། སྔགས་ཀྱི་རྒྱུད་ལ་སོགས་པ་ལེགས་པར་བསླབས་ནས་ཇི་ལྟར་བླ་མའི་
བཀའ་ལས་བྱུང་བའི་མན་ངག་གིས་བསྟན་པ་ལྟར་བྱས་ནས་དཔང་པོར་བཞག་སྟེ་སྒྲུབ་པ་ཆེན་པོ་བརྩམ་པར་བྱའོ། །དེ་ཡང་སྣོད་ལ་ཕབ་པའི་ལྷ་གཉིས་ཀྱིས་བྲིས་པའི་རི་མོའི་དཀྱིལ་འཁོར་ལ་གནས་ནས་ཞི་བའི་སྦྱོར་བས་རྣལ་འབྱོར་གསུམ་རྫོགས་པའི་ཏིང་ངེ་འཛིན་གྱིས་ཇི་སྲིད་
བློ་རབ་དང་ཐ་མའི་བྱེ་བྲག་གིས། ཟླ་བ་དྲུག་གསུམ་གྱི་བར་དུ་ཆོ་ག་དེས་བསྒྲུབ་པར་བྱའོ། །དེས་བྱིན་གྱིས་བརླབ་པར་མ་གྱུར་ཅིང་བྱང་ཆུབ་ཀྱང་མ་གྲུབ་ན། དེའི་ཚེ་ཞག་བདུན་ལ་སོགས་དབྱེ་བས་དྲག་ཤུལ་དུ་བསྒྲུབ་པར་བྱའོ། །དེ་ལས་གཞན་པ་དབང་དུ་བྱ་བ་དང་བསྲུང་བའི་སྦྱོར་
བ་ཡང་བྱའོ། །ལེའུ་བཅོ་བརྒྱད་པ་ལས་ཀྱང་། །དབང་དུ་བྱས་དང་བསྲུང་བ་དང་། །དེ་ཡི་བྱ་བ་རབ་ཏུ་སྦྱར། །ཞེས་གསུངས་པའི་ཕྱིར་རོ། །དེ་ལ་དྲག་ཤུལ་གྱི་སྦྱོར་བ་ནི་འདི་ལྟ་སྟེ། ལེའུ་བཅུ་པ་ལས་ཀྱང་། རང་སྔགས་སྐྱེས་བུ་བསྒོམས་ནས་ནི། །གནས་གཞི་རྣམས་སུ་
གཟུགས་ཀྱི་ཚུལ། །ཞག་གསུམ་ཚུལ་དུ་སྦྱོར་བ་ཡིས། །ཁ་དོག་གསུམ་དུ་རབ་ཏུ་བསྒོམ། །ཞེས་བཅོམ་ལྡན་འདས་རྡོ་རྗེ་འཆང་གིས་དེ་སྐད་ཅེས་བཀའ་སྩལ་ཏོ། །དེ་ལ་འདི་ནི་རྡོ་རྗེ་དམ་ཚིག་མཆོག་གིས་གསང་བའོ། །སྙིང་གའི་གནས་སུ་ཕྲ་མོ་ཡིས། །དཀྱིལ་འཁོར་
རྣམས་ནི་དགོད་པར་བྱ། །ཡི་གེ་མཆོག་ཏུ་གྱུར་པའི་ཚིག །དེ་ཡི་དབུས་སུ་བསམ་པར་བྱ། །རྡོ་རྗེ་ཆེན་པོ་རྩེ་ལྔ་པ། །རྟག་ཏུ་སྦྱོར་བས་བསྒོམ་པར་བྱ། །རྡོ་རྗེ་ཀྱོ་བའི་ཁྱད་པར་གྱིས། །རྡོ་རྗེ་གསུམ་རྣམས་བསམ་པར་བྱ། །དེ་ཡི་སྙིང་གར་གདབ་བྱ་སྟེ། །ལྷ་རྣམས་རབ་ཏུ་
བསྐུལ་བར་བྱ། །ཨོཾ་ཨ་ཕཊ་ཛ། འདི་ནི་རྡོ་རྗེ་ཐམས་ཅད་ཀྱི། །སངས་རྒྱས་བྱང་ཆུབ་རབ་བསྒྲུབ་པའོ། །འཁོར་ལོ་པདྨོ་རིགས་ལ་སོགས། །རྡོ་རྗེ་ཀྱོ་བ་རྣམ་བསྒོམ་ཞིང་། །སྙིང་ག་རུ་ནི་བསྐུལ་བར་བཤད། །འདི་ནི་རོལ་མོ་འབྱུང་བ་སྟེ། །རྡོ་རྗེ་ཡི་ནི་ཚུལ་མཆོག་འདི། །

44-1-92b

ཞག་བདུན་བར་དུ་བྱས་ནས་ནི། །ཡེ་ཤེས་རྡོ་རྗེ་ཅན་གྱི་གསང་། །སྐུ་དང་གསུང་ཐུགས་འགྲུབ་པར་འགྱུར། །མཆོག་སྩོལ་བ་དག་རྣམ་པར་གཟིགས། །ཡིད་ནི་འཇིགས་ཤིང་སྐྲག་གྱུར་ནས། །ཡིད་ནི་མགུ་ཞིང་དགར་འགྱུར་བའི། །དངོས་གྲུབ་རྒྱ་ཆེན་འགྲུབ་པར་འགྱུར། །
སངས་རྒྱས་བྱང་ཆུབ་སེམས་དཔའ་དང་། །སྔགས་ཀྱི་སྤྱོད་པའི་དོན་གྲུབ་པས། །རྨོངས་པས་འགལ་བར་བྱས་ནས་ནི། །དེ་ཡི་སྲོག་ནི་དེར་ཟད་འགྱུར། །ཞེས་པ་ལ་སོགས་པས་སྐུ་གསུང་ཐུགས་རླུང་གི་ཤིང་རྟ་ལ་ཞོན་པ་རྣམས་ཀྱིས་མི་གནས་པའི་ཕྱིར་མྱ་ངན་ལས་འདས་
པའི་དབྱིངས་ན་བཞུགས་པའི་ཡེ་ཤེས་ཀྱི་འཁོར་ལོའི་ཐུགས་ཀར་ལྕགས་ཀྱུས་བརྡེག་ཅིང་། ང་ནི་དཔལ་ལྡན་ཆེ་གེ་མོ། །ཞེས་བྱ་བ་ལ་སོགས་པས་བཀའ་བསྒོ་ཞིང་བསྐུལ་ནས་རང་དང་ལྷན་ཅིག་ཏུ་བསྒོམ་པ་དང་། ལེའུ་བཅུ་བཞི་པ་ལས། ཕན་ཚུན་དཀྲི་བའི་ཚུལ་དུ་བྱ། །མཐེ་བོང་
གཉིས་ནི་རབ་ཏུ་བསྡམ། །རྣམ་པར་སྣང་མཛད་ཚུལ་གནས་ཏེ། །ཞེས་པ་དང་། ཡེ་ཤེས་པདྨ་ཁ་དབྱེ་བ། །རྡོ་རྗེ་སོར་མོ་ངེས་པར་གཞག། །འདོད་ཆགས་རྡོ་རྗེའི་ཚུལ་གནས་ཏེ། །ཞེས་པ་དང་། རྩེ་མོ་ལྔ་པ་བཅིངས་ནས་ནི། །འོད་འཕྲོ་མང་པོ་འཁྲུག་ཅིང་འབར། །རྡོ་རྗེ་སེམས་
དཔའ་མཉམ་གཞག་ལ། །ཞེས་བྱ་བའི་རིམ་པས་རྣམ་པར་སྣང་མཛད་དང་སྤྱན་མ་གཉིས་དཀྲིས་ལ་རྡོ་རྗེ་དང་པདྨ་སྦྱར་ཏེ་གདབ་པ་དང་། སྣང་བ་མཐའ་ཡས་དང་ན་བཟའ་དཀར་མོ་དཀྲིས་ཏེ་པདྨ་ཁ་ཕྱེ་བའི་ཚུལ་དུ་འོད་ཟེར་དང་ལྡན་པའི་རྡོ་རྗེ་བཞག་ནས་གདབ་པ་དང་། མི་བསྐྱོད་
པ་དང་མཱ་མ་ཀཱི་དཀྲིས་ཏེ་རྩེ་མོ་ལྔ་པའི་གསང་བའི་རྡོ་རྗེ་ཆོས་འབྱུང་གི་ནང་དུ་ཉི་མ་བྱེ་བ་ཕྲག་བརྒྱའི་འོད་དང་ལྡན་པ་བསམས་ཏེ་གདབ་པ་སྟེ། དེ་ལྟར་རྡོ་རྗེ་དང་པདྨ་སྦྱར་ནས་ཐམས་ཅད་གནག་ཅིང་ཁྲོས་པར་བསམས་ལ། རང་གི་རིག་མའི་ཆོས་འབྱུང་གི་ནང་དུ་ཆུད་པའི་གྲུ་གསུམ་
མེའི་དཀྱིལ་འཁོར་གྱི་སྟེང་དུ་རྣམ་པར་སྣང་མཛད་ལ་སོགས་པ་དམ་ཚིག་ལ་བསྙེངས་པར་བསམས་ལ། རང་གི་རིགས་དང་འབྲེལ་པའི་ཕུར་བུ་གཤིན་རྗེ་གཤེད་པོ་ལ་སོགས་པ་རང་གི་གསང་བའི་རྡོ་རྗེ་ལས་ཕྱུང་སྟེ་གནས་རྣམས་སུ་བསྟན་ནས་དངོས་གྲུབ་ཆེན་པོ་དགུག་པ་ཞག་

44-1-93a

བདུན་ལ་སོགས་པའི་བར་དུ་བྱས་ནས་མཆོག་གི་ཡང་མཆོག་གི་བསྙེན་སྒྲུབ་བཞི་ལ་གནས་ནས་ཆོ་ག་འདི་ཐམས་ཅད་མ་ལུས་པར་བསམ་པར་བྱའོ། །དཔུང་པ་རབ་བརྐྱང་མགུལ་པ་ནས། །མི་གཡོ་ཞིང་ནི་བརྟན་པར་འཁྱུད། །བརླ་གཉིས་རབ་ཏུ་བློ་
ལྡན་པས། །བུང་བའི་ཚུལ་དུ་རྩེ་བར་བྱ། །འགྱིང་བག་སྟབས་ཀྱིས་འཁྱུད་ནས་ནི། །གཡོན་གྱི་སྤྱི་བོར་རབ་བརྟེན་ནས། །གཡས་ཀྱི་ཀོ་སྐོ་བཏེག་ནས་སུ། །མ་མཆུ་གཞིབ་ཅིང་སྦྱོར་བ་བརྩམ། །སིད་སྒྲའི་སྔགས་ནི་བརྗོད་ནས་ཀྱང་། །དཔུང་པའི་བར་དུ་རབ་བྱས་ནས། །ཁ་
ཡིས་དེ་ལ་རྩེ་བར་བྱ། །རྣམ་པ་དེ་བཞིན་མཆན་ཁུང་དང་། །མགྲིན་པའི་གློ་དང་སུམ་མདོ་རྣམས། །སེན་མོ་རེ་མོས་གདབ་བྱ་ཞིང་། །ཡང་དང་ཡང་དུ་བྱུག་པ་དང་། །གཡོན་གྱིས་པདྨ་མཉེ་བ་དང་། །ལག་པ་སྦྱོར་བའི་དཀྱིལ་འཁོར་ལ། །རྡོ་རྗེ་གཡོན་གྱི་སོར་མོ་གསུམ། །ཆོས་
འབྱུང་ནང་དུ་བྲུད་ཅིང་རྩེ། །ཧཱུྃ་ཡིག་ལས་བསྐྱེད་རྡོ་རྗེ་ཡི། །འོད་ཟེར་སྣ་ལྔ་འཕྲོ་བ་ཡིས། །བྱང་ཆུབ་སེམས་ཀྱི་ན་རི་ལ། །ལྕེ་དེ་ཡིས་ནི་བསྐྱོད་ནས་ཀྱང་། །སྔགས་འདི་ཆེད་དུ་བརྗོད་པར་བྱ། །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ཡིས་བསྐུལ་བ་ཙམ་
གྱིས་ནི། །སྙིང་འདར་དྲན་པ་ཉམས་པར་འགྱུར། །སྤྱི་བོ་སྐྲ་གྲོལ་གོས་ཀྱང་འདོར། །འབྱུང་བའི་རྔུལ་ཆུས་ཀུན་ཏུ་ཁྱབ། །བརྟན་པའི་ངང་ཚུལ་ཤོར་ནས་ནི། །རང་གི་བ་སྤུ་ཀུན་ཀྱང་གཡོ། །དམར་བའི་མིག་ནི་ཕྲ་བར་བལྟ། །བདག་ཉིད་མགུལ་ནས་ཡང་འཁྱུད་ནས། །དགའ་
བའི་དབྱངས་ཀྱིས་གླུ་བླང་ཞིང་། །སིད་སྒྲའི་སྔགས་ནི་བརྗོད་པར་བྱ། །དེ་ལྟ་བུའི་ཚོགས་སྒྲུབ་པའི་གནས་སྐབས་སུ་སྟོང་ཕྲག་བདུན་ཅུ་རྩ་གཉིས་ཀྱི་སྦུབས་སུ་ཨཱ་ལི་དང་ཀཱ་ལི་དང་། མ་ད་ན་པ་ཏྲ་དང་། ཀུན་མ་ཀ་དང་། ཤང་ཤང་ཀ་དང་། ན་རི་གསུམ་སྟེ་ཀུན་ལ་བསྐུལ་ཞིང་བསྐྱོད་
པས་བདག་ཉིད་ཀྱི་ཕུང་པོ་དང་ཁམས་དང་སྐྱེ་མཆེད་གཉིས་སུ་མེད་པ་རྣམས་བཞི་པའི་དུས་སུ་དྲི་མ་མེད་པའི་རྒྱུན་ལྟ་བུར་ཞུ་བར་གྱུར་པའི་དུས་སུ་བདག་དངོས་པོ་ཐམས་ཅད་ཀྱི་རང་བཞིན་དུ་མཐོང་སྟེ་དེ་བཞིན་དུ་རྒྱུ་བ་དང་མི་རྒྱུ་བ་ཐམས་ཅད་ཀྱི་ཆོས་ཟབ་མོ་དང་ཡང་དག་པར་གསལ་བ་གང་དུ་སྨོས་

44-1-93b

པ་ལྟར་རྟོགས་པ་དེ་ལས་ཡང་དག་པའི་ཡེ་ཤེས་དབང་དུ་གྱུར་པའི་རྣལ་འབྱོར་པ་ཞེས་བྱའོ། །རྩ་བའི་རྒྱུད་ལས་ཀྱང་། རྡོ་རྗེ་ཉི་མ་ནུབ་ནས་ཀྱང་། །བསྒྲུབ་པ་ཀུན་དུ་བརྩམ་པར་བྱ། །སྐྱ་རིངས་ཤར་བའི་དུས་སུ་ནི། །སྐྱེས་བུ་དེ་ནི་འགྲུབ་པར་འགྱུར། །ཞེས་གསུངས་སོ། །དེ་ཉིད་
ལས། ཆགས་པའི་ཡིད་ཀྱིས་འདོད་པ་ཡིས། །རྟག་ཏུ་འདོད་པའི་ཡོན་ཏན་བསྟན། །ཞེས་གསུངས་སོ། །དེ་ནས་རྣལ་འབྱོར་པ་ཆེན་པོ་དེ་ཕྱིས་མཆོག་ཏུ་འགྱུར་ཞིང་ཀུན་བརྟགས་པའི་མཚན་ཉིད་དང་བྲལ་བ་རྣམས་ཀྱི་དོན་དུ་གོང་མའི་འོད་གསལ་བའི་ངོ་བོ་ལས་བཞེངས་ཏེ། རྟག་
པ་ལ་སོགས་པའི་དཀྱིལ་འཁོར་གྱི་འཁོར་ལོ་ཡིས་སྲིད་པ་ཇི་སྲིད་ཡོད་པ་དེ་སྲིད་ཀྱི་བར་དུ་རོ་མྱང་བའི་མཚན་ཉིད་བརྒྱད་དང་ལྡན་པར་བཞུགས་ནས་དེ་རྣམས་ཀྱི་དོན་མཛད་དོ། །བླ་མའི་ཞལ་སྔ་ནས་ཀྱང་། ཡང་དག་ཡེ་ཤེས་དབང་ཐོབ་པས། །གཟུགས་བརྙན་བདག་ཉིད་སྤྱི་གཟུགས་
ཀྱིས། །དཀྱིལ་འཁོར་གསུམ་གྱི་མཐའ་ཡས་ཁམས། །འགྲོ་བའི་ཕན་འདོགས་བྱེད་པའོ། །ཞེས་གསུངས་སོ། །དེ་བས་ན་གཞན་སྡུག་བསྔལ་གྱི་ལམ་གྱིས་བསྐལ་པ་ཆེན་པོ་གསུམ་ན་བླ་ན་མེད་པའི་སངས་རྒྱས་ཐོབ་པར་འདོད་པ་རྣམས་ཀྱིས་ཀྱང་འདི་ལྟ་བུའི་དཔལ་དང་ལྡན་
པའི་ཀུན་ནས་བཀྲ་ཤིས་པའི་ངོ་བོ་བདག་དང་གཞན་གྱི་དོན་ཕུན་སུམ་ཚོགས་པའི་རྟེན་དུ་གྱུར་པ། ཚེ་འདི་ལ་ཐོབ་པའི་ལམ་འདི་སྐྱེས་བུ་སུ་ཡིས་མི་བསྒོམ། བསྒོམ་པར་བྱ་བ་ཁོ་ན་ཡིན་ནོ། །དེ་བས་ན་བདག་གི་བླ་མ་ཆེན་པོའི་ཞལ་སྔ་ནས། ཕ་རོལ་ཏུ་ཕྱིན་པ་རྣམས་དང་། གསང་
སྔགས་ལ་མཆོག་ཏུ་གཞོལ་བའི་སེམས་ཅན་རྣམས་གཟུང་བར་བྱ་བའི་དོན་དུ། རྣལ་འབྱོར་ཆེན་པོའི་རྒྱུད་ཐམས་ཅད་དང་། དེ་ལས་གཞན་པའི་རྒྱུད་རྣམས་དང་། བྱིན་གྱིས་བརླབས་པའི་རིམ་པའི་མན་ངག་ཏུ་ཡང་དག་པར་བལྟས་ནས་རྣལ་འབྱོར་ཆེན་པོའི་མངོན་དུ་བྱས་ཏེ་
ཚིགས་སུ་བཅད་པ་དང་། དེ་རྐྱང་པ་ལ་སོགས་པའི་སྒོ་ནས་ཚིག་སྙན་ཅིང་ཡིད་དུ་འོང་བ་དང་སྒྲུབ་པའི་ཐབས་ཀྱི་རིམ་པ་སྒྲོན་མ་ལྟ་བུ་རྣམས་བྱིས་པ་སོ་སོའི་སྐྱེ་བོ་རྣམས་ཀྱིས་རྟོགས་པར་བྱ་བའི་དོན་དུ་སྦས་པ་ལྟ་བུ་རྣམས་ཕྱུང་སྟེ་རྣམ་པར་དགོད་པ་མཛད་དོ། །ཁོ་བོས་ཀྱང་བླ་མ་ཆེན་

44-1-94a

པོ་དེའི་མན་ངག་སྙན་ཁུང་ནས་བརྒྱུད་པ་རྣམས་བློ་ལ་གནས་བཞིན་པར་བྱས་ནས། སྐྱེ་བོ་རྣམས་གཟུང་བར་བྱ་བའི་དོན་དུ་རྣལ་འབྱོར་པ་རྣམས་ཀྱི་བཀོད་པའི་རིམ་པ་ཅུང་ཟད་བསྟན་པར་བྱས་སོ། །ལ་ལ་ནི་བདག་ལ་དེ་བཞིན་གཤེགས་པ་ཐམས་ཅད་ཀྱིས་བྱིན་
གྱིས་བརླབས་པའི་མན་ངག་སློབ་དཔོན་དག་གི་ཞལ་སྔ་ནས་མ་ཐོབ་ཅིང་། གཞན་དག་ནི་རིགས་པ་མ་ཡིན་པའི་ཤགས་ཙམ་ལ་བརྟེན་ནས་བདག་ནི་རྣལ་འབྱོར་པའི་མན་ངག་ཡང་དག་པར་ཐོབ་པོ་ཞེས་རློམ་སེམས་ཤིང་། གཞན་དག་ལ་ཡང་དེ་ལྟར་བསྙད་པ་དེ་ནི་བསྐལ་པ་ཁྲག་ཁྲིག་
གི་བར་དུ་ཡང་། བདག་ལ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབ་པར་མི་འགྱུར་རོ། །སློབ་དཔོན་ཆེན་པོ་ཤཱཀྱ་མི་ཏྲིའི་ཞལ་སྔ་ནས་ཀྱང་། གང་ཞིག་བླ་མའི་ཞལ་ནས་བྱིན་གྱིས་བརླབས་པའི་མན་ངག་ནི། །མ་ཐོབ་བཞིན་དུ་རིགས་མིན་ཆོས་ལ་བརྟེན་གྱུར་ནས། །
བདག་ནི་རྣལ་འབྱོར་ཆེན་པོ་ཡིན་ཞེས་གང་སྨྲ་བ། །བླུན་ཆེན་སྐྱེ་བོ་དེ་ནི་རྒྱལ་བ་རྣམས་དང་ངས་མི་འདོད། །ཅེས་གསུངས་སོ། །དེ་བས་ན་སྐྱེས་བུ་དམ་པ་རྣམས་དེ་བཞིན་གཤེགས་པ་ཐམས་ཅད་མཉེས་པར་འདོད་ན། རང་གི་ལྷག་པའི་ལྷ་སློབ་དཔོན་ཆེན་པོ་ཐབས་ཐམས་ཅད་ཀྱིས་
མཉེས་པར་བྱས་ཏེ། དེའི་ཞལ་སྔ་ནས་བྱིན་གྱིས་བརླབས་པའི་རིམ་པའི་མན་ངག་ཐོབ་པར་བྱས་ཏེ། བསྐྱེད་པ་དང་རྫོགས་པའི་རིམ་པས་གོང་དུ་སྨོས་པ་ལྟར་འཇུག་པར་བྱས་ནས། ཞུགས་པས་ཀྱང་ཚེ་འདི་ཉིད་ལ་དངོས་གྲུབ་ཐམས་ཅད་མངོན་སུམ་དུ་བྱེད་པར་འགྱུར་རོ། །དེ་སྐད་དུ་རྩ་བའི་
རྒྱུད་ལས་ཀྱང་། འདིས་ནི་དེ་བཞིན་གཤེགས་པའི་སྐུ། །རྡོ་རྗེ་འཛིན་པའི་ཐུགས་དང་ནི། །ཆོས་འཛིན་མཆོག་གི་གསུང་དག་ཀྱང་། །ཚེ་འདི་ཉིད་ལ་ཐོབ་པར་འགྱུར། །སྐུ་དང་གསུང་དང་ཐུགས་ཀྱང་འགྲུབ། །གང་གཞན་ཕྲ་མོར་བཤད་པ་རྣམས། །རྡོ་རྗེ་མི་ཕྱེད་གསུམ་བསྒོམས་
ཏེ། །བཟླས་པ་ཙམ་གྱིས་དེ་འགྲུབ་འགྱུར། །ཞེས་གསུངས་སོ། །དཔལ་ལྡན་ཡེ་ཤེས་ཞབས་ནི་བླ་ན་མེད་པ་ཐུགས་རྗེ་ཆེན་པོ་ཡི། །དྲིན་གྱིས་སྣང་བས་ཁེབས་ཕྱིར་བདག་ནི་བླུན་ཡང་ཅུང་ཟད་ཙམ་དུ་ཕྱེ། །དེ་ཡི་དགེ་བ་ཟླ་བ་ལྟ་བུར་འདུག་པ་དེ་ཡིས་སྐྱེས་བུ་མ་ལུས་རྣམས། །འཇམ་

44-1-94b

རྒྱལ་ཐོབ་ནས་བདུད་ལས་རྒྱལ་འགྱུར་ཟབ་ཅིང་རྒྱ་ཆེའི་དོན་རྟོགས་ཤོག། །བདག་གི་དོན་འགྲུབ་པར་བྱེད་པ་ཞེས་བྱ་བ་རྣལ་འབྱོར་གྱི་བྱ་བའི་རིམ་པ་སློབ་དཔོན་ཆེན་པོ་བི་ཏ་པཱ་དས་མཛད་པ་རྫོགས་སོ།།      །།རྒྱ་གར་གྱི་མཁན་པོ་ཀ་མ་ལ་གུ་ཧྱ་དང་། བོད་ཀྱི་ལོ་ཙཱ་བ་ཆེན་པོ་མངའ་བདག་ལྷ་
ཡེ་ཤེས་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།༄༅༅། །རྒྱ་གར་སྐད་དུ། ཥ་ཌངྒ་ཡོ་གཱ་ལོ་ཀ་ཀྲ་མ། བོད་སྐད་དུ། སྦྱོར་བ་ཡན་ལག་དྲུག་གི་སྣང་བའི་རིམ་པ། དཔལ་འཇམ་པའི་རྡོ་རྗེ་ལ་ཕྱག་འཚལ་ལོ། །ཤེས་རབ་ཐབས་ཀྱི་
བདག་ཉིད་ཅན། །ཐོག་མར་འཇམ་རྡོར་ལ་བཏུད་ནས། །དེ་ཡི་སློབ་མ་ཡེ་ཤེས་ཞབས། །དེས་བརྒྱུད་པ་ལའང་གུས་བཅས་ནས། །སྨན་ཞབས་ཞལ་ནས་གསུངས་པ་ཡི། །ཡན་ལག་དྲུག་པ་རབ་བསྒོམས་ན། །འཇམ་པའི་རྡོ་རྗེ་ལ་སོགས་པའི། །རྫོགས་པའི་རིམ་པ་འགྲུབ་པར་
འགྱུར། །བསྐྱེད་པའི་རིམ་པ་རྙེད་འདོད་པས། །ཡན་ལག་བཞི་པའི་རིམ་པ་ཡིས། །མཐུན་པའི་སྦྱོར་བ་ལ་གནས་པས། །ཅིས་ཀྱང་རྣལ་འབྱོར་པ་ཡིས་འཐོབ། །རྫོགས་པའི་རིམ་པ་སྤྱོད་འདོད་པ། །ཡན་ལག་དྲུག་ལ་གོམས་སྦྱོར་ན། །བྱ་བ་སྤྲོས་བྲལ་རང་བཞིན་གྱིས། །
དངོས་གྲུབ་ཀྱི་ནི་མཆོག་བསྒྲུབ་པོ། །སོ་སོར་སྡུད་དང་བསམ་གཏན་དང་། །སྲོག་རྩོལ་དེ་བཞིན་གཟུང་བ་དང་། རྗེས་སུ་དྲན་དང་ཏིང་ངེ་འཛིན། །སྦྱོར་བའི་ཡན་ལག་དྲུག་ཅེས་གྲགས། །དྲུག་པོ་དེའི་ནང་ནས་སོ་སོར་སྡུད་པ་བཤད་པ་ནི་བདེ་བ་རྒྱ་མཚོ་ཆེན་པོའི་གཉིད་ལས་ལྷ་མོ་བཞིས་
ཡང་དག་པར་བསྐུལ་ནས་སད་པའི་ཚེ་རང་གི་སྙིང་གར་པདྨ་དང་ཟླ་བ་ལ་སོགས་པའི་ས་བོན་རྣམ་པར་བསམས་ཏེ། དང་པོར་གདོང་ལ་སོགས་པ་རྣམ་པར་ཐར་པའི་སྒོ་གསུམ་གྱིས་རྣམ་པར་དག་པར་བྱས་ནས། ཡིད་དང་མཐུན་པའི་གནས་སུ་མཆོད་པ་དང་སྡིག་པ་བཤགས་པ་ལ་སོགས་
པའི་ཆོ་ག་ཐམས་ཅད་སྤྱད་ནས། མཾ་ལ་སོགས་པའི་ས་བོན་ལས་འོད་ཟེར་གྱི་དྲ་བས་བརྟན་གཡོའི་འགྲོ་བ་ཐམས་ཅད་དངུལ་ཆུས་ལྕགས་ལ་སོགས་པའི་གོང་བུར་བསྒྱུར་བ་བཞིན་དུ་དྲི་མ་མེད་པའི་ཟླ་བའི་འོད་ཟེར་ལྟ་བུ་དང་། སྒྱུ་མ་ལྟ་བུའི་གཟུགས་སུ་རྣམ་པར་རྟོགས་ནས། རང་གི་སྙིང་

44-1-95a

གའི་ས་བོན་གྱི་ཐིག་ལེ་ལ་བསྡུས་ནས། རང་གི་ལུས་དང་པདྨ་སོགས་པ་དེ་ཡང་ག་པུར་དེངས་པ་ལྟར་རིམ་གྱིས་ཐིག་ལེ་ཉིད་དུ་བསྒོམ། ཐིག་ལེ་ཡང་མི་ཤིགས་པ་བྱང་ཆུབ་སེམས་ཀྱི་གཟུགས་སྟོང་ཉིད་སྙིང་པོ་ཅན་ལ་སྨོན་ལམ་གྱི་སྟོབས་ཀྱིས་བྱིན་གྱིས་བརླབས་པས་
རི་མོ་དྲང་པོ་ཙམ་དུ་བལྟས་ལ་ཡང་། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་པ་བྲག་ཅ་ལྟ་བུའི་སྔགས་འདིས་བྱིན་གྱིས་བརླབ་བོ། །དེ་མ་ཐག་ཏུ་སྟོང་པ་ཉིད་ལ་སྙོམས་པར་ཞུགས་པའི་རྣལ་འབྱོར་པ་སྨོན་ལམ་གྱི་སྟོབས་ཀྱིས་རྨི་ལམ་སད་པ་ལྟ་བུར་མྱུར་དུ་འགྲོ་བའི་དོན་ལ་
བསམས་ཏེ། ནཱ་ད་ལ་རིམ་གྱིས་བྱུང་བས་ས་བོན་གྱི་འོད་ཟེར་གྱི་དྲ་བའི་རྣམ་འཕྲུལ་གྱིས་ཀུན་དུ་ཁྱབ་པའི་དབུས་སུ་ཆོས་ཀྱི་འབྱུང་གནས་ཀྱི་དབུས་སུ་སྣ་ཚོགས་རྡོ་རྗེའི་ལྟེ་བར་གནས་པ་སྣ་ཚོགས་པདྨའི་ལྟེ་བ་ལ་གཞལ་ཡས་ཁང་གནས་པའི་དབུས་སུ་པདྨ་དང་ཟླ་བ་ལ་ས་བོན་གྱིས་མཚན་
པའི་ཕྱག་མཚན་ཡོངས་སུ་གྱུར་པ་ལས་ཐོག་མར་དེ་བཞིན་གཤེགས་པ་མ་ལུས་པ་བསྡུས་ལ་རང་འདོད་པའི་ལྷས་རང་དང་འདྲ་བའི་རིག་མ་ལ་འཁྱུད་པར་བལྟའོ། །དེ་ནས། དབང་པོ་བཅུ་པོ་རྣམས་ཀྱི་བར། །རང་གི་འཇུག་གནས་ཐམས་ཅད་དུ། །འདོད་པ་སོ་སོར་སྡུད་པས་ན། །སོ་
སོར་སྡུད་པ་ཞེས་བཤད་དོ། །ཞེས་པས་ནི། སོ་སོར་སྡུད་པའི་དོན་ཏེ། ཚིགས་སུ་བཅད་པ་ཕྱི་མ་དེའི་དོན་བཤད་པ་ནི། དབང་པོ་བཅུ་ཞེས་པ་དབང་པོ་ལྔ་ནི་མིག་གི་དབང་པོ་ལ་སོགས་པ་རྣམས་དང་། ཡུལ་གཟུགས་ལ་སོགས་པ་རྣམས་སོ། །རང་གི་འཇུག་གནས་ཞེས་བྱ་བ་གཟུང་
བ་དང་འཛིན་པ་གཟུགས་ལ་བརྟེན་པའི་ཡིད་དེ་མིག་གི་རྣམ་པར་ཤེས་པ་ལ་སོགས་པའི་ངོ་བོ་ཉིད་དེ་སོ་སོར་སྡུད་པ་སྟེ་ཞེན་པ་མེད་པར་བྱེད་པའོ། །འདོད་པ་སོ་སོར་སྡུད་པ་ནི་ཡུལ་རྣམས་ལ་ཆགས་པའི་སེམས་བཟློག་པའོ། །དེ་ཡང་འདི་ལྟར་བཤད་པར་བྱ་སྟེ། མིག་གི་དབང་པོ་ལ་
སོགས་པ་རྣམས་སའི་སྙིང་པོ་ལ་སོགས་པའི་ས་བོན་ལས་བསྐྱེད་ནས་ཐུགས་ཀའི་ས་བོན་ལས་འོད་ཟེར་གྱི་དྲ་བ་བོར་བའི་དུས་སུ་གཟུགས་རྡོ་རྗེ་ལ་སོགས་པ་ལ་ཛཿཧཱུྃ་བཾ་ཧོཿཁའི་ལ་སོགས་པའི་ས་བོན་མཚན་མ་དང་བཅས་པ་བསམས་པ་ལས། གཟུགས་རྡོ་རྗེ་མ་ལ་སོགས་པ་དམིགས་

44-1-95b

ནས་འོད་ཟེར་ཚུར་འདུས་པ་ལས་སའི་སྙིང་པོ་ལ་སོགས་པ་དང་སྙོམས་པར་ཞུགས་པ་ནི་དོན་དམ་པར་སྟོང་པ་ཉིད་དུ་རོ་གཅིག་པས་བདེ་བ་བསྐྱེད་པར་རིག་པ་ནི་དེ་ཉིད་ལས། རྣལ་འབྱོར་སོ་སོར་སྡུད་ཞུགས་པ། །སྟོང་ཉིད་བསམ་གཏན་དེ་ལ་འཇུག། །དམིགས་པ་མེད་པར་འཇུག་པའི་
སེམས། །གཟུང་དང་འཛིན་ལས་རྣམ་པར་ལྡོག །འདི་ཡང་དགའ་བའི་གནས་སྐབས་སུ། །ཞེས་གསུངས་པས་སོ་སོར་སྡུད་པ་སྟེ་དང་པོའོ།།      །།ད་ནི་བསམ་གཏན་བཤད་པར་བྱ་སྟེ། ཡན་ལག་དང་པོས་ནི་འཇུག་པའི་རྣམ་པར་ཤེས་པ་དང་། ལྡོག་པའི་ཤེས་པའི་
མཚན་ཉིད་ཀྱིས་སོ་སོར་སྡུད་པ་གོམས་པར་བྱས་ནས་ཉོན་མོངས་པ་ཅན་གྱི་ཡིད་གནས་གྱུར་པའི་མཚན་ཉིད་ཅན་གྱི་བསམ་གཏན་ལ་སྤྱོད་པར་བྱའོ། །འདོད་པ་ལྔ་ནི་མདོར་བསྡུས་ན། །སངས་རྒྱས་ལྔ་རུ་སྦྱོར་བ་ཡིས། །བརྟག་པ་བསམ་གཏན་ཞེས་བཤད་དེ། །བསམ་གཏན་དེ་
ནི་རྣམ་ལྔར་གྱུར། །ཞེས་པ་དེའི་དོན་བཤད་པ་ནི་གཟུགས་ལ་སོགས་པའི་འདོད་པའི་ཡོན་ཏན་ལྔའི་ཡུལ་ལ་མཛེས་པ་དང་མི་མཛེས་པ་དང་བཏང་སྙོམས་དང་རང་མཆོག་ཏུ་མཛེས་པ་དང་། གཞན་མཆོག་ཏུ་མཛེས་པས་འདོད་ཆགས་དང་ཞེ་སྡང་དང་གཏི་མུག་དང་ང་རྒྱལ་དང་ཕྲག་དོག་
གི་བདག་ཉིད་ཀྱི་ཉོན་མོངས་པའི་སེམས་སྐྱེས་པས་ན་ཡུལ་དང་སེམས་གཅིག་ཏུ་བྱེད་པ་ནི་འདོད་ཡོན་ལྔ་སྟེ། སེམས་ཉིད་ཡིན་ནོ་ཞེས་བཤད་དོ། །དེ་ཡང་། འདོད་པའི་སེམས་ཞེས་བཤད་པ་སྟེ། །འདོད་ཆགས་ཞེ་སྡང་རྨོངས་པའི་དབང་། །ང་རྒྱལ་ཕྲག་དོག་ཅན་བདག་ཉིད། །ཡང་
དག་རྫོགས་པའི་སངས་རྒྱས་ལྔ། །ཞེས་གསུངས། སངས་རྒྱས་ལྔ་རུ་སྦྱོར་བ་ཡིས། །བརྟག་པ་བསམ་གཏན་ཞེས་བཤད་དེ། །ཞེས་པ་ནི་མཛེས་པའི་གཟུགས་ལ་སོགས་པ་ལ་འདོད་ཆགས་པའི་སེམས་དེ་ནི་སྣང་བ་མཐའ་ཡས་ཀྱི་རང་བཞིན་ནོ། །མི་མཛེས་པ་ལ་ཞེ་སྡང་
བའི་སེམས་དེ་ནི་མི་བསྐྱོད་པའི་རང་བཞིན་ནོ། །བཏང་སྙོམས་ལ་གཏི་མུག་པའི་སེམས་དེ་ནི་རྣམ་པར་སྣང་མཛད་ཀྱི་རང་བཞིན་ནོ། །རང་མཆོག་ཏུ་མཛེས་པ་ལ་ང་རྒྱལ་བའི་སེམས་དེ་ནི་རིན་ཆེན་འབྱུང་ལྡན་གྱི་རང་བཞིན་ནོ། །གཞན་མཆོག་ཏུ་མཛེས་པ་ལ་ཕྲག་དོག་པའི་སེམས་དེ་ནི་དོན་

44-1-96a

ཡོད་གྲུབ་པའི་རང་བཞིན་ནོ། །དེ་ལྟ་བུའི་རང་བཞིན་ལ་རྟག་པ་ནི་བསམ་གཏན་ནོ། །བསམ་གཏན་དེ་ཡང་དབྱེ་བས་རྣམ་པ་ལྔར་འགྱུར་ཏེ། རྟོག་པ་དང་དཔྱོད་པ་དང་དགའ་བ་དང་དེ་བཞིན་བདེ་བ་ཉིད་དང་ཡང་དག་སྟེ། ལྔ་པོ་དེར་ནི་བསམ་གཏན་བསྡུ། །བརྟག་དང་
བསམ་དང་བསྒོམ་པ་ལ། །བསམ་གཏན་ཞེས་ནི་རབ་ཏུ་བཤད། །བསམ་གཏན་རྣམ་པར་མི་རྟོག་པ། །བསམ་གཏན་དེ་ནི་སངས་རྒྱས་ཡུལ། །དང་པོའི་རྣལ་འབྱོར་པ་རྨོངས་ནས། །གཞན་དུ་སྟོང་ཉིད་ལ་སེམས་ན། །བློ་གྲོས་ཤིན་ཏུ་རྨོངས་གྱུར་པས། །མུ་སྟེགས་ལམ་
ལ་འཇུག་པར་འགྱུར། །ཞེས་བྱ་བས་ཡུལ་དང་ཡུལ་ཅན་གྱི་ཤེས་པ་སྙོམས་པར་འཇུག་པ་ནི་གསང་བ་གསུམ་ལས་ཏེ། ཇི་ལྟར་གོང་དུ་བཤད་པའི་འདོད་ཆགས་ལ་སོགས་པའི་སེམས་རྣམས་ནི་སྣང་བ་མཐའ་ཡས་ལ་སོགས་པའི་རང་བཞིན་དུ་བསྒྲུབས་ནས་འདོད་ཆགས་ཀྱི་སེམས་
ལ་སོགས་པ་ཕྱིར་ལྡོག་པར་བྱེད་པ་འདི་ནི་རྟོག་པའོ། །དེ་ལ་སེམས་ཉིད་ཙམ་དུ་ཅི་རིགས་པར་འཇུག་པ་ནི་དཔྱོད་པའོ། །སེམས་ཀྱི་རང་བཞིན་རབ་ཏུ་ཤེས་པ་གང་ཡིན་པ་ནི་དགའ་བའོ། །དེ་ལ་དགའ་བ་ལས་ཀྱི་ནུས་པས་ཐོད་པའི་ལུས་ཇི་ལྟ་བ་བཞིན་དུ་བདེ་བའོ། །དེ་ལྟར་རྟོགས་པ་
དང་རྟོགས་པར་བྱེད་པ་མེད་པ་དེ་ཙམ་ཉིད་དུ་སེམས་རྩེ་གཅིག་ཏུ་གནས་པའི་རང་བཞིན་ནི་ཀུན་རྫོབ་དང་དོན་དམ་པའི་བདེན་པའི་ངོ་བོ་ཉིད་དུ་ཟུང་དུ་འཇུག་པའི་ཤེས་པ་ནི་བསམ་གཏན་ནོ། །དེ་ཉིད་འདི་ལྟར་བཤད་པར་བྱ་སྟེ། གལ་ཏེ་གཟུགས་ལ་སོགས་པ་ལ་ཉེ་བར་འཇུག་པ་ན། དེ་ལ་འདོད་
ཆགས་ལ་སོགས་སྐྱེས་ན་སྣང་བ་མཐའ་ཡས་ལ་སོགས་པའི་རང་བཞིན་དུ་ངེས་པར་བྱས་ནས་མཛེས་པ་ལ་སོགས་པའི་གཟུགས་ལ་སོགས་པ་རང་དང་འདྲ་བའི་ཤེས་རབ་མའི་ངོ་བོ་ཉིད་དུ་དམིགས་ནས་སྙོམས་པར་ཞུགས་པས། ང་རྒྱལ་རྡོ་རྗེ་དང་སྣང་བ་མཐའ་ཡས་སུ་འདུས་པར་
བསམ། ཕྲག་དོག་རྡོ་རྗེ་དང་མི་བསྐྱོད་པར་འདུས་པར་བསམས་ནས་རྡོ་རྗེ་གསུམ་གྱི་བདག་ཉིད་ནམ་མཁའ་ལྟ་བུར་རྟོགས་ནས་རང་གི་ལུས་དང་ངག་དང་ཡིད་ཀྱང་རྡོ་རྗེ་གསུམ་གྱི་རང་བཞིན་ཉིད་དུ་རྣམ་པར་བསམ་ཞིང་ཅི་རིགས་པ་ཉིད་དུ་འགྲུབ་པས་ན་ཡིད་དགའ་བ་ཐོབ་པ་ལས་ཀྱི་ནུས་པ་

44-1-96b

ཐོབ་པའི་ལུས་ཀྱི་བདེ་བ་ཅན་ལ། དཔལ་ལྡན་རྡོ་རྗེ་ཐུགས་འཆང་བ། །ལ་སོགས་པའི་ཚིགས་སུ་བཅད་པས་རང་གི་སེམས་དང་། ནམ་མཁར་གནས་པའི་རྡོ་རྗེ་གསུམ་ཁྱད་པར་མེད་པར་རྩེ་གཅིག་པའི་མཚན་ཉིད་ཅན་གྱི་ཏིང་ངེ་འཛིན་བསྒོམ་པར་བྱ་བ་འདིས་ནི་བསམ་གཏན་གྱི་ཡན་ལག་
ལྔ་པ་སྟེ་གཉིས་པའོ།།      །།ད་ནི་གསུམ་པ་སྲོག་རྩོལ་གྱི་ཡན་ལག །ཡེ་ཤེས་ལྔ་ཡི་རང་བཞིན་དབུགས། །འབྱུང་བ་ལྔ་ཡི་ངོ་བོ་ཉིད། །གོང་བུའི་གཟུགས་ཀྱིས་ཕྱུང་ནས་ནི། །སྣ་ཡི་རྩེ་མོར་རབ་ཏུ་བརྟག། །རིན་ཆེན་ཁ་དོག་སྣ་ལྔ་པ། །སྲོག་དང་རྩོལ་བ་དྲན་
ཞེས་བཤད། །ཞེས་བཤད་པ་ནི་མེ་ལོང་ལྟ་བུ་ལ་སོགས་པའི་ཡེ་ཤེས་ཀྱི་ངོ་བོ་ཉིད་ཀྱི་ཕྱིར། ཡེ་ཤེས་ལྔ་ཡི་རང་བཞིན་ནོ། །འབྱུང་བ་ལྔའི་ངོ་བོ་ཉིད་ནི་ས་ལ་སོགས་པ་ལྔའི་དཀྱིལ་འཁོར་ནས་བྱུང་བའི་དབུགས་ངེས་པར་འབྱིན་པ་ནི་སྣའི་རྩེ་མོ་ལྷ་མོའི་པདྨའི་སྣ་རྩེ་ན་གོང་
བུའི་གཟུགས་ཀྱིས་ཏེ། ཐིག་ལེའི་གཟུགས་སུ་བརྟག་པ་ནི་རྣམ་པར་བསམ་པའོ། །ཁ་དོག་ལྔ་ནི་དཀར་པོ་དང་། སེར་པོ་དང་། དམར་བ་དང་། ལྗང་བ་དང་། སྔོ་བའི་རང་བཞིན་ནོ། །རིན་ཆེན་ཏེ་རིན་པོ་ཆེ་ནི་མཆོག་གོ། །དྲན་ནི་དགའ་བ་བསྐྱེད་པས་ན་རིན་པོ་ཆེ་དང་། རྙེད་
དཀའ་བ་དང་། འོད་རབ་ཏུ་འབར་བའི་ཕྱིར་རོ། །དེ་ཡང་གྱུར་པས་ན་སྲོག་རྩོལ་དྲན་ཞེས་བྱའོ། །དེ་ཉིད་འདི་ལྟར་བཤད་པར་བྱ་སྟེ། སྣ་བུག་ནང་ནས་ཕྱིར་འབྱུང་བའི་དབུགས་འབྱུང་བ་ཆེན་པོ་ལྔའི་རང་བཞིན་འོད་ཟེར་གྱི་དྲ་བ་ཅན་ཁ་དོག་ལྔ་དང་ཡེ་ཤེས་ལྔའི་བདག་ཉིད་ཀྱིས་ནམ་མཁའ་
ཀུན་དུ་ཁྱབ་པར་སྤྲོས་ནས། འོད་ཟེར་གྱི་དྲ་བ་དེ་དག་ཐབས་དང་ཤེས་རབ་གཉིས་སུ་མེད་པར་སྙོམས་པར་འཇུག་པའི་བདེ་བས། སངས་རྒྱས་དང་བྱང་ཆུབ་སེམས་དཔའ་རྣམས་ལྷན་ཅིག་སྐྱེས་དགའི་ཡེ་ཤེས་ཀྱི་བདུད་རྩིའི་རོ་རབ་ཏུ་སྣང་བས་ཅི་རིགས་པར་བཀུག་ནས་རང་གི་སྣ་བུག་
ཉིད་ནས་གཞུག །དེས་རང་གི་ལུས་ཀྱི་ཡན་ལག་ཀུན་ལ་ཁྱབ་པས་བདེ་བའི་རང་བཞིན་དུ་བསྒོམས་ནས་དེའི་འོད་ཀྱི་དྲ་བ་དང་བདེ་བ་དང་གཉིས་སུ་མེད་པར་གྱུར་ནས་རྡོ་རྗེའི་ལམ་ནས་བྱུང་ནས་ལྷ་མོའི་པདྨའི་སྣ་རྩེ་ལ་ཐིག་ལེ་མུ་ཏིག་རིན་པོ་ཆེ་ལ་སིནྡྷུ་རས་བསྒོས་པས་དཀར་དམར་ལྟ་

44-1-97a

བུར་ཤིན་ཏུ་མཛེས་པའོ། །རང་དང་འདྲ་བའི་རིག་མ་ལ་ཡན་ལག་གིས་འཁྱུད་པའི་འཇམ་པའི་རྡོ་རྗེ་ལ་སོགས་པ་སྙིང་པོར་གྱུར་པ་རྟག་ཏུ་བསྒོམ་པར་བྱ་བ་ནི་ཕྲ་བའི་རྣལ་འབྱོར་དང་མཚུངས་པ་ནི་ཡན་ལག་གསུམ་པའོ།།      །།ད་ནི་ཡན་ལག་བཞི་པ་
རང་སྔགས་སྙིང་གར་བསམས་ནས་ནི། སྲོག་ནི་ཐིག་ལེར་གྱུར་པར་བཞག། །རང་དབང་རིན་ཆེན་དགག་པ་ནི། །གཟུང་བ་འཛིན་པ་ཡིན་པར་བཤད། །སེམས་ནི་འགོག་པའི་རྡོ་རྗེར་གྱུར། །མཚན་མ་ཉེར་འཛིན་འབྱུང་བར་འགྱུར། །མཚན་མའི་ཁམས་ནི་རྣམ་པ་ལྔ། །བྱང་
ཆུབ་རྡོ་རྗེས་གསུངས་པ་ཡི། །སྨིག་རྒྱུ་འདྲ་བ་དང་པོ་སྟེ། །དུ་བ་ལྟ་བུ་གཉིས་པ་ཡིན། །མཁའ་སྣང་འདྲ་བ་གསུམ་པ་སྟེ། །མར་མེ་འབར་བ་བཞི་པ་ཡིན། །སྤྲིན་མེད་ནམ་མཁའ་ལྟ་བུ་ནི། །རྟག་ཏུ་སྣང་བ་ལྔ་པའོ། །ཞེས་བྱ་བ་བཤད་པ་ནི་རང་སྔགས་སྙིང་གར་བསམས་ནས་
ཡེ་ཤེས་སེམས་དཔའི་ཐུགས་ཀར་གནས་པའི་མཚན་མའི་དབུས་ན་གནས་པའི་མཾ་ལ་སོགས་པའི་ས་བོན་བརྟན་པར་བྱས་ནས་སྲོག་དེ་ཐིག་ལེ་ལ་བཅུག་ནས་འོད་ཟེར་ལྔ་དང་ལྡན་པར་བསྒོམ་མོ། །རང་དབང་རིན་ཆེན་དགག་པ་ཞེས་པ་བརྟན་པར་གྱུར་པས་ན་དགག་པ་སྟེ། 
དབང་པོ་དང་ལྷན་ཅིག་པའམ། ཡང་ན་རང་གི་དབང་པོ་དང་ལྷན་ཅིག་པས་སོ། །གཟུང་བ་ནི་ཕྱིར་འགྲོ་བ་ཟློག་པར་བྱེད་པའི་དོན་ཏོ། །དེ་ལྟར་སེམས་བརྟན་པར་གྱུར་པའི་རིམ་པས་ས་ལ་སོགས་པ་འབྱུང་བ་ཆེན་པོ་ལྔའི་དཀྱིལ་འཁོར་ནས་འབྱུང་བའི་དབུགས་ཟད་པ་ལ་མཚན་
མའི་ཤེས་པ་འབྱུང་བ་སྟེ། དེ་ཡང་རྣམ་པ་ལྔ་ལས། དང་པོར་སྨིག་རྒྱུ་ལྟ་བུས་ནི་སའི་དཀྱིལ་འཁོར་ལས་འབྱུང་བའི་དབུགས་ཟད་པས་ན་དྲོད་ཀྱི་གནས་སྐབས་སོ། །དུ་བ་ལྟ་བུས་ནི་ཆུའི་དཀྱིལ་འཁོར་ནས་འབྱུང་བའི་དབུགས་ཟད་པས་ན་རྩེ་མོའི་མཚན་ཉིད་སྣང་བའི་
གནས་སྐབས་སོ། །ནམ་མཁའ་ལྟ་བུས་ནི་ནམ་མཁའ་ཀུན་དུ་ཁྱབ་པའམ། མེ་སྟག་འཕྲོ་བ་ལྟ་བུ་མེའི་དཀྱིལ་འཁོར་ནས་འབྱུང་བའི་དབུགས་ཟད་པས་ན་བཟོད་པའི་མཚན་ཉིད་སྣང་བ་ཆེན་པོའི་གནས་སྐབས་སོ། །མར་མེ་ལྟ་བུས་ནི་རླུང་གི་དཀྱིལ་འཁོར་ལས་བྱུང་

44-1-97b

བའི་དབུགས་ཟད་པས་ན་ཆོས་མཆོག་ཆེན་པོའི་མཚན་ཉིད་སྣང་བ་ཐོབ་པའི་གནས་སྐབས་སོ། །སྣང་བའི་རྣམ་པ་ཡང་ཕྱོགས་དཔག་ཏུ་མེད་པའི་དཀྱིལ་འཁོར་ཐམས་ཅད་དུ་ཁྱབ་པ་སྟོན་པའི་བདུད་རྩིའི་འོད་ཀྱིས་སྙོམས་པའི་ནམ་མཁའི་དཀྱིལ་འཁོར་ནས་འབྱུང་བའི་དབུགས་ཟད་
པས་ན་ཐམས་ཅད་དུ་ཆོས་ཀྱི་དབྱིངས་ཀྱི་མཚན་ཉིད་ཉེ་བར་སྣང་བ་ཐོབ་སྟེ། ས་རབ་ཏུ་དགའ་བའི་བདེ་བ་ཆེན་པོར་རབ་ཏུ་འཇུག་པའི་གནས་སྐབས་སོ། །དེ་ཉིད་འདི་ལྟར་བཤད་པར་བྱ་སྟེ། དེ་མ་ཐག་ཏུ་ཡེ་ཤེས་སེམས་དཔའ་སྙིང་གར་བཅུག་ནས་མཚན་མའི་ས་བོན་ལས་འོད་ཟེར་གྱི་དྲ་བ་སྲོག་
དང་འདྲེས་པར་གྱུར་ནས་རྣམ་པར་སྤྲོས་པས་གོང་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས་ཡང་རང་གི་སྙིང་གའི་མཚན་མའི་ས་བོན་གྱི་ཐིག་ལེ་ལ་བསྡུ། སྔགས་ཀྱི་ཡི་གེ་རྣམས་ཀྱང་ཐིག་ལེར་བསམས་ནས།དེའི་དབུས་སུ་རང་ཉིད་དང་རིག་མ་ལ་ཡན་ལག་གིས་འཁྱུད་
པས་བདེ་བ་རྒྱ་མཚོ་རོ་མྱོང་བའི་རང་བཞིན་དུ་བདག་བསམས་པ་ནི། མཆན་ཁུང་གཉིས་སུ་ལག་པ་གཉིས་རབ་ཏུ་བསྡམས་ནས། འོག་སྒོ་གཉིས་ཀྱང་བསྡམས་ལ་ལྕེ་རྩེ་བཟློག་ནས་རྡོ་རྗེ་སྐྱིལ་ཀྲུང་བཅིངས་ཏེ། རིམ་ནས་རིམ་གྱིས་སྲོག་གཟུང་བར་བྱ་བ་ནི་ཐིག་ལེའི་སྦྱོར་བས་མཆོག་ཏུ་གྱུར་
པའི་གདམས་ངག་སྟེ་ཡན་ལག་བཞི་པའོ།།      །།དེ་ལྟར་མཆོག་དགའི་གནས་སྐབས་སུ་ཉོན་མོངས་པ་ཅན་གྱི་ཡིད་གནས་གྱུར་པའི་མཚན་ཉིད་ཅན་མཐོང་བའི་ལམ་གྱི་བར་དུ་བསྟན་ནས། ད་ནི་དགའ་བྲལ་གྱི་གནས་སྐབས་སུ་ཡང་སྔོན་དུ་གྱུར་པ་ལས་དྲན་པ་ཡང་དང་ཡང་དུ་མངོན་དུ་
བྱ་བའི་མཚན་ཉིད་ཅན་གྱི་བསྒོམ་པའི་ལམ་གྱིས་རྗེས་སུ་དྲན་པ་ཡན་ལག་ལྔ་པ། བརྟན་གྱུར་རྡོ་རྗེ་ལམ་ནས་ནི། །ནམ་མཁའི་ཁམས་སུ་སྤྲོ་བར་བྱ། །རྗེས་དྲན་གང་ཞིག་རྣམ་བསྒོམ་པ། །དེ་དང་འདྲ་བར་སྤྲོ་བར་བྱ། །རྗེས་སུ་དྲན་པ་ཞེས་བཤད་དོ། །སོ་སོར་སྣང་བ་དེ་ལས་སྐྱེ། །
ཞེས་བྱ་བར་བཤད་པ་ནི་བརྟན་པའི་མཚན་མའི་ཤེས་པ་བྱུང་བར་ཤེས་པའི་སྒོ་ནས་བརྟན་པའི་ཤེས་པ་སྤྲོ་བར་བྱ་བར་འགྱུར་གྱི་སྒྲས་མི་བརྟན་ན་མི་སྤྲོ་བ་ནི་རྡོ་རྗེ་ལམ་ནས་སོ། །གང་ནས་ཞེ་ན། མཁའ་ནས་ཞེས་པས་ཆོས་འབྱུང་ནས་དང་། ནམ་མཁའ་དཀྱིལ་འཁོར་ནས་སོ། །རྗེས་སུ་དྲན་

44-1-98a

པ་སྟེ་གོང་དུ་སངས་རྒྱས་ལ་སོགས་པ་རྗེས་སུ་དྲན་པ་དེ་ལྟ་བུའི་ཤེས་པ་དྲན་པའོ། །རང་དང་གཞན་པ་སོ་སོར་སྣང་བ་དང་མཉམ་པས་དཀྱིལ་འཁོར་གྱི་འཁོར་ལོ་ལ་སོགས་པ་དང་འདྲ་བར་ཤེས་པ་སྐྱེས་པའོ། །དེ་ཉིད་འདི་ལྟར་བཤད་པར་བྱ་སྟེ། གོང་དུ་མཚན་མ་
བྱུང་བའི་སྒོ་ནས་སེམས་ངེས་པར་བརྟེན་པར་གྱུར་པར་ཤེས་པ་རང་གི་སྙིང་གའི་ཡེ་ཤེས་སེམས་དཔའི་ཐུགས་ཀའི་ཐིག་ལེ་དེ་ལས་འོད་ཟེར་གྱི་དྲ་བ་ཐབས་ཤེས་རབ་སྙོམས་པར་ཞུགས་པས་སངས་རྒྱས་ཀྱི་གཟུགས་ཀྱི་ངོ་བོ་ཉིད་དམ་ཡང་ན་མཚན་མའི་རང་བཞིན་དུ་སྤྲོ་བ་ནི། རྡོ་རྗེའི་ལམ་ནས་
ལྷ་མོའི་པདྨའི་ནང་གི་གནས་སུ་ཡུད་ཙམ་བསྒོམས་ལ། དེ་ནས་ཕྱི་རོལ་དུ་ནམ་མཁའི་ཁམས་ཀྱི་འགྲོ་བ་མ་ལུས་པ་དང་སྙོམས་པར་འཇུག་པའི་རང་བཞིན་ཉིད་དུ་བྱས་ཏེ་རྡོ་རྗེའི་ལམ་ནས་བསྡུས་པས་བདེ་བའི་བདག་ཉིད་དུ་ཡན་ལག་ཐམས་ཅད་བདེ་བར་བསྒྲུབས་ཏེ། ཐོག་མའི་
ཐིག་ལེ་ཡང་འདུས་ནས་བསྒོམ་པར་བྱ་བ་ནི་གདམས་ངག་སྟེ་ཡན་ལག་ལྔ་པའོ།།      །།ད་ནི་སློབ་མའི་ལམ་སངས་རྒྱས་ཐོབ་པར་བྱེད་པའི་མཚན་ཉིད་ལྷན་ཅིག་སྐྱེས་དགའི་རང་བཞིན་ཅན་ཡན་ལག་དྲུག་པ། ཐབས་དང་ཤེས་རབ་སྙོམས་འཇུག་པས། །དངོས་པོ་ཐམས་
ཅད་མདོར་བསྡུས་པ། །གོང་བུའི་ཚུལ་གྱིས་བསྡུས་ནས་ནི། །དབུས་སུ་གཟུགས་ནི་རྣམ་པར་བསྒོམ། །ཡུད་ཀྱིས་ཡེ་ཤེས་རྫོགས་བྱེད་པ། །ཏིང་ངེ་འཛིན་ཞེས་བརྟགས་པ་ཡིན། །ཞེས་བཤད་པར་བྱ་སྟེ། ཐབས་དང་ཤེས་རབ་སྙོམས་འཇུག་ནི་བདག་ཉིད་གཉིས་སུ་
མེད་པའི་བདེ་བའི་རང་བཞིན་བསྒོམ། བརྟེན་གཡོའི་དངོས་པོ་ཐམས་ཅད་ཀྱི་བདག་ཉིད་དུ་རང་གི་སེམས་ཙམ་པ་ཉིད་ནི་ཐབས་དང་ཤེས་རབ་ཀྱི་བདག་ཉིད་ཡིན་ལ། སྙོམས་འཇུག་ནི་གཉིས་སུ་མེད་པ་ཐོབ་པས་ན་མདོར་བསྡུས་པ་སྟེ་གོང་བུའི་རང་བཞིན་སངས་རྒྱས་ཀྱི་གཟུགས་
ཅན་ནོ། །དབུས་སུ་གཟུགས་ནི་ཞེས་པ་ལུས་ཀྱི་དབུས་སུ་རྣམ་པར་བསྒོམས་པས་འདྲེས་པར་འགྱུར་བའོ། །ཡུད་ཀྱིས་ནི་ཡང་དག་པར་ཞུ་བར་གྱུར་པ་ལས་ལྷ་མོ་བཞིའི་གླུས་བསྐུལ་བའི་སྒོ་ནས་གཉིས་སུ་མེད་པའི་བདེ་བ་ཡེ་ཤེས་ཀྱི་ལྷའི་སྐུའི་རང་བཞིན་ཅན་དུ་འགྲུབ་པར་

44-1-98b

འགྱུར་བའི་ཤེས་པ་རྫོགས་པར་བྱེད་པའི་ཏིང་ངེ་འཛིན་ཏོ། །དེ་འདི་ལྟར་བཤད་པར་བྱ་སྟེ། གོང་འདི་ཡན་ལག་ལྔ་པ་ནས་སེམས་བརྟན་པར་གྱུར་པའི་རྣལ་འབྱོར་པས་རང་བཞིན་སོ་སོར་སྣང་བའི་དཀྱིལ་འཁོར་གྱི་འཁོར་ལོ་ལ་སོགས་པ་དང་འདྲ་བ་ཡང་དང་ཡང་དུ་སྐྱེད་པར་བྱེད་ནུས་
པས་སྤྲོ་བ་དང་བསྡུ་བ་དང་། དབང་དུ་བྱ་བའི་དོན་དུ་རང་གིས་བདེ་བ་ཉམས་སུ་མྱོང་བ་ནི་སྒྱུ་མ་ལྟ་བུའི་རང་བཞིན་གྱི་འོད་ཟེར་དུ་མ་འཕྲོ་བའི་དྲ་བས་ཀུན་ནས་སྙོམས་པར་འཇུག་པའི་རང་བཞིན་གྱིས་ཤིན་ཏུ་ཕྲ་བ་དུ་མའི་ངོ་བོ་ཉིད་ཆགས་ཐོགས་མེད་པར་བསྡུས་ནས། རང་ཉིད་ཞུ་བར་
གྱུར་པ་དང་འདྲེས་པའི་བདེ་བ་སྒྱུ་མ་ལྟ་བུ་རྣམ་པར་བསམས་པ་ལས། སྔོན་གྱི་སྨོན་ལམ་གྱི་དབང་གིས་སྙིང་རྗེ་ལ་སོགས་པའི་རང་བཞིན་ཅན་སྤྱན་མ་ལ་སོགས་པའི་ལྷ་མོ་བཞིས་བསྐུལ་བས་མྱུར་དུ་ལངས་ཏེ་ཡེ་ཤེས་ཀྱི་རང་བཞིན་གྱི་འཇམ་པའི་རྡོ་རྗེ་ལ་སོགས་པ་རང་དང་འདྲ་བའི་ལུས་
ལ་འཁྱུད་པར་བསྐྱེད་པའི་བདུད་རྩིའི་བཅུད་ཟག་པའི་རོ་མྱང་བར་བསྒོམ་པ་ནི་ཏིང་ངེ་འཛིན་གྱི་གདམས་ངག་སྟེ་ཡན་ལག་དྲུག་པའོ།།      །།དེ་ལ་སོ་སོར་སྡུད་པ་འགྲུབ་པས་ནི་སྔགས་རྣམས་ཐམས་ཅད་འགྲུབ་བོ། །བསམ་གཏན་གྱིས་ནི་མངོན་པར་ཤེས་པ་ཡང་འགྲུབ་བོ། །
སྲོག་རྩོལ་གྱིས་ནི་བྱང་ཆུབ་སེམས་དཔས་བྱིན་གྱིས་རློབ་བོ། །གཟུང་བས་ནི་རྡོ་རྗེ་སེམས་དཔས་བྱིན་གྱིས་རློབ་བོ། །རྗེས་སུ་དྲན་པས་ནི་འོད་ཟེར་གྱི་དཀྱིལ་འཁོར་སྤྲོ་བའོ། །བསམ་གཏན་གྱི་དབང་གིས་ནི་སྒྲིབ་པ་ཐམས་ཅད་ལས་རྣམ་པར་གྲོལ་བའོ། །དེ་ཡང་། སོ་སོར་སྡུད་ལས་
ངེས་རྙེད་ན། །སྔགས་རྣམས་ཀུན་གྱིས་བྱིན་གྱིས་བརླབ། །བསམ་གཏན་ཡེ་ཤེས་ངེས་ཐོབ་ན། །མངོན་ཤེས་ལྔ་པོ་རྙེད་པར་འགྱུར། །སྲོག་དང་རྩོལ་བ་ལ་དབང་ན། །རྡོ་རྗེ་སེམས་དཔའ་གཟིགས་པར་མཛད། །བཟུང་བའི་སྟོབས་ནི་རྟག་པ་ལ། །རྡོ་རྗེ་སེམས་དཔའ་ངེས་པར་
འཇུག །རྗེས་སུ་དྲན་པས་ཡང་དག་པར། །འོད་ཟེར་གྱིས་ནི་དཀྱིལ་འཁོར་བསྐྱེད། །ཏིང་ངེ་འཛིན་གྱི་དབང་གིས་ནི། །སྒྲིབ་པ་རྣམས་ལས་ངེས་པར་གྲོལ། །ཞེས་གསུངས་སོ། །དཔལ་ལྡན་ཡེ་ཤེས་ཞབས་ཀྱི་སྦྱོར་བའི་ཡན་ལག་དྲུག་མཛེས་པར། །གང་གིས་ཤིན་ཏུ་དྲི་མེད་

44-1-99a

བཤད་པས་དགེ་བ་དེ་བསྐྲུན་ལ། །ཤིན་ཏུ་དག་པ་དེ་ནི་རྒྱལ་བའི་བློ་ཅན་མིག་ཅན་ལ། །དཔལ་ལྡན་ཡན་ལག་དྲུག་གི་ཆུས་བཀྲུས་ཡན་ལག་རྣམ་དག་ཤོག། །བླ་མ་བརྒྱུད་པའི་རྗེས་འབྲངས་ཤིང་། །འཇམ་པའི་རྡོ་རྗེའི་བཀའ་དྲིན་ལས། །དཔལ་ལྡན་རྣམ་སྣང་
རྡོ་རྗེ་ཡིས། །རིམ་པར་སྦྱར་བས་གསལ་བར་བྱེད། །དཔལ་སྨན་པའི་ཞབས་ཀྱི་ཞལ་སྔ་ནས་བྱུང་བ། སྦྱོར་བ་ཡན་ལག་དྲུག་གི་སྣང་བའི་རིམ་པ་ཞེས་བྱ་བ། དཔལ་རྣམ་པར་སྣང་མཛད་རྡོ་རྗེས་མཛད་པ་རྫོགས་སོ།།      །།བླ་མ་ཆེན་པོ་པཎྜི་ཏ་པུཎྱཱ་ཤྲཱིའི་ཞལ་སྔ་ནས་དང་། ལོ་ཙཱ་བ་
དགེ་སློང་གཡུང་དྲུང་འོད་ཀྱིས་བསྒྱུར་བའོ།།༄༅༅། །རྒྱ་གར་སྐད་དུ། ཤྲཱི་གུ་ཧྱ་ས་མཱ་ཛ་སྱ་མཉྫུ་ཤྲཱི་སཱ་དྷ་ནཾ། བོད་སྐད་དུ། དཔལ་གསང་བ་འདུས་པའི་འཇམ་དཔལ་གྱི་སྒྲུབ་ཐབས། དཔལ་འཇམ་པའི་རྡོ་རྗེ་ལ་ཕྱག་འཚལ་ལོ། །ཆོས་དང་ལོངས་
སྤྱོད་སྤྲུལ་པའི་སྐུ། །སྐུ་གསུང་ཐུགས་ནི་རྡོ་རྗེ་ཅན། །ཡེ་ཤེས་རྣམ་པ་ལྔ་དང་ལྡན། །རྟོག་པ་མ་ལུས་ཀུན་ལས་གྲོལ། །ཐམས་ཅད་ངོ་བོ་ཐམས་ཅད་དུ། །དཀྱིལ་འཁོར་འཁོར་ལོ་མཆོག་དང་ལྡན། །འཇམ་དཔལ་དེ་ལ་ཕྱག་འཚལ་ནས། །འགྲོ་བའི་བྱང་ཆུབ་ཐོབ་པའི་རྒྱུ། །དེ་
ཡི་སྒྲུབ་པའི་ཆོ་ག་མཆོག། །ཅི་ནུས་བདག་གིས་བཤད་པར་བྱ། །དང་པོ་སྔགས་པ་བདག་ཉིད་ནི། །འཇམ་པའི་སྟན་ལ་འདུག་བྱས་ནས། །རང་གི་སྙིང་གར་ཟླ་བ་ལ། །ཚེ་རབས་སྔོན་ནས་གོམས་བྱས་པའི། །ཚད་མེད་བཞི་པོ་སྙིང་རྗེ་དང་། །བྱམས་དང་དགའ་དང་བཏང་སྙོམས་
ཏེ། །ཚངས་སྤྱོད་མཚན་ཉིད་བཞི་རྣམས་ཀྱི། རྒྱུ་ཡི་དངོས་པོའི་ས་བོན་མཾ། །དམ་པའི་གུར་གུམ་ལྟ་བུ་ཡི། །འོད་ཟེར་འཕྲོ་བར་རྣམ་པར་བསམ། །འགྲོ་རྣམས་སྡུག་བསྔལ་མཐོང་བྱས་ནས། །གྲོལ་འདོན་མཚན་ཉིད་སྙིང་རྗེའོ། །བདེ་བར་འདོད་རྣམས་མཐོང་བྱས་ནས། །ཕན་པའི་
བདེ་བ་མ་ལུས་པ། །གྲུབ་པར་འདོད་པ་བྱམས་པའོ། །འགྲོ་རྣམས་སྤྱོད་པ་མི་མཉམ་ཞིང་། །གདུལ་དཀའ་སྡུག་བསྔལ་ལམ་ལ་དགའ། །བདེ་བ་མི་འདོད་པ་རྣམས་ཀྱི། །འཁོར་བའི་སྡུག་བསྔལ་བསམ་པ་དང་། །འཇིག་རྟེན་འཇིག་རྟེན་འདས་པ་ཡི། །བདེ་བ་མཐའ་ཡས་དང་

44-1-99b

ལྡན་པའི། །ཇི་ལྟར་བདག་གིས་བྱ་བསམས་ཏེ། །རང་གི་སྙིང་གར་གནས་པའི་མཾ། །སངས་རྒྱས་ཀུན་གྱི་བྱིན་རླབས་ཀྱིས། །འཇམ་དབྱངས་འགྲུབ་པའི་རྒྱུ་བསམས་ལ། །དེ་ཉིད་བཅོམ་ལྡན་ཐམས་ཅད་མཁྱེན། །འགྲོ་བ་འདུལ་བའི་ཐབས་མཁྱེན་པས། །ཇི་ལྟ་ཇི་ལྟར་འདུལ་
འགྱུར་བས། །དེ་ལྟ་དེ་ལྟར་འགྲོ་བ་ལ། །ཐབས་ཀུན་རབ་ཏུ་སྟོན་མཛད་པས། །ཐབས་ཉིད་གང་གིས་སེམས་ཅན་རྣམས། །སྡུག་བསྔལ་ཀུན་ལས་གྲོལ་བ་དང་། །བླ་མེད་བྱང་ཆུབ་ཐོབ་ཀྱི་བར། །བདེ་བ་མ་ལུས་ལྡན་འགྲུབ་པ། །འདི་ལྟར་བདག་ཉིད་འཇམ་དཔལ་སྐུར། །འགྲུབ་
ཅིང་འགྲོ་བའི་དོན་བྱེད་པའི། །སྟོབས་དང་ལྡན་པར་བསམ་པ་ལ། །དགའ་བའི་མཚན་ཉིད་དགའ་བའོ། །བསྒོམས་པས་བྱང་ཆུབ་ངེས་བྱེད་ཕྱིར། །འཇིག་རྟེན་བྱ་བ་མི་བྱེད་པའི། །མཚན་ཉིད་བཏང་སྙོམས་ཆེན་པོ་སྟེ། །དེ་རྣམས་ངེས་པར་བསམ་པར་བྱའོ། །འཇམ་དཔལ་
ཉིད་དུ་བསྒྲུབ་པ་ཡང་། །བསོད་ནམས་མེད་པར་མི་འགྲུབ་པས། །སྦྱིན་པ་ལ་སོགས་འགྲུབ་པའི་རྒྱུ། །དབུལ་ཕྱིར་བདག་གིས་མི་ནུས་པས། །སྙིང་གར་ཡིད་བཞིན་ནོར་བུ་ལྟར། །འགྲོ་བའི་དོན་ཀུན་འགྲུབ་བྱེད་པའི། །མཾ་ཉིད་རབ་ཏུ་དྲན་བྱས་ཏེ། །དེ་འོད་ལས་བྱུང་ནམ་མཁའ་ལ། །
བླ་མ་དམ་པ་སངས་རྒྱས་རྣམས། །སྲས་དང་བཅས་པར་གསལ་བྱས་ནས། །དེ་ཡི་འོད་ཟེར་ལས་བྱུང་བ། །སྤྱན་ལ་སྩོགས་པའི་ལྷ་མོ་བཅུས། །དངོས་སུ་གསང་བའི་མཆོད་པ་དང་། །གཞན་ཡང་ཕྱི་ཡི་མཆོད་པའི་སྤྲིན། །རིན་ཆེན་བདུན་དང་མཆོད་པ་ལྔ། །དྲི་ཡི་ཕྱེ་མ་སྣ་ཚོགས་གོས། །
སྣ་ཚོགས་རྒྱན་དང་ཕྲེང་བ་དང་། །གདུགས་དང་རྒྱལ་མཚན་བ་དན་དང་། །རྔ་ཡབ་སྦྲང་ཡབ་བསིལ་ཡབ་དང་། །རྟ་དང་གླང་པོ་བུད་མེད་ཚོགས། །སེང་གེ་གདན་དང་བླ་རེ་སོགས། །ཇི་སྙེད་བརྟན་པའི་སེམས་ཀྱིས་སུ། །མཆོད་པ་བྱས་ནས་ཕྱག་ཀྱང་བྱ། །ཐོག་མ་མེད་པའི་སྲིད་རྒྱུན་མན་
ཆད་བློ་གྲོས་རྣམ་རྟོག་ལས་བྱུང་མ་ལུས་ཚང་སྡིག་གང་། །ཐུགས་རྗེ་ཆེར་ལྡན་མ་ལུས་མདུན་དུ་ཆོ་ག་དེ་བཞིན་དེ་རྣམས་བདག་གིས་བཤགས་པར་བྱ། །སངས་རྒྱས་བྱང་ཆུབ་སེམས་དཔའ་རྣམས་དང་དེ་བཞིན་འཕགས་དང་གཞན་རྣམས་ཀྱིས་ནི་དགེ་བ་གང་མཛད་པ། །དེ་རྣམས་ལྷག་

44-1-100a

མེད་རྗེས་སུ་ཡི་རང་བླ་མེད་བྱང་ཆུབ་ཆེན་པོར་ཡང་དག་བདག་གིས་བསྔོ། །སྤྲོ་བྱེད་དྲི་མེད་ཐུགས་ནི་ཟླ་བ་ལྟ་བུས་མཐའ་ཡས་ཐུགས་རྗེ་དམ་པའི་ཐབས་རྣམས་ལ། །བདེ་བར་གཤེགས་པ་ཀུན་ལ་བདག་ཉིད་ནང་འཁོར་སྤྱོད་བཞིན་རྟག་ཏུ་རབ་ཏུ་སྐྱབས་སུ་མཆི། །རྟོག་པ་ཇི་
སྙེད་མ་ལུས་གྲོལ་བ་ལྷག་མེད་དམ་པའི་སེམས་ཅན་ཕུན་སུམ་ཚོགས་པའི་རྟེན། །ཇི་སྙེད་ཐམས་ཅད་རོ་གཅིག་དངོས་པོ་ཆོས་ལ་བདག་ཉིད་ཀྱིས་ནི་རབ་ཏུ་སྐྱབས་སུ་མཆི། །ཡང་དག་བཅིངས་པ་མ་ལུས་གྲོལ་བའི་ཐུགས་མཆོག་དང་ལྡན་ཀུན་གྱི་དཔལ་ཉིད་ཡང་དག་བསྟོད། །རབ་དགའ་
ལ་སྩོགས་ས་བཅུར་བཞུགས་རྣམས་རབ་ཏུ་བྱུང་བདག་ཚོགས་ལ་ཡང་དག་སྐྱབས་སུ་མཆི། །བསམ་པའི་ངོ་བོ་རྣམ་སྨིན་དག་ཕྱིར་སྒྲིབ་པའི་བག་ཆགས་ཐམས་ཅད་ཡང་དག་ཤིན་ཏུ་བཅོམ། །ཡོངས་སུ་གྲོལ་བའི་སེམས་ནི་རྣམ་བརྒྱན་བླ་མེད་བྱང་ཆུབ་ལ་ནི་ཡང་དག་བསྐྱེད་པར་བྱ། །
སྲས་ལྡན་བདེ་བར་གཤེགས་དང་ལམ་གཅིག་ཏུ་ནི་སྦྱིན་སོགས་ཡོན་ཏན་དཀར་པོ་དངོས་པོ་སྟེ། །མ་ལུས་ཡང་དག་རྫོགས་པའི་སངས་རྒྱས་རང་བཞིན་བློ་ཡིས་ད་ལྟར་བདག་གིས་བརྟེན་པར་བགྱི། །འཇིག་རྟེན་མ་ལུས་འདི་རྣམས་ལྟ་བའི་དྲ་བས་བཅིངས་པ་ལ་ནི་སྙིང་རྗེ་ཆེན་པོ་བསྐྱེད། །
བླ་མེད་བྱང་ཆུབ་སེམས་ནི་དྲི་མེད་རིན་ཆེན་བདག་གིས་ཡང་དག་གོས་པས་ཡོངས་སུ་བསམ་པར་བྱ། །རང་བཞིན་དང་བྲལ་སྟོང་པ་ཉིད། །རྒྱུ་མེད་པས་ནི་མཚན་མ་མེད། །སོ་སོར་རྟོག་གི་ཀུན་བྲལ་བས། །ཇི་སྙེད་སྨོན་པ་མ་ལུས་བྲལ། །དེ་སྐད་ལན་གསུམ་བརྗོད་པར་བྱ། །བསོད་
ནམས་ཚོགས་ནི་རྫོགས་བྱས་ནས། །ཡེ་ཤེས་ཚོགས་ཀྱི་དོན་དུ་ནི། །སྟོང་པ་ཉིད་ནི་བསམ་པར་བྱ། །ཨོཾ་ཤུ་ནྱ་ཏཱ་ཛྷཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྔགས་འདི་བཟླས་པ་བྱས་ནས་སུ། །འགྲོ་བ་ཀུན་གྱི་ལུས་ངག་ཡིད། །དེ་རྣམས་བདག་གིས་ངོ་བོ་གཅིག །རང་བཞིན་མེད་ཕྱིར་ལུས་
ངག་ཡིད། །དེ་རྣམས་རང་བཞིན་བཏགས་པ་ཙམ། །གང་ཕྱིར་བརྟགས་པར་རང་འདོད་དེ། །དེ་ཕྱིར་རང་བཞིན་ལུས་ངག་ཡིད། །ཨོཾ་ཨཱཿཧཱུྃ་ཡིག་གསུམ་བྱས་ལ། །ཧོཿགཉིས་བར་ན་རབ་གནས་པ། །ཟླ་བའི་དཀྱིལ་འཁོར་སྟེང་དུ་ནི། །མདུན་གྱི་མཁའ་ལ་བསམ་པར་བྱ། །

44-1-100b

བྱང་ཆུབ་སྒྲུབ་པའི་དུས་སུ་ནི། །བར་དུ་གཅོད་པའི་བགེགས་བསལ་ཕྱིར། །མདུན་དུ་ཉི་མའི་དཀྱིལ་འཁོར་ལ། །ནག་པོ་ཧཱུྃ་ལས་བྱུང་བ་ཡི། །རྡོ་རྗེ་འོད་ཟེར་འབར་བ་ཅན། །དེ་ཡི་འོད་ཟེར་རབ་འཕྲོས་པས། །མཚམས་ཀྱི་ཕྱི་རོལ་དག་ན་ནི། །བགེགས་རྣམས་ཕུར་བུས་གདབ་
པར་བྱ། །ཕྱོགས་དང་མཚམས་སུ་འཕྲོས་པ་ཡིས། །རྡོ་རྗེའི་ར་བ་རབ་བརྩིགས་ཏེ། །སྟེང་དུ་འཕྲོས་པས་རྡོ་རྗེ་གཟེབ། །འོག་ཏུ་འགྲོ་བ་རྣམས་ལས་སུ། །རྡོ་རྗེའི་ས་གཞིར་བསམ་པར་བྱ། །བདུད་དང་བྲལ་བའི་སེམས་ཀྱིས་སུ། །དེ་ཡི་དབུས་སུ་རྡོ་རྗེ་སེམས། །འོག་ནས་
འབྱུང་བ་ལྟ་བུར་བསམ། །དེ་ལས་ཆོས་འབྱུང་ཕྱག་རྒྱར་དཀར། །གྲུབ་ཉིད་ཕྲ་མོ་མར་བལྟས་ནས། །གྱེན་དུ་འགྲེང་བ་རབ་གནས་པས། །ནང་ཉིད་ནམ་མཁའ་ལྟ་བུ་ཡི། །དབུས་སུ་སེར་པོ་པཾ་ལས་བྱུང་། །སྣ་ཚོགས་པདྨ་རྣམ་བསམས་ཏེ། །དེ་སྟེང་ཁཾ་ནི་ལྗང་གུ་ལས། །
སྣ་ཚོགས་རྡོ་རྗེ་བསམ་པར་བྱ། །དེ་སྟེང་ཟླ་བའི་དབུས་སུ་ནི། །དཀར་པོ་བྲུཾ་ལས་བྱུང་བ་ཡི། །རྩིབས་བརྒྱད་འཁོར་ལོའི་ལྟེ་བ་ལ། །བྲུཾ་གྱིས་མཚན་པ་རྣམ་པར་བསམ། །དེ་ལས་སྣང་མཛད་རིག་མར་བཅས། །དེ་ལས་བྱུང་བའི་གཞལ་མེད་ཁང་། །གྲུ་བཞི་པ་ལ་སྒོ་བཞི་པ། །ཏྭ་ར་
ཎ་བཞིས་བརྒྱན་པ་སྟེ། །ཧ་ར་ཧ་ར་ཕྱེད་པས་བརྒྱན། །སྣ་ཚོགས་པདྨ་བཅུ་དགུའི་སྟེང་། །ཉི་མའི་གདན་ནི་བདུན་རྣམས་དང་། །ཟླ་བ་བཅུ་གཉིས་དང་ལྡན་པ། །དེ་ལྟ་བུ་ནི་རྣམ་པར་བསམ། །དེ་ཡི་དབུས་ཀྱི་ཟླ་བ་ལ། །ཡི་གེ་གསུམ་ལ་གནས་པའི་སེམས། །རབ་ཏུ་གོམས་པར་
བསམ་བྱས་ཏེ། །ཕྱོགས་བཅུའི་འཇིག་རྟེན་ཁམས་གནས་པའི། །བདེ་གཤེགས་འགྲོ་བ་མ་ལུས་རྣམས། །བྱང་ཆུབ་རྒྱུ་ལ་ངེས་བྱེད་པས། །དེ་ཡི་དུས་སུ་གཟིགས་པར་བྱ། །དེ་རྣམས་མངོན་དགའ་སྒྲུབ་རྟེན་དུ། །ཐབས་དང་ཤེས་རབ་རང་བཞིན་གྱིས། །སྒྲ་ཡིག་བཅུ་དྲུག་
ཉིས་འགྱུར་དང་། །གནས་ཀྱི་ཡི་གེ་སུམ་ཅུ་བཞི། །ཡ་ར་ལ་ཝ་ཌ་ཌྷར་ལྷག། །བཞི་བཅུ་ཉིས་འགྱུར་དུ་བྱས་པའི། །ཡི་གེ་བརྒྱད་ཅུ་གཟུགས་སུ་འགྱུར། །དེ་ནས་གཞལ་མེད་ཁང་པ་ཡི། །སྟེང་གི་མཁའ་ལ་འབྱོར་གྱུར་ནས། །དེ་རྣམས་ཡེ་ཤེས་ཀྱིས་བསྐུལ་ཏེ། །སེམས་ཉིད་

44-1-101a

དྲངས་ནས་གཅིག་ཏུ་འགྱུར། །དེ་ནས་ནང་གི་ཟླ་བ་ལ། །ཡི་གེ་ཕྲེང་བ་རིམ་པ་གཉིས། །འོག་དང་སྟེང་དུ་གནས་པ་ལས། །ཐབས་དང་ཤེས་རབ་རང་བཞིན་དང་། །སྨོན་དང་འཇུག་པའི་སེམས་དང་ནི། །མཚན་དང་དཔེ་བྱད་རང་བཞིན་གྱི། །ཟླ་བ་གཉིས་སུ་
འགྲུབ་པར་བྱ། །དེ་གཉིས་དྲི་མེད་འོད་གསལ་ཕྱིར། །མེ་ལོང་ཡེ་ཤེས་མངོན་གྱུར་པའོ། །དེ་གཉིས་གཅིག་ཏུ་གྱུར་པ་ནི། །མཉམ་ཉིད་གཅིག་ཏུ་མཐོང་བའོ། །དེ་ལས་དཀར་པོ་ཧཱུྃ་དུ་གྱུར། །དེ་ལས་རྡོ་རྗེ་དམར་པོ་ཉིད། །ཧཱུྃ་གིས་མཚན་པ་བསམ་བྱ་སྟེ། །ཨོཾ་བཛྲ་ཨཱཏྨ་ཀོ྅ཧཾ་ཞེས། 
བདག་ལ་དེ་ཡི་ང་རྒྱལ་བྱ། །དེ་ཉིད་ཀུན་རྟོག་ཡེ་ཤེས་སོ། །དེ་ནས་ཧཱུྃ་ལས་བྱུང་བ་ཡི། །བདེ་གཤེགས་རྣམས་ཀྱིས་ཇི་སྙེད་པའི། །འགྲོ་བ་བདེ་གཤེགས་ཉིད་བྱས་ནས། །ཧཱུྃ་གི་ནང་དུ་ཐིམ་བྱས་ཏེ། །ཨོཾ་ཡ་ཐ་སརྦ་ཏ་ཐཱ་ག་ཏ་ཨཱ་ཧཾ་ཞེས། བདག་ལ་དེ་ཡི་ང་རྒྱལ་བྱ། །ནན་ཏན་ཡེ་
ཤེས་མཐོང་བའོ། །ཧཱུྃ་གི་འོད་ཟེར་གྱིས་བསྐུལ་ནས། །ནམ་མཁར་གནས་པའི་བདེ་གཤེགས་རྣམས། །ཧཱུྃ་ཉིད་ལ་ནི་ཐིམ་པར་བྱ། །དེ་གཉིས་ཞུ་བར་གྱུར་པ་ལས། །དབུས་ཞལ་སྐུ་ནི་ཆུ་ཤེལ་མདོག། །གཡས་དང་གཡས་མིན་གནག་དང་དམར། །དབུ་བརྒྱན་མི་བསྐྱོད་པས་གནོན་
པས། །རྡོ་རྗེ་སྐྱིལ་མོ་ཀྲུང་བཅས་ཤིང་། །ཟླ་བའི་གདན་དང་རྒྱབ་རྟེན་ལྡན། །རིན་ཆེན་སྣ་ཚོགས་རྒྱན་གྱིས་བརྒྱན། །ཕྱག་གཉིས་བདག་འོད་རིག་མ་འཁྱུད། །གཡས་གཉིས་རྡོ་རྗེ་རལ་གྲི་སྟེ། །གཡོན་གཉིས་རིན་ཆེན་པདྨ་འཛིན། །དེ་འདྲའི་རྣམ་པ་དང་ལྡན་པའི། །རྡོ་རྗེ་སེམས་དཔའ་
རབ་ཏུ་བསྒོམ། །དེ་ཉིད་ཤིན་ཏུ་རྣམ་དག་པའི། །ཆོས་དབྱིངས་ཡེ་ཤེས་རབ་རྫོགས་པའོ། །དེ་ནས་འདོད་ཆགས་ཆེན་པོ་ཡིས། །འདུལ་བའི་འཇིག་རྟེན་མཐོང་གྱུར་ནས། །བདེ་བའི་སྒྲ་ཡིས་རྒྱལ་བའི་ཚོགས། །བསྐུལ་ནས་བྱོན་པར་གྱུར་པ་རྣམས། །བ་སྤུའི་བུ་གར་ཐིམ་གྱུར་ནས། །མི་
སྣང་བར་ནི་རྒྱས་གྱུར་ཏེ། །རང་གི་རིག་མ་དགའ་བར་བྱས། །དེ་ནས་ཐིམ་པའི་རྒྱལ་བའི་ཚོགས། །རང་རང་རིགས་དང་ཡོངས་འབྲེལ་པའི། །སྤྱན་ལ་སོགས་པའི་ལྷ་མོ་གཟུགས། །རིག་གི་རྡོ་རྗེ་མ་ཡི་བར། །རང་གི་བ་སྤུའི་བུ་ག་ནས། །སྤྲོས་ཏེ་ཡུམ་གྱི་བ་སྤུ་ཡི། །བུ་གར་ཐིམ་པས་

44-1-101b

ཐབས་ཉིད་མཉེས། །དེ་ནས་ཡེ་ཤེས་སེམས་དཔའ་ཡི། །ས་བོན་འོད་ཀྱིས་བདེ་གཤེགས་རྣམས། །བཀུག་ནས་ཞལ་དུ་ལམ་ཞུགས་ནས། །སྐུ་ལ་ཐིམ་ནས་ཞུ་བྱས་ཏེ། །རྡོ་རྗེར་ལམ་བྱུང་པདྨར་གནས། །དེ་ལས་རྡོ་རྗེ་སེམས་དཔའ་ཉིད། །གཙོར་བྱས་ལྷ་ནི་བཅུ་དགུ་ཡི། །
དཀྱིལ་འཁོར་འཁོར་ལོ་རབ་ཏུ་བསམ། །དེ་ནང་བློ་ཡིས་སེམས་ཅན་རྣམས། །སྒོ་བཞིའི་ལམ་ནས་ཞུགས་པར་བསམ། །དེ་ནས་ཡེ་ཤེས་སེམས་དཔའ་ནི། །འོད་ཀྱིས་བདེ་གཤེགས་རྣམས་བཀུག་ནས། །ཞལ་གྱི་ལམ་ཞུགས་ཞུ་བྱས་ཏེ། །རྡོ་རྗེར་ལམ་བྱུང་དབང་ཡང་བསྐུར། །
དེ་ཡི་མཐུ་ཡིས་སེམས་ཅན་རྣམས། །བདེ་དང་ཡིད་བདེ་ཐོབ་པར་འགྱུར། །ཇི་ལྟར་རིམ་པར་དབྱེ་བ་ཡི། །མིག་དང་རྣ་བ་སྣ་དང་ནི། །ལྕེ་དང་ལུས་དང་ཡིད་དག་དང་། །གཟུགས་སྒྲ་དྲི་རོ་རེག་བྱ་ཆོས། །ས་དང་ཆུ་དང་མེ་དང་རླུང་། །གཟུགས་དང་ཚོར་བ་འདུ་ཤེས་དང་། །འདུ་བྱེད་རྣམ་
ཤེས་རྣམ་དག་པས། །དེ་ལས་ཀྵིཾ་ཛྲིཾ་ཁཾ་གཾ་ཥྐཾ་སཾ། ཛཿཧཱུྃ་བཾ་ཧོཿ། ཁཾ་རཾ་ལཾ་མཱཾ་པཾ་ཏཱཾ། བྲཱུཾ་ཨཱཾ་ཛཱིཾ་ཁཾ་ཧཱུྃ་ཞེས་བྱ་བའི་ས་བོན་རྣམས་སུ་གྱུར། དེ་ལས་འཁོར་ལོ་རྡོ་རྗེ་དང་། །རིན་པོ་ཆེ་དང་པདྨ་དང་། །རལ་གྲི་དང་ནི་རྡོ་རྗེ་དང་། །མེ་ལོང་པི་ཝང་དྲི་ཡི་ཅང་། །རོ་ཡི་སྣོད་དང་སྣ་ཚོགས་གོས། །
ཆོས་ཀྱི་འབྱུང་གནས་ཕྱག་རྒྱ་དང་། །འཁོར་ལོ་ཨུཏྤལ་དམར་པོ་དང་། །པདྨ་དམར་དང་ཨུཏྤལ་སེར། །འཁོར་ལོ་རིན་ཆེན་པདྨ་དང་། །རལ་གྲི་རྡོ་རྗེ་ཕྱག་མཚན་རྣམས། །རང་རང་ས་བོན་མཚན་པར་གནས། །ས་བོན་ཕྱག་མཚན་དེ་ཉིད་ལས། །ས་སྙིང་ཕྱག་ན་རྡོ་རྗེ་དང་། །ནམ་སྙིང་
འཇིག་རྟེན་དབང་ཕྱུག་དང་། །སྒྲིབ་པ་རྣམ་སེལ་ཀུན་དུ་བཟང་། །གཟུགས་སྒྲ་དྲི་རོ་རེག་དང་ནི། །ཆོས་ཀྱི་དབྱིངས་ཀྱི་རྡོ་རྗེ་དང་། །སྤྱན་ཡངས་མ་དང་མཱ་མ་ཀཱི། །གོས་དམར་མོ་དང་སྒྲོལ་མ་དང་། །རྣམ་སྣང་མཛད་དང་རིན་ཆེན་འབྱུང་། །སྣང་མཐའ་ཡས་དང་དོན་ཡོད་གྲུབ། །མི་
བསྐྱོད་པ་རྣམས་རབ་ཏུ་གྲུབ། །དེ་ནས་པདྨའི་གཞལ་ཡས་ནས། །བློ་ཡིས་ཕྱི་རོལ་དབྱུང་བྱས་ཏེ། །དེ་རྣམས་ཕན་པར་ཤེས་ནས་སུ། །བཅོམ་ལྡན་ཕྱག་འཚལ་བསྟོད་བྱས་ནས། །བཅོམ་ལྡན་སེམས་ཅན་དོན་དུ་ནི། །མཁའ་ལ་ཕྱོགས་བཅུར་སྤྲོས་པར་བསམ། །འགྲོ་བའི་དབང་

44-1-102a

བསྐུར་རྫོགས་བྱས་ནས། །རང་གི་ཞལ་གྱི་ལམ་དུ་ནི། །ཡི་གེ་གསུམ་ཉིད་ཞུགས་བྱས་ཏེ། །ཞུགས་ནས་རྡོ་རྗེའི་ལམ་ནས་སུ། །པདྨོ་དབུས་སུ་བབས་པར་བྱ། །དེ་ཡི་འོད་ཟེར་དམར་འཕྲོས་པས། །རེག་པས་ཡབ་ཡུམ་གཉི་ག་ཡང་། །འདོད་ཆགས་ཆེན་
པོའི་མེ་ཡིས་ནི། །ཡོངས་སུ་ཞུ་བར་གྱུར་པར་བསམ། །དེ་ནས་ཁུ་བ་དེ་ཉིད་ལས། །མཱ་མ་ཀཱི་ནི་དབྱུང་བྱས་ནས། །ལྷོ་ནུབ་མཚམས་ཀྱི་གྲྭར་བཞག་སྟེ། །དབྱངས་ཀྱིས་བསྐུལ་བར་བསྒོམ་བྱས་ཏེ། །རྡོ་རྗེ་ཐུགས་ཁྱོད་སེམས་ཅན་དབྱིངས་ཀྱི་ཁམས་ཀྱི་དབང་ཕྱུག་སྟེ། །དགའ་
བའི་རྣམ་པ་ཡིད་འོང་མཁྱེན་པ་བདག་ལ་ཐར་པར་མཛད་དུ་གསོལ། །སེམས་ཅན་སྐྱེད་བྱེད་གཉེན་མཆོག་འདོད་པའི་དོན་ཆེན་རྣམས་ཀྱིས་ནི། །མགོན་པོ་བདག་ནི་གསོན་པར་མཆིས་བཞེས་དགྱེས་པར་མཛད་དུ་གསོལ། །ཅི་འཆད་འདི་ཡིས་བསྐུལ་མ་ཐག། །ཁུ་བ་ཉིད་ལ་
ཐིམ་པར་བྱ། །རིམ་བཞིན་ལྷ་མོ་གསུམ་པོ་ཡང་། །ཁུ་བ་ཉིད་ལས་ཕྱུང་ནས་ནི། །མེ་དང་རླུང་དང་དབང་ལྡན་གྲྭར། །གནས་ནས་བསྐུལ་བར་བྱེད་པར་བསམ། །རྡོ་རྗེ་སྐུ་ཁྱོད་སེམས་ཅན་ཀུན་གྱིས་དགའ་བར་མཁྱེན་པ་པོ། །སངས་རྒྱས་འཁོར་ལོ་དོན་དུ་དོན་དམ་བྱང་ཆུབ་
བསྟན་པ་ཅན། །མགོན་པོ་ཆེན་པོ་བདག་ཉིད་ལེགས་པར་གསོན་པར་མཆིས་བཞེད་ན། །འདོད་ཆགས་ཀྱིས་ནི་འདོད་ཆགས་དམ་ཚིག་བདག་ལ་དགྱེས་པར་མཛོད། །རྡོ་རྗེ་གསུང་ཁྱོད་ཐམས་ཅད་ཀྱིས་ནི་ཐུགས་རྗེ་དང་ལྡན་པ། །འཇིག་རྟེན་དོན་གྱི་དགོས་པའི་དོན་ཀུན་དམ་པའི་སྤྱོད་པ་ཅན། །
མགོན་པོ་ཆེན་པོ་བདག་ཉིད་གལ་ཏེ་གསོན་པར་མཆིས་བཞེད་ན། །ཀུན་དུ་བཟང་པོ་བདེ་བར་སྤྱོད་པ་བདག་ལ་དགྱེས་པར་མཛོད། །རྡོ་རྗེ་འདོད་པ་ཁྱེད་ནི་དམ་ཚིག་མཆོག་གི་ཕན་དོན་ཆེ། །ཡང་དག་རྫོགས་པའི་སངས་རྒྱས་གསུང་དངོས་མཉམ་པའི་ཐུགས་རྗེ་ཅན། །མགོན་པོ་ཆེན་པོ་
བདག་ཉིད་གལ་ཏེ་གསོན་པར་མཆིས་བཞེད་ན། །ཡོན་ཏན་རིན་ཆེན་མང་པོའི་གཏེར་བཞིན་བདག་ལ་དགྱེས་པར་མཛོད། །རིམ་བཞིན་དབྱངས་ཀྱིས་བསྐུལ་མ་ཐག། །རིམ་པ་བཞིན་དུ་ཐིམ་པར་བྱས། །ལྷ་མོས་བསྐུལ་པའི་དབང་གིས་སུ། །བྱང་ཆུབ་སེམས་བྱུང་ས་བོན་མཾ། །གུར་

44-1-102b

གུམ་མདོག་འདྲར་རྣམ་བསམས་ཏེ། །དེ་ལས་རལ་གྲིའི་ཡུ་བ་ལ། །ཟླ་བའི་སྟེང་དུ་མཾ་གྱིས་མཚན། །དེ་ཡི་འོད་ཀྱི་མཁའ་དབྱིངས་ན། །གནས་པའི་བདེ་བར་གཤེགས་པ་རྣམས། །འཇམ་པའི་རྡོ་རྗེའི་སྐུར་བྱས་ཏེ། །བཀུག་ནས་མཾ་ལ་ཞུགས་པར་བྱ། །དེ་གཉིས་ཞུ་བར་གྱུར་པ་ལས། །
དབུས་ཞལ་སྐུ་ནི་གུར་གུམ་མདོག། །གཡས་དང་གཡས་མིན་གནག་དང་དཀར། །ཕྱག་གཉིས་རང་འོད་རིག་མ་འཁྱུད། །གཡས་གཉིས་རལ་གྲི་མདའ་འཛིན་པ། །གཡོན་གཉིས་གཞུ་དང་ཨུཏྤལ་སྔོ། །རིན་ཆེན་དབུ་རྒྱན་དང་ལྡན་པ། །རྡོ་རྗེ་སྐྱིལ་ཀྲུང་ཤིན་ཏུ་བརྟེན། །རྒྱན་རྣམས་སོ་
སོར་བརྒྱན་བྱས་པའི། །འཇམ་དབྱངས་དཔལ་དང་ལྡན་པ་བསམ། །ཨོཾ་དྷརྨྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། ཆོས་ཀྱི་དབྱིངས་སུ་བྱིན་གྱིས་བརླབ། །གཉེན་པོའི་བསྙེན་པའི་ཡན་ལག་དང་། །འདྲ་བར་འབྱུང་བའི་འབྲས་བུའོ། །དེ་ནས་རང་གི་མིག་གཉིས་ཀྱི། །དབུས་སུ་ཟླ་བ་རེ་རེ་ལ། །
ཀྵིཾ་དཀར་པོ་ལས་བྱུང་བ་ཡི། །འཁོར་ལོ་དཀར་པོ་རྩིབས་བརྒྱད་པའི། །ལྟེ་བར་ཀྵིཾ་ཡིས་མཚན་པ་བསམ། །དེ་ལས་ས་ཡི་སྙིང་པོ་ཉིད། །གཡས་གནག་གཡོན་ནི་དམར་བའི་ཞལ། །གཡས་གཉིས་འཁོར་ལོ་རལ་གྲི་འཛིན། །གཡོན་གཉིས་ནོར་བུ་པདྨ་འཛིན། །རྣ་བའི་བུ་ག་
གཉིས་པོ་ལ། །ཟླ་བའི་དབུས་སུ་ནག་པོ་ཛྲིཾ། །དེ་ལས་རྡོ་རྗེ་ཛྲིཾ་གིས་མཚན། །དེ་ལས་ཕྱག་ན་རྡོ་རྗེ་ཉིད། །གཡས་དང་གཡོན་དཀར་དམར་བའི་ཞལ། །གཡས་གཉིས་རྡོ་རྗེ་རལ་གྲི་འཛིན། །གཡོན་གཉིས་ནོར་བུ་པདྨར་ལྡན། །སྣ་ཡི་བུ་ག་གཉིས་པོ་ལ། །ཟླ་བའི་དབུས་སུ་ཁཾ་སེར་
པོ། །དེ་ལས་རིན་ཆེན་ལྗང་གུ་ནི། །ཁཾ་གིས་མཚན་པ་ལས་བྱུང་བའི། །ནམ་མཁའི་སྙིང་པོ་བསམ་པར་བྱ། །གཡས་སྔོ་གཡོན་ནི་དཀར་བའི་ཞལ། །གཡས་གཉིས་ནོར་བུ་རལ་གྲི་འཛིན། །གཡོན་གཉིས་འཁོར་ལོ་པདྨ་འཛིན། །ལྕེ་དབུས་ཟླ་བའི་དཀྱིལ་འཁོར་ལ། །དམར་
པོ་གཾ་ལས་བྱུང་བ་ཡི། །པདྨ་གཾ་གིས་མཚན་པ་བསམ། །དེ་ལས་འཇིག་རྟེན་དབང་ཕྱུག་ཉིད། །གཡས་གནག་གཡོན་ནི་དཀར་བའི་ཞལ། །གཡས་གཉིས་པདྨ་རལ་གྲི་འཛིན། །གཡོན་གཉིས་ནོར་བུ་འཁོར་ལོ་འཛིན། །དཔྲལ་བའི་དབུས་སུ་ཟླ་བ་ལ། །ཀྵི་ཉིད་ལྗང་གུ་

44-1-103a

ལས་བྱུང་བའི། །རལ་གྲིའི་ཡུ་བ་ཥྐཾ་གིས་མཚན། །དེ་ལས་སྒྲིབ་པ་རྣམ་སེལ་ཉིད། །གཡས་སྔོ་གཡོན་ནི་དཀར་བའི་ཞལ། །གཡས་གཉིས་འཁོར་ལོ་རལ་གྲི་འཛིན། །གཡོན་གཉིས་ནོར་བུ་པདྨ་འཛིན། །ལྟེ་བའི་དབུས་སུ་ཟླ་བ་ལ། །དཀར་པོ་སཾ་ལས་བྱུང་བ་ཡི། །རྡོ་རྗེ་བུམ་པ་སཾ་གིས་མཚན། །དེ་ལས་ཀུན་དུ་བཟང་པོ་ཉིད། །གཡས་གནག་གཡོན་ནི་དམར་བའི་ཞལ། །གཡས་གཉིས་རྡོ་རྗེ་རལ་གྲི་འཛིན། །གཡོན་གཉིས་ནོར་བུ་པདྨ་འཛིན། །རང་རང་ས་བོན་ཇི་ལྟ་བར། །དབུས་ཀྱི་ཞལ་དང་མཚན་མ་དང་། །སྐུ་རྣམས་ཀུན་ཡང་དེ་བཞིན་དུ། །རྡོ་རྗེ་སྐྱིལ་ཀྲུང་རབ་བརྟན་ཞིང་། །ཕྱག་གཉིས་རང་འོད་རིག་མ་འཁྱུད། །རིན་ཆེན་དབུ་རྒྱན་ལྡན་པའོ། །བསྙེན་པའི་གྲུབ་པའི་ཡན་ལག་དང་། །རྣམ་པར་སྨིན་པའི་འབྲས་བུའོ། །དེ་ནས་སྙིང་གའི་ཟླ་བ་ལ། །ནག་པོ་ཧཱུྃ་ལས་བྱུང་བ་ཡི། །རྡོ་རྗེ་བུམ་པའི་ཧཱུྃ་གིས་མཚན། །དེ་ནས་རྡོ་རྗེ་བུམ་པ་ལས། །ཧཱུྃ་གིས་མཚན་པ་བསྒོམ་བྱས་ཏེ། །ནང་གི་ཧཱུྃ་དང་རྡོ་རྗེ་ལས། །ཕྱག་ན་རྡོ་རྗེ་ལྟ་བུ་ཡི། །ཐུགས་ཀྱི་རྡོ་རྗེ་བསམ་བྱས་ཏེ། །དེ་ཡི་ཐུགས་ཀར་ཟླ་བ་ལ། །ཧཱུྃ་གིས་མཚན་པ་བསམ་པར་བྱ། །ལྕེ་རྩ་ཟླ་བའི་དཀྱིལ་འཁོར་ལ། །དམར་པོ་ཨཱཿལས་བྱུང་བ་ཡི། །པདྨའི་དབུས་ན་ཨཱཿཡིས་མཚན། །དེ་ལས་པདྨ་ཨཱཿས་མཚན་པ། །ནང་གི་ཨཱཿདང་པདྨ་ལས། །འཇིག་རྟེན་དབང་ཕྱུག་ལྟ་བུ་ཡི། །ངག་གི་རྡོ་རྗེ་བསམ་བྱས་ཏེ། །དེ་ཡི་ཐུགས་ཀར་ཟླ་བ་ལ། །ཨཱཿལས་པདྨ་དབུས་སུ་ཡང་། །ཨཱཿཡིས་མཚན་པ་བསམ་པར་བྱ། །མགོ་དབུས་ཟླ་བའི་དཀྱིལ་འཁོར་ལ། །ཨོཾ་ལས་འཁོར་ལོའི་ལྟེ་བ་ལ། །ཨོཾ་གྱིས་མཚན་པ་བསམ་པར་བྱ། །དེ་ལས་འཁོར་ལོ་ཨོཾ་གྱིས་མཚན། །ནང་གི་ཨོཾ་དང་འཁོར་ལོ་ལས། །ས་ཡི་སྙིང་པོ་ལྟ་བུ་ཡི། །སྐུ་ཡི་རྡོ་རྗེ་བསམ་པར་བྱ། །དེ་ཡི་ཐུགས་ཀར་ཟླ་བ་ལ། །ཨོཾ་ལས་འཁོར་ལོ་ལྟེ་བ་ལ། །ཨོཾ་གྱིས་མཚན་པ་བསམ་པར་བྱ། །དེ་ནས་ཐུགས་སོགས་རྡོ་རྗེ་ཡི། །ཐུགས་ལས་འོད་ཟེར་རབ་སྤྲོས་ནས། །སྤྱན་སོགས་ལྷ་མོ་བཅུ་རྣམས་ཀྱིས། །མཁའ་ལ་གནས་པའི་བདེ་གཤེགས་རྣམས། །སོ་སོ་ཐུགས་ཀ་ལ་སོགས་ལ། །གནས་པའི་ཐུགས་སོགས་རྡོ་རྗེ་ལ། །མཆོད་ནས་ཞུ་བ་གསོལ་བར་བྱ། །དཔལ་ལྡན་ཐུགས་ནི་རྡོ་རྗེ་འཆང་། །རྡོ་རྗེ་མི་ཕྱེད་གསུམ་བསྒོམས་པས། །དེ་རིང་བདག་དབང་བྱིན་གྱིས་རློབས། །རྡོ་རྗེ་ཐུགས་ཅན་མཛད་དུ་གསོལ། །དེ་ནི་རང་གིས་བསྒོམ་པ་ལའོ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་ཀུན། །དེ་རིང་བདག་དབང་བྱིན་གྱིས་རློབས། །རྡོ་རྗེ་ཐུགས་ཅན་མཛད་དུ་གསོལ། །དེ་ནི་ལྷུན་གྱིས་གྲུབ་པ་ཡི། །ཐུགས་ཀ་ན་ནི་གནས་པ་ལའོ། །དེ་ནས་ལྷུན་གྱིས་གྲུབ་པ་ཡི། །ཐུགས་ཀྱི་རྡོ་རྗེ་མ་ལུས་རྣམས། །རང་གི་ཉིད་ལ་ཞུགས་བྱས་ལ། །ཨོཾ་སརྦྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་གཉིས་སུ་མེད་པར་བྱིན་གྱིས་བརླབ། །ཆོས་ཀྱི་ངག་ལམ་དཔལ་དང་ལྡན། །རྡོ་རྗེ་མི་ཕྱིད་གསུམ་བསྒོམས་པས། །དེ་རིང་བདག་དབང་བྱིན་གྱིས་རློབས། །རྡོ་རྗེ་གསུང་ཅན་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་ཀུན། །དེ་རིང་བདག་དབང་བྱིན་
གྱིས་རློབས། །རྡོ་རྗེ་གསུང་ཅན་མཛད་དུ་གསོལ། །དེ་ཡིས་དེ་བཞིན་གཤེགས་
པ་ཡི། །གསུང་གི་རྡོ་རྗེ་ཇི་སྙེད་རྣམས། །རང་གི་ཉིད་ལ་ཞུགས་བྱས་ལ། །ཨོཾ་
སརྦ་ཏ་ཐཱ་ག་ཏ་བཱཀ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་གཉིས་སུ་མེད་པར་བྱིན་
གྱིས་བརླབ། །དཔལ་ལྡན་སྐུ་ནི་རྡོ་རྗེ་འཆང་། །རྡོ་རྗེ་མི་ཕྱེད་གསུམ་བསྒོམས་
པས། །དེ་རིང་བདག་དབང་བྱིན་གྱིས་རློབས། །རྡོ་རྗེ་སྐུ་ཅན་མཛད་དུ་
གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་
གསུམ་བསྒོམས་ཀུན། །དེ་རིང་བདག་དབང་བྱིན་གྱིས་རློབས། །རྡོ་རྗེ་སྐུ་
ཅན་མཛད་དུ་གསོལ། །དེ་ཡིས་དེ་བཞིན་གཤེགས་པ་ཡི། །སྐུ་ཡི་རྡོ་རྗེ་ཇི་སྙེད་
རྣམས། །རང་གི་ཉིད་ལ་ཞུགས་བྱས་ལ། །ཨོཾ་སརྦྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་
ཝ་ཨཱཏྨ་ཀོ྅་ཧཾ། ཞེས་གཉིས་སུ་མེད་པར་བྱིན་གྱིས་བརླབ། །བསྙེན་པའི་སྒྲུབ་
པའི་ཡན་ལག་དང་། །སྐྱེས་བུ་བྱེད་པའི་འབྲས་བུའོ། །དེ་ནས་ནུ་མའི་བར་དུ་
ནི། །ཟླ་བའི་དབུས་སུ་མཾ་ལས་བྱུང་། །རལ་གྲིའི་ཡུ་བ་མཾ་གྱིས་མཚན། །དེ་ནས་རལ་གྲིའི་ཡུ་བ་ལའང་། །མཾ་གིས་མཚན་པར་རབ་བསམས་ཏེ། །ནང་གི་
དེ་གཉིས་ལས་བྱུང་

44-1-103b

empty page

44-1-104a

བའི། །དམ་ཚིག་སེམས་དཔའ་འདྲ་བ་ཡི། །ཡེ་ཤེས་སེམས་དཔའ་གནས་དང་བཅས། །དེ་ཡི་ཐུགས་ཀར་ཟླ་བ་ལ། །མཾ་ལས་རལ་གྲིའི་ཡུ་བ་ལའང་། །ཟླ་བའི་སྟེང་དུ་མཾ་བསམས་ཏེ། །དེ་ཡི་འོད་ཟེར་གྱིས་བསྐུལ་ནས། །ནམ་མཁར་གནས་པའི་བདེ་
གཤེགས་རྣམས། །སོ་སོར་འོད་ཟེར་ལས་བྱུང་བའི། །སྤྱན་སོགས་ལྷ་མོ་བཅུ་རྣམས་ཀྱིས། །བུམ་པའི་ཡེ་ཤེས་ཆུ་རྒྱུན་གྱིས། །དྲི་མ་མེད་བྱས་དབང་བསྐུར་ཞེས། །ཆུ་དང་ལྷ་མོ་སྐུར་ཐིམ་སྟེ། །མི་བསྐྱོད་དབུ་རྒྱན་རབ་ཏུ་གྲུབ། །བསྙེན་པའི་སྒྲུབ་པ་ཆེན་པོ་ཡི། །དྲི་མ་མེད་པའི་
འབྲས་བུའོ། །དེ་ནས་མདུན་དུ་ཟླ་བ་བསམ། །ཡི་གེ་གསུམ་ལ་གནས་བྱེད་པའི། །རྣལ་འབྱོར་པ་ཡི་སེམས་ཉིད་ནི། །བག་ཆགས་དངོས་པོ་གང་ཡིན་དེ། །ཟླ་བའི་དབུས་སུ་གནས་བྱས་ལ། །སྔོན་བཞིན་འགྲོ་བའི་བྱང་ཆུབ་རྒྱུར། །འཐད་པའི་བདེ་གཤེགས་མ་ལུས་ཀྱིས། །ཟླ་
བའི་གཉིས་པ་གྲུབ་ལ་སོགས། །མངོན་པར་བྱང་ཆུབ་རྣམ་པ་ལྔས། །རྡོ་རྗེ་སེམས་དཔའ་རབ་ཏུ་བསྒོམ། །གཉི་གའི་དགའ་བ་དག་དང་ནི། །འགྲོ་བ་དབང་བསྐུར་མ་བྱས་པར། །སྔ་མ་བཞིན་དུ་ཡི་གེ་གསུམ། །ཞལ་གྱི་ལམ་དུ་ཞུགས་བྱས་ནས། །ཞུ་ནས་རྡོ་རྗེའི་ལམ་ནས་སུ། །ཕྱག་
ནས་པདྨོའི་ནང་དུ་གནས། །དེ་ཡི་འོད་ཟེར་འཕྲོས་པ་ཡིས། །འོད་རིགས་བཅས་པར་ཞུ་བར་གྱུར། །ལྷ་མོས་དབྱངས་ཀྱིས་བསྐུལ་བ་ལས། །ཁུ་བ་ལས་བྱུང་མཾ་གྱི་མདོག །གུར་གུམ་ལྟ་བུ་ལས་བྱུང་བའི། །རལ་གྲིའི་ཡུ་བར་ཟླ་བའང་། །མཾ་གྱིས་མཚན་པ་བསམ་བྱས་
ཏེ། །དེ་ཡི་འོད་ཀྱིས་མཁའ་དབྱིངས་ན། །གནས་པའི་བདེ་གཤེགས་ཇི་སྙེད་རྣམས། །འཇམ་པའི་རྡོ་རྗེ་མར་བྱས་ཏེ། །བཀུག་ནས་དེ་ལ་ཞུགས་པར་བྱ། །མཾ་དང་རལ་གྲི་དེ་གྱུར་པས། །འཇམ་པའི་རྡོ་རྗེ་ལྟ་བུ་ཡི། །འཇམ་དབྱངས་མ་ནི་བདག་ཉིད་ཀྱིས། །འོད་ཀྱི་
ཐབས་ལ་འཁྱུད་པ་བསྒོམ། །ཨོཾ་དྷརྨྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། །ཞེས་བདག་ཉིད་ང་རྒྱལ་བསྐྱེད་པར་བྱ། །བར་གྱི་བསྙེན་པའི་ཡན་ལག་དང་། །འདྲ་བར་འབྱུང་བའི་འབྲས་བུའོ། །དེ་ནས་སྔོན་དུ་བསྟན་པ་བཞིན། །མིག་ལ་སོགས་པ་བྱིན་གྱིས་བརླབ། །བར་གྱི་ཉེ་བའི་

44-1-104b

བསྒྲུབ་པ་དང་། །རྣམ་པར་སྨིན་པའི་འབྲས་བུའོ། །སྔོན་བཞིན་ཐུགས་སོགས་རྡོ་རྗེ་རྣམས། །གྲུབ་པར་འགྱུར་བར་རབ་བསྒོམས་ཏེ། །སྔར་གྱིས་བྱིན་གྱིས་བརླབས་པ་ཙམ། །བར་གྱི་གྲུབ་པའི་ཡན་ལག་དང་། །སྐྱེས་བུ་བྱེད་པའི་འབྲས་བུའོ། །དེ་ནས་འཇམ་པའི་རྡོ་
རྗེ་ཡི། །ཡེ་ཤེས་སེམས་དཔའི་ས་བོན་གྱི། །འོད་ཀྱིས་བདེ་གཤེགས་མ་ལུས་རྣམས། །བསྐུལ་བའི་འོད་ཟེར་ལས་བྱུང་བའི། །སྤྱན་ལ་སོགས་པས་དབང་བསྐུར་ནས། །མི་བསྐྱོད་དབུ་རྒྱན་ལྡན་པར་བྱ། །བར་གྱི་སྒྲུབ་པ་ཆེན་པོ་དང་། །དྲི་མ་མེད་པའི་འབྲས་བུའོ། །དེ་
ནས་སྐྲ་ཡི་ལམ་ནང་གི། །ཟླ་བའི་དབུས་སུ་ཨོཾ་དཀར་པོ། །སྐུ་ཡི་རིགས་ཀྱི་རང་བཞིན་ཏེ། །དེ་ཡི་ཨོཾ་ནི་ཕྲ་མོ་ཡིས། །ནུ་མ་ཡན་ལག་ཁྱབ་པར་བསམ། །སྙིང་གར་ཉི་མ་སྟེང་དུ་ནི། །ནག་པོ་ཧཱུྃ་ནི་བསམ་བྱ་བ། །ཐུགས་ཀྱི་རིགས་ཀྱི་རང་བཞིན་ཏེ། །དེ་ཡི་ཧཱུྃ་ནི་ཕྲ་མོ་ཡིས། །
ལྟེ་བ་ཡན་ཆད་ཁྱབ་པར་བསམ། །ལྟེ་བའི་འོག་ཏུ་ཉི་མ་ལ། །སྭཱ་ཉིད་སེར་པོ་རིན་ཆེན་རིགས། །དེ་ཡི་སྭཱ་ནི་ཕྲ་མོ་ཡིས། །རྐེད་པ་ཡན་ཆད་ཁྱབ་པར་བསམ། །གསང་བའི་དབུས་སུ་ཉི་མ་ལ། །ཨཱཿཉིད་དམར་པོ་འདོད་ཆགས་རིགས། །དེ་ལས་འཕྲོས་པའི་ཨཱཿརྣམས་ཀྱིས། །
རྐེད་པ་མ་ལུས་ཁྱབ་པར་བསམ། །བརླ་གཉིས་དབུས་ནས་ཉི་མ་ལ། །ཧཱ་ཉིད་ལྗང་གུ་ལས་ཀྱི་རིགས། །དེ་ཡི་ཧཱ་ནི་ཕྲ་མོ་རྣམས། །རྐང་མཐིལ་ཡན་ཆད་ཁྱབ་པར་བསམ། །རིགས་ལྔའི་ཚོགས་དང་ལྡན་བྱས་ཏེ། །ཧཱུྃ་གིས་རང་གི་རྡོ་རྗེ་ཉིད། །བུམ་པར་བྱས་པ་བསམ་བྱས་
ནས། །ཨོཾ་གྱིས་བུ་ག་གྲུབ་པར་བྱ། །དེ་ཡི་ནང་དུ་ཕཊ་སེར་པོ། །རང་གི་རིག་མའི་པདྨ་ལ། །ནག་པོ་ཧཱུྃ་ཉིད་ཕྲ་མོ་ཡིས། །ཁྱབ་པར་རབ་ཏུ་བསམ་བྱས་ནས། །ཨཱཿཡིས་སྙིང་པོ་འགྲུབ་བྱ་ཞིང་། །བུ་གར་ཕཊ་ཀྱང་བསམ་པར་བྱ། །གནས་སྐབས་ལྔ་དང་གྱུར་པ་ཡི། །ཤེས་
རབ་མ་ཉིད་གྲུབ་བྱས་ལ། །རང་གི་འོད་ཟེར་གྱིས་བསྐུལ་ནས། །རང་གི་རིག་མ་ཉིད་ལ་ཐིམ། །ཨོཾ་སརྦྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་སྔགས་ཉིད་རབ་ཏུ་བཟླས་པར་བྱ། །དང་པོའི་རྣལ་འབྱོར་གྱི་ཏིང་ངེ་འཛིན་རྫོགས་སོ།།      །།དེ་ནས་

44-1-105a

རང་གི་ས་བོན་གྱི། །འོད་ཀྱིས་བདེ་གཤེགས་རྣམས་བཀུག་སྟེ། །ཞལ་དུ་ཞུགས་ཏེ་ཞུ་གྱུར་ནས། །པདྨའི་ནང་དུ་འབབ་པར་བྱ། །དེ་ལས་གྱུར་པའི་ས་བོན་མཾ། །དེ་ལས་གཙོ་བོ་མི་བསྐྱོད་པ། །འཁོར་ལོར་བཅས་པ་བསྐོར་བྱས་ཏེ། །འགྲོ་བའི་སྔགས་
ཀྱིས་རིམ་བཞིན་སྤྲོ། །བཛྲ་དྷྲྀཀ་ཞེས་པས་སུ། །ཕྱག་ན་རྡོ་རྗེ་ལྟ་བུ་ཡི། །མི་བསྐྱོད་པ་ནི་འཕྲོ་བྱས་ཏེ། །སངས་རྒྱས་བྱ་བ་ཀུན་མཛད་ནས། །འདུས་ནས་བདག་ལ་ཞུགས་པར་བྱ། །ཛི་ན་ཛིཀ་ཀ་ཞེས་པས་སུ། །ས་ཡི་སྙིང་པོ་ལྟ་བུ་ཡི། །གོང་མ་ལྟ་བུ་རྣམ་སྣང་མཛད། །
འཕྲོས་ཏེ་འདུས་ནས་རང་མདུན་དུ། །ཤར་གྱི་ཟླ་བར་གནས་པར་བསམ། །རཏྣ་དྷྲྀཀ་ཞེས་པས་སུ། །ནམ་མཁའི་སྙིང་པོ་འདྲ་བ་ཡི། །རིན་ཆེན་འབྱུང་ལྡན་འཕྲོས་བྱས་ནས། །ལྷོ་ཡི་ཉི་མར་གནས་པར་བསམ། །ཨཱ་རོ་ལྀ་ཀ་ཞེས་པས་སུ། །འཇིག་རྟེན་དབང་ཕྱུག་
འདྲ་བ་ཡི། །འོད་དཔག་མེད་པ་འཕྲོས་བྱས་ནས། །ནུབ་ཀྱི་ཉི་མར་གནས་པར་བྱ། །པྲཛྙཱ་དྷྲྀཀ་ཅེས་པས་སུ། །སྒྲིབ་པ་རྣམ་སེལ་འདྲ་བ་ཡི། །དོན་ཡོད་གྲུབ་པ་འཕྲོ་བྱས་ནས། །བྱང་གི་ཉི་མར་གནས་པར་བསམ། །ཀུན་ཀྱང་རལ་པའི་དབུ་རྒྱན་ཅན། །གསུམ་པོ་ཉི་
མའི་འོད་དང་ནི། །སྣང་མཛད་ཟླ་བའི་འོད་འདྲ་བའི། །དཀྱིལ་འཁོར་རྒྱབ་བརྟེན་ལྡན་པའོ། །མོ་ཧ་ར་ཏཱི་ཞེས་པས་སུ། །ས་ཡི་སྙིང་པོ་ལྟ་བུ་ཡི། །སྤྱན་མ་ཤར་ལྷོ་མཚམས་སུ་བསམ། །དྭེ་ཥ་ར་ཏཱི་ཞེས་པས་སུ། །ཕྱག་ན་རྡོ་རྗེ་ལྟ་བུ་ཡི། །མཱ་མ་ཀཱི་ནི་ལྷོ་ནུབ་མཚམས། །རཱ་
ག་ར་ཏཱི་ཞེས་པས་སུ། །འཇིག་རྟེན་དབང་ཕྱུག་འདྲ་བ་ཡི། །གོས་དཀར་མོ་ནི་ནུབ་བྱང་མཚམས། །བཛྲ་ར་ཏཱི་ཞེས་བྱ་བས། །ནམ་མཁའི་སྙིང་པོ་འདྲ་བ་ཡི། །སྒྲོལ་མ་བྱང་ཤར་མཚམས་སུ་བསམ། །དེ་རྣམས་རྩ་བའི་ཕྱག་མཚན་ནི། །འཁོར་ལོ་ཨུཏྤལ་པདྨ་དམར། །ཨུཏྤལ་
སེར་པོར་ཤེས་པར་བྱ། །འཁོར་ལོ་ཕྱི་རོལ་གྲྭ་བཞི་དང་། །ཤར་གྱི་གཡས་གཡོན་ཕྱོགས་གཉིས་ལ། །དེ་ཉིད་གསུམ་གྱི་གོང་མ་ལྟར། །གཟུགས་སྒྲ་དྲི་རོ་རེག་བྱ་དང་། །ཆོས་ཀྱི་དབྱིངས་ཀྱི་རྡོ་རྗེ་མ། །ས་སྙིང་ལ་སོགས་འདྲ་བ་རྣམས། །མེ་ལོང་པི་ཝང་དྲི་ཡི་དུང་། །རོ་ཡི་སྣོད་

44-1-105b

དང་སྣ་ཚོགས་གོས། །ཆོས་ཀྱི་འབྱུང་གནས་ཕྱག་རྒྱ་རྣམས། །རིམ་བཞིན་རྩ་བའི་ཕྱག་མཚན་ལྡན། །ཡ་མནྟ་ཀྲྀཏ་ཅེས་པས་སུ། །མི་བསྐྱོད་ལྟ་བུའི་གཤིན་རྗེ་གཤེད། །གོང་མ་ལྟ་བུ་ཤར་སྒོར་བསམ། །པྲཛྙཱནྟ་ཀྲྀཏ་ཅེས་པས་སུ། །རྣམ་པར་སྣང་མཛད་ལྟ་བུ་ཡི། །ཤེས་
རབ་མཐར་བྱེད་ཉི་མའི་གདན། །ཉི་མའི་འོད་ཀྱི་དཀྱིལ་འཁོར་གྱིས། །བྱེ་བྲག་བྱས་པ་ལྷོ་སྒོར་བསམ། །པདྨཱནྟ་ཀྲྀཏ་ཅེས་པས་སུ། །འོད་དཔག་མེད་པ་ལྟ་བུ་ཡི། །པདྨ་མཐར་བྱེད་ནུབ་སྒོར་བསམ། །བིགྷྣཱནྟ་ཀྲྀཏ་ཅེས་པས་སུ། །གཤིན་རྗེ་མཐར་འབྱིན་ལྟ་བུ་ཡི། །བགེགས་
མཐར་འབྱིན་པ་བྱང་གི་སྒོར། །དེ་རྣམས་རྩ་བའི་ཕྱག་མཚན་ནི། །རྡོ་རྗེ་ཐོ་བ་རྡོ་རྗེ་དབྱིག། །པདྨ་རྡོ་རྗེ་ཁ་དབྱེ་བའོ། །ཀུན་ཀྱང་གཡས་བསྐུམ་གཡོན་བརྐྱང་ཞབས། །ཞལ་ནི་དགོད་དང་གདངས་པ་དང་། །ཁྲོ་དང་མཆེ་བ་གཙིགས་པར་ལྡན། །ལྗགས་འདྲིལ་སྤྱན་ཟླུམ་འདྲིལ་བ་
དང་། །ཉི་མ་གསར་ཤར་ལྟ་བུ་དང་། །ཞལ་ནི་ཁྲོ་གཉེར་དང་ལྡན་པ། །གསུས་པ་ཆེ་ཞིང་ཡངས་པ་དང་། །སྲ་ཞིང་ཕྱེ་བ་འཕྱང་བར་ལྡན། །བརླ་དང་བྲང་ཡང་དེ་བཞིན་ཏེ། །ལུས་དང་ཡན་ལག་ཐམས་ཅད་ཀུན། །ཐུང་ཞིང་རབ་ཏུ་སྦོམ་པ་དང་། །སྨ་ར་དམར་སེར་འོད་དང་ལྡན། །
སྐྲ་ཡང་དམར་སེར་འོད་དང་ལྡན། །གྱེན་དུ་འཁྱིལ་ཞིང་འབར་བ་སྟེ། །འོད་ཟེར་འབར་བར་ལྡན་པ་རྣམས། །རང་འོད་རིག་མ་སྨ་ར་མེད། །དང་པོ་ཕྱག་གིས་འཁྱུད་པ་དང་། །སྟག་ལྤགས་སྨད་གཡོགས་དང་ལྡན་པ། །བུང་བ་ནག་པོ་ལྟ་བུ་ཡི། །མཐའ་ཡས་དབུ་ཡི་ཐོད་
དུ་བཅིངས། །མདོག་དམར་དྲག་པོ་ལྟ་བུ་ཡི། །འཇོག་པོ་ཡི་ནི་སྙན་ཆ་དང་། །པདྨ་ཆེན་པོ་དཀར་པོ་ཡིས། །དོ་ཤལ་རྒྱན་ནི་བྱས་པ་སྟེ། །སྟོབས་རྒྱུ་ལྗང་གུ་སེ་རལ་ཁ། །དུང་སྐྱོང་སེར་པོས་ཕྱག་གདུབ་བྱས། །ཁ་དོག་སྣ་ཚོགས་ལྟ་བུ་ཡི། །རིགས་ལྡན་གྱི་ནི་དཔུང་
རྒྱན་དང་། །ནོར་རྒྱས་མདོག་དཀར་སྐ་རགས་བྱས། །པདྨའི་རྩ་བ་ལྟ་བུ་ཡི། །པདྨས་རྐང་གདུབ་བྱས་པ་ཡི། །དེ་རྣམས་རབ་ཏུ་བསམ་པར་བྱ། །དེ་ནས་རང་གི་ས་བོན་གྱི། །འོད་ཟེར་ལྕགས་ཀྱུ་འདྲ་རྣམས་ཀྱིས། །ཁྲོ་བོ་བཞི་ཡི་ཐུགས་བསྐུལ་ནས། །གཤིན་རྗེ་གཤེད་ཀྱིས་ཛཿ

44-1-106a

ཞེས་བརྗོད། །དེ་ཡི་ཐུགས་ལས་འཕྲོས་པ་ཡི། །ཁྲོ་བོ་རྣམས་ཀྱིས་དཀྱིལ་འཁོར་གྱི། །བགེགས་རྣམས་མེད་པར་བསྲུང་བྱས་ཏེ། །ལྕགས་ཀྱུས་དགུག་པར་བྱས་ནས་སུ། །རྡོ་རྗེ་ར་བ་བཤིག་བྱས་ཏེ། །ཞུགས་ཏེ་རང་གི་མདུན་དུ་ནི། །སྣ་ཚོགས་
པདྨར་གནས་པར་བསམ། །དེ་ནས་སྙིང་ནས་འཕྲོས་པ་ཡི། །ཁྲོ་བོ་རྣམས་ཀྱི་ར་བ་ཉིད། །བཤིག་པ་བརྩིགས་པར་བྱས་ནས་སུ། །ཕྱིར་ཡང་སྙིང་ལ་ཞུགས་པར་བྱ། །དེ་ནས་རང་གི་མདུན་དུ་ནི། །མན་ཇི་གསུམ་ལ་དུང་ཕོར་གསུམ། །མེ་ཏོག་དཀར་པོ་དང་ལྡན་པ། །
ཙནྡན་ཆུ་ཡིས་གང་བར་བྱས། །དེ་མདུན་མན་ཇི་གཉིས་སྟེང་དུ། །གསེར་དང་རིན་ཆེན་ལས་བྱས་པའི། །གསོལ་བའི་སྣོད་གཉིས་གཞག་པར་བྱ། །གཡས་ཕྱོགས་དུང་གི་གསུམ་པ་ལ། །འོག་ནས་འབྱུང་བའི་ཆོ་གས་སུ། །བྱིན་བརླབས་བདུད་རྩི་ལྔ་བླུགས་བྱ། །ཡི་གེ་
གསུམ་གྱི་བར་བྱས་ཏེ། །ཡི་དམ་ལྷ་ཡི་སྔགས་བཟླས་ལ། །ཀུ་ཤའི་བམ་པོ་དང་པོ་ཡི། །དུང་གི་ཆུ་ཡིས་གསོལ་བའི་སྣོད། །དང་པོ་ལན་གསུམ་བཏུང་གཏོར་བྱ། །གཉིས་པའི་ཆུ་དང་མེ་ཏོག་བཅས། །བཟུང་སྟེ་དེ་ཡི་སྣོད་ཉིད་ལ། །ལན་གསུམ་ཉེ་རེག་སྦྱིན་
པར་བྱ། །གསུམ་པ་བདུད་རྩི་དང་ལྡན་པས། །གཉིས་པ་མཆོད་ཡོན་ཆུ་ཡང་སྦྱིན། །དེ་ནས་མེ་ཏོག་བཟུང་བྱས་ཏེ། །ཞབས་བསིལ་ཕྱག་རྒྱ་དང་ལྡན་པར། །དེ་ཡི་སྣོད་ལ་ཞབས་བསིལ་སྦྱིན། །དེ་ནས་རང་སྙིང་འོད་ཟེར་གྱིས། །ཤེས་རབ་མཐར་བྱེད་བསྐུལ་བྱས་ནས། །དེ་
ཡིས་ཧཱུྃ་བརྗོད་སྙིང་ལས་སུ། །བྱུང་བའི་འོད་ཟེར་དཀར་པོ་ཡིས། །ཡེ་ཤེས་དཀྱིལ་འཁོར་བཏེག་བྱས་ནས། །རང་གི་དཀྱིལ་འཁོར་ཞུགས་པར་བྱ། །དེ་ནས་རང་སྙིང་འོད་ཟེར་གྱིས། །པདྨ་མཐར་བྱེད་བསྐུལ་བྱས་ནས། །དེ་ཡིས་བཾ་བརྗོད་ཐུགས་ལས་སུ། །འོད་ཟེར་སེར་པོ་
འཕྲོས་པ་ཡིས། །དཀྱིལ་འཁོར་ཁྱབ་པར་བྱས་ནས་བཅིང་། །དེ་ནས་རང་སྙིང་འོད་ཟེར་གྱིས། །བགེགས་མཐར་ཕྱིན་པ་བསྐུལ་བྱས་ནས། །དེ་ཡིས་ཧོཿབརྗོད་དེ་སྙིང་ལས། །འོད་ཟེར་དམར་པོ་འཕྲོས་པ་ཡིས། །ཁྱབ་པར་རབ་ཏུ་དགའ་བར་བསམ། །ཡང་དག་བསྙེན་

44-1-106b

པའི་ཡན་ལག་དང་། །འདྲ་བར་འབྱུང་བའི་འབྲས་བུའོ། །ཀུན་གྱི་མིག་ལ་སོགས་པ་རྣམས། །ས་ཡི་སྙིང་པོ་ལ་སོགས་པར། །རྫོགས་པའི་ཚུལ་གྱིས་བྱིན་གྱིས་བརླབས། །ཡང་དག་སྒྲུབ་པའི་ཡན་ལག་དང་། །རྣམ་པར་སྨིན་པའི་འབྲས་བུའོ། །དེ་རྣམས་ཀུན་ལ་གནས་
གསུམ་དུ། །སྐུ་གསུང་ཐུགས་ཀྱི་རྡོ་རྗེ་ཉིད། །སྔགས་ཀྱིས་བྱིན་གྱིས་བརླབས་བྱས་ཏེ། །རྫོགས་པའི་ཚུལ་དུ་བསྒོམ་པར་བྱ། །ཡང་དག་བསྒྲུབ་པ་ཡན་ལག་དང་། །སྐྱེས་བུ་བྱེད་པའི་འབྲས་བུའོ། །རང་གི་ས་བོན་འོད་ཟེར་གྱིས། །བསྐུལ་ནས་ནམ་མཁར་གནས་པ་ཡི། །
བདེ་གཤེགས་རྣམས་ཀྱི་འོད་ཟེར་ལས། །སྤྱན་སོགས་ལྷ་མོ་བཅུ་རྣམས་ཀྱི། །དབང་བསྐུར་བྱས་ནས་དབུ་རྒྱན་ལ། །རང་རང་བདག་པོ་གྲུབ་བྱ་བ། །བདེ་གཤེགས་ལྔ་དང་མཱ་མ་ཀཱི། །སྒྲ་དང་ཆོས་དབྱིངས་རྡོ་རྗེ་དང་། །ཤེས་རབ་མཐར་ཕྱིན་བགེགས་མཐར་ཕྱིན། །དེ་རྣམས་
བདག་པོ་མི་བསྐྱོད་པ། །སྤྱན་མ་གཟུགས་ཀྱི་རྡོ་རྗེ་དང་། །གཤིན་རྗེ་མཐར་ཕྱིན་རྣམ་སྣང་མཛད། །དྲི་ཡི་རྡོ་རྗེ་རིན་ཆེན་འབྱུང་། །རོ་ཡི་རྡོ་རྗེ་གོས་དཀར་མོ། །པདྨ་མཐར་ཕྱིན་འོད་དཔག་མེད། །སྒྲོལ་མ་རེག་གི་རྡོ་རྗེ་མའི། །དབུ་རྒྱན་བདག་པོ་དོན་ཡོད་གྲུབ། །མི་བསྐྱོད་
དབུ་རྒྱན་རྡོ་རྗེ་སེམས། །སྒྲུབ་པ་ཆེན་པོའི་ཡན་ལག་དང་། །དྲི་མ་མེད་པའི་འབྲས་བུའོ། །དེ་ནས་རང་གི་ས་བོན་གྱི། །འོད་ཀྱིས་བདེ་གཤེགས་རྣམས་བཀུག་སྟེ། །ཞལ་དུ་ཞུགས་ནས་ཞུ་བྱས་ལ། །པདྨོའི་དབུས་སུ་འབབ་པར་བྱ། །ཁུ་བ་དེ་ལས་གྱུར་པ་ཡི། །ཛཿཧཱུྃ་བཾ་ཧོཿ 
ཁཾ་རཾ་ཞེས། །དང་པོའི་ཕྲེང་བ་དང་ལྡན་པ། །དེ་སྟེང་མཾ་ལཾ་པཾ་ཏཾ་ཞེས། །གཞན་གྱི་སྟེང་དུ་གནས་པར་བྱ། །རང་གི་ས་བོན་འོད་ཟེར་གྱིས། །གཟུགས་སོགས་རྡོ་རྗེ་དགུག་བྱས་ལ། །རང་རང་ས་བོན་ལ་ནི་ཐིམ། །དེ་ཡི་ས་བོན་རྒྱས་པར་འགྱུར། །རིག་མའི་བ་སྤུའི་བུ་ག་ནས། །
ས་བོན་རྣམས་ལས་འོད་འཕྲོས་ཏེ། །དཀྱིལ་འཁོར་ལས་ནི་མཐོང་བར་བྱ། །དེ་ལས་བྱུང་བའི་སྤྱན་ལ་སོགས། །དཀྱིལ་འཁོར་ལ་ནི་འཕྲོ་བྱས་ལ། །རང་རང་རིགས་དང་འབྲེལ་རྣམས་ཀྱི། །རང་གི་འཁོར་ལོ་རབ་ཏུ་མཆོད། །ཨོཾ་སརྦྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་

44-1-107a

སྔགས་ཀྱང་རབ་ཏུ་བརྗོད་པར་བྱ། །དེ་ནས་རབ་ཏུ་བསྟོད་པར་བྱ། །མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁས་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །དབྱངས་ཀྱི་རྡོ་རྗེ་ཕྱག་འཚལ་བསྟོད། །རྡོ་རྗེ་བདུད་རྩི་རྒྱལ་པོ་ཆེ། །རྡོ་རྗེ་
ཞི་བ་དགའ་བ་ཆེ། །རང་བཞིན་འོད་གསལ་མཆོག་གི་མཆོག། །ཞེ་སྡང་རྡོ་རྗེ་ཕྱག་འཚལ་བསྟོད། །རིན་ཆེན་རྒྱལ་པོ་ཤིན་ཏུ་ཟབ། །རྡོ་རྗེ་ནམ་མཁའ་དྲི་མ་མེད། །རང་བཞིན་དག་པས་གོས་པ་མེད། །རྡོ་རྗེ་སྐུ་ལ་ཕྱག་འཚལ་བསྟོད། །རྡོ་རྗེ་བདུད་རྩི་རྒྱལ་པོ་ཆེ། །མི་
རྟོག་ནམ་མཁའི་རྡོ་རྗེ་འཆང་། །འདོད་ཆགས་ཕ་རོལ་ཕྱིན་པ་ཐོབ། །འོད་གསལ་རྡོ་རྗེ་ཕྱག་འཚལ་བསྟོད། །རྡོ་རྗེ་དོན་གྲུབ་རྫོགས་སངས་རྒྱས། །བསམ་པ་ཐམས་ཅད་ཡོངས་སུ་གྲུབ། །རང་བཞིན་དག་པ་ཉིད་ལས་བྱུང་། །རྡོ་རྗེ་སེམས་དཔའ་ཕྱག་འཚལ་
བསྟོད། །དེ་ནས་ས་བོན་ཡཾ་གི་མདོག །དུ་བ་ལྟ་བུ་ལས་བྱུང་བའི། །རླུང་གི་དཀྱིལ་འཁོར་གཞུ་ལྟ་བུ། །གཡས་གཡོན་བ་དན་གྱིས་མཚན་པ། །ཡཾ་གིས་མཚན་པ་བསམ་པར་བྱ། །དེ་སྟེང་རཾ་ནི་དམར་པོ་ལས། །བྱུང་བའི་མེ་ཡི་དཀྱིལ་འཁོར་ནི། །གྲུ་གསུམ་
འབར་བ་རཾ་གྱིས་མཚན། །དེ་སྟེང་ཨ་དཀར་བྱུང་བ་ཡི། །པདྨའི་སྣོད་ནི་ཨ་ཡིས་མཚན། །དེ་ནང་དབུས་ཀྱི་ཕྱོགས་དང་ནི། །ཤར་ལྷོ་ནུབ་བྱང་ཕྱོགས་བཞི་རུ། །རིམ་བཞིན་དྲི་ཆུ་དྲི་ཆེན་དང་། །རཀྟ་དང་ནི་བྱང་ཆུབ་སེམས། །མ་ཧཱ་མཾ་ས་གཞག་པར་བྱ། །དེ་སྟེང་ཤར་དུ་
ཟླ་བ་དང་། །ལྷག་མ་བཞི་ནི་ཉི་མའི་གདན། །དེ་སྟེང་ཧཱུྃ་བྲཱུཾ་ཨཱཾ་ཛྲཱིཾ་ཁཾ། །ས་བོན་རྣམ་ལྔ་མཐོང་བྱས་ནས། །ཡེ་ཤེས་སེམས་དཔའི་ས་བོན་གྱི། །འོད་ཀྱིས་བདེ་གཤེགས་རྣམས་བཀུག་སྟེ། །རང་རང་ས་བོན་ཉིད་དུ་ཐིམ། །དེ་ནས་རླུང་གིས་མེ་བསྐྱོད་ནས། །མེ་ཡི་ཐོད་
པ་བཙོས་པ་ཡི། །རླངས་པ་ལས་བྱུང་ཧཱུཾ་གི་ཚོགས། །དཀར་པོ་ལས་བྱུང་རྡོ་རྗེའི་ཚོགས། །བུམ་པ་ཧཱུྃ་གིས་མཚན་པར་བསམ། །དེ་རྣམས་ཕྲེང་བ་ལྟ་བུའི་རྒྱུན། །ཞུ་ནས་སྣོད་ལ་ཞུགས་པར་བྱ། །དེ་བཞིན་ལན་གཉིས་གསུམ་བཞིའི་བར། །བསམས་ཏེ་རླུང་མེ་ལ་

44-1-107b

སོགས་པ། །དེ་རྣམས་མ་ལུས་གྱུར་པར་བསམ། །མེ་ཏོག་པདྨ་དཀར་པོ་ནང་། །བདུད་རྩིས་གང་བར་གྱུར་པར་བསམ། །བསིལ་བར་བྱ་ཕྱིར་དེ་སྟེང་དུ། །དཀར་པོ་ཨཾ་ནི་བསམ་བྱས་ཏེ། །ཞུ་ནས་ནང་དུ་ཞུགས་པར་བྱ། །དེ་ནས་འོད་ཟེར་འབར་འགྱུར་ཏེ། །ཕྱིར་ཡང་དེ་ཉིད་
ཞུགས་པར་བྱ། །རང་གི་ལྕེ་ཡི་དཀྱིལ་དུ་ཡང་། །ཧཱུྃ་ལས་རྡོ་རྗེ་རྩེ་གསུམ་པ། །བུམ་པར་ཧཱུྃ་གིས་བྱིན་བརླབས་བསམ། །དེ་ཉིད་གསུམ་གྱི་གསང་སྔགས་ཉིད། །ཇི་ལྟར་འདོད་པ་བཟླས་བྱས་ཏེ། །བདུད་རྩིས་བཀང་བའི་པདྨ་ལ། །ཡེ་ཤེས་སེམས་དཔའི་ས་བོན་ལས། །འོད་
ཟེར་བྱུང་བས་བསྐུལ་བྱས་ནས། །པདྨ་བཅུ་དགུར་འཕྲོས་གྱུར་ཏེ། །ལྷ་རྣམས་སོ་སོའི་ཕྱག་གནས་ནས། །ཡབ་ཡུམ་དུས་གཅིག་མཐུན་པ་རུ། །བདུད་རྩིའི་རོ་མཆོག་མྱོང་བར་བསམ། །དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་རྫོགས་སོ།།      །།
དེ་ནས་ཡེ་ཤེས་སེམས་དཔའ་ཡི། །ས་བོན་ལས་ནི་འོད་ཟེར་ཚོགས། །གཞལ་ཡས་ཁང་གི་ཕྱི་རོལ་དུ། །ཁ་དོག་སྣ་ཚོགས་འཕྲོས་པ་ཡི། །རྩེ་གསུམ་བདེ་གཤེགས་བྱུང་རྣམས་ཀྱིས། །འགྲོ་བ་སངས་རྒྱས་པར་བྱས་ནས། །ས་བོན་ཉིད་ལ་ཐིམ་གྱུར་ཏེ། །དེ་ཡིས་ཡང་
དག་རྒྱས་པར་གྱུར། །འོད་ཟེར་བསམ་གྱིས་མི་ཁྱབ་ཕྱིར། །མཾ་དེ་ཉིད་ནི་ཐིག་ལེར་གྱུར། །དེ་ཡི་འོད་ཟེར་རིམ་པ་ཡིས། །དང་པོ་རལ་གྲི་སྣང་བར་བྱས། །དེ་ནས་ཡེ་ཤེས་སེམས་དཔའ་ཡི། །ནང་དང་ཕྱི་དང་ལུས་དང་ནི། །ཡེ་ཤེས་སེམས་དཔའི་དཀྱིལ་འཁོར་རྣམས། །
གནས་པའི་རལ་གྲི་དག་དང་ནི། །དམ་ཚིག་སེམས་དཔའི་སྐུ་གསུང་ཐུགས། །རྡོ་རྗེ་ཚུན་ཆད་སྣང་བྱས་ནས། །དེ་ནས་རང་སེམས་ཡི་གེ་མཾ། །ཐིག་ལེ་ལྟ་བུར་ཞུགས་པར་བྱ། །བསྐྱེད་པའི་རིམ་པ་དེ་མ་ཐག །ཏིང་འཛིན་གསུམ་གྱིས་ཡོངས་སུ་གྲུབ། །འཇམ་པའི་རྡོ་
རྗེ་བསམ་བྱས་ནས། །དམ་ཚིག་སེམས་དང་འབྲེལ་པ་ཡི། །རྡོ་རྗེ་ཐུགས་སོགས་ཡན་ཆད་གསལ། །གཞག་པའི་འོད་ཟེར་རྣམས་ཀྱིས་ནི། །དམ་ཚིག་སེམས་དཔའི་ཕྱི་ཡི་སྐུ། །དེ་ཡི་དཀྱིལ་འཁོར་གསལ་བྱས་ནས། །གཞལ་མེད་ཁང་ནས་ཕྱི་རོལ་དུ། །བྱུང་ནས་

44-1-108a

འགྲོ་རྣམས་གསལ་བྱས་ནས། །ཡང་ནི་དེ་བཞིན་བཞུགས་པར་བྱ། །དེ་ལྟའི་རིམ་པ་རབ་འཕྲོ་ཞིང་། །ཇི་ཙམ་འདོད་པར་འཕྲོ་འདུ་བྱ། །འདི་ལྟར་ཐིག་ལེ་རྣལ་འབྱོར་བསྒོམ། །ལས་ཀྱི་རྒྱལ་བ་མཆོག་ཅེས་བྱ་བའི་ཏིང་ངེ་འཛིན་རྫོགས་སོ།།      །།
ཐིག་ལེ་རྣལ་འབྱོར་བསྡུ་བྱས་ནས། །ཕྲ་མོ་རྣལ་འབྱོར་བསྒོམ་པར་བྱ། །ཡེ་ཤེས་སེམས་དཔའི་ས་བོན་གྱི། །འོད་ཀྱིས་བདེ་གཤེགས་རྣམས་བཀུག་ནས། །ཞལ་གྱི་ལམ་དུ་ཞུགས་བྱས་ནས། །རྡོ་རྗེའི་ལམ་ནས་པདྨར་གནས། །དེ་ནས་ལས་ཀྱི་ཚད་ཙམ་གྱི། །རལ་གྲི་ཡུ་བར་
གཞལ་མེད་ཁང་། །རྡོ་རྗེ་སེམས་དཔའི་དཀྱིལ་འཁོར་ལྡན། །པདྨོ་དབུས་ན་མཐོང་བར་བྱ། །གཉི་གའི་དགའ་བ་ལ་སོགས་པ། །ཐིག་ལེ་རྣལ་འབྱོར་ཡན་ཆད་པར། །ཏིང་འཛིན་གསུམ་ཉིད་རྫོགས་པ་ཡི། །རང་གི་རྡོ་རྗེ་རྩེ་ལྔ་ཡི། །རྩེ་དབུས་ལྕགས་ཀྱུ་ལྟ་བུ་རུ། །བསམ་སྟེ་
དེ་ཡི་ལྕགས་ཀྱུ་ཡིས། །དམ་ཚིག་སེམས་དཔའི་དཀྱིལ་འཁོར་དང་། །ལྡན་པའི་རལ་གྲི་ཕྲ་མོ་ཉིད། །ཕྱི་རོལ་དུ་ནི་ཕྱུང་བྱས་ཏེ། །པདྨའི་སྣ་རྩེར་གནས་པར་བྱ། །འདི་ཡི་ཐིག་ལེ་རྣལ་འབྱོར་ལ། །དམ་ཚིག་སེམས་དང་འབྲེལ་པ་ཡི། །སྐུ་དང་གསུང་ཐུགས་རྡོ་རྗེའི། །
སྣང་བར་བྱས་པ་ཡན་ཆད་ཀྱི། །འོད་ཀྱིས་དམ་ཚིག་སེམས་དཔའ་ཡི། །ཕྱི་ཡི་ལུས་ཀྱི་དཀྱིལ་འཁོར་གྱི། །ལྷ་རྣམས་རབ་ཏུ་གསལ་བྱས་ནས། །གཞལ་མེད་ཁང་ནས་ཕྱིར་བྱུང་བའི། །འོད་ཀྱིས་ནམ་མཁའ་ཁྱབ་བྱས་ཏེ། །ཕྱིར་ཡང་དེ་ཉིད་ཞུགས་པར་བྱ། །དེ་བཞིན་
ཡང་དང་ཡང་ནི་བསམ། །མཚན་མ་མ་བྱུང་བར་དུ་ནི། །འོད་ཟེར་ཙམ་གྱི་འཕྲོ་འདུ་ཉིད། །ཇི་ཙམ་འདོད་པ་རབ་ཏུ་བྱ། །མཚན་མ་རྣམ་པ་ལྔ་མཐོང་ནས། །ལྷ་དང་ཕྱག་མཚན་ལ་སོགས་པ། །ཡང་ནས་ཡང་དུ་འཕྲོ་འདུ་བྱ། །ཕྲ་མོའི་ཏིང་ངེ་འཛིན་རྫོགས་སོ།།      །།ཕྲ་མོའི་
རྣལ་འབྱོར་བསྡུས་མ་ཐག །སྐུ་ཡི་རྡོ་རྗེ་ལ་སོགས་པའི། །ཐུགས་ཀྱི་ཟླ་བ་ལ་གནས་པའི། །ཕྱག་མཚན་དཀྱིལ་ན་གནས་པ་ཡི། །ཨོཾ་སོགས་བཟླས་པའི་དུས་སུ་ནི། །སྐུ་ཡི་རྡོ་རྗེ་ལ་སོགས་དང་། །ལྷ་མོ་བདེ་གཤེགས་བཅས་པ་རྣམས། །པདྨའི་དཀྱིལ་ན་གནས་པ་ཡི། །ལྷ་

44-1-108b

མོའི་ས་བོན་ཛཾ་ལ་སོགས། །གཟུགས་ཀྱི་རྡོ་རྗེ་ལ་སོགས་པའི། །མཆོད་པའི་ལྷ་མོར་ལྡན་པ་རྣམས། །རིམ་པར་བྱེ་བྲག་སོ་སོ་ནས། །བཟླས་མ་ཐག་ཏུ་འཕྲོ་བྱས་ཏེ། །བཟླས་པ་ཟིན་པའི་སྐད་ཅིག་ལ། །རང་རང་ས་བོན་ཞུགས་པར་བྱ། །འདི་ལྟར་རིམ་པའི་བཟླས་བརྗོད་
རྫོགས། །རྫོགས་པའི་བཟླས་བརྗོད་ཕྱོགས་སུ་ནི། །རེ་རེ་བརྗོད་པའི་སྐད་ཅིག་ལ། །རང་རང་ས་བོན་རྣམས་ལས་ནི། །སྐུ་ཡི་རྡོ་རྗེ་ལ་སོགས་དང་། །ལྷ་མོ་དེ་བཞིན་གཤེགས་པ་དང་། །ཨོཾ་ལ་སོགས་པའི་ཡི་གེ་རྣམས། །བཟླས་པ་ཟིན་པའི་སྐད་ཅིག་ལ། །རང་རང་ས་བོན་
རྣམས་ལ་ནི། །སྐུ་ཡི་རྡོ་རྗེ་ལ་སོགས་དང་། །ལྷ་མོ་དང་བཅས་བདེ་གཤེགས་ཀུན། །མཆོད་པ་དང་ལྡན་ཞུགས་པར་བྱ། །དེ་ལྟར་རྫོགས་པའི་བཟླས་བརྗོད་བསྒོམ། །བཟླས་པས་ངལ་བར་གྱུར་ན་ཡང་། །སྤྱན་སོགས་ལྷ་མོ་བཞི་རྣམས་ཀྱི། །དབྱངས་ཀྱིས་བླང་ཞིང་བསྐུལ་ནས་ནི། །
སྔོན་བཞིན་དཀྱིལ་འཁོར་མཆོད་པར་བྱ། །སྤྱི་བོར་མཐོ་གང་ཙམ་དུ་ནི། །མཐོ་གང་ཙམ་གྱི་ཟླ་བ་བསམ། །དེ་སྟེང་ཟླ་བ་ཉི་མ་ལ། །བྲཱུཾ་ཨཱཾ་ཛྲཱིཾ་ཁཾ་ཧཱུྃ་རྣམ་ལྔ། །དྲི་ཆེན་རྫས་སོགས་སྟེང་དུ་བསམ། །དེ་རྣམས་དབུས་སུ་ཨོཾ་དཀར་པོ། །དེ་ནས་རང་རང་ས་བོན་གྱི། །འོད་ཀྱིས་བདེ་གཤེགས་
བཀུག་བྱས་ནས། །ཞུགས་ཏེ་གཅིག་ཏུ་གྱུར་བྱས་ལ། །དེ་ནས་ཡེ་ཤེས་སེམས་དཔའ་ཡི། །ས་བོན་འོད་ཀྱིས་བསྐུལ་བྱས་ནས། །ཞུ་སྟེ་ཨོཾ་གྱིས་རེག་བྱས་ལ། །དེ་རྒྱུན་མགོ་ལ་འབབ་བྱ་སྟེ། །གཟི་བྱིན་ལྡན་པར་ཤེས་པར་བྱ། །དེ་ནས་སྐད་ཅིག་ངལ་བསོས་ཏེ། །གོང་མ་ལྟ་བུའི་ཆོ་
ག་ཡིས། །གསང་སྔགས་བཟླས་བརྗོད་ཡང་བྱའོ། །གལ་ཏེ་གཤེགས་སུ་གསོལ་འདོད་ན། །སྔོན་བཞིན་མཆོད་དང་བསྟོད་པ་དང་། །བདུད་རྩི་བྱ་བའི་བར་བྱས་ཏེ། །དེ་ཉིད་གསུམ་གྱི་གསང་སྔགས་ཀྱིས། །ཡེ་ཤེས་སེམས་དཔའི་དཀྱིལ་འཁོར་ལ། །ཕྱི་རོལ་དཀྱིལ་
འཁོར་ཞུགས་པར་བྱ། །དེ་ནས་སྡུག་བསྔལ་ལྡན་པ་ཡི། །སེམས་ཅན་མཐོང་བར་བྱས་ནས་སུ། །སྔོན་དུ་སྨོན་ལམ་བྱས་པ་ཉིད། །མངོན་སུམ་ཉིད་དུ་བསམ་བྱས་ཏེ། །འཇམ་པའི་རྡོ་རྗེ་སྦྱོར་ལྡན་པས། །རང་སེམས་དག་བྱས་ལངས་པར་བྱ། །གཟུགས་སྒྲ་དྲི་རོ་རེག་བྱ་

44-1-109a

རྣམས། །རང་གི་སེམས་ཙམ་མིན་པའི་ཕྱིར། །རིམ་བཞིན་རྣམ་པར་སྣང་མཛད་དང་། །མི་བསྐྱོད་པ་དང་རིན་ཆེན་འབྱུང་། །སྣང་བ་མཐའ་ཡས་དོན་ཡོད་གྲུབ། །ཡང་ན་འཇམ་པའི་རྡོ་རྗེ་ཉིད། །ཡང་ན་རྡོ་རྗེ་སེམས་དཔའ་བསམ། །བྱ་བ་མ་ལུས་བྱེད་དོ་
ཅོག །ལྷ་ཡི་དེ་ཉིད་དག་ལྡན་བྱ། །དེ་ཡི་ཐུགས་ཀྱི་ཟླ་བ་ལ། །ཡེ་ཤེས་སེམས་དཔའི་དཀྱིལ་འཁོར་ཉིད། །སེམས་ཀྱིས་བསམ་པར་བྱས་ནས་སུ། །བཟའ་བཏུང་བདུད་རྩིར་རབ་བྱས་ཏེ། །གོང་མ་ལྟ་བུའི་ཆོ་ག་ཡིས། །ཡི་གེ་གསུམ་གྱི་སྔགས་བརྗོད་ལ། །ལྕེ་ལ་རྡོ་རྗེ་ཧཱུྃ་
དཀར་པོ། །དེ་ལས་རྡོ་རྗེ་རྩེ་གསུམ་པ། །བུམ་པར་ཧཱུྃ་གིས་མཚན་བྱས་ཏེ། །དཀྱིལ་འཁོར་ལྷ་རྣམས་མ་ལུས་པར། །ཚིམ་པའི་བསམ་པས་མྱང་བར་བྱ། །ཁྱིམ་ནས་འབྱུང་དང་འཇུག་ལ་སོགས། །ལུས་ངག་ཡིད་ཀྱི་ལས་རྣམས་ཀུན། །སེམས་ཅན་དོན་ལ་སྦྱོར་བ་དང་། །
སངས་རྒྱས་མཆོད་པར་རྣམ་དག་བསམ། །དམ་ཚིག་ཉམས་པ་གསོ་བའི་ཕྱིར། །སྣ་ཚོགས་པདྨར་ཟླ་བ་ལ། །དོན་ཡོད་གྲུབ་པའི་རྣལ་འབྱོར་པས། །འགྲོ་རྣམས་རང་བཞིན་དག་བསམས་ཏེ། །རང་གི་སྙིང་གར་ཟླ་བ་ལ། །ཁཾ་ལས་སྣ་ཚོགས་རྡོ་རྗེ་སྟེ། །དེ་དཀྱིལ་ཟླ་བར་
ཁཾ་ཡང་བསམ། །དེ་ལས་འོད་ཟེར་རྣམས་སྤྲོས་པས། །བདེ་གཤེགས་མ་ལུས་བསྐུལ་བྱས་ཏེ། །དེ་རྣམས་ལས་བྱུང་འོད་ཟེར་ལས། །སྤྱན་སོགས་ལྷ་མོ་བཅུ་རྣམས་ཀྱིས། །རང་ལ་དབང་བསྐུར་བྱས་པར་བསམ། །བླ་མ་བརྙས་སོགས་སྐྱོན་བྱུང་ན། །ཡོན་དང་ལྡན་པའི་མཆོད་བསྟོད་
དག །བླ་མ་ལ་ནི་དབུལ་བྱས་ཏེ། །དབང་བསྐུར་ཆོ་གས་ཁྲུས་ཀྱང་བྱ། །དེ་ནས་ཐོ་རངས་དུས་དང་ནི། །ཉི་མ་ཕྱེད་དང་ནུབ་པ་དང་། །ནམ་ཕྱེད་དུས་དང་རྩེ་གཅིག་པར། །དེ་བཞིན་ཐམས་ཅད་བསྒོམ་པར་བྱ། །བྱ་བས་བསྐལ་པའི་རྣལ་འབྱོར་པ། །ཐོ་རངས་དུས་ན་ཏིང་འཛིན་
གསུམ། །མ་ལུས་པར་ནི་བསྒོམ་པར་བྱ། །དེ་ལས་གཞན་པའི་དུས་ན་ནི། བདེ་བའི་སྟན་ལ་འདུག་བྱས་ཏེ། །ཡི་དམ་ལྷ་ཡི་སྙིང་ག་རུ། །མཚན་མ་ལ་སོགས་བསམ་བྱས་ལ། །དེ་ཉིད་གསུམ་གྱི་གསང་སྔགས་ཀྱིས། །ཡེ་ཤེས་སེམས་དཔའི་དཀྱིལ་འཁོར་ལས། །དམ་

44-1-109b

ཚིག་སེམས་དཔའི་དཀྱིལ་འཁོར་སྤྲོ། །དེ་བཞིན་དབང་བསྐུར་མཆོད་པ་དང་། །བསྟོད་དང་བདུད་རྩི་མྱང་ལ་སོགས། །བྱས་ནས་སྔགས་ཀྱི་བཟླས་བརྗོད་བྱ། །ལྡང་བར་འདོད་པའི་རྣལ་འབྱོར་པས། །སྔོན་བཞིན་མཆོད་དང་བསྟོད་པ་དང་། །བདུད་རྩི་མྱང་བའི་བར་བྱས་ཏེ། །
ཡི་གེ་གསུམ་གྱིས་ཕྱི་རོལ་གྱི། །དཀྱིལ་འཁོར་ཡེ་ཤེས་སེམས་དཔའ་ཡི། །འཁོར་ལོ་ཉིད་ལ་ཞུགས་པར་བྱ། །གོང་མ་ལྟ་བུར་བྱ་བ་རྣམས། །མ་ལུས་རབ་ཏུ་སྤྱོད་བྱེད་ཅིང་། །ནམ་ཕྱེད་དུས་སུ་རྣལ་འབྱོར་པས། །ཨོཾ་ཨཱཿཧཱུྃ་མུཿཞེས་སྔགས་ཀྱིས། །མཆོད་པ་ལ་
སོགས་རབ་བྱས་ཏེ། །ཡེ་ཤེས་དཀྱིལ་འཁོར་གཤེགས་པར་བྱ། །དེ་ཉིད་གསུམ་གྱི་དམ་ཚིག་གི། །དཀྱིལ་འཁོར་ཡེ་ཤེས་སེམས་དཔའ་ཡི། །འཁོར་ལོ་ལ་ནི་ཞུགས་པར་བྱ། །ཉལ་བའི་དུས་ན་ཐབས་ཉིད་ཀྱི། །ཤེས་རབ་མ་དང་བཅས་པར་ཉལ། །ཐོ་རངས་ལངས་
པའི་དུས་ན་ནི། །ལྷ་མོས་དབྱངས་ཀྱིས་བསྐུལ་ནས་ལངས། །ཁ་དོག་སྣ་ཚོགས་བསྒྱུར་བྱས་ལ། །རང་གི་སྙིང་གར་ཟླ་བ་ལ། །ས་བོན་མཾ་ཙམ་བསམ་བྱས་ལ། །ཐ་མལ་པ་ཡི་ལུས་ཉིད་ནི། །གོང་མ་ལྟ་བུས་ཐོ་རངས་ཀྱི། དུས་ལ་སོགས་པར་བསྒོམ་པར་བྱས། །སྒྲུབ་ཐབས་
འདི་ནི་བྱས་པ་ཡིས། །བསོད་ནམས་ཚོགས་ནི་གང་ཐོབ་དེས། །འགྲོ་བ་ཐམས་ཅད་བཅོམ་ལྡན་འདས། །འཇམ་པའི་རྡོ་རྗེར་གྲུབ་གྱུར་ཅིག །སློབ་དཔོན་ཆེན་པོ་མར་མེ་མཛད་བཟང་པོས་མཛད་པའི་གསང་བ་འདུས་པའི་སྒྲུབ་ཐབས་ཀྱི་རྣམ་པར་བཤད་པ། དཀྱིལ་འཁོར་ཆེན་པོའི་སྒྲུབ་ཐབས་
སློབ་དཔོན་མཁས་པ་ཆེན་པོ་དཔལ་ཀུན་དུ་བཟང་པོའི་ཞབས་ཀྱིས་མཛད་པ་རྫོགས་སོ།།      །།བོད་ཡུལ་དུ་བོད་རིས་ཀྱི་དབང་ཕྱུག་དམ་པའི་མངའ་བདག་དཔལ་ལྷ་བཙན་པོ་ཁྲི་མགོན་བཙན་གྱིས་ཡོན་བདག་བྱས་ནས། རྒྱ་གར་གྱི་མཁན་པོ་སུ་མ་ཏི་ཀཱིརྟིས་བསྒྱུར་ནས་གཏན་ལ་
ཕབ་པའོ།།༄༅༅། །རྒྱ་གར་སྐད་དུ། ཤྲཱི་ས་མཱ་ཛ་ཨ་བྷི་ས་མ་ཡ་ནཱ་མ་སཱ་དྷ་ནཾ། བོད་སྐད་དུ། དཔལ་གསང་བ་འདུས་པའི་མངོན་པར་རྟོགས་པ་ཞེས་བྱ་བའི་སྒྲུབ་པའི་ཐབས། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ནང་པར་དང་

44-1-110a

པོར་བསམ་གཏན་གྱི་ཁང་པ་ཡིད་དང་རྗེས་སུ་མཐུན་པ་ཤིན་ཏུ་དབེན་པར་སྟན་འཇམ་པོ་ལ་འདུག་སྟེ། འགྲོ་བ་དྲུག་གི་སེམས་ཅན་ཐམས་ཅད་ལ་བློས་བལྟས་ལ་བྱམས་པའི་སེམས་བསྐྱེད་དེ་བདག་གིར་བྱས་ནས། དེ་རྣམས་ཕོལ་མིག་ལ་སོགས་པའི་སྡུག་
བསྔལ་དང་ལྡན་པ་དང་། དེའི་རྒྱུ་མི་དགེ་བ་བཅུའི་ལས་ཀྱི་ལམ་ཡིན་པར་བྱས་ཏེ། དེ་ནས་སྙིང་རྗེའི་སེམས་བསྐྱེད་པས་གདུངས་པའི་བློས་གནོད་པ་དེ་བསལ་བའི་ཕྱིར། བདག་ཉིད་འཇམ་པའི་རྡོ་རྗེར་གྱུར་ནས་སེམས་ཅན་རྣམས་ཀྱང་དེ་དང་འདྲ་བར་བསྐྱེད་པར་བྱའོ་ཞེས་སྨོན་ལམ་བྱའོ། །
དེ་ནས་བསྒོམ་པའི་སྦྱོར་བ་བརྩམ་པར་བྱ་སྟེ། རང་གི་སྙིང་གར་ཡི་གེ་ཨ་ཡོངས་སུ་གྱུར་པའི་ཟླ་བའི་དཀྱིལ་འཁོར་ལ་ཡི་གེ་མཾ་མདོག་སེར་པོ་བསམས་ནས། དེ་ལས་བྱུང་བའི་འོད་ཟེར་གྱིས་སངས་རྒྱས་ལྔ་རྣམས་དང་། རང་གི་འདོད་པའི་ལྷ་རྣམས་དང་། སློབ་དཔོན་མདུན་
དུ་ནམ་མཁའ་ལ་བསམས་ཏེ། སྙིང་པོ་འོད་ཟེར་གྱི་སྒོ་ལས་བྱུང་བའི་གཟུགས་རྡོ་རྗེ་ལ་སོགས་པ་རྣམས་ཀྱིས་ཡང་དག་པར་མཆོད་ལ་ཕྱག་བྱས་ཏེ། སྡིག་པ་བཤགས་པ་ལ་སོགས་པའི་ཚིགས་སུ་བཅད་པ་ལན་གསུམ་བརྗོད་པར་བྱའོ། །དེ་ལ་ཚིགས་སུ་བཅད་པ་ནི་
འདི་ཡིན་ཏེ། གང་ཞིག་ཐོག་མེད་སྲིད་པའི་ཆུ་ཀླུང་དུ། །ཞེས་བྱ་བ་ལ་སོགས་པའོ། །དེ་ནས་རྣམ་པར་ཐར་པའི་སྒོ་གསུམ་གྱི་ངོ་བོ་སྟོང་པ་ཉིད་རྣམ་པར་བསྒོམས་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བའི་སྔགས་ཀྱིས་བྱིན་གྱིས་བརླབ་པར་བྱའོ། །དེ་ནས་
སེམས་གཅིག་པུ་ཉིད་ནི་བསོད་ནམས་དང་ཡེ་ཤེས་ཀྱི་སྟོབས་ཀྱིས་རྣམ་པ་གཉིས་སུ་འགྱུར་ཏེ། ཨོཾ་ཨཱཿཧཱུྃ་ཞེས་བྱ་བ་ནི་འཇུག་པའོ། །སོ་སོར་སྣང་བའི་བདག་ཉིད་ཅན་ནི་སྨོན་པའོ། །དེ་ལ་ཡང་བགེགས་འབྱུང་བར་འགྱུར་ན་མདུན་དུ་ཡི་གེ་ཨཱཿལས་བྱུང་བའི་ཉི་མའི་དཀྱིལ་འཁོར་
བསམས་ལ། དེའི་སྟེང་དུ་ཡི་གེ་ཧཱུྃ་དང་བཅས་པའི་རྡོ་རྗེ་དྲག་པོ་ནག་པོ་བསམས་ཏེ། དེའི་འོད་ཟེར་རྣམས་ཀྱིས་བགེགས་བསལ་བར་བསམས་ལ། དེ་ཉིད་ཀྱིས་རྡོ་རྗེ་དྲ་བར་བྱས་པའི་ཆོས་འབྱུང་དཀར་པོ་གྲུ་གསུམ་ནང་སྟོང་པ་གྱེན་ཀར་འདུག་པའོ། །དེའི་འོག་ལོགས་སུ་ཡི་གེ་ཨ་

44-1-110b

ཡོངས་སུ་གྱུར་པ་ལས་ཟླ་བའི་དཀྱིལ་འཁོར། ཡི་གེ་བཾ་ཡོངས་སུ་གྱུར་པ་ལས་སྣ་ཚོགས་པདྨའི་སྟེང་དུ་ཟླ་བ་ལ་ཁཾ་ལྗང་གུ་ཡོངས་སུ་གྱུར་པ་ལས་སྣ་ཚོགས་རྡོ་རྗེ། དེར་ཟླ་བ་ལ་བྲཱུ་ཡོངས་སུ་གྱུར་པ་ལས་འཁོར་ལོ་ཡི་གེ་བྲཱུཾ་དང་བཅས་པའོ། །དེ་གཉིས་ཡོངས་སུ་གྱུར་པ་ལས་
རྣམ་པར་སྣང་མཛད་སྐུ་མདོག་དཀར་པོ་ཞལ་གཡས་གནག་པ། གཡོན་དམར་བ། ཕྱག་གཉིས་ཀྱིས་ཤེས་རབ་དམ་པ་ལ་འཁྱུད་པ། གཡས་ན་འཁོར་ལོ་རལ་གྲི་དང་། གཡོན་ན་རིན་པོ་ཆེ་དང་པདྨ་བསྣམས་པ། རྡོ་རྗེ་སྐྱིལ་མོ་ཀྲུང་གིས་བཞུགས་པ། ཟླ་བའི་གདན་དང་ཟླ་
བའི་འོད་མངའ་བ། རིན་པོ་ཆེའི་ཅོད་པན་ཅན་བསམས་ལ། དེའི་ཡེ་ཤེས་སེམས་དཔའི་སྙིང་པོའི་འོད་ཟེར་རྣམས་ཀྱིས་སངས་རྒྱས་རྣམས་ཡང་དག་པར་བསྐུལ་ནས་བཅུག་ལ། །དེ་ཡོངས་སུ་གྱུར་པ་ལས་ཁང་པ་བརྩེགས་པ་ཟུར་བཞི་པ་ལ་སོགས་པ་དང་ཡང་དག་པར་ལྡན་པ་
བསམས་ལ། དེའི་དབུས་མའི་ཟླ་བའི་དཀྱིལ་འཁོར་ལ་སྟོང་པ་ཉིད་བཅུ་དྲུག་གི་ངོ་བོ་ཨ་ལ་སོགས་པ་ཡོངས་སུ་གྱུར་པའི་ཟླ་བ་དེ་རྣམས་ཀྱིས་མཚན་པ་ནི་མི་བསྐྱོད་པའི་རྣམ་པའོ། །དེའི་སྟེང་དུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་འཛིན་པའི་ངོ་བོ་ཀ་ལ་སོགས་པ་
ཡོངས་སུ་གྱུར་པ་ལས་དེ་རྣམས་ཀྱིས་མཚན་པའི་ཟླ་བའི་དཀྱིལ་འཁོར་གཉིས་པ་ནི་རིན་ཆེན་འབྱུང་ལྡན་གྱི་རྣམ་པའོ། །དེའི་སྟེང་དུ་ཡི་གེ་ཧཱུྃ་དམར་པོ་སྟེ། ཟླ་བའི་དཀྱིལ་འཁོར་གཉིས་དང་ཡི་གེ་ཧཱུྃ་ལས་རྡོ་རྗེ་རྩེ་ལྔ་པ་དམར་པོར་གྱུར་པ་ལས་ཡི་གེ་ཧཱུྃ་གིས་མཚན་པ་ནི་སྣང་བ་མཐའ་ཡས་
ཀྱི་རྣམ་པའོ། །དེའི་འོད་ཟེར་རྣམས་ཀྱིས་སངས་རྒྱས་ཐམས་ཅད་ཡང་དག་པར་བསྐུལ་ནས་བཅུག་སྟེ། །དེའི་ང་རྒྱལ་དུ་བྱས་པ་དང་ལྡན་པའི་རྣལ་འབྱོར་པ་ནི་དོན་ཡོད་གྲུབ་པའི་རྣམ་པ་སྟེ། དེ་ཡོངས་སུ་གྱུར་པ་ལས་རྡོ་རྗེ་སེམས་དཔའི་སྐུར་བདག་ཉིད་བསམ་པ་ནི། སྐུ་མདོག་
དཀར་པོ། །ཞལ་གཡས་གནག །གཡོན་དམར་བ། ཕྱག་གཉིས་ཀྱིས་ཤེས་རབ་དམ་པ་ལ་འཁྱུད་པ། གཡས་ན་རྡོ་རྗེ་དང་རལ་གྲི། གཡོན་རིན་པོ་ཆེ་དང་པདྨ་བསྣམས་པ། རིན་པོ་ཆེའི་ཅོད་པན་དང་། ཟླ་བའི་གདན་དང་ཟླ་བའི་འོད་མངའ་བ། རྡོ་རྗེའི་སྐྱིལ་མོ་ཀྲུང་གིས་བཞུགས་

44-1-111a

པའི་སྐུར་བདག་ཉིད་བསམས་ལ། སེམས་ཅན་རྣམས་འདོད་ཆགས་ཆེན་པོས་འདུལ་བར་ཤེས་ནས་དགའ་བའི་སྒྱུ་མའི་སྒྲས་སངས་རྒྱས་རྣམས་བདག་ཉིད་ལ་བཅུག་ལ། དེ་ལ་སྤྱན་མ་ལ་སོགས་པ་དགུའི་གཟུགས་ཀྱིས་རང་གི་ལྷ་མོའི་ནང་དུ་ཆུད་པར་བྱས་
ནས། དེ་ནས་ཡི་གེ་ཧཱུྃ་གི་འོད་ཟེར་རྣམས་ཀྱིས་སངས་རྒྱས་རྣམས་ཡང་དག་པར་བསྐུལ་ནས་ཁར་བཅུག་སྟེ། རྡོ་རྗེའི་ལམ་ནས་ངེས་པར་ཕྱུང་ལ། པདྨའི་ནང་དུ་བྱང་ཆུབ་ཀྱི་སེམས་རྣམ་པར་བལྟ་སྟེ། དེ་ཡོངས་སུ་གྱུར་པ་ལས་དཀྱིལ་འཁོར་དུ་བསམས་ལ། སེམས་ཅན་མ་ལུས་པ་ཡིད་
ཀྱིས་རབ་ཏུ་བཅུག་སྟེ། དེ་བྱང་ཆུབ་ཀྱི་སེམས་སུ་ཡོངས་སུ་གྱུར་ནས། རྡོ་རྗེའི་ལམ་ནས་ངེས་པར་འབྱུང་བའི་སངས་རྒྱས་རྣམས་ཀྱིས་དབང་བསྐུར་བར་བྱའོ། །དེ་ནས་དེ་བྲཱུཾ་ཨཱཾ་ཛྲཱིཾ་ཁཾ་ཧཱུྃ། ལཾ་མཱཾ་པཾ་ཏཱཾ། ཛཿཧཱུྃ་བཾ་ཧོཿཁཾ་རཾ། ཀྵིཾ་ཛྲིཾ་ཁཾ་གཾ་ཥྐཾ་སཾ། ཛཿཧཱུྃ་བཾ་ཧོཿ། ཞེས་བྱ་བའི་ཡི་གེ་ལས་བྱུང་བའི་རྣམ་
པར་སྣང་མཛད་ལ་སོགས་པའི་དེ་བཞིན་གཤེགས་པ་ཐམས་ཅད་པདྨའི་ནང་གི་དཀྱིལ་འཁོར་གྱི་ལྷ་མོའི་བ་སྤུའི་བུ་ག་ནས་བློས་དབྱུང་ངོ་། །དེ་ལྟར་སེམས་ཅན་གྱི་ཁམས་རྣམ་པར་དག་ནས། ཧཱུྃ་ལས་འོད་ཟེར་བྱུང་བས་ཡི་གེ་ཧོ་གཉིས་དང་ཨོཾ་ཨཱཿཧཱུྃ་ཞེས་བྱ་བའི་འཇུག་པའི་
སེམས་སྤེལ་བ་བཀུག་ལ་ཁར་བཅུག་སྟེ། རྡོ་རྗེའི་ལམ་ནས་ངེས་པར་ཕྱུང་ནས་བྱང་ཆུབ་ཀྱི་སེམས་ཀྱི་རྣམ་པར་ལྷ་མོའི་པདྨའི་ནང་དུ་བབས་པ་དང་། དེའི་འོད་ཟེར་རྣམས་ཀྱིས་རེག་པ་ཙམ་གྱིས་རིག་པ་རྡོ་རྗེ་འཛིན་པ་དང་བཅས་པར་ཞུ་བར་གྱུར་པར་བསམ་མོ། །དེ་ནས་འབྱུང་བ་
ཆེན་པོ་བཞི་སྤྱན་མ་ལ་སོགས་པའི་ལྷ་མོར་གྱུར་པས། སེམས་ཅན་ཁམས་ན་ཞེས་བྱ་བ་ལ་སོགས་པའི་གླུས་བསྐུལ་བར་བསམ་མོ། །འདི་རྣམས་ཀྱིས་ཡང་དག་པར་བསྐུལ་བར་གྱུར་པ་དང་། སེམས་ཀྱིས་འོད་ཟེར་དེ་འབྱུང་བ་བཞི་དང་སངས་རྒྱས་ཐམས་ཅད་ཀྱིས་བསྐུལ་ནས་
སངས་རྒྱས་ཞུགས་པར་གྱུར་པ་ལས་རང་གི་སྔགས་ཀྱི་གཟུགས་སུ་བདག་ཉིད་བསམས་ནས། དེ་ཡོངས་སུ་གྱུར་པ་ལས་རལ་གྲི་ཡི་གེ་མཾ་གྱིས་མཚན་པའོ། །དེ་གཉིས་ཡོངས་སུ་གྱུར་པ་ལས་འཇམ་པའི་རྡོ་རྗེ་སྐུ་མདོག་སེར་པོ། །ཞལ་གཡས་ནག་པོ་གཡོན་དཀར་པོ་

44-1-111b

ཕྱག་གཉིས་ཀྱིས་ཤེས་རབ་དམ་པ་ལ་འཁྱུད་པ། གཡས་ན་རལ་གྲི་དམ་པ་དང་། གཡོན་ན་ཨུཏྤལ་དང་གཞུ་བསྣམས་པ། ཟླ་བའི་འོད་དང་རིན་པོ་ཆེའི་ཅོད་པན་མངའ་བ། སྣ་ཚོགས་པདྨའི་སྟེང་ན་ཟླ་བ་ལ་རྡོ་རྗེའི་སྐྱིལ་ཀྲུང་དུ་བཞུགས་པར་བསམས་ལ། དེའི་སྙིང་གར་
ཟླ་བ་ལ་རལ་གྲི། དེའི་དབུས་སུ་དེ་དང་འདྲ་བའི་ཡེ་ཤེས་སེམས་དཔའ་དེའི་ཐུགས་ཀར་ཟླ་བ་རལ་གྲི། དེའི་དབུས་སུ་ཡི་གེ་མཾ་གནས་པར་བསམས་ལ། ཨོཾ་དྷརྨྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བའི་གསང་སྔགས་ཀྱིས་བྱིན་གྱིས་བརླབ་པའོ། །འདི་དག་ནི་མཆོག་གི་བསྙེན་པའི་
ཡན་ལག་སྟེ། རྒྱུ་མཐུན་པའི་འབྲས་བུ་ཆུང་བའོ། །དེའི་མིག་ཏུ་ཟླ་བ་ལ་ཀྵིཾ་དཀར་པོ་ཡོངས་སུ་གྱུར་པ་ལས་འཁོར་ལོ་ཀྵིཾ་གིས་མཚན་པའོ། །དེ་གཉིས་ཡོངས་སུ་གྱུར་པ་ལས་སའི་སྙིང་པོ་སྐུ་མདོག་དཀར་པོ། ཞལ་གཡས་གནག་གཡོན་དམར། ཕྱག་གཉིས་ཤེས་རབ་
དམ་པ་ལ་འཁྱུད་པ། གཡས་ན་འཁོར་ལོ་དང་རལ་གྲི། གཡོན་ནོར་བུ་དང་པདྨ་བསྣམས་པའོ། །དེ་བཞིན་དུ་རྣ་བ་ལ་ཡི་གེ་ཛྲིཾ་དང་བཅས་པའི་རྡོ་རྗེ་ཡོངས་སུ་གྱུར་པ་ལས་ཕྱག་ན་རྡོ་རྗེ་སྐུ་མདོག་ནག་པོ། ཞལ་གཡས་དཀར་པོ་གཡོན་དམར། ཕྱག་གཉིས་ཀྱིས་ཤེས་རབ་དམ་པ་ལ་འཁྱུད་
པའོ། །གཡས་ན་རྡོ་རྗེ་དང་རལ་གྲི། གཡོན་ན་རིན་པོ་ཆེ་དང་པདྨའོ། །དེ་བཞིན་དུ་སྣ་ལ་ཡི་གེ་ཁཾ་དང་བཅས་པའི་རིན་པོ་ཆེ་ཡོངས་སུ་གྱུར་པ་ལས་ནམ་མཁའི་སྙིང་པོ་སྐུ་མདོག་སེར་པོ། ཞལ་གཡས་གནག་གཡོན་དཀར་བ། ཕྱག་གཉིས་ཀྱིས་ཤེས་རབ་དམ་པ་ལ་འཁྱུད་པ། 
གཡས་ན་རིན་པོ་ཆེ་དང་རལ་གྲི། གཡོན་ན་འཁོར་ལོ་པདྨ་པའོ། །དེ་བཞིན་དུ་ལྕེ་ལ་ཡི་གེ་གཾ་དང་བཅས་པའི་པདྨ་ཡོངས་སུ་གྱུར་པ་ལས་འཇིག་རྟེན་དབང་ཕྱུག་སྐུ་མདོག་དམར་པོ། ཞལ་གཡས་གནག་གཡོན་དཀར་བ། ཕྱག་གཉིས་ཀྱིས་ཤེས་རབ་དམ་པ་ལ་
འཁྱུད་པ། གཡས་ན་པདྨ་དང་རལ་གྲི། གཡོན་ན་རིན་པོ་ཆེ་དང་འཁོར་ལོ་བསྣམས་པའོ། །དེ་བཞིན་དུ་མགོ་ལ་ཡི་གེ་ཥྐཾ་དང་བཅས་པའི་རལ་གྲི་ཡོངས་སུ་གྱུར་པ་ལས་སྒྲིབ་པ་ཐམས་ཅད་རྣམ་པར་སེལ་བ་སྐུ་མདོག་ལྗང་གུ། ཞལ་གཡས་གནག་གཡོན་དཀར་བ། ཕྱག་

44-1-112a

གཉིས་ཀྱིས་ཤེས་རབ་དམ་པ་ལ་འཁྱུད་པ། གཡས་ན་རལ་གྲི་དང་འཁོར་རོ། །གཡོན་ན་རིན་པོ་ཆེ་དང་པདྨ་བསྣམས་པའོ། །དེ་བཞིན་དུ་ལྟེ་བ་ལ་ཡི་གེ་སཾ་དང་བཅས་པའི་རྡོ་རྗེ་ཡོངས་སུ་གྱུར་པ་ལས་ཀུན་དུ་བཟང་པོ་སྐུ་མདོག་དཀར་པོ། གཡས་
གནག་གཡོན་དམར་བ། ཕྱག་གཉིས་ཀྱིས་ཤེས་རབ་དམ་པ་ལ་འཁྱུད་པ། ཕྱག་གཡས་ན་རྡོ་རྗེ་དང་རལ་གྲི། གཡོན་ན་རིན་པོ་ཆེ་དང་པདྨ་བསྣམས་པ་སྟེ། སའི་སྙིང་པོ་ལ་སོགས་པ་འདི་རྣམས་ཀྱང་ཟླ་བའི་གདན་དང་ཟླ་བའི་འོད་དང་། རིན་པོ་ཆེའི་ཅོད་པན་མངའ་བ། རྡོ་རྗེའི་སྐྱིལ་མོ་
ཀྲུང་གིས་བཞུགས་པའོ། །དེ་དག་ནི་མཆོག་གི་ཉེ་བར་སྒྲུབ་པའི་ཡན་ལག་སྟེ། རྣམ་པར་སྨིན་པའི་འབྲས་བུ་ཆུང་ངུའོ། །ཀུན་དུ་བཟང་པོའི་སྟེང་དུ་ཟླ་བ་ལ་ཡི་གེ་ཧཱུཾ་ནག་པོ་ཡོངས་སུ་གྱུར་པ་ལས་རྡོ་རྗེའི་ལྟེ་བ་ལ་ཧཱུྃ་དང་བཅས་པའི་རྡོ་རྗེ་ཡོངས་སུ་གྱུར་པ་ལས་ཐུགས་རྡོ་རྗེ་ཕྱག་ན་རྡོ་
རྗེ་ལྟ་བུ་ཐུགས་ཀའི་ཟླ་བ་ལ་ཡི་གེ་ཧཱུྃ་ནག་པོའོ། །ལྕེ་རྩེར་ཡི་གེ་ཨཱཿ ཡོངས་སུ་གྱུར་པ་ལས་པདྨའི་ལྟེ་བ་ལ་ཡི་གེ་ཨཱཿདང་བཅས་པའི་པདྨ་ཡོངས་སུ་གྱུར་པ་ལས་གསུང་རྡོ་རྗེ་འཇིག་རྟེན་དབང་ཕྱུག་ལྟ་བུའོ། །དེའི་ཐུགས་ཀའི་ཟླ་བ་ལ་ཡི་གེ་ཨཱཿདམར་པོའོ། །དཔྲལ་བར་ཡི་གེ་
ཨོཾ་ཡོངས་སུ་གྱུར་པ་ལས་འཁོར་ལོའི་ལྟེ་བར་ཨོཾ་དང་བཅས་པའི་འཁོར་ལོ་ཡོངས་སུ་གྱུར་པ་ལས་སྐུ་རྡོ་རྗེ་སའི་སྙིང་པོ་ལྟ་བུའོ། །དེའི་ཐུགས་ཀར་ཟླ་བ་ལ་ཡི་གེ་ཨོཾ་དཀར་པོ་སྙིང་པོ་དེ་རྣམས་ཀྱི་འོད་ཟེར་གྱིས་ཐུགས་རྡོ་རྗེ་ལ་སོགས་པའི་སངས་རྒྱས་རྣམས་ཡང་དག་པར་མཆོད་ནས་
དཔལ་ལྡན་རྡོ་རྗེ་ཐུགས་འཆང་བ། །ཞེས་བྱ་བ་ལ་སོགས་པ་བརྗོད་དེ། ཡང་དག་པར་བསྐུལ་ལ་སྔགས་ཀྱིས་བྱིན་གྱིས་བརླབ་པར་བྱའོ། །དེ་དག་ནི་མཆོག་གི་བསྒྲུབ་པའི་ཡན་ལག་སྟེ། སྐྱེས་བུ་བྱེད་པའི་འབྲས་བུ་ཆུང་ངུའོ། །སྙིང་པོའི་འོད་ཟེར་གྱིས་སངས་རྒྱས་ཐམས་ཅད་
བསྐུལ་བ་དང་དེ་རྣམས་ཀྱིས་འོད་ཟེར་བཏང་བའི་སྒོ་ནས་བྱུང་བའི་སྤྱན་མ་ལ་སོགས་པའི་རིགས་རྣམས་ཀྱི་རིན་པོ་ཆེའི་བུམ་པ་ནས་བདུད་རྩིས་དབང་བསྐུར་བ་དང་ལྡན་པ་དང་། རང་གི་རིགས་ཀྱི་བདག་པོ་ཅོད་པན་དུ་ཐོགས་པའོ། །དེ་དག་ནི་མཆོག་གི་སྒྲུབ་པ་ཆེན་པོའི་ཡན་ལག་སྟེ། དབང་གི་

44-1-112b

འབྲས་བུ་ཆུང་ངུའོ། །ཡན་ལག་བཞི་པའི་དང་པོའོ། །རྣལ་འབྱོར་པ་མཆོག་གི་བསྙེན་པ་ལ་སོགས་པའི་ཡན་ལག་འདི་དག་གིས་རྒྱུ་མཐུན་པའི་འབྲས་བུ་འབྲིང་པོ་ལ་སོགས་པ་ནི་རང་དང་འདྲ་བར་བསྐྱེད་པར་བྱའོ། །གཞན་ཡང་ཨོཾ་ཧཱུྃ་སྭཱ་ཨཱཿ ཧཱ་ཞེས་བྱ་བའི་ཡི་གེ་ལས་བསྐྱོད་
པར་བྱས་ཏེ། དེའི་མགོ་དང་། སྙིང་ག་དང་། ལྟེ་བ་དང་། གསང་བ་དང་། བརླ་དང་། རྐང་པའི་མཐར་ཐུག་པའི་བར་རོ། །ཡི་གེ་ཧཱུྃ་ལས་པདྨ་ཨཱཿལས་ལྟེ་བ། ཕཊ་ལས་དབབ་པ་དགག་པའོ། །བདག་ཉིད་ཀྱིས་ཡང་ཡི་གེ་ཧཱུྃ་ལས་རྡོ་རྗེ། ཨོཾ་ལས་ནོར་བུ་ཕཊ་ཀྱིས་དགག་པའོ། །
དེ་ནས་སྙིང་པོའི་འོད་ཟེར་རྣམས་ཀྱིས་བསྐུལ་ལ་དྲངས་ཏེ། དེ་དང་ལྷན་ཅིག་སྔགས་པས་དགའ་བ་བརྩམ་པར་བྱའོ། །ཨོཾ་སརྦྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཡན་ལག་བཞི་པའི་གཉིས་པས་ཏེ། འདི་དག་ནི་དང་པོའི་སྦྱོར་བའི་ཏིང་ངེ་འཛིན་ཏོ། །སྙིང་པོའི་གསང་
སྔགས་ཀྱི་འོད་ཟེར་རྣམས་ཀྱིས་སངས་རྒྱས་རྣམས་བསྐུལ་ལ་བཀུག་ནས་ཁར་བཅུག་སྟེ། ལྷ་མོའི་འདོད་ཆགས་ཀྱིས་ཟླ་བ་ཞུ་བར་གྱུར་པ་དང་། པདྨའི་ནང་དུ་ཕབ་པ་ལས་བྱུང་བའི་རང་གི་ས་བོན་ཡོངས་སུ་གྱུར་པ་ལས་བདག་པོ་དབུས་ན་གནས་པའི་དཀྱིལ་འཁོར་བ་བསམས་ལ་ཆོ་
ག་འདིས་དབྱུང་བར་བྱའོ། །བཛྲ་དྷྲྀཀ་ཅེས་བྱ་བ་ལས་མི་བསྐྱོད་པ་བསྐུལ་ཏེ། སྐུ་མདོག་ནག་པོ་ཞལ་གཡས་དཀར་བ། གཡོན་དམར་བ། ཕྱག་གཉིས་ཀྱིས་ཤེས་རབ་དམ་པ་ལ་འཁྱུད་པ། གཡས་ན་རྡོ་རྗེ་དང་རལ་གྲི། གཡོན་ན་རིན་པོ་ཆེ་དང་པདྨ་བསྣམས་པ། ཉི་མའི་གདན་
དང་ཟླ་བའི་འོད་མངའ་བ། རལ་པ་དང་ཅོད་པན་ཅན། རྡོ་རྗེ་སྐྱིལ་མོ་ཀྲུང་གིས་བཞུགས་པ་དངོས་པོ་ཐམས་ཅད་ཀྱིས་བདག་ལ་བཞུགས་པར་བྱའོ། །ཛི་ན་ཛིཀ་ཅེས་བྱ་བས་རྣམ་པར་སྣང་མཛད་དགོད་དེ། སྐུ་མདོག་དཀར་པོ་ཞལ་གཡས་གནག །གཡོན་དམར་བ། ཕྱག་གཉིས་ཀྱིས་
ཤེས་རབ་དམ་པ་ལ་འཁྱུད་པ། གཡས་ན་འཁོར་ལོ་དང་རལ་གྲི། གཡོན་ན་རིན་པོ་ཆེ་དང་པདྨ་བསྣམས་པ། ཟླ་བའི་གདན་དང་ཟླ་བའི་འོད་མངའ་བ། ཤར་གྱི་པདྨ་ལ་བཞུགས་པར་བྱའོ། །རཏྣ་དྷྲྀཀ་ཅེས་བྱ་བས་རིན་ཆེན་འབྱུང་ལྡན་དགོད་དེ། སྐུ་མདོག་སེར་པོ་ཞལ་གཡས་

44-1-113a

གནག་གཡོན་དཀར་བ། ཕྱག་གཉིས་ཀྱིས་ཤེས་རབ་དམ་པ་ལ་འཁྱུད་པ། གཡས་ན་རིན་པོ་ཆེ་དང་རལ་གྲི། གཡོན་ན་འཁོར་ལོ་དང་པདྨ་བསྣམས་པ། ལྷོར་བཞུགས་པར་བྱའོ། །ཨཱ་རོ་ལྀ་ཀ་ཅེས་བྱ་བས་འོད་དཔག་ཏུ་མེད་པ་དགོད་དེ། སྐུ་མདོག་དམར་
པོ། ཞལ་གཡས་གནག །གཡོན་དཀར་བ། ཕྱག་གཉིས་ཀྱིས་ཤེས་རབ་དམ་པ་ལ་འཁྱུད་པ། གཡས་ན་པདྨ་དང་རལ་གྲི། གཡོན་ན་རིན་པོ་ཆེ་དང་འཁོར་ལོ་བསྣམས་པ། ནུབ་ཏུ་བཞུགས་པར་བྱའོ། །པྲཛྙཱ་དྷྲྀཀ་ཅེས་བྱ་བས་དོན་ཡོད་གྲུབ་པ་དགོད་དེ། སྐུ་མདོག་ལྗང་གུ། ཞལ་
གཡས་གནག །གཡོན་དཀར་བ། ཕྱག་གཉིས་ཀྱིས་ཤེས་རབ་དམ་པ་ལ་འཁྱུད་པ། གཡས་ན་རལ་གྲི་དང་འཁོར་རོ། །གཡོན་ན་རིན་པོ་ཆེ་དང་པདྨ་བསྣམས་པ། བྱང་དུ་བཞུགས་པར་བྱའོ། །འདི་རྣམས་ནི་ཉི་མའི་གདན་དང་ཉི་མའི་འོད་དང་ན་བཟའ་དང་རྒྱན་བཟང་པོ་དང་།
རལ་པ་དང་ཅོད་པན་མངའ་བ། རྡོ་རྗེ་སྐྱིལ་མོ་ཀྲུང་གིས་བཞུགས་པའོ། །མོ་ཧ་ར་ཏཱི་ཞེས་བྱ་བས་ཤར་ལྷོར་སྤྱན་མ་དགོད་དེ། སྐུ་མདོག་དཀར་པོ། ཞལ་གཡས་གནག་གཡོན་དམར་བ། ཕྱག་གཉིས་ཀྱིས་ཐབས་ལ་འཁྱུད་པ། གཡས་ན་འཁོར་ལོ་དང་རལ་གྲི། གཡོན་
ན་རིན་པོ་ཆེ་དང་པདྨ་བསྣམས་པའོ། །དྭེ་ཥ་ར་ཏཱི་ཞེས་བྱ་བ་ལས་ལྷོ་ནུབ་ཏུ་མཱ་མ་ཀཱི་དགོད་དེ། སྐུ་མདོག་ནག་པོ་ཞལ་གཡས་དཀར་བ། གཡོན་དམར་བ། ཕྱག་གཉིས་ཀྱིས་ཐབས་ལ་འཁྱུད་པ། གཡས་ན་ཨུཏྤལ་དམར་པོ་དང་རལ་གྲི། གཡོན་ན་རིན་པོ་ཆེ་དང་པདྨ་བསྣམས་པའོ། །
རཱ་ག་ར་ཏཱི་ཞེས་བྱ་བ་ལས་ནུབ་བྱང་དུ་གོས་དཀར་མོ་དགོད་དེ། སྐུ་མདོག་དམར་མོ་ཞལ་གཡས་གནག །གཡོན་དཀར་བ། ཕྱག་གཉིས་ཀྱིས་ཐབས་ལ་འཁྱུད་པ། གཡས་ན་པདྨ་དང་རལ་གྲི། གཡོན་ནོར་བུ་དང་འཁོར་ལོ་བསྣམས་པའོ། །བཛྲ་ར་ཏཱི་ཞེས་བྱ་བ་ལས་བྱང་ཤར་དུ་སྒྲོལ་
མ་དགོད་དེ། སྐུ་མདོག་སེར་པོ། ཞལ་གཡས་གནག །གཡོན་དཀར་བ། ཕྱག་གཉིས་ཀྱིས་ཐབས་ལ་འཁྱུད་པ། གཡས་ན་ཨུཏྤལ་སེར་པོ་དང་རལ་གྲི། གཡོན་ན་རིན་པོ་ཆེ་དང་པདྨ་བསྣམས་པའོ། །ཕྱི་རིམ་གྱི་ཤར་ལྷོར་དེ་ཁོ་ན་ཉིད་གསུམ་ལས་གཟུགས་རྡོ་རྗེ་སའི་སྙིང་པོ་

44-1-113b

ལྟ་བུ་མེ་ལོང་ལ་སོགས་པ་དང་ལྡན་པའོ། །དེ་བཞིན་དུ་ལྷོ་ནུབ་ཏུ་སྒྲ་རྡོ་རྗེ་ཕྱག་ན་རྡོ་རྗེ་ལྟ་བུ་ལ་པི་ཝང་ལ་སོགས་པ་དང་ལྡན་པའོ། །དེ་བཞིན་དུ་ནུབ་བྱང་དུ་དྲི་རྡོ་རྗེ་ནམ་མཁའི་སྙིང་པོ་ལྟ་བུ་ལ་དྲིའི་དུང་ཆོས་ལ་སོགས་པ་དང་ལྡན་པའོ། །དེ་བཞིན་དུ་བྱང་ཤར་དུ་རོ་རྡོ་རྗེ་འཇིག་རྟེན་དབང་ཕྱུག་
ལྟ་བུ་ལ་ཐོད་པ་ལ་སོགས་པ་དང་ལྡན་པའོ། །ཤར་གྱི་སྒོའི་གཡོན་དུ་རེག་རྡོ་རྗེ་སྒྲིབ་པ་རྣམ་པར་སེལ་བ་ལྟ་བུ་ལ་ལྷའི་གོས་སྣ་ཚོགས་པ་དང་ལྡན་པའོ། །ཤར་གྱི་སྒོའི་གཡས་སུ་ཆོས་ཀྱི་དབྱིངས་རྡོ་རྗེ་ཀུན་དུ་བཟང་པོ་ལྟ་བུ་ལ་ཆོས་འབྱུང་བ་ལ་སོགས་པ་དང་ལྡན་ཏེ། ལྷ་མོ་
བཅུ་པོ་དེ་རྣམས་ནི་ཟླ་བའི་འོད་མངའ་བ། རྡོ་རྗེའི་སྐྱིལ་མོ་ཀྲུང་གིས་བཞུགས་པ། རིན་པོ་ཆེའི་ཅོད་པན་དང་ན་བཟའ་བཟང་པོ་དང་ལྡན་པའོ། །ཡ་མཱནྟ་ཀྲྀཏ་ཅེས་བྱ་བ་ལས་ཤར་ཕྱོགས་ཀྱི་སྒོར་གཤིན་རྗེ་གཤེད་དགོད་དེ་སྐུ་མདོག་ནག་པོ། །ཞལ་གཡས་དཀར་གཡོན་དམར་བ། 
ཕྱག་གཉིས་ཀྱིས་ཤེས་རབ་དམ་པ་ལ་འཁྱུད་པ། གཡས་ན་རྡོ་རྗེས་མཚན་པའི་ཐོ་བ་དང་རལ་གྲི། གཡོན་ན་རིན་པོ་ཆེ་དང་པདྨ་བསྣམས་པའོ། །པྲཛྙཱནྟ་ཀྲྀཏ་ཅེས་བྱ་བ་ལས་ལྷོ་ཕྱོགས་ཀྱི་སྒོར་ཤེས་རབ་མཐར་བྱེད་དགོད་དེ། སྐུ་མདོག་དཀར་པོ། །ཞལ་གཡས་གནག །གཡོན་
དམར་བ། ཕྱག་གཉིས་ཀྱིས་ཤེས་རབ་དམ་པ་ལ་འཁྱུད་པ། གཡས་ན་རིན་པོ་ཆེ་ས་མཚན་པའི་དབྱིག་པ་དང་རལ་གྲི། གཡོན་ན་རིན་པོ་ཆེ་དང་པདྨ་བསྣམས་པའོ། །པདྨཱནྟ་ཀྲྀཏ་ཅེས་བྱ་བ་ལས་ནུབ་ཕྱོགས་ཀྱི་སྒོར་པདྨ་མཐར་བྱེད་དགོད་དེ། སྐུ་མདོག་དམར་པོ། ཞལ་གཡས་
གནག་གཡོན་དཀར་བ། ཕྱག་གཉིས་ཀྱིས་ཤེས་རབ་དམ་པ་ལ་འཁྱུད་པ། གཡས་ན་པདྨ་དང་རལ་གྲི། གཡོན་ན་རིན་པོ་ཆེ་དང་འཁོར་ལོ་བསྣམས་པའོ། །བིགྷྣཱནྟ་ཀྲྀཏ་ཅེས་བྱ་བ་ལས་བྱང་ཕྱོགས་ཀྱི་སྒོར་བགེགས་མཐར་བྱེད་དགོད་དེ། སྐུ་མདོག་ནག་པོ། ཞལ་གཡས་དཀར། 
གཡོན་དམར་པོ། ཕྱག་གཉིས་ཀྱིས་ཤེས་རབ་དམ་པ་ལ་འཁྱུད་པ། གཡས་ན་རྡོ་རྗེ་དང་རལ་གྲི། གཡོན་ན་རིན་པོ་ཆེ་དང་པདྨ་བསྣམས་པ་སྟེ། ཁྲོ་བོ་འདི་རྣམས་ཉི་མའི་གདན་དང་ཉི་མའི་འོད་མངའ་བ། ཁྲོ་བོའི་སྐྱིལ་མོ་ཀྲུང་གིས་བཞུགས་པ། སྟག་གི་པགས་པ་མནབས་པ། སྦྲུལ་

44-1-114a

གྱིས་བརྒྱན་པ། སྨིན་མ་དང་། ཨག་ཚོམ་དང་སྤྱན་སེར་བ། དབུ་སྐྲ་གྱེན་དུ་བརྫེས་པ། མཆེ་བ་གཙིགས་པ། ལྗགས་འདྲིལ་བ། དེ་ལྟར་དངོས་པོ་ཐམས་ཅད་ཀྱིས་རྫོགས་པའི་དཀྱིལ་འཁོར་བསྟན་ནས། སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་ཀྱི་དཀྱིལ་
འཁོར་གྱི་སངས་རྒྱས་རྣམས་སྤྱན་དྲངས་ནས། མདུན་དུ་བལྟས་ལ། དེ་རྣམས་དང་ལྷན་ཅིག་འོངས་པའི་བགེགས་གཤིན་རྗེ་གཤེད་ལ་སོགས་པས་བསྐྲད་པ་དང་། མངོན་པར་བསྲུང་བ་དང་། བཅིང་བ་དང་མཉེས་པར་བྱས་ནས། བདུད་རྩིས་གང་བའི་སྣོད་ཀྱིས་མཆོད་ཡོན་ཕུལ་ལ། སྙིང་
པོའི་འོད་ཟེར་ལས་བྱུང་བའི་གཟུགས་རྡོ་རྗེ་མ་ལ་སོགས་པ་རྣམས་ཀྱིས་ཡང་དག་པར་མཆོད་ཅིང་། གཤིན་རྗེ་གཤེད་ལ་སོགས་པའི་རང་བཞིན་གསང་སྔགས་ཀྱིས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱའོ། །དེ་དག་ནི་ཐུན་མོང་གི་བསྙེན་པའི་ཡན་ལག་
སྟེ། རྒྱུ་མཐུན་པའི་འབྲས་བུ་ཆེན་པོའོ། །རྣམ་པར་སྣང་མཛད་ལ་སོགས་པའི་དཀྱིལ་འཁོར་གྱི་ལྷ་རྣམས་ཀྱི་མིག་ལ་སོགས་པ་བྱིན་གྱིས་བརླབས་པ་ནི། སྤྱིའི་ཉེ་བར་བསྒྲུབ་པའི་ཡན་ལག་སྟེ། རྣམ་པར་སྨིན་པའི་འབྲས་བུ་ཆེན་པོའོ། །དེ་བཞིན་དུ་སྐུ་གསུང་ཐུགས་བྱིན་གྱིས་
བརླབ་པ་ནི། སྤྱིའི་སྒྲུབ་པའི་ཡན་ལག་སྟེ། སྐྱེས་བུ་བྱེད་པའི་འབྲས་བུ་ཆེན་པོའོ། །དེ་ཉིད་གཞན་དུ་དབང་བསྐུར་བར་གྱུར་པ་ནི། སངས་རྒྱས་རྣམས་དང་རྡོ་རྗེ་འཆང་བ་དང་། མཱ་མ་ཀཱི་དང་། སྒྲ་རྡོ་རྗེ་དང་། ཆོས་དབྱིངས་རྡོ་རྗེ་དང་། ཤེས་རབ་མཐར་བྱེད་དང་བགེགས་མཐར་བྱེད་ཀྱི་
ཅོད་པན་ལ་ནི་མི་བསྐྱོད་པའོ། །སྤྱན་དང་གཟུགས་རྡོ་རྗེ་དང་། གཤིན་རྗེ་གཤེད་ཀྱི་ཅོད་པན་ལ་ནི་རྣམ་པར་སྣང་མཛད་དོ། །གོས་དཀར་མོ་དང་། རོ་རྡོ་རྗེ་མ་དང་། པདྨ་མཐར་བྱེད་ཀྱི་ཅོད་པན་ལ་ནི་འོད་དཔག་ཏུ་མེད་པའོ། །སྒྲོལ་མ་དང་རེག་རྡོ་རྗེའི་ཅོད་པན་ལ་ནི་དོན་ཡོད་གྲུབ་པའོ། །དྲིའི་རྡོ་
རྗེའི་ཅོད་པན་ལ་ནི་རིན་ཆེན་འབྱུང་ལྡན་ནོ། །འདི་དག་ནི་སྤྱིའི་སྒྲུབ་པ་ཆེན་པོའི་ཡན་ལག་སྟེ། དབང་གི་འབྲས་བུ་ཆེན་པོའི་ཡན་ལག་བཞི་པའི་གསུམ་པའོ། །སྙིང་པོའི་འོད་ཟེར་རྣམས་ཀྱིས་སངས་རྒྱས་རྣམས་བསྐུལ་ལ་ཁར་བཅུག་སྟེ། རྡོ་རྗེའི་ལམ་ནས་ངེས་པར་ཕྱུང་ནས།

44-1-114b

ལྷ་མོའི་ཆགས་པས་པདྨའི་ནང་དུ་ཟླ་བ་ཞུ་བའི་གཟུགས་ཅན་དུ་བསམས་ལ། དེའི་འོད་ཟེར་ལས་བྱུང་བའི་གཟུགས་རྡོ་རྗེ་ལ་སོགས་པ་ཕྱུང་བས་ཡང་དག་པར་མཆོད་ནས། ཨོཾ་སརྦྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བའི་གསང་སྔགས་ཀྱིས་བྱིན་གྱིས་བརླབ་པར་བྱའོ། །
དེ་ནས་རང་གི་ཡིད་ལྷག་པའི་ལྷར་གྱུར་པ་ལས་ཆོས་རྣམས་ཀྱི། མི་བསྐྱོད་པ་ནི་རྡོ་རྗེ་ཆེ། །ཞེས་བྱ་བ་ལ་སོགས་པའི་སྟོང་པའི་སྒྲ་བྲག་ཅ་ལྟ་བུར་བསྟོད་པ་བྱེད་པར་བསམ་མོ། །དེ་ནས་བདུད་རྩི་མྱང་བའི་ཆོ་ག་འདི་ཡིན་ཏེ། ཡི་གེ་ཡཾ་ཡོངས་སུ་གྱུར་པ་ལས་རླུང་གི་དཀྱིལ་འཁོར་གཞུའི་
དབྱིབས་ལྟ་བུ་ལ་བ་དན་གྱིས་མཚན་པ། དུ་བའི་མདོག་ཅན་ཡི་གེ་ཡཾ་དང་བཅས་པ། དེའི་སྟེང་དུ་ཡི་གེ་རཾ་ཡོངས་སུ་གྱུར་པ་ལས་མེའི་དཀྱིལ་འཁོར་གྲུ་གསུམ་ཟུར་གསུམ་ལ་རྡོ་རྗེས་མཚན་པའི་ཡི་གེ་རཾ་དང་བཅས་པའོ། །དེའི་སྟེང་དུ་ཟླ་བ་ལ་ཡི་གེ་ཨ་ཡོངས་སུ་གྱུར་པ་ལས་ཐོད་པའོ། །
དེར་སྔགས་པས་བི་མུ་ཤུ་མ་ར་སྟེ་བདུད་རྩི་ལྔ་དང་། གོ་ཀུ་ད་ཧ་ན་སྟེ་དཔའ་བོ་ལྔ་བཀོད་ལ། རླུང་གིས་བསྐྱོད་པའི་མེས་ཐོད་པ་དེ་ལ་གནས་པའི་ཡེ་ཤེས་ཀྱི་བདུད་རྩིར་གྱུར་པར་བསམས་ལ། དེར་ཡི་གེ་ཧཱུྃ་ལས་རྡོ་རྗེར་གྱུར་པ་ཡང་ནང་དུ་བསམ་མོ། །ཡང་ཡི་གེ་ཨོཾ་གྱིས་དེ་བཞིན་གཤེགས་
པ་ལྔའི་ས་བོན་དྲངས་ལ་འདྲེས་པར་གྱུར་པར་བྱས་ནས། དེར་ཡི་གེ་གསུམ་མངོན་པར་བཟླས་ལ་རྣལ་འབྱོར་པས་ཧཱུྃ་བཀོད་པའི་རྡོ་རྗེའི་ལྕེ་བཟང་པོ་དང་། དེ་ལྷ་རྣམས་ཚིམ་པར་བྱའོ། །འདི་ནི་དཀྱིལ་འཁོར་གྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ཏོ། །སྙིང་པོ་ལས་ངེས་པར་
བྱུང་བའི་སངས་རྒྱས་རྣམས་ཀྱིས་ཡང་དག་པ་མ་ཡིན་པའི་རྟོག་པ་སྤངས་པས་དེའི་བདག་ཉིད་དུ་འགྲོ་བ་རྣམས་བྱས་ནས་རང་གི་ས་བོན་གྱི་ནང་དུ་བཅུག་སྟེ། ཐིག་ལེའི་གཟུགས་སུ་རང་གི་ཡིད་ཡོངས་སུ་བསྒོམས་ལ། སེམས་དེའི་འོད་ཟེར་གྱི་ཕྲེང་བའི་སྣང་བས་སྐུ་དང་གསུང་དང་
ཐུགས་དང་ལུས་ཀྱི་མཆོག་གི་བར་སད་པར་བྱས་ལ། ཡང་དེ་ཉིད་དུ་ཞུགས་པས་ཡེ་ཤེས་ཀྱི་བདུད་རྩི་འབབ་པར་བསམ་མོ། །དེས་ནང་གི་ལུས་དང་དེ་བཞིན་དུ་ཐམས་ཅད་སྣང་བར་བྱས་ཏེ། བ་སྤུའི་བུ་ག་རེ་རེ་ནས་བྱུང་བའི་མཐའ་ཡས་པའི་འོད་ཀྱི་ཚོགས་རྣམས་ཀྱིས་སྣ་ཚོགས་པ་ཀུན་དུ་བཀང་ནས་

44-1-115a

སླར་འདུས་ཏེ་གནས་པ་དང་། བརྟན་པར་གྱུར་པ་ནི་ཐིག་ལེའི་རྣལ་འབྱོར་རོ། །དེ་ནས་རང་གི་སྔགས་ཀྱི་འོད་ཟེར་གྱིས་སངས་རྒྱས་བཅུག་ལ། རྡོ་རྗེའི་ལམ་ནས་ངེས་པར་ཕྱུང་ནས་ཟླ་བ་ཞུ་བར་གྱུར་པ་ལས། དེ་ཡོངས་སུ་གྱུར་པའི་མཚན་མ་ཕྲ་མོའི་ལྟེ་བར་ཏིང་ངེ་འཛིན་གཉིས་བསྐྱེད་
ལ། སྣ་ཚོགས་པ་སངས་རྒྱས་ཀྱི་བདག་ཉིད་དུ་རང་གི་སྔགས་ཀྱིས་ནང་དུ་བཅུག་ལ། ཐིག་ལེ་དེའི་གཟུགས་ཅན་འོད་གསལ་བར་བདག་ཉིད་བསམས་ཏེ། དེའི་འོད་ཟེར་རྣམས་ཀྱིས་དཀྱིལ་འཁོར་ལ་བལྟས་ལ་སེམས་བརྟན་པར་གྱུར་ནས་རྗེས་སུ་དྲན་པ་བཅུ་དྲུག་བསྒོམ་པར་བྱའོ། །བསྒོམས་པས་དུབ་
ན་ཅིག་ཅར་རམ་རིམ་གྱིས་སེམས་མ་ཡེངས་པར་བཟླས་བརྗོད་བྱའོ། །རང་གི་རྒྱུད་ཚིམ་པར་བྱ་བ་བསམ་པ་ནི་མཐོ་གང་གིས་སྤགས་པ་ལ་སྤྱི་བོའི་སྟེང་དུ་གདུགས་དཀར་པོ་བཞིན་བདུད་རྩིའི་དཀྱིལ་འཁོར་དེའི་སྟེང་དུ་ཡི་གེ་ཨོཾ། དེའི་འོད་ཟེར་རྣམས་ཀྱིས་བདུད་རྩི་ཕབ་ལ། དེ་ནས་སྲོག་
གི་རླུང་དང་རང་གི་སྔགས་ཀྱི་འོད་ཟེར་གྱིས་དྲངས་ནས། རྐན་གྱི་ཕྱོགས་སུ་ཕབ་ནས་བ་སྤུའི་ཁུང་བུ་དང་རྩ་བརྒྱད་ལས་སྐུ་གསུང་ཐུགས་ཚིམ་པར་བྱས། དེ་ནས་བཟླས་པ་དཔག་ཏུ་མེད་པར་བྱས་ནས། ཨོཾ་ལ་སོགས་པ་དེ་ཁོ་ན་ཉིད་གསུམ་གྱིས་དཀྱིལ་འཁོར་གྱི་འཁོར་ལོ་བསྡུས་ལ་ཡང་དག་
པའི་སྨོན་ལམ་མངོན་དུ་བྱའོ། །དེ་ནས་རང་གི་ལྷའི་ང་རྒྱལ་དང་ལྡན་པས་ལངས་ནས་ཐམས་ཅད་ཀྱང་དེ་དང་འདྲ་བར་བསམས་ནས་གནས་པར་བྱའོ། །བདུད་རྩི་མྱང་བའི་རིམ་གྱིས་ཟས་ལ་སོགས་པ་སྤྱད་པར་བྱའོ། །དབང་བསྐུར་བའི་རིམ་པས་ཁྲུས་བྱའོ། །རྒྱུ་མཐུན་པ་འབྲིང་པོ་ལ་
སོགས་པས་གྲོང་གི་ཆོས་བྱའོ། །ཐུན་མཚམས་སུ་ཡང་དེ་ཁོ་ན་ཉིད་གསུམ་གྱི་དཀྱིལ་འཁོར་རྣམ་པར་སྤྲོས་ལ། མཆོད་པ་ལ་སོགས་པ་སྔོན་དུ་འགྲོ་བས་བཟླས་པ་བྱས་ནས། ཡང་དེ་ཁོ་ན་ཉིད་གསུམ་གྱི་དཀྱིལ་འཁོར་བསྡུས་ལ་ཉལ་བར་བྱའོ། །ཡང་ནང་པར་གྱི་དུས་སུ་བསྐྱེད་པའི་རིམ་
གྱིས་ཏིང་ངེ་འཛིན་གསུམ་རྫོགས་པར་བྱས་ལ་མཉམ་པར་གཞག་ནས་བཟླས་བརྗོད་ལ་སོགས་པ་བྱའོ། །བསྒོམ་པའི་ཆོ་ག་འདི་ནི་ཤེས་རབ་དམན་པའི་སེམས་ཅན་མཐོང་ནས། སློབ་དཔོན་གྱིས་འདི་ཉིད་གསར་དུ་བརྩམས་པ་ཡིན་ནོ། །དཔལ་གསང་བ་འདུས་པའི་མངོན་པར་

44-1-115b

རྟོགས་པ་ཞེས་བྱ་བའི་སྒྲུབ་པའི་ཐབས། སློབ་དཔོན་བསོད་སྙོམས་པས་མཛད་པ་རྫོགས་སོ།།      །།རྒྱ་གར་གྱི་མཁན་པོ་ཤྲདྡྷཱ་ཀ་ར་ཝརྨ་དང་། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་སླད་ཀྱིས་ཀྱང་བཅོས་ནས་གཏན་ལ་ཕབ་པའོ།།      །།
༄༅༅། །རྒྱ་གར་སྐད་དུ། མཎྜལ་བི་དྷི། བོད་སྐད་དུ། དཀྱིལ་འཁོར་གྱི་ཆོ་ག །བཅོམ་ལྡན་འདས་འཇམ་པའི་རྡོ་རྗེ་ལ་ཕྱག་འཚལ་ལོ། །མི་ཤེས་མུན་པའི་བགེགས་སེལ་ཅིང་། །འགྲོ་བའི་ཕུན་ཚོགས་མཆོག་གྱུར་པ། །འཇམ་མཆོག་བླ་མ་ལ་བཏུད་དེ། །དཀྱིལ་འཁོར་
བྲི་བ་གསལ་བཤད་བྱ། །ངོ་ཚ་ཡང་ནི་རྣམ་སྤངས་ཏེ། །སློབ་མ་བློ་དམན་ལ་བརྩེ་བས། །ཕན་ཕྱིར་ཆོ་ག་འདི་བརྩམས་ཀྱིས། །སྐྱེ་བོ་དམ་པ་བཟོད་མཛད་རིགས། །ཐོག་མར་རེ་ཞིག་སྔགས་པ་གྲགས་པ་དང་། མ་གྲགས་པ་དང་། རྙེད་པ་དང་། མ་རྙེད་པ་དང་། བདེ་བ་དང་། སྡུག་
བསྔལ་བ་དང་། བསྟོད་པ་དང་། སྨད་པ་ཞེས་བྱ་བའི་འཇིག་རྟེན་གྱི་ཆོས་བརྒྱད་ཀྱིས་སེམས་མ་འཕྲོགས་པ། འཇིགས་པ་མེད་པ། གཡོ་དང་བྲལ་བ། ལུས་དང་སྲོག་ལ་ལྟོས་པ་མེད་པ་ཞེས་བྱ་བ་ལ་སོགས་པའི་མཚན་ཉིད་དང་ལྡན་པ་དང་། གཏོང་བ་ལ་སོགས་པའི་ཡོན་ཏན་དང་ལྡན་
པས། ཐུན་བཞིས་དང་པོའི་སྦྱོར་བ་དང་། དཀྱིལ་འཁོར་གྱི་རྒྱལ་པོ་མཆོག་དང་ལས་ཀྱི་རྒྱལ་པོ་མཆོག་སྟེ། ཏིང་ངེ་འཛིན་གསུམ་བསྒོམས་པ་ལ་མངོན་པར་དགའ་བས་སྔོན་དུ་བསྙེན་པ་བྱའོ། །དེ་ལ་ཐུགས་ཀྱི་དཀྱིལ་འཁོར་ཡིན་ནི་འཁོར་ལོའི་གཙོ་བོ་མི་བསྐྱོད་པའི་སྔགས་
བཟླས་བརྗོད་འབུམ་བྱའོ། །གསུང་དང་སྐུའི་དཀྱིལ་འཁོར་ལ་ནི། འཁོར་ལོའི་གཙོ་བོ་འོད་དཔག་ཏུ་མེད་པ་དང་། རྣམ་པར་སྣང་མཛད་ཀྱི་སྔགས་དེ་བཞིན་དུ་བཟླས་པར་བྱའོ། །རང་གི་ལྷག་པའི་ལྷའི་སྔགས་འབུམ་དང་། དཀྱིལ་འཁོར་པའི་སྔགས་རེ་རེ་ཞིང་ཁྲི་ཁྲི་བཟླའོ། །ཡང་ན་འཁོར་
ལོ་ཅན་གྱི་བཀའ་ཐོབ་ན་དཀྱིལ་འཁོར་བྲི་བར་བྱའོ། །སྔོན་དུ་བསྙེན་པའི་རིམ་པའོ། །དེ་ནས་དཀྱིལ་འཁོར་གྱི་ཁང་པར་ཞུགས་ལ་བདུད་རྩི་ཐབ་སྦྱོར་གྱི་སྔགས་བཟླས་པའི་ཆུས་བསང་ཞིང་བྱུག་པ་བྱས་ལ། སའི་ལྷ་མོ་ལ་ཡང་དམ་ཚིག་གིས་གསོལ་བ་གདབ་བོ། །དེ་ནས་འཁོར་ལོ་རྩིབས་

44-1-116a

བཅུ་པ་བསྒོམས་ཏེ་བགེགས་རྣམས་བསྐྲད་ནས། འབྱོར་བ་ཅི་ཡོད་པས་མཆོད་པ་དང་། གཏོར་མ་དང་། སྦྱིན་སྲེག་བྱས་ལ་སའི་ལྷ་མོ་བློས་ནམ་མཁའ་ལ་བཞག་སྟེ། པུས་མོ་ནུབ་ཙམ་པ་བརྐོས་ནས། གྱོ་མོ་ལ་སོགས་པ་བསལ་ཏེ། ས་དེ་ཉིད་ཀྱིས་ཁུང་བུ་
དགང་བར་བྱའོ། །ཡང་གསང་བའི་དེ་ཁོ་ན་ཉིད་ཀྱི་རྒྱུད་ལས། པུས་མོ་ནུབ་ཙམ་བརྐོས་ནས་ནི། །ས་དེ་ཉིད་ཀྱིས་དགང་བར་བྱ། །གལ་ཏེ་ལྷག་པར་གྱུར་ན་ནི། །དེ་ཚེ་དངོས་གྲུབ་ཡོད་པར་བཤད། །ཅེས་གསུངས་པ་ཡིན་ནོ། །ཁུང་བུ་དགང་བའི་དུས་སུ་ཡང་མཆོད་པ་དང་། སྦྱིན་སྲེག་
དང་གཏོར་མ་བྱའོ། །ཕྱིའི་ས་སྦྱང་བའོ། །ཡང་སློབ་དཔོན་རང་གི་སློབ་མ་དང་བཅས་པས་དཀྱིལ་འཁོར་གྱི་ཁང་པར་མཆོད་པ་དང་། ས་སྦྱང་བ་བྱས་ལ། འཁོར་ལོ་རྩིབས་བཅུ་པའི་སྦྱོར་བ་དང་ལྡན་པའམ། རང་གི་འདོད་པའི་ལྷའི་སྦྱོར་བ་དང་ལྡན་པས་ཨོཾ་བྷཱུ་ཁཾ། ཞེས་བྱ་བའི་སྔགས་འདིས་ས་ནམ་
མཁའི་རང་བཞིན་དུ་བསྒོམས་ལ། ཧཱུྃ་ལཾ་ཧཱུྃ་ཞེས་བྱ་བ་འདིས་རྡོ་རྗེའི་རང་བཞིན་དུ་བསམས་ལ། ཨོཾ་མེ་དཱི་ནཱི་བཛྲཱི་བྷ་ཝ་བཛྲ་བནྡྷ་ཧཱུྃ། ཞེས་བྱ་བ་འདིས་ས་བྱིན་གྱིས་བརླབ་པར་བྱའོ། །ནང་གི་བདག་ཉིད་ཅན་གྱི་ས་སྦྱང་བའི་རིམ་པའོ། །དེ་ནས་རྡོ་རྗེ་སློབ་དཔོན་དཀྱིལ་འཁོར་གྱི་སའི་དབུས་སུ་ཏིང་
ངེ་འཛིན་གསུམ་གྱི་སྦྱོར་བ་དང་ལྡན་པས། རྡོ་རྗེ་དང་དྲིལ་བུ་འཆང་བ་ལ། རྣམ་པར་སྣང་མཛད་ལ་སོགས་པའི་སྦྱོར་བ་དང་ལྡན་པའི་སློབ་མ་བཞི་པོ་རྡོ་རྗེ་དང་དྲིལ་བུ་འཛིན་ཅིང་ཕྱོགས་བཞིར་གནས་པས་ཚིགས་སུ་བཅད་པ་བཞིས་གསོལ་བ་གདབ་བོ། །དེ་བཞིན་གཤེགས་པ་ཀུན་
ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །མཚན་རྣམས་ཐམས་ཅད་ཡང་དག་རྫོགས། །མཚན་མིན་ཐམས་ཅད་རྣམ་སྤངས་པ། །ཀུན་དུ་བཟང་པོ་སྐུ་ཡི་མཆོག །དཀྱིལ་འཁོར་དམ་པ་
བཤད་དུ་གསོལ། །ཞི་བའི་ཆོས་ནི་མཆོག་ལས་བྱུང་། །ཡེ་ཤེས་སྤྱོད་པ་རྣམ་སྦྱོང་བ། །ཀུན་དུ་བཟང་པོ་གསུང་གི་མཆོག །དཀྱིལ་འཁོར་དམ་པ་བཤད་དུ་གསོལ། །སེམས་ཅན་ཀུན་གྱི་སེམས་ཆེན་པོ། །རང་བཞིན་དག་པ་དྲི་མ་མེད། །ཀུན་བཟང་ཐུགས་མཆོག་ཁ་ལོ་སྒྱུར། །

44-1-116b

དཀྱིལ་འཁོར་དམ་པ་བཤད་དུ་གསོལ། །དཀྱིལ་འཁོར་བྲི་བའི་ཕྱིར་གསོལ་བ་གདབ་པའོ། །གསོལ་བ་བཏབ་པའི་རྗེས་ཐོགས་ལ། སེམས་ཅན་གྱི་ཁམས་རྣམས་ཉོན་མོངས་པས་ཁྱབ་པ་ལ་བལྟས་ལ། ཉོན་མོངས་པ་ལ་ཁྲོས་པས་བདུད་རྩི་ཐབ་སྦྱོར་གྱི་སྦྱོར་བའི་བདག་ཉིད་
ཅན་དུ་བསྒོམས་ཏེ། ཧཱུྃ་བཛྲ་ཙཀྲ་ཏིཥྛ་ཞེས་བྱ་བས་དཀྱིལ་འཁོར་གྱི་འཁོར་ལོ་ནམ་མཁར་བཏེག་ནས།ཡི་གེ་མཾ་གྱིས་མིག་གཡོན་པར་ཟླ་བའི་དཀྱིལ་འཁོར། ཊ་ཞེས་བྱ་བ་མིག་གཡས་པར་ཉི་མའི་དཀྱིལ་འཁོར་བསམས་ནས། ཕྱོགས་བཅུའི་འགྲོ་བ་དུས་གསུམ་དུ་གཏོགས་པ་རྣམས་
ལ་བལྟས་ཏེ། ལངས་ནས་རྐང་པའི་འོག་ཏུ་རྡོ་རྗེ་འབར་བ་དང་བཅས་པ་རྣམ་པར་བསྒོམས་ལ། ཡི་གེ་ཧཱུྃ་ཟློས་ཤིང་དབང་ལྡན་གྱི་ཕྱོགས་ནས་བརྩམས་ཏེ། རྡོ་རྗེའི་འགྲོས་ཀྱིས་གར་བྱེད་པས་དཀྱིལ་འཁོར་གྱི་ས་གཞི་བསྐོར་ལ། དཀྱིལ་འཁོར་གྱི་ས་གཞི་ལ་གནས་པའི་ལྷ་ལ་སོགས་པའི་
བགེགས་རྣམས་བསྐྲད་པར་བྱའོ། །སྐུ་གསུང་ཐུགས་ལ་གནས་པ་ཡི། །བགེགས་ཀྱི་ཚོགས་རྣམས་ཐམས་ཅད་ཉོན། །ང་ནི་དཔལ་ལྡན་རྡོ་རྗེ་འཛིན། །བཀའ་ཡི་འཁོར་ལོ་རབ་སྦྱོར་བ། །གལ་ཏེ་བདག་བསྒོས་ལས་འདས་ན། །རྡོ་རྗེ་འབར་བའི་གཟུགས་ལྡན་པ། །སྐུ་གསུམ་བྱུང་
བས་དགས་བྱ་སྟེ། །འཇིག་འགྱུར་འདིར་ནི་གདོན་མི་ཟ། །ཞེས་བྱ་བའི་ཚིག་འདིས་བསྐྲད་པར་བྱའོ། །ས་ཡོངས་སུ་གཟུང་བའོ། །དེ་ནས་ཡང་བགེགས་ཞི་བར་བྱ་བའི་ཕྱིར། དཀྱིལ་འཁོར་གྱི་སའི་དབུས་སུ་བདུད་རྩི་ཐབ་སྦྱོར་སྐུ་སྨད་རྩེ་གཅིག་པ་འདྲ་བ་ལ། སྐུ་སྟོད་ཁྲོ་བོའི་སྐུའི་
རྣམ་པ་ཕྱོགས་བཅུར་བསམས་ལ། ཨོཾ་གྷ་གྷ། གྷཱ་ཏ་ཡ་གྷཱ་ཏ་ཡ། སརྦྦ་དུཥྚཱ་ན་ཕཊ། ཀཱི་ལ་ཡ་ཀཱི་ལ་ཡ་སརྦྦ་པཱ་པཾ་ཕཊ། ཧཱུྃ་ཧཱུྃ་ཧཱུྃ་བཛྲ་ཀཱི་ལ་ཡ་བཛྲ་དྷ་རོད་ཨཱཛྙཱ་པཱ་ཡ་ཏི། ཀཱ་ཡ་ཝཱ་ཀཱ་ཙིཏྟ་བཛྲ་ཀཱི་ལ་ཡ་ཧཱུྃ་ཕཊ། ཅེས་བྱ་བའི་ཕུར་བུའི་སྔགས་ཀྱིས་ཕུར་བུས་གདབ་པར་བྱའོ། །དེ་
ནས་ས་གཞི་བགེགས་དང་བྲལ་བ་འབར་བའི་ཕྲེང་བའི་འོད་ཟེར་གྱིས་ཁྱབ་པར་བསམས་ལ། ཕུར་བུའི་ཕྱི་རོལ་དུ་རྡོ་རྗེའི་ར་བའི་འོད་ཟེར་དང་བཅས་པ་བསམ་མོ། །དེའི་ཕྱི་རོལ་དུ་རྡོ་རྗེ་ར་བ། དེའི་ཕྱི་རོལ་དུ་དབང་ཆེན་གྱི་དཀྱིལ་འཁོར་ཁ་དོག་སེར་པོ་ཟུར་བཞི་པས་ཕྱོགས་བཅིང་ངོ་། །དེ་

