49-1-1a



49-1-1b

༄༅༅། །རྒྱ་གར་སྐད་དུ། ནཱ་མ་སཾ་གཱི་ཏི་བྲྀཏྟི་ནཱ་མ་ཨརྠ་པྲ་ས་ཀ་ཀཱ་ར་ཎ་དཱི་པ་ནཱ་མ། བོད་སྐད་དུ། མཚན་ཡང་དག་པར་བརྗོད་པའི་འགྲེལ་པ་མཚན་དོན་གསལ་བར་བྱེད་པའི་སྒྲོན་མ་ཞེས་བྱ་བ། 
འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཟབ་ཅིང་རྒྱ་ཆེའི་སྐུ་མངའ་བའི། །འཇམ་པའི་དཔལ་ལ་ཕྱག་འཚལ་ཏེ། །སྐལ་ལྡན་རྣལ་འབྱོར་གང་ཞིག་གིས། །རྗེ་བཙུན་མཚན་བརྗོད་རྟོགས་བྱའི་
ཕྱིར། །བཤད་པའི་རྒྱུད་དང་གདམས་ངག་ལ། །བརྟེན་ཏེ་འབད་པས་བཤད་པར་བྱ། །བཤད་ཚུལ་ལྔ་ཡི་སྒོ་ཕྱེ་ལ། །ཇི་སྙེད་རིགས་རྣམས་དྲུག་བསྡུས་ཏེ། །ཕན་ཡོན་བཅས་པ་བཤད་པ་ཡིན། །དེ་ལ་
འཇམ་དཔལ་ཡེ་ཤེས་སེམས་དཔའི་མཚན་ཇི་ལྟར་ཡིན་པ་རྟོགས་པར་འདོད་པའི་རྣལ་འབྱོར་པས་དབང་པོ་རབ་འབྲིང་གསུམ་དུ་འགྱུར་ཏེ། རབ་ལ་བཀའ་རྒྱུད་མདོའི་བདག་ཉིད་ཅན་འདིའི་མཚན་བཤད་པར་བྱ། འབྲིང་
ལ་གཞུང་དབུ་ཞབས་ཀྱི་དབྱེ་བ་བསྟན་པར་བྱ། ཐ་མ་ལ་ཡི་གེ་འབྲུ་རེ་རེ་ནས་བསྟན་པར་བྱའོ། །དེ་ལ་དྲིས་ལན་གྱི་ཚུལ་དུ་བཤད་པ་དང་། མཐའ་སྡུད་གསུམ་གྱི་ཚུལ་དུ་བཤད་པ་ནི་དོན་གནས་སྐབས་སུ་སྦྱར་

49-1-2a

བར་བྱའོ། །དེ་ལ་དབང་པོ་རབ་མགོ་སྨོས་པས་གོ་བ་རྣམས་ཀྱི་དོན་དུ་རྒྱུད་ཀྱི་མཚན་ཉིད་བསྟན་པ་ནི། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པ་ཞེས་པ་འདིས་བསྟན་ཏེ། དེ་ལ་འཕགས་པ་ནི་གཉིས་ཏེ། 
བརྗོད་བྱ་དོན་གྱི་སྒོ་ནས་འཕགས་པ་དང་། རྗོད་བྱེད་ཚིག་གི་སྒོ་ནས་འཕགས་པའོ། །དེ་ཡང་ཇི་ལྟར་བསྣམས་ན་རབ་དཀུ་ལ། །མྱངས་ན་ཞིམ་པའི་སྨན་བཞིན་དུ། །ཆོས་ཀྱང་དེ་བཞིན་གཉིས་སུ་གནས། །དོན་དང་ཡི་གེར་ཤེས་པར་བྱ། །
ཞེས་གསུངས་པ་ལྟ་བུའོ། །དེ་ལ་བརྗོད་བྱ་དོན་གྱི་སྒོ་ནས་འཕགས་པ་ནི། རྗེ་བཙུན་ཉིད་ལ་འཁོར་བའི་མཐའ་དང་མྱ་ངན་ལས་འདས་པའི་མཐའ་གཉིས་ལས་འཕགས་ཏེ། མཐའ་གཉིས་ལ་ཞེན་པ་ནི་སྒྲིབ་པ་མེད་པ་ཡིན་ཏེ། འདི་གཉིས་
ལས། སྒྲིབ་པ་ཀུན་ལས་ངེས་པར་གྲོལ། །མཁའ་ལྟར་མཉམ་པ་ཉིད་ལ་གནས། །ཞེས་འབྱུང་ངོ་། །རྗོད་བྱེད་ཚིག་གི་སྒོ་ནས་འཕགས་པ་ནི་ཐབས་ཀྱི་ཐེག་པ་འདི་ཉིད་ཡིན་ཏེ། ཐབས་མང་བ་དང་ཐབས་མཁས་པ་དང་། ཐབས་སླ་བ་དང་། 
ཐབས་མྱུར་བ་དང་བཞིས་འཕགས་ཏེ། དེ་ཡང་། དོན་གཅིག་ན་ཡང་བྱེ་བྲག་ནི། །ཐབས་མང་བ་དང་མཁས་པ་དང་། །དེ་བཞིན་སླ་དང་མྱུར་བ་ཡིས། །སྔགས་ཀྱི་བསྟན་པ་ཁྱད་པར་འཕགས། །ཞེས་འབྱུང་ངོ་། །དེ་ལ་ཐབས་མང་བ་ནི་

49-1-2b

གདུལ་བྱ་རྣམས་ཀྱི་བློ་ལ་ཇི་ལྟར་མོས་པ་ལས་མ་བཟློག་པར་གྲོལ་བའི་ཐབས་མཐའ་ཡས་པར་སྟོན་པའོ། །དེ་ཡང་། ངེས་འབྱུང་ཀུན་གྱི་ལམ་ལ་གནས། །ཞེས་སོ། །ཉོན་མོངས་མ་སྤངས་ཀྱང་གྲོལ་བའི་ཐབས་ཤེས་པས་ཐབས་མཁས་པའོ། །དེ་ཡང་།མཁས་པ་ཆེན་པོ་ཐབས་ཆེ་བ། །ཞེས་པའོ། །
སྒོ་གསུམ་དཀའ་ཐུབ་ཀྱིས་མ་གཟིར་བར་འདོད་པའི་ལོངས་སྤྱོད་ལ་གནས་བཞིན་དུ་གྲོལ་བའི་ཐབས་སྟོན་པས་ཐབས་སླ་བའོ། །དེ་ཡང་། ལོངས་སྤྱོད་རྫོགས་སྐུ་ཀུན་གྱི་རྒྱལ། །ཞེས་སོ། །ཐབས་ཀྱི་ཐེག་པའི་རིགས་ཅན་གྱིས་ཐམས་ཅད་གཉིས་མེད་དུ་རྟོགས་པས། ཚེ་འདི་ཉིད་ལ་བྱང་ཆུབ་འགྲུབ་པས་
ཐབས་མྱུར་བའོ། །དེ་ལ་འཇམ་དཔལ་ནི་དབྱེ་ན་རྣམ་པ་ལྔ་སྟེ། རང་བཞིན་རྒྱུའི་འཇམ་དཔལ་དང་། སྒོམ་པ་ལམ་གྱི་འཇམ་དཔལ་དང་། མཐར་ཐུག་འབྲས་བུའི་འཇམ་དཔལ་དང་། གདུལ་བྱ་ལས་དག་པ་ལ་སྣང་བའི་འཇམ་དཔལ་དང་། རྣམ་པའི་བདག་ཉིད་དུ་སྣང་བའི་འཇམ་དཔལ་ལོ། །དེ་ལ་རང་
བཞིན་རྒྱུའི་འཇམ་དཔལ་ནི་འཁོར་འདས་ཀྱི་ཆོས་ཐམས་ཅད་ལ་ཆོས་ཉིད་དེ་བཞིན་ཉིད་ཀྱིས་ཁྱབ་པ་སྟེ། འདི་ཉིད་ལས། མི་འགྱུར་ཀུན་འགྲོ་ཁྱབ་པ་པོ། །ཕྲ་ཞིང་ཟག་མེད་ས་བོན་བྲལ། །ཞེས་འབྱུང་ངོ་། །དེ་ལ་མཚན་མའི་རྣམ་པར་རྟོག་པའི་ཟུག་རྔུ་བྲལ་བ་དང་། རྟོགས་ན་ཀུན་གྱི་དཔལ་དུ་གྱུར་པས་དེ་སྐད་ཅེས་
བྱའོ། །སྒོམ་པ་ལམ་གྱི་འཇམ་དཔལ་ནི་བསྐྱེད་རིམ་དང་རྫོགས་རིམ་ལ་སོགས་ཏེ། ལམ་གྱི་ཆོས་སུ་གྱུར་པ་རྣམས་ཡིན་ཏེ། འདི་ཉིད་ལས། ངེས་འབྱུང་ཀུན་གྱི་ལམ་ལ་གནས། །ཞེས་འབྱུང་ངོ་། །དེ་ཉིད་ཀྱི་གནས་སྐབས་ནས་རྟོགས་པའི་ཟུག་རྔུ་རྣམས་ནི་སྤངས་ལ། ཤས་ཤིག་ནི་སྤོང་བ་ལ་ཞུགས་པས་
འཇམ་ལ། དེ་ལས་བདག་དང་གཞན་གྱི་དོན་འབྱུང་བས་དཔལ་ལོ། །མཐར་ཐུག་འབྲས་བུའི་འཇམ་དཔལ་ནི་སྐུ་གསུམ་ཡེ་ཤེས་ལྔའི་བདག་ཉིད་ལ་བྱ་སྟེ། འདི་ཉིད་ལས། མཆོག་གི་དང་པོ་སྐུ་གསུམ་འཆང་། །ཞེས་འབྱུང་ངོ་། །དེ་ལ་སྐུ་གསུམ་ནི་ཐུན་མོང་གི་དབང་དུ་བྱས་ན། ཆོས་སྐུ་སྐྱེ་མེད་ནམ་མཁའ་ལྟ་བུ་
ལ་ལོངས་སྤྱོད་རྫོགས་པའི་སྐུ་རྣམ་པར་སྣང་མཛད་སྤྲིན་ལྟ་བུ་འབྱུང་བ་དེ་ལས་སྤྲུལ་སྐུ་ཤཱཀྱ་ཐུབ་པ་ཆར་ལྟ་བུས་འགྲོ་བའི་དོན་མཛད་པའོ། །ཁྱད་པར་གྱི་དབང་དུ་བྱས་ན། རིག་པ་རང་བཞིན་གྱིས་འོད་གསལ་བ་ནི་ལོངས་སྤྱོད་རྫོགས་པའི་སྐུ། རིག་པ་སྣ་ཚོགས་སུ་འཆར་བ་སྤྲུལ་པའི་སྐུ། ཇི་ལྟར་སྣང་

49-1-3a

ཡང་དོན་སྐྱེ་མེད་ལས་མ་འདས་པ་ཆོས་ཀྱི་སྐུའོ། །དེ་ལ་ཡེ་ཤེས་ལྔ་ནི་ཆོས་ཉིད་སྐྱེ་འགག་མེད་པ་ཆོས་ཀྱི་དབྱིངས་ཀྱི་ཡེ་ཤེས་ཏེ། དེ་ཉིད་གསལ་ལ་རྟོག་པ་མེད་པ་མེ་ལོང་ལྟ་བུའི་ཡེ་ཤེས། དེ་གཉིས་སུ་དབྱེར་མེད་ཅིང་བླང་དོར་མེད་པས་མཉམ་པ་ཉིད་ཀྱི་ཡེ་ཤེས། ཆོས་སྤྱི་དང་
རང་གི་མཚན་ཉིད་མ་འདྲེས་པར་གསལ་བ་ནི་སོ་སོར་རྟོག་པའི་ཡེ་ཤེས། བདག་དང་གཞན་གྱི་དོན་རྩོལ་བ་མེད་པར་གྲུབ་པས་ནི་བྱ་བ་གྲུབ་པའི་ཡེ་ཤེས་སོ། །དེ་ཡང་འདི་ཉིད་ལས། ཁྱབ་བདག་ཡེ་ཤེས་ལྔ་ཡི་བདག །ཅེས་འབྱུང་ངོ་། །གདུལ་བྱ་ལས་དག་པ་ལ་སྣང་བའི་འཇམ་དཔལ་ནི་རྣལ་
འབྱོར་པའི་ཏིང་ངེ་འཛིན་གོམས་པའི་མཐུས་ལྷའི་སྐུའི་ཞལ་མཐོང་བའོ། །རྣམ་པའི་བདག་ཉིད་དུ་སྣང་བའི་འཇམ་དཔལ་ནི་སྐུའི་གཟུགས་བརྙན་དུ་གྱུར་པ་རས་བལ་ལ་རི་མོ་བྲིས་པ་དང་། ཟངས་ལྕགས་ལ་འབུར་དུ་བཏོད་པ་དེ་རྣམས་སོ། །གྱི་ཞེས་པ་ནི་འབྲེལ་པའི་ཡི་གེ་སྟེ། ཇི་སྐད་དུ་
སྨོས་པའི་ཡོན་ཏན་རྣམས་དང་། ཡོན་ཏན་ཅན་རྗེ་བཙུན་འཇམ་དཔལ་དུ་འབྲེལ་པར་སྟོན་ཏེ། བརྒྱ་བྱིན་གྱི་བ་ཕྲ་མོ་ཞེས་བྱ་བ་ལྟ་བུའོ། །མཚན་ཡང་དག་པར་བརྗོད་པ་ཞེས་པ། མཚན་ནི་འོག་ནས་འབྱུང་བའི་ཡོན་ཏན་གྱི་ཆོས་རྣམས་ཡིན་ལ། ཡོན་ཏན་དེ་དག་དང་རྗེ་བཙུན་ཉིད་ལྡན་ལ། ལྡན་པ་ཁོ་ན་
ལྟར་བརྗོད་པའོ། །ཚུལ་ཇི་ལྟར་བརྗོད་ན་གཉིས་ཏེ། ཟབ་པ་དོན་གྱི་སྒོ་ནས་བརྗོད་པ་དང་། རྒྱ་ཆེ་བ་ཚིག་གི་སྒོ་ནས་བརྗོད་པའོ། །དོན་གྱི་སྒོ་ནས་བརྗོད་པ་ནི་དོན་གཉིས་སུ་མེད་པའི་ཡེ་ཤེས་སུ་གསལ་བའོ། །ཚིག་གི་སྒོ་ནས་བརྗོད་པ་ལ་གསུམ་སྟེ། མཚན་ཉིད་གཉིས་སུ་མེད་པའི་ཚུལ་དུ་བརྗོད་
པ་དང་། གསང་སྔགས་ཀྱི་ཚུལ་དུ་བརྗོད་པ་དང་། ཡོན་ཏན་གྱི་ཚུལ་དུ་བརྗོད་པའོ། །དེ་ལ་མཚན་ཉིད་གཉིས་སུ་མེད་པའི་ཚུལ་དུ་བརྗོད་པ་ནི་རང་གི་སེམས་ཀྱི་མཚན་ཉིད་གཉིས་སུ་མེད་པའི་ཡེ་ཤེས་སུ་ངོ་ཤེས་པར་བྱས་ལ་མཚན་བརྗོད་པར་བྱ་སྟེ། བརྗོད་པའི་སྒྲ་དེ་དག་བྱུང་ཡང་སྐྱེ་འགག་མེད་པའི་ངང་ལས་བྱུང་
ལ། ཐིམ་ཡང་དེ་ཉིད་དུ་ཐིམ་སྟེ། མདོར་ན་ཆོས་ཀྱི་རང་སྒྲར་ཤེས་པར་བྱའོ། །འདི་ཉིད་ལས། གཉིས་མེད་གཉིས་སུ་མེད་པར་སྟོན། །ཡང་དག་མཐའ་ལ་རྣམ་པར་གནས། །ཞེས་འབྱུང་ངོ་། །མཚན་སྔགས་ཀྱི་ཚུལ་དུ་བརྗོད་པ་ནི་བདག་ཉིད་རྗེ་བཙུན་འཇམ་དཔལ་དུ་བསྒོམས་ཏེ་མཚན་བརྗོད་པས་ཐུགས་

49-1-3b

ཀའི་མུཾ་ལས་འོད་ཟེར་འཕྲོས་པས་འཕགས་པ་མཆོད་པ་དང་། སེམས་ཅན་གྱི་དོན་བྱས་སླར་རང་གི་ཐུགས་ཀར་ཐིམ། ཡང་སྔ་མ་ལྟར་སྤྲོ་ཞིང་བསྡུས་ཏེ། མཚན་ཀླག་པ་མ་ཐོན་གྱི་བར་དུ་ཅི་རིགས་སུ་བྱ་བའོ། །དེ་ཡང་འདི་ཉིད་ལས། གསང་སྔགས་ཚུལ་ཆེན་བདག་ཉིད་ཅན། །ཞེས་འབྱུང་ངོ་། །མཚན་ཡོན་
ཏན་གྱི་ཚུལ་དུ་བརྗོད་པ་ནི་རྗེ་བཙུན་འཇམ་དཔལ་ཉིད་ལ་འཁོར་སངས་རྒྱས་དང་། བྱང་ཆུབ་སེམས་དཔའ་དང་། ཉན་ཐོས་དང་རང་སངས་རྒྱས་དཔག་ཏུ་མེད་པས་བསྐོར་བ། མདུན་གྱི་ནམ་མཁའ་ལ་སྤྱན་དྲངས་ལ་མཚན་བརྗོད་པར་བྱ་སྟེ། འདི་ཡང་ཁྱོད་ཀྱི་ཡོན་ཏན་ཡིན་ཞེས་དམིགས་པའོ། །དེ་ཡང་འདི་ཉིད་ལས། 
དེ་བཞིན་གཤེགས་པའི་ཡོན་ཏན་མཚོ། །ཞེས་འབྱུང་ངོ་། །དེ་དག་ཀྱང་བསྡུ་ན་དོན་ཟབ་པ་དང་། ཚིག་རྒྱ་ཆེ་བ་གཉིས་ཏེ། འདི་ཉིད་ལས། ཟབ་ཅིང་རྒྱ་ཆེའི་སྒྲ་སྒྲོགས་པ། །ཞེས་འབྱུང་ངོ་། །ད་ནི་བར་ཆད་ཉེ་བར་ཞི་བར་བྱ་བའི་ཕྱིར་ཕྱག་བཙལ་བ་བསྟན་པ་ནི། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་
ལོ་ཞེས་སྨོས་ཏེ། ཕྱག་ན་རྡོ་རྗེས་ཤཱཀྱ་ཐུབ་པ་ལ་ཞུས་ནས། གླེགས་བམ་དུ་སྡུད་པའི་དུས་སུ། སླད་དུ་ཡི་དམ་ལྷ་ལ་ཕྱག་འཚལ་བ་ཡིན་ཏེ། འོ་ན་ཕྱག་ན་རྡོ་རྗེ་ལ་ཡང་བར་ཆད་འབྱུང་ངམ་ཞེ་ན། མ་ཡིན་ཏེ། རྗེས་འཇུག་གི་དོན་དུ་དགོངས་པའོ། །དེ་ཡང་འཇམ་དཔལ་ནི་གོང་དུ་བཤད་ཟིན་ཏོ། །
སྐུ་དུས་གསུམ་དུ་བགྲེས་རྒུད་མི་མངའ་བས་གཞོན་ནུ་སྟེ། རྟག་ཏུ་ད་ལྟར་འབྱུང་བ་ལྟ་བུའི་ཚུལ་དུ་བཞུགས་པའོ། །ལ་ནི་དགར་བའི་ཡི་གེ་སྟེ་འཇམ་དཔལ་ཉིད་ལའོ། །ཕྱག་འཚལ་ལོ་ཞེས་པ། ཟབ་པ་དོན་རྟོགས་པའི་ཕྱག་དང་། རྒྱ་ཆེ་ལུས་ངག་ཡིད་གསུམ་གུས་པའི་ཚུལ་གྱིས་ཕྱག་བཙལ་བའོ། །
དེ་ལ་དབང་པོ་འབྲིང་གི་དོན་དུ་དབུ་ཞབས་ཀྱི་དབྱེ་བ་བསྟན་པ་ནི། བཤད་པའི་རྒྱུད་ཀྱི་རྗེས་སུ་འབྲངས་ནས་ཁེའུ་བཅུ་བཞིར་སྟོན་པ་ལས་དང་པོར་ཞུས་པའི་ལེའུ་བསྟན་པའི་ཕྱིར། དེ་ནས་དཔལ་ལྡན་རྡོ་རྗེ་འཆང་། །ཞེས་པ་ལ་སོགས་པ་སྨོས་ཏེ། དེ་ནས་ཞེས་བྱ་བ་ནི་མཚམས་སྦྱོར་བའི་ཚིག་
ཡིན་ཏེ་གོང་དུ་རྩ་བའི་རྒྱུད་ལེའུ་ཁྲི་དྲུག་སྟོང་པ་བཤད་པའི་རྗེས་སུ་མཚན་ཡང་དག་པར་བརྗོད་པ་མན་ངག་གི་སྙིང་པོ་གླུར་བླངས་པའི་ལེའུ་འདི་ཞུས་ཞེས་པའོ། །དཔལ་ནི་རྟོགས་པ་བདག་གི་དཔལ། །ཐུགས་རྗེ་གཞན་གྱི་དཔལ་གཉིས་དང་། །ཕྱག་ན་རྡོ་རྗེ་ཉིད་ལྡན་པའོ། །རྡོ་རྗེ་འཆང་བ་ནི། ནད་

49-1-4a

ན་ཟབ་པ་དོན་གྱི་རྡོ་རྗེ་ཡེ་ཤེས་ལྔ་དབྱེར་མི་ཕྱེད་པར་འཆང་ངོ་། །དེ་ཡང་། མི་ཕྱེད་རྡོ་རྗེ་ཞེས་བརྗོད་དེ། །སེམས་དཔའ་སྲིད་གསུམ་གཅིག་པུའོ། །ཞེས་འབྱུང་ངོ་། །དོན་དེ་ལྟ་བུ་དང་ལྡན་པའི་རྟགས་སུ་རྒྱ་ཆེ་བ་ལྕགས་ཀྱི་རྡོ་རྗེ་རྩེ་ལྔ་པ་བསྣམས་པའོ། །དེས་མཛད་པའི་ཕྲིན་ལས་ཅི་
མཛད་ཅེ་ན། གདུལ་དཀའ་འདུལ་བ་རྣམས་ཀྱི་མཆོག །དཔའ་བོ་འཇིག་རྟེན་གསུམ་ལས་རྒྱལ། །ཞེས་སྨོས་ཏེ། ཚངས་པ་དང་ཁྱབ་འཇུག་ལ་སོགས་ཏེ། གདུལ་དཀའ་བ་རྣམས་འདུལ་བ་ལ། སངས་རྒྱས་ཐམས་ཅད་འདུས་ནས་རི་རབ་ཀྱི་རྩེ་མོར་ཕྱག་ན་རྡོ་རྗེ་ལ་དབང་བསྐུར་བས་མཆོག་ཅེས་བྱའོ། །
རང་འཇིགས་པ་དང་བྲལ་ཞིང་གཞན་གྱི་དཔུང་འཇོམས་པས་དཔའ་ལ། ས་འོག་གི་བདག་པོ་མ་ཧཱ་དེ་བ་དང་། ས་སྟེངས་ཀྱི་བདག་པོ་ཁྱབ་འཇུག །ས་བླའི་བདག་པོ་ཚངས་པ་དང་གསུམ་ནི་ཕྱི་རོལ་པའི་སྐུ་གསུང་ཐུགས་ཀྱི་ལྷ་གསུམ་ཡིན་ལ། དེ་གསུམ་བཏུལ་བས་འཇིག་རྟེན་གསུམ་ལས་
རྒྱལ་བའོ། །དེ་ཡང་ནང་དུ་ཉོན་མོངས་པ་གསུམ་བཏུལ་བའི་རྟགས་སོ། །དེའི་རིགས་དང་རྟགས་གང་ཞེ་ན། རྡོ་རྗེ་དབང་ཕྱུག་གསང་བའི་རྒྱལ། །ཞེས་སྨོས་ཏེ། རྡོ་རྗེའི་རིགས་ཡིན་པ་དང་། གསང་སྔགས་ཀྱི་སྡུད་པ་པོ་རྡོ་རྗེ་ཐེག་པའི་མངའ་བདག་ཏུ་གྱུར་པས་ཀྱང་རྡོ་རྗེ་དབང་ཕྱུག་གོ། །གསང་བའི་
དམ་ཚིག་དང་ལྡན་ཞིང་། ནང་གི་ཉོན་མོངས་པ་དང་གདུག་པ་ཅན་རྣམས་ལས་རྒྱལ་བས་རྒྱལ་ཞེས་བྱའོ། །དེའི་ཞལ་རས་ཅི་འདྲ་ཞེ་ན། པདྨ་དཀར་པོ་རྒྱས་འདྲའི་སྤྱན། །པདྨ་རྒྱས་པའི་ཞལ་མངའ་བ། །ཞེས་སྨོས་ཏེ། པདྨ་འདམ་ནས་སྐྱེས་ཀྱང་འདམ་གྱི་སྐྱོན་གྱིས་མ་གོས་པ་དང་འདྲ་བར། 
ཕྱག་ན་རྡོ་རྗེ་ཉིད་ཤིན་ཏུ་ཁྲོ་ཁྲོ་འདྲ་ཡང་ནང་ན་ཉོན་མོངས་པ་མེད་པས་དཀར་བའོ། །སྤྱན་ཀུན་དུ་ཟླུམ་པས་རྒྱས་འདྲའི་སྤྱན་ནོ། །དེའི་ཕྱག་མཚན་ཅི་འདྲ་ཞེ་ན། རང་གི་ལག་གི་རྡོ་རྗེ་མཆོག །ཡང་དང་ཡང་དུ་གསོར་བྱེད་པ། །ཞེས་སྨོས་ཏེ། ལག་གི་རྡོ་རྗེ་དེ་དོན་གྱི་རྟགས་སུ་བྱུང་བས་མཆོག་གོ། །
ཡང་དང་ཡང་དུ་གསོར་བྱེད་པ་ནི། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་ཡང་ནས་ཡང་དུ་སྐོར་ཅིག་པར་ཞུ་བ་འབུལ་བའི་བརྡ་ཡང་ཡིན། ཐུགས་རྗེ་རྒྱུན་མི་ཆད་པས་འགྲོ་བ་འདྲེན་པའི་བརྡ་ཡང་ཡིན། གདུག་པ་ཅན་རྒྱུན་མི་ཆད་པར་འདུལ་བའི་བརྡ་ཡང་ཡིན། ནང་ན་ཡེ་ཤེས་རྒྱུན་མི་ཆད་པར་མངའ་

49-1-4b

བའི་བརྡ་ཡང་ཡིན། དེ་ཡི་གྲོགས་གང་དང་ལྷན་ཅིག་ཏུ་ཞུས་ཤེ་ན། འཁོར་ལག་ན་རྡོ་རྗེ་ཁྲོ་ཚོགས་ལྔ་བརྒྱ་དང་ལྷན་ཅིག་ཏུ་ཞུས་པའི་ཕྱིར། ཁྲོ་གཉེར་རིམ་པར་ལྡན་ལ་སོགས། །ལག་ན་རྡོ་རྗེ་མཐའ་ཡས་པ། །ཞེས་སྨོས་ཏེ། ཁྲོ་གཉེར་ནི་མཆེ་བ་གཙིགས་པ་དང་། སྤྱན་བཟློག་པ་དང་། སྨིན་མ་
བསྡུས་པ་དང་། འབྲི་གུ་ཏ་གྱེན་དུ་འགྲེང་བ་ལ་སོགས་པའོ། །ཁྲོ་ཚོགས་དེ་དག་ལ་ཡང་ཡོན་ཏན་དང་མཐུ་མཐའ་ཡས་པ་དག་དང་ལྡན་པའོ། །དེ་དག་གིས་ཕྲིན་ལས་ཅི་མཛད་ཅེ་ན། དཔའ་བོ་གདུལ་དཀའ་འདུལ་བ་པོ། །ཞེས་སྨོས་ཏེ། གོང་དུ་བཤད་པ་དང་འདྲའོ། །ཅིའི་ཕྱིར་གདུལ་
དཀའ་ཞེ་ན། དྲག་པོ་བཙན་ཐབས་ཀྱིས་འདུལ་དགོས་པའི་ཕྱིར་རོ། །དེའི་ཉམས་ཅི་འདྲ་ཞེ་ན། འཇིགས་སུ་རུང་དང་དཔའ་བྱེད་ཅན། །ཞེས་སྨོས་ཏེ། ཁྲོ་བོའི་ཆ་བྱད་དང་ལྡན་པའོ། །དེ་དག་གི་ཕྱག་མཚན་ཅི་ཞེ་ན། རྡོ་རྗེ་རྩེ་མོ་རབ་འཕྲོ་བ། །རང་གི་ལག་གིས་གསོར་བྱེད་པ། །ཞེས་སྨོས་ཏེ། རྡོ་རྗེའི་
རྩེ་མོ་ལས་རྡོ་རྗེ་ཕྲ་མོ་བྱུང་ནས་གདུག་པ་ཅན་འདུལ་བའོ། །དེ་དག་ཀྱང་གཙོ་བོའི་རྗེས་མཐུན་དུ་སྤྱོད་པའོ། །དེ་དག་གི་བསམ་པའི་ཁྱད་པར་ཅི་ཞེ་ན། སྙིང་རྗེ་ཆེ་དང་ཤེས་རབ་དང་། །ཐབས་ཀྱིས་འགྲོ་དོན་བྱེད་པའི་མཆོག །ཅེས་པ་ལ་སོགས་པ་སྨོས་ཏེ། འགྲོ་བ་རྣམས་ལ་སྙིང་རྗེ་ཆེན་པོ་དང་ལྡན་
པ་ནི་རྒྱ་ཆེ་བའོ། །ཤེས་རབ་ཀྱི་ཆོས་རྣམ་པར་འབྱེད་པ་ནི་ཟབ་པའོ། །ཐབས་དེ་ལྟ་བུས་གཞན་དོན་བྱེད་པས་ན་མཆོག་གོ། །ཡོན་ཏན་གྱི་ཁྱད་པར་ཇི་ལྟ་བུས་ཤེ་ན། དགའ་མགུ་རངས་པའི་བསམ་པ་ཅན། །ཞེས་པ་འགྲོ་བའི་དོན་བྱེད་པ་ལ་དགའ། སྟོན་པ་མཐོང་བ་ན་མགུ། ཆོས་བཤད་
པས་རྗེས་སུ་ཡི་རང་བའི་བསམ་པ་ཡོད་པའོ། །གཟུགས་ཅི་དང་ལྡན་པས་སངས་རྒྱས་ཀྱི་ཕྲིན་ལས་བྱེད་ཅེ་ན། ཁྲོ་བོའི་ལུས་ཀྱི་གཟུགས་ལྡན་པ། །སངས་རྒྱས་ཕྲིན་ལས་བྱེད་པའི་མགོན། །ལུས་བཏུད་རྣམས་དང་ལྷན་ཅིག་ཏུ། །ཞེས་སྨོས་ཏེ། རྒྱན་དང་རང་བཞིན་ཁྲོ་བོར་གནས་
ཤིང་མཛད་པ་བཅུ་གཉིས་སམ་ཕྲིན་ལས་རྣམ་པ་བཞིའི་སྒོ་ནས་འགྲོ་བའི་དོན་མཛད་ལ། ཁྲོ་བོ་དེ་རྣམས་ཀྱིས་ཀྱང་བག་མེད་དུ་མ་ཡིན་ཏེ། ཤིན་ཏུ་གུས་པའི་ཚུལ་གྱིས་ལུས་བཏུད་ནས་ཞུས་པའོ། །ཚུལ་ལམ་ཐབས་ཇི་ལྟར་ཞུས་ཤེ་ན། དེ་བཞིན་གཤེགས་པ་བཅོམ་ལྡན་འདས། །རྫོགས་

49-1-5a

སངས་རྒྱས་ལ་ཕྱག་འཚལ་ནས། །ཐལ་མོ་སྦྱར་བར་བྱས་ནས་ནི། །སྤྱན་སྔར་འདུག་སྟེ་འདི་སྐད་གསོལ། །ཞེས་སྨོས་ཏེ།  དེ་བཞིན་ཉིད་དུ་གཤེགས་པ་དང་། །འགྲོ་བའི་དོན་ལ་གཤེགས་ཤིང་བདུད་བཞི་བཅོམ། ལེགས་པའི་ཡོན་ཏན་དྲུག་དང་ལྡན་པ་ཆེ་བའི་ཡོན་ཏན་
ཐམས་ཅད་རྫོགས་པ། མ་རིག་པའི་སྒྲིབ་པ་སངས་ཤིང་ཡེ་ཤེས་རྒྱས་པ་སྟེ། དེ་ཡང་། མ་རིག་གཉིད་ནི་སངས་ཕྱིར་དང་། །ཤེས་བྱ་ལ་ཡང་བློ་རྒྱས་ཕྱིར། །སངས་རྒྱས་པདྨོ་ལྟར་སངས་རྒྱས། །ཞེས་པ་ལྟ་བུའོ། །དེ་དག་གིས་ཐལ་མོ་སྦྱར་བའི་བར་དུ་རྡོ་རྗེ་བཅུག་ནས། མདུན་དུ་ཙོག་ཙོག་པོར་
འདུག་ནས་ཞུས་པའོ། །དགོས་ཆེད་ཅིའི་དོན་དུ་ཞུས་ཤེ་ན། ཁྱབ་བདག་བདག་ལ་སྨན་པ་དང་། །བདག་དོན་བདག་ལ་ཐུགས་བརྩེའི་ཕྱིར། །སྒྱུ་འཕྲུལ་དྲ་བའི་མངོན་རྫོགས་པའི། །བྱང་ཆུབ་ཅི་ནས་བདག་ཐོབ་མཛོད། །ཅེས་སྨོས་ཏེ། བརྟན་གཡོ་ཀུན་ལ་ཁྱབ་པས་ན་ཁྱབ་བདག་ཅེས་སྟོན་
པ་ལ་བོས་ནས། འཁོར་བདག་ཅག་རྣམས་ལ་སྨན་པ་དང་། ཐུགས་བརྩེ་བར་མཛད་པས་ཐབས་དང་ཤེས་རབ་ཁྱད་པར་ཅན་ཟུང་དུ་འབྲེལ་པས་སྒྱུ་འཕྲུལ་དྲ་བ་སྟེ། དེའི་སྒོ་ནས་མངོན་པར་རྫོགས་པར་བྱང་ཆུབ་བདག་གིས་ཐོབ་པར་མཛོད་ཅིག་པ་སྟེ། རང་དོན་གཞན་དོན་དང་འབྲེལ་པའོ། །འོ་ན་
བདག་གི་དོན་ཞུས་པ་དེ་ཡིན་ན། གཞན་གྱི་དོན་དུ་ཞུས་པ་གང་ཡིན་ཞེ་ན། ཉོན་མོངས་པས་ནི་སེམས་དཀྲུགས་ཤིང་། །མི་ཤེས་འདམ་དུ་བྱིང་བ་ཡི། །སེམས་ཅན་ཀུན་ལ་སྨན་པ་དང་། །བླ་མེད་འབྲས་བུ་ཐོབ་བྱའི་ཕྱིར། །ཞེས་སྨོས་ཏེ། ཞེ་སྡང་ལ་སོགས་པ་ཉོན་མོངས་པས་བྱང་ཆུབ་སེམས་ཆུ་
རྙོགས་པ་ལྟ་བུར་དཀྲུགས་ཤིང་། དེ་ཁོ་ན་ཉིད་མི་ཤེས་ཏེ། གླང་པོ་ཆེ་འདམ་དུ་ཆུད་པ་ལྟར་སྡུག་བསྔལ་གྱི་རྒྱ་མཚོར་ཆུད་པའི་སེམས་ཅན་ཀུན་ལ། དེ་ལས་བཟློག་ནས་ཚེ་འདིར་སྨན་པར་བྱ་བ་དང་། ཚེ་ཕྱི་མ་ལ་བླ་ན་མེད་པའི་བྱང་ཆུབ་ཀྱི་འབྲས་བུ་ཐོབ་པར་བྱ་བའི་ཕྱིར་ཡང་བཤད་དུ་གསོལ་ཞེས་བྱ་
བའོ། །སྟོན་པ་གང་ལ་ཞུས་ཤེ་ན། རྫོགས་པའི་སངས་རྒྱས་བཅོམ་ལྡན་འདས། །འགྲོ་བའི་བླ་མ་སྟོན་པ་པོ། །ཞེས་སྨོས་ཏེ། རང་དང་གཞན་གྱི་དོན་ཐམས་ཅད་རྫོགས་པའི་སངས་རྒྱས་བཅོམ་ལྡན་འདས་ལ་ཞུས་ཞེས་པའོ། །དེས་འགྲོ་བ་རྣམས་ལ་ཆོས་སྟོན་པར་མཛད་པའོ། །སྟོན་

49-1-5b

པ་དེས་དོན་མི་མཁྱེན་པ་མི་སྲིད་དམ་ཞེ་ན། དམ་ཚིག་ཆེན་པོ་དེ་ཉིད་མཁྱེན། །ཞེས་སོ། །དོན་རྟོགས་པ་ལས་མི་འདའ་བས་དམ་ཚིག་ཆེན་པོ་སྟེ། དེ་ཉིད་ཇི་ལྟ་བ་མཁྱེན་པའོ། །དེས་གདུལ་བྱའི་དབང་པོ་དང་བསམ་པ་མཁྱེན་ཞེ་ན། དབང་པོ་བསམ་པ་མཁྱེན་མཆོག་གིས། །ཞེས་སྨོས་ཏེ། དབང་
པོའི་བྱེ་བྲག་གང་ལ་གང་མོས་མཁྱེན་པའོ། །འོ་ན་ཆོས་གང་ཞུ་ཞེ་ན། བཅོམ་ལྡན་འདས་ཀྱི་ཡེ་ཤེས་སྐུ། །གཙུག་ཏོར་ཆེན་པོའི་ཚིག་གི་བདག །ཡེ་ཤེས་སྐུ་སྟེ་རང་བྱུང་བ། །འཇམ་དཔལ་ཡེ་ཤེས་སེམས་དཔའ་ཡི། །མིང་ནི་ཡང་དག་བརྗོད་པའི་མཆོག །ཅེས་སྨོས་ཏེ། བཅོམ་ལྡན་
འདས་ཀྱི་ཡེ་ཤེས་སྐུ་ནི། མེ་ལོང་ལྟར་ཐམས་ཅད་ལ་གསལ་ཞིང་འཆར་བས་མེ་ལོང་ལྟ་བུའི་ཡེ་ཤེས་སོ། །གཙུག་ཏོར་ཆེན་པོ་ནི་ཆོས་ཐམས་ཅད་མཉམ་པ་ཉིད་ཀུན་གྱི་སྤྱི་བོའི་གཙུག་ཏུ་བཀུར་བའི་འོས་ཡིན་པས་མཉམ་པ་ཉིད་ཀྱི་ཡེ་ཤེས་སོ། །ཚིག་གི་བདག་པོ་ནི་ཆོས་སྤྱི་དང་རང་གི་མཚན་
ཉིད་མ་འདྲེས་པར་མཁྱེན་པའི་སྒོ་ནས་ཆོས་ཀྱི་ཚིག་གསུངས་པ་སྟེ། སོ་སོར་རྟོག་པའི་ཡེ་ཤེས་སོ། །ཡེ་ཤེས་སྐུ་ནི་འགྲོ་བའི་བྱ་བ་གྲུབ་པར་བྱེད་པའི་སྐུ་སྟེ། དེ་ཡང་ཡེ་ཤེས་ལས་གྲུབ་པའི་སྐུ་ཡིན་པས་བྱ་བ་གྲུབ་པའི་ཡེ་ཤེས་སོ། །རང་འབྱུང་བ་ནི་སྐྱེ་བ་མེད་པ་ཆོས་ཀྱི་དབྱིངས་ཀྱི་ཡེ་ཤེས་སོ། །
འཇམ་དཔལ་ཡེ་ཤེས་སེམས་དཔའ་ནི། རྩ་བ་བྱང་ཆུབ་ཀྱི་སེམས་ཏེ། ཡེ་ཤེས་ཆེན་པོས་མཉམ་པ་ཉིད་ལ་སེམས་ལ་ཐུགས་རྗེས་འགྲོ་བའི་དོན་ལ་སེམས་པའོ། །དེའི་རྟགས་གཟུགས་སྐུར་བྱུང་བ་ལ་ཡང་དེ་སྐད་ཅེས་བྱའོ། །ཚིག་དང་དོན་གྱི་སྒོ་ནས་དེའི་མིང་ཡང་དག་པར་
བརྗོད་པ་ནི་གཞན་པས་དོན་ཆེ་བས་ན་མཆོག་གོ། །མདོར་ན་ཡེ་ཤེས་ལྔ་བྱང་ཆུབ་སེམས་དང་དྲུག་རོ་གཅིག་པའི་ཆོས་གཅིག་ཞུས་པའོ། །འོ་ན་མིང་ལས་དོན་མ་ཞུས་སམ་ཞེ་ན། དོན་ཟབ་དོན་ནི་རྒྱ་ཆེ་ཞིང་། །དོན་ཆེན་མཚུངས་མེད་རབ་ཞི་བ། །ཐོག་མ་བར་དང་མཐར་དགེ་བ། །
ཞེས་སྨོས་ཏེ། ཅིའི་ཕྱིར་ན་དོན་ཟབ་ཅེ་ན། དོན་ཆེན་པོ་གསང་སྔགས་ཀྱི་དོན་ཆོས་མཉམ་པ་ཉིད་ཡིན་པས་ཀྱང་ཟབ། ཆོས་གང་དང་ཡང་མཚུངས་པ་མེད་པས་ཀྱང་ཟབ། སྤྲོས་པའི་མཚན་མ་རབ་ཏུ་ཞི་བས་ཀྱང་ཟབ། དགེ་བ་གསུམ་གྱི་རྒྱ་དང་ལྡན་པས་ཀྱང་ཟབ། དུས་གསུམ་གྱི་

49-1-6a

སངས་རྒྱས་ཀྱིས་གསུངས་པས་ཀྱང་ཟབ། རྡོ་རྗེ་ཐེག་པའི་གླུ་ཡིན་པས་ཀྱང་ཟབ། དེ་ལྟར་བརྗོད་བྱ་ཟབ་པས་རྗོད་བྱེད་ཀྱང་ཟབ་པོ། །རྒྱ་ཆེ་བ་ནི་རྣམ་སྤྲུལ་སྣ་ཚོགས་སུ་སྣང་བའོ། །གང་དང་ཡང་མི་མཉམ་པས་མཚུངས་པ་མེད་པའོ། །སྤྲོས་པའི་མཐའ་ཐམས་ཅད་རབ་ཏུ་ཞི་བ། 
ཐོག་མར་དགེ་བ་ཐོས་པའི་ཤེས་རབ། བར་དུ་དགེ་བ་བསམ་པའི་ཤེས་རབ། ཐ་མར་དགེ་བ་བསྒོམ་པའི་ཤེས་རབ་པོ། །ཅིའི་ཕྱིར་ཞེ་ན། ཉོན་མོངས་པ་རྩད་ནས་འབྱིན་པས་དགེ་བའོ། །དེ་སུས་གསུངས་ཤེ་ན། འདས་པའི་སངས་རྒྱས་རྣམས་ཀྱིས་གསུངས། །མ་འོངས་རྣམས་ཀྱང་གསུང་
འགྱུར་ལ། །ད་ལྟར་བྱུང་བ་རྫོགས་སངས་རྒྱས། །ཡང་དང་ཡང་དུ་གསུངས་པ་གང་། །ཞེས་སྨོས་ཏེ། རྒྱལ་བ་ཤཱཀྱ་ཐུབ་པས་རི་བྱ་རྐང་ཅན་དུ་ཕྱག་ན་རྡོ་རྗེ་ལ་འདི་གསུངས་པའི་དུས་སུ། དེའི་བྱིན་གྱི་རླབས་ཀྱིས་བྱང་ཕྱོགས་ཀྱི་འཇིག་རྟེན་གྱི་ཁམས་པདྨོ་ཅན་ཞེས་བྱ་བ་ནི། དེ་བཞིན་གཤེགས་
པ་པདྨོ་མཆོག་ཅེས་བྱ་བས་ཀྱང་འཁོར་གྱི་བྱང་ཆུབ་སེམས་དཔའ་རྣམས་ལ་འདི་གསུངས་སོ། །དེ་བཞིན་དུ་ཕྱོགས་ལྔ་པོར་ཡང་གསུངས་སོ། །ཆོས་ཉིད་ཀྱི་མཁའ་རྣམ་པར་དག་པས་ཀྱང་སངས་རྒྱས་རྡོ་རྗེ་འཆང་གིས་འཁོར་གྱི་དེ་བཞིན་གཤེགས་པ་ལ་འདི་གསུངས་སོ། །དཔལ་རྣམ་པར་སྣང་
མཛད་ཀྱིས་ཀྱང་འོག་མིན་དུ་འཁོར་བྱང་ཆུབ་སེམས་དཔའ་རྣམས་ལ་འདི་གསུངས་སོ། །རི་རབ་ཀྱི་རྩེར་སྤྲུལ་སྐུ་འཁོར་ལོས་སྒྱུར་བ་ལྟ་བུས་ཀྱང་སུམ་ཅུ་རྩ་གསུམ་པའི་ལྷ་རྣམས་ལ་འདི་གསུངས་སོ། །དགའ་ལྡན་གྱི་གནས་སུ་ཡང་ལྷ་རྣམས་ལ་ཡང་རྒྱལ་བ་བྱམས་པས་འདི་གསུངས་སོ། །
དེར་ཡང་མ་ཟད་དེ་རྡེའུ་དང་ཤིང་བུ་དང་ནམ་མཁའ་ལ་སོགས་པ་ལ་ཡང་འདིའི་སྒྲ་གྲག་པ་འབྱུང་ངོ་། །དེ་ཡང་། སེམས་དཔའ་མཆོག་གི་བསྟན་པ་ནི། །དབང་སྦྱོར་བ་དང་རྟོགས་པ་དང་། །མཁའ་དང་གཟུགས་ནི་ཐམས་ཅད་དང་། །ནམ་མཁའ་ལས་ཀྱང་གྲགས་པར་འགྱུར། །ཞེས་
བྱ་བ་འབྱུང་ངོ་། །དེ་ཉིད་རྩ་བའི་རྒྱུད་ཁྲི་དྲུག་སྟོང་པར་ཡང་ལན་གཅིག་བཤད། ཕྱིས་དགའ་བ་སྤྱོད་པ་འདིར་ཡང་ལན་གཅིག་བཤད་དེ། ཤཱཀྱ་ཐུབ་པས་ལན་གཉིས་བཤད་པའོ། །སྒྱུ་འཕྲུལ་དྲ་བ་གླུར་བླངས་པའི་དོན་གང་ཡིན་ན། རྒྱུད་ཆེན་སྒྱུ་འཕྲུལ་དྲ་བ་ལས། རྡོ་རྗེ་འཆང་ཆེན་གསང་

49-1-6b

སྔགས་འཆང་། །དཔག་མེད་རྣམས་ཀྱི་བཀའ་བཞིན་དུ། །གླུ་བླངས་གང་ལགས་བཤད་དུ་གསོལ། །ཞེས་པ་རྩ་བའི་རྒྱུད་སྒྱུ་འཕྲུལ་དྲ་བ་ལ་སོགས་པར་རྡོ་རྗེ་འཆང་གིས་ཀྱང་དོན་དཔག་ཏུ་མེད་པ་རྡོ་རྗེའི་གླུ་གསུངས་ནས་འཁོར་རྣམས་དགའ་བ་བསྐྱེད་པ་དེ་བཞིན་དུ། བདག་ཅག་ལ་
ཡང་བཤད་དུ་གསོལ་ཞེས་པའོ། །ཞུས་པའི་དོན་དེ་གཟུང་བར་ཁས་བླངས་པ་ནི། མགོན་པོ་རྫོགས་སངས་རྒྱས་ཀུན་གྱི། །གསང་འཛིན་ཅི་ནས་བདག་འགྱུར་ཕྱིར། །ངེས་པར་འབྱུང་བའི་བར་དུ་འདི། །བདག་གི་བསམ་པ་བརྟན་པོས་གཟུང་། །ཞེས་སྨོས་ཏེ། སངས་རྒྱས་
ཀྱིས་གསུངས་པའི་གསང་སྔགས་རྣམས་འཛིན་པར་གྱུར་པའི་ཕྱིར་ངེས་པར་བྱང་ཆུབ་མ་ཐོབ་ཀྱི་བར་དུ་བདག་གི་བསམ་པ་ལ་ཐེ་ཚོམ་མེད་ཅིང་བརྗོད་པ་མེད་པར་གཟུང་ངོ་ཞེས་ཁས་བླང་ས་པའོ། །གཞན་དོན་དུ་བཤད་པར་ཁས་བླངས་པ་ནི། ཉོན་མོངས་མ་ལུས་བསལ་བ་དང་། །མི་ཤེས་མ་
ལུས་སྤངས་པའི་ཕྱིར། །བསམ་པའི་ཁྱད་པར་ཇི་བཞིན་དུ། །སེམས་ཅན་རྣམས་ལ་བཤད་པར་འཚལ། །ཞེས་སྨོས་ཏེ། བཟུང་ནས་ཅི་བྱེད་ན། སེམས་ཅན་གྱི་ཉོན་མོངས་པ་མ་ལུས་བསལ་བ་དང་། དེའི་རྒྱུ་མི་ཤེས་པ་དང་མ་རིག་པ་སྤང་བའི་ཕྱིར་བཤད་དོ། །དེ་ཡང་བསམ་པ་ཇི་ལྟར་མོས་
པའི་ཁྱད་པར་ཤེས་པར་བྱས་ནས་བཤད་ཀྱི་ཐུན་མོང་དུ་མ་ཡིན་ནོ། །ལུས་ངག་ཡིད་གསུམ་གུས་པའི་ཚུལ་གྱིས་ཞུས་པ་ནི། གསང་དབང་ལག་ན་རྡོ་རྗེ་ཡིས། །དེ་བཞིན་གཤེགས་ལ་དེ་སྐད་དུ། །གསོལ་ནས་ཐལ་མོ་སྦྱར་བྱས་ཏེ། །ལུས་བཏུད་ནས་ནི་སྤྱན་སྔར་འདུག །ཅེས་པ་ནི་ཕྱག་ན་རྡོ་
རྗེས་ཤཱཀྱ་ཐུབ་པ་ལ་ཐལ་མོ་སྦྱར། ལུས་གུས་པའི་ཚུལ་གྱིས་བཏུད། གདན་པདྨ་ལས་འཕགས་ནས་གསོལ་བ་བཏབ་པའོ། །ད་ནི་ལན་གསུངས་པའི་ལེའུ་བསྟན་པའི་ཕྱིར། དེ་ནས་བཅོམ་ལྡན་ཤཱཀྱ་ཐུབ། །རྫོགས་པའི་སངས་རྒྱས་རྐང་གཉིས་མཆོག །ཅེས་པ་ལ་སོགས་པ་སྨོས་ཏེ། སྡུད་པ་པོས་སྟོན་པ་ལ་
ཞུས་མ་ཐག་པའི་རྗེས་དེ་ནས་ཞེས་བྱ་བར་མཚམས་སྦྱར་རོ། །ཕུང་པོ་དང་། ཉོན་མོངས་པ་དང་། ལྷའི་བུ་དང་། འཆི་བདག་གི་བདུད་དང་བཞི་བཅོམ་ལ། དཔལ་དང་གྲགས་དང་ཡེ་ཤེས་དང་། །དབང་ཕྱུག་དང་ནི་གཟུགས་བཟང་དང་། །བརྩོན་འགྲུས་ཕུན་སུམ་ཚོགས་པ་དང་ལྡན་ལ། རྒྱལ་པོ་

49-1-7a

ཤཱཀྱའི་རིགས་སུ་སྐྱེས་པས་ཀྱང་ཤཱཀྱ་ལུས་ངག་ཡིད་གསུམ་མི་དགེ་བའི་ལས་ལ་བསྲུང་མི་དགོས་པར་རང་བཞིན་གྱིས་ཐུབ་པས་ཐུབ་ཅེས་བྱའོ། །བདག་དང་གཞན་གྱི་དོན་ཐམས་ཅད་རྫོགས་ཤིང་། སྒྲིབ་པ་ཐམས་ཅད་སངས་ཤིང་ཡེ་ཤེས་རྒྱས་པའོ། །མི་དང་ལྷ་རྐང་གཉིས་
སུ་གནས་པའི་གཙོ་བོར་གྱུར་པས་མཆོག་གོ། །ཡང་ན་སྐུ་མཆོག་ཏུ་གྱུར་པས་མཚན་དང་དཔེ་བྱད་ཀྱིས་བརྒྱན་པ་དང་། གསུང་མཆོག་ཏུ་གྱུར་པས་ཚངས་པའི་དབྱངས་ལྟ་བུ། ཐུགས་མཆོག་ཏུ་གྱུར་པས་ཐམས་ཅད་མཁྱེན་པའི་ཡེ་ཤེས་དང་། ཡོན་ཏན་མཆོག་ཏུ་གྱུར་པས་ཡིད་བཞིན་གྱི་
ནོར་བུ་རིན་པོ་ཆེ་ལྟར་ཟད་པ་མེད་པ་དང་། ཕྲིན་ལས་མཆོག་ཏུ་གྱུར་པས་འགྲོ་དོན་ལ་ཐོགས་པ་མེད་པ་དང་། དེ་ལྟར་མཆོག་རྣམ་པ་ལྔ་དང་ལྡན་པའོ། །དེས་ཚུལ་ཇི་ལྟར་བཤད་ཅེ་ན། ཉིད་ཀྱི་ཞལ་ནས་ལྗགས་བཟང་བ། །རིང་ཞིང་ཡངས་པ་བརྐྱང་མཛད་དེ། །ཞེས་པ་ལ་སོགས་པ་སྨོས་ཏེ། 
ཤཱཀྱ་ཐུབ་པ་དེ་ཉིད་ཀྱི་ལྗགས་དེ་ནི་དམ་པའི་ཆོས་འབྱུང་བའི་གནས་ཡིན་པས་བཟང་བ་དང་། ལྗགས་ཀྱིས་མི་དགེ་བའི་ཆོས་མི་གསུང་བས་བཟང་བའོ། །དེའི་མཚན་ཉིད་ནི་རིང་ཞིང་ཞལ་གྱི་ནང་དུ་ཡངས་པའི་ལྗགས་བརྐྱང་བའོ། །དེ་ལས་ཅི་མཛད་ཅེ་ན། འཇིག་རྟེན་གསུམ་པོ་སྣང་མཛད་
ཅིང་། །བདུད་བཞིའི་དགྲ་རྣམས་འདུལ་མཛད་པ། །སེམས་ཅན་རྣམས་ཀྱི་ངན་སོང་གསུམ། །སྦྱོང་བར་བྱེད་པའི་འཛུམ་བསྟན་ནས། །ཞེས་སྨོས་ཏེ། སྤྱིར་དེ་བཞིན་གཤེགས་པ་ལ་རང་བཞིན་གྱི་འོད་ཀྱང་ཡོད་དེ། དེ་ཡང་ལྷ་རྣམས་ང་རྒྱལ་བསྐྱུངས་པའི་ཕྱིར་འོད་ཀྱིས་མོག་མོག་པོར་
བྱས་པ་ལྟ་བུ་དང་། དེ་བས་ཀྱང་ཁྱད་པར་དུ་ལྗགས་ཀྱི་རྩེ་མོ་ལས་འོད་འཕྲོས་ཏེ། དང་པོར་རི་བྱ་རྐང་ཅན་གསལ་བར་བྱས། དེ་ནས་འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་གསལ་བར་བྱས། འོད་ཟེར་གྱིས་བདུད་རྣམ་པ་བཞི་ཡང་བཏུལ། འོད་
ཟེར་ལས་ཁྲོ་ཚོགས་སྤྲོས་ཏེ། ཁྱད་པར་དུ་རྒྱུད་བཤད་པ་ལ་བར་དུ་གཅོད་པ་ལྷའི་བུའི་བདུད་བཏུལ། འོད་ཟེར་སེམས་ཅན་ལ་ཕོག་པས་ལོང་བས་གཟུགས་མཐོང་། འོན་པས་སྒྲ་ཐོས། ལྐུགས་པས་སྨྲ་ཤེས། དྲན་པ་ཉམས་པ་རྣམས་དྲན་པ་གསལ་ནས། ཞ་གྲུམ་གྱིས་འགྲོ་ཤེས།

49-1-7b

ངན་སོང་གསུམ་ལ་ཕོག་པས་སྡུག་བསྔལ་དང་བྲལ། ཉོན་མོངས་པ་རྣམས་སྦྱངས། དེ་ནས་འཁོར་རྣམས་ལ་འཛུམ་པ་མཛད་པ་དང་། ལྗགས་བརྐྱང་བ་དང་ལྗགས་ལས་འོད་ཟེར་བཀྱེ་བ་ནི་ཆོས་འབྱུང་བའི་སྔ་ལྟས་གསུམ་ཡིན་ཏེ། མེ་འབྱུང་བའི་སྔ་ལྟས་སུ་དུ་བ་ལྟ་བུའོ། །གསུང་
གང་གིས་གསུངས་ཤེ་ན། ཚངས་པའི་གསུང་ནི་སྙན་པ་ཡིས། །འཇིག་རྟེན་གསུམ་པོ་ཀུན་བཀང་ནས། །ཞེས་སྨོས་ཏེ། དཔེར་ན་ཚངས་པ་གསུང་སྒྲོགས་ཀྱི་གསུང་ནི་སྙན་པ་དང་། ཆེ་བ་དང་། ཕྲ་བ་དང་།  གསལ་བ་དང་། ཁུགས་འབྱིན་པ་དང་། རྒྱུན་རིང་བ་དང་། ལྟེང་ཆགས་པ་དང་། 
མེར་ཆགས་པ་དང་། ཟག་པ་མེད་པའི་བདེ་བ་རྒྱུད་ལ་སྐྱེ་བ་དང་། ཤིན་ཏུ་ཐག་རིང་ཡང་རུང་། དྲུང་ན་འདུག་པ་ལྟར་ཐོས་པ་ལ་སོགས་པ་གསུང་གི་ཡོན་ཏན་དཔག་ཏུ་མེད་པ་དང་ལྡན་པའོ། །འདིར་ཡང་དེ་དང་འདྲའོ། །འཇིག་རྟེན་གསུམ་དུ་གསུངས་ཀྱང་སེམས་ཅན་རྣམས་སྐད་རིགས་
མི་མཐུན་པས་གོ་འམ་ཞེ་ན། ལས་འཕྲོ་ཅན་གྱིས་གོ་བར་འགྱུར་རོ། །འཁོར་གང་ལ་གསུངས་ཤེ་ན། ལག་ན་རྡོ་རྗེ་སྟོབས་པོ་ཆེ། །གསང་དབང་ལ་ནི་སླར་གསུངས་པ། །ཞེས་སྨོས་ཏེ།  ཕྱག་ན་རྡོ་རྗེ་ནི་སངས་རྒྱས་སྟོང་རྩ་གཅིག་གི་ཐ་ཆུངས་ཡིན་པས། སངས་རྒྱས་ཐམས་ཅད་འདུས་པས་
དབང་བསྐུར་བ་ཡིན་ཏེ། དེ་ཡང་ང་ནི་ཁྲོ་བོ་གོས་སྔོན་ཅན། །སངས་རྒྱས་ཐམས་ཅད་འདུས་པའི་སྐུ། །ཞེས་པ་ལྟ་བུའོ། །གསང་མཚན་དུ་ཡང་། ལག་ན་རྡོ་རྗེ་སྟོབས་པོ་ཆེ། །ཞེས་བཏགས་སོ། །འོ་ན་འདི་བྱིན་གྱིས་བརླབས་པའི་བཀའ་ཡིན་ནམ་སྙམ་པ་ལ་མ་ཡིན་ཏེ། དངོས་སུ་གསུངས་
པའི་བཀའ་ཡིན་པས། །གསང་དབང་ལ་ནི་སླར་གསུངས་པ། །ཞེས་པ་སྟེ། གསང་བའི་དབང་ཐོབ་པས་ཀྱང་གསང་དབང་། སྐུ་གསུང་ཐུགས་ཀྱི་གསང་བ་ལ་དབང་བསྐུར་བས་ཀྱང་གསང་དབང་། གསང་སྔགས་ཀྱི་སྡུད་པ་པོ་ཡིན་པས་ཀྱང་གསང་དབང་། སྔགས་ཀྱི་ཐེག་པ་ལ་
མངའ་མཛད་པའི་ཕྱིར་གསང་དབང་ངོ་། །སྟོན་པས་གོང་དུ་གླུར་བླངས་པ་དེ་ཕྱག་ན་རྡོ་རྗེ་ལ་ཡང་སླར་གསུངས་པའོ། །དགོས་པ་ཅིའི་དོན་དུ་གསུངས་ཤེ་ན། སྙིང་རྗེ་ཆེ་དང་ལྡན་གྱུར་པས། །འགྲོ་ལ་ཕན་པའི་དོན་དུ་ཁྱོད། །ཅེས་པ་ལ་སོགས་པ་སྨོས་ཏེ། སྙིང་རྗེ་ཆེན་པོ་དང་ལྡན་པ་

49-1-8a

ཁྱོད་འགྲོ་བ་ལ་འདི་དང་ཕྱི་མར་ཕན་པའི་དོན་དུ་ཁྱོད་ང་ལ་འདྲི་བ་ལ་འདི་བཤད་དོ་ཞེས་པའོ། །གང་གི་མཚན་ནས་བརྗོད་ན་དོན་ཆེ་ཞེ་ན། ཡེ་ཤེས་ལུས་ཅན་འཇམ་དཔལ་གྱི། །མིང་བརྗོད་པས་ནི་དོན་ཆེ་བ། །དག་པར་བྱེད་ཅིང་སྡིག་སེལ་བ། །ཞེས་སྨོས་ཏེ། ཡེ་ཤེས་དྲུག་རོ་
གཅིག་པའི་ལུས་ཅན་འཇམ་དཔལ་ཉིད་ཀྱི་མིང་ནས་བརྗོད་ན་དོན་ཆེ་བའོ། །ཅིའི་ཕྱིར་དོན་ཆེ་ཞེ་ན། བཀླགས་པ་ཙམ་གྱིས་རང་གི་རྒྱུད་ལ་ཡོད་པའི་སྒྲིབ་པ་ཐམས་ཅད་དག་པར་བྱེད་ཅིང་འཕྲལ་གྱི་སྡིག་པ་ཐམས་ཅད་སེལ་བར་བྱེད་པས་དོན་ཆེ་བའོ། །འཁོར་ལ་ཉོན་ཅིག་པར་བསྐུལ་བའི་ཕྱིར། ང་ལས་
ཉན་པར་བརྩོན་པ་ནི། །ལེགས་སོ་དཔལ་ལྡན་རྡོ་རྗེ་འཆང་། །ལག་ན་རྡོ་རྗེ་ཁྱོད་ལེགས་སོ། །གསང་བའི་བདག་པོ་དེ་ཕྱིར་ངས། །ཁྱོད་ལ་ལེགས་པར་བསྟན་པར་བྱ། །ཁྱོད་ནི་རྩེ་གཅིག་ཡིད་ཀྱིས་ཉོན། །ཞེས་སྨོས་ཏེ། ཤཱཀྱ་ཐུབ་པ་ང་ལ་ཁྱོད་ཉན་པ་ནི་ལེགས་སོ། །ཅིའི་ཕྱིར་ལེགས་ཤེ་ན། འཇམ་
དཔལ་གྱིས་དོན་དྲི་བའི་ཕྱིར་རོ། །གསང་བའི་བདག་པོ་ཞེས་སྡུད་པ་པོ་ལ་བོས་ན། མ་འོངས་པའི་སེམས་ཅན་རྣམས་ལ་ཕན་པར་བྱེད་པ་དེའི་ཕྱིར། ཁྱོད་ལ་མཚན་ཡང་དག་པར་བརྗོད་པའི་རིགས་དྲུག་གི་བདག་ཉིད་ཅན་ལེགས་པར་བསྟན་པར་བྱ་ཡིས། ཁྱོད་རྩེ་གཅིག་པའི་ཡིད་ཀྱིས་ཉོན་ཅིག་ཅེས་
བསྐུལ་བའོ། །འོ་ན་ཕྱག་ན་རྡོ་རྗེ་ལ་ཡང་བསྐུལ་དགོས་སམ་ཞེ་ན། དེ་དགོས་པ་མ་ཡིན་ཏེ། ཕྱག་ན་རྡོ་རྗེ་ལ་མཚན་ནས་ཕྱི་རབས་ཀྱི་རྣལ་འབྱོར་པ་རྣམས་ལ་སྣོད་ཀྱིས་མ་ཟིན་པ་དང་། བརྗེད་པ་དང་། འདྲེས་པ་དང་གསུམ་སྤོངས་ལ་ཉོན་ཅིག་པར་གདམས་པའོ། །དེ་ལྟར་གསུངས་པས་འཁོར་རྗེས་སུ་
ཡི་རང་བ་ནི། བཅོམ་ལྡན་དེ་ནི་ལེགས་ཞེས་གསོལ། །ཞེས་སྨོས་པ་ཡིན་ཏེ། བཅོམ་ལྡན་འདས་བདག་ཅག་ལ་འཇམ་དཔལ་གྱིས་ཆོས་གནང་བ་དེ་ནི་ལེགས་སོ་ཞེས་པའི་དོན་ཏོ། །ད་ནི་རིགས་ལ་གཟིགས་པའི་ལེའུ་བསྟན་པའི་ཕྱིར། དེ་ནས་བཅོམ་ལྡན་ཤཱཀྱ་ཐུབ། །ཅེས་པ་ལ་སོགས་པ་
སྨོས་ཏེ། ཉན་པར་ངེས་མ་ཐག་པ་དེ་ནས་བཅོམ་ལྡན་འདས་ཀྱིས་གསུངས་ཞེས་སྦྱར་རོ། །གསང་སྔགས་རིགས་ཆེན་ཐམས་ཅད་དང་། །ཞེས་པ་འདིས་ནི་རིགས་བསྡུས་པ་ལ་གཟིགས་པ་བསྟན་ཏེ།གསང་སྔགས་འདི་མནྟྲ་ཞེས་པའི་སྒྲས་སྐྱོབ་པ་ལ་འཇུག་སྟེ། མདོར་ན་ཐབས་དང་

49-1-8b

ཤེས་རབ་ཁྱད་པར་ཅན་ལ་བྱའོ། །རིགས་ལས་བྱུང་བས་ན་རིགས་སོ། །རིགས་འཛིན་པས་ན་རིགས་སོ། །རིགས་ཐམས་ཅད་ཀྱི་བདག་པོར་གྱུར་ཅིང་། རིགས་ཐམས་ཅད་འདུས་པས་ན་རིགས་ཆེན་ནོ། །བྱ་བ་དང་སྤྱོད་པ་དང་རྣལ་འབྱོར་གྱི་ཐེག་པ་རྣམས་བསྐྱེད་པའི་གནས་སུ་གྱུར་པས་ཀྱང་དེ་སྐད་
ཅེས་བྱའོ། །འདིའི་དགོས་པ་ནི་ཉོན་མོངས་པ་ལྔ་ཆ་མཉམ་དུ་འདུལ་བའི་གཉེན་པོ་སྟེ། མདོར་བསྟན་གྱི་ཚུལ་ལོ། །གསང་སྔགས་རིག་སྔགས་འཆང་བའི་རིགས། །ཞེས་པ་འདིས་ནི་ལས་ཀྱི་རིགས་ལ་གཟིགས་པ་བསྟན་ཏེ། གསང་སྔགས་ནི་ཕོ་སྟེ་ཐབས་སོ། །རིག་སྔགས་ནི་མོ་སྟེ་ཤེས་
རབ་པོ། །བྱེད་པ་ལས་ནི་གསང་སྔགས་ཀྱིས་ནི་ལོག་པར་རྟོགས་པ་སེལ་ལོ། །རིག་སྔགས་ཀྱིས་ནི་མ་རིག་པ་སེལ་ཏོ། །དེ་ཡང་། འདའ་བར་བྱ་བ་མ་ཡིན་ལ། །དབྱེ་བར་དཀའ་བ་གསང་བ་ཉིད། །གསང་སྟེ་བསྒྲུབ་ཕྱིར་སྔགས་པ་ནི། །གསང་སྔགས་ཞེས་བྱའི་ངེས་པར་བརྗོད། །ཅེས་པ་
དང་། ངག་གི་རིགས་མཆོག་བསྒྲུབ་པ་དང་། །དངོས་གྲུབ་འདོད་པ་ཡོད་པ་སྟེ། །དེ་ཕྱིར་རིག་སྔགས་ཞེས་བྱའོ། །ཞེས་གསུངས་པ་ལྟ་བུའོ། །འཆང་བ་ནི་འཛིན་པའོ། །འདིའི་དགོས་པ་ནི་གདུལ་བྱ་ཕྲག་དོག་དང་ལེ་ལོ་ཤས་ཆེ་བ་རྣམས་འདུལ་བའོ། །རིགས་གསུམ་ལ་ནི་རྣམ་པར་གཟིགས། །
ཞེས་པ་འདིས་ནི་དེ་བཞིན་གཤེགས་པའི་རིགས་ལ་གཟིགས་པ་བསྟན་ཏེ། རིགས་གསུམ་ནི་སྐུ་གསུང་ཐུགས་སོ། །རིགས་དེ་གསུམ་རྣམ་སྣང་ལ་འདུས་པས་དེ་སྐད་ཅེས་བྱའོ། །འདིའི་དགོས་པ་ནི་གཏི་མུག་ཤས་ཆེ་བ་རྣམས་འདུལ་བར་བྱེད་པའོ། །འཇིག་རྟེན་འཇིག་རྟེན་འདས་
པའི་རིགས། །ཞེས་པ་འདིས་ནི་པདྨའི་རིགས་ལ་གཟིགས་པ་བསྟན་ཏེ། སོ་སོར་རྟོག་པའི་ཡེ་ཤེས་ཀྱིས་འཇིག་རྟེན་དང་འཇིག་རྟེན་ལས་འདས་པ་གཉིས་མཁྱེན་ཏེ། དེ་ཡང་གཉིས་སུ་སྣང་ལ་གཉིས་སུ་མ་ཞོན་པའི་ཚུལ་དུ་མཁྱེན་ནོ། །དེས་ན་འཇིག་རྟེན་ལས་འདས་པ་དང་། འཇིག་རྟེན་
པ་གཉིས་ཀའི་རིགས་སོ། །འདིའི་དགོས་པ་ནི་འདོད་ཆགས་ཤས་ཆེ་བ་རྣམས་འདུལ་བར་བྱེད་དོ། །འཇིག་རྟེན་སྣང་བྱེད་རིགས་ཆེན་དང་། །ཞེས་པ་འདིས་ནི་རྡོ་རྗེའི་རིགས་ལ་གཟིགས་པ་བསྟན་ཏེ། འཇིག་རྟེན་གྱི་ཆོས་ཐམས་ཅད་སྣང་ལ་རང་བཞིན་མེད་པར་མེ་ལོང་གི་གཟུགས་བརྙན་

49-1-9a

ལྟར་རྟོགས་པས་འཇིག་རྟེན་སྣང་བར་བྱེད་དོ། །ཐམས་ཅད་ཀྱི་ཐུགས་ཀྱི་ངོ་བོར་གྱུར་པས་རིགས་ཆེན་ནོ། །འདིའི་དགོས་པ་ནི་ཞེ་སྡང་ཤས་ཆེ་བ་རྣམས་འདུལ་བར་བྱེད་དོ། །ཕྱག་རྒྱ་ཆེན་པོའི་རིགས་མཆོག་དང་། །ཞེས་པ་འདིས་ནི་རྩ་བ་བྱང་ཆུབ་ཀྱི་སེམས་རྡོ་རྗེའི་རིགས་
བསྟན་ཏེ། ཕྱག་རྒྱ་ལ་སྤྱིར་དུ་མ་ཡོད་ཀྱང་འདིར་རྒྱས་འདེབས་པའི་ཕྱིར་ཕྱག་རྒྱ་སྟེ། ཆོས་ཐམས་ཅད་སྐྱེ་བ་མེད་པའི་རྒྱས་འདེབས་པའི་མཆོག་གོ། །འདིའི་དགོས་པ་ནི་སྤྲོས་པའི་མཚན་མ་ཐམས་ཅད་འཇོམས་པར་བྱེད་དོ། རིགས་ཆེན་གཙུག་ཏོར་ཆེར་གཟིགས་ནས། །
ཞེས་པ་འདིས་ནི་རིན་པོ་ཆེའི་རིགས་ལ་གཟིགས་པ་བསྟན་ཏེ། རིན་ཆེན་འབྱུང་ལྡན་ནི་སངས་རྒྱས་ཀྱི་ཆེ་བའི་ཡོན་ཏན་ཐམས་ཅད་འབྱུང་བའི་རིགས་ཡིན་པས་རིགས་ཆེན་ནོ། །གཙུག་ཏོར་ནི་ཡོན་ཏན་གྱིས་མཐོ་བར་བྱས་པའོ། །དེ་ཡང་མིང་གི་རྣམ་གྲངས་ནི་གཟིགས་ཞེས་བྱ། ཏིང་ངེ་འཛིན་
ལ་སྙོམས་པར་འཇུག་ཅེས་བྱའོ། །དེ་ཡང་ཚུལ་ཇི་ལྟར་གཟིགས་ནི་ཡེ་ཤེས་ཀྱི་སྤྱན་གྱིས་ཟབ་པ་སྟོང་པ་ཉིད་ཇི་ལྟ་བའི་དོན་ལ་གཟིགས་པ་དང་། ཐུགས་རྗེའི་སྤྱན་གྱིས་རྒྱ་ཆེ་བ་ཇི་སྙེད་པ་ལ་གཟིགས་པའོ། །ཡང་གསུམ་སྟེ། སྤང་བྱ་ཉོན་མོངས་པ་དང་། དེ་སྤོང་བའི་གཉེན་པོ་ལྷའི་
རིགས་དང་། ལྷའི་རྟོག་པ་ཟློག་པར་བྱེད་པ་ཡེ་ཤེས་ལ་གཟིགས་པ་རྣམས་སུ་ཡང་སྦྱར་རོ། །ད་ནི་སྒྱུ་འཕྲུལ་དྲ་བ་མན་ངག་གི་ལེའུ་བསྟན་པའི་ཕྱིར་ཐམས་ཅད་ལ་བསྟོད་པ། ཚིག་གི་བདག་པོས་ཚིགས་སུ་བཅད། །ཅེས་པ། ཚིག་གི་བདག་པོ་ནི་བཅོམ་ལྡན་འདས་ཉིད་དོ། །ཚིགས་སུ་
བཅད་པ་ནི་རིགས་དྲུག་གི་བདག་ཉིད་ཚེག་བར་བདུན་པ་ཉིད་དུ་ཚིགས་སུ་བཅད་དེ་སྟོན་པ་གསུང་གི་མངའ་བདག་ཡིན་པས་བདག་པོ་ཞེས་ཀྱང་བྱ། རིགས་ལ་གཟིགས་པ་ཐུགས་ལ་རྟོགས་ནས། ཚིག་གི་བདག་པོས་ཚིགས་སུ་བཅད་ཅེས་བྱའོ། །གསང་སྔགས་རྒྱལ་པོ་དྲུག་ལྡན་ཞིང་། །
ཞེས་པ། ཨོཾ་བཛྲ་ཏཱིཀྵྞ་ལ་སོགས་པ་ཡེ་ཤེས་སེམས་དཔའ་དྲུག་གི་སྔགས་དྲུག་གོ། །བརྗོད་བྱའི་གཙོ་བོ་ཇི་ལྟ་བུ་ཞིག་གསུངས་ཤེ་ན། གཉིས་སུ་མེད་པར་འབྱུང་བ་དང་། །ཞེས་པ་ལ་སོགས་པ་སྟེ། གཟུང་འཛིན་གཉིས་མེད་པར་ཡེ་ཤེས་ཀྱི་སྐུའི་བདག་ཉིད་དུ་སངས་རྒྱས་པའོ། །མི་སྐྱེ་

49-1-9b

ཆོས་ཅན་འདི་གསུངས་པ། །ཞེས་པ། རིག་པ་རང་གསལ་བ་དེ་ཡང་སྐྱེ་མེད་ཀྱི་རང་བཞིན་དུ་གནས་པ་སྟེ་འབྲས་བུའི་མཆོག་གོ། །བློ་བོད་པ་བསྐྱེད་པའི་ཕྱིར་འབྲས་བུའི་ས་བསྟན་པ་ནི། ཨ་ཨཱ་ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨཿདེ་ཡང་སངས་རྒྱས་ཀྱི་ས་བཅུ་གཉིས་ལ་མཐོ་དམན་དང་རིམ་
པ་ཡོད་པ་མ་ཡིན་ཏེ། ཡེ་ཤེས་གཅིག་ལ་ཡོན་ཏན་གྱི་བྱེ་བྲག་བཅུ་གཉིས་སུ་བསྟན་པའོ། །དེ་ཡང་སངས་རྒྱས་ཀྱི་མཁྱེན་པའི་ཡེ་ཤེས་ཀྱིས་མ་རིག་པ་བཅོམ་ནས་ཤེས་བྱ་གསལ་བར་སྣང་བ་དང་། ཉོན་མོངས་པ་མ་སྤངས་པར་ཡེ་ཤེས་སུ་གསལ་བ་དང་། མཐའ་དང་དབུས་མེད་པ་དང་། མི་
འགྱུར་ཞིང་དབྱེར་མི་ཕྱེད་པ་དང་། སེམས་ཅན་གྱི་དགོས་འདོད་ཐམས་ཅད་འབྱུང་བ་དང་། འགྲོ་བའི་དོན་མཛད་ཀྱང་སྐྱོན་གྱིས་མ་གོས་པ་དང་། རྩོལ་བ་མེད་པར་གཞན་དོན་འགྲུབ་པ་དང་། ཡང་དག་པར་དཔེ་མཚོན་པ་དང་བྲལ་བ་དང་། ཕྱོགས་འདྲ་ཙམ་གྱིས་མཚོན་དུ་བཏུབ་པ་དང་། རིག་
པ་རང་བཞིན་གྱིས་འོད་གསལ་བ་དང་། ཤེས་བྱ་ཇི་ལྟ་བ་དང་ཇི་སྙེད་པ་ཐམས་ཅད་མཁྱེན་པ་དང་།  སོ་སོ་རང་རིག་པ་གཉིས་སུ་མཁྱེན་པའོ། །དེ་རྣམས་སུ་སངས་རྒྱས་ཀྱི་ཡོན་ཏན་ཇི་སྙེད་ཅིག་གསུངས་པ་ཐམས་ཅད་འདུས་པར་ཤེས་པར་བྱའོ། །དེ་ཡང་འདི་སྐད་དུ་རྡོ་རྗེ་སྙིང་པོ་རྒྱན་གྱི་རྒྱུད་
ལས། ཀུན་དུ་འོད་ཀྱི་ས་ཆེན་པོ། །དེ་ནི་ཉི་མའི་དཀྱིལ་འཁོར་འདྲ། །བདུད་རྩི་འོད་ནི་གཉིས་པ་སྟེ། །ཤིན་ཏུ་འོད་གསལ་ཟླ་བ་འདྲ། །ནམ་མཁའ་འོད་ནི་གསུམ་པ་སྟེ། །ནམ་མཁའ་ཇི་བཞིན་རབ་ཏུ་གནས། །རྡོ་རྗེ་འོད་ནི་བཞི་པ་སྟེ། །ས་དེ་ཉིད་ནི་ཡིད་དགའ་བའོ། །ལྔ་པ་རིན་ཆེན་འོད་ཅེས་
པ། །དབང་བསྐུར་བ་ལ་རབ་ཏུ་གནས། །པདྨའི་འོད་ནི་དྲུག་པ་སྟེ། །པདྨ་བཞིན་དུ་རབ་ཏུ་གྱེས། །བདུན་པ་ལས་ནི་འོད་ཅེས་བྱ། །སངས་རྒྱས་ཕྲིན་ལས་བྱེད་པར་འདོད། །བརྒྱད་པ་དཔེ་མེད་ཅེས་པ་སྟེ། །དོན་ལ་དཔེ་དང་མཉམ་པ་མིན། །དཔེ་ལྡན་ཞེས་པ་དགུ་པ་ཡིན། །ཐམས་ཅད་
དཔེ་ནི་སོ་སོར་འབིགས། །བཅུ་པ་ཤེས་རབ་འོད་ཅེས་པ། །སངས་རྒྱས་ས་ནི་བླ་ན་མེད། །བཅུ་གཅིག་ཐམས་ཅད་མཁྱེན་པ་ཉིད། །ས་ཆེན་རབ་ཏུ་འོད་གསལ་བ། །བཅུ་གཉིས་སོ་སོ་རང་རིག་པ། །སངས་རྒྱས་ཡེ་ཤེས་རབ་ཏུ་རྫོགས། །ཞེས་འབྱུང་བས་གསལ་ལོ། །

49-1-10a

དུས་གསུམ་གྱི་སངས་རྒྱས་ཐམས་ཅད་ཀྱི་ཐུགས་ཀྱི་བདག་ཉིད་དུ་འཇམ་དཔལ་ཉིད་བསྟན་པའི་ཕྱིར་སྠི་ཏོ་ཧྲྀ་དི་ནི་ཞེས་པ་ལ་སོགས་པ་སྨོས་ཏེ། སྠི་ཏོ་ཧྲྀ་དི་ནི་ཐུགས་ཀར་གནས་པའོ། །རྫྙཱ་ན་མཱུརྟི་ནི་ཡེ་ཤེས་ཀྱི་སྐུའོ། །ར་ཧཾ་བུདྡྷོ་ནི་དུས་གསུམ་གྱི་སངས་རྒྱས་སོ། །
བུདྡྷ་ནན་ནི་བདག་ཉིད་སངས་རྒྱས་ཡིན་ནོ། །ཏྲྱེེ་དྷྭ་བརྟི་ནན་ནི་དུས་གསུམ་དུ་བཞུགས་པའོ། །མཐའ་བསྡུས་པས་ནི་དུས་གསུམ་དུ་བཞུགས་པའི་སངས་རྒྱས་ཀྱི་ཡེ་ཤེས་ཀྱི་སྐུའི་བདག་ཉིད་ཐུགས་ལ་གནས་པའི་སངས་རྒྱས་ཡིན་ཞེས་པའོ། །དེ་ལ་ཤེས་རབ་ཀྱི་འཁོར་ལོ་བསྒོམ་པ་བསྟན་
པ་ནི། ཨོཾ་བཛྲ་ཏཱིཀྵྞ་ནི་རྡོ་རྗེ་རྣོན་པོའོ། །དུཿཁ་ཙྪི་ད་ནི་སྡུག་བསྔལ་གཅོད་པའོ། །པྲཛྙཱ་ཛྙཱ་ན་མཱུརྟ་ཡེ་ནི་ཡེ་ཤེས་ཀྱི་གཙུག་ཏོར་རོ། །ཛྙཱ་ན་ཀཱ་ཡ་ནི་ཡེ་ཤེས་ཀྱི་སྐུ་ཅན་ནོ། །བཱ་གཱི་ཤྭ་ར་ནི་ངག་གི་དབང་ཕྱུག་གོ། །ཨ་ར་བ་ཙ་ན་ཡ་ཏེ་ན་མཿནི་སྐྱེ་བ་མད་པའི་ཤེས་རབ་ཆགས་པ་མེད་པའི་སྤྱོད་ཡུལ་
ཞེས་པའོ། །དེ་དག་ནི་པདྨ་དང་། རྡོ་རྗེ་དང་། དེ་བཞིན་གཤེགས་པ་དང་། ལས་དང་རིན་པོ་ཆེ་དང་། བྱང་སེམས་རྡོ་རྗེའི་རིགས་ཏ། གོ་རིམས་བཞིན་དུ་སྦྱར་བར་བྱའོ། །བསྒོམ་ཞིང་སྔགས་བཟླས་པའི་ཚེ་ན་ནི་བདག་ཉིད་རྗེ་བཙུན་དུ་བསྒོམས་པའི་ཐུགས་ཀར་འཁོར་ལོ་རྩིབས་དྲུག་མུ་
ཁྱུད་དང་ལྡན་པ་ལ་སྔགས་དྲུག་པོ་འདི་བཀོད་ལ་སྤྲོ་བསྡུ་བྱ་ཞིང་བཟླས་པ་བྱའོ། །མཚན་བརྗོད་འདོན་པའི་དུས་སུ་ནི། འདི་རྣམས་མིང་གི་གཙོ་བོ་རྣམས་ཀྱི་སྒོ་ནས་བསྟོད་པ་ཡིན་པར་ཤེས་པར་བྱའོ། །ད་ནི་རྩ་བ་བྱང་ཆུབ་སེམས་ཀྱི་སྒོ་ནས་འཇམ་དཔལ་ཡེ་ཤེས་སེམས་དཔའི་ལེའུ་
བསྟན་པ་ནི། འདི་ལྟར་སངས་རྒྱས་བཅོམ་ལྡན་འདས། །ཞེས་བྱ་བ་ལ་སོགས་པ་སྨོས་ཏེ། ད་ནི་དེའི་མཚན་རྒྱས་པར་བཤད་པ་ནི་འདི་ལྟར་ཡིན་ཞེས་བྱའོ། །རྫོགས་པའི་སངས་རྒྱས་འབྱུང་བའི་རྒྱུ་ནི། ཆོས་སྐྱེ་བ་མེད་པ་བསྒོམས་པ་ལས་འབྱུང་བས། རྫོགས་པའི་སངས་རྒྱས་
ཨ་ལས་བྱུང་། །ཞེས་བྱའོ། །འོ་ན་ཡི་གེ་ཨ་གཅིག་པུ་ལས་བྱུང་བ་ཅི་ཡིན་ཞེ་ན། ཨ་ནི་ཡིག་འབྲུ་ཀུན་གྱི་མཆོག །ཅེས་པའོ། །ཅིའི་ཕྱིར་མཆོག་ཡིན་ཞེ་ན། ཆོས་ཀྱི་དོན་ཆེན་པོ་སྟོན་པའི་ཡི་གེ་ཡིན་པས། །དོན་ཆེན་ཡི་གེ་དམ་པ་ཡིན། །ཞེས་པའོ། །དེ་ཡང་ཅིའི་ཕྱིར་ན་

49-1-10b

དོན་ཆེན་སྐྱེ་བ་མེད་པའི་དོན་སྟོན་པས། ཁོང་ནས་འབྱུང་བ་སྐྱེ་བ་མེད། །ཅེས་བྱ་སྟེ། ཡི་གེ་གཞན་ནི་སོ་ལྕེ་མཆུ་དང་ཡར་རྐན་ལ་སོགས་པ་རྣམས་ལ་རག་ལུས་ལ། ཨ་ནི་དེ་རྣམས་ལ་རག་མ་ལུས་ཏེ། ཁོང་ནས་རང་འབྱུང་དུ་འབྱུང་བས་ཡི་གེ་རྣམས་ཀྱི་ནང་ན་དམ་པའོ། །དེ་ཉིད་ལ་
བརྗོད་དུ་མེད་པར་གནས་པས། ཚིག་ཏུ་བརྗོད་པ་སྤངས་པ་སྟེ། །ཞེས་བྱའོ། །བརྗོད་པའི་སྒྲ་ཐམས་ཅད་ཀྱི་རྒྱུའི་གཙོ་བོར་གྱུར་ཏེ་ངག་ཐམས་ཅད་ལ་འཇུག་པར་བྱེད་པས། བརྗོད་པ་ཀུན་གྱི་རྒྱུ་ཡི་མཆོག །ཚིག་ཀུན་རབ་ཏུ་གསལ་བར་བྱེད། །ཅེས་བྱ་བ་ལ་སོགས་པ་སྨོས་ཏེ། འོ་ན་ཉོན་
མོངས་པ་ཇི་ལྟར་སྤང་ཞེ་ན། མཆོད་པ་ཆེན་པོ་འདོད་ཆགས་ཆེ། །སེམས་ཅན་ཐམས་ཅད་དགའ་བར་བྱེད། །ཅེས་བྱ་བ་ལ་སོགས་པ་སྨོས་ཏེ། དེ་མཆོད་པ་ནི་ལྷ་མཉེས་པར་བྱེད་པའི་ཕྱིར་ན་མཆོད་པ་སྟེ། འདིར་ཉོན་མོངས་པ་མ་སྤངས་པར་ཡེ་ཤེས་སུ་གྲུབ་པ་དགོས་པ་མཐུན་ཏེ་རང་གིས་མཆོད་
པའོ། །དེ་ནས་ཀུན་ལ་སྦྱར་རོ། །ཆེན་པོའི་སྒྲ་ནི་དཔེར་ན་དུག་སེལ་བའི་སྔགས་ལ་དུག་སྔགས་ཟེར་བ་ལྟར་མི་མཐུན་པའི་ཕྱོགས་འཇོམས་པས་ཆེན་པོའོ། །འདོད་ཆགས་ནི་ཉོན་མོངས་མཉམ་པ་ཉིད་ལ་ངང་གིས་ཆགས་པའོ། །དེས་ལོག་པའི་འདོད་ཆགས་དང་བྲལ་བར་བྱེད་ཅིང་ཟག་མེད་
ཀྱི་དགའ་བསྐྱེད་པར་བྱེད་པའོ། །མཆོད་པ་ཆེན་པོ་ཞེ་སྡང་ཆེ། །ཉོན་མོངས་ཀུན་གྱི་དགྲ་ཆེ་བ། །ཞེས་པ་རྣམ་པར་རྟོག་པ་འཇོམས་པའི་ཞེ་སྡང་མངའ་ལ། ཞེ་སྡང་རང་ཁ་མ་འཇོམས་པས་དགྲ་ཆེ་བའོ། །མཆོད་པ་ཆེན་པོ་གཏི་མུག་ཆེ། །གཏི་མུག་བློ་སྟེ་གཏི་མུག་སེལ། །ཞེས་པ་
ཆོས་ཐ་དད་དུ་བྱེད་པ་མེད་པའི་དོན་གྱི་གཏི་མུག་དང་ལྡན་པས་དེས་གཏི་མུག་རང་ཁ་མ་སེལ་བའོ། །མཆོད་པ་ཆེན་པོ་ཁྲ་བ་ཆེ། །ཁྲོ་བ་ཆེན་པོ་དགྲ་ཆེ་བ། །ཞེས་སྨོས་ཏེ། ཉོན་མོངས་པ་སྐྱེར་མི་སྟེར་བས་ཁྲོ་བ་ཆེ་ལ། དེས་ཁོང་ཁྲོ་རང་ཁ་མ་འཇོམས་པས་དགྲ་ཆེ་བའོ། །མཆོད་པ་
ཆེན་པོ་ཆགས་པ་ཆེ། །ཆགས་པ་ཐམས་ཅད་སེལ་བར་བྱེད། །ཅེས་པ་དོན་ཟག་མེད་ཀྱི་བདེ་བ་ལ་ཆགས་ལ། སེར་སྣའི་ཆགས་ཞེན་རང་ཁ་མ་སེལ་བར་བྱེད་དོ། །དེ་ལ་གོང་མ་གོང་མ་ནི་འཇོམས་བྱེད། འོག་མ་འོག་མ་ནི་གཞོམ་བྱའོ། །དེ་དག་ལ་མན་ངག་ཏུ་སྦྱར་ན་རྣམ་པ་བཞི་

49-1-11a

སྟེ། ཉོན་མོངས་པ་དེ་དག་ལ་ཞེན་པའི་གདུལ་བྱ་ལ་དེ་དག་མ་སྤངས་པའི་རྗེས་སུ་མཐུན་པའི་སྤྱོད་པའི་ཐབས་ཀྱིས་གྲོལ་བར་བྱེད་པས་སྤྱོད་མཐུན་གྲོལ་བའི་མཆོད་པའོ། །ཉོན་མོངས་པ་ཡེ་ཤེས་ལྔར་གནས་གྱུར་པས་གནས་གྱུར་ཡེ་ཤེས་ཀྱི་མཆོད་པའོ། །ཉོན་
མོངས་པ་ལྔ་ལས་གྲོལ་བས་རིགས་ལྔའི་སྐུ་ཕྱག་རྒྱ་ཆེན་པོ་ཐོབ་པས་གྲོལ་ཐར་ཕྱག་རྒྱའི་མཆོད་པའོ། །ཉོན་མོངས་པ་ལ་བརྟགས་ན་ངོ་བོ་གྲུབ་པ་མེད་དེ་ཆོས་ཉིད་དུ་གནས་པས་རང་བཞིན་དག་པའི་མཆོད་པའོ། །འདོད་པ་ཆེན་པོ་བདེ་བ་ཆེ། །དགའ་བ་ཆེན་པོ་མགུ་བ་ཆེ། །
ཞེས་པ་སེམས་ཅན་ཐར་པར་འདོད་པའི་བློ་ཡོད་པ་ལ་ཐར་པའི་བདེ་བསྐྱེད་པར་བྱེད་ཅིང་ཆོས་བསྟན་པས་དགའ་ལ། །དོན་རྟོགས་པས་མགུ་བར་བྱེད་པའོ། །གཟུགས་ཆེ་ལུས་ཀྱང་ཆེ་བ་སྟེ། །ཁ་དོག་ཆེ་ཞིང་ལུས་བོང་ཆེ། །མིང་ཡང་ཆེ་ཞིང་རྒྱ་ཆེ་བ། །དཀྱིལ་འཁོར་ཆེན་པོ་
ཡངས་པ་ཡིན། །ཞེས་སྣང་ལ་རང་བཞིན་མེད་པའི་གཟུགས་དང་། གདོལ་པ་ཅན་གྱི་ལུས་ལྟ་བུར་ཡང་སྤྲུལ་ཏེ། དེ་ཡང་ཡེ་ཤེས་ལས་གྲུབ་པ་ཡིན་པས་ཆེ་ཞེས་བྱའོ། །ནང་ན་ཡེ་ཤེས་གསལ་བའི་རྟགས་སུ་སྐུ་གཟི་མདངས་དང་ལྡན་པས་ཁ་དོག་ཆེ་བའོ། །གཞན་ཟིལ་
གྱིས་གནོན་པས་ལུས་བོང་ཆེ་བའོ། །གྲགས་པ་ཆེན་པོ་ཡོད་པས་མིང་ཆེ་བའོ། །བསོད་ནམས་ཀྱི་ཚོགས་རྒྱས་པས་རྒྱ་ཆེ་བའོ། །འདིར་ཟབ་པ་དང་རྒྱ་ཆེ་བ་གཉིས་སུ་མེད་པ་དང་། ནོ་པི་ཀ་མཐའ་དག་འབྱུང་བས་དཀྱིལ་འཁོར་ཆེན་པོའོ། །ཀུན་ལ་ཁྱབ་པ་དང་གང་ཡང་
བཀག་པ་མེད་པས་ཡངས་པའོ། །དེ་ལ་ཡེ་ཤེས་ཀྱི་ཁྱད་པར་ནི། ཤེས་རབ་མཚོན་ཆེན་འཆང་བ་སྟེ། །ཉོན་མོངས་ལྕགས་ཀྱུ་ཆེ་བའི་མཆོག །གྲགས་ཆེན་སྙན་གྲགས་ཆེན་པོ་སྟེ། །སྣང་བ་ཆེན་པོ་གསལ་བ་ཆེ། །ཞེས་སྨོས་ཏེ། ཤེས་རབ་ཀྱི་མཚོན་གྱིས་ཉོན་མོངས་པ་འཇོམས་
པ་སྟེ། དཔེར་ན་ཉོན་མོངས་པ་གླང་པོ་ཆེ་སྨྱོན་པ་ལ་ཡེ་ཤེས་ལྕགས་ཀྱུས་འདུལ་བ་ལྟ་བུའོ། །དེ་ཡང་ཁམས་གསུམ་དུ་གྲགས་པ་ཁྱད་པར་ཅན་ཡོད་པ་དང་། ནང་དུ་ཡེ་ཤེས་གསལ་བའི་རྟགས་སུ་ཕྱིར་འོད་ཟེར་གསལ་བས་བསྐོར་བའོ། །དེ་ལ་སྤྲུལ་པའི་ཚུལ་ཇི་ལྟར་འབྱུང་ཞེ་

49-1-11b

ན། མཁས་པ་སྒྱུ་འཕྲུལ་ཆེན་པོ་འཆང་། །སྒྱུ་འཕྲུལ་ཆེན་པོ་དོན་གྲུབ་པ། །སྒྱུ་འཕྲུལ་ཆེན་པོ་དགའ་བས་དགའ། །སྒྱུ་འཕྲུལ་ཆེན་པོ་མིག་འཕྲུལ་ཅན། །ཞེས་སྨོས་ཏེ། འགྲོ་བ་ལ་ཚོགས་གཉིས་རྫོགས་པར་བྱེད་པའི་ཐབས་ལ་མཁས་པ་སྟེ། སྒྱུ་མ་ལྟ་བུའི་སྤྲུལ་པས་འགྲོ་བའི་དོན་
མཛད་པའི་ཐབས་ཀྱིས་གང་འདོད་པའི་དོན་འགྲུབ་པར་བྱེད་པ་སྟེ། དེ་ཡང་། སེམས་ནི་སྒྱུ་མའི་རྣམ་པ་སྟེ། །བྱང་ཆུབ་ཀྱང་ནི་སྒྱུ་མ་འདྲ། །དཔེར་ན་སྒྱུ་མའི་མཁན་པོ་འགས། །གྱོ་མོ་ལ་ནི་སྔགས་བཟླས་ཏེ། །སྦྱོར་བ་གོམས་པས་བསྣུན་ན་ནི། །རྐང་བཞི་པ་ལ་སོགས་པའི་གཟུགས། །
ཞེན་པའི་སེམས་ལ་སྣང་བར་འགྱུར། །ཞེས་གསུངས་པ་ལྟ་བུའོ། །ཐུགས་རྗེས་འགྲོ་བའི་དོན་ལ་དགའ་བ་དང་། ཤེས་རབ་ཀྱིས་གཉིས་མེད་ཀྱི་དོན་ལ་དགའ་བའོ། །མེད་པ་འཕྲུལ་ཞིང་ཡོད་པ་བསྒྱུར་བ་དང་འདྲ་སྟེ། དོན་ཟབ་མོ་མ་རྟོགས་པ་རྣམས་ལ་མིག་འཕྲུལ་བསྟན་ནས་དངོས་
འཛིན་ཟློག་པར་བྱེད་དོ། །དེས་ཐུན་མོང་གི་ལམ་ཇི་ལྟ་བུ་སྟོན་ཞེ་ན། སྦྱིན་བདག་ཆེན་པོ་གཙོ་བོ་སྟེ། །ཚུལ་ཁྲིམས་ཆེན་པོ་འཆང་བའི་མཆོག །བཟོད་ཆེན་འཆང་བ་བརྟན་པ་པོ། །བརྩོན་འགྲུས་ཆེན་པོ་བརྟུལ་བ་ཡིན། །བསམ་གཏན་ཆེན་པོའི་ཏིང་འཛིན་གནས། །ཤེས་རབ་
ཆེན་པོ་ལུས་འཆང་བ། །སྟོབས་པོ་ཆེ་ལ་ཐབས་ཆེ་བ། །སྨོན་ལམ་ཡེ་ཤེས་རྒྱ་མཚོ་སྟེ། །ཞེས་སྨོས་ཏེ། འཁོར་གསུམ་ཡོངས་སུ་དག་པ་གཏོང་བས་སྦྱིན་པའི་གཙོ་བོའོ། །ཉེས་བྱས་མི་འབྱུང་བས་ཚུལ་ཁྲིམས་ཆེན་པོའོ། །མཚན་མས་མི་འཁྲུགས་པས་བཟོད་པ་བརྟན་
པའོ། །རྟོགས་པས་མ་གོས་པས་བརྩོན་འགྲུས་བརྟུལ་བའོ། །གཡེང་བའི་སྒྲ་མེད་པས་བསམ་གཏན་ཆེན་པོའོ། །གཉིས་མེད་རྟོགས་པས་ཤེས་རབ་ཆེན་པོའོ། །བདུད་ཀྱི་དཔུང་འཇོམས་པས་སྟོབས་ཆེ་བའོ། །བདག་དང་གཞན་གྲོལ་བར་བྱེད་པའི་ཐབས་སྣ་ཚོགས་མངའ་
བས་ཐབས་ཆེ་བར་འགྱུར་རོ། །བདག་དང་གཞན་གྲོལ་བར་བྱེད་པའི་སྨོན་ལམ་མངའ་བས་དང་། ཇི་ལྟ་བ་དང་ཇི་སྙེད་པ་མཁྱེན་པའི་ཡེ་ཤེས་མངའ་བ་སྟེ། རྒྱ་ཆེ་བ་དང་། སྣང་ལ་ཞེན་པ་མེད་པ་རྒྱ་མཚོ་དང་འདྲའོ། །དེ་ལྟར་ཕ་རོལ་ཏུ་ཕྱིན་པ་བཅུ་དང་རྗེ་བཙུན་ལྡན་ལ། གཞན་ལ་

49-1-12a

ཡང་སྟོན་པར་མཛད་དོ། །བྱམས་ཆེན་རང་བཞིན་དཔག་ཏུ་མེད། །སྙིང་རྗེ་ཆེན་པོ་བློ་ཡི་མཆོག །ཅེས་པ་འགྲོ་བ་ལ་བུ་གཅིག་པའི་མ་བཞིན་དུ་བྱམས་ལ། དེ་ཉིད་ལ་མ་ཞེན་པས་བྱམས་པ་ཆེན་པོའོ། །རིས་སུ་ཆེ་བ་དང་། རེས་འཇོག་མེད་པས་དཔག་ཏུ་མེད་དོ། །
འགྲོ་བ་ལ་སྙིང་རྗེ་རྒྱུན་མི་འཆད་པས་ཆེ་བའོ། །དེ་ཉིད་ལའང་མ་ཞེན་པས་བློའི་མཆོག་གོ། །འོ་ན་ཚད་མེད་པ་བཞི་ཡོད་པ་ལ་དགའ་བ་དང་བཏང་སྙོམས་མ་སྨོས་པ་ཅི་ཡིན་ཞེ་ན། དེ་ནི་ཆོས་ཟླས་དབྱེ་བ་སྟེ་ཤུགས་ལ་བསྟན་ཏོ། །ཐབས་ཤེས་རབ་ཀྱི་ཁྱད་པར་ཅི་ཞེ་ན། ཤེས་རབ་ཆེན་པོ་བློ་ཆེན་
ལྡན། །མཁས་པ་ཆེན་པོ་ཐབས་ཆེ་བ། །ཞེས་སྨོས་ཏེ། ཆོས་རབ་ཏུ་རྣམ་པར་ཕྱེ་ནས་གཉིས་མེད་རྟོགས་པའི་ཤེས་རབ་ཆེན་པོ་མངའ་བ་སྟེ། དེས་འགྲོ་བའི་དོན་བྱེད་པའི་བློ་གྲོས་དང་ལྡན་པའི་སྒོ་ནས་ཐབས་ཀྱི་བྱ་བ་ལ་མཁས་ཏེ། གདུལ་བྱའི་བསམ་པ་དང་སྦྱར་ནས་གང་ལ་ཇི་ལྟར་འདུལ་
བའི་ཐབས་སྣ་ཚོགས་སྟོན་པའོ། །ཐབས་དང་ཤེས་རབ་ནི་ཁྱབ་ཆེ་སྟེ། ལམ་དང་འབྲས་བུས་བསྡུས་པ་ཡོ་ལ་གནས་སོ། །འོ་ན་རྫུ་འཕྲུལ་གྱི་སྒོ་ཇི་ལྟ་བུས་དོན་མཛད་ཅེ་ན། རྫུ་འཕྲུལ་ཆེན་པོའི་སྟོབས་དང་ལྡན། །ཤུགས་ཆེན་མགྱོགས་པ་ཆེན་པོ་སྟེ། །རྫུ་འཕྲུལ་ཆེན་པོ་ཆེར་གྲགས་
པ། །སྟོབས་ཆེན་ཕ་རོལ་གནོན་པ་པོ། །ཞེས་སྨོས་ཏེ། སྟོད་ནས་མེ་འབར་བ་དང་། སྨད་ནས་ཆུ་འབྲུབ་པ་དང་། གཅིག་དུ་མར་བྱེད་པ་དང་། དུ་མ་གཅིག་ཏུ་བྱེད་པ་དང་། སྟོང་གསུམ་ཕྱག་རྒྱར་ཤོང་བ་དང་། ཕྱག་རྒྱ་སྟོང་གསུམ་དུ་སྤྲུལ་པ་ལ་སོགས་པ་དང་། ཚུར་མི་བརྫི་བ་དང་། གཞན་
ཕར་འཇོམས་པས་སྟོབས་སོ། །འགྲོ་བའི་དོན་བྱེད་པ་ལ་ཡིད་ལྟར་མགྱོགས་པའི་ཤུགས་དང་ལྡན་ཞིང་། ཉན་ཐོས་དང་། རང་རྒྱལ་དང་། འཇིག་རྟེན་པ་དང་། བྱང་ཆུབ་སེམས་དཔའ་རྣམས་ལ་ཆེར་གྲགས་སོ། །ཡེ་ཤེས་ཀྱི་སྟོབས་ཀྱིས་བདུད་བཞི་ཟིལ་གྱིས་གནོན་པ་སྟེ་ཆེ་བའོ། །
དེའི་ནུས་མཐུ་དངོས་གང་ཞེ་ན། སྲིད་པའི་རི་བོ་ཆེན་པོ་འཇོམས། །མཁྲེགས་ཤིང་རྡོ་རྗེ་ཆེན་པོ་འཆང་། །དྲག་པོ་ཆེན་པོ་དྲག་ཤུལ་ཆེ། །འཇིགས་ཆེན་འཇིགས་པར་བྱེད་པ་པོ། །ཞེས་སྨོས་ཏེ། ཡང་ནས་ཡང་དུ་འགྲོ་བ་དྲུག་ཏུ་སྐྱེ་བས་སྲིད་པའོ། །དེ་རི་བོ་ལྟར་གཞོམ་དཀའ་

49-1-12b

བས། གཉིས་མེད་རྟོགས་པས་འཇོམས་པར་བྱེད་པའོ། །དེའི་མཚན་ཉིད་མི་འགྱུར་བས་མཁྲེགས་ལ། སྟོང་པ་ཉིད་རྡོ་རྗེ་ལྟར་དབྱེར་མི་ཕྱེད་པའོ། །དེ་ཡང་། མི་ཕྱེད་མི་ཆོད་མི་ཤིགས་པས། །སྟོང་པ་ཉིད་ལ་རྡོ་རྗེར་བཤད། །ཅེས་པ་ལྟ་བུའོ། །དེ་ཡང་དོན་གྱི་སྒོ་ནས་བག་ཆགས་
ཐམས་ཅད་འཇོམས་པས་དྲག་པོ་ཆེ་ལ་རྟགས་ཀྱི་སྒོ་ནས་གདུག་པ་ཅན་ཐམས་ཅད་འདུལ་བར་བྱེད་པའི་དྲག་པོའི་གཟུགས་སུ་སྤྲུལ་པའོ། །དེས་གང་འཇིགས་པར་བྱེད་ན། ཁྱབ་འཇུག་དང་། མ་ཧཱ་དེ་བ་ལ་སོགས་པ་འཇིགས་ཆེན་རྣམས་རྗེ་བཙུན་གྱིས་འཇིགས་པར་བྱེད་པའོ། །ཁྱད་
པར་གྱི་ལམ་གྱི་ཚུལ་གང་ཞེ་ན། མགོན་པོ་རིགས་མཆོག་ཆེན་པོ་སྟེ། །བླ་མ་གསང་སྔགས་ཆེ་བའི་མཆོག །ཐེག་པ་ཆེན་པོའི་ཚུལ་ལ་གནས། །ཐེག་པ་ཆེན་པོའི་ཚུལ་གྱི་མཆོག །ཅེས་སྨོས་ཏེ། གདུལ་བྱའི་མགོན་སྐྱབས་མཛད་པའི་སྐུ་གསུང་ཐུགས་ཀྱི་ལྷའི་རིགས་ལ་མཆོག་
ཏུ་གྱུར་ཅིང་འགྲོ་བ་ལ་དམ་པའི་ཆོས་ཉེ་བར་སྟོན་པས་བླ་མ། ཐབས་དང་ཤེས་རབ་ཁྱད་པར་ཅན་སྟོན་པས་གསང་སྔགས་ཆེ་བའི་མཆོག་གོ། །དེ་ཡང་། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་པས། །ས་དང་ཕ་
རོལ་ཕྱིན་པའོ། །སྔགས་ཀྱི་བསྟན་པ་ཁྱད་པར་འཕགས། །ཞེས་གསུངས་པ་ལྟ་བུའོ། །དེ་ཡང་ཐེག་པ་ཆེན་པོ་ནི་ཤེས་རབ་དང་སྙིང་རྗེས་ཁྱད་པར་དུ་བྱས་པའོ། །སྐལ་བ་ཅན་དེ་ལ་གཟུད་པའི་ཕྱིར། །རང་ཉིད་ཀྱང་དེ་ལ་གནས་པའི་ཚུལ་སྟོན་ན། །ཐེག་པ་ཆེན་པོ་འདིའི་ཚུལ་ཕ་
རོལ་ཏུ་ཕྱིན་པ་ལས་མཆོག་ཏུ་གྱུར་ཏོ། །གང་གིས་ན་འཁོར་འདས་དབྱེར་མེད་དུ་སྟོན་པའོ། །ད་ནི་ཆོས་ཀྱི་དབྱིངས་ཀྱི་སྒོ་ནས་འཇམ་དཔལ་ཡེ་ཤེས་སེམས་དཔའི་མཚན་བསྟན་པའི་ཕྱིར། སངས་རྒྱས་རྣམ་པར་སྣང་མཛད་ཆེ། །ཐུབ་པ་ཆེན་པོ་ཐུབ་ཆེན་ལྡན། །གསང་སྔགས་
ཚུལ་ཆེན་ལས་བྱུང་བ། །གསང་སྔགས་ཚུལ་ཆེན་བདག་ཉིད་ཅན། །ཞེས་སྨོས་ཏེ། སྒྲིབ་པ་སངས་ཤིང་ཡེ་ཤེས་རྒྱས་པས་གདུལ་བྱ་ལ་རྣམ་པ་སྣ་ཚོགས་སུ་སྣང་ཞིང་། གཞན་དོན་མཛད་པས་ཆེའོ། །སྐུ་གསུང་ཐུགས་ཀྱི་མི་དགེ་བའི་ལས་ལ་བསྲུང་མི་དགོས་པར་ཐུབ་

49-1-13a

དེ་ཡང་དུས་རྟག་ཏུ་མཉམ་པ་ལ་བཞག་པས་ཐུབ་ཆེན་ལྡན་ནོ། །བསམ་གྱིས་མི་ཁྱབ་པའི་མཐུ་སྟོན་པ་དང་། འཇིག་རྟེན་དང་འཇིག་རྟེན་ལས་འདས་པའི་སྲོག་བསྐུལ་བས་ན་སྔགས་སོ། །དེ་ཉིད་རྟོགས་དཀའ་བ་དང་། གཞན་ལ་བསྟན་པ་མ་ཡིན་པས་གསང་
བའོ། །ཚུལ་ནི་ལམ་མོ། །དེ་ལས་སངས་རྒྱས་འབྱུང་བ་སྟེ། དེ་ནི་ཁྱད་པར་གྱི་ལམ་མོ། །རྗེ་བཙུན་ཉིད་གསང་སྔགས་ཀྱི་ངོ་བོ་ཉིད་དུ་བཞུགས་པས་ན་བདག་ཉིད་ཅན་ནོ། །ཐུན་མོང་གི་ལམ་གང་ཞེ་ན། ཕ་རོལ་ཕྱིན་བཅུ་ཐོབ་པ་སྟེ། །ཕ་རོལ་ཕྱིན་པ་བཅུ་ལ་གནས། །ཕ་རོལ་ཕྱིན་བཅུ་
དག་པ་སྟེ། །ཕ་རོལ་ཕྱིན་པ་བཅུ་ཡི་ཚུལ། །ཞེས་སྨོས་ཏེ། ཕ་རོལ་ཏུ་ཕྱིན་པ་བཅུ་ལ་དབང་ཐོབ་ཅིང་། གཞན་དེ་ལ་གཟུད་པའི་ཕྱིར་རང་ཡང་དེ་ལ་གནས་པའི་ཚུལ་སྟོན་པ་དང་། དེ་རྣམས་ལ་མ་ཞེན་པ་དང་། དེ་དག་གི་གཞུང་ཚུལ་ལ་མཁས་པའོ། །མགོན་པོ་ས་བཅུའི་དབང་ཕྱུག་སྟེ། །
ས་བཅུ་ལ་ནི་གནས་པ་པོ། །ཞེས་པས་ནི་ཡོན་ཏན་འཕེལ་བའི་རྟེན་བྱེད་པས་ཤེས་རབ་དང་ཏིང་ངེ་འཛིན་ལས་ཞེས་བྱ་སྟེ། དེ་ཡང་འཇིག་རྟེན་ལས་འདས་པའི་སེམས་ཐོབ་པས་ས་དང་པོ་རབ་ཏུ་དགའ་བའོ། །ཚུལ་ཁྲིམས་འཆལ་བའི་དྲི་མ་དང་བྲལ་བས་གཉིས་པ་དྲི་མ་མེད་པའོ། །
མཆོག་ཏུ་གསལ་བའི་ཤེས་རབ་ཐོབ་པས་གསུམ་པ་འོད་བྱེད་པའོ། །བྱང་ཆུབ་ཀྱི་ཕྱོགས་དང་མཐུན་པའི་ཆོས་ཀྱི་འོད་འཕྲོ་བས་བཞི་པ་འོད་འཕྲོ་བའོ། །བསམ་གཏན་དང་འགྲོ་དོན་མཛད་པ་གཉིས་འཇོམས་པས་རང་གི་རྒྱུད་སྦྱང་བར་དཀའ་བར་མཛད་པས་ལྔ་པ་སྦྱང་དཀའ་བའོ། །
མཚན་མ་མེད་པའི་ཏིང་ངེ་འཛིན་མངོན་དུ་གྱུར་པས་དྲུག་པ་མངོན་དུ་གྱུར་པའོ། །མཚན་མ་ལས་རིང་དུ་སོང་བས་ན་བདུན་པ་རིང་དུ་སོང་བའོ། །ཏིང་ངེ་འཛིན་དེ་ལ་མཚན་མ་གང་གིས་ཀྱང་མི་གཡོ་བར་གནས་པས་བརྒྱད་པ་མི་གཡོ་བའོ། །གདུལ་བྱ་རྣམས་ལ་ཆོས་སྟོན་པའི་བློ་གྲོས་
ཆེན་པོ་དང་ལྡན་པས་དགུ་པ་ལེགས་པའི་བློ་གྲོས་སོ། །ཆོས་ཀྱི་ཆར་གྱིས་གདུལ་བྱའི་ཆོས་ཀྱི་ལོ་ཏོག་སྨིན་པར་བྱེད་པའི་ཡོན་ཏན་གྱི་སྤྲིན་ཆེན་པོ་དང་ལྡན་པ་ས་བཅུ་པ་ཆོས་ཀྱི་སྤྲིན་གྱི་ས་ཞེས་བྱའོ། །ས་བཅུ་ལ་དབང་བསྒྱུར་ཞིང་གཞན་ལ་འཆད་པ་དང་། གཞན་དེ་ལ་གཟུད་པར་བྱ་

49-1-13b

བའི་ཕྱིར། དེ་ལ་གནས་པའི་ཚུལ་སྟོན་པའོ། །དེར་ཡང་མ་ཟད་དེ་ཆེ་བའི་ཡོན་ཏན་དུ་མར་སྣང་བའི་ཕྱིར། ཤེས་བཅུ་རྣམ་དག་བདག་ཉིད་ཅན། །ཞེས་བྱ་བ་ལ་སོགས་པ་སྨོས་ཏེ། ཤེས་པ་བཅུ་ནི་ཆོས་ཤེས་པ་དང་། རྗེས་སུ་འགྲོ་བ་ཤེས་པ་དང་། ཕ་རོལ་གྱི་སེམས་ཤེས་པ་དང་། 
ཀུན་རྫོབ་ཤེས་པ་དང་། སྡུག་བསྔལ་ཤེས་པ་དང་། ཀུན་འབྱུང་ཤེས་པ་དང་། འགོག་པ་ཤེས་པ་དང་། ལམ་ཤེས་པ་དང་། ཟད་པ་ཤེས་པ་དང་། མི་སྐྱེ་བ་ཤེས་པ་དང་། ཤེས་པ་བཅུ་པོ་དེ་རང་བཞིན་མེད་པར་ཤེས་པས་རྣམ་དག་གོ། །དེ་རྣམས་གཞན་ལ་སྟོན་པས་ཤེས་བཅུ་རྣམ་དག་
འཆང་བ་པོ་ཞེས་བྱའོ། །རྣམ་པ་བཅུ་པོ་དོན་བཅུའི་དོན། །ཞེས་པ་རྣམ་པ་བཅུ་ནི་འཁོར་བའི་ཆོས་ཕུང་པོ་ལྔ་དང་། ཉོན་མོངས་པ་ལྔ་སྟེ་བཅུའོ། །འཁོར་བའི་ཆོས་ཐམས་ཅད་བསྡུས་ན་དེར་འདུས་སོ། །དེ་དག་རྣམ་པར་དག་པས་དོན་བཅུ་སྟེ། རིགས་ལྔ་ཡེ་ཤེས་ལྔ་སྟེ་བཅུའོ། །དེ་བཅུ་
ནི་དོན་དུ་གཉེར་བར་བྱ་བའི་འོས་ཡིན་པས་དོན་ཞེས་བྱའོ། །ཐུབ་དབང་སྟོབས་བཅུ་ཁྱབ་པའི་བདག །ཅེས་པ་ཐུབ་པ་ནི་རྒྱལ་བ་རྣམས་སོ། །དེ་རྣམས་ཀྱི་གཙོ་བོར་གྱུར་པས་ཐུབ་དབང་ངོ་། །སྟོབས་བཅུ་ནི་གནས་དང་གནས་མ་ཡིན་པ་མཁྱེན་པའི་སྟོབས་དང་། ལས་དང་འབྲས་བུ་མཁྱེན་
པའི་སྟོབས་དང་། ཁམས་རྣམས་ཇི་ལྟ་བ་བཞིན་དུ་མཁྱེན་པའི་སྟོབས་དང་། ལམ་སྣ་ཚོགས་པ་མཁྱེན་པའི་སྟོབས་དང་། ཕ་རོལ་གྱི་མོས་པ་སྣ་ཚོགས་མཁྱེན་པའི་སྟོབས་དང་། དབང་པོ་མཆོག་དང་མཆོག་མ་ཡིན་པ་མཁྱེན་པའི་སྟོབས་དང་། ཀུན་ནས་ཉོན་མོངས་པ་དང་རྣམ་པར་བྱང་བ་
མཁྱེན་པའི་སྟོབས་དང་། སྔོན་གྱི་གནས་རྗེས་སུ་དྲན་པ་མཁྱེན་པའི་སྟོབས་དང་། སྐྱེ་བ་དང་འཆི་འཕོ་མཁྱེན་པའི་སྟོབས་དང་། ཟག་བཅས་དང་ཟག་མེད་མཁྱེན་པའི་སྟོབས་མོ། །དེ་ཡང་ཐུགས་རྗེ་ཆེན་པོས་ཀུན་ལ་ཁྱབ་པའི་བདག་ཉིད་དུ་ཞུགས་པའོ། །ཐུགས་རྗེས་ཁྱབ་
པ་ཙམ་མ་ཡིན་ཏེ། གདུལ་བྱ་མ་ལུས་པའི་དོན་ཇི་ལྟར་འཚམ་པར་མཛད་པས། ཀུན་གྱི་དོན་ནི་མ་ལུས་བྱེད། །ཅེས་པ་སྨོས་པ་ཡིན་ནོ། །རྣམ་བཅུ་དབང་ལྡན་ཆེ་བ་པོ། །ཞེས་པ་རྗེ་བཙུན་ཉིད་དབང་བཅུའི་ཡོན་ཏན་དང་ལྡན་ཏེ། ཚེ་ལ་དབང་བ་དང་། སེམས་དང་། ཡོ་བྱད་

49-1-14a

དང་། ལས་དང་། སྐྱེ་བ་དང་། རྫུ་འཕྲུལ་དང་། མོས་པ་དང་། སྨོན་ལམ་དང་། ཡེ་ཤེས་དང་། ཆོས་ལ་དབང་བའོ། །དེ་ལྟར་ན་མཚན་མ་ཅན་གྱི་སྐྱོན་དུ་མི་འགྱུར་རམ་ཞེ་ན། ཐོག་མ་མེད་པ་སྤྲོས་མེད་བདག །དེ་བཞིན་ཉིད་དག་དག་པའི་བདག །ཅེས་སྨོས་ཏེ། 
ཆོས་ཉིད་ལ་ཐོག་མཐའ་མེད་པ་ལ་བརྟགས་པས་མཐའ་ཐམས་ཅད་དང་བྲལ་བས་སྤྲོས་པ་མེད་པའོ། །འགྱུར་བ་མེད་པས་དེ་བཞིན་ཉིད་དོ། །གཟུང་འཛིན་གྱི་དྲི་མ་མེད་པས་དག་པའི་བདག་གོ། །དེ་ལྟར་ན་གཞན་གྱི་དོན་ལ་ཇི་ལྟར་འདུག་ཅེ་ན། བདེན་པར་སྨྲ་ཞིང་ཚིག་མི་འགྱུར། །
ཇི་སྐད་སྨྲས་པ་དེ་བཞིན་བྱེད། །གཉིས་མེད་གཉིས་སུ་མེད་པར་སྟོན། །གཞན་མི་སླུ་བར་དོན་དང་མཐུན་པར་སྨྲ་བས་བདེན་པར་སྨྲ་ལ། གཞན་དོན་བྱེད་པར་དམ་བཅས་པ་ཁོ་ན་བཞིན་དུ་མཛད་པས་ཚིག་མི་འགྱུར་བའོ། །ཆོས་ཐམས་ཅད་སྒྱུ་མའམ་རྨི་ལམ་ལྟ་བུ་ཡིན་ནོ་ཞེས་སྨྲ་
བ་ཁོ་ན་བཞིན་དུ་རང་ཡང་སྤྱོད་པར་བྱེད་དོ། །རྗེས་སུ་མཐུན་པས་གཞན་མོས་པ་བསྐྱེད་པའི་ཕྱིར་རོ། །དེ་མི་མཐུན་པའི་ཕྱོགས་ཟིལ་གྱིས་གནོན་པར་བསྟན་པ་ནི། ཡང་དག་མཐའ་ལ་རྣམ་པར་གནས། །བདག་མེད་སེང་གེའི་སྒྲ་དང་ལྡན། །མུ་སྟེགས་རི་དྭགས་ངན་འཇིགས་བྱེད། །
ཀུན་དུ་འགྲོ་བའི་དོན་ཡོད་སྟོབས། །དེ་བཞིན་གཤེགས་པའི་ཡིད་ལྟར་མགྱོགས། །ཞེས་སྨོས་ཏེ། ཡང་དག་པའི་མཐའ་གཉིས་མེད་ལ་གནས་ནས། བདག་དང་བདག་གིར་མངོན་པར་ཞེན་པ་མེད་པའི་ཆོས་ཀྱི་སྒྲ་འཇིགས་པ་མེད་པར་སྒྲོགས་པར་བྱེད་པ། སེང་གེའི་སྒྲ་ལྟ་བུ་ལྟ་བ་
ལོག་པ་བདག་ཏུ་རྟོག་ཅིང་། ནང་པ་ལ་སྨོད་པའི་རི་དྭགས་ལྟ་བུ་ངན་པ་འཇིགས་ཤིང་སྐྲག་པར་བྱེད་ཅིང་འགྲོ་བ་ཀུན་གྱི་དོན་སྐྱེས་བུའི་སྟོབས་ལྟར་ཇི་ལྟར་ཡང་སྣང་ནས་མཛད་དོ། །དེ་ཡང་འགྲོ་བའི་དོན་ལ་དེ་ཀ་བཞིན་དུ་གཤེགས་ཏེ། མྱུར་བར་མཛད་པའི་དཔེ་ནི་ཡིད་ལྟ་བུའོ། །
དེ་ལ་སྐུའི་ཡོན་ཏན་ཇི་ལྟར་སྣང་ན། རྒྱལ་བ་རྣམ་རྒྱལ་དགྲ་ལས་རྒྱལ། །འཁོར་ལོས་སྒྱུར་བ་སྟོབས་པོ་ཆེ། །ཚོགས་ཀྱི་སློབ་དཔོན་ཚོགས་ཀྱི་མཆོག །ཚོགས་རྗེ་ཚོགས་བདག་དབང་དང་ལྡན། །མཐུ་ཆེན་གཅེས་པར་འཛིན་པ་སྟེ། །ཚུལ་ཆེན་གཞན་གྱི་དྲིང་མི་འཇོག །ཅེས་ཏེ།

49-1-14b

ཡོན་ཏན་གྱི་བགོ་སྐལ་གྱིས་མ་ཕམ་པས་རྒྱལ་བ་དང་། རྣམ་པར་རྟོག་པ་ལས་རྒྱལ་བ་དང་། དགྲ་བདུད་བཞི་ལས་རྒྱལ་བ་སྟེ། འཇིག་རྟེན་པའི་འཁོར་ལོས་སྒྱུར་བའི་རྒྱལ་པོ་ལྟར་སྤྲུལ་ནས་འགྲོ་བའི་དོན་མཛད་པས་ཀྱང་འཁོར་ལོས་སྒྱུར་བའོ། །ཆོས་ཀྱི་འཁོར་ལོ་བསྐོར་
བས་འགྲོ་བ་རྣམས་ཀྱི་ཁ་ལོ་སྒྱུར་བས་ཀྱང་འཁོར་ལོས་སྒྱུར་བའོ། །དཀྱིལ་འཁོར་གྱི་གཙོ་བོ་མཛད་པས་ཀྱང་འཁོར་ལོས་སྒྱུར་བའོ། །གཞན་གྱི་དཔུང་འཇོམས་པས་ཀྱང་སྟོབས་ཆེ་བའོ། །དེ་ཡང་ཉན་ཐོས་ཀྱི་ཚོགས་ཀྱི་སློབ་དཔོན་མཛད་ཅིང་། རང་རྒྱལ་བ་འདྲེན་པས་ན་ཚོགས་
ཀྱི་མཆོག་གོ། །བྱང་ཆུབ་སེམས་དཔའི་ཚོགས་ཀྱི་རྗེ་བོ་མཛད་ཅིང་། དེ་བཞིན་གཤེགས་པ་ཚོགས་ཀྱི་བདག་པོ་མཛད། དེ་རྣམས་ལ་དབང་བསྒྱུར་བའི་མཐུ་དང་ལྡན་པའོ། །དེར་ཡང་མ་ཟད་དེ་གཟུང་འཛིན་འཇོམས་པའི་མཐུ་ཆེན་པོ་མངའ་བས་ཤིན་ཏུ་གཅེས་པའི་ཆོས་ནི་གཉིས་མེད་ཡིན་
པས་དེ་འཆང་བས་འཛིན་པའོ། །དེས་ན་ལམ་བགྲོད་དུ་མེད་པས། གཞན་གྱིས་བཀྲི་མི་དགོས་པ་སྟེ། དེས་ན་གཞན་གྱི་དྲིང་མི་འཇོག་པའོ། །དེ་ལ་གསུང་གི་ཡོན་ཏན་ཇི་ལྟ་བུ་འབྱུང་ཞེ་ན། ཚིག་རྗེ་ཚིག་བདག་སྨྲ་མཁས་པ། །ཚིག་ལ་དབང་བ་ཚིག་མཐའ་ཡས། །ཚིག་བདེན་བདེན་
པར་སྨྲ་བ་སྟེ། །བདེན་པ་བཞི་ནི་སྟོན་པ་པོ། །ཞེས་སྨོས་ཏེ། འདིས་ནི་སོ་སོ་ཡང་དག་པར་རིག་པ་བཞི་བསྟན་ཏེ། ཚིག་རྗེ་ནི་དོན་སོ་སོ་ཡང་དག་པར་རིག་པའོ། །ཚིག་བདག་ནི་ངེས་པའི་ཚིག་སོ་སོ་ཡང་དག་པར་རིག་པའོ། །སྨྲ་བ་མཁས་པ་ནི་ཆོས་སོ་སོ་ཡང་དག་པར་རིག་པའོ། །ཚིག་
ལ་དབང་བ་ནི་སྤོབས་པ་སོ་སོ་ཡང་དག་པར་རིག་པའོ། །སྒྲ་སྐད་སྣ་ཚོགས་ཀྱིས་དོན་མཛད་པས་ཚིག་མཐའ་ཡས་སོ། །མི་སླུ་བའི་ཆོས་གསུངས་པས་ཚིག་བདེན་ལ། དེ་ཡང་ཀུན་རྫོབ་དང་དོན་དམ་པ་གཉིས་སུ་ཕྱེ་ནས་སྨྲ་བ་དང་། སྡུག་བསྔལ་དང་། ཀུན་འབྱུང་དང་། འགོག་པ་དང་། 
ལམ་སྟེ། དེ་ལྟར་བདེན་པ་བཞི་ཕྱེ་ནས་ཀྱང་སྟོན་པར་མཛད་དོ། །ངེས་པར་འབྱུང་བའི་ཆོས་སུ་ཇི་ལྟར་སྣང་ཞེ་ན། ཕྱིར་མི་ལྡོག་པ་ཕྱིར་མི་འོང་། །འདྲེན་པ་རང་རྒྱལ་བསེ་རུའི་ཚུལ། །ངེས་འབྱུང་སྣ་ཚོགས་ལས་འབྱུང་བ། །འབྱུང་བ་ཆེན་པོ་རྒྱུ་གཅིག་པོ། །དགེ་སློང་དགྲ་བཅོམ་ཟག་

49-1-15a

པ་ཟད། །འདོད་ཆགས་བྲལ་བ་དབང་པོ་ཐུལ། །བདེ་བ་རྙེད་པ་འཇིགས་མེད་ཐོབ། །ཅེས་སྨོས་ཏེ། སྤྱིར་བཟོད་པ་ཐོབ་ནས་ངན་སོང་དུ་མི་ལྡོག །ས་དང་པོ་ཐོབ་ནས་འཁོར་བར་མི་ལྡོག །ས་བརྒྱད་པ་ནོན་ནས་ཐེག་དམན་དུ་མི་ལྡོག་སྟེ། དེ་ཕྱིན་ཆད་རྫོགས་
པའི་བྱང་ཆུབ་ལས་ཕྱིར་མི་ལྡོག་སྟེ། འཁོར་བར་མི་འོང་ངོ་། །འགྲོ་བའི་དོན་དུ་སྤྲུལ་པ་ནི་མ་གཏོགས་སོ། །དེ་ལ་འདྲེན་པ་རང་རྒྱལ་ནི་ནེ་ཚོ་ལྟར་ཚོགས་ན་སྤྱོད་པའོ། །བསེ་རུ་ནི་བསེ་རུ་ལྟར་གཅིག་པུར་གནས་པའོ། །རྗེ་བཙུན་དེར་ཡང་སྤྲུལ་ལོ། །དེར་ཡང་མ་ཟད་དེ་ཐེག་པ་སྣ་ཚོགས་
ཀྱི་སྒོ་ནས་གང་ལ་གང་གིས་འདུལ་བ་དང་། ཁམས་གསུམ་ལས་ངེས་པར་འབྱུང་བའི་ལན་སྣ་ཚོགས་སྟོན་པར་མཛད་ཅིང་། འབྱུང་བ་ཆེན་པོ་ལྔར་སྣང་ནས་ཀྱང་དོན་མཛད་དེ། དེ་དག་གི་རྒྱུ་ནི་གཉིས་སུ་མེད་པའི་ཡེ་ཤེས་སོ། །དེ་ཡང་དགེ་བ་ལམ་དུ་སློང་ཞིང་། ཉོན་མོངས་པའི་དགྲ་འཇོམས་
པས་སྲིད་པར་སྐྱེ་བའི་ཟག་པ་ཟད་དོ། །འདོད་ཆགས་ལ་སོགས་པ་ཉོན་མོངས་པ་དང་བྲལ་བས་སྤྱོད་ཡུལ་གྱིས་མི་གོས་ཏེ། མིག་ལ་སོགས་ཡུལ་ལྔ་ལ་མི་ཆགས་པར་ཤར་བས། འཁོར་བའི་གཡངས་ས་འཇིགས་པར་མི་འགྱུར་རོ། །དེ་འཆད་པ་པོའི་ཚུལ་ཅི་འདྲ་ཞེ་ན། བསིལ་བར་གྱུར་པས་
རྙོག་པ་མེད། །རིག་པ་དང་ནི་རྐང་པར་ལྡན། །བདེ་གཤེགས་འཇིག་རྟེན་རིག་པའི་མཆོག །བདག་གིར་མི་འཛིན་ངར་མི་འཛིན། །བདེན་པ་གཉིས་ཀྱི་ཚུལ་ལ་གནས། །འཁོར་བའི་ཕ་རོལ་མཐར་སོན་པ། །བྱ་བ་བྱས་པ་སྐམ་སར་གནས། །ཡེ་ཤེས་འབའ་ཞིག་ལས་འབྱུང་བ། །ཞེས་
སྨོས་ཏེ། བསིལ་བ་ཆུ་ལྟ་བུའི་ཆོས་ཉིད་ཀྱིས་ཉོན་མོངས་པའི་གདུང་བ་སེལ་ཞིང་། གློ་བུར་གྱི་རྣམ་པར་རྟོག་པ་དྲི་མ་ཆུའི་རྙོག་མ་ལྟ་བུ་དང་བྲལ་ཏེ། མིག་དང་འདྲ་བའི་ལྟ་བ་རིག་པ་དང་། རྐང་པ་དང་འདྲ་བར་སྤྱོད་པ་ཟུང་འབྲེལ་དུ་ལྡན་པས་འཁོར་བའི་སྡུག་བསྔལ་དང་བྲལ་བས་བདེ་བར་གཤེགས་
པ་ལ་སེམས་ཅན་གྱི་ལས་འཕྲོ་དང་། མོས་པ་དང་སྣོད་དུ་རུང་མི་རུང་དང་། འདུལ་བའི་དུས་ལ་བབ་མ་བབ་མཁྱེན་པས་ཉན་ཐོས་དང་། རང་རྒྱལ་ལས་ཁྱད་པར་དུ་འཕགས་པས་འཇིག་རྟེན་རིག་པའི་མཆོག་གོ། །མངོན་སུམ་དུ་སྣང་བ་འདི་སྒྱུ་མ་ལྟ་བུར་མཁྱེན་པས་ཕྱི་ཡུལ་ལ་བདག་གིར་མི་

49-1-15b

འཛིན་ལ། ནང་སེམས་ལ་ངར་མི་འཛིན་ཏེ། རང་དོན་དང་གཞན་དོན་གྱི་དབང་གིས་བདེན་པ་གཉིས་ཀྱི་ཚུལ་ལ་གནས་པར་བྱེད་དོ། །འོ་ན་འཁོར་བར་མི་འགྱུར་རམ་ཞེ་ན། འཁོར་བའི་ཕ་རོལ་མཐར་སོན་ཏེ། །བྱ་བ་བྱས་ནས་སྟོབས་དང་ལྡན་པས་འདམ་ནས་འཐོན་པ་ལྟར་འཁོར་བའི་འདམ་
ནས་འཐོན་ཏེ་བྱང་ཆུབ་ཀྱི་སྐམ་ས་ལ་གནས་པའོ། །དེའི་རྒྱུ་ནི་གཉིས་སུ་མེད་པར་རྟོགས་པའི་ཡེ་ཤེས་འབའ་ཞིག་ལ་གཟུགས་སྐུ་གཉིས་འབྱུང་བའོ། །དེས་བསྟན་པའི་ཆོས་གང་ཞེ་ན། ཤེས་རབ་མཚོན་ཆེན་རྣམ་འཇོམས་པ། །དམ་ཆོས་ཆོས་རྒྱལ་གསལ་བར་ལྡན། །འཇིག་རྟེན་
སྣང་བར་བྱེད་པའི་མཆོག །ཅེས་བྱ་བ་ལ་སོགས་པ་སྨོས་ཏེ། ཤེས་རབ་མཚོན་ལྟ་བུས་ཉོན་མོངས་པ་འཇོམས་པའོ། །དམ་པའི་ཆོས་རྒྱལ་པོ་ལྟ་བུ་ཐུགས་ལ་གསལ་བར་ལྡན་པས་འཇིག་རྟེན་པ་ལ་ཡེ་ཤེས་སྣང་བར་བྱེད་པའོ། །དོན་ཕྲ་མོ་ཙམ་མ་ཡིན་ཏེ་ཐར་པ་ལ་སྦྱོར་བའི་མཆོག་གོ། །དེས་
གཞན་དོན་འབྱུང་བའི་ཚུལ་ནི། ཆོས་ཀྱི་དབང་ཕྱུག་ཆོས་ཀྱི་རྒྱལ། །ལེགས་པའི་ལམ་ནི་སྟོན་པ་པོ། །དོན་གྲུབ་བསམ་པ་གྲུབ་པ་སྟེ། །ཞེས་སྨོས་ཏེ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལ་རྗེ་བཙུན་ཉིད་དབང་སྒྱུར་བས་ཆོས་ཀྱི་དབང་ཕྱུག་གོ། །དེས་གདུལ་བྱ་རྣམས་ཉོན་མོངས་པ་ལས་རྒྱལ་
བར་བྱས་ནས་ཕྱིན་ཅི་མ་ལོག་པར་ལེགས་པའི་ལམ་ཇི་ལྟར་འཚམ་པར་བསྟན་ཏེ། སེམས་ཅན་གྱི་དོན་དང་བསམ་པ་གྲུབ་པར་བྱེད་པའོ། །འོ་ན་རྗེ་བཙུན་ཉིད་རྟོག་བཅས་སུ་མི་འགྱུར་རམ་ཞེ་ན། ཀུན་དུ་རྟོག་པ་ཐམས་ཅད་སྤངས། །རྣམ་པར་མི་རྟོག་དབྱིངས་མི་ཟད། །ཆོས་དབྱིངས་དམ་པ་
ཟད་མི་ཤེས། །ཞེས་སྨོས་ཏེ། གཞན་དོན་མཛད་ཀྱང་རྟོག་པ་མེད་དེ། ཡང་དག་པའི་ཡེ་ཤེས་དང་ལོག་རྟོག་འགལ་བའི་ཕྱིར་རོ། །རྣམ་པར་མི་རྟོག་ཀྱང་དབྱིངས་ལས་ཡོན་ཏན་ཟད་པ་མེད་པར་འབྱུང་སྟེ། ཡོན་ཏན་གྱི་འབྱུང་ཁུངས་ཆོས་ཀྱི་དབྱིངས་ལ་ཟད་མི་ཤེས་པའོ། །དེ་ཚོགས་ཇི་
ལྟར་རྫོགས་ཤེ་ན། བསོད་ནམས་ལྡན་པ་བསོད་ནམས་ཚོགས། །ཡེ་ཤེས་ཡེ་ཤེས་ཁྱད་པར་ཆེ། །ཡེ་ཤེས་ལྡན་པ་ཡོད་མེད་ཤེས། །ཚོགས་གཉིས་ཚོགས་ནི་བསགས་པའོ། །ཞེས་སྨོས་ཏེ། རྗེ་བཙུན་ཉིད་ཡེ་ནས་བསོད་ནམས་ཀྱི་ཚོགས་དང་ལྡན་ལ། གཞན་དེ་ལ་གཞུག་པའི་

49-1-16a

ཕྱིར་ཉིད་ཀྱང་ཚོགས་སོགས་པའི་ཚུལ་སྟོན་པའོ། །ཡེ་ཤེས་ཀྱི་ཚོགས་དང་ཡང་ལྡན་ཏེ། དེ་ཡང་ཉན་ཐོས་དང་རང་རྒྱལ་བའི་ཡེ་ཤེས་ལས་ཀྱང་། བྱང་ཆུབ་སེམས་དཔའི་ཡེ་ཤེས་ཁྱད་པར་ཆེ་སྟེ། དེ་ལས་ཀྱང་ཁྱད་པར་དུ་གྱུར་པ་དེ་བཞིན་གཤེགས་པའི་ཡེ་ཤེས་
དང་ལྡན་པས། ཡོད་པ་ཞེས་བྱ་བ་ཇི་སྙེད་པ་དང་། མེད་པ་ཞེས་བྱ་བ་ཇི་ལྟ་བ་ཤེས་པ་སྟེ། དེ་ལྟར་ཚོགས་གཉིས་རྫོགས་པས་ནི་ཚོགས་བསགས་པ་ལས་འབྱུང་བར་བསྟན་པའོ། །ཚོགས་བསགས་པ་ལས་སངས་རྒྱས་ཀྱི་སྐུ་ཇི་ལྟར་འབྱུང་ཞེ་ན། རྟག་པ་ཀུན་རྒྱལ་རྣལ་འབྱོར་ཅན། །བསམ་
གཏན་བསམ་བྱ་བློ་ལྡན་མཆོག །སོ་སོ་རང་རིག་སྤྱོད་ཡུལ་བ། །མཆོག་གི་དང་པོ་སྐུ་གསུམ་འཆང་། །ཞེས་པ་ལ་སོགས་པ་སྨོས་ཏེ། དོན་དམ་ཆོས་ཀྱི་སྐུ་མི་འགྱུར་བ་དེ་རྣམ་རྟོག་གི་སྒྲ་ལས་རྒྱལ་ཞིང་། ཐབས་དང་ཤེས་རབ་ཟུང་དུ་འབྲེལ་བས་རྣལ་འབྱོར་ཏེ། དེ་ཡང་འདི་སྐད་དུ། 
ཐབས་དང་ཤེས་རབ་སྙོམས་འཇུག་པ། །རྣལ་འབྱོར་ཞེས་སུ་བརྗོད་པ་ཡིན། །ཞེས་གསུངས་པ་ལྟ་བུའོ། །རྣམ་པར་མི་རྟོག་པའི་སྙིང་པོ་ལ་རྣམ་པར་རྟོག་པ་མི་གཡོ་བས་བསམ་གཏན། དེ་སངས་རྒྱས་དོན་དུ་གཉེར་བ་རྣམས་ཀྱིས་བསམ་པར་བྱ་བའི་འོས་ཡིན་པས་བསམ་བྱ། གཉིས་
མེད་རྟོགས་པས་བློ་དང་ལྡན་པའི་མཆོག་གོ། །དེ་ཡང་མཁྱེན་ཚད་ནི། ཆོས་སྤྱི་དང་རང་གི་མཚན་ཉིད་མ་འདྲེས་པར་སོ་སོ་རང་གིས་རིག་པའོ། །དེ་ལ་མ་ཞེན་པ་ནི་མི་གཡོ་བའོ། །དེ་ལྟ་བུ་ནི་སྐུ་ཐམས་ཅད་ཀྱི་མཆོག་ཏུ་གྱུར་པ་སྟེ། སྐུའི་བྱེ་བྲག་གཞན་འབྱུང་བའི་དངོས་པོ་ལ་དེ་ཐོབ་དགོས་པས་
དང་པོ། དེའི་ཡོན་ཏན་གྱི་ཁྱད་པར་སྐུ་གསུམ་དུ་སྣང་བའོ། །དེ་ལས་སྐུ་དང་ཡེ་ཤེས་ཀྱི་བྱེ་བྲག་ཇི་ལྟར་འབྱུང་ཞེ་ན། སངས་རྒྱས་སྐུ་ལྔའི་བདག་ཉིད་ཅན། །ཁྱབ་བདག་ཡེ་ཤེས་ལྔ་ཡི་བདག །སངས་རྒྱས་ལྔ་བདག་ཅོད་པན་ཅན། །སྤྱན་ལྔ་ཆགས་པ་མེད་པ་འཆང་། །སངས་རྒྱས་
ཐམས་ཅད་སྐྱེད་པ་པོ། །སངས་རྒྱས་སྲས་པོ་དམ་པའི་མཆོག །ཅེས་སྨོས་ཏེ། སྐུ་ལྔ་ནི་ཆོས་ཀྱི་སྐུ་དང་། ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུ་དང་། རྡོ་རྗེ་ལྟ་བུའི་སྐུ་དང་། མངོན་པར་བྱང་ཆུབ་པའི་སྐུའོ། །ཁྱབ་བདག་ནི་ཆོས་ཀྱི་དབྱིངས་ཀྱིས་སྣོད་བཅུད་ཀུན་ལ་ཁྱབ་པའོ། །

49-1-16b

ཡེ་ཤེས་ལྔ་ནི་སླད་དུ་བཤད་ཟིན་ཏོ། །སངས་རྒྱས་ལྔ་ནི་རྣམ་པར་སྣང་མཛད་ལ་སོགས་པ་ལྔའོ། །ཡེ་ཤེས་ལྔ་ལས་སངས་རྒྱས་ལྔས་བརྒྱན་པ་ཅོད་པན་ཅན་ཞེས་བྱའོ། །སྤྱན་ལྔ་ནི་ཤའི་སྤྱན་དང་། ལྷའི་སྤྱན་དང་། ཤེས་རབ་ཀྱི་སྤྱན་དང་། ཆོས་ཀྱི་སྤྱན་དང་། སངས་རྒྱས་ཀྱི་སྤྱན་ནོ། །དེ་རྣམས་
ལ་ཐོགས་ཆགས་མེད་པས་མངའ་བའོ། །བྱང་ཆུབ་ཀྱི་སེམས་དེ་ཁོ་ན་ཉིད་རྟོགས་ནས་སངས་རྒྱས་ཐམས་ཅད་སྐྱེད་པའི་ཡུམ་དུ་འགྱུར་ཞིང་། ས་ལ་གནས་པའི་བྱང་ཆུབ་སེམས་དཔའ་རྣམས་ནི་སངས་རྒྱས་ཀྱི་སྲས་སོ། །འོ་ན་ཉན་ཐོས་རྣམས་སྲས་དམ་པ་མིན་པ་ཅིའི་ཕྱིར་ཞེ་ན། དཔེར་ན། 
འཁོར་ལོས་སྒྱུར་བའི་རྒྱལ་པོ་ལ་སྲས་སྟོང་ཡོད་ཀྱང་། མཚན་དང་ལྡན་པ་གཅིག་སྲས་ཀྱི་དམ་པར་འཛིན་པ་དེ་བཞིན་དུ། ཉན་ཐོས་དང་རང་རྒྱལ་ཤེས་རབ་དང་སྙིང་རྗེ་ཆུང་བས་སངས་རྒྱས་ཀྱི་རིགས་འཛིན་ཅིང་མཛད་པ་སྒྲུབ་མི་ནུས་པས་སྲས་ཀྱི་དམ་པ་མ་ཡིན་ནོ། །བྱང་ཆུབ་སེམས་དཔའ་ནི་
སྙིང་རྗེ་དང་ཤེས་རབ་ཆེ་བས་སངས་རྒྱས་ཀྱི་རིགས་འཛིན་ཅིང་མཛད་པ་སྒྲུབ་པས་སྲས་པོ་དམ་པའོ། །གནས་སྐབས་སུ་བྱང་ཆུབ་སེམས་དཔའི་གཟུགས་སུ་རྗེ་བཙུན་ཉིད་བཞུགས་ནས་འགྲོ་བའི་དོན་མཛད་པས་དེ་སྐད་ཅེས་བྱའོ། །དེའི་མཛད་པ་ཅི་ཞེ་ན། ཤེས་པ་སྲིད་འབྱུང་སྐྱེ་གནས་མེད། །ཆོས་
ལས་བྱུང་བ་སྲིད་པ་སེལ། །གཅིག་ཏུ་སྲ་མཁྲེགས་རྡོ་རྗེའི་བདག །སྐྱེས་མ་ཐག་ཏུ་འགྲོ་བའི་བདག །ཅེས་སྨོས་ཏེ། དེ་ཁོ་ན་ཤེས་པས་སྲིད་པ་ལས་འབྱུང་སྟེ། འཁོར་བར་སྐྱེ་བའི་གནས་མེད་དོ། །ཆོས་ཀྱི་སྐུ་རྟོགས་པ་ལས་ཡེ་ཤེས་འབྱུང་སྟེ། དེ་སྲིད་པའི་རྒྱུ་ལས་དང་ཉོན་མོངས་པ་
སེལ་ལོ། །གང་གིས་སེལ་ན་ཡེ་ཤེས་དྲུག་རོ་གཅིག་པ། གཉེན་པོ་མེད་པ། དབྱེར་མེད་པ་དེས་སེལ་ལོ། །དུས་ནམ་སེལ་ན་སྐྱེས་མ་ཐག་ཏུའོ། །ཡེ་ཤེས་ལྔའི་ཚུལ་གྱིས་གཞན་གྱིས་མ་རིག་པ་ཇི་ལྟར་སེལ་ན། ནམ་མཁའ་ལས་བྱུང་རང་བྱུང་བ། །ཤེས་རབ་ཡེ་ཤེས་མེའོ་ཆེ། །འོད་ཆེན་རྣམ་
པར་སྣང་བར་བྱེད། །ཡེ་ཤེས་སྐར་མ་ལམ་མེ་བ། །འགྲོ་བའི་མར་མེ་ཡེ་ཤེས་སྒྲོན། །ཞེས་སྨོས་ཏེ། ཆོས་ཀྱི་དབྱིངས་ནམ་མཁའ་དང་འདྲ་བ་ལས་ཡོན་ཏན་འགག་པ་མེད་པ་འབྱུང་བས་ཆོས་ཀྱི་དབྱིངས་ཀྱི་ཡེ་ཤེས་སོ། །དེའི་དོན་ཤེས་རབ་དམ་པ་རྟོགས་ཏེ། གསལ་ལ་རྟོག་པ་མེད་པའི་ཡེ་

49-1-17a

ཤེས་ཀྱི་མེས་འཇོམས་ཏེ། མེ་ཡིས་རྩི་སྦུར་བསྲེག་པ་ལྟ་བུ་ནི་མེ་ལོང་ལྟ་བུའི་ཡེ་ཤེས་སོ། །ཆོས་ཐམས་ཅད་མཉམ་པར་རྟོགས་པའི་ཡེ་ཤེས་ཀྱི་འོད་ཆེན་པོ་འབར་བས་གདུལ་བྱ་ལ་ཆེ་བའི་ཡོན་ཏན་སྣ་ཚོགས་སྣང་བར་བྱེད་པས་མཉམ་པ་ཉིད་ཀྱི་ཡེ་ཤེས་སོ། །སོ་སོར་རྟོག་
པའི་ཡེ་ཤེས་སྤྲིན་མེད་པའི་ནམ་མཁའ་ལ་སྐར་མའི་ཚོགས་མ་འདྲེས་པར་གསལ་བ་ལྟར་ཆོས་ཐམས་ཅད་ཀྱི་མཚན་ཉིད་མ་འདྲེས་པར་རྟོགས་པས་སོ་སོར་རྟོག་པའི་ཡེ་ཤེས་སོ། །བྱ་བ་གྲུབ་པའི་ཡེ་ཤེས་མར་མེ་ལྟ་བུས་འགྲོ་བའི་མ་རིག་པའི་མུན་པ་སེལ་ཞིང་། འདོད་པའི་དོན་ཡོངས་སུ་རྫོགས་
པར་མཛད་པས་བྱ་བ་གྲུབ་པའི་ཡེ་ཤེས་སོ། །ཁྱད་པར་གསང་སྔགས་ཀྱི་སྒོ་ནས་བསྟན་པའི་ཕྱིར། གཟི་བརྗིད་ཆེན་པོ་འོད་གསལ་བ། །སྔགས་མཆོག་མངའ་བདག་རིག་སྔགས་རྒྱལ། །གསང་སྔགས་རྒྱལ་པོ་དོན་ཆེན་བྱེད། །གཙུག་ཏོར་ཆེན་པོ་རྨད་བྱུང་གཙུག །ཅེས་སྨོས་ཏེ། 
གཞན་ཟིལ་གྱིས་གནོན་པའི་གཟི་བརྗིད་ཀྱི་ཕུང་པོ་ཆེན་པོ་མངའ་ཞིང་། ནང་ན་ཡེ་ཤེས་ལྔ་གསལ་བའི་རྟགས་སུ་ཕྱི་རོལ་དུ་འོད་ཁ་དོག་ལྔ་གསལ་བའོ། །སྔགས་ཀྱི་མཆོག་ཏུ་གྱུར་པས་གསང་སྔགས་རིག་སྔགས་ཡིན་ལ་དེའི་མངའ་བདག་གོ། །རིག་སྔགས་ཀྱི་རྒྱལ་པོ་ནི་ཤེས་རབ་དང་ཡེ་ཤེས་
ཡིན་ལ། གསང་སྔགས་ཀྱི་རྒྱལ་པོ་ནི་ཐབས་དང་ཤེས་རབ་ཁྱད་པར་ཅན་ཡིན་པས། སྐལ་བ་དང་སྐལ་བར་ལྡན་པ་ལ་དེ་གཉིས་ཀྱི་སྒོ་ནས་དོན་བྱེད་པའོ། །དེ་ནི་རྨད་དུ་བྱུང་བའི་ཆོས་ཡིན་པས་གཙུག་ཏོར་ལྟར་ཀུན་གྱི་སྤྱི་གཙུག་ཏུ་བཀུར་བར་འོས་པའོ། །དེ་ཙམ་དུ་མ་ཟད་དེ་འཁྲུལ་པ་སྣ་ཚོགས་སུ་
འབྱུང་བ་ནི། ནམ་མཁའི་བདག་པོ་སྣ་ཚོགས་སྟོན། །སངས་རྒྱས་ཀུན་གྱི་སྐུ་ཡི་མཆོག །འགྲོ་ཀུན་དགའ་བའི་མིག་དང་ལྡན། །སྣ་ཚོགས་གཟུགས་ཅན་སྐྱེད་པ་པོ། །ཞེས་སྨོས་ཏེ། ཟབ་པ་རང་གི་དོན་ནམ་མཁའ་ལྟ་བུ་ལས་རྒྱ་ཆེ་བ་གཞན་གྱི་དོན་སྣ་ཚོགས་སྟོན་པའོ། །སྐུའི་མཆོག་ཏུ་
གྱུར་པ་ནི་དྲུག་པོ་རོ་གཅིག་པའོ། །དེས་འགྲོ་བའི་དོན་ལ་གཟིགས་ཏེ་ཇི་ལྟར་དགའ་བའི་གཟུགས་སྣ་ཚོགས་སུ་སྤྲུལ་ནས་དོན་མཛད་པའོ། །མདོར་ན་བྱང་ཆུབ་ཀྱི་སེམས་སྣ་ཚོགས་སུ་སྤྲུལ་ནས་དོན་མཛད་པའོ། །མདོར་ན་བྱང་ཆུབ་ཀྱི་སེམས་གཟུགས་སྣ་ཚོགས་སུ་ཤར་བར་སྟོན་ཏོ། །