44-1-117a

ནས་མེའི་དཀྱིལ་འཁོར་དམར་པོ་གྲུ་གསུམ་པས་མཚམས་བཅིང་བར་བསམ་པར་བྱའོ། །དེའི་རྗེས་ལ་སའི་ལྷ་མོ་མེ་ཏོག་ལ་སོགས་པས་ཡང་དག་པར་མཆོད་ནས། སྐྱོབ་པ་སངས་རྒྱས་ཐམས་ཅད། །སྤྱོད་པའི་ཚུལ་གྱི་ཁྱད་པར་དང་། །ས་དང་ཕ་རོལ་ཕྱིན་
པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་ཀྱི་སྡེ། །ཕམ་པར་བྱས་ཏེ་དཀྱིལ་འཁོར་བྲི། །ཞེས་བྱ་བས་ལྷག་པར་གནས་པར་བྱའོ། །དེའི་རྗེས་ལ་དཀྱིལ་འཁོར་གྱིས་དྲི་ཞིམ་པོས་བྱུགས་ལ། དེར་
མེ་ཏོག་སིལ་མ་བཀྲམ་ལ། ས་གཞི་དེ་ལ་བདུད་རྩི་ལྔ་པོ་ལེགས་པར་སྦྱངས་པ་དང་བཅས་པའི་དྲིས་དཀྱིལ་འཁོར་བཅུ་དགུ་བྱས་ནས། ནམ་མཁའ་ལ་བཞུགས་པའི་དཀྱིལ་འཁོར་བྲི་ཞེས་བྱ་བས་ལྷག་པར་གནས་པར་བྱའོ། །དྲི་ཞིམ་པོའི་དཀྱིལ་འཁོར་དུ་ཇི་ལྟ་བ་བཞིན་དུ་
བཅུག་ནས། ཡང་མཚམས་དང་ཕྱོགས་བཅིང་བ་བྱས་ལ། འབྱོར་བ་ཅི་ཡོད་པས་ཕྱི་དང་ཡིད་ཀྱིས་མཆོད་པ་བྱས་ལ། མི་བསྐྱོད་རྡོ་རྗེ་ཡེ་ཤེས་ཆེ། །ཞེས་བྱ་བ་ལ་སོགས་པས་བསྟོད་པ་དང་། བདུད་རྩི་མྱང་བའི་ཆོ་ག་བྱའོ། །དེ་ནས་བུམ་པ་ལྷག་པར་གནས་པར་བྱ་བ་ནི། རྣམ་པར་
རྒྱལ་བའི་བུམ་པ། མགྲིན་པ་རིང་བ། མཆུ་འཕྱང་བ། གསུས་པ་ཆེ་བ་ལ། ནས་དང་། གྲོ་དང་། མ་ཤ་དང་། འབྲས་སོ་བ་དང་། ཏིལ་ཏེ་འབྲུ་ལྔ་དང་། པྲི་ཧ་ཏི་དང་། ཀཎྜ་ཀ་རི་དང་། གི་རི་ཀརྞི་དཀར་པོ་དང་། ས་ཧ་དང་། ས་ཧ་དེ་བ་སྟེ་སྨན་ལྔ་དང་། གསེར་དང་། བྱི་རུ་དང་། མུ་ཏིག་
དང་། དུང་དང་། ནོར་བུ་སྟེ། རིན་པོ་ཆེ་སྣ་ལྔ་དང་ལྡན་པ་སྤོས་ཆུས་གང་བ་མགྲིན་པ་གོས་སར་པས་དཀྲིས་པ། ཡལ་ག་དྲི་ཞིམ་པོས་ཁ་བརྒྱན་པ་ལྷག་པར་གནས་པར་བྱའོ། །དེའི་རིམ་པ་ནི་འདི་ཡིན་ཏེ། རྣམ་པར་རྒྱལ་བའི་བུམ་པ་ལ་དཀྱིལ་འཁོར་གྱི་འཁོར་ལོའི་གཙོ་བོ་བསམས་ཏེ། གསང་
བ་དང་། མཆོད་ཡོན་ལ་སོགས་པ་ཕུལ་ལ། མེ་ཏོག་དང་། སྤོས་དང་། མར་མེ་དང་། དྲིས་མཆོད་ཅིང་བསྟོད་པ་ཡང་བྱས་ནས། མེ་ཏོག་གི་ཕྲེང་བས་དཀྲིས་པའི་རྡོ་རྗེ་རྣམ་པར་རྒྱལ་བའི་བུམ་པའི་ཁར་བཞག་ལ། བདག་པོའི་སྔགས་ཡི་གེ་གསུམ་དང་སྤེལ་བ་དེ་ལ་བཟླས་པར་

44-1-117b

བྱའོ། །དེ་ལས་གཞན་པའི་དཀྱིལ་འཁོར་པའི་བུམ་པ་བཅོ་བརྒྱད་ཀྱང་སྤོས་ཆུས་བཀང་ལ། ཨ་མྲ་ལ་སོགས་པའི་ཡལ་ག་དང་ལྡན་པ། མགུལ་པ་རས་སྣ་ཚོགས་ཀྱིས་དཀྲིས་པ་ལ། དཀྱིལ་འཁོར་པའི་སྔགས་ཡི་གེ་གསུམ་དང་སྤེལ་བ་ཐུན་གསུམ་དུ་མངོན་པར་བཟླས་པར་
བྱའོ། །ཡང་བུམ་པ་གཞན་སེམས་ཅན་ཐམས་ཅད་ལ་བསང་གཏོར་བྱ་བའི་ཕྱིར། བདུད་རྩི་ཐབ་སྦྱོར་གྱི་སྔགས། ཨོཾ་ཨཱཿ་བིགྷྣཱནྟ་ཀྲྀཏ་ཧཱུྃ་ཞེས་བྱ་བ་མངོན་པར་བཟླའོ། །གཏོར་མ་ཡང་སྦྱིན་ནོ། །བུམ་པ་ལྷག་པར་གནས་པའི་རིམ་པའོ། །དེ་ནས་སྤོས་སྣོད་ཐོགས་ལ། པུས་
མོ་གཡས་པའི་ལྷ་ང་ས་ལ་བཙུགས་ཏེ། སངས་རྒྱས་ལ་སོགས་པའི་འཁོར་ལོའི་གཙོ་བོ་ལྷག་པར་གནས་པར་བྱའོ། །བཅོམ་ལྡན་འཇམ་པའི་རྡོ་རྗེ་མཆོག །རིག་སྔགས་རྒྱལ་ལ་ཕྱག་འཚལ་ལོ། །སློབ་མ་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །
ཐུགས་རྗེའི་བདག་ཉིད་ཅན་རྣམས་ཀྱི། དཀྱིལ་འཁོར་བདག་ནི་འདྲི་བར་འཚལ། །བཅོམ་ལྡན་བདག་ནི་གུས་པ་ལ། །དེ་ནི་གནང་བར་མཛད་པའི་རིགས། །སངས་རྒྱས་འགྲོ་འཁོར་བྱ་དོན་སྩོལ། །བྱང་ཆུབ་སེམས་དཔའ་འབྲས་གནས་དང་། །གང་ཡང་གསང་སྔགས་ལྷ་
རྣམས་དང་། །འཇིག་རྟེན་སྐྱོང་བའི་ལྷ་རྣམས་དང་། །གང་ཡང་འབྱུང་པོ་མཐུ་ཅན་དང་། །གང་ཡང་ལྷ་ཡི་སྤྱན་མངའ་བ། །སེམས་ཅན་བསྟན་ལ་དགའ་བ་རྣམས། །བདག་ལ་དགོངས་པར་མཛད་དུ་གསོལ། །བདག་མིང་འདི་ཞེས་བགྱི་བ་ཡིས། །དཀྱིལ་འཁོར་ཆོ་ག་འབྱུང་བ་
འདི། །འགྲོ་བ་དག་པར་བྱ་བའི་ཕྱིར། །ཡོ་བྱད་ཅི་འབྱོར་པས་འདྲི་ན། །བདག་དང་སློབ་མར་བཅས་པ་ལ། །ཐུགས་ནི་བརྩེ་བར་དགོངས་ནས་སུ། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབ་པ་མཛད་དུ་གསོལ། །ལྷ་ལྷག་པར་གནས་པའི་ཆོ་གའོ། །དེ་ནས་བཟླས་
བརྗོད་ཀྱང་ཅི་ནུས་བྱའོ། །དེའི་རྗེས་ལ་སློབ་མ་རེ་རེ་ཞིང་ཡང་མེ་ཏོག་གི་ཕྲེང་བ་ཐོགས་ལ། ཡིད་གཞུངས་སྤྲོ་བ་ཆེ་བ་དང་། །བྱས་པ་གཟོ་ཞིང་ང་རྒྱལ་མེད། །རིགས་མཐོ་ཡོན་ཏན་ལྡན་ཞིང་དད། །གཟུགས་དང་ཁ་དོག་ལང་ཚོར་ལྡན། །བདེ་བར་གཤེགས་པའི་གསང་སྔགས་ནི། །སྒྲུབ་

44-1-118a

ལ་དོན་གཉེར་མངོན་བརྩོན་ན། །ཞེས་བྱ་བ་ནི་སློབ་མའི་མཚན་ཉིད་དོ། །གཟུགས་ངན་ཡོན་ཏན་མེད་པའམ། །དམན་པའང་ལྷག་པར་གནས་པར་བྱ། །ཞེས་བྱ་བ་ནི་སློབ་མ་ཕལ་པ་རྣམས་སོ། །དཀྱིལ་འཁོར་གྱི་ནི་ཆོ་ག་ལས། །འཁོར་བཞིའི་ཆར་ཡང་
རྗེས་སུ་གནང་། །རང་གི་བསླབ་དང་ཤིན་ཏུ་ལྡན། །ཐེག་ཆེན་ལ་དགའི་བདག་ཉིད་ཅན། །ལ་ལ་གསང་སྔགས་སྒྲུབ་དོན་གཉེར། །འདི་ན་དཀྱིལ་འཁོར་འཇུག་པར་བྱེད། །བསོད་ནམས་འདོད་པས་དེ་ལས་གཞན། །གཞན་དག་འཇིག་རྟེན་གཞན་དོན་གཉེར། །འཇིག་རྟེན་ཕ་རོལ་
དོན་གཉེར་བའི། །དད་པ་མང་དུ་བྱེད་པ་ཡི། །བློ་ལྡན་དཀྱིལ་འཁོར་འཇུག་བྱ་ཡི། །ཚེ་འདིའི་འབྲས་བུ་འདོད་མི་བྱ། །ཚེ་འདི་འདོད་པར་གྱུར་པ་ལ། །འཇིག་རྟེན་ཕ་རོལ་དོན་མི་འགྲུབ། །འཇིག་རྟེན་ཕ་རོལ་དོན་གཉེར་སྐྱེས། །འཇིག་རྟེན་འདི་ཡི་འབྲས་བུ་རྒྱས། །ཞེས་བརྗོད་
ལ། སློབ་མ་དེ་བློས་རང་གི་ནང་དུ་བཅུག་སྟེ། རང་གི་རྡོ་རྗེ་ལས་ཕྱུང་ནས། རང་གི་སོ་སོར་སྣང་བའི་རིག་མའི་པདྨར་གནས་པ་ལ། དེ་བཞིན་གཤེགས་པ་རྣམས་ཞུ་བའི་ཚུལ་དུ་གྱུར་པས་དབང་བསྐུར་བར་བསམས་ལ། དཀྱིལ་འཁོར་གྱི་ཁང་པའི་སྒོར་འདུག་ནས་གསོལ་བ་འདེབས་
པར་བྱའོ། །དགའ་ཆེན་ཁྱོད་བདག་སྟོན་པ་པས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །བྱང་ཆུབ་སེམས་ནི་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །
སྐྱབས་གསུམ་དག་ནི་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་འཚལ། །ཞེས་བྱ་བས་གསོལ་བ་བཏབ་པ་དང་། སློབ་དཔོན་གྱིས་སློབ་མའི་གཙོ་བོ་གཅིག་ལ་དམིགས་ཏེ། བུ་ཚུར་ཐེག་པ་ཆེན་པོ་ཡི། །གསང་སྔགས་སྤྱོད་ཚུལ་ཆོ་ག་
ནི། །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་མགོན་པོ་རྣམས། །འགྲོ་ལ་ཕན་ཕྱིར་བཞུགས་པ་དག །དེ་དག་ཀུན་གྱིས་གསང་སྔགས་ཀྱི། །ཆོ་ག་མཆོག་བཟང་འདི་མཁྱེན་ནས། །

44-1-118b

དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། །གསང་སྔགས་སྦྱོར་བ་མཉམ་མེད་དེ། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་
བློ་གྲོས་འདི་གྱིས་ཤིག །ཅེས་བརྗོད་ལ། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །བསོད་ནམས་ཀུན་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་བྱ་བའི་གསུམ་ལ་སྐྱབས་སུ་འགྲོ་བའི་ཚིགས་སུ་བཅད་པ་
ལན་གསུམ་ཟློས་སུ་གཞུག་གོ། །དེ་ནས་བདུད་རྩི་ཐབ་སྦྱོར་གྱི་སྔགས་ཀྱིས་མངོན་པར་བསྲུངས་ལ་དེ་རྣམས་ཀྱི་སྙིང་ག་དང་ལྐོག་མ་དང་སྤྱི་བོར་རྡོ་རྗེ་དང་པདྨ་དང་། འཁོར་ལོ་བསམས་ལ། མཚན་མ་དེ་རྣམས་ཉིད་ཀྱི་ལྟེ་བའི་དབུས་སུ་ཧཱུྃ་ཨཱཿཨོཾ་ཞེས་བྱ་བའི་ཡི་གེ་གསུམ་བསྒོམ་
པར་བྱའོ། །དེ་ནས་རྡོ་རྗེ་ཁུ་ཚུར་གཡས་པས་བཟུང་ལ་བཏེག་སྟེ། སློབ་དཔོན་གྱིས་སློབ་མའི་སྙིང་ག་དང་སྤྱི་བོ་དང་ལྐོག་མར་གཏུགས་ལ། ཧཱུྃ་ཨོཾ་ཨཱཿཞེས་བརྗོད་པར་བྱའོ། །དེ་ནས་སློབ་མའི་སྤྱི་བོར་མེ་ཏོག་དང་། མདུན་དུ་སྤོས་དང་། མར་མེ་དང་། སྙིང་གར་དྲི་སྦྱིན་པར་བྱའོ། །
དེའི་རྗེས་ལ་ཨ་ཤྭཏྠ་ལ་སོགས་པའི་སོ་ཤིང་སོར་བཅུ་གཉིས་པ། ཡོན་པོ་མ་ཡིན་པ། རྩེ་མོའི་ཆ་མེ་ཏོག་གི་ཕྲེང་བས་དཀྲིས་པ་ལ་བདུད་རྩི་ཐབ་སྦྱོར་གྱི་སྔགས་བཟླས་པ་སློབ་མ་རྣམས་ལ་སྦྱིན་པར་བྱའོ། །སློབ་མ་དེ་རྣམས་ཀྱང་ཤར་རམ་ནུབ་ཏུ་ཁ་བལྟས་ཏེ། སོ་ཤིང་དེ་
བཅས་ལ་བ་ལང་གི་ཀོ་བ་ཙམ་གྱི་སའི་ཆ་བའི་ལྕི་བས་བྱུགས་ལ། སོ་ཤིང་ལྟོས་པ་མེད་པར་དོར་བར་བྱའོ། །གལ་ཏེ་སོ་ཤིང་གི་རྩེ་མོ་ཤར་ལ་སོགས་པའི་ཕྱོགས་སུ་བལྟས་ན། ཞི་བ་ལ་སོགས་པའི་དངོས་གྲུབ་ཡོད་པར་སྟོན་ཏོ། །དེ་ནས་སྐྱོར་ཆུ་གསུམ་སྦྱིན་པར་བྱ་སྟེ། ཨོཾ་ཧྲཱིཿབི་
ཤུདྡྷཿདྷརྨྨ་སརྦྦ་པཱ་པཾ་ནི་ཤྩ་སཾ་ཤོ་དྷ་ཡ། སརྦྦ་བི་ཀལྤཱན་ཨ་པ་ན་ཡ་ཧཱུྃ། ཞེས་བྱ་བའི་སྔགས་བཟླས་པའི་ཆུ་དེས་ཁ་བཀྲུ་བར་བྱའོ། །ཡང་དེ་འདུག་པ་ལ་བདུད་རྩི་ཐབ་སྦྱོར་གྱི་སྔགས་བཟླས་པའི་ཀུ་ཤ་སྔས་དང་སྟན་གྱི་ཕྱིར་བྱིན་ལ། བདུད་རྩི་ཐབ་སྦྱོར་གྱི་སྔགས་བཟླས་པའི་སྲུང་

44-1-119a

སྐུད་ཀྱིས་སློབ་མ་རྣམས་བསྲུང་བའི་ཕྱིར། དཔུང་པ་གཡས་པར་བཅིང་བར་བྱའོ། །དེ་ཡང་སྒྱུ་འཕྲུལ་དྲ་བའི་རྒྱུད་ལས། །སྲད་བུས་གཡས་པར་བཅིང་བྱ་ཞིང་། །ཀུ་ཤ་དག་ནི་ལག་པར་རོ། །ཞེས་གསུངས་པ་ཡིན་ནོ། །དེ་ནས། འཇིག་རྟེན་དུ་ནི་ཀུན་མཁྱེན་
རྣམས། །ཨུ་དུམྦཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ན་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་མཉམ་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །བསྐལ་བ་བྱེ་བ་
དུ་མ་རུ། །སྡིག་པ་བགྱིས་པར་འགྱུར་བ་གང་། །དེ་ཀུན་དཀྱིལ་འཁོར་འདི་འདྲ་བ། །མཐོང་བས་འབྱང་བར་འགྱུར་ལ་གསན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་པ་སྨོས་ཅི་འཚལ། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །གང་
དག་སྤྱོད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་བ། །དེ་དག་གིས་ནི་ངན་འགྲོའི་རྒྱུན། །སྡུག་བསྔལ་ཀུན་འབྱུང་རབ་ཏུ་བཅད། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པ། །བདག་ཉིད་ཆེན་པོ་ཀུན་གྱིས་ནི། །
བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་ལ། །སང་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་འདིར་ནི་དོང་བས་ནི། །རང་བྱུང་སྐལ་བ་ཆེན་པོ་པ། །འཇིག་
རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་རྣམས་སུ་འགྱུར། །ཞེས་ཆོས་བཤད་པ་བསྒྲག་པར་བྱའོ། །སློབ་དཔོན་ཉིད་དོན་དུ་གཉེར་བའི་སློབ་མ་ནི། །བདུད་རྩི་ཐབ་སྦྱོར་གྱི་སྔགས་ཀྱིས་བསྲུངས་ཏེ་བཞག་ལ། ཁྱད་པར་གྱི་སྡོམ་པ་འཛིན་དུ་གཞུག་གོ། །མི་ལྡོག་འཁོར་
ལོའི་དབང་བསྐུར་བ། །སྩལ་བའི་མགོན་པོ་བདག་ལ་གསུངས། །འཁོར་ལོ་ལྷ་ཡི་དེ་ཉིད་དང་། །སློབ་དཔོན་གྱི་ནི་ལས་རྣམས་དང་། །སངས་རྒྱས་ཀུན་གྱི་དམ་ཚིག་དང་། །སྡོམ་དང་གསང་བ་དམ་ཚིག་གསུམ། །སེམས་ཅན་ཀུན་གྱི་དོན་བགྱིད་ཕྱིར། །བདག་ནི་རྟག་ཏུ་སློབ་

44-1-119b

དཔོན་འགྱུར། །ཞེས་གསོལ་བ་བཏབ་པ་དང་། སློབ་མ་དེ་ཀུ་ཤའི་སྟན་ལ་ཉལ་དུ་གཞུག་གོ། །སློབ་མ་ལྷག་པར་གནས་པའི་ཆོ་གའོ། །ཡང་སློབ་དཔོན་དཀྱིལ་འཁོར་གྱི་ཁང་པར་ཞུགས་ལ། བསྲུང་བར་བྱ་བའི་ཕྱིར་བདུད་རྩི་ཐབ་སྦྱོར་གྱི་སྔགས་ཡང་དང་ཡང་དུ་བཟླ་བར་བྱའོ། །
ཡང་ནང་པར་གྱི་དུས་སུ་ཕྱིར་བྱུང་ལ་སློབ་མ་བོས་ཏེ། དེ་རྣམས་ལ་རྨི་ལམ་དགེ་མི་དགེ་དྲི་བར་བྱའོ། །མི་དགེ་བ་མཐོང་ན་བདུད་རྩི་ཐབ་སྦྱོར་གྱི་སྔགས་ཀྱིས་བསྲུང་བར་བྱའོ། །དེ་ནས་ཡང་ནང་པར་དཀྱིལ་འཁོར་མཆོད་པ་དང་། བསྟོད་པ་དང་བདུད་རྩི་མྱང་བ་ལ་སོགས་པ་བྱས་ལ།
དྲིའི་དཀྱིལ་འཁོར་ལ་བཞུགས་པའི་དཀྱིལ་འཁོར་གྱི་འཁོར་ལོ་གཤེགས་པར་བྱ་བའི་དོན་དུ་བློས་བཏེག་ལ་ནམ་མཁར་གཞག་པར་བྱའོ། །དེ་ནས་དཀྱིལ་འཁོར་ཟུར་བཞི་པ་ལ་སོགས་པ་ཕྱིའི་སྲད་བུས་ཐིག་གདབ་བོ། །དེའི་རིམ་པ་ནི་འདི་ཡིན་ཏེ། དེ་ལ་སྔགས་པས་རེ་ཞིག་
དང་པོར་ཚངས་པའི་ཐིག་གཉིས་པ་མི་ཡོ་བ་དང་། དེའི་རྗེས་ལ་ཁྲུ་གང་ལ་སོགས་པའི་ཚད་ཀྱིས་ཟུར་བཞི་པའི་ཐིག་མི་ཡོ་བ་དང་། དེའི་འོག་ཏུ་མཚམས་ཀྱི་ཐིག་གཉིས་པ་གདབ་བོ། །འཁོར་ལོ་ཟུར་བཞི་པའི་བརྒྱད་ཆའི་ཚད་ནི་སྒོའི་སའི་ཆའི་ཐིག་གདབ་བོ། །དེ་ནས་ཚོན་སྣ་
ལྔའི་ས་ལ་སོགས་པའི་ཚད་ལ་ཇི་སྐད་བཤད་པ་བཞིན་དུ་ཐིག་གདབ་པར་བྱའོ། །ལྷའི་སྣམ་བུའི་སའི་ཐིག་གདབ་བོ། །དེའི་ནང་གི་ཟུར་བཞིའི་ནང་དུ་སྙིང་པོའི་དཀྱིལ་འཁོར་བྲིའོ། །ཟུར་བཞིའི་སྒོའི་ཚད་ཙམ་ནི་ཚོན་སྣ་ལྔའི་སའི་ཚད་དོ། །ཀ་བ་ནི་རྡོ་རྗེ་དང་། རིན་པོ་ཆེ་ལ་སོགས་
པས་མཚན་མ་དང་ལྡན་པ་ལ། རྡོ་རྗེ་ཕྲེང་བས་བསྐོར་བ་བྲི་བའམ་འདྲིར་གཞུག་གོ། །ཕྱི་རོལ་དུ་རྟ་བབས་སྒོའི་ཆའི་སུམ་འགྱུར་དུ་བྱས་ལ། དེའི་ཕྱི་རོལ་དུ་དཀྱིལ་འཁོར་དང་རྗེས་སུ་མཐུན་པའི་ཚད་ཀྱི་ལྕགས་རི་ཇི་ལྟར་མཛེས་པར་བྲིའོ། །སའི་ཐིག་གདབ་པའི་རིམ་པའོ། །དེ་ནས་ཡེ་ཤེས་ཀྱི་
ཐིག་གི་ཚོན་སྣ་ལྔའི་སྲད་བུ་ཡེ་ཤེས་ལྔ་དང་ལྡན་པ་ལ་རྫི་མ་བསྐྱོད་ཅིང་གཡོ་བའི་འབར་བའི་ལྟ་བས་རྣམ་པར་སྣང་མཛད་ལ་སོགས་པའི་ཐུགས་ཀ་ནས་དྲངས་པའི་ཡེ་ཤེས་ཀྱི་སྲད་བུས་བྱིན་གྱིས་རློབ་པའོ། །དེ་ཡང་དེ་ཁོ་ན་ཉིད་བསྡུས་པ་ལས། རབ་ཏུ་མྱུར་བར་མིག་བསྒུལ་ཞིང་། །མིག་གི་རྫི་མ་

44-1-120a

འགུགས་བྱེད་པ། །ལྟ་བ་གཟི་ཅན་ཡིན་པར་བཤད། །འགྲོ་བ་ཐམས་ཅད་འགུགས་བྱེད་པའོ། །ཞེས་བཤད་པ་དང་ཡི་གེ་ཛ་ལས་ཟླ་བ་དང་ཉི་མའི་མིག་སྔགས་པས་བསྒོམ་པར་བྱའོ། །ཡེ་ཤེས་ཀྱི་ཐིག་དེ་ཆུར་ནི་དཀྱིལ་འཁོར་གྱི་ཉིས་འགྱུར་ལ། སྦོམས་སུ་
སྒོའི་ཉི་ཤུ་ཆའི་ཚད་ནི་སྲད་བུ་དེ་ཟླུམ་པོར་བྱ་ཞིང་དྲི་དང་བདུད་རྩི་ལྔས་བྱུགས་ལ། ཡི་གེ་གསུམ་དང་སྤེལ་བའི་བདུད་རྩི་ཐབ་སྦྱོར་གྱི་སྔགས་ཀྱིས་བསྲུངས་ནས། བྷ་ག་བཱན་པྲ་ཡཙྪ་ཤ་ཤྭད་ཏཾ་སཱུ་ཏྲཾ་སྭ་ཙཀྲ་སཱུ་ཏྲ་ན་ཡ། ཞེས་བྱ་བ་ལ་སོགས་པའི་ཚུལ་འདིས་རྣམ་པར་སྣང་མཛད་ལ་སོགས་པ་ནས་
མི་བསྐྱོད་པའི་བར་གྱི་དེ་བཞིན་གཤེགས་པ་རྣམས་ལ་གསོལ་བ་གདབ་བོ། །དེ་ནས་ཨ་ནྱོ྅་ནྱ་ཨ་ནུ་ག་ཏ། སརྦྦ་དྷརྨྨ་སྥ་ར་སྥ་ར་སརྦྦ་དྷརྨྨ། ཨ་ཏྱནྟ་ཨ་ནུ་པྲ་བིཥྚ་སརྦྦ་དྷརྨྨ། ཞེས་བྱ་བས་ཐིག་འཛིན་པའི་སློབ་མ་བདུད་རྩི་ཐབ་སྦྱོར་གྱི་སྦྱོར་བ་དང་ལྡན་པས་ལྷན་ཅིག་བསྒྲིལ་བར་བྱའོ། །དེའི་
རྗེས་ལ་སློབ་དཔོན་ནུབ་སྒོར་འདུག་སྟེ། བདག་ཉིད་ཛཿཛཿཛཿཞེས་བྱ་བ་ཟློས་ཤིང་ཁུ་ཚུར་གཡོན་པས་ཐིག་བཟུང་ལ་ལྟེ་བར་བཞག་སྟེ། སློབ་མས་ཤར་ཕྱོགས་ཀྱི་སྒོར་གནས་པ་ལ་ཛཿགསུམ་གྱིས་དེའི་ལག་ཏུ་བཏང་ལ། ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུྃ། ནམ་མཁའ་གང་བའི་
བདེ་གཤེགས་རྣམས། །ཁྱེད་ཀྱི་འགྲོ་དོན་མཛད་དུས་ལགས། །ཐིག་གི་སྒྲ་ཡིས་བསྐུལ་ནས་ནི། །དེ་རྣམས་འདིར་ནི་གཤེགས་སུ་གསོལ། །ཞེས་བྱ་བའི་སྔགས་བརྗོད་དེ། ནམ་མཁར་ཐིག་གདབ་ལ། ཐིག་གི་སྒྲ་དེས་དེ་བཞིན་གཤེགས་པ་རྣམས་བསྐུལ་ནས་བྱོན་
པར་བསམ་པར་བྱའོ། །དེའི་རྗེས་ལ་བསྐོར་ཕྱོགས་སུ་སོང་སྟེ། ལྷོ་ཕྱོགས་སུ་སོང་ལ་དེར་འདུག་སྟེ། སློབ་མ་བྱང་ཕྱོགས་སུ་འདུག་པ་དང་ལྷན་ཅིག་ཐིག་གདབ་བོ། །འོག་ཏུ་ཐིག་གདབ་པ་ལ་ཡང་རིམ་པ་དེ་ཉིད་ཡིན་ནོ། །དེ་ནས་མེའི་ཕྱོགས་སུ་སོང་སྟེ། དེ་བཞིན་དུ་
འདུག་སྟེ། བྱང་ཕྱོགས་སུ་བལྟས་ལ། སློབ་མ་དབང་ལྡན་གྱི་ཕྱོགས་སུ་འདུག་སྟེ། ལྷོ་ཕྱོགས་སུ་བལྟས་པ་དང་ལྷན་ཅིག་ཤར་གྱི་ཆའི་ཐིག་གདབ་པར་བྱའོ། །དེ་ནས་རླུང་གི་ཕྱོགས་སུ་སོང་ལ་ལྷོ་ཕྱོགས་སུ་བལྟས་ཏེ། སློབ་མ་བདེན་བྲལ་གྱི་ཕྱོགས་སུ་གནས་པ་དང་ལྷན་

44-1-120b

ཅིག་ནུབ་ཀྱི་ཆའི་ཐིག་གདབ་བོ། །ཡང་བསྐོར་ཕྱོགས་སུ་སོང་སྟེ། རླུང་གི་ཕྱོགས་སུ་འདུག་ལ་སློབ་མ་དབང་ལྡན་གྱི་ཕྱོགས་སུ་འདུག་པ་དང་ལྷན་ཅིག་བྱང་གི་ཆར་ཐིག་གདབ་བོ། །དེའི་རྗེས་ལ་དེ་བཞིན་དུ་མེའི་ཕྱོགས་སུ་སོང་སྟེ། དེ་ཉིད་དུ་འདུག་ལ་སློབ་མ་བདེན་བྲལ་གྱི་ཕྱོགས་
སུ་འདུག་པ་དང་ལྷན་ཅིག་ལྷོའི་ཆའི་ཐིག་གདབ་བོ། །དེ་ཉིད་དུ་འདུག་ལ་སློབ་མ་རླུང་གི་ཕྱོགས་སུ་འདུག་པ་དང་ལྷན་ཅིག་མཚམས་ཀྱི་ཐིག་གདབ་བོ། །དེ་ནས་བདེན་བྲལ་གྱི་ཕྱོགས་སུ་སོང་ལ་ལྷན་ཅིག་བྱང་གི་མཚམས་ཀྱི་ཐིག་གདབ་བོ། །དེ་ཉིད་དུ་འདུག་ལ་སློབ་མ་རླུང་གི་
ཕྱོགས་སུ་འདུག་པ་དང་ལྷན་ཅིག་མཚམས་ཀྱི་ཐིག་གདབ་བོ། །དེ་ནས་བདེན་བྲལ་གྱི་ཕྱོགས་སུ་སོང་ལ། སློབ་མ་དབང་ལྡན་གྱི་ཕྱོགས་སུ་སོང་བ་དང་ལྷན་ཅིག་བྱང་གི་མཚམས་ཀྱི་ཐིག་གདབ་བོ། །ཐིག་དེ་ཉིས་ལྡབ་ཏུ་བྱས་ལ་སློབ་དཔོན་དཀྱིལ་འཁོར་གྱི་དབུས་སུ་འདུག་པས་
བཟུང་ལ། སློབ་མས་ཐིག་གི་ཕྱོགས་གཅིག་ནས་བཟུང་སྟེ། དབང་ལྡན་གྱི་ཕྱོགས་ནས་བརྩམས་ནས་གཡས་ཕྱོགས་ནས་བསྐོར་ཏེ་དེ་དང་ལྷན་ཅིག་རྡོ་རྗེ་ལྟ་བུའི་ཕྱིའི་ཐིག་གདབ་བོ། །སྲད་བུ་དེ་ཉིད་ཡང་ཉིས་ལྡབ་ཏུ་བྱས་ལ་སློབ་དཔོན་རང་ཉིད་ཀྱིས་དབང་ལྡན་གྱི་ཕྱོགས་ནས་བརྩམས་
ཏེ། བསྐོར་ཕྱོགས་སུ་ནང་གི་འཁོར་ལོའི་ཐིག་གདབ་བོ། །དེ་ལྟར་ཐིག་བཏབ་ནས། ཁྲོ་གཉེར་གཉེར་མ་རབ་བསྡུས་པ། །ཁྲོ་བའི་མིག་ནི་བཙུམ་པ་སྟེ། །ཞེས་བྱ་བའི་ཁྲོ་བའི་ལྟ་བ་དང་། མཉམ་པར་གཞག་པའི་ས་ཧྲི་ཞེས་བརྗོད་དེ་སྒོ་བཞི་དབྱེ་བར་བྱའོ། །དེ་ནས་དེ་ཁོ་ན་ཉིད་
བསྡུས་པ་ལས། དེ་ནས་དབུས་སུ་འདུག་ནས་ནི། །རྡོ་རྗེ་སློབ་དཔོན་མཉམ་གཞག་པས། །རྡོ་རྗེའི་སྒོ་ནི་རྣམ་བཞིའོ། །ཡིད་ཀྱིས་སུ་ནི་དབྱེ་བས་བྱ། །ཞེས་གསུངས་པ་ཡིན་ནོ། །དེ་ནས་ཚོན་སྣ་ལྔ་པའི་སྲད་བུ་དེ་ཡི་གེ་མུཿདང་། ཡི་གེ་གསུམ་གྱིས་གཤེགས་སུ་གསོལ་ལ་
གནས་སུ་གཞག་པར་བྱའོ། །ཡེ་ཤེས་ཀྱི་ཐིག་གི་ཆོ་གའི་རིམ་པའོ། །དེ་ནས་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ལྔའི་ཁ་དོག་ཅན་གྱི་ཚོན་རྩི་མུ་ཏིག་གི་ཕྱེ་མ་ལ་སོགས་པའམ། དེ་མ་འབྱོར་ན་འབྲས་སཱ་ལུའི་ཕྱེ་མ་ལེགས་པར་བཏགས་ཤིང་། ལེགས་པར་

44-1-121a

བརྡུངས་པ་ཅི་རྙེད་པའི་སྣོད་དུ་གཞག་སྟེ། འདི་དག་ལ་ཡང་སྔ་མ་བཞིན་དུ་བལྟས་ཏེ། རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་ཚོན་གྱི་མདོག་ཅན་ཇི་ལྟ་བར་བཅུག་སྟེ། ཨོཾ་བཛྲ་ཙི་ཏྲ་ས་མ་ཡ་ཧཱུྃ། ཞེས་བྱ་བ་འདི་བཟླ་བར་བྱའོ། །དེའི་རྗེས་ལ་
དཀྱིལ་འཁོར་ན་གནས་པའི་ཡེ་ཤེས་ཀྱི་ཐིག་ཡིད་ཀྱིས་བཏེག་སྟེ། བཛྲ་བེ་ག་ཞེས་བྱ་བའི་སྔགས་བརྗོད་ལ་ནང་དུ་ཞུགས་ཏེ། འདི་ནི་ཆོས་དབྱིངས་དག་པ་སྟེ། །སེམས་ཅན་ཁམས་ནི་དགྲོལ་བྱེད་པ། །རྣམ་སྣང་རྒྱལ་པོ་རང་ཉིད་ནི། །དེ་བཞིན་གཤེགས་པ་ཀུན་གྱི་གནས། །ཞེས་
བརྗོད་ལ། ཚོན་དེ་རེ་རེ་ཞིང་གཡོན་པའི་ཁུ་ཚུར་གྱིས་བླངས་ལ། དབང་ལྡན་གྱི་ཕྱོགས་ནས་བརྩམས་ཏེ། ཕྱི་རོལ་ནས་དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། ནག་པོ་ཕན་ཚུན་མ་རེག་ཅིང་མ་ཡོ་བར་སློབ་དཔོན་གྱིས་དགྱེ་བར་བྱའོ། །དེ་ཡང་གསང་བའི་
ཚོགས་མཐོན་པོ་ལས། དཀར་པོ་རྡོ་རྗེའི་རྩེ་རང་བཞིན། །གཞན་དག་གསེར་ལ་དམིགས་པ་སྟེ། །པདྨ་རཱ་གའི་རང་བཞིན་རྩེ། །དེ་བཞིན་གཞན་དག་མརྒད་དོ། །ནག་པོ་ནང་དུ་ཤེས་བྱས་ཏེ། །འདི་ནི་ཚོན་གྱི་རིམ་པར་བཤད། །ཅེས་གསུངས་པ་ཡིན་ནོ། །དེ་ནས་དམ་ཚིག་ལས་ཉམས་
པ་རྣམས་སྤང་བར་བྱ་བའི་ཕྱིར། རི་མོའི་བློས་ནམ་མཁར་བཏེག་སྟེ། སླར་ཡང་བཛྲ་བེ་ག་ཞེས་བྱ་བའི་སྔགས་བརྗོད་ལ་སློབ་དཔོན་ཕྱིར་འབྱུང་བར་བྱའོ། །དེ་ཡང་དེ་ཁོ་ན་ཉིད་བསྡུས་པ་ལས། ཡིད་ཀྱིས་རི་མོ་བཏེག་ནས་ནི། །རྡོ་རྗེ་སྲད་བུའམ་གཞན་ཡང་རུང་། །ཕྱིར་རུང་ནང་དུ་
ཞུགས་ཀྱང་ནི། །དམ་ཚིག་འགལ་བར་མི་འགྱུར་རོ། །ཞེས་གསུངས་པ་ཡིན་ནོ། །དེའི་འོག་ཏུ་སློབ་དཔོན་ཀྱང་སློབ་དཔོན་འཇུག་པ་དང་འབྱུང་བའི་རིམ་པས་དགྱེ་བར་བྱའོ། །ཚོན་དགྱེ་བའི་ཆོ་གའི་རིམ་པའོ། །མི་བསྐྱོད་པ་བདག་པོར་གྱུར་པའི་དུས་སུ་ནི། ཤར་ཕྱོགས་ཀྱི་སའི་ཆ་
ནི་དཀར་པོའོ། །ལྷོ་ཕྱོགས་ཀྱི་སའི་ཆ་ནི་སེར་པོའོ། །ནུབ་ཕྱོགས་ཀྱི་སའི་ཆ་ནི་དམར་པོའོ། །བྱང་ཕྱོགས་ཀྱི་སའི་ཆ་ནི་ལྗང་གུའོ། །རྡོ་རྗེའི་ཐིག་གི་མཐར་ཐུག་པའི་ནང་སྙིང་པོའི་དཀྱིལ་འཁོར་དབུས་མ་ནི་སྔོན་པོའོ། །དེར་དབུས་མ་ནི་སྣ་ཚོགས་པདྨ་དང་ཉི་མའི་དཀྱིལ་འཁོར་ལ་

44-1-121b

གནས་པའི་རྡོ་རྗེ་ཁ་གྱེས་པ་སྔོན་པོ་འབར་བ་དང་བཅས་པ་བྲི་བར་བྱའོ། །ཤར་ཕྱོགས་ཀྱི་ཆར་ནི་སྣ་ཚོགས་པདྨའི་ཟླ་བའི་དཀྱིལ་འཁོར་ལ་གནས་པའི་འཁོར་ལོའོ། །ལྷོ་དང་ནུབ་དང་བྱང་གི་ཕྱོགས་སུ་སྣ་ཚོགས་པདྨ་ལ་གནས་པའི་ཉི་མའི་དཀྱིལ་འཁོར་གྱི་སྟེང་དུ་རིན་པོ་ཆེ་ཆ་དགུ་སྔོན་པོ་དང་
པདྨ་དམར་པོ་དང་། རལ་གྲི་སྟེ་མཚན་མ་འདི་དག་བྲི་བར་བྱའོ། །མེ་དང་བདེན་བྲལ་དང་རླུང་དང་དབང་ལྡན་གྱི་མཚམས་རྣམས་སུ་སྣ་ཚོགས་པདྨ་ལ་གནས་པའི་ཟླ་བའི་དཀྱིལ་འཁོར་ལ་མིག་འབྲས་སྔོ་བའི་སྤྱན་དང་། རྡོ་རྗེ་སྔོན་པོ་དང་། པདྨ་དམར་པོ་ནི་ཁ་བྱེ་བ་སྡོང་བུ་དང་བཅས་པ་དང་། ཨུཏྤལ་
སྔོན་པོ་འདྲིའམ་འདྲིར་གཞུག་གོ། །ཕྱིའི་དཀྱིལ་འཁོར་གྱི་མེ་ལ་སོགས་པའི་མཚམས་རྣམས་དང་། ཤར་སྒོའི་ངོས་གཉིས་སུ་སྣ་ཚོགས་པདྨ་ལ་གནས་པའི་ཟླ་བའི་དཀྱིལ་འཁོར་གྱི་སྟེང་དུ། མེ་ལོང་དང་། པི་ཝང་དང་། དུང་ཆོས་དང་། པདྨའི་སྣོད་དང་། རས་སྣ་ཚོགས་དང་། ཆོས་
འབྱུང་བའི་ཕྱག་རྒྱ་བྲིའོ། །ཤར་སྒོར་སྣ་ཚོགས་པདྨ་ལ་གནས་པའི་ཉི་མའི་དཀྱིལ་འཁོར་ལ་ཐོ་བ། དེ་བཞིན་དུ་ལྷོ་སྒོར་དབྱིག་པ། ནུབ་སྒོར་པདྨ་དམར་པོ། བྱང་སྒོར་རྡོ་རྗེ་བྲི་བར་བྱའོ། །ཚོན་དགྱེ་ཟིན་པ་དང་ཁྲུས་བྱས་ལ་གོས་གཙང་མ་གོན་ཏེ། ཡང་ཕྱི་དྲོའི་དུས་སུ་དཀྱིལ་འཁོར་གྱི་ཁང་
པར་ཞུགས་ལ། ཚོན་ལྷག་མ་དེ་རྣམས་དེ་ཁོ་ན་ཉིད་གསུམ་ཡི་གེ་མུཿའི་མཐའ་དང་བཅས་པས་གཤེགས་སུ་གསོལ། ཚོན་གྱི་སྣོད་སྐྱེ་བོ་མེད་པའི་ས་ཕྱོགས་སུ་བཞག་ནས། དཀྱིལ་འཁོར་གྱི་ཕྱི་རིམ་བའི་ལྕི་བས་བྱུགས་ལ་སྤོས་ཆུ་དྲི་ཞིམ་པོས་ཀྱང་བྱུགས་ཏེ་དེ་ཉིད་དུ་མེ་ཏོག་སིལ་མ་བཀྲམ་
པར་བྱའོ། །དེའི་རྗེས་ལ་གདུགས་དང་རྒྱལ་མཚན་དང་བ་དན་ལ་སོགས་པའི་ཡོ་བྱད་བྲི་བ་དང་། བུམ་པ་དགོད་པར་བྱས་ཏེ། རྣམ་པར་རྒྱལ་བའི་བུམ་པ་ནི་དཀྱིལ་འཁོར་གྱི་ཕྱི་རོལ་གཙོ་བོའི་གཡས་ཀྱི་ཆར་གཞག་གོ། །བུམ་པ་གཞན་རྣམས་ནི་འབར་བའི་ཕྲེང་བའི་ཕྱི་རོལ་གྱི་གྲྭ་བཞིར་གཞག་གོ། །ཡང་
བུམ་པ་གཞན་ཞིག་ལ་བདུད་རྩི་ཐབ་སྦྱོར་གྱི་སྔགས་བཟླས་ལ་ཀུ་ཤའི་ཁྲེས་ཆུང་དང་བཅས་པ་ནི་བསང་གཏོར་བྱ་བའི་ཕྱིར་དཀྱིལ་འཁོར་གྱི་སྒོ་ལོགས་སུ་གཞག་པར་བྱའོ། །བུམ་པ་དེ་རྣམས་ལས་ཆུ་ཉུང་ཟད་ཉུང་ཟད་བླངས་ཏེ། མཆོད་ཡོན་གྱི་སྣོད་དུ་བླུགས་ལ། མཆོད་ཡོན་གྱི་སྣོད་དེ་ཡང་བདག་དང་སློབ་མ་

44-1-122a

དབང་བསྐུར་བར་བྱ་བའི་དོན་དུ་རྣམ་པར་རྒྱལ་བའི་བུམ་པའི་ཁར་གཞག་གོ། །དེ་ནས་མཆོད་པ་རྒྱ་ཆེན་པོ་བྱས་ལ་ཕྱོགས་མཚམས་བཞིར་མར་མེ་བརྒྱད་གཞག་པ་དང་། དེ་ནས་ལྷག་པའི་སྤོས་སྣོད་སྤོས་དྲི་ཞིམ་པ་དང་བཅས་པར་གཞག་པར་བྱའོ། །དེ་ནས་སློབ་དཔོན་ཆོ་
ག་བཞིན་དུ་རྒྱན་ཐམས་ཅད་ཀྱིས་བརྒྱན་ལ། དཀྱིལ་འཁོར་གྱི་ཤར་གྱི་སྒོར་སྟན་ནང་ཚངས་ཅན་ལ་ལྷ་ལ་མངོན་པར་ཕྱོགས་པས་འདུག་སྟེ། དཀྱིལ་འཁོར་བསྒྲུབ་པ་བརྩམ་པར་བྱའོ། །དེའི་རིམ་པ་ནི་འདི་ཡིན་ནོ། །རྒྱུད་ལས་ཇི་ལྟར་བཤད་པ་ལྟ་བུའི་ཕྱིའི་རིག་པ་དང་ལྷན་ཅིག་དཀྱིལ་འཁོར་
བསྒྲུབ་པར་བྱའོ། །དེ་མེད་ན་ཡིད་ཀྱིས་བསྒོམ་པར་བྱའོ། །དེ་ཡང་དང་པོར་རེ་ཞིག་སློབ་དཔོན་གྱི་ཏིང་ངེ་འཛིན་གསུམ་གྱི་སྦྱོར་བ་དང་ལྡན་པས་རང་གི་རྡོ་རྗེ་དང་། ཆུ་སྐྱེས་ཡང་དག་པར་སྦྱོར་བའི་སྒྲས་ནམ་མཁའ་ལ་བཞུགས་པའི་དེ་བཞིན་གཤེགས་པ་རྣམས་བློས་རང་གི་ནང་དུ་བཅུག་
ནས་སླར་ཡང་དཀྱིལ་འཁོར་གྱི་འཁོར་ལོ་ལྟ་བུར་རང་གི་ལུས་ལས་བྱུང་ནས་ནམ་མཁའ་ལ་ཁྱབ་པར་སྤྲོ་བར་བྱའོ། །དེ་ནས་སླར་ཡང་བཀུག་ལ་དཀྱིལ་འཁོར་གྱི་ངོས་སུ་གཞག་པར་བྱའོ། །དེ་ནས་གཤིན་རྗེ་གཤིད་ལ་སོགས་པས་བགེགས་བསྐྲད་ལ། རྡོ་རྗེ་ར་བ་ལ་སོགས་པ་
རྣམ་པར་བསྒོམས་ནས། དེའི་རྗེས་ལ་དཀྱིལ་འཁོར་གྱི་ངོས་ལ་བཞུགས་པ་ཡི་གེ་ཛཿས་དགུག་པ་དང་། ཧཱུྃ་གིས་དཀྱིལ་འཁོར་གྱི་དབུས་སུ་རང་རང་གི་མཚན་མར་གཞུག་པ་དང་། དེ་བཞིན་དུ་བཾ་གིས་བརྟན་པར་བྱ་བ་དང་། ཧོཿས་མཉེས་པར་བྱས་ནས་ཉེ་བར་བསྒྲུབ་པ་ལ་སོགས་
པས་བྱིན་གྱིས་བརླབ་པར་བསམ་པར་བྱའོ། །དེའི་རྗེས་ལ་མཆོད་ཡོན་དང་མེ་ཏོག་ལ་སོགས་པའི་མཆོད་པ་ཡི་གེ་གསུམ་གྱིས་མངོན་པར་བཟླས་པ་དང་། རས་ཟུང་རེ་དེ་བཞིན་དུ་མངོན་པར་བཟླས་པ་ལྷ་རེ་རེ་ཞིང་དབུལ་བ་དང་། ནང་གི་མཆོད་པ་ཡང་བྱས་ནས། རྡོ་རྗེ་དྲིལ་བུ་དཀྲོལ་
ཞིང་བསྟོད་པ་བྱ་སྟེ། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁས་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་དབྱིངས་ལ་ཕྱག་འཚལ་ལོ། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་ཆེན་པོ། །རང་བཞིན་འོད་གསལ་མཆོག་གི་མཆོག །སྟོན་

44-1-122b

པ་རྡོ་རྗེ་ཁྱོད་ཕྱག་འཚལ། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མ་མེད། །རང་བཞིན་དག་པ་གོས་པ་མེད། །རྡོ་རྗེ་སྐུ་ལ་ཕྱག་འཚལ་ལོ། །རྡོ་རྗེ་མི་འཆི་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །རྡོ་རྗེ་གསུང་ལ་
ཕྱག་འཚལ་ལོ། །དོན་ཡོད་རྡོ་རྗེ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །རང་བཞིན་དག་པ་ཉིད་ལས་བྱུང་། །རྡོ་རྗེ་སེམས་དཔའ་ཕྱག་འཚལ་ལོ། །དེ་ལྟར་བསྟོད་པ་བྱས་ནས་དཀྱིལ་འཁོར་གྱི་འཁོར་ལོ་དང་བདག་ཉིད་བདུད་རྩི་མྱང་བར་བྱའོ། །དེ་ནས་
སྒྲུབ་པའི་གྲོགས་མཆོག་དཀྱིལ་འཁོར་དུ་བཞག་ལ་ཕྱིར་བྱུང་སྟེ། བཟའ་བ་དང་བཅའ་བ་སྣ་ཚོགས་ཉ་དང་ཤ་ལ་སོགས་པ་དང་བཅས་པའི་གཏོར་མ་རྒྱ་ཆེན་པོ་རང་རང་གི་ཕྱོགས་ཀྱི་གཏོར་མའི་སྔགས་མངོན་པར་བཟླས་ལ་ཕྱོགས་སྐྱོང་རྣམས་ལ་ཕུལ་ནས། ཡང་དཀྱིལ་འཁོར་གྱི་ཁང་
པར་ཞུགས་ཏེ། རྡོ་རྗེ་ཧཱུྃ་མཛད་ཀྱི་སྦྱོར་བ་དང་ལྡན་པས་དཀྱིལ་འཁོར་ལ་ཕྱག་བྱས་ལ། རྡོ་རྗེ་དྲིལ་བུ་དཀྲོལ་ཞིང་སློབ་མ་དང་ལྷན་ཅིག་བསྐོར་བ་ལན་གསུམ་བྱའོ། །ཡང་ཕྱིར་བྱུང་ལ་ནང་པར་གྱི་དུས་སུ་རྒྱས་པའི་སྦྱིན་སྲེག་བྱ་སྟེ། དེ་བཞིན་ནང་པར་རྒྱས་པར་བྱ། །ཞེས་བཤད་པའི་ཕྱིར་རོ། །
སླར་ཡང་ཞུགས་ཏེ་འོག་ནས་བཤད་པའི་ཆོ་གས་རྗེས་སུ་གནང་བའི་དབང་བསྐུར་བའི་མཐར་ཐུག་པའི་འཇུག་པའི་ཆོ་ག་བཅོམ་ལྡན་འདས་བདག་པོ་ལས་ཐོབ་པར་བློས་བསམ་པར་བྱའོ། །འདོད་ཆགས་ཆེ་ལས་བྱུང་དེ་ཉིད། །འཁོར་ལོ་གཟུགས་བརྙན་ལྟ་བུར་ནི། །ཤེས་པར་བྱས་
ལ་དཀྱིལ་འཁོར་དུ། །སློབ་མ་གཞུག་པར་བྱ་བའི་ཕྱིར། །བཅོམ་ལྡན་བདག་པོར་གསོལ་བ་གདབ་པར་བྱའོ། །ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །རྡོ་རྗེ་སེམས་དཔའ་ཆེ་རང་བཞིན། །རྡོ་རྗེ་སེམས་དཔའ་དེང་གྲུབ་མཛོད། །ཀུན་མཆོག་
དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་གྲུབ་མཛོད། །ཉེས་པ་མི་མངའ་རྟག་པ་ཁྱོད། །འདོད་ཆགས་ཀུན་གྱི་རྗེས་ཆགས་པ། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་ཀྱིས་གྲུབ་མཛོད། །

44-1-123a

ཤིན་ཏུ་དག་པ་ཀུན་གྱི་མཆོག །གདོད་ནས་གྲོལ་བ་དེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །བྱང་ཆུབ་སེམས་དཔའ་བདག་གྲུབ་མཛོད། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོའི་ཕྱག་རྒྱ་མཆོག །གྲུབ་པའི་རྡོ་རྗེ་ཆེར་བསྟོད་
པ། །རྡོ་རྗེ་སྙེམས་བདག་བདག་མཛོད་ཅིག །སེམས་ཅན་ཀུན་གྱི་ཡིད་ཁྱབ་ཅིང་། །སེམས་ཅན་ཀུན་གྱི་སྙིང་ལ་ཞུགས། །སེམས་ཅན་ཀུན་གྱི་ཡབ་གྱུར་ཉིད། །འདོད་ཆགས་དམ་ཚིག་མཆོག་གྱུར་པའོ། །བདེན་པ་གང་གིས་ཡེ་ཤེས་མཆོག །ཤེས་རབ་ཐབས་བདག་དཀྱིལ་
འཁོར་ཡིན། །བདེན་པ་དེ་ཡིས་མགོན་བདག་ལ། །ཁྱོད་ཀྱི་འདོད་པ་རབ་རྫོགས་ཤོག །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་བྱུང་། །དེ་བཞིན་ཉིད་ལས་ངེས་པར་སྐྱེས། །བདེན་
པ་འདི་ཡིས་དཀྱིལ་འཁོར་དུ། །གཟུགས་བརྙན་གསལ་བར་སློབ་མ་རྣམས། །ཀུན་གྱིས་དྲི་མ་མེད་མཐོང་ཤོག །ཅེས་བདེན་པ་བསྒྲག་པར་བྱའོ། །སློབ་མ་རེ་རེ་ཞིང་ཡང་རྒྱན་ཐམས་ཅད་ཀྱིས་བརྒྱན་ལ་གོས་དམར་པོ་བསྐོན་པ་དང་། ཡི་གེ་གསུམ་གྱིས་བྱིན་གྱིས་བརླབས་པའི་
དར་དམར་པོས་གདོང་གཡོགས་ཤིང་། མགོ་ལ་མེ་ཏོག་གི་ཕྲེང་བ་དཀྲིས་པ་ལག་ན་མེ་ཏོག་གི་ཕྲེང་བ་ཐོགས་པ་ཡོལ་བའི་བར་དུ་བཞག་ལ་དཀྱིལ་འཁོར་གྱི་ཁང་པའི་སྒོར་གཞག་པའི་བུམ་པའི་ཆུས་བསང་གཏོར་བྱས་ནས། སློབ་མ་ལ་འདུག་པ་ཁྱོད་སུ་ཡིན་ཞེས་དྲི་བར་བྱའོ། །སློབ་
མས་ཀྱང་སྡུག་པ་བདག་ནི་སྐལ་བ་བཟང་པོའོ་ཞེས་བརྗོད་པར་བྱའོ། །དེ་ནས་སློབ་མ་དེའི་སྙིང་གར་རྡོ་རྗེ་བཞག་ནས་འོག་ནས་བཤད་པའི་རྣལ་འབྱོར་གྱི་སེམས་བསྐྱེད་པར་བྱ་སྟེ། ཨོཾ་སརྦྦ་ཡོ་ག་ཙིཏྟ་ཨུཏྤཱ་ད་ཡཱ་མི། སུ་ར་ཏེ་ས་མ་ཡ་སྟྭཾ་ཧོ། །སིདྡྷི་བཛྲ་ཡ་ཐཱ་སུ་ཁཾ། དེང་ཁྱོད་དེ་བཞིན་གཤེགས་པ་
ཐམས་ཅད་ཀྱིས་བྱིན་གྱིས་རླབ་ཀྱི། དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་འདི། ཁྱེད་ཀྱིས་དཀྱིལ་འཁོར་དུ་མ་ཞུགས་པ་རྣམས་ལ་སྨྲ་བར་མ་བྱེད་ཅིག །དད་པ་དང་མི་ལྡན་པ་རྣམས་ལ་ཡང་མ་ཡིན་ནོ་ཞེས་བརྗོད་པར་བྱའོ། །ཛཿཧཱུྃ་ཞེས་བརྗོད་པ་འདིས་ཀྱང་སློབ་

44-1-123b

དཔོན་གྱིས་སློབ་མ་དགུག་པ་དང་གཞུག་པར་བྱ་ཞིང་། ཨཱ་ཁཾ་བཱི་ར་ཧཱུྃ། ཞེས་བྱ་བའི་སྔགས་ཀྱང་བརྗོད་པར་བྱའོ། །དམ་ཚིག་གི་མཆོག་འཛིན་དུ་གཞུག་པར་བྱ་བའི་ཕྱིར་སློབ་མ་དེ་དཀྱིལ་འཁོར་གྱི་ཤར་སྒོའི་མདུན་དུ་བཞག་ལ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་
ཞུགས་ཀྱིས། ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། དེ་ལྟ་བུའི་ཡེ་ཤེས་བསྐྱེད་པར་བྱ་ཡི། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ལ་མ་སྨྲ་ཤིག །དམ་ཚིག་ཉམས་
པར་གྱུར་ཏ་རེ། །ཞེས་བརྗོད་ལ་སློབ་མའི་སྙིང་གར་རྡོ་རྗེ་བཞག་ལ། ཨོཾ་རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་འགྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་བརྗོད་ནས་བདུད་རྩི་ལྔ་པདྨའི་སྣོད་དུ་བཞག་སྟེ། ཡི་གེ་གསུམ་གྱིས་
བྱིན་གྱིས་བརླབས་ལ་ཇི་ལྟ་བ་བཞིན་དུ་བསྒོམས་ཏེ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་སྟེ། །རྡོ་རྗེ་བདུད་རྩིའི་ཆུ་འཐུངས་ཤིག །ཨོཾ་བཛྲ་ཨུ་ད་ཀ་ཋ་ཋ་ཋ། ཞེས་བརྗོད་དེ་སློབ་མ་འཐུང་དུ་གཞུག་གོ། །སློབ་དཔོན་གྱིས་སློབ་
མ་ལ་དམ་བཅའ་བ་བརྟན་པར་གྱུར་པའི་ཕྱིར། འོག་ནས་བཤད་པ་འདི་ཡང་བརྗོད་དོ། །དེང་ཕྱིན་ཆད་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱིས། ངས་འདི་བྱོས་ཤིག་ཅེས་བསྒོ་བ་གང་ཡིན་པ་དེ་ཡང་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་བ་མ་སྤངས་པར་ཁྱོད་དུས་བྱས་ནས་
དམྱལ་བར་ལྟུང་བར་གྱུར་ཏ་རེ་ཞེས་སྨྲས་ལ། དེ་ནས་སློབ་མ་ལ་འདི་སྐད་དུ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ་རྡོ་རྗེ་སེམས་དཔའ་དབབ་པར་གྱུར་ཅིག་ཅེས་སྨྲོས་ཤིག་ཅེས་བསྒོ་ལ། སློབ་མའི་སྙིང་གར་ལཾ་ལས་བྱུང་བའི་དབང་ཆེན་གྱི་དཀྱིལ་འཁོར་ཟུར་བཞི་པ་ཁ་དོག་སེར་
པོ་རྡོ་རྗེ་གསུམ་པས་མཚན་པ་དབུས་སུ་ཡི་གེ་ཧཱུྃ་གནས་པ་བསྒོམ་མོ། །ལྐོག་མར་ཡང་བཾ་ལས་བྱུང་བའི་ཆུའི་དཀྱིལ་འཁོར་ཟླུམ་པོ་ཁ་དོག་དཀར་པོ་བུམ་པས་མཚན་པ་ལ། དབུས་ན་ཡི་གེ་ཨ་གནས་པར་བསྒོམ་མོ། །སྤྱི་བོར་ཡི་གེ་ཡཾ་ལས་བྱུང་བའི་རླུང་གི་དཀྱིལ་འཁོར་གཞུའི་དབྱིབས་

44-1-124a

ཅན་ཁ་དོག་སྔོན་པོ་བ་དན་གྱིས་མཚན་པ་ལ་དབུས་སུ་ཡི་གེ་ཧ་གནས་པར་བསམ་མོ། །སློབ་མའི་རྐང་པའི་འོག་ཏུ་ཡང་ཡི་གེ་ཛྙཻཾ་འོད་ཟེར་འབར་བ་དང་བཅས་པ་བསམས་ལ། དེའི་ཡང་འོག་ཏུ་རླུང་གི་དཀྱིལ་འཁོར་གྱི་སྟེང་ན་རཾ་ལས་བྱུང་བའི་མེའི་དཀྱིལ་འཁོར་གྲུ་གསུམ་ཁ་དོག་
དམར་པོ་བསམས་ནས། དྲིལ་བུ་དཀྲོལ་ཞིང་། ཨཱ་བེ་ཤ་ཡ་སྟྭཾ་བྷ་ཡ། ར་ར་ར་ར། །ཙཱ་ལ་ཡ། ཧཱུྃ་ཧ་ཨ་ཛྷིཾ་ཞེས་བརྗོད་པར་བྱའོ། །སློབ་མ་དེའི་ལྕེ་ལ་ཡི་གེ་ཧྲཱིཿདམར་པོ་བསམས་ལ། དེ་འོད་དཔག་ཏུ་མེད་པའི་སྐུར་བསམས་ནས་བབས་པར་གྱུར་པ་དང་། འདོད་ཆགས་རྡོ་རྗེར་དེ་གནས་པ་
ལ། རྡོ་རྗེ་དགེ་བ་དང་མི་དགེ་བ་སྨྲོས་ཤིག་ཅེས་དྲིས་ནས། ཨོཾ་ཏིཥྛ་བཛྲ་ཞེས་བྱ་བ་འདིས་སློབ་མ་དེ་བརྟན་པར་བྱའོ། །དེ་ནས་པྲ་ཏཱིཙྪ་བཛྲ་ཧོཿ། ཞེས་བརྗོད་དེ། མེ་ཏོག་གི་ཕྲེང་བ་དཀྱིལ་འཁོར་དུ་དོར་ལ། དེ་བླངས་ནས་པྲ་ཏི་གྲྀཧྞ་ཏྭ་མི་མཾ་སཏྭ་མ་ཧཱ་བ་ལ། ཞེས་བྱ་བ་འདིས་སློབ་མའི་མགོ་
བོ་ལ་བཅིངས་ནས། དེའི་མིག་གཉིས་སུ་ཡི་གེ་ཨོཾ་འོད་ཟེར་དང་བཅས་པ་བསམས་ལ། རྡོ་རྗེ་སེམས་དཔའ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །མིག་ནི་ཐམས་ཅད་འབྱེད་མཛད་དེ། །རྡོ་རྗེའི་མིག་ནི་བླ་ན་མེད། །ཅེས་བྱ་བའི་ཚིགས་སུ་བཅད་པ་བརྗོད་ལ། གདོང་
གཡོགས་བཀྲོལ་ནས་དཀྱིལ་འཁོར་གྱི་བདག་པོ་ནས་བདུད་རྩི་ཐབ་སྦྱོར་གྱི་བར་དུ་བསྟན་པར་བྱའོ། །དེ་ལ་ལྷ་རྣམས་ཀྱི་མཚན་མའམ།  མཚན་མ་དང་ཉེ་བར་མེ་ཏོག་གི་ཕྲེང་བ་གང་དུ་བབས་པ་དེའི་རྣལ་འབྱོར་སྦྱིན་པར་བྱའོ། །ཡང་ན་སློབ་མ་གང་ལ་དད་པ་དེའི་སྦྱོར་བ་སྦྱིན་པར་བྱའོ།  །
སློབ་མ་གཞུག་པའི་ཆོ་གའོ། །ད་ནི་དབང་བསྐུར་བ་ཡིན་ཏེ། དེའི་རིམ་པ་ནི་འདི་ཡིན་ནོ། །སྔར་བཤད་པའི་རྣམ་པར་རྒྱལ་བའི་བུམ་པ་ལ་གཞག་པའི་སྣོད་ལ་གནས་པའི་ཆུས་སློབ་མ་རྣམ་པར་སྣང་མཛད་དུ་བསྒོམས་པའི་སྤྱི་བོར། ཨོཾ་བཛྲ་ཨ་བྷི་ཥིཉྩ། ཞེས་ཟློས་ཤིང་དབང་བསྐུར་
བ་ནི་ཆུའི་དབང་བསྐུར་བའོ། །གསེར་ལ་སོགས་པ་ཁམས་ཀྱི་རང་བཞིན་ལས་བྱས་པའམ། འབུར་དུ་བརྐོས་པ་འམ། རི་མོ་བྲིས་པའི་ཅོད་པན་དེ་མ་འབྱོར་ན་རས་ལས་བྱས་པ་དེའི་སྤྱི་བོར་བཞག་ལ། ལག་པས་འཛིན་དུ་བཅུག་ནས་སྤྱི་བོ་དེར་མི་བསྐྱོད་པ་བུམ་པ་བསྣམས་པ་

44-1-124b

བསམ་ཞིང་། རིག་པ་དུ་མས་ཀྱང་སློབ་མ་ལ་དབང་བསྐུར་བ་བསམ་པར་བྱ་བ་ནི་ཅོད་པན་གྱི་དབང་བསྐུར་བའོ། །དེའི་སྙིང་གར་རྡོ་རྗེ་བཞག་ལ་དེ་ཡང་ལག་པས་འཛིན་དུ་བཅུག་ནས་དེའི་སྤྱི་བོར་མི་བསྐྱོད་པ་བུམ་པ་བསྣམས་པ་བསམས་ནས། སངས་རྒྱས་ཀུན་གྱི་རྡོ་རྗེའི་དབང་། །དེ་རིང་
ཁྱོད་ལ་བསྐུར་བར་གྱུར། །སངས་རྒྱས་ཀུན་དུ་རབ་གྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང་། །ཞེས་བརྗོད་པ་ནི་རྡོ་རྗེའི་དབང་བསྐུར་བའོ། །དེའི་རང་གི་གདོད་མའི་ལྷའི་རྣལ་འབྱོར་བྱིན་ལ་སློབ་མ་རྡོ་རྗེ་དང་དྲིལ་བུ་དག་འཁྱུད་པའི་ཚུལ་གྱིས་འཛིན་དུ་བཅུག་ལ། ཨོཾ་བཛྲ་ཨ་དྷི་པ་ཏི་སྟཾ་
ཨ་བྷི་ཥིཉྩཱ་མི། ཏིཥྛ་བཛྲ་ས་མ་ཡ་སྟྭཾ། ཞེས་བརྗོད་པར་བྱ་སྟེ། འདི་ནི་བདག་པོའི་དབང་བསྐུར་བའོ། །དེའི་སྤྱི་བོར་ལག་པ་བཞག་ལ། ཨོཾ་བཛྲ་སཏྭ་སྟྭཾ་ཨ་བྷི་ཥིཉྩཱ་མི་བཛྲ་ནཱ་མཿཨ་བྷི་ཥེ་ཀ་ཏ། ཀྱེ་ཆེ་གེ་མོ་རྡོ་རྗེ་ཞེས་མིང་གི་དབང་བསྐུར་བས། རང་གི་དངོས་ཀུན་གང་གང་སྣང་། །གཙོ་བོ་
དེ་ནི་རྣམ་པར་རྒྱལ། །རང་བཞིན་གྱིས་ནི་ཆོས་དག་པས། །སངས་རྒྱས་ཡེ་ཤེས་གང་ཡིན་དེའོ། །ཞེས་སློབ་མ་ལ་བསྒོ་བར་བྱ་བ་ནི་མིང་གི་དབང་བསྐུར་བའོ། །རིག་པའི་དབང་བསྐུར་བའི་རྣམ་པར་དག་པ་ནི་འདི་ལྟ་སྟེ། ཆུའི་དབང་བསྐུར་བ་ནི། མེ་ལོང་ལྟ་བུའི་ཡེ་ཤེས་ཀྱི་བདག་ཉིད་ཅན།
མི་བསྐྱོད་པའི་རྣམ་པར་དག་པའོ། །ཅོད་པན་གྱི་དབང་བསྐུར་བ་ནི་མཉམ་པ་ཉིད་ཀྱི་ཡེ་ཤེས་ཀྱི་བདག་ཉིད་ཅན་རིན་ཆེན་འབྱུང་ལྡན་གྱིའོ། །རྡོ་རྗེའི་དབང་བསྐུར་བ་ནི་སོ་སོར་རྟོག་པའི་ཡེ་ཤེས་ཀྱི་བདག་ཉིད་ཅན་འོད་དཔག་ཏུ་མེད་པའིའོ། །བདག་པོའི་དབང་བསྐུར་བ་ནི་བྱ་བ་སྒྲུབ་པའི་ཡེ་ཤེས་
ཀྱི་བདག་ཉིད་ཅན་དོན་ཡོད་པར་གྲུབ་པའིའོ། །མིང་གི་དབང་བསྐུར་བ་ནི། མ་རིག་པ་འགགས་ནས་རིག་པའི་ཁམས་དང་། རིག་རྣམ་པར་དག་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་བདག་ཉིད་ཅན་རྣམ་པར་སྣང་མཛད་ཀྱི་རྣམ་པར་དག་པ་ཡིན་ནོ། །དེའི་རྗེས་ལ་གལ་ཏེ་ཕྱིར་མི་ལྡོག་པའི་དབང་བསྐུར་བར་
མི་བྱེད་ན། རིག་པའི་དབང་བསྐུར་བ་ལ་ཡང་རྡོ་རྗེའི་བརྟུལ་ཞུགས་དང་། ལུང་བསྟན་པ་དང་། དབུགས་དབྱུང་བ་སྦྱིན་པར་བྱའོ། །ཡང་ན་རིག་པའི་དབང་བསྐུར་བ་ཙམ་བྱེད་ན། དེའི་ཚེ་དེའི་རྗེས་ལ་རྡོ་རྗེའི་བརྟུལ་ཞུགས་ཁོ་ན་ཙམ་སྦྱིན་པར་བྱ་བ་ལ་ཕྱིར་མི་ལྡོག་པའི་དབང་བསྐུར་བའི་དུས་སུ་ནི་འདི་

44-1-125a

ལ་ལུང་བསྟན་སྦྱིན་པར་བྱའོ། །དེ་ལ་རྡོ་རྗེའི་བརྟུལ་ཞུགས་ནི་འདི་ཡིན་ཏེ། འདི་དེ་སངས་རྒྱས་ཐམས་ཅད་ཉིད། །རྡོ་རྗེ་སེམས་དཔའི་ལག་ན་གནས། །ཁྱོད་ཀྱིས་ཀྱང་ནི་རྟག་ཏུ་བཅང་། །རྡོ་རྗེ་སེམས་དཔའི་བརྟུལ་ཞུགས་བརྟན། །ཞེས་བརྗོད་ལ་རྡོ་རྗེ་སློབ་མ་
འཛིན་དུ་བཅུག་ལ་སྔགས་འདི་བརྗོད་དུ་གཞུག་སྟེ། ཨོཾ་སརྦྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་སྟྭཾ་དྷ་ར་ཡཱ་མི་ཧི་ཧི་ཧི་ཧི་ཧི་ཧཱུྃ། དེ་ནས། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །
ཅེས་བརྗོད་ཅིང་འདིས་རྡོ་རྗེ་འཛིན་དུ་གཞུག་གོ། །དེའི་རྗེས་ལ་རྡོ་རྗེ་དྲིལ་བུ་འཛིན་དུ་བཅུག་ལ། འདི་དེ་སངས་རྒྱས་ཐམས་ཅད་ཀྱི། །ཤེས་རབ་སྒྲ་ཡི་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་བཅང་། །བྱང་ཆུབ་མཆོག་ཏུ་རྒྱལ་བ་བཞེད། །ཅེས་བྱ་བ་འདིས་འཛིན་དུ་བཅུག་པ་སྟེ་
ཆོས་ཀྱི་ཚུལ་ཉིད་དུ་འདིས་དཀྲོལ་བར་བྱའོ། །སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །ངོ་བོ་ཉིད་དག་སེམས་དཔའ་མཆོག །སྲིད་པའི་མཆོག་ནི་བྱེད་པར་འགྱུར། །ཞེས་བྱ་བ་ནི་རྡོ་རྗེའི་བརྟུལ་ཞུགས་སོ། །དེ་ལ་ཁུ་ཚུར་གཡོན་པས་ཆོས་གོས་ཀྱི་མཐའ་
ནས་བཟུང་སྟེ། སྙིང་གར་བཞག་ལ་ལག་པ་གཡས་པ་མཆོག་སྦྱིན་པར་བྱས་ནས། སློབ་དཔོན་དང་དེ་བཞིན་གཤེགས་པས་ལུང་བསྟན་པར་བྱ་སྟེ། འདི་ནི་ངས་ཁྱོད་ལུང་བསྟན་པ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་མཆོག་གི་སྒྲུབ་པའི་ཕྱིར། །སྲིད་པའི་ངན་
འགྲོ་ཉིད་ལས་བཏོན། །ཀྱེ་དེ་བཞིན་གཤེགས་པ་རྡོ་རྗེ་ཆེ་གེ་མོ་ཞེས་བྱ་བ། སིདྡྷི་བྷུ་ར་བྷུ་བ་སྭཿ། འདི་ཡིས་དབང་བསྐུར་གྱུར་པ་ཡི། །སྔགས་པ་འགྲོ་བ་ཀུན་གྱི་བདག །བླ་ན་མེད་པའི་བྱང་ཆུབ་ཏུ། །བདེ་གཤེགས་ཀྱིས་ཀྱང་ལུང་བསྟན་མཛད། །ཅེས་བྱ་བའི་ཚིགས་སུ་བཅད་པ་ནི་
ལུང་བསྟན་པའོ། །དེ་ནས་དེར་ཚིགས་སུ་བཅད་པ་འདི་དག་གིས་དབུགས་དབྱུང་བ་སྦྱིན་པར་བྱ་སྟེ། མཆོག་གསང་དཀྱིལ་འཁོར་དམ་པ་ནི། །མཐོང་བ་དང་ནི་ཞུགས་གྱུར་པས། །སྡིག་པ་ཀུན་ལས་ངེས་གྲོལ་བར། །ཁྱེད་རྣམས་དེང་ཉིད་ལེགས་པར་གནས། །བདེ་ཆེན་

44-1-125b

ཐེག་པ་འདི་ལས་ནི། །སླར་ཁྱོད་འཆི་བ་ཡོད་མིན་ཏེ། །མི་ཚུགས་པ་དང་མི་སོད་པས། །ཅིས་ཀྱང་མི་འཇིགས་དགའ་བར་གྱིས། །སྲིད་པ་ཤིན་ཏུ་དག་པའི་ཕྱིར། །སྲིད་པའི་སྡུག་བསྔལ་ལས་ཁྱོད་འདས། །སྲིད་པ་ཤིན་ཏུ་གྲུབ་པའི་ཕྱིར། །སྟོན་པའི་མཆོག་ཏུ་གྱུར་
པ་ཡིན། །དམ་ཚིག་སྡོམ་པ་གྲུབ་པ་འདི། །རྟག་ཏུ་ཁྱོད་ཀྱིས་བསྲུང་བར་བྱ། །སངས་རྒྱས་ཀུན་གྱིས་མཐུན་པར་གསུངས། །དམ་པ་རྟག་པའི་བཀའ་ཡིན་ནོ། །གང་ཞིག་བསྐྱེད་པ་ཙམ་གྱིས་ནི། །སངས་རྒྱས་ཉིད་དུ་དོགས་མེད་པའི། །བྱང་ཆུབ་སེམས་ནི་བཏང་མི་བྱ། །
ཕྱག་ན་རྡོ་རྗེ་གང་ཡིན་པའོ། །དམ་པའི་ཆོས་ནི་མི་སྤང་ཞིང་། །ནམ་ཡང་དོར་བར་མི་བྱའོ། །མི་ཤེས་པའམ་རྨོངས་པ་ཡིས། །ཚུལ་ཆེན་བསྟན་པར་མི་བྱའོ། །བདག་ཉིད་ཡོངས་སུ་སྤངས་ནས་སུ། །དཀའ་ཐུབ་ཀྱིས་ནི་མ་གདུངས་ཤིང་། །ཅི་བདེ་བས་ནི་བདེ་བར་གཟུང་། །འདི་ནི་མ་བྱོན་
རྫོགས་སངས་རྒྱས། །རྡོ་རྗེ་དྲིལ་བུ་ཕྱག་རྒྱ་རྣམས། །ནམ་ཡང་ཡོངས་སུ་མི་དོར་ཞིང་། །སློབ་དཔོན་སྨད་པར་མི་བྱ་སྟེ། །འདི་ནི་སངས་རྒྱས་ཀུན་དང་འདྲ། །སངས་རྒྱས་ཀུན་མཚུངས་བློ་ཡིས་ནི། །སློབ་དཔོན་ལ་ནི་གང་སྨོད་པ། །དེ་ནི་སངས་རྒྱས་ཀུན་སྨད་པས། །རྟག་ཏུ་སྡུག་བསྔལ་
འཐོབ་འགྱུར་ཏེ། །རིམས་དང་དུག་དང་དབྱིག་དུག་ནད། །མཁའ་འགྲོ་རྣམས་ཀྱིས་གཙེས་པ་དང་། །གདོན་དང་ལོག་འདྲེན་གཏུམ་པོ་ཡིས། །བསད་ནས་སེམས་ཅན་དམྱལ་བར་འགྱུར། །དེ་བས་ནན་ཏན་ཐམས་ཅད་ཀྱིས། །རྡོ་རྗེ་སློབ་དཔོན་བློ་གྲོས་ཆེ། །དགེ་བ་རབ་ཏུ་མི་སྤྱོམས་
པ། །ནམ་ཡང་སྨད་པར་མི་བྱའོ། །བླ་མ་ལ་ནི་གུས་བཅས་ཡོན། །རྗེས་མཐུན་ཁྱོད་ཀྱིས་སྦྱིན་པར་བྱ། །དེས་ནི་རིམས་སོགས་གནོད་པ་རྣམས། །ཕྱིར་ཞིང་འབྱུང་བར་མི་འགྱུར་རོ། །རྟག་ཏུ་རང་གི་དམ་ཚིག་བསྲུངས། །རྟག་ཏུ་དེ་བཞིན་གཤེགས་པ་མཆོད། །རྟག་ཏུ་བླ་མ་ལ་ཡང་
འབུལ། །འདི་ནི་སངས་རྒྱས་ཀུན་དང་འདྲ། །དེ་བྱིན་སངས་རྒྱས་ཐམས་ཅད་ལ། །རྟག་ཏུ་བྱིན་པ་ཉིད་དུ་འགྱུར། །དེ་བྱིན་བསོད་ནམས་ཚོགས་ཡིན་ཏེ། །ཚོགས་ལས་དངོས་གྲུབ་མཆོག་ཏུ་འགྱུར། །གང་ཕྱིར་འདིར་ནི་ལེགས་གནས་པས། །དེང་ཁྱོད་སྐྱེ་བ་འབྲས་བུར་བཅས། །

44-1-126a

དམ་ཚིག་ལྷ་རྣམས་ཀུན་མཉམ་པར། །དེང་ཁྱོད་གྱུར་པར་ཐེ་ཚོམ་མེད། །སངས་རྒྱས་རྡོ་རྗེ་འཛིན་བཅས་པ། །ཀུན་གྱིས་དེང་ཁྱོད་དབང་བསྐུར་བས། །ཁམས་གསུམ་གྱི་ནི་རྒྱལ་པོ་ཆེ། །རྒྱལ་པོའི་བདག་པོར་བརྟན་པ་ཡིན། །དེང་ནི་བདུད་ལས་རྣམ་རྒྱལ་ཏེ། །
གྲོང་ཁྱེར་མཆོག་ཏུ་རབ་ཞུགས་པ། །ཁྱེད་རྣམས་ཀྱིས་ནི་སངས་རྒྱས་ཉིད། །དེ་ཉིད་ཐོབ་པར་ཐེ་ཚོམ་མེད། །དེ་ལྟར་ཡིད་ནི་རབ་དང་རྡོ་རྗེ་ཉིད་དུ་གྱིས། །རང་གི་དམ་ཚིག་མི་ཟད་བདེ་བསྐྱེད་བརྟེན་པར་གྱིས། །དེང་ནི་འགྲོ་ལ་མྱུར་བདེ་རྡོ་རྗེ་སེམས་དཔའ་དང་། །རབ་ཏུ་མཉམ་ཞིང་རྟག་
པ་ཉིད་དུ་རྟོགས་པར་འགྱུར། །དེ་ནས་དེའི་རྗེས་ལ་ཚིགས་སུ་བཅད་པ་འདི་དག་གིས་ཆོས་བཤད་པར་བྱ་སྟེ། སྙིང་པོ་བསྙེན་པ་སོགས་བཤད་པས། །ཕྱག་རྒྱ་ཆེན་པོར་བྱིན་བརླབས་ལ། །དམ་ཚིག་འདོད་པའི་གཟུགས་སོགས་ཀྱིས། །མ་ཆགས་གསང་སྔགས་ཡང་དག་
བཟླ། །རང་རིག་པ་ཡི་ངོ་བོ་ཉིད། །ཕྱོགས་བཅུར་དུས་གསུམ་བཞུགས་པ་སྟེ། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །དཀའ་ཐུབ་སྡོམ་པ་མི་ཟད་པ། །བརྟེན་པས་འགྲུབ་པར་མི་འགྱུར་གྱི། །སྐུ་གསུང་ཐུགས་བྱུང་མཁའ་ལས་སྐྱེས། །ནང་
གི་མངོན་པར་ཤེས་པས་འགྲུབ། །དེ་བས་སངས་རྒྱས་སེམས་དཔའ་མཆོག །སྔགས་ཀྱི་སྤྱོད་མཆོག་སྤྱོད་པ་རྣམས། །ཆོས་ཀྱི་ཡི་གེ་མཆོག་ཐོབ་པ། །འདོད་པ་ཐམས་ཅད་བསྟེན་པས་སོ། །བདེ་དང་སྡུག་བསྔལ་གཉིས་བདག་ཅན། །འདོད་པའི་ཡོན་ཏན་ལྔ་རྣམས་
བསྟེན། །ཡེ་ཤེས་དོན་གཉེར་འདོད་ཆགས་ཅན། །སྦྱོར་བས་བསྒྲུབས་ན་མྱུར་དུ་འགྲུབ། །སྐུ་གསུང་ཐུགས་ནི་ཡང་དག་འགྲུབ། །གང་གཞན་སྨན་པར་བཤད་པ་ནི། །སྔགས་ཀྱི་བཟླས་པས་འགྲུབ་པར་འགྱུར། །སྐུ་གསུང་ཐུགས་ནི་བསྒོམས་པས་སོ། །ཞེས་བྱ་བ་
ནི་ཆོས་བཤད་པའོ། །དེ་ཁོ་ན་ཉིད་ཀྱི་རྡོ་རྗེ་གཟུང་བ་དང་། ཆོས་ཀྱི་དྲིལ་བུ་དཀྲོལ་བ་ལ་སོགས་པ་ཤེས་པར་བྱ་བའི་ཕྱིར། དེ་ཉིད་ཀྱི་ནི་རྡོ་རྗེ་གཟུང་། །ཆོས་ཀྱི་དྲིལ་བུ་དཀྲོལ་བར་བྱ། །བྱིན་གྱིས་བརླབས་ནས་སྙིང་པོ་བཟླ། །ཞེས་བྱ་བ་དེ་ནི་འདི་ཡིན་ནོ། །རིག་པའི་དབང་

44-1-126b

བསྐུར་བའི་ཆོ་གའོ། །ད་ནི་ཕྱིར་མི་ལྡོག་པའི་དབང་བསྐུར་བ་སྟེ། དེའི་རིམ་པ་ནི་འདི་ཡིན་ནོ། །སློབ་མས་ཕྱག་བྱས་ལ། །བྱང་ཆུབ་རྡོ་རྗེ་སངས་རྒྱས་ཀྱིས། །མཆོད་ཆེན་ཇི་ལྟར་སྩལ་བ་བཞིན། །བདག་ཀྱང་རབ་ཏུ་བསྐྱབ་པའི་ཕྱིར། །ནམ་མཁའི་རྡོ་རྗེ་བདག་ལ་སྩོལ། །ཞེས་
བྱ་བའི་ཚིགས་སུ་བཅད་པས་གསོལ་བ་གདབ་པའོ། །དེའི་འོག་ཏུ་ཡོ་བྱད་འབྱོར་ན། །གདུགས་དང་རྒྱལ་མཚན་གདགས་པ་དང་། འཁོར་ལོ་དང་། དུང་ལ་སོགས་པ་དབང་བསྐུར་བའི་རྫས་རྣམས་ཉེ་བར་བསམས་ལ། སྔ་མ་བཞིན་དུ་སློབ་མ་སྒོར་སེང་གེའི་སྟན་པ་
གཞག་པའི་སྟན་ནང་ཚངས་ཅན་ལ་འདུག་ཏུ་བཅུག་སྟེ། སྟེང་ནས་བླ་རེ་བྲེ་བ་དང་རྒྱན་ཐམས་ཅད་ཀྱིས་བརྒྱན་པར་བྱའོ། །དེ་དག་མ་འབྱོར་ན་སྣ་ཚོགས་པདྨ་འདབ་མ་བརྒྱད་པར་ཁྲིའུ་དང་སྟན་བཞག་ལ་རང་གི་ལྷའི་སྦྱོར་བ་དང་ལྡན་པར་བཞག་ལ། ཡེ་ཤེས་སེམས་དཔའི་
ཐུགས་ཀ་ནས་བྱུང་བའི་འོད་ཟེར་ལས། དཀྱིལ་འཁོར་གྱི་འཁོར་ལོ་ལྟ་བུའི་དེ་བཞིན་གཤེགས་པ་ནམ་མཁའ་ཁྱབ་པར་བྱུང་བ་རྣམས་ཀྱིས་ཕྱག་ན་བུམ་པ་བསྣམས་ཤིང་། གདུགས་དང་རྒྱལ་མཚན་དང་། བ་དན་ལ་སོགས་པས་དབང་བསྐུར་བར་མཛད་པར་བསམས་ལ། 
སློབ་དཔོན་གྱིས། རྡོ་རྗེ་ཆེན་པོའི་དབང་བསྐུར་བ། །ཁམས་གསུམ་གྱིས་ནི་ཕྱག་བྱས་པ། །གསང་བ་གསུམ་གྱི་གནས་ལས་བྱུང་། །སངས་རྒྱས་ཀུན་གྱིས་སྦྱིན་པར་བྱ། །ཞེས་བྱ་བའི་ཚིགས་སུ་བཅད་པ་བརྗོད་པར་བྱའོ། །དེ་ནས་དཀྱིལ་འཁོར་གྱི་དེ་ཁོ་ན་ཉིད་བསྟན་
པར་བྱ་སྟེ། དཀྱིལ་འཁོར་ཞེས་བྱ་གང་བཤད་པ། །ཡིད་ནི་དཀྱིལ་འཁོར་དམ་པ་ཡིན། །གཞལ་ཡས་ཁང་ནི་ཡེ་ཤེས་ཏེ། །སེམས་ཀྱི་བརྩེགས་པ་བསྒྲེང་བ་ཡིན། །ཕྱི་ཡི་གྲུ་བཞི་པ་གང་ཡིན། །ཚད་ཀྱིས་མཉམ་ཉིད་གྱུར་པ་ཡིན། །བྱམས་པ་ལ་སོགས་སེམས་
གང་ཡིན། །ཐིག་བཞི་ཞེས་ནི་བཤད་པ་ཡིན། །ཆོས་ཀྱི་སྦྱོར་བ་རྗེས་དྲན་ཉིད། །གང་དེ་རྡོ་རྗེའི་ཐིག་ཏུ་བཤད། །ལྟ་བ་ཀུན་ལས་རྣམ་གྲོལ་བ། །ཡེ་ཤེས་ཐིག་ཏུ་བཤད་པ་ཡིན། །ཚུལ་ཁྲིམས་སོགས་ཀྱི་དམ་པ་ནི། །གང་ཡིན་རྒྱན་དུ་བཤད་པ་ཡིན། །དད་དབང་ལ་སོགས་སེམས་

44-1-127a

གང་ཡིན། །ར་བ་ལྔས་ནི་ཡང་དག་བྱུང་། །རྣམ་པར་ཐར་པ་བཞི་པོ་ནི། །སྒོ་རྣམས་སུ་ནི་ཡང་དག་བཤད། །ཡང་དག་སྤོང་བ་བཞི་པོ་ནི། །རྟ་བབས་རྣམས་དང་ཀ་བར་བྱུང་། །དྲན་པ་ཉེར་གཞག་བཞི་པོ་ནི། །ཁྱམས་རྣམས་བཞི་པོར་ཤེས་པར་བྱ། །རྫུ་འཕྲུལ་རྐང་པ་བཞི་
པོ་ནི། །དེ་ནི་སྒོ་ཁྱུད་རྣམ་བཞི་ཡིན། །བྱང་ཆུབ་ཡན་ལག་བདུན་པ་ཡིན། །ཕྲེང་བ་མེ་ཏོག་ཆུན་བརྒྱན་པ། །འཕགས་ལམ་ཡན་ལག་བརྒྱད་པ་ནི། །ཀ་བ་བརྒྱད་ཅེས་བྱ་བར་བཤད། །སྒྲིབ་པ་གཉིས་ལས་རྣམ་གྲོལ་ཞིང་། །ཏིང་འཛིན་ཡེ་ཤེས་ཀྱིས་བརྟགས་པ། །ལམ་གྱི་ཡེ་ཤེས་
ཁྱད་པར་རྣམས། །རྔ་ཡབ་ཅེས་ནི་ཡང་དག་བཤད། །ཉོན་མོངས་ཐམས་ཅད་ངེས་གཅོད་ཅིང་། །ཉོན་མོངས་འཕྲོག་པས་དྲ་བ་སྟེ། །ཡང་དག་གཅོད་ཅིང་སྤོང་བ་ཉིད། །སེལ་བའི་སྤོང་བ་ལ་གནས་པ། །ཚོགས་གཉིས་ཀྱི་ནི་སྦྱོར་བ་ཉིད། །ཉོན་མོངས་པ་ཡི་ཕྱེད་འཕྲོག་པ། །དྲ་བ་ཕྱེད་
ཅེས་བྱ་བར་བཤད། །ཅེས་བྱ་བ་ནི་དཀྱིལ་འཁོར་གྱི་དེ་ཁོ་ན་ཉིད་བསྒྲག་པར་བྱའོ། །ཕུང་པོ་ལྔ་ནི་མདོར་བསྡུས་ན། །སངས་རྒྱས་ལྔར་ནི་རབ་ཏུ་བཤད། །རྡོ་རྗེ་སྐྱེ་མཆེད་ཉིད་དག་ཀྱང་། །བྱང་ཆུབ་སེམས་དཔའི་དཀྱིལ་འཁོར་མཆོག། །ས་ནི་སྤྱན་ཞེས་བྱ་བར་བཤད། །ཆུ་ཡི་ཁམས་ནི་མཱ་
མ་ཀཱི། །མེ་ནི་གོས་དཀར་མོ་རུ་བཤད། །རླུང་ནི་སྒྲོལ་མར་རབ་ཏུ་བསྒྲགས། །གཏི་མུག་གཏི་མུག་ལོངས་སྤྱོད་པས། །གཏི་མུག་ཟད་ཕྱིར་གཤིན་རྗེ་གཤེད། །དེ་ནས་ལུས་མཐར་བྱེད་པ་སྟེ། །དེས་ན་ཤེས་བྱ་མཐར་བྱེད་འགྱུར། །ཉེས་པ་ཉེས་པ་ལོངས་སྤྱོད་པས། །ཉེས་པ་ཟད་ཕྱིར་ཤེས་
མཐར་བྱེད། །དེས་ན་སེམས་ནི་མཐར་བྱེད་དེ། །དེས་ན་ཉོན་མོངས་མཐར་བྱེད་འགྱུར། །འདོད་ཆགས་འདོད་ཆགས་ལོངས་སྤྱོད་པས། །འདོད་ཆགས་ཟད་པས་པད་མཐར་བྱེད། །དེས་ན་ཆགས་པ་མཐར་བྱེད་དེ། །དེ་བཞིན་སྙོམས་འཇུག་མཐར་བྱེད་འགྱུར། །ཉོན་མོངས་
ཀུན་ཟད་གང་ཡིན་དང་། །དེ་བཞིན་ལས་ནི་ཐམས་ཅད་ཟད། །སྒྲིབ་པ་ཀུན་ཟད་ཡེ་ཤེས་ནི། །བགེགས་མཐར་བྱེད་ཅེས་བྱ་བར་བཤད། །ཅེས་བྱ་བ་ནི་ལྷའི་དེ་ཁོ་ན་ཉིད་དོ། །ཕྱིར་མི་ལྡོག་པའི་དབང་བསྐུར་བའི་རིམ་པའོ། །དེའི་འོག་ཏུ་རྗེས་སུ་གནང་བའི་དབང་བསྐུར་བ་སྦྱིན་

44-1-127b

པར་བྱ་སྟེ། ཇི་ལྟ་ཇི་ལྟར་འདུལ་འགྱུར་བའི། །དེ་ལྟ་དེ་ལྟར་ཆགས་ལ་སོགས། །གཙང་བས་སེམས་ཅན་དོན་བྱེད་དོ། །ཉིན་རེ་ཞིང་ནི་ཐུན་བཞི་རུ། །ཏིང་འཛིན་གསུམ་གྱི་སྦྱོར་ལྡན་པས། །གྱུར་ནས་ཐུན་མོང་ཅིག་ཤོས་ཀྱི། །དངོས་གྲུབ་ཐོབ་པ་བསྒྲུབ་པར་བྱ། །ཞེས་བརྗོད་
པར་བྱའོ། །དེ་ནས་ཇི་སྐད་དུ་བཤད་པའི་མཚན་ཉིད་ཅན་གྱི་གཟུངས་ཀྱི་དཀྱིལ་འཁོར་དུ་བཅུག་ལ། དེ་དང་ལྷན་ཅིག་གསང་བའི་མཆོད་པ་བྱས་ནས། །ཐུབ་པའི་དབང་ཚོགས་རྡོ་རྗེའི་མཐར། །ཡང་དག་འབབ་སྟེ་བདེ་མཆོག་སྟེ། །ཐུ་བོ་ཐ་མ་མིན་པར་བསྡམ། །སྣོད་གྱུར་སྒོར་
ནི་ངེས་པར་དབབ། །བརྟན་པའི་བློ་ལྡན་སྣོད་ཀྱིས་ཀུན། །རྣམ་སྣང་བདག་ཉིད་ཅན་འཐུངས་ལ། །སྣ་ཚོགས་བཞིན་ཏེ་སྣ་ཚོགས་འགྱུར། །ཀྱེ་མ་ཤིན་ཏུ་བདེན་ཚིག་བརྗོད། །གཟུངས་འདི་ཤིན་ཏུ་ཡིད་འོང་སྟེ། །བརྟན་བྱར་སངས་རྒྱས་རྣམས་ཀྱིས་བརྟགས། །རྡོ་རྗེ་འཁོར་
ལོའི་རབ་སྦྱོར་བས། །བདུད་རྩིའི་བདག་ཉིད་ཅན་བདེ་སྤྱད། །རྡོ་རྗེ་སྐྱིལ་ཀྲུང་ཉིད་དང་སེམས། །ནོར་ལྡན་ཁོངས་སུ་གཏོགས་པར་ལྟ། །དེ་ལྟར་སློབ་དཔོན་གྱི་ཤེས་རབ་དང་འདུས་པའི་རྒྱུར་གྱུར་པས་དེ་ཁོ་ན་ཉིད་ཉེ་བར་མཚོན་པར་བྱའོ། །དེ་ཡང་དེ་བཞིན་ནོ་ཞེས་བྱ་བ་ཡང་བསྟན་
པར་བྱ་སྟེ། །འདི་དག་ནི་གསང་བའི་དབང་བསྐུར་བ་དང་། ཤེས་རབ་ཡེ་ཤེས་ཀྱི་དབང་བསྐུར་བའོ། །དེའི་རྗེས་ལ་དཀྱིལ་འཁོར་གྱི་ཁང་པ་ནས་ཕྱིར་བྱུང་ལ་ཇི་སྐད་དུ་བཤད་པའི་ཞི་བའི་སྦྱིན་སྲེག་བྱས་ནས། སླར་ཡང་དཀྱིལ་འཁོར་གྱི་ཁང་པར་ཞུགས་ནས། ཤར་སྒོར་འདུག་ལ་
མཆོད་པ་རྒྱ་ཆེན་པོ་བྱས་ཏེ། བསྟོད་པ་ཡང་བྱས་ནས། ཡི་གེ་གསུམ་ཐ་མ་མུཿདང་བཅས་པས་གཤེགས་སུ་གསོལ་བར་བྱའོ། །ཚོན་རྩི་ཡང་ཕྱགས་ནས་སྣོད་གཙང་མར་བཞག་ལ་རྒྱ་མཚོར་འབབ་པའི་ཆུ་བོར་དོར་བར་བྱའོ། །དེ་ནས་ཨོཾ་ཨ་ཀཱ་རོ་མུ་ཁཾ་སརྦྦ་དྡྷརྨཱ་ཎཱཾ་ཨཱདྱ་ནུཏྤནྣ་ཏྭཱཏ་ཅེས་བྱ་བའི་
སྔགས་བརྗོད་ཅིང་དཀྱིལ་འཁོར་གྱི་ས་གཞི་བྱུག་པའམ་བྱུག་ཏུ་གཞུག་པར་བྱའོ། །དེའི་རྗེས་ལ་གཏོར་མ་རྒྱ་ཆེན་པོ་བྱས་ལ། །གཏོར་མའི་སྔགས་ཀྱིས་སྦྱིན་པར་བྱའོ། །འཁོར་ལོ་འདྲི་བའི་ཆོ་ག་བྲིས་པ་ལས། །བདག་གིས་བསོད་ནམས་དྲི་མེད་གང་བསགས་པས། །དེས་ནི་འགྲོ་བ་མ་

44-1-128a

ལུས་འདི་དག་ཀུན། །རྒྱལ་བའི་གོ་འཕང་མྱུར་དུ་ཐོབ་པར་ཤོག། །དེ་བཞིན་བློ་གྲོས་རྣོ་ཞིང་འགྲོ་བ་རྣམས། །སྲིད་པའི་རྒྱ་མཚོ་ལས་ནི་འདོན་པ་དང་། །སྔགས་པ་མ་ལུས་གསང་སྔགས་ཚུལ་གྱིས་ནི། །ཡང་དག་མན་ངག་ལེགས་པར་ཐོབ་པར་ཤོག། །དཀྱིལ་འཁོར་བྲི་
བའི་ཆོ་ག་སློབ་དཔོན་བསོད་སྙོམས་པས་མཛད་པ་རྫོགས་སོ།།      །།སྒྲ་བསྒྱུར་གྱི་ལོ་ཙཱ་བ་ཆེན་པོ་དགེ་སློང་རིན་ཆེན་བཟང་པོས་བསྒྱུར་བའོ།།༄༅༅། །རྒྱ་གར་སྐད་དུ། པྲི་ཡ་སཱ་དྷ་ནཾ་ནཱ་མ། བོད་སྐད་དུ། དགའ་བའི་སྒྲུབ་པའི་ཐབས་ཞེས་བྱ་བ། དཔལ་
འཇམ་པའི་རྡོ་རྗེ་ལ་ཕྱག་འཚལ་ལོ། །ཆོས་དང་ལོངས་སྤྱོད་སྤྲུལ་པ་ཡི། །སྐུ་གསུམ་རྣམ་པར་གནས་གྱུར་པ། །འཇམ་དཔལ་ཡང་དག་ཕྱག་འཚལ་ནས། །དེ་ཡི་སྒྲུབ་ཐབས་རིམ་བཤད་བྱ། །དཔལ་ལྡན་གསང་འདུས་ལ་བརྟེན་ནས། །ཕུན་སུམ་ཚོགས་པ་ཀུན་བྱེད་པ། །བླ་
མས་ཇི་ལྟར་བསྟན་པ་ཡི། །ཡེ་ཤེས་ཞབས་ཀྱིས་ལམ་བསྟན་པས། །ཤེས་རབ་ཐབས་ཀྱི་རང་བཞིན་གྱི། །ཤེས་སྒྲུབ་ལྡན་པའི་སེམས་དག་ལ། །ཕལ་ཆེར་གསལ་བའི་སྒྲ་ཡི་དོན། །བདག་མཉམ་བློ་ལྡན་ལ་ཕན་པར། །བླ་མ་རྙེད་དཀའ་འཇིག་རྟེན་ན། །དལ་འབྱོར་ཤིན་
ཏུ་གཡོ་བ་སྟེ། །སྣོད་ལ་ཤེས་རབ་ཐབས་འདི་ནི། །དེ་ཕྱིར་སེམས་ཀྱིས་བྱ་བར་རིགས། །བྱམས་དང་སྙིང་རྗེ་མཉམ་ལྡན་པས། །སེམས་ནི་བྱང་ཆུབ་བསྐྱེད་བྱས་ལ། །སངས་རྒྱས་རྣམས་ཀྱི་རབ་ཟབ་པའི། །ཚུལ་ལ་ལྷག་པར་མོས་པའི་ཡིད། །སྦྱིན་དང་ཁྲིམས་སོགས་ཕུན་སུམ་
ཚོགས། །སྲིད་དང་ལོངས་སྤྱོད་ལ་ཕྱིར་ཕྱོགས། །སེམས་ཀྱི་སྡུག་བསྔལ་ཡང་སྐྱོ་མེད། །ལྷ་རྣམས་བསྟེན་པ་བྱེད་གྱུར་པ། །ཆུ་དང་ཅོད་པན་རྡོ་རྗེ་དང་། །བདག་པོ་མིང་དང་སློབ་དཔོན་གསང་། །ཤེས་རབ་ཡེ་ཤེས་བརྟུལ་ཞུགས་སོགས། །བསོད་ནམས་ཡེ་ཤེས་ཆེར་
འཆར་བའི། །དཔལ་ལྡན་གསང་འདུས་དཀྱིལ་འཁོར་དུ། །ཇི་ལྟར་རིགས་པར་དབང་བསྐུར་བ། །བླ་མ་ཡོངས་སུ་མཉེས་པ་ཡིས། །དབང་བསྐུར་རྡོ་རྗེ་སེམས་བརྟན་པ། །རྣལ་འབྱོར་སྤྱོད་ནུས་རྣལ་འབྱོར་པས། །རི་བོ་ལ་སོགས་ཡིད་འོང་བར། །གནས་བྱས་

44-1-128b

མགོན་པོ་བསྒྲུབ་པར་བྱ། །བསམ་གཏན་སོགས་པ་ལ་བརྩོན་པ། །མཚན་མོ་ཕྱེད་ཀྱི་ལྷག་མ་ལ། །ཆོ་ག་བཞིན་དུ་ལངས་བྱས་ལ། །སྙིང་ཟླར་དེ་ཉིད་མཾ་འོད་ལྡན། །གདོང་ལ་སོགས་པ་དག་པར་བྱ། །དེ་ནས་ཆུ་བཟངས་སྨན་དང་ནི། །མེ་ཏོག་ག་པུར་ཙནྡན་གྱིས། །བསམ་
གཏན་གནས་ནི་ཡང་དག་གནས། །བསམས་པས་ཀྱང་ནི་ཡིད་འོང་བྱ། །བདེ་བའི་སྟན་ལ་གནས་ནས་ནི། །ལེགས་བརྟན་རྡོ་རྗེའི་སྐྱིལ་མོ་ཀྲུང་། །དེ་རུ་ཡང་ན་བདེར་གནས་པས། །བསམ་གཏན་རབ་ཏུ་བསམ་པར་བྱ། །སངས་རྒྱས་བྱང་ཆུབ་སེམས་དཔའ་དང་། །ཀུན་དུ་
བླ་མར་བཅས་པ་ཡི། །དུས་གསུམ་གཤེགས་པས་ཡོངས་གང་བ། །ནམ་མཁར་མངོན་སུམ་བཞིན་བལྟས་ལ། །ས་བོན་མཾ་བྱུང་གཟུགས་སོགས་པས། །དེ་བཞིན་རིན་ཆེན་ཕུང་པོ་ཡིས། །མཆོད་སོགས་རྟོག་པ་སྤང་བྱས་ནས། །རབ་ཏུ་འབད་པས་དེ་རྣམས་མཆོད། །དེ་
རྣམས་སྤྱན་སྔར་གནས་བྱས་ལ། །པུས་མོ་བཙུགས་ཏེ་ཐལ་སྦྱར་ནས། །དམིགས་པ་མེད་པར་བྱས་ནས་ནི། །སྡིག་པ་བཤགས་པ་ལ་སོགས་བྱ། །གང་ཞིག་ཐོག་མེད་སྲིད་པའི་ཆུ་ཀླུང་དུ། །མ་ལུས་ཀུན་རྟོག་གིས་བསགས་རྙོག་པ་རྣམས། །ཐུགས་རྗེ་ཆེར་ལྡན་སྤྱན་སྔར་
དེ་དག་ནི། །ཆོ་ག་བཞིན་དུ་ཐམས་ཅད་བཤགས་པར་བགྱི། །རྫོགས་སངས་རྒྱས་དང་བྱང་ཆུབ་སེམས་དཔའ་དང་། །འཕགས་པ་གཞན་གྱིས་དགེ་བ་གང་མཛད་པ།  །དེ་དག་ཀུན་ལ་ཡང་དག་ཡི་རང་ཞིང་། །བྱང་ཆུབ་ཏུ་ནི་ཡོངས་སུ་བསྔོ་བར་བགྱི། །ཡིད་ཀྱི་རོལ་པ་དྲི་མེད་ཟླ་
འདྲས་བསྒྲུབས། །སྙིང་རྗེ་དམ་པ་མཐའ་ཡས་པ་ཡི་ཐབས། །རང་གི་ཡིད་ལ་གནས་པར་གྱུར་པ་ཡི། །བདེ་གཤེགས་རྣམས་ལ་རྟག་ཏུ་སྐྱབས་སུ་མཆི། །རྟོག་པ་མ་ལུས་པ་ལས་ངེས་གྲོལ་ཞིང་། །སེམས་དཔའ་དམ་པ་ཀུན་གྱི་ཕུན་ཚོགས་གཞི། །དངོས་པོ་ཐམས་ཅད་རོ་གཅིག་
ངོ་བོ་ཉིད། །དམ་པའི་ཆོས་ལ་རྟག་པར་སྐྱབས་སུ་མཆི། །འཆིང་བ་རྣམས་ལས་ཡང་དག་གྲོལ་འགྱུར་ཞིང་། །སྙིང་རྗེ་མཆོག་གིས་བསྐྲུན་པའི་དཔལ་དང་ལྡན། རབ་ཏུ་དགའ་སོགས་ས་ལ་རབ་བཞུགས་པ། །བརྟུལ་ཞུགས་དབང་པོའི་ཚོགས་ལ་སྐྱབས་སུ་མཆི། །བསམ་

44-1-129a

དང་རྣམ་པར་སྨིན་པ་དག་གྱུར་ཅིང་། །སྒྲིབ་པ་ཀུན་གྱི་བག་ཆགས་ཡང་དག་འབྱིན། །ལྷག་པར་མོས་པས་རྣམ་པར་བརྒྱན་པ་ཡི། །སེམས་ནི་བྱང་ཆུབ་དམ་པར་བསྐྱེད་པར་བགྱི། །བདེ་གཤེགས་སྲས་བཅས་རྣམས་ཀྱི་ལམ་གཅིག་པུ། །སྦྱིན་སོགས་
རྣམ་བཅུ་དཀར་པོའི་ཡོན་ཏན་ཚུལ། །རྫོགས་སངས་རྒྱས་བདག་མ་ལུས་ངོ་བོའི་བློས། །ཡང་དག་ཉིད་དུ་ད་ནི་གནས་པར་བགྱི། །འཇིག་རྟེན་མཐར་འབྱིན་བསམ་པ་དང་། །ལོག་པར་ལྟ་བའི་བསྒོམ་པ་དང་། །ཚུལ་ཁྲིམས་བརྟུལ་ཞུགས་མཆོག་འཛིན་པའི། །ཉེས་པས་འགྲོ་བ་
འདི་བསྐྱེད་པས། །སྙིང་རྗེ་ཐམས་ཅད་དམིགས་བྱས་ཏེ། །དོན་དམ་པ་ནི་ཇི་ལྟ་བར། །བྱང་ཆུབ་སེམས་མཆོག་བསྒོམ་པར་བྱ། །ཚིགས་བཅད་དོན་འདི་བསམ་བྱ་སྟེ། །ངོ་བོ་ཉིད་དང་བྲལ་ཕྱིར་སྟོང་པ་སྟེ། །དེ་ཕྱིར་རྒྱུ་དང་བྲལ་བས་མཚན་མ་མེད། །རྟོག་པ་རྣམས་དང་བྲལ་ཕྱིར་
དངོས་པོ་ནི། །མ་ལུས་སྨོན་པ་ལས་ནི་ངེས་པར་གྲོལ། །དེ་ལྟར་སྟོང་པ་དང་ལྡན་པར། །འགྲོ་བ་འདི་ཀུན་བལྟ་བྱས་ནས། །ཇི་སྲིད་སེམས་ནི་བརྟན་འདོད་པས། །སྔགས་འདི་ཉེ་བར་བརྗོད་པར་བྱ། །ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། སྟོང་ཉིད་རོ་གཅིག་གང་སེམས་དཔའོ། །
བྱང་ཆུབ་མཆོག་ཏུ་མི་འགྱུར་རོ། །གནས་དང་གཞལ་ཡས་བདག་ཉིད་དེ། །རང་གི་སེམས་ཀྱིས་འདི་ལྟར་བྱ། །སངས་རྒྱས་ཞིང་དུ་ནམ་ཡང་ནི། །མ་དག་པ་ཡིས་འཚང་མི་རྒྱ། །དེ་ཡིས་དང་པོར་ཞིང་དག་ཕྱིར། །རང་སེམས་ཉི་མར་བསྒོམ་པར་བྱ། །དེ་རུ་ཧཱུྃ་སྐྱེས་རྡོ་རྗེ་ནི། །ཁ་གྱེས་
སྔོན་པོ་འོད་འབར་བ། །དེ་ཡི་དབུས་གནས་ཧཱུྃ་ཡིག་ལས། །རྡོ་རྗེ་ཕྲ་མོ་རྣམ་སྤྲོ་བྱ། །འོག་དང་སྟེང་དང་ཕྱོགས་བཞི་རུ། །རྡོ་རྗེ་ར་བ་གུར་དང་ནི། །རྡོ་རྗེ་རང་བཞིན་ས་གཞི་བྱ། །བསྲུང་བའི་དོན་དུ་བསམ་པར་བྱ། །སྡུག་བསྔལ་ཀུན་འབྱུང་ཤེས་པ་དང་། །འགོག་པ་དང་ནི་ལམ་དང་ནི། །
ཟད་དང་མི་སྐྱེ་ཆོས་དང་ནི། །དེ་བཞིན་རྗེས་དང་ཀུན་རྫོབ་དང་། །སྔོན་གྱི་གནས་འགྲོ་ཤེས་པ་དང་། །ཇི་ལྟར་ཐོས་པ་རྣམ་པར་ཤེས། །ཆོས་དབྱིངས་ཐ་དད་མེད་པ་རྣམས། །ཤེས་པ་འདི་རྣམས་སུ་འགྱུར་རོ། །འདི་ལྟར་ཤེས་པ་བཅུ་གཅིག་ནི། །ལེགས་པར་རྫོགས་པའི་རྒྱུ་

44-1-129b

ཡིན་ཏེ། །རྩིབས་བཅུ་ལ་ནི་ཁྲོ་བོ་བཅུ། །ལྟེ་བར་མཆོག་ནི་བཅུ་གཅིག་པ། །ཤར་སོགས་ཕྱོགས་ནི་དེ་རྣམས་སུ། །གོ་རིམས་བཞིན་དུ་དེ་རྣམས་ལ། །གཤིན་རྗེ་ཤེས་རབ་མཐར་བྱེད་བསྒོམ། །པདྨ་བགེགས་ནི་མཐར་བྱེད་ཀྱང་། །མེ་ལ་སོགས་པའི་མཚམས་རྣམས་
སུ། །འདོད་སྔོན་སྟོབས་དང་མི་གཡོ་རྣམས། །སྟེང་དུ་གཙུག་ཏོར་རྒྱལ་པོར་འགྱུར། །འོག་ཏུ་གནོད་མཛེས་འདྲེན་པའོ། །ལྟེ་བར་རྡོ་རྗེ་ཧཱུྃ་མཛད་དཔལ། །རྟག་པ་ལ་སོགས་པར་ཡང་འགྱུར། །རང་གི་ལྷག་པའི་ལྷ་ཡང་འདིར། །རྣལ་འབྱོར་པ་ནི་ཁ་ཅིག་འདོད། །ཐོ་བ་
ལྕགས་ཀྱུ་དབྱིག་པ་དང་། །དབྱུག་པ་པདྨ་རྩེ་གསུམ་དང་། །རྡོ་རྗེ་རལ་གྲི་འཁོར་ལོ་དང་། །རྡོ་རྗེ་རྡོ་རྗེ་གཡས་ན་འཛིན། །ཕྱག་གཡས་ཐམས་ཅད་རལ་གྲི་སྟེ། །གཡོན་ན་རིན་ཆེན་པདྨའོ། །སྤྱན་གཡོན་རྡོ་རྗེ་འཛིན་པར་འགྱུར། །མི་གཡོ་བྱིས་པའི་རྒྱན་གྱིས་བརྒྱན། །རྩ་
བའི་ཕྱག་མཚན་རྡོ་རྗེ་སྟེ། །གཡས་ཉིད་ན་ནི་ཡང་དག་གནས། །གང་གི་གཡས་ན་པདྨ་ཡོད།  །དེ་ཡི་གཡོན་དུ་འཁོར་ལོའོ། །རྡོ་རྗེ་ཧཱུྃ་མཛད་ཀྱི་གཡོན་དུ། །ཞགས་པ་ལྕགས་ཀྱུའི་ཕྱག་འབར་བ། །ཨུ་མ་དང་བཅས་བདེ་བྱེད་ནི། །ཞབས་ཀྱིས་མནན་ནས་ཡང་དག་གནས། །
གཞན་གྱིས་མི་ཐུབ་དཀར་པོར་འགྱུར། །པདྨ་མཐར་བྱེད་དམར་པོ་སྟེ། །གཙུག་ཏོར་ཁ་དོག་སེར་པོར་འགྱུར། །ལྷག་མ་རྡོ་རྗེ་འཛིན་ནག་པོ། །དམར་དང་སེར་དང་ལུས་དཀར་རྣམས། །གཡས་པའི་གདོང་ནི་ནག་པོ་མཛེས། །དཀར་དང་དཀར་མིན་དམར་བ་ནི། །དེ་རྣམས་ཀྱི་ནི་
གཡོན་དུ་བསྒྲགས། །ཁྲོ་བོ་ནག་པོ་རྣམས་ཀྱི་ནི། །དབྱེ་བས་ཁ་དོག་ཤེས་པར་བྱ། །ནས་ཀྱི་མྱུ་གུ་དང་འདྲ་བ། །གཡོན་པ་དམར་པོའི་རྣམ་པ་སྟེ། །གཡས་པ་དཀར་པོར་འདོད་པ་ཡིན། །བདེན་བྲལ་དང་ནི་རླུང་གི་མཚམས། །གང་ཞིག་ཕྱོགས་སུ་གནས་པ་རྣམས། །ཐམས་ཅད་
མི་སྡུག་ཐུང་བ་སྟེ། །གདོང་འཇིགས་གསུས་པ་ཆེན་པོ་སྟེ། །སྨ་ར་སྨིན་མ་སྐྲ་སེར་བ། །གད་རྒྱངས་བཞད་པར་བྱེད་པའོ། །སྟག་གི་པགས་པས་གོས་མཛད་ཁྲོ། །སྦྲུལ་གྱི་རྒྱན་ནི་འཛིན་པའོ། །མགུལ་དང་ལག་པ་རྣ་བ་ལ། །རིགས་ལྡན་དུང་དུང་འཇོག་པོ་རྣམས། །དམར་སེར་

44-1-130a

མདངས་ལྡན་ནོར་རྒྱས་ནི། །སྐ་རགས་སུ་ནི་རྣམ་པར་གནས། །རྐང་པ་དཔུང་པར་དཀར་བ་ཡི། །པདྨ་པདྨ་ཆེན་པོ་གནས། །ཀརྐོ་ཊ་དང་མཐའ་ཡས་དག །ལྗང་སྔོ་སེ་རལ་མགོ་ལའོ། །མཆེ་བས་ཅུང་ཟད་མཆུ་མནན་ཏེ། །ཞལ་ནི་རྣམ་པར་བརྒྱན་པའོ། །ཞི་
བའི་རྒྱན་དང་གོས་བཟང་སྟེ། །གཟུགས་མཛེས་གཞན་ནི་མཚམས་ཐུང་བ། །སྔ་མ་སྐུ་ནི་གྱེན་འགྲེང་ཚོགས། །གཞན་ནི་རིན་ཆེན་དབུ་བརྒྱན་ནོ། །ཐམས་ཅད་སྨིན་མ་ཁྲོ་གཉེར་འཁྱོག །ཞལ་ནི་གཉེར་མས་མཚན་མ་སྟེ། །སྣ་ཚོགས་ཆུ་སྐྱེས་ཉི་མ་ལ། །གཡོན་བརྐྱང་ཞབས་ཀྱིས་
ཡང་དག་གནས། །ཕྱོགས་སུ་ཁྲོ་བོའི་རིགས་སྤྲོ་བ། །སྡང་ཚོགས་ཐམས་ཅད་འཇིགས་བྱེད་པ། །འོག་མ་བར་དང་མཐར་བྲལ་བ། །སྐྱེ་དང་འཇིག་པ་རྣམ་པར་སྤངས། །ཐམས་ཅད་ཡེ་ཤེས་ཙམ་ལ་བརྟེན། །ཆོས་ཀྱི་དེ་ཉིད་གོ་འཕང་གནས། །འདི་ནི་ཤེས་པ་ཇི་ལྟར་ཐོབ། །གྲུབ་
ནས་ཡོངས་སུ་གནས་པའོ། །འཁོར་ལོར་ཆོས་འབྱུང་ཕྱག་རྒྱ་ནི། །གྲུ་གསུམ་དཀར་པོ་སྟེང་གནས་པ། །དབུས་གནས་སྣ་ཚོགས་པད་རྡོ་རྗེ། །ནང་གི་ནམ་མཁའི་རང་བཞིན་དུ། །རྫོགས་པའི་སངས་རྒྱས་འོད་འཕྲོར་ལྡན། །ཕྱོགས་ནི་མཐའ་ཡས་གསལ་བལྟ་དང་། །སྣ་ཚོགས་
རྡོ་རྗེ་ལ་གནས་བསྒོམ། །ཟླ་བར་བྷཱུཾ་ནི་ཡང་དག་འབར། །འཁོར་ལོ་རྩིབས་ནི་བཅུ་གཉིས་པ། །མ་རིག་ལ་སོགས་ཡན་ལག་དག །ས་བོན་བཅས་པ་དེ་གྱུར་ནས། །རྟག་པ་རིག་མར་བཅས་ལ་བྱུང་། །བྱང་ཆུབ་ཕྱོགས་ཀྱི་ཆོས་རྣམས་ཀྱི། །རྣམ་དག་འཁོར་ལོ་བསྒོམ་པར་བྱ། །དེ་
ལ་སངས་རྒྱས་སངས་རྒྱས་མིན། །མཉམ་ཕྱིར་གྲུ་བཞིར་གནས་པའོ། །དེ་ཡི་རྣམ་དག་རྣམ་བསྟན་ཕྱིར། །བྱང་ཆུབ་ཕྱོགས་ཀྱི་ཆོས་རྣམས་ལས། །དྲན་པ་དག་པ་ཤར་ཕྱོགས་སྒོར། །གང་ཕྱིར་དྲན་པ་སྔོན་འགྲོ་བས། །དགེ་ལ་རྗེས་སུ་འཇུག་པར་འགྱུར། །དགེ་དང་མི་དགེའི་
ཆོས་རྣམས་ནི། །བསྐྱེད་དང་མི་བསྐྱེད་པ་ཡི་ཕྱིར། །རྩོམ་དང་ཡོངས་སུ་སྦྱོང་ཡིན་ཏེ། །སོ་སོར་རྟོག་དང་བྱ་ལྷུར་ལེན། །འདི་ནི་བརྩོན་འགྲུས་རྣམ་དག་པས། །དེས་ན་ལྷོ་ཡི་སྒོ་རུ་འགྱུར། །འདུན་པ་བརྩོན་འགྲུས་དེ་བཞིན་སེམས། །དཔྱོད་པ་ཞེས་བྱ་འདི་དག་པས། །རྫུ་

44-1-130b

འཕྲུལ་རྐང་པ་བཞི་ཡིན་ཏེ། །དེ་བས་ནུབ་ཕྱོགས་སྒོ་རུ་འགྱུར། །དད་པ་བརྩོན་འགྲུས་དྲན་པ་ཉིད། །ཏིང་འཛིན་ཤེས་རབ་དང་བཅས་པ། །དབང་པོ་ལྔ་པོ་དེ་དག་པས། །བྱང་ཕྱོགས་སྒོར་ནི་འདི་འགྱུར་རོ། །རྟོག་དང་དཔྱོད་དང་དགའ་བ་དང་། །བདེ་དང་ཏིང་ངེ་འཛིན་རྣམས་ནི། །བསམ་
གཏན་དང་པོ་ཡན་ལག་ལྔ། །གཉིས་པ་ཡན་ལག་བཞི་ཡིན་ཏེ། །རྟོག་པ་དང་ནི་དཔྱོད་པ་དང་། །ནང་ནི་རབ་ཏུ་དང་བ་དང་། །བསམ་གཏན་དང་པོའི་ཡན་ལག་མཐས། །དེ་ཡིས་གང་ནི་ལྡན་གྱུར་པའོ། །བཏང་སྙོམས་དྲན་པ་དང་འབྲེལ་པ། །ཤེས་བཞིན་དང་ནི་བདེ་བའི་རྟེན། །
དེ་ནི་སེམས་རྩེ་གཅིག་པར་ལྡན། །ཡན་ལག་ལྔ་ལྡན་གསུམ་པ་ཡིན། །བཏང་སྙོམས་དྲན་པ་ཡོངས་སུ་དག །བདེ་སྡུག་མིན་པའི་ཚོར་བ་དང་། །སེམས་རྩེ་གཅིག་དང་ལྡན་པས་ན། །ཡན་ལག་བཞི་ལྡན་བཞི་པ་ཡིན། །གོ་རིམས་ཇི་བཞིན་བསམ་གཏན་ནི། །བཞི་པོ་
ཡོངས་སུ་དག་པ་ཡིས། །འདི་དག་སྒོ་སྒོར་གྱུར་པ་ཡི། །རྟ་བབས་གཟུགས་ཀྱིས་མཛེས་པར་བྱས། །དཔའ་འགྲོ་ནམ་མཁའ་མཛོད་དུ་གྲགས། །དྲི་མེད་སེང་གེ་རྣམ་རོལ་པའི། །ཏིང་འཛིན་འདི་རྣམས་རྣམ་དག་པ། །ཁྱམས་ནི་བསྐོར་བར་གྱུར་པའོ། །ཨ་ཀཱ་རོ་མུ་ཁཾ་
ཞེས་སོགས། །བཟོད་དང་ཆོས་དང་དོན་སྔགས་ཀྱི། །གཟུགས་རྣམས་དག་ཅིང་དག་པ་ཡིས། །མཆོད་བཟངས་ཀྱིས་ནི་ལག་སྦྲེལ་བའི། །དེ་དག་ཁྱམས་རྟེན་ལྷ་མོ་ཡིས། །ཀུན་ནས་ཡོངས་སུ་བསྐོར་བའོ། །སེམས་ཅན་འདོད་པ་རྫོགས་བྱེད་པས། །སྣ་ཚོགས་རིན་
ཆེན་རྒྱན་གྱིས་བརྒྱན། །མདོ་དང་དབྱངས་དང་ལུང་བསྟན་དང་། །ཚིགས་བཅད་ཆེད་བརྗོད་གླེང་གཞི་དང་། །དེ་ལྟ་བུར་བྱུང་ཤིན་ཏུ་རྒྱས། །སྐྱེས་པའི་རབས་རྣམས་སྒྲ་སྒྲོགས་པ། །སྟོན་པའི་བསྟན་པ་ཡན་ལག་དགུ། །ཕྱོགས་བཅུ་རབ་ཏུ་སྐོར་བར་བྱེད། །འདི་ནི་རླུང་གིས་
སྐྱོད་པའོ། །བ་དན་དྲིལ་བུའི་སྒྲ་སྒྲོགས་ལྡན། །དྲན་པ་ཤེས་རབ་ཏིང་ངེ་འཛིན། །ཤིན་ཏུ་སྦྱངས་དང་དགའ་བཏང་སྙོམས། །བརྩོན་འགྲུས་ཞེས་པ་འདི་བདུན་པ། །བྱང་ཆུབ་ཡན་ལག་རྣམ་དག་པས། །དྲ་བ་དྲ་ཕྱེད་ཉི་ཟླ་དང་། །ཕྲེང་བཟངས་མེ་ལོང་རྔ་ཡབ་མཛེས། །ཇི་ལྟར་
44-1-131a

གནས་སུ་བཀོད་པ་ཡི། །འདི་རྣམས་ཀྱིས་ནི་མཛེས་བྱས་པའོ། །སྟོང་ཉིད་ལ་སོགས་རྣམ་པ་དང་། །གཟུགས་ཅན་གཟུགས་རྣམས་ལྟ་བྱེད་པ། །ཟིལ་གྱིས་མནན་ནས་རབ་ཏུ་ཤེས། །དེ་ནི་རྣམ་ཐར་དང་པོ་ཡིན། །ནང་ནི་གཟུགས་མེད་འདུ་ཤེས་པས། །
ཕྱི་རོལ་གཟུགས་ལ་སྔར་བཞིན་དུ། །མཐོང་བ་ཞེས་པ་གཉིས་པ་སྟེ། །རྣམ་པར་ཐར་པ་ཡང་དག་བརྗོད། །སྡུག་པའི་རྣམ་ཐར་ལུས་ཀྱིས་ནི། །གཟུགས་དང་ལྡན་པ་ཉིད་བརྗོད་པས། །མངོན་སུམ་བྱས་ནས་རྫོགས་བྱས་ཏེ། །ནམ་མཁའ་དང་ནི་རྣམ་ཤེས་དང་། །ཅི་ཡང་མེད་པ་
གཞན་ཡིན་ཏེ། །འདུ་ཤེས་མེད་མིན་འདུ་ཤེས་མེད། །སྐྱེ་མཆེད་བདུན་གྱི་དབྱེ་བ་ཡིས། །འགོག་པའི་སྙོམས་པར་འཇུག་པ་ནི། །བརྒྱད་པ་ཉེ་བར་བརྗོད་པ་སྟེ། །ཡིད་ནི་རྣམ་པར་གྲོལ་བ་ཡིས། །རྣམ་པར་ཐར་པར་དེས་འདོད་དོ། །འདི་ལྟར་རྣམ་ཐར་བརྒྱད་རྣམས་ནི། །གོ་རིམས་ཇི་
བཞིན་རྣམ་དག་པས། །འཁོར་ལོ་རིན་ཆེན་མཚོ་སྐྱེས་དང་། །རལ་གྲི་ཀ་བ་བརྒྱད་ཀྱིས་བརྒྱན། །ཀུན་དུ་བར་ཆད་མེད་པ་ཡིས། །རྡོ་རྗེ་ཐེག་པ་རབ་བསྐོར་བས། །ཀ་བའི་སྟེང་དུ་གནས་གྱུར་པ། །རྡོ་རྗེ་ཕྲེང་བ་ཟླུམ་པོས་བསྐོར། །གཟུགས་ལ་སོགས་པ་ཕྱིན་ཅི་ལོག །རབ་ཏུ་ཞི་བས་བླ་མེད་པའི། །
ཚད་མེད་པ་དང་ཡང་དག་སྤངས། །འདོད་པའི་ཡོན་ཏན་ལྔ་པོ་འདི། །ཤིན་ཏུ་རྣམ་དག་ལས་གྲུབ་པ། །ཆོས་ཀྱི་དབྱིངས་ཀྱིས་རྣམ་པར་བརྒྱན། །མཆོད་པ་རྣམ་པ་ལྔ་ཡིས་དགྱེས། །ཆོ་ག་ཇི་བཞིན་རྣམ་པར་གསོལ། །འགྲོ་བ་ཀུན་དང་ཐ་མི་དད། །ཉེས་པས་གང་ལ་མ་གོས་པ། །གནས་
འདི་དག་ནི་བཅུ་དགུ་རུ། །སྣ་ཚོགས་པདྨས་བརྒྱན་བྱས་པའོ། །རྨོངས་དང་རབ་རིབ་གཞིར་གྱུར་པ། །འདམ་ནི་རྣམ་པར་སྐེམས་པས་ན། །བྱང་ཆུབ་སེམས་ཀྱི་མྱུ་གུ་དག །སྨིན་པའི་དོན་དུ་ཡང་འདི་ཡིན། །སྙིང་རྗེའི་རང་བཞིན་ཉི་བཟང་པོ། །བདུན་གྱིས་ཡོངས་སུ་བརྒྱན་པའོ། །དབུས་
ཀྱི་སྟན་དང་མདུན་སྤངས་ཏེ། །ཕྱོགས་དང་སྒོ་ན་རྣམ་པར་གནས། །དགེ་བའི་རྩ་བ་འཕེལ་བ་དང་། །ཉོན་མོངས་གདུང་བ་ཞི་བའི་ཕྱིར། །ཤེས་རབ་བདག་ཉིད་མངོན་ཁྱབ་པ། །ལྷག་མ་ནུབ་མོ་བྱེད་པ་ཡིན། །ཚོགས་གཉིས་ཡང་དག་རྫོགས་འགྱུར་བས། །གྲུབ་པར་བསྟན་པའི་དོན་གྱི་ཕྱིར། །

44-1-131b

སྙིང་རྗེས་བརླན་པས་ཡང་དག་གང་། །བུམ་པ་གང་བས་འདི་བརྒྱན་བྱས། །ཡེ་ཤེས་ལྔ་ཡི་རང་བཞིན་གྱིས། །དེ་བཞིན་རིན་ཆེན་ལྔ་ཡི་གཟུགས། །གཞལ་ཡས་ཁང་གི་རྣམ་པ་ནི། །རང་གི་སེམས་ནི་རྣམ་དག་པའོ། །དེ་དབུས་གདན་གྱི་ཟླ་བ་ལ། །ཉིས་འགྱུར་དབྱངས་ཡིག་
བཅུ་དྲུག་སྟེ། །མཚན་ནི་སུམ་ཅུ་རྩ་གཉིས་ཚོགས། །བསྐྱེད་པར་ནུས་པས་བསྒོམ་པར་བྱ། །ལུགས་དང་མཐུན་ད་ང་མི་མཐུན་པའི། །ཕྲེང་གཉིས་དག་ནི་དགོད་པར་བྱ། །དག་པའི་ཟླ་བ་ཤེལ་འདྲ་བས། །འོད་ཟེར་ཕྲེང་བ་སྤྲོ་བར་བྱེད། །འདི་ལྟར་གཞན་ཡང་བསྒོམ་བྱ་སྟེ། །དབྱངས་
ཡིག་བཅུ་དྲུག་ལས་བྱུང་བ། །སྟོང་པ་ཉིད་ཀྱིས་འཕངས་པས་ན། །གང་ཕྱིར་སེམས་ནི་འདི་ལྟར་འགྱུར། །དེས་ན་ཤེས་རབ་རང་བཞིན་འདི། །རི་བོང་ཅན་དུ་ཡང་དག་མཚོན། །ཤེས་རབ་ཡང་ནི་གཉིས་མེད་ཤེས། །བཅུ་དྲུག་སྟོང་པ་ཉིད་གསུངས་པ། །དཀྱིལ་འཁོར་ཚོགས་ནི་དག་
ཆེན་པོ། །ནམ་མཁའ་བཞིན་དུ་དྲི་མ་མེད། །གནས་ངན་ལེན་ནི་ཀུན་ནས་གྲོལ། །རྟོག་པ་སྤངས་པའི་མཆོག་ཡིན་ནོ། །ཉོན་མོངས་དྲི་མ་ཐམས་ཅད་དག །ཟླ་བ་མཐོང་བ་སྔོན་འགྲོ་བ། །འདིར་ནི་སངས་རྒྱས་ཡོན་ཏན་ཀུན། །ཨ་ལ་སོགས་པའི་གཟུགས་ཀྱིས་གནས། །ཨ་ཨཱ། 
ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ་ཨཾ་ཨཱཿ། འདི་དག་བཅུ་དྲུག་ཚོགས་པས་ནི། །བྱུང་བ་ངེས་པར་བསྟན་པ་ཡིན། །ཀུན་དུ་བཟང་པོའི་གསལ་བ་རུ། །ཡེ་ཤེས་ཞབས་ནི་ཉིད་ཀྱིས་སུ། །དེར་གནས་ཆོ་ག་བཞིན་དུ་སྒྲ། །དབྱངས་ཡིག་བཅུ་དྲུག་སྨྲ་བ་ཡིས། །ཇི་
ལྟར་བརྗོད་པའི་དབྱངས་ཡིག་གིས། །བསིལ་བའི་འོད་ཟེར་རབ་བསྒྲུབ་པ། །འདི་རྣམས་འདི་ལྟར་གྲུབ་པ་ནི། །སྐྱེས་བུ་ཆེན་པོའི་མཚན་ཡིན་ནོ། །སྐུ་ནི་བྱིན་གྱིས་བརླབས་འགྱུར་བ། །གང་ཕྱིར་འདི་ལས་འབྱུང་བར་འགྱུར། །དྷ་ད་ཡ་ལ་ཝ་བསྣན་བྱ། །ཀ་སོགས་ཉིས་འགྱུར་བྱས་པ་
ལས། །དེ་སྟེང་རི་བོང་ཅན་བལྟ་སྟེ། །དཔེ་བྱད་སྒྲུབ་པར་བྱེད་པའོ། །བྱང་ཆུབ་སེམས་ཀྱི་རང་བཞིན་པས། །སྙིང་རྗེ་རྩ་བའི་རང་བཞིན་གྲགས། །བསོད་ནམས་ཚོགས་ནི་ཡང་དག་རྫོགས། །ཡིད་ལས་བྱུང་ཡང་རྙོག་པ་བྲལ། །འཇིག་རྟེན་རབ་གྲགས་གྲངས་ཀྱིས་ནི། །གཟུགས་བརྙན་

44-1-132a

རབ་ཏུ་སྦྱོར་བ་ལས། །སངས་རྒྱས་ཡོན་ཏན་ཀུན་གྱི་ལུས། །འདིར་ནི་ཀ་ལ་སོགས་པས་གསལ། །ཡང་གསུངས་པ། སྙིང་རྗེ་ཆགས་ལས་ཡང་དག་བྱུང་། །སེམས་ཅན་རྗེས་སུ་འཛིན་བྱེད་པ། །དགེ་བའི་ཆོས་ནི་ཡང་དག་རྫོགས། །ཉོན་མོངས་ཀུན་ལ་ངེས་གནོད་
པ། །ཟླ་བའི་དཀྱིལ་འཁོར་དབུས་སུ་ནི། །བྱང་ཆུབ་ཟླ་བ་གཉིས་པའོ། །འདིར་ཡང་སངས་རྒྱས་ཡོན་ཏན་རྣམས། །ཀ་སོགས་གཟུགས་ཀྱིས་ཡང་དག་འཇུག །གཟུགས་བརྙན་རབ་ཏུ་སྦྱོར་བས་སོ། །ཞེས་སོ། །ཀུན་གཞི་རྣམ་ཤེས་གྱུར་པ་ལས། །འདི་ནི་ཟླ་བ་གཉིས་སུ་གྲགས། །
མེ་ལོང་ཡེ་ཤེས་སུ་བརྗོད་པ། །རྣམ་པ་དང་པོ་ཉིད་ཡིན་ནོ། །ཉོན་མོངས་ཅན་ཡིད་གྱུར་པ་ལས། །མཉམ་པ་ཉིད་ཀྱི་ངོ་བོ་ཉིད། །དེར་ཡང་ཧཱུྃ་བྱུང་རྡོ་རྗེ་སྟེ། །དམར་གསལ་བ་ཡི་འོད་ཅན་ནོ། །ཕུང་པོ་ལྔ་ནི་རྣམ་དག་པས། །ཡེ་ཤེས་ལྔ་རུ་བསྟན་པ་ཡིན། །སྟེང་དུ་གནས་པ་དེ་ཡི་ནི། །ལྟེ་བར་
ཧཱུྃ་ཡིག་ཟླ་གཉིས་གནས། །བརྗོད་བྱ་རྗོད་བྱེད་ལས་འདས་ཏེ། །ཆོས་ཉིད་རབ་ཏུ་རྟོགས་པས་ན། །དེ་ནི་རྟོགས་པར་གྱུར་པ་ལས། །སོ་སོར་ཀུན་དུ་རྟོག་པར་བསྒོམ། །དེ་ལས་དེ་བཞིན་གཤེགས་སྤྲོས་པས། །འགྲོ་བ་ཀུན་ལ་ཕན་བྱས་ནས། །སངས་རྒྱས་གང་དེ་འདིར་བསྡུས་པ། །དེ་ནི་བྱ་བ་ནན་
ཏན་ནོ། །བྱང་ཆུབ་སྤྱོད་གང་དག་པ་ནི། །བླ་མེད་སངས་རྒྱས་ཡེ་ཤེས་སོ། །དེ་རྣམས་དག་ནི་རང་བཞིན་གཟུགས། །བརྟན་པས་རྡོ་རྗེ་ཉིད་དུ་འགྱུར། །འདི་ལྟར་ཡིད་ཀྱིས་བསྒོམ་བྱས་ནས། །རང་གཟུགས་ཐ་དད་མེད་པའི་དངོས། །རྡོ་རྗེ་ཇི་ལྟར་བསྟན་མཐོང་ནས། །དེ་ལ་བདག་ཏུ་ང་རྒྱལ་བྱ། །དེ་ཡང་།
སངས་རྒྱས་ཀུན་གྱི་སྐུ་འདི་ནི། །སྣང་བ་མེད་ཅིང་གནས་མེད་པ། །མ་སྐྱེས་མ་བྱས་དག་པ་སྟེ། །རང་བཞིན་ལ་སོགས་རྣམ་པར་སྤངས། །མི་ཆོད་མི་ཕྱེད་སྲེག་ཏུ་མེད། །ལྷག་མ་མེད་པ་ཆོས་ཀྱི་སྐུ། །རྡོ་རྗེ་བདག་ཉིད་ཡང་དག་འབྱུང་། །རྡོ་རྗེ་སྐུ་ནི་བླ་ན་མེད། །ཅེས་གསུངས་སོ། །རང་གི་སེམས་
ཀྱི་འཕེན་པ་ཡིས། །བྱང་སེམས་ཤར་བ་མཆོག་ཡིན་ནོ། །སྤྲོ་དང་བསྡུ་བ་དག་ལ་ནི། །བརྟན་པར་བྱེད་འདོད་བྱིན་གྱིས་བརླབ། །རྫོགས་སངས་རྒྱས་སུ་མཉམ་འགྲོ་བ། །རྒྱུད་གཞན་ལས་ཀྱང་གསུངས་པ་ཡིན། །སྔགས་ནི་འདི་རྣམས་འདིར་བརྗོད་པ། །གང་ཞིག་སྔགས་ནི་རིག་པས་

44-1-132b

སོ། །དེ་ལ། ཨོཾ་ཙིཏྟ་པྲ་ཏི་བེ་དྷྭཾ་ཀ་རོ་མི། ཨོཾ་བོ་དྷི་ཙིཏྟཾ་ཨུཏྤཱ་ད་ཡཱ་མི། ཨོཾ་ཏིཥྛ་བཛྲ། ཨོཾ་པ་ར་བཛྲ། ཨོཾ་སཾ་ཧ་ར་བཛྲ་ཨཱཏྨ་ཀོ྅ཧཾ། ཨོཾ་ཡ་ཐཱ་སརྦྦ་ཏ་ཐཱ་ག་ཏ་ཏ་ཧྲཱ་ཨ་ཧཾ། ཞེས་པའོ། །དེ་ལ་ཟླ་སོགས་ཡོངས་གྱུར་པས། །སྐད་ཅིག་ཡེ་ཤེས་སྦྱོར་བ་ཡིས། །ཀུན་དུ་བཟང་པོར་བདག་ཉིད་
ནི། །རྒྱལ་བ་རྣམས་བསྐྱེད་རྒྱལ་བ་ཡིན། །སངས་རྒྱས་ཀུན་གྱི་རང་བཞིན་མགོན། །རྣམ་ཐར་སྒོ་གསུམ་གྱི་ནི་ཞལ། །སྔོན་པོ་དཀར་པོ་དམར་པོར་ལྡན། །གཡས་དང་དབུས་དང་གཡོན་རྣམས་སོ། །ཤེས་རབ་ཐབས་ནི་བདག་ཉིད་སྐུ། །རྡོ་རྗེ་རལ་གྲི་ནོར་བུ་པད། །གཉིས་ཀྱིས་ཤེས་རབ་
ལ་འཁྱུད་པ། །རྡོ་རྗེ་སྐྱིལ་མོ་ཀྲུང་གིས་གནས། །མི་བསྐྱོད་པ་ཡིས་སྤྱི་བོར་བརྒྱན། །རལ་པའི་ཐོར་ཚུགས་ཀྱིས་བརྒྱན་པའོ། །རྒྱན་རྣམས་ཀུན་གྱིས་བརྒྱན་པ་སྟེ། །ཞི་དང་སྒེག་པའི་གཟུགས་འཛིན་པ། །ཕུན་ཚོགས་ཀུན་བྱེད་མགོན་པོ་སྟེ། །མཚན་མོ་བྱེད་པའི་འོད་བྱེད་པ། །ཆོས་
དབྱིངས་ཤིན་ཏུ་རྣམ་དག་པའི། །རང་བཞིན་དུ་ནི་བསྒོམ་པར་བྱ། །འདོད་ཆགས་ཆེན་པོ་འདུལ་བ་ཡི། །སེམས་ཅན་ཁམས་ལ་ཀུན་དུ་ནི། །སྣོད་ལྡན་ལ་ནི་བལྟས་ནས་ནི། །གསང་བ་འདུས་པའི་དོན་བསྟན་ཕྱིར། །དག་པའི་སྒྱུ་མའི་སྒྲ་རྣམས་ཀྱིས། །ལུས་ལ་སངས་རྒྱས་རྣམས་བཅུག་
སྟེ། །བདེ་བ་རྫོགས་པ་ཡང་དག་གྲུབ། །ཐམས་ཅད་སངས་རྒྱས་གཅིག་གཟུགས་གྱུར། །སྤྱན་དང་གཟུགས་ཀྱི་རྡོ་རྗེ་སོགས། །གཟུགས་སུ་སྤྲུལ་ནས་ཕྱུང་བ་རྣམས། །དེ་རྣམས་རང་གི་རིག་མ་ལ། །ཇི་ལྟ་བ་བཞིན་ཡང་དག་གཞུག །དེ་བཞིན་འཁོར་ལོའི་སངས་རྒྱས་རྣམས། །བཅུག་སྟེ་
ཞུ་བར་གྱུར་པ་རྣམས། །ལྷ་མོའི་པདྨར་སྤྲོ་བྱས་ལ། །རྡོ་རྗེ་ཅན་གྱིས་གནས་པར་བལྟ། །དེ་དག་ཡོངས་སུ་གྱུར་པ་སེམས། །རྟེན་དང་བརྟེན་བཅས་དཀྱིལ་འཁོར་ཏེ། །མི་བསྐྱོད་གཙོ་བོ་བསྒོམ་བྱས་ལ། །སྐྱེ་བོའི་ཚོགས་ནི་ཡང་དག་གཞུག །རྣམ་སྣང་ལ་སོགས་སངས་རྒྱས་རྣམས། །དེ་བཞིན་
རྡོ་རྗེ་ཅན་གྱིས་གཞུག །བྱང་ཆུབ་སེམས་སུ་ཞུ་ལྡན་པས། །དེ་ཡིས་སྐྱེ་བ་དབང་བསྐུར་བྱ། །དེ་ནས་བྱང་ཆུབ་སེམས་ཀྱིས་ནི། །འགྲོ་ལ་འོད་ཟེར་རེག་གྱུར་པས། །སྟོན་པའི་བྱིན་གྱིས་བརླབས་དབང་གིས། །ཡང་དག་བྱང་ཆུབ་བདེ་ཐོབ་པ། །ཐམས་ཅད་ཞལ་གསུམ་ཕྱག་དྲུག་སྟེ། །ས་སྙིང་

44-1-133a

ལ་སོགས་ངོ་བོ་ཉིད། །དཀྱིལ་འཁོར་འཁོར་ལོ་ཅན་གྱུར་པ། །སངས་རྒྱས་ཀུན་གྱི་ཡོན་ཏན་ལྡན། །དེ་ཕྱིར་དེ་རྣམས་མཉམ་པར་ལྡན། །དེར་གནས་སངས་རྒྱས་མཁས་པ་ཡིས། །སེམས་ཀྱིས་མང་པོ་གདོན་པར་བྱ། །གཉུག་མའི་ས་བོན་ཇི་ལྟ་བས། །དམ་
པའི་མིག་དང་རྣ་བ་སྣ། །ལྕེ་དང་ལུས་དང་ཡིད་རྣམས་ཀྱིས། །ཡོངས་སུ་དག་པའི་རང་བཞིན་ནི། །དེ་ནི་ཡེ་ཤེས་བཟང་ཤར་བ། །ས་སྙིང་ལ་སོགས་དྲུག་པོ་ཡི། །ས་བོན་ལ་སོགས་རིམ་བཞིན་ཡིན། །ཀྵིཾ་ཛྲཱིཾ་ཁཾ་གཾ་དེ་བཞིན་དུ། ཥྐཾ་སཾ་ཞེས་པ་ཡི་གེའི་རིམ། །ཛཿཧཱུྃ་བཾ་ཧོཿདེ་བཞིན་དུ། །
ཁཾ་རཾ་ས་བོན་རིམ་འདི་རྣམས། །གཟུགས་སོགས་རྡོ་རྗེ་དྲུག་རྣམས་ཀྱིས། །གཟུགས་སོགས་སྐྱེ་མཆེད་བདག་ཉིད་དོ། །ལཾ་མཱཾ་པཾ་ཏཱཾ་འདི་ཞེས་བྱ། །ས་བོན་ས་བོན་རིག་པས་བརྗོད། །སྤྱན་མ་ལ་སོགས་བཞི་པོ་ནི། །ས་ལ་སོགས་པའི་རང་བཞིན་ཡིན། །གཟུགས་དང་ཚོར་བ་འདུ་
ཤེས་དང་། །འདུ་བྱེད་དང་ནི་རྣམ་ཤེས་ཀྱང་། །རྟག་ཏུ་རྣམ་པར་དག་གྲུབ་པའི། །རྟག་པ་ལ་སོགས་པར་གསལ་ལོ། །བྲཱུཾ་ཨཱཾ་ཛྲཱིཾ་ཁཾ་ཧཱུཾ་ས་བོན། །འདི་རྣམས་གོ་རིམས་ཇི་བཞིན་འགྱུར། །འདི་ལྟར་ཐམས་ཅད་ཕྱུང་ནས་ནི། །ལྷག་པའི་ལྷ་རྣམས་བསྒྲུབ་པར་བྱ། །དེ་ལ་ལྷག་པའི་ལྷ་
རྣམས་ནི། །སངས་རྒྱས་དཀྱིལ་འཁོར་འཁོར་ལོ་ཅན། །སྔོན་བཞིན་རྣལ་འབྱོར་པས་བསྐུལ་བས། །རང་གི་ཁ་རུ་གཞུག་པར་བྱ། །དེ་ནི་བྱང་ཆུབ་སེམས་བྱས་ལ། །རྡོ་རྗེ་ནས་ནི་སོན་པར་བལྟ། །རིག་མའི་པདྨའི་ནང་སོང་བ། །ཁ་དོག་གཟུགས་སུ་གྱུར་པའོ། །ཤེས་རབ་ཐབས་
ཀྱི་ཆགས་ཆེན་གྱི། །རང་བཞིན་ཕྱིར་ན་འོད་གསལ་བའོ། །དེ་རུ་ཨོཾ་ཨཱཿཧཱུྃ་བསམ་མོ། །ཧོཿདམར་གཉིས་ཀྱི་དབུས་བཅུག་ལ། །ཤེས་རབ་ཐབས་ཀྱི་རང་བཞིན་གྱི། །མེ་འབར་བས་ནི་ཞུ་བར་བྱས། །འོད་ཀྱི་ཚོགས་སུ་གྱུར་པ་ཡི། །འོད་ནི་འབར་བས་ཡབ་ཡུམ་ཡང་། །ཟླ་བ་
དང་འདྲ་ཞུ་བའི་གཟུགས། །ཟླ་བའི་དཀྱིལ་འཁོར་དབུས་སུ་ནི། །མྱ་ངན་འདས་པའི་ལམ་བཞིན་གནས། །དོགས་མེད་རང་ཉིད་ཀྱིས་བལྟས་ལ། །བྱམས་པ་སྙིང་རྗེའི་རྒྱུ་མཐུན་དང་། །དགའ་དང་བཏང་སྙོམས་རང་བཞིན་གྱི། །མཱ་མ་ཀཱི་དང་སྤྱན་མར་གྲགས། །གོས་དཀར་སྒྲོལ་མ་

44-1-133b

མཉམ་པ་རུ། །མི་དམིགས་པ་ཡི་སྦྱོར་བ་ཡིས། །དེ་ཡི་འོད་ཟེར་ལས་བྱུང་བ། །འདི་རྣམས་རང་གི་གནས་བཞུགས་པས། །བསྐུལ་བས་རྩོལ་བ་བསྒོམ་པར་བྱ། །སེམས་ཅན་ཁམས་ན་གནས་ཀྱི་དབང་ཕྱུག་ཁྱོད་ནི་རྡོ་རྗེའི་ཐུགས། །དགའ་བའི་ཡིད་འོང་དོན་ཆེན་འདོད་པས་
བདག་ལ་སྐྱབས་སུ་གསོལ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །སེམས་ཅན་ཡབ་ཆེན་གཉེན་མཆོག་བདག་ལ་དགྱེས་པར་མཛད་དུ་གསོལ། །རྡོ་རྗེ་སྐུ་ཁྱོད་བཀའ་ཡི་འཁོར་ལོ་སེམས་ཅན་ཀུན་ལ་ཕན། །སངས་རྒྱས་དོན་དུ་བྱང་ཆུབ་དོན་དམ་རབ་ཏུ་
ཕན་པར་གཟིགས། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །འདོད་ཆགས་དམ་ཚིག་ཆགས་པས་བདག་ལ་དགྱེས་པར་མཛད་དུ་གསོལ། །ཁྱོད་ནི་རྡོ་རྗེའི་གསུང་སྟེ་ཀུན་ལ་ཕན་ཞིང་ཐུགས་བརྩེ་བ། །འཇིག་རྟེན་དག་ནི་དོན་དང་དགོངས་པ་མཛད་ལ་རབ་ཏུ་
བརྩོན། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །དགའ་བའི་སྤྱོད་པ་ཀུན་དུ་བཟང་པོ་བདག་ལ་དགྱེས་པར་མཛད་དུ་གསོལ། །ཁྱོད་ནི་རྡོ་རྗེ་འདོད་པ་དམ་ཚིག་མཆོག་གི་ཕན་དོན་ཆེ། །ཡང་དག་རྫོགས་སངས་རྒྱས་ཀྱི་གདུང་མཆོག་མཉམ་ཉིད་ཐུགས་བརྩེ་
བ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །ཡོན་ཏན་རིན་ཆེན་མང་པོའི་གཏེར་གྱུར་བདག་ལ་དགྱེས་པར་མཛོད། །འདི་རྣམས་ཀྱིས་ནི་བསྐུལ་བའི་སེམས། །ཞུ་བའི་གཟུགས་སུ་བསྒོམ་པར་བྱ། །སེམས་ཅན་དོན་ཉམས་མཐོང་བས་ན། །བདག་ཉིད་
ཕུན་ཚོགས་ཉམས་པ་འདྲ། །སྒྱུ་མ་ལྟ་བུར་མོས་པ་ཡིས། །ཆོས་རྣམས་ཐམས་ཅད་བརྟག་པར་བྱ། །ཡོངས་སུ་གྱུར་ནས་སངས་རྒྱས་སྤྲོས། །ཞུ་བ་ཡི་གེ་མཾ་དུ་བསྒོམ། །དེ་ཡོངས་གྱུར་པས་རལ་གྲི་སྟེ། །ས་བོན་མཾ་འབར་ཡུ་བར་ནི། །བདག་གི་རང་བཞིན་དེ་ལྟར་བསྒོམ། །སེམས་
བརྟན་དེ་ཉིད་རིག་པས་སོ། །དེ་ལས་བྱུང་བའི་སངས་རྒྱས་ཚོགས། །འགྲོ་ལ་ཕན་པར་བལྟ་བར་བྱ། །སླར་ཡང་དེ་རུ་ཞུགས་གྱུར་ནས། །འཇམ་པའི་རྡོ་རྗེར་བསྒོམ་པར་བྱ། །སྤྲོ་བྱ་རྒྱན་དང་ཅོད་པན་ཅན། །གུར་གུམ་རློན་པའི་འོད་ལྡན་པ། །རལ་གྲི་མདའ་དང་ཆུ་སྐྱེས་སྔོ། །གཞུ་

44-1-134a

ཡིས་མཚན་པ་བཞི་པོ་དང་། །རྩ་བའི་ཕྱག་གཉིས་ཀྱིས་འཁྱུད་པ། །ཤེས་རབ་འདི་ཞལ་མྱང་བས་འགྱིད། །ཟླ་བར་རྡོ་རྗེ་སྐྱིལ་མོས་གནས། །ན་བཟའ་དམ་པས་རྒྱན་གྱིས་མཛེས། །གཡས་དང་གཡོན་གྱི་ཞལ་དག་ནི། །སྔོ་དཀར་སྒེག་པའི་གཟུགས་འཛིན་
པ། །སངས་རྒྱས་ཚོགས་ནི་མ་ལུས་སྤྲོ། །སྲིད་གསུམ་མ་ནི་རབ་ཏུ་བསྒྲུབས། །སྲིད་པ་སྡུག་བསྔལ་དབང་སོང་བ། །ཉོན་མོངས་ཀུན་སྐྱེས་བསལ་བར་མཛད། །བདག་ཉིད་བདེ་བ་དང་མཉམ་པས། །སྡུག་བསྔལ་ཐམས་ཅད་རྣམ་པར་སྤངས། །རབ་ཏུ་རྟོགས་པའི་སྣོད་རུང་
བ། །སེམས་ཅན་ཀུན་གྱི་དོན་བྱས་ཏེ། །སྙིང་རྗེ་ཆགས་མེད་ངོ་བོ་ཡིས། །ཀུན་རྫོབ་ཏུ་ནི་ཐབས་བསྟན་ཏོ། །མྱ་ངན་འདས་ཀྱང་ཚུལ་བཞིན་དུ། །ཡང་དག་མ་ཡིན་སྒྲོ་འདོགས་སྲིད། །སོ་སོའི་སྐྱེ་བོར་བདེན་འགྱུར་བའི། །སྡུག་བསྔལ་ཐམས་ཅད་ཞི་བར་བྱེད། །གང་ཞིག་འདིར་
ནི་མོས་བྱེད་པ། །ཆོས་ཀྱི་དབྱིངས་ཀྱིས་ཁྱབ་པའོ། །རྣམ་པར་བྱང་ལ་ཞུགས་པ་ཡི། །སྤང་བར་བྱ་ཕྱིར་འདི་བརྗོད་དོ། །ཨོཾ་དྷརྨྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧཾ། ཆུང་ངུའི་གཉེན་པོའི་ཡན་ལག་ཉིད། །ཆུང་ངུའི་རྒྱུ་མཐུན་འབྲས་བཟང་པོ། །དེ་ནས་མིག་སོགས་བྱིན་བརླབ་པ། །ཐམས་ཅད་
མཁྱེན་པ་ཐོབ་ཕྱིར་བྱ། །ཟླ་བའི་དཀྱིལ་འཁོར་དབུས་གནས་པ། །ཀྵིཾ་ཡིག་དཀར་དང་འཁོར་ལོ་ལས། །ཕྱག་དང་ཞལ་དང་མཚོན་ཆ་ཉིད། །རྣམ་པར་སྣང་མཛད་རང་བཞིན་ཅན། །མིག་ཏུ་ས་ཡི་སྙིང་པོར་གྲགས། །ཕྱག་ན་རྡོ་རྗེ་རྣ་བར་སོན། །ཟླ་བར་ཛྲཱིཾ་ཡིག་རྡོ་རྗེ་ལས། །བྱུང་བ་མི་བསྐྱོད་
པ་འདྲའི་གཟུགས། ཟླ་བར་ཁཾ་དང་རིན་ཆེན་སྐྱེས། །སྣ་ཡི་ནང་དུ་མཁའ་སྙིང་པོ། །རིན་ཆེན་འབྱུང་ལྡན་དང་འདྲ་བར། །ཁ་དོག་མཚན་མ་ཞལ་རྣམས་སོ། །སྒྲོལ་མའི་བདག་པོར་ཡང་དག་གནས། །གཾ་དང་མཚོ་སྐྱེས་ལས་བྱུང་བ། །འཇིག་རྟེན་མགོན་པོ་ལྕེ་ལའོ། །ཁ་དོག་ལ་སོགས་དཔག་
མེད་འདྲ། །མཚན་མོ་བྱེད་བཟང་གཟུགས་སྟེང་གནས། །ཡི་གེ་ཥྐཾ་མཆོག་རལ་གྲི་ལས། །ཞལ་སོགས་དོན་ཡོད་དང་འདྲ་བར། །མགོ་བོར་སྒྲིབ་པ་རྣམ་སེལ་གཙོ།  །འོད་དཀར་གདན་ལ་སཾ་སྐྱེས་ཏེ། །རྡོ་རྗེ་འཛིན་པའི་གཟུགས་འདྲ་བ། །སྙིང་གར་ཀུན་ཏུ་བཟང་པོར་གྲགས། །བྱང་

44-1-134b

ཆུབ་སེམས་དཔའ་བསྒོམ་པར་བྱ། །ཐམས་ཅད་རྡོ་རྗེ་སྐྱིལ་མོ་ཀྲུང་། །རབ་འཕྲོ་རིན་ཆེན་ཅོད་པན་ཅན། །ཤེས་རབ་དམ་པས་འཁྱུད་ཞི་བ། །ཟླ་བཟང་ལ་བརྟེན་འོད་གསལ་བ། །རང་གི་ཁ་དོག་ས་བོན་བསྒྲུབས། །སྤྲོ་ཞིང་བསྡུ་བའི་སྦྱོར་བ་ཡིས། །རང་རང་སྐྱེ་མཆེད་བདག་ཉིད་གཟུགས། །
རང་རང་རྣམ་པར་ཡང་དག་གནས། །དེ་བཞིན་མཚན་རང་ས་བོན་ལས། །རང་གི་གདན་ལ་གནས་པའི་གཟུགས། །གཟུགས་སོགས་གཟུགས་ཀྱི་རྡོ་རྗེ་སོགས། །ས་སོགས་སྤྱན་ལ་སོགས་པ་རྣམས། །རྣམ་སྣང་ལ་སོགས་སངས་རྒྱས་རྣམས། །གཟུགས་སོགས་ཕུང་པོ་ལྔ་པོ་
རྣམས། །བསྒོམ་བྱ་ངེས་པར་མོས་པ་ཡིས། །སེམས་ནི་བརྟན་པ་ཉིད་ཀྱིས་ནི། །འདི་དག་ཉེ་བའི་སྒྲུབ་པ་དང་། །རྣམ་པར་སྨིན་པའི་འབྲས་བུར་བྱེད། །ཆོས་དང་ལོངས་སྤྱོད་སྤྲུལ་པ་ཡི། །སྐུ་ཡི་དོན་དུ་འདི་བསྒོམ་བྱ། །སྙིང་ཟླར་གནས་པའི་ཧཱུྃ་ཡིག་ལས། །ཡང་དག་བྱུང་བའི་རྡོར་
དབུས་སུ། །དེ་བཞིན་ཧཱུྃ་སྐྱེས་རྡོ་རྗེ་ནི། །ཕྲ་མོ་བསྒོམ་བྱ་ཧཱུྃ་དང་བཅས། །དེ་ཡི་སངས་རྒྱས་འོད་ཟེར་གྱིས། །སེམས་ཅན་དོན་བྱས་ཡོངས་གྱུར་ནས། །ཐུགས་ཀྱི་རྡོ་རྗེ་དབང་ཕྱུག་བསྒོམ། །ཕྱག་ན་རྡོ་རྗེ་དང་འདྲ་མཆོག །ཐུགས་རྡོར་རང་སྙིང་ས་བོན་གྱི། །འོད་ཟེར་ལས་སྤྲུལ་
གཟུགས་རྣམས་ཀྱིས། །ཐུགས་ཀྱི་རྡོ་རྗེས་གང་ཁྱབ་པ། །ཕྱོགས་གནས་ཡང་དག་རྫོགས་སངས་རྒྱས། །སྙིང་གའི་ས་བོན་འོད་ཟེར་གྱིས། །ཀུན་དུ་ཡང་དག་སྤྲུལ་པའོ། །གཟུགས་སོགས་རྡོ་རྗེར་གྱུར་པ་ཡིས། །དེ་རིགས་ནང་ཞུགས་བདག་ཉིད་ཀྱིས། །མཆོད་བྱས་དེ་རྣམས་
ཐུགས་རྡོ་རྗེ། །བྱིན་གྱིས་བརླབ་ཕྱིར་གསོལ་བ་གདབ། །ཚིགས་བཅད་འདི་གཉིས་རྟོགས་བྱས་ལ། །ཐམས་ཅད་བདེ་བྱེད་བརྗོད་པར་བྱ། །དཔལ་ལྡན་རྡོ་རྗེ་ཐུགས་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་
དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །སངས་རྒྱས་ཀུན་གྱི་ཐུགས་རྣམས་ཀྱིས། །ཡོན་ཏན་གྱིས་ནི་མཉམ་གྱུར་པ། །དེ་ཡིས་བྱིན་གྱིས་

44-1-135a

བརླབས་པའི་ཐུགས། །སེམས་སུ་བརྟན་པར་རྣམ་པར་བལྟ། །རྫོགས་སངས་རྒྱས་ཀྱི་ཐུགས་རྡོ་རྗེའི། །བདག་པོ་དང་མཉམ་བལྟ་བར་བྱ། །ཐུགས་ཀྱི་སྔགས་ཀྱིས་བྱིན་གྱིས་བརླབས། །རྡོ་རྗེའི་ཚིག་གིས་བརྗོད་པར་བྱ། །ཨོཾ་སརྦྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་
ཀོ྅ཧཾ། ཞེས་པ་ནི་སྔགས་སོ། །དེ་སྟེང་ནུ་མའི་དཀྱིལ་དུ་ནི། །མཚན་མའི་དཀྱིལ་དུ་གསོལ་གདབ་མེད། །དམ་ཚིག་སེམས་དཔའ་དང་འདྲ་བ། །ཡེ་ཤེས་སེམས་དཔའ་བསྒོམ་པར་བྱ། །ལྐོག་མར་ཨཱཿསྐྱེས་ཆུ་སྐྱེས་ལ། །ཨཱཿལས་བྱུང་བའི་པདྨ་ནི། །ཕྲ་མོ་ས་བོན་བཅས་པ་བསྒོམ། །
གསུང་གི་རྡོ་རྗེ་བསམ་པར་བྱ། །སྤྱན་རས་གཟིགས་དང་དེ་འདྲ་བསྒོམ། །མཁའ་གནས་གསུང་གི་རྡོ་རྗེ་བསྣམས། །ཡང་དག་མཆོད་བྱ་གསོལ་བ་གདབ། །དེ་ཡི་ཚིགས་བཅད་གཉིས་བརྗོད་དོ། །ཆོས་ཀྱི་གསུང་ལམ་དཔལ་དང་ལྡན། །རྡོ་རྗེ་མི་ཕྱེད་གསུམ་བསྒོམས་པས། །དེང་
བདག་བྱིན་གྱིས་བརླབས་ནས་སུ། །རྡོ་རྗེ་གསུང་གིས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབ་ནས་སུ། །རྡོ་རྗེ་གསུང་གིས་མཛད་དུ་གསོལ། །དབྱངས་ཀྱི་ཡན་ལག་ཀུན་ཕུན་ཚོགས། །
རང་གི་ངག་ནི་མོས་པར་བྱ། །སངས་རྒྱས་གསུང་དང་མཉམ་གྱུར་པ། །སྔགས་འདིས་བྱིན་གྱིས་བརླབ་པར་བྱ། །ཨོཾ་སརྦྦ་ཏ་ཐཱ་ག་ཏ་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྤྱི་བོར་ཟླ་གནས་ཨོཾ་ལས་ནི། །བྱུང་བའི་འཁོར་ལོ་རྩིབས་བརྒྱད་པ། །ཨོཾ་དང་འཁོར་ལོ་པྲ་ལས་བྱུང་། །ས་སྙིང་དང་
འདྲ་དེ་བལྟས་ནས། །རྫོགས་པའི་སངས་རྒྱས་ཕྱོགས་གནས་ལ། །ཚིགས་བཅད་གཉིས་ཀྱིས་སྐུ་རྡོར་ཚོགས། །བྱིན་གྱིས་བརླབ་ཕྱིར་གསོལ་བ་གདབ། །དཔལ་ལྡན་རྡོ་རྗེ་སྐུ་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་
སྐུས་ནི་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུས་ནི་མཛད་དུ་གསོལ། །བྱིན་གྱིས་བརླབ་པར་སྐུ་བལྟས་ལ། །མཚན་ནི་སུམ་ཅུ་རྩ་གཉིས་འབར། །དཔེ་བྱད་བཟང་པོ་ཕུན་

44-1-135b

ཚོགས་པ། །མཉམ་པར་བྱ་ཕྱིར་བརྗོད་པར་བྱ། །ཨོཾ་སརྦྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ས་སྙིང་ལ་སོགས་སྐུ་མཐར་ཐུག །མིག་ལ་སོགས་པ་རྣམ་དག་པ། །འདི་ལྟར་མདོར་བསྡུས་ཤེས་པར་བྱ། །ཕྱག་རྒྱ་བཞི་ཡིས་རྒྱས་བཏབ་པའོ། །ཆུང་ངུའི་སྒྲུབ་པའི་ཡན་ལག་དང་། །ཆུང་
ངུའི་སྐྱེས་བུའི་བྱེད་འབྲས་སོ། །ཇི་ལྟར་ཆོས་རྒྱལ་དབང་བསྐུར་བ། །དེ་བཞིན་འདིར་ནི་དྲན་པར་བྱ། །ཡེ་ཤེས་སེམས་དཔའི་ཐུགས་འོད་ཀྱིས། །རྫོགས་པའི་སངས་རྒྱས་བསྐུལ་ནས་ནི། །འོད་ཟེར་ལས་བྱུང་རིག་མ་རྣམས། །བར་མེད་ཁྱབ་པ་གང་རྣམས་ཀྱིས། །པདྨའི་ཕྱག་ནི་
ནུས་པ་ཡིས། །རིན་ཆེན་བུམ་པ་ཡིད་འོང་བ། །རང་ལུས་རྣམ་དག་ཁ་དོག་བཟང་། །བྱང་ཆུབ་སེམས་ཀྱིས་རབ་གང་བས། །གཟུགས་ལ་སོགས་པའི་རྡོ་རྗེས་ཀྱང་། །མཆོད་པ་སྔོན་དུ་འགྲོ་བ་ཡིས། །བདག་ཉིད་འཁོར་ལོས་སྒྱུར་བཞིན་དུ། །དེ་ཉིད་རིག་པས་དབང་བསྐུར་བྱ། །སྤྱི་
བོར་མི་བསྐྱོད་རྫོགས་སངས་རྒྱས། །འཆད་པར་འགྱུར་བའི་ཕྱག་སོགས་ལྡན། །བྱང་ཆུབ་སེམས་ནི་དམ་པའི་ཆུ། །ཡོངས་སུ་གྱུར་བས་བསྒོམ་པར་བྱ། །ཡེ་ཤེས་ཆེན་པོའི་མཐུར་ཤེས་བྱ། །ཆུང་ངུའི་སྒྲུབ་པ་ཆེན་པོ་དང་། །འབྲས་བུ་ཡང་ནི་དྲི་མེད་ནི། །ཆུང་ངུའི་ངོ་བོར་རབ་ཏུ་
བསྒྲགས། །རྒྱུ་མཐུན་རྒྱུ་དང་འདྲ་བ་སྟེ། །རྣམ་པར་སྨིན་པ་ལྷག་འབྲས་བུ། །གང་གིས་སྟོབས་ལས་གང་སྐྱེས་པ། །འབྲས་བུ་དེ་ནི་སྐྱེས་བུར་འདོད། །དྲི་མེད་བྲལ་བའི་འབྲས་བུ་སྟེ། །གང་ཕྱིར་ཆོས་ཀུན་བདག་པོའོ། །མ་ལུས་སེམས་ཅན་ཕུན་ཚོགས་དོན། །སྣ་ཚོགས་དྲི་མ་འཁྲུ་
བས་སོ། །དེ་བཞིན་ཤེས་རབ་མདུན་བལྟས་ལ། །རང་སྙིང་བདག་ཉིད་མཉམ་བྱས་པ། །དེ་ནི་སྔར་བཞིན་བསྒོམས་ནས་ནི། །མིག་ལ་སོགས་པ་སྦྱང་བའོ། །སླར་ཡང་འདི་ཡི་བྱེ་བྲག་ནི། །རྣམ་པ་གཞན་དག་བརྗོད་པར་བྱ། །སྐུ་སོགས་བྱིན་གྱིས་བརླབ་པ་ལ། །ཚིགས་བཅད་བརྗོད་པ་སྤངས་
པའོ། །དེ་ནི་འབྲིང་གི་བསྙེན་སོགས་དང་། །ལྡན་པར་ཉེ་བར་བརྟག་པར་བྱ། །ཐབས་ནི་ཡེ་ཤེས་ལྔ་ཡིན་ཀྱང་། །ཤེས་རབ་ཆགས་པ་དག་གྱུར་ཏེ། །དཔལ་ལྡན་གསང་འདུས་རྫོགས་བྱང་ཆུབ། །སྒྲུབ་པར་འདོད་པའི་སེམས་ལ་ནི། །བྱང་ཆུབ་མངོན་དུ་བྱེད་འདོད་པས། །བཏང་སྙོམས་ལམ་ལ་ཞུགས་

44-1-136a

གྱུར་པ། །དཀར་དང་དཀར་མིན་ལྗང་སེར་དང་། །དམར་པོ་ལྗང་སྔོན་འོད་འདྲ་བ། །ཨོཾ་ཧཱུཾ་སྭཱ་དང་ཨཱཿཧཱར་བཅས།  །གོ་རིམས་འདིས་ནི་བྱིན་གྱིས་བརླབ། །སྙིང་མིན་སྐུ་ཡི་རྡོ་རྗེར་གྲགས། །ལྟེ་མིན་རྡོ་རྗེ་འཛིན་པའོ། །གསང་མིན་རིན་ཆེན་འབྱུང་ལྡན་ནོ། །གསང་
བར་འདོད་ཆགས་རྡོ་རྗེའོ། །བརླ་ནས་རྐང་པ་ལ་གཏུགས་ལ། །དོན་ཡོད་བལྟས་ཏེ་ཡི་གེ་དེས། །ལྷ་མོའི་ཁ་དོག་དབྱིབས་རྣམས་ནི། །དེ་ལ་དེ་རྣམས་བརྟག་པར་བྱ། །ཧཱུྃ་སྐྱེས་པདྨ་འདབ་བརྒྱད་པ། །དེ་ནི་དམར་པོ་འོད་ཕྲེང་བ། །གསང་ཡིན་རང་གི་གསང་བ་ཡང་། །རྡོ་རྗེར་གྱུར་པར་
རྣམ་པར་བསམ། །ཡི་གེ་ཨཱཿདང་ཨོཾ་ལས་བྱུང་། །དེ་དག་ཟེ་འབྲུ་ནོར་བུ་དང་། །སངས་རྒྱས་གཟུགས་ནི་དུ་མ་རུ། །བདག་ཀྱང་བསྒོམ་པར་བྱ་བའོ། །འདོད་ཆགས་ཆགས་པའི་སྤྱན་གྱིས་བལྟ། །དེ་ནས་དེ་དང་བདེ་འདོད་པས། །རྒྱལ་བའི་རྗེས་ཆགས་བྱ་བ་ཡི། །ལུགས་ཡིན་
ཞེས་ནི་བྱས་པའི་སེམས། །མཉམ་པའི་ཡེ་ཤེས་སྦྱོར་བ་ཡིས། །འོད་ཟེར་ཞགས་པས་བཀུག་ནས་ནི། །སྔགས་པས་དགའ་བ་བརྩམ་པར་བྱ། །རང་འདྲའི་ནང་དུ་ལྷུང་གྱུར་པས། །འདོད་ཆགས་ཉེས་པ་སྤངས་ནས་ནི། །སྐལ་བཟང་མ་དང་རྗེས་ཆགས་བྱ། །སངས་རྒྱས་མཆོད་
ཕྱིར་ང་རྒྱལ་བྱ། །སྔགས་འདི་ཉེ་བར་བརྗོད་པར་བྱའོ། །ཨོཾ་སརྦྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཏིང་འཛིན་རང་དོན་བསྒོམ་པའོ། །འདི་ནི་དང་པོའི་སྦྱོར་བའོ། །དེའི་ཕྱིར་དཀྱིལ་འཁོར་རྒྱལ་པོ་མཆོག །གཞན་གྱི་དོན་དུ་བསྒོམ་པར་བྱ། །ཡེ་ཤེས་སེམས་དཔའི་
སྙིང་ཟླ་ཡི། །ཡི་གེ་མཾ་གྱི་འོད་ཟེར་གྱིས། །སངས་རྒྱས་ཚོགས་ལ་གསོལ་བཏབ་ནས། །རང་གི་ས་བོན་ནང་གཞུག་བྱ། །རང་རིག་པདྨའི་ཁོངས་སུ་ནི། །རྡོ་རྗེ་ནས་ནི་གདོན་པར་བྱ། །བྱང་ཆུབ་སེམས་ནི་ཞུ་གྱུར་ནས། །རང་གི་འོད་ནི་འབར་བ་ལས། །དེ་དག་གྱུར་པ་ས་བོན་ཏེ། །
རང་གི་འོད་ཟེར་འབར་བ་ལས། །དེ་གྱུར་རང་གི་ས་བོན་དགོད། །རང་གི་དཀྱིལ་འཁོར་བསྒོམ་པར་བྱ། །རྟེན་དང་བརྟེན་པ་རྣམ་པར་གསལ། །གཅིག་ཉུང་ཉི་ཤུའི་ལྷ་རྣམས་སོ། །དེ་རུ་བརྟན་པར་བྱས་ནས་ནི། །རྗེས་གནང་ཐོབ་བྱ་རིགས་བདག་ལས། །ཆོ་ག་བཞིན་དུ་འཁོར་ལོ་

44-1-136b

གདོན། །སྒྲུབ་པ་པོ་ཡིས་སྔགས་བརྗོད་པས། །བདེན་མིན་སྒྲོ་འདོགས་ལས་བྱུང་བ། །ཞེ་སྡང་རྒྱུན་ནི་དག་པ་ཡིས། །མ་འདྲེས་ཨིནྡྲ་ནཱི་ལའི་འོད། །ཕྱག་མཚན་རྡོ་རྗེ་སེམས་དང་མཚུངས། །རྣམ་དག་ཡེ་ཤེས་ལས་གྲུབ་པ། །ཆོས་ཀྱི་དབྱིངས་ཀྱི་རང་བཞིན་ལས། །ཅུང་ཟད་འགྲོ་
བའི་ཉམས་ཚུལ་ལྡན། །སངས་རྒྱས་སྟོང་ནི་སྤྲོ་བྱེད་པ། །དམར་དང་གནག་དང་དཀར་པོའི་གཟུགས། །གཡོན་དང་དབུས་དང་གཡས་རྣམས་སོ། །བཛྲ་དྷྲྀཀ་གིས་ཡང་དག་བསྐུལ། །མི་བསྐྱོད་གཙོ་བོ་གདོན་པར་བྱ། །ཕྱོགས་ཀྱི་སེམས་ཅན་ཞེ་སྡང་རིགས། །ཞེ་སྡང་རྡོ་རྗེའི་རང་
བཞིན་བྱས། །ཡིད་ཀྱིས་དེ་ལྟར་རིག་བྱས་ནས། །བསྡུས་ནས་བདག་ལ་བསྟིམ་པར་བྱ། །གཟུགས་ཕུང་ཀུན་གཞི་རྣམ་པར་ཤེས། །གཏི་མུག་ལུས་ནི་རྣམ་དག་པ། །མེ་ལོང་ཡེ་ཤེས་ཡང་དག་པ། །འཁོར་ལོ་རལ་གྲི་ནོར་བུ་པད། །རྡོ་རྗེ་འཛིན་ཆེན་རྣམ་པ་ཡི། །ཞལ་དང་ཁ་དོག་
རྗེས་སུ་བྱེད། །སླར་ཡང་ཡིད་ཀྱིས་གདོན་པར་བྱ། །ཛི་ན་ཛིཀ་གིས་རྟག་པའོ། །འགྲོ་བའི་གཏི་མུག་བཅོམ་ནས་ནི། །མ་ལུས་དེ་ཡི་ངོ་བོར་བྱས། །དེ་བསྡུས་ནས་ནི་བློ་ལྡན་གྱིས། །མདུན་དུ་རི་བོང་དཀྱིལ་འཁོར་དགོད། །ང་རྒྱལ་ཉོན་མོངས་ཅན་ཡོད་ཚོར། །ཕུང་པོ་རྣམ་པར་དག་གྱུར་
པ། །མཉམ་ཉིད་ཡེ་ཤེས་ཡང་དག་ལྡན། །འཇམ་པའི་རྡོ་རྗེ་ལྟ་བུའི་ཞལ། །རཏྣ་དྷྲྀཀ་གིས་རིན་ཆེན་དབང་། །འཛམ་བུའི་ཆུ་བོའི་དང་མཚུངས་འོད། །བདག་ཉིད་ཆེན་པོས་གདོན་པར་བྱ། །རིན་ཆེན་རལ་གྲི་འཁོར་ལོ་པད། །དེ་ཡིས་མ་ལུས་འཇིག་རྟེན་འདི། །གཟིགས་ནས་བདག་
དང་མཉམ་པར་མཛོད། །ཡང་དག་བསྡུས་ནས་ལྷོ་ཕྱོགས་ཆར། །དེ་ནི་ཉི་མར་དགོད་པར་བྱ། །འདུ་ཤེས་ཕུང་པོ་དག་འདོད་ཆགས། །རྣམ་རྟོག་ཤེས་པ་དག་གྱུར་པ། །སོ་སོར་ཡང་དག་རྟོག་པར་བྱ། །པདྨ་རལ་གྲི་ནོར་འཁོར་ལོ། །གཡས་དང་གཡོན་གྱི་ཞལ་དག་ནི། །འཇམ་པའི་ཆ་
བྱད་དང་འདྲའོ།  །སྣང་བ་མཐའ་ཡས་ཤིན་ཏུ་དམར། །ཨཱ་རོ་ལྀཀ་གིས་གདོན་པར་བྱ། །བརྗོད་བྱ་རྗོད་བྱེད་ལས་འདས་པའི། །ཆོས་ཉིད་རབ་ཏུ་སྟོན་བྱེད་པས། །འདོད་ཆགས་སེམས་ཅན་དག་བྱས་ནས། །བཟློག་པ་ལས་ནི་ཡང་དག་བྱུང་། །འདོད་ཆགས་ཆེན་པོ་ལ་གནས་པ། །བརྟུལ་

44-1-137a

ཞུགས་ཅན་གྱིས་ཡང་དག་བཟུང་། །རྒྱབ་ཏུ་པདྨ་ཉི་དཀྱིལ་དུ། །དེར་བྱོན་གནས་པར་ཡང་དག་བལྟ། །ཕྲག་དོག་ལ་ཞུགས་རྣམ་པར་ཤེས། །འདུ་བྱེད་ཕུང་པོ་དག་པ་ཡིས། །གཅིག་ཏུ་ལྗང་གུ་མཐའ་ཡས་འོད། །རལ་གྲི་འཁོར་ལོ་ནོར་བུ་པད། །པྲཛྙཱ་དྷྲྀཀ་གིས་
དོན་ཡོད་གྲགས། །བྱ་བ་ནན་ཏན་བདེན་པའི་ལམ། །སེམས་ཅན་ཀུན་དོན་མཛད་པའོ། །ནམ་མཁའ་ཁྱབ་པར་སྤྲོ་བར་བྱ། །ཕྲག་དོག་གཙོ་བོའི་ཕྲག་དོག་ལ། །ཟློས་པས་རིམ་གྱིས་བཏུལ་ནས་ནི། །བྱ་ནན་ཡེ་ཤེས་དང་ལྡན་པར། །འགྲོ་བའི་རང་བཞིན་བྱས་ནས་ནི། །བསྡུས་
ནས་བྱང་གི་ཕྱོགས་སུ་ནི། །མཚོ་སྐྱེས་ཉི་མའི་དཀྱིལ་འཁོར་དུ། །སླར་ཡང་བཞུགས་པར་བསྒོམ་པར་བྱ། །རྩེ་གཅིག་ཡིད་ཀྱིས་གསལ་བར་བསྒོམ། །ཀུན་ཀྱང་དམ་པའི་ཤེས་རབ་འཁྱུད། །ལེགས་བརྒྱན་རྩ་བའི་ཕྱག་གཉིས་ཀྱིས། །རྡོ་རྗེ་སྐྱིལ་མོ་ཀྲུང་བསྒོམ་བྱ། །
རལ་པའི་ཐོར་ཚུགས་ཀྱིས་བརྒྱན་པའོ། །ས་དང་སྙིང་པོ་ཐབས་དང་ནི། །སྟོང་པ་ཉིད་སྒོའི་རང་བཞིན་ཅན། །རྟག་པའི་གཟུགས་ཀྱིས་སྤྱན་མ་ནི། །མོ་ཧ་ར་ཏཱི་ཞེས་པས་གདོན། །སེམས་ཅན་དོན་ལ་བརྩོན་པ་དང་། །སྙིང་རྗེ་སྟོང་པ་ཉིད་ཀྱི་སྒོ། །རང་གི་ཉེས་སྤོང་བསམ་གཏན་
དང་། །ཡང་དག་པ་ཡི་ལས་དང་ནི། །མྱུར་བར་བདེ་བའི་བྱང་ཆུབ་དང་། །མ་ལུས་ཐབས་ནི་གསུམ་དག་དང་། །འགྲོ་བ་རིང་དུ་སོང་བ་ལས། །ཇི་ལྟའི་སྟོབས་ཀྱིས་གཞག་བྱས་ནས། །ཉེས་དང་འཇིགས་པས་ཀུན་ཉེན་ལ། །ཕན་ཕྱིར་དེ་ནི་ཡང་དག་གནས། །བསྡུས་ནས་ཡིད་
ཀྱིས་བལྟ་བྱས་ཏེ། །མེ་རུ་ཞི་བ་སྒྲུབ་བྱེད་མའོ། །བྱམས་དང་སྨོན་ལམ་ཡང་དག་ལྡན། །ཆུ་ཁམས་མཚན་མ་མེད་པ་ཡིས། །རྣམ་དག་ལྷ་མོ་མཱ་མ་ཀཱི། །མི་བསྐྱོད་རང་འོད་དང་མཚུངས་པ། །དེ་ཥ་ར་ཏཱི་ཞེས་བསྐུལ་ནས། །ཀུན་ནས་འོད་ཟེར་མི་མཉམ་དང་། །ཚོགས་ནི་སོགས་
པར་རྩོམ་པ་དང་། །སེམས་ཅན་དོན་ལ་རྗེས་འབྲེལ་དང་། །སངས་རྒྱས་ཞིང་ནི་རྣམ་དག་དང་། །འདིར་ནི་སྨོན་ལམ་གསུམ་དག་དང་། །མི་གཡོ་བ་ལ་ངེས་བཞུགས་ནས། །བྱམས་སོགས་དམ་པ་ལ་བཞུགས་ནས། །འགྲོ་བ་ཀུན་གྱི་དོན་བྱས་ཏེ། །འགྲོ་བ་དེ་དེ་འོད་འབར་བྱས། །

44-1-137b

བསྡུས་ནས་བདེན་བྲལ་དུ་བཀོད་པ། །ཡང་དག་འཇིགས་པ་འཇོམས་བྱེད་མའོ། །སྟོབས་ཀྱི་ཕ་རོལ་ཕྱིན་དང་མེ། །དགའ་བ་དང་ནི་སྨོན་པ་མེད། །དག་པའི་གོས་དཀར་མོ་གདོན་བྱ། །འོད་དཔག་མེད་པའི་བཙུན་མོར་མཚུངས། །རཱ་ག་ར་ཏཱི་ཞེས་བསྐུལ་ནས། །སྒེག་པའི་
ཉམས་དང་དམ་པའི་དགའ། །དགའ་བ་ལ་སོགས་ཡོན་ཏན་དང་། །རང་ལས་ཉོན་མོངས་བདུད་སོགས་ལས། །རྣམ་པར་བཟློག་ལ་དགོད་པ་སྟེ། །དེ་ཡིས་འགྲོ་ལ་ཕན་པར་བྱས། །འདིར་ནི་སྟོབས་ནི་རྣམ་གསུམ་དང་། །ལེགས་པའི་བློ་གྲོས་ལ་གཞག་པ། །ཇི་ལྟར་བྱས་
ནས་ཡང་དག་འོངས། །འོད་མཛེས་འཁྲིགས་པའི་ཕྲེང་བ་ཅན། །རླུང་དུ་རྒྱས་པ་འཕེལ་མཛད་མ། །རྣལ་འབྱོར་པ་ཡིས་བཞུགས་པར་བསྒོམ། །བཏང་སྙོམས་ཡེ་ཤེས་ཕ་རོལ་ཕྱིན། །རླུང་དང་རང་བཞིན་འོད་གསལ་བ། །རྣམ་དག་སྒྲོལ་མ་གདོན་པར་བྱ། །བཙོ་མའི་གསེར་གྱི་
འོད་དང་ལྡན། །བཛྲ་ར་ཏཱི་ཞེས་སྔགས་ཀྱིས། །རིན་ཆེན་དབང་གི་ཞལ་མཛེས་མ། །འགྲོ་བའི་བྱ་ཀུན་རང་གི་ནི། །བཏང་སྙོམས་ཡོན་ཏན་སོགས་ཀྱིས་མཛད། །མི་རྟོག་པ་དང་རྣམ་རྟོག་དག །མཉམ་པར་རབ་ཏུ་རྟོགས་པ་དང་། །སེམས་ཅན་དོན་ཐབས་ཕུན་སུམ་ཚོགས། །ལྐོག་
ཏུ་གྱུར་པའི་རྗེས་འཇུག་ལ། །འགྲོ་བ་ཐམས་ཅད་ངེས་པར་སྦྱར། །ཡེ་ཤེས་ཕ་རོལ་ཕྱིན་ཡུམ་དང་། །ཆོས་ཀྱི་སྤྲིན་གྱི་རང་བཞིན་གྱི། །ས་ལ་ཡང་དག་བཞུགས་པར་བྱ། །དེ་ནས་སྣ་ཚོགས་ཡོན་ཏན་རྟེན། །བསྒོམས་ནས་སྦྱོར་བས་བསྡུ་བྱས་ཏེ། །དབང་ལྡན་དུ་ནི་ལྷ་མོ་དེ། །དབང་
གི་ལས་ནི་སྒྲུབ་བྱེད་བཞུགས། །ཐམས་ཅད་རིན་ཆེན་ཅོད་པན་མཚན། །ལང་ཚོ་སར་པས་འགྱིང་བག་ཅན། །རྡོ་རྗེ་སྐྱིལ་ཀྲུང་རྣལ་འབྱོར་ལྡན། །ཟླ་མཛེས་གདན་དང་དེ་ཡི་འོད། །བདག་འདྲའི་ཐབས་ལ་ཡང་དག་འཁྱུད། །མཛེས་མ་དགའ་བར་བསྒོམ་པར་བྱ། །ཕྱོགས་ཀྱི་
འགྲོ་བའི་དོན་བྱས་ནས། །ཇི་ལྟ་ཇི་ལྟར་ད་ལྟར་བྱུང་། །འཁོར་ལོ་ཨུཏྤལ་དམར་པོ་པད། །ཨུཏྤལ་སེར་པོ་དང་འདྲ་བ། །ཕྱག་མཚན་འདི་རྣམས་གཙོ་བོར་འགྱུར། །ལྷག་མ་རང་གི་བདག་པོར་མཚུངས། །སེར་སྣའི་གཉེན་པོར་གྱུར་པ་ཡིས། །སྤྱན་མ་གཉིས་པ་ཉིད་ཡིན་ཏེ། །སྦྱིན་

44-1-138a

པའི་ཕ་རོལ་ཕྱིན་དག་པ། །འདི་ལྟར་གཟུགས་ཀྱི་རྡོ་རྗེ་གདོན། །ཆོས་དང་ཟང་ཟིང་མི་འཇིགས་གྲགས། །ཇི་ལྟར་ནུས་པས་སྦྱིན་པ་ལ། །སེར་སྣའི་དྲི་མ་ལས་གྲོལ་ཕྱིར། །འགྲོ་བ་མ་ལུས་དགོད་པར་བྱ། །རབ་ནི་སྔོན་སོང་དགའ་བའི་སར། །འགྲོ་བའི་དམ་
པ་བཞག་ནས་ནི། །ཕྱི་ཡི་དཀྱིལ་འཁོར་གྱི་མཚམས་ཀྱི། མེ་ཡི་མཚམས་སུ་གཞག་པར་བྱ། །རྣམ་དག་ཚུལ་ཁྲིམས་ལས་གྲུབ་པ། །མཱ་མ་ཀཱི་དང་མཚུངས་པ་དེ། །སྒྲ་རྡོ་རྗེ་གྲགས་གདོན་པར་བྱ། །ངན་སོང་གིས་འཇིགས་སྐྲག་བྱེད་པ། །སྡོམ་དང་ཤིན་ཏུ་སེམས་ཅན་དོན། །དམ་
ཆོས་ཡོངས་སུ་འཛིན་པ་དང་། །འདིར་ནི་ཚུལ་ཁྲིམས་རྣམ་གསུམ་ལ། །ཚུལ་ཁྲིམས་འཆལ་ལ་ཞུགས་པ་དག །སྣོད་ནི་ཇི་ལྟར་གཞག་པར་བྱ། །དེ་བཞིན་དྲི་མེད་ས་ལ་བཞག །སླར་ནི་ཇི་ལྟར་གཤེགས་བལྟས་ལ། །བདེན་བྲལ་དུ་ནི་ཡིད་འོང་མའོ། །དེ་བཞིན་བཟོད་པ་རྣམ་དག་
མཆོག །རིན་ཆེན་དབང་ཕྱུག་ཤེས་རབ་མཚུངས། །སེམས་ཅན་ཀུན་ལ་ཕན་ལྡན་པ། །དྲི་ཡི་རྡོ་རྗེ་ཡང་དག་གདོན། །ཆོས་ལ་དམིགས་པ་ཕུན་ཚོགས་དང་། །སེམས་ཅན་སྡུག་བསྔལ་ལྷག་གནས་དང་། །གཞན་གྱིས་གནོད་པ་ལ་བཟོད་ལ། །འགྲོ་བ་མ་ལུས་བཀོད་བྱས་
ཏེ། །དེས་ནི་འོད་བྱེད་ས་ལ་ནི། །རྟག་ཏུ་བརྟེན་པར་བྱེད་པའོ། །རླུང་དུ་མཛེས་པའི་གཟུགས་ཅན་ཏེ། །བྱོན་ནས་གནས་པར་བལྟ་བར་བྱ། །བརྩོན་འགྲུས་ཕུན་ཚོགས་རྣམ་དག་པ། །གོས་དཀར་མོ་དང་འདྲ་བ་གཞན། །སླར་ཡང་འོད་དཔག་མེད་འཛིན་མ། །རོ་ཡི་རྡོ་རྗེ་ཡང་དག་
འབྱུང་། །གོ་ཆ་བཞི་དང་རབ་སྦྱོར་དང་། །ཡོངས་སུ་བརྟན་པར་གྱུར་པ་ཡི། །འདིར་ཡང་བརྩོན་འགྲུས་རྣམ་གསུམ་དང་། །སེམས་ཅན་འོད་འཕྲོ་ལ་འགོད་དེ། །ཡེ་ཤེས་བདུད་རྩི་ཚིམ་བྱེད་པས། །འགྲོ་བ་ཐམས་ཅད་ཚིམ་པར་བྱེད། །དེ་བྱོན་ནས་ནི་དབང་ལྡན་དུ། །ཡང་དག་
གནས་པར་མཁས་པས་བསྒོམ། །བསམ་གཏན་རྣམ་དག་ཡང་དག་གྲུབ། །དོན་ཡོད་རང་འོད་རྗེས་བྱེད་མ། །འཇིག་རྟེན་རྣམ་གཡེང་ཞི་བའི་ཕྱིར། །རེག་བྱ་རྡོ་རྗེ་ཡང་དག་གདོན། །མཐོང་བའི་ཆོས་ལ་གནས་པ་དང་། །ཉེས་པ་སེལ་བར་བྱེད་པ་དང་། །ཁྱབ་བདག་དམ་པའི་

44-1-138b

བསམ་གཏན་ལ། །སྐྱེ་བོ་མ་ལུས་ངེས་སྦྱར་ཏེ། །ཀུན་ཀྱང་སྦྱང་དཀའི་ས་ལ་ནི། །བརྟན་པར་ཡང་དག་སྦྱར་བྱས་ཏེ། །ཤར་གྱི་སྒོ་ཡི་བྱང་དུ་ནི། །བྱོན་ནས་ཡང་དག་གནས་པར་བསྒོམ། །ཤེས་རབ་ཕ་རོལ་ཕྱིན་རྣམ་དག །རང་བཞིན་ཞི་བའི་གཟུགས་ཅན་མ། །ཀུན་དུ་བཟང་
པོའི་རིག་མ་འདྲ། །དེ་ནས་ཆོས་དབྱིངས་རྡོ་རྗེ་གདོན། །སྦྱར་བྱ་ཐོས་དང་བསམ་པ་དང་། །བསྒོམ་པ་ལ་ཡང་བྱེ་བྲག་ཏུ། །གཏི་མུག་མུན་པའི་སྐྱེ་བོ་ཀུན། །མངོན་དུ་གྱུར་ལ་བརྟན་པར་བྱས། །ཤར་སྒོའི་ལྷོ་ཡི་ཆ་ལ་ནི། །དམ་པའི་ལམ་མཆོག་གསལ་བྱེད་མ། །མཐའ་ཡས་
ཡོན་ཏན་རྒྱ་མཚོ་ནི། །བློ་དང་ལྡན་པས་གནས་པར་བསྒོམ། །ཐམས་ཅད་འདི་ལ་ཤེས་བྱས་ཏེ། །ཐབས་དང་རྒྱན་དང་ཅོད་པན་དག །འདི་རྣམས་ཐམས་ཅད་ཀྱི་ཡང་ནི། །རྩ་བའི་མཚན་མའི་ཁྱད་པར་ནི། །མཛེས་པའི་མེ་ལོང་པི་ཝང་ཅན། །དྲི་ཡིས་རབ་གང་དུང་དང་ནི། །ཡེ་
ཤེས་བདུད་རྩིས་གང་བ་ཡི། །རོ་ཡི་སྣོད་ནི་ཤིན་ཏུ་མཛེས། །སྣ་ཚོགས་ཁ་དོག་གོས་དང་ནི། །ཆོས་འབྱུང་གི་ནི་ཕྱག་རྒྱ་ཡང་། །ཕྱག་ནི་གཡས་པ་ཉིད་ཀྱིས་ནི། །ཕྱག་རྒྱ་མཆོག་ནི་ཡིན་ཕྱིར་འཛིན། །སྐུ་གསུང་ཐུགས་ཀྱི་དབྱེ་བ་ཡིས། །རིགས་ཀྱི་རིམ་པས་དགོད་པར་བྱ། །གང་
ཕྱིར་འདི་སྐད་ལེའུ་ནི། །བཅོ་བརྒྱད་པ་ལས་ཡང་གསུངས་པ། །ཀུན་ཀྱང་རྫོགས་པའི་སངས་རྒྱས་སུ། །དཀྱིལ་འཁོར་དུ་ནི་དགོད་པའི་ཕྱིར། །དེ་རྣམས་གཞན་དུ་ཐོས་གྱུར་པས། །དེ་རྣམས་འབྱིན་པ་ཡིག་གསུམ་འདོད། །མ་དང་ཕུང་པོ་འཇིག་ཚོགས་ལྟ། །ཤེས་བྱའི་སྒྲིབ་པ་ཟད་
ཅེས་བྱ། །དད་པའི་རང་བཞིན་ཡང་དག་གྲུ། །ཁྲོ་བོའི་ཚོགས་ནི་ཡང་དག་སྤྲོས། །གདུལ་དཀའ་འདུལ་ལ་རབ་བརྩོན་པ། །ཐམས་ཅད་དུ་ནི་འཇིགས་པའི་གཟུགས། །ཡ་མཱནྟ་ཀྲྀཏ་ཅེས་པས་ཁྲོ། །གཤིན་རྗེ་འཇོམས་བྱེད་སྤྲོ་བར་བྱ། །རང་གི་ཡོན་ཏན་ལ་བཀོད་ནས། །རྣམ་མནན་
རིམ་པ་བསྒོམས་པ་ལས། །དེ་ནི་ཤར་ཕྱོགས་སྒོར་གནས་བསམ། །ཉི་མའི་དཀྱིལ་འཁོར་དབུས་སུའོ། །ལེ་ལོ་ཉོན་མོངས་བདུད་དང་ནི། །མཐར་འཇིགས་ལྟ་བ་མི་མཐུན་ཕྱོགས། །རྣམ་དག་བརྩོན་འགྲུས་ཡང་དག་འབྱུང་། །སེམས་ཅན་ཀུན་ལ་ཕན་དོན་དུ། །མ་ལུས་སྡང་བའི་ཚོགས་དག་

44-1-139a

ནི། །གདུལ་བའི་དོན་དུ་ཡང་དག་བརྩོན། །བསྐལ་པ་འབར་བའི་མེ་དང་མཚུངས། །དེ་ཡི་འོད་ཟེར་ནམ་མཁའ་ཁྱབ། །ལྷ་དང་ལྷ་མིན་སྤྱི་བོ་ཡིས། །རིན་པོ་ཆེ་ཡིས་ཞབས་གཉིས་བརྒྱན། །པྲཛྙཱནྟ་ཀྲྀཏ་ཅེས་པས་ཁྲོ། །ཤེས་རབ་མཐར་བྱེད་ཅེས་པས་གདོན། །རང་གི་བརྩོན་འགྲུས་སོགས་ལྡན་པར། །འགྲོ་བ་འདིར་བྱས་བྱོན་གྱུར་པ། །ལྷོ་ཡི་སྒོ་རུ་བསྒོམ་པར་བྱ། །མཚོ་སྐྱེས་ཉི་མའི་དཀྱིལ་འཁོར་དུ། །འཆི་བདག་བརྗེད་ངས་ལོག་པར་ལྟ། །སྐྱེ་བའི་སྒྲིབ་པ་མི་མཐུན་ཕྱོགས། །རྣམ་དག་དྲན་པ་ལས་སྐྱེས་པ། །པདྨཱནྟ་ཀྲྀཏ་ཀྱིས་ཁྱབ་བདག །གདོན་བྱ་ཕྱོགས་སུ་སེམས་ཅན་དོན། །བྱས་པས་དྲན་སོགས་མཆོག་གྱུར་པས། །བྱོན་ནས་ནུབ་ཕྱོགས་སྒོ་རུ་ནི། །ཉི་དཀྱིལ་ཡང་དག་གནས་པ་བསྒོམ། །རྣམ་གཡེང་ལྟ་བ་མཆོག་ཏུ་འཛིན། །ལྷ་ཡི་བདུད་དང་ལས་སྒྲིབ་དག །རྣམ་པར་གཡེང་ལ་རབ་གཏུམ་གཟུགས། །ཏིང་འཛིན་དམ་པའི་རང་བཞིན་གྱི། །བིགྷྣཱནྟ་ཀྲྀཏ་ཅེས་པས་གྲོལ། །བགེགས་འཇོམས་པ་ནི་གདོན་པར་བྱ། །དེ་ནས་འགྲོ་བའི་བྱ་བ་བྱས། །མི་མཐུན་ཕྱོགས་ཟད་ལས་དེ་གྲུབ། །དེ་ནི་བྱོན་ནས་ཡང་དག་གནས། །བྱང་གི་སྒོ་ཡི་ཉི་མ་ལའོ། །བགེགས་ཀྱི་ཚོགས་ནི་མ་ལུས་པ། །ཀུན་དུ་འཇོམས་པར་བྱེད་པའོ། །འདི་དག་ཞལ་མདོག་མཚོན་ཆ་རྣམས། །སྲུང་བའི་འཁོར་ལོར་བརྗོད་པ་ཡིན། །དེ་ཡི་ཕྱིར་ན་འཕྲལ་དུ་ནི། །བསྒོམ་བྱ་དེ་རྣམས་འདིར་མ་བརྗོད། །དགུག་པ་དང་ནི་གཞུག་པ་དང་། །བཅིང་བ་དང་ནི་མཉེས་པ་ཡང་། །ཉམས་པ་མེད་པའི་བྱ་བ་དག །འདི་རྣམས་བྱེ་བྲག་ཤེས་པར་བྱ། །ཐམས་ཅད་གདན་ལ་སྐྱིལ་ཀྲུང་ནི། །བཅས་པས་ཡང་དག་གནས་པ་རྣམས། །དཀྱིལ་འཁོར་བདག་པོ་ལ་མངོན་ཕྱོགས། །བྱང་ཆུབ་སེམས་དཔའ་འདིར་མི་འདོད། །གཞན་དག་སེམས་དཔའི་སྐྱིལ་ཀྲུང་ངོ་། །ཁྲོ་བོ་རྣམས་ནི་གཡོན་བརྐྱང་གིས། །བྱེ་བྲག་ཏུ་ནི་འདིར་གནས་སོ། །འདི་ལྟར་ཐམས་ཅད་དུ་གྲུབ་པ། །དམ་ཚིག་དཀྱིལ་འཁོར་བལྟས་ནས་ནི། །ཡེ་ཤེས་སེམས་དཔའི་སྙིང་འོད་ཀྱིས། །ཡེ་ཤེས་དཀྱིལ་འཁོར་དགུག་པར་བྱ། །བགེགས་ནི་མཐར་བྱེད་ལ་སོགས་པས། །བགེགས་བསྐྲད་ཡང་དག་བསྲུངས་ནས་ནི། །མཆོད་ཡོན་དབུལ་བྱ་རང་སྔགས་ཀྱིས། །དམ་པའི་ཙནྡན་ལ་སོགས་པའི། །དགུག་པ་ལ་སོགས་ལས་རྣམས་ནི། །

44-1-139b

མན་ངག་གིས་ནི་རིག་པར་བྱ། །གཤིན་རྗེ་མཐར་བྱེད་སོགས་ཁྲོ་བོས། །ཇི་ལྟར་སླར་ཡང་རིམ་བཞིན་དུའོ། །འདི་ནི་ཆེན་པོའི་རྒྱུ་མཐུན་གྱིས། །ཡང་དག་འབྲས་སྐྱེས་དམ་པ་དང་། །ཆེན་པོའི་བསྙེན་པར་ཤེས་པར་བྱ། །བསྒོམ་པ་གསུམ་གྱི་རང་བཞིན་གྱིས། །སོ་སོར་དཀྱིལ་འཁོར་པ་རྣམས་ཀྱིས། །མིག་སོགས་བྱིན་གྱིས་བརླབས་པས་ན། །ཆེན་པོའི་རྣམ་སྨིན་འབྲས་དོན་དང་། །ཆེན་པོའི་ཉེ་བར་བསྒྲུབ་པའོ། །ཐུགས་སོགས་བྱིན་གྱིས་བརླབས་པ་ལས། །ཆེན་པོ་ཡི་ནི་སྒྲུབ་པ་དང་། །ཆེན་པོ་དེ་ལས་གྲུབ་གྱུར་པ། །འབྲས་བུའང་སྐྱེས་བུ་བྱེད་པའོ། །ཕུན་སུམ་ཚོགས་པའི་དབང་ཐོབ་པ། །ཆེན་པོར་སོན་པར་གྱུར་པ་སྟེ། །འདིར་ཡང་སྒྲུབ་པ་ཆེན་པོ་སྟེ། །དེ་ཡང་དྲི་མེད་འབྲས་བུར་གྲགས། །སངས་རྒྱས་རྣམས་ལ་རྡོ་རྗེ་སེམས། །མཱ་མ་ཀཱི་དང་སྒྲ་རྡོར་དག །ཕྱག་ན་རྡོ་རྗེ་ཁྲོ་རྣམས་ལས། །པདྨ་གཤིན་རྗེ་མ་གཏོགས་པའི། །སྤྱི་བོར་མི་བསྐྱོད་དོན་གྱིས་སོ། །དེ་ལའང་རྡོ་རྗེ་འཛིན་ཆེན་གནས། །ཐུགས་གསུང་སྐུ་རྡོ་རྗེ་རྣམས་ཀྱི། །མི་བསྐྱོད་དཔག་མེད་རྟག་པ་རྣམས། །ཁ་ཅིག་རྡོ་རྗེ་འཛིན་པར་སྨྲ། །རྣམ་པར་མ་སྤྲོས་རང་བཞིན་ལ། །ཡེ་ཤེས་ལྔ་གཅིག་རང་བཞིན་པས། །སངས་རྒྱས་ལྔ་རུ་བསྒྲགས་པ་ཡིན། །ས་ཡི་སྙིང་པོ་གཤིན་རྗེ་གཤེད། །སྤྱན་དང་གཟུགས་ཀྱི་རྡོ་རྗེ་ཡིས། །སྤྱི་བོར་རྟག་པ་རིན་ཆེན་དབང་། །དྲི་ཡི་རྡོ་རྗེ་མཁའ་སྙིང་ལའོ། །འཇིག་རྟེན་དབང་ཕྱུག་པད་མཐར་བྱེད། །གོས་དཀར་རོ་ཡི་རྡོ་རྗེ་ཡིས། །སྤྱི་བོར་འོད་དཔག་མེད་པར་འགྱུར། །གཙུག་ཏུ་ནོར་བུ་བཞིན་དུ་གསལ། །སྒྲོལ་མ་སྒྲིབ་པ་རྣམ་སེལ་དང་། །རེག་བྱའི་རྡོ་རྗེ་ཅོད་པན་ཡང་། །དབང་བསྐུར་གོ་འཕང་ཐོབ་གྱུར་ནས། །འདྲེན་པ་དོན་ཡོད་གྲུབ་པ་བཞུགས། །ཀུན་དུ་བཟང་པོ་ཆོས་དབྱིངས་ཀྱི། །སྤྱི་བོར་ཡང་ནི་གསལ་གྱུར་པ། །རྡོ་རྗེ་འཛིན་པ་ཆེན་པོའོ། །གང་གིས་གང་ལ་དབང་བསྐུར་འདིར། །དེ་ཡི་དེ་ནི་བདག་པོར་འདོད། །དབང་གི་གོ་འཕང་གནས་གྱུར་པ། །སྤྱི་བོར་རང་གི་བདག་པོས་མཚན། །དེ་རྣམས་

44-1-140a

དཀྱིལ་འཁོར་འདིར་མི་བསྒོམ། །ལྷག་མ་ནང་བདག་དཀྱིལ་འཁོར་མིན། །ཕྱག་རྒྱ་བཞི་ཡིས་མཚན་པ་དང་། །རིགས་ཀྱི་བདག་པོ་དབང་བསྐུར་མིན། །ཤེས་རབ་ཐབས་ཀྱི་རང་བཞིན་མིན། །གང་རྣམས་ཞལ་གསུམ་ཕྱག་དྲུག་མིན། །གང་གིས་གང་ལ་ཕྱོགས་
བཅུ་རུ། །འགྲོ་བའི་དོན་ནི་བྱེད་པ་མིན། །དབང་བསྐུར་གྱི་ནི་རྗེས་ཐོགས་ལ། །བློ་དང་ལྡན་པས་མཆོད་པར་བྱ། །ཚོགས་གཉིས་པོ་ནི་འཕེལ་ཕྱིར་དང་། །ཡེ་ཤེས་སྙིང་པོ་བསྐྱེད་པའི་ཕྱིར། །ཡེ་ཤེས་སྙིང་གའི་ས་བོན་གྱི། །འོད་ཀྱིས་ཐམས་ཅད་ཀུན་ནས་བཀུག །དེ་ལ་གཟུགས་
ལ་སོགས་པའི་ཡུལ། །རང་གི་སྙིང་གར་གཞུག་པར་བྱ། །དེ་ནས་ཞུ་བར་གྱུར་བསམས་ལ། །རྡོ་རྗེའི་ལམ་ནས་རྣམ་པར་འབྱུང་། །ལྷ་མོའི་པདྨར་བལྟ་བར་བྱ། །དེ་ནི་བ་སྤུའི་བུ་ག་ལས། །འོད་ཟེར་གཟུགས་ཀྱིས་དེ་རྣམས་དབྱུང་། །དེ་རྣམས་འོད་ཟེར་སྒོ་དབྱུང་བ། །རྒྱན་ནི་ཐམས་
ཅད་འཛིན་པ་རྣམས། །རྟོག་པ་ལས་ནི་གྲོལ་འགྱུར་བས། །རྫོགས་སངས་རྒྱས་ཀྱི་བདེ་རྒྱུ་ཡིས། །སྒྱུ་མ་ལ་སོགས་ཡང་དག་བལྟ། །འཇིག་རྟེན་ལྟ་ལ་མཁས་པ་རྣམས། །ནམ་མཁར་མ་ལུས་སྤྲུལ་བྱས་ལ། །མཆོད་པ་འཛིན་པས་བྲེལ་བའི་ཕྱིར། །གཟུགས་རྡོ་རྗེ་སོགས་ལྷ་མོའི་ཚོགས། །
ནམ་མཁའ་དང་ནི་མཉམ་གྱུར་པས། །ཀུན་ནས་དེ་ལས་བྱུང་གྱུར་པ། །ལྷ་རྫས་སྤོས་ནི་ཡིད་འོང་བ། །སྣ་ཚོགས་ཕྱི་ཡི་མེ་ཏོག་སོགས། །རང་གི་བདེ་བར་གཤེགས་ཀྱང་མཆོད། །མཆོད་པའི་བདག་ཉིད་མཉམ་སོན་པར། །མཆོད་པ་ཉིད་དུ་སེམས་ཀྱིས་བསམ། །མི་བརྟན་པ་ནི་རབ་ཞི་ཉིད། །
སྔགས་འདི་བརྗོད་པར་བྱའོ། །ཨོཾ་སརྦྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཐམས་ཅད་སྒྲ་བརྙན་དང་མཉམ་པར། །སྒྲ་ཡི་ཚོགས་ནི་ངེས་བསམས་ཏེ། །ཆོས་རྣམས་རང་ལས་དབྱེར་མེད་པས། །འདོད་པའི་ལྷ་ཡིས་བསྟོད་པར་བྱ། །མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་
ནི་མཁས་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་དབྱངས་ལ་ཕྱག་འཚལ་བསྟོད། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་ཆེན་པོ། །རང་བཞིན་འོད་གསལ་མཆོག་གི་མཆོག །སྟོན་པ་རྡོ་རྗེ་ཕྱག་འཚལ་བསྟོད། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་

44-1-140b

ནམ་མཁའ་དྲི་མེད་མཁའ། །རང་བཞིན་དག་པ་གོས་པ་མེད། །རྡོ་རྗེ་སྐུ་ལ་ཕྱག་འཚལ་བསྟོད། །རྡོ་རྗེ་དཔག་མེད་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །རྡོ་རྗེ་གསུང་ལ་ཕྱག་འཚལ་བསྟོད། །དོན་ཡོད་རྡོ་རྗེ་རྫོགས་སངས་
རྒྱས། །བསམ་པ་ཐམས་ཅད་རྫོགས་མཛད་པ། །རང་བཞིན་དག་པ་ཉིད་ལས་བྱུང་། །རྡོ་རྗེ་སེམས་དཔའ་ཕྱག་འཚལ་བསྟོད། །ནམ་མཁའི་ཕྱོགས་གནས་ཟླ་བ་ལ། །གནས་པའི་ཧཱུྃ་སྐྱེས་བསྒོམ་བྱ་སྟེ། །དེ་ནི་རྡོ་རྗེ་ཧཱུྃ་བཅས་སོ། །དེ་ཡི་འོག་ཏུ་འདི་བསམ་བྱ། །དུང་མདོག་གཞུ་
དབྱིབས་རྒྱལ་མཚན་ལྡན། །ཡཾ་སྐྱེས་རླུང་གི་དཀྱིལ་འཁོར་རོ། །དེ་དབུས་རཾ་སྐྱེས་དམར་པོ་ནི། །ཟུར་གསུམ་མེ་ཡི་དཀྱིལ་འཁོར་རོ། །དེ་སྟེང་ཨ་ལས་བྱུང་བ་ཡི། །པདྨའི་སྣོད་ཀྱི་དབུས་སུ་ནི། །བི་མུ་མ་ར་ཤུ་དང་བཅས། །གོ་ཀུ་ད་ཧ་ན་དང་ལྔའོ། །སངས་རྒྱས་ས་བོན་བུམ་སོགས་
ཀྱིས། །གོ་རིམས་ཇི་བཞིན་བྱིན་གྱིས་བརླབ། །དེ་རུ་རྡོ་རྗེ་དབབ་པར་བྱའོ། །ཞུ་གྱུར་འོད་ཟེར་རྣམས་ཀྱིས་ནི། །དེ་ནས་ཐམས་ཅད་ཞུ་བྱས་ཏེ། །མེ་ནི་རབ་ཏུ་གསལ་བྱས་སོ། །ཡི་གེ་ཨོཾ་ནི་དེ་རུ་དགོད། །སྟོན་ཟླའི་འོད་ཟེར་ཕུང་པོ་འདྲ། །དེ་འོད་ཀྱིས་བཀུག་སངས་རྒྱས་ཀྱི། །བདུད་རྩི་མ་ལུས་
ནང་དུ་གཞུག །བློ་དང་ལྡན་པས་བདུད་རྩི་བཞིན། །དེ་ནི་འོད་ཟེར་གྱིས་གང་ལྟ། །ཨོཾ་ཨཱཿཧཱུྃ་ཞེས་བྱ་བ་ཡི། །ཡི་གེ་གསུམ་གྱིས་བྱིན་གྱིས་བརླབ། །རང་གི་སྙིང་ཟླར་འཁོར་ལོ་ནི། །དཔའ་བོའི་བློ་ཡིས་བསྒོམ་པར་བྱ། །བདག་ཉིད་དཀྱིལ་འཁོར་པ་རྣམས་ཀྱིས། །ལྕེ་ལ་རྡོ་རྗེ་འབར་བ་
སྟེ། །ཡང་དག་ཧཱུྃ་ཧཱུྃ་ནས་འབྲས་སྐྱེས། །རྩེ་ལྔ་དཀར་པོ་བསྒོམ་པར་བྱ། །རང་བཞིན་སྤྱི་བོར་བསམས་ནས་ནི། །དེ་བཞིན་གཤེགས་རྣམས་ཚིམ་པར་བྱ། །རྟོག་པ་མེད་པའི་སེམས་ཀྱིས་ནི། །བློ་དང་ལྡན་པས་འདི་བསམ་མོ། །ལྕེ་ཡི་རྡོ་རྗེ་སྦུ་གུ་ཡིས། །བློ་དང་ལྡན་པས་བཀུག་པར་
བྱ། །བདག་དང་དཀྱིལ་འཁོར་པ་རྣམས་ཀྱང་། །ཡེ་ཤེས་བདུད་རྩི་ཆུ་དེས་ཚིམ། །དཀྱིལ་འཁོར་འབྱིན་པ་སྔོན་འགྲོ་བའི། །བདུད་རྩི་མྱང་བའི་ཆོ་ག་ནི། །འདི་ནི་དཀྱིལ་འཁོར་རྒྱལ་མཆོག་གི། ཏིང་ངེ་འཛིན་དུ་ཡོངས་སུ་གནས། །རང་སེམས་དབང་དུ་བྱ་བའི་ཕྱིར། །ཐིག་ལེའི་རྣལ་འབྱོར་

44-1-141a

ལ་སོགས་བསྒོམ། །ཇི་ལྟར་རིགས་པར་བསྒོམ་བྱ་སྟེ། །ལས་ཀྱི་རྒྱལ་མཆོག་སྒྲུབ་པ་ལའོ། །གཅིག་དང་དུ་མའི་ངོ་བོ་ཡིས། །ཕྱི་རོལ་དངོས་པོ་ཡོད་མ་ཡིན། །དེ་ཕྱིར་དེ་ཡིས་འཛིན་པ་མེད། །རྣམ་པར་ཤེས་ཀྱང་ཡོད་མ་ཡིན། །དེ་ཕྱིར་འདི་དག་རང་ཡིད་དངོས། །
བག་ཆགས་ཀྱིས་དཀྲུགས་རྨི་ལམ་བཞིན། །འགྲོ་བ་ཇི་ལྟ་ཇི་ལྟར་མིན། །འདི་དག་རབ་ཏུ་རྟོགས་པར་བྱ། །འདི་ལྟར་སྤྱད་བྱས་རྫོགས་སངས་རྒྱས། །ཡེ་ཤེས་སྙིང་གའི་ས་བོན་རྣམས། །སྤྲོས་པས་འགྲོ་བ་མ་ལུས་པ། །དེས་ནི་རྫོགས་སངས་རྒྱས་སུ་བྱས། །སླར་ཡང་ཡིད་ཀྱིས་བཀུག་
ནས་ནི། །རང་གི་སྙིང་གར་གཞུག་པར་བྱ། །ཙ་ན་ཀ་གནས་དབང་གྱུར་ལྟ། །རང་སྔགས་ཐིག་ལེའི་གཟུགས་ཅན་ནོ། །དེ་ཡི་ནང་སོང་བལྟ་བར་བྱ། །བདག་ཉིད་ལྷ་ཡི་དཀྱིལ་འཁོར་ནི། །ཡེ་ཤེས་སེམས་དཔའི་དེ་འོད་ཀྱིས། །ཐུགས་ལ་སོགས་པ་སད་པར་བྱ། །སླར་ཡང་དེ་ཡིས་
ཐམས་ཅད་ནི། །བར་མེད་རབ་ཏུ་གསལ་བར་རོ། །བ་སྤུའི་ཁུང་བུ་ལས་སོང་བ། །འོད་ཀྱིས་སྣ་ཚོགས་ཀྱང་གསལ་ལོ། །སླར་ཡང་དེ་ཉིད་དུ་བསམས་ཏེ། །རབ་ཞུགས་གསལ་བའི་གཟུགས་སུ་ལྟ། །རྣལ་འབྱོར་དེ་ལྟར་སེམས་རྩེ་གཅིག །དེ་ནི་ཡེ་ཤེས་བདུད་རྩི་འབབ། །འདི་
ནི་ཐིག་ལེའི་རྣལ་འབྱོར་རོ། །སྔར་བཞིན་འོད་ཟེར་གྱིས་བསྐུལ་བས། །སངས་རྒྱས་ཚོགས་ནི་ཡང་དག་གཞུག །རང་གི་ས་བོན་རྟག་ལས་གྲུབ། །ཞུ་བར་གྱུར་ཅེས་བསམ་པར་བྱ། །རང་རིག་གསང་བའི་སྣ་རྩེ་ལ། །ནས་ཙམ་གྱི་ནི་ཚད་དག་ནི། །རལ་གྲི་རང་ས་བོན་སྐྱེས་ལྟ། །
དེ་དབུས་ཡུངས་ཀར་དང་མཉམ་པའི། །ཡེ་ཤེས་ལྔ་ཡི་རང་བཞིན་ཕྱིར། །ཁ་དོག་ལྔ་ལྡན་བསྒོམ་པར་བྱ། །ཇི་སྐད་བརྗོད་པ་དེའི་དབུས་སུ། །དཀྱིལ་འཁོར་རྫོགས་པར་བསྒོམ་པར་བྱ། །དང་པོ་སྨིག་རྒྱུ་འདྲ་བ་སྟེ། །དུ་བ་ལྟ་བུ་གཉིས་པ་ཡིན། །མཁའ་སྣང་ལྟ་བུ་གསུམ་པ་
ཡིན། །མར་མེ་ལྟར་འབར་བཞི་པ་ཡིན། །སྤྲིན་མེད་ནམ་མཁའ་ལྟ་བུར་ནི། །རྟག་ཏུ་སྣང་བ་ལྔ་པ་ཡིན། །འདི་ལྟར་མཚན་མ་ལྔ་རྣམས་ནི། །སེམས་ཀྱིས་རབ་ཏུ་བརྟན་གྱུར་པར། །རྣལ་འབྱོར་པ་ཡིས་ཤེས་པར་བྱ། །འགྲོ་བའི་དོན་ནི་རབ་སྒྲུབ་ཕྱིར། །སྤྲུལ་པ་ཡི་ནི་དབང་གྱུར་

44-1-141b

པར། །ཕན་སེམས་སྙིང་རྗེའི་བསམ་པ་ཡིས། །གཟུང་བ་ལ་སོགས་མ་མྱོང་བས། །བདག་ཉིད་རིག་ལ་བསྟན་ནས་ནི། །སངས་རྒྱས་སྤྲོ་བར་བྱ་བ་སྟེ། །མཚན་མའམ་འོད་ཟེར་ལས་སྤྲུལ་པས། །འདི་ནི་ཕྲ་མོའི་རྣལ་འབྱོར་རོ། །སྐུ་གསུང་ཡེ་ཤེས་ཐུགས་རྣམས་ནི། །བདག་ཉིད་བསྒོམ་
ལ་རབ་བརྩོན་པ། །རང་མཚན་ལྟེ་བར་གནས་གྱུར་པ། །ཇི་ལྟ་ཇི་ལྟར་རང་བསྟན་ལ། །ཨོཾ་ཨཱཿམཾ་ཧཱུྃ་ཞེས་གསལ་བར། །བལྟ་བྱ་དེར་གནས་བློ་ཡིས་ནི། །སྔགས་ཀྱི་བཟླས་པའི་ཆོ་ག་བྱ། །འདིར་ནི་ཁ་ཅིག་ཡང་དག་གནས། །རླུང་དང་ཆུ་དང་དབང་ཆེན་དང་། །མེ་ཡི་དཀྱིལ་འཁོར་
དབུས་དག་ཏུ། །སྐུ་སོགས་ས་བོན་གཞན་དག་ནི། །གཞུང་ལུགས་སྨྲ་བས་བརྗོད་པའོ། །དེ་རྗེས་རང་གི་ཏིང་འཛིན་གནས། །མཁས་པས་རང་སྔགས་དབྱེ་བ་མེད། །རིང་མིན་ཐུང་བ་མ་ཡིན་ནོ། །སྔགས་ནི་འདི་ལྟར་གདོན་པར་བྱ། །སྲོག་གི་རླུང་གིས་ཁྱབ་པར་བྱ། །ཨོཾ་ལ་སོགས་
པའི་ས་བོན་གྱི། །སྐུ་ལ་སོགས་པ་སྤྲོ་བར་བྱ། །ཐམས་ཅད་ཐུགས་སོགས་བྱིན་རླབས་བཞིན། །དེ་རྣམས་གཟུགས་རྡོ་རྗེ་སོགས་ཀྱིས། །དེར་གནས་མཆོད་པ་བྱས་ནས་ནི། །བལྟ་བྱ་བདེ་མཆོག་ཐོབ་པ་ཡིས། །རྩོལ་བའི་རླུང་གིས་བཀུག་ནས་ནི། །རང་རང་ས་བོན་དུ་གཞུག་བྱ། །རིམ་
པ་འདི་ལྟར་བྱ་བ་ནི། །སོ་སོར་རིམ་ནི་གསུམ་སྤྲོ་བ། །བརྗོད་པས་མ་ལུས་སྤྲོ་བར་བྱ། །སྔགས་ཀྱི་བློ་ནི་བསྡུས་བྱས་ཏེ། །ཡེ་ཤེས་ས་བོན་ཡེ་ཤེས་ལ། །ཀུན་ནམ་རྟག་ཏུ་སྤྲོ་བར་བྱ། །འདིར་ནི་རྣལ་འབྱོར་ཁ་ཅིག་གིས། །ཐིག་ལེ་ཕྲ་མོར་ཡང་དག་ལྡན། །ཆུང་ངུ་སོགས་དབྱེ་སྦྱོར་བ་
ཡིས། །དང་པོར་མ་སྐྱེས་རང་བཞིན་དུ། །སྐུ་ལ་སོགས་པ་རྣམ་པར་བརྟག །རང་གི་ས་བོན་བྱང་ཆུབ་བརྟག །བསམ་གཏན་བཟླས་པའི་ཆོ་གས་གནས། །འདི་ནི་བཟླས་པའི་ཆོ་གའོ། །ཞུམ་པའི་སེམས་དང་ལེ་ལོ་དང་། །རྒོད་པ་ལ་ནི་ལྷག་མཐོང་བྱ། །འདི་ལྟར་ཞུམ་པས་གཟུང་
གྱུར་ནས། །ལྷ་མོའི་གླུ་ཡིས་བསྐུལ་བ་སྟེ། །རྒོད་པ་ཐིག་ལེའི་སྦྱོར་སོགས་ཀྱིས། །དེ་ཉིད་བསྒོམ་པས་ཞི་བར་བྱ། །དངོས་པོ་རྣམ་པར་དཔྱད་པ་ཡིས། །སྟོང་པ་ཉིད་ནི་ཡིད་ལ་བྱ། །བསྒོམ་པས་བསྐྱོད་པས་ངལ་གྱུར་ན། །དེ་རྣམས་ཞི་བར་བྱ་ཉིད་ལ། །འདི་ལྟར་ཚིམ་པའི་ཆོ་ག་

44-1-142a

བྱ། །ཉམས་སྟོབས་འཕེལ་བར་བྱ་བའི་ཕྱིར། །སྤྱི་བོར་མཐོ་གང་གིས་སྤགས་པར། །བདུད་རྩི་དཀྱིལ་འཁོར་བདུད་རྩིར་བཅས། །ཨོཾ་ཡིག་དཀར་པོ་དང་ལྡན་ལྟ། །བདུད་རྩི་འཛག་པའི་འོད་དང་བཅས། །དེ་ནས་བདུད་རྩིའི་རང་བཞིན་རྒྱུན། །རྟག་ཏུ་འཛག་
པར་བྱེད་པ་ནི། །སྲོག་རྩོལ་འོད་ཀྱིས་བཀུག་བྱ་སྟེ། །བློ་ལྡན་གྱིས་སྐུ་སོགས་ལ་དབབ། །འདི་ནི་ཚིམ་བྱེད་ཆོ་གའོ། །འདི་ལྟར་ཐང་ཅིག་ངལ་བསོ་སྟེ། །བདེ་ཞེན་གྱིས་ནི་མ་དཀྲུགས་པར། །ཐིག་ལེ་ལ་སོགས་སྔོན་འགྲོ་བའི། །མ་ཞན་པ་ཡིས་སྔགས་བཟླས་བྱ། །གང་ཚེ་འགྲོ་བར་འདོད་པ་
དང་། །བསྒོམ་པ་གཏོང་བར་འདོད་པ་ཡིས། །དེ་ཚེ་མཆོད་བསྟོད་བདུད་རྩི་མྱང་། །ཆོ་ག་བཞིན་དུ་བྱས་ནས་ནི། །སྐུ་གསུང་ཐུགས་ཀྱི་རྡོ་རྗེ་རྣམས། །མཚན་མའི་ས་བོན་ལ་བསྡུས་བྱ། །སྤྲུལ་པའི་དཀྱིལ་འཁོར་ཐམས་ཅད་ནི། །ཆོ་ག་བཞིན་དུ་རིམ་གྱིས་སོ། །གདོད་ནས་མ་སྐྱེས་བསྒོམ་བྱ་སྟེ། །
སྐུ་གསུང་ཐུགས་ཀྱི་བདག་ཉིད་དོ། །ནམ་མཁའ་བཞིན་དུ་མ་གོས་པ། །གཉིས་མེད་ཡེ་ཤེས་རང་བཞིན་ནོ། །འདི་ནི་ལས་ཀྱི་རྒྱལ་མཆོག་གི། །ཏིང་ངེ་འཛིན་དུ་ཡོངས་སུ་བསྒྲགས། །སླར་ཡང་སྨོན་ལམ་གདབ་བྱ་སྟེ། །སེམས་ཅན་དོན་ནི་ཉེར་འཕེལ་ཕྱིར། །བདག་གིས་བསོད་ནམས་གང་བསགས་དང་། །འཇམ་པའི་རྡོ་རྗེ་བསྟེན་པ་
ཡིས། །འཇམ་པའི་རྡོ་རྗེར་བདག་གྱུར་ནས། །སེམས་ཅན་སྡུག་བསྔལ་སྒྲོལ་གྱུར་ཅིག །སེམས་ཅན་དོན་ཐབས་ཕུན་སུམ་ཚོགས། །རྣམ་པར་རྒྱལ་བས་ལེགས་གྲུབ་ཤོག །སེམས་ཅན་འཁོར་བ་ཇི་སྲིད་དུ། །དེ་སྲིད་འགྲོ་ལ་ཕན་བྱེད་ཤོག །ཆོས་དང་ལོངས་སྤྱོད་སྤྲུལ་པ་ཡིས། །སྐུ་གསུམ་
རྣམ་པར་གནས་པ་དང་། །བདག་ལ་འགྲོ་བ་རེ་བ་དང་། །འདོད་པ་བདག་ལ་སྒྲུབ་པར་ཤོག །འཇིག་རྟེན་ཁམས་ནི་ཐམས་ཅད་ན། །སྐད་ཅིག་གིས་ནི་ཐམས་ཅད་དུ། །གདུལ་བའི་ཐབས་ནི་རིག་པ་ཡིས། །སྣོད་དང་སྣོད་མིན་བསྐང་བར་བྱ། །གདུལ་བྱ་མ་ཡིན་ཁ་ཅིག་ནི། །ཁམས་
གསུམ་དག་ཏུ་བྱུང་གྱུར་ན། །ཐམས་ཅད་བྱང་ཆུབ་ལམ་ལ་ནི། །དེ་རྣམས་བདག་གིས་གཟུང་བར་བགྱི། །འདི་ནི་སྨོན་ལམ་མོ། །ལྷག་པའི་ལྷ་ཡི་སྦྱོར་བ་ཡིས། །ཏིང་ངེ་འཛིན་ལས་ལངས་ནས་ནི། །རྣལ་འབྱོར་ཡིད་ནི་ཆགས་མེད་པས། །སྣང་བའི་གོ་འཕང་ལ་གནས་ཏེ། །ཐམས་ཅད་རང་གི་ལྷ་

44-1-142b

གཟུགས་སམ། །རང་གི་རིགས་ཀྱི་རྗེས་རིམ་མམ། །གཟུགས་སོགས་རྡོ་རྗེའི་ངོ་བོའམ། །རང་རང་དག་པར་རྣམ་པར་གནས། །གཉིས་མེད་ཡེ་ཤེས་རང་བཞིན་གྱིས། །རྡོ་རྗེ་འཆང་ཆེན་བདག་ཉིད་རྣམས། །ཇི་ལྟར་ཐོབ་པའི་ཡུལ་རྣམས་ནི། །དོག་པ་མེད་པ་ཉེ་བར་སྤྱད། །འདི་
ནི་མཐའ་ཡས་མཆོད་མཆོག་ཏུ། །སངས་རྒྱས་རྣམས་ཀྱིས་ཡང་དག་གསུངས། །རྟག་ཏུ་བར་མེད་སྦྱོར་བས་ན། །བྱང་ཆུབ་འབྲས་བུ་སྟེར་བར་བྱེད། །ཟས་ལ་སྦྱོར་ན་སྔར་བཞིན་དུ། །བདུད་རྩི་མྱང་བའི་ཆོ་གས་བརྟེན། །འདི་ནི་ཕྱི་ཡི་སྦྱིན་སྲེག་གམ། །གཞན་ཉིད་ཀྱིས་ཀྱང་བསྒྲེ་བར་
བྱ། །ཡིད་ཀྱིས་བསམ་པ་ཙམ་གྱིས་ཀྱང་། །ལེགས་པར་བརྟེན་པས་དེ་བཞིན་སྤྱོད། །ཕུང་པོའི་བུད་ཤིང་བསྲེགས་པ་ཡིས། །ཡེ་ཤེས་མེ་རུ་བླ་ན་མེད། །བདག་ཉིད་མཆོད་པ་ཉིད་ནི་བྱ། །གཞན་ནམ་རང་གི་ལྷག་པའི་ལྷ། །རྟག་ཏུ་འདོད་པའི་ཡོན་ཏན་གྱིས། །དམ་ཚིག་འདི་ནི་བདེ་གཤེགས་
བཞེད། །སྡོམ་ལ་གནས་པས་ཇི་ལྟར་རྙེད། །བདག་ཉིད་དམ་ཚིག་མ་ཉམས་པས། །རྙེད་པས་ཉིན་མོའམ་མཚན་མོ་རུ། །ལེགས་པར་སྤྲོས་པས་ཡང་དག་སྤྱད། །གང་གིས་སེམས་ཅན་མཉམ་མེད་དོན། །སངས་རྒྱས་མཆོད་པ་མཆོག་ཡིན་ཏེ། །གང་ཡང་ལུས་ལ་སོགས་པའི་
ལས། །སྙིང་རྗེའི་བསམ་པས་རྒྱལ་བ་སྟེ། །སྔགས་དང་ཕྱག་རྒྱའི་བདག་ཉིད་ཀྱིས། །དེ་ཀུན་དེ་ཡིར་འགྱུར་བ་སྟེ། །ལྷག་པའི་ལྷ་ཡི་སྦྱོར་བདག་ཉིད། །གང་ཉིད་ཐམས་ཅད་དུ་བྱ་སྟེ། །འདིའམ་གཞན་དུ་སྨན་པའམ། །ཕ་ཡིས་བུ་ལ་བསླབ་ཆེད་དུ། །འབྲས་བུ་མེད་ལ་
ཕན་བསམས་པས། །ལས་ཀྱི་གནོད་པ་རྩོམ་པར་བྱེད། །ཤེས་རབ་ཐབས་ཀྱི་ཆོ་ག་དང་། །དངོས་ཀུན་བདག་ཉིད་རིག་པ་ཡིས། །ནམ་མཁའ་དང་ནི་མཉམ་པའི་སེམས། །གཉིས་མེད་རྣལ་འབྱོར་མིན་ཞེས་འགྱུར། །དོན་ཡོད་གྲུབ་པའི་སྦྱོར་ལྡན་པས། །དེ་ཡི་འཁོར་ལོའི་
དབུས་གནས་ཏེ། །ཇི་ལྟར་ཚུལ་བཞིན་དབང་བསྐུར་བ། །དམ་ཚིག་ཉམས་པ་བླང་བར་བྱ། །རང་གི་ཡེ་ཤེས་ཐུགས་ཟླ་རུ། །ཁམས་སྐྱེས་སྣ་ཚོགས་རྡོ་རྗེར་གནས། །ཟླ་བར་ཁཾ་ཡིག་བཅས་བསམས་ནས། །འོད་ཟེར་གྱིས་ནི་རྒྱལ་བ་བསྐུལ། །སླར་ཡང་འདི་ནི་ཁྱད་པར་ཏེ། །དབང་