49-1-17b

དེ་ཉིད་དོན་དང་ལྡན་པས་གཞན་གྱིས་བཀུར་བའི་འོས་སུ་གྱུར་པའི་ཕྱིར། དྲང་སྲོང་ཆེ་དགུས་མཆོད་ཅིང་བརྗོད། །རིགས་གསུམ་འཆང་བ་གསང་སྔགས་འཆང་། །དམ་ཚིག་ཆེན་པོ་གསང་སྔགས་འཛིན། །གཙོ་བོ་དཀོན་མཆོག་གསུམ་འཛིན་པ། །ཞེས་པ་སྟེ། དྲང་སྲོང་ནི་སྤྱིར་རིག་པ་
སྒྲུབ་པ་རྣམས་ལ་བྱ། དྲང་སྲོང་ཆེན་པོ་ནི་བཅོམ་ལྡན་འདས་ཏེ་རང་ཡང་དྲང་པོའི་ལམ་དུ་ཞུགས་པ་ལ། གཞན་ཡང་དྲང་པོའི་ལམ་དུ་སོང་བའི་ཕྱིར་རོ། །དེས་ཀྱང་རྗེ་བཙུན་ཉིད་ལ་མཆོད་པ་དང་། ཡོན་ཏན་བརྗོད་ཅིང་བསྟོད་པའི་གནས་སུ་གྱུར་པའོ། །དེ་ཅི་འཆང་ན། སྐུ་དེ་བཞིན་གཤེགས་
པའི་རིགས་དང་། གསུང་པདྨའི་རིགས་དང་། ཐུགས་རྡོ་རྗེའི་རིགས་གསུམ་འཆང་ཞིང་ཐབས་དང་ཤེས་རབ་ཁྱད་པར་ཅན་འཆང་བས་ན། གསང་སྔགས་འཆང་བ་སྟེ། དོན་ལས་མི་འདའ་བས་ན། དམ་ཚིག་ཆེན་པོ་གསང་སྔགས་ཀྱི་སྒོ་ནས་གདུལ་བྱ་རྗེས་སུ་འཛིན་ཏེ། རྩ་བ་བྱང་ཆུབ་ཀྱི་
སེམས་ཏེ་ཆོས་ཐམས་ཅད་ཀྱི་མཆོག་ཏུ་གྱུར་པས་གཙོ་བོའོ། །དེས་དཀོན་མཆོག་གསུམ་གྱི་ཚུལ་འཛིན་ཅིང་། གཞན་ཡང་འཛིན་དུ་འཇུག་པར་མཛད་དོ། །དེ་ཡང་རྒྱ་ཆེ་བའི་དཀོན་མཆོག་ནི་སྤྱི་དང་མཐུན། ཟབ་པའི་དབང་དུ་བྱས་ནས་བྱང་ཆུབ་ཀྱི་སེམས་གཉིས་སུ་མེད་པས་སངས་རྒྱས་
དཀོན་མཆོག །དེའི་དོན་རྟོགས་པ་ནི་ཆོས་དཀོན་མཆོག་གོ། །རྗེས་སུ་སྒྲུབ་པ་ནི་དགེ་འདུན་དཀོན་མཆོག་གོ། །ཆོས་ཀྱི་སྒོ་མོ་ཇི་སྙེད་པ་ཡང་ཐེག་པ་གསུམ་དུ་འདུས་ཏེ། གདུལ་བྱ་རྗེས་སུ་གཟུང་བའི་ཕྱིར། །ཐེག་པ་མཆོག་གསུམ་སྟོན་པ་པོ། །དོན་ཡོད་ཞགས་པ་རྣམ་པར་རྒྱལ། །འཛིན་
པ་ཆེན་པོ་རྡོ་རྗེ་ཞགས། །རྡོ་རྗེ་ལྕགས་ཀྱུ་ཞགས་པ་ཆེ། །ཞེས་པ་སྨོས་ཏེ། ཉན་ཐོས་དང་། རང་རྒྱལ་བ་དང་། ཐེག་པ་ཆེན་པོ་གསུམ་གང་ཟག་གི་བློ་དང་སྦྱར་ནས་གང་མོས་པ་ལ་སྟོན་པར་བྱེད་དེ། དེས་འགྲོ་བའི་དོན་ཡོད་པར་མཛད་དོ། །འཁོར་བ་ལས་རྒྱལ་བར་བྱེད་དོ། །ཐུགས་རྗེའི་
ཞགས་པས་གདུལ་བྱ་རྗེས་སུ་འཛིན་པས་དེ་ཡང་རྒྱུ་ཅི་ལས་འབྱུང་ན། ཆོས་ཀྱི་སྐུ་རྡོ་རྗེ་ལྟ་བུ་རྟོགས་པ་ལས་འབྱུང་ངོ་། །དེ་ཡང་། སྟོང་ཉིད་ཆོས་སྐུར་རྟོགས་པའི་རྟགས། །བྱམས་དང་སྙིང་རྗེས་རབ་ཏུ་འཕེལ། །ཞེས་པ་ལྟ་བུའོ། །ཐུགས་རྗེས་གདུལ་བྱ་རྗེས་སུ་འཛིན་པས་

49-1-18a

ལྕགས་ཀྱུ་དང་འདྲ། ཉོན་མོངས་པ་རྣམས་འཆིང་བས་ཞགས་པ་དང་འདྲ། དེ་ཉིད་ལ་ཡང་མ་ཞེན་པས་ཆེ་ཞེས་བྱའོ། །ད་ནི་མེ་ལོང་ལྟ་བུའི་ཡེ་ཤེས་ཀྱི་སྒོ་ནས་འཇམ་དཔལ་ཡེ་ཤེས་སེམས་དཔའི་མཚན་བསྟན་པའི་ཕྱིར། རྡོ་རྗེ་འཇིགས་བྱེད་འཇིགས་པར་བྱེད། །ཅེས་བྱ་བ་
ལ་སོགས་པ་སྨོས་ཏེ། འདིར་ཁྲོ་བོ་གཤིན་རྗེ་གཤེད་ཀྱི་མིང་བསྟན་ཏེ། དེ་ཡང་རྡོ་རྗེའི་རིགས་ཡིན་པས་རྡོ་རྗེའོ། །ཤིན་ཏུ་འཇིགས་པར་བྱེད་པའི་ཆ་བྱད་དུ་བསྟན་ནས། མ་ཧཱ་དེ་བ་ལ་སོགས་པ་དང་། ལས་ཀྱི་གཤིན་རྗེ་རྣམས་ཞི་བས་མི་འདུལ་བ་དེ་དག་འཇིགས་ཤིང་སྐྲག་པར་བྱེད་པས་འདུལ་
བའོ། །ཁྲོ་བོའི་རྒྱལ་པོ་གདོང་དྲུག་འཇིགས། །མིག་དྲུག་ལག་དྲུག་སྟོབས་དང་ལྡན། །ཀེང་རུས་མཆེ་བ་གཙིགས་པ་པོ། །ཞེས་པ་འདིས་ཡོན་ཏན་རྟགས་ཀྱི་ཕྱག་རྒྱ་བསྟན་ཏེ། ཁྲོ་བོ་ནི་གསོད་པ་དང་སྐྲོད་པ་ལ་སོགས་པ་དྲག་པོའི་ཆ་བྱད་དུ་སྟོན་ཏེ། དེ་ཡང་། གསོད་དང་སྐྲོད་དང་དྲག་པོར་
སྟོན། །འདི་ནི་ཁྲོ་བོའི་དོན་དུ་བརྗོད། །ཅེས་པ་ལྟ་བུའོ། །དེའི་ནང་དུ་མེ་ལོང་ལྟ་བུའི་ཡེ་ཤེས་ཀྱིས་ཉོན་མོངས་པ་ཞེ་སྡང་ལ་སོགས་པ་བཅོམ་པའི་རྟགས་སོ། །དེ་ནི་ཁྲོ་བོ་རྣམས་ཀྱི་ནང་ན་གཙོ་བོར་གྱུར་པས་རྒྱལ་པོའོ། །དེ་ཡང་རིགས་དྲུག་དང་ལྡན་པའི་རྟགས་སུ་གདོང་དྲུག་གོ། །ཡེ་ཤེས་
དྲུག་དང་ལྡན་པའི་རྟགས་སུ་མིག་དྲུག་གོ། །ཕ་རོལ་ཏུ་ཕྱིན་པ་དྲུག་དང་ལྡན་པའི་རྟགས་སུ་ལག་པ་དྲུག་གོ། །གདུག་པ་འཇོམས་པར་བྱེད་པའི་སྟོབས་དང་ལྡན་པའོ། །མི་མགོ་སྐམ་རློན་གྱིས་བརྒྱན་པས་ཀེང་རུས་སོ། །ངེས་པར་འབྱེད་པའི་ཤེས་རབ་རྣོན་པོས་ཉོན་མོངས་པ་འཇོམས་ཤིང་། 
གདུག་པ་ཅན་འདུལ་བའི་རྟགས་སུ་མཆེ་བ་གཙིགས་པའོ། །ཧ་ལ་ཧ་ལ་གདོང་བརྒྱ་པ། །ཞེས་པ་འདིས་འཇིགས་བྱེད་ཆེན་པོའི་རྒྱན་བསྟན་ཏེ། ཧ་ལ་ནི་དུག་སྟེ། དུག་བཞི་དང་ལྡན་པའི་སྤྲུལ་གྱིས་ལུས་དང་ཡན་ལག་བརྒྱན་པའོ། །གཤིན་རྗེ་གཤེད་པོ་བགེགས་ཀྱི་རྒྱལ། །རྡོ་རྗེ་ཤུགས་
ཅན་འཇིགས་བྱེད་པ། །ཞེས་པ་འདིས་ནི་སྐུའི་ཕྲིན་ལས་བསྟན་ཏེ། འདི་ལས་ཀྱི་གཤིན་རྗེ་རྣམས་འདུལ་བའི་གཤེད་དུ་གྱུར་པ་སྟེ། བགེགས་ཀྱི་རྒྱལ་པོ་བྱི་ན་ཡ་ཀ་དང་། ཚོགས་བདག་གླང་སྣ་ལ་སོགས་པ་རྣམས་འདུལ་བར་བྱེད་པས་རྒྱལ་པོའོ། །རྡོ་རྗེ་ལྟར་ཕྲིན་ལས་ཐོགས་པ་མེད་པར་

49-1-18b

མཛད་པའི་ཤུགས་ཆེན་པོ་དང་ལྡན་པའི་སྒོ་ནས་གདུག་པ་ཅན་རྣམས་འཇིགས་ཤིང་སྐྲག་པར་མཛད་པའོ། །རྡོ་རྗེའི་གྲགས་པའི་ཁྱད་པར་ཇི་ཙམ་ཞེ་ན། རྡོ་རྗེ་གྲགས་པ་རྡོ་རྗེ་སྙིང་། །ཞེས་སྨོས་ཏེ། ཆོས་ཐམས་ཅད་རྡོ་རྗེ་ལྟར་དབྱེར་མི་ཕྱེད་ཅིང་། འཇིག་རྟེན་གསུམ་དུ་གྲགས་པའི་ཁྱད་པར་དང་ལྡན་པའོ། །
དབྱེར་མི་ཕྱེད་པ་རྡོ་རྗེ་ལྟ་བུ་སྟེ། ཆོས་ཐམས་ཅད་ཀྱི་འཕྲོ་བར་གྱུར་པའི་གཞིར་གྱུར་པས་ཀྱང་སྙིང་པོ། རྡོ་རྗེ་ལྟ་བུ་ཐུགས་ཀྱི་རིགས་ཡིན་པས་ཀྱང་རྡོ་རྗེའི་སྙིང་། རྟགས་ཁྲོ་བོ་རྣམས་ཀྱི་ཐུགས་ཀར་བཞག་པས་ཀྱང་རྡོ་རྗེའི་སྙིང་ངོ་། །སྐུ་དེའི་ཡོན་ཏན་བསྟན་པ་ནི། །སྒྱུ་འཕྲུལ་རྡོ་རྗེ་གསུས་པོ་ཆེ། །
ཞེས་སྨོས་ཏེ། སྒྱུ་མ་ལྟ་བུའི་སྤྲུལ་པ་སྣ་ཚོགས་སུ་སྤྲུལ་ཞིང་། རྡོ་རྗེ་ལྟ་བུའི་སྐུ་དེ་ཡང་ནང་དུ་ཆེ་བའི་ཡོན་ཏན་ཐམས་ཅད་ཀྱིས་གང་བའི་རྟགས་སུ་གསུས་ཁྱིམ་ཆེ་བའོ། །དེའི་རྒྱུ་ཅི་ཞེ་ན། རྡོ་རྗེ་ལས་སྐྱེས་རྡོ་རྗེའི་བདག །ཅེས་པ་སྨོས་ཏེ། དེའི་རྒྱུ་ནི་ཆོས་སྐུ་རྡོ་རྗེ་ལྟ་བུ་རྟོགས་པ་ལས་སྐྱེས་ཏེ། རིགས་
ཐམས་ཅད་ཀྱི་གཙོ་བོར་གྱུར་པས་བདག་པོའོ། །དེའི་དཔེ་ནི། རྡོ་རྗེ་སྙིང་པོ་མཁའ་འདྲ་བ། །ཞེས་སྨོས་ཏེ། དངོས་པོ་མེད་པ་དང་། ཀུན་ལ་ཁྱབ་པ་དང་། ཆོ་འཕྲུལ་མི་འགག་པའི་ཕྱིར་ནམ་མཁའོ། །འོ་ན་མཚན་མ་ཅན་དུ་མི་འགྱུར་རམ་ཞེ་ན། མི་གཡོ་རལ་པ་གཅིག་གིས་བསྒྱིངས། །
གླང་ཆེན་ཀོ་རློན་གོས་སུ་གྱོན། །ཞེས་པ་འདིས་ཡོན་ཏན་གྱི་རྒྱན་བསྟན་ཏེ་མཚན་མའི་རྣམ་པར་རྟོག་པ་མི་གཡོ་ཞིང་། གཉིས་སུ་མེད་པར་རྟོགས་པའི་རྟགས་རལ་པའི་ཐོར་ཚུགས་གཅིག་ཏུ་བཅིངས་པའོ། །ཐེག་པ་མཆོག་དང་ལྡན་པའི་རྟགས་སུ་གླང་པོ་ཆེའི་ཀོ་ལོན་གོས་སུ་གྱོན་པའོ། །ཁྲོ་བོའི་
གསུང་ཇི་ལྟ་བུ་ཞེ་ན། དྲག་ཆེན་ཧ་ཧ་ཞེས་སྒྲོགས་པ། །ཧི་ཧི་ཞེས་སྒྲོགས་འཇིགས་པར་བྱེད། །གད་མོ་ཆེན་མོ་གད་རྒྱངས་ཅན། །རྡོ་རྗེ་གད་མོ་ཆེར་སྒྲོགས་པ། །ཞེས་སྨོས་ཏེ། འགྲོ་བའི་དོན་མཛད་པ་ལ་དགྱེས་པས་ཧ་ཧ་ཞེས་པའི་སྒྲ་སྒྲོགས་ཤིང་། ཧི་ཧི་ཞེས་པའི་སྒྲས་མ་རུངས་པ་རྣམས་
འཇིགས་ཤིང་བརྒྱལ་བར་བྱེད་པའི་གད་མོ་ཆེ་བར་སྒྲོགས་ཏེ། རྡོ་རྗེ་དང་འདྲ་བར་གཞན་གྱིས་བར་དུ་མི་ཆོད་པར་ཤིན་ཏུ་རྒྱ་ཆེ་བ་སྟེ། འཇིག་རྟེན་གསུམ་ན་ཐོས་པར་སྒྲོགས་པའོ། །འོ་ན་ཐུགས་ཀྱི་རང་བཞིན་ཇི་ལྟ་བུ་ལགས་ཤེ་ན། རྡོ་རྗེ་སེམས་དཔའ་སེམས་དཔའ་ཆེ། །རྡོ་རྗེ་རྒྱལ་

49-1-19a

པོ་བདེ་བ་ཆེ། །རྡོ་རྗེ་དྲག་པོ་དགའ་བ་ཆེ། །རྡོ་རྗེ་ཧཱུཾ་སྟེ་ཧཱུཾ་ཞེས་སྒྲོགས། །ཞེས་སྨོས་ཏེ། རྡོ་རྗེ་ལྟར་མི་ཕྱེད་པའི་ཐུགས་ཡེ་ཤེས་ཆེན་པོ། ཆོས་ཀྱི་དབྱིངས་ལ་སེམས་པ་དང་། ཐུགས་རྗེས་འགྲོ་བའི་དོན་ལ་སེམས་པའོ། །དེའི་གོང་ན་གཞན་མེད་པས་རྒྱལ་པོའོ། །ཟག་
པ་མེད་པའི་བདེ་བ་ཆེན་པོ་མངའ་ཞིང་། གདུག་པ་ཅན་འཇོམས་པའི་ཐུགས་མངའ་བས་དྲག་པོའོ། །དེས་སེམས་ཅན་རྣམས་ཀྱི་དགའ་བ་ཆེན་པོ་སྐྱེད་པར་མཛད་དོ། །རྡོ་རྗེ་ལྟ་བུ་ཐུགས་སུ་ཆུད་པའི་སྒོ་ནས། ཧཱུཾ་ཧཱུཾ་ཞེས་པའི་སྒྲ་བསྒྲགས་ནས། གདུག་པ་ཅན་ཚར་གཅོད་པར་མཛད་
དོ། །ཁྲོ་བོ་དེ་ལས་ཅི་མཛད་ཅེ་ན། མཚོན་དུ་རྡོ་རྗེ་མདའ་ཐོགས་པ། །རྡོ་རྗེ་རལ་གྲིས་མ་ལུས་གཅོད། །རྡོ་རྗེ་ཀུན་འཆང་རྡོ་རྗེ་ཅན། །རྡོ་རྗེ་གཅིག་པུ་གཡུལ་སེལ་བ། །ཞེས་སྨོས་ཏེ། ཕྱག་མཚན་རྡོ་རྗེ་ལྟར་ཉོན་མོངས་པ་འབིགས་པའི་ཐབས་ཤེས་རབ་ཀྱི་མདའ་གཞུ་དང་། རྣམ་པར་
རྟོག་པ་གཅོད་པར་བྱེད་པའི། ཤེས་རབ་ཀྱི་རལ་གྲི་ཐོགས་པ་དང་། དུག་ལྔ་ཆོམས་པའི་རྟགས་རྡོ་རྗེ་འཆང་བ་དང་། རྡོ་རྗེ་ལྟར་གཞན་འཇོམས་པར་བྱེད་པའི་མཐུ་དང་ལྡན་པས་རྡོ་རྗེ་ཅན་ཞེས་བྱའོ། །དེ་ཡང་རྡོ་རྗེ་ལྟ་བུ་གཉིས་སུ་མེད་པའི་ཡེ་ཤེས་ཀྱིས་བདུད་བཞི་དང་གདུག་པ་ཅན་འཇོམས་
ཤིང་གཡུལ་ངོ་ཟློག་པར་བྱེད་དོ། །རྒྱན་གྱི་སྒོ་ནས་ཁྱད་པར་གྱི་ཡོན་ཏན་བསྟན་པ་ནི། རྡོ་རྗེ་འབར་བ་མིག་མི་བཟད། །སྐྲ་ཡང་རྡོ་རྗེ་འབར་བ་སྟེ། །རྡོ་རྗེ་འབེབས་པ་འབེབས་པ་ཆེ། །མིག་བརྒྱ་པ་སྟེ་རྡོ་རྗེའི་མིག །ལུས་ནི་རྡོ་རྗེའི་བ་སྤུ་ཅན། །རྡོ་རྗེའི་སྤུ་ནི་གཅིག་པུ་ལུས། །སེན་མོ་སྐྱེས་
པ་རྡོ་རྗེ་རྩེ། །རྡོ་རྗེ་སྙིང་པོ་པགས་པ་མཁྲེགས། །རྡོ་རྗེ་ཕྲེང་ཐོགས་དཔལ་དང་ལྡན། །རྡོ་རྗེ་རྒྱན་གྱིས་བརྒྱན་པ་སྟེ། །ཞེས་སྨོས་ཏེ། རྡོ་རྗེ་འབར་བ་ལྟ་བུའི་དྲག་པོའི་སྤྱན་ཤིན་ཏུ་མི་བཟད་པར་འཇིགས་པ་མངའ་ཞིང་དབུ་སྐྲ་ཡང་རྡོ་རྗེའི་སྐྲའོ། །གཞན་གྱི་རྒྱུད་ལ་ཡང་སྐུ་གསུང་ཐུགས་རྡོ་རྗེ་ལྟ་བུའི་
ཡེ་ཤེས་འབེབས་པར་མཛད་ལ་མིག་བརྒྱ་པ་ཞེས་པ་ནི་མཚོན་པ་ཙམ་སྟེ། ཐམས་ཅད་དུ་མ་འགགས་པ་ཤེས་རབ་ཀྱི་སྤྱན་དབྱེར་མི་ཕྱེད་པ་དང་ལྡན་པའོ། །ལུས་ལ་རྡོ་རྗེའི་བ་སྤུ་དངོས་སུ་འཁྱིལ་བ་མངའ་ཞིང་། རྡོ་རྗེའི་སྤུ་དེ་གཉིས་སུ་མེད་པའི་ལུས་ལ་བརྒྱན་པའོ། །གདུག་པ་ཅན་

49-1-19b

འདུལ་བའི་རྟགས་དང་། རིགས་ལྔ་ཡེ་ཤེས་ལྔ་དབྱེར་མི་ཕྱེད་པའི་རྟགས་སུ་སོར་མོའི་རྩེ་མོར་རྡོ་རྗེ་སྐྱེས་པའོ། །ཐམས་ཅད་གཉིས་མེད་དུ་བསྡུས་པའི་རྟགས་སུ། རྡོ་རྗེའི་པགས་པ་སྲ་ལ་འཐས་པ་མངའ་བའོ། །རྡོ་རྗེའི་ཕྲེང་བ་ཐོགས་ནས་གཞན་དོན་མཛད་པས་དཔལ་དང་ལྡན་པའོ། །
ཆེ་བའི་ཡོན་ཏན་ཕྲེང་བ་བརྒྱུས་པ་ལྟར་རྒྱུན་མི་འཆད་པ་དང་ལྡན་པའི་རྟགས་སོ། །དེ་ལྟར་ཁྱད་པར་གྱི་རྒྱན་རྡོ་རྗེས་བརྒྱན་པའི་སྒོ་ནས་ཆེ་བའི་ཡོན་ཏན་རྣམས་བསྟན་པ་ཡིན་ཏེ། ཐུགས་རྡོ་རྗེའི་རིགས་ཡིན་པའི་ཕྱིར་རོ། །འོ་ན་གསུང་གི་སྒོ་ནས་འགྲོ་བ་འདྲེན་པའི་ཡོན་ཏན་གང་ཞེ་ན། གད་
རྒྱངས་ཧ་ཧ་ངེས་པར་སྒྲོགས། །ཡི་གེ་དྲུག་པ་རྡོ་རྗེའི་སྒྲ། །འཇམ་དབྱངས་ཆེན་པོ་སྒྲ་ཆེ་བ། །འཇིག་རྟེན་གསུམ་ན་སྒྲ་གཅིག་པ། །ནམ་མཁའི་མཐའ་ལ་སྒྲ་སྒྲོགས་པ། །སྒྲ་དང་ལྡན་པ་རྣམས་ཀྱི་མཆོག །ཅེས་སྨོས་ཏེ། འགྲོ་བའི་དོན་མཛད་པ་ལ་དགྱེས་པའི་སྒྲ་ཧ་ཧ་ཞེས་སྒྲོགས་ཤིང་། 
ཡི་གེ་དྲུག་པ་ནི་རྒྱས་པར་ཡི་གེ་དྲུག་པའི་སྔགས། དེ་ལས་བསྡུ་ན་བཱ་གཱི་ཤྭ་རིའི་འབྲུ་དྲུག་པའོ། །དེ་གཉིས་ནི་གསང་སྔགས་རྡོ་རྗེའི་ཐེག་པའི་སྒྲའོ། །ལས་འཕྲོ་ཅན་རྣམས་ལ་སྙན་ཅིང་ཡིད་དུ་འོང་བས་འཇམ་དབྱངས་སོ། །དོན་ཆེན་པོ་སྟོན་པའི་སྒྲ་ཡིན་པས་ཆེ་བས་སོ། །དེ་གང་དུ་སྒྲོགས་
ནི་འཇིག་རྟེན་གསུམ་དུའོ། །གཉིས་མེད་སྟོན་པའི་སྒྲ་ཡིན་པས་གཅིག་གོ། །ཡང་ཇི་སྙེད་ཅིག་བསྒྲགས་ཀྱང་འགྲོ་བ་འདྲེན་པར་གཅིག་པའོ། །སྒྲ་དེ་ལ་འགྲན་ཟླ་མེད་པས་ཀྱང་སྒྲ་གཅིག་པའོ། །དེ་ཇི་ཙམ་དུ་སྒྲོགས་ཤེ་ན། ནམ་མཁའ་ཁྱབ་པར་སྒྲོགས་པའོ། །སྒྲ་རྣམས་ཀྱི་ནང་ན་
ཆོས་ཀྱི་སྒྲ་འདི་མཆོག་ཏུ་གྱུར་པ་སྟེ་དོན་ཆེན་པོ་ལ་སྦྱོར་བའི་ཕྱིར་རོ། །སོ་སོར་རྟོག་པའི་ཡེ་ཤེས་ཀྱི་སྒོ་ནས་འཇམ་དཔལ་ཡེ་ཤེས་སེམས་དཔའི་མཚན་བསྟན་པའི་ཕྱིར། ཡང་དག་བདག་མེད་དེ་བཞིན་ཉིད། །ཡང་དག་མཐའ་སྟེ་ཡི་གེ་མེད། །ཅེས་པ་ལ་སོགས་པ་སྨོས་ཏེ། དེ་ལ་གསུང་
གི་རྒྱུ་ནི་ཡང་དག་པ་བདག་མེད་དེ་བཞིན་ཉིད་དོ། །གསུང་གི་ཆེ་བ་ནི། སྟོང་ཉིད་སྨྲ་བའི་ཁྱུ་མཆོག་སྟེ། །ཟབ་ཅིང་རྒྱ་ཆེ་སྒྲ་སྒྲོགས་པ། །ཆོས་ཀྱི་དུང་སྟེ་སྒྲ་ཆེན་ལྡན། །ཆོས་ཀྱི་གཎྜཱི་སྒྲ་བོ་ཆེ། །མི་གནས་མྱ་ངན་འདས་པ་པོ། །ཕྱོགས་བཅུ་ཆོས་ཀྱི་རྔ་བོ་ཆེ། །ཞེས་སྨོས་ཏེ། ཆོས་

49-1-20a

ཐམས་ཅད་སྟོང་པ་ཉིད་དུ་སྨྲ་བ་ནི་སྨྲ་བ་ཐམས་ཅད་ཀྱི་གཙོ་བོ་ཡིན་པས་ཁྱུ་མཆོག་སྟེ། དཔེར་ན། གླང་པོ་ཆེའི་ཕྲུ་གུ་ཕ་མ་ཤི་ནས་སེང་གེས་ནུ་མ་བསྣུན་ནས་གསོས་པ་ལ་ཁྱུ་མཆོག་ཟེར་ཏེ། དེས་ཁྱུས་འགྲོ་ཟིལ་གྱིས་གནོན་ཏེ་དེ་དང་འདྲ་བའི་ཕྱིར་རོ། །ཅིའི་མཆོག་ཡིན་
ན། ཟབ་པ་དང་རྒྱ་ཆེ་བའི་ཆོས་ཀྱི་སྒྲ་སྒྲོགས་པའི་ཕྱིར་རོ། །ཆོས་འབྱུང་བའི་སྔ་ལྟས་ནི། ཆོས་ཀྱི་དུང་ལྟ་བུའི་སྒྲ་ཆེན་པོས་བདུད་བཏུལ་ནས། ཆོས་ཀྱི་གཎྜཱི་ལྟ་བུའི་སྒྲ་ཆེན་པོས་འཁོར་བསྡུས་ནས། མཐའ་གཉིས་ལ་མི་གནས་པའི་མྱ་ངན་ལས་འདས་པའི་ཆོས་སྟོན་པ་སྟེ། དེ་ཡང་ཤེས་
པས་སྲིད་ལ་མི་གནས་དང་། །སྙིང་རྗེས་ཞི་ལ་མི་གནས་ཤིང་། །ཞེས་པ་ལྟ་བུའོ། །རྒྱ་ཇི་ཙམ་ཆེ་ཞེ་ན། ཕྱོགས་བཅུ་ཐམས་ཅད་དུ་ཁྱབ་པར་བྱེད་པའོ། །གང་གིས་ཤེ་ན། ཆོས་ཀྱི་སྒྲ་ཆེན་པོ་རྔ་བོ་ཆེ་དང་འདྲ་བ་སྒྲོགས་པའོ། །དེ་ལ་ཀུན་འབྱུང་བའི་གཞི་གང་ཞེ་ན། གཟུགས་མེད་
གཟུགས་བཟང་དམ་པ་སྟེ། །སྣ་ཚོགས་གཟུགས་ཅན་ཡིད་ལས་སྐྱེས། །གཟུགས་རྣམས་ཐམས་ཅད་སྣང་བའི་དཔལ། །གཟུགས་བརྙན་མ་ལུས་འཆང་བ་པོ། །ཞེས་སྨོས་ཏེ། ཆོས་སྐུ་ལ་ངོ་བོ་ཉིད་མ་གྲུབ་པས་གཟུགས་མེད་པའོ། །དེའི་བྱིན་གྱི་རླབས་ལས་ལོངས་སྤྱོད་རྫོགས་
པའི་སྐུ་མཚན་དང་དཔེ་བྱད་ཀྱིས་བརྒྱན་པ། གཟུགས་བཟང་བའི་དམ་པའོ། །སྤྲུལ་སྐུ་སྣ་ཚོགས་གཟུགས་ཅན་དེ་ཡིད་ཡེ་ཤེས་སུ་གྲོལ་བ་ལས་སྐྱེས་ཞེས་པ་དང་། ཡང་སྤྲུལ་སྐུ་སྣ་ཚོགས་གཟུགས་ཅན་གྱི་ཡིད་ལ་ཇི་ལྟར་འདོད་པ་ལྟར་སྐྱེས་ཞེས་བཤད་དོ། །རྗེ་བཙུན་དེ་ཉིད་ཉན་
ཐོས་དང་། རང་རྒྱལ་བ་དང་། བྱང་ཆུབ་སེམས་དཔའ་དང་། ཚངས་པ་དང་། ཁྱབ་འཇུག་ལ་སོགས་པའི་གཟུགས་བརྙན་མ་ལུས་པར་སྣང་ནས་དོན་མཛད་པའོ། །སྐུ་དེའི་ཆེ་བ་ཇི་ལྟ་བུ་ཞེ་ན། མཚུངས་པ་མེད་ཅིང་ཆེ་བར་གྲགས། །ཁམས་གསུམ་དབང་ཕྱུག་ཆེན་པོ་སྟེ། །
འཕགས་ལམ་ཤིན་ཏུ་མཐོ་ལ་གནས། །དར་བ་ཆེན་པོ་ཆོས་ཀྱི་ཏོག །ཅེས་སྨོས་ཏེ། ཚོགས་གཉིས་ཡོངས་སུ་རྫོགས་པའི་དབང་གིས་གཉེན་པོ་གང་གིས་ཀྱང་མི་ཚུགས་ཏེ། བདུད་དང་མུ་སྟེགས་ལ་སོགས་པ་གང་གིས་ཀྱང་ཟིལ་གྱིས་མི་ནོན་པས་ན་ཆེ་བར་གྲགས་སོ། །དེ་ཡང་

49-1-20b

འཕགས་པའི་ལམ་ལས་མཐོ་བར་གྱུར་པས་གཉིས་སུ་མེད་པའི་ཡེ་ཤེས་ལ་གནས་པའོ། །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་མཁྱེན་པས་དར་བ་ཆེན་པོའི་ཆོས་སོ། །གཉིས་སུ་མེད་པ་ནི་རབ་རྩེ་མོའི་ཏོག་ཅེས་བྱའོ། །དེ་གདུལ་བྱ་ལ་ཇི་ལྟར་མོས་པར་སྣང་བ་ནི། འཇིག་རྟེན་གསུམ་ན་གཞོན་
ལུས་གཅིག །གནས་བརྟན་རྒན་པོ་སྐྱེ་དགུའི་བདག །སུམ་ཅུ་རྩ་གཉིས་མཚན་འཆང་བ། །སྡུ་གུ་འཇིག་རྟེན་གསུམ་ན་མཛེས། །ཞེས་སྨོས་ཏེ། བྱང་ཆུབ་སེམས་དཔས་འདུལ་བ་རྣམས་ལ་བགྲེས་རྒུད་མི་མངའ་སྟེ་རྟག་ཏུ་བྱིས་པ་ལོ་བརྒྱད་ལོན་པ་ལྟ་བུ་གཞན་གྱི་ཡིད་འཕྲོག་པར་བྱེད་པ་ལྟ་
བུས་དོན་མཛད་པའོ། །ཉན་ཐོས་ཀྱིས་འདུལ་བ་རྣམས་ལ་གནས་བརྟན་རབ་འབྱོར་ལྟ་བུར་སྤྲུལ། རང་རྒྱལ་བས་འདུལ་བ་རྣམས་ལ་རང་རྒྱལ་རྒན་པོ་རྫུ་འཕྲུལ་ཆེར་སྟོན་པ་ལྟ་བུར་སྤྲུལ། སྣ་ཚོགས་ཀྱིས་འདུལ་བ་ལ་སྐྱེ་དགུའི་བདག་པོར་སྤྲུལ་ནས་དོན་མཛད་དེ། དེ་ལ་སྐྱེ་བ་དགུ་ནི་
ཉན་ཐོས་དང་། རང་རྒྱལ་བ་དང་། ཐེག་པ་ཆེན་པོ་དང་གསུམ། དེའི་ཁར་འགྲོ་བ་རིགས་དྲུག་གི་གནས་སུ་སྤྲུལ་སྐུ་ཐུབ་པ་དྲུག་གིས་དོན་མཛད་པ་དང་། དགུ་ལ་བྱའོ། །དེ་ལ་མཚན་སུམ་ཅུ་རྩ་གཉིས་ནི་ཐུན་མོང་དུ་བསྟན་ཏོ། །ཕྱག་དང་ཞབས་འཁོར་ལོའི་མཚན་དང་ལྡན་པ་ཉིད་དང་། ཞབས་
རུས་སྦལ་བཞིན་དུ་གནས་པ་དང་། ཕྱག་དང་ཞབས་ཀྱི་སོར་མོ་འབྲེལ་པ་དང་། ཕྱག་དང་ཞབས་གཞོན་ཞིང་འཇམ་པ་དང་། བདུན་མཐོ་བ་དང་། ཕྱག་གི་སོར་མོ་རིང་བ་དང་། རྟིང་པ་ཡངས་པ་དང་། སྐུ་ཆེ་ཞིང་དྲང་བ་དང་། འབུར་མི་མངོན་པ་དང་། སྐུའི་སྤུ་གྱེན་དུ་འཁྱིལ་བ་དང་། 
བྱིན་པ་རི་དྭགས་ཨེ་ན་ཡ་ལྟ་བུ་དང་། ཕྱག་རིང་ཞིང་མཛེས་པ་དང་། མདོམས་ཀྱི་སྦ་བ་སྦུབས་སུ་ནུབ་པ་དང་། སྐུ་མདོག་གསེར་ལྟ་བུ་དང་། པགས་པ་འཇམ་པ་དང་། སྤུ་རེ་རེ་ནས་གཡས་ཕྱོགས་སུ་འཁྱིལ་པ་དང་། ཞལ་མཛོད་སྤུས་བརྒྱན་པ་དང་། རོ་སྟོད་སེང་གེ་འདྲ་བ་དང་། 
དཔུང་མགོ་ཟླུམ་པ་དང་། ཐལ་གོང་རྒྱས་པ་དང་། རོ་བྲོ་བའི་མཆོག་མཁྱེན་པ་དང་། ཤིང་ནྱ་གྲོ་དྷ་ལྟར་ཆུ་ཞེང་གབ་པ་དང་། དབུ་གཙུག་ཏོར་དང་ལྡན་པ་དང་། ལྗགས་རིང་བ་དང་། གསུང་ཚངས་པའི་དབྱངས་ལྟ་བུ་དང་། འགྲམ་པ་སེང་གེའི་འདྲ་བ་དང་། ཚེམས་དཀར་བ་དང་།

49-1-21a

ཚེམས་མཉམ་པ་དང་། ཚེམས་ཐགས་བཟང་བ་དང་། ཚེམས་བཞི་བཅུ་མངའ་བ་དང་། སྤྱན་མཐོན་མཐིང་དུ་གནས་པ་དང་། སྤྱན་རྫི་བའི་རྫི་མ་ལྟ་བུའོ། །ཁྱད་པར་གྱི་དབང་དུ་བྱས་ན། དཔལ་རྣམ་པར་སྣང་མཛད་ལ་རྒྱུའི་སེམས་དཔའ་བཅུ་དྲུག་འབྲས་བུའི་སེམས་
དཔའ་བཅུ་དྲུག་གིས་བརྒྱན་པ་ལ་བཤད་དོ། །དེ་ལྟར་འཇིག་རྟེན་གསུམ་ན་ཤིན་ཏུ་སྡུག་ཅིང་ཡིད་དུ་འོང་ལ། བལྟ་བས་ཆོག་མི་ཤེས་པ་འདུན་པ་སྐྱེས་བུའི་གནས་སུ་གྱུར་པའོ། །དེས་འཇིག་རྟེན་པ་ཇི་ལྟར་སྐྱོབ་ཅེ་ན། འཇིག་རྟེན་ཤེས་ལེགས་སློབ་དཔོན་ཏེ། །འཇིག་རྟེན་སློབ་དཔོན་
འཇིགས་པ་མེད། །མགོན་སྐྱོབ་འཇིག་རྟེན་ཡིད་གཅུགས་པ། །སྐྱབས་དང་སྐྱོབ་པ་བླ་ན་མེད། །ཅེས་སྨོས་ཏེ། འཇིག་རྟེན་པའི་སྨན་དང་བཟོ་ལ་སོགས་པ་ཡང་རྗེ་བཙུན་ཉིད་ཀྱིས་བསླབས་པ་ཡིན་ལ། ལོག་པའི་ལམ་ལས་ཟློག་ཅིང་དམ་པའི་ལམ་སྟོན་པའི་སློབ་དཔོན་ཡང་མཛད་དོ། །
ཐ་སྙད་ཀྱི་རིགས་པ་དང་ལྡན་པས་གཞན་གྱིས་བརྩད་བཅད་ཀྱང་འཇིགས་པ་དང་བག་ཚ་བ་མེད་པར་འཇིག་རྟེན་སྐྱོབ་པ་སྟེ། ཇི་ལྟར་ཡིད་དང་མཐུན་པར་སྔར་གྱི་ཡང་སྐྱོབས་མཛད་ལ། ཕྱིས་ཀྱང་སྐྱོབ་སྟེ་བླ་ན་མེད་པའི་བྱང་ཆུབ་ཐོབ་པར་བྱེད་དོ། །འོ་ན་ཐུགས་ཀྱི་མཁྱེན་ཚད་ཅི་མངའ་ཞེ་ན། 
ནམ་མཁའི་མཐའ་ལ་ལོངས་སྤྱོད་པ། །ཐམས་ཅད་མཁྱེན་པའི་ཡེ་ཤེས་མཚོ། །ཞེས་པ། ཆོས་ཀྱི་སྐུ་ནམ་མཁའི་མཐའ་ལྟ་བུ་ལ་ལོངས་སྤྱོད་ཅིང་རྟོགས་པས་ཤེས་བྱ་ཇི་ལྟ་བ་དང་ཇི་སྙེད་པ་ཐམས་ཅད་མཁྱེན་པའི་ཡེ་ཤེས་ཆེ་བའི་ཡོན་ཏན་རྒྱ་མཚོ་ལྟ་བུ་མངའ་བའོ། །དེའི་བྱེད་པའི་
ལས་གང་ཞེ་ན། མ་རིག་སྒོ་ངའི་སྦུབས་འབྱེད་པ། །སྲིད་པའི་དྲ་བ་འཇོམས་པ་པོ། །ཉོན་མོངས་མ་ལུས་ཞི་བྱེད་པ། །འཁོར་བའི་རྒྱ་མཚོའི་ཕ་རོལ་ཕྱིན། །ཞེས་སྨོས་ཏེ། གཉིས་སུ་མེད་པའི་དོན་རྟོགས་པས་མ་རིག་སྒོ་ངའི་ཤུན་ལྤགས་འདྲ་བ་སྦུབས་ཕྱེ་ནས་སྲིད་པའི་དྲ་བ་ལས་དང་ཉོན་
མོངས་པ་དང་འབྲེལ་བ་རྣམས་བཅོམ་སྟེ། ཉོན་མོངས་པ་རྩ་བ་ལྔའམ་དྲུག་དང་། ཉེ་བའི་ཉོན་མོངས་པ་ཉི་ཤུ་པོ་དང་། ཀུན་ནས་ཉོན་མོངས་པ་སྟེ་བརྒྱ་དང་གསུམ་ལྟ་བུ་ཞི་ནས་འཁོར་བའི་རྒྱ་མཚོའི་ཕ་རོལ་ཕྱིན་པའོ། །དེ་རྟོགས་པའི་ཕན་ཡོན་ནི། ཡེ་ཤེས་དབང་བསྐུར་ཅོད་པན་

49-1-21b

ཅན། །རྫོགས་པའི་སངས་རྒྱས་རྒྱན་དུ་ཐོགས། །སྡུག་བསྔལ་གསུམ་གྱི་སྡུག་བསྔལ་ཞི། །གསུམ་སེལ་མཐའ་ཡས་གྲོལ་གསུམ་ཐོབ། །སྒྲིབ་པ་ཀུན་ལས་ངེས་པར་གྲོལ། །མཁའ་ལྟར་མཉམ་པ་ཉིད་ལ་གནས། །ཉོན་མོངས་དྲི་མ་ཀུན་ལས་འདས། །ཞེས་སྨོས་ཏེ། གཉིས་
སུ་མེད་པའི་དོན་རྟོགས་པས་ཉོན་མོངས་པ་ལྔ་མ་སྤངས་རང་སར་གྲོལ་ཏེ། ཡེ་ཤེས་ལྔར་སྣང་བ་སྟེ།བུམ་པ་ལ་སོགས་པའི་དབང་ལ་ལྟོས་པ་མ་ཡིན་ཏེ། ཡེ་ཤེས་གཅིག་རྫོགས་ཀྱི་དབང་ཞེས་བྱའོ། །བཞི་རིག་པ་གཅིག་ལ་སྣང་ཚུལ་ཡེ་ཤེས་ཀྱིས་བརྒྱན་པ་དེ་ཤིན་ཏུ་མཛེས་པའི་
ཕྱིར་ཅོད་པན་ནོ། །དེ་ཡང་། སེམས་ཀྱིས་ཆོས་ལ་དབང་ཐོབ་ན། །རྫས་ཚིག་མཚན་མའི་དབང་རྣམས་ཀུན། །མ་བསྐུར་ཀྱང་ནི་ཐོབ་པར་འགྱུར། །ཞེས་པ་ལྟ་བུའོ། །ཡེ་ཤེས་ལྔའི་གཟུགས་བརྙན་སངས་རྒྱས་ལྔར་ཤར་ཏེ། གསལ་ཞིང་མཛེས་པའི་ཕྱིར་རྒྱན་ཞེས་བྱའོ། །སྡུག་
བསྔལ་ནི་གསུམ་དུ་འདུས། དེ་ལྟར་རྟོག་པས་སྡུག་བསྔལ་གྱི་སྡུག་བསྔལ་དང་། འདུ་བྱེད་ཀྱི་སྡུག་བསྔལ་དང་། འགྱུར་བའི་སྡུག་བསྔལ་དང་གསུམ་ཞི་ལ། ཉོན་མོངས་པ་རྣམས་ཀྱང་དུག་གསུམ་དུ་འདུས་ཏེ། དེས་སེལ་ཞིང་སྤོང་ངོ་། །དེ་གསུམ་བསལ་ནས་འགྲོ་བ་མཐའ་ཡས་པའི་
དོན་བྱས་ནས། གྲོལ་བ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་གསུམ་ཐོབ་པར་བྱེད་དོ། །ཁྱད་པར་དུ་སྐུ་གསུམ་ལ་བྱའོ། །དེ་ཡང་ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་ཀུན་ལས་གྲོལ་ནས། ནམ་མཁའ་ལྟ་བུའི་མཉམ་པ་ཉིད་ལ་གནས་ཏེ། 
དེ་ཕན་ཆོད་ཉོན་མོངས་པའི་དྲི་མ་ལས་འདས་པའོ། །དེ་ལྟར་རྟོགས་པའི་ངོ་བོ་ཅི་ཞེ་ན། དུས་གསུམ་དུས་མེད་རྟོག་པ་པོ། །སེམས་ཅན་ཀུན་གྱི་གཙོ་བོ་ཆེ། །ཡོན་ཏན་ཐོད་ཅན་རྣམས་ཀྱི་ཐོད། །ལུས་ཀུན་ལས་ནི་རྣམ་གྲོལ་བ། །ནམ་མཁའི་ལམ་ལ་རབ་གནས་པ། །ཞེས་སྨོས་ཏེ། མཉམ་པ་ཉིད་ལ་དུས་གསུམ་
དུ་དབྱེར་མེད་དེ། དེ་ཡང་། འདས་པའི་དེ་བཞིན་ཉིད་གང་མ་འོངས་དེ་བཞིན་ཉིད། །ད་ལྟར་དེ་བཞིན་ཉིད་འདི་ཐམས་ཅད་བྱེ་བྲག་མེད། །ཅེས་པ་ལྟ་བུའོ། །དེ་ལྟར་རྟོགས་པ་ནི་སེམས་ཅན་ཀུན་ལས་ཆེས་ཁྱད་པར་འཕགས་པས་གཙོ་བོ་ཆེའོ། །དེ་ཡང་། འཇིག་རྟེན་པ་བས་ཉན་

49-1-22a

ཐོས་ཡོན་ཏན་ཆེ་ལ། དེ་ལས་ཀྱང་རང་རྒྱལ་བ། དེ་ལས་ཀྱང་བྱང་ཆུབ་སེམས་དཔའ། དེ་བས་ཀྱང་དེ་བཞིན་གཤེགས་པ་ཡོན་ཏན་ཆེ་བ་རྣམས་ཞེས་བྱའོ། །ཐོད་ནི་ཡོན་ཏན་གྱིས་མཛེས་པར་བརྒྱན་པའོ། །དེ་ལས་ཀྱང་ཐོད་ལྟར་མཛེས་ཤིང་རབ་ཏུ་གྱུར་པ་ནི་རྗེ་བཙུན་
ཉིད་དོ། །དེ་ལྟར་འགྲོ་བའི་ལུས་ཀུན་དུ་སྐྱེ་བ་གྲོལ་ནས་ནམ་མཁའ་ལྟ་བུའི་ཡེ་ཤེས་ལ་གནས་སོ། །འོ་ན་འགྲོ་བའི་དོན་ཇི་ལྟར་མཛད་ན། ཡིད་བཞིན་ནོར་བུ་ཆེན་པོ་འཆང་། །ཁྱབ་བདག་རིན་ཆེན་ཀུན་གྱི་བདག །དཔག་བསམ་ཤིང་ཆེན་རྒྱས་པ་སྟེ། བུམ་པ་བཟང་པོ་ཆེ་བའི་
མཆོག །བྱེད་པ་སེམས་ཅན་ཀུན་དོན་བྱེད། །ཕན་འདོགས་སེམས་ཅན་མཉེས་གཤིན་པ། །ཞེས་སྨོས་ཏེ། གཞན་དོན་འབྱུང་བའི་དཔེ་ཡིད་བཞིན་ནོར་བུ་ལ་ཡང་ཆོས་བརྒྱད་དེ། སེམས་ཅན་གྱི་དགོས་འདོད་འབྱུང་བ་དང་། དེ་ཡང་གསོལ་བ་མ་བཏབ་ན་མི་འབྱུང་བ་དང་བཏབ་ན་
འབྱུང་བ་དང་། དུས་སུ་འབྱུང་བ་དང་། ཇི་ལྟར་འཚམ་པར་འབྱུང་བ་དང་། ཟད་མི་ཤེས་པར་འབྱུང་བ་དང་། རྟོག་པ་མེད་པར་འབྱུང་བ་དང་། ཕྱིས་ལན་ལ་རེ་བ་མེད་པའོ། །དེ་དང་འདྲ་བའི་ཡོན་ཏན་རིན་པོ་ཆེ་ལྟ་བུ་དེས་ཀུན་ལ་ཁྱབ་པའི་བདག་ཉིད་དོ། །ཡང་དཔག་བསམ་ཤིང་དང་འདྲ་
སྟེ། དེ་ལ་ཡང་ཆོས་བཅུ་སྟེ། སྔ་མ་བརྒྱད་ཀྱི་ཁར་བསིལ་བ་དང་། འགྲོ་བ་ངལ་སོས་པའི་གནས་སུ་གྱུར་པ་ལྟ་བུ་དང་བཅུའོ། །ཡང་བུམ་པ་བཟང་པོ་བསྒྲུབ་པ་དང་འདྲ་སྟེ། དེ་ལ་ཆོས་བཅུ་སྟེ། སྔ་མ་བརྒྱད་ཀྱི་ཁར། བསྒྲུབས་ན་འབྱུང་བ་དང་། མ་བསྒྲུབས་ན་མི་འབྱུང་བ་དང་བཅུའོ། །
དེ་ཡང་། བུམ་པ་བཟང་པོ་དང་ནི་དཔག་བསམ་ཤིང་། །ཡིད་བཞིན་ནོར་རྣམས་སེམས་དང་མི་ལྡན་པས། །སེམས་ཅན་རྣམས་ཀྱི་དོན་ནི་འབྱུང་འགྱུར་ན། །ཐུགས་རྗེ་ཆེར་མངའ་རྒྱལ་བ་སྨོས་ཅི་དགོས། །ཞེས་པ་ལྟ་བུའོ། །དེ་ལྟར་བུ་གཅིག་པའི་མ་ལྟར་ཕན་འདོགས་པའོ། །
དེས་གདུལ་བྱའི་བསམ་པ་ཇི་ལྟར་མཁྱེན་ཅེ་ན། བཟང་ངན་ཤེས་ཤིང་དུས་ཤེས་ལ། །ཁྱབ་བདག་དམ་ཤེས་དམ་ཚིག་ལྡན། །དུས་ཤེས་སེམས་ཅན་དབང་དོན་ཤེས། །རྣམ་གྲོལ་གསུམ་ལ་མཁས་པ་པོ། །ཡོན་ཏན་ལྡན་ཞིང་ཡོན་ཏན་ཤེས། །ཞེས་སྨོས་ཏེ། ལས་བཟང་ངན་ཤེས་

49-1-22b

ཤིང་། དེའི་འབྲས་བུ་དུས་ཇི་ཙམ་ན་འབྱུང་ཤེས་ལ། ཐུགས་རྗེས་ཀུན་ལ་ཁྱབ་པའི་བདག་པོ་གཞན་གྱི་ཚིག་ཀྱང་ཤེས་ལ། རང་ཡང་དེ་ཁོ་ན་ལས་མི་འདའ་བའི་དམ་ཚིག་དང་ལྡན་པའོ། །དོན་མཛད་པའི་ཚེ་འདུལ་བའི་དུས་ཚོད་ཤེས་ཤིང་སེམས་ཅན་གྱི་དབང་པོ་རབ་འབྲིང་ཐ་མ་དང་། 
དད་པ་དང་བརྩོན་འགྲུས་རབ་འབྲིང་ཐ་མའི་དོན་ཤེས་པའོ། །དེ་ཡང་ཐམས་ཅད་མཁྱེན་པའི་ཡེ་ཤེས་མངའ་བས། ཉན་ཐོས་དང་། རང་རྒྱལ་བ་དང་། ཐེག་པ་ཆེན་པོ་དང་རྣམ་གྲོལ་གསུམ་ལ་མཁས་པའོ། །སྐུ་དང་ཡེ་ཤེས་སྟོབས་དང་མི་འཇིགས་པ་ལ་སོགས་པའི་ཡོན་ཏན་དང་
རྗེ་བཙུན་ཉིད་ཀྱང་ལྡན་ཞིང་། ཉན་ཐོས་དང་། རང་རྒྱལ་བ་ལ་སོགས་པའི་རྒྱུད་ལ་ཡོད་པའི་ཡོན་ཏན་རྣམས་ཀྱང་ཤེས་པའོ། །དེ་ལྟར་གྱུར་པའི་བཀྲ་ཤིས་པའི་དམ་པར་བསྟན་པའི་ཕྱིར། ཆོས་ཤེས་བཀྲ་ཤིས་བཀྲ་ཤིས་འབྱུང་། །བཀྲ་ཤིས་ཀུན་གྱི་བཀྲ་ཤིས་པ། །གྲགས་པའི་བཀྲ་ཤིས་
སྙན་གྲགས་དགེ། །དབུགས་འབྱིན་ཆེན་པོ་དགའ་སྟོན་ཆེ། །དགའ་ཆེན་རོལ་མོ་ཆེན་པོ་སྟེ། །ཞེས་སྨོས་ཏེ། དེ་ལྟར་ཆོས་ཀྱི་དོན་ཤེས་པས་ཆེ་འདིར་ཡང་ལེགས་པའི་ཡོན་ཏན་ཀུན་འབྱུང་བས་བཀྲ་ཤིས་ལ། ཕྱི་མར་ཡང་ལེགས་པའི་ཡོན་ཏན་ཀུན་འབྱུང་བས་བཀྲ་ཤིས་འབྱུང་ངོ་། །
འཇིག་རྟེན་པའི་ཚེ་རིང་བ་དང་། ནོར་དང་རིགས་རྒྱུད་འཕེལ་བ་ལ་སོགས་པ་བཀྲ་ཤིས་པ་རྣམས་ཀྱི་ནང་ན་ཡང་བཀྲ་ཤིས་དམ་པར་འགྱུར་རོ། །ཁམས་གསུམ་དུ་གྲགས་ཤིང་ལེགས་པའི་ཡོན་ཏན་འབྱུང་བས་གྲགས་པའི་བཀྲ་ཤིས་སོ། །མི་དགེ་བ་ལས་ལོག་ནས་དགེ་བ་སྣ་ཚོགས་ལ་ཞུགས་
པས་སྙན་གྲགས་དགེ་བའོ། །འགྲོ་བ་རྣམས་ཐར་པའི་ལམ་དུ་དབུགས་འབྱིན་པས་ཀུན་དགའ་བའི་ཆོས་ཀྱི་སྟོན་མོ་ཆེན་པོ་མཛད་ཅིང་། ཟག་མེད་ཀྱི་བདེ་བ་ཆེན་པོ་ཐོབ་པས་དགའ་ཆེན་ནོ། །འདོད་པའི་ཡོན་ཏན་མི་སྤོང་བས་རོལ་མོ་ཆེན་པོ་ཞེས་བྱའོ། །དེས་འགྲོ་བ་སྐྱོབ་པའི་ཚུལ་ནི། 
བཀུར་སྟི་རིམ་གྲོ་ཕུན་སུམ་ཚོགས། །མཆོག་ཏུ་དགའ་བའི་གྲགས་བདག་དཔལ། །མཆོག་ལྡན་མཆོག་སྦྱིན་གཙོ་བོ་སྟེ། །སྐྱབས་ཀྱི་དམ་པ་སྐྱབས་སུ་འོས། །འཇིག་རྟེན་དགྲ་སྟེ་རབ་ཀྱི་མཆོག །འཇིགས་པ་མ་ལུས་སེལ་བ་པོ། །ཞེས་སྨོས་ཏེ། ཀུན་གྱིས་བཀུར་བ་དང་། རིམ་གྲོར་

49-1-23a

བྱ་བའི་འོས་ནི་འཇིག་རྟེན་པ་དང་འཇིག་རྟེན་ལས་འདས་པའི་ཡོན་ཏན་ཕུན་སུམ་ཚོགས་པ་ཐམས་ཅད་ཀྱི་གཏེར་དུ་གྱུར་པ། མཆོག་ཏུ་འགྲོ་བའི་དོན་ལ་དགའ་བ། ཁམས་གསུམ་དུ་གྲགས་ཤིང་ཚོགས་གཉིས་རྫོགས་པས་དཔལ་ཏེ།  ཡོན་ཏན་གྱི་སྐལ་བ་མཆོག་དང་ལྡན་
ཞིང་། གཞན་ཡང་མཆོག་སྟེར་བའི་གཙོ་བོར་གྱུར་པའོ། །དེས་སྡུག་བསྔལ་བ་རྣམས་འཁོར་བའི་འཇིགས་པ་ལས་སྐྱོབ་ཅིང་དེ་ལས་ལྷག་པ་མེད་པས་སྐྱབས་སུ་འོས་པའོ། །ཅི་ལས་སྐྱོབ་ཅེ་ན། འཇིག་རྟེན་གྱི་རྟོག་པ་དགྲ་ཡིན་ཏེ། དེ་ལས་སྐྱོབ་པའོ། །དེ་ཡང་འཇིག་རྟེན་ལས་རབ་ཏུ་གྱུར་པས་
ཉན་ཐོས་སོ། །དེ་ལས་རབ་ཏུ་གྱུར་པས་རང་རྒྱལ་ལོ། །དེ་ལས་རབ་ཏུ་གྱུར་པས་བྱང་ཆུབ་སེམས་དཔའོ། །དེ་དག་ལས་ཀྱང་མཆོག་ཏུ་གྱུར་པ་རྗེ་བཙུན་ནོ། །དེས་བདུད་དང་སྡུག་བསྔལ་ཐམས་ཅད་སེལ་བར་བྱེད་པའོ། །མུ་སྟེགས་ཀྱི་ཆ་བྱད་ཀྱིས་འདུལ་བ་ལ་དེར་སྤྲུལ་ནས་འགྲོ་བའི་དོན་
མཛད་པའི་ཕྱིར། གཙུག་ཕུད་ཕུད་བུ་ལྕང་ལོ་ཅན། །རལ་པ་མུཉྫ་ཅོད་པན་ཐོགས། །གདོང་ལྔ་གཙུག་ཕུད་ལྔ་དང་ལྡན། །ཟུར་ཕུད་ལྔ་པ་མེ་ཏོག་ཐོད། །ཅེས་སྨོས་ཏེ། གཙུག་ཕུད་ནི་སྐྲ་དང་ཁ་སྤུ་བཞར་བྲེགས་ནས་སྤྱི་བོར་གཙུག་ཕུད་ཙམ་འཛིན་པས་འདུལ་བ་དེར་སྤྲུལ་ལོ། །
ཕུད་བུ་ནི་སྐྲ་གཞན་བྲེགས་ནས་དཔྲལ་བར་བཅིངས་པའོ། །ལྕང་ལོ་ཅན་ནི་སྐྲ་སིལ་བུ་རིང་བའོ། །རལ་པ་ནི་རལ་པ་སོག་ཁ་ནོན་པ་ནི། ལྷ་ཆེན་པོ་ལ་དད་པ་རྣམས་ཀྱི་གཟུགས་འཛིན་པའོ། །མུཉྫ་ནི་རྐེད་སོར་སླེབས་པའི་རལ་པ་སྐེ་རགས་སུ་བཅིངས་པའོ། །ཅོད་པན་ནི་དར་ལ་
སོགས་པ་ཐོད་དུ་བཅིངས་པའོ། །ཐ་མ་ཅོད་པན་དུ་འཕུར་བའོ། །གདོང་ལྔ་ནི་ཕྱོགས་བཞིན་གདོང་པ་བཞི། སྤྱི་བོའི་གཙུག་ན་གཅིག་སྟེ་ལྔའོ། །གདོང་པ་བཞི་ནས་རིག་བྱེད་ཀྱི་སྒྲ་བཞི་འདོན་ཏེ། ཤར་ནས་ངེས་བརྗོད་ཀྱི་རིག་བྱེད། ལྷོ་ནས་མཆོད་བརྗོད་ཀྱི་རིག་བྱེད། ནུབ་ནས་སྙན་
དངགས་ཀྱི་རིག་བྱེད། བྱང་ནས་སྲིད་སྲུང་གི་རིག་བྱེད་འདོན་པའོ། །དེ་ལྟར་ཚངས་པ་གདོང་ལྔ་པ་ལྟ་བུས་འདུལ་བ་དེར་སྤྲུལ་ལོ། །ཡང་མགོ་ལ་གཙུག་ཕུད་ལྔ་དང་ལྡན་པ་མུ་སྟེགས་གཟེགས་ཟན་གྱི་གཟུགས་ཀྱིས་འདུལ་བ་ལ་དེས་སྤྲུལ་ལོ། །ཡང་མགོ་ལ་རིན་པོ་ཆེའི་ཟུར་ཕུད་ལྔ་

49-1-23b

ཡོད་པ་དྲི་ཟའི་གཟུགས་ཀྱིས་འདུལ་བ་ལ་དེར་སྤྲུལ་ལོ། །ཡང་མགོ་ལ་མེ་ཏོག་གི་ཐོད་བཅིངས་པས་གཞན་འཕྲུལ་དབང་བྱེད་ཀྱི་ལྷའི་གཟུགས་ཀྱིས་འདུལ་བ་ལ་དེར་སྤྲུལ་ལོ། །འོ་ན་སངས་རྒྱས་པའི་བརྟུལ་ཞུགས་ཇི་ལྟར་འཛིན་ཞེ་ན། མགོ་ཟླུམ་བརྟུལ་ཞུགས་ཆེན་པོ་འཆང་། །ཚངས་
པར་སྤྱོད་པ་བརྟུལ་ཞུགས་མཆོག །དཀའ་ཐུབ་མཐར་ཕྱིན་དཀའ་ཐུབ་ཆེ། །གཙང་གནས་དམ་པ་གཽ་ཏ་མ། །བྲམ་ཟེ་ཚངས་པ་ཚངས་པ་ཤེས། །ཞེས་སྨོས་ཏེ། ཤཱཀྱ་ཐུབ་པ་ལྟ་བུའི་རབ་ཏུ་བྱུང་བས་འདུལ་བ་ལ་མགོ་ཟླུམ་དུ་སྤྲུལ་ནས་གནོད་པ་ལས་ཟློག་པའི་བརྟུལ་ཞུགས་འཛིན་པར་མཛད་དོ། །
ཡང་ཚངས་པར་སྤྱོད་པའི་སྡོམ་པ་ལ་གནས་ཤིང་བརྟུལ་ཞུགས་འཛིན་པས་འདུལ་བ་ལ་དེར་སྟོན་ཏོ། །ཤཱཀྱ་ཐུབ་པ་ཆུ་བོ་ནེ་ར་ཛཱ་རར་དཀའ་ཐུབ་མཛད་པ་ལྟ་བུ་ལ་ཡང་དེར་སྟོན་ཏོ། །གཽ་ཏ་མ་ནི་ཤཱཀྱའི་རིགས་ཏེ། གཙང་སྦྲ་ལ་གནས་པ་རྒྱལ་རིགས་སུ་སྤྲུལ་པ་དང་། རང་བཞིན་གྱིས་དཀའ་ཐུབ་
དང་། གཙང་སྦྲ་ལ་གནས་པ་བྲམ་ཟེ་ལྟ་བུར་ཀྱང་སྤྲུལ་པ་མཛད་དོ། །ཉིད་ལ་ཉེས་པའི་སྐྱོན་གྱིས་མ་གོས་པས་ཚངས་པ། གཞན་སྐྱོན་དང་བྲལ་བའི་ཐབས་ཤིས་པས་ཚངས་པ་ཤེས་ཞེས་བྱའོ། །དེ་ལྟར་སྤྲུལ་པའི་ཕན་ཡོན་ཅི་ཞེ་ན། མྱ་ངན་འདས་པ་ཚངས་པ་ཐོབ། །གྲོལ་བ་ཐར་པ་རྣམ་གྲོལ་ལུས། །རྣམ་གྲོལ་
ཞི་བ་ཞི་བ་ཉིད། །མྱ་ངན་འདས་པ་མྱ་ངན་འདས། །ལེགས་པར་མྱ་ངན་འདས་དང་ཉེ། །བདེ་སྡུག་སེལ་བ་མཐར་གྱུར་པ། །ཞེས་སྨོས་ཏེ། འཁོར་བའི་སྡུག་བསྔལ་དང་བྲལ་བས་མྱ་ངན་ལས་འདས་པའོ། །དེ་ཉིད་ལ་ཞེན་པ་དང་བྲལ་བས་ཚངས་པ་ཐོབ་པའོ། །དེ་ལྟར་
འཆིང་བ་མཐའ་དག་ལས་གྲོལ་ཞིང་ཐར་ནས་ཡེ་ཤེས་ཀྱི་སྐུ་ཐོབ་སྟེ། དེས་ཡོན་ཏན་ཐམས་ཅད་འབྱུང་བའི་རྟེན་བྱེད་པས་ལུས་ཞེས་བྱའོ། །དེ་ལྟར་ཉོན་མོངས་པ་ལས་གྲོལ་ཞིང་སྤྲོས་པའི་མཚན་མ་ཐམས་ཅད་ཞི་བས་ཞི་བའོ། །ཞི་བ་དེ་ཉིད་ལས་མྱ་ངན་ལས་འདས་པའི་ཆོས་ཀྱི་ཡོན་ཏན་རྣམས་
འབྱུང་སྟེ། མྱ་ངན་ལས་འདས་པ་ནི་ཉན་ཐོས་ཀྱི་ལམ་མོ། །མྱ་ངན་ལས་འདས་པ་ཕྱི་མ་ནི་རང་རྒྱལ་བའི་ལམ་མོ། །ལེགས་པར་མྱ་ངན་ལས་འདས་པ་ནི་བྱང་ཆུབ་སེམས་དཔའ་རྣམས་སོ། །བདེ་བ་མྱ་ངན་ལས་འདས་པའི་མཐའ་དང་། སྡུག་བསྔལ་འཁོར་བའི་མཐའ་གཉིས་སེལ་ཏེ།

49-1-24a

མཐར་གྱུར་པའི་ཡེ་ཤེས་དང་ལྡན་པ་ནི་སངས་རྒྱས་ཉིད་དོ། །གཞིའི་གནས་ལུགས་རྣམ་པར་དག་པའི་ངོ་བོ་ཉིད་དུ་བསྟན་པའི་ཕྱིར། ཆགས་བྲལ་ལུས་ལས་འདས་པ་པོ། །ཐུབ་པ་མེད་པ་དཔེ་མེད་པ། །མི་མངོན་མི་སྣང་གསལ་བྱེད་མིན། །མི་འགྱུར་ཀུན་འགྲོ་
ཁྱབ་པ་པོ། །ཕྲ་ཞིང་ཟག་མེད་ས་བོན་བྲལ། །རྡུལ་མེད་རྡུལ་བྲལ་དྲི་མ་མེད། །ཉེས་པ་སྤངས་པ་སྐྱོན་མེད་པ། །ཞེས་སྨོས་ཏེ། ཡུལ་རྣམས་ལ་ཆགས་པའི་བློ་དང་བྲལ་བའི་ཡེ་ཤེས་སུ་སྣང་བ་ལས་འདས་ཏེ། དེ་ཉིད་མི་མཐུན་པའི་ཕྱོགས་ཀྱི་སྟོབས་ཀྱིས་མི་བརྫི་བས་ཐུབ་པ་མེད་དོ། །གང་
དང་ཡང་མཉམ་པ་མེད་པས་དཔེ་མེད་དོ། །འདི་མཚན་ཉིད་དངོས་པོ་ཅིར་ཡང་མི་མཐོང་ལ་མཚན་མ་གང་དུ་ཡང་མི་སྣང་སྟེ། རང་བཞིན་གྱིས་འོད་གསལ་བའི་བདག་ཉིད་དུ་གནས་པས་དོན་ལ་གསལ་བྱེད་མི་དགོས་ཏེ་མར་མེ་ལྟ་བུའོ། །འདུས་མ་བྱས་པའི་རྐྱེན་གང་གིས་ཀྱང་མི་འགྱུར་ཞིང་། བདེ་
གཤེགས་ཀྱི་སྙིང་པོ་ཀུན་གྲོལ་དེས་ཏིལ་འབྲུ་ལ་མར་བཞིན་ཀུན་ལ་ཁྱབ་པོ། །རྟུལ་པོས་མི་ཤེས་པས་ཕྲ་ཞིང་ཟག་པ་སྟེ་སྲིད་པར་སྐྱེ་བའི་ས་བོན་མ་རིག་པ་བདག་ཏུ་འཛིན་པ་དང་བྲལ་བའོ། །དེ་ལྟར་གཞི་ལ་རྣམ་པར་རྟོག་པའི་རྡུལ་དག་ནས་མེད་ལ། དེ་མ་རྟོགས་པའི་བློ་ཡང་དེ་ཉིད། རྟོགས་
ན་རྟོགས་པའི་རྡུལ་དང་བྲལ་བར་འགྱུར་ལ། དེ་ཉིད་ལ་ཡང་མ་ཞེན་པས་དྲི་མ་མེད་པའོ། །དེ་ལྟར་སྒྲིབ་གཉིས་སྤངས་པས་ཉེས་པའི་སྐྱོན་གང་ཡང་མེད་པའོ། །དོན་གཉིས་སུ་མེད་པ་ལྷུན་གྱིས་གྲུབ་པའི་ཚུལ་ནི། ཤིན་ཏུ་སད་པ་སད་པའི་བདག །ཀུན་ཤེས་ཀུན་རིག་དམ་པ་པོ། །རྣམ་པར་
ཤེས་པའི་ཆོས་ཉིད་འདས། །ཡེ་ཤེས་གཉིས་མེད་ཚུལ་འཆང་བ། །རྣམ་པར་རྟོག་མེད་ལྷུན་གྱིས་གྲུབ། །ཅེས་སྨོས་སྒྲིབ་པ་གཉིས་ལས་སད་པའམ། ཡང་ན་སྣང་བ་ཡེ་ཤེས་སུ་སད་པའམ། སེམས་སྟོང་པར་སད་པས་ཇི་སྙེད་པ་ཀུན་ཤེས་ཤིང་། ཇི་ལྟ་བ་རིག་ལ། དེ་ཡང་དབྱེར་
མེད་དུ་ཤེས་པས་དམ་པའོ། །དེ་ལྟར་རྟོག་པ་དང་བྲལ་བས་རྣམ་པར་ཤེས་པའི་ཆོས་ཉིད་ཀྱི་ཀློང་དུ་འདས་པའོ། །འདས་པ་ཙམ་ན་གཉིས་སུ་མེད་པའི་ཡེ་ཤེས་ཀྱི་ཚུལ་འཆང་བའོ། །རྣམ་པར་རྟོག་པ་དང་བྲལ་བའི་ཡེ་ཤེས་རྒྱུ་རྐྱེན་མེད་པར་ལྷུན་གྱིས་གྲུབ་པ་སྟེ། ངོ་བོ་ལྷུན་གྲུབ་པོ། །དེ་ལ་ཡོན་ཏན་

49-1-24b

ཐམས་ཅད་ལྷུན་གྱིས་གྲུབ་པས་ཡོན་ཏན་ལྷུན་གྲུབ་པོ། །རྒྱུ་རྐྱེན་གྱིས་ཇི་ལྟར་མ་བསྐྱེད་ཅེ་ན། དུས་གསུམ་སངས་རྒྱས་ལས་བྱེད་པ། །སངས་རྒྱས་ཐོག་མ་ཐ་མ་མེད། །དང་པོའི་སངས་རྒྱས་རྒྱུ་མེད་པ། །ཡེ་ཤེས་མིག་གཅིག་དྲི་མ་མེད། །ཡེ་ཤེས་ལུས་ཅན་དེ་བཞིན་གཤེགས། །ཞེས་སྨོས་ཏེ། 
དུས་གསུམ་གྱི་སངས་རྒྱས་རྣམས་ཀྱིས་སེམས་ཅན་འདྲེན་པའི་ལས་མཛད་དེ། སངས་རྒྱས་ལ་ཐོག་མ་འདི་ནས་བྱུང་བྱ་བ་དང་། ཐ་མ་འདིར་སོང་བྱ་བ་མེད་དེ་དང་པོ་ཉིད་ནས་རྒྱུ་མེད་པའོ། །དེ་ལ་གཉིས་འཛིན་གྱི་དྲི་མ་མེད་པས་ཡེ་ཤེས་མིག་གཅིག་གོ། །ཡེ་ཤེས་དྲུག་རོ་གཅིག་པའི་ལུས་
ཡིན་པས་དེ་སྐད་ཅེས་བྱའོ། །དེ་ལ་གསུང་གི་ཁྱད་པར་ཅི་ཞེ་ན། ཚིག་གི་དབང་ཕྱུག་སྨྲ་བ་ཆེ། །སྨྲ་བའི་སྐྱེས་མཆོག་སྨྲ་བའི་རྒྱལ། །སྨྲ་བའི་དམ་པ་མཆོག་གི་གནས། །སྨྲ་བའི་སེང་གེ་མཚུངས་པ་མེད། །ཅེས་སྨྲས་ཏེ། ཟབ་ཅིང་རྒྱ་ཆེ་བའི་ཆོས་གསུངས་པས་ཚིག་གི་དབང་ཕྱུག་སྨྲ་བ་ཆེའོ། །མུ་སྟེགས་
ཀྱི་སྨྲ་བ་ལས་མཆོག་ཏུ་གྱུར་ཅིང་། ཉན་ཐོས་ཀྱི་སྨྲ་བ་ཟིལ་གྱིས་གནོན་པས་སྨྲ་བའི་རྒྱལ་ལོ། །རང་རྒྱལ་བའི་སྨྲ་བ་ལས་འཕགས་པས་དམ་པའོ། །སྐྱེ་མེད་ཀྱི་སྒྲ་ཆོས་སྨྲ་བའི་གོང་ན་གཞན་མེད་པས་མཆོག་གི་གནས་སོ། །དེ་ནི་སེང་གེ་དང་འདྲ་སྟེ་བདུད་ལ་སོགས་པའི་རྒོལ་བས་མི་ཚུགས་སོ། །
འོ་ན་སྐུའི་ཆེ་བ་གང་ཞེ་ན། ཀུན་དུ་ལྟ་བ་མཆོག་ཏུ་དགའ། །གཟི་བརྗིད་ཕུང་པོ་བལྟ་ན་སྡུག །འོད་བཟངས་འབར་བ་དཔལ་གྱི་བེའུ། །ལག་ན་འོད་འབར་སྣང་བ་པོ། །ཞེས་སྨོས་ཏེ། ཤེས་རབ་དམ་པས་དོན་ལ་ལྟ་ཞིང་། ཐུགས་རྗེ་དམ་པས་འགྲོ་བ་ལ་གཟིགས་པས་ཀུན་དུ་ལྟ་བའོ། །བདེ་བ་ཆེན་
པོ་འཕགས་པས་མཆོག་ཏུ་དགའོ། །གཟི་བརྗིད་ཆེན་པོ་གཞན་ཡིད་དུ་འོང་ཞིང་སྡུག་པའི་སྐུ་མངའ་ལ། ནང་ན་ཡེ་ཤེས་དྲུག་འབར་བས་མ་རིག་པའི་མུན་པ་སེལ་བའི་རྟགས་ཕྱི་རུ་འོད་ཁ་དོག་དྲུག་འབར་བའོ། །མཚན་ཐུན་མོང་མ་ཡིན་པ་ཐུགས་ཀ་ན་རིན་པོ་ཆེ་དཔལ་བེའུས་བརྒྱན་པའོ། །ཕྱག་
ལས་ཀྱང་འོད་ཟེར་འབར་ཏེ་ཞི་བས་འདུལ་བ་རྣམས་འདུན་པ་སྐྱེད་པར་བྱེད་ལ། དེས་མི་འདུལ་བ་རྣམས་ཚར་གཅོད་པར་བྱེད་དོ། །དེས་འགྲོ་བའི་ནད་ཇི་ལྟར་སེལ་ཞེ་ན། སྨན་པ་ཆེ་མཆོག་གཙོ་བོ་སྟེ། །ཟུག་རྔུ་འབྱིན་པ་བླ་ན་མེད། །སྨན་རྣམས་མ་ལུས་ལྗོན་པའི་ཤིང་། །ནད་དོ་ཅོག་གི་དགྲ་ཆེ་བ། །ཞེས་

49-1-25a

སྨོས་ཏེ། སྨན་པའི་མཆོག་སྟེ་བདག་མེད་ཀྱི་དོན་བསྟན་ནས་བདག་འཛིན་གྱི་ཟུག་རྔུ་འབྱིན་ཅིང་། དེ་ཡང་སྨན་གྱི་དཔེ་ནི་ལྗོན་ཤིང་དང་འདྲ་སྟེ། རྩ་བ་དང་ཡལ་ག་དང་ལོ་འདབ་དང་མེ་ཏོག་ལ་བརྟེན་ནས་འབྲས་བུ་འབྱུང་བ་ལྟར་རྩ་བ་ནི་བྱང་ཆུབ་སེམས་སོ། །ཡལ་ག་ནི་རྟོགས་
པར་བྱེད་པའི་ཐབས་ཀྱི་ཡན་ལག་རྣམས་སོ། །ལོ་མ་ནི་འདིར་ཐེག་པ་སོ་སོའི་ཆོས་ཀྱང་བཀག་པ་མེད་པའོ། །མེ་ཏོག་ནི་རྟོགས་པའི་ཉམས་མྱོང་ངོ་། །འབྲས་བུ་ནི་དེ་མཐར་ཕྱིན་པའོ། །དེར་ཡང་མ་ཟད་དེ་ཕྱི་ནང་གི་སྨན་སྣ་ཚོགས་སུ་ཡང་སྤྲུལ་ལོ། །དེས་དགྲ་ཕྱི་ནང་གི་ནད་སེལ་བར་
བྱེད་དོ། །འོ་ན་སྐུའི་ཁྱད་པར་ཅི་ཞེ་ན། སྡུ་གུ་འཇིག་རྟེན་གསུམ་གྱི་མཆོག །དཔལ་ལྡན་རྒྱུ་སྐར་དཀྱིལ་འཁོར་ཅན། །ཞེས་སྨོས་ཏེ། སེམས་ཅན་གྱི་ངོ་བོ་ལ་སྡུག་ཅིང་མཛེས་པར་སྤྲུལ་ནས་དོན་མཛད་དེ། དཔེར་ན་རྒྱུ་སྐར་རྣམས་ཀྱི་ནང་ན་ཟླ་བ་ལྟར། ལྷ་དང་མི་རྣམས་ཟིལ་གྱིས་གནོན་པའོ། །དེས་
སྐྱོབ་པའི་ཐུགས་རྗེ་ཇི་ལྟ་བུ་ཞེ་ན། ཕྱོགས་བཅུ་ནམ་མཁའི་མཐས་གཏུགས་པ། །ཆོས་ཀྱི་རྒྱལ་མཚན་ལེགས་པར་འཛུགས། །འགྲོ་ན་གདུགས་གཅིག་ཡངས་པ་སྟེ། །བྱམས་དང་སྙིང་རྗེའི་དཀྱིལ་འཁོར་ཅན། །དཔལ་ལྡན་པདྨ་གར་གྱི་བདག །ཁྱབ་བདག་ཆེན་པོ་རིན་ཆེན་གདུགས། །
ཞེས་སྨོས་ཏེ། རྒྱ་ནི་ཕྱོགས་བཅུ་ནམ་མཁའི་མཐའ་དང་མཉམ་པར་དམ་པའི་ཆོས་སྒྲོགས་པའི་མཚན་མར་རྒྱལ་མཚན་འཛུགས་ཤིང་། གདུགས་ཀྱིས་ཆར་དང་ཉི་མ་ལ་སོགས་པ་སྐྱོབ་པ་ལྟ་བུ་ནི། བྱམས་པ་དང་སྙིང་རྗེར་ལྡན་པའི་དབང་གིས་སོ། །དེ་ཡང་མ་གོས་པ་པདྨ་དང་འདྲ་ལ། འགྲོ་བ་
འདྲེན་པའི་ཐབས་སྣ་ཚོགས་སྒྱུར་བ་ནི་གར་དང་འདྲའོ། །དེ་ཡང་ཡོན་ཏན་རིན་པོ་ཆེའི་གདུགས་ལྟ་བུས་སྐྱོབ་པའི་བདག་པོ་ནི་རྗེ་བཙུན་ཉིད་དོ། །ཇི་ལྟར་བསྟན་ཀྱང་ངེས་པའི་ལམ་གཅིག་ལས་མེད་པའི་ཕྱིར།  སངས་རྒྱས་ཀུན་གྱི་གཟི་བརྗིད་ཆེ། །སངས་རྒྱས་ཀུན་གྱི་སྐུ་ཆེ་བ། །སངས་རྒྱས་ཀུན་གྱི་
རྣལ་འབྱོར་ཆེ། །སངས་རྒྱས་ཀུན་གྱི་བསྟན་པ་གཅིག །ཅེས་སྨོས་ཏེ། རྗེ་བཙུན་ཉིད་ལ་སངས་རྒྱས་ཀུན་གྱི་གཟི་བརྗིད་ཆེན་པོ་མངའ་ལ། སངས་རྒྱས་ཀུན་གྱི་སྐུ་རྣམ་པ་གསུམ་ཡང་འཆང་བར་མཛད་དེ། ཐམས་ཅད་རྗེ་བཙུན་གྱི་སྤྲུལ་པ་ཡིན་པའི་ཕྱིར་རོ། །སངས་རྒྱས་ཀུན་གྱི་རྣལ་

49-1-25b

འབྱོར་ཆེ། །ཐབས་དང་ཤེས་རབ་ཀྱི་གཙོ་བོར་ཡང་ཞུགས་ལ། སངས་རྒྱས་ཀྱི་བསྟན་པའི་ཆོས་ཇི་སྙེད་ཅིག་གསུངས་ཀྱང་། ཡང་དག་པར་ན་གཉིས་སུ་མེད་པར་སྟོན་པའི་ཐེག་པ་གཅིག་ལས་མེད་དེ། དེ་ཡང་། ཐེག་པའི་སྒོ་མོ་བསམ་ཡས་ཀྱང་། །ངེས་པའི་དོན་དུ་གཅིག་ལས་མེད། །ཅེས་
པ་ལྟ་བུའོ། །ངེས་པའི་དོན་གཅིག་ལ་ཡེ་ཤེས་ལྔར་ཇི་ལྟར་སྣང་ཞེ་ན། རྡོ་རྗེ་རིན་ཆེན་དབང་བསྐུར་དཔལ། །རིན་ཆེན་ཀུན་བདག་དབང་ཕྱུག་སྟེ། །འཇིག་རྟེན་དབང་ཕྱུག་ཀུན་གྱི་བདག །རྡོ་རྗེ་འཆང་བ་ཀུན་གྱི་རྗེ། །སངས་རྒྱས་ཀུན་གྱི་ཐུགས་ཆེ་བ། །ཞེས་སྨོས་ཏེ། རྡོ་རྗེ་ནི་ཚུར་མི་ཚུགས་པ་དང་
ཕར་ཤེས་བྱ་འབིགས་པ་སྟེ། ཆོས་ཀྱི་དབྱིངས་རྟོགས་པ་ལ་དབང་ཐོབ་པས། དེ་ནི་མེ་ལོང་ལྟ་བུའི་ཡེ་ཤེས་མི་བསྐྱོད་པའི་ངོ་བོ་སྟེ། དེས་ཞེ་སྡང་རང་ཁ་མ་འདུལ་བར་བྱེད་པའོ། །ཆོས་ཐམས་ཅད་མཉམ་པ་ཉིད་དུ་རྟོགས་ཏེ། ཡོན་ཏན་རིན་པོ་ཆེ་ཀུན་ལ་དབང་སྒྱུར་བའི་བདག་པོ་ནི་མཉམ་པ་
ཉིད་ཀྱི་ཡེ་ཤེས་རིན་ཆེན་འབྱུང་ལྡན་གྱི་ངོ་བོ་སྟེ། དེས་ང་རྒྱལ་དང་སེར་སྣ་རང་ཁ་མ་འདུལ་ལོ། །དེས་འཇིག་རྟེན་གྱི་ཆོས་ཐམས་ཅད་ཀྱི་ངོ་བོ་སོ་སོ་མ་འདྲེས་པ་ལ་གསལ་བ་ལ་དབང་སྒྱུར་བའི་བདག་པོ་ནི་སོ་སོར་རྟོག་པའི་ཡེ་ཤེས་སྣང་བ་མཐའ་ཡས་ཀྱི་ངོ་བོ་སྟེ། དེས་འདོད་ཆགས་རང་ཁ་མ་འདུལ་
ལོ། །རྡོ་རྗེ་ལྟར་ཕྲིན་ལས་ཐོགས་པ་མེད་པར་འཆང་བ་ནི་བྱ་བ་གྲུབ་པའི་ཡེ་ཤེས་དོན་ཡོད་གྲུབ་པའི་ངོ་བོ་སྟེ། དེས་ཕྲག་དོག་དང་ལེ་ལོ་རང་ཁ་མ་འདུལ་ལོ། །སངས་རྒྱས་ཀུན་གྱི་ཐུགས་ཆོས་ཀྱི་དབྱིངས་རྣམ་པར་དག་པ་ཆེན་པོ་ནི་ཆོས་ཀྱི་དབྱིངས་ཀྱི་ཡེ་ཤེས་རྣམ་པར་སྣང་མཛད་ཀྱི་ངོ་བོ་སྟེ། དེས་
གཏི་མུག་རང་ཁ་མ་འདུལ་ལོ། །དེ་དག་ཀྱང་སྐུ་གསུང་ཐུགས་སུ་འདུས་ཚུལ་བསྟན་པའི་ཕྱིར། སངས་རྒྱས་ཀུན་གྱི་ཐུགས་ལ་གནས། །སངས་རྒྱས་ཀུན་གྱི་སྐུ་ཆེ་བ། །སངས་རྒྱས་ཀུན་གྱི་གསུང་ཡང་ཡིན། །ཞེས་སྨོས་ཏེ། རྗེ་བཙུན་གྱི་ཐུགས་ནི་ཡེ་ཤེས་དྲུག་རོ་གཅིག་ཅིང་མཉམ་པ་
སྟེ། དེས་སངས་རྒྱས་ཀུན་གྱི་ཐུགས་ལ་ཁྱབ་ཅིང་གནས་པའོ། །དེ་ཡང་ཤེས་བྱ་མ་ལུས་པ་མཁྱེན་ཅིང་རིག་པས་ན་ཐུགས་སོ། །སངས་རྒྱས་ཀུན་གྱི་སྐུར་སྤྲུལ་པ་ཡང་རྗེ་བཙུན་ཉིད་ཡིན་པས་སྐུ་རྣམས་ཀྱི་ནང་ན་ཆེ་བའོ། །དེ་ཡང་ཁྱབ་ཅིང་རྟེན་བྱེད་པ་དང་། སྣང་བས་ན་སྐུའོ། །སངས་

49-1-26a

རྒྱས་ཀུན་གྱི་གསུང་འབྱུང་བའི་རྒྱུ་དང་ངོ་བོ་ཉིད་དུ་ཡང་རྗེ་བཙུན་འགྱུར་བ་སྟེ། གསལ་བ་དང་གོ་བར་བྱེད་པ་དང་གྲགས་པའི་ཕྱིར་ན་གསུང་ངོ་། །དེས་གཞན་གྱི་མུན་པ་སེལ་ཞིང་མ་གོས་པ་ནི། རྡོ་རྗེ་ཉི་མ་སྣང་བ་ཆེ། །རྡོ་རྗེ་ཟླ་བ་དྲི་མེད་འོད། །ཆགས་བྲལ་ལ་སོགས་ཆགས་པ་ཆེ། །
ཁ་དོག་སྣ་ཚོགས་འབར་བའི་འོད། །རྡོ་རྗེ་སྐྱིལ་ཀྲུང་རྫོགས་སངས་རྒྱས། །སངས་རྒྱས་འགྲོ་བའི་ཆོས་འཛིན་པ། །དཔལ་ལྡན་སངས་རྒྱས་པདྨ་སྐྱེས། །ཞེས་སྨོས་ཏེ། གཉིས་སུ་མེད་པའི་ཡེ་ཤེས་ཀྱིས་སྲིད་པའི་རྒྱ་མཚོ་སྐེམས་པས་ཉི་མ་ཆེའོ། །མ་རིག་པའི་མུན་པ་སེལ་བའི་ཟླ་བའི་འོད་དོ། །
ཆགས་པ་རང་ཁ་མ་དང་བྲལ་ཞིང་དོན་དང་གདུལ་བྱ་ལ་ཆགས་པའོ། །ཡང་ན་ཕ་རོལ་ཏུ་ཕྱིན་པས་འདུལ་བའི་གང་ཟག་ལ་ཆགས་པ་དང་བྲལ་བའི་ཚུལ་དུ་ཆོས་བཤད་ལ། གསང་སྔགས་ཀྱི་རིགས་ཅན་ལ་ཆགས་པ་རང་རྒྱུད་དུ་སྤྱོད་པའི་ཚུལ་གྱིས་ཆོས་བཤད་དོ། །ནང་ན་ཡེ་ཤེས་དང་ཐུགས་
རྗེའི་འོད་འབར་བའི་རྟགས། ཕྱི་རོལ་དུ་ཁ་དོག་སྣ་ཚོགས་ཀྱི་འོད་འབར་བའོ། །ཐབས་དང་ཤེས་རབ་དབྱེར་མེད་པའི་རྟགས་སུ་རྡོ་རྗེ་སྐྱིལ་ཀྲུང་དུ་བཞུགས་པའོ། །སངས་རྒྱས་རྣམས་འགྲོ་བ་ལ་བྱམས་པའི་ཆོས་འཛིན་པ་ནི་ཐུགས་མི་རྟོག་པའི་ཚུལ་གྱིས་རང་སྒྲར་ཤར་བ་ལ་བྱའོ། །
ཉེས་སྐྱོན་དང་བྲལ་བ་ནི་པདྨ་ལྟ་བུ་སྟེ། དེ་ནི་སངས་རྒྱས་ཀུན་གྱི་སྐྱེ་གནས་སུ་གྱུར་པའོ། །ཚུལ་ཇི་ལྟ་བུ་ཞེ་ན། ཀུན་མཁྱེན་ཡེ་ཤེས་མཛོད་འཛིན་པ། །རྒྱལ་པོ་སྒྱུ་འཕྲུལ་སྣ་ཚོགས་འཆང་། །ཆེ་བ་གསང་སྔགས་རིག་སྔགས་འཆང་། །ཞེས་སྨོས་ཏེ། ཤེས་བྱ་ཇི་ལྟ་བ་དང་ཇི་སྙེད་པ་
མཁྱེན་པས་ཀུན་མཁྱེན་ཡེ་ཤེས་ཀྱི་མཛོད་འཛིན་པའོ། །ཡོན་ཏན་གྱི་བགོ་སྐལ་ལས་རྒྱལ་བ་དང་བདུད་ལས་རྒྱལ་ཞིང་སྒྱུ་མ་ལྟ་བུའི་སྤྲུལ་པ་མོས་པ་སྣ་ཚོགས་འདུལ་བའི་ཐབས་སྣ་ཚོགས་འཆང་བའོ། །ཆེ་བའི་ཡོན་ཏན་ཁྱད་པར་དུ་གསང་སྔགས་ཀྱི་ངོ་བོ་ཐབས་ཤེས་རབ་དང་། རིག་
སྔགས་ཀྱི་ངོ་བོ་ཤེས་རབ་དང་ཡེ་ཤེས་འཆང་བའོ། །འོ་ན་ཤེས་རབ་ཀྱི་ལས་གང་ཞེ་ན། རྡོ་རྗེ་རྣོན་པོ་རལ་གྲི་ཆེ། །ཡི་གེ་མཆོག་སྟེ་རྣམ་པར་དག །ཐེག་པ་ཆེན་པོ་སྡུག་བསྔལ་གཅོད། །མཚོན་ཆ་ཆེན་པོ་རྡོ་རྗེ་ཆོས། །རྡོ་རྗེ་ཟབ་མོ་ཛི་ན་ཛི་ཀ །རྡོ་རྗེ་བློ་གྲོས་དོན་བཞིན་རིག །ཅེས་

49-1-26b

སྨོས་ཏེ། གཉིས་སུ་མེད་པའི་ཡེ་ཤེས་རལ་གྲི་དང་འདྲ་བས་བདག་ཏུ་རྟོག་པ་ཐམས་ཅད་གཅོད་ཅིང་། དོན་མི་འགྱུར་བ་ཡི་གེ་དང་འདྲ་སྟེ། རྟོག་པའི་དྲི་མས་མ་གོས་པས་མཆོག་གོ། །ཤེས་རབ་དང་སྙིང་རྗེས་ཁྱད་པར་བྱས་ནས་ཐེག་པ་ཆེན་པོ་སྟེ། དེ་རྟོགས་པས་སྡུག་བསྔལ་རྩ་
བ་ནས་གཅོད་པའོ། །དེ་གཅོད་པའི་མཚོན་ཆ་ནི་གཉིས་སུ་མེད་པའི་ཡེ་ཤེས་རྡོ་རྗེ་ལྟ་བུའོ། །དེ་ལྟ་བུའི་ཟབ་མོ་ནི་རྒྱལ་བའི་ཡང་རྒྱལ་པོ་ཡིན་པས་ཛི་ན་ཛི་ཀ་གོ། །ཤེས་རབ་ཆེན་པོའི་བློ་དང་ལྡན་པས། ཤེས་བྱ་ཇི་ལྟ་བ་རིག་པའོ། །དེ་ལྟར་རིག་པས་གདུལ་བྱ་ལ་རྒྱུ་འབྲས་ཀྱི་ཐེག་པ་སྟོན་པ་ནི། 
ཕ་རོལ་ཕྱིན་པ་ཀུན་རྫོགས་པ། །ས་རྣམས་ཀུན་གྱི་རྒྱན་དང་ལྡན། །རྣམ་པར་དག་པ་བདག་མེད་ཆོས། །ཡང་དག་ཡེ་ཤེས་ཟླ་འོད་བཟང་། །བརྩོན་ཆེན་སྒྱུ་འཕྲུལ་དྲ་བ་སྟེ། །རྒྱུད་ཀུན་གྱི་ནི་བདག་པོ་མཆོག །ཅེས་སྨོས་ཏེ། རྗེ་བཙུན་ཉིད་ལ་ཕ་རོལ་ཏུ་ཕྱིན་པའི་ངོ་བོ་རྣམས་ཀྱང་རྫོགས་པར་
མངའ་ལ།  ས་བཅུའི་ཡོན་ཏན་གྱིས་ཀྱང་བརྒྱན་ཏེ། མ་གོས་པས་རྣམ་པར་དག་པ་བདག་མེད་ཆོས་སོ། །ཡང་དག་པའི་ཡེ་ཤིས་ཟླ་བའི་འོད་ལྟ་བུས་མ་རིག་པ་དང་གདུང་བ་སེལ་ཞིང་། འགྲོ་བའི་དོན་ལ་བརྩོན་འགྲུས་ཆེན་པོ་དང་ལྡན་ཏེ། སྒྱུ་མ་ལྟ་བུའི་སྤྲུལ་པ་སྣ་ཚོགས་སྟོན་ཅིང་། ཁྱད་པར་
དུ་རྒྱུད་ཐམས་ཅད་ཀྱི་མཆོག་ཏུ་གྱུར་པ་གཉིས་སུ་མེད་པའི་ཡེ་ཤེས་སྟོན་པའོ། །རྩ་བ་བྱང་ཆུབ་ཀྱི་སེམས་གཉིས་སུ་མེད་པས་རྒྱལ་བ་ཀུན་གྱི་སྙིང་པོར་བསྟན་པའི་ཕྱིར། རྡོ་རྗེའི་གདན་ནི་མ་ལུས་ལྡན། །ཡེ་ཤེས་སྐུ་རྣམས་མ་ལུས་འཆང་། །ཀུན་དུ་བཟང་པོ་བློ་གྲོས་བཟང་། །ས་ཡི་སྙིང་པོ་འགྲོ་
བ་འཛིན། །སངས་རྒྱས་ཀུན་གྱི་སྙིང་པོ་ཆེ། །ཞེས་སྨོས་ཏེ། གཞི་ཆོས་སྐུ་རྡོ་རྗེ་ལྟ་བུའི་རྟོགས་པ་ལས་ཡེ་ཤེས་ཀྱི་སྐུ་སྣ་ཚོགས་འབྱུང་ཞིང་བཟང་ངན་དང་བླང་དོར་གང་ཡང་མེད་པས་ཀུན་དུ་བཟང་ལ། བདག་དང་གཞན་ལ་ཕན་པ་མཁྱེན་པས་བློ་གྲོས་བཟང་ངོ་། །ས་བཞིན་དུ་སེམས་ཅན་ལ་
ཕན་པའི་ཡོན་ཏན་སྐྱེད་པའི་ཕྱིར་དང་། སྣོད་ཀྱི་འཇིག་རྟེན་དུ་སྤྲུལ་ནས་འགྲོ་བའི་དོན་མཛད་པའི་ཕྱིར། སངས་རྒྱས་ཀུན་གྱི་སྤྲུལ་པ་འབྱུང་བའི་སྙིང་པོ་ཆེན་པོར་གྱུར་པའོ། །སྙིང་པོ་དེ་ལས་སྤྲུལ་པ་ཚུལ་ཇི་ལྟར་འབྱུང་བ་ནི། སྤྲུལ་པའི་འཁོར་ལོ་སྣ་ཚོགས་འཆང་། །དངོས་པོ་ཀུན་གྱི་

49-1-27a

རང་བཞིན་མཆོག །དངོས་པོ་ཀུན་གྱི་རང་བཞིན་འཛིན། །སྐྱེ་མེད་ཆོས་དེ་སྣ་ཚོགས་སྟོན། །ཞེས་སྨོས་ཏེ། རིག་པ་བྱང་ཆུབ་སེམས་ཅིར་ཡང་འཆར་བས་སྒྲུབ་ཐབས་ཀྱི་བྱེ་བྲག་སྣ་ཚོགས་འབྱུང་བ་ཡིན་ལ། དེར་ཡང་མ་ཟད་སྐུ་གསུང་ཐུགས་ཀྱི་སྤྲུལ་པ་སྣ་ཚོགས་
འབྱུང་བའི་གཞི་ཡིན་ལ། སྣོད་བཅུད་ཀྱི་དངོས་པོ་ཀུན་གྱི་རང་བཞིན་སྐྱེ་མེད་དུ་གནས་པས་ཀྱང་མཆོག་གོ། །དོན་སྐྱེ་བ་མེད་པས་ཀྱང་གཟུགས་ནས་རྣམ་པ་ཐམས་ཅད་མཁྱེན་པའི་བར་ལྟ་བུར་ཀྱང་མ་འགགས་པར་ཤར་བས་རང་བཞིན་འཛིན་ཏོ། །མདོར་ན་ཟབ་པར་སྐྱེ་བ་མེད་ཀྱང་རྒྱ་ཆེ་བ་སྣ་
ཚོགས་སུ་སྟོན་ཏོ། །ཟབ་པ་དང་རྒྱ་ཆེ་བ་གཉིས་སུ་མེད་པས་ཐེག་པ་ཐམས་ཅད་ཀྱི་མཆོག་ཅེས་བྱའོ། །ཤེས་རབ་དམ་པའི་ངོ་བོ་ཅི་ཞེ་ན། ཆོས་ཀུན་ངོ་བོ་ཉིད་འཆང་བ། །ཤེས་རབ་ཆེན་པོས་སྐད་ཅིག་ལ། །ཆོས་ཀུན་ཁོང་དུ་ཆུད་པ་སྟེ། །ཆོས་ཀུན་མངོན་པར་རྟོགས་པ་སྟེ། །ཞེས་སྨོས་ཏེ།
ཆོས་ཕུང་པོ་དང་། ཁམས་དང་། སྐྱེ་མཆེད་དང་། རྟེན་ཅིང་འབྲེལ་པར་འབྱུང་བ་ལ་སོགས་པ་ཀུན་གྱི་ངོ་བོ་ཉིད་ནི་མཉམ་པ་ཆེན་པོ་ཡིན་ལ། དེ་གང་གིས་རྟོགས་ན་ཤེས་རབ་ཆེན་པོས་སྐད་ཅིག་ལ། ཤེས་བྱའི་ཆོས་ཐམས་ཅད་ཁོང་དུ་ཆུད་དེ་མངོན་སུམ་དུ་གསལ་བར་རྟོགས་པའོ། །ཤེས་རབ་དེའི་
སྟོབས་ཇི་ལྟ་བུ་ཞེ་ན། ཐུབ་པ་བློ་མཆོག་འབྱུང་པོ་སེལ། །མི་གཡོ་རབ་ཏུ་དང་བའི་བདག །རྫོགས་པའི་སངས་རྒྱས་བྱང་ཆུབ་འཆང་། །སངས་རྒྱས་ཀུན་གྱི་མངོན་སུམ་པ། །ཡེ་ཤེས་མེ་ལྕེ་འོད་རབ་གསལ། །ཞེས་སྨོས་ཏེ། ལུས་ངག་ཡིད་གསུམ་མི་དགེ་བའི་ལས་ལ་ཐུབ་ཅིང་། ཆོས་ཉིད་
རྟོགས་པའི་བློའི་མཆོག་ཡོད་པས་རྣམ་རྟོག་གི་གནོད་པ་འབྱུང་བ་ལྟ་བུ་སེལ་ཏེ། མཚན་མ་གང་གིས་ཀྱང་མི་གཡོ་བར་ཆུ་དང་བལྟ་བུའི་བདག་ཉིད་གསལ་ལ་རྟོག་པ་མེད་པ་ནི་རྫོགས་པའི་སངས་རྒྱས་ཀྱི་བྱང་ཆུབ་སྟེ། དེ་ཡང་ལམ་ལ་གནས་པའི་རྣལ་འབྱོར་པས་ནི་མཆོག་མཁྱེན་ལ། སངས་
རྒྱས་ཀྱིས་མངོན་སུམ་མཁྱེན་ཏེ། ཡེ་ཤེས་དེའི་དཔེ་ནི་མེ་ལྕེ་འབར་བ་དང་འདྲ་ལ། མ་རིག་པ་སེལ་བ་དང་ཉོན་མོངས་པ་སེལ་བ་དང་། སྲིན་བུ་མེ་ཁྱེར་ལ་སོགས་པའི་འོད་ཟིལ་གྱིས་གནོན་པ་དང་། ཞིང་ཁམས་གྲངས་མེད་དུ་སྣང་བར་བྱེད་པའོ། །ད་ནི་མཉམ་པ་ཉིད་ཀྱི་ཡེ་ཤེས་ཀྱི་སྒོ་ནས་

49-1-27b

འཇམ་དཔལ་ཡེ་ཤེས་སེམས་དཔའི་མཚན་བསྟན་པའི་ཕྱིར། འདོད་པའི་དོན་གྲུབ་དམ་པ་སྟེ། །ངན་སོང་ཐམས་ཅད་རྣམ་སྦྱོང་བ། །མགོན་པོ་སེམས་ཅན་ཀུན་གྱི་མཆོག །སེམས་ཅན་ཐམས་ཅད་རབ་གྲོལ་བྱེད། །ཉོན་མོངས་གཡུལ་དུ་གཅིག་དཔའ་བ། །མི་ཤེས་དགྲ་ཡི་དྲེགས་པ་
འཇོམས། །ཞེས་པ་ལ་སོགས་པ་སྨོས་ཏེ། མཐོ་རིས་དང་ཐར་པ་འདོད་པ་རྣམས་ཀྱི་དོན་དུ་སྦྱིན་པ་ལ་སོགས་པའི་སྒོ་ནས་སྒྲུབ་པར་བྱེད་དེ། དམན་པ་ངན་སོང་གསུམ་ལས་ཀྱང་ཐར་པ་དང་རྗེས་སུ་མཐུན་པའི་ཆོས་རྣམས་བསྟན་ནས་རྒྱུ་དང་འབྲས་བུ་སྦྱོང་ཞིང་། སེམས་ཅན་ཀུན་གྱི་དོན་
བྱེད་པས་མཆོག་གོ། །སེམས་ཅན་ཐམས་ཅད་ཀྱི་བསམ་པ་མཁྱེན་པས་བློའི་རིམ་པ་དང་སྦྱར་ནས་ཉོན་མོངས་པའི་འཆིང་བ་ལས་གྲོལ་བར་བྱེད་དོ། །ཆོས་ཇི་སྙེད་ཅིག་བཤད་ཀྱང་ཉོན་མོངས་པ་འདུལ་བའི་གཉེན་པོར་གཅིག་གོ། །དེས་མུ་སྟེགས་ལ་སོགས་པ་ཟིལ་གྱིས་གནོན་པས་
དྲེགས་པ་འཇོམས་པའོ། །གཞན་གྱི་ཉོན་མོངས་པ་དེ་ལྟར་འཇོམས་ན། འོ་ན་གཞན་འདུལ་བའི་གཟུགས་སུ་ཇི་ལྟར་སྟོན་ཞེ་ན། དཔལ་ལྡན་བློ་དང་སྒེག་པར་ལྡན། །བརྟན་པོ་མི་སྡུག་གཟུགས་འཆང་བ། །ཞེས་སྨོས་ཏེ། བདག་དང་གཞན་གྱི་དཔལ་དུ་གྱུར་པས་ཤེས་རབ་ཆེན་པོའི་བློ་དང་
ལྡན་པ། བལྟ་ན་མཛེས་པར་མཛད་པས་ན་སྒེག་པའོ། །དོན་མི་འགྱུར་བར་བརྟན་ལ། ཞི་བས་མི་འདུལ་བ་ལ་བདུད་ལ་སོགས་པ་ཟློག་པའི་འཇིགས་སུ་རུང་བའི་གཟུགས་འཆང་བའོ། །དེ་ཡང་གར་ལ་མོས་པ་ལ་གར་དུ་སྟོན་པའི་ཕྱིར། །ལག་པ་བརྒྱ་པོ་ཀུན་བསྐྱོད་ཅིང་། །གོམ་པའི་སྟབས་ཀྱིས་
གར་བྱེད་པ། །དཔལ་ལྡན་ལག་པ་བརྒྱས་གང་ལ། །ནམ་མཁའ་ཁྱབ་པར་གར་བྱེད་པ། །ཞེས་སྨོས་ཏེ། ཚངས་པ་འདུལ་བའི་གར་ལག་པ་བརྒྱ་སྤྲུལ་ཏེ་བསྒྱུར་བ་དང་། ཚོགས་གཉིས་རྫོགས་པའི་མཐུས་ལག་པ་བརྒྱར་སྤྲུལ་ཏེ། ནམ་མཁའ་ཁྱབ་ཚད་དུ་འགྲོ་བའི་དོན་བྱེད་པའོ། །ལུས་
ཀྱི་རྫུ་འཕྲུལ་གཞན་ཡང་སྟོན་པའི་ཕྱིར། ས་ཡི་དཀྱིལ་འཁོར་གཞི་ཡི་ཁྱོན། །རྐང་པ་ཡ་གཅིག་མཐིལ་གྱིས་གནོན། །རྐང་མཐེབ་སེན་མོའི་ཁྱོན་གྱིས་ཀྱང་། །ཚངས་པའི་ཡུལ་ས་རྩེ་ནས་གནོན། །ཞེས་སྨོས་ཏེ། གླིང་བཞིའི་ཁྱབ་འཇུག་གིས་འདུལ་བ་དེའི་གཉེན་པོར་གླིང་བཞི་རི་རབ་

49-1-28a

དང་བཅས་པ་རྐང་པ་ཡ་གཅིག་གི་མཐིལ་གྱིས་མནན་པ་སྟེ། གླིང་བཞི་ཆུང་དུ་མ་སོང་ལ་ཞབས་ཆེ་རུ་མ་སོང་ངོ་། །གྱེན་ལ་ནི་ཞབས་ཀྱི་མཐེ་བོང་གིས་ཚངས་པའི་འཇིག་རྟེན་དུས་གཅིག་ཏུ་གནོན་ཏོ། །སྔ་མ་ལྟར་ཆེ་ཆུང་དུ་མ་སོང་བའི་རྫུ་འཕྲུལ་སྟོན་ཏོ། །འཁོར་བ་འདི་མ་
སྤངས་པར་ཇི་ལྟར་གྲོལ་བར་འགྱུར་ཞེ་ན། དོན་གཅིག་གཉིས་མེད་ཆོས་ཀྱི་དོན། །དམ་པའི་དོན་དེ་འཇིགས་པ་མེད། །རྣམ་རིག་སྣ་ཚོགས་གཟུགས་དོན་ཅན། །རྣམ་ཤེས་སྣ་ཚོགས་རྒྱུད་དང་ལྡན། །དངོས་དོན་མ་ལུས་རྣམས་ལ་དགའ། །སྟོང་པ་ཉིད་དགའ་འདོད་
ཆགས་བློ། །སྲིད་པའི་འདོད་ཆགས་སྤངས་པ་སྟེ། །སྲིད་གསུམ་དགའ་བ་ཆེན་པོ་པ། །ཞེས་སྨོས་ཏེ།  གཉིས་སུ་མེད་པ་ནི་དོན་དམ་པ་ཆོས་ཀྱི་སྐུ་ནི་དོན་དམ་པ་སྟེ། གཞན་གྱིས་མི་ཐུབ་པས་འཇིགས་པ་མེད་དེ། ཐུགས་རྗེ་དང་སྨོན་ལམ་གྱི་ཤུགས་ཀྱིས་རྣམ་རིག་སྣ་ཚོགས་ཀྱི་གཟུགས་སུ་སྤྲུལ་ལོ། །ཀུན་གཞི་རྣམ་ཤེས་
ཉིད་རྣམ་རྟོག་སྣ་ཚོགས་དང་འབྲེལ་པས་རྒྱུད་དོ། །དེ་ལྟར་དངོས་པོ་འཁོར་བའི་དོན་མ་ལུས་པར་མཛད་པ་ལས་དགྱེས་ཤིང་། དོན་དམ་པར་སྟོང་པ་ཉིད་ལ་དགའ་ཞིང་ཆགས་པའི་བློས་ཁམས་གསུམ་གྱི་འདོད་ཆགས་རང་ཁ་མ་ལས་གྲོལ་བས་སྤངས་པའོ། །ཤེས་རབ་ཆེན་པོས་སྲིད་པ་ལས་
གྲོལ་ཀྱང་ཐུགས་རྗེས་དེར་སྤྲུལ་ནས་དོན་མཛད་པ་ལ་དགའོ། །དོན་མཛད་པའི་ཚེ་སྐུའི་གཟི་མདངས་ཅི་འདྲ་ཞེ་ན། སྤྲིན་དཀར་དག་པ་བཞིན་དུ་དཀར། །འོད་བཟངས་སྟོན་ཀའི་ཟླ་བའི་འོད། །ཉི་མ་འཆར་ཀའི་དཀྱིལ་ལྟར་མཛེས། །སེན་མོའི་འོད་ནི་ཤས་ཆེར་དམར། །ཞེས་སྨོས་ཏེ། དོན་ལ་མ་
གོས་པའི་མཚན་མ་འོད་ཁ་དོག་སྤྲིན་ལྟར་དཀར་ཞིང་། ཡེ་ཤེས་ཀྱི་འོད་ཟེར་འཕྲོ་བའི་དཔེ་སྟོན་ཀའི་ཟླ་བའི་འོད་ལྟ་བུས་མ་རིག་པའི་མུན་པ་སེལ་ཞིང་གདུང་བ་ཚིམ་པར་བྱེད་པའོ། །དེ་ལས་ཀྱང་ཡེ་ཤེས་དྲུག་རོ་གཅིག་པའི་རྟགས་སུ་འོད་ཁ་དོག་དྲུག་དང་ལྡན་པའི་སྐུ་མངའ་སྟེ། འགྲོ་བ་ལ་ཐུགས་
རྗེས་ཆགས་པའི་རྟགས་སུ་ཕྱག་གི་སེན་མོ་དམར་བའོ། །རྒྱན་གྱི་ཁྱད་པར་ཇི་ལྟ་བུ་ཞེ་ན། ཅོད་པན་བཟང་པོ་མཐོན་ཀའི་རྩེ། །སྐྲ་མཆོག་མཐོན་ཀ་ཆེན་པོ་པ། །ནོར་བུ་ཆེན་པོ་འོད་ཆགས་དཔལ། །སངས་རྒྱས་སྤྲུལ་པའི་རྒྱན་དང་ལྡན། །ཞེས་སྨོས་ཏེ། མཐའ་གཉིས་ལས་རྒྱལ་བའི་

49-1-28b

རྟགས་སུ་དབུ་ལ་རིན་པོ་ཆེའི་ཅོད་པན་བཟང་ཞིང་མཛེས་པས་བརྒྱན་པའོ། །སྐྲ་ཡང་གཞན་པས་མཆོག་ཏུ་གྱུར་པས་རིན་པོ་ཆེ་མཐོན་ཀ་ལྟར་སྔོ་ཞིང་མཛེས་པའི་སྐྲ་མངའ་བའོ། །འགྲོ་བའི་དོན་རྫོགས་པར་མཛད་པའི་རྟགས་སུ་ཐུགས་ཀ་ན་ཡིད་བཞིན་གྱི་ནོར་བུ་རིན་པོ་ཆེས་བརྒྱན་ཅིང་། 
སངས་རྒྱས་ཀྱི་སྤྲུལ་པ་དཔག་ཏུ་མེད་པ་མངའ་བའི་རྟགས་སུ་བ་སྤུ་རེ་རེ་ལ་ཡེ་ཤེས་སེམས་དཔའ་རེ་རེ་གསལ་ཞིང་མཛེས་པས་བརྒྱན་པའོ། །དེ་ལྟ་བུ་དེ་ལ་ལམ་གྱི་ཁྱད་པར་ཇི་ལྟ་བུ་མངའ་ཞེ་ན། འཇིག་རྟེན་ཁམས་བརྒྱ་ཀུན་བསྐྱོད་པ། །རྫུ་འཕྲུལ་རྐང་པའི་སྟོབས་ཆེན་ལྡན། །དེ་ཉིད་
དྲན་པ་ཆེན་པོ་འཆང་། །ཞེས་སྨོས་ཏེ། འཇིག་རྟེན་ཁམས་བརྒྱ་ནི་མཚོན་པ་ཙམ་སྟེ། མཐའ་ཡས་པར་བསྐྱོད་པར་མཛད་དོ། །བསྐྱོད་ནས་ཅི་མཛད་ན་རྫུ་འཕྲུལ་གྱི་རྐང་པ་བཞི་ལ་སོགས་པའི་སྒོ་ནས་འགྲོ་དོན་མཛད་དེ། རྫུ་འཕྲུལ་གྱི་རྐང་པ་བཞི་ནི་འདུན་པའི་ཏིང་ངེ་འཛིན་དང་ལྡན་པ་རྫུ་
འཕྲུལ་གྱི་རྐང་པ་དང་། སེམས་ཀྱི་ཏིང་ངེ་འཛིན་དང་ལྡན་པ་རྫུ་འཕྲུལ་གྱི་རྐང་པ་དང་། བརྩོན་འགྲུས་ཀྱི་ཏིང་ངེ་འཛིན་དང་ལྡན་པ་རྫུ་འཕྲུལ་གྱི་རྐང་པ་དང་། དཔྱོད་པའི་ཏིང་ངེ་འཛིན་དང་ལྡན་པ་རྫུ་འཕྲུལ་གྱི་རྐང་པའོ། །དེ་ཡང་དོན་མི་བསྙེལ་བའི་དྲན་པ་ཆེན་པོ་འཆང་སྟེ། གཞན་ཡང་བྱང་ཆུབ་ཀྱི་ཡན་
ལག་གང་ཞེ་ན། དྲན་པ་བཞི་པོ་ཏིང་འཛིན་རྒྱལ། །བྱང་ཆུབ་ཡན་ལག་མེ་ཏོག་སྤོས། །དེ་བཞིན་གཤེགས་པའི་ཡོན་ཏན་མཚོ། །ལམ་གྱི་ཡན་ལག་བརྒྱད་ཚུལ་རིག །ཡང་དག་སངས་རྒྱས་ལམ་རིག་པ། །ཞེས་སྨོས་ཏེ། དྲན་པ་བཞི་ནི་ལུས་དྲན་པ་ཉེ་བར་གཞག་པ་དང་། སེམས་དང་། 
ཚོར་བ་དང་། ཆོས་སོ། །དེ་རྣམས་ནི་ཚོགས་ལམ་གྱི་གནས་སྐབས་སོ། །དྲན་པ་བཞི་པོ་དེ་ལ་ཡང་མ་ཞེན་པས་ཏིང་ངེ་འཛིན་རྒྱལ་ལོ། །དེ་ལ་མཐོང་ལམ་གྱི་གནས་སྐབས་ན་བྱང་ཆུབ་ཀྱི་ཡན་ལག་བདུན་ཏེ། དྲན་པ་ཡང་དག་བྱང་ཆུབ་ཀྱི་ཡན་ལག་དང་། ཆོས་རྣམ་པར་དབྱེ་བ་དང་། བརྩོན་
འགྲུས་དང་། དགའ་བ་དང་། ཤིན་ཏུ་སྦྱངས་པ་དང་། ཏིང་ངེ་འཛིན་དང་། བཏང་སྙོམས་སོ། །དེ་ལྟ་བུའི་སྒོ་ནས་འགྲོ་བའི་དོན་བྱེད་པ་དང་། འཕགས་པ་མཉེས་པར་བྱེད་པས་མེ་ཏོག་སྤོས་སོ། །དེར་ཡང་མ་ཟད་དེ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་སོགས་ཏེ།  དེ་བཞིན་

49-1-29a

གཤེགས་པའི་ཡོན་ཏན་རྒྱ་མཚོ་ཙམ་གྱི་གཞིར་རྗེ་བཙུན་ཉིད་འགྱུར་རོ། །གཞན་ཡང་བསྒོམ་ལམ་གྱི་གནས་སྐབས་ན་འཕགས་པའི་ལམ་ཡན་ལག་བརྒྱད་པ་སྟེ། ཡང་དག་པའི་ལྟ་བ་དང་། རྟོག་པ་དང་། ངག་དང་། ལས་ཀྱི་མཐའ་དང་། འཚོ་བ་དང་། རྩོལ་བ་དང་། དྲན་པ་དང་། 
ཏིང་ངེ་འཛིན་ཏོ། །དེ་ལྟ་བུའི་ཚུལ་རིག་ནས་འགྲོ་བ་འདྲེན་པར་མཛད་དོ། །དེ་ལྟར་རིག་པ་ནི་ཡང་དག་པར་སངས་རྒྱས་པའི་ལམ་རིག་པའོ། །དོན་མཛད་པ་ལ་སྔོན་དུ་ཐུགས་རྗེ་སྐྱེ་དགོས་པའི་ཕྱིར། སེམས་ཅན་ཀུན་ལ་ཤས་ཆེར་ཆགས། །ནམ་མཁའ་ལྟ་བུར་ཆགས་པ་མེད། །སེམས་ཅན་
ཀུན་གྱི་ཡིད་ལ་འཇུག །སེམས་ཅན་ཀུན་གྱི་ཡིད་ལྟར་མགྱོགས། །ཞེས་སྨོས་ཏེ། སེམས་ཅན་ཀུན་ལ་བུ་གཅིག་པའི་མ་ལྟར་ཐུགས་རྗེས་ཆགས་ཤིང་། འོ་ན་མཚན་མར་མི་འགྱུར་རམ་ཞེ་ན། དོན་ནམ་མཁའ་ལྟར་མཁྱེན་པས་ཆགས་པ་རང་ཁ་མ་སེལ་ལོ། །དེ་ཡང་སེམས་ཅན་ཀུན་གྱི་ཡིད་ལ་
ཁྱབ་པར་འཇུག་ཅིང་། འགྲོ་བའི་དོན་ལ་བརྩོན་འགྲུས་ཡིད་ལྟར་མགྱོགས་པར་མཛད་པའོ། །དེ་ཡང་དོན་བྱ་བའི་ཡུལ་མཁྱེན་པ་བསྟན་པའི་ཕྱིར། སེམས་ཅན་ཀུན་གྱི་དབང་དོན་ཤེས། །སེམས་ཅན་ཀུན་གྱི་ཡིད་འཕྲོག་པ། །ཕུང་པོ་ལྔ་དོན་དེ་ཉིད་ཤེས། །རྣམ་དག་ཕུང་པོ་ལྔ་འཆང་བ། །ཞེས་
སྨོས་ཏེ། སེམས་ཅན་ཀུན་གྱི་དབང་པོ་རབ་འབྲིང་ཐ་མ་ཤེས་ཤིང་དོན་གང་ལ་མོས་པ་རྣམས་ཤེས་པས་སོ། །སྐུ་ལྟ་བས་ཆོག་མི་ཤེས་པ་སྟོན་པས་ཀྱང་སེམས་ཅན་ཀུན་གྱི་ཡིད་འཕྲོག་ལ། ཡིད་རྟོག་བཅས་རྟོག་མེད་དུ་བཟློག་པས་ཀྱང་ཡིད་འཕྲོག་པའོ། །དེ་ཡང་ཕུང་པོ་ལྔའི་དོན་ཀུན་རྫོབ་སྒྱུ་
མ་ལྟ་བུར་ཤེས་ལ། དོན་དམ་དུ་སྐྱེ་བ་མེད་པར་ཤེས་པའོ། །དེ་ཡང་རྣམ་པར་དག་པའི་ཕུང་པོ་ལྔ་དང་ལྡན་ཏེ། ཚུལ་ཁྲིམས་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོའོ། །འོ་ན་དོན་
བྱེད་པའི་ཐབས་ཇི་ལྟར་མཁྱེན་ཅེ་ན། ངེས་འབྱུང་ཀུན་གྱི་མཐའ་ལ་གནས། །ངེས་པར་འབྱུང་བ་ཀུན་ལ་མཁས། །ངེས་འབྱུང་ཀུན་གྱི་ལམ་ལ་གནས། །ངེས་པར་འབྱུང་བ་ཀུན་སྟོན་པ། །ཞེས་སྨོས་ཏེ། ཁམས་གསུམ་པ་ལས་ངེས་པར་འབྱུང་བའི་ཆོས་ཀུན་གྱི་མཐར་ཐུག་པ་ནི་གཉིས་

49-1-29b

སུ་མེད་པའི་ཡེ་ཤེས་ཏེ། དེ་ལ་རྗེ་བཙུན་ཉིད་ངང་གིས་གནས་ཤིང་། ངེས་པར་འབྱུང་བའི་ཆོས་ཀུན་སྟོན་པ་ལ་ཡང་མཁས་པའོ། །ཉིད་ཀྱང་ལམ་དེ་ལ་གནས་པའི་ཚུལ་སྟོན་ཏེ། གཞན་དང་འདྲ་བའི་ཕྱིར་རོ། །གདུལ་བྱ་རྣམས་ལ་ཇི་ལྟར་འཚམ་པར་འབྱུང་བའི་ཆོས་སྟོན་པར་མཛད་དོ། །དེས་
གཞན་དོན་ཇི་ལྟར་མཛད་ཅེ་ན། ཡན་ལག་བཅུ་གཉིས་སྲིད་རྩ་བཏོན། །དག་པ་རྣམ་པ་བཅུ་གཉིས་འཆང་། །བདེན་བཞིའི་ཚུལ་གྱི་རྣམ་པ་ཅན། །ཤེས་པ་བརྒྱད་པོ་རྟོགས་པ་འཆང་། །བདེན་དོན་རྣམ་པ་བཅུ་གཉིས་ལྡན། །དེ་ཉིད་རྣམ་པ་བཅུ་དྲུག་རིག །རྣམ་པ་ཉི་ཤུས་བྱང་ཆུབ་པ། །རྣམ་པར་
སངས་རྒྱས་ཀུན་རིག་མཆོག །སངས་རྒྱས་ཀུན་གྱི་སྤྲུལ་པའི་སྐུ། །བྱེ་བ་དཔག་མེད་འགྱེད་པ་པོ། །ཞེས་སྨོས་ཏེ། རྟེན་འབྲེལ་ཡན་ལག་བཅུ་གཉིས་ཀྱིས་ནི་སྲིད་པ་ཡིན་ཏེ། མ་རིག་པའི་རྐྱེན་གྱིས་འདུ་བྱེད་འབྱུང་། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤིས་པའི་རྐྱེན་གྱིས་མིང་
དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤིའོ། །དེ་རྣམས་ཀྱི་རྩ་
བ་ནི་མ་རིག་པ་ཡིན་ཏེ། མ་རིག་པ་འགགས་ན་དེ་རྣམས་འགག་པའི་ཕྱིར་རོ། །གཉིས་སུ་མེད་པའི་ཡེ་ཤེས་ཆེན་པོས་མ་རིག་པ་རྩ་བ་ནས་བཏོན་པའོ། །ཡང་སྐྱེ་མཆེད་བཅུ་གཉིས་དག་པའི་ཚུལ་ནི། མིག་གི་སྐྱེ་མཆེད་དང་། གཟུགས་ཀྱི་སྐྱེ་མཆེད་དང་། རྣ་བ་དང་སྒྲ་དང་། སྣ་
དང་། དྲི་དང་། ལྕེ་དང་རོ་དང་། ལུས་དང་རེག་བྱ་དང་། ཡིད་དང་། ཆོས་ཀྱིའོ། །ཡང་བདེན་པ་རྣམ་པ་བཞིས་ཀྱང་སེམས་ཅན་ཁྲིད་པར་མཛད་དེ། སྡུག་བསྔལ་གྱི་བདེན་པ་དང་། ཀུན་འབྱུང་གི་བདེན་པ་དང་། འགོག་པའི་བདེན་པ་དང་། ལམ་གྱི་བདེན་པའོ། །དེ་དག་ནི་ཐུན་མོང་
གི་ལམ་མོ། །ཁྱད་པར་གྱི་ལམ་ནི་རྣམ་པར་ཤེས་པའི་ཚོགས་བརྒྱད་ཀྱི་རང་བཞིན་རྟོགས་པ་སྟེ། དེ་ཡང་ཚོགས་བདུན་ནི་ཀུན་གཞིའི་བྱིན་གྱི་རླབས་ཀྱིས་འབྱུང་བ་ཡིན་ལ་ཀུན་གཞི་སྐྱེ་མེད་དུ་ཤེས་པས་འདྲེས་པས་བརྒྱད་ཅར་སྐྱེ་མེད་དུ་ཤེས་པར་འགྱུར་རོ། །དེ་ཡང་འདི་སྐད་དུ། བརྒྱད་

49-1-30a

པོ་སྐྱེ་མེད་ཤེས་པ་ཡིས། །དགོངས་པ་རྒྱལ་བ་ཀུན་དང་མཉམ། །ཞེས་པ་ལྟ་བུའོ། །ཡང་དག་པའི་བདེན་པའི་དོན་སངས་རྒྱས་པའི་ཡོན་ཏན་བཅུ་གཉིས་དང་ཡང་ལྡན་ཏེ། རིགས་ལྔ་ཡེ་ཤེས་ལྔ་ཤེས་རབ་དང་སྙིང་རྗེ་ཁྱད་པར་ཅན་ནོ། །དེ་ཉིད་རྣམ་པ་བཅུ་དྲུག་ནི་སྟོང་པ་ཉིད་བཅུ་
དྲུག་སྟེ། ནང་སྟོང་པ་ཉིད་དང་། ཕྱི་སྟོང་པ་ཉིད་དང་། ཕྱི་ནང་སྟོང་པ་ཉིད་དང་། སྟོང་པ་ཉིད་སྟོང་པ་ཉིད་དང་། ཆེན་པོ་སྟོང་པ་ཉིད་དང་། དོན་དམ་པ་སྟོང་པ་ཉིད་དང་། འདུས་བྱས་སྟོང་པ་ཉིད་དང་། འདུས་མ་བྱས་སྟོང་པ་ཉིད་དང་། མཐའ་ལས་འདས་པ་སྟོང་པ་ཉིད་དང་། ཐོག་མ་དང་ཐ་མ་མེད་པ་སྟོང་པ་
ཉིད་དང་། དོར་བ་མེད་པ་སྟོང་པ་ཉིད་དང་། རང་བཞིན་སྟོང་པ་ཉིད་དང་། ཆོས་ཐམས་ཅད་སྟོང་པ་ཉིད་དང་། རང་གི་མཚན་ཉིད་སྟོང་པ་ཉིད་དང་། མི་དམིགས་པ་སྟོང་པ་ཉིད་དང་། དངོས་པོ་མེད་པའི་ངོ་བོ་ཉིད་སྟོང་པ་ཉིད་དོ། །དེ་མ་གཏོགས་པ་སེམས་ཅན་གྱི་དུས་ན། ས་ལ་སོགས་པ་འབྱུང་བ་
ལྔ།  ག་ལ་སོགས་པ་ཕུང་པོ་ལྔ། འདོད་ཆགས་ལ་སོགས་པ་ཉོན་མོངས་པ་ལྔ། མིག་ལ་སོགས་པ་དབང་པོ་ལྔ་སྟེ། རྣམ་པ་ཉི་ཤུར་སྣང་བ་སྟེ། དོན་རྟོགས་པའི་དུས་ན་དེ་དག་ཀྱང་རིགས་ལྔ་ཡེ་ཤེས་ལྔར་ཤར་ཏེ། སངས་རྒྱས་ཀྱི་ཆོས་ཀྱང་དེ་དག་ཏུ་འདུས་ཏེ། རྣམ་པ་དེ་དག་ལས་
གྲོལ་ནས་སངས་རྒྱས་ཀྱི་བྱང་ཆུབ་ཡིན་པས་མཆོག་གོ། །དེ་ཡང་འདི་སྐད་དུ། འབྱུང་བ་ལྔ་དང་ཉོན་མོངས་ཕུང་པོ་ལྔ། །དབང་པོ་རྣམ་ལྔའི་ཞེན་པ་དང་བྲལ་ནས། །རིགས་ལྔ་ཡེ་ཤེས་ལྔར་སྣང་ལ། །རྫོགས་སངས་རྒྱས་པའི་བྱང་ཆུབ་ཡིན། །ཞེས་གསུངས་པ་ལྟ་བུའོ། །དེ་ལྟ་བུའི་
སངས་རྒྱས་ལ་རྣམ་པ་ཐམས་ཅད་མཁྱེན་པའི་ཡེ་ཤེས་མངའ་བས་ཀུན་རིག་པའོ། །རིག་ནས་སྤྲུལ་པ་བྱེ་བ་དཔག་ཏུ་མེད་པ་བཀྱེ་ནས་སེམས་ཅན་གྱི་དོན་མཛད་པའོ། །དེ་ཡང་གདུལ་བྱའི་བློ་དང་འཚམ་པའི་ཐེག་པ་སྟོན་པའི་ཕྱིར། སྐད་ཅིག་ཐམས་ཅད་མངོན་པར་རྟོགས། །སེམས་ཀྱི་
སྐད་ཅིག་དོན་ཀུན་རིག །ཐེག་པ་སྣ་ཚོགས་ཐབས་ཚུལ་གྱིས། །འགྲོ་བའི་དོན་ལ་རྟོགས་པ་པོ། །ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་སྨོས་ཏེ། སྐད་ཅིག་གིས་གདུལ་བྱའི་བསམ་པ་དང་བག་ལ་ཉལ་ཐམས་ཅད་རིག་ནས་དོན་མཛད་དེ།

49-1-30b

འོ་ན་རྟོག་བཅས་སུ་ཐལ་ལོ་ཞེ་ན། རྟོག་བྱེད་དེ་རང་ཡང་སྐྱེ་མེད་དུ་རིག་པའོ། །རིག་ནས་ཐེག་པ་སྣ་ཚོགས་ཀྱིས་འགྲོ་བའི་དོན་མཛད་པའོ། །དེ་ཡང་འདི་སྐད་དུ། ཇི་སྲིད་སེམས་རྣམས་འཇུག་གི་བར། །ཐེག་པའི་མཐའ་ལ་ཐུག་པ་མེད། །ཅེས་པ་ལྟ་བུའོ། །དེ་ཡང་གདུལ་བྱ་ཐེག་པ་
གསུམ་གྱིས་འདུལ་བ་ལ་ཉན་ཐོས་དང་། རང་རྒྱལ་དང་། ཐེག་པ་ཆེན་པོ་བསྟན་ཏོ། །ཡང་དག་པར་ཐེག་པ་གཅིག་སྟེ་འབྲས་བུ་རྡོ་རྗེའི་ཐེག་པའོ། །དེ་ཡང་འབྲས་བུ་སངས་རྒྱས་ན་ཇི་ལྟར་གནས་པ་དང་དེ་ལྟ་ཉིད་ནས་ལམ་དུ་ཁྱེར་ནས་འབྲས་བུར་གནས་ཞེས་བྱའོ། །དེ་ཡང་སྐྱེ་དགུ་ཐེག་པ་
དགུ་བསྟན་པ་ཡང་འགྲོ་བའི་དོན་བསྟན་པ་མ་གཏོགས་པ། ཐེག་པ་འདི་ཀུན་ཡང་དག་པའི་ཐེག་པ་དག་ལས་གཞན་མ་ཡིན་ཞེས་པ་ལྟ་བུ། དེ་ཡང་གསུམ་པོ་ནི་རྒྱུའི་ཐེག་པའོ། །གཅིག་ནི་འབྲས་བུའི་ཐེག་པའོ། །དེ་ཡང་། རྒྱུ་ལ་སྦྱོར་བ་རྒྱུ་ཡི་ཆོས། །འཁོར་ལོ་ཤིན་ཏུ་བསྐོར་བྱས་
ནས། །འབྲས་བུའི་ཐེག་པ་ཉེ་ལམ་ཞིག །དུས་ཚིགས་ཕྱི་མར་འབྱུང་བར་འགྱུར། །ཞེས་པ་ལྟ་བུའོ། །དེ་ལའང་སྤངས་པའི་ཁྱད་པར་བསྟན་པའི་ཕྱིར། ཉོན་མོངས་ཁམས་རྣམས་དག་པའི་བདག །ལས་ཀྱི་ཁམས་རྣམས་ཟད་བྱེད་པ། །ཆུ་བོ་རྒྱ་མཚོ་ཀུན་ལས་རྒལ། །སྦྱོར་བའི་
དགོན་པ་ལས་བྱུང་བ། །ཉོན་མོངས་ཉེ་བ་ཀུན་ཉོན་མོངས། །བག་ཆགས་བཅས་པ་གཏན་སྤངས་པ། །ཞེས་སྨོས་ཏེ། གཉིས་མེད་རྟོགས་པས་ཉོན་མོངས་པ་དག་ཅིང་། ལས་ངན་སློང་བར་བྱེད་པའི་སེམས་མེད་པ་དང་། ལས་ཟད་པར་བྱེད་པའོ། །འཁོར་བའི་སྤྱོད་ཡུལ་ཇི་སྙེད་པ་
རྣམས་ནི་ཆུ་བོ་དང་འདྲ་སྟེ། རྒྱུན་རིང་བ་དང་། རྒྱུན་ཕྱོགས་སུ་ཁྱེར་བར་བྱེད་པ་དང་། རྒལ་དཀའ་བ་དང་། མང་བའི་ཕྱིར་དེ་ལས་རྒལ་ཞིང་དོན་ལ་སྦྱོར་བའི་ཡེ་ཤེས་ནི། རྟོག་པ་ལས་དབེན་པས་དགོན་པ་ཞེས་བྱའོ། །ཉོན་མོངས་པའི་རྩ་བ་དྲུག་དང་། དེ་ཡང་ཉེ་བའི་ཉོན་མོངས་པ་ཉི་ཤུ་
དང་། ཀུན་ནས་ཉོན་མོངས་པ་སྡུག་བསྔལ་རྣམས་དང་བག་ཆགས་ས་བོན་དང་བཅས་པ་གཏན་ནས་སྤངས་པའོ། །དེ་ཉིད་ཐབས་དང་ཤེས་རབ་དམ་པ་དང་ཇི་ལྟར་ལྡན་ཞེ་ན། སྙིང་རྗེ་ཆེན་པོ་ཤེས་རབ་ཐབས། །དོན་ཡོད་འགྲོ་བའི་དོན་བྱེད་པ། །འདུ་ཤེས་ཀུན་གྱི་དོན་སྤངས་ཤིང་། །

49-1-31a

རྣམ་ཤེས་དོན་ནི་འགག་པར་བྱེད། །ཅེས་སྨོས་ཏེ། སྙིང་རྗེ་ཆེན་པོ་དང་ལྡན་པས་ཞི་བའི་མཐའ་ལ་མི་གནས་ཤིང་། ཤེས་རབ་ཆེན་པོ་དང་ལྡན་པས་སྲིད་པའམ་འཁོར་བ་ལ་མི་གནས་ཏེ། ཐབས་དེ་ལྟ་བུས་འགྲོ་བའི་དོན་བྱེད་དོ། །འོ་ན་མཚན་མར་འཛིན་པ་ཅན་དུ་མི་
འགྱུར་རམ་ཞེ་ན། འདུ་ཤེས་ནི་ཡུལ་ལ་མཚན་མར་འཛིན་པ་སྟེ། དེས་སྤངས་ཤིང་རྣམ་ཤེས་ཟག་པ་དང་བཅས་པ་སྐྱེ་མེད་དུ་རྟོག་པས་དེའི་སྐྱོན་མེད་དོ། །དེ་ལྟར་རང་རྟོགས་པ་མ་ནོར་བས་གཞན་མ་ནོར་བའི་ལམ་ལ་འགོད་པའི་ཕྱིར། སེམས་ཅན་ཀུན་གྱི་ཡིད་དང་ལྡན། །སངས་རྒྱས་ཀུན་
གྱི་ཐུགས་རིག་པ། །སེམས་ཅན་ཀུན་གྱི་ཡིད་ལ་གནས། །དེ་དག་སེམས་དང་མཐུན་པར་འཇུག །སེམས་ཅན་ཀུན་ཡིད་ཚིམ་པར་བྱེད། །སེམས་ཅན་ཀུན་གྱི་ཡིད་དགའ་བ། །གྲུབ་པ་མཐར་ཕྱིན་འཁྲུལ་པ་མེད། །ནོར་བ་ཐམས་ཅད་རྣམ་པར་སྤངས། །དོན་གསུམ་ཐེ་ཚོམ་མེད་པའི་བློ། །
ཀུན་དོན་ཡོན་ཏན་གསུམ་གྱི་བདག །ཅེས་སྨོས་ཏེ། སེམས་ཅན་གྱི་ཡིད་དང་མཐུན་པར་དོན་མཛད་པ་དེ་ཡང་སངས་རྒྱས་ཀྱི་ཐུགས་མི་རྟོག་པར་རིག་པའི་སྒོ་ནས་མཛད་དེ། དེས་སེམས་ཅན་ཀུན་གྱི་ཡིད་ལ་ཁྱབ་པར་གནས་ཏེ། དེ་དག་གི་སེམས་དང་མཐུན་པར་འགྲོ་བའི་དོན་ལ་འཇུག་ལ། 
ཞུགས་ནས་སེམས་ཅན་ཇི་ལྟར་འདོད་པ་ལྟར་ཚིམ་ཞིང་དགའ་བར་བྱེད་དེ། སེམས་ཅན་གྱི་དོན་སྒྲུབ་པ་མཐའ་ཕྱིན་པར་བྱེད་དོ། །དེ་ཡང་འཁྲུལ་པའམ་ནོར་བ་ཐམས་ཅད་སྤངས་ཏེ། དྲང་བའི་དོན་དང་། ངེས་པའི་དོན་དང་། ཐེག་པ་སྣ་ཚོགས་ཀྱི་དོན་དང་།གསུམ་ལ་ཐེ་ཚོམ་མེད་པ་སྟེ། གྲུབ་
པའི་མཐའ་རྣམས་ངེས་པར་ཤེས་པའི་ཕྱིར་རོ། །སེམས་ཅན་ཀུན་གྱི་དོན་དུ་གྱུར་པའི་ཡོན་ཏན་སྐུ་དང་གསུང་དང་ཐུགས་གསུམ་གྱི་བདག་པོར་གྱུར་པའོ། །དེ་ཉིད་ལས་ཀྱང་། སངས་རྒྱས་ཀུན་གྱི་ཐུགས་ལ་གནས། །སངས་རྒྱས་ཀུན་གྱི་སྐུ་ཆེ་བ། །སངས་རྒྱས་ཀུན་གྱི་གསུང་ཡང་ཡིན། །
ཞེས་འབྱུང་ངོ་། །དེ་ཡང་རྒྱུ་རྟོགས་པས་འབྲས་བུ་མཆོག་ཏུ་གྲུབ་པའི་ཕྱིར། ཕུང་པོ་ལྔ་དོན་དུས་གསུམ་དུ། །སྐད་ཅིག་ཐམས་ཅད་བྱེ་བྲག་ཕྱེད། །སྐད་ཅིག་གཅིག་གིས་རྫོགས་སངས་རྒྱས། །སངས་རྒྱས་ཀུན་གྱི་རང་བཞིན་འཆང་། །ལུས་མེད་ལུས་ཏེ་ལུས་ཀྱི་མཆོག །ལུས་ཀྱི་

49-1-31b

མཐའ་ནི་རྟོགས་པ་པོ། །གཟུགས་རྣམས་སྣ་ཚོགས་སྣང་བའི་དཔལ། །ནོར་བུ་ཆེན་པོ་རིན་ཆེན་ཏོག །ཅེས་སྨོས་ཏེ། རྒྱུའི་དུས་ན་ཕུང་པོ་ལྔ་ལ་དུས་གསུམ་གྱི་སྐད་ཅིག་མས་གཞིག་ན་བྱེ་བྲག་ཕྱེད་དེ། མུ་སྟེགས་ཀྱི་བདག་པོ་ལ་སོགས་པར་བྱེད་དེ། འབྲས་བུའི་དུས་སུ་དེ་ཁོ་ན་ཉིད་ཐུགས་སུ་ཆུད་པའི་
རིམ་པ་ཡོད་པ་མ་ཡིན་པས་སྐད་ཅིག་མས་ཀྱང་སངས་རྒྱས་ཏེ། འདི་ནི་ལས་འཕྲོ་དང་དབང་པོའི་མཆོག་ཏུ་གྱུར་པ་ལ་བྱེད་རྩོལ་གྱི་སྤྲོས་པ་བཅད་དེ། དེ་བཞིན་ཉིད་བསྒོམས་པས་ལམ་ཉེ་བར་སྟོན་ཏོ། །དེ་ཡང་བྱེད་རྩོལ་གྱི་སྤྲོས་པ་བཅད་པ་ནི་འདི་སྐད་དུ། ཤེས་རབ་དམ་པས་མ་ཟིན་པའི། །
ལམ་གྱི་དགེ་བ་སྟེགས་བཅས་ཀྱང་། །མཐོ་རིས་ལྷ་དང་མི་རུ་སྐྱེ། །སྐྱེ་ཤི་མེད་པའི་ས་མི་ཐོབ། །ཅེས་པ་ལྟ་བུའོ། །དེ་ཡང་། སངས་རྒྱས་ཀུན་གྱི་རང་བཞིན་མཉམ། །ཐུགས་རྗེས་འགྲོ་དོན་མཛད་པར་མཉམ། །མཛད་ལུགས་མི་མཉམ། སྐུ་བོང་དང་ཚེ་ཚད་དང་། ཚུལ་དང་རིགས་མི་མཉམ་པ་
ལྟར་སྣང་ངོ་། །དེ་ཡང་རང་བཞིན་སྐྱེ་མེད་འཆང་བར་མཛད་དོ། །ཆོས་ཀྱི་སྐུ་ལ་ཟག་བཅས་ཀྱི་ལུས་མེད་ལ། དེའི་བྱིན་གྱི་རླབས་ལས་ལོངས་སྤྱོད་རྫོགས་པའི་སྐུ་ལུས་ཀྱི་མཆོག་ཏུ་གྱུར་པ་འབྱུང་ངོ་། །ལུས་ཐམས་ཅད་ཀྱི་མཐའ་སྐྱེ་མེད་དུ་རྟོགས་པ་ལས་སྤྲུལ་སྐུ་སྣ་ཚོགས་པ་འགྲོ་བའི་དཔལ་
དུ་འབྱུང་བ་ནི་ཡིད་བཞིན་གྱི་ནོར་བུ་དང་འདྲ་བར་འདོད་པ་སྐོང་བས་རབ་ཅེས་བྱའོ། །ཙོ་ཏོ་ཞེས་བྱ་བ་མེ་ཏོག་ཅེས་བྱའོ། །དེ་ཡང་ལོངས་སྤྱོད་རྫོགས་པའི་སྐུ་ནི་ངེས་པ་རྣམ་པ་ལྔ་དང་ལྡན་ཏེ། རྣམ་པ་ངེས་པ་དང་། གནས་ངེས་པ་དང་། འཁོར་ངེས་པ། ཆོས་ངེས་པ། དུས་ངེས་པའོ། །
སྤྲུལ་སྐུ་ནི་རྣམ་པ་མ་ངེས། གནས་མ་ངེས། འཁོར་མ་ངེས། ཆོས་མ་ངེས། དུས་མ་ངེས་པའོ། །ད་ནི་བྱ་བ་གྲུབ་པའི་ཡེ་ཤེས་ཀྱི་སྒོ་ནས་འཇམ་དཔལ་ཡེ་ཤེས་སེམས་དཔའི་མཚན་བསྟན་པར་བྱ་སྟེ། དེ་ཡང་ཕྲིན་ལས་ཀྱི་རྒྱུ་གང་ཞེ་ན། སངས་རྒྱས་ཀུན་གྱིས་རྟོགས་བྱ་བ། །སངས་
རྒྱས་བྱང་ཆུབ་བླ་ན་མེད། །ཅེས་པ་ལ་སོགས་པ་སྨོས་ཏེ། ཆོས་ཀྱི་སྐུ་གཉིས་མེད་ནི་སངས་རྒྱས་ཀུན་གྱི་རང་བཞིན་རྟོགས་པར་བྱ་བའི་ཆོས་ཆེན་པོ་ཡིན་ལ། དེ་རྟོགས་ནས་སངས་རྒྱས་ཀྱི་བྱང་ཆུབ་བླ་ན་མེད་པའོ། །གསང་སྔགས་ལས་བྱུང་ཡི་གེ་མེད། །གསང་སྔགས་ཆེན་པོ་རིགས་

49-1-32a

གསུམ་པ། །གསང་སྔགས་དོན་ཀུན་སྐྱེད་པ་པོ། །ཐིག་ཁེ་ཆེན་པོ་ཡི་གེ་མེད། །སྟོང་པ་ཆེན་པོ་ཡི་གེ་ལྔ། །ཐིག་ལེ་སྟོང་པ་ཡི་གེ་བརྒྱ། །ཞེས་པ་ཐབས་དང་ཤེས་རབ་ལས་བྱུང་བའི་ཆོས་ཀྱི་ངོ་བོ་ཉིད་བརྗོད་དུ་མེད་པས་ཡི་གེ་མེད་པའོ། །རྒྱུ་ཆེ་བ་ཐབས་དང་ཤེས་རབ་
ལས་འབྲས་བུ་ཆེ་བ་སྐུ་གསུང་ཐུགས་ཀྱི་རིགས་གསུམ་ལྷུན་གྱིས་གྲུབ་པའོ། །དེས་གསང་སྔགས་ཀྱི་དོན་བསྐྱེད་རིམ་པ་དང་། རྫོགས་རིམ་གཞན་གྱི་རྒྱུད་ལས་སྐྱེད་པར་བྱེད་པའོ། །དོན་དམ་པར་ཐིག་ཆོས་ཉིད་མི་འགྱུར་བ་ལ། ལེ་ཁྱབ་ཅིང་གདལ་བ་སྟེ། ངོ་བོ་ཚིག་གིས་བརྗོད་དུ་མེད་
པའོ། །སྟོང་པ་ཆེན་པོ་ཆོས་ཀྱི་སྐུ་དེ་ཉིད་ལས་དེ་བཞིན་གཤེགས་པ་ལྔའི་ས་བོན་ཡི་གེ་མ་འགགས་པར་ཤར་བ་ནི། ཨོཾ་ཨཱཿཧཱུཾ་སྭཱ་ཧཱ། དེ་ལྔའོ། །ཐིག་ལེ་སྐྱེ་བ་མེད་པ་དེ་ལས་ཡི་གེ་བརྒྱ་སྟེ། དེ་ལ་བརྟེན་ནས་སྒྲུབ་ཐབས་སྣ་ཚོགས་འབྱུང་བ་སྟེ། དོན་དུ་ན་ཆོས་ཀྱི་སྐུ་ལ་ཕྱོགས་རིས་
མེད་ཅིང་འགག་པ་མེད་པའི་མཐུའོ། །འོ་ན་ཐུགས་ཀྱི་སྤྲུལ་པ་གང་ཞེ་ན། རྣམ་པ་ཀུན་ལྡན་རྣམ་པ་མེད། །བཅུ་དྲུག་ཕྱེད་ཕྱེད་ཐིག་ལེ་ཅན། །ཡན་ལག་མེད་པའི་རྩིས་ལས་འདས། །བསམ་གཏན་བཞི་ཡི་རྩེ་མོ་ཅན། །བསམ་གཏན་ཡན་ལག་ཀུན་ཤེས་ཤིང་། །ཏིང་འཛིན་རིག་དང་
རྒྱུད་རིག་པ། །ཞེས་སྨོས་ཏེ། ཀུན་རྫོབ་ཏུ་མཚན་དང་དཔེ་བྱད་ལ་སོགས་ཏེ་སྣོད་བཅུད་ཀྱི་རྣམ་པ་ཀུན་དང་ལྡན་ལ། དོན་དམ་པར་སྣང་བའི་ངོ་བོ་ཉིད་མེད་དོ། །དབྱངས་ཀྱི་ཡི་གེ་བཅུ་དྲུག་གི་ཕྱེད་ཡི་གེ་བརྒྱད་ཡིན་ལ། བརྒྱད་ཀྱི་ཕྱེད་བཞི་ཡིན་ཏེ། ཨ་ཨཱ་ཨཾ་ཨཿ། ཞེས་པའོ། །དེ་བཞི་ནི་
མཚོན་བྱེད་དུ་བྱུང་བ་ཡིན་ཏེ། དེ་བཞིས་ཅི་མཚོན་ན། རྣམ་པར་ཐར་པའི་སྒོ་བཞི་མཚོན་ཏེ། སྟོང་པ་ཉིད་ཀྱི་རྣམ་པར་ཐར་པ་དང་། མཚན་མ་མེད་པའི་རྣམ་པར་ཐར་པ་དང་། སྨོན་པ་མེད་པའི་རྣམ་པར་ཐར་པ་དང་། ཐབས་ལ་མཁས་པའི་རྣམ་པར་ཐར་པའོ། །དེ་ཡང་སྟོང་པ་ཉིད་ཀྱིས་ནི་
དངོས་པོ་ལས་འབྱིན་པར་བྱེད་དོ། །མཚན་མ་མེད་པས་ནི་མཚན་མ་ཕྲ་མོའི་ཞེན་པ་ལས་ཀྱང་འབྱིན་པར་བྱེད་དོ། །སྨོན་པ་མེད་པས་ནི་འབྲས་བུ་རེ་སྨོན་གྱི་མཐའ་ལ་དམིགས་པ་ལས་འབྱིན་པར་བྱེད་དོ། །ཐབས་ལ་མཁས་པས་ནི་ཐབས་དམན་ཞིང་མི་མཁས་པ་རྣམས་ལས་འབྱིན་པར་བྱེད་