44-1-143a

བསྐུར་སྔོན་དུ་སོང་བ་ཡིས། །བླ་མ་བརྙས་ལ་སོགས་ཉེས་པ། །བཤགས་དང་སྦྱིན་དང་མཆོད་སྟོན་ནོ། །སྔར་གྱི་དབང་བསྐུར་བཞིན་དུ་ཁྲུས། །རང་གི་འཁོར་ལོའི་བདག་སྦྱོར་ལྡན། །ཐུན་མཚམས་གསུམ་དུ་བསྒོམ་བྱ་སྟེ། །ལས་དང་པོ་ཡིས་མཉམ་མར་
བྱ། །རང་གིས་སྤྲུལ་པའི་དཀྱིལ་འཁོར་ནི། །སྔར་བཞིན་དུ་ནི་ཉེར་བསྡུས་ཏེ། །ཡེ་ཤེས་འཁོར་ལོར་མཉམ་སོན་པས། །ཤེས་རབ་སྙིང་རྗེར་ལྡན་པས་ཉལ། །ནང་པར་ཉལ་བས་ལྡང་བ་ན། །ལྷ་མོའི་གླུ་ཡིས་བསྐུལ་བ་སྟེ། །སྔར་བཞིན་བསྒོམ་པ་སྔོན་འགྲོ་བས། །རྟག་ཏུ་སྔགས་
ཀྱི་བཟླས་པ་བརྩམ། །ཉེ་བའི་སྒྲུབ་པ་ནས་བརྩམས་ཏེ། །ཡེ་ཤེས་ཅུང་ཟད་ཐོབ་བདག་པོ། །སྔགས་ཀྱི་ཚུལ་ཁྲིམས་བརྟུལ་ཞུགས་ལྡན། །དང་པོའི་ལས་དང་འདྲ་བར་བསྒོམ། །སྤྲོ་བ་དང་ནི་བསྡུ་བར་ལྡན། །སླར་ཡང་ཡང་དག་ཡེ་ཤེས་སོ། །སྐད་ཅིག་གིས་ནི་ཡེ་ཤེས་རྫོགས། །
མཚན་མིན་རྣལ་འབྱོར་ཡང་དག་བསྟེན། །སོ་སོར་དཀྱིལ་འཁོར་ལ་གནས་པ། །རྟག་ཏུ་སྣང་བས་ཕན་པ་བསྒོམ། །འཁོར་ལོ་བདག་ཉིད་གཟུགས་ཀྱིས་ནི། །མཚན་མ་གཉིས་ནི་ཐོབ་གྱུར་པ། །དང་པོའི་ལས་ཅན་འདིར་ཤེས་བྱ། །དེ་ནས་རེ་རེ་འཕེལ་བ་ནི། །ལྷག་མའི་རྣལ་འབྱོར་
པར་ཤེས་བྱ། །ཏིང་འཛིན་གསུམ་ནི་ཡོངས་རྫོགས་པ། །སྔ་མ་བཞིན་དུ་ལས་དང་པོའི། །འབྱིན་པའི་དཀྱིལ་འཁོར་སྔོན་སོང་བ། །ལྷག་མའི་མཚམས་ལ་བསྒོམ་པ་ཡི། །ཡེ་ཤེས་དཀྱིལ་འཁོར་འབྱིན་པ་དང་། །སླར་ཡང་སྤྲུལ་པའི་འཁོར་སྡུད་པ། །གང་ཚེ་ཉལ་བར་འདོད་གྱུར་
ཞེས། །རྣལ་འབྱོར་པ་ནི་གཞན་དག་སྨྲ། །རྡུལ་ཚོན་དཀྱིལ་འཁོར་བྲི་བའམ། །ཡིད་ཀྱིས་སྤྲུལ་པར་བྱ་བ་ཡང་། །སྐུ་གསུང་ཐུགས་ནི་ལེགས་མཆོད་པ། །ཆོ་ག་བཞིན་དུ་དེར་མཆོད་ནས། །རང་འདོད་ལྷ་ཡི་རྣལ་འབྱོར་གྱིས། །འཁོར་ལོའི་དབུས་སུ་ཡང་དག་གནས། །འདོད་པའི་
དངོས་པོ་བསྒྲུབ་པར་བྱ། །དེ་ཡི་རྒྱུ་ལ་སེམས་བརྟན་པས། །སྔར་གསུངས་བདུད་རྩི་འཁྱིལ་པ་སྤྲོ་བའི་ཁྲོ་བོའི་འོད་ཟེར་ནམ་མཁར་འབར། །འཁོར་ལོའི་བདག་པོ་ཤེས་བྱ་ཆོ་ག་ཡིས་ནི་རང་ཉིད་དེ་ཡི་རྣལ་འབྱོར་ལྡན། །ངེས་པར་ཆོས་ཀྱི་རང་བཞིན་འོད་གསལ་མཆོག་ཉིད་ཅེས་པ་ཉིད་དུ་རིག་

44-1-143b

པར་བྱ། །ལོག་འདྲེན་བགེགས་ནི་སུན་ཕྱུང་བཅོམ་ལྡན་འདས་ཀྱིས་བདག་ཉིད་དབང་ནི་བསྐུར་བར་བྱ། །མི་བསྐྱོད་པས་དབེན་སླར་ཡང་གལ་ཏེ་སངས་རྒྱས་དེ་ཡི་བདག་པོར་འགྱུར། །འཁོར་ལོའི་བདག་པོ་དེ་ཡི་གནས་ཞུགས་དབུས་ཀྱི་ལྟེ་བའི་ཆ་ལ་ལྡན། །དེ་ནི་བཅོམ་ལྡན་མི་བསྐྱོད་ཅེས་སུ་
གསལ་བར་གཞན་གྱིས་གཞུང་དག་སྨྲ་བྱེད་ཀྱང་། །གསང་བར་ཡང་ནི་འཁོར་ལོའི་བདག་པོ་གསང་བ་དེ་ཡང་འགྱུར་ཞེས་འདིར་སྨྲ་མི་རིགས་མིན། །འདིར་ནི་དག་པའི་བློ་ཅན་རྣམས་ཀྱིས་མེ་ལོང་ལ་སོགས་གཟུགས་པ་དག་པར་བརྗོད། །རྣམ་པར་ཤེས་པ་དེ་ཡི་བདག་པོར་གྱུར་
པས་དབུས་ཀྱི་གདན་ལ་རིག་པར་འདོད། །སྤྱིར་བཏང་ལས་གཞན་འདིར་ནི་གཞན་དག་ནི། །ཉམས་མྱོང་གཅིག་པ་ཉིད་དེ་དེ་ཁོ་ནས། །སངས་རྒྱས་སངས་རྒྱས་མ་ཡིན་ཉིད་དུ་མཉམ། །སངས་རྒྱས་སངས་རྒྱས་མིན་པར་ཇི་ལྟར་རྟེན། །ཞི་དང་འཁྲུལ་པའི་དྲི་མའི་རྙོག་པས་གོས་པའི་
ཡིད་ནི་དག་པས་དཀར་བའི་གཟུགས། །སེམས་ཅན་བསམ་པ་ཡོངས་སུ་རྫོགས་པར་བྱེད་པའི་ཡིད་ཀྱིས་རྒྱས་པ་སེར་བའི་འོད། །དམར་པོ་འདོད་ཆགས་རྣམ་དག་ཀུན་གྱི་དབང་གིས་ཆོ་ག་ལ་ནི་སྦྱོར་གྱུར་པ། །བྱ་བ་ནན་ཏན་ཞེས་བྱའི་ངོ་བོར་གྱུར་པས་བཻ་ཌཱུརྱ་ཡི་ཁ་དོག་འབར། །ཞེ་
སྡང་ཉོན་མོངས་རྣམ་དག་ཀྱང་ནི་ཤིན་ཏུ་སྡང་བ་རྣམས་ལ་གནག་པའི་འོད། །མེ་ལོང་ལ་སོགས་མི་འདོད་པས་ན་ཇི་ལྟར་ཡང་འདིར་ཞེ་སྡང་དག །རྡོ་རྗེ་ཅན་གྱིས་མེ་ལོང་སོགས་སུ་གྱུར་པ་སྔོན་པོའི་གཟུགས་སུ་གང་གིས་ཡིན། །ཅིའི་ཕྱིར་དབུས་སུ་ཞེ་སྡང་རྣམ་དག་གྲུབ་སྐུ་དཀར་
པོ་ལ་སོགས་མཛེས་པར་འགྱུར། །ཇི་ལྟར་སྤྱིར་བཏང་ལ་ཡང་འདི་ནི་ནང་འདུས་རང་གི་བདག་དང་མི་བསྐྱོད་གཉིས། །དེའི་ཕྱིར་བདེ་བར་གཤེགས་པར་གཅིག་གྱུར་གཞན་མིན་དེ་ཡི་གཟུགས་མི་བསྟེན། །འདི་ལྟར་གཞན་དུ་འགལ་བ་སྤང་བའི་བློ་རྣམས་ཇི་ལྟར་ཡང་དག་གསུངས། །
ཐ་དད་ཡེ་ཤེས་ཀྱིས་བྱས་གྱུར་པས་ཇི་ལྟར་སྒྲོལ་མ་ལ་སོགས་གཉིས་སུ་རྟོགས། །ཡེ་ཤེས་ལྔ་ཡི་བདག་ཉིད་རྣམས་ནི་འདི་རྣམས་ངེས་པར་ཡེ་ཤེས་སོ་སོ་སྟེ། །ལྷག་པར་གྲགས་པ་གང་གིས་གང་དུ་མྱུར་བ་ཡེ་ཤེས་དེའི་དག་པ། །ཡེ་ཤེས་ཀྱིས་འགྱུར་ཁ་དོག་གནས་པ་རྟོག་

44-1-144a

པས་གལ་ཏེ་ཁ་དོག་ཡིན་གྱུར་ན། །དཀྱིལ་འཁོར་བདག་པོ་འཇམ་དཔལ་གསལ་བ་ཉིད་དུ་ངེས་པར་བདག་པོ་ཉིད་དུ་འགྱུར། །རྡོ་རྗེ་ཅན་གྱི་ལུགས་ནི་གལ་ཏེ་འགའ་ཞིག་ཡོད་ན་བདེ་གཤེགས་གནས་ལ་བརྟེན། །རང་རིགས་དབང་ཕྱུག་དང་ནི་རྒྱལ་བའི་སྲས་
པོ་འཁོར་ལོའི་བདག་པོར་གནས་པར་བྱ། །སངས་རྒྱས་སངས་རྒྱས་མ་ཡིན་བདག་ཉིད་ངོར་མཚོན་གང་ཞིག་གསང་བའི་འཁོར་དབང་ཕྱུག །མི་བསྐྱོད་ངེས་པར་བདག་པོར་གྱུར་ན་རྣམ་པར་སྣང་མཛད་ལ་སོགས་གཉིས་སུ་འགྱུར། །དཔལ་ལྡན་ཡེ་ཤེས་ཞབས་ཀྱི་ལམ་ཞུགས་
བླ་མ་རྗེས་བསྟེན་པས། །བདག་གིས་མན་ངག་ཁྱད་པར་གང་ཞིག་ཅུང་ཟད་ཐོབ་གྱུར་པ། །འདི་ནི་དེ་ཡི་དྲན་པ་ཉམས་པར་མ་གྱུར་ཞེས་ཕྱིར་དང་། །དེ་ཕྱིར་འདི་ནི་ཡང་དག་སྤེལ་བ་བདག་མཉམ་བློ་ལ་ཕན་ཕྱིར་རོ། །ལེགས་པར་བསྡུ་བྱས་བདེ་བའི་སྒྲུབ་ཐབས་བྱང་ཆུབ་ལམ་ཐོབ་
པ། །འདིར་ནི་བདག་གིས་གང་ཞིག་མཉམ་པ་མེད་པའི་བསོད་ནམས་གྲངས། །དཔལ་ལྡན་གསང་བ་འདུས་པའི་ཆོ་ག་ཉིད་ཀྱིས་སྐྱོན་སྤངས་པ། །དེ་ཡིས་བྱང་ཆུབ་མཆོག་གི་གོ་འཕང་སྐྱེ་བོས་ཐོབ་པར་ཤོག །རྒྱལ་དང་རྒྱལ་བའི་སྲས་ཀྱིས་གདུལ་བྱ་མ་ཡིན་སྤངས་གྱུར་པ། །
བསམ་གྱིས་མི་ཁྱབ་རྣམས་ལ་ཕྱོགས་བཅུར་གནས་པའི་སེམས་ཅན་རྣམས། །དེ་ཡིས་བྱང་ཆུབ་སྒྲུབ་པའི་ཆེད་དུ་རྒྱལ་བས་བྱིན་ཞེས་པས། །དགའ་བའི་སྒྲུབ་ཐབས་ཞེས་གྲགས་འདི་ནི་བདག་གིས་བཀོད། །དགའ་བའི་སྒྲུབ་པའི་ཐབས་སློབ་དཔོན་ཆེན་པོ་རྒྱལ་བས་བྱིན་པས་
མཛད་པ་རྫོགས་སོ།།      །།པཎྜི་ཏ་པདྨ་ཀ་ར་ཝརྨ་དང་། ལོ་ཙཱ་བ་རིན་ཆེན་བཟང་པོའི་འགྱུར།།༄༅༅། །རྒྱ་གར་སྐད་དུ། ཤྲཱི་ཨཀྵོ་བྷྱ་བཛྲ་སཱ་དྷ་ནཾ། བོད་སྐད་དུ། དཔལ་མི་བསྐྱོད་རྡོ་རྗེའི་སྒྲུབ་པའི་ཐབས། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་
ཕྱག་འཚལ་ལོ། །ཁྱབ་བདག་སྒྲིབ་པ་ཀུན་ལས་གྲོལ། །ཡེ་ཤེས་ལྔ་ཡི་བདག་ཉིད་ཅན། །རང་སྣང་རིག་པའི་ཡན་ལག་འདུས། །མི་བསྐྱོད་བླ་མ་ཡང་བཏུད་ནས། །དཀའ་བས་ཐོབ་དང་འཁྲུལ་འཇིགས་པས། །ཡེ་ཤེས་ཞལ་སྔའི་རྗེས་འབྲངས་ནས། །རིན་ཆེན་རྡོ་རྗེས་རྣམ་

44-1-144b

གསལ་བའི། །དེ་ཡི་སྒྲུབ་ཐབས་བྲི་བར་བྱ། །དེ་ལ་སྔགས་པ་སྙིང་རྗེ་ཆེན་པོའི་རྒྱུས་བྱང་ཆུབ་ཏུ་སེམས་བསྐྱེད་པ། སྦྱིན་པ་ལ་སོགས་པའི་ཡོན་ཏན་གྱིས་རྣམ་པར་བརྒྱན་པ། ཐབས་དང་ཤེས་རབ་གཉིས་སུ་མེད་པའི་ཐབ་མོའི་ཚུལ་ལྷག་པར་མོས་པ་དང་། དཔལ་གསང་བ་
འདུས་པའི་དཀྱིལ་འཁོར་དུ་ཆུ་དང་། ཅོད་པན་དང་། རྡོ་རྗེ་དང་། བདག་པོ་དང་། མིང་དང་། བུམ་པ་དང་། གསང་བ་དང་།ཤེས་རབ་ཡེ་ཤེས་ཀྱི་དབང་བསྐུར་བ་དང་། བརྟུལ་ཞུགས་དང་། ལུང་བསྟན་པ་དང་། དབུགས་དབྱུང་བ་དང་། རྗེས་སུ་གནང་བ་ཆོ་ག་བཞིན་དུ་ཐོབ་པས།
རི་བོ་ལ་སོགས་པ་ཡིད་དང་རྗེས་སུ་མཐུན་པ་འགའ་ཞིག་ཏུ། ཟླ་བ་དང་། ཉི་མ་དང་། ཆུ་དང་། སྨན་དང་། དྲི་ཞེས་བྱ་བས་དཀྱིལ་འཁོར་གྲུ་བཞི་པར་བྱུགས་ལ། མེ་ཏོག་དྲི་ཞིམ་པོ་སྣ་ཚོགས་པའི་སིལ་མ་གཏོར་བར་བྱའོ། །དེ་དག་མེད་ན་ནི་ཐམས་ཅད་ཡིད་ཀྱིས་བྱས་ནས། དེར་སྟན་བདེ་བ་
ལ་རྡོ་རྗེ་སྐྱིལ་མོ་ཀྲུང་གིས་འཇུག་སྟེ། རྣམ་པར་ཐར་པའི་སྒོ་གསུམ་རྣམ་པར་དག་ཅིང་བྱམས་པ་ལ་སོགས་པ་བསྒོམ་པ་སྔོན་དུ་སོང་བ་དང་། རང་གི་སྙིང་གའི་ཉི་མའི་དཀྱིལ་འཁོར་ལ་ཡི་གེ་ཧཱུྃ་སྔོན་པོ་མགོ་གྱེན་དུ་བལྟས་པ་བསམས་ལ། ནམ་མཁའི་ངོས་སུ་རང་གི་འདོད་པའི་ལྷའི་
དཀྱིལ་འཁོར་གྱི་འཁོར་ལོ་དང་། དེ་དང་ཐ་མི་དད་པའི་གཟུགས་ཅན་གྱི་བླ་མ་རྣམས་ཀྱིས་ཀྱང་ཏིལ་གྱི་གང་བུ་ལྟར་བར་མཚམས་མེད་པར་ཡོངས་སུ་གང་བར་དམིགས་ཤིང་བསམས་ལ་ཧཱུྃ་དེ་ལས་གཟུགས་དང་། སྒྲ་དང་། དྲི་དང་། རོ་དང་། རེག་བྱ་རྡོ་རྗེ་རྣམས་དང་། རིན་པོ་ཆེ་
སྣ་བདུན་དང་། རྒྱལ་མཚན་དང་། ལྷ་བཤོས་ལ་སོགས་པ་ཕྱིའི་མཆོད་པ་སྣ་ཚོགས་པ་ཐམས་ཅད་ཀྱང་རྣམ་པར་སྤྲོ་བར་བྱའོ། །སྤྱན་མ་ལ་སོགས་པའི་རིག་མ་རྣམས་དང་། ཆོས་ཀྱི་དབྱིངས་རྡོ་རྗེ་ཡང་ལ་ལའི་གཞུང་གིས་འབྱིན་པར་བྱེད་དེ། དེ་བཞིན་གཤེགས་པ་དེ་དག་ཐམས་
ཅད་ཡང་དག་པར་མཆོད་ཅིང་བདག་ཉིད་ཀྱང་དེ་བཞིན་གཤེགས་པ་རེ་རེའི་སྤྱན་སྔར་འདུག་སྟེ། གུས་པས་བཏུད་ནས་ཕྱག་བྱས་ཏེ། ཐལ་མོ་སྦྱར་ཏེ་པུས་མོའི་ལྷ་ང་ས་ལ་བཙུགས་ཏེ་གནས་པར་བསམ་པར་བྱའོ། །དེའི་འོག་ཏུ་མཆོད་པ་དང་། མཆོད་པར་བྱེད་པ་དང་། མཆོད་པ་སྟེ་

44-1-145a

གསུམ་ཆར་ཡང་རྨི་ལམ་གྱི་ནང་གི་རྨི་ལམ་ལྟར་བརྫུན་ཞིང་། སོ་སོ་རང་གིས་རིག་པའི་བདག་ཉིད་ཅན་དུ་ལྷག་པར་མོས་པར་བྱའོ། །དེ་བཞིན་དུ་བཤགས་པར་བྱ་བ་དང་། བཤགས་པར་བྱེད་པ་དང་། བཤགས་པ་དང་། གང་རྣམས་ཀྱི་མདུན་དུ་བཤེགས་
པར་བྱ་བ་དང་། རྗེས་སུ་ཡི་རང་བར་བྱ་བ་དང་། རྗེས་སུ་ཡི་རང་བར་བྱེད་པ་དང་། རྗེས་སུ་ཡི་རང་བ་དང་། བསྔོ་བར་བྱ་བ་དང་། སྔོ་བར་བྱེད་པ་དང་། བསྔོ་བ་དང་། གང་དུ་བསྔོ་བར་བྱ་བ་དང་། གསོལ་བར་བྱ་བ་དང་། གསོལ་བ་པོ་དང་། གསོལ་བ་སྟེ། གསུམ་ཆར་ཡང་སྔ་མ་
བཞིན་དུ་བསམས་ལ། སྡིག་པ་བཤགས་པ་ལ་སོགས་པ་འདི་ལྟར་བྱའོ། །གང་ཞིག་ཐོག་མེད་ཅེས་བྱ་བ་ལ་སོགས་པ་དང་། ཀུན་འདོད་དབུགས་འབྱིན་སོགས་མཛད་པའི། །སངས་རྒྱས་ཀུན་ལ་བདག་བསྐུལ་བ། །བསྟན་པ་ནམ་མཁའི་མཐའ་མཉམ་པས། །འཇིག་རྟེན་ཀུན་
སྡིག་མེད་སྣང་མཛོད། །ཅེས་བྱ་བ་དང་། ཡིད་ཀྱི་རོལ་པ་ཞེས་བྱ་བ་ལ་སོགས་པ་གསུམ་ལ་སྐྱབས་སུ་འགྲོ་བ་ནས། ཡང་དག་ཉིད་དུ་ད་ནི་གནས་པར་བགྱི། །ཞེས་བྱ་བའི་བར་གྱིས་བྱའོ། །དེ་ནས་སྲིད་པ་གསུམ་དུ་གཏོགས་པའི་སེམས་ཅན་གྱི་ཁམས་མ་ལུས་པ་རྣམས་
འཇིག་ཚོགས་ལ་སོགས་པའི་ལྟ་བར་བཤད་པ་རྣམས་དང་། སྐྱེ་བ་ལ་སོགས་པའི་སྡུག་བསྔལ་རྣམས་ཀྱིས་གཟིར་བར་གྱུར་པ་ལ་དམིགས་ལ། ཀྱེ་མའོ་སེམས་ཅན་འདི་དག་ནི་འདོད་ཆགས་ལ་སོགས་ཆུ་སྲིན་གྱི་ཚོགས་ཀྱིས་ཀུན་དུ་དཀྲུགས་པ། བདག་དང་བདག་གི་རྣམ་
པར་རྟོག་པ་ཤིན་ཏུ་ཟབ་པའི་ཆུ་དང་ལྡན་པའི་འཁོར་བའི་རྒྱ་མཚོ་ཆེན་པོར་ཐབས་དང་ཤེས་རབ་བླ་ན་མེད་པའི་དེ་ཁོ་ན་ཉིད་ཀྱི་གྲུ་རྣམ་པར་ཞིག་པ། ལས་དང་ཉོན་མོངས་པའི་དབའ་རླབས་རྣམས་ཀྱིས་སྐྱེད་པ་ལ་སོགས་པའི་སྡུག་བསྔལ་རྣམས་སུ་ཕན་ཚུན་རྣམ་པར་གཡེངས་པ། སྐྱབས་
མེད་པར་གྱུར་པས་ཡོངས་སུ་ཉོན་མོངས་པ་དེ་རྣམས་ལ། བདག་དཔལ་མི་བསྐྱོད་རྡོ་རྗེར་གྱུར་ནས་དེ་དག་སྡུག་བསྔལ་ཆེན་པོ་དང་སྡུག་བསྔལ་གྱི་རྒྱུར་གྱུར་པའི་འཁོར་བའི་རྒྱ་མཚོ་འདི་ལས་བཏོན་ནས་ཐབས་དང་ཤེས་རབ་ཀྱི་ཏིང་ངེ་འཛིན་གྱི་མཐུས་བླངས་ཏེ། མཆོག་ཏུ་བདེ་བ་དམ་པ་རྒྱ་ཆེ་

44-1-145b

བའི་རང་བཞིན་ཅན་གྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རིན་པོ་ཆེའི་གླིང་དུ་གཞག་པར་བྱའོ་ཞེས་དེ་རྣམས་ལ་སྙིང་རྗེ་ཆེན་པོ་བསྐྱེད་ནས་འཇུག་པའི་མཚན་ཉིད་ཅན་གྱི་དོན་དམ་པའི་བྱང་ཆུབ་ཀྱི་སེམས་བསྒོམ་པར་བྱའོ། །དེ་ཡང་གཟུང་བ་དང་འཛིན་པའི་ངོ་བོ་ཉིད་དང་བྲལ་བས་
སྟོང་པ་ཉིད་ཡིན་ལ། དེ་ལྟ་བུ་ནི་ཤེས་པ་གཞན་མི་བསྐྱེད་པས་དེ་བཞིན་དུ་མཚན་མ་མེད་པ་ཡིན་ནོ། །ཤེས་པ་ཙམ་ལས་ཐ་དད་པའི་ཁམས་གསུམ་པ་ནི་ཤིན་ཏུ་ཡང་མེད་པས་ན་རྟོག་པ་མེད་པ་ཉིད་དུ་ངེས་པར་བརྟགས་ན་གང་དུ་ཡང་སྨོན་པར་མི་བྱེད་པས་དེའི་ཕྱིར་རྒྱུ་བ་དང་མི་རྒྱུ་བའི་དངོས་པོ་
མ་ལུས་པ་ནི་སྨོན་པ་མེད་པ་ཡིན་ནོ། །དེ་ལྟར་རྣམ་པར་ཐར་པའི་སྒོ་གསུམ་གྱི་ངོ་བོ་ཉིད་ཀྱི་རང་གི་སེམས་སོ་སོ་རང་གིས་རིག་པ་བེམས་པོ་མ་ཡིན་པ་བསམས་ལ། འོག་ནས་བཤད་པའི་སྔགས་ཀྱི་དོན་ལ་ལྷག་པར་མོས་པས་བྱིན་གྱིས་བརླབ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝཱ་
ཨཱཏྨ་ཀོ྅ཧཾ། དེ་ནས་སེམས་དེ་ཉིད་ཉི་མའི་དཀྱིལ་འཁོར་དེའི་སྟེང་དུ་ཡི་གེ་ཧཱུྃ་སྔོན་པོ་ལས་རྡོ་རྗེ་དེའི་ལྟེ་བར་ཉི་མ་ལ་གནས་པའི་ཧཱུྃ་གིས་མཚན་པར་བསམས་ལ་དེ་ལས་རྡོ་རྗེ་རྣམས་ཀུན་དུ་སྤྲོས་ཏེ། ས་ཡང་རྡོ་རྗེའི་རང་བཞིན་དུ་རྣམ་པར་བསྒོམ་མོ། །དེ་ནས་སྲུང་བའི་འཁོར་ལོའི་ཕྱི་རོལ་དུ་རཾ་ལས་
བྱུང་བའི་མེའི་དཀྱིལ་འཁོར་གྲུ་གསུམ་དམར་པོ་གསལ་བར་དྲི་མ་མེད་པས་རང་འདོད་པའི་ཕྱོགས་བཅིངས་ལ། དེའི་ནང་དུ་ཡི་གེ་ལཾ་སེར་པོ་ལས་བྱུང་བའི་རྡོ་རྗེ་རྩེ་གསུམ་པས་ཕྱིའི་མཚམས་བཞིར་མཚན་པའི་དབང་ཆེན་གྱི་དཀྱིལ་འཁོར་གྱིས་མཚམས་བཅིངས་ཏེ། ཧཱུྃ་ལས་བྱུང་བའི་ཁྲོ་བོའི་རྡོ་རྗེ་
བསྐལ་པའི་མེ་ལྟར་འབར་བར་སྣང་བས་མཚམས་ཀྱི་ནང་དུ་རབ་བྱས་ནས། བཾ་ལས་བྱུང་བ་ཆུའི་དཀྱིལ་འཁོར་དཀར་པོ་རབ་ཏུ་འབར་བའི་མེ་ལྟར་སྣང་བས་ར་བའི་སྟེང་དུ་རྡོ་རྗེའི་དྲ་བ་བསྒོམ་པར་བྱའོ། །དེའི་འོག་ཏུ་ར་བ་དང་དྲ་བའི་དབུས་སུ་རྡོ་རྗེའི་རང་བཞིན་གྱི་ས་གཞིར་སྐད་ཅིག་གིས་འཁོར་
བར་བྱེད་པའི་འཁོར་ལོ་རྩིབས་བཅུ་པ་མདོག་སེར་པོ། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་ལ་སོགས་པ་ཤིན་ཏུ་རྒྱས་པའི་མདོ་ལས་གསུངས་པའི་སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་དང་། ཟད་པ་དང་། མི་སྐྱེ་བ་དང་། ཆོས་དང་།

44-1-146a

རྗེས་སུ་རྟོག་པ་དང་། ཡོངས་སུ་བྱང་བ་ཤེས་པ་ཞེས་བྱ་བ་སྟེ། ཀུན་རྫོབ་དང་། ཕ་རོལ་གྱི་སེམས་ཤེས་ཞེས་བྱ་བ་སྟེ། ཤེས་པ་བཅུའི་ངོ་བོ་ཁྲོ་བོ་བཅུའོ། །ཡང་ན་རེ་རེ་ཞིང་ཡེ་ཤེས་བཅུའི་བདག་ཉིད་ཅན་དུ་བྱ་བ་སྟེ། མེ་ལོང་ལྟ་བུ་ལ་སོགས་པའི་ཡེ་ཤེས་ལྔ་པོ་དང་། 
རྣམ་པར་བྱང་བའི་ཕུང་པོ་ལྔ་ནི་དེའི་རྒྱུར་གྱུར་པ་ཡིན་པས་ན་ཡེ་ཤེས་ལྔ་ཡིན་ཞེས་བྱ་བ་ནི་གཞུང་གཞན་ཡིན་ནོ། །མན་ངག་ཇི་ལྟ་བ་བཞིན་དུ། ཕྱོགས་དང་མཚམས་དང་། སྟེང་དང་འོག་གི་རྩིབས་བཅུ་པོ་རྣམས་དང་། འཁོར་ལོའི་ལྟེ་བ་ལ་བཤད་མ་ཐག་པའི་ཤེས་བཅུ་རྣམ་པར་དག་པའི་ངོ་
བོའི་སྒྲ་ཇི་བཞིན་པའི་ཡེ་ཤེས་ཀྱི་རང་བཞིན་རྡོ་རྗེ་ཧཱུྃ་མཛད་དམ་གཞན་ཡང་གཙུག་ཏོར་དང་རྣམ་པར་སྣང་མཛད་ལ་སོགས་པ་བགེགས་རབ་ཏུ་འཇོམས་པར་བྱེད་པ་རྣམས་ཇི་ལྟ་བ་བཞིན་དུ་བསམ་པར་བྱའོ། །དེ་ལ་ཁྲོ་བོ་རྣམས་ཀྱི་ཕྱོགས་དང་སྐུ་མདོག་གི་ངེས་པ་ནི་འདི་ཡིན་ཏེ། ཤར་ཕྱོགས་
ཀྱི་རྩིབས་ལ་ཁྲོ་བོ་གཤིན་རྗེའི་གཤེད་པོ་སྐུ་མདོག་སྔོན་པོ་ཞལ་གསུམ་པ་ཞལ་གཡས་དང་གཡོན་གཉིས་དཀར་བ་དང་། དམར་བ། ཐམས་ཅད་ཀྱི་ཕྱག་དང་པོ་གཉིས་ཀྱིས་རང་དང་འདྲ་བའི་རིག་མ་ལ་ཡང་དག་པར་འཁྱུད་པ་ནི་ངེས་པ་ཡིན་ལ། ཕྱག་ལྷག་མ་རྣམས་ན་ཐོ་བ་དང་། རལ་གྲི་
དང་། ནོར་བུ་དང་། པདྨ་རིམ་བཞིན་བསྣམས་པར་མཛད་པའོ། །ལྷོར་ཤེས་རབ་མཐར་བྱེད་སྐུ་མདོག་དཀར་པོ། ཞལ་གཡས་དང་གཡོན་སྔོན་པོ་དང་དམར་པོ། དབྱིག་པ་དང་། རལ་གྲི་དང་། ནོར་བུ་དང་། པདྨ་བསྣམས་པའོ། །ནུབ་ཏུ་པདྨ་མཐར་བྱེད་སྐུ་མདོག་དམར་པོ། ཞལ་
གཡས་དང་གཡོན་སྔོན་པོ་དང་དཀར་པོ་དང་། པདྨ་དང་རལ་གྲི་དང་། ནོར་བུ་དང་འཁོར་ལོ་བསྣམས་པའོ། །བྱང་དུ་བགེགས་མཐར་བྱེད་གཤིན་རྗེ་གཤེད་དང་འདྲ་བ་ལས། ཁྲོ་བོའི་རྡོ་རྗེ་དང་། རལ་གྲི་དང་། ནོར་བུ་དང་། པདྨ་བསྣམས་པའོ། །ཤར་ལྷོར་འདོད་པའི་རྒྱལ་པོ་ཁྲོ་བོ་སྒེག་པ་
སྐུ་མདོག་སྔོ་བ། ཞལ་གཡས་དང་གཡོན་དཀར་བ་དང་དམར་བ། ལྕགས་ཀྱུ་དང་། རལ་གྲི་དང་། ནོར་བུ་དང་། པདྨ་བསྣམས་པའོ། །ལྷོ་ནུབ་ཏུ་དབྱིག་སྔོན་སྐུ་མདོག་སྔོ་བ། ཞལ་གཡས་དང་གཡོན་དཀར་བ་དང་དམར་བ། དབྱིག་པ་དང་། རལ་གྲི་དང་། ནོར་བུ་དང་། པདྨ་

44-1-146b

བསྣམས་པའོ། །ནུབ་བྱང་དུ་སྟོབས་པོ་ཆེ་གཤིན་རྗེ་གཤེད་དང་འདྲ་བ་རྩེ་གསུམ་དང་། རལ་གྲི་དང་། ནོར་བུ་དང་། པདྨ་བསྣམས་པའོ། །འདི་དག་པས་འདོད་པའི་རྒྱལ་པོ་མ་གཏོགས་པ་གཤིན་རྗེ་གཤེད་ནས་སྟོབས་པོ་ཆེའི་བར་ནི་གཟུགས་མི་སྡུག་པ། སྨིན་བསྡུས་དབུས་སྐྲ་གྱེན་
འབར་བ། །ཨག་ཚོམ་སྨིན་མ་སྤྱན་དམར་སེར། །ཞལ་གདངས་པ་དང་ལྗགས་བསྐྱོད་པ། །མཆེ་གཙིགས་ཧ་ཧ་ཞེས་བཞད་པ། །གདུག་པའི་སྦྲུལ་གྱིས་སྐུ་བརྒྱན་པ། །མིའུ་ཐུང་གསུས་པ་འཕྱང་བའོ། །བྱང་ཤར་དུ་མི་གཡོ་བ་ནི་འདོད་པའི་རྒྱལ་པོ་ལྟ་བུ་རལ་གྲི་དང་། རྡོ་རྗེ་དང་། ནོར་བུ་
དང་། པདྨ་བསྣམས་པ་མི་གཡོ་བའོ། །སྟེང་དུ་གཙུག་ཏོར་འཁོར་ལོས་སྒྱུར་བ་སྐུ་མདོག་སེར་པོ་ཞལ་གཡས་དང་གཡོན་སྔོན་པོ་དང་དཀར་པོ་སྟེ། འཁོར་ལོ་སེར་པོ་དང་། རལ་གྲི་དང་། ནོར་བུ་དང་། པདྨ་བསྣམས་པའོ། །འཁོར་ལོ་འབར་བས་རབ་ཏུ་བསྐོར་བའོ། །འོག་ཏུ་ནི་གནོད་
མཛེས་འདོད་པའི་རྒྱལ་པོ་དང་འདྲ་བ་ལས་རྡོ་རྗེ་དང་། རལ་གྲི་དང་། ནོར་བུ་དང་། པདྨ་བསྣམས་པའོ། །འཁོར་ལོའི་ལྟེ་བ་ལ་ནི་ཧཱུྃ་མཛད་གནོད་མཛེས་དང་འདྲ་བ་ལས་རྡོ་རྗེ་དང་། རལ་གྲི་དང་། ལྕགས་ཀྱུ་དང་། ཞགས་པ་བསྣམས་པའོ། །གཡོན་དང་གཡས་ལོགས་སུ་དབང་
ཕྱུག་ཆེན་པོ་ཆུང་མ་དང་བཅས་པ་གན་རྐྱལ་དུ་འདུག་པ་ལ། རྣ་བ་གཡོན་པའི་སྟེང་དང་། ནུ་མ་གཉིས་པ་རིམ་བཞིན་དུ་གཡོན་བརྐྱང་བས་མནན་ཏེ་བཞུགས་པའོ། །འདི་དག་ལས་འདོད་པའི་རྒྱལ་པོ་ལ་སོགས་པ་ནས་རྡོ་རྗེའི་ཧཱུྃ་མཛད་ཀྱི་བར་ནི་ཁྲོ་བོ་སྒེག་པ་མཆེ་བ་ཅུང་ཟད་གཙིགས་པ། 
ཨག་ཚོམ་མེད་པ་རིན་པོ་ཆེའི་ཅོད་པན་དང་རིན་པོ་ཆེའི་རྒྱན་མངའ་བའོ། །གཤིན་རྗེའི་གཤེད་ལ་སོགས་པ་ནས་རྡོ་རྗེ་ཧཱུྃ་མཛད་ཀྱི་བར་ནི་སྣ་ཚོགས་པདྨ་དང་ཉི་མའི་གདན་ལ་གཡོན་བརྐྱང་བས་གནས་པ་དང་ཉི་མའི་འོད་ཀྱི་དཀྱིལ་འཁོར་མངའོ། །དེ་ནས་སྲུང་བའི་འཁོར་ལོའི་དབུས་
ན་གནས་པའི་རྡོ་རྗེ་ཧཱུྃ་མཛད་དམ། རང་གི་འདོད་པའི་ལྷ་གང་ཡང་རུང་བ་ཡོངས་སུ་གྱུར་པ་ལས་ཆོས་འབྱུང་བའི་ཕྱག་རྒྱ་གྱེན་དུ་བལྟས་ཏེ་གནས་པ། སྐུ་དང་གསུང་དང་ཐུགས་རྣམ་པར་དག་པའི་གྲུ་གསུམ་པ། ནང་ན་ནམ་མཁའི་རང་བཞིན་ཡོད་ན། དབུས་ན་པདྨ་དང་སྣ་ཚོགས་རྡོ་རྗེ་

44-1-147a

གནས་པ་བསྒོམ་པར་བྱའོ། །ཆོས་འབྱུང་བའི་ནང་དེར་སྣ་ཚོགས་རྡོ་རྗེའི་ལྟེ་བ་ལ་ཟླ་བའི་དཀྱིལ་འཁོར་ལ་གནས་པའི་བྷྲཱུྃ་ཡོངས་སུ་གྱུར་པ་ལས་འཁོར་ལོ་རྩིབས་བཅུ་གཉིས་པ་མ་རིག་པ་ལ་སོགས་པ་རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་རྣམ་པར་
དག་པའི་ངོ་བོ་ཉིད་བསྒོམ་པར་བྱའོ། །དེའི་ལྟེ་བ་ལ་ཟླ་བའི་དཀྱིལ་འཁོར་ལ་བྷྲཱུཾ་ཉིད་བསམས་ལ་དེ་བཞིན་གཤེགས་པ་རྣམས་སྤྲོས་པ་སྔོན་དུ་འགྲོ་བས་ཡི་གེ་བྷྲཱུཾ་དང་འཁོར་ལོ་དེ་ཡོངས་སུ་གྱུར་པ་ལས་རྣམ་པར་སྣང་མཛད་རིག་པ་དང་བཅས་པའི་ཡན་ལག་ལས་ཡང་དག་པར་འབྱུང་བའི་
གཞིའི་དཀྱིལ་འཁོར་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་རྣམ་པར་དག་པའི་ངོ་བོ་ཉིད་བསྒོམ་པར་བྱའོ། །དེ་ཡང་དེ་བཞིན་གཤེགས་པ་དང་སོ་སོའི་སྐྱེ་བོ་དག་དེ་ཁོ་ན་ཉིད་གཉིས་སུ་མེད་པའི་ངོ་བོ་ཉིད་ཀྱིས་མི་མཉམ་པ་མེད་པས་ན་ཟུར་བཞི་པའོ། །དེ་བཞིན་དུ་ལུས་དང་ཚོར་བ་དང་སེམས་
དང་ཆོས་རྣམས་གཅིག་དང་དུ་མ་དང་བྲལ་བ་ཉིད་ཀྱིས་སྦྱོར་བ་གང་ཡན་ལག་སྣ་ཚོགས་པ་ལ་འཇུག་པ་ཙམ་གྱིས་ལུས་འདི་ནི་གཟུང་བ་ལ་སོགས་པས་རྣམ་པར་དབེན་པའི་སེམས་ཀྱིས་རྣམ་པར་དྲན་པ་ཉེ་བར་འཇོག་པས་ན། ལུས་དང་། ཚོར་བ་དང་། སེམས་དང་། ཆོས་ཞེས་བྱ་བའི་
དྲན་པ་ཉེ་བར་གཞག་པ་བཞི་པོ་རྣམ་པར་དག་པ་ནི་ཤར་གྱི་སྒོའོ། །མི་དགེ་བ་སྐྱེས་པ་དང་། མ་སྐྱེས་པ་རྣམས་སྤང་ཞིང་མི་སྐྱེ་བའི་ཕྱིར་དང་། དགེ་བ་མ་སྐྱེས་པ་དང་། སྐྱེས་པ་རྣམས་བསྐྱེད་པ་དང་གནས་པའི་ཕྱིར་རིམ་གྱིས་རྩོམ་པ་དང་། ཡོངས་སུ་བསྐྱངས་པ་དང་། སོ་སོར་རྟོག་པ་དང་།
ནན་ཏན་ལྷུར་བྱེད་པ་ཞེས་བྱ་བའི་བརྩོན་འགྲུས་བཞི་རྣམ་པར་དག་པ་ནི་གཉིས་པ་སྟེ་ལྷོའི་སྒོའོ། །འདུན་པ་དང་བརྩོན་འགྲུས་དང་སེམས་དང་སྤྱོད་པ་སྟེ་རྫུ་འཕྲུལ་གྱི་རྐང་པ་བཞི་རྣམ་པར་དག་པ་ནི་གསུམ་པ་ནུབ་ཀྱི་སྒོའོ། །དད་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་དང་།
དབང་པོ་ལྔ་རྣམ་པར་དག་པ་ནི་བཞི་བ་བྱང་གི་སྒོའོ། །རྟོག་པ་དང་། དཔྱོད་པ་དང་། དགའ་བ་དང་། བདེ་བ་དང་། སེམས་རྩེ་གཅིག་པ་སྟེ་ཡན་ལག་ལྔ་པའི་བསམ་གཏན་དང་པོ་དང་། ནང་གི་བདག་ཉིད་རབ་ཏུ་དང་བ་དང་། དགའ་བ་དང་། བདེ་བ་དང་། སེམས་རྩེ་གཅིག་པ་སྟེ་ཡན་ལག་བཞི་

44-1-147b

པ་དང་ལྡན་པའི་གཉིས་པ་དང་། བཏང་སྙོམས་དང་། དྲན་པ་དང་། ཤེས་བཞིན་དང་། བདེ་བ་དང་། སེམས་རྩེ་གཅིག་པ་སྟེ། ཡན་ལག་ལྔ་དང་ལྡན་པའི་གསུམ་པ་དང་། བཏང་སྙོམས་ཡོངས་སུ་དག་པ་དང་། དྲན་པ་ཡོངས་སུ་དག་པ་དང་། སྡུག་བསྔལ་བ་དང་། བདེ་བའི་ཚོར་བ་མེད་པ་
དང་། སེམས་རྩེ་གཅིག་པ་སྟེ་ཡན་ལག་བཞི་པ་དང་ལྡན་པའི་བཞི་པ་སྟེ། དེ་ལྟར་རིམ་བཞིན་དུ་བསམ་གཏན་བཞི་རྣམ་པར་དག་པ་ནི་རྟ་བབས་བཞི་ཡིན་ནོ། །དཔའ་བར་འགྲོ་བ་དང་། ནམ་མཁའ་མཛོད་དང་། དྲི་མ་མེད་པ་དང་། སེང་གེ་རྣམ་པར་རོལ་པའི་ཏིང་ངེ་འཛིན་རྣམ་པར་དག་པའི་
ཁ་ཁྱེར་བཞིས་ཡོངས་སུ་བསྐོར་བ་དང་། དེ་བཞིན་དུ་བཟོད་པ་དང་། ཆོས་དང་། དོན་དང་སྔགས་ཀྱི་གཟུངས་རྣམ་པར་དག་པའི་ལྷ་མོའི་ཚོགས་ལག་ན་མཆོད་པ་རྣམ་པ་སྣ་ཚོགས་པ་ཐོགས་པ་ཁ་ཁྱེར་ལ་གནས་པ་དང་། འགྲོ་བ་མ་ལུས་པའི་བསམ་པ་སྣ་ཚོགས་པ་སོ་སོར་བསྐོང་བའི་
རིན་པོ་ཆེ་མ་ལུས་པར་རྣམ་པར་སྤྲས་པའི་རྒྱན་སྣ་ཚོགས་པས་རྣམ་པར་བརྒྱན་པ་དང་གདུལ་བྱའི་དབང་གིས་བྱུང་བ་མདོ་དང་དབྱངས་ཀྱིས་བསྙད་པ་དང་། ལུང་དུ་བསྟན་པ་དང་། ཚིགས་སུ་བཅད་པ་དང་། ཆེད་དུ་བརྗོད་པ་དང་། གླེང་གཞི་དང་། དེ་ལྟ་བུ་བྱུང་བ་དང་། སྐྱེས་པའི་རབས་དང་། ཤིན་
ཏུ་རྒྱས་པའི་སྡེ་ཞེས་བྱ་བ་གསུང་རབ་ཡན་ལག་དགུའི་དམ་པའི་ཆོས་ཀུན་དུ་སྒྲོགས་པས་ན་བ་དན་རྩེ་མོ་སྣ་ཚོགས་པའི་དྲིལ་བུའི་སྒྲ་སྒྲོགས་པ་རླུང་གིས་བསྐྱོད་པ་དང་། ཡེ་ཤེས་ཉིད་གསལ་བ་ཉིད་ཀྱིས་མེ་ལོང་དང་འདྲ་བས་ནས་མེ་ལོང་ངོ་། །དེའི་ངོ་བོ་ཉིད་ཀྱི་དྲན་པ་དང་། ཆོས་རབ་ཏུ་རྣམ་
པར་འབྱེད་པ་དང་། དགའ་བ་དང་། ཤིན་ཏུ་སྦྱངས་པ་དང་། ཏིང་ངེ་འཛིན་དང་། བརྩོན་འགྲུས་དང་། བཏང་སྙོམས་ཏེ། བྱང་ཆུབ་ཀྱི་ཡན་ལག་བདུན་རྣམ་པར་དག་པའི་མཚན་ཉིད་ཅན་ལ་སོགས་པའི་མེ་ཏོག་ཕུན་སུམ་ཚོགས་པའི་རྣམ་པར་དག་པ་དང་དྲ་བ་དང་དྲ་བ་ཕྱེད་པ་དང་། ཟླ་བ་དང་། ཉི་
མ་དང་། མེ་ལོང་དང་། མེ་ཏོག་གི་ཕྲེང་བ་དང་། རྔ་ཡབ་འབར་བ་དང་ལྡན་པ་དང་། གཟུགས་ཅན་གཟུགས་རྣམས་ལ་ལྟ་བ་ནི་རྣམ་པར་ཐར་པ་དང་པོའོ། །ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་རྣམས་ལ་ལྟ་བ་འདི་ནི་གཉིས་པའོ། །སྡུག་པའི་རྣམ་པར་ཐར་

44-1-148a

པ་ལུས་ཀྱིས་མངོན་སུམ་དུ་བྱས་ཏེ་རྫོགས་པར་བྱས་ནས་གནས་པ་དེ་ནི་གསུམ་པའོ། །ནམ་མཁའ་མཐའ་ཡས་སྐྱེ་མཆེད་ནི་བཞི་པའོ། །རྣམ་ཤེས་མཐའ་ཡས་སྐྱེ་མཆེད་ནི་ལྔ་པའོ། །ཅི་ཡང་མེད་པའི་སྐྱེ་མཆེད་ནི་དྲུག་པའོ། །འདུ་ཤེས་མེད་འདུ་ཤེས་མེད་མིན་
སྐྱེ་མཆེད་ནི་བདུན་པའོ། །འགོག་པའི་སྙོམས་པར་འཇུག་པ་ནི་བརྒྱད་པ་སྟེ། དེ་ལྟར་རྣམ་པར་ཐར་པ་བརྒྱད་པ་ནི་རྒྱལ་བའི་ཡུམ་ལས་གཟུགས་ཅན་གཟུགས་རྣམས་ལ་ལྟ་བ་དེ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་རྣམ་པར་ཟིལ་གྱིས་མནན་ནས་མཐོང་བ་འདི་
ནི་རྣམ་པར་ཐར་པ་དང་པོའོ་ཞེས་བྱ་བ་ནས་དེ་ཉིད་དུ་འགོག་པའི་སྙོམས་པར་འཇུག་པ་སྟོང་པ་ཉིད་དང་། མཚན་མ་མེད་པ་དང་སྨོན་པ་མེད་པའི་རྣམ་པས་དེ་ཟིལ་གྱིས་མནན་ནས་མཐོང་བ་འདི་ནི་རྣམ་པར་ཐར་པ་བརྒྱད་པའོ་ཞེས་འབྱུང་བ་དང་། ཡང་འདི་དཔལ་མཆོག་དང་པོའི་རྒྱ་ཆེར་བཤད་པ་ཀུན་
དགའ་སྙིང་པོའི་ཞལ་སྔ་ནས་ཀྱིས་བཤད་པ་ཡིན་ཏེ། རྣམ་པར་ཐར་པ་བརྒྱད་པོ་འདི་དག་རྣམ་པར་དག་པ་ནི་རིམ་བཞིན་དུ་འཁོར་ལོ་ལ་སོགས་པའི་ཀ་བ་བརྒྱད་ཀྱིས་ཉེ་བར་མཛེས་པར་བྱས་པ་དང་། སངས་རྒྱས་ཐམས་ཅད་དུ་བར་ཆད་མེད་པར་རྡོ་རྗེའི་ཚུལ་གྱིས་ཆོས་ཀྱི་འཁོར་ལོ་བསྐོར་བར་
ཀ་བ་བརྒྱད་ཀྱི་སྟེང་དུ་རྡོ་རྗེའི་ཕྲེང་བ་ཟླུམ་པོས་ཡོངས་སུ་བསྐོར་བ་དང་། གཟུགས་ལ་སོགས་པ་རྣམས་ལ་ཕྱིན་ཅི་ལོག་མེད་པས་བླ་ན་མེད་ཅིང་མཐའ་ཡས་པའི་འདོད་པའི་ཡོན་ཏན་ལྔ་དང་ལྡན་པ་དང་། ཆོས་ཀྱི་དབྱིངས་ཤིན་ཏུ་རྣམ་པར་དག་པའི་མཆོད་པ་ལྔས་ཉེ་བར་བརྒྱན་པ་དང་། འགྲོ་བ་
མ་ལུས་པ་དང་ཐ་མི་དད་པར་བསྟན་ཀྱང་དེར་གཏོགས་པའི་ཉེས་པས་མ་གོས་པས་ལྡོང་བུ་དང་བཅས་པའི་སྣ་ཚོགས་པདྨའི་གདན་གྱིས་ཉེ་བར་མཛེས་པར་བྱས་པའི་ལྷའི་གནས་བཅུ་དགུ་ལ་སེམས་ཅན་མ་ལུས་པའི་རྒྱུད་དུ་གཏོགས་པའི་མུན་ནག་རྣམ་པར་སེལ་ཅིང་མི་དགེ་བ་རྣམ་པ་བཅུའི་འདམ་རྫབ་
ཡང་དག་པར་སྐེམས་པ་དང་། བྱང་ཆུབ་སེམས་ཀྱི་མྱུ་གུ་ཡོངས་སུ་སྨིན་པར་བྱེད་པས་ཤེས་རབ་ཀྱི་ངོ་བོ་ཉིད་ཀྱི་ཉི་མའི་གདན་བདུན་དང་། དེ་བཞིན་དུ་སེམས་ཅན་ཐམས་ཅད་ཀྱི་ཉོན་མོངས་པའི་གདུང་བ་ཉེ་བར་ཞི་བར་བྱེད་པ་དང་། དགེ་བའི་རྩ་བའི་མྱུ་གུ་ཉེ་བར་འཕེལ་བར་བྱེད་པས་སྙིང་རྗེ་ཆེན་པོའི་

44-1-148b

ངོ་བོ་ཉིད་ཀྱི་ཟླ་བའི་གདན་བཅུ་གཉིས་སྣ་ཚོགས་པདྨའི་སྟན་ལ་གནས་པ་དང་ལྡན་པ་དང་། སྙིང་རྗེས་བརླན་པ་དང་། བསོད་ནམས་དང་། ཡེ་ཤེས་ཀྱི་ཚོགས་ཡོངས་སུ་རྫོགས་པའི་ཕྱིར་བུམ་པ་གང་བས་བརྒྱན་པ་དང་། ཡེ་ཤེས་ལྔའི་ངོ་བོ་ཉིད་ཡིན་པས་ཁ་དོག་ལྔ་ལས་ཡོངས་སུ་གྲུབ་
པའི་ཁང་པ་བརྩེགས་མ་སྟེ། དེ་རྣམ་པར་དག་པས་རང་གི་སེམས་ཉིད་དེ་ལྟ་བུའི་གཟུགས་སུ་བསྒོམ་པར་བྱའོ། །དེ་ནས་དེའི་བུམ་པའི་དབུས་ཟླ་བའི་གདན་ལ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་སྐྱེད་པར་བྱེད་པ། དབྱངས་ཀྱི་ཡི་གེ་བཅུ་དྲུག་ལུགས་དང་མཐུན་པ་དང་ལུགས་
ལས་བཟློག་པ་ཉིས་འགྱུར་དུ་བྱས་པའི་ཕྲེང་གཉིས་ལས་ཡོངས་སུ་གྲུབ་པ་ཤེས་རབ་ཀྱི་ངོ་བོ་ཉིད་རང་གི་སེམས་ཀྱི་ཡེ་ཤེས་ཀྱི་ཟླ་བ་རྣམ་པར་བསྒོམས་ལ། དེའི་སྟེང་དུ་དཔེ་བྱད་བཟང་པོ་བརྒྱད་ཅུ་སྐྱེད་པར་བྱེད་པ། ཀ་ལ་སོགས་པ་གསལ་བྱའི་ཡི་གེ་ཚར་གཉིས་སུ་བྱས་པའི་དྲུག་ཅུ་རྩ་
བཞིའི་དབུས་སུ་དབྱངས་ཀྱི་ཡི་གེ་བཅུ་དྲུག་ཕྲེང་གཅིག་གནས་པའི་ཡི་གེ་བརྒྱད་ཅུ་ཡོངས་སུ་རྫོགས་པ་ལས་ཡོངས་སུ་གྲུབ་པའི་སྙིང་རྗེ་ཆེན་པོའི་ངོ་བོ་ཉིད་ཟླ་བའི་དཀྱིལ་འཁོར་གཉིས་པོ་བསྒོམ་པར་བྱའོ། །ཟླ་བ་གཉིས་པོ་དེ་དག་ནི་ཀུན་གཞི་རྣམ་པར་ཤེས་པ་ཡོངས་སུ་གྱུར་པ་མེ་
ལོང་ལྟ་བུའི་ཡེ་ཤེས་རྣམ་པར་དག་པར་བལྟ་བར་བྱ་ལ་འདི་གཉིས་གཅིག་ཏུ་གྱུར་པས་ཉོན་མོངས་པ་ཅན་གྱི་ཡིད་ཀྱི་རྣམ་པར་ཤེས་པ་ཡོངས་སུ་གྱུར་པ་མཉམ་པ་ཉིད་ཀྱི་ཡེ་ཤེས་སོ། །དེའི་སྟེང་དུ་ཧཱུྃ་ལས་བྱུང་བའི་རྡོ་རྗེ་ནོར་བུ་དམར་སྐྱ་ལྟ་བུ་གཟུགས་ལ་སོགས་པ་ཕུང་པོ་ལྔ་རྣམ་པར་དག་
པའི་ངོ་བོ་ཉིད་མེ་ལོང་ལྟ་བུ་ལ་སོགས་པའི་ཡེ་ཤེས་ལྔ་ཡང་དག་པར་སྟོན་པར་བྱེད་པའི་རྡོ་རྗེ་རྩེ་ལྔ་པ་གྱེན་དུ་བལྟས་ཏེ་གནས་པ་ལ། རྡོ་རྗེའི་ལྟེ་བ་ལ་ཡང་ཟླ་བ་ལ་གནས་པའི་ཡི་གེ་ཧཱུྃ་རྗོད་པ་དང་བརྗོད་པར་བྱ་བ་ལས་འདས་པ་རྣམ་པར་རྟོག་པའི་རྣམ་པར་ཤེས་པ་གནས་གྱུར་པ་སོ་སོར་རྟོག་
པའི་ཡེ་ཤེས་ཀྱི་བདག་ཉིད་དུ་བསྒོམ་པར་བྱའོ། །དེ་ལ་དེ་བཞིན་གཤེགས་པ་སྤྲོས་ནས་འགྲོ་བའི་དོན་བྱས་ཏེ་བསྡུས་པའི་འོག་ཏུ། ཨོཾ་བཛྲ་ཨཱཏྨ་ཀོ྅ཧཾ། ཞེས་བྱ་བའི་ང་རྒྱལ་བྱ་བ་ནི་འཇུག་པའི་རྣམ་པར་ཤེས་པ་གནས་གྱུར་པ་བྱ་བ་གྲུབ་པའི་ཡེ་ཤེས་ཀྱི་ངོ་བོ་ཉིད་དོ། །དེའི་འོག་ཏུ་སྐད་ཅིག་

44-1-149a

གིས་ཡེ་ཤེས་ཀྱི་ཟླ་བ་དང་མཚན་མ་དང་ས་བོན་དེ་ཡོངས་སུ་གྱུར་པ་ལས་བདག་ཉིད་དཔལ་ལྡན་ཀུན་དུ་བཟང་པོ་ཐུབ་པའི་མཆོག་གི་ཕྲ་རབ་རྣམ་པར་བསྡུས་པ་ལས་གྲུབ་པ། རྒྱལ་བ་སྐྱེད་པར་བྱེད་པའི་རྣམ་པར་ཐར་པའི་སྒོ་གསུམ་རྣམ་པར་དག་པའི་ཞལ་གསུམ་མངའ་བ། 
ཞལ་དང་པོ་དང་སྐུ་ཐམས་ཅད་ཟླ་བ་རྒྱས་པ་ལྟར་དཀར་བ། ཞལ་གཡས་དང་གཡོན་སྔོ་བ་དང་དམར་བ། སྟོང་པ་ཉིད་དང་སྙིང་རྗེ་ཆེན་པོ་དག་རབ་ཀྱི་མཐར་ཐུག་པར་གྱུར་པས། ཐབས་དང་ཤེས་རབ་ཀྱི་བདག་ཉིད་ཅན་གྱི་སྐུ་དམ་པ་དང་ལྡན་པ་རྒྱན་སྣ་ཚོགས་རྣམ་པར་འབར་བའི་ཕྱག་དྲུག་
མངའ་བ་དང་ཕྱག་དང་པོ་གཉིས་ཀྱིས་རང་དང་འདྲ་བའི་རིག་མ་ལ་འཁྱུད་པས་མ་མཆུ་ཚེམས་ཀྱིས་འཛིན་པར་མཛད་པ། ཕྱག་ལྷག་མ་རྣམས་ན་རྡོ་རྗེ་དམར་པོ་དང་། རལ་གྲི་དང་། ནོར་བུ་དང་། པདྨ་རིམ་བཞིན་དུ་བསྣམས་པ། རྡོ་རྗེའི་སྐྱིལ་མོ་ཀྲུང་གིས་བཞུགས་པ་མི་བསྐྱོད་པས་བརྒྱན་
པའི་རལ་པའི་ཅོད་པན་ཅན། ཆོས་ཀྱི་དབྱིངས་ཤིན་ཏུ་རྣམ་པར་དག་པའི་ངོ་བོ་ཉིད་བསྒོམ་པར་བྱའོ། །དེ་ནས་འདོད་ཆགས་ཆེན་པོ་འདུལ་བའི་སེམས་ཅན་གྱི་འཇིག་རྟེན་རྣམས་ལ་འདི་ནི་དཔལ་གསང་བ་འདུས་པས་འདུལ་བའི་སྣོད་ཡིན་པ་ཡང་དག་པར་མཐོང་ནས་རབ་ཏུ་དགའ་བའི་སྒྲས་རང་
གི་ལུས་ལ་རྒྱལ་བའི་ཚོགས་བཅུག་སྟེ། སྤྱན་ལ་སོགས་པའི་རིམ་པ་རྣམས་དང་གཟུགས་ལ་སོགས་པའི་ཡུལ་གྱི་ངོ་བོ་ཉིད་ཀྱི་ལྷ་མོའི་རང་བཞིན་དུ་གྱུར་ལ། དེ་ཡང་སླར་རང་གི་ལུས་ལས་ཕྱུང་སྟེ། རང་གི་རིག་པའི་ནང་དུ་ཇི་ལྟ་བ་བཞིན་དུ་གཞུག་པར་བྱའོ། །དེ་ནས་ཡང་དེ་བཞིན་དུ་དེ་བཞིན་
གཤེགས་པ་རྣམས་དཀྱིལ་འཁོར་གྱི་འཁོར་ལོའི་རྣམ་པ་ལྟ་བུར་རང་གི་ལུས་ལ་བཅུག་ལ་ཟླ་བ་ཞུ་བར་གྱུར་པ་རང་གི་གསང་བའི་རྡོ་རྗེ་ལས་རང་གི་རིག་པའི་ཆུ་སྐྱེས་སུ་ཕྱུང་སྟེ་ཡོངས་སུ་གྱུར་པ་ལས་རྟེན་དང་བརྟེན་པ་པོའི་དཀྱིལ་འཁོར་མི་བསྐྱོད་པའི་བདག་པོ་ཅན་ལྷ་བཅུ་དགུའི་བདག་ཉིད་ཅན་
དང་ལྡན་པ་བསམས་ལ། འགྲོ་བ་མ་ལུས་པའི་ཚོགས་དབུགས་དབྱུང་བའི་ཕྱིར་དེར་གཞུག་པར་བྱའོ། །དེའི་འོག་ཏུ་ཡང་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་རྣམས་རང་གི་ལུས་ལ་བཅུག་སྟེ། བྱང་ཆུབ་ཀྱི་སེམས་ཞུ་བར་གྱུར་པ་ལས་དེ་གསང་བའི་རྡོ་རྗེའི་ལམ་ནས་ཕྱུང་

44-1-149b

སྟེ། དེས་དེ་རྣམས་ལ་དབང་བསྐུར་བར་བསྒོམ་པར་བྱའོ། །དེ་ནས་བྱང་ཆུབ་ཀྱི་སེམས་ཀྱི་འོད་ཟེར་དེས་སེམས་ཅན་ཐམས་ཅད་ལ་རེག་པ་དང་། དབུ་གསུམ་ལ་ཕྱག་དྲུག་པ་ཐབས་དང་ཤེས་རབ་མཆོག་ཏུ་དགའ་བའི་བདེ་བ་དམ་པའི་བདག་ཉིད་ཅན་སའི་སྙིང་པོ་ལ་སོགས་པ་དཀྱིལ་འཁོར་གྱི་
འཁོར་ལོའི་ངོ་བོ་ཉིད་དུ་གྱུར་པར་སྐད་ཅིག་མས་བསམས་ལ། དེའི་འོག་ཏུ་དེ་རྣམས་ཀྵིཾ་ཛྲཱིཾ་ཁཾ་གཾ་ཥྐཾ་སཾ་ཞེས་བྱ་བའི་ས་བོན་ལས་རིམ་བཞིན་དུ་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་རྣམ་པར་དག་པའི་ངོ་བོ་ཉིད། སའི་སྙིང་པོ་དང་། ཕྱག་ན་རྡོ་རྗེ་དང་། ནམ་མཁའི་སྙིང་པོ་དང་། 
འཇིག་རྟེན་དབང་ཕྱུག་དང་། སྒྲིབ་པ་ཐམས་ཅད་རྣམ་པར་སེལ་བ་དང་། ཀུན་དུ་བཟང་པོ་རང་གིས་ས་བོན་བརྗོད་པ་སྔོན་དུ་འགྲོ་བས་དབྱུང་བར་བྱའོ། །དེ་བཞིན་དུ་ཛཿཧཱུྃ་བཾ་ཧྃཿཁཾ་རཾ་ཞེས་བྱ་བའི་ས་བོན་ལས་ཕྱི་དང་ནང་གི་བདག་ཉིད་ཅན་གྱི་གཟུགས་དང་། སྒྲ་དང་། དྲི་དང་། རོ་དང་། རེག་བྱ་
དང་། ཆོས་ཀྱི་དབྱིངས་ཀྱི་རྡོ་རྗེ་མ་རྣམས་ཕྱི་རོལ་ན་གནས་པ་དང་། ལཾ་མཱཾ་པཾ་ཏཱཾ་ཞེས་བྱ་བའི་ས་བོན་ལས་ས་དང་། ཆུ་དང་། མེ་དང་། རླུང་གི་ངོ་བོ་ཉིད་དང་། སྤྱན་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་སྟེ་འགྲོ་བའི་བདག་ཉིད་ཀྱི་དེ་ཁོ་ན་ཉིད་ལས་བྱུང་བ་རྣམས་དང་། བྲུཾ་ཨཱཾ་ཛྲཱིཾ་
ཁཾ་ཧཱུྃ་ཞེས་བྱ་བ་ལས་རིམ་བཞིན་དུ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་ཕུང་པོའི་ངོ་བོ་ཉིད་དེ་བཞིན་གཤེགས་པ་རྣམ་པར་སྣང་མཛད་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་གྲུབ་པ་དང་། མི་བསྐྱོད་པ་དེ་བཞིན་
དུ་དབྱུང་བར་བྱའོ། །ལ་ལ་ནི་ས་བོན་འདི་དག་ཉིད་ཀྱིས་ཆོས་འབྱུང་བའི་ཕྱག་རྒྱར་འདི་དག་རེ་རེ་ནས་བསྐྱེད་ཅེས་ཟེར་རོ། །གཞན་དག་ནི་འདི་རྣམས་ཀྱི་མིག་ལ་སོགས་པ་རྣམ་པར་སྦྱང་བར་བྱའོ་ཞེས་ཟེར་རོ། །ཡང་གཞན་དག་ནི་གང་གི་ཕྱིར་རྒྱུད་ལས། རྡོ་རྗེ་ནམ་མཁའི་ཁམས་འདིར་
སེམས་ཅན་གང་སྐུ་གསུང་ཐུགས་ཀྱི་དམ་ཚིག་ལས་ཡང་དག་པར་བྱུང་བ་དེ་རྣམས་རྡོ་རྗེའི་དཔལ་གྱིས་རེག་པ་དང་། དེ་ཐམས་ཅད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་གསུམ་གྱི་ཡེ་ཤེས་ཐོབ་པར་གྱུར་ཏོ་ཞེས་གསུངས་པས་ན། བསྐྱེད་པ་ཡང་

44-1-150a

མ་ཡིན་ལ་དེ་རྣམས་ཀྱི་མིག་ལ་སོགས་པ་རྣམ་པར་དག་པར་ཡང་ཤེས་པར་མི་བྱའོ་ཞེས་ཟེར་རོ། །གཞན་ཡང་དེ་ལྟ་བུ་ཡིན་དུ་ཟིན་ནི་སངས་རྒྱས་ཡེ་ཤེས་ཀྱི་ཞལ་སྔ་ནས་ཀྱིས་ཀྱང་། འདི་ལྟར་རྡོ་རྗེ་ས་བོན་གྱིས་ནི་བསྐྱེད་པར་བྱ་ཞེས་བྱ་བ་དང་། མིག་ལ་སོགས་པ་རྣམ་
པར་སྦྱང་བར་བྱའོ་ཞེས་གསུངས་པར་འགྱུར་རོ། །སྙན་དངགས་མཁན་ཆེན་པོ་བ་ཉིད་ཡིན་པས་ན་དེ་ལྟར་བསྟན་པར་ནུས་ན་ཡང་དེ་ལྟར་མ་ཡིན་ལ་མར་མེ་མཛད་བཟང་པོའི་ཞལ་སྔ་ནས་ཀྱིས་དཀྱིལ་འཁོར་གྱི་ཆོ་ག་མཛད་པར་ཡང་ཁྱད་པར་མ་བརྗོད་པས་ན། རྣམ་པ་ཐམས་ཅད་དུ་འབྱིན་པ་ཉིད་དུ་ངེས་
ཀྱི་བསྐྱེད་པ་ནི་མ་ཡིན་ཞེས་བྱ་བར་གནས་སོ། །དེའི་འོག་ཏུ་ཡང་རང་གི་འདོད་པའི་ལྷའི་དཀྱིལ་གྱི་འཁོར་ལོའི་དྲི་ཟ་ཉེ་བ་འཁོར་ལྟ་བུ་རང་གི་ཁར་བཅུག་ལ། བྱང་ཆུབ་ཀྱི་སེམས་ཞུ་བར་གྱུར་པ་རྡོ་རྗེའི་ལམ་ནས་རང་གི་རིག་མའི་ཆུ་སྐྱེས་ཀྱི་ནང་དུ་ངེས་པར་བྱུང་བ་ནི་ཤེས་རབ་དང་སྙིང་རྗེ་ཆེན་པོའི་ངོ་བོ་ཉིད་
ཧོཿདམར་པོ་གཉིས་དང་སྤེལ་བ། སྐུ་དང་གསུང་དང་ཐུགས་ཀྱི་ངོ་བོ་ཉིད། ཨོཾ་ཨཱཿཧཱུྃ་ཞེས་བྱ་བའི་ཡི་གེ་གསུམ་བསམ་པར་བྱའོ། །དེ་ནས་ཐབས་དང་ཤེས་རབ་ཀྱི་འདོད་ཆགས་ཆེན་པོ་འབར་བ་རྣམས་ཀྱིས་ཡི་གེ་ལྔ་པོ་དེ་ཞུ་བར་གྱུར་པར་བསམས་ལ། དེ་ཡང་འོད་ཟེར་རྣམས་ཀྱིས་རྡོ་རྗེ་སེམས་
དཔའི་རིག་པ་དང་བཅས་པ་ཡང་ཟླ་བ་ཞུ་བར་གྱུར་ནས་དབུས་ཀྱི་ཟླ་བའི་གདན་གྱི་སྟེང་དུ་བྱང་ཆུབ་ཀྱི་སེམས་ཀྱི་དཀྱིལ་འཁོར་གྱི་རྣམ་པར་བསམ་པར་བྱའོ། །དེ་ནས་དུས་ཡུན་རིང་པོར་གོམས་པས་རང་བཞིན་དུ་བྱས་པའི་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཆེན་པོའི་རྒྱུ་མཐུན་
པའི་རང་བཞིན་མཱ་མ་ཀཱི་ལ་སོགས་པ་རྣམས་དེ་བཞིན་གཤེགས་པའི་འོད་ཟེར་སྣང་བས་བསྐུལ་ཏེ་བྱུང་བའི་གླུའི་སྒྲས་བསྐུལ་བའི་རིམ་གྱིས་སེམས་ཅན་ཁམས་ན་བྱ་བ་ལ་སོགས་པའི་གླུ་བཞི་པོ་བསམ་པར་བྱའོ། །བསྐུལ་བ་མངོན་དུ་བྱས་པ་དང་། ཆོས་ཀྱི་དབྱིངས་ལ་ནི་གཞན་གྱི་
དོན་མ་ཚང་པས་རྒུད་པ་ལྟ་བུར་མཐོང་སྟེ། སྒྱུ་མ་ལྟ་བུར་མོས་པས་དེ་བཞིན་གཤེགས་པ་སྤྲོས་པ་ལ་སོགས་སྔོན་དུ་འགྲོ་བ་ཡོངས་སུ་གྱུར་པའི་ཡི་གེ་ཧཱུྃ་ཉི་མའི་དཀྱིལ་འཁོར་ལ་གནས་པར་རང་ཉིད་གྱུར་ལ། དེ་ཡོངས་སུ་གྱུར་པ་ལས་ཀྱང་ཞེ་སྡང་རྣམ་པར་དག་པ་ཅུང་ཟད་ཁྲོ་བོའི་གཟུགས་

44-1-150b

ཅན་གྱི་རྡོ་རྗེ་སྔོན་པོ་ལྟེ་བར་ཧཱུྃ་གིས་མཚན་པ་བསམས་ལ། དེའི་འོད་ལས་བྱུང་བའི་དེ་བཞིན་གཤེགས་པ་རྣམས་ཀྱིས་འགྲོ་བ་དམ་པའི་དོན་མཛད་ནས་དེ་ཉིད་དུ་ཞུགས་པ་དང་། དེ་ཡོངས་སུ་གྱུར་པ་ལས་བདག་ཉིད་སྐུ་ཐམས་ཅད་དང་། ཞལ་དབུས་མ་ནོར་བུ་མཐིང་ཀ་ལྟ་བུ་མཆེ་བ་ཅུང་
ཟད་གཙིགས་པ་དང་ལྡན་པ་ཞལ་གཡས་གཡོན་དཀར་པོ་དང་དམར་པོ། ཕྱག་དྲུག་པ་གཉིས་ཀྱིས་རང་དང་འདྲ་བ་ལ་ཀུན་དུ་འཁྱུད་པ། ལྷག་མ་རྣམས་ན་རྡོ་རྗེ་སྔོན་པོ་དང་། རལ་གྲི་དང་། ནོར་བུ་དང་། པདྨ་རིམ་བཞིན་བསྣམས་ལ། རྡོ་རྗེ་སྐྱིལ་མོ་ཀྲུང་གིས་བཞུགས་པ་རྒྱན་ཐམས་
ཅད་ཀྱིས་བརྒྱན་པ་རལ་པ་དང་ཅོད་པན་འཆང་བ། མཆོག་ཏུ་དགའ་བའི་ངོ་བོ་ཉིད་ཀྱིས་རང་དང་འདྲ་བའི་རིག་པའི་ལྷ་མོའི་མ་མཆུ་འཛིན་པ་ཉི་མའི་དཀྱིལ་འཁོར་གྱི་སྟེང་དུ་བསྒོམ་པར་བྱའོ། །དེ་ནས། སྲིད་པར་ཆགས་པས་སྲིད་མཐའ་ཡས། །ཞི་བར་ཆགས་ན་འབྱོར་ཉམས་ཆ། །ཞེས་བྱ་བ་
སྨོས་པས་གུས་པ་དང་བཅས་ཤིང་རྒྱུན་མི་འཆད་པར་ཡུན་རིང་པོ་གོམས་པར་བསྟེན་པར་གྱུར་པའི་དམིགས་སུ་མེད་པའི་སྙིང་རྗེ་ཆེན་པོར་ཡང་དག་པར་བསྟེན་པ་ནི་ཀུན་རྫོབ་ཏུ་ཡིན་ནོ། །དེ་བཞིན་དུ་ཕྱིན་ཅི་ལོག་པའི་སྟོང་པ་ཉིད་བསྟེན་པ་ལ་ས་ཐོབ་པ་བདག་དང་བདག་གིར་རྟོག་པ་ལ་སོགས་
པ་རྣམ་པར་རྟོག་པའི་རྒྱུན་མ་གྲུབ་པ་སྒྱུ་མ་ལྟ་བུའི་དག་པ་འཇིག་རྟེན་པ་ཕྱིན་ཅི་མ་ལོག་པ་ཞལ་གསུམ་དང་ཕྱག་དྲུག་པར་ཐབས་དང་ཤེས་རབ་ཀྱི་སྒྱུ་མའི་ཏིང་ངེ་འཛིན་དྲི་མ་མེད་པ་ལས་ཡང་དག་པར་བྱུང་བ་བདེ་བ་ཆེན་པོའི་ངོ་བོ་ཉིད་ཟབ་པ་དང་རྒྱ་ཆེ་བའི་བདག་ཉིད་ཅན་ཡིད་བཞིན་གྱི་ནོར་བུ་
ལྟར་འཁོར་བ་ཇི་སྲིད་པར་འགྲོ་བ་མ་ལུས་པའི་དོན་གྱི་བྱ་བ་བྱེད་པ། སྲིད་པ་དང་ཞི་བར་རབ་ཏུ་མི་གནས་པ། ཆོས་ཀྱི་དབྱིངས་ཀྱི་ངོ་བོ་ཉིད་དུ་རང་གི་བདག་ཉིད་ལྷག་པར་མོས་པར་བྱས་ལ་བྱིན་གྱིས་བརླབ་པར་བྱའོ། །ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། རྒྱུ་མཐུན་པའི་འབྲས་བུ་ཆུང་ངུ་དང་།
བསྙེན་པའི་ཡན་ལག་ཆུང་ངུ་སྟེ་དང་པོའོ། །དེ་ནས་ཕུང་པོ་དང་། ཁམས་དང་། སྐྱེ་མཆེད་བྱིན་གྱིས་བརླབས་པའི་མཚན་ཉིད་རྣམ་པར་སྨིན་པ་མེད་པར་ཐམས་ཅད་མཁྱེན་པར་མི་འགྱུར་བས་དེ་ཐོབ་པར་བྱ་བའི་ཕྱིར། ཕུང་པོ་དང་། ཁམས་དང་། སྐྱེ་མཆེད་བྱིན་གྱིས་བརླབ་པར་བྱ་སྟེ་

44-1-151a

དེའི་ཕྱིར་མིག་གཉིས་སུ་ཟླ་བའི་དཀྱིལ་འཁོར་ལ་གནས་པའི་ཡི་གེ་ཀྵིཾ་ལས་འཁོར་ལོ་དཀར་པོ་རྩིབས་བརྒྱད་པ་ལྟེ་བར་ཡི་གེ་ཀྵིཾ་གནས་པ་བསམས་ལ། དེའི་འོད་ཟེར་ལས་བྱུང་བའི་སའི་སྙིང་པོའི་དཀྱིལ་འཁོར་གྱི་འཁོར་ལོས་འགྲོ་བའི་དོན་བྱས་ནས། དེ་ཉིད་དུ་ཞུགས་
པ་དང་དེ་ཐམས་ཅད་ཡོངས་སུ་གྱུར་པ་ལས་སའི་སྙིང་པོ་རྣམ་པར་སྣང་མཛད་ལྟ་བུ་རིན་པོ་ཆེའི་ཅོད་པན་བསམ་པར་བྱའོ། །དེ་བཞིན་དུ་རྣ་བ་གཉིས་སུ་ཡི་གེ་ཛྲཱིཾ་སྔོན་པོ་དང་།རྡོ་རྗེ་ཡོངས་སུ་གྱུར་པ་ལས་ཕྱག་ན་རྡོ་རྗེ་མི་བསྐྱོད་པ་ལྟ་བུའོ། །སྣར་ཡི་གེ་ཁཾ་སེར་པོ་དང་རིན་པོ་ཆེ་ཡོངས་སུ་གྱུར་པ་ལས་
ནམ་མཁའི་སྙིང་པོ་རིན་པོ་ཆེ་དཔལ་ལྟ་བུའོ། །ལྕེ་ལ་ཡི་གེ་གཾ་དམར་པོ་དང་། པདྨ་འདབ་མ་བརྒྱད་པ་ཡོངས་སུ་གྱུར་པ་ལས་འཇིག་རྟེན་དབང་ཕྱུག་འོད་དཔག་ཏུ་མེད་པ་ལྟ་བུའོ། །ཐོད་པའི་སྦུབས་ཀྱི་ནང་དུ་ཡི་གེ་ཥྐཾ་ལྗང་གུ་དང་རལ་གྲི་ཡོངས་སུ་གྱུར་པ་ལས་སྒྲིབ་པ་ཐམས་ཅད་རྣམ་པར་སེལ་བ་
དོན་ཡོད་གྲུབ་པ་ལྟ་བུའོ། །ཡིད་ལ་ཡི་གེ་སཾ་དཀར་པོ་དང་རྡོ་རྗེ་ཡོངས་སུ་གྱུར་པ་ལས་ཀུན་དུ་བཟང་པོ་རྡོ་རྗེ་སེམས་དཔའ་ལྟ་བུར་བསམ་པར་བྱའོ། །གཟུགས་ཀྱི་སྐྱེ་མཆེད་ལ་ཡི་གེ་ཛཿདང་མེ་ལོང་ཡོངས་སུ་གྱུར་པ་ལས་གཟུགས་རྡོ་རྗེའོ། །སྒྲའི་སྐྱེ་མཆེད་ལ་ཧཱུྃ་དང་པི་ཝང་ཡོངས་སུ་གྱུར་པ་ལས་སྒྲ་
རྡོ་རྗེའོ། །དྲིའི་སྐྱེ་མཆེད་ལ་བཾ་དང་དྲིའི་དུང་ཆོས་ཡོངས་སུ་གྱུར་པ་ལས་དྲི་རྡོ་རྗེའོ། །རོའི་སྐྱེ་མཆེད་ལ་ཧོཿདང་རོའི་སྣོད་ཡོངས་སུ་གྱུར་པ་ལས་རོ་རྡོ་རྗེའོ། །རེག་བྱའི་སྐྱེ་མཆེད་ལ་ཁཾ་དང་གོས་སྣ་ཚོགས་ཡོངས་སུ་གྱུར་པ་ལས་རེག་རྡོ་རྗེའོ། །ཆོས་ཀྱི་སྐྱེ་མཆེད་ལ་རཾ་ལས་བྱུང་བའི་ཆོས་འབྱུང་བའི་ཡོངས་སུ་
གྱུར་པ་ལས་ཆོས་ཀྱི་དབྱིངས་རྡོ་རྗེ་བསམ་པར་བྱའོ། །དེ་བཞིན་དུ་ཕྱི་དང་ནང་གི་སའི་ཁམས་ལ་ལཾ་དང་འཁོར་ལོ་ཡོངས་སུ་གྱུར་པ་ལས་སྤྱན་ནོ། །ཆུའི་ཁམས་ལ་མཱཾ་དང་ཨུཏྤལ་སྔོན་པོ་ཡོངས་སུ་གྱུར་པ་ལས་མཱ་མ་ཀཱིའོ། །མེའི་ཁམས་ལ་པཾ་དང་པདྨ་ཡོངས་སུ་གྱུར་པ་ལས་གོས་དཀར་མོའོ། །རླུང་
གི་ཁམས་ལ་ཏཱཾ་དང་ཨུཏྤལ་སེར་པོ་ཡོངས་སུ་གྱུར་པ་ལས་སྒྲོལ་མ་བསམ་པར་བྱའོ། །གཟུགས་ཀྱི་ཕུང་པོ་ལ་བྲུཾ་དང་འཁོར་ལོ་རྩིབས་བརྒྱད་པ་ཡོངས་སུ་གྱུར་པ་ལས་རྣམ་པར་སྣང་མཛད་དོ། །ཚོར་བའི་ཕུང་པོ་ལ་ཨཱཾ་དང་རིན་པོ་ཆེ་ཆ་དགུ་པ་ཡོངས་སུ་གྱུར་པ་ལས་རིན་ཆེན་འབྱུང་ལྡན་ནོ། །འདུ་

44-1-151b

ཤེས་ཀྱི་ཕུང་པོ་ལ་ཛྲཱྀཾ་དང་པདྨ་ཡོངས་སུ་གྱུར་པ་ལས་འོད་དཔག་ཏུ་མེད་པའོ། །འདུ་བྱེད་ཀྱི་ཕུང་པོ་ལ་ཁཾ་དང་རལ་གྲི་ཡོངས་སུ་གྱུར་པ་ལས་དོན་ཡོད་གྲུབ་པའོ། །རྣམ་པར་ཤེས་པའི་ཕུང་པོ་ལ་ཧཱུྃ་དང་རྡོ་རྗེ་ཡོངས་སུ་གྱུར་པ་ལས་མི་བསྐྱོད་པ་བསམ་པར་བྱ་ཞིང་། འདི་རྣམས་ཀྱི་ཐུགས་ཀར་རང་རང་གི་སྟན་
ལ་གནས་པའི་ཇི་སྐད་བཤད་པའི་མཚན་མའི་དབུས་སུ་རང་རང་གི་ས་བོན་བསམ་པར་བྱའོ། །རྣམ་པར་སྨིན་པའི་འབྲས་བུ་ཆུང་ངུ་དང་། ཉེ་བར་སྒྲུབ་པའི་ཡན་ལག་ཆུང་ངུ་སྟེ་གཉིས་པའོ། །འདིར་ལ་ལ་ནི། རང་གི་ས་བོན་འོད་རྣམས་ཀྱིས། །རང་གི་མིག་སོགས་ས་སྙིང་ལ། །སོགས་པས་
ཇི་བཞིན་བཀང་བྱས་ནས། །ཞེས་སྨོས་པས། ནང་གི་བདག་ཉིད་ཅན་གྱི་སྐྱེ་མཆེད་དྲུག་བྱིན་གྱིས་བརླབས་པ་ཉིད་ནི་ཉེ་བར་སྒྲུབ་པ་ཡིན་ནོ་ཞེས་ཟེར་མོད་ཀྱི། དེ་ནི་མ་ཡིན་ནོ་ཞེས་གཞན་དག་ཟེར་ཏེ། གང་གི་ཕྱིར་རྣམ་པར་སྨིན་པ་ནི་ཐམས་ཅད་མཁྱེན་པའི་མཚན་ཉིད་ཅན་ཡིན་ལ་ཐམས་ཅད་
མཁྱེན་པ་དེ་ཡང་ཕྱི་ནང་གི་བདག་ཉིད་ཅན་གྱི་ཕུང་པོ་ཁམས་དང་སྐྱེ་མཆེད་ཡོངས་སུ་ཤེས་པའི་མཚན་ཉིད་ཡིན་ནོ། །དེ་བས་ན་མིག་ལ་སོགས་པ་ནི་ཉེ་བར་མཚོན་པ་ལྷུར་ལེན་པ་ཕྱིའི་སྐྱེ་མཆེད་རྣམས་དང་། ཁམས་དང་ཕུང་པོ་ཡང་དག་པར་བྱིན་གྱིས་བརླབ་པར་བལྟ་བར་བྱའོ། །དེ་ཡང་ལུང་
ལས་དགེ་སློང་དག་ཐམས་ཅད་མཁྱེན་པ་ཞེས་བྱ་བ་ནི། ཕུང་པོ་ལྔ་དང་སྐྱེ་མཆེད་བཅུ་གཉིས་དང་། ཁམས་བཅོ་བརྒྱད་དེ། གང་གི་ཤེས་པ་དེ་ནི་ཐམས་ཅད་མཁྱེན་པའོ་ཞེས་གསུངས་པ་ཡིན་ནོ། །གཞན་ཡང་ལྷག་པར་བསྒོམ་པར་གྱུར་པས་ན་འབྲས་བུ་ལྷག་པར་ཐོབ་པར་རིགས་པ་ཡིན་པས་
ལྷག་པ་ནི་མཆོག་གི་མ་ཚང་བ་ནི་དེ་ལྟ་མ་ཡིན་ནོ། །དེ་ནས་ཆོས་དང་ལོངས་སྤྱོད་རྫོགས་པ་དང་སྤྲུལ་པ་ཐོབ་པས་ནི་འགྲོ་བའི་དོན་བྱེད་པས་ཆོས་དང་ལོངས་སྤྱོད་རྫོགས་པ་དང་། སྤྲུལ་པའི་སྐུ་རྣམ་པར་དག་པ་ཐུགས་དང་གསུང་དང་སྐུ་བྱིན་གྱིས་བརླབ་པ་ཞེས་བྱའོ། །དེ་ཡང་ཐུགས་ཀའི་ཟླ་བའི་
ཧཱུྃ་ལས་བྱུང་བའི་རྡོ་རྗེའི་ལྟེ་བར་ཟླ་བ་ལ་གནས་པའི་ཧཱུྃ་ཉིད་ལས་རྡོ་རྗེ་ཕྲ་མོ་ལྟེ་བར་ཧཱུྃ་གིས་མཚན་པ་བསྒོམས་ལ་དེའི་འོད་ཟེར་གྱི་ཚོགས་ལས་དེ་བཞིན་གཤེགས་པ་སྤྲོས་པ་ལ་སོགས་པ་སྔོན་དུ་འགྲོ་བས་རྡོ་རྗེ་ཕྲ་མོའི་ས་བོན་དེ་ཡོངས་སུ་གྱུར་པ་ལས་ཐུགས་ཀའི་ཟླ་བའི་མཚན་མའི་དབུས་སུ་ཐུགས་

44-1-152a

རྡོ་རྗེ་ལྟ་བུ་ཕྱག་རྒྱ་ཆེན་པོའི་ངོ་བོ་ཉིད་ཆོས་ཀྱི་སྐུ་རྣམ་པར་དག་པ་སྟེ། དེའི་ཐུགས་ཀར་ཡང་ཟླ་བ་ལ་གནས་པའི་རྡོ་རྗེའི་ལྟེ་བ་ལ་ཡི་གེ་ཧཱུྃ་བསམས་ལ་དེ་ལ་ཐུགས་རྡོ་རྗེ་རྣམས་ཡང་དག་པར་སྤྲོས་ཏེ། དེ་རྣམས་དང་ཐོག་མ་མེད་པ་ནས་ཡང་དག་པར་གྲུབ་པའི་དེ་བཞིན་
གཤེགས་པ་རྣམས་འགྲོ་བའི་དོན་གྱི་བྱ་བ་ཆགས་པས་ནམ་མཁའ་ཡོངས་སུ་གང་བར་ལྷག་པར་མོས་ལ། རང་གི་ཐུགས་རྡོ་རྗེའི་མཚན་མའི་ལྟེ་བ་ལ་གནས་པའི་ཧཱུྃ་ལས་གཟུགས་རྡོ་རྗེ་ལ་སོགས་པའི་འོད་ཟེར་སྤྲོས་ཏེ། དེ་རྣམས་ཀྱི་རང་དང་འདྲ་བའི་རིག་པའི་ནང་དུ་ཆུད་པར་བསམས་ལ།
དེ་རྣམས་ཀྱི་ཡངས་ཤིང་རྒྱ་ཆེ་བའི་མཆོག་ཏུ་དགའ་བའི་ངོ་བོ་ཉིད་དུ་གྱུར་པས་དེ་ཤིན་ཏུ་མཉེས་པར་བྱས་ཤིང་རབ་ཏུ་མཆོད་པས་དེ་རྣམས་མངོན་པར་དགྱེས་པར་བསམས་ལ་རང་གི་ཐུགས་རྡོ་རྗེར་བྱིན་གྱིས་བརླབ་པའི་ཕྱིར། རང་གི་སྤྲུལ་པ་དང་ཐོག་མ་མེད་པ་ནས་གྲུབ་པའི་དེ་བཞིན་གཤེགས་པའི་
ཐུགས་ལ་གནས་པ་ལ་ཡང་། དཔལ་ལྡན་རྡོ་རྗེ་ཞེས་བྱ་བ་ལ་སོགས་པའི་ཚིགས་སུ་བཅད་པ་གཉིས་ཀྱིས་བྱིན་གྱིས་བརླབ་པར་བྱ་སྟེ། དཔལ་ལྡན་རྡོ་རྗེ་ཐུགས་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །
ཞེས་བྱ་བ་ཐོག་མ་མེད་པས་ན་རང་གི་སྤྲུལ་པ་ལའོ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །ཞེས་བྱ་བ་ཐོག་མ་མེད་པ་ནས་ཡང་དག་པར་གྲུབ་པའོ། །དེ་ནས་
གསོལ་བ་བཏབ་པའི་རྗེས་ཐོགས་ལ་དེ་རྣམས་ཀྱི་བདག་ཉིད་ཐུགས་རྡོ་རྗེར་ཞུགས་པ་སྔོན་དུ་འགྲོ་བས་དེས་བྱིན་གྱིས་བརླབས་པར་བསམས་ལ། དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་དང་བདག་ཉིད་མཉམ་པ་ཉིད་དུ་གྱུར་པའི་ཕྱིར། ཨོཾ་སརྦྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ།
ཞེས་བརྗོད་པས་གཉིས་སུ་མེད་པ་རྣམ་པར་དག་པའི་ང་རྒྱལ་བྱའོ། །དེ་བཞིན་དུ་ནུ་མ་གཉིས་ཀྱི་བར་དུ་གསོལ་བ་བཏབ་པ་མེད་པར་ཉི་མའི་དཀྱིལ་འཁོར་ལ་ཡེ་ཤེས་སེམས་དཔའ་དམ་ཚིག་སེམས་དཔའ་ལྟ་བུར་དམ་ཚིག་གི་ཕྱག་རྒྱའི་ངོ་བོ་ཉིད་རྡོ་རྗེའི་ལྟེ་བར་བསམ་པར་བྱའོ། །ལྐོག་མར་ཡང་སྔ་

44-1-152b

མ་བཞིན་དུ་ཨཱཿལས་བྱུང་བའི་པདྨའི་ལྟེ་བར་ཡི་གེ་ཨཱཿཕྲ་མོ་དང་པདྨ་ཡོངས་སུ་གྱུར་པ་ལས་ལོངས་སྤྱོད་རྫོགས་པའི་སྐུ་རྣམ་པར་དག་པ་ཆོས་ཀྱི་ཕྱག་རྒྱའི་ངོ་བོ་ཉིད་གསུང་རྡོ་རྗེ་འཇིག་རྟེན་དབང་ཕྱུག་ལྟ་བུར་བསམས་ལ་མཆོད་པ་ལ་སོགས་པ་སྔོན་དུ་འགྲོ་བས་བྱིན་གྱིས་བརླབ་པར་བསམ་པར་བྱའོ། །ཆོས་ཀྱི་
གསུང་ལམ་དཔལ་དང་ལྡན། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་གིས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་
གསུང་གིས་མཛད་དུ་གསོལ། །ཨོཾ་སརྦྦ་ཏ་ཐཱ་ག་ཏ་ཝཱཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེའི་འོག་ཏུ་དེ་བཞིན་དུ་སྤྱི་བོར་ཟླ་བའི་དཀྱིལ་འཁོར་ལ་གནས་པའི་ཨོཾ་ལས་འཁོར་ལོ་རྩིབས་བརྒྱད་པ། འཁོར་ལོའི་ལྟེ་བར་ཨོཾ་དང་འཁོར་ལོ་ཡོངས་སུ་གྱུར་པ་ལས་སྤྲུལ་པའི་སྐུ་རྣམ་པར་དག་པ་ལས་ཕྱག་
རྒྱའི་ངོ་བོ་ཉིད་སྐུ་རྡོ་རྗེ་སའི་སྙིང་པོ་ལྟ་བུར་བསམས་ལ་གསོལ་བ་གདབ་པ་སྔོན་དུ་འགྲོ་བ་དང་ང་རྒྱལ་བྱའོ། །དཔལ་ལྡན་རྡོ་རྗེ་སྐུ་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུས་ནི་མཛད་དུ་གསོལ། །ཕྱོགས་བཅུར་བཞུགས་པའ་སངས་
རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུས་ནི་མཛད་དུ་གསོལ། །ཨོཾ་སརྦྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཐུགས་རྡོ་རྗེ་ལ་སོགས་པ་འདི་དག་ཀྱང་རེ་རེ་ཞིང་ཕྱག་རྒྱ་བཞིས་རྒྱས་བཏབ་ཅིང་རང་གི་མཚན་ཉིད་དང་བྲལ་བས་
རང་བཞིན་གྱིས་འོད་གསལ་བ་བསྒོམ་པར་བྱའོ། །སྐྱེས་བུ་བྱེད་པའི་འབྲས་བུ་ཆུང་ངུ་དང་། སྒྲུབ་པའི་ཡན་ལག་ཆུང་ངུའོ། །དེ་ནས་ཁམས་གསུམ་གྱི་ཆོས་ཀྱི་རྒྱལ་པོར་དབང་བསྐུར་བ་མེད་པར་ཡང་དག་པར་རྫོགས་པའི་སངས་རྒྱས་ཉིད་དུ་མི་འགྱུར་བས་དབང་གི་འབྲས་བུ་ཆུང་ངུ་དང་། སྒྲུབ་པ་ཆེན་
པོའི་ཡན་ལག་ཆུང་ངུ་བསྒོམ་པར་བྱའོ། །དེ་ཡང་ཡེ་ཤེས་སེམས་དཔའི་ཐུགས་ཀའི་ས་བོན་ལས་འོད་ཟེར་སྤྲོས་པས་ཕྱོགས་བཅུ་ན་བཞུགས་པའི་དེ་བཞིན་གཤེགས་པའི་ཚོགས་རྣམས་ཡང་དག་པར་བསྐུལ་ལ། དེའི་འོད་ཟེར་ལས་བྱུང་བའི་སྤྱན་ལ་སོགས་པའི་རིག་པའི་ཚོགས་རང་གི་རིགས་

44-1-153a

རྣམ་པར་དག་པའི་ཆོས་ཅན་གྱི་བྱང་ཆུབ་ཀྱི་སེམས་ཀྱིས་གང་བའི་རིན་པོ་ཆེའི་བུམ་པ་ཕྱག་ན་བསྣམས་པ་རྣམས་དང་། གཟུགས་རྡོ་རྗེ་ལ་སོགས་པ་ཕྱིའི་མཆོད་པ་རྣམ་པ་སྣ་ཚོགས་པ་དང་། བཀྲ་ཤིས་ཀྱི་གླུ་དང་། རོལ་མོའི་སྒྲ་རྣམས་ཀྱིས་བདག་ཉིད་དབང་བསྐུར་བར་
གྱུར་པར་བསྒོམ་པར་བྱའོ། །དེའི་འོག་ཏུ་སྤྱི་བོར་བྱང་ཆུབ་ཀྱི་སེམས་ཀྱི་ཆུ་དེ་ཡོངས་སུ་གྱུར་པ་ལས་རྡོ་རྗེ་སེམས་དཔའ་རང་གི་ཅོད་པན་ལ་བསྒོམ་པར་བྱའོ། །དབང་གི་འབྲས་བུ་ཆུང་ངུ་དང་སྒྲུབ་པ་ཆེན་པོའི་ཆུང་ངུའོ། །ད་ནི་ཆུང་ངུ་རྣམས་ལ་གུས་པ་དང་བཅས་ཤིང་རྒྱུན་མི་འཆད་པར་ཡུན་
རིང་དུ་བསྒོམས་ནས། བར་མ་བསྒོམ་པར་བྱ་བ་ཡིན་པས། རྒྱུ་མཐུན་པ་བར་མ་ལ་སོགས་པའི་འབྲས་བུ་རྫོགས་པར་བྱ་བའི་ཕྱིར་བསྙེན་པ་བར་མ་ཉིད་བསྒོམ་པར་བྱའོ། །དེ་ལ་ལ་དག་ནི་སྡིག་པ་བཤགས་པ་ནས་བརྩམས་ཏེ་གཞལ་ཡས་ཁང་ཟླ་བ་ཞུ་བ་བསྒོམ་པ་སྔོན་དུ་འགྲོ་བས་རིག་
པ་ལོགས་ཤིག་བསྐྱེད་པའི་བར་བྱས་ལ། རང་དང་འདྲ་བའི་རིག་པར་དགུག་པ་དང་། གཞུག་པ་དང་བཅིང་བ་དང་དབང་དུ་བྱ་བའི་མཐར་ཐུག་པ་ནི་བསྙེན་པ་བར་མ་ཡིན་པར་འདོད་མོད། དེ་བཞིན་ཡང་དག་ལྟས་ཞེས་བྱེད་པའི་ཚིག་དང་འབྲེལ་པ་དང་། སྤྲུལ་ནས་བྱ་བའི་ཚིག་གིས་
བཤད་པ་ལས་ན་འདི་དག་དེ་ལྟ་མ་ཡིན་ནོ་ཞེས་གཞན་དག་འདོད་དེ་གཞན་དུ་དེ་ལྟར་སྤྲུལ་ཞེས་སྨྲ་བ་ནི། སྙན་དངགས་མཁན་ཆེན་པོ་པ་ཉིད་ཀྱིས་ནུས་མོད་ཀྱི། དེ་ལྟར་མ་བཤད་དེ་དེ་ལྟར་ན་ཐེ་ཚོམ་མེད་པར་བསྟན་པར་འགྱུར་བ་ཡིན་པ་དང་། ཡང་བསྐྱེད་པ་ལ་དོན་མེད་པའམ། དཀྱིལ་འཁོར་པ་རེ་རེ་
ཡང་རིག་པ་རེ་རེ་ནས་བསྐྱེད་དགོས་པར་ཐལ་བར་འགྱུར་ཏེ། ཁྱད་པར་མེད་པའི་ཕྱིར་རོ། །ཡང་ན་ཁྱད་པར་ཡོད་དོ་ཞེ་ན། དེ་ཉིད་དེ་ལྟ་ན་ནི་ཐབས་ཀྱི་ཆ་དང་ཤེས་རབ་ཀྱི་ཆ་ལས་འགྱུར་རོ། །དཀྱིལ་འཁོར་གྱི་ཆོ་གར་ཡང་ཁྱད་པར་མ་བསྟན་ཏོ། །དེ་བས་ན་ཅིག་ཅར་བསྐྱེད་པ་ཡང་ལས་དང་པོ་པ་ཉིད་
ཀྱི་སྐུ་མདོག་དང་ཕྱག་མཚན་ལ་སོགས་པ་བསྒོམ་པར་མི་ནུས་པས་ན། ཕྱིས་སྐུ་མདོག་དང་། ཕྱག་མཚན་ལ་སོགས་པ་བསམ་པ་འདི་ནི་བསྙེན་པ་བར་མ་ཡིན་ནོ་ཞེས་བྱ་བར་རིགས་ཏེ། དེས་ན་དེ་བཞིན་བལྟ་ཞེས་བྱ་བ་ཡང་གོ་རིམས་སུ་གྱུར་པ་ཡིན་ནོ། །ཤིན་ཏུ་སྤྲོས་པས་ཆོག་གོ། །དེ་

44-1-153b

ལ་སྔ་མ་བཞིན་དུ་མིག་ལ་སོགས་པ་བྱིན་གྱིས་བརླབས་པ་ནི། རྣམ་པར་སྨིན་པའི་འབྲས་བུ་བར་མ་དང་། ཉེ་བར་སྒྲུབ་པ་བར་མའོ། །གསོལ་བ་འདེབས་པ་མེད་པར་ཐུགས་དང་། གསུང་དང་། སྐུ་བྱིན་གྱིས་བརླབས་པ་ནི་སྐྱེས་བུ་བྱེད་པའི་འབྲས་བུ་བར་མ་དང་། སྒྲུབ་པ་བར་མའོ། །
དབང་བསྐུར་བ་ནི་དབང་གི་འབྲས་བུ་བར་མ་དང་། སྒྲུབ་པ་ཆེན་པོ་བར་མའོ། །དེ་ནས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབ་པར་བྱ་བ་ནི། དེའི་སྤྱི་བོ་ནས་ནུ་མའི་བར་དུ་ཟླ་བའི་དཀྱིལ་འཁོར་ལ་གནས་པའི་ཨོཾ་དང་འཁོར་ལོ་ཡོངས་སུ་གྱུར་པ་ལས་རྣམ་པར་སྣང་
མཛད་ཀྱི་ཕྲ་རབ་ཀྱི་ངོ་བོ་ཉིད་ཀྱི་རང་གི་ལྷའི་ཁ་དོག་གོ། །དེའི་སྙིང་ག་ནས་ལྟེ་བའི་བར་དུ་ཉི་མ་ལ་གནས་པའི་ཧཱུྃ་དང་རྡོ་རྗེ་ཡོངས་སུ་གྱུར་པ་ལས་མི་བསྐྱོད་པའི་ངོ་བོ་ཉིད་དོ། །ལྟེ་བ་ནས་གསང་བའི་བར་དུ་སྭཱ་དང་རིན་པོ་ཆེ་ཡོངས་སུ་གྱུར་པ་ལས་རིན་ཆེན་འབྱུང་ལྡན་གྱི་ཕྲ་རབ་ཀྱི་ངོ་བོ་ཉིད་དོ། །གསང་
བ་ནས་པུས་མོའི་བར་དུ་ཨཱཿདང་པདྨ་ལས་བྱུང་བའི་འོད་དཔག་ཏུ་མེད་པའི་ཕྲ་རབ་ཀྱི་ངོ་བོ་ཉིད་དོ། །པུས་མོ་ནས་རྐང་པའི་བར་དུ་ཧཱ་དང་རལ་གྲི་ཡོངས་སུ་གྱུར་པའི་དོན་ཡོད་པར་གྲུབ་པའི་ཕྲ་རབ་ཀྱི་ངོ་བོ་ཉིད་དེ་ཤེས་རབ་ཀྱི་སྐུ་རང་གི་མདོག་ཏུ་དེ་ལྟར་བསྒོམ་པར་བྱའོ། །དེ་ནས་དེའི་གསང་བའི་ཧཱུྃ་ཡོངས་སུ་
གྱུར་པ་ལས་པདྨ་དམར་པོ་འདབ་མ་བརྒྱད་པ་ལ་ཨ་ལས་བྱུང་བའི་སྣ་ཚོགས་ཟེ་བ་ཅན། དེ་བཞིན་དུ་རང་གི་གསང་བའི་ཧཱུྃ་ཡོངས་སུ་གྱུར་པ་ལས་རྡོ་རྗེ་རྩེ་ལྔ་པའམ་རྩེ་གཅིག་པ་དམར་པོ་ནོར་བུའི་ཆ་ཨོཾ་ལས་བྱུང་བ་བསྐྱེད་ལ་མན་ངག་ཇི་ལྟ་བས་བྱང་ཆུབ་ཀྱི་སེམས་གསལ་བ་མངོན་སྤྱོད་ཀྱི་ཡི་གེ་གཉི་
གའི་སྒྲུབ་ཐབས་སུ་བསམས་ལ་ཤེས་རབ་དམ་པའི་རྒྱུ་མཐུན་པའི་ཐབས་དང་བཅས་པ་ཡིན་པའི་ཕྱིར། ཕྱིན་ཅི་མ་ལོག་པའི་གཉུག་མའི་ལུས་རང་དང་གཉི་གའི་ལུས་ལ་དེ་བཞིན་གཤེགས་པ་ཐམས་ཅད་བཅུག་སྟེ། སོ་སོའི་རྡུལ་ཕྲ་རབ་ཀྱི་དཀྱིལ་འཁོར་གྱི་བདག་ཉིད་དུ་མོས་པར་བྱས་ལ། 
རང་གི་ལུས་དེ་དང་ཐ་མི་དད་པར་རྟོགས་པས་དེ་བཞིན་གཤེགས་པ་ཐམས་ཅད་མཉེས་པར་བྱའོ་ཞེས་ལྷག་པར་མོས་ལ་རྡོ་རྗེ་དང་པདྨ་སྙོམས་པར་འཇུག་པ་བརྩམ་པར་བྱའོ། །དེ་ནས་ཆོས་ཉིད་ཀྱིས་དེ་བཞིན་གཤེགས་པ་རྣམས་རྗེས་སུ་མཉེས་པའི་བདག་ཉིད་ཀྱི་མཉམ་པ་ཉིད་ཀྱི་དོན་དང་གཉིས་སུ་

44-1-154a

མེད་པའི་ང་རྒྱལ་བྱ་བ་ནི། ཨོཾ་སརྦྦ་ཏ་ཐཱ་ག་ཏ་ཨ་ནུ་རཱག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བའོ། །དེ་ལྟར་སྟོང་པ་ཉིད་བསྒོམ་པ་ནས་རྗེས་སུ་མཉེས་པར་བྱ་བའི་མཐར་ཐུག་པ་ནི། དང་པོ་སྦྱོར་བའི་ཏིང་ངེ་འཛིན་ཡིན་ནོ། །ཏིང་ངེ་འཛིན་བར་མ་བསྒོམ་པར་བྱ་བ་ལ། རབ་ཀྱི་མཐར་
ཐུག་པ་ལ་མཐའ་རྟོགས་པའི་ཕྱིར་ཆེན་པོ་ཞེས་བྱ་བ་ཡིན་ཏེ། དེ་བས་ན་དེ་བསྐྱེད་པའི་ཕྱིར་དཀྱིལ་འཁོར་གྱི་རྒྱལ་པོ་མཆོག་གི་ཏིང་ངེ་འཛིན་བསྒོམ་པར་བྱའོ། །དེ་ནས་ཡེ་ཤེས་སེམས་དཔའི་ཐུགས་ཀའི་མཚན་མའི་ལྟེ་བ་ལ་གནས་པའི་ཧཱུྃ་གི་འོད་ཟེར་གྱི་ལྕགས་ཀྱུས་ཕྱོགས་བཅུ་ན་
བཞུགས་པའི་དེ་བཞིན་གཤེགས་པའི་ཚོགས་རྣམས་བཀུག་ལ་དེ་ཉིད་དུ་བཅུག་སྟེ་བྱང་ཆུབ་སེམས་ཞུ་བར་གྱུར་པ་དང་། རང་གི་གསང་བའི་རྡོ་རྗེའི་ལམ་ནས་ཕྱུང་སྟེ། རང་དང་འདྲ་བའི་ཤེས་རབ་ཀྱི་གསང་བའི་ཆུ་སྐྱེས་ཀྱི་ནང་ན་གནས་པར་བསམས་ལ་དེ་ཡོངས་སུ་གྱུར་པ་ལས་རང་གི་ས་བོན་
དུ་བསམས་ལ། དེ་བཞིན་གཤེགས་པ་རྣམས་སྤྲོ་བ་ལ་སོགས་པའི་སྔོན་དུ་འགྲོ་བ་ལས་དེའི་ས་བོན་ཉིད་ཡོངས་སུ་གྱུར་པ་དང་། ལྷ་བཅུ་དགུའི་བདག་ཉིད་ཅན་གྱི་དཀྱིལ་འཁོར་རྟེན་དང་བརྟེན་པ་པོར་བཅས་པ་སོ་སོའི་སྐུ་མདོག་དང་། གདན་དང་། ཞལ་དང་། ཕྱག་དང་། ཕྱག་མཚན་ལ་
སོགས་པ་དང་ལྡན་པ་ཡོངས་སུ་གསལ་བ་དེ་ཉིད་དུ་བརྟན་པར་བྱས་ལ། རང་གི་བདག་པོ་ལས་མན་ངག་ཇི་ལྟ་བ་བཞིན་དུ་རྗེས་སུ་གནང་བ་ཐོབ་ནས་རང་གི་མིང་བརྗོད་དེ་རྡོ་རྗེའི་བདག་ཉིད་དུ་བསྒྲགས་ནས།འབྱིན་པའི་སྔགས་བརྗོད་པ་སྔོན་དུ་འགྲོ་བ་རིམ་གྱིས་དེ་ལས་རེ་རེ་ནས་དབྱུང་བར་བྱའོ། །
བཛྲ་དྷྲྀཀ་ཅེས་བྱ་བས་ཡང་དག་པར་བསྐུལ་ལ་རྣམ་པར་ཤེས་པའི་ཕུང་པོ་དང་ཐུགས་དང་ཞེ་སྡང་ཆེན་པོ་དང་། ཆོས་ཀྱི་དབྱིངས་ཤིན་ཏུ་རྣམ་པར་དག་པའི་ངོ་བོ་མི་བསྐྱོད་པ་སྔར་བཤད་པའི་ཞལ་ལ་སོགས་པ་དང་ལྡན་པ་ཕྱུང་ལ། དེས་ཕྱོགས་བཅུའི་འཇིག་རྟེན་གྱི་ཁམས་ཀུན་དུ་ཁྱབ་པར་བྱས་ལ། 
སྒྲ་སྐད་དང་སྤྲུལ་པ་དང་ཆོ་འཕྲུལ་རྣམས་འཇུག་པའི་ཁྱད་པར་སྣ་ཚོགས་སྐལ་བ་ཇི་ལྟ་བ་བཞིན་དུ་དད་པར་བྱས་ནས་རང་གི་གདུལ་བྱ་བདག་དང་བདག་གིར་མངོན་པར་ཞེན་པ་ལས་བཟློག་ནས། དེ་ཡང་བདག་དང་བདག་གིར་མངོན་པར་འདོད་པའི་དངོས་པོ་དང་རྗེས་སུ་མཐུན་པ། གནོད་སེམས་ཀྱི་

44-1-154b

མཚན་ཉིད་ཅན་གྱི་ཀུན་ནས་ཉོན་མོངས་པ་ཅན་གྱི་ཞེ་སྡང་ལ་བདག་དང་བདག་གི་བ་དེ་དང་དེའི་གཉེན་པོར་གྱུར་པ་སྟོང་པ་ཉིད་ངེས་པར་བསྟན་པས་ཉོན་མོངས་པ་ཐམས་ཅད་ཀྱི་དགྲ་བོ་ཆེན་པོའི་ངོ་བོ་ཉིད་ཞེ་སྡང་ཆེན་པོ་ལ་ངེས་པར་སྦྱར་ཏེ། རྣམ་པར་ཤེས་པའི་སོ་སོར་བརྟགས་པ་ཙམ་དུ་ཟད་དོ་ཞེས་བྱ་
བའི་རང་གི་མཚན་ཉིད་ཀྱི་རྣམ་པར་ཤེས་པ་སྟོང་པ་ཉིད་ཡིན་པ། དྲི་མ་རྣམས་གློ་བུར་བ་ཡིན་པས་སེམས་ཀྱི་རང་བཞིན་འོད་གསལ་བར་བསྟན་པས་ཆོས་ཀྱི་དབྱིངས་ཤིན་ཏུ་རྣམ་པར་དག་པ་ཉིད་དུ་ངེས་པར་བྱས་ནས། སླར་བྱོན་ཏེ་རང་གི་སྐུ་དང་གསུང་དང་ཐུགས་རྡོ་རྗེ་ལ་ཞུགས་པར་བསམ་
པར་བྱའོ། །འདིར་ནི་རྒྱུ་དང་འབྲས་བུའི་བརྗོད་པར་འདོད་པ་ཐ་དད་པ་ཙམ་གྱིས་དབྱེ་བ་དང་། རྣམ་པར་དག་པའི་དབྱེ་བ་ནི་མི་བསྐྱོད་པའི་རྣལ་འབྱོར་པས། བཛྲ་དྷྲྀཀ་ཅེས་བྱ་བའི་སྔགས་འདི་ཉིད་ཀྱིས། རྡོ་རྗེ་འཆང་ཆེན་པོ་ཕྱུང་ནས་བདག་ཉིད་ཀྱི་ནང་དུ་ཞུགས་པར་བྱ་སྟེ། རྡོ་རྗེ་འཆང་ནི་མི་
བསྐྱོད་པའོ་ཞེས་པ་ལ་ལས་བཤད་དོ། །གཞན་དག་ནི་རྡོ་རྗེ་འཆང་བ་ལ་ནི་མི་བསྐྱོད་པ་ཡིན་གྱི།མི་བསྐྱོད་པ་ལ་ནི་རྡོ་རྗེ་འཆང་བ་མ་ཡིན་ནོ་ཞེས་ཟེར་རོ། །གང་ཀུན་དུ་བཟང་པོ་ལ་སོགས་པ་དེ་བཞིན་དུ་ཛི་ན་ཛིཀ་ཅེས་བྱ་བས་གཟུགས་ཀྱི་ཕུང་པོ་དང་། སྐུ་དང་། གཏི་མུག་ཆེན་པོ་དང་མེ་ལོང་
རྣམ་པར་དག་པའི་སྐུ་རྡོ་རྗེ་འཆང་ཆེན་པོ་ལྟ་བུའི་སྐུ་མདོག་དང་ཞལ་ལ་སོགས་པ་དང་ལྡན་པ་ལས། འཁོར་ལོ་རྩིབས་བརྒྱད་པ་དཀར་པོ་དང་རལ་གྲི་དང་ནོར་བུ་དང་། པདྨ་བསྣམས་པ་དང་། དེ་བཞིན་དུ་གཏི་མུག་གཙོར་གྱུར་ཅིང་གཟུགས་སུ་རུང་བས་ན་གཟུགས་སོ་ཞེས་བྱ་བ་འདིས། དེའི་
མཐའ་མེད་པ་ཉིད་ཀྱིས་ནི། གཏི་མུག་དེ་ཡང་མེད་པ་ཉིད་དུ་བསྟན་ཅིང་རྟེན་ཅིང་འབྲེལ་པར་འབྱུང་བ་ཡོངས་སུ་གསལ་བར་བྱེད་པ་ཡང་དག་པའི་དོན་མཐོང་བ་དང་། མི་མཐུན་པར་གྱུར་པའི་གཏི་མུག་བསལ་ནས། གཏི་མུག་གི་བློ་སེལ་བས་ཀྱང་གཏི་མུག་ཆེན་པོར་རབ་ཏུ་བཞག་སྟེ། མེ་
ལོང་ལྟ་བུའི་ཡེ་ཤེས་སུ་ཡང་དེ་ངེས་པར་མཛད་ནས་སླར་བྱོན་ཏེ། ཤར་ཕྱོགས་ཀྱི་པདྨའི་གདན་ལ་བཞུགས་སོ། །རཏྣ་དྷྲྀཀ་ཅེས་བྱ་བས་ཚོར་བའི་ཕུང་པོ་དང་། ང་རྒྱལ་དང་མཉམ་པ་ཉིད་ཀྱི་ཡེ་ཤེས་རྣམ་པར་དག་པའི་ངོ་བོ་ཉིད་རིན་ཆེན་འབྱུང་ལྡན་སྐུ་ཐམས་ཅད་དང་ཞལ་དང་པོ་སེར་པོ་ཞལ་

44-1-155a

གཡས་དང་གཡོན་སྔོན་པོ་དང་དཀར་པོ་སྟེ། ཞལ་གསུམ་པ། རིན་པོ་ཆེ་མརྒད་ཆ་དགུ་པ་དང་རལ་གྲི་དང་འཁོར་ལོ་དང་པདྨ་བསྣམས་པ་ཕྱུང་ལ་སྔ་མ་བཞིན་དུ་ང་རྒྱལ་གྱིས་ཁེངས་པ་ལ་ཆོས་ཐམས་ཅད་ནམ་མཁའ་དང་མཉམ་པ་ཉིད་དུ་རབ་ཏུ་བསྟན་པས་ང་
རྒྱལ་དང་བདག་ཅེས་བྱ་བའི་ཉོན་མོངས་པ་ཅན་གྱི་ཡིད་ཀྱི་རྣམ་པར་ཤེས་པའི་བདག་ཉིད་ཅན་གྱི་ཀུན་ནས་ཉོན་མོངས་པ་ཅན་གྱི་ང་རྒྱལ་བསལ་ཏེ། ཚོར་བ་དང་ཚོར་བ་པོ་མེད་པས་ཚོར་བའི་ཕུང་པོ་སྟོང་པ་ཉིད་དུ་རྟོགས་པར་བྱས་པ་དང་། མཉམ་པ་ཉིད་ཀྱི་ཡེ་ཤེས་སུ་ཡང་ངེས་པར་མཛད་
ནས། ལྷོ་ཕྱོགས་སུ་སྣ་ཚོགས་པདྨ་དང་ཉི་མའི་གདན་ལ་བཞུགས་སོ། །ཨཱ་རོ་ལྀཀ་ཅེས་བྱ་བས་འདུ་ཤེས་ཀྱི་ཕུང་པོ་དང་། གསུང་དང་འདོད་ཆགས་དང་གོ་སོར་རྟོག་པའི་ཡེ་ཤེས་རྣམ་པར་དག་པའི་ངོ་བོ་ཉིད་འོད་དཔག་ཏུ་མེད་པ་སྐུ་ཐམས་ཅད་དང་ཞལ་དང་པོ་དམར་པོ། གཡས་དང་གཡོན་
སྔོན་པོ་དང་དཀར་པོའི་ཞལ་གསུམ་མངའ་བ། པདྨ་དང་རལ་གྲི་དང་ནོར་བུ་དང་འཁོར་ལོ་བསྣམས་པ། སོ་སོ་རང་གི་རིག་པ་ཉིད་ཀྱིས་ཆོས་ཐམས་ཅད་བརྗོད་དུ་མེད་པ་ཉིད་ཀྱིས་ན་ཆགས་པ་དང་ལྡན་པ་ཡང་གང་ཞིག་ཡིན་ཞིང་གང་དུ་ཆགས་པར་འགྱུར་ཞེས་སོ་སོར་བསྟན་པས་སྔ་མ་བཞིན་དུ་
འདོད་ཆགས་གཙོ་བོར་གྱུར་པ་ཐ་མལ་པའི་རྟོག་པ་དང་། བདེ་བའི་བདག་ཉིད་ཅན་བདག་དང་བདག་གིར་ལྟ་བ་ལས་བྱུང་བ། ཟག་པ་དང་བཅས་པའི་ཆོས་ཀྱི་ཡུལ་ལ་མངོན་པར་ཞེན་པའི་མཚན་ཉིད་ཅན་གྱི་འདོད་ཆགས་ཀྱིས་ལྡོངས་པ་རྣམས་ལ་དེ་ལས་ཕྱིན་ཅི་ལོག་སེམས་ཅན་ཐམས་ཅད་ཟག་
པ་མེད་པའི་དགའ་བའི་བྱ་བ་ལ་མངོན་པར་ཞེན་པའི་མཚན་ཉིད་ཅན་གྱི་འདོད་ཆགས་ཆེན་པོ་ལ་ངེས་པར་སྦྱར་ཏེ། སོ་སོར་རྟོག་པའི་ཡེ་ཤེས་སུའང་ངེས་པར་མཛད་ནས་སླར་བྱོན་ཏེ། ནུབ་ཏུ་སྣ་ཚོགས་པདྨ་དང་ཉི་མའི་གདན་ལ་བཞུགས་སོ། །པྲཛྙཱ་དྷྲྀཀ་ཅེས་བྱ་བ་ལས་འདུ་བྱེད་ཀྱི་ཕུང་པོ་དང་
ཕྲག་དོག་དང་བྱ་བ་གྲུབ་པའི་ཡེ་ཤེས་རྣམ་པར་དག་པ་དོན་ཡོད་པར་གྲུབ་པ་སྐུ་ཐམས་ཅད་དང་ཞལ་དང་པོ་ལྗང་གུ་གཡས་སྔོན་པོ་དང་། གཡོན་དཀར་པོའི་ཞལ་གསུམ་པ་རལ་གྲི་དང་འཁོར་ལོ་དང་ནོར་བུ་དང་པདྨ་བསྣམས་པ་སྔ་མ་བཞིན་དུ་ཕྲག་དོག་གཙོ་བོར་གྱུར་པ་གཞན་གྱི་ཡོན་ཏན་ལ་

44-1-155b

ཞེ་སྡང་བའི་བདག་ཉིད་ཅན་གྱི་ཕྲག་དོག་ལས་བཟློག་སྟེ། བདག་ཉིད་ཀྱིས་སེམས་ཅན་འདི་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞག་པར་བྱ་བའི་བདག་གིས་གཞན་དག་གི་གོ་སྐབས་དབྱེ་བར་མི་བྱའོ། །དེ་ལྟ་བུའི་མཚན་ཉིད་ཅན་གྱི་ཕྲག་དོག་ཆེན་པོ་ལ་རབ་ཏུ་
བཞག་ཅིང་བྱ་བ་གྲུབ་པའི་ཡེ་ཤེས་སུའང་ངེས་པར་མཛད་ནས། བྱང་དུ་སྣ་ཚོགས་པདྨ་དང་ཉི་མའི་གདན་ལ་བཞུགས་སོ། །འདི་དག་ཐམས་ཅད་ཀྱང་ཤིན་ཏུ་མཛེས་པའི་རལ་པའི་ཅོད་པན་གྱི་མཆོག་མངའ་བ་རིན་པོ་ཆེ་སྣ་ཚོགས་འོད་འབར་བས་བརྒྱན་པ་ཐབས་དང་ཤེས་རབ་ཀྱི་རང་
བཞིན་ཅན་གྱི་ཏིང་ངེ་འཛིན་དྲི་མ་མེད་པ་ལས་ཡང་དག་པར་བྱུང་བའི་བདེ་བ་ཆེན་པོ་བབས་པའི་རང་བཞིན་གྱི་དབང་ཕྱུག་ཕྱག་དང་པོ་གཉིས་ཀྱིས་རང་དང་འདྲ་བའི་རིག་མ་ལ་འཁྱུད་ཅིང་རིན་པོ་ཆེ་སྣ་ཚོགས་ཀྱི་ཅོད་པན་ཅན་རྒྱན་ཐམས་ཅད་རབ་ཏུ་འབར་བ་འཛིན་པར་མཛད་པའོ། །མོ་ཧ་ར་ཏཱི་
ཞེས་བྱ་བས་སའི་ཁམས་དང་། རྣམ་པར་ཐར་པའི་སྒོ་སྟོང་པ་ཉིད་དང་། སྙིང་རྗེ་ཆེན་པོ་དང་། ཐབས་ཀྱི་ཕ་རོལ་ཏུ་ཕྱིན་པ་རྣམ་པར་དག་པའི་ངོ་བོ་ཉིད་ལྷ་མོ་སྤྱན་རྣམ་པར་སྣང་མཛད་ཀྱི་རང་དང་འདྲ་བའི་རིག་པ་ལྟ་བུ་ཐབས་ཀྱི་ཕ་རོལ་ཏུ་ཕྱིན་པ་དང་། སྙིང་རྗེ་ཆེན་པོ་མ་ཚང་བའི་སེམས་ཅན་མ་ལུས་
པ་སྡུག་བསྔལ་བསྐྱབ་པ་ལ་ངེས་པར་སྦྱར་ནས་ཆོས་ཐམས་ཅད་སྟོང་པ་ཉིད་ལ་ངེས་པར་བསྟན་ཅིང་བཤད་པས་སེམས་ཅན་ཐམས་ཅད་ཀྱི་དོན་གྱི་ཁུར་བསྐུར་བ་ལ་ཡོངས་སུ་སྐྱོ་བ་མེད་པའི་ཚུལ་གྱིས་ས་དང་མཉམ་པའི་སེམས་དང་རང་གི་ཉེས་པ་སེལ་བར་བྱེད་པ་དང་། མི་གཡོ་
བ་དང་། སེམས་ཅན་གྱི་དོན་ལ་འཇུག་པར་མཛད་ཅིང་བདེ་བས་མྱུར་དུ་མངོན་པར་བྱང་ཆུབ་སྟེ། ཐབས་ཀྱི་ཕ་རོལ་ཏུ་ཕྱིན་པ་རྣམ་པ་གསུམ་ལ་ངེས་པར་སྦྱར་བས་རིང་དུ་སོང་བའི་སར་ངེས་པར་སྦྱར་ཏེ། སླར་བྱོན་ནས་ཞི་བར་མཛད་པའི་ཚུལ་གྱིས་མེའི་ཕྱོགས་སུ་བཞུགས་སོ། །དྭེ་ཥ་
ར་ཏཱི་ཞེས་བྱ་བས་ཆུའི་ཁམས་དང་། རྣམ་པར་ཐར་པའི་སྒོ་མཚན་མ་མེད་པ་དང་བྱམས་པ་ཆེན་པོ་དང་། སྨོན་ལམ་གྱི་ཕ་རོལ་ཏུ་ཕྱིན་པ་རྣམ་པར་དག་པའི་ངོ་བོ་ཉིད་ལྷ་མོ་མཱ་མ་ཀཱི། མི་བསྐྱོད་པའི་རང་དང་འདྲ་བའི་རིག་པ་ལྟ་བུའི། ཨུཏྤལ་དམར་པོ་དང་། རལ་གྲི་དང་། ནོར་བུ་དང་།

44-1-156a

པདྨ་བསྣམས་པ། བྱམས་པ་ཆེན་པོ་དང་། སྨོན་ལམ་མ་ཚང་བའི་སེམས་ཅན་ཐམས་ཅད་བདེ་བ་ལ་ཉེ་བར་ལོངས་སྤྱོད་པ་ལ་ངེས་པར་སྦྱར་ཏེ། ཆོས་ཐམས་ཅད་མཚན་མ་མེད་པའི་དེ་ཁོ་ན་ཉིད་བསྐྱེད་ནས་སེམས་ཅན་ཐམས་ཅད་ཀྱི་སྲེད་པ་མ་ལུས་པ་ལ་
སོགས་པ་ཉེ་བར་ཞི་བའི་དོན་གྱི་བྱ་བ་མཛད་ཅིང་ཆུ་དང་མཉམ་པའི་ཐུགས་ཉིད་ཀྱིས་དེ་བཞིན་དུ་རང་གི་ཚོགས་དང་འབྲེལ་པའི་འགྲོ་བའི་དོན་གྱི་རྒྱུན་དང་ལྡན་པས། སངས་རྒྱས་ཀྱི་ཞིང་ཡོངས་སུ་དག་པར་མཛད་ནས་སྨོན་ལམ་གྱི་ཕ་རོལ་ཏུ་ཕྱིན་པ་གསུམ་ལ་ངེས་པར་སྦྱར་ཏེ། མི་གཡོ་
བའི་ས་ལ་ངེས་པར་མཛད་ནས། བདེན་བྲལ་གྱི་ཕྱོགས་སུ་བསྲུང་བ་ལ་མངོན་པར་བརྩོན་པར་བཞུགས་སོ། །རཱ་ག་ར་ཏཱི་ཞེས་བྱ་བས་མེའི་ཁམས་དང་རྣམ་པར་ཐར་པའི་སྒོ་སྨོན་པ་མེད་པ་དང་། དགའ་བ་ཆེན་པོ་དང་། སྟོབས་ཀྱི་ཕ་རོལ་ཏུ་ཕྱིན་པ་རྣམ་པར་དག་པའི་ངོ་བོ་ཉིད་ན་བཟའ་དཀར་
མོ་འོད་དཔག་ཏུ་མེད་པའི་རང་དང་འདྲ་བའི་རིག་པ་ལྟ་བུ། དགའ་བ་ཆེན་པོ་དང་སྟོབས་ཀྱི་ཕ་རོལ་ཏུ་ཕྱིན་པ་མ་ཚང་བ་རྣམས་སངས་རྒྱས་ཀྱི་ཆོས་ཐམས་ཅད་ལ་རབ་ཏུ་དགའ་བ་ལ་ཡང་དག་པར་རབ་ཏུ་སྦྱར་ནས། རང་རིག་པ་ལས་ཐ་དད་པའི་ཁམས་གསུམ་པ་རྣམས་ནི་ཤིན་ཏུ་ཡང་མེད་པའི་ཕྱིར།
ཆོས་ཐམས་ཅད་སྨོན་པ་མེད་པ་ཉིད་དུ་གསལ་བར་བྱས་ནས་གྲང་བ་ཉེ་བར་སེལ་བ་ལ་སོགས་པའི་དོན་གྱི་བྱ་བས་མེ་དང་མཉམ་པའི་ཐུགས་ཉིད་ཀྱིས་དེ་བཞིན་དུ་ལས་ལས་ཟློག་པ་དང་། ཉོན་མོངས་པ་སེལ་བ་དང་། བདུད་དང་གཞན་གྱི་གནོད་པ་ལས་བཟློག་སྟེ། རང་གི་མི་མཐུན་པའི་
ཕྱོགས་གསུམ་གྱིས་ཟིལ་གྱིས་མི་གནོན་པའི་ངོ་བོ་ཉིད་སྟོབས་ཀྱི་ཕ་རོལ་ཏུ་ཕྱིན་པ་གསུམ་ལ་ངེས་པར་སྦྱར་བས་ལེགས་པའི་བློ་གྲོས་ཀྱི་སར་ངེས་པར་མཛད་ནས་རླུང་གི་ཕྱོགས་སུ་རྒྱས་པ་འཕེལ་བར་མཛད་པས་བཞུགས་སོ། །བཛྲ་ར་ཏཱི་ཞེས་བྱ་བས་རླུང་གི་ཁམས་དང་། རྣམ་པར་ཐར་
པའི་སྒོ་རང་བཞིན་གྱིས་འོད་གསལ་བ་དང་བཏང་སྙོམས་ཆེན་པོ་དང་ཡེ་ཤེས་ཀྱི་ཕ་རོལ་ཏུ་ཕྱིན་པ་རྣམ་པར་དག་པའི་ངོ་བོ་ཉིད་སྒྲོལ་མ་སྐུ་ཐམས་ཅད་དང་ཞལ་དང་པོ་སེར་པོ། གཡས་དང་གཡོན་སྔོན་པོ་དང་དཀར་པོ་སྟེ། ཞལ་གསུམ་པ་ཨུཏྤ་ལ་སེར་པོ་དང་། རལ་གྲི་དང་ནོར་བུ་

44-1-156b

དང་པདྨ་བསྣམས་པ་བཏང་སྙོམས་ཆེན་པོ་དང་ཡེ་ཤེས་ཀྱི་ཕ་རོལ་ཏུ་ཕྱིན་པ་མ་ཚང་བའི་ཉེས་པ་ཐམས་ཅད་དེ། བདེ་བ་དང་། སྡུག་བསྔལ་དང་། རྙེད་པ་དང་། མ་རྙེད་པ་དང་། གྲགས་པ་དང་། མ་གྲགས་པ་དང་། བསྟོད་པ་དང་། སྨད་པ་ལ་བཏང་སྙོམས་ཤིང་སེམས་ཅན་ཐམས་
ཅད་ཀྱི་གདུང་བ་རབ་ཏུ་ཞི་བ་ལ་སོགས་པའི་དོན་གྱི་བྱ་བས་རླུང་དང་འདྲ་བའི་མཉམ་པའི་སེམས་ལ་ངེས་པར་སྦྱོར་བར་མཛད་ཅིང་ཉོན་མོངས་པ་རྣམས་གློ་བུར་བ་ཡིན་པའི་ཕྱིར་ཆོས་ཐམས་ཅད་རང་བཞིན་གྱིས་འོད་གསལ་བ་ཉིད་དུ་ཡོངས་སུ་གསལ་བར་མཛད་ནས་རྟོག་པ་དང་མི་རྟོག་
པའི་མཉམ་པ་ཉིད་དུ་ཁོང་དུ་ཆུད་པས་སེམས་ཅན་གྱི་དོན་གྱི་ཐབས་ལ་ལྐོག་ཏུ་མ་གྱུར་ཅིང་ཡེ་ཤེས་ཀྱི་ཕ་རོལ་ཏུ་ཕྱིན་པ་རྣམ་པ་གསུམ་ལ་ངེས་པར་སྦྱར་ནས་ཆོས་ཀྱི་སྤྲིན་གྱི་ས་ལ་རབ་ཏུ་བཞག་སྟེ་དབང་ལྡན་གྱི་ཕྱོགས་སུ་དབང་གི་བྱ་བ་མཛད་ཅིང་བཞུགས་སོ། །དེ་བཞིན་དུ་
སེར་སྣའི་གཉེན་པོར་གྱུར་པ་སྦྱིན་པའི་ཕ་རོལ་ཏུ་ཕྱིན་པ་རྣམ་པར་དག་པ་གཟུགས་རྡོ་རྗེ་སྤྱན་དང་འདྲ་བ་ལ་མེ་ལོང་དང་། རལ་གྲི་དང་། ནོར་བུ་དང་། པདྨ་བསྣམས་པ་དང་། སེར་སྣ་གཙོ་བོར་གྱུར་པ་རྣམས་ལ་ཆོས་དང་ཟང་ཟིང་དང་བྱམས་པ་སྟེ། སྦྱིན་པའི་ཕ་རོལ་ཏུ་ཕྱིན་པ་རྣམ་
པ་གསུམ་ལ་ངེས་པར་སྦྱར་བས་རབ་ཏུ་དགའ་བའི་ས་ལ་རབ་ཏུ་བཞག་ནས། ཕྱིའི་དཀྱིལ་འཁོར་གྱི་ཤར་ལྷོའི་མཚམས་སུ་བཞུགས་སོ། །དེ་བཞིན་དུ་ཚུལ་ཁྲིམས་འཆལ་བའི་གཉེན་པོར་གྱུར་པ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་སྒྲ་རྡོ་རྗེ་མཱ་མ་ཀཱི་ལྟ་བུ། པི་ཝང་
དང་། རལ་གྲི་དང་། ནོར་བུ་དང་། པདྨ་བསྣམས་པ། ཚུལ་ཁྲིམས་འཆལ་པ་སེལ་བ་གཙོ་བོར་གྱུར་པ་སྡོམ་པ་དང་སེམས་ཅན་གྱི་དོན་བྱ་བ་དང་། དགེ་བའི་ཆོས་ཡང་དག་པར་སྡུད་པར་བྱེད་པ་སྟེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རྣམ་པ་གསུམ་ལ་ངེས་པར་སྦྱར་བས་དྲི་མ་མེད་པ་
ལ་རབ་ཏུ་བཞག་སྟེ། ལྷོ་ནུབ་ཀྱི་ཕྱོགས་མཚམས་སུ་བཞུགས་སོ། །ཁྲོ་བའི་གཉེན་པོར་གྱུར་པ་བཟོད་པའི་ཕ་རོལ་ཏུ་ཕྱིན་པ་རྣམ་པར་དག་པ་དྲི་རྡོ་རྗེ་རིན་ཆེན་དབང་ཕྱུག་གི་རང་དང་འདྲ་བའི་རིག་མ་ལྟ་བུ་དྲིའི་དུང་ཆོས་དང་། རལ་གྲི་དང་། འཁོར་ལོ་དང་། པདྨ་བསྣམས་པ་

44-1-157a

བཟོད་པ་མེད་པ་གཙོ་བོར་གྱུར་པ་རྣམས་ལ། ཆོས་ལ་དམིགས་པ་དང་། སྡུག་བསྔལ་ལ་ཇི་མི་སྙམ་པ་དང་། གཞན་གྱི་གནོད་པ་ལ་མི་མཇེད་པ་སྟེ། ཕ་རོལ་ཏུ་ཕྱིན་པ་གསུམ་ལ་ངེས་པར་སྦྱར་བས་འོད་བྱེད་པའི་ས་ལ་ངེས་པར་མཛད་དེ། ཕྱིའི་དཀྱིལ་འཁོར་
གྱི་ནུབ་བྱང་གི་མཚམས་སུ་བཞུགས་སོ། །ལེ་ལོའི་གཉེན་པོར་གྱུར་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་རོ་རྡོ་རྗེ་ན་བཟའ་དཀར་མོ་དང་འདྲ་བ། རོའི་སྣོད་དང་། རལ་གྲི་དང་། ནོར་བུ་དང་། འཁོར་ལོ་བསྣམས་པ། ལེ་ལོ་ཉེ་བར་འཇོམས་པ་གཙོ་བོར་གྱུར་པ་རྣམས་
ལ་གོ་ཆ་དང་སྦྱོར་བ་དང་། མི་ལྡོག་པ་ཞེས་བྱ་བ་སྟེ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་གསུམ་ལ་ངེས་པར་སྦྱོར་བས་འོད་འཕྲོ་བའི་ས་ལ་ངེས་པར་མཛད་ནས། བྱང་ཤར་གྱི་མཚམས་སུ་བཞུགས་སོ། །རྣམ་པར་གཡེང་བའི་གཉེན་པོར་གྱུར་པ་བསམ་གཏན་གྱི་ཕ་རོལ་ཏུ་ཕྱིན་པ་
རྣམ་པར་དག་པ་རེག་རྡོ་རྗེ་སྒྲིབ་པ་ཐམས་ཅད་རྣམ་པར་སེལ་བ་ལྟ་བུ་གོས་སྣ་ཚོགས་དང་རལ་གྲི་དང་ནོར་བུ་དང་པདྨ་བསྣམས་པ་རྣམ་པར་གཡེང་བ་གཙོ་བོར་གྱུར་པའི་གདུལ་བྱ་ལ་ཉེས་པ་སེལ་བ་དང་། གནས་པ་དང་། འབྱོར་བ་བྱེད་པ་སྟེ། བསམ་གཏན་གྱི་ཕ་རོལ་ཏུ་ཕྱིན་པ་རྣམ་པ་
གསུམ་ལ་ངེས་པར་སྦྱར་བས་སྦྱང་དཀའ་བའི་ས་ལ་ངེས་པར་མཛད་ནས་ཤར་སྒོའི་གཡོན་ཕྱོགས་སུ་བཞུགས་སོ། །ཤེས་རབ་འཆལ་བའི་གཉེན་པོར་གྱུར་པ་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པའི་ངོ་བོ་ཉིད་ཆོས་ཀྱི་དབྱིངས་རྡོ་རྗེ་ཀུན་དུ་བཟང་པོ་ལྟ་བུ་ལ་ཆོས་འབྱུང་
བ་དང་། རལ་གྲི་དང་། ནོར་བུ་དང་། པདྨ་བསྣམས་པ། ཤེས་རབ་འཆལ་པ་གཙོ་བོར་གྱུར་པའི་རང་གི་གདུལ་བྱ་ལ་ཐོས་པ་དང་། བསམ་པ་དང་། བསྒོམ་པ་སྟེ། ཤེས་རབ་རྣམ་པ་གསུམ་ལ་སྦྱར་ནས་མངོན་དུ་གྱུར་པའི་ས་ལ་ངེས་པར་མཛད་དེ། སྔ་མ་བཞིན་དུ་ཤར་སྒོའི་
གཡས་ལོགས་སུ་བཞུགས་སོ། །གཟུགས་རྡོ་རྗེ་ལ་སོགས་པ་འདི་རྣམས་ཀྱི་སོ་སོར་ངེས་པའི་འབྱིན་པ་ནི་མེད་པས་སྤྱིར། ཨོཾ་ཨཱཿཧཱུྃ་ཞེས་བྱ་བ་དེ་ཁོ་ན་ཉིད་གསུམ་གྱིས་དབྱུང་བར་བྱའོ། །སྤྱན་ལ་སོགས་པའི་རིག་པ་རྣམས་ཆོས་ཀྱི་དབྱིངས་རྡོ་རྗེའི་མཐར་ཐུག་པ་རྣམས་ནི་ཕྱག་དང་

44-1-157b

པོ་གཉིས་ཀྱིས་རང་དང་འདྲ་བའི་ཐབས་ལ་འཁྱུད་པ་རིན་པོ་ཆེ་སྣ་ཚོགས་པའི་རྒྱན་གྱི་འོད་ཟེར་གྱི་ཚོགས་ཀྱིས་ཕྱོགས་བཅུའི་ཚོགས་རྣམས་ཁྱབ་པར་དགའ་བ་ཆེན་པོ་དམ་པའི་ཉམས་དང་ལྡན་པ་སྣ་ཚོགས་པདྨ་དང་ཟླ་བའི་གདན་ལ་བཞུགས་པར་བསྒོམ་པར་བྱའོ། །ཡ་མཱནྟ་ཀྲྀཏ་
ཅེས་བྱ་བས་མ་དད་པ་དང་ཕུང་པོའི་བདུད་དང་འཇིག་ཚོགས་ལ་ལྟ་བ་དང་ཤེས་བྱའི་སྒྲིབ་པའི་གཉེན་པོར་གྱུར་པ་དད་པའི་ངོ་བོ་ཉིད་གཤིན་རྗེ་གཤེད་སྲུང་བའི་འཁོར་ལོ་ལས་བཤད་པའི་ཞལ་ལ་སོགས་པ་དང་ལྡན་པ་མ་དད་པ་དང་། འཇིག་ཚོགས་ལ་ལྟ་བ་གཙོར་འཛིན་པའི་གདུལ་
བྱ་རྣམས་ལ་བསྟེན་ནས་བདེན་པ་དང་། དཀོན་མཆོག་དང་། ལས་དང་། འབྲས་བུ་ཡོད་པ་ཉིད་དང་། ཡོན་ཏན་དང་ལྡན་པ་ཉིད་དང་ཐོབ་པའི་མཚན་ཉིད་ཡིན་པར་མངོན་པར་ཡིད་ཆེས་པ་བསྐྱེད་ནས་ཆོས་ཐམས་ཅད་དང་པོ་ནས་སྐྱེ་བ་མེད་པ་ནས་མི་འཇིག་པའི་བདག་ཉིད་ཅན་ཡིན་པ་
གསལ་བར་བྱས་པས་རྟོག་པའི་གཤིན་རྗེ་བཀག་ཅིང་ཤེས་བྱའི་སྒྲིབ་པ་སྤངས་པས་འཇིག་ཚོགས་ལ་ལྟ་བ་ལས་བཟློག་སྟེ། ཕུང་པོའི་བདུད་ལས་རྣམ་པར་རྒྱལ་བ་ངེས་པར་མཛད་ནས་སླར་བྱོན་ཏེ་ཤར་སྒོར་བཞུགས་སོ། །པྲཛྙཱནྟ་ཀྲྀཏ་ཅེས་བྱ་བས་ལེ་ལོ་དང་ཉོན་མོངས་པའི་བདུད་
དང་མཐར་འཛིན་པར་ལྟ་བ་དང་། ཉོན་མོངས་པའི་སྒྲིབ་པའི་གཉེན་པོ་བརྩོན་འགྲུས་ཀྱི་ངོ་བོ་ཉིད་ཤེས་རབ་མཐར་བྱེད་སྔ་མ་བཞིན་དུ་ལེ་ལོ་ལ་སོགས་པའི་བག་ཆགས་ཤས་ཆེ་བའི་གདུལ་བྱའི་སེམས་ཅན་རྣམས་ལ་བརྟེན་ནས་བརྩོན་འགྲུས་ལ་ཡང་དག་པར་སྦྱར་ནས། ཆོས་
ཐམས་ཅད་རྣམ་པར་ཤེས་པའི་བདག་ཉིད་ཡིན་པར་ཡོངས་སུ་བསྟན་པས་ཉོན་མོངས་པའི་སྒྲིབ་པ་དང་རྟག་པ་ལ་སོགས་པ་མཐར་འཛིན་པ་ལས་ངེས་པར་བཟློག་སྟེ། ཉོན་མོངས་པའི་བདུད་ལས་རྣམ་པར་རྒྱལ་བར་མཛད་ནས་དེ་བཞིན་དུ་ལྷོ་སྒོར་བཞུགས་སོ། །པདྨཱནྟ་ཀྲྀཏ་ཅེས་བྱ་བས་
བརྗེད་ངས་པ་དང་འཆི་བདག་གི་བདུད་དང་ལོག་པར་ལྟ་བ་དང་། སྐྱེ་བའི་སྒྲིབ་པའི་གཉེན་པོ་དྲན་པའི་ངོ་བོ་ཉིད་པདྨ་མཐར་བྱེད་སྔར་བཤད་པའི་ཞལ་ལ་སོགས་པ་དང་ལྡན་པ། དེ་བཞིན་དུ་བརྗེད་ངས་པ་དང་ལོག་པར་ལྟ་བའི་བག་ཆགས་ཤས་ཆེ་བའི་གདུལ་བྱ་ལ་བརྟེན་ནས། ལས་ཀྱི་འབྲས་

44-1-158a

བུ་ཆུད་མི་ཟ་བར་བསྟན་པས་ཡང་དག་པའི་ལྟ་བ་ལ་ངེས་པར་སྦྱར་ནས། ཡང་དག་པའི་དྲན་པ་ལ་ཉེ་བར་བཞག་སྟེ། ཕུང་པོ་ལྔ་བརྟགས་པའི་བདག་ཉིད་ཅན་ཡིན་པས་འཆི་འཕོ་བ་དང་བྲལ་ཞིང་དེ་ཁོ་ན་ཉིད་དུ་བརྗོད་དུ་མེད་པའི་བདག་ཉིད་ཅན་ཡིན་པར་བསྟན་པས་སྐྱེ་
བའི་སྒྲིབ་པ་སྤངས་ཤིང་འཆི་བདག་གི་བདུད་ལས་ཡོངས་སུ་རྒྱལ་བར་མཛད་ནས་སླར་བྱོན་ཏེ་ནུབ་སྒོར་བཞུགས་སོ། །བིགྷྣཱནྟ་ཀྲྀཏ་ཅེས་བྱ་བས་སྔར་བཤད་པའི་རྣམ་པར་གཡེང་བ་དང་ལྷའི་བུའི་བདུད་དང་ལྟ་བ་མཆོག་ཏུ་འཛིན་པ་དང་། ལས་ཀྱི་སྒྲིབ་པའི་གཉེན་པོ་ཏིང་ངེ་འཛིན་རྣམ་པར་དག་པའི་
བདུད་རྩི་ཐབ་སྦྱོར་སྔ་མ་བཞིན་དུ་རྣམ་པར་གཡེང་བ་ལ་སོགས་པའི་བག་ཆགས་ཤས་ཆེ་བའི་གདུལ་བྱ་རྣམས་ལ་བརྟེན་ཏེ་སེམས་རྩེ་གཅིག་པ་ཉིད་ལ་ངེས་པར་སྦྱར་ནས་ཆོས་ཐམས་ཅད་རང་བཞིན་གྱིས་ཞི་བ་ཡིན་པའི་ཕྱིར་རྣམ་པར་མི་རྟོག་པའི་བདག་ཉིད་ཅན་ཡིན་པར་བསྟན་ནས་འཇིག་ཚོགས་
ལ་སོགས་པའི་ལྟ་བ་མཆོག་དང་གཙོ་བོ་ཡིན་པར་ལྟ་བ་ལས་བཟློག་སྟེ། ལྷའི་བུའི་བདུད་ལས་རྒྱལ་བར་མཛད་དེ་སླར་བྱོན་པ་དང་བགེགས་ཀྱི་ཚོགས་རབ་ཏུ་འཇོམས་ཤིང་བྱང་སྒོར་བཞུགས་སོ། །འདིར་ཡང་དཀྱིལ་འཁོར་བ་ཐམས་ཅད་ནི་རང་རང་གི་སྟན་དང་འོད་ཀྱི་དཀྱིལ་འཁོར་ལ་རྡོ་
རྗེའི་སྐྱིལ་མོ་ཀྲུང་གིས་བདག་པོ་ལ་མངོན་པར་ཕྱོགས་པ་ཡིན་ལ། ཁྲོ་བོ་རྣམས་ནི་སྣ་ཚོགས་པདྨ་དང་ཉི་མའི་གདན་ལ། གཡས་དང་གཡོན་གྱི་སྦྱོར་བ་ཡིས། །གཡོན་བརྐྱང་བ་ཡི་ཚུལ་གྱིས་ནི། །ཁྲོ་བོའི་སྐྱིལ་མོ་ཀྲུང་བཅས་ནས། །བདུད་རྣམས་རབ་ཏུ་འཇོམས་པ་ཡིན། །ཞེས་བརྗོད་
པས། ཁྲོ་བོ་གཡོན་བརྐྱང་བས་གནས་པ་ཡིན་ནོ་ཞེས་བཤད་པ་ཡིན་ནོ། །དེ་ནས་ཡོངས་སུ་རྫོགས་པའི་དཀྱིལ་འཁོར་དངོས་པོ་ཐམས་ཅད་ཀྱིས་བལྟས་ཏེ། ཡེ་ཤེས་སེམས་དཔའི་ཐུགས་ཀའི་མཚན་མར་གནས་པའི་ས་བོན་གྱི་འོད་ཀྱི་ལྕགས་ཀྱུ་རྣམས་ཀྱིས་ཐོག་མ་མེད་པ་ནས་
ཡང་དག་པར་གྲུབ་པའི་ཡེ་ཤེས་ཀྱི་དཀྱིལ་འཁོར་བཀུག་ལ་མདུན་དུ་བསམས་ཏེ། གཤིན་རྗེ་གཤེད་ལ་སོགས་པའམ། གཞན་གང་ཡང་རུང་བ་ཡང་དག་པར་སྤྲོས་པས། དེར་གཏོགས་པའི་བགེགས་རྣམས་ཡང་དག་པར་བསལ་ལ་མངོན་པར་བསྲུངས་ཏེ། ཟླ་བ་ལ་

44-1-158b

སོགས་པ་དང་། མེ་ཏོག་དང་ལྡན་པའི་མཆོད་ཡོན་ལ་ཨོཾ་ཨཱཿཧཱུྃ་ཧཱུྃ་མངོན་པར་བཟླས་ནས་ཕུལ་ལ་གཤིན་རྗེ་གཤེད་ལ་སོགས་པས་དམ་ཚིག་གི་དཀྱིལ་འཁོར་ལ་མན་ངག་ཇི་ལྟ་བ་བཞིན་དུ་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་བ་བྱས་ནས་མཉེས་པར་བྱས་
ཏེ། འདི་དག་ནི་རྒྱུ་མཐུན་པའི་འབྲས་བུ་ཆེན་པོ་དང་། བསྙེན་པ་ཆེན་པོའོ། །དཀྱིལ་འཁོར་པ་རེ་རེ་ཞིང་མིག་ལ་སོགས་པ་བྱིན་གྱིས་བརླབ་པ་ནི་རྣམ་པར་སྨིན་པའི་འབྲས་བུ་ཆེན་པོ་དང་། ཉེ་བར་སྒྲུབ་པ་ཆེན་པོའོ། །ཚིགས་སུ་བཅད་པས་གསོལ་བ་གདབ་པ་དང་། ཐུགས་ལ་སོགས་
པའི་སྔགས་མེད་པ་ནི་སྐྱེས་བུ་བྱེད་པའི་འབྲས་བུ་ཆེན་པོ་དང་། སྒྲུབ་པ་ཆེན་པོའོ། །དབང་བསྐུར་བ་ནི་དབང་གི་འབྲས་བུ་ཆེན་པོ་དང་། སྒྲུབ་པ་ཆེན་པོའི་ཆེན་པོའོ། །འདི་རྣམས་ཀྱི་བདག་པོའི་ངེས་པ་བརྗོད་པར་བྱ་སྟེ། མི་བསྐྱོད་པའི་ཅོད་པན་དུ་ནི་རྡོ་རྗེ་འཆང་ཆེན་པོའོ། །རྡོ་རྗེ་
འཆང་ཆེན་པོ་དང་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་རྣམས་དང་། མཱ་མ་ཀཱི་དང་། ཕྱག་ན་རྡོ་རྗེ་དང་། སྒྲ་རྡོ་རྗེ་དང་། སྲུང་བའི་འཁོར་ལོ་བཤད་པའི་ཁྲོ་བོ་རྣམས་ལས་གཤིན་རྗེ་མཐར་བྱེད་དང་པདྨ་མཐར་བྱེད་མ་གཏོགས་པ་གཞན་གྱིས་མི་ཐུབ་པ་ལ་
སོགས་པའི་ཅོད་པན་དུ་ནི་མི་བསྐྱོད་པའོ། །སྤྱན་དང་སའི་སྙིང་པོ་དང་། གཟུགས་རྡོ་རྗེ་མ་དང་། གཤིན་རྗེ་གཤེད་ཀྱི་ཅོད་པན་ལ་རྣམ་པར་སྣང་མཛད་དོ། །དྲི་རྡོ་རྗེ་མ་དང་ནམ་མཁའི་སྙིང་པོའི་ཅོད་པན་ལ་ནི་རིན་ཆེན་དབང་ངོ་། །གོས་དཀར་མོ་དང་། འཇིག་རྟེན་དབང་ཕྱུག་
དང་། རོ་རྡོ་རྗེ་དང་། པདྨ་མཐར་བྱེད་ཀྱི་ཅོད་པན་ལ་ནི་འོད་དཔག་ཏུ་མེད་པའོ། །སྒྲོལ་མ་དང་། སྒྲིབ་པ་རྣམ་པར་སེལ་བ་དང་། རེག་རྡོ་རྗེའི་ཅོད་པན་ལ་ནི་དོན་ཡོད་པར་གྲུབ་པའོ། །ཀུན་དུ་བཟང་པོ་དང་ཆོས་ཀྱི་དབྱིངས་རྡོ་རྗེ་ལ་ནི་རྡོ་རྗེ་འཆང་ཆེན་པོའོ། །དེ་ནས་སྒྲུབ་པ་ཆེན་པོའི་རྗེས་
ཐོགས་ལ་སྔ་མ་བཞིན་སྙིང་གའི་ས་བོན་གྱི་འོད་ཟེར་རྣམས་ཀྱིས་ཕྱོགས་བཅུ་ན་བཞུགས་པའི་གཟུགས་ལ་སོགས་པའི་འདོད་པའི་ཡོན་ཏན་ལྔ་བཀུག་ལ་སྙིང་གར་བཅུག་སྟེ། ཟླ་བ་ཞུ་བར་གྱུར་པས་རང་གི་རྡོ་རྗེའི་ལམ་ནས་ཕྱུང་སྟེ། རིག་པའི་ཆུ་སྐྱེས་སུ་གནས་པར་

44-1-159a

བསམས་ལ། དེའི་བ་སྤུའི་བུ་ག་རེ་རེ་ནས་བྱུང་བའི་འོད་ཟེར་རྣམ་པ་སྣ་ཚོགས་རྒྱ་ཆེན་པོས་ནམ་མཁའི་ཁམས་ཀུན་དུ་ཁྱབ་པར་སྤྲོས་ལ། འོད་ཟེར་གྱི་སྒོ་ལས་བྱུང་བ་གཟུགས་ལ་སོགས་པའི་ལྷ་མོ་དྲི་མ་མེད་པའི་རྒྱན་ཐམས་ཅད་ཀྱིས་ཡན་ལག་ལེགས་
པར་བརྒྱན་པ། རྟོག་པ་མ་ལུས་པ་ལས་ངེས་པར་གྲོལ་ཞིང་བདེ་བ་མཆོག་བསྐྱེད་པའི་རྒྱུར་གྱུར་པ་དངོས་པོ་སྒྱུ་མ་དང་མཚུངས་པ་ལ་སོགས་པར་རྟོགས་པ་འཇིག་རྟེན་ལྟ་བ་ལ་མཁས་པ་དང་། འོད་ཟེར་གྱི་སྣང་བ་ལས་སྤྲུལ་པའི་མཆོད་པའི་སྤྲིན་གྱི་དྲ་བའི་ཚོགས་སྣ་ཚོགས་
པ་དང་ལྡན་པ་རྣམས་དང་། དེ་བཞིན་དུ་ཕྱིའི་དྲི་ལ་སོགས་པ། ཁང་པ་བརྩེགས་པའི་འོད་ཟེར་འཕྲོ་བ་ལས་བྱུང་བ་ནམ་མཁའི་མཐས་ཁྱབ་པ་རྣམས་ཀྱིས་རབ་ཏུ་མཆོད། རང་དང་ཐུབ་པའི་དབང་པོ་དང་མཆོད་པ་དང་མཆོད་པའི་བདག་ཉིད་མཉམ་པ་ཉིད་ཀྱི་དོན་གྱིས་གཉིས་སུ་མེད་པའི་
ང་རྒྱལ་བྱའོ། །ཨོཾ་སརྦྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེའི་འོག་ཏུ་སྒྲའི་ཡུལ་ཐམས་ཅད་བྲག་ཅ་ལྟ་བུར་ལྷག་པར་མོས་ཤིང་། རང་གི་བདག་ཉིད་དང་ཐ་མི་དད་པའི་དཀྱིལ་འཁོར་གྱི་འཁོར་ལོའི་བདག་ཉིད་ཅན་ཕུང་པོ་དང་ཁམས་དང་སྐྱེ་མཆེད་ཀྱི་གཟུགས་ཅན་གྱི་ཆོས་ཐམས་
ཅད་རང་གི་ཡིད་ཀྱིས་ལྷག་པའི་ལྷ་ལ་བསྟོད་པའི་སྒྲ་བྱེད་པར་བསམ་པར་བྱེད་པ་ནི། མི་བསྐྱོད་རྡོ་རྗེ་ཞེས་བྱ་བ་ལ་སོགས་པའོ། །དེ་ནས་བར་སྣང་ལ་གནས་པའི་ཟླ་བའི་དཀྱིལ་འཁོར་ལ་འདུག་པའི་ཧཱུྃ་ལས་བྱུང་བའི་རྡོ་རྗེ་རྩེ་ལྔ་པའི་ལྟེ་བར་ཧཱུྃ་དང་ལྡན་པར་བསམས་ལ། དེའི་འོག་ཏུ་
ཡི་གེ་ཡཾ་ལས་བྱུང་བའི་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་རྡོ་རྗེས་མཚན་པ་ལ་གནས་པའི་རཾ་ལས་བྱུང་བའི་མེའི་དཀྱིལ་འཁོར་དམར་པོ་གྲུ་གསུམ་པའི་སྟེང་དུ། ཡི་གེ་ཨ་ལས་བྱུང་བའི་པདྨའི་སྣོད་བསམས་ལ་དེའི་ནང་དུ་བི་ར་ཤུ་མ་མུ་ཞེས་བྱ་བ་མི་འཆི་བ་ལྔ་པོ་ལ་
རིམ་བཞིན་དུ། བྲུྃ་ཨཱྃ་ཛྲཱྀ་ཁཾ་ཧཱུྃ་གིས་བྱིན་གྱིས་བརླབ་པ་དང་། གོ་ཀུ་ད་ཧ་ན་སྟེ་ལྔ་པོ་ཡང་དེ་བཞིན་དུ་བསམས་ལ་རྡོ་རྗེ་ཡང་དེའི་འོད་ཟེར་གྱིས་ཞུ་ཞིང་དེ་ཉིད་དུ་ཐིམ་པར་གྱུར་པར་བསམས་ལ། དེ་ཡང་མེ་འབར་བ་རྣམས་ཀྱིས་མ་ལུས་པར་ཞུ་བར་གྱུར་ཅིང་ཉེས་པ་དང་བྲལ་བ་དང་མཉམ་པ་

44-1-159b

མེད་པའི་བཅུད་དང་སྟོབས་དང་ཞུ་བར་གྱུར་པའི་བདག་ཉིད་ཅན་དུ་ལྷག་པར་མོས་ལ། དེར་ཨོཾ་དཀར་པོ་འབར་བ་བཀོད་པ་དེའི་འོད་ཟེར་གྱིས་དེ་བཞིན་གཤེགས་པ་རྣམས་བདུད་རྩིའི་རྣམ་པར་དེའི་ནང་དུ་ཆུད་པར་བསམས་ལ། དེའི་འོད་ཟེར་གྱི་ཚོགས་འཕྲོ་བ་ལ་ཡི་གེ་གསུམ་མང་
དུ་བཟླས་ཏེ། ལྷག་པའི་ལྷའི་སྦྱོར་བ་དང་ལྡན་པའི་རང་གི་སྙིང་གར་དཀྱིལ་འཁོར་གྱི་འཁོར་ལོ་བསམས་ལ། བདག་ཉིད་དང་དཀྱིལ་འཁོར་བ་ཐམས་ཅད་ཀྱི་ལྕེ་ལ་ཧཱུྃ་ལས་བྱུང་བའི་རྡོ་རྗེ་རྩེ་ལྔ་པ་ནས་འབྲས་ཙམ་དཀར་པོ་ལྟེ་བ་ལ་ཧཱུྃ་གིས་མཚན་པ་དང་། ཅོད་པན་དུ་ཡང་རང་གི་
བདག་པོ་བསམས་ལ། དེ་བཞིན་གཤེགས་པ་ཐམས་ཅད་ཚིམ་པར་བྱའོ་ཞེས་ལྷག་པར་མོས་པར་བྱས་ལ། ཀུན་དུ་རྟོག་པའི་དྲི་མ་མ་ལུས་པ་དང་བྲལ་བས་དེས་སྙིང་གའི་ཟླ་བར་ཆུད་པའི་རྒྱལ་བའི་འཁོར་ལོ་མ་ལུས་པ་དང་བདག་ཉིད་དང་དཀྱིལ་འཁོར་པ་རྣམས་ཚིམ་པར་
བྱའོ། །དཀྱིལ་འཁོར་དབྱུང་བ་ནས་བརྩམས་ཏེ་བདུད་རྩི་མྱང་བའི་མཐར་ཐུག་པ་ནི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ཏོ། །དེ་ལྟར་ཆེན་པོ་བསྒོམས་པ་ལ་སེམས་དབང་དུ་བྱ་བ་བསྐྱེད་པར་བྱ་བའི་ཕྱིར་ལས་ཀྱི་རྒྱལ་པོ་མཆོག་བསྒོམ་པར་བྱ་བ་ཡིན་པས། 
ཐིག་ལེའི་རྣལ་འབྱོར་ལ་སོགས་པ་བསྒོམ་པར་བྱའོ། །དེ་ནས་ཡེ་ཤེས་སེམས་དཔའི་ཐུགས་ཀའི་མཚན་མའི་ལྟེ་བ་ལ་གནས་པའི་ཧཱུྃ་གི་འོད་ཟེར་ལས་བྱུང་བའི་དཀྱིལ་འཁོར་གྱི་འཁོར་ལོའི་དེ་བཞིན་གཤེགས་པ་རྣམས་ཀྱིས་འགྲོ་བ་མ་ལུས་པ་ཐབས་དང་ཤེས་རབ་ཀྱི་རང་བཞིན་ཅན་
གྱི་དྲི་མ་མེད་པའི་ཏིང་ངེ་འཛིན་ལས་ཡང་དག་པར་བྱུང་བའི་བདེ་བ་ཆེན་པོའི་རང་བཞིན་ཅན་གྱི་དཀྱིལ་འཁོར་གྱི་འཁོར་ལོར་བྱས་ནས་ཧཱུྃ་དེ་ཉིད་དུ་ཞུགས་པ་དང་། དེ་ཡོངས་སུ་གྱུར་པ་ལས་ཙ་ན་ཀའི་འབྲུ་ཚོད་ཙམ་གྱི་ཐིག་ལེའི་དབུས་སུ་དཀྱིལ་འཁོར་གྱི་འཁོར་ལོ་ལྷ་བཅུ་དགུ་གསལ་
བའི་བདག་ཉིད་ཅན་དུ་བདག་ཉིད་རྣམ་པར་བསྒོམས་ལ། དེའི་མདོག་ཅན་གྱི་འོད་ཀྱི་ཕྲེང་བས་ཡེ་ཤེས་སེམས་དཔའ་དང་ཐུགས་དང་གསུང་དང་སྐུ་རྡོ་རྗེ་དང་ལུས་ཀྱི་མཆོག་དང་། རང་གི་ནང་གི་ལུས་ཀྱང་དེས་སད་པར་བྱས་ཤིང་སྣང་བར་བྱས་ནས་བ་སྤུ་རེ་རེ་ཀུན་ནས་མཐའ་ཡས་པའི་

44-1-160a

འོད་ཟེར་གྱི་སྣང་བའི་ཚོགས་ཀྱིས་སྣ་ཚོགས་པར་ཁྱབ་པར་བྱས་ནས། ཡང་དེ་ཉིད་དུ་ཞུགས་ནས་གཉིས་སུ་མེད་པའི་བདག་ཉིད་ཅན་དུ་བསྒོམ་པ་ནི་ཐིག་ལེའི་རྣལ་འབྱོར་རོ། །དེའི་འོག་ཏུ་དེ་བཞིན་གཤེགས་པ་ཞུགས་པ་ལ་སྔོན་དུ་འགྲོ་བས་རང་དང་འདྲ་བའི་ཆོས་འབྱུང་
བའི་སྣ་རྩེར་བྱང་ཆུབ་ཀྱི་སེམས་ལས་བྱུང་བའི་ཧཱུྃ་ཡོངས་སུ་གྱུར་པ་ལས་རྡོ་རྗེ་རྩེ་ལྔ་པ་སྔོན་པོ་ནས་འབྲས་ཙམ་གྱི་ལྟེ་བ་ལ་ཉི་མའི་སྟེང་ན་གནས་པའི་ཧཱུྃ་ཡོངས་སུ་གྱུར་པ་ལས་ཡུངས་ཀར་གྱི་འབྲུ་ཚོད་ཙམ་ཕྲ་བ། ཡེ་ཤེས་ལྔའི་བདག་ཉིད་ཅན་གྱི་རིན་པོ་ཆེ་ཁ་དོག་སྣ་ལྔའི་དབུས་ན་ཇི་སྐད་
བཤད་པའི་རྟེན་དང་བརྟེན་པའི་དཀྱིལ་འཁོར་གྱི་འཁོར་ལོ་རྒྱུ་མཐུན་པའི་འབྲས་བུ་དང་། བསྙེན་པ་ལ་སོགས་པའི་ཡན་ལག་བཞི་ཆུང་ངུ་དང་།འབྲིང་དང་། ཆེན་པོ་འདི་དག་བསམ་ཞིང་སེམས་ལ་དབང་དུ་གྱུར་པར་བྱ་བའི་ཕྱིར་བསྒོམ་པར་བྱའོ། །དེ་ནས་སྨིག་རྒྱུ་ལྟ་བུ་ལ་སོགས་
པ་མཚན་མ་གང་ཡང་རུང་བ་ཐོབ་པས་སེམས་བརྟན་པར་བཟུང་བ་ལ་སོགས་པ་ངོ་བོ་ཉིད་མེད་ཅིང་རང་རིག་པའི་ངོ་བོ་ཉིད་ལ་དེའི་འོད་ཟེར་ལས་སྤྲུལ་པའི་དེ་བཞིན་གཤེགས་པ་རྣམས་སམ་རྡོ་རྗེ་ལ་སོགས་པ་མཚན་མ་སྣ་ཚོགས་པ་སྤྲོ་བ་ཡང་དང་ཡང་བྱའོ། །འདི་ནི་ཕྲ་མོའི་རྣལ་འབྱོར་རོ། །
དེའི་འོག་ཏུ་རྡོ་རྗེ་དང་གསལ་བ་དང་ཆོས་དང་འཁོར་ལོ་མན་ངག་ཇི་ལྟ་བ་བཞིན་དུ་སྐུ་དང་གསུང་དང་ཐུགས་རྡོ་རྗེ་དང་། ཡེ་ཤེས་སེམས་དཔའི་ཐུགས་ཀའི་མཚན་མའི་ལྟེ་བར་གནས་པ་རང་རང་གི་སྟན་ལ། ཨོཾ་ཨཱཿཧཱུྃ་ཧཱུྃ་ཞེས་བྱ་བ་བརྗོད་པ་དང་བརྗོད་པར་བྱ་བ་ལས་འདས་པ་སོ་སོ་རང་གིས་
རིག་པ་ཡེ་ཤེས་ལྔའི་བདག་ཉིད་ཅན་བསམས་ལ། གནས་པ་དང་བརྟན་པར་གྱུར་པར་ལྷག་པར་མོས་ཤིང་མྱུར་བ་དང་བུལ་བ་ལ་སོགས་པའི་ཉེས་པ་དང་བྲལ་བ་ཕན་ཚུན་ཤིན་ཏུ་མ་བསྡམས་པར་གསང་སྔགས་ཀྱི་རྒྱལ་པོ་གསལ་བར་བརྗོད་ཅིང་སྲོག་གི་རླུང་གིས་ཨོཾ་ལ་སོགས་པའི་ས་བོན་
རེ་རེ་ལས་སྐུ་རྡོ་རྗེ་ལ་སོགས་པ་ཡང་དག་པར་སྤྲོ་བར་བྱ་ཞིང་། དེ་རྣམས་ཀྱིས་ནམ་མཁའ་མ་ལུས་པར་ཁྱབ་པར་བསམས་ལ། ཐུགས་ལ་སོགས་པ་བྱིན་གྱིས་བརླབས་པ་བཞིན་དུ་གཟུགས་རྡོ་རྗེ་ལ་སོགས་པས་རབ་ཏུ་མཆོད་ཅིང་རིག་པ་མཆོག་གིས་ཡོངས་སུ་འཁྱུད་པའི་བདེ་བ་ཆེན་པོ་

44-1-160b

བབས་པའི་གཞན་གྱི་དབང་དུ་གྱུར་པར་བསམས་ནས། རྩོལ་བའི་རླུང་གིས་དེ་ཉིད་དུ་གཞུག་པར་བསམས་ལ་རིམ་གྱིས་སམ་ས་བོན་ལས་ཅིག་ཅར་སྤྲོ་བའམ། རིམ་གྱིས་བཟླས་བརྗོད་བྱ་བ་ནི་སྔགས་ཀྱི་བཟླས་པའོ། །དེ་ལ། རྒྱུ་མཐུན་སོགས་དང་ལྷག་མོས་པ། །ཐིག་ལེ་ཕྲ་
མོ་གསང་གསུམ་དབྱུང་། །ཆུང་ངུ་ལ་སོགས་དབྱེ་བ་ཡིས། །རྣལ་འབྱོར་བསྙེན་སོགས་དེ་བཞིན་བསྒོམ། །ཞེས་པ་དང་། དེ་ནས་དེའི་འོག་ཏུ།ཞུམ་པའི་སེམས་ནི་ངེས་བཟུང་ཞིང་། །རྒོད་པ་སླར་ཡང་ཞི་བར་བྱ། །ཞེས་སྨོས་པས་ཐིག་ལེའི་རྣལ་འབྱོར་ལ་སོགས་པ་བསྒོམས་
པས་སེམས་ཞུམ་པར་གྱུར་ཅིང་སེམས་ཀྱི་རྒྱུ་ཆུང་བ་དེ་གཟུང་བའི་ཕྱིར་སྔ་མ་བཞིན་དུ་རིམ་པའི་ཚོགས་ཀྱི་གླུས་རབ་ཏུ་སད་པར་བྱ་ཞིང་ཚིམ་པར་བྱེད་དོ། །དེ་ཡང་སྤྱི་བོར་མཐོ་གང་ཙམ་གྱིས་འཕགས་པར་ཟླ་བའི་དཀྱིལ་འཁོར་ལ་གནས་པའི་བདུད་རྩི་ལྔ་ཨོཾ་དཀར་པོས་བྱིན་གྱིས་
བརླབས་ཤིང་འཛག་པར་གྱུར་པར་བསམས་ལ། དེའི་སྲོག་དང་རྩོལ་བའི་འོད་ཟེར་གྱིས་ལྕགས་ཀྱུས་དྲངས་ལ། སྐྱོ་བ་སེལ་བར་བྱེད་པའི་བདུད་རྩིའི་རྒྱུན་སྐུ་རྡོ་རྗེ་ལ་སོགས་པར་དབབ་པར་བྱ་སྟེ། འདི་ནི་ཚིམ་པར་བྱའོ། །དེ་ལྟར་ཐང་ཅིག་ངལ་བསོ་ནས། སླར་ཡང་བདེ་བ་དེ་ལ་ཞེན་
ཅིང་དེས་སེམས་རྒོད་པར་གྱུར་ན་ཐིག་ལེའི་རྣལ་འབྱོར་བསྒོམ་པ་སྔོན་དུ་འགྲོ་བས་སྔ་མ་བཞིན་དུ་སྔགས་ཀྱི་བཟླས་པ་ཉིན་མཚན་དུ་བྱ་ཞིང་། དེ་ལ་ཡང་ཞེན་པ་མེད་པར་བྱའོ། །དེའི་འོག་ཏུ་གཤེགས་སུ་གསོལ་བ་བྱེད་པར་འདོད་པའི་སྔགས་པས་དཀྱིལ་འཁོར་གྱི་རྒྱལ་པོ་མཆོག་བཞིན་དུ་མཆོད་
པ་དང་བསྟོད་པ་དང་བདུད་རྩི་མྱང་བར་བྱས་ལ་སྐུ་ལ་སོགས་པའི་རྡོ་རྗེའི་ཐུགས་ཀར་གནས་པའི་ཨོཾ་ལ་སོགས་པའི་ཡི་གེ་རྣམས་ལ་ཇི་ལྟ་བ་བཞིན་དུ་དཀྱིལ་འཁོར་བ་རྣམས་ནང་དུ་ཆུད་པར་བྱས་ནས། དེ་ཡང་སྐུ་གསུང་ཐུགས་ནམ་མཁའ་ལྟར་མ་སྐྱེས་ཤིང་གཉིས་སུ་མེད་པའི་ཡེ་ཤེས་ཀྱི་ངོ་བོ་ཉིད་
དུ་བསྒོམ་པར་བྱའོ། །འདི་ནི་གཤེགས་སུ་གསོལ་བའོ། །དེ་ལྟར་ཐིག་ལེའི་རྣལ་འབྱོར་ལ་སོགས་པ་ནས། གཤེགས་སུ་གསོལ་བའི་མཐར་ཐུག་པ་ནི། ལས་ཀྱི་རྒྱལ་པོ་མཆོག་གི་ཏིང་ངེ་འཛིན་ནོ། །དེ་ནས་བཤད་མ་ཐག་པའི་ཐབས་དང་ཤེས་རབ་ཀྱི་རང་བཞིན་དྲི་མ་མེད་པའི་

44-1-161a

ཏིང་ངེ་འཛིན་ལས་བྱུང་བ། ཡངས་ཤིང་རྒྱ་ཆེ་བའི་བདེ་བ་དམ་པའི་ངོ་བོ་ཉིད་དཔལ་གསང་བ་འདུས་པའི་མངོན་པར་བྱང་ཆུབ་པ་རྟོག་པའི་ལྟ་བ་དང་བྲལ་ཞིང་བདག་དང་བདག་གིར་འཛིན་པས་འགྲོ་བ་མ་ལུས་པ་འཁོར་བའི་གཡང་སར་ལྟུང་ཞིང་སྐྱབས་མེད་པ་ལ་མངོན་
པར་བསམས་ལ། དེ་ལ་སྙིང་རྗེ་མཐའ་ཡས་པས་སྨོན་ལམ་མངོན་དུ་བྱའོ། །དཔལ་ལྡན་མི་བསྐྱོད་མགོན་པོ་ཡི། །བསྒོམས་པ་ལས་ཐོབ་དགེ་བ་དེས། །དེ་ཡི་ཡེ་ཤེས་ལྡན་གྱུར་པས། །འགྲོ་བ་ཀུན་མཁྱེན་ས་ཐོབ་ཤོག །གང་ཚེ་བལྟ་བར་འདོད་པའམ། །ཅུང་ཟད་འདྲི་བར་
འདོད་ན་ཡང་། །མགོན་པོ་ཐུགས་བདག་གང་ཡིན་ཏེ། །གེགས་མེད་པར་ནི་མཐོང་བར་ཤོག །ཕྱོགས་བཅུ་ནམ་མཁའི་མཐའ་གཏུགས་པའི། །སེམས་ཅན་ཀུན་དོན་སྒྲུབ་པའི་ཕྱིར། །ཇི་ལྟར་ཐུབ་དབང་སྤྱོད་མཛད་པ། །བདག་གི་སྤྱོད་པའང་དེ་འདྲར་ཤོག །ཇི་སྲིད་དང་པོའི་མཐར་
གཏུགས་པའི། །འཁོར་བ་རྣམས་ཀྱི་མཐའ་སྤངས་པ། །དེ་སྲིད་སེམས་ཅན་དོན་ཕྱིར་ཉིད། །སྤྱོད་པ་དཔག་མེད་སྤྱད་པར་བགྱི། །ཇི་སྲིད་འཇིག་རྟེན་གྱུར་པ་ཡི། །སངས་རྒྱས་ཐམས་ཅད་མྱ་ངན་འདས། །དེ་ཡི་བསྟན་པའི་དོན་དུ་ནི། །སྤྱོད་པ་དཔག་མེད་སྤྱད་པར་བགྱི། །རྡོ་རྗེ་
སེམས་སོགས་གཟུགས་ཀྱིས་ནི། །རྣམ་པ་ཀུན་དུ་སྤྱད་བྱ་ཞིང་། །སྔགས་ཀྱི་གཟུགས་ཀྱིས་སེམས་ཅན་རྣམས། །དེ་དང་དེ་ཚེ་གདུལ་བར་བགྱི། །དེའི་འོག་ཏུ་རང་གི་ལྷའི་ང་རྒྱལ་དང་ལྡན་པའི་ཏིང་ངེ་འཛིན་གྱིས་ལངས་ལ། ཡུལ་རྣམས་མིག་ཡོར་ཙམ་གྱི་རང་གི་ངོ་བོ་ཉིད་དམ། རང་གི་
ལྷའི་རྣམ་པར་མོས་ལ། རིགས་ཇི་ལྟ་བ་བཞིན་དུ་རྣམ་པར་སྣང་མཛད་ལ་སོགས་པའི་ངོ་བོ་ཉིད་དམ། རང་རང་གི་རྣམ་པར་དག་པ་གཟུགས་རྡོ་རྗེ་ལ་སོགས་པའི་ངོ་བོ་ཉིད་དམ། གཉིས་སུ་མེད་པའི་ཡེ་ཤེས་རྡོ་རྗེ་འཆང་ཆེན་པོའི་ངོ་བོ་ཉིད་དུ་ལྷག་པར་མོས་པས། ཇི་ལྟར་རྙེད་པའི་འདོད་པའི་
ལོངས་སྤྱོད་ཐམས་ཅད་ལ་ཉེ་བར་སྤྱོད་པའི་བྱ་བ་བྱ་ཞིང་ཕྱིན་ཅི་ལོག་གི་རྟོག་པ་དང་བྲལ་བ་འདི་ཉིད་ནི་མཆོད་པའི་མཆོག་ཡིད་མགུ་བར་བྱེད་པ་ཉིད་དོ། །ཟས་ལ་སྤྱོད་པའི་དུས་སུ་ཡང་ཡེ་ཤེས་སེམས་དཔའི་ཐུགས་ཀའི་ཟླ་བར་རང་གི་འདོད་པའི་ལྷའི་དཀྱིལ་འཁོར་གྱི་འཁོར་ལོ་བསམས་ལ་

44-1-161b

རང་གི་ཟས་དཔའ་བོ་ལྔ་དང་། མི་འཆི་བ་ལྔའི་རྣམ་པར་སྔ་མ་བཞིན་དུ་བསྐྱེད་ལ། དཀྱིལ་འཁོར་གྱི་འཁོར་ལོའི་བདག་ཉིད་ཅན་དུ་ལྷག་པར་མོས་པས་མངོན་པར་བཟླས་ཏེ། ལྕེ་ལ་རྡོ་རྗེ་དཀར་པོ་དང་། བདག་པོ་ཡང་ཅོད་པན་དུ་བསམས་ཏེ། སྤྱོད་པར་བྱེད་པ་དང་། ཁ་ཟས་མཉམ་
པ་ཉིད་དུ་བསྒོམ་ཞིང་། དེ་བཞིན་དུ་རང་གི་ལྷག་པའི་ལྷའི་འཁོར་ལོ་དམ་ཚིག་པར་བྱ་ཞིང་དེས་མཆོད་པར་བྱ་བ་ནི་ཕྱིའི་སྦྱིན་སྲེག་གོ། །ནང་གི་བདག་ཉིད་ཅན་གྱི་ཡེ་ཤེས་ཀྱི་མེ་ལ་ཕུང་པོའི་ཤིང་བསྲེགས་པས་བླ་ན་མེད་པར་བཤད་པ་ཡིན་ནོ། །དེ་ལྟར་འདོད་པ་མ་ལུས་པས་རང་གི་ལྷའི་
ངོ་བོ་ཉིད་ཀྱི་བདག་ཉིད་དམ། གཞན་དག་ཡང་དག་པར་མཆོད་པའི་དམ་ཚིག་འདི་ནི་བདེ་བར་གཤེགས་པ་རྣམས་ཀྱིས་རྗེས་སུ་གནང་བ་ཡིན་ནོ། །ཇི་སྐད་བཤད་པའི་སྡོམ་ལྡན་པས། །ཇི་སྙེད་པ་ནི་ཀུན་དུ་སྤྱད། །དམ་ཚིག་མེད་གྱུར་བློ་ཡིས་ནི། །གསང་འདུས་དང་གཞན་ཤེས་པར་བྱ། །སངས་རྒྱས་
མཆོད་དང་འགྲོ་དོན་ནམ། །ལུས་ལས་འབྱུང་བ་མཐོང་བ་ན། །སྙིང་རྗེས་ནོན་པས་ལས་བྱ་བ། །སྔགས་རྒྱའི་བདག་ཉིད་ཅན་ཕན་བྱ། །དེ་ནས་གནས་སྐབས་ཐམས་ཅད་དུ། །རྒྱུན་མི་འཆད་པར་བདེ་བར་གཤེགས་པ་མ་ལུས་པ་ལ་མཆོད་པ་དང་འགྲོ་བའི་དོན་གྱི་བྱ་བ་ལ་ཞེན་ཅིང་ཤེས་རབ་དང་ཐབས་ཀྱི་རང་
བཞིན་དྲི་མ་མེད་པའི་ཏིང་ངེ་འཛིན་ལས་བྱུང་བའི་བདེ་བ་དམ་པས་ཁྱབ་པ་བརྟན་པ་དང་། གཡོ་བའི་དངོས་པོ་ཐམས་ཅད་ཀྱི་ཕྲ་རབ་རེ་རེའི་ངོ་བོ་རང་གི་འདོད་པའི་ལྷའི་དཀྱིལ་འཁོར་གྱི་འཁོར་ལོ་དང་ཐ་མི་དད་པར་ཤེས་ཤིང་། དེ་ནས་མི་བདེན་པའི་རྟོག་པ་མ་ལུས་པ་མཉམ་པ་ཉིད་དུ་སྦྱོར་བས་བརྟག་
པའི་སེམས་ལ་ནག་པོའི་ལས་རྣམས་ལྟ་ག་ལ་ཡོད། དེ་ཡང་། དངོས་པོ་གཅིག་ལ་ཀུན་རྟོག་པ། །རྣམ་པ་སྣ་ཚོགས་སྣང་གྱུར་ཏེ། །གྲོལ་དང་སྡུག་བསྔལ་བདེ་བསྐྱེད་པའི། །ལས་ནི་མ་ལུས་འབྱུང་བར་འགྱུར། །དེ་བས་དགེ་དང་མི་དགེའི་ལས། །ལུས་ལ་སོགས་པའི་རྟག་
ལས་བྱུང་། །རྟོག་པ་ཀུན་ལས་ངེས་གྲོལ་བའི། །ཡེ་ཤེས་དེ་ལ་རྟོག་པ་ཅི། །ཞེས་བྱ་བ་སྨོས་པ་ཡིན་ནོ། །དམ་ཚིག་ལས་ཉམས་པ་ལ་དོན་ཡོད་པར་གྲུབ་པའི་རྣལ་འབྱོར་ཇི་ལྟ་བ་བཞིན་དུ་བྱ་བ་སྔོན་དུ་འགྲོ་བས་འཁོར་ལོ་དེ་ལ་ཞུགས་པའི་ཡེ་ཤེས་སེམས་དཔའི་ཐུགས་ཀའི་ཟླ་བའི་

44-1-162a

ཁཾ་ལས་བྱུང་བའི་སྣ་ཚོགས་རྡོ་རྗེའི་ལྟེ་བར་ཟླ་བ་ལ་གནས་པའི་ཡི་གེ་ཁཾ་བསམས་ལ། དེའི་འོད་ཟེར་རྣམས་ཀྱིས་དེ་བཞིན་གཤེགས་པ་བསྐུལ་བ་སྔོན་དུ་འགྲོ་བས་བདག་ཉིད་སྣ་ཚོགས་པདྨ་འདབ་མ་དང་ཟླ་བ་ལ་གནས་ཏེ། གཟུང་བ་ལ་སོགས་པའི་
དངོས་པོ་རྣམས་ལས་དབེན་པར་རང་བཞིན་གྱིས་འོད་གསལ་བར་ལྷག་པར་མོས་ལ་སྔ་མ་བཞིན་དུ་དབང་བསྐུར་བར་བྱའོ། །བླ་མ་ལ་བརྙས་པ་ལ་སོགས་པའི་ཉེས་པ་རྣམས་ལ་ཡང་ཅི་ནུས་པར་མཆོད་པ་དང་སྦྱིན་པ་སྔོན་དུ་འགྲོ་བ་བྱ་བའི་བཤགས་པ་ལ་སོགས་པའི་སྔོན་དུ་འགྲོ་བས་
དམ་ཚིག་བླང་བར་བྱའོ། །འདི་ནི་དམ་ཚིག་གིས་གསོ་བའོ། །ཕྱིའི་ཁྲུས་བྱེད་པར་འདོད་ན་རང་གི་ལྷའི་སྦྱོར་བ་དང་ལྡན་པས་ཟླ་བ་ལ་གནས་ཏེ། དབང་བསྐུར་བའི་ཆོ་ག་ཉིད་ཀྱིས་ཁྲུས་བྱའོ། །ཐུན་མཚམས་གཞན་ལ་ཡང་སྔ་མ་བཞིན་དུ་མཆོད་པ་དང་སྡིག་པ་བཤགས་པ་ནས་བདུད་
རྩི་མྱང་བའི་མཐར་ཐུག་པའི་བར་རྫོགས་པར་བྱས་ནས། ཐིག་ལེ་དང་ཕྲ་མོ་བསྒོམ་པ་སྔོན་དུ་འགྲོ་བས་སྔགས་ཀྱི་བཟླས་པ་བྱས་ལ། ཡེ་ཤེས་སེམས་དཔའི་ཐུགས་ཀའི་དཀྱིལ་འཁོར་གྱི་འཁོར་ལོ་ནང་དུ་ཆུད་པར་བྱས་ལ། སྙིང་རྗེ་དང་ཤེས་རབ་ཏུ་ལྡན་པས་ཉལ་བར་བྱའོ། །ལངས་པའི་
དུས་སུ་སྤྱན་ལ་སོགས་པའི་ལྷ་མོ་རྣམས་ཀྱི་གླུས་བསྐུལ་ནས་ནང་པར་ལངས་ཏེ། ལས་དང་པོ་པས་སྔ་མ་བཞིན་དུ་ལེགས་པར་བཟླས་བརྗོད་བྱའོ། །དེ་ལྟར་ཉིན་རེ་བཞིན་ཐུན་བཞིའི་རིམ་གྱིས་སྡིག་པ་བཤགས་པ་ལ་སོགས་པའི་ཏིང་ངེ་འཛིན་གསུམ་གྱི་སྦྱོར་བས་མཚན་མ་གཉིས་ཐོབ་པའི་བར་
ནི་ལས་དང་པོ་པའོ། །དེ་ནས་སྔགས་ཀྱི་ཚུལ་ཁྲིམས་དང་བརྟུལ་ཞུགས་དག་པར་ལྡན་ཞིང་སྡིག་པ་བཤགས་པ་ལ་སོགས་པ་དང་བྲལ་བས་ཉེ་བར་སྒྲུབ་པ་ནས་བརྩམས་ཏེ། ཏིང་ངེ་འཛིན་གསུམ་བསྒོམས་པ་ལ་མཚན་མ་གསུམ་པོ་ཐོབ་པའི་བར་ནི་ཡེ་ཤེས་ཅུང་ཟད་ཙམ་ལ་དབང་ཐོབ་པའོ། །
དེ་རྣམ་པ་ཐམས་ཅད་དུ་ཡོངས་སུ་རྫོགས་ཤིང་སྤྲོ་བ་དང་བསྡུ་བ་བྱེད་པ་མཚན་མ་བཞི་ཐོབ་པ་ན་ཡེ་ཤེས་ལ་དབང་ཐོབ་པ་སྟེ། ཉིན་མཚན་དུ་མངོན་པར་སྦྱོར་བ་ཙམ་བསྟེན་པར་བྱའོ། །དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་རེ་རེའི་ནང་དུ་ཆུད་པའི་འཁོར་ལོ་གསུམ་གྱི་གཟུགས་

44-1-162b

བརྙན་གྱི་བདག་ཉིད་ཅན་གྱི་གཟུགས་སུ་བསྒོམ་པས་རྟག་ཏུ་སྣང་བའི་མཚན་མ་ཐོབ་པའི་རྣལ་འབྱོར་པ་ནི་ཡང་དག་པའི་ཡེ་ཤེས་ལ་དབང་ཐོབ་པ་ཞེས་བྱའོ། །དེ་ནས་སྔགས་གྲུབ་ཅིང་མཚན་མ་མང་པོ་ཐོབ་ནས། དེ་ཁོ་ན་ཉིད་གསུམ་ལ་མཆོད་པ་བྱས་ལ། རང་གི་སྔགས་མར་མེ་མཛད་བཟང་
པོས་བཤད་པའི་དཀྱིལ་འཁོར་ལ་གནས་པའི་ཆོ་གས་རྒྱུད་ལས་བཤད་པའི་མངོན་པར་འདོད་པའི་དངོས་གྲུབ་རྣམས་བསྒྲུབ་པར་བྱའོ། །བགེགས་ཉེ་བར་ཞི་བའི་དོན་དུ་ནི་བདུད་རྩི་ཐབ་སྦྱོར་གྱི་སྦྱོར་བའི་བདག་ཉིད་ཅན་གྱི་འཁོར་ལོར་གནས་ཤིང་འོད་ཟེར་སྤྲོ་བ་སྔོན་དུ་འགྲོ་བས། ཆོས་ཐམས་ཅད་
ནམ་མཁའ་དང་འདྲ་བར་རང་བཞིན་གྱིས་འོད་གསལ་བར་ལྷག་པར་མོས་ལ། ཇི་ལྟ་བ་བཞིན་དུ་དབང་བསྐུར་བ་བླང་བར་བྱ་སྟེ། གདུག་པའི་དགྲ་ནི་རྗེས་དྲན་བྱ། །ཞེས་བཤད་པ་ཡིན་ནོ། །གང་ཞིག་དབུས་ན་གནས་གྱུར་པ། །འཁོར་ལོ་དེ་ཡི་ཡིན་པར་འགྱུར། །དེ་བཞིན་གཤེགས་པར་བདག་
གྱུར་ན། །དེ་ཡི་གནས་སུ་མི་བསྐྱོད་བཞུགས། །གཞན་བདག་རང་བདག་གནས་སུ་སྟེ། །རང་ཉིད་ལ་ནི་རང་བདག་པོ། །འབྱིན་པ་སྔོན་འགྲོ་བྱེད་པ་ནི། །བློ་དང་ལྡན་པས་གཞུག་པར་བྱ། །རྣམ་པ་ཀུན་དུ་སྔོན་པོ་ནི། །གཡོན་མིན་ཞལ་མར་གཡས་མིན་པར། །ཡེ་ཤེས་ཞལ་སྔའི་རྗེས་འབྲང་
ནས། །གསང་འདུས་ལས་ནི་ཤེས་པར་བྱ། །དེ་ལྟར་བྱང་ཕྱོགས་ལམ་པའི་མཁས་པའི་ཞབས་བསྟེན་ནས། །ཡང་དག་ཐོབ་པ་དེ་ཉིད་བརྗེད་པས་འདིར་འཇིགས་ཏེ། །ངོ་ཚ་སྤངས་ནས་གསལ་བྱས་ང་རྒྱལ་གྱིས་མ་ཡིན། །དེས་འདིར་བློ་བཟངས་རིགས་ཚུལ་ཅན་གྱིས་བཟོད་པར་མཛོད། །
ཡེ་ཤེས་དམ་པའི་གཞུང་ལུགས་རང་གི་ཤེས་རབ་ཀྱིས། །ཅུང་ཟད་གསལ་བཤད་དགེ་བ་མཆོག་གྱུར་གང་བསགས་པ། །དེས་ནི་འགྲོ་ཀུན་གཉིས་མེད་ཟླ་བ་ལས་བྱུང་བའི། །འོད་ཟེར་བཟང་པོས་མུན་གསལ་ཐུགས་ཀྱི་མགོན་ཐོབ་ཤོག །དཔལ་ལྡན་མི་བསྐྱོད་རྡོ་རྗེ་སྒྲུབ་པའི་
ཐབས། སློབ་དཔོན་དཔལ་རིན་ཆེན་རྡོ་རྗེས་མཛད་པ་རྫོགས་སོ།།      །།རྒྱ་གར་གྱི་མཁན་པོ་པདྨ་ཀ་ར་ཝརྨ་དང་། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།༄༅༅། །རྒྱ་གར་སྐད་དུ། སཾ་ཀྵིཔྟ་སུ་བོ་དྷཾ་ཤྲཱི་

44-1-163a

ས་མཱ་ཛ་སཱ་དྷ་ནཾ་ནཱ་མ། བོད་སྐད་དུ། དཔལ་གསང་བ་འདུས་པ་རྟོགས་སླ་ཞིང་མདོར་བསྡུས་པའི་སྒྲུབ་ཐབས་ཞེས་བྱ་བ། དཔལ་འཇམ་པའི་དབྱངས་ལ་ཕྱག་འཚལ་ལོ། །འདས་དང་མ་བྱོན་ད་ལྟར་གྱི། །རྫོགས་སངས་རྒྱས་ཀྱི་ཡེ་ཤེས་སྐུ། །སྙིང་རྗེས་
འཁོར་བའི་སྲིད་གནས་པའི། །འཇམ་དཔལ་ལ་ནི་ཕྱག་འཚལ་ལོ། །འདིར་བསྒོམ་པ་ལ་དབང་བའི་སྔགས་པས་ནང་པར་སྔར་མཱ་མ་ཀཱི་ལ་སོགས་པའི་གླུ་ཡིས་བསྐུལ་བས་སད་པར་ལྷག་པར་མོས་པས་སྟན་ལས་ལངས་ཏེ། རང་གི་སྙིང་གའི་ཟླ་བ་ལ་སངས་རྒྱས་ཐམས་ཅད་ཀྱི་
ཡོན་ཏན་གྱི་ས་བོན་དུ་གྱུར་པ་གུར་གུམ་བཟང་པོ་ལྟ་བུ་ཅུང་ཞིག་དམར་བའི་མཾ་གྱི་ཡི་གེ་བལྟས་ནས། གདོང་དག་པ་ལ་སོགས་པ་བྱས་ཏེ། དེའི་རྗེས་ལ་ཡིད་དང་རྗེས་སུ་མཐུན་པའི་ས་ཕྱོགས་གང་ཞིག་ཏུ། ཉི་མ་དང་། ཟླ་བ་དང་། ཆུ་དང་། སྨན་དང་། དྲི་རྣམས་ཀྱིས་མཎྜལ་གྲུ་བཞི་བྱས་
ལ།མེ་ཏོག་སྣ་ཚོགས་པ་གཅལ་དུ་དགྲམ་མོ། །མེད་ན་ཐམས་ཅད་ཡིད་ཀྱིས་བྱས་ནས་དེ་ལ་ཇི་ལྟར་རྙེད་པའི་སྟན་བདེ་བ་ལ་ཉེ་བར་གནས་ནས། སྙིང་རྗེ་དང་བྱམས་པ་དང་བཏང་སྙོམས་རྣམས་ཇི་སྐད་དུ་གང་གསུངས་པའི་རང་བཞིན་མངོན་དུ་བྱས་ནས་སྙིང་རྗེའི་འོད་ཟེར་གྱིས་རེག་པས་བྱོན་
པའི་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་དཀྱིལ་འཁོར་གྱི་འཁོར་ལོའི་བདག་ཉིད་ཅན་ནམ། ནམ་མཁའི་ངོས་ཐམས་ཅད་ཁྱབ་པར་བལྟས་ནས། ས་བོན་དེའི་འོད་ཟེར་ལས་བྱུང་བའི་གཟུགས་རྡོ་རྗེ་མ་ལ་སོགས་པའི་ལྷ་མོ་དགུ་ཡིས་མཆོད་པའི་ཡོ་བྱད་སྣ་ཚོགས་
པས་མཆོད་དེ། སྡིག་པ་བཤགས་ཤིང་སླར་ཡང་བསྡམ་པར་བྱའོ། །བསོད་ནམས་ཐམས་ཅད་ལ་རྗེས་སུ་ཡི་རང་བ་དང་། འཁོར་བ་ཇི་སྲིད་པར་སངས་རྒྱས་ཐམས་ཅད་ཆོས་ཀྱི་འཁོར་ལོ་བསྐོར་བར་བསྐུལ་བ་དང་། དཀོན་མཆོག་གསུམ་ལ་སྐྱབས་སུ་མཆི་བ་དང་། བྱང་ཆུབ་ཏུ་སེམས་
བསྐྱེད་པ་དང་དཀྱིལ་འཁོར་གྱི་འཁོར་ལོའི་རང་བཞིན་གྱིས་ལམ་ལ་བརྟེན་པ་དང་། མཆོད་པ་ལ་སོགས་པ་ལས་བྱུང་བའི་བསོད་ནམས་ཀྱི་ཚོགས་འཁོར་གསུམ་མི་དམིགས་པས་དཔལ་འཇམ་པའི་རྡོ་རྗེ་ཉིད་དུ་ཡོངས་སུ་བསྔོ་བར་བྱའོ། །དེའི་རྗེས་ལ་གཟུང་བ་དང་འཛིན་པ་ལ་སོགས་

44-1-163b

པའི་རང་བཞིན་དང་བྲལ་བས་སྟོང་པའོ། །དོན་དམ་པའི་རྒྱུ་དང་འབྲས་བུའི་བདག་ཉིད་དངོས་པོ་དང་བྲལ་བས་ན་མཚན་མ་མེད་པའོ། །དངོས་སུ་ན་ཆོས་ཐམས་ཅད་རྣམ་པར་མི་རྟོག་པ་ཉིད་ཀྱི་ཕྱིར་འགྲོ་བ་མ་ལུས་པ་ལ་སྨོན་པ་མེད་པའོ། །རྣམ་པར་ཐར་པའི་སྒོ་གསུམ་གྱི་ངོ་བོ་དམ་པའི་འཇུག་
པ་བྱང་ཆུབ་ཀྱི་སེམས་བསྐྱེད་ནས། ཨོཾ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བས་བརྟན་པར་བྱའོ། །དེ་ནས་སེམས་དེ་ཉིད་སྟོང་པ་ཉིད་ཨཾ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་རོ། །དེའི་སྟེང་དུ་ཧཱུྃ་ལས་སྐྱེས་པའི་རྡོ་རྗེ་རྩེ་ལྔ་པའི་ལྟེ་བར་ཡི་གེ་ཧཱུྃ་སྔོན་པོ་མགོ་གྱེན་དུ་བལྟས་
པའི་ལྟེ་བར་ཧཱུྃ་གིས་བྱིན་གྱིས་བརླབས་པ་བསྒོམས་ཏེ། དེ་ལས་འཕྲོས་པའི་རྡོ་རྗེ་ནས་ཀྱི་ཚད་ཙམ་རྣམས་ཀྱི་རྡོ་རྗེའི་རང་བཞིན་གྱི་ས་གཞིའོ། །དེའི་རང་བཞིན་གྱི་ར་བ་དང་གུར་ཡང་བསམ་པར་བྱའོ། །དེའི་ཕྱི་རོལ་ཀུན་དུ་རཾ་ལས་བྱུང་བའི་གྲུ་གསུམ་དམར་པོ་མེའི་དཀྱིལ་འཁོར་
རཾ་གྱིས་མཚན་པས་ཕྱོགས་བཅིང་བར་བྱའོ། །དེའི་ནང་དུ་ལཾ་སེར་པོ་ཡོངས་སུ་གྱུར་པ་ལས་ཟུར་བཞི་རྡོ་རྗེ་རྩེ་གསུམ་པས་མཚན་པའི་ཟུར་བཞི་པ་སེར་པོ་སའི་དཀྱིལ་འཁོར་གྱིས་མཚམས་བཅིང་ངོ་། །བཾ་དཀར་པོ་ལས་བྱུང་ཞིང་དབུས་སུ་བུམ་པས་མཚན་པའི་ཆུའི་དཀྱིལ་འཁོར་
དཀར་པོ་འབར་བའི་མེའི་གཟི་བརྗིད་ལྟ་བུའི་རྡོ་རྗེའི་གུར་གཡོགས་པར་བསམ་པར་བྱའོ། །དེའི་རྗེས་ལ་ར་བ་དང་གུར་གྱི་ནང་དུ་རྡོ་རྗེའི་ས་གཞི་ལ་མ་རེག་པའི་འཁོར་ལོ་རྩིབས་བཅུ་པ་སེར་པོ་འཁོར་ལོའི་རྩིབས་ལ་གནས་པའི་མི་གཡོ་བའི་ཁྲོ་བོ་བཅུའོ། །ལྟེ་བར་རྡོ་རྗེ་ཧཱུྃ་མཛད་གནས་པས་བགེགས་
སྐྲོད་པར་བྱེད་པར་བསམ་པར་བྱའོ། །དེ་ལ་སྔར་གསུངས་པའི་ཤར་གྱི་རྩིབས་ལ་གཤིན་རྗེ་གཤེད་ཁ་དོག་ནག་པོ་ཞལ་གཡས་གཡོན་གཉིས་དཀར་བ་དང་དམར་བའོ། །འདིར་ཡང་ཐམས་ཅད་ཀྱི་ཕྱག་གཙོ་བོ་གཉིས་རིག་མ་ལ་འཁྱུད་པའོ། །ཕྱག་ལྷག་མ་རྣམས་ཀྱིས་རྡོ་རྗེ་ཐོ་བ་དང་རལ་གྲི་
སྔོ་བསངས་དང་ནོར་བུ་ཆ་དགུ་པ་ལྗང་གུ་དང་། པདྨ་དམར་པོ་འདབ་མ་བརྒྱད་པ་རྣམས་འཛིན་པའོ། །ལྷོའི་རྩིབས་ལ་ཤེས་རབ་མཐར་བྱེད་ཁ་དོག་དཀར་པོ་གཡས་པ་དང་གཡོན་པའི་ཞལ་ནི་སྔོ་བ་དང་དམར་བའོ། །རྡོ་རྗེ་ལྕགས་ཀྱུ་དང་དབྱུག་པ་དཀར་པོ་དང་སྔར་གསུངས་པའི་གཟུགས་

44-1-164a

ཅན་གྱི་རལ་གྲི་དང་ནོར་བུ་འཛིན་པའོ། །ནུབ་ཕྱོགས་ཀྱི་རྩིབས་ལ་པདྨ་མཐར་བྱེད་དམར་པོ། གཡས་དང་གཡོན་པའི་ཞལ་ནི་སྔོ་བ་དང་དཀར་བའོ། །པདྨ་དང་རལ་གྲི་དང་ནོར་བུ་དང་འཁོར་ལོ་རྩིབས་བརྒྱད་པ་འཛིན་པའོ། །བྱང་གི་ཕྱོགས་ཀྱི་རྩིབས་ལ་བགེགས་མཐར་བྱེད་
གཤིན་རྗེ་གཤེད་ལྟ་བུའོ། །ཁྲོ་བོའི་རྡོ་རྗེ་དང་རལ་གྲི་དང་ནོར་བུ་དང་པདྨ་འཛིན་པའོ། །མེའི་མཚམས་ཀྱི་རྩིབས་ལ་འདོད་པའི་རྒྱལ་པོ་ཡང་ཞལ་གཉིས་ཁ་དོག་དེ་དང་མཚུངས་པ་སྟེ། འོན་ཀྱང་རོལ་པའི་ཁྲོ་བོའོ། །ལྕགས་ཀྱུ་དང་རལ་གྲི་དང་ནོར་བུ་དང་པདྨ་འཛིན་པའོ། །བདེན་བྲལ་གྱི་རྩིབས་ལ་
དབྱུག་པ་སྔོན་པོ་གཤིན་རྗེ་གཤེད་དང་འདྲ་བ་སྟེ། དབྱུག་པ་སྔོན་པོ་དང་རལ་གྲི་དང་ནོར་བུ་དང་པདྨ་འཛིན་པའོ། །རླུང་གི་མཚམས་ཀྱི་རྩིབས་ལ་སྟོབས་པོ་ཆེ་དང་མཚུངས་པ་སྟེ། རྩེ་གསུམ་དང་རལ་གྲི་དང་ནོར་བུ་དང་པདྨ་འཛིན་པའོ། །འདི་རྣམས་ལས་འདོད་པའི་རྒྱལ་པོ་མ་གཏོགས་པ་གཤིན་རྗེ་
གཤེད་ལ་སོགས་པ་དྲུག་ནི་གཙིགས་པའི་ཁྲོ་བོ་སྟེ་འཇིགས་པའི་རྣམ་པར་སྨིན་མ་གཡོ་ཞིང་ཁྲོ་གཉེར་དང་བཅས་པའི་ཀླུ་མཐའ་ཡས་སྔོན་པོས་གྱེན་དུ་བརྫེས་པའི་སྐྲ་སེར་པོ་བཅིངས་པའོ། །འཇོག་པོ་དཀར་པོས་རྣ་རྒྱན་བྱས་པའོ། །པདྨ་དཀར་པོས་དོ་ཤལ་བྱས་པ། ཀརྐོ་ཊ་ལྗང་གུས་སེ་རལ་
ཁར་བྱས་པ། རིགས་ལྡན་ཁྲོ་བོས་དཔུང་རྒྱན་བྱས་པ། དུང་སྐྱོང་སེར་པོས་གདུ་བུ་བྱས་པ། ནོར་རྒྱས་དཀར་པོས་སྐེ་རགས་བྱས་པ། པདྨ་དཀར་པོས་རྐང་གདུབ་བྱས་པ། སྤྱན་རྩ་དམར་ཞིང་ཟླུམ་ལ་འཁྱིལ་བ། སྨ་ར་སེར་ཞིང་ཞལ་གདངས་པ་ལྗགས་འདྲིལ་ཞིང་མཆེ་བ་གཙིགས་པ། 
གད་མོ་ཆེན་མོ་ཅན་ཚད་ཐུང་ཞིང་གསུས་པ་འཕྱང་བ་དབང་ལྡན་གྱི་མཚམས་ཀྱི་རྩིབས་ལ་མི་གཡོ་བ་འདོད་པའི་རྒྱལ་པོ་དང་མཚུངས་པ་རལ་གྲི་དང་རྡོ་རྗེ་དང་ནོར་བུ་དང་པདྨ་འཛིན་པའོ། །སྟེང་དུ་གཙུག་ཏོར་འཁོར་ལོས་སྒྱུར་བ་ཁ་དོག་སེར་པོ་གཡས་པ་དང་གཡོན་པའི་ཞལ་ནི་སྔོ་བ་དང་དཀར་བ་སྟེ། འཁོར་
ལོ་སེར་པོ་དང་རལ་གྲི་དང་ནོར་བུ་དང་པདྨ་འཛིན་པའོ། །འཁོར་ལོ་འབར་བས་ཡོངས་སུ་བསྐོར་བའོ། །འོག་ཏུ་གནོད་མཛེས་འདོད་པའི་རྒྱལ་པོ་ལྟ་བུ་སྟེ། རྡོ་རྗེ་དང་རལ་གྲི་དང་ནོར་བུ་དང་པདྨ་འཛིན་པའོ། །འཁོར་ལོའི་ལྟེ་བ་ལ་དེ་དང་མཚུངས་པའི་ཧཱུྃ་མཛད་རྡོ་རྗེ་དང་རལ་གྲི་དང་ལྕགས་ཀྱུ་དང་ཞགས་པ་

44-1-164b

འཛིན་པ་སྟེ། གཡོན་ངོས་སུ་དབང་ཕྱུག་ཆེན་པོ་ནི་གན་རྐྱལ་དུ་བསྒྱེལ་བའི་རྣ་བ་གཡོན་པ་ཞབས་གཡས་པས་མནན་པ། གཡས་ངོས་སུ་དེ་བཞིན་དུ་བསྒྱེལ་བའི་གཽ་རཱིའི་ནུ་མ་ཞབས་གཡོན་གྱིས་མནན་པའོ། །འདི་རྣམས་ཀྱང་འདོད་པའི་རྒྱལ་པོ་ལ་སོགས་ལྔ་ནི། རོལ་པའི་ཁྲོ་བོ་སྟེ་ཅུང་ཞིག་
མཆེ་བ་གཙིགས་པར་སྣང་བ། སྨ་ར་མེད་ཅིང་རིན་པོ་ཆེའི་ཅོད་པན་ཅན་རིན་པོ་ཆེ་སྣ་ཚོགས་ཀྱིས་ཀྱང་བརྒྱན་པ་གཤིན་རྗེ་གཤེད་ལ་སོགས་པ་འདི་རྣམས་ཐམས་ཅད་ཀྱང་པདྨ་དང་ཉི་མ་ལ་ཞབས་གཡས་པ་བསྐུམ་ཞིང་ཞབས་གཡོན་བརྐྱང་བས་གནས་པ། ཟླ་བའི་འོད་ཀྱི་དཀྱིལ་འཁོར་ཅན་ཁ་དོག་
དང་མཚུངས་པའི་ཞལ་དང་པོས་བཙུན་མོའི་མཆུ་འཇིབ་པ་སྡུག་བསྔལ་དང་། ཀུན་འབྱུང་དང་། འགོག་པ་དང་། ལམ་དང་། ཟད་པ་དང་། མི་སྐྱེ་བ་དང་། ཆོས་དང་། རྗེས་སུ་ཤེས་པ་དང་། ཀུན་རྫོབ་དང་ཡོངས་སུ་རྒྱལ་བ་ཤེས་པ་རྣམ་པར་དག་པའོ། །ཡང་རྡོ་རྗེ་ཧཱུྃ་མཛད་ནི་ཡེ་ཤེས་བཅུ་པོ་
འདི་རྣམས་རྣམ་པར་དག་པ་སྒྲ་ཇི་བཞིན་པའི་ཡེ་ཤེས་ཀྱི་རང་བཞིན་ནོ། །དེ་ནས་རྡོ་རྗེ་སེམས་དཔའི་གཟུགས་ཅན་གྱི་རང་བཞིན་རྡོ་རྗེ་ཧཱུྃ་མཛད་ཡོངས་སུ་གྱུར་པ་ལས། སྟེང་ཡངས་ཤིང་འོག་ཕྲ་བ་སྐུ་དང་གསུང་དང་ཐུགས་རྣམ་པར་དག་པའི་གྲུ་གསུམ་པ་ནམ་མཁའི་རང་བཞིན་གྱི་དབུས་ན་གནས་པའི་སྣ་
ཚོགས་པདྨ་ལ་གནས་པའི་སྣ་ཚོགས་རྡོ་རྗེ་ཅན་སངས་རྒྱས་ཀྱི་ཚོགས་ཀྱི་འོད་ཟེར་འཕྲོ་བ། རི་བོང་ཅན་ལྟར་དཀར་བའི་ཆོས་འབྱུང་གི་ཕྱག་རྒྱ་བསྒོམ་པར་བྱའོ། །དེ་ལ་སྣ་ཚོགས་རྡོ་རྗེའི་ལྟེ་བར་བྲུཾ་དཀར་པོ་ཡོངས་སུ་གྱུར་པ་ལས་རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་རྣམ་པར་དག་པའི་
རྩིབས་བཅུ་གཉིས་པའི་འཁོར་ལོའི་ལྟེ་བ་ལ་ཟླ་བ་ལ་གནས་པའི་བྲུཾ་ལས་དེ་བཞིན་གཤེགས་པ་སྤྲོ་བ་ལ་སོགས་པ་སྔོན་དུ་འགྲོ་བས་འཁོར་ལོ་ལ་སོགས་པ་ཡོངས་སུ་གྱུར་པ་ལས་རིག་མ་དང་བཅས་པའི་རྣམ་པར་སྣང་མཛད་ལས་བྱུང་བའི་གཞལ་ཡས་ཁང་གྲུ་བཞི་པ་སྒོ་བཞི་པ། རྟ་བབས་
བཞིས་བརྒྱན་པ་རིན་པོ་ཆེ་ལྔའི་རང་བཞིན་གྱི་རྩིབས་ཅན་ཇི་ལྟར་གནས་པའི་དེ་བཞིན་གཤེགས་པའི་ཁ་དོག་དང་རྗེས་སུ་མཐུན་པའི་ས་གཞི་དང་སྟེང་གཡོགས་ཤེལ་དག་པ་ཇི་ལྟ་བུའི་མཆོད་རྟེན་གྱིས་ཉེ་བར་བརྒྱན་པ། སྟེང་རྡོ་རྗེ་ཕྲེང་བས་ཡོངས་སུ་བསྐོར་བ་འཁོར་ལོ་ལ་སོགས་པས་མཚན་པའི་དཀར་པོ་

44-1-165a

དང་སེར་པོ་ལ་སོགས་པའི་ཀ་བ་བརྒྱད་ཀྱིས་ཉེ་བར་བརྒྱན་པ་མཆོད་པའི་ལྷ་མོ་དང་ལྡན་པའི་ཁྱམས་བཞིས་ཡོངས་སུ་བསྐོར་བའི་རྩིག་པ་ལ་སོགས་པར་རབ་ཏུ་འཕྱང་བའི་དྲ་བ་དང་དྲ་བ་ཕྱེད་པ་དང་། མེ་ལོང་དང་ཟླ་བ་དང་ཉི་མ་དང་རྔ་ཡབ་དང་། ཕྲེང་བ་དང་བ་དན་རླུང་གིས་
བསྐྱོད་པས་གཡེར་ཀའི་སྒྲ་ཕྱོགས་ཀྱི་སྒོ་རྣམས་སུ་སྒྲོགས་པ་དང་ལྡན་པ་འདོད་པའི་ཡོན་ཏན་དང་རབ་ཏུ་ལྡན་པའི་མཆོད་པའི་ཡོ་བྱད་ལྔས་བརྒྱན་པའི་སྙིང་པོ་གཅིག་པ་ཡུ་བ་དང་བཅས་པ་སྣ་ཚོགས་པདྨ་བཅུ་དགུ་ལ་གནས་པའི་ཉི་མ་བདུན་དང་ཟླ་བ་བཅུ་གཉིས་ཀྱི་གདན་གནས་ཇི་ལྟ་བར་གནས་པ་
དང་ལྡན་པ་བུམ་པ་གང་བ་བརྒྱད་དང་། ཐུབ་པའི་ཚོགས་དཔག་ཏུ་མེད་པ་འཕྲོ་བ་དང་ལྡན་པ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་རྣམ་པར་དག་པའི་འོད་ཟེར་འཕྲོ་བ་དང་ལྡན་པ་དེ་བཞིན་གཤེགས་པ་ཐམས་ཅད་ཀྱི་ཡོན་ཏན་རིན་པོ་ཆེའི་ཕུང་པོ་གཞལ་ཡས་ཁང་བསམ་པར་བྱའོ། །དེའི་
དབུས་ཀྱི་གདན་ལ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་རྫོགས་པར་བྱེད་པའི་དབྱངས་ཀྱི་ཡི་གེ་སུམ་ཅུ་རྩ་གཉིས་ལུགས་ལས་འབྱུང་བ་དང་བཟློག་པ་ལས་ཕྲེང་གཉིས་ཡོངས་སུ་གྱུར་པ་ལས། བླ་ན་མེད་པའི་ཤེས་རབ་ཀྱི་རང་བཞིན་ཟླ་བ་རྣམ་པར་བསམས་ནས། དེའི་སྟེང་དུ་སོ་དང་
མཆུ་ལས་བྱུང་བའི་བ་དང་ཀྵ་ཡོངས་སུ་སྤངས་ཏེ། དཔེ་བྱད་བཟང་པོ་བརྒྱད་ཅུ་ཡོངས་སུ་རྫོགས་པར་བྱེད་པའི་ཀ་ལ་སོགས་པ་ཉིས་འགྱུར་གསལ་བྱེད་སུམ་ཅུ་རྩ་བཞི་ཕྲེང་གཉིས་ཀྱི་དབུས་སུ་གནས་པ། དབྱངས་ཀྱི་ཡི་གེ་བཅུ་དྲུག་ཡོངས་སུ་རྫོགས་པས་ཡི་གེ་བརྒྱད་ཅུ་ལས་བྱུང་བའི་སྙིང་རྗེ་ཆེན་
པོའི་རང་བཞིན་གྱི་ཟླ་བའི་དཀྱིལ་འཁོར་གཞན་བསམ་པར་བྱའོ། །འདི་གཉིས་ཀྱང་ཕན་ཚུན་སོ་སོར་སྣང་བས་མེ་ལོང་ལྟ་བུའི་ཡེ་ཤེས་སོ། །གཅིག་ཏུ་གྱུར་པ་ནི་མཉམ་པ་ཉིད་ཀྱི་ཡེ་ཤེས་སོ། །དེའི་སྟེང་དུ་ཧཱུྃ་དཀར་པོ་ལས་སྐྱེས་པའི་རྡོ་རྗེ་རྩེ་ལྔ་པ་པདྨ་རཱ་ག་ལྟར་དམར་བ་དང་། དེའི་ལྟེ་བའི་ཟླ་བ་
ལ་གནས་པའི་ཡི་གེ་ཧཱུྃ་བརྗོད་པར་བྱ་བ་དང་རྗོད་པར་བྱེད་པའི་དངོས་པོ་ལས་འདས་པའི་ཡེ་ཤེས་ཀྱི་རང་བཞིན་བསམ་མོ། །དེ་ནས་ཡེ་ཤེས་དེ་དེ་བཞིན་གཤེགས་པ་སྤྲོས་པ་ལ་སོགས་པའི་རྗེས་ལ། ཨོཾ་བཛྲ་ཨཱཏྨ་ཀོ྅ཧཾ། ཞེས་ང་རྒྱལ་བྱ་བ་ནི་བྱ་བ་ནན་ཏན་གྱི་ཡེ་ཤེས་ཀྱི་རང་བཞིན་དུ་བྱས་ནས་སྐད་ཅིག་གིས་

44-1-165b

ཟླ་བ་དང་ཕྱག་མཚན་དང་ས་བོན་ཡོངས་སུ་གྱུར་པ་ལས་རྣམ་པར་ཐར་པའི་སྒོ་གསུམ་ཡོངས་སུ་དག་པའི་ཞལ་གསུམ་པ་སྟེ། ལུས་དང་རྩ་བའི་ཞལ་ནི་དཀར་པོ། གཡས་པ་དང་གཡོན་པའི་ཞལ་ནི་སྔོན་པོ་དང་དམར་པོའོ། །ཕ་རོལ་ཕྱིན་པ་དྲུག་གི་རང་བཞིན་ནི་ཕྱག་དྲུག་གོ། །རྒྱན་སྣ་ཚོགས་ཀྱིས་
བརྒྱན་པ་ཕྱག་གཙོ་བོ་གཉིས་ཀྱིས་རང་དང་འདྲ་བའི་རིག་མ་ལ་འཁྱུད་ཅིང་ཞལ་གྱི་རོ་མྱང་བ་ལ་དགྱེས་པ་ལྷག་མ་བཞིས་རྡོ་རྗེ་དམར་པོ་དང་། རལ་གྲི་དང་ནོར་བུ་དང་པདྨ་འཛིན་པ་མི་བསྐྱོད་པའི་ཅོད་པན་ཅན། རྡོ་རྗེའི་སྐྱིལ་མོ་ཀྲུང་གིས་གནས་ལ་ཤེས་རབ་དང་ཐབས་ཀྱི་རང་བཞིན་ཆོས་ཀྱི་དབྱིངས་
རྣམ་པར་དག་པའི་རང་བཞིན་གྱི་ངོ་བོ་ཉིད་དཔལ་རྡོ་རྗེ་སེམས་དཔའ་དེའི་རང་བཞིན་ལས་གྲུབ་པར་བདག་ཉིད་བསྒོམ་པར་བྱའོ་ཞེས་པ་ནི་མངོན་པར་བྱང་ཆུབ་པ་རྣམ་པ་ལྔའོ། །དེ་ནས་རྗེས་སུ་ཆགས་པས་འདུལ་བའི་སྐྱེ་བོ་རྗེས་སུ་གཟུང་བའི་ཕྱིར། སྒྱུ་མའི་བདེ་བའི་སྲས་སངས་རྒྱས་ཀྱི་ཚོགས་
བདག་ཉིད་ཀྱི་ལུས་ལ་བཅུག་པས་བདག་ཉིད་རྒྱས་པའི་ལྷ་མོས་མཉེས་པར་བྱས་ནས། ཡང་དེས་སྤྱན་མ་ལ་སོགས་པའི་ལྷ་མོ་དེ་ཕྱུང་བས་རང་དང་མཚུངས་པའི་ནང་དུ་བསྒོམས་ནས། བདག་ཉིད་མཉེས་ཤིང་གཉི་གའི་རྗེས་སུ་ཆགས་པར་བྱས་ནས། དེ་བཞིན་དུ་དཀྱིལ་འཁོར་གྱི་འཁོར་ལོའི་
དེ་བཞིན་གཤེགས་པ་རྣམས་བདག་ཉིད་ཀྱི་ལུས་ལ་ཞུགས་ཏེ། སྙིང་རྗེའི་ས་བོན་གྱི་འོད་ཟེར་གྱིས་རེག་པས་ཟླ་བ་གཞན་པའི་གཟུགས་སུ་གྱུར་ནས། རང་གི་རྡོ་རྗེའི་ལམ་ནས་རིག་མའི་པདྨར་ལྷུང་བར་བལྟས་ཏེ། སྐད་ཅིག་དེ་ཡོངས་སུ་གྱུར་པ་ལས་མི་བསྐྱོད་པས་གཙོ་བྱས་པའི་རྟེན་དང་བརྟེན་
པའི་དཀྱིལ་འཁོར་བསམས་ཏེ། བློ་ཡིས་སྐྱེ་བོའི་ཚོགས་དབུགས་དབྱུང་བའི་ཕྱིར་དེར་གཞུག་པར་བྱའོ། །དེའི་རྗེས་ལ་སྙིང་རྗེའི་ས་བོན་ལས་འོད་ཟེར་གྱིས་བཀུག་པའི་དེ་བཞིན་གཤེགས་པ་རྣམས་ཞལ་དུ་ཞུ་བས་དེ་རྣམས་དབང་བསྐུར་བར་བྱའོ། །དེའི་རྗེས་ལ་དེའི་མཐུས་དེ་རྣམས་སའི་
སྙིང་པོ་ལ་སོགས་པའི་དཀྱིལ་འཁོར་གྱི་འཁོར་ལོའི་བདག་ཉིད་རྫོགས་པར་བལྟས་ནས། ཀྵཾ་ཛྲཱིཾ་ཁཾ་གཾ་ཥྐཾ་སཾ་གི་ས་བོན་རྣམས་ཀྱི་རིམ་པས་སའི་སྙིང་པོ་ཕྱག་ན་རྡོ་རྗེ་ནམ་མཁའི་སྙིང་པོ་འཇིག་རྟེན་དབང་ཕྱུག་སྒྲིབ་པ་རྣམ་པར་སེལ་བ་ཀུན་དུ་བཟང་པོ་རྣམས་སོ། །ཛཿཧཱུྃ་བཾ་ཧོཿ ཁཾ་རཾ་གྱི་ས་བོན་རྣམས་ཀྱིས།

44-1-166a

གཟུགས་སྒྲ་དྲི་རོ་རེག་བྱ་ཆོས་ཀྱི་དབྱིངས་ཀྱི་རྡོ་རྗེ་མ་རྣམས་སོ། །ལཾ་མཱཾ་པཾ་ཏཱཾ་གི་ས་བོན་རྣམས་ཀྱིས་སྤྱན་མ་མཱ་མ་ཀཱི་གོས་དཀར་མོ་སྒྲོལ་མ་རྣམས་སོ། །བྲུཾ་ཨཱཾ་ཛྲཱིཾ་ཁཾ་ཧཱུྃ་ཞེས་བྱ་བས་རྣམ་པར་སྣང་མཛད་རིན་ཆེན་འབྱུང་ལྡན་འོད་དཔག་ཏུ་མེད་པ་དོན་ཡོད་གྲུབ་པ་མི་བསྐྱོད་
པ་རྣམས་བཏོན་ནས་ཐམས་ཅད་དེ་དང་དེའི་དོན་བྱེད་པར་དམིགས་ནས། དེ་ཉིད་གསུམ་གྱི་ས་བོན་བཏོན་པའི་གསང་བའི་དཀྱིལ་འཁོར་དངོས་པོ་ཐམས་ཅད་ཀྱི་བདག་ཉིད་ཀྱི་གཞལ་ཡས་ཁང་ལ་ཞུགས་པར་བསམ་མོ། །དེའི་རྗེས་ལ་དཀྱིལ་འཁོར་དང་བཅས་པའི་འཇམ་པའི་རྡོ་རྗེ་དྲི་ཟའི་
སེམས་ཅན་གྱི་གཟུགས་ཅན་འདོད་ཆགས་ཆེན་པོའི་བདག་ཉིད་ཀྱི་ཞལ་དུ་ཞུགས་ནས་སྙིང་གར་ཞུ་སྟེ་རྡོ་རྗེ་ནས་བཏོན་ནས། རང་དང་མཚུངས་པའི་རིག་མའི་པདྨའི་ནང་དུ་ལྷུང་བས་དམར་ཞིང་འབར་བའི་ཁྲོ་བོ་གཉིས་ཀྱིས་བརྟེན་པའི་ཨོཾ་ཨཱཿཧཱུྃ་ཞེས་བྱ་བའི་ཡི་གེ་གསུམ་གྱི་རང་བཞིན་དུ་བལྟས་
ནས་འདོད་ཆགས་ཀྱི་མེས་བཞུ་སྟེ། དེ་དང་རེག་པས་བདག་ཉིད་དང་རིག་མ་དང་བཅས་པ་ཟླ་བའི་དཀྱིལ་འཁོར་གྱི་སྟེང་དུ། དབང་པོའི་གཞུ་དང་མཚུངས་པའི་བྱང་ཆུབ་ཀྱི་སེམས་ཀྱི་ཟླ་བའི་དཀྱིལ་འཁོར་རྣམ་པར་བལྟ་བར་བྱའོ། །དེ་ནས་དེའི་འོད་ཟེར་གྱིས་བསྐུལ་བའི་དེ་བཞིན་གཤེགས་
པའི་འོད་ཟེར་ལས་བྱུང་བར་གྱུར་པའི་ཡུན་རིང་དུ་གོམས་པར་བྱས་པའི་མི་དམིགས་པའི་སྙིང་རྗེ་ཆེན་པོ་དང་། བྱམས་པ་ལ་སོགས་པའི་རང་བཞིན་གྱི་མཱ་མ་ཀཱི་དང་སྤྱན་མ་དང་གོས་དཀར་མོ་དང་སྒྲོལ་མ་རྣམས་རང་རང་གི་གནས་ནས་གནས་པས་འདི་ལྟར་བསྐུལ་བར་བསམ་མོ། །སེམས་ཅན་
ཁམས་ན་གནས་པའི་དབང་ཕྱུག་ཁྱོད་ནི་རྡོ་རྗེ་ཐུགས། །དགའ་བའི་ཡིད་འོང་དོན་ཆེན་འདོད་པས་བདག་ལ་བསྐྱབ་ཏུ་གསོལ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །སེམས་ཅན་ཡབ་ཆེན་གཉེན་མཆོག་བདག་ལ་དགྱེས་པར་མཛད་དུ་གསོལ། །རྡོ་རྗེའི་
སྐུ་ཁྱོད་བཀའ་ཡི་འཁོར་ལོ་སེམས་ཅན་ཀུན་ལ་ཕན། །སངས་རྒྱས་དོན་དུ་བྱང་ཆུབ་མཆོག་ཏུ་རབ་ཏུ་ཕན་པར་གཟིགས། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །འདོད་ཆགས་དམ་ཚིག་ཆགས་པས་བདག་ལ་དགྱེས་པར་མཛད་དུ་གསོལ། །ཁྱོད་ནི་རྡོ་རྗེའི་

44-1-166b

གསུང་སྟེ་ཀུན་ལ་ཕན་ཞིང་ཐུགས་བརྩེ་བ། །སེམས་ཅན་འཇིག་རྟེན་དག་ནི་དོན་མཛད་པ་ལ་རྟག་ཏུ་བརྩོན། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །སྤྱོད་པ་དྲི་མེད་ཀུན་དུ་བཟང་པོ་བདག་ལ་དགྱེས་པར་མཛད་དུ་གསོལ། །ཁྱོད་ནི་རྡོ་རྗེ་འདོད་པས་དམ་ཚིག་
མཆོག་གི་ཕན་དོན་ཆེ། །ཡང་དག་རྫོགས་སངས་རྒྱས་ཀྱི་གདུང་མཆོག་མཉམ་པ་ཉིད་གཟིགས་པ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །ཡོན་ཏན་རིན་ཆེན་མང་པོའི་གཏེར་གྱུར་བདག་ལ་དགྱེས་པར་མཛོད། །ཅེས་བྱ་བའི་གླུའི་དོན་ཐོས་པས་སྒྲ་བརྙན་ལྟར་
བསམས་ནས། སྙིང་རྗེ་གཞན་གྱི་དབང་དུ་གྱུར་པས་སྟོང་པ་ཉིད་ཀྱི་ཏིང་ངེ་འཛིན་གྱི་རྒུད་པ་ལྟར་བསམས་ཏེ། འགྲོ་བ་མ་ལུས་པ་སྒྱུ་མ་ལྟ་བུར་བལྟས་ནས། ཟླ་བ་ཞུ་བ་ལས་གྱུར་པའི་འོད་ཟེར་རབ་ཏུ་འཕྲོ་བའི་མཾ་གི་ཡི་གེའི་རང་བཞིན་དུ་གྱུར་ཏེ། དེ་ནས་དེ་ཡོངས་སུ་གྱུར་པའི་རལ་གྲིའི་ཡུ་བར་
གནས་པའི་ཟླ་བ་ལ་གནས་པའི་གསལ་བའི་མཾ་གི་ཡི་གེ་ལས་འཇམ་པའི་རྡོ་རྗེར་གྱུར་ཏེ་ཕྱུང་ནས་སེམས་ཅན་གྱི་དོན་བྱས་ནས། དེ་ཉིད་དུ་ཞུགས་ཏེ་རལ་གྲི་ལ་སོགས་པ་ཡོངས་སུ་གྱུར་པ་ལས་སྐུ་མདོག་དང་ཞལ་གཙོ་བོར་གུར་གུམ་གཞོན་ནུ་ལྟར་ཡིད་དུ་འོང་ཞིང་མཛེས་པ་གཡས་དང་
གཡོན་པའི་ཞལ་ནི་སྔོ་བ་དང་དཀར་བ་སྣ་ཚོགས་པའི་རྒྱན་གྱིས་ཡིད་དུ་འོང་ཞིང་རིན་པོ་ཆེའི་རང་བཞིན་གྱི་ཅོད་པན་ཅན། ཕྱག་དང་པོ་གཉིས་ཀྱིས་རང་དང་འདྲ་བའི་རིག་མ་ལ་འཁྱུད་པ་ཕྱག་ལྷག་མ་རྣམས་ཀྱིས་རིམ་པ་ཇི་ལྟ་བ་བཞིན་དུ་རལ་གྲི་དང་མདའ་དང་ཨུཏྤལ་སྔོན་པོ་དང་གཞུ་འཛིན་པ། རྣམ་
པར་སྣང་མཛད་ལ་སོགས་པའི་སངས་རྒྱས་ཀྱི་ཚོགས་འཕྲོས་པས་ནམ་མཁའ་ཁྱབ་པ་དབུས་ཀྱི་ཟླ་བའི་གདན་ལ་རྡོ་རྗེ་སྐྱིལ་མོ་ཀྲུང་གིས་ཉེ་བར་གནས་པའི་འཇམ་པའི་རྡོ་རྗེར་བདག་ཉིད་བསྒོམ་པར་བྱའོ། །དེའི་རྗེས་ལ་ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པས་བདག་ཉིད་ཆོས་ཀྱི་དབྱིངས་
ཀྱི་རང་བཞིན་མངོན་དུ་བྱས་ཏེ། བྱིན་གྱིས་བརླབས་པ་ནི་ཆུང་ངུའི་རྒྱུ་མཐུན་པའི་འབྲས་བུ་དང་ཆུང་ངུའི་གཉེན་པོའོ། །དེ་ནས་མིག་འབྲས་གཉིས་ཀྱི་ནང་དུ་ཟླ་བ་ལ་ཀྵིཾ་དཀར་པོ་ལས་སྐྱེས་པའི་འཁོར་ལོ་རྩིབས་བརྒྱད་པའི་ལྟེ་བའི་གནས་ན་གནས་པའི་ཀྵིཾ་གི་འོད་ཟེར་ལས་བྱུང་བའི་སའི་སྙིང་པོའི་

44-1-167a

དཀྱིལ་འཁོར་གྱིས། འགྲོ་བའི་དོན་བྱས་ནས་ས་བོན་ལ་ཞུགས་ཏེ་དེ་ཐམས་ཅད་ཡོངས་སུ་གྱུར་པ་ལས་སའི་སྙིང་པོའི་རིན་པོ་ཆེའི་ཅོད་པན་ཅན་འཆད་པར་འགྱུར་བའི་རྣམ་པར་སྣང་མཛད་དང་མཚུངས་པ། ལྷའི་མིག་གིས་མངོན་པར་ཤེས་པའི་ངོ་བོ་ཉིད་བསྒོམ་པར་བྱའོ། །
དེ་བཞིན་དུ་རྣ་བ་གཉིས་ལ་ཟླ་བའི་དཀྱིལ་འཁོར་ལ་གནས་པའི་ཛྲཱིཾ་སྔོན་པོ་ལས་བྱུང་བའི་རྡོ་རྗེ་ལ་སོགས་པ་ཡོངས་སུ་གྱུར་པ་ལས་མི་བསྐྱོད་པའི་ངོ་བོ་ཕྱག་ན་རྡོ་རྗེ་ལྟ་བུ་རྣ་བའི་མངོན་པར་ཤེས་པའི་རྣམ་པར་དག་པའོ། །སྣ་ལ་ཁཾ་སེར་པོ་དང་རིན་པོ་ཆེ་ལ་སོགས་པ་ལས་སྐྱེས་པའི་ནམ་མཁའི་
སྙིང་པོ་རིན་ཆེན་འབྱུང་ལྡན་དང་མཚུངས་པའི་གཞན་གྱི་སེམས་ཤེས་པའི་མངོན་པར་ཤེས་པའི་རང་བཞིན་ནོ། །ལྕེ་ལ་གཾ་དམར་པོ་དང་པདྨ་འདབ་མ་བརྒྱད་པ་ལ་སོགས་པ་ཡོངས་སུ་གྱུར་པ་ལས་འོད་དཔག་ཏུ་མེད་པ་དང་མཚུངས་པའི་འཇིག་རྟེན་དབང་ཕྱུག་སྔོན་གྱི་གནས་རྗེས་སུ་དྲན་པའི་
མངོན་པར་ཤེས་པའི་རང་བཞིན་ནོ། །དཔྲལ་བར་ཥྐཾ་ལྗང་གུ་ཡོངས་སུ་གྱུར་པ་ལས་དོན་ཡོད་གྲུབ་པ་ལྟ་བུའི་སྒྲིབ་པ་ཐམས་ཅད་རྣམ་པར་སེལ་བ་རྫུ་འཕྲུལ་གྱི་རྐང་པ་མངོན་པར་ཤེས་པའི་རང་བཞིན་ནོ། །ནུ་མ་གཉིས་ཀྱི་སྟེང་དུ་མགྲིན་པའི་འོག་ཏུ་སཾ་དཀར་པོ་ཡོངས་སུ་གྱུར་པ་ལས། རྡོ་རྗེ་
སེམས་དཔའ་ལྟ་བུའི་ཀུན་དུ་བཟང་པོ་ཟག་པ་ཟད་པའི་མངོན་པར་ཤེས་པའི་རང་བཞིན་ནོ། །ཡང་འདི་རྣམས་ཀྱི་སྙིང་གར་ཟླ་བ་ལ་གནས་པའི་རང་རང་གི་མཚན་མའི་དབུས་ཀྱི་ཟླ་བར་གནས་པའི་ཇི་ལྟ་བུའི་ས་བོན་རྣམས་བསྒོམ་པར་བྱའོ་ཞེས་བྱ་བ་ནི་ཀུན་མཁྱེན་པའི་རང་བཞིན་ཆུང་ངུའི་རྣམ་
པར་སྨིན་པའི་འབྲས་བུ་དང་། ཆུང་ངུའི་ཉེ་བར་སྒྲུབ་པའོ། །དེ་ནས་ནུ་མ་གཉིས་ཀྱི་འོག་རང་གི་སྙིང་གའི་ཟླ་བ་ལ་ཧཱུྃ་གིས་བསྐྱེད་པའི་རྡོ་རྗེའི་ལྟེ་བར་ཟླ་བ་ལ་གནས་པའི་ཧཱུྃ་ལས་སྐྱེས་པའི་རྡོ་རྗེ་ཕྲ་མོ་ཧཱུྃ་གིས་བྱིན་གྱིས་བརླབས་པ་བསམས་ཏེ། དེའི་འོད་ཟེར་ལས་དེ་བཞིན་གཤེགས་པ་སྤྲོ་བ་ལ་
སོགས་པ་སྔོན་དུ་འགྲོ་བ་ལས་རྡོ་རྗེ་ཕྲ་མོ་ལ་སོགས་པ་ལས་སྐྱེས་པའི་སྙིང་གའི་ཟླ་བའི་མཚན་མའི་ལྟེ་བ་ལ་ཆོས་སྐུ་རྣམ་པར་དག་པ་ཕྱག་རྒྱ་ཆེན་པོའི་ངོ་བོ་ཕྱག་ན་རྡོ་རྗེ་དང་མཚུངས་པ་དེའི་སྙིང་གར་ཡང་ཟླ་བ་ལ་གནས་པའི་རྡོ་རྗེའི་ལྟེ་བའི་ཧཱུྃ་ལས་སྤྲོས་པ་ཐུགས་རྡོ་རྗེ་དང་། གདོད་མ་ནས་གྲུབ་