49-1-32b

དོ། །དེ་བཞི་ཡང་སྤྲོས་པ་ཕྱོགས་རེ་བཅད་པའི་ཡོན་ཏན་གྱི་ཆ་ནས་བཞིར་བཤད་ཀྱིས། དོན་དུ་ན་ཐིག་ལེ་ཆེན་པོ་ཡི་གེ་མེད་པའོ། །ཡང་སྤྱི་བོ་བདེ་བ་ཆེན་པོའི་འཁོར་ལོ་ན་བྱང་ཆུབ་ཀྱི་སེམས་ཐིག་ལེ་ཆ་བཅུ་དྲུག་ཏུ་གནས་ཏེ། དེ་ལས་ཀྱི་ཕྱག་རྒྱའི་ཐབས་ཀྱི་བྱེ་བྲག་རྣམས་ལ་བརྟེན་ཏེ། སྤྱི་བོ་བདེ་
བ་ཆེན་པོའི་འཁོར་ལོའི་ཐིག་ལེ་བཅུ་དྲུག་པོ་བཞུ་བའི་ཕྱེད་བརྒྱད་སྙིང་གཟུགས་ཆོས་ཀྱི་འཁོར་ལོར་ཕབ། དེ་བཞུ་བའི་ཕྱེད་ལྟེ་བ་སྤྲུལ་པའི་འཁོར་ལོར་ཕབ། དེའི་ཕྱིར་གསང་བ་བདེ་སྐྱོང་གི་འཁོར་ལོར་ཕབ་སྟེ། གཉིས་ཤོས་གཉིས་མཉམ་གྱི་དུས་སུ་ངོས་གཟུང་ངོ་། །དེ་ཡང་དང་ཡང་དུ་གོམས་པར་བྱས་
པས་མཐར་དེའི་ཞེན་པ་བག་ཙམ་དང་ཡང་བྲལ་ཏེ། ཐིག་ལེ་ཆེན་པོ་ཡི་གེ་མེད་པ་རྟོགས་པར་འགྱུར་རོ། །དེ་ཡང་འདི་སྐད་དུ། ཟབ་མོ་རྣམ་པར་ཐར་པ་བཞིས། །རྣོན་པོའི་དོན་དུ་བཤད་པ་ཡིན། །འཁོར་ལོ་བཞིན་དུ་བསྐོར་བྱེད་པ། །རྟུལ་པོའི་དོན་དུ་ཤེས་པར་བྱ། །ཞེས་འབྱུང་ངོ་། །དེ་ལྟར་
བསྒོམས་པས་རྣམ་རྟོག་གི་ཡན་ལག་མེད་པ། བརྗོད་པའི་རྩིས་ལས་འདས་པའོ། །ཏིང་ངེ་འཛིན་བཟང་བ་ནི་བསམ་གཏན་བཞི་ལ་ལྷའི་ཏིང་ངེ་འཛིན་ལྟ་བུའོ། །ཉིད་ཀྱང་དེ་དང་ལྡན་ཞིང་གཞན་གྱི་ཏིང་ངེ་འཛིན་བསམ་གཏན་གྱི་ཡན་ལག་རྣམས་ཀྱང་ཤེས་ཏེ། དེ་ཡང་འདོད་པའི་ཁམས་ན་ལྷག་
མཐོང་ཤས་ཆེ་བའི་བསམ་གཏན་ཀྱང་ཤེས་པའོ། །གཟུགས་མེད་པའི་ཁམས་ན་ཞི་གནས་ཤས་ཆེ་བའི་བསམ་གཏན་ཀྱང་ཤེས་པའོ། །གཟུགས་ཀྱི་ཁམས་ན་ཞི་གནས་ལྷག་མཐོང་ཟུང་དུ་འབྲེལ་པའི་བསམ་གཏན་ཀྱང་ཤེས་ཏེ། དེ་ལ་བསམ་གཏན་བཞི་ལ་ཡན་ལག་བཅོ་བརྒྱད་དེ། 
བསམ་གཏན་དང་པོ་ལ་ཡང་ཡན་ལག་ལྔ་སྟེ། རྟོག་པ་དང་། དཔྱོད་པ་དང་། དགའ་བ་དང་། བདེ་བ་དང་། སེམས་རྩེ་གཅིག་པ་ཉིད་དོ། །བསམ་གཏན་གཉིས་པ་ལ་ཡང་ཡན་ལག་བཞི་སྟེ། དགའ་བ་དང་། བདེ་བ་དང་། ནང་རབ་ཏུ་དང་བ་དང་། སེམས་རྩེ་གཅིག་པ་ཉིད་དོ། །བསམ་
གཏན་གསུམ་པ་ལ་ཡང་ཡན་ལག་ལྔ་སྟེ། བཏང་སྙོམས་དང་། དྲན་པ་དང་། ཤེས་བཞིན་དང་།བདེ་བ་དང་། སེམས་རྩེ་གཅིག་པ་ཉིད་དོ། །བསམ་གཏན་བཞི་པ་ལ་ཡང་ཡན་ལག་བཞི་སྟེ། བཏང་སྙོམས་ཡོངས་སུ་དག་པ་དང་། དྲན་པ་ཡོངས་སུ་དག་པ་དང་། བདེ་བ་ཡང་མ་

49-1-33a

ཡིན་སྡུག་བསྔལ་བ་ཡང་མ་ཡིན་པའི་ཚོར་བ་ཡོངས་སུ་དག་པ་དང་། སེམས་རྩེ་གཅིག་པ་ཉིད་དོ། །དེ་རྣམས་རྗེ་བཙུན་ཉིད་ཀྱིས་ཤེས་པའོ། །གཞན་དཔའ་བར་འགྲོ་བའི་ཏིང་ངེ་འཛིན་དང་། རིན་ཆེན་ཕྱག་རྒྱའི་ཏིང་ངེ་འཛིན་དང་། སེང་གེ་རྣམ་པར་བསྒྱིངས་པའི་ཏིང་ངེ་འཛིན་
དང་། ཟླ་བའི་རྒྱལ་མཚན་དཔལ་ཞེས་བྱ་བའི་ཏིང་ངེ་འཛིན་ལ་སོགས་པ་ཏིང་ངེ་འཛིན་བརྒྱ་རྩ་གཅིག་ཀྱང་མཁྱེན་ཅིང་།  གང་ཟག་གི་བསམ་པ་དང་བག་ལ་ཉལ་དང་སྐྱེ་གནས་ཀྱི་རྒྱུད་ཀྱིས་བསྡུས་པ་རྣམས་ཀྱང་རིག་ཅིང་མཁྱེན་ནོ། །འོ་ན་ལོངས་སྐུའི་མཚོན་པ་ཅི་ཞེ་ན། ཏིང་འཛིན་ལུས་ཅན་ལུས་ཀྱི་
མཆོག །ལོངས་སྤྱོད་རྫོགས་སྐུ་ཀུན་གྱི་རྒྱལ། །ཞེས་སྨོས་ཏེ། ཏིང་ངེ་འཛིན་ལུས་ཅན་ནི་ཆོས་ཀྱི་སྐུ་སྟེ། སྐུ་དེ་གཉིས་ཀྱི་རྟེན་བྱེད་ཅིང་མཆོག་ཏུ་གྱུར་པ་དེ་ནི་གཞིའོ། །དེ་ལས་ཐེག་པ་ཆེན་པོའི་ཆོས་ལ་ལོངས་སྤྱོད་པ་སྐུ་རྣམ་པར་སྣང་མཛད་དུ་སྣང་སྟེ། དེ་ཡང་ངེས་པ་ལྔ་དང་ལྡན་ཞིང་འཁོར་ལོས་
སྒྱུར་བའི་རྒྱལ་པོ་ལྟ་བུར་བཞུགས་པ་སྟེ། དེ་ཡང་། ཐེག་ཆེན་ཉེ་བར་ལོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་འདོད། །ཅེས་པ་ལྟ་བུའོ། །དེ་ཡང་སྐུའི་མཛད་སྤྱོད་རྣམ་པར་དག་པའི་སྒོ་ནས་འཁོར་ས་བཅུའི་བྱང་ཆུབ་སེམས་དཔའ་རྣམས་ཀྱི་གཙོ་བོར་གྱུར་པ་རྣམས་ལ་ཆོས་ཀྱི་
འཁོར་ལོ་བསྐོར་བར་མཛད་དོ། །དེ་ལ་སྤྲུལ་པའི་སྐུའི་མཛད་སྤྱོད་ཅི་ཞེ་ན། སྤྲུལ་པའི་སྐུ་སྟེ་སྐུ་ཡི་མཆོག །སངས་རྒྱས་སྤྲུལ་པའི་རྒྱུད་འཆང་བ། །ཕྱོགས་བཅུར་སྤྲུལ་པ་སྣ་ཚོགས་འགྱེད། །ཇི་བཞིན་འགྲོ་བའི་དོན་བྱེད་པ། །ཞེས་སྨོས་ཏེ། དེ་ཡང་རྒྱལ་བ་སྤྲུལ་པའི་སྐུ་ནི། འཁོར་རིགས་
དྲུག་གི་སེམས་ཅན་དང་། ཉན་ཐོས་དང་། རང་རྒྱལ་བ་རྣམས་ལ་གསུང་གི་མཛད་སྤྱོད་རྣམ་པར་དག་པའི་སྒོ་ནས་ཆོས་ཀྱི་འཁོར་ལོ་སྐོར་བར་མཛད་དེ། སྤྲུལ་སྐུ་མ་དག་པ་ལས་མཆོག་ཏུ་གྱུར་པ་སངས་རྒྱས་རྣམ་པར་གཟིགས། གཙུག་ཏོར་ཅན་ལ་སོགས་པ་སངས་རྒྱས་སྟོང་རྩ་གཉིས་
ཀྱི་རྒྱུད་དུ་སྤྲུལ་པའོ། །སྤྲུལ་ནས་གང་དུ་འགྱེད་ན་ཕྱོགས་བཅུར་འགྱེད་དོ། །བཀྱེ་ནས་ཅི་བྱེད་ན་ཇི་ལྟར་འཚམ་པ་ལྟར་འགྲོ་བའི་དོན་བྱེད་པའོ། །འོ་ན་མ་དག་པའི་སྤྲུལ་སྐུ་གང་ཞེ་ན། ལྷ་ཡི་དབང་པོ་ལྷ་ཡི་ལྷ། །ལྷ་ཡི་བདག་པོ་ལྷ་མིན་བདག །འཆི་མེད་དབང་པོ་ལྷ་ཡི་བླ། །འཇོམས་

49-1-33b

བྱེད་འཇོམས་བྱེད་དབང་ཕྱུག་པོ། །ཞེས་སྨོས་ཏེ། ལྷའི་དབང་པོ་སྟེ་ཁྱབ་འཇུག་གིས་འདུལ་བ་ལ་ཁྱབ་འཇུག་ཏུ་སྤྲུལ་ལོ། །ལྷའི་ལྷ་ནི་ཚངས་པའོ། །ལྷའི་བདག་པོ་ནི་བརྒྱ་བྱིན་ནོ། །ལྷ་མིན་བདག་ནི་ཐགས་བཟངས་རིས་སོ། །འཆི་མེད་དབང་པོ་ནི་འཐབ་བྲལ་ལ་སོགས་པའི་ལྷའི་རྒྱལ་
པོ་རྣམས་སོ། །ལྷའི་བླ་ནི་གཞན་འཕྲུལ་དབང་བྱེད་ལ་སོགས་པའི་ལྷའི་རྒྱལ་པོའོ། །འཇོམས་བྱེད་ནི་དྲག་པོ་འཇིགས་བྱེད་དོ། །འཇོམས་བྱེད་དབང་ཕྱུག་ནི་མ་ཧཱ་དེ་བའོ། །དེ་རྣམས་ཀྱིས་འདུལ་བ་ལ་དེ་རྣམས་སུ་སྤྲུལ་ནས་དོན་མཛད་དོ། །ཆོས་ཀྱི་སྦྱིན་པའི་ཚུལ་ནི། སྲིད་པའི་དགོན་
པ་ལས་རྒལ་བ། །སྟོན་པ་གཅིག་པུ་འགྲོ་བའི་བླ། །འཇིག་རྟེན་ཕྱོགས་བཅུར་རབ་གྲགས་པ། །ཆོས་ཀྱི་སྦྱིན་བདག་ཆེ་བ་པོ། །བྱམས་པའི་གོ་ཆ་ཆས་པ་སྟེ། །སྙིང་རྗེ་ཡི་ནི་ཡ་ལད་བགོས། །ཤེས་རབ་རལ་གྲི་མདའ་གཞུ་ཐོགས། །ཉོན་མོངས་མི་ཤེས་གཡུལ་ངོ་སེལ། །དཔའ་བོ་
བདུད་དགྲ་བདུད་འདུལ་བ། །བདུད་བཞིའི་འཇིགས་པ་སེལ་བར་བྱེད། །བདུད་ཀྱི་དཔུང་རྣམས་ཕམ་བྱེད་པ། །ཞེས་སྨོས་ཏེ། སྲིད་པ་ནི་ངེས་པའི་འབྱུང་གནས་ཡིན་ཏེ། དགོན་པ་ནི་དེ་ལས་དབེན་པའོ། །དེ་ལས་རྒལ་ཏེ་དོན་གཉིས་མེད་རྟོགས་པས་སྟོན་པ་གཅིག་པུའོ། །ཡང་ན་བསྟན་
པ་གཅིག་ལ་སྟོན་པ་གཉིས་མི་འབྱུང་བས་སོ། །འགྲོ་བ་ཐམས་ཅད་ཀྱི་སྟོན་པར་གྱུར་པས་ན་བླ་མའོ། །དེ་ཡིས་འཇིག་རྟེན་ཕྱོགས་བཅུར་གྲགས་ཏེ། རྒྱུ་ཅིས་གྲགས་ན་ཆོས་ཀྱི་སྦྱིན་པས་གྲགས་སོ། །དེ་ཡང་རློམ་པ་ལྟ་བུ་མ་ཡིན་ཏེ། བྱམས་པའི་གོ་ཆ་གོན་ཞིང་། སྙིང་རྗེའི་
ཁྲབ་གོན་པའོ། །དེའི་མཚོན་ཆ་ནི་ཉོན་མོངས་པ་གཅོད་པ་ཤེས་རབ་ཀྱི་རལ་གྲི་དང་། ཐབས་ཤེས་རབ་ཀྱི་མདའ་གཞུས་ཉོན་མོངས་པ་དང་མ་རིག་པའི་གཡུལ་ངོ་སེལ་ལོ། །གང་ལས་དཔའ་ན་བདུད་འདུལ་བས་དཔའོ། །གཞན་བདུད་བཞིའི་འཇིགས་པ་ལས་ཀྱང་སྐྱོབ་ཅིང་སེལ་
བར་བྱེད་དོ། །ཕྱོགས་གཅིག་སེལ་བ་ཙམ་མ་ཡིན་ཏེ། བདུད་ཀྱི་དཔུང་སྡེ་དང་བཅས་པ་ཕམ་པར་བྱེད་པ་སྟེ། དེ་ཡང་སེམས་སྐྱེ་བ་མེད་པ་རྟོགས་པས་ཉོན་མོངས་པའི་བདུད་བཅོམ། སེམས་ཉིད་ལ་རྒས་རྒུད་མེད་པས་ཕུང་པོའི་བདུད་བཅོམ། སེམས་ཉིད་ལ་སྐྱེ་ཤི་མེད་པས་

49-1-34a

འཆི་བདག་གི་བདུད་བཅོམ། སེམས་ཉིད་རྟོགས་པས་ཐེ་ཚོམ་དང་བྲལ་ཏེ་ལྷའི་བུའི་བདུད་བཅོམ། དེ་ཡང་འདི་སྐད་དུ། གལ་ཏེ་བདུད་ཀྱི་ཚོགས་ནི་བྱེ་བ་དག །སངས་རྒྱས་སྐུར་བསྒྱུར་བར་ཆད་སྨྲ་བྱས་ཀྱང་། །ཆོས་ལ་མཁས་པས་ཆོས་ཉིད་རབ་ཐོབ་སྟེ། །དེ་དག་
བྱང་ཆུབ་ལས་ནི་བཟློག་མི་ནུས། །ཞེས་པ་ལྟ་བུའོ། །དེ་ལྟ་བུ་དེ་མཆོད་པའི་འོས་སུ་བསྟན་པའི་ཕྱིར། རྫོགས་པའི་སངས་རྒྱས་འཇིག་རྟེན་འདྲེན། །མཆོད་འོས་བསྟོད་འོས་ཕྱག་གི་གནས། །རྟག་ཏུ་རི་མོར་བྱ་བའི་འོས། །བཀུར་འོས་རྗེད་པར་བྱ་བའི་མཆོག །ཕྱག་བྱར་འོས་པ་བླ་
མའི་རབ། །ཅེས་སྨོས་ཏེ། སངས་རྒྱས་ཀྱི་བདག་ཉིད་རྗེ་བཙུན་གྱིས་འཇིག་རྟེན་པ་རྣམ་པར་ཐར་པའི་གནས་སུ་འདྲེན་པས།  མཆོད་པ་དང་། བསྟོད་པ་དང་། ཕྱག་བྱ་བ་དང་། སྐུ་གཟུགས་བྲིས་ལ་མཆོད་པ་དང་།རྒྱན་གདགས་པ་དང་། ཕུ་དུད་དུ་བཀུར་བ་དང་།  ཡོན་ཏན་བསྒྲགས་པ་དང་།  
ལུས་ངག་ཡིད་གསུམ་གུས་པས་ཕྱག་བྱ་བར་འོས་ཏེ། བླ་མའི་རབ་ཏུ་གྱུར་པའི་ཕྱིར་རོ། །དེའི་མཁྱེན་པའི་བྱེ་བྲག་ཅི་ཞེ་ན། འཇིག་རྟེན་གསུམ་པོ་གོམ་གཅིག་བགྲོད། །མཁའ་ལྟར་མཐའ་མེད་རྣམ་པར་གནོན། །གསུམ་རིག་གཙང་མ་དག་པ་སྟེ། །མངོན་ཤེས་དྲུག་ལྡན་རྗེས་དྲན་
དྲུག །ཅེས་སྨོས་ཏེ། འཇིག་རྟེན་གསུམ་པོ་དེ་ཤེས་རབ་ཀྱི་གོམ་པ་གཅིག་གི་བར་དུ་བགྲོད་ལ། རྟགས་རྫུ་འཕྲུལ་གྱི་གོམ་པས་བགྲོད་དོ། །ནམ་མཁའ་ལྟར་ཆོས་ཀྱི་སྐུ་མཐའ་མེད་པར་རྟོགས་པས་ཉོན་མོངས་པ་གནོན་པར་བྱེད་དོ། །དེ་ཡང་ཕྱི་སྡེ་སྣོད་གསུམ་རིག་ལ། ནང་དུ་སྐུ་གསུང་
ཐུགས་རིག་སྟེ། བདག་གཞན་གྱི་དྲི་མ་དང་བྲལ་བས་གཙང་མ་དག་པའོ། །གཞན་ཡང་མངོན་པར་ཤེས་པ་དྲུག་སྟེ། ལྷའི་མིག་གི་མངོན་པར་ཤེས་པ་དང་། ལྷའི་རྣ་བའི་མངོན་པར་ཤེས་པ་དང་། ཕ་རོལ་གྱི་སེམས་ཤེས་པ་དང་། སྔོན་གྱི་གནས་རྗེས་སུ་དྲན་པ་དང་། རྫུ་འཕྲུལ་
གྱི་བྱ་བ་ཤེས་པ་དང་། ཟག་པ་ཟད་པའི་མངོན་པར་ཤེས་པའོ། །རྗེས་སུ་དྲན་པ་དྲུག་ནི། སངས་རྒྱས་རྗེས་སུ་དྲན་པ་དང་། ཆོས་རྗེས་སུ་དྲན་པ་དང་། དགེ་འདུན་རྗེས་སུ་དྲན་པ་དང་། དམ་ཆིག་རྗེས་སུ་དྲན་པ་དང་། ཐུགས་རྗེ་རྗེས་སུ་དྲན་པ་དང་། མཛད་པ་རྗེས་སུ་དྲན་པ་དང་དྲུག་གོ། །

49-1-34b

ཤེས་རབ་དམ་པ་ཇི་ལྟ་བུ་ཞེ་ན། བྱང་ཆུབ་སེམས་དཔའ་སེམས་དཔའ་ཆེ། །རྫུ་འཕྲུལ་ཆེན་པོ་འཇིག་རྟེན་འདས། །ཤེས་རབ་ཕ་རོལ་ཕྱིན་པའི་མཐའ། །ཤེས་རབ་ཀྱིས་ནི་དེ་ཉིད་ཐོབ། །ཅེས་སྨོས་ཏེ། བྱང་ཆུབ་སེམས་དཔའ་ནི་རང་དོན་ནོ། །སེམས་དཔའ་ཆེན་པོ་ནི་གཞན་དོན་ནོ། །དེ་
ཡང་བྱང་ཆུབ་ནི་ནམ་མཁའ་ལྟ་བུའི་ཆོས་ཀྱི་སྐུ་ལ། སེམས་དཔའ་དེ་ནི་དེ་རྟོགས་པར་འདོད་པའི་འདུན་པ་ཡོད་པ་དང་། གཞན་གྱི་དོན་ལ་དཔའ་བའོ། །དེ་ཡང་འདི་སྐད་དུ། བྱང་ཆུབ་ནམ་མཁའི་མཚན་ཉིད་དེ། །ཀུན་དུ་རྟོག་པ་ཐམས་ཅད་སྤངས། །གང་ཞིག་དེ་རྟོགས་འདོད་པ་དེ། །བྱང་
ཆུབ་སེམས་དཔའ་ཞེས་བྱའོ། །ཞེས་པ་ལྟ་བུའོ། །དེ་ཡང་རྫུ་འཕྲུལ་ཆེན་པོ་བརྙེས་ཏེ་འཇིག་རྟེན་ལས་འདས་པའོ། །ཕ་རོལ་ཏུ་ཕྱིན་པའི་མཐར་ཐུག་པ་དེ་ཁོ་ན་ཉིད་ནི། ཤེས་རབ་ཀྱིས་ཐོབ་པར་བྱེད་དོ། །དེ་ཉིད་དཔེ་ལས་འདས་པར་བསྟན་པའི་ཕྱིར། བདག་རིག་གཞན་རིག་
ཐམས་ཅད་པ། །ཀུན་ལ་ཕན་པའི་གང་ཟག་མཆོག །དཔེར་བྱ་ཀུན་ལས་འདས་པ་སྟེ། །ཤེས་དང་ཤེས་བྱའི་བདག་པོ་མཆོག །ཅེས་སྨོས་ཏེ། ཇི་ལྟ་བ་བདག་གི་དོན་དང་། ཇི་སྙེད་པ་གཞན་གྱི་དོན་ཐམས་ཅད་རིག་པའི་སྒོ་ནས་ཀུན་ལ་ཕན་པར་བྱེད་པ་སྟེ། གང་ཟག་ལྟར་སྤྲུལ་ཀྱང་
དངོས་མ་ཡིན་པས་མཆོག་གོ། །ཅུང་ཟད་དུ་ཡང་མཉམ་པ་མེད་པས་ན་དཔེ་ལས་འདས་པའོ། །ཤེས་པར་བྱེད་པ་དང་ཤེས་པར་བྱ་བའི་དོན་གཉིས་ཀའི་བདག་པོའི་མཆོག་ཏུ་གྱུར་པའོ། །གང་གི་སྒོ་ནས་ཤེས་པར་བྱེད་ཅེ་ན། གཙོ་བོ་ཆོས་ཀྱི་སྦྱིན་བདག་སྟེ། །ཕྱག་རྒྱ་བཞི་པོ་དོན་
སྟོན་པ། །འགྲོ་བའི་བསྙེན་བཀུར་གནས་ཀྱི་མཆོག །ངེས་འབྱུང་གསུམ་པོ་བགྲོད་རྣམས་ཀྱི། །དོན་གྱི་དམ་པ་རྣམ་དག་དཔལ། །འཇིག་རྟེན་གསུམ་ན་སྐལ་བཟང་ཆེ། །ཞེས་སྨོས་ཏེ། རྗེ་བཙུན་ཉིད་སངས་རྒྱས་ཐམས་ཅད་ཀྱི་གཙོ་བོར་གྱུར་པས་ཀྱང་ཆོས་ཀྱི་སྦྱིན་པ་ནི་སྦྱིན་པ་རྣམས་
ཀྱི་གཙོ་བོར་གྱུར་པའོ། །དེའི་བདག་པོ་ནི་རྗེ་བཙུན་ནོ། །དེ་ཕྱག་རྒྱ་བཞིའི་ཆོས་སྟོན་ཏེ། དེ་ལ་ཡང་བཀའ་རྟགས་ཀྱི་ཕྱག་རྒྱ་བཞི་ལ། ཐེག་པ་ཆུང་ངུའི་བཀའ་རྟགས་ཀྱི་ཕྱག་རྒྱ་བཞི་ནི། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པའོ། །དེ་ཡང་། མི་

49-1-35a

རྟག་སྡུག་བསྔལ་སྟོང་དང་བདག་མེད་པ། །དེ་ནི་རྫོགས་སངས་རྒྱས་ཀྱིས་གསུངས་པའི་ཆོས། །ཞེས་འབྱུང་ངོ་། །འདི་ཉིད་ལས་ཀྱང་།  བདེན་བཞིའི་ཚུལ་གྱི་རྣམ་པ་ཅན། །ཞེས་འབྱུང་ངོ་། །ཐེག་པ་ཆེན་པོའི་དབང་དུ་བྱས་ན། བཀའ་ལ་སྣང་། དོན་དང་མཐུན། 
རིག་པ་དང་འཐད། གཏན་ཚིགས་ཀྱིས་རྒྱས་པའོ། །དེ་ཡང་།  བཀའ་དོན་རིག་པ་གཏན་ཚིགས་དང་། །སྣང་དང་མི་འགལ་རྒྱས་འཐད་ཡིན། །ཞེས་པ་ལྟ་བུའོ། །དེ་ལ་ལྷའི་སྐུ་ཕྱག་རྒྱ་ཆེན་པོ་བཞི་ནི། སྐུ་ཕྱག་རྒྱ་ཆེན་པོ། གསུང་ཆོས་ཀྱི་ཕྱག་རྒྱ། ཐུགས་དམ་ཚིག་གི་ཕྱག་རྒྱ། འབྲོ་འདུ་ལས་
ཀྱི་ཕྱག་རྒྱའོ། །གདུལ་བྱ་ལམ་གྱི་ཕྱག་རྒྱ་བཞི་ནི་ལས་ཀྱི་ཕྱག་རྒྱ་དང་། ཆོས་ཀྱི་ཕྱག་རྒྱ་དང་ཕྱག་རྒྱ་ཆེན་པོ་དང་། དམ་ཚིག་གི་ཕྱག་རྒྱའོ། །དེ་ལྟར་སྟོན་པ་ནི་འགྲོ་བ་རྣམས་ཀྱི་བསྙེན་བཀུར་བའི་ཆོས་ཀྱི་མཆོག་གོ། །ངེས་འབྱུང་གསུམ་ནི་ཐེག་པ་གསུམ་མོ། །དེ་བགྲོད་པའི་འབྲས་བུ་ནི།  དོན་དམ་པ་
སྒྲིབ་པ་གཉིས་དག་པས་བདག་དང་གཞན་གྱི་དཔལ་དུ་འགྱུར་ཏེ། འཇིག་རྟེན་གསུམ་ན་སྐལ་བ་མཆོག་ཏུ་གྱུར་པའོ། །དེ་ལྟ་བུའི་སྟོན་པ་དེ་གང་ཡིན་ཞེ་ན། ཚོགས་གཉིས་རྫོགས་ཤིང་བདག་དང་གཞན་གྱི་དཔལ་དུ་གྱུར་པ་འབྱོར་བ་ཕུན་སུམ་ཚོགས་པ་སྟེར་བར་བྱེད་པ་རྗེ་བཙུན་ཉིད་ཡིན་པས། 
དཔལ་ལྡན་འབྱོར་བ་ཀུན་བྱེད་པ། །འཇམ་དཔལ་དཔལ་དང་ལྡན་པའི་མཆོག །ཅེས་གསུངས་པ་ཡིན་ནོ། །ད་ནི་འཇམ་དཔལ་ཡེ་ཤེས་སེམས་དཔའ་ལ་བསྟོད་པའི་ལེའུ་བསྟན་པའི་ཕྱིར། མཆོག་སྦྱིན་རྡོ་རྗེ་མཆོག་ཁྱོད་འདུད། །ཡང་དག་མཐར་གྱུར་ཁྱོད་ལ་འདུད། །སྟོང་ཉིད་ལས་བྱུང་ཁྱོད་ལ་འདུད། །
སངས་རྒྱས་བྱང་ཆུབ་ཁྱོད་ལ་འདུད། །ཅེས་པ་ལ་སོགས་པ་སྨོས་ཏེ། དེ་ཡང་འདིས་ནི་ཆོས་ཀྱི་དབྱིངས་ཀྱི་ཡེ་ཤེས་ཀྱི་སྒོ་ནས་བསྟོད་པ་སྟེ། མཆོག་ཏུ་གྱུར་པའི་ཆོས་ཀྱི་དབྱིངས་གཞན་ལ་སྦྱིན་པར་བྱེད་པ་པོ་ནི་སྐུ་གསུང་ཐུགས་རྡོ་རྗེ་ལྟར་དབྱེར་མི་ཕྱེད་པའི་མཆོག་རྗེ་བཙུན་འཇམ་དཔལ་ཁྱོད་
ཡིན་པས་ཁྱོད་ལ་འདུད་ཅིང་ཕྱག་འཚལ་ཞེས་པའོ། །ཁྱོད་ཅེས་པ་ནི་བོད་པའི་སྒྲ་ཀུན་ལ་སྦྱར་རོ། །ཡང་དག་པའི་མཐར་གྱུར་པ་ནི་སྐྱེ་བ་མེད་པ་ཁྱོད་ལ་འདུད་པའོ། །སྟོང་པ་ཉིད་ཀྱི་དོན་རྟོགས་པ་ལས་བྱུང་བ་ཁྱོད་ལ་འདུད་དོ། །སངས་རྒྱས་རྣམས་ཀྱི་བྱང་ཆུབ་དམ་པ་ཡིན་པས་ཁྱོད་

49-1-35b

ལ་གུས་པས་འདུད་ཅེས་པའོ། །མེ་ལོང་ལྟ་བུའི་ཡེ་ཤེས་ཀྱི་སྒོ་ནས་བསྟོད་པ་བསྟན་པའི་ཕྱིར། སངས་རྒྱས་ཆགས་པ་ཁྱོད་ལ་འདུད། །སངས་རྒྱས་འདོད་ལ་ཕྱག་འཚལ་འདུད། །སངས་རྒྱས་དགྱེས་པ་ཁྱོད་ལ་འདུད། །སངས་རྒྱས་རོལ་ལ་ཕྱག་འཚལ་འདུད། །ཅེས་སྨོས་ཏེ། སངས་
རྒྱས་ཀྱི་ཡེ་ཤེས་མེ་ལོང་ལྟ་བུས་ཆོས་ཀྱི་དབྱིངས་ལ་གནས་ཤིང་ཆགས་པ་ཁྱོད་ལ་འདུད་དོ། །སངས་རྒྱས་རྣམས་ཐུགས་རྗེས་འགྲོ་བ་འདྲེན་པར་འདོད་པ་ཁྱོད་ལ་འདུད་དོ། །སངས་རྒྱས་ཡེ་ཤེས་མེ་ལོང་ལྟ་བུས་ཆོས་ཀྱི་དབྱིངས་རྟོགས་པས་དགྱེས་པ་ཁྱོད་ལ་འདུད་དོ། །སངས་རྒྱས་ཀྱི་
དབྱིངས་དང་ཡེ་ཤེས་གཉིས་སུ་མེད་པ་ལ་རོལ་པས་ཁྱོད་ལ་ཕྱག་འཚལ་ཞིང་འདུད་དོ། །ད་ནི་སོ་སོར་རྟོག་པའི་ཡེ་ཤེས་ཀྱི་སྒོ་ནས་བསྟོད་པ་བསྟན་པའི་ཕྱིར། སངས་རྒྱས་འཛུམ་པ་ཁྱོད་ལ་འདུད། །སངས་རྒྱས་བཞད་ལ་ཕྱག་འཚལ་འདུད། །སངས་རྒྱས་གསུང་ཉིད་ཁྱོད་ལ་འདུད། །
སངས་རྒྱས་ཐུགས་ལ་ཕྱག་འཚལ་འདུད། །ཅེས་སྨོས་ཏེ། སངས་རྒྱས་ཀྱི་དེ་ཁོ་ན་ཉིད་ཁོང་དུ་ཆུད་པས་མཉེས་ནས་ཞལ་འཛུམ་པ་མཛད་པས་ཁྱོད་ལ་འདུད་དོ། །སངས་རྒྱས་འགྲོ་བའི་དོན་མཛད་པ་ལ་དགྱེས་ནས་བཞད་པ་ནི་ཆོས་གསུང་བའི་སྔ་ལྟས་སྟོན་པ་ཁྱོད་ལ་ཕྱག་འཚལ་
ཞིང་འདུད་དོ། །སངས་རྒྱས་གསུང་གི་སྒོ་ནས་གདུལ་བྱ་ལ་སྣ་ཚོགས་སུ་ཆོས་སྟོན་པས་ཁྱོད་ལ་འདུད་དོ། །སངས་རྒྱས་འགྲོ་བའི་ཆོས་སྟོན་པར་མཛད་ཀྱང་ཐུགས་མཉམ་པ་ཉིད་ལས་མ་གཡོས་པས་ཁྱོད་ལ་ཕྱག་འཚལ་ཞིང་འདུད་ཅེས་པའོ། །ད་ནི་མཉམ་པ་ཉིད་ཀྱི་ཡེ་ཤེས་
ཀྱི་སྒོ་ནས་བསྟོད་པ་བསྟན་པའི་ཕྱིར། མེད་པ་ལས་བྱུང་ཁྱོད་ལ་འདུད། །སངས་རྒྱས་འབྱུང་བ་ཁྱོད་ལ་འདུད། །ནམ་མཁའ་ལས་བྱུང་ཁྱོད་ལ་འདུད། །ཡེ་ཤེས་ལས་བྱུང་ཁྱོད་ལ་འདུད། །ཅེས་སྨོས་ཏེ། ཆོས་ཐམས་ཅད་དངོས་པོ་མེད་པར་རྟོགས་པ་ལས་འབྱུང་བས་ཁྱོད་ལ་འདུད་དོ། །
སངས་རྒྱས་འགྲོ་བའི་དོན་ལ་འཇིག་རྟེན་དུ་འབྱུང་བས་ཁྱོད་ལ་འདུད་དོ། །ཆོས་ཉིད་ནམ་མཁའ་ལྟ་བུ་རྟོགས་པ་ལས་ཆེ་བའི་ཡོན་ཏན་ཐམས་ཅད་འབྱུང་བས་ཁྱོད་ལ་འདུད་དོ། །མཉམ་པ་ཉིད་ཀྱི་ཡེ་ཤེས་ལས་བྱུང་བའི་འཇམ་དཔལ་ཁྱོད་ལ་འདུད་དོ། །ད་ནི་བྱ་བ་གྲུབ་པའི་ཡེ་ཤེས་ཀྱི་སྒོ་ནས་

49-1-36a

བསྟོད་པའི་ཕྱིར། སྒྱུ་འཕྲུལ་དྲ་བ་ཁྱོད་ལ་འདུད། །སངས་རྒྱས་རོལ་སྟོན་ཁྱོད་ལ་འདུད། །ཐམས་ཅད་ཐམས་ཅད་ཁྱོད་ལ་འདུད། །ཡེ་ཤེས་སྐུ་ཉིད་ཁྱོད་ལ་འདུད། །ཅེས་སྨོས་ཏེ།  སྒྱུ་མ་ལྟ་བུའི་སྤྲུལ་པ་ཐམས་ཅད་ཐབས་དང་ཤེས་རབ་དྲ་བ་ལྟ་བུར་འབྲེལ་བས་མེད་པ་སྤྲུལ་
ཞིང་ཡོད་པ་བསྒྱུར་བ་ཁྱོད་ལ་འདུད་དོ། །འགྲོ་བའི་དོན་དུ་སངས་རྒྱས་ཀྱི་སྐུ་གསུང་ཐུགས་ཀྱི་རོལ་པ་སྣ་ཚོགས་སྟོན་པ་ཁྱོད་ལ་འདུད་དོ། །ཡོན་ཏན་ཐམས་ཅད་དང་ལྡན་ཞིང་ཡོན་ཏན་ཐམས་ཅད་ཀྱིས་གཞན་དོན་གྲུབ་པར་བྱེད་པ་ཁྱོད་ལ་འདུད་དོ། །ཡེ་ཤེས་དྲུག་རོ་གཅིག་པ་ལས་གྲུབ་པའི་སྐུ་
ཉིད་འཇམ་དཔལ་ཁྱོད་ཡིན་པས་ཕྱག་འཚལ་འདུད་དོ་ཞེས་བསྟོད་པའོ། །ད་ནི་འབད་པ་དོན་ཡོད་པར་བྱ་བའི་ཕྱིར། ཉམས་སུ་བླངས་པའི་ཕན་ཡོན་བསྟན་པ་ནི། ལག་ན་རྡོ་རྗེ་རྡོ་རྗེ་འཆང་། །ཞེས་བྱ་བ་ལ་སོགས་པ་སྨོས་ཏེ། དེ་ནི་བཅོམ་ལྡན་འདས་ཀྱིས་དབང་བསྐུར་བའི་མིང་ངོ་། །ལུས་
དང་།  ངག་དང་། ཡིད་ཀྱི་གསང་བ་ཞེས་པ་ནི། དེ་སྣང་སྟོང་དང་། གྲག་སྟོང་དང་། རིག་སྟོང་དུ་རྟོགས་དཀའ་བས་གསང་བའོ། །ལྷག་མ་ནི་གོ་སླའོ། །ཆོས་ཐམས་ཅད་ཀྱི་ལུང་ངོ་ཞེས་པ་ནི་མཚན་ཡང་དག་པ་འདི་ཁྱབ་ཆེ་བས་ན་ལུང་ངོ་། །མི་སླུ་བས་ན་ལུང་། གཟུང་སླ་བས་ན་ལུང་ངོ་། །
ཚངས་པའི་གནས་བཞི་ནི་ཚད་མེད་པ་བཞིའོ། །ཀུན་དུ་སྦྱོར་བ་ཐམས་ཅད་དང་བྲལ་བ་ནི་རྗེས་སུ་ཆགས་པའི་ཀུན་དུ་སྦྱོར་བ་དང་། ཁོང་ཁྲོ་བའི་ཀུན་དུ་སྦྱོར་བ་དང་། ང་རྒྱལ་བའི་ཀུན་དུ་སྦྱོར་བ་དང་། མ་རིག་པའི་ཀུན་དུ་སྦྱོར་བ་དང་། ལྟ་བའི་ཀུན་དུ་སྦྱོར་བ་དང་། མཆོག་ཏུ་ཀུན་དུ་སྦྱོར་བ་དང་། 
ཐེ་ཚོམ་གྱི་ཀུན་དུ་སྦྱོར་བ་དང་། སེར་སྣའི་ཀུན་དུ་སྦྱོར་བ་རྣམས་སོ། །རྫས་ཐམས་ཅད་ལས་ཐར་པ་ནི། ཉོན་མོངས་པ་དང་བཅས་པའི་ཕུང་པོ་དང་བྲལ་བའོ། །མི་ཁོམ་པ་བརྒྱད་པོ་ནི། སེམས་ཅན་དམྱལ་བར་སྐྱེ་བ་དང་། ཡི་དྭགས་དང་། བྱོལ་སོང་དང་། དབང་པོ་མ་ཚང་བ་དང་། ལྟ་
བ་ལོག་པར་འཛིན་པ་དང་། ཡུལ་མཐའ་འཁོབ་ཏུ་སྐྱེས་པ་དང་། སངས་རྒྱས་མི་བཞུགས་པའི་ཞིང་དུ་སྐྱེས་པ་དང་། འདུ་ཤེས་མེད་པའི་སྲིད་པར་སྐྱེས་པའོ། །འཇིགས་པ་ཆེན་པོ་བརྒྱད་ནི། སེང་གེ་དང་། སྟག་དང་། གླང་པོ་ཆེ་སྨྱོན་པ་དང་། སྦྲུལ་དང་། རྒྱལ་པོའི་ཆད་པ་དང་།

49-1-36b

མེ་དང་། ཆུ་དང་། ཤ་ཟའི་འཇིགས་པ་དང་བརྒྱད་དོ། །དབང་ཕྱུག་ཕུན་སུམ་ཚོགས་པ་ནི། ཡོན་ཏན་གྱི་དབང་ཕྱུག་བརྒྱད་ལ་བྱ་སྟེ། དེ་ཡང་ཕ་རོལ་ཏུ་ཕྱིན་པའི་གཞུང་གིས། སྐུ་ཡང་བ་དང་། ཕྲ་བ་དང་། གཞན་གྱིས་མཆོད་པ་དང་། བདག་པོར་གྱུར་པ་དང་། ལོངས་སྤྱོད་པ་དང་།གར་
ཡང་ཕྱིན་པ་དང་། འདོད་དགུར་ལྡན་པ་དང་། དགའ་མགུར་སྤྱོད་པ་དང་བརྒྱད་དོ། །གསང་སྔགས་ཀྱི་གཞུང་གིས་སྐུའི་དབང་ཕྱུག་དང་། གསུང་གི་དབང་ཕྱུག་དང་།  ཐུགས་ཀྱི་དབང་ཕྱུག་དང་། རྫུ་འཕྲུལ་གྱི་དབང་ཕྱུག་དང་། ཕྱོགས་ཐམས་ཅད་དུ་སོང་བའི་དབང་ཕྱུག་དང་། འདོད་
སྤྱོད་ཀྱི་དབང་ཕྱུག་དང་། ཅི་འདོད་སྦྱིན་པའི་དབང་ཕྱུག་དང་། གནས་ཀྱི་དབང་ཕྱུག་དང་བརྒྱད་དོ། །དེ་ཡང་འདི་སྐད་དུ། ཡང་ཞིང་ཕྲ་བ་མཆོད་པའི་འོས། །བདག་གྱུར་ལོངས་སྤྱོད་གར་ཡང་ཕྱིན། །འདོད་དགུར་ལྡན་ཞིང་དགའ་མགུར་སྤྱོད། །དེ་དག་རྒྱལ་པོའི་དབང་ཕྱུག་བརྒྱད། །
ཅེས་པ་འབྱུང་ངོ་། །སྐུ་གསུང་ཐུགས་དང་རྫུ་འཕྲུལ་ཆེ། །ཀུན་སོང་འདོད་སྤྱོད་གཞན་ལ་སྦྱིན། །གནས་ཀྱི་དབང་ཕྱུག་རྣམ་པ་བརྒྱད། །འདི་དག་རྡོ་རྗེ་འཆང་གི་ཆོས། །ཞེས་འབྱུང་ངོ་། །སྤྱན་ལྔ་ནི་གོང་དུ་བཤད་ཟིན་ཏོ། །གྲོང་ནི་ཁང་ཁྱིམ་གཅིག་ཡོད་པའོ། །གྲོང་ཁྱེར་ནི་ཁྱིམ་
མང་པོ་ཚན་གཅིག་ཏུ་སྤུངས་པའོ། །གྲོང་རྡལ་ནི་གྲོང་ཚོམ་བུ་མང་པོ་ཡོད་པའོ། །ལྗོངས་ནི་ཡུལ་ལུང་པ་གཅིག་གིས་བསྡུས་པའོ། །ཡུལ་འཁོར་ནི་ཡུལ་གྲུ་མང་པོ་ཞིག་ཕྱོགས་གཅིག་ཏུ་བྱས་པའོ། །མ་མོ་བདུན་པོ་ནི་ཁྱོ་མེད་མ་བཞི།  ཁྱོ་ཅན་མ་གསུམ་སྟེ་བདུན་ལས་ཚངས་
པ་མོ་དང་། ཁྱབ་འཇུག་མོ་དང་། དབང་མོ་དང་། གཞོན་ནུ་མ་དང་། བཞི་ཁྱོ་མེད་མའོ། །དྲག་མོ་དང་། ཕག་མོ་དང་། རྒན་བྱོད་མོ་དང་གསུམ་མ་ཧཱ་དེ་བའི་ཆུང་མའོ། །སྙིགས་མ་ལྔ་ནི། ལྟ་བའི་སྙིགས་མ་དང་། ཉོན་མོངས་པའི་སྙིགས་མ་དང་། ཚེའི་སྙིགས་མ་དང་། ཟས་ཀྱི་
སྙིགས་མ་དང་། དུས་ཀྱི་སྙིགས་མ་དང་ལྔའོ། །ལྷག་མ་རྣམས་ནི་གོ་སླ་བས་མ་བཤད་དོ། །ད་ནི་ཤིན་ཏུ་བསྡུས་པ་ལས་མཚན་ཐམས་ཅད་བསྡུས་པའི་སྔགས་བསྟན་པའི་ཕྱིར། ཨོཾ་སརྦ་དྷརྨཱ་ཞེས་བྱ་བ་ལ་སོགས་པ་སྨོས་ཏེ། ཨོཾ་ནི་བཀྲ་ཤིས་པའི་ཚིག་ཀྱང་ཡིན། ཡེ་

49-1-37a

ཤེས་ལྔ་ཡང་ཡིན། ཕྱག་འཚལ་ཞིང་བྱིན་གྱིས་རློབ་པར་བྱེད་པ་ཡང་ཡིན་ནོ། །སརྦ་ནི་ཐམས་ཅད་དྷ་རྨཱ་ནི་ཆོས་ཨ་བྷཱ་བ་ནི་དངོས་པོ་མེད་པ། སྭ་བྷཱ་བ་ནི་རང་བཞིན། བི་ཤུདྡྷ་ནི་རྣམ་པར་དག་པ། ཙཀྵུ་ནི་མིག །ཨ་ཨཱ་ཨཾ་ཨཿནི། རྣམ་པར་ཐར་པ་བཞི་ཡི་མཚོན་པ་སྟེ། 
སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། ཐབས་མཁས་པ་དང་བཞི་སྟེ། འདི་བཞི་ཡང་དོན་སྐྱེ་བ་མེད་པར་འདུ་སྟེ། དེ་ལྟར་མཐའ་བསྡུས་པས། ཆོས་ཐམས་ཅད་དངོས་པོ་མེད་པའི་རང་བཞིན་གྱིས་རྣམ་པར་དག་པའི་མིག་གིས་སྐྱེ་བ་མེད་པ་ཤེས་སོ་ཞེས་བཤད་པ་ཡིན་
ནོ། །དེ་དག་གིས་ནི་རྩ་བའི་སྔགས་བསྟན་ཏོ། །པྲ་ཀྲྀཏ་ནི་ཟབ་པ་དང་རྒྱ་ཆེ་བ་གཉིས་སུ་མེད་པ། པ་རི་ཤུདྡྷ་ནི་ཡོངས་སུ་དག་པ་སརྦ་དྷ་རྨཱ་ནི་ཆོས་ཐམས་ཅད། ཡ་དུ་ཏ་ནི་བསྐྱེད་པ། སརྦ་ཏ་ཐཱ་ག་ཏ་ནི་དེ་བཞིན་གཤེགས་པ་ཐམས་ཅད།  ཛྙཱ་ན་ཀཱ་ཡ་ནི་ཡེ་ཤེས་ཀྱི་སྐུ། མཉྫུ་ཤྲཱི་ནི་
འཇམ་དཔལ་ལོ། །པ་རི་ཤུ་དྡྷི་ཏ་ནི་ཡོངས་སུ་དག་པ། མུ་པཱ་དཱ་ཡེ་ཏི་ཨཱ་ཞེས་པ་བྱིན་གྱིས་རློབ་པར་བྱེད་པ་ཞེས་ཀྱང་སྟོན་ཏོ། །ཁས་བླང་ངོ་། །གཟུང་བར་བྱའོ་ཞེས་པས་ཀྱང་སྟོན་ཏོ། །མཐའ་བསྡུས་པས་ཟབ་པ་དང་རྒྱ་ཆེ་བ་གཉིས་སུ་མེད་པ་ཡོངས་སུ་དག་པ་ལས་ཆོས་ཐམས་ཅད་སྐྱེད་པར་བྱེད་པ། དེ་བཞིན་གཤེགས་པ་
ཐམས་ཅད་ཀྱི་སྐུ་འཇམ་དཔལ་ཡོངས་སུ་དག་པར་ཁས་བླང་གཟུང་བར་བྱ་ཞེས་པའོ། །ཨ་ཨཱ་ནི་སྐྱེ་འགག་མེད་པ། སརྦ་ཏ་ཐཱ་ག་ཏ་ནི་དེ་བཞིན་གཤེགས་པ་ཐམས་ཅད། ཧྲྀ་ད་ཡ་ནི་སྙིང་པོ་སྟེ་ཐུགས་སོ། །ཧ་ར་ཧ་ར་འཕྲོག་པར་བྱེད་པའོ། །ཨོཾ་ཧཱུཾ་ཧྲཱིཿནི་སྐུ་གསུང་ཐུགས་བྱིན་གྱིས་རློབ་པའོ། །
བྷ་ག་བཱན་ནི་བཅོམ་ལྡན་འདས་སོ། །ཛྙཱ་ན་མཱུརྟི་ནི་ཡེ་ཤེས་ཀྱི་སྐུའོ། །ཝཱ་གཱི་ཤྭ་ར་ནི་ངག་གི་དབང་ཕྱུག་གོ། །མ་ཧཱ་པཱ་ཙ་ནི་གསུང་བ་ཆེན་པོའོ། །སརྦ་དྷརྨ་ནི་ཆོས་ཐམས་ཅད། ག་ག་ན་ནི་ནམ་མཁའ་ལྟ་བུའོ། །ཨ་མ་ལ་ནི་དྲི་མ་མེད་པ། སུ་པ་རི་ཤུདྡྷ་ནི་ཡོངས་སུ་དག་པའོ། །དྷརྨ་དྷཱ་ཏུ་ནི་ཆོས་
ཀྱི་དབྱིངས་སོ། །ཛྙཱ་ན་གརྦྷ་ཨ་ནི་ཡེ་ཤེས་ཀྱི་སྙིང་པོའོ། །མཐའ་བསྡུས་པས་སྐྱེ་འགག་མེད་པའི་དེ་བཞིན་གཤེགས་པ་ཐམས་ཅད་ཀྱི་ཐུགས་འཕྲོག་པར་བྱེད་པ། སྐུ་གསུང་ཐུགས་བྱིན་གྱིས་རློབ་པར་བྱེད་པ། བཅོམ་ལྡན་འདས་ཀྱི་ཡེ་ཤེས་ཀྱི་སྐུ་དང་། གསུང་གི་དབང་ཕྱུག་གསུང་བ་ཆེན་པོ།

49-1-37b

ཆོས་ཐམས་ཅད་ནམ་མཁའ་ལྟར་དྲི་མ་མེད་ཅིང་ཡོངས་སུ་དག་པ། ཆོས་ཀྱི་དབྱིངས་ཀྱི་ཡེ་ཤེས་ཀྱི་སྙིང་པོ་ཞེས་བྱ་སྟེ། དེས་ནི་ལས་སྔགས་བསྟན་ཏེ་བསྡུས་པའི་དོན་ཏོ། །དེ་ལྟར་སྟོན་པ་ཤཱཀྱ་ཐུབ་པས་ལམ་འབྲས་བུ་དང་བཅས་པའི་ཆོས་སོ། །ཐུན་མོང་མ་ཡིན་པའི་མཚན་གསུངས་པས་
འཁོར་རྗེས་སུ་ཡི་རང་བ་བསྟན་པ་ནི། དེ་ནས་དཔལ་ལྡན་རྡོ་རྗེ་འཆང་། །དགའ་ཞིང་མགུ་ནས་ཐལ་མོ་སྦྱར། །ཞེས་བྱ་བ་ལ་སོགས་པ་སྨོས་ཏེ། དེ་ཡང་འདིས་ནི་ཚུལ་ཇི་ལྟར་ཡི་རང་བ་བསྟན་ཏེ། མཚན་གྱི་གཞུང་རྫོགས་པའི་རྗེས་དེ་ནས་དཔལ་ལྡན་རྡོ་རྗེ་འཆང་། རང་དང་གཞན་གྱི་དོན་ཡོངས་
སུ་རྫོགས་པས་དགའ་ཞིང་། དེ་བཤད་པའི་སྟོན་པ་ལ་མགུ་ནས་ལུས་ཙོག་པུར་འདུག །ལག་པ་ཐལ་མོ་སྦྱར་ནས་ཡི་རང་ངོ་། །ཡུལ་གང་ལ་ཡི་རང་ན། མགོན་པོ་བཅོམ་ལྡན་དེ་བཞིན་གཤེགས། །རྫོགས་སངས་རྒྱས་ལ་ཕྱག་འཚལ་ནས། །ཞེས་སྨོས་ཏེ། འགྲོ་བ་རྣམས་ཀྱི་དོན་མཛད་
པས་ཀྱང་ཤཱཀྱ་ཐུབ་པ། བདུད་བཞི་བཅོམ་ཞིང་། ལེགས་པའི་ཡོན་ཏན་དྲུག་དང་ལྡན་པས།ཟབ་པ་དེ་བཞིན་ཉིད་དུ་གཤེགས་པ་དང་། རྒྱ་ཆེ་བ་འགྲོ་བའི་དོན་ལ་གཤེགས་པ། ཚོགས་གཉིས་རྫོགས་ཤིང་། སྤངས་པ་ཕུན་སུམ་ཚོགས་པ་དང་། ཡེ་ཤེས་ཕུན་སུམ་ཚོགས་
པ་དེ་ལ། ལུས་ངག་ཡིད་གསུམ་གུས་པ་དང་བཅས་ནས།  གསང་བའི་བདག་པོ་ཕྱག་ན་རྡོ་རྗེ་འཁོར་མང་པོ་དང་བཅས་ཏེ་ཕྱག་འཚལ་བའོ། །འཁོར་གང་དང་བཅས་ཏེ་ཡི་རང་ན། དེ་ནི་མགོན་པོ་གསང་བའི་བདག །ལག་ན་རྡོ་རྗེ་ཁྲོ་བོའི་རྒྱལ། །སྣ་ཚོགས་གཞན་དང་ལྷན་ཅིག་
ཏུ། །ཞེས་སྨོས་ཏེ། འགྲོ་བའི་མགོན་མཛད་པ། གསང་བའི་བདག་པོ་ལག་ན་རྡོ་རྗེ་ལ་སངས་རྒྱས་ཐམས་ཅད་ཀྱིས་ལས་ཀྱི་ཁྲོ་བོར་དབང་བསྐུར། དབང་རྟགས་སུ་ལག་ཏུ་རྡོ་རྗེ་གཏད། གསང་མཚན་དུ་ལག་ན་རྡོ་རྗེ་ཞེས་བཏགས་པས་ན། ཁྲོ་བོའི་རྒྱལ་པོའོ། །ཡོན་ཏན་སྣ་ཚོགས་དང་
ལྡན་པའི་འཁོར་ལྔ་བརྒྱ་པོ་གཞན་དང་ལྷན་ཅིག་ཏུ་ཡི་རང་ངོ་། །ཚིག་གང་གི་སྒོ་ནས་ཡི་རང་ན། གསང་བསྟོད་ནས་ནི་ཚིག་འདི་གསོལ། །མགོན་པོ་བདག་ཅག་ཡི་རང་ངོ་། །ལེགས་སོ་ལེགས་སོ་ལེགས་པར་གསུངས། །ཞེས་སྨོས་ཏེ། གསང་བསྟོད་པ་ནི་ཞུམ་པ་མེད་པར་དབུ་

49-1-38a

འཕང་བསྟོད་པའོ། །བདག་ཅག་འཁོར་དང་བཅས་པ་ཡི་རང་སྟེ། ཟབ་པ་རང་གི་དོན་འབྱུང་བ་ལེགས་སོ། །རྒྱ་ཆེ་བ་གཞན་གྱི་དོན་འབྱུང་བ་ལེགས་སོ། །ཟབ་པ་དང་རྒྱ་ཆེ་བ་གཉིས་སུ་མེད་པར་གསུངས་པས་ལེགས་པར་གསུངས་པའོ། །དགོས་པ་གང་གི་ཕྱིར་ཡི་རང་
ན། རྣམ་གྲོལ་འབྲས་བུ་འཚལ་བ་ཡི། །འགྲོ་བ་མགོན་མེད་རྣམས་དང་ནི། །བདག་ཅག་ཡང་དག་རྫོགས་པ་ཡི། །བྱང་ཆུབ་ཐོབ་པའི་དོན་ཆེན་མཛད། །ཅེས་སྨོས་ཏེ། ཉོན་མོངས་པའི་འཆིང་བ་ལས་གྲོལ་བའི་འབྲས་བུ་འདོད་པའི་འགྲོ་བ་མགོན་མེད་པ་རྣམས་དང་། བདག་ཅག་གིས་རྫོགས་
པའི་བྱང་ཆུབ་ཐོབ་པའི་དོན་དུ་མཛད་པས་སོ། །ཆོས་གང་ལ་ཡི་རང་ན། སྒྱུ་འཕྲུལ་དྲ་བའི་ཚུལ་བསྟན་པ། །འདི་ནི་རྣམ་དག་ལེགས་པའི་ལམ། །ཟབ་ཅིང་ཡངས་ལ་རྒྱ་ཆེ་སྟེ། །དོན་ཆེན་འགྲོ་བའི་དོན་བྱེད་པ། །ཞེས་སྨོས་ཏེ། སྒྱུ་འཕྲུལ་དྲ་བའི་ཆོས་བསྟན་པ་འདི་ནི་ཤིན་ཏུ་ལེགས་པའི་
ལམ་སྟེ། ཟབ་པ་དང་ཡངས་ཤིང་རྒྱ་ཆེ་བ་དང་། འགྲོ་བའི་དོན་བགྱིད་པས་སོ། །ཡིད་ཆེས་པའི་རྒྱུ་མཚན་ཅི་ཡོད་པའི་ཕྱིར་རྗེས་སུ་ཡི་རང་ན། སངས་རྒྱས་རྣམས་ཀྱི་ཡུལ་འདི་ནི། །རྫོགས་པའི་སངས་རྒྱས་རྣམས་ཀྱིས་བཤད། །ཅེས་སྨོས་ཏེ། སངས་རྒྱས་རྣམས་ཀྱི་སྤྱོད་ཡུལ་གྱི་ཆོས་
འདི་ནི་གང་ཟག་གིས་མ་གསུངས་ཏེ། རྫོགས་པའི་སངས་རྒྱས་ཀྱིས་གསུངས་པས། བརྫུན་དང་། ནོར་བ་མི་འབྱུང་བས་ཡིད་ཆེས་པའི་ཕྱིར། རྗེས་སུ་ཡི་རང་ཞེས་བཤད་པ་ཡིན་ནོ། །དེ་ཡང་། ལུང་ནི་ཡིད་ཆེས་ཚིག་ཡིན་ཏེ། །ཉེས་པ་ཟད་པ་བརྫུན་གྱི་ཚིག །སྨྲ་བར་མི་བྱེད་རྒྱུ་མེད་
ཕྱིར། །ཉེས་ཟད་ལུང་དུ་ཤེས་པར་བྱ། །ཞེས་གསུངས་པ་ལྟ་བུའོ། །སངས་རྒྱས་ཀུན་གྱི་བདག་ཉིད་འཇམ་དཔལ་མཚན། །ཟབ་ཅིང་རྒྱ་ཆེ་ཤིན་ཏུ་དཔག་དཀའ་ཡང་། །བཤད་པའི་རྒྱུད་དང་གདམས་ངག་ལ་བརྟེན་ནས། །སློབ་མས་གསོལ་བཏབ་ཕྱིར་ན་བདག་གིས་བརྩམས། །
ནོངས་པར་གྱུར་པ་འཕགས་དང་མཁས་ལ་བཤགས། །འདི་བརྩམས་དགེ་བ་མ་ནོར་མཆིས་པ་ཡིས། །ཀུན་གྱིས་འཇམ་དཔལ་གོ་འཕང་ཐོབ་པར་ཤོག །ཆོས་སྐད་བྱིངས་ལ་མ་བརྟེན་བོད་ཀྱི་མིས། །གོ་བར་བདེ་ཕྱིར་རང་སོའི་སྐད་ཀྱིས་བཀྲོལ། །དེ་ཕྱིར་མཁས་པས་ཚིག་སྐྱོན་བརྟག་མི་

49-1-38b

རིགས། །འོན་ཀྱང་རྒྱལ་བའི་ལུང་ལའང་སྐུར་འདེབས་ན། །བདག་འདྲའི་གཞུང་ལ་ཅི་ཕྱིར་སྨོད་མི་རིགས། །མཚན་ཡང་དག་པར་བརྗོད་པའི་འགྲེལ་པ་མཚན་དོན་གསལ་བར་བྱེད་པའི་སྒྲོན་མེ་ཞེས་བྱ་བ་རྫོགས་སོ།།      །།སློབ་དཔོན་བི་མ་ལ་མི་ཏྲས་མཛད་ནས་ཐུགས་ཀྱི་སྲས་ཉང་
ཏིང་ངེ་འཛིན་གྱིས་ཞུས་པའོ། །གཉགས་ཛྙཱ་ནས་བསྒྱུར་བའོ།།༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ནཱ་མ་སཾ་གཱི་ཏི། ཨརྠ་ཨཱ་ལོ་ཀ་ར་ནཱ་མ། བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་དོན་གསལ་བར་བྱེད་པ་ཞེས་བྱ་བ། འཇམ་དཔལ་ཡེ་
ཤེས་སེམས་དཔའ་ལ་ཕྱག་འཚལ་ལོ། །མི་གཡོ་འགག་མེད་དག་པའི་ངང་། །རང་བྱུང་ཡེ་ཤེས་འོད་གསལ་བ། །འཇམ་དཔལ་ཞི་བའི་ཡེ་ཤིས་སེམས། །མི་རྟོག་གཟུགས་སྐུ་རང་བྱུང་བའི། །མགོན་པོ་དེ་ལ་གུས་བཏུད་དེ། །རྒྱ་ཆེར་རབ་ཟབ་དག་པའི་རྒྱུད། །རིན་ཆེན་ལྟ་བུའི་དགོངས་
པ་ལ། །འགྲོ་བ་ཐབས་བསམ་མི་ཁྱབ་ཀྱང་། །བདེ་གཤེགས་སྟོན་པའི་བྱིན་རླབས་གདམས་པ་ཡིས། །ངེས་དོན་ཕྱོགས་གཅིག་བདག་གིས་གསལ་བར་དགྲོལ། །འཇམ་དཔལ་གྱི་མཚན་ཡང་དག་པར་བརྗོད་པ་འདི་ལ་སྤྱི་དོན་རྣམ་པ་དགུས་བསྟན་ཏེ། ལེའུ་དང་པོ་ཞུས་པ་དང་། ཞུས་
ལན་དུ་ཕུན་སུམ་ཚོགས་པ་ལྔ་དང་སྦྱར་ཏེ་བསྟན་པ་དང་། ལེའུ་གཉིས་པ་མི་གནས་པའི་ཡེ་ཤེས་ཆེན་པོ་དྲུག་པ་རྡོ་རྗེ་འཆང་གི་དོན་བསྟན་པ་དང་། ལེའུ་གསུམ་པ་ཤེས་བྱ་ངོ་བོས་སྟོང་པ་ཆོས་ཀྱི་དབྱིངས་ཀྱི་དོན་བསྟན་པ་དང་། ལེའུ་བཞི་པ་གཞི་འགག་པ་མེད་པ་མེ་ལོང་ལྟ་བུའི་ཡེ་ཤེས་ཀྱི་
དོན་བསྟན་པ་དང་། ལེའུ་ལྔ་པ་གཞིའི་རྩལ་སོ་སོར་དཔྱོད་པ་སོ་སོར་རྟོག་པའི་ཡེ་ཤེས་ཀྱི་དོན་བསྟན་པ་དང་། ལེའུ་དྲུག་པ་གཞིའི་ངོ་བོ་སྐྱེ་འགག་མེད་པ་མཉམ་པ་ཉིད་ཀྱི་ཡེ་ཤེས་དང་སྦྱར་ཏེ་བསྟན་པ་དང་། ལེའུ་བདུན་པ་ཤེས་བྱ་ཐོགས་པ་མེད་པ་བྱ་བ་གྲུབ་པའི་ཡེ་ཤེས་ཀྱི་དོན་
བསྟན་པ་དང་། ལེའུ་བརྒྱད་པ་ཆེ་བ་བརྗོད་པ་སྔགས་ཀྱི་སྒྲ་དང་བཅས་པ་བསྟན་པ་དང་། ལེའུ་དགུ་པ་རྗེས་སུ་ཡི་རང་བའི་སྒོ་ནས་བདག་དང་གཞན་གྱི་དོན་མཐར་ཕྱིན་པར་བསྟན་པའོ། །དེ་ནས་ལེའུ་དང་པོ་བཤད་དེ། དེ་ནས་ཞེས་པ་སྟོན་པ་ལ་སོགས་པ་ཕུན་སུམ་ཚོགས་པ་གནས་

49-1-39a

སོ། །འདིས་དུས་ཕུན་སུམ་ཚོགས་པ་བསྟན་པའོ། །དེ་ནས་དཔལ་ལྡན་རྡོ་རྗེ་འཆང་། །ཞེས་པ་ཞུ་བ་པོས་ཏེ་དེ་ཡང་རྟོག་པ་བདག་གི་དཔལ་དང་། ཐུགས་རྗེ་གཞན་གྱི་དཔལ་ལོ། །དོན་གྱི་རྡོ་རྗེ་ཆོས་ཀྱི་རྒྱུད་དང་ལྡན་ཞིང་། ཡོན་ཏན་གྱི་སྣང་བ་རྒྱུ་གཉིས་ངང་གིས་གསལ་
ཏེ་མི་འབྲལ་བའོ། །གདུལ་དཀའ་འདུལ་བ་རྣམས་ཀྱི་མཆོག །ཅེས་པ། སྟོན་པའི་སྤྲུལ་པ་གོང་མའི་ཕྲིན་ལས་ཏེ། ཐབས་མ་འགགས་པའོ། །དཔའ་བོ་འཇིག་རྟེན་གསུམ་ལས་རྒྱལ། །ཞེས་པ། འཇིག་རྟེན་གསུམ་གྱི་ཉོན་མོངས་པ་དང་སྡུག་བསྔལ་འཇོམས་ཤིང་། རང་ལ་དེའི་
སྐྱོན་གྱིས་མ་གོས་ཤིང་། འཁྲུལ་སྣང་གི་ཡེ་ཤེས་སུ་སྣང་བའོ། །དེ་ལྟར་འཁོར་བ་འཇོམས་ནུས་པ་ཇི་ལྟ་ཞེ་ན། རྡོ་རྗེ་ཡིན་པ་དང་། དབང་ཕྱུག་ཡིན་པ་དང་། གསང་བའི་བདག་པོ་ཡིན་པས་གོང་མ་ལས་རྒྱལ་ཞེས་པའོ། །པདྨ་དཀར་པོ་རྒྱས་འདྲའི་སྤྱན། །ཞེས་པ་ཞུ་བ་པོས་དོན་མཛད་པ་
ནི། གང་ལ་གང་འདུལ་མཁྱེན་ཏེ། སྤྱན་ལྔ་དང་ལྡན་པས་དོན་མཛད་ཀྱང་སྐྱོན་གྱིས་མ་གོས་ཏེ། པདྨ་ལྟ་བུའོ། །པདྨ་རྒྱས་པའི་གདན་ལ་བཞུགས། །ཞེས་པ་འདིས་གནས་ཕུན་སུམ་ཚོགས་པ་སྟོན་ཏོ། །བྱ་རྒོད་ཕུང་པོའི་རི་ལ་སྐྱོན་མེད་པའི་དགོངས་པ་ལ་གནས་ཞེས་བྱའོ། །རང་གི་
ལག་གི་རྡོ་རྗེ་མཆོག །ཅེས་པ། དོན་གྱི་རྡོ་རྗེ་ཡོད་པའི་རྟགས་སུ་ཕྱག་མཚན་རྡོ་རྗེ་བསྣམས་པའོ། །ཡང་དང་ཡང་དུ་གསོར་བྱེད་པ། །ཞེས་པ་ནི་ཁམས་གསུམ་གྱི་ཉོན་མོངས་པ་དང་། ཉོན་མོངས་པ་ཐམས་ཅད་ཟིལ་གྱིས་གནོན་པའོ། །ཁྲོ་གཉེར་རིམ་པར་ལྡན་ལ་སོགས། །ཞེས་
པ་དེ་དང་། ཚུལ་མཐུན་པ་འཁོར་ཕུན་སུམ་ཚོགས་པའོ། །ལག་ན་རྡོ་རྗེ་མཐའ་ཡས་པ། །ཞེས་པ་དེའི་འཁོར་རིགས་འཛིན་པ་སྤྲུལ་པའི་འཁོར་བགྲང་བ་ལས་འདས་པའོ། །དཔའ་བོ་གདུལ་དཀའ་འདུལ་བ་པོ། །ཞེས་པ་འཁོར་དེ་རྣམས་ཀྱང་མ་རིག་པ་དང་ལོག་རྟོག་འཇོམས་
ནུས་པའོ། །འཇིགས་སུ་རུང་བའི་དཔའ་བྱེད་ཅན། །ཞེས་པ་བདུད་དང་སྲིན་པོ་ཟིལ་གྱིས་གནོན་པའི་མདངས་དང་ལྡན་པའོ། །རྡོ་རྗེ་ཞེས་པ་རིག་པའོ། །རྩེ་མོ་ཞེས་པ་ཡེ་ཤེས་སོ། །འཕྲོ་ཞེས་པ་མ་འགགས་པའོ། །རང་གི་ཞེས་པ་རིག་པའོ། །ལག་གི་ཞེས་པ་ཡོན་ཏན་གྱི་རྩལ་

49-1-39b

ལོ། །གསོར་བྱེད་པ་ཞེས་པ་ཐུགས་རྗེས་འགྲོ་དོན་མཛད་པའོ། །སྙིང་རྗེ་ཆེ་དང་ཞེས་པ་མཛད་པ་དང་བཅས་པའི་སྙིང་རྗེ་མ་ཡིན་ཏེ། མཛད་པ་མེད་པའི་ཐུགས་རྗེ་ཆེན་པོའོ། །དེ་ཡང་གང་ལས་འབྱུང་ཞེ་ན། ཤེས་རབ་དང་ཞེས་བྱ་སྟེ། ཕྱོགས་ལྷུང་མེད་པའི་ཤེས་རབ་པོ། །ཐབས་ཀྱིས་འགྲོ་དོན་
བྱེད་པའི་མཆོག །ཅེས་པ་བྱ་བརྩལ་མི་མངའ་བའི་ཡེ་ཤེས་ལྔ་བྱུང་ནས་སྐུ་གཉིས་སུ་གྱུར་ཏེ། འགྲོ་བའི་དོན་མཛད་པའོ། །དེ་ཡང་གཞན་ལས་དཔག་པའི་དོན་བྱ་བརྩལ་ལས་འདས་པའི་སྐུ་དང་ཡེ་ཤེས་མཚོན་པའོ། །དགའ་མགུ་རངས་པའི་བསམ་པ་ཅན། །ཞེས་པ་ཉོན་མོངས་པ་མི་མངའ་
བར་དགྱེས་པའོ། །ཁྲོ་བོའི་ལུས་ཀྱི་གཟུགས་ལྡན་པ། །ཞེས་པ་ནི། ཐབས་མ་འགགས་པའི་སྐུར་དེ་ལྟར་ཡང་སྣང་བའོ། །སངས་རྒྱས་ཕྲིན་ལས་བྱེད་པའི་མགོན། །ཞེས་པ་སྟེ། ཚད་མེད་པ་བཞིའམ་ཕྲིན་ལས་བཞིས་སེམས་ཅན་སྐྱོབ་པའོ། །ལུས་བཏུད་རྣམས་དང་ལྷན་ཅིག་པ། །ཞེས་
པ། དེའི་འཁོར་དང་བཅས་པ་སྟོན་པ་ལ་བསྟོད་ཅིང་མོས་པ་བསྐྱེད་པའོ། །དེ་བཞིན་གཤེགས་པ་བཅོམ་ལྡན་འདས། །ཞེས་པ་དང་། རྫོགས་སངས་རྒྱས་ལ་ཕྱག་འཚལ་ནས། །ཞེས་པ་སྟོན་པ་ལ་འཁོར་རྣམས་ཀྱིས་སོ། །ཐལ་མོ་སྦྱར་བ་བྱས་ནས་ནི། །ཞེས་པ་ཞུ་བ་པོའི་ལུས་ཀྱི་
འདུག་ཚུལ་ལོ། །སྤྱན་སྔར་འདུག་སྟེ་འདི་སྐད་གསོལ། །ཞེས་པ་སྟོན་པའི་དྲུང་དུ་ཞུ་བ་པོ་འདུག་སྟེ་ཞུ་བ་དབུལ་བའོ། །ཇི་སྐད་འབུལ་ཞེ་ན། ཁྱབ་བདག་ཅེས་པ་སྟོན་པ་པོ་བདག་ལ་ཕན་པ་དང་ཞེས་ཞུ་བ་པོ་ལའོ། །བདག་དོན་ཞེས་པ་བདག་ལ་མི་དགོས་ཀྱང་གཞན་མོས་པ་སྐྱེད་
པའི་ཆེད་དུ་ཚུལ་བསྟན་པའོ། །བདག་ལ་ཐུགས་བརྩེའི་ཕྱིར་ཞེས་པ་སྟོན་པ་དེ་ཞུ་བ་པོ་ལ་བྱམས་ཐུགས་དང་ལྡན་པའོ། །སྒྱུ་འཕྲུལ་ཞེས་པ་རིག་པ་དང་སེམས་སོ། །དྲ་བ་ཞེས་པ་གཉིས་སུ་མེད་པའོ། །མངོན་ཞེས་པ་ད་ལྟར་གསལ་བའོ། །རྫོགས་ཞེས་པ་སྐུ་ལ་ཆེ་བ་
རྫོགས་པའོ། །ཡང་ན་རིག་པ་ལ་ཡེ་ཤེས་རྫོགས་པའོ། །བྱང་ཆུབ་ཅེས་པ་རིག་པའི་ཡེ་ཤེས་སོ། །ཅི་ནས་བདག་ཐོབ་མཛོད་ཅེས་པ་སྟོན་པའི་ཐུགས་རྗེ་དང་ཐབས་ཀྱིས་བདག་གི་དོན་རང་ལ་ཡོད་པས་དེ་རྟོགས་ཤིང་ཐོབ་པར་མཛད་དུ་གསོལ་ཞེས་པའོ། །ཉོན་མོངས་པས་ནི་སེམས་

49-1-40a

དཀྲུགས་ཤིང་། །མི་ཤེས་འདམ་དུ་བྱིང་བ་ཡི། །སེམས་ཅན་ཀུན་ལ་སྨན་པ་དང་། །བླ་མེད་འབྲས་བུ་ཐོབ་བྱའི་ཕྱིར། །ཞེས་པ་འགྲོ་དྲུག་དུག་ལྔ་དུག་གསུམ་གྱིས་ཟིན་པ་ལ་ཡེ་ཤེས་ཀྱི་སྐྱབས་དམ་པ་མཛད་དུ་གསོལ་ཞེས་པ་སྟེ། གཞན་དོན་དུ་ཞུས་པའོ། །གང་ལ་ཞུས་
ཤེ་ན། རྫོགས་པའི་སངས་རྒྱས་བཅོམ་ལྡན་འདས་ལའོ། །དེའི་ཕྱིར་ན། འགྲོ་བའི་བླ་མ་སྟོན་པ་པོ། །ཞེས་པ་ཅི་སྟེ་ཞེ་ན། དམ་ཚིག་ཆེན་པོ་དེ་ཉིད་མཁྱེན། །དབང་པོ་བསམ་པ་མཁྱེན་མཆོག་གི། །ཞེས་པའོ། །དེ་ཡང་དོན་སྤྱོད་ཡིན་ཞེས་པའོ། །བཅོམ་
ལྡན་འདས་ཀྱི་ཡེ་ཤེས་སྐུ། །གཙུག་ཏོར་ཆེན་པོ་ཚིག་གི་བདག །ཡེ་ཤེས་སྐུ་སྟེ་རང་འབྱུང་བ། །ཞེས་པ་སྟོན་པའི་སྐུ་བག་ཆགས་ཀྱི་གདོས་པ་ཅན་མིན་ཏེ་འོད་ཀྱི་སྐུ་ཡིན་ལ། སྐུ་དེ་ལ་ནུབ་པ་དང་འགྱུར་བ་མེད་དེ། ཚིག་གི་ཚོགས་ཐམས་ཅད་ཀྱི་མངའ་བདག་གོ། །ཅིའི་ཕྱིར་ཞེ་ན། ཡེ་ཤིས་
སྐུ་སྟེ་རང་འབྱུང་བ། །ཞེས་པའོ། །དེ་ནི་སྟོན་པ་ཕུན་སུམ་ཚོགས་པའི་བདག་ཉིད་དོ། །འཇམ་ཞེས་པ་རིག་པའོ། །དཔལ་ཞེས་པ་རིག་འཛིན་གྱི་སའོ། །ཡེ་ཤེས་ཞེས་པ་ལོངས་སྐུའོ། །སེམས་དཔའི་ཞེས་པ་སྤྲུལ་པའི་སྐུའོ། །མིང་ནི་ཡང་དག་བརྗོད་པའི་མཆོག །ཅེས་པ་དེའི་དོན་
མཚན་ཚིག་ལ་བརྟེན་ཏེ་གཅོད་ཅིང་མཚོན་པའོ། །དོན་ཟབ་པ་ཞེས་པ་སྒྲོས་འདོགས་མི་ནུས་ཤིང་། སྐུར་པ་གདབ་མི་ནུས་ཏེ། གཞན་གྱི་བློས་དཔག་པར་དཀའ་བས་སོ། །དོན་ནི་རྒྱ་ཆེ་ཞིང་ཞེས་པ་དང་པོའི་གནས་ལུགས། བར་དུ་འཁྲུལ་ལུགས། ཐ་མ་གྲོལ་ལུགས་ལ་སོགས་
པ་སྟོན་པའོ། །དོན་ཆེན་མཚུངས་མེད་རབ་ཞི་བ། །ཞེས་པ། གཞི་དག་པ་ཆོས་ཀྱི་སྐུ་ལ་འབྲས་བུ་དག་པ་ཤེས་རབ་རིག་པའི་སྐུ་ལྔས་བརྒྱན་པ་དེའི་གོང་ན་གཞན་མེད་པ་གཞན་གྱིས་འགྲན་ཟླ་མེད་པའོ། །ཐོག་མ་བར་དང་མཐར་དགེ་བ། །ཞེས་པ། དུས་གསུམ་དུ་བཟང་པོར་
གནས་པའོ། །ཅི་སྟེ་ཞེ་ན། འདས་པའི་སངས་རྒྱས་རྣམས་ཀྱིས་གསུངས། །མ་འོངས་རྣམས་ཀྱང་གསུང་འགྱུར་ལ། །ད་ལྟར་བྱུང་བའི་རྫོགས་སངས་རྒྱས། །ཡང་དང་ཡང་དུ་གསུངས་པ་གང་། །ཞེས་པའོ། །རྒྱུད་ཆེན་སྒྱུ་འཕྲུལ་དྲ་བ་ལས། །ཞེས་པ་དོན་གྱི་རྒྱུད་ཆེན་པོ་