44-1-167b

པའི་དེ་བཞིན་གཤེགས་པ་རྣམས་ཀྱིས་ནམ་མཁའི་ཁམས་གང་བར་བསམས་ཏེ། དེ་རྣམས་ཧཱུྃ་གི་འོད་ཟེར་ལས་འཕྲོས་པ་གཟུགས་རྡོ་རྗེ་མ་ལ་སོགས་པ་རྣམས་ཀྱིས་མཆོད་པ་རྣམ་པ་སྣ་ཚོགས་པ་སྔོན་དུ་འགྲོ་བས། རང་དང་འདྲ་བའི་རིག་མའི་ནང་དུ་ཞུགས་པས་རྗེས་སུ་ཆགས་པའི་
བདག་ཉིད་ཀྱིས་ཐུགས་བྱིན་གྱིས་བརླབ་པར་བྱ་སྟེ། དཔལ་ལྡན་རྡོ་རྗེ་ཐུགས་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །ཞེས་བྱ་བ་ནི་བདག་ཉིད་ཀྱི་སྤྲུལ་པ་ལའོ། །ཕྱོགས་བཅུར་བཞུགས་པའི་སངས་
རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་རླབས་གོ་འཕང་ནི། །རྡོ་རྗེ་ཐུགས་ཀྱིས་མཛད་དུ་གསོལ། །ཞེས་པ་ནི་ཐོག་མ་ནས་གྲུབ་པའི་དེ་བཞིན་གཤེགས་པའི་ཐུགས་ཀ་ན་གནས་པ་རྣམས་ཏེ། གསོལ་བ་བཏབ་པས་བདག་ཉིད་ཀྱི་ཐུགས་རྡོ་རྗེའི་ནང་དུ་ཞུགས་
པར་བལྟའོ། །ཨོཾ་སརྦྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པས་བྱིན་གྱིས་བརླབ་ཅིང་བརྟན་པར་བྱའོ། །དེ་བཞིན་དུ་ནུ་མ་གཉིས་ཀྱི་བར་དུ་རང་གི་ས་བོན་ལ་སོགས་པ་ལས་སྐྱེས་པའི་རལ་གྲིའི་ཡུ་བ་ལ་གནས་པའི་ཟླ་བ་ལ་གསོལ་བ་བཏབ་པར་བསམས་པས་དམ་ཚིག་སེམས་དཔའ་
ལྟ་བུའི་ཡེ་ཤེས་སེམས་དཔའ་དམ་ཚིག་གི་ཕྱག་རྒྱའི་རང་བཞིན་བསྒོམ་པར་བྱའོ། །མགྲིན་པར་སྔ་མ་བཞིན་དུ་ཨཱཿལས་སྐྱེས་པའི་པདྨ་ཕྲ་མོ་ལ་སོགས་པ་ཡོངས་སུ་གྱུར་པ་ལས་ལོངས་སྤྱོད་རྫོགས་པའི་སྐུ་རྣམ་པར་དག་པ་ཆོས་ཀྱི་ཕྱག་རྒྱའི་རང་བཞིན་འཇིག་རྟེན་དབང་ཕྱུག་ལྟ་བུའི་གསུང་རྡོ་རྗེ་
བསམས་ཏེ། མཆོད་པ་དང་གསོལ་བ་བཏབ་པ་སྔོན་དུ་འགྲོ་བས་བྱིན་གྱིས་བརླབ་པར་བྱའོ། །ཆོས་ཀྱི་གསུང་ལམ་དཔལ་དང་ལྡན། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་རླབས་གོ་འཕང་ནི། །རྡོ་རྗེ་གསུང་གིས་མཛད་དུ་གསོལ། །ཕྱོགས་བཅུར་བཞུགས་པའི་སངས་
རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་རླབས་གོ་འཕང་ནི། །རྡོ་རྗེ་གསུང་གིས་མཛད་དུ་གསོལ། །ཨོཾ་སརྦྦ་ཏ་ཐཱ་ག་ཏ་ཝཱཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེའི་རྗེས་ལ་དེ་བཞིན་དུ་སྤྱི་བོར་ཟླ་བ་ལ་གནས་པའི་ཨོཾ་ལས་བསྐྱེད་པའི་འཁོར་ལོ་རྩིབས་བརྒྱད་པ་ལ་ཟླ་

44-1-168a

བ་ལ་གནས་པའི་ཨོཾ་ལས་བསྐྱེད་པའི་འཁོར་ལོ་ཕྲ་མོའི་ལྟེ་བར་ཟླ་བ་ལ་གནས་པའི་ཨོཾ་དང་འཁོར་ལོ་ཡོངས་སུ་གྱུར་པ་ལས་སྤྲུལ་པའི་སྐུ་རྣམ་པར་དག་པ་ལས་ཀྱི་ཕྱག་རྒྱའི་རང་བཞིན་སའི་སྙིང་པོ་ལྟ་བུའི་རྡོ་རྗེ་བལྟ་སྟེ། སྔར་བཞིན་དུ་བྱིན་གྱིས་བརླབ་པར་བྱའོ། །དཔལ་
ལྡན་རྡོ་རྗེ་སྐུ་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་རླབས་གོ་འཕང་ནི། །རྡོ་རྗེ་སྐུ་ཡིས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་རླབས་གོ་འཕང་ནི། །རྡོ་རྗེ་སྐུ་ཡིས་མཛད་
དུ་གསོལ། །ཨོཾ་སརྦྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཐུགས་རྡོ་རྗེ་ལ་སོགས་པ་འདི་རྣམས་རང་རང་གི་མཚན་ཉིད་ལྟེ་བ་ལ་གནས་པའི་ཕྱག་རྒྱ་བཞིའི་རང་བཞིན་གྱི་ཡི་གེ་བཞིའི་རྒྱས་བཏབ་པས་མཚན་ཉིད་དང་བྲལ་བ་རང་བཞིན་མེད་པར་བསྒོམ་པར་བྱའོ་ཞེས་པ་ནི། ཆུང་ངུའི་སྐྱེས་
བུའི་བྱེད་པའི་འབྲས་བུ་དང་ཆུང་ངུའི་སྒྲུབ་པའོ། །དེ་ནས་ཡེ་ཤེས་སེམས་དཔའི་ཐུགས་ཀའི་ས་བོན་གྱི་འོད་ཟེར་གྱིས་རེག་པས་དེ་བཞིན་གཤེགས་པའི་ཚོགས་ཀྱི་འོད་ཟེར་ལས་བྱུང་བའི་སྤྱན་ལ་སོགས་པའི་ལྷ་མོ་རྣམས་ཀྱིས་ལག་པས་བཟུང་བའི་རང་གི་རིགས་རྣམ་པར་དག་པའི་ཁ་དོག་སྟེ། 
དེའི་བྱང་ཆུབ་ཀྱི་སེམས་ཀྱིས་ཡོངས་སུ་དག་པའི་རིན་པོ་ཆེའི་བུམ་པས་གཟུགས་རྡོ་རྗེ་ལ་སོགས་པའི་རོལ་མོ་སྣ་ཚོགས་པ་དང་། མཆོད་པ་དང་བཀྲ་ཤིས་ཀྱི་གླུ་ལ་སོགས་པ་སྔོན་དུ་འགྲོ་བས། བདག་ཉིད་ལ་དབང་བསྐུར་བ་ལས། བདག་ཉིད་ཀྱི་ཅོད་པན་ལ་བྱང་ཆུབ་ཀྱི་སེམས་ཀྱི་ལྷག་མ་
ལས་མི་བསྐྱོད་པ་བསྒོམ་པར་བྱའོ་ཞེས་པ་ནི་ཆུང་ངུའི་དྲི་མ་མེད་པའི་འབྲས་བུ་དང་། ཆུང་ངུའི་སྒྲུབ་པ་ཆེན་པོའོ། །དེའི་རྗེས་ལ་ལྷན་ཅིག་སྐྱེས་པའི་རང་དང་མཚུངས་པའི་ཁ་དོག་དང་། ཕྱག་ལ་ལྟ་བའི་འབྲིང་གི་རྒྱུ་མཐུན་པའི་འབྲས་བུ་དང་། འབྲིང་གི་གཉེན་པོའོ། །སྔར་བཞིན་དུ་དེའི་མིག་ལ་
སོགས་པ་བྱིན་གྱིས་བརླབས་པ་ནི་འབྲིང་གི་རྣམ་པར་སྨིན་པའི་འབྲས་བུ་དང་། འབྲིང་གི་ཉེ་བར་སྒྲུབ་པའི་འབྲས་བུའོ། །གསོལ་བ་བཏབ་པ་མེད་པར་ཐུགས་དང་གསུང་དང་སྐུ་བྱིན་གྱིས་བརླབས་པ་ནི་འབྲིང་གི་སྐྱེས་བུ་བྱེད་པའི་འབྲས་བུ་དང་། འབྲིང་གི་སྒྲུབ་པ་ཆེན་པོའོ། །སྔར་བཞིན་དུ་ཡེ་ཤེས་

44-1-168b

སེམས་དཔའི་ཐུགས་ཀའི་ས་བོན་གྱི་འོད་ཟེར་གྱིས་དེ་བཞིན་གཤེགས་པ་རྣམས་བསྐུལ་བ་ལ་སོགས་པའི་སྒོ་ནས་དབང་བསྐུར་བ་ལ་སོགས་པ་དྲི་མ་མེད་པའི་འབྲས་བུ་དང་། འབྲིང་གི་སྒྲུབ་པ་ཆེན་པོའོ། །དེ་ནས་དེའི་སྤྱི་བོ་ནས་སྙིང་ག་ལ་ཐུག་པའི་བར་ཟླ་བའི་དཀྱིལ་འཁོར་ལ་གནས་
པའི་ཨོཾ་དང་འཁོར་ལོ་ཡོངས་སུ་གྱུར་པ་ལས། རྣམ་པར་སྣང་མཛད་ཀྱི་རྡུལ་ཕྲ་རབ་ཀྱི་ངོ་བོ། །སྙིང་ག་ནས་ལྟེ་བ་ལ་ཐུག་པར་ཉི་མ་ལ་གནས་པའི་ཧཱུྃ་དང་རྡོ་རྗེ་ལས་སྐྱེས་པ་མི་བསྐྱོད་པའི་རྡུལ་ཕྲ་རབ་ཀྱི་རང་བཞིན་ནོ། །ལྟེ་བ་ནས་གསང་བ་ལ་ཐུག་པར་ཉི་མ་ལ་གནས་པའི་སྭཱ་དང་རིན་པོ་ཆེ་
ཡོངས་སུ་གྱུར་པ་ལས་རིན་ཆེན་འབྱུང་ལྡན་གྱི་རྡུལ་ཕྲ་རབ་ཀྱི་རང་བཞིན་ནོ། །གསང་བ་ནས་པུས་མོ་ལ་ཐུག་པར་ཉི་མ་ལ་གནས་པའི་ཨཱཿདང་པདྨ་ལས་སྐྱེས་པའི་འོད་དཔག་ཏུ་མེད་པའི་རྡུལ་ཕྲ་རབ་ཀྱི་རང་བཞིན་ནོ། །པུས་མོ་ནས་རྐང་པའི་མཐིལ་ལ་ཐུག་པར་ཉི་མ་ལ་གནས་པའི་ཧཱ་དང་།
རལ་གྲི་ཡོངས་སུ་གྱུར་པ་ལས་དོན་ཡོད་གྲུབ་པའི་རྡུལ་ཕྲ་རབ་ཀྱི་རང་བཞིན་ཅན། རྩ་བའི་ཁ་དོག་མ་ཉམས་པར་བསྒོམ་པར་བྱའོ། །དེ་ནས་དེའི་པདྨ་ཧཱུྃ་ཡོངས་སུ་གྱུར་པ་ལས། པདྨ་དམར་པོ་འདབ་མ་བརྒྱད་པ་ལ་ཨ་ལས་ཟེ་འབྲུ་སྣ་ཚོགས་ཅན་གྱི་གསང་བའོ། །བདག་ཉིད་ཀྱི་ཧཱུྃ་
ཡོངས་སུ་གྱུར་པ་ལས་རང་བཞིན་ཁ་དོག་ཅན་གྱི་རྡོ་རྗེ་རྩེ་མོ་གཅིག་པ་ཨོཾ་ལས་སྐྱེས་པའི་ནོར་བུ་དམར་པོ་ཅན་གྱི་བུ་གར་བྱང་ཆུབ་ཀྱི་སེམས་གནས་པར་བྱ་བའི་ཕྱིར་ཕཊ་སེར་པོ་བསམས་ཏེ། གཉིས་པའི་ལུས་ལ་དེ་བཞིན་གཤེགས་པ་ཐམས་ཅད་བློས་བཅུག་ལ་རྡུལ་ཕྲ་རབ་སོ་སོ་ལ་དཀྱིལ་
འཁོར་གྱི་འཁོར་ལོའི་བདག་ཉིད་དུ་ལྷག་པར་བསམ་པར་བྱ་སྟེ། མཐར་ཚད་མེད་ཅིང་བླ་ན་མེད་པའི་བདེ་བ་ཆེན་པོའི་དེ་བཞིན་གཤེགས་པ་ཐམས་ཅད་རྗེས་སུ་ཆགས་པའི་བསམ་པས་རྡོ་རྗེ་དང་པདྨ་སྙོམས་པར་འཇུག་པར་བསམས་ཏེ། ཨོཾ་སརྦྦ་ཏ་ཐཱ་ག་ཏ་ཨ་ནུ་རཱག་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ།
ཞེས་པས་ང་རྒྱལ་བྱའོ་ཞེས་པ་ནི་སྦྱོར་བ་དང་པོའི་ཏིང་ངེ་འཛིན་ནོ། །དེ་ནས་ཡེ་ཤེས་སེམས་དཔའི་ཐུགས་ཀའི་ཟླ་བའི་རལ་གྲིའི་ཡུ་བར་གནས་པའི་མཾ་གི་འོད་ཟེར་གྱིས་བཀུག་པའི་དེ་བཞིན་གཤེགས་པའི་ཚོགས་ཞལ་ནས་བཅུག་སྟེ། ཞུ་བར་གྱུར་ནས་བདག་ཉིད་ཀྱི་རྡོ་རྗེ་ནས་བཏོན་ཏེ་ལྷ་མོའི་

44-1-169a

པདྨའི་ནང་དུ་བལྟ་བར་བྱའོ། །དེ་ཡོངས་སུ་གྱུར་པ་ལས་ཡི་གེ་མཾ་གྱི་ས་བོན་ལས་དེ་བཞིན་གཤེགས་པ་སྤྲོ་བ་ལ་སོགས་པ་སྔོན་དུ་འགྲོ་བ་ལས་གཞལ་ཡས་ཁང་ན་གནས་པའི་ལྷ་བཅུ་དགུའི་བདག་ཉིད་ཅན་གྱི་མི་བསྐྱོད་པ་གཙོ་བོར་གྱུར་པ་དཀྱིལ་འཁོར་གྱི་འཁོར་ལོ་
ཁ་དོག་ལ་སོགས་པ་དེ་ཉིད་དུ་གསལ་བར་བྱས་ནས། རིམ་པས་རེ་རེ་ནས་རང་རང་གི་སྔགས་བརྗོད་པས་དབྱུང་བར་བྱའོ། །དེ་ལ་མི་བསྐྱོད་པ་རྣམ་པར་ཤེས་པའི་ཕུང་པོ་རྣམ་པར་དག་པ་ཆོས་ཀྱི་དབྱིངས་ཤིན་ཏུ་རྣམ་པར་དག་པའི་ཡེ་ཤེས་ཀྱི་རང་བཞིན་ལུས་དང་རྩ་བའི་ཞལ་སྔོན་པོ་མཆེ་བ་ཅུང་
ཞིག་གཙིགས་པ། གཡས་པ་དང་གཡོན་པའི་ཞལ་ནི་དཀར་བ་དང་དམར་བའོ། །རིམ་པ་བཞིན་དུ་ཕྱག་བཞི་ན་རྡོ་རྗེ་སྔོན་པོ་དང་། རལ་གྲི་དང་། ནོར་བུ་དང་པདྨ་འཛིན་པ་བཛྲ་དྷྲྀཀ་ཅེས་པས་བསྐུལ་ཞིང་བཏོན་ཏེ། ཅི་ལྟར་རིགས་པའི་དཔག་ཏུ་མེད་པའི་སྤྲུལ་པས་འགྲོ་བའི་དོན་བྱས་
ནས་བསྡུས་ཏེ། བདག་ཉིད་ལ་ཞུགས་པར་བསམ་མོ། །ཛི་ན་ཛིཀ་ཅེས་པས་གཟུགས་ཀྱི་ཕུང་པོ་རྣམ་པར་དག་པ་མེ་ལོང་ལྟ་བུའི་ཡེ་ཤེས་ཀྱི་བདག་ཉིད་རྡོ་རྗེ་སེམས་དཔའི་ཁ་དོག་དང་ཞལ་ལ་སོགས་པ་དང་ལྡན་པའི་འཁོར་ལོ་རྩིབས་བརྒྱད་པ་དཀར་པོ་དང་། རལ་གྲི་དང་ནོར་བུ་དང་པདྨ་
འཛིན་པ་རང་གིས་གདུལ་བར་བྱ་བ་བཏུལ་ནས། སླར་འོངས་ཏེ་སྔར་གྱི་སྣ་ཚོགས་པདྨ་དང་ཟླ་བའི་གདན་ལ་བཞུགས་སོ། །རཏྣ་དྷྲྀཀ་ཅེས་བྱ་བས་ཚོར་བའི་ཕུང་པོ་རྣམ་པར་དག་པ་མཉམ་པ་ཉིད་ཀྱི་ཡེ་ཤེས་ཀྱི་བདག་ཉིད་གཙོ་བོ་དང་མཚུངས་པའི་ཁ་དོག་རིན་པོ་ཆེ་ཆ་དགུ་དང་རལ་གྲི་དང་འཁོར་
ལོ་དང་པདྨ་འཛིན་པ་སྔར་བཞིན་དུ་ལྷོ་ཕྱོགས་སུ་པདྨ་དང་ཉི་མའི་གདན་ལ་བཞུགས་སོ། །ཨཱ་རོ་ལྀཀ་ཅེས་པས་འདུ་ཤེས་ཀྱི་ཕུང་པོ་རྣམ་པར་དག་པ་སོ་སོར་རྟོག་པའི་ཡེ་ཤེས་ཀྱི་རང་བཞིན་ལུས་ཐམས་ཅད་དང་རྩ་བའི་ཞལ་དམར་པོ། །གཡས་པ་དང་གཡོན་པའི་ཞལ་ནི་སྔོ་བ་དང་དཀར་
བའོ། །པདྨ་འདབ་མ་བརྒྱད་པ་རལ་གྲི་དང་ནོར་བུ་དང་འཁོར་ལོ་འཛིན་པ་སྔར་བཞིན་དུ་སྣ་ཚོགས་པདྨ་དང་ཉི་མའི་གདན་ལའོ། །པྲཛྙཱ་དྷྲྀཀ་ཅེས་པས་འདུ་བྱེད་ཀྱི་ཕུང་པོ་རྣམ་པར་དག་པ་བྱ་བ་གྲུབ་པའི་ཡེ་ཤེས་ཀྱི་རང་བཞིན་ལུས་ཐམས་ཅད་དང་རྩ་བའི་ཞལ་ལྗང་གུ། གཡས་དང་གཡོན་

44-1-169b

སྔོ་བ་དང་དཀར་བའི་དོན་ཡོད་གྲུབ་པ་ཕྱག་ན་རལ་གྲི་དང་འཁོར་ལོ་དང་རིན་པོ་ཆེ་དང་པདྨ་འཛིན་པ། བྱང་དུ་སྔར་བཞིན་དུ་སྣ་ཚོགས་པདྨ་དང་ཉི་མའི་གདན་ལའོ། །འདི་རྣམས་ཐམས་ཅད་ཀྱང་མཛེས་པའི་རལ་པའི་ཅོད་པན་ཅན། རྒྱན་སྣ་ཚོགས་ཀྱིས་བརྒྱན་པའི་ཕྱག་གཉིས་ཀྱིས་འཁྱུད་པའི་
རིན་པོ་ཆེ་སྣ་ཚོགས་ཀྱི་ཅོད་པན་ཅན། རྒྱན་སྣ་ཚོགས་ཀྱིས་མཛེས་པའི་རང་དང་མཚུངས་པའི་རིག་མའི་མཆུའི་རོ་མྱང་བའོ། །མོ་ཧ་ར་ཏཱི་ཞེས་བྱ་བས་སའི་ཁམས་རྣམ་པར་དག་པ་བྱམས་པའི་རང་བཞིན་རྣམ་པར་སྣང་མཛད་ཀྱི་རིག་མ་དང་མཚུངས་པའི་སྤྱན། སྔར་བཞིན་དུ་མེའི་མཚམས་
སུའོ། །དྭེ་ཥ་ར་ཏཱི་ཞེས་པས་ཆུའི་ཁམས་རྣམ་པར་དག་པའི་སྙིང་རྗེ་ཆེན་པོའི་རང་བཞིན་མི་བསྐྱོད་པའི་རིག་མའི་གཟུགས་ཅན། ཨུཏྤལ་དམར་པོ་དང་རལ་གྲི་དང་ནོར་བུ་དང་པདྨ་འཛིན་པའི་མཱ་མ་ཀཱི་དེ་བཞིན་དུ་བདེན་བྲལ་དུའོ། །རཱ་ག་ར་ཏཱི་ཞེས་བྱ་བས་མེའི་ཁམས་རྣམ་པར་དག་
པ་དགའ་བ་ཆེན་པོའི་རང་བཞིན་འོད་དཔག་ཏུ་མེད་པའི་རིག་མ་དང་འདྲ་བའི་གོས་དཀར་མོ་དེ་བཞིན་དུ་རླུང་གི་མཚམས་སུའོ། །བཛྲ་ར་ཏཱི་ཞེས་བྱ་བས་རླུང་གི་ཁམས་རྣམ་པར་དག་པ་བཏང་སྙོམས་ཆེན་པོའི་རང་བཞིན། ལུས་ཐམས་ཅད་དང་རྩ་བའི་ཞལ་སེར་པོ་གཡས་དང་གཞན་མའི་
ཞལ་ནི་སྔོ་བ་དང་དཀར་བ། ཨུཏྤལ་སེར་པོ་དང་རལ་གྲི་དང་ནོར་བུ་དང་པདྨ་འཛིན་པའི་སྒྲོལ་མ་སྔར་བཞིན་དུ་དབང་ལྡན་གྱི་མཚམས་སུའོ། །དེ་བཞིན་དུ་སྦྱིན་པའི་ཕ་རོལ་ཏུ་ཕྱིན་པའི་རང་བཞིན་ཡུལ་གྱི་གཟུགས་རྣམ་པར་དག་པ་མེ་ལོང་དང་རལ་གྲི་དང་ནོར་བུ་དང་པདྨ་འཛིན་པ་སྤྱན་མ་ལྟ་བུའི་
གཟུགས་རྡོ་རྗེ་མ་ཕྱིའི་འཕར་མའི་མེའི་མཚམས་སུའོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་རང་བཞིན་སྒྲ་རྣམ་པར་དག་པའི་པི་ཝང་དང་རལ་གྲི་དང་ནོར་བུ་དང་པདྨ་འཛིན་པ་མཱ་མ་ཀཱི་དང་མཚུངས་པ་སྒྲ་རྡོ་རྗེ་མ་བདེན་བྲལ་གྱི་མཚམས་སུའོ། །བཟོད་པའི་ཕ་རོལ་ཏུ་ཕྱིན་པའི་རང་བཞིན་དྲི་རྣམ་པར་དག་
པའི་དྲིའི་དུང་ཆོས་སེར་པོ་དང་། རལ་གྲི་དང་འཁོར་ལོ་དང་པདྨ་འཛིན་པ་རིན་ཆེན་འབྱུང་ལྡན་གྱི་རིག་མ་དང་མཚུངས་པའི་དྲི་རྡོ་རྗེ་མ་རླུང་གི་མཚམས་སུའོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་བཞིན་རོ་རྣམ་པར་དག་པ་རོས་གང་བའི་ལྷུང་བཟེད་དམར་པོ་དང་། རལ་གྲི་དང་ནོར་བུ་དང་འཁོར་ལོ་

44-1-170a

འཛིན་པ་གོས་དཀར་མོ་དང་མཚུངས་པ་རོ་རྡོ་རྗེ་མ་དབང་ལྡན་གྱི་མཚམས་སུའོ། །བསམ་གཏན་གྱི་ཕ་རོལ་ཏུ་ཕྱིན་པའི་རང་བཞིན་རེག་རྣམ་པར་དག་པ་ན་བཟའ་སྣ་ཚོགས་དང་། རལ་གྲི་དང་ནོར་བུ་དང་པདྨ་འཛིན་པ་དོན་ཡོད་གྲུབ་པའི་རིག་མ་དང་མཚུངས་པའི་རེག་བྱ་རྡོ་རྗེ་
མ་སྔར་བཞིན་དུ་བྱང་ཕྱོགས་སུའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཆོས་ཀྱི་དབྱིངས་རྣམ་པར་དག་པ་ཆོས་འབྱུང་གི་ཕྱག་རྒྱ་དང་རལ་གྲི་དང་ནོར་བུ་དང་པདྨ་འཛིན་པ་རྡོ་རྗེ་སེམས་དཔའི་རིག་མ་དང་མཚུངས་པ་ཆོས་ཀྱི་དབྱིངས་ཀྱི་རྡོ་རྗེ་མ་སྔར་བཞིན་དུ་ལྷོའི་སྒོའི་ངོས་སུའོ། །དྲུག་པོ་འདི་རྣམས་
ཀྱང་ཨོཾ་ཨཱཿཧཱུྃ་ཞེས་བྱ་བ་དེ་ཉིད་གསུམ་གྱིས་བཏོན་ལ། གཟུགས་ལ་སོགས་པ་དྲུག་པོ་འདི་རྣམས་ཀྱང་རང་དང་འདྲ་བའི་ཐབས་ལ་འཁྱུད་པ་ཞལ་གྱི་རོ་མྱང་བར་འདོད་པའི་རིན་པོ་ཆེ་སྣ་ཚོགས་ཀྱིས་བརྒྱན་པའི་ཅོད་པན་ཅན་སྣ་ཚོགས་པདྨ་དང་ཟླ་བའི་གདན་ལ་བསྒོམ་པར་བྱའོ། །ཡ་
མཱནྟ་ཀྲྀཏ་ཅེས་བྱ་བས་གཤིན་རྗེ་གཤེད་དད་པའི་རང་བཞིན་སྔར་གསུངས་པའི་ཁ་དོག་དང་ལྡན་པ་ཤར་ཕྱོགས་ཀྱི་སྒོ་རུའོ། །དེ་བཞིན་དུ་པྲཛྙཱནྟ་ཀྲྀཏ་ཅེས་བྱ་བས་བརྩོན་འགྲུས་ཀྱི་རང་བཞིན་ཤེས་རབ་མཐར་བྱེད་ལྷོ་ཕྱོགས་ཀྱི་སྒོ་རུའོ། །པདྨཱནྟ་ཀྲྀཏ་ཅེས་བྱ་བས་དྲན་པའི་རང་བཞིན་པདྨ་
མཐར་བྱེད་ནུབ་ཕྱོགས་ཀྱི་སྒོ་རུའོ། །བིགྷྣཱནྟ་ཀྲྀཏ་ཅེས་བྱ་བས་ཏིང་ངེ་འཛིན་གྱི་རང་བཞིན་བདུད་རྩི་འཁྱིལ་པ་བྱང་ཕྱོགས་ཀྱི་སྒོ་རུའོ། །ནང་གི་གཞལ་ཡས་ཁང་དེ་ཉིད་གསུམ་གྱིས་བཏོན་ལ་ཕྱིའི་གཞལ་ཡས་ཁང་ལ་བསྟིམ་པར་བྱའོ། །སྒོ་སྐྱོང་བ་འདི་རྣམས་ཐམས་ཅད་ཀྱང་སྣ་ཚོགས་
པདྨ་དང་ཉི་མའི་གདན་ལ་གཡོན་བརྐྱང་བས་གནས་པ་ཉི་མའི་འོད་ཀྱི་དཀྱིལ་འཁོར་ཅན་ནོ། །གཞན་ནི་རང་རང་གི་གདན་གྱི་འོད་ཀྱི་དཀྱིལ་འཁོར་ཅན་ནོ། །ཐམས་ཅད་ཀྱང་དཀྱིལ་འཁོར་པ་དང་དཀྱིལ་འཁོར་གྱི་བདག་པོ་ལ་མངོན་པར་ཕྱོགས་པར་བསྒོམ་པར་བྱའོ་ཞེས་པས་ཡོངས་སུ་
རྫོགས་པའི་དཀྱིལ་འཁོར་ལ་བལྟས་ནས་རང་གི་ཡེ་ཤེས་སེམས་དཔའི་ཐུགས་ཀའི་ས་བོན་གྱི་འོད་ཟེར་གྱི་ལྕགས་ཀྱུས་བཀུག་པའི་གདོད་མ་ནས་གྲུབ་པའི་ཡེ་ཤེས་ཀྱི་དཀྱིལ་འཁོར་མདུན་གྱི་རྡོ་རྗེ་གུར་གྱི་སྟེང་དུ་བལྟས་ཏེ། གཤིན་རྗེ་གཤེད་ལ་སོགས་པ་གང་ཡང་རུང་བ་ཅིག་སྤྲོས་པས་དེ་དང་

44-1-170b

ལྷན་ཅིག་འོངས་པའི་བགེགས་རྣམས་བསྐྲད་ཅིང་མངོན་པར་བསྲུངས་ཏེ། རང་གི་སྔགས་བཟླས་པའི་ཟླ་བ་དང་མེ་ཏོག་ལ་སོགས་པའི་མཆོད་ཡོན་ཕུལ་ནས། ཨོཾ་ཨཱཿཡ་མཱནྟ་ཀྲྀཏ་ཨཱ་ཀཪྵ་ཛཿཧཱུཾ། ཞེས་བྱ་བས་གཤིན་རྗེ་གཤེད་ཀྱིས་བཀུག་སྟེ། ཨོཾ་ཨཱཿཔྲཛྙཱནྟ་ཀྲྀཏ་པྲ་བེ་ཤཱ་ཡ་ཧཱུྃ་ཧཱུྃ། ཞེས་
བྱ་བས་ཤེས་རབ་མཐར་བྱེད་ཀྱིས་བཅུག་ནས།  ཨོཾ་ཨཱཿཔདྨཱནྟ་ཀྲྀཏ་བནྡྷ་ཡ་བཾ་ཧཱུྃ། ཞེས་པས་པདྨ་མཐར་བྱེད་ཀྱིས་བཅིངས་ཏེ། ཨོཾ་ཨཱཿ་བིགྷྣཱནྟ་ཀྲྀཏ་ཏོ་ཥ་ཡ་ཧོཿཧཱུྃ། ཞེས་པས་བགེགས་མཐར་བྱེད་ཀྱིས་མཉེས་པར་བྱའོ་ཞེས་བྱ་བ་ནི་རབ་ཀྱི་རྒྱུ་མཐུན་པའི་འབྲས་བུ་དང་རབ་ཀྱི་བསྙེན་པའོ། །
དཀྱིལ་འཁོར་པ་སོ་སོའི་མིག་ལ་སོགས་པ་བྱིན་གྱིས་བརླབ་པ་ནི་རབ་ཀྱི་རྣམ་པར་སྨིན་པའི་འབྲས་བུ་དང་། རབ་ཀྱི་ཉེ་བར་སྒྲུབ་པའོ། །གསོལ་བ་བཏབ་པའི་ཚིགས་སུ་བཅད་པ་དང་བྱིན་གྱིས་བརླབ་པའི་སྔགས་བརྗོད་པ་སྤངས་པའི་ཐུགས་ལ་སོགས་པ་བྱིན་གྱིས་བརླབས་པ་ནི་རབ་ཀྱི་སྐྱེས་བུས་
བྱེད་པའི་འབྲས་བུ་དང་རབ་ཀྱི་སྒྲུབ་པའོ། །སྔར་བཞིན་དུ་ཡང་དབང་བསྐུར་བ་ནི་རབ་ཀྱི་དྲི་མ་མེད་པའི་འབྲས་བུ་དང་རབ་ཀྱི་སྒྲུབ་པ་ཆེན་པོའོ། །དེ་ལ་མི་བསྐྱོད་པའི་ཅོད་པན་ལ་རྡོ་རྗེ་སེམས་དཔའོ། །ཡང་རྡོ་རྗེ་སེམས་དཔའ་དང་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་རྣམས་
དང་ཐུགས་རྡོ་རྗེ་དང་མཱ་མ་ཀཱི་དང་ཕྱག་ན་རྡོ་རྗེ་དང་སྒྲ་རྡོ་རྗེ་མ་དང་ཤེས་རབ་མཐར་བྱེད་ལ་སོགས་པ་ཁྲོ་བོ་རྣམས་ཀྱི་མི་བསྐྱོད་པའོ། །སྤྱན་དང་སྐུ་རྡོ་རྗེ་དང་སའི་སྙིང་པོ་དང་གཟུགས་རྡོ་རྗེ་མ་དང་གཤིན་རྗེ་གཤེད་ལ་སོགས་པ་རྣམས་ཀྱི་རྣམ་པར་སྣང་མཛད་དོ། །ནམ་མཁའི་སྙིང་པོ་དང་། དྲི་རྡོ་རྗེ་མའི་རིན་
ཆེན་དབང་ངོ་། །གསུང་རྡོ་རྗེ་དང་གོས་དཀར་མོ་དང་འཇིག་རྟེན་དབང་ཕྱུག་དང་རོ་རྡོ་རྗེ་མ་དང་པདྨ་མཐར་བྱེད་རྣམས་ཀྱི་འོད་དཔག་ཏུ་མེད་པའོ། །སྒྲིབ་པ་ཐམས་ཅད་རྣམ་པར་སེལ་བ་དང་རེག་རྡོ་རྗེ་མ་རྣམས་ཀྱི་དོན་ཡོད་གྲུབ་པའོ། །ཀུན་དུ་བཟང་པོ་དང་ཆོས་ཀྱི་དབྱིངས་ཀྱི་རྡོ་རྗེ་མ་དག་ནི་རྡོ་རྗེ་སེམས་
དཔའོ། །དེ་ནས་སྙིང་གའི་ས་བོན་གྱི་འོད་ཟེར་གྱིས་འདོད་པའི་ཡོན་ཏན་ལྔ་བཀུག་ནས་སྙིང་གར་ཞུགས་ཏེ།ཟླ་བ་ཞུ་བའི་གཟུགས་སུ་གྱུར་ནས་རྡོ་རྗེ་ནས་བྱུང་ཞིང་པདྨར་སོང་བར་བལྟས་ཏེ། དེ་ལས་རིག་མའི་བ་སྤུའི་བུ་ག་ནས་བྱུང་བའི་འོད་ཟེར་ཚོགས་ཀྱི་སྒོ་ནས་བྱུང་ཞིང་སྤྲུལ་པས་མཆོད་

44-1-171a

པའི་ཡོ་བྱད་སྣ་ཚོགས་ལ་གཟུགས་རྡོ་རྗེ་མ་ལ་སོགས་པའི་ལྷ་མོ་རྣམས་ཀྱིས་གཞལ་ཡས་ཁང་གི་འོད་ལས་བྱུང་བའི་ཁྱད་པར་དུ་འཕགས་པའི་གཟུགས་ལ་སོགས་པ་རྣམས་ཀྱིས་ཀྱང་བདག་ཉིད་དཀྱིལ་འཁོར་དང་བཅས་པ་ལ་མཆོད་པར་བྱ་སྟེ། ཨོཾ་སརྦྦ་ཏ་ཐཱ་ག་ཏ་པཱུ་ཛ་བཛྲ་
སྭ་བྷཱ་ཝ་ཨཱཏྨ་ཀོ྅ཧཾ། ཞེས་པས་ལྷག་པར་མོས་པར་བྱའོ། །དེའི་རྗེས་ལ། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ཀྱི་མཁས་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་དབྱངས་ལ་ཕྱག་འཚལ་བསྟོད། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་ཆེན་
པོ། །རང་བཞིན་འོད་གསལ་མཆོག་གི་མཆོག །སྟོན་པ་རྡོ་རྗེ་ཕྱག་འཚལ་བསྟོད། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མེད་མཁའ། །རང་བཞིན་རྣམ་དག་གོས་པ་མེད། །རྡོ་རྗེ་སྐུ་ལ་ཕྱག་འཚལ་བསྟོད། །རྡོ་རྗེ་འོད་དཔག་མེད་རྒྱལ་པོ། །མི་རྟོག་རྡོ་རྗེ་ནམ་
མཁའ་འཛིན། །འདོད་ཆགས་ཕ་རོལ་ཕྱིན་པ་བརྙེས། །རྡོ་རྗེ་གསུང་ལ་ཕྱག་འཚལ་ལོ། །དོན་ཡོད་རྡོ་རྗེ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །དག་པའི་ངོ་བོ་ཉིད་ལས་བྱུང་། །རྡོ་རྗེ་སེམས་དཔའ་ཕྱག་འཚལ་བསྟོད། །ཅེས་བྱ་བས་གཞལ་ཡས་ཁང་
ན་གནས་པའི་ཀ་བ་དང་བུམ་པ་རྣམས་བདག་ཉིད་ལ་བསྟོད་པ་བྱེད་པར་བསམ་པར་བྱའོ། །དེ་ནས་མདུན་དུ་ཡཾ་ལས་རླུང་གི་དཀྱིལ་འཁོར་སྔོན་པོ་མཐའ་གཉིས་ན་གཡོ་བའི་བ་དན་སྔོན་པོས་མཚན་པ་གཞུའི་རྣམ་པའི་སྟེང་དུ་རཾ་ལས་སྐྱེས་པའི་རཾ་དམར་པོས་མཚན་པ་གྲུ་གསུམ་མེའི་དཀྱིལ་
འཁོར་གྱི་སྟེང་དུ་རིན་པོ་ཆེའི་སྒྱེད་པུ་ལ་གནས་པ། ཨ་དཀར་པོ་ལས་སྐྱེས་པའི་པདྨའི་སྣོད་ཀྱི་ནང་དུ་གནས་པ། བི་ར་ཤུ་མ་མུ་ཞེས་པའི་མིང་ཅན་གྱི་བདུད་རྩི་ལྔ་དང་རིམ་པས་བྲུཾ་ཨཱྃ་ཛྲིཾ་ཁཾ་ཧཱུྃ་གིས་བྱིན་གྱིས་བརླབ་པ་དེ་བཞིན་དུ་གོ་ཀུ་ད་ཧ་ན་ཡང་བསམས་ཏེ། དེའི་ཁ་ཆོད་ལྟ་བུའི་ཟླ་བའི་
དཀྱིལ་འཁོར་ལ་གནས་པའི་ཧཱུྃ་ལས་སྐྱེས་པའི་ལྟེ་བར་དེ་དང་ལྡན་པ་རྡོ་རྗེ་དཀར་པོ་རྩེ་ལྔ་པ་བལྟས་ནས། བྲུཾ་ལ་སོགས་པའི་འོད་ཟེར་ནི་རྣམ་པར་བཞུ་སྟེ། དེ་ཉིད་ཀྱི་ནང་དུ་ཞུགས་པར་བསམས་ནས། རླུང་གིས་སྦར་བའི་མེ་སྦར་བས་བསྲོ་ཞིང་ཞུ་བས་བླ་ན་མེད་པའི་རོའི་རང་བཞིན་དུ་ལྷག་པར་མོས་

44-1-171b

པར་བྱས་ཏེ། དེ་རུ་རྣམ་པར་བཀོད་པའི་རབ་ཏུ་གསལ་བའི་ཨོཾ་དཀར་པོའི་འོད་ཟེར་གྱིས་བཀུག་པའི་དེ་བཞིན་གཤེགས་པའི་ཡེ་ཤེས་ཀྱི་བདུད་རྩི་རྣམས་བཅུག་ནས་དེ་ཉིད་གསུམ་གྱིས་ལན་མང་དུ་བསྔགས་ཏེ། དེ་ཡིས་རང་རང་གི་ལྕེའི་རྩེ་མོ་ལ་གནས་པའི་ཧཱུྃ་ལས་སྐྱེས་པའི་ལྟེ་བར་དེས་
བྱིན་གྱིས་བརླབས་པ་ནས་ཀྱི་ཚད་ཙམ་རྡོ་རྗེ་དཀར་པོའི་སྦུ་གུས་དྲངས་པས་བདག་ཉིད་ཀྱི་ཡེ་ཤེས་སེམས་དཔའི་ཐུགས་ཀའི་ས་བོན་ཡོངས་སུ་གྱུར་པ་ལས་བདག་ཉིད་དཀྱིལ་འཁོར་གྱི་འཁོར་ལོ་དང་། དཀྱིལ་འཁོར་པ་རྣམས་རང་རང་གི་དབུ་རྒྱན་ལ་རིགས་ཀྱི་བདག་པོ་བསམས་ཏེ་ཚིམ་པར་བྱའོ་
ཞེས་པ་ནི། དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ནོ། །དེ་ནས་སེམས་དབང་དུ་བྱ་བའི་ཕྱིར་ཐིག་ལེའི་རྣལ་འབྱོར་ལ་སོགས་པ་བསྒོམ་པར་བྱའོ། །དེ་ལ་ཡེ་ཤེས་སེམས་དཔའི་ཐུགས་ཀའི་མཚན་མའི་ལྟེ་བར་གནས་པའི་ས་བོན་གྱི་འོད་ཟེར་ལས་བྱུང་བའི་དེ་བཞིན་
གཤེགས་པ་རྣམས་ཀྱིས་འགྲོ་བ་མ་ལུས་པ་སངས་རྒྱས་སུ་བྱས་ནས་དེའི་ནང་དུ་ཞུགས་ཏེ་དེའི་ས་བོན་ཡོངས་སུ་གྱུར་པས་སྲན་མའི་ཚད་ཙམ་གྱི་ཐིག་ལེའི་ནང་དུ་འཕྲོ་བའི་རྟེན་དང་བརྟེན་པའི་བདག་ཉིད་ཀྱི་འཁོར་ལོ་ལྟར་རྒྱུ་མཐུན་པ་དང་བསྙེན་པ་ལ་སོགས་པ་མོས་པ་བརྟན་པར་བྱ་སྟེ། དེའི་འོད་ཟེར་
གྱི་ཕྲེང་བས་རང་གི་རྟེན་རལ་གྲི་དང་ཡེ་ཤེས་སེམས་དཔའ་ལ་སོགས་པ་དང་། སའི་སྙིང་པོ་ལ་སོགས་པ་རིམ་གྱིས་སྣང་བར་བྱས་ཤིང་། འཇིག་རྟེན་གསུམ་མ་ལུས་པར་སྣང་བར་བྱས་ཏེ་ཡང་དང་ཡང་དུ་དེ་ཉིད་དུ་ཐིམ་པར་བྱའོ་ཞེས་བྱ་བ་ནི་ཐིག་ལེའི་རྣལ་འབྱོར་རོ། །དེའི་རྗེས་ལ་དེ་བཞིན་
གཤེགས་པའི་ཚོགས་ཞལ་དུ་བཅུག་སྟེ། ཞུ་ནས་ཞུ་བའི་ཐིག་ལེ་ཡོངས་སུ་གྱུར་པ་ལས་ནས་ཀྱི་ཚད་ཙམ་གྱི་རལ་གྲི་དང་རང་གི་རིག་པའི་པདྨའི་སྣ་རྩེར་བལྟས་ཏེ། དེའི་ཡུ་བར་ཟླ་བ་ལ་གནས་པའི་ཡི་གེ་མཾ་ཡོངས་སུ་གྱུར་པ་ལས་ཉུངས་ཀར་གྱི་ཚད་ཙམ་དུ་ཕྲ་བའི་རིན་པོ་ཆེ་ཁ་དོག་ལྔ་པའི་
དབུས་སུ་རྟེན་དང་བརྟེན་པའི་རང་བཞིན་བདག་ཉིད་འཁོར་ལོ་ཆུང་ངུ་དང་། འབྲིང་དང་། རབ་ཀྱི་རྒྱུ་མཐུན་པའི་འབྲས་བུ་དང་། བསྙེན་པ་ལ་སོགས་པའི་ཡན་ལག་བཞི་དང་ལྡན་པར་མོས་པས་སེམས་དབང་དུ་བྱ་བའི་ཕྱིར་བསྒོམ་པར་བྱའོ། །དེ་ནས་སྨིག་རྒྱུ་དང་། དུ་བ་དང་། མཁའ་སྣང་དང་། མར་

44-1-172a

མེ་དང་ནམ་མཁའི་རྣམ་པ་རྣམས་ལས་གང་ཡང་རུང་བའི་མཚན་མ་ཐོབ་ནས། སེམས་བརྟན་པར་ཁོང་དུ་ཆུད་པས་རང་གིས་རིག་པའི་བདག་ཉིད་དེའི་འོད་ལས་བྱུང་བའི་འཇམ་པའི་རྡོ་རྗེ་ལ་སོགས་པའམ། དེའི་མཚན་མ་རལ་གྲི་ལ་སོགས་པ་རྣམས་སྤྲོ་བ་དང་བསྡུ་བའི་
རིམ་པ་རིམ་གྱིས་བྱའོ་ཞེས་བྱ་བ་ནི་ཕྲ་མོའི་རྣལ་འབྱོར་རོ། །དེ་ནས་སྐུ་རྡོ་རྗེ་དང་། གསུང་རྡོ་རྗེ་དང་། ཐུགས་རྡོ་རྗེ་དང་། ཡེ་ཤེས་སེམས་དཔའི་ཐུགས་ཀའི་མཚན་མའི་ལྟེ་བ་རྣམས་ལ་ཟླ་བ་ལ་གནས་པའི་ཨོཾ་དང་ཨཱཿདང་མཾ་དང་ཧཱུྃ་གི་ཡི་གེ་རྣམས་བལྟ་སྟེ། མྱུར་བ་ལ་སོགས་པའི་སྐྱོན་དང་བྲལ་བ་
བརྗོད་པས། ཨོཾ་ལ་སོགས་པའི་ས་བོན་ལས་རང་གི་ཇི་ལྟ་བའམ། ཅིག་ཅར་དུ་སྐུ་རྡོ་རྗེ་ལ་སོགས་པ་རྣམས་དང་། མཾ་ལས་དེ་བཞིན་གཤེགས་པ་ལྔ་སྲོག་གི་རླུང་གིས་སྤྲོས་ཏེ། ཡན་ལག་བཞི་དང་ལྡན་པ་ཉིད་དུ་ལྷག་པར་མོས་པས་ཐུགས་ལ་སོགས་པ་བྱིན་གྱིས་བརླབས་པ་ལྟ་བུར་
་གཟུགས་རྡོ་རྗེ་མ་ལ་སོགས་པ་རྣམས་ཀྱིས་མཆོད་པས་ཡོངས་སུ་མཉེས་ཏེ། རྩོལ་བའི་རླུང་གིས་རྟེན་དེ་ཉིད་ལྷག་པར་མོས་པས་ཡང་དག་པར་བསྡུས་པར་བལྟས་ཏེ། ཇི་སྲིད་སྐྱོ་བའི་བར་དུ་བཟླས་སོ་ཞེས་བྱ་བ་ནི་བཟླས་པའོ། །ངལ་ན་མཐོ་གང་ཙམ་གྱིས་སྤགས་པར་སྤྱི་བོའི་སྟེང་དུ་ཟླ་
བའི་དཀྱིལ་འཁོར་ལ་གནས་པ་ལྷན་ཅིག་ཏུ་གྲུབ་པའི་བདུད་རྩི་ལྔ་ཨོཾ་དཀར་པོས་བྱིན་གྱིས་བརླབས་པས་བདུད་རྩི་འཛག་པར་བསམས་ཏེ། དེ་ནས་སྲོག་དང་རྩོལ་བས་བཀུག་པའི་བདུད་རྩིའི་རྒྱུན་སྐུ་རྡོ་རྗེ་ལ་སོགས་པ་དབབ་པར་བྱའོ་ཞེས་པས་ཚིམ་ཞིང་ངལ་སོས་ནས། སླར་ཡང་ཐིག་ལེ་ལ་
སོགས་པ་བསྒོམ་པ་སྔོན་དུ་འགྲོ་བས་བཟླས་པར་བྱའོ། །གཤེགས་སུ་གསོལ་བར་འདོད་ན་ཡང་སྔར་བཞིན་དུ་མཆོད་པ་དང་བསྟོད་པ་དང་བདུད་རྩི་མྱང་བ་བྱས་ནས། ཨོཾ་ལ་སོགས་པའི་ཡི་གེ་གསུམ་ལ་རིགས་ཇི་ལྟ་བུའི་དཀྱིལ་འཁོར་རྣམས་བསྡུས་ཏེ། ཡི་གེ་གསུམ་པོ་དེ་ཡང་གཉིས་
སུ་མེད་པའི་ཡེ་ཤེས་ཀྱི་རང་བཞིན་དུ་བསྒོམ་པར་བྱའོ་ཞེས་བྱ་བ་ནི་ལས་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ཏོ། །འཇམ་དཔལ་ཇི་ལྟར་མཁྱེན་ཅིང་དཔའ་བོ་དང་། །ཀུན་དུ་བཟང་པོ་དེ་ཡང་དེ་བཞིན་ཏེ། །དེ་དག་གི་ཡང་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་ཡོངས་སུ་

44-1-172b

བསྔོ། །དུས་གསུམ་གཤེགས་པ་རྒྱལ་བ་ཐམས་ཅད་ཀྱི། །བསྔོ་བ་གང་ལ་མཆོག་ཏུ་བསྔགས་པ་ལྟར། །བདག་གི་དགེ་བའི་རྩ་བ་འདི་དག་ཀྱང་། །བཟང་པོ་སྤྱོད་ཕྱིར་ཡོངས་སུ་བསྔོ་བར་བགྱི། །ཞེས་པས་ཏིང་ངེ་འཛིན་གསུམ་ལས་བྱུང་བའི་བསོད་ནམས་ཀྱི་ཕུང་པོ་ཐམས་ཅད་ཀྱང་
ཡོངས་སུ་བསྔོས་ནས། ལངས་ཏེ་འཇམ་པའི་རྡོ་རྗེའི་ང་རྒྱལ་གྱིས་གནས་པར་བྱའོ། །འགྲོ་བ་ཐམས་ཅད་དེའི་རྣམ་པའི་རྡོ་རྗེ་སེམས་དཔའི་རང་བཞིན་དུའོ། །ཇི་ལྟར་རིག་པའི་རྣམ་པར་སྣང་མཛད་ལ་སོགས་པའི་ངོ་བོའམ། གཟུགས་རྡོ་རྗེ་མ་ལ་སོགས་པའི་རང་བཞིན་དུ་བསམས་ཏེ་གནས་
པར་བྱའོ། །ལུས་ལ་སོགས་པའི་བྱ་བ་ཡང་རྗེས་སུ་མཐུན་པའི་འགྲོ་བའི་དོན་དུ་ཡོངས་སུ་བསྔོ་བར་བྱའོ། །བདག་དང་གཞན་ཡང་འཇམ་པའི་རྡོ་རྗེ་ཉིད་དུ་ལྷག་པར་མོས་པས་ཇི་ལྟར་རྙེད་པའི་འདོད་པའི་ཡོན་ཏན་ལྔས་ཡོངས་སུ་མཉེས་པར་བྱའོ། །ཕྱིའི་མཆོད་པ་བྱེད་པར་འདོད་པས་ཀྱང་
ཙནྡན་ལ་སོགས་པས་བྱུགས་པའི་དཀྱིལ་འཁོར་དང་རང་གི་སྙིང་གའི་ས་བོན་གྱི་འོད་ཀྱིས་བཀུག་པའི་འཇམ་པའི་རྡོ་རྗེའི་འཁོར་ལོའི་རྣལ་འབྱོར་ཇི་ལྟ་བར་བྱས་ཏེ། དེ་ཉིད་གསུམ་གྱིས་བརྟེན་པའི་རྩ་བའི་སྔགས་ཀྱི་གཟུགས་ཀྱིས་དང་། སྒོ་སྲུང་བ་བཞི་རང་རང་གི་འབྱིན་པའི་སྔགས་ཀྱི་རང་
བཞིན་དེ་ཉིད་གསུམ་གྱིས་བརྟན་པའི་སྔགས་ཀྱིས་མེ་ཏོག་ལ་སོགས་པ་དང་མཆོད་ཡོན་ལ་སོགས་པའི་སྦྱིན་པ་སྔོན་དུ་འགྲོ་བས་མཆོད་པ་བྱའོ། །ཁྲུས་བྱེད་པས་ཀྱང་དབང་བསྐུར་བའི་ཆོ་གས་སོ། །ཟས་ཟ་བར་འདོད་པས་ཀྱང་ཁ་ཟས་བདུད་རྩི་རྣམ་པ་ལྔ་དང་སྒྲོན་མ་རྣམ་པ་ལྔའི་རྣམ་
པར་ལྷག་པར་མོས་ཤིང་སྔར་བཞིན་དུ་སྙིང་གར་འཁོར་ལོའི་བདག་པོ་བསྐྱེད་ནས་ཅོད་པན་ལ་རིགས་ཀྱི་བདག་པོའོ། །ལྕེ་ལ་སྔར་བཞིན་དུ་རྡོ་རྗེ་དཀར་པོ་རྣམ་པར་བསམས་ཏེ། དཀྱིལ་འཁོར་གྱི་འཁོར་ལོ་ཚིམ་པར་བྱ་བའི་བསམ་པས་བཟའ་བར་བྱའོ། །ཐུན་མཚམས་གཞན་ལ་ཡང་
སྔར་བཞིན་དུ་ཏིང་ངེ་འཛིན་གསུམ་སྐད་ཅིག་གིས་མངོན་དུ་བྱས་ནས་ཐིག་ལེ་དང་ཕྲ་མོའི་བསྒོམ་པ་སྔོན་དུ་འགྲོ་བས་གནས་པར་བྱའོ། །དགོངས་ཀྱི་ཐུན་མཚམས་སུ་ཡང་ཏིང་ངེ་འཛིན་གསུམ་ཡོངས་སུ་རྫོགས་ཤིང་ཉལ་བར་འདོད་པས་ཡེ་ཤེས་སེམས་དཔའི་ཐུགས་ཀར་འཁོར་ལོ་བསྡུས་

44-1-173a

ནས་ཤེས་རབ་དང་སྙིང་རྗེར་ལྡན་པས་ཉལ་བར་བྱའོ། །དེ་བཞིན་དུ་ཉི་མ་གཞན་ཐམས་ཅད་ཏིང་ངེ་འཛིན་གཉིས་སུ་མེད་པའི་རང་བཞིན་ལ་མཚན་མ་དང་། ས་བོན་དང་ལྷ་རྣམས་ཇི་ལྟར་རིགས་པར་ལྷག་པར་མོས་པར་བྱའོ། །དམ་ཚིག་ཉམས་ན་དོན་ཡོད་གྲུབ་པ་ཇི་
ལྟ་བའི་རྣལ་འབྱོར་དང་ལྡན་པས་ཡེ་ཤེས་སེམས་དཔའི་སྙིང་གའི་ཟླ་བ་ལ་ཁཾ་ལས་སྐྱེས་པའི་སྣ་ཚོགས་རྡོ་རྗེའི་ནང་ན་གནས་པའི་ཁཾ་གི་འོད་ཟེར་རྣམས་ཀྱིས་དེ་བཞིན་གཤེགས་པ་བསྐུལ་བ་ལ་སོགས་པ་སྔོན་དུ་འགྲོ་བས་སྣ་ཚོགས་པདྨའི་ཟླ་བར་གནས་པའི་བདག་ཉིད་ལ་སྔར་བཞིན་དུ་
དབང་བསྐུར་བར་བྱའོ། །བླ་མ་ལ་བརྙས་པ་ལ་སོགས་པའི་ཉེས་པ་ལ་ནི་སྟོན་མོ་སྔོན་དུ་འགྲོ་བས་འབྱོར་པ་ཇི་ལྟ་བས་བླ་མ་ལ་ཡོན་ཆེན་པོ་ཕུལ་ཏེ། བཤགས་པ་ལ་སོགས་པ་སྔོན་དུ་འགྲོ་བས་སྡོམ་པ་གཟུང་བར་བྱའོ་ཞེས་པ་ནི་དམ་ཚིག་གསོ་བའོ། །དེ་ལྟར་གུས་པ་དང་བཅས་ཤིང་རྒྱུན་མི་
འཆད་པར་ཡུན་རིང་དུ་གོམས་པ་ལས་དངོས་གྲུབ་ཀྱི་མཚན་མ་ལན་བདུན་ཐོབ་ནས་སྔར་གསུངས་པའི་འཁོར་ལོར་གནས་པས་སྔར་བཞིན་དུ་སྐུ་དང་གསུང་དང་ཐུགས་རྡོ་རྗེ་རྣམས་མཆོད་ནས། བཟང་པོའི་ཞབས་ཀྱིས་གསུངས་པའི་ཆོ་གས་མངོན་པར་འདོད་པའི་རལ་གྲི་ལ་སོགས་པའི་དངོས་གྲུབ་
བསྒྲུབ་པར་བྱའོ། །ཉེ་བར་འོངས་པའི་བགེགས་ཞི་བར་བྱ་བའི་ཕྱིར་བདུད་རྩི་འཁྱིལ་པའི་འཁོར་ལོར་གནས་ཏེ་དེའི་སྔགས་མང་དུ་བཟླས་པར་བྱའོ། །འདི་ཡི་དབུས་སུ་གནས་འགྱུར་གང་། །འཁོར་ལོའང་དེ་ཡི་ཡིན་པར་འདོད། །རྟོག་པ་ལ་སོགས་དབུས་གནས་པ། །མི་བསྐྱོད་དེ་ཡི་
གནས་སུ་གནས། །བྱང་ཆུབ་སེམས་དཔའ་གཙོ་ཡིན་ན། །རང་རིག་བདག་པོ་རང་ལ་འཇུག །གཞན་ཡང་ཞལ་གཡོན་སྔོན་པོ་མིན། །གཡས་པ་དམར་པོ་མ་ཡིན་ནོ། །ཞེས་པའོ། །འཇམ་པའི་རྡོ་རྗེའི་སྒྲུབ་པའི་ཐབས། །འདུས་ཤིང་རྟོགས་སླ་མངོན་བརྗོད་པས། །སྐྱེ་བར་ལེགས་བྱས་ཇི་
སྙེད་པ། །དེས་ནི་འགྲོ་བ་དེ་མཚུངས་ཤོག །འདུས་ཤིང་རྟོགས་སླ་བའི་འཇམ་པའི་རྡོ་རྗེའི་སྒྲུབ་ཐབས། དཔལ་མཁས་པ་ཆེན་པོ་སུ་ན་ཡ་ཤྲཱི་མི་ཏྲ་པཎྜི་ཏས་མཛད་པ་རྫོགས་སོ།།      །།པཎྜི་ཏ་དེ་ཉིད་དང་། ལོ་ཙཱ་བ་ཀློག་སྐྱ་གཞོན་ནུ་འབར་གྱིས་བསྒྱུར་ཅིང་ཞུས་པའོ།།      །།

44-1-173b

༄༅༅། །རྒྱ་གར་སྐད་དུ། ཨ་བྷི་ཥེ་ཀ་པྲ་ཀྲི་ཡཾ། བོད་སྐད་དུ། དབང་གི་རབ་ཏུ་བྱེད་པ། བཅོམ་ལྡན་འདས་རྡོ་རྗེ་སེམས་དཔའ་ལ་ཕྱག་འཚལ་ལོ། །ཐོག་མཐའ་མེད་ཅིང་རྟག་ཏུ་གྲུབ། །ཐུབ་པ་བདེ་བ་ཆེན་པོའི་སྐུ། །ལྷན་ཅིག་སྐྱེས་དགའ་ཕྱག་འཚལ་ནས། །དབང་གི་ཆོ་
ག་གསལ་བཤད་བྱ། །དེ་ལ་ཇི་ལྟ་བ་བཞིན་དུ་དབང་བསྐུར་ཞིང་རྗེས་སུ་གནང་བ་ཐོབ་ལ། ཏིང་ངེ་འཛིན་གསུམ་ལ་མཁས་པ། རིག་པ་བཟླས་པའི་རྣལ་འབྱོར་པས། རང་གི་སློབ་མ་ལེགས་པར་བརྟགས་ལ། རྗེས་སུ་གཟུང་བར་འདོད་པས། རྒྱལ་པོ་དང་རྐུན་པོ་ལ་སོགས་པའི་ཉེ་བར་
འཚེ་བ་ཐམས་ཅད་དང་བྲལ་བའི་དཀྱིལ་འཁོར་གྱི་ཁང་པ་ལ་སོགས་པར་ཆོ་ག་ཇི་ལྟ་བ་བཞིན་དུ་རྡུལ་ཚོན་གྱི་དཀྱིལ་འཁོར་བྲི་བའམ་རས་རིས་ཀྱི་དཀྱིལ་འཁོར་ལ་མཆོད་པ་རྣམ་པ་ལྔས་མཆོད་དེ། དགོངས་ཀའི་དུས་སུ་བུམ་པ་ལྷག་པར་གནས་པ་བྱའོ། །རང་རང་གི་མཚན་མས་བརྒྱན་པ་བཅུ་
དགུའམ། དགུའམ། ལྔའམ། གཅིག་གོ། །དེ་ལ་མི་བསྐྱོད་པའི་རྡོ་རྗེ་སྔོན་པོ་རྩེ་ལྔ་པའོ། །རྣམ་པར་སྣང་མཛད་ཀྱི་འཁོར་ལོ་དཀར་པོ་རྩིབས་བརྒྱད་པའོ། །རིན་ཆེན་འབྱུང་ལྡན་གྱི་ནོར་བུ་ལྗང་གུའོ། །འོད་དཔག་ཏུ་མེད་པའི་པདྨ་དམར་པོའོ། །དོན་ཡོད་གྲུབ་པའི་རལ་གྲི་ལྗང་གུའོ། །སྤྱན་
མའི་འབྲས་བུ་ནག་པོའི་མིག་དཀར་པོ་གཉིས་སོ། །མཱ་མ་ཀཱིའི་རྡོ་རྗེ་སྔོན་པོ་རྩེ་ལྔ་པའོ། །གོས་དཀར་མོའི་པདྨ་དམར་པོའོ། །སྒྲོལ་མའི་ཨུཏྤལ་སྔོན་པོའོ། །གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་ཀྱི་དབྱིངས་ཀྱི་རྡོ་རྗེ་མ་རྣམས་ཀྱི་མེ་ལོང་དཀར་པོ་དང་། དྲི་ཟའི་པི་
ཝང་སྔོན་པོ་དང་། དུང་དཀར་སེར་དང་། རོའི་སྣོད་དམར་པོའམ། ཁ་དོག་སྣ་ཚོགས་པའི་གོས་དང་། ཆོས་འབྱུང་དཀར་པོ་རྣམས་རིམ་བཞིན་དུ་དགོད་པར་བྱའོ། །གཤིན་རྗེ་མཐར་བྱེད་དང་། ཤེས་རབ་མཐར་བྱེད་དང་། པདྨ་མཐར་བྱེད་དང་། བགེགས་མཐར་བྱེད་རྣམས་ཀྱི་རྡོ་རྗེ་ཐོ་བ་སྔོན་པོ་
དང་། རྡོ་རྗེ་དབྱུག་པ་དཀར་པོ་དང་། པདྨ་དམར་པོ་དང་། རྡོ་རྗེ་སྔོན་པོ་ཁ་བྱེ་བ་རྣམས་སོ། །ལས་ཐམས་ཅད་པའི་བུམ་པ་ནི། བདུད་རྩི་འཁྱིལ་པའམ། རྡོ་རྗེ་སེམས་དཔའོ། །སྣ་ཚོགས་པའི་པདྨ་དང་ཟླ་བའི་དཀྱིལ་འཁོར་ལ་རྣམ་པར་སྣང་མཛད་ཀྱི་དང་ལྷ་མོ་བཅུ་རྣམས་ཀྱི་མཚན་མ་བྲི་

44-1-174a

བར་བྱའོ། །གཞན་རྣམས་ཀྱི་ཉི་མའི་དཀྱིལ་འཁོར་ལའོ། །དེའི་ནང་ནས་རྣམ་པར་རྒྱལ་བའི་བུམ་པ་ཤིན་ཏུ་ཆེ་བ་ནག་ནོག་དང་མི་གཙང་བ་མེད་པ། ལྟོ་བ་འཕྱང་བ། སྐེ་པ་རིང་བ། མཚན་མ་ལེགས་པར་བྲིས་ལ་གོས་ལེགས་པ་གཉིས་ཀྱིས་སྐེ་བ་དཀྲིས་པ། ཨ་མྲའི་
ཡལ་ག་ལ་སོགས་པས་བརྒྱན་པ། གསེར་དང་། དངུལ་དང་། མུ་མེན་དང་། མུ་ཏིག་དང་། བྱི་རུའོ། །ནས་དང་། གྲོ་དང་། འབྲས་ཀྱི་སོ་བ་དང་། ཏིལ་དང་། མོན་སྲན་གྲེའུའོ། །བྲྀ་ཧ་ཏི་དང་། ཀཎྜ་ཀཱ་རི་དང་། རྣམ་པར་རྒྱལ་བ་དཀར་པོ་དང་། དཎྜོཏྤ་ལ་དཀར་པོ་དང་། ཧ་ས་དེ་
བའོ། །རིན་པོ་ཆེ་སྣ་ལྔ་དང་། འབྲུ་སྣ་ལྔ་དང་། སྨན་སྣ་ལྔ་ལྟོ་བའི་ནང་དུ་རབ་ཏུ་བཅུག་ནས། དྲི་ཞིམ་པོའི་ཆུས་ཡོངས་སུ་གང་བར་བྱའོ། །དེའི་སྟེང་དུ་དཀྱིལ་འཁོར་གྱི་འཁོར་ལོ་བསྒོམས་ནས། ཨརྒྷ་དང་། ཞབས་བསིལ་ལ་སོགས་པ་ཕུལ་ཏེ། ཡེ་ཤེས་ཀྱི་བདུད་རྩི་ཞུ་བའི་གཟུགས་
བློ་ཡིས་བཅུག་ནས། དེའི་རྗེས་སུ་མེ་ཏོག་གི་ཕྲེང་བས་བརྒྱན་པའི་རྡོ་རྗེ་སྟེང་དུ་ཡང་དག་པར་བཞག་སྟེ། རང་གི་ལྷག་པའི་ལྷའི་སྔགས་བརྒྱ་རྩ་བརྒྱད་དམ། བདུད་རྩི་འཁྱིལ་པའི་སྔགས་ཀྱིས་མངོན་པར་བསྔགས་པར་བྱའོ། །བུམ་པ་གཞན་རྣམས་ཀྱང་ཇི་ལྟར་རིགས་པར་དཀྱིལ་འཁོར་
གྱི་འཁོར་ལོའི་སྔགས་ཀྱིས་བྱའོ། །མེ་ཏོག་དང་བདུག་པ་ལ་སོགས་པས་ཡང་དག་པར་མཆོད་དེ། གཏོར་མ་བྱིན་ནས་བསྟོད་པ་བྱ་བ་ནི། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁས་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་དབྱིངས་ལ་ཕྱག་འཚལ་བསྟོད། །
རྣམ་པར་སྣང་མཛད་དགའ་ཆེན་པོ། །རྡོ་རྗེ་ཞི་བ་དགའ་བ་ཆེ། །རང་བཞིན་འོད་གསལ་མཆོག་གི་གནས། །སྟོན་པ་རྡོ་རྗེ་ཕྱག་འཚལ་བསྟོད། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མ་མེད། །རང་བཞིན་དག་པ་གོས་པ་མེད། །རྡོ་རྗེ་སྐུ་ལ་ཕྱག་འཚལ་བསྟོད། །རྡོ་རྗེ་དཔག་
མེད་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་ཐོབ། །རྡོ་རྗེ་གསུང་ལ་ཕྱག་འཚལ་བསྟོད། །རྡོ་རྗེ་དོན་ཡོད་རྫོགས་སངས་རྒྱས། །བསམ་པ་ཐམས་ཅད་ཡོངས་རྫོགས་པ། །རང་བཞིན་དག་པ་ཡང་དག་གྱུར། །རྡོ་རྗེ་སེམས་དཔའ་ཕྱག་འཚལ་བསྟོད། །

44-1-174b

ཅེས་བྱ་བ་བརྗོད་དེ་དྲིལ་བུ་དཀྲོལ་བར་བྱའོ། །བུམ་པ་ལྷག་པར་གནས་པའི་ཆོ་གའོ། །དེའི་འོག་ཏུ་དཀྱིལ་འཁོར་བྱས་པའི་སློབ་མ་རྣམས་མེ་ཏོག་གི་ཕྲེང་བ་བཟུང་སྟེ། པུས་མོ་གཡས་པའི་ལྷ་ང་ས་ལ་བཙུགས་ནས། སྔགས་ཀྱི་སྣོད་དུ་རུང་བ་རྣམས་ལ་འདི་བསྒྲག་པར་བྱ་སྟེ། ཁ་ཅིག་གསང་
སྔགས་གྲུབ་དོན་གཉེར། །དཀྱིལ་འཁོར་འདིར་ནི་འཇུག་པར་བྱེད། །བསོད་ནམས་འདོད་པས་དེ་ལས་གཞན། །གཞན་དག་འཇིག་རྟེན་མཆོག་དོན་གཉེར། །འཇིག་རྟེན་མཆོག་དོན་གཉེར་བ་ཡིས། །དད་པ་མང་དུ་བྱེད་པ་ཡི། །བློ་ལྡན་དཀྱིལ་འཁོར་འཇུག་བྱ་ཡི། །ཚེ་འདིར་འབྲས་བུ་འདོད་
མི་བྱ། །ཚེ་འདིར་འདོད་པར་གྱུར་པ་ལ། །འཇིག་རྟེན་ཕ་རོལ་ཐོབ་མི་འགྱུར། །འཇིག་རྟེན་ཕ་རོལ་དོན་གཉེར་ནས། །འཇིག་རྟེན་འདི་ཡི་འབྲས་བུ་རྒྱས། །སློབ་མ་དེ་རྣམས་བློ་ཡིས་རང་གི་ལུས་ལ་བཅུག་ནས། རྡོ་རྗེའི་ལམ་ནས་ཕྱུང་ནས། རང་འོད་ཀྱི་རིག་མའི་པདྨ་ལ་གནས་པར་
བསམས་ལ་དེ་བཞིན་གཤེགས་པ་ཐམས་ཅད་ཞུ་བའི་ངོ་བོས་དབང་བསྐུར་ནས་དཀྱིལ་འཁོར་གྱི་ཤར་སྒོར་བཞག་སྟེ། འཇུག་པའི་དོན་དུ་གསོལ་བ་གདབ་པར་བྱའོ། །ཁྱོད་ནི་སྟོན་པ་དཔལ་ཆེན་པོ། །མཱ་མ་ཀཱི་དང་བདག་སྦྱོར་བའི། །མགོན་པོ་ཆེན་པོ་བདག་འཚལ་ལོ། །བྱང་ཆུབ་ཆེན་པོའི་
ཚུལ་བསྟན་པ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་དང་། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་གཞུག་ཏུ་གསོལ། །ཞེས་བྱའོ། །སློབ་
མ་གཅིག་གཅོ་བོར་བྱས་ནས། བུ་ཁྱོད་ཚུར་ཤོག་ཐེག་ཆེན་གྱི། །ཆོ་ག་སྔགས་ཀྱི་སྤྱོད་པའི་ཚུལ། །ཁྱེད་ལ་ཡང་དག་བཤད་པར་བྱ། །ཁྱོད་ནི་ཚུལ་ཆེན་སྣོད་ཡིན་ཏེ། །དུས་གསུམ་འབྱུང་བའི་སངས་རྒྱས་རྣམས། །སྐུ་གསུང་ཐུགས་ཀྱི་རྡོ་རྗེ་ཅན། །རྡོ་རྗེ་སྔགས་ཀྱི་མཐུ་སྟོབས་
ཀྱིས། །ཡེ་ཤེས་མཉམ་མེད་ཡང་དག་བརྙེས། །གསང་སྔགས་སྦྱོར་བ་མཉམ་མེད་དེ། །ཤཱཀྱ་སེང་སོགས་སྐྱོབ་པ་ཡིས། །བདུད་སྡེ་ཤིན་ཏུ་མི་བཟད་པ། །སྟོབས་ཆེན་དག་ཀྱང་དེ་ཡིས་བཅོམ། །འཇིག་རྟེན་རྗེས་མཐུན་རྟོགས་ནས་ནི། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་

44-1-175a

ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་བརྗོད་པར་བྱས་ནས། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །བསོད་ནམས་ཀུན་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་བྱ་བས་
གསུམ་ལ་སྐྱབས་སུ་འགྲོ་བ་ལན་གསུམ་བརྗོད་པར་བྱའོ། །སློབ་མ་དེ་རྣམས་ལ། ཨོཾ་ཨཱཿ་བིགྷྣཱནྟ་ཀྲྀཏ་ཧཱུྃ། ཞེས་བདུད་རྩི་འཁྱིལ་པའི་སྔགས་ཀྱིས་བསྲུང་བ་བྱས་ལ། དེ་རྣམས་ཀྱི་སྙིང་ག་དང་། མགྲིན་པ་དང་། སྤྱི་བོར་ཟླ་བ་ལ་གནས་པའི་རྡོ་རྗེ་དང་། པདྨ་དང་། འཁོར་ལོའི་ལྟེ་བ་ལ་
ཧཱུྃ་ཨཱཿཨོཾ་རྣམ་པར་བསམ་པར་བྱའོ། །སློབ་དཔོན་ཡང་ལངས་ཏེ། གཡས་པའི་ཁུ་ཚུར་གྱིས་རྡོ་རྗེ་བཟུང་བས། སློབ་མ་རྣམས་ཀྱི་སྙིང་ག་དང་། མགྲིན་པ་དང་། སྤྱི་བོར་རྡོ་རྗེ་ཡང་དག་པར་གཏུགས་ཏེ། ཧཱུྃ་ཨཱཿཨོཾ་ཞེས་བྱ་བ་བརྗོད་ནས་སོ། །མེ་ཏོག་ནི་སྤྱི་བོར་རོ། །བདུག་སྤོས་དང་
མར་མེ་ནི་མདུན་དུའོ། །དེ་བཞིན་དུ་དྲི་ནི་སྙིང་གར་སྦྱིན་པར་བྱའོ། །དེ་ནས་བདུད་རྩི་འཁྱིལ་པའི་སྔགས་ཀྱིས་མངོན་པར་བཟླས་པའི་སོ་ཤིང་གས་པ་མེད་པ། རྨ་མེད་པ། ཨ་ཤྭཏྠ་ལ་སོགས་པ་སོར་བཅུ་གཉིས་ཀྱི་ཚད་རྩེ་མོར་མེ་ཏོག་གི་ཕྲེང་བས་དཀྲིས་པ་སློབ་མ་རྣམས་ལ་སྦྱིན་པར་བྱའོ། །
དེ་རྣམས་ཀྱིས་ཀྱང་ཤར་ཕྱོགས་སུ་ཁ་བལྟས་པའམ། བྱང་ཕྱོགས་སུ་ཁ་བལྟས་པས་བཅའ་སྟེ། ཕྱུགས་ཀྱི་ཀོ་བ་ཙམ་བྱུགས་པའི་ས་ལ་བསྐྱུར་བར་བྱའོ། །དེ་ལ་ཞི་བ་ལ་སོགས་པའི་ལས་བསྟན་པར་བྱ་སྟེ། གང་ཡང་སྔོན་དུ་ཁ་བལྟས་ལྟུང་། །མཆོག་གི་དངོས་གྲུབ་དེར་ཤེས་
བྱ། །དེ་བཞིན་ཤར་དུ་རྩེ་མོ་བལྟས། །དངོས་གྲུབ་འབྲིང་དུ་རབ་ཏུ་གྲགས། །དེ་བཞིན་བྱང་དུ་ཁ་བལྟས་པས། །བྱོལ་སོང་དངོས་གྲུབ་འཇིག་རྟེན་འདོད། །གལ་ཏེ་ལྷོ་རུ་མངོན་ཕྱོགས་པ། །ཤིན་ཏུ་ནག་པོར་དེ་ནས་འགྱུར། །ནུབ་ཏུ་མངོན་པར་ཁ་བལྟས་པས། །ཕྲ་མོའི་དངོས་
གྲུབ་དེ་ནས་ཤེས། །དེ་ནས་སོ་ཤིང་བསྐྱུར་བ་ལས། །གལ་ཏེ་འོག་ཏུ་ཁ་བལྟས་ལྟུང་། །དེ་ནི་ས་འོག་དངོས་གྲུབ་འགྱུར། །ངེས་པར་ཐེ་ཚོམ་མེད་པའོ། །དེ་ནས་སློབ་དཔོན་གྱིས་ཁ་བཤལ་བ་ཆུ་ཁྱོར་བ་གསུམ་བླུད་པར་བྱ་སྟེ། ཨོཾ་ཧྲཱིཿབི་ཤུདྡྷ་སརྦྦ་དྷརྨྨ་པཱ་པཾ་ནི་ཤྩ་སཾ་ཤོ་དྷ་ཡ། སརྦྦ་

44-1-175b

བི་ཀལྤཱ་ན་ཨ་པ་ན་ཡ་ཧཱུྃ། ཞེས་བྱ་བའི་སྔགས་ཀྱིས་ཁ་བཤལ་བར་བྱའོ། །ཡང་དེ་རྣམས་འདུག་ཏུ་བཅུག་ནས། ཀུ་ཤ་ལ་བདུད་རྩི་འཁྱིལ་པའི་སྔགས་ཀྱིས་མངོན་པར་བཟླས་ཏེ་དེ་རྣམས་ལ་སྟན་དང་སྔས་སུ་བྱིན་ནས། དེ་ཉིད་ཀྱི་སྔགས་ཀྱིས་མངོན་པར་བཟླས་པ། སྐུད་པ་སུམ་སྒྲིལ་
བྱས་ཏེ། མདུད་པ་གསུམ་བྱས་པ་བསྲུང་བའི་དོན་དུ་སློབ་མ་རྣམས་ཀྱི་དཔུང་པ་གཡས་པ་ལ་བཅིངས་ཏེ། ཆོས་བཤད་པས་སྤྲོ་བ་བསྐྱེད་པར་བྱའོ། །འཇིག་རྟེན་དུ་ནི་ཀུན་མཁྱེན་རྣམས། །ཨུ་དུམྦཱ་རའི་མེ་ཏོག་བཞིན། །བརྒྱ་ལམ་ནས་ནི་རེས་འགའ་ཞིག །འབྱུང་འགྱུར་ཡང་ནི་མི་
འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་སེམས་ཅན་མཉམ་མེད་དོན། །མྱ་ངན་མི་འདའ་བྱེད་པར་ནུས། །བསྐལ་བ་བྱེ་བ་དུ་མ་རུ། །སྡིག་པ་བགྱིས་པར་གྱུར་པ་གང་། །དེ་ཀུན་དཀྱིལ་འཁོར་འདི་འདྲ་བ། །མཐོང་ནས་འབྱང་བར་
འགྱུར་ལ་གསན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་པ་སྨོས་ཅི་དགོས། །གང་དག་སྤྱོད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་བ། །དེང་བདག་གིས་ནི་ངན་འགྲོའི་རྒྱུན། །སྡུག་བསྔལ་ཀུན་འབྱུང་རབ་ཏུ་བཅད། །བདག་ཉིད་ཆེན་པོ་ཁྱེད་རྣམས་
ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པ། །བདག་ཉིད་ཆེན་པོ་ཀུན་གྱིས་ནི། །བསྟན་པ་འདི་ནི་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པའོ། །དེ་ཕྱིར་ཁྱེད་རྣམས་ཐེག་ཆེན་ལ། །སང་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་
བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བས་ན། །དེ་བཞིན་གཤེགས་པ་རྣམས་སུ་འགྱུར། །ཞེས་བྱ་བ་ལ་སོགས་པའི་ཆོས་བཤད་ཅིང་བསྒྲགས་ནས། དེ་རྣམས་བདུད་རྩི་འཁྱིལ་པའི་སྔགས་ཀྱིས་ཡང་དག་པར་བསྲུངས་ལ། སྡོམ་པའི་བྱེ་བྲག་གཟུང་བར་བྱའོ། །
ཕྱིར་མི་ལྡོག་པའི་འཁོར་ལོའི་དབང་། །བྱིན་ནས་མགོན་པོ་བདག་ལ་གསུངས། །དཀྱིལ་འཁོར་ལྷ་ཡི་དེ་ཉིད་དང་། །སློབ་དཔོན་གྱི་ནི་ལས་རྣམས་དང་། །སངས་རྒྱས་རྣམས་ཀྱི་དམ་ཚིག་དང་། །གསང་བའི་སྡོམ་པ་བླ་ན་མེད། །སེམས་ཅན་རྣམས་ཀྱི་དོན་བྱེད་ཕྱིར། །རྟག་ཏུ་བདག་ནི་སློབ་དཔོན་

44-1-176a

འགྱུར། །ཞེས་བྱའོ། །སློབ་མ་དེ་རྣམས་ཀུ་ཤའི་སྟན་ལ་ཉལ་དུ་བཅུག་སྟེ། རྨི་ལམ་ལ་ཅི་མཐོང་བ་ང་ལ་ཟློས་ཤིག་ཅེས་བྱའོ། །སློབ་མ་ལྷག་པར་གནས་པའི་ཆོ་གའོ། །ཡང་དཀྱིལ་འཁོར་གྱི་ཁང་པར་སློབ་དཔོན་ཞུགས་ནས་བསྲུང་བའི་དོན་དུ་བདུད་རྩི་
འཁྱིལ་པའི་སྔགས་བཟླས་པར་བྱའོ། །གཏོར་མ་ཡང་བྱིན་ནས། ཨོཾ་ཨཱཿ་བིགྷྣཱནྟ་ཀྲྀཏ་ཧཱུྃ། ཞེས་བྱ་བའི་སྔགས་ཀྱིས་ནང་པར་སྔ་བར་ཕྱིར་བྱུང་ནས་སློབ་མ་དེ་རྣམས་བོས་ཏེ། དེ་རྣམས་ཀྱི་རྨི་ལམ་དགེ་བའམ། མི་དགེ་བ་དྲིས་ནས། གལ་ཏེ་རྨི་ལམ་མི་དགེ་ན་བདུད་རྩི་འཁྱིལ་པའི་སྔགས་
ཀྱིས་བསྲུང་བར་བྱའོ། །དེ་ནས་བྲིས་སྐུ་ལ་སོགས་པའི་དཀྱིལ་འཁོར་ལ་མཆོད་པ་རྒྱ་ཆེན་པོ་བྱས་ནས། རང་གི་ལྷའི་རྣལ་འབྱོར་སྔོན་དུ་སོང་བས། རང་ཉིད་ཀྱིས་སློབ་མ་འཇུག་པའི་ཆོ་གས་ཞུགས་ནས། དེ་ནས་འོག་ནས་འབྱུང་བ་བཞིན་དུ་རྗེས་སུ་གནང་བའི་དབང་གི་བར་བཅོམ་ལྡན་འདས་གཙོ་བོ་
ལ་བློ་ཡིས་འཐོབ་པར་བྱའོ། །དེ་ནས་སློབ་མ་རྣམས་གཞུག་པར་བྱ་བའི་དོན་དུ་བདེན་པའི་བྱིན་གྱི་རླབས་གསོལ་བར་བྱའོ། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་འབྱུང་། །དེ་
བཞིན་ཉིད་ལས་ངེས་པར་སྐྱེས། །བདེན་པ་འདི་ཡིས་དཀྱིལ་འཁོར་དུ། །གཟུགས་བརྙན་ལྟ་བུ་སློབ་མས་ནི། །གསལ་ཤིང་སྡིག་མེད་མཐོང་བར་ཤོག །ཅེས་བྱ་བས་བདེན་པའི་བྱིན་གྱི་རླབས་གསོལ་ནས། ཡོལ་བ་ལས་ཕྱི་རོལ་དུ་ཡོན་བྱིན་པའི་སློབ་མ་དབང་བསྐུར་བ་ནི་སྣོད་དུ་བྱ་
བའི་ཕྱིར། རྣམ་པར་སྣང་མཛད་ཀྱི་གཟུགས་སུ་ཉེ་བར་དམིགས་ལ། ཨཱ་ཁཾ་བཱི་ར་ཧཱུྃ། ཞེས་བྱ་བའི་སྔགས་ཀྱིས་མེ་ཏོག་གི་ཕྲེང་བ་བཟུང་བ་གདོང་གཡོགས་ཀྱིས་དཀྲིས་པ་བུམ་པའི་ཆུས་གཏོར་བ་དཀྱིལ་འཁོར་དུ་འཇུག་པའི་དོན་དུ་དྲི་བར་བྱའོ། །ཀྱེ་ཁྱོད་གང་ལ་དགའ་ཞེས་བྱ། །བདེ་བ་
ཆེན་པོ་བདག་ནི་སྐལ་བ་བཟང་པོ་ལ་ཞེས་བྱའོ། །སློབ་མའི་སྙིང་གར་རྡོ་རྗེ་བཞག་ནས། ཨོཾ་སརྦྦ་ཡོ་ག་ཙིཏྟ་ཨུཏྤཱ་ད་ཡཱ་མི། སུ་ར་ཏེ་ས་མ་ཡ་སྟྭཾ་ཧོཿསིདྡྷི་བཛྲ་ཡ་ཐཱ་སུ་ཁཾ། ཞེས་བྱ་བ་འདིས་བྱང་ཆུབ་ཀྱི་སེམས་བསྐྱེད་ནས་བརྗོད་པར་བྱ་སྟེ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་

44-1-176b

བརླབ་པར་འགྱུར་རོ། །ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་འདི་དཀྱིལ་འཁོར་དུ་མ་ཞུགས་པ་རྣམས་ལ་བརྗོད་པར་མི་བྱ་ཞིང་མི་དད་པར་ཡང་མི་བྱའོ། །ཧཱུྃ་ཛཿཧཱུྃ་ཞེས་བྱ་བ་འདིས་བཀུག་སྟེ་ཡོལ་བའི་ནང་དུ་བཅུག་ནས་དཀྱིལ་འཁོར་གྱི་ཤར་གྱི་སྒོར་ཡང་དག་
པར་བཞག་སྟེ། འདི་སྐད་དུ་བརྗོད་པར་བྱའོ། །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱི། དེའི་ཕྱིར་ངས་ཁྱོད་ལ་རྡོ་རྗེའི་ཡེ་ཤེས་བསྐྱེད་པར་བྱའོ། །ཡེ་ཤེས་གང་གིས་ཁྱོད་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་པར་འགྱུར་ན། དངོས་གྲུབ་གཞན་
ལྟ་སྨོས་ཀྱང་ཅི་དགོས་ཁྱོད་ཀྱིས་དཀྱིལ་འཁོར་མ་མཐོང་བ་རྣམས་ཀྱི་མདུན་དུ་བརྗོད་པར་མ་བྱེད་ཅིག་དམ་ཚིག་ཉམས་པར་གྱུར་ཏ་རེ། ཡང་སློབ་མའི་སྤྱི་བོར་རྡོ་རྗེ་གཞག་ལ་བརྗོད་པར་བྱ་སྟེ། འདི་ནི་དམ་ཚིག་རྡོ་རྗེ་སྟེ། །གལ་ཏེ་ལ་ལར་ཁྱོད་འདི་སྨྲ། །ཁྱོད་ནི་སྤྱི་བོ་འགས་པར་བྱེད། །
མེ་ཏོག་དང་བཅས་པའི་རྡོ་རྗེ་སྙིང་གར་གཞག་ལ་བརྗོད་པར་བྱ་སྟེ། ཨོཾ་རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་གྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ནས་གཤེགས། །འདིས་མནའ་བསྒགས་ནས་བདུད་རྩི་རྣམ་པ་ལྔ་པདྨའི་སྣོད་ལ་གནས་པའི་
ཡི་གེ་གསུམ་གྱིས་བརླབས་ལ། ཨོཾ་བཛྲ་ཨ་མྲྀ་ཏོ་ད་ཡ་ཧཱུྃ་ཋཿཞེས་བྱ་བ་འདིས་ལན་བདུན་བཟླས་པ་བྱས་ནས། འདི་ནི་ཁྱོད་ཀྱི་དམྱལ་བའི་ཆུ། །དམ་ལས་འདས་ན་བསྲེག་པར་འགྱུར། །དམ་ཚིག་བསྲུངས་ན་དངོས་གྲུབ་སྟེར། །རྡོ་རྗེ་བདུད་རྩི་ཆུ་འཐུངས་ཤིག །ཅེས་བརྗོད་ལ་བླུད་པར་
བྱའོ། །དེ་ནས་འདི་བརྗོད་པར་བྱ་སྟེ། དེང་ཕྱིན་ཆད་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱིས། ངས་འདི་གྱིས་ཤིག་ཅེས་བསྒོ་བ་གང་ཡིན་པ་དེ་ཡང་ཁྱོད་ཀྱིས་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་བ་མ་སྤངས་པར་ཁྱོད་འཆི་བའི་དུས་བྱས་ནས་དམྱལ་བར་ལྟུང་བར་གྱུར་ཏ་རེ་ཞེས་
བརྗོད་པས་དམ་ཚིག་གི་ཆུ་སྦྱིན་པར་བྱའོ། །དེ་ནས་སློབ་མས་འདི་ལྟར་བརྗོད་དུ་གཞུག་སྟེ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབ་ལ་རྡོ་རྗེ་སེམས་དཔའ་བདག་ལ་དབབ་ཏུ་གསོལ་ཞེས་བྱའོ། །དེ་ནས་སློབ་མའི་སྙིང་གར་ལཾ་སེར་པོ་ཡོངས་སུ་གྱུར་པ་ལས། རྡོ་རྗེ་རྩེ་གསུམ་

44-1-177a

ལས་མཚན་པའི་དབང་ཆེན་གྱི་དཀྱིལ་འཁོར་གྲུ་བཞི་པ་ལ་ཡི་གེ་ཧཱུྃ་གནས་པའོ། །སྤྱི་བོར་བཾ་ཡིག་ལས་སྐྱེས་པའི་བུམ་པས་མཚན་པའི་ཆུའི་དཀྱིལ་འཁོར་ཟླུམ་པོ་དཀར་པོ་ལ་ཡི་གེ་ཧཿགནས་པའོ། །མགྲིན་པར་ཡཾ་ཡིག་ལས་སྐྱེས་པ་གཡོ་བའི་བ་དན་གཉིས་ཀྱིས་
མཚན་པའི་དུ་བའི་མདོག་ཅན་གཞུའི་རྣམ་པ་ལྟ་བུ་རླུང་གི་དཀྱིལ་འཁོར་ལ་ཡི་གེ་ཨཱཿགནས་པའོ། །རྐང་པའི་མཐིལ་དུ་རླུང་གི་དཀྱིལ་འཁོར་གྱིས་སྦར་བའི་གྲུ་གསུམ་པ་འོད་ཟེར་འཕྲོ་བའི་མེའི་དཀྱིལ་འཁོར་ལ་ཡི་གེ་ཛྷེཾཿགནས་པའི་འོད་ཟེར་དང་བཅས་པ་བསྒོམས་ཏེ། དྲེགས་པ་དང་བཅས་
པའི་དྲིལ་བུ་དཀྲོལ་ལ། ཨཱ་བེ་ཤ་ཡ་སྟྭཾ་བྷ་ཡ་ར་ར་ར་ར་ཅཱ་ལ་ཡ་ཧཱུྃ་ཧཿཨཿཛྷཻཾཿཞེས་བརྗོད་ནས་ལྕེ་ལ་ཡི་གེ་ཨཱཿདམར་པོ་བསམས་ནས་འོད་དཔག་ཏུ་མེད་པའི་གཟུགས་སུ་བསྒོམ་པར་བྱའོ། །བབས་ནས་བུ་ཁྱོད་དགེ་དང་མི་དགེ་སྨོས་ཞེས་བྱ་བ་བརྗོད་དོ། །སྨྲ་བ་ཤེས་ནས་ཨོཾ་ཏིཥྛ་བཛྲ། ཞེས་བྱ་
བས་བརྟན་པར་བྱའོ། །ཁྱོད་ཀྱི་མིག་ལ་ཅི་སྣང་ཅི་མཐོང་ཞེས་དྲིས་ནས། དེ་ནས་དེ་ཡིས་བརྗོད་དེ། དཀར་པོ་དང་། སེར་པོ་དང་། དམར་པོ་དང་། ནག་པོ་མཐོང་ན། ཞི་བ་དང་། རྒྱས་པ་དང་། དབང་དང་། མངོན་སྤྱོད་ཀྱི་དངོས་གྲུབ་ཀྱི་སྣོད་དང་ལྡན་པར་བརྗོད་ནས་བདེན་པའི་བྱིན་གྱི་རླབས་
བརྗོད་པར་བྱ་སྟེ། དེ་ལྟར་དཀྱིལ་འཁོར་ཡང་དག་འདིར། །བདག་གིས་སློབ་མ་གཞུག་པ་ལ། །ཇི་ལྟར་བསོད་ནམས་དེ་བཞིན་ཤོག །ལྷ་རྣམས་ཀྱི་ནི་རིགས་ཀྱི་རིམ། །ཇི་ལྟར་དངོས་གྲུབ་རིམ་པ་འདི། །གང་གི་རིགས་ཀྱི་སྣོད་ཡིན་ལ། །ཇི་ལྟར་བསོད་ནམས་མཐུ་ཡིས་ནི། །དཀྱིལ་
འཁོར་འདིར་ཡང་དེ་བཞིན་ཤོག །དེ་ནས་མེ་ཏོག་གི་ཕྲེང་བ་དེ། པྲ་ཏཱིཙྪ་བཛྲ་ཧོཿཞེས་བྱ་བ་འདི་ཡིས་དཀྱིལ་འཁོར་ལ་བསྒྱུར་བར་བྱའོ། །དེ་ནས་མེ་ཏོག་ལྷུང་བ་ལ། དམན་པ་དང་། འབྲིང་དང་། མཆོག་གི་དངོས་གྲུབ་མཚོན་པར་བྱའོ། །དེ་ལ་གལ་ཏེ་སངས་རྒྱས་རྣམས་ཀྱི་དབུའི་སྤྱི་
གཙུག་གི་དཔྲལ་བར་བབས་ན་དེས་ཕྱག་རྒྱ་ཆེན་པོའི་དངོས་གྲུབ་ཐོབ་པོ། །གལ་ཏེ་སྤྱན་ནམ་ཞལ་ལ་བབས་ན་དེ་སྔགས་ཀྱི་དངོས་གྲུབ་བོ། །ཡན་ལག་མཆོག་ལ་ནི་མཆོག་གོ། །ཡན་ལག་འབྲིང་ལ་ནི་འབྲིང་ངོ་། །སྨད་ཀྱི་ཆ་ལ་ནི་ཐ་མའོ། །གཟུགས་ལས་ཤིན་ཏུ་རིང་བར་

44-1-177b

བབས་ན་ཕྲན་ཚེགས་སོ། །ཉེ་བ་ནི་དངོས་གྲུབ་མྱུར་དུ་འགྲུབ་པའོ། །ལྷ་རྣམས་ཀྱི་རང་གི་རེའུ་མིག་གི་གནས་ལ་རྣམ་པར་དཔྱད་པའི་ཕྱིར་ཤེས་པར་བྱའོ། །གལ་ཏེ་ལྷ་གཉིས་ཀྱི་དབུས་སུ་ལྷུང་ན། དེའི་ཚེ་མེ་ཏོག་གང་དང་ཉེ་བར་བབས་པ་དེའི་རིགས་ཡིན་ནོ། །དཀྱིལ་འཁོར་གྱི་ཕྱི་རོལ་
དུ་བབས་ན་ཕྲན་ཚེགས་ཀྱི་དངོས་གྲུབ་བོ། །གལ་ཏེ་དཀྱིལ་འཁོར་གྱི་མཚམས་ཀྱི་ཕྱི་རོལ་ལ་བབས་ན། དེའི་ཚེ་ཡང་བསྐྱུར་དུ་གཞུག་གོ། །ལན་གསུམ་དུ་བྱས་ཏེ་དེ་ལ་དེ་ཉིད་དུ་བབས་ན་དངོས་གྲུབ་མེད་དེ། ཕྱིའི་རྡོ་རྗེ་ར་བའི་ཕྱི་རོལ་དུ་ལྷུང་ན་དངོས་གྲུབ་མེད་དོ། །ནང་དུ་བབས་ན་ཤིན་ཏུ་
དཀའ་བས་སོ་ཞེས་བྱ་བ་ནི་མེ་ཏོག་བསྐྱུར་བའི་ཆོ་གའོ། །དེ་ནས་ཡང་མེ་ཏོག་ཕྲེང་བ་དེ་ཡང་བླངས་ནས། སློབ་མའི་སྤྱི་བོར་བཅིང་བར་བྱ་སྟེ། པྲ་ཏི་གྲྀཧྣ་སྟྭཾ་མི་མཾ་སཏྭ་མ་ཧཱ་པ་ལ། ཞེས་བྱ་བ་བརྗོད་དོ། །མིག་གཉིས་ལ་ཡི་གེ་ཨོཾ་བསམས་ནས། རྡོ་རྗེ་སེམས་དཔའ་དེང་ཁྱོད་ཀྱི། །མིག་
འབྱེད་པ་ལ་བརྩོན་པར་མཛད། །མིག་ནི་ཐམས་ཅད་འབྱེད་མཛད་དེ། །རྡོ་རྗེའི་མིག་ནི་བླ་ན་མེད། །ཅེས་བྱ་བ་བརྗོད་ནས་གདོང་གཡོགས་དགྲོལ་བར་བྱའོ། །དེ་ནས་དཀྱིལ་འཁོར་བསྟན་པར་བྱ་སྟེ། དབུས་སུ་རྣམ་པར་ཤེས་པའི་ཕུང་པོ་མི་བསྐྱོད་པ་ཤར་ལ་སོགས་པའི་ཕྱོགས་སུ་གཟུགས་ནི་
རྣམ་པར་སྣང་མཛད་དོ། །ཚོར་བ་ནི་རིན་ཆེན་འབྱུང་ལྡན་ནོ། །འདུ་ཤེས་ནི་འོད་དཔག་ཏུ་མེད་པའོ། །འདུ་བྱེད་ནི་དོན་ཡོད་གྲུབ་པའོ། །མེ་ལ་སོགས་པའི་མཚམས་རྣམས་སུ་སའི་ཁམས་ནི་སྤྱན་མའོ། །ཆུའི་ཁམས་ནི་མཱ་མ་ཀཱིའོ། །མེའི་ཁམས་ནི་གོས་དཀར་མོའོ། །རླུང་གི་ཁམས་
ནི་སྒྲོལ་མའོ། །ཕྱིའི་དཀྱིལ་འཁོར་གྱི་མེ་ལ་སོགས་པའི་མཚམས་བཞི་དང་ཤར་ཕྱོགས་ཀྱི་སྒོའི་མཚམས་རྣམས་སུ་གཟུགས་རྡོ་རྗེ་མ་དང་། སྒྲ་རྡོ་རྗེ་མ་དང་། དྲི་རྡོ་རྗེ་མ་དང་། རོ་རྡོ་རྗེ་མ་དང་། རེག་བྱ་རྡོ་རྗེ་མ་དང་། ཆོས་ཀྱི་དབྱིངས་ཀྱི་རྡོ་རྗེ་མའོ། །གཤིན་རྗེ་མཐར་བྱེད་དང་། པདྨ་མཐར་བྱེད་དང་།
ཤེས་རབ་མཐར་བྱེད་དང་། བགེགས་མཐར་བྱེད་རྣམས་ནི་ཤར་ལ་སོགས་པའི་སྒོར་གནས་པའོ་ཞེས་བྱ་བ་ནི་དཀྱིལ་འཁོར་དུ་འཇུག་པའི་ཆོ་གའོ། །ད་ནི་དབང་བསྐུར་བའི་ཆོ་ག་བརྗོད་པར་བྱ་སྟེ། བྱང་ཆུབ་རྡོ་རྗེ་སངས་རྒྱས་རྣམས། །མཆོད་ཆེན་ཇི་ལྟར་བྱིན་པ་ལྟར། །བདག་ཀྱང་བསྒྲལ་

44-1-178a

བའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་གསོལ། །ཞེས་བྱ་བས་གསོལ་བ་གདབ་པ་དང་ལྡན་པའི་སློབ་མ་མི་བསྐྱོད་པའི་གཟུགས་སུ་དམིགས་ནས། རང་རིག་སྐྱེས་བུའི་ཆུ་ཡིས་ནི། །ཀུན་དུ་བུམ་པའི་རྒྱན་རྣམས་ཀྱིས། །དབང་བསྐུར་རྡོ་རྗེ་ཅན་བསམས་ནས། །
རྡོ་རྗེ་ཐུགས་ནི་རབ་ཏུ་བསྒོམ། །རྡོ་རྗེ་དང་བཅས་པའི་ཁུ་ཚུར་གྱིས་ཆུ་བླངས་ནས། དབང་བསྐུར་བ་ནི་རྡོ་རྗེ་ཆེ། །ཁམས་གསུམ་པ་ཡིས་ཕྱག་བྱས་པ། །གསང་བ་གསུམ་ལས་བྱུང་བ་ཡི། །སངས་རྒྱས་ཀུན་གྱིས་སྦྱིན་པར་བྱ། །ཨོཾ་བཛྲ་ཨ་བྷི་ཥིཉྩ་མི་སྟྭཾ། ཞེས་བྱ་བ་བརྗོད་ནས། སློབ་མ་འཁོར་
ལོས་སྒྱུར་བ་བཞིན་དུ་དབང་བསྐུར་བར་བྱའོ་ཞེས་བྱ་བ་ནི་ཆུའི་དབང་བསྐུར་བའི་ཆོ་ག་སྟེ། མེ་ལོང་ལྟ་བུའི་ཡེ་ཤེས་སོ། །དེ་ནས་གོང་དུ་བསྟན་པའི་རིམ་པས་གསེར་རམ་གོས་ལ་སོགས་པ་ལས་བྱས་པའི་དབུ་རྒྱན་རིན་ཆེན་འབྱུང་ལྡན་གྱི་སྦྱོར་བས་སློབ་མའི་མགོ་ལ་སྦྱིན་པར་བྱའོ། །ཨོཾ་སརྦྦ་
བུདྡྷ་ཙུ་ཌ་མཱ་ཎི་མ་ཧཱ་མ་གུ་ཏཾ་པྲ་ཏཱིཙྪ་བཛྲ་ཧོཿ། ནམ་མཁའི་ཁམས་ཀྱི་ཡོངས་སུ་གཏོགས་པའི་དེ་བཞིན་གཤེགས་པ་ཐམས་ཅད་རིགས་ཀྱི་བདག་པོའི་གཟུགས་ཀྱི་དབུ་བརྒྱན་ལ་ཉེ་བར་གནས་པ་བསམ་པར་བྱའོ་ཞེས་བྱ་བ་ནི་དབུ་རྒྱན་གྱི་དབང་བསྐུར་བའི་ཆོ་ག་སྟེ། མཉམ་པ་ཉིད་ཀྱི་ཡེ་ཤེས་སོ། །
དེ་ནས་རྡོ་རྗེ་རྩེ་ལྔ་པ་ཆེན་པོ་ལག་པས་སྙིང་གར་བཞག །སློབ་མ་འཇིག་རྟེན་དབང་འདྲ་ཞིང་། །རྡོ་རྗེ་སེམས་དཔའ་ཞེས་དབང་བསྐུར། །སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །འདི་དེ་སངས་རྒྱས་ཐམས་ཅད་ཀྱི། །དངོས་གྲུབ་ཕྱིར་ན་རྡོ་རྗེ་ལོང་། །ཞེས་བྱ་བ་བརྗོད་
ལ། རྡོ་རྗེ་སྙིང་ག་ལ་སོགས་པར་གཏུགས་ནས། ལག་པ་གཡས་པར་རྡོ་རྗེ་སྦྱིན་པར་བྱའོ་ཞེས་བྱ་བ་ནི་རྡོ་རྗེའི་དབང་གི་ཆོ་ག་སྟེ། སོ་སོར་ཀུན་དུ་རྟོག་པའི་ཡེ་ཤེས་སོ། །དེ་ནས་དོན་ཡོད་གྲུབ་པའི་གཟུགས་སུ་དམིགས་ནས། ལག་པ་གཡོན་པས་དྲིལ་བུ་བྱིན་ལ་སློབ་མ་རྡོ་རྗེ་དྲིལ་བུ་དང་ལྡན་
པའི་ལག་པ་གཉིས་ཀྱིས་འཁྱུད་པའི་རྣམ་པ་ལྟར་བྱས་ནས། ཨོཾ་བཛྲ་ཨ་དྷི་པ་ཏི་ཏྭཾ་ཨ་བྷི་ཥིཉྩཱ་མི་ཏིཥྛ་བཛྲ་མ་ཧཱ་ས་མ་ཡ་སྟྭཾ། ཞེས་བྱ་བ་ནི་དྲིལ་བུའི་དབང་གི་ཆོ་ག་སྟེ། བྱ་བ་ནན་ཏན་གྱི་ཡེ་ཤེས་སོ། །དེ་ནས་རྣམ་པར་སྣང་མཛད་ཀྱི་གཟུགས་སུ་དམིགས་ནས། མིང་གི་དབང་བསྐུར་

44-1-178b

བར་བྱ་སྟེ། མགོ་བོར་རྡོ་རྗེ་དྲིལ་བུ་བཞག་ནས། ཨོཾ་བཛྲ་སཏྭ་ཏྭཾ་ཨ་བྷི་ཥིཉྩཱ་མི་བཛྲ་ནཱ་མ་ཨ་བྷི་ཥེ་ཀ་ཏཿ། ཀྱེ་དཔལ་ཞེ་སྡང་རྡོ་རྗེ། ཀྱེ་དཔལ་གཏི་མུག་རྡོ་རྗེ། ཀྱེ་དཔལ་ང་རྒྱལ་རྡོ་རྗེ། ཀྱེ་དཔལ་འདོད་ཆགས་རྡོ་རྗེ། ཀྱེ་དཔལ་ཕྲག་དོག་རྡོ་རྗེ་ཞེས་བྱ་བ་ལ་སོགས་པ་རིགས་དང་རྗེས་སུ་མཐུན་
པའི་ངོ་བོ་ཉིད་ཀྱིས་མིང་བྱའོ། །མི་བསྐྱོད་པ་ནི་དགྱེས་པའི་རྡོ་རྗེ་དང་། ལོངས་སྤྱོད་རྡོ་རྗེ་དང་། དགའ་བའི་རྡོ་རྗེ་དང་། སྒེག་པའི་རྡོ་རྗེ་དང་། རོལ་པའི་རྡོ་རྗེ་དང་། རང་བྱུང་རྡོ་རྗེ་དང་། ཞེ་སྡང་རྡོ་རྗེ་དང་། ཀྱཻ་རྡོ་རྗེ་དང་། སྙིང་རྗེ་སྟོབས་ཀྱི་རྡོ་རྗེ་དང་། ཐུགས་ཀྱི་རྡོ་རྗེ་ཞེས་བརྗོད་དོ། །རྣམ་པར་སྣང་
མཛད་ཀྱི་ནི་རྣམ་པར་སྣང་མཛད་རྡོ་རྗེ་དང་། གཏི་མུག་རྡོ་རྗེ་དང་། ཨོཾ་ཡིག་རྡོ་རྗེ་དང་། རྟག་པའི་རྡོ་རྗེ་དང་། དེ་བཞིན་གཤེགས་པའི་རྡོ་རྗེ་དང་། སྒྱུ་མའི་རྡོ་རྗེ་དང་། སངས་རྒྱས་རྡོ་རྗེ་དང་། སྐུའི་རྡོ་རྗེ་ཞེས་མངོན་པར་བརྗོད་དོ། །རིན་ཆེན་འབྱུང་ལྡན་གྱི་ནི་རིན་ཆེན་རྡོ་རྗེ་དང་། ཡིད་བཞིན་ནོར་
བུ་རྡོ་རྗེ་དང་། མཁའ་རྡོ་རྗེ་དང་། ནམ་མཁའ་རྡོ་རྗེ་དང་། མ་རྡོ་རྗེ་དང་། ཉི་མ་རྡོ་རྗེ་དང་། འོད་བྱེད་རྡོ་རྗེ་དང་། ང་རྒྱལ་རྡོ་རྗེ་ཞེས་བྱ་བ་ལ་སོགས་པ་བསྟན་ཏོ། །འོད་དཔག་མེད་ཀྱི་ནི་འདོད་ཆགས་རྡོ་རྗེ་དང་། སྤྱན་རས་གཟིགས་རྡོ་རྗེ་དང་། ཆོས་རྡོ་རྗེ་དང་། པདྨའི་རྡོ་རྗེ་དང་། ཤེས་རབ་མྱུ་གུ་
རྡོ་རྗེ་དང་། བདེ་བའི་མྱུ་གུ་རྡོ་རྗེ་དང་། སྙིང་རྗེ་མྱུ་གུ་རྡོ་རྗེ་དང་། པདྨའི་མྱུ་གུ་རྡོ་རྗེ་དང་། མཆོག་དགའི་རྡོ་རྗེ་དང་། དགའ་བདེའི་རྡོ་རྗེ་དང་། ངག་གི་རྡོ་རྗེ་ཞེས་བྱ་བར་བརྗོད་དོ། །དོན་ཡོད་གྲུབ་པའི་ནི། དོན་ཡོད་གྲུབ་པ་རྡོ་རྗེ་དང་། རྡོ་རྗེ་རྟ་མཆོག་དང་། དམ་ཚིག་རྡོ་རྗེ་དང་། ཕ་རོལ་ཏུ་ཕྱིན་
པའི་རྡོ་རྗེ་དང་། ལམ་གྱི་རྡོ་རྗེ་དང་། ཕྲག་དོག་རྡོ་རྗེ་ཞེས་བརྗོད་དོ། །རྡོ་རྗེ་སེམས་དཔའི་ནི། མཆོག་གི་དང་པོའི་རྡོ་རྗེ་དང་། མི་མཉམ་པའི་རྡོ་རྗེ་དང་། དགའ་བའི་རྡོ་རྗེ་དང་། དམ་ཚིག་རྡོ་རྗེ་དང་། རྣམ་པར་རྒྱལ་བའི་རྡོ་རྗེ་དང་། བདེ་བ་ཆེན་པོའི་རྡོ་རྗེ་དང་། མི་གཡོ་བའི་རྡོ་རྗེ་དང་། སེམས་
དཔའི་རྡོ་རྗེ་དང་། ཡན་ལག་མེད་པའི་རྡོ་རྗེ་དང་། ཡེ་ཤེས་རྡོ་རྗེ་དང་། ལྷན་ཅིག་སྐྱེས་པའི་རྡོ་རྗེ་དང་ཞེས་བྱ་བར་རབ་ཏུ་གྲགས་པའོ། །མི་བསྐྱོད་པའི་རིམ་གྱིས་བུད་མེད་རྣམས་ལ་ནི། བདག་མེད་རྡོ་རྗེ་དང་། ཕྱག་ན་རྡོ་རྗེ་མ་དང་། རྡོ་རྗེ་ཕྲེང་བ་མ་དང་། འབྱུང་གནས་རྡོ་རྗེ་མ་དང་། རྡོ་རྗེ་མཱ་མ་ཀཱི་ཞེས་

44-1-179a

བརྗོད་དོ། །རྣམ་པར་སྣང་མཛད་ཀྱི་ནི། རྡོ་རྗེ་སྤྱན་མ་དང་། རྡོ་རྗེ་མཁའ་འགྲོ་མ་དང་། རྡོ་རྗེ་དཀར་མོ་དང་། རྡོ་རྗེ་སྒེག་མོ་དང་། རྡོ་རྗེ་འཁྱུད་མ་ཞེས་བརྗོད་དོ། །རིན་ཆེན་འབྱུང་ལྡན་གྱི་ནི། རྡོ་རྗེ་སྒྲོལ་མ་དང་། རྡོ་རྗེ་དབུགས་འབྱིན་མ་དང་། རྡོ་རྗེ་འབར་མ་དང་། རྡོ་རྗེ་ཕྲེང་བ་
མ་ཞེས་བརྗོད་དོ། །འོད་དཔག་ཏུ་མེད་པ་ནི། འདོད་ཆགས་རྡོ་རྗེ་མ་དང་། རྡོ་རྗེ་གླུ་མ་དང་། ངོ་མཚར་བདེ་བའི་རྡོ་རྗེ་མ་དང་། རྡོ་རྗེ་བེ་ཏཱ་ལཱི་དང་། རྡོ་རྗེ་བློ་མ་དང་། རྡོ་རྗེ་བཞད་མ་དང་། པདྨ་རྡོ་རྗེ་མ་དང་། རྡོ་རྗེ་གོས་དཀར་མོ་ཞེས་བརྗོད་དོ། །དོན་ཡོད་གྲུབ་པའི་ནི། རྡོ་རྗེ་སྙིང་པོ་མ་དང་། རྡོ་རྗེ་སྒྱུ་མ་དང་། 
རྡོ་རྗེ་ཐོ་བ་མོ་དང་། རྡོ་རྗེ་སྒྲོལ་མ་ཞེས་བརྗོད་དོ། །རྡོ་རྗེ་སེམས་དཔའི་ནི། རྡོ་རྗེ་རོལ་མ་དང་། རྡོ་རྗེ་མགྱོགས་མ་དང་། རྡོ་རྗེ་འདོད་མ་དང་། རྡོ་རྗེ་ཀང་ཀ་མ་དང་། རྡོ་རྗེ་ལྦུ་བ་མ་དང་། རྡོ་རྗེ་འཆར་མ་དང་། རྡོ་རྗེ་མཱ་མ་ཀཱི་ཞེས་བརྗོད་དོ། །མིང་གི་དབང་བསྐུར་བའི་ཆོ་ག་སྟེ། ཤིན་ཏུ་རྣམ་པར་
དག་པའི་ཆོས་ཀྱི་དབྱིངས་ཀྱི་ཡེ་ཤེས་སོ། །དབང་བསྐུར་བ་འདི་རྣམས་ཀྱིས་སྔགས་དང་རྒྱུད་ཉན་པ་དང་། འཆད་པ་དང་། སྔགས་སྒྲུབ་པ་ལ་དབང་བསྐུར་བར་འགྱུར་རོ། །དབང་ལྔ་པོ་ཉིད་ནི་རིག་པའི་དབང་ཞེས་བརྗོད་དོ། །རྣམ་པ་ཐམས་ཅད་དུ་སྤྱན་མ་ལ་སོགས་པའི་རིག་མའི་
བྱ་བ་འཇུག་པའི་ཕྱིར་རོ་ཞེས་བྱའོ། །དེ་ནས། ཀྱེ་རྡོ་རྗེ་སློབ་དཔོན་དབང་བསྐུར་བ། །གང་གིས་ཁྱོད་ཀྱི་དྲིན་གྱིས་བདག །རང་དང་གཞན་དོན་ནུས་གྱུར་པའི། །སྙིང་རྗེའི་གཏེར་གྱིས་བདག་ལ་སྩོལ། །ཞེས་བྱ་བས་གསོལ་བ་བཏབ་པ་དང་ལྡན་པའི་སློབ་མ་རྒྱན་ཐམས་ཅད་ཀྱིས་བརྒྱན་
པ། གདུགས་དང་། རྒྱལ་མཚན་དང་། བླ་རེ་བླང་བར་བྱ་སྟེ། ཤར་སྒོར་སེང་གེའི་ཁྲི་ལ་སྣ་ཚོགས་ཀྱི་པདྨ་ལ་གནས་པའི་འདབ་མ་བརྒྱད་པའི་སྟེང་དུ། རྡོ་རྗེ་སེམས་དཔའི་གཟུགས་སུ་དམིགས་ནས་ཧཱུྃ་ཡིག་ལས་སྐྱེས་པའི་རྡོ་རྗེ་བསྒོམས་ཏེ། ཐོག་མཐའ་མེད་པའི་སེམས་དཔའ་ནི། །
རྡོ་རྗེ་སེམས་དཔའ་བདེ་བ་ཆེ། །ཀུན་དུ་བཟང་པོ་ཐམས་ཅད་བདག །རྡོ་རྗེ་སྙེམས་མ་གཙོ་བོའི་གཙོ། །མཆོག་གི་དང་པོ་སྐྱེས་བུ་བཅོམ་ལྡན་འདས། །ཞེས་བྱ་བ་དེ་ཉིད་ཀྱིས་རྡོ་རྗེ་འཛིན་དུ་གཞུག་གོ། །དེ་ནས་ཨ་ཡིག་ལས་སྐྱེས་པའི་དྲིལ་བུ་སྟེ། འདི་ནི་སངས་རྒྱས་ཐམས་ཅད་ནི། །ཤེས་རབ་

44-1-179b

དབྱངས་ཀྱི་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་བཅང་། །བྱང་ཆུབ་མཆོག་ཏུ་རྒྱལ་བ་བཞེད། །ཅེས་བྱ་བས་གཡོན་པའི་ལག་ཏུ་སྦྱིན་པར་བྱའོ། །སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་པར་བྱས། །ངོ་བོ་ཉིད་དག་སེམས་དཔའ་མཆོག །སྲིད་པ་མཆོག་ཏུ་བྱེད་པར་
འགྱུར། །ཞེས་བྱ་བས་ཀྱང་སློབ་མས་དཀྲོལ་བར་བྱའོ། །དེ་ནས་ཕྱག་རྒྱའི་དམ་ཚིག་བརྗོད་པར་བྱ་སྟེ། ཡིད་ཀྱིས་སྐུ་ནི་སྟོན་པའི་ཕྱིར། །གང་གིས་ཐམས་ཅད་སྐུར་བསྟན་ལ། །དེ་ན་ཕྱག་རྒྱར་རབ་ཏུ་གྲགས། །ཞེས་བྱ་བ་འདིས་རང་འདོད་པའི་ལྷའི་སྐུར་ཕྱག་རྒྱ་ཆེན་པོར་བྱིན་གྱིས་
བརླབས་ནས་འཁྱུད་པར་བྱའོ། །དེ་ནས་སློབ་དཔོན་གྱིས་རང་གི་སྙིང་གའི་ས་བོན་ལས་བྱུང་བའི་ལྷའི་ཚོགས་ནམ་མཁའ་ལ་གནས་པས་དབང་བསྐུར་བར་བསམས་ནས། དབང་བསྐུར་བ་ནི་རྡོ་རྗེ་ཆེ། །ཁམས་གསུམ་ཀུན་གྱིས་ཕྱག་བྱས་པ། །གསང་བ་གསུམ་ལས་བྱུང་བ་ནི། །སངས་
རྒྱས་ཀུན་གྱིས་སྦྱིན་པར་བྱ། །ཞེས་བྱ་བ་དང་། ཕྱིར་མི་ལྡོག་པའི་དབང་བསྐུར་བའི་ཚིགས་བཅད་རྣམས་ཀྱིས་དབང་བསྐུར་བར་བྱའོ། །ཨོཾ་སུ་པྲ་ཏིཥྛ་ཏྭ་བཛྲེ། ཞེས་བརྗོད་དེ་ཞུ་བའི་ཞབས་ལ་མི་བསྐྱོད་པས་རྒྱས་བཏབ་པར་བསམ། ཇི་ལྟར་གསུངས་པ་ནི། ཤེས་རབ་བཅུ་དྲུག་ལོན་པ་
ལ། །ལག་པ་གཉིས་ཀྱིས་འཁྱུད་ནས་སུ། །རྡོ་རྗེ་དྲིལ་བུ་མཉམ་སྦྱར་བས། །སློབ་དཔོན་དབང་དུ་འདོད་པ་ཡིན། །དེ་ནས་མདོར་བསྡུས་པའི་དཀྱིལ་འཁོར་གྱི་དེ་ཉིད་དང་། དཀྱིལ་འཁོར་གྱི་རྣམ་པར་དག་པ་བརྗོད་པར་བྱ་སྟེ། དཀྱིལ་འཁོར་པདྨ་ཉིད་དུ་བརྗོད། །ཡིད་ཀྱི་འཁོར་ལོ་
མཆོག་ཡིན་ཏེ། །ཡེ་ཤེས་ཞེས་བྱ་གཞལ་ཡས་ཁང་། །སེམས་ཀྱི་གཞལ་ཡས་མཐོན་པོ་སྟེ། །ཕུང་པོ་ལྔ་ནི་མདོར་བསྡུས་ན། །སངས་རྒྱས་ལྔར་ནི་རབ་ཏུ་གྲགས། །ཞེས་བྱ་བ་ལ་སོགས་པའོ། །དེ་ནས་སློབ་མ་རྣམ་པར་སྣང་མཛད་ལ་སོགས་པའི་གཟུགས་སུ་དམིགས་ནས། 
རྗེས་སུ་གནང་བ་སྦྱིན་པར་བྱ་སྟེ། །སེམས་ཅན་ཀུན་ལ་ཕན་དོན་དུ། །འཇིག་རྟེན་ཁམས་ནི་ཐམས་ཅད་དུ། །ཇི་ལྟར་འདུལ་བ་སྣ་ཚོགས་ཀྱིས། །ཆོས་ཀྱི་འཁོར་ལོ་བསྐོར་བར་གྱིས། །ཆོས་ཀྱི་གནས་སུ་རྡོ་རྗེ་དང་། །རིན་པོ་ཆེ་དང་པདྨ་དང་། །ལས་ཀྱི་སྒྲ་རབ་ཏུ་གཞུག་པར་བྱས་

44-1-180a

ལ་རིམ་གྱིས་ཚིགས་བཅད་ལྔས་རྗེས་སུ་གནང་བ་སྦྱིན་པར་བྱའོ། །དེ་ནས་མི་བསྐྱོད་པའི་གཟུགས་སུ་དམིགས་ནས་རྡོ་རྗེའི་བརྟུལ་ཞུགས་སྦྱིན་པར་བྱ་སྟེ། འདི་དེ་སངས་རྒྱས་ཐམས་ཅད་ཀྱི། །རྡོ་རྗེ་སེམས་དཔའི་ཕྱག་ན་གནས། །ཁྱོད་ཀྱིས་ཀྱང་ནི་རྟག་ཏུ་ཟུང་། །ཕྱག་
ན་རྡོ་རྗེའི་བརྟུལ་ཞུགས་བརྟན། །ཞེས་བྱ་བ་འདིས་ཧཱུྃ་ལས་སྐྱེས་པའི་རྡོ་རྗེ་སྦྱིན་པར་བྱའོ། །ཨོཾ་སརྦྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་ཏྭཾ་དྷ་ར་ཡཱ་མི་ཧི་ཧི་ཧི་ཧི་ཧི་ཧཱུྃ། ཞེས་བྱ་བ་བརྗོད་ལ། སློབ་མ་རྡོ་རྗེའི་བརྟུལ་ཞུགས་འཛིན་དུ་གཞུག་གོ་ཞེས་བྱ་བ་ནི་རྡོ་རྗེའི་བརྟུལ་ཞུགས་སྦྱིན་པའོ། །དེ་ནས་བདག་
ཉིད་སངས་རྒྱས་ཀྱི་གཟུགས་སུ་བསྒོམས་ནས། གཡོན་པའི་ཁུ་ཚུར་གྱིས་སྙིང་གར་ཆོས་གོས་ཀྱི་སྣེ་བཟུང་ལ་ལག་པ་གཡས་པས་མཆོག་སྦྱིན་པའི་ཕྱག་རྒྱས་རང་གི་སློབ་མ་གང་གི་རིགས་ཡིན་པ་དེའི་གཟུགས་སུ་དམིགས་པར་བྱ་སྟེ། ཨོཾ་ཨེ་ཥོ་ཧཾ་ཏྭཾ་བྱཱ་ཀ་རོ་མི། བཛྲ་སཏྭ་ཏ་ཐཱ་ག་ཏ། བྷ་བ་
དུརྒ་ཏི་ཏོདྡྷཱི་ཏྱཱ། ཨ་ཏྱནྟ་བྷ་བ་ཤུངྔྷཱ་ཡ། ཀྱེ་ཆེ་གེ་མོ་རྡོ་རྗེ་ཏ་ཐཱ་ག་ཏཿསིདྡྷྱ་ས་མ་ཡ་སྠཱ་བྷུརྦྷུ་བ་སྭཿ། ཞེས་བྱ་བས་ལུང་བསྟན་པར་བྱ་སྟེ། འདི་ལྟར་འབྱུང་བའི་ཕྱག་རྒྱ་འདིས་གང་ལུང་བསྟན་པར་བྱས་པ་དེ་ལ་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་ཐམས་ཅད་དཀྱིལ་འཁོར་གྱི་འཁོར་
ལོ་པས་མགྲིན་གཅིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་འགྱུར་ཏེ། འདི་འབྱུང་བའི་ཕྱག་རྒྱའི་མཐུ་དང་། སྔགས་འདིའི་སྟོབས་ཉིད་ཀྱིས་ཕྱིར་དད་པར་བྱའོ་ཞེས་སློབ་མ་ལ་བརྗོད་པར་བྱའོ་ཞེས་བྱ་བ་ནི་ལུང་བསྟན་པའོ། །དེ་ནས་ཨོཾ་མ་ཧཱ་ས་མ་ཡ་ཧ་ན་ཧཱུྃ་ཕཊ། 
ཅེས་བྱ་བ་བརྗོད་ལ་དབུགས་དབྱུང་བ་སྦྱིན་པར་བྱའོ། །གསང་མཆོག་དཀྱིལ་འཁོར་དམ་པ་ནི། །མཐོང་བ་དང་ནི་ཞུགས་གྱུར་པས། །སྡིག་པ་ཀུན་ལས་ངེས་པར་གྲོལ། །ཁྱེད་རྣམས་དེ་རིང་ལེགས་པར་གནས། །བདེ་ཆེན་ཐེག་པ་འདི་ལ་ནི། །ཕྱིན་ཆད་འཆི་བ་ཡོད་མིན་ཏེ། །སྲིད་པའི་
སྡུག་བསྔལ་ལས་ཁྱོད་འདས། །སྲིད་པ་ཤིན་ཏུ་དག་པའི་ཕྱིར། །གང་ཞིག་སྐྱེས་པ་ཙམ་གྱིས་ནི། །སངས་རྒྱས་ཉིད་དུ་རྟོགས་མེད་པའི། །རྡོ་རྗེ་ཞེས་གང་ཕྱག་རྒྱ་དང་། །བྱང་ཆུབ་སེམས་ཀྱང་གཏང་མི་བྱ། །དམ་པའི་ཆོས་ཀྱང་མི་སྤོང་ཞིང་། །ནམ་ཡང་དོར་བར་མི་བྱའོ། །མི་ཤེས་པའམ་

44-1-180b

རྨོངས་པ་ཡིས། །དེ་ཡིས་བྱས་ནས་བཤགས་པར་བྱ། །རྡོ་རྗེ་དྲིལ་བུའི་ཕྱག་རྒྱ་རྣམས། །ནམ་ཡང་གཏང་བར་མི་བྱའོ། །སློབ་དཔོན་སྨད་པར་མི་བྱ་སྟེ། །འདི་ནི་སངས་རྒྱས་ཀུན་དང་མཉམ། །རང་གི་བདག་ཉིད་མི་སྤོང་ཞིང་། །དཀའ་ཐུབ་ཀྱིས་ཀྱང་གདུང་མི་བྱ། །ཇི་ལྟར་བདེ་བས་བདེ་བ་
བཟུང་། །འདི་ནི་མ་འོངས་རྫོགས་སངས་རྒྱས། །དེ་རིང་དཀྱིལ་འཁོར་སློབ་དཔོན་དང་། །སྔགས་དང་རྒྱུད་ནི་འཛིན་པར་འགྱུར། །སངས་རྒྱས་བྱང་ཆུབ་སེམས་དཔའ་དང་། །ལྷ་རྣམས་ཀྱིས་ཀྱང་མཐུན་པར་འདོད། །སེམས་ཅན་རྣམས་ནི་གཟུང་དོན་དུ། །ཁྱོད་ཀྱིས་དཀྱིལ་འཁོར་ཆོ་
ག་བཞིན། །འབད་པ་ཡིས་ནི་བྲི་བར་བྱ། །སྒྲུབ་པ་པོ་རྣམས་རྒྱུད་ལ་སྦྱོར། །ཞེས་བྱ་བ་ནི་དབུགས་དབྱུང་བ་སྦྱིན་པའོ། །རྗེས་སུ་གནང་བ་ལ་སོགས་པ་བཞི་པོ་འདི་རྣམས་ནི། རིག་པའི་དབང་རྣམ་པ་ལྔའི་རྗེས་སུའམ། སློབ་དཔོན་གྱི་དབང་གི་རྗེས་སུ་སྦྱིན་པར་བྱའོ། །སློབ་དཔོན་གྱི་དབང་ཉིད་
ནི་ཕྱིར་མི་ལྡོག་པའི་དབང་ཞེས་བརྗོད་པར་བྱའོ། །དབང་ལྔ་དང་། སློབ་དཔོན་གྱི་དབང་ལ་ནི་བུམ་པའི་དབང་ཞེས་བརྗོད་དེ། ཐམས་ཅད་བུམ་པའི་བྱ་བ་འཇུག་པའི་ཕྱིར་རོ། །དབང་དྲུག་པོ་འདི་ནི་རྒྱུད་ཐམས་ཅད་དང་མི་འགལ་བའོ། །རྡོ་རྗེ་སློབ་དཔོན་གྱི་དབང་ཞེས་བྱ་བ་ནི་ལུས་རྡོ་རྗེ་རྣམ་
པར་དག་པའོ། །དེའི་རྗེས་སུ་དབེན་པའི་ས་ཕྱོགས་སུ་ཡོལ་བ་ལ་སོགས་པ་བྱས་ལ་རང་གི་ཡིད་དུ་སྡུག་པའི་གཟུགས་དང་། ལང་ཚོས་བརྒྱན་པའི་དམ་ཚིག་དང་སྡོམ་པའི་སྣོད་དང་ལྡན་པའི་ཤེས་རབ་གསང་བའི་དབང་གི་དོན་དུ་སློབ་མ་བླ་མ་ལ་དབུལ་བར་བྱས་ནས་གྲོལ་བའི་གནས་སྐབས་
སུ་གསོལ་བ་གདབ་པར་བྱ་སྟེ། བྱང་ཆུབ་རྡོ་རྗེས་སངས་རྒྱས་ལ། །མཆོད་ཆེན་ཇི་ལྟར་བྱིན་པ་ལྟར། །བདག་ཀྱང་བསྒྲལ་བའི་དོན་གྱི་ཕྱིར། །ནམ་མཁའ་རྡོ་རྗེ་བདག་ལ་སྩོལ། །བླ་མས་ཀྱང་ཏིང་ངེ་འཛིན་གསུམ་མངོན་དུ་བྱས་ནས། རང་རིག་པར་བྱ་ཞིང་ནམ་མཁའི་ཁམས་སུ་སྤྲོ་བར་བྱ་སྟེ། 
ཤེས་རབ་ཀྱི་པདྨ་ནས་བླངས་ལ། །ཤེས་རབ་གདོང་ཡང་བཅིང་བྱ་ཞིང་། །དེ་བཞིན་ཐབས་ཀྱི་གདོང་ཡང་ངོ་། །མཐེབ་ཆེན་དང་སྲིན་ལག་གཉིས་ཀྱིས་སློབ་མའི་ཁར་སྦྱིན་པར་བྱའོ། །དེས་ཀྱང་ཨ་ཧོ་སུ་ཁཾ་ཞེས་བརྗོད་པས་ལོངས་སྤྱོད་དུ་གཞུག་པར་བྱ་སྟེ། རྣམ་པར་སྣང་མཛད་ཀྱི་བདག་ཉིད་

44-1-181a

དུ་བྱས་པའོ། །དེ་ཉིད་ཀྱང་ལངས་ལ་འདི་ཁོ་ན་ལྟར་སྦྱིན་པར་བྱའོ་ཞེས་བྱ་བ་ནི་གསང་བའི་དབང་གིས་ངག་རྡོ་རྗེ་རྣམ་པར་དག་པར་བྱེད་པའོ་ཞེས་བྱ་བ་འདི་ནི་གསང་བའི་དབང་གི་ཆོ་གའོ། །དེ་ནས་ཕྱག་རྒྱ་གཅིག་ཏུ་འདོད་པ་དེ་ཉིད་ཀྱིས་སམ། གཞན་ཕྱག་རྒྱ་ཐ་དད་དུ་འདོད་
ཀྱང་རུང་སྟེ། སོ་སོར་རང་གིས་རིག་པར་བྱ་བ་ཆོས་ཀྱི་སྐུ་རབ་ཏུ་རྟོགས་པར་བྱ་བའི་དོན་དུ་སྔོན་དུ་བསྟན་པའི་ཚིགས་བཅད་ཀྱིས་གསོལ་བ་བཏབ་པ་དང་ལྡན་པའི་སློབ་མ་ལ། དེའི་ལག་པ་དེའི་ལག་པར་རབ་ཏུ་བཞག་ནས། དེ་བཞིན་གཤེགས་པ་ཐམས་ཅད་དཔང་པོར་བྱས་ལ། སྤྱི་བོར་རྡོ་རྗེ་མཉམ་
པར་བཞག་སྟེ། བླ་མ་རྡོ་རྗེས་འདི་བརྗོད་པར་བྱ་སྟེ། འདི་ནི་ཁྱོད་ཀྱིས་གཟུང་བའི་མཆོག །བརྟན་པར་སངས་རྒྱས་རྣམས་ཀྱིས་བརྟགས། །འཁོར་ལོ་རིམ་པའི་སྦྱོར་བ་ཡིས། །བདེ་བཟང་ཡང་དག་མྱོང་བར་གྱིས། །ཐབས་གཞན་གྱིས་ནི་སངས་རྒྱས་ཉིད། །འགྲོ་གསུམ་འདི་ཡང་
དག་མི་འགྱུར། །དེ་ཕྱིར་འདི་དང་མི་འབྲལ་ཞིང་། །ཁྱོད་ཀྱིས་ནམ་ཡང་མི་བཏང་ངོ་། །འདི་དེ་སངས་རྒྱས་ཐམས་ཅད་ཀྱི། །རིག་མའི་བརྟུལ་ཞུགས་བླ་ན་མེད། །རྨོངས་པ་གང་གིས་འདའ་བྱེད་ན། །དེ་ལ་མཆོག་གི་དངོས་གྲུབ་མེད། །ཅེས་བྱ་བ་བརྗོད་ནས་སྦྱིན་པར་བྱའོ། །དེས་ཀྱང་
གུར་གུམ་དང་། ཙནྡན་གྱིས་བྱུགས་ལ་མེ་ཏོག་དྲི་ཞིམ་པོའི་ཕྲེང་བས་བརྒྱན་ནས། གོས་མེད་པར་རང་གི་པདྨ་གསལ་བར་བསྟན་ལ། འདི་སྐད་བརྗོད་པར་བྱ་སྟེ། བུ་ཁྱོད་ཀྱང་ནི་འདོད་དམ་ཅི། །དྲི་ཆེན་དྲི་ཆུ་སོགས་བཟའ་ཞིང་། །ཤ་ཁྲག་ཁུ་བ་དེ་བཞིན་དུ། །དེ་བཞིན་གཞན་ཡང་བུད་མེད་གུས། །
བྷ་གའི་པདྨ་འོ་བྱེད་པ། །བུ་ཁྱོད་སྨྲོས་ཤིག་ཅི་བདེ་བར། །ཞེས་བརྗོད་དོ། །དེས་ཀྱང་། ལྷ་མོ་ཅི་ཕྱིར་བདག་མི་འདོད། །ཁྲག་དང་ཁུ་བ་སོགས་ཟ་ཞིང་། །བུད་མེད་རྣམས་ལ་རྟག་གུས་བགྱིད། །བྷ་ག་ལ་ཡང་འོ་བགྱིད་དོ། །ཞེས་བརྗོད་པར་བྱའོ། །དེ་ནས་དགའ་ཞིང་དགྱེས་པས་རྣམ་
པར་ལྟ་བར་བྱེད་ཅིང་། བདག་གི་ཡིད་དུ་འོང་བ་བཞིན་དུ་མངོན་པར་བལྟ་ཞིང་ཙོག་ཙོག་པོར་འདུག་སྟེ། རང་གི་ཆུ་སྐྱེས་གསལ་བར་བྱས་ནས། འདི་སྐད་བརྗོད་པར་བྱ་སྟེ། ཨ་ཧོ་བདག་གི་པདྨ་འདི། །སངས་རྒྱས་ཀུན་གྱིས་བྱིན་བརླབས་ལ། །གང་ཞིག་ཆོ་ག་བཞིན་བསྟེན་ན། །དེ་ཡི་མདུན་

44-1-181b

ན་བདག་གནས་སོ། །ཇི་ལྟར་པདྨའི་དགོས་པ་གྱིས། །ཡང་དག་སངས་རྒྱས་མཉེས་བྱེད་སྩོགས། །བདེ་ཆེན་རྒྱལ་པོ་རང་ཉིད་ནི། །འདི་ཉིད་ལ་ནི་ཡང་དག་བཞུགས། །བྷཉྫ་མོཀྵ་ཧོཿ། ཞེས་བརྗོད་པར་བྱའོ། །དེ་རང་རང་གི་ལྷག་པའི་ལྷའི་རྣལ་འབྱོར་གྱི་བདག་ཉིད་ཅན་དེའི་ཡང་སྤྱི་བོ་དང་། སྙིང་
ག་དང་། ལྟེ་བ་དང་། གསང་བ་དང་། བརླ་གཉིས་ལ་རིམ་པ་ཇི་ལྟ་བས། ཨོཾ་ཨཱཿཧཱུྃ་སྭཱ་ཧཱ། ཞེས་བྱ་བས་རིགས་ལྔའི་ཚོགས་དང་ལྡན་པར་བྱས་ནས། དེ་ནས་ཡི་གེ་ཧཱུྃ་ལས། པདྨ་དང་། རྡོ་རྗེའོ། །ཡི་གེ་ཨཱཿདང་ཨོཾ་གཉིས་ལས་ཟེ་འབྲུ་དང་ནོར་བུའོ། །བུ་གར་ཕཊ་སེར་པོ་བཀོད་ལ། རྡོ་རྗེ་
དབྱིངས་ཀྱི་དབང་ཕྱུག་མའི་རྩ་གཡོན་མའི་ཆར་གནས་པ་ལ། སོར་མོས་ཅུང་ཞིག་བསྐུལ་བར་བྱ། །ཕྱི་རོལ་བླ་མས་འདི་ཤེས་ནས། །དེ་ནས་ཨོཾ་སརྦྦ་ཏ་ཐཱ་ག་ཏཱ་ནུ་རཱ་ག་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ།ཞེས་བརྗོད་ནས་དགའ་བ་བརྩམ་པར་བྱའོ། །པདྨར་རྡོ་རྗེ་བཅུག་ནས་ནི། །བྱང་ཆུབ་སེམས་
ནི་གཏོང་མི་བྱ། །དགའ་བ་དེ་ནི་བསྐྱོད་ནས་སུ། །སེམས་ནི་གང་བར་བསྒོམ་པར་བྱ། །ཇི་སྲིད་རྣལ་འབྱོར་པ་ཡིས་ནི། །བྱང་ཆུབ་སེམས་ནི་ཕྱིར་མི་གཏོང་། །དེ་རྙེད་རྒྱུན་མི་འཆད་པར་འཐོབ། །དགའ་བའི་བདེ་བ་སྨོས་ཅི་དགོས། །དངོས་གྲུབ་ཀུན་གྱི་གཏེར་གྱུར་པའི། །བྱང་ཆུབ་
སེམས་ནི་ལྟུང་གྱུར་ན། །དངོས་གྲུབ་མཆོག་ལྟ་ག་ལ་ཡོད། །ནམ་མཁའི་ཁམས་དང་རྡོ་རྗེར་སྦྱོར། །རེག་པས་ངོ་མཚར་ཆེར་གྱུར་པའི། །གལ་ཏེ་བདེ་བ་སྐྱེ་བར་འགྱུར། །མཆོག་གི་དགའ་བར་བྱེད་པ་པོ། །དགའ་བྲལ་དགའ་བའི་དབུས་དག་ཏུ། །མཚོན་ཞིང་ལྟོས་ལ་བསྟན་པར་
གྱིས། །པདྨའི་ནམ་མཁར་རྡོ་རྗེ་ནོར་བུས་མནན་པ་ལ། །རྡོ་རྗེ་སྐྱིལ་ཀྲུང་སེམས་ཀྱིས་ནི། །ནོར་བུའི་ནང་དུ་བལྟ་བར་བྱ། །གང་ཞིག་ཡེ་ཤེས་སྐྱེས་གྱུར་པ། །ཡེ་ཤེས་དེ་གཟུགས་ཤིན་ཏུ་དུལ། །འདོད་ཆགས་མ་ཡིན་ཆགས་བྲལ་མིན། །དབུ་མར་ཡང་ནི་མི་དམིགས་
སོ། །རྣལ་འབྱོར་གང་གིས་ཡེ་ཤེས་མཐོང་། །བདེ་བ་གནས་ཤིང་མི་འབྱུང་བའོ། །ཐུན་ནམ་ཡང་ན་ཉིན་གཅིག་གམ། །ཟླ་བ་ཟླ་ཕྱེད་ལོ་སྐོར་རམ། །བསྐལ་པའམ་བསྐལ་པ་བརྒྱ་སྟོང་དུ། །ཡེ་ཤེས་མངོན་སྦྱོར་གནས་པར་འགྱུར། །སློབ་མ་སྙོམས་འཇུག་མཐོང་ན་ནི། །བླ་

44-1-182a

མའི་སྙིང་ག་ལས་བྱུང་བའི། །གཏི་མུག་དགའ་སོགས་བཞི་རྣམས་ནི། །དེ་ཡི་སྙིང་གར་གཞུག་པར་བྱ། །སློབ་མས་གཟུང་ཞིང་རྟོགས་ནས་ནི། །པདྨའི་ཁོངས་སུ་སྤྲོ་བར་བྱ། །དེ་ནས་ལྕེ་ཡིས་སེམས་དེ་ནི། །བྱང་ཆུབ་སྔོན་འགྲོ་བླང་བར་བྱ། །ཞེས་བྱ་བ་ནི་
ཤེས་རབ་ཡེ་ཤེས་ཀྱི་དབང་གི་ཆོ་གའོ། །དེ་ནས་ཇི་ལྟར་བསྟན་པའི་ཆོ་གས་དངོས་གྲུབ་ཤེས་རབ་ཡེ་ཤེས་ཀྱི་དབང་བླངས་པ་དེ་ཉིད་ལ། བཞི་པ་མངོན་པར་བརྗོད་པའི་དབང་རིན་པོ་ཆེ་འབྲས་བུར་གྱུར་པ་བརྗོད་པར་བྱ་སྟེ། གཞན་དུ་ན་དམ་ཚིག་ཉམས་པའི་འཇིགས་པས་སོ། །ཇི་ལྟར་རྒྱུད་
ལས། དབང་བསྐུར་མ་ཐོབ་རྣལ་འབྱོར་པས། །རྣལ་འབྱོར་ཉིད་དུ་མངོན་འདོད་ན། །མཁའ་ལ་ཁུ་ཚུར་བརྡེག་པ་དང་། །སྨིག་རྒྱུའི་ཆུ་ནི་འཐུང་བའོ། །དེའི་ཕྱིར་ཇི་ལྟར་བསྟན་པ་ཡི། །ཆོ་གས་དབང་བསྐུར་སྦྱིན་པར་བྱ། །སློབ་མ་མོས་པའི་བསམ་པ་རབ་བལྟས་ནས། །ཟབ་ཅིང་
རྒྱ་ཆེའི་ཚུལ་ལྷག་མོས་ན། །དབང་བསྐུར་རིན་ཆེན་ཚིག་གིས་སྦྱིན་པར་བྱ། །གཞན་ལ་ནི་མ་ཡིན་ནོ་ཞེས་བྱའོ། །རྒྱ་ཆེ་བ་ལ་ལྷག་པར་མོས་པ་དག །ལྷག་པར་མོས་པ་མ་ཡིན་པ་ཇི་ལྟར་ཤེས་ཤེ་ན། དེ་ལ་གསུངས་པ་ནི། དུ་བ་ལས་ནི་མེར་ཤེས་ཏེ། །ཆུ་སྐྱར་ལས་ནི་ཆུར་ཤེས་སོ། །བྱང་
ཆུབ་སེམས་དཔའ་བློ་ལྡན་ལ། །རིགས་ནི་མཚན་མ་རྣམས་ལས་ཤེས། །རབ་དགའ་ཞལ་ནི་པདྨ་ནི། །རབ་ཏུ་རྒྱས་ཤིང་ལུས་སྤུ་ལྡང་། །དེ་ཉིད་ཀྱིས་མཁས་མཐོང་ནས་ནི། །དམ་པའི་སློབ་མ་གཟུང་བར་བྱ། །ཇི་ལྟར་བཅོམ་ལྡན་འདས་ཀྱིས་གསུངས་པ། དབང་ནི་རྣམ་པ་གསུམ་
དག་ཏུ། །རྒྱུད་འདི་ལས་ནི་རབ་ཏུ་གྲགས། །སློབ་དཔོན་གསང་བ་ཤེས་རབ་དང་། །བཞི་པ་དེ་ཡང་དེ་བཞིན་ནོ། །ཞེས་བྱའོ། །དེ་ལ། དགོད་དང་བལྟས་དང་ལག་བཅངས་དང་། །དེ་ཡང་གཉིས་ཀྱིས་གཉིས་སྤྲད་འཁྱུད། །དགའ་དང་མཆོག་དགའ་ཉིད་དང་ནི། །བྲལ་བ་ལྷན་ཅིག་
སྐྱེས་དེ་བཞིན། །སྣ་ཚོགས་རྣམ་པར་སྨིན་པ་དང་། །རྣམ་པར་ཉིད་དང་མཚན་ཉིད་བྲལ། །ཐམས་ཅད་དབང་གི་རྗེས་རིམ་དུ། །ཤེས་རབ་ཡན་ལག་འདུས་སྐྱེས་རྟོགས། །ཡང་གསུངས་པ། ཨེ་ཡི་ཆ་བྱད་བཟང་པོ་གང་། །དབུས་སུ་ཝཾ་གྱིས་རྣམ་པར་བརྒྱན། །བདེ་བ་ཐམས་ཅད་ཀྱི་

44-1-182b

ནི་གནས། །སངས་རྒྱས་རིན་ཆེན་ཟ་མ་ཏོག །དེ་ལ། དགོད་པ་དག་པ་སློབ་དཔོན་ཏེ། །བལྟས་ལ་དེ་བཞིན་གསང་བའོ། །ལག་བཅངས་ཤེས་རབ་ཡེ་ཤེས་དང་། །བཞི་པ་གཉིས་ཀྱིས་གཉིས་སྤྲོད་པའོ། །དགའ་བ་བདེ་བ་ཅུང་ཟད་བདེ། །མཆོག་ཏུ་དགའ་བ་བདེ་བས་ལྷག །དགའ་
བྲལ་དགའ་བ་ཆགས་བྲལ་ཏེ། །ལྷག་མ་ལྷན་ཅིག་སྐྱེས་དགའོ། །དང་པོ་རེག་པར་འདོད་པ་སྟེ། །གཉིས་པ་བདེ་བར་འདོད་པའོ། །གསུམ་པ་ཆགས་དང་བྲལ་བའི་ཕྱིར། །དེས་ནི་བཞི་པ་བསྒོམ་པར་བྱ། །དགའ་བ་དང་པོ་སྣ་ཚོགས་ཏེ། །མཆོག་ཏུ་དགའ་བ་རྣམ་པར་སྨིན། །དགའ་
བྲལ་དགའ་བ་སྣ་ཚོགས་དགའ། །ལྷན་ཅིག་སྐྱེས་དགའ་མཚན་ཉིད་བྲལ། །སྣ་ཚོགས་སྣ་ཚོགས་ཉིད་བརྗོད་པ། །འོ་དང་འཁྱུད་པ་ལ་སོགས་པའོ། །རྣམ་སྨིན་དེ་ལས་བཟློག་པ་སྟེ། །བདེ་བའི་ཡེ་ཤེས་ཟ་བའོ། །རྣམ་སྨིན་རྣམ་པར་རྟོག་པ་སྟེ། །བདེ་བ་བདག་གིས་མྱོང་ཞེས་
པའོ། །མཚན་ཉིད་བྲལ་བ་གསུམ་ལས་གཞན། །འདོད་ཆགས་འདོད་ཆགས་མིན་པ་སྤངས། །ཞེས་བྱའོ། །དེ་ཉིད་གསུངས་པ། འདོད་ཆགས་མ་ཡིན་ཆགས་བྲལ་མིན། །དབུ་མར་ཡང་ནི་མི་དམིགས་སོ། །གསུམ་པོ་རྣམ་པར་སྤངས་པ་ཉིད། །ལྷན་སྐྱེས་ཡང་དག་བྱང་ཆུབ་
བརྗོད། །འདི་ཉིད་ཀྱི་དོན་བཅོམ་ལྡན་འདས་ཀྱིས་དཔལ་གསང་བ་འདུས་པ་ལས་གསུངས་པ་སྟེ། བསྒྲུབ་བྱ་སྒྲུབ་བྱེད་ཡང་དག་སྦྱོར། །གང་དེ་བསྙེན་པ་ཞེས་བརྗོད་དོ། །རྡོ་རྗེ་པདྨ་མཉམ་སྦྱོར་བས། །ཉེ་བར་བསྙེན་པ་ཞེས་བརྗོད་ཅིང་། །བསྐྱོད་པ་རང་བཞིན་སྒྲུབ་པ་སྟེ། །ཧཱུྃ་ཕཊ་ཡི་གེར་
ལྡན་པའོ། །རང་བཞིན་བདེ་བ་དམ་པ་ཞི། །སྒྲུབ་པ་ཆེན་པོར་བརྗོད་པར་བྱ། །བསྒྲུབ་བྱ་ནི་ཤེས་རབ་བོ། །སྒྲུབ་བྱེད་ནི་ཐབས་སོ། །དེ་གཉིས་ཡོངས་སུ་སྦྱོར་བ་ནི་བསྙེན་པའོ། །པདྨར་རྡོ་རྗེ་གཞུག་པ་ནི་ཉེ་བར་སྒྲུབ་པའོ། །བསྐྱོད་པ་ནི་སྒྲུབ་པ་སྟེ། རང་བཞིན་བདེ་བ་དམ་པ་ཞི། །སྒྲུབ་པ་
ཆེན་པོ་བརྗོད་པར་བྱ། །བསྒྲུབ་བྱ་དང་སྒྲུབ་པ་སྦྱོར་བས་རྡོ་རྗེ་དང་པདྨར་གཞུག་པའི་བར་ནི་དགའ་བའོ། །ཤིན་ཏུ་བསྐྱོད་པ་ལས་བྱང་ཆུབ་ཀྱི་སེམས་ཀྱིས་གང་བ་ནི་མཆོག་ཏུ་དགའ་བའོ། །ཕྱིར་བྱུང་བ་ནི་དགའ་བྲལ་ལོ། །གང་གི་ཚེ་དེ་གཉིས་ཀྱི་དབུས་སུ་དམ་པའི་བདེ་བ་ཞི་བར་གྱུར་

44-1-183a

པ་དེའི་ཚེ། ལྷན་ཅིག་སྐྱེས་པའི་དགའ་བ་བསྒྲུབ་པར་བྱ་ཞེས་བྱ་བའི་དོན་ཏོ། །འདི་ཉིད་གསུངས་པ། ཐོག་མ་ཐ་མ་དབུས་མེད་ཅིང་། །སྲིད་དང་མྱ་ངན་འདས་པ་མིན། །འདི་དེ་མཆོག་གི་བདེ་ཆེན་པོ། །རང་དང་གཞན་ཡང་མི་དམིགས་སོ། །མཆོག་ཏུ་དགའ་བའི་
སྲིད་པར་བརྗོད། །དགའ་བྲལ་དགའ་བས་མྱ་ངན་འདས། །དབུས་སུ་དགའ་བ་ཙམ་ཉིད་ནི། །འདི་རྣམས་སྤངས་པ་ལྷན་ཅིག་སྐྱེས། །སྣ་ཚོགས་ཉིད་སྤངས་སྐད་ཅིག་ལ། །མཆོག་ཏུ་དགའ་བ་ཡང་དག་ཐོབ། །སྟོན་པས་བཀའ་སྩལ་སེམས་དཔའ་ཆེ། །བདེ་བ་ཆེན་པོ་ཡང་
དག་གཟུང་། །ཇི་སྙེད་བྱང་ཆུབ་བར་དུ་ནི། །སེམས་ཅན་དོན་གྱིས་རྡོ་རྗེ་འཛིན། །ཞེས་བྱ་བ་ལ་སོགས་པ་དེ་ལྟར་ཡིན་ན་རྣམ་པ་གསུམ་གྱི་བྱེ་བྲག་ཇི་ལྟར་གསུངས་ཤེ་ན། རྒྱུ་དང་འབྲས་བུ་དབྱེར་མེད་ཅིང་། །སྔོན་མ་གསུམ་དུ་རབ་ཏུ་གྲགས། །དགའ་བྲལ་དགའ་བའི་དབུས་ཉིད་
དུ། །ཞི་བའི་རྣམ་པར་གསལ་ཕྱིར་རོ། །དེ་གཉིས་དབུས་སུ་ཇི་ལྟར་གསལ་བ་ཡིན་ཞེ་ན། མཆོག་མཐའ་དགའ་བྲལ་དབུས་ཉིད་ཀྱི། །སྟོང་ལས་སྟོང་ཉིད་རྡོ་རྗེ་འཛིན། །ཞེས་བྱ་བ་ལ་སོགས་པའི་ཚིག་གིས་སོ། །སྟོང་ལས་སྟོང་ཉིད་གང་ཡིན་ཞེས། །ཐོག་མ་ཐ་མ་མེད་ཞི་བ། །དངོས་
དང་དངོས་མེད་བདག་ཉིད་གཙོ། །སྟོང་ཉིད་སྙིང་རྗེ་དབྱེར་མེད་པ། །བྱང་ཆུབ་སེམས་ཞེས་རབ་ཏུ་དྲན། །ཞེས་བྱ་བ་ནི་གྲུབ་པའི་མཐའ་ཡིན་པའི་ཕྱིར་རོ། །འདི་ནི་ཐབས་གང་གིས་ཇི་ལྟར་སྐྱེད་པར་བྱེད་ཅེ་ན། དཀྱིལ་འཁོར་འཁོར་ལོ་སོགས་ཐབས་དང་། བདག་བྱིན་བརླབ་པའི་རིམ་པ་
ཡིས། །ཞེས་བྱ་བ་རྒྱས་པར་འདིར་བདག་གིས་མ་བཀྲོལ་ཏེ། ཅིའི་ཕྱིར་ཞེ་ན། ཡེ་ཤེས་འདི་ནི་རང་རིག་པ། །ངག་གི་སྤྱོད་ཡུལ་ལས་འདས་ཤིང་། །རང་བྱིན་བརླབ་པའི་རིམ་པ་འདི། །ཀུན་མཁྱེན་ཡེ་ཤེས་དེ་བདག་ཉིད།  །གཞན་ཡང་གསུངས་པ། གཞན་གྱིས་བརྗོད་མིན་ལྷན་
ཅིག་སྐྱེས། །གང་དུ་བཙལ་ཡང་མི་རྙེད་པ། །བླ་མ་བརྒྱུད་པའི་རིམ་བསྟེན་དང་། །རང་གི་བསོད་ནམས་ཀྱིས་རྟོགས་སོ། །བླ་མའི་ཞབས་ཀྱི་དྲིན་གྱིས་དང་། །བསོད་ནམས་ཆེན་པོ་ལྡན་རྣམས་རང་། །ཡེ་ཤེས་སྐད་ཅིག་གིས་བསྐྱེད་འགྱུར། །ངག་གི་སྤྱོད་ཡུལ་ལས་འདས་པའོ། །དེ་

44-1-183b

བཞིན་དུ་གསུངས་པ། བདེ་ཆེན་རྒྱལ་པོ་གཅིག་པུ་རྒྱལ་བ་སྟེ། །རྒྱུ་འབྲས་རྟག་ཏུ་འགྲོ་བ་རྣམས་ལ་འཆར། །གང་ཡང་རྗོད་པར་བྱེད་པའི་དུས་ན་ནི། །ཐམས་ཅད་མཁྱེན་པ་ངག་གིས་འཕོངས་པར་འགྱུར། །ས་ར་ཧ་ཡིས་གང་གསུངས་པ། །བླ་མས་ངག་གིས་མི་བརྗོད་ཅིང་། །སློབ་མས་ཀྱང་ནི་གོ་
བ་མིན། །འགྲོ་ཀུན་ལྷན་ཅིག་སྐྱེས་པའི་བདུད་རྩིའི་བཅུད། །གང་ལ་བཟླ་ཞིང་ཅི་ནི་བཟླ་བར་བྱ། །བློ་ཡི་སྤྱོད་ཡུལ་མ་ཡིན་ཕྱིར། །ངག་གིས་བརྗོད་པར་མི་ནུས་སོ། །བླ་མས་གསུངས་པ་དངོས་པོ་འཇུག་པས་རིང་སྤྱད་དོ། །དེ་ནི་རིམ་གྱིས་སྙིང་རྗེ་ལ་སོགས་ཡོན་ཏན་ལྡན། །དད་ལྡན་དེ་ཡི་
སྙིང་ལ་རང་ཉིད་སྐྱེ་བར་འགྱུར། །བྱང་ཆུབ་ཏུ་སེམས་བསྐྱེད་པའི་མཚན་ཉིད་ཇི་ལྟར་ཡིན་ཞེ་ན། དབང་པོ་ཉིད་ནི་ལྡོག་གྱུར་ཞིང་། །ཡིད་ནི་ནང་དུ་ཆུད་པ་དང་། །སེམས་དཔའ་ཉམས་པ་རབ་སྣང་ཞིང་། །ལུས་ནི་དམ་པའི་བདེ་བ་མྱོང་། །དབང་པོའི་ཚོགས་ནི་ནང་དུ་ནུབ་འགྱུར་ཞིང་། །རྣམ་རྟོག་
ཉམས་པས་སྲིད་པའི་ས་བོན་མི་འཐོབ་པ། །དགའ་བའི་འོད་ཀྱིས་རང་བཞིན་འདི་ཉིད་ནི། །ནམ་མཁའ་དང་མཉམ་ངོ་མཚར་བསིལ་ཞིང་ཞིམ། །གང་ལ་དབང་པོ་ཞུ་འགྱུར་ཞིང་། །རང་གི་བདག་ཉིད་ཉམས་འགྱུར་བ། །དེ་ནི་ལྷན་ཅིག་སྐྱེས་དགའ་སྟེ། །གསལ་བར་བླ་མའི་ཞབས་ལ་དྲིས། །དེ་ཉིད་
ཀྱི་ཕྱིར་གསུངས་པ། དུས་མཉམ་དག་ཏུ་ཡུལ་དང་དབང་པོ་རྣམ་གཉིས་ནི། །གང་ཞིག་སྐྱེས་ཤིང་ནུབ་པ་དེ་ལ་ཕྱག་འཚལ་ལོ། །གང་ཡང་མངོན་དགའ་རྒྱལ་བ་མཛེས་པའི་སྐུ་གཅིག་པོ། །མཁས་པ་རྣམས་ཀྱི་སྙིང་ལ་གསལ་ཞིང་སད་པར་འདུག །དེའི་ཕྱིར་རྣམ་པར་རྟོག་པ་ཐམས་ཅད་རབ་བཅོམ་
ཞིང་། །གང་འདིར་བློ་ཡིས་དམ་པའི་བདེ་འདོད་པ། །དེ་ཡང་བྱ་བ་བྱས་པའི་མཁས་པ་སྟེ། །གཞན་ནི་རྐང་གཉིས་པ་ཡི་ཕྱུགས་ཡིན་ནོ། །ཞེས་བྱའོ། །རྒྱས་པར་བརྗོད་པ་རེ་ཞིག་དེས་ཆོག་གོ། །དེའི་ཕྱིར་བླ་མ་དམ་པ་ཡང་དག་པར་མཉེས་པར་བྱས་ནས། དམ་པའི་སློབ་མས་སྐུ་གསུམ་དུ་ནང་དུ་རྟོགས་
པའི་བདེ་བ་ཆེན་པོའི་ངོ་བོ་ཉིད་རང་རིག་པར་བྱའོ་ཞེས་བྱ་བ་ནི་དམ་པའི་དབང་པོ་ཐོབ་པའོ། །བྱ་བ་བྱས་ནས་འདི་བརྗོད་པར་བྱ་སྟེ། དེང་བདག་སྐྱེ་བ་འབྲས་བུར་བཅས། །བདག་གཙོ་འབྲས་བུ་དང་ལྡན་ཡིན། །དེ་རིང་སངས་རྒྱས་རིགས་སུ་སྐྱེས། །བདག་ནི་དི་རིང་སངས་རྒྱས་སྲས། །དེ་བཞིན་

44-1-184a

གཤེགས་གསུངས་ཡོན་ཏན་འདི། །བླ་མ་དེ་ལ་དབུལ་བར་བྱ། །སྣ་ཚོགས་རྒྱན་དང་གོས་ལ་སོགས། །ཁྱད་པར་དུ་ཡང་རང་གི་ལུས། །ཞེས་བྱའོ། །དེ་ནས་སྦྱིན་སྲེག་བྱ་ཞིང་གཏོར་མ་བྱིན་ནས། ཚོགས་ཀྱི་འཁོར་ལོ་རབ་ཏུ་བྱ། །དགེ་འདུན་སྟོན་མོ་བྱས་ནས་ནི། །
སྡུག་བསྔལ་སྐྱབས་མེད་ཚིམ་པར་བྱ། །དབང་བསྐུར་བ་ཡི་ཆོ་ག་མདོར་བསྡུས་བྱས་པ་ལས། །གང་གིས་བསོད་ནམས་དཔག་མེད་ཐོབ་པར་གྱུར་པ་སྟེ། །དེ་ཡིས་གཉིས་མེད་བསམ་མི་ཁྱབ་པ་བདེ་ཆེན་བདག །རང་བྱུང་རྡོ་རྗེ་འཛིན་པ་སྐྱེ་འགྲོས་ཐོབ་པར་ཤོག །མདོར་བསྡུས་པའི་དབང་གི་
རབ་ཏུ་བྱེད་པ། སློབ་དཔོན་མཁས་པ་ཆེན་པོ་དཔལ་དགའ་བའི་རྡོ་རྗེས་མཛད་པ་རྫོགས་སོ།།      །།གཞུང་ཚད་ནི་ཚིགས་བཅད་སུམ་བརྒྱ་སྟེ་བམ་པོ་གཅིག་གོ། །ཐོ་ལིང་གི་གཙུག་ལག་ཁང་དུ་རྗེ་མངའ་བདག་བཙན་པོ་རྩེ་ལྡི་བཙན་གྱི་བཀའ་ལུང་གིས། རྒྱ་གར་གྱི་མཁན་པོ་
མཁས་པ་ཆེན་པོ་དཔལ་མར་མེ་མཛད་དང་། བོད་ཀྱི་ལོ་ཙཱ་བ་དགེ་སློང་བ་རིས་བསྒྱུར་བའོ།།༄༅༅། །རྒྱ་གར་སྐད་དུ། སཾ་ཀྵིཔྟཱ་བྷི་ཥེ་ཀ་གུ་ཧྱ་སཱ་མཱ་ཛི་ཀ །བོད་སྐད་དུ། འདུས་པའི་དབང་བསྐུར་བ་མདོར་བསྡུས་པ། བྱང་ཆུབ་སེམས་དཔའ་འཕགས་པ་སྤྱན་རས་
གཟིགས་དབང་ཕྱུག་ལ་ཕྱག་འཚལ་ལོ། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཆུ་དང་ཅོད་པན་རྡོ་རྗེ་དང་ནི་དྲིལ་བུ་མིང་། །རིགས་གསུམ་དང་ལྡན་སྐལ་ལྡན་སློབ་དཔོན་གསང་བ་མཆོག །དབང་བསྐུར་དམ་པ་དགུ་པོ་གང་ཞིག་བསོད་ནམས་དཔག་མེད་ཀྱིས། །སྲིད་པ་དག་པར་
སྐྱེད་མཛད་སྒྲོལ་མ་དེ་ལ་ཕྱག་འཚལ་ལོ། །རྩོད་པའི་དུས་དང་ཕྲད་པས་ཡིད་གཞུངས་རྣམ་ཞན་ཅིང་། །འགྲོ་བ་ཤིན་ཏུ་བསྡུས་པར་འདོད་ཅིང་ནན་ཏན་མེད། །དེས་ན་དབང་རིམ་རྒྱས་པ་སྤངས་པའི་དབང་བསྐུར་མདོར་བསྡུས་འདི། །ངག་གི་དབང་ཕྱུག་གྲགས་པ་ཡིས་ནི་བརྗོད་པར་བྱ། །མུ་སྟེགས་ལ་མིན་
རྨོངས་ལ་མིན། །རྟོག་གེ་སྐམ་པོ་དག་ལ་མིན། །ཉན་ཐོས་ལ་མིན་མ་ནིང་དང་། །རྒན་པོ་བྱིས་པ་ལ་ཡང་མིན། །རྒྱལ་པོ་ལ་མིན་བུ་ལ་མིན། །དད་པ་མེད་པ་ལ་མིན་པའི། །བདུན་དང་བརྒྱད་པ་ལ་སྦྱིན་པ། །བསྟན་ལ་ཕན་པ་འདོགས་པ་ཉིད། །དེ་ལ་རེ་ཞིག་ཇི་ལྟ་བ་བཞིན་དུ་དབང་

44-1-184b

བསྐུར་ཞིང་རྗེས་སུ་གནང་བ་ཐོབ་པ་རིག་སྔགས་བཟླས་པའི་སྔགས་པས། སྔོན་ལ་སློབ་མའི་སྣོད་བརྟག་སྟེ། དད་པ་དང་ཐོས་པ་ལ་སོགས་པ་ཡོངས་སུ་སྦྱངས་པ་དོན་དུ་གཉེར་ཞིང་ལེགས་པར་བརྟགས་པའི་སྐལ་བ་དང་ལྡན་པའི་སློབ་མ་དག་ལ་དབང་བསྐུར་བ་ལ་སོགས་པས་གཟུང་བར་འདོད་
པས། དཀྱིལ་འཁོར་ལ་སོགས་པའི་གནས་ནི་རྒྱལ་པོ་དང་ཆོམ་རྐུན་ལ་སོགས་པ་ཉེ་བར་འཚེ་བ་ཐམས་ཅད་དང་བྲལ་བའི་དཀྱིལ་འཁོར་གྱི་ཁང་པ་ལ་སོགས་པར་ཆོ་ག་ཇི་ལྟ་བ་བཞིན་དུ་བྲིས་པའི་རྡུལ་ཚོན་གྱི་དཀྱིལ་འཁོར་རམ། མཚན་ཉིད་དང་ལྡན་པའི་རས་རིས་ལ་སོགས་པའི་དཀྱིལ་
འཁོར་རམ། མངོན་སུམ་དུ་བྱས་པའི་དཀྱིལ་འཁོར་དུ་མེ་ཏོག་དང་། བདུག་སྤོས་དང་། ལྷ་བཤོས་ལ་སོགས་པ་རྣམས་ཀྱིས་མཆོད་པ་དང་རང་གི་ལྷའི་རྣལ་འབྱོར་སྔོན་དུ་འགྲོ་བས་རང་ཉིད་སློབ་མ་འཇུག་པའི་རིམ་པས་ཞུགས་ལ། ཡོལ་བའི་ཕྱི་རོལ་དུ་ཡོན་དབུལ་བ་དབང་བསྐུར་
བའི་སྐལ་བ་ཅན་ཅིག་གིས་སློབ་མ་རྣམ་པར་སྣང་མཛད་ཀྱི་གཟུགས་སུ་དམིགས་ལ། ཨཱ་ཁཾ་བཱི་ར་ཧཱུྃ། ཞེས་པ་འདིས་མེ་ཏོག་གི་ཕྲེང་བ་བཟུང་ལ་གདོང་གཡོགས་བཅིངས་ཏེ། བགེགས་མཐར་བྱེད་ཀྱི་སྔགས་བཟླས་པའི་བུམ་པའི་ཆུས་བསང་གཏོར་བྱས་ལ། དཀྱིལ་འཁོར་དུ་གཞུག་
པའི་དོན་དུ་ཀྱེ་བདེ་བ་དགའ་བ་ཁྱོད་སུ་ཡིན་ཞེས་དྲི་བར་བྱའོ། །དེས་ཀྱང་བདེ་ཆེན་བདག་ནི་སྐལ་བ་བཟང་པོ་ཞེས་བརྗོད་པར་བྱའོ། །དེ་མ་ཐག་ཏུ། ཨོཾ་སརྦྦ་ཡོ་ག་ཙིཏྟཾ་ཨུཏྤཱ་ད་ཡཱ་མི། ཞེས་པ་འདིས་བྱང་ཆུབ་ཏུ་སེམས་བསྐྱེད་པར་བྱའོ། །དེ་ནས་རྡོ་རྗེ་དང་བཅས་པའི་རྡོ་རྗེ་ཨོཾ་སུ་ར་ཏེ་ས་མ་ཡ་
སྟྭཾ་ཧོ་སིདྡྷི་བཛྲ་ཡ་ཐཱ་སུ་ཁ།ཞེས་པ་འདིས་སྙིང་གར་རྡོ་རྗེ་གཞག་པར་བྱའོ། །དེ་ནས་སྔར་སྨྲས་པའི་ཡི་གེ་ལྔ་པོས་ཡོལ་བའི་ནང་དུ་བཅུག་ལ་འདི་སྐད་བརྗོད་པར་བྱའོ། །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས་ངས་ཁྱོད་ལ་རྡོ་རྗེའི་ཡེ་ཤེས་འདི་བསྐྱེད་པར་བྱ་ཡིས།
ཡེ་ཤེས་གང་གིས་ཁྱོད་དེ་བཞིན་གཤེགས་པའི་ཡེ་ཤེས་ཀྱང་ཐོབ་པར་འགྱུར་ན། དངོས་གྲུབ་གཞན་ལྟ་ཅི་སྨོས། ཁྱོད་ཀྱིས་འདི་དཀྱིལ་འཁོར་མ་མཐོང་བའི་མདུན་དུ་སྨྲ་བར་མ་བྱེད་ཅིག །སྨྲས་ན་ཁྱོད་དམ་ཚིག་ཉམས་པར་འགྱུར་ཏ་རེ། དེ་ནས་རྡོ་རྗེ་མགོ་བོར་བཞག་ནས་འདི་སྐད་ཅེས་བརྗོད་

44-1-185a

༼མ་དཔེ་འདིར་མི་མཐུན་པ་འདུག༽པར་བྱའོ། །འདི་ཁྱོད་ཀྱི་དམ་ཚིག་གི་རྡོ་རྗེ་སྟེ། གལ་ཏེ་ཁྱོད་ཀྱིས་འདི་འགའ་ཞིག་ལ་སྨྲས་ན་སྤྱི་བོ་འགེམས་པར་འགྱུར་རོ། །རྡོ་རྗེ་སེམས་རང་དེང་ཁྱོད། །སྙིང་ལ་ཡང་དག་ཞུགས་པར་མཛད། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་པ་འདིས་མནའ་བསྒགས་ལ། ཙནྡན་དང་གུར་གུམ་ལ་སོགས་པ་བསྲེས་པའི་ཆུ་ལ། ཨོཾ་བཛྲ་ཨ་མྲྀ་ཏ་ཨུ་ད་ཀ་ཋ། ཞེས་པའི་སྔགས་ལན་བདུན་བཟླས་ཏེ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་སྟེ། །རྡོ་རྗེ་བདུད་རྩིའི་ཆུ་འཐུང་ཤིག །ཅེས་བརྗོད་ཅིང་བླུད་པར་བྱ། དེ་ནས་འདི་དག་བརྗོད་པར་བྱ་སྟེ། དེང་ནས་བརྩམས་ཏེ་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱིས། ངས་འདི་གྱིས་ཤིག་བསྒོ་བ་གང་ཡིན་པ་དེ་ཁྱོད་ཀྱིས་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །ཡ་ང་བ་མ་སྤངས་པར་ཁྱོད་དུས་བྱས་ནས་སེམས་ཅན་དམྱལ་བར་ལྟུང་བར་འགྱུར་ཏ་རེ། དེ་དག་ནི་དམ་ཚིག་གི་ཆུ་སྦྱིན་པའོ། །དེ་ནས་དཀྱིལ་འཁོར་གྱི་ཆོ་ག་ལ་སོགས་པར་གསུངས་པའི་དབབ་པའི་ཆོ་གས་དབབ་པར་བྱའོ། །དེ་ནས་བདེན་པའི་བྱིན་རླབས་ཀྱིས། །དེ་ལྟར་བདག་གི་དཀྱིལ་འཁོར་དུ། །སློབ་མ་འདི་ནི་ལེགས་བཅུག་ནས། །བསོད་ནམས་ཇི་ལྟ་དེ་བཞིན་ཤོག །ལྷ་རྣམས་རིགས་ཀྱི་རིམ་པ་དག །འདི་ཡིས་དངོས་གྲུབ་ཇི་འདྲར་འགྱུར། །རིགས་གང་གིས་ནི་སྣོད་འགྱུར་དང་། །བསོད་ནམས་མཐུ་དག་ཅི་འདྲ་བ། །དེ་འདྲ་དཀྱིལ་འཁོར་འདི་རུ་ཤོག །ཅེས་དེ་ལྟར་བྱས་ནས། ཁྱོད་ཀྱི་མིག་གིས་ཅི་འདྲ་བ་དག་སྣང་ཞེས་དྲི་བར་བྱའོ། །དེ་ནས་དེ་བརྗོད་པའི་དཀར་པོ་དང་སེར་པོ་དང་དམར་པོ་དང་ནག་པོར་སྣང་བ་རྣམས་ཀྱིས། ཞི་བ་དང་རྒྱས་པ་དང་དབང་དུ་བྱ་བ་དང་དྲག་ཤུལ་སྤྱོད་པའི་དངོས་གྲུབ་ཀྱི་སྐལ་བ་ཅན་རྣམས་སུ་གོ་རིམས་ཇི་ལྟ་བ་བཞིན་དུ་བརྗོད་པར་བྱའོ། །དེ་ནས་དེས་བཟུང་བའི་མེ་ཏོག་གི་ཕྲེང་བ་དེ་དཀྱིལ་འཁོར་དུ་པྲ་ཏཱིཙྪ་བཛྲ་ཧོ། ཞེས་བྱ་བ་འདིས་དོར་བར་བྱའོ། །དེ་ནས་མེ་ཏོག་དོར་བ་ལས་དམན་པ་དང་མཆོག་ལ་སོགས་པའི་དངོས་གྲུབ་མཚོན་པར་བྱའོ། །དེ་ལ་གལ་ཏེ་སངས་རྒྱས་རྣམས་ཀྱི་དབུའམ་མཛོད་སྤུའམ་གཙུག་ཏོར་ལ་ལྷུང་ན་ཕྱག་རྒྱ་ཆེན་པོའི་དངོས་གྲུབ་འགྲུབ་བོ། །གལ་ཏེ་སྤྱན་ནམ་ཞལ་ལྷུང་ན་སྔགས་ཀྱི་དངོས་གྲུབ་ཏུ་འགྱུར་རོ། །ཡན་ལག་མཆོག་ལ་ནི་མཆོག་གོ། །ཡན་ལག་བར་པ་ལ་ནི་འབྲིང་ངོ་། །སྨད་ཀྱི་ཆ་ལ་ནི་ཐ་མའོ། །གཟུགས་ལས་ཡུན་རིང་བས་ན་ཤིན་ཏུ་ཡུན་རིང་བའོ། །ཉེ་བ་ལ་ནི་མྱུར་དུ་དངོས་གྲུབ་བོ། །ལྷ་རྣམས་ཀྱི་རང་གི་གནས་ཀྱི་ལེ་ཚེ་ལ་སོགས་པར་བཅས་པར་ཤེས་པར་བྱའོ། །ལྷ་གཉིས་ཀྱི་བར་དུ་གལ་ཏེ་ལྷུང་ན་དེའི་ཚེ་མེ་ཏོག་དེ་གང་ལ་ཉེ་བ་དེའི་རིགས་ཡིན་ནོ། །དཀྱིལ་འཁོར་གྱི་ཕྱི་རོལ་དུ་ལྷུང་ན་ནི་དངོས་གྲུབ་ཕྲན་ཚེགས་སུ་འགྱུར་རོ། །གལ་ཏེ་རི་མོ་ལ་ལྷུང་ན་དེ་ཚེ་སླར་ཡང་དོར་བར་བྱ་སྟེ། ལན་གསུམ་བྱས་ཀྱང་དེ་ཉིད་དུ་ལྷུང་ན་དངོས་གྲུབ་མེད་དོ། །ཕྱི་རོལ་གྱི་རྡོ་རྗེ་ར་བའི་ཕྱི་རོལ་དུ་ལྷུང་ན་དངོས་གྲུབ་མེད་དོ། །སྙིང་པོ་ལ་་ལྷུང་ན་ནི་ཕྲན་ཚེགས་སོ། །དེ་དག་ནི་མེ་ཏོག་དོར་བའོ། །དེ་ནས་དོར་བའི་ཕྲེང་བ་དེ་སླར་ཡང་བླངས་ནས་སློབ་མའི་སྤྱི་བོར་བཅིངས་ནས་པྲ་ཏི་གྲྀཧྞ་ཏྭ་མི་མཾ་སཏྭ་མ་ཧཱ་བ་ལ་ཞེས་བརྗོད་དོ། །ཨོཾ་བཛྲ་སཏྭ་ཡ་ཏརྱ་ཙཀྵུ་ཏ་གྷ་ཊ་ཏད་སྥ་ར་ཎ་ཨུཏྒྷ་ཊ་ཨ་ཏི་སརྦྦ་ཀྵོ། བཛྲ་ཙཀྵུར་ནུཏྟ་རཾ། ཞེས་བརྗོད་ཅིང་གདོང་གཡོགས་དགྲོལ་བར་བྱའོ། །དེ་ནས་དཀྱིལ་འཁོར་གྱི་ལྷ་སོ་སོའི་མིང་བརྗོད་ལ། སྔོན་དུ་འགྲོ་བས་སྒོ་སྐྱོང་ནས་བརྩམས་ནས་བདག་པོའི་མཐར་ཐུག་པར་བསྟན་པར་བྱའོ། །དེ་དག་ནི་དཀྱིལ་འཁོར་དུ་གཞུག་པའི་ཆོ་གའོ། །དེ་ནས། བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་བསྐྱབ་པའི་དོན་སླད་དུ། །ནམ་མཁའ་རྡོ་རྗེ་དེང་བདག་སྩོལ། །ཞེས་བྱ་བས་གསོལ་བ་བཏབ་ལ། བུམ་པ་བཟུང་བའི་སྤྱན་མ་ལ་སོགས་པ་རྣམས་ཀྱིས་དབང་བསྐུར་བར་བྱ་སྟེ། དབང་བསྐུར་བ་ནི་རྡོ་རྗེ་ཆེ། །ཁམས་གསུམ་པ་ཡིས་ཕྱག་བྱས་པ། །གསང་བ་གསུམ་གྱི་གནས་ལས་བྱུང་། །སངས་རྒྱས་ཀུན་གྱིས་སྦྱིན་པར་བྱ། །ཞེས་བརྗོད་ནས་བདུད་རྩི་འཁྱིལ་པ་བཟླས་པའི་བུམ་པ་ནས་རྡོ་རྗེ་ཁུ་ཚུར་གྱིས་ཆུ་བླངས་ལ། ཨོཾ་བཛྲ་ཨ་བྷི་ཥིཉྩཱ་མི། ཞེས་བརྗོད་ལ་གདོང་བཀྲུ། སློབ་མ་འཁོར་ལོས་སྒྱུར་བ་བཞིན་དུ་དབང་བསྐུར་བར་བྱའོ། །དེ་དག་ནི་ཆུའི་དབང་བསྐུར་བའི་ཆོ་གའོ། །དེ་ནས་རང་གི་ལྷ་དང་ལྷན་ཅིག་པའི་གསེར་དང་རས་ལ་སོགས་པ་ལས་བྱས་པའི་ཅོད་པན་སློབ་མའི་མགོ་བོར་སྔར་སྨྲས་པའི་རིམ་པས་ལེགས་པར་བཞག་ལ། ནམ་མཁའི་

44-1-185b

empty page
44-1-186a

དཀྱིལ་ན་བཞུགས་པའི་དེ་བཞིན་གཤེགས་པ་ཐམས་ཅད་རྡོ་རྗེའི་གཟུགས་ཀྱིས་ཅོད་པན་ལ་བཞུགས་པར་བསམ་པར་བྱའོ། །དེ་དག་ནི་ཅོད་པན་གྱི་དབང་བསྐུར་བའི་ཆོ་གའོ། །དེ་ནས་རྡོ་རྗེ་བླངས་ལ། སངས་རྒྱས་རྣམས་ཀྱིས་རྡོ་རྗེའི་དབང་། །དེ་རིང་ཁྱོད་ལ་
བསྐུར་བར་བྱ། །འདི་དེ་སངས་རྒྱས་ཐམས་ཅད་ཉིད། །རབ་ཏུ་གྲུབ་ཕྱིར་རྡོ་རྗེ་ཟུང་། །ཞེས་གདོན་ཞིང་རྡོ་རྗེ་སྙིང་ག་ལ་སོགས་པར་རེག་ནས་རྡོ་རྗེ་ལག་པ་གཡས་སུ་སྦྱིན་པར་བྱའོ། །དེ་དག་ནི་རྡོ་རྗེའི་དབང་བསྐུར་བའི་ཆོ་གའོ། །དེ་ནས་ལག་པ་གཡོན་པར་དྲིལ་བུ་བྱིན་ལ་
རྡོ་རྗེ་དང་དྲིལ་བུར་ལྡན་པའི་སློབ་མའི་ལག་པ་གཉིས་ཀྱིས་འཁྱུད་པའི་ཚུལ་དུ་བཅུག་ལ། ཨོཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི་ཏིཥྛ་བཛྲ་ས་མ་ཡ་སྟྭཾ། ཞེས་གདོན་པར་བྱའོ། །དྲིལ་བུའི་དབང་བསྐུར་བ་ནི་བདག་པོའི་དབང་བསྐུར་བ་ཞེས་བརྗོད་དོ། །དེ་དག་ནི་དྲིལ་བུའི་དབང་བསྐུར་བའི་ཆོ་གའོ། །
དེའི་རྗེས་ལ་རྡོ་རྗེ་དང་དྲིལ་བུ་སློབ་མའི་སྤྱི་བོར་བཟུང་ལ། ཨོཾ་བཛྲ་སཏྭ་ཏྭཾ་ཨ་བྷི་ཥིཉྩ་མི་བཛྲ་ན་མ་ཨ་བྷི་ཥེ་ཀ་ཏ། ཀྱེ་དཔལ་ཆེ་གེ་མོ་རྡོ་རྗེ་ཞེས་རིགས་དང་མཐུན་པའི་མིང་དག་གདགས་སོ། །དབང་བསྐུར་བ་དེ་དག་གིས་ནི་སྔགས་དང་རྒྱུད་ཉན་པ་དང་འཆད་པ་དང་སྔགས་སྒྲུབ་པ་ལ་དབང་བསྐུར་བྱ་བར་
འགྱུར་རོ། །དབང་བསྐུར་བ་ལྔ་པོ་དེ་ཉིད་ནི་རིག་པའི་དབང་བསྐུར་བ་ཞེས་བརྗོད་དོ། །ཐམས་ཅད་དུ་སྤྱན་མ་ལ་སོགས་པའི་རིགས་རྣམས་ཀྱི་བྱ་བ་ཡོད་པའི་ཕྱིར་རོ། །དེ་དག་ནི་མིང་གི་དབང་བསྐུར་བའི་ཆོ་གའོ། །དེའི་རྗེས་ལ་རིག་པའི་དབང་བསྐུར་བ་བླངས་ཤིང་སློབ་དཔོན་གྱི་སྡོམ་པ་བླངས་
པ་ལ། རྡོ་རྗེ་སློབ་དཔོན་དབང་བསྐུར་བ། །གང་གིས་ཁྱོད་ཀྱི་དྲིན་གྱིས་དག །བདག་དང་གཞན་དོན་ནུས་འགྱུར་བ། །བརྩེ་བའི་གཏེར་གྱིས་བདག་ལ་སྩོལ། །ཞེས་གསོལ་བ་བཏབ་པར་གྱུར་པའི་སློབ་མ་ལ་བསམ་གཏན་གྱི་སྤྱན་ལ་སོགས་པ་རྣམས་ཀྱིས་དབང་བསྐུར་ནས་དམ་ཚིག་གསུམ་
འཛིན་དུ་གཞུག་གོ། །དེ་ལ་དམ་ཚིག་གསུམ་ནི་འདི་ཡིན་ཏེ། ཧཱུྃ་གི་ཡི་གེ་རྡོ་རྗེར་བསམས་ནས། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །བཅོམ་ལྡན་འདས་དམ་པ་དང་པོའི་སྐྱེས་

44-1-186b

བུའོ་ཞེས་བྱ་བ་དེ་ཁོ་ན་ཉིད་རྡོ་རྗེ་གཟུང་ངོ་། །དེ་དག་ནི་རྡོ་རྗེའི་དམ་ཚིག་གོ། །དེ་མ་ཐག་ཏུ་ཡི་གེ་ཨ་ལས་སྐྱེས་པའི་དྲིལ་བུ་ལ། འདི་དེ་སངས་རྒྱས་ཐམས་ཅད་ཀྱི། །ཡེ་ཤེས་དབྱངས་ཀྱི་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་ཟུང་། །བྱང་ཆུབ་མཆོག་ཏུ་རྒྱལ་བས་བཞིང་། །ཅེས་
པ་འདིས་སློབ་མའི་ལག་ཏུ་སྦྱིན་ནོ། །སྲིད་པ་རང་བཞིན་གྱིས་ནི་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་མཆོག །སྲིད་པ་མཆོག་ནི་བྱེད་པར་འགྱུར། །ཞེས་བྱ་བ་འདིས་སློབ་མས་ཀྱང་དཀྲོལ་བར་བྱའོ། །དེ་དག་ནི་དྲིལ་བུའི་དམ་ཚིག་གོ། །དེའི་
རྗེས་ལ། ཡིད་ཀྱིས་ལུས་ནི་བརྟན་བྱའི་ཕྱིར། །ཕྱག་རྒྱ་དམ་ཚིག་ཅེས་བྱར་གསུངས། །གང་གིས་ལུས་ཀུན་བརྟགས་པས་ན། །དེས་ན་ཕྱག་རྒྱ་རབ་ཏུ་བསྒྲགས། །ཞེས་བྱ་བ་འདིས་རང་གི་འདོད་པའི་ལྷའི་ལུས་ཀྱིས་བདག་ཉིད་ཕྱག་རྒྱ་ཆེན་པོར་བྱིན་གྱིས་བརླབ་པར་བྱའོ། །དེ་དག་ནི་
ཕྱག་རྒྱའི་དམ་ཚིག་གོ། །དེ་ནས་དཀྱིལ་འཁོར་གྱི་དེ་ཁོ་ན་ཉིད་ནི་དཀྱིལ་འཁོར་གྱི་རྣམ་པར་དག་པའི་མཚན་ཉིད་དང་། ལྷའི་དེ་ཁོ་ནས་ནི་ལྷའི་རྣམ་པར་དག་པའི་མཚན་ཉིད་དང་། སློབ་དཔོན་གྱི་ལས་ནི་དཀྱིལ་འཁོར་གྱི་སྒྲུབ་པ་སྔོན་དུ་འགྲོ་བ་སྟེ། དེར་སློབ་དཔོན་གྱི་འཇུག་པའི་བྱ་བའི་
མཚན་ཉིད་དོ་ཞེས་སེམས་ཤིང་འདི་གསུམ་བསྟན་པར་བྱའོ། །དེ་ནས་རྣམ་པར་སྣང་མཛད་ལ་སོགས་པའི་གཟུགས་སུ་དམིགས་པའི་སློབ་མ་ལ་རྗེས་སུ་གནང་བ་སྦྱིན་པར་བྱ་སྟེ། སེམས་ཅན་ཀུན་ལ་ཕན་དོན་དུ། །འཇིག་རྟེན་ཀུན་ལ་ཐམས་ཅད་དུ། །ཇི་ལྟར་འདུལ་བ་སྣ་ཚོགས་པ། །ཆོས་
ཀྱི་འཁོར་ལོ་རབ་ཏུ་བསྐོར། །ཞེས་ཆོས་ཀྱི་གནས་སུ་རྡོ་རྗེ་དང་རིན་པོ་ཆེ་དང་པདྨ་དང་ལས་ཀྱི་སྒྲ་བཅུག་ལ་རིམ་པ་བཞིན་དུ་ཚིགས་སུ་བཅད་པ་ལྔས་བྱ་སྟེ། དེ་དག་ནི་རྗེས་སུ་གནང་བའི་སྤྱིན་པའོ། །དེ་ནས། འདི་དེ་སངས་རྒྱས་ཐམས་ཅད་ཉིད། །རྡོ་རྗེ་སེམས་དཔའི་ཕྱག་ན་གནས། །ཁྱོད་ཀྱིས་
ཀྱང་ནི་རྟག་ཏུ་གཟུང་། །ཕྱག་ན་རྡོ་རྗེས་བརྟུལ་ཞུགས་བརྟན། །ཞེས་པས་རྡོ་རྗེ་སྦྱིན་ཏེ། སརྦྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་སྟྭཾ་དྷཱ་ར་ཡ་མི་བཛྲ་སཏྭ་ཧི་ཧི་ཧི་ཧཾ་ཧཱུྃ། ཞེས་བརྗོད་དུ་གཞུག་ཅིང་སློབ་མ་རྡོ་རྗེ་བརྟུལ་ཞུགས་འཛིན་དུ་གཞུག་གོ། །དེ་དག་ནི་རྡོ་རྗེ་སྦྱིན་པའོ། །དེའི་རྗེས་ལ་སངས་

44-1-187a

རྒྱས་ཀྱི་གཟུགས་སུ་བདག་ཉིད་བསམས་ནས། སྙིང་གར་ཁུ་ཚུར་གཡོན་པས་ཆོས་གོས་ཀྱི་གྲྭ་ནས་འཛིན་པའི་ཚུལ་དུ་བྱས་ལ། གཡས་པ་མཆོག་སྦྱིན་པས། ཨོཾ་འདིར་ནི་ངས་ཁྱོད་ལུང་བསྟན་ཡིན། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཤིན་ཏུ་
གྲུབ་པའི་ཕྱིར། །སྲིད་པའི་ངན་འགྲོ་རྣམས་ལས་བཏོན། །ཀྱེ་ཆེ་གེ་མོ་ཞེས་བྱ་བ་དེ་བཞིན་གཤེགས་པའི། སིདྡྷི་ས་མ་ཡ་སྟྭཾ་བྷུརྦྷུ་བ་སྭཿ། ཞེས་བྱ་བས་ལུང་བསྟན་ཏེ། གང་ལ་འཕགས་པའི་ཕྱག་རྒྱ་འདིས་ལུང་སྟོན་པར་བྱེད་ན། དེ་བཞིན་གཤེགས་པ་ཐམས་ཅད་བྱང་ཆུབ་སེམས་
དཔའི་འཁོར་གྱི་དཀྱིལ་འཁོར་རྣམས་ཀྱིས་མགྲིན་གཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་མཛད་དེ། འཕགས་པ་ཕྱག་རྒྱ་ཆེན་པོ་འདིའི་མཐུ་དང་གསང་སྔགས་ཀྱི་སྟོབས་ཀྱིས་སོ་ཞེས་དད་པར་བྱའོ། །དེ་དག་ནི་ལུང་བསྟན་པའོ། །དེ་ནས་གསང་བ་བརྗོད་
པར་བྱ་སྟེ། འདོད་ཆགས་བྲལ་བ་ལྟ་བུའི་སྡིག །ཁམས་གསུམ་ན་ནི་གཞན་མེད་དེ། །དེ་བས་འདོད་ཆགས་བྲལ་བྱ་བར། །ཁྱོད་ཀྱིས་ནམ་ཡང་མ་བྱེད་ཅིག །མ་ཧཱ་ས་མ་ཡ་ཧཱ་ན་ཧཱུྃ་ཕཊ། དེ་ནས། མཆོག་གསང་དཀྱིལ་འཁོར་དམ་པ་ནི། །མཐོང་བ་དང་ནི་ཞུགས་པ་ཡིས། །སྡིག་
པ་ཀུན་ལས་ངེས་གྲོལ་བར། །ཁྱོད་ནི་དེ་ཉིད་ལེགས་པར་གནས། །བདེ་ཆེན་ཐེག་པ་འདི་ལ་ནི། །ཕྱིན་ཆད་འཆི་བ་ཡོད་མིན་ཏེ། །སྲིད་པ་ཤིན་ཏུ་དག་བྱའི་ཕྱིར། །སྲིད་པའི་སྡུག་བསྔལ་རྣམས་ལས་འདས། །བྱང་ཆུབ་སེམས་ནི་བཏང་མི་བྱ། །རྡོ་རྗེ་ཞེས་བྱའི་ཕྱག་རྒྱ་དང་། །གང་ཞིག་
སྐྱེས་པ་ཙམ་གྱིས་ནི། །སངས་རྒྱས་ཉིད་དུ་དོགས་མེད་པའོ། །དམ་པའི་ཆོས་ནི་མི་སྨད་ཅིང་། །ནམ་ཡང་སྤང་བར་མི་བྱ་སྟེ། །མི་ཤེས་པའམ་རྨོངས་པ་ཡིས། །དེ་ནི་བསྟན་པར་མི་བྱའོ། །རྡོ་རྗེ་དྲིལ་བུ་ཕྱག་རྒྱ་ཡང་། །ནམ་ཡང་སྤང་བར་མི་བྱའོ། །སློབ་དཔོན་བརྙས་པར་མི་བྱ་སྟེ། །
ད་ནི་སངས་རྒྱས་ཀུན་དང་མཚུངས། །རང་གི་བདག་ཉིད་ཡོངས་སྤངས་ནས། །དཀའ་ཐུབ་ཀྱིས་ནི་གདུང་མི་བྱ། །ཇི་ལྟར་བདེ་བར་བདེ་བ་བཟུང་། །འདི་ནི་མ་བྱོན་རྫོགས་སངས་རྒྱས། །དེ་རིང་རྡོ་རྗེ་སློབ་དཔོན་ཏེ། །སྔགས་དང་རྒྱུད་ནི་འཛིན་པ་ཁྱོད། །སངས་རྒྱས་བྱང་ཆུབ་སེམས་རྣམས་དང་། །

44-1-187b

ལྷ་རྣམས་ཀྱིས་ནི་བཞེད་པ་ཡིན། །སེམས་ཅན་རྣམས་ལ་སྙིང་བརྩེའི་ཕྱིར། །ཁྱོད་ཀྱིས་དཀྱིལ་འཁོར་ཆོ་ག་བཞིན། །འབད་པ་ཡིས་ནི་བྲི་བྱ་ཞིང་། །སྒྲུབ་པ་པོ་རྣམས་རྒྱུད་ལ་སྦྱོར། །དེ་དག་ནི་དབུགས་དབྱུང་བའོ། །རྗེས་སུ་གནང་བ་ལ་སོགས་པ་བཞི་པོ་འདི་དག་རྣམས་ནི། དབང་
བསྐུར་བ་ལྔའི་དེ་མ་ཐག་ཏུའམ། བཞི་པའི་དབང་བསྐུར་བའི་དེ་མ་ཐག་ཏུ་བརྗོད་པར་བྱའོ། །སློབ་དཔོན་གྱི་དབང་བསྐུར་བ་ཉིད་ལ་ནི་ཕྱིར་མི་ལྡོག་པའི་དབང་བསྐུར་བ་ཞེས་བརྗོད་དོ། །དབང་བསྐུར་བ་ལྔ་དང་སློབ་དཔོན་གྱི་དབང་བསྐུར་བ་ནི་བུམ་པའི་དབང་ཡིན་ཏེ། ཐམས་ཅད་དུ་བུམ་པའི་བྱེད་པ་ཡོད་
པས་སོ། །དབང་བསྐུར་བ་དྲུག་པོ་བྱ་བ་ནི་རྒྱུད་ཐམས་ཅད་དུ་ཡང་འགལ་བ་མེད་དེ་འཇམ་དཔལ་གྱི་རྒྱུད་ལ་སོགས་པ་རྣམས་སུ་བསྟན་པའི་ཕྱིར་རོ། །དེ་དག་ནི་སློབ་དཔོན་གྱི་དབང་བསྐུར་བའི་ཆོ་གའོ། །དེ་ནས་ཡོལ་བ་ལ་སོགས་པ་དབེན་པར་བྱས་པའི་ཕྱོགས་སུ་སློབ་མས་རང་གི་སེམས་དང་
འཐད་པའི་གཟུགས་ལ་སོགས་པའི་ཡོན་ཏན་དང་ལྡན་པ་དམ་ཚིག་དང་སྡོམ་པ་དང་ཏིང་ངེ་འཛིན་གསུམ་ལ་མཁས་པ་རྒྱན་ཐམས་ཅད་ཀྱིས་བརྒྱན་པ་ཤིན་ཏུ་དད་པ་སྙིང་རྗེའི་བདག་ཉིད་ཅན་གྱི་ཤེས་རབ་གསང་བའི་དབང་བསྐུར་བའི་དོན་དུ་བླ་མ་ལ་ཕུལ་ལ། བྱང་ཆུབ་རྡོ་རྗེ་ཞེས་པ་ལ་སོགས་
པས་གསོལ་བ་གདབ་པར་བྱའོ། །བླ་མས་ཀྱང་ཏིང་ངེ་འཛིན་གསུམ་མངོན་སུམ་དུ་བྱས་ཤིང་དེ་བཞིན་ཉིད་ཀྱི་པདྨའི་ནང་དུ་སྦྱོར་བས་བསྐྱོད་པའི་རྡོ་རྗེ་ནོར་བུའི་ནང་དུ་ཆུད་པ་རང་གིས་རིག་པར་བྱས་ནས། སེམས་ཀྱང་ནམ་མཁའི་ཁམས་སུ་མ་ལྷུང་བ་ཉིད་དུ་མཚོ་སྐྱེས་ནས་རྡོ་རྗེ་བཏོན་ནས་སྲིན་ལག་
དང་མཐེ་བོ་དག་གིས་སློབ་མའི་མིག་དང་ལག་པའི་སྤྱོད་ཡུལ་མ་ཡིན་པར་དེ་ཁའི་ནི་ཆུ་སྐྱེས་ཀྱི་ནམ་མཁར་སྦྱིན་པར་བྱའོ། །དེས་ཀྱང་ཨ་ཧོ་མ་ཧཱ་སུ་ཁ། ཞེས་བརྗོད་དེ་དྲངས་ནས་ལོངས་སྤྱོད་ཅིང་ལོངས་སྤྱོད་ཀྱི་སྦུ་གུར་གཞུག་པར་བྱའོ། །དེ་ཉིད་ཀྱིས་ཀྱང་ལངས་ལ་རང་གི་ཁྱད་པར་གྱི་ནང་ནས་
ཁྱད་པར་དུ་འཕགས་ཏེ་མེ་ཏོག་གི་བཅུད་ཀྱི་ཐིགས་པ་གོས་དང་བྲལ་ཞིང་སྒེག་པ་དང་བཅས་པས་དེའི་ནམ་མཁར་གཞུག་པར་བྱའོ། །དེ་ནི་ཤེས་རབ་དང་ཐབས་ཀྱི་གསང་བ་དག་གི་དབང་བསྐུར་བའི་ཆོ་གའོ། །དེ་ནས་དེ་བཞིན་ཉིད་གཅིག་ཏུ་འདོད་ན་དེ་ཉིད་ཀྱིས་སོ། །ཐ་དད་པར་འདོད་ན་གཞན་གྱིས་ཏེ། རང་རིག་

44-1-188a

པའི་ཡེ་ཤེས་མངོན་སུམ་དུ་བྱེད་པའི་གནས་སྐབས་སུ་སྔར་སྨྲས་པའི་ཚིགས་སུ་བཅད་པས་གསོལ་བ་བཏབ་པར་གྱུར་པའི་སློབ་མ་དེའི་ལག་པ་བཞག་ལ། ཉམས་དགའ་གཟུངས་འདི་ཁྱོད་ཀྱིས་ནི། །བསྟེན་བྱར་སངས་རྒྱས་རྣམས་ཀྱིས་བསྔགས། །འཁོར་བའི་རིམ་པའི་སྦྱོར་
བ་ཡིས། །བདེ་བ་དམ་པ་མྱང་བར་གྱིས། །ཐབས་གཞན་གྱིས་ནི་སངས་རྒྱས་མིན། །འདི་ནི་འགྲོ་བ་གསུམ་ན་དག །དེ་བས་འདི་དང་བྲལ་བར་ནི། །ཁྱོད་ཀྱིས་ནམ་ཡང་མ་བྱེད་ཅིག །འདི་དེ་སངས་རྒྱས་ཐམས་ཅད་ཀྱི། །རིག་པའི་བརྟུལ་ཞུགས་བླ་ན་མེད། །བླུན་པོ་འགའ་ཞིག་འདའ་བྱེད་ན། །
དེ་ལ་དངོས་གྲུབ་མཆོག་ནི་མེད། །ཅེས་བརྗོད་དེ་གཏང་བར་བྱའོ། །དེ་ཡང་ཙནྡན་དང་གུར་གུམ་ལ་སོགས་པ་བྱུགས་པ་ཤིན་ཏུ་དྲི་ཞིམ་པ་ལ་སོགས་པའི་མེ་ཏོག་གི་ཕྲེང་བས་སྟེང་དུ་བརྒྱན་པ་གོས་མེད་པར་ཆུ་སྐྱེས་མཛེས་པ་གསལ་བར་སྟོན་པར་བྱེད་ཅིང་སློབ་མ་ལ་འདི་སྐད་སྨྲ་བར་བྱ་སྟེ། བུ་ཁྱོད་བདེན་
པར་སྨྲའམ་ཅི། །བཤང་གཅི་ལ་སོགས་བཟའ་བ་དང་། །ཁྲག་དང་ཁུ་བ་དེ་བཞིན་ཤ །དེ་བཞིན་མཆོག་ཏུ་བུད་མེད་གུས། །བྷ་གའི་པདྨར་འོ་བྱེད་པ། །བུ་ཡིས་ཇི་ལྟར་བདེ་བར་སྨྲོས། །ཞེས་བརྗོད་དོ། །དེས་ཀྱང་། ཁྲག་དང་ཁུ་བ་སོགས་ཟ་དང་། །རྟག་ཏུ་བུད་མེད་གུས་བྱས་དང་། །བྷ་
ག་ཉིད་ལ་འོ་བགྱིད་པར། །ལྷ་མོ་ཅི་སྟེ་བདག་མི་སྤྲོ། །ཞེས་སྨྲ་བར་བགྱིའོ། །དེ་དགའ་ཞིང་བྱམས་པ་དང་ལྡན་པས་སྒྲུབ་པ་པོ་ལ་བདག་པོ་བཞིན་དུ་རྣམ་པར་ལྟ་ཞིང་། ཙོག་ཙོག་པོར་ཆུ་སྐྱེས་བསྟན་ནས་འདི་སྐད་ཅེས་སྨྲ་བར་བྱའོ། །ཨེ་མའོ་ང་ཡི་པདྨ་འདི། །བདེ་བ་ཀུན་དང་ཡང་དག་ལྡན། །
གང་ཞིག་ཆོ་གས་བསྟེན་བྱེད་པ། །དེ་ཡི་མདུན་དུ་ང་གནས་སོ། །རྫོགས་སངས་མཉེས་པར་བྱ་ལ་སོགས། །ཇི་ལྟའི་བྱ་བ་པདྨར་གྱིས། །བདེ་ཆེན་རྒྱལ་པོ་རང་ཉིད་ནི། །འདི་ཉིད་དུ་ནི་རབ་ཏུ་གནས། །ཨུད་ཕུ་ལ་ལ་བྷ་མ་ཛི་ཛྭ་ལ། ལ་སོགས་པས་བྱེད་པ་ལེགས་པར་གདགས་པས། ཇི་
སྲིད་རྣལ་འབྱོར་བྱང་ཆུབ་སེམས། །གདོད་པ་རུ་ནི་མི་བྱེད་པས། །དེ་སྲིད་རྒྱུན་མི་ཆད་པ་ཡི། །དགའ་སྐྱེས་བདེ་བ་ཅི་ཡང་ཐོབ། །དངོས་གྲུབ་ཀུན་གྱི་གཏེར་གྱུར་པའི། །བྱང་ཆུབ་སེམས་ནི་ལྷུང་གྱུར་ན། །ཕུང་པོ་རྣམ་ཤེས་བརྒྱལ་བ་ལ། །མ་སྨད་དངོས་གྲུབ་གཟུགས་ལ་ཡོད། །མཁའ་

44-1-188b

དབྱིངས་རྡོ་རྗེ་མཉམ་སྦྱོར་དང་། །རེག་ལས་རྨད་བྱུང་ཆེན་པོ་ཡི། །བདེ་བ་སྐྱེས་པ་གང་ཡིན་པ། །མཆོག་ཏུ་དགའ་བ་བྱེད་པའོ། །དགའ་བྲལ་དགའ་བ་བདག་དབུས་སུ། །མཚན་བྱ་བརྟགས་ལ་བརྟན་པར་གྱིས། །པདྨའི་ནམ་མཁར་རྡོ་རྗེ་དང་། །ལྟེ་བ་དག་ནི་གནོན་ནས་སུ། །རྡོ་རྗེ་
སྐྱིལ་མོ་ཀྲུང་ལ་སེམས། །ནོར་བུའི་ནང་དུ་སོན་པ་ལྟ། །ཡེ་ཤེས་སྐྱེ་བ་གང་ཡིན་ཏེ། །ཤིན་ཏུ་ཡེ་ཤེས་ངོ་བོ་ཡིན། །འདོད་ཆགས་མ་ཡིན་ཆགས་བྲལ་མིན། །དབུ་མར་དམིགས་སུ་མེད་པ་སྟེ། །གང་ཚེ་རྣལ་འབྱོར་ཡེ་ཤེས་མཐོང་། །བདེ་བར་འགྱུར་བ་བདེ་བར་གནས། །ཐུན་ནམ་
ཡང་ན་ཉི་མ་གཅིག །ཟླ་ཕྱེད་ཟླ་བ་ཁྱུད་སྐོར་དང་། །བསྐལ་པའམ་བསྐལ་པ་སྟོང་ཕྲག་ཏུ། །ཡེ་ཤེས་མངོན་པར་སྦྱོར་བས་གནས། །དེ་ལྟར་བརྟགས་ལ་ཇི་ལྟར་ནུས་པས་བཟུང་བ་ལ་བཏང་སྟེ་ཆུ་སྐྱེས་ལྕེ་ཉིད་ཀྱིས་རྗེས་སུ་བླངས་ཏེ། དེ་ཁོ་ན་མཐོང་བས་བྱང་ཆུབ་ཀྱི་སེམས་དམ་ཚིག་གི་ངོ་
བོ་གཟུང་བར་བྱའོ། །ཤེས་རབ་ཡེ་ཤེས་ཀྱི་དབང་བསྐུར་བའི་ཆོ་གའོ། །དེའི་རྗེས་ལ་དབང་བསྐུར་བ་བདུན་འཐོབ་ཅིང་ཤེས་རབ་ཡེ་ཤེས་མངོན་སུམ་དུ་བླངས་པ་ཉིད་མ་རྙེད་ན་ཡང་ཚིག་གིས་སྨྲས་ལ་དབང་རིན་པོ་ཆེ་སློབ་དཔོན་གྱི་མན་ངག་ལས་ཡེ་ཤེས་ཀྱི་དབང་སྦྱིན་པ་དེ་ལ་བཞི་བ་མངོན་
པར་བརྗོད་པ་དབང་བསྐུར་བའི་རིན་པོ་ཆེ་བླ་མའི་མན་ངག་གིས་རྟོགས་པར་བྱ་བའི་ངོ་བོ་སྦྱིན་པར་བྱའོ། །དེ་ནི། སློབ་མའི་མོས་པ་ཡིད་ཀྱིས་ཡོངས་བརྟགས་ལ། །ཇི་སྐད་གསུངས་པའི་ཆོ་གས་གསང་བྱིན་ནས། །རྒྱ་ཆེ་ཟབ་པའི་ཚུལ་ལ་མོས་པ་ན། །དབང་བསྐུར་རིན་ཆེན་ཚིག་ཉིད་སྦྱིན་པར་བྱ། །
ཞེས་གསུངས་སོ། །ཤེས་རབ་ཡེ་ཤེས་ཀྱི་དབང་བསྐུར་དངོས་སུ་མ་ཐོབ་པ་ལ་སླར་ཡང་ཚིག་ཙམ་གྱིས་དབང་བསྐུར་བ་སྦྱིན་པར་མི་བྱ་སྟེ། དམ་ཚིག་ཉམས་པས་འཇིགས་པའི་ཕྱིར་རོ། །འོ་ན་གལ་ཏེ་ཤེས་རབ་ཡེ་ཤེས་ཀྱི་དབང་བསྐུར་དངོས་སུ་མ་ཐོབ་པ་ལ་ཚིག་ཙམ་གྱི་དབང་བསྐུར་བ་
བཀག་ན། ཇི་ལྟར་ན་དགེ་སློང་རྣམས་རྗེས་སུ་གཟུང་བར་བྱ་ཞེ་ན། དགེ་སློང་རྣམས་རྗེས་སུ་གཟུང་བར་མི་བྱ་སྟེ། དེ་དག་ལ་ནི་འདིར་དབང་མེད་པའི་ཕྱིར། དེ་ལྟར་ཡང་། གང་ཡང་དགེ་སློང་དངོས་དགའ་དང་། །གང་ཡང་རྟོག་གེ་ལ་དགའི་མི། །གང་ཡང་རྒན་པོའི་དངོས་གནས་པ། །དེ་

44-1-189a

ལ་དེ་ཉིད་བསྟན་མི་བྱ། །ཞེས་གསུངས་སོ། །འོ་ན་ཇི་ལྟར་ན། སོ་སོར་འབྲང་མ་ཆེན་མོ་ལ་སོགས་པར་གསུངས་པ། དགེ་སློང་རྡོ་རྗེ་འཛིན་པས་བྱ། །བདུད་ལ་བསྡིགས་པ་ལ་བརྩོན་པ། །ཞེས་བྱ་བ་ལ་སོགས་པ་ནི་གསུངས་པ་ཉིད་དོ་ཞེ་ན།འོན་ཀྱང་དགེ་སློང་འགའ་ཞིག་
གཅིག་ཏུ་ངེས་པར་གྲགས་པའི་དཀའ་ཐུབ་ཅན་ཉན་ཐོས་ཀྱི་ཐེག་པ་ལྟ་བ་གཅིག་པ་སྟེ། དེ་ལ་ནི་སྔགས་དང་ཕྱག་རྒྱ་ལ་སོགས་པའི་དབང་བསྐུར་བ་དབང་མེད་པ་ཉིད་དོ། །ཡང་གང་ཞིག་ཉན་ཐོས་ཀྱི་སྡོམ་པ་དང་ཐེག་པ་ཆེན་པོར་སེམས་བསྐྱེད་པ་དང་ལྡན་པ་སྟེ། དེ་ལ་སྔགས་དང་ཕྱག་རྒྱ་ལ་སོགས་པ་ལ་དབང་
ཡོད་དེ། དེ་ཡང་གསང་བའི་དབང་བསྐུར་བ་ལ་སོགས་པ་མེད་དོ། །ཡང་གང་ཞིག་ཉན་ཐོས་ཀྱི་སྡོམ་པ་དང་སྔགས་ཀྱི་ཚུལ་ལ་ཡང་སེམས་བསྐྱེད་པ་དང་ལྡན་པ་སྟེ། དེ་ལ་ནི་ཐམས་ཅད་དུ་དབང་བསྐུར་བ་ལ་སོགས་པའི་དབང་ཡོད་པ་སྟེ་དེ་ཉིད་ནི་རྡོ་རྗེ་འཛིན་པས་བདུད་ལ་བསྡིགས་པ་ལ་སོགས་པ་
བྱའོ། །འོ་ན་དེ་ལྟར་ན་ཡང་ཇི་ལྟར་ན་དགེ་སློང་གི་སྡོམ་པ་མི་ཉམས་པར་འགྱུར་རམ་ཞེ་ན། མི་འགྱུར་ཏེ། འདི་ལྟར་དགེ་སློང་གི་སྡོམ་པ་མ་བཏང་བར། ཕྱི་ནང་གསང་བའི་ཐེག་པ་གསུམ། །སྡོམ་པ་སོ་སོར་གཟུང་བར་བགྱི། །ཞེས་བྱ་བ་ལ་སོགས་པ་གང་གི་ཚེ། སྡོམ་པ་གཞན་དང་མི་འགལ་
ཞིང་། །ལྷག་པ་ཡང་སོ་སོར་འཛིན་པ་ཡིན་ན་དེའི་ཚེ་ཇི་ལྟར་སྡོམ་པ་ཉམས། ཅི་སྟེ་མི་འགལ་ཞིང་ལྷག་པའི་སྡོམ་པ་མ་ཉམས་པར་ཡིན་དུ་བཅུག་ན་དགེ་སློང་གི་སྡོམ་པ་ལ་དབང་པོ་གཉིས་སྙོམས་པར་འཇུག་པར་བྱེད་པ་ཇི་ལྟར་མི་ཉམས་ཤི་ན། དེ་ལྟར་ན་ཡང་མི་ཉམས་ཏེ། འདུལ་བ་ལ་སོགས་པར་
བཀག་པ་སྤྱོད་པ་ནི་ཉམས་པར་བསྟན་གྱི་ཡང་མ་བཀག་པར་སྤྱོད་པ་ལ་ནི་མ་ཡིན་ནོ། །ཁམས་གསུམ་པར་གྱུར་པའི་མི་དང་ལྷ་ལ་སོགས་པའི་མཛེས་མ་རྣམས་ལ་ཟག་པ་དང་བཅས་པའི་མངོན་པར་ཞེན་པ་མྱོང་བའི་མཚན་ཉིད་འདོད་ཆགས་བྱང་བར་བྱེད་པ་དེ་དག་འདུལ་བ་ལ་སོགས་པར་བཀག་གི། ཡང་
ཁམས་གསུམ་པ་ལས་འདས་པའི་ལུས་ཅན་རྣམ་པར་རིག་པ་ཙམ་དུ་ངོ་བོ་གཅིག་པའི་འཇམ་པའི་རྡོ་རྗེ་ལ་སོགས་པ་རང་སྣང་བའི་ངོ་བོ་རྣམས་ནི་མ་ཡིན་ནོ། །གཞན་དུ་ན་རྨི་ལམ་དུ་ཉེ་བར་དམིགས་པ་དང་། རྟོག་པའི་ཡུལ་གྱི་རང་བཞིན་གྱི་ངོ་བོ་རྣམས་ལ་ཡང་སྡོམ་པ་ཉམས་པར་འགྱུར་རོ། །ཅི་སྟེ་དེ་དག་ལ་

44-1-189b

ཡང་བདག་གིས་ལེགས་པར་བྱས་སོ། །བདག་གིས་རབ་ཏུ་གྱུར་ཏོ་ཞེས་རབ་ཏུ་རྗེས་སུ་ཡི་རང་བར་བྱེད་པ་ཉོན་མོངས་པ་ཅན་གྱི་སེམས་ལ་ནི་ལྟུང་བར་གྱུར་པ་ཉིད་དོ་ཞེ་ན། ལྟུང་བ་ཙམ་དུ་གྱུར་པ་ནི་བདེན་ན་ཡང་སྡོམ་པ་ཉམས་པ་ནི་མ་ཡིན་ནོ། །གལ་ཏེ་དེ་ལ་སྨོད་པའི་སེམས་སུ་བྱེད་ན་དེའི་ཚེ་ནི་
ལྟུང་བ་ཙམ་དུ་ཡང་མི་འགྱུར་རོ། །དེ་ཡང་། སྡིག་པ་ཤིན་ཏུ་མི་བཟད་བྱས་ན་ཡང་། །བདག་ཉིད་སྨོད་པར་བྱེད་པ་ཡང་བར་འགྱུར། །ཞེས་གསུངས་སོ། །དེ་ལྟར་ན་ཇི་ལྟར་རྨི་ལམ་ན་ཉེ་བར་མ་དམིགས་པ་ཀུན་བརྟགས་པའི་བུད་མེད་རྣམས་མོས་པ་ཉིད་འཇུག་པའི་ཚོར་བ་སྲེད་པ་ལ་ཡང་སྡོམ་པ་
ཉམས་པ་མེད་ལ་སྨོད་པ་ནི་ལྟུང་བ་ཙམ་དུ་ཡང་མི་འགྱུར་བ་དེ་བཞིན་དུ་ཁམས་གསུམ་པ་ལས་འདས་པའི་འཇམ་པའི་རྡོ་རྗེ་ལ་སོགས་པའི་རང་གི་ངོ་བོ་ཤེས་རབ་སེམས་ཙམ་གྱི་རང་གི་ངོ་བོ་རྣམས་ལ་ཡོངས་སུ་དག་པ་མངོན་པར་མ་ཞེན་པའི་མཚན་ཉིད་འདོད་ཆགས་ཆེན་པོ་མངོན་དུ་བྱེད་པ་དེ་མི་
དམིགས་པ་སྟོང་པ་ཉིད་བསྒོམས་པས་སྨོད་པ་ཉིད་ལ་དགེ་སློང་གི་དངོས་པོ་ཉམས་པ་མེད་ཅིང་ལྟུང་བ་ཙམ་དུ་ཡང་མི་འགྱུར་རོ་ཞེས་འདོད་པར་བྱའོ། །འོ་ན་སེམས་ཙམ་དུ་ངོ་བོ་གཅིག་པའི་འཇམ་པའི་རྡོ་རྗེ་ལ་སོགས་པའི་རང་གི་ངོ་བོ་ཤེས་རབ་ལ་རིགས་པ་འདི་ཡོད་ན་ཕྱི་རོལ་གྱི་ལས་ཀྱི་ཕྱག་རྒྱ་
འདུལ་བར་བཀག་པ་ལ་རིགས་པ་འདི་ཇི་ལྟར་ཡིན་ཞེ་ན་བརྗོད་པར་བྱ་སྟེ། ཅི་འདིར་ཁྱེད་ཀྱིས་གཟུགས་ལ་སོགས་པ་རང་གི་སེམས་སྣང་བ་ཙམ་དུ་ལུས་གཅིག་པ་ཉིད་ཀྱི་གྲགས་པ་ཙམ་ཡང་མ་ཐོས་སམ་གང་གིས་ནི་རྗོད་བྱེད་དེ་དེ་བཞིན་ནོ། །དེ་ལྟར་ནི་ཁྱེད་འདྲ་བ་ལ་ནི་རྣམ་པར་རིག་པ་ཙམ་གྱི་ངོ་བོ་
དེ་ཁོ་ན་གོ་བར་བྱེད་པའམ་བརྫུན་པའི་ངོ་བོར་སྣང་བ་ཙམ་ཉིད་ཀྱི་གོ་བར་བྱེད་པ་དག་གིས་གསང་སྔགས་ཀྱི་ཚུལ་ལ་དབང་ཡོད་པ་མ་ཡིན་ནོ། །གཟུགས་ལ་སོགས་པའི་དངོས་པོ་ཐམས་ཅད་ཀྱི་སེམས་སྣང་བ་ཙམ་དུ་གོ་བ་ལ་རང་གི་བུད་མེད་དུ་སྣང་བ་དང་ཐ་མི་དད་པར་འཇམ་པའི་རྡོ་རྗེ་ལ་སོགས་པ་
རང་སྣང་བའི་ངོ་བོར་ཡོངས་སུ་གྱུར་པའི་ལས་ཀྱི་ཕྱག་རྒྱ་སྒྱུ་མ་ལྟ་བུ་དེས་རྣམ་པར་སྦྱངས་པ་ལ་དབང་བསྐུར་བ་ཁ་ན་མ་ཐོབ་མེད་པ་ཐོབ་པ་ལ་ཡང་དགེ་སློང་རྣམས་ཀྱི་སྡོམ་པ་ཞིག་པའི་ཉེས་པར་མི་འགྱུར་རོ། །དེ་དག་ནི་བཞི་པའི་དབང་གི་ཆོ་གའོ། །དབང་བསྐུར་མདོར་བསྡུས་བརྗོད་པ་ལས་ནི་

44-1-190a

བདག་ལས་སྐྱེས་པ་ཡི། །དུང་ཟླ་ཀུནྡ་ཀུ་མུ་ད་དང་ཆུ་སྐྱེས་འོད་མཚུངས་པའི། །བསོད་ནམས་གང་ཡིན་མཁའ་དང་མཚུངས་པ་དེས་ནི་འགྲོ་བའི་ཚོགས། །ཤེས་རབ་པདྨ་ལས་བྱུང་རྡོ་རྗེ་འཆང་གི་རང་བཞིན་ཤོག །གསང་བ་འདུས་པའི་དབང་བསྐུར་བའི་ཆོ་ག་མདོར་
བསྡུས་པ་རྫོགས་སོ།།      །།འདི་ནི་པཎྜི་ཏ་ངག་གི་དབང་ཕྱུག་གྲགས་པས་མཛད་པ། བལ་པོའི་པཎྜི་ཏ་སུ་མ་ཏི་ཀཱིརྟིའི་ཞལ་སྔ་ནས་དང་། བོད་ཀྱི་ལོ་ཙཱ་བ་ཀློག་སྐྱ་གཞོན་ནུ་འབར་གྱི་ཞལ་སྔ་ནས་དང་། མར་པ་ཆོས་ཀྱི་དབང་ཕྱུག་གིས་བསྒྱུར་ཅིང་ཞུས་པའོ།།      །།
༄༅༅། །རྒྱ་གར་སྐད་དུ། སཔྟ་ཨངྒ་། བོད་སྐད་དུ། ཡན་ལག་བདུན་པ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ལུས་ཅན་གཡོ་བ་མི་མངའ་སྐུ་ནི་བདེ་བས་ཀུན་ནས་གང་། །ནམ་མཁའ་དང་མཚུངས་ཤིན་ཏུ་ཁྱད་པར་འཕགས་པའི་སྙིང་རྗེར་ལྡན། །རྒྱུན་མི་
འཆད་པའི་སྐུ་སྟེ་ཀུན་ནས་ཆད་པས་རྣམ་པར་སྟོང་། །ཡན་ལག་བདུན་ལྡན་ཐུབ་པའི་དབང་པོ་དེ་ལ་རབ་ཏུ་འདུད། །འཇིག་རྟེན་དབང་ཕྱུག་ཕྱག་བྱས་ནས། །ཕྱག་རྒྱ་ཆེན་པོར་རབ་རྟོགས་ཕྱིར། །དཔེ་ཆུང་རིམ་པས་ཡན་ལག་བདུན། །བཞི་པའི་དོན་དག་རྣམ་དབྱེ་བྱ། །ལོངས་སྤྱོད་རྫོགས་
དང་ཁ་སྦྱར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་ཆད་པ་འགོག་པ་མེད། །ཡན་ལག་བདུན་ལྡན་དོན་དང་ལྡན་པ་བསྒྲུབ་བྱ་འདིར། །བདག་འདོད་ཚད་མས་ཡོངས་བསྒོམས་བློ་ཅན་གྱིས་ཀྱང་བསྔགས། །དེ་ལྟར་སྒྲ་དང་ལྡན་ཉིད་ཕྱིར། །ཡང་གི་སྒྲ་དོན་ལྡན་ཕྱིར་དང་། །དེ་
བཞིན་སྒྲ་དོན་སྐྱེས་ཉིད་ཕྱིར། །བཞི་པ་དེ་བཞིན་ཉིད་བདག་འདོད། །ཅེས་བྱ་བའི་ཚིགས་བཅད་གཉིས་ནི་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་སྟོན་པར་བྱེད་པ་སྟེ། ཕྱག་རྒྱ་ཆེན་པོར་ཁོ་ན་དབང་བསྐུར་བ་བཞི་པ་ཡིན་ནོ། །དེ་ལ། འཇིག་རྟེན་དབང་ཕྱུག་ཕྱག་བྱས་ནས། །ཞེས་བྱ་བ་ནི་
བཅོམ་ལྡན་འདས་འཇིག་རྟེན་དབང་ཕྱུག་ལ་ཕྱག་འཚལ་བའོ། །ཕྱག་རྒྱ་ཆེན་པོར་རབ་རྟོགས་ཕྱིར། །ཞེས་བྱ་བ་ནི་ཕྱག་རྒྱ་ཆེན་པོའི་རང་བཞིན་དུ་དབང་བསྐུར་བཞི་པ་ཁོང་དུ་ཆུད་པར་བྱ་བའི་དོན་ཏོ། །དཔེ་ཆུང་རིམ་པས་ཞེས་བྱ་བ་ནི་ཚད་ཆུང་བའི་གཟུགས་ལ་དཔེ་ཆུང་ཞེས་བྱ་སྟེ། མཐོ་གང་གི་ཚད་དམ།

44-1-190b

ཁྲུ་གང་གི་ཚད་ཀྱི་དཔེ་ཆུང་བའོ། །དེ་ལ་རིམ་པས་ཞེས་བྱ་བ་ནི་བྲི་བའི་རིམ་པ་སྟེ། མཐར་གྱིས་ཞེས་བྱ་བའི་བར་དུའོ། །ཡན་ལག་བདུན་གྱིས་ཞེས་བྱ་བ་ནི་བཞི་པའི་དོན་ཉིད་ཡན་ལག་བདུན་གྱིས་མཚོན་པར་བྱེད་པའོ། །ཡང་དག་པར་རྣམ་པར་དབྱེ་བ་ནི་བྱེ་བྲག་གིས་ཁོང་དུ་ཆུད་པར་བྱའོ། །དེ་
ལ་རི་མོ་མཁན་མཁས་པས་དཔེ་ཆུང་བྱ་བ་ཡིན་པས་དང་པོ་འོག་ལོགས་སུ་དབང་བསྐུར་དྲུག་པོ་སྟོན་པར་བྱེད་པའི་བུམ་པ་ཁ་དོག་སེར་པོ་བྲི་བར་བྱའོ། །དེའི་སྟེང་དུ་གསང་བའི་དབང་བསྐུར་སྟོན་པར་བྱེད་པའི་རྡོ་རྗེ་ཁ་དོག་དམར་པོ་བྲི་བར་བྱའོ། །དེའི་སྟེང་དུ་ཤེས་རབ་ཡེ་ཤེས་ཀྱི་དབང་
བསྐུར་སྟོན་པར་བྱེད་པའི་ཆོས་འབྱུང་སྐྱ་རེངས་དཀར་པོའི་མདོག་ཅན་བྲི་བར་བྱའོ། །ཆོས་འབྱུང་གི་སྟེང་དུ་སྡོང་བུ་བདུན་དང་ལྡན་པའི་པདྨའི་གདན། དེ་དག་ལ་ཡང་བཞི་པ་སྣང་བ་ཉིད་ལས། ཉིད་མཚུངས་ལྷ་མོས་འཁྱུད་དང་ཞེས་བྱ་བ་ལ་སོགས་ཚིགས་སུ་བཅད་པ་བདུན་སྨོས་ལ། རྣམ་པ་
བདུན་བྲི་བར་བྱ་སྟེ། དེ་ལ་དང་པོའི་པདྨ་ལ་སྐུ་རྡོ་རྗེ་ལ་སོགས་པ་འདོད་པའི་དབང་གིས་ཉིད་དང་མཚུངས་པའི་ལྷ་མོས་འཁྱུད་པ་ཁ་དོག་དཀར་པོ་ལ་སོགས་པ་གསང་བ་འདུས་པའི་རིམ་པ་ལྟར་བྲི་བར་བྱའོ། །པདྨ་གཉིས་པ་ལ་བདེ་བ་ཆེན་པོའི་ཡེ་ཤེས་རིན་པོ་ཆེ་པདྨ་རཱ་གའི་རྩེ་མོ་ལྟ་བུ་དང་། པདྨ་
གསུམ་པའི་པདྨ་ཅིག་ཤོས་ཀྱི་སྟེང་དུ་བདེ་བ་ཆེན་པོ་ཉིད་པདྨ་རཱ་གའི་རྩེ་མོ་ལྟ་བུ་དང་། པདྨ་བཞི་པའི་སྟེང་དུ་གསུང་རྡོ་རྗེ་ལ་སོགས་པ་ཁ་དོག་དམར་པོ་ལ་སོགས་པ་འདོད་པས་བྲི་བར་བྱའོ། །པདྨ་ལྔ་པའི་པདྨ་གཉིས་པའི་སྟེང་དུ་བཏང་སྙོམས་ཀྱི་ཡེ་ཤེས་ཁ་དོག་དམར་པོ་དང་པདྨ་དྲུག་
པ་ལ་ཐུགས་རྡོ་རྗེ་ལ་སོགས་པ་ཁ་དོག་ནག་པོ་ལ་སོགས་པ་དང་། པདྨ་བདུན་པའི་པདྨ་གཉིས་པའི་སྟེང་དུ་འགག་པ་སྟོན་པར་བྱེད་པའི་ཐིག་ལེ་ཁ་དོག་ནག་པོ་བྲི་བར་བྱའོ། །སྟེང་གི་ཕྱོགས་སུ་དཀར་བྱང་ལ་ཚིགས་བཅད་གཉིས་པ་ལོངས་སྤྱོད་རྫོགས་དང་ཞེས་བྱ་བ་ལ་སོགས་པའི་
ཚིགས་སུ་བཅད་པ་གཉིས་བྲི་བར་བྱའོ། །སློབ་དཔོན་མཁས་པ་ངག་གི་དབང་ཕྱུག་གྲགས་པའི་བཞེད་གཞུང་ཡན་ལག་བདུན་དང་ལྡན་པའི་བསྒྲུབ་པར་བྱ་བ་བཞི་པ་ལས་དཔེ་ཆུང་བྲི་བའི་རིམ་པ་སྟེ་ལེའུ་དང་པོའོ།།      །།ད་ནི་ཡན་ལག་བདུན་སོ་སོར་བཤད་པ་ཡིན་པས། ལོངས་

44-1-191a

སྤྱོད་རྫོགས་དང་ཞེས་བྱ་བ་ལ་སོགས་པ་སྨོས་ཏེ། ལོངས་སྤྱོད་རྫོགས་པའི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་རྣམ་པར་སྤྲས་པའི་རང་བཞིན་གྱི་སྐུའོ། །ལོངས་སྤྱོད་རྫོགས་པའི་སྐུ་སྨོས་པས་ཆོས་ཀྱི་སྐུ་དང་སྤྲུལ་པའི་སྐུ་ཡང་
བཟུང་བ་ཡིན་ཏེ། སྐུ་གསུམ་ལ་ཐ་དད་པ་ཉིད་མི་མངའ་བའི་ཕྱིར་རོ། །ཆོས་ཀྱི་སྐུ་ནི་རྣམ་པ་གཉིས་ཏེ། དྲན་པ་ཉེ་བར་གཞག་པ་ལ་སོགས་པ་ནས་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་སོགས་པ་དང་དེ་བཞིན་ཉིད་ཀྱི་མཚན་ཉིད་དོ། །སྤྲུལ་པའི་སྐུ་ཡང་རྣམ་པ་གཉིས་ཏེ། ལོངས་སྤྱོད་རྫོགས་
པའི་སྐུ་ཉིད་གདུལ་བྱའི་དབང་གིས་ཚངས་པ་དང་དྲག་པོ་ལ་སོགས་པ་རྣམ་པ་སྣ་ཚོགས་སུ་སྣང་བའི་མཚན་ཉིད་དང་། ལོངས་སྤྱོད་རྫོགས་པའི་སྐུ་ལས་སྤྲོས་པའི་སངས་རྒྱས་དང་བྱང་ཆུབ་སེམས་དཔའ་ལ་སོགས་པ་སྣ་ཚོགས་པ་འབྱུང་བ་ནི་སྤྲུལ་པའི་མཚན་ཉིད་དོ། །དེ་ལྟར་ཡན་ལག་དང་པོ་བཤད་
ནས་གཉིས་པ་ཁ་སྦྱར་ཞེས་བྱ་བ་ལ་སོགས་པ་སྨོས་ཏེ། ཁ་སྦྱར་གྱི་སྒྲས་ནི་ཉིད་དང་མཚུངས་པའི་ལྷ་མོ་དང་སྙོམས་པར་ཞུགས་པ་ཡིན་ཏེ། ཁ་སྦྱར་སྤངས་པའི་ལོངས་སྤྱོད་རྫོགས་པའི་སྐུ་ཙམ་ཞིག་ཉེ་བར་བཟུང་ན་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལས་གསུངས་པའི་ལོངས་སྤྱོད་རྫོགས་པའི་སྐུ་དང་
མཚུངས་པར་འགྱུར་བས་དེ་རྣམ་པར་སྤྱོད་པའི་དོན་དུ་ཁ་སྦྱར་སྨོས་པ་ཡིན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལས། དབང་པོ་གཉིས་ཀྱི་སྦྱོར་བ་ཡིས། །དངོས་པོ་ཐམས་ཅད་རྣམ་པར་སྒོམ། །ཞེས་བྱ་བའི་གཞུང་མེད་ལ། དཔལ་གསང་བ་འདུས་པ་ལ་ནི་ཡོད་པའི་ཕྱིར་རོ། །དཔལ་གསང་
བ་འདུས་པ་ལ་ཡང་ཁ་སྦྱོར་གྱི་སྤྱི་དགོས་མ་ཡིན་ནམ། ལུས་ཐམས་ཅད་ལ་ཁྱབ་པར་བྱེད་པ་དགའ་བའི་ངོ་བོ་ཙམ་གྱིས་སེམས་ཅན་གྱི་དོན་ཐམས་ཅད་གྲུབ་པའི་ཕྱིར་རོ་ཞེ་ན། དེ་ལྟ་ནི་མ་ཡིན་ཏེ། འདོད་ཁམས་ཀྱི་སེམས་ཅན་ལྷག་པར་ཆགས་པས་སྤྱོད་པ་རྣམས་རྗེས་སུ་གཟུང་བར་བྱ་བའི་
ཕྱིར་བཅོམ་ལྡན་འདས་ཀྱིས་འདུས་པའི་སྙོམས་པར་འཇུག་པ་བསྟན་པར་མཛད་པ་ཡིན་ཏེ། དབང་པོ་གཉིས་ཀྱི་སྦྱོར་བས་ཀྱང་ཆགས་པའི་བདེ་བ་ཆེན་པོ་རྣམ་པར་དག་པ་ལ་རྒྱ་ཆེར་ལོངས་སྤྱད་པའི་སྒོ་ནས་སངས་རྒྱས་ཉིད་བསྒྲུབ་པར་བྱ་བའི་དོན་ཏོ། །ཁ་སྦྱོར་ཡོད་ན་ཡང་སྒྱུ་མ་མཁན་གྱི་སྤྲུལ་