49-1-40b

རིག་པའི་ཡེ་ཤེས་གཉིས་སུ་མེད་པ་ལས་སོ། །རྡོ་རྗེ་འཆང་ཆེན་གསང་སྔགས་འཆང་། །ཞེས་པ་དཔལ་རྡོ་རྗེ་སེམས་དཔའ་སྐུ་གསུང་ཐུགས་ཀྱི་བདག་ཉིད་དོན་གཞན་ལས་ཁྱད་པར་འཕགས་པ་གོང་བཞིན་རིག་པས་སྐལ་བ་དང་ལྡན་པས་སོ། །དཔག་མེད་རྣམས་ཀྱིས་དགའ་བཞིན་དུ། །
ཞེས་པ་སངས་རྒྱས་བསམ་གྱིས་མི་ཁྱབ་པས་གསུངས་སོ། །གླུ་བླངས་གང་ལགས་བཤད་དུ་གསོལ། །ཞེས་ཞུས་པ་ཐུགས་ལས་ནི་བཀྲོལ། མགུར་གྱི་བུམ་པར་དྲིལ་ཏེ། ལྗགས་ཀྱི་དབང་པོ་ལ་བཀྲོམ་ནས་གསུངས་པ་གང་ལགས་པ་དེ་སྟོན་པས་བདག་ལ་གསུངས་ཞེས་པའོ། །
མགོན་པོ་རྫོགས་སངས་རྒྱས་ཀུན་གྱི། །གསང་འཛིན་ཅི་ན་ས་བདག་འགྱུར་ཕྱིར། །ཞེས་པ་བཤད་པའི་དགོས་པའོ། །དེ་ཡང་དུས་གསུམ་བུདྡྷའི་དོན་གྱི་མཚན་ཉིད་སེམས་ལ་འཛིན་ཏེ། ཅི་སྟེ་བདག་ཀྱང་དེ་ལྟར་འགྱུར་བའི་ཕྱིར་ནའོ། །ངེས་པར་འབྱུང་གི་བར་དུ་འདི་ཞེས་པ། དོན་
ཅི་ཙམ་གསུང་གི་བར་དུའོ། །བདག་གིས་བསམ་པ་བརྟན་པོས་གཟུང་། །ཞེས་པ་ཞུ་བ་པོས་གསུངས་པའི་དོན་ཐུགས་ལ་འཆང་བའོ། །ཉོན་མོངས་མ་ལུས་བསལ་བ་དང་། །མི་ཤེས་མ་ལུས་སྤང་བའི་ཕྱིར། །ཞེས་པ་གཞན་གྱི་དོན་གྱི་དགོས་པའོ། །དེའི་ཕྱིར་ན། བསམ་པའི་
ཁྱད་པར་ཇི་བཞིན་དུ། །སེམས་ཅན་རྣམས་ལ་བཤད་པར་འཚལ། །ཞེས་གསུངས་ཏེ། འགྲོ་བའི་བློ་དང་མོས་པའི་ཁྱད་པར་དང་སྦྱར་ནས་དོན་མཛད་ཅེས་པའོ། །གསང་དབང་ལག་ན་རྡོ་རྗེ་ཡིས། །ཞེས་པ་ཞུ་བ་པོས་སོ། །དེ་བཞིན་གཤེགས་ལ་དེ་སྐད་དུ། ཞེས་སྟོན་པ་པོ་
ལའོ། །གསོལ་ནས་ཞེས་པ་དགོངས་སྐད་དོ། །ཐལ་མོ་སྦྱར་བ་བྱས་ཏེ་ཞེས་པ་ཞུ་བའི་ཚུལ་གྱིས་སྤྱོད་པའོ། །དེ་ནས་ཞེས་པ་དགོངས་སྐད་ཞུས་ནས་སོ། །བཅོམ་ཞེས་པ་བདུད་བཞི་བཅོམ་པའོ། །ལྡན་ཞེས་པ་སྐུ་དང་ཡེ་ཤེས་སུའོ། །ཤཱ་ཞེས་པ་སྟོན་པ་རྡོ་རྗེ་སེམས་དཔའི་
སྤྲུལ་པ་ཐུབ་པ་དྲུག་གདུལ་བྱ་སོ་སོ་ལ་སྣང་བའོ། །ཀྱ་ཞེས་པ་སྤྲུལ་སྐུ་རེ་རེས་དོན་རེ་རེ་མཛད་པའོ། །ཐུབ་ཅེས་པ་ཐུགས་རྗེས་འགྲོ་བའི་མ་རིག་པ་དང་ལག་རྟོག་འཇོམས་པའོ། །རྫོགས་པའི་སངས་རྒྱས་རྐང་གཉིས་མཆོག །ཅེས་པ། གོང་མའི་སྟོན་པ་དེ་འཁོར་རྣམས་ཀྱི་

49-1-41a

ནང་ན་མཆོག་ཏུ་གྱུར་པའོ། །ཉིད་ཀྱི་ཞལ་ནས་ལྗགས་བཟང་བ། །ཞེས་པ་ཐུགས་ལས་བཀྲོལ། མགུར་གྱི་བུམ་པར་དྲིལ། ལྗགས་ཀྱི་པདྨར་བཀྲམ། ཚེམས་ཀྱི་བར་ནས་བཤར་ཏེ་དོན་གསུངས་པའོ། །དེ་ཡང་སྨྲ་བའི་སེང་གེར་གྱུར་པའོ། །འཇིག་རྟེན་གསུམ་པོ་
སྣང་བྱེད་ཅིང་། །བདུད་བཞིའི་དགྲ་རྣམས་སེལ་བྱེད་པ། །ཞེས་པ་གོང་མའི་དགོས་པའོ། །སེམས་ཅན་རྣམས་ཀྱི་ངན་སོང་གསུམ། །ཞེས་པ་སེམས་ཅན་ལས་ཀྱི་བྱེ་བྲག་གིས་དམྱལ་བ་ཡི་དྭགས་ཀྱི་ཚུལ་དང་བྱོལ་སོང་དུ་སྣང་བའོ། །སྦྱོང་བར་བྱེད་པའི་འཛུམ་བསྟན་ནས། །ཞེས་སྟོན་པའི་
ཐུགས་རྗེས་གོང་མ་བཞིན་ནོ། །ཚངས་པའི་གསུང་ནི་སྙན་པ་ཡིས། །ཞེས་པ་ལྷ་ཚངས་པའི་གསུང་ལྟ་བུར་འགྱུར་བའི་གསུང་བློ་རབ་འབྲིང་ལ་འཚམ་པ་ཅིག་གསུངས་པའོ། །འཇིག་རྟེན་གསུམ་པོ་ཀུན་བཀང་ནས། །ཞེས་ཆོས་ཐམས་ཅད་འཆད་པའི་སྟོན་པ་སྤྲུལ་པའི་སྐུས་གང་བའམ། 
ཡང་ན་གསུང་དེ་ཉིད་མིའི་གནས་སུ་བསྒྲགས་པས་གཞན་དུ་ཡང་དེ་ལ་མི་ཆེ་མི་ཆུང་བར་སྣང་བའོ། །ལག་ན་རྡོ་རྗེ་སྟོབས་པོ་ཆེ། །ཞེས་པ་གང་གདུལ་དཀའ་བ་འདུལ་བ་ལས་གཞན་ཡེ་ཤེས་ཀྱི་སྟོབས་ཀྱིས་དུག་ལྔ་འཇོམས་པའི་ཐུགས་རྗེའི་སྟོབས་ཀྱིས་འགྲོ་བ་སྒྲོལ་བའི་ལྷག་པའི་མཐུ་ཅན་ནོ། །
གསང་དབང་ལ་ནི་སླར་གསུངས་པ། །ཞེས་པ་ཐུན་མོང་མ་ཡིན་པའི་དགོངས་པ་ལ་མངའ་མཛད་ཅིང་དབང་སྒྱུར་བའོ། །དེ་ལ་སྟོན་པས་ཞུས་ལན་གསུངས་པའོ། །སྙིང་རྗེ་ཆེ་དང་ལྡན་གྱུར་པས། །ཞེས་པ་ལག་ན་རྡོ་རྗེ་དེ་ལའོ། །འགྲོ་ལ་ཕན་པའི་དོན་དུ་ཁྱོད། །ཅེས་ཞུ་བ་པོས་གཞན་དོན་དུ་
ཞུས་པའོ། །ཡེ་ཤེས་ལུས་ཅན་འཇམ་དཔལ་གྱིའོ། །དགོས་པ་ཅི་ཡོད་ཅེ་ན། མིང་བརྗོད་པས་ནི་དོན་ཆེའོ། །དོན་ཇི་ཙམ་དུ་ཆེ་ཞེ་ན། དག་པར་བྱེད་ཅིང་སྡིག་སེལ་བ། །ང་ལས་ཉན་པར་བརྩོན་པ་ནི། །ཞེས་པ། སྟོན་པ་པོས་ཞུ་བ་པོ་ལའོ། །ལེགས་སོ་དཔལ་ལྡན་རྡོ་རྗེ་འཆང་། །ཞེས་པ་
རང་དོན་དུ་མི་དགོས་ཀྱང་གཞན་དོན་དུ་མཐར་ཕྱིན་པས་སོ། །ལག་ན་རྡོ་རྗེ་ཁྱོད་ལེགས་སོ། །ཞེས་པ་ཁྱོད་ཀྱིས་ཞུས་པ་མ་ནོར་ཞེས་པའོ། །གསང་བའི་བདག་པོ་དེ་ཕྱིར་ངས། །ཞེས་པ་བསྟན་པའི་དགོངས་པ་ཐུན་མོང་མ་ཡིན་པ་མཁྱེན་ཅིང་མངའ་བས་བདག་པོར་འགྱུར་བའོ། །

49-1-41b

དེའི་ཕྱིར་ཁྱོད་ལ་མི་དགོས་ཀྱང་གཞན་དོན་དུ་བསྟན་ཞེས་པའོ། །ཁྱོད་ལ་ལེགས་པར་བསྟན་པར་བྱ། །ཞེས་པ་ལག་ན་རྡོ་རྗེ་ལ་ཤཱཀྱ་ཐུབ་ཀྱིས་མཚན་བརྗོད་བསྟན་པའོ། །དངོས་ཆོས་ཕུན་སུམ་ཚོགས་པ་འབྱུང་བའོ། །ཁྱོད་ནི་རྩེ་གཅིག་ཡིད་ཀྱིས་ཉོན། །ཞེས་པ། སྟོན་པའི་གསུང་ལ་
ལག་ན་རྡོ་རྗེ་ཉོན་ཅིག་པ་སྟེ་མ་ཡེངས་མ་འཕྲོས་པའོ། །བཅོམ་ལྡན་དེ་ནི་ལེགས་ཞེས་གསོལ། །ཞེས་པ་སྟོན་པས་གསུངས་པའི་དོན་ལ་ཞུ་བ་པོས་འཁོར་དང་བཅས་པ་དགྱེས་པའོ། །དེ་ནས་བཅོམ་ལྡན་ཤཱཀྱ་ཐུབ། །ཅེས་པ་སྟོན་པའོ། །གསང་སྔགས་རིགས་ཆེན་ཐམས་ཅད་དང་། །ཞེས་
པ་སྟོན་པའི་རིགས་འཛིན་ཅིང་གསང་སྔགས་འཆང་མོས་པའི་འཁོར་རོ། །གསང་སྔགས་རིག་སྔགས་འཆང་བའི་རིགས། །ཞེས་པ་གོང་མའི་འཁོར་གྱི་དབྱེ་བའོ། །རིགས་གསུམ་ལ་ནི་རྣམ་པར་གཟིགས། །ཞེས་པ་སྟོན་པས་འཁོར་གསུམ་ལ་གཟིགས་ནས་དོན་གསུངས་ཞེས་པའོ། །
འཇིག་རྟེན་འཇིག་རྟེན་འདས་པའི་རིགས། །ཞེས་པ་འཁོར་དེ་དག་ཀྱང་གཉིས་སུ་འདུས་ཏེ། འཇིག་རྟེན་པ་དང་ལྷ་དང་མི་ལ་སོགས་པ་དང་། འཇིག་རྟེན་ལས་འདས་པ་ཕྱག་ན་རྡོ་རྗེ་ལ་སོགས་པའོ། །འཇིག་རྟེན་སྣང་བྱེད་རིགས་ཆེན་དང་། །ཞེས་པ་དོན་བྱེད་ནུས་པའོ། །ཕྱག་རྒྱ་ཆེན་པོའི་
རིགས་མཆོག་དང་། །ཞེས་པ། དེའི་ནང་ནས་དོན་མཆོག་ཏུ་གྱུར་པའི་དགོངས་པ་བྱ་བརྩལ་དང་བྲལ་བ་ལ་མོས་པའོ། །རིགས་ཆེན་གཙུག་ཏོར་ཆེར་གཟིགས་ནས། །ཞེས་པ་དང་། འཁོར་གྱི་ནང་ནས་ཤེས་རབ་ཀྱི་སྙིང་སྟོབས་དང་ལྡན་པར་རིག་པའི་ཡེ་ཤེས་ཀྱི་དོན་རྟོགས་ནུས་པའོ། །འཁོར་
གྱི་ནང་ནས་དབུའི་གཙུག་ཏོར་ལྟར་གོང་དུ་འགྱུར་བའི་དགོངས་པ་ནུབ་པ་མེད་པའོ། །དེའི་དོན་དུ་ངེས་པའི་དོན་དུ་གསུངས་པའོ། །ཇི་ལྟར་གསུངས་ན། ཚིག་གི་བདག་པོར་གྱུར་པའི་སྟོན་པས་ཚིགས་སུ་བཅད་པའོ། །དེ་ཡན་ཆད་དུ་ལེའུ་དང་པོའི་དགོས་པ་བསྟན་པའོ།།      །།ད་ནི་ལེའུ་གཉིས་
པ་མི་གནས་པའི་ཡེ་ཤེས་ཆེན་པོ་རྡོ་རྗེ་འཆང་གི་དོན་བསྟན་ཏེ། གསང་ཞེས་པ། རིག་པ་དངོས་མེད་ཀྱི་ཡེ་ཤེས་ཀུན་གྱི་ཐུན་མོང་མ་ཡིན་པའོ། །སྔགས་ཞེས་པ་དེ་ལས་ལྷག་པ་མེད་དེ། དོན་མཆོག་ཏུ་གྱུར་པའོ། །རྒྱལ་པོ་ཞེས་པ། རྟོགས་མ་རྟོགས་ཀྱི་བྱེ་བྲག་གམ་ཡོན་ཏན་གྱི་སྣང་བ་

49-1-42a

འཁོར་འདས་སུ་ཤར་ལ། དེ་འདུས་ཀྱང་དེ་ཉིད་དུ་འདུས་ཤིང་གྲོལ་བས་ན་ཐམས་ཅད་ཀྱི་བདག་པོ་ལྟ་བུའོ། །ཅིའི་ཕྱིར་ཞེ་ན། དྲུག་ལྡན་ཞིང་ཞེས་འབྱུང་སྟེ། གཞི་དེ་སྐུ་ལྔ་ངོ་བོ་ཉིད་ཀྱི་སྐུ་དང་དྲུག་ཏུ་ལྡན། རིགས་ལྔ་ཨའི་རིགས་དང་དྲུག་ཏུ་ལྡན། ཡུམ་ལྔ་བདག་ཏུ་
མེད་པའི་ཡུམ་དང་དྲུག་ཏུ་ལྡན། དུག་ལྔ་ཁོང་ཁྲོ་དང་དྲུག་ཏུ་ལྡན། རིགས་དྲུག་དང་ལྡན་པའོ། །གཉིས་སུ་མེད་པར་འབྱུང་བ་དང་། །ཞེས་པ་དེ་ཡང་དྲུག་པ་དེ་རྣམས་དངོས་སུ་མཚན་མ་དང་བཅས་པར་ཡོད་པ་མ་ཡིན་ཏེ། ཡོན་ཏན་གྱི་ཆར་ཡོད་ཅེས་བྱའོ། །དངོས་སུ་མེད་པས་སྐྱོན་དུ་མི་འགྱུར་
ཡོན་ཏན་གྱི་ཆར་ཡོད་པས་ཕྱིར་སྣང་ནུས་ཏེ། མི་སྐྱེ་ཆོས་ཅན་ཞེས་འབྱུང་སྟེ། རང་འབྱུང་གཉིས་མེད་ལ་ཡོན་ཏན་འགག་མེད་དུ་གནས་པའོ། །དེ་ཡང་ཇི་ལྟར་གནས་ན་ཆོས་ཉིད་ཆོས་སྐུ་དབྱེར་མེད་པའི་ངང་ན་རིག་པའི་རང་གདངས་འབྱུང་བ་ལྔའི་བུམ་པ་ན་ཤེས་རབ་རིག་པའི་སྐུ་ལྔ་ས་བོན་
དུ་སྨིན་ལ། འབྲས་བུར་མ་སྨིན་ཏེ། སྟོང་པ་ཡེ་ཤེས་ཀྱི་སྙིང་པོ་ཅན་དུ་གནས་པའོ། །འདི་གསུངས་པ་ཞེ་ན། དེ་མཚོན་པའི་ཐབས་སྔགས་ཀྱི་སྒྲ་ཇི་བཞིན་པའོ། །ཨ་ཞེས་པ་དག་པ་སྐྱོན་མེད་དེ་ཆོས་ཉིད་ཡངས་པ་ཆེན་པོའོ། །ཨཱ་ཞེས་པ་ཆོས་ཉིད་དེའི་ཀློང་ན་ཆོས་སྐུ་ཡེ་ནས་གནས་ཏེ། 
རྒྱུན་གྱིས་རྟག་པའོ། །ཨི་ཞེས་པ་ཐུགས་རྗེ་ཆེན་པོ་ཅན། ཨཱི་ཞེས་པ་ཐུགས་རྗེ་རྒྱུན་གྱིས་རྟག་པའོ། །ཨུ་ཨཱུ་ཞེས་པ་ཐུགས་རྗེས་དང་པོའི་རང་སར་གཉིས་སུ་མེད་པར་བསྡུས་པའོ། །ཨེ་ཨཻ་ཞེས་པ་མཁྱེན་པའི་ཡེ་ཤེས་སྟོབས་དང་ལྡན་པའོ། །ཨོ་ཨཽ་ཞེས་པ་ངོ་བོ་སྐྱེ་མེད་མི་རྟོག་
ཀྱང་རྩལ་དཔྱོད་ཀྱི་ཡེ་ཤེས་མི་འགག་པར་ཕྱིས་འཆར་ནུས་པའོ། །ཨཾ་ཨཿཞེས་པ་གཞིའི་ཡོན་ཏན་དེ་ལྟར་སྣང་ཡང་དོན་སྐྱེ་མེད་དག་པ་མཉམ་ཉིད་དུ་གནས་ཞེས་པའོ། །སྠི་ཏོ་ཞེས་པ་རིག་པ་འགྱུར་བ་མེད་པ་ལ་ཐུགས་རྗེ་ཐོགས་པ་མེད་པ་འབྱུང་བའོ། །ཧྲྀ་དི་ཞེས་པ་ཐུགས་རང་འབྱུང་གི་
ཡེ་ཤེས་མི་འགྱུར་བའོ། །ཛྙཱ་ན་མཱུརྟི་ཞེས་པ་ཐུན་མོང་གི་ཡེ་ཤེས་མཉམ་པའི་ཐུགས་རྗེ་དང་བཅས་པ་མི་འགྱུར་བའོ། །ར་ཧཾ་ཞེས་པ་ཐུགས་རྗེ་འགག་མེད་ཀུན་ལ་སྙོམས་པའོ། །དེ་བཞིན་དུ་སྒྲའི་དོན་ཁོང་ནས་བརྡའོ། །བུདྡྷོ་བུདྔྷཱ་ནཱན་ཏྲྱ་དྷྭ་བརྟི་ནཾ་ཨོཾ་བཛྲ་ཏཱིཀྵྞ། དུཿཁ་ཙྪི་ད་པྲཛྙཱ་ཛྙཱ་ན་མཱུརྟ་ཡེ་ཛྙཱ་ན

49-1-42b

ཀཱ་ཡ་བཱ་གཱི་ཤྭ་ར། ཨ་ར་པ་ཙ་ན་ཡ་ཏེ་ན་མཿ། འདི་ལྟར་ཞེས་པ་གཞིའི་ཡོན་ཏན་ལས་སྐུ་དང་ཡེ་ཤེས་བྱུང་ལུགས་སྟོན་པའོ། །སངས་རྒྱས་བཅོམ་ལྡན་འདས་ཞེས་པ་རིག་པའི་ཡེ་ཤེས་རྟོག་པའི་མཐའ་དང་བྲལ་ཞིང་། ཡོན་ཏན་གྱི་སྣང་བ་ཕྱོགས་མེད་དུ་འབྱུང་སྟེ། རང་གི་ངོ་བོ་སྐྱོན་གྱི་མཐའ་ལས་
གྲོལ་བའོ། །རྫོགས་པའི་སངས་རྒྱས་ཨ་ལས་བྱུང་། །ཞེས་པ་གཞི་སྐྱེ་བ་མེད་པ་རང་བཞིན་འགག་པ་མེད་པ་ལས་ཡོན་ཏན་གྱི་སྣང་བ་ཡེ་ཤེས་སུ་འཆར་ཏེ། རིག་པ་ཤེས་རབ་ཀྱི་སྐུ་ལྔ་རིན་པོ་ཆེ་འོད་འབར་བའོ། །ཨ་ནི་ཡིག་འབྲུ་ཀུན་གྱི་མཆོག །ཅེས་པ། དཔེར་ན་ཨ་ནི་ཡིག་འབྲུ་ཐམས་
ཅད་ཀྱི་ངོ་བོ་ཡིན་པ་དང་འདྲ་བར་རིག་པ་ཡེ་ཤེས་ལྔ་དང་འབྱུང་བ་ལས་མཆོག་ཏུ་འགྱུར་བའོ། །དོན་ཆེན་ཡི་གེ་དམ་པ་ཡིན། །ཞེས་པ། ཡི་གེ་ཨ་ལྟ་བུའམ་དེ་ལ་བརྟེན་པའི་ཚིག་དང་མིང་ལྟ་བུ་མ་ཡིན་ཏེ། རིག་པ་ཆོས་ཀྱི་སྐུ་རང་བཞིན་གྱིས་རྣམ་པར་དག་པ། རང་འབྱུང་དབྱེར་མེད་ཀྱི་དོན་
ཞེས་པའོ། །དཔེར་ན་ཡི་གེ་ཨ་ཁོང་ནས་འབྱུང་སྟེ་སྒྲ་གཞན་གྱི་གནས་ལྟ་བུ་ཡིན་པས་སྒྲ་རང་འབྱུང་ངོ་། །རང་བྱུང་ཡིན་པས་སྐྱེ་བ་མེད་དོ། །དེ་བཞིན་དུ་འཁོར་འདས་ཀྱི་ཆོས་ནི་གཞི་ལས་འབྱུང་ལ། གཞི་དེ་ལ་རྒྱུ་རྐྱེན་མེད་པར་རང་འབྱུང་བའོ། །དེ་བས་སྐྱེ་བ་མེད་དོ། །ཚིག་ཏུ་བརྗོད་
པ་སྤངས་པ་སྟེ། །ཞེས་པ་རིག་པ་བརྗོད་པ་ལས་འདས་པའོ། །བརྗོད་པ་ཀུན་གྱི་རྒྱུ་ཡི་མཆོག །ཅེས་པ་དེའི་ཡོན་ཏན་ནམ་རྩལ་དུ་སྒྲ་དང་ཐ་སྙད་ཐམས་ཅད་ཤར་བའོ། །ཐམས་ཅད་ཀྱི་གཞི་རྩ་ཡིན་ཞེས་པའོ། །ཚིག་ཀུན་རབ་ཏུ་གསལ་བར་བྱེད། །ཅེས་པ་མཚོན་བྱ་དོན་གྱི་གཞི་མོ་དེ། མཚོན་
བྱེད་ཚིག་གི་སྒྲོན་མ་ལ་བརྟེན་ནས་མཚོན་ཅིང་བརྗོད་པས་ན་ཚིག་གསལ་བར་སྟོན་པའོ། །མཆོད་པ་ཆེན་པོ་འདོད་ཆགས་ཆེ། །ཞེས་པ་འདི་ནི་ཡེ་ཤེས་ཀྱི་མཚན་ཉིད་སྟོན་ཏེ། སེམས་ཅན་གྱི་འདོད་ཆགས་རང་རྒྱུད་ལས་ལོག་སྟེ། དེའི་གཉེན་པོར་རིག་པའི་ཤེས་རབ་དཔྱོད་བྱེད་མ་འགགས་
པས་སོ་སོར་རྟོག་པའི་ཡེ་ཤེས་སོ། །སེམས་ཅན་ཐམས་ཅད་དགའ་བར་བྱེད། །ཅེས་པ་ཐུགས་རྗེ་ཆེན་པོས་རྩོལ་བ་བྱ་མི་དགོས་པར་འདོད་ཆགས་ཡེ་ཤེས་སུ་བསྟན་པས་གཉིས་སུ་མེད་དེ་དགའ་བའོ། །མཆོད་པ་ཆེན་པོ་ཞེ་སྡང་ཆེ། །ཞེས་པ་འགྲོ་བའི་ཉོན་མོངས་པ་སེལ་ཏེ། རིག་པ་

49-1-43a

འགག་པ་མེད་དེ་མེ་ལོང་ཡེ་ཤེས་སོ། །ཉོན་མོངས་ཀུན་གྱི་དགྲ་ཆེ་བ། །ཞེས་པ་ཉོན་མོངས་པ་མི་གནས་ཏེ་ཡེ་ཤེས་མ་འགགས་པ་ཡིན་པས་སོ། །མཆོད་པ་ཆེན་པོ་གཏི་མུག་ཆེ། །ཞེས་པ་རིག་པ་འབྱེད་པ་མེད་པའི་ཤེས་རབ་སྟེ། ཆོས་ཀྱི་དབྱིངས་ཀྱི་ཡེ་ཤེས་སོ། །གཏི་
མུག་བློ་སྟེ་ཞེས་པ། མི་རྟོག་པའི་ཤེས་རབ་གཅོད་པའོ། །གཏི་མུག་སེལ་ཞེས་པ་མི་གནས་པའོ། །མཆོད་པ་ཆེན་པོ་ཁྲོ་བ་ཆེ། །ཞེས་པ་གཉིས་འཛིན་དང་བཅས་པའི་ཉོན་མོངས་པ་མི་གནས་ཏེ། རང་འབྱུང་གི་ཡེ་ཤེས་འོད་དུ་གསལ་བའོ། །ཁྲོ་བོ་ཆེན་པོ་དགྲ་ཆེ་བ། །ཞེས་པ་མ་རིག་པའི་
ཁོང་ཁྲོ་འཇོམས་པའོ། །མཆོད་པ་ཆེན་པོ་ཆགས་པ་ཆེ། །ཞེས་པ་ཟག་པ་མེད་པའི་བདེ་བའོ། །ཆགས་པ་ཐམས་ཅད་སེལ་བར་བྱེད། །ཅེས་པ་རྟོག་བཅས་སོ། །འདོད་པ་ཆེན་པོ་བདེ་བ་ཆེ། །ཞེས་པ་རང་གིས་རང་གི་སྐུ་དང་ཡེ་ཤེས་རྟོགས་པར་འདོད་པ་དེ་རྟོགས་པས་བྱ་བརྩལ་ལས་
གྲོལ་བའོ། །ཡང་ན་ཆགས་པ་མེད་པའི་བདེ་བའོ། །གཉིས་མེད་ཀྱི་དོན་ལ་དགྱེས་ཤིང་ཉོན་མོངས་པ་མེད་པའོ། །གཟུགས་ཆེན་ཞེས་པ་ཡེ་ཤེས་ཀྱི་སྤྱན་ལྔས་ཀུན་དུ་ཁྱབ་གདལ་བའོ། །ལུས་ཀྱང་ཆེ་བ་སྟེ་ཞེས་པ་རིན་པོ་ཆེའི་ལུས་ནམ་མཁའ་ལྟ་བུའོ། །ཁ་དོག་ཆེ་ཞིང་ཞེས་པ་
གཟུགས་ཡིན་ཏེ། དེ་ཉིད་ཁ་དོག་རྣམ་པ་ལྔ་དང་ལྡན་པའོ། །ལུས་བོང་ཆེ་བ་ནི་གཟུགས་ཀྱི་རྟེན་ནས་རིན་པོ་ཆེའི་དབུགས་སོ། །ཆེ་བ་ནི་ལུས་དང་གཟུགས་ཅན་ལས་གྲོལ་བའོ། །མིང་ཡང་ཆེ་ཞིང་ཞེས་པ་དེའི་མཚན་ནོ། །རྒྱ་ཆེ་ཞེས་པ་འདོགས་ཤིང་བརྗོད་པའི་ལུགས་མང་བའོ། །དཀྱིལ་
འཁོར་ཆེན་པོ་ཡངས་པ་ཡིན། །ཞེས་པ་རིག་པའི་ཡེ་ཤེས་དབྱིངས་རྣམ་པར་དག་པའི་ངང་ནས་འགག་པ་མེད་པར་ངང་གིས་གནས་སོ། །ཤེས་རབ་མཚོན་ཆེན་འཆང་བ་སྟེ། །ཞེས་པ་རྩལ་དཔྱོད་ནུས་པས་རང་རིག་རང་གསལ་དུ་རྟོགས་པའོ། །ཉོན་མོངས་ལྕགས་ཀྱུ་ཆེ་བའི་མཆོག 
ཅེས་པ་གོང་མས་ཉོན་མོངས་པ་ཡེ་ཤེས་སུ་སྒྲོལ་ཞིང་གསལ་བའོ། །གྲགས་ཆེན་ཞེས་པ་སྟོབས་ཅིར་ཡང་སྣང་ཞིང་གྲགས་པའོ། །སྙན་གྲགས་ཆེན་པོ་སྟེ་ཞེས་པ་མ་བྱས་པར་མ་ཐུན་པར་སྣང་བའོ། །སྣང་བ་ཆེན་པོ་གསལ་བ་ཆེ། །ཞེས་པ་ཆོས་ཉིད་རང་སྣང་གསལ་བ་མ་འགགས་པ།

49-1-43b

ཡངས། ཁྱབ། དག །གསལ། མི་འགྱུར་བ། སྟོན་པ། ཆོས་ཉིད་མཚན་ཉིད་དྲུག་ལྡན་ནོ། །མཁས་པ་སྒྱུ་འཕྲུལ་ཆེན་པོ་འཆང་། །ཞེས་པ་རིག་པ་དང་ཡེ་ཤེས་དོན་གཉིས་སུ་མེད་དེ། དབྱིངས་ཀྱི་ངང་དུ་འདུ་འབྲལ་མེད་པའོ། །སྒྱུ་འཕྲུལ་ཆེན་པོ་ཞེས་པ་བཞིའོ། །དོན་གྲུབ་ཅེས་པ་ཇི་བཞིན་རང་
གིས་རང་གི་དོན་རྟོགས་པའོ། །སྒྱུ་འཕྲུལ་ཆེན་པོ་དགའ་བས་དགའ། །ཞེས་པ། རང་ལ་གནས་པའི་ཐིག་ལེ་ཆེན་པོ་རྟོགས་པའི་དོན་ཉམས་སུ་མྱོང་བ་སྟེ། མངོན་དུ་འགྱུར་བས་ནའོ། །སྒྱུ་འཕྲུལ་ཆེན་པོ་མིག་འཕྲུལ་ཅན། །ཞེས་པ་ཤེས་རབ་ཟབ་མོ་ཉིད་ཐབས་ཀྱི་བྱེ་བྲག་མ་འགགས་པ་ཅིར་ཡང་
སྣང་བའོ། །སྦྱིན་བདག་ཆེན་པོ་གཙོ་བོ་སྟེ། །ཞེས་པ་ཐམས་ཅད་དེ་ལས་འབྱུང་ཞིང་སྣང་བའོ། །ཚུལ་ཁྲིམས་ཆེན་པོ་འཆད་པའི་མཆོག །ཅེས་པ་བསྲུང་མཚམས་མེད་པས་མི་ཉམས་པའོ། །བཟོད་ཆེན་འཆང་བ་བརྟན་པ་པོ། །ཞེས་པ་དགོངས་པ་ཉག་གཅིག་ལ་ཉོན་མོངས་པ་སྐྱེ་བའི་
ཡུལ་མེད་དེ་མི་རྟོག་པའོ། །བརྩོན་འགྲུས་ཆེན་པོ་བརྟུལ་བ་ཡིན། །ཞེས་པ་ཡ་ནས་བྱས་ཟིན་པའི་ཆོས་ལ་ད་སྡོད་བྱར་མེད་པའོ། །བསམ་གཏན་ཆེན་པོའི་ཏིང་འཛིན་གནས། །ཞེས་པ་རིག་པ་རང་གི་ངོ་བོ་མི་གཡོ་བའི་དགོངས་པ་ཕུན་ཆེན་པོ་གཅིག་གོ། །ཤེས་རབ་ཆེན་པོའི་ལུས་
འཆང་བ། །ཞེས་པ་ཕྱོགས་ལྷུང་མེད་པའི་ཤེས་རབ་རིག་པ་རྐྱང་པར་བྱུང་བ། ཡེ་ཤེས་གཟུགས་ཀྱི་སྐུ་གཉིས་ཀྱི་རྟེན་རིན་པོ་ཆེའི་སྦུབས་སོ། །སྟོབས་པོ་ཆེ་ལ་ཞེས་པ་འཁོར་འདས་ཐམས་ཅད་སྣང་ནུས་པའོ། །ཐབས་ཞེས་པ་བྱ་བརྩལ་མི་མངའ་བར་གྲོལ་ནུས་པའོ། །སྨོན་
ལམ་ཞེས་པ་གཞན་ལ་སྨོན་དུ་མེད་དེ། སྐུ་དང་ཡེ་ཤེས་ཆེན་པོའི་ཡོན་ཏན་ཐམས་ཅད་རང་ལ་རྫོགས་པའོ། །ཡེ་ཤེས་ཞེས་པ་གཞི་གནས་ཀྱི་ཡེ་ཤེས་ཆོས་ཀྱི་སྐུ་ལ་མཚན་ཉིད་འཛིན་པའི་ཡེ་ཤེས་འོད་ལྔར་རང་ཆས་སོ། །རྒྱ་མཚོ་ཞེས་པ་དེའི་བཞུགས་གནས་དབྱིངས་ཀྱི་ཐིག་ལེའོ། །
བྱམས་ཆེན་ཞེས་པ་བྱིན་རླབས་ཀྱི་སྐུ་གཉིས་འབྱུང་སྟེ་འགྲོ་ལ་ཕན་འདོགས་པའོ། །རང་བཞིན་ཞེས་པ་རིག་པའི་སྣང་བ་ཡེ་ཤེས་དང་སྐུ་མི་འདྲ་བའི་བྱེ་བྲག་ཏུ་སྣང་བའོ། །དཔག་ཏུ་མེད་ཅེས་པ་ཡོན་ཏན་སྟོབས་ལ་ཚད་གཟུང་དུ་མེད་པའོ། །སྙིང་རྗེ་ཆེན་པོ་བློ་ཡི་མཆོག །ཅེས་པ་

49-1-44a

ཐུགས་རྗེ་འགག་པ་མེད་པའོ། །ཤེས་རབ་ཆེན་པོ་ཤེས་པ་གཞིའི་དགོངས་པའོ། །བློ་ཆེར་ལྡན་ཞེས་པ་རྩལ་ལོ། །དེ་ཡང་སྟོན་པ་དེ་དང་ལྡན་པའོ། །མཁས་པ་ཆེན་པོ་ཐབས་ཆེ་བ། །ཞེས་པ་ཤེས་རབ་རིག་པའི་སྐུའོ། །དེ་ཡང་བྱ་བརྩལ་མི་མངའ་བའོ། །རྫུ་འཕྲུལ་
ཆེན་པོ་སྟོབས་དང་ལྡན། །ཞེས་པ་ཤེས་རབ་རིག་པའི་སྐུ་ལས་ཉིད་ལས་མི་ཞན་པའི་འཁོར་འབྱིན་ཅིང་། དེ་ལས་ཚོམ་བུ་ལྔ་སྤྲུལ་པ་དང་། ཡང་སྤྲུལ་ལ་སོགས་པ་ཐོགས་པ་མེད་པར་འབྱུང་ནུས་པའོ། །ཤུགས་ཆེན་ཞེས་པ་རིག་པའི་ཡོན་ཏན་ནོ། །མགྱོགས་པ་ནི་སྐད་ཅིག་མ་ལ་
བསྐྱོད་པའོ། །ཆེན་པོ་སྟེ་ཞེས་པ་རྩོལ་བ་དང་བཅས་པས་བགྲོད་དུ་མེད་པའོ། །དེ་ཡང་། རྫུ་འཕྲུལ་ཆེན་པོ་ཆེར་གྲགས་པ། །ཞེས་པ་ཐབས་མ་འགགས་པའོ། །སྟོབས་ཆེན་ཕ་རོལ་གནོན་པ་པོ། །ཞེས་པ་སྐད་ཅིག་མ་གཅིག་ལ་འཁྲུལ་སྣང་ཡེ་ཤེས་སུ་བསྒྱུར་བའོ། །སྤྲུལ་
སྐུའི་ས་ནས་ལོངས་སྐུར་གྲོལ་ནུས་ལ་དེ་ལས་མྱ་ངན་ལས་འདས་པའི་ས་ནོན་པའོ། །དངོས་གང་ཞེ་ན། སྲིད་པའི་རི་བོ་ཆེན་པོ་འཇོམས། །ཞེས་བྱ་སྟེ། སྲིད་པའི་རི་བོ་ཆེན་པོ་རྟོགས་པས་སྐད་ཅིག་མ་ལ་གྲོལ་བའོ། །མཁྲེགས་ཤིང་རྡོ་རྗེ་ཆེན་པོ་འཆང་། །ཞེས་པ་ཆོས་ཉིད་འགྱུར་བ་
མེད་པའི་ངང་ནས་མི་འབྲལ་བར་གནས་པའོ། །དྲག་པོ་ཆེན་པོ་ཞེས་པ་གཞིའོ། །དྲག་ཤུལ་ཆེ། ཞེས་པ་འཁོར་བའི་ཆོས་ཅན་མཚན་མ་འཇོམས་པའོ། །འཇིགས་ཆེན་འཇིགས་པར་བྱེད་པའི་མཆོག །ཅེས་པ་སྤྲུལ་པའི་སྐུ་ཐུབ་པ་དྲུག་གིས་འཇིག་རྟེན་དྲུག་གི་གདུག་པ་ཅན་
འདུལ་ཞིང་གཟུང་འཛིན་འཇོམས་པའོ། །མགོན་པོ་ཞེས་པ་རྡོ་རྗེ་སེམས་དཔའོ། །རིགས་མཆོག་ཆེན་པོ་སྟེ་ཞེས་པ་སྤྲུལ་པའི་སྐུ་དྲུག་སྟོན་པའི་རིགས་འཛིན་པའོ། །མཆོག་ནི་འདུལ་བྱེད་ཀྱི་ཐབས་དེ་ལས་ལྷག་པ་མེད་དོ། །ཡང་ན་མཐུན་པའི་སེམས་ཅན་ལས་སྣང་བའོ། །བླ་མ་གསང་
སྔགས་ཆེ་བའི་མཆོག །ཅེས་པ་གོང་མའི་སྐུ་དྲུག་པོ་དེ་འགྲོ་བ་དྲུག་གི་དོན་དུ་ཆོས་འཆད་དེ། དེ་ཡང་ངེས་པའི་དོན་གཙོ་ཆེར་སྔགས་འཆད་པར་འགྱུར་བའོ། །དེས་ན་འགྲོ་བའི་བླ་མའོ། །ཐེག་པ་ཆེན་པོའི་ཚུལ་ལ་གནས། །ཞེས་པ་བྱ་བརྩལ་བར་སྐུ་དང་ཡེ་ཤེས་ཀྱི་དོན་ལ་གནས་པའོ། །

49-1-44b

ཐེག་པ་ཆེན་པོའི་ཚུལ་གྱི་མཆོག །ཅེས་པ་ཐེག་པ་ཆེན་པོའི་ནང་ན་མཆོག་ཏུ་གྱུར་པའོ། །དེ་ཡན་ཆད་དུ་ལེའུ་གཉིས་པའི་དོན་བཤད་པའོ།།      །།ད་ནི་གཞིའི་ངོ་བོ་སྟོང་པ་ཉིད་ཀྱི་དོན་འཆད་དེ། སངས་རྒྱས་རྣམ་པར་སྣང་མཛད་ཆེ། །ཞེས་པ་ཤེས་བྱ་ངོ་བོས་སྟོང་པ་ཉིད་ཆོས་ཀྱི་དབྱིངས་ཀྱི་ཡེ་ཤེས་
ཏེ། དེའི་མཚན་ཉིད་འཛིན་པའི་འོད་མཐིང་གའོ། །དེའི་དོན་གྱི་སྐུ་རྣམ་པར་སྣང་མཛད་རིག་པའི་སྐུ་ལྔ་ཞལ་ཕྱོགས་བཅུར་གཟིགས་པ་གཅིག་ཏུ་ཤར་ཏེ།དེའི་སྣང་བ་ལོངས་སྐུའི་དཀྱིལ་འཁོར་གསལ་བ་ནས་དེ་ལོངས་སྐུའི་གཙོ་བོར་གྱུར་པའོ། །ཐུབ་པ་ཆེན་པོ་ཐུབ་ཆེན་ལྡན། །ཞེས་པ་
འཁོར་གྱི་སྤྲུལ་པའི་སྐུ་དྲུག་གིས་དོན་བྱེད་ནུས་པའི་ཐུགས་རྗེའོ། །གསང་སྔགས་ཚུལ་ཆེན་ལས་བྱུང་བ། །ཞེས་པ་དོན་གོང་མ་དེ་སྔགས་ཀྱི་ཚུལ་ཡིན་གཞན་གྱིས་རྟོགས་པར་དཀའ་ཞེས་པའོ། །གསང་སྔགས་ཚུལ་ཆེན་བདག་ཉིད་ཅན། །ཞེས་པ་གསང་སྔགས་དོན་གྱི་ངོ་བོའི་བདག་པོར་གྱུར་
པའོ། །ཕ་རོལ་ཕྱིན་བཅུ་ཐོབ་པ་སྟེ། །ཞེས་པ་རྩོལ་བ་དང་བཅས་པའི་ཕ་རོལ་ཏུ་ཕྱིན་པ་ནི་མ་ཡིན་ཏེ། འོ་ན་གང་ཞེ་ན། ཁམས་གསུམ་གྱི་ཆོས་ལ་མི་གནས་པ་དང་། འཇུག་སྒོ་མེད་པ་དང་། བརྗོད་པ་མེད་པ་དང་། འགྲན་ཟླ་མེད་པ་དང་། གཡོ་བ་མེད་པ་དང་། ཤེས་རབ་ཆེན་པོ་ཡང་
ཡིན་པ་དང་། བྱ་བརྩལ་མི་མངའ་བ་དང་། སྐད་ཅིག་མ་ལ་འཆར་བསྐྱོད་ནུས་པ་དང་། ཡོན་ཏན་ཐམས་ཅད་རང་ལ་རྫོགས་པ་དང་། ཡེ་ནས་ཡེ་ཤེས་ཆེན་པོའི་དོན་ལ་འདུ་འབྲལ་མེད་པས་འཐོབ་ཅིང་གནས་པའོ། །ཕ་རོལ་ཕྱིན་པ་བཅུ་ལ་གནས། །ཞེས་བྱའོ། །ཕ་རོལ་ཕྱིན་
བཅུ་དག་པ་སྟེ། །ཞེས་པ་འོག་མ་པའི་ཕ་རོལ་ཏུ་ཕྱིན་པ་བཅུ་རེ་དོགས་དང་རྩོལ་བ་དང་བཅས་པ་དེ་མི་གནས་པའོ། །ཕ་རོལ་ཕྱིན་པ་བཅུ་ཡི་ཚུལ། །ཞེས་པ་དོན་གྱི་གནས་ལུགས་ཀྱི་ཡོན་ཏན་དེ་ལྟར་སྣང་བའོ། །མགོན་པོ་ཞེས་པ་སྤྲུལ་པའི་སྐུ་རྣམས་སོ། །ས་བཅུའི་དབང་ཕྱུག་ནི་
སངས་རྒྱས་ཀྱི་ས་ནས་ཐུགས་རྗེ་ཡེ་ཤེས་ཤར་ཏེ། འགྲོ་བའི་དོན་དུ་བྱང་ཆུབ་སེམས་དཔའི་ས་ལ་གནས་པ་དོན་གཞན་ལ་སེམས་པའི་སེམས་དཔའོ། །དབང་ཕྱུག་ཅེས་པ་ཐམས་ཅད་ཀྱི་མངའ་བདག་གོ། །ས་བཅུ་ལ་ནི་གནས་པ་པོ། །ཞེས་པ་སྤྲུལ་པའི་སྐུ་བག་ཆགས་ཀྱི་ལུས་ཅན་

49-1-45a

དེ་ཇི་ལྟར་གནས་ན། རྟོགས་པ་རྒྱུད་ལ་སྐྱེས་པའི་དུས་ན་མོས་པ་སྤྱོད་པའི་ས་པ་ཡིན་ནོ། །བླ་མས་ཇི་བཞིན་པ་རྣམ་པ་བཞིའོ། །ངོ་སྤྲོད་བཞི་དང་བཅས་པས་བསྡོམས་པ་བསྒྲགས་པའི་ཚེ་སྐུ་དང་ཡེ་ཤེས་རང་བཅས་གནས་པ་དེ་མཐོང་བས་རབ་ཏུ་དགའ་བའོ། །གདེང་དང་
ལྡན་པས་ཐེ་ཚོམ་མེད་དེ་དྲི་མ་མེད་པའོ། །སེམས་དང་ཡེ་ཤེས་ཕྱེད་དེ་སེམས་རིག་དབང་དུ་འདུས་པས་མཚན་མ་ཟིལ་གྱིས་གནོན་ནས་དེ་བཞིན་ལ་སྟོན་པ་རག་མ་ལུས་ཙམ་ན་འོད་གསལ་བའོ། །གཞན་དོན་མཐར་ཕྱིན་པ་ནི་འོད་འཕྲོ་བའོ། །དེ་ཡང་མ་རྟོགས་པ་དུག་ལྔ་དུག་གསུམ་སྦྱང་དཀའ་
ཡང་རྟོགས་པ་ཁྱད་པར་ཅན་རྒྱུད་ལ་སྐྱེས་པ་ནི་དུག་ལྔ་དུག་གསུམ་ཡེ་ཤེས་ལྔར་གྲོལ་བའོ། །དེ་ནི་སྦྱང་དཀའ་བའོ། །དྲུག་པ་མངོན་དུ་གྱུར་པ་ནི་སྦུབས་གསུམ་དང་སྐུ་གསུམ་གྱི་དོན་ཇི་ལྟ་བ་བཞིན་དུ་ཤེས་པའོ། །བདུན་པ་རིང་དུ་སོང་བ་ནི་ཟག་བཅས་ཀྱི་འབྲས་བུ་ཅན་ལས་གྲོལ་བའོ། །བརྒྱད་
པ་མི་གཡོ་བ་ནི་འབྱུང་བ་དངས་སྙིགས་ཕྱེད་པའོ། །དགུ་པ་ལེགས་པའི་བློ་གྲོས་ནི་དགོས་པ་རང་ལས་འབྱུང་བའོ། །བཅུ་པ་ཆོས་ཀྱི་སྤྲིན་ཞེས་པ་ཆོས་ལ་དབང་ཐོབ་པའོ། །ས་ནི་གཅིག་སྟེ་དེ་མན་ཆད་ཤེས་པའི་ཉམས་ལ་བརྩིས་པའོ། །བཅུ་གཅིག་ཡན་ཆད་དེའི་སྣང་བའི་རྩལ་ལོ། །དོན་དེ་ལ་
གནས་པ་ནི། ས་བཅུ་ལ་ནི་གནས་པ་པོ། །ཞེས་བྱའོ། །ཤེས་བཅུ་ནི་ས་བཅུ་དང་ཕ་རོལ་ཏུ་ཕྱིན་པ་བཅུ་དང་གོང་བཞིན་ཤེས་པའོ། །རྣམ་དག་ནི་དེ་རྣམས་ཀྱི་མཚན་མ་ལ་མི་གནས་པའོ། །བདག་ཉིད་ཆེན་པོ་ཞེས་པ་ནི། རིག་པ་ཐམས་ཅད་ཀྱི་མངའ་བདག་ཏུ་འདུག་པའོ། །ཤེས་བཅུའི་
རྣམ་དག་འཆང་བ་པོ་ནི་དོན་གྱི་ངོ་བོ་དང་མི་འབྲལ་ཞེས་པ་སྟེ། ས་དང་ཕ་རོལ་ཏུ་ཕྱིན་པ་ངེས་པའི་དོན་དུ་བསྟན་པ་གོང་མའོ། །རྣམ་པ་བཅུ་པོ་དོན་བཅུའི་དོན། །ཞེས་པ་འབྱུང་བའི་དངས་མ་ལྔ་དང་། སྙིགས་མ་ལྔའི་དོན་རིག་པའི་མཚན་ཉིད་དང་ཡེ་ཤེས་ཀྱི་རང་གདངས་དང་ལྔ་ལྔ་སྣང་བའི་དོན་
ཏོ། །ཐུབ་ཅེས་པ་དྲུག་སྟེ་སྤྲུལ་པའི་སྐུའོ། །དབང་ཞེས་པ་ཞིང་དྲུག་ལ་སོ་སོར་མངའ་མཛད་པའོ། །སྟོབས་བཅུ་ཞེས་པ་ཤེས་རབ་ཀྱི་སྟོབས་ལྔ་ཡབ་ཡུམ་དུ་སྣང་བའོ། །ཁྱབ་ཅེས་པ་ཆོས་སྐུས་སོ། །བདག་ཅེས་པ་རིག་པའི་ཡེ་ཤེས་སྐུ་གསུམ་དུ་སྣང་བའོ། །ཀུན་གྱི་དོན་ནི་མ་ལུས་

49-1-45b

བྱེད། །ཅེས་པ་སྤྲུལ་པའི་སྐུ་དྲུག་གིས་སོ། །རྣམ་བཅུ་དབང་ལྡན་ཆེ་བའི་མཆོག །ཅེས་པ་རིགས་ལྔ་ཡབ་ཡུམ་བཅུའི་དབང་རིག་པའི་སྐུ་ལྔ་ལ་ཡོད་ལ། དེའི་དབང་དང་རིག་པ་ལྡན་ཏེ་དེའི་གོང་ན་གཞན་མེད་པས་སོ། །ཐོག་མ་མེད་པ་ཞེས་པ་ཆོས་ཉིད་དང་ཡེ་ཤེས་ལ་དུས་མེད་དེ་
ཡེ་ནས་གནས་པའོ། །སྤྲོས་མེད་བདག་ཅེས་པ་གཞི་ལ་སྤྲོས་པའི་ཆོས་མི་གནས་པའོ། །འོ་ན་ཇི་ལྟར་གནས་ཤེ་ན། དེ་བཞིན་ཉིད་དག་དག་པའི་བདག །ཅེས་པ་འདིས་སྟོན་ཏེ། ཆོས་ཀྱི་སྐུ་ཕྱི་ནང་མེད་པའི་ཡེ་ཤེས་ཞི་བ་ངོ་བོས་སྟོང་པ་དང་། ཡེ་ཤེས་འགག་པ་མེད་པར་གསལ་བའི་
བུམ་པ་ལྔ་དང་རིག་པ་ཤེས་རབ་ཀྱི་སྐུ་ལྔ་མ་འདྲེས་པར་ཡོངས་སུ་རྫོགས་པར་གནས་སོ། །མ་རིག་པ་དང་ལོག་རྟོག་ངང་གིས་བཅོམ་ནས་བདག་མེད་པའི་བདག་ཉིད་ཆེན་པོ་ལྷུན་གྱིས་གྲུབ་པའོ། །བདེན་པར་སྨྲ་ཞིང་ཚིག་མི་འགྱུར། །ཞེས་པ་སྟོན་པ་ལ་ཉེས་པ་ཟད་པས་བརྫུན་མི་སྨྲ་སྟེ། རྒྱུ་མེད་པས་
སོ། །འགག་མ་ནོར་བར་གསལ་ཞིང་གསུངས་པའི་དོན་མི་འགྱུར་བའོ། །ཇི་སྐད་སྨྲས་པ་དེ་བཞིན་བྱེད། །ཅེས་པ་གསུངས་པའི་དོན་དང་མཐུན་པར་སྤྱོད་པའོ། །ཇི་སྐད་གསུངས་ཤེ་ན། གཉིས་མེད་གཉིས་སུ་མེད་པར་སྟོན་པ་སྟེ། དེ་ཡང་གཉིས་པ་ནི་བཞིའོ། །གཉིས་སུ་མེད་པར་སྟོན་པའོ། །
ཡང་དག་མཐའ་ལ་རྣམ་པར་གནས། །ཞེས་པ་རིན་པོ་ཆེའི་སྦུབས་ན་སྐུ་གཉིས་ནང་གསལ་དུ་གནས་པའོ། །བདག་མེད་ཅེས་པ་རིན་པོ་ཆེའི་སྐུ་ལ་བག་ཆགས་ཀྱི་བདག་མེད་པའོ། །སེང་གེའི་སྒྲ་དང་ལྡན་ཞེས་པ་དེ་ལྟར་མ་རྟོགས་པའི་ལོག་ལྟ་ཅན་ཟིལ་གྱིས་གནོན་པའོ། །ལོག་ལྟ་ཅན་གང་
ཞེ་ན། མུ་སྟེགས་རི་དྭགས་ངན་འཇིགས་བྱེད། །ཅེས་པ་སྟེ། མུ་སྟེགས་ནི་རྟག་ཆད་གཉིས་སོ། །རི་དྭགས་ནི་ཉན་ཐོས་ལ་སོགས་པའོ། །འཇིགས་པ་ནི་དོན་གོང་མ་ལའོ། །ཀུན་དུ་འགྲོ་བ་དོན་ཡོད་སྟོབས། །ཞེས་པ། ཆོས་ཀྱི་དབྱིངས་ཀྱི་ཡེ་ཤེས་ཏེ། ཤར་ཡང་དེ་ཉིད་དུ་ཤར་ལ། གྲོལ་
ཡང་དེ་ཉིད་དུ་གྲོལ་བའོ། །དེ་ཡང་དོན་ནི་རིག་པའོ། །ཡོད་པ་ནི་རིག་པ་ལས་ཡོན་ཏན་དུ་སྣང་བའོ། །སྟོབས་ཞེས་པ་ནང་ཀ་དེ་ངེས་འབྱུང་བའོ། །དེ་བཞིན་གཤེགས་པའི་ཡིད་ལྟར་མགྱོགས་པ་ནི་མ་འགགས་པའི་ཤེས་རབ་དབུགས་མེད་པའི་རྒྱུ་བ་དང་ངོ་། །རྒྱལ་བ་ཞེས་པ་ལོངས་
49-1-46a

སྐུའོ། །རྣམ་རྒྱལ་ཞེས་པ་ཚོམ་བུའོ། །དགྲ་ལས་རྒྱལ་ཞེས་པ་དུག་ལྔ་དུག་གསུམ་ལ་སོགས་པ་མི་མངའ་བ་སྟེ། འཁོར་བ་ལས་གྲོལ་བའོ། །འཁོར་ལོས་སྒྱུར་བ་ཞེས་པ་ཡི་གེ་དྲུག་པའི་ངོ་བོའོ། །སྟོབས་པོ་ཆེ་ཞེས་པ་སྤྲུལ་པའི་སྐུ་དྲུག་སྐྱེས་ནས་འགྲོ་དྲུག་གི་ཉོན་མོངས་
པ་ལས་གྲོལ་ཞིང་མཚན་མ་ཟིལ་གྱིས་གནོན་པའོ། །ཚོགས་ཀྱི་སློབ་དཔོན་ཚོགས་ཀྱི་བདག །ཅེས་པ་འགྲོ་དྲུག་གི་སློབ་དཔོན་ཐུབ་པ་དྲུག །ཐུབ་པ་དྲུག་ནི་རིགས་དྲུག་གི་ནང་ན་མཆོག་ཏུ་གནས་པའོ། །ཚོགས་རྗེ་ཞེས་པ་ནི་རིག་པའོ། །ཚོགས་བདག་ནི་འཁོར་འདས་ཀྱི་གཙོ་བོ་སྟེ་རིག་
པ་དང་ཡེ་ཤེས་སོ། །དབང་དང་ལྡན་པ་ནི་དེ་ལས་ཆོས་ཐམས་ཅད་སྤྲོས་ཤིང་སྡུད་པ་སྟེ། མཐུ་ཆེན་གཅེས་པར་འཛིན་པ་སྟེ་ཞེས་པ་རིག་པ་དངོས་མེད་ཀྱི་ཡེ་ཤེས་གདོས་པ་ཅན་གྱི་ཆོས་ཡིན་ཏེ། ཡོན་ཏན་གྱི་སྒོ་ཡངས་པ་ཐམས་ཅད་ཀྱི་མངའ་བདག་ཏུ་གྱུར་པའོ། །ཚུལ་ཆེན་གཞན་གྱི་དྲིང་མི་
འཇོག །ཅེས་པ། རིག་པ་རང་འབྱུང་གི་ཡེ་ཤེས་རྒྱུ་རྐྱེན་གཞན་ལ་རག་མ་ལུས་པའོ། །ཚིག་རྗེ་ཚིག་བདག་སྨྲ་མཁས་པ། །ཞེས་པ་ཆོས་ཐམས་ཅད་ཀྱི་བདག་པོ་ཚིག་ཐམས་ཅད་ཀྱི་འབྱུང་གནས་རིག་པ་ཡིན་པས་དེའི་དོན་མ་ནོར་བར་གསུང་བ་ལ་སྨྲ་མཁས་པ་ཞེས་བྱའོ། །ཚིག་ལ་
དབང་བ་ནི་འཁོར་གྱི་བྱེ་བྲག་དང་སྦྱར་ནས་ཆོས་སྟོན་པའོ། །ཚིག་མཐའ་ཡས་པ་ནི་ཐེག་པ་སྣ་ཚོགས་སོ། །ཚིག་བདེན་པར་སྨྲ་བ་ནི་སྟོན་པའོ། །བདེན་པ་བཞི་ནི་སྟོན་པ་པོ། །ཞེས་པ་ཆོས་སྐུ་ལོངས་སྐུ་སྤྲུལ་སྐུ་དང་ཐུགས་རྗེ་འོད་ཟེར་གྱི་སྐུ་དང་བཞིའོ། །དེ་བཞིན་མི་སླུ་བའི་བརྫུན་
ཏེ་ངེས་པའོ། །ཕྱིར་མི་ལྡོག་པ་ཕྱིར་མི་འོང་། །ཞེས་པ་དང་པོ་གཞིའི་དུས་ན་ས་བོན་བཞི་རྫོགས་སུ་བཞུགས་པ་ལས་སྤྱི་བ་རྩལ་གྱི་དུས་སུ་འབྲས་བུ་སྐུར་སྨིན་ཏེ། ཕྱིས་འབྲས་བུ་རྒྱུར་མི་ལྡོག་པའོ། །འདྲེན་པ་རང་རྒྱལ་བསེ་རུའི་ཚུལ། །ཞེས་པ་ཐུགས་རྗེ་དང་ཐབས་མ་འགགས་པ་སྣ་ཚོགས་
སུ་བསྟན་པ་ཡང་དོན་ཐིག་ལེ་ཉག་གཅིག་གོ། །ངེས་འབྱུང་སྣ་ཚོགས་ལས་བྱུང་བ། །ཞེས་པ་རིག་པ་ལས་ཡེ་ཤེས་ཤར་ཏེ། རྟོགས་མ་རྟོགས་ཀྱིས་སྣ་ཚོགས་སུ་སྣང་བའོ། །འབྱུང་བ་ཆེན་པོ་རྒྱུ་གཅིག་པོ། །ཞེས་པ་ཡེ་ཤེས་ཀྱི་འབྱུང་བ་ལྔ་རིག་པའི་ཡོན་ཏན་ལས་ཤར་བའོ། །དགེ་

49-1-46b

སློང་དགྲ་བཅོམ་ཟག་པ་ཟད། །ཅེས་པ་ནམ་པར་མི་རྟོག་པའི་ཡེ་ཤེས་རང་བཞིན་གྱིས་དག་པའོ། །འདོད་ཆགས་བྲལ་བས་དབང་པོ་ཐུལ། །ཞེས་པ་སེམས་ཅན་གྱི་ཉོན་མོངས་པ་མི་མངའ་བ་སྟེ། རྡོ་རྗེ་དང་པདྨ་མི་གནས་པའོ། །བདེ་བ་རྙེད་པས་འཇིགས་མེད་ཐོབ། །ཅེས་པ་ཆོས་སྐུ་
བྱ་བརྩལ་ལས་འདས་པ་རང་ཆས་སུ་རྟོགས་པས་འཁོར་བ་ལ་ཉམ་མི་ང་བའོ། །བསིལ་བར་གྱུར་པས་རྙོག་པ་མེད། །ཅེས་པ་སྐུ་གསུམ་རྣམ་པར་དག་པའོ། །རིག་པ་དང་ནི་རྐང་པར་ལྡན། །ཞེས་པ་རང་སྣང་རྟོགས་ཤིང་ཐབས་མ་འགགས་པས་སྐད་ཅིག་མ་ལ་གྲོལ་ནུས་པའོ། །བདེ་གཤེགས་
འཇིག་རྟེན་རིག་པའི་མཆོག །ཅེས་པ་ལུས་བར་པ་ནས་ཆོས་ཀྱི་སྤྱན་ནམ་མཁའ་ལས་ཉི་མ་ཤར་བ་ལྟ་བུར་གྱུར་པའོ། །བདག་གིར་མི་འཛིན་ངར་མི་འཛིན། །ཞེས་པ་གོང་བཞིན་རྣམ་པ་ཐམས་ཅད་མཁྱེན་ཡང་གཉིས་འཛིན་མེད་དེ་དབུགས་ཅན་མིན་པས་སོ། །བདེན་པ་གཉིས་ཀྱི་
ཚུལ་ལ་གནས། །ཞེས་པ་ཡར་ཆོས་སྐུ་རིན་པོ་ཆེའི་སྦུགས་བདེན། མར་སྤྲུལ་སྐུ་བག་ཆགས་ཀྱི་སྦུགས་བདེན་ཏེ། གཉིས་སྣང་ཡོད་ལ་གཉིས་འཛིན་མེད་པའོ། །དངོས་ལོངས་སྐུའོ། །འཁོར་བའི་ཕ་རོལ་མཐར་སོན་པ། །ཞེས་པ་མྱ་ངན་ལས་འདས་པའོ། །བྱ་བ་བྱས་པ་སྐམ་སར་
གནས། །ཞེས་པ་ལུས་བར་པ་ནས་སངས་རྒྱས་ཀྱི་མཛད་པ་མཛད་དེ། དེ་ནས་མྱ་ངན་ལས་འདས་པའོ། །ཡེ་ཤེས་འབའ་ཞིག་ལས་བྱུང་བ། །ཞེས་པ་འཁོར་འདས་ཐམས་ཅད་ཡེ་ཤེས་ཀྱི་རྩལ་ལོ། །ཤེས་རབ་མཚོན་ཆས་རྣམ་འཇོམས་པ། །ཞེས་པ་ཤེས་རབ་ཅན་གྱིས་དེ་ལྟར་རྟོགས་པའི་དུས་
ན། འཁོར་འདས་གཉིས་སམ་གཟུང་འཛིན་གཉིས་མི་གནས་པའོ། །དམ་ཆོས་ཆོས་རྒྱལ་གསལ་བར་ལྡན། །ཞེས་པ་སྤྲུལ་པའི་སྐུ་དྲུག་གོ། །ཡང་ན་གཞི་ལ་འཁོར་འདས་ཀྱི་ཚོགས་གཉིས་ཡོན་ཏན་དུ་སྣང་བའོ། །འཇིག་རྟེན་སྣང་བར་བྱེད་པའི་མཆོག །ཅེས་པ་རྩལ་འཇིག་རྟེན་དུ་སྣང་
བའམ་འཇིག་རྟེན་གྱི་འགྲོ་བ་ལ་སྐུ་དང་ཡེ་ཤེས་སྣང་བར་བྱེད་པའི་མཆོག་གོ། །ཆོས་ཀྱི་དབང་ཕྱུག་ཆོས་ཀྱི་རྒྱལ། །ཞེས་པ་སངས་རྒྱས་ཀྱི་སྤྲུལ་པས་ཆོས་ལ་དབང་ཐོབ་སྟེ་མངའ་མཛད་པའོ། །ལེགས་པའི་ལམ་ནི་སྟོན་པ་པོ། །ཞེས་པ་སྤྲུལ་སྐུས་འགྲོ་བ་ལ་དབང་པོ་རབ་འབྲིང་ཐ་མ་ལ་གྲོལ་

49-1-47a

ཐབས་བསྟན་པའོ། །དོན་གྲུབ་བསམ་པ་གྲུབ་པ་སྟེ། །ཞེས་པ་སྤྲུལ་པའི་སྐུས་སེམས་ཅན་གྱི་དོན་གྲུབ་པ་སྟེ། མ་ནུའི་སེམས་ལ་སོགས་པ་ཤེས་པས་བསམ་པ་སྒྲུབ་ནུས་པའོ། །ཀུན་དུ་རྟོག་པ་ཐམས་ཅད་སྤངས། །ཞེས་པ་ཐུགས་ཀྱི་དགོངས་པ་མི་གཡོ་བའོ། །རྣམ་
པར་མི་རྟོག་དབྱིངས་མི་ཟད། །ཅེས་པ་དབྱིངས་མི་གཡོ་མི་འགྱུར་བས་ནའོ། །ཆོས་དབྱིངས་དམ་པ་ཟད་མི་ཤེས། །ཞེས་པ་དེའི་ནང་ནས་ཡོན་ཏན་འབྱུང་བ་རིན་པོ་ཆེའི་སྐུ་ལས། སྣང་གྲགས་ཐམས་ཅད་ཤར་ཡང་ཆོས་ཉིད་ལ་སྐྱེ་བ་དང་འགག་པ་མེད་པའོ། །བསོད་རྣམས་
ལྡན་པ་བསོད་ནམས་ཚོགས། །ཞེས་པ་གཞི་ཆོས་ཀྱི་སྐུ་ལ་མཁས་པ་ཚོགས་གཉིས་རྫོགས་ཏེ། ཡོན་ཏན་གྱི་རྩལ་འབྱུང་བ་ལྔ་ཡེ་ཤེས་སུ་གསལ་ཞིང་དེ་ལྟར་གྲུབ་པ་ནི་ཡེ་ཤེས་ཀྱི་ཚོགས། ཡེ་ཤེས་བསོད་ནམས་ཀྱི་ཚོགས་སོ། །ཡེ་ཤེས་ཡེ་ཤེས་ཁྱད་པར་ཆེ། །ཞེས་པ་ཞི་གནས་ཀྱི་ཡེ་ཤེས་དང་མཚན་ཉིད་འཛིན་
པའི་ཡེ་ཤེས་ཀྱི་ཁྱད་པར་བསྟན་པའོ། །དེ་ཡང་ཞི་གནས་ལས་མཚན་ཉིད་འཛིན་པར་ཤར་ལ། དེ་ལས་དེ་བྱུང་བའོ། །དེ་ལས་དེ་འཕགས་པའོ། །ཡེ་ཤེས་ལྡན་པ་ཡོད་མེད་ཤེས། །ཞེས་པ་ཡོན་ཏན་གྱི་སྣང་བ་གཞི་ལ་གྲུབ་ཚུལ་བརྩི་བའོ། །ཚོགས་གཉིས་ཚོགས་ནི་བསགས་པ་པོ། །
ཞེས་པ་ཆོས་སྐུ་དང་གཟུགས་སྐུ་གཉིས་འདུ་འབྲལ་མེད་པར་རྟོགས་པའོ། །རྟོག་པ་ཀུན་རྒྱལ་རྣལ་འབྱོར་ཅན། །ཞེས་པ་འགྱུར་བ་མེད་པའི་དགོངས་པའོ། །བསམ་གཏན་བསམ་བྱ་བློ་ལྡན་མཆོག །ཅེས་པ། བསྒོམ་བྱ་སྐུ་དང་ཡེ་ཤེས་སྒོམ་བྱེད་རིག་པའི་རྒྱལ་པོ་གཉིས་ཀྱི་འབྲེལ་སོ་
བརྩིས་པའོ། །སོ་སོ་རང་རིག་མི་གཡོ་བ། །ཞེས་པ་རིག་པའི་རྩལ་སོ་སོར་རྫོགས་པའི་དུས་ན། སོ་སོར་རིག་སྟེ་གྲོལ་བའི་དུས་ན་ཡང་རིན་ཆེན་སྦུབས་ན་དགོངས་པ་སོ་སོར་གནས་པའོ། །དེ་ཤེས་པ་གནས་འགྱུར་གྱི་ཡེ་ཤེས་མེད་དེ། རིག་པ་ཟང་ཐལ་ཡིན་པས་ནའོ། །མཆོག་གི་དང་པོ་
སྐུ་གསུམ་འཆང་། །ཞེས་པ་རིན་པོ་ཆེའི་སྦུབས་ལ་སྐུ་གསུམ་ནང་ན་གསལ་ལོ། །སངས་རྒྱས་སྐུ་ལྔའི་བདག་ཉིད་ཅན། །ཞེས་པ་ཆོས་ཀྱི་སྐུའི་སྤྲུལ་སྐུའོ། །ཁྱབ་བདག་ཡེ་ཤེས་ལྔ་ཡི་བདག །ཅེས་པ་ལོངས་སྐུའི་ལུས་སོ། །དེ་ཡང་ཡུམ་ལྔའི་ནང་ནས་སོ། །སངས་རྒྱས་མངའ་

49-1-47b

བདག་ཅོད་པན་ཅན། །ཞེས་པ་གཞི་ལ་གྲུབ་སྟེ། ལྷ་དོན་གྱི་ངོ་བོ་ལ་སྣང་ཙམ་ན། ཧེ་རུ་ཀ་ལྔ་དབུ་རྒྱན་དུ་གནས་པའོ། །འགྲོ་བ་འདུལ་བའི་སྐབས་ན། ཧེ་རུ་ཀའི་དབུ་རྒྱན་རིགས་ལྔའོ། །སྤྱན་ལྔ་ཆགས་པ་མེད་པ་འཆང་། །ཞེས་པ་ལོངས་སྐུ་སྤྱན་ལྔ་དང་ལྡན་ཏེ་མི་གནས་པའོ། །སངས་རྒྱས་ཐམས་ཅད་
སྐྱེད་པ་པོ། །ཞེས་པ་རིག་པ་ལས་རྣམ་སྣང་ལ་སོགས་པ་ཤར་ཏེ་དེ་དག་ལ་སོགས་པ་ཐམས་ཅད་རིག་པ་ལས་འབྱུང་ཞེས་པའོ། །སངས་རྒྱས་སྲས་པོ་དམ་པའི་མཆོག །ཅེས་པ་གཟུགས་སྐུའི་སངས་རྒྱས་ཐམས་ཅད་ཆོས་སྐུའི་སྲས་ཏེ། དབྱེར་མི་ཕྱེད་པའོ། །དེ་ལས་གཞན་པ་མི་གནས་
སོ། །ཤེས་པས་སྲིད་འབྱུང་སྐྱེ་གནས་མེད། །ཅེས་པ་གོང་མའི་དོན་རྟོགས་པས་སྲིད་པ་གསུམ་དང་སྐྱེ་བ་བཞིའི་རྒྱུ་མ་རིག་པ་མེད་པའོ། །ཆོས་ལས་འབྱུང་བ་སྲིད་པ་སེལ། །ཞེས་པ་མཚན་མ་ཕྲ་རགས་རྟོག་པ་རྩིང་ཞིབ་ལས་སྣང་བའོ། །སྲིད་པ་རྟོགས་པས་མི་གནས་པའོ། །གཅིག་
པུ་སྲ་མཁྲེགས་རྡོ་རྗེའི་བདག །ཅེས་པ་ཆོས་ལས་གྲོལ་ནས་ཆོས་འགྱུར་བ་མེད་པའི་གདན་ལ་སྐུ་ཟང་ཐལ་ཆེན་པོའི་ངང་ན་རིན་པོ་ཆེ་འོད་འབར་ལྔའི་རང་བཞིན་རིག་པའི་བདག་ཉིད་ཆེན་པོར་གནས་ཏེ་ཕྱིས་འགྱུར་མི་སྲིད་དོ། །སྐྱེས་མ་ཐག་པར་འགྲོ་བའི་བདག །ཅེས་པ། ཤེས་རབ་ཡེ་ཤེས་མེ་བོ་
ཆེ། །ཞེས་པ་ཕྱོགས་ལྷུང་མེད་པའི་ཤེས་རབ་ལས་རྩལ་ཡེ་ཤེས་ཀྱི་མེ་ཆེན་པོ་ལྔར་གསལ་བའོ། །སྐྱེ་མ་ཐག་པའི་འགྲོ་བ་འདི་ཡིན་ཐམས་ཅད་རང་སྣང་ཡིན་ཞིང་རང་ཤར་བས་སླར་ཡང་གྲོལ་བའོ། །ནམ་མཁའ་ལས་བྱུང་རང་བྱུང་བ། །ཞེས་པ་རིག་པ་ནམ་མཁའ་ལྟ་བུ་ལས་ཡེ་ཤེས་ཀྱི་སྣང་བ་ལྔ་
ཆོས་ཉིད་ནམ་མཁའ་ལྟ་བུ་ལ་ཤར་བའོ། །ཤེས་རབ་ཡེ་ཤེས་གོང་དུ་བཤད། །འོད་ཆེན་རྣམ་པར་སྣང་བར་བྱེད། །ཅེས་པ་ཡེ་ཤེས་ཀྱི་མེ་དེ་ཡེ་ནས་རང་འབྱུང་ཡིན་ལ། ཁ་དོག་ཀྱང་མཐིང་ག་ལ་སོགས་པ་ལྔར་གསལ་ཞིང་དེའི་སྣང་བ་ལ་རྟོགས་མ་རྟོགས་ཀྱིས་འཁོར་འདས་སུ་ཤར་བའོ། །
ཡེ་ཤེས་སྣང་བ་ལམ་མེ་བ། །ཞེས་པ་ཡེ་ཤེས་ལྔའི་སྣང་བ་མ་འགགས་པའོ། །འགྲོ་བའི་མར་མེ་ཡེ་ཤེས་སྒྲོན། །ཞེས་པ། གོང་མའི་ཡེ་ཤེས་ཀྱི་སྣང་བ་དེ། འགྲོ་བའི་རྟགས་ཀྱི་ཡེ་ཤེས་ཁོ་ན་ཡིན་ཞེས་པའོ། །ཕྱོགས་གཅིག་ནི་སྤྲུལ་པའི་སྐུ་དྲུག་གིས་འགྲོ་བའི་དོན་བྱེད་པ་ལ་ཟེར་རོ། །གཟི་

49-1-48a

བརྗིད་ཆེན་པོ་འོད་གསལ་བ། །ཞེས་པ་རིག་པའི་ཡེ་ཤེས་ཀྱིས་འཁོར་འདས་ཟིལ་གྱིས་གནོན་ཅིང་ངོ་བོ་མ་འགགས་པའོ། །སྔགས་མཆོག་མངའ་བདག་རིག་སྔགས་རྒྱལ། །ཞེས་པ་སྔགས་ཀྱི་ནང་ནས་ཀྱང་གཞན་ལས་ལྷག་པའི་དོན་ཏོ། །རང་གི་སྣང་བ་མ་འགགས་
ཅིར་ཡང་སྣང་བས། རིག་པ་ནི་ཐམས་ཅད་ཀྱི་བདག་པོ་སྟེ་མངའ་མཛད་པའོ། །གསང་སྔགས་རྒྱལ་པོ་དོན་ཆེན་བྱེད། །ཅེས་པ་རིག་པའི་ཡེ་ཤེས་དེ་ཡོན་ཏན་གྱི་སྣང་བ་མ་འགགས་པའོ། །གཙུག་ཏོར་ཆེན་པོ་རྨད་བྱུང་གཙུག །ཅེས་པ་རིག་པའི་ཡེ་ཤེས་ཐམས་ཅད་ཀྱི་བདག་པོ་
ནུབ་པ་མེད་པ་རྒྱལ་མཚན་གྱི་རྩེ་མོ་ལྟ་བུའོ། །ནམ་མཁའི་བདག་པོ་སྣ་ཚོགས་སྟོན། །ཞེས་པ་རིག་པའི་ཡེ་ཤེས་ཀྱི་སྟོབས་མ་འགགས་པའོ། །སངས་རྒྱས་ཀུན་གྱི་སྐུ་ཡི་མཆོག །ཅེས་པ་གཟུགས་ཐམས་ཅད་ཀྱི་སྐུ་ནི་ཡེ་ཤེས་ཀྱི་ཕུང་པོ་ལྔ་ཡིན་ལ། དེའི་སྐུ་རིན་པོ་ཆེའི་སྐུའོ། །འགྲོ་
ཀུན་དགའ་བའི་མིག་དང་ལྡན། །ཞེས་པ་ཡེ་ཤེས་ཀྱི་སྤྱན་མ་འགགས་པ་ཆོས་ཀྱི་སྤྱན་དུ་ཤར་ལ། ཆོས་ཀྱི་སྤྱན་མ་འགགས་པ་ཤེས་རབ་ཀྱི་སྤྱན་དུ་ཤར་ནས། འགྲོ་བའི་གཅོད་བྱེད་མ་འགགས་པའོ། །སྣ་ཚོགས་གཟུགས་ཅན་སྐྱེད་པ་པོ། །ཞེས་པ་རིག་པའི་རྩལ་ཡེ་ཤེས་ཀྱི་སྐུ་རིན་པོ་
ཆེ་འོད་འབར་བ་ལྟར་སྣང་ལ་དེའི་སྣང་བ་མ་རྟོགས་པ་འགྲོ་དྲུག་གི་ལུས་དུ་མར་སྣང་བ། དྲང་སྲོང་ཆེ་དགུས་མཆོད་ཅིང་བརྗོད། །ཅེས་པ་དུས་གསུམ་གྱི་སངས་རྒྱས་ཀྱིས་དེའི་དོན་གྱི་ཆེ་བ་དང་ཡོན་ཏན་ཇི་ལྟར་སྣང་བ་ལྟར་གསུངས་པའོ། །རིགས་གསུམ་འཆང་བ་གསང་སྔགས་འཆང་། །
ཞེས་པ་སྐུ་བཞི་སྐུ་གསུམ་སྐུ་གསུང་ཐུགས་དང་ལྡན་པའོ། །དེ་ཡང་མཚན་མའི་ཡི་གེ་གསུམ་མོ། །དམ་ཚིག་ཆེན་པོ་གསང་སྔགས་འཛིན། །ཞེས་པ་རིག་པའི་ཡེ་ཤེས་གསང་སྔགས་ཐམས་ཅད་ཀྱི་རྩ་བར་གྱུར་པའོ། །དེ་ཡང་སྐུ་དང་ཡེ་ཤེས་ལས་མི་འདའ་ཞིང་། དེའི་གསང་སྔགས་
ཨོཾ་ཨཱཿཧཱུཾ་ལྟ་བུའོ། །གཙོ་བོ་དཀོན་མཆོག་གསུམ་འཛིན་པ། །ཞེས་པ་གཙོ་བོ་སངས་རྒྱས་དཀོན་མཆོག་དང་། ཆོས་དཀོན་མཆོག་དང་། དགེ་འདུན་དཀོན་མཆོག་ལྟ་བུར་ལྟ་བའོ། །ཐེག་པ་མཆོག་གསུམ་སྟོན་པ་པོ། །ཞེས་པ་གཙོ་བོ་དེས་འཁོར་རྣམས་ལའོ། །དོན་ཡོད་

49-1-48b

ཞགས་པ་རྣམ་པར་རྒྱལ། །ཞེས་པ་ཐུགས་རྗེས་འགྲོ་དོན་མཛད་ཅིང་རང་མཚན་མའི་ཆོས་ལས་གྲོལ་བའོ། །འཛིན་པ་ཆེན་པོ་རྡོ་རྗེ་ཞགས། །ཞེས་པ་ཆོས་སྐུ་དང་གཟུགས་སྐུ་གཉིས་མ་བཟུང་བ་སྟེ། འདུ་འབྲལ་མེད་པའི་དགོངས་པའོ། །རྡོ་རྗེ་ལྕགས་ཀྱུ་ཞགས་པ་ཆེ། །ཞེས་པ་ཐུགས་
རྗེ་འགྱུར་བ་མེད་པས་ཞིང་དག་པ་ངེས་པའི་ས་ལ་འཛིན་ཅིང་ཐུགས་རྗེས་ཆོས་ཉིད་ཀྱི་དོན་ལ་སྦྱོར་བའོ། །དེ་ཡན་ཆད་དུ་ལེའུ་གསུམ་པའོ།།      །།ཤེས་བྱ་ངོ་བོས་སྟོང་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་དོན་བསྟན་པའོ། །ད་ནི་ལེའུ་བཞི་པ་གཞི་འགག་པ་མེད་པའི་མེ་ལོང་ཡེ་ཤེས་
ཀྱི་དོན་བསྟན་པའོ། །རྡོ་རྗེ་འཇིགས་བྱེད་འཇིགས་པར་བྱེད། །ཅེས་པ་ཆོས་ཀྱི་སྐུ་རྡོ་རྗེ་ལྟ་བུ་ནི་དང་པོ་རྒྱུ་མེད་པ། ཐ་མ་རྐྱེན་མེད་དེ་མི་འགྱུར་བ་ནམ་མཁའ་ལྟ་བུར་གནས་ཏེ་མཚན་མ་ཟིལ་གྱིས་གནོན་ཏེ་གཟུང་འཛིན་གྱི་རྟོག་པ་འཇོམས་པའོ། །ཁྲོ་བོའི་རྒྱལ་པོ་གདོང་དྲུག་འཇིགས། །ཞེས་པ་
གཟུགས་ཀྱི་སྐུ་ཁྲོ་བོ་ལྟར་བཅོས་པ་ནི་མིན་ཏེ་ཆོས་ཀྱི་སྐུ་ངང་གིས་ཁྲོ་བས་གཟུང་འཛིན་འཇོམས་པའོ། །དེ་ཡང་ཞལ་ཕྱོགས་དྲུག་གམ་བཅུར་ཟང་ཐལ་བར་གཟིགས་པས་ཕྱོགས་དྲུག་དང་བཅུའི་མཚན་མར་མི་གནས་ཏེ། ཡུམ་གྱི་བྷ་ག་ལ་བདེ་བ་ཀློང་གཅིག་ཏུ་འཁྱིལ་ཞིང་ཟང་ཐལ་བའོ། །
མིག་དྲུག་ལག་དྲུག་སྟོབས་དང་ལྡན། །ཞེས་པ་ཕྱོགས་དྲུག་ཟང་ཐལ་དུ་གསལ་ཞིང་། ཡེ་ཤེས་ལྔ་མི་གནས་པའི་ཡེ་ཤེས་དང་དྲུག་མ་འགགས་པའོ། །ཀེང་རུས་མཆེ་བ་གཙིགས་པ་པོ། །ཞེས་པ་རིག་པ་འགག་པ་མེད་པའི་ཡེ་ཤེས་ཀྱིས་མ་རིག་པ་དང་ལོག་རྟོག་གཟུང་འཛིན་
ལ་སོགས་པ་ངང་གིས་བཅོམ་ཞིང་འཚལ་བའོ། །ཧ་ལ་ཧ་ལ་ཞེས་པ་མཚན་མ་ཚོགས་ནས་ནུས་པས་འཇོམས་པ་ལྟ་བུ་ནི་མ་ཡིན་ཏེ། རིག་པའི་སྟོབས་ཀྱིས་འཇོམས་པའོ། །གདོང་བརྒྱ་པ་ཞེས་པ་རིག་པའི་ཡེ་ཤེས་ཀྱི་ཡོན་ཏན་ཅིར་ཡང་སྣང་བའོ། །གཤིན་རྗེ་གཤེད་པོ་བགེགས་
ཀྱི་རྒྱལ། །ཞེས་པ་ཆོས་ཀྱི་སྐུ་རིག་པ་དངོས་མེད་ཀྱི་ཡེ་ཤེས་ཀྱིས་འཁོར་བའི་ཆོས་བཅོམ་སྟེ། མ་རིག་པ་ཀ་ནས་དག །གཟུང་འཛིན་ཀ་ནས་དག །ཐམས་ཅད་ལ་མངའ་མཛད་པའོ། །དེ་ཅིའི་ཕྱིར་ཞེ་ན། རྡོ་རྗེ་ཤུགས་འཆང་འཇིགས་བྱེད་པ། །ཞེས་པ་འབྱུང་སྟེ་ཆོས་སྐུ་ངང་

49-1-49a

ངམ་ཤུགས་ཀྱིས་མཚན་མ་དང་བྲལ་བའོ། །རྡོ་རྗེ་གྲགས་པ་རྡོ་རྗེའི་སྙིང་། །ཞེས་པ་ཆོས་སྐུ་འགག་པ་མེད་པའི་མེ་ལོང་ལྟ་བུར་གནས་པས་འཁོར་འདས་སུ་སྣང་ཞིང་གྲགས་པ་སྟེ། དོན་རྡོ་རྗེ་ལྟ་བུའི་ཆོས་སྐུ་འགྱུར་བ་མེད་པར་གནས་པའོ། །སྒྱུ་འཕྲུལ་ཆེན་པོ་
གསུས་པོ་ཆེ། །ཞེས་པ་ཐབས་འགག་པ་མེད་པའི་ཡེ་ཤེས་དང་། ཤེས་རབ་འགྱུར་བ་མེད་པའི་ཆོས་ཉིད་གཉིས་དབྱེར་མི་ཕྱེད་དེ་ཐམས་ཅད་ཡོན་ཏན་དུ་གཞི་ལ་བྱུང་ཡང་དེ་ལས་བྱུང་སྟེ། ཐིམ་ཡང་དེ་ལ་ཐིམ་པའོ། །ཐམས་ཅད་ཀྱི་འབྱུང་གནས་སོ། །རྡོ་རྗེ་ལས་སྐྱེས་རྡོ་རྗེའི་བདག །
ཅེས་པ་སྐུ་གཉིས་ཆོས་སྐུ་ལས་བྱུང་ཞིང་ཆོས་སྐུ་དང་དབྱེར་མེད་པའོ། །རྡོ་རྗེ་སྙིང་པོ་མཁའ་འདྲ་བ། །ཞེས་པ་འགྱུར་བ་མེད་པའི་སྙིང་པོ་འགག་པ་མེད་པར་གསལ་ཏེ་དཔེ་ནམ་མཁའ་ལྟར་གནས་པའོ། །མི་གཡོ་རལ་པ་གཅིག་གིས་བསྒྱིངས། །ཞེས་པ་ཆོས་ཉིད་འགྱུར་བ་མེད་པ་ལས། ཡེ་
ཤེས་འགག་པ་མེད་པར་གསལ་ཏེ། ཅིར་སྣང་ཅིར་གསལ་ཡང་དོན་ཐིག་ལེ་ཉག་གཅིག་ཏུ་གནས་པའོ། །གླང་ཆེན་ཀོ་རློན་གོས་སུ་གྱོན། །ཞེས་པ་ཆོས་ཉིད་འགྱུར་བ་མེད་པའི་ངང་ལ་གནས་པའོ། །གྲགས་ཆེན་ཧ་ཧ་ཞེས་སྒྲོགས་པ། །ཞེས་པ་རང་བྱུང་གི་ཡེ་ཤེས་ལ་གསུང་འགག་
པ་མེད་པའོ། །ཧི་ཧི་ཞེས་སྒྲོགས་འཇིགས་པར་བྱེད། །ཅེས་པ་འགག་པ་མེད་པའི་ཐུགས་རྗེས་མཚན་མ་ཟིལ་གྱིས་གནོན་པའོ། །གད་མོ་ཆེན་པོ་གད་རྒྱངས་ཅན། །ཞེས་པ་འཇིག་རྟེན་པའི་གད་མོ་ནི་མ་ཡིན་ཏེ། ཆོས་ཉིད་ཀྱི་དོན་ལ་གཉིས་སུ་མེད་པར་བཞད་ཅིང་རང་བྱུང་མ་
འགགས་པའོ། །རྡོ་རྗེ་གད་མོ་ཆེར་སྒྲོགས་པ། །ཞེས་པ་དོན་ལ་བྱ་བརྩལ་ལས་འདས་པར་གསུངས་པའོ། །དེ་སུས་གསུངས་ཤེ་ན། རྡོ་རྗེ་སེམས་དཔའ་སེམས་དཔའ་ཆེ། །ཞེས་འབྱུང་སྟེ་སྟོན་པ་དེ་ལྟ་བུས་སོ། །རྡོ་རྗེ་རྒྱལ་པོ་བདེ་བ་ཆེ། །ཞེས་པ་ཆོས་སྐུ་བྱ་བརྩལ་ལས་
འདས་པའོ། །རྡོ་རྗེ་དྲག་པོ་དགའ་བ་ཆེ། །ཞེས་པ་མཚན་མ་ངང་གིས་དག་སྟེ་དོན་གཉིས་མེད་པའོ། །རྡོ་རྗེ་ཧཱུཾ་སྟེ་ཧཱུཾ་ཞེས་སྒྲོགས། །ཞེས་པ་ཆོས་སྐུ་ཡེ་ཤེས་ལྔ་དང་ལྡན་ལ། ཐམས་ཅད་དང་ལྡན་པའི་རྩལ་གྱིས་མི་འགག་ཅེས་པའོ། །མཚོན་དུ་རྡོ་རྗེའི་མདའ་ཐོགས་པ། །

49-1-49b

ཞེས་པ་རིག་པ་འགག་པ་མེད་པས་མཚན་མའི་གཟུང་འཛིན་འབིགས་པའོ། །རྡོ་རྗེ་རལ་གྲིས་མ་ལུས་གཅོད། །ཅེས་པ་མ་རིག་པ་ལ་སོགས་པ་ཆོས་ཉིད་ལ་ངང་གིས་མི་གནས་པའོ། །རྡོ་རྗེ་ཀུན་འཆང་རྡོ་རྗེ་ཅན། །ཞེས་པ་རིག་པ་ཡོན་ཏན་ཐམས་ཅད་ཀྱི་མངའ་བདག་སྟེ། དོན་དབྱེར་
མེད་པའོ། །རྡོ་རྗེ་གཅིག་པུ་གཡུལ་སེལ་བ། །ཞེས་པ་ཆོས་སྐུ་ཉག་གཅིག་ལ་གཟུང་འཛིན་མི་མངའ་སྟེ་འཁོར་བ་མེད་པའོ། །རྡོ་རྗེ་འབར་བ་མིག་མི་བཟད། །ཅེས་པ་ཆོས་སྐུ་ལ་ཡེ་ཤེས་ཀྱི་སྤྱན་མ་འགགས་པའོ། །སྐྲ་ཡང་རྡོ་རྗེ་འབར་བ་སྟེ། །ཞེས་པ་སྤྲོས་པ་ཐམས་ཅད་ཡེ་ཤེས་ཀྱི་སྣང་
བ་ཡིན་ཞེས་པའོ། །རྡོ་རྗེ་འབེབས་པ་འབེབས་པ་ཆེ། །ཞེས་པ་ཆོས་སྐུའི་རྩལ་བྱ་བརྩལ་མི་མངའ་བར་གཟུགས་སྐུ་གཉིས་ཀྱི་སྣང་བར་འཆར་ཞེས་པའོ། །མིག་བརྒྱ་པ་སྟེ་རྡོ་རྗེའི་མིག །ཅེས་པ་ཆོས་སྐུའི་སྤྱན་མ་འགགས་པར་ཅིར་ཡང་སྣང་བའོ། །དེ་ཡང་དོན་ཆོས་སྐུ་ཐལ་འབྱུང་ངོ་། །
ལུས་ནི་རྡོ་རྗེའི་བ་སྤུ་ཅན། །ཞེས་པ་སྐྱེ་འགག་མེད་པ་རིན་པོ་ཆེའི་སྦུགས་སོ། །རྡོ་རྗེའི་སྤུ་ནི་གཅིག་པུའི་ལུས། །ཞེས་པ་གོང་མ་དེ་ཉག་གཅིག་ཏུ་བཞུགས་པའོ། །སེན་མོ་སྐྱེས་པ་རྡོ་རྗེའི་རྩེ། །ཞེས་པ་ཆོས་སྐུའི་རྩལ་ལོ། །རྡོ་རྗེ་སྙིང་པོ་ཞེས་པ་ཆོས་སྐུ་འགྱུར་མེད་འགག་མེད་དོ། །
པགས་པ་མཁྲེགས་ཞེས་པ་ཆོས་ཉིད་མི་འགྱུར་བའོ། །རྡོ་རྗེ་ཕྲེང་ཐོགས་དཔལ་དང་ལྡན། །ཞེས་པ་ཆོས་ཉིད་ལ་རིག་པས་བརྒྱན། རིག་པ་ལ་ཡེ་ཤེས་ཀྱིས་བརྒྱན། ཡེ་ཤེས་ལ་ཐུགས་རྗེས་བརྒྱན་པའོ། །དེ་ཡང་ཐུགས་རྗེ་སྐྱོབ་པ་མ་འགགས་པའོ། །རྡོ་རྗེའི་རྒྱན་གྱིས་བརྒྱན་
པ་སྟེ། །ཞེས་པ་ཆོས་སྐུ་ལ་འབྲས་བུ་སྐུ་དང་ཡེ་ཤེས་ཀྱིས་བརྒྱན་པའོ། །རྩལ་ནི་རྒྱན་བཞིར་ཤར་བའོ། །གད་རྒྱངས་ཧ་ཧ་ངེས་པར་སྒྲོགས། །ཞེས་པ་རང་འབྱུང་ཡེ་ཤེས་ཀྱི་གསུང་མ་འགགས་པའོ། །ཡང་དག་པའི་དོན་ལ་དགྱེས་པའོ། །གང་ཞེ་ན། ཡི་གེ་དྲུག་པ་རྡོ་རྗེའི་སྒྲ། །
ཞེས་པ་ལ་གཉིས་ཏེ། སྒྲའི་ཡི་གེ་དྲུག་པ་དང་། ཆོས་ཉིད་དོན་གྱི་ཡི་གེ་དྲུག་སྟེ། བཛྲ་པྲ་ཏཱིཙྪ་ཡ་ཧཱུཾ་ཞེས་པ་ཨ་ཧ་ཤ་ས་མ། དེ་ཡང་གཞིའི་གནས་ལུགས་སུ་ཤེས་པར་བྱའོ། །དེ་ཡང་ཞལ་གྱི་སྦྱོར་བའི་ཆོས་ཉིད་ཀྱི་གསུང་ངོ་། །འཇམ་དབྱངས་ཆེན་པོ་སྒྲ་ཆེན་པོ། །ཞེས་པ་ཆོས་

49-1-50a

ཀྱི་སྐུའི་སྒྲ་ལས་ལྷག་པ་གཞན་མེད་པའོ། །དེ་ཡང་གོང་མའོ། །འཇིག་རྟེན་གསུམ་ན་སྒྲ་གཅིག་པ། །ཞེས་པ་སྟེ་གཉིས་མེད་བརྗོད་པས་རང་བྱུང་ཡེ་ཤེས་འགག་པར་གཅིག་པའོ། །ནམ་མཁའི་མཐའ་ལས་སྒྲ་སྒྲོགས་པ། །ཞེས་པ། ཟབ་མོའི་དོན་ནམ་མཁའི་
མཐའ་དང་མཉམ་པར་སྟོན་པའོ། །སྒྲ་དང་ལྡན་པ་རྣམས་ཀྱི་མཆོག །ཅེས་པ་ཆོས་སྐུའི་རྩལ་སྒྲར་ཤར་བས་རིག་པ་ཆོས་སྐུ་ནི་སྒྲ་ཡོན་ཏན་དུ་ལྡན་པའོ། །དེ་ཡང་དེ་ལྟར་སྣང་བ་ནི་རིག་པ་འགག་པ་མེད་པ་མེ་ལོང་ལྟ་བུ་ཡིན་པས་སོ། །དེ་ལྟར་བརྗོད་པ་ནི་མ་འགགས་པའི་སྐུ་རྡོ་རྗེ་
སེམས་དཔའོ། །དེ་ཡན་ཆད་དུ་ལེའུ་བཞི་པ་ཞེས་བྱ་བ་འགག་པ་མེད་པ་མེ་ལོང་ཡེ་ཤེས་ཀྱི་དོན་བསྟན་པའོ།།      །།ད་ནི་ལེའུ་ལྔ་པ་ཤེས་རབ་ཡོངས་སུ་གཅོད་པ་སོ་སོར་རྟོག་པའི་དོན་སྟོན་ཏེ། མ་ཧཱ་པྲ་ཤ་པྲ་ར། ཡང་དག་བདག་མེད་དེ་བཞིན་ཉིད། །ཅེས་པ་ཡང་དག་
པའི་དོན་རིག་པའི་ཡེ་ཤེས་ལ་བག་ཆགས་ཀྱི་བདག་མེད་དེ་སྐུ་གསུམ་འདུ་འབྲལ་མེད་པའོ། །ཡང་དག་མཐའ་སྟེ་ཡི་གེ་མེད། །ཅེས་པ་ཆོས་སྐུ་བརྗོད་པ་ལས་འདས་པའོ། །སྟོང་ཉིད་སྨྲ་བའི་ཁྱུ་མཆོག་སྟེ། །ཞེས་པ་ཆོས་ཉིད་སྟོང་པ་འགག་མེད་སྨྲ་བ་ནི་སྨྲ་བའི་ནང་ནས་
མཆོག་ཏུ་གྱུར་པའོ། །ཟབ་ཅིང་རྒྱ་ཆེ་སྒྲ་སྒྲོགས་པ། །ཞེས་པ་ཆོས་སྐུ་ཟབ་སྟེ་དཔག་པར་དཀའ་ཡངས་པའི་དོན་འཆད་པའོ། །ཆོས་ཀྱི་དྲུང་སྟེ་སྒྲ་ཆེན་ལྡན། །ཞེས་པ་རང་བྱུང་ཡེ་ཤེས་ཀྱི་གསུང་མ་འགགས་པའི་དོན་མཚོན་པའི་ཚིག་གོ། །ཆོས་ཀྱི་གཎྜཱི་སྒྲ་བོ་ཆེ། །ཞེས་པ་འཁོར་
བ་སྨིན་པའི་དུས་སུ་ཐེག་པའི་དོན་ངེས་པར་སྒྲོགས་པའོ། །མི་གནས་མྱ་ངན་འདས་པ་པོ། །ཞེས་པ་རྩལ་སོ་སོར་རྟོགས་པ་དེ་དེ་ལྟར་སྣང་ཡང་གཞི་ཆོས་ཉིད་ཀྱི་སྒྲ་དང་ཐ་སྙད་ལ་མི་གནས་པའོ། །ཕྱོགས་བཅུ་ཆོས་ཀྱི་རྔ་བོ་ཆེ། །ཞེས་པ་སྤྲུལ་པའི་སྐུ་དྲུག་གིས་འགྲོ་བ་དྲུག་ལ་
ཆོས་སྟོན་པའོ། །གཟུགས་མེད་ཅེས་པ་ཆོས་སྐུའོ། །གཟུགས་བཟང་ཞེས་པ་གཟུགས་སྐུ་གཉིས་སོ། །དམ་པ་སྟེ་གཉིས་སུ་མེད་པའོ། །དངོས་རྡོ་རྗེ་སེམས་དཔའོ། །དཔལ་ལྡན་སངས་རྒྱས་པདྨ་སྐྱེས། །ཞེས་པ་བྱ་བ་དང་བྲལ་བའོ། །སྣ་ཚོགས་གཟུགས་ཅན་

49-1-50b

ཡིད་ལས་སྐྱེས། །ཞེས་པ་སེམས་ཅན་ཏེ་སྲིད་པའི་སྒོ་ང་གཉིས་ལ་ཡིད་ཀྱི་སྦྱོར་བ་ཤོར་བས། ནོར་བུ་དྲི་མ་མེད་པ་དང་། ཉི་མ་རབ་ཏུ་སྣང་བ་ལ་བྱའོ། །ཡན་ལག་བཅུ་གཉིས་བྱ་བ་དང་ཡང་འབྲེལ་ལོ། །གཟུགས་རྣམས་ཐམས་ཅད་སྣང་བའི་དཔལ། །ཞེས་པ་རིགས་དྲུག་ལུས་ཀྱི་
དབྱིབས་ཐ་དད་དུ་ཤར་བའི་དཔལ་དུ་རྡོ་རྗེ་སེམས་དཔའ་བྱོན་པའོ། །གཟུགས་བརྙན་མ་ལུས་འཆང་བ་པོ། །ཞེས་པ་སྤྲུལ་པའི་སྐུ་དང་ལྡན་པའོ། །ཚུགས་པ་མེད་པ་ཆེ་བར་གྲགས། །ཞེས་པ་གཞན་ལས་དཔག་པའི་དོན་ནོ། །ཁམས་གསུམ་དབང་ཕྱུག་ཆེན་པོ་སྟེ་སྟོན་པ་དེ་ཁམས་
གསུམ་ན་གནས་ཤིང་འགྲོ་བའི་ཁ་ལོ་སྒྱུར་ཏེ་ཁམས་གསུམ་གྱི་མངའ་མཛད་པའོ། །འཕགས་ལམ་ཤིན་ཏུ་མཐོ་ལ་གནས། །ཞེས་པ་རྩོལ་བ་དང་བྲལ་བའི་ཆོས་ཉིད་ཀྱི་དོན་ལ་མི་འབྲལ་བར་གནས་པའོ། །དར་བ་ཆེན་པོ་ཆོས་ཀྱི་ཏོག །ཅེས་པ་སྔགས་ཀྱི་བསྟན་པ་རྒྱས་པར་
བྱེད་པའོ། །དེ་ཡང་དོན་མི་འགྱུར་བས་གནས་པའོ། །འཇིག་རྟེན་གསུམ་ན་གཞོན་ལུས་གཅིག །ཅེས་པ་འཇིག་རྟེན་གསུམ་གྱི་གཟུགས་ཅན་མང་གིས་ཀྱང་སྐུ་འགྱུར་བ་མེད་པའི་མྱུ་གུ་བགྲེས་རྒུད་མི་མངའ་བའོ། །གནས་བརྟན་རྒན་པོ་སྐྱེ་དགུའི་བདག །ཅེས་པ་གཞི་
གནས་ལུགས་ཐམས་ཅད་འབྱུང་གནས་སོ། །སུམ་ཅུ་རྩ་གཉིས་མཚན་འཆང་བ། །ཞེས་པ་ལོངས་སྐུ་དང་སྤྲུལ་སྐུའོ། །སྡུ་གུ་འཇིག་རྟེན་གསུམ་ན་མཛེས། །ཞེས་པ་སྤྲུལ་པའི་སྐུས་སེམས་ཅན་གྱི་དོན་བྱེད་པའོ། །འཇིག་རྟེན་ཤེས་ལེགས་སློབ་དཔོན་ཏེ། །ཞེས་པ་འཇིག་རྟེན་
པའི་རྒྱུད་གྲོལ་བར་བསྟན་པའོ། །འཇིག་རྟེན་སློབ་དཔོན་འཇིགས་པ་མེད། །ཅེས་པ་འཇིག་རྟེན་ན་དོན་མཛད་ཀྱང་ཉོན་མོངས་པས་མ་གོས་ཏེ་འཁོར་བ་ལ་ཉམ་ང་བ་མེད་པའོ། །མགོན་སྐྱོབ་འཇིག་རྟེན་ཡིད་གཅུགས་པ། །ཞེས་པ་མཐུན་པའི་སྒོ་ནས་འདུལ་ཞིང་སེམས་ཅན་དང་མཛད་
པའོ། །དེ་ཡང་གདུལ་བྱ་དང་འཚམ་པར་སྣང་བའོ། །སྐྱབས་དང་སྐྱོབ་པ་བླ་ན་མེད། །ཅེས་པ་འགྲོ་བའི་མགོན་དུ་སྟོན་པ་ལས་ལྷག་པ་གཞན་མེད་པའོ། །ནམ་མཁའི་ལམ་ལ་རབ་གནས་པ། །ཞེས་པ་ཐུགས་ཀྱི་དགོངས་པ་ལ་སྐྱེ་འགག་མེད་དེ། དོན་གཉིས་མེད་དུ་གནས་པའོ། །

49-1-51a

ཐམས་ཅད་མཁྱེན་པའི་ཡེ་ཤེས་མཚོ། །ཞེས་པ་འབྱེད་པ་མེད་པའི་ཤེས་རབ་དགོངས་པ་ཆོས་ཉིད་ཀྱི་ངང་ངོ་། །མ་རིག་སྒོ་ངའི་སྦུབས་འབྱེད་པ། །ཞེས་པ་སེམས་དང་ཡེ་ཤེས་འབྱེད་ཐབས་དང་ངོ་སྤྲོད་ཐབས་སོ། །སྲིད་པའི་རི་བོ་ཆེན་པོ་འཇོམས། །ཞེས་པ་འཁྲུལ་སྣང་
ཡེ་ཤེས་སུ་གྱུར་པའོ། །ཉོན་མོངས་མ་ལུས་ཞི་བྱེད་པ། །ཞེས་པ་སེམས་དང་ཡེ་ཤེས་ཕྱེད་པས་གཟུང་འཛིན་ནམ་མཁའི་མཐའ་ལ་དེངས་པའོ། །འཁོར་བའི་རྒྱ་མཚོ་ཕ་རོལ་ཕྱིན། །ཞེས་པ་མ་དག་པའི་འཁྲུལ་པ་ལས་གྲོལ་ནས་ཆོས་ཉིད་ཀྱི་བར་དོ་ལ་གནས་པའོ། །ཡེ་ཤེས་དབང་བསྐུར་
ཅོད་པན་ཅན། །ཞེས་པ་དང་། རྫོགས་པའི་སངས་རྒྱས་རྒྱུན་དུ་ཐོགས་ཏེ་ཤེས་པ་ལྔ་ལྡན་གྱི་དགོངས་པ་མཐར་ཕྱིན་ཏེ་རིགས་ལྔའི་བདེ་བར་གཤེགས་པ། འཁོར་ཚོམ་བུ་དང་བཅས་པ་སྣང་སྟེ་རིག་པའི་རྒྱན་དུ་ཐོགས་ལ་སྐུ་དེ་དག་ལ་ཡང་ཧེ་རུ་ཀ་དབུ་རྒྱན་དུ་གནས་པར་གསུངས་སོ། །སྡུག་
བསྔལ་གསུམ་གྱི་སྡུག་བསྔལ་ཞི། །ཞེས་པ་ལུས་ངག་གི་སྡུག་བསྔལ་ལས་གྲོལ་བའོ། །གསུམ་སེལ་མཐའ་ཡས་གྲོལ་གསུམ་ཐོབ། །ཅེས་པ་ལོངས་སྐུ་ཡབ་ཡུམ་གྱི་ལྗགས་ལས་རིན་པོ་ཆེ་སྒྲའི་ཡི་གེ་དྲུག་འབྱུང་སྟེ་གསུང་གི་འོད་ཟེར་ལ་རོལ་པས་སྤྲུལ་པའི་སྐུ་དྲུག་ཏུ་གྱུར་ཏེ། འགྲོ་
དྲུག་གི་ལུས་ངག་ཡིད་གསུམ་གྱི་སྒྲིབ་པ་བསལ་ཏེ། མཐའ་ཡས་པའི་སེམས་ཅན་གྱི་ལུས་ལས་གྲོལ་ཏེ། དེ་ཡང་བློ་རབ་འབྲིང་གིས་གྲོལ་ནས་སྐུ་དང་ཡེ་ཤེས་མངོན་དུ་གྱུར་པའོ། །དེའི་དུས་སུ་སྒྲིབ་པ་ཀུན་ལས་ངེས་པར་གྲོལ་ཏེ་ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་ངང་གིས་
དག་པའོ། །མཁའ་ལྟར་མཉམ་པ་ཉིད་ལ་གནས། ཞེས་པ་གོང་གི་ལོངས་སྐུ་ཚོམ་བུ་དང་བཅས་པ་དང་།  ཕྱིས་གྲོལ་བའི་སངས་རྒྱས་གཉིས་ཀ་རིན་པོ་ཆེའི་སྦུབས་ནས་དགོངས་པ་དབྱེར་མེད་པར་གནས་པའོ། །དེ་ཡང་རང་གསལ་རྟོག་མེད་དེ། སོ་སོར་མ་འདྲེས་པ་ལ་མི་འབྱེད་པའོ། །
དུས་དེར་ཉོན་མོངས་པའི་དྲི་མ་ཀུན་ལས་འདས་ཏེ། དུས་གསུམ་སྐུ་གསུམ་ངང་དུ་གྲོལ། །དུག་ལྔ་ཡེ་ཤེས་ཀྱི་བུམ་པ་ལྔར་གྲོལ།  མ་རིག་པ་རིག་པ་ཟང་ཐལ་ཆེན་པོར་གྲོལ་བས་མྱ་ངན་ལས་འདས་པའོ། །དུས་གསུམ་དུས་མེད་རྟོགས་པ་པོ། །ཞེས་པ་མ་རྟོགས་པ་ལ་དུས་གསུམ་དུ་

49-1-51b

སྣང་ཡང་རྟོག་པ་ལ་མི་གནས་ཏེ། རིག་པ་སྐྱེ་འགག་མེད་པ་གཅིག་ཏུ་གནས་སོ། །སེམས་ཅན་ཀུན་གྱི་གཙོ་བོ་ཆེ། །ཡོན་ཏན་ཐོད་ཅན་རྣམས་ཀྱི་ཐོད། །ཅེས་པ་སྤྲུལ་པའི་སྐུ་འགྲོ་དྲུག་གི་གཙོ་བོའམ་ཐོད་ལྟ་བུར་གྱུར་པའོ། །ལུས་ཀུན་ལས་ནི་རྣམ་པར་གྲོལ། །ཞེས་པ་སེམས་ཅན་
གྱི་ལུས་གདོས་པ་ཅན་ལས་སྐད་ཅིག་མ་ལ་གྲོལ་བའོ། །ནམ་མཁའི་ལམ་ལ་རབ་གནས་པ། །ཞེས་པ་ཆོས་ཉིད་ནམ་མཁའ་ལྟ་བུ་ལས་མ་གཡོས་པའོ། །ཡིད་བཞིན་ནོར་བུ་ཆེན་པོ་འཆང་། །ཞེས་པ་རིག་པ་ཆོས་ཀྱི་སྐུ་ཡོན་ཏན་གྱི་སྐུ་གཉིས་དང་མི་འབྲལ་བའི་ཕྱིར། སྐུ་གཉིས་ནང་
གསལ་དུ་འཆང་བའོ། །ཁྱབ་བདག་རིན་ཆེན་ཀུན་གྱི་མཆོག །ཅེས་པ་ཆོས་སྐུ་དངོས་མེད་ལས་ཡེ་ཤེས་འགག་མེད་འཆར་ཞིང་ཡེ་ཤེས་འགག་མེད་ཀྱི་དོན་གྱིས་ཐམས་ཅད་ལ་མ་ཁྱབ་པ་མེད་དེ་མེད་པ་དེ་ནི། རིན་པོ་ཆེའི་ནང་ནས་ཀྱང་མཆོག་ཏུ་གྱུར་པའོ། །དཔག་བསམ་ཤིང་ཆེན་རྒྱས་པ་སྟེ། །
ཞེས་པ་རིག་པ་ཆོས་སྐུ་རིན་པོ་ཆེ་དང་འདྲ་བ་ལས་ཡོན་ཏན་ཕྱོགས་མེད་དུ་འབྱུང་བ་དང་། རིན་པོ་ཆེའི་ཤིང་ལ་རྩ་བ་ཡོད་པ་དང་འདྲ་བར་རིག་པ་ཉིད་དོ། །ཡལ་ག་ཡོད་པ་དང་འདྲ་བར་སྤྲོས་པའི་ཆོས་ཅན་ནོ། །དེ་ཡང་དངོས་འཁོར་བའོ། །ལོ་མ་དང་མེ་ཏོག་དང་འདྲ་བར་སྐུ་དང་ཡེ་ཤེས་སོ། །འབྲས་བུ་དང་འདྲ་
བ་རྟོགས་པའི་ཆོས་སྐུའོ། །བུམ་པ་བཟང་པོ་ཆེ་བའི་མཆོག །ཅེས་པ་རིན་པོ་ཆེའི་སྦུབས་ན་གནས་དགོས་པ་གྲུབ་པ་དང་འདྲ་བར་ཆོས་སྐུ་བུམ་པ་ཆེན་པོ་དེའི་ནང་ནས་ཡེ་ཤེས་ཀྱི་མྱུ་གུ་ཆེན་པོ་ལྔ་འབྱུང་སྟེ། དེ་ལས་རིན་པོ་ཆེའི་སྐུ་ལྔ་གསལ་ཏེ། དེ་ལས་ཐུགས་རྗེ་སྤྲུལ་པའི་སྐུ་བྱུང་ནས་སེམས་
ཅན་གྱི་དོན་བྱེད་དེ་ནང་ནས་ནོར་བུ་རིན་པོ་ཆེའི་མཛོད་ཕྱུང་བའོ། །བྱེད་པ་སེམས་ཅན་ཀུན་དོན་བྱེད། །ཅེས་པ་སྐུ་གཉིས་ཀྱིས་སོ། །ཕན་འདོགས་སེམས་ཅན་མཉེས་གཤིན་པ། །ཞེས་པ་དང་། བཟང་ངན་ཤེས་ཤིང་དུས་ཤེས་པ། །ཞེས་པ་འཁོར་བའི་སྣོད་ཀྱི་བྱེ་བྲག་དང་གདུལ་བྱ་སྐབས་ལ་བབ་མ་བབ་
མཁྱེན་པའོ། །ཁྱབ་བདག་དམ་ཤེས་དམ་ཚིག་ལྡན། །ཞེས་པ་རིག་པའི་ཡེ་ཤེས་ཀྱི་དོན་ཤེས་ཤིང་དེ་དང་མི་འབྲལ་བའོ། །དེ་ཡང་རྗེས་འཇུག་གི་རྩ་བའི་དམ་ཚིག་གསུམ་གྱི་གཟུངས་ཐུབ་པའོ། །འདུ་ཤེས་སེམས་ཅན་དབང་དོན་ཤེས། །ཞེས་པ་གདུལ་བྱ་སྐབས་ལ་བབ་མ་བབ་དང་། སེམས་ཅན་

49-1-52a

གྱི་བསམ་པ་མཁྱེན་པའོ། །དེ་ཡང་ཤེས་རབ་རྣོ་རྟུལ་ལ་སོགས་པ་མཁྱེན་པའོ། །རྣམ་གྲོལ་གསུམ་ལ་མཁས་པ་པོ། །ཞེས་པ་རྣམ་པ་གསུམ་ལས་གྲོལ་བ་ལ་མཁས་པ་སྟེ། ཡུལ་སེམས་ལུས་དང་གསུམ་མོ། །རྣམ་གྲོལ་གསུམ་དུ་གྲོལ་བ་ལ་མཁས་ཏེ་རབ་འབྲིང་ཐ་མའོ། །
ཡོན་ཏན་ལྡན་ཞིང་ཡོན་ཏན་ཤེས། །ཞེས་པ་གཞིའི་ཡོན་ཏན་དང་ཞིང་གི་ཡོན་ཏན་ཤེས་པའོ། །དངོས་སྐུ་དང་ཡེ་ཤེས་སོ། །ཆོས་ཤེས་བཀྲ་ཤིས་བཀྲ་ཤིས་འབྱུང་། །ཞེས་པ་ཆོས་ཅན་དང་ཆོས་ཉིད་ཀྱི་དོན་མ་འདྲེས་པར་ཇི་ལྟ་བར་ཤེས་པ་དེའི་དོན་རང་ཆས་སུ་གནས་པར་སྡུག་བསྔལ་གྱི་མཐའ་ལས་གྲོལ་བ་
ནི་བཀྲ་ཤིས་པ་སྟེ། བཀྲ་ཤིས་ཐམས་ཅད་ཀྱི་རྩ་བར་འབྱུང་ངོ་། །དོན་རིག་པའི་ཡེ་ཤེས་དེ་བཀྲ་ཤིས་ཐམས་ཅད་ཡོན་ཏན་དུ་གནས་པས་ན་བཀྲ་ཤིས་ཀུན་གྱི་བཀྲ་ཤིས་པའོ། །གྲགས་པའི་བཀྲ་ཤིས་སྙན་གྲགས་དགེ། །ཞེས་པ། རིག་པ་དང་ཡེ་ཤེས་ཀུན་གྱི་ངོ་བོར་གནས་ཏེ། བདག་གཞན་གྱི་
དཔལ་གྱི་གནས་སུ་གྱུར་པ་དང་ཡོན་ཏན་ཐམས་ཅད་དྲི་མ་མེད་པར་གྲགས་པ་དང་། མ་བསགས་པའི་ཚོགས་གཉིས་ལ་དགྱེས་པའི་ངོ་བོ་ཉིད་ལས་དགེ་བའོ། །དབུགས་འབྱིན་ཆེན་པོ་དགའ་སྟོན་ཆེ། །ཞེས་པ་དོན་སྐུ་གསུམ་ཡེ་ཤེས་ལྔ་རྟོགས་ན་བྱ་བརྩལ་བྱ་མི་དགོས་པར་སྡུག་བསྔལ་ཞི་བས་
ནའོ། །དེ་ཡང་ཡོན་ཏན་གྱི་སྒོ་ཡངས་པས་རྩལ་ཕྱོགས་མེད་དུ་འཆར་བའོ། །དགའ་ཆེན་རོལ་མོ་ཆེན་པོ་པ། །ཞེས་པ་སྣང་སྲིད་རྒྱན་དང་རོལ་པར་ཤར་ཏེ་རིག་པ་རང་སྣང་བའོ། །བཀུར་སྟི་རིམ་གྲོ་ཕུན་སུམ་ཚོགས། །ཞེས་པ་འདོད་ཡོན་དགག་སྒྲུབ་མེད་པ་བསམ་གཏན་གྱི་རྩེ་ཆེན་པོར་གྱུར་པའོ། །
མཆོག་ཏུ་ཞེས་པ་ཆོས་སྐུའོ། །དགའ་བ་ཞེས་པ་རང་ལ་ཡོད་པས་བྱ་བརྩལ་བྱ་མི་དགོས་སོ། །གྲགས་ཞེས་པ་ཡོན་ཏན་འཁོར་འདས་སུ་སྣང་ངོ་། །བདག་ཅེས་པ་རིག་པ་བདག་པོར་གྱུར་པའོ། །དཔལ་ཞེས་པ་ཡོན་ཏན་གྱི་སྐུ་གཉིས་གདུལ་བྱ་ལ་ཤར་བའོ། །མཆོག་ཅེས་པ་སྐུ་གསུམ་འདུ་
འབྲལ་མེད་པའོ། །ལྡན་ཞེས་པ་རིག་པའོ། །མཆོག་སྦྱིན་ཞེས་པ་རྩལ་སྐུ་དང་ཡེ་ཤེས་སུ་ཤར་བའོ། །གཙོ་བོ་སྟེ་ཞེས་པ་རྣམ་སྣང་རིག་པའི་སྐུ་ལྔའོ། །སྐྱབས་ཀྱི་དམ་པ་སྐྱབས་ཀྱི་འོས། །ཞེས་པ་དེའི་ཐུགས་རྗེའི་སྤྲུལ་པའི་སྐུ་དྲུག་གོ། །འཇིག་རྟེན་དགྲ་སྟེ་རབ་ཀྱི་མཆོག །ཅེས་

49-1-52b

པ་འཇིག་རྟེན་འཁྲུལ་བའི་དགྲར་འགྱུར་བའོ། །དེ་ཡང་འཁྲུལ་སྣང་འཇོམས་པའི་མཆོག་ཏུ་གྱུར་པའོ། །འཇིགས་པ་མ་ལུས་སེལ་བ་པོ། །ཞེས་པ་ཐུགས་རྗེས་སྡུག་བསྔལ་དང་འཇིགས་པ་ལས་སྐྱོབ་པའོ། །གཙུག་ཕུད་ཕུད་པུ་ལྕང་ལོ་ཅན། །ཞེས་པ་དང་། རལ་པ་མུཉྫ་ཅོད་
པན་ཐོགས། །ཞེས་པ་ལོངས་སྤྱོད་རྫོགས་པའི་འཁོར་ཉིད་ལས་མི་ཞན་པའི་རིགས་ལྔའོ། །དེ་ཡང་ཡེ་ཤེས་ལྔའི་ཐུགས་ཏེ་ཧེ་རུ་ཀ་ལྔ་དང་ལྡན་ཞིང་ཡེ་ཤེས་ཀྱི་མདངས་དང་བཅས་པའོ། །གདོང་ལྔ་གཙུག་ཕུད་ལྔ་དང་ལྡན། །ཞེས་པ་རྣམ་སྣང་ཀུན་དུ་ཞལ་ལོ། །དེ་ཡང་ཡེ་ཤེས་ཀྱི་ཧེ་རུ་
ཀ་དབུ་ལ་རྒྱས་འདེབས་སུ་ཐོགས་པའོ། །ཟུར་ཕུད་ལྔ་པ་མེ་ཏོག་ཐོད། །མགོ་ཟླུམ་བརྟུལ་ཞུགས་ཆེན་པོ་འཆང་། །ཞེས་པ་ལོངས་སྐུའི་ཐུགས་རྗེ་མི་མཐུན་པའོ། །ཚངས་པར་སྤྱོད་པ་བརྟུལ་ཞུགས་མཆོག །ཅེས་པ་དང་། དཀའ་ཐུབ་མཐར་ཕྱིན་དཀའ་ཐུབ་ཆེ། །ཞེས་པ་ཐུབ་པ་དེ་
རྣམས་ཀྱིས་སོ། །གཙང་གནས་དམ་པ་གཽ་ཏ་མ། །ཞེས་པ་ཐུབ་པའི་དགོངས་པ་དག་པ་དང་སྤྱོད་པ་དག་པ་སྟེ། །འབྱེད་པ་མེད་པའི་ཤེས་རབ་ལ་གནས་པའོ། །བྲམ་ཟེ་ཚངས་པ་ཚངས་པ་ཤེས། །ཞེས་པ་ཆོས་སྐུ་རྣམ་པར་དག་པའོ། །དེའི་དོན་ཤེས་ཤིང་དགོངས་པ་དང་ལྡན་པའོ། །
འབྲས་བུ་གང་ཞེ་ན། མྱ་ངན་འདས་པའི་ཚངས་པ་ཐོབ་པའོ། །ཇི་ལྟར་ཐོབ་ཅེ་ན། གྲོལ་བ་ཐར་པ་རྣམ་གྲོལ་ལུས། །ཞེས་བྱ་སྟེ། ཡུལ་སེམས་ལུས་ལས་གྲོལ་ཞིང་འཁོར་བའི་རྒྱ་མཚོ་ལས་ཐར་ཏེ།  དབང་པོ་ཡང་རབ་ནི་འཇུག་པ་དང་སྣང་བ་དང་། ཤེས་པ་དང་གྲོལ་བ་དུས་མཉམ་པའོ། །
འབྲིང་པོ་བསམ་གཏན་ལྔ་པས་མྱ་ངན་ལས་འདས་པའོ། །དེ་ཡང་གང་གྲོལ་ཡང་བར་དུ་སྐུ་ལྔ་ཚོམ་བུ་དང་བཅས་པར་གསལ་ལོ། །ཐ་མ་རིན་ཆེན་སྦུབས་ན་སྐུ་གསུམ་ན་གསལ་བའོ། །རྣམ་གྲོལ་ཞེས་པ་ཆོས་ལས་གྲོལ་བའོ། །ཞི་བ་ཞེས་པ་གཞིའི་ཆོས་ཉིད་དོ། །ཞི་བ་ཉིད་ཅེས་
པ་རང་དེའི་ངང་ལ་གནས་པའོ། །མྱ་ངན་འདས་ཞེས་པ་གཞིའོ། །མྱ་ངན་འདས་ཞེས་པ་སྐུ་ལྔ་ཚོམ་བུ་དང་བཅས་པའོ། །ལེགས་པར་ཞེས་པ་དེ་བཞིན་གཤེགས་པ་ཇི་ལྟར་གྲོལ་བ་ལྟར་གྲོལ་བས་ལམ་མ་ནོར་བའོ། །མྱ་ངན་འདས་དང་ཉེ་ཞེས་པ་ཐུགས་རྗེ་སྤྲུལ་པའི་སྐུ་དང་དེའི་གྲོལ་བའི་

49-1-53a

ཡིད་ཀྱི་སྐུའོ། །བདེ་སྡུག་སེལ་བའི་མཐར་གྱུར་པ། །ཞེས་པ་སྤྲུལ་སྐུས་འགྲོ་དོན་བྱས་ནས་སླར་མྱ་ངན་ལས་འདས་པའོ། །ཆགས་བྲལ་ལུས་ལས་འདས་པ་པོ། །ཞེས་པ་རིན་ཆེན་སྦུབས་སོ། །ཐུབ་པ་མེད་པ་དཔེ་མེད་པ་དེ་ལྷག་པ་མེད་པའོ། །དཔེ་མེད་པ་ཞེས་པ་གང་
གིས་ཀྱང་དེའི་ཕྱོགས་ལ་དཔེ་མི་བཏུབ་པའོ། །མི་མངོན་ཞེས་པ་མྱ་ངན་འདས་སྐུ་ཕྱིར་མི་མངོན་པའོ། །མི་སྣང་ཞེས་པ་སྐུ་ལྔ་པོ་གདུལ་བྱ་ལ་མི་སྣང་ངོ་། །གསལ་བྱེད་མིན་ཞེས་པ་སྐུ་ལྔ་ལ་ཐུགས་རྗེ་མི་འགྱུར་ཏེ། ཉོན་མོངས་པ་དང་བློའི་རྟོག་པ་མི་སེལ་ལོ། །མི་འགྱུར་
ཞེས་པ་ཕྱིས་རྒྱུ་འབྲས་བུར་སྨིན་ནས་འབྲས་བུ་རྒྱུར་མི་ལྡོག་གོ། །ཀུན་འགྲོ་བ་ཞེས་པ་བུདྡྷའི་དུར་སའོ། །ཁྱབ་པ་པོ་ཞེས་པ་རིན་ཆེན་སྦུབས་ལ་ནུབ་པ་མེད་པ་ནམ་མཁའ་ལྟ་བུའོ། །ཕྲ་ཞིང་ཞེས་པ་དོན་དེ་བརྟག་དཀའ་བའོ། །ཟག་མེད་ས་བོན་བྲལ་ཞེས་པ་རྟོགས་པ་དང་ལྡན་པ་ལ་འཁོར་བའི་ས་བོན་
མི་གནས་པའོ། །རྡུལ་མེད་རྡུལ་བྲལ་དྲི་མ་མེད། །ཅེས་པ་མྱ་ངན་འདས་ནས་ཉོན་མོངས་པ་ཞེ་སྡང་ལ་སོགས་པ་མི་གནས་ཤིང་བྲལ་བའོ། །ཉེས་པ་སྤངས་པ་སྐྱོན་མེད་པ། །ཞེས་པ་ཆོས་སྐུ་ལ་ཉེས་པ་ངང་གིས་སྤངས་པ་སྟེ་རྟག་ཆད་ལ་སོགས་པའི་སྐྱོན་མེད་དོ། །ཤིན་ཏུ་སད་པ་སད་
པའི་བདག །ཅེས་པ། དཔེར་ན་འཇིག་རྟེན་པའི་རྨི་ལམ་སད་པ་དང་འདྲ་བར་འགྱུར་ཏེ། མ་རིག་པའི་གཉིད་སད་ནས་རིག་པའི་མར་མེ་ནང་ན་གསལ་བའོ། །ཀུན་ཤེས་ཀུན་རིག་དམ་པ་པོ། །ཞེས་པ། རིན་པོ་ཆེའི་སྦུབས་ན་ཀུན་གྱི་ཤེས་པ་དང་རིག་པ་གཉིས་མེད་པར་གནས་པའོ། །རྣམ་
པར་ཤེས་པའི་ཆོས་ཉིད་འདས། །ཞེས་པ་ད་ལྟའི་ཤེས་པ་རྟོག་བཅས་འདི་ལས་གྲོལ་ཞེས་པ། འོ་ན་ཇི་ལྟར་གནས་ཤེ་ན། ཡེ་ཤེས་གཉིས་མེད་ཚུལ་འཆང་བ། །ཞེས་པ་སྟོང་པ་ཡེ་ཤེས་ཀྱི་སྙིང་པོ་ཅན་དུ་གནས་ཏེ། རིག་པའི་ནང་ན་ཡེ་ཤེས་གནས་པའོ། །དོན་གཉིས་མེད་པར་སྣང་བ་མི་
འགག་པའོ། །རྣམ་པར་རྟོག་མེད་ལྷུན་གྱིས་གྲུབ། །ཅེས་པ་སྐུ་གསུམ་ནང་གསལ་དུ་གནས་ཏེ། བག་ཆགས་ཀྱི་དབུགས་མེད་པས་འཛིན་རྟོག་མི་རྒྱུ་བའོ། །དུས་གསུམ་སངས་རྒྱས་ལས་བྱེད་པ། །ཞེས་པ་ཐུགས་རྗེའི་སྤྲུལ་སྐུ་དྲུག་གིས་དུས་གསུམ་གྱི་བུདྡྷའི་ཕྲིན་ལས་འགྲོ་

49-1-53b

བ་སྒྲོལ་བའོ། །སངས་རྒྱས་ཐོག་མ་ཐ་མ་མེད། །ཅེས་པ་དང་པོ་དང་ཐ་མའི་དུས་མེད་པ་སྟེ་ཡེ་ཤེས་པའོ། །ཅིའི་ཕྱིར་ཞེ་ན། དང་པོའི་སངས་རྒྱས་རྒྱུ་མེད་པས་སོ། །དེ་ཡང་དོན་རང་བྱུང་གི་ཡེ་ཤེས་སོ། །ཡེ་ཤིས་མིག་གཅིག་དྲི་མ་མེད། །ཅེས་པ་རིན་པོ་ཆེའི་ལུས་ལ་ཡེ་ཤེས་ཀྱི་སྤྱན་རྣམ་
པར་དག་པ་གསལ་བའོ། །ཡེ་ཤེས་ལུས་ཅན་དེ་བཞིན་གཤེགས། །ཞེས་པ་རིན་པོ་ཆེའི་འོད་འབར་བའི་སྐུ་ལྔའོ། །ཚིག་གི་དབང་ཕྱུག་སྨྲ་བ་ཆེ། །ཞེས་པ་དོན་ངོ་མཚར་ཅན་གསུངས་པའོ། །སྨྲ་བའི་སྐྱེས་མཆོག་སྨྲ་བའི་རྒྱལ། །ཞེས་པ་གཞན་པས་ལྷག་པར་གྱུར་པའོ། །སྨྲ་བའི་
དམ་པ་མཆོག་གི་གནས། །ཞེས་པ་གསུངས་པའི་དོན་ཁྱད་པར་དུ་འཕགས་པའོ། །སྨྲ་བའི་སེང་གེ་མཚུངས་པ་མེད། །ཅེས་པ་དོན་ངེས་པར་སྒྲོགས་པ་སྟོན་པ་ལ་འགྲན་ནུས་པ་མེད་པའོ། །ཀུན་དུ་ལྟ་བ་མཆོག་ཏུ་དགའ། །ཞེས་པ་ཆོས་སྐུ་ཟང་ཐལ་ལོ། །གཟི་བརྗིད་ཕུང་པོ་བལྟ་ན་སྡུག །
ཅེས་པ་ཡེ་ཤེས་ཀྱི་བག་ཆགས་ཀྱི་ལུས་ཅན་ཟིལ་གྱིས་གནོན་ཅིང་མཛེས་པའོ། །འོད་བཟངས་འབར་བ་དཔལ་གྱི་བེའུ། །ཞེས་པ་ཐུགས་རིག་པའི་ཡེ་ཤེས་རིན་པོ་ཆེ་འོད་འབར་བའོ། །ལག་ན་འོད་འབར་སྣང་བ་པོ། །ཞེས་པ་ཐུགས་རྗེས་འགྲོ་བའི་མ་རིག་པ་སེལ་བའོ། །སྨན་པ་ཆེ་མཆོག་
གཙོ་བོ་སྟེ། །ཟུག་རྔུ་འབྱིན་པ་བླ་ན་མེད། །སྨན་རྣམས་མ་ལུས་ལྗོན་པའི་ཤིང་། །ཞེས་པ་དཔལ་རྡོ་རྗེ་སེམས་དཔའ་ལ་སོགས་པ་སྤྲུལ་པའི་སྐུ་རྣམས་ཀྱིས་ཉོན་མོངས་པའི་དུག་དང་གཟུང་འཛིན་འཇོམས་པ་སྟེ་སྐུ་གསུམ་ཡེ་ཤེས་བཞི་བརྩིས་པས་རླུང་མཁྲིས་སེལ་བ་ལས་མཆོག་ཏུ་
གྱུར་པའོ། །སྡུ་གུ་འཇིག་རྟེན་གསུམ་གྱི་མཆོག །ཅེས་པ་སྤྲུལ་སྐུའོ། །དཔལ་ལྡན་རྒྱུ་སྐར་དཀྱིལ་འཁོར་ཅན། །ཞེས་པ་ལོངས་སྤྱོད་རྫོགས་པའི་སྐུ་ལས་སྤྲུལ་སྐུ་ཉི་མ་དང་ཟེར་བཞིན་འབྱུང་བའོ། །ཕྱོགས་བཅུ་ནམ་མཁའི་མཐར་ཐུག་པར། །ཆོས་ཀྱི་རྒྱལ་མཚན་ལེགས་པར་
འཛུགས། །ཞེས་པ་སངས་རྒྱས་ཀྱི་སྤྲུལ་པས་སངས་རྒྱས་ཀྱི་བསྟན་པ་རིམ་གྱིས་འཛིན་ཏེ། དེ་བཞིན་གཤེགས་པའི་སྐུ་ལ་སྤྲུལ་པ་རྒྱུན་མི་འཆད་པར་འབྱུང་བས་སེམས་ཅན་གྱི་དོན་ཞེས་པའོ། །འགྲོ་ན་གདུགས་གཅིག་ཡངས་པ་སྟེ། །བྱམས་དང་སྙིང་རྗེའི་དཀྱིལ་འཁོར་

49-1-54a

ཅན། །ཞེས་པ་ཕྱོགས་རིས་མེད་པའི་སྙིང་རྗེ་དང་ལྡན་པའོ། །དེ་ཡང་དོན་གྱི་དཀྱིལ་འཁོར་གྱི་རྣམ་པའོ། །དཔལ་ལྡན་པདྨ་གར་གྱི་བདག །ཅེས་པ་དོན་མཛད་པའི་ཐབས་དང་ལྡན་པས་ན། དོན་གྲུབ་ལ་རང་ལ་འཁོར་བའི་སྐྱོན་གྱིས་མ་གོས་པའོ། །ཁྱབ་བདག་
ཆེན་པོ་རིན་ཆེན་གདུགས། །ཞེས་པ་རིན་པོ་ཆེ་དང་འདྲ། གདུགས་དང་འདྲ། སངས་རྒྱས་ཀུན་གྱི་གཟི་བརྗིད་ཆེ། །ཞེས་པ་ཉོན་མོངས་པ་དང་འཁོར་བ་ཟིལ་གྱིས་གནོན་པའོ། །སངས་རྒྱས་ཀུན་གྱི་སྐུ་འཆང་བ། །ཞེས་པ་རིག་པ་ལ་ཡེ་ཤེས་ཀྱི་སྐུ་ལྔ་རྫོགས་པའོ། །སངས་
རྒྱས་ཀུན་གྱི་རྣལ་འབྱོར་ཅན། །ཞེས་པ་སངས་རྒྱས་ཀུན་གྱི་དགོངས་པ་དང་ལྡན་པས་ནའོ། །སངས་རྒྱས་ཀུན་གྱི་བསྟན་པ་གཅིག །ཅེས་པ་དོན་གྱི་དགོངས་པ་ལ་གཅིག་ལས་མི་མངའ་བས་ན་སངས་རྒྱས་ཀུན་གྱི་བསྟན་པ་གཅིག་གོ། །རྡོ་རྗེ་རིན་ཆེན་དབང་བསྐུར་དཔལ། །ཞེས་
པ་རིག་པ་རྩལ་གྱི་དབང་སྟེ། དེ་ཡང་ཕྱི་བུམ་པའི་དབང་། རིན་པོ་ཆེ་མྱུ་གུའི་དབང་དང་། ནང་རྒྱལ་རྟགས་ཕྱག་རྒྱའི་དབང་དང་། ཤེས་རབ་རིག་པའི་སྐུ་ལྔའི་དབང་དང་། གསང་བའི་དབང་དེ་ཁོ་ན་ཉིད་ཅེས་བྱའོ། །དེ་ཡང་མཚོན་ན་རིན་པོ་ཆེ་སྒྲའི་ཡི་གེ་བསྟན་པའོ། །དེ་ནས་རིག་
པ་རྩལ་གྱི་དབང་མཚན་མ་ལ་བརྟེན་པའོ། །རིན་ཆེན་ཀུན་བདག་དབང་ཕྱུག་སྟེ། །ཞེས་པ་རིག་པ་ཆོས་སྐུ་ཐམས་ཅད་ཀྱི་བདག་པོར་གྱུར་པའོ། །འཇིག་རྟེན་དབང་ཕྱུག་ཀུན་གྱི་བདག །ཅེས་པ་རིག་པའི་རྩལ་གོང་དུ་མ་ཤར་ལ། འདུ་ཡང་དེ་ཉིད་ངང་དུ་འདུ་བས་བདག་པོ་ལྟ་
བུར་གྱུར་པའོ། །རྡོ་རྗེ་འཆང་བ་ཀུན་གྱི་རྗེ། །ཞེས་པ་རིག་པ་ཆོས་སྐུའོ། །སངས་རྒྱས་ཀུན་གྱི་ཐུགས་ཆེ་བ། །ཞེས་པ་རིག་པ་རང་བྱུང་གི་ཡེ་ཤེས་སོ། །སངས་རྒྱས་ཀུན་གྱི་ཐུགས་ལ་གནས། །ཞེས་པ་བཞུགས་པའི་གནས་ཏེ། ཙིཏྟ་རིན་པོ་ཆེ་ན་གནས། །ཞེས་གསུངས་སོ། །
སངས་རྒྱས་ཀུན་གྱི་སྐུ་ཆེ་བ། །ཞེས་པ་ཡེ་ཤེས་ཀྱི་སྐུ་སྟེ་ལྷུན་གྲུབ་ཆེན་པོའོ། །སངས་རྒྱས་ཀུན་གྱི་གསུང་ཡང་ཡིན། །ཞེས་པ་རང་བྱུང་གི་ཡེ་ཤེས་འགག་པ་མེད་པའི་རྩལ་ལོ། །རྡོ་རྗེ་ཉི་མ་སྣང་བ་ཆེ། །ཞེས་པ་ཐབས་འགག་པ་མེད་པའི་ཡེ་ཤེས་སོ། །རྡོ་རྗེ་ཟླ་བ་དྲི་

49-1-54b

མེད་འོད། །ཅེས་པ་ཤེས་རབ་འགྱུར་བ་མེད་པའི་ཆོས་ཉིད་ངང་གིས་འོད་གསལ་བའོ། །རྡོ་རྗེ་སྐྱིལ་ཀྲུང་རྫོགས་སངས་རྒྱས། །ཞེས་པ་རིག་པ་དང་ཡེ་ཤེས་དེ་གཟུགས་ཀྱི་སྐུར་གྲུབ་པའོ། །སངས་རྒྱས་འགྲོ་བའི་ཆོས་འཛིན་པ། །ཞེས་པ་གདུལ་བྱ་དང་མཐུན་པར་སྣང་བའོ། །
དཔལ་ལྡན་སངས་རྒྱས་པདྨ་སྐྱེས། །ཞེས་པ་སངས་རྒྱས་དང་སེམས་ཅན་རྒྱབ་གྱེས་པའི་དུས་བདག་གཞན་གྱི་དོན་ཐུགས་སུ་ཆུད་པའོ། །དཔལ་རྡོ་རྗེ་སེམས་དཔའ་རྟོགས་པ་སྐད་ཅིག་མ་ལ་གྲུབ་པའོ། །ཀུན་མཁྱེན་ཡེ་ཤེས་མཛོད་འཛིན་པ། །ཞེས་པ་སྟོན་པ་ཐུགས་ཤེས་རབ་
ཡོངས་སུ་རྒྱས་པའི་དུས་ཀུན་མཁྱེན་ཏེ། ཡེ་ཤེས་ཀྱི་མཛོད་དང་ལྡན་པའོ། །རྒྱལ་པོ་སྒྱུ་འཕྲུལ་སྣ་ཚོགས་འཆང་། །ཞེས་པ་དབུའི་གཙུག་ཏོར་ལ་སོགས་པ་ལས་སྤྲུལ་པའི་སྐུ་བསམ་གྱིས་མི་ཁྱབ་པ་འཕྲོས་པའོ། །དངོས་ཐུགས་རྗེ་འགག་པ་མེད་པ་དང་ལྡན་པའོ། །ཆེ་བ་
སངས་རྒྱས་རིག་སྔགས་འཆང་། །ཞེས་པ་གསང་སྔགས་ཐམས་ཅད་ཀྱི་བདག་པོར་གྱུར་པའོ། །རྡོ་རྗེ་རྣོན་པོ་རལ་གྲི་ཆེ། །ཞེས་པ་སོ་སོར་རྟོག་པའི་ཤེས་རབ་བོ། ཐེག་པ་ཆེན་པོ་སྡུག་བསྔལ་གཅོད། །ཅེས་པ་ཐེག་པ་ཆེན་པོའི་འབྲས་བུ་རྟོགས་པས་སྡུག་བསྔལ་ལ་གནས་
པའི་སྐབས་མེད་པའོ། །དོན་རང་ཆས་རྩོལ་བ་དང་བྲལ་བའོ། །མཚོན་ཆ་ཆེན་པོ་རྡོ་རྗེའི་ཆོས། །ཞེས་པ་གཉིས་སུ་མེད་པའི་ཡེ་ཤེས་སོ། །རྡོ་རྗེ་ཟབ་མོ་ཛི་ན་ཛིག །ཅེས་པ་ཉན་ཐོས་ལ་སོགས་པ་ལས་རྒྱལ་བ་ལས་ཀྱང་རྒྱལ་བར་འགྱུར་བའི་གསང་སྔགས་མཆོག་གོ། །རྡོ་རྗེ་བློ་
གྲོས་དོན་ཆེན་རིག །ཅེས་པ་དབྱེར་མེད་པའི་དོན་མི་རྟོག་པའོ། །ཕ་རོལ་ཕྱིན་པ་ཀུན་རྫོགས་པ། །ཞེས་པ་མངའ་བས་ནའོ། །ས་རྣམས་ཀུན་གྱི་རྒྱན་དང་ལྡན། །ཞེས་པ་དང་པོ་རབ་ཏུ་དགའ་བ་ནས་ས་བཅུ་པ་མན་ཆོད་སྤྲུལ་སྐུའི་སའོ། །ཤེས་རབ་ཀྱི་རྩལ་འབྱོངས་པས་
སོ། །བཅུ་གཅིག་ནས་བཅུ་བཞིའི་བར་དུ་ལོངས་སྐུའི་ས་སྟེ་ཆེ་བའི་ཡེ་ཤེས་མཐར་རྫོགས་པས་སྤྲུལ་པའི་སྐུའི་ས་སྟེ། སྤྲུལ་སྐུ་འབྱིན་ནོ། །ཞིང་དག་པ་ངེས་པའི་ས་ལ་སྦྱོར་བའོ། །བཅོ་ལྔ་ནས་བཅུ་དྲུག་ཏུ་མྱ་ངན་ལས་འདས་པའི་ས་སྟེ། ཞི་བའི་ཆོས་ཀྱི་སྐུའི་ཞིང་སྟེ་འབྱེད་པ་

49-1-55a

མེད་པའི་ཤེས་རབ་ལ་གནས་པའོ། །དེ་ཡང་དོན་གྱི་ཕྱོགས་ཆ་རེ་རེ་ནས་བརྩིས་པའོ། །རྣམ་པར་དག་པ་བདག་མེད་ཆོས། །ཞེས་པ་ཆོས་སྐུ་རིན་པོ་ཆེའི་དབུགས་སོ། །ཡང་དག་ཡེ་ཤེས་ཟླ་འོད་བཟང་། །ཞེས་པ་ཤེས་རབ་འགྱུར་བ་མེད་པའི་ཆོས་ཉིད་ཡེ་ཤེས་ཀྱི་སྣང་བ་
དང་བཅས་པའོ། །བརྩོན་ཆེན་སྒྱུ་འཕྲུལ་དྲ་བ་སྟེ། །ཞེས་པ་རྩོལ་བ་དང་བཅས་པའི་བརྩོན་འགྲུས་མིན་ཏེ། ཡེ་ནས་བྱས་ཟིན་པའི་ཆོས་ཏེ་ད་སྡོད་བྱར་མེད་པའོ། །རིག་པ་འགག་པ་མེད་པར་གནས་པས་ནའོ། །རྒྱུད་ཀུན་གྱི་ནི་བདག་པོ་མཆོག །ཅེས་པ་ཚིག་གི་རྒྱུད་ཐམས་ཅད་དོན་གྱི་
རྒྱུད་རིགས་ལས་ཐམས་ཅད་འབྱུང་བས་ན་རིག་པའོ། །རྡོ་རྗེའི་གདན་ནི་མ་ལུས་ལྡན། །ཞེས་པ་ཐམས་ཅད་ཆོས་ཉིད་ཀྱི་ངང་ལ་འདུག་པའོ། །ཡེ་ཤེས་སྐུ་རྣམས་མ་ལུས་ལྡན། །ཞེས་པ་སྐུ་རེ་རེ་ལ་ཡང་ཡེ་ཤེས་ལྔ་ཆར་རྫོགས་པའོ། །དེ་དང་རིག་པ་ལྡན་པའོ། །ཀུན་དུ་བཟང་པོ་
བློ་གྲོས་བཟང་། །ཞེས་པ་སེམས་ཅན་གྱི་བློ་དང་གྲོས་སུ་མཐུན་པ་དྲུག་བཟང་བའོ། །ས་ཡི་སྙིང་པོ་འགྲོ་བ་འཛིན། །ཞེས་པ་བཅུ་བཞི་པ་རྡོ་རྗེ་འཛིན་པའི་ས་ལ་ཐུགས་རྗེ་ལྕགས་ཀྱུས་ཞིང་དག་པ་འཛིན་པའོ། །སངས་རྒྱས་ཀུན་གྱི་སྙིང་པོ་ཅན། །ཞེས་པ་རིག་པའོ། །སྤྲུལ་པའི་
འཁོར་ལོ་སྣ་ཚོགས་འཆང་། །ཞེས་པ་རྡོ་རྗེ་སེམས་དཔའ་ལས་སྤྲུལ་པའི་སྐུ་དྲུག་བྱུང་བའམ་ཡང་ན་ལུས་བར་པ་ནས་སྤྲུལ་པ་འགྱེད་པའོ། །དངོས་པོ་ཀུན་གྱི་རང་བཞིན་མཆོག །ཅེས་པ་རིགས་དྲུག་སྣང་བའོ། །དངོས་པོ་ཀུན་གྱི་རང་བཞིན་འཛིན། །ཅེས་པ་སྤྲུལ་པའི་
སྐུ་དྲུག་གིས་སོ། །རིགས་དྲུག་སོ་སོའི་མཚན་ཉིད་འཛིན་པའོ། །སྐྱེ་མེད་ཆོས་དེ་ཞེས་པ་ཡང་དག་པའི་དོན་སྐྱེ་འགག་མེད་པ་ཁོ་ནའོ། །འདུལ་ཐབས་སུ་སྣ་ཚོགས་པའོ། །ཆོས་ཀུན་ངོ་བོ་ཉིད་འཆང་བ། །ཞེས་པ་སྟོན་པའི་ཐུགས་ལའོ། །ཤེས་རབ་ཆེན་པོའི་སྐད་ཅིག་ལ། །ཆོས་
ཀུན་ཁོང་དུ་ཆུད་པའོ། །ཞེས་པ་རྡོ་རྗེ་སེམས་དཔའ་ལུས་ཀྱི་མཐའ་མེད་རྟོགས་ཀྱིས་སྦུབས་སུ་རྫོགས་པའི་ཚེ་ཐོས་རྟོགས་དུས་གཅིག་ཏུ་འཆར་བའོ། །འཁོར་འདས་ཀྱི་ཆོས་ཐམས་ཅད་དུས་གཅིག་ཏུ་མཁྱེན་པའོ། །ཆོས་ཀུན་མངོན་པར་རྟོགས་པ་སྟེ། །ཞེས་པ་འཁོར་

49-1-55b

འདས་ཀྱི་ཆོས་ཐམས་ཅད་ལྐོག་ཏུ་མ་གྱུར་པར་མངོན་པར་སྣང་ཞིང་རྫོགས་པའོ། །ཐུབ་པ་བློ་མཆོག་འབྱུང་བའི་མཐའ། །ཞེས་པ་སྟོན་པ་བློའི་མཆོག་དང་ལྡན་པས་འབྱུང་བའི་མཐའ་ཆོས་སྐུ་རིན་པོ་ཆེ་རྟོགས་པའོ། །དེ་ཇི་ལྟར་རྟོགས་ཤེ་ན། མི་གཡོ་རབ་ཏུ་དང་བའི་བདག །ཅེས་པ་རིན་པོ་
ཆེའི་རྡོ་རྗེའི་གདན་ལ་དགོངས་པ་མི་གཡོ་བར་གནས་པའོ། །རྫོགས་པའི་སངས་རྒྱས་བྱང་ཆུབ་འཆང་། །ཞེས་པ་རིག་པ་ཡེ་ཤེས་ཀྱི་སྐུ་ལྔ་རིན་པོ་ཆེའི་སྦུབས་ན་ནང་གསལ་མི་འབྲལ་བའོ། །སངས་རྒྱས་ཀུན་གྱི་མངོན་སུམ་པ། །ཞེས་པ་རིག་པ་ཤེས་རབ་ཀྱི་སྐུ་ལ་ཡཱེ་ཤེས་ཀྱི་སྤྱན་མངོན་སུམ་དུ་
སྣང་བའོ། །དངོས་གོང་ཞེ་ན། ཡེ་ཤེས་མེ་ལྕེ་འོད་རབ་གསལ། །ཞེས་པ་རིག་པའི་ངང་ནས་ཡེ་ཤེས་ཀྱི་བུམ་པ་ལྔ་གསལ་ཏེ། དེའི་ངང་ནས་རིག་པ་ཤེས་རབ་ཀྱི་སྐུ་ལྔ་གནས་སོ། །དེ་དག་ཐམས་ཅད་དོན་སོ་སོར་རྟོག་པའི་ཡེ་ཤེས་ཀྱི་སྣང་བའོ། །དེས་ལེའུ་ལྔ་པ་སོ་སོར་རྟོག་པ་ཡེ་ཤེས་ཀྱི་
དོན་བསྟན་པའོ།།      །།ད་ནི་དོན་གྲུབ་པ་ཤེས་བྱ་རྒྱུན་གྱིས་མཉམ་པ། མཉམ་པ་ཉིད་ཀྱི་ཡེ་ཤེས་ཀྱི་དོན་བཤད་པར་བྱ་སྟེ། རཏྣ་པྲ་ས་ར་དུ་པ་ཡ་མ་ལ་མ་ལ། འདོད་པའི་དོན་གྲུབ་དམ་པ་སྟེ། །ཞེས་པ་རིག་པ་ཆོས་ཀྱི་སྐུ་ལས་ཡོན་ཏན་གྱི་སྣང་བ་སྐུ་གཉིས་དུས་གཅིག་ཏུ་གྲུབ་སྟེ། དོན་
སྐུ་གསུམ་འདུ་འབྲལ་མེད་པ་སྐྱེ་འགག་མེད་པ་མཉམ་པ་ཉིད་ཀྱི་ཡེ་ཤེས་སུ་གནས་པའོ། །ངན་སོང་ཐམས་ཅད་རྣམ་སྦྱོང་བ། །ཞེས་པ་ཐུགས་རྗེ་འབྱུང་བའི་སྐུ་གསུམ་མོ། །མགོན་པོ་སེམས་ཅན་ཀུན་གྱི་མཆོག །ཅེས་པ་སྤྲུལ་པའི་སྐུ་དེས་སེམས་ཅན་དྲུག་གི་མགོན་དང་སྐྱབས་ཀྱི་
མཆོག་ཏུ་གྱུར་པའོ། །སེམས་ཅན་ཐམས་ཅད་རབ་གྲོལ་བྱེད། །ཅེས་པ་སྤྲུལ་སྐུས་སེམས་ཅན་འཁོར་བ་ལས་གྲོལ་ཞེས་པའོ། །ཉོན་མོངས་གཡུལ་དུ་གཅིག་དཔའ་བ། །ཞེས་པ་རིག་པའི་ཡེ་ཤེས་ལ་ཉོན་མོངས་པ་མ་གྲུབ་པས་གཡུལ་བཟློག་པའོ། །མི་ཤེས་དགྲ་ཡི་དྲེགས་
པ་འཇོམས། །ཞེས་པ་མ་རིག་པ་དང་དུག་ལྔ་དང་གཟུང་འཛིན་དང་སྣང་གྲགས་ཐམས་ཅད་འཇོམས་པའོ། །དཔལ་ལྡན་བློ་དང་རྟོགས་པར་ལྡན། །ཞེས་པ་མགོན་པོ་རྡོ་རྗེ་སེམས་དཔའ་དེ་བློ་དང་ལྡན་པས་གྱུར་པའོ། །བརྟན་པོ་མི་སྡུག་གཟུགས་འཆང་བ། །ཞེས་པ་གཞི་