44-1-191b

པའི་སྐྱེས་པ་དང་བུད་མེད་ཀྱི་ཁ་སྦྱོར་ལས་བདེ་བ་ཆེན་པོར་མི་འགྱུར་ལ། འདི་ལ་ནི་ཡོད་པའི་ཕྱིར་བདེ་ཆེན་ཞེས་བྱ་བས་ཡན་ལག་གསུམ་པ་སྨོས་ཏེ། དེ་ལ་ལུས་ཀྱི་བདེ་བ་ཉམས་སུ་མྱོང་བ་ལ་ནི་བདེ་བ་ཞེས་བྱ་ཞིང་། སེམས་ལས་བྱུང་བའི་བདེ་བ་ཉམས་སུ་མྱོང་བ་ལ་ནི་ཡིད་བདེ་བ་ཞེས་བྱ་སྟེ། བདེ་
བ་དེ་ཡང་གྲོག་སྦུར་ལ་སོགས་པ་སེམས་ཅན་གྱི་ཚོགས་མ་ལུས་པ་ཤིན་ཏུ་འདོད་པར་བྱ་བ་ཡིན་ནོ། །ཆེན་པོ་ཞེས་བྱ་བ་ནི། ཤིན་ཏུ་རྒྱ་ཆེ་བ་ཉིད་དང་། ཟག་པ་མེད་པ་ཉིད་དང་། གྱ་ནོམ་པ་ཉིད་དང་། འཁོར་བ་ཇི་སྲིད་པར་གནས་པ་ཉིད་ལ་སོགས་པའི་བྱེ་བྲག་དང་ལྡན་པས་ཆེ་བ་ཉིད་ཡིན་
པའི་ཕྱིར་བདེ་བ་ཆེན་པོ་ཞེས་བྱའོ། །ཕྱག་རྒྱ་ཆེན་པོའི་རང་བཞིན་སངས་རྒྱས་ཉིད་ཀྱང་རང་བཞིན་མེད་པར་བསྒྲུབ་པར་བྱ་བ་ཡིན་པས་ཡན་ལག་བཞི་པ་སྨོས་ཏེ། རང་བཞིན་མེད་པ་ཞེས་བྱ་བ་ནི་རང་བཞིན་གང་ལ་མེད་ཅིང་རང་བཞིན་གང་ལ་སྤངས་པ་དེ་ཉིད་རང་བཞིན་མེད་པ་སྟེ། 
གཅིག་དང་དུ་མ་ལ་སོགས་པའི་རང་བཞིན་གྱིས་སྟོང་ཞིང་བརྫུན་པ་ཡིན་ཏེ། དྲི་ཟའི་གྲོང་ཁྱེར་དང་ཆུ་ཟླ་ལྟ་བུའོ། །དེ་སྐད་དུ་བཅོམ་ལྡན་འདས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་ལས། སངས་རྒྱས་ཀྱང་རྨི་ལམ་ལྟ་བུ་སྒྱུ་མ་ལྟ་བུའོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པ་ནི། 
སྒྱུ་མ་ལྟ་བུ་དང་ཐ་མི་དད་པའི་ཕྱིར་རོ་ཞེས་འབྱུང་ངོ་། །མྱ་ངན་ལས་འདས་པ་ཡང་སྒྱུ་མ་ལྟ་བུ་རྨི་ལམ་ལྟ་བུའོ། །མྱ་ངན་ལས་འདས་པ་ལས་ཁྱད་པར་དུ་འཕགས་པའི་ཆོས་གཞན་ཞིག་ཡོད་ན་ཡང་དེ་ཡང་རྨི་ལམ་ལྟ་བུ་སྒྱུ་མ་ལྟ་བུའོ་ཞེས་སྨྲའོ་ཞེས་གསུངས་སོ། །རང་བཞིན་མེད་པ་ཞེས་བྱ་བ་འདི་ཅི་
ཞིག་ཡིན། ཇི་སྐད་དུ་བཤད་པའི་སངས་རྒྱས་ཉིད་བསྒྲུབ་པར་བྱ་བ་ཡིན་ནོ་ཞེ་ན། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཁོ་ན་རང་བཞིན་མེད་པ་ཉིད་ཡིན་ལ། དེ་ཉིད་དེ་བཞིན་ཉིད་དང་། ཡང་དག་པའི་མཐའ་དང་། ཆོས་བདག་མེད་པ་ཉིད་དང་། ཆོས་ཟབ་པ་ཉིད་དང་། ཆོས་
མཉམ་པ་ཉིད་དང་། ཆོས་ངེས་པ་ཉིད་དང་།ཆོས་དེ་ཁོ་ན་ཉིད་དང་། ཆོས་ཉིད་དང་། དོན་དམ་པ་དང་། བླ་ན་མེད་པའི་བྱང་ཆུབ་དང་གཉིས་སུ་མེད་པའི་ཡེ་ཤེས་ཞེས་བྱ་བ་ལ་སོགས་པའི་སྒྲ་དེ་དང་དེ་དག་གིས་བརྗོད་པར་བྱ་བ་ཡིན་ནོ། །དེ་ལ་འདིར་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་

44-1-192a

ཉིད་གང་ཞེ་ན། སྨྲས་པ་འདི་ལྟར་བཅོམ་ལྡན་འདས་ཀྱིས་གཙུག་ན་རིན་པོ་ཆེ་ལ་སོགས་པ་ཐེག་པ་ཆེན་པོའི་མདོ་སྡེ་རྣམས་ལས། སྦྱིན་པའི་ཕ་རོལ་ཏུ་ཕྱིན་པ་དང་བྲལ་བས་མ་ཡིན། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་བྲལ་བས་མ་ཡིན། ཤེས་ར་བ་ཀྱི་ཕ་རོལ་ཏུ་ཕྱིན་པའི་
བར་དང་བྲལ་བས་མ་ཡིན། ལོངས་སྤྱོད་རྫོགས་པའི་སྐུ་ལ་སོགས་པའི་བར་དང་བྲལ་བས་མ་ཡིན། དྲན་པ་ཉེ་བར་གཞག་པ་ལ་སོགས་པའི་སངས་རྒྱས་ཀྱི་ཆོས་ཐམས་ཅད་ཀྱི་བར་དང་བྲལ་བས་མ་ཡིན་ཞེས་བྱ་བ་འདི་ནི་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཅེས་བྱའོ་ཞེས་
གསུངས་སོ། །ངེས་པའི་ཚིག་ནི་ཐམས་ཅད་ཀྱང་དེ་ཡིན་ལ། བུམ་པ་དང་། སྣམ་བུ་དང་། ཤིང་རྟ་ལ་སོགས་པས་གསུམ་དུ་གཏོགས་པའི་རྣམ་པ་ཡང་ཡིན་པས་རྣམ་པ་ཐམས་ཅད་དོ། །དེ་དག་གི་ནང་ནས་གང་ཁྱད་པར་དུ་འཕགས་པ་ལོངས་སྤྱོད་རྫོགས་པའི་སྐུ་ལ་སོགས་པའི་ངོ་བོ་དང་། སྦྱིན་
པའི་ཕ་རོལ་ཏུ་ཕྱིན་པ་ལ་སོགས་པ་ནི་མཆོག་སྟེ་དེ་དང་ལྡན་ཞིང་འབྱོར་པ་དེ་ནི་བདག་ཉིད་ཀྱིས་གནས་པའི་སྟོང་པ་ཉིད་གང་ཡིན་པ་དེ་ནི་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཡིན་གྱི། ནམ་མཁའི་མེ་ཏོག་གམ་རི་བོང་གི་རྭ་ལ་སོགས་པའི་སྟོང་པ་ཉིད་མ་ཡིན་ཏེ། དེ་ནི་མེད་པའི་ངོ་བོ་ཉིད་
ཡིན་པའི་ཕྱིར་བཅོམ་ལྡན་འདས་ཀྱིས་མངོན་སུམ་དུ་བྱས་པར་མི་རུང་བར་སུན་ཕྱུང་བ་ཉིད་ཀྱི་ཕྱིར་རོ། །འོན་ཀྱང་གལ་ཏེ་རྣམ་པ་ཐམས་ཅད་ཀྱི་མཆོག་དང་ལྡན་པ་སྟོང་པ་ཉིད་ལ་ཡང་འདི་ཉིད་དེ་ཁོ་ན་ཉིད་དང་། སྙིང་པོ་ལ་སོགས་པའི་རྣམ་པར་མངོན་པར་ཞེན་པར་འགྱུར་ན་དེའི་ཚེ་དེ་ཡང་ལྟ་བ་དམན་
པས་དམྱལ་བར་འགྲོ་བའི་རྒྱུར་འགྱུར་རོ། །དེ་སྐད་དུ་བཅོམ་ལྡན་འདས་ཀྱིས། སྟོང་ཉིད་ལྟ་བ་ཐམས་ཅད་ལས། །འབྱུང་བར་འགྱུར་བ་རྣམས་ཀྱིས་གསུངས། །གང་གི་སྟོང་པ་ཉིད་ལྟ་བ། །དེ་ནི་སྒྲུབ་ཏུ་མི་རུང་ངོ་། །སྟོང་པ་ཉིད་ལ་ལྟ་ཉེས་ན། །ཤེས་རབ་ཆུང་ལྡན་ཕུང་བར་འགྱུར། །
ཇི་ལྟར་སྦྲུལ་ལ་བཟུང་ཉེས་དང་། །རིག་སྔགས་ཉེས་པར་བསྒྲུབས་པ་བཞིན། །ཞེས་གསུངས་སོ། །ཅི་རབ་ཏུ་གྲགས་པའི་འཇིག་རྟེན་རྣམས་ཀྱིས་ཁྱད་པར་མེད་པའི་སྟོང་པ་ཉིད་དེ། སངས་རྒྱས་ལ་སོགས་པའི་དངོས་པོ་རྣམས་ལས་ཐ་དད་པ་ཞིག་གམ། ཐ་མི་དད་པ་ཞིག་ཏུ་འགྱུར་གྲང་

44-1-192b

ན། གལ་ཏེ་ཐ་དད་པ་ཡིན་པ་དེའི་ཚེ་སངས་རྒྱས་ལ་སོགས་པའི་དངོས་པོ་རྣམས་སྟོང་པ་ཉིད་དུ་མི་འགྱུར་ཏེ། དངོས་པོ་ལས་ཐ་དད་པའི་སྟོང་པ་ཉིད་ཀྱི་དངོས་པོའི་དོན་རང་བཞིན་དང་བཅས་པའི་ངོ་བོ་ཉིད་ཀྱིས་སྟོང་པ་མ་ཡིན་པ་ཐམས་ཅད་སྟོང་པར་བྱེད་པར་མི་ནུས་པའི་ཕྱིར་རོ། །དེ་ལྟར་
ཡང་། དེ་ལ་ཡང་དག་ཡང་དག་མིན། །ངོ་བོ་ཉིད་ཀྱིས་གང་གནས་པ། །རང་བཞིན་གྱིས་ནི་གསོ་བྱ་མིན། །དེ་ཅི་གཞན་དུ་བསྒྱུར་ནུས་སམ། །ཞེས་གསུངས་སོ། །ཅི་སྟེ་ཐ་དད་པའི་སྟོང་པ་ཉིད་བསྒོམ་པའི་རིགས་པས་དངོས་པོ་ཐམས་ཅད་སྟོང་པར་བྱེད་ཅིང་ཉམས་པར་བྱེད་དོ་ཞེ་ན།
གལ་ཏེ་དེ་ལྟར་གྱུར་ན་དེའི་ཚེ་འདས་པའི་སངས་རྒྱས་ལ་སོགས་པ་རྣམས་ཀྱིས་སྟོང་པ་ཉིད་བསྒོམ་པའི་རིགས་པ་མངོན་སུམ་དུ་མཛད་པ་དེའི་གནས་སྐབས་དེ་ཉིད་དུ་ཁམས་གསུམ་པའི་དངོས་པོ་རྣམས་མི་སྣང་བར་འགྱུར་གྱི་ཁྱད་པར་དུ་འཕགས་པའི་ངོ་བོ་ཉིད་སྣང་བ་ནི་མ་ཡིན་པར་འགྱུར་ན་ཇི་ལྟར་ཐ་
དད་པའི་སྟོང་པ་ཉིད་བསྒོམ་པའི་རིགས་པས་དེ་དག་སྟོང་པར་བྱེད་ཅིང་འཇིག་པའི་མཚན་ཉིད་དུ་ན། དེ་སྐད་དུ།འཇིག་རྟེན་སྣ་ཚོགས་གང་འདི་སྤང་བྱ་མིན། །སྐྱེས་བུ་ཀུན་རྟོག་ཆགས་པའང་སྤང་བྱ་སྟེ། །འཇིག་རྟེན་སྣ་ཚོགས་དེ་ལྟ་ཉིད་དུ་གནས། །དེ་ཕྱིར་མཁས་པས་སྤང་བྱ་འདི་སྤོང་བྱེད། །
ཅེས་གསུངས་སོ། །འོན་ཀྱང་སྟོང་པར་བྱེད་པ་ནི་བུམ་པ་འཇིག་པར་བྱེད་པའི་ཐོ་བ་ལྟར་དངོས་པོ་ཉིད་ཡིན་ལ་ཐ་དད་པའི་སྟོང་པ་ཉིད་ནམ་མཁར་གྱུར་པས་ནི་སྟོང་པར་བྱེད་པར་ཡང་མི་ནུས་ཏེ། ནམ་མཁའ་གཟུགས་ཅན་མ་ཡིན་པ་བསྒོམས་པས་ཀྱང་དངོས་པོ་རྣམས་འཇིག་པར་མ་མཐོང་ངོ་། །
ནམ་མཁའ་དང་དངོས་པོ་ཐམས་ཅད་འགལ་བ་ཡང་མེད་དེ་ལྷན་ཅིག་གནས་པར་མཐོང་བའི་ཕྱིར་རོ། །གལ་ཏེ་ཡང་ནམ་མཁའ་དངོས་པོ་རྣམས་འཇིག་པར་གྱུར་ན་དེའི་ཚེ་དངོས་པོ་འགའ་ཡང་སྣང་བར་མི་འགྱུར་ཏེ་འགལ་བའི་ཕྱིར་རོ། །ཇི་སྟེ་དངོས་པོ་ལས་སྟོང་པ་ཉིད་ཐ་མི་དད་པ་དེ་ལྟ་ན་ནི་
བདག་ཉིད་དང་སྟོང་པ་ཉིད་ཐ་མི་དད་པས་སྟོང་པ་ཉིད་ཡིན་པའི་ཕྱིར། གཞན་མ་ཡིན་པའི་དངོས་པོ་རྣམས་ཇི་ལྟ་ན་སྟོང་པ་ཉིད་དུ་བྱེད། དེ་སྐད་དུ། དངོས་ལས་སྟོང་ཉིད་གཞན་མ་ཡིན། །དེ་མ་གཏོགས་པར་དངོས་ཀྱང་མེད། །ཅེས་གསུངས་པ་དང་། གཞན་ཡང་གཟུགས་ལས་སྟོང་པ་

44-1-193a

ཉིད་གཞན་མ་ཡིན། སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ལ་སོགས་པའི་དངོས་པོ་ཐམས་ཅད་ལ་སྦྱར་རོ་ཞེས་གསུངས་སོ། །འོན་ཀྱང་དངོས་པོ་རྣམས་ལས་ཐ་དད་པའི་
དངོས་པོ་མེད་པའི་ངོ་བོ་ཉིད་སྟོང་པ་ཉིད་དུ་རྟོག་པ་རྣམས་ཀྱིས་སངས་རྒྱས་བཅོམ་ལྡན་འདས་ཉིད་ལ་སྐུར་བར་འགྱུར་ཏེ། སངས་རྒྱས་ཉིད་ཀྱི་ཐ་དད་པའི་དངོས་པོ་ཉིད་ཀྱིས་ཐ་དད་པ་བཟློག་པའི་ཕྱིར་ཆོས་ཐམས་ཅད་སྟོང་པ་ཆོས་ཐམས་ཅད་རང་བཞིན་མེད་པ་ཡིན་ནོ་ཞེས་བྱ་བ་ལ་སོགས་པའི་བཀས་
ཐ་མི་དད་པའི་སྟོང་པ་ཉིད་སྟོན་པའི་ཕྱིར་རོ། །དམ་པའི་ཆོས་ལ་ཡང་སྐུར་བར་འགྱུར་ཏེ། དེས་བསྟན་པའི་ཆོས་ཐམས་ཅད་རང་བཞིན་མེད་པ་ཉིད་དུ་རབ་ཏུ་སྟོན་པར་བྱེད་པ་ཉིད་ཀྱི་ཕྱིར་རོ། །དགེ་འདུན་ལ་ཡང་སྐུར་བར་འགྱུར་ཏེ། དགེ་འདུན་གྱི་ཆོས་ཐམས་ཅད་རང་བཞིན་མེད་པ་མངོན་སུམ་དུ་
མཛད་པའི་ཕྱིར་རོ། །དེ་བས་ན་དངོས་པོ་ཐམས་ཅད་སྟོང་པ་ཉིད་ཡིན་ལ། སྟོང་པ་ཉིད་ཁོ་ན་དངོས་པོ་ཡིན་ནོ། །སློབ་དཔོན་ཀླུ་སྒྲུབ་ཀྱི་ཞལ་སྔ་ནས་ཀྱིས་ཀྱང་། འགྲོ་ཀུན་རྒྱུ་དང་འབྲས་བུ་སྟེ། །འདི་ལས་སེམས་ཅན་གཞན་ཅིའང་མེད། །སྟོང་པ་ཁོ་ནའི་ཆོས་རྣམས་ལས། །སྟོང་
པའི་ཆོས་རྣམས་འབྱུང་བར་ཟད། །ཅེས་གསུངས་སོ། །ཅི་སྟེ་དངོས་པོ་ཐམས་ཅད་སྟོང་པའོ་ཞེས་བཤད་པས་ནི་དངོས་པོ་ཐམས་ཅད་མེད་པ་ཉིད་དོ་ཞེས་བསྟན་པར་འགྱུར་རོ་ཞེ་ན། དེ་སྐད་དུ་བསྟན་པ་མ་ཡིན་ཏེ། གང་གི་ཕྱིར་དངོས་པོ་ཐམས་ཅད་སྟོང་པ་དག་དང་། དངོས་པོ་ཐམས་ཅད་
མེད་པ་ཞེས་བྱ་བའི་ངག་འདི་ལ་སྟོང་པ་དང་མེད་པ་ཞེས་བྱ་བའི་སྒྲ་འདི་ནི་དོན་གཅིག་ཉིད་མ་ཡིན་ཏེ། འདི་ལྟར་གྲོང་ཁྱེར་འདི་ནི་མི་ཡོད་དམ་མེད་ཅེས་དྲིས་པ་ན་འགའ་ཞིག་ན་རེ་གྲོང་འདི་ན་མི་མེད་དོ་ཞེས་སྨྲ་སྟེ་མིས་སྟོང་པའི་ཁྱིམ་དང་། ཤིང་ལ་སོགས་པ་ཙམ་ཞིག་ཡིན་ནོ་ཞེས་པའི་དོན་ཏོ། །གཞན་
ཡང་ཅི་ནགས་ཀྱི་ཕྱོགས་འདི་ན་གྲོང་ཡོད་དམ་མེད་ཅེས་དྲིས་པས་ན་ནགས་ཀྱི་ཕྱོགས་འདི་ན་གྲོང་མེད་དོ་ཞེས་སྨྲ་སྟེ། མིས་སྟོང་པའི་གྲོང་ཁྱེར་ཙམ་ཡང་མེད་དོ་ཞེས་བྱ་བའི་ཐ་ཚིག་གོ། །དེ་བས་ན། དངོས་པོ་སྟོང་པ་ལས་མེད་དོ་ཞེས་བྱ་བའི་སྒྲའི་དོན་ཐ་དད་དེ། དོན་གཅིག་པ་ཉིད་མ་

44-1-193b

ཡིན་ནོ་ཟེར་ཏེ། བུམ་པ་སྟོང་པ་དང་། བུམ་པ་མེད་དོ་ཞེས་བྱ་བའི་སྒྲ་དང་འདྲ་སྟེ། བུམ་པ་སྟོང་པ་ཞེས་བྱ་བ་ནི་བུམ་པ་ན་ཆུ་ལ་སོགས་པ་མེད་པ་ཡིན་ལ། བུམ་པ་མེད་དོ་བྱ་བ་འདི་ནི་བུམ་པ་ཉིད་ཀྱང་མེད་དེ། ཆུ་ལ་སོགས་པས་སྟོང་པ་ཉིད་དུ་གཟུགས་ལ་འགྱུར། དེའི་ཕྱིར་རྟོག་པ་དང་ལྡན་པ་
རྣམས་སྒྲའི་དོན་ལ་རྨོངས་པར་མི་བྱའོ། །འཇིག་རྟེན་ཀུན་རྫོབ་བདེན་པ་དང་། །དམ་པའི་དོན་གྱི་བདེན་པ་སྟེ། །བདེན་གཉིས་ཡང་དག་བསྟེན་ནས་ནི། །སངས་རྒྱས་ཆོས་རྣམས་སྟོན་པར་མཛད། །ཅེས་བྱ་བའི་ཚིག་གི་དོན་དེ་དག་ཐམས་ཅད་ཀྱང་ཀུན་རྫོབ་ཀྱི་བདེན་པ་ལ་བརྟེན་ནས། ཡང་
དག་ཀུན་རྫོབ་རྣམས་ཀྱི་སྐས། །མེད་པར་ཡང་དག་ཁང་པ་ཡི། །སྟེང་དུ་འཛེག་པར་བྱ་བ་ནི། །མཁས་ལ་རུང་བ་མ་ཡིན་ནོ། །ཞེས་བྱ་བ་དང་། དོན་དམ་བདེན་པ་ལ་གནས་ནས། །སྟོང་པ་མ་ཡིན་མི་སྟོང་མིན། །སྟོང་དང་མི་སྟོང་གཉིས་ཀའང་མིན། །སྟོང་དང་མི་སྟོང་གྲོལ་མིན་པར། །
རྒྱལ་བ་རྣམས་ནི་སྟོན་པར་མཛད། །ཅེས་གསུངས་སོ། །འོན་ཀྱང་བདེན་པ་གཉིས་སྟོན་པའང་འཇིག་རྟེན་ལ་ཐུགས་བརྩེ་བས་ཀུན་རྫོབ་ཉིད་དུ་བཅོམ་ལྡན་འདས་ཀྱིས་ཀུན་རྫོབ་ལས་མ་གཏོགས་པ་དོན་དམ་པ་ཞེས་བྱ་བ་འགའ་ཞིག་ཀྱང་ཡོད་པ་མ་ཡིན་ཏེ། ཀུན་རྫོབ་བརྟག་ཅིང་དཔྱད་མི་བཟོད་
པ་ཁོ་ནའི་ངོ་བོ་ཉིད་དོན་དམ་པ་ཡིན་པས་དེ་ཡང་ཀུན་རྫོབ་ལས་ཐ་མི་དད་དོ། །དབྱེ་བ་ནི་རྣམ་པར་ཕྱེ་ན་གདུལ་བྱ་རྣམས་ཀྱིས་བདེ་བར་ཁོང་དུ་ཆུད་པར་བྱ་བའི་ཕྱིར་རྣམ་པར་བརྟགས་པ་ཡིན་ནོ། །འདིས་དངོས་པོ་རྣམས་ལས་ཐ་དད་པའི་སྟོང་པ་ཉིད་ཡོད་པ་མ་ཡིན་ནོ་ཞེས་རབ་ཏུ་བསྟན་པ་ཡིན་
ནོ། །ད་ནི་ཤིན་ཏུ་བློ་ཆུང་བ་ཁ་ཅིག་འདི་སྐད་སྨྲ་སྟེ། དངོས་པོ་མཐོང་བའི་ཚེའམ་རང་གི་འདོད་པའི་ལྷ་བསྒོམ་པའི་ཚེ་འགའ་ཞིག་གིས་འགའ་ཞིག་གི་མིག་མཐོང་བར་འགྱུར་བའམ། བསྒོམ་པས་ལྷ་བསྒོམ་པའི་དུས་དེའི་ཚེ་རྣ་བ་མཐོང་བས་བསྒོམ་པར་མི་ནུས་ཏེ། དེའི་ཚེ་དེ་དག་མེད་
པའི་ཕྱིར་དང་། རྣམ་པར་མི་རྟོག་པ་ཡིན་པའི་ཕྱིར་རོ། །དེ་བཞིན་དུ་གང་གི་ཚེ་རྣ་བ་ཡིན་པ་དེའི་ཚེ་སྣ་མ་ཡིན། གང་གི་ཚེ་སྣ་ཡིན་པ་དེའི་ཚེ་རྒྱབ་དང་། ལག་པ་དང་། རྐང་པ་དང་། རྒྱུ་མ་དང་། རྐང་དང་། མཁལ་མ་ལ་སོགས་པ་མངོན་པའམ། བསྒོམ་པ་ཉིད་དུ་མི་ནུས་པས་ཡོངས་

44-1-194a

སུ་མ་རྫོགས་པའི་བུད་མེད་མཐོང་བའམ། ཡོངས་སུ་མ་རྫོགས་པའི་ལྷ་ཉིད་བསྒོམས་པས་ཡོངས་སུ་རྫོགས་པའི་བུད་མེད་མཐོང་བར་མི་ནུས་ལ། ཡོངས་སུ་རྫོགས་པའི་ལྷ་ཉིད་བསྒོམ་པར་ཡང་མི་འགྱུར་བའི་ཕྱིར་ལྷ་ཉིད་བསྒོམས་པས་མངོན་སུམ་དུ་བྱེད་པར་མི་ནུས་སོ། །
དེ་བས་ན་ལྷ་ཉིད་བསྒོམས་པས་ཕྱག་རྒྱ་ཆེན་པོའི་དངོས་གྲུབ་རྣམ་པ་ཐམས་ཅད་མཁྱེན་པའི་ངོ་བོ་འགྲུབ་པར་ཡང་མི་འགྱུར་རོ། །འོ་ན་གང་གིས་འགྲུབ་པ་ཡིན་ཞེ་ན། སྟོང་པ་ཉིད་འབའ་ཞིག་བསྒོམས་པས་འགྲུབ་པར་བྱེད་དམ་བསྒོམ་པ་མ་གཏོགས་པས་འགྲུབ་པར་བྱེད། ཁ་ཅིག་འདི་སྐད་དུ་
ཡང་། བསྒོམ་བྱ་གཟུངས་དང་སྔགས་བརྗོད་པ་དག་མེད། །དེ་ཀུན་འཁྲུལ་བའི་ཡིད་ཀྱི་རྣམ་པ་ཡིན། །སེམས་ནི་རྟོག་བཅས་མ་ཡིན་བསམ་པ་ཡིས། །འཁྲུལ་བར་མ་བྱེད་གཡེང་མེད་བདག་བདེར་མནོས། །ཞེས་སྨྲ་སྟེ། ཐོས་པ་དང་བསམ་པ་ལ་སོགས་པ་ལ་ལྟོས་པ་མེད་པར་ལྷན་
ཅིག་སྐྱེས་པའི་རྣལ་འབྱོར་མ་རྣམས་ལ་འདས་པ་ལ་སོགས་པའི་ཤེས་པ་འགྲུབ་པ་དང་འགྲོ་སྙམ་དུ་སེམས་ན་དེ་ནི་སྙིང་པོ་མ་ཡིན་ཏེ། སྟོང་པ་ཉིད་འབའ་ཞིག་ནི་གོང་དུ་སྨོས་པའི་རིགས་པས་བསལ་བ་ཉིད་ཀྱི་ཕྱིར་རོ། །འོན་ཀྱང་ནམ་མཁའི་རང་བཞིན་དུ་གྱུར་པའི་སྟོང་པ་ཉིད་འབའ་ཞིག་གིས་ནི་
དགོས་པ་ཅུང་ཞིག་ཀྱང་བསྒྲུབ་པར་ནུས་པ་མ་ཡིན་ཏེ། ས་བོན་ལས་མྱུ་གུ་བཞིན་དུ་ནམ་མཁའ་ལས་འབྲས་བུ་འགྲུབ་པ་མ་མཐོང་སྟེ། ནམ་མཁའ་ནུས་པ་ཐམས་ཅད་དང་བྲལ་བའི་མཚན་ཉིད་ཅན་ཡིན་པའི་ཕྱིར་རོ། །བསྒོམ་པ་མ་གཏོགས་པས་ཀྱང་ཕྱག་རྒྱ་ཆེན་པོ་འགྲུབ་པར་ཡང་མི་
འགྱུར་ཏེ། རྒྱུ་མེད་པ་ཉིད་ཀྱིས་དེ་དག་ཐམས་ཅད་སངས་རྒྱས་ཉིད་དུ་ཐལ་བར་འགྱུར་བའི་ཕྱིར་རོ། །ལྷན་ཅིག་སྐྱེས་པའི་རྣལ་འབྱོར་མ་ཐམས་ཅད་ཀྱིས་འདས་པ་ལ་སོགས་པའི་ཤེས་པ་ཡང་སྐྱེ་བ་སྔོན་མར་གོམས་པ་བྱས་པ་ཡིན་གྱི་གཞན་དུ་ན་བུད་མེད་ཐམས་ཅད་ཁོ་ན་འདས་པ་ལ་སོགས་
པའི་ཤེས་པ་དང་ལྡན་པར་འགྱུར་རོ། །འོན་ཀྱང་གང་གི་ཚེ་འགྲོ་བ་རྣམས་ཤིན་ཏུ་མཛེས་མ་མགུ་བ་བསྐྱེད་པ་དང་ལྷན་ཅིག་དགའ་མགུར་རྩེ་བ་ཉམས་སུ་མྱོང་བའི་དུས་དེ་ན་གང་གི་ཚེ་ཁ་ལ་འོ་བྱས་པ་དེའི་ཚེ་ཡན་ལག་མཆོག་ལ་རེག་པ་མ་ཡིན་ཏེ་མི་ནུས་པ་ཉིད་ཀྱི་ཕྱིར་རོ། །གང་གི་ཚེ་ཡན་ལག་མཆོག་

44-1-194b

ལ་རེག་པར་གྱུར་པ་དེའི་ཚེ་ནུ་མ་གཉིས་ལ་རེག་པ་མ་ཡིན་ལ་དེ་བཞིན་དུ་ཡན་ལག་གཞན་དམིགས་པ་ལ་ཡང་བརྗོད་པར་བྱའོ། །མུན་པ་དག་ཏུ་དགའ་མའི་གཟུགས་དམིགས་པ་མེད་ན་ཡང་འཇིག་རྟེན་པ་འདི་སྐད་དུ། བདག་ཀྱང་མཚན་ཕྱེད་ན་གཟུགས་ལ་སོགས་པའི་ཡོན་ཏན་དང་ལྡན་
པའི་དགའ་མའི་ཡན་ལག་ཐམས་ཅད་ལ་ལོངས་སྤྱོད་པ་དང་ལྡན་ནོ་ཞེས་སྨྲའོ། །དེ་བཞིན་དུ་གང་གི་ཚེ་ཡིད་དུ་འོང་བའི་མིག་དང་། ཁ་ལ་སོགས་པ་མཐོང་བ་དེའི་ཚེ་རྒྱབ་ལ་སོགས་པ་མ་མཐོང་ཡང་འཇིག་རྟེན་ན་ཡང་དག་གིས་ཤིན་ཏུ་དགའ་མའི་རྣམ་པ་ཐམས་ཅད་མཐོང་ངོ་ཞེས་སྨྲའོ། །དེ་
བཞིན་དུ་གང་གི་ཚེ་ཁང་པ་བརྩིག་པ་ན་ཀ་བ་དང་པོ་བཙུགས་པའི་ཚེ་ཀ་བ་གཉིས་པ་དང་། གསུམ་པ་ལ་སོགས་པ་མེད་ཅིང་སྐད་ཅིག་མས་ཁང་པ་བརྩིགས་པ་མ་ཡིན་ཡང་འཇིག་རྟེན་པ་ཡང་དག་གིས་ཁང་པ་རྫོགས་པར་བྱས་པ་མཐོང་ངོ་ཞེས་སྨྲའོ། །དེ་བཞིན་དུ་བཟའ་བ་དང་བཅའ་བ་
ལ་སོགས་པ་བྱས་པ་ཡང་བརྗོད་པར་བྱའོ། །དེ་བས་ན་འདི་ལྟར་ཆུང་མ་ལ་སོགས་པ་ལ་ལོངས་སྤྱོད་པའི་ཚེ། ཡན་ལག་ཐམས་ཅད་ལ་ལོངས་སྤྱོད་པ་མེད་མོད་ཀྱི་འཇིག་རྟེན་ལ་ཡུལ་གྱི་བཟང་མོའི་ཡན་ལག་ཐམས་ཅད་ལ་མངོན་པར་ཞེན་པའི་སྒོ་ནས་བརྟེན་ཅིང་ཤིན་ཏུ་དགའ་བའི་བདེ་བ་
དམིགས་པའི་ཕྱིར། ཡང་དེ་དག་གི་སྐྱེས་བུའི་དོན་མཆོག་གི་ངོ་བོ་སྒྲུབ་པར་འགྱུར་བ་དེ་བཞིན་དུ། ལྷ་ཉིད་སྒོམ་པའི་དུས་ན་ལས་དང་པོ་པ་རྣམས་ཐམས་ཅད་ཀྱི་སྐད་ཅིག་གཅིག་ལ་ཡན་ལག་ཐམས་ཅད་མི་སྣང་ཡང་མངོན་པར་ཞེན་པས་དོན་བསྒྲུབས་ལ། བསྒོམ་པ་ཡོངས་སུ་རྫོགས་
པ་ན་དབང་པོའི་གཞུ་སྣང་བ་བཞིན་དུ་རང་རིག་པའི་ཡེ་ཤེས་ཀྱི་རང་བཞིན་ཡོངས་སུ་རྫོགས་པའི་ལྷ་ཉིད་མཐོང་བར་འགྱུར་རོ། །དེ་སྐད་དུ། དེ་ཕྱིར་ཡང་དག་ཡང་དག་མིན། །གང་དག་ཤིན་ཏུ་བསྒོམས་པ་ལས། །བསྒོམ་པའི་སྟོབས་ནི་རྫོགས་པ་ན། །དེ་གསལ་མི་རྟོག་བློ་འབྲས་ཅན། །ཞེས་
གསུངས་སོ། །གལ་ཏེ་བསྒོམས་པ་ན། ཡན་ལག་ཐམས་ཅད་མི་དམིགས་པ་དེའི་ཚེ། བསྒོམ་པ་ཡོངས་སུ་རྫོགས་པ་ན། །དེ་གསལ་མི་རྟོག་བློ་འབྲས་ཅན། །ཞེས་བྱ་བའི་ཚད་མའི་འཁོར་ལོའི་གཙུག་གི་ནོར་བུ་སློབ་དཔོན་ཆོས་ཀྱི་གྲགས་པའི་བཀའ་ཡང་ཇི་ལྟར་

44-1-195a

འཐད། དེ་བས་ན་བུད་མེད་གཟུགས་མཛེས་པ་མཐོང་བའི་དུས་ན། སྐད་ཅིག་དེ་ཉིད་ལ་རྒྱུ་མ་དང་། རུས་པ་དང་། རྐང་དང་རྩ་རྒྱུས་ལ་སོགས་པ་ལ་མ་དམིགས་ཀྱང་། འཇིག་རྟེན་པ་བུད་མེད་མཐོང་བ་དང་རེག་པ་ལ་སོགས་པར་རབ་ཏུ་འཇུག་སྟེ། དེ་དག་གི་
འདོད་པའི་འབྲས་བུ་བསྒྲུབ་པ་ཡང་རྫོགས་པར་འགྱུར་ལ། དེ་བཞིན་དུ་ལྷ་ཉིད་བསྒོམ་པ་ལ་སོགས་པ་ཡང་འགྱུར་རོ། །དེ་ལ་སྨྲས་པ་ཅི་ལྷའི་རྣམ་པ་གོང་བུ་དང་། རིལ་པོ་ལ་སོགས་པ་བརྫུན་པའི་ངོ་བོ་བསྒོམ་པའི་འབད་པས་ཅི་ཞིག་བྱེད། ཡིད་བཞིན་གྱི་ནོར་བུ་ལ་མཆོད་པ་ལས། 
གླང་པོ་དང་རྟ་ལ་སོགས་པ་འབྱུང་བ་བཞིན་དུ། སྟོང་པ་ཉིད་འབའ་ཞིག་བསྒོམས་པ་ཉིད་ཀྱིས་ཕྱག་རྒྱ་ཆེན་པོའི་རྣམ་པ་ཐམས་ཅད་དུ་འགྲུབ་པར་འགྱུར་རོ་ཞེ་ན། ཀྱེ་མའོ་རྨོངས་པའི་བློ་ཅན་རྣམས་ཀྱི་སྟོང་པ་ཉིད་འབའ་ཞིག་ཏུ་རྨོངས་པ་ལ་བརྟན་པོ་ཉིད་རྒྱ་ཆེར་བསལ་བའི་ཕྱིར་རོ། །
བློ་གྲོས་དམན་པ་རྣམས་ཀྱི་ཚིག་ལ་གུས་པས་ཆོག་གོ། །ནམ་མཁའི་མེ་ཏོག་ལ་སོགས་པ་སྟོང་པ་ཉིད་དུ་བསྒོམ་པ་འདིས་མར་མེ་ལ་སོགས་པ་རྣམ་པར་འཇིག་པའི་མཚན་ཉིད་ཀྱི་སྟོང་པ་ཉིད་དང་། འོ་མ་ལ་སོགས་པ་འཐུང་བའི་དུས་ཀྱི་འོ་མ་ལ་སོགས་པར་མི་དམིགས་པའི་སྟོང་པ་ཉིད་
དང་། གཉིད་ལོག་པའི་གནས་སྐབས་ན་དངོས་པོ་ཐམས་ཅད་མི་དམིགས་པའི་སྟོང་པ་ཉིད་དང་། འཆི་བའི་དུས་ན་སེམས་ཅན་ཐམས་ཅད་མི་དམིགས་པའི་སྟོང་པ་ཉིད་ངེས་པར་གསལ་བར་རིག་པར་བྱ་སྟེ། སྟོང་པ་ཉིད་དེ་དག་གོང་དུ་སྨོས་པར་རིག་པས་དཔྱད་མི་བཟོད་ཅིང་། དེ་དག་
རྨོངས་པའི་བློ་ཅན་དག་གིས་རྟོགས་པ་ཙམ་གྱིས་སྦྱར་བ་ཉིད་ཡིན་པའི་ཕྱིར་རོ། །ཇི་སྟེ་ཡང་སྲིད་ཅེས་བྱ་བ་ཕུང་པོ་ལྔ་པོ་སྟོང་པ་ཉིད་ཀྱི་མེས་བསྲེགས་པར་གྱུར་ཞེས་བྱ་བའི་བཀའ་དང་། དེ་བཞིན་དུ་དངོས་པོ་ཐམས་ཅད་སྣང་བ་མེད་པ་ཉིད་དུ་བྱས་ནས། སེམས་ཙམ་ཡང་སྣང་བ་མེད་
པར་བལྟ་བར་བྱའོ་ཞེས་གསུངས་པ་དང་། དེ་བཞིན་དུ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བའི་ང་རྒྱལ་བྱེད་པས་རི་རབ་དང་ཉི་མ་དང་ཟླ་བ་ལ་སོགས་པ་སྟོང་པ་ཉིད་དུ་བསྒོམ་པར་བྱའོ་ཞེས་གསུངས་པ་དང་། དེ་བཞིན་དུ། གསང་སྔགས་རང་བཞིན་དག་པ་བརྗོད་

44-1-195b

ནས་ནི། །དངོས་ཀུན་མ་ལུས་ཀུན་ནས་སྟོང་སྒོམ་ཞིང་། །མཁས་པས་ཕྱི་ནང་བདག་གི་ལུས་ཉིད་ཀྱང་། །ཞེས་བྱ་བས་ཐམས་ཅད་དངོས་པོ་མེད་པ་སྟོང་པ་ཉིད་དུ་བལྟ་བར་བྱའོ་ཞེས་བྱ་བ་ནི་ལུང་ཡིན་ལ། དེ་ཇི་ལྟར་སུན་འབྱིན་པར་བྱེད་ཅེ་ན། དེ་ལྟར་ནི་མ་ཡིན་ཏེ། ལུང་ནི་ཐམས་ཅད་
དུ་དངོས་པོ་མེད་པའི་རང་བཞིན་སྟོང་པ་ཉིད་ཁོ་ན་སྟོན་པར་བྱེད་དོ། །འདི་ལྟར་ཕུང་པོ་ལྔ་པོ་སྟོང་པ་ཉིད་ཀྱིས་མེས་བསྲེགས་པར་ཞེས་བྱ་བ་ལ། གཅིག་དང་དུ་མ་དང་བྲལ་བ་ནི། སྟོང་པ་ཉིད་ཀྱི་མེ་ཞེས་བྱ་བ་ཡིན་ལ། དེས་བསྲེགས་པ་ནི་རང་བཞིན་མེད་པར་བྱས་པ་ཡིན་གྱི། ཐལ་བར་གྱུར་པར་
བྱས་པ་ཡང་ནི་མ་ཡིན་ཏེ། ཡང་སྲིད་པ་ཞེས་གསུངས་པའི་ཕྱིར་རོ། །དེ་བཞིན་དུ་སྣང་བ་མེད་པར་བྱས་ནས་ཞེས་བྱ་བ་ནི། གཅིག་དང་དུ་མ་དང་བྲལ་པའི་རང་བཞིན་མེད་པར་དཔྱད་པ་བྱས་པའི་སྒོ་ནས་ཇི་ལྟ་བ་བཞིན་དུ་སྣང་བ་མེད་པར་གྱུར་པ་ཡིན་ཏེ། དེ་ལྟར་བྱས་ནས་སེམས་ཙམ་ཡང་དེ་བཞིན་དུ་
བལྟ་བར་བྱའོ། །དེ་བཞིན་དུ་ལུང་གི་ཚིག་ཐམས་ཅད་ཤེས་པར་བྱ་སྟེ་ཤིན་ཏུ་སྤྲོས་པས་ཆོག་གོ། །ནམ་མཁའ་ལ་སོགས་པ་བསྒོམ་པའི་དུས་ན། ཤེས་པ་ཡོད་དམ་མེད་ཅེ་ན། །མེད་ཅེས་སུ་ཞིག་སྨྲ་བར་བྱེད། །གལ་ཏེ་ཤེས་པ་ཉིད་མེད་པ་དེ་ལྟ་ན་ཡང་། གང་ལ་ནམ་མཁའི་རྣམ་པར་
སྣང་བར་འགྱུར། གལ་ཏེ་ཡང་ནམ་མཁའི་རྣམ་པར་མི་སྣང་བ་དེ་ལྟ་ན་ནི་ཅི་ཞིག་སྒོམ་པར་བྱེད། དེ་བས་ན་ནམ་མཁའི་རྣམ་པའི་རྣམ་པར་རྟོག་པ་ཡོད་དོ། །དེ་བཞིན་དུ་རི་བོང་གི་རྭ་ལ་སོགས་པ་བསྒོམ་པ་ལ་ཡང་བརྗོད་པར་བྱའོ། །འོ་ན་ནམ་མཁའི་རྣམ་པའི་རྣམ་པར་ཤེས་པ་རྣམ་པར་ཆད་
པར་འགྱུར་རམ་མི་འགྱུར་ཞེ་ན། ཆད་པར་མི་འགྱུར་ཏེ། ཤེས་པའི་རྒྱུན་འཁོར་བ་ཇི་སྲིད་པར་རབ་ཏུ་འཇུག་པའི་ཕྱིར་རོ། །འོ་ན་ནམ་མཁའ་ལ་སོགས་པའི་རྣམ་པར་ཤེས་པ་རྣམ་པ་དང་བཅས་པ་ཞེའམ། རྣམ་པ་མེད་པ་ཞེས་བརྗོད་པར་བྱ། རྣམ་པ་དང་བཅས་པར་བརྗོད་པར་བྱའོ་ཞེ་ན། 
འོ་ན་སྔོན་པོ་ལ་སོགས་པའི་རྣམ་པ་མེད་པ་ཡིན་ནོ། །ཇི་ལྟར་རྣམ་པ་དང་བཅས་པ་ཡིན། ནམ་མཁའ་ལ་སོགས་པའི་རྣམ་པ་ཁོ་ནས་རྣམ་པ་དང་བཅས་པ་ཡིན་ཏེ། མུན་པའི་རྣམ་པ་བཞིན་དུ་ནམ་མཁའི་རྣམ་པར་རྟོག་པ་ནི་སྔོ་བསངས་སུ་སྣང་ངོ་། །དེ་ལྟར་གྱུར་ན་ནི། རྣམ་པ་མེད་པའི་

44-1-196a

ཤེས་པ་མེད་པ་ཉིད་དོ། །བདེན་ཏེ་རྣམ་པ་མེད་པའི་ཤེས་པ་ནི་ཡོད་པ་མ་ཡིན་ཏེ། རྨི་ལམ་ན་ཡང་རྣམ་པར་རིག་པ་ཡིན་ནོ། །ཡང་དག་པའི་ཤེས་པ་ཐོབ་པར་གྱུར་ནས། ཕྱིས་བདག་ཉིད་རིག་པར་འགྱུར་རོ་ཞེ་ན། མནའ་ཆུ་བཏུང་བ་མ་གཏོགས་པ་འདི་ལ་ཚད་མས་
བསྒྲུབ་པ་ཡོད་པ་མ་ཡིན་ཏེ། དེ་ལ་གཉིད་སྟུག་པོའི་ལོག་པའི་གནས་སྐབས་སམ། བརྒྱལ་བའམ་ཤི་བ་ལ་སོགས་པའི་གནས་སྐབས་ན། ཇི་ལྟར་ཤེས་པ་ཡོད་དེ། རང་རིག་པའི་དངོས་པོ་མེད་པའི་ཕྱིར་རོ། །དེས་ན་རང་རིག་པའི་ཡོད་པ་མ་ཡིན་ཏེ། ཤེས་པ་རང་རིག་པའི་རང་
བཞིན་ཡིན་པའི་ཕྱིར་རོ། །གལ་ཏེ་ཡང་མེད་པ་ཉིད་ཡིན་ན། ཤེས་པ་རང་རིག་པའི་རང་བཞིན་གཉིད་ལོག་པས་ནོན་པ་ལས་སད་པའི་གནས་སྐབས་སམ། འཇིག་རྟེན་ཕ་རོལ་དུ་སྐྱེས་པའི་གནས་སྐབས་སུ་ཁར་སང་གི་གནས་དང་ཟན་ལ་སོགས་པ་དྲན་པ་དང་། སྔོན་གྱི་སྐྱེ་བ་དྲན་པའི་གོ་རིམས་
ཇི་ལྟར་འཐད། དེ་བས་ན་སེམས་ལས་སེམས་གཞན་འབྱུང་བར་འགྱུར་བས། ཐམས་ཅད་དུ་རང་རིག་པའི་ཤེས་པ་ཡོད་པར་གྲུབ་སྟེ། རབ་ཏུ་སྤྲོས་པས་ཆོག་གོ། །ཡན་ལག་བཞི་པའི་རྣམ་པར་བཤད་པའོ། །དེ་ནི་ཇི་ལྟར་ལུས་ཀྱི་རྣམ་པ་མེད་པ་ན། སེམས་ཅན་གྱི་དོན་རྣམ་པ་
ཐམས་ཅད་དུ་མེད་པ་དེ་བཞིན་དུ་སྙིང་རྗེ་ཆེན་པོ་མེད་པར་ཡང་སེམས་ཅན་གྱི་དོན་རྣམ་པ་ཐམས་ཅད་དུ་ཡོད་པ་མ་ཡིན་པས་ཡན་ལག་ལྔ་པ་སྨོས་པ་ཡིན་ནོ། །སྙིང་རྗེས་ཡོངས་གང་ཞེས་བྱ་བ་ལ། སྙིང་རྗེའི་དངོས་པོ་ཉིད་ནི་སྙིང་རྗེ་ཉིད་དེ། དེ་ཡོངས་སུ་གང་བ་ནི་ཡོངས་སུ་རྫོགས་པའོ། །
དེ་གང་ཞེ་ན། བསྒྲུབ་པར་བྱ་བ་ཞེས་བྱ་བའི་རང་བཞིན་ནོ། །དེ་ཇི་ལྟ་བུའི་མཚན་ཉིད་ཅན་གྱི་སྙིང་རྗེ་ཆེན་པོ་ཞེས་བྱ་ཞེ་ན། སྡུག་བསྔལ་གྱི་རྒྱུ་ལས་ཡང་དག་པར་གདོན་པར་འདོད་པ་ནི་སྙིང་རྗེ་ཆེན་པོའོ། །དེ་ཡང་རྣམ་པ་གསུམ་སྟེ། སེམས་ཅན་ལ་དམིགས་པ་དང་།ཆོས་ལ་དམིགས་
པ་དང་། དམིགས་པ་མེད་པའོ། །དེ་ལ་སྡུག་བསྔལ་ལས་ཞེས་བྱ་བ་ནི་མངོན་སུམ་དུ་ཉམས་སུ་མྱོང་བར་གྱུར་པ་གླད་གཟེར་ལ་སོགས་པའི་མཚན་ཉིད་ལས་སོ། །སྡུག་བསྔལ་གྱི་རྒྱུ་ལས་ཞེས་བྱ་བ་ནི་སྡུག་བསྔལ་གྱི་རྒྱུ་མི་དགེ་བ་བཅུ་ལ་སོགས་པ་གང་ཡིན་པ་དེ་ནི་སྡུག་བསྔལ་གྱི་

44-1-196b

རྒྱུ་ཡིན་ལ། དེ་ལས་གདོན་པ་ནི་རབ་ཏུ་ཞི་བའི་བདེ་བ་ཆེན་པོའི་གྲོང་ཁྱེར་དུ་རྣམ་པར་འཇོག་པའོ། །དེ་འདོད་པ་ཉིད་དེ་མངོན་པར་འདོད་པ་གང་ཡིན་པ་དེ་ནི་སྙིང་རྗེ་ཞེས་བྱའོ། །སྡུག་བསྔལ་རྣམ་པ་གསུམ་དང་ལྡན་པའི་ཕྱིར། ཡང་བཅོམ་ལྡན་འདས་ཀྱིས་དངོས་པོ་ཐམས་ཅད་སྡུག་བསྔལ་
དུ་གསུངས་སོ། །དེ་ལ་སྡུག་བསྔལ་གྱི་སྡུག་བསྔལ་ཉིད་ནི་ཇི་ལྟར་ཉམས་སུ་མྱོང་བར་གྱུར་པའི་མིག་ནད་ལ་སོགས་པའོ། །གཉིས་པ་འདུ་བྱེད་ཀྱི་སྡུག་བསྔལ་ཉིད་ནི་ཇི་ལྟར་ཞིང་ལས་དང་། བཟོ་སྟོན་པ་དང་། ཚོང་གིས་ཁྱིམ་གྱི་བུ་སྨད་འཚོ་བར་བྱེད་པ་ལ་སོགས་པ་སྟེ། ཉེ་དུ་གསོ་
བར་བྱ་བའི་མཚན་ཉིད་ཀྱི་འདུ་བྱེད་ཐམས་ཅད་སྡུག་བསྔལ་གྱི་ངོ་བོ་ཉིད་ཡིན་པའི་ཕྱིར་རོ། །གསུམ་པ་འགྱུར་བའི་སྡུག་བསྔལ་ཉིད་ནི་དཔེར་ན་དུག་ལ་སོགས་པའི་མཚན་ཉིད་དེ། དུག་མངར་བ་ཉིད་ཀྱི་ཕྱིར་དེའི་ཚེ་ཉིད་ན་སྡུག་བསྔལ་བ་མ་ཡིན་ལ། རྣམ་པར་འགྱུར་བས་སྡུག་བསྔལ་ཉིད་
དེ་དེ་མི་མཐུན་པར་ཡོངས་སུ་འགྱུར་བ་ནི་རྣམ་པར་འགྱུར་བ་ཞེས་བྱ་བ་མ་འོངས་པ་ན། འཆི་བ་ལ་སོགས་པའི་སྡུག་བསྔལ་གྱི་རྒྱུ་ཉིད་ཡིན་པ་ལྟར་དང་། མི་དགེ་བ་བཅུ་ལ་སོགས་པའི་སྡུག་བསྔལ་གྱི་རྒྱུ་ཉིད་ཡིན་པའི་ཕྱིར་རོ། །སྙིང་རྗེ་ཆེན་པོ་ཡང་རྣམ་པ་གསུམ་སྟེ། སེམས་ཅན་གྱི་ཚོགས་
མ་ལུས་པ་ལ་དམིགས་པས་ན། སེམས་ཅན་ལ་དམིགས་པ་སྟེ་དང་པོའོ། །དོན་དམ་པར་སེམས་ཅན་མེད་པའི་ཕྱིར་རོ། །ཁམས་གསུམ་པ་འདི་དག་སེམས་ཙམ་ཡིན་ཏེ། སེམས་ཅན་ཞེས་བྱ་བ་ལ་འགའ་ཞིག་ཡོད་པ་མ་ཡིན་ནོ་ཞེས་བྱ་བ་ནི་ཆོས་ཙམ་ལ་དམིགས་པའི་ཕྱིར། 
ཆོས་ལ་དམིགས་པ་སྟེ་གཉིས་པའོ། །ཆོས་ཐམས་ཅད་རྣམ་པར་དཔྱད་ན་དངོས་པོ་མེད་པ་ལ། དམིགས་པའི་སྒོ་ནས་དམིགས་པ་མེད་པ་ནི་གསུམ་པའོ། །དེ་ལ་སེམས་ཅན་ལ་དམིགས་པ་ནི་ལས་དང་པོ་པའིའོ། །ཆོས་ལ་དམིགས་པ་ནི་སར་ཆུད་པའི་བྱང་ཆུབ་སེམས་དཔའིའོ། །
དམིགས་པ་མེད་པ་ནི་སངས་རྒྱས་བཅོམ་ལྡན་འདས་ཀྱིའོ། །གལ་ཏེ་སངས་རྒྱས་རྣམས་དམིགས་པ་མེད་པ་ཡིན་ན། ཇི་ལྟར་དམིགས་པ་མི་མངའ་བའི་ཕྱིར། ཇི་ལྟར་ན་སེམས་ཅན་རྣམས་ཀྱི་དོན་མཛད་པ་དང་། ཆོས་ཀྱི་དོན་མཛད་ཅེ་ན། ཇི་ལྟར་ཡིད་བཞིན་གྱི་ནོར་བུ་དམིགས་པ་མེད་

44-1-197a

ཀྱང་སེམས་ཅན་གྱི་དོན་བྱེད་པ་དེ་བཞིན་དུ་སངས་རྒྱས་རྣམས་ཀྱང་མཛད་དོ། །གལ་ཏེ་ཡིད་བཞིན་གྱི་ནོར་བུ་རྣམ་པར་མི་རྟོག་པ་དམིགས་པ་མེད་པ་བཞིན་དུ་སེམས་ཅན་གྱི་དོན་བྱེད་ན། དེའི་ཚེ་ཇི་ལྟར་སེམས་ཅན་དེ་དག་ཐམས་ཅད་ཀྱི་མ་ཡིན་ཞེ་ན། དེ་ནི་མ་ཡིན་
ཏེ་ཡིད་བཞིན་གྱི་ནོར་བུ་སྐལ་བ་ཇི་ལྟ་བ་བཞིན་སེམས་ཅན་གྱི་དོན་བྱེད་ཀྱི་དེ་དག་ཐམས་ཅད་ཀྱི་ནི་མ་ཡིན་ནོ། །དེ་བཞིན་དུ་སངས་རྒྱས་བཅོམ་ལྡན་འདས་སྔོན་གྱི་སྨོན་ལམ་གྱི་སྟོབས་ཀྱིས་སྐལ་པ་ཇི་ལྟ་བ་བཞིན་དུ་སེམས་ཅན་གྱི་དོན་མཛད་དོ། །དེ་སྐད་དུ། ལྷ་ཡི་རྒྱལ་པོས་ཆར་ཕབ་ཀྱང་། །
ས་བོན་མི་རུང་མི་སྨིན་ལྟར། །སངས་རྒྱས་རྣམས་ནི་བྱུང་གྱུར་ཀྱང་། །སྐལ་བ་མེད་པས་དེ་མི་མྱོང་། །དེ་བཞིན་དུ། ཐུབ་པ་རྩོལ་བ་མི་མངའ་ཡང་། །འཁོར་ལོ་འཁོར་བའི་ཚུལ་དུ་ནི། །ཇི་ལྟར་འདོད་བཞིན་གྱི་གསོགས་ལས། །ཆོས་སྟོན་པ་ཡང་འབྱུང་བར་འགྱུར། །དེ་བཞིན་དུ། 
ཐུབ་ཀུན་རྟོག་པ་མི་མངའ་ཡང་། །དཔག་བསམ་གྱི་ནི་ཤིང་བཞིན་དུ། །སེམས་ཅན་གྱི་ནི་དོན་བསྒྲུབ་པ། །མི་རྟོག་ན་ཡང་མཛད་པར་འགྱུར། །ཞེས་གསུངས་སོ། །ཡིད་བཞིན་གྱི་ནོར་བུ་བེམས་པོའི་ངོ་བོ་མ་ཡིན་ནམ། ཇི་ལྟར་རྟོགས་པའི་རང་བཞིན་སངས་རྒྱས་དག་དང་མཚུངས་
ཤེ་ན་དེ་ལྟར་མ་ཡིན་ནོ། །རྣམ་པ་ཐམས་ཅད་ཀྱིས་མཚུངས་པ་ནི་མ་ཡིན་ཏེ། ཡིད་བཞིན་གྱི་ནོར་བུ་དམིགས་པ་མེད་པ་ཙམ་གྱི་སྒོ་ནས་དཔེ་ཉིད་ཡིན་པའི་ཕྱིར་རོ། །སངས་རྒྱས་བཅོམ་ལྡན་འདས་ནི་ཡོན་ཏན་མ་ལུས་པ་ད་ང་ལྡན་པ་གཉིས་སུ་མེད་པ་ཡེ་ཤེས་ཀྱི་རང་བཞིན་ཡིན་པའི་ཕྱིར་དང་ཡིད་
བཞིན་གྱི་ནོར་བུ་ནི་དེ་ལས་བཟློག་པ་ཡིན་པའི་ཕྱིར་རོ། །རྣམ་པར་སྤྲོས་པས་ཆོག་གོ། །ཡན་ལག་ལྔ་པའི་རྣམ་པར་བཤད་པའོ། །ད་ནི་རྒྱུན་མ་ཆད་པ་ཞེས་བྱ་བས་ཡན་ལག་དྲུག་པ་སྨོས་པ་ཡིན་ཏེ། ལོངས་སྤྱོད་རྫོགས་པའི་སྐུ་བཤད་པའི་ཡོན་ཏན་རྣམས་དང་ལྡན་པའི་རྒྱུད་ཉིད་རབ་ཏུ་
འཇུག་པ་ཉིད་ཀྱིས། མི་གནས་པའི་མྱ་ངན་ལས་འདས་པ་ཉིད་ཡིན་པའི་ཕྱིར་རྒྱུན་མི་འཆད་པ་ཉིད་ཡིན་གྱི། ལོངས་སྤྱོད་རྫོགས་པའི་སྐུ་ཡང་གནས་སྐབས་འགའ་ཞིག་ཏུ་རབ་ཏུ་འཇུག་པ་དང་ལྡོག་པའི་མཚན་ཉིད་བར་ཆད་དང་བཅས་པ་ཉིད་ནི་མ་ཡིན་ནོ། །གལ་ཏེ་དེ་ལྟ་ཡིན་ན་རྟག་ཏུ་

44-1-197b

བཅོམ་ལྡན་འདས་ལོངས་སྤྱོད་རྫོགས་པའི་སྐུའི་ངོ་བོ་ཉིད་ཀྱི་གནས་སྐབས་ཡིན་པའི་ཕྱིར། ལོངས་སྤྱོད་རྫོགས་པའི་སྐུའི་ངོ་བོ་ཉིད་དུ་གདུལ་བྱ་རྣམས་ཀྱིས་རྟག་ཏུ་མཐོང་བ་ཐོབ་པར་འགྱུར་གྱི། བརྒྱ་བྱིན་དང་ཚངས་པ་ལ་སོགས་པའི་ཚུལ་དུ་ལྡོག་པའི་ངོ་བོ་ཉིད་ཀྱིས་མ་ཡིན་པར་
འགྱུར་རོ་ཞེ་ན། དེ་ལྟ་ནི་མ་ཡིན་ཏེ། ལོངས་སྤྱོད་རྫོགས་པའི་སྐུ་རྒྱུན་མི་འཆད་པར་རབ་ཏུ་འཇུག་པ་ཉིད་ཡིན་ན་ཡང་། གདུལ་བྱའི་དབང་གིས་བརྒྱ་བྱིན་དང་ཚངས་པ་ལ་སོགས་པའི་ངོ་བོར་སྣང་བ་འགལ་བ་མེད་དོ། །དཔེར་ན་གར་མཁན་གྱི་ལུས་དང་འདྲ་སྟེ། ཇི་ལྟར་དང་པོར་
ཟློས་གར་མཁན་གྱི་ལུས་ཀྱི་རྣམ་པ་ཉིད་དུ་སྣང་ལ། གླུའི་དུས་དང་རོལ་མོའི་གནས་སྐབས་དག་ཏུ་མཚན་སྣ་ཚོགས་པའི་ཆ་ལུགས་ཀྱི་དབང་གིས་ཁྱབ་འཇུག་དང་། ལྷ་ཆེན་པོ་དང་། ཚངས་པ་ལ་སོགས་པའི་གཟུགས་སུ་འཇིག་རྟེན་རྣམས་ལ་སྣང་སྟེ། དེའི་རང་གི་ངོ་བོ་ཉིད་ལ་
ཟློས་གར་མཁན་གྱི་ལུས་ཀྱི་ངོ་བོ་ཉིད་གནས་སྐབས་ཐམས་ཅད་དུ་ཡོད་པ་ཉིད་དོ་ཞེས་འཇིག་རྟེན་པ་རྣམས་ཐ་སྙད་དུ་འཇུག་གོ། །དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱི་ལོངས་སྤྱོད་རྫོགས་པའི་སྐུ་ཡང་རྟག་ཏུ་རྒྱུན་མི་འཆད་པར་བཞུགས་པ་མི་གནས་པའི་མྱ་ངན་ལས་འདས་
པའི་ངོ་བོ་སྟུག་པོ་བཀོད་པ་ན་བཞུགས་པ་ཡིན་ནོ། །དེ་སྐད་དུ། གཙང་མ་རིས་ཀྱི་སྟེང་གནས་པ། །གྲོང་ཁྱེར་རབ་དགའ་འོག་མིན་དུ། །རྫོགས་པའི་སངས་རྒྱས་དེར་འཚང་རྒྱ། །སྤྲུལ་པ་དག་ནི་འདིར་སངས་རྒྱས། །ཞེས་གསུངས་སོ། །ཡན་ལག་དྲུག་པའི་བཤད་པའོ། །
ད་ནི་འགོག་པ་མེད་ཅེས་བྱ་བས་ཡན་ལག་བདུན་པ་སྨོས་པ་ཡིན་ཏེ། འགོག་པ་ནི་ལོངས་སྤྱོད་རྫོགས་པའི་རྣམ་པར་ལྡོག་པ་དང་། རྣམ་པར་འཆད་པ་དང་། དུས་ཅུང་ཞིག་བཞུགས་ན་འཇིགས་པ་ཞེས་བྱ་བའི་བར་དུའོ། །འགོག་པ་དང་བྲལ་བར་གྱུར་པ་ནི་འགོག་པ་མེད་པའོ། །
དེ་ཡང་གང་ཞེ་ན། བསྒྲུབ་པར་བྱ་བ་ཞེས་བྱ་བའི་རང་བཞིན་ནོ། །སྙིང་རྗེས་གཞན་གྱི་དབང་དུ་གྱུར་པའི་ཕྱིར་དང་། སེམས་ཅན་གྱི་རྒྱུད་རྒྱུན་མི་འཆད་པའི་ཕྱིར་འཁོར་བ་ཇི་སྲིད་བར་བཞུགས་སོ་ཞེས་བྱ་བའི་དོན་ཏོ། །ད་ནི་ཡན་ལག་བདུན་པ་ཉེ་བར་བསྡུ་བའི་སྒོ་ནས། རང་གི་འདོད་པ་

44-1-198a

ཉིད་ནི་ཡན་ལག་བདུན་ཞེས་བྱ་བ་ལ་སོགས་པ་སྨོས་ཏེ། ཡན་ལག་བདུན་དུ་བཤད་པ་དེ་དག་དང་ལྡན་པའི་བསྒྲུབ་བྱ་སངས་རྒྱས་ཉིད་དང་། རྡོ་རྗེ་འཆང་ཉིད་ལ་སོགས་པ་བདེ་བ་ཆེན་པོའི་ངོ་བོ་གང་ཡིན་པ་བདག་འདོད་པ་སྟེ་བདུན་པའོ། །འདིར་ཞེས་བྱ་བ་ནི་
གསང་བ་འདུས་པའི་རྒྱུད་དུའོ། །བདག་ཉིད་གཅིག་པུ་འདོད་པ་མ་ཡིན་ཏེ། ཚད་མས་ཡོངས་བསྒོམས་བློ་ཡིས་སྔགས་པ་ཡང་ཡིན་ཏེ། མངོན་སུམ་ལ་སོགས་པའི་བློའི་ཚད་མས་ཡོངས་སུ་བསྒོམས་ཤིང་གོམས་པར་བྱ་བའི་བློ་གང་ལ་ཡོད་པ་དེ་ལ་ཚད་མས་ཡོངས་བསྒོམས་
བློ་ཅན་ཏེ། མཁས་པ་རྣམས་སོ། །དེ་དག་གིས་ཀྱང་སྔགས་ལ་རབ་ཏུ་བསྟོད་ཅིང་དེ་དག་ཀྱང་བཞེད་དེ་ཀུན་དུ་བཟང་པོ་ཉིད་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ། །སློབ་དཔོན་ངག་གི་དབང་ཕྱུག་གྲགས་པའི་བཞེད་གཞུང་ཡན་ལག་བདུན་དང་ལྡན་པའི་བསྒྲུབ་པ་བྱ་བ་བཞི་པ་ཡང་སྒྲུབ་
པའི་ཡན་ལག་བདུན་རྣམ་པར་དཀྲོལ་བ་སྟེ་ལེའུ་གཉིས་པའོ།།      །།ཡན་ལག་བདུན་དང་ལྡན་པའི་བསྒྲུབ་བྱ་ཁྱོད་ཉིད་འདོད་པ་དང་མཁས་པ་གཞན་དག་གིས་བསྔགས་པ་ཡང་མ་ཡིན་ནམ། དེ་བཞིན་པའི་སྒྲས་བརྗོད་པ་ཉིད་དུ་ཇི་ལྟར་འགྱུར་ཞེ་ན། སྨྲས་པ། དེ་ལྟར་སྒྲ་དང་ལྡན་
ཉིད་ཕྱིར། །ཞེས་བྱ་བ་ལ་སོགས་པ་སྨོས་ཏེ། དེ་ལྟར་སྒྲ་དང་ལྡན་ཉིད་ཕྱིར། །ཞེས་བྱ་བ་ལ་སོགས་པ་རྒྱུ་རྣམ་པ་གསུམ་གྱི་ཡན་ལག་བདུན་དང་ལྡན་པའི་བསྒྲུབ་བྱ་ནི་བཞི་པ་ཡིན་ནོ་ཞེས་བྱ་བ་ནི་ཁྱད་པར་རོ། །དེ་ལྟར་དེ་བཞིན་གཤེགས་པ་ཡང་། །ཞེས་བྱ་བའི་ངག་འདི་ལ་དེ་ལྟར་ཀྱི་
སྒྲས་ཤེས་རབ་ཡེ་ཤེས་ལྷར་མཚོན་པར་བྱེད་པ་ཉིད་ཡིན་ཏེ། དེ་ལྟར་ཞེས་བྱ་བའི་སྒྲས་བརྗོད་པར་བྱ་བ་ནི། དེ་ལྟར་སྒྲ་བརྗོད་པའོ། །དེ་ཡང་གང་ཞེ་ན། པདྨ་དང་རྡོ་རྗེ་ཀུན་ནས་རེག་པ་ལས་སྐྱེས་པ་ལུས་ཀྱི་བདེ་བ་གཅིག་པུའི་ངོ་བོ་དེ་དང་ལྡན་པ་ནི་བསྒྲུབ་པར་བྱ་བ་ཡན་ལག་བདུན་པའོ། །
དེའི་དངོས་པོ་ནི་དེའི་ངོ་བོ་ཉིད་དོ། །རྒྱུ་དེའི་ཕྱིར་རོ། །ངག་དེ་ཉིད་ལ་ཡང་གི་སྒྲ་ཡོད་པ་ཡིན་ཏེ། ཡང་གི་སྒྲ་དེའི་དོན་ནི་ཡང་གི་སྒྲའི་དོན་ཏོ། །སྦྱོར་བ་ནི་དེ་དང་ལྡན་པ་སྟེ། དེའི་ཕྱིར་ཡན་ལག་བདུན་དང་ལྡན་པའི་བསྒྲུབ་པར་བྱ་བ་ཉིད་དེ་ཡིན་ནོ། །ཡང་གི་སྒྲའི་དོན་ལ་དོན་གྱི་ཁྱད་པར་ཅི་

44-1-198b

ཡོད་པ་མ་ཡིན་ནམ། འདི་ལ་ཁྱད་པར་ཞེས་བྱ་བ་ནི་གང་ཡིན། སྨྲས་པ། བདེ་བ་རྒྱ་ཆེ་བ་ཉིད་དང་། ཟག་པ་མེད་པ་ཉིད་དང་། གྱ་ནོམ་པ་ཉིད་དང་། རྒྱུན་མི་འཆད་པ་ཉིད་དང་། འཁོར་བ་ཇི་སྲིད་པར་གནས་པ་ཉིད་ལ་སོགས་པ་ནི་ཁྱད་པར་རོ། །དེ་ཡང་ཤེས་རབ་ཡེ་ཤེས་ཁྱད་པར་མེད་
པ་སྐད་ཅིག་མ་འདི་ལ་ནི་མི་སྲིད་པ། བསྒོམས་པས་མངོན་སུམ་དུ་གྱུར་པའི་སྐབས་ན་ནི་འགྱུར་བ་ཡིན་ནོ། །ཤེས་རབ་ཡེ་ཤེས་ནི་ལས་ཀྱི་ཕྱག་རྒྱའི་སྟོབས་ལས་བྱུང་བའི་སྐད་ཅིག་མ་ཙམ་ཟག་པ་དང་བཅས་པ་རྡོ་རྗེས་ཀུན་ནས་རེག་པའི་དུས་ཡིན་ན། ལས་ཀྱི་ཕྱག་རྒྱའི་ལུས་ལ་དམ་པར་
འཁྱུད་པའི་རྡུལ་ལ་སོགས་པ་དང་ལྡན་པ་སྡུག་བསྔལ་གྱིས་གྱ་ནོམ་པ་མ་ཡིན་པ་དང་། འཇིག་པའི་རྒྱུ་ཉིད་ཡིན་པའི་ཕྱིར་སྐད་ཅིག་མ་ཡུན་ཐུང་བའི་དུས་སུ་གནས་པ་ཉིད་ཀྱི་ཕྱིར་རོ། །ནོར་བུ་ཙམ་ལ་གནས་པ་ཉིད་ཀྱིས་རྒྱ་ཆེ་བ་མ་ཡིན་ཏེ་ཡན་ལག་ཐམས་ཅད་ལ་མ་ཁྱབ་པའི་ཕྱིར་རོ། །
རྒྱུན་མི་འཆད་པར་གྱུར་པ་ཡང་མ་ཡིན་ཏེ་དེ་བཞིན་དུ་མི་སྣང་བའི་ཕྱིར་རོ། །འཁོར་བ་ཇི་སྲིད་པར་གནས་པར་གྱུར་པ་ཡང་མ་ཡིན་ཏེ། ལས་ཀྱི་ཕྱག་རྒྱའི་ཀུན་དུ་སྦྱོར་བ་མི་རྟག་པ་ཉིད་ཀྱི་ཕྱིར་རོ། །དེ་ལྟར་ཁྱད་པར་དེ་དག་ཤེས་རབ་ཡེ་ཤེས་ཀྱི་བདེ་བའི་ངོ་བོ་སྐད་ཅིག་ཙམ་གནས་པའི་
མཚན་ཉིད་ལ་མི་སྲིད་པ། དེ་ཉིད་མངོན་སུམ་དུ་གྱུར་པའི་གནས་སྐབས་མཚོན་པར་བྱ་བ་གང་ཡིན་པའི་ཁྱད་པར་དུ་འཕགས་པ་ཡིན་ཏེ། ཡང་གི་སྒྲས་མཚོན་པར་བྱ་བ་ནི་བསྒྲུབ་པར་བྱ་བ་ཡན་ལག་བདུན་པའོ། །རྒྱུ་གསུམ་པ་ནི། དེ་བཞིན་སྒྲ་དོན་སྐྱེས་ཉིད་ཕྱིར། །ཞེས་བྱ་བ་
སྨོས་ཏེ། དེ་བཞིན་ཞེས་བྱ་བ་ནི་ཇི་ལྟར་ཤེས་རབ་ཡེ་ཤེས་ཏིང་ངེ་འཛིན་གསུམ་ལ་མཁས་པའི་ལས་ཀྱི་ཕྱག་རྒྱ་དང་ཐབས་ལ་སོགས་པ་ལས་སྐྱེས་པ་བཞིན་དུ། དེ་ལྟ་བུ་ཚོགས་པ་ཤེས་རབ་དང་ཐབས་དང་ལྡན་པ་ཡིན་པ་ལས་སྐྱེས་པ་དེ་བསྒྲུབ་པར་བྱ་བར་འགྱུར་རོ། །དེ་བཞིན་དུ་སྒྲ་དོན་
ལས་སྐྱེས་པ་གང་ཡིན་པ་དེ། དེ་བཞིན་སྒྲའི་དོན་སྐྱེས་ཉིད་དེ། དེའི་དངོས་པོ་ནི་དེ་ཉིད་ཡིན་པ་རྒྱུ་དེའི་ཕྱིར། ཡན་ལག་བདུན་དང་ལྡན་པའི་བསྒྲུབ་བྱ་དེ་བཞིན་ཉིད་དུ་བདག་འདོད་པ་ནི་ཡང་དག་པར་འདོད་ཀྱི། གཞན་དག་ནི་ཡན་ལག་གཉིས་པ་ལ་སོགས་པ་དང་བྲལ་བ་ཡིན་ནོ། །བཞི་པ་གཅིག་

44-1-199a

པའི་ངོ་བོ་ཉིད་མ་ཡིན་ནམ། དེ་རྣམ་པ་བདུན་དུ་ཇི་ལྟར་རུང་ཞེ་ན། བདེན་ཏེ་སློབ་དཔོན་དུ་མའི་བསམ་པས་ཐ་དད་པའི་ཕྱིར། བཞི་པ་གཅིག་ཁོ་ན་ལ་དེ་དག་སོ་སོར་འདོད་པ་ཡིན་ནོ། །རྣམ་པ་བདུན་ཆར་ཡན་ལག་བདུན་དང་ལྡན་པ་མ་ཡིན་ནམ་ཞེ་ན། རྣམ་པ་བདུན་
པོ་ཉིད་ཡན་ལག་བདུན་དང་ལྡན་པ་མ་ཡིན་ལ། འོན་ཀྱང་རྣམ་པ་གཅིག་ཁོ་ན་ཡིན་ཏེ། ཇི་ལྟར་བཞི་པ་སྣང་བ་ལས་སྐུ་ནི་ནམ་མཁའ་དང་མཚུངས་ཞེས་བྱ་བས་རྣམ་པ་བཞི་པ་ཡིན་ནོ། །ཡན་ལག་བདུན་དང་ལྡན་པ་ཞེས་བྱ་བའི་རྒྱུས་དེ་ཉིད་བཞི་པ་མ་ཡིན་ནམ། དབང་བསྐུར་གྱི་སྒྲས་
བརྗོད་པ་ཉིད་དུ་ཇི་ལྟར་འགྱུར་ཞེ་ན། སྨྲས་པ། ཇི་ལྟར་ཆུ་དང་ཅོད་པན་ལ་སོགས་པས་དྲི་མ་མེད་པར་བྱེད་པའི་ཕྱིར། དབང་བསྐུར་ཉིད་ཡིན་པ་དེ་བཞིན་དུ་ཡན་ལག་བདུན་དང་ལྡན་པའི་བསྒྲུབ་བྱས་ཀྱང་། རྣམ་པ་ཐམས་ཅད་དུ་དྲི་མ་མེད་པར་བྱེད་པའི་ཕྱིར། དབང་བསྐུར་བའི་ངོ་བོ་
ཉིད་ཡིན་ནོ། །དེ་སྐད་དུ་བཅོམ་ལྡན་འདས་ཀྱིས། དབང་བསྐུར་བ་ནི་གསུམ་དུ་དབྱེ། །བུམ་པའི་དབང་ནི་དང་པོ་སྟེ། །གསང་བའི་དབང་ནི་གཉིས་པ་ཡིན། །ཤེས་རབ་ཡེ་ཤེས་གསུམ་པ་སྟེ། །དེ་ལྟར་དེ་བཞིན་བཞི་པ་ཡང་། །རྒྱུད་འདི་ལས་ནི་རབ་ཏུ་བཤད། །ཅེས་བྱ་བ་འདིས་
དབང་བསྐུར་བ་རྣམ་པ་གསུམ་དུ་གསང་བ་འདུས་པའི་རྒྱུད་ལས་གསུངས་སོ། །དེ་ལ་ཇི་ལྟར་བཞི་པ་ཞེས་བྱ་ཞེ་ན། ཀྱེ་མའོ་བཤད་ཀྱང་རྨོངས་པ་རྣམས་ཀྱིས་རྟོགས་པར་མ་གྱུར་པ་ནི་དཀའོ། །འདི་ལྟར། དེ་ལྟར་དེ་བཞིན་བཞི་པ་ཡང་། །ཞེས་བྱ་བའི་སྒྲ་འདིས་མངོན་སུམ་དུ་ཐོས་པ་མ་
ཡིན་ནམ། མངོན་སུམ་དུ་ཐོས་པ་བདེན་ཏེ། འོན་ཀྱང་ཤེས་རབ་ཡེ་ཤེས་ཉིད་ལ་འདིར་བཞི་པའི་སྒྲར་བརྗོད་པ་ཡིན་ནོ། །ཅི་བཅོམ་ལྡན་འདས་ཀྱི་བཀའ་མི་སླུ་བ་མ་ཡིན་ནམ། གང་གིས་ཤེས་རབ་ཡེ་ཤེས་ཁོ་ན་བཞི་པ་ཡིན་ཞེས་གསུངས། བཅོམ་ལྡན་འདས་ཀྱི་བཀའ་སླུ་བ་ནི་མ་ཡིན་
ཏེ། དེ་ལྟ་ན་ཡང་མཁས་པ་སྙམ་སེམས་པ་བླ་མའི་མན་ངག་དང་བྲལ་བ་ཉིད་རྡོ་རྗེའི་ཚིག་ལ་སོགས་པས་ཁོང་དུ་ཆུད་པར་འདོད་པ་རྣམས་རྨོངས་པ་སྐྱེད་པའི་ཕྱིར། གསུམ་པ་ཁོ་ན་ལ་བཞི་པའི་སྒྲར་བསྟན་པ་ཡིན་ནོ་ཞེ་ན། སྙིང་རྗེ་ཆེན་པོ་དང་ལྡན་པ་མ་ཡིན་ནམ། ཇི་ལྟར་ན་སེམས་ཅན་ལ་

44-1-199b

རྨོངས་པ་སྐྱེད་པའི་ཕྱིར་རམ། དཔེ་མཁྱུད་མཛད་པར་རིགས། ཇི་སྟེ་ཤེས་རབ་ཡེ་ཤེས་དེ་ཉིད་བསྒོམས་པས་མངོན་སུམ་དུ་བྱས་པར་གྱུར་པ་ལ་བཞི་པ་ཞེས་བྱའོ་ཞེ་ན། དེ་ལྟར་ན་མངོན་སུམ་དུ་བྱས་པ་དང་། མ་བྱས་པ་ཐ་དད་པའི་ཕྱིར་བཞི་པ་ཉིད་ཐོབ་པར་འགྱུར་རོ། །དབང་བསྐུར་རྣམ་
པ་གསུམ་དུ་དབྱེ། །ཞེས་བྱ་བས་དེའི་གནས་སྐབས་ཀྱི་ངག་འབྲེལ་པ་མ་ཡིན་ནམ། ཅི་སྟེ་བཅོམ་ལྡན་འདས་ཀྱི་དགོངས་པ་ཡང་བཞི་པ་ཉིད་ཐ་དད་པ་ཡིན་ན། གསུམ་དུ་དབྱེ་ཞེས་བྱ་བའི་བཀའ་འབྲེལ་བ་ཉིད་མེད་པ་ཐོབ་པར་འགྱུར་རོ་ཞེ་ན། དེ་ལྟར་ནི་མ་ཡིན་ཏེ། དབང་བསྐུར་གང་
དག་བསྒོམས་པས་མངོན་སུམ་དུ་བྱས་པ་མེད་པ་དེར་དབྱེ་བ་རྣམ་པ་གསུམ་དུ་གསུངས་ལ། གང་བསྒོམས་པས་མངོན་སུམ་དུ་བྱ་བ་ཡོད་པ་དེར་བཞི་པ་ཡིན་པས་ཉེས་པ་མེད་དོ། །དེ་བས་བཤད་པའི་རིམ་པས་ཚད་མས་གྲུབ་པའི་བཞི་པོ་ཡོད་པ་ཡིན་ནོ། །ཅི་སྟེ་ཆུ་དང་ཅོད་པན་ལ་
སོགས་པའི་་དབང་བསྐུར་བ་དགུ་པོ་འདི་དག་ལ། ཇི་ལྟར་ན། དབང་བསྐུར་གྱི་དབྱེ་བ་རྣམ་པ་གསུམ་དུ་བསྟན་ཞེ་ན། བདེན་ཏེ་འོན་ཀྱང་ཆུ་དང་ཅོད་པན་དང་། རྡོ་རྗེ་དང་བདག་པོ་དང་མིང་དང་སློབ་དཔོན་དུ་དབང་བསྐུར་བ་དྲུག་པོ་དེ་དག་ནི་གཅིག་ཏུ་བྱས་ནས། བུམ་པའི་དབང་ནི་དང་པོ་སྟེ། །
ཞེས་བསྟན་པ་ཡིན་ཏེ། ཐམས་ཅད་སྤྱན་ལ་སོགས་པས་ཡོངས་སུ་བཟུང་བའི་བུམ་པ་དག་གི་བྱ་བ་ཡིན་པའི་ཕྱིར་རོ། །གསང་བ་དག་ནི་ཤེས་རབ་དང་། །ཐབས་དང་འབྲེལ་པའི་པདྨ་དང་། །རྡོ་རྗེ་དག་གིས་དབང་བསྐུར་བ་ནི་གཉིས་པའོ། །ཤེས་རབ་སྟེ་ལས་ཀྱི་ཕྱག་རྒྱ་ལས་དང་། 
ལས་ཀྱི་ཕྱག་རྒྱའི་ཡེ་ཤེས་ནི་ཤེས་རབ་ཡེ་ཤེས་ཏེ། ཐབས་ཀྱི་རྡོ་རྗེའི་ཆ་ལ་གནས་པ་དང་། ཤེས་རབ་ཀྱི་པདྨ་ལ་གནས་པ་ནི་གསུམ་པའོ། །དེ་ལྟར་དེ་བཞིན་བཞི་པ་ཡང་། །ཞེས་བྱ་བ་ནི། ཤེས་རབ་ཡེ་ཤེས་ཀྱིས་མཚོན་པར་བྱེད་པའི་ངོ་བོ་དེ་བསྒོམས་པས་ཁྱད་པར་དུ་འཕགས་པ་
མཚོན་པར་བྱ་བའི་ངོ་བོ་གསུངས་པ་ཁོ་ན་ལ་བཞི་པ་ཞེས་བྱའོ། །ད་ནི་བཞི་པ་སྣང་བ་ལས་སྨོས་པའི་རྡོ་རྗེ་ཞེས་བྱ་བའི་ཚིགས་སུ་བཅད་པས་སྐྱེ་བའི་རིམ་པ་བསྟན་པར་བྱ་སྟེ། དེ་ལ་རྡོ་རྗེ་ནི་རྡོ་རྗེའོ། །ས་བོན་ཞེས་བྱ་བ་ནི་བྱང་ཆུབ་སེམས་དཔའི་བརྡའོ། །དེ་འབབ་པ་ནི་འཛག་པ་སྟེ། སློབ་མའི་

44-1-200a

ཁའི་ནམ་མཁའི་སྒོ་ནས་སྙིང་ལ་རབ་ཏུ་ཞུགས་པའོ། །དེས་དག་པ་ནི་དྲི་མ་མེད་པར་བྱས་ནས། སློབ་མའི་སེམས་ཞིང་དུ་གྱུར་པ་འདི་ནི་གསང་བའི་དབང་སྟོན་པར་བྱེད་པའོ། །དག་པ་ཡང་དེ་ཉིད་ཡིན་པ་དེ་ནི་པདྨ་རྣམ་པར་དག་པའི་ཆོ་གས་སོ། །ཆུ་སྐྱེས་
ཡང་དེ་ཡིན་ཏེ། ཤེས་རབ་ཀྱི་ཆུ་ལས་སྐྱེས་པའོ། །དེ་ལས་འབྱུང་བ་ནི་སྐྱེས་པ་སྟེ། ཡེ་ཤེས་གང་ཡིན་པ་དེ་ཉིད་མྱུ་གུའི་ཚུལ་ཅན་གྱི་ངོ་བོ་ཉིད་ཡིན་པས་མྱུ་གུའོ། །དེ་བསྒོམས་པའི་རིམ་གྱིས་བཞི་པའི་འབྲས་བུ་དང་མཐུན་པ་ཡང་དག་པར་འཕེལ་བར་འགྱུར་བ་དེ་ཉིད་དུ། ཆུ་
སྐྱེས་ཡང་དག་མྱུ་གུ་འབྱུང་སྐྱེས་ཤིང་། །ཞེས་བྱའོ། །དེས་ཡན་ལག་བདུན་དང་ལྡན་པ་བཞི་པ་ཁོ་ནའི་འབྲས་བུ་བསྒྲུབ་པར་བྱ་བ་ནི་འབྲས་བུའོ། །ཡོངས་གསལ་སྨིན་པར་འགྱུར་བ་ཡི། །ཞེས་བྱ་བ་ནི་རྣམ་པར་གསལ་བར་འགྱུར་བ་སྟེ། མངོན་སུམ་དུ་འགྱུར་ཞེས་བྱ་བའི་ཐ་
ཚིག་གོ། །བདག་གིས་རིམ་པ་འདིས་བཞི་པ་གསལ་བར་བྱས་པ་ལ། གསལ་དུ་ཟིན་དང་མན་ངག་དང་། མང་དུ་ཐོས་པ་དང་བྲལ་བས་མཁས་པ་སྟེ། ལྔ་རིག་པ་ལ་ཡང་སྦས་པ་སྟེ་རྟོགས་པར་དཀའ་བའོ། །གང་ཞིག་རྡོ་རྗེའི་རྩེ་མོའི་ཆ་ལ་གནས་པ་ལྷན་ཅིག་སྐྱེས་པའི་བདེ་བའི་ངོ་བོ་
ཙམ་བཞི་པར་གཞུང་བྱེད་པར་འདོད་དེ་བཞི་པ་སྣང་བ་ལས། རྡོ་རྗེའི་ས་བོན་ཞེས་བྱ་བ་ལ་སོགས་པའི་ཚིགས་སུ་བཅད་པ་རྣམ་པར་བཤད་པ་ཉིད་ཀྱི་ཕྱིར་རོ་ཞེས་བདག་ཉིད་ཀྱི་རྣམ་པར་རྟོག་པ་སྨྲས་ཏེ། དེ་དག་བདག་གི་བསམ་པ་ཡང་དག་པར་མི་ཤེས་པ་ཡིན་ནོ། །རྡོ་རྗེའི་རྩེ་མོའི་ཆ་ལ་
གནས་པ་བདག་གིས་བཞི་པར་འདོད་པ་མ་ཡིན་ཏེ། ཡན་ལག་བདུན་དང་བྲལ་བ་ཉིད་ཀྱི་ཕྱིར་རོ། །དེ་ལྟ་ཡིན་ན་རྡོ་རྗེ་ཞེས་བྱ་བ་ལ་སོགས་པས་ཇི་ལྟར་རྣམ་པར་མ་བཤད་ཅིང་བླ་མའི་མན་ངག་ལས་ཤེས་པར་བྱ་བ་ཡིན་ནོ་ཞེས་སྨྲས་ན། བླ་མའི་མན་ངག་མེད་པར་འདོད་པ། མཁས་པའོ་
སྙམ་སེམས་པའི་མཁས་པའི་དྲེགས་པ་བསལ་བའི་ཕྱིར་རོ། །འོན་ཀྱང་གཞན་དག་གི་འདོད་པ་ཡང་བསྟན་པ་ཡིན་ཏེ། དེ་ལྟར་དེ་བཞིན་བཞི་པ་ཡང་། །ཞེས་བཅོམ་ལྡན་འདས་ཀྱིས་གསུངས་པ་ཉིད་ཀྱི་ཕྱིར། སློབ་དཔོན་བདག་ཉིད་ཀྱི་རྣམ་པར་རྟོག་པས་བཞི་པ་དམ་པ་མ་ཡིན་དུ་

44-1-200b

ཟིན་ཀྱང་། རྣམ་པ་སྣ་ཚོགས་སུ་རྣམ་པར་རྟོག་པར་འགྱུར་ཏེ། ཇི་ལྟར་ལས་ཀྱི་ཕྱག་རྒྱ་ལ་ཀུན་དུ་སྦྱོར་བའི་རྡོ་རྗེའི་རྩེ་མོའི་ཆ་ལ་གནས་པའི་བདེ་བ་གང་ཡིན་པ་དེ་ཤེས་རབ་ཡེ་ཤེས་ཏེ། གང་དེ་ལས་འཕོས་པའི་བྱང་ཆུབ་ཀྱི་སེམས་གང་ཡིན་པ་དེ་བཞི་པ་ཡིན་ནོ། །དེ་བཞིན་དུ་ཤེས་རབ་
ཡེ་ཤེས་ཀྱི་དེ་མ་ཐག་པ་བྱང་ཆུབ་ཀྱི་སེམས་ལྕེས་བཟུང་བ་གང་ཡིན་པ་དེ་བཞི་པ་ཡིན་ནོ། །དེ་བཞིན་དུ་དེ་མ་ཐག་པ་ཁོ་ན་སྟེ། ཤེས་རབ་གཞན་ལས་ལོངས་སྤྱོད་པ་གང་ཡིན་པ་དེ་བཞི་པ་ཡིན་ནོ། །དེ་བཞིན་དུ་ཤེས་རབ་ཡེ་ཤེས་ཀྱི་དེ་མ་ཐག་པ་ཁོ་ནར་བདུད་རྩི་ལྔ་དང་ཤ་ཆེན་ལྔས་ཆོས་
འབྱུང་བའི་ཕྱག་རྒྱར་བཅུག་པ་བཟའ་བ་གང་ཡིན་པ་དེ་བཞི་པ་ཡིན་ནོ། །དེ་བཞིན་དུ་དེ་མ་ཐག་པ་ཉིད་དུ་ཡང་ཤེས་རབ་དེ་ཉིད་ཀྱི་གང་ཤེས་པ་དེ་ནི་བཞི་པ་ཡིན་ནོ། །དེ་བཞིན་དུ་ཤེས་རབ་ཡེ་ཤེས་ཀྱི་མཐར་རྡོ་རྗེ་འཆང་གི་ངོ་བོར་དབུགས་དབྱུང་བ་ནི་བཞི་པའོ། །དེ་བཞིན་དུ་དེ་མ་ཐག་པ་
འདི་ཆགས་པ་དང་བྲལ་བའི་སེམས་ལས་འདས་པའི་མཐར་ལྷན་ཅིག་སྐྱེས་པའི་གནས་སྐབས་སུ་བཏང་སྙོམས་ཀྱི་ཤེས་པ་བསམ་གྱིས་མི་ཁྱབ་པའོ་ཞེས་རྟོགས་པ་ནི་བཞི་པའོ། །དེ་བཞིན་དུ་དེ་མ་ཐག་པ་ཉིད་དུ་ཁམས་གསུམ་པ་འདི་དག་ཐམས་ཅད་རང་རིག་པའི་རང་བཞིན་ནོ་ཞེས་རྟོག་
པ་དེ་བཞི་པ་ཡིན་ནོ། །དེ་བཞིན་དུ་ཤེས་རབ་ཡེ་ཤེས་ཀྱི་དེ་མ་ཐག་པ་ཉིད་དུ་ཁམས་གསུམ་པ་འདི་དག་ཐམས་ཅད་བརྫུན་པའི་ངོ་བོ་ཉིད་དོ་ཞེས་བྱ་བར་རྟོགས་པ་གང་ཡིན་པ་དེ་བཞི་པ་ཡིན་ནོ། །དེ་བཞིན་དུ་དེ་མ་ཐག་པ་ཉིད་དུ་སྣའི་བུ་གར་རླུང་ཞུགས་པ་དང་། འབྱུང་བ་དག་གི་བར་གང་
ཡིན་པ་དེ་བཞི་པ་ཡིན་ནོ། །དེ་བཞིན་དུ་དེ་མ་ཐག་པ་ཉིད་དུ་དབུགས་འགགས་པ་གོམས་པར་བྱེད་པ་དེ་བཞི་པ་ཡིན་ནོ། །དེ་བཞིན་དུ་དེ་མ་ཐག་པ་ཉིད་དུ་ལྕེའུ་ཆུང་གིས་རོ་བདུད་རྩི་བཏུང་བ་དེ་བཞི་པ་ཡིན་ནོ། །དེ་བཞིན་དུ་དེ་མ་ཐག་པ་ཉིད་དུ་བུད་མེད་ཀྱི་ལས་ཀྱི་ཕྱག་རྒྱ་དང་། རིག་པ་འཛིན་མ་
ལ་སོགས་པ་སྟོན་པ་གང་ཡིན་པ་དེ་བཞི་པ་ཡིན་ཏེ། དེ་སྐད་དུ། ལས་ཀྱི་ཕྱག་རྒྱ་ཁྲོ་རྒྱུན་ཅན། །ཐག་རིངས་ཡོངས་སུ་སྤང་བར་བྱ། །ཞེས་གསུངས་སོ། །དེ་བཞིན་དུ་དེ་མ་ཐག་པ་ཉིད་དུ་ལས་ཀྱི་ཕྱག་རྒྱ་ཡོངས་སུ་སྤངས་ནས་ཡེ་ཤེས་ཀྱི་ཕྱག་རྒྱ་བསྟེན་པ་གང་ཡིན་པ་དེ་བཞི་པ་ཡིན་ནོ། །

44-1-201a

དེ་བཞིན་དུ་དེ་མ་ཐག་པ་ཉིད་ཀྱི་ཕྱག་རྒྱ་ཡང་རྣམ་པར་སྤངས་ནས། སྟོང་པ་ཉིད་ཀྱི་ངོ་བོ་ཕྱག་རྒྱ་ཆེན་པོ་གཅིག་པུ་བསྒོམ་པ་གང་ཡིན་པ་དེ་བཞི་པ་ཡིན་ནོ། །དེ་བཞིན་དུ་དེ་མ་ཐག་པ་ཉིད་དུ་འདོད་པའི་ཡོན་ཏན་ལྔ་པོ་རྒྱུན་མི་འཆད་པ་བསྟེན་པ་གང་ཡིན་པ་དེ་བཞི་པ་
ཡིན་ནོ། །དེ་བཞིན་དུ་ཐིག་ལེ་དང་ནཱ་ད་ལས་འདས་ནས་སྙིང་གར་བཞུགས་པར་བསམས་པ་དེ་ནི་བཞི་པ་ཡིན་ནོ་ཞེས་བྱ་བ་ལ་སོགས་པ་རང་གི་རྣམ་པར་རྟོག་པའི་བཟོས་རྣམ་པར་བརྟགས་པ་རྣམ་པ་སྣ་ཚོགས་པ་དེ་དག་བཞི་པར་བདག་མི་འདོད་དེ། ཡན་ལག་བདུན་དང་བྲལ་བ་ཉིད་
ཀྱིས་སྙིང་པོ་མེད་པའི་ཕྱིར་རོ། །སློབ་དཔོན་ངག་གི་དབང་ཕྱུག་གྲགས་པའི་བཞེད་གཞུང་ཡན་ལག་བདུན་དང་ལྡན་པའི་བསྒྲུབ་པར་བྱ་བ་བཞི་པ་ལས། བཞི་པ་སྒྲུབ་པའི་ལེའུ་སྟེ་གསུམ་པའོ།།      །།ཇི་ལྟར་དཔེ་ཆུང་ངུ་བྲིས་པའི་རྣམ་པ་བདུན་པོ་གང་ཡིན་པ་དེ་དག་ཐམས་ཅད་
ཉིད་ཡན་ལག་བདུན་དང་ལྡན་པའམ། བཞི་པའི་མཚན་ཉིད་དང་ལྡན་པ་ཡིན་ནམ། འོན་ཏེ་འགའ་ཞིག་དང་ལྡན་ཞེ་ན། སྨྲས་པ། དེ་དག་ཐམས་ཅད་ཡན་ལག་བདུན་དང་ལྡན་པ་མ་ཡིན་ཏེ། འདི་ལྟར། དེ་ལ་དང་པོའི་རྣམ་པ་ནི། །ཞེས་བྱ་བ་ཡན་ལག་གཅིག་དང་བྲལ་བ་དང་། རྣམ་
པ་གཉིས་པ་ནི་ལོངས་སྤྱོད་རྫོགས་པ་དང་། ཁ་སྦྱར་དག་དང་བྲལ་བ་ཉིད་ཡིན་པའི་ཕྱིར་ཡན་ལག་གཉིས་དང་བྲལ་བ་དང་། རྣམ་པ་གསུམ་པ་ནི་འབྲས་བུའི་གནས་སྐབས་ན་རྣམ་པ་གཉིས་པ་དང་བྲལ་བར་ཡན་ལག་གཉིས་དང་བྲལ་བ་དང་། རྣམ་པ་བཞི་པ་ནི་ཡན་ལག་བདུན་པ་
རྫོགས་པ་དང་བྲལ་བ་ཡིན་ནོ། །རྣམ་པ་ལྔ་པ་ནི་འབྲས་བུའི་གནས་སྐབས་ལོངས་སྤྱོད་རྫོགས་པ་དང་ཁ་སྦྱར་དང་བདེ་བ་ཆེན་པོ་སྟེ། ཡན་ལག་གསུམ་དང་བྲལ་བ་དང་། རྣམ་པ་དྲུག་པ་ནི་རྒྱུན་མི་འཆད་པ་ཞེས་བྱ་བའི་ཡན་ལག་གཅིག་དང་བྲལ་བ་དང་། རྣམ་པ་བདུན་པ་ནི་འབྲས་བུའི་གནས་
སྐབས་ན་ཡན་ལག་ཐམས་ཅད་དང་བྲལ་བ་ཡིན་ནོ། །ད་ནི་བཞི་པའི་མཚན་ཉིད་དང་བྲལ་བ་དང་མ་བྲལ་བ་བསྟན་པར་བྱ་བ་ཡིན་པས། དེ་ལ་རྣམ་པ་དང་པོ། དེ་ལྟར་སྒྲས་བརྗོད་ལྡན་ཉིད་ཕྱིར། །ཞེས་བྱ་བའི་མཚན་ཉིད་དང་བྲལ་བ་ཡིན་ཏེ། ཤེས་རབ་ཡེ་ཤེས་དང་འདྲ་བའི་ངོ་བོ་ཉིད་

44-1-201b

འབྲས་བུའི་གནས་སྐབས་ན་མེད་པའི་ཕྱིར་རོ། །མཚན་ཉིད་ལྷག་མ་གཉིས་ནི་ཡོད་པ་ཉིད་དོ། །རྣམ་པ་གཉིས་པ་ན། དེ་བཞིན་སྒྲ་དོན་སྐྱེས་ཉིད་ཕྱིར། །ཞེས་བྱ་བའི་མཚན་ཉིད་དང་བྲལ་བ་ཡིན་ཏེ། ལྷ་ཉིད་ལ་ལྟོས་པ་མེད་པའི་བདེ་བ་འབའ་ཞིག་ཙམ་བསྒོམ་པའི་ཕྱིར་རོ། །མཚན་ཉིད་
ལྷག་མ་གཉིས་ནི་ཡོད་དོ། །རྣམ་པ་གསུམ་པ་ནི་འབྲས་བུའི་གནས་སྐབས་ན། དེ་བཞིན་སྒྲ་དོན་སྐྱེས་པའི་ཕྱིར། །ཞེས་བྱ་བའི་མཚན་ཉིད་དང་བྲལ་བ་ཡིན་ལ་ལྷག་མ་ནི་ཡོད་དོ། །རྣམ་པ་བཞི་པ་ནི་མཚན་ཉིད་གསུམ་པོ་དང་ལྡན་པ་ཡིན་ནོ། །རྣམ་པ་ལྔ་པ་ནི་འབྲས་བུའི་གནས་
སྐབས་ན། དེ་ལྟར་སྒྲས་བརྗོད་ལྡན་ཉིད་ཕྱིར། །ཞེས་བྱ་བ་དང་། དེ་བཞིན་སྒྲ་དོན་སྐྱེས་ཉིད་ཕྱིར། །ཞེས་བྱ་བའི་མཚན་ཉིད་དག་དང་བྲལ་བའོ། །རྣམ་པ་དྲུག་པ་ནི་ཡང་གི་སྒྲའི་ཕྱོགས་གཅིག་དང་བྲལ་བ་ཡིན་ཏེ། ཡང་གི་སྒྲའི་དོན་ནི་ཟག་པ་མེད་པ་ཉིད་དང་། གྱ་ནོམ་པ་ཉིད་དང་། ཆེ་བ་ཉིད་
དང་། འཁོར་བ་ཇི་སྲིད་བར་བཞུགས་པ་ཉིད་ཅེས་བྱ་བའི་ཁྱད་པར་རྣམས་ཡིན་ལ། དེའི་ཕྱོགས་གཅིག་རྒྱུན་མི་འཆད་པ་ཉིད་རྣམ་པ་དྲུག་པ་ལ་མེད་དེ་བར་དུ་རྒྱུན་ཆད་པའི་ཕྱིར་རོ། །རྣམ་པ་བདུན་པའི་བཞི་པའི་མཚན་ཉིད་གསུམ་ཀ་དང་བྲལ་བ་ཡིན་པའི་ཕྱིར་རོ། །འདིར་ཡང་ཡན་ལག་དང་
བྲལ་བ་དང་། མཚན་ཉིད་དང་བྲལ་བའི་རྣམ་པ་ཡང་དེ་དག་གི་འདོད་པས་བསྒོམས་པར་འགྱུར་ཏེ། རིག་པ་མེད་པར་རང་དབང་དང་འདོད་པས་འཇུག་པ་དག་ནི་སངས་རྒྱས་ཀྱིས་བཟློག་པར་ཡང་མི་སྤྱོད་དོ། །སློབ་དཔོན་ངག་གི་དབང་ཕྱུག་གྲགས་པའི་བཞེད་གཞུང་ཡན་ལག་བདུན་
དང་ལྡན་པའི་བསྒྲུབ་པར་བྱ་བ་བཞི་པ་ལས། རྣམ་པ་བདུན་པོ་དང་མཚན་ཉིད་དང་བྲལ་མ་བྲལ་སྤྱོད་པའི་ལེའུ་སྟེ་བཞི་པའོ།།      །།དེ་ལྟར་ཡན་ལག་བདུན་དང་ལྡན་པའི་བསྒྲུབ་བྱ་འཇམ་པའི་རྡོ་རྗེ་ལ་སོགས་པའི་ངོ་བོ་འབའ་ཞིག་ཙམ་ཞིག་བསྒོམ་པར་བྱའམ་འཁོར་ལོ་ཅན་བསྒོམ་པར་
བྱ་བ་ལ། ཤེས་རབ་ཀྱིས་གཏན་ལ་ཕབ་པ་ལ་དད་པ་ཆེན་པོ་བྱས་ནས་བསྒོམ་པར་འདོད་པས་རབ་ཏུ་འབད་པར་བྱ་སྟེ། དེ་སྐད་དུ། དད་པ་ཉིད་ཀྱིས་ཆོས་རྣམས་བསྟེན། །ཤེས་རབ་ལྡན་ཕྱིར་དེ་ཉིད་རིག །འདི་གཉིས་གཙོ་བོ་ཤེས་རབ་སྟེ། །འདི་ཡི་སྔོན་འགྲོ་དད་པ་ཡིན། །སྔོན་དུ་

44-1-202a

འགྲོ་བའི་རིགས་པ་འདིས། །དད་པ་ཐེག་པ་མཆོག་ཡིན་ཏེ། །དེ་ཕྱིར་བློ་ཅན་འགྲོ་བ་ཡིས། །དད་པ་རྗེས་སུ་བསྟེན་པར་བྱ། །དད་པ་མེད་པའི་མི་དག་ལ། །དཀར་པོའི་ཆོས་རྣམས་མི་སྐྱེ་སྟེ། །མེ་ཡིས་ཚིག་པའི་ས་བོན་ལས། །ལྗང་བུ་སྔོན་པོ་མི་སྐྱེ་ལྟར། །
ཞེས་གསུངས་སོ། །དེ་ལ་ཡིད་དང་འཐད་པའི་གནས་འགའ་ཞིག་ཏུ་འདུག་སྟེ། ཡེ་ཤེས་ཞབས་ཀྱི་ཀུན་དུ་བཟང་པོའི་སྒྲུབ་ཐབས་ལས་སྨོས་པའི་ཁ་གདོང་ལ་སོགས་པ་ཡོངས་སུ་དག་པ་སྔོན་དུ་སོང་བ་དང་། སྡིག་པ་བཤགས་པ་ལ་སོགས་པ་དང་།བསྐྱེད་པའི་རིམ་པའི་ཡན་ལག་བཞི་
བསྙེན་པ་ལ་སོགས་པ་སྔོན་དུ་སོང་བའི་ཇི་སྲིད་ཐིག་ལེའི་རྣལ་འབྱོར་དང་། ཕྲ་མོའི་རྣལ་འབྱོར་མཐར་ཐུག་པ་མ་ཚང་བ་མེད་པའི་ནན་ཏན་གྱི་ཆོ་གས་ཇི་སྲིད་དུ་མངོན་སུམ་དུ་གྱུར་པ་དེ་སྲིད་དུ་དུས་གསུམ་མམ། དུས་བཞིའམ། དུས་དྲུག་ཏུ་བསྒོམ་པར་བྱའོ། །ཅུང་ཞིག་ན་མཚན་མ་རྙེད་པར་
གྱུར་ན་རྣམ་པ་ཐམས་ཅད་ཀྱི་མཆོག་དང་ལྡན་པ་བསྐྱེད་པའི་རིམ་པ་ལ་ལྟོས་པ་མེད་པར་སྐད་ཅིག་ཉིད་ལ་བསྒོམ་པར་བྱ་སྟེ། དེ་སྐད་དུ། རྣམ་པ་ཀུན་གྱི་མཆོག་ལྡན་པའི། །སྤྲོ་དང་བསྡུ་བ་མཛད་པའོ། །ཞེས་པའི་སྐད་ཅིག་གིས་བསྒྲུབས་པའི། །རྣལ་འབྱོར་རྫོགས་པ་དག་ཏུ་
བཤད། །དེ་བཞིན་དུ། དེ་ལྟར་རྟོགས་ནས་སྙིང་རྗེར་ལྡན་པ་དང་། །ཡེ་ཤེས་བསམ་ཡས་སྐད་ཅིག་གིས་བསྒྲུབས་པ། །དཔལ་ལྡན་ཀུན་དུ་བཟང་པོའི་རང་བཞིན་གྱིས། །ངོ་བོ་སུ་ཞིག་ངེས་པར་སྒོམ་མི་བྱེད། །ཅེས་གསུངས་སོ། །དེ་ཉིད་ཡུན་རིང་པོར་གུས་པ་དང་བཅས་པ་
རྒྱུན་མ་ཆད་པར་བསྒོམས་པར་གྱུར་ན། ཚེ་དེ་ཉིད་ལ་ཟླ་བ་དྲུག་ལ་སོགས་པས་མངོན་སུམ་དུ་གྱུར་པ་ཐེ་ཚོམ་མི་བྱའོ། །དེ་སྐད་དུ་ཡང་། ཚོགས་གཉིས་དག་ནི་རྫོགས་པ་ལས། །བྱང་ཆུབ་རྒྱུ་མཚན་ཡོད་མ་ཡིན། །ཚེ་འདི་ཉིད་ལ་སངས་རྒྱས་ཉིད། །འགྱུར་བ་གང་གིས་ཟློག་པར་
བྱེད། །དེ་བཞིན་དུ། ཀྱེ་མའོ་རྨོངས་ཉིད་ཀྱེ་མའོ་སྙོམ་ལས་ཅན། །མཛེས་པའི་དོན་ཡོད་ཀྱེ་མ་སྐྱེ་བོ་འདི། །རང་སེམས་ཙམ་དང་འབྲེལ་པའི་སངས་རྒྱས་ཉིད། །མདུན་ན་གནས་ཀྱང་གང་ཞིག་བསྟེན་མི་བྱེད། །ཅེས་གསུངས་སོ། །ཁྱིམ་ནོར་བུ་སོགས་སྡུག་བསྔལ་སྐད་ཅིག་

44-1-202b

མ། །ཡང་འདི་མི་དགེ་བ་ཞེས་ཤེས་བྱས་ནས། །བསོད་སྙོམས་གཅིག་པུ་ཙམ་གྱིས་འཚོ་བྱ་བ། །ནགས་རི་རྒལ་དཀའ་བསྟེན་ལ་བསམ་གཏན་གྱིས། །མི་ལུས་ཤིན་ཏུ་རྙེད་དཀའ་རྙེད་གྱུར་ནས། །དོན་དུ་བརྣག་པ་གང་ཡིན་བརྟུལ་ཏེ་སྒྲུབ། །ཤུགས་དྲག་རླུང་གིས་བསྐྱོད་པའི་མར་མེ་
ལྟར། །ཚེ་ནི་སྐད་ཅིག་གནས་པའི་གདེང་ཡོད་མིན། །བདག་གིས་སང་ནི་འདི་བྱ་གནང་ནི་འདི་དང་འདི་དག་བྱ། །བསམ་པ་དོན་མེད་རྙེད་འགྱུར་སྲིད་པ་མི་བརྟན་མི་རྟག་སྟེ། །འགྲོ་བ་བྱ་བ་མཐར་མ་ཕྱུང་བས་ཡུལ་གྱི་ཆུར་ལྷུང་སྟེ། །ཆུ་སྲིན་ཁར་མཚུངས་འཆི་བའི་སྒོར་ནི་རབ་ཏུ་ཞུགས་པར་
གྱུར། །གང་ཞིག་བསམས་ཏེ་བྱར་བརྩམས་ན། །དེ་ལས་གཞན་དུ་མི་བསམ་སྟེ། །དེར་གཏད་པ་ཡི་སེམས་པ་ཡིས། །དེ་ཉིད་རེ་ཞིག་བསྒྲུབ་པར་བྱ། །རྟ་བདུན་གྱིས་དྲངས་འཁོར་ལོ་གཅིག་པའི་ཤིང་རྟར་ཞུགས་ནས་ནི། །ལམ་ཡང་དམིགས་པར་མ་གྱུར་ཁ་ལོས་སྒྱུར་བ་དག་ཀྱང་རྐང་
པ་མེད། །ཉི་མའི་བདག་ཉིད་ཉིན་རེ་མཐར་མེད་ནམ་མཁའི་མཐར་ཡང་འགྲོ་ཞིང་བསྐོར། །སྐྱེས་བུ་ཡིད་བརྟན་གྱུར་པས་མཐར་ཐུག་ཕན་བྱེད་བྱ་བ་ཅིས་མི་སྒྲུབ། །འཇིག་རྟེན་མ་ལུས་པ་དག་བསྲེག་བྱ་ཞེས། །གལ་ཏེ་འབད་ཀྱང་གྲུབ་པར་མི་འགྱུར་བཞིན། །ཤིན་ཏུ་བརྟུན་པས་མཉམ་
མེད་ལས་བྱེད་པ། །སྙན་མིན་སྨད་པའི་ལས་ཡིན་ཡིད་བརྟེན་དག་གིས་མིན། །ས་གཞི་ཉི་མས་གདུངས་པའི་སྟེང་གི་སྨིག་རྒྱུ་ལ་ནི་རི་དྭགས་གང་། །སྐོམ་པས་གདུངས་པར་གྱུར་པ་ཆུ་ཚོལ་བྱེད་པས་ལུས་དུབ་ཀྱང་མི་ལྡོག །དེ་ཉིད་ཤེས་པར་མ་གྱུར་པས་ན་ཆུ་གཞན་དག་ཀྱང་ཚོལ་མི་བྱེད། །
གནས་མིན་པ་ལ་ཆགས་པར་གྱུར་པའང་འབྲས་བུ་བགེགས་ཀྱང་བྱེད། །ཅེས་བྱ་བ་ནི་བསྒོམ་པའི་དོན་ལ་རབ་ཏུ་སྤྲོ་བ་བསྐྱེད་པའོ། །དེ་ལྟར་བདེ་གཤེགས་བསྟན་པ་རྒྱ་མཚོ་བློ་ཡི་སྲུབ་ཤིང་གིས་བསྲུབས་ནས། །ལྷ་ཡི་ཚོགས་ཀྱིས་བདུད་རྩི་བཞིན་དུ་བདག་གིས་བསོད་ནམས་གང་ཐོབ་པ། །
དེས་ནི་སྲིད་གསུམ་སྐྱེ་བོ་མཐའ་དག་མ་ལུས་པ་ཡིས་ཡན་ལག་བདུན། །རྟོགས་པར་གྱུར་ནས་དོན་དམ་ཉིད་ནི་མྱུར་དུ་ཐོབ་འགྱུར་ཤོག །དཔལ་ལྡན་གསང་བ་འདུས་པ་ལས། །དྲི་མེད་དང་མཆོག་མཐར་ཕྱིན་པས། །ངག་གི་དབང་ཕྱུག་དེ་ཡིས་འདི། །བྱས་པས་བློ་ངན་འཇིག་གྱུར་ཅིག །

44-1-203a

སློབ་དཔོན་ངག་གི་དབང་ཕྱུག་གྲགས་པའི་བཞེད་གཞུང་ཡན་ལག་བདུན་དང་ལྡན་པའི་བསྒྲུབ་པར་བྱ་བ་བཞི་པ་ལས། བསྒོམ་པ་ལ་སྤྲོ་བ་བསྐྱེད་པའི་ལེའུ་ཞེས་བྱ་བ་སྟེ་ལྔ་པའོ།།      །།ཡན་ལག་བདུན་དང་ལྡན་པའི་བསྒྲུབ་པར་བྱ་བའི་ཚིགས་སུ་བཅད་པ་གཉིས་
ཀྱི་བཤད་པ་རྫོགས་སོ།།      །།གཞུང་འདི་མཁས་པ་རྣམས་ཀྱིས་ནི། །ལེགས་པར་རྣམ་པར་བརྩི་བྱས་ནས། །བརྒྱ་ཕྲག་རྣམ་པ་བཞི་དག་དང་། །ཉི་ཤུ་རྩ་ལྔར་ཡང་དག་ལྡན། །སློབ་དཔོན་ངག་གི་དབང་ཕྱུག་གྲགས་པས་མཛད་པའི་ཡན་ལག་བདུན་དང་ལྡན་པའི་བཞི་པ་རྫོགས་
སོ།།      །།ལོ་ཙཱ་བ་འགོས་ལྷས་བཙས་ཀྱིས་རྒྱ་གར་ཤར་ཕྱོགས་ཀྱི་དཔེ་ལས་ཞུ་གཏུགས་གཡར་ཁྲལ་འཚལ་བ་ལགས་སོ།།༄༅༅། །རྒྱ་གར་སྐད་དུ། ཏཏྟྭཱ་རཏྣ་ཨཱ་ལོ་ཀ། བོད་སྐད་དུ། དེ་ཁོ་ན་ཉིད་རིན་པོ་ཆེ་སྣང་བ། བཅོམ་ལྡན་འདས་འཇམ་པའི་རྡོ་རྗེ་
ལ་ཕྱག་འཚལ་ལོ། །དཔེ་མེད་བདེ་བའི་ངོ་བོ་དཔལ་གྱི་གནས་གྱུར་གནས་འདྲེན་པ། །དཔེ་མེད་ལྷ་མོ་བཅུ་ཡི་ངོ་བོ་རིག་དང་རིག་པར་བཅས། །སྲིད་པ་གསུམ་ཕན་བདེ་བ་ཐོབ་མཛད་འགྱུར་མིན་འགྱུར་བ་མེད། །ཇི་སྲིད་རེ་བ་སྣང་བར་ཕྱག་ན་པདྨ་རྒྱལ་གྱུར་ཅིག །དཔལ་ལྡན་
སྔགས་ཀྱི་གཞུང་ལུགས་མཛེས་པའི་དབང་བཞིའི་ངོ་བོ་དག །རབ་ཏུ་གསལ་བའི་སྒྲས་སྟོང་གྱུར་པས་གང་གིས་མི་ཤེས་ཤིང་། །དུ་མའི་མན་ངག་བདུན་གྱི་དབྱེ་བའི་ཚོགས་ཀྱིས་ཡོངས་འཁྲུགས་པ། །དེ་དག་རྣམས་ཀྱིས་གསལ་བར་རྟོགས་པར་བྱ་ཕྱིར་འབད་པས་བྱ། །དེ་ཉིད་
བསྒྲུབ་བྱའི་ངོ་བོར་རིག་པ་ལ། །མུ་སྟེགས་མ་ལུས་བློ་རྣམས་རྣམ་པར་འཁྲུལ། །དེ་ལས་རིག་བྱེད་མཐར་ནི་སྨྲ་བ་ཡི། །སྐྱེ་བོ་རྣམས་ནི་དེ་ཉིད་མཆོག་ཅེས་སྨྲ། །དགའ་བའི་ངོ་བོ་རང་རིག་མི་གཡོ་ཞིང་། །བསྒྲུབ་བྱར་འདོད་པ་རིག་བྱེད་མཐའ་ཅན་པའོ། །ཉན་ཐོས་རང་རྒྱལ་བཅས་པ་
གཟུགས་ལ་སོགས། །ཕུང་པོ་དག་དང་བྲལ་བ་བསྒྲུབ་བྱར་འདོད། །རྣམ་པས་སྟོང་པ་ནམ་མཁའ་ཟླ་བའི་ངོ་བོ་ཉིད། །སོ་སོར་རང་རིག་སྙིང་རྗེའི་རང་བཞིན་ཅན། །མཛེས་པའི་མཚན་རྣམས་ཀྱིས་བརྒྱན་དོན་མཛད་པ། །སྦྱིན་ལ་སོགས་པའི་རྒྱུ་མཐུན་བདེ་བྲལ་བ། །སྦྱིན་སོགས་ཕ་རོལ་

44-1-203b

ཕྱིན་དྲུག་ཚུལ་གནས་པ། །དཀའ་བཅས་སྐུ་ནི་མཛེས་པའི་མཚན་གྱིས་བརྒྱན། །ས་བཅུར་བཞུགས་པས་ཡང་དག་ལོངས་སྤྱོད་པ། །འགྲོ་དོན་མཛད་པ་བསྒྲུབ་བྱར་རབ་ཏུ་སྨྲ། །སྦྱིན་སོགས་ཡོན་ཏན་མ་ལུས་ཡོངས་རྫོགས་པ། །རྫོགས་སངས་མཛད་པ་མ་ལུས་མཛད་ནས་ནི། །གང་
ཞིག་ཡང་དག་མཐའ་ནི་མངོན་མཛད་པ། །འགོག་པའི་ངོ་བོ་བསྒྲུབ་བྱ་ཡང་དག་ཡོད། །ཉིད་མཚུངས་ལྷ་མོས་འཁྱུད་ཅིང་འགྲོ་བ་ཡི། །དོན་མཛད་བདེ་སྡུག་ཉིད་བྲལ་ངོ་བོ་ཉིད། །སྐུ་ནི་དཔེ་བྱད་བཟང་པོ་བརྒྱད་ཅུས་བརྒྱན། །རྟོག་པ་དང་བྲལ་བསྒྲུབ་བྱར་རབ་ཏུ་འཆད། །དང་པོ་ཉིད་ནས་ལྷ་ཡི་
རྣམ་པ་དག །ཁྱད་པར་གྱིས་སྟོང་བདེ་བ་ཡང་དག་བསྒོམ། །གསལ་འགྱུར་བདེ་ཆེན་འགྲོ་བའི་དོན་མཛད་པ། །ཡིད་བཞིན་ནོར་བུར་གྲགས་པ་ཁ་ཅིག་སྨྲ། །རང་བདག་བདེ་བའི་ངོ་བོ་མངོན་བྱས་ནས། །ཕྱིས་བཏང་བདེ་བ་ཙམ་ཞིག་འབྲས་འགྱུར་བའོ། །དག་པ་མངོན་སུམ་བྱེད་པར་ནུས་
མེད་ནས། །དེ་ཕྱིར་བདག་པོའི་རྣམ་པ་བསྒོམ་པ་ཡིན། །སྐུ་ནི་ནམ་མཁའ་དང་མཚུངས་ཡན་ལག་མཚན་གྱིས་བརྒྱན། །དཔེ་མེད་བདེ་བས་གང་བ་ཉིད་དང་མཚུངས་པར་འདུས་པ་དང་། །ཐུབ་པའི་དབང་པོ་འཕྲོ་བས་སེམས་ཅན་རྣམས་ཀྱི་དོན་མཛད་པ། །ཆད་པས་སྟོང་པ་བསྒྲུབ་བྱ་ཉིད་དུ་
གཞན་དག་རབ་ཏུ་སྨྲ། །རང་བདག་བདེ་བའི་ངོ་བོ་མངོན་བྱས་ནས། །བཏང་སྙོམས་ངོ་བོ་ཡེ་ཤེས་ཙམ་འབྲས་བུ། །འཁོར་བ་སྲིད་ཞུགས་སེམས་ཅན་དོན་མཛད་པ། །ཡིད་བཞིན་ནོར་གྲགས་གཅིག་ཏུ་ཞི་གྱུར་པའོ། །དཀྱིལ་འཁོར་བདེ་གང་མངོན་སུམ་བྱས་ནས་ནི། །ཕྱིས་ནི་དེ་རང་འདོད་
པས་ངེས་ལྡོག་པ། །སེམས་ཅན་དོན་ཡང་ཡོད་དེ་འདིར་མེད་མིན། །གང་ཕྱིར་ངེས་པར་ལྡོག་ལས་རབ་ཏུ་བྱུང་། །དེ་རྣམས་ལས་འདོད་ངོ་བོ་གསལ་བྱས་ལ། །ཕྱིར་ནི་འགོག་པས་འབྲས་བུ་ཁ་ཅིག་སྨྲ། །གང་ཕྱིར་འགོག་པའི་ངོ་བོ་ཐ་དད་མིན། །དེ་ཕྱིར་ཐ་དད་ཕྱོགས་ཀྱིའམ་ཐ་དད་མེད། །
ཤེས་རབ་ཡེ་ཤེས་ཕྱིས་ནི་བྱང་ཆུབ་སེམས། །རོ་མྱང་དབང་བཞིར་འཆད་པ་དེ་མཆོག་མིན། །གང་ཕྱིར་བསྒོམ་སོགས་ཀུན་སྩོལ་དོན་མེད་པ། །ཐོབ་འགྱུར་དེ་འབྲས་རབ་ཏུ་མི་རུང་ཕྱིར། །ཤེས་རབ་ཡེ་ཤེས་ཕྱིར་ནི་དགའ་བའི་རོ། །མྱོང་རྙེད་དབང་བསྐུར་བཞིར་སྨྲ་དེ་དམན་ཏེ། །གང་ཕྱིར་

44-1-204a

བསྒོམ་སོགས་ཀུན་ལ་རབ་ཏུ་སྩོལ། །སངས་རྒྱས་ཀྱིས་གསུངས་འབྲས་མེད་རབ་ཐལ་འགྱུར། །རྡོ་རྗེའི་ས་བོན་དྲི་མེད་དགའ་འབབ་པ། །དག་པའི་ཆུ་སྐྱེས་ཡང་དག་མྱུ་གུ་འབྱུང་རྒྱས་ཤིང་། །བཞི་པའི་འབྲུ་ནི་ཡོངས་གསལ་སྨིན་འགྱུར་བའི། །བཞི་པ་དག་
ནི་མཁས་པ་རྣམས་ལ་སྦས། །གསལ་བྱེད་བདུད་རྩི་ལྔ་དང་ཐིག་ལེ་ཟླ་བ་དང་། །སྨིན་དབུས་ཐིག་ལེ་ལས་བྱུང་དཀྱིལ་འཁོར་དང་། །རླུང་གི་རང་བཞིན་ལྕེའུ་ཆུང་སོགས་དེ་ཉིད། །ངོ་བོ་མིན་པ་བདག་ཉིད་ཀྱིས་རྟག་ཏུ། །རྨི་ལམ་མིག་འཕྲུལ་གཟུགས་བརྙན་སྒྱུ་མ་དང་། །སྨིག་རྒྱུ་དྲི་མའི་
གྲོང་ཁྱེར་ཆུ་ཟླ་དང་། །གཞན་གྱི་སྒྲ་ཡིས་མངོན་པར་བརྗོད་པ་ཡིས། །འདིར་བཤད་བསྒྲུབ་བྱ་གཞན་ལ་ཡོད་མ་ཡིན། །ཟབ་མོ་སྟོང་ཉིད་སོ་སོར་སྣང་བ་ཙམ། །ཞི་བ་ཤིན་ཏུ་ཕྲ་བ་སྒྲས་བརྗོད་མིན། །གོས་མེད་དངོས་བྲལ་དྲི་མེད་ལ་སོགས་དང་། །གཞན་སྒྲུབ་ཡོད་པ་འཁྲུལ་པར་མི་
བྱའོ། །རྣམ་པ་བདུན་པོ་བཀོད་པའི་ངོ་བོ་དག་ལས་ནམ་མཁའ་མ་ལུས་པའི། །སློབ་དབྱིངས་ཁྱབ་པར་བྱེད་པའི་བསོད་ནམས་གང་ཞིག་བདག་གིས་ཐོབ་གྱུར་པ། །དེས་ནི་འཇིག་རྟེན་འདི་དག་དཔེ་མེད་པ་ཡི་རིག་མས་འཁྱུད་པར་འགྱུར་བ་ཡི། །མཛེས་པའི་སྐུ་ལས་རྒྱལ་
བའི་སྤྲུལ་པ་དག་གིས་འགྲོ་བའི་དོན་བྱེད་ཤོག །དེ་ཁོ་ན་ཉིད་རིན་པོ་ཆེ་སྣང་བ་སློབ་དཔོན་ངག་གི་དབང་ཕྱུག་གྲགས་པས་མཛད་པ་རྫོགས་སོ།།༄༅༅། །རྒྱ་གར་སྐད་དུ། ཏཏྟྭཱ་རཏྣ་ཨཱ་ལོ་ཀ་བྱཱ་ཁྱཱ་ན། བོད་སྐད་དུ། དེ་ཁོ་ན་ཉིད་རིན་པོ་ཆེ་སྣང་བའི་རྣམ་པར་བཤད་
པ། བཅོམ་ལྡན་འདས་གསུང་གི་དབང་ཕྱུག་ལ་ཕྱག་འཚལ་ལོ། །འོད་དཔག་མེད་པ་རིན་ཆེན་གྱིས། །འོད་ཀྱིས་སྤྱི་གཙུག་མཛེས་པ་ཡི། །འཇིག་རྟེན་དབང་ལ་ཕྱག་འཚལ་ལོ། །བཞི་པའི་སྣང་བར་རབ་བཤད་བྱ། །དཔེ་མེད་ཅེས་བྱ་བ་ལ་སོགས་པ་ལ་གང་གི་ཕྱག་ན་པདྨ་བསྣམས་
པ་དེ་ནི་ཕྱག་ན་པདྨ་སྟེ། བཅོམ་ལྡན་འདས་སྤྱན་རས་གཟིགས་དབང་ཕྱུག་ཡིན་ལ། དེ་རྒྱལ་བར་གྱུར་ཅིག་ཅེས་བྱ་བར་སྦྱར་རོ། །ཁྱད་པར་ཇི་ལྟ་བུ་ཞིག་དང་ལྡན་ཞེ་ན། དཔེ་མེད་ཅེས་བྱ་བ་ལ་སོགས་པ་སྨོས་ཏེ། དཔེ་མེད་པ་ནི་ཤིན་ཏུ་གྱ་ནོམ་པ་ཉིད་དང་། རྒྱ་ཆེ་བ་ཉིད་དང་། འཁོར་བའི་མཐའི་

44-1-204b

བར་དུ་གནས་པའི་མཚན་ཉིད་ཀྱི་ཆོས་དང་ལྡན་པ་སྟེ། གཞན་དག་ལ་དེ་མེད་པའི་ཕྱིར་རོ། །གང་གིས་རང་བཞིན་བདེ་བ་ཉིད་ཀྱི་ངོ་བོ་དཔེ་དང་བྲལ་བར་གྱུར་པ་དེ་ལ་དེ་སྐད་ཅེས་བྱའོ། །གཞན་ཡང་ཁྱད་པར་ཇི་ལྟ་བུ་ཞིག་དང་ལྡན་ཞེ་ན། དཔལ་དེ་བསོད་ནམས་དང་ཡེ་ཤེས་ཀྱི་ཚོགས་ཀྱི་
མཚན་ཉིད་ཡིན་ལ། དེའི་གནས་ནི་གཞིར་གྱུར་པ་གང་ཡིན་པ་དེ་ལ་དེ་སྐད་ཅེས་བྱའོ། །ཆོས་ཀྱི་སྐུའི་ངོ་བོ་ཉིད་ཀྱིས་ཀུན་དུ་འགྲོ་བ་ཉིད་ཡིན་པའི་ཕྱིར། སོ་སོར་ངེས་པའི་གནས་མེད་པས་ན་གནས་མེད་པའོ། །ཡང་ཁྱད་པར་ཅི་འདྲ་ཞེ་ན། དཔེ་མེད་རྣམས་ཏེ། གཟུགས་མཆོག་ཏུ་
གྱུར་པ་དང་། ན་ཚོད་དང་། སྒེག་པ་ལ་སོགས་པའི་ཉམས་དང་སྙིང་རྗེ་ཆེན་པོ་ལ་སོགས་པ་དང་ལྡན་པ་ཉིད་ཀྱིས་ན་དཔེ་མེད་པ་སྟེ། དཔེ་ལས་འདས་པའི་གཟུགས་རྡོ་རྗེ་ལ་སོགས་པ་ནས། སྒྲོལ་མའི་མཐར་ཐུག་པའི་ལྷ་མོ་བཅུའི་ངོ་བོ་རིག་མའི་འཁོར་གྱིས་བསྐོར་བ་གང་ལ་ཡོད་པ་དེ་
ལ་དེ་སྐད་ཅེས་བྱའོ། །དེ་ཉིད་ནི་རང་གི་འོད་ཀྱིས་རིག་པ་སྟེ། ཤེས་རབ་དང་ལྷན་ཅིག་འཇུག་པའི་ཕྱིར་རིག་པ་དང་བཅས་པའོ། །སྲིད་པ་གསུམ་ནི་འཇིག་རྟེན་གསུམ་ན་གནས་པའི་སྐྱེ་བོའོ། །གང་ལ་ཕན་པ་ནི་མ་འོངས་པའི་ཕན་པ་སྟེ། སངས་རྒྱས་ཉིད་ལ་སོགས་པའོ། །དེ་ལ་བདེ་
བ་ནི་འཕྲལ་གྱི་ཕན་པ་སྟེ། འཁོར་ལོས་སྒྱུར་བ་ཉིད་ལ་སོགས་པའོ། །དེ་ཐོབ་པ་ནི་རྙེད་པ་སྟེ་མངོན་དུ་བྱས་པའོ། །དེ་དག་སྒྲུབ་པར་མཛད་པོ་གང་ཡིན་པ་དེ་ལ་དེ་སྐད་ཅེས་བྱའོ། །ཡོངས་སུ་མྱ་ངན་ལས་མི་འདའ་བའི་ཆོས་ཉིད་ཀྱིས་མི་གནས་པའི་མྱ་ངན་ལས་འདས་པའི་ངོ་བོ་རྙེད་པས་རྣམ་པ་
གཞན་དུ་མི་འགྱུར་བའི་ཕྱིར་འགྱུར་བ་མེད་པ་ཡིན་ཏེ་དེ་ལྟ་བུའི་ཁྱད་པར་ཅན་གྱི་བཅོམ་ལྡན་འདས་རྒྱལ་བར་གྱུར་ཅིག་ཅེས་བྱ་བའོ། །དུས་ཇི་སྲིད་དུ་ཞེ་ན། ཇི་སྲིད་རེ་བ་སྣང་བར་ཞེས་བྱ་བ་སྨོས་ཏེ། རེ་བའི་ངོ་བོའི་སྒྲས་ནི་ཕྱོགས་བཅུ་ནམ་མཁའི་རང་བཞིན་པའམ། ཡང་ན་རེ་བ་སྟེ། སེམས་ཅན་
ཐམས་ཅད་སྲིད་པའི་ལོངས་སྤྱོད་ལ་སྲེག་པའོ། །རེ་བ་དེ་སྣང་བ་ནི་གསལ་བ་དང་། རབ་ཏུ་འཇུག་པ་དང་། རབ་ཏུ་སྐྱེ་བའི་བར་དུ་སྟེ། དེ་སྲིད་དུ་བཅོམ་ལྡན་འདས་རྒྱལ་བར་གྱུར་པ་ནི་ཁྱབ་འཇུག་དང་། ལྷ་ཆེན་པོ་དང་། ཚངས་པ་ལ་སོགས་པ་ཐམས་ཅད་ལས་ཁྱད་པར་དུ་འཕགས་པར་གྱུར་

44-1-205a

ཅིག་ཅེས་བྱ་བའི་དོན་ཏོ། །དེ་ལ་དཔེ་མེད་བདེ་བའི་ངོ་བོ་ཞེས་བྱ་བ་འདིས་ནི་རང་གི་དོན་ཕུན་སུམ་ཚོགས་པ་བསྟན་ཏོ། །དཔལ་གྱི་གནས་འགྱུར་ཞེས་བྱ་བ་ནི་དེའི་ཐབས་ཡིན་ཏེ་བསོད་ནམས་དང་ཡེ་ཤེས་ཀྱི་ཚོགས་དག་ནི་དཔལ་གྱི་སྒྲས་མངོན་པར་བརྗོད་པའི་ཕྱིར་
རོ། །སྲིད་པ་གསུམ་ན་ཕན་དང་བདེ་བ་ཐོབ་པར་མཛད། །ཅེས་བྱ་བ་འདིས་ནི་གཞན་གྱི་དོན་ཕུན་སུམ་ཚོགས་པ་བསྟན་ཏོ། །དཔེ་མེད་ལྷ་མོ་བཅུ་ཡི་ངོ་བོ་རིག་དང་རིག་མར་བཅས། །ཞེས་བྱ་བ་འདིས་ནི་དེའི་ཐབས་ཡིན་ཏེ། ལྷ་མོ་བཅུ་དང་དམ་པའི་སྐུ་མཚན་སུམ་ཅུ་རྩ་གཉིས་དང་། དཔེ་
བྱད་བཟང་པོ་བརྒྱད་ཅུའི་རྣམ་པས་སྟོང་ན། གཞན་གྱི་དོན་ཕུན་སུམ་ཚོགས་པ་རྣམ་པ་ཐམས་ཅད་དུ་མཛད་པའི་མཐུ་མི་མངའ་བའི་ཕྱིར་རོ། །དཔལ་ལྡན་སྔགས་ཀྱི་གཞུང་ལུགས་ཤེས། །ཞེས་བྱ་བ་ལ་སོགས་པ་ལ། སྔགས་ཀྱི་གཞུང་ལུགས་ཞེས་བྱ་བའི་སྒྲས་ནི། རྣལ་འབྱོར་གྱི་
རྒྱུད་སྤྱིར་རྗོད་པར་བྱེད་པ་ཡིན་དུ་ཟིན་ཀྱང་ཤུགས་ཀྱིས་དཔལ་གསང་བ་འདུས་པ་ཡོངས་སུ་གཟུང་བར་བྱ་སྟེ། གཞན་དག་ལ་བཞི་པའི་དོན་མི་སྲིད་པའི་ཕྱིར་རོ། །ལྷག་མ་ནི་གོ་སླའོ། །དུ་མའི་མན་ངག་ཅེས་བྱ་བ་ལ་སོགས་པ་ལ། འདས་པ་དང་མ་འོངས་པ་དང་། ད་ལྟར་གྱི་སློབ་དཔོན་དུ་
མའི་མན་ངག་གི་ཚོགས་ཡང་དག་པར་བསྡུས་པའི་མདུན་གྱི་དབྱེ་བས་ཡོངས་སུ་དཀྲུགས་པ་ནི། རྣམ་པར་དཀྲུགས་པས་རྣམ་པ་ཐམས་ཅད་ལ་རྣམ་པར་ཁྱབ་པ་སྟེ། དེས་བསྒྲུབ་པར་བྱ་བ་དཀྲུགས་པའོ། །གསལ་བར་རྟོགས་པར་བྱ་བའི་ཕྱིར། །ཞེས་བྱ་བ་ནི་བདེ་བར་གནས་པར་
ཁོང་དུ་ཆུད་པར་བྱ་བའི་ཕྱིར་ཞེས་བྱ་བའི་ཐ་ཚིག་གོ། །དེ་ཉིད་བསྒྲུབ་བྱའི་ཞེས་བྱ་བ་ལ་སོགས་པ་ལ། མུ་སྟེགས་ཅན་གང་ལ་ཀུན་ནས་འཁྲུལ་པ་སྟེ། རྣམ་པར་འཁྲུལ་པའི་བློ་ཤེས་རབ་ཀྱི་བྱེ་བྲག་ཡོད་པ་དེ་ལ་དེ་སྐད་ཅེས་བྱའོ། །མུ་སྟེགས་ཅན་དེ་དག་ཐམས་ཅད་བདག་དང་བདག་
གིར་འཛིན་པའི་ལིང་ཏོག་གིས་བློའི་མིག་ཁེབས་པར་གྱུར་པས། དེ་ཁོ་ན་ཉིད་འདི་ཞེས་སམ། བསྒྲུབ་པར་བྱ་བ་ནི་འདི་ཞེས་དེ་ཁོ་ན་ཉིད་དང་། བསྒྲུབ་པར་བྱ་བ་དེའི་རང་གི་ངོ་བོ་གང་ཡིན་པ་རིག་ཅིང་ཁོང་དུ་ཆུད་པར་བྱ་བ་དེ་དག་ལ་འཁྲུལ་པའོ། །ལྷག་མ་ནི་གོ་སླའོ། །དེ་ཁོ་ན་ཉིད་

44-1-205b

དང་བསྒྲུབ་པར་བྱ་བ་དག་ནི་བླང་བར་བྱ་བ་ཉིད་དུ་ངོ་བོ་གཅིག་པ་མ་ཡིན་ནམ། ཅིའི་ཕྱིར་དེ་ཁོ་ན་ཉིད་དང་། བསྒྲུབ་པར་བྱ་བ་ཞེས་དབྱེ་བ་བསྟན་ཞེ་ན། དེ་ནི་བདེན་པ་མ་ཡིན་ཏེ། དེ་ཁོ་ན་ཉིད་ནི་བླང་བར་བྱ་བ་ཉིད་ཡིན་ཡང་བདེ་བ་དང་སྡུག་བསྔལ་དང་། བཏང་སྙོམས་ལ་སོགས་པ་སོ་སོར་
སྣང་བའི་ཚོགས་མ་ལུས་པ་ལ་ཤེས་བྱ་ཙམ་དུ་ཁྱབ་པར་བྱེད་པ་ཡིན་ལ། བསྒྲུབ་པར་བྱ་བ་ཡང་མངོན་པར་འདོད་པར་བྱ་བ་མ་ཡིན་པ་ལས་བཟློག་པར་འདོད་པའི་མཚན་ཉིད་ཀྱིས་བླང་བར་བྱ་བ་ཉིད་ཡིན་ཀྱང་། སྲོག་ཆགས་ཐམས་ཅད་ཀྱིས་གདོན་མི་ཟ་བར་བསྒྲུབ་པར་བྱ་བ་མ་ཡིན་པ་
ལས་བཟློག་པ། བསྒྲུབ་པར་བྱ་བའི་འབྲས་བུ་ཉིད་དུ་མངོན་པར་འདོད་པའི་ཕྱིར་ཉེས་པ་མེད་དོ། །དེ་ལ་རེ་ཞིག་རིག་བྱེད་ཀྱི་མཐར་སྨྲ་བའི་མངོན་པར་འདོད་པའི་བསྒྲུབ་པར་བྱ་བ་ནི་དགའ་བའི་ངོ་བོ་ཞེས་བྱ་བ་ལ་སོགས་པ་སྨོས་ཏེ་དགའ་བའི་ངོ་བོ་ནི་རྟག་ཏུ་བདེ་བའི་རང་བཞིན་ཉིད་ཡིན་པའི་ཕྱིར་རོ། །
རང་རིག་པ་ནི་གསལ་བའི་ངོ་བོ་ཉིད་ཡིན་གྱིས་བདག་ཉིད་རབ་ཏུ་སྣང་བ་ཉིད་ཀྱི་ཕྱིར་རོ། །མི་གཡོ་བ་ཞེས་བྱ་བ་ནི་མི་རྟག་པ་ཉིད་ཀྱིས་བསྐྱོད་པར་མི་ནུས་པའི་ཕྱིར་རོ། །ཞི་བ་ནི་ཉོན་མོངས་པ་དང་། ཉེ་བའི་ཉོན་མོངས་པས་སྟོང་པ་ཉིད་དུ་ཡོངས་སུ་བརྟགས་པའི་ཕྱིར་རོ། །རྣམ་པ་དེ་ལྟ་བུ་བསྒྲུབ་
པར་བྱ་བ་ལ་བདུན་པ་ལ་ནི་འདོད་པར་གྱུར་པའོ། །གང་ཉན་ཐོས་དང་བཅས་པ་འཇུག་པའི་རང་རྒྱལ་བ་ནི་བསེ་རུ་ལྟ་བུ་སྟེ། གཅིག་པུ་རྒྱུ་བ་དང་། ཚོགས་ཀྱིས་སྤྱོད་པའི་རང་སངས་རྒྱས་དག་བསྒྲུབ་བྱར་འདོད་དོ། །ཅི་འདྲ་བ་ཞིག་ཅེ་ན། གཟུགས་ལ་སོགས་པའི་ཕུང་པོ་དང་བྲལ་བའོ། །གཟུགས་དང་། ཚོར་བ་དང་། འདུ་
ཤེས་དང་། འདུ་བྱེད་དང་། རྣམ་པར་ཤེས་པའི་མཚན་ཉིད་དག་གི་ཕུང་པོ་རྣམས་ནི་སྤུངས་པ་སྟེ་བྲལ་བ་དང་རྣམ་པར་ཆད་པ་དང་འགགས་པར་གྱུར་པ་ཞེས་བྱ་བའི་བར་དུའོ། །འདི་སྐད་བསྟན་པར་འགྱུར་ཏེ། ཉན་ཐོས་དང་རང་སངས་རྒྱས་ཐམས་ཅད་ནི་ཕུང་པོ་ལྷག་མ་དང་བཅས་པ་དང་། ཕུང་པོ་ལྷག་མ་
མེད་པའི་དབྱེ་བས་མྱ་ངན་ལས་འདས་པ་ཐ་དད་ཀྱང་ཕུང་པོ་ལྷག་མ་མེད་པའི་མྱ་ངན་ལས་འདས་པ་ཁོ་ན་མངོན་སུམ་དུ་བྱ་བའི་ཕྱིར་བསྒྲུབ་པར་བྱ་བར་ཞུགས་པ་ཡིན་ནོ། །ད་ནི་ཕ་རོལ་ཏུ་ཕྱིན་པའི་ཚུལ་དུ་སྨྲ་བ་དག་ལ་མངོན་པར་འདོད་པའི་བསྒྲུབ་པར་བྱ་བ་རྣམ་པ་བཞི་བསྟན་པའི་ཕྱིར། རྣམ་པ་སྟོང་པ་ཞེས་བྱ་བ་

44-1-206a

ལ་སོགས་པ་སྨོས་ཏེ། རྣམ་པ་ནི་སྔོན་པོ་དང་། སེར་པོ་དང་། བདེ་བ་དང་སྡུག་བསྔལ་ལ་སོགས་པ་སྣ་ཚོགས་པའི་རྣམ་པའོ། །དེས་སྟོང་པ་སྟེ་རྣམ་པ་མེད་པའོ། །རྣམ་པ་མེད་པ་དེ་ཉིད་ཀྱི་ཕྱིར་ནམ་མཁའ་ལྟ་བུའོ། །གང་གི་རང་བཞིན་ཟླ་བ་དང་འདྲ་བར་འོད་གསལ་
བའི་ངོ་བོ་ཡིན་པ་དེ་ལ་དེ་སྐད་ཅེས་བྱའོ། །སོ་སོར་རང་རིག་པ་གཅིག་པུའི་ངོ་བོ་རིག་པའོ། །འདིར་སྡུག་བསྔལ་དང་སྡུག་བསྔལ་གྱི་རྒྱུ་དག་ལས་འགྲོ་བ་མ་ལུས་པ་གདོན་པར་འདོད་པའི་སྙིང་རྗེའི་རང་བཞིན་གང་ཡིན་པ་དེ་ལ་དེ་སྐད་ཅེས་བྱའོ། །འདི་སྐད་དུ་བཤད་པར་འགྱུར་ཏེ། ཕ་རོལ་ཏུ་ཕྱིན་པ་ཉེ་
བར་སྟོན་པའི་སྒྲས་བརྗོད་པར་བྱ། སྔོན་པོ་དང་། སེར་པོ་ལ་སོགས་པའི་རྣམ་པ་སྣ་ཚོགས་པས་སྟོང་ཞིང་སྣང་བ་མེད་ལ། དྲི་མ་མེད་པ་ནམ་མཁའ་ལྟ་བུར་དག་པ་འགྲོ་བ་མ་ལུས་པའི་དོན་བྱེད་པའི་སྙིང་རྗེ་ཆེན་པོ་དང་ལྡན་པ་སོ་སོར་རང་གིས་རིག་པའི་བསྒྲུབ་པར་བྱ་བ་ཡིན་ཏེ། ཕ་རོལ་ཏུ་ཕྱིན་པའི་
ཚུལ་གྱིས་བསྒྲུབ་པར་བྱ་བ་དང་པོའོ། །མཛེས་པ་ཡང་དེ་ཉིད་ཡིན་ལ། མཚན་ཡང་དེ་ཉིད་ཡིན་པས་ན་མཛེས་པའི་མཚན་སུམ་ཅུ་རྩ་གཉིས་ཞེས་བྱ་སྟེ། དེས་བརྒྱན་པའོ། །དོན་ནི་སྐྱེ་བོ་རྣམས་ཀྱིས་དགོངས་པ་སྟེ། དེ་མཛད་པའི་ངང་ཚུལ་ཅན་གྱི་རང་བཞིན་གང་ལ་ཡོད་པ་དེ་ནི་དོན་མཛད་པའོ། །
སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་བཅུའི་རྒྱུ་མཐུན་པ་དེ་ནི། རང་གི་མཐའི་སྟོབས་ཀྱིས་འདྲ་བའི་འབྲས་བུའོ། །སྡུག་བསྔལ་སྔར་སྤངས་པ་ཉིད་ཀྱི་ཕྱིར་རོ། །བདེ་བ་ཡང་སྔོན་དུ་བྱས་པའི་གནས་སྐབས་ན་མེད་པའི་ཕྱིར་བཏང་སྙོམས་ཀྱི་ངོ་བོ་ཉིད་ཀྱི་བདེ་བ་ཉིད་མེད་པ་ནི་བདེ་བྲལ་བའོ། །འདི་སྐད་དུ་
བསྟན་པར་འགྱུར་ཏེ། མཚན་སུམ་ཅུ་རྩ་གཉིས་འཛིན་ཅིང་དཔེ་བྱད་བཟང་པོ་བརྒྱད་ཅུས་རྣམ་པར་སྤྲས་པའི་སྐུས། འགྲོ་བ་མ་ལུས་པའི་དོན་མཛད་པ། སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་གོམས་པར་མཛད་པའི་སྟོབས་ཀྱིས་བདག་ཉིད་ཡང་དག་པར་རྫོགས་པའི་སངས་རྒྱས་ཀྱི་ངོ་བོ་ཉིད་བདེ་བ་དང་། སྡུག་
བསྔལ་སྤངས་པའི་བཏང་སྙོམས་ཀྱི་ངོ་བོ་ཉིད་ནི་བསྒྲུབ་པར་བྱ་བ་གཉིས་པ་ཡིན་ནོ། །དགའ་བཅས་ཞེས་བྱ་བ་ལ་སོགས་པ་ལ། དགའ་བ་དང་ལྷན་ཅིག་འཇུག་པའི་ཕྱིར་དེ་དག་དགའ་བ་དང་བཅས་པ་ཡིན་ལ། མཛེས་པའི་མཚན་རྣམས་ཀྱིས་བརྒྱན་པའི་སྐུ་ཡང་ཡིན་པས་སོ། །ཡང་དག་ལོངས་སྤྱོད་པ་

44-1-206b

ནི། ཆོས་བསྟན་པའི་སྒོ་ནས་ཉེ་བར་ལོངས་སྤྱོད་པར་གྱུར་པའོ། །སུ་ཞིག་གིས་ཤེ་ན། ས་བཅུའི་དབང་ཕྱུག་རྣམས་ཀྱིས་ཏེ། ས་ལྷག་མ་རྣམས་ན་གནས་པའི་སྤྱོད་ཡུལ་མ་ཡིན་པ་ཉིད་ཀྱི་ཕྱིར། ས་བཅུ་བརྙེས་པ་སྤྱན་རས་གཟིགས་དང་འཇམ་དཔལ་ལ་སོགས་པ་རྣམས་ཀྱིས་ལོངས་སྤྱོད་པར་བྱ་བ་
མ་ཡིན་ནོ་ཞེས་བྱ་བའི་བར་དུའོ། །ལྷག་མ་ནི་གོ་སླའོ། །འདི་སྐད་དུ་བཤད་པར་འགྱུར་ཏེ། གནས་གཙང་མའི་སྟེང་ན་ཡང་དག་པར་རྫོགས་པའི་སངས་རྒྱས་ཀྱི་ཕོ་བྲང་སྟུག་པོ་བཀོད་པ་ཞེས་བྱ་བ་ན་ཇི་ལྟར་བཅོམ་ལྡན་འདས་དགའ་བའི་ངོ་བོ་ལོངས་སྤྱོད་རྫོགས་པའི་སྐུའི་བདག་ཉིད་ཅན། སྤྲུལ་པའི་
སྐུའི་སྒོ་ནས་འགྲོ་བ་མ་ལུས་པའི་དོན་ཡང་དག་པར་སྒྲུབ་པར་མཛད་པ་ཉན་ཐོས་དང་རང་སངས་རྒྱས་དང་། ས་དགུའི་དབང་ཕྱུག་རྣམས་ཀྱིས་ཀྱང་མི་མཐོང་བའི་སྐུ་ཅན། ས་བཅུའི་དབང་ཕྱུག་མཆོག་ཏུ་གྱུར་པའི་བྱང་ཆུབ་སེམས་དཔའ་ཁོ་ནས་ཆོས་གསན་པའི་སྒོ་ནས་ཉེ་བར་ལོངས་སྤྱད་པར་བྱ་བ་
འཁོར་བ་ཇི་སྲིད་ནས་བཞུགས་ཏེ། དེ་ལྟ་བུའི་བསྒྲུབ་པར་བྱ་བ་གསུམ་པ་ཡིན་ནོ། །སྦྱིན་སོགས་ཞེས་བྱ་བ་ལ་སོགས་པ་ལ་ཡོན་ཏན་འདུ་བྱེད་གོམས་པར་བྱེད་པའི་ཕྱིར། སྦྱིན་པ་ལ་སོགས་པའི་ཕ་རོལ་དུ་ཕྱིན་པ་ཉིད་ཡོན་ཏན་ཡིན་ལ་དེ་དག་ཡང་དག་པར་རྫོགས་པ་སྟེ། ཡོངས་སུ་རྫོགས་པར་བྱས་
ནས། གང་རྫོགས་པའི་སངས་རྒྱས་རྣམས་ཀྱིས་ངེས་པར་མཛད་པར་བྱ་བ་མ་ལུས་པ་དེ་ཡང་མཛད་ནས། ཡང་དག་པའི་མཐའ་སྟེ་གང་སེམས་དང་སེམས་ལས་བྱུང་བ་འགོག་པའི་བདག་ཉིད་སྟོང་པའི་མཚན་ཉིད་མངོན་སུམ་དུ་མཛད་པའོ། །དེ་ཡང་བསྒྲུབ་བྱར་ཡོད་པ་ཡིན་ནོ་ཞེས་ཕ་རོལ་ཏུ་ཕྱིན་པའི་
ཚུལ་ལ་གནས་པ་དག་དེ་སྐད་སྨྲ་བ་བསྒྲུབ་པར་བྱ་བ་བཞི་པ་ཡིན་ནོ། །ད་ནི་སྔགས་ཀྱི་ཚུལ་དུ་བཤད་པའི་བསྒྲུབ་པར་བྱ་བ་རྣམ་པ་བདུན་བསྟན་པའི་ཕྱིར། ཉིད་མཚུངས་ལྷ་མོས་ཞེས་བྱ་བ་ལ་སོགས་པ་སྨོས་ཏེ། ཉིད་དང་མཚུངས་པའི་ལྷ་མོས་འཁྱུད་པའི་ངང་ཚུལ་ཅན་གྱི་རང་བཞིན་གང་ལ་མངའ་
བ་དེ་ནི། ཉིད་མཚུངས་ལྷ་མོས་འཁྱུད་པ་ཅན་ནོ། །རྟོག་པ་དང་བྲལ་བ་ནི་རྟོག་པ་མེད་ཅིང་སྤངས་པ་སྟེ། རྣམ་པར་མི་རྟོག་པ་ཞེས་བྱ་བའི་བར་དུའོ། །གཞན་ནི་གོ་སླའོ། །འདིའི་དོན་ནི་འདི་ཡིན་ཏེ། ཡང་དག་པར་འཁྱུད་པ་སྟེ། ཉིད་དང་མཚུངས་པའི་ལྷ་མོས་འཁྱུད་པ་ཅན། འགྲོ་བ་མ་ལུས་པའི་

44-1-207a

དོན་མཛད་པའི་སྐུ་མཚན་སུམ་ཅུ་རྩ་གཉིས་ལ་སོགས་པས་རྣམ་པར་བརྒྱན་པ་བཏང་སྙོམས་ཀྱི་ངོ་བོ་ཉིད་དུ་འཁོར་བ་ཇི་སྲིད་དུ་བཞུགས་པ་མངོན་དུ་བྱ་བ་ཡིན་ནོ་ཞེས་བྱ་བ་བསྒྲུབ་པར་བྱ་བ་དང་པོའོ། །དང་པོ་ཉིད་ནས་ཞེས་བྱ་བ་ལ་སོགས་པ་ལ་ལྷའི་རྣམ་པའི་ཁྱད་པར་ཏེ། བདག་ཉིད་ཀྱིས་
འདོད་པའི་ལྷའི་རྣམ་པས་སྟོང་པ་ད་ང་། རྣམ་པ་མེད་པ་ཞེས་བྱ་བའི་བར་དུའོ། །དང་པོ་ཉིད་ནས་ཞེས་བྱ་བ་ནི། ཐོག་མ་ཉིད་ནས་བཤད་མ་ཐག་པའི་ལྷའི་རྣམ་པ་ཉིད་ལ་ལྟོས་པ་མེད་པར་བདེ་བ་ཡང་དག་པར་བསྒོམ་པར་བྱ་བ་རྣམ་པར་བསྒོམས་པས་མངོན་སུམ་དུ་བྱ་བ་གསལ་བ་མ་ཡིན་པ་གསལ་བར་
བྱས་པར་གྱུར་པའི་བདེ་བ་ཆེན་པོ་ཞེས་བྱ་བར་འགྱུར་རོ། །དེ་ཡང་འགྲོ་དོན་མཛད་པ་ནི་ཡིད་བཞིན་གྱི་ནོར་བུ་དང་མཚུངས་པའི་ཚུལ་དུའོ། །འདི་སྐད་བཤད་པར་འགྱུར་ཏེ། བཤད་མ་ཐག་པ་ཉིད་ཀྱི་སྔགས་དང་ཕྱག་རྒྱ་དང་ལྷའི་རྣམ་པ་ཉིད་སྤངས་ཏེ། བདེ་བ་འབའ་ཞིག་ཙམ་བསྒོམས་པས་གསལ་བར་
བྱས་ལ་བདེ་བ་ཆེན་པོ་ཞེས་བྱ། ཡིད་བཞིན་གྱི་ནོར་བུ་བཞིན་དུ་འགྲོ་བ་མ་ལུས་པའི་དོན་མཛད་པ་སྒྱུ་མ་ལྟ་བུའི་འཁོར་བ་ཇི་སྲིད་བར་བཞུགས་པ་ནི་བསྒྲུབ་པར་བྱ་བ་གཉིས་པའོ། །རང་བདག་ཅེས་བྱ་བ་ལ་སོགས་པ་སྨོས་པ་ལ་རང་གི་བདག་པོ་ནི་རང་གི་འདོད་པའི་ལྷ་ཉིད་དོ། །བདེ་བའི་ངོ་བོ་ཉིད་ནི་བདེ་བ་གཅིག་
པུའི་རང་བཞིན་ནོ། །མངོན་བྱས་པ་ནི་ཀུན་ནས་མངོན་སུམ་དུ་བྱས་པ་ཡིན་ནོ། །ཕྱིས་ལྷའི་རྣམ་པ་ཉིད་ཡོངས་སུ་བཏང་ནས་སྒྲུབ་པའི་འབྲས་བུ་བདེ་བ་ཙམ་ལ་གནས་པར་གྱུར་པའོ། །གལ་ཏེ་མངོན་སུམ་དུ་བྱས་ནས་ཀྱང་ལྷའི་རྣམ་པའི་ངོ་བོ་ཉིད་གཏང་བར་བྱ་བ་ཡིན་པ་དེ་ལྟ་ན་ནི། དང་པོ་ཉིད་ཅིའི་ཕྱིར་
རྣམ་པར་སྒོམ་པར་བྱེད་དེ། བསྒྲུབ་པར་བྱ་བ་གཉིས་པ་བཞིན་དུ་བདེ་བ་ཙམ་ཉིད་ཅི་སྟེ་བསྒོམ་པར་བྱ་བ་མ་ཡིན་ནམ་ངལ་བ་དོན་མེད་པས་ཅི་ཞིག་བྱ་ཞེ་ན། དག་པ་ཞེས་བྱ་བ་ལ་སོགས་པ་སྨོས་ཏེ། དག་པ་འབའ་ཞིག་ལྷའི་རྣམ་པ་དང་། རྣམ་པར་བྲལ་བའི་བདེ་བ་ཙམ་ཁོ་ན་མངོན་སུམ་དུ་བྱེད་མི་ནུས་ཏེ། རྣམ་
པ་དང་བྲལ་བའི་བདེ་བ་འབའ་ཞིག་མི་དམིགས་པའི་ཕྱིར་རོ། །རྒྱུ་དེའི་ཕྱིར་རང་གི་བདག་པོའི་རྣམ་པ་སྒོམ་པར་བྱེད་པ་སྟེ། བསྒྲུབ་པར་བྱ་བ་གསུམ་པ་ཡིན་ནོ། །དེའི་དོན་ནི་འདི་ཡིན་ཏེ། ལྷ་ཉིད་ཀྱི་རྣམ་པ་དང་ལྡན་པའི་བདེ་བ་ཁོ་ན་རྣམ་པར་བསྒོམ་པར་བྱ་བ་མངོན་སུམ་དུ་བྱས་ནས་ལྷའི་རྣམ་པ་ཉིད་

44-1-207b

བཏང་སྟེ། བདེ་བ་ཙམ་ཁོ་ན་བསྒྲུབ་པར་བྱ་བ་ཡོན་ཏན་དུ་འཆད་དོ། །སྐུ་ནི་བྱ་བ་ལ་སོགས་པ་ལ་གང་གི་སྐུ་ནམ་མཁའ་དང་མཚུངས་པའི་སྒྱུ་མ་དང་འདྲ་བར་དཔྱད་མི་བཟོད་པའོ། །གང་གིས་ཡན་ལག་མཚན་གྱི་སྟེ། མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་སྤྲས་པར་
གྱུར་པའོ། །དཔེ་མེད་ཅེས་བྱ་བ་ནི་གྱ་ནོམ་པ་ཉིད་དང་། རྒྱ་ཆེ་བ་ཉིད་དང་། བར་མེད་པ་ཉིད་དང་། འཁོར་བ་ཇི་སྲིད་བར་རབ་ཏུ་འཇུག་པ་ཉིད་དང་ཟག་པ་མེད་པ་ཉིད་ལ་སོགས་པ་རྣམས་ཀྱིས་དཔེ་མེད་པའི་ཕྱིར་རོ། །དཔེ་ལས་འདས་པའི་བདེ་བས་གང་བ་ནི། བ་སྤུའི་རྩེ་མོའི་མཐར་ཐུག་པར་གྱུར་པའི་
ཉིད་དང་མཚུངས་པ་ཡང་དེ་ལྟ་བུར་གྱུར་པས་འདུས་པ་སྟེ། ཀུན་ནས་འཁྱུད་པར་གྱུར་པའོ། །ཐུབ་པའི་དབང་པོའི་དཔག་ཏུ་མེད་པ་འཕྲོ་བར་གྱུར་པ་དེ་ཡང་དེ་ལྟ་བུ་ཁོ་ནས་སེམས་ཅན་གྱི་དོན་མཛད་པའོ། །ཆད་པས་ཞེས་བྱ་བ་ནི།འགོག་པ་སྟོང་པ་སྟེ་སྤངས་པའོ། །འདི་སྐད་བཤད་པར་འགྱུར་ཏེ།
ནམ་མཁའ་དང་། སྒྱུ་མ་དང་། མིག་འཕྲུལ་དང་། སྨིག་རྒྱུ་དང་། དྲི་ཟའི་གྲོང་ཁྱེར་དང་། ཆུ་ཟླ་དང་། གཟུགས་བརྙན་དང་། རྨི་ལམ་དང་འདྲ་བས་གཅིག་དང་། དུ་མ་དང་། དངོས་པོ་དང་། དངོས་པོ་མེད་པ་དང་། གཟུང་བ་དང་འཛིན་པའི་རང་བཞིན་དང་བྲལ་ལ། ཐོག་མ་དང་ཐ་མ་མེད་
པའི་དངོས་པོ་མ་ལུས་པའི་རང་བཞིན་སྣང་བ་མེད་པས། དྲི་མ་མེད་པ་དཔེ་ཐམས་ཅད་ལས་ཤིན་ཏུ་འདས་པ། མཆོག་ཏུ་ཕྲ་ཞིང་ཤིན་ཏུ་ཟབ་པ། ཤེས་རབ་ཀྱི་ངོ་བོ་ཉིད་ཀྱིས་ཆོས་ཀྱི་སྐུའི་རང་བཞིན་ཡིན་པ་དང་། སྐུ་མཚན་སུམ་ཅུ་རྩ་གཉིས་ཀྱིས་བརྒྱན་ཞིང་། དཔེ་བྱད་བཟང་པོ་བརྒྱད་ཅུས་
རྣམ་པར་སྤྲས་པ། ཤིན་ཏུ་སྒེག་ཅིང་ན་ཚོད་ལ་སོགས་པ་དང་ལྡན་པ་ཉིད་དང་། ཉིད་དང་མཚུངས་པའི་ལྷ་མོས་སྐུ་ལ་འཁྱུད་ཅིང་། གཟུགས་རྡོ་རྗེ་ལ་སོགས་པ་ནས། སྒྲོལ་མའི་མཐར་ཐུག་པའི་ལྷ་མོའི་ཚོགས་ཀྱིས་མཚན་མ་མེད་པའི་དགའ་བའི་རང་གི་ངོ་བོའི་རབ་ཏུ་དབྱེ་བ་དཔག་ཏུ་མེད་པས་མཆོག་
ཏུ་དགའ་བ་ལ་ཉེ་བར་ལོངས་སྤྱོད་པའི་སྒོ་ནས། གཟུགས་བརྙན་དང་འདྲ་བས་ཡང་དག་པར་ལོངས་སྤྱོད་པ་ནི་སྙིང་རྗེའི་རང་བཞིན་རྒྱ་ཆེ་བ་ཉིད་ཀྱིས་ལོངས་སྤྱོད་རྫོགས་པའི་སྐུའི་ངོ་བོ་ཉིད་དང་། གདུལ་བྱའི་སྐྱེ་བོ་མོས་པ་སྣ་ཚོགས་པ་ཡོངས་སུ་སྨིན་པར་བྱ་བའི་དོན་དུ། རྫུ་འཕྲུལ་དང་ཆོ་འཕྲུལ་རྣམ་

44-1-208a

པ་དུ་མའི་སྒོ་ནས་རིགས་ཀྱི་ནང་དུ་ཆུད་པའི་རྫོགས་པའི་སངས་རྒྱས་དང་། བྱང་ཆུབ་སེམས་དཔའ་ལ་སོགས་པའི་སྤྲུལ་པ་དཔག་ཏུ་མེད་པ་སྤྲོ་བ་དང་། བསྡུ་བ་མཛད་པ་ཉིད་ཀྱིས་ནི་སྤྲུལ་པའི་སྐུའི་མཚན་ཉིད་དང་། སྟོང་པ་ཉིད་དང་། སྙིང་རྗེ་ཐ་མི་དད་པའི་བྱང་ཆུབ་སེམས་ཀྱི་
རང་བཞིན་དྲི་མ་མེད་པ་ཤེས་རབ་དང་ཐབས་ཀྱི་ཏིང་ངེ་འཛིན་ལས་ཡང་དག་པར་འབྱུང་བའི་བདེ་བ་དམ་པས་གང་བ། འཁོར་བ་ཇི་སྲིད་བར་བཞུགས་པའི་ཆོས་ཅན་མི་གནས་པའི་མྱ་ངན་ལས་འདས་པའི་ངོ་བོ་མར་མེ་རླུང་གིས་མ་བསྐྱོད་པའི་རྩེ་མོ་བཞིན་དུ་དྲི་མ་མེད་པའི་རྒྱུན་གྱི་རྟག་པ་ཉིད་ཀྱིས་
འགོག་པས་སྟོང་པ་ནི་བསྒྲུབ་པར་བྱ་བ་བཞི་པའོ། །རང་བདག་ཅེས་བྱ་བ་ལ་སོགས་པ་ལ་རང་གི་བདག་པོ་མངོན་སུམ་དུ་བྱས་ནས་ཕྱིས་བཏང་སྟེ། བཏང་སྙོམས་ཀྱི་ངོ་བོ་གང་ཡིན་པའི་ཡེ་ཤེས་དེ་ཙམ་ཞིག་བསྒྲུབ་བྱར་འགྱུར་རོ། །གཞན་ནི་རྟོགས་པར་སླའོ། །འདི་སྐད་བཤད་པར་འགྱུར་ཏེ། 
དཀྱིལ་འཁོར་གྱི་འཁོར་ལོའི་ངོ་བོ་མངོན་སུམ་དུ་བྱས་ནས། ཕྱིས་དེ་བཀག་ཅིང་བཏང་སྙོམས་ཀྱི་ཡེ་ཤེས་ཙམ་དུ་གྱུར་པ་ནི་བསྒྲུབ་པར་བྱ་བ་ལྔ་པའོ། །དཀྱིལ་འཁོར་ཞེས་བྱ་བ་ལ་སོགས་པ་ལ། དཀྱིལ་འཁོར་བདེ་བའི་རང་བཞིན་ཅན་མངོན་དུ་བྱས་ནས། དེའི་རང་གི་འདོད་པ་ངེས་པར་
ལྡོག་པ་ནི་འགོག་པའོ། །གལ་ཏེ་མངོན་སུམ་དུ་བྱས་ནས་ཀྱང་། ཕྱིས་རང་གི་འདོད་པས་འགོག་པར་བྱ་བ་ཡིན་ན་ནི་དེའི་ཚེ་ཡུན་རིང་པོར་གོམས་པར་བྱས་པའི་སྙིང་རྗེ་མེད་པར་འགྱུར་བ་མ་ཡིན་ནམ། དེ་ཡང་མེད་པའི་ཕྱིར་སེམས་ཅན་གྱི་དོན་མེད་པར་འགྱུར་རོ་ཞེས་དོགས་པ་ལ། སེམས་ཅན་
དོན་ཡང་ཡོད་དེ་འདིར་མེད་མིན། །ཞེས་བྱ་བ་སྨོས་ཏེ། ཕྱོགས་འདི་ལ་སེམས་ཅན་གྱི་དོན་བྱེད་པ་མེད་པ་མ་ཡིན་ཏེ། གང་གི་ཕྱིར་འགོག་པའི་འཁོར་ལོ་ལས་སྙིང་རྗེའི་རང་བཞིན་ཅན་སེམས་ཅན་གྱི་དོན་རབ་ཏུ་འབྱུང་བ་ཡོད་པ་ཡིན་ནོ། །དེ་ནི་འདི་སྐད་དུ་བསྟན་ཏེ། བདེ་བས་ཡང་དག་པར་གང་
བའི་འཁོར་ལོ་མངོན་སུམ་དུ་བྱས་ནས། དུས་ཇི་སྲིད་དུ་འདོད་པར་རྣམ་པར་གནས་པ་སྟེ། ཕྱིས་དེ་རྣམས་ཐམས་ཅད་དུ་མར་མེ་བཞིན་དུ་འགོག་པ་ཡིན་ནོ། །ཡང་གང་གི་ཚེ་སེམས་ཅན་གྱི་དོན་མངོན་པར་འདོད་པར་གྱུར་ན། དེའི་འགགས་པ་ཉིད་ལས་འཁོར་ལོའི་ཁྱད་པར་འབྱུང་ཞིང་སེམས་ཅན་

44-1-208b

གྱི་དོན་མཛད་དོ། །འཁོར་ལོའི་ཁྱད་པར་འབྱུང་བ་ཡང་རིང་དུ་འགགས་པའི་འཁོར་ལོའི་ཁོ་ན་ལས་སྐལ་བ་ཇི་ལྟ་བ་བཞིན་དུ་གདུལ་བྱ་རྣམས་ཀྱིས་མངོན་པར་འདོད་པ་རྙེད་པར་འགྱུར་རོ་ཞེས་བྱ་བ་ནི་བསྒྲུབ་པར་བྱ་བ་དྲུག་པའོ། །དེ་རྣམས་ལས་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཕྱོགས་དྲུག་
པོ་རྣམས་ཀྱི་ནང་ནས་འབྲས་བུ་བསྒྲུབ་བྱ་གང་ཁོ་ན་མངོན་སུམ་དུ་བྱས་ཤིང་དེའི་འོག་ཏུ་རྣམ་པ་ཐམས་ཅད་དུ་མར་མེ་བཞིན་དུ་འགོག་པ་དུས་གཞན་ན་སེམས་ཅན་གྱི་དོན་ལ་སོགས་པས་སྟོང་པ་མངོན་སུམ་དུ་བྱས་པ་ཡིན་ནོ། །ཕྱོགས་དྲུག་གི་དབྱེ་བས་འགོག་པ་ཡང་དྲུག་ཁོ་ནར་འགྱུར་བ་མ་ཡིན་ནམ། 
འགོག་པ་དེ་ཇི་ལྟར་ན་གཅིག་ཁོ་ནར་འགྱུར་ཞེས་དོགས་པ་ལ། གང་ཕྱིར་ཞེས་བྱ་བ་ལ་སོགས་པ་སྨོས་ཏེ། ཐ་མི་དད་པའི་ངོ་བོ་གང་ཡིན་པ་དེ་ལ་དེ་སྐད་བྱ་སྟེ། ཕྱོགས་དྲུག་གི་མཚན་ཉིད་ཀྱི་དབྱེ་བས་ཀྱང་འགོག་པ་རྣམས་ལ་ཐ་དད་པ་ཡོད་པ་མ་ཡིན་ཏེ། འགོག་པ་ནི་དངོས་པོ་མེད་པའི་ངོ་བོ་ཉིད་དུ་
གཅིག་ཅིང་མཚུངས་པའི་ཕྱིར་རོ། །དོན་ནི་འདི་ཡིན་ཏེ། ཕྱོགས་གཞན་ཞིག་མངོན་སུམ་དུ་བྱས་ནས། དེའི་འོག་ཏུ་དེའི་རྒྱུད་རྒྱུན་ཆད་པའི་ངོ་བོ་འགོག་པ་ནི་བསྒྲུབ་པར་བྱ་བ་བདུན་པའོ། །ཤེས་རབ་ཡེ་ཤེས་ཞེས་བྱ་བ་ལ་སོགས་པ་ལ་ཤེས་རབ་དང་ཡེ་ཤེས་ནི་ཤེས་རབ་ཡེ་ཤེས་ཏེ། དབང་བསྐུར་
བའི་བྱེ་བྲག་གོ། །ཕྱིས་ནི་འདས་པའི་འོག་ཏུའོ། །གང་ཞེ་ན། བྱང་ཆུབ་ཀྱི་སེམས་ཏེ་བདུད་རྩིའི་ངོ་བོ་ལྕེས་བཀུག་ནས་བླངས་པ་གང་ཡིན་པ་དེ་ནི་བཞི་པ་སྟེ། དབང་བསྐུར་བཞི་པ་ཡིན་པར་སྨྲ་བ་དེ་ནི་མཆོག་མ་ཡིན་པ་དང་། དམན་པ་དང་། ཤིན་ཏུ་སྨད་པ་ཞེས་བྱ་བའི་བར་དུའོ། །ཅིའི་ཕྱིར་
མཆོག་མིན་ཞེ་ན། གང་གི་ཕྱིར་སྔགས་དང་ཕྱག་རྒྱ་དང་། ལྷ་ཉིད་ལ་སོགས་པའི་རྣམ་པ་བསྒོམ་པ་ལ་ཡང་དང་ཡང་དུ་འབད་པ་དང་། གཞན་ཡང་དེ་བཞིན་གཤེགས་པས་གསུངས་པའི་སྒྲུབ་པའི་མཚན་ཉིད་དོན་མེད་པ་ཐོབ་པར་འགྱུར་རོ། །གང་ལས་ཤེ་ན། དེ་འབྲས་ཏེ་བསྒོམས་པས་
བསྒྲུབ་པར་བྱ་བའི་འབྲས་བུ་བྱང་ཆུབ་ཀྱི་སེམས་ཀྱི་རོ་མྱང་བའི་དུས་ཉིད་ན་རབ་ཏུ་གྲུབ་པ་ཉིད་དང་། འབྲས་བུ་ཁྱད་པར་ཅན་གཞན་ཡང་མེད་པའི་ཕྱིར་ཞེས་བྱ་བའི་བར་དུའོ། །ཤེས་རབ་ཅེས་བྱ་བ་ལ་སོགས་པ་ལ། ཤེས་རབ་ཡེ་ཤེས་ལ་དུས་ཕྱིས་ཇི་ལྟ་བ་བཞིན་དུ་རྙེད་པའི་དགའ་བ་སྟེ། བུད་མེད་

44-1-209a

གང་ཡིན་པ་དེ་དང་། རེག་པའི་སྒོ་ནས་རོ་མྱང་བའི་དབང་བསྐུར་བ་གང་ཡིན་པ་དེ་ནི་དམན་པའོ། །ལྷག་མའི་དོན་ནི་རྟོགས་པར་ཟད་དོ། །དེ་ལྟར་དེ་བཞིན་བཞི་པ་ཡང་། །ཞེས་བྱ་བ་བཤད་པར་བྱ་བ་ལ་བཞི་པ་ནི་གསུམ་པ་ཤེས་རབ་ཡེ་ཤེས་ལས་ལྟོས་ནས་བཞི་པ་
ཞེས་བྱའོ། །དེ་ལྟར་ཞེས་བྱ་བ་ལ་དེ་ཞེས་བྱ་བའི་སྒྲ་ཤེས་རབ་ཡེ་ཤེས་ཀྱི་ངོ་བོ་དེ་མཚོན་པར་བྱེད་པ་ཡིན་ནོ། །ཡང་ཞེས་བྱ་བ་ལ། ཡང་གི་སྒྲས་ནི་དེ་ལས་ཁྱད་པར་དུ་གྱུར་པ་ཡིན་ལ། ཁྱད་པར་ཡང་ཟག་པ་མེད་པ་ཤིན་ཏུ་རྒྱས་པ་ཉིད་དང་། བར་ཆད་མེད་པ་ཉིད་དང་། རྒྱུན་མི་འཆད་
པར་སྐྱེ་བ་ཉིད་ཀྱི་མཚན་ཉིད་དོ། །དེ་བཞིན་ཞེས་བྱ་བ་ནི་དེ་བཞིན་གྱི་སྒྲས་དེ་དང་འདྲ་བ་ཉིད་དུ་བསྟན་པ་ཡིན་ལ། དེ་དང་འདྲ་བ་ཉིད་ཀྱང་ཅི་འདྲ་བའི་ཤེས་རབ་དང་ལྡན་པའི་ཚོགས་པ་ལས། ཤེས་རབ་ཡེ་ཤེས་ཅི་འདྲ་བ་སྐྱེ་བ་བཞིན་དུ་ཕྱིས་ཀྱང་དེ་དང་འདྲ་བའི་ཚོགས་པ་ལས་ཀྱང་དེ་དང་འདྲ་
བ་བསྐྱེད་ཀྱི་གཞན་དུ་ནི་མ་ཡིན་ནོ་ཞེས་བྱ་བ་ནི། དེ་བཞིན་གྱི་སྒྲའི་དོན་ཡིན་ནོ། །འདིར་ཡང་མཚོན་པར་བྱ་བའི་དོན་མཚོན་པར་བྱེད་པའི་དངོས་པོ་ཁོང་དུ་ཆུད་པར་བྱ་བ་ཡིན་ཏེ། འདིར་གོ་བར་བྱེད་པས་ན། མཚོན་བྱེད་དེ་ཉམས་སུ་མྱོང་བར་གྱུར་པའི་ཤེས་རབ་ཡེ་ཤེས་སོ། །ཁྱད་པར་མ་གཟུང་
བའི་ཁྱད་པར་ཅན་རྟོགས་པར་མི་འགྱུར་བ་ཞེས་བྱ་བའི་རིག་པ་འདིས་ཉམས་སུ་མ་མྱོང་བར་མཚོན་བྱེད་ཉིད་དུ་མི་འཐད་དོ། །མཚོན་པར་བྱ་ཞིང་ཤེས་པར་བྱ་ལ་གོ་བར་བྱ་ཞིང་བསྒྲུབ་པར་བྱ་བས་ན་མཚོན་བྱ་སྟེ་མངོན་དུ་གྱུར་པའི་བཞི་པའོ། །འདིར་འགའ་ཞིག །དབང་ནི་རྣམ་པ་གསུམ་དག་ཏུ། །
རྒྱུད་འདི་ལས་ནི་རབ་ཏུ་གྲགས། །ཞེས་གསུངས་པས་ན། བཞི་པ་ནི་ཡང་དག་པ་མ་ཡིན་ནོ་ཞེ་ན། དེ་ལྟར་དེ་བཞིན་བཞི་པ་ཡང་། །ཞེས་བྱ་བའི་ཚིག་བཅོམ་ལྡན་འདས་ཀྱིས་གསུངས་པ་ཡོད་པ་མ་ཡིན་ནམ། ཇི་ལྟར་མེད་ཅེ་ན། བདེན་ཏེ། བཅོམ་ལྡན་འདས་ཀྱིས་མན་ངག་
བསྲུང་བར་བྱ་བའི་ཕྱིར་དང་། བསྟན་པར་བྱ་བ་ཉིད་ཡིན་པའི་ཕྱིར་རོ། །གཞན་དག་སྒྲུབ་པ་ཆེན་པོ་བཞི་པ་སྟེ། །ཞེས་བྱ་བ་ལ་སོགས་པ་ལ་བཞི་པ་ཞེས་བྱ་བའི་ཚིག་ཡོད་པ་ཡིན་པ་དེ་ཉིད་འདིར་རྣམ་པར་འབྲེལ་བའི་ཕྱིར་བཞི་པའི་སྒྲ་གསུངས་པ་ཡིན་གྱི། བཞི་པ་ཞེས་བྱ་བའི་དབང་

44-1-209b

བསྐུར་བའི་ཁྱད་པར་ཡང་ཡོད་པ་མ་ཡིན་ནོ་ཞེ་ན། དེའི་འདོད་པ་ཉིད་ལྟར་ན་འདི་ལ་མངོན་དུ་བྱ་བ་འབད་པའི་ཕྱིར་དེ་བསྒོམ་པ་དོན་མེད་པའི་ཉེས་པར་འགྱུར་རོ། །འབྲས་བུ་དང་བཅས་པར་ཁས་ལེན་པ་ཡང་བཞི་པ་གྲུབ་པ་ཡིན་ནོ། །དེ་ལ་མཚོན་པར་བྱེད་པ་ཤེས་རབ་ཡེ་ཤེས་ཉིད་ནི་ཁོང་དུ་ཆུད་
ལ་མཚོན་པར་བྱ་བ་ལ་ཐམས་ཅད་རྨོངས་པར་གྱུར་པས་དེ་རྣམ་པར་དཔྱད་པར་བྱ་སྟེ་མཚོན་པར་བྱ་བ་ཡང་སྲིད་ན་དོན་གྱི་ངོ་བོ་ཞིག་གམ། ཤེས་པའི་ངོ་བོ་ཞིག་ཏུ་འགྱུར་གྲང་ན། དེ་ལ་དོན་གྱི་ངོ་བོ་ཉིད་ནི་མ་ཡིན་ཏེ། དོན་ཉིད་མེད་པའི་ཕྱིར་དང་། གཅིག་དང་དུ་མའི་རང་བཞིན་དང་བྲལ་བའི་
ཚད་མས་དེ་བསལ་བ་ཉིད་ཀྱི་ཕྱིར་རོ། །སྔགས་ཀྱི་ཚུལ་ལ་ཡང་རྣམ་པར་ཤེས་པར་སྨྲ་བ་དང་། དབུ་མ་པའི་འདོད་གཞུང་གཙོ་བོ་ཉིད་ཡིན་པའི་ཕྱིར་རོ། །ཤེས་པའི་ངོ་བོ་ཞིག་ཏུ་འགྱུར་གྲང་ན། ཤེས་པ་ཡང་རྣམ་པ་དང་བཅས་པ་ཞིག་གམ། རྣམ་པ་མེད་པ་ཞིག་ཏུ་འགྱུར་གྲང་། 
རྣམ་པ་དང་བཅས་པ་ལ་ཡང་ཤེས་པ་གཉིས་མེད་པའི་ངོ་བོའམ། དུ་མའི་ངོ་བོ་ཞིག་ཏུ་འགྱུར་ཞེས་རྣམ་པར་བརྟག་པར་བྱ་བ་ཡིན་ནོ། །དེ་ལ་རྣམ་པ་མེད་པར་སྨྲ་བ་དག་ནི་རྣམ་པར་ཤེས་པ་རྣམ་པ་དང་བཅས་པ་ནི་རྣམ་པ་ཐམས་ཅད་དུ་ཡོད་པ་མ་ཡིན་ཏེ། ནམ་མཁའི་མེ་ཏོག་དང་འདྲའོ། །
ཞེས་སྨའོ། །མངོན་སུམ་ལ་སྔོན་པོ་དང་། སེར་པོ་དང་། དཀར་པོ་ལ་སོགས་པ་དང་། བུམ་པ་དང་། སྣམ་བུ་དང་། ཤིང་རྟ་ལ་སོགས་པའི་ངོ་བོར་རྣམ་པ་རྣམས་སྣང་བ་མ་ཡིན་ནམ། དོན་དེ་དག་ལ་མེད་པའི་ཕྱིར་ཤེས་པའི་ངོ་བོ་ཉིད་ཡིན་ན། དེ་ཇི་ལྟར་རྣམ་པ་དང་བཅས་པ་མ་ཡིན་ཞེ་ན། 
བདེན་ཏེ། རྣམ་པ་རྣམས་སྣང་བ་ཉིད་ནི་ཡིན་མོད་ཀྱི་འོན་ཀྱང་བརྫུན་པ་ཡིན་ནོ། །བརྫུན་པ་ཉིད་ཀྱང་གཅིག་དང་དུ་མ་དང་བྲལ་བའི་མཚན་ཉིད་ཀྱིས་རབ་ཏུ་གྲུབ་པའོ། །ཚད་མའི་ངོ་བོ་དེ་ཡང་གཞན་དག་ཏུ་བཤད་པ་ཉིད་ཀྱིས་འདིར་མ་སྤྲོས་སོ། །བརྫུན་པ་ཉིད་དུ་གྲུབ་པས་ཀྱང་སྒྱུ་མའི་རང་བཞིན་དང་འདྲ་
བར་རྣམ་པར་འཁྲུལ་པའི་རང་བཞིན་རབ་ཏུ་སྟོན་ལ། འཁྲུལ་པ་ལྡོག་པས་ཀྱང་ཤེལ་སྒོང་དག་པ་ལྟ་བུ་རྣམ་པ་མེད་པ་དེ་ཁོ་ན་དོན་དམ་པར་གྲུབ་པར་འགྱུར་རོ། །དེ་བས་ན་རྣམ་པ་དང་བཅས་པའི་རྣམ་པར་ཤེས་པ་ནི། ཤེས་པ་གཉིས་མེད་པའི་ངོ་བོའམ། དུ་མའི་ངོ་བོར་ཡོད་དོ་ཞེས་པའི་རྟོག་པ་

44-1-210a

གཉིས་ཀ་བསལ་བ་ཡིན་ནོ། །རྣམ་པ་མེད་པའི་ཤེས་པ་ཡང་དམིགས་པའི་རིག་བྱར་གྱུར་པ་རྨི་ལམ་ན་ཡང་མ་དམིགས་པ་མ་ཡིན་ནམ། དེ་ཇི་ལྟར་ན་དོན་དམ་པར་གྲུབ་པར་ཡོད་པ་ཞེས་བྱ་ཞེ་ན། ཤེས་པ་རྣམས་ནི་བདེ་བ་ལ་སོགས་པའི་རྣམ་པ་ཡོངས་སུ་གསལ་བའི་
ངོ་བོ་རྣམ་པ་མེད་པར་རིག་པ་ཁོ་ན་ཡིན་ལ། སྔོན་པོ་ལ་སོགས་པའི་རྣམ་པ་ཡང་བརྫུན་པར་སྣང་བ་ཡིན་ནོ། །གཞན་དུ་ན་དེ་དག་བདེན་པ་ཉིད་ཡིན་ན་ནི་རྣམ་པ་ཐམས་ཅད་བདེན་པར་འགྱུར་ལ། དེ་ལྟ་ན་ཡང་གཟུང་བ་དང་འཛིན་པའི་དངོས་པོ་བདེན་པར་འགྱུར་རོ། །སྣང་བ་བདེན་པ་ཉིད་དུ་གྱུར་
པ་དེ་བས་ན། དེ་དག་ཐམས་ཅད་ཀྱང་གྲོལ་བ་ཉིད་དུ་ཐལ་བར་འགྱུར་ཏེ། ཅུང་ཞིག་ཀྱང་ལོག་པའི་རྣམ་པར་ངོ་བོ་མི་སྣང་བའི་ཕྱིར་རོ། །དེ་སྐད་དུ་ཡང་། ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །ཞེས་གསུངས་པའི་ཕྱིར། དེའི་ཕྱིར་མི་འདོད་དུ་ཟིན་ཀྱང་སྔོན་པོ་
ལ་སོགས་པའི་རྣམ་པ་བརྫུན་པ་ཉིད་དུ་བལྟ་བར་བྱའོ། །བདེ་བ་ལ་སོགས་པ་རྣམ་པ་བདེན་པར་དམིགས་པ་ཡིན་ན་དེ་ཇི་ལྟར་ན་དམིགས་པ་མ་ཡིན་ཞེ་ན། བདེ་བ་ལ་སོགས་པའི་རྣམ་པའི་ཤེས་པ་ཡང་རྣམ་པ་དང་བཅས་པ་ཁོ་ན་ལ་དམིགས་པ་ཁོ་ན་ཡིན་ཏེ། བདེ་བ་ལ་སོགས་པ་ནི་རྣམ་པའི་རང་
བཞིན་ཉིད་ཡིན་པའི་ཕྱིར་རོ། །བདེ་བ་ལ་སོགས་པའི་རྣམ་པས་སྟོང་པའི་རྣམ་པར་ཤེས་པ་ནི། རྨི་ལམ་ན་ཡང་རིག་པ་མེད་པ་མ་ཡིན་ནམ། འཁྲུལ་པ་མ་ལུས་པ་དང་བྲལ་བའི་ས་བརྒྱད་པ་ལ་དམིགས་པའི་རིག་བྱར་འགྱུར་རོ། །།འདི་ལ་ཡང་མནའ་དོར་བ་མ་ཡིན་པ་སྒྲུབ་པར་བྱེད་པའི་
ཚད་མ་ཡོད་པ་མ་ཡིན་ནོ་ཞེ་ན། དེ་ནི་བདེན་པ་མ་ཡིན་ཏེ། བསམ་པ་ཡོངས་སུ་མ་ཤེས་པའི་ཕྱིར་དང་། བདེ་བ་ལ་སོགས་པ་ཉིད་སྔོན་པོ་ལ་སོགས་པའི་རྣམ་པ་དང་བྲལ་བའི་རྣམ་པར་ཤེས་པ་མེད་པ་ཉིད་དུ་འདོད་པའི་ཕྱིར་ཏེ། དེ་ཡང་ད་ལྟ་ཉིད་ན། རང་རིག་པའི་ཚད་མས་གྲུབ་པ་སྲོག་ཆགས་
ཐམས་ཅད་ལ་ཡོད་པ་ཡིན་ན། ཇི་ལྟར་ན་དམིགས་པར་མ་གྱུར། དེ་ཡང་གཅིག་དང་དུ་མ་དང་བྲལ་བའི་ཕྱིར་བརྫུན་པ་ཉིད་དང་འཁྲུལ་པ་ཙམ་ཡིན་ཏེ། གཅིག་དང་དུ་མའི་རང་བཞིན་དང་བྲལ་བ་ཉིད་ཀྱིས། རྣམ་པ་དང་བཅས་པའི་ཤེས་པ་དང་། རྣམ་པ་མེད་པའི་ཤེས་པ་ལ་ཁྱབ་པ་ཉིད་ཀྱི་

44-1-210b

ཕྱིར་རོ། །རིག་པ་འདིས་རྣམ་པ་དང་བཅས་པ་དང་། རྣམ་པ་མེད་པའི་ཤེས་པ་མ་ལུས་པར་བརྫུན་པར་རབ་ཏུ་བསྒྲུབས་པས་ཅུང་ཞིག་ཀྱང་དོན་དམ་པའི་དངོས་པོ་དེ་ཁོ་ན་ཉིད་དུ་མེད་པ་མ་ཡིན་ནམ། ཇི་ལྟར་ན་མཚོན་པར་བྱ་བའི་རང་བཞིན་ཚད་མས་ཉེ་བར་མཚོན་པར་བྱ་ཞེ་ན། ཉེས་པ་དེ་ནི་
མེད་དེ། དབུ་མ་པ་འདོད་པའི་ཚད་མས་བརྫུན་པ་ཉིད་དུ་གྲུབ་པ་ཡང་། གཅིག་དང་དུ་མའི་རང་བཞིན་དང་བྲལ་བ། ཆོས་ཅན་གྱི་ངོ་བོ་སྣང་བ་ཙམ་དང་སྒྱུ་མ་ལྟ་བུ་མ་བཀག་པའི་ཕྱིར་རོ། །བརྫུན་དུ་སྣང་བ་དེ་ཉིད་ལ་ཡང་མཚོན་པར་བྱ་བ་དང་། མཚོན་པར་བྱེད་པ་དང་། འཁོར་བ་
དང་། མྱ་ངན་ལས་འདས་པ་དང་། དཀྱིལ་འཁོར་གྱི་འཁོར་ལོ་ལ་སོགས་པ་བསྒོམས་པས་འགྲོ་བ་མ་ལུས་པའི་དོན་མཛད་པ་ལ་སོགས་པ་གནོད་པ་མེད་པར་རྣམ་པར་གཞག་པ་གྲུབ་པ་ཡིན་ནོ། །དེ་སྐད་དུ་ཡང་། སངས་རྒྱས་རྡོ་རྗེ་སེམས་དཔའ་ཉིད། །ཀུན་རྫོབ་ཉིད་དུ་རབ་ཏུ་
གྲུབ། །ཅེས་གསུངས་སོ། །དངོས་པོ་སྐྱེས་པ་ཐམས་ཅད་བརྫུན་པའི་ངོ་བོ་ཉིད་ཀྱིས་སྙིང་པོ་མེད་པ་མ་ཡིན་ནམ། དེའི་ཚེ་ཅིའི་ཕྱིར་བྲི་བའི་དཀྱིལ་འཁོར་ལ་སོགས་པ་བསྒོམ་པའི་འབད་པ་བྱེད་ཅེ་ན། དེ་ནི་བདེན་པ་མ་ཡིན་ཏེ། ལོག་པར་སྒྲོ་འདོགས་གཅོད་པའི་ཕྱིར་རོ། །
གྲོལ་བྱེད་བརྫུན་ཡང་འབད་པར་བྱ། །ཞེས་བྱ་བའི་ཚིག་གིས་ཇི་ལྟར་ཡང་རྣམ་པར་དཔྱད་ན། ཡང་དག་པའི་དངོས་པོའི་ངོ་བོ་ཉིད་མེད་པ་དེ་ལྟར་ན་ཡང་བདག་བདེ་བར་གྱུར་ཅིག །བདག་སྡུག་བསྔལ་བར་མ་གྱུར་ཅིག་ཅེས་བྱ་བ་ནི། སྲེད་པ་སྲོག་ཆགས་མ་ལུས་པ་ལ་ཡོད་དོ། །འདི་ལྟར་དགེ་
བ་དང་མི་དགེ་བའི་རྨི་ལམ་ལོག་པ་ཉིད་དུ་མཚུངས་ཀྱང་དགེ་བའི་རྨི་ལམ་མཐོང་བས་ནི། ཡིད་བདེ་བར་གྱུར་ལ། མི་དགེ་བའི་རྨི་ལམ་གྱིས་ནི་ཡིད་མི་བདེ་བར་འགྱུར་ཏེ། དེ་བསལ་བའི་ཕྱིར་དམ་པའི་ཆོས་ཀློག་པ་དང་། སྔགས་ཟློས་པ་ལ་སོགས་པ་ལ་རབ་ཏུ་འཇུག་པར་འགྱུར་རོ། །དེ་
བཞིན་དུ་བརྫུན་པ་བཞིན་དུ་ཁྱད་མེད་ཀྱང་སྡུག་བསྔལ་ལ་སོགས་པ་རང་བཞིན་གྱི་རྣམ་པར་རྟོག་པ་སྤངས་པའི་ཕྱིར་དང་། ཡང་དག་པར་རྫོགས་པའི་བྱང་ཆུབ་ཀྱི་མཚན་ཉིད་ཀྱི་འབྲས་བུ་ཐོབ་པར་བྱ་བའི་ཕྱིར་རྟོག་པ་དང་ལྡན་པ་དོན་དུ་གཉེར་བ་རྣམས་རབ་ཏུ་འཇུག་པར་འགྱུར་རོ། །རྩོམ་པ་འདིའི་

44-1-211a

དོན་གང་ཡིན་པ་དེའི་དོན་ཉམས་པར་འགྱུར་བ་མ་ཡིན་ནམ། འདི་ལྟར་མཚན་གཞི་དང་། མཚན་ཉིད་དཔྱད་པ་ན་སྐབས་ལ་བབ་པ་དེ་ཡང་གཏམ་གཞན་དུ་ཐལ་བས་བརྗོད་པའི་ཕྱིར། གང་དུ་སོང་བ་མི་ཤེས་སོ་ཞེ་ན། དེ་རྣམ་པ་བདུན་དུ་དབྱེ་བ་བྱས་པ་ཉིད་མ་
ཡིན་ནམ་ཞེ་ན། བདེན་ཏེ་བུ་རམ་དང་མངར་བ་ཉིད་ཀྱི་ཚུལ་གྱིས་དེ་ལྟར་ནི་མི་ཤེས་ཏེ། དེ་ལས་སྙིང་པོ་དང་སྙིང་པོ་མ་ཡིན་པ་གང་ཞེ་ན། སྨྲས་པ། སྔགས་ཀྱི་ཚུལ་ལ་བརྗོད་པའི་རིམ་པ་མེད་པའི་ཕྱིར་དང་། ལྷའི་རྣལ་འབྱོར་གྱི་སྙོམས་པར་འཇུག་པའི་སྒོམ་པ་དོན་མེད་པའི་ཕྱིར་དང་། 
རིགས་པ་མེད་པའི་ཕྱིར་ན། དང་པོ་སྙིང་པོ་མེད་པ་ཉིད་དེ། འདི་ལྟར་ཚོགས་པ་ཅན་རྣམས་ཚོགས་པར་གྱུར་ན། འབྲས་བུ་གང་ཡིན་པ་དེ་གདོན་མི་ཟ་བ་ཉིད་ཡིན་ནོ། །གཞན་དུ་ན་དེའི་ཚོགས་པ་མ་ཡིན་པར་འགྱུར་ཏེ། དེ་བས་མངོན་དུ་བྱས་པའི་གནས་སྐབས་ན་ཚོགས་པ་ཅན་རྣམས་
ཚོགས་པས་ན། དེའི་འབྲས་བུ་གདོན་མི་ཟ་བར་ཡོད་པར་འགྱུར་རོ། །དེ་ལྟར་གྱུར་པས་དང་པོ་ཉམས་པ་ཡིན་ནོ། །སྐུ་ལ་སོགས་པའི་རྣམ་པས་སྟོང་པའི་བདེ་བའི་ངོ་བོ་འབའ་ཞིག་མི་དམིགས་པའི་གཉིས་པ་བདེན་པ་ཉིད་མ་ཡིན་ཏེ། འདི་ལྟར་མཚན་མས་རྣམ་པར་ངེས་པ་ཉིད་རྟོག་པ་
དང་ལྡན་པས་བསྒོམ་པར་བྱ་བ་ཉིད་ཡིན་གྱི། གང་ཡང་རུང་བ་ནི་མ་ཡིན་ནོ། །ཚད་མས་གྲུབ་པ་ཁོ་ན་དམིགས་པ་ཉིད་ཡིན་ལ། དེ་ཉིད་སྐྱེ་བོ་ཐམས་ཅད་ཀྱིས་འདོད་པར་བྱ་བ་ཉིད་དུ་སྣང་ངོ་། །དེ་བས་ན་གཅིག་པུ་མི་དམིགས་པའི་ཕྱིར་དང་། འདོད་པར་བྱ་བ་མ་ཡིན་པའི་ཕྱིར་དང་། འཁོར་
ལོའི་རང་བཞིན་མི་དམིགས་པའི་ཕྱིར་དང་། མངོན་སུམ་དུ་བྱེད་པར་མི་ནུས་པའི་ཕྱིར་དང་། འབད་པ་ཉིད་མཚུངས་པའི་ཕྱིར་གཉིས་པ་རྣམ་པར་རྟོག་པ་ཙམ་ཡིན་ནོ། །གནོད་པར་བྱེད་པ་མེད་པའི་ཡང་དག་པའི་དོན་གྱི་རང་བཞིན་ཉིད་ཀྱིས་རང་དབང་དུ་གྱུར་པ་དོར་བར་མི་ནུས་པ་ཉིད་ཀྱི་
ཕྱིར་དང་ལྡན་པའི་ངོ་བོ་ལ་བྱེ་བྲག་མེད་པའི་ཕྱིར་དང་། དགོས་པ་མེད་པའི་ཕྱིར་གསུམ་པ་དགེ་བ་མ་ཡིན་ཏེ། འདི་ལྟར་ལྷན་ཅིག་དམིགས་ནས། དེའི་བདག་ཉིད་གྲུབ་པ་ལས་གཅིག་ཡོངས་སུ་དོར་ན་གཞན་ཡང་གདོན་མི་ཟ་བར་ཡོངས་སུ་སྤངས་པའམ། ཡང་ན་འགའ་ལ་ཡང་མ་

44-1-211b

ཡིན་ནོ། །སྤྲོས་པ་ཉིད་ཀྱིས་འབད་པ་ཉིད་མངས་པའི་ཕྱིར་དང་། རྣམ་པར་དཔྱད་མི་བཟོད་པ་ཉིད་ཀྱིས་འཁྲུལ་པའི་ངོ་བོ་ཡིན་པས་དོན་དམ་པའི་ངོ་བོ་ཉིད་མ་ཡིན་པའི་ཕྱིར། གསུམ་པའི་ཐ་མའི་ཕྱོགས་ཀྱང་ལེགས་པ་མ་ཡིན་ནོ་ཞེ་ན། དེ་ལ་འགའ་ཞིག་ལས་རིགས་པ་ཅུང་ཞིག་ཅིག་
བརྗོད་པར་མི་བྱ་སྟེ། སྤྲོས་པའི་ངོ་བོ་ཉིད་དུ་གྱུར་ཀྱང་། ཕྲ་མོ་དང་། ཐིག་ལེ་ལ་སོགས་པ་ཡང་དང་ཡང་དུ་བསྒོམས་པ་ནི་ཇི་སྲིད་དུ་མངོན་སུམ་དུ་གྱུར་པ་དེ་སྲིད་དུ་འབད་པས་ཡང་དང་ཡང་དུ་བསྒོམས་པའི་ཕྱིར་དང་། ཐམས་ཅད་དུ་བསྒོམ་པར་བྱ་བ་དངོས་པོ་ཉིད་དུ་ཡོད་ལ། དེ་ལ་འདིར་
གལ་ཏེ་འབད་པས་འཇིག་ན་ནི། ཅུང་ཞིག་ཀྱང་བསྒོམ་པར་མི་བྱ་བར་འགྱུར་རོ། །སྤྲོས་པ་རྣམས་ཀྱི་ངོ་བོ་ཉིད་ནི་དེ་ལྟ་ཡིན་ནོ་ཞེ་ན། སྤྲོས་པ་དང་སྤྲོས་པ་མེད་པ་དག་བསྒོམ་པའི་གནས་སྐབས་ན་ཁྱད་པར་ཅི་ཞིག་ཡོད། འོན་ཏེ་སྤྲོས་པ་མེད་པར་མྱུར་དུ་བརྟན་པོར་གྱུར་པ་འདི་ཁྱད་པར་
ཡིན་ཏེ། དམིགས་པ་གང་ཁོ་ན་ལ་སེམས་ཡུན་རིང་པོར་རྒྱུན་མི་འཆད་པར་ཡང་དང་ཡང་དུ་གཏད་པས་དེ་ཉིད་ལ་བརྟན་པོར་འགྱུར་རོ་ཞེས་བྱ་བ་ནི་རིགས་པ་ཡིན་ནོ། །འདི་ལ་ལུང་ཡང་ཡོད་དེ། དེ་སྐད་དུ་ཡང་། དེའི་ཕྱིར་ཡང་དག་ཡང་དག་མིན། །གང་གང་ཤིན་ཏུ་གོམས་པ་
ལས། །བསྒོམ་པའི་སྟོབས་ནི་རྫོགས་པ་ན། །དེ་གསལ་མི་རྟོག་བློ་འབྲས་ཅན། །ཞེས་གསུངས་པ་དང་། འདིར་ཐག་མི་རིང་བ་ན། གནས་པ་ཡིན་པར་ཡང་གསུངས་ཏེ། ཨེ་མའོ་རྨོངས་ཉིད་ཨེ་མའོ་སྙོམ་ལས་ཅན། །ཨེ་མའོ་དོན་དམ་རྒྱབ་ཀྱིས་ཕྱོགས་འགྲོ་འདི། །རང་
སེམས་ཙམ་དང་འབྲེལ་པའི་སངས་རྒྱས་ཉིད། །རིང་མི་གནས་ཀྱང་མི་འབད་ངོ་མཚར་ཆེ། །ཞེས་པ་མ་ཡིན་ནམ། དེ་བས་འདི་ལ་ཁྱད་པར་མེད་དོ། །སྤྲོས་པ་ལ་དམིགས་པ་ནི་འཁྲུལ་པའི་ངོ་བོ་ཉིད་ཀྱིས་དོན་དམ་པ་མ་ཡིན་པ་ཉིད་དོ་ཞེ་ན། ཐམས་ཅད་དུ་བསྒོམ་པའི་ཡུལ་གྱིས་དངོས་པོ་
མི་འཁྲུལ་པས་ཅུང་ཞིག་ཀྱང་བསྒོམ་པར་བྱ་བ་མེད་པར་འགྱུར་ལ། དེ་བས་ན་རྣམ་པ་ཐམས་ཅད་དུ་ཐར་པའི་ལམ་བསྒོམ་པ་དོན་མེད་པར་འགྱུར་རོ། །དེ་ལྟར་འཁྲུལ་ཡང་སྒྱུ་མ་ལྟ་བུའི་རྣམ་པར་ཞུགས་པས་སྤྲོས་པ་མེད་པར་བསྒོམ་པར་འགྱུར་བ་སྐྱོན་ཡོད་པ་མ་ཡིན་ནོ་ཞེ་ན། སྤྲོས་

44-1-212a

པ་དེ་ཡང་སྒྱུ་མའི་རྣམ་པར་ཞུགས་པས་དེ་ལ་ཡང་སྐྱོན་གྱི་སྐབས་ཅི་ཞིག་ཡོད། དེ་བས་ན་དོན་དུ་གཉེར་བས་སྤྲོས་པའམ། སྤྲོས་པ་མེད་པ་ཡང་རུང་། གང་ཁོ་ན་འདོད་པའི་ཚད་མ་དང་ལྡན་པའམ། ཅིག་ཤོས་དེ་ཉིད་ལེ་ལོ་སྤངས་ནས་ཕྱག་རྒྱ་ཆེན་པོ་དོན་དུ་གཉེར་བས་
བསྒོམ་པར་བྱ་སྟེ་ཤིན་ཏུ་ཐལ་ཆེས་པས་ཆོག་གོ། །དེ་ལ་སྙིང་པོ་དང་ཅིག་ཤོས་ཀྱི་རྣམ་པར་དབྱེ་བ་ཡང་བླ་མ་མཉེས་པར་བྱེད་པ་རྣམས་ཀྱིས་ཤེས་པར་བྱེད་པ་ཡིན་ནོ། །དགོས་པ་ལ་སོགས་པ་གསུམ་པའི་ཕྱོགས་ལ་བཤད་པའི་ཉེས་པ་དང་། གསང་སྔགས་ཀྱི་ཚུལ་གྱི་རིམ་པ་མེད་པའི་
ཕྱིར།ལྔ་པ་སྐྱོན་དང་བྲལ་བ་མ་ཡིན་ནོ། །སྔར་སྔོན་དུ་བྱས་པའི་ཕྱིར། སྔགས་ཀྱི་ཚུལ་ལ་རབ་ཏུ་སྦྱོར་བ་ཡོད་པ་མ་ཡིན་ནམ། ཅིའི་ཕྱིར་དེ་ལ་མེད་ཅེ་ན། བདེན་ཏེ། བསྒྲུབ་པར་བྱ་བ་འབྲས་བུ་མངོན་དུ་གྱུར་པའི་གནས་སྐབས་དེ་ཡང་རིམ་པ་འདི་ལ་མེད་པ་དང་། མངོན་དུ་གྱུར་པ་ཡོངས་
སུ་བཏང་བ་དང་། དགོས་པ་མ་མཐོང་བའི་ཕྱིར་རོ། །རང་གི་འདོད་པས་བཟློག་མི་ནུས་པའི་ཕྱིར་དང་། དགོས་པ་མེད་པའི་ཕྱིར་དང་། སེམས་ཅན་གྱི་དོན་མེད་པའི་ཕྱིར། ལྔ་པའི་མཐའི་རབ་ཏུ་དབྱེ་བ་རྟོག་པའི་དྲི་མས་སྟོང་པ་མ་ཡིན་ནོ། །དེ་ལ་ཇི་ལྟར་བཟློག་མི་ནུས་ཤེ་ན། ཇི་ལྟར་འགའ་
ཞིག་ལྡོག་པ་ནི་རྒྱུ་ལྡོག་པའམ། ཁྱད་པར་བྱེད་པ་བཟློག་པ་ལས་འགྱུར་ན། དེ་ལ་མངོན་སུམ་དུ་བྱས་པའི་དཀྱིལ་འཁོར་གྱི་འཁོར་ལོ་ཡང་ལྡོག་པར་བྱེད་པའི་རྒྱུའམ། ཁྱབ་པར་བྱེད་པ་ལྡོག་པ་ཡོད་པ་མ་ཡིན་ནོ། །རང་གི་འདོད་པས་འགོག་པ་ཡང་མི་ནུས་ཏེ་མི་མཐུན་པ་མེད་པའི་ཕྱིར། 
སྡུག་བསྔལ་ལ་སོགས་པ་འགོག་པ་འདོད་ཀྱང་སྡུག་བསྔལ་ལ་སོགས་པ་ལ་འཇུག་པ་མཐོང་བའི་ཕྱིར་རོ། །སྟོང་པ་ཉིད་ཀྱིས་ལྡོག་པར་བྱེད་པ་ཡོད་པ་མ་ཡིན་ནམ། འདི་ལྟར་ཤིང་གི་ཕུང་པོ་ལ་མེ་རབ་ཏུ་འབར་བས་ཤིང་མ་ལུས་པ་ཐལ་བར་བྱས་ནས་དེའི་འོག་ཏུ་བདག་ཉིད་ཀྱང་རང་གི་
ངང་ཁོ་ནས་ལྡོག་པར་འགྱུར་བ་དེ་དཀྱིལ་འཁོར་གྱི་འཁོར་ལོ་སྟོང་པ་ཉིད་ཀྱི་ཡེ་ཤེས་ཀྱི་མེ་རབ་ཏུ་འབར་བས་མངོན་སུམ་དུ་བྱས་ནས་ཀྱང་། དཀྱིལ་འཁོར་གྱི་འཁོར་ལོ་མ་ལུས་པར་ལྡོག་པར་བྱེད་ལ། དེ་ཡང་རང་གི་ལྡོག་པར་འགྱུར་རོ་ཞེ་ན། དེ་ནི་བདེན་པ་མ་ཡིན་ཏེ། དཔེ་དང་མཐུན་

44-1-212b

པ་མ་ཡིན་པའི་ཕྱིར་རོ། །དེ་ལ་འདི་ལྟར་ཤིང་འགྱུར་བར་བྱེད་པའི་རྒྱུར་གྱུར་པའི་མེ་ནི་ཤིང་གི་འགྱུར་བ་ཡང་དག་པར་སྐྱེད་པ་ཉིད་ཀྱིས་ཤིང་འགྱུར་བར་བྱེད་པ་ནི་མེ་ཡིན་ནོ་ཞེས་འཇིག་རྟེན་པ་རྣམས་སེམས་ལ་འདིར་ན་སྟོང་པ་ཉིད་ཀྱི་དཀྱིལ་འཁོར་འཁོར་ལོས་སྒྱུར་བར་བྱེད་པའི་རྒྱུ་མ་ཡིན་ན་
དེའི་ཕྱིར་ལྡོག་པར་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། སྟོང་པ་ཉིད་ལ་རང་གི་ངང་གིས་ལྡོག་གོ་ཞེས་ཀྱང་སྨྲ་བར་བྱ་བ་མ་ཡིན་ནོ། །རྒྱུར་མི་འགྱུར་དུ་ཆུག་ན་ཡང་སྟོང་པ་ཉིད་ཁྱབ་པར་བྱེད་པ་ནི་འགྱུར་བ་མ་ཡིན་ནམ། ཁྱབ་པར་བྱེད་པ་ཤིང་ལོག་པས་ཁྱབ་པར་ཤིང་ཤ་པ་ལྡོག་པ་བཞིན་
དུ་ལྡོག་པ་འགྱུར་རོ་ཞེ་ན། དེ་ཡང་སྙིང་པོ་མ་ཡིན་ཏེ། འདི་ལྟར་ཐམས་ཅད་དུ་ཤེས་བྱའི་དཀྱིལ་འཁོར་ཐམས་ཅད་ལ་ཁྱབ་པར་བྱེད་པ་དེ་ཁོ་ན་ཉིད་ཀྱི་ངོ་བོ་སྟོང་པ་ཉིད་དེ་ལ་ལྡོག་པ་ནམ་ཡང་ཡོད་པ་མ་ཡིན་ནོ། །གལ་ཏེ་ལྡོག་པར་འགྱུར་ན་ཡང་དག་པར་རྫོགས་པའི་བྱང་ཆུབ་མངོན་
སུམ་དུ་བྱེད་པ་ལས་དུས་སྔ་མའམ། དེ་མ་ཐག་ཏུ་སངས་རྒྱས་བཅོམ་ལྡན་འདས་ལྡོག་པར་འགྱུར་ན་མ་ཡིན་ཏེ། ཡང་དག་པར་རྫོགས་པའི་སངས་རྒྱས་སུ་གྱུར་ནས་ཀྱང་ཐུགས་རྗེས་དུས་ཇི་སྲིད་ཅིག་གི་བར་དུ་གནས་པ་ཉིད་ཀྱིས་ཞལ་གྱིས་བཞེས་པའི་ཕྱིར་འགྱུར་བ་ཡང་མ་ཡིན་
ནོ། །འོན་ཀྱང་སྟོང་པ་ཉིད་ཀྱང་ཡེ་ཤེས་ཀྱི་ངོ་བོ་ཉིད་ལ། འཁོར་ལོ་ཡང་ཡེ་ཤེས་ཀྱི་ངོ་བོ་ཉིད་ཡིན་ནོ། །ཅི་སྟེ་སྟོང་པ་ཉིད་ཀྱི་ཡེ་ཤེས་སྐྱེས་པས་འཁོར་ལོའི་ཡེ་ཤེས་ལོག་ན་སྟོང་པ་ཉིད་ཀྱི་ཡེ་ཤེས་ལས་གང་གིས་ལྡོག་པར་བྱེད། དེ་ཉིད་ཀྱིས་ལྡོག་པ་ནི་འགལ་བའི་ཕྱིར་ལ།
རྒྱུའམ་ཁྱད་པར་བྱེད་པ་མེད་པ་དེ་བས་ན་སྟོང་པ་ཉིད་ཀྱི་ཡེ་ཤེས་ལ་ལྡོག་པ་མེད་དོ། །དེ་བས་ན་དཀྱིལ་འཁོར་གྱི་འཁོར་ལོ་ཡང་སྟོང་པ་ཉིད་ཀྱིས་ལྡོག་གོ་ཞེས་བྱ་བ་ཡང་མ་ཡིན་ཏེ། སྟོང་པ་ཉིད་ལ་ལྡོག་པར་བྱེད་པ་ཡིན་པ། ལོག་པ་དང་སྟོང་པ་ཉིད་ཀྱིས་ལྡོག་པར་བྱེད་པ་ཡིན་
ནོ་ཞེས་སུ་ཞིག་སྨྲ། འོན་ཀྱང་ལྡོག་པར་བྱེད་པ་དེ་ནི་བླ་མའི་མན་ངག་ལས་ཤེས་སོ་ཞེས་བྱ་བ་འདི་ཡང་སྙིང་པོ་མ་ཡིན་ཏེ། བླ་མའི་མན་ངག་ལས་ཀྱང་སྟོང་པ་ཉིད་དང་། དེ་ལྡོག་པ་ལས་མ་གཏོགས་པའི་ལྡོག་པར་བྱེད་པའི་ཚད་མ་གཞན་ཅུང་ཟད་ཡོད་པ་མ་ཡིན་ནོ། །སོ་སོར་སྐད་

44-1-213a

ཅིག་མའི་འཇིག་པ་དང་། སྐད་ཅིག་གིས་ཉམས་པའི་ངོ་བོས་དངོས་པོ་ཐམས་ཅད་ལ་ཁྱབ་མོད་ཀྱི། རྒྱུད་ཀྱི་རྒྱུན་ལྡོག་པ་ནི་མ་ཡིན་ནོ། །དེའི་ཕྱིར་རང་གི་བདོག་པ་བརྟག་པར་མི་བྱ་སྟེ་ལྡོག་པའི་སྙིང་པོ་མེད་པ་ལ་རྟོག་པ་དང་ལྡན་པ་རྣམས་ཀྱིས་བརྟགས་པ་
དགོས་པ་ཡོད་པ་མ་ཡིན་ནོ། །དེ་སྐད་དུ་ཡང་། སེམས་ཅན་རྣམས་ནི་སྒྲོལ་གྱུར་པ། །རབ་དགའ་རྒྱ་མཚོ་གང་ཡིན་དེ། །དེ་ཉིད་ཀྱིས་རྫོགས་མ་ཡིན་ནམ། །ཐར་པ་རོ་བྲལ་ཅི་ཞིག་དགོས། །ཞེས་གསུངས་སོ། །སེམས་ཅན་གྱི་དོན་ཡང་ལྡོག་པ་ལ་མེད་དེ། ནམ་མཁའི་
མེ་ཏོག་ལ་ནམ་ཡང་དོན་གྱི་བྱ་བ་ཅུང་ཞིག་ཀྱང་མི་སྲིད་དེ། ཡུན་རིང་པོར་འགགས་ཀྱང་དངོས་པོའི་ངོ་བོ་འདས་པའི་འཁོར་ལོ་ལས་སེམས་ཅན་གྱི་དོན་འབྱུང་བར་འགྱུར་རོ་ཞེས་བྱ་བ་ཡང་སྙིང་པོ་མ་ཡིན་ཏེ། ཡུན་རིང་པོར་ཁྱིམ་བྱ་ཤི་བ་ཡང་སྒྲ་སྒྲོགས་པར་ཐལ་བར་འགྱུར་བའི་ཕྱིར་
རོ། །རྣལ་འབྱོར་པའི་བྱིན་གྱི་རླབས་ཀྱིས་ནམ་མཁའ་ལས་ཀྱང་དངོས་པོའི་ངོ་བོ་འདས་པའི་འཁོར་ལོ་ལས་སེམས་ཅན་གྱི་དོན་བྱེད་པ་ཡིན་ལ། ནམ་མཁའ་ནི་མ་ཡིན་ཏེ། དེའི་ངོ་བོ་ཉིད་མ་ཡིན་པའི་ཕྱིར་རོ། །དཀྱིལ་འཁོར་འཁོར་ལོ་འགགས་པ་ལས་སེམས་ཅན་གྱི་དོན་
བྱེད་པའི་དུས་ན་ཡང་འབྱུང་ཡང་དེ་ལས་དོན་བྱེད་པར་འགྱུར་བ་མ་ཡིན་ནམ། དེ་བས་ན་འགགས་ཤིང་ཡང་སྐྱེ་བར་འགྱུར་རོ་ཞེ་ན། དེ་ནི་བདེན་པ་མ་ཡིན་ཏེ། ཇི་ལྟར་སེམས་ཅན་གྱི་དོན་བྱེད་པ་དེ་ལས་བྱུང་བ་མེད་པ་དེ་བཞིན་དུ་དོན་བྱེད་པའི་འཁོར་ལོ་ཡང་དེ་ལ་མི་སྲིད་དོ། །འགགས་
པ་ལས་ཀྱང་འབྱུང་བ་ལ་དགོས་པ་ཅུང་ཟད་ཀྱང་ཡོད་པ་མ་ཡིན་ཏེ། ཤིན་ཏུ་སྤྲོས་པས་ཆོག་གོ། །དྲུག་པའི་ཕྱོགས་ལ་བཤད་པའི་སྐྱོན་གྱིས་ཚོགས་བདུན་པ་ལ་ཡང་ཡོད་པས་བརྟག་པ་ལ་ཡང་བརྟག་པར་མི་བྱའོ། །དྲུག་པ་དང་བདུན་པ་མཚུངས་པ་ཉིད་ཀྱི་ཕྱིར་དེ་ལ་ཁྱད་པར་ཅི་
ཡོད་ཅེ་ན། ཁྱད་པར་ཡོད་དེ། སྔ་མའི་གནས་སྐབས་འཁོར་ལོའི་རྣམ་པ་ཉིད་ངེས་པར་བྱས་ནས་ཡང་དང་ཡང་དུ་རང་གི་འདོད་པས་སྐྱེད་པར་བྱེད་པ་ཉིད་ཡིན་ལ། བདུན་པ་ལ་ནི་དེ་མེད་པ་དེ་བས་ན་མཚུངས་པ་དང་ཐ་མི་དད་པ་མ་ཡིན་པར་བསྟན་ཏོ། །རྡོ་རྗེའི་ས་བོན་ཞེས་བྱ་བ་ལ་སོགས་

44-1-213b

པ་ལ། དེ་དག་ནི་བླ་མའི་མན་ངག་ལས་ཤེས་པར་བྱའོ། །གསལ་བྱེད་ལྔ་ཞེས་བྱ་བ་ལ་སོགས་པ་ལ། གསལ་བྱེད་ལྔ་ཞེས་བྱ་བའི་སྒྲ་ལ། བ་ལང་དང་། ཁྱི་དང་། གླང་པོ་དང་། རྟ་དང་། མིའི་མཚན་ཉིད་དོ། །བདུད་རྩི་ལྔའི་སྒྲ་ནི། བི་དང་། མུ་དང་། མ་དང་། ར་དང་། 
ཤུའི་མཚན་ཉིད་དོ། །དེ་དག་རྟག་ཏུ་བརྟེན་པ་ཁོ་ནས་བསྒྲུབ་པར་བྱ་བར་སེམས་སོ། །ཐིག་ལེ་ཞེས་བྱ་བ་ནི། སྙིང་གར་ཟླ་བ་ལ་གནས་པའི་ཐིག་ལེ་འོད་འཕྲོ་བར་གྱུར་པ་ལ་དེ་ཁོ་ན་ཉིད་བསྒྲུབ་པར་བྱ་བ་ཡིན་ནོ་ཞེས་སེམས་ནས་རྣམ་པར་སྒོམ་པར་བྱེད་དོ། །ཟླ་བ་ཞེས་བྱ་བ་ནི་སྙིང་གའི་
གནས་སུ་ཟླ་བ་ཕྱེད་པའམ། ཟླ་བ་རྒྱས་པས་སྙིང་གར་པདྨ་ལ་གནས་པ་འགའ་ཞིག་རྣམ་པར་སྒོམ་པར་བྱེད་དོ། །སྨིན་དབུས་ཐིག་ལེ་ལས་བྱུང་དཀྱིལ་འཁོར་དང་། །ཞེས་བྱ་བ་ནི་སྨིན་མའི་དབུས་ཏེ་མཛོད་སྤུའི་གནས་སུ་ཐིག་ལེ་རྣམ་པར་བསྒོམ་པར་བྱའོ། །ཐིག་ལེ་དེ་ལས་
བྱུང་བའི་དཀྱིལ་འཁོར་ནི། རླུང་དང་། ཆུ་དང་། དབང་ཆེན་གྱི་དཀྱིལ་འཁོར་དང་མེའི་མཚན་ཉིད་དོ། །འདི་སྐད་དུ་བསྟན་པར་འགྱུར་ཏེ། ཁ་དང་། རྣ་བ་ད་ང་། སྣ་དང་། མིག་ལག་པའི་སོར་མོས་བཀབ་ལ། སྨིན་མའི་དབུས་སུ་ཐིག་ལེ་བལྟ་བར་བྱའོ། །དེ་ལ་ཡང་གསལ་
པོར་གྱུར་པའི་གནས་སྐབས་སུ་དགེ་བ་དང་མི་དགེ་བའི་ལྟས་ཡང་དག་པར་སྟོན་པར་བྱེད་པ། དབང་ཆེན་ལ་སོགས་པའི་དཀྱིལ་འཁོར་རབ་ཏུ་བསྐྱེད་པའི་ཐིག་ལེ་དེ་ལ་ཡང་དེ་ཁོ་ན་ཉིད་དུ་སེམས་སོ། །རླུང་གི་རང་བཞིན་ཞེས་བྱ་བ་ནི་པུ་ར་ཀ་དང་། ཀུམ་པ་ཀ་དང་། རེ་ཙི་ཀ་དང་། ཤཱནྟ་ཀ་
སྟེ། དབུགས་འབྱུང་རྔུབ་ལ་སོགས་པའི་མཚན་ཉིད་དོ། །འདི་སྐད་དུ་བཤད་པ་ཡིན་ཏེ། དེ་ལ་འདི་ལྟར་གྲངས་ཅན་ལ་སོགས་པས་བསྟན་པའི་རླུང་གི་རང་བཞིན་ཤེས་པར་བྱས་ནས། དབུགས་བསྒགས་པ་ལས་བརྟན་པོར་བྱས་ནས། ནམ་མཁའ་ལ་རྒྱུ་བས་འོང་བ་དང་། གཞན་
གྱི་གྲོང་དུ་འཇུག་པ་དང་། གྲོལ་བའི་བར་དུ་མངོན་སུམ་དུ་བྱེད་པར་འགྱུར་བའོ་ཞེས་བྱ་བ་ནི་རླུང་གི་དེ་ཁོ་ན་ཉིད་དུ་སྨྲ་བ་རྣམས་ཀྱིའོ། །ལྕེའུ་ཆུང་ཞེས་བྱ་བ་ནི་མེད་པའི་ཕྱོགས་ལྕེའི་ཕུགས་ཀྱི་རང་གི་སྟེང་ན་གླང་པོ་ཆེའི་སྣའི་རྣམ་པ་ལྟ་བུ་ཁ་འོག་ཏུ་བལྟས་པ་ལྕེའི་མིང་

44-1-214a

ཅན་དུ་ལྕེའུ་ཆུང་ཡོད་དེ། དེ་ཡང་ནུས་པའི་ངོ་བོ་སྡིག་པའི་རང་བཞིན་དུ་ཡོད་པ་དེ་ཁོ་ན་ཉིད་ཡིན་ནོ། །དེ་ལ་ལྕེའི་རྩེ་མོས་རེག་པར་གྱུར་ཙམ་ན་བདུད་རྩི་རྒྱུན་མི་འཆད་པར་འཇིག་པར་འགྱུར་རོ། །བདུད་རྩི་རྒྱུན་བབས་པ་དེས་ཀྱང་དོན་དམ་པའི་བདག་
ཉིད་ཚིམ་པར་འགྱུར་བ་བསྒོམ་ཞེས་བྱ་བ་ནི་ལྕེའུ་ཆུང་གི་དེ་ཁོ་ན་ཉིད་ཡིན་ནོ། །སོགས་པའི་སྒྲས་ནི་སྙིང་གའི་དབུས་ཀྱི་དཀྱིལ་འཁོར་རྩིབས་བཅུ་དྲུག་པའི་དབུས་ན་ཧཱུྃ་གནས་པ་ཡེ་ཤེས་ཀྱི་རང་བཞིན་བཞི་པའི་ངོ་བོ་དེ་ཁོ་ན་ཉིད་བསྒོམ་པར་བྱའོ་ཞེས་བྱ་བ་ལ་སོགས་པ་བཟུང་སྟེ། ཡང་
སྨྲས་པ། བཅུ་ལས་དྲུག་ལྷག་རྩ་དང་ལྡན་པའི་འཁོར་ལོ་ཡི། །དཀྱིལ་ན་གནས་པའི་སྙིང་གར་རྣམ་པར་གནས་པའི་བདག །དེས་ནི་དེ་ཡི་ཁྱད་པར་ལྟ་བུའི་གྲུབ་པ་སྟེར། །དེ་ནི་མངོན་པར་མི་གཡོ་བ་ཡི་ཡིད་དག་གིས། །རྣལ་འབྱོར་པ་ཡི་སེམས་དེ་དེ་ལྟར་མངོན་པར་བསམ། །
ནུབ་པར་གྱུར་པའི་མགོན་པོ་རྒྱལ་བར་གྱུར་དེ་ནི། །ནུས་པ་དག་གིས་དེ་ནི་ཡོངས་སུ་བསྐོར་དང་བཅས། །ཞེས་བྱ་བ་དེ་ལྟ་བུ་མུ་སྟེགས་བྱེད་པ་ལ་སོགས་པ་དེ་ཁོ་ན་ཉིད་དུ་འདོད་པ་དེ་དག་ཐམས་ཅད་ནི་དེ་ཁོ་ན་ཉིད་མ་ཡིན་ནོ་ཞེས་བདག་ཉིད་ཀྱིས་བརྟག་པར་བྱ། དཔྱད་པར་བྱའོ་ཞེས་བྱ་བའི་བར་
དུའོ། །རྨི་ལམ་མིག་འཕྲུལ་ཞེས་བྱ་བ་ལ་སོགས་པ་ལ། རྨི་ལམ་དང་། མིག་འཕྲུལ་ལྟ་བུ་དང་། གཟུགས་བརྙན་དང་། སྒྱུ་མ་དང་། སྨིག་རྒྱུ་དང་། དྲི་ཟའི་གྲོང་ཁྱེར་དང་། ཆུ་ཟླ་ལྟ་བུའོ། །གཞན་གྱི་སྒྲས་ནི། ནམ་མཁའ་དང་། བྲག་ཅ་དང་། དབུ་བ་ལྟ་བུའོ་ཞེས་བྱ་བ་ལ་
སོགས་པའི་སྒྲས་སོ། །དེ་ལྟ་བུའི་མངོན་པར་བརྗོད་པ་ནི་སྨྲ་བ་པོས་དེ་ལྟ་བུའི་བསྟན་པའི་བསྒྲུབ་པར་བྱ་བ་ལས་གཞན་མེད་པ་ཉིད་དེ། གཞན་ཡང་འདིར་བཤད་པ་ཁོ་ན་བསྒྲུབ་པར་བྱ་བ་ཡིན་ནོ་ཞེས་སྒྲ་དེ་དེ་ལ་འཇུག་པར་རང་ཉིད་ཀྱིས་ཤེས་པར་བྱའོ། །ཟབ་མོ་སྟོང་ཉིད་སོ་སོར་སྣང་བ་ཙམ། །
ཞི་བ་ཤིན་ཏུ་ཕྲ་བ་སྒྲས་བརྗོད་མིན། །གོས་མེད་དངོས་བྲལ་དྲི་མེད་ལ་སོགས་དང་། །ཞེས་བྱ་བ་ལ་སོགས་པའི་སྒྲས་ཞི་བ་དང་། རྣམ་པ་མེད་པ་དང་། སྤྲོས་པ་མེད་པ་དང་། ཐོག་མ་མེད་པ་དང་། འགག་པ་མེད་པ་ཞེས་བྱ་བ་ལ་སོགས་པའི་སྒྲ་ཡིས་ཀྱང་འཁྲུལ་པར་མི་བྱ་ཞིང་། གཞན་

44-1-214b

སྒྲུབ་ཏུ་ཡོད་པ་ནི་གཞན་གྱིས་བསྒྲུབ་པར་བྱ་བ་ཡོད་པ་ནི་འདིར་ཡོད་པའི་སྒྲ་དེས་བཤད་པའི་བསྒྲུབ་པར་བྱ་བ་ལས་མཆོག་འགའ་ཞིག་ཡོད་དོ་ཞེས་འཁྲུལ་པར་མི་བྱ་སྟེ། བཤད་པའི་བསྒྲུབ་པར་བྱ་བ་ཁོ་ན་དེ་དག་ཐམས་ཅད་ཀྱིས་བརྗོད་པར་བྱ་བ་ཡིན་ཞེས་ངེས་པར་བྱའོ། །དཔལ་ལྡན་གསང་
བ་འདུས་པ་ལས། །དྲི་མེད་ངག་མཆོག་མཐར་ཕྱིན་པའི། །ངག་གི་དབང་ཕྱུག་དེ་ཡིས་འདི། །བྱས་པས་བློ་ངན་འཇིག་གྱུར་ཅིག །བདག་གིས་འདི་བཤད་བྱས་པ་ལས། །པད་དཀར་ཀུནྡ་ཁ་བྱེ་ལྟ་བུ་དང་། །འོ་མ་སྐར་མ་ལྟ་བུའི་བསོད་ནམས་གང་བསགས་པ། །དེ་ཡིས་
འགྲོ་བ་བདག་ཉིད་དང་མཚུངས་རིག་མས་ཉེར་འཁྱུད་པའི། །དཔེ་མེད་བདེ་ཆེན་གང་བའི་དབང་ཕྱུག་དཔལ་གྱུར་ཤོག །དེ་ཁོ་ན་ཉིད་རིན་པོ་ཆེ་སྣང་བའི་རྣམ་པར་བཤད་པ། སློབ་དཔོན་ངག་གི་དབང་ཕྱུག་གྲགས་པས་མཛད་པ་རྫོགས་སོ།།      །།ལོ་ཙཱ་བ་འགོས་ལྷས་བཙས་ཀྱིས་རྒྱ་གར་
ཤར་ཕྱོགས་ཀྱི་དཔེ་ལས་ཞུ་གཏུགས་གཡར་ཁྲལ་འཚལ་བ་ལགས་སོ།།༄༅༅། །རྒྱ་གར་སྐད་དུ། སུ་བིཥྚི་སཱ་དྷ་ནོ་པ་ཡི་ཀ། བོད་སྐད་དུ། རབ་ཏུ་གསལ་བ་ཞེས་བྱ་བའི་སྒྲུབ་པའི་ཐབས། བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་
ལོ། །ཡེ་ཤེས་ཞབས་ལ་ཕྱག་འཚལ་ཏེ། །དེའི་གཞུང་རྡོ་རྗེ་ཅན་སྒྲུབ་ཐབས། །སློབ་མ་བློ་གྲོས་ཆུང་དོན་དུ། །རབ་ཏུ་གསལ་བར་བཤད་པར་བྱ། །རྩོམ་པའི་ནུས་པ་མེད་ན་ཡང་། །སྙིང་རྗེ་ཡིས་ནི་དྲངས་པ་ཡིས། །བུ་ལ་ཕན་པར་འདོད་པའི་མ། །རང་གི་ནུས་པ་འཇལ་མི་བྱེད། །
དེ་ལ་རྣལ་འབྱོར་པ་སྙིང་རྗེས་བྱང་ཆུབ་ཏུ་སེམས་བསྐྱེད་པ་སྦྱིན་པ་ལ་སོགས་པ་ལ་བརྩོན་པ། སྟོང་པ་ཉིད་ལ་ལྷག་པར་མོས་པ་གསང་བ་འདུས་པའི་དཀྱིལ་འཁོར་དུ་ཇི་ལྟ་བ་བཞིན་དུ་དབང་བསྐུར་བ་རྗེས་སུ་གནང་བ་ཐོབ་པ་བསྒོམ་པའི་ཆོ་ག་ལ་ཤིན་ཏུ་མཁས་པས། རི་བོ་ལ་སོགས་པའི་
ཕྱོགས་འགའ་ཞིག་ཏུ། བསམ་གཏན་གྱི་ཁང་པ་རྫས་ལ་སོགས་པས་ཉེ་བར་བྱུགས་པར་སྟན་ཤིན་ཏུ་འཇམ་པ་ལ་འདུག་སྟེ་རང་གི་སྙིང་གར་ཟླ་བ་ལ་གནས་པའི་ཧཱུྃ་གནས་ཏེ། དེའི་འོད་ཟེར་ལས་བྱུང་བའི་གཟུགས་རྡོ་རྗེ་ལ་སོགས་པ་རྣམས་ཀྱིས་ནམ་མཁའ་ལ་བཞུགས་པའི་བླ་མ་དང་།

44-1-215a

སངས་རྒྱས་དང་བྱང་ཆུབ་སེམས་དཔའ་རྣམས་ལ་ཡང་དག་པར་མཆོད་ནས། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། བྱང་ཆུབ་ཏུ་སེམས་བསྐྱེད་པ་དང་ལམ་ལ་གནས་པ་དང་། བདག་ཉིད་དབུལ་བ་ཡང་བྱས་ནས་སྟོང་པ་ཉིད་
བསྒོམས་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བས་བྱིན་གྱིས་རློབ་བོ། །དེ་ནས་དེར་ཉི་མའི་དཀྱིལ་འཁོར་ལ་གནས་པའི་ཧཱུྃ་ལས་བྱུང་བའི་རྡོ་རྗེའི་ལྟེ་བར་ཉི་མ་ལ་གནས་པའི་ཧཱུྃ་ལས་སྤྲོས་པའི་འོད་ཟེར་གྱིས་བགེགས་ཀྱི་ཚོགས་རྣམས་ཕམ་པར་བྱས་ནས་འོད་ཟེར་དེ་
ཡོངས་སུ་གྱུར་པ་ལས་རྡོ་རྗེ་དྲ་བ་དང་རྡོ་རྗེ་ར་བ་དང་རྡོ་རྗེའི་རང་བཞིན་ཅན་གྱི་རྣམ་པར་བསམས་ལ། དེའི་ནང་དུ་ཆོས་འབྱུང་བ་གྱེན་དཀར་གནས་པ། ནང་ཁོང་སྟོང་དབུས་ན་སྣ་ཚོགས་པདྨ་ལ་སྣ་ཚོགས་རྡོ་རྗེ་བསམས་ལ། དེར་ཡི་གེ་བྲུཾ་དང་འཁོར་ལོ་ལས་བྱུང་བའི་རྣམ་པར་སྣང་མཛད་
སྐུ་མདོག་དཀར་བ། དཀར་པོ་དང་ནག་པོ་དང་དམར་པོ་སྟེ་ཞལ་གསུམ་མངའ་བ་ཕྱག་དྲུག་ལས་ཕྱག་གཉིས་ཀྱིས་རང་དང་འདྲ་བའི་རིག་མ་དམ་པ་ལ་འཁྱུད་པ། ཕྱག་ལྷག་མ་རྣམས་ལ་འཁོར་ལོ་དང་རལ་གྲི་དང་པདྨ་དང་རིན་པོ་ཆེ་བསྣམས་པ་རིམ་བཞིན་བསམས་ལ། དེ་ཡོངས་སུ་
གྱུར་པ་ལས་གཞལ་ཡས་ཁང་གྲུ་བཞི་པ་ལ་སྒོ་བཞི་པ་རྟ་བབས་བཞི་ལ་སོགས་པས་བརྒྱན་པ། ལྷ་བཅུ་དགུའི་གནས་སྣ་ཚོགས་པདྨ་ལ་གནས་པའི་ཉི་མའི་དཀྱིལ་འཁོར་བདུན་དང་། ཟླ་བའི་དཀྱིལ་འཁོར་བཅུ་གཉིས་ཀྱི་གདན་དང་ལྡན་པ་བསྒོམ་པར་བྱའོ། །དེའི་དབུས་མའི་
གདན་ལ་ཨ་ལ་སོགས་པ་ཉིས་འགྱུར་དུ་བྱས་པ་ལས། མཚན་སུམ་ཅུ་རྩ་གཉིས་སུ་གྱུར་པའི་ཟླ་བའི་དཀྱིལ་འཁོར་དང་ཡི་གེ་ཀ་ལ་སོགས་པར་ད་དྷ་ཌ་ཌྷ་ཡ་ལ་དང་བཅས་ཉིས་འགྱུར་དུ་བྱས་པའི་ཆའི་རྣམ་པར་དག་པ་དཔེ་བྱད་བཟང་པོ་བརྒྱད་ཅུ་ནི་ཟླ་བའི་དཀྱིལ་འཁོར་གཉིས་
པའོ། །དེའི་སྟེང་དུ་ཧཱུྃ་ལས་བྱུང་བའི་རྡོ་རྗེ་དམར་པོ་ལྟེ་བ་ལ་ཧཱུྃ་གིས་མཚན་པ་བསམས་ལ། ཨོཾ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བས་ང་རྒྱལ་བྱའོ། །དེ་ནས་ཡི་གེ་ཧཱུྃ་ལས་འོད་ཟེར་སྤྲོས་པས་འགྲོ་བ་རྣམས་རྡོ་རྗེ་འཆང་དང་འདྲ་བར་བྱས་ལ་དེ་ཉིད་དུ་བསྡུས་ཏེ་ཟླ་བ་དང་རྡོ་རྗེ་ཡོངས་སུ་

44-1-215b

གྱུར་པ་ལས་རྡོ་རྗེ་སེམས་དཔའ་རྣམ་པར་སྣང་མཛད་དང་འདྲ་བར་བསམ་པར་བྱས་པ་ལས། ཁྱད་པར་ནི་འཁོར་ལོའི་གནས་སུ་རྡོ་རྗེ་བསྣམས་པ་རིན་པོ་ཆེའི་ཅོད་པན་དང་ལྡན་པའོ། །དེའི་རྗེས་ལ་འདོད་ཆགས་ཆེན་པོས་འདུལ་བའི་སྣོད་ཀྱི་འཇིག་རྟེན་ལ་དམིགས་ནས་རབ་ཏུ་དགའ་བའི་
སྒྲས་རྒྱལ་བའི་ཚོགས་རྣམས་རང་གི་ལུས་ལ་བཅུག་སྟེ། བདེ་བ་དང་ལྡན་པར་བཏོན་ལ་སྤྱན་ལ་སོགས་པ་ལྷ་མོ་དགུའི་གཟུགས་སུ་རང་རིག་པའི་ལྷ་མོའི་ནང་དུ་ཆུད་པར་བྱའོ། །དེ་བཞིན་གཤེགས་པ་ལྔ་པོ་རང་གི་ཁ་ནས་བཅུག་སྟེ། ལུས་ཀྱི་ནང་དུ་ཆུད་པར་བྱས་ལ། རྡོ་རྗེའི་ལམ་
ནས་བྱང་ཆུབ་སེམས་ཞུ་བའི་རང་བཞིན་དུ་ཕྱུང་ལ་ཧཱུྃ་གིས་བྱིན་གྱིས་བརླབ་པར་བསམས་པ་ལས། རྡོ་རྗེ་འཆང་བདག་པོར་གྱུར་པའི་དཀྱིལ་འཁོར་རྣམས་སྤྲུལ་ལ། དེར་སེམས་ཅན་རྣམས་བཅུག་ལ་ཡང་དེ་བཞིན་གཤེགས་པ་ཐམས་ཅད་བཅུག་པའི་ཡེ་ཤེས་ཀྱི་བདུད་རྩིས་སྔར་གྱི་
སེམས་ཅན་རྣམས་དབང་བསྐུར་ལ་དབྱུང་བར་བྱ་སྟེ། ཀྵིཾ་ཛྲིཾ་ཁཾ་བཾ་ཥྐཾ་སཾ་ཞེས་བྱ་བའི་ས་བོན་ལས་གོ་རིམས་བཞིན་དུ། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རང་བཞིན་སའི་སྙིང་པོ་དང་། ཕྱག་ན་རྡོ་རྗེ་དང་། ནམ་མཁའི་སྙིང་པོ་དང་། འཇིག་རྟེན་དབང་ཕྱུག་
དང་། སྒྲིབ་པ་ཐམས་ཅད་རྣམ་པར་སེལ་བ་དང་། ཀུན་དུ་བཟང་པོ་ལྟ་བུར་གྱུར་པ་གདོན་པ་དང་། ཛཿཧཱུྃ་བཾ་ཧོཿཁཾ་རཾ་ཞེས་བྱ་བ་ལས་གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་ཀྱི་རང་བཞིན་གཟུགས་རྡོ་རྗེ་དང་། སྒྲ་རྡོ་རྗེ་དང་། དྲི་རྡོ་རྗེ་དང་། རོ་རྡོ་རྗེ་དང་། རེག་
རྡོ་རྗེ་དང་། ཆོས་ཀྱི་དབྱིངས་ཀྱི་རྡོ་རྗེ་ལྟ་བུར་གྱུར་པ་དང་། ལཱཾ་མཱཾ་པཱཾ་ཏཱཾ་ཨ་ཏ། ཞེས་བྱ་བ་ལས་ས་དང་། ཆུ་དང་། མེ་དང་། རླུང་གི་རང་བཞིན་སྤྱན་མ་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་ལྟ་བུར་གྱུར་པ་དང་། བྷྲཱུཾ་ཨཱཾ་ཛྲཱིཾ་ཁཾ་ཧཱུྃ་ཞེས་བྱ་བ་ལས། གཟུགས་དང་། ཚོར་བ་
དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་རང་བཞིན་རྣམ་པར་སྣང་མཛད་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་གྲུབ་པ་དང་། མི་བསྐྱོད་པ་ལྟ་བུར་གྱུར་པ་དབྱུང་བར་བྱའོ། །དེ་ནས་དཀྱིལ་འཁོར་གྱི་འཁོར་ལོ་ཡང་བསམ་པར་མི་

44-1-216a

བྱའོ། །དེའི་རྗེས་ལ། ཨོཾ་ཨཱཿཧཱུྃ། ཞེས་བྱ་བའི་ཡི་གེ་གསུམ་པོ་སྐུ་དང་། གསུང་དང་། ཐུགས་ཀྱི་རང་བཞིན་ཅན་ཡི་གེ་ཧོ་གཉིས་དང་སྤེལ་བ་རང་དང་འདྲ་བའི་རིག་མའི་ཆགས་པའི་སྟོབས་ཀྱིས་ཞུ་བར་གྱུར་པར་བསམས་ལ། ཡང་དེའི་སྟོབས་ཀྱིས་བདག་ཉིད་
དང་རང་གི་རིག་པ་ཡང་འདོད་ཆགས་ཆེན་པོའི་ཚུལ་གྱིས་ཏིང་ངེ་འཛིན་གྱིས་ཞུ་བར་གྱུར་པས། སྤྱན་ལ་སོགས་པའི་གླུའི་སྒྲས་བསྐུལ་བར་བྱའོ། །སེམས་ཅན་ཁམས་ནི་གནས་ཀྱི་དབང་ཕྱུག་ཁྱོད་ནི་རྡོ་རྗེའི་ཐུགས། །དགའ་བའི་ཡིད་འོང་དོན་ཆེན་འདོད་པ་དག་ལ་སྐྱབས་སུ་གསོལ། །
མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །སེམས་ཅན་ཡབ་ཆེན་གཉེན་མཆོག་བདག་ལ་དགྱེས་པར་མཛད་དུ་གསོལ། །རྡོ་རྗེ་སྐུ་ཁྱོད་བཀའ་ཡི་འཁོར་ལོ་སེམས་ཅན་ཀུན་ལ་ཕན། །སངས་རྒྱས་དོན་དུ་བྱང་ཆུབ་དོན་དམ་རབ་ཏུ་ཕན་པར་གཟིགས། །མགོན་པོ་
གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །འདོད་ཆགས་དམ་ཚིག་ཆགས་པས་བདག་ལ་དགྱེས་པར་མཛད་དུ་གསོལ། །ཁྱོད་ནི་རྡོ་རྗེའི་གསུང་སྟེ་ཀུན་ལ་ཕན་ཞིང་ཐུགས་བརྩེ་ན། །འཇིག་རྟེན་དག་གི་དོན་དང་དགོས་པ་མཛད་ལ་རབ་ཏུ་བརྩོན། །མགོན་པོ་གལ་ཏེ་དེ་རིང་བདག་
ནི་གསོན་པར་མཆིས་བཞེད་ན། །དགའ་བའི་སྤྱོད་པ་ཀུན་དུ་བཟང་པོས་བདག་ལ་དགྱེས་པར་མཛད་དུ་གསོལ། །ཁྱོད་ནི་རྡོ་རྗེའི་སྤྱོད་པ་དགྱེས་ཟེར་དམ་ཚིག་མཆོག་གི་ཕན་དོན་ཆེ། །ཡང་དག་རྫོགས་སངས་རྒྱས་ཀྱི་གདུང་མཆོག་མཉམ་ཉིད་ཐུགས་བརྩེ་བས། །མགོན་པོ་གལ་ཏེ་དེ་
རིང་བདག་ནི་གསོན་པར་མཆིས་བཞེད་ན། །ཡོན་ཏན་རིན་ཆེན་མང་པོའི་གཏེར་གྱུར་བདག་ལ་དགྱེས་པར་མཛོད། །དེ་ལྟར་བསྐུལ་བའི་དབང་གིས་ཞུ་བ་ལས་བྱུང་བའི་ཡི་གེ་ཧཱུྃ་ཡོངས་སུ་གྱུར་པ་ལས་བྱུང་བའི་རྡོ་རྗེ་དེའི་ལྟེ་བ་ལ་ཧཱུྃ་གནས་པར་བསམས་ལ། དེའི་འོད་ཟེར་གྱིས་འགྲོ་བ་
རྣམས་རྡོ་རྗེ་འཆང་བར་བྱས་ལ་སླར་ཡང་དེ་ཉིད་དུ་བཅུག་ནས། དེ་ཡོངས་སུ་གྱུར་པ་ལས་བདག་ཉིད་རྡོ་རྗེ་འཆང་བ་སྐུ་མདོག་སྔོ་བ། ཞལ་གསུམ་པ་ཞལ་གཡས་པ་དཀར་བ་དང་། གཡོན་པ་དམར་བ་དང་། ཕྱག་གཉིས་ཀྱིས་རང་སྣང་བའི་རིག་མ་ལ་འཁྱུད་པ་ཕྱག་ལྷག་མ་རྣམས་ན། རྡོ་རྗེ་

44-1-216b

དང་། རལ་གྲི་དང་། པདྨ་དང་། ནོར་བུ་གོ་རིམས་ཇི་ལྟ་བ་བཞིན་དུ་བསྣམས་པར་བསམས་ལ། ཨོཾ་དྷརྨ་དྷཱ་ཏུ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བས་ང་རྒྱལ་བྱའོ། །འདི་ནི་བསྙེན་པ་ཆུང་ངུ་དང་། རྒྱུ་མཐུན་པའི་འབྲས་བུ་ཆུང་ངུའོ། །དེ་ནས་མིག་ལ་སོགས་པ་བྱིན་གྱིས་བརླབ་
པར་བྱ་སྟེ། མིག་གཉིས་ཀྱི་དབུས་སུ་ཟླ་བ་ལ་ཡི་གེ་ཀྵིཾ་དང་། འཁོར་ལོ་ཡོངས་སུ་གྱུར་པ་ལས་སའི་སྙིང་པོ་སྐུ་མདོག་དཀར་པོ། གཡས་པའི་རྩ་བའི་ཕྱག་ན་འཁོར་ལོ་བསྣམས་པ། དེའི་གཡོན་དུ་ཡི་གེ་ཛྲིཾ་དང་། མེ་ལོང་ཡོངས་སུ་གྱུར་པ་ལས་གཟུགས་རྡོ་རྗེ་སྐུ་མདོག་དཀར་བ་
མེ་ལོང་བསྣམས་པའོ། །རྣ་བ་གཉིས་ཀྱི་དབུས་སུ་ཟླ་བ་ལ་ཡི་གེ་ཛྲིཾ་དང་རྡོ་རྗེ་ལས་བྱུང་བའི་ཕྱག་ན་རྡོ་རྗེ་སྐུ་མདོག་སྔོ་བ་རྡོ་རྗེ་བསྣམས་པ། དེའི་གཡོན་དུ་ཧཱུྃ་དང་པི་ཝང་ལས་བྱུང་བའི་སྒྲ་རྡོ་རྗེ་སྔོ་བ་པི་ཝང་བསྣམས་པ། སྣ་བུག་གཉིས་སུ་ཟླ་བ་ལ་ཁཾ་དང་རིན་པོ་ཆེ་ལས་བྱུང་བའི་ནམ་མཁའི་
སྙིང་པོ་སྐུ་མདོག་སེར་བ་རིན་པོ་ཆེ་བསྣམས་པ། དེའི་གཡོན་དུ་བཾ་དང་དྲིའི་དུང་ཕོར་ལས་བྱུང་བའི་དྲི་རྡོ་རྗེ་སྐུ་མདོག་སེར་བ་དྲིའི་དུང་ཕོར་བསྣམས་པའོ། །ལྕེ་ལ་གཾ་དང་པདྨ་ཡོངས་སུ་གྱུར་པ་ལས་འཇིག་རྟེན་དབང་ཕྱུག་སྐུ་མདོག་དམར་བ། པདྨ་དམར་པོ་བསྣམས་པའོ། །དེའི་གཡོན་
དུ་ཧོ་དང་རོའི་སྣོད་ཡོངས་སུ་གྱུར་པ་ལས་རོ་རྡོ་རྗེ་སྐུ་མདོག་དམར་བ། རོའི་སྣོད་བསྣམས་པའོ། །སྤྱི་བོར་ཡི་གེ་ཀྵཾ་དང་རལ་གྲི་ལས་བྱུང་བའི་སྒྲིབ་པ་རྣམ་པར་སེལ་བ། སྐུ་མདོག་ལྗང་གུ་རལ་གྲི་བསྣམས་པ། དེའི་གཡོན་དུ་ཁཾ་དང་གོས་སྣ་ཚོགས་ལས་བྱུང་བའི་རེག་རྡོ་རྗེ་སྐུ་མདོག་
ལྗང་གུ་གོས་སྣ་ཚོགས་བསྣམས་པ། ལྐོག་མའི་འོག་ཏུ་ཡི་གེ་སཾ་དང་རྡོ་རྗེ་ཡོངས་སུ་གྱུར་པ་ལས་ཀུན་དུ་བཟང་པོ་སྐུ་མདོག་དཀར་པོ་རྡོ་རྗེ་བསྣམས་པ། དེའི་གཡོན་དུ་རཾ་དང་ཆོས་འབྱུང་ཡོངས་སུ་གྱུར་པ་ལས་ཆོས་ཀྱི་དབྱིངས་རྡོ་རྗེ་སྐུ་མདོག་དཀར་བ་ཆོས་འབྱུང་བསྣམས་པ་བསམ་པར་
བྱའོ། །འོག་ནས་ལྷ་རྣམས་ཐམས་ཅད་ཀྱང་ཞལ་གསུམ་དང་ཕྱག་དྲུག་པར་བཤད་དེ། ཕྱག་གཉིས་ཀྱིས་རང་རང་གི་ཐབས་དང་ཤེས་རབ་ལ་འཁྱུད་པ། སྐུ་མདོག་སེར་བ་དང་། དམར་བ་དང་། ལྗང་བའི་ཞལ། གཡས་སྔོ་བ། གཡོན་པ་དཀར་བ། དཀར་པོའི་གཡོན་པ་དམར་

44-1-217a

བ། སྔོན་པོའི་གཡས་པ་དཀར་བ་ཡིན་ནོ། །ཇི་སྐད་བཤད་པའི་ལྷ་ཐམས་ཅད་ཟླ་བའི་དཀྱིལ་འཁོར་རིན་པོ་ཆེའི་ཅོད་པན་ཅན། ཕྱག་ལྷག་མ་རྣམས་ནི་རྡོ་རྗེ་དང་། རལ་གྲི་དང་། པདྨ་དང་། རིན་པོ་ཆེ་རིམ་བཞིན་དུ་བསྣམས་པ། གང་གི་རྩ་བའི་ཕྱག་ན་རལ་
གྲིའམ་པདྨ་དང་། རིན་པོ་ཆེ་བསྣམས་པ། དེ་རྣམས་ཀྱི་གཡས་ཀྱི་རྩ་བའི་ཕྱག་གཉིས་པ་ནི་འཁོར་ལོ་བསྣམས་པའོ། །འདི་ནི་ཉེ་བར་བསྒྲུབ་པ་ཆུང་ངུ་དང་རྣམ་པར་སྨིན་པའི་འབྲས་བུ་ཆུང་ངུ་ཡིན་ནོ། །དེ་ནས་སྙིང་གར་ཟླ་བ་ལ་གནས་པའི་ཧཱུྃ་དང་རྡོ་རྗེ་ཡོངས་སུ་གྱུར་པ་ལས། ཐུགས་
རྡོ་རྗེ་སྐུ་མདོག་སྔོ་བ་ལྐོག་མར་པདྨའི་ལྟེ་བར་གནས་པའི་ཨ་ཡོངས་སུ་གྱུར་པ་ལས་གསུང་རྡོ་རྗེ་སྐུ་མདོག་དམར་པོ་པདྨ་བསྣམས་པ། དཔྲལ་བའི་ནང་དུ་འཁོར་ལོའི་ལྟེ་བར་གནས་པའི་ཨོཾ་དང་འཁོར་ལོ་ཡོངས་སུ་གྱུར་པ་ལས་སྐུ་རྡོ་རྗེ་སྐུ་མདོག་དཀར་བ་འཁོར་ལོ་བསྣམས་པ། འདི་རྣམས་
ཀྱི་ཐུགས་ཀར་གོ་རིམས་བཞིན་དུ། རྡོ་རྗེའི་ལྟེ་བ་དང་། པདྨ་གེ་སར་དང་། འཁོར་ལོའི་ལྟེ་བར་ཧཱུྃ་དང་ཨ་དང་ཨོཾ་གནས་པའི་འོད་ཟེར་ལས་བྱུང་བའི་གཟུགས་རྡོ་རྗེ་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའོ། །ཐུགས་དང་། གསུང་དང་། སྐུ་རྡོ་རྗེ་ཡང་དག་པར་
མཆོད་ལ་བཀུག་སྟེ། མདུན་དུ་བཞུགས་པ་དེས་རང་གི་ཐུགས་དང་། གསུང་དང་། སྐུ་བྱིན་གྱིས་བརླབ་པར་བྱའོ། །དཔལ་ལྡན་རྡོ་རྗེ་ཐུགས་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །
ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །དེ་ནས་རང་གི་ཐུགས་རྡོ་རྗེ་ལ་ཐུགས་རྡོ་རྗེ་བཅུག་ནས། ཨོཾ་སརྦྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། 
ཞེས་བྱ་བས་ང་རྒྱལ་བྱའོ། །ཆོས་ཀྱི་གསུང་ལམ་དཔལ་དང་ལྡན། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་གིས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །

44-1-217b

དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་གིས་མཛད་དུ་གསོལ། །དེ་ནས་རང་གི་གསུང་རྡོ་རྗེ་ལ་གསུང་རྡོ་རྗེ་བཅུག་སྟེ། ཨོཾ་སརྦྦ་ཏ་ཐཱ་ག་ཏ་བཱཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བ་འདིས་ང་རྒྱལ་བྱའོ། །དཔལ་ལྡན་རྡོ་རྗེ་སྐུ་འཆང་བ། །རྡོ་རྗེ་མི་ཕྱེད་གསུམ་བསྒོམས་
པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུས་ནི་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུས་ནི་མཛད་དུ་གསོལ། །དེ་ནས་རང་གི་སྐུ་རྡོ་རྗེ་ལ་སྐུ་རྡོ་རྗེ་
བཅུག་སྟེ། ཨོཾ་སརྦྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བ་འདིས་ང་རྒྱལ་བྱའོ། །འདི་ནི་སྒྲུབ་པ་ཆུང་ངུ་དང་། སྐྱེས་བུ་བྱེད་པའི་འབྲས་བུ་ཆུང་ངུའོ། །དེའི་རྗེས་ལ་ནུ་མའི་བར་དུ་རྡོ་རྗེའི་དབུས་སུ་ཕྱི་རོལ་གྱི་རྡོ་རྗེ་འཆང་ཇི་ལྟ་བ་དེ་འདྲ་བའི་ཡེ་ཤེས་སེམས་དཔའ་བསྒོམས་
ལ་དེའི་ཐུགས་ཀའི་རྡོ་རྗེའི་ལྟེ་བ་ལ་གནས་པའི་ཡི་གེ་ཧཱུྃ་གི་འོད་ཟེར་ལས་བྱུང་བའི་གཟུགས་རྡོ་རྗེ་ལ་སོགས་པས་ནམ་མཁའ་ལ་བཞུགས་པའི་དེ་བཞིན་གཤེགས་པ་རྣམས་ཡང་དག་པར་མཆོད་ནས་བཀུག་སྟེ། དེའི་འོད་ཟེར་ལས་བྱུང་བའི་ལྷ་མོ་ཡེ་ཤེས་ཀྱི་བདུད་རྩིས་གང་བའི་བུམ་པ་
ཐོགས་པ་རྣམས་ཀྱིས་བདག་ཉིད་ལ་དབང་བསྐུར་བ་དང་། དེ་བཞིན་གཤེགས་པ་ལྔའི་ཅོད་པན་དུ་གྱུར་པར་བསམ་པར་བྱའོ། །འདི་ནི་སྒྲུབ་པ་ཆེན་པོའི་ཆུང་ངུ་དང་། དབང་བསྐུར་བའི་འབྲས་བུ་ཆུང་ངུའོ། །དེ་བཞིན་དུ་རང་གི་ལྷ་མོ་བསྙེན་པ་ཆུང་ངུ་ལ་སོགས་པའི་དབྱེ་བས་མིག་ལ་
སོགས་པ་བྱིན་གྱིས་བརླབ་པ་དང་། ཐུགས་དང་། གསུང་དང་། སྐུ་བྱིན་གྱིས་བརླབ་པ་དང་། དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་སྔོན་དུ་འགྲོ་བས་ཡན་ལག་བཞི་རྫོགས་པར་བྱས་ལ་རིགས་ལྔ་དགོད་པར་བྱ་སྟེ། ནུ་མ་ཡན་ཆད་ཨོཾ་ཡོངས་སུ་གྱུར་པ་ལས་
རྣམ་པར་སྣང་མཛད་ཀྱི་རང་བཞིན། ནུ་མའི་འོག་ནས་ལྟེ་བ་ཡན་ཆད་ཀྱི་བར་དུ་ཧཱུྃ་ཡོངས་སུ་གྱུར་པ་ལས་མི་བསྐྱོད་པའི་རང་བཞིན་ཅན། རྐེད་པའི་ཕྱོགས་སུ་སྭཱ་ཡོངས་སུ་གྱུར་པ་ལས་རིན་ཆེན་འབྱུང་ལྡན་གྱི་རང་བཞིན། པདྨར་ཨ་ཡོངས་སུ་གྱུར་པ་ལས། འོད་དཔག་ཏུ་མེད་པའི་རང་

44-1-218a

བཞིན། བྱིན་པ་གཉིས་སུ་ཧཱ་ཡོངས་སུ་གྱུར་པ་ལས་དོན་ཡོད་པར་གྲུབ་པའི་རང་བཞིན་དུ་བསམ་པ་དང་། ཧཱུྃ་ཡོངས་སུ་གྱུར་པ་ལས་རང་གི་རྡོ་རྗེ། ཨོཾ་ཡོངས་སུ་གྱུར་པ་ལས་ནོར་བུའི་བུ་གར་ཡི་གེ་ཕཊ་རང་དང་འདྲ་བའི་ཡང་ཧཱུྃ་ཡོངས་སུ་གྱུར་པ་ལས་པདྨ་ཨཱཿཡོངས་
སུ་གྱུར་པ་ལས་ལྟེ་བར་བསམས་ལ། དེ་བཞིན་གཤེགས་པ་ཐམས་ཅད་ལ་མཆོད་པར་བྱ་བའི་ཕྱིར་དང་། ལྷན་ཅིག་བླ་ན་མེད་པའི་དགའ་བ་བརྩམས་ལ། ཨོཾ་སརྦྦ་ཏ་ཐཱ་ག་ཏཱ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བས་བྱིན་གྱིས་བརླབ་པར་བྱའོ། །འདི་ནི་དང་པོར་སྦྱོར་བ་ཞེས་
བྱ་བའི་ཏིང་ངེ་འཛིན་དང་པོའོ།།      །།དེའི་རྗེས་ལ་དེ་བཞིན་གཤེགས་པ་ལྔ་པོ་རང་གི་ཁའི་སྒོ་ནས་བཅུག་སྟེ། རྡོ་རྗེའི་ལམ་ནས་བྱུང་ནས་སྔ་མ་བཞིན་དུ་བྱང་ཆུབ་ཀྱི་སེམས་ཧཱུྃ་གིས་བྱིན་གྱིས་བརླབ་པར་བསམས་ལ། དེ་ཡོངས་སུ་གྱུར་པ་ལས་མི་བསྐྱོད་པ་གཙོ་བོར་གྱུར་པའི་
དཀྱིལ་འཁོར་གྱི་འཁོར་ལོ་སྤྲུལ་ལ་རང་གཞན་གྱི་དོན་དུ་ཕྱི་རོལ་དུ་འབྱུང་བར་བྱ་སྟེ། བཛྲ་དྷྲྀཀ་ཅེས་བྱ་བས་མི་བསྐྱོད་པ་སྐུ་མདོག་ནག་པོ་རྡོ་རྗེ་བསྣམས་པ་ཕྱུང་ལ་སྤྲོས་པ་ལས་འགྲོ་བའི་དོན་བྱས་ནས་སླར་བསྡུས་ཏེ། རང་གི་ལུས་ལ་དངོས་པོ་ཐམས་ཅད་ཀྱིས་གཞུག་པར་བྱའོ། །དེ་
བཞིན་དུ་ཐམས་ཅད་ཀྱང་སྤྲོ་ཞིང་བསྡུ་བར་བྱ་སྟེ། ཛི་ན་ཛིཀ་ཅེས་བྱ་བས་རྣམ་པར་སྣང་མཛད་སྐུ་མདོག་དཀར་པོ་ཕྱག་ན་འཁོར་ལོ་བསྣམས་པ་ནི་ཤར་གྱི་ཟླ་བར་རོ། །རཏྣ་དྷྲྀཀ་ཅེས་བྱ་བས་རིན་ཆེན་འབྱུང་ལྡན་སྐུ་མདོག་སེར་བ་རིན་པོ་ཆེ་བསྣམས་པ་ནི་ལྷོའི་ཕྱོགས་སུའོ། །ཨཱ་རོ་ལྀཀ་ཅེས་བྱ་བས་
འོད་དཔག་ཏུ་མེད་པ་སྐུ་མདོག་དམར་བ་པདྨ་དམར་པོ་བསྣམས་པ་ནི་ནུབ་ཏུའོ། །པྲཛྙཱ་དྷྲྀཀ་ཅེས་བྱ་བས་དོན་ཡོད་པར་གྲུབ་པ་སྐུ་མདོག་ལྗང་གུ་རལ་གྲི་བསྣམས་པ་ནི་བྱང་དུའོ། །དེ་བཞིན་གཤེགས་པ་ཐམས་ཅད་ཀྱང་རལ་པ་དང་ཅོད་པན་མངའ་བ། ཉི་མའི་གདན་དང་ཉི་མའི་འོད་མངའ་བའོ། །
མོ་ཧ་རཱ་ཏི་ཞེས་བྱ་བས་ལྷ་མོ་སྤྱན་མ་སྐུ་མདོག་དཀར་མོ་འཁོར་ལོ་བསྣམས་པ་ནི་མེའི་ཕྱོགས་སུའོ། །དྭེ་ཥ་རཱ་ཏི་ཞེས་བྱ་བས་མཱ་མ་ཀཱི་སྐུ་མདོག་སྔོན་མོ། །ཨུཏྤལ་སྔོན་དམར་བསྣམས་པ་བདེན་བྲལ་གྱི་ཕྱོགས་སུའོ། །རཱ་ག་རཱ་ཏི་ཞེས་བྱ་བས་གོས་དཀར་མོ་སྐུ་མདོག་དམར་བ། པདྨ་

44-1-218b

དམར་པོ་བསྣམས་པ་ནི་རླུང་གི་ཕྱོགས་སུའོ། །བཛྲ་རཱ་ཏི་ཞེས་བྱ་བས་སྒྲོལ་མ་སྐུ་མདོག་སེར་མོ་ཨུཏྤལ་སེར་པོ་བསྣམས་པ་ནི་དབང་ལྡན་གྱི་ཕྱོགས་སུའོ། །ཨོཾ་ཨཱཿརཱུ་པ་བཛྲི་ཧཱུྃ། ཞེས་བྱ་བ་ལ་སོགས་པར་དེ་ཁོ་ན་ཉིད་གསུམ་དང་སྤེལ་པས་གཟུགས་རྡོ་རྗེ་ལ་སོགས་པའི་ལྷ་མོ་དཀྱིལ་
འཁོར་གྱི་གྲྭ་བཞི་དང་། ཤར་ཕྱོགས་ཀྱི་སྒོའི་ངོས་གཉིས་སུ་བསམ་པར་བྱའོ། །ལྷ་མོ་ཐམས་ཅད་ཀྱང་རིན་པོ་ཆེའི་ཅོད་པན་ཟླ་བའི་གདན་དང་ཟླ་བའི་འོད་མངའ་བའོ། །ཡ་མཱནྟ་ཀྲྀཏ་ཅེས་བྱ་བས་ཁྲོ་བོ་གཤིན་རྗེ་གཤེད་སྐུ་མདོག་སྔོ་བ་རྡོ་རྗེ་ཐོ་བ་བསྣམས་པ་ནི་ཤར་སྒོར་རོ། །པྲཛྙཱནྟ་ཀྲྀཏ་
ཅེས་བྱ་བས་གཞན་གྱིས་མི་ཐུབ་པ་སྐུ་མདོག་དཀར་པོ་དབྱིག་པ་བསྣམས་པ་ནི་ལྷོ་སྒོར་རོ། །པདྨཱནྟ་ཀྲྀཏ་ཅེས་བྱ་བས་རྟ་མགྲིན་སྐུ་མདོག་དམར་བ་པདྨ་དམར་པོ་བསྣམས་པ་ནི་ནུབ་སྒོར་རོ། །བིགྷྣཱནྟ་ཀྲྀཏ་ཅེས་བྱ་བས་བདུད་རྩི་ཐབ་སྦྱོར་སྐུ་མདོག་སྔོ་བ་རྡོ་རྗེ་སྔོན་པོ་བསྣམས་པ་ཕྱུང་སྟེ། 
བྱང་གི་སྒོར་བསྒོམ་པར་བྱའོ། །ཁྲོ་བོ་ཐམས་ཅད་ཀྱང་རྣམ་པར་འགྱུར་བ། འཇིགས་སུ་རུང་བ། དབུ་སྐྲ་དམར་སེར་གྱེན་དུ་འབར་བ། གསུས་པ་འཕྱང་བ། མཆེ་བ་གཙིགས་པ། ཉི་མའི་གདན་དང་ཉི་མའི་འོད་མངའ་བའོ། །དེ་ནས་རང་གི་སྔགས་ཀྱི་འོད་ཀྱིས་དཀྱིལ་འཁོར་གྱི་འཁོར་
ལོ་བཀུག་ལ་བཅུག་སྟེ་དབང་དུ་བྱས་ལ་གཤིན་རྗེ་གཤེད་ལ་སོགས་པ་ཉིད་ཀྱིས་བགེགས་མེད་པར་བྱས་ལ་རང་གི་སྔགས་བཟླས་པའི་མཆོད་ཡོན་ཕུལ་ཏེ་གཤིན་རྗེ་གཤེད་ལ་སོགས་ཉིད་ཀྱིས་ཛཿཧཱུྃ་བཾ་ཧོཿ། ཞེས་བྱ་བ་དང་རིམ་བཞིན་དུ་རང་གི་དཀྱིལ་འཁོར་དུ་དེ་དགུག་པ་དང་། གཞུག་པ་དང་
བཅིང་བ་དང་། དབང་དུ་བྱའོ། །འདི་དག་ནི་བསྙེན་པ་ཆེན་པོ་དང་། རྒྱུ་མཐུན་པའི་འབྲས་བུ་ཆེན་པོ་ཡིན་ནོ། །དེ་ནས་སྔ་མ་བཞིན་དུ་ཐམས་ཅད་ཀྱི་མིག་ལ་སོགས་པ་བྱིན་གྱིས་བརླབ་པ་ནི་བསྙེན་པའི་ཡན་ལག་ཆེན་པོ་དང་རྣམ་པར་སྨིན་པའི་འབྲས་བུ་ཆེན་པོའོ། །དེ་ནས་ཐམས་ཅད་
ལ་ཇི་སྐད་བཤད་པའི་རིམ་པས་ཐུགས་དང་གསུང་དང་སྐུ་བྱིན་གྱིས་བརླབས་པ་ནི་བསྙེན་པའི་ཡན་ལག་ཆེན་པོ་དང་སྐྱེས་བུ་བྱེད་པའི་འབྲས་བུ་ཆེན་པོའོ། །ཐམས་ཅད་ཀྱི་ཐུགས་ཀར་གནས་པའི་ཡེ་ཤེས་སེམས་དཔའི་ས་བོན་གྱི་ཡི་གེའི་འོད་ཟེར་གྱིས་ནམ་མཁའ་ལ་བཞུགས་པའི་དེ་བཞིན་

44-1-219a

གཤེགས་པ་རྣམས་མཆོད་ལ་དེའི་འོད་ཟེར་ལས་བྱུང་བའི་གཟུགས་རྡོ་རྗེ་ལ་སོགས་པ་ཡེ་ཤེས་ཀྱི་བདུད་རྩིས་གང་བའི་བུམ་པ་བསྣམས་པས་དེ་དབང་བསྐུར་བར་བསམས་ལ། ཐམས་ཅད་ཀྱི་ཅོད་པན་ལ་བདག་པོའི་དེ་བཞིན་གཤེགས་པ་རྣམས་བསམ་པར་བྱ་སྟེ། 
དེ་བཞིན་གཤེགས་པ་རྣམས་ལ་ནི་རྡོ་རྗེ་འཆང་བའོ། །སྤྱན་དང་གཟུགས་རྡོ་རྗེ་དང་གཤིན་རྗེ་གཤེད་ཀྱི་ཅོད་པན་ལ་ནི་རྣམ་པར་སྣང་མཛད་དོ། །མཱ་མ་ཀཱི་དང་སྒྲ་རྡོ་རྗེ་དང་ཆོས་ཀྱི་དབྱིངས་ཀྱི་རྡོ་རྗེ་དང་། གཞན་གྱིས་མི་ཐུབ་པ་དང་བདུད་རྩི་ཐབ་སྦྱོར་གྱིས་ནི་མི་བསྐྱོད་པའོ། །གོས་དཀར་མོ་
དང་རྡོ་རྗེ་དང་། རྟ་མགྲིན་གྱི་ནི་འོད་དཔག་ཏུ་མེད་པའོ། །སྒྲོལ་མ་དང་རེག་རྡོ་རྗེ་ལ་ནི་དོན་ཡོད་པར་གྲུབ་པའོ། །སའི་སྙིང་པོ་ལ་སོགས་པ་ལ་ནི་རང་རང་གི་མདོག་དང་རྗེས་སུ་མཐུན་པའི་དེ་བཞིན་གཤེགས་པའི་ཅོད་པན་ནོ། །ཀུན་དུ་བཟང་པོའི་ཅོད་པན་ལ་ནི་མི་བསྐྱོད་པའོ། །འདི་དག་ནི་སྒྲུབ་
པ་ཆེན་པོའི་ཡན་ལག་ཆེན་པོ་དང་དབང་བསྐུར་བའི་འབྲས་བུ་ཆེན་པོའོ། །དེ་ནས་མཆོད་པ་བྱས་ཏེ། དེ་བཞིན་གཤེགས་པ་ལྔ་ཁ་ནས་བཅུག་ལ་རྡོ་རྗེའི་ལམ་ནས་ཕྱུང་སྟེ་སྔ་མ་བཞིན་དུ་བྱང་ཆུབ་ཀྱི་སེམས་སུ་གྱུར་པ་དང་། རང་དང་འདྲ་བའི་རིག་མའི་བ་སྤུའི་བུ་ག་ནས་གཟུགས་རྡོ་རྗེ་ལ་སོགས་པ་
ལྷ་མོའི་ཚོགས་རང་རང་གི་མཚན་མ་ཐོགས་པ་དང་། མཆོད་པ་སྣ་ཚོགས་པ་དང་ཡང་བཅས་པ་སྤྲོས་པས་དཀྱིལ་འཁོར་གྱི་བདག་པོ་ཡང་དག་པར་མཆོད་ལ། ཨོཾ་སརྦྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བ་འདིས་བྱིན་གྱིས་བརླབ་པར་བྱའོ། །དེ་ནས་བདག་དཀྱིལ་འཁོར་པ་དང་
བཅས་པར་བསྟོད་པ་བྱས་པར་བསམ་པར་བྱའོ། །མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁས་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་དབྱངས་ལ་ཕྱག་འཚལ་ལོ། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་ཆེན་པོ། །རང་བཞིན་འོད་གསལ་
མཆོག་གི་མཆོག །སྟོན་པ་རྡོ་རྗེ་ཕྱག་འཚལ་ལོ། །རིན་ཆེན་རྒྱལ་པོ་རབ་ཏུ་བཟང་། །རྡོ་རྗེ་ནམ་མཁའ་དྲི་མེད་མཁའ། །རང་བཞིན་དག་པ་གོས་པ་མེད། །རྡོ་རྗེ་སྐུ་ལ་ཕྱག་འཚལ་ལོ། །རྡོ་རྗེ་མི་འཆི་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །

44-1-219b

རྡོ་རྗེ་གསུང་ལ་ཕྱག་འཚལ་ལོ།  །དོན་ཡོད་རྡོ་རྗེ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །རང་བཞིན་དག་པ་ཉིད་ལས་གྲུབ། །རྡོ་རྗེ་སེམས་དཔའ་ཕྱག་འཚལ་ལོ། །དེ་ནས་བདུད་རྩི་མྱོང་བ་བྱས་ཏེ། ཡཾ་ལས་བྱུང་བའི་རླུང་གི་དཀྱིལ་འཁོར་གཞུའི་དབྱིབས་ཅན་སྔོན་པོ་བ་དན་
གྱིས་མཚན་པ། དེའི་སྟེང་དུ་རཾ་ལས་བྱུང་བའི་མེའི་དཀྱིལ་འཁོར་གྲུ་གསུམ་དམར་པོ། དེའི་སྟེང་དུ་ཨ་ལས་བྱུང་བའི་པདྨའི་སྣོད་ལ་གནས་པའི་བདུད་རྩི་ལྔ་པོ་རྣམ་པར་སྣང་མཛད་ལ་སོགས་པའི་ས་བོན་ལས་བསྐྱེད་པ། ཨོཾ་གྱིས་བྱིན་གྱིས་བརླབས་པ་དེའི་ཡང་སྟེང་དུ་ཧཱུྃ་ལས་བྱུང་བའི་རྡོ་རྗེ་བསམས་ལ།
འབར་བ་དང་སྲེག་པ་ལ་སོགས་པའི་བྱ་བས་རྫོགས་པར་བྱས་ལ། ཨོཾ་གྱི་འོད་ཟེར་གྱིས་ཡེ་ཤེས་ཀྱི་བདུད་རྩི་དྲངས་ལ། དེ་བཞིན་གཤེགས་པ་རྣམས་ཀྱང་དེའི་ནང་དུ་ཆུད་པར་བྱས་ཏེ། རང་གི་སྔགས་ཀྱིས་བྱིན་གྱིས་བརླབས་ལ། ལྕེ་ལ་ཧཱུྃ་བཀོད་པའི་རྡོ་རྗེ་ལྕེར། རོ་རྡོ་རྗེས་བསྟབས་པས་དཀྱིལ་
འཁོར་པའི་ལྷ་རྣམས་དང་བཅས་པ་ལ་ཚིམ་པར་བྱའོ། །དཀྱིལ་འཁོར་གྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པའོ།།      །།དེ་ནས་ཡེ་ཤེས་སེམས་དཔའི་ཐུགས་ཀའི་ས་བོན་གྱི་འོད་ཟེར་གྱིས་འཇིག་རྟེན་གསུམ་པོ་སྣང་བར་བྱས་ལ་རྡོ་རྗེ་འཆང་བར་བྱས་ཏེ། དཀྱིལ་འཁོར་གྱི་འཁོར་
ལོར་གཞུག་པར་བྱའོ། །དཀྱིལ་འཁོར་གྱི་འཁོར་ལོའང་བདག་ལའོ། །བདག་ཉིད་ཀྱང་ཡེ་ཤེས་སེམས་དཔའ་ལའོ། །ཡེ་ཤེས་སེམས་དཔའ་ཡང་མཚན་མ་ལའོ། །མཚན་མ་ཡང་ཐིག་ལེའི་ནང་དུ་ཆུད་པར་བྱས་ལ་ཐིག་ལེ་ལ་དཀྱིལ་འཁོར་གྱི་འཁོར་ལོ་བསྐྱེད་པའི་རིམ་པས་སྐད་ཅིག་གིས་བསྒོམ་
པར་བྱའོ། །འདིར་བསྙེན་པ་ལ་སོགས་པ་ནི་ཆེན་པོའི་སྒྲར་བརྗོད་པར་བྱའོ། །ཡང་འོད་ཟེར་གྱི་ཕྲེང་བས་ས་བོན་སྣང་བར་བྱས་ལ། ས་བོན་ལས་མཚན་མ། མཚན་མ་ལས་ཡེ་ཤེས་སེམས་དཔའ། ཡེ་ཤེས་སེམས་དཔའ་ལས་ཀྱང་རྡོ་རྗེ་འཆང་བ་དེ་ལས་ཀྱང་དཀྱིལ་འཁོར། དཀྱིལ་འཁོར་ལས་ཀྱང་
འཇིག་རྟེན་གསུམ་པོར་སྤྲོ་བ་དང་བསྡུ་བ་བྱས་ལ་ཇི་སྲིད་འདོད་ཀྱི་བར་དུ་བསྒོམ་པ་ནི་ཐིག་ལེའི་རྣལ་འབྱོར་རོ། །དེ་ནས་དེ་བཞིན་གཤེགས་པ་ལྔ་ཁར་བཅུག་ལ་རྡོ་རྗེའི་ལམ་ནས་ཕྱུང་སྟེ་སྔ་མ་བཞིན་དུ་བྱང་ཆུབ་ཀྱི་སེམས་སུ་གྱུར་པ་རང་དང་འདྲ་བའི་རིག་མའི་པདྨའི་ལྟེ་བར། ནས་འབྲུ་ཙམ་གྱི་རྡོ་རྗེ་

44-1-220a

བསམས་ལ་དེའི་ནང་དུ་དཀྱིལ་འཁོར་གྱི་འཁོར་ལོ་བསྐྱེད་པའི་རིམ་པས་སྐད་ཅིག་ཙམ་གྱིས་བསྒོམ་པ་ནང་དུ་ཆུད་པར་བྱའོ། །འདིར་བསྙེན་པ་ལ་སོགས་པ་ནི་ཆེན་པོའི་སྒྲར་བརྗོད་པར་བྱའོ། །ཇི་སྲིད་བརྟན་པར་མ་གྱུར་པ་དེ་སྲིད་ཀྱི་བར་དུ་ཤིན་ཏུ་སྤྲོ་བར་མི་བྱ་ལ། བརྟན་
པར་གྱུར་ན་ནི་དེ་བཞིན་གཤེགས་པ་ལྔ་དང་དེའི་མཚན་མ་སྣ་ཚོགས་སྤྲོ་བར་བྱ་སྟེ་འདི་ནི་ཕྲ་མོའི་རྣལ་འབྱོར་རོ། །ཨོཾ་ཨཱཿཧཱུྃ་ཧཱུྃ། ཞེས་ཟློས་ཤིང་སྐུ་དང་གསུང་དང་ཐུགས་རྡོ་རྗེ་ལས་རེ་རེ་ཞིང་སྐུ་དང་གསུང་ཐུགས་གསུམ་གྱི་བདག་ཉིད་ཅན་ཡེ་ཤེས་སེམས་དཔའ་ནི་ལྔ་པོའི་བདག་ཉིད་ཅན་ཉིད་དུ་དེ་
དག་ཐམས་ཅད་རིམ་གྱིས་སམ་ཅིག་ཅར་ཡང་དག་པར་སྤྲོས་ལ་ལེགས་པར་མཆོད་དེ། ཉེ་བར་བསྡུས་ལ། དབུགས་རྔུབ་པ་དང་དབྱུང་བས་དལ་བ་དང་རིང་བ་མེད་པར་བཟླ་བར་བྱ་ཞིང་སྔགས་ལ་ཡང་ཞེན་པ་མེད་པར་གསང་སྔགས་བཟླ་བར་བྱའོ། །བདེ་བ་ལ་ཤིན་ཏུ་ཞེན་ན་སྔར་བཤད་པའི་
གླུས་བསྐུལ་ལ་འཁོར་ལོ་མཆོད་པར་བྱའོ། །སྐྱོ་བར་གྱུར་ན་མཐོ་གང་ཙམ་གྱིས་དཔགས་པར་ཟླ་བའི་དཀྱིལ་འཁོར་ལ་གནས་པའི་ཡི་གེ་ཨོཾ་བྱང་ཆུབ་ཀྱི་སེམས་ཀྱི་འོད་ཟེར་གྱི་ཕྲེང་བ་དང་བཅས་པ་དབུགས་དབྱུང་བ་དང་རྔུབ་པའི་ལྕགས་ཀྱུས་དྲངས་ལ་བདག་ཉིད་ཚིམ་པར་བྱའོ། །གཤེགས་
སུ་གསོལ་བར་འདོད་ན་མཆོད་པ་ལ་སོགས་པ་བྱས་ལ་ས་བོན་གྱི་སྔགས་ཀྱིས་འཁོར་ལོ་བདག་ཉིད་ཀྱི་ནང་དུ་ཆུད་པར་བྱས་ལ་སྐུ་ལ་སོགས་པར་བྱིན་གྱིས་བརླབས་པར་བསམས་ལ། སེམས་ཅན་ལ་ཕན་པའི་ཕྱིར་སྨོན་ལམ་བྱས་ནས། རང་གི་ལྷའི་ང་རྒྱལ་དུ་བྱས་ལ་ཡུལ་རྣམས་
གཟུགས་རྡོ་རྗེ་ལ་སོགས་པའི་རྣམ་པའམ། རྣམ་པར་སྣང་མཛད་ལ་སོགས་པ་དང་། རྡོ་རྗེ་འཆང་དང་འདྲ་བར་བལྟ་བར་བྱ་སྟེ། འདི་ཉིད་དེ་བཞིན་གཤེགས་པ་ཐམས་ཅད་ལ་མཆོད་པ་ཡིན་ནོ། །ཟས་ལ་སྤྱད་པའི་དུས་སུ་སྙིང་གར་ཟླ་བ་ལ་གནས་པའི་དཀྱིལ་འཁོར་གྱི་འཁོར་ལོ་
དམིགས་ལ་རང་གི་ཟས་བདུད་རྩི་ལྔའི་རང་བཞིན་ཅན་དུ་བསམས་ལ། རང་གི་སྔགས་ཀྱང་མངོན་པར་བཟླས་ལ་སྐུ་ལ་སོགས་པའི་ལྷ་རྣམས་ཚིམ་པར་བྱས་ཏེ། འདི་ཉིད་ནི་ནང་གི་སྦྱིན་སྲེག་ཡིན་ནོ། །དེ་བཞིན་དུ་འདོད་པའི་ཡོན་ཏན་ལྔས་བདག་དང་གཞན་ལ་མཆོད་པ་ནི་དེ་

44-1-220b

བཞིན་གཤེགས་པའི་དམ་ཚིག་ཡིན་ནོ། །དེ་ལྟ་བུའི་སྡོམ་པ་དང་ལྡན་པའི་རྣལ་འབྱོར་པས་བདག་དང་གཞན་ལ་མཆོད་པའི་བདེ་བར་གཤེགས་པ་མཆོད་པ་གང་ཅུང་ཟད་ཅི་བྱེད་པ་ཐམས་ཅད་ཕྱག་རྒྱ་དང་སྔགས་ཀྱི་རྣམ་པ་ཡིན་ཞིང་ཁ་ན་མ་ཐོ་བ་མེད་པས་འཚང་རྒྱ་བ་ཉིད་ཐོབ་པར་བྱེད་པ་
ཡིན་ནོ། །དམ་ཚིག་ཉམས་པ་ལ་དམ་ཚིག་རྡོ་རྗེའི་རྣལ་འབྱོར་པས་སྣ་ཚོགས་པདྨ་ལ་གནས་པའི་སྣ་ཚོགས་རྡོ་རྗེ་ལ་བཞུགས་པའི་ཡེ་ཤེས་སེམས་དཔའ་ཆོ་ག་བཞིན་དུ་བསྐྱེད་ལ། སྔར་བཤད་པའི་ཆོ་གས་དབང་བསྐུར་བ་བྱས་ལ་བཟླས་བརྗོད་ལ་སོགས་པ་བྱའོ། །ཕྱིའི་ཁྲུས་
ལ་ཡང་རིམ་པ་འདི་ཉིད་ཁྱད་པར་དུ་བསྟན་པར་བྱའོ། །ཐུན་གྱི་ཐ་མ་ཡང་དེ་བཞིན་དུ་མཆོད་པ་ལ་སོགས་པ་སྔོན་དུ་འགྲོ་བས་བཟླས་བརྗོད་བྱས་ལ་སྙིང་གར་འཁོར་ལོ་བསྡུས་ཏེ་སྙིང་རྗེ་དང་ཤེས་རབ་ཏུ་ལྡན་པས་ཉལ་བར་བྱའོ། །ལངས་པའི་དུས་སུ་སྤྱན་ལ་སོགས་པའི་གླུས་བདག་
ཉིད་ཡང་དག་པར་བསྐུལ་ལ་སྔ་མ་བཞིན་དུ་རང་གི་ལྷར་བསྐྱེད་དེ། མིག་ལ་སོགས་པ་བྱིན་གྱིས་བརླབ་པ་བྱས་ལ་དཀྱིལ་འཁོར་སྤྲོས་ཏེ་བཟླས་བརྗོད་ལ་སོགས་པ་བྱའོ། །དངོས་གྲུབ་བསྒྲུབས་ནས་སྔར་བཤད་པའི་དཀྱིལ་འཁོར་ལ་གནས་པ་ཉིད་ཀྱིས་བསྒྲུབ་པར་བྱའོ། །བགེགས་ནི་
བདུད་རྩི་ཐབ་སྦྱོར་གྱི་འཁོར་ལོར་བསམས་པས་འབད་མི་དགོས་པར་འཇོམས་པར་འགྱུར་རོ། །ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པའོ། །རབ་ཏུ་གསལ་བ་ཞེས་བྱ་བའི་སྒྲུབ་པའི་ཐབས་སློབ་དཔོན་དཔེ་མེད་པའི་རྡོ་རྗེས་མཛད་པ་རྫོགས་སོ།།      །།རྒྱ་གར་གྱི་
མཁན་པོ་ཆེན་པོ་བཱིརྱ་བྷ་དྲ་དང་། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།༄༅༅། །རྒྱ་གར་སྐད་དུ། ཤྲཱི་ས་མཱ་ཛ་ལོ་ཀེ་ཤྭ་ར་སཱ་དྷ་ནཾ་ནཱ་མ། བོད་སྐད་དུ། དཔལ་གསང་བ་འདུས་པ་འཇིག་རྟེན་དབང་ཕྱུག་གི་སྒྲུབ་
པའི་ཐབས་ཞེས་བྱ་བ། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །སྤྲུལ་པའི་འོད་ཟེར་དཔག་མེད་པ། །འཕྲོས་པས་འགྲོ་བའི་སྡུག་བསྔལ་སེལ། །རྣམ་རྟོག་མེད་བདེའི་བདག་ཉིད་ཅན། །དཔལ་ལྡན་རྡོ་རྗེ་ཆོས་

44-1-221a

ལ་འདུད། །དཔལ་ལྡན་འདུས་པ་སྣང་བ་ཆེ། །རྒྱུད་རྒྱལ་རིམ་པ་ལ་བརྟེན་ཏེ། །འཇིག་རྟེན་མགོན་པོ་སྒྲུབ་པ་ཡི། །རིམ་པ་མདོར་བསྡུས་གསལ་བར་བྲི། །དང་པོ་སྙིང་རྗེའི་སྟོབས་ལས་བྱུང་། །རྫོགས་པའི་བྱང་ཆུབ་སེམས་བརྟན་བྱས། །སྲིད་པའི་ལོངས་སྤྱོད་
བདེ་བ་ཆགས། །ཡོངས་སུ་འཛིན་པ་རྒྱབ་ཀྱིས་ཕྱོགས། །དད་སོགས་ནོར་ནི་ཕུན་ཚོགས་རྣམས། །བླ་མ་སངས་རྒྱས་དང་མཉམ་གུས། །དེས་བསྟན་དམ་ཚིག་སྤྱོད་པ་ནི། །ཡོངས་སུ་སྐྱོང་ལ་རབ་ཏུ་བརྩོན། །བུམ་པ་གསང་སོགས་དབང་བསྐུར་བ། །བླ་མའི་དྲིན་གྱིས་ཡང་དག་ཐོབ། །
ལུས་ངག་སེམས་རྣམས་དག་པ་ཉིད། །སྒྲུབ་པ་པོ་ནི་དངོས་གྲུབ་སྣོད། །ཏིང་འཛིན་ཡན་ལག་ལས་བྱུང་བའི། །ཚོགས་ནི་ཡོངས་སུ་རྫོགས་པ་ལས། །མྱུར་དུ་དངོས་གྲུབ་ཐོབ་པར་འགྱུར། །དེ་ལྟར་གསང་སྔགས་ཚུལ་གནས་ཡིན། །ཏིང་འཛིན་ཡན་ལག་ཉམས་གྱུར་ཅིང་། །དེ་ཡི་མི་མཐུན་
ཕྱོགས་གནས་ན། །སྐྱེ་བ་བྱེ་བ་སྟོང་གིས་ཀྱང་། །ཏིང་འཛིན་རབ་ཏུ་འགྲུབ་མི་འགྱུར། །དེ་བས་ཏིང་འཛིན་རབ་བསྒྲུབ་ཕྱིར། །གསང་སྔགས་སྤྱོད་གནས་རྣལ་འབྱོར་པས། །དེ་ལས་གཞན་པའི་སེམས་སྤངས་ཏེ། །གཡེང་མེད་བརྩོན་པས་འབད་པར་བྱ། །ཏིང་ངེ་འཛིན་གྱི་ཡན་ལག་
དང་། །མི་མཐུན་ཕྱོགས་གང་ངེས་བྱའི་ཕྱིར། །ཏིང་འཛིན་ཡན་ལག་མི་མཐུན་ཕྱོགས། །དེ་ནི་མདོར་བསྡུས་ནས་བཤད་བྱ། །ཚུལ་ཁྲིམས་ཕུན་སུམ་ཚོགས་པ་དང་། །ལོངས་སྤྱོད་རྣམས་ལ་ལྟོས་མེད་ཅིང་། །བཟོད་ལྡན་དམ་བཅས་བརྟན་པ་དང་། །སྐྱེ་བོའི་འདུ་འཛི་རྣམ་པར་སྤོང་། །ལུས་
དང་ངག་ཡིད་ལས་རྣམས་ལ། །ཤེས་བཞིན་དང་ནི་ལྡན་པ་ལ། །སངས་རྒྱས་སྐུར་རྟོག་དྲན་པ་ཡིས། །ལུས་ཀྱི་རྗེས་དྲན་ཡང་དག་ལྡན། །དུས་གང་དུ་ནི་གང་བྱ་བའི། །རྗེས་དྲན་དེ་ལ་བརྟན་པ་དང་། །སྒྲིབ་པ་ལྔ་ནི་སྤོང་བ་དང་། །ཟས་ཀྱི་ཚོད་རིག་སྤྱོད་ལམ་རན། །འཇིག་རྟེན་ཆོས་ནི་
ཐམས་ཅད་ལ། །རྟག་ཏུ་སེམས་ནི་བཏང་སྙོམས་དང་། །ཡོ་བྱད་བསྙུངས་འདི་ཡན་ལག་སྟེ། །གོ་བཟློག་པ་ནི་མི་མཐུན་ཕྱོགས། །ཡིད་དང་རྗེས་སུ་མཐུན་པའི་བསམ་གཏན་གྱི་གནས་སུ་སྟན་བདེ་བ་ལ་འདུག་ནས་བགེགས་བསལ་བར་བྱའོ། །ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦྦ་དུཥྚཱཾ་

44-1-221b

ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ། ཧཱུྃ་ཧཱུྃ་ཧཱུྃ་བཛྲ་ཀཱི་ལ་ཡ་བཛྲ་དྷ་རོ་ཨཱཛྙཱ་པ་ཡ་ཏི།སརྦྦ་དུཥྚཱ་ནཱཾ་ཀཱ་ཡ་བཱཀ་ཙིཏྟ་ཀཱི་ལ་ཡ་ཧཱུྃ་ཕཊ། སྔགས་འདིས་ཕྱོགས་བཅུའི་བགེགས་ཐམས་ཅད་བསལ་བར་བྱའོ། །དེ་ནས་རང་གི་སྙིང་གར་དབྱངས་ཀྱི་ཡི་གེ་དང་པོ་ཡོངས་སུ་གྱུར་པའི་ཟླ་བའི་
དཀྱིལ་འཁོར་ལ་ཡི་གེ་ཧྲི་དམར་པོ་བསམས་ལ། དེའི་འོད་ཟེར་སྤྲོས་པས་རང་གི་ལུས་སྣང་བར་བྱས་པ་སྔོན་དུ་འགྲོ་བ་དང་། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་སྣང་བར་བྱས་ནས། དཀྱིལ་འཁོར་གྱི་འཁོར་ལོ་ལྟ་བུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་
ཡང་དག་པར་བསྐུལ་བ་བཀུག་པ་དང་། རྗེ་བཙུན་བླ་མ་ཡང་ནམ་མཁའ་ལ་དམིགས་ཏེ། ཨོཾ་སརྦྦ་ཏ་ཐཱ་ག་ཏ་ཀཱ་ཡ་བཱཀ་ཙིཏྟ་པྲ་ཎ་མེ་ན་བཛྲ་བནྡྷ་ནཾ་ཀ་རོ་མི། ཞེས་བྱ་བས་ཕྱག་བྱའོ། །དེ་ནས་ཡི་གེ་ཧྲི་དེ་ཉིད་ལས་འོད་ཟེར་གྱི་ཚོགས་ཁ་དོག་སྣ་ཚོགས་པ་སྤྲོ་བ་སྔོན་དུ་འགྲོ་བ་དང་། གཟུགས་
རྡོ་རྗེ་ལ་སོགས་པ་མཆོད་པའི་ལྷ་མོའི་ཚོགས་ཡང་དག་པར་སྤྲོས་ལ། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བཟླས་ཤིང་སངས་རྒྱས་དང་བྱང་ཆུབ་སེམས་དཔའ་དང་བླ་མ་ལེགས་པར་མཆོད་པར་བྱའོ། །དེ་རྣམས་ཀྱི་སྤྱན་སྔར་པུས་མོའི་ལྷ་ང་ས་ལ་བཙུགས་ནས་ཐལ་མོ་
སྦྱར་ཏེ། འདི་ལྟར་སྡིག་པ་བཤགས་པ་ལ་སོགས་པ་བྱ་སྟེ། གང་ཞིག་ཐོག་མེད་སྲིད་པའི་ཆུ་ཀླུང་དུ། །མ་ལུས་ཀུན་རྟོག་གིས་བསགས་རྙོག་པ་རྣམས། །ཐུགས་རྗེ་ཆེ་ལྡན་སྤྱན་སྔར་དེ་དག་ནི། །ཆོ་ག་བཞིན་དུ་ཐམས་ཅད་བཤགས་པར་བགྱི། །རྫོགས་སངས་རྒྱས་དང་བྱང་ཆུབ་
སེམས་དཔའ་དང་། །འཕགས་པ་གཞན་གྱིས་དགེ་བ་གང་མཛད་པ། །དེ་དག་ཀུན་ལ་ཡང་དག་ཡིད་རང་ཞིང་། །བྱང་ཆུབ་ཏུ་ནི་ཡོངས་སུ་བསྔོ་བར་བགྱི། །ཡིད་ཀྱི་རོལ་པ་དྲི་མེད་ཟླ་འདྲས་བསྒྲུབས། །སྙིང་རྗེ་དམ་པ་མཐའ་ཡས་པ་ཡི་ཐབས། །རང་གི་ཡིད་ལ་གནས་པར་གྱུར་
པ་ཡི། །བདེ་གཤེགས་རྣམས་ལ་རྟག་ཏུ་སྐྱབས་སུ་མཆི། །རྟོག་པ་མ་ལུས་པ་ལས་ངེས་གྲོལ་ཞིང་། །སེམས་དཔའ་དམ་པ་རྣམས་ནི་ཕུན་ཚོགས་གཞི། །དངོས་པོ་ཐམས་ཅད་རོ་གཅིག་ངོ་བོ་ཉིད། །དམ་པའི་ཆོས་ལ་རྟག་ཏུ་སྐྱབས་སུ་མཆི། །འཆིང་བ་རྣམས་ལས་ཡང་

44-1-222a

དག་གྲོལ་འགྱུར་ཞིང་། །སྙིང་རྗེ་མཆོག་གིས་བསྐྲུན་པའི་དཔལ་དང་ལྡན། །རབ་ཏུ་དགའ་སོགས་ས་ལ་རབ་བཞུགས་པ། །བརྟུལ་ཞུགས་དབང་པོའི་ཚོགས་ལ་སྐྱབས་སུ་མཆི། །བསམ་དང་རྣམ་པར་སྨིན་པ་དག་གྱུར་པ། །སྒྲིབ་པ་ཀུན་གྱི་བག་ཆགས་ཡང་
དག་འབྱིན། །ལྷག་པར་མོས་པས་རྣམ་པར་བརྒྱན་པ་ཡི། །སེམས་ནི་བྱང་ཆུབ་དམ་པར་བསྐྱེད་པར་བགྱི། །བདེ་གཤེགས་སྲས་བཅས་རྣམས་ཀྱི་ལམ་གཅིག་པུ། །སྦྱིན་སོགས་རྣམ་བཅུ་དཀར་པོའི་ཡོན་ཏན་ཚུལ། །རྫོགས་སངས་རྒྱས་བདག་མ་ལུས་ངོ་བོ་བློས། །ཡང་དག་ཉིད་དུ་ད་ནི་
གནས་པར་བགྱི། །དེ་ལྟར་ལམ་ལ་གནས་པའི་བར་དུ་བྱས། །དེ་ནས། ངོ་བོ་ཉིད་དང་བྲལ་ཕྱིར་སྟོང་པ་སྟེ། །རང་བཞིན་རྒྱུ་དང་བྲལ་བས་མཚན་མ་མེད། །རྟོག་པ་རྣམས་དང་བྲལ་ཕྱིར་དངོས་པོ་ནི། །མ་ལུས་སྨོན་པ་ལས་ནི་ངེས་པར་གྲོལ། །ཞེས་བྱ་བས་གཟུང་བ་དང་འཛིན་པ་ལ་སོགས་
པའི་སྤྲོས་པ་ཐམས་ཅད་དང་བྲལ་བས་ཁམས་གསུམ་པོ་མ་ལུས་པ་སྟོང་པར་བསྒོམས་ལ། འདིས་སྟོང་པ་ཉིད་དུ་བྱིན་གྱིས་བརླབ་པ་བསྟན་པར་བྱའོ། །ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེའི་འོག་ཏུ་སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་དོན་སྟོང་པའི་བདག་ཉིད་ཅན་གྱི་སེམས་
དེ་ཉིད་ཡི་གེ་ཨ་དམར་པོ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་གྱི་རྣམ་པར་བསམ། དེའི་སྟེང་དུ་ཧཱུྃ་ནག་པོ་ཡོངས་སུ་གྱུར་པ་ལས་རྡོ་རྗེ་རྩེ་ལྔ་པ་ནག་པོ་ཁ་གྱེས་པ་ལྟེ་བའི་ཡི་གེ་ཧཱུྃ་གིས་མཚན་པ་ཉི་མ་ལ་གནས་པ་བསམ་མོ། །དེ་ནས་དེ་ལས་བྱུང་བའི་རྡོ་རྗེའི་རང་བཞིན་གྱི་འོད་ཟེར་
ཕྱོགས་བཅུར་ཀུན་དུ་འཕྲོས་པས་བགེགས་ཐམས་ཅད་བསལ་ལ། རྡོ་རྗེའི་རང་བཞིན་གྱི་འོད་ཟེར་དེ་ཉིད་ལས་རྡོ་རྗེ་ར་བ་དང་དྲ་བ་དཔངས་དཔག་ཚད་བརྒྱ་སྟོང་དུ་མ་ཡོད་པ། བདུད་ཐམས་ཅད་ཀྱིས་བསྒྲོད་པར་མི་ནུས་པ། ཕྱོགས་ཐམས་ཅད་དུ་ཁྱབ་པའི་ཕྱི་རོལ་ན་དུས་མཐའི་མེའི་ཕུང་པོ་འབར་བ་
ལྟ་བུས་བསྐོར་བ་དང་། རྡོ་རྗེའི་རང་བཞིན་གྱི་སའི་དཀྱིལ་འཁོར་སའི་འོག་གི་མཐར་ཐུག་པ་བསམས་ལ། དེའི་དབུས་སུ་ཆོས་འབྱུང་བའི་ཕྱག་རྒྱ་གྱེན་ཀར་གནས་པ་སྟེང་ཡངས་པ། འོག་དོག་པ། ནམ་མཁའི་ཁམས་རྒྱ་ཆེ་བ་ཁོངས་སུ་ཆུད་པ། སྟོན་ཀའི་ཟླ་བ་ལྟར་དཀར་བར་བསམས་

44-1-222b

ལ། དེའི་དབུས་སུ་ཡི་གེ་པཾ་སེར་པོ་ལས་བྱུང་བའི་སྣ་ཚོགས་པདྨ་རྒྱ་ཆེ་བ། དེའི་དབུས་སུ་ཡི་གེ་ཧཱུྃ་ནག་པོ་ལས་བྱུང་བའི་སྣ་ཚོགས་རྡོ་རྗེ་བསམས་ལ། དེའི་དབུས་སུ་ཟླ་བ་ལ་གནས་པའི་ཡི་གེ་བྲུཾ་དཀར་པོ་ཡོངས་སུ་གྱུར་པ་ལས་འཁོར་ལོ་རྩིབས་བཅུ་གཉིས་པ་དེའི་ལྟེ་བར་ཟླ་བ་ལ་གནས་
པའི་ཡི་གེ་བྲུྃ་བསམས་ལ། དེ་ཡོངས་སུ་གྱུར་པ་ལས་བཅོམ་ལྡན་འདས་རྣམ་པར་སྣང་མཛད་སྐུ་མདོག་དཀར་པོ་དང་། སྔོན་པོ་དང་། དམར་པོ་གསུམ་གྱིས་རྣམ་པར་མཛེས་པ། ཕྱག་དྲུག་པ། ཕྱག་དང་པོ་གཉིས་ཀྱིས་རང་དང་འདྲ་བའི་རིག་མ་ལ་འཁྱུད་པ། གཡས་ཀྱི་
གཉིས་པ་ན་འཁོར་ལོ་དཀར་པོ། གསུམ་པ་ན་རལ་གྲི། ཕྱག་གཡོན་གྱི་གཉིས་པ་ན་རིན་པོ་ཆེ། གསུམ་པ་ན་པདྨ་དམར་པོ་བསྣམས་པ། རལ་པ་དང་ཅོད་པན་མངའ་བ། སྣ་ཚོགས་པདྨ་དང་ཟླ་བ་ལ། རྡོ་རྗེའི་སྐྱིལ་མོ་ཀྲུང་གིས་བཞུགས་པ། འོད་ཟེར་དཀར་པོའི་ཚོགས་
རྣམ་པར་འཕྲོ་བ་བསམས་ལ། དེ་ཡོངས་སུ་གྱུར་པ་ལས་ཁང་པ་བརྩེགས་མ་རིམ་པ་གཉིས། རིན་པོ་ཆེ་སྣ་ཚོགས་འོད་གསལ་བའི་རང་བཞིན་ཅན། ཕྱིའི་རིམ་པ་ཟུར་བཞི་པ་སྒོ་བཞི་པ། རྟ་བབས་བཞིས་བརྒྱན་པ། བ་དན་དང་རྒྱལ་མཚན་ཁ་དོག་རྣམ་པར་སྣ་ཚོགས་པ་ལ་དྲིལ་བུ་
བཏགས་པ་རླུང་གིས་བསྐྱོད་པ་དང་། མེ་ཏོག་གི་ཕྲེང་བ་དང་། རྔ་ཡབ་དང་། དྲ་བ་དང་། དྲ་བ་ཕྱེད་པས་ཉེ་བར་མཛེས་པ། ཕྱི་རོལ་ན་གཟུགས་ཀྱི་གནས་ཀྱི་ཁ་ཁྱེར་རྡོ་རྗེ་རིན་པོ་ཆེས་ཉེ་བར་མཛེས་ཤིང་ཡིད་དུ་འོང་བའོ། །ནང་གི་རིམ་པ་ཟླུམ་པོ་ལ་རྡོ་རྗེ་ཕྲེང་བས་ཡོངས་སུ་བསྐོར་བ། 
ཀ་བ་བརྒྱད་ཀྱིས་ཉེ་བར་མཛེས་པ། སྡོང་བུ་དང་བཅས་པའི་སྣ་ཚོགས་པདྨའི་འདབ་མ་ལ་གནས་པའི་ཟླ་བ་བཅུ་གཉིས་དང་། ཉི་མ་བདུན་གྱི་གདན་དང་ལྡན་པ་རྣམ་པར་བསམས་ནས། དེར་དབུས་མའི་ཟླ་བའི་གདན་ལ་དབྱངས་ཀྱི་ཡི་གེ་བཅུ་དྲུག་ཉིས་འགྱུར་དུ་བྱས་པ་ཡོངས་སུ་གྱུར་པ་
ལས། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱི་རྒྱུར་གྱུར་པའི་ཟླ་བའི་དཀྱིལ་འཁོར་བསམས་ལ། དེའི་སྟེང་དུ་ཀ་ལ་སོགས་པ་གསལ་བྱའི་ཡི་གེ་སུམ་ཅུ་རྩ་བཞི་དང་ད་དྷ་ཌ་ཌྷ་ཡ་ལ་ཞེས་བྱ་བའི་ཡི་གེ་དྲུག་གིས་བསྣན་པ་ཉིས་འགྱུར་དུ་བྱས་པ་དཀར་པོ་བརྒྱད་ཅུ་ཡོངས་སུ་གྱུར་པ་ལས།

44-1-223a

དཔེ་བྱད་བཟང་པོ་བརྒྱད་ཅུ་སྐྱེད་པར་བྱེད་པའི་ཟླ་བའི་དཀྱིལ་འཁོར་གཉིས་པར་བསམ་པར་བྱའོ། །དེ་ལྟར་ཤེས་རབ་དང་ཐབས་ཀྱི་རང་བཞིན་གྱི་ཟླ་བའི་དཀྱིལ་འཁོར་གཉིས་བསྒོམས་པ་ལས་ཀུན་གཞི་རྣམ་པར་ཤེས་པ་གནས་གྱུར་ནས། ཆོས་ཐམས་ཅད་
གཟུགས་བརྙན་དང་འདྲ་བར་རྟོགས་པས་མེ་ལོང་ལྟ་བུའི་ཡེ་ཤེས་སྐྱེ་བ་ཡིན་ནོ། །དེ་ནས་ཟླ་བ་དེ་གཉིས་གཅིག་ཏུ་གྱུར་པས་རང་བཞིན་གྱིས་རྟོགས་པའི་དབྱེ་བ་མེད་པས། ཉོན་མོངས་པ་ཅན་གྱི་ཡིད་གནས་གྱུར་པ་མཉམ་པ་ཉིད་ཀྱི་ཡེ་ཤེས་ཡིན་ནོ། །ཟླ་བའི་དཀྱིལ་འཁོར་དེ་ཉིད་ལ་ཡི་གེ་
ཧཱུྃ་དམར་པོ་བསམས་ལ། དེ་ཡོངས་སུ་གྱུར་པ་ལས་རྡོ་རྗེ་དམར་པོ་དེའི་ལྟེ་བར་ཡི་གེ་ཧཱུྃ་དམར་པོ་དང་བཅས་པར་བསམས་ལ། རྗེད་པ་དང་བརྗོད་པར་བྱ་བའི་རྣམ་པར་རྟོག་པ་གནས་གྱུར་པ་ལས་ནི་སོ་སོར་རྟོག་པའི་ཡེ་ཤེས་སོ། །དེ་ནས་རྡོ་རྗེ་དེ་དང་ཡི་གེ་ཧཱུྃ་ལས་བྱུང་བའི་འོད་ཟེར་གྱི་ཚོགས་
ཀྱིས་འགྲོ་བ་རྣམས་རྣམ་པར་སྦྱངས་ལ་རྡོ་རྗེ་སེམས་དཔའི་རྣམ་པར་བསྐྱེད་དེ། ལྟེ་བ་ལ་ཡི་གེ་ཧཱུྃ་དང་བཅས་པའི་རྡོ་རྗེར་བཅུག་ལ། ཨོཾ་བཛྲ་ཨཱཏྨ་ཀོ྅ཧཾ། ཞེས་བྱ་བས་ང་རྒྱལ་བྱའོ། །དེ་ནི་འཇུག་པའི་རྣམ་པར་ཤེས་པ་གནས་གྱུར་པའི་བྱ་བ་གྲུབ་པའི་ཡེ་ཤེས་ཡིན་ནོ། །དེ་ནས་ཟླ་
བ་དང་རྡོ་རྗེ་དང་། ཡི་གེ་ཧཱུྃ་ཡོངས་སུ་གྱུར་པ་སྔོན་དུ་འགྲོ་བ་ལས་བདག་ཉིད་རྡོ་རྗེ་སེམས་དཔའི་སྐུ་ཤེལ་གོང་དག་པ་འདྲ་བ་ཞལ་གསུམ་པ། ཞལ་དང་པོ་དཀར་པོ། གཡས་སྔོན་པོ། གཡོན་དམར་པོ། ཕྱག་དྲུག་པ། རྩ་བའི་ཕྱག་གཉིས་ཀྱིས་རང་དང་འདྲ་བའི་རིག་མ་ལ་འཁྱུད་
པ། གཡས་ཀྱི་ཕྱག་གཉིས་པས་རྡོ་རྗེ་དམར་པོ། གསུམ་པས་རལ་གྲི། གཡོན་གྱི་ཕྱག་གཉིས་པས་རིན་པོ་ཆེ། གསུམ་པས་པདྨ་བསྣམས་པ། རིན་པོ་ཆེའི་ཅོད་པན་ཅན།  གཟུང་བ་ལ་སོགས་པའི་རྣམ་པར་རྟོག་པ་མ་དག་པ་དང་བྲལ་བས་ཆོས་ཀྱི་དབྱིངས་ཤིན་ཏུ་རྣམ་པར་
དག་པའི་ངོ་བོ་ཉིད་བསྐྱེད་པ་རྡོ་རྗེ་སེམས་དཔར་བདག་ཉིད་བསམས་ལ། འདོད་ཆགས་ཆེན་པོས་འདུལ་བའི་འཇིག་རྟེན་ལ་བལྟས་ཏེ་དེ་ཡང་དག་པར་སྦྱང་བར་བྱའོ། །དེ་ལ་འདོད་ཆགས་ཆེན་པོས་འདུལ་བའི་སེམས་ཅན་གྱི་ཁམས་རྣམ་པར་སྦྱང་བའི་རིམ་པ་ནི་འདི་ཡིན་ཏེ། རབ་ཏུ་

44-1-223b

དགའ་བའི་སྒྲས་ནམ་མཁའི་ཁམས་ན་བཞུགས་པའི་དེ་བཞིན་གཤེགས་པ་ཐམས་ཅད་རང་གི་ལུས་ལ་བཅུག་ལ། སྤྱན་ལ་སོགས་པ་ནས་རེག་རྡོ་རྗེའི་མཐར་ཐུག་པའི་ལྷ་མོའི་གཟུགས་སུ་ཕྱུང་ལ། རང་གི་ཤེས་རབ་ཀྱི་ལུས་ལ་གཞུག་པར་བྱའོ། །དེ་ནས་སླར་ཡང་དེ་བཞིན་གཤེགས་
པའི་ཚོགས་རང་གི་ལུས་ལ་བཅུག་སྟེ། བྱང་ཆུབ་ཀྱི་སེམས་ཞུ་བར་གྱུར་པ་རང་དང་འདྲ་བའི་པདྨའི་ལྟེ་བར་ཧཱུྃ་གི་བྱིན་གྱིས་བརླབས་པའི་བྱང་ཆུབ་ཀྱི་སེམས་ཞུ་བའི་དཀྱིལ་འཁོར་དུ་རྣམ་པར་བསམས་ལ།དེ་ཡོངས་སུ་གྱུར་པ་ལས་རྟེན་དང་བརྟེན་པའི་དཀྱིལ་འཁོར་ལྷ་བཅུ་དགུའི་
བདག་ཉིད་ཅན་རྡོ་རྗེ་འཆང་བ་གཙོ་བོར་གྱུར་པར་བསམས་ལ། དེར་སེམས་ཅན་རྣམས་བློས་བཅུག་ནས། ཡང་དེ་བཞིན་དུ། དེ་བཞིན་གཤེགས་པ་རྣམས་རང་གི་ལུས་ལ་བཅུག་ལ། དེ་བཞིན་དུ་བྱང་ཆུབ་ཀྱི་སེམས་ཞུ་བར་གྱུར་པ་རྡོ་རྗེའི་ལམ་ནས་ཕྱུང་སྟེ། གསང་བའི་དཀྱིལ་
འཁོར་དུ་ཞུགས་པའི་སེམས་ཅན་རྣམས་བྱང་ཆུབ་ཀྱི་སེམས་ཀྱི་བདུད་རྩིས་དབང་བསྐུར་ནས། ཀྵིཾ་ཛྲིཾ་ཁཾ་གཾ་ཥྐཾ་སཾ་གི་ས་བོན་ལས་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་དབང་པོའི་བདག་ཉིད་ཅན། འོག་ནས་བཤད་པའི་སྐུ་མདོག་དང་ཕྱག་
མཚན་དང་ལྡན་པའི་སའི་སྙིང་པོ་དང་། ཕྱག་ན་རྡོ་རྗེ་དང་། ནམ་མཁའི་སྙིང་པོ་དང་། འཇིག་རྟེན་དབང་ཕྱུག་དང་། སྒྲིབ་པ་རྣམ་པར་སེལ་བ་དང་། ཀུན་དུ་བཟང་པོའི་རྣམ་པར་བསྐྱེད་དེ་དབྱུང་བར་བྱའོ། །ཛཿཧཱུྃ་བཾ་ཧོཿཁཾ་རཾ་གྱིས་ས་བོན་ལས་གཟུགས་རྡོ་རྗེ་དང་། སྒྲ་རྡོ་རྗེ་དང་། དྲི་
རྡོ་རྗེ་དང་། རོ་རྡོ་རྗེ་དང་། རེག་རྡོ་རྗེ་དང་། ཆོས་ཀྱི་དབྱིངས་རྡོ་རྗེར་གྱུར་པ་གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་ཀྱི་དབྱིངས་ཀྱི་བདག་ཉིད་ཅན། འོག་ནས་བཤད་པའི་སྐུ་མདོག་དང་ཞལ་དང་ཕྱག་དང་ལྡན་པ་དབྱུང་བར་བྱའོ། །ལཱཾ་མཱཾ་པཱཾ་ཏཱཾ་གིས་ས་བོན་
ལས། ས་དང་། ཆུ་དང་། མེ་དང་། རླུང་གི་བདག་ཉིད་ཅན་སྤྱན་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་འོག་ནས་བཤད་པའི་སྐུ་མདོག་དང་ཞལ་དང་ཕྱག་དང་ལྡན་པ་དབྱུང་བར་བྱའོ། །བྷྲཱུཾ་ཨཱཾ་ཛྲཱིཾ་ཁཾ་ཧཱུྃ་གི་ས་བོན་ལས། གཟུགས་དང་། ཚོར་བ་དང་། འདུ་

44-1-224a

ཤེས་དང་། འདུ་བྱེད་དང་། རྣམ་པར་ཤེས་པའི་ཕུང་པོའི་རང་བཞིན་རྣམ་པར་སྣང་མཛད་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་དང་། དོན་ཡོད་གྲུབ་པ་དང་། མི་བསྐྱོད་པ་དབྱུང་བར་བྱའོ། །དེ་ནས་རྟེན་དང་བརྟེན་པའི་དཀྱིལ་འཁོར་དེ་
ཐམས་ཅད་སྟོང་ཞིང་ནམ་མཁའ་ལྟ་བུར་བསམས་ལ། དེའི་འོག་ཏུ་ཨོཾ་ཨཱཿཧཱུྃ་ཞེས་བྱ་བའི་ཡི་གེ་གསུམ་ཁ་དོག་དཀར་པོ་དང་། དམར་པོ་དང་། ནག་པོ་དང་། སྐུ་དང་། གསུང་དང་། ཐུགས་རྡོ་རྗེའི་རང་བཞིན་ཅན། སྙིང་རྗེ་དང་ཤེས་རབ་ཀྱི་རང་བཞིན་ཧོཿདམར་པོ་གཉིས་ཀྱི་ནང་
དུ་ཆུད་པ་མདུན་གྱི་ནམ་མཁའ་ལ་བསམས་ལ། ཁའི་སྒོ་ནས་རང་གི་ལུས་ལ་བཅུག་སྟེ། རང་དང་འདྲ་བའི་རིག་མའི་འདོད་ཆགས་ཀྱི་མེས་ཞུ་བར་གྱུར་པས་རང་གི་རྡོ་རྗེའི་ལམ་ནས་ཕྱུང་སྟེ། རང་དང་འདྲ་བའི་ཆུ་སྐྱེས་ཀྱི་ལྟེ་བའི་ནང་དུ་ཆུད་པར་བསམས་ལ། དེའི་སྟོབས་ཀྱིས་
བདག་ཉིད་རིག་མ་དང་བཅས་པ་འདོད་ཆགས་ཆེན་པོའི་ཚུལ་གྱི་ཏིང་ངེ་འཛིན་གྱིས་ཞུ་བར་གྱུར་ནས། དངུལ་ཆུའི་ཚོགས་ལྟར་འོད་གསལ་བར་བལྟ་བར་བྱའོ། །དེ་ནས་བཅོམ་ལྡན་འདས་ཆོས་ཀྱི་དབྱིངས་ཀྱི་རང་བཞིན་དེ་ཉིད་གདུལ་བྱའི་སྐྱེ་བོ་རྣམ་པ་སྣ་ཚོགས་འདུལ་བ་དང་རྗེས་སུ་མཐུན་
པའི་གཟུགས་ཀྱི་སྐུ་ཡང་དག་པར་འཛིན་པའི་དོན་དུ། རང་གི་རྒྱུད་ལས་ཐ་མི་དད་པའི་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཀྱི་ངོ་བོ་ཉིད། ལྷ་མོ་སྤྱན་མ་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མས་བསྐུལ་བའི་གླུས་རབ་ཏུ་སད་བཞིན་པར་བསྒོམ་པར་
བྱའོ། །སེམས་ཅན་ཁམས་ན་གནས་ཀྱི་དབང་ཕྱུག་ཁྱོད་ནི་རྡོ་རྗེའི་ཐུགས། །དགའ་བའི་ཡིད་འོང་དོན་ཆེན་འདོད་པས་བདག་ལ་བསྐྱབ་ཏུ་གསོལ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །སེམས་ཅན་ཡབ་ཆེན་གཉེན་མཆོག་བདག་ལ་དགྱེས་པར་
མཛད་དུ་གསོལ། །རྡོ་རྗེ་སྐུ་ཁྱོད་བཀའ་ཡི་འཁོར་ལོ་སེམས་ཅན་ཀུན་ལ་ཕན། །སངས་རྒྱས་དོན་དུ་བྱང་ཆུབ་དོན་དམ་རབ་ཏུ་ཕན་པར་གཟིགས། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །འདོད་ཆགས་དམ་ཚིག་ཆགས་པས་བདག་ལ་དགྱེས་པར་མཛད་དུ་

44-1-224b

གསོལ། ཁྱེད་ནི་རྡོ་རྗེའི་གསུང་སྟེ་ཀུན་ལ་ཕན་ཞིང་ཐུགས་བརྩེ་བ། །འཇིག་རྟེན་དག་ནི་དོན་དང་དགོས་པ་མཛད་ལ་རབ་ཏུ་བརྩོན། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །དགའ་བའི་སྤྱོད་པ་ཀུན་དུ་བཟང་པོ་བདག་ལ་དགྱེས་པར་མཛད་དུ་གསོལ། །
ཁྱོད་ནི་རྡོ་རྗེ་འདོད་པ་དམ་ཚིག་མཆོག་གི་ཕན་དོན་ཆེ། །ཡང་དག་རྫོགས་སངས་རྒྱས་ཀྱི་གདུང་མཆོག་མཉམ་ཉིད་ཐུགས་བརྩེ་བ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །ཡོན་ཏན་རིན་ཆེན་མང་པོའི་གཏེར་གྱུར་བདག་ལ་དགྱེས་པར་མཛོད། །དེ་ལྟར་
གླུས་ཡང་དག་པར་བསྐུལ་བའི་འོག་ཏུ་དངོས་པོ་ཐམས་ཅད་སྒྱུ་མ་ལྟ་བུར་བསམས་ལ། འདོད་ཆགས་ཆེན་པོས་འདུལ་བའི་སྐྱེ་བོ་དང་རྗེས་སུ་མཐུན་པའི་སྐྱེས་བུ་ཆེན་པོའི་མཚན་དང་དཔེ་བྱད་ཀྱིས་བརྒྱན་པའི་འཕགས་པ་སྤྱན་རས་གཟིགས་དབང་ཕྱུག་གི་སྐུར་བདག་ཉིད་བསྐྱེད་པར་བྱ་
བའི་ཕྱིར། ཞུ་བ་དེ་ཡོངས་སུ་གྱུར་པ་ལས་ཡི་གེ་ཧྲཱིཿདམར་པོའོ། །དེ་ཡོངས་སུ་གྱུར་པ་ལས་པདྨ་དམར་པོའི་དབུས་ན་ཟླ་བ་ལ་གནས་པའི་ཡི་གེ་ཧྲཱིཿའོད་ཟེར་རྣམ་པར་འཕྲོ་བ་རྣམ་པར་བསམས་ལ། དེ་ལས་བྱུང་བའི་འོད་ཟེར་གྱི་ཚོགས་རྣམས་ཀྱིས་འཇིག་རྟེན་གྱི་ཁམས་མ་ལུས་
པ་སྣང་བར་བྱས་ཏེ། གདུལ་བྱའི་སེམས་ཅན་གྱི་ཁམས་རྣམ་པ་སྣ་ཚོགས་པ་རྣམ་པར་སྦྱངས་ནས། འཕགས་པ་སྤྱན་རས་གཟིགས་དབང་ཕྱུག་ལྟ་བུའི་དེ་བཞིན་གཤེགས་པ་འོག་ནས་བཤད་པའི་སྐུ་མདོག་དང་ཞལ་དང་། ཕྱག་དང་། མཚན་མ་དང་ལྡན་པར་བྱས་ལ། པདྨ་དམར་
པོ་ཡི་གེ་ཧྲཱིཿས་མཚན་པ་དེ་ཉིད་དུ་བཅུག་ནས་པདྨ་དང་། ཟླ་བ་དང་ཡི་གེ་ཧྲཱིཿདེ་ཡོངས་སུ་གྱུར་པ་ལས་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་ཞལ་གསུམ་པ། ཕྱག་དྲུག་པ། སྐུ་ཐམས་ཅད་དང་ཞལ་དང་པོ་དམར་བ། ཞལ་གཡས་པ་སྔོ་ཞིང་གཡོན་པ་
དཀར་བ། རྩ་བའི་ཕྱག་གཉིས་ཀྱིས་རང་དང་འདྲ་བའི་རིག་མ་ལ་འཁྱུད་པ། གཡས་ཀྱི་ཕྱག་གཉིས་པ་ན་པདྨ། གསུམ་པ་ན་རལ་གྲི་བསྣམས་པ། གཡོན་གྱི་ཕྱག་གཉིས་ན་རིན་པོ་ཆེ། གསུམ་པ་ན་འཁོར་ལོ་བསྣམས་པ། རལ་པ་དང་ཅོད་པན་དང་ལྡན་པར་བདག་ཉིད་རྣམ་པར་

44-1-225a

བསམས་ལ། འཁོར་བ་དང་མྱ་ངན་ལས་འདས་པ་མི་གནས་པའི་དོན་དུ་སྔགས་འདི་བརྗོད་པར་བྱའོ། །ཨོཾ་དྷརྨྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། འདི་དག་རྒྱུ་མཐུན་པའི་འབྲས་བུ་དང་བསྙེན་པའི་ཡན་ལག་ཆུང་ངུ་ཡིན་ནོ། །དེའི་འོག་ཏུ་མིག་གཉིས་སུ་ཨ་
དཀར་པོ་ལས་ཟླ་བ་ལ་གནས་པའི་ཡི་གེ་ཀྵིཾ་དང་འཁོར་ལོ་ཡོངས་སུ་གྱུར་པ་ལས། སའི་སྙིང་པོ་རིན་པོ་ཆེའི་ཅོད་པན་ཅན་ཞལ་དང་ཕྱག་དང་མཚན་མ་ལ་སོགས་པ་བཅོམ་ལྡན་འདས་རྣམ་པར་སྣང་མཛད་དང་འདྲ་བ་སྟེ་དེའི་འོག་མ་རྣམས་ལ་དེ་བཞིན་ནོ། །དེ་བཞིན་དུ་རྣ་བ་གཉིས་སུ་ཟླ་བ་ལ་
གནས་པའི་ཡི་གེ་ཛྲིཾ་སྔོན་པོ་དང་རྡོ་རྗེ་ཡོངས་སུ་གྱུར་པ་ལས་ཕྱག་ན་རྡོ་རྗེ་འོག་ནས་བཤད་པའི་མི་བསྐྱོད་པ་ལྟ་བུའོ། །སྣ་ལ་ཟླ་བ་ལ་གནས་པའི་ཡི་གེ་ཁཾ་སེར་པོ་དང་རིན་པོ་ཆེ་ལྗང་གུ་ཆ་དགུ་པ་ཡོངས་སུ་གྱུར་པ་ལས་ནམ་མཁའི་སྙིང་པོ་རིན་ཆེན་འབྱུང་ལྡན་ལྟ་བུའོ། །ལྕེ་ལ་ཟླ་བ་ལ་
གནས་པའི་གཾ་དམར་པོ་དང་པདྨ་དམར་པོ་ཡོངས་སུ་གྱུར་པ་ལས་འཇིག་རྟེན་དབང་ཕྱུག་འོད་དཔག་ཏུ་མེད་པ་ལྟ་བུའོ། །ཐོད་པའི་ནང་དུ་ཟླ་བ་ལ་གནས་པའི་ཀྵཾ་ལྗང་གུ་དང་རལ་གྲི་ཡོངས་སུ་གྱུར་པ་ལས་སྒྲིབ་པ་ཐམས་ཅད་རྣམ་པར་སེལ་བ་དོན་ཡོད་པར་གྲུབ་པ་ལྟ་བུའོ། །ལྟེ་བར་ཟླ་བ་ལ་
གནས་པའི་ཡི་གེ་སཾ་དཀར་པོ་དང་རྡོ་རྗེ་དམར་པོ་ཡོངས་སུ་གྱུར་པ་ལས་སྔར་བཤད་པའི་རྡོ་རྗེ་སེམས་དཔའ་ལྟ་བུ་བསྒོམ་པར་བྱ་སྟེ། འདི་དག་ནི་རྣམ་པར་སྨིན་པའི་འབྲས་བུ་ཆུང་ངུ་དང་ཉེ་བར་སྒྲུབ་པ་ཆུང་ངུའོ། །དེ་ནས་ཆོས་དང་། ལོངས་སྤྱོད་རྫོགས་པ་དང་། སྤྲུལ་པའི་སྐུ་གསུམ་བསྐྱེད་
པར་བྱ་བའི་དོན་དུ་ཐུགས་ཀྱི་གསང་བ་ལ་སོགས་པ་བྱིན་གྱིས་བརླབ་པ་འདི་ལྟར་བྱ་སྟེ། རང་གི་སྙིང་གར་ཟླ་བ་ལ་གནས་པའི་ཡི་གེ་ཧཱུྃ་ཡོངས་སུ་གྱུར་པ་ལས་རྡོ་རྗེ་རྩེ་ལྔ་པ་ལྟེ་བར་ཟླ་བ་ལ་གནས་པའི་ཡི་གེ་ཧཱུྃ་བསམས་ལ། དེའི་འོད་ཟེར་གྱི་སྒོ་ལས་བྱུང་བའི་ཐུགས་རྡོ་རྗེའི་སྤྲུལ་པའི་
ཚོགས་རྣམས་ཀྱིས་འགྲོ་བ་རྣམས་ཐུགས་རྡོ་རྗེའི་རྣམ་པ་བསྐྱེད་པ། ཡང་སྙིང་གར་གནས་པའི་ཡི་གེ་ཧཱུྃ་དེ་ཉིད་དུ་བཅུག་ནས། ཡི་གེ་ཧཱུྃ་དང་ཟླ་བ་དང་རྡོ་རྗེ་ཡོངས་སུ་གྱུར་པ་ལས་ཐུགས་རྡོ་རྗེ་ཞེ་སྡང་རྡོ་རྗེ་ལྟ་བུའི་རིན་པོ་ཆེའི་ཅོད་པན་ཅན་བསམས་ལ། དེའི་ཐུགས་ཀར་ཟླ་བ་ལ་གནས་པའི་

44-1-225b

ཡི་གེ་ཧཱུཾ་སྔོན་པོ་ལས་བྱུང་བའི་འོད་ཟེར་གྱི་སྒོ་རྣམས་ལས་ཐུགས་རྡོ་རྗེའི་ཚོགས་རྣམ་པར་སྤྲོས་ལ་དེའི་འོད་ཟེར་གྱིས་ཐོག་མ་མེད་པ་ནས་གྲུབ་པའི་དེ་བཞིན་གཤེགས་པ་ཐུགས་རྡོ་རྗེའི་ཚོགས་སྤྱན་དྲངས་ལ་ནམ་མཁའི་ཁམས་ཀུན་དུ་དགང་ངོ་། །དེ་ལས་ཧཱུྃ་དེ་ཉིད་ལས་བྱུང་བའི་གཟུགས་རྡོ་རྗེ་ལ་
སོགས་པའི་ལྷ་མོ་རྣམས་ཀྱིས་ཡང་དག་པར་མཆོད་ལ། ཐུགས་རྡོ་རྗེར་བྱིན་གྱིས་བརླབ་པའི་དོན་དུ་གསོལ་བ་གདབ་པར་བྱའོ། །དཔལ་ལྡན་རྡོ་རྗེ་ཐུགས་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །
ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །དེ་ནས་རང་གི་སེམས་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེར་བྱིན་གྱིས་བརླབས་པར་ལྷག་པར་མོས་
ཤིང་། ཨོཾ་སརྦྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱིན་གྱིས་བརླབ་པར་བྱའོ། །དེའི་སྟེང་ལྐོག་མའི་འོག་ཏུ་ཟླ་བ་ལ་གནས་པའི་པདྨ་དམར་པོའི་ལྟེ་བ་ལ་གནས་པའི་ཟླ་བ་ལ་ཡི་གེ་ཧྲཱིཿདམར་པོ་བསམས་ལ། དེ་ལས་བྱུང་བའི་འོད་ཟེར་རྣམས་ཀྱིས་དེ་བཞིན་གཤེགས་པ་ཐམས་
ཅད་བཀུག་ནས་ཡི་གེ་ཧྲཱིཿལས་གཟུགས་རྡོ་རྗེ་ལ་སོགས་པ་སྤྲོས་ཏེ། དེ་རྣམས་ཀྱིས་དེ་ཡང་དག་པར་མཆོད་ནས་ཡི་གེ་ཧྲཱིཿདེ་ཉིད་དུ་བཅུག་ལ་དེ་ཐམས་ཅད་ཡོངས་སུ་གྱུར་པ་ལས་ཡེ་ཤེས་སེམས་དཔའ་བསམ་ཞིང་། དེའི་ཐུགས་ཀར་ཟླ་བ་ལ་གནས་པའི་རང་གི་ས་བོན་བསྒོམ་པར་བྱའོ། །དེའི་
གོང་དུ་ལྐོག་མར་ཟླ་བའི་དཀྱིལ་འཁོར་གྱི་སྟེང་དུ་ཨཱཿདམར་པོ་ཡོངས་སུ་གྱུར་པ་ལས་པདྨ་དམར་པོ་དེའི་དབུས་སུ་ཟླ་བ་ལ་གནས་པའི་ཡི་གེ་ཨཱཿབསམས་ལ། དེའི་འོད་ཟེར་འཕྲོས་པའི་སྒོ་ནས་བྱུང་བའི་དེ་བཞིན་གཤེགས་པ་གསུང་རྡོ་རྗེ་སྤྲུལ་པའི་ཚོགས་རྣམས་ཀྱིས་འགྲོ་བ་རྣམས་
གསུང་རྡོ་རྗེའི་རྣམ་པར་བསྐྱེད་ལ། ཡང་ལྐོག་མར་གནས་པའི་ཨཱཿདེ་ཉིད་དུ་བཅུག་ནས་ཡི་གེ་ཨཱཿདང་ཟླ་བ་དང་པདྨ་ཡོངས་སུ་གྱུར་པ་ལས། གསུང་རྡོ་རྗེ་འདོད་ཆགས་རྡོ་རྗེ་ལྟ་བུ་རིན་པོ་ཆེའི་ཅོད་པན་བསམས་ལ། དེའི་ལྐོག་མར་ཟླ་བ་ལ་གནས་པའི་ཨཱཿདམར་པོ་ལས་བྱུང་བའི་འོད་

44-1-226a

ཟེར་གྱི་སྒོ་རྣམས་ལས་གསུང་རྡོ་རྗེའི་ཚོགས་རྣམས་སྤྲོས་ལ། དེའི་འོད་ཟེར་གྱིས་སྔོན་གྲུབ་པའི་སངས་རྒྱས་རྣམས་ཀྱིས་ནམ་མཁའི་གཏོས་བཀང་ལ་དེ་བཞིན་དུ་གཟུགས་རྡོ་རྗེ་མ་ལ་སོགས་པས་དེ་རྣམས་ཡང་དག་པར་མཆོད་དེ། རང་ཉིད་གསུང་རྡོ་རྗེར་བྱིན་
གྱིས་བརླབ་པའི་དོན་དུ་གསོལ་བ་གདབ་པར་བྱའོ། །ཆོས་ཀྱི་གསུང་ལམ་དཔལ་དང་ལྡན། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་གིས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་
གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་གིས་མཛད་དུ་གསོལ། །དེ་ནས་དེ་རྣམས་རང་གི་གསུང་རྡོ་རྗེར་བཅུག་ལ་འདི་ལྟར་ང་རྒྱལ་བྱའོ། །ཨོཾ་སརྦྦ་ཏ་ཐཱ་ག་ཏ་བཱཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་མགོ་བོར་ཟླ་བ་ལ་གནས་པའི་འཁོར་ལོའི་
ལྟེ་བར་ཟླ་བ་ལ་གནས་པའི་ཡི་གེ་ཨོཾ་དཀར་པོ་བསམས་ལ། དེ་ལས་སྤྲོས་པའི་འོད་ཟེར་གྱི་སྒོ་ལས་བྱུང་བའི་དེ་བཞིན་གཤེགས་པ་སྐུ་རྡོ་རྗེ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེས་སྔ་མ་བཞིན་དུ་ནམ་མཁའི་གཏོས་གང་བར་བསམས་ལ། དེ་ནས་སྔ་མ་བཞིན་དུ་
གཟུགས་རྡོ་རྗེ་ལ་སོགས་པས་དེ་རྣམས་ཡང་དག་པར་མཆོད་དེ། མགོ་བོའི་ཡི་གེ་ཨོཾ་དུ་བཅུག་ལ་སྐུ་རྡོ་རྗེར་བྱིན་གྱིས་བརླབ་པའི་དོན་དུ་གསོལ་བ་གདབ་པར་བྱའོ། །དཔལ་ལྡན་རྡོ་རྗེ་སྐུ་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་
སུ། །རྡོ་རྗེ་སྐུས་ནི་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུས་ནི་མཛད་དུ་གསོལ། །དེ་ནས་དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེས་བྱིན་གྱིས་
བརླབས་པས། རང་ཉིད་སྐུ་རྡོ་རྗེར་བྱིན་གྱིས་བརླབ་པར་བྱའོ། །ཨོཾ་སརྦྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། འདི་དག་ནི་སྐྱེས་བུ་བྱེད་པའི་འབྲས་བུ་ཆུང་ངུ་དང་སྒྲུབ་པ་ཆུང་ངུ་ཡིན་ནོ། །དེ་ནས་ཡེ་ཤེས་སེམས་དཔའི་ཐུགས་ཀའི་ས་བོན་ལས་བྱུང་བའི་འོད་ཟེར་རྣམས་ཀྱིས་

44-1-226b

དེ་བཞིན་གཤེགས་པའི་ཚོགས་བཀུག་ལ། མདུན་གྱི་ནམ་མཁའི་ཕྱོགས་སུ་བཞུགས་པར་བསམས་ནས། བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་མཛད་པ་ལྟར། །བདག་ཀྱང་རྟོག་པར་བྱ་བའི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་བྱ་བས་
དབང་བསྐུར་བར་གསོལ་བ་བཏབ་པའི་ཚིགས་སུ་བཅད་པས་དབང་བསྐུར་བར་གསོལ་བ་བཏབ་པའི་རྗེས་ཐོགས་ལ། དེ་བཞིན་གཤེགས་པའི་སྐུ་ལས་བྱུང་བའི་སྤྱན་ལ་སོགས་པའི་ལྷ་མོ་ཡེ་ཤེས་ཀྱི་བདུད་རྩིས་ཡོངས་སུ་གང་བའི་རིན་པོ་ཆེའི་བུམ་པ་བསྣམས་པ་རྣམས་ཀྱིས་
གཟུགས་རྡོ་རྗེ་མ་ལ་སོགས་པའི་མཆོད་པ་དང་། རོལ་མོ་དང་བཀྲ་ཤིས་ཀྱི་གླུ་རྣམས་སྣ་ཚོགས་པའི་ཅ་ཅོ་འདོན་པས་བདག་ཉིད་ལ་དབང་བསྐུར་བར་བསམས་ལ། བྱང་ཆུབ་ཀྱི་སེམས་དེ་ཡོངས་སུ་གྱུར་པ་ལས། བཅོམ་ལྡན་འདས་འཇིག་རྟེན་དབང་ཕྱུག་གི་དབུའི་སྟེང་གི་ཅོད་
པན་ལ་བཅོམ་ལྡན་འདས་འོད་དཔག་ཏུ་མེད་པ་བསམ་པར་བྱའོ། །འདི་ནི་དབང་གི་འབྲས་བུ་ཆུང་ངུ་དང་། སྒྲུབ་པ་ཆེན་པོའི་ཡན་ལག་ཆུང་ངུ་ཡིན་ནོ། །དེ་ནས་རང་དང་འདྲ་བའི་རིག་མ་ཡང་བདག་ཉིད་སྔར་བསྙེན་པ་ཆུང་ངུ་ལ་སོགས་པའི་རིམ་པས་མིག་ལ་སོགས་པ་བྱིན་གྱིས་
བརླབ་པ་དང་། ཐུགས་དང་གསུང་དང་སྐུ་རྡོ་རྗེར་བྱིན་གྱིས་བརླབ་པ་དང་། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བར་བྱ་སྟེ། ཡན་ལག་བཞི་པ་བར་མ་རྫོགས་པར་བྱས་ནས་རིགས་ལྔ་དང་བསྲེ་བར་བྱའོ། །དེའི་རིམ་པ་ནི་འདི་ཡིན་ཏེ། ནུ་མ་ཡན་ཆད་ནས་མགོ་བོའི་བར་
དུ་ཡི་གེ་ཨོཾ་དཀར་པོ་ཡོངས་སུ་གྱུར་པ་ལས། རྣམ་པར་སྣང་མཛད་ཀྱི་ཕྲ་རབ་ཀྱི་རང་བཞིན་ནུ་མའི་འོག་ནས་ལྟེ་བ་ཡན་ཆད་དུ་ཡི་གེ་ཧཱུྃ་སྔོན་པོ་ཡོངས་སུ་གྱུར་པ་ལས་མི་བསྐྱོད་པའི་ཕྲ་རབ་ཀྱི་རང་བཞིན། ལྟེ་བའི་འོག་ནས་རྐེད་པའི་བར་དུ་ཡི་གེ་སྭཱ་སེར་པོ་ཡོངས་སུ་གྱུར་པ་ལས་རིན་ཆེན་འབྱུང་ལྡན་
གྱི་ཕྲ་རབ་ཀྱི་རང་བཞིན། པདྨ་ནས་བརླ་གཉིས་སུ་ཡི་གེ་ཨཱཿདམར་པོ་ཡོངས་སུ་གྱུར་པ་ལས་འོད་དཔག་ཏུ་མེད་པའི་ཕྲ་རབ་ཀྱི་རང་བཞིན། པུས་མོ་གཉིས་ནས་བརྩམས་ཏེ། རྐང་མཐིལ་གཉིས་ཀྱི་མཐར་ཐུག་པར་ཡི་གེ་ཧཱ་ལྗང་གུ་ཡོངས་སུ་གྱུར་པ་ལས་དོན་ཡོད་པར་གྲུབ་པའི་རང་བཞིན་

44-1-227a

ནོ། །དེ་ལྟར་རང་གི་རིག་མ་ལ་རིགས་ལྔ་དང་བསྲེ་བ་དམིགས་ལ། དེ་ནས་ཡི་གེ་ཧཱུྃ་ཡོངས་སུ་གྱུར་པ་ལས་རང་གི་རྡོ་རྗེ། ཨོཾ་ཡོངས་སུ་གྱུར་པ་ལས་ནོར་བུ། བུ་གར་ཕཊ་ཀྱིས་བྱིན་གྱིས་བརླབས་ལ། རང་གི་རིག་མ་ལ་ཡི་གེ་ཧཱུྃ་ཡོངས་སུ་གྱུར་པ་ལས་པདྨ། ཡི་གེ་ཨཱཿ
ཡོངས་སུ་གྱུར་པ་ལས་ལྟེ་བར་བསམ་མོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་བླ་ན་མེད་པའི་བདེ་བ་ལ་ཡང་དག་པར་ལོངས་སྤྱོད་པའི་མཆོད་པའི་དོན་དུ་རང་དང་འདྲ་བ་དང་ལྷན་ཅིག་དགའ་བ་ཙམ་པར་བྱིན་གྱིས་བརླབ་པར་བྱའོ། །ཨོཾ་སརྦྦ་ཏ་ཐཱ་ག་ཏཱ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་
ཧཾ། འདི་དག་ནི་དང་པོའི་སྦྱོར་བ་ཞེས་བྱ་བའི་ཏིང་ངེ་འཛིན་ཏོ། །དེའི་འོག་ཏུ་རབ་ཏུ་དགའ་བའི་སྒྲས་དེ་བཞིན་གཤེགས་པ་ལྔ་ཁར་བཅུག་ལ་འདོད་ཆགས་ཆེན་པོའི་མེས་ཞུ་བར་གྱུར་ནས་རྡོ་རྗེའི་ལམ་ནས་ཕྱུང་ལ། རང་དང་འདྲ་བའི་རིག་མའི་ཆུ་སྐྱེས་ཀྱི་ནང་དུ་བྱང་ཆུབ་ཀྱི་སེམས་ཞུ་བའི་དཀྱིལ་
འཁོར་ཡི་གེ་ཧྲཱིཿདམར་པོས་བྱིན་གྱིས་བརླབ་པར་བསམས་ལ། དེ་ཡོངས་སུ་གྱུར་པ་ལས་བཅོམ་ལྡན་འདས་འོད་དཔག་ཏུ་མེད་པའི་བདག་པོར་གྱུར་པའི་དཀྱིལ་འཁོར་གྱི་འཁོར་ལོ་མངོན་པར་སྤྲུལ་ལ། བདག་དང་གཞན་གྱི་དོན་རྫོགས་པར་བྱ་བའི་ཕྱིར་ཕྱི་རོལ་དུ་སྤྲོ་བར་བྱ་སྟེ། ཨཱ་རོ་ལྀཀ་
ཅེས་པས་འོད་དཔག་ཏུ་མེད་པ་སྐུ་མདོག་དམར་པོ་དང་། ཞལ་དམར་པོ་དང་། སྔོན་པོ་དང་། དཀར་པོ་ཞལ་གསུམ་དང་ལྡན་པ། ཕྱག་དྲུག་པ་རྩ་བའི་ཕྱག་གཉིས་ཀྱིས་རང་དང་འདྲ་བ་ལ་འཁྱུད་པ། གཡས་ཀྱི་ཕྱག་གཉིས་པ་ན་པདྨ་དམར་པོ། གསུམ་པ་ན་རལ་གྲི་བསྣམས་པ། གཡོན་
གྱི་ཕྱག་གཉིས་པ་ན་རིན་པོ་ཆེ། གསུམ་པ་ན་འཁོར་ལོ་བསྣམས་པ་ཕྱུང་ལ་སྤྲོས་པས་འགྲོ་བ་རྣམས་གསུང་གི་རྡོ་རྗེའི་རྣམ་པར་བྱས་ནས། དེའི་སྐུར་བཅུག་ལ་དེ་ཡང་རང་གི་ལུས་ལ་དངོས་པོ་ཐམས་ཅད་ཀྱིས་གཞུག་པར་བྱའོ། །དེ་བཞིན་དུ་ཐམས་ཅད་དུ་ཡང་སྤྲོ་བ་དང་བསྡུ་བར་བྱའོ། །དེ་
ནས་ཛི་ན་ཛི་ཀ་ཅེས་བྱ་བས་རྣམ་པར་སྣང་མཛད་སྔ་མ་ལྟ་བུ་ཕྱུང་ལ་ཤར་ཕྱོགས་ཀྱི་ཟླ་བ་ལ་དགོད་པར་བྱའོ། །དེའི་འོག་ཏུ་རཏྣ་དྷྲྀཀ་ཅེས་བྱ་བས་རིན་ཆེན་འབྱུང་ལྡན་སྐུ་མདོག་སེར་པོ། ཞལ་གསུམ་སེར་པོ་དང་། སྔོན་པོ་དང་། དཀར་པོ་དང་ལྡན་པ་ཕྱག་དྲུག་པ་རྩ་བའི་ཕྱག་གཉིས་

44-1-227b

ཀྱིས་རང་དང་འདྲ་བ་ལ་འཁྱུད་པ། གཡས་ཀྱི་ཕྱག་གཉིས་པ་ན་རིན་པོ་ཆེ་ལྗང་གུ། གསུམ་པ་ན་རལ་གྲི་བསྣམས་པ། གཡོན་གྱི་ཕྱག་གཉིས་པ་ན་འཁོར་རོ། །གསུམ་པ་ན་པདྨ་བསྣམས་པ། ལྷོ་ཕྱོགས་ཀྱི་ཉི་མའི་དཀྱིལ་འཁོར་ལ་གཞག་པར་བྱའོ། །དེ་ནས་བཛྲ་དྷྲྀཀ་ཅེས་
བྱ་བས་མི་བསྐྱོད་པ་སྐུ་མདོག་སྔོན་པོ། ཞལ་གསུམ་པ་སྔོ་བ་དང་། དཀར་བ་དང་། དམར་བ་ཕྱག་དྲུག་པ། རྩ་བའི་ཕྱག་གཉིས་ཀྱིས་རང་དང་འདྲ་བ་ལ་འཁྱུད་པ། གཡས་ཀྱི་ཕྱག་གཉིས་པ་ན་ཞི་བའི་རྡོ་རྗེ་ནག་པོ། གསུམ་པ་ན་རལ་གྲི་བསྣམས་པ། གཡོན་གྱི་ཕྱག་གཉིས་པ་ན་
ནོར་བུ། གསུམ་པ་ན་པདྨ་བསྣམས་པ། ནུབ་ཕྱོགས་ཀྱི་ཉི་མའི་དཀྱིལ་འཁོར་ལ་གཞག་པར་བྱའོ། །དེའི་འོག་ཏུ་པྲཛྙཱ་དྷྲྀཀ་ཅེས་བྱ་བས་དོན་ཡོད་གྲུབ་པ་སྐུ་མདོག་ལྗང་གུ་ཞལ་གསུམ་པ། ལྗང་གུ་དང་། སྔོན་པོ་དང་། དཀར་པོ་ཕྱག་དྲུག་པ་རྩ་བའི་ཕྱག་གཉིས་ཀྱིས་ཤེས་རབ་
མ་ལ་འཁྱུད་པ། ཕྱག་གཡས་པའི་གཉིས་པ་ན་རལ་གྲི། གསུམ་པ་ན་འཁོར་ལོ་བསྣམས་པ། ཕྱག་གཡོན་པའི་གཉིས་པ་ན་རིན་པོ་ཆེ། གསུམ་པ་ན་པདྨ་བསྣམས་པ། བྱང་ཕྱོགས་ཀྱི་ཉི་མའི་དཀྱིལ་འཁོར་ལ་གཞག་པར་བྱའོ། །དེ་བཞིན་གཤེགས་པ་བཞི་པོ་ནི་ཉི་མའི་
གདན་དང་ཉི་མའི་འོད་མངའ་བ། རལ་པ་དང་ཅོད་པན་ཅན་ཡིན་ལ། རྣམ་པར་སྣང་མཛད་ནི་ཟླ་བའི་གདན་དང་ཟླ་བའི་འོད་མངའ་བའོ། །དེ་ནས་མོ་ཧ་རཱ་ཏི་ཞེས་བྱ་བས་ལྷ་མོ་སྤྱན་ཞལ་དང་ཕྱག་ལ་སོགས་པ་རྣམ་པར་སྣང་མཛད་དང་འདྲ་བ་མེའི་ཕྱོགས་སུ་ཟླ་བའི་དཀྱིལ་འཁོར་ལ་གཞག་
པར་བྱའོ། །དེ་ནས་དྭེ་ཥ་རཱ་ཏི་ཞེས་བྱ་བས་མཱ་མ་ཀཱི་ཞལ་དང་ཕྱག་ལ་སོགས་པ་མི་བསྐྱོད་པ་དང་འདྲ་བ་བདེན་བྲལ་གྱི་ཕྱོགས་སུ་ཟླ་བའི་དཀྱིལ་འཁོར་ལ་གཞག་པར་བྱའོ། །དེ་ནས་རཱ་ག་ར་ཏི་ཞེས་བྱ་བས་ལྷ་མོ་གོས་དཀར་མོ་ཞལ་དང་ཕྱག་ལ་སོགས་པ་འོད་དཔག་ཏུ་མེད་པ་དང་
འདྲ་བ་རླུང་གི་ཕྱོགས་ཀྱི་ཟླ་བའི་དཀྱིལ་འཁོར་ལ་གཞག་པར་བྱའོ། །དེ་ནས་བཛྲ་རཱ་ཏི་ཞེས་བྱ་བས་སྒྲོལ་མ་ཞལ་དང་ཕྱག་ལ་སོགས་པ་རིན་ཆེན་འབྱུང་ལྡན་དང་འདྲ་བ་རྩ་བའི་ཕྱག་གཉིས་ཀྱིས་ཐབས་ལ་འཁྱུད་པ་ཕྱག་གཉིས་པ་ན་ཨུཏྤལ་སེར་པོ་ཁ་ཕྱེ་བ། གསུམ་པ་ན་རལ་གྲི་བསྣམས་

44-1-228a

པ། གཡོན་པའི་ཕྱག་གཉིས་ན་རིན་པོ་ཆེ། གསུམ་པ་ན་འཁོར་ལོ་བསྣམས་པ། དབང་ལྡན་གྱི་ཕྱོགས་སུ་ཟླ་བའི་དཀྱིལ་འཁོར་ལ་དགོད་པར་བྱའོ། །དེའི་འོག་ཏུ་ཨོཾ་ཨཱཿརཱུ་པ་བཛྲ་ཧཱུྃ། ཞེས་བྱ་བའི་ཡི་གེ་གསུམ་གྱི་བར་དུ་མིང་བཅུག་ལ། རེ་རེའི་སྔགས་
བརྗོད་ནས་གཟུགས་རྡོ་རྗེ་ལ་སོགས་པ་ནས་ཆོས་ཀྱི་དབྱིངས་རྡོ་རྗེའི་བར་གྱི་མཆོད་པའི་ལྷ་མོ་རྣམས་རིམ་བཞིན་དུ། གཟུགས་རྡོ་རྗེ་དང་། སྒྲ་རྡོ་རྗེ་དང་། དྲི་རྡོ་རྗེ་དང་། རོ་རྡོ་རྗེ་དང་། རེག་རྡོ་རྗེ་དང་། ཆོས་ཀྱི་དབྱིངས་རྡོ་རྗེ་གོ་རིམས་བཞིན་དུ་སྐུ་མདོག་དཀར་པོ་དང་། སྔོ་བ་དང་། སེར་བ་དང་།
དམར་བ་དང་། ལྗང་གུ་དང་། དཀར་པོ་ཕྱག་དྲུག་པ། རྩ་བའི་ཕྱག་གཉིས་ཀྱིས་ཐབས་ལ་འཁྱུད་པ། ཕྱག་གཡས་པའི་གཉིས་པ་ན་མེ་ལོང་དང་། པི་ཝང་དང་། དྲིའི་དུང་ཕོར་དང་། རོའི་སྣོད་དང་། གོས་དང་། ཆོས་འབྱུང་བའི་མཚན་མ་བསྣམས་པ། ཕྱག་ལྷག་མ་རྣམས་ན་
རིམ་བཞིན་དུ་རལ་གྲི་དང་། ནོར་བུ་དང་། པདྨ་བསྣམས་པ། རྒྱན་དང་ན་བཟའ་ལ་སོགས་པས་བརྒྱན་པ་ཟླ་བའི་གདན་དང་ཟླ་བའི་འོད་མངའ་བ། རྡོ་རྗེ་སྐྱིལ་མོ་ཀྲུང་གིས་ལེགས་པར་བཞུགས་པ། རིམ་པ་གཉིས་པའི་མེ་ལ་སོགས་པའི་མཚམས་རྣམས་དང་། ཤར་ཕྱོགས་ཀྱི་སྒོ་
ལོགས་གཉིས་སུ་ཟླ་བའི་དཀྱིལ་འཁོར་ལ་སྔ་མ་བཞིན་དུ་དགོད་པར་བྱའོ། །དེའི་འོག་ཏུ་ཡ་མཱནྟ་ཀྲྀཏ་ཅེས་བྱ་བས་གཤིན་རྗེ་གཤེད་སྐུ་མདོག་ནག་པོ་ཞལ་གསུམ་པ་ནག་པོ་དང་དཀར་པོ་དང་དམར་པོ། རྩ་བའི་ཕྱག་གཉིས་ཀྱིས་རང་དང་འདྲ་བ་ལ་འཁྱུད་པ། ཕྱག་ལྷག་མ་རྣམས་ཀྱིས་རྡོ་རྗེ་
ཐོ་བ་དང་། རལ་གྲི་དང་། རིན་པོ་ཆེ་དང་། པདྨ་བསྣམས་པ། སྔ་མ་བཞིན་དུ་ཕྱུང་ལ་སྤྲོ་བ་ལ་སོགས་པ་བྱ་བ་སྔོན་དུ་འགྲོ་བས་ཤར་ཕྱོགས་ཀྱི་སྒོར་ཉི་མའི་དཀྱིལ་འཁོར་ལ་གཞག་པར་བྱའོ། །དེ་བཞིན་དུ་པྲཛྙཱནྟ་ཀྲྀཏ་ཅེས་བྱ་བས་ཤེས་རབ་མཐར་བྱེད་སྐུ་མདོག་དམར་པོ་ཞལ་གསུམ། 
དཀར་པོ་དང་། སྔོན་པོ་དང་། དམར་པོ་ཕྱག་དྲུག་པ། རྩ་བའི་ཕྱག་གཉིས་ཀྱིས་རང་དང་འདྲ་བ་ལ་འཁྱུད་པ། ཕྱག་ལྷག་མ་རྣམས་ན་རྡོ་རྗེ་དབྱིག་པ་དཀར་པོ་དང་། རལ་གྲི་དང་། རིན་པོ་ཆེ་དང་པདྨ་བསྣམས་པ། སྔ་མ་བཞིན་དུ་སྤྲོ་བ་ལ་སོགས་པ་བྱས་ལ་ལྷོ་ཕྱོགས་ཀྱི་སྒོར་ཉི་མའི་དཀྱིལ་འཁོར་

44-1-228b

ལ་གཞག་པར་བྱའོ། །དེ་བཞིན་དུ་པདྨཱནྟ་ཀྲྀཏ་ཅེས་བྱ་བས་པདྨ་མཐར་བྱེད་སྐུ་མདོག་དམར་བ། ཞལ་གསུམ་པ་དམར་པོ་དང་། སྔོན་པོ་དང་། དཀར་པོ་མངའ་བ། ཕྱག་དྲུག་པ། རྩ་བའི་ཕྱག་གཉིས་ཀྱིས་རང་དང་འདྲ་བ་ལ་འཁྱུད་པ། ཕྱག་ལྷག་མ་རྣམས་ན་པདྨ་དམར་པོ་དང་། རལ་གྲི་དང་། 
འཁོར་ལོ་དང་། རིན་པོ་ཆེ་བསྣམས་པ་སྔ་མ་བཞིན་དུ་ཕྱུང་ལ། སྤྲོ་བ་ལ་སོགས་པ་བྱས་ནས། ནུབ་ཀྱི་སྒོར་ཉི་མའི་དཀྱིལ་འཁོར་ལ་གཞག་པ་བྱའོ། །དེ་བཞིན་དུ་བིགྷྣཱནྟ་ཀྲྀཏ་ཅེས་བྱ་བས་བགེགས་མཐར་བྱེད་སྐུ་མདོག་ནག་པོ་ཞལ་གསུམ་ནག་པོ་དང་། དཀར་པོ་དང་། དམར་པོ་དང་།
ཕྱག་དྲུག་པ། རྩ་བའི་ཕྱག་གཉིས་ཀྱིས་རང་དང་འདྲ་བ་ལ་འཁྱུད་པ། ལྷག་མ་རྣམས་ན་རྡོ་རྗེ་ནག་པོ་ཁ་གྱེས་པ་དང་། རལ་གྲི་དང་། རིན་པོ་ཆེ་དང་། པདྨ་བསྣམས་པ། སྔ་མ་བཞིན་དུ་ཕྱུང་ལ། སྤྲོ་བ་ལ་སོགས་པ་བྱས་ནས། བྱང་ཕྱོགས་ཀྱི་ཉི་མའི་དཀྱིལ་འཁོར་ལ་གཞག་པར་
བྱའོ། །ཁྲོ་བོ་ཐམས་ཅད་ཀྱང་དབུ་སྐྲ་དམར་སེར་གྱེན་དུ་བརྫེས་པ། གསུས་པ་འཕྱང་བ། ཤིན་ཏུ་གདུག་པ། སྤྱན་དམར་ཞིང་ཟླུམ་པ། མིའུ་ཐུང་གི་གཟུགས་ཅན། སྟག་གི་པགས་པའི་ཤམ་ཐབས་ཅན། ཀླུ་ཆེན་པོ་རྣམས་ཀྱིས་བརྒྱན་པ། ཞལ་གྱི་མཆེ་བ་གཙིགས་པ། ལྗགས་
བསྐྱོད་ཅིང་འཇིགས་སུ་རུང་བ་ཉི་མའི་འོད་ཤས་ཆེར་འབར་བའོ། །དེ་ལྟར་དཀྱིལ་འཁོར་གྱི་འཁོར་ལོ་མ་ལུས་པ་བསྐྱེད་ཅིང་བརྟན་པར་བསྒོམ་པར་བྱའོ། །དེ་ནས་ཡེ་ཤེས་སེམས་དཔའི་སྙིང་པོའི་ས་བོན་གྱི་འོད་ཀྱིས་ཡེ་ཤེས་ཀྱི་དཀྱིལ་འཁོར་སྤྱན་དྲངས་ལ་མདུན་གྱི་ནམ་མཁའ་ལ་བསམས་ཏེ་རང་
གི་སྒོ་སྲུང་རྣམས་ཀྱིས་དེའི་བགེགས་བསྐྲད་ལ་ཡང་དག་པར་བསྲུངས་ཏེ། རང་གི་སྔགས་ཀྱིས་མཆོད་ཡོན་ཕུལ་ལ། གཟུགས་རྡོ་རྗེ་ལ་སོགས་པ་རྣམ་པར་སྤྲོས་ཏེ་ཡང་དག་པར་མཆོད་ནས། ཛཿཧཱུྃ་བཾ་ཧོཿཞེས་བྱ་བའི་ཡི་གེ་རྣམས་ཀྱིས་གོ་རིམས་ཇི་བཞིན་དུ་དགུག་པ་དང་། གཞུག་པ་དང་། 
དབང་དུ་བྱ་བ་དང་། མཉེས་པར་བྱ་བ་ནི། རྒྱུ་མཐུན་པའི་འབྲས་བུ་ཆེན་པོ་དང་། བསྙེན་པའི་ཡན་ལག་ཆེན་པོ་ཡིན་ནོ། །དེ་ཡང་སྔ་མ་བཞིན་དུ་མིག་ལ་སོགས་པ་བྱིན་གྱིས་བརླབ་པར་བྱ་བ་ནི་རྣམ་པར་སྨིན་པའི་འབྲས་བུ་ཆེན་པོ་དང་ཉེ་བར་སྒྲུབ་པ་ཆེན་པོ་ཡིན་ནོ། །དེ་ནས་སྔར་བཤད་པའི་རིམ་

44-1-229a

པས་སྐུ་དང་གསུང་དང་ཐུགས་བྱིན་གྱིས་བརླབ་པར་བྱ་བ་ནི་སྒྲུབ་པ་ཆེན་པོ་དང་སྐྱེས་བུ་བྱེད་པའི་འབྲས་བུ་ཆེན་པོ་ཡིན་ནོ། །དེ་ནས་དཀྱིལ་འཁོར་པ་ཐམས་ཅད་ཀྱི་ཐུགས་ཀའི་ཡེ་ཤེས་སེམས་དཔའི་སྙིང་པོའི་འོད་ཀྱིས་དེ་བཞིན་གཤེགས་པ་རྣམས་བསྐུལ་ལ་བཀུག་
སྟེ། མདུན་གྱི་ནམ་མཁའ་ལ་བསམས་ནས། གཟུགས་རྡོ་རྗེ་ལ་སོགས་པས་ཡང་དག་པར་མཆོད་ལ་དབང་བསྐུར་བའི་དོན་དུ་གསོལ་བ་གདབ་བོ། །དེ་ནས་དེ་བཞིན་གཤེགས་པ་རྣམས་ཀྱི་སྐུ་ལས་བྱུང་བའི་ལྷ་མོ་སྤྱན་མ་ལ་སོགས་པ་རྣམས་ཡེ་ཤེས་ཀྱི་བདུད་རྩིས་ཡོངས་སུ་གང་བའི་
རིན་པོ་ཆེའི་བུམ་པ་ཐོགས་པས་དབང་བསྐུར་བ་དང་། དཀྱིལ་འཁོར་པ་རྣམས་ཀྱི་དབུ་ལ་རང་གི་བདག་པོར་གྱུར་པ་བསམ་པར་བྱའོ། །དེ་ལ་དེ་བཞིན་གཤེགས་པ་ཐམས་ཅད་ཀྱི་དབུ་ལ་མི་བསྐྱོད་པའོ། །མི་བསྐྱོད་པའི་དབུ་ལ་ནི་རྡོ་རྗེ་སེམས་དཔའོ། །སྤྱན་དང་གཟུགས་རྡོ་རྗེ་དང་གཤིན་རྗེ་གཤེད་
ཀྱི་དབུ་ལ་ནི་རྣམ་པར་སྣང་མཛད་དོ། །མཱ་མ་ཀཱི་དང་སྒྲ་རྡོ་རྗེ་དང་ཆོས་ཀྱི་དབྱིངས་རྡོ་རྗེ་དང་ཤེས་རབ་མཐར་བྱེད་དང་བགེགས་མཐར་བྱེད་ཀྱི་དབུ་ལ་ནི་མི་བསྐྱོད་པའོ། །གོས་དཀར་མོ་དང་རོ་རྡོ་རྗེ་དང་རྟ་མགྲིན་གྱི་དབུ་ལ་ནི་འོད་དཔག་ཏུ་མེད་པའོ། །སྒྲོལ་མ་དང་རེག་རྡོ་རྗེའི་དབུ་ལ་ནི་དོན་ཡོད་གྲུབ་པའོ། །དྲི་རྡོ་རྗེའི་
དབུ་ལ་ནི་རིན་ཆེན་འབྱུང་ལྡན་ནོ། །སའི་སྙིང་པོ་དང་། ཕྱག་ན་རྡོ་རྗེ་དང་། ནམ་མཁའི་སྙིང་པོ་དང་། འཇིག་རྟེན་དབང་ཕྱུག་དང་། སྒྲིབ་པ་ཐམས་ཅད་རྣམ་པར་སེལ་བ་དང་། ཀུན་དུ་བཟང་པོའི་དབུ་ལ་ནི་གོ་རིམས་བཞིན་དུ་རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་
མེད་པ་དང་། དོན་ཡོད་གྲུབ་པ་དང་། མི་བསྐྱོད་པ་བསམ་པར་བྱའོ། །དཀྱིལ་འཁོར་གྱི་འཁོར་ལོའི་གཙོ་བོ་ལ་སོགས་པ་དཀྱིལ་འཁོར་པ་འདི་དག་ཐམས་ཅད་རིགས་ཀྱི་བདག་པོ་དང་བཅས་ཤིང་ཤེས་རབ་དང་ཐབས་ཀྱི་རང་བཞིན་དྲི་མ་མེད་པའི་མཆོག་ཏུ་བདེ་བ་དམ་པའི་ངོ་བོ་ཉིད་དུ་བསམ་པར་བྱའོ། །
དེ་ལྟར་ན་འདི་དག་ནི་སྒྲུབ་པ་ཆེན་པོའི་ཆེན་པོ་དང་དབང་གི་འབྲས་བུ་ཆེན་པོ་ཡིན་ནོ། །དེ་ནས་ཡེ་ཤེས་སེམས་དཔའི་ཐུགས་ཀའི་ས་བོན་གྱི་འོད་ཟེར་གྱི་ཚོགས་ཀྱིས་ནམ་མཁའི་ཁམས་ན་གནས་པའི་གཟུགས་ལ་སོགས་པའི་ཡུལ་ཐམས་ཅད་བདག་ཉིད་ཀྱི་རང་དང་འདྲ་བའི་རིག་མའི་སྙིང་གར་ཆོ་ག་བཞིན་

44-1-229b

དུ་བཅུག་ལ་རང་དང་འདྲ་བའི་པདྨའི་ནང་དུ་ཞུ་བར་གྱུར་པ་བསམས་ནས། དེའི་འོད་ཟེར་ལས་བྱུང་བའི་གཟུགས་རྡོ་རྗེ་ལ་སོགས་པའི་ལྷ་མོའི་ཚོགས་རྣམས་དང་། ཕྱིའི་མཆོད་པའི་ཚོགས་རྣམས་ཀྱིས་དཀྱིལ་འཁོར་གྱི་འཁོར་ལོ་ཡང་དག་པར་མཆོད་ལ། མཆོད་པ་དང་མཆོད་པ་བྱེད་པ་པོ་དབྱེར་མེད་
དུ་ང་རྒྱལ་བྱས་ནས། ཨོཾ་སརྦྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་བདག་ཉིད་དཀྱིལ་འཁོར་པ་དང་བཅས་པ་ལ་འདི་ལྟར་བསྟོད་པར་བྱའོ། །རྡོ་རྗེ་མི་འཆི་རྒྱལ་པོ་ཆེ། །མི་རྟོག་ནམ་མཁར་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །རྡོ་རྗེ་གསུང་ལ་ཕྱག་འཚལ་ལོ། །
རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་ཆེན་པོ། །རང་བཞིན་འོད་གསལ་མཆོག་གི་མཆོག །སྟོན་པ་རྡོ་རྗེ་ཕྱག་འཚལ་ལོ། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མ་མེད། །རང་བཞིན་དག་པ་གོས་པ་མེད། །རྡོ་རྗེ་སྐུ་ལ་ཕྱག་འཚལ་ལོ། །མི་བསྐྱོད་རྡོ་རྗེ་ཡེ་ཤེས་ཆེ། །
རྡོ་རྗེ་དབྱིངས་ནི་མཁས་ཆེན་པོ། །དཀྱིལ་འཁོར་མཆོག་གསུམ་ཡི་གེ་གསུམ། །རྡོ་རྗེ་དབྱིངས་ལ་ཕྱག་འཚལ་ལོ། །དོན་ཡོད་རྒྱལ་པོ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །རང་བཞིན་དག་པ་ལས་བྱུང་བ། །རྡོ་རྗེ་སེམས་དཔའ་ཕྱག་འཚལ་ལོ། །དེ་ནས་བདུད་རྩི་མྱང་བའི་ཆོ་ག་འདི་ལྟར་
བྱ་སྟེ། མདུན་དུ་ཡི་གེ་ཡཾ་ཡོངས་སུ་གྱུར་པ་ལས་རླུང་གི་དཀྱིལ་འཁོར་གཞུའི་དབྱིབས་ཅན་བ་དན་གྱིས་མཚན་པ་བསམས་ལ། དེའི་སྟེང་དུ་རཾ་ཡོངས་སུ་གྱུར་པ་ལས་མེའི་དཀྱིལ་འཁོར་གྲུ་གསུམ་རབ་ཏུ་འབར་བའི་གཟུགས་ཅན་དམིགས་ལ། དེའི་སྟེང་དུ་ཨ་ཡོངས་སུ་གྱུར་པ་ལས་
ཐོད་པ་དེའི་ནང་དུ་བདུད་རྩི་ལྔ་བྷྲཱུཾ་ཨཱཾ་ཛྲཱིཾ་ཁཾ་ཧཱུྃ། ཞེས་བྱ་བ་དེ་བཞིན་གཤེགས་པ་ལྔའི་ས་བོན་གྱིས་བྱིན་གྱིས་བརླབས་པར་བསམས་ནས། དེའི་འོག་ཏུ་བསྲེག་པ་དང་འབར་བ་ལ་སོགས་པས་ཡང་དག་པར་སྦྱངས་ལ། ཨོཾ་གྱིས་བྱིན་གྱིས་བརླབས་པར་བསམས་ནས། དེའི་སྟེང་དུ་ཧཱུྃ་ལས་བྱུང་
བའི་རྡོ་རྗེ་བསམ་མོ། །དེ་ནས་ཡི་གེ་ཨོཾ་གྱི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་བདུད་རྩི་བཀུག་ལ། བདུད་རྩི་ལྔ་པོ་དེ་ཉིད་ཀྱི་ནང་དུ་གཞུག་པར་བྱའོ། །དེ་ནས་བསྲེག་པ་དང་འབར་བས་ཡི་གེ་ཨོཾ་དང་རྡོ་རྗེ་དེ་ཉིད་དུ་ཞུ་བར་གྱུར་པར་བསམས་ལ། དེ་ལྟར་བསྐྱེད་

44-1-230a

པའི་བདུད་རྩི་དེ་ལྕེ་ལ་ཡི་གེ་ཧཱུྃ་ལས་རྡོ་རྗེ་བཀོད་པའི་ལྕེ་བཟང་པོ་དང་། རོ་རྡོ་རྗེས་བསྟབས་པས་བདག་ཉིད་དང་། དཀྱིལ་འཁོར་པ་རྣམས་ཚིམ་པར་བྱའོ། །དེ་ལྟར་དཀྱིལ་འཁོར་འབྱིན་པ་ནས་བདུད་རྩི་མྱོང་བའི་བར་དུ་ནི། དཀྱིལ་འཁོར་རྒྱལ་པོ་མཆོག་ཅེས་བྱ་
བའི་ཏིང་ངེ་འཛིན་ཡིན་ནོ།  །སེམས་དབང་དུ་གྱུར་པ་ཐོབ་ན་ཞི་བ་ལ་སོགས་པའི་ལས་རྣམས་ཀྱིས་འགྲོ་བའི་དོན་བསྒྲུབ་པར་བྱ་བ་ཡིན་པའི་ཕྱིར་རོ། །ཐིག་ལེ་རྣལ་འབྱོར་བསྒོམ་པར་བྱ་བ་ཡིན་པས་སེམས་བརྟན་པར་བྱ་བའི་དོན་དུ་ལས་ཀྱི་རྒྱལ་པོ་མཆོག་བསྒོམ་པར་བྱའོ། །དེ་བས་
ན་ཡེ་ཤེས་སེམས་དཔའི་ཐུགས་ཀའི་ས་བོན་གྱི་འོད་ཟེར་རྣམས་ཀྱིས་ཁམས་གསུམ་པོ་སྣང་བར་བྱས་ནས་རང་གི་ལྷའི་རྣམ་པར་བྱས་ལ་དཀྱིལ་འཁོར་གྱི་འཁོར་ལོར་གཞུག་ཞུག་པར་བྱའོ། །དཀྱིལ་འཁོར་གྱི་འཁོར་ལོ་ནི་བདག་ཉིད་ལ་གཞུག་གོ། །བདག་ནི་ཡེ་ཤེས་སེམས་དཔའ་ལ་
གཞུག་གོ། །ཡེ་ཤེས་སེམས་དཔའ་ནི་མཚན་མར་རོ། །མཚན་མ་ནི་ཙ་ན་ཀའི་ཚད་ཀྱི་ཐིག་ལེར་བཅུག་ལ།ཐིག་ལེའི་དབུས་སུ་བསྐྱེད་པའི་རིམ་པས་དཀྱིལ་འཁོར་གྱི་འཁོར་ལོ་སྐད་ཅིག་ཙམ་གྱིས་བསྒོམ་པར་བྱའོ། །འདིར་བསྙེན་པ་ལ་སོགས་པ་ནི་ཆེན་པོའི་སྒྲར་བརྗོད་དོ། །
ཙ་ན་ཀའི་འབྲས་བུའི་ཚད་ཙམ་དུ་དེ་ལྟར་བསྒོམས་ལ། ཡང་ཐིག་ལེའི་དབུས་སུ་ཆུད་པའི་འོད་ཟེར་གྱི་ཚོགས་སུ་སྣང་བ་ལས་ས་བོན་དུ་བསམ་མོ། །ས་བོན་གྱི་འོད་ཟེར་རྣམས་ལས་མཚན་མ་མཚན་མའི་འོད་ཟེར་རྣམས་ལས་ཡེ་ཤེས་སེམས་དཔར་བསམ་མོ། །ཡེ་ཤེས་སེམས་དཔའི་
འོད་ཟེར་སྤྲོས་པ་ལས། དཀྱིལ་འཁོར་གྱི་བདག་པོའི་བདག་ཉིད་བསམ་མོ། །དེ་ནས་དཀྱིལ་འཁོར་གྱི་བདག་པོའི་འོད་ཟེར་གྱི་སྣང་བ་ལས། དཀྱིལ་འཁོར་གྱི་འཁོར་ལོ་སྔ་མ་བཞིན་དུ་གནས་པར་བསམས་ལ། དཀྱིལ་འཁོར་གྱི་འཁོར་ལོ་དེ་ཀུན་དུ་སྤྲོས་པའི་འོད་ཟེར་རྣམས་ཀྱིས་ཁམས་
གསུམ་པ་མ་ལུས་པར་དེ་བཞིན་གཤེགས་པའི་ཚོགས་ཀྱིས་ཁྱབ་པར་བསྒོམས་ནས། ཡང་དེ་བཞིན་དུ་ཐིག་ལེའི་བར་དུ་བསྡུ་ཞིང་སླར་སྤྲོ་བ་དང་། སླར་ཡང་ཐིག་ལེའི་བར་དུ་བསྡུ་བ་དང་། དེ་བཞིན་དུ་དཀྱིལ་འཁོར་གྱི་འཁོར་ལོ་བསྒོམ་པ་ཇི་སྲིད་འདོད་ཀྱི་བར་དུ་བྱས་པ་ནི་ཐིག་ལེའི་རྣལ་འབྱོར་

44-1-230b

རོ། །དེའི་འོག་ཏུ་ནམ་མཁའ་ལ་བཞུགས་པའི་རིགས་ལྔའི་དེ་བཞིན་གཤེགས་པ་རྣམས་བདག་ཉིད་ཀྱི་ཁར་བཅུག་སྟེ། བྱང་ཆུབ་ཀྱི་སེམས་ཞུ་བར་གྱུར་པ་ལས་རྡོ་རྗེའི་ལམ་ནས་ཕྱུང་སྟེ། སྔ་མ་བཞིན་དུ་རང་དང་འདྲ་བའི་པདྨའི་ལྟེ་བར་བྱང་ཆུབ་ཀྱི་སེམས་ཞུ་བའི་ཐིག་ལེར་བསམས་ལ་དེར་
ཡི་གེ་ཧྲཱིཿཡོངས་སུ་གྱུར་པ་ལས་པདྨ་ཙ་ན་ཀའི་འབྲས་བུའི་ཚད་ཙམ་དུ་བསྒོམས་ལ། པདྨའི་ལྟེ་བའི་དབུས་སུ་དཀྱིལ་འཁོར་གྱི་འཁོར་ལོ་བསྐྱེད་པའི་རིམ་པས་སྐད་ཅིག་གིས་བསྒོམ་པར་བྱའོ། །འདིར་བསྙེན་པ་ལ་སོགས་པ་ནི་ཆེན་པོའི་སྒྲར་བརྗོད་དོ། །འདི་ལ་ཇི་སྲིད་དུ་སེམས་
བརྟན་པར་མ་གྱུར་པ་དེ་སྲིད་དུ་ཤིན་ཏུ་སྤྲོ་བར་མི་བྱའོ། །སེམས་བརྟན་པར་གྱུར་ནས་ནི་ཡང་དེ་བཞིན་གཤེགས་པ་རྣམས་དང་སྤྲོ་བ་དང་བསྡུ་བར་བྱ་བ་ནི་ཕྲ་མོའི་རྣལ་འབྱོར་རོ། །དེ་ནས་བསྒོམས་པས་སྐྱོ་ན། ཡི་གེ་དགུ་པོ་ཡེ་ཤེས་སེམས་དཔའི་ཐུགས་ཀའི་ས་བོན་ཡོངས་སུ་བསྐོར་
ཏེ་གནས་པ་ལ་བཟླས་བརྗོད་བྱའོ། །ཨོཾ་ཨཱཿཨོཾ་མ་ཎི་པདྨེ་ཧཱུྃ་ཧཱུྃ། ཞེས་བྱ་བའི་སྔགས་ཟློས་ཤིང་སྐུ་དང་གསུང་དང་ཐུགས་རྡོ་རྗེ་རེ་རེ་ཞིང་ངམ་ཐུགས་རྡོ་རྗེའི་བདག་ཉིད་ཅན་དང་ཡེ་ཤེས་སེམས་དཔའ་དང་དེའི་སྐུ་དང་གསུང་དང་ཐུགས་རྡོ་རྗེ་དང་། ཡེ་ཤེས་སེམས་དཔའ་དང་ལྷན་ཅིག་ལྔ་པོའི་
བདག་ཉིད་ཅན་བསམས་ལ། དེ་རེ་རེ་ཞིང་འབྱིན་པ་དང་འཇུག་པའི་རླུང་གིས་རིམ་གྱིས་སམ་ཅིག་ཅར་སྤྲོ་བ་དང་བསྡུ་བར་བྱ་ཞིང་། མྱུར་བ་དང་ངལ་ཆེས་པའི་ཉེས་པ་དང་བྲལ་བར་སྔགས་ཀྱི་དེ་ཁོ་ན་ཉིད་ལ་ལྷག་པར་མོས་པས། གསང་སྔགས་ཡི་གེ་དགུ་པོ་བཟླས་པར་བྱ་སྟེ་འདི་ནི་
བཟླས་པའི་ཆོ་གའོ། །དེ་ནས་བསྒོམ་པ་དང་བཟླས་པས་དུབ་པ་བསལ་བའི་དོན་དུ་ལྷ་མོའི་གླུས་བསྐུལ་ལ། སྤྱི་བོའི་སྟེང་དུ་མཐོ་གང་ཙམ་གྱིས་དཔགས་པར་ཟླ་བའི་དཀྱིལ་འཁོར་ལ། ཨོཾ་དཀར་པོ་གནས་པར་རྣམ་པར་བསམས་ལ། དེ་ལས་བདུད་རྩི་འབབ་པས་བདག་ཉིད་ཚིམ་
པར་བྱས་པར་བསྒོམ་པར་བྱ་སྟེ། འདི་ནི་བརྟན་པར་བྱ་བའི་ཆོ་གའོ། །དེ་ནས་ཡང་ངལ་བསོ་ལ་སྔགས་ཀྱི་དེ་ཁོ་ན་ཉིད་ལ་ལྷག་པར་མོས་པས་ཇི་སྲིད་ཀྱི་བར་དུ་བཟླས་བརྗོད་བྱའོ། །དེ་ནས་གཤེགས་སུ་གསོལ་བར་འདོད་ན་རང་གི་ཡེ་ཤེས་སེམས་དཔའི་འོད་ཟེར་སྤྲོས་པས་དཀྱིལ་འཁོར་གྱི་

44-1-231a

འཁོར་ལོ་དང་བཅས་པའི་ཕྱི་རོལ་ཏུ་སྤྲོས་ལ་མདུན་གྱི་ནམ་མཁའ་ལ་བསམས་ཏེ་མཆོད་པའི་སྤྲིན་སྤྲོས། དེས་བདག་ཉིད་དང་དཀྱིལ་འཁོར་གྱི་འཁོར་ལོ་ཡང་དག་པར་མཆོད་ནས། ཡེ་ཤེས་ཀྱི་དཀྱིལ་འཁོར་ཨོཾ་ཀྲྀ་ཏོ་བ་སརྦྦ་སཏྭཱ་རྠ། སིདྡྷི་མ་དཏྟཱ་ཡ་ནུ་ག །གཙྪ་
ཏཱཾ་བུདྡྷ་བི་ཥ་ཡཾ། ཕུན་ར་ག་མ་ན་ཡཙྪཿ། ཞེས་བྱ་བ་འདིས་གཤེགས་སུ་གསོལ་ལོ། །དེའི་སྤྲུལ་པ་རྣམས་བདག་ཉིད་ལ་བསྡུ་བར་བྱའོ། །དེ་ནས་བསོད་ནམས་ཡོངས་སུ་བསྔོ་བའི་ཕྱིར་འདི་ལྟར་སྨོན་ལམ་གདབ་པར་བྱ་སྟེ། རྡོ་རྗེ་འཆང་བ་ཆེན་པོའི་དཔལ། །སངས་རྒྱས་ཐམས་ཅད་
དགྱེས་པ་ནི། །དགེ་བ་འདི་ཡིས་ཐོབ་གྱུར་ནས། །འགྲོ་བས་ཀྱང་ནི་དེ་ཐོབ་ཤོག །ཕྱག་རྒྱ་ཆེན་པོའི་དོན་གྲུབ་ཕྱིར། །སྤྱོད་གང་སངས་རྒྱས་ཀྱིས་བསྔགས་པ། །འགྲོ་བའི་དོན་ནི་བྱ་བའི་ཕྱིར། །སྤྱོད་དེ་ཉིད་དང་བདག་ལྡན་ཤོག །དེ་བཞིན་གཤེགས་རྣམས་ཐབས་གང་གིས། །
ཐམས་ཅད་མཁྱེན་ཉིད་གོ་འཕང་བརྙེས། །དག་ཅིང་ཡན་ལག་ཀུན་རྫོགས་པ། །ཐབས་དེ་དང་ནི་བདག་ལྡན་ཤོག །སྒྲིབ་པ་ཐམས་ཅད་ཡོངས་ཟད་ཕྱིར། །སངས་རྒྱས་ཀྱིས་སྔགས་ཤེས་རབ་གང་། །རྣམ་ཀུན་མཁྱེན་ཉིད་ཀུན་བྱའི་ཕྱིར། །བདག་གིས་ཤེས་རབ་དེ་ཐོབ་ཤོག །རང་གི་
ལྷ་ཡི་སྦྱོར་བ་ཡིས། །རབ་མཉམ་གཞག་སྟེ་གནས་པར་བྱ། །རང་གི་དཀྱིལ་འཁོར་པ་ཚུལ་དུ། །ཁམས་གསུམ་པོ་ནི་བལྟ་བར་བྱ། །བཟའ་དང་བཏུང་བ་དུས་སུ་ནི། །སྐད་ཅིག་མ་ཡི་སྦྱོར་བ་ཡིས། །རང་གི་ལྷག་པའི་ལྷར་བསམས་ཏེ། །བཟའ་དང་བཅའ་སོགས་རྣམ་སྦྱངས་
ལ། །བདུད་རྩི་མྱང་བའི་ཆོ་ག་ཡང་། །རྡོ་རྗེ་ལྕེ་ཡི་སྦྱོར་བ་ཡིས། །རང་གི་ལྷག་ལྷག་གཙོ་བོར་གྱུར། །དཀྱིལ་འཁོར་སྙིང་གར་བསམས་ནས་སུ། །རང་སྔགས་བྱིན་བརླབས་རོ་ཡིས་ནི། །སྐུ་ཡི་རྡོ་རྗེ་སོགས་ཚིམ་བྱ། །མཆོད་པ་འདི་ཉིད་དམ་པ་སྟེ། །སངས་རྒྱས་ཀུན་གྱིས་
རབ་ཏུ་བསྔགས། །འདི་ཉིད་ནང་གི་སྦྱིན་སྲེག་ནི། །ཡིན་པར་གསང་འདུས་ལས་བཤད་དོ། །ཁྲུས་ཀྱི་དུས་སུ་སྤྱན་སོགས་ཀྱིས། །དབང་བསྐུར་ལྟ་བུར་རྣམ་པར་སྤྱད། །དྲན་པ་བརྗེད་སོགས་ཉེས་པ་ཡིས། །གལ་ཏེ་དམ་ཚིག་ཉམས་གྱུར་ན། །དེ་ཚེ་དམ་ཚིག་རྡོ་རྗེ་ཞེས། །བྱ་བ་རང་

44-1-231b

གི་སྙིང་གར་བསྒོམ། །དེ་ཡི་ཐུགས་ཀར་ཡི་གེ་ཁཾ། །མཚན་མའི་དབུས་སུ་ཆུ་དབང་བསམ། །སྐུ་གསུང་ཐུགས་ཀྱི་རྡོ་རྗེ་སོགས། །ཆོ་ག་ཇི་བཞིན་དགོད་པར་བྱ། །སྐུ་གསུང་ཐུགས་ཀྱི་དབུས་ཆུད་པའི། །དེ་ཡི་ས་བོན་ཁ་ནས་བཟླས། །དམ་ཚིག་ཉམས་པའི་ཉེས་པ་ནི། །སྦྱོང་
འདོད་དམ་ཚིག་རྡོ་རྗེ་ཡིས། །གསང་སྔགས་ཡོངས་སུ་བཟླས་ནས་ནི། །བསྒོམ་པའི་མཐར་ནི་གཤེགས་སུ་གསོལ། །ཉལ་བའི་དུས་སུ་རང་གི་ནི། །སྙིང་གར་དཀྱིལ་འཁོར་བསམ་པའམ། །ཡང་ན་སྟོང་ཉིད་བསྒོམས་ནས་ནི། །རྣལ་འབྱོར་པས་ནི་ཅི་བདེར་ཉལ། །གཉིད་སད་
པ་ཡི་དུས་སུ་ནི། །ལྷ་མོས་བསྐུལ་བ་དྲན་བྱས་ལ། །མལ་ནས་ལངས་ཏེ་རྣལ་འབྱོར་པས། །སྔ་མ་བཞིན་དུ་བསམ་གཏན་སྤྱད། །དཔལ་ལྡན་འདུས་པའི་རྗེས་འབྲངས་ཏེ། །འཕགས་པ་འཇིག་རྟེན་དབང་སྒྲུབ་ཐབས། །བྱང་ཆུབ་འོད་ཀྱི་ངོར་མཛད་དེ། །མར་མེ་མཛད་ཀྱིས་འདི་
བྱས་སོ། །སྒྲུབ་ཐབས་འདི་ནི་ལེགས་བྲིས་པ། །བདག་གིས་དགེ་བ་གང་ཐོབ་པ། །དེ་ཡིས་འགྲོ་བ་ཐམས་ཅད་ནི། །རྡོ་རྗེ་ཆོས་ཀྱི་གནས་ཐོབ་ཤོག །འཕགས་པ་སྤྱན་རས་གཟིགས་དབང་ཕྱུག་གི་སྒྲུབ་པའི་ཐབས། དཔལ་གསང་བ་འདུས་པའི་རྒྱུད་ཀྱི་རིམ་པས་བསྒྲུབས་
པ། སློབ་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱི་ཞལ་སྔ་ནས་མཛད་པ་རྫོགས་སོ།།      །།རྒྱ་གར་གྱི་མཁན་པོ་དཱི་པཾ་ཀཱ་ར་ཤྲཱི་ཛྙཱ་ན་དང་། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །།
༄༅༅། །རྒྱ་གར་སྐད་དུ། ཨཱརྱཱ་ཝ་ལོ་ཀ་ཏེ་ཤྭ་ར་སཱ་དྷ་ནཾ། བོད་སྐད་དུ། འཕགས་པ་སྤྱན་རས་གཟིགས་འཇིག་རྟེན་དབང་ཕྱུག་སྒྲུབ་པའི་ཐབས། འཇིག་རྟེན་མགོན་པོ་ལ་ཕྱག་འཚལ་ལོ། །གང་ཐུགས་ཐུགས་རྗེའི་དབང་གྱུར་ཏེ། །རྟག་ཏུ་གཞན་གྱི་
དོན་མཛད་པ། །འཇིག་རྟེན་མགོན་ལ་ཕྱག་འཚལ་ཏེ། །དེ་ཡི་སྒྲུབ་ཐབས་བྲི་བར་བྱ། །བྱང་ཆུབ་ཏུ་ནི་སེམས་བསྐྱེད་ཅིང་། །དད་དང་སྙིང་རྗེར་ལྡན་པ་དང་། །བླ་མ་ལ་གུས་གཏོང་སེམས་ལྡན། །བདེན་པར་སྨྲ་ཞིང་བརྩོན་ལྡན་པས། །ཡིད་དང་རྗེས་སུ་མཐུན་གནས་

44-1-232a

སུ། །བདེ་བའི་སྟན་ལ་འདུག་ནས་ཀྱང་། །སྔོན་དུ་བྱ་བ་རྣམས་བྱས་ལ། །འཇིག་རྟེན་མགོན་པོ་བསྒྲུབ་པར་བྱ། །དང་པོ་བདག་ཉིད་ཀྱི་སྙིང་གར་ཨ་ལས་རི་བོང་ཅན་བསམས་ལ། དེའི་སྟེང་དུ་ས་བོན་གྱི་ཡི་གེ་བསམས་ཏེ། དེ་ལས་འོད་འཕྲོས་པས་
འཇིག་རྟེན་མགོན་པོ་སྤྱན་དྲངས་ཏེ། ཕྱག་ལ་སོགས་པ་ཡན་ལག་བདུན་པ་བྱའོ། །དེ་ནས་གསུམ་ལ་སྐྱབས་སུ་འགྲོ་བ་དང་སེམས་བསྐྱེད་པ་བྱས་ལ་སྙིང་རྗེ་ཆེན་པོ་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་དོ། །དེས་དངོས་པོ་ཐམས་ཅད་གཟུང་
བ་དང་འཛིན་པ་གཉིས་སུ་མེད་པ་སྟོང་པ་ཉིད་དུ་བསྒོམ་པར་བྱའོ། །དེ་ནས་རང་གི་སེམས་ཉིད་པཾ་ལས་པདྨ་འདབ་མ་བརྒྱད་པར་བསམས་ཏེ། དེའི་སྟེང་དུ་ཨ་ལས་ཟླ་བའི་དཀྱིལ་འཁོར་རོ། །དེའི་དབུས་སུ་ཡང་ས་བོན་གྱི་ཡི་གེ་དེ་ཉིད་དོ། །དེ་ལས་འོད་འཕྲོས་འགྲོ་
བ་རྣམས་དག་པར་བྱས་ནས་དེ་ཉིད་དུ་བསྡུ་བར་བྱའོ། །དེ་ཡོངས་སུ་གྱུར་པ་ལས་བདག་ཉིད་འཇིག་རྟེན་མགོན་པོ་སྐུ་མདོག་དམར་པོ། ཞལ་གསུམ་པ། དམར་པོ་དང་། དཀར་པོ་དང་། སྔོན་པོར་སྣང་བ་དང་། ཕྱག་དྲུག་པ་གཡས་གཡོན་དང་པོ་གཉིས་སྙོམས་པར་
འཇུག་པའི་ཕྱག་རྒྱ་ཅན། གཡས་ཀྱི་གཉིས་པ་དང་། གསུམ་པ་ན་པདྨ་དང་རལ་གྲི་བསྣམས་པ། གཡོན་གྱི་གཉིས་པ་དང་། གསུམ་པ་ན་རིན་པོ་ཆེ་དང་འཁོར་ལོ་བསྣམས་པའོ། །དེའི་ཐུགས་ཀར་ཡེ་ཤེས་སེམས་དཔའ་རང་དང་འདྲ་བའི་ཆ་ཕྲ་བའོ། །དེའི་ཐུགས་ཀར་
རི་བོང་ཅན་ལ་ས་བོན་གྱི་ཡི་གེའོ། །དེ་ལས་འོད་འཕྲོས་ཏེ། ཡེ་ཤེས་པ་རང་བཞིན་གྱི་གནས་ནས་སྤྱན་དྲངས་ལ་མཆོད་པ་བྱས་ལ། ཛཿཧཱུྃ་བཾ་ཧོཿ། ཞེས་བརྗོད་དེ། རང་ལ་དགུག་པ་དང་། གཞུག་པ་དང་། བཅིང་བ་དང་། མཉེས་པར་བྱའོ། །དེ་ནས་
གནས་གསུམ་དུ་ཡི་གེ་གསུམ་བསམས་ལ། སྐུ་གསུང་ཐུགས་བྱིན་གྱིས་བརླབ་པར་བྱའོ། །ཡང་ས་བོན་ལས་འོད་འཕྲོས་ཏེ། སངས་རྒྱས་ལྔ་སྤྱན་དྲངས་ལ་མཆོད་པ་བྱས་ལ། མགོན་པོ་དེ་བཞིན་གཤེགས་ཀུན་གྱིས། །བདག་ལ་དབང་བསྐུར་མཛད་

44-1-232b

དུ་གསོལ། །ཞེས་གསོལ་བ་གདབ་ཅིང་། དེས་དབང་བསྐུར་བར་བསམ་ཞིང་རིགས་ཀྱི་བདག་པོས་རྒྱས་གདབ་བོ། །དེ་ཉིད་རྣམ་པར་གསལ་བར་བསྒོམ་པར་བྱའོ། །ཡང་འབྱུང་བ་རླུང་ལས་གྲུབ་པའི་པདྨ་ཙ་ན་ཀའི་ཚད་ཙམ་སྟེང་གི་སྣའི་རྩེ་མོར་རེག་པའི་མཚན་མ་དང་།
གཟུགས་ཀྱི་མཚན་མ་བྱུང་བའི་བར་དུ་བསྒོམ་པར་བྱའོ། །ཡང་ས་བོན་གྱི་ཡི་གེ་དེ་ལས་དེའི་སྐུ་རྣམས་སྤྲོ་ཞིང་བསྡུ་བར་བྱའོ། །དེ་ནས་སྤྲོ་བར་གྱུར་ན་ཡེ་ཤེས་སེམས་དཔའི་ཐུགས་ཀའི་ས་བོན་ལ། ཨོཾ་ཨཱཿཨོཾ་མ་ཎི་པདྨེ་ཧཱུྃ་ཧཱུཾ་ཧྲཱིཿསྭཱ་ཧཱ། ཞེས་བྱ་བ་གཡོན་སྐོར་དུ་བཀོད་དེ། མན་
ངག་ཇི་ལྟ་བ་བཞིན་དུ་བསྒོམ་པར་བྱའོ།། དེ་ནས་ལྡང་བར་འདོད་ན་ཡེ་ཤེས་སེམས་དཔའ་ཕྱུང་ལ་མཆོད་པ་བྱས་ཏེ།  གང་ཡང་བདག་བློ་གཏི་མུག་པས། །འདིར་ནི་བྱ་མིན་གང་བྱས་པ། །གང་ཡང་ལུས་ཅན་སྐྱབས་གྱུར་པ། །མགོན་པོ་ཁྱོད་ནི་བཟོད་པར་མཛོད། །ཅེས་
གསོལ་བ་གདབ་པར་བྱའོ། །རྟག་ཏུ་གཞན་གྱི་དོན་མཛད་པ། །འཇིག་རྟེན་དབང་ཕྱུག་གྲུབ་པ་ནི། །དགེ་བ་དེ་ཡིས་ཐོབ་གྱུར་ཅིག །འགྲོ་བས་ཀྱང་ནི་དེ་ཐོབ་ཤོག །ཅེས་བྱ་བས་སྨོན་ལམ་གདབ་པར་བྱའོ། །དེ་ནས། ཨོཾ་ཨཱཿཧཱུྃ་མུཿ། ཞེས་པས་གཤེགས་
སུ་གསོལ་ལོ། །འབྱུང་བ་ཐམས་ཅད་ལ་ཡང་བྱ། །མདུན་དུ་ཆོས་འབྱུང་པད་ཟླ་ཅན། །བསམས་ལ་ས་བོན་འོད་ཟེར་གྱིས། །འབྱུང་པོ་ཐམས་ཅད་བཀུག་ནས་ནི། །རང་འདོད་ལྷ་ཡི་རྣམ་པར་བྱ། །གཏོར་མ་སྦྱང་བའི་རིམ་པ་ནི། །ཡཾ་བྱུང་རླུང་ལས་རཾ་བྱུང་མེ། །
ཨ་ལས་བྱུང་བའི་པད་སྣོད་དུ། །མུ་བི་ར་ཤུ་མ་ལས་བྱུང་བ་ཡི། །རྡོ་རྗེ་ཆུ་སོགས་རྫས་རྣམས་བསང་། །སྦྱང་བ་ལ་སོགས་རྣམ་བྱས་ནས། །དེ་རུ་ཡི་གེ་ཧྲཱིཿབཀོད་དེ། །ཡེ་ཤེས་བདུད་རྩི་བཀུག་བྱས་ལ། །ཧཱུཾ་ལས་བྱུང་བའི་རྡོ་རྗེས་དཀྲུགས། །སྔགས་འདིས་བྱིན་གྱིས་
བརླབས་ཏེ་འབུལ། །ཨོཾ་ཨ་ཀཱ་རོ་མུ་ཁཾ་སརྦྦ་དྷརྨྨཱ་ཎཱཾ་ཨཱ་དྱ་ནུཏྤ་ནྣ་ཏྭཱཏ་ཨོཾ་ཨཱཿཧཱུཾ་ཕཊ། ཅེས་ལན་བདུན་ནམ་གསུམ་བཟླས་ལ་དབུལ་བར་བྱའོ། །དེ་ནས་དེ་རྣམས་ཚིམ་པས་གཉིས་སུ་མེད་པའི་བདེ་བ་ཆེན་པོའི་ཏིང་ངེ་འཛིན་ཐོབ་པར་བསམས་ལ། ཨོཾ་ཨཱཿཧཱུཾ་མུཿས་གཤེགས་

44-1-233a

སུ་གསོལ་བར་བྱའོ། །ཟས་ལ་ཉེ་བར་སྤྱོད་དུས་སུ་སྔ་མའི་ཏིང་ངེ་འཛིན་དེ་ཉིད་ཀྱིས་ཁ་ཟས་སྔ་མ་བཞིན་སྦྱངས་ལ། སྙིང་གར་རང་གི་ལྷ་བསམས་ལ། །ནང་གི་སྦྱིན་སྲེག་བསམ་ལྡན་པས། །ཟས་ལ་ཉེ་བར་སྤྱད་པར་བྱ། །དེ་ནས་མཆོད་རྟེན་ལ་སོགས་ཀྱི། །
དགེ་བའི་ལས་ལ་འབད་པར་བྱ། །ཉལ་བའི་དུས་སུ་བདག་ཉིད་ཀྱི། །སྙིང་གའི་ས་བོན་དེ་ཉིད་དུ། །བརྟན་དང་གཡོ་བ་ཀུན་བསྡུས་ཏེ། །བདག་ཉིད་ཀྱང་ནི་དེར་བསྡུས་ལ། །སྟོང་ཉིད་ཏིང་འཛིན་ལ་གནས་བྱ། །ནང་པར་ལངས་ནས་སྔ་མ་བཞིན། །སྒྲུབ་པ་ལ་ནི་འཇུག་པར་བྱ། །ཁྲུས་ནི་རང་ལ་
དབང་བསྐུར་བསམ། །དཔལ་ལྡན་འདུས་པའི་རྗེས་འབྲངས་ཏེ། །འཇིག་རྟེན་དབང་པོ་སྒྲུབ་པའི་ཐབས། །མར་མེ་མཛད་དཔལ་ཡེ་ཤེས་ཀྱིས། །མན་ངག་མདོར་བསྡུས་འདིར་བཤད་ཡིན། །འཇིག་རྟེན་མགོན་པོ་སྒྲུབ་པའི་ཐབས་སློབ་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱིས་
མཛད་པ་རྫོགས་སོ།།༄༅༅། །རྒྱ་གར་སྐད་དུ། ཤྲཱི་གུ་ཧྱ་ས་མཱ་ཛ་སྟོ་ཏྲ། བོད་སྐད་དུ། དཔལ་གསང་བ་འདུས་པའི་བསྟོད་པ། འཇམ་པའི་རྡོ་རྗེ་ལ་ཕྱག་འཚལ་ལོ། །ཀུན་དུ་རྟོག་པ་མ་ལུས་སྤངས། །དྲི་མ་དང་བྲལ་བདག་ཉིད་ཅན། །ཀུན་བཟང་ཆོས་
དབྱིངས་ངོ་བོ་ཉིད། །མི་བསྐྱོད་པ་ལ་ཕྱག་འཚལ་ལོ། །སྟོན་ཀའི་ཟླ་བ་ལྟར་དཀར་བ། །འོད་ཟེར་བརྒྱ་ཕྲག་རྣམ་འགྱེད་པ། །མེ་ལོང་ཡེ་ཤེས་ངོ་བོ་ཉིད། །རྣམ་སྣང་གཙོ་ལ་ཕྱག་འཚལ་ལོ། །ལྟ་ངན་རྟོག་པ་དང་བྲལ་ཞིང་། །སྐྱོན་མེད་མཁའ་ལྟར་རྣམ་པར་དག །མཉམ་ཉིད་ཡེ་ཤེས་ངོ་
བོ་ཉིད། །རིན་ཆེན་དབང་ལ་ཕྱག་འཚལ་ལོ། །དཔག་མེད་འོད་ཀྱི་མཁའ་ཀུན་ཁྱབ། །ཚད་མེད་ཡོན་ཏན་ཕྲེང་བ་ཡིས། །ཀུན་རྟོག་ཡེ་ཤེས་མཁྱེན་པ་ཡི། །འོད་དཔག་མེད་ལ་ཕྱག་འཚལ་ལོ། །འགྲོ་བའི་དོན་ནི་མཛད་པ་པོ། །ཇི་བཞིན་དུ་འབྱུང་འགྱུར་བ་ཡིས། །བྱ་གྲུབ་ཡེ་ཤེས་ངོ་བོ་ཉིད། །
དོན་ཡོད་གྲུབ་པ་དེ་ལ་འདུད། །ས་ལྟར་སེམས་ཅན་ཐམས་ཅད་ཀྱི། །མཆོག་ཏུ་རྣམ་པར་འཛིན་སྤྱོད་པ། །ཐུགས་རྗེ་སྤྱོད་པ་གཡོ་བ་པོ། །ལྷ་མོ་སྤྱན་མར་ཕྱག་འཚལ་ལོ། །གང་གི་མཐུ་ཡིས་སེམས་ཅན་རྣམས། །ཉོན་མོངས་ཉིད་ནི་རབ་ཞི་བ། །ཆུ་ལྟར་ཕན་པ་དོན་ཆེན་གྱི། །མཱ་མ་ཀཱི་ལ་ཕྱག་འཚལ་

44-1-233b

ལོ། །མེ་ལྟར་སེམས་ཅན་ཐམས་ཅད་ཀྱི། །ཉོན་མོངས་ཉིད་ནི་བསྲེག་པར་བརྩོན། བྱ་བ་རྩེ་མོ་མཆོག་གྲུབ་པ། །ན་བཟའ་དཀར་མོར་ཕྱག་འཚལ་ལོ། །རླུང་ལྟར་ཀུན་ནས་ཉོན་མོངས་པའི། །རྩད་འབྱིན་འགྲོ་ལ་བདེ་བ་སྩོལ། །ཨུཏྤ་ལ་ཡི་སྤྱན་མངའ་བ། །སྒྲོལ་མ་ལ་ནི་ཕྱག་འཚལ་
ལོ། །གང་གི་གཟུགས་ནི་རྒྱ་ཆེ་ཞིང་། །རྣམ་པ་ཀུན་དུ་མི་འཕྲོ་བ། །བརྟགས་བྲལ་གཟུགས་ཀྱི་རྡོ་རྗེ་མ། །མཉམ་མེད་དེ་ལ་ཕྱག་འཚལ་ལོ། །གང་གི་མཐུ་ཡིས་སྒྲ་རྣམས་ཀྱི། །དེ་ཉིད་དམ་པ་གསུང་རྒྱས་ཤིང་། །རྣ་བའི་བདེ་བ་སྩོལ་མཛད་པ། །སྒྲ་རྡོ་རྗེ་ལ་ཕྱག་འཚལ་
ལོ། །གང་གི་ལོངས་སྤྱོད་ལྷུན་གྲུབ་པ། །སེམས་ཅན་མ་ལུས་ལ་སེམས་པའི། །བུང་བའི་སྒྲ་མཛད་རྡོ་རྗེ་དྲི། །མ་སྨད་དེ་ལ་ཕྱག་འཚལ་ལོ། །གང་གི་རང་རིག་བརྟན་དུ་མེད། །གཉིས་མེད་རོ་མྱང་སྟོབས་ཀྱིས་སུ། །སེམས་ཅན་བདེ་ལ་གནས་མཛད་པ། །རོ་རྡོ་རྗེ་ལ་ཕྱག་འཚལ་
ལོ། །ཇི་བཞིན་དུ་ནི་འབྱུང་འགྱུར་བའི། །རེ་བ་གང་ལ་སྲེད་མཐའ་རུ། །འགྲོ་གསུང་རྟག་ཏུ་དགའ་མཛད་པའི། །རེག་རྡོ་རྗེ་ལ་ཕྱག་འཚལ་ལོ། །གང་ཕྱིར་ཀུན་ནས་ཉོན་མོངས་པ། །གཅོད་པའི་རྒྱུད་གྱུར་ཆོས་རྣམས་ཀྱིས། །ཀུན་ལ་རྟག་ཏུ་རྟོག་མཛད་པ། །བླ་མེད་ཆོས་ཀྱི་རྡོ་རྗེ་
འདུད། །གང་ཕྱིར་ཐེག་པ་ཆེན་པོ་ལ། །མི་རྣམས་དགའ་བ་སྐྱེད་མཛད་པ། །དད་པ་རྣམ་དག་ངོ་བོ་ཉིད། །གཤིན་རྗེ་གཤེད་པོར་ཕྱག་འཚལ་ལོ། །མཁས་པ་གང་གིས་སྟོབས་ཀྱིས་སུ། །བྱང་ཆུབ་ཚོགས་རྣམས་རྫོགས་མཛད་པ། །བརྩོན་འགྲུས་རྣམ་དག་ངོ་བོ་ཉིད། །ཤེས་
རབ་མཐར་བྱེད་ཕྱག་འཚལ་ལོ། །གང་གི་མཐུ་ཡིས་སེམས་ཅན་རྣམས། །དགེ་བ་བརྗེད་མེད་སྐྱེད་མཛད་པ། །དྲན་པ་རྣམ་དག་ངོ་བོ་ཉིད། །པདྨ་མཐར་བྱེད་ཕྱག་འཚལ་ལོ། །གང་གི་སྟོབས་ཀྱིས་སེམས་ཅན་རྣམས། །བགེགས་བྲལ་བདེ་ལ་གནས་མཛད་པ། །བསམ་གཏན་རྣམ་དག་
ངོ་བོ་ཉིད། །བགེགས་འཇོམས་མཛད་ལ་ཕྱག་འཚལ་ལོ། །དཔལ་གསང་བ་འདུས་པའི་བསྟོད་པ་སློབ་དཔོན་ཆེན་པོ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།།      །།པཎྜི་ཏ་དེ་ཉིད་དང་། ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་བའོ།།      །།

44-1-234a

༄༅༅། །རྒྱ་གར་སྐད་དུ། ད་ཤ་ཏཏྟཱ། བོད་སྐད་དུ། དེ་ཁོ་ན་ཉིད་བཅུ་པ། བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དཀྱིལ་འཁོར་ཡང་དག་ཇི་ལྟ་བར། །རབ་ཏུ་བརྟག་པར་སུ་ཡིས་ནུས། །རང་གི་
འཁོར་ལོ་གནས་བསྙེན་པ། །བྱས་ནས་དེ་འོག་དཀྱིལ་འཁོར་བྲི། །དཀྱིལ་འཁོར་ས་ནི་སྦྱང་བྱ་བ། །ཕྱི་རོལ་མཆོད་པའི་ཡོན་གྱིས་ཏེ། །དགོངས་ཀ་ནང་གི་ས་དག་པ། །བཏབ་ནས་ས་གཞི་ཡོངས་སུ་གཟུང་། །ལྷག་པར་གནས་པ་ཉིན་གཉིས་པ། །རབ་གནས་ཆོ་གས་བུམ་པ་དང་། །
མེ་ལོང་ཨརྒྷ་བླ་རེ་སོགས། །ལས་ནི་ཐམས་ཅད་པ་ཡི་སྣོད། །སྲོད་ལ་སློབ་མ་དམ་པ་དང་། །ས་དང་འཁོར་ལོ་གཙོ་སྐྱོབ་པ། །ཡེ་ཤེས་སྲད་བུ་སྦྱངས་ནས་ནི། །དེ་ནས་ཚོན་ཡང་དགྱེ་བྱ་སྟེ། །ཉིན་གསུམ་པ་ལ་མཚན་མ་ནི། །དགོད་པ་ལ་
སོགས་རྫོགས་པར་བལྟ། །དཀྱིལ་འཁོར་མཚན་མོ་བསྒྲུབ་བྱ་ཞིང་། །གསོལ་གདབ་ཕྱོགས་སྐྱོང་གཏོར་མ་སྦྱིན། །གདོང་གཡོགས་ལ་སོགས་ཆོ་ག་བཞིན། །སོ་སོར་རང་སྔགས་ལྡན་པ་ཡིས། །བླ་མ་བདག་པོ་བློ་ཡིས་ནི། །འཇུག་པར་སློབ་དཔོན་ཡང་
དག་བྱ། །ཆུ་དང་ཅོད་པན་རྡོ་རྗེ་བདག །མིང་དང་བུམ་པ་གསང་བ་དང་། །ཤེས་རབ་ཡེ་ཤེས་དབང་བསྐུར་བ། །ཡང་དག་བརྗོད་དེ་དེ་བཞིན་ཡང་། །བརྟུལ་ཞུགས་ལུང་བསྟན་དབུགས་དབྱུང་ལ། །རྗེས་གནང་མཐའ་ཡི་རིམ་པས་ཀྱང་། །དེ་ནས་
འདི་ལྟར་སློབ་མ་གཞུག །ཡོན་བླངས་ནས་ནི་དབང་བསྐུར་ཞིང་། །ཐོག་མ་དབུས་དང་མཐའ་མ་རུ། །སྦྱིན་སྲེག་བྱས་ནས་འཁོར་ལོ་གཤེགས། །གསང་བའི་ཚིག་ཅེས་བྱ་བ་ཡི། །བཅུ་པོ་འདི་དག་བླ་མས་ཀྱང་། །གཞན་དུ་མི་འགྱུར་སློབ་མ་ལ། །
མན་ངག་དག་ནི་བསྟན་པར་བྱ། །བསྲུང་དང་ཕྱིར་བཟློག་འཁོར་ལོ་དང་། །ཁ་སྦྱར་དབྱེ་དང་གཏོར་མ་དང་། །མ་དང་སྔགས་བཏུ་བཟླས་བརྗོད་དང་། །དྲག་པོ་དཀྱིལ་འཁོར་སྒྲུབ་པའོ། །སློབ་དཔོན་ལས་ནི་བྱས་པ་ཡིས། །བདག་གིས་དགེ་བ་གང་

44-1-234b

ཐོབ་པས། །འཇིག་རྟེན་འགྲོ་དོན་གྱིས་བརྒྱན་ཞིང་། །དཔལ་ལྡན་གསང་འདུས་ལ་གནས་ཤོག །ཚིགས་སུ་བཅད་པ་བཅུ་པའོ། །བརྟན་ཞིང་དུལ་ལ་བློ་གྲོས་ལྡན། །དེ་ལ་སོགས་པའི་ཡོན་ཏན་ལྡན། །སློབ་མའང་ཡོན་ཏན་དེ་ལྟ་བུ། །ཅུང་ཟད་དམན་
པས་གསོལ་བ་གདབ། །དེ་ནས་དཔལ་ལྡན་སྔགས་ཚུལ་བཤད། །ཐར་རྒྱལ་འབྲས་བུ་འདོད་པས་བྱ། །གཞན་དུ་བླ་མ་སློབ་མ་དང་། །ངེས་པར་ཉམས་པ་ཉིད་དུ་འགྱུར། །དེ་ལ་སློབ་དཔོན་ལ་སློབ་མས་དཀྱིལ་འཁོར་བྲི་བར་བྱ་བའི་ཕྱིར་ལན་
གཉིས་ལན་གསུམ་དུ་གསོལ་བ་བཏབ་ནས། དེའི་ཚེ་སེམས་ཅན་གྱི་ཁམས་འདི་དག་ཐམས་ཅད་བླ་ན་མེད་པའི་བདེ་བའི་གནས་ལ་བདག་གིས་དགོད་པར་བྱའོ་ཞེས་ལྷག་པའི་བསམ་པ་བསྐྱེད་ལ། སློབ་མ་ལ་ཁྱོད་ཀྱིས་ཡོ་བྱད་ཐམས་ཅད་ཚོགས་
པར་བྱས་སམ་འོན་ཏེ་མ་བྱས་ཞེས་དྲི་བར་བྱའོ། །གལ་ཏེ་ཅུང་ཟད་ནི་ཚོགས་སོ། །ཅུང་ཟད་ནི་མ་ཚོགས་གོ་ཞེས་ཟེར་ན། དེའི་ཚེ་དེའི་ལྟེ་བ་ལ་ཉི་མའི་དཀྱིལ་འཁོར་ལ་གནས་པའི་ཧཱུཾ་གི་འོད་ཟེར་རྣམས་ཀྱིས་སྙིང་གར་གནས་པའི་ཀཾ་ལས་བྱུང་བའི་སྡིག་པ་
ཁ་དོག་གནག་པ་མི་སྡུག་པ་ཤ་ཟ་ལྟ་བུ་སྣའི་རྩེ་མོར་བྱུང་བ་དང་། ཧཱུཾ་དེ་ཡང་སྙིང་གར་ཕྱིན་ཏེ་བདུད་རྩི་ཐབ་སྦྱོར་གྱི་གཟུགས་སུ་གྱུར་ནས་བྱུང་སྟེ། ཨོཾ་ཨཱ་ན་མཿས་མནྟ་ཀཱ་ཡ་བཱཀ་ཙིཏྟ་བཛྲ་ཎཱཾ་ན་མོ་བཛྲ་ཀྲོ་དྷ་ཡ་ཞེས་བྱ་བ་ལ་སོགས་པའི་སྔགས་ཀྱིས་ཟ་རུ་
བཅུག་ནས་སློབ་མ་དེ་ཡང་སཾ་ལས་ཀུན་དུ་བཟང་པོའི་གཟུགས་སུ་བསྐྱེད་དེ་བདུད་རྩི་ཐབ་སྦྱོར་གྱི་ཕུར་བུས་དེའི་སེམས་ཀྱི་བགེགས་ལ་བཏབ་ནས་བགེགས་ཞི་བར་བྱ་བའི་ཕྱིར་བདུད་རྩི་ཐབ་སྦྱོར་གྱི་སྔགས་འདི་བཟླས་པར་སྦྱིན་པར་བྱའོ། །བདག་ཀྱང་སྔོན་དུ་བསྙེན་
པ་བྱ་བའི་ཕྱིར་ཏིང་ངེ་འཛིན་གསུམ་བསྐྱེད་དེ་ཐུན་བཞིར་བཟླས་པས་འཁོར་ལོ་ཅན་སྔགས་འབུམ་བཟླས་ཞེས་བྱ་བ་ལ་སོགས་པའི་གྲངས་བཟུང་བ་ལ་བཟླས་བརྗོད་བྱའོ། །ཡང་ན་ཕྲ་མོའི་རྣལ་འབྱོར་དང་། ཐིག་ལེའི་རྣལ་འབྱོར་ལ་གནས་པས་སེམས་ཀྱི་

44-1-235a

སྦྱོང་བ་རྩེ་གཅིག་པས་བྱའོ། །སྔོན་དུ་བསྙེན་པའི་ཆོ་གའོ། །དེ་ནས་དཀྱིལ་འཁོར་གྱི་ཁང་པའི་ཕྱིར་ས་ཡོངས་སུ་བརྟག་པར་བྱ་སྟེ། གཙུག་ལག་ཁང་ངམ་མཆོད་རྟེན་དང་འདུ་ཁང་ལ་སོགས་པ་གནས་ཤེས་པ་རྣམས་སུ་མཆོད་ཡོན་དབུལ་
བ་ལ་སོགས་པའི་ཆོ་ག་ཇི་ལྟ་བས་བརྐོ་ཞིང་སླར་དགང་བ་ལ་སོགས་པའི་བཤད་པ་རྣམས་དེ་བཞིན་དུ་བྱ་སྟེ། དཀྱིལ་འཁོར་གྱི་ཁང་པ་བརྩིག་པར་བྱའོ། །ཟུག་རྔུའི་ཉེས་པ་ཐམས་ཅད་ནི། །གལ་ཏེ་དབྱུང་བར་མ་ནུས་ན། །ལག་པས་མནན་ཞིང་ཡི་གེ་གསུམ། །
སྔགས་བཟླས་སླར་ནི་བརྐོ་བར་བྱའོ། །ཁང་ཐོག་དང་ནི་རྡོ་ལེབ་དང་། །བ་ལང་ལྷས་དང་གཙུག་ལག་ཁང་། །མཆོད་རྟེན་དྲུང་དང་འབབ་ཆུའི་འགྲམ། །ས་གཞི་སྔར་ནི་ཡོངས་སྦྱངས་པས། །ཁུང་བུ་བཀང་བ་ལ་སོགས་པས། །སླར་ནི་སྦྱང་སོགས་བྱ་མི་
དགོས། །ཕྱིའི་ས་སྦྱང་བའི་ཆོ་གའོ། །མཚན་མོ་དེར་བདུད་རྩི་ཐབ་སྦྱོར་གྱི་འཁོར་ལོའི་སྦྱོར་བས་གནས་ཏེ་ས་གཞི་རྡོ་རྗེའི་རང་བཞིན་དུ་བྱིན་གྱིས་བརླབ་པ་ནི་ནང་གི་ས་གཞི་ཡོངས་སུ་སྦྱོང་བའི་ཆོ་གའོ། །དེ་ནས་ཐིག་འདེབས་པའི་སྲད་བུས་ཐིག་བཏབ་
ལ། ཇི་སྐད་དུ་བཤད་པའི་དཀྱིལ་འཁོར་དང་དཀྱིལ་འཁོར་གྱི་ཁང་པའི་དབུས་སུ་འདུག་སྟེ། རྣལ་འབྱོར་པ་ཏིང་ངེ་འཛིན་གསུམ་གྱི་སྦྱོར་བ་བསྒོམས་ལ་སྒོ་སྲུང་གི་རང་གི་སློབ་མ་བཞི་སློབ་དཔོན་དུ་བསྐོས་པས། དེ་བཞིན་གཤེགས་པ་ཀུན་ཞི་བ། །ཞེས་
པ་ལ་སོགས་པ་ནས་ཁ་ལོས་སྒྱུར་བ་ལ་ཐུག་པའི་ཚིགས་སུ་བཅད་པ་རེ་རེ་འདོན་དུ་གཞུག་པར་བྱའོ། །དེ་ནས་སློབ་དཔོན་གྱིས་སྤྲུལ་པའི་འཁོར་ལོ་ཡིད་ཀྱིས་ནམ་མཁའ་ལ་བཏེག་ལ། རང་གི་ལྷ་ཁྲོ་བོའི་སྦྱོར་བ་བསྒྱིངས་པ་དང་བཅས་པའི་རྡོ་རྗེ་འགྲོས་ཀྱིས་གར་བྱེད་ཅིང་
ལྷ་ལ་སོགས་པ་ཞེས་པ་ནས་གདོན་མི་ཟ་བ་ལ་ཐུག་པ་བརྗོད་པར་བྱ་སྟེ། བགེགས་མེད་པར་བྱ་བའི་ཕྱིར་ཕུར་བུས་བཏབ་ལ་རྡོ་རྗེ་ར་བའི་ཕྱི་རོལ་དུ་དབང་ཆེན་དང་མེའི་དཀྱིལ་འཁོར་དག་གིས་ཕྱོགས་དང་མཚམས་བཅིང་བ་བྱས་ནས་མཉམ་པར་བཞག་པས་དེ་ཉིད་དུ་ཉལ་

44-1-235b

བར་བྱའོ། །དང་པོ་ཡོངས་སུ་གཟུང་བའི་ཆོ་གའོ།།      །།ཉི་མ་གཉིས་པ་ལ་བུམ་པ་བཅུ་དགུ་ལ་སྣ་ཚོགས་པདྨ་ལ་གནས་པའི་ཟླ་བ་དང་ཉི་མ་ལ་རང་གི་འཁོར་ལོ་ཇི་ལྟ་བ་བཞིན་དུ་ལྷ་བཅུ་དགུའི་མཚན་མ་རྣམས་བྲིས་པའི་དཀྱིལ་འཁོར་དང་རྗེས་སུ་མཐུན་པར་
བྲི་བར་བྱའོ། །དེ་ཡང་སྤྱན་གྱི་ནི་མིག་གོ། །མཱ་མ་ཀཱིའི་ནི་རྡོ་རྗེ་སྔོན་པོའོ། །བུམ་པ་བཅུ་བྱེད་ན་རྣམ་པར་རྒྱལ་བའི་བུམ་པའི་ཁའི་སྟེང་དུ་གཙོ་བོའི་མཚན་མ་དང་ངོས་བཞིར་དེ་བཞིན་གཤེགས་པ་བཞིའི་མཚན་མ་དང་གཟུགས་རྡོ་རྗེ་ལ་སོགས་གཞན་གཅིག་ལའོ། །
ལྷག་མ་བརྒྱད་ལ་སྤྱན་ལ་སོགས་པ་དང་གཤིན་རྗེ་གཤེད་ལ་སོགས་པའི་མཚན་མ་དགོད་པའོ། །བུམ་པ་ལྔ་བྱེད་ན་སྤྱན་ལ་སོགས་པ་ལྷ་མོ་བཞིའི་མཚན་མ་རྣམས་བུམ་པ་གཅིག་ལ་བྲི། གཤིན་རྗེ་མཐར་བྱེད་དང་། ཤེས་རབ་མཐར་བྱེད་དང་། པདྨ་མཐར་བྱེད་ཀྱི་
མཚན་མ་གཅིག་ལ་བྲི། བདུད་རྩི་ཐབ་སྦྱོར་གྱི་མཚན་མ་ལས་ཐམས་ཅད་པའི་བུམ་པ་ལ་བྲི། བུམ་པ་ལྷག་མ་གཉིས་ལ་ནི་སྔ་མ་བཞིན་དུའོ། །དེ་བཞིན་གཤེགས་པ་བདུན་གྱི་མཚན་མ་རྡོ་རྗེ་བྲི་སྟེ། རིགས་མི་ཤེས་པ་རྣམས་ཀྱི་ཡང་དེ་བཞིན་ནོ། །ཤེས་རབ་
ཀྱི་ཕ་རོལ་ཏུ་ཕྱིན་པའི་གླེགས་བམ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྷ་མོ་གཉིས་སུ་མེད་པ་ལས་གླེགས་བམ་གྱིས་ཕྱེས་ནས་ཐུགས་ཀྱི་ནང་དུ་འདུས་པ་ཡིན་ནོ། །མཆོད་རྟེན་ནི་འཁོར་ལོ་སྟེ། དེ་བཞིན་གཤེགས་པའི་རིགས་ཡིན་པའི་ཕྱིར་རོ། །གླེགས་
བམ་གཞན་དག་ནི་པདྨའི་མཚན་མ་སྟེ། གསུང་རྡོ་རྗེའི་ངོ་བོ་ཡིན་པའི་ཕྱིར་རོ། །དེ་དག་ཀྱང་ཀུན་ནས་འཁོར་བར་བཞག་ལ་དེ་རྣམས་སུ་མཆོད་ཡོན་གྱི་སྣོད་ལས་སྤོས་ཆུ་ཅུང་ཟད་བཅུག་ནས་རང་རང་གི་འཁོར་ལོ་བསམས་ལ་མཆོད་པ་ལྔས་མཆོད་དེ། རང་རང་གི་ས་
བོན་ཡི་གེ་གསུམ་གྱི་ནང་དུ་བཅུག་སྟེ། འཁོར་ལོའི་དབང་པོ་རྣམ་པར་རྒྱལ་བ་ལ་བཟླས་པར་བྱའོ། །ལས་ཐམས་ཅད་པ་ལ་རིག་པའི་བདག་པོ་དང་། རིགས་ཀྱི་སྙིང་པོ་དང་། རིགས་ཀྱི་རིག་མ་རྣམས་ཀྱིས་བཟླས་པར་བྱའོ། །དཔལ་ཧེ་རུ་ཀའི་རིགས་ཀྱི་བདག་པོ་ནི་མི་

44-1-236a

བསྐྱོད་པའོ། །རིགས་ཀྱི་སྙིང་པོ་ནི་ཧཱུཾ་ཡིག་གོ། །རིགས་ཀྱི་རིག་མ་ནི་མཱ་མ་ཀཱིའོ། །བཛྲ་དྷྲྀཀ་ཅེས་བྱ་བའི་སྔགས་ཡི་གེ་གསུམ་གྱི་ནང་དུ་བཅུག་པ་དང་། ཧཱུཾ་ཞེས་བྱ་བའི་སྔགས་ཡི་གེ་གསུམ་གྱི་ནང་དུ་བཅུག་པ་དང་། མཱ་མ་ཀཱིའི་སྔགས་
ཡི་གེ་གསུམ་གྱི་ནང་དུ་བཅུག་པ་ནི་རིགས་ཀྱི་བདག་པོ་དང་། རིགས་ཀྱི་སྙིང་པོ་དང་རིགས་ཀྱི་རིག་མ་རྣམས་ཀྱི་ལས་ཐམས་ཅད་པའི་བུམ་པ་ལ་བཟླས་པར་བྱའོ། །བཟླས་བརྗོད་བྱས་ནས་སྣོད་གཅིག་ཏུ་ཡང་མཆོད་ཡོན་སྩོལ་བ་བླ་ན་ཡོད་པ་དང་བཅས་པའི་ཕྱི་
རོལ་མཆོད་པ་དང་། རབ་གནས་ཀྱི་ཆོ་གར་བཤད་པའི་རིམ་པས་བུམ་པ་ལྷག་པར་གནས་པ་དང་མེ་ལོང་ལ་སོགས་པའི་ཡི་གེ་གསུམ་གྱིས་བྱིན་གྱིས་བརླབ་བོ། །ཉེ་བར་མཁོ་བ་ལྷག་པར་གནས་པའི་ཆོ་གའོ། །དགོངས་ཀའི་དུས་སུ་ཡང་དཀྱིལ་འཁོར་གྱི་ཁང་
པའི་སྔ་ཁང་ངམ་ཁྱམས་སུ་སློབ་དཔོན་འདུག་སྟེ། མདུན་དུ་འདུག་པའི་སློབ་མ་ཕྲེང་བ་ཐོགས་པ་དགེ་བསྙེན་མ་ཡིན་པ་ལ་དགེ་བསྙེན་གྱི་སྡོམ་པ་བྱིན་ནས་སྤྲོ་བ་བསྐྱེད་པར་བྱ་བའི་ཕྱིར་དཀྱིལ་འཁོར་གྱི་ནི་ཞེས་བྱ་བ་ནས་འབྲས་བུ་རྒྱས་ཞེས་བྱ་བའི་བར་དུ་བཤད་པར་
བྱའོ། །དེ་ནས་དེ་རང་གི་ལུས་སུ་བཅུག་སྟེ་རང་གི་རྡོ་རྗེའི་ལམ་ནས་ཕྱུང་ནས་རང་གི་ཤེས་རབ་ཀྱི་ཆུ་སྐྱེས་ཀྱི་ནང་དུ་དེ་བཅུག་ལ་འགྲོ་བའི་ལུས་བཞིན་དུ་དབང་བཀུར་ཏེ། སའི་སྙིང་པོ་ལ་སོགས་པ་བཞིན་དུ་ཕྱུང་ནས་དགའ་ཆེན་ཞེས་བྱ་བ་ནས་འཇུག་པར་འཚལ་
ཞེས་བྱ་བའི་བར་དུ་ལན་གསུམ་འདོན་དུ་གཞུག་གོ། །སློབ་དཔོན་གྱིས་ཀྱང་ཁྱོད་ནི་ཚུལ་ཆེན་ཞེས་བྱ་བ་ནས། བུ་ཡིས་བློ་གྲོས་འདི་གྱིས་ཤིག །ཅེས་བྱ་བ་ལ་སོགས་པའི་བར་གྱིས་ཚིག་སྤྲོ་བ་བསྐྱེད་པར་བྱ་བའི་ཕྱིར། ལན་གསུམ་བརྗོད་པས་གཟེངས་བསྟོད་ལ། 
གང་ཞིག་ཐོག་མེད་ཅེས་བྱ་བ་ནས་ད་ནི་གནས་པར་བགྱི་ཞེས་བྱ་བ་ལ་སོགས་པའི་བར་དུ་བརྗོད་པར་བྱའོ། །དེ་ནས་བསྙེན་པ་ལ་སོགས་པའི་ཡན་ལག་དང་ལྡན་པས་ལྷར་བསྐྱེད་པ་ཕྱི་རོལ་གྱི་དྲི་ལ་སོགས་པས་ཀྱང་མཆོད་ནས་ཐལ་མོ་དེ་རྣམས་ལ་སོ་ཤིང་སྦྱིན་

44-1-236b

པར་བྱའོ། །དེས་ཀྱང་མཆོད་ནས་མདུན་དུ་བའི་ལྕི་བས་བྱུགས་པའི་གྲུ་བཞི་པའི་ས་ལ་ལྟོས་པ་མེད་པར་དོར་བར་བྱའོ། །དེ་ནས་ཧཱུཾ་ལས་བསྐྱེད་པའི་ཆུ་དེ་ཉིད་བཟླས་ལ་འཐོར་འཐུང་བྱ་བའི་ཕྱིར་སྦྱིན་པར་བྱའོ། །ཨོཾ་ཧྲཱིཿཞེས་བྱ་བ་ལ་སོགས་པའི་སྔགས་ཀྱིས་བཏབ་
པའི་སྐྱོར་ཆུ་ལན་གསུམ་འཐུང་དུ་བཅུག་ལ་བོས་ནས་མདུན་དུ་བཞག་སྟེ། སྲད་བུ་སུམ་བསྒྲིལ་མདུད་པ་གསུམ་དང་ལྡན་པ་དཔུང་པ་གཡས་པར་བཅིངས་ལ། ཧཱུཾ་ལས་བསྐྱེད་པའི་ཀུ་ཤ་སར་པ་མ་ཉམས་པ་གཅིག་ནི་སྔས་བྱ་བའི་ཕྱིར་སྦྱིན། གཉིས་པ་ཡང་ཧཱུཾ་ལས་
བསྐྱེད་དེ་འོག་ཏུ་སྟན་དུ་གདིང་བའི་ཕྱིར་བྱིན་ལ་བདུད་རྩི་ཐབ་སྦྱོར་གྱིས་ཡང་དག་པར་བསྲུངས་ཏེ་ཆོས་བསྟན་པས་གཟེངས་བསྟོད་པའི་ཕྱིར་འཇིག་རྟེན་དུ་ནི་ཞེས་བྱ་བ་ལ་སོགས་པ་ནས། དེ་བཞིན་གཤེགས་པ་རྣམས་སུ་འགྱུར། །ཞེས་བྱ་བའི་བར་གྱི་ཚིགས་སུ་
བཅད་པ་བརྗོད་ལ་ནང་པར་ང་ལ་རྨི་ལམ་སྨྲོས་ཤིག་ཅེས་བསྒོ་སྟེ། ཁང་པ་གཞན་དུ་སེང་གེའི་ཉལ་ཐབས་ཀྱིས་ཉལ་དུ་གཞུག་གོ། །སློབ་དཔོན་དོན་དུ་གཉེར་བའི་སློབ་མ་ལ་ནི། ཐུབ་པ་ཉི་མ་མ་ལུས་པ། །ཞེས་བྱ་བ་ནས། མཆོད་པའི་ལས་ཀྱང་ཅི་ནུས་བྱ། །ཞེས་བྱ་
བའི་བར་དུ་འཁོར་ལོ་ཕྱིར་མི་ལྡོག་པའི་དབང་བསྐུར་བའི་སྡོམ་པ་བྱིན་ལ། ཁྱོད་ཀྱིས་རྟག་ཏུ་བསྲུང་བར་བྱ། །ཞེས་བརྗོད་ལ་དེ་ལ་ཁྱད་པར་གྱི་སྡོམ་པ་བསྒྲགས་ཤིང་དེ་བཞིན་དུ་སྡིག་པ་བཤགས་པ་ལ་སོགས་པ་བྱེད་དུ་གཞུག་གོ། །སློབ་མ་ལྷག་པར་གནས་པའི་ཆོ་
གའོ། །དེ་ནས་བླ་མ་དེ་ལས་གཞན་པའི་སློབ་དཔོན་བཞི་དང་བཅས་པར་དཀྱིལ་འཁོར་གྱི་ཁང་པར་ཞུགས་ལ་ཕྱོགས་སུ་ཕུར་བུས་ཡང་དག་པར་གདབ་སྟེ། རྡོ་རྗེ་ར་བའི་ཕྱི་རོལ་དུ་དབང་ཆེན་དང་མེའི་དཀྱིལ་འཁོར་གཉིས་ཀྱིས་ཕྱོགས་མཚམས་བཅིང་བ་བྱས་ལ་འདི་
ལས་བཤད་པའི་སའི་ལྷ་མོ་རྣམས་མཆོད་ལ། སྐྱོབ་པ་སངས་རྒྱས་ཞེས་བྱ་བ་ནས་དཀྱིལ་འཁོར་བྲི་ཞེས་བྱ་བའི་བར་གྱིས་གསོལ་བ་གདབ་པའོ། །སའི་ལྷ་མོ་ལྷག་པར་གནས་པའི་ཆོ་གའོ། །དེ་ནས་ནམ་མཁའ་ན་གནས་པའི་དཀྱིལ་འཁོར་ཡིད་ཀྱིས་

44-1-237a

བཀུག་ལ་བདུད་རྩི་ལྔའི་དཀྱིལ་འཁོར་བཅུ་དགུ་ལ་རང་རང་ཇི་ལྟ་བ་བཞིན་དུ་བཅུག་སྟེ། ཡང་དག་པར་མཆོད་ནས་ནི་མི་བསྐྱོད་པ་ཞེས་བྱ་བ་ལ་སོགས་པའི་ཚིགས་སུ་བཅད་པས་བསྟོད་ཅིང་བདུད་རྩི་ལྔ་བསྟབས་ཏེ། པུས་མོ་གཡས་པའི་
ལྷ་ང་ས་ལ་བཙུགས་ནས་སྤོས་ཁང་ཐོགས་ལ་བཅོམ་ལྡན་ཞེས་བྱ་བ་ནས་མཛད་དུ་གསོལ་ཞེས་བྱ་བའི་བར་གྱི་ཚིགས་སུ་བཅད་པ་ལན་གསུམ་བརྗོད་པ་འདིས་ནི་འཁོར་ལོའི་གཙོ་བོ་དང་སངས་རྒྱས་ཐམས་ཅད་ལྷག་པར་གནས་པར་བྱའོ། །དཀྱིལ་འཁོར་གྱི་ལྷ་
ལྷག་པར་གནས་པའི་ཆོ་གའོ། །དེ་ནས་ཇི་སྐད་དུ་བཤད་པའི་སྣོད་ལྔ་ལ་གཞག་པའི་ཁ་དོག་སྣ་ལྔ་པའི་སྲད་བུ་ལ། རྟག་པ་ལ་སོགས་པའི་འཁོར་ལོའི་གཙོ་བོ་རྣམས་བཀོད་དེ། རང་གི་ཕྱོགས་ན་བཞུགས་པའི་རྟག་པ་ལ་སོགས་པའི་སྙིང་པོར་གྱུར་པ་དེ་ཁ་དོག་རྣམས་
དང་ལྡན་པའི་འོད་ཟེར་སྲད་བུར་བསམས་ཏེ། ཨོཾ་ཨཱཿཔཉྩ་ཤཱ་ཤྭ་ཏ་སུ་ཏྲ་སཱ་ཙཀྲ་སུ་ཏྲ་ནཱ་ཡ་ཧཱུཾ། ཞེས་བརྗོད་པས་འདིར་བཅོམ་ལྡན་འདས་རྣམ་པར་སྣང་མཛད་ཀྱི་གནས་སུ་བཅོམ་ལྡན་འདས་རིན་ཆེན་འབྱུང་ལྡན་ལ་སོགས་པ་ཡང་དེ་བཞིན་དུ་སྦྱར་བར་བྱའོ། །དེ་ལྟར་
གསོལ་བ་གདབ་པས། མཉེས་པ་དེ་རྣམས་གཞུག་པའི་སྲད་བུ་ལ་རྫི་མ་མྱུར་བར་འདེགས་ཤིང་མིག་འགུལ་བའི་འབར་བའི་ལྟ་བས་བཀུག་སྟེ། ལྔ་པོ་འདི་ལྟར་གཅིག་ཏུ་བྱས་ནས་བསྒྲིལ་བར་བྱའོ། །ཨོཾ་ཨཱཿཨ་ནྱོ་ནྱ་ཨ་ནུ་ག་ཏ་སརྦྦ་དྷརྨཱ་ཧཱུཾ། 
ཨོཾ་ཨ་སྥ་ར་སྥ་ར་ཨ་ནུ་པྲ་བིཥྚ་སརྦྦ་དྷརྨྨ་ཧཱུཾ། ཨོཾ་ཨཱཿཨཱ་ཏྱནྟ་ཨ་ནུ་པྲ་བིཥྚ་སརྦ་དྷརྨཱ་ཧཱུཾ། ཞེས་བརྗོད་དེ། དེ་ནས་བདུད་རྩི་ཐབ་སྦྱོར་གྱི་སྦྱོར་བས་རྡོ་རྗེ་དྲིལ་བུ་ཐོགས་པའི་སློབ་མ་སྲད་བུ་མཐའ་ནས་འཛིན་པ་དང་བཅས་པས་སློབ་དཔོན་རྡོ་རྗེ་ཐོགས་ལ་ཡེ་ཤེས་ཀྱི་སྲད་
བུ་གཡོན་པའི་ཁུ་ཚུར་གྱིས་བཟུང་སྟེ། ཛཿཞེས་ལན་གསུམ་བརྗོད་ལ་སློབ་མ་ལ་བཏང་ནས། ཛཿཛཿཛཿཞེས་བརྗོད་ཅིང་སློབ་མ་ཡང་འགྲོ་བར་བྱའོ། །སློབ་དཔོན་ནུབ་ཕྱོགས་ཀྱི་སྒོར་ཤར་ཕྱོགས་སུ་བལྟས་ཏེ་འདུག་ལ་ཚངས་པའི་ཐིག་གདབ་པར་བྱའོ། །

44-1-237b

དེ་ནས་ཡང་གཡས་ཕྱོགས་སུ་བསྐོར་ནས་ལྷོ་ཕྱོགས་ཀྱི་སྒོར་སོང་སྟེ་བྱང་དུ་བལྟས་ཏེ་འདུག་ལ། ཚངས་པའི་ཐིག་གཉིས་གདབ་པར་བྱའོ། །དེ་བཞིན་དུ་དེ་ཉིད་དུ་ཤར་ལྷོ་མཚམས་སུ་སོང་སྟེ། བྱང་ཕྱོགས་སུ་ཁ་བལྟས་ཏེ་འདུག་ལ་ཤར་ཕྱོགས་ཀྱི་ཐིག་གདབ་པར་བྱའོ། །
དེ་ནས་དེ་བཞིན་དུ་བྱང་ཕྱོགས་སུ་སོང་སྟེ་ལྷོ་ཕྱོགས་སུ་བལྟས་ནས་འདུག་ལ་ནུབ་ཕྱོགས་ཀྱི་ཐིག་གདབ་པར་བྱའོ། །དེ་བཞིན་དུ་དེ་ཉིད་ཤར་ཕྱོགས་སུ་བལྟས་ཏེ་འདུག་ལ། བྱང་ཕྱོགས་ཀྱི་ཐིག་གདབ་པར་བྱའོ། །དེ་ནས་དེ་བཞིན་དུ་ཤར་ལྷོ་མཚམས་སུ་སོང་སྟེ། 
ནུབ་ཕྱོགས་སུ་བལྟས་ནས་འདུག་ལ་ལྷོ་ཕྱོགས་ཀྱི་ཐིག་གདབ་པར་བྱའོ། །དེ་ནས་དེ་ཉིད་དུ་འདུག་སྟེ་ནུབ་བྱང་ཕྱོགས་སུ་བལྟས་ལ་མཚམས་ཀྱི་ཐིག་གདབ་པར་བྱའོ། །དེ་ནས་དེ་བཞིན་དུ་སོང་སྟེ་ལྷོ་ནུབ་མཚམས་སུ་འདུག་ལ་བྱང་ཤར་མཚམས་སུ་བལྟས་ལ་མཚམས་ཀྱི་
ཐིག་གདབ་པར་བྱའོ། །སློབ་མ་ཡང་བསྐོར་ཕྱོགས་སུ་སོང་སྟེ། དེ་ཡང་དེར་སློབ་དཔོན་ལ་མངོན་དུ་ཕྱོགས་ནས་གདབ་པར་བྱའོ། །འདི་ནི་ཡེ་ཤེས་ཀྱི་སྲད་བུ་མངོན་པར་འདུ་བྱ་བ་དང་གདབ་པའོ། །དེ་བཞིན་དུ་ཚོན་རྩི་ལྔ་ཡང་བཅོམ་ལྡན་འདས་རྣམ་པར་སྣང་
མཛད་ལ་སོགས་པ་ཡེ་ཤེས་ཀྱི་ཚོན་གང་ཡིན་པ་དེ་བཞིན་དུ་བཀུག་སྟེ། གཟི་བྱིན་བསྐྱེད་ལ་སློབ་དཔོན་ནང་དུ་གནས་ནས་ཤར་དུ་བལྟས་ཏེ། བྱང་ཤར་མཚམས་ནས་བརྩམས་ཏེ། གཡས་སུ་བསྐོར་ཞིང་སོ་སོར་ཚོན་རྩི་དགྱེ་བར་བྱའོ། །དེའི་འོག་ཏུ་གཞན་དག་
ནི་སློབ་མ་སློབ་དཔོན་བཞི་དང་བཅས་ཏེ་དགྱེ་བར་བྱའོ། །ཉི་མ་གསུམ་པ་ལ་ཚོན་རྩི་དགྱེ་བ་དང་མཚན་མ་དགོད་པ་ལ་སོགས་པ་ལེགས་པར་རྫོགས་པ་དང་། རྡོ་རྗེ་ཧཱུཾ་མཛད་ཀྱི་སྦྱོར་བས་ཞུགས་ལ་བསྐོར་བ་བྱ་སྟེ། བལྟས་ལ་མ་ཚང་བ་དང་ལྷག་མའི་ཉེས་པ་བསྐང་
བའི་ཕྱིར་ཞི་བའམ་རྒྱས་པའི་སྦྱིན་སྲེག་བྱའོ། །བུམ་པ་རྣམས་ཀྱང་འཁོར་ལོའི་ཕྱི་རོལ་གྱི་མཚམས་སུ་བཞག་ལ་རྣམ་པར་རྒྱལ་བའི་བུམ་པ་ཤར་ཕྱོགས་ཀྱི་སྒོ་དང་ཉེ་བའི་གནས་ཀྱི་ཆ་སྒོའི་ཕྱི་རོལ་དུ་གཞག་གོ་ཞེས་ཟེར་རོ། །ལ་ལ་ནི་ལྷོ་ཕྱོགས་ཀྱི་སྒོའི་ཕྱི་

44-1-238a

རོལ་དུ་གཞག་གོ་ཞེས་ཟེར་རོ། །གཞན་དག་ནི་ཁྲིའི་སྟེང་དུ་རྣམ་པར་རྒྱལ་བའི་བུམ་པ་བདག་པོའི་གཡས་དང་བདུད་རྩི་ལྔའི་སྣོད་དབུས་སུ་གཞག་གོ་ཞེས་ཟེར་རོ། །འཇུག་པར་འདོད་པས་ཀུ་ཤའི་ཆུན་པོ་དང་བཅས་པའི་བདུད་རྩི་ཐབ་སྦྱོར་གྱི་བུམ་
པ་དཀྱིལ་འཁོར་གྱི་ཁང་པའི་ཤར་གྱི་ཕྱོགས་སུ་གཞག་ཅིང་སློབ་དཔོན་གྱི་སྟན་ཡང་བཏིང་ལ་དགོངས་ཀའི་དུས་སུ་དཀྱིལ་འཁོར་བསྒྲུབས་ལ། བླ་ན་ཡོད་པ་དང་བཅས་པའི་མཆོད་པས་མཆོད་ལ། མགོན་པོ་དངོས་གྲུབ་ཐམས་ཅད་ཀྱིས་ཕྱི་རོལ་འགྲོ་བ་
སེམས་ཅན་ཐམས་ཅད་ཀྱི་དོན་མཛོད་ཅིག་ཅེས་གསོལ་བ་གདབ་པར་བྱའོ། །དེ་ནས་ཕྱིར་བྱུང་ལ་འདི་ལས་བཤད་པའི་གཏོར་མཆོག་བཞིན་དུ་བྱིན་གྱིས་བརླབས་ཏེ། དེའི་འོག་ཏུ་སློབ་མ་འཇུག་པའི་ཆོ་ག་བཞིན་དུ་སློབ་དཔོན་ཞུགས་ལ་སོ་སོར་ཕྱག་བྱ་སྟེ། 
དབང་བསྐུར་བ་ལ་སོགས་པ་ཡིད་ཀྱིས་བླངས་ནས་རང་གི་བདག་པོའི་བདག་ཉིད་ཀྱི་སློབ་དཔོན་དུ་གྱུར་པ་ལས་ཐམས་ཅད་བྱེད་པར་མོས་པར་བྱའོ། །འཁོར་ལོའི་དེ་ཁོ་ན་ཉིད་ཀྱང་ཆོས་ཉིད་ཀྱི་གཟུགས་བརྙན་བཞིན་དུ་ཤེས་པར་བྱས་ལ། ནམ་མཁའ་ལས་བྱུང་ཞེས་
བྱ་བ་ནས་དྲི་མ་མེད་མཐོང་ཤོག་ཅེས་བྱ་བའི་བར་དུ་བརྗོད་པར་བྱའོ། །དེ་ནས་སློབ་མ་སྐལ་བ་ཆེན་པོའི་ཆ་ལུགས་དང་ལྡན་པ་ལ་ཕྱི་རོལ་དུ་གདོང་གཡོགས་དམར་པོས་གདོང་བཀབ་སྟེ། ཐལ་མོས་མེ་ཏོག་དཀར་པོ་གཅིག་ཐོགས་ལ་སྐྱེས་བུའི་རིག་པས་
ཁྲིད་ལ་ཡོལ་བ་གཉིས་ཀྱི་བར་དུ་ཐེམ་པ་ལ་བཞག་སྟེ། བླ་མས་ཧཱུཾ་གིས་ཡོལ་བའི་ཕྱོགས་གཅིག་བཏེག་ནས་ཀུ་ཤའི་ཆུན་པོས་བསང་གཏོར་བྱས་ལ་སྡུག་པ་ཁྱོད་སུ་ཡིན་ཞེས་དྲི་བར་བྱའོ། །དེས་ཀྱང་བདག་ནི་སྐལ་བ་བཟང་པོ་ཞེས་སྨྲ་བ་དང་ཡང་དག་པར་མཆོད་
ལ་དཀྱིལ་འཁོར་གྱི་ཁང་པར་བཅུག་སྟེ། ཨོཾ་སརྦ་ཡོ་ག་ཙིཏྟ་ཨུཏྤ་ད་ཡ་མི་ཞེས་བྱ་བ་དང་། བྱང་ཆུབ་ཀྱི་སེམས་དམ་པ་བསྐྱེད་ལ་དེའི་སྙིང་གར་ས་བོན་ལས་རྡོ་རྗེ་བསྐྱེད་ལ། ཨོཾ་སུ་ར་ཏ་ས་མ་ཡ་སྟྭཾ། ཞེས་བྱ་བ་ནས་མ་དད་པར་མི་བྱའོ་ཞེས་བྱ་བའི་བར་དུ་བརྗོད་ཅིང་།

44-1-238b

ཛཿཧཱུཾ་ཞེས་བྱ་བ་གཉིས་ཀྱིས་ཡིད་ཀྱིས་བཀུག་ལ་དེར་གཞུག་སྟེ། དཀྱིལ་འཁོར་གྱི་ཆོ་གར་བཤད་པའི་ཡི་གེ་ལྔ་པོ་ཨ་ཁཾ་བཱི་ར་ཧཱུཾ་ཞེས་བརྗོད་དེ། འཇུག་པའི་སྒོའི་སྟན་གྱི་སྟེང་དུ་བཞག་ལ་རྣམ་པར་སྣང་མཛད་དང་གཤིན་རྗེ་གཤིད་ཀྱི་བར་དུ་བཞག་ནས་དེང་ཁྱོད་ཅེས་
བྱ་བ་ནས་དམ་ཚིག་ཉམས་པར་གྱུར་ཏ་རེ་ཞེས་བྱ་བའི་བར་དུ་བརྗོད་ལ་དེའི་སྙིང་གར་རྡོ་རྗེ་བཞག་ནས། ཨོཾ་རྡོ་རྗེ་སེམས་དཔའ་དེང་ཁྱོད་ཀྱིས། །ཞེས་བྱ་བ་ལ་སོགས་པའི་ཚིགས་སུ་བཅད་པ་བརྗོད་པར་བྱའོ། །དེ་ནས་བདུད་རྩི་ལྔ་དུང་ཆོས་ལས་མཐེ་བོ་སྲིན་
ལག་དེའི་ཁར་མངོན་དུ་བྱིན་ལ། འདི་ནི་ཞེས་བྱ་བ་ནས་ཋ་ཞེས་བྱ་བའི་བར་དུ་བརྗོད་དེ། འཐུང་དུ་བཅུག་ལ་སློབ་མའི་དམ་བཅའ་བ་བརྟན་པར་བྱ་བའི་ཕྱིར་དེང་ཕྱིན་ཆད་ཅེས་བྱ་བ་ནས་གྱུར་ཏ་རེ་ཞེས་བྱ་བའི་བར་དུ་བརྗོད་པར་བྱའོ། །དེ་ནས་དེ་བཞིན་གཤེགས་པ་
ཐམས་ཅད་ཀྱིས་བྱིན་གྱིས་རློབས་ལ། རྡོ་རྗེ་སེམས་དཔའ་བདག་ལ་འབབ་པར་གྱུར་ཅིག་ཅེས་སྨྲར་བཅུག་ལ་སློབ་མ་རླུང་དང་ཆུ་དང་དབང་ཆེན་གྱི་དཀྱིལ་འཁོར་ལ་བཞག་སྟེ། ཧ་ཨ་ཧཱུཾ་ཞེས་བྱ་བའི་སྐུ་གསུང་ཐུགས་ཀྱི་སྙིང་པོ་བཀོད་པ་དང་། རྐང་པ་གཉིས་ཀྱི་འོག་ཏུ་ཛྷཻཾ་
ཞེས་བྱ་བ་རླུང་དང་མེའི་དཀྱིལ་འཁོར་བསམས་ལ། ཨཱ་བེ་ཤ་ཡ་ནས་ཛྷཻཾ་ཞེས་བྱ་བའི་བར་དུ་དྲིལ་བུ་དཀྲོལ་ཞིང་ལན་གསུམ་བརྗོད་པར་བྱའོ། །སྒོ་སྲུང་གི་སློབ་མ་བཞིས་ཀྱང་དྲིལ་བུ་དཀྲོལ་བར་བྱའོ། །དེ་ནས་དེའི་ལྕེ་ལ་ཨ་དམར་པོ་དང་འོད་དཔག་ཏུ་མེད་པར་
བསམས་ཏེ་བབས་པར་གྱུར་པ་དང་། བྲུ་ཧི་བཛྲ་ཤུ་བྷ་ཨ་ཤུ་བྷ་དྲི་བ་དང་བབས་པ་བརྟན་པར་བྱ་བའི་ཕྱིར། ཏིཥྛ་བཛྲ་ཞེས་བརྗོད་པས་ཉེ་བར་བསྡུ་བ་ནི་དབབ་པའི་ཆོ་གའོ། །དེ་ནས་པྲ་ཏཱིཙྪ་བཛྲ་ཧོཿ། ཞེས་འདོན་དུ་བཅུག་ལ་དེའི་ལག་པ་ན་གནས་པའི་མེ་ཏོག་དཀྱིལ་
འཁོར་དུ་འདོར་བཅུག་ནས་མེ་ཏོག་དེ་གང་གི་རིགས་སུ་བབས་པར་ཤེས་པར་བྱ་སྟེ། བླངས་ནས་དེའི་མགོ་ལ་བཅིངས་ལ་པྲ་ཏི་གྲྀཧྞ་སྟུཾ་མི་མཾ་སཏྭ་མ་ཧཱ་བ་ལ་ཞེས་བརྗོད་པར་བྱས་ནས་རྒྱུད་གཞན་ལས་བཤད་པའི་ཕྲེང་བའི་དབང་བསྐུར་བར་བྱའོ། །དེ་ནས་དེའི་མིག་གཉིས་

44-1-239a

ལ་ཨོཾ་བསམས་ལ། རྡོ་རྗེ་སེམས་དཔའ་དེང་ཁྱོད་ཀྱི། །ཞེས་བྱ་བ་ལ་སོགས་པའི་ཚིགས་སུ་བཅད་པ་བརྗོད་དེ། གདོང་གཡོགས་བཀྲོལ་ཏེ་དཀྱིལ་འཁོར་གྱི་བདག་པོ་ལས་བརྩམས་ཏེ་བདུད་རྩི་ཐབ་སྦྱོར་གྱི་བར་དུ་བརྟན་པར་བྱའོ། །སློབ་མ་འཇུག་
པའི་ཆོ་གའོ། །སྟན་དེ་ཉིད་ལ་ཤར་ཕྱོགས་སུ་ཁ་བསྟན་ནས་སྐྱིལ་མོ་ཀྲུང་གིས་འདུག་ཏུ་བཅུག་སྟེ། སྔར་བཤད་པའི་རྣམ་པར་རྒྱལ་བའི་བུམ་པའི་སྟེང་དུ་མཆོད་ཡོན་གྱི་སྣོད་བཞག་པའི་ནང་དུ་བུམ་པ་ཐམས་ཅད་ལས་ཆུ་ཉུང་ཟད་ཙམ་ཞིག་ཐུག་ལ་ལོ་མའི་ཆུན་པོས་བླངས་
པའི་ཆུ་དང་། སློབ་མ་བསྙེན་པ་ལ་སོགས་པའི་རིམ་པས་རང་གི་ལྷར་བསྐྱེད་པའི་མགོ་ལ། ཨོཾ་བཛྲ་ཨ་བྷི་ཥིཉྩ། ཞེས་བརྗོད་ཅིང་དབང་བསྐུར་བར་བྱ་བའི་ཆུའི་དབང་བསྐུར་བའོ། །གོས་ལ་སོགས་པས་བརྒྱན་པའི་ཅོད་པན་དེའི་རིགས་ཀྱི་གཙོ་བོས་མཚན་པར་བསམས་
ལ་དེའི་མགོ་ལ་བསྐོན་ལ་འཆད་པར་འགྱུར་བ་རྣམས་སོ། །ཅོད་པན་དང་དར་དཔྱངས་ཀྱི་དབང་བསྐུར་བའོ། །དེའི་སྙིང་གར་རྡོ་རྗེ་བཞག་ལ་དེས་ལག་པ་གཡས་པས་བཟུང་ནས་སངས་རྒྱས་ཀུན་གྱི་ཞེས་བྱ་བ་ལ་སོགས་པའི་ཚིགས་སུ་བཅད་པ་བརྗོད་པར་བྱ་བ་ནི་
རྡོ་རྗེའི་དབང་བསྐུར་བའོ། །རང་གི་བདག་པོའི་སྦྱོར་བ་དང་ལྡན་པ་ལས་དེའི་སྙིང་གར་རྡོ་རྗེ་དང་དྲིལ་བུ་བཟུང་ནས་ལག་པ་གཡས་པ་དང་གཡོན་གྱིས་འཁྱུད་ཅིང་། ཨོཾ་བཛྲ་ཨ་དྷི་བ་ཏི་སྟྭཾ་ཨ་བྷི་ཥིཉྩཱ་མི་ཏིཥྛ་བཛྲ་ས་མ་ཡ་སྟྭཾ། ཞེས་བརྗོད་པར་བྱ་སྟེ། འདི་ནི་བདག་པོའི་
དབང་བསྐུར་བའོ། །རྡོ་རྗེ་དང་དྲིལ་བུ་དང་ལྡན་པ་དེའི་མགོ་ལ་དེའི་ལག་པ་བཞག་སྟེ། ཨོཾ་བཛྲ་སཏྭ་སྟྭཾ། ཨ་བྷི་ཥིཉྩ་མི། བཛྲ་ནཱ་མ་ཨ་བྷི་ཥེ་ཀ་ཏ་ཀྱེ་ཆེ་གེ་མོ་ཞེས་བརྗོད་པར་བྱ་སྟེ། འདི་ནི་མིང་གི་དབང་བསྐུར་བའོ། །ལ་ལ་དག་ནི་མེ་ཏོག་གང་དུ་བབས་པ་དེའི་
རིགས་དང་རྗེས་སུ་མཐུན་པར་མིང་གདགས་པར་བྱའོ་ཞེས་ཟེར་རོ། །དེ་ནས་རང་གི་བདག་པོ་ཞེས་བྱ་བ་ནས་དབང་བསྐུར་བ་ཡང་འདི་ཡིན་ཞེས་བྱ་བའི་བར་དུ་བརྗོད་ཅིང་ཆོས་བཤད་དེ། དབང་བསྐུར་ལྔ་པོས་ནི་མི་བསྐྱོད་པ་ལ་སོགས་པའི་རྣམ་པར་དག་པ་ཤེས་པར་

44-1-239b

བྱའོ། །འདི་ནི་རིག་པའི་དབང་བསྐུར་བའོ། །དབང་བསྐུར་བ་དེ་རྣམས་ཀྱིས་ནི་འབྲས་བུར་གྱུར་པའི་ཡེ་ཤེས་ལྔ་རྫོགས་པར་འགྱུར་ཏེ། དེ་བས་སློབ་མ་མི་ཕྱེད་པར་གྱུར་ཅིང་སྟོང་པ་ཉིད་ཀྱི་ཁམས་སོ། །རིགས་ཀྱི་སྐྱེ་བའི་གནས་སུ་འགྱུར་ཞིང་བྱང་ཆུབ་ལ་དབང་
བའི་སྐལ་བ་དང་ལྡན་པར་འགྱུར་རོ། །དེ་ནས་དེ་ལ་རྡོ་རྗེའི་བརྟུལ་ཞུགས་དང་ལུང་བསྟན་པ་དང་དབུགས་དབྱུང་བ་དག་བསྟན་པར་བྱ་སྟེ། དེ་ལ་འདི་ནི་ཞེས་བྱ་བ་ལ་སོགས་པའི་ཚིགས་སུ་བཅད་པ་བརྗོད་ལ་དེའི་ལག་ཏུ་རྡོ་རྗེ་བྱིན་ཏེ། ཨོཾ་སརྦྦ་ཏ་ཐཱ་ག་ཏ་ཞེས་བྱ་བ་
ལ་སོགས་པ་བརྗོད་ནས་དེའི་ལག་པ་གཡས་པར་འཛིན་དུ་གཞུག་སྟེ་འདི་ནི་རྡོ་རྗེའི་བརྟུལ་ཞུགས་སོ། །དེ་ནས་ཐོག་མཐའ་མེད་པའི་ཞེས་བྱ་བ་ལ་སོགས་པ་ཚིགས་སུ་བཅད་པ་བླ་མས་བརྗོད་ལ་དེ་ཁོ་ན་ཉིད་ཀྱིས་རྡོ་རྗེ་གཟུང་བར་བྱའོ། །དེ་ནས་འདི་དེ་ཞེས་བྱ་བ་ལ་སོགས་
པའི་ཚིགས་སུ་བཅད་པ་བརྗོད་ལ་ལག་པ་གཡོན་པར་དྲིལ་བུ་འཛིན་དུ་བཅུག་ནས། སྲིད་པ་ངོ་བོ་ཉིད་ཀྱིས་དག །ཅེས་བྱ་བ་ལ་སོགས་པའི་ཚིགས་སུ་བཅད་པ་བརྗོད་དུ་བཅུག་ལ། སྙིང་པོ་བསྙེན་པ་སོགས་བཤད་པ། །ཞེས་བྱ་བ་ནས་བསྒོམ་པས་སོ་ཞེས་བྱ་བའི་བར་
དུ་བརྗོད་པར་བྱའོ། །དེ་ལྟར་སྲིད་པའི་ལོངས་སྤྱོད་རྣམ་པར་དག་པའི་ཐབས་བསྟན་ནས་དེའི་འོག་ཏུ་ཕྱིར་མི་ལྡོག་པའི་དབང་བསྐུར་བ་མི་བྱེད་ན་ལུང་བསྟན་པ་དང་དབུགས་དབྱུང་བ་དག་བྱ་སྟེ། འདི་ནི་རིག་པའི་དབང་བསྐུར་བ་དང་རྗེས་སུ་འབྲེལ་པའི་ཆོ་གའོ། །
དེ་ནས་བབས་ལ་སློབ་དཔོན་ལ་མཆོད་ལ། བླ་མ་ལ་བྱང་ཆུབ་རྡོ་རྗེ་ཞེས་བྱ་བ་ལ་སོགས་པ་ཚིགས་སུ་བཅད་པ་བརྗོད་པར་བྱའོ། །དེ་ནས་བླ་མ་མགུ་བས་སྡོམ་པ་བཞི་བྱིན་ནས་སྟན་དེ་ཉིད་ལ་སྔ་མ་བཞིན་དུ་འདུག་ཏུ་བཅུག་ནས། ཡན་ལག་བཞིའི་ཆོ་གས་རང་གི་
སྔགས་ཀྱི་སྦྱོར་བ་བྱ་སྟེ། རང་གི་སྙིང་ག་ལས་སྤྲུལ་པའི་རིག་མེ་མཆོད་པའི་ལྷ་མོ་རྣམས་ཀྱིས་དབང་བསྐུར་བ་ནི་རྡོ་རྗེ་ཆེ་ཞེས་བྱ་བའི་ཚིགས་སུ་བཅད་པ་ཟློས་པས་དབང་བསྐུར་བར་བྱའོ། །དེ་ནས་དཀྱིལ་འཁོར་ལ་བལྟས་ཏེ་སྔ་མ་བཞིན་དུ་སྟན་ལ་འདུག་ཏུ་བཅུག་

44-1-240a

ལ་མི་མཉམ་མེད་པ་ཞེས་བྱ་བ་ནས་ཕ་རོལ་ཏུ་ཕྱིན་པ་ལ་སོགས་པའོ་ཞེས་བྱ་བའི་བར་དུ་བསྟན་པར་བྱ་སྟེ་འདི་ནི་ཕྱིར་མི་ལྡོག་པའི་དབང་བསྐུར་བའོ། །གལ་ཏེ་གསང་བ་དང་ཤེས་རབ་ཡེ་ཤེས་ཀྱི་དབང་བསྐུར་བ་མི་སྟེར་ན་དེའི་ཚེ་འདིར་
ལུང་བསྟན་པ་དང་། དབུགས་དབྱུང་བ་བྱིན་ལ་རྗེས་སུ་གནང་བ་བྱིན་པར་བྱ་སྟེ། དེ་ནི་བྱ་བའི་རྒྱུད་དང་སྤྱོད་པའི་རྒྱུད་དང་། རྣལ་འབྱོར་གྱི་རྒྱུད་ལ་སོགས་པ་སྟོན་པ་ལ་སོགས་པ་ལ་དབང་བར་གྱུར་ཏེ། འདིའི་མིང་ནི་སློབ་དཔོན་དུ་དབང་བསྐུར་བ་
ཞེས་བྱའོ། །དེ་ནས་ཡང་དག་པར་མཆོད་ལ་ཤེས་རབ་གཏད་ནས། བྱང་ཆུབ་རྡོ་རྗེ་ཞེས་བྱ་བ་ལ་སོགས་པའི་ཚིགས་སུ་བཅད་པས་བླ་མ་ལ་གསོལ་བ་གདབ་སྟེ། དེས་སྡོམ་པ་བཞི་བྱིན་ལ་སློབ་མ་ཡོལ་བས་བར་དུ་བཅད་པར་བཞག་ནས་གསང་བའི་
མཆོད་པ་ནི་མཐར་ཡོལ་བའི་མཐའ་མ་བཏེག་སྟེ། མཐེ་བོང་དང་སྲིན་ལག་གིས་རྡོ་རྗེ་བཟུང་ནས་གསང་བའི་དབང་སྦྱིན་པར་བྱའོ། །དེས་ཀྱང་ཀྱེ་མ་བདེའོ་ཞེས་བརྗོད་དེ་མྱང་བར་བྱའོ། །སློབ་དཔོན་རང་ཉིད་ཕྱིར་ལོག་ནས་པདྨ་ལ་གནས་པ་རང་གིས་མྱང་སྟེ། 
དེས་ཀྱང་ཁ་ཡིས་རང་གི་རྡོ་རྗེ་མྱང་དུ་བཅུག་ནས་རང་གི་སྟན་ནང་ཚངས་ཅན་ལ་སོགས་པ་ལ་འདུག་པར་བྱའོ། །དེ་ནས་ཕན་ཡོན་བརྗོད་པར་བྱ་སྟེ། ཞུགས་པར་གྱུར་པའི་སློབ་མ་ལ། །འདི་ནི་རྡོ་རྗེ་ཅན་ཀུན་གྱིས། །ཞེས་བྱ་བ་ལ་སོགས་པ་བརྗོད་པར་བྱའོ། །ལ་ལ་དག་
ནི་ཡང་དེ་བཞིན་དུ་གསོལ་བ་གདབ་པར་བྱའོ་ཞེས་ཟེར་རོ། །དེ་ནས་མདུན་དུ་འདུག་པ་དེ་དག་གི་ལག་པ་གཡས་པ་གཡོན་པའི་སྟེང་དུ་བཞག་སྟེ། མངོན་སུམ་དུ་ཤེས་རབ་ཡན་ལག་འདུས་ཞེས་བྱ་བ་ལ་སོགས་པ་ནས་ཁོངས་སུ་གཏོགས་པར་བསམས་ཞེས་བྱ་བའི་བར་
དུ་བརྗོད་པར་བྱའོ། །ཡོལ་བའི་ནང་དུ་བསངས་ཏེ་འདུག་ནས་གསང་བའི་མཆོད་པ་ལ་གནས་པའི་སློབ་མ་ལ་བལྟས་ཏེ། གལ་ཏེ་རྣམ་པར་སྣང་མཛད་ཀྱི་རྣལ་འབྱོར་པའམ། དེའི་རིགས་ཀྱི་རྣལ་འབྱོར་པ་ཡིན་ན་དེའི་ཚེ་རྣམ་པར་སྣང་མཛད་ཀྱི་རྣལ་འབྱོར་བྱས་

44-1-240b

ལ་རང་གི་སྙིང་ག་ནས་རྣམ་པར་སྣང་མཛད་སྤྲོ་བ་ནི། རིག་མ་ལ་འཁྱུད་པའི་ལུས་བདེ་བ་ཆེན་པོའི་ཆ་བྱད་དུ་བྱས་ལ། རྡོ་རྗེ་དང་པདྨ་དག་ལས་བདུད་རྩིའི་ཆུ་རྒྱུན་འབབ་པར་བསམས་ལ་འབབ་པ་དེ་ཉིད་བཅོམ་ལྡན་འདས་ཀྱིས་ཟླ་བའི་ཁ་དོག་དང་ལྡན་པས་དེ་ལ་དབང་
བསྐུར་བར་བསམས་ནས། རྣམ་པར་སྣང་མཛད་སློབ་མ་དེ་ཉིད་ལ་ཐིམ་པར་བྱས་ལ་མར་གྱི་བུམ་པ་བཞིན་དུ་ཞུགས་པར་སེམས་ཀྱིས་བསམ་པར་བྱའོ། །ཡང་ན་རིགས་གཞན་གྱི་རྣལ་འབྱོར་པ་ཡིན་ན་དེའི་ཚེ་དེའི་རིགས་ཀྱི་ལྷ་སྤྲོས་ཏེ། དེའི་རིགས་ཀྱི་མདོག་དང་
ལྡན་པའི་བདུད་རྩིའི་རྒྱུན་གྱིས་དབང་བསྐུར་བ་དེ་བཞིན་དུ་བསམ་པར་བྱ་ཞིང་། གཏི་མུག་ཅེས་བྱ་བ་ནས་རང་ཉིད་གྱུར་ཅེས་བྱ་བའི་བར་དུ་བརྗོད་པར་བྱའོ། །མཐར་བླ་མ་ཡོལ་བ་ནས་བྱུང་སྟེ། རང་གི་སྟན་ལ་འདུག་པ་དེ་དག་མདུན་ན་ཙོག་ཙོག་པོར་འདུག་པ་ལ་དེ་དག་གི་རིག་མའི་ལག་པ་གཡོན་པ་
སློབ་མའི་ལག་པ་གཡས་པར་བཞག་པ་བཟུང་ནས་རང་གི་ལག་པ་གཡས་པ་སློབ་མའི་མགོ་བོར་བཞག་ནས། ཐབས་གཞན་གྱིས་ནི་ཞེས་བྱ་བ་ནས་མཆོག་མ་ཡིན་ཞེས་བྱ་བའི་བར་དང་། བྱང་ཆུབ་སྤྱོད་པ་གཞན་ཞེས་བྱ་བ་ནས་ཐོབ་མི་འགྱུར་ཞེས་བྱ་བའི་བར་དུ་བརྗོད་དོ། །དེ་ནས་
སློབ་དཔོན་དེ་ལྷ་ལས་བབས་པའི་ཕྱག་རྒྱ་དང་ལྡན་པས་འདི་ཉིད་ཅེས་བྱ་བ་ནས། བདེ་བར་གཤེགས་ཞེས་བྱ་བའི་བར་དུ་བརྗོད་པར་བྱའོ། །རྗེས་སུ་གནང་བ་ཡང་བྱིན་ནས་ཇི་ལྟ་ཇི་ལྟ་ཞེས་བྱ་བ་ནས། བྱང་ཆུབ་མཆོག་ཏུ་འགྱུར་ཞེས་བྱ་བའི་བར་དུ་བརྗོད་ལ། དབུགས་
དབྱུང་བའི་ཕྱིར་མཐོང་བ་དང་ནི་ཞུགས་པ་ཞེས་བྱ་བ་ལ་སོགས་པ་ནས་འགྱུར་ཞེས་བྱ་བའི་བར་དུ་བརྗོད་པར་བྱའོ། །གཞན་དག་ནི་ཕྱག་རྒྱ་བྱིན་གྱིས་བརླབས་ཞེས་བྱ་བ་ལ་སོགས་པ་ཡང་འདིར་བརྗོད་པར་བྱའོ་ཞེས་ཟེར་རོ། །དེ་ནས་སློབ་མས་བླ་མའི་ཞབས་གཉིས་
ལ་ཕྱག་བྱས་ཏེ་འདི་སྐད་ཅེས་བརྗོད་པར་བྱ་སྟེ། གཙོ་བོས་ཇི་ལྟར་བཀའ་སྩལ་པ། །དེ་བཞིན་དུ་ནི་བགྱིད་པར་འཚལ། །ཞེས་བརྗོད་པར་བྱའོ། །ཕྱག་འཚལ་བ་དང་ལེགས་པར་གནས་སོ། །ཞེས་བཀྲ་ཤེས་པའི་ཚིག་ཀྱང་བརྗོད་པར་བྱའོ། །དེ་ནས་འདི་ལ་གསང་

44-1-241a

བའི་གནས་བསླབ་པར་བྱའོ། །ཧཱུཾ་བཛྲ་ཀྲི་ཏ་བྷུ་མེ་ཧཱུཾ་ཞེས་བྱ་བས་རྡོ་རྗེ་ར་བ་དང་གུར་གྱི་ཕྱི་རོལ་ཏུ་དབང་ཆེན་ལ་སོགས་པའི་དཀྱིལ་འཁོར་བཞི་ནི་བསྲུང་བ་ཡིན་པར་ལ་ལ་དག་འདོད་དེ། ས་བོན་ལཾ་སེར་པོ་ལས་སའི་དཀྱིལ་འཁོར་ཟུར་བཞི་པ་མཚམས་
སུ་རྡོ་རྗེ་རྩེ་གསུམ་པས་མཚན་མ་དང་། ཡཾ་སྔོན་པོ་ལས་བྱུང་བའི་རླུང་གི་དཀྱིལ་འཁོར་གཞུ་ལྟ་བུ་བ་དན་གྱིས་མཚན་པ་དང་། དེའི་ཕྱི་རིམ་དུ་ཆུའི་དཀྱིལ་འཁོར་བསམ་པར་བྱ་སྟེ། ས་བོན་བཾ་ལས་བྱུང་བ་མདོག་དཀར་པོ་དང་། དེའི་ཕྱི་རིམ་དུ་ས་བོན་རཾ་ལས་བྱུང་བའི་
མེའི་དཀྱིལ་འཁོར་དམར་པོ་བསམ་མོ། །མཆོག་ཏུ་བསམ་པ་ནི་ནམ་མཁའ་ལ་ཉི་མའི་དཀྱིལ་འཁོར་ལ་གནས་པའི་ཡི་གེ་བྷྲཱུཾ་འོད་ཟེར་སེར་པོ་དང་ལྡན་པ་བསམས་ནས། བྷྲཱུཾ་ལས་བྱུང་བའི་འཁོར་ལོ་མདོག་སེར་པོ་རྩིབས་བཅུ་པ་བསམས་ལ། དེའི་དབུས་སུ་དཔལ་རྡོ་རྗེ་
ཧཱུཾ་མཛད་བསམས་ཏེ། དེས་ལྷ་ཆེན་པོ་དང་ཨུ་མ་མནན་པར་བསམ་མོ། །དེ་ཡང་། གཡས་ན་རྡོ་རྗེ་རལ་གྲི་སྟེ། །གཡོན་ན་ཞགས་པ་ལྕགས་ཀྱུ་བསྣམས། །སྒེག་པ་ཁྲོ་བོའི་གཟུགས་འཆང་ཞིང་། །ཁམས་གསུམ་དག་ནི་འདུལ་བར་བརྩོན། །གཤིན་རྗེ་གཤེད་སོགས་ཁྲོ་བོ་
རྣམས། །མཁས་པས་ཕྱོགས་ཀྱི་རྩིབས་ལ་བསམ། །འདོད་རྒྱལ་དབྱིག་སྔོན་སྟོབས་མི་གཡོ། །ཤར་ལྷོ་མཚམས་སོགས་རྩིབས་ལ་བསམས། །གཙུག་ཏོར་འཁོར་ལོས་སྒྱུར་བ་སྟེ། །གནོད་མཛེས་འོག་སྟེ་རིམ་བཞིན་བསམ། །ཞེས་བཤད་པ་ཡིན་ནོ། །དེ་ལ་ཁྲོ་བོ་བཅུའི་
ས་བོན་ནི་ཡི་གེ་ཧཱུཾ་སྟེ་གཞན་གཙུག་ཏོར་འཁོར་ལོས་སྒྱུར་བའི་ས་བོན་ནི་ཡི་གེ་བྷྲཱུཾ་མོ། །གཞན་དག་ནི་པྲཾ་དང་ཧཱུཾ་དག་གཞན་གྱིས་མི་ཐུབ་པ་དང་། སྟོབས་པོ་ཆེའི་ས་བོན་ཡིན་པར་འདོད་དོ། །འདོད་པའི་རྒྱལ་པོ་གནོད་མཛེས་དང་། །མི་གཡོ་གཙུག་ཏོར་འཁོར་ལོས་སྒྱུར། །འཁོར་
ལོའི་གཙོ་བོ་དང་བཅས་པ། །ཨག་ཚོམ་མེད་པར་རིན་ཆེན་གཅོད། །གཞན་དག་དེ་ལས་བཟློག་པའོ། །ཀུན་ཀྱང་ཉི་མའི་དཀྱིལ་འཁོར་ལ། །གཡོན་བརྐྱང་ནས་ནི་བཞུགས་པའོ། །ཉི་མའི་འོད་དང་ལྡན་པ་ལ། །རང་སྣང་རིག་པའི་བདེ་མྱོང་དང་། །ལྡན་པ་འཁྱུད་པ་ཡི་ནི་ལུས། །ཁྲོ་བོ་ཆེན་པོ་

44-1-241b

པདྨ་མཐར་བྱེད་ཀྱི་ཞལ་དང་པོ་དང་། སྐུ་མདོག་དམར་པོ་ཞལ་གཡས་ནག་པོ་གཡོན་དཀར་པོའོ། །གཙུག་ཏོར་འཁོར་ལོས་སྒྱུར་བའི་ཞལ་དང་པོ་དང་སྐུ་མདོག་སེར་པོ་ཞལ་གཡས་སྔོན་པོ་གཡོན་དཀར་པོའོ། །ཤེས་རབ་མཐར་བྱེད་ཀྱི་ཞལ་དང་པོ་དང་། སྐུ་མདོག་དཀར་
པོ་ལ་ཞལ་གཡས་སྔོན་པོ། གཡོན་དམར་པོའོ། །གང་གཞན་སྐུ་མདོག་སྔོན་པོར་བཞུགས་པ་དེ་དག་གི་ཞལ་གཡས་དཀར་པོ་གཡོན་དམར་པོ་སྟེ། ཞལ་དང་པོ་སྐུའི་མདོག་དང་མཐུན་ནོ། །ཐམས་ཅད་ཀྱི་ཅོད་པན་ལ་ནི་མི་བསྐྱོད་པ་བཞུགས་པ། གཤིན་རྗེ་གཤེད་
ཀྱི་ཅོད་པན་ལ་རྣམ་པར་སྣང་མཛད། པདྨ་མཐར་བྱེད་ཀྱི་ཅོད་པན་ལ་འོད་དཔག་ཏུ་མེད་པ་བཞུགས་པའོ། །ཐམས་ཅད་ཀྱི་ཡང་ཕྱག་གཡས་ན་རལ་གྲི། ཕྱག་གཡོན་གཉིས་ན་རིན་པོ་ཆེ་དང་པདྨ། པདྨ་མཐར་བྱེད་ཀྱི་ཕྱག་གཡས་གཉིས་ན་པདྨ་དང་རལ་གྲི། གཡོན་གཉིས་
ན་འཁོར་ལོ་དང་རིན་པོ་ཆེ་བསྣམས་པའོ། །རྩིབས་བཅུ་ལ་གནས་པའི་ཁྲོ་བོ་བཅུ་པོ་རྣམས་ཀྱི་ཕྱག་གཡས་ཀྱི་དང་པོ་ནི་རྩ་བའི་ཕྱག་མཚན་ཐོ་བ་དང་། ལྕགས་ཀྱུ་དང་དབྱིག་པ་དང་། དབྱུག་པ་སྔོན་པོ་དང་། པདྨ་དང་རྩེ་གསུམ་པ་དང་། རྡོ་རྗེ་དང་། རལ་གྲི་དང་།
འཁོར་ལོ་སེར་པོ་དང་། རྡོ་རྗེ་བསྣམས་པའོ། །གཤིན་རྗེ་གཤེད་ལ་སོགས་པ་ཤར་ལ་སོགས་པའི་རྩིབས་ལ་ཇི་ལྟ་བ་བཞིན་དུ་བསམ་པར་བྱའོ། །ཁྲོ་བོ་མི་གཡོ་བའི་ཁྱད་པར་བཤད་པར་བྱ་སྟེ། ཕྱག་གཡས་ན་རྡོ་རྗེ་དང་རལ་གྲི་འཛིན་པ། གཡོན་ན་འཁོར་ལོ་དང་
ཞགས་པ་བསྣམས་པ། སྤྱན་ཡོ་བ་བྱིས་པའི་རྒྱན་གྱིས་བརྒྱན་པ་བསམ་པར་བྱའོ། །སྤྱན་ཡོ་རྡོ་རྗེ་འཛིན་པ་ནི། །མི་གཡོ་བྱིས་པའི་རྒྱན་གྱིས་བརྒྱན། །ཞེས་བྱ་བ་ཡིན་ནོ། །འདིའི་མཚོན་ཆ་གཙོ་བོ་ནི་རྡོ་རྗེར་ཁ་ཅིག་འདོད་དོ། །མི་གཡོ་བའི་མཚོན་ཆའི་གཙོ་
བོ་ནི་རལ་གྲི་ཡིན་པར་ཁ་ཅིག་འདོད་དོ། །འོག་གི་ཆའི་འཁོར་ལོའི་རྩིབས་ལ་གནོད་མཛེས་རྒྱལ་པོ་ཕྱག་གཡས་ན་རྡོ་རྗེ་ནག་པོ་བསྣམས་པའོ། །སྟེང་གི་རྩིབས་ལ་བཞུགས་པའི་གཙུག་ཏོར་འཁོར་ལོས་སྒྱུར་བའི་ཕྱག་གཡས་ན་འཁོར་ལོ་རྩིབས་བརྒྱད་པ་བསྣམས་

44-1-242a

པ་འོད་ཀྱི་འཁོར་ལོ་ཅན་བསམ་པར་བྱའོ། །ཁྲོ་བོ་འཇིགས་ཕྱག་ལྡན་པས་ཁྱབ། །འབར་བའི་ཕྲེང་བས་འཁྲུག་པའི་འོད། །མི་འགྱུར་ལྟ་བུའི་ཤུགས་ཀྱིས་ནི། །གཡས་ཕྱོགས་བསྐོར་བས་འཁོར་བར་འགྱུར། །ཕྱོགས་བཅུར་
གནས་པའི་ཁྲོ་བོ་ནི། །སྟོབས་ཆེན་ཕ་རོལ་གནོན་པ་སྟེ། །དེ་རྣམས་གཡོ་བ་མེད་པ་ནི། །ཤེས་རབ་ཐབས་ཀྱི་བདེ་བའི་བདག །བསྲུང་ཕྱིར་རྣལ་འབྱོར་པས་བརྟགས་བསམ། །ཐེག་པ་དམན་པར་ལྷུང་རྣམས་ལ། །སྲུང་བའི་དོན་དུ་འཁོར་ལོ་དང་། །ལྟེ་ནང་
ཁོང་སྟོང་གནས་པ་ཡང་། །རྡོ་རྗེ་ཧཱུཾ་མཛད་སྙིང་དབུས་སུ། །ཆོས་ཀྱི་འབྱུང་གནས་ཕྱག་རྒྱ་དེར། །གཞལ་ཡས་ཁང་སོགས་བསྒོམ་པར་བྱ། །འཁོར་ལོ་སེར་པོ་རྩིབས་བཅུ་ལ། །དེ་ཡི་དབུས་སུ་བསྒོམ་པར་བྱ། །ཞེས་ལེའུ་བཅོ་བརྒྱད་པ་ལས་བརྗོད་པའི་
དབུས་ཀྱི་སྒྲའི་དགོས་པ་ནི་འདིས་བཤད་པར་འགྱུར་རོ། །དེ་བཞིན་གང་ཚེ་དེས་འཁོར་ལོ། །དབུས་སུ་གཙུག་ཏོར་གྱིས་བརྒྱན་ན། །སྟེང་གི་རྩིབས་ལ་ཧཱུཾ་མཛད་དེ། །གཡོན་དུ་འཁོར་བར་བསམ་པར་བྱ། །མཆོད་པ་ལ་སོགས་སྔོན་བྱས་ནས། །མཚན་མོ་ངག་
ནི་ལན་གསུམ་ཞིག །གསང་སྔགས་བརྗོད་དེ་མཆོད་བྱས་ནས། །ཕྱིར་ཟློག་ཞེས་བྱར་གྱུར་པ་ཡིན། ཨོཾ་ཨཿཨུཥྞཱི་ཥ་བཛྲ་ཙཀྲ་བརྟི། སརྦ་ལོ་ཀོཏྟ་རཱ་མནྟྲ་ཏནྟྲ། ཙུརྞ་པྲ་ཡོ་གི་ནཱི་སརྦ་བི་ཥ་བི་ཙུརྞ་ཡ། མ་མ་ཀྲྀ་ཏ་ཡེ་ན་ཀེ་ན་ཙི་ཏ། ཀྲྀ་ཏེ་ནི་ཀ་རི་ཎི་པ་ཏཱ་ནི་སརྦྦ་ནི།
ཚིནྡ་ཚིནྡ། བྷིནྡ་བྷིནྡ། ཀཾ་པ་ཀཾ་པ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། བིདྷྭནྶ་ཡ། བིདྷྭནྶ་ཡ། ཤ་ཏ་ས་ཧ་སྲ། བི་ཙུརྞ་ཡ་བི་ཙུརྞ་ཡ། ཨུཥྞཱི་ཥ་བཛྲ་ཙཀྲ་བརྟི། བྷྲཱུཾ་བྷྲཱུཾ་བྷྲཱུཾ། ཧཱུཾ་ཧཱུཾ་ཧཱུཾ། ཞེས་ཉིན་མོ་དང་མཚན་མོ་ལན་གསུམ་བརྗོད་ནས། རྣལ་འབྱོར་པའམ་འགའ་ཞིག་
གནོད་པ་བྱ་བར་རྩོམ་པ་དེ་ཉིད་ལ་དེ་ཐམས་ཅད་དབབ་པར་འགྱུར་རོ། །ཕྱིར་བཟློག་པའོ། །གྲོ་ག་ལ་སོགས་པ་ལ་འཁོར་ལོ་གཉིས་བྲིས་ཏེ་ཞེས་བྱ་བ་ལ་སོགས་པའི་དོན་ནི་འདི་ཡིན་ཏེ། རྣམ་པར་སྣང་མཛད་ཀྱི་སྦྱོར་བ་ཇི་ལྟ་བ་དང་ལྡན་པས་གྲོ་གའམ་དར་ལ་

44-1-242b

སོགས་པ་ལ་སྐྱེས་པ་བསྲུང་བའི་ཕྱིར་གུར་གུམ། བུད་མེད་བསྲུང་བའི་ཕྱིར་ནི་གི་ཝང་གིས་དཀྱིལ་འཁོར་ཟུར་བཞི་པ། སྒོ་བཞི་པ་རྟ་བབས་བཞི་དང་ལྡན་པ་བྲིས་པ་དེའི་ནང་དུ་སྣ་ཚོགས་རྡོ་རྗེ་རྩེ་མོ་བཅུ་གཉིས་པའི་ལྟེ་བ་ལ་འཁོར་ལོ་རྩིབས་བརྒྱད་པ་དེའི་ལྟེ་བ་ལ་གསུམ།
སྟེང་དུ་ཟླ་བ་ཕྱེད་པ་ལ་ཐིག་ལེས་བརྒྱན་པ། ལ་ལ་ནས་དྲུག་པར་འགྱུར་བའི་ས་བོན་ནི་ཧ་ཞེས་བྱ་བའི་དོན་ཏེ། དེའི་ནང་དུ་ཨོཾ་ཨཱཿཛི་ན་ཛི་ཀ་ཆེ་གེ་མོ་ཤཱནྟིཾ་ཀུ་རུ་ཧཱུཾ་ཞེས་བྱ་བ་བྲིའོ། །ཤར་ལ་སོགས་པའི་ཕྱོགས་ཀྱི་རྩིབས་ཀྱི་དབུས་སུ་ནི་མི་བསྐྱོད་པ་ལ་སོགས་པ་ཕྱུང་བའི་
སྔགས་བྲི་བར་བྱའོ། །མེ་ལ་སོགས་པ་མཚམས་ཀྱི་རྩིབས་ལ་ནི་སྤྱན་ལ་སོགས་པ་ཕྱུང་བའི་སྔགས་བྲིའོ། །འཁོར་ལོའི་མུ་ཁྱུད་ལ་ནི་ཨོཾ་ཨཿཨོཾ་ཧཱུ་ལུ་ཧུ་ལུ། ཏིཥྛ་ཏིཥྛ། ཆེ་གེ་མོའི་ཨུ་པ་དྲ་བ་དི་ཀཾ་བནྡྷ་བནྡྷ། ཧ་ན་ཧ་ན། ད་ཧ་ད་ཧ། ཨ་མྲྀ་ཏེ་ཧཱུཾ་ཕཊ་ཅེས་བྱ་བ་མགོ་ནང་དུ་
བསྟན་ལ་གཡས་ཕྱོགས་སུ་བསྐོར་ནས་འཁོར་བར་བྲིའོ། །ཤར་ལ་སོགས་པའི་སྒོ་བཞིར་ནི། གཤིན་རྗེ་གཤེད་ལ་སོགས་པ་ཕྱུང་བའི་སྔགས་བྲིའོ། །གཟུགས་རྡོ་རྗེ་ལ་སོགས་པ་ལྷ་མོ་དྲུག་གི་གནས་སུ་ནི་ཨོཾ་ཨཱཿཧཱུཾ་ཞེས་བྱ་བའི་ཡི་གེ་གསུམ་མམ། རང་རང་གི་ས་བོན་
དང་བཅས་པ་སྟེ། ཨོཾ་ཛཿཧཱུཾ་ཞེས་བྱ་བ་ལ་སོགས་པའོ། །དར་ལ་སོགས་པ་དེ་རིམ་པ་བརྒྱད་ལ་སོགས་པར་ལྟེ་བ་ལ་སྦུ་ཀུ་ལ་དཀྲིས་ནས་སྲད་བུས་དཀྲིས་ཏེ། རྒྱ་སྐྱེགས་ལ་སོགས་པས་བྱུགས་ལ། རབ་ཏུ་གནས་པར་བྱས་ནས་དཔུང་པའམ་མགུལ་དུ་གདགས་པར་བྱའོ། །དེ་ནས་ཏིང་ངེ་འཛིན་
གསུམ་དང་ལྡན་པའི་སློབ་དཔོན་གྱིས་རང་གི་འདོད་པའི་ལྷའི་ཐུགས་ཀར་བཤད་མ་ཐག་པའི་གཞལ་ཡས་ཁང་གི་ནང་དུ་ཆུད་པའི་འཁོར་ལོ་དེར་གནས་ཇི་ལྟ་བར་བཅོམ་ལྡན་འདས་རྣམ་པར་སྣང་མཛད་ལ་སོགས་པའི་ལྷ་བཅུ་དགུའི་ངོ་བོ་ཉིད་ཀྱི་སྔགས་དང་ལྡན་པ། མུ་ཁྱུད་ལ་བཀོད་པའི་
ཡི་གེ་རེ་རེའི་འོད་ལས་བྱུང་བའི་འཕགས་པ་བདུད་རྩི་འཁྱིལ་པའི་ཚོགས་རྣམས་ཀྱིས་རྣམ་པར་འཚེ་བ་ཐམས་ཅད་རྣམ་པར་འཇིགས་ཤིང་དེའི་ལྟེ་བའི་རང་གི་མིང་གི་ཡི་གེ་དང་པོ་ལས་བྱུང་བའི་བསྒྲུབ་པར་བྱ་བ་བསམས་ནས། དེའི་ཤེས་པ་བཀུག་སྟེ་གཅིག་ཏུ་བྱས་ནས་ཡི་གི་ཧཾ་གི་ཆོག་

44-1-243a

གས་གོ་བསྐོན་པའི་ལུས་ལ་བཅོམ་ལྡན་འདས་རྣམ་པར་སྣང་མཛད་འབྱིན་པའི་སྔགས་ཀྱི་ཕྲེང་བ་ལས་བདུད་རྩིའི་རྒྱུན་འཛག་པས་ལུས་ཁྱབ་པར་བསམས་ལ། འོད་ཀྱི་སྒོ་ལས་བྱུང་བའི་ལྷ་སྐུ་མདོག་དཀར་པོ་དང་ལྡན་པའི་ལྷའི་ཚོགས་བུམ་པ་དཀར་པོ་
ལས་བདུད་རྩིས་དབང་བསྐུར་རོ། །ཡང་ན་ཡང་དག་པར་སྦྱོར་བ་ལས་བྱུང་བའི་བྱང་ཆུབ་ཀྱི་སེམས་ཀྱིས་སམ། ཡང་ན་ཞུ་བར་གྱུར་ནས་བདག་ཉིད་ལ་ཞུགས་པའི་དབང་བསྐུར་བས་དབང་བསྐུར་བ་དང་། ཉེས་པ་ཐམས་ཅད་དང་བྲལ་བར་བསམས་ལ་ཡང་དང་ཡང་དུ་གསང་
སྔགས་བཟླས་བརྗོད་བྱས་ནས་བླ་ན་ཡོད་པ་དང་བཅས་པའི་མཆོད་པ་བྱས་ལ། ལྷའི་མཆོད་པའི་གནས་སུ་ཁ་སྦྱར་ལ་གཞག་པའམ། མགུལ་ལ་སོགས་པར་གདགས་པར་བྱ་སྟེ། དེ་དེ་ནས་ཞི་བར་འགྱུར་བ་ནི་ཞི་བའི་ལས་ཡིན་ལ་ལས་ཐམས་ཅད་ནི་འདི་ནང་དུ་འདུས་
པ་ཡིན་ཏེ་མངོན་པར་འདོད་པ་མ་ཡིན་པའི་ཉེས་པ་ཐམས་ཅད་ཞི་བར་བྱེད་པའི་ཕྱིར་ཞི་བའི་བསྲུང་བའོ། །རིག་པའི་དོན་དུ་ནི་ཕྱིར་བཟློག་པའི་འཁོར་བའོ། །གང་ཞིག་དཀོན་མཆོག་གསུམ་གནོད་བྱེད། །མི་གང་སློབ་དཔོན་ལ་འཁུ་དང་། །ཕ་དང་མ་ནི་གནོད་བྱེད་དང་། །
དེ་བཞིན་གཞན་ཡང་རྟག་གསོད་པ། །དེ་ལ་རྣལ་དབང་མགོན་པོས་ནི། །བརྩེ་བས་གཞན་དབང་འགྱུར་སེམས་ཀྱིས། །སྦྱིན་དང་བརྗོད་པས་ལས་དེ་ལས། །བཟློག་པར་བྱ་ཞིང་གསོལ་བ་གདབ། །གལ་ཏེ་རྨོངས་པ་མི་ལྡོག་ན། །དེ་ཚེ་ལས་འདི་བརྩམ་པར་བྱ། །ཁ་སྦྱོར་
དབྱེ་བ་བཤད་པར་བྱ་སྟེ། ཐུན་མཚམས་དང་པོའི་མཐར་རང་གི་ལྷའི་སྦྱོར་བ་རང་གི་ཕྱག་རྒྱ་ལེགས་པར་བསླབས་པ་དང་ལྷན་ཅིག་སྐད་ཅིག་གིས་བྱས་ལ་ཡེ་ཤེས་སེམས་དཔའི་ཐུགས་ཀའི་ས་བོན་ལས་སངས་རྒྱས་ཐམས་ཅད་ཀྱི་ཚོགས་སྤྲོས་ལ་འོད་ཟེར་དེ་ཉིད་ལས་བསྒྲུབ་བྱ་སྤྲོས་
ཏེ། རང་གི་མདུན་དུ་ཡང་སྤྲོས་པའི་སངས་རྒྱས་ཀྱི་སྐུ་དང་། ཕྱོགས་བཅུར་གནས་པའི་སེམས་ཅན་ཐམས་ཅད་ཀྱི་ཚོགས་བསྒྲུབ་པར་བྱ་བ་དེས་མཚོན་ཆ་སྣ་ཚོགས་ཀྱིས་དུམ་བུ་བརྒྱར་བྱས་ཤིང་ཕྱེ་མར་བྱས་པ་དང་ཁྲོས་པའི་སེམས་དང་ངག་རྩུབ་པོས་ཀྱང་གནོད་པ་བྱས་པར་

44-1-243b

བསམས་ལ་སེམས་ཅན་གདུག་པ་དེ་ང་ནི་སངས་རྒྱས་གསོད་པའོ་ཞེས་འགྱོད་པ་སྐྱེས་ཤིང་དམྱལ་བའི་འཇིགས་པས་སྐྲག་ཅིང་སྐྱབས་མེད་པར་བལྟས་ནས་དེ་གནོན་པར་བྱ་བའི་དོན་དུ་སྙིང་རྗེ་ཆེན་པོས་ཁྲོ་བ་བསྐྱེད་ལ། དེ་ལས་གང་བྱས་པ་རང་གི་བདག་པོ་ལ་གསང་བར་
གསོལ་ལོ། །དེ་ནས་བདག་པོ་དེ་དཀྱིལ་འཁོར་དང་བཅས་པ་སྔོན་པོར་གྱུར་པ་ལ། མཆོད་པ་དང་བསྟོད་པ་དང་བདུད་རྩི་མྱང་བར་བྱས་ནས་ལས་ཡང་དག་པར་བརྩམ་པར་བྱ་སྟེ། རང་གི་ཡེ་ཤེས་སེམས་དཔའི་ཐུགས་ཀའི་མཚན་མ་ལ་གནས་པའི་སྙིང་པོའི་འོད་ཟེར་
གྱིས་གཙོ་བོ་དྲངས་ལ། རྡོ་རྗེའི་ལམ་ནས་ཞུ་བར་གྱུར་པས་ཆུ་སྐྱེས་སུ་གནོད་མཛེས་ལྟ་བུར་བྱུང་བར་བསམ་མོ། །ལ་ལ་དག་ནི་འདིའི་ཕྱག་ན་ལྕགས་ཀྱུ་དང་། རལ་གྲི་དང་། རིན་པོ་ཆེ་དང་། ཞགས་པ་བསྣམས་པའོ་ཞེས་ཟེར་རོ། །གཞན་དག་ནི་གནོད་
མཛེས་ཞེས་བྱ་བའི་སྒྲ་རྡོ་རྗེ་ཧཱུཾ་མཛད་ལ་བྱའོ་ཞེས་ཟེར་རོ། །དེས་བསྒྲུབ་པར་བྱ་བའི་བསྲུང་བ་ཕྲོགས་པར་བློ་དང་ལྡན་པས་བསམ་པར་བྱའོ། །སྟེང་འོག་གི་ཆར་ཡང་ཧཱུཾ་དང་བཾ་ལས་བྱུང་བའི་ཁ་སྦྱོར་རིམ་པ་བཞིན་དུ་མགོ་དང་རྐང་པ་ལ་གནས་པའི་ཕྱིའི་བསྲུང་བའི་ཁ་
སྦྱོར་དང་མགོར་གནས་པའི་དབྱངས་ཀྱི་ཡི་གེ་ཐ་མ་ལས་བྱུང་བའི་སྣ་ཚོགས་རྡོ་རྗེ་ཧཱུཾ་གིས་བྱིན་གྱིས་བརླབས་པ་དྲངས་ཏེ། གནོད་མཛེས་ཉིད་ཀྱིས་སྒྲུབ་པ་པོའི་གཡོན་ཕྱོགས་སུ་བཞག་ལ། དེ་ནས་ཡང་བསྒྲུབ་པར་བྱ་བའི་རྡོ་རྗེའི་ལམ་ནས་དེ་བཅུག་ནས། སྙིང་གར་གནས་པའི་
མི་བསྐྱོད་པའི་ཡེ་ཤེས་སེམས་དཔའི་མདུན་ཕྱོགས་ན་གནས་པའི་དཔལ་ལྡན་གནོད་མཛེས་ཀྱིས་ཡེ་ཤེས་སེམས་དཔའ་ལ་རིགས་པ་མང་པོས་གསོལ་བ་གདབ་སྟེ། གང་ཞིག་ལས་ནི་འདི་ལྟ་བུ། །གནས་གྱུར་རྣམ་པ་ཐམས་ཅད་དུ། །ཕྱིས་ལེགས་འགྱུར་ཕྱིར་སྤང་དུ་
གསོལ། །འདི་ནི་མ་དད་པར་སྨྲ་བ། སློབ་དཔོན་ལ་སྨོད་པ། སངས་རྒྱས་མང་པོ་གསོད་པར་བྱེད་པ་ལགས་ཀྱིས། འདི་ལ་བྱིན་གྱིས་རློབ་པ་དང་བསྲུང་བ་སྤང་དུ་གསོལ།དེ་ལྟ་མ་ཡིན་ན་ཁྱེད་རྣམས་ནི་བརྫུན་དུ་སྨྲ་བ་དང་། རང་གིས་གསུངས་པའི་དམ་

44-1-244a

ཚིག་ལས་འདས་པ་ཡིན་ནོ། །དེས་ན་ངེད་ཀྱིས་ནི་འདིའི་ལུས་བཏང་གིས་ཇི་ལྟར་འདོད་པ་བཞིན་དུ་གྱིས་ཤིག་ཅེས་གསུངས་ཤིང་ཞལ་གྱིས་བཞེས་ཏེ། ཡེ་ཤེས་སེམས་དཔའ་དགྱེས་ན་ནི། །བསྒྲུབ་པར་བྱ་བའི་ལུས་ལས་གཤེགས། །གནོད་
མཛེས་སྐད་ཅིག་དེ་ཉིད་ལ། །ཁ་སྦྱར་འབྱེད་ཅིང་གསོད་པར་བྱེད། །ཇི་ལྟ་བུའི་ཁ་སྦྱར་བཀུག་ནས་ཁྱེར་ཏེ་འོངས་པ་དེ་ལྟ་བུ་བཤད་པར་བྱ་སྟེ། རྡོ་རྗེའི་ཁ་སྦྱར་དང་། རལ་གྲིའི་ཁ་སྦྱར་དང་། པདྨའི་ཁ་སྦྱར་དང་། ནོར་བུའི་ཁ་སྦྱར་དང་། འཁོར་ལོའི་ཁ་སྦྱར་
རིམ་པ་ཇི་ལྟ་བ་བཞིན་དུ་སྟེང་འོག་གི་ཆར་ཁ་སྦྱར་གྱི་དབུས་སུ་གནས་པའི་ཡེ་ཤེས་སེམས་དཔའ་དང་ལྷན་ཅིག་བཀུག་ལ་གཡོན་ཕྱོགས་སུ་གཏད་ནས། དེ་ཉིད་དུ་རང་གི་ལྷ་མོའི་པདྨ་ལ་བསྲུང་བ་དང་། འཁྲུལ་འཁོར་དང་། སྔགས་དང་། ཡམས་དང་། འཚེ་བ་ལ་སོགས་པ་བྱེད་
པ་ཞུ་བར་གྱུར་ནས། རྡོ་རྗེའི་ལམ་ནས་བགེགས་མཐར་བྱེད་ཀྱི་ཕུར་བུའི་གཟུགས་ཀྱིས་གཙོ་བོའི་ས་བོན་གྱིས་དྲངས་ལ་ལག་པ་གཡོན་པས་མགུལ་ནས་བཟུང་བའི་ཕུར་བུ་འདེབས་བྱེད་ཀྱི་ལག་པ་གཡས་ན་གནས་པའི་རྡོ་རྗེ་ཐོ་བས་བརྡུངས་ནས་དེའི་སྔགས་གསལ་པོར་
བརྗོད་ཅིང་ཐམས་ཅད་སྤངས་པར་བསམས་ལ། ཕུར་བུས་གདབ་པར་བྱའོ། །དེའི་སྔགས་ནི་ཨོཾ་གྷ་གྷ་ཞེས་བྱ་བ་ལ་སོགས་པ་ཡིན་ནོ། །དེས་ན་ལུས་ལ་ཏིལ་མར་གྱིས་བསྐུས་པ། གོས་མེད་པ། སྐྱབས་མེད་པ། འཇིགས་པས་ཉེན་པ། སྐྲ་གྲོལ་བ། ནུས་པ་དང་
བྲལ་བ། མེའི་དཀྱིལ་འཁོར་གྱི་མདུན་ན་གནས་པ། བསྲུང་བ་ཐམས་ཅད་སྤངས་པར་བསམས་ལ། ཡེ་ཤེས་སེམས་དཔའི་ཐུགས་ཀའི་སྙིང་པོའི་འོད་ཀྱིས་སངས་རྒྱས་ཀྱི་སྤྲིན་གྱི་ཚོགས་བཀུག་ལ་རང་གི་ལུས་ལ་གཞུག་པར་བྱའོ། །དེ་ནས་དེ་ཞི་བའི་ཚུལ་ལས་
ཁྲོ་བོའི་ཉམས་དང་ཆ་ལུགས་སུ་བསྒྱུར་ཏེ། ཤིན་ཏུ་ཚ་བའི་ཏིལ་མར་གྱི་ནང་དུ་ཆུ་བསིལ་བཞུགས་པ་བཞིན་དུ་ཡོངས་སུ་གྱུར་ཅིང་། ཤིན་ཏུ་འབར་བ་ཁྲོ་བས་འཁྲུགས་པར་རྣམ་པར་འགྱུར་ཞིང་། གཙིགས་པ་འཇིགས་སུ་རུང་བ། རྡོ་རྗེ་ལ་སོགས་པའི་མཚོན་ཆ་སྣ་ཚོགས་

44-1-244b

པ་བསྣམས་པ་སྤྲོས་ཏེ། དེ་རྣམས་ཀྱིས་གཏུབས་པ་དང་། ཅེ་སྤྱང་ལ་སོགས་པས་ཟོས་པ་དང་། ནད་ཀྱིས་གདུངས་ཤིང་ཕྱེ་མར་བྱས་ནས་བསད་པར་བསམས་ལ། འཁྲུལ་འཁོར་དང་སྔགས་ལ་སོགས་པས་བྱའོ། །དེ་ལྟར་བསྒྲུབ་པར་བྱ་བ་བསད་ནས། བསམ་གཏན་དང་
སྔགས་ལ་སོགས་པའི་ལས་ཀྱིས་ཞུ་བའི་དངོས་པོར་གྱུར་པ་དང་། ལྷ་མོ་ཐམས་ཅད་ཀྱིས་ཡོངས་སུ་བསྐུལ་ལ། དེའི་ཚེ་ཧཱུཾ་ལས་བྱུང་བའི་རྡོ་རྗེ་ཧཱུཾ་གིས་མཚན་པས་མི་བསྐྱོད་རྡོ་རྗེའམ། གཞན་དག་ཏུ་སྔགས་པས་བྱའོ། །དེ་ནས་ཨོཾ་ཨཱཿབཛྲ་ཀཱི་ལི་ཀཱི་ལ་ཡ་ཧཱུཾ་ཞེས་བརྗོད་དེ་
ཕུར་བུ་གདབ་པར་བྱའོ། །དེ་ནས་རང་རང་གི་ས་བོན་གྱི་ལྕགས་ཀྱུས་དྲངས་པའི་སྤྱན་ལ་སོགས་པའི་རིག་མ་རྣམས་ཀྱིས་ཡེ་ཤེས་རྡོ་རྗེ་ཅན་ལ་དབང་བསྐུར་ཞིང་རིག་པ་དེ་ཉིད་དུ་ཞུགས་པར་བསམ་པར་བྱའོ། །དེ་ནས་ཡེ་ཤེས་རྡོ་རྗེ་ཅན་དེ་ཉིད་ཀྱི་སྙིང་གར་བཞག་སྟེ། ཡང་དེ་
བཞིན་དུ་དབང་བསྐུར་ལ། དེ་ཞུ་བར་གྱུར་ནས་ཞུགས་པ་དང་། དེ་མི་བསྐྱོད་པའི་བདག་ཉིད་དུ་བྱ་སྟེ། མཆོད་ཅིང་བསྟོད་པ་དང་བདུད་རྩི་མྱང་བ་ལ་སོགས་པ་བྱའོ། །ཡང་དག་གསུངས་པས་ཇི་སྐད་དུ། །བཤད་པའི་ཆོ་ག་འདི་ཡིས་ནི། །མི་བསྐྱོད་རྡོ་རྗེ་སངས་རྒྱས་ཀྱི། །
ཞིང་དུ་སྡིག་ཅན་ཁྲིད་འགྱུར་ཏེ། །རྨོངས་པ་འདི་ཡིས་འཆི་བ་ནི། །ཕྱིན་ཅི་ལོག་ཏུ་བཏགས་པར་ཟད། །ཆགས་དང་ཞེ་སྡང་གཏི་མུག་གིས། །གང་གིས་ལོག་པར་བཟུང་གྱུར་ནས། །འགྲོ་བ་རྣམས་ནི་གསོད་བྱས་ན། །འོག་ཏུ་བལྟས་ཏེ་མནར་མེད་སྐྱེ། །གལ་ཏེ་སེམས་
ཅན་གདུག་པའི་འདོད་པའི་ལྷ་ཤེས་ན་དེའི་ཚེ་དེ་ལྟ་བུའི་སེམས་དཔའི་ཧཱུཾ་ལ་སོགས་པ་ལས་བྱུང་བ་རྡོ་རྗེ་ལ་སོགས་པའི་ཁ་སྦྱོར་གྱི་ནང་ན་གནས་པའི་རིམ་གྱིས་རང་གི་རིགས་དང་རྗེས་སུ་མཐུན་པའི་མཚན་མའི་ཁ་སྦྱར་ཕྱི་རོལ་ན་གནས་པ་མཆོག་ཏུ་ཁ་སྦྱར་བྱས་པར་འགྱུར་རོ། །
གལ་ཏེ་དེའི་ལྷག་པའི་ལྷ་མ་ཤེས་ན་དེའི་ཚེ་མི་བསྐྱོད་པའི་གཟུགས་སུ་བལྟ་བར་བྱའོ། །གཞུང་གཞན་དག་ནི་རང་གི་མཚན་མ་གཅིག་གི་ནང་དུ་ཆུད་པའི་ཡེ་ཤེས་སེམས་དཔའོ་ཞེས་འདོད་དོ། །བསྒྲུབ་པར་བྱ་བ་ལ་ལས་འདི་བྱས་ནས་དགེ་བའི་བཤེས་གཉེན་མཉེས་པར་བྱས་ནས་

44-1-245a

སྡིག་པ་སྦྱང་བའི་ཐབས་ཉམས་སུ་མ་བླངས་ན་འཆི་བའི་འོག་ཏུ་ངན་འགྲོར་སྐྱེ་བར་འགྱུར་ཏེ། གང་ཞིག་མངོན་པར་ཤེས་པ་ཐོབ་ཅིང་། ཤིན་ཏུ་ཤེས་པ་དག་གིས་མངོན་སྤྱོད་ཀྱི་ལས་བྱ་བར་བཅོམ་ལྡན་འདས་ཀྱིས་རྗེས་སུ་གནང་བ་ཡིན་ནོ། །དེ་
ཡང་། གང་གིས་ཐོག་མཐའ་དབུས་དག་ཏུ། །སྙིང་རྗེ་ཉམས་པར་མ་གྱུར་ཅིང་། །གང་གིས་སྙིང་རྗེ་སྔོན་བྱས་ལ། །དེ་ཡིས་བྱ་ཡི་གཞན་གྱིས་མིན། །དེ་ལ་དང་པོ་ཁོ་ནར་སྔགས་པས་བཟའ་བ་དང་། བཅའ་བ་དང་། གཞིབ་པ་དང་། བལྡག་པ་ལ་སོགས་པ་རྣམ་པ་མང་
པོ་སྣ་ཚོགས་པ་དང་ལྡན་པ་དང་། དྲི་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་དང་། དྲིལ་བུ་ལ་སོགས་པ་ཡོངས་སུ་རྫོགས་པ་དང་། རོལ་མོའི་སྒྲ་ཆེན་པོ་རྣམ་པ་ལྔ་བཞག་ལ། གཏོར་མ་མདུན་དུ་
གཞག་པ་ནི་ཤིང་རྟའམ་ཙེལ་པོའམ་ཁུར་བུ་གཞག་པའམ་ཐ་ན་སྙིམ་པ་གསུམ་ཡན་ཆད་ཅི་འབྱོར་པའམ་མ་འབྱོར་ན་ཐམས་ཅད་ཡིད་ཀྱིས་བསྐྱེད་ལ་གཏོར་མ་ལ་བལྟས་ཏེ་སྐད་ཅིག་མ་རང་གི་ལྷ་སྐུ་མདོག་ནག་པོ་དང་ལྡན་པས་ཡེ་ཤེས་སེམས་དཔའི་ཐུགས་ཀའི་སྙིང་པོའི་
འོད་ཟེར་གྱིས་འཇིག་རྟེན་སྐྱོང་བ་ཐམས་ཅད་བཀུག་ལ་རང་རང་གི་གཟུགས་ཀྱིས་རང་རང་གི་ཕྱོགས་སུ་བཞག་སྟེ། རང་གི་སྙིང་གའི་འོད་ཟེར་ལས་བྱུང་བའི་ཕུར་བུ་བཅུའི་སྟེང་དུ་རང་གི་ཕྱོགས་ཀྱི་ཁྲོ་བོ་དབྱིབས་སུ་གནས་པ་ལ་ལྟེ་བ་མན་ཆད་རྡོ་རྗེ་རྩེ་གཅིག་པ་ལྟ་བུ་ཤེས་
རབ་དམ་པ་ལ་འཁྱུད་པ། སྲུང་བའི་འཁོར་ལོར་བཤད་པའི་མཚོན་བྱ་ལ་སོགས་པ་དང་ལྡན་པ་སྤྲོ་བར་བྱའོ། །སྤྲོས་ནས་རང་གི་ལྷག་པའི་ལྷ་མཆོག་ཁྲོས་ནས་གཡས་ན་རྡོ་རྗེ་ཐོ་བ་བསྣམས་པ། གཡོན་པས་ཕུར་བུའི་མགུལ་ནས་བཟུང་སྟེ་སྤྱི་བོ་ནས་བརྡུངས་
ཤིང་སྤྱི་བོ་ནས་རྐང་པའི་མཐར་ཐུག་པའི་བར་དུ་ཕྱོགས་སྐྱོང་རྣམས་ལ་ཕུར་བུ་གདབ་པར་བྱའོ། །གསང་སྔགས་འདི་ཡང་བསྒྱིངས་པ་དང་བཅས་པས་གདོན་པར་བྱ་སྟེ། ཨོཾ་ཨཱཿཡ་མཱནྟ་ཀྲྀཏ་སརྦ་དུཥྚ་ཨིནྡྲོ་པིཎྜཱ་ན་ས་པ་རི་བཱ་ར་ཎ་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཔྲཛྙཱནྟ་

44-1-245b

ཀྲྀཏ་སརྦ་དུཥྚ་ཡ་མཱན་ས་པ་རི་བཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཔདྨཱནྟ་ཀྲྀཏ་སརྦ་དུཥྚ་ནཱ་གཱ་ན་ས་པ་རི་བཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿ་བིགྷྣཱཾ་ཏ་ཀྲྀཏ་སརྦ་དུཥྚ་ག་ན་པ་ཏི་ཀུ་བེ་རཱ་ཎ་ས་པ་རི་བཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་ཊཀྐཱི་རཱ་ཛཱ་ན་སརྦ་དུཥྚ་ཨགྣི་ན་ས་པ་རི་བཱ་རཱ་ན་ཀཱི་ལ་
ཡ་ཧཱུཾ་ཕཊ། ཨོཾ་ཨཱཿཧཱུཾ་ནཱི་ལ་དཎྜ་སརྦ་དུཥྚ་ནཻ་ཪྼྀ་ཏྱ་ན་ས་པ་རི་བཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་མ་ཧཱ་བ་ལ་སརྦ་དུཥྚ་བ་ཡུ་ན་ས་པ་རི་བཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་ཨ་ཙ་ལ་སརྦ་དུཥྚ་ཨཱི་ཤ་ནཱན་ས་པ་རི་བཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿབྲུཾ་ཙཀྲ་སརྦ་དུཥྚ་ཙནྡྲ་ཨརྐ་པ་
ཏི་མ་ཧཱ་ན་ས་པ་རི་བཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་སུཾ་བྷ་སརྦ་དུཥྚ་བེ་མ་ཙི་ཏྲ་པྲྀ་ཐྭི་དེ་བ་ཏཱན་ས་པ་རི་བཱ་རཱ་ན་ཀཱི་ལ་ཡ་ཧཱུཾ་ཕཊ། དེ་ལྟར་ཕུར་བུ་བཏབ་པའི་རྗེས་ཐོགས་ལ་གསང་བ་འདུས་པའི་ལྷའི་རྣམ་པར་གྱུར་ཏོ། །དེ་ནས་འདི་རྣམས་ཀྱི་མཚན་མ་ལ་སོགས་པ་བཤད་པར་
བྱ་སྟེ། རྡོ་རྗེ་མཚོན་ཆ་ནི་ལུས་དང་གདོང་དང་པོ་སེར་པོ། གཡས་ནག་པོ། གཡོན་དཀར་པོ། ལག་པ་གཡས་གཉིས་ན་རྡོ་རྗེ་དང་རལ་གྲི་ཐོགས་པ། གཡོན་གཉིས་ན་རིན་པོ་ཆེ་དང་པདྨ་ཐོགས་པ། ཟླ་བའི་སྟེང་ན་འདུག་པ། རིན་པོ་ཆེའི་ཅོད་པན་གྱི་སྟེང་དུ་མི་
བསྐྱོད་པས་མཚན་པ། མིག་སྟོང་དང་ལྡན་པ་ཤར་དུ་གནས་པར་བསམ་པར་བྱའོ། །དེ་དང་ཧ་ཅང་མི་རིང་བའི་གཡོན་ལོགས་སུ་རྡོ་རྗེ་སྒྱུ་མ་སྔོན་པོ། གདོང་གཡས་དཀར་པོ། གཡོན་དམར་པོ། ལག་པ་གཡས་གཉིས་ན་འཁོར་ལོ་དང་རལ་གྲི་ཐོགས་པ། གཡོན་གཉིས་ན་དུང་དང་པདྨ་ཐོགས་
པ། ཉི་མའི་སྟན་ལ་གནས་པ། ཉི་མའི་འོད་ཡོད་པ། མི་བསྐྱོད་པའི་ཅོད་པན་ཅན་ནོ། །མེའི་ཕྱོགས་སུ་རྡོ་རྗ་སྔོན་པོ་མེ། གདོང་དང་པོ་དང་ལུས་མདོག་དམར་པོ། གདོང་གཡས་སྔོན་པོ། གཡོན་དཀར་པོ། ལག་པ་གཡས་གཉིས་ན་བགྲང་ཕྲེང་དང་མི་འཇིགས་པ་སྟེ། ལག་པ་གཡོན་
གཉིས་ན་དབྱིག་པ་དང་གུནྡྷེ་ཐོགས་པ་མིག་དམར་བ། ཉི་མའི་སྟན་ལ་འདུག་པ། ཉི་མའི་འོད་ཡོད་པ། མི་བསྐྱོད་པའི་ཅོད་པན་ཅན་ནོ། །བདེན་བྲལ་གྱི་ཕྱོགས་སུ་རྡོ་རྗེ་གཏུན་ཤིང་མདོག་ནག་པོ། གདོང་གཡས་དཀར་པོ། གཡོན་དམར་པོ། ལག་པ་གཡས་གཉིས་ན་གྲི་གུག་
44-1-246a

དང་རལ་གྲི་ཐོགས་པ། གཡོན་གཉིས་ན་རིན་པོ་ཆེ་དང་ཁྲག་གིས་བཀང་བའི་ཐོད་པ་ཐོགས་པ། སྐྲ་ཁམ་པ་གྱེན་དུ་བརྫེས་པ། ཨག་ཚོམ་གྱི་ཕྲེང་བས་རྣམ་པར་མཛེས་པ། ཉི་མའི་སྟན་ལ་གཡོན་བརྐྱང་བས་གནས་པ། མི་བསྐྱོད་པའི་ཅོད་པན་ཅན་
ནོ། །ནུབ་ཕྱོགས་སུ་རྡོ་རྗེ་སྐུ་མདོག་དཀར་པོ། གདོང་གཡས་སྔོན་པོ། གཡོན་དམར་པོ། ལག་པ་གཉིས་ན་སྦྲུལ་གྱི་ཞགས་པ་དང་རལ་གྲི་ཐོགས་པ། གཡོན་གཉིས་ན་རིན་པོ་ཆེ་དང་པདྨ་ཐོགས་པ། ཟླ་བའི་སྟེང་དང་པདྨའི་འོད་ཡོད་པ་འོད་དཔག་མེད་ཀྱི་ཅོད་པན་ཅན་
ནོ། །རླུང་གི་ཕྱོགས་སུ་རྡོ་རྗེ་རླུང་མདོག་ལྗང་གུ་གདོང་གཡས་སྔོན་པོ།གཡོན་དམར་པོ། ལག་པ་གཡས་གཉིས་ན་གོས་དང་རལ་གྲི་ཐོགས་པ། གཡོན་གཉིས་ན་རིན་པོ་ཆེ་དང་པདྨ་ཐོགས་པ། ཟླ་བའི་སྟན་དང་ཟླ་བའི་འོད་ཡོད་པ། དོན་ཡོད་གྲུབ་པའི་ཅོད་པན་ཅན་ནོ། །དེ་དང་
ཧ་ཅང་མི་རིང་བའི་གཡོན་ལོགས་སུ་རྡོ་རྗེ་སྣ་མདོག་དཀར་པོ། གདོང་གཡས་སྔོན་པོ། གཡོན་དམར་པོ། ལག་པ་གཡས་གཉིས་ན་ལ་དུ་དང་རལ་གྲི་ཐོགས་པ། གཡོན་གཉིས་ན་རིན་པོ་ཆེ་དང་ཆང་གིས་བཀང་བའི་ཁམ་ཕོར་ཐོགས་པ། ཟླ་བའི་སྟན་ལ་འདུག་ཅིང་ཉི་
མའི་འོད་ཡོད་པ། མི་བསྐྱོད་པའི་ཅོད་པན་ཅན་ནོ། །བྱང་ཕྱོགས་སུ་རྡོ་རྗེ་འཇིགས་བྱེད་མདོག་སེར་པོ། གདོང་གཡས་ནག་པོ། གཡོན་དཀར་པོ། ལག་པ་གཡས་གཉིས་ན་བི་ཛ་པཱུ་ར་དང་རལ་གྲི་ཐོགས་པ། གཡོན་གཉིས་ན་པདྨ་དང་ནེའུ་ལེ་ཐོགས་པ། ཉི་མའི་སྟན་
ལ་འདུག་ཅིང་ཉི་མའི་འོད་ཡོད་པ། མི་བསྐྱོད་པའི་ཅོད་པན་ཅན་ནོ། །དབང་ལྡན་གྱི་ཕྱོགས་སུ་རྡོ་རྗེ་ཁྲོ་བོ་མདོག་དཀར་པོ། གདོང་གཡས་སྔོན་པོ། གཡོན་དམར་པོ། ལག་པ་གཡས་གཉིས་ན་རྩེ་གསུམ་དང་རལ་གྲི་ཐོགས་པ། གཡོན་གཉིས་ན་རིན་པོ་ཆེ་དང་པདྨ་
བསྣམས་པ། མིའི་རུས་པའི་རྒྱན་ཅན་ཟླ་བའི་སྟན་ལ་འདུག་ཅིང་ཟླ་བའི་འོད་དང་རྒྱན་ཡོད་པ་འོད་དཔག་ཏུ་མེད་པའི་ཅོད་པན་ཅན་ནོ། །སྟེང་གི་ཕྱོགས་ཀྱི་ཆ་ལ་རྡོ་རྗེ་འོད་མདོག་དཀར་པོ། གདོང་གཡས་སྔོན་པོ། གཡོན་དམར་པོ། ལག་པ་གཡས་གཉིས་ན་པདྨ་དམར་པོ་དང་

44-1-246b

རལ་གྲི་ཐོགས་པ། གཡོན་གཉིས་ན་རིན་པོ་ཆེ་དང་འཁོར་ལོ་ཐོགས་པ། ཟླ་བའི་སྟན་ལ་འདུག་ཅིང་ཟླ་བའི་འོད་ཡོད་པ་མི་བསྐྱོད་པའི་ཅོད་པན་ཅན་ནོ། །དེ་ཉིད་ཀྱི་གཡོན་ལོགས་སུ་རྡོ་རྗེ་འཁྱིལ་པ་མདོག་དམར་པོ། གདོང་གཡས་སྔོན་པོ། གཡོན་དཀར་པོ། ལག་པ་གཡས་གཉིས་
ན་པདྨ་དམར་པོ་དང་རལ་གྲི་ཐོགས་པ། གཡོན་གཉིས་ན་རིན་པོ་ཆེ་དང་འཁོར་ལོ་ཐོགས་པ། ཉི་མའི་སྟན་ལ་འདུག་ཅིང་ཉི་མའི་འོད་ཡོད་པ། རིན་ཆེན་འབྱུང་ལྡན་གྱི་ཅོད་པན་ཅན་ནོ། །འདི་ཉིད་ཀྱི་གཡོན་ལོགས་སུ་རྡོ་རྗེ་མི་སྨྲ་བ་མདོག་སེར་པོ། གདོང་གཡས་ནག་པོ། གཡོན་དཀར་
པོ། ལག་པ་གཡས་གཉིས་ན་པདྨ་སེར་པོ་དང་། རལ་གྲི་ཐོགས་པ། གཡོན་གཉིས་ན་རིན་པོ་ཆེ་དང་འཁོར་ལོ་ཐོགས་པ། ཟླ་བའི་གདན་ལ་འདུག་ཅིང་ཟླ་བའི་འོད་ཡོད་པ། རྣམ་པར་སྣང་མཛད་ཀྱི་ཅོད་པན་ཅན་ནོ། །འོག་ཏུ་ཐགས་བཟངས་རིས་མདོག་སྔོན་པོ། གདོང་གཡས་དཀར་པོ། 
གཡོན་དམར་པོ། ལག་པ་གཡས་གཉིས་ན་རྡོ་རྗེ་དང་འཁོར་ལོ་ཐོགས་པ། གཡོན་གཉིས་ན་རིན་པོ་ཆེ་དང་པདྨ་ཐོགས་པ། ཉི་མའི་གདན་ལ་འདུག་ཅིང་ཉི་མའི་འོད་ཡོད་པ་མི་བསྐྱོད་པའི་ཅོད་པན་ཅན་ནོ། །དེའི་གཡོན་ལོགས་སུ་སའི་ལྷ་མོ་མདོག་སེར་བ། གདོང་གཡས་སྔོ་བ། གཡོན་
དཀར་བ། ལག་པ་དང་པོ་གཉིས་ཀྱིས་རང་སྣང་བ་ལ་འཁྱུད་པ་ལྷུར་བྱེད་པ། གཡས་གཉིས་ན་པདྨ་སེར་པོ་དང་། རལ་གྲི་ཐོགས་པ། གཡོན་གཉིས་ན་རིན་པོ་ཆེ་དང་འཁོར་ལོ་ཐོགས་པ། ཟླ་བའི་གདན་ལ་འདུག་ཅིང་ཟླ་བའི་འོད་ཡོད་པ། རྣམ་པར་སྣང་མཛད་ཀྱི་ཅོད་པན་ཅན་ནོ། །འདི་དག་ཐམས་
ཅད་ཀྱང་སྣ་ཚོགས་པདྨའི་སྟེང་ན་རྡོ་རྗེ་སྐྱིལ་ཀྲུང་གིས་བཞུགས་པ། ལག་པ་དང་པོ་གཉིས་ཀྱིས་རང་སྣང་ལ་འཁྱུད་པའི་རིན་པོ་ཆེའི་ཅོད་པན་ཅན་ནོ། །རྒྱན་ཐམས་ཅད་ཀྱིས་བརྒྱན་པ་དང་ལྷའི་གོས་དང་ཕྲེང་བ་དང་། བྱུག་པ་དང་ལྡན་པ། མཚན་དང་དཔེ་བྱད་ཉེ་བར་འབར་བ། ཕྱག་རྒྱ་བཞིས་
རྒྱས་བཏབ་པ་སྟེ། དེ་ལྟ་བུར་གྱུར་པ་བདེ་བར་གཤེགས་པ་དང་འདྲ་བར་བསམས་ལ། འདོད་པའི་ལྷ་སྐུ་མདོག་སྔོན་པོ་ཡོངས་སུ་གྱུར་ཏེ། ལྷན་ཅིག་སྐྱེས་པའི་མདོག་དང་ལྡན་པའི་འདོད་པའི་ལྷའི་དཀྱིལ་འཁོར་གྱི་འཁོར་ལོ་མཆོད་པར་བཤད་པའི་ཆོ་གས་ཤེས་རབ་ཀྱི་བ་སྤུ་རེ་རེ་ནས་བྱུང་བ། འོད་ཟེར་

44-1-247a

སྣ་ཚོགས་རྒྱ་ཆེན་པོ་འཐོན་པ་ལས་བྱུང་བའི་གཟུགས་རྡོ་རྗེ་ལ་སོགས་པའི་ལྷ་མོ་རྣམས་དང་དེ་བཞིན་དུ་ཕྱིའི་དྲི་ལ་སོགས་པ་ཐམས་ཅད་ཀྱིས་ཀྱང་མཆོད་ལ། སྔར་ཡང་དག་པར་བརྟགས་པའི་གཏོར་མ་བདུད་རྩི་ལྔ་དང་ལྡན་པ་ལ་གཏོར་མའི་སྔགས་མངོན་པར་བཟླས་པས་ཚིམ་པར་
བྱ་ཞིང་། མི་བསྐྱོད་པ་ནི་ཡེ་ཤེས་ཆེ། །ཞེས་བྱ་བའི་ཚིགས་སུ་བཅད་པས་བསྟོད་ལ། དགའ་ཞིང་མགུ་ནས་མངོན་པར་འདོད་པའི་དངོས་གྲུབ་སྟེར་བར་བརྩོན་པ་རྣམས་ལ་གསོལ་བ་བཏབ་ནས་བཟོད་པ་གསོལ་ཏེ་སྔགས་འདིས་གཤེགས་སུ་གསོལ་བར་བྱ་སྟེ། ཨོཾ་ཨཱཿཨོཾ་ཨ་ཀཱ་རོ་མུ་ཁཾ་སརྦ་
དྷརྨྨཱ་ཎཱཾ་ཨཱདྱ་ནུཏྤནྣ་ཏྭཱཏ་ཧཱུཾ་མུཿཞེས་པས་སོ། །ཚོན་དང་ལྷ་རྣམས་ཀྱི་མཚན་མ་དང་། སྙིང་པོ་ལ་སོགས་པ་འདི་ཉིད་ཀྱིས་གཤེགས་སུ་གསོལ་བར་བྱའོ། །ཨོཾ་ཨཱཿསརྦ་ཏྲེེ་དྷྭ་ཛ་ད་ཤ་དི་ཀ་ལོ་ཀ་དྷཱ་ཏུ་ཨཱ་ནནྟ་ག་ག་ན། ས་མུ་དྲ་མེ་གྷ་བྱཱུ་ཧ་པྲ་ས་ར་པ་ར་མཱ་ནུ་ཛོ་མཎྜལ། པ་རཾ་པ་ར་ཨནྟརྒ་ཏ་ས་མ་པཏྟྱཱ་བ་
སྠཱི་ཏཱཿ། དྷཱརྨ་དྷཱ་ཏུ་སཾ་བ་ས་ར་ཨཱ་ཀཱ་ཤ་དྷཱ་ཏུ་པརྱ་བཱ་ས་ན། སརྦ་ཏྲྱ་དྷྭ་ཛ་ད་ཤ་དི་ཀ་ལོ་ཀ་དྷཱ་ཏུ་ཨཱ་ནནྟ་ག་ག་ན། ས་མུ་དྲ་མེ་གྷ་ན་བྱཱུ་ཧ་པྲ་ས་ར་ག་ག་ན་ས་མཱ། སརྦ་ལོ་ཀ་པཱ་ལ་སརྦ་སཏྭཱཤྩ། ཏདྱ་ཐཱ། བཛྲཱ་ཡུ་དྷ། མཱ་ཡ་བཛྲ་བཛྲཱ་ན་ལ། བཛྲ་ཀཱ་ལ། བཛྲ་མུ་ཥ་ལ། ནཱ་ག་བཛྲ། བཛྲཱ་ནཱི་ལ། བཛྲ་ཤོཎྜ། 
བཛྲ་བྷཻ་ར་བ། བཛྲ་ཀྲོ་དྷཱ། བཛྲ་པྲ་བྷཱ། བཛྲ་ཀུཎྜ་ལི། མཱུ་ན་བཛྲ། བི་མ་ཙི་ཏྲ། པྲྀ་ཐྭཱི་དེ་བ་ཏཱ། ས་པ་རི་བཱ་ར་ཨི་དན། པུཥྤ། དྷཱུ་པ། དཱི་པ། གནྡྷ། ནཻ་བི་དྱཱ་དི་སཾ་ཡུ་ཀྟཾ། བ་ལིཾ་ཨུ་པ་ཧ་རཾ་པྲ་ཏཱིཙྪ། ཨུ་པ་བྷུ་ཛྱ་མ་མ་སརྦ་ཏྭཱ་ནཱཉྩ། ཧི་ར་ཎྱ་སུ་བརྞ། དྷ་ན་དྷཱ་ནྱ། ཨཱ་ཡུཿཡོ་བ་ན་ཨ་རོ་གྱ། སཏྶུ་ཁ་ཨཱ་པ་ཧ་ར་
ཀཱན་སརྦ་བིགྷྣཱཾ་བི་ནཱ་ཡ་ཀཱན། སརྦ་དུཥྚཱན་པྲ་དུཥྚཱན། མ་ནུཥྱ་ཨ་མ་ནུཥྱཱ་ན། ཛཾ་བྷ་ཡ་སྟཾ་བྷ་ཡ། བནྡྷ་ཡ། བིདྷྭནྶཱ་ཡ་མ་མ་ཧི་ར་ཎྱ་སུ་བརྞ། དྷ་ན་དྷཱ་ནྱ། ཨཱ་ཡུཿཡོ་བ་ན། ཨ་རོ་གྱ། སཏྶུ་ཁཱ་ནི་མ་ཧཱ་སུ་ཁཱ་ནི། པྲ་བྲྀདྡྷ་ཡེ། ཡཱ་བ་ད་ཨཱ་བོ་དྷི་མཎྜ་པརྱནྟཾ། ཌྙཻ་ཀ་ཡ་ཏྱ་མ་ཏ་ས་ཧ་ཡི་ཏྭཾ། ཤཱནྟིཾ་རཀྵཱཉྩ་ཀུ་རུ་ཧཱུཾ། ཨོཾ་ཨཱཿཨོཾ་
ཨ་ཀཱ་རོ་མུ་ཁཾ་སརྦ་དྷརྨྨཱ་ཎཱཾ་ཨཱདྱ་ནུཏྤནྣ་ཏྭཱཏ་ཧཱུཾ་ཕཊ་སྭཱ་ཧཱ་ཧཱུཾ། དཀྱིལ་འཁོར་གྱི་ཁང་པའི་ཕྱི་རོལ་དུ་ཕྱོགས་དང་མཚམས་རྣམས་སུ་མཎྜལ་ཟླུམ་པོ་བྱའོ། །དབང་ལྡན་དང་དབང་པོའི་མཎྜལ་གྱི་བར་དུ་ཟླ་བ་དང་ཉི་མ་དང་། ཚངས་པ་ཆེན་པོའི་མཎྜལ་གཅིག་བྱའོ། །དེ་བཞིན་དུ་སྲིན་པོ་དང་། ཆུ་ལྷའི་མཎྜལ་གྱི་

44-1-247b

དབུས་སུ་ཐགས་བཟངས་རིས་དང་། ས་ཡི་ལྷ་མོའི་མཎྜལ་གཅིག་བྱའོ། །དེར་རྡོ་རྗེ་མཚོན་ཆ་ལ་སོགས་པ་ལ་སྔགས་ཀྱིས་མངོན་པར་བསྔགས་ཏེ། གཏོར་མ་དང་། དྲི་དང་། མེ་ཏོག་དང་། བདུག་པ་དང་། མར་མེ་དང་། ཆང་ལ་སོགས་པ་དབུལ་བར་བྱའོ། །རིག་པའི་
དབང་བསྐུར་བ་དང་། ཕྱིར་མི་ལྡོག་པའི་དབང་བསྐུར་བ་འདི་གཉིས་ནི་བུམ་པའི་དབང་བསྐུར་བ་སྟེ། དང་པོར་བཤད་པ་ཡིན་ནོ། །དེ་ནས་ཀྱེ་མ་བདེ་བ་ཞེས་བརྗོད་དེ། སེམས་ཀྱི་དམ་པ་མྱང་བ་ནི་གཉིས་པའོ། །རྨོངས་པ་ཞེས་བྱ་བའི་ཚིགས་སུ་བཅད་པའི་དོན་ཉམས་སུ་
བླང་བ་གསུམ་པའོ། །བདག་གི་སྟོན་ཞེས་བྱ་བ་ལ་སོགས་པའི་ཚིགས་སུ་བཅད་པའི་དོན་བྱེད་པས་དེ་ཡང་ཞེས་བྱ་བའི་ཚིགས་སུ་བཅད་པའི་དོན་ཡང་བཤད་པ་ནི་བཞི་པའོ། །སྔར་བཤད་པའི་བྲིས་པའི་དཀྱིལ་འཁོར་རམ། ཡིད་ཀྱིས་བརྟགས་པའི་ཡེ་ཤེས་ཀྱི་དཀྱིལ་འཁོར་
རམ། རས་ཀྱི་རི་མོ་ལ་དམིགས་པ་ཡང་རུང་སྟེ། གཙང་ཞིང་ཉམས་དགའ་བ་རྣམ་པར་དབེན་པའི་ས་ཕྱོགས་སུ་བུམ་པའི་དབང་བསྐུར་བ་ཐོབ་པའི་སློབ་མ་སྔགས་དང་རྒྱུད་ལེགས་པར་བསླབ་པ་བཞིན་ལེགས་པ་མི་གཡེངས་པ།དེ་ཁོ་ན་ཉིད་རིག་པ་ལ་བརྩོན་པ་དང་དམ་ཚིག་
བསྲུང་བ་ལ་བརྩོན་པ། རང་གི་རིགས་སམ་གཞན་ཡང་རུང་སྟེ། རྒྱུད་ལས་བཤད་པའི་བདེན་པའི་རྒྱུ་ཐམས་ཅད་དང་ལྡན་པ་རྡོ་རྗེ་སློབ་དཔོན་ལ་དབུལ་བར་བྱའོ། །དེ་ནས་དེ་གཡོན་ལོགས་སུ་གནས་པ་དང་ལྷན་ཅིག་བཞུགས་པའི་བླ་མ་ལ། འོ་མ་དང་མར་མེ་དང་བསྙེན་བཀུར་བ་དང་། དྲི་དང་ཕྲེང་བ་
ལ་སོགས་པ་རྒྱ་ཆེན་པོས་མཆོད་ལ་ཕྱི་རོལ་གྱི་ཡོ་བྱད་བླ་ན་ཡོད་པའི་མཆོད་པ་དང་བཅས་པས་ཀྱང་ཡང་དག་པར་མཆོད་ལ་པུས་མོ་གཡས་པའི་ལྷ་ང་ས་ལ་བཙུགས་ནས་ཐལ་མོ་སྦྱར་ལ། སློབ་དཔོན་ཆེན་པོ་ལ་གསོལ་བ་གདབ་པར་བྱ་སྟེ། ཁྱེད་ཀྱི་ཞབས་ཀྱི་བཀའ་དྲིན་གྱིས། །བླ་མེད་བྱ་བ་བདག་གིས་
རིག །དེ་ཡང་དབང་བསྐུར་རིན་ཆེན་གྱིས། །མགོན་པོ་རྗེས་སུ་བཟུང་བར་མཛོད། །བདེ་ཆེན་དཔལ་གྱི་མགོན་པོ་ཡིས། །སངས་རྒྱས་སྐྱོབ་པ་ཇི་ལྟར་ནི། །བདག་པོའི་དེ་ཉིད་སྟོན་མཛད་པ། །དེ་བཞིན་བདག་ལ་མགོན་དགྱེས་མཛོད། །སྡུག་བསྔལ་ཀུན་གྱི་གནས་གྱུར་པའི། །དམྱལ་ལས་གཙོ་བོས་

44-1-248a

གདོན་དུ་གསོལ། །སྡུག་བསྔལ་ཐམས་ཅད་བཅད་པ་དང་། །མགོན་མེད་པ་ལ་སྙིང་རྗེ་མཛོད། །ཁྱོད་ཞབས་པདྨ་སྤངས་ནས་ནི། །གཙོ་བོ་གཞན་ལ་སྐྱབས་མ་མཆིས། །འགྲོ་ན་དཔའ་བོ་ཐུབ་ཆེན་པོ། །དེ་བས་སངས་རྒྱས་མཆོག་བརྙེས་མཛོད། །དེ་ལྟར་གསོལ་བའི་ཆོ་ག་མཆོག །
དམ་པ་དེ་ནི་ཐོས་གྱུར་ནས། །བླ་མ་དཔལ་ལྡན་ཡོན་ཏན་མཚོས། །སྙིང་རྗེ་སློབ་པ་ལ་བསྐྱེད་ལ། །བཞིན་ནི་རབ་ཏུ་དང་གྱུར་པས། །རང་གི་བརྩེ་བ་རབ་དགའ་ཞིང་། །རྣལ་འབྱོར་རྒྱུད་ལས་འབྱུང་བའི་མཆོག །དམ་ཚིག་བཟང་པོ་བསྟན་པར་བྱ། །སྲོག་ཆགས་བུ་ཁྱོད་ཀྱིས་སོད་ཅིག །བརྫུན་གྱི་ཚིག་
ཀྱང་སྨྲ་བར་བྱ། །མ་བྱིན་པར་ཡང་བླང་བར་བྱ། །གཞན་གྱི་ཆུང་མ་བསྟེན་པར་བྱ། །དམ་ཚིག་སྡོམ་པ་མཆོག་བཞི་ནི། །བཟང་པོ་ཁྱོད་ཀྱིས་བསྐྱང་བར་བྱ། །དྲི་ཆུ་བཤང་དང་ཤ་མཚལ་ཆེན། །ལྔ་པ་སེམས་ལས་བྱུང་བ་དང་། །ཁྱི་མི་རྟ་དང་གླང་ཆེན་པ། །སྦྱང་བ་ལ་སོགས་ཆོ་གས་ནི། །ཁྱོད་ཀྱིས་
རྟག་ཏུ་བཟའ་བྱ་སྟེ། །དམ་ཚིག་འདི་ནི་རྨད་བྱུང་བའོ། །དེ་ནས་སྔར་བཤད་པའི་དཀྱིལ་འཁོར་ཉིད་དུ་བསྒོམས་པས་ཡོངས་སུ་བརྟགས་པའི་དཀྱིལ་འཁོར་ལ་སློབ་དཔོན་ལྷ་ཐམས་ཅད་ཀྱི་འཁོར་ལོའི་དབུས་སུ་གནས་ཏེ་རང་གི་ལྷག་པའི་ལྷའི་སྦྱོར་བ་ཇི་ལྟ་བུ་དང་ལྡན་པས་རང་གི་རིག་
མའི་པདྨར་བདུད་རྩི་རྣམ་པ་ལྔ་བཅུག་སྟེ། མན་ངག་ཇི་ལྟ་བ་བཞིན་དུ་དེའི་རྣལ་འབྱོར་དང་ལྡན་པས། དབང་བསྐུར་བར་བྱ་བའི་རང་གི་ལྷག་པའི་ལྷ་སྤྲོས་ནས་དེས་སེམས་ཅན་གྱི་དོན་བྱེད་དུ་བཅུག་སྟེ་བཀུག་ནས་རང་གི་ལུས་ལ་བཅུག་སྟེ། དེའི་རྣམ་པར་གྱུར་པས་སློབ་མ་ཡང་དེའི་རང་
བཞིན་དུ་བྱིན་གྱིས་བརླབས་ཏེ། མིག་ལ་སོགས་པ་རང་གི་ལྷ་དང་ལྡན་པར་བསྒོམས་ཏེ། རང་གི་བ་སྤུའི་བུ་ག་རྣམས་ལས་བྱུང་བའི་འོད་ཟེར་གྱི་ལྕགས་ཀྱུའི་ཚོགས་ཀྱིས་ནམ་མཁའི་ཁམས་ཐམས་ཅད་དུ་ཁྱབ་པའི་དེ་བཞིན་གཤེགས་པ་ཐམས་ཅད་སྤྱན་དྲངས་ཏེ། རང་གི་ལུས་ལ་བཅུག་
ནས་ལས་ལ་གནས་པ་ཞུ་བར་གྱུར་ཏེ། མཆོག་ཏུ་དགའ་བ་ནི་གནས་སྐབས་ན། རྡོ་རྗེའི་ལམ་ནས་བྱུང་ནས་མཐེ་བོ་དང་སྲིན་ལག་གིས་བཟུང་སྟེ། སློབ་མའི་ཁ་རུ་སྦྱིན་པར་བྱའོ། །རྣམ་པར་སྣང་མཛད་ཀྱི་རྣལ་འབྱོར་དང་ལྡན་པའི་སློབ་མས་བདེ་བ་ཆེ་ཞེས་བརྗོད་ནས་སེམས་ལས་བྱུང་བ་

44-1-248b

འདི་བཏུང་བར་བྱའོ། །འདི་ནི་རྡོ་རྗེ་ཅན་ཀུན་གྱི། །དབང་བསྐུར་ཆོ་ག་མཆོག་ཡིན་ཏེ། །སྔགས་འདི་ཐམས་ཅད་གྲུབ་པ་དང་། །ལས་ཀྱི་མཆོག་ནི་འགྲུབ་པར་འགྱུར། །ཞེས་བྱ་བ་ནི་གཉིས་པའོ། །དེ་ནས་པདྨ་ལ་གནས་བླ། །མེ་ཏོག་དང་ལྡན་སེམས་བྱུང་བ། །རང་གི་ཁ་ཡིས་མཆོད་
དོན་དང་། །རྡོ་རྗེར་སོན་པའི་རིག་མའི་ཁས། །མི་ཡི་ཐོད་པའི་ནང་བླུགས་པ། །དྲི་ཆེན་དྲི་ཆུ་ཤ་ལྡན་པ། །ལྷ་རྣམས་ལ་ནི་དབུལ་བར་བྱ། །དེ་ནས་དེའམ་གཞན་ཤིན་ཏུ་དད་པ་དང་ལྡན་པ། ཤེས་རབ་ཆེ་བ། གཟུགས་བཟང་བ། སྒྲུབ་པ་པོ་ལ་དགའ་བ། སྦྱོར་བ་གཅིག་པའི་བྱ་བ་
ལ་གོམས་པ། དམ་ཚིག་ཤེས་ཤིང་ལེགས་སྤྲས་པ། །བླ་མ་ལ་ནི་སྒྲུབ་པ་པོས། །ཡོན་གྱི་དོན་དུ་དབུལ་བར་བྱ། །ཡང་སློབ་མས་བླ་མ་ལ་གསོལ་བ་བཏབ་ལ་མཆོད་པ་ལ་སོགས་པ་བྱས་ཏེ། བླ་མས་བྱིན་གྱིས་བརླབས་ནས་ཕྱག་རྒྱ་དེ་སློབ་པའི་ཆེད་དུ་སྦྱིན་པར་བྱའོ། །མེ་ཏོག་ལ་སོགས་དམ་ཚིག་ལྡན། །སངས་རྒྱས་
སོགས་པར་བྱིན་གྱིས་བརླབས། །དེ་དང་རྣལ་འབྱོར་སྙོམས་འཇུག་ཅིང་། །བླ་ན་ཡོད་དང་བཅས་པས་མཆོད། །སློབ་མ་ཕྱི་རོལ་མཆོད་པ་ཡིས། །རྡོ་རྗེ་འཛིན་ནི་གཉིས་པ་བཞིན། །བཀྲ་ཤིས་སྣ་ཚོགས་སྒྲོགས་པ་དང་། །རོལ་མོའི་སྒྲ་ནི་དུ་མ་དང་། །རྔ་ཡབ་རྒྱལ་མཚན་གདུགས་
ལ་སོགས། །མེ་ཏོག་ཕྲེང་བཟང་ཙནྡན་སོགས། །རྡོ་རྗེ་སྐྱིལ་ཀྲུང་སྦྱོར་བ་ཡིས། །བརྟན་ཞིང་མཉམ་པར་བཞག་ནས་སུ། །དེ་ལ་ཆོ་ག་བཞིན་དབང་བསྐུར། །མེ་ཏོག་ཕྲེང་ཐོགས་བཞི་ཐལ་སྦྱར། །དེར་སློབ་དཔོན་རང་གི་བདག་པོའི་སྦྱོར་བ་དང་ལྡན་པས་སློབ་མ་ཡང་དེའི་སྦྱོར་བ་དང་
ལྡན་པར་བྱེད་དུ་བཅུག་ལ་མཉམ་པར་བཞག་ནས་རང་གི་རིགས་ཀྱི་སའི་སྤྲིན་རྣམས་བྱང་ཆུབ་ཀྱི་སེམས་ཀྱིས་ཡོངས་སུ་གང་བའི་ཆུ་ཤེལ་གྱི་བུམ་པ་ཐོགས་པ་སྤྲོས་ཏེ། དེས་བྱང་ཆུབ་ཀྱི་སེམས་ཀྱི་རྒྱུན་ཕབ་པས་དབང་བསྐུར་བ་སྩོལ་ནས་དེ་དག་ཐམས་ཅད་མཆོག་ཏུ་བདེ་བའི་ཏིང་ངེ་
འཛིན་ལ་སྙོམས་པར་ཞུགས་པས་ཞུ་བར་གྱུར་ཏེ། ཡེ་ཤེས་ཀྱི་བདུད་རྩིའི་རྣམ་པར་རེད་ནས་སློབ་མའི་ལུས་ལ་ཞུགས་པ་དང་དེ་ཡང་ལྷའི་ལུས་བདེ་བ་ཆེན་པོའི་ངོ་བོ་ཉིད་དུ་གྱུར་པར་བསམ་པར་བྱའོ་ཞེས་བྱ་བའི་དོན་འདི་སྟོན་པ་ཡིན་ཏེ། རྨོངས་པའི་གཏི་མུག་སྦྱོར་བ་ཅན། །ཞེས་བྱ་བ་ནས། ཤེས་རབ་

44-1-249a

ཡེ་ཤེས་བདག་ཉིད་འགྱུར། །ཞེས་བྱ་བའི་བར་ནི་གསུམ་པ་ཡིན་ནོ། །དེ་ལྟར་གནས་པའི་རིག་མ་ཡི། །དེ་ཚེ་བླ་མས་ལག་བཟུང་ནས། །སློབ་མ་ཡི་ནི་ལག་ཏུ་གཏད། །དེ་བཞིན་གཤེགས་པ་དབང་དུ་སྩོལ། །བདག་གིས་དེ་རིང་ནས་བརྩམས་ནས། །སྒྲུབ་པ་
པོ་ལ་བུ་མོ་གཏད། །བྱང་ཆུབ་ཆེན་པོ་བསྒྲུབ་པའི་ཕྱིར། །དེ་བཞིན་གཤེགས་པ་མཁྱེན་པར་གསོལ། །ཞེས་སོ། །དེ་ནས་དེ་ལ། གཟུངས་མ་དེ་ཉིད་ཉམས་དགའ་བ། །ཁྱོད་ཀྱིས་རྟག་ཏུ་བསྒྲུབ་པར་བྱ། །ཞེས་བརྗོད་དོ། །ལག་པར་གཏད་ནས་ཞེས་པ་ནས་མཆོག་མ་ཡིན་ཞེས་བྱ་
བའི་བར་ཏེ་འདི་ནི་བཞི་པའོ། །དེ་ནས་བརྩམས་ཏེ་དེ་ལ་ནི། །གསང་བའི་མཆོག་ནི་བཤད་པར་བྱ། །རྒྱུད་ཀུན་དུ་ནི་གང་སྦས་པ། །ཡི་གེ་ཕྱག་རྒྱ་སྦས་རྣམས་ཀྱང་། །བཤད་མ་ཐག་པའི་ཆོ་གས་འདི་ལ་བྱིན་གྱིས་བརླབས་ལ་དེ་ལ་བླ་མས་སྦྱིན་པར་བྱ་སྟེ། འདི་ནི་སངས་རྒྱས་མ་རུ་བསྒྲགས། །
ཞེས་བྱ་བའི་ཕྱིར་དང་། རྡོ་རྗེ་འཛིན་པའི་སྤྲུལ་པའི་བདག་ཉིད་བླ་མ་དང་འབྲེལ་པ་དེ་མ་ཐག་ཏུ་ལོངས་སྤྱོད་པའི་ཕྱིར་རོ། །སེམས་ཅན་ཁམས་ནི་དཔག་མེད་པ། །ཞེས་བྱ་བ་ལ་སོགས་པའི་དོན་ནི་འདི་ཡིན་ནོ། །དེ་ཉིད་གསུམ་དང་སྦྱིན་པ་སྤེལ། །ཞེས་བྱ་བའི་དོན་ནི་འབྱིན་པའི་སྔགས་དེ་ཁོ་ན་ཉིད་
གསུམ་དང་སྤེལ་བར་བྱ་སྟེ། ཨོཾ་ཨཱཿབཛྲ་དྷྲྀཀ་ཧཱུཾ། ཞེས་བྱ་བ་ལ་སོགས་པའོ། །སྙིང་པོའི་ས་བོན་ཡང་། ཡི་གེ་གསུམ་དང་སྤེལ་ན་སྔགས་སུ་འགྱུར་ཏེ། ཨོཾ་ཨཱཿབྲུཾ་ཧཱུཾ་ཞེས་བྱ་བ་ལ་སོགས་པའོ། །སྙིང་པོ་མི་ཤེས་པ་དག་ནི་མིང་གི་ཡི་གེའི་ནང་ན་གང་དང་པོ་ཡོད་པ་དེ་ཐིག་ལེ་དང་བཅས་
ནས་སྙིང་པོའི་ས་བོན་དུ་འགྱུར་ཏེ། དེ་བ་དཏྟཱ་ཞེས་བྱ་བ་ལ་དེ་ཞེས་བྱ་བ་ལ་སོགས་པའོ། །ཕྲེང་བའི་སྔགས་ཀྱང་ཡི་གེ་གསུམ་དང་སྤེལ་ན་སྔགས་ཞེས་བྱ་བའི་མིང་ཐོབ་སྟེ།ཨོཾ་ཨཱཿཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ནི་སརྦཱརྠ་སཱ་དྷ་ནཾ་སྭཱ་ཧཱ་ཧཱུཾ་ཞེས་བྱའོ་ཞེས་ལ་ལ་འདོད་དོ། །གཞན་དག་ནི་ཕྲེང་
བའི་སྔགས་རྣམས་ནི་སྒྲ་ཇི་བཞིན་དུ་བྱའོ་ཞེས་ཟེར་རོ། །རྒྱས་པ་ལ་སོགས་པའི་དུས་སུ་ནི་སྭཱ་ཧཱའི་གནས་སུ་ཨོཾ་ལ་སོགས་པར་འགྱུར་ཏེ། པུཥྚིཾ་ཀུ་རུ་ཨོཾ། ཤཱནྟིཾ་ཀུ་རུ་སྭཱ་ཧཱ། སིདྡྷི་མེ་བ་ཤིཾ་ཀུ་རུ་ཧོ། ཨཱ་ཀཪྵ་ཡ་ཛཿབཻ་དེ་ཤ་ཡ་ཧཱུཾ། ཨུཙྪ་ཊ་ཡ་ཕཊ། ཨུཙྪ་ཊ་ཡ་ཧཱུཾ། ཨུཙྪ་ཊ་ཡ་ཧཱུཾ་

44-1-249b

ཕཊ་ཅེས་བྱ་བ་གང་ཡང་རུང་བའོ། །མཱ་ར་ཡ་ཕཊ། དེ་སྐད་དུ་བརྗོད་པ་རྒྱས་པ་དང་ཞི་བ་ལ་སོགས་པ་ནི་སྔགས་ཀྱི་མཐའ་མར་བསྐུལ་བའི་ཚིག་གཞུག་པར་བཤད་པ་ནི་འདི་དག་གིས་བྱའོ་ཞེས་པའོ། །ཡང་ཞེས་བྱ་བའི་སྒྲས་ནི་མིང་ནང་དུ་ཆུད་པས་ཐོག་མ་དང་ཐ་མར་འདི་དག་སྤེལ་བར་
བྱའོ་ཞེས་ཕྱོགས་གཉིས་པ་སྟོན་པ་ཡིན་ཏེ། སྭཱ་ཧཱ་དེ་བ་དཏྟྭ་ཤཱནྟིཾ་ཀུ་རུ་སྭཱ་ཧཱ་ཞེས་བྱ་བ་ལ་སོགས་པ་རྒྱས་པའི་ལས་རྣམས་ལ་ཡང་ངོ་། །ཇི་ལྟ་བ་བཞིན་དུ་གནས་པའི་སྔགས་ཉིད་ལས་ཐམས་ཅད་བྱེད་དེ། པུཥྚིཾ་ཀུ་རུ་ཞེས་བྱ་བ་ལ་སོགས་པ་སྤེལ་བར་གཞན་དག་གོ། །ཡང་ཞི་བ་
ལ་སོགས་པ་བསྐུལ་བའི་དབང་གིས་ལས་གང་བྱེད་པར་གྱུར་པ་དེ་ནི་རིག་པ་ཞེས་བྱ་བ་སྟེ། ཨོཾ་ཨཱཿཛི་ན་ཛི་ཀ་ཆེ་གེ་མོ་ཤཱནྟིཾ་ཀུ་རུ་ཧཱུཾ། ཞེས་བྱ་བ་ལ་སོགས་པའོ། །ཕྲེང་བའི་སྔགས་ཀྱང་རིག་པ་ཞེས་བྱ་སྟེ། དེ་ལས་བཤད་པའི་ལས་རྣམས་བྱེད་པའོ་ཞེས་བྱ་བ་ལ་སོགས་པའོ། །རྡོ་རྗེ་གསལ་ཞེས་
བྱ་བ་ལ་སོགས་པ་ལ་རླུང་དང་ཆུ་དང་། དབང་ཆེན་དང་། མེའི་དཀྱིལ་འཁོར་ལ་སོགས་པའི་སྐུ་ལ་སོགས་པའི་ས་བོན་བསམ་པར་བྱའོ་ཞེས་ལ་ལ་ཟེར་རོ། །རྡོ་རྗེ་ཞེས་པ་ནི་མི་ཤིགས་པ་ཡིན་པས་ཟླ་བའི་དཀྱིལ་འཁོར་བཞིན་ནོ། །གསལ་བ་ཞེས་པ་ཡང་དེ་བཞིན་ནོ། །ཆོས་ཞེས་བྱ་བ་ཡང་རང་གི་
མཚན་ཉིད་འཛིན་པ་ཡིན་པས་ཟླ་བའི་གཟུགས་སོ། །དེར་འཁོར་ལོ་ཞེས་བྱ་བ་ནི་སྟན་དེར་ཡེ་ཤེས་སེམས་དཔའི་ས་བོན་གང་སྔར་གནས་པའི་ཟླ་བའི་གདན་ནམ་ཉི་མའི་གདན་ནོ། །དེ་སྐད་དུ་ལེའུ་བཅོ་བརྒྱད་པ་ལས་བཟླས་པ་ལ་ནི་སྤྲོ་བ་དང་། བསྡུ་ཞེས་བྱ་བ་ལ་སོགས་པ་ནས་དེ་ཉིད་
བསྐུལ་བར་སྨྲ་བའོ་ཞེས་བྱ་བའི་ཕྱིར་རོ། །སྣ་ཚོགས་ཞེས་པ་ནི་སྣ་ཚོགས་པའི་རང་བཞིན་ཡེ་ཤེས་སེམས་དཔའི་ས་བོན་ནོ། །དུས་གསུམ་ས་བོན་ནི་ཡི་གེ་གསུམ་དང་ལྷན་ཅིག་ཏུ་བཟླས་པའོ། །ལེའུ་བཅུ་གསུམ་པ་ལས་གསུངས་པ། དམ་ཚིག་དེ་ནི་རྡོ་རྗེ་གསུམ། །དབུ་མའི་དམ་ཚིག་རྡོ་རྗེ་ཅན། །
དེ་ཉིད་དམ་ཚིག་རྡོ་རྗེ་ཡི། །བཟླས་པ་མ་ནིང་ཞེས་བརྗོད་དོ། །རྡོ་རྗེ་གསུམ་ནི་སྐུ་དང་གསུང་དང་ཐུགས་རྣམས་སོ། །དམ་ཚིག་ཅེས་བྱ་བ་ནི་འདའ་བར་མི་བྱ་བའོ། །དེ་ཁོ་ན་ཉིད་ནི་ས་བོན་ཏེ། ཨོཾ་ཨཱཿཧཱུཾ་ཞེས་པའོ། །དམ་ཚིག་རྡོ་རྗེ་ཅན་རྣམས་ནི། །དམ་ཚིག་སེམས་དཔའི་དེ་ཁོ་ན་ཉིད་ཡིན་ལ། སྙིང་པོ་དང་

44-1-250a

འབྱིན་པ་དང་ཕྲེང་བའི་སྔགས་ཀྱང་དབུས་སུ་འགྱུར་ཏེ། ཨོཾ་ཨཱཿམཾ་ཧཱུཾ་ཞེས་པ་ལ་སོགས་པའོ། །དེ་ཉིད་ཅེས་པ་ནི་བརྗོད་མ་ཐག་པའི་ཆོ་ག་སྟེ། ལྷ་ཐམས་ཅད་ལ་ཡང་སྦྱར་བར་བྱའོ། །དེ་ལྟར་ཡང་བཤད་དོ། །ཡང་ན་གཞན་དུ་བཤད་པར་བྱ་སྟེ། རྒྱུད་ཀྱི་རྒྱལ་པོ་ཡང་ཡིད་བཞིན་གྱི་རིན་པོ་ཆེ་
ལྟ་བུ་ཡིན་པའི་ཕྱིར། དམ་ཚིག་རྡོ་རྗེ་གསུམ་ནི་སྐུ་དང་གསུང་དང་ཐུགས་དབྱེར་མེད་པའི་ལྷ་ལ་དམིགས་པའི་ངོ་བོའོ། །དེའི་དེ་ཉིད་ནི་དབྱེར་མི་ཕྱེད་པའི་ཤེས་རབ་ལྷ་མོའི་རྣམ་པར་ཡོངས་སུ་གྱུར་པའོ། །དེ་དག་གི་དབུས་སུ་ཡང་དག་པར་སྦྱོར་བ་ལས་བྱུང་བ་བདེ་བ་ཆེན་པོའོ། །དམ་ཚིག་རྡོ་རྗེའི་ཞེས་
པ་གཏི་མུག་གི་རིགས་ཀྱི་ལྷ་རྣམས་སོ། །དེ་སྐད་དུ་ཡང་གསུངས་པ། འདོད་ཆགས་སྐྱེས་པ་བུད་མེད་ནི། །ཞེ་སྡང་གཏི་མུག་གཉིས་སྤངས་པའོ། །ཞེས་སོ། །དེ་ཉིད་ཐུན་མོང་བ་ཉིད་དུ་བསྟན་པར་འདོད་ནས་གསུངས་པའོ། །དེ་ཉིད་ཅེས་པ་ནི་རྡོ་རྗེ་ཅན་ཐམས་ཅད་ཀྱི་རིགས་ཀྱི་ལྷ་རྣམས་སོ། །བུད་མེད་དང་
སྐྱེས་པའི་རྣམ་པར་རྟོག་པ་མེད་པས་མ་ནིང་གི་བཟླས་པ་ཞེས་སོ། །དེ་ལྟར་ཡེ་ཤེས་ཞབས་ཀྱིས་གསུངས་པ། རྒྱ་མཚོ་ཆུ་རུ་པད་ཆེན་པོ། །འོད་ཟེར་འབར་བས་ཡང་དག་འཁྲུག །དེ་རྣམས་རིག་མ་དང་ལྡན་པ། །རྨི་ལམ་ཡོངས་སུ་གསལ་བར་མཐོང་། །དེ་རུ་གང་དེ་སྐྱེ་འགྱུར་བ། །བརྫུན་དང་བདེན་པ་སྤངས་
པའོ། །འདི་ལྟར་ཆོས་རྣམས་ཐམས་ཅད་ཀྱི། །རང་བཞིན་རྟོགས་བྱ་མཁས་པ་ཡིས། །ཞེས་སོ། །ཕྱི་རོལ་དོན་མེད་ཀྱང་དཀར་པོ་དང་བདེ་བ་ལ་སོགས་པའི་རྣམ་པའི་ཤེས་པ་ལས་དཀར་པོ་དང་བདེ་བ་ལ་སོགས་པའི་རྣམ་པའི་ཤེས་པ་སྐྱེ་བར་འགྱུར་རོ། །བག་ཆགས་གཙོ་བོར་གྱུར་པ་སད་པ་ལས་རྨི་ལམ་ལ་སོགས་པ་བཞིན་ནོ། །
གང་རྣམ་འགྲེལ་ལས། གང་གི་ཅུང་ཟད་དེ་ཉིད་ནི། །གང་གི་བག་ཆགས་སད་བྱེད་ཡིན། །དེ་ལ་བློ་ནི་ངེས་པ་སྟེ། །ཕྱི་རོལ་དོན་ལ་ལྟོས་པ་ཡིན། །གང་ཞིག་གང་གི་རྣམ་པར་བསྒོས། །དེ་ནི་དེ་ཡི་རྣམ་པར་བསྐྱེད། །གང་དང་གང་གི་དངོས་པོ་ཡིས། །མི་རྣམས་ཡིད་ནི་ཡང་དག་སྦྱར། །དེ་རྣམས་དེ་ཡི་རང་བཞིན་འཐོབ། །ཇི་ལྟར་སྣ་ཚོགས་ནོར་བུ་
བཞིན། །ཞེས་བརྗོད་པའི་ཕྱིར་རོ། །དེ་ཡང་སྔོན་པོ་ལ་སོགས་པའི་རྣམ་པ་གང་གི་ཚེ་རྗེས་སུ་མཐུན་པའི་གཟུགས་དེས་རབ་ཏུ་སྣང་བ་ཡིན་ཏེ། དེའི་ཚེ་བདེ་བ་ལ་སོགས་པའི་ངོ་བོ་ཉིད་དུ་བརྗོད་དེ། རྗེས་སུ་འཛིན་པ་ལ་སོགས་པའི་ངོ་བོ་ཡིན་པའི་ཕྱིར་རོ། །ཐམས་ཅད་ཉིད་འཁོར་བར་འགྱུར་ཏེ་བདེ་བ་འདོད་པ་དང་སྡུག་བསྔལ་དང་བྲལ་བར་འདོད་པའི་

44-1-250b

ཕྱིར་རོ། །ལན་ནི་དེས་ན་འདི་རྣམས་མཆོག་ཏུ་དགའ་བའི་བདག་ཉིད་ཁོ་ནའི་ཁྱད་པར་དུ་འཕགས་པའི་རྣམ་པར་འགྱུར་ལ་དེ་ཡང་བསྒོམས་པའི་སྟོབས་ཀྱིས་གསལ་པོར་འགྱུར་རོ་ཞེས་ཏེ། བདེ་བའི་ངོ་བོ་སྔོན་པོ་ལ་སོགས་པའི་རྣམ་པར་ཤེས་པ་ནི་དེ་ཁོ་ན་ཉིད་དུ་འགྱུར་རོ་ཞེས་སོ། །དེ་སྐད་དུ་ཡེ་ཤེས་ཞབས་ཀྱིས་གསུངས་པ། 
ཤེས་རབ་ཐབས་ཀྱི་བདག་ཉིད་དྲི་མ་མེད་པ་ཡི། །ཏིང་འཛིན་ལས་བྱུང་དམ་པའི་བདེས་གང་བར། །འཁོར་ལོ་བསམས་ནས་ཞེས་པ་དང་། རྟོག་པ་ཀུན་ལས་ངེས་གྲོལ་མཆོག །བདེ་བའི་རྒྱུར་གྱུར་པ་རྣམས་ཀྱིས་ནི་ཞེས་ཀྱང་ངོ་། །འདིར་ཚིགས་སུ་བཅད་པ་རྣམས་སུ་འགྱུར་ཏེ། དཔལ་ལྡན་ཆོས་འབྱུང་ནང་གནས་པ། །ཇི་ལྟར་གཞལ་
ཡས་ཁང་བརྗོད་པར། །འདོད་པའི་ཡོན་ཏན་ལྔས་དབང་ཕྱུག །ཡིད་འོང་གནས་ནི་ཕུན་སུམ་ཚོགས། །བསྒོམས་ཏེ་རྒྱལ་བའི་སྙོམས་འཇུག་འདོད། །དགའ་བས་ཟབ་མོའི་ལས་གནས་པ། །དེ་ཡི་རྗེས་ལ་ཆེན་པོར་གྱུར་པ་དགོད་ལ་འདོད། །འཇིག་ཆགས་ཆེན་པོ་དང་ནི་འདྲ་བར་འགྱུར་བ་ཡིན། །དེ་དག་དེ་རུ་རྟོག་མེད་པ་དེ་ཐབས་
དང་བློ། །ཏིང་འཛིན་ཡང་དག་བྱུང་བས་རབ་ཏུ་བདེ་བས་གང་། །གང་ཞིག་བདེ་བ་ཆེན་པོ་སྐྱེས། །འདོད་པའི་ཡོན་ཏན་ལྔ་རང་བཞིན། །བསྒོམས་པའི་སྟོབས་ཀྱིས་གསལ་བ་ནི། །ཉིན་དང་མཚན་དུ་རྒྱུན་མི་ཆད། །དེ་ཤེས་རྟོགས་པའི་རང་བཞིན་ཕྱིར། །གསལ་བར་སྣང་བ་རྟོག་པ་མེད། །མ་དཔྱད་ཉམས་དགར་ཡོད་པ་སྟེ། །འདིར་ནི་བརྗོད་མེད་
རྟོག་བྲལ་བས། །སྔར་གྱི་གོམས་པའི་སྟོབས་ཀྱིས་ཀྱང་། །སྙིང་རྗེས་སྤྲོ་དང་བསྡུ་བ་ཡིན། །ལྷུན་གྱིས་གྲུབ་པས་སེམས་ཅན་དོན། །དེ་ཕྱིར་ཡིད་བཞིན་ནོར་བུ་བཞིན། །འཚེ་བ་མེད་དང་ཡང་དག་དོན། །ངོ་བོ་ཉིད་ལ་ཕྱིན་ལོག་གིས། །དབང་དུ་ཟིན་ཀྱང་མི་བཟློགས་ཏེ། །བློ་ནི་དེ་ཕྱོགས་འཛིན་ཕྱིར་རོ། །ཞེས་རིགས་པ་ལས་སོ། །དེ་ནི་རྟོག་པ་
མེད་པའི་ཆོས་ཡིན་ཏེ། །བུད་མེད་སྐྱེས་པའི་རྟོག་སྤངས་པ། །དེ་ནི་མ་ནིང་བཟླས་པ་ཡིན། །ཕྱི་རོལ་དགའ་བ་སྐད་ཅིག་སྟེ། །དཔེ་དང་བྲལ་བས་བརྗོད་པར་བྱ། །རྡོ་རྗེ་པདྨ་འདུས་པ་ལས། །ལས་ཀྱི་ཕྱག་རྒྱ་དང་ལྡན་པ། །གང་ཞིག་འདི་ནི་བསྒོམས་པ་ལས་སོ། །བདེན་པ་གསུངས་པས་མངོན་སུམ་བརྗོད། །དེ་ནི་ལས་དང་སེམས་ཅན་གྱི། །བྱང་ཆུབ་
སེམས་ནི་བསྟན་པ་ལ། །གང་ལ་ལས་ཀྱི་ཕྱག་རྒྱ་སྤངས། །གཞན་དུ་མཚོན་པ་ནུས་མ་ཡིན། །རྟོགས་པ་དང་པོའི་ལས་ཅན་གྱིས། །གཞན་དུ་རིགས་པ་མ་ཡིན་ནོ། །བཟང་པོའི་གནས་ལ་དེ་ནུས་པ། །ཐོག་མཐའ་བར་དུ་དྲི་མེད་ལ། །འདི་ལྟར་དེ་ནི་མཆོག་ཞི་བ། །ནམ་མཁའི་ཁམས་སུ་གྲགས་པར་གནས། །རྡོ་རྗེ་པདྨའི་སྦྱོར་བ་ནི། །ཡང་དག་

44-1-251a

རབ་སྦྱིན་ལས་ཀྱང་ཐོབ། །དང་པོའི་ལས་ཀྱི་སེམས་ཅན་རྣམས། །མཚོན་ཆ་ཡིད་ཆེས་བྱེད་པའོ། །རྡོ་རྗེ་ནམ་མཁའི་ཁམས་སྦྱོར་དང་། །རིག་པ་ལས་ཀྱང་རྨད་བྱུང་ཆེ། །གང་དེ་བདེ་བ་སྐྱེད་བྱེད་པ། །མཆོག་ཏུ་དགའ་བར་བྱེད་པ་པོ། །དེ་ཟད་པ་ལས་དགའ་བྲལ་ཏེ། །བྲལ་དགའ་མཐའ་ཡིན་དེ་ནི་མཆོག །རང་གི་ངོ་བོ་བསྟན་དུ་
མེད། །ཅུང་ཟད་དེ་རུ་སྐྱེ་འགྱུར་བ། །དབང་པོ་ཀུན་ལས་གྲོལ་བ་ཡིན། །རྩོད་མེད་མཆོག་ཏུ་ཞི་བ་པོ། །ཁྱབ་དང་དངོས་པོ་མེད་པ་ཡི། །དེ་ནི་བྱང་ཆུབ་གནས་མཆོག་གོ། །ཀུན་ཏུ་བཟང་པོར་གྲགས་པ་བཟང་། །བྲལ་དགའ་མཐའ་རུ་རྣམ་པར་གནས། །སྒྲུབ་པ་པོ་ཡི་མཆོག་གསང་སྟེ། །དེ་ནི་གྲོལ་བ་གནས་སུ་བསྒྲགས། །གཞན་དག་གི་བརྗོད་
པ་ནི་དགའ་བ་དང་། མཆོག་ཏུ་དགའ་བ་དང་། དགའ་བྲལ་དུ་གྲགས་པའི་སྐད་ཅིག་མ་གསུམ་རིམ་གྱིས་སྐྱེ་བར་འགྱུར་ཏེ། དགའ་བྲལ་གྱི་དབུས་སུ་དེ་བཞིན་གཤེགས་པ་དྲུག་པ་ནི་དེ་ཡིན་ནོ་ཞེས་སོ། །གཞན་དག་བརྗོད་པ་ནི་སྐད་ཅིག་མ་དང་། ཕྲ་བ་དང་རྟེན་དང་། དེ་བཞིན་དུ་རྣམ་པར་གནོན་པའི་མཐའ་དང་། ཆོས་ཐམས་
ཅད་གཏོད་པར་བྱེད་པ་ཞེས་པ་སྟེ། དགའ་བའི་སྐད་ཅིག་མའི་ངོ་བོ་ཞེས་སོ། །དེ་རྣམས་ལས་གཞན་པ་ནི་དགའ་བའི་སྐད་ཅིག་མ་སྟེ། དོན་དམ་པར་བརྗོད་དུ་མེད་པ་དང་། སྒྲས་ཀྱང་བརྗོད་དུ་མེད་པ་གང་ཡིན་པ་དེ་ནི་དེ་བཞིན་གཤེགས་པ་དྲུག་པའོ། །དགའ་བའི་སྐད་ཅིག་མ་འདི་རྣམས་ནི་ཕྲ་མོའི་རྣལ་འབྱོར་བསྒོམས་པས་བརྟན་པར་
བྱས་པའི་སེམས་རྣལ་འབྱོར་པ་བསྒོམ་པ་ལ་མངོན་པར་དགའ་བའི་བསྒོམས་པའི་སྟོབས་ཀྱིས་རང་གི་རིག་པའི་སྐད་ཅིག་མ་གསལ་བའི་རྣམ་པ་སྐྱེ་བར་འགྱུར་རོ་ཞེས་པ་ལ་སོགས་པའོ། །རིག་པའི་བརྟུལ་ཞུགས་ཀྱི་སྐབས་སུ་གསུངས་པ་ནི། པདྨར་རྡོ་རྗེ་སྦྱར་བྱས་ནས། །བྱང་ཆུབ་སེམས་ནི་གཏད་མི་བྱ། །བསྐྱེད་པར་བྱས་ནས་དགའ་
བ་དེ། །སེམས་ཀྱིས་གང་བྱས་བསྒོམ་པར་བྱ། །རྣལ་འབྱོར་པ་ཡི་བྱང་ཆུབ་སེམས། །ཇི་སྲིད་གཏོང་བར་མི་བྱེད་པ། །དེ་སྲིད་རྒྱུན་མི་འཆད་པ་ནི། །དགའ་བ་ཅུང་ཟད་འབྱུང་བ་བདེ། །དེ་ཉིད་དང་ལྡན་བདག་ཉིད་ནི། །བསྒོམས་པས་ངེས་པར་གྲོལ་བར་འགྱུར། །བྱང་ཆུབ་སེམས་ནི་ལྷུང་གྱུར་ན། །དངོས་གྲུབ་ཀུན་གྱི་གཏེར་གྱུར་པ། །
མ་སྨད་དངོས་གྲུབ་ཇི་ལྟར་འགྱུར། །ཕྱག་རྒྱ་ཆེན་པོར་ལྡན་པ་གང་། །བདེ་བ་ཆེན་པོ་མྱོང་བྱེད་པ། །ཡེ་ཤེས་བདུད་རྩི་དེ་ཉིད་མཆོག །དེ་ནི་སྨྲ་བར་ནུས་ཉིད་མིན། །གུས་པར་བསྒོམས་པས་གོ་བྱ་གང་། །རང་རིག་རང་གི་མཚན་ཉིད་ཡིན། །རྣམ་པ་ཀུན་གྱི་མཆོག་ལྡན་པ། །སྤྲོ་དང་བསྡུ་བ་མཛད་པ་པོ། །རྒྱུའི་གནས་སྐབས་སུ་མཆོག་ཏུ་

44-1-251b

དགའ་བའི་མཚན་ཉིད་ཀྱི་དཀྱིལ་འཁོར་གྱི་འཁོར་ལོའི་རྣམ་པའི་ཡེ་ཤེས་ལ་སྦྱང་བར་བྱ་སྟེ། འདིས་ཀྱང་དེའི་རང་བཞིན་ཉིད་ཀྱི་ངོ་བོར་གྱུར་པ་ནི་དགའ་བའི་རང་བཞིན་གྱི་བྱང་ཆུབ་ཏུ་བརྗོད་དོ། །དོན་དམ་པར་ནི་ཡུལ་དང་ལྷན་ཅིག་པའི་བདེ་བའི་སེམས་ལས་སྐྱེས་པའི་བདེ་བ་དག་སྲིད་པ་མ་ཡིན་ཏེ། དེའི་ཚེ་བདེ་བ་དང་བདེ་བ་མ་ཡིན་
པའི་རྣམ་པར་རྟོག་པ་མེད་པའི་ཕྱིར་རོ། །འོན་ཀྱང་ཇི་ལྟར་གོམས་པའི་སྟོབས་ཀྱིས་གསལ་བའི་རྣམ་པ་ནི་རང་རིག་པའི་མཐར་ཐུག་པ་སྦ་བར་ནུས་པ་མ་ཡིན་པའི་གསལ་བ་ཉིད་དོ་ཞེས་གཞན་དག་གོ། །མི་རྟོག་པ་ཉིད་ཀྱིས་དབང་པོའི་མངོན་སུམ་བཞིན་དུ་རྣལ་འབྱོར་གྱི་མངོན་སུམ་ཡིན་ནོ། །དེ་ཉིད་ཀྱི་ཕྱིར་གསུངས་པ། འཛིན་པ་
གཞན་ན་དེ་གཞན་མིན། །ཁྱོད་ཀྱང་དེ་བཞིན་ང་ཡང་གཞན། །ཀྱེ་སྙིང་ཁྱོད་ཀྱང་མཉམ་གྱུར་ན། །ང་ཡིན་ཞེས་ནི་སུ་ཡིས་ཤེས། །འདོད་ཆགས་མ་ཡིན་ཆགས་བྲལ་མིན། །དབུ་མར་དམིགས་པ་མ་ཡིན་ཏེ། །བུད་མེད་ཐམས་ཅད་རྒྱུ་ཕྱག་རྒྱ། །དམིགས་མེད་ཐེག་པ་བླ་ན་མེད། །ཅེས་སྡོམ་པ་ལས་སོ། །བདེ་བ་ཆེན་པོའི་རྗེས་སུ་
དམིགས་པའི་དཀྱིལ་འཁོར་གྱི་འཁོར་ལོ་སེམས་ཀྱིས་བསྒོམ་པར་བྱ་སྟེ། དེ་ཡང་མ་ནིང་གི་རྟགས་ཡིན་པས་མ་ནིང་གི་བཟླས་པར་བརྗོད་དོ། །དགའ་བྲལ་གྱི་ནི་དབུས་སུ་ནི། །གང་དུ་མཚོན་བྱ་རབ་ཏུ་གནས། །སྔོན་པོ་ལ་སོགས་རྣམ་བྲལ་བ། །བསྒོམ་པར་བྱ་བ་ཁ་ཅིག་གོ། །དབང་པོ་གཉིས་ཀྱིས་སྙོམས་པར་འཇུག །ལྷ་
རྣམས་དམིགས་པ་མེད་པ་ནི། །རྟེན་མེད་པ་ལ་བསྒོམ་པ་ནི། །ནུས་པར་མིན་ཞེས་གཞན་སྨྲའོ། །རེག་ལས་སྐྱེས་ཀྱི་དགའ་མཚུངས་པ། །བདེ་དང་བསྒྲུབ་པ་ཟག་པ་མེད། །ཇི་ལྟར་གཞན་ཡང་རྒྱུ་ལས་ནི། །དེ་འདྲའི་འབྲས་བུ་ཇི་ལྟར་འདོད། །ཅེས་སོ། །ཏིང་ངེ་འཛིན་གསུམ་གྱི་སྦྱོར་བ་དང་ལྡན་པས། ཇི་སྐད་བཤད་པའི་ཆོ་ག་ཡིས། །ཐུན་
མཚམས་བཞིར་བྱིན་གྱིས་རློབ་པ་ལ་བརྩོན་པ། དམ་ཚིག་དང་སྡོམ་པ་ལ་གནས་ཏེ། མཚན་མ་ཐོབ་ནས་ཟླ་བ་དྲུག་ཏུ་བསྒོམ་པར་བྱའོ། །དེ་ལྟ་ན་ཡང་འདོད་པའི་ལྷ་མ་གྲུབ་ན་སླར་ཡང་ཆོ་ག་མ་ཚང་བ་མེད་པས། དམ་ཚིག་ལ་སོགས་པ་ལ་གནས་ཏེ་སླར་ཡང་ཟླ་བ་བཅོ་བརྒྱད་ཀྱི་བར་དུ་བསྒོམ་པར་བྱའོ། །དེ་ལྟ་ན་ཡང་གལ་ཏེ་མ་
གྲུབ་ན་ཐུན་མཚམས་ཀྱི་མཐར་དྲག་པོའི་སྦྱོར་བ་བརྩམ་པར་བྱའོ། །གང་རྣམ་པར་སྣང་མཛད་ཀྱི་རྣལ་འབྱོར་པ་ཁ་དོག་ནག་པོ་དང་ལྡན་པ་སྦྱངས་པའི་ཤེས་རབ་མ་དང་ལྷན་ཅིག་གཉིས་སུ་མེད་པའི་སྦྱོར་བ་དང་ལྡན་པས་དཀྱིལ་འཁོར་བ་དང་ཟླ་བའི་དཀྱིལ་འཁོར་ལ་སོགས་པ་དང་། གཞལ་ཡས་ཁང་ཡང་མངོན་

44-1-252a

སྤྱོད་ཀྱི་ཆོ་ག་བཞིན་དུ་ནག་པོར་བསྒོམས་ཏེ་མཆོད་པ་དང་། བསྟོད་པ་དང་བདུད་རྩི་མྱང་བ་བྱས་ནས་དེའི་རྗེས་ལ་རང་གི་སྙིང་གའི་ས་བོན་གྱིས་དེ་བཞིན་གཤེགས་པའི་ཚོགས་བཀུག་སྟེ། ཤེས་རབ་དང་ཐབས་ཀྱི་སྦྱོར་བས་ཆུ་སྐྱེས་སུ་ཕབ་ནས་ཇི་ལྟར་བསྒོམ་པའི་གཟུགས་ཀྱིས་དཀྱིལ་འཁོར་གྱི་རྣམ་པར་མེའི་
དཀྱིལ་འཁོར་ལ་འཇིགས་ཤིང་འདར་བ་དང་ལྡན་པ་བལྟ་བར་བྱའོ། །དེ་ནས་སྙིང་གའི་ས་བོན་གྱི་འོད་ཟེར་འབར་བས། དེ་བཞིན་གཤེགས་པའི་ཚོགས་བཀུག་སྟེ། ཤེས་རབ་དང་ཐབས་ཀྱི་སྦྱོར་བ་དང་ལྡན་པས་ཞུ་བར་གྱུར་པ་རྡོ་རྗེའི་ལམ་ནས་ཕྱུང་སྟེ། གཤིན་རྗེ་མཐར་བྱེད་ཀྱི་ཕུར་པའི་གཟུགས་སུ་བྱས་ལ། དེ་བཞིན་དུ་
གཞན་དག་གི་བདག་པོ་ཁ་དོག་ནག་པོ་ཁྲོས་པ་རྡོ་རྗེ་ནས་ཕྱུང་སྟེ། ཕྱག་གཡོན་པས་སྐེ་ནས་བཟུང་ནས་ཕྱུང་བའི་ཕུར་པའི་མགོ་བོར་བརྡུངས་པ་ནི་གཡས་པའི་ཕྱག་གི་རྡོ་རྗེ་ཐོ་བས་གདབ་པར་བྱ་སྟེ། བསྒྱིངས་པ་དང་བཅས་པས་སྔགས་ཟློས་ཤིང་ངོ་། །ཨོཾ་ཨཱཿཚིནྡ་ཚིནྡ། ཧ་ན་ཧ་ན། ད་ཧ་ད་ཧ་དྷི་པ་ཏི་ཙཀྲ་བཻ་རོ་ཙ་ན་བཛྲ་ཀཱི་ལ་
ཡ་ཧཱུཾ་ཕཊ་ཅེས་པའོ། །ཕུར་བུ་དེ་ཡང་རྡོ་རྗེས་མནན་པ་དང་ལྡན་པར་བལྟ་བར་བྱ་སྟེ། དེ་དངོས་གྲུབ་ཏུ་འགྱུར་རོ། །དེ་ནས་ཨོཾ་ཨཱཿབཛྲོད་ཀཱི་ལ་ཡ་ཧཱུཾ་ཞེས་སྔགས་བརྗོད་པས་ཕུར་པ་དབྱུང་བར་བྱའོ། །དེ་ནས་རང་གི་ཁ་དོག་གིས་གནས་ཏེ་རང་གི་ས་བོན་གྱིས་བསྐུལ་བའི་སྤྱན་ལ་སོགས་པ་རྣམས་ཀྱིས་ཨོཾ་རུ་རུ་སྥུ་རུ་ཞེས་བྱ་བ་ལ་
སོགས་པའི་སྔགས་བརྗོད་ཅིང་ཕུར་པས་བཏབ་པའི་དཀྱིལ་འཁོར་གྱི་འཁོར་ལོ་ལ་དབང་བསྐུར་བ་སྦྱིན་པར་བྱའོ། །འདིའི་རྗེས་སུ་འབྲངས་པས་དེའི་རིགས་རྣམས་ཀྱིས་དྲག་པོའི་སྒྲུབ་པའི་ཐབས་བལྟ་བར་བྱའོ། །རྣམ་པར་སྣང་མཛད་ཀྱི་རིགས་ཀྱི་དྲག་པོའི་བསྒྲུབ་པའོ། །དེ་བཞིན་དུ་ཁ་དོག་ནག་པོ་སྣང་བ་མཐའ་ཡས་ཀྱི་དཀྱིལ་
འཁོར་བའི་ལྷ་རྣམས་དང་། ཟླ་བའི་གདན་དང་གཞལ་ཡས་ཁང་ལ་སོགས་པ་རྣམས་ལྷན་ཅིག་ཏུ་བསྒོམས་ཏེ། པདྨ་མཐར་བྱེད་ཁ་དོག་དམར་པོའི་ཕུར་པས་གདབ་པར་བྱ་སྟེ། ཨོཾ་ཨཱཿཧྲི་བྷུར་བྷུ་བཿཨ་མྲྀ་ཏཱ་བྷཾ་ཀཱི་ལ་ཡ་དེའི་རིགས་ཀྱི་ལྷ་རྣམས་ཀྱི་ཡང་རུང་སྟེ། ཧཱུཾ་ཕཊ་འོད་དཔག་ཏུ་མེད་པ་དང་དེའི་རིགས་ཀྱི་ལྷ་རྣམས་ཀྱི་
དྲག་པོའི་སྒྲུབ་ཐབས་སོ། །མི་བསྐྱོད་པ་དང་རིན་ཆེན་འབྱུང་ལྡན་དང་། དོན་ཡོད་གྲུབ་པའི་སྦྱོར་བ་ཡིས། ཁ་དོག་ནག་པོར་དཀྱིལ་འཁོར་དང་བཅས་པར་བསྒོམས་ནས་འདི་རྣམས་ཀྱི་རིགས་དང་བདུད་རྩི་འཁྱིལ་པའི་ཕུར་བ་སྔགས་འདིས་གདབ་པར་བྱ་སྟེ། ཨོཾ་ཨཱཿབཛྲ་རཱ་ཛ་ཨ་ཀྵི་བྱ་ཀཱི་ལ་ཡ་དེའི་རིགས་ཀྱི་ལྷ་རྣམས་

44-1-252b

ཀྱང་རུང་། ཧཱུཾ་ཕཊ་མི་བསྐྱོད་པ་དང་། རིན་ཆེན་འབྱུང་ལྡན་དང་དོན་ཡོད་གྲུབ་པའི་དྲག་པོའི་སྒྲུབ་ཐབས་སོ། །གདབ་པར་བྱ་བ་དང་ཕུར་བུ་དང་འདེབས་པར་བྱེད་པ་འདི་དག་ཐམས་ཅད་ལ་མངོན་པར་ཞེན་པ་མེད་པས་བྱ་སྟེ། གཞན་དུ་ན་འགྲུབ་པར་མི་འགྱུར་རོ། །དྲག་པོའི་སྒྲུབ་པའི་དུས་སུ་དེ་བཞིན་གཤེགས་པ་རྣམས་ཀྱི་དབུ་རྒྱན་དུ་རྡོ་
རྗེ་སེམས་དཔའ་བསྒོམ་པར་བྱའོ། །གནོད་མཛེས་རྒྱལ་པོ་ཡང་དེ་བཞིན་གཤེགས་པ་རྣམས་ཀྱི་དབུ་རྒྱན་གཉིས་པར་བསྒོམ། ཡང་ན་རྡོ་རྗེ་འཛིན་པ་སངས་རྒྱས་རྣམས་ཀྱི་གནས་ལྔ་རྣམས་སུ་བསྒོམ་པར་བྱ་སྟེ། སྤྱི་བོ་དང་ལྐོག་མ་དང་ཐུགས་ཀ་དང་ལྟེ་བ་གསུམ་འདུས་གསང་བ་རྣམས་སུའོ། །དེ་ནས་རྣལ་འབྱོར་དམ་
ཚིག་མཆོག །ཅེས་བྱ་བ་ལ་སོགས་པ་ནས། འཁོར་ལོ་ཡང་དག་ལེགས་བྲིས་ལ། །སྔར་ཞེས་བྱ་བ་ལ་སོགས་པའི་གཞུང་གི་དོན་ནི་འདི་ཡིན་ཏེ། ཚོན་རྩི་དགྱེ་བ་དང་། མཚན་མ་དགོད་པ་ལ་སོགས་པ་རྫོགས་པ་དང་། རྡོ་རྗེ་ར་བ་དང་། འོད་ཀྱིས་བསྐོར་བའི་ཕྱི་རོལ་དུ་དཀྱིལ་འཁོར་གྱི་ཁང་པའི་ས་གཞི་བའི་ལྕི་བས་བྱུགས་ལ་སྤོས་
ཆུས་ཆག་ཆག་བཏབ་སྟེ། མེ་ཏོག་གི་སིལ་མ་གཏོར་ལ་བུམ་པ་རྣམས་གཞན་དུ་བཞག་སྟེ། བླ་རེས་ལ་སོགས་པ་བྲེ་བ་དང་། མཆོད་པ་རྣམ་པ་ལྔ་དང་། ཕྱི་ནང་གི་མཆོད་པས་རྒྱ་ཆེར་མཆོད་པར་བྱའོ། །དེའི་ཆོ་ག་ནི་འདི་ཡིན་ཏེ། ཤར་ཕྱོགས་ཀྱི་སྒོར་སྟན་ཤིན་ཏུ་བཟང་པོ་ལ་སློབ་དཔོན་ཤིན་ཏུ་ཁྲུས་བྱས་པ་ཡན་ལག་དྲིས་
བྱུགས་པ་ཕྲེང་བ་དང་གོས་ཀྱིས་བརྒྱན་པ་ལྷ་ལ་མངོན་པར་ཕྱོགས་ནས་འདུག་སྟེ། ལོ་བཅུ་གཉིས་ལོན་པ་རྒྱུད་ལས་བཤད་པའི་མཚན་ཉིད་དང་ལྡན་པའི་ཕྱི་རོལ་གྱི་བུད་མེད་ཡོད་པར་གྱུར་ན་དེ་དང་ལྷན་ཅིག་སྙོམས་པར་ཞུགས་ལ། ཏིང་ངེ་འཛིན་གསུམ་གྱི་སྦྱོར་བ་དང་ལྡན་པས་དཀྱིལ་འཁོར་བསྒྲུབ་པར་བྱའོ། །དེའི་རིམ་པ་ནི་འདི་
ཡིན་ཏེ་རྡུལ་ཚོན་གྱི་དཀྱིལ་འཁོར་བསྒྲུབ་པ་ལ་སྒྲུབ་ཐབས་ཀྱི་ཆོ་གའི་རིམ་པས་དང་པོའི་སྦྱོར་བ་ཇི་ལྟ་བ་བཞིན་དུ་བྱས་ལ། དེ་ནས་རང་འོད་ཀྱི་ཆུ་སྐྱེས་སུ་ཡིད་ཀྱིས་གཞལ་ཡས་ཁང་བསྐྱེད་ནས་སྙིང་པོ་འོད་ཀྱིས་དྲངས་པའི་དེ་བཞིན་གཤེགས་པའི་ཚོགས་རང་གི་ལུས་ལ་བཅུག་སྟེ། ཞུ་བར་གྱུར་པའི་རྡོ་རྗེ་ལམ་ནས་བཏོན་ཏེ། 
སྤྲུལ་པའི་གཞལ་ཡས་ཁང་ན་གནས་པའི་སྣ་ཚོགས་པདྨ་ལ་གནས་པའི་ཟླ་བ་དང་ཉི་མ་ལ་གནས་པའི་གདན་བཅུ་དགུ་ལ་རང་གི་རིགས་ཀྱི་མདོག་དང་ལྡན་པའི་བྱང་ཆུབ་ཀྱི་སེམས་ཀྱི་ཐིག་ལེའི་གཟུགས་སུ་བསམས་ལ་དེ་ཡོངས་སུ་གྱུར་པ་ལས་འཁོར་ལོའི་གཙོ་བོའི་ས་བོན་ལས་བྱུང་བའི་ལྷ་བཅུ་དགུའི་བདག་ཉིད་ཇི་སྐད་དུ་བཤད་པའི་

44-1-253a

དཀྱིལ་འཁོར་བསམས་ནས་དེར་སློབ་མ་འཇུག་པའི་ཆོ་གས་ཞུགས་ཏེ། དབང་བསྐུར་བ་ཐམས་ཅད་ཐོབ་པའི་འོག་ཏུ་རྗེས་སུ་གནང་བ་ཐོབ་ནས་ཇི་ལྟ་བ་བཞིན་དུ་ཕྱུང་སྟེ་རང་གི་མཚན་མ་ཇི་ལྟ་བའི་གནས་སུ་བཞག་ནས་རྡོ་རྗེ་དང་ཆུ་སྐྱེས་བསྐྱོད་པའི་ཕཊ་ཀྱི་སྒྲས་ཡེ་ཤེས་ཀྱི་དཀྱིལ་འཁོར་བཀུག་ལ། དཀྱིལ་འཁོར་གྱི་
འཁོར་ལོའི་ངོས་ལ་བཞག་ཅིང་འཁོར་ལོ་ཅན་དང་ལྷན་ཅིག་འོངས་པའི་བགེགས་རྣམས་གཤིན་རྗེ་གཤེད་ལ་སོགས་པའི་སྦྱོར་བས་བསྐྲད་ལ་རྡོ་རྗེ་ར་བ་ཁ་གྱེས་པའི་མཚམས་ཡིད་ཀྱིས་སྐད་ཅིག་ཙམ་གྱིས་བརྟན་པར་གྱུར་པར་བལྟའོ། །དེ་ནས་ཨོཾ་ཨཱཿམཾ་པྲ་བཱ་ར་སངྐཱ་ར་པྲ་ཏཱིཙྪ་ཧཱུཾ་ཞེས་པ་འདི་ཡིས་དེ་ལ་ཨརྒྷ་དབུལ་བར་
བྱའོ། །ཨོཾ་ཨཱཿམཾ་པ་ཏྱ་པྲ་ཏཱིཙྪ་ཧཱུཾ་ཞེས་བྱ་བ་འདིས་ཞབས་བསིལ་དབུལ་ལོ། །དེ་ནས་སྤྱན་མ་ལ་སོགས་པ་སྤྲོས་པས་མཆོད་ནས་མི་བསྐྱོད་པ་ནི་ཞེས་བྱ་བ་ལ་སོགས་པས་བསྟོད་ལ་སྒོ་བ་རྣམས་ཀྱིས་སྒོའི་བྱ་བའོ། །ཨོཾ་ཨཱཿཡ་མནྟ་ཀྲྀཏྟ་ཛྙཱ་ན་མཎྜལ་ཨ་ཀཪྵ་ཡ་ཛཿཧཱུཾ་ཞེས་བརྗོད་པ་དང་མདུན་ན་གནས་པའི་འཁོར་ལོ་
གཤིན་རྗེ་གཤེད་ཀྱི་འོད་ཟེར་གྱིས་དགུག་པར་བྱའོ། །ཨོཾ་ཨཱཿཔྲཛྙཱནྟ་ཀྲྀཏྟ་ཛྷཱ་ན་མཎྜ་ལ་པྲ་བེ་ཤ་ཡ་ཧཱུཾ་ཧཱུཾ་ཞེས་བྱ་བས་དམ་ཚིག་གི་དཀྱིལ་འཁོར་ལ་ཡེ་ཤེས་ཀྱི་དཀྱིལ་འཁོར་གཞུག་པར་བྱའོ། །ཨོཾ་ཨཱཿཔདྨཱནྟ་ཀྲྀཏྟ་ཛཱ་ན་མཎྜ་ལ་བྷནྡ་ཡཾ་བཾ་ཧཱུཾ་ཞེས་པས་དམ་ཚིག་གི་དཀྱིལ་འཁོར་ལ་ཡེ་ཤེས་ཀྱི་དཀྱིལ་འཁོར་
བཅིང་བར་བྱའོ། །ཨོཾ་ཨཱཿབིགྷྣཱནྟ་ཀྲྀཏྟ་ཛྙ་ན་མཎྜ་ལ་ཏོ་ཥ་ཡ་ཧོཿཧཱུཾ་ཞེས་བྱ་བས་བདུད་རྩི་འཁྱིལ་པའི་འོད་ཟེར་རྣམས་ཀྱིས་དཀྱིལ་འཁོར་པ་དངོས་གྲུབ་སྟེར་བ་ལ་མངོན་དུ་ཕྱོགས་པར་བྱའོ། །ཡེ་ཤེས་ཀྱི་དཀྱིལ་འཁོར་དང་ལྷན་ཅིག་དམ་ཚིག་གི་དཀྱིལ་འཁོར་གཅིག་ཏུ་བྱས་ཏེ། ཡེ་ཤེས་སེམས་
དཔའ་ཡང་དཀྱིལ་འཁོར་གྱི་བདག་པོར་འགྱུར་ཏེ་འདི་ནི་ཆེན་པོའི་བསྙེན་པའོ། །རང་འོད་ཀྱི་ལྷ་མོའི་སྙིང་གའི་ཡེ་ཤེས་སེམས་མ་ནི་བདག་པོ་མེད་པ་ཡིན་ནོ། །ཆེན་པོའི་ཉེ་བར་སྒྲུབ་པ་དང་། སྒྲུབ་པ་དང་སྒྲུབ་པ་ཆེན་པོ་དང་ལྡན་པའི་དཀྱིལ་འཁོར་ཡང་དག་པར་མཆོད་ནས་མེ་ཏོག་དང་། བདུག་པ་དང་།མར་མེ་དང་། ཕྲེང་བ་དང་།
བྱུག་པ་དང་། ཕྱི་མ་དང་། ཆོས་གོས་དང་། གདུགས་དང་རྒྱལ་མཚན་དང་། བ་དན་དང་། བླ་རེས་དང་། རྔ་ཡབ་ལ་སོགས་པ་དང་། བཟའ་བ་དང་། བཅའ་བ་དང་། བལྡག་པ་དང་། གཞིབ་པ་དང་། བཏུང་བ་ལ་སོགས་པའི་གཏོར་མའི་ཉེ་བར་སྤྱོད་པ་དང་། གླུ་དང་ཉེ་བར་སྤྱོད་པ་དང་། གླུ་དང་གར་དང་རོལ་མོ་དང་རྒྱན་དང་རང་གིས་བརྟགས་པའི་གླང་པོ་

44-1-253b

ཆེ་དང་། རྟ་དང་བ་ལང་གི་ཁྱུ་ལ་སོགས་པ་བསྟབས་ཏེ་དྲིལ་བུ་དཀྲོལ་ཞིང་མི་བསྐྱོད་རྡོ་རྗེ་ཞེས་བྱ་བ་ལ་སོགས་པའི་ཚིགས་སུ་བཅད་པ་རྣམས་ཀྱིས་བསྟོད་པ་བྱའོ། །སྒོ་སྐྱོང་བཞི་ཡིས་ཀྱང་བརྗོད་མ་ཐག་པའི་དཀྱིལ་འཁོར་སྒྲུབ་པའི་ཆོ་ག་དང་། དྲིལ་བུ་དཀྲོལ་ཞིང་བསྟོད་པ་ལ་ཐུག་པ་
ཐམས་ཅད་ཉམས་སུ་བླང་བར་བྱའོ། །ཕྱི་ནས་ལས་ཀྱི་ཕྱག་རྒྱའི་ཆུ་སྐྱེས་ལ་གནས་པ་རང་གི་ཁས་མེ་ཏོག་དང་བཅས་པའི་རང་གི་སེམས་ལས་བྱུང་བ་བླངས་ཏེ་རང་གི་རྡོ་རྗེ་ལ་གནས་པ་ཡང་རིག་པའི་ཁ་ཡིས་བླངས་ནས་ཙནྡན་བཟང་པོ་ལ་སོགས་པ་དང་ལྡན་པའི་པདྨའི་སྣོད་དུ་
བླུགས་པའི་ཡེ་ཤེས་ཀྱི་བདུད་རྩི་བསྐྱེད་པ་ལ་མཆོད་པའི་དོན་དུ་དབུལ་བར་བྱའོ། །མགོན་པོ་རྣམས་དང་རང་ཉིད་ཀྱིས་སྤྲུལ་པ་ལ་ཡང་ཕྱག་བྱ་སྟེ། བཟོད་པར་གསོལ་ནས་དངོས་གྲུབ་ཐམས་ཅད་ཀྱི་རྗེས་སུ་སེམས་ཅན་གྱི་དོན་མཛོད་ཅིག་ཅེས་གསོལ་བ་བཏབ་ནས་སྒྲུབ་
པའི་གྲོགས་མཆོག་དཀྱིལ་འཁོར་དུ་བཞག་སྟེ། ཕྱིར་བྱུང་ལ་གཏོར་མ་བཏང་ནས་འདི་སྐད་བརྗོད་པའི་རིམ་གྱིས་སློབ་མ་གཞུག་པའི་ཆོ་གས་སློབ་དཔོན་ཉིད་འཇུག་པར་བྱའོ། །སླར་ཡང་། བཟང་པོ་ཞབས་ཀྱིས་བརྗོད་པའི་དོན། །སྒོ་རྣམས་ཀུན་དུ་ཤེས་བྱས་
ལ། །རང་གི་འཁོར་ལོར་རབ་གསལ་བར། །ཞེས་པ་ལ་སོགས་པའི་དོན་ཡིན་ནོ། །ཕྱི་རོལ་གྱི་རིག་མ་མེད་ན་ཡང་འདི་ཁོ་ན་ལྟར་དཀྱིལ་འཁོར་བསྒྲུབ་པར་བྱའོ། །སྔགས་བཏུ་བ་དང་གཏོར་མ་བསྲུང་། །ཕུར་བུས་གདབ་དང་འཁོར་ལོ་
སྒྲུབ། །ཁ་སྦྱར་དབྱེ་དང་དབང་བསྐུར་བཟླས། །ཕྱིར་བཟློག་པ་ནི་གཉིས་སུ་གྲགས། །གང་ཡང་བདག་བློ་གཏི་མུག་པས། །ལེགས་སྤྱད་འདི་ལ་ཉེས་བྱས་གང་། །གང་ཕྱིར་ལུས་ཅན་སྐྱབས་གྱུར་པ། །དེ་ནི་མགོན་པོས་བཟོད་པར་མཛོད། །གཙོ་བོ་ནུས་པ་མ་
མཆིས་ཤིང་། །མ་རྙེད་པ་དང་མ་འབྱོར་པ། །འདིར་ནི་བྱ་བ་གང་བྱས་རྣམས། །དེ་དག་ཐམས་ཅད་བཟོད་པར་མཛོད། །དེ་ཁོ་ན་ཉིད་བཅུ་པ་སློབ་དཔོན་རྒྱན་པས་མཛད་པ་རྫོགས་སོ།།      །།བོད་ཀྱི་ལོ་ཙཱ་བ་དགེ་སློང་དར་མ་གྲགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །།

44-1-254a

༄༅༅། །རྒྱ་གར་སྐད་དུ། པྲ་ཏིཥྛ་བི་དྷིཿ། བོད་སྐད་དུ། རབ་ཏུ་གནས་པའི་ཆོ་ག །དཔལ་འཇམ་པའི་རྡོ་རྗེ་ལ་ཕྱག་འཚལ་ལོ། །མི་གནས་མྱ་ངན་འདས་པ་པོ། །ཐོག་མ་ཐ་མ་མེད་པའི་མཆོག །རྡོ་རྗེ་འཛིན་ཆེན་ཕྱག་འཚལ་ནས། །སྤྱན་དབྱེའི་ཆོ་ག་བཤད་པར་བྱ། །སྙིང་པོའི་
ཞལ་སྔ་སོགས་མཁྱེན་པའི། །དེ་བཞིན་བློ་ཡི་དོན་མཆོག་རྣམས། །མང་པོ་ཡིས་ནི་བསྔགས་པའི་ཕྱིར། །དཔལ་ལྡན་འདུས་དང་རྗེས་མཐུན་པའི། །གང་དུ་སྐུ་གཟུགས་བྱས་ཟིན་པ། །མ་མཆོད་ཡུན་རིང་རབ་བཞག་པ། །དེ་སྲིད་གཞག་པར་མི་ཤེས་པས། །ཇི་སྲིད་མ་མཆོད་ལེགས་
མི་འགྱུར། །གང་དུ་རབ་གནས་མ་བྱས་པ། །ཕྱག་འཚལ་མཆོད་པ་དེ་བཞིན་དུ། །གསང་སྔགས་དམན་པའི་སྦྱིན་སྲེག་ནི། །སྦྱིན་སྲེག་འབྲས་བུ་མེད་པར་འགྱུར། །ནམ་མཁའི་དབྱིངས་དང་མཉམ་འཇུག་རྗེས་འགྲོ་རབ་གནས་པ། །དེ་བཞིན་ཆོས་དང་བདེ་གཤེགས་གླེགས་བམ་རྡོ་རྗེ་དྲིལ། །
མགོན་པོ་དོན་དམ་འདི་དག་མི་ཤེས་འཇིག་རྟེན་རྣམས། །འཇིག་རྟེན་ཕན་པར་འདོད་པ་རབ་གནས་བྱེད་པར་འགྱུར། །སློབ་དཔོན་མཚན་དང་ལྡན་པ་དང་། །བསྟན་བཅོས་ཀུན་ལ་འཇིགས་མེད་པ། །ཆོ་ག་བཞིན་དུ་རྗེས་གནང་བ། །ཆུ་སོགས་སྔོན་དུ་འགྲོ་བ་ཡི། །ཤེས་རབ་ཡེ་ཤེས་དབང་
བསྐུར་བས། །སློབ་དཔོན་རང་གིས་དབང་བསྐུར་ཏེ། །དཀྱིལ་འཁོར་ལེགས་པར་བྲི་བར་བྱ། །རྒྱུད་དང་གསང་སྔགས་ཆོ་ག་ཤེས། །དཀྱིལ་འཁོར་ཏིང་འཛིན་ཕྱག་རྒྱ་དང་། །སྟང་སྟབས་འདུག་སྟངས་སྦྱིན་སྲེག་དང་། །སྔགས་དང་བཟླས་བརྗོད་མཆོད་པའི་ལས། །དགོད་པ་དང་ནི་བསྡུ་བ་
སྟེ། །དེ་ཉིད་བཅུ་པོ་ཤེས་པ་ཡིས། །ལྷ་ཁང་མཆོད་རྟེན་དམ་ཆོས་ཀྱི། གླེགས་བམ་སྐུ་གཟུགས་རས་རིས་སོགས། །བྱས་ཟིན་མཚན་དང་ལྡན་པ་དག །ཆ་བཞིན་གསལ་ཏེ་མཛེས་པ་དག །མཚན་དེ་ངེས་པར་ཤེས་པ་ཡིས། །རབ་གནས་བྱ་བར་རིགས་པ་ཡིན། །བསོད་ནམས་སྤེལ་བར་བྱ་བའི་
ཕྱིར། །དད་པས་ཇི་ལྟར་ཆོ་ག་བཞིན། །ཆོ་ག་དམན་པས་མི་བྱ་སྟེ། །རབ་གནས་རྟག་ཏུ་སྨད་པས་ན། །ཚེ་འདིར་སྡུག་བསྔལ་ཆེན་པོ་དང་། །ཕ་རོལ་དུ་ཡང་འཇིགས་པ་ཆེ། །དེ་ལྟར་ཀུན་དུ་འབད་པ་ཡིས། །གྲུབ་པར་འདོད་པས་བྱ་བ་ཡིན། །བྱ་བ་རང་གིས་ནུས་པ་ཡིས། །ཆོ་ག་བཞིན་དུ་ཀུན་

44-1-254b

རྫོགས་བྱ། །དེ་ལྟར་བྱས་ནས་བསོད་ནམས་ཆེ། །མཐོང་དང་མ་མཐོང་ཀུན་དུ་སྐྱེ། །ལྷ་ཡི་བདག་ཉིད་ཆེན་པོ་ཡང་། །བྱིན་གྱིས་རློབ་ཅིང་ཉེ་བར་འགྱུར། །དེ་ལ་དད་པ་དང་བས་གསོལ། །སློབ་མས་ལན་གྲངས་ཁྱད་པར་དུ། །ཉི་མ་སྐར་མ་བཟང་པོ་དང་། །གཟའ་དང་འབྱོར་པ་ལྡན་པ་ལ། །
ཤིན་ཏུ་སར་པའི་གོས་གྱོན་ཅིང་། །དྲི་དང་བདུག་པས་རབ་བསྒོས་ཏེ། །ཐམས་ཅད་རྒྱན་གྱིས་ཡན་ལག་མཛེས། །དྲི་ཞིམ་མེ་ཏོག་གིས་མཆོད་ནས། །ལག་ན་རྡོ་རྗེ་དྲིལ་ཐོགས་ནས། །སློབ་མ་དང་བཅས་མཆོད་པར་བྱ། །གདུགས་དང་རྒྱལ་མཚན་བ་དན་སོགས། །བླ་རེ་རྒྱ་ཆེར་བྲི་བར་བྱ། །བུམ་
པ་གང་སོགས་དེ་བཞིན་གཞག །བཀྲ་ཤིས་རྫས་ཀྱིས་བརྒྱན་པ་དང་། །པི་ཝང་གླིང་བུ་རྫ་རྔ་སོགས། །གླུ་དང་གར་དང་དགའ་སྟོན་ཆེ། །སྣ་ཚོགས་མེ་ཏོག་རྒྱ་ཆེར་བཀྲམ། །ཙནྡན་ཨ་ཀ་རུ་ཡིས་བདུག །དྲི་ཞིམ་ཙནྡན་བཟང་པོས་བྱུག །བདུད་རྩི་འཁྱིལ་པས་བསྲུང་བར་བྱ། །ཁྲུ་བཞི་
པ་ལ་གྲུ་བཞི་པ། །དཔངས་སུ་དེ་ཡི་ཕྱེད་དུ་བྱ། །རབ་ཏུ་དབེན་ཞིང་ཡིད་དགའ་བ། །མཛེས་པའི་ཀ་བས་བརྒྱན་པ་ཡི། །གནས་སུ་འབད་པས་རབ་ཞུགས་ནས། །རབ་གནས་ཆོ་གའི་གནས་སུ་ནི། །འཇམ་ལ་རབ་གཙང་མཐོ་བ་ཡི། །བདེ་བའི་སྟན་ལ་འདུག་ནས་ནི། །རབ་གནས་
དཔལ་ལྡན་བདག་ཉིད་ཀྱིས། །ཏིང་འཛིན་གསུམ་ལྡན་སློབ་དཔོན་གྱིས། །ས་ནི་ཡོངས་སུ་གཟུང་བར་བྱ། །བགེགས་མེད་ཕྱིར་ནི་ཕུར་བུས་གདབ། །ཕྱོགས་མཚམས་བཅིང་བར་བྱ་བ་དང་། །དྲ་བ་ར་བ་མཁས་པས་བྱ། །བསྙེན་པ་བུམ་པའི་ཆོ་ག་བཞིན། །དཀྱིལ་འཁོར་ཆོ་ག་ཇི་
ལྟ་བར། །གོས་བཟངས་ཀྱིས་ནི་མགུལ་པ་བཅིང་། །ཨ་མྲའི་ལོ་མས་ཁ་དགབ་སྟེ། །བུམ་པ་དཀྱིལ་འཁོར་སྔགས་ཀྱིས་བསྙེན། །འབྲུ་ལྔ་སྨན་དང་རིན་ཆེན་དང་། །ཙནྡན་ཆུ་ཡིས་དགང་བྱས་ཏེ། །མེ་ཏོག་ཕྲེང་བཅིངས་རྡོ་རྗེ་གཞག །འཁོར་ལོའི་གཙོ་བོས་རྣམ་རྒྱལ་བཟླས། །
མཆོད་ཡོན་ཕུལ་ནས་ཡང་དག་མཆོད། །མེ་ཏོག་དཀར་པོ་བཀྲམ་པ་དང་། །ལྷ་ཡི་མདུན་དུ་གནས་བྱས་ཏེ། །དེ་ཡི་འོག་ཏུ་རྫོགས་བྱས་ནས། །ཐམས་ཅད་ལས་ཀྱི་མཆོག་ལྡན་པ། །མཉམ་པའི་སེམས་ཀྱིས་དཀྱིལ་འཁོར་ལ། །དབུ་གསུམ་ཕྱག་དྲུག་རང་གི་ནི། །མཛེས་པའི་

44-1-255a

ཤེས་རབ་དགའ་བ་ཡིས། །སྒྲུབ་པ་ཆེན་པོའི་མཐར་ཐུག་པར། །ཆོ་ག་ཇི་བཞིན་རྫོགས་པར་བྱ། །ནམ་མཁའི་མཐར་ཐུག་སྤྲོ་བྱས་ཏེ། །སངས་རྒྱས་ཚོགས་ནི་མདུན་དུ་བལྟ། །མཆོད་ཡོན་ཞལ་བསིལ་རང་སྔགས་ཀྱིས། །འཐོར་འཐུང་ཡང་ནི་དེ་བཞིན་བྱ། །བགེགས་
མཐར་སྔགས་ཀྱིས་བཏབ་པའི་ཆུས། །མཆོད་པ་ཀུན་ལ་བསང་གཏོར་བྱ། །མེ་ཏོག་ལ་སོགས་ཅི་འབྱོར་དང་། །དེ་བཞིན་རྡོ་རྗེ་གཟུགས་སོགས་ཀྱིས། །ཀུན་དུ་ཡང་དག་མཆོད་པར་བྱ། །བདུད་རྩི་མྱང་སོགས་མཁས་པས་བྱ། །ཐལ་མོ་སྦྱར་ནས་ཕྱག་འཚལ་ཏེ། །མེ་ཏོག་གཏོར་ནས་འདི་
སྐད་བརྗོད། །ཨོཾ་སརྦ་ཏ་ཐཱ་ག་ཏ་སུ་ལ་ལི་ཏ་བི་ལཱ་སྱ། ན་མི་ཏ་ན་མིཿཏྭཱ་ཏ། བྷ་ག་ལཱན་ཏཾ་ཛཿཧཱུྃ་བཾ་ཧོཿ། པྲ་ཏཱིཙྪ་ཀུ་སུ་མཱཉྫ་ལི་ནཱ་ཐཱ་ཧོ་ས་མ་ཡ་སྟྭཾ་མ་ཧཱ་མི་ཏི། དེ་ནས་སྤོས་ཀྱིས་མཆོད་བྱ་སྟེ། །ས་ལ་པུས་མོ་བཙུགས་ནས་ནི། །མགོན་པོ་འདིར་གཤེགས་སྤྱན་འདྲེན་ཞེས། །དེ་ལྟར་ཚིག་ནི་
བརྗོད་པར་བྱ། །འདི་ཞེས་བྱ་བ་བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་ལོ། །ཐུགས་རྗེ་ཆེན་པོ་སྤྱན་དབྱེ་བར། །མགོན་པོ་བདག་ནི་བགྱིད་པར་འཚལ། །སློབ་མ་ལ་ཡང་ཕན་པ་དང་། །ཁྱེད་རྣམས་ལ་ཡང་མཆོད་པའི་ཕྱིར། །བཅོམ་ལྡན་བགྱིད་པར་འཚལ་ལགས་ན། །དེ་
བས་མགོན་པོ་གནང་བའི་རིགས། །ཇི་ལྟར་སངས་རྒྱས་ཐམས་ཅད་དག །དགའ་ལྡན་གནས་ན་བཞུགས་པ་ལས། །ལྷ་མོ་སྒྱུ་འཕྲུལ་ལྷུམ་གཤེགས་ལྟར། །དེ་བཞིན་གནས་འདིར་གཤེགས་སུ་གསོལ། །མགོན་པོ་གནས་འདིར་རྟག་ཏུ་ཡང་། །བཞུགས་ནས་མེ་ཏོག་སྤོས་འདི་དག །བྱང་
ཆུབ་སེམས་ནི་རབ་འཕེལ་ཕྱིར། །འདི་ཡི་དོན་དུ་བཞེས་སུ་གསོལ། །སངས་རྒྱས་བདག་ལ་དགོངས་སུ་གསོལ། །འགྲོ་བའི་འཁོར་བའི་དོན་དུ་ནི། །འབྲས་གནས་བྱང་ཆུབ་སེམས་དཔའ་དང་། །གང་ཡང་གསང་སྔགས་ལྷ་རྣམས་དང་། །འཇིག་རྟེན་སྐྱོང་བའི་ལྷ་རྣམས་དང་། །འབྱུང་པོ་ཡང་
དག་རྫོགས་པ་ཡི། །སངས་རྒྱས་བདག་ལ་དགའ་ཀུན་དང་། །གཞན་ཡང་ལྷ་ཡི་སྤྱན་མངའ་བ། །འདི་ཞེས་བྱ་བ་རྡོ་རྗེ་བདག །རིག་པའི་རྒྱལ་པོ་འདི་ཡི་ནི། །ཅི་ནས་རབ་གནས་བགྱིད་ལགས་ན། །བྱིན་གྱིས་བརླབས་པར་མཛད་དུ་གསོལ། །དུས་གསུམ་དུ་ནི་སྤྱན་དྲངས་ཏེ། །སྔ་མ་བཞིན་དུ་

44-1-255b

རབ་མཆོད་ནས། །རོལ་མོ་དྲིལ་བུས་ཡང་དག་བསྟོད། །དེ་ནས་བདུད་རྩི་མྱང་བར་བྱ། །དེ་བཞིན་དུ་ནི་སྤྱན་དྲངས་ནས། །བདག་ཉིད་སྤྲོ་བ་བསྐྱེད་པར་བྱ། །དེང་བདག་སྐྱེ་བ་འབྲས་བུ་ཡོད། །དེང་བདག་འཚོ་བ་འབྲས་བུར་བཅས། །དམ་ཚིག་ལྷ་དང་མཉམ་པར་ནི། །བདག་ཉིད་གྱུར་
པར་ཐེ་ཚོམ་མེད། །བྱང་ཆུབ་སེམས་དཔའི་སེམས་ཀྱིས་ནི། །བདག་ནི་ཕྱིར་མི་ལྡོག་པར་གྱུར། །དེ་བཞིན་གཤེགས་པའི་རིགས་སྐྱེས་པར། །དེང་བདག་གྱུར་པར་ཐེ་ཚོམ་མེད། །བདག་གི་ཉི་མ་དེང་མཆོག་ཡིན། །དེང་གི་མཆོད་པ་བླ་ན་མེད། །སངས་རྒྱས་ཐམས་ཅད་སྤྱན་
དྲངས་པས། །དེང་གི་འདུས་པ་མཆོག་ཡིན་ནོ། །དེ་ནས་ཕྱོགས་སྐྱོང་གཏོར་མ་སྦྱིན། །འབད་པས་སློབ་མ་བསྲུང་བར་བྱ། །ཁྲོ་བོ་བདུད་རྩི་འཁྱིལ་བཟླས་པའི། །སྐུད་པས་དཔུང་པ་བཅིང་བར་བྱ། །དེ་ནས་བསང་བྱས་དྲི་ཡིས་བྱུག །སྙིང་གར་ཞི་བའི་རིགས་པས་བསྲུང་། །ལྷ་
རྣམས་རབ་གནས་བྱ་བའི་ཕྱིར། །བདུད་རྩི་འཁྱིལ་པས་བསྲུངས་ཏེ་ཉལ། །སློབ་མ་ཡི་ནི་བསྙུང་བར་བྱ། །ཆོ་ག་ལྷན་ཅིག་བྱས་ནས་ནི། །ཇི་སྐད་བསྒོམ་པ་བཞིན་བྱས་ཏེ། །བླ་མའི་ཚིག་བཞིན་མཆོད་ལ་སོགས། །གཡོ་མེད་པས་ནི་རབ་བྱས་ན། །མཆོད་སྦྱིན་འབྲས་བུ་ཐོབ་
པར་འགྱུར། །འདི་ནི་བསྙེན་པའི་ཆོ་གའོ། །དེ་ནས་ཕྱེད་ཉིན་ནང་པར་ནི། །ཡོ་བྱད་ཐམས་ཅད་ལྡན་པར་བསག །མ་ལ་ཏིལ་དང་མ་ལི་ཀ །ནཱ་ག་གེ་སར་ཕྲེང་བས་བརྒྱན། །སྔ་མ་བཞིན་དུ་གོས་གཙང་བགོ། །རྒྱན་རྣམས་ཀྱིས་ནི་མཛེས་པར་བྱ། །ཨ་ཀ་རུ་ལ་སོགས་
པས་བདུག །སློབ་དཔོན་བདག་ཉིད་ལྷར་བསྐྱེད་ནས། །གསང་སྔགས་ཀྱིས་ནི་བུམ་པ་བཟླས། །ཆོ་ག་བཞིན་དུ་གཏོར་མ་སྦྱིན།  །སྐུ་གཟུགས་མདུན་དུ་འདུག་བྱས་ཏེ། །ཏིང་འཛིན་གསུམ་པོ་བསྐྱེད་པར་བྱ། །བཀྲ་ཤིས་ཚིགས་བཅད་དོན་བྱ་ཞིང་། །ཡང་དང་ཡང་དུ་བསྟོད་པར་བྱ། །
སྣ་ཚོགས་རོལ་མོའི་སྒྲ་ཡང་དཀྲོལ། །རྒྱལ་པོའི་དབང་བསྐུར་ཚུལ་དུ་ནི། །གདུགས་དཀར་ལ་སོགས་གཟུང་བར་བྱ། །སྐུ་གཟུགས་ཤར་དུ་བསྟན་བྱས་ཏེ། རས་ཡུག་སེར་པོ་ཟུང་གིས་དགབ། །ཡན་ལག་བཞི་བ་ལས་བྱུང་ཞིང་། བསྙེན་པ་ལ་སོགས་བསྒྲུབ་པར་བྱ། །

44-1-256a

ཐམས་ཅད་བྱ་བ་དང་ལྡན་པས། །ཡི་གེ་གསུམ་པོས་བྱིན་གྱིས་བརླབ། །སྔ་མ་བཞིན་དུ་ལེགས་བཞག་ནས། །རིག་པས་ལེགས་པར་སྦྱང་བར་བྱ། །གཡས་དང་གཡོན་གྱི་ལག་པ་ཡིས། །ཡུངས་ཀར་དག་ཀྱང་གཟུང་བྱ་སྟེ། །ཕྱོགས་དང་ཕྱོགས་མིན་བཟློག་
ནས་ནི། །བསྐོར་བའི་ཚུལ་གྱིས་མེ་ལ་གཏོར། །ལན་གསུམ་བྱས་ནས་ཆུ་ལ་གཏོར། །གྲོ་གའམ་ལོ་མའི་སྣོད་དུ་ནི། །འབྲས་ཆན་ཆུ་ཡིས་སྦྱང་བར་བྱ། །ཡུངས་ཀར་གྱི་སྔགས་ནི། ཨོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། དེ་ནས་དེ་ཡི་གསང་སྔགས་དང་། །རབ་གཙང་དཱུར་ཝའི་
པིར་གྱིས་ནི། །འབྲུ་མར་དྲི་ནི་ཞིམ་པོས་བསྐུ། །སྔགས་ལ་ཨོཾ་སརྦ་ཏ་ཐཱ་ག་ཏཱ་ཡ་བི་ཤོ་དྷ་ནི་སྭཱ་ཧཱ། འཁར་བའི་སྣོད་དུ་འདག་ཆལ་དང་། །དེ་བཞིན་བུམ་པས་ཁྲུས་བྱའོ། །ལག་ན་སྤྱན་སོགས་བུམ་པ་ཡིས། །ཆོ་ག་བཞིན་དུ་དབང་བསྐུར་ཞིང་། །སྟོན་པའི་བདག་ཉིད་བརྗོད་བྱ་སྟེ། །ཇི་ལྟར་
བལྟམས་པ་ཙམ་གྱིས་ནི། །དེ་བཞིན་གཤེགས་པ་ཁྲུས་གསོལ་བ། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་གསོལ་ལོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུྃ། རི་མོར་བྲིས་པ་མེ་ལོང་ལ། །སྐུ་གཟུགས་རྣམས་ནི་ཉིད་ལའོ། །དང་པོར་རྣམ་པར་རྒྱལ་བ་
དང་། །དེ་ནས་རྣམ་སྣང་ལ་སོགས་དང་། །སྤྱན་ལ་སོགས་པ་བུམ་པ་དང་། །དེའི་འོག་གཟུགས་ལ་སོགས་པ་དང་། །ཐ་མར་གཤིན་རྗེ་གཤེད་སོགས་ཀྱིས། །མཁས་པ་རིམ་བཞིན་ཁྲུས་གསོལ་ལོ། །གཙང་མའི་གོས་ཀྱིས་སྐུ་ཕྱིའོ། །ཡང་ན་ལག་པས་ཕྱི་ཡང་རུང་། །གུར་ཀུམ་
གྱིས་ནི་བྲིས་པ་ཡི། །རས་ཡུག་དཀར་པོ་ཟུང་ཡང་དབུལ། །ཨོཾ་དི་བྱ་བཱ་ས་སྱེ་སྭཱ་ཧཱ། ཤིན་ཏུ་དྲི་ཞིམ་གླ་རྩིའམ། །དེ་བཞིན་གཞན་ཡང་གུར་གུམ་སོགས། །སྔགས་དང་བཅས་པས་བྱུག་པ་དབུལ། །ཨོཾ་ཨཱཿབཛྲ་གནྡྷེ་ཧཱུྃ། རྒྱན་རྣམས་ཀྱང་ནི་དབུལ་བྱ་ཞིང་། །དེ་བཞིན་ཅོད་པན་
དབུལ་བར་བྱ། །ཨོཾ་བཛྲ་རཏྣ་ཏྲཾ། དེ་བཞིན་མེ་ལོང་བསྟན་པར་བྱ། །ཨོཾ་བཛྲ་ས་ཏྭ་ཨ། གསེར་ལས་བྱས་པའི་ཐུར་མ་ཡིས། །དེ་ནས་སྤྱན་ཡང་དབྱེ་བར་བྱ། །ཨོཾ་ཙཀྵུ་ཙཀྵུ་ས་མནྟ་ཙཀྵུ་བི་ཤོ་དྷ་ནི་སྭཱ་ཧཱ། སོ་རྩི་གི་ཝང་མེ་ཏོག་རྣམས། །ཐ་མར་ཕུལ་ནས་གཞུག་པར་བྱ། །བྲིས་པ་དང་

44-1-256b

ནི་བསམས་པའམ། །བདུད་རྩི་འཁྱིལ་པས་འཁོར་ལོ་བསང་། །གཤིན་རྗེ་གཤེད་སོགས་རང་སྔགས་སམ། །ཡང་ན་ཡི་གེ་ལྔ་པོ་བཟླས། །ཨ་ཁཾ་བཱི་ར་ཧཱུྃ། དེ་ནས་ཤེས་རབ་ཡན་ལག་འདུས། །རྣལ་འབྱོར་ལྡན་པ་རང་གིས་བྱ། །བླ་མའི་མན་ངག་གིས་བསྐྱེད་པའི། །དཀྱིལ་
འཁོར་བདེ་བའི་བདག་ཉིད་ནི། །སྐུ་གཟུགས་དེ་ཡི་ནང་དུ་གཞུག །དེ་ནས་ཡེ་ཤེས་དཀྱིལ་འཁོར་དེ། །མདུན་གྱི་ནམ་མཁའ་ལ་གནས་དགུག །ཐུགས་ཀྱི་ས་བོན་འོད་ཟེར་ལྡན། །བགེགས་མཐར་བྱེད་ཀྱིས་བགེགས་རྣམས་གཞོམ། །ཀུན་དུ་བསྐྲད་ནས་བསྲུང་བྱ་སྟེ། །ཙནྡན་ལ་
སོགས་མེ་ཏོག་བཅས། །གསང་སྔགས་བཟླས་པའི་མཆོད་ཡོན་དབུལ། །གཤིན་རྗེ་གཤེད་སོགས་ཀྱིས་དགུག་གནས། །གཞུག་དང་བཅིང་དང་མཉེས་པར་བྱ། །མིག་སོགས་ལུས་ནི་བྱིན་གྱིས་བརླབ། །དེ་ནས་ཆུ་ལ་སོགས་པ་ཡིས། །དེ་བཞིན་དུ་ནི་དབང་བསྐུར་ཏེ། །མཆོད་
ཡོན་སོགས་པས་མཆོད་པར་བྱ། །ཇི་ལྟར་རང་སྔགས་དང་ལྡན་པའི། །མཆོད་པ་རྣམས་ནི་དབུལ་བར་བྱ། །མེ་ཏོག་ལ་སོགས་དབུལ་བའི་སྔགས། །མེ་ཏོག་འདི་ནི་མཆོག་གྱུར་པ། །དེ་བཞིན་ཆུ་སྐྱེས་ཐང་སྐྱེས་དག །དད་པ་མཆོག་གིས་དབུལ་ལགས་ན། །ཅི་བདེ་བར་
ནི་བཞེས་སུ་གསོལ། །ཨོཾ་བཛྲ་པུཥྤེ་ཧཱུྃ། ལྷན་ཅིག་སྐྱེས་དང་སྦྱར་བ་ཡི། །བདུག་སྤོས་དམ་པ་འདི་དག་ནི། །དད་པ་མཆོག་གིས་དབུལ་ལགས་ན། །ཅི་བདེ་བར་ནི་བཞེས་སུ་གསོལ། །ཨོཾ་ཨཱཿབཛྲ་དྷཱུ་པེ་ཧཱུྃ། ལྷན་ཅིག་སྐྱེས་དང་སྦྱར་བ་ཡི། །དྲི་མཆོག་དམ་པ་འདི་
དག་ནི། །དད་པ་ལ་སོགས་ཀུན་ལ་སྦྱར། །ཨོཾ་ཨཱཿབཛྲ་གནྡྷེ་ཧཱུྃ། མུན་པའི་ཚོགས་ནི་འཇོམས་བྱེད་ཅིང་། །ཕྱོགས་ཀུན་གསལ་བའི་མར་མེ་འདི། །ཀུན་མཁྱེན་ཡེ་ཤེས་གསལ་བའི་ཕྱིར། །དང་བའི་སེམས་ཀྱིས་དབུལ་བར་བགྱི། །ཨོཾ་ཨཱཿབཛྲ་ཨཱ་ལོ་ཀེ་ཧཱུྃ། ཁ་
དོག་དྲི་དང་རོ་ལྡན་པའི། །བཟའ་དང་བཅའ་བ་ཡང་དག་ལྡན། །ཐམས་ཅད་སྦྱར་བའི་བཤོས་འདི་དག །དང་བའི་སེམས་ཀྱིས་དབུལ་བར་བགྱི། །ཨོཾ་ཨཱཿབཛྲ་ནི་ཝི་ཏྱེ་ཧཱུྃ། དེ་ནས་འཐོར་འཐུང་འབུལ་བར་བྱ། །སྤོས་ཆུ་ཡིས་ནི་བསང་བར་བྱ། །གཟུགས་ལ་སོགས་

44-1-257a

པས་ཡང་དག་མཆོད། །བསྟོད་དང་དེ་བཞིན་བདུད་རྩི་མྱང་། །ཆགས་པ་ཆེན་པོ་བསྐྱེད་དེ་ཉིད། །དེ་ཉིད་རིག་དད་བདེན་པ་བརྗོད། །ཡི་གེ་བརྒྱ་པ་བཟླས་པ་ཡིས། །བརྟན་པར་བྱས་ནས་གསོལ་བ་གདབ། །ཁྱོད་ཀྱིས་སེམས་ཅན་ཀུན་གྱི་དོན། །
མཛད་ནས་ཐམས་ཅད་སྒྲུབ་པར་མཛོད། །དེ་ནས་ཐ་མ་ཕྱོགས་སྐྱོང་སྦྱིན། །ཇི་སྐད་གསུངས་བཞིན་མཆོད་བྱ་ཞིང་། །དེ་ཉིད་ཤེས་པས་མཉེས་པའི་ཕྱིར། །ཆོ་ག་བཞིན་དུ་སྦྱིན་སྲེག་བྱ། །ཁ་ཁྱེར་སོར་བཞི་བོར་བ་ཡི། །ཕྱི་རོལ་དུ་ནི་པདྨ་བྱ། །ཁུང་བུ་རྒྱར་ནི་ཁྲུ་གང་ལ། །དེ་
ཡི་ཟབས་སུ་ཁྲུ་ཕྱེད་བྱ། །ལས་ཀུན་བྱེད་པའམ་འཁོར་ལོ་བཞིན། །མཚན་མ་དཀྱུས་དང་དཔངས་སུ་ནི། །སོར་ནི་བརྒྱད་དང་གཅིག་བྱས་པའི། །འཁོར་ལོ་ཁུང་བུའི་དབུས་སུ་བྲི། །རྡོ་རྗེ་རིན་ཆེན་ཆུ་སྐྱེས་དང་། །རལ་གྲི་དབུས་སུ་བྲི་བར་བྱ། །ཕྱི་རོལ་རྡོ་རྗེ་ར་བས་བསྐོར། །སློབ་
དཔོན་ཤར་དུ་ཁ་བལྟས་ནས། །ལས་ཀུན་བྱེད་པས་བསྲུང་བར་བྱ། །གཡོན་དུ་མཆོད་ཡོན་ལ་སོགས་གཞག །ཡོ་བྱད་བཀོད་པ་བསང་བར་བྱ། །རྣལ་འབྱོར་ཅན་གྱིས་རབ་གནས་བྱ། །རང་སྔགས་ལས་ནི་ཁུང་བུ་བསྐྱེད། །གཙང་མའི་རྩྭ་སྐམ་དང་བཅས་ལས། །ཞི་རྒྱས་ཆོ་
ག་ལས་གསུངས་བཞིན། །ཆོ་ག་ཤེས་པས་མེ་བཅུག་སྟེ། །ལས་ཀུན་བྱེད་པའི་སྤོས་ཆུ་དང་། །ཀུ་ཤའི་རྩེ་མོས་བསང་བ་བྱས། །ཁྲོ་བོ་བདུད་རྩི་འཁྱིལ་སྔགས་སམ། །ཡི་གེ་གསུམ་གྱིས་ལན་གསུམ་གདབ། །འོ་མ་ཅན་གྱི་ཤིང་ལས་སྦར། །རླུང་ཡབ་ཀྱིས་ནི་སྦར་བར་བྱ། །
ཨོཾ་ཛྲ་ལ་ཛྲ་ལ་ཧཱུཾ། རང་སྔགས་ལན་བདུན་བཟླས་པ་ཡི། །བླུགས་གཟར་གང་བའི་མར་གྱིས་ནི། །དེ་ཡི་གཟི་བྱིན་བསྐྱེད་པར་བྱ། །སྔོ་ལ་ཤིན་ཏུ་མི་རིང་བ། །གཙང་མའི་ཀུ་ཤ་དགྲམ་པར་བྱ། །དང་པོར་རྩེ་མོ་ཤར་དུ་བསྟན། །གཡས་ནས་བསྐོར་ཞིང་དགྲམ་པར་བྱ། །དེ་ཉིད་ཀྱིས་ནི་
སྟེང་དུ་དགབ། །གསང་སྔགས་སྔོན་དུ་འགྲོ་བས་བྱ། །ཨོཾ་ཨཱཿཨི་མེ་ཀུ་ཤཱ་ཤུབྷ་དི་བྱཱཿབི་ཏྲ་བྲཧྨ་བི་ཏྲེ་ནེ། བུདྡྷ་དྷརྨྨཱ་སངྒྷ་ར་ཀ་པྲྀ་ཐི་བཱི་སཉྫ་ཏ་གརྦྷ། ཨ་བི་གྷྣཾ་མཱཾ་ཤཱནྟིཾ་ཀུརྦནྟུ་ཧཱུཾ། ཨོཾ་བཛྲ་ས་ཏྭ་ཨ་ཞེས་བྱ་བའམ། ཡི་གེ་འབྲུ་གསུམ་གྱིས་བྱའོ། །དེ་འོག་ཁུང་བུའི་དབུས་

44-1-257b

གནས་པ། །པདྨ་ལ་གནས་གྲུ་གསུམ་རཾ། །རྡོ་རྗེ་སེམས་དཔའ་ཡོངས་གྱུར་པ། །རཾ་ལས་བྱུང་བའི་མེ་བསམ་མོ། །སྐུ་མདོག་སེར་པོ་དབུ་གསུམ་པ། །ཤ་རྒྱས་ཤེས་རབ་མ་ལ་འཁྱུད། །གུནྡྷེ་མི་འཇིགས་དབྱུག་པ་དང་། །ཕྲེང་བ་འཛིན་པ་འབར་བའི་ལུས། །
ལས་དང་རྗེས་མཐུན་གོས་རྒྱན་བཅས། །མཁའ་ནས་ཡེ་ཤེས་མེ་བསམས་ཏེ། །དེ་འདྲ་འདོད་པའི་རྒྱལ་པོས་བཀུག །ཡི་གེ་གསུམ་དགོད་བྱིན་གྱིས་བརླབ། །བགེགས་རྣམས་བསྐྲད་ནས་བསྲུང་བར་བྱ། །དེ་ནས་གདན་ལ་བཞུགས་སུ་གསོལ། །དེའི་སྔགས། ཨེ་ཧྱེ་ཧི་མ་ཧཱ་
བྷཱུ་ཏ་དེ་བ་རྀ་ཥི་དྭི་ཛ་ས་ཏ་མ། གྲྀ་ཧི་ཏྭཱ་ཨ་ཧུ་ཏི་མ་ཧཱ་རཾ་ཨ་སྨིནྶནྣི་ཧི་ཏོ་བྷ་བཱ། ཞེས་བྱ་བས་ཁུང་བུར་བཞུགས་སུ་གསོལ་ནས་ནི། ཀུ་ཤ་ལ་སོགས་དགྲམ་པར་བྱ། །གཤིན་རྗེ་གཤེད་ཀྱིས་དགུག་པ་དང་། །གཞུག་སོགས་སྔོན་དུ་འགྲོ་བ་ཡིས། །མཉེས་པ་དང་ནི་བལྟ་
བར་བྱ། །ཨོཾ་ཨགྣ་ཡེ་ཨཱ་དི་བྱཱ་བི་ཥ་མ་ཧཱ་ཤྲི་ཡེ་ཧ་བྱ་ཀ་བྱ་བཱ་ཧཱ་ཎ་ཡ་དྲྀ་ཤྱ་ཛཿཧཱུྃ་བཾ་ཧོཿས་མ་ཡ་སྟྭཾ་མ་ཧཱ་ཨི་ཏི། དེར་ནི་བལྟ་བར་བྱས་ན་ནི། །མཆོད་ཡོན་ཞལ་བསིལ་འཐོར་འཐུང་དང་། །མེ་ཏོག་ལ་སོགས་མཆོད་པ་རྣམས། །འབུལ་གྱིས་སྭཱ་ཧཱ་ཞེས་བྱ་བས། །
ཡོ་བྱད་དག་ནི་ཉེ་བར་དགོད། །དགང་བླུགས་འབྲུ་ཡི་བྱེ་བྲག་སྔགས། །ཤུབ་བུས་ཡམ་ཤིང་ལ་སོགས་པ། །ཇི་ལྟར་འདོད་པས་དབུལ་བར་བྱ། །དེ་ནི་མིག་སོགས་བྱིན་གྱིས་བརླབ། །དེ་བཞིན་དུ་ཡང་དབང་བསྐུར་ནས། །མཆོད་ཡོན་ཞབས་བསིལ་འཐོར་འཐུང་
དབུལ། །བསང་ནས་རིམ་བཞིན་མཆོད་པ་འབུལ། །ཕྱི་ཡི་མཆོད་པ་མེ་ཏོག་སོགས། །རྡོ་རྗེ་གཟུགས་སོགས་དེ་བཞིན་ཏེ། །བསྟོད་དང་བདུད་རྩི་མྱང་བ་དང་། །ལག་པ་བཀྲུས་ནས་འཐོར་འཐུང་བྱ། །ལན་གསུམ་བདུད་རྩི་འཁྱིལ་པ་ཡིས། །བཟླས་པའི་ཆུ་
ཡིས་དེ་བཞིན་བྱ། །དེ་ཡི་ཞལ་ལས་འབར་བའི་རཾ། །ཆོ་ག་ཤེས་པས་དགོད་པར་བྱ། །བླུགས་གཟར་གྲུ་བཞི་སོར་བཞི་པ། །སོར་གཉིས་ཟབ་བརྐོས་རྡོ་རྗེས་མཚན། །མདུན་དུ་པདྨའི་འདབ་འདྲ་བའོ། །དགང་གཟར་ཆུ་སྐྱེས་འདབ་འདྲ་བའི། །སོར་གཉིས་

44-1-258a

ཕྱེད་བརྐོས་རྡོ་རྗེས་མཚན། །ལྷ་ཡི་ས་བོན་ལས་བསྐྱེད་ནས། །དགང་གཟར་བླུགས་གཟར་གྱི་དབུས་སུ། །རབ་ཏུ་འབར་བའི་ཧཱུྃ་བསྒོམས་ནས། །དེ་ལ་དགང་བླུགས་དབུལ་བར་བྱ། །འབར་བར་ཤེས་ནས་མཚན་མ་བརྟག །དགང་བླུགས་དབུལ་བའི་
སྔགས། ཨོཾ་ན་མཿས་མནྟ་བྷུདྡྷཱ་ནཱཾ། ཨགྣ་ཡེ་སྭཱ་ཧཱ། མི་ཤེས་བདུད་རྩི་འཁྱིལ་བཟླ་ཞིང་། །དེ་ཡིས་བགེགས་ཀྱང་བསྐྲད་པར་བྱ། །དེ་ནས་བསང་གཏོར་བྱས་ནས་ཀྱང་། །འོད་གསལ་དེ་ཉིད་བསྒོམ་བྱ་སྟེ། །རབ་འབར་མེ་ལ་ཡམ་ཤིང་འབྲས། །མར་དང་ཏིལ་དང་དཱུར་ཝ་དང་། །
ཟས་མཆོག་ཀུ་ཤ་ཆོ་ག་བཞིན། །ཨོཾ་ཨགྣ་ཡེ་སྭཱ་ཧཱ། མར་གྱི་སྔགས་སོ། །ཨོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། ཏིལ་གྱི་སྔགས་སོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ། དཱུར་ཝའིའོ། །ཨོཾ་བཛྲ་པུཥྚ་ཡ་སྭཱ་ཧཱ། འབྲས་མ་གྲུགས་པའོ། །ཨོཾ་སརྦ་སཾ་པ་དེ་སྭཱ་ཧཱ། ཟས་མཆོག་གིའོ། །
ཨོཾ་ཨ་པྲ་ཏི་ཧ་ཏ་བཛྲ་ལ་ཏཱ་ཡ་སྭཱ་ཧཱ། ཀུ་ཤའིའོ། །ཨོཾ་བཛྲ་བི་ཛཱ་ཡ་སྭཱ་ཧཱ། འབྲས་སོ་བའིའོ། །ཨོཾ་མ་ཧཱ་བེ་གཱ་ཡ་སྭཱ་ཧཱ། ནས་ཀྱིའོ། །ཨོཾ་མ་ཧཱ་བ་ལཱ་ཡ་སྭཱ་ཧཱ། མ་ཤའིའོ། །ཨོཾ་བཛྲ་གྷསྨ་ར་ཡེ་སྭཱ་ཧཱ། གྲོ་དབུལ་བའོ། །ཨོཾ་བཛྲ་བི་ཛཱ་ཡ་སྭཱ་ཧཱ། ཨུ་དུམྺཱ་རའིའོ། །ཨོཾ་བོ་དྷི་བྲྀཀྵཱ་
ཡ་སྭཱ་ཧཱ། ཨ་ཤྭདྠའིའོ། །ཨོཾ་བཛྲ་ཡ་སྭཱ་ཧཱ། པླཀྵའིའོ། །ཨོཾ་བཛྲ་ཀུ་བེ་རཱ་ཡ་སྭཱ་ཧཱ། ནྱ་གྲོ་དྷའིའོ། །ཨོཾ་ཧ་ས་ཀ་ར་སྭཱ་ཧཱ། ཨ་མྲའིའོ། །རྒྱས་དང་ཞི་དང་དབང་དང་དགུག །གསད་དང་བསྐྲད་དང་མངོན་སྤྱོད་རྣམས། ཨོཾ་སྭཱ་ཧཱ་ཧོ་ཛྫཿཧཱུྃ་ཧཱུྃ་ཕཊ། སྔགས་ཀྱི་མཐའ་ཡང་བརྗོད་པར་བྱ། །ཞུ་
བའི་རྫས་ཐམས་ཅད་ནི་ཞལ་དུའོ། །ཡམ་ཤིང་དང་རུས་ཕྱེ་ལ་སོགས་པ་ནི་འོད་ཀྱི་དཀྱིལ་འཁོར་ལའོ། །ཟས་མཆོག་དང་ཏིལ་དང་འབྲས་ཡོས་ལ་སོགས་པ་ནི་ཕྱག་ཏུའོ། །དཱུར་ཝའི་མྱུ་གུ་དང་། འབྲས་མ་གྲུགས་པ་དང་། མེ་ཏོག་ནི་དབུ་ལའོ། །དྲི་ནི་ཐུགས་ཀར་རོ། །བདུག་སྤོས་དང་
མར་མེ་དང་། མཆོད་ཡོན་ནི་མདུན་ནའོ། །ཞབས་བསིལ་ནི་ཞབས་ལ་དབུལ་བར་བསམ་མོ། །དེ་འོག་དགང་བླུགས་སྦྱིན་བྱ་སྟེ། །མཆོད་ཡོན་འཐོར་འཐུང་སྔ་མ་བཞིན། །མཆོད་དང་བསྟོད་དང་བདུད་རྩི་མྱང་། །བྱས་ནས་དེ་ཡི་ཐུགས་ཀར་ནི། །རང་གི་ས་བོན་ལས་བྱུང་བའི། །

44-1-258b

རབ་གནས་རང་གི་དཀྱིལ་འཁོར་བསྒོམ། །ལྕེ་ལ་མཛེས་ཤིང་ཕྲ་བ་ཡི། །ཧཱུྃ་ལས་བྱུང་བའི་རྡོ་རྗེ་བསམ། །ཕྱི་ཡི་མཆོད་པ་སྔ་མ་བཞིན། །རྡོ་རྗེ་གཟུགས་སོགས་ཀྱིས་དེ་བཞིན། །བསྟོད་དང་བདུད་རྩི་ཡང་དག་མྱང་། །དེ་བཞིན་དུ་ཡང་འཐོར་འཐུང་བྱ། །སྔ་མ་བཞིན་དུ་
དགང་བླུགས་དབུལ། །སྲེག་རྫས་ཡམ་ཤིང་རིམ་བཞིན་དབུལ། །སློབ་མའི་ལག་གཡས་མཐེ་བོང་ནི། །ལག་པ་གཡོན་པས་གཟུང་བྱ་སྟེ། །མར་གྱིས་གང་བའི་སྦྱིན་བླུགས་ཏེ། །སློབ་མ་གཞུག་པའི་དོན་དུ་ནི། །མགོ་ལ་གཡས་ནས་བསྐོར་བྱས་ཏེ། །ཞི་བའི་ཕྱིར་
ནི་སྦྱིན་སྲེག་བྱ། །གསུམ་མམ་བདུན་ནམ་ཡང་ན་གཅིག །རྒྱལ་པོ་འམ་ནི་ས་བདག་དང་། །ཕྱོགས་སྐྱོང་བདག་ཉིད་ཞི་བའི་ཕྱིར། །སྦྱིན་སྲེག་བྱས་ནས་གསོལ་བ་གདབ། །སློབ་མ་ཤིན་ཏུ་འབད་པ་ཡིས། །སློབ་དཔོན་རབ་ཏུ་མཉེས་པར་བྱ། །བུ་མོ་རིན་ཆེན་ནོར་བུས་བརྒྱན། །
གླང་ཆེན་རྟ་ནི་མྱུར་འགྲོ་དང་། །བ་ཞོན་བཟང་དང་ས་གཞི་རྣམས། །དད་པས་ཡོན་ནི་དབུལ་བར་བྱ། །སློབ་དཔོན་ཡོངས་སུ་མཉེས་བྱས་ནས། །དེས་ན་ལས་ཀུན་འགྲུབ་འགྱུར་ཞིང་། །རང་སྔགས་ལྷ་ཡང་མཉེས་པར་འགྱུར། །གཞན་ཡང་ཟླ་བ་ལྷག་བསྒོམས་ནས། །དགང་
བླུགས་དག་ཀྱང་དབུལ་བར་བྱ། །ཐུགས་ཀའི་ཟླ་བ་འཁོར་ལོ་ལྕེ། །དེ་བཞིན་མཐར་ནི་དགང་བླུགས་བྱ། །དེ་ཡི་ལག་པར་དྲི་དང་ནི། །སོ་རྩི་དེ་བཞིན་ན་བཟའ་ཡིས། །རབ་མཆོད་ནས་ནི་བསྟོད་པར་བྱ། །ཡི་གེ་བརྒྱ་པ་ཡང་དག་བཟླ། །ཆོ་ག་ཉམས་པ་གང་བགྱིས་པ། །
མགོན་པོ་བདག་ལ་བཟོད་པར་མཛོད། །མི་ཤེས་པ་དང་མ་འབྱོར་པ། །གང་ཕྱིར་ལུས་ཅན་སྐྱབས་གྱུར་པས། །ཆོ་ག་དམན་ལ་བཟོད་པར་གསོལ། །དེ་སྐད་བརྗོད་ནས་གཤེགས་སུ་གསོལ། །ཁྱོད་ཀྱིས་འགྲོ་བའི་དོན་ཀུན་མཛད། །དངོས་གྲུབ་སྩལ་ནས་གཤེགས་
སུ་གསོལ། །སངས་རྒྱས་ཡུལ་དུ་གཤེགས་ནས་ནི། །སླར་ཡང་གཤེགས་པར་མཛད་དུ་གསོལ། །རང་གི་ལུས་སུ་རབ་བཅུག་ནས། །ཆོ་ག་ལས་ནི་བཤད་པ་བཞིན། །རྣལ་འབྱོར་ཅན་གྱིས་སྲེག་རྫས་ཀྱི། །དེ་བཞིན་ལྷག་མ་མེ་ལ་དབུལ། །ཆོ་ག་སྔོན་བཞིན་གཤེགས་

44-1-259a

གསོལ་ནས། །ཆོ་ག་བཞིན་དུ་གཏོར་མ་དབུལ། །ཨོཾ་ཨཱཿཨ་ཀཱ་རོ་མུ་ཁཾ་སརྦ་དྷརྨྨ་ཎཱཾ་ཨཱདྱ་ནུཏྤནྣ་ཏྭཱཏ་མུཿཨི། ཞེས་བྱ་བ་ནི་གཤེགས་སུ་གསོལ་བའི་སྔགས་སོ། །སྲེག་རྫས་ལྷག་མ་འོ་མ་མར། །སྦྲང་རྩི་ཀ་ར་ལྡན་པ་རྣམས། །དེ་ཉིད་དུ་ནི་ཆ་རུ་བསྐོལ། །
རང་གི་བདག་པོའི་སྔགས་འདི་བཟླས། །ཨོཾ་དེ་བ་ཨནྣེ་ས་མཱ་དྷི་དྷྱཱ་ན་པཱི་ན་ནི་སྭཱ་ཧཱ། གསེར་ལ་སོགས་པའི་སྣོད་དུ་ནི། །ལྷ་རྣམས་ལ་ནི་དབུལ་བར་བྱ། །གན་རྐྱལ་ཁ་སྦུབ་ཡོན་པོར་མིན། །བརྟན་ཅིང་དྲང་པོར་སྐུ་བཞག་ནས། །སྐུ་ཡི་སུམ་ཆའི་ཚད་ཙམ་གྱི། །གདན་ལ་
བཟོ་བོ་མཁས་པས་གཞག །དྲི་གཙང་ཁང་དུ་མ་བཅུག་ན། །ཉེས་པ་དག་ནི་འཕེལ་བར་འགྱུར། །བཞུགས་སུ་གསོལ་བའི་སྔགས། ཨོཾ་སུ་པྲ་ཏིཥྛ་བཛྲེ་སྭཱ་ཧཱ། སྔ་མ་བཞིན་དུ་མཆོད་བྱས་ཏེ། །བདུད་རྩི་ཡང་ནི་མྱང་བར་བྱ། །ཡི་གེ་བརྒྱ་པ་བཟླས་པ་ཡིས། །བརྟན་
པར་བྱ་ཞིང་བཟོད་པར་གསོལ། །འགྲོ་བའི་འཁོར་ལོའི་དོན་གྱི་ཕྱིར། །རྫོགས་སངས་རྒྱས་ལ་བཟོད་པར་གསོལ། །འབྲས་བུ་གནས་དང་སེམས་དཔའ་དང་། །གཞན་ཡང་གསང་སྔགས་ལྷ་རྣམས་དང་། །འཇིག་རྟེན་སྐྱོང་བའི་ལྷ་རྣམས་དང་། །འབྱུང་པོ་རྫོགས་
པའི་སངས་རྒྱས་ཀྱི། །བསྟན་པ་ཀུན་ལ་དགའ་བ་དང་། །གང་དག་ལྷ་ཡི་སྤྱན་མངའ་བ། །ཆོ་ག་བཞིན་དུ་མ་འབྱོར་པ། །གང་ཞིག་ལུས་ཅན་སྐྱབས་གྱུར་པས། །མཆོག་ཏུ་ཡོན་བདག་གཞན་ལ་ཡང་། །ཀུན་དུ་བདེ་ལེགས་ཞི་མཛད་ནས། །སངས་རྒྱས་ཡུལ་དུ་གཤེགས་
ནས་ཀྱང་། །སླར་ཡང་གཤེགས་པར་མཛད་དུ་གསོལ། །བསྐལ་པའམ་ནི་བསྐལ་པ་བརྒྱར། །སྐུ་འདི་ལྷག་པར་གནས་གྱུར་ཅིག །ལྷ་རྣམས་ཀྱིས་ཀྱང་བསྲུང་བར་ཤོག །ས་དང་ཆུ་དང་མེ་རླུང་གི། འཇིགས་པ་ལས་ཀྱང་སྐྱོབ་པ་དང་། །ཐམས་ཅད་དགའ་ཞིང་ཚིམ་གྱུར་ནས། །
རང་གི་གནས་སུ་ལེགས་པར་གཤེགས། །སློབ་དཔོན་སློབ་མར་བཅས་པ་དག །བུ་དང་ཚ་བོ་བསྲུང་གྱུར་ཅིག །དེ་ནས་སློབ་མ་བོས་བྱས་ཏེ། །བླ་མ་སྙིང་རྗེས་འདི་སྐད་བརྗོད། །གང་ཞིག་ཁྱོད་ཀྱིས་གསོལ་བ་བཏབ། །རབ་གནས་སྡིག་པ་དང་བྲལ་བ། །ད་ལྟ་ང་ཡིས་ལེགས་

44-1-259b

པ་བྱས། །ཅི་བདེ་བར་ནི་མཆོད་པར་གྱིས། །སྔགས་ཀྱིས་གཙང་བྱས་ཞལ་ཟས་འདི། །སློབ་མ་ལ་ཡང་སྦྱིན་པར་བྱ། །དེ་བཞིན་གཤེགས་པའི་ལྷག་མ་འདི། །ཟོ་ཤིག་སྡིག་པ་བྱང་བར་འགྱུར། །ལྷག་མ་གཞན་ལ་སྦྱིན་བྱ་ཞིང་། །བྱིན་ནས་དེ་བཞིན་རང་གིས་བཟའ། །སློབ་མ་
གུས་པར་ཤེས་ནས་ནི། །སླར་ཡང་ཡོན་ནི་བསླང་བར་བྱ། །དེ་ཡིས་ཡོན་ཡང་ཕུལ་ནས་ནི། །གུས་པས་སློབ་དཔོན་མཉེས་པར་བྱ། །མཆོད་ནས་དེ་འོག་བསྐོར་བར་བྱ། །ལེགས་པར་ལྷ་ལ་ཕྱག་བཙལ་ནས། །སློབ་མ་རང་གི་གནས་འགྲོ་ནས། །དགེ་འདུན་ལ་
ཡང་ཆོས་སྟོན་བྱ། །ཇི་ལྟར་རང་ནི་ནུས་པ་བཞིན། །ཉིན་མཚན་དུ་ནི་དགའ་སྟོན་བྱ། །གླུ་དང་གར་དང་རོལ་མོ་དང་། །རྩེ་དང་དགོད་དང་དགའ་བས་གནས། །འབད་པས་བཟོ་བོ་དགའ་བར་བྱ། །དེ་བཞིན་དུ་ནི་འཁོར་གཞན་དང་། །མགོན་མེད་རྣམས་ལ་ཆོས་སྟོན་
དང་། །ཡོན་ཡང་རབ་ཏུ་སྦྱིན་པར་བྱ། །དཀྱིལ་འཁོར་དང་ནི་སྦྱིན་སྲེག་དང་། །རབ་ཏུ་གནས་པས་ཡོ་བྱད་ཀུན། །དེ་དག་ཐམས་ཅད་སློབ་དཔོན་དབང་། །དེ་ཉིད་རྡོ་རྗེ་འཛིན་ཡིན་པར། །བྱ་བ་སྤྱོད་པའི་རྒྱུད་ལས་གསུངས། །གལ་ཏེ་རབ་གནས་བྱེད་པ་ཡིས། །
ཐབས་དང་ཤེས་རབ་བདག་ཉིད་གཟུགས། །ཁྱད་པར་འབྲས་བུ་ཐོབ་པར་གསུངས། །འདུས་པའི་རྒྱུད་ལས་གཞན་དུ་མིན། །གང་ཞིག་རྣལ་འབྱོར་རྒྱུད་གཞན་གྱིས། །མངོན་སུམ་རང་དགའ་བདེ་ཆེན་མིན། །སྦྱིན་སྲེག་ཆོ་ག་དང་བཅས་པའི། །རབ་གནས་ཆོ་ག་གསལ་ཕྱེ་
བས། །བྱས་པའི་བསོད་ནམས་གང་ཡོད་དེས། །འགྲོ་བ་འདི་ཀུན་བདེར་གནས་ཤོག །རབ་ཏུ་གནས་པའི་ཆོ་ག་སློབ་དཔོན་ཟླ་བའི་འོད་ཀྱིས་མཛད་པ་རྫོགས་སོ།།      །།རྒྱ་གར་གྱི་མཁན་པོ་པུཎྱ་ཀཱིརྟི་དང་། བོད་ཀྱི་ལོ་ཙཱ་བ་དགེ་སློང་བསོད་ནམས་རྒྱལ་བས་བསྒྱུར་
བའོ།།༄༅༅། །རྒྱ་གར་སྐད་དུ། སཱ་ས་ན་སརྦ་ཀ་སཱ་དྷ་ན་ནཱ་མ། བོད་སྐད་དུ། བསྟན་པའི་ནོར་ཐམས་ཅད་པ་ཞེས་བྱ་བའི་སྒྲུབ་པའི་ཐབས། དཔལ་འཇམ་པའི་རྡོ་རྗེ་ལ་ཕྱག་འཚལ་ལོ། །སངས་རྒྱས་བསྟན་པ་བདུད་རྩི་ཡི། །རྒྱ་མཚོ་གཏིང་མཐའ་

44-1-260a

མེད་པ་ལ། །ནོར་ལྡན་རྣམས་ནི་གཞུག་པའི་ཕྱིར། །གོ་རིམས་བཞིན་དུ་བརྗོད་པར་བྱ། །གཽ་ཏ་མའི་བསྟན་ལ་དད། །གལ་ཏེ་རིགས་ཀྱི་བུ་འོངས་ན། །དང་པོར་གསུམ་ལ་སྐྱབས་འགྲོ་སྦྱིན། །དེ་ཡི་རྗེས་ལ་བྱང་ཆུབ་སེམས། དེ་ལ་འདི་ནི་སྐྱབས་སུ་
འགྲོ་བ་སྔོན་དུ་སོང་བའི་བྱང་ཆུབ་ཏུ་སེམས་བསྐྱེད་པའི་ཆོ་གའོ། །དུས་བཟང་པོ་ལ་དད་པ་དང་ལྡན་པའི་རིགས་ཀྱི་བུས་གཙང་བ་དང་གཙང་བའི་གོས་ཀྱིས་ཡིད་དུ་འོང་བའི་ས་ཕྱོགས་སུ་དེ་བཞིན་གཤེགས་པའི་སྐུ་གཟུགས་རབ་ཏུ་མཆོད་ནས་དེའི་མདུན་དུ་དཀོན་མཆོག་གསུམ་
དང་བླ་མ་ལ་དཀྱིལ་འཁོར་རྣམས་བྱས་ཏེ། ཇི་ལྟར་སྲིད་པའི་མེ་ཏོག་ལ་སོགས་པའི་རབ་ཏུ་སྦྱིན་པ་སྔོན་དུ་སོང་བས་དཀོན་མཆོག་གསུམ་རྣམས་ལ་ཕྱག་བྱས་ཏེ། ཇི་ལྟར་དེ་ལྟར་ནུས་པས་རབ་ཏུ་མཆོད་ནས་བླ་མ་མཁས་པ་སྙིང་རྗེ་ཅན་ལ་ཡོན་ཕུལ་ནས་མེ་ཏོག་སྙིམ་པ་སྔོན་དུ་
འགྲོ་བས་ཞབས་གཉིས་ལ་གཏུགས་ཏེ། པུས་མོ་ལྷ་ང་ས་ལ་བཙུགས་པའམ་ཙོག་ཙོག་པོས་ཐལ་མོ་སྦྱར་ནས་གནས་ཏེ་ལན་གསུམ་དུ་གསོལ་བ་གདབ་པར་བྱའོ། །དགེ་བའི་བཤེས་གཉེན་གྱིས་གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཀྱི་སེམས་ཀྱང་བདག་ལ་
གསོལ་ཞེས་སོ། །དེ་ནས་བླ་མས་ལྷག་པའི་བསམ་པས་རབ་ཏུ་ཞུགས་པའི་སློབ་མ་ལ་བལྟས་ཏེ་ཅི་ནུས་པས་སྦྱིན་པར་བྱའོ་ཞེས་སོ། །ཁས་བླངས་པ་སྔོན་དུ་སོང་བས་འདི་ལྟར་སྦྱིན་པར་བྱའོ། །ཚེ་དང་ལྡན་པ་ཁྱོད་ཀྱིས་འདི་སྐད་སྨྲོས་ཤིག །ཕྱོགས་བཅུའི་འཇིག་རྟེན་གྱི་
ཁམས་ན་བཞུགས་པའི་སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་གང་ཅུང་ཟད་ལུས་དང་ངག་དང་ཡིད་རྣམས་ཀྱིས་སངས་རྒྱས་དང་བྱང་ཆུབ་
སེམས་དཔའ་ཕ་མ་གཉིས་དང་། དེ་ལས་གཞན་པའི་སེམས་ཅན་གཞན་དག་ལ་ཡང་བརྟེན་ནས་སྐྱེ་བ་འདི་དང་སྐྱེ་བ་གཞན་དག་གམ་སྲིད་པ་བར་མ་རྣམས་སུ་བདག་གིས་སྡིག་པའི་ལས་བགྱིས་པ་དང་། བགྱིད་དུ་སྩལ་བ་དང་། རྗེས་སུ་ཡི་རང་བ་ཡང་རུང་། དེ་དག་ཐམས་ཅད་གཅིག་ཏུ་

44-1-260b

བསྡུས་ཤིང་མཉམ་པར་བཟླུམས་ཏེ་སྡོམ་ནས་སངས་རྒྱས་དང་བྱང་ཆུབ་སེམས་དཔའ་དང་སློབ་དཔོན་གྱི་མདུན་དུ་མཆོག་ཏུ་རབ་ཏུ་བཤགས་པར་བགྱིའོ། །ཤེས་བཞིན་དྲན་པ་ན་རབ་ཏུ་མི་འཆབ་པོ། །འདི་ལྟར་ལན་གསུམ་དུའོ། །བདག་མིང་འདི་ཞེས་བགྱི་བས་འདི་ལྟར་སྡིག་
པ་བཤགས་ནས་ཉི་མ་འདི་ནས་བཟུང་སྟེ་སྙིང་པོ་བྱང་ཆུབ་ལ་མཆིས་ཀྱི་བར་དུ་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་ཅན་ཐམས་ཅད་མཁྱེན་པ་ཐམས་ཅད་གཟིགས་པ་འཇིགས་པ་མི་བཟད་པ་ཐམས་ཅད་ལས་འདས་པ། སྐྱེས་བུ་ཆེན་པོ་མི་ཕྱེད་པའི་སྐུ། བླ་ན་མེད་པའི་སྐུ་
ཆོས་ཀྱི་སྐུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །བདག་མིང་འདི་ཞེས་བགྱི་བས་འདི་ལྟར་སྡིག་པ་བཤགས་ནས་ཉི་མ་འདི་ནས་བཟུང་སྟེ། བྱང་ཆུབ་སྙིང་པོ་ལ་མཆིས་ཀྱི་བར་དུ་ཞི་བ་འདོད་ཆགས་དང་བྲལ་བའི་མཆོག་ཆོས་ལ་སྐྱབས་སུ་མཆིའོ། །བདག་
མིང་འདི་ཞེས་བགྱི་བས་འདི་ལྟར་སྡིག་པ་བཤགས་ནས་ཉི་མ་འདི་ནས་བཟུང་སྟེ་སྙིང་པོ་བྱང་ཆུབ་ལ་མཆིས་ཀྱི་བར་དུ་ཚོགས་རྣམས་ཀྱི་མཆོག་ཕྱིར་མི་ལྡོག་པའི་བྱང་ཆུབ་སེམས་དཔའི་དགེ་འདུན་ལ་སྐྱབས་སུ་མཆིའོ། །བདག་མིང་འདི་ཞེས་བགྱི་བ་འདི་ལྟར་སྡིག་པ་
བཤགས་པ་དང་གསུམ་ལ་སྐྱབས་སུ་མཆིས་ནས་སེམས་ཅན་གྱི་ཁམས་མཐའ་མེད་པ་རྣམས་བསྒྲལ་པའི་ཆེད་དང་། དབྱུང་བའི་ཕྱིར་དང་འཁོར་བའི་སྡུག་བསྔལ་ལས་ཡོངས་སུ་བསྐྱབ་པའི་དོན་དང་། ཐམས་ཅད་མཁྱེན་པའི་ཡེ་ཤེས་བླ་ན་མེད་པ་ལ་རབ་ཏུ་གཞག་པའི་ཕྱིར།
ཇི་ལྟར་འདས་པ་དང་། མ་བྱོན་པ་དང་། ད་ལྟར་བྱུང་བའི་བྱང་ཆུབ་སེམས་དཔའ་རྣམས་ཀྱིས་བྱང་ཆུབ་ཏུ་སེམས་བསྐྱེད་ནས་སངས་རྒྱས་ཉིད་རྟོགས་པར་གྱུར་པ་དང་། རྟོགས་པར་འགྱུར་བ་དང་། ཇི་ལྟར་སངས་རྒྱས་ཐམས་ཅད་སྒྲིབ་པ་དང་བྲལ་བའི་སངས་རྒྱས་ཀྱི་ཡེ་ཤེས་དང་
སངས་རྒྱས་ཀྱི་སྤྱན་གྱིས་གཟིགས་ཤིང་མཁྱེན་པ་དང་། ཇི་ལྟར་ཆོས་རྣམས་ཀྱི་ཆོས་ཉིད་མཁྱེན་པའི་ཆོ་ག་དེས་བདག་མིང་འདི་ཞེས་བགྱི་བ། སློབ་དཔོན་མཚན་འདི་ཞེས་བྱ་བའི་མདུན་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་མདུན་དུ་བླ་ན་མེད་པ་ཡང་

44-1-261a

དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །འདི་ལྟར་ལན་གསུམ་དུའོ། །དེ་ནས་གལ་ཏེ་འདོད་ན་དགེ་བསྙེན་གྱི་སྡོམ་པ་སྦྱིན་ནོ། །གསུམ་ལ་སྐྱབས་སུ་འགྲོ་བ་སྔོན་དུ་སོང་བའི་བསླབ་པ་ལྔ་འཛིན་པ་ནི་དགེ་བསྙེན་གྱི་སྡོམ་པའོ། །
དེ་ཡང་སྔར་གསོལ་བ་བཏབ་པ་དང་ལྡན་པ་སྐྱབས་སུ་སོང་བ་ལ་འདི་ལྟར་སྦྱིན་པར་བྱའོ། །ཚེ་དང་ལྡན་པ་ཁྱོད་འདི་སྐད་སྨྲོས་ཤིག །སློབ་དཔོན་དགོངས་སུ་གསོལ། ཇི་ལྟར་འཕགས་པ་དགྲ་བཅོམ་པ་དེ་རྣམས་ཀྱིས་ཇི་སྲིད་འཚོའི་བར་དུ་ཐ་ན་སྲིན་བུ་གྲོག་མ་ཡང་ཉེ་བར་
བཟུང་སྟེ། སེམས་ཅན་ཐམས་ཅད་ལ་ངོ་ཚ་དང་སྙིང་རྗེ་དང་ལྡན་པས་སྲོག་གཅོད་པ་སྤངས་པ་དང་། སྲོག་གཅོད་པ་ལས་སླར་ལོག་པ་དང་། དབྱུག་པ་སྤངས་པ་དང་། མཚོན་ཆ་སྤངས་པ་དེ་བཞིན་དུ་བདག་མིང་འདི་ཞེས་བགྱི་བས་ཀྱང་ཐ་མ་སྲིན་བུ་གྲོག་མ་ཡང་ཉེ་བར་བཟུང་སྟེ་
སེམས་ཅན་ངོ་ཚ་དང་སྙིང་རྗེ་དང་ལྡན་པས་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག་པ་དང་དབྱུག་པ་སྤང་བ་དང་། མཚོན་ཆ་སྤང་བར་བགྱིའོ། །ཡན་ལག་དང་པོ་འདིས་འཕགས་པ་དགྲ་བཅོམ་པ་དེ་རྣམས་ཀྱི་བསླབ་པ་ལ་རྗེས་སུ་སྒྲུབ་པོ་རྗེས་སུ་བགྱིད་དོ། །གཞན་
ཡང་སླར་ཇི་ལྟར་འཕགས་པ་དགྲ་བཅོམ་པ་དེ་རྣམས་ཀྱིས་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། འབྲུའི་ཆང་མྱོས་པར་འགྱུར་བའི་གནས་སྤངས་ཤིང་མྱོས་པར་འགྱུར་བའི་གནས་ལས་སླར་ལོག་པ་དེ་བཞིན་
དུ་མིང་འདི་ཞེས་བགྱི་བ་ཉི་མ་འདི་ནས་བཟུང་སྟེ། ཇི་སྲིད་འཚོའི་བར་དུ་མ་བྱིན་པར་ལེན་པ་དང་འདོད་པས་ལོག་པར་གཡེམ་པ་དང་བརྫུན་དུ་སྨྲ་བ་དང་། འབྲུའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཤིང་། འབྲུའི་གནས་ལས་སླར་ལོག་པར་བགྱིའོ། །ཡན་
ལག་ལྔ་པ་འདིས་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །བདག་སློབ་དཔོན་གྱིས་དགེ་བསྙེན་དུ་བཟུང་དུ་གསོལ། དེ་བཞིན་དུ་ལན་གཉིས་ལན་གསུམ་མོ། །དེ་བཞིན་དུ་གལ་ཏེ་གསོ་སྦྱོང་ལེན་

44-1-261b

པར་འདོད་ན་དེའི་ཚེ་གོ་མའི་སྡོམ་པ་སྦྱིན་པར་བྱའོ། །སྐྱབས་སུ་འགྲོ་བ་སྔོན་དུ་སོང་བའི་བསླབ་པ་བརྒྱད་འཛིན་པ་ནི་གོ་མའི་སྡོམ་པའོ། །དེ་ཡང་གསོལ་བ་བཏབ་པ་དང་ལྡན་པ་གསུམ་ལ་སྐྱབས་སུ་འགྲོ་བ་སྔོན་དུ་སོང་བ་ལ་འདི་ལྟར་སྦྱིན་པར་བྱའོ། །ཚེ་དང་ལྡན་
པ་ཁྱོད་ཀྱིས་འདི་སྐད་སྨྲོས་ཤིག་བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་ཕྱིས་ཀྱི་མཚན་མོའི་ཉི་མ་ཤར་བ་ལ་ཐུག་པ་དེ་སྲིད་དུ། སྲོག་གཅོད་ཀུན་དང་གཞན་གྱི་ནོར་འཕྲོག་དེ་བཞིན་མི་ཚངས་སྤྱོད། །ཕྲ་བརྫུན་དགའ་བ་སྐྱེད་བྱེད་ཆང་དང་དུས་མ་
ཡིན་པའི་ཟས། །ཕྲེང་བ་ཚོན་རྩི་གླུ་གར་རོལ་པ་ཁྲི་སྟན་ཆེན་པོ་དག །བདག་ནི་དེ་རིང་སྤོང་བྱེད་དགྲ་བཅོམ་ཞུགས་པའི་ཡོན་ཏན་བརྒྱད། །དེ་བཞིན་དུ་ལན་གསུམ་མོ། །དེ་ནས་གཞན་ཡང་དགེ་ཚུལ་གྱི་སྡོམ་པ་དང་། དགེ་སློང་གི་སྡོམ་པ་དང་། བྱང་ཆུབ་
སེམས་དཔའི་སྡོམ་པ་དང་། སྔགས་ཀྱི་ཚུལ་རྡོ་རྗེ་སེམས་དཔའི་སྡོམ་པ་ཡང་ཡོད་དེ། དེ་ཡང་སྦྱོར་བ་ཇི་ལྟ་བ་བཞིན་དང་། མོས་པ་ཇི་ལྟ་བ་བཞིན་དང་། སྐབས་ཇི་ལྟ་བ་བཞིན་དང་། ཆོ་ག་ཇི་ལྟ་བ་བཞིན་དུ་བླང་བར་བྱ་སྟེ། དེ་འདིར་མ་བསྟན་ཏེ་ཐུན་མོང་མ་
ཡིན་པ་ཉིད་ཀྱི་ཕྱིར་རོ། །དེ་ལ་སྲོག་གཅོད་པ་དང་། མ་བྱིན་པ་ལེན་པ་དང་། འདོད་པ་ལོག་པར་གཡེམ་པ་དང་། བརྫུན་དུ་སྨྲ་བ་དང་། འབྲུའི་ཆང་དང་། བཙོས་པའི་ཆང་དང་། བག་མེད་པའི་གནས་ཏེ། འདི་ལས་ལྡོག་པ་ནི་དགེ་བསྙེན་གྱི་བསླབ་པའི་གནས་
ལྔའོ། །དེ་བཞིན་དུ་སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། འབྲུའི་ཆང་བག་མེད་པའི་གནས་དང་། དུས་མ་ཡིན་པའི་ཟས་དང་། གར་ལ་སོགས་པ་དང་། ཕྲེང་བ་ལ་སོགས་པ་དང་། ཁྲི་སྟན་ཆེན་པོ་དང་། 
ཁྲི་སྟན་མཐོན་པོ་དང་། གསེར་ལ་སོགས་པ་སྟེ་འདི་དག་སྤོང་བ་ནི་དགེ་ཚུལ་གྱི་བསླབ་པའི་གནས་བཅུའོ། །དེ་བཞིན་ཕམ་པ་རྣམས་དང་། དགེ་འདུན་གྱི་ལྷག་མ་རྣམས་དང་། སོ་སོར་བཤགས་པར་བྱ་བ་དང་། ཉེས་བྱས་རྣམས་དེ་ལྟུང་བ་སྡེ་ལྔ་ནི་དགེ་སློང་རྣམས་ཀྱིའོ། །

44-1-262a

ཕམ་པ་དང་། ཉེས་བྱས་ཏེ་ལྟུང་བ་དེ་གཉིས་ནི་བྱང་ཆུབ་སེམས་དཔའི་སྡོམ་ཅན་གྱིའོ། །ཕམ་པ་རྣམས་དང་དགེ་འདུན་གྱི་ལྷག་མ་རྣམས་ཞེས་པ་ནི་རྩ་བའི་ལྟུང་བ་དང་། ལྟུང་བ་སྦོམ་པོའི་སྒྲས་བརྗོད་དེ། ལྟུང་བ་དེ་གཉིས་ནི་རྡོ་རྗེ་སེམས་དཔའི་
སྡོམ་པ་ཅན་གྱིའོ། །དེ་ལ་བླ་མ་ལ་བརྙས་པ་དང་། དེ་བཞིན་གཤེགས་པའི་བཀའ་ལས་འདས་པ་དང་། ཞེ་སྡང་གིས་རྡོ་རྗེ་སྤུན་གྱི་ཉེས་པ་བརྗོད་པ་དང་། བྱམས་པ་སྤོང་བ་དང་། བྱང་ཆུབ་ཀྱི་སེམས་སྤོང་བ་དང་། ཐེག་པ་གསུམ་ལ་སྨོད་པ་དང་། ཡོངས་སུ་མ་སྨིན་
པ་ལ་གསང་བ་སྒྲོགས་པ་དང་། དེ་བཞིན་གཤེགས་པའི་བདག་ཉིད་ཕུང་པོ་ལྔ་ལ་སྨོད་པ་དང་། ཆོས་ཐམས་ཅད་རང་བཞིན་གྱིས་ཡོངས་སུ་དག་པ་ལ་ཐེ་ཚོམ་ཟ་བ་དང་། སྡང་བ་ལ་བྱམས་པ་དང་། ཆོས་ཐམས་ཅད་ཐོག་མ་དང་ཐ་མས་སྟོང་པ་ལ་ཐོག་མ་དང་ཐ་མར་རྟོག་པ་དང་། དད་
པ་དང་ལྡན་པའི་སེམས་རབ་ཏུ་སུན་འབྱིན་པ་དང་། ཇི་ལྟར་རྙེད་པའི་དམ་ཚིག་མི་བསྟེན་པ་དང་། བུད་མེད་ལ་སྨོད་པ་ཞེས་བྱ་སྟེ་རྩ་བའི་ལྟུང་བ་བཅུ་བཞིའོ། །དེ་བཞིན་དུ་སྟོབས་ཀྱིས་རྣལ་འབྱོར་མ་ལེན་པ་དང་། སྟོབས་ཀྱིས་དེའི་བྱང་ཆུབ་ཀྱི་སེམས་ལེན་པ་དང་། གསང་བ་མི་
སྦེད་པ་དང་། དམ་ཚིག་ལ་རྩོད་པ་དང་། དད་པ་དང་ལྡན་པ་ལ་ཆོས་ལོག་པར་སྟོན་པ་དང་། ཉན་ཐོས་ཀྱི་ཐེག་པ་ལ་ཞུགས་པ་དང་ཞག་བདུན་དུ་ལྷན་ཅིག་གནས་པ་དང་རྣལ་འབྱོར་མི་ཤེས་པར་རྣལ་འབྱོར་པ་དེ་ཉིད་དུ་ང་རྒྱལ་བ་དང་། དད་པ་དང་མི་ལྡན་པ་ལ་ཆོས་སྟོན་པ་ཞེས་པ་
སྟེ། ལྟུང་བ་སྦོམ་པོ་བརྒྱད་དོ། །རྡོ་རྗེ་སེམས་དཔའི་སྡོམ་པ་ལ་མོས་ནས་གནས་པ་དེས་ཡོངས་སུ་ཀུན་དུ་སྤང་བར་བྱའོ། །སླར་ཡང་གཉིས་སུ་མེད་པའི་གནས་སྐབས་མངོན་སུམ་དུ་མ་བྱས་པའི་གནས་སྐབས་སུ་ལྷན་ཅིག་སྐྱེས་པ་བསམ་གྱིས་མི་ཁྱབ་པའི་རྣལ་
འབྱོར་ལ་རེ་ནས་སྤྱོད་པ་ཅི་ཡང་རུང་ནང་རུལ་བའི་རྨ་ལྡན་བཞིན་དུ་ཕྱི་རོལ་གྱི་འགྱིང་གིས་གནས་པར་མི་བྱའོ། །གང་ཞིག་རིགས་མི་ལྡན་པ་ལ་སོགས་པས་སྡོམ་པ་གཅིག་ཀྱང་ཉེ་བར་ལེན་པར་མི་ནུས་པ་དེས་ཀྱང་གཞི་རྣམས་ལས་གཉིས་སམ་གཅིག་ཀྱང་རུང་བའི་བསླབ་པའི་གནས་

44-1-262b

ལ་བསླབ་པར་བྱའོ། །དེ་ཡང་མི་ནུས་ན་སྐྱབས་སུ་འགྲོ་བ་སྔོན་དུ་སོང་བའི་བྱང་ཆུབ་ཀྱི་སེམས་ཙམ་འདི་ལ་སྦྱིན་པར་བྱའོ། །དེ་ཡང་དགེ་བསྙེན་དང་བྱང་ཆུབ་སེམས་དཔའ་ཡང་མཆོག་ཏུ་སྐྱབས་སུ་འགྲོ་བ་འདི་ཙམ་གྱི་ཕྱིར་རོ། །སྨོན་པ་བྱང་ཆུབ་ཀྱི་སེམས་ཙམ་གྱི་ཕྱིར་འགྲོ་
བ་ལས་རྒྱལ་བ་ལ་མི་དམན་པ་ཉིད་ཀྱི་ཕྱིར་རོ། །སྐྱབས་སུ་འགྲོ་བ་དང་བྱང་ཆུབ་ཀྱི་སེམས་བསྐྱེད་པ་དང་། སྡོམ་པའི་ཆོ་གའི་རབ་ཏུ་དབྱེ་བ་སྟེ་དང་པོའོ།།      །།ལྷག་པའི་བསམ་པ་ལ་རབ་ཏུ་ཡང་དག་པར་ཞུགས་པའི་བྱང་ཆུབ་སེམས་དཔའ་རྟག་ཏུ་བཅོམ་ལྡན་འདས་
ཀྱི་མཆོད་པ་བྱ་བར་འོས་པས་མཆོད་པའི་ཆོ་ག་བཤད་པར་བྱའོ། །ནང་པར་སྔར་ལངས་ནས་སམ། ཇི་ལྟར་སྐབས་ཡོད་པ་ཡང་རུང་། ཡིད་དུ་འོང་བའི་ས་ཕྱོགས་གཙང་སྦྲ་བྱས་ཏེ། སངས་རྒྱས་དང་བྱང་ཆུབ་སེམས་དཔའི་སྐུ་དང་ཐང་ཀ་དང་། པུ་སྟི་རྣམས་དང་
གཞན་ཡང་གང་རུང་ཁྲུས་བྱ་བར་འོས་པ་འཆད་པར་འགྱུར་བའི་སྔགས་ཀྱིས་ཁྲུས་བྱས་ལ་རྨ་བྱའི་རླུང་ཡབ་ལ་སོགས་པས་རྡུལ་བྱབས་ཏེ། ཇི་ལྟར་རྙེད་པའི་ན་བཟའ་དང་དྲི་དང་རྒྱན་དང་མེ་ཏོག་ལ་སོགས་པས་རྩའི་རྩེ་མོའི་ཆུའི་ཚད་ཙམ་གྱིས་ཀྱང་འཆད་པར་འགྱུར་བའི་
སྔགས་ཀྱིས་བྱིན་གྱིས་བརླབས་ལ་རབ་ཏུ་མཆོད་པར་བྱའོ། །དེ་ལ་འདི་ནི་ཁྲུས་ཀྱི་སྔགས་ཏེ། ཨོཾ་ཨཱཿཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུྃ་ཧཱུྃ། དེ་བཞིན་དུ་ན་བཟའ་ལ་སོགས་པའི་སྔགས་ནི། ཨོཾ་ཨཱཿཨོཾ་བཛྲ་ཝསྟྲ་ཡེ་སྭཱ་ཧཱ་ཧཱུྃ། ཨོཾ་ཨཱཿཨོཾ་
བཛྲ་ས་མ་ལཾ་བྷ་ནེ་སྭཱ་ཧཱ་ཧཱུྃ། ཨོཾ་ཨཱཿཨོཾ་བཛྲ་ཨ་ལཾ་ཀ་རེ་སྭཱ་ཧཱ་ཧཱུྃ། ཨོཾ་ཨཱཿཨོཾ་བཛྲ་པུཥྤེ་སྭཱ་ཧཱ་ཧཱུྃ། དེ་བཞིན་དུ་གཞན་ཡང་སྤོས་ལ་སོགས་པ་དག་དེ་ཁོ་ན་ཉིད་གསུམ་པོ་འདི་ཉིད་ཀྱིས་རིམ་པས་ནང་དུ་བཅུག་ལ་རོལ་པར་བྱའོ། །དེ་བས་ན་སྐུ་ལ་སོགས་པ་དེ་རྣམས་ཀྱི་
མདུན་དུའོ། །སྐུ་ལ་སོགས་པ་མེད་ན་ཕྱོགས་བཅུ་དུས་གསུམ་དུ་བྱུང་བའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་དམིགས་ལ་གང་ཅུང་ཟད་འཆད་པར་འགྱུར་བའི་སྔགས་ཀྱིས་བྱིན་གྱིས་བརླབས་པ་ལ་ལྕི་བ་ལ་སོགས་པའི་དཀྱིལ་འཁོར་བྱ་སྟེ། འཆད་པར་

44-1-263a

འགྱུར་བའི་སྔགས་ཀྱིས་དཀྱིལ་འཁོར་བྱིན་གྱིས་བརླབས་སོ། །དེ་ལ་འདི་ནི་ས་གཞི་བྱིན་གྱིས་བརླབ་པའི་སྔགས་ཏེ། ཨོཾ་ཨཱཿཨོཾ་བཛྲ་བྷཱུ་མི་སྭཱ་ཧཱ་ཧཱུྃ། དེ་བཞིན་དུ་དཀྱིལ་འཁོར་བྱིན་གྱིས་བརླབ་པའི་སྔགས་ནི། ཨོཾ་ཨཱཿཨོཾ་བཛྲ་རེ་ཁེ་སྭཱ་ཧཱ་ཧཱུྃ། 
དེ་བཞིན་དུ་ཨརྒྷའི་སྔགས་ནི། ཨོཾ་ཨཱཿམཾ་པྲ་བ་ར་སཏྐ་ར་ཨརྒྷཾ་པྲ་ཏཱིཙྪ་སྭཱ་ཧཱ་ཧཱུྃ། དེ་ལ་ཡང་དཀྱིལ་འཁོར་བའི་རང་གི་སྙིང་ག་ན་གནས་པའི་དབྱངས་ཡིག་དང་པོ་དཀར་པོ་ཡོངས་སུ་གྱུར་པའི་ནང་ཟླ་བའི་དཀྱིལ་འཁོར་གྱི་དབུས་སུ་གནས་པ་གུར་གུམ་ལྟར་དམར་བའི་
མཾ་ཡིག་གི་ས་བོན་ལས་འོད་ཟེར་འཕྲོས་པས་ཐོག་མ་མེད་པ་ནས་གྲུབ་པའི་ཡེ་ཤེས་ཀྱི་དཀྱིལ་འཁོར་གྱི་བདག་ཉིད་འཇམ་དཔལ་རྡོ་རྗེ་གཙོ་བོར་གྱུར་པའི་དཔལ་གསང་བ་འདུས་པའི་དཀྱིལ་འཁོར་གྱི་འཁོར་ལོ་བཀུག་སྟེ།དེར་གནས་པ་དེ་རྣམས་ཀྱི་གནས་དང་མཚན་
དང་ཁ་དོག་དང་ཕྱག་མཚན་དང་། ས་བོན་རྣམས་མངོན་དུ་བྱའོ། །དེ་ལ་རྩ་བ་གཅིག་ལ་ཡལ་ག་བཅུ་དགུ་པའི་སྣ་ཚོགས་པདྨ་ལ་མགོན་པོ་དང་བཅས་པའི་ལྷ་རྣམས་ཀྱི་གནས་རིན་པོ་ཆེ་སྣ་བདུན་གྱི་རང་བཞིན་རྣམ་པར་བཀྲ་བའི་གཞལ་ཡས་ཁང་གི་དབུས་སུ་པདྨ་དང་ཟླ་བའི་
དཀྱིལ་འཁོར་ལ་འཇམ་དཔལ་རྡོ་རྗེ་གུར་གུམ་ལྟར་དམར་བ་རལ་གྲི་ནག་པོ་དང་མདའ་དམར་པོ་དང་ཨུཏྤལ་སྔོན་པོ་དང་གཞུ་དམར་པོ་འཛིན་པ་གུར་གུམ་དམར་པོ་ལྟ་བུའི་མཾ་ཡིག་ནི་ས་བོན་ནོ། །དེའི་དབུ་ལ་མི་བསྐྱོད་པ་ནག་པོ་རྡོ་རྗེ་རྩེ་ལྔ་པ་ནག་པོ་འཛིན་པ་ཧཱུྃ་ཡིག་
ནག་པོ་ནི་ས་བོན་ནོ། །མདུན་དུ་རྣམ་པར་སྣང་མཛད་དཀར་པོ་འཁོར་ལོ་དཀར་པོ་རྩིབས་བརྒྱད་པ་འཛིན་པ་བྷྲཱུཾ་ཡིག་དཀར་པོ་ནི་ས་བོན་ནོ། །གཡས་སུ་རིན་ཆེན་འབྱུང་ལྡན་སེར་པོ་པདྨ་རཱ་ག་ལྟར་རིན་པོ་ཆེ་ཟུར་དགུ་པ་ལྗང་གུ་འཛིན་པ་ཨཱཾ་ཡིག་སེར་པོ་ནི་ས་བོན་ནོ། །ནུབ་
ཕྱོགས་སྣང་བ་མཐའ་ཡས་དམར་པོ་པདྨ་འཛིན་པ་ཛྲཱིཾ་ཡིག་དམར་པོ་ནི་ས་བོན་ནོ། །བྱང་ཕྱོགས་སུ་དོན་ཡོད་གྲུབ་པ་ལྗང་གུ་རལ་གྲི་ནག་པོ་འཛིན་པ་ཁཾ་ཡིག་ལྗང་གུ་ནི་ས་བོན་ནོ། །མེའི་མཚམས་སུ་ནི་སྤྱན་མ་དཀར་མོ་འཁོར་ལོ་དཀར་པོ་འཛིན་པ་ལཾ་ཡིག་དཀར་པོའི་

44-1-263b

ས་བོན་ནོ། །སྲིན་པོའི་མཚམས་སུ་མཱ་མ་ཀཱི་ནག་མོ་ཨུཏྤལ་དམར་པོ་འཛིན་པ་མཾ་ཡིག་ནག་པོ་ནི་ས་བོན་ནོ། །རླུང་གི་མཚམས་སུ་གོས་དཀར་མོ་དམར་མོ་པདྨ་དམར་པོ་འཛིན་པ་པཾ་ཡིག་དམར་པོ་ནི་ས་བོན་ནོ། །དབང་ལྡན་གྱི་མཚམས་སུ་སྒྲོལ་མ་སེར་མོ་ཨུཏྤལ་
འཛིན་པ་ཏཱཾ་ཡིག་སེར་པོ་ནི་ས་བོན་ནོ། །ཕྱིའི་མེའི་མཚམས་སུ་གཟུགས་རྡོ་རྗེ་མ་དཀར་མོ་མེ་ལོང་དཀར་པོ་འཛིན་པ་ཛཿདཀར་པོ་ནི་ས་བོན་ནོ། །སྲིན་པོའི་མཚམས་སུ་སྒྲ་རྡོ་རྗེ་མ་ནག་མོ་པི་ཝང་ནག་པོ་འཛིན་པ་ཧཱུྃ་ཡིག་ནག་པོ་ནི་ས་བོན་ནོ། །རླུང་གི་མཚམས་སུ་དྲི་རྡོ་རྗེ་
མ་སེར་མོ་དྲི་ཆུ་སེར་མོས་བཀང་བའི་དུང་ཕོར་འཛིན་པ་བཾ་ཡིག་སེར་པོ་ནི་ས་བོན་ནོ། །དབང་ལྡན་གྱི་མཚམས་སུ་རོ་རྡོ་རྗེ་མ་དམར་མོ་རོ་དམར་པོས་བཀང་བའི་སྣོད་དཀར་པོ་འཛིན་པ་ཧོཿཡིག་དམར་པོ་ནི་ས་བོན་ནོ། །ཤར་ཕྱོགས་ཀྱི་སྒོའི་བྱང་གི་རྩ་རུ་ཆོས་ཀྱི་དབྱིངས་རེག་རྡོ་རྗེ་མ་ལྗང་
གུ་གོས་སྣ་ཚོགས་འཛིན་པ་ཁཾ་ཡིག་ལྗང་གུ་ནི་ས་བོན་ནོ། །ལྷོའི་སྒོའི་རྩ་རུ་ཆོས་ཀྱི་དབྱིངས་ཀྱི་རྡོ་རྗེ་མ་ཆོས་འབྱུང་དཀར་པོ་འཛིན་པ་རཾ་ཡིག་དཀར་པོ་ནི་ས་བོན་ནོ། །ཤར་སྒོ་རུ་གཤིན་རྗེ་མཐར་བྱེད་ནག་པོ་འཇིགས་པ་རྡོ་རྗེ་ཐོ་བ་ནག་པོ་འཛིན་པ་ཧཱུྃ་ཡིག་ནག་པོ་ནི་ས་བོན་ནོ། །
ལྷོ་སྒོ་རུ་ཤེས་རབ་མཐར་བྱེད་དཀར་པོ་རྡོ་རྗེ་རྩེ་ལྔ་པ་ནག་པོས་མཚན་པའི་དབྱིག་པ་དཀར་པོ་ནི་ས་བོན་ནོ། །ནུབ་སྒོ་རུ་པདྨ་མཐར་བྱེད་དམར་མོ་འཇིགས་པ་པདྨ་དམར་པོ་འཛིན་པ་ཧཱུྃ་ཡིག་དམར་པོ་ནི་ས་བོན་ནོ། །བྱང་སྒོ་རུ་བགེགས་མཐར་བྱེད་ནག་པོ་འཇིགས་པ་རྡོ་རྗེ་ནག་
པོ་རྩེ་ལྔ་པ་འཛིན་པ་ཧཱུྃ་ཡིག་ནག་པོ་ནི་ས་བོན་ནོ། །བསྲུང་བའི་འཁོར་ལོ་རྩི་བས་བཅུ་པ་འཁོར་ལོ་ཁ་དོག་སེར་པོའི་ཤར་དང་ལྷོ་དང་ནུབ་དང་བྱང་གི་རྩིབས་ཀྱི་དབུས་རྣམས་སུ་གཤིན་རྗེ་མཐར་བྱེད་ལ་སོགས་པ་འདི་དག་ཉིད་དོ། །མེའི་མཚམས་ཀྱི་རྩིབས་ཀྱི་མཚམས་ན་
འདོད་པའི་རྒྱལ་པོ་མཛེས་པ་ནག་པོ་ལྕགས་ཀྱུ་ནག་པོ་འཛིན་པ་ཧཱུྃ་ཡིག་ནག་པོ་ནི་ས་བོན་ནོ། །སྲིན་པོའི་མཚམས་ཀྱི་རྩིབས་ཀྱི་དབུས་སུ་དབྱུག་པ་སྔོན་པོ་འཇིགས་པ་ནག་པོ་དབྱུག་པ་ནག་པོ་འཛིན་པ། ཧཱུྃ་ཡིག་ནག་པོ་ནི་ས་བོན་ནོ། །རླུང་གི་མཚམས་ཀྱི་རྩིབས་

44-1-264a

ཀྱི་དབུས་སུ་སྟོབས་པོ་ཆེ་འཇིགས་པ་ནག་པོ་རྩེ་གསུམ་ནག་པོ་འཛིན་པ་ཧཱུྃ་ཡིག་ནག་པོ་ནི་ས་བོན་ནོ། །དབང་ལྡན་གྱི་མཚམས་ཀྱི་རྩིབས་ཀྱི་དབུས་སུ་མི་གཡོ་བ་ནག་པོ་མཛེས་པ་བྱིས་པའི་ཆ་བྱད་ཅན་སྤྱན་ཡོ་བ་ནག་པོ་རལ་གྲི་ནག་པོ་འཛིན་པ་ཧཱུྃ་ཡིག་ནག་པོ་ནི་ས་བོན་ནོ། །
སྟེང་གི་རྩིབས་ཀྱི་དབུས་སུ་གཙུག་ཏོར་འཁོར་ལོས་སྒྱུར་བ་མཛེས་པ་སེར་པོ་འཁོར་ལོ་རྩིབས་བརྒྱད་པ་སེར་པོ་འཛིན་པ་འཁོར་ལོ་སེར་པོ་འབར་བས་ཡོངས་སུ་བསྐོར་བ་བྲུཾ་ཡིག་སེར་པོ་ནི་ས་བོན་ནོ། །འོག་གི་རྩིབས་ཀྱི་དབུས་སུ་གནོད་མཛེས་རྒྱལ་པོ་མཛེས་པ་སྐུ་མདོག་ནག་
པོ་རྡོ་རྗེ་རྩེ་ལྔ་པ་ནག་པོ་འཛིན་པ་ཧཱུྃ་ཡིག་ནག་པོ་ནི་ས་བོན་ནོ། །འཁོར་ལོའི་ལྟེ་བའི་དབུས་སུ་རྡོ་རྗེ་ཧཱུྃ་མཛད་མཛེས་པ་ནག་པོ་ཆོས་འབྱུང་བ་དཀར་པོ་བསྐྱེད་པ་སྟེ་ས་བོན་ནོ། །རྡོ་རྗེ་ནག་པོ་རྩེ་ལྔ་པ་དང་། རལ་གྲི་ནག་པོ་དང་། ལྕགས་ཀྱུ་ནག་པོ་དང་། ཞགས་པ་
ནག་པོ་འཛིན་པ་ཞབས་གཡོན་པ་དང་གཡས་པ་གཉིས་ཀྱིས་ཨུ་མའི་ནུ་མའི་བུམ་པ་དང་། བདེ་བྱེད་ཀྱི་རྣ་བ་གཡོན་པ་མནན་པ་སྟེ། ཧཱུྃ་ཡིག་ནག་པོ་ནི་ས་བོན་ནོ། །མདོར་བསྡུས་པ་འདི་དྲན་པར་བྱས་ལ་མཆོད་པར་བྱའོ། །གལ་ཏེ་མངོན་པར་བརྩོན་པ་ཡོད་ན་གཞན་
འདི་ཡང་དྲན་པར་བྱའོ། །འཇམ་པའི་རྡོ་རྗེ་ལ་སོགས་པ་ཐམས་ཅད་འདི་ལྟར་ཤེས་པར་བྱ་སྟེ། ཞལ་གསུམ་ཕྱག་དྲུག་པ་རང་རང་གི་གཟུགས་ཀྱི་རྡུལ་ཕྲ་རབ་ལས་ཡོངས་སུ་བསྒྲུབ་པའི་གཟུགས་ཅན་རྣམས་ཡེ་ཤེས་སེམས་དཔའི་སྙིང་གི་ས་བོན་ལས་བྱུང་བ་རང་རང་གི་
དཀྱིལ་འཁོར་གྱི་འཁོར་ལོ་སྤྲོས་པས་སེམས་ཅན་གྱི་དོན་བྱེད་པ་དང་། རྒྱན་ཐམས་ཅད་འཛིན་པ་དང་། རིན་པོ་ཆེའི་དབུ་རྒྱན་དང་། རྡོ་རྗེའི་སྐྱིལ་མོ་ཀྲུང་དང་། ཕྱག་གཉིས་གཙོ་བོ་གཉིས་ཀྱིས་རང་འོད་ཀྱི་རིག་མ་ལ་འཁྱུད་པ། མཛེས་པའི་མ་མཆུ་འཛིན་པ། ལྷག་མའི་ཕྱག་
གཅོ་བོ་རྣམས་ཀྱི་ཕྱག་མཚན་རལ་གྲི་ནག་པོ་དང་། རིན་པོ་ཆེ་མར་གད་ལྗང་གུ་ཟུར་དགུ་པ་དང་། པདྨ་དམར་པོ་འདབ་མ་བརྒྱད་པ་འཛིན་པའོ། །རལ་གྲི་དང་རིན་པོ་ཆེ་དང་པདྨ་རྣམས་དང་། གཞན་གྱི་ཡང་ཕྱག་མཚན་གཙོ་བོའི་གནས་སུ་འཁོར་ལོ་རྩིབས་བརྒྱད་པའོ། །མི་

44-1-264b

གཡོ་བ་ནི་དེའི་གནས་སུ་རྡོ་རྗེ་ནག་པོ་རྩེ་ལྔ་པའོ། །ཐམས་ཅད་ཀྱི་ཡང་གཡས་དང་གཡོན་གྱི་ཞལ་ནི་སྔོན་པོ་དང་དཀར་པོ་སྟེ། དཀར་པོ་རྣམས་ཀྱི་ནི་སྔོན་པོ་དང་དམར་པོའོ། །སྔོན་པོ་རྣམས་ཀྱི་ནི་དཀར་པོ་དང་དམར་པོའོ། །ཁྲོ་བོ་མ་གཏོགས་པ་ཐམས་ཅད་ཤིན་ཏུ་སྒེག་པ་
འབར་བ་ཡིད་དུ་འོང་བའི་གཟུགས་ཅན་ནོ། །དེ་བཞིན་གཤེགས་པ་རྣམས་རྡོ་རྗེ་སེམས་དཔའ་དང་། རང་འོད་མཛེས་མ་མ་གཏོགས་ནི་རལ་པའི་ཐོར་ཚུགས་ཅན་ནོ། །རྣམ་པར་སྣང་མཛད་དང་། རྡོ་རྗེ་སེམས་དཔའ་མ་གཏོགས་པའི་དེ་བཞིན་གཤེགས་པ་ཐམས་ཅད་དང་། 
ཁྲོ་བོ་རྣམས་ཀྱི་ནི་ཉི་མའི་འོད་དང་ཉི་མའི་གདན་རྣམས་སོ། །ཁྲོ་བོ་ཐམས་ཅད་གཡོན་བརྐྱང་ངོ་། །ཁྲོ་བོ་འཇིགས་པ་རྣམས་ནི་ཐུང་བ་གསུས་པ་འཕྱང་བ་སྨིན་མ་དང་སྨ་ར་དང་སྐྲ་གྱེན་དུ་འགྲེང་བ་རྣམས་སོ། །ཀླུ་མཐའ་ཡས་ཤིན་ཏུ་སྔོ་བས་མགོ་ལ་བཅིང་བ་དང་འཇོག་པོ་དམར་པོས་
རྣ་བའི་འདབ་མ་བརྒྱན་པ་དང་། དཀར་པོ་པདྨ་ཆེན་པོས་རྒྱན་དོ་ཤལ་བྱས་པ་དང་། ལྗང་གུ་ཀརྐོ་ཊས་ཚངས་པའི་སྐུད་པ་དང་། སེར་པོ་དུང་སྐྱོང་གིས་གདུ་བུ་བྱས་པ་དང་། ཁ་དོག་སྣ་ཚོགས་རིགས་ལྡན་གྱིས་ལེགས་པར་མཛེས་པའི་དཔུང་རྒྱན་དང་། པདྨ་སྐྱ་བོ་ལྟ་བུ་ནོར་
ལྡན་གྱིས་སྐ་རགས་སྤྲས་པ་དང་། པདྨའི་ཡུ་བ་སྐྱ་བོ་ལྟ་བུའི་པདྨ་རྐང་རྒྱན་བྱས་པ་དང་། སྟག་གི་པགས་པའི་གོས་འཛིན་པ་དང་། ལྕེ་འདྲིལ་བ་དང་། གདོང་འཇིགས་པ་དང་། བཞད་པའི་གད་རྒྱངས་དང་། དཔྲལ་བའི་དབྱེས་ལ་ཁྲོ་གཉེར་དང་། སྤྱན་ཟླུམ་པོ་ཅུང་ཟད་
དམར་བ་རྣམས་སོ། །ཁྲོ་བོ་མཛེས་པ་རྣམས་ནི་ཁྲོ་བའི་གཟུགས་དང་། ཁྲོ་གཉེར་ཅུང་ཟད་དང་རྒྱན་ཐམས་ཅད་འཛིན་པ་དང་རིན་པོ་ཆེའི་དབུ་རྒྱན་ཅན་ཏེ་སྨ་ར་མེད་པའོ། །དཔལ་འཇམ་པའི་རྡོ་རྗེ་དང་། རྣམ་པར་སྣང་མཛད་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་
དང་།དོན་ཡོད་གྲུབ་པ་དང་། མཱ་མ་ཀཱི་དང་། སྒྲ་རྡོ་རྗེ་དང་། ཤེས་རབ་མཐར་བྱེད་དང་། བགེགས་མཐར་བྱེད་དང་། སྲུང་བའི་འཁོར་ལོ་ལ་གནས་པའི་བགེགས་མཐར་བྱེད་དང་། ཤེས་རབ་མཐར་བྱེད་དང་། འདོད་པའི་རྒྱལ་པོ་དང་། དབྱུག་པ་སྔོན་པོ་དང་། སྟོབས་

44-1-265a

པོ་ཆེ་དང་། མི་གཡོ་བ་དང་། གཙུག་ཏོར་འཁོར་ལོས་སྒྱུར་བ་དང་། གནོད་མཛེས་རྒྱལ་པོ་དང་། རྡོ་རྗེ་ཧཱུྃ་མཛད་རྣམས་ཀྱི་རིགས་ཀྱི་བདག་པོ་ནི་མི་བསྐྱོད་པའོ། །མི་བསྐྱོད་པ་དང་ཆོས་ཀྱི་དབྱིངས་ཀྱི་རྡོ་རྗེ་མ་གཉིས་ཀྱི་རིགས་ཀྱི་བདག་པོ་རྡོ་རྗེ་སེམས་དཔའོ། །
སྤྱན་མ་དང་གཟུགས་རྡོ་རྗེ་མ་དང་། གཤིན་རྗེ་མཐར་བྱེད་དང་། སྲུང་བའི་འཁོར་ལོ་ལ་གནས་པའི་གཤིན་རྗེ་མཐར་བྱེད་རྣམས་ཀྱི་བདག་པོ་ནི་རྣམ་པར་སྣང་མཛད་དོ། །གོས་དཀར་མོ་དང་། རོ་རྡོ་རྗེ་མ་དང་། པདྨ་མཐར་བྱེད་དང་། སྲུང་བའི་འཁོར་ལོ་ལ་གནས་པའི་པདྨ་མཐར་
བྱེད་རྣམས་ཀྱི་བདག་པོ་ནི་སྣང་བ་མཐའ་ཡས་སོ། །སྒྲོལ་མ་དང་རེག་རྡོ་རྗེ་མ་གཉིས་ཀྱི་བདག་པོ་ནི་དོན་ཡོད་གྲུབ་པའོ། །དྲི་རྡོ་རྗེ་མའི་བདག་པོ་ནི་རིན་ཆེན་འབྱུང་ལྡན་ནོ། །དཀྱིལ་འཁོར་ཐམས་ཅད་ཀྱི་བདག་པོ་ལ་ཞལ་བལྟས་པའོ། །རྣམ་པར་སྤྲོས་པ་འདི་དྲན་པར་བྱས་ལ་མན་ངག་ཇི་ལྟ་བ་
བཞིན་དུ་ཞབས་བསིལ་དང་ཞལ་བསིལ་བ་དང་། ཨརྒྷཾ་ཕུལ་ལ་དྲིལ་བུ་དཀྲོལ་ཏེ། རང་རང་གི་ས་བོན་དེ་ཁོ་ན་ཉིད་གསུམ་གྱི་ནང་དུ་བཅུག་ལ་མངོན་པར་བསྔགས་ཏེ། གནས་ཇི་ལྟ་བ་བཞིན་དུ་མེ་ཏོག་ལ་སོགས་པ་དབུལ་བར་བྱའོ། །དེ་ནས་ཕྱིའི་སྐུ་ལ་སོགས་པ་དང་། གསང་བའི་
མཆོད་པ་ཡེ་ཤེས་ཀྱི་དཀྱིལ་འཁོར་ལ་ཡང་དྲིལ་བུ་དཀྲོལ་བ་དང་བཅས་པས། ཨོཾ་ཨཱཿཨོཾ་བཛྲ་དྷཱུ་པེ་སྭཱ་ཧཱ་ཧཱུྃ། འདི་ལ་སོགས་པ་སྔར་བསྟན་པའི་སྔགས་ཀྱིས་ཇི་ལྟར་རྙེད་པའི་སྤོས་དང་། མར་མེ་དང་དྲི་དང་ལྷ་བཤོས་ལ་སོགས་པ་ཉེ་བར་བསྟབས་ལ་རང་གི་སྙིང་ག་ནས་
བྱུང་བའི་བླ་ན་མེད་པའི་མཐར་ཐུག་པ་ཟག་པ་དང་བྲལ་བའི་གཟུགས་དང་སྒྲ་དང་དྲི་དང་རོ་དང་རེག་བྱ་ལ་ཐུག་པའི་རབ་ཏུ་དབྱེ་བས་འདོད་པའི་ཡོན་ཏན་ལྔས་མཆོད་པར་བྱ་སྟེ། འདི་ནི་ཕྱིའི་མཆོད་པའོ། །གསང་བའི་མཆོད་པ་ནི་མན་ངག་ཇི་ལྟ་བ་བཞིན་དུ་ཁོང་དུ་ཆུད་པར་བྱའོ། །
དེ་ནས་མཆོད་པར་བྱ་བ་དང་མཆོད་པར་བྱེད་པ་དང་། མཆོད་པ་དང་། ཕྱག་བྱ་བ་དང་། ཕྱག་བྱེད་པ་དང་། ཕྱག་དང་། བཤགས་པར་བྱ་བ་དང་། བཤགས་པར་བྱེད་པ་དང་། བཤགས་པ་ལ་སོགས་པ་སྟོང་པ་ཉིད་དང་། མཚན་མ་མེད་པ་དང་། རང་བཞིན་གྱིས་འོད་གསལ་བར་བསྒོམ་པར་

44-1-265b

བྱའོ། །བླ་ན་མེད་པའི་མཆོད་པ་བདུན་པོ་གསལ་བར་བྱེད་པའི་ཚིགས་སུ་བཅད་པ་གཅིག་པུ་འདི་ནི་སྔོན་དུ་བྱས་ལ་ལྷག་པའི་བསམ་པས་གདོན་པར་བྱའོ། །སྡིག་པ་ཐམས་ཅད་བདག་གིས་བཤགས་བགྱི་མཆོག་ཏུ་དགའ་བས་དགེ་བ་རྣམས་ལ་རྗེས་ཡི་རང་། །བཅོམ་
ལྡན་འདས་ཀྱིས་དམ་པའི་ཆོས་ལ་ཡང་ནི་སྐྱེ་བ་ཇི་སྲིད་གནས་པར་གསོལ་བ་འདེབས། །དཀོན་མཆོག་གསུམ་ལ་སྐྱབས་སུ་མཆི་བར་ཁས་འཆེས་ཡིད་ནི་བྱང་ཆུབ་མཆོག་ཏུ་སེམས་བསྐྱེད་བགྱི། །དེ་ཡི་ལམ་ལ་ཡང་དག་གནས་བགྱི་དགེ་བའི་ཆོ་ག་བྱང་ཆུབ་མཆོག་ཏུ་བསྔོ་
བར་བགྱི། །འདི་ནི་རབ་ཏུ་རྟོགས་པའི་མཆོད་པའོ། །དེ་ནས་མི་བསྐྱོད་རྡོ་རྗེ་ཞེས་བྱ་བ་ལ་སོགས་པ་ཚིགས་སུ་བཅད་པ་ལྔ་དང་མངོན་པར་འདོདཔའི་བསྟོད་པ་གཞན་ཡང་རུང་བས་བསྟོད་ལ་ཕྱག་བྱས་ཏེ། བསྐོར་བ་བྱས་ལ་སླར་ཡང་ཕྱག་བྱས་ཏེ། ཉེ་བར་འདུག་ནས་ཇི་
ལྟ་བ་བཞིན་དུ་གསང་བ་འདུས་པའི་སྔགས་སམ། གཞན་གང་ཡང་རུང་བས་བཅོམ་ལྡན་འདས་ཛཾ་བྷ་ལ་ལ་ཆུ་དང་། འབྱུང་པོ་ཐམས་ཅད་ལ་གཏོར་མ་དང་། ཡི་དྭགས་རྣམས་ལ་ཡང་ཆུ་སྦྱིན་པར་བྱའོ། །དེ་ལ་ཨོཾ་ཨཱཿཛཾ་དྷ་ནཾ་མེ་དེ་ཧི་ཧཱུྃ་ཛཾ་བྷ་ལ་ལ་ཆུ་སྦྱིན་པའི་སྔགས་སོ། །
ཨོཾ་ཨཱཿཨོཾ་ཨ་ཀཱ་རོ་མུ་ཁཾ་སརྦ་དྷརྨྨ་ཎཱཾ་ཨཱདྱ་ནུཏྤནྣ་ཏྭཱཏ་ཨོཾ་ཨཱཿཧཱུྃ་ཕཊ་སྭཱ་ཧཱ་ཧཱུྃ། མདོར་བསྡུས་པའི་གཏོར་མའི་སྔགས་སོ། །ཨོཾ་ཨཱཿཨོཾ་ཛ་ལ་མི་ཏཾ་སརྦ་པྲེ་ཏེ་བྷྱ་སྭཱ་ཧཱ་ཧཱུྃ། ཡི་དགས་རྣམས་ལ་ཆུ་སྦྱིན་པའི་སྔགས་སོ། །དེ་ནས་སྟན་བདེ་བ་ལ་འདུག་སྟེ། ཤེས་རབ་ཀྱི་ཕ་རོལ་ཏུ་
ཕྱིན་པ་ལ་སོགས་པ་མངོན་པར་འདོད་པའི་དམ་པའི་ཆོས་བཀླག་པར་བྱའོ། །ཡང་ན་འཁོར་ལོའི་བཟླས་པ་བྱའོ། །མཐའ་རུ་མངོན་པར་འདོད་པའི་སྨོན་ལམ་བཏབ་ནས། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །ཇི་ལྟར་འདོད་པའི་དངོས་གྲུབ་སྩོལ། །སངས་རྒྱས་ཡུལ་དུ་
གཤེགས་མཛོད་ལ། །སླར་ཡང་འདི་རུ་གཤེགས་སུ་གསོལ། །མུཿསྔགས་འདིས་དྲིལ་བུའི་སྒྲ་སྔོན་དུ་སོང་བས་ཡེ་ཤེས་ཀྱི་དཀྱིལ་འཁོར་གཤེགས་སུ་གསོལ་ནས་བདེ་བར་གནས་པར་བྱའོ། །དེ་བཞིན་དུ་རྡོ་རྗེ་འཇིགས་བྱེད་དང་། གཤིན་རྗེ་གཤེད་ནག་པོ་ལ་སོགས་པ་དང་། དེ་

44-1-266a

བཞིན་དུ་དགྱེས་པའི་རྡོ་རྗེ་དང་། འཁོར་ལོ་སྡོམ་པ་དང་། སྒྱུ་འཕྲུལ་ཆེན་མོ་ལ་སོགས་པ་དང་། དེ་བཞིན་དུ་དཔའ་བོ་གཅིག་སྒྲུབ་པ་དང་། བརྟན་པའི་འཁོར་ལོ་དང་། ཨ་ར་པ་ཙ་ན་དང་། ཀུ་རུ་ཀུལླེ་ལ་སོགས་པ་དང་། དེ་བཞིན་དུ་ཁཪྶ་པཱ་ཎི་དང་། སེང་ལྡེང་ནགས་
ཚལ་ལ་སོགས་པ་ཡང་ཇི་ལྟར་མོས་པ་ཇི་ལྟར་ཐོབ་པ་སྤྱན་དྲངས་ལ་རབ་ཏུ་མཆོད་དེ་གཤེགས་སུ་གསོལ་ལོ། །དྲོའི་གནས་སུ་གཏོར་མ་དང་བཤོས་གཙང་དང་། སྡོམ་ཆང་གསུམ་དང་། ཕུད་དང་ལྷག་མའི་ཁམས་རྣམས་ཏེ་རབ་ཏུ་སྦྱིན་པ་ལྔ་ཅིས་ཀྱང་སྦྱིན་པར་བྱའོ། །དེ་ལ་སྔར་
བསྟན་པའི་སྔགས་ཀྱིས་འབྱུང་པོ་ཐམས་ཅད་ལ་གཏོར་མ་སྦྱིན་ནོ། །ཨོཾ་ཨཱཿཨོཾ་བཛྲ་ནཻ་བིདྱ་བུདྡྷ་དྷརྨྨཱ་སཾ་གྷེ་བྷྱཿསྭཱ་ཧཱ་ཧཱུྃ། སྔགས་འདིས། སངས་རྒྱས་དང་ཆོས་དང་དགེ་འདུན་ལ་བཤོས་གཙང་དབུལ་ལོ། །ཨོཾ་ཨཱཿཨོཾ་ཧ་རཱི་ཏྱེ་སྭཱ་ཧཱ་ཧཱུྃ། འདིས་འཕྲོག་མ་ལ་སྡོམ་ཆང་གསུམ་སྦྱིན་པར་
བྱའོ། །དེ་ཁོ་ན་ཉིད་གསུམ་གྱི་ནང་དུ་བཅུག་པའི་རང་གི་ས་བོན་གྱི་རང་བདག་པོའི་ལྷ་ལ་ཟས་ཕུད་དབུལ་བར་བྱའོ། །ཨོཾ་ཨཱཿཨོཾ་ཨུ་ཙྪིཥྛ་པཎྜི་ཨ་ས་ནེ་བྷྱཿསྭཱ་ཧཱ་ཧཱུྃ། འདིས་ལྷག་མའི་ཁཾ་སྦྱིན་པར་བྱའོ། །འདི་ནི་མཆོད་པའི་ཆོ་ག་སྟེ་གཉིས་པའོ།།      །།དེ་ནས་བླ་མ་བསྟེན་པ་དང་།
སེམས་ཅན་བསྟེན་པ་དང་། འགྲོ་བ་དྲུག་གི་ཚིག་ལེའུར་བྱས་པ་དང་། བྱང་ཆུབ་སེམས་དཔའི་སྤྱོད་པ་ལ་འཇུག་པ་ལ་སོགས་པ་དང་། དེ་བཞིན་དུ་བྱང་ཆུབ་སེམས་དཔའ་རྣམ་པ་ལྔ་དང་། སྒྲུབ་ཐབས་ཀུན་ལས་བཏུས་པ་དང་། དཔའ་བོ་གཅིག་སྒྲུབ་པ་དང་། དབང་སྔོན་དུ་འགྲོ་
བའི་དབང་གི་རབ་ཏུ་བྱེད་པ་དང་དཀྱིལ་འཁོར་གྱི་ཆོ་ག་དང་། དཔལ་གསང་བ་འདུས་པ་ལ་སོགས་པ་རྒྱུད་ཀྱི་རྒྱལ་པོ་རྣམས་མཉན་ལ་ཤེས་རབ་དང་སྙིང་རྗེ་དང་ཤིན་ཏུ་ཡང་དག་པར་ལྡན་པས་རང་བཞིན་གྱི་དོན་ཕུན་སུམ་ཚོགས་པའི་དཔལ་ལྡན་དཀྱིལ་འཁོར་གྱི་འཁོར་ལོ་བསྒོམ་པར་
བྱའོ། །ཡོན་ཏན་གང་དང་ལྡན་པས་བྱང་ཆུབ་སེམས་དཔའ་བསྒོམ་པ་ལ་དབང་བར་འགྱུར་བའི་ཡོན་ཏན་དེ་རྣམས་བཤད་པར་བྱ་སྟེ། དེ་ལ་ལྕགས་ཀྱི་ཁང་པ་འབར་བར་རབ་ཏུ་ཞུགས་པ་དང་འདྲ་བར་ཁམས་གསུམ་པ་སྡུག་བསྔལ་གསུམ་གྱིས་གདུངས་པར་ངེས་པ་དང་། སྙིང་རྗེ་དང་

44-1-266b

བྱམས་པ་དང་དགའ་བ་དང་། བཏང་སྙོམས་དང་། དཀོན་མཆོག་གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། མི་དགེ་བ་བཅུ་ལས་ལྡོག་པ་དང་། བསླབ་པའི་གནས་ལྔ་ལ་སོགས་པ་ལ་ཞུགས་པ་དང་། ཆོས་ཐམས་ཅད་ལ་རྨི་ལམ་ལ་སོགས་
པ་ལྟ་བུར་མོས་པ་དང་། བདེན་པ་དང་དཀོན་མཆོག་དང་ལས་ཀྱི་འབྲས་བུ་ལ་མངོན་པར་ཡིད་ཆེས་པའི་མཚན་ཉིད་ཀྱི་དད་པ་དང་གསོན་པོའི་དེ་ཉིད་སེམས་ཅན་གྱི་དོན་བྱེད་པ་གཅིག་པུ་དང་། གཅིག་ཏུ་དཀོན་མཆོག་གསུམ་ལ་དགའ་བ་དང་། བྱང་ཆུབ་པར་རིངས་པ་དང་། 
ཐེ་ཚོམ་མེད་པ་དང་། ཞེན་པ་མེད་པ་དང་། འཆད་པར་འགྱུར་བའི་གནས་རྣམ་པ་ལྔ་ཡོངས་སུ་ཤེས་པ་དང་། ཕ་རོལ་ཏུ་ཕྱིན་པ་བཅུ་སྦྱང་བ་ལ་གཅིག་ཏུ་དགའ་བ་རྣམས་ནི་ཡོན་ཏན་ནོ། །ཐ་ན་ཡོན་ཏན་གྱི་བྱེ་བྲག་ཁྱད་པར་ཅན་བཅོ་བརྒྱད་དང་ལྡན་པའི་བྱང་ཆུབ་སེམས་
དཔའ་ཕ་རོལ་ཏུ་ཕྱིན་པའི་ཚུལ་གྱིས་མངོན་པར་བྱང་ཆུབ་པ་ལ་དབང་ཡོད་པ་དེ་བཞིན་དུ་ཐབས་དང་ཤེས་རབ་གཉིས་སུ་མེད་པ་ཟབ་མོའི་ཚུལ་ལྷག་པར་མོས་པ་དང་། གསང་བ་འདུས་པའི་ཆོ་གས་ཆུའི་དབང་དང་། དབུ་རྒྱན་དང་། རྡོ་རྗེ་དང་། དྲིལ་བུ་དང་། མིང་དང་། 
བུམ་པ་དང་། གསང་བ་དང་། ཤེས་རབ་ཡེ་ཤེས་དང་། དབང་བཞི་པ་དང་། བརྟུལ་ཞུགས་དང་། ལུང་བསྟན་དང་། དབུགས་དབྱུང་བ་དང་། རྗེས་སུ་སྣང་བ་དང་། བླ་མ་བསྟེན་པ་དང་། སེམས་ཅན་བསྟེན་པ་དང་། ལྟུང་བ་སྦོམ་པོ་དང་། རྩ་བའི་ལྟུང་བ་ཡོངས་སུ་སྤོང་བ་
རྣམས་སོ། །ཐ་ན་ཡོན་ཏན་བྱེ་བྲག་ཅན་སུམ་ཅུ་དྲུག་དང་ལྡན་པ་མཆོག་ཏུ་ཟབ་ཅིང་རྒྱ་ཆེ་བའི་ཆོས་ལ་རབ་ཏུ་ཞུགས་པ་རྡོ་རྗེ་སེམས་དཔའི་སྡོམ་པ་འཛིན་པའི་བྱང་ཆུབ་སེམས་དཔའ་ཆེན་པོ་དཔལ་གསང་བ་འདུས་པ་ལ་སོགས་པའི་བཅོམ་ལྡན་འདས་ཀྱི་བསྒོམ་པའི་སྣོད་ཡིན་
ནོ་ཞེས་པའོ། །སྣོད་ཀྱི་ཆོ་ག་སྟེ་གསུམ་པའོ།།      །།ད་ནི་བསྒོམ་པའི་ཆོ་ག་བརྗོད་དེ་སྔོན་དུ་བསྟན་པའི་ཆོ་གས་བསྒོམ་པའི་བདག་པོར་གྱུར་པའི་རྣལ་འབྱོར་པ་ཐོ་རངས་ཀྱི་ཐུན་མཚམས་སུ་གཉིད་རབ་ཏུ་སད་པ་ནི་ལྷ་མོའི་གླུའི་སྒྲས་རབ་ཏུ་སངས་པར་ལྷག་པར་མོས་པར་བྱ་སྟེ།

44-1-267a

རང་གི་སྙིང་གར་དབྱངས་ཡིག་དང་པོ་དཀར་པོ་ཡོངས་སུ་གྱུར་པའི་ཟླ་བའི་དཀྱིལ་འཁོར་གྱི་དབུས་སུ་ཇི་སྲིད་དུ་ནམ་མཁའ་ཁྱབ་པའི་འོད་དང་ལྡན་པའི་མཾ་ཡིག་གུར་གུམ་ལྟ་བུའི་མདོག་གྱེན་དུ་འགྲེང་བ་འོད་ཟེར་འཕྲོ་བ་བསྒོམས་ནས་ངོ་ལ་སོགས་པ་བཀྲུ་བར་བྱའོ། །དེ་
ནས་ཟླ་བ་དང་ཉི་མ་དང་ཆུ་དང་སྨན་དང་དྲི་རྣམས་ཀྱིས་ཉེ་བར་བྱུགས་ལ་མེ་ཏོག་གིས་རྣམ་པར་ཉེ་བར་བརྒྱན་ཏེ། ཡིད་དུ་འོང་བའི་ས་ཕྱོགས་སུ་སྟན་བདེ་བ་ལ་རྡོ་རྗེ་སྐྱིལ་ཀྲུང་གིས་འདུག་པའོ། །དེ་མི་ནུས་ན་ཡིད་ཀྱིས་དེ་ལྟར་ཐམས་ཅད་བསམ་པའམ། གང་དང་གང་དུ་དེ་དང་དེར་
ཇི་ལྟར་བདེ་བར་འདུག་ནས་སྡུག་བསྔལ་གསུམ་གྱིས་སྡུག་བསྔལ་བའི་འགྲོ་བ་རྣམས་ལ་ཚངས་པའི་གནས་བཞི་བསྒོམ་པར་བྱའོ། །དེ་ལ་ལན་དུ་ཕན་འདོགས་པ་ལ་སོགས་པ་ལ་མི་ལྟོས་པར་འཁོར་བ་དང་དེའི་རྒྱུ་ལས་འགྲོ་བ་རྣམས་ཉེ་བར་གདོན་པའི་བསམ་པ་ནི་སྙིང་རྗེའོ། །
སེམས་ཅན་རྣམས་སངས་རྒྱས་ཉིད་དང་དེའི་རྒྱུ་མཐུན་པ་ཉེ་བར་སྦྱོར་བར་བྱེད་པའི་བསམ་པ་ནི་བྱམས་པའོ། །ཇི་ལྟར་བསྟན་པའི་འགྲོ་བའི་དོན་བྱ་བ་ལ་སངས་རྒྱས་ཉིད་མཉམ་པ་མེད་པའི་ཐབས་ལ་ངེས་པར་འཛིན་པའི་བར་དུ་དགའ་བ་ནི་དགའ་བའོ། །སངས་རྒྱས་ཉིད་བསྒྲུབ་པ་ལ་
བསོད་ནམས་དང་ཡེ་ཤེས་ཀྱི་ཚོགས་ཀྱི་བདག་ཉིད་ལ་འཇུག་པ་དང་། དེའི་འཇིག་རྟེན་གྱི་བྱ་བའི་ཆོས་བརྒྱད་ལ་སོགས་པ་མཐའ་དག་སྐབས་མ་ཡིན་པའི་བྱ་བ་ལ་མི་ལྟོས་པ་ནི་བཏང་སྙོམས་སོ། །དེ་ནས་སྙིང་གའི་ཟླ་བའི་ས་བོན་གྱི་འོད་ཟེར་གྱིས་བསྐུལ་ནས་སྙིང་རྗེ་ཆེན་
པོས་ཕྱོགས་བཅུ་དུས་གསུམ་ན་བཞུགས་པའི་བླ་མ་དང་། སངས་རྒྱས་དང་བྱང་ཆུབ་སེམས་དཔའ་རྣམས་ཏིལ་གྱི་གང་བུ་བཞིན་དུ་ཀུན་དུ་བར་མཚམས་མེད་པར་ནམ་མཁའི་དབྱིངས་ཐམས་ཅད་དུ་མངོན་པར་ཁྱབ་པའི་འཇམ་དཔལ་རྡོ་རྗེའི་སྐུ་རྣལ་འབྱོར་པ་ལ་ཕན་པའི་ཆེད་དུ་ཉེ་
བར་གནས་པར་དམིགས་ལ་ཞབས་བསིལ་དང་ཞལ་བསིལ་དང་མཆོད་ཡོན་རྣམས་ཕུལ་ལ་ཕྱི་དང་ནང་དང་སྒྲུབ་པའི་མཆོད་པ་རྣམས་ཀྱིས་མཆོད་པར་བྱའོ། །ཨོཾ་ཡིག་ཡོངས་སུ་གྱུར་པའི་པདྨའི་སྣོད་རིན་པོ་ཆེ་སྣ་བདུན་གྱི་རང་བཞིན་གྱི་མན་འཇིའི་སྟེང་དུ་བཞག་ལ་བདུད་རྩི་རྣམ་པ་ལྔ་

44-1-267b

དང་བརྩོན་འགྲུས་ལྔ་རྣམས་བྲུཾ་ལ་སོགས་པའི་ས་བོན་གྱིས་བྱིན་གྱིས་བརླབས་པར་བལྟས་ན་དེ་ཁོ་ན་ཉིད་གསུམ་གྱིས་བྱིན་གྱིས་བརླབ་པའི་བླ་ན་མེད་པའི་ཆུ་དང་མེ་ཏོག་རྣམས་རབ་ཏུ་བསང་བ་དང་། རང་གི་ས་བོན་དེ་ཁོ་ན་ཉིད་གསུམ་གྱི་ནང་དུ་སྨོས་པས་ཞབས་བསིལ་དང་ཞལ་བསིལ་
དང་མཆོད་ཡོན་རྣམས་ཕུལ་ནས་ཐུགས་ཀའི་ས་བོན་ལས་སྤྲོས་པའི་རིན་པོ་ཆེ་སྣ་བདུན་ལ་སོགས་པས་ཇི་སྲིད་དུ་རབ་ཏུ་ཕྱེ་བས་བླ་ན་མེད་པའི་འདོད་པའི་ཡོན་ཏན་ལྔ་རྣམས་ཀྱིས་སོ་སོར་མཆོད་པ་བྱེད་པ་ཞེས་བྱ་བ་ནི་ཕྱིའི་མཆོད་པའོ། །དེ་ནས་སྤྱན་མ་ལ་སོགས་པ་དཔག་ཏུ་མེད་པ་
རྣམས་ཀྱིས་སོ་སོར་དཀྱིལ་འཁོར་གྱི་བདག་པོ་དང་། དཀྱིལ་འཁོར་པ་རྣམས་ལ་ཇི་སྲིད་དུ་ཐིམ་སྟེ། དེ་རྣམས་ལ་མཆོད་པ་བྱེད་པ་ཞེས་བྱ་བ་ནི་གསང་བའི་མཆོད་པའོ། །དེ་ནས་བཅོམ་ལྡན་འདས་ཀྱི་གྲངས་ཀྱི་བདག་ཉིད་ཀྱི་དངོས་པོ་རྣམས་མངོན་པར་སྤྲུལ་པ་ཡིད་ཀྱིས་བསྟོད་ལ་
སྙིམ་པ་མེ་ཏོག་གིས་བཀང་བ་སྔོན་དུ་འགྲོ་བས་ཕྱག་འཚལ་ཏེ་བླ་ན་མེད་པའི་མཆོད་པའི་ཆོ་ག་བདུན་པོ་བརྗོད་ལ་ཚིགས་སུ་བཅད་པའི་དོན་མངོན་སུམ་དུ་ལྷག་པའི་བསམ་པས་བརྗོད་དེ། སྡིག་པ་ཐམས་ཅད་བདག་གིས་བཤགས་པར་བགྱིའོ། །མཆོག་ཏུ་དགའ་བས་དགེ་བ་རྣམས་ལ་
རྗེས་ཡི་རང་། །བཅོམ་ལྡན་འདས་ཀྱིས་དམ་པའི་ཆོས་ལ་ཡང་ནི་སྐྱེ་བ་ཇི་སྲིད་གནས་པར་གསོལ་བ་འདེབས། །དཀོན་མཆོག་གསུམ་ལ་སྐྱབས་སུ་མཆི་བར་ཁས་འཆེ་ཡིད་ནི་བྱང་ཆུབ་མཆོག་ཏུ་སེམས་བསྐྱེད་བགྱི། །དེ་ཡི་ལམ་ལ་ཡང་དག་གནས་བགྱི་དགེ་བའི་ཆོ་ག་བྱང་
ཆུབ་མཆོག་ཏུ་བསྔོ་བར་བགྱི། །ཞེས་བྱ་བ་ནི་སྒྲུབ་པའི་མཆོད་པའོ། །དེ་ནས་རབ་ཏུ་དགྱེས་པར་སྤྱན་གཟིགས་ཏེ་གང་དང་གང་དུ་གཤེགས་པའི་དེ་བཞིན་གཤེགས་པ་རྣམས་ལ་དེ་བཞིན་དུ་ཡང་ཇི་སྲིད་ནམ་མཁའི་ཁམས་སུ་རྒྱུན་མི་ཆད་པར་འདི་རྣམས་ལ་བདག་གིས་མཆོད་པ་
རྣམ་པ་གསུམ་གྱིས་ལྷག་པར་མོས་པར་བྱས་ནས་མཐར་གཤེགས་སུ་གསོལ་བར་བྱའོ། །དེ་ནས་བདག་དཔལ་འཇམ་པའི་རྡོ་རྗེར་གྱུར་ནས་འཁོར་བའི་རྒྱ་མཚོར་གནས་པའི་སེམས་ཅན་འདི་རྣམས་བླ་ན་མེད་པའི་ཆོས་བསྟན་པའི་གཟིངས་ཀྱིས་དཔལ་གསང་བ་འདུས་པ་

44-1-268a

རིན་པོ་ཆེའི་གླིང་ལ་ཉེ་བར་གཞག་པར་བྱའོ་ཞེས་སྨོན་པ་བྱང་ཆུབ་ཀྱི་སེམས་རྣམ་པར་བསྒོམ་ཞིང་། འཇུག་པ་བྱང་ཆུབ་ཀྱི་སེམས་ཀྱི་རང་བཞིན་རྣམ་པར་ཐར་པའི་སྒོ་གསུམ་བསྒོམ་པར་བྱའོ། །སྟོང་པ་ནི་ལུས་དང་ལོངས་སྤྱོད་དང་གནས་ལ་སོགས་པའི་རྣམ་
པ་དང་། སངས་རྒྱས་དང་བྱང་ཆུབ་སེམས་དཔའ་དང་། རང་སངས་རྒྱས་དང་། ཉན་ཐོས་དང་སློབ་པ་དང་མི་སློབ་པ་དང་། སོ་སོའི་སྐྱེ་བོའི་ཚོགས་ཀྱིས་བདག་ཉིད་རྒྱུ་བ་དང་མི་རྒྱུ་བ་སྣ་ཚོགས་པ་འདི་རྣམས་དོན་དམ་པར་གཟུང་བ་དང་འཛིན་པའི་རང་བཞིན་བདག་མེད་པའི་
ཕྱིར་རོ། །མཚན་མ་མེད་པ་ནི་དོན་དམ་པར་རྒྱུ་མེད་པའི་ཕྱིར་རོ། །སྨོན་པ་མེད་པ་ནི་དོན་དམ་པའི་རང་བཞིན་ཤིན་ཏུ་ལྷག་པའི་འབྲས་བུ་མེད་པའི་ཕྱིར་རོ། །སེམས་ཅན་སོ་སོ་དོན་དམ་པར་རང་བཞིན་གྱིས་འོད་གསལ་བ་གཟུང་བ་དང་འཛིན་པ་མེད་པ་རྒྱུ་དང་འབྲས་བུ་མེད་པ་ཇི་
སྲིད་སྣང་བའི་མཐར་ཐུག་པའི་རྣམ་པ་སྣ་ཚོགས་པ་རྣམས་གཉིས་སུ་མེད་པ་ཙམ་དུ་འདོད་པའི་ཕྱིར་རོ། །དེ་བས་ན་སོ་སོའི་རྣམ་པ་གཉིས་སུ་མེད་པ་ཙམ་གྱི་བདག་ཉིད་སྣ་ཚོགས་པའི་ཆོས་ཅན་རྣམས་གཟུང་བ་དང་འཛིན་པ་དང་རྒྱུ་དང་འབྲས་བུ་ལ་སོགས་པ་མཐའ་དག་ཏུ་རྟོག་པས་
སྟོང་པ་ཉིད་ཀྱི་དེ་ཁོ་ན་ཉིད་དོ། །འདིར་ཡང་དེ་ལྟར་འདོད་པའི་རྟོག་པ་རྣམས་སྟོང་པ་ཉིད་དེ་ཇི་ལྟར་ལྷག་པའི་བསམ་པ་དངོས་པོ་མེད་པས་ཕུང་པོའི་ཚོགས་རྣམས་རྟག་པ་དང་རྒྱུན་མི་འཆད་པ་དང་། མི་ཕྱེད་པ་ནི་ཆོས་ཀྱི་སྐུར་བརྗོད་དོ། །འདི་ཉིད་སྟོང་པ་ཉིད་ཀྱི་སྔགས་འདིས་བརྟན་པར་
བྱ་སྟེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་བྱའོ། །དེ་ནས་ཀུན་རྫོབ་ཏུ་རྒྱུ་དང་འབྲས་བུའི་དངོས་པོ་ལ་བརྟེན་ནས་ལུས་དང་ལོངས་སྤྱོད་དང་གནས་ལ་སོགས་པའི་རྣམ་པའི་རང་གི་སེམས་ཀྱི་རྒྱུད་ཡོངས་སུ་གྱུར་པ་ལས་ནམ་མཁའ་ལ་ཨོཾ་ཡིག་དམར་པོའོ། །དེ་ཡོངས་སུ་གྱུར་པ་
ལས་ཉི་མའི་དཀྱིལ་འཁོར་དམར་པོའོ། །དེའི་སྟེང་དུ་ཧཱུྃ་ཡིག་ནག་པོ་མགོ་གྱེན་དུ་བལྟས་པ་དེ་ཡོངས་སུ་གྱུར་པ་ལས་རྡོ་རྗེ་ནག་པོ་རྩེ་ལྔ་པ་གྱེན་དུ་བསྒྲེང་བར་གནས་པའོ། །དེའི་ལྟེ་བ་ལ་ཉི་མའི་དཀྱིལ་འཁོར་གྱི་གནས་སུ་ཧཱུྃ་ཡིག་དེ་ཉིད་རྣམ་པར་བསྒོམ་པར་བྱའོ། །དེ་ནས་ཧཱུྃ་ཡིག་

44-1-268b

ལས་ཐམས་ཅད་སྤྲོས་པའི་རྡོ་རྗེ་རྩེ་ལྔ་པ་ནག་པོ་ནས་ཀྱི་འབྲུ་ཙམ་གྱི་རང་བཞིན་གྱི་འོད་ཟེར་རྣམས་ཡོངས་སུ་གྱུར་པ་ལས་ཇི་ལྟར་འདོད་པའི་རྡོ་རྗེའི་རང་བཞིན་གྱི་ས་གཞི་དང་། ལོགས་སུ་གྱུར་པས་རྡོ་རྗེའི་ར་བ་དང་སྟེང་དུ་གྱུར་པས་རྡོ་རྗེའི་གུར་རྣམ་པར་བསྒོམ་ཞིང་ཧཱུྃ་ཡིག་ཟད་པ་ལས་
རྡོ་རྗེ་ལ་སོགས་པ་མེད་པར་རྣམ་པར་བསམ་པ་དང་། རྡོ་རྗེའི་རང་བཞིན་གྱི་ས་གཞིའི་འོག་ཏུ་དེ་ལས་ལྷག་པར་ལཾ་ཡིག་སེར་པོ་ཡོངས་སུ་གྱུར་པ་ལས་སའི་དཀྱིལ་འཁོར་རྡོ་རྗེ་རྩེ་གསུམ་པས་མཚན་པ་དང་། དེའི་འོག་ཏུ་ཡང་དུ་བ་ལྟ་བུ་ཡཾ་ཡིག་ཡོངས་སུ་གྱུར་པ་ལས་ཆུ་དང་ཞེང་དུ་
གྲངས་མེད་པའི་རླུང་གི་དཀྱིལ་འཁོར་གཞུ་བརྡུངས་པ་ལྟ་བུ་མཐའ་གཉིས་རླུང་གིས་བསྐྱོད་པ་དང་ལྡན་པའི་རྒྱལ་མཚན་སྔོན་པོ་གཉིས་ཀྱིས་མཚན་པ་དང་།དེའི་ཡང་སྟེང་དུ་རྡོ་རྗེ་ར་བས་བསྐོར་བའི་ཤིན་ཏུ་རིང་བར་རཾ་ཡིག་དམར་པོ་ཡོངས་སུ་གྱུར་པ་ལས་མེའི་དཀྱིལ་འཁོར་གྲུ་གསུམ་
པ་དཔངས་སུ་རྡོ་རྗེ་ར་བའི་མཐར་ཐུག་པར་འབར་བ་དང་། རྡོ་རྗེ་གུར་གྱི་སྟེང་དུ་བཾ་ཡིག་དཀར་པོ་ཡོངས་སུ་གྱུར་པ་ལས་ཆུའི་དཀྱིལ་འཁོར་བུམ་པས་མཚན་པ་དབའ་རླབས་ཀྱིས་བསྐྱོད་པ་མེའི་དཀྱིལ་འཁོར་འབར་བའི་མཐར་ཐུག་པར་གནས་པར་བསྒོམ་པར་བྱའོ། །རྡོ་རྗེའི་རང་བཞིན་གྱི་
ས་གཞི་ལ་སོགས་པའི་དབུས་སུ་ལོགས་ལ་མ་རེག་པར་ནམ་མཁའ་བར་སྣང་ལ་གཤིན་རྗེ་གཤེད་ལ་སོགས་པ་ཁྲོ་བོ་བཅུ་གཅིག་ལྷག་པར་གནས་པ་འཁོར་ལོ་སེར་པོ་རྩིབས་བཅུ་པ་མྱུར་དུ་འཁོར་བའི་སྲུང་བའི་འཁོར་ལོ་མན་ངག་ཇི་ལྟ་བ་བཞིན་དུ་རྣམ་པར་བསྒོམ་པར་བྱའོ། །དེ་ཡང་
གཤིན་རྗེ་གཤེད་ལ་སོགས་པ་དང་། འཇམ་པའི་རྡོ་རྗེ་ལ་སོགས་པ་འཆད་པར་འགྱུར་བའི་བཅོམ་ལྡན་འདས་ཐམས་ཅད་ཉིད་མཆོད་པའི་ཆོ་གར་བཀོད་པ་བཞིན་དུ་ཕྱག་དང་ཞལ་དང་ཁ་དོག་དང་དབྱིབས་ལ་སོགས་པ་རྣལ་འབྱོར་པས་བལྟ་བར་བྱའོ། །བསྒོམ་པའི་ཆོ་གར་ཡང་གནས་
དེ་དང་དེར་འདི་རྣམས་མཆོག་ཏུ་གཟུང་བར་བྱའོ། །ང་རྒྱལ་དང་བཅས་པའི་སྔོན་དུ་བསྟན་པའི་སྲུང་བའི་འཁོར་ལོ་སྐད་ཅིག་ཙམ་གྱིས་རྣམ་པར་བསྒོམས་ནས་སྣ་ཚོགས་པའི་བདག་ཉིད་རྣམས་བགེགས་མེད་པར་མྱུར་བར་ལྷག་པར་མོས་པར་བྱའོ། །དཔལ་ལྡན་རྡོ་རྗེ་ཧཱུྃ་མཛད་

44-1-269a

ཡོངས་སུ་གྱུར་པ་ལས་ཆོས་ཀྱི་འབྱུང་གནས་ཀྱི་ཕྱག་རྒྱ་ནམ་མཁའ་གྲུ་གསུམ་པ་ཁ་དོག་དཀར་པོ་གྲ་གཉིས་སྟེང་དུ་བལྟས་པ་ནང་ཡངས་པ་རྣམ་པ་སྣ་ཚོགས་པའི་འོད་ཟེར་གྱི་ཚོགས་ཀྱི་ས་ཕྱོགས་མཐའ་དག་གསལ་བར་བྱེད་པའི་འཁོར་ལོ་བསྒོམ་པར་བྱའོ། །
དེའི་དབུས་སུ་ནམ་མཁའ་ལ་སྣ་ཚོགས་པདྨ་དེའི་སྟེང་དུ་སྣ་ཚོགས་རྡོ་རྗེ་རྣམ་པར་བསྒོམ་པར་བྱའོ། །དེའི་ལྟེ་བ་ཇི་སྲིད་དུ་འདོད་པར་རབ་ཏུ་ཡངས་པར་ཟླ་བའི་དཀྱིལ་འཁོར་གྱི་དབུས་སུ་བྲུཾ་ཡིག་དཀར་པོ་རྣམ་པར་བསྒོམས་ལ་དེ་ཡོངས་སུ་གྱུར་པ་ལས་འཁོར་ལོ་དཀར་པོ་རྩིབས་བཅུ་
གཉིས་པའོ། །དེའི་ལྟེ་བ་ལ་ཟླ་བ་ལ་གནས་པའི་བྲུཾ་ཡིག་གོ། དེ་ལས་སྤྲུལ་པས་འགྲོ་བ་ཐམས་ཅད་རྣམ་པར་སྣང་མཛད་དུ་བྱས་ཏེ། དེ་རྣམས་སླར་དེ་ཉིད་དུ་ཐིམ་པར་བསྒོམས་ལ། བྲུཾ་ཡིག་དང་འཁོར་ལོ་ཡོངས་སུ་གྱུར་པ་ལས་འཆད་པར་འགྱུར་བའི་མཚན་ཉིད་དང་ལྡན་པ་
འཁོར་ལོ་དཀར་པོ་རྩིབས་བཅུ་གཉིས་པ་འཛིན་པ་རིག་མ་དང་ལྡན་པའི་བཅོམ་ལྡན་འདས་རྣམ་པར་སྣང་མཛད་བསྒོམ་པར་བྱའོ། །དེ་ཡོངས་སུ་གྱུར་པ་ལས་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་ཡོན་ཏན་ཡང་དག་པར་རྩོམ་པ་སྟེ། གྲུ་བཞི་དང་སྒོ་བཞི་དང་རྟ་བབས་བཞི་དང་
ཡང་དག་པར་ལྡན་པ་དང་། ཁྱམས་བཞིས་ཡོངས་སུ་བསྐོར་བ། ཁྱམས་བཞི་ལ་གནས་པའི་མཆོད་པ་རྣམ་པ་སྣ་ཚོགས་པས་ཕྱག་འབྲེལ་པའི་ལྷ་མོའི་ཚོགས་དཔག་ཏུ་མེད་པ་རྣམས་དང་། རིན་པོ་ཆེ་ཁྱད་པར་མེད་པའི་རྒྱན་རྣམ་པ་སྣ་ཚོགས་པས་བརྒྱན་པ། ཇི་ལྟར་ལེགས་
པར་གནས་པའི་རླུང་གིས་བསྐྱོད་པའི་རྒྱལ་མཚན་གྱི་དར་དཔྱངས་ཀྱི་མཐར་གནས་པའི་དྲིལ་བུའི་སྒྲས་ཕྱོགས་ཐམས་ཅད་དུ་འཁོར་བར་འཁྲོལ་བ། ཤིན་ཏུ་དྲི་མ་མེད་པས་མེ་ལོང་བཞིན་དུ་སྣ་ཚོགས་པས་འཕེལ་བའི་མཐར་ཐུག་པའི་གཟུགས་བརྙན་དང་། དྲ་བ་དང་དྲ་བ་ཕྱེད་པ་དང་། 
ཟླ་བ་དང་ཉི་མ་དང་མེ་ལོང་དང་། མེ་ཏོག་ཕྲེང་བ་དང་། རྔ་ཡབ་མེ་ཏོག་གི་རྣམ་པ་ལ་སོགས་པས་ཉེ་བར་བརྒྱན་པ་དང་། འཁོར་ལོ་ལ་སོགས་པས་བརྒྱན་པའི་ཀ་བ་བརྒྱད་ཀྱིས་ཉེ་བར་བརྒྱན་པའི་སྟེང་དུ་རྡོ་རྗེ་ཕྲེང་བ་ཟླུམ་པོས་ཡོངས་སུ་བསྐོར་བ་དང་། བླ་ན་མེད་པ་དང་ཟག་པ་མེད་པ་དང་

44-1-269b

གཞལ་དུ་མེད་པའི་འདོད་པའི་ཡོན་ཏན་ལྔས་ཡོངས་སུ་གང་བ་དང་། མཆོད་པ་ལྔས་བརྒྱན་པ་དང་། བུམ་པ་བརྒྱད་ཀྱིས་ཉེ་བར་བརྒྱན་པ་དང་། རིན་པོ་ཆེ་ཁ་དོག་ལྔའི་རྩིག་པས་ཡོངས་སུ་བསྐོར་བ་དང་། སྟེང་དུ་རིན་པོ་ཆེ་ཡིས་ཕུབ་པ་དང་། རིན་པོ་ཆེ་སྣ་བདུན་གྱི་རང་
བཞིན་གྱི་གཙང་ཁང་བྱུར་བུས་བརྒྱན་པར་བྱས་པ། རྩ་བ་གཅིག་ལ་འདབ་མ་བཅུ་དགུ་པ་ཟླ་བ་དང་ཉི་མ་དང་སྣ་ཚོགས་པདྨ་དང་བཅས་པས་བརྒྱན་པའི་ལྷའི་གནས་དང་། རིན་པོ་ཆེ་ཁ་དོག་ལྔས་ཡོངས་སུ་རྫོགས་པ་དང་། ཡན་ལག་སོ་སོ་ལས་འཕྲོ་ཞིང་འཇུག་པའི་དེ་
བཞིན་གཤིགས་པ་རྣམས་སྤྲོས་པས་འགྲོ་བའི་དོན་བྱེད་པ་དང་། རྣམ་པ་སྣ་ཚོགས་པ་གཉིས་སུ་མེད་པའི་ཡིད་ཀྱི་རོལ་པའི་རང་བཞིན་མཉམ་པ་མེད་པ་དཔལ་ལྡན་གཞལ་ཡས་ཁང་པར་རྣམ་པར་བསྒོམ་པར་བྱའོ། །དེ་ལ་དེའི་དབུས་སུ་ཟླ་བའི་དཀྱིལ་འཁོར་གྱི་སྟེང་དུ་ཨ་ཡིག་
ལ་སོགས་པ་དཀར་པོ་མགོ་གྱེན་དུ་འགྲེང་བའི་དབྱངས་ཡིག་བཅུ་དྲུག་ལུགས་དང་མཐུན་པ་དང་། ལུགས་དང་མི་མཐུན་པ་དག་གི་འོད་ཟེར་གྱིས་ཐོག་མ་མེད་པ་ནས་གྲུབ་པའི་དེ་བཞིན་གཤེགས་པའི་ཡན་ལག་ལས་མར་མེ་ལྟ་བུར་བཀུག་ལ་སྐྱེས་བུ་ཆེན་པོའི་མཚན་སུམ་ཅུ་
རྩ་གཉིས་རྣམ་པར་བསྒོམས་ལ་དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་གྱི་སྟེང་དུ་ནམ་མཁའ་ལ་སོར་གཅིག་གིས་འཕགས་པ་ཟླ་བའི་དཀྱིལ་འཁོར་རྣམ་པར་བསྒོམས་ལ། ཨོཾ་ཙིཏྟ་པྲ་ཏི་བེ་དྷ་ནཾ་ཀ་རོ་མི་ཞེས་བྱ་བའི་སྔགས་ཀྱིས་མངོན་པར་བསྔགས་ཏེ། ཤེས་རབ་ཆེན་པོའི་
རང་བཞིན་དུ་ལྷག་པར་མོས་པར་བྱའོ། །དེ་ནས་དེའི་སྟེང་དུ་མཐར་གནས་པའི་ཝ་ཡིག་དང་ཀྵ་ཡིག་སྤངས་པའི་ཀ་ལ་སོགས་པ་གསལ་བྱེད་སུམ་ཅུ་རྩ་གཉིས་རྣམས་ལུགས་དང་མཐུན་པ་དང་། ཡང་དེ་ཉིད་ལུགས་དང་མི་མཐུན་པ་དག་གིས་ཕྲེང་བའི་དབུས་སུ་ཡང་ཨ་ཡིག་ལ་སོགས་
པའི་དབྱངས་ཡིག་བཅུ་དྲུག་ལུགས་དང་མཐུན་པའོ། །གསལ་བྱེད་དེ་རྣམས་དང་དབྱངས་ཡིག་རྣམས་དཀར་པོ་མགོ་གྱེན་དུ་འགྲེང་བ་རྣམས་ཀྱིས་སྔོན་བཞིན་དུ་བཀུག་ལ་དཔེ་བྱད་བཟང་པོ་བརྒྱད་ཅུ་རྣམས་རྣམ་པར་བསྒོམས་ཏེ། དེ་ཡོངས་སུ་གྱུར་པ་ལས་དེའི་སྟེང་དུ་ནམ་མཁའ་ལ་སོར་དྲུག་

44-1-270a

གཅིག་གིས་འཕགས་པར་ནི་ཟླ་བའི་དཀྱིལ་འཁོར་གཉིས་པ་རྣམ་པར་བསྒོམས་ལ། ཨོཾ་བོ་དྷི་ཙིཏྟ་ཨུཏྤཱ་ད་ཡཱ་མི་ཞེས་བྱ་བའི་སྔགས་ཏེ། སྙིང་རྗེ་ཆེན་པོའི་རང་བཞིན་དུ་ལྷག་པར་མོས་པར་བྱའོ། །དེ་ནས་ཟླ་བ་གཉིས་ཕན་ཚུན་གཟུགས་བརྙན་གསལ་བར་སྣང་
བ་ནི་མེ་ལོང་ལྟ་བུའི་ཡེ་ཤེས་སོ། །དེ་གཉིས་གཅིག་ཏུ་གྱུར་པ་ནི་མཉམ་པ་ཉིད་ཀྱི་ཡེ་ཤེས་སོ། །དེའི་སྟེང་དུ་ཧཱུྃ་ཡིག་རྣམས་དཀར་པོ་ཡོངས་སུ་གྱུར་པ་ལས་རྡོ་རྗེ་དམར་པོ་རྩེ་ལྔ་པའི་ལྟེ་བའི་དབུས་སུ་ཟླ་བའི་དཀྱིལ་འཁོར་ལ་ཧཱུྃ་ཡིག་རྣམ་པར་བསྒོམས་ལ། དེའི་
བརྗོད་པར་བྱ་བ་དང་། རྗོད་པར་བྱེད་པ་སྟོང་པ་ཉིད་དུ་སོ་སོར་རྟོག་པ་ནི་སོ་སོར་རྟོག་པའི་ཡེ་ཤེས་སོ། །དེ་ལས་སྤྲོས་པའི་རྡོ་རྗེ་སེམས་དཔའི་ཚོགས་རྣམས་ཀྱིས་འགྲོ་བ་ཐམས་ཅད་རྡོ་རྗེ་འཛིན་པར་བྱས་ནས་སླར་དེ་ཉིད་དུ་རབ་ཏུ་ཞུགས་ལ། ཨོཾ་བཛྲ་ཨཱཏྨ་ཀོ྅ཧཾ་ཞེས་བྱ་བར་
ང་རྒྱལ་བྱེད་པ་ནི་བྱ་བ་ནན་ཏན་གྱི་ཡེ་ཤེས་སོ། །དེ་ནས་ཟླ་བ་དང་རྡོ་རྗེ་དང་ཧཱུྃ་ཡིག་རྣམས་ཡོངས་སུ་གྱུར་པ་ལས་རྡོ་རྗེ་སེམས་དཔའ་ཡོངས་སུ་རྫོགས་པ་ནི་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་སོ། །དེ་ལྟར་མེ་ལོང་ལྟ་བུའི་ཡེ་ཤེས་ལ་སོགས་པ་ཡེ་ཤེས་ལྔའི་
བདག་ཉིད་སྐུ་མདོག་དཀར་པོ་རྡོ་རྗེ་རྩེ་ལྔ་པ་དམར་པོ་འཛིན་པ་བཅོམ་ལྡན་འདས་རྡོ་རྗེ་སེམས་དཔའི་བདག་ཉིད་བསྒོམ་པར་བྱའོ། །དེ་ནས་འདོད་ཆགས་ཆེན་པོའི་གདུལ་བྱར་ཁམས་གསུམ་པ་ལྷག་པར་མོས་པར་བྱས་ལ་རང་གི་རིག་མ་དང་ལྷན་ཅིག་ཏུ་ཤིན་ཏུ་དགའ་བ་རྩོམ་པ་
དགའ་བའི་སྒྱུ་མའི་སྒྲས་དེ་བཞིན་གཤེགས་པ་རྣམས་བཀུག་ལ་རང་གི་ལུས་ཀྱི་བ་སྤུའི་བུ་གའི་ནང་དུ་ཞུགས་ཏེ། དེ་བཞིན་གཤེགས་པ་རྣམས་དང་སྐུ་གཅིག་ཏུ་གྱུར་པས་བཅོམ་ལྡན་འདས་འདོད་པ་དང་ལྡན་པ་རང་གི་རིག་མ་ལེགས་པ་དང་བླ་ན་མེད་པའི་བདེ་བའི་མཆོག་རྣམ་པར་བསྒོམ་
པར་བྱའོ། །དེ་བཞིན་དུ་རང་གི་ལུས་ལས་རྣམ་པར་སྤྲོས་པ་རྣམས་སྤྱན་མ་ལ་སོགས་པའི་ལྷ་མོ་དགུའི་རིགས་སུ་གྱུར་པ་དཔག་ཏུ་མེད་པ་རྣམས་བཅོམ་ལྡན་འདས་མ་ལ་ཇི་སྲིད་ཐིམ་པར་བསྒོམས་ལ་མཐའ་དག་ལྷ་མོའི་འཁོར་ལོའི་རང་བཞིན་དུ་གྱུར་པས་བཅོམ་ལྡན་འདས་མ་འདོད་

44-1-270b

པ་དང་ལྡན་པའི་བདག་ཉིད་ཀྱང་བདེ་བ་ཤིན་ཏུ་གསལ་བར་མཐོང་བའོ།།      །།དེ་ནས་ཡེ་ཤེས་སེམས་དཔའི་ཐུགས་ཀའི་ཕྱག་མཚན་གྱི་ས་བོན་གྱི་འོད་ཟེར་རྣམས་ཀྱིས་ཕྱོགས་བཅུར་ཁྱབ་པའི་དེ་བཞིན་གཤེགས་པ་ཐམས་ཅད་བཀུག་ནས་ཞལ་དུ་ཞུགས་ཏེ། ཐུགས་ཀའི་ཕྱག་མཚན་
གྱི་ས་བོན་གྱི་འོད་ཟེར་གྱིས་རེག་པས་བདེ་བ་ཆེན་པོའི་དབང་དུ་གྱུར་པས་ཞུ་ནས་རྡོ་རྗེའི་ལམ་ནས་བྱུང་སྟེ་ལྷ་མོའི་པདྨའི་ནང་དུ་བབས་པར་བལྟ་བར་བྱའོ། །དེ་ནས་རྡོ་རྗེ་དང་པདྨ་བསྐྱོད་པ་ལས་འོད་ཀྱི་གོང་བུ་དེ་ཡོངས་སུ་གྱུར་པ་ལས་གཙོ་བོ་མི་བསྐྱོད་པའི་རྟེན་དང་བརྟེན་པའི་བདག་ཉིད་དཔལ་དཀྱིལ་
འཁོར་གྱི་འཁོར་ལོ་ཡིད་ཀྱིས་བསམས་ནས། དེར་སེམས་ཅན་ཐམས་ཅད་གཞུག་པར་བྱའོ། །དེ་ནས་གཙོ་བོ་རྣམ་པར་སྣང་མཛད་ཀྱི་དཀྱིལ་འཁོར་གྱི་འཁོར་ལོ་སྔ་མ་བཞིན་དུ་བཀུག་སྟེ། རྡོ་རྗེའི་ལམ་ནས་བྱུང་ནས་མན་ངག་ཇི་ལྟ་བ་བཞིན་དུ་སེམས་ཅན་ཐམས་ཅད་ལ་རེག་པས་ཇི་ལྟར་ལྷག་
པར་མོས་པས་ཇི་ལྟ་བ་བཞིན་དུ་སྐུ་གསུམ་གྱི་བདག་ཉིད་སའི་སྙིང་པོ་ལ་སོགས་པའི་གཟུགས་སུ་བསྐྱེད་པ་རྣམས་འོག་ནས་འཆད་པར་འགྱུར་བའི་སྔགས་ཀྱིས་དབྱུང་བར་བྱའོ། །ཀྵཾ་ཛྲིཾ་ཁཾ་གཾ་ཥྐཾ་སཾ་ཞེས་བྱ་བས་སའི་སྙིང་པོ་དང་ཕྱག་ན་རྡོ་རྗེ་དང་། ནམ་མཁའི་སྙིང་པོ་དང་། འཇིག་རྟེན་
དབང་ཕྱུག་དང་། སྒྲིབ་པ་ཐམས་ཅད་རྣམ་པར་སེལ་བ་དང་། ཀུན་དུ་བཟང་པོ་རྣམས་སོ། །ཛཿཧཱུྃ་བཾ་ཧོཿ།ཁཾ་རཾ་ཞེས་བྱ་བ་ནས་གཟུགས་རྡོ་རྗེ་མ་དང་། སྒྲ་རྡོ་རྗེ་མ་དང་། དྲི་རྡོ་རྗེ་མ་དང་། རོ་རྡོ་རྗེ་མ་དང་། རེག་བྱ་རྡོ་རྗེ་མ་དང་། ཆོས་ཀྱི་དབྱིངས་ཀྱི་རྡོ་རྗེ་མའོ། །ལཱཾ་མཱཾ་པཱཾ་ཏཱཾ་ཞེས་བྱས་
པས་སྤྱན་མ་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་རྣམས་སོ། །བྷྲཱུཾ་ཨཱཾ་ཛྲཱྀཾ་ཁཾ་ཧཱུྃ་ཞེས་བྱ་བ་འདིས་རྣམ་པར་སྣང་མཛད་དང་། རིན་ཆེན་འབྱུང་ལྡན་དང་། འོད་དཔག་མེད་དང་། དོན་ཡོད་གྲུབ་པ་དང་། མི་བསྐྱོད་པ་རྣམས་སྤྲོས་པ་དང་། དེ་ཁོ་ན་ཉིད་གསུམ་གྱིས་གཤིན་
རྗེ་མཐར་བྱེད་ལ་སོགས་པ་སྤྲོས་པའོ། །འདི་ཉིད་ཀྱིས་གཞལ་ཡས་ཁང་ཇི་སྲིད་དུ་ཕྱི་རོལ་གྱི་གཞལ་ཡས་ཁང་ལ་ཐིམ་པར་བསྒོམ་པར་བྱའོ། །དེ་ནས་ནམ་མཁའི་ཕྱོགས་སུ་གང་ནས་བྱོན་ཅིང་ཚོགས་པའི་དཀྱིལ་འཁོར་གྱི་འཁོར་ལོའི་བདག་ཉིད་འཇམ་པའི་རྡོ་རྗེ་འདོད་ཆགས་ཆེན་པོའི་རོས་

44-1-271a

མྱོས་པར་བལྟ་སྟེ། ཞལ་དུ་ཞུགས་ནས་ཞུ་བར་གྱུར་པ་རྡོ་རྗེའི་ལམ་ན་པདྨར་བཅས་པར་བལྟས་ལ་འོད་ཀྱི་གོང་བུ་དེ་ཡོངས་སུ་གྱུར་པ་ལས་ཧོ་ཡིག་དམར་པོ་གཉིས་ཀྱི་བར་དུ་དེ་ཁོ་ན་ཉིད་གསུམ་བལྟ་བར་བྱའོ། །དེ་ནས་ཡི་གེ་དེ་རྣམས་ཐབས་དང་ཤེས་
རབ་ཀྱི་འདོད་ཆགས་ཆེན་པོ་མེ་འབར་བས་ཐབས་དང་། ཤེས་རབ་གཉིས་ཀྱང་གདན་ཟླ་བའི་དཀྱིལ་འཁོར་ལ་འོད་དཔག་ཏུ་མེད་པར་གསལ་ཏེ། འདོད་ཆགས་ཆེན་པོ་འབར་བ་འཇའ་ཚོན་ལྟ་བུར་ཞུ་བའོ། །དེ་ནས་དེའི་འོད་ཟེར་གྱིས་བསྐུལ་བའི་ཐོག་མ་མེད་པ་ནས་གྲུབ་པའི་འཇམ་
དཔའི་རྡོ་རྗེ་ལས་བཀུག་པའི་སྤྱན་མ་དང་། མཱ་མ་ཀཱི་དང་གོས་དཀར་མོ་དང་སྒྲོལ་མ་དང་གནས་ཇི་ལྟ་བ་ན་གནས་པས་རང་རང་གི་ཚིགས་སུ་བཅད་པས་འོད་ཀྱི་གོང་བུ་དེ་ལ་བསྐུལ་བར་བསམ་པར་བྱའོ། །སེམས་ཅན་ཁམས་ན་གནས་ཀྱི་དབང་ཕྱུག་ཁྱོད་ནི་རྡོ་རྗེ་ཐུགས། །དགའ་
བའི་ཡིད་འོང་དོན་ཆེན་འདོད་པས་བདག་ལ་སྐྱབས་སུ་གསོལ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །འདོད་ཆགས་དམ་ཚིག་ཆགས་པས་བདག་ལ་དགྱེས་པར་མཛད་དུ་གསོལ། །རྡོ་རྗེ་སྐུ་ཁྱོད་ནི་རྡོ་རྗེ་ཐུགས། དགའ་བའི་ཡིད་འོང་དོན་ཆེན་འདོད་
པས་བདག་ལ་སྐྱབས་སུ་གསོལ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །སེམས་ཅན་ཡབ་ཆེན་གཉེན་མཆོག་བདག་ལ་དགྱེས་པར་མཛད་དུ་གསོལ། །ཁྱོད་ནི་རྡོ་རྗེ་བཀའ་ཡི་འཁོར་ལོ་སེམས་ཅན་ཀུན་ལ་ཕན། །སངས་རྒྱས་དོན་དུ་བྱང་ཆུབ་དོན་
དམ་རབ་ཏུ་ཕན་པར་གཟིགས། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །འདོད་ཆགས་དམ་ཚིག་ཆགས་པས་བདག་ལ་དགྱེས་པར་མཛད་དུ་གསོལ། །ཁྱོད་ནི་རྡོ་རྗེ་གསུང་སྟེ་ཀུན་ལ་ཕན་ཞིང་ཐུགས་བརྩེ་བ། །འཇིག་རྟེན་དག་གི་དོན་དང་དགོངས་པ་མཛད་
ལ་རབ་ཏུ་བརྩོན། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །རབ་དགའི་སྤྱོད་པ་ཀུན་ཏུ་བཟང་པོས་བདག་ལ་དགྱེས་པར་མཛོད། །ཁྱོད་ནི་རྡོ་རྗེའི་འདོད་པ་དམ་ཚིག་མཆོག་གི་ཕན་དོན་ཆེ། །ཡང་དག་རྫོགས་སངས་རྒྱས་ཀྱི་གདུང་མཆོག་མཉམ་ཉིད་ཐུགས་

44-1-271b

བརྩེ་བ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །ཡོན་ཏན་རིན་ཆེན་མང་པོའི་གཏེར་གྱུར་བདག་ལ་དགྱེས་པར་མཛོད། །དེ་ནས་བསྐུལ་བའི་སྒྲས་རབ་ཏུ་སངས་ཏེ་ཆོས་ཐམས་ཅད་རང་བཞིན་གྱིས་འོད་གསལ་བར་རྣམ་པར་བསྒོམས་ལ་འོད་ཀྱི་གོང་བུ་དེ་ལས་
འོད་ཟེར་སྤྲོས་པའི་འཇམ་པའི་རྡོ་རྗེ་རྣམས་རྣམ་པར་སྤྲོས་པས་འགྲོ་བའི་དོན་བྱས་ནས་སྤྱན་མ་ལ་སོགས་པའི་ལྷ་མོ་བཞིས་བཀུག་ནས་འོད་ཀྱི་གོང་བུ་དེ་ལ་རབ་ཏུ་ཞུགས་པར་བལྟའོ། །དེ་ནས་འོད་ཀྱི་གོང་བུ་དེ་ཡོངས་སུ་གྱུར་པ་ལས་མཾ་ཡིག་བལྟས་ནས་དེ་ནས་ཡང་འཇམ་པའི་རྡོ་རྗེ་
རྣམས་རྣམ་པར་སྤྲོས་པས་འགྲོ་བའི་དོན་བྱེད་པ་སྔོན་དུ་འགྲོ་བས་མཾ་ཡིག་ཡོངས་སུ་གྱུར་པ་ལས་རལ་གྲིའི་ཡུ་བ་ལས་ཟླ་བའི་གནས་སུ་མཾ་ཡིག་གིས་བྱིན་གྱིས་བརླབས་ལ་ཡང་འཇམ་པའི་རྡོ་རྗེ་རྣམས་རྣམ་པར་སྤྲོས་པས་འགྲོ་བའི་དོན་བྱས་ན་མཾ་ཡིག་དང་རལ་གྲི་ཡོངས་སུ་གྱུར་པ་
ལས་བཅོམ་ལྡན་འདས་འཇམ་པའི་རྡོ་རྗེ་གུར་གུམ་ལྟ་བུའི་སྙིང་རྗེ་ཆེན་པོ་དང་ཤེས་རབ་ཀྱི་རྒྱུ་མཐུན་པ་དང་། ཇི་སྲིད་ནམ་མཁའི་ཁམས་འོད་ཀྱིས་ཁྱབ་པ། རིགས་དཔག་ཏུ་མེད་པ་སྤྲོས་པས་འགྲོ་བའི་དོན་བྱེད་པར་རྩོམ་པ་རལ་གྲི་ནག་པོ་དང་། མདའ་དམར་པོ་དང་། 
ཨུཏྤལ་སྔོན་པོ་དང་། གཞུ་དམར་པོ་འཛིན་པ་བསྒོམ་པར་བྱའོ། །དེ་ནས་ལོངས་སྤྱོད་རྫོགས་པའི་སྐུའི་རང་བཞིན་གྱི་དཀྱིལ་འཁོར་འཁོར་ལོའི་བདག་ཉིད་བཅོམ་ལྡན་འདས་ཏེ། ལོངས་སྤྱོད་རྫོགས་པའི་སྐུའི་བདག་ཉིད་མི་ཕྱེད་པ་གཟུང་བ་དང་། འཛིན་པ་སྟོང་པ་ཉིད་ཀྱི་ཆོས་ཀྱི་
སྐུ་དེ་བཞིན་གཤེགས་པ་དང་ཆོས་ཐམས་ཅད་ལྷན་ཅིག་དབྱེར་མི་ཕྱེད་པར་རྟོགས་པར་བྱ་བའི་ཕྱིར་འདིར་ལྷག་པར་མོས་པར་བྱའོ། །ཨོཾ་དྷརྨྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧཾ་ཞེས་བྱ་བའི་དཀྱིལ་འཁོར་གྱི་བདག་པོ་ཡོངས་སུ་རྫོགས་པ་ནི་ཆུང་ངུའི་རྒྱུ་མཐུན་པའི་འབྲས་བུ་དང་། ཆུང་
ངུའི་བསྙེན་པའོ།།      །།དེ་ནས་མིག་འབྲས་ཀྱི་སྟེང་གཉིས་སུ་སོ་སོར་ཟླ་བའི་དཀྱིལ་འཁོར་ལ་ཀྵཾ་ཡིག་དཀར་པོ་དེ་ཡོངས་སུ་གྱུར་པ་ལས་འཁོར་ལོ་དཀར་པོ་རྩིབས་བརྒྱད་པའོ། །དེའི་ལྟེ་བའི་ནང་དུ་ཟླ་བ་ལ་གནས་པའི་ཀྵཾ་ཡིག་དེ་ལས་སའི་སྙིང་པོ་རྣམ་པར་སྤྲོས་པས་

44-1-272a

འགྲོ་བའི་དོན་བྱེད་པ་སྔོན་དུ་འགྲོ་བས་ཀྵཾ་ཡིག་དང་འཁོར་ལོ་ཡོངས་སུ་གྱུར་པ་ལས་མིག་གི་དབང་པོ་རྣམ་པར་དག་པ་རྣམ་པར་སྣང་མཛད་བཞིན་དུ་སའི་སྙིང་པོ་བསྒོམ་པར་བྱའོ། །དེ་ལྟར་རྣ་བ་གཉིས་ལ་སོ་སོར་ཟླ་བ་ལས་ཛྲིཾ་ཡིག་ནག་པོ་དང་རྡོ་རྗེ་ཡོངས་སུ་
གྱུར་པ་ལས་མི་བསྐྱོད་པ་བཞིན་དུ་ཕྱག་ན་རྡོ་རྗེའོ། །སྣའི་རྩ་བར་ཟླ་བ་ལ་ཁཾ་ཡིག་སེར་པོ་དང་རིན་པོ་ཆེ་ཡོངས་སུ་གྱུར་པ་ལས་རིན་ཆེན་འབྱུང་ལྡན་བཞིན་དུ་ནམ་མཁའི་སྙིང་པོའོ། །ལྕེའི་དབུས་སུ་ཟླ་བ་ལ་གཾ་ཡིག་དམར་པོ་དང་པདྨ་ཡོངས་སུ་གྱུར་པ་ལས་འོད་དཔག་མེད་དེ་དེ་བཞིན་དུ་
འཇིག་རྟེན་དབང་ཕྱུག་གོ། །དཔྲལ་བའི་དབུས་སུ་ཟླ་བ་ལ་ཥྐཾ་ཡིག་ལྗང་གུ་དང་རལ་གྲི་ནག་པོ་ཡོངས་སུ་གྱུར་པ་ལས་དོན་ཡོད་གྲུབ་པ་བཞིན་དུ་སྒྲིབ་པ་རྣམ་པར་སེལ་བའོ། །མགྲིན་པའི་རྩ་བའི་འོག་ཏུ་ཟླ་བ་ལ་སཾ་ཡིག་དཀར་པོ་དང་རྡོ་རྗེ་དམར་པོ་ཡོངས་སུ་གྱུར་པ་ལས་རྡོ་རྗེ་སེམས་
དཔའ་བཞིན་དུ་ཀུན་དུ་བཟང་པོ་བསྒོམ་པར་བྱའོ། །འདི་ནི་དབང་པོ་རྣམ་པར་སྦྱོང་བའོ།།      །།དེ་བཞིན་དུ་ནམ་མཁའ་ལ་ཟླ་བའི་དཀྱིལ་འཁོར་ལ་གནས་པའི་ཛཾ་ཡིག་དཀར་པོ་དང་མེ་ལོང་ཡོངས་སུ་གྱུར་པ་ལས་གཟུགས་རྣམ་པར་དག་པ་རྣམ་པར་སྣང་མཛད་ཀྱི་རང་བཞིན་གཟུགས་རྡོ་རྗེ་
མ་མེ་ལོང་འཛིན་པའོ། །ཧཱུྃ་ཡིག་ནག་པོ་དང་པི་ཝང་ཡོངས་སུ་གྱུར་པ་ལས་སྒྲ་རྣམ་པར་དག་པ་མི་བསྐྱོད་པའི་རང་བཞིན་སྒྲ་རྡོ་རྗེ་མ་པི་ཝང་འཛིན་པའོ། །བཾ་ཡིག་སེར་པོ་དང་དྲི་ཆུས་བཀང་བའི་དུང་ཕོར་ཡོངས་སུ་གྱུར་པ་ལས་དྲི་རྣམ་པར་དག་པ་རིན་ཆེན་འབྱུང་ལྡན་གྱི་རང་བཞིན་དྲི་རྡོ་རྗེ་མ་དྲི་
ཆུས་བཀང་བའི་དུང་ཕོར་འཛིན་པའོ། །ཧོ་ཡིག་དམར་པོ་དང་རོའི་སྣོད་ཡོངས་སུ་གྱུར་པ་ལས་རོ་རྣམ་པར་དག་པ་སྣང་བ་མཐའ་ཡས་ཀྱི་རང་བཞིན་རོ་རྡོ་རྗེ་མ་རོས་བཀང་བའི་སྣོད་དཀར་པོ་འཛིན་པའོ། །ཁཾ་ཡིག་ལྗང་གུ་དང་གོས་སྣ་ཚོགས་ཡོངས་སུ་གྱུར་པ་ལས་རེག་བྱ་རྣམ་པར་དག་
པ་དོན་ཡོད་གྲུབ་པའི་རང་བཞིན་རེག་བྱ་རྡོ་རྗེ་མ་གོས་སྣ་ཚོགས་འཛིན་པའོ། །རཾ་ཡིག་དཀར་པོ་དང་ཆོས་འབྱུང་ཡོངས་སུ་གྱུར་པ་ལས་ཆོས་ཀྱི་ཁམས་རྣམ་པར་དག་པ་རྡོ་རྗེ་སེམས་དཔའི་རང་བཞིན་ཆོས་ཀྱི་དབྱིངས་ཀྱི་རྡོ་རྗེ་མ་ཆོས་འབྱུང་འཛིན་པ་སྟེ་འདི་ནི་ཡུལ་དྲུག་རྣམ་པར་སྦྱོང་བའོ།།      །།

44-1-272b

དེ་བཞིན་དུ་ལཾ་ཡིག་དཀར་པོ་དང་འཁོར་ལོ་རྩིབས་བརྒྱད་པ་ཡོངས་སུ་གྱུར་པ་ལས་སའི་ཁམས་རྣམ་པར་སྣང་མཛད་ཀྱི་རང་བཞིན་སྤྱན་མ་འཁོར་ལོ་རྩིབས་བརྒྱད་པ་འཛིན་པའོ། །མཾ་ཡིག་ནག་པོ་དང་ཨུཏྤལ་དམར་པོ་ཡོངས་སུ་གྱུར་པ་ལས་ཆུའི་ཁམས་རྣམ་པར་དག་པ་མི་བསྐྱོད་
པའི་རང་བཞིན་མཱ་མ་ཀཱི་ཨུཏྤལ་དམར་པོ་འཛིན་པའོ། །པཾ་ཡིག་དམར་པོ་དང་པདྨ་ཡོངས་སུ་གྱུར་པ་ལས་མེའི་ཁམས་རྣམ་པར་དག་པ་སྣང་བ་མཐའ་ཡས་ཀྱི་རང་བཞིན་གོས་དཀར་མོ་པདྨ་དམར་པོ་འདབ་མ་བརྒྱད་པ་འཛིན་པའོ། །ཏཾ་ཡིག་སེར་པོ་དང་གསེར་གྱི་ཨུཏྤལ་ཡོངས་
སུ་གྱུར་པ་ལས་རླུང་གི་ཁམས་རྣམ་པར་དག་པ་རིན་ཆེན་འབྱུང་ལྡན་གྱི་རང་བཞིན་སྒྲོལ་མ་གསེར་གྱི་ཨུཏྤལ་འཛིན་པའོ། །འདི་ནི་ཁམས་བཞི་རྣམ་པར་སྦྱོང་བའོ།།      །།དེ་བཞིན་དུ་བྷྲཱུཾ་ཡིག་དཀར་པོ་དང་འཁོར་ལོ་ཡོངས་སུ་གྱུར་པ་ལས་གཟུགས་ཀྱི་ཕུང་པོ་རྣམ་པར་དག་པ་རྣམ་པར་སྣང་
མཛད་འཁོར་ལོ་དཀར་པོ་རྩིབས་བརྒྱད་པ་འཛིན་པའོ། །ཨཱཾ་ཡིག་སེར་པོ་དང་། རིན་པོ་ཆེ་ཡོངས་སུ་གྱུར་པ་ལས་ཚོར་བའི་ཕུང་པོ་རྣམ་པར་དག་པ་རིན་ཆེན་འབྱུང་ལྡན་རིན་པོ་ཆེ་ལྗང་གུ་འཛིན་པའོ། །ཛྲཱྀཾ་ཡིག་དམར་པོ་དང་པདྨ་ཡོངས་སུ་གྱུར་པ་ལས་འདུ་ཤེས་ཀྱི་ཕུང་པོ་རྣམ་པར་
དག་པ་འོད་དཔག་ཏུ་མེད་པ་པདྨ་དམར་པོ་འདབ་མ་བརྒྱད་པ་འཛིན་པའོ། །ཁཾ་ཡིག་ལྗང་གུ་དང་རལ་གྲི་ཡོངས་སུ་གྱུར་པ་ལས་འདུ་བྱེད་ཀྱི་ཕུང་པོ་རྣམ་པར་དག་པ་དོན་ཡོད་གྲུབ་པ་རལ་གྲི་ནག་པོ་འཛིན་པའོ། །ཧཱུྃ་ཡིག་ནག་པོ་དང་རྡོ་རྗེ་ཡོངས་སུ་གྱུར་པ་ལས་རྣམ་པར་ཤེས་པའི་ཕུང་པོ་
རྣམ་པར་དག་པ་མི་བསྐྱོད་པ་རྡོ་རྗེ་ནག་པོ་འཛིན་པའོ། །འདི་ནི་ཕུང་པོ་ལྔ་རྣམ་པར་སྦྱོང་བའོ། །ཆུང་ངུའི་རྣམ་པར་སྨིན་པའི་འབྲས་བུ་དང་། ཆུང་ངུའི་ཉེ་བར་སྒྲུབ་པའོ།།      །།ནུ་མ་གཉིས་ཀྱི་འོག་ཏུ་ཟླ་བ་ལ་གནས་པའི་ཧཱུྃ་ཡིག་ནག་པོ་དེ་ཡོངས་སུ་གྱུར་པ་ལས་རྡོ་རྗེ་ནག་པོ་དེའི་
དབུས་ཀྱི་ལྟེ་བ་ལ་གནས་པའི་ཧཱུྃ་ཡིག་ནག་པོའོ། །དེ་ཡོངས་སུ་གྱུར་པ་ལས་སླར་ཡང་རྡོ་རྗེའི་ལྟེ་བའི་དབུས་སུ་ཟླ་བ་ལ་གནས་པའི་ཧཱུཾ་ཡིག་སྟེ། དེ་ལས་ཐུགས་རྡོ་རྗེ་སྤྲོ་བ་དང་བསྡུ་བ་སྔོན་དུ་འགྲོ་བའི་ནང་དུ་གནས་པའི་ཧཱུྃ་ཡིག་དང་རྡོ་རྗ་ཡོངས་སུ་གྱུར་པ་ལས་ཕྱག་ན་རྡོ་རྗེ་ཡོངས་སུ་གྱུར་

44-1-273a

པ་ལས་ཕྱག་ན་རྡོ་རྗེ་ལྟ་བུའི་ཐུགས་རྡོ་རྗེ་བསྒོམ་པར་བྱའོ། །དེ་ནས་ཐུགས་རྡོ་རྗེའི་སྙིང་གར་ཟླ་བ་ལ་གནས་པའི་རྡོ་རྗེའི་ལྟེ་བའི་དབུས་སུ་ཟླ་བ་ལ་གནས་པའི་ཧཱུྃ་ཡིག་ལས་བྱུང་བའི་ཐུགས་རྡོ་རྗེ་སྤྲོས་པས་འགྲོ་བའི་དོན་བྱས་ནས་མདུན་དུ་བྱོན་ཏེ་གནས་པ་རྣམས་དང་། གདོད་
མ་ནས་གྲུབ་པའི་ཐུགས་རྡོ་རྗེ་རྣམས་ཀྱང་མདུན་དུ་སྤྱན་དྲངས་ལ་གནས་པར་བལྟས་ཏེ། སྙིང་གའི་ས་བོན་ལས་བྱུང་བའི་ཕྱི་ནང་གསང་བའི་མཆོད་པས་ཡང་དག་པར་མཆོད་པས་དགྱེས་པར་བལྟས་ལ་རང་གིས་སྤྲུལ་པ་དང་ཐོག་མ་མེད་པ་ནས་གྲུབ་པ་རྣམས་ལ་ཚིགས་སུ་གཅད་པ་གཉིས་
ཀྱིས་གསོལ་བ་གདབ་པར་བྱའོ། །རྡོ་རྗེ་འཛིན་ཐུགས་དཔལ་དང་ལྡན། །རྡོ་རྗེ་མི་ཕྱེད་གསུམ་བསྒོམ་པས། །དེང་བདག་བྱིན་གྱིས་བརླབས་གནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམ་པས། །
དེང་བདག་བྱིན་གྱིས་བརླབས་གནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །དེ་ནས་གསོལ་བ་བཏབ་པའི་དེ་མ་ཐག་ཏུ་རབ་ཏུ་དགྱེས་པས་རང་གི་ཐུགས་རྡོ་རྗེའི་བདག་ཉིད་དུ་རབ་ཏུ་ཞུགས་པར་བསམས་ལ་འདིས་ལྷག་པར་མོས་པར་བྱ་སྟེ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧཾ། 
དེ་བཞིན་དུ་ནུ་མ་གཉིས་ཀྱི་བར་དུ་ཟླ་བ་ལ་གནས་པའི་རལ་གྲིའི་ཡུ་བའི་དབུས་སུ་ཟླ་བ་ལ་གནས་པའི་མཾ་ཡིག་དང་རལ་གྲི་ཡོངས་སུ་གྱུར་པ་ལས་གསོལ་བ་བཏབ་པ་མེད་པར་དམ་ཚིག་སེམས་དཔའ་བཞིན་དུ་ཡེ་ཤེས་སེམས་དཔའ་བསྒོམ་པར་བྱའོ། །དེ་བཞིན་དུ་ཐུགས་རྡོ་རྗེ་བསྐྱེད་པའི་
རིམ་པ་ཉིད་ཀྱིས་མགྲིན་པའི་རྩ་བར་ཟླ་བ་ལ་གནས་པའི་རལ་གྲིའི་ཡུ་བའི་དབུས་སུ་ཟླ་བ་ལ་གནས་པའི་ཨ་ཡིག་དམར་པོ་དང་པདྨ་ཡོངས་སུ་གྱུར་པ་ལས་གསོལ་བ་བཏབ་ནས་ལྷན་ཅིག་འཇིག་རྟེན་དབང་ཕྱུག་བཞིན་དུ་གསུང་རྡོ་རྗེ་བསྒོམ་པར་བྱའོ། །དེར་གསོལ་བ་བཏབ་པའི་ཚིགས་སུ་བཅད་པ་
གཉིས་ནི། ཆོས་ཀྱི་གསུང་ལམ་དཔལ་དང་ལྡན། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་གནས་སུ། །རྡོ་རྗེ་གསུང་གིས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་

44-1-273b

བརླབས་གནས་སུ། །རྡོ་རྗེ་གསུང་གིས་མཛད་དུ་གསོལ། །དེ་ནས་བཅོམ་ལྡན་འདས་བཞུགས་པའི་དེ་མ་ཐག་ཏུ། ཨོཾ་སརྦ་ཏ་ཐཱ་ག་ཏ་བཱཀ་བཛྲ་སྭ་བྷཱ་བ་ཨཏྨ་ཀོ྅ཧཾ། ཞེས་བྱ་བས་ལྷག་པར་མོས་པར་བྱའོ། །དེ་ནས་དེ་ཉིད་ཀྱི་བསྐྱེད་པའི་རིམ་པས་དཔྲལ་བར་ཨོཾ་ཡིག་དཀར་པོ་
དང་འཁོར་ལོ་ཡོངས་སུ་གྱུར་པ་ལས་གསོལ་བ་བཏབ་པ་ལས་ལྷན་ཅིག་སའི་སྙིང་པོ་བཞིན་དུ་སྐུ་རྡོ་རྗེ་བསྒོམ་པར་བྱའོ། །དེ་ལ་འདི་ནི་གསོལ་བ་གདབ་པའི་ཚིགས་སུ་བཅད་པ་གཉིས་ཏེ། དཔལ་ལྡན་རྡོ་རྗེ་སྐུ་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་
བརླབས་གནས་སུ། །རྡོ་རྗེ་སྐུ་ཡིས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་གནས་སུ། །རྡོ་རྗེ་སྐུ་ཡིས་མཛད་དུ་གསོལ། །དེ་ནས་རབ་ཏུ་ཞུགས་པའི་དེ་མ་ཐག་ཏུ། 
ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་བྱ་བས་ལྷག་པར་མོས་པར་བྱའོ། །དེ་ལྟར་ཐུགས་རྡོ་རྗེ་ལ་སོགས་པས་བྱིན་གྱིས་བརླབ་པ་ནི་ཆུང་ངུའི་སྐྱེས་བུ་བྱེད་པའི་འབྲས་བུ་དང་ཆུང་ངུའི་སྒྲུབ་པའོ།། །།དེ་ནས་ཡེ་ཤེས་སེམས་དཔའི་ཐུགས་ཀའི་ཕྱག་མཚན་གྱི་
ས་བོན་ལས་འོད་ཟེར་རྣམ་པར་སྤྲོས་པས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཡང་དག་པར་བསྐུལ་ཏེ། དེ་བཞིན་གཤེགས་པའི་སོ་སོའི་སྐུ་ལས་རྣམ་པར་སྤྲོས་པའི་རང་རང་གི་སྐུ་མདོག་གི་རིན་པོ་ཆེའི་བུམ་པ་བྱང་ཆུབ་ཀྱི་སེམས་ཀྱིས་བཀང་བས་ཕྱག་འབྲེལ་པ་རྣམས་
ཀྱིས་ནམ་མཁའ་ཁྱབ་པས་རྒྱལ་མཚན་དང་བ་དན་ལ་སོགས་པས་ཕྱག་འབྲེལ་པའི་མཆོད་པའི་ལྷ་མོའི་ཚོགས་ཀྱིས་ཡོངས་སུ་བསྐོར་བ་སྤྱན་མ་ལ་སོགས་པ་ཆོས་ཀྱི་དབྱིངས་ཀྱི་རྡོ་རྗེ་མའི་མཐར་ཐུག་པའི་ལྷ་མོའི་ཚོགས་དཔག་ཏུ་མེད་པས་བདག་ཉིད་དབང་བསྐུར་བས་བལྟས་ལ་སྤྱི་བོར་
བབས་པའི་ཆུའི་ལྷག་མ་ཡོངས་སུ་གྱུར་པ་ལས་མི་བསྐྱོད་པ་བསམས་ནས་བཀུག་པའི་བུམ་པ་རྣམས་གཞལ་ཡས་ཁང་གི་བུམ་པ་རྣམས་ལ་ཐིམ་པར་བསྒོམས་ནས། ལྷ་མོ་རྣམས་ཀྱིས་གསང་བའི་མཆོད་པས་མཆོད་ཅིང་། དགའ་བའི་ཚོགས་བླ་ན་མེད་པའི་བདག་ཉིད་ཀྱིས་ཤིན་ཏུ་བདེ་བར་

44-1-274a

བལྟ་བའི་དབང་བསྐུར་བ་ནི་ཆུང་ངུའི་དྲི་མ་མེད་པའི་འབྲས་བུ་དང་ཆུང་ངུའི་སྒྲུབ་པ་ཆེན་པོ་སྟེ། དེ་ལྟར་ཆུང་ངུའི་ཡན་ལག་བཞིའོ།།      །།དེ་ནས་རང་གི་འོད་ཀྱི་ཤེས་རབ་མའི་སེན་མོ་ནས་བརྩམས་ཏེ་སྐྲ་མཚམས་ཀྱི་མཐར་ཐུག་པའི་ཡན་ལག་དགའ་བ་ཤིན་ཏུ་རྒྱ་
ཆེ་བ་འཁོར་བ་མ་ཡིན་པ་བླ་ན་མེད་པའི་བདེ་བ་ཆེན་པོའི་བདུད་རྩིའི་རྒྱུན་འབྱུང་བར་བལྟས་པ་ནི་འབྲིང་གི་རྒྱུ་མཐུན་པའི་འབྲས་བུ་དང་འབྲིང་གི་བསྙེན་པའོ། །དེ་ནས་གོང་མ་བཞིན་དུ་སའི་སྙིང་པོ་ལ་སོགས་པ་མིག་ལ་སོགས་པའི་སྐྱེ་མཆེད་དྲུག་བྱིན་གྱིས་བརླབ་པ་ནི་འབྲིང་གི་རྣམ་པར་
སྨིན་པའི་འབྲས་བུ་དང་། འབྲིང་གི་ཉེ་བར་སྒྲུབ་པའོ། །དེ་ནས་གསོལ་བ་གདབ་པ་མེད་པར་ཐུགས་དང་གསུང་དང་སྐུ་བྱིན་གྱིས་བརླབ་པ་ནི་འབྲིང་གི་སྐྱེས་བུའི་བྱེད་པའི་འབྲས་བུ་དང་འབྲིང་གི་སྒྲུབ་པའོ། །དེ་བཞིན་དུ་བཅོམ་ལྡན་འདས་ཡེ་ཤེས་སེམས་དཔའ་བསྒོམས་ནས་དབང་
བསྐུར་བར་བསྒོམ་པ་ནི་འབྲིང་གི་དྲི་མ་མེད་པའི་འབྲས་བུ་དང་། འབྲིང་གི་སྒྲུབ་པ་ཆེན་པོའོ། །དེ་ལྟར་འབྲིང་གི་ཡན་ལག་བཞིའོ།།      །།དེ་ནས་བཅོམ་ལྡན་འདས་མའི་སྤྱི་བོའི་ནང་དུ་ཟླ་བའི་དཀྱིལ་འཁོར་ལ་གནས་པའི་ཨོཾ་ཡིག་དཀར་པོ་ཡོངས་སུ་གྱུར་པ་ལས་འཁོར་ལོའོ། །
དེའི་ལྟེ་བའི་ནང་དུ་ཟླ་བ་ལ་གནས་པའི་ཨོཾ་ཡིག་དཀར་པོའོ། །དེ་ཡོངས་སུ་གྱུར་པ་ལས་ནུ་མ་གཉིས་ཀྱི་སྟེང་གི་མཚམས་ནས་སྤྱི་བོའི་མཐར་ཐུག་པར་རྣམ་པར་སྣང་མཛད་ཀྱི་རྡུལ་ཕྲ་རབ་ཀྱི་རང་བཞིན་དུ་བལྟ་བར་བྱའོ། །དེ་བཞིན་དུ་ལྟེ་བའི་ནང་དུ་ཟླ་བ་ལ་གནས་པའི་ཨོཾ་ཡིག་
དཀར་པོའོ། །དེ་ཡོངས་སུ་གྱུར་པ་ལས་ནུ་མ་གཉིས་ཀྱི་སྟེང་ནས་ནུ་མ་གཉིས་ཀྱི་བར་མཐར་ཐུག་པར་མི་བསྐྱོད་པའི་རྡུལ་ཕྲ་རབ་ཀྱི་རང་བཞིན་བལྟ་བར་བྱའོ། །དེ་ནས་ལྟེ་བའི་འོག་གི་ནང་དུ་ཉི་མའི་དཀྱིལ་འཁོར་ལ་གནས་པའི་སྭཱ་ཡིག་སེར་པོ་ཡོངས་སུ་གྱུར་པ་ལས་རིན་པོ་ཆེ་
མར་གཏའོ། །དེའི་ནང་དུ་ཉི་མའི་དཀྱིལ་འཁོར་ལ་གནས་པའི་སྭཱ་ཡིག་སེར་པོའོ། །དེ་ཡོངས་སུ་གྱུར་པ་ལས་པདྨའི་སྟེང་ནས་ལྟེ་བའི་མཐར་ཐུག་པར་རིན་ཆེན་འབྱུང་ལྡན་གྱི་རྡུལ་ཕྲ་རབ་ཀྱི་རང་བཞིན་དུ་བལྟ་བར་བྱའོ། །དེ་བཞིན་དུ་པདྨའི་ནང་དུ་ཉི་མའི་དཀྱིལ་འཁོར་ལ་གནས་པའི་

44-1-274b

ཨཱཿཡིག་དམར་པོ་ཡོངས་སུ་གྱུར་པ་ལས་ཁ་བྱེ་བའི་པདྨ་དམར་པོ་འདབ་མ་བརྒྱད་པའོ། །དེའི་ནང་དུ་ཉི་མའི་དཀྱིལ་འཁོར་ལ་གནས་པའི་ཨ་ཡིག་དམར་པོའོ། །དེ་ཡོངས་སུ་གྱུར་པ་ལས་པདྨ་ནས་བརྩམས་ཏེ་པུས་མོ་གཉིས་ཀྱི་སྟེང་གི་མཐར་ཐུག་པར་འོད་དཔག་མེད་ཀྱི་རྡུལ་ཕྲ་རབ་
ཀྱི་རང་བཞིན་དུ་བལྟ་བར་བྱའོ། །དེ་བཞིན་དུ་པུས་མོ་གཉིས་ཀྱི་འོག་ཏུ་སོ་སོར་ཉི་མའི་དཀྱིལ་འཁོར་ལ་གནས་པའི་ཧ་ཡིག་ལྗང་གུ་ཡོངས་སུ་གྱུར་པ་ལས་རལ་གྲིའོ། །དེའི་ཡུ་བའི་ནང་དུ་ཉི་མའི་དཀྱིལ་འཁོར་ལ་གནས་པའི་ཧཱ་ཡིག་གོ། །དེ་ཡོངས་སུ་གྱུར་པ་ལས་པུས་མོ་
གཉིས་ནས་བརྩམས་ཏེ་རྐང་པའི་སོར་མོའི་མཐར་ཐུག་པར་དོན་ཡོད་གྲུབ་པའི་རྡུལ་ཕྲ་རབ་ཀྱི་རང་བཞིན་དུ་བལྟ་བར་བྱའོ། །དེ་ལྟར་རིགས་ལྔ་གཅིག་ཏུ་ཚོགས་པས་ཡོངས་སུ་མ་ཉམས་པ་རང་གི་ཁ་དོག་དང་དབྱིབས་ཀྱིས་བཅོམ་ལྡན་འདས་མ་གསལ་བར་བྱའོ། །དེའི་ཆུ་སྐྱེས་ལ་
ཧཱུྃ་ཡིག་དམར་པོ་ཡོངས་སུ་གྱུར་པ་ལས་ཁ་འོག་ཏུ་བལྟས་པའི་པདྨ་ལྟ་བུ་ལ་ཨཱཿཡིག་དམར་པོ་ཡོངས་སུ་གྱུར་པ་ལས་ཟེའུ་འབྲུ་རྣམ་པར་བསྒོམ་མོ། །དེ་བཞིན་དུ་ཧཱུྃ་ཡིག་དམར་པོ་ཡོངས་སུ་གྱུར་པ་ལས་རང་གི་རྡོ་རྗེའོ། །ཨོཾ་ཡིག་དཀར་པོ་ཡོངས་སུ་གྱུར་པ་ལས་ནོར་བུའི་
ཆ་རྡོ་རྗེ་རྩེ་ལྔ་པ་ལྟ་བུའི་རྗེས་སུ་བྱེད་པ་ཤིན་ཏུ་ཡིད་འཕྲོག་པ་བལྟས་ནས་དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པའི་དོན་བདག་ལ་བརྩམས་པར་འགྲོས་ནས་གཉིས་ཀའི་ཐུགས་ཀའི་ས་བོན་གྱི་འོད་ཟེར་གྱིས་དེ་བཞིན་གཤེགས་པ་ཐམས་ཅད་བཀུག་ནས་རང་གི་ལུས་
དང་ཡན་ལག་རྣམས་ལ་ཐིམ་པར་བསྒོམས་ལ་ཐུགས་ཀའི་ས་བོན་གྱི་འོད་ཟེར་གྱིས་དེ་བཞིན་གཤེགས་པ་ཐམས་ཅད་བཀུག་ནས་ཞལ་དུ་ཞུགས་ཏེ། མན་ངག་ཇི་ལྟ་བ་བཞིན་དུ་གནས་ཇི་ལྟ་བ་བལྟས་ལ་སྔགས་བརྗོད་དོ། །ཨོཾ་སརྦ་ཏ་ཐཱ་ག་ཏ་ཨ་ནུ་རཱག་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། 
ཞེས་བྱ་བའི་བར་ནི་དང་པོ་སྦྱོར་བའི་ཏིང་ངེ་འཛིན་ཏོ། །དེ་ནས་ཐུགས་ཀའི་ས་བོན་གྱིས་དེ་བཞིན་གཤེགས་པ་ཐམས་ཅད་བཀུག་ནས་ཞལ་ནས་ཞལ་དུ་ཞུགས་ཏེ་ཞུ་བར་གྱུར་པ་རྣམས་རྡོ་རྗེའི་ལམ་ནས་ཕྱུང་ནས་པདྨའི་ནང་དུ་གནས་པར་བལྟས་ལ་འོད་ཀྱི་གོང་བུ་དེ་ཡོངས་སུ་གྱུར་པ་ལས་

44-1-275a

མཾ་ཡིག་གོ། །དེ་ལས་བྱུང་བའི་མི་བསྐྱོད་པ་རྣམ་པར་སྤྲོས་པས་འགྲོ་བའི་དོན་བྱས་ནས་མཾ་ཡིག་དེ་ཡོངས་སུ་གྱུར་པ་ལས་གཙོ་བོ་མི་བསྐྱོད་པའི་རྟེན་དང་བརྟེན་པའི་དཀྱིལ་འཁོར་གྱི་བདག་ཉིད་གསང་བའི་དཀྱིལ་འཁོར་བལྟའོ། །དེ་ནས་མི་བསྐྱོད་པ་ལ་སོགས་པ་
རྣམས་སོ་སོར་མངོན་སུམ་དུ་བྱས་ཏེ་མན་ངག་ཇི་ལྟ་བ་བཞིན་དུ་རིགས་ཀྱི་བདག་པོ་ལ་རྗེས་སུ་གནང་བ་ཐོབ་ནས་རང་རང་གི་སྔགས་ཀྱིས་དབྱུང་བར་བྱའོ། །དེ་ལ་བཛྲ་དྷྲིཀ་ཅེས་བྱ་བའི་སྔགས་འདིས་ཉེ་བར་ཕྱུང་བའི་བཅོམ་ལྡན་འདས་མི་བསྐྱོད་པ་སྤྲུལ་པ་དཔག་ཏུ་མེད་པ་སྤྲོས་པས་འགྲོ་བའི་དོན་
བྱས་ནས་འཇམ་པའི་རྡོ་རྗེའི་སྐུ་གསུང་ཐུགས་རྡོ་རྗེ་རྣམས་ལ་ཐིམ་པར་གྱུར་པར་བསམ་མོ། །དེ་བཞིན་དུ་ཛི་ན་ཛིཀ་ཅེས་བྱ་བའི་སྔགས་འདིས་འགྲོ་བའི་དོན་བྱེད་པ་སྔོན་དུ་འགྲོ་བས་མདུན་དུ་རྣམ་པར་སྣང་མཛད་དོ། །དེ་བཞིན་དུ་རཏྣ་དྷྲྀཀ་ཅེས་བྱ་བ་འདིས་ལྷོ་ཕྱོགས་སུ་རིན་ཆེན་འབྱུང་ལྡན་ནོ། །
ཨཱ་རོ་ལྀཀ་ཅེས་བྱ་བ་འདིས་ནུབ་ཕྱོགས་སུ་འོད་དཔག་མེད་དོ། །པྲཛྙཱ་དྷྲྀཀ་ཅེས་བྱ་བ་འདིས་བྱང་ཕྱོགས་སུ་དོན་ཡོད་གྲུབ་པའོ། །མོ་ཧ་ར་ཏི་ཞེས་བྱ་བ་འདིས་མེའི་མཚམས་སུ་སྤྱན་ནོ། །དྭེ་ཥ་ར་ཏི་ཞེས་བྱ་བ་འདིས་བདེན་བྲལ་གྱི་མཚམས་སུ་མཱ་མ་ཀཱིའོ། །རཱ་ག་ར་ཏི་ཞེས་བྱ་བ་འདིས་རླུང་
གི་མཚམས་སུ་གོས་དཀར་མོའོ། །བཛྲ་ར་ཏི་ཞེས་བྱ་བ་འདིས་དབང་ལྡན་གྱི་མཚམས་སུ་སྒྲོལ་མའོ། །ཨོཾ་ཨཱཿཧཱུྃ་ཞེས་བྱ་བ་འདིས་གོ་རིམས་བཞིན་དུ་མེའི་མཚམས་ལ་སོགས་པའི་མཚམས་བཞི་དང་། ཤར་སྒོའི་བྱང་དང་ལྷོའི་འགྲམ་གཉིས་སུ་གཟུགས་རྡོ་རྗེ་མ་ལ་སོགས་པ་དྲུག་གོ། །
ཡ་མཱནྟ་ཀྲྀཏ་ཅེས་བྱ་བ་འདིས་ཤར་ཕྱོགས་ཀྱི་སྒོར་གཤིན་རྗེ་གཤེད་དོ། །པྲཛྙཱ་ན་ཏ་ཀྲྀཏ་ཅེས་བྱ་བ་འདིས་ལྷོའི་སྒོར་ཤེས་རབ་མཐར་བྱེད་དོ། །པདྨཱན་ཏ་ཀྲྀཏ་ཅེས་བྱ་བ་འདིས་ནུབ་ཀྱི་སྒོར་པདྨ་མཐར་བྱེད་དོ། །བྷི་གྷྣཱཾ་ཏ་ཀྲྀཏ་ཅེས་བྱ་བ་འདིས་བྱང་གི་སྒོར་བགེགས་མཐར་བྱེད་དོ། །ཨོཾ་ཨཱཿཧཱུྃ་ཞེས་བྱ་
བ་འདིས་ཕྱིའི་གཞལ་ཡས་ཁང་ལ་གཞལ་ཡས་ཁང་དེ་ཐིམ་པར་བལྟའོ། །དེ་ནས་ཡེ་ཤེས་སེམས་དཔའི་ཐུགས་ཀའི་ཕྱག་མཚན་གྱི་ས་བོན་འོད་ཟེར་གྱི་ལྕགས་ཀྱུའི་རྣམ་པས་ཐོག་མ་མེད་པའི་གྲུབ་པའི་ཡེ་ཤེས་ཀྱི་དཀྱིལ་འཁོར་གྱི་བདག་ཉིད་བཅོམ་ལྡན་འདས་འཇམ་པའི་རྡོ་རྗེ་

44-1-275b

མདུན་དུ་སྤྱན་དྲངས་པའི་བཅོམ་ལྡན་འདས་རབ་ཏུ་གཞུག་པའི་ཕྱིར་གུར་མཚམས་དབྱེ་བ་དང་། སྒོ་ནས་ཞུགས་པ་ལ་གཤིན་རྗེ་གཤེད་ལ་སོགས་པས་བདུད་རྣམས་བསྐྲད་ནས་རྡོ་རྗེའི་གུར་སྔོན་བཞིན་དུ་བརྟན་པར་བལྟས་ལ་བཅོམ་ལྡན་འདས་རྣམས་ལ་ཞབས་བསིལ་དང་། ཞལ་བསིལ་
དང་མཆོད་ཡོན་རྣམས་ཕུལ་ནས་ཕྱི་དང་གསང་བའི་མཆོད་པ་རྣམས་ཀྱིས་ཡང་དག་པར་མཆོད་དེ། གཤིན་རྗེ་གཤེད་ལ་སོགས་པས་མན་ངག་ཇི་ལྟ་བ་བཞིན་དུ་དགུག་པ་དང་། གཞུག་པ་དང་། བཅིང་བ་དང་། དགྱེས་པ་བསྐྱེད་པར་བྱའོ། །དེ་ནས་ཐོག་མ་མེད་པ་ནས་གྲུབ་པའི་
འཇམ་པའི་རྡོ་རྗེ་དང་ལྷན་ཅིག་གཉིས་སུ་མེད་པའི་རང་བཞིན་ལྷག་པར་མོས་པར་བྱའོ་ཞེས་བྱ་བའི་བར་གྱིས་རྒྱུ་མཐུན་པའི་འབྲས་བུ་ཆེན་པོ་དང་བསྙེན་པ་ཆེན་པོའོ།།      །།དེ་ནས་དཀྱིལ་འཁོར་གྱི་བདག་པོ་དང་། དཀྱིལ་འཁོར་པ་རྣམས་ཀྱི་རང་གི་རིག་མ་དང་བཅས་པར་གོང་མ་
བཞིན་དུས་གཅིག་ཏུ་མིག་ལ་སོགས་པའི་སྐྱེ་མཆེད་དྲུག་བྱིན་གྱིས་བརླབས་པ་ཞེས་བྱ་བ་ནི་རྣམ་པར་སྨིན་པ་དང་། ཆེན་པོའི་ཉེ་བར་སྒྲུབ་པའོ། །དེ་ནས་གསོལ་བ་བཏབ་པ་མེད་པར་ཐུགས་དང་གསུང་དང་སྐུ་བྱིན་གྱིས་བརླབས་པ་ཞེས་བྱ་བ་ནི་ཆེན་པོའི་སྐྱེས་བུ་བྱེད་པའི་འབྲས་བུ་དང་། ཆེན་
པོའི་སྒྲུབ་པའོ། །དེ་ནས་སོ་སོར་གོང་མ་བཞིན་དུ་ཡེ་ཤེས་སེམས་དཔའ་བསྒོམས་ནས་དབང་བསྐུར་བ་ལ་སོགས་པ་ནི་དྲི་མ་མེད་པའི་འབྲས་བུ་དང་། ཆེན་པོའི་སྒྲུབ་པ་ཆེན་པོ་ཞེས་བྱ་བའི་ཡན་ལག་བཞིའོ། །ཆུ་ལྷག་མ་ཡོངས་སུ་གྱུར་པ་ལས་འཇམ་པའི་རྡོ་རྗེ་དང་། རྣམ་པར་
སྣང་མཛད་དང་། རིན་ཆེན་འབྱུང་ལྡན་དང་། འོད་དཔག་མེད་དང་། དོན་ཡོད་གྲུབ་པ་དང་། མཱ་མ་ཀཱི་དང་། སྒྲ་རྡོ་རྗེ་མ་དང་། ཤེས་རབ་མཐར་བྱེད་དང་། བགེགས་མཐར་བྱེད་དང་། ཕྱག་ན་རྡོ་རྗེ་དང་། ཐུགས་རྡོ་རྗེ་དང་། སྲུང་བའི་འཁོར་ལོ་ལ་གནས་པའི་ཤེས་རབ་མཐར་
བྱེད་དང་། བགེགས་མཐར་བྱེད་དང་། འདོད་པའི་རྒྱལ་པོ་དང་། དབྱིག་པ་སྔོན་པོ་དང་། སྟོབས་པོ་ཆེ་དང་། མི་གཡོ་བ་དང་། གཙུག་ཏོར་འཁོར་ལོས་སྒྱུར་བ་དང་། གནོད་མཛེས་རྒྱལ་པོ་དང་། རྡོ་རྗེ་ཧཱུྃ་མཛད་རྣམས་ཀྱི་དབུ་ལ་མི་བསྐྱོད་པའོ། །སྤྱན་མ་དང་། གཟུགས་རྡོ་རྗེ་

44-1-276a

མ་དང་། གཤིན་རྗེ་གཤེད་དང་། སའི་སྙིང་པོ་དང་། སྐུ་རྡོ་རྗེ་དང་། བསྲུང་བའི་འཁོར་ལོ་ལ་གནས་པའི་གཤིན་རྗེ་གཤེད་རྣམས་ལ་རྣམ་པར་སྣང་མཛད་དོ། །དྲི་རྡོ་རྗེ་མ་དང་། ནམ་མཁའི་སྙིང་པོ་དག་ལ་རིན་ཆེན་འབྱུང་ལྡན་ནོ། །གོས་དཀར་མོ་དང་།
རོ་རྡོ་རྗེ་མ་དང་། པདྨ་མཐར་བྱེད་དང་། འཇིག་རྟེན་དབང་ཕྱུག་དང་། གསུང་རྡོ་རྗེ་དང་། སྲུང་བའི་འཁོར་ལོ་ལ་གནས་པའི་པདྨ་མཐར་བྱེད་རྣམས་ལ་འོད་དཔག་མེད་དོ། །སྒྲོལ་མ་དང་། རེག་བྱ་རྡོ་རྗེ་མ་དང་། སྒྲིབ་པ་ཐམས་ཅད་རྣམ་པར་སེལ་བ་རྣམས་ལ་དོན་ཡོད་གྲུབ་པའོ། །ཆོས་
ཀྱི་དབྱིངས་རྡོ་རྗེ་མ་དང་། ཀུན་དུ་བཟང་པོ་དག་ལ་རྡོ་རྗེ་འཛིན་པའོ་ཞེས་བྱ་བ་རིགས་ཀྱི་བདག་པོ་བསྒོམ་པའོ། །དེ་ནས་ཐུགས་ཀའི་ས་བོན་གྱི་འོད་ཟེར་གྱིས་ཕྱོགས་བཅུ་ན་གནས་པའི་འདོད་པའི་ཡོན་ཏན་ལྔ་རྣམས་བཀུག་ནས་ཞལ་དུ་ཞུགས་ཏེ་ཞུ་བར་གྱུར་པ་རྡོ་རྗེའི་ལམ་ནས་ལྷ་མོའི་པདྨར་བབས་
པར་བལྟས་ལ་འོད་ཀྱི་གོང་བུ་དེ་ཡོངས་སུ་གྱུར་པ་ལས་བླ་ན་མེད་པ་ཟག་པ་མེད་པ་དཔག་ཏུ་མེད་པའི་འདོད་པའི་ཡོན་ཏན་ལྔས་ཕྱག་འབྲེལ་པའི་གཟུགས་རྡོ་རྗེ་མ་ལ་སོགས་པའི་མཐར་ཐུག་པའི་ལྷ་མོའི་ཚོགས་བཅོམ་ལྡན་འདས་མའི་བ་སྤུའི་བུ་ག་སོ་སོ་ནས་རྣམ་པར་སྤྲོས་པས་དཀྱིལ་
འཁོར་པ་རྣམས་མཆོད་ཅིང་བླ་ན་མེད་པའི་བདེ་བ་ཆེན་པོས་ཚིམ་པའི་བདག་ཉིད་དུ་བལྟས་ལ། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བརྗོད་པར་བྱའོ། །དེ་ནས་དཀྱིལ་འཁོར་རྣམས་དང་ལྷ་མོའི་ཚོགས་རྣམས་དང་། གཞན་ཡང་ཀ་བ་དང་རྩིག་པ་དང་རྟ་བབས་ལ་
སོགས་པ་ཀུན་ནས་བསྟོད་པའི་བདག་ཉིད་དུ་བལྟ་བར་བྱའོ། །དེ་ལ་འདི་ནི་བསྟོད་པའི་ཚིགས་སུ་བཅད་པ་ལྔ་སྟེ། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁས་ཆེན་པོ། །རྡོ་རྗེ་གསུང་མཆོག་དཀྱིལ་འཁོར་གསུམ། །རྡོ་རྗེ་དབྱིངས་ལ་ཕྱག་འཚལ་ལོ། །རྣམ་པར་
སྣང་མཛད་དག་པ་ཆེ། །རྡོ་རྗེ་ཞི་བྱེད་དགའ་ཆེན་པོ། །རང་བཞིན་འོད་གསལ་མཆོག་གི་མཆོག །སྟོན་པ་རྡོ་རྗེ་ཕྱག་འཚལ་ལོ། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མ་མེད། །རང་བཞིན་དག་པ་གོས་པ་མེད། །རྡོ་རྗེ་བརྗོད་ཅིག་ཕྱག་འཚལ་ལོ། །

44-1-276b

རྡོ་རྗེ་མི་ཕྱེད་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །རྡོ་རྗེ་གསུངས་ཤིག་ཕྱག་འཚལ་ལོ། །དོན་ཡོད་རྡོ་རྗེ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །རང་བཞིན་དག་པ་ཉིད་ལས་བྱུང་། །རྡོ་རྗེ་སེམས་
དཔའ་ཕྱག་འཚལ་ལོ། །དེ་ནས་འཇམ་པའི་རྡོ་རྗེའི་མདུན་དུ་ཨཱཿཡིག་དམར་པོ་ཡོངས་སུ་གྱུར་པ་ལས་བྲུཾ་ལ་སོགས་པ་ས་བོན་བྱིན་གྱིས་བརླབས་པའི་བདུད་རྩི་ལྔ་དང་། བརྩོན་འགྲུས་ལྔས་ཡོངས་སུ་གང་བའི་པདྨའི་སྣོད་དཀར་པོ་རིན་པོ་ཆེ་སྣ་བདུན་གྱི་རང་བཞིན་གྱི་མན་འཇིའི་
སྟེང་དུ་བལྟའོ། །དེའི་སྟེང་དུ་མཐོ་གང་ཙམ་གྱི་སྟེང་དུ་ཟླ་བའི་དཀྱིལ་འཁོར་ལ་གནས་པའི་ཧཱུྃ་ཡིག་དཀར་པོ་ཡོངས་སུ་གྱུར་པ་ལས་རྡོ་རྗེ་དཀར་པོའི་ལྟེ་བའི་དབུས་སུ་ཟླ་བའི་དཀྱིལ་འཁོར་ལ་གནས་པའི་ཧཱུྃ་ཡིག་དཀར་པོས་བྱིན་གྱིས་བརླབས་པ་བལྟས་ནས་པདྨའི་སྣོད་ཀྱི་འོག་ཏུ་ཡཾ་
ཡིག་ཡོངས་སུ་གྱུར་པ་ལས་རླུང་གི་དཀྱིལ་འཁོར་རོ། །རླུང་གི་དཀྱིལ་འཁོར་གྱི་སྟེང་དུ་རཾ་ཡིག་ཡོངས་སུ་གྱུར་པ་ལས་མེའི་དཀྱིལ་འཁོར་རྣམ་པར་བསྒོམས་ནས་རླུང་གིས་སྦར་བའི་མེས་པདྨའི་སྣོད་རབ་ཏུ་དྲོས་པས་བདུད་རྩི་ལ་སོགས་པ་ཞུ་སྟེ། དེའི་རླངས་པས་ཟླ་བ་དང་རྡོ་རྗེ་ལ་
སོགས་པ་ཞུ་ནས་དེ་ཉིད་དུ་ལྷུང་བ་དེ་ཐམས་ཅད་བླ་ན་མེད་པའི་བདུད་རྩིས་ཡོངས་སུ་གང་བར་བལྟའོ། །དེའི་སྟེང་དུ་ཞུ་བའི་བདུད་རྩིའི་རྒྱུན་འབབ་པའི་ཨོཾ་ཡིག་བལྟས་ནས་དེའི་འོད་ཀྱིས་དེ་བཞིན་གཤེགས་པ་ཐམས་ཅད་ཀྱི་བདུད་རྩིའི་རྣམ་པ་རྣམས་བཀུག་ནས་དེར་ཐིམ་པར་བསྒོམས་
ལ། ཨོཾ་ཡིག་ཀྱང་ཞུ་བར་གྱུར་ནས་དེ་ཉིད་དུ་ཞུགས་པར་བལྟས་ནས་བདུད་རྩི་དེ་ཁོ་ན་ཉིད་དུ་གསུམ་གྱིས་ལན་མང་དུ་བྱིན་གྱིས་བརླབ་པའོ། །དེ་ནས་བཅོམ་ལྡན་འདས་དང་དཀྱིལ་འཁོར་པ་རྣམས་ཀྱི་ཐུགས་ཀར་གནས་པའི་ཡེ་ཤེས་སེམས་དཔའི་ཐུགས་ཀའི་ཕྱག་མཚན་གྱི་དབུས་
སུ་རང་རང་གི་ས་བོན་ཡོངས་སུ་གྱུར་པ་ལས་རང་རང་གི་གཙོ་བོའི་དཀྱིལ་འཁོར་གྱི་འཁོར་ལོ་སོ་སོའི་ལྕེའི་དབུས་སུ་ཧཱུྃ་དཀར་པོ་ཡོངས་སུ་གྱུར་པ་ལས་རྡོ་རྗེ་རྩེ་ལྔ་པ་ནས་ཙམ་ནང་སྦུ་གུར་གྱུར་པ་ལྟེ་བ་ལ་ཧཱུྃ་ཡིག་གིས་བྱིན་གྱིས་བརླབས་པས་བལྟས་ནས་སྒྱུ་མ་ལྟ་བུར་གསལ་བ་སྣ་ཚོགས་པ་

44-1-277a

འདི་ཐམས་ཅད་གཉིས་སུ་མེད་པ་ཙམ་དུ་ལྷག་པར་མོས་པར་བྱའོ། །རྡོ་རྗེ་རྩེ་ལྔ་པའི་འོད་ཟེར་གྱིས་དྲངས་ནས་རང་གི་སྙིང་གར་གནས་པའི་འཁོར་ལོ་ལ་སོགས་པ་དང་། བདག་ཉིད་དཀྱིལ་འཁོར་གྱི་ལྷ་ཚོགས་རྣམས་ཀྱིས་ཚིམ་པར་བྱའོ་ཞེས་པ་ནི་དཀྱིལ་འཁོར་
རྒྱལ་པོ་མཆོག་གི་ཏིང་ངེ་འཛིན་ཏོ། །དེ་ནས་ཐམས་ཅད་ཀྱི་ཡེ་ཤེས་སེམས་དཔའི་ཐུགས་ཀའི་ཕྱག་མཚན་གྱི་དབུས་སུ་གནས་པའི་དཀྱིལ་འཁོར་གྱི་འཁོར་ལོ་ཡོངས་སུ་གྱུར་པ་ལས་རང་རང་གི་ས་བོན་བལྟས་ནས་མཾ་ཡིག་ལས་སྤྲོས་པའི་འཇམ་པའི་རྡོ་རྗེ་རྣམ་པར་སྤྲོས་པས་སེམས་ཅན་
ཐམས་ཅད་འཇམ་པའི་རྡོ་རྗེར་བྱས་ཏེ་བཀུག་ནས་མཾ་ཡིག་ལ་རབ་ཏུ་ཞུགས་ཤིང་མཾ་ཡིག་དེ་ཡོངས་སུ་གྱུར་པ་ལས་སྲན་མའི་ཚད་ཙམ་གྱི་ནང་སྟོང་པའི་ཐིག་ལེ་རྣམ་པར་བསྒོམས་ལ་དེའི་དབུས་སུ་ཡན་ལག་བཞི་དང་ལྡན་པའི་རྟེན་དང་བརྟེན་པའི་བདག་ཉིད་གཙོ་བོ་འཇམ་པའི་རྡོ་རྗེའི་དཀྱིལ་
འཁོར་གྱི་འཁོར་ལོ་སྐད་ཅིག་ཙམ་གྱིས་བལྟ་བར་བྱའོ། །དེ་ནས་དེའི་དཀྱིལ་འཁོར་གྱི་འཁོར་ལོ་བཀུག་ནས་སྤྲོས་པའི་འོད་ཟེར་དགག་པར་མི་ནུས་པ་འཕྲོས་པ་གོ་རིམས་བཞིན་དུ་རལ་གྲི་དང་། ཡེ་ཤེས་སེམས་དཔའ་དང་། རལ་གྲི་གཉིས་པ་དང་། སྐུ་དང་གསུང་དང་ཐུགས་རྣམས་
དང་། སའི་སྙིང་པོ་ལ་སོགས་པའི་བྱང་ཆུབ་སེམས་དཔའ་རྣམས་དང་། དམ་ཚིག་སེམས་དཔའ་རྣམས་དང་། དཀྱིལ་འཁོར་པ་རྣམས་དང་། མཆོད་པའི་ལྷ་མོ་དང་། གཞལ་ཡས་ཁང་དང་སྣ་ཚོགས་རྡོ་རྗེ་དང་། སྣ་ཚོགས་པདྨ་དང་། ཆོས་ཀྱི་འབྱུང་གནས་ཀྱི་ཕྱག་རྒྱ་དང་འཁོར་
ལོའི་ལྟེ་བ་དང་། རྩིབས་བཅུའི་ནང་ན་གནས་པའི་ཁྲོ་བོ་བཅུས་བྱིན་གྱིས་བརླབས་པས་མྱུར་དུ་འཁོར་བའི་སྲུང་བའི་འཁོར་ལོ་དང་། རྡོ་རྗེའི་ས་གཞི་དང་ར་བ་དང་གུར་རྣམས་དང་། ས་དང་རླུང་དང་མེ་དང་ཆུའི་དཀྱིལ་འཁོར་རྣམས་དང་། དེ་ནས་ཇི་སྲིད་ནམ་མཁའི་ཁམས་སུ་གནས་པའི་འཇིག་རྟེན་གྱི་
ཁམས་རྣམས་གསལ་བར་བྱས་ཏེ་འགྲོ་བ་རྫོགས་པའི་སངས་རྒྱས་སུ་བྱས་ནས་དེ་ཉིད་ཀྱི་རིམ་པས་དཀྱིལ་འཁོར་དེ་ཉིད་དུ་རབ་ཏུ་ཞུགས་ཤིང་། དེ་ཉིད་ནས་ཡང་སྤྲོ་བ་དང་འཇུག་པ་ཇི་སྙེད་འདོད་ཀྱི་བར་དུ་བྱ་བ་ནི་ཐིག་ལེའི་རྣལ་འབྱོར་རོ། །དེ་ནས་ཐིག་ལེའི་འཁོར་ལོ་དེ་ཡོངས་སུ་གྱུར་པ་

44-1-277b

ལས་མཾ་ཡིག་བལྟས་ནས་དེའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཡང་དག་པར་བཀུག་ནས་ཞལ་དུ་ཞུགས་ཤིང་རྡོ་རྗེའི་ལམ་ནས་སྤྲོས་ཏེ་ལྷ་མོའི་པདྨའི་དབུས་སུ་ཞུ་བར་རྗེས་སུ་བལྟའོ། །དེ་ནས་འོད་ཀྱི་གོང་བུ་ལས། རྡོ་རྗེ་དང་པདྨ་བསྐྱོད་པ་ལས་སྤྲོས་པའི་བྱང་ཆུབ་ཀྱི་སེམས་
ཀྱི་ཐིག་ལེ་གཅིག་དཱུར་ཝའི་ཡལ་གའི་རྩེ་མོ་ལ་ཟིལ་པའི་ཐིགས་པ་བཞིན་དུ་སྣའི་རྩེ་མོར་བལྟས་ནས་དེ་ཡོངས་སུ་གྱུར་པ་ལས་མཾ་ཡིག་གོ། །དེ་ཡོངས་སུ་གྱུར་པ་ལས་ནས་འབྲུ་ཙམ་གྱི་རལ་གྲིའོ། །དེའི་ཡུ་བའི་ནང་དུ་མཾ་ཡིག་ཡོངས་སུ་གྱུར་པ་ལས་ཟླ་བ་ལ་གནས་པའི་ཐིག་ལེ་ཕྲ་མོ་ནང་
སྟོང་པ་ཁ་དོག་ལྔ་པ་ཡུངས་ཀར་གྱི་ཚད་ཙམ་མོ། །དེའི་ནང་དུ་འཇམ་པའི་རྡོ་རྗེས་གཙོ་བོ་མཛད་པའི་རྟེན་དང་བརྟེན་པའི་བདག་ཉིད་ཡན་ལག་བཞི་པའི་དཀྱིལ་འཁོར་གྱི་འཁོར་ལོ་མཚན་ཉིད་མཚན་མ་མ་ཐོབ་ཀྱི་བར་དུ་སྤྲོ་བ་དང་བསྡུ་བས་སྟོང་པ་ཉིད་བསྒོམ་པར་བྱའོ། །མཚན་མ་ཐོབ་པའི་ཚེ་
རྣམ་པར་སྤྲོས་ཏེ་དེ་བཞིན་གཤེགས་པ་ལྔའི་གཙོ་བོ་བྱས་པའི་དཀྱིལ་འཁོར་གྱི་འཁོར་ལོ་འཁོར་ལོའམ། དེའི་ལྟེ་བ་ལ་བྱིན་གྱིས་བརླབས་པའི་ཕྱག་མཚན་གྱིས་འགྲོ་བའི་དོན་བྱེད་པ་ནི་ཕྲ་མོའི་རྣལ་འབྱོར་རོ། །དེ་ནས་མན་ངག་ཇི་ལྟ་བ་བཞིན་དུ་ཨོཾ་ཨཱ་མཾཿཧཱུཾ་ཞེས་བྱ་བའི་ཡི་གེ་འདི་རྣམས་གནས་ཇི་ལྟ་
བར་བལྟས་ནས་ཡི་གེ་སོ་སོར་བརྗོད་པའི་དུས་སུ་སྐུ་རྡོ་རྗེ་ལ་སོགས་པས་འགྲོ་བའི་དོན་བྱས་ནས་མདུན་དུ་བྱོན་པར་བལྟས་ལ་ཕྱི་ནང་གསང་བའི་མཆོད་པས་ཡང་དག་པར་མཆོད་དེ་རང་རང་གི་ས་བོན་ལ་ཐིམ་པར་གྱུར་པའོ། །དེ་བཞིན་དུ་དེ་ལྟར་སྐད་ཅིག་མ་སོ་སོ་ལ་སྤྲོ་བ་དང་འཇུག་པ་
ལྷག་པར་མོས་པ་ཤིན་ཏུ་ཐོགས་པ་དང་ཤིན་ཏུ་མྱུར་བ་དང་། རྣམ་པར་གཡེང་བ་མ་ཡིན་པའི་སེམས་ཀྱིས་བཟླས་པ་བྱེད་པ་ནི་བཟླས་པའི་ཆོ་གའོ། །དེ་ནས་ངལ་བ་ཉིད་ན་ཡུད་ཙམ་ཅིག་ངལ་བ་སོས་ལ་ལྷ་མོའི་གླུའི་སྒྲས་ཆད་པ་ལས་རྒྱལ་བ་སྟེ། སྤྱི་བོའི་སྟེང་མཐོ་གང་ཙམ་གྱི་
སྟེང་ཟླ་བའི་དཀྱིལ་འཁོར་ལ་གནས་པ་བདུད་རྩིའི་རྣམ་པ་ལྔ་རབ་ཏུ་བསྒྲུབས་པ་ཨོཾ་ཡིག་དཀར་པོས་བྱིན་གྱིས་བརླབས་པའི་བདུད་རྩི་འཛག་པར་བསམས་ནས་སྲོག་དང་སྩོལ་བའི་འོད་ཟེར་གྱི་ལྕགས་ཀྱུས་བཀུག་ནས་བདུད་རྩིའི་རྒྱུན་འབབ་པས། སྐུ་རྡོ་རྗེ་ལ་སོགས་པའི་སོ་སོའི་ཡན་

44-1-278a

ལག་གི་ངལ་བ་ཡོངས་སུ་སྤངས་པ་ནི་ཚིམ་པའི་ཆོ་གའོ། །དེ་ནས་ཀྱང་མངོན་པར་འདོད་པའི་ཡིད་ཀྱིས་སླར་ཡང་ཐིག་ལེ་དང་ཕྲ་མོའི་རྣལ་འབྱོར་བསྒོམ་པར་བྱ་བ་དང་སྔགས་བཟླས་པར་བྱ་བ་དང་། ཚིམ་པར་ཡང་བྱ་བ་སྟེ་ཇི་སྲིད་འདོད་ཀྱི་བར་དུ་ཡང་དང་ཡང་དུ་
འཇུག་པར་བྱའོ། །སེམས་ཞུམ་ན་ཡང་ལྷ་མོའི་གླུའི་སྒྲས་རབ་ཏུ་སངས་པར་བྱ་བ་དང་། རྣམ་པར་གཡེང་བ་ཕྲ་མོའི་རྣལ་འབྱོར་གྱིས་ཞི་བར་བྱའོ། །དེ་ནས་ལྡང་བར་འདོད་ན་སྐད་ཅིག་ཙམ་གྱིས་མཆོད་པ་དང་། བསྟོད་པ་དང་། བདུད་རྩི་མྱང་བར་བྱས་ནས་རྣམ་པར་སྣང་མཛད་
ཀྱིས་བྱིན་གྱིས་བརླབས་པ་རྣམས་ཧཱུྃ་ཡིག་ལ་ཐིམ་པར་བསྒོམ་པར་བྱ་བ་དང་། འོད་དཔག་མེད་ཀྱིས་བྱིན་གྱིས་བརླབས་པ་རྣམས་ཨཱཿཡིག་ལ་ཐིམ་པར་བསྒོམ་པ་དང་། གཞན་དཀྱིལ་འཁོར་པ་རྣམས་ཧཱུྃ་ཡིག་ལ་ཐིམ་པར་བསྒོམས་ལ་བདག་ཉིད་འཇམ་པའི་རྡོ་རྗེའི་རང་བཞིན་ཨོཾ་ཡིག་ལ་
སོགས་པ་ལས་དང་ཆོས་དང་དམ་ཚིག་དང་ཕྱག་རྒྱ་ཆེན་པོའི་རང་བཞིན་དུ་བྱིན་གྱིས་བརླབ་པ་དང་། མཆོད་པའི་ལྷ་མོ་ལ་སོགས་པ་དང་བཅས་པ་ཇི་ལྟར་བསྟན་པའི་དཀྱིལ་འཁོར་གྱི་དབུས་སུ་གནས་པ་དང་། སྣ་ཚོགས་པ་རྣམས་གཉིས་སུ་མེད་པ་ནམ་མཁའི་བདག་ཉིད་དུ་ལྷག་པར་
མོས་པར་བྱའོ། །འཁྲུལ་དང་མ་འཁྲུལ་རྟོག་དང་མི་རྟོག་དང་། །བདེ་དང་དཀར་པོ་ལ་སོགས་དབང་པོ་ལས་སྐྱེས་རྣམས། །ཤེས་རྣམས་ཐ་དད་མིན་ཏེ་ལྷན་ཅིག་དམིགས་པའི་ཕྱིར། །སྔོན་དང་ཕྱི་མར་ཡང་ནི་དབྱེ་བ་མེད་པ་ཉིད། །ཅེས་ཇི་ལྟར་བསྟན་པ་ནི་ལས་ཀྱི་རྒྱལ་
པོ་མཆོག་གི་ཏིང་ངེ་འཛིན་ཏོ། །བསྒོམ་པར་མི་ནུས་ན་བཟླས་པ་བྱ་བ་རྣམས་བསྟན་པ་ནི་ཁྲོ་བོ་རྣམས་མ་གཏོགས་པ་འཇམ་པའི་རྡོ་རྗེ་ལ་སོགས་པ་རྣམས་ཀྱི་སྔོན་དུ་བསྟན་པའི་ས་བོན་དེ་ཉིད་གསུམ་གྱི་བར་དུ་བཅུག་པ་མན་ངག་ཇི་ལྟ་བ་བཞིན་དུ་བཟླས་པར་བྱའོ། །གཞལ་ཡས་
ཁང་དང་སྲུང་བའི་འཁོར་ལོ་ལ་གནས་པའི་གཤིན་རྗེ་གཤེད་ལ་སོགས་པ་གཞིའི་འབྱིན་པའི་སྔགས་དེ་ཁོ་ན་ཉིད་གསུམ་གྱི་བར་དུ་བཅུག་ལ་བཟླས་པར་བྱའོ། །འདོད་པའི་རྒྱལ་པོ་ལ་སོགས་པ་བདུན་གྱི་སྔགས་བརྗོད་དེ། ཨོཾ་ཨཱཿཧཱུྃ་ཊཀྐི་ནི་སྭཱ་ཧཱ། ཨོཾ་ཨཱཿཧཱུྃ་ཨ་ཙ་ལ་ཧཱུྃ།

44-1-278b

ཨོཾ་ཨཱཿཧཱུྃ་དཎྜ་ཧཱུྃ། ཨོཾ་ཨཱཿཧཱུྃ་བ་ལ་ཧཱུྃ། ཨོཾ་ཨཱཿཧཱུྃ་བྷྲཱུཾ་ཙ་ཀྲ་ཧཱུྃ། ཨོཾ་ཨཱཿཧཱུྃ་སུཾ་བྷ་ཧཱུྃ། ཨོཾ་ཨཱཿཧཱུྃ་བཛྲ་ཧཱུྃ་ཞེས་པའོ། །ཨོཾ་ཨཱཿན་མཿས་མནྟ་ཀཱ་ཡ་བཱ་ཀ་ཙིཏྟ་བཛྲ་ནཾ། ན་མོ་བཛྲ་ཀྲོ་དྷཱ་ཡ། མ་ཧཱ་དཾཥྚོ་ཊ་ཀ་བྷཻ་ར་བ་ཡ། ཨ་སི་མུ་ས་ལ་པ་ར་སུ་པཱ་ཤ་ཧ་སྟཱ་ཡ། ཨོཾ་ཨ་མྲྀ་ཏ་
ཀུཎྜ་ལི་ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། གརྫྫ་གརྫྫ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷྣཱན་བི་ན་ཡ་ཀ །མ་ཧཱ་ག་ན་པ་ཏི་ཛཱི་བ་ཏ་ན་ཀ་རཱ་ཡ་ཧཱུྃ་ཕཊ་སྭཱ་ཧཱ་ཧཱུྃ། འཇིགས་པ་ཐམས་ཅད་ལས་སྐྱོབ་པ་བདུད་རྩི་འཁྱིལ་པའི་སྔགས་འདི་རྟག་ཏུ་
བཟླས་པར་བྱ་ཞེས་བྱ་བ་ནི་བསྒོམ་པའི་ཆོ་གའོ། །བསྒོམས་པ་ལས་ལངས་པའི་དུས་སུ་རང་གི་ལྷའི་རྣལ་འབྱོར་གྱི་ས་ལ་གནས་ནས་བརྟན་པ་དང་གཡོ་བའི་ཁམས་གསུམ་པ་ཐམས་ཅད་རང་གི་ལྷག་པའི་ལྷའི་གཟུགས་ཀྱིས་སམ་སྦྱར་བ་ཇི་ལྟ་བ་བཞིན་དུ་གཟུགས་རྡོ་རྗེ་
མ་ལ་སོགས་པའི་གཟུགས་ཀྱིས་ལྷག་པར་མོས་པས་བྱ་བ་ཐམས་ཅད་བྱེད་པ་དང་ཟས་ལ་སོགས་པ་བདུད་རྩི་མྱང་བའི་ཆོ་གས་བྱ་བ་དང་། སྤྲོས་པ་མེད་པའི་རང་རིག་པའི་དཀྱིལ་འཁོར་གྱི་འཁོར་ལོའི་བདག་ཉིད་གཉིས་སུ་མེད་པར་རབ་ཏུ་གསལ་བའི་མེས་སྐད་ཅིག་
གཅིག་ལ་སྐྱེས་པའི་རྟོག་པ་ཐམས་ཅད་ཀྱི་བུད་ཤིང་བསྲེག་པ་དང་། དཀོན་མཆོག་གསུམ་ལ་མཆོད་པ་བྱ་བ་དང་། སེམས་ཅན་གྱི་དོན་ཙམ་གྱི་ཕྱིར་ལུས་ལ་སོགས་པའི་བྱ་བ་བྱེད་པ་དང་། དམ་ཚིག་ལ་གནས་པ་གྲོགས་དམ་ཚིག་ལ་གནས་པ་དང་། ཤིན་ཏུ་གསང་སྟེ་
བདེ་བ་དང་མི་འགལ་བར་དམ་ཚིག་བསྟེན་པ་དང་། དམ་ཚིག་ཉམས་ན་དོན་ཡོད་གྲུབ་པའི་རྣལ་འབྱོར་གྱིས་ལངས་ཏེ། བླ་མ་ལ་ཆེན་པོར་མི་བྱེད་པ་ལ་སོགས་པའི་རྩ་བའི་ལྟུང་བ་བྱུང་ན་སྡོམ་པ་གཟུང་བ་སྔོན་དུ་འགྲོ་བས་ཡོན་ཕུལ་ནས་བཟོད་པར་གསོལ། སོ་སོར་
བཤགས་པ་དང་། ཡང་སྡོམ་པ་གཟུང་བར་བྱའོ། །དབང་བསྐུར་བའི་ཆོ་གས་ཕྱིའི་ཁྲུས་བྱ་བ་དང་། ཐུན་གྱི་མཚམས་སུ་ཡང་ལས་དང་པོ་པས་གོང་མ་བཞིན་དུ་བསམ་གཏན་བྱའོ། །གྲུབ་པའི་མཚན་མ་ཐོབ་ནས་རྒྱུད་དུ་བསྟན་པའི་རིམ་པས་དངོས་གྲུབ་པ་དང་།

44-1-279a

བགེགས་སོ་སོར་ཉེ་བར་བྱུང་ན་བདུད་རྩི་ཐབ་སྦྱོར་གྱི་རྣལ་འབྱོར་གྱིས་ཕྱེ་མར་བྱ་བ་དང་། རྒྱུ་མཐུན་པ་དང་རྣམ་པར་སྨིན་པ་དང་། སྐྱེས་བུ་བྱེད་པ་དང་། དྲི་མ་མེད་པ་ཞེས་བྱ་བའི་འབྲས་བུ་བཞིར་ངེས་པ་དང་། བསྙེན་པ་དང་ཉེ་བར་སྒྲུབ་པ་དང་སྒྲུབ་པ་ཆེན་པོ་ཞེས་བྱ་
བའི་ཡན་ལག་བཞིར་ངེས་པ་དང་། ལས་དང་པོ་པ་དང་། ཡེ་ཤེས་ཅུང་ཟད་ལ་དབང་ཐོབ་པ་དང་། ཡང་དག་པའི་ཡེ་ཤེས་ལ་དབང་ཐོབ་པ་ཞེས་བྱ་བའི་རྣལ་འབྱོར་པ་བཞིར་ངེས་པ་དང་། སྨིག་རྒྱུ་ལྟ་བུ་དང་། དུ་བ་ལྟ་བུ་དང་། མེ་ཁྱེར་ལྟ་བུ་དང་། མར་མེ་ལྟ་བུ་དང་། རྟག་
ཏུ་ནམ་མཁའ་ལ་གསལ་བར་སྣང་བ་ཞེས་བྱ་བའི་མཚན་མ་ལྔར་ངེས་པ་དང་། སྦྱོར་བ་དང་པོ་དང་། དཀྱིལ་འཁོར་རྒྱལ་པོ་མཆོག་དང་། ལས་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་དུ་ངེས་པ་དང་། དཀྱིལ་འཁོར་གྱི་བདག་པོའི་རྣམ་པར་ངེས་པ་དང་། ཐུགས་ཀར་
ཞུགས་པའི་དཀྱིལ་འཁོར་གྱི་འཁོར་ལོས་ཁམས་གསལ་བར་བྱས་ཏེ་ཉལ་བར་བྱ་ཞེས་བྱ་བ་ནི་བསྒོམ་པའི་རྣལ་འབྱོར་སྤྱོད་པའི་ཆོ་གའོ། །ཆེ་བའི་ཆོ་ག་བརྗོད་ནས་ད་ནི་མཆོག་ཏུ་ཟབ་པའི་གནས་བསྟན་པ་ཐམས་ཅད་ཀྱི་ནོར་གྱི་ཚིག་དོན་ལྔ་པོ་བརྗོད་པར་བྱ་སྟེ། འདིར་ངེས་པར་དོན་
དམ་པར་ཆོས་ཐམས་ཅད་གཅིག་དང་དུ་མ་དང་གཟུང་བ་དང་འཛིན་པ་དང་། རྒྱུ་དང་འབྲས་བུ་རྟག་པ་དང་། རྟག་མིན་རྟག་པ་ལ་སོགས་པའི་སྤྲོས་པ་དང་བྲལ་བས་སྒྱུ་མ་དང་སྨིག་རྒྱུ་དང་རྨི་ལམ་དང་ཆུ་ཟླ་དང་གཟུགས་བརྙན་ལྟ་བུར་སོ་སོའི་རྒྱུད་མངོན་པར་འདོད་པས་གསལ་བ་སྣ་
ཚོགས་གཉིས་སུ་མེད་པ་ཙམ་ཡིན་ཡང་ཀུན་རྫོབ་ལ་བརྟེན་ཏེ་རྒྱལ་བའི་སྲས་ཀྱིས་ཇི་ལྟར་རིག་པར་ལྡོག་པར་བྱས་པའི་བྱེ་བྲག་གི་ཚད་མ་དང་། གཞལ་བྱ་དང་། དེ་ཁོ་ན་ཉིད་དང་། བསྒྲུབ་བྱ་དང་། སྒྲུབ་ཐབས་ཀྱི་རྣམ་པར་གཞག་པར་བྱ་སྟེ། བྱང་ཆུབ་རབ་ཏུ་རྟོགས་
པར་བྱའོ། །དེ་ལ་འདིར་ཚད་མ་ནི་རང་རིག་པའི་མངོན་སུམ་སྟེ། གསལ་བ་སྣ་ཚོགས་པའི་རྣམ་པ་སྣ་ཚོགས་པའི་ཆོས་ཅན་གཞན་ལ་ལྟོས་པ་མེད་པ་རབ་ཏུ་གསལ་བ་བེམས་པོ་ལས་ལོག་པའི་ཆོས་སོ། །གཞལ་བྱ་ནི་རང་རིག་པའི་ཚད་མ་ལས་ལོག་ན་མེད་པ་ཐ་

44-1-279b

མི་དད་པའི་ངོ་བོའི་རང་བཞིན་གཟུགས་དང་སྒྲ་དང་དྲི་དང་རོ་དང་རེག་བྱ་དང་། བདེ་བ་དང་། སྡུག་བསྔལ་དང་། བཏང་སྙོམས་ཀྱི་བདག་ཉིད་སྣ་ཚོགས་ཀྱི་རྣམ་པའི་ཚོགས་སོ། །དེ་ཁོ་ན་ཉིད་ནི་སོ་སོའི་རྒྱུད་དུ་མངོན་པར་འདོད་པ་རྣམས་ཀྱི་སྣ་ཚོགས་གཉིས་སུ་མེད་པ་རབ་ཏུ་གསལ་
བའི་བདག་ཉིད་སེམས་ཅན་ཐམས་ཅད་གཟུགས་ཀྱི་གཟུང་བ་དང་། འཛིན་པ་ལ་སོགས་པར་བཏགས་པའི་སྤྲོས་པ་རྣམ་པར་གྲོལ་བའོ། །ཡུལ་དང་དངོས་པོ་ཐམས་ཅད་ལ་ཁྱབ་པ་དམིགས་པ་ན་སངས་རྒྱས་ཐམས་ཅད་ཀྱི་ཡོན་ཏན་སྐྱེ་བའི་རྒྱུ་སྟེ་མི་རྟག་པ་ལ་སོགས་པ་
བཞིན་དུ་བརྟགས་པ་ཐུན་མོང་གི་ཆོས་སོ། །དེ་ཉིད་ཀྱང་ལོངས་སྤྱོད་རྫོགས་པའི་རྟེན་དུ་ངེས་ཏེ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྐུ་རུ་ཤེས་སོ། །བསྒྲུབ་བྱ་ནི་སངས་རྒྱས་ཉིད་དེ། འདི་ལྟར་ཡང་གཙང་མའི་གནས་ཀྱི་སྟེང་ན་སྟུག་པོ་བཀོད་པའི་མིང་ཅན་ཡང་དག་
པར་རྫོགས་པའི་སངས་རྒྱས་རྣམས་ཏེ། ཇི་ལྟར་བཅོམ་ལྡན་འདས་དགའ་བའི་རང་བཞིན་སྟོབས་དང་མི་འཇིགས་པ་ལ་སོགས་པ་ཐམས་ཅད་མཁྱེན་པ་ལ་སོགས་པ་ཡིད་ཀྱི་ཡོན་ཏན་གྱིས་རྒྱས་པར་གྱུར་པ་མཚན་དང་དཔེ་བྱད་ཀྱིས་འབར་བར་གྱུར་པ་ལོངས་སྤྱོད་རྫོགས་པའི་
བདག་ཉིད་དེ་བརྟགས་པས་སྟོང་པའི་མཚན་ཉིད་ཆོས་ཀྱི་སྐུ་མངོན་དུ་བྱས་ཏེ། སྤྲུལ་པ་སྤྲོས་པས་མཚམས་མེད་པར་འགྲོ་བའི་དོན་ཡང་དག་པར་རྫོགས་པར་བྱེད་པ་ཉན་ཐོས་དང་རང་སངས་རྒྱས་དང་། ས་དགུའི་དབང་ཕྱུག་བྱང་ཆུབ་སེམས་དཔས་ཀྱང་མི་མཐོང་བའི་སྐུ། ས་བཅུའི་
བྱང་ཆུབ་སེམས་དཔའ་དབང་ཕྱུག་མཆོག་གིས་ཆོས་ཉན་པའི་སྒོ་ནས་འཁོར་བ་ཇི་སྲིད་ཀྱི་བར་དུ་བཞུགས་པ་སྟེ་དེ་ཉིད་བསྒྲུབ་བྱའོ། །སྒྲུབ་ཐབས་ནི་སླར་ཡང་ལྕགས་ཀྱི་ཁང་པ་འབར་བར་རབ་ཏུ་ཞུགས་པར་གྱུར་པའི་སྡུག་བསྔལ་གསུམ་གྱིས་སྡུག་བསྔལ་བའི་
ཁམས་གསུམ་པ་ངེས་པ་ལ་སོགས་པས་ཚིག་དོན་ལྔ་པོ་ངེས་པ་ལ་ཐུག་པས་ཡོན་ཏན་བཅོ་བརྒྱད་དང་ལྡན་པའི་བྱང་ཆུབ་སེམས་དཔའ་ཕ་རོལ་ཏུ་ཕྱིན་པ་བཅུ་ལ་གོམས་པ་ནི་ཕ་རོལ་ཏུ་ཕྱིན་པའི་ཚུལ་གྱིས་གནས་པའོ། །དཔལ་ལྡན་སྔགས་ཀྱི་ཐེག་པའི་ཚུལ་ལ་

44-1-280a

ཚད་མ་དང་། གཞལ་བྱ་དང་། དེ་ཁོ་ན་ཉིད་ནི་དེ་རྣམས་ཉིད་དོ། །བསྒྲུབ་བྱ་དང་སྒྲུབ་ཐབས་དག་ལ་ཁྱད་པར་ཡོད་དེ། དེ་ལ་བསྒྲུབ་བྱ་ནི་བཅོམ་ལྡན་འདས་དེ་ཉིད། འོན་ཀྱང་འདིར་བྱེ་བྲག་ནི་རླུང་དང་མེ་དང་ས་དང་ཆུའི་དཀྱིལ་འཁོར་གྱི་དབུས་
སུ་ཡངས་པ་ན་རྡོ་རྗེ་ས་གཞི་ལ་སོགས་པའི་དབུས་ན་གནས་པའི་སྲུང་བའི་འཁོར་ལོའི་ལྟེ་བར་དཔལ་ལྡན་ཆོས་ཀྱི་འབྱུང་གནས་ཀྱི་ནང་ན་གནས་པའི་གཞལ་ཡས་ཁང་དུ་ཇི་ལྟར་འདོད་པའི་ཡོན་ཏན་ལྔའི་དབང་ཕྱུག་ཡིད་དུ་འོང་བའི་གནས་ཕུན་སུམ་ཚོགས་པ་ན་སངས་
རྒྱས་ཐམས་ཅད་ཡོན་ཏན་གྱིས་དག་པའི་རྟེན་དང་བརྟེན་པའི་རང་བཞིན་དག་ཡོད་པ་ན་བསྒྲུབ་བྱར་འདོད་པའི་རྒྱལ་བ་ལྷ་མོའི་འདོད་པས་དམ་པར་འཁྱུད་པའི་བྱ་བར་གནས་ཤིང་ཆགས་པའོ། །དེ་ནས་གཞན་དུ་ཡང་འགྱུར་བ་སྟེ། མཆོག་ཏུ་རྣམ་པར་གཡེང་བའི་དགའ་བ་འཇིགས་
པ་དང་ཆགས་པའི་སྐལ་བ་ལྟ་བུ་དེར་དགེ་ལ་རྟོག་པ་མེད་ཅིང་ཐབས་ཀྱི་བློ་དང་ཏིང་ངེ་འཛིན་ལས་བྱུང་བ་དེ་བས་རབ་ཏུ་གང་བ། བདེ་བ་ཆེན་པོ་གང་སྐྱེས་པ། །འདོད་པ་ཡོན་ཏན་ལྔ་རྣམ་པ། །བསྒོམས་པའི་སྟོབས་ཀྱིས་གསལ་བ་ནི། །ཉིན་མཚན་རྒྱུན་དུ་མི་འཆད་པའོ། །
དེ་ཡི་ཡེ་ཤེས་རྟོགས་རང་བཞིན། །གསལ་བ་ཡིན་པས་རྟོགས་པ་མེད། །སྣ་ཚོགས་གཉིས་སུ་མེད་རང་བཞིན། །ཡོད་མེད་རྟོགས་པས་རྗོད་བྱེད་ཕྱིར། །ཐུགས་རྗེས་སྤྲོ་བ་དང་བསྡུ་བ། །སྔར་གོམས་པ་ཡི་དབང་གིས་ཡིན། །ལྷུན་གྲུབ་སེམས་ཅན་དོན་ཡིན་
ཏེ། །དེ་ནས་ཡིད་བཞིན་ནོར་བུ་བཞིན། །དེ་ནི་ལྷུན་གྱིས་གྲུབ་པས་ན། །རྟག་ཏུ་མ་ཉམས་པ་ཡི་བློ། །ནམ་མཁའི་མཐས་གཏུགས་འགྲོ་བ་ཡི། །དོན་བྱེད་པ་ལ་རབ་ཏུ་འཇུག །དེ་བས་འདི་ལྟར་སྐུ་དང་ལྡན་པ་ཤེས་རབ་ལ་འཁྱུད་པ་རང་གསལ་རང་བཞིན་ཏེ། མཆོག་
ཏུ་ཐུགས་རྗེས་རབ་ཏུ་རྒྱུན་ཆུད་པ་དང་རྣམ་པར་བྲལ་བའི་སྐུ། །དཔེ་མེད་པ་ཡི་བདེ་གང་རྟེན་དང་བརྟེན་པའི་རང་བཞིན་ནི། །ཐུབ་པའི་དབང་པོའི་ཡན་ལག་བདུན་དང་ལྡན་པ་ལ་ཕྱག་འཚལ། །འདི་ལྡན་ཡན་ལག་བདུན་དང་ལྡན་པའི་བཞི་པ་ནི་བསྒྲུབ་བྱའོ། །འདི་ཉིད་ནི་

44-1-280b

ཕྱག་རྒྱ་ཆེན་པོའི་དངོས་གྲུབ་ཏུ་བརྗོད་དོ། །ཁ་ཅིག་སླར་ཡང་འདི་ལྟ་བུ་བསྒྲུབ་བྱ་ཡིན་པར་སྨྲ་སྟེ། ཤེས་རབ་དང་ཡེ་ཤེས་ཀྱི་དབང་གི་དུས་ན་བླ་མའི་མན་ངག་གིས་སོ་སོར་བདག་ཉིད་རིག་ཅིང་། མཆོག་དགའ་དང་དགའ་བྲལ་གྱི་དུས་སུ་གནས་པ་ཆོས་ཐམས་ཅད་ཀྱི་གཅིག་
ཏུ་ལྷན་ཅིག་སྐྱེས་པ་ཕྱག་དང་ཞལ་དང་ཁ་དོག་དང་། དབྱིབས་ལ་སོགས་པའི་རྣམ་པ་ཐམས་ཅད་ཀྱི་དྲི་མ་ལས་གྲོལ་བ། ནམ་མཁའ་དང་མཚུངས་པ་མཐའ་ཡས་པའི་དེ་བཞིན་གཤེགས་པའི་ཡོན་ཏན་རིན་པོ་ཆེ་རྫོགས་པའི་བདག་ཉིད་འགྲོ་བ་མ་ལུས་པའི་དོན་
བྱེད་པ་ཀུན་རྫོབ་ཏུ་ལོངས་སྤྱོད་རྫོགས་པ་དང་། སྤྲུལ་པའི་སྐུ་གཉིས་ཀྱི་རྟེན་དུ་གྱུར་པ། ཡིད་བཞིན་གྱི་ནོར་བུ་བཞིན་དུ་རྟོག་པ་མེད་ཀྱང་མངོན་པར་འདོད་པའི་དོན་ཐམས་ཅད་སྒྲུབ་པར་བྱེད་པ། ཐོག་མ་དང་ཐ་མ་མེད་པ་སྒྱུ་མ་ལྟ་བུ་སྤྲོས་པ་ཐམས་ཅད་དང་བྲལ་བ། གསལ་
བ་ཟག་པ་མེད་པ་བདེ་བ་ཆེན་པོའི་རང་བཞིན་ཙམ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྐུའི་བདག་ཉིད་བླང་བར་བྱའོ། །འདི་ཡང་རྟག་ཏུ་ཤར་བའི་ཕྱིར་མ་རིག་པ་ཙམ་རྣམ་པར་ལོག་པས་ཐོབ་པར་བྱའོ། །མེད་པ་ཉིད་ཡིན་ན་ཡང་བསྒོམས་པའི་སྟོབས་ཀྱིས་
རྫོགས་པར་བྱ་བའོ། །འདི་ནི་ངེས་པར་གདམས་ངག་ངན་པ་ཡིན་པའི་ཕྱིར་ཐག་རིང་དུ་སྤང་བར་བྱའོ། །འདི་ལྟར་ཡང་བདེ་བ་ཆེན་པོ་གཅིག་པུ་མངོན་པར་འདོད་པའི་བསྒྲུབ་བྱ་ཡིན་པ་ཉིད་དུ་ཅི་ལུང་གིས་བསྒྲུབས་པས་སམ། དགག་པར་བྱ་བ་མ་ཡིན་པས་སམ། དེ་གཅིག་
ཏུ་རྫོགས་པར་བྱེད་པའི་ཚོགས་པ་ཡོད་པས་སམ། དེ་གཅིག་པུ་འདོད་པ་སྲིད་པས་སམ། ཤེས་རབ་ཡེ་ཤེས་ཀྱི་དུས་ན་དེ་ཙམ་རབ་ཏུ་སྣང་བས་སམ། མན་ངག་བརྒྱུད་པ་ལས་འོངས་པ་ཡིན་ཞེས་བརྟག་པ་བདུན་ནོ། །ཁྱེད་ཀྱི་བདེ་བ་ཙམ་ལ་གཅིག་ཏུ་ལུང་སྒྲུབ་པར་བྱེད་
པ་མ་ཡིན་ལ་སླར་ཡང་གནོད་པར་བྱེད་པ་ཉིད་ཡིན་ཏེ། བརྟགས་པ་གཉིས་ཀྱིས་རྒྱལ་པོ་ལས་ཇི་སྐད་གསུངས་པ། རྡོ་རྗེ་སྙིང་པོས་གསོལ་བ། རྫོགས་པའི་རིམ་པའི་རྣལ་འབྱོར་འདི། །མཆོག་གི་བདེ་བ་དམ་པར་འདོད། །རྫོགས་པའི་བསྒོམ་པ་དམན་པ་ལ། །

44-1-281a

བསྐྱོད་པ་དགོས་པ་ཅི་ཞིག་ཡོད། །བཅོམ་ལྡན་འདས་ཀྱིས་གསུངས་པ། ཀྱེ་མ་དད་པའི་ཤུགས་ཀྱིས་ནི། །བྱང་ཆུབ་སེམས་དཔའ་ཆེན་པོ་ཉམས། །ལུས་ཀྱི་དངོས་མེད་གང་ལས་བདེ། །བདེ་བ་སྨྲ་བ་མི་འཐད་དོ། །ཁྱབ་བྱ་ཁྱབ་བྱེད་
དངོས་པོ་ཡིས། །བདེ་བས་འགྲོ་བ་ཁྱབ་པ་ཉིད། །ཇི་ལྟར་མེ་ཏོག་ལ་བརྟེན་དྲི། །མེ་ཏོག་མེད་པས་རྙེད་མི་འགྱུར། །དེ་བཞིན་གཟུགས་སོགས་མེད་པས་ན། །བདེ་བ་ཉིད་ནི་དམིགས་མི་འགྱུར། །ཞེས་པ་ལ་སོགས་པའོ། །དེ་བཞིན་དུ་རྡོ་རྗེ་གུར་ལས་ཀྱང་བསྟན་ཏེ། ཅི་
བཅོམ་ལྡན་འདས་ལུས་དང་ལྡན་པ་སྒོམ་པ་འདི་ལ་དགོས་པ་ཅི་ཞིག་བདོག །བཅོམ་ལྡན་འདས་ཀྱིས་བཀའ་སྩལ་པ། གསང་བའི་བདག་པོ་དགོས་པ་ཡོད། བཅོམ་ལྡན་འདས་ཅི་ཞིག་བརྗོད། བཅོམ་ལྡན་འདས་ཀྱིས་བཀའ་སྩལ་པ། སངས་རྒྱས་ཉིད་དོ། །སངས་རྒྱས་
ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རྣམ་པ་ཐམས་ཅད་མཁྱེན་པ་ཉིད་དོ། །ཕྱག་ན་རྡོ་རྗེས་གསོལ་བ། ལུས་དང་བཅས་པ་ཅིག་བཅོམ་ལྡན་འདས་ལགས་སམ། འདི་ནི་བདེན་ཏེ་འདི་ཉིད་ནི། །སྟོན་པ་སུམ་ཅུ་རྩ་གཉིས་མཚན། །ཁྱབ་བདག་དཔེ་བྱད་
བརྒྱད་ཅུར་ལྡན། །དེ་ནི་ཇི་ལྟར་མི་འདྲ་བའི། །རྒྱུ་ཡིས་ཇི་ལྟར་བསྒྲུབ་བྱར་འགྱུར། །དེ་ལྟ་བས་ན་བྱང་ཆུབ་སེམས་དཔའ་ཆེན་པོ་རྣམ་པ་མེད་པའི་བྱང་ཆུབ་ཅེས་པ་ལ་སོགས་པ་དེ་ལྟར་མ་བརྗོད་ཅིག །བསྒྲུབ་བྱ་བརྗོད་ནས་འདི་ཉིད་དུ་སྒྲུབ་ཐབས་ཀྱང་བརྗོད་དོ། །ལྟ་བ་ལས་
དམན་གྱུར་པ་རྣམས། །བདག་ཏུ་ལྟ་བ་ཚོལ་འདོད་ལ། །བདག་ཏུ་ལྟ་བས་གསལ་བའི་ཕྱིར། །རྒྱལ་བས་སྟོང་པ་ཉིད་འདི་བསྟན། །དེ་ཕྱིར་དཀྱིལ་འཁོར་འཁོར་ལོར་གྲགས། །ཐབས་ཡིན་བདེ་བའི་སྒྲུབ་ཐབས་སོ། །སངས་རྒྱས་ང་རྒྱལ་སྦྱོར་བ་ཡིས། །སངས་
རྒྱས་ཡུན་མི་རིང་བར་འགྱུར། །ཞེས་བྱ་བ་ལ་སོགས་པའོ། །དཔལ་འཁོར་ལོ་སྡོམ་པ་ལ་སོགས་པ་ཡང་རྒྱ་ཆེས་པས་འཇིགས་པས་མ་བྲིས་སོ། །བྱ་བ་དང་སྤྱོད་པ་དང་རྣལ་འབྱོར་བླ་ན་མེད་པ་དང་རྣལ་འབྱོར་མ་ལུས་པ་བླ་ན་མེད་པའི་རྒྱུད་ཀྱི་རབ་ཏུ་དབྱེ་བ་དཔལ་གསང་བ་འདུས་

44-1-281b

པ་ལ་ཐུག་པ་རྣལ་འབྱོར་གྱི་ཐེག་པ་མཐའ་དག་ཏུ་ལོངས་སྤྱོད་རྫོགས་པ་སྐུའི་བདག་ཉིད་བཅོམ་ལྡན་འདས་ཀྱི་རིགས་ཀྱི་གནས་ཡིན་ཏེ། ཇི་ལྟར་བདག་གིས་ཇི་སྲིད་བྲི་བར་བྱ། །ངག་འདི་དག་ནི་དྲང་བའི་དོན་ཡང་ཡིན་ནོ། །ཞེས་བརྗོད་པར་མི་བྱའོ། །བདེ་བ་ཉིད་གཟུགས་ལ་སོགས་པའི་
རྣམ་པ་སྟེ། འཁོར་ལོ་ཡང་རང་རིག་པའི་ཚད་མས་གྲུབ་པའི་ཕྱིར་འདིས་ནི་ལུང་གིས་གསལ་བ་རེ་ཞིག་བསྒྲུབ་བྱ་ཡིན་ནོ། །འདི་དག་དགག་པར་བྱ་བ་མ་ཡིན་ཏེ། རང་རིག་པའི་བདེ་བའི་རྣམ་པ་བཞིན་དུ་གཟུགས་ལ་སོགས་པའི་རྣམ་པ་འཁོར་ལོ་ལ་ཡང་མི་གནོད་པའི་ཕྱིར་རོ། །ཅི་སྟེ་བདེ་བ་ཉིད་
སེམས་ཀྱི་རང་བཞིན་ཡུལ་ན་མི་གནས་པས་གནོད་པར་མི་ནུས་སོ་ཞེ་ན་མ་ཡིན་ཏེ། དེ་ལྟར་སྡུག་བསྔལ་ལ་སོགས་པ་ཡང་དེ་བཞིན་དུ་ཐལ་བར་འགྱུར་རོ། །གཞན་ཡང་བདེ་བ་ལ་སོགས་པ་ཆ་ཤས་དང་བཅས་པ་ཡིན་ཞེ་ན་ཡན་ལག་ཅན་གྱི་རྫས་དང་འདྲ་བའི་སྐྱོན་དང་། ཆ་ཤས་མེད་
ན་རྡུལ་ཕྲ་རབ་བཞིན་ནོ། །དེ་ལས་གཞན་པའི་རྣམ་པ་ནི་ཡོད་པ་མ་ཡིན་ཏེ། དོན་མེད་པར་བརྫུན་དུ་སྨྲ་བ་ཉིད་དོ། །གལ་ཏེ་རང་རིག་པས་གྲུབ་པས་གནོད་པ་མེད་ན་འདི་ལྟར་རྣམ་པའི་ཚོགས་ཀྱང་རང་རིག་པས་གྲུབ་པའི་ཕྱིར་ཞེ་སྡང་ལྷག་པ་ཉིད་དོ། །དེ་བཞིན་དུ་བྱེད་པ་དང་ཤེས་པར་བྱེད་
པ་ཡང་བདེ་བ་ལ་ཡིན་བཞིན་དུ་རྣམ་པའི་ཚོགས་ཀྱང་དེ་མ་ཐག་པ་རང་རིག་པའི་བདག་ཉིད་ཀྱིས་རྒྱུས་རབ་ཏུ་གྲུབ་པ་ཉིད། འདོད་པ་ཡང་བདེ་བ་ཆེན་པོ་རྒྱས་པ་བླ་ན་མེད་པའི་སྐུ་སྤངས་ཏེ་བདེ་བ་ཙམ་ཉིད་འདོད་པ་ནི་ཕྱུགས་ལ་ཡང་མི་སྲིད་དོ། །ཇི་ལྟར་གསུངས་པ། འཁོར་ལོའི་སྐྱོན་གྱིས་མ་གོས་ཤིང་། །
མཚན་དང་དཔེ་བྱད་དག་འབར་བ། །བདག་གི་དངོས་པོ་སྤངས་པ་ཉིད། །གལ་ཏེ་འདོད་ན་ནམ་མཁའ་ཙམ། །ཤེས་རབ་ཡེ་ཤེས་ཀྱི་དུས་ན་དེ་ཙམ་རབ་ཏུ་སྣང་བ་ནི་མ་ཡིན་ནོ། །བདེ་བ་ཤར་བ་ན་ཡང་དབྱེར་མེད་པའི་གཟུགས་ལ་སོགས་པའི་རྣམ་པའི་འཁོར་ལོ་ལ་ཡང་མི་གནོད་པའི་ཕྱིར་དང་།
ཚོགས་པ་ལ་སོགས་པ་སྐྱེ་ཞེས་པའི་རིགས་པས་སོ། །གཟུགས་ལ་སོགས་པའི་རྣམ་པ་སྣང་བ་ལ་རབ་ཏུ་ཞེ་སྡང་བས་མར་མེ་ལ་སོགས་པས་བསལ་ན་ཡང་། ཡང་ས་དང་ཆུ་དང་། འོག་གི་སྟན་དང་གཉིས་ཀྱི་ལུས་ལ་སོགས་པ་འཁྱུད་པ་ལས་སྐྱེས་པའི་རྒྱུ་མ་ཚང་བ་མེད་པའི་རབ་ཏུ་སྣང་བ་

44-1-282a

གཞན་མི་སྲིད་པ་དང་བྲལ་བའི་ཕྱིར་རོ། །ཇི་ལྟར་གསུངས་པ། གང་ཞིག་འབྲས་བུ་སྐྱེད་པར་བྱེད་རིག་ན། །དེ་ཡི་ཚོགས་པ་ཡོད་པ་ཡིན་ན་ཡང་། །དེ་དང་ཉེ་བས་འབྲས་བུ་དང་ལྡན་མ་ཡིན་ན། །ཅུང་ཟད་གང་ལས་ཀྱང་ནི་སྐྱེ་བར་མི་འགྱུར་རོ། །སྐྱེ་བར་བྱེད་པ་མ་ཚང་བ་
མེད་དེ། དེའི་སྔར་གྱི་བདེ་བ་ཡང་མི་སྐྱེ་བར་ཐལ་བར་འགྱུར་བས་སོ། །འདི་ཡང་མ་ཡིན་ཏེ། ཐམས་ཅད་ཉེ་བར་དམིགས་པ་ལ་འགལ་བ་མེད་པའི་ཕྱིར་རོ། །གཅིག་ཏུ་དེའི་གནས་སྐབས་ན་ཡང་རྣམ་པ་སྣ་ཚོགས་པའི་སེམས་དབྱེར་མེད་པར་གྱུར་པའི་སོ་སོ་རང་རིག་པ་ཙམ་ན་ཡང་བདེ་
བ་ལ་ཆགས་པའི་ཕྱིར་དང་། བླ་མས་ཀྱང་དེ་ཙམ་བླང་བར་བྱ་བ་ཉིད་དུ་བསྟན་པའི་ཕྱིར་དེ་དྲན་པ་སྲིད་པ་ན་དེ་ཉིད་གསལ་ཞེས་པ་ཤེས་རབ་དམན་པའི་ཐ་སྙད་དོ། །བདེ་བ་ཙམ་གསལ་བར་གྱུར་པ་དེ་ལྟ་ན་ཡང་ཅི་དེ་ཙམ་གྱིས་དེ་ཁོ་ན་ཉིད་བསྒྲུབ་བྱར་འགྱུར། ནད་མི་བཟད་པ་བསྣུན་པའི་
སྡུག་བསྔལ་ཡང་དེ་ཙམ་རབ་ཏུ་སྣང་བའི་ཕྱིར་དེ་ཡང་དེ་ལྟར་དེ་ཉིད་དུ་ཐལ་བར་འགྱུར་བས་སོ། །འདོད་པ་ཉིད་ཀྱང་མ་ཡིན་ཏེ། དེ་ལས་ལྷག་པའི་རྣམ་པ་སྣ་ཚོགས་པའི་སྐུ་སྐྱེ་བོ་ཐམས་ཅད་ལ་གྲགས་སོ། །རྩ་བ་མེད་པའི་མན་ངག་ཙམ་ནི་བག་མེད་པའི་གནས་སོ། །སྡུག་བསྔལ་ལ་སོགས་
པ་མི་དམིགས་པ་འདི་རྟག་ཏུ་ཤར་བ་ཡང་མ་ཡིན་ནོ། །ཅི་སྟེ་གང་གོམས་པར་བྱས་པ་དེ་གསལ་བར་འགྱུར་ཏེ། བདེ་བ་ཡང་དེའི་ཚོགས་པ་དམིགས་ཏེ་གོམས་པར་བྱས་པས་གསལ་བར་འགྱུར་རོ་ཞེ་ན་མ་ཡིན་ཏེ་བདེ་བ་ནི་ཡང་རྒྱུ་ཚོགས་པ་ཁྱད་པར་ཅན་བསྒོམ་པ་རབ་ཏུ་འབྲེལ་པ་ཡིན་ཏེ། 
དེ་ལྟར་བསྒོམ་པས་གསལ་བ་ཡང་ཁྱད་པར་དུ་འཕགས་པའི་ཚོགས་པ་བསྒོམ་པ་དང་རབ་ཏུ་འབྲེལ་པ་མཐོང་སྟེ། ཇི་ལྟར་འདོད་ཅེ་ན་མ་དེ་ལས་སྐྱེས་པའི་བདེ་བ་ལ་གཞན་གྱིས་གནོད་པ་ན་ཡང་འདོད་པ་ཅན་བདེ་བ་འདོད་པས་བུད་མེད་ལ་རྟོག་པ་ནི་དང་པོར་རྒྱུ་ཁྱད་པར་ཅན་བསྒོམ་སྟེ། བདེ་བ་
སྐྱེས་པ་ན་དེ་ཡོངས་སུ་སྤོང་ཞེས་པ་ཡང་མི་རིགས་སོ། །བསྒོམ་པས་རང་གི་ངང་གིས་འབྱུང་བའི་བདེ་བ་ཉིད་བཞིན་དུ་དེ་སྤོང་བ་དང་བྲལ་བའི་ཕྱིར་རོ། །དེ་ལྟར་ན་ཡང་ཅི་དེ་ཙམ་གྱིས་དེ་ལྟ་བུའི་ལོངས་སྤྱོད་པ་ལས་ཕྱི་རོལ་དུ་གྱུར་པས་ཀོའུ་ལ་དང་རིག་བྱེད་པ་སྙིང་པོར་བྱས་པས་དགོས་པར་

44-1-282b

འགྱུར་ཏེ་གཟུགས་ལ་སོགས་པའི་ཚོགས་པ་དེ་སྐྱེད་པར་བྱ་བའི་བདེ་བའི་རིགས་བདེ་བ་ཙམ་བསྒོམས་པས་རིགས་མི་མཐུན་པའི་རྒྱུ་ལས་མི་སྐྱེའོ། །དབང་པོ་གཉིས་ཁོ་ན་ལས་སྐྱེས་པ་ནི་བདེ་བ་མ་ཡིན་ཏེ། འོན་ཀྱང་ཐུན་མོང་གི་དབང་པོ་ལྔ་ལས་སྐྱེས་པའི་བདེ་བ་ལྔ་རྣམས་སུ་
རབ་ཏུ་གྲགས་སོ། །དེ་ལ་ཇི་ལྟར་དབང་པོ་ཅིག་ལས་སྐྱེས་པའི་ཁོ་ནའི་བདེ་བ་དམིགས་ནས་གསལ་པོར་བྱས་པས་གྲུབ་པ་བདག་ཉིད་སླུ་བ་ཡིན། དེ་ལྟར་ན། ལུང་དང་རིགས་པའི་འདོད་པས་རབ་འཁྲུགས་ཏེ། །འཁོར་ལོ་མེད་པས་རིགས་མི་མཐུན་པ་ཡི། །ལོངས་སྤྱོད་ལས་སྐྱེས་པ་ཡི་
ཡོན་ཏན་དུ། །སྒྲོ་བཏགས་དམ་བཅས་ཙམ་གྱིས་སངས་རྒྱས་འགྲུབ། །ཀོའུ་ས་ལ་སོགས་པ་ཡང་འདོད་པས། །འདི་འདྲའི་བག་མེད་པ་ཡི་གནས་ཡིན་ཏེ། །རྟག་ཏུ་ཤར་ལ་མི་སྡུག་བྱེད་པ་ནི། །གྲགས་ཅན་བཞིན་དུ་འདི་ནི་ཕྱུགས་ཡིན་ནོ། །གཞན་དག་ན་རེ་ཆོས་ཐམས་ཅད་ཀྱི་དེ་ཁོ་ན་
ཉིད་ནི་རང་བཞིན་མེད་པ་སྟེ། ཀུན་རྫོབ་ཏུ་ཕུང་པོ་ལྔ་པོ་ཙམ་ཉིད་དོ། །ཕུང་པོ་ལྔའི་བདག་ཉིད་དམ་གཟུགས་ཀྱི་ཕུང་པོ་ལྔ་ཙམ་གྱི་བདག་ཉིད་ཀྱི་དེ་བཞིན་གཤེགས་པ་ནི་བསྒྲུབ་བྱ་ཡིན་ནོ་ཞེས་སོ། །ཡང་གཞན་དག་ན་རེ་ཅིག་ཏུ་དྲི་མ་མེད་པའི་དགའ་བ་རབ་ཏུ་སྣང་བ་ཙམ་ཆོས་ཐམས་ཅད་ཀྱི་རང་
བཞིན་དེའི་བདག་ཉིད་ཁོ་ན་བསྒྲུབ་བྱའོ་ཞེས་སོ། །ཡང་ཁ་ཅིག་ནི་ཆོས་ཐམས་ཅད་ཀྱི་རང་བཞིན་མ་སྐྱེས་པ་ནི་དེ་ཁོ་ན་ཉིད་དེ། སངས་རྒྱས་ཀྱི་དེའི་བདག་ཉིད་ཁོ་ན་སྟེ་བསྒྲུབ་བྱ་ཞེས་སོ། །གཞན་ཡང་ཆོས་ཐམས་ཅད་ནི་དམིགས་པ་སྟེ། མི་དམིགས་པ་ཡང་མི་དམིགས་པ་ནི་དེ་ཁོ་ན་ཉིད་དེ།
དེའི་བདག་ཉིད་ནི་བསྒྲུབ་བྱ་ཞེས་སོ། །ཁ་ཅིག་ནི་སྤྱོད་པ་ཐམས་ཅད་ལས་འདས་པ་སོ་སོ་རང་གིས་རིག་པ་བསམ་གྱིས་མི་ཁྱབ་པའི་གནས་སྐབས་ཁྱད་པར་ཅན་ནི་དེ་ཁོ་ན་ཉིད་དེ། རྟོགས་པ་ནི་བསྒྲུབ་བྱ་ཞེས་བྱའོ། །ཡང་ཁ་ཅིག་ན་རེ་རྨི་ལམ་དང་སྒྱུ་མ་དང་དྲི་ཟའི་གྲོང་ཁྱེར་ལྟ་བུ་བརྫུན་པའི་རྣམ་པར་
ཤེས་པ་ཙམ་ནི་དེ་ཁོ་ན་ཉིད་དེ། དེ་ལྟ་བུའི་དེ་བཞིན་གཤེགས་པ་ནི་བསྒྲུབ་བྱ་ཞེས་འདོད་དོ། །དེ་ལ་དང་པོའི་ཕྱོགས་གཉིས་པ་ནི་མི་རིགས་ཏེ་རྣམ་པ་དང་བཅས་པའི་རབ་ཏུ་གསལ་བ་ཙམ་གྱི་ཚད་མས་གྲུབ་པའི་ཕྱིར་རོ། །སྐྱེ་བ་མེད་པའི་ཕྱོགས་ལ་ཡང་ལང་ཀར་གཤེགས་པར་བཅོམ་

44-1-283a

ལྡན་འདས་ཀྱིས་གསུངས་ཏེ། སེམས་ཙམ་ཉིད་དུ་རྣམ་གཞག་པ། །སྐྱེ་བ་མེད་པར་ངས་བརྗོད་དོ། །ཞེས་སོ། །དེ་བཞིན་དུ་མི་དམིགས་པ་དང་བསམ་གྱིས་མི་ཁྱབ་པའི་གནས་སྐབས་ཀྱང་རྣམ་པ་སྣ་ཚོགས་པའི་སེམས་ཙམ་ཉིད་དུ་རྟོགས་པར་བྱའོ། །བརྫུན་པ་ཉིད་
དུ་སྨྲ་བ་ཡང་རང་རིག་པའི་མངོན་སུམ་ཉིད་ཀྱི་སྣོད་དོ། །དེ་ལྟ་བས་ན་བཏགས་པ་ཙམ་གྱིས་སྟོང་པ་ཉིད་ནི་དེ་ཁོ་ན་ཉིད་དོ། །ཡན་ལག་བདུན་དང་ལྡན་པའི་དཀྱིལ་འཁོར་གྱི་འཁོར་ལོ་བསྒྲུབ་བྱ་ཉིད་དོ་ཞེས་རྟོགས་པར་བྱ་སྟེ། ཇི་སྐད་དུ་གསུངས་པ། ལོངས་སྤྱོད་རྫོགས་དང་ཁ་སྦྱར་བདེ་ཆེན་སྣ་
ཚོགས་སེམས། །སྙིང་རྗེས་ངེས་གང་རྒྱུན་མི་འཆད་དང་འགོག་པ་མེད། །ཡན་ལག་བདག་འདོད་འདིར་ནི་བདུན་པོ་ཉིད་ལྡན་པ། །བསྒྲུབ་བྱར་ཚད་མས་ཡོངས་བསྒྲུབས་བློ་ཡིས་བསྔགས། །ཞེས་ཏེ་ཡན་ལག་བདུན་དང་ལྡན་པ་སྔར་བརྗོད་པ་ཉིད་ཀྱིས་བསྒྲུབ་བྱ་བླང་བར་བྱའོ། །ཇི་
ལྟ་བུའི་ཡང་དཀྱིལ་འཁོར་དེ་དབྱེར་མེད་པར་གྱུར་པ་བདེ་བ་ཆེན་པོའི་རང་བཞིན་བླང་བར་བྱ་བ་སྟེ། གང་དང་གང་དུ་ཡང་དེ་ཉེ་བར་མཚོན་པར་བྱའོ། །ཇི་ལྟར་ཡང་ལོངས་སྤྱོད་དང་ཆོས་ཀྱི་སྐུའི་དོན་རྫོགས་པར་འགྱུར་བའོ། །དེ་བླ་ན་མེད་པའི་བླ་མའི་ཞབས་ཀྱི་བཀའ་དྲིན་གྱིས་རྟོགས་པར་
བྱའོ། །ཡང་སྒྲུབ་ཐབས་ནི་དབང་གིས་ཆོ་གར་རྟོགས་པར་བྱས་པའོ། །ཡོན་ཏན་སུམ་ཅུ་སོ་དྲུག་གི་རིན་པོ་ཆེས་འབར་བར་གྱུར་པའི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་སེམས་དཔའ་ཆེན་པོའི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་ཡོན་ཏན་
རྩོམ་པའོ། །རང་རིག་པའི་ཚད་མས་རྟོགས་པ་དྲི་མ་མེད་པའི་ཆོས་ཀྱི་དབྱིངས་གསལ་བ་རིགས་མ་ལུས་པས་བརྒྱན་པ་ནམ་མཁའ་ཐམས་ཅད་ཀྱི་དཀྱིལ་འཁོར་ཕ་རོལ་ཏུ་ཕྱིན་པའི་ཐེག་པ་ཐམས་ཅད་ཀྱི་དོན་རྣམ་པར་དག་པའི་ཡན་ལག་ཐབས་དང་ཤེས་རབ་ཀྱི་རང་བཞིན་དྲི་མ་མེད་
པའི་ཏིང་ངེ་འཛིན་ལས་བྱུང་བར་གྱུར་པའི་རྒྱ་ཆེ་བའི་བདེ་བས་ཡོངས་སུ་རྒྱས་པ། རྟེན་དང་བརྟེན་པའི་བདག་ཉིད་དཔལ་གསང་བ་འདུས་པའི་དཀྱིལ་འཁོར་གྱི་འཁོར་ལོ་གང་དེའི་བདག་ཉིད་སྤྲོས་པ་དང་བྲལ་བ་རབ་ཏུ་གསལ་བ་སྦྱངས་པ་སྟེ། དེ་བརྗོད་པ་དེ་ལྟ་བས་ན་ཆོས་བཏགས་པ་

44-1-283b

དེ་ཉིད་ཀྱིས་ངོ་བོ་ཉིད་སྟོང་པ་ཐམས་ཅད་སྣང་བའི་སྣོད་དོ། །ཁ་ཅིག་གིས་སྣ་ཚོགས་གཉིས་སུ་མེད་པ་སེམས་ཀྱི་འཁོར་ལོ་འདི་བསྒོམ་པར་བྱ་བ་སྟེ། བསྒོམ་པར་བྱ་བས་སྤྲོས་པ་ཞི་བའི་ཕྱིར་རོ། །མངོན་སུམ་བྱས་ན་འཁོར་བ་འཁོར་བར་མི་འགྱུར་ཇི་སྲིད་འདིའི་གནས་སྐབས་སུ། །བླང་
བྱ་དོར་བྱ་བསྒྲུབ་བྱར་འབྱུང་བ་ཡོངས་ཤེས་དེ་སྲིད་དུ་ནི་མི་གཡོ་ཡོད། །དེ་ལྟ་བས་ན་ཚོགས་གཉིས་གོམས་པས་ཡོངས་སུ་གྱུར་པ་སྐུ་དང་ཐུགས་ཀྱི་ཡོན་ཏན་དག །རྣལ་འབྱོར་དབང་ཕྱུག་འདི་ནི་དཔེ་མེད་པ་ཡི་གནས་སུ་བྱང་ཆུབ་ཐོབ་ཅེས་གྲགས། །དེ་ལ་ཡང་མཆོག་གི་ཕྱག་རྒྱ་གཟུང་
བ་དག་གིས་དགའ་བར་རྩོམ་པའི་དགོད་པའི་རོའི་རོལ་པའི་ཤུགས་སྟོབས་ཀྱིས་གསེར་གྱི་སྐ་རགས་ཀྱི་མདུད་པ་གྲོལ་བར་རང་འོད་ཀྱིས་རིག་མའི་མཆོག་ལང་ཚོ་བབ་པ་མགྲིན་པ་དང་བཅས་པ་ཞེན་པས་གཟུང་བ་ཁྱབ་པའི་མཆོག་ཏུ་བདེ་བའི་རྩེ་མོའི་རང་བཞིན་མ་ལུས་པ་གཉིས་སུ་
རྟོགས་པ་ཡོངས་སུ་སྤངས་པ་རང་རིག་པ་ལ་གཞོལ་བའི་གནས་སྐབས་ན་ཡང་ནུ་མ་མཁྲང་བའི་བ་སྤུའི་ཚོགས་ལངས་པའི་ལུས་རང་དང་གཞན་གྱི་དོན་ཕུན་སུམ་ཚོགས་པའི་རྩེ་མོར་གྱུར་པའི་དཀྱིལ་འཁོར་གྱི་འཁོར་ལོའི་བདག་ཉིད་བཅོམ་ལྡན་འདས་མ་ཡང་འཇིག་རྟེན་གསུམ་ན་སྤྲོ་
བ་ཆེན་པོ་ལ་གང་ཞིག་ལྷན་ཅིག་སྐྱེས་པ་དང་། བསམ་གྱིས་མི་ཁྱབ་པར་བྱིན་གྱིས་བརླབས་པའི་རིམ་པ་དང་། རྡོ་རྗེ་འཛིན་པ་ཆེན་པོ་དང་། སྒྲུབ་པ་ཆེན་པོ་དང་། ཕྱག་རྒྱ་ཆེན་པོའི་དངོས་གྲུབ་དང་། དོན་དམ་པ་དང་ཤེས་རབ་ཀྱི་ཕ་རོལ་ཏུ་ཕྱིན་པ་དང་། དེ་བཞིན་ཉིད་དང་། སྟོང་པ་ཉིད་དང་། ཐུགས་རྗེ་
དབྱེར་མེད་པའི་བྱང་ཆུབ་ཀྱི་སེམས་ཀྱི་ཟབ་མོ་དང་། སྟོང་པ་དང་། ཞི་བ་དང་། འབའ་ཞིག་པ་དང་། དྲི་མ་མེད་པ་དང་། མཐའ་མེད་པ་དང་། ནམ་མཁའ་དང་མཚུངས་པ་དང་།རབ་ཏུ་གསལ་བ་དང་། དྲི་མ་མེད་པ་དང་། མ་གོས་པ་དང་། མ་བསྒྱུར་བ་དང་། གཉིས་སུ་མེད་པ་དང་། མ་སྐྱེས་པ་
དང་། མ་འགག་པ་དང་། ཞི་བ་དང་རང་བཞིན་གྱིས་འོད་གསལ་བ་ལ་སོགས་པའི་ཚིག་རྣམས་ཀྱིས་བསྒྲུབ་བྱ་གཞན་ཁས་ལེན་པ་ནི་བག་མེད་པའོ། །དེ་ལ་ཐམས་ཅད་མཁྱེན་པས་ཀྱང་བློ་གྲོས་རྟུལ་པོ་རྣམས་རྟོགས་པར་མཛད་ནུས་པ་མ་ཡིན་ན་ཇི་ལྟར་ན་ཁོ་བོ་ཅག་རིགས་པ་ལེགས་པར་

44-1-284a

འདར་བའི་རལ་གྲི་ཐོགས་པ་རྣམས་ཀྱིས་ཀྱང་ནུས། ཅིག་ཏུ་དད་པ་ལ་གཞོལ་བ་དེ་ཁོ་ན་ཉིད་ངན་པ་དང་ལྡན་པའི་ཚིག་ལ་ཡིད་ཆེས་པ་ཙམ་ཡིན་པའི་ཕྱིར་སྙིང་བརྩེ་བ་ལ་མཆོག་ཏུ་གཞོལ་བས་ཚད་མ་དང་ལྡན་པའི་འཁོར་ལོ་རྣམས་སུ་གཞུག་པར་བྱ་བ་ཡིན་
ཡང་དམ་པ་རྗེས་སུ་འབྲང་བ་རྣམས་ལ་དམ་བཅས་པ་ཙམ་ཡིན་ཏེ་སྤྲོས་པས་ཀྱང་ཁོ་བོ་ཅག་གི་བླ་མས་མཛད་པའི་གསུང་རབ་ཀྱི་ཚིག་གི་སྒྲོལ་མ་དཔལ་ལྡན་རྣམ་པ་བསྡུས་པར་བཤད་པ་ཡིན་ནོ། །དགེ་བ་འདི་ལས་སྣ་ཚོགས་ཀུན། །བྱང་ཆུབ་སེམས་དཔའི་བདེ་འབྱུང་གནས། །
མཐར་ཐུག་འཇམ་པའི་རྡོ་རྗེར་གྱུར། །དེ་རྣམས་སྡིག་ཀུན་བདག་ལ་སྨིན། །བདག་ནི་འཇམ་པའི་སྨྲ་བའི་རྒྱལ་པོ་དང་། །འཇམ་གཞོན་རྒྱལ་བའི་ཁུར་ཁྱེར་ཤོག །གང་གི་ནང་ན་གསང་འདུས་དཀྱིལ་འཁོར་ཡིན་པ་ལ། །ཀྱེ་མ་སྐུ་ཡི་ཆ་བྱད་གནས་པ་དགེ་སློང་གཟུགས། །སངས་རྒྱས་
བསྟན་པ་བདག་གིས་ཕུང་པོར་བྱས། །འདི་ནི་བཤེས་གཉེན་ཞབས་དཔལ་ལས་ཡིན་ན། །བྱིས་པ་ཡིན་ཡང་འཕྲལ་དུ་དོན་འདི་འགྱུར། །བདག་གི་ཁ་ནི་ཁབ་དང་འདྲར་འགྱུར་ཀྱང་། །འདི་ནི་རྙེད་པར་དཀའ་བའི་བདུད་རྩི་ཡིན། །འཇིག་རྟེན་གསུམ་གྱིས་མགོན་པོ་ཐོབ་པར་ཤོག །
འགྲོ་བ་ཕུན་སུམ་ཚོགས་ཉམས་སྐྱོབ་དང་ཕན་པ་བགྱིད། །བརྟུལ་ཞུགས་ཆེན་པོས་གནས་པ་ཐུབ་པའི་རྒྱལ་པོའི་སྲས། །ཟབ་དང་རྒྱ་ཆེའི་ཚུལ་ལ་རབ་ཏུ་ཞུགས་པ་གང་ཡིན་པར། །འདི་རྣམས་ཇི་ལྟར་གྱུར་པའི་ཆོ་ག་རྣམ་པར་ཕྱེ་བ་ཡིན། །འདི་ནི་བསྟན་པའི་ནོར་ཐམས་ཅད་པ་སྟེ། 
པཎྜི་ཏ་ཆེན་པོ་རཏྣ་ཀཱིརྟིས་མཛད་པ་རྫོགས་སོ།།      །།པཎྜི་ཏ་རཏྣ་ཀཱིརྟི་དང་། ལོ་ཙཱ་བ་ཆིངས་ཡོན་ཏན་འབར་གྱིས་བསྒྱུར།༄༅༅། །རྒྱ་གར་སྐད་དུ། ད་ས་ཀྲོ་དྷ་བ་ལིཾ་བི་དྷིཿ། བོད་སྐད་དུ། ཁྲོ་བོ་བཅུའི་གཏོར་མའི་ཆོ་ག །བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་
ཕྱག་འཚལ་ལོ། །ཁྲོ་བོ་བཅུའི་གཏོར་མ་ནི་རང་ཉིད་འཇམ་པའི་རྡོ་རྗེ་ལ་སོགས་པའི་རྣལ་འབྱོར་དང་ལྡན་པས་ཆོ་ག་ཡན་ལག་གསུམ་གྱིས་མདུན་དུ་བསྐྱེད་པའམ་ཡང་ན་བཀུག་སྟེ། སྐད་ཅིག་གིས་མདུན་དུ་དམིགས་ལ་ཧཱུྃ་ལས་ལྕེ་རྡོ་རྗེ་སྦུ་གུའི་རྣམ་པར་བལྟ་བར་བྱས་ལ། ཨོཾ་ཨཱཿཡ་མཱནྟ་ཀྲྀཏ་ཨི་

44-1-284b

མཾ་བ་ལིཾ་གྲྀཧྞ་གྲྀཧྞ་ཧཱུྃ་ཞེས་བརྗོད་ལ་བདུད་རྩི་སྦྱང་བའི་སྦྱོར་བས་གཏོར་མ་སྦྱངས་ཏེ་གོང་གི་སྔགས་ལན་གསུམ་བརྗོད་པས་གསོལ་བར་བསམ་མོ། །དེ་ནས་མེ་ཏོག་ལ་སོགས་པས་མཆོད་དེ་ཞབས་བསིལ་དང་སོ་རྩི་བྱིན་ནས། དྲིལ་བུ་དཀྲོལ་ནས་མི་བསྐྱོད་པ་ནི་ཡེ་ཤེ་ཆེ་ལ་སོགས་པའི་བསྟོད་པ་བྱས་ནས་ཡི་
གེ་བརྒྱ་པ་བརྗོད་ལ་གཤེགས་སུ་གསོལ་ལོ། །དེ་བཞིན་དུ་ཁྲོ་བོ་བཅུ་ཀ་ལ་ཡང་བྱའོ། །ཡི་གེ་གསུམ་གྱི་བར་དུ་ཁྲོ་བོ་བཅུའི་རང་རང་གི་སྔགས་བཅུག་སྟེ། དེའི་སྟེང་དུ་ཨི་མཾ་བ་ལིཾ་གྲྀཧྞ་གྲྀཧྞ་ཞེས་བྱ་བ་བསྣན་པ་ནི་སྔགས་སོ། །གཞན་ཆོ་ག་ཐམས་ཅད་གོང་དང་མཐུན་ནོ། །ཁྲོ་བོ་བཅུའི་
གཏོར་མའི་ཆོ་ག་རྫོགས་སོ།།      །།འདིའི་ལག་ལེན་ནི་མདུན་དུ་བྲུཾ་ལས་འཁོར་ལོ་རྩིབས་བཅུ་པ་ལྟེ་བ་དང་བཅུ་གཅིག་པར་བསམས་ལ། དེའི་སྟེང་དུ་ཨ་ལས་ཟླ་བར་བསམ། དེའི་སྟེང་དུ་ཧཱུྃ་དགུ་བྲུཾ་དང་བཅུ། དེ་རྣམས་གྱུར་པ་ལས་འོད་འཕྲོས་ཁྲོ་བོ་བཅུ་སྤྱན་དྲངས་ནས་ཕྱག་མཚན་རྣམས་
ལ་ཐིམ་པར་བསམས་ལ། འཁོར་ལོ་རྩིབས་བཅུའི་སྟེང་དུ་ཁྲོ་བོ་བཅུ་བསམ་མོ། །ཡང་རང་གི་ཡི་དམ་ལྷར་བསྒོམས་ལ་སྙིང་གའི་ས་བོན་གྱིས་ཁྲོ་བོ་བཅུ་སྤྱན་དྲངས་ནས་དེ་རྣམས་ལ་བསྟིམ་སྟེ་མགྲོན་སྤྱན་དྲངས་པའོ། །དེ་ནས་གཏོར་མ་དམིགས་པ་ལས། ཡཾ་ལས་རླུང་། རཾ་ལས་
མེ། དེའི་སྟེང་དུ་ཨོཾ་ཨཱཿཧཱུྃ་གསུམ་ལས་ཐོད་པའི་སྒྱེད་པུ་གསུམ། དེའི་སྟེང་དུ་ཨ་ལས་ཐོད་པ་ཕྱི་དཀར་བ་ནང་དམར་བ་བསམས་ཏེ་དེའི་ནང་དུ་གཏོར་མ། དེའི་སྟེང་དུ་བི་མུ་ར་ཤུ་མ་གོ་ཀུ་ད་ཧ་ན་ཞེས་བྱ་བ་ཡི་གེ་བཅུ་ལས་ཤ་ལྔ་བདུད་རྩི་ལྔ་བསྐྱེད་ལ་དེ་ནས་ཡཾ་ལས་རླུང་གཡོས་ཏེ་མེ་འབར་བས་དམ་ཚིག་
གི་བདུད་རྩི་སྦྱང་བར་བསམ། དེའི་སྟེང་དུ་པདྨ་ཟླ་བའི་སྟེང་དུ་ཧཱུྃ་ལས་རྡོ་རྗེ་རྩེ་ལྔ་པ་ལ་ཧཱུྃ་གིས་མཚན་པ་དེ་ལས་འོད་སྤྲོས་པས་འོག་མིན་གྱི་གནས་ན་ཡོད་པའི་ཁྲོ་བོ་བཅུའི་ཐུགས་ཀ་ནས་ཡེ་ཤེས་ཀྱི་བདུད་རྩི་སྤྱན་དྲངས་ནས་དེ་གཉིས་དབྱེར་མེད་དུ་གྱུར་པར་བསམ་མོ། །དེ་ནས་ཨོཾ་ཨཱཿཧཱུྃ་ཞེས་པ་
ལན་གསུམ་བརྗོད་པས་དབྱེར་མེད་དུ་བསམ་མོ། །དེ་ནས་སྔགས་བརྗོད་ལ་གདབ་བོ། །དེ་ནས་གྲུབ་ནས་ཁྲོ་བོ་རེ་ལ་མཆོད་པ་རེ་དང་བསྟོད་པ་རེ་བྱ། མ་གྲུབ་ན་བཅུ་བྱར་ལ་སྤོགས་ཅིག་བྱའོ། །དེ་ནས་གཤེགས་སུ་གསོལ། དམ་ཚིག་པ་རང་ལ་བསྡུ་བའམ། ཡང་ཁྲོ་བོ་རྣམས་ཧཱུྃ་ལ།

44-1-285a

དེ་ཕྱག་མཚན་རྣམས་ལ། དེ་རྣམས་འཁོར་ལོ་ལ། དེ་བྲུཾ་ལ། བྲུཾ་སྟོང་པ་ཉིད་དུ་བསམས་ལ་གཏོར་མ་ས་གཙང་གཏོར། དགེ་བ་བསྔོ། མི་དམིགས་པར་གཟུང་ངོ་། །གཏོར་མ་དེ་རྣམས་གསོལ་བས་ཆོས་ཉིད་ལ་ཐིམ་པའམ། ཡེ་ཤེས་ལ་ཡེ་ཤེས་ཐིམ་
པར་བསམ་མོ། །དུར་ཁྲོད་པ་རྣམས་གཏོར་མ་གསོལ་བ་བདེ་བར་བསམ་མོ། །ཡ་མཱནྟ་ཀྲྀཏ། པྲཛྙཱནྟ་ཀྲྀཏ། པདྨཱནྟ་ཀྲྀཏ། བིགྷྣཱནྟ་ཀྲྀཏ། ཊཀྐི་རཱ་ཛ། ནཱི་ལ་དཎྜ། མ་ཧཱ་བ་ལ། ཨ་ཙ་ལ། ཨུཥྞཱི་ཥ་ཙཀྲ་བརྟྟི། སུཾ་བྷ་རཱ་ཛཱ། གཤིན་རྗེ་མཐར་བྱེད་ནི་མདོག་སྔོ་བ། གཡས་དཀར་
བ། གཡོན་དམར་བ། ཕྱག་གཡས་ན་ཐོ་བ་དང་རལ་གྲི། གཡོན་ན་རིན་པོ་ཆེ་དང་པདྨའོ། །ཤེས་རབ་མཐར་བྱེད་ནི་མདོག་དཀར་བ་ཞལ་གཡས་སྔོ་བ། གཡོན་དམར་བ། ཕྱག་གཡས་ན་དབྱུག་པ་དང་རལ་གྲི། གཡོན་ན་རིན་པོ་ཆེ་དང་པདྨའོ། །པདྨ་མཐར་བྱེད་ནི་མདོག་དམར་
བའོ། །ཞལ་གཡས་ནག་པ་གཡོན་དཀར་བའོ། །ཕྱག་གཡས་ན་པདྨ་དང་རལ་གྲིའོ། །གཡོན་ན་རིན་པོ་ཆེ་དང་འཁོར་ལོ། །བགེགས་མཐར་བྱེད་ནི་མདོག་སྔོ་བའོ། །ཞལ་གཡས་དཀར་གཡོན་དམར་བའོ། །ཕྱག་གཡས་ན་རྡོ་རྗེ་དང་རལ་གྲི། གཡོན་ན་རིན་པོ་ཆེ་དང་པདྨའོ། །
འདོད་པའི་རྒྱལ་པོ་ནི་མདོག་སྔོན་པོ། ཞལ་གཡས་དཀར་གཡོན་དམར་བའོ། །ཕྱག་གཡས་ན་ལྕགས་ཀྱུ་དང་རལ་གྲི། གཡོན་ན་རིན་པོ་ཆེ་དང་པདྨའོ། །དབྱུག་སྔོན་ཅན་ནི་མདོག་སྔོན་པོ་ཞལ་གཡས་དཀར་གཡོན་དམར་བའོ། །ཕྱག་གཡས་ན་དབྱུག་པ་སྔོན་པོ་དང་རལ་གྲིའོ། །
གཡོན་ན་རིན་པོ་ཆེ་དང་པདྨའོ། །སྟོབས་པོ་ཆེ་ནི་མདོག་སྔོན་པོ། ཞལ་གཡས་དཀར་གཡོན་དམར་བའོ། །ཕྱག་གཡས་ན་རྩེ་གསུམ་དང་རལ་གྲི། གཡོན་ན་རིན་པོ་ཆེ་དང་པདྨའོ། །མི་གཡོ་བ་ནི་མདོག་སྔོ་བ། ཞལ་གཡས་དཀར་གཡོན་དམར་བའོ། །ཕྱག་གཡས་ན་
རལ་གྲི་དང་རྡོ་རྗེ། གཡོན་ན་ཞགས་པ་དང་འཁོར་རོ། །མིག་ཟུར་གྱི་གཟུགས་ཀྱི་ལྟ་བ་བྱིས་པའི་གཟུགས་དང་ལྡན་པ་བསམ་པར་བྱའོ། །གཙུག་ཏོར་འཁོར་ལོས་སྒྱུར་བ་ནི་མདོག་སེར་པོ་ཞལ་གཡས་སྔོ་བ་གཡོན་དཀར་བའོ། །ཕྱག་གཡས་ན་འཁོར་ལོ་སེར་པོ་དང་རལ་

44-1-285b

གྲི། གཡོན་ན་རིན་པོ་ཆེ་དང་པདྨའོ། །གནོད་མཛེས་རྒྱལ་པོ་ནི་མདོག་སྔོ་བ་ཞལ་གཡས་དཀར་བ་གཡོན་དམར་བའོ། །ཕྱག་གཡས་ན་རྡོ་རྗེ་དང་རལ་གྲི། གཡོན་ན་རིན་པོ་ཆེ་དང་པདྨའོ། །ཁྲོ་བོ་འདི་དག་ཐམས་ཅད་ཀྱི་ཕྱག་འོག་མ་གཉིས་ནི་རང་འོད་ལ་འཁྱུད་པའི་ཕྱག་
རྒྱའོ། །གཤིན་རྗེ་གཤེད་ལ་རྣམ་པར་སྣང་མཛད་ཀྱིས་དབུ་བརྒྱན་པའོ། །པདྨ་མཐར་བྱེད་ལ་ནི་སྣང་བ་མཐའ་ཡས་ཀྱིས་དབུ་བརྒྱན་པའོ། །གཞན་ཐམས་ཅད་ལ་ནི་མི་བསྐྱོད་པས་དབུ་བརྒྱན་པའོ། །རྫོགས་སོ།།      །།བཅོམ་ལྡན་འདས་འཇམ་དཔལ་གཞོན་
ནུར་གྱུར་པ་ལ་ཕྱག་འཚལ་ལོ། །བུམ་པའི་དབང་བསྐུར་དང་པོ་སྟེ། །གཉིས་པ་གསང་བའི་དབང་བསྐུར་བ། །ཤེས་རབ་ཡེ་ཤེས་གསུམ་པ་སྟེ། །བཞི་པ་ཡང་ནི་དེ་བཞིན་ནོ། །ཞེས་བྱ་བ་ལ། འདིར་བཞི་པ་ཡང་ནི་དེ་བཞིན་ནོ་ཞེས་བྱ་བ་དབང་བསྐུར་བཞི་པོ་ཡང་
ལོག་པར་བསྒྲུབ་པ་མང་པོ་ཡོད་པས་གཞུང་རྣམས་མང་པོར་འདོད་པའི་གཞུང་སྟེ། དང་པོར་བསྟན་ནས་རང་གི་འདོད་གཞུང་ཕྱིས་བསྟན་པར་བྱའོ། །ལ་ལ་ནི་ཤེས་རབ་དང་ཡེ་ཤེས་ཀྱི་རྗེས་ཐོགས་ལ། བྱང་ཆུབ་ཀྱི་སེམས་མྱང་བ་ནི་བཞི་པ་ཡིན་ནོ་ཞེས་ཟེར་རོ། །གཞན་དག་ནི་
ཤེས་རབ་ཡེ་ཤེས་ཀྱི་རྗེས་ཐོགས་ལ་ཡང་ཤེས་པ་མྱང་བར་བྱ་བ་ནི་བཞི་པ་ཡིན་པར་འདོད་དོ། །ཡང་གཞན་དག་ནི་ཤེས་རབ་དང་ཡེ་ཤེས་ཀྱི་རྗེས་ཐོགས་ལ་སློབ་དཔོན་གྱི་སློབ་མ་ལ་རྡོ་རྗེ་ཉི་མ་ནུབ་པ་དང་ཞེས་བྱ་བ་ལ་སོགས་པའི་ཚིགས་སུ་བཅད་པའི་དོན་གོ་བར་བྱ་བ་བཞི་པ་ཡིན་
ནོ་ཞེས་ཟེར་རོ། །ཁ་ཅིག་ནི་ཤེས་རབ་དང་ཡེ་ཤེས་ཀྱི་རྗེས་ལ་ནོར་བུའི་བུ་ག་དང་། ཡང་དག་པར་རེག་པས་བྱང་ཆུབ་ཀྱི་སེམས་བཅས་པས་ཉེ་བར་དམིགས་པ་ཐམས་ཅད་ལས་ལྡོག་པ་ནི་བཞི་པ་ཡིན་ནོ་ཟེར་རོ། །ལ་ལ་དག་ནི་ཤེས་རབ་དང་ཡེ་ཤེས་ཀྱི་རྗེས་ལ་ནོར་བུའི་མཐར་
བྱང་ཆུབ་ཀྱི་སེམས་བབས་པ་ན་དམིགས་པའི་རྟོགས་པ་ཐམས་ཅད་དང་བྲལ་བ་ནི་བཞི་པ་ཡིན་ནོ་ཞེས་ཟེར་རོ། །ལ་ལ་ནི་ཤེས་རབ་དང་ཡེ་ཤེས་ཀྱི་རྗེས་ལ་དང་པོ་བྱང་ཆུབ་ཀྱི་སེམས་བབས་པ་ན་ཉེ་བར་དམིགས་པ་ཐམས་ཅད་དང་བྲལ་བ་ནི་བཞི་པ་ཡིན་ནོ་ཞེས་ཟེར་རོ། །གཞན་དག་ནི་ཤེས་

44-1-286a

རབ་ཡེ་ཤེས་ཀྱི་རྗེས་ལ་ནམ་མཁའ་དབྱིངས་སུ་བྱང་ཆུབ་ཀྱི་སེམས་མ་ལུས་པར་བབས་པ་ན་བཏང་སྙོམས་ཀྱི་སྐབས་ནི་བཞི་པ་ཡིན་པར་འདོད་དོ། །འདི་དག་ཐམས་ཅད་ནི་དོར་བར་བྱའོ། །ལ་ལ་དག་ཤེས་རབ་དང་ཡེ་ཤེས་ཀྱི་དབང་བསྐུར་བྱིན་པའི་རྗེས་ལ་སློབ་
མ་ཚིག་གིས་དེའི་དོན་བསྟན་ཞིང་རྗེས་སུ་གནང་བའི་དབང་བསྐུར་བ་ནི་བཞི་པ་ཡིན་པར་འདོད་དོ། །རྗེས་སུ་གནང་བའི་དབང་བསྐུར་བའི་དོན་དུ་རྗེས་དེ་ཕྱི་ནས་ཡེ་ཤེས་ཀྱི་རྗེས་སུ་གནང་བའི་དབང་བསྐུར་བ་ཡིན་ནོ། །བསྒྲུབ་བྱ་སྒྲུབ་པར་ཡང་དག་སྦྱོར། །གང་ཡིན་དེ་ནི་བསྙེན་པར་
བཤད། །རྡོ་རྗེ་པདྨ་མཉམ་སྦྱོར་བ། །ཉེ་བར་བསྒྲུབ་པ་ཞེས་བཤད་དོ། །ཡི་གེ་ཧཱུྃ་དང་ཕཊ་ལྡན་པར། །བསྐྱེད་པ་བསྒྲུབ་པ་ཞེས་བཤད་ལ། །ངོ་བོ་ཉིད་ཞི་བདེ་བ་ནི། །སྒྲུབ་པ་ཆེན་པོ་ཞེས་བཤད་དོ། །ཞེས་བྱ་བ་རྫོགས་པའི་རིམ་པ་ལ་ཚིགས་སུ་བཅད་པ་འདིས་ཡན་ལག་
བཞི་ཇི་ལྟ་བ་བཞིན་དུ་བྱ་བ་ནི་ཤེས་རབ་དང་ཡེ་ཤེས་ཀྱི་དབང་བསྐུར་བ་བཞི་པ་ཡིན་ནོ་ཞེས་བླ་མ་ཁ་ཅིག་ཁོ་ན་འཆད་དོ། །སངས་རྒྱས་ཡེ་ཤེས་ལ་སོགས་པའི་བླ་མ་ཆེན་པོ་དག་ནི། དབང་བསྐུར་བ་གསུམ་པ་ནི་འདིར་དེ་ཡང་དེ་བཞིན་ནོ་ཞེས་གསུངས་པའི་དབང་བསྐུར་བ་བཞི་པ་གང་མ་
ཡིན་ཏེ། ཡང་བསྒྲུབ་པར་བྱ་བའི་འབྲས་བུའི་ངོ་བོ་དེ་ཁོ་ན་ཉིད་བཤད་པ་ཡིན་པར་བཞེད་དོ། །སངས་རྒྱས་ཡེ་ཤེས་ཀྱི་ཞལ་སྔ་ནས་ཀྱི་གཞུང་འདི་ཉིད་ནི་གཟུང་བར་བྱ་སྟེ། ནམ་མཁའ་དབྱིངས་སུ་བྱང་ཆུབ་ཀྱི་སེམས་བབས་པ་དང་། མཆོག་ཏུ་དགའ་བའི་བར་མཚམས་སུ་ཉེ་བར་
དམིགས་པ་ཐམས་ཅད་དང་བྲལ་བ་གང་ཡིན་པ་དེ་ནི་དབང་བསྐུར་བ་བཞི་པ་སྟེ། རྡོ་རྗེ་འཆང་འདུས་པའི་ངོ་བོ་ཉིད་ཡིན་ཞིང་རྫོགས་པའི་རིམ་པའི་ཕྱོགས་ཀྱི་སྒྲུབ་པ་དང་བསྒྲུབ་པར་བྱ་བའི་ཡང་དག་པར་སྦྱོར་བའི་དུས་སུ་བཅད་པའི་དོན་བརྡ་སྤྲོད་པར་གྱུར་པས་དབང་བསྐུར་བའི་བཞི་པ་རྡོ་རྗེ་
འཆང་འདུས་པའི་ཚུལ་ཉིད་ཀྱིས་མན་ངག་སྟོན་པ་ཡིན་པར་བལྟ་བར་བྱའོ། །དབང་བསྐུར་བའི་རབ་ཏུ་བྱེད་པ་ནི་དེ་ལྟར་བསྟན་པ་ཡིན་ནོ། །སློབ་དཔོན་མཁས་པ་ཆེན་པོ་བསོད་སྙོམས་པ་དགེ་སློང་འོད་སྲུངས་གཞོན་ནུའི་ཞལ་སྔ་ནས་མཛད་པ་རྫོགས་སོ།།      །།རྒྱ་གར་གྱི་

44-1-286b

མཁན་པོ་ཏ་ཐཱ་ག་ཏ་རཀྵི་ཏ་དང་། ཞུ་ཆེན་གྱི་ལོ་ཙཱ་བ་བནྡྷེ་རིན་ཆེན་བཟང་པོས་བསྒྱུར་བའོ།།༄༅༅། །རྒྱ་གར་སྐད་དུ། ཥ་ཊ་ཨཾ་ག་ཡོ་ག་ནཱ་མ་ཊཱི་ཀཱ། བོད་སྐད་དུ། སྦྱོར་བ་ཡན་ལག་དྲུག་པ་ཞེས་བྱ་བའི་འགྲེལ་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །
ཡེ་ཤེས་བདུད་རྩི་ཉིད་ཅེས་པ་ལ་འདིར་གཅིག་པུར་འཛིན་པ་མ་ཡིན་ཏེ། རྩ་བ་ལས་བཤད་པ་དེ་ཉིད་མཆོག་ཡིན་ནོ་ཞེས་དྲན་པའོ། །སྦྱོར་བ་ཡན་ལག་དྲུག་ཅེས་པ་ལ་སྦྱོར་བ་ནི་ཏིང་ངེ་འཛིན་གསུམ་མོ། །དེའི་ཡན་ལག་ནི་ཆའོ། །དེ་ནི་སོ་སོར་སྤོང་བ་དང་། །ཞེས་པ་ལ་སོགས་
པའོ། །སོ་སོར་སྤོང་བ་བཤད་པ་དབང་པོ་རྣམ་པ་བཅུ། །ཞེས་ཏེ་ཀུན་དུ་སྤྱོད་པའི་ངོ་བོ་གང་ཡུལ་རྣམས་འདོད་པའི་ངོ་བོའི་ལྷར་རང་རང་གནས་པས་ཕྱི་རོལ་གྱི་ངོ་བོ་སྤོང་བ་སྟེ། ཁྱི་ཡིས་ཁྱི་འབྱིན་པའི་ཚུལ་ལོ། །བསམ་གཏན་ནི་འདི་སྟེ་འདོད་པ་ལྔ་ནི་འདོད་ཆགས་ཆེན་པོ་ལ་
སོགས་པ་སྟེ། དེ་ཡང་འདོད་ཆགས་ཞེ་སྡང་གཏི་མུག་གི་སེམས་ནི་འདོད་པར་གསུངས་པ་སྟེ་ཞེས་གོང་དུ་བཤད་དོ། །དེ་རྣམས་གཙོ་བོ་ལྔར་སྦྱོར་བ་ནི་གཙོ་བོར་གསུངས་པ་སྟེ། གཞན་ཡང་ཚད་མེད་པ་དང་། ཕ་རོལ་ཏུ་ཕྱིན་པ་དང་། སྟོབས་ལྔ་ཡང་བསྡུས་ནས་ལྷ་མོ་
རྣམས་དང་ཁྲོ་བོར་སྦྱར་ཏེ། སྦྱོར་བ་དང་པོ་དང་ཆེན་པོའི་ལྷའི་སྦྱོར་བ་ནི་བསམ་གཏན་དུ་བཞེད་དོ། །དེ་ཡང་ཡན་ལག་ལྔ་སྟེ་བསམ་གཏན་རྟོགས་པ་ལ་སོགས་པ་ཞེས་སོ། །དེ་ལ་གསང་བ་གསུམ་ཡང་མཆོག་གི་ལྷའི་ཕྱིར་ན་གཙོ་བོར་གསུངས་པ་སྟེ། ཉེ་བའི་སྒྲུབ་པ་ལ་
སོགས་པ་ཡང་རྟོག་པར་སྦྱར་རོ། །དེ་རྣམས་ནི་གོང་དུ་སྨོས་པའི་ལྷ་ལྔར་ལྷག་པའི་ལྷ་དང་དེའི་རིག་མ་ལ་བྱའོ། །དེ་ཉིད་གཉིས་སུ་མེད་པར་སྦྱོར་བ་ནི་གཉིས་པའོ། །དེའི་རེག་པ་ལས་བྱུང་བའི་དགའ་བ་ནི་གསུམ་པའོ། །དེ་གཉིས་ཀྱི་སེམས་རྡོ་རྗེ་དང་པདྨ་ལས་བསྡུས་པའི་
བདེ་བ་ནི་བཞི་པའོ། །རང་གི་སེམས་དེ་ཤེས་པས་ཤེས་བྱའི་འབྱུང་བ་ཟད་པའི་ཡེ་ཤེས་ནི་ལྔ་པའོ། །ཡན་ལག་གསུམ་པ་གསུངས་པ་སངས་རྒྱས་ཀུན། །ཞེས་པ་ལ་སོགས་པ་སྟེ། སངས་རྒྱས་ཀུན་ནི་རང་གི་སེམས་སོ། །དེའི་དངོས་ཞི་བ་ནི་དེའི་བཞོན་པའི་དབུགས་སོ། །འདོད་

44-1-287a

པ་ཐམས་ཅད་ནི་དངོས་གྲུབ་བོ། །ཡེ་ཤེས་ལྔ་དང་འབྱུང་བ་ལྔ་ནི་དབུགས་ཏེ་ཁ་དོག་ལྔ་དང་། དེའི་རང་བཞིན་དུ་ལྡན་པའོ། །དེ་འོད་ཀྱི་གོང་བུ་ལྟར་རྡོ་རྗེ་ལས་ཕྱུང་ནས་སྣ་རྩེ་ལ་བསྒོམ་སྟེ། ཁ་དོག་ལྔ་པ་རིན་པོ་ཆེ། །ཞེས་པ་ནི་ཕྱི་ནང་གི་འཁོར་ལོ་དང་ལྡན་པའི་ངོ་
བོ་སྟེ་དེས་ན་ཕྲ་མོའི་སྦྱོར་བ་གསུངས་སོ། །ཇི་སྟེ་གཞན་དུ་གྱུར་ཅིང་ཉམས་ན་སླར་ཡང་གཟུང་བ་གསུངས་པ། རང་སྔགས་ཞེས་པ་ལ་སོགས་པ་སྟེ། དེ་ལས་ཉམས་པའི་རྣལ་འབྱོར་པས་ཕྲ་མོའི་གཙོ་བོ་རང་གི་ངོ་བོའི་ཡེ་ཤེས་སེམས་དཔའི་སྙིང་ལ་ས་བོན་བཀོད་པའི་ཐིག་ལེ་ལ་
དབུགས་ཡེ་ཤེས་ཀྱི་འོད་དུ་བསྒོམས་ནས་སྔར་གྱི་རིན་པོ་ཆེ་དེ་སླར་ཡང་གཟུང་ངོ་ཞེའོ། །དེས་ཀྱང་མཚན་མ་འབྱུང་སྟེ་དེ་ནས་དབུགས་དེ་རྡོ་རྗེའི་ལམ་ནས་པདྨ་ལ་སྤྲོའོ། །ཅི་སྟེ་དེ་ལས་ཀྱང་ཉམས་ན་དེ་ནི་དབང་པོ་ཤིན་ཏུ་རྟུལ་བས་ཕྱི་རོལ་ལས་ཀྱི་ཕྱག་རྒྱ་བརྩལ་ཏེ། ལེའུ་བདུན་པ་
ལྟར་སྦྱར་ནས་ཡང་དེའི་ཚུལ་དུ་སྤྲོས་ནས་སོ་སོར་སྣང་བ་ནི་རྗེས་སུ་དྲན་པའོ། །ཏིང་ངེ་འཛིན་གསུངས་པ་ཐབས་དང་ཞེས་པ་ལ་སོགས་པ་སྟེ། ཡེ་ཤེས་ཐམས་ཅད་ལ་དབང་ཐོབ་པས་དངོས་པོ་ཀུན་བསྡུས་ཏེ་གོང་བུར་རྡོ་རྗེ་ལས་བྱུང་ནས་ཤིན་ཏུ་ཕྲ་བའི་རྡུལ་ལྟ་བུའི་ནང་དུ་ལྷའི་
གཟུགས་རྣམས་ཀྱི་ཡེ་ཤེས་སྐད་ཅིག་མས་རྫོགས་པ་གཞན་ལ་ཕན་པའི་དོན་དུ་སྤྲོ་བ་དང་བསྡུ་བ་དག་བྱེད་དམ་པའི་མཚན་མ་ཐོབ་པ་ནི་ཏིང་ངེ་འཛིན་ཏོ། །དེ་རྣམས་ཀྱི་ཡོན་ཏན་གསུངས་པ་སོ་སོར་སྤོང་བ་ཞེས་པ་ལ་སོགས་པའོ། །དཔལ་གསང་བ་འདུས་པའི་སྦྱོར་བ་ཡན་ལག་
དྲུག་པ་ཞེས་བྱ་བའི་འགྲེལ་པ་སློབ་དཔོན་སངས་རྒྱས་ཡེ་ཤེས་ཞབས་ཀྱི་ལུགས་པཎྜི་ཏ་སྨྲྀ་ཏིས་མཛད་པ་རྫོགས་སོ།།༄༅༅། །རྒྱ་གར་སྐད་དུ། ཥ་ཌ་ཨཾ་ག་ཡོ་ག་ནཱ་མ། བོད་སྐད་དུ། སྦྱོར་བ་ཡན་ལག་དྲུག་པ་ཞེས་བྱ་བ། འཇམ་པའི་
རྡོ་རྗེ་ལ་ཕྱག་འཚལ་ལོ། །ཀུན་དུ་བཟང་པོ་ཞེས་བྱ་བ་ནི་བསྐྱེད་རྫོགས་རྣམ་པ་གཉིས་ཏེ། དེ་ལ་ཐིག་ལེ་དང་ཕྲ་མོའི་སྦྱོར་བ་ནི་རྫོགས་པའི་རིམ་པ་སྟེ་གོང་མ་ནི་བསྐྱེད་པའི་རིམ་པའོ། །བསྐྱེད་པ་དང་རྫོགས་པའི་རིམ་པ་འདི་གཉིས་རིག་པས་གྲུབ་པའི་ཡན་ལག་དྲུག་པའི་གོ་

44-1-287b

རིམས་ཁོ་ནས་བསྒོམ་སྟེ། གཞན་དུ་ན་ཡང་དག་པའི་གྲུབ་པ་མི་འཐོབ་པོ་ཞེས་གསུངས་པ་ཡང་རྒྱུད་ཕྱི་མ་ལས། བསྙེན་པ་ཡན་ལག་དྲུག་གིས་ནི། །གྲུབ་པ་མཆོག་ནི་བྱས་ནས་སུ། །བསྒྲུབ་པར་བྱ་ཡིས་གཞན་དུ་ནི། །དངོས་གྲུབ་མཆོག་ཏུ་འབྱུང་མི་འགྱུར། །སོ་སོར་སྡུད་དང་
བསམ་གཏན་དང་། །སྲོག་རྩོལ་དེ་བཞིན་འཛིན་པ་དང་། །རྗེས་སུ་དྲན་དང་ཏིང་ངེ་འཛིན། །སྦྱོར་བ་ཡན་ལག་དྲུག་ཏུ་འདོད། །ཅེས་སོ། །དེ་ལ་མིག་ལ་སོགས་པའི་འགྲེལ་པ་ཅན་རྣམ་པར་ཤེས་པ་ལྔའོ། །དེ་རྣམས་གཟུགས་ལ་སོགས་པའི་ཡུལ་རྣམས་ལ་སོ་སོར་སྡུད་པ་ནི་
བཀུག་ནས་ཡང་དག་པར་དུལ་བར་བྱེད་པ་གང་ཡིན་པ་དེ་སོ་སོར་སྡུད་པའོ། །ཡང་ན་ལྷ་ཉིད་ཀྱི་ཚུལ་དུ་ཡུལ་གཟུང་བ་ནི་སོ་སོར་སྡུད་པའོ། །བསམ་གཏན་ནི་སོ་སོར་སྡུད་པའི་གོ་རིམས་ཀྱིས་ཡིད་ཀྱི་རྣམ་པར་ཤེས་པ་ལྷ་ཉིད་དུ་བསྒོམ་པའོ། །དེ་ཡང་རྣམ་པར་རྟོག་པ་དང་། རྣམ་
པར་དཔྱོད་པ་དང་། དགའ་བ་དང་། བདེ་བ་དང་། སེམས་རྩེ་གཅིག་པའི་དབྱེ་བས་རྣམ་པ་ལྔའོ། །དེ་ལ་སྣོད་དང་བཅུད་ཀྱི་དཀྱིལ་འཁོར་དང་བཅས་པ་བཅོམ་ལྡན་འདས་འཇམ་པའི་རྡོ་རྗེར་བརྟགས་པ་ཉིད་ནི་རྣམ་པར་རྟོག་པའོ། །དེ་ཁོ་ན་ལ་བརྟེན་པ་ཉིད་ཀྱིས་ངེས་པ་ནི་རྣམ་
པར་དཔྱོད་པའོ། །རྣམ་པར་དཔྱོད་པས་དེ་དང་དེའི་ལྷ་ཉིད་དུ་དམིགས་ཤིང་ཡིད་བདེ་བ་ནི་དགའ་བའོ། །དགའ་བ་བསྒོམས་པས་ལྷ་ལ་སེམས་ཟིན་པ་ནི་བདེ་བའོ། །བདེ་བ་དང་ལྡན་པའི་སེམས་ཏིང་ངེ་འཛིན་དུ་འགྱུར་བའི་ཕྱིར་ལོག་པའི་ཀུན་རྫོབ་རྣམ་པ་སྣ་ཚོགས་ལ་
དམིགས་པའི་མི་ཤེས་པ་འབྱུང་བ་ཟད་པས་འདོད་པའི་ལྷ་ཁོ་ན་ལ་དམིགས་པའི་སེམས་ནི་རྩེ་གཅིག་པ་ཉིད་དོ་ཞེས་བྱ་བ་བསམ་གཏན་ཡན་ལག་ལྔ་པོ་དེ་ནི་བསྐྱེད་པའི་རིམ་པའོ། །སྲོག་རྩོལ་ལ་སོགས་པས་རྫོགས་རིམ་བསྒོམ་པའི་རིམ་པ་འདི་ཡིན་ཏེ། མེ་ལོང་ལྟ་བུ་མཉམ་
པ་ཉིད། སོ་སོར་རྟོག་པ། བྱ་བ་གྲུབ་པ། ཤིན་དུ་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་ཞེས་བྱ་བ་ལྔའི་རྒྱུ་ཡིན་པས། ཡེ་ཤེས་ལྔའི་རང་བཞིན་མེ་རླུང་ས་ཆུ་ནམ་མཁའི་རང་བཞིན་ཡིན་པས་འབྱུང་བ་ལྔའི་བདག་ཉིད་སྲོག་རྩོལ་ཐུར་དུ་རྒྱུ་བའི་བྱ་བ་བྱས་ཏེ།

44-1-288a

ཡུངས་འབྲུའི་ཚད་ཙམ་བྱང་ཆུབ་སེམས་ཀྱི་ཐིག་ལེ་གོང་བུའི་ཚུལ་གྱིས་རྡོ་རྗེའི་སྣ་རྩེར་ཕབ་ནས་གོང་དུ་གསུངས་པའི་སོ་སོར་སྡུད་པ་དང་། བསམ་གཏན་ཡན་ལག་ལྔའི་རིམ་པ་བསྒོམ་པར་བྱ་སྟེ། ཐིག་ལེའི་སྦྱོར་བ་འདི་ནི་སྲོག་
རླུང་ཕྱི་རོལ་དུ་རྒྱུ་བ་ཟློག་པར་བྱེད་པས་རྒྱུད་ཕྱི་མ་ལས་སྲོག་རྩོལ་ཞེས་བརྗོད་དོ། །འདི་ཡང་ཉེ་བར་མཚོན་པ་སྟེ། སྙིང་གའི་ཐིག་ལེ་ལ་སོགས་པའི་སྦྱོར་བ་ཡང་ཡིན་པར་ཤེས་པར་བྱའོ། །བྱེ་བྲག་ཏུ་བསམ་གཏན་འདི་ལྟ་བུའི་སྟོབས་ཀྱིས་རོ་མ་དང་བརྐྱང་མར་རླུང་རྒྱུ་
བ་ལ་སོགས་ཏེ། དབུ་མར་སྲོག་རླུང་རྒྱུ་བ་ནི་སྲོག་རྩོལ་ཡིན་ནོ། །དེ་ནས་སྙིང་གར་མཾ་ཡིག་ཀྱང་པ་བསམས་ཏེ། དེའི་ཐིག་ལེ་ལ་སྲོག་རབ་ཏུ་འཇུག་པར་བསྒོམས་པས་གཟུང་འཛིན་སྲོག་རྩོལ་དང་བཅས་པ་ཉམས་པའི་ཕྱིར་སྟོང་ཉིད་དང་རོ་གཅིག་པས་སངས་རྒྱས་
ཐམས་ཅད་ཀྱི་རང་བཞིན་ཞི་བ་སེམས་རིན་པོ་ཆེ་སྣང་བ་ཙམ་ནམ་མཁའ་དང་མཚུངས་པའི་འོད་གསལ་ཉིད་དུ་གྱུར་པ་ལ་གང་སྲོག་རླུང་བརྟན་པར་གྱུར་པ་དེ་ནི་འཛིན་པའོ། །འདི་ཡང་ཉེ་བར་མཚོན་པ་ཙམ་སྟེ། རྡོ་རྗེའི་སྣའི་རྩེ་མོར་བསྒོམས་པའི་ཕྲ་མོའི་སྦྱོར་
བའམ། གཏུམ་མོ་ལ་སོགས་པའི་སྦྱོར་བ་ལ་གསུངས་མ་ཐག་པའི་རིམ་པས་གང་སྲོག་རླུང་བརྟན་པར་གྱུར་པ་དེ་ཡང་འཛིན་པའོ། །འཛིན་པའི་རྗེས་ལ་སྨིག་རྒྱུ། དུ་བ་སྲིན་བུ་མེ་ཁྱེར་མར་མེ། སྤྲིན་མེད་པའི་ནམ་མཁའ་ལྟ་བུའི་རྟགས་ལྔ་མཐོང་བར་འགྱུར་
རོ། །དེ་ནས་སྲོག་རྩོལ་དང་བཅས་པའི་སེམས་འོད་གསལ་བའི་རང་བཞིན་གྱིས་གང་ཚེ་སེམས་བརྟན་པར་གྱུར་པ་དེའི་ཚེ། སྨོན་ལམ་གྱི་མཐུས་བསྒོམས་པའི་ལྷ་དྲན་ཏེ། དེ་ལ་ཡང་བསྒོམས་པའི་ལྷ་ཕྲ་བའི་སྦྱོར་བ་ལས་སྒོམ་པ་པོས་འོད་ཟེར་སྤྲོ་བར་བྱེད་པ་ནི་
རྗེས་སུ་དྲན་པའོ། །འོད་དེ་དང་བཅས་པའི་བ་སྤུའི་བུ་ག་རེ་རེ་རྣམས་ཀྱིས་ཕུང་པོ་ཁམས་དང་། སྐྱེ་མཆེད་ལ་སོགས་པ་ལྷའི་རང་བཞིན་སྤྲོས་པ་ནི་རྗེས་སུ་དྲན་པ་ཞེས་བྱ་བ་དགོངས་པ་ཅན་ཡིན་ནོ། །དཔལ་གསང་བ་འདུས་པ་ལས། བརྟན་པ་རིན་ཆེན་སྤྲོ་བར་བྱ། །

44-1-288b

མི་བརྟན་པས་ནི་སྤྲོ་མི་བྱ། །རབ་མཆོག་སྤྲིན་རྣམས་ཀྱིས་སྤྲོ་བྱ། །སངས་རྒྱས་ཡེ་ཤེས་མཉམ་འོད་ཀྱིས། །ཞེས་སོ། །དེ་ནས་ཕུང་པོ་ཁམས་དང་སྐྱེ་མཆེད་ཀྱི་རང་བཞིན་སྤྲོས་པའི་ཆོས་ཐམས་ཅད་ཀྱི་ངོ་བོ་ལྷ་རྣམས་འོད་དུ་བྱས་ནས་འོད་ཟེར་རྣམས་ཀྱང་གསུངས་པའི་སྦྱོར་
བ་ལས་ཕྲ་བའི་རྣལ་འབྱོར་སྟོང་པ་དང་། སྙིང་རྗེ་མི་ཕྱེད་པའི་རང་བཞིན་ལ་དྲིལ་བའི་ཚུལ་དུ་བསྡུས་ནས། སྐད་ཅིག་གིས་རང་རིག་པའི་ཡེ་ཤེས་འབྱུང་བ་ནི་ཏིང་ངེ་འཛིན་ཏོ། །རྒྱུད་གཞན་ནས་བསྟན་པ་དང་བརྒྱུད་པའི་རིམ་པ་ལས་བྱུང་བའི་བཤད་པ་འདི་ཁོ་ནའོ། །
ཡེ་ཤེས་ཞབས་ལུགས་ཀྱི་སྦྱོར་བ་ཡན་ལག་དྲུག་པ་ཞེས་བྱ་བ་རྫོགས་སོ།།༄༅༅། །རྒྱ་གར་སྐད་དུ། མཉྫུ་བཛྲ་པཱུ་ཛ་བི་དྷིཿ། བོད་སྐད་དུ། འཇམ་པའི་རྡོ་རྗེ་མཆོད་པའི་ཆོ་ག །
བཅོམ་ལྡན་འདས་འཇམ་པའི་དབྱངས་ལ་ཕྱག་འཚལ་ལོ། །ཨོཾ་བཛྲ་སཏྭ་སརྦ་བིགྷྣཱན་ཨུ་ས་ར་ཡ་ཧཱུྃ་ཕཊ་ཅེས་པས་གུར་གུམ་ལ་སོགས་པ་བདུད་རྩི་ལྔ་དང་བཅས་པས་མཎྜལ་གྲུ་བཞིར་བྱུགས་ལ། སྐད་ཅིག་གིས་འབྱུང་བ་བཞི་དང་། རི་རབ་ཀྱི་སྟེང་དུ་ཡོད་པར་
བསམས་ཏེ། ཨོཾ་བཛྲ་རེ་ཁེ་ཧཱུྃ་ཞེས་པས་དབུས་སུ་མཎྜལ་ཟླུམ་པོར་བྱས་ལ། ཨོཾ་སུ་རེ་གེ་སརྦ་ཏ་ཐཱ་ག་ཏ་ཨ་དྷི་ཏིཥྛནྟུ་མཎྜལ་ཀཱཾ་སྭཱ་ཧཱ་ཞེས་བྱ་བས་མེ་ཏོག་ཕུལ་ནས་ལག་པ་བཀྲུས་ཏེ། སྐད་ཅིག་གིས་རང་གི་སྙིང་གའི་ས་བོན་ནམ། འོག་མིན་ནས་
ཡེ་ཤེས་ཀྱི་དཀྱིལ་འཁོར་སྤྱན་དྲངས་ཏེ་མཎྜལ་གྱི་སྟེང་དུ་བཞུགས་པར་བསམས་ལ་མཆོད་དེ། ཨོཾ་པྲ་ཝ་ར་སཏྐ་ར་ཨརྒྷཾ་པཱ་དྱ་ཨཉྩ་མ་ནཾ་པྲ་ཏཱིཙྪ་སྭཱ་ཧཱ། ཨརྒྷཾ་ལ་སོགས་པའི་སྔགས་སོ། །དེའི་དབུས་སུ་ཨོཾ་ཨཱཿབཛྲ་དྷྲྀཀ་དྭེ་ཥ་བཛྲཱ་ཡ་བཛྲ་
པུཥྤེ་ཧཱུྃ་སྭཱ་ཧཱ།ཨོཾ་ཨཱཿ་མཉྫུ་བཛྲ་ཡེ་པུཥྤེ་ཧཱུྃ་སྭཱ་ཧཱ། ཞེས་བྱ་བས་ཡབ་ཡུམ་ལ་ལན་གསུམ་དུ་མཆོད་ནས།  ཤར་དུ་ཨོཾ་ཨཱཿཛི་ན་ཛིཀ་མོ་ཧ་བཛྲཱ་ཡ་བཛྲ་པུཥྤེ་ཧཱུཾ་སྭཱ་ཧཱ། ལྷོ་རུ་ཨོཾ་ཨཱཿརཏྣ་དྷྲྀཀ་པི་ཤུ་ན་བཛྲཱ་ཡ་བཛྲ་པུཥྤེ་ཧཱུྃ་སྭཱ་ཧཱ། ནུབ་ཏུ་ཨོཾ་ཨཱཿཨཱ་རོ་ལྀཀ་

44-1-289a

རཱ་ག་བཛྲཱ་ཡ་བཛྲ་པུཥྤེ་ཧཱུྃ་སྭཱ་ཧཱ། བྱང་དུ་ཨོཾ་ཨཱཿཔྲཛྙཱ་དྷྲྀཀ་ཨིཪྴ་བཛྲཱ་ཡ་བཛྲ་པུཥྤེ་ཧཱུྃ། མེར་ཨོཾ་ཨཱཿམོ་ཧ་རཱ་ཏི་བཛྲ་པུཥྤེ་ཧཱུྃ་སྭཱ་ཧཱ། བདེན་བྲལ་དུ་ཨོཾ་ཨཱཿདྭེ་ཁ་ར་ཏི་བཛྲ་པུཥྤེ་ཧཱུྃ་སྭཱ་ཧཱ། རླུང་དུ་ཨོཾ་ཨཱཿརཱ་ག་ར་ཏི་བཛྲ་པུཥྤེ་ཧཱུྃ་སྭཱ་ཧཱ། དབང་
ལྡན་དུ་ཨོཾ་ཨཱཿབཛྲ་ར་ཏི་བཛྲ་པུཥྤེ་ཧཱུྃ་སྭཱ་ཧཱ། དེ་ནས་ཕྱིའི་མེ་མཚམས་སུ་ཨོཾ་ཨཱཿརཱུ་པ་བཛྲ་ཡཻ་ཛཿབཛྲ་པུཥྤེ་ཧཱུྃ་སྭཱ་ཧཱ། བདེན་བྲལ་དུ་ཨོཾ་ཨཱཿཤཔྟ་བཛྲ་ཡེ་ཧཱུྃ་བཛྲ་པུཥྤེ་ཧཱུྃ་སྭཱ་ཧཱ། རླུང་དུ་ཨོཾ་ཨཱཿགནྡྷེ་བཛྲ་ཡཻ་བཾ་བཛྲ་པུཥྤེ་ཧཱུྃ་སྭཱ་ཧཱ། དབང་ལྡན་དུ་
ཨོཾ་ཨཱཿརཱ་ས་བཛྲ་ཡཻ་ཧོཿབཛྲ་པུཥྤེ་ཧཱུྃ་སྭཱ་ཧཱ། ཤར་སྒོའི་གཡོན་དུ་ཨོཾ་ཨཱཿསྤཪྴ་བཛྲ་ཡཻ་ཁཾཿབཛྲ་པུཥྤེ་ཧཱུྃ་སྭཱ་ཧཱ། གཡས་སུ་ཨོཾ་ཨཱཿ་དྷརྨྨ་དྷཱ་ཏུ་བཛྲ་ཡཻ་རཾ་བཛྲ་པུཥྤེ་ཧཱུྃ་སྭཱ་ཧཱ། ཤར་སྒོར་ཨོཾ་ཨཱཿཡ་མཱནྟ་ཀྲྀཏ་བཛྲ་པུཥྤེ་ཧཱུྃ་སྭཱ་ཧཱ། ལྷོ་སྒོར་ཨོཾ་ཨཱཿ
པྲཛྙཱནྟ་ཀྲྀཏ་བཛྲ་པུཥྤེ་ཧཱུྃ་སྭཱ་ཧཱ། ནུབ་ཏུ་ཨོཾ་ཨཱཿཔདྨཱནྟ་ཀྲྀཏ་བཛྲ་པུཥྤེ་ཧཱུྃ་སྭཱ་ཧཱ། བྱང་དུ་ཨོཾ་ཨཱཿབིགྷྣཱནྟ་ཀྲྀཏ་བཛྲ་པུཥྤེ་ཧཱུྃ་སྭཱ་ཧཱ། ཞེས་བྱ་བ་འདིས་རིམ་པ་བཞིན་དུ་མཆོད་ནས། བདུག་སྤོས་ལ་སོགས་པ་རང་རང་གི་སྔགས་ཀྱིས་ཕུལ་ལ་བསྟོད་
པས་བསྟོད་དེ། དྲིལ་བུ་དཀྲོལ་ཞིང་ཡི་གེ་བརྒྱ་པ་བརྗོད་དེ། འདོད་པའི་དོན་ལ་གསོལ་བ་གདབ་པ་དང་། སྨོན་ལམ་དང་། བཟླས་པ་བྱས་ནས། ཨོཾ་ཨཱཿཧཱུྃ་མུ་ཞེས་པས་གཤེགས་སུ་གསོལ་ནས། སྙིང་གའི་ས་བོན་གྱི་འོད་ཟེར་
གྱིས་མཎྜལ་རང་ལ་ཡེ་ཤེས་པ་བཞིན་དུ་གཞུག་པར་བྱའོ། །འཇམ་པའི་རྡོ་རྗེ་མཆོད་པའི་ཆོ་ག་སློབ་དཔོན་དཔལ་སྦྱིན་གྱིས་མཛད་པ་རྫོགས་སོ།།      །།ཤཱཀྱའི་དགེ་སློང་བློ་གྲོས་སེང་གེས་ཞུ་ཆེན་བྱས་ནས་པཎྜི་ཏ་ཆེན་པོ་བི་བྷཱུ་ཏི་
ཙནྡྲས་རང་འགྱུར་དུ་མཛད་པའོ།།      །།ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎཿ།།      །།

44-1-289b

empty page