49-1-56a

མི་འགྱུར་བ་ལས་ཡོན་ཏན་མི་འགག་པ་འཆར་ནུས་པའོ། །ལག་པ་བརྒྱ་པོ་ཀུན་བསྐྱོད་པ། །ཞེས་པ་རིག་པའི་རྩལ་ལོ། །གོམ་པའི་སྟོབས་ཀྱིས་གར་བྱེད་པ། །ཞེས་པ་ཐབས་འགག་པ་མེད་པའི་ཡེ་ཤེས་ཀྱི་སྣང་བ་འོད་དུ་གསལ་བའོ། །དཔལ་ལྡན་ལག་པ་
བརྒྱས་གང་ལ། །ཞེས་པ་རྩལ་ལམ་སྟོབས་མ་འགགས་པའོ། །ནམ་མཁའ་ཁྱབ་པར་གར་བྱེད་པ། །ཞེས་པ་རིག་པ་འོད་ཀྱི་ཁང་པ་ཅན་འོད་མཐའ་མེད་པར་འགྱུར་བའོ། །ས་ཡི་དཀྱིལ་འཁོར་གཞི་ཡི་ཁྱོན། །རྐང་པ་ཡ་གཅིག་མཐིལ་གྱིས་གནོན། །ཞེས་པ་ཆོས་ཉིད་ས་
གཞི་དང་འདྲ་བ་དེ་རྐང་པ་ཡ་གཅིག་གི་མཐིལ་ཉིད་ཀྱིས་གནོན་པའོ། །དངོས་རིག་པའི་ཡེ་ཤེས་ནུབ་པ་མེད་པ་ཆེན་པོའོ། །རྐང་མཐེབ་སེན་མོའི་ཁྱོན་གྱིས་ཀྱང་། །ཚངས་པའི་ཡུལ་ས་རྩེ་ནས་གནོན། །ཞེས་པ་རིག་པ་ཡེ་ཤེས་ཀྱི་སྣང་བར་མ་གྱུར་པ་མེད་པའོ། །དོན་གཅིག་ཅེས་པ་
འཁོར་འདས་ཐམས་ཅད་དོ། །གང་དུ་གཅིག་ན་གཉིས་མེད་དུའོ། །གང་དུ་གཅིག་ན་ཆོས་ཀྱི་དོན། །ཞེས་པའོ། །དམ་པའི་དོན་ཏེ་འཇིགས་པ་མེད། །ཅེས་པ་མི་རྟོག་པའི་ཡེ་ཤེས་ཡིན་པས་འཁོར་བའི་ཆོས་ལ་ཉམ་མི་ང་བའོ། །རྣམ་རིག་སྣ་ཚོགས་གཟུགས་དོན་ཅན། །ཞེས་
པ་ཐམས་ཅད་རིག་པའི་ཡེ་ཤེས་རང་ཤར་ཡིན་ཞེས་པའོ། །རྣམ་ཤེས་སྣ་ཚོགས་རྒྱུད་དང་ལྡན། །ཞེས་པ་སྟོན་པས་གོང་མའི་དོན་ཐུགས་ལ་གསལ་ཞེས་པའོ། །དངོས་དོན་མ་ལུས་རྣམས་ལ་དགའ། །ཞེས་པ་གཉིས་སུ་མེད་པར་རྟོགས་པས་སོ། །སྟོང་པ་ཉིད་དགའ་
འདོད་ཆགས་བློ། །ཞེས་པ་ཆོས་ཉིད་ཞི་བ་དང་ཆོས་སྐུ་དངོས་མེད་གཉིས་འདུ་འབྲལ་མེད་པར་རྟོགས་པའོ། །ཐུགས་རྗེ་ཆགས་པ་བདག་ཉིད་དུ་གནས་འགྲོ་བའི་ཉོན་མོངས་པ་རང་རྒྱུད་ལ་མི་མངའ་བས་སྲིད་པའི་འདོད་ཆགས་སྤངས་པ་སྟེ་ཞེས་བྱའོ། །སྲིད་གསུམ་དགའ་བ་ཆེན་
པོ་པ། །ཞེས་པ་ཐུགས་རྗེས་ཏེ་སྲིད་པ་གསུམ་གྱི་དོན་ལ་དགའ་བའོ། །དོན་ལ་སྤྱོད་པའོ། །སྤྲིན་དཀར་དག་པ་བཞིན་དུ་དཀར། །ཞེས་པ་འགྲོ་བའི་དོན་མཛད་ཀྱང་འཁོར་བའི་སྐྱོན་གྱིས་མ་གོས་པའོ། །འོད་བཟང་སྟོན་ཀའི་ཟླ་བའི་འོད། །ཅེས་པ་གང་གི་སྐྱོན་དང་བྲལ་བའི་དོན་དེ་ཉིད་

49-1-56b

ཤེས་རབ་འགག་པ་མེད་པའི་ཡེ་ཤེས་སུ་གནས་པའོ། །ཉི་མ་འཆར་ཀའི་དཀྱིལ་ལྟར་མཛེས། །ཞེས་པ་ཡེ་ཤེས་ཀྱི་སྣང་བ་ཆེན་པོ་དེ་ཡང་གསལ་བ་འཚེར་བ་དང་བའོ། །སེན་མོའི་འོད་ནི་ཤས་ཆེར་དམར། །ཞེས་པ་ཐུགས་རྗེ་ཆགས་པའི་བདག་ཉིད་དོ། །ཡང་ན་བདེ་བར་གཤེགས་པའི་
མཚན་དཔེའི་ཁྱད་པར་རོ། །ཅོད་པན་བཟང་པོ་མཐོན་ཀའི་རྩེ། །ཞེས་པ་ཡེ་ཤེས་ལྔའི་ཅོད་པན་ལ་ནུབ་པ་མེད་པའོ། །དངོས་རིག་པའི་རྩེ་ལ་ཡེ་ཤེས་གསལ་བའོ། །སྐྲ་མཆོག་མཐོན་ཀ་ཆེན་པོ་ཅན། །ཞེས་པ་ཡེ་ཤེས་ཀྱི་སྣང་བ་མ་འགགས་པར་གསལ་བའོ། །ནོར་བུ་ཆེན་པོ་འོད་
ཆགས་དཔལ། །ཞེས་པ་རིག་པའི་ཡེ་ཤེས་འགག་པ་མེད་པའི་ཐུགས་རྗེ་དང་ལྡན་པའོ། །སངས་རྒྱས་སྤྲུལ་པའི་རྒྱན་དང་ལྡན། །ཞེས་པ་ཆོས་སྐུའི་སངས་རྒྱས་ལ་གཟུགས་སྐུས་བརྒྱན་པའོ། །གཟུགས་སྐུ་ལ་སྤྲུལ་སྐུས་བརྒྱན་པའོ། །འཇིག་རྟེན་ཁམས་བརྒྱ་ཀུན་བསྐྱོད་པ། །
ཞེས་པ་ཐུགས་རྗེ་མ་འགགས་པ་འཁྲུལ་པའི་སྣང་བ་དག་པ་ཡེ་ཤེས་ཀྱི་སྣང་བར་བསྒྱུར་བའོ། །རྫུ་འཕྲུལ་རྐང་པའི་སྟོབས་ཆེན་ལྡན། །ཞེས་པ་ས་ལམ་རིམ་པས་བགྲོད་མི་དགོས་པར་ཡེ་ཤེས་ཀྱི་རླུང་གིས་སྐད་ཅིག་མ་ལ་བྱོན་པའོ། །དེ་ཉིད་དྲན་པ་ཆེན་པོ་འཆང་། །ཞེས་པ་སྔར་འདྲིས་
པ་ཕྱིས་ཤེས་པ་ལྟ་བུའོ། །དྲན་པ་བཞི་པོ་ཏིང་འཛིན་རྒྱལ། །ཞེས་པ་དུས་དེར་མཐོང་བའི་ཡུལ་ལ་ཤེས་པའི་དྲན་པ་སད། དེ་ཡང་ཤེས་རབ་ཀྱི་ཤེས་པ་སྐྱེ་ལུགས་དང་རབ་དང་འབྲིང་དང་ཐ་མའི་བྱེ་བྲག་གིས་དྲན་པ་སད་པའོ། །བྱང་ཆུབ་ཡན་ལག་ཅེས་པ་དུས་དེར་སྐུའི་སྣང་བ་གསལ་
བའོ། །ཡན་ལག་ཅེས་པ་གཙོ་བོའི་རྩལ་ལོ། །མེ་ཏོག་སྤོས་ཞེས་པ་ལྷ་མོ་མེ་ཏོག་མ་དང་སྤོས་མེ་མ་ལ་སོགས་པའི་ཚོམ་བུའི་དཀྱིལ་འཁོར་ལྔ་གསལ་བའོ། །དེ་བཞིན་གཤེགས་པའི་ཡོན་ཏན་མཚོ། །ཞེས་པ་རིགས་ལྔའི་ཡོན་ཏན་སྐུ་བཞི་བཅུ་རྩ་གཉིས་སུ་སྣང་ལ་དེ་ཡང་
ཆོས་ཉིད་མི་གཡོ་བའི་ངང་ལ་གནས་པའོ། །ལམ་གྱི་ཡན་ལག་བརྒྱད་ཚུལ་རིག །འདུ་འབྲལ་མེད་པའི་དགོངས་པ་སྟེ། །དེ་ཡང་ཡན་ལག་ཏུ་བསླབ་ཐབས་བཞི་དང་དུས་བཞིར་སྦྱར་བའོ། །ཡང་དག་སངས་རྒྱས་ལམ་རིག་པ། །ཞེས་པ་སྒོམ་དུ་མེད་པའི་དགོངས་པའོ། །

49-1-57a

སེམས་ཅན་ཀུན་ལ་ཤས་ཆེར་ཆགས། །ཞེས་པ་རིག་པ་ལ་ཁྱད་པར་མེད་པའི་གནད་ཀྱིས་སངས་རྒྱས་ཀྱི་དགོངས་པ་སེམས་ཅན་ལ་ཡང་ཡོད་པའོ། །ཡང་ན་སྤྲུལ་སྐུའོ། །ནམ་མཁའ་ལྟ་བུར་ཆགས་པ་མེད། །ཅེས་པ་ཆགས་བྲལ་ཆགས་མེད་གཉིས་མེད་པར་ནམ་
མཁའ་ལྟ་བུར་ཡེ་ནས་གནས་པའོ། །སེམས་ཅན་ཀུན་གྱི་ཡིད་ལ་འཇུག །ཅེས་པ་སེམས་ཅན་གྱི་ཡིད་དང་བུདྡྷའི་ཐུགས་གཉིས་སུ་མེད་པར་ཡང་ན་སྤྲུལ་སྐུས་མཐུན་པར་སྣང་བའོ། །སེམས་ཅན་ཀུན་གྱི་ཡིད་ལྟར་མགྱོགས། །ཞེས་པ་ཐུགས་རྗེའི་རྩལ་ཐོགས་པ་མེད་པའོ། །སེམས་
ཅན་ཀུན་གྱི་དབང་དོན་ཤེས། །ཞེས་པ་བློ་རབ་འབྲིང་གི་བྱེ་བྲག་ཤེས་པའོ། །སེམས་ཅན་ཀུན་གྱི་ཡིད་འཕྲོག་པ། །ཞེས་པ་སྤྲུལ་པའི་སྐུས་འདུལ་བའི་དོན་དེ་ལ་མཛེས་ཤིང་འཚམ་པར་བསྟན་ནས་དོན་བྱེད་པའོ། །ཕུང་པོ་ལྔ་དོན་དེ་ཉིད་ཤེས། །ཞེས་པ་ཕུང་པོ་ལྔའི་དོན་ནམ་དེ་བཞིན་
ཉིད་ཤེས་པའོ། །རྣམ་དག་ཕུང་པོ་ལྔ་འཆང་བ། །ཞེས་པ་རིག་པ་དེ་ཡེ་ཤེས་སྒྱུ་མ་ལྔ་དང་མི་འབྲལ་བའོ། །ངེས་འབྱུང་ཀུན་གྱི་མཐའ་ལ་གནས། །ཞེས་པ་འོག་མའི་ངེས་འབྱེད་ཆ་བཞི་ལས་གྲོལ་ཏེ། དོན་མི་འགྱུར་བ་སྐུ་དང་ཡེ་ཤེས་ཀྱི་མཐའ་ལ་གནས་པའོ། །ངེས་པར་འབྱུང་བ་ཀུན་
ལ་མཁས། །ཞེས་པ་ནི་སྟོན་པའོ། །ངེས་འབྱུང་ཀུན་གྱི་ལམ་ལ་གནས། །ཞེས་པ་མི་འབྲལ་བའོ། །ངེས་པར་འབྱུང་བ་ཀུན་སྟོན་པ། །ཞེས་པ་ངེས་པར་འབྱུང་བ་ལ་གཉིས་ཏེ། འཁོར་བ་དང་མྱ་ངན་ལས་འདས་པའོ། །དེ་ཡང་ལྐོག་ཏུ་མ་གྱུར་པར་གསལ་ཞིང་སྣང་བའོ། །ཡན་ལག་
བཅུ་གཉིས་སྲིད་རྩ་བཏོན། །ཞེས་པ། དང་པོ་ལུས་ཀྱི་མཐའ་མ་རྫོགས་པར་ཤེས་བྱའི་རྩལ་མ་རྫོགས་ཏེ། མཐོང་བའི་ཡུལ་ལ་ཤེས་པའི་དྲན་པ་སད་མ་ནུས་པས་མ་རིག་པ་དངོས་སུ་མེད་པ་ལ་ཉམས་པ་ཡོད་པའོ། །དེ་ལ་མ་རིག་པ་ལ་སོགས་པ་རྟེན་འབྲེལ་བཅུ་གཉིས་སུ་འཁྲུལ་ལོ། །འཁྲུལ་
པའི་ཡན་ལག་སྲིད་གསུམ་རྩེ་མོའོ། །དག་པ་རྣམ་པ་བཅུ་གཉིས་འཆང་། །ཞེས་པ་མ་རིག་པ་ལ་སོགས་པ་དག་ནས་རྟོགས་པ་འཆང་བ་སྟེ་སྟོན་པའོ། །བདེན་བཞིའི་ཚུལ་གྱི་རྣམ་པ་ཅན། །ཞེས་པ་ངོ་སྤྲོད་བཞིའོ། །ཤེས་པ་བརྒྱད་པོ་རྟོགས་པ་འཆང་། །ཞེས་པ་རྣམ་པར་ཤེས་པའི་

49-1-57b

ཚོགས་བརྒྱད་དེ། དེའི་དོན་རིག་པའི་རྩལ་ཤེས་རབ་དང་། དེའི་ཡོན་ཏན་སྐུ་དང་དེའི་ཡོན་ཏན་སྒོ་ལྔའི་ཡུལ་དང་དེ་ལས་རྣམ་པར་ཤེས་པའོ། །རང་ཤར་རང་གྲོལ་ཤེས་པའོ། །བདེན་དོན་རྣམ་པ་བཅུ་གཉིས་ལྡན། །ཞེས་པ་བདེན་བཞིའི་གོང་བཞིན་མཐོང་བ་ཡུལ་གྱི་གནས་དང་། བསྟན་
པ་ཚིག་གི་གཟེར་བཞི་དང་མཐར་ཕྱིན་པའི་འབྲས་བུ་དང་བཞིའོ། །དེ་ཉིད་རྣམ་པ་བཅུ་དྲུག་རིག །ཅེས་པ་མཐར་ཕྱིན་པའི་འབྲས་བུའི་སྐབས་སུ་རེ་རེ་ལ་ཡང་མུ་བཞིར་ཕྱེ་བ་སྟེ་དེའི་སྐབས་སུ་ཐིག་ལེ་ཉག་གཅིག་གི་ཨ་ཏི་དང་། ཐིག་ལེ་ཉག་གཅིག་གི་མ་ཧཱ་དང་། ཐིག་ལེ་ཉག་གཅིག་གི་ཨ་ནུ་
དང་། ཐིག་ལེ་ཉག་གཅིག་གི་དངོས་པོའོ། །རྣམ་པ་ཉི་ཤུས་བྱང་ཆུབ་པ། །ཞེས་པ་དང་པོ་རིག་པའི་རྩལ་འབྱུང་བ་ལྔ། དེ་ལས་ཐིག་ལེ་ལྔ། དེ་ལས་རིགས་ལྔའི་སངས་རྒྱས་སྐུར་གྲུབ་པས་ནའོ། །རྣམ་པར་སངས་རྒྱས་ཀུན་རིག་མཆོག །ཅེས་པ་གོང་མའི་རྣམ་པ་ཉི་ཤུའོ། །དེ་ཡང་ཀུན་
རིག་གོ་ཞིང་རྟོགས་པའོ། །སངས་རྒྱས་ཀུན་གྱི་སྤྲུལ་པའི་སྐུ། །བྱེ་བ་དཔག་མེད་འགྱེད་པ་པོ། །ཞེས་པ་ལོངས་སྐུ་ཡབ་ཡུམ་གྱི་ཞལ་གྱི་བར་ནས་ཡི་གེ་དྲུག་པའི་འོད་ཟེར་འཕྲོ་བའོ། །སྐད་ཅིག་ཐམས་ཅད་མངོན་པར་རྟོགས། །ཞེས་པ་སྐད་ཅིག་མ་ལ་སྣང་བ་འཆར་ནུབ་དང་སྐྱེ་འགག་
མེད་པའི་དོན་རྟོགས་པའོ། །སེམས་ཀྱི་སྐད་ཅིག་དོན་ཀུན་རིག །ཅེས་པ་རིག་པའི་རྩལ་དུ་སེམས་འཆར་ལུགས་དང་། སེམས་དེ་རང་གི་གནས་ལ་སོགས་པའི་ཆོས་ལྔར་རྟོགས་ཤིང་རིག་པའོ། །ཐེག་པ་སྣ་ཚོགས་ཐབས་ཚུལ་གྱིས། །འགྲོ་བའི་དོན་ལ་རྟོགས་པ་པོ། །ཞེས་
པ་སྤྲུལ་པའི་སྐུས་འགྲོ་བའི་དོན་མཛད་པ་ནི་གདུལ་བྱའི་ཡུལ་དང་སྦྱར་ནས་འདུལ་ཐབས་ཐེག་པ་སྣ་ཚོགས་གསུངས་པའོ། །ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་པ་གོང་གི་ཐེག་པ་དེ་དག་ཀྱང་གསུམ་དུ་འབྱུང་སྟེ། ཉན་
ཐོས་རང་རྒྱལ་བྱང་ཆུབ་སེམས་དཔའོ། །གཅིག་གི་འབྲས་བུར་གནས་ཏེ་གསང་སྔགས་ཡང་དག་པའི་འབྲས་བུ་ཁོ་ནའོ། །ཉོན་མོངས་ཁམས་རྣམས་དག་པའི་བདག །ཅེས་པ་སྟོན་པ་སྤྲུལ་པའི་སྐུའི་བདག་པོ་མཛད་ཀྱང་ཉོན་མོངས་པས་གོས་པ་མེད་དེ། དོན་གྱི་

49-1-58a

དགོངས་པ་དག་པའི་བདག་ཉིད་དུ་གནས་པའོ། །ལས་ཀྱི་ཁམས་ནི་ཟད་བྱེད་པ། །ཞེས་པ་སྟོན་པ་སྤྲུལ་པའི་སྐུས་འགྲོ་བའི་སྐུར་དོན་མཛད་པའི་དགོངས་པ་དང་ལྡན་པའོ། །ཆུ་བོ་རྒྱ་མཚོ་ཀུན་ལས་རྒལ། །ཞེས་པ་འདོད་པ་དང་སྲིད་པ་དང་ལྟ་བ་དང་མ་རིག་
པའི་ཆུ་བོ་དང་བཞི་ལས་འདས་པའི་དོན་དེ་སྟོན་པ་དེའོ། །སྦྱོར་བའི་དགོན་པ་ལས་རྒལ་བ། །ཞེས་པ་སྲིད་པ་ལ་སོགས་པ་བཞི་ལ་ངེས་པར་གནས་པ་ལས་སྟོན་པ་ངེས་པར་འབྱུང་བའོ། །ཉོན་མོངས་ཉེ་བ་ཀུན་ཉོན་མོངས། །བག་ཆགས་བཅས་པ་གཏན་སྤངས་པ། །ཞེས་པ་
སྟོན་པས་དུག་ལྔ་ཁོང་ཁྲོ་ལ་སོགས་པར་བཅས་པ། ཡེ་ཤེས་ཆེན་པོར་གྲོལ་ཞིང་བག་ཆགས་ངང་གིས་མི་གནས་ཏེ། རིག་པ་ཀ་ནས་དག་པར་མཁྱེན་ཅིང་གནས་པའོ། །སྙིང་རྗེ་ཆེན་པོ་ཤེས་རབ་ཐབས། །ཞེས་པ་རིག་པ་འགག་པ་མེད་པ་བྱ་བརྩལ་མི་མངའ་བའོ། །དོན་ཡོད་
འགྲོ་བའི་དོན་བྱེད་པ། །ཞེས་པ་གོང་མའི་ཐབས་ཤེས་རབ་ཀྱི་བདག་ཉིད་དེས་སོ། །འདུ་ཤེས་ཀུན་གྱི་དོན་སྤངས་ཤིང་། །ཞེས་པ་དོན་བྱེད་པ་དང་བྱ་བ་དང་བྱེད་པ་པོའི་རྟོག་པ་རང་རྒྱུད་ལ་མི་མངའ་བའོ། །རྣམ་ཤེས་དོན་ནི་འགག་པ་མེད། །ཅེས་པ་དོན་བྱས་ནས་རྣམ་པར་ཤེས་
པའི་ཚོགས་བརྒྱད་ལས་གྲོལ་བར་བྱེད་པའོ། །སེམས་ཅན་ཀུན་ཡིད་ཡུལ་དང་ལྡན། །ཞེས་པ་མངོན་པར་ཤེས་པ་ལྔ་མངའ་བའོ། །སངས་རྒྱས་ཀུན་གྱི་ཐུགས་རིག་པ། །ཞེས་པ་དང་། སེམས་ཅན་ཀུན་གྱི་ཡིད་ལ་གནས། །ཞེས་པ་སངས་རྒྱས་ཀྱི་ཐུགས་ནི་དངོས་མེད་ཀྱི་ཡེ་ཤེས་
རིག་པ་ཡིན་ལ་དེ་འགྲོ་བའི་ཡིད་ལ་གནས་པའོ། །དེ་དག་སེམས་དང་མཐུན་པར་འཇུག །ཅེས་པ་སྤྲུལ་སྐུས་སེམས་ཅན་གྱི་སེམས་ཤེས་པས་བསམ་པ་ལྟར་བྱེད་པའོ། །སེམས་ཅན་ཀུན་ཡིད་ཚིམ་པར་བྱེད། །ཅེས་པ་བསམ་པ་བསྒྲུབ་པའོ། །སེམས་ཅན་ཀུན་གྱི་ཡིད་དགའ་བ། །
ཞེས་པ་བསམ་པ་འགྲུབ་པས་དགའ་སྟེ་དངོས་གང་ཞེ་ན། གྲུབ་པ་མཐར་ཕྱིན་འཁྲུལ་པ་མེད། །ཅེས་པས་སོ། །དེ་ཡང་གང་ཞེ་ན། རིན་པོ་ཆེའི་སྦུབས་ནའོ། །ནོར་བ་ཐམས་ཅད་རྣམ་པར་སྤངས། །ཞེས་པ་གོལ་ས་དང་བྲལ་བའོ། །དོན་གསུམ་ཐེ་ཚོམ་མེད་པའི་བློ། །ཞེས་པ་སྒྲའི་བྱེ་བྲག་

49-1-58b

འགའ་ལ་འཇུག་སྟེ་འདིར་ངོ་སྤྲོད་གསུམ་ལ་བྱའོ། །དེ་ཡང་ངོ་སྤྲད་པས་ཐེ་ཚོམ་དང་བྲལ་བའོ། །ཀུན་དོན་བྱེད་ཅེས་པ་འཁོར་འདས་ཀུན་གྱིའོ། །ཡོན་ཏན་ཞེས་པ་ཐམས་ཅད་ཡོན་ཏན་དུ་ཤར་བའོ། །གསུམ་གྱི་བདག་ཅེས་པ་སྐུ་གསུམ་གྱི་བདག་པོའོ། །ཕུང་པོ་ལྔ་དོན་དུས་གསུམ་དུ། །
ཞེས་པ་ཕུང་པོ་ལྔའི་དོན་དུས་གསུམ་དུ་མཛད་ཅིང་གནས་པའོ། །དེ་ཡང་ཇི་ལྟར་གནས་ན་ཡེ་ཤེས་ཀྱི་སྐུ་རང་གིས་རྣམ་པར་དག་པར་གནས་སོ། །སྐད་ཅིག་ཐམས་ཅད་བྱེ་བྲག་ཕྱེད། །ཅེས་པ་ད་ལྟར་སྐད་ཅིག་མ་གཅིག་ཡིན་ཏེ། ཕྱིས་ཡེ་ཤེས་སྐྱེ་བ་སྟེ། དེ་ནི་དབང་པོ་རབ་འབྲིང་གི་
གྲོལ་ལུགས་སོ། །དེ་ལས་ལྷག་པ་ནི་སྐད་ཅིག་གཅིག་གིས་རྫོགས་སངས་རྒྱས་ཏེ་རབ་བོ། །སངས་རྒྱས་ཀུན་གྱི་རང་བཞིན་འཆང་། །ཞེས་པ་ལོངས་སྐུ་བཞི་བཅུ་རྩ་གཉིས་སོ། །ལུས་མེད་ལུས་ཏེ་ལུས་ཀྱི་མཆོག །ཅེས་པ་བག་ཆགས་ཀྱི་ལུས་མི་གནས་ཏེ། ཡེ་ཤེས་ཀྱི་སྐུའི་མཆོག་ཏུ་
གནས་པའོ། །ལུས་ཀྱི་མཐའ་ནི་རྟོགས་པ་པོ། །ཞེས་པ་རིན་པོ་ཆེ་ལྟ་བུའི་སྐུ་རྟོགས་པའོ། །གཟུགས་རྣམས་སྣ་ཚོགས་ཀུན་དུ་སྟོན། །ཞེས་པ་སྤྲུལ་པའི་སྐུ་འབྱིན་པའོ། །ནོར་བུ་ཆེན་པོ་རིན་ཆེན་ཏོག །ཅེས་པ་དེ་ནས་སླར་མྱ་ངན་ལས་འདས་ཏེ། ཆོས་སྐུ་རིན་པོ་ཆེའི་ངང་ལ་གནས་ཏེ། དགོངས་
པ་ཕྱིས་མི་འགྱུར་བར་གནས་པའོ། །དེ་ཡན་ཆད་དུ་ལེའུ་དྲུག་པ་གཞི་སྐྱེ་འགག་མེད་པ་མཉམ་པ་ཉིད་དུ་གནས་པས་མཉམ་པ་ཉིད་ཀྱི་ཡེ་ཤེས་ཀྱི་དོན་བསྟན་པའོ།།      །།ད་ནི་དོན་བདུན་པ་ཤེས་བྱ་ཐོགས་པ་མེད་པ་བྱ་བ་གྲུབ་པའི་ཡེ་ཤེས་ཀྱི་དོན་བསྟན་པར་བྱ་སྟེ། ཨ་ཧ་ཛྙཱ་ན་སརྦ་ཀརྨ་
ཙཀྲའོ། །སངས་རྒྱས་ཀུན་གྱིས་རྟོགས་བྱ་བ། །ཞེས་པ་དུས་གསུམ་གྱི་སངས་རྒྱས་ཀྱིས་རྟོགས་པར་བྱ་བ་ནི་རང་རིག་པའི་ཡེ་ཤེས་ཉིད་ཡིན་ཏེ། དེ་རང་ལ་རང་ཆས་སུ་གནས་པའོ། །སངས་རྒྱས་བྱང་ཆུབ་བླ་ན་མེད། །ཅེས་པ་རང་བཞིན་རང་ཆས་ཡིན་ཏེ། དེའི་གོང་ན་གཞན་མེད་
བླ་ན་མེད་པའོ། །ལོགས་ན་མེད་གུད་ན་མེད་པའོ། །གསང་སྔགས་ལས་བྱུང་ཡི་གེ་མེད། །ཅེས་པ་ཚིག་དང་ཡི་གེ་ཐམས་ཅད་གསང་སྔགས་ཀྱི་དོན་ངོ་བོ་ལས་བྱུང་བ་ཡིན་ལ། །དེ་ཉིད་རང་ཚིག་དང་ཡི་གེ་ལས་འདས་པའོ། །གསང་སྔགས་ཆེན་པོ་རིགས་གསུམ་པ། །ཞེས་པ་

49-1-59a

མཚོན་བྱེད་ཚིག་གི་སྒྲོན་མ་དེས་ཕྱི་ནང་གསུམ་དུ་བསྟན་པའོ། །གསང་སྔགས་དོན་ཀུན་སྐྱེད་པ་པོ། །ཞེས་པ་གཞི་གསང་སྔགས་ཀྱི་རྩ་བ་ལས། གསང་སྔགས་སྤྲོས་པ་དེ་ཉིད་ཀྱིས་དེ་ཉིད་མཚོན་ཅིང་རྟོགས་པ་སྐྱེད་པའོ། །ཐིག་ལེ་ཆེན་པོ་ཡི་གེ་མེད། །ཅེས་
པ་རིག་པ་རང་འབྱུང་གི་ཡེ་ཤེས་འགག་པ་མེད་པ་ལ་གང་གི་ཡང་སྒྲ་དང་ཐ་སྙད་མི་གནས་པའོ། །སྟོང་པ་ཆེན་པོ་ཡི་གེ་ལྔ། །ཞེས་པ་ཆོས་སྐུ་དངོས་མེད་ཀྱི་ངང་ནས་རིག་པ་ཡི་གེ་རྣམ་པ་ལྔ་འོད་དུ་གསལ་བའོ། །དེ་མཚོན་པ་ཨ་ལྟ་བུའོ། །ཐིག་ལེ་སྟོང་པ་ཡི་གེ་བརྒྱ། །ཞེས་པ་སྟོབས་
དང་ཐབས་མ་འགགས་པའི་ཡི་གེ་བརྒྱ་ཞེས་བྱ་སྟེ། འཁོར་འདས་ཀྱི་ཆོས་བརྗོད་བྱ་རྗོད་བྱེད་སྣ་ཚོགས་སུ་ཤར་བའོ། །དེ་ཡང་ཡི་གེ་བརྒྱར་གྲངས་བཅད་པ་ནི་མེད་ཀྱི་མང་བའི་ཐ་ཚིག་གོ། །རྣམ་པ་ཀུན་ལྡན་རྣམ་པ་མེད། །ཅེས་པ་ཡོན་ཏན་སྐུ་གསུམ་གྱི་རྣམ་པ་དང་ལྡན་ཞིང་མཚན་མར་མི་
གནས་པའོ། །བཅུ་དྲུག་ཕྱེད་ཕྱིད་ཐིག་ལེ་ཅན། །ཞེས་བྱ་བ་དེ་ལ་གཉིས་ཏེ་ལོངས་སྐུ་རེ་རེ་ལ་སེམས་དཔའ་སེམས་མ་བཞི་བཞིས་བསྐོར་བས། ཕྱོགས་བཞིའི་ཚོམ་བུ་སྟེ་འཁོར་རོ། །དེ་ཡང་བཅུ་དྲུག་ནི་སེམས་དཔའ་སེམས་མ་བཅུ་དྲུག་གོ། །ཕྱེད་ནི་ཕོ་མོ་བརྒྱད་དུ་བཅད་པའོ། །ཕྱེད་ཕྱི་
མ་ནི་བཞི་བཞིས་བསྐོར་བའོ། །སྤྲུལ་སྐུའི་སྐབས་སུ་དེ་ལ་ཡང་འདི་ལྟར་བསྟན་པར་བྱ་སྟེ། རང་འབྱུང་དབྱིངས་ཀྱི་ཐིག་ལེ་ལས་རྩལ་ནི་ཕྱི་དང་ནང་དུ་ཤར་ཏེ། ནང་དུ་རིག་པའི་ཡེ་ཤེས་དང་སེམས་སུ་སྣང་བའོ། །ཕྱི་བདེ་ཆེན་གསང་བའི་ཐིག་ལེ་ལས་བདེ་བ་ཆེན་པོ་འོད་འབར་བའི་ཐིག་
ལེར་བྱུང་། དེ་ལས་བདེ་བ་ཆེན་པོ་ཡོངས་ལ་ཁྱབ་པའི་སྐབས་སུ་བཅུ་དྲུག་གི་ཕྱེད་བརྒྱད། དེའི་ཕྱེད་བཞི་སྟེ། གཅིག་པདྨར་ཤར། གཅིག་མཉམ། གཅིག་བདེ་གསལ་མི་རྟོག་པའོ། །གཅིག་གཡོ་ལ་མ་ཐོགས་པའི་སྐབས་སུ་ཆོས་སྐུའི་བདེ་བ་ངོས་ཟིན་ཅིང་ཐུགས་རྗེ་སྤྲུལ་
པའི་སྐུ་འབྱིན་པའོ། །ཡན་ལག་མེད་པའི་རྩིས་ལས་འདས། །ཞེས་པ་ཆོས་སྐུ་སྤྲོས་བྲལ་ཆེན་པོ་གོང་མའི་རྩིས་དང་གྲངས་དེ་མི་གནས་ཞེས་པའོ། །བསམ་གཏན་བཞི་ཡི་རྩེ་མོ་ཅན། །ཞེས་པ་འཇིག་རྟེན་པའི་བསམ་གཏན་ལས་འདས་ཏེ། ངང་དང་རང་བཞིན་བདག་ཉིད་

49-1-59b

ཆེན་པོ་ལྷུན་གྱིས་གྲུབ་པའོ། །དེའི་དོན་ལ་གནས་པའོ། །བསམ་གཏན་ཡན་ལག་ཀུན་ཤེས་ཤིང་། །ཞེས་པ་བསྒོམ་པ་བསླང་ཐབས་དང་བསྒོམ་པའི་ས་མཚམས་སོ། །ཏིང་འཛིན་རིག་དང་རྒྱུད་རིག་པ། །ཞེས་པ་དེ་བཞིན་གཤེགས་པའི་བསམ་གཏན་ནི་རང་རིག་རྒྱུད་ལ་གསལ་ཞིང་
རྟོགས་པའོ། །ཏིང་འཛིན་ལུས་ཅན་ལུས་ཀྱི་མཆོག །ཅེས་པ་ཏིང་ངེ་འཛིན་མཐར་ཕྱིན་པའོ། །ལོངས་སྤྱོད་རྫོགས་སྐུ་ཡི་རྒྱལ། །ཞེས་པ་ཡར་ཞིང་དག་ཅིང་མར་འཁོར་སྟོན་པའོ། །སྐུ་བཞི་བཅུ་རྩ་གཉིས་ཚོམ་བུ་དང་བཅས་པར་སྣང་ངོ་། །སྤྲུལ་པའི་སྐུ་སྟེ་སྐུ་ཡི་མཆོག །ཅེས་པ་
ལོངས་སྐུའི་གསུང་གི་ཟེར་ལ་རོལ་པའི་ཐུབ་པ་དྲུག་སྟེ། འགྲོ་དྲུག་གི་ནང་ནས་མཆོག་ཏུ་གྱུར་པའོ། །སངས་རྒྱས་སྤྲུལ་པའི་རྒྱུད་འཆང་བ། །ཞེས་པ་སྤྲུལ་སྐུ་སྔ་མ་གྲོལ་ཞིང་དེའི་ཕྱི་མས་འགྲོ་དོན་མཛད་དེ་དེ་བཞིན་གཤེགས་པའི་སྐུ་ལ་སྤྲུལ་པ་ཟམ་ཆད་པའོ། །ཕྱོགས་བཅུར་སྤྲུལ་པ་
སྣ་ཚོགས་འགྱེད། །ཅེས་པ་ལུས་བར་པ་ན་ལོངས་སྐུ་ལ་ཆོས་ཀྱི་སྤྱན་ཤར་བའི་དུས་སུ། ཡི་གེ་དྲུག་པའི་སྒྲ་ལས་འཕྲོ་བའོ། །ཇི་བཞིན་འགྲོ་བའི་དོན་བྱེད་པ། །ཞེས་པ་ཇི་བཞིན་པ་ལ་གཉིས་ཏེ། སྔ་མའི་སྤྲུལ་པའི་སྐུ་ཇི་བཞིན་དུ་དོན་མཛད་པ་དང་། འགྲོ་བ་ཇི་བཞིན་མཐུན་པར་སྣང་བས་འདུལ་
ཞིང་དོན་མཛད་པའོ། །ལྷ་ཡི་དབང་པོ་ལྷ་ཡི་ལྷ། །ཞེས་པ་དང་། ལྷ་ཡི་བདག་པོ་ལྷ་མིན་བདག །ཅེས་པ་ནི། ལྷས་འདུལ་བ་ལ་ལྷ་ཡི་ཐུབ་པ་ལྟར་ཡང་སྣང་།  ལྷ་མིན་གྱིས་འདུལ་བ་ལ་ལྷ་མིན་ལྟར་སྣང་སྟེ། འགྲོ་དྲུག་གི་གཉེན་པོར་ཐུབ་པ་དྲུག་ཤར་བའོ། །འཆི་མེད་དབང་པོ་ལྷ་ཡི་
བླ། །ཞེས་པ་ལྷའི་ཐུབ་པ་དེ་ལྷ་ཐམས་ཅད་ཀྱི་བླ་མར་གྱུར་ཏེ། མཆོག་གམ་གཙོ་བོའོ། །ཐུབ་པ་གཞན་གོ་སླའོ། །འཇོམས་བྱེད་འཇོམས་བྱེད་དབང་ཕྱུག་པོ། །ཞེས་པ་གཟུང་བ་དང་འཛིན་པ་འཇོམས་པའོ། །སྲིད་པའི་དགོན་པ་ལས་རྒལ་བ། །ཞེས་པ་རྟོགས་པ་ཅན་འཆི་བའོ། །སྟོན་
པ་གཅིག་པུ་འགྲོ་བའི་བླ། །ཞེས་པ། སྟོན་པ་སྤྲུལ་པའི་སྐུར་སྤྲུལ་ནས་འགྲོ་བ་དྲུག་གི་བླ་མ་དང་གོང་མར་གྱུར་པའོ། །འཇིག་རྟེན་ཕྱོགས་བཅུར་རབ་གྲགས་པ། །ཞེས་པ་གཉིས་ཏེ་རིག་པའི་ཡོན་ཏན་དེ་ལྟར་སྣང་བ་དང་། དེའི་སྤྲུལ་པ་དེ་ལྟར་སྣང་ཞིང་གྲགས་པའོ། །ཆོས་ཀྱི་སྦྱིན་བདག་

49-1-60a

ཆེ་བ་པོ། །ཞེས་པ་ཡོན་ཏན་ཆོས་སྐུར་འགྱུར་བ་དང་། དེ་བརྗོད་པར་འགྱུར་བ་དང་། བྱམས་པའི་གོ་ཆས་བགོས་པ་སྟེ། །ཞེས་པ་དང་། སྙིང་རྗེ་ཡི་ནི་ཡ་ལད་བགོས། །ཞེས་པ་སྤྲུལ་པའི་སྐུ་དེ་དག་ཚད་མེད་པ་བཞིས་འདུལ་ཞིང་དོན་མཛད་པའོ། །ཤེས་རབ་རལ་གྲི་མདའ་གཞུ་
ཐོགས། །ཞེས་པ་དང་། ཉོན་མོངས་མི་ཤེས་གཡུལ་ངོ་སེལ། །ཞེས་པ་སོ་སོར་རྟོག་པའི་ཤེས་རབ་ཀྱིས་ཉོན་མོངས་པ་དང་མ་རིག་པ་དང་གཟུང་འཛིན་གྱི་གཡུལ་སེལ་བའོ། །དཔའ་བོ་གདུལ་དཀའ་འདུལ་བ་པོ། །ཞེས་པ་དང་། བདུད་བཞིའི་འཇིགས་པ་སེལ་བར་བྱེད། །ཅེས་པ་སྟོན་
པས་བདུད་བཞི་ངང་གིས་བཅོམ་ཞིང་ཐུགས་རྗེས་འགྲོ་བའི་བདུད་ཤུགས་ཀྱིས་སེལ་བའོ། །བདུད་ཀྱི་དཔུང་རྣམས་ཕམ་བྱེད་པ། །ཞེས་པ་མ་རིག་པའི་རྩ་བ་ཡན་ལག་དང་བཅས་པ་རྩད་ནས་བཅད་པའོ། །རྫོགས་པའི་སངས་རྒྱས་འཇིག་རྟེན་འདྲེན། །ཞེས་པ་ལུས་བར་པ་ལ་ཆོས་ཉིད་
ཀྱི་མཁའ་ལ་ཡེ་ཤེས་ཀྱི་སྐུ་གསལ་བའི་ཚེ། ཆོས་ཉིད་ཀྱི་སྤྱན་མངོན་ཤེས་དང་ལྡན་ཞིང་ཞལ་གྱི་བར་ནས་ཡི་གེ་དྲུག་པའི་འཁོར་ལོ་འབྱུང་སྟེ། སྤྲུལ་པའི་སྐུས་འཇིག་རྟེན་གྱི་འགྲོ་བ་འདྲེན་ནོ། །མཆོད་འོས་བསྟོད་འོས་ཕྱག་གི་གནས། །རྟག་ཏུ་རི་མོར་བྱ་བའི་འོས། །བཀུར་འོས་
རྗེད་པར་བྱེད་པའི་མཆོག །ཕྱག་བྱར་འོས་པ་བླ་མའི་རབ། །ཅེས་པ་སྟོན་པ་སྤྲུལ་པའི་སྐུ་དེ་ཡོན་ཏན་དང་ལྡན་པས་ཅིའི་ཕྱིར་ཞེ་ན། འཇིག་རྟེན་གསུམ་པོ་གོམ་གཅིག་བགྲོད། །ཅེས་འབྱུང་སྟེ་སྟོན་པའི་ཐུགས་རྗེས་རྟོགས་པ་རྒྱུད་ལ་བསྐྱེད་ནས་སངས་རྒྱས་ཀྱི་སྤྲུལ་པའི་ས་འདི་
ནས་སངས་རྒྱས་ལོངས་སྐུའི་སར་སྐད་ཅིག་ལ་སེང་གེའི་མཆོངས་སྟབས་ལྟ་བུའོ། །མཁའ་ལྟར་མཐའ་མེད་རྣམ་པར་གནོན། །ཞེས་པ་རིག་པ་ཟང་ཐལ་ནམ་མཁའི་མཐའ་དང་མཉམ་པའོ། །གསུམ་རིག་གཙང་མ་དག་པ་སྟེ། །ཞེས་པ་སྒྲ་འགའ་ལ་འཇུག་གིས་ཀྱང་ཞེས་
སྦུབས་གསུམ་རང་ལུགས་ཆེན་པོའོ། །མངོན་ཤེས་དྲུག་ལྡན་རྗེས་དྲན་དྲུག །ཅེས་པ་ཆོས་ཀྱི་སྤྱན་རྣམ་པ་དྲུག་དྲུག་གོ། །རྗེས་སུ་དྲན་པ་ཡང་དེ་རང་ཉིད་དོ། །རྩོལ་བའོ། །བྱང་ཆུབ་སེམས་དཔའ་སེམས་དཔའ་ཆེ། །ཞེས་པ་དོན་བདག་ལ་སེམས་དཔའ་ལས་ལོག་

49-1-60b

སྟེ། དོན་གཞན་ལ་སེམས་དཔའ་སེམས་དཔའོ། །རྫུ་འཕྲུལ་ཆེན་པོའི་འཇིག་རྟེན་འདས། །ཞེས་པ་དེ་ཡང་རྫུ་འཕྲུལ་དང་ལྡན་པའི་སྤྲུལ་སྐུ་སྟེ།  འཇིག་རྟེན་ལས་འདས་ཏེ་རང་སར་གྲོལ་བའོ། །ཤེས་རབ་ཕ་རོལ་ཕྱིན་པའི་མཐའ། །ཤེས་རབ་ཀྱིས་ནི་དེ་ཉིད་ཐོབ། །ཅེས་པ་རྩོལ་བ་
དང་བཅས་པས་འཁོར་བ་ལས་ཕ་རོལ་ཏུ་ཕྱིན་པ་ནི་མ་ཡིན་ཏེ། ཤེས་རབ་ཁྱད་པར་ཅན་རྟོགས་པ་རྒྱུད་ལ་ཤེས་པའི་སྟོབས་ཀྱིས་ཕ་རོལ་ཏུ་ཕྱིན་ཏེ། ཕྱོགས་ལྷུང་མེད་པའི་ཤེས་རབ་རྣམ་པར་མི་རྟོག་པ་ལ་གནས་སོ། །བདག་རིག་གཞན་རིག་ཐམས་ཅད་པ། །ཀུན་ལ་ཕན་པའི་གང་
ཟག་མཆོག །ཅེས་པ་སྟོན་པ་སྤྲུལ་པའི་སྐུ་དེས་བདག་གི་དོན་ཀྱང་རིག་ཤེས་གྲོལ་ལོ། །གཞན་གྱི་དོན་སྟོབས་ཀྱང་རིག་ཤེས་གྲོལ་ཏེ། ཐམས་ཅད་མཁྱེན་ཏེ་ཀུན་ལ་ཕན་འདོགས་པའི་སྐུའོ། །དཔེར་བྱ་ཀུན་ལས་འདས་པ་སྟེ། །ཞེས་པ་འགྲན་པའི་ཟླ་མེད་པའོ། །ཤེས་དང་
ཤེས་བྱའི་བདག་པོ་མཆོག །ཅེས་པ་ཤེས་པར་བྱ་བའི་དངོས་པོའི་གནས་ལུགས་དང་། ཤེས་པར་བྱེད་པ་རྣམས་འབྱོར་པ་སྟེ། བློ་རྣམ་པ་གཉིས་སུ་མེད་པར་འགྱུར་བས་བདག་པོའོ། །དེའི་གོང་ན་གཞན་མེད་པས་མཆོག་གོ། །གཙོ་བོ་ཆོས་ཀྱི་སྦྱིན་བདག་སྟེ། །ཞེས་པ་རིགས་
དྲུག་གི་གཙོ་བོ་ཐུབ་པ་དྲུག་གིས་གང་ལ་གང་འདུལ་གྱི་ཆོས་སྟོན་པས་ནའོ། །ཕྱག་རྒྱ་བཞི་པོའི་དོན་སྟོན་པ། །ཞེས་པ། ཆོས་སྐུ་དངོས་མེད་འགག་མེད་ཕྱག་རྒྱ་ཆེན་པོའོ། །དེའི་ཡོན་ཏན་གྱི་སྣང་བ་ལོངས་སྐུ་འོད་འབར་བ་ནི་དམ་ཚིག་གི་ཕྱག་རྒྱའོ། །རང་བྱུང་གི་ཡེ་ཤེས་གསུང་འགག་པ་
མེད་པ་ནི་ཆོས་ཀྱི་ཕྱག་རྒྱའོ། །ཐུགས་རྗེ་སྤྲུལ་པའི་སྐུས་གདུལ་བྱའི་དོན་མཛད་པ་ལས་ཀྱི་ཕྱག་རྒྱའོ། །འགྲོ་བའི་བསྙེན་བཀུར་གནས་ཀྱི་མཆོག །ཅེས་པ་དོན་དེ་ལྟ་བུ་སྟོན་པས་ནའོ། །ངེས་འབྱུང་གསུམ་པོ་བགྲོད་རྣམས་ཀྱི། །ཞེས་པ་ཉན་ཐོས་རང་རྒྱལ་བྱང་ཆུབ་སེམས་དཔའ་
དེ་གསུམ་རིམ་པས་བགྲོད་པས་བསྙེན་བཀུར་བྱ་བ་གོང་མ་བཞིན་ནོ། །དོན་གྱི་དམ་པ་རྣམ་དག་དཔལ། །ཞེས་པ་ངེས་པའི་དོན་གསང་སྔགས་བླ་ན་མེད་པའོ། །དེ་ཡང་རང་བཞིན་གྱིས་རྣམ་པར་དག་པ་དབྱེར་མི་ཕྱེད་པའི་སྐུ་གསུམ་དུ་བསྟན་པའོ། །འཇིག་རྟེན་གསུམ་ན་

49-1-61a

སྐལ་བཟང་ཆེ། །ཞེས་པ་གོང་མའི་དོན་དང་ཕྲད་པ་རྣམས་སོ། །དཔལ་ལྡན་འབྱོར་བ་ཀུན་བྱེད་པ། །ཞེས་པ་བདག་དང་གཞན་གྱི་དཔལ་དང་ལྡན་པས་སྐུ་དང་ཡེ་ཤེས་ཀྱི་འབྱོར་བ་བྱེད་པའོ། །གང་གིས་བྱེད་ཅེ་ན། འཇམ་དཔལ་དཔལ་དང་ལྡན་པའི་མཆོག །ཅེས་པ་
འདི་ཁོ་ནས་སོ། །དེ་ཡན་ཆད་དུ་ལེའུ་བདུན་པ་ཤེས་བྱ་ཐོགས་པ་མེད་པའོ། །བྱ་བ་གྲུབ་པའི་ཡེ་ཤེས་དང་སྦྱར་ནས་བཤད་པའོ།།      །།ད་ནི་ལེའུ་བརྒྱད་པ་ཆེ་བ་བརྗོད་པ་སྔགས་ཀྱི་སྒྲ་དང་བཅས་པ་བསྟན་པར་བྱའོ། །རཛྙཱ་ཨ་བྷྱི་ཏྱ་མ་ཧཱ་རུད་པྲ་ས་ར། མཆོག་སྦྱིན་རྡོ་རྗེ་མཆོག་ཁྱོད་
འདུད། །ཅེས་པ་གོང་གི་དོན་ཆེན་པོ་ཁྱད་པར་འཕགས་པ་རིན་པོ་ཆེ་ལྟ་བུའི་དགོངས་པ་གྲུབ། ཆོས་ཉིད་འགྱུར་བ་མེད་པ་དང་འདུ་འབྲལ་མེད་པའོ། །དོན་གཉིས་སུ་མེད་པར་འགྱུར་བའོ། །ཡང་དག་མཐར་གྱུར་ཁྱོད་ལ་འདུད། །ཅེས་པ་རིན་པོ་ཆེའི་སྐུ་འགྱུར་བ་མེད་པ། དོན་གྱི་ཕུག་
ཆེན་པོར་འགྱུར་བའོ། །སྟོང་ཉིད་ལས་བྱུང་ཁྱོད་ལ་འདུད། །ཅེས་པ། དབྱིངས་སྟོང་པ་དང་། རིག་པ་སྟོང་པ་དབྱེར་མི་ཕྱེད་པའི་ནང་ནས་སྐུ་གཉིས་ནང་གསལ་དུ་འབྱུང་བའོ། །སངས་རྒྱས་བྱང་ཆུབ་ཁྱོད་ལ་འདུད། །ཅེས་པ་རང་བཞིན་གྱིས་རྣམ་པར་དག་པར་ཡོན་ཏན་གཞན་དབང་དུ་
མ་གྱུར་པའོ། །སངས་རྒྱས་ཆགས་པ་ཁྱོད་ལ་འདུད། །ཅེས་པ་ཟག་པ་མེད་པའི་བདེ་བའོ། །སངས་རྒྱས་འདོད་ལ་ཕྱག་འཚལ་འདུད། །ཅེས་པ་ཐམས་ཅད་ཀྱིས་ཐོབ་བྱའོ། །སངས་རྒྱས་དགྱེས་པ་ཁྱོད་ལ་འདུད། །ཅེས་པ་གཉིས་སུ་མེད་པའི་དོན་མཐར་ཕྱིན་ཏེ། མྱ་
ངན་ལས་འདས་པའོ། །སངས་རྒྱས་རོལ་ལ་ཕྱག་འཚལ་འདུད། །ཅེས་པ་གཉིས་སུ་མེད་པའི་དོན་མཐར་ཕྱིན་པ་གདུལ་བྱ་ཐེག་པ་ཆེན་པོའི་དོན་གཞན་ལ་བཞག་སྟེ་ཤིན་ཏུ་ཡང་དགྱེས་པའོ། །སངས་རྒྱས་འཛུམ་པ་ཁྱོད་ལ་འདུད། །ཅེས་པ་ལུང་སྟོན་པའོ། །དེ་ཡང་སངས་རྒྱས་
བཞད་པ་ནི་མཚན་མ་ཟིལ་གྱིས་གནོན་པའོ། །སངས་རྒྱས་གསུང་ཉིད་ཁྱོད་ལ་འདུད། །ཅེས་པ་རང་བྱུང་གི་ཡེ་ཤེས་གསུང་མ་འགགས་པ་ཐམས་ཅད་ཀྱི་བརྗོད་བྱའི་རྒྱུར་གྱུར་པའོ། །སངས་རྒྱས་ཐུགས་ལ་ཕྱག་འཚལ་འདུད། །ཅེས་པ་མི་འགྱུར་བའི་རིག་པ་དེ་བག་ཆགས་དང་

49-1-61b

བྲལ་བའོ། །མེད་པ་ལས་བྱུང་ཁྱོད་ལ་འདུད། །ཅེས་པ་ཡོན་ཏན་གྱི་སྟོབས་སྐུ་གསུམ་ཡེ་ཤེས་ལྔར་འབྱུང་བའོ། །ནམ་མཁའ་ལས་བྱུང་ཁྱོད་ལ་འདུད། །ཅེས་པ་དངོས་པོར་མེད་ལ་ཡོན་ཏན་དུ་ཡོད་པའོ། །སངས་རྒྱས་འབྱུང་བ་ཁྱོད་ལ་འདུད། །ཅེས་པ་ཡོན་ཏན་གྱི་སྟོབས་
སྐུ་ལྔ་ཡེ་ཤེས་ལྔ་ཆོས་ཉིད་ཀྱི་ངང་ན་གནས་ཤིང་གསལ་བའོ། །ཡེ་ཤེས་ལས་བྱུང་ཁྱོད་ལ་འདུད། །ཅེས་པ་གཞི་གནས་ཀྱི་ཡེ་ཤེས་ལས་མཚན་ཉིད་གཉིས་སུ་མེད་པའི་ཡེ་ཤེས་ལྔ་འབྱུང་བའོ། །སྒྱུ་འཕྲུལ་དྲ་བ་ཁྱོད་ལ་འདུད། །ཅེས་པ་རིག་པ་འགག་པ་མེད་པའི་ཡེ་ཤེས་གཉིས་
སུ་མེད་པར་གནས་པའོ། །སངས་རྒྱས་རོལ་སྟོན་ཁྱོད་ལ་འདུད། །ཅེས་པ་ཡེ་ཤེས་ཀྱི་སྣང་བ་མ་འགགས་པའོ། །ཐམས་ཅད་ཐམས་ཅད་ཁྱོད་ལ་འདུད། །ཅེས་པ་ཐམས་ཅད་གཉིས་སུ་མེད་པའོ། །ཡེ་ཤེས་སྐུ་ཉིད་ཁྱོད་ལ་འདུད། །ཅེས་པ་ཡེ་ཤེས་ཀྱི་སྐུར་གྱུར་པའོ། །ཨོཾ་
ཞེས་པ་ཞི་གནས་ཀྱི་ཡེ་ཤེས་ལས་མཚན་ཉིད་འཛིན་པའི་ཡེ་ཤེས་ལྔར་རང་བཞིན་གྱིས་འོད་གསལ་བའོ། །ས་ཞེས་པ་དེའི་བཞུགས་གནས་ཏེ། ཆོས་ཀྱི་དབྱིངས་སོ། །རྦ་ཞེས་པ་གོང་མའི་ཐུགས་རྗེ་སྐུར་སྣང་བའོ། །དེ་བཞིན་དུ་སྒྲ་ཇི་བཞིན་དུ་བཞི་སྦག་ལ་སོགས་པ་དང་བསྟུན་ལ་ཁོང་
ནས་བདེའོ། །དྷ་རྨ་ཨ་བྷཱ་བ། སྭ་བྷཱ་བ། བི་ཤུདྡྷ། བཛྲ་ཙཀྵུ། ཨ་ཨཱ་ཨཾ་ཨཿ། པྲ་ཀྲྀ་ཏི། པ་རི་ཤུདྡྷ། སརྦ་དྷརྨཿ ཡ་དུ་ཏ། སརྦ་ཏ་ཐཱ་ག་ཏ། ཛྙཱ་ན་ཀཱ་ཡ། མཉྫ་ཤྲཱི་པ་རི་ཤུདྡྷི་ཏཱ། མུ་པཱ་དཱ་ཡ་ཏི། ཨ་ཨཱཿ། སརྦ་ཏ་ཐཱ་ག་ཏ། ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿ། བྷ་ག་བཱན་ཛྙཱ་ན་མཱུརྟི། བཱ་གཱི་
ཤྭ་ར། མ་ཧཱ་པཱ་ཙ། སརྦ་དྷརྨ། ག་ག་ན། ཨ་མ་ལ། སུ་པ་རི་ཤུདྔྷ། དྷརྨ་དྷཱ་ཏུ། ཛྙཱ་ན་གརྦྷ་ཨཱཿ། དེ་ཡན་ཆད་དུ་ལེའུ་བརྒྱད་པ། ཆེ་བ་བརྗོད་པ་སྔགས་ཀྱི་སྒྲ་དང་བཅས་པ་བཤད་པའོ་།།      །།ད་ནི་ལེའུ་དགུ་པ་རྗེས་སུ་ཡི་རང་བའི་སྒོ་ནས་བདག་གཞན་གྱི་སྒོ་ནས་དགོངས་པ་མཐར་ཕྱིན་པར་བསྟན་ཏེ། དེ་ནས་
ཞེས་པ་སྟོན་པས་གོང་མའི་དོན་གསུངས་ནས་བར་གཞན་གྱིས་མ་ཆོད་དེ། ཞུ་བ་པོས་རྗེས་སུ་ཡི་རང་བ་ཕུལ་བའི་ཐ་ཚིག་གོ། །དཔལ་ལྡན་ཞེས་པ་རྟོགས་པ་བདག་གི་དཔལ་ལྡན་ཏེ། སྟོན་པའི་ཐུགས་ཀྱི་དགོངས་པ་མཁྱེན་པས་མཁྱེན་པའོ། །ཐུགས་རྗེ་གཞན་གྱི་དཔལ་དང་ལྡན་ཏེ།

49-1-62a

གསང་སྔགས་ཀྱི་དོན་ཆེན་པོ་ཞུས་ནས་འགྲོ་དོན་མཛད་པའོ། །ཞུ་བ་པོ་རང་རྒྱུད་པ་མེད་དེ་རྡོ་རྗེ་སེམས་དཔའི་ཐུགས་ཀྱི་ཀློང་ནས་ཕྱུང་། འོད་ལྔ་ཤངས་ཀྱི་རླུང་སྒྲོམ་ནས་བཏོན་ནས་ཕྱག་ན་རྡོ་རྗེའི་སྐུར་གྱུར་པའོ། །དེ་ཡང་ཞིབ་ཏུ་གཞན་ན་གསལ་བས་མ་སྨོས་སོ། །རྡོ་རྗེ་འཆང་ཞེས་
པ་ཕྱག་ན་རྡོ་རྗེའོ། །དགའ་ཞིང་མགུ་ནས་ཐལ་མོ་སྦྱར། །ཞེས་པ་སྟོན་པའི་བཀའ་ཕྱིན་ཅི་མ་ལོག་པའོ། །དེ་ཡང་བདག་གཞན་གྱི་དོན་མཐར་ཕྱིན་པའོ། །མགོན་པོ་ཞེས་པ་བདག་གཞན་གྱི་མགོན་ནོ། །དེ་ཡང་གང་ཞེ་ན། བཅོམ་ལྡན་འདས་དེ་བཞིན་གཤེགས་པའོ། །རྫོགས་སངས་
རྒྱས་ལ་ཕྱག་འཚལ་ནས། །ཞེས་པ་ཞུ་བ་པོས་སྟོན་པ་ལའོ། །དེ་ནི་མགོན་པོ་གསང་བའི་བདག །ཅེས་པ་ཞུ་བ་པོས་སྟོན་པའི་ཐུགས་མཁྱེན་པའོ། །ལག་ན་རྡོ་རྗེ་ཁྲོ་བོའི་རྒྱལ། །ཞེས་པ་ཁྲོ་བོ་གཞན་ལས་ལྷག་པར་འགྱུར་བའོ། །སྣ་ཚོགས་གཞན་དང་ལྷན་ཅིག་ཏུ། །ཞེས་པ་འཁོར་
རྣམས་སོ། །གསང་བསྟོད་ནས་ནི་ཚིག་འདི་གསོལ། །ཞེས་པ་དགོངས་པ་སྐྱེས་པའོ། །མགོན་པོ་བདག་ཅག་ཡི་རང་ངོ་། །ཞེས་པ་ཕྱི་ནང་གསང་བའི་དོན་སྟོན་པ་ལ་ཞུས་པས་འཁོར་དང་བཅས་པ་དགྱེས་པའོ། །ལེགས་སོ་ཞེས་པ་ཚིག་མ་ནོར་བས་སོ། །ལེགས་སོ་གཉིས་པ་དོན་མ་
ནོར་བས་སོ། །ལེགས་པར་གསུངས་ཞེས་པ་སྟོན་པས་བདག་གཞན་གྱི་དོན་དུ་བཤད་ཐབས་ཀྱི་ཡན་ལག་དང་ལྡན་པར་གསུངས་པའོ། །རྣམ་གྲོལ་འབྲས་བུ་འཚལ་བ་ཡི། །ཞེས་པ་སྐད་ཅིག་གསུམ་ལ་ཕྱི་ནང་གི་རྣམ་པ་ལས་གྲོལ་ནས་འབྲས་བུ་ཡེ་ཤིས་ཆེན་པོ་ཐོབ་པར་འཚལ་བའི་
འཁོར་ཏམ་གོང་མའོ། །གང་ཞེ་ན། འགྲོ་བ་མགོན་མེད་རྣམས་དང་ནི། །ཞེས་པ་ཐུན་མོང་གི་འཁོར་རྣམས་སོ། །བདག་ཅག་ཡང་དག་རྫོགས་པ་ཡི། །ཞེས་པ་ནི་ཁྱད་པར་གྱི་འཁོར་རོ། །བྱང་ཆུབ་ཐོབ་པའི་དོན་ཆེན་མཛད། །ཅེས་པ་གནས་སྐབས་ཀྱི་འབྲས་བུ་ཙམ་ཡིན་ཏེ། 
བུདྡྷས་མྱ་ངན་ལས་འདས་པའི་དགོངས་པ་གསུངས་པའོ། །སྒྱུ་འཕྲུལ་དྲ་བའི་ཚུལ་སྟོན་པ། །ཞེས་པ་རིག་པ་དང་ཡེ་ཤེས་ཀྱི་འདུག་ཚུལ་ལོ། །འདི་ནི་རྣམ་དག་ལེགས་པའི་ལམ། །ཞེས་པ་དོན་མ་ནོར་བའོ། །ཟབ་ཅིང་ཡངས་ལ་རྒྱ་ཆེ་བ། །ཞེས་པ་གཏིང་དཔག་དཀའ་བའོ། །དོན་

49-1-62b

ཀུན་འབྱུང་བའོ། །ཀུན་སྣང་ཆེན་པོའོ། །ནམ་མཁའ་ལྟ་བུར་ནུབ་པ་མེད་པའོ། །དོན་ཆེན་འགྲོ་བའི་དོན་བྱེད་པ། །ཞེས་པ་སྟོན་པས་གོང་མའི་དོན་གསུངས་པ་ནི། དོན་ཆེན་འགྲོ་བའི་དོན་མཛད་པའོ། །སངས་རྒྱས་རྣམས་ཀྱི་ཡུལ་འདི་ནི། །ཞེས་པ་དུས་གསུམ་གྱི་སངས་རྒྱས་ཀྱི་ཤེས་བྱའོ། །
རྫོགས་པའི་སངས་རྒྱས་རྣམས་ཀྱིས་བཤད། །ཅེས་པ་ཆེ་བའི་ཡེ་ཤེས་དང་ཚོགས་ཆེན་པོ་གཉིས་ཡེ་ནས་རྫོགས་པའི་སངས་རྒྱས་རྣམས་ཀྱིས་བཤད་པའོ། །བཅོམ་ལྡན་འདས་འཇམ་དཔལ་ཡེ་ཤེས་སེམས་དཔའི་དོན་དམ་པའི་མཚན་ཡང་དག་པར་བརྗོད་པའོ་ཞེས་པ་ནི་བདུད་བཞི་ངང་གིས་
བཅོམ་སྟེ། སྐུ་དང་ཡེ་ཤེས་སུ་ཤུགས་ཀྱིས་ལྡན་ནས། རྟག་ཆད་ཀྱི་མཐའ་ལས་ཡེ་ནས་འདས་པའོ། །སྐུ་གསུམ་ཡེ་ཤེས་ལྔའི་དོན་གཉིས་སུ་མེད་པའི་མཚོན་ཚིག་གཏིང་ནས་མ་ནོར་བར་གསུངས་པའོ། །བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་གསུངས་པ་ཞེས་མིའི་
ཐུབ་པ་དེས་སྟོན་པ་རྡོ་རྗེ་འཆང་གི་དོན་འཁོར་རྣམས་ལ་གོང་བཞིན་གསུངས་པའོ། །དེ་ཡན་ཆད་དུ་ལེའུ་དགུ་པ་རྗེས་སུ་ཡི་རང་བའི་སྒོ་ནས་བདག་གཞན་གྱི་དོན་མཐར་ཕྱིན་པར་བསྟན་པའོ།།      །།དམ་པའི་གདམས་པ་ཐུགས་ཀྱི་གཏེར། །རྣལ་འབྱོར་ཀུན་གྱི་ཐུགས་འཆང་བ། །
འདི་བྲིས་ཉེས་པ་འབྱུང་མི་སྲིད། །གལ་ཏེ་ཉེས་པ་འབྱུང་བ་ན། །བླ་མ་བདེ་གཤེགས་ཆོས་སྐྱོང་རྣམས། །རྟོག་མེད་ཡེ་ཤེས་ངང་དུ་བཟོད། །འདི་བྲིས་འདི་ཡི་དགེ་བ་ཡིས། །དྲི་མེད་རྒྱུད་ཆེན་གྲོལ་འགྱུར་ཤོག །འགྲེལ་པ་རྒྱུན་གཅོད་སྤུ་གྲི་ཞེས་བྱ་བ་དགའ་རབ་རྡོ་རྗེས་མཛད་
པ་རྫོགས་སོ།།༄༅། །རྒྱ་གར་སྐད་དུ། ནཱ་མ་སཾ་གཱི་ཏི་ཨུ་པ་དྷ་ར་བི་ཏར་ཀ་ནཱ་མ། བོད་སྐད་དུ། མཚན་ཡང་དག་པར་བརྗོད་པའི་ཉེ་བར་བསྡུས་པའི་རྣམ་པར་རྟོག་གེ་ཞེས་བྱ་བ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །
དཔལ་རྡོ་རྗེ་སེམས་དཔའ་ཡེ་ཤེས་ཀྱི་སྐུ་དང་ལྡན་པ་ལ་ཕྱག་འཚལ་ལོ། །ལོངས་སྤྱོད་མིན་པར་འབབ་པ་ཡིས། །འོད་གསལ་ལས་ནི་ཡང་དག་བྱུང་། །སངས་རྒྱས་བྱང་ཆུབ་སེམས་རྣམས་སོ། །དེར་གནས་ཐིམ་པས་ཕྱག་འཚལ་ཏེ། །མཚན་བརྗོད་པ་ཡི་ནམ་གྲངས་ཚིག །

49-1-63a

མིང་ནི་དུ་མ་བཤད་པར་བྱ། །ཇི་ལྟར་འཁོར་ལོ་དྲུག་པ་སེམས། །རྩ་བའི་འཁོར་ལོར་དེ་ཐིམ་པས། །འགྲོ་དང་མི་འགྲོ་བར་བགྱིད་དེ། །རླུང་དང་རྣམ་པར་ཤེས་ཕྱིར་རོ། །བག་ཆགས་ཀྱིས་ནི་ལུས་སོགས་གསུམ། །ཐ་མལ་རྟག་ཏུ་འཆིང་བར་བྱེད། །མཁས་པས་
རྟག་ཏུ་མི་འཆིང་སྟེ། །མྱ་ངན་འདས་པའི་བག་ཆགས་ཚུལ། །སྟོང་དང་སྙིང་རྗེ་དབྱེར་མེད་ལས། །འགྲོ་དང་མི་འགྲོ་ཡང་དག་བྱུང་། །གཉིས་མེད་བཞི་ལས་གཟུགས་བརྙན་གྱིས། །ཕ་རོལ་དག་གི་དོན་བྱེད་པའོ། །དེ་ལྟར་ཐབས་ནི་བཞིར་བྱས་ནས། །བསམ་གཏན་རིགས་ཀྱི་
མིང་ཉིད་དུ། །བྱང་ཆུབ་སེམས་དཔའ་བརྗོད་པ་ཡིན། །ཚིགས་བཅད་བརྒྱ་དང་དྲུག་ཅུ་གཉིས། །དེ་བཞིན་གཉིས་ལྷག་དེ་རྣམས་སོ། །གཞན་དག་ཀྱང་ནི་ཕན་ཡོན་གྱི། །ཚིགས་བཅད་བརྒྱ་དང་དེ་བཞིན་ཕྱེད། །སྒྱུ་འཕྲུལ་དྲ་བ་ལས་བྱུང་བའི། །རྟག་ཏུ་བསྟོད་པའི་རྒྱལ་པོ་དེ། །
དུས་གསུམ་སངས་རྒྱས་རྣམས་ཀྱིས་བསྟན། །དེ་ལྟར་མན་ངག་མང་པོ་ནི། །ཐེག་བཞི་གཞན་ཡང་འཇིག་རྟེན་པའི། །བསྟན་བཅོས་སྣ་ཚོགས་ལུགས་ཉིད་དུ། །དགོངས་པའི་སྐད་ཀྱིས་བསྟན་པ་ཡིན། །རྣལ་འབྱོར་འབྱུང་བ་ཆེ་དབུས་དང་། །གྱུར་པ་རྒྱུར་བྱས་སྤྱོད་ཡུལ་ལོ། །
དེ་ལྟར་ཚིགས་བཅད་དང་པོ་སོགས། །ཡེ་ཤེས་སྐུ་ཡི་བར་དུ་ནི། །ཕྱག་འཚལ་བསྟོད་ཚིག་ཇི་སྙེད་པ། །ཨ་བ་དྷཱུ་ཏཱི་ལ་གནས་ཚིག །དེ་ནས་ཡི་གེ་སྦྱོར་བ་ཡིས། །ཚིགས་བཅད་ཚིག་ནི་མི་ཟད་པ། །རྩ་བའི་མཐའ་རུ་གནས་པ་ཡི། །འཁོར་ལོ་རྣམ་པ་དྲུག་གི་མིང་། །
དེ་ནི་ཇི་ལྟར་རྣལ་འབྱོར་ལུང་། །མདོ་རུ་བསྡུས་ཏེ་རབ་བཤད་བྱ། །ཨ་བ་དྷཱུ་ཏཱི་ཐམས་ཅད་རྟེན། །དགའ་བ་བཅུ་དྲུག་མཚན་ཉིད་དོ། །ཨུ་རྱན་བུ་གའི་རྩ་ལམ་ནས། །ཛཱ་ལན་དྷ་རའི་བུ་གར་འཇུག །ཡེ་ཤེས་ཆོ་གའི་ནུས་པ་ལས། །འོག་ནས་སྟེང་འཇུག་ཡང་དག་རྫོགས། །ཨ་
བ་དྷཱུ་ཏཱི་ལ་བརྟེན་ནས། །རྣམ་པར་ཤེས་པའི་མཚན་ཉིད་དོ། །རང་བཞིན་མང་པོ་དེ་དག་ལས། །རང་རིག་པ་ནི་མཆོག་གི་དུས། །དེ་རིམ་བྲལ་བ་མ་རུངས་པ། །དེ་ནས་དཔའ་སོགས་རོ་དགུར་ལྡན། །ངག་གི་བརྡ་རུ་བརྟགས་ལས་སྐྱེས། །ཇི་ལྟར་ཕ་ཡི་བདེ་ལས་བྱུང་། །སྟོང་

49-1-63b

ཉིད་སྙིང་རྗེ་དབྱེར་མེད་པས། །ངག་གིས་བརྗོད་པ་ལས་མ་སྐྱེས། །ཇི་ལྟར་བདེ་ལས་དགའ་བའི་སེམས། །མེ་ལོང་ལྟར་གྱུར་གཞན་ཡང་ཁྲོ། །ལུས་འདུད་ཡེ་ཤེས་འཕགས་པས་དོ། །རབ་འདུད་སྔོན་དུ་ཆོ་ག་ཡིས། །སྲོག་དང་རྩོལ་བར་རྣམ་དཔྱད་བྱ། །བཅོམ་ལྡན་རྟག་ཏུ་
སྟོང་ཉིད་དེ། །དེ་བཞིན་གཤེགས་པ་ཆོས་དབྱིངས་སོ། །ཐལ་མོ་སྦྱར་བ་སྟེང་འོག་སྦྱོར། །ཀུན་རྫོབ་བདེན་པའི་སྤྱན་སྔར་འདུག །དོན་དམ་དེ་བཞིན་ཐ་དད་མིན། །ནོར་བུའི་ནང་ཞུགས་རྣལ་འབྱོར་གྱིས། །དེ་བཞིན་ལོངས་སྤྱོད་གྲོལ་བའི་འབྲས། །དབུ་མ་ཉིད་དུ་རྣམ་
དཔྱད་པར། །གྱུར་པས་བསམ་གྱིས་མི་ཁྱབ་ཐོབ། །ཉོན་མོངས་ཤིང་དོན་ཉེ་ཉོན་མོངས། །མི་ཤེས་འདམ་གྱི་རྟོག་པ་སྟེ། །དེ་དག་རྣམ་དཔྱོད་ཐོབ་པར་ནི། །རིགས་མེད་ཐམས་ཅད་ཟད་པར་འགྱུར། །གང་ཞིག་རབ་ཏུ་གསལ་བར་འགྱུར། །མར་མེ་འབར་བའི་རྩེ་ལྟར་གྱུར། །
དེ་བཞིན་རྟག་ཏུ་སངས་རྒྱས་ཏེ། །ལས་ཀྱི་ཕྱག་རྒྱ་སོགས་ལས་སྐྱེའོ། །བཅོམ་ལྡན་བྷ་ག་རྣལ་འབྱོར་དང་། །བདག་ལ་སོགས་པའི་བདེན་བཞི་ཡིས། །ཤེས་པས་ཤེས་བྱ་གསལ་བྱ་བ། །སྲིད་དང་མྱ་ངན་འདས་པ་སྤངས། །སོང་བ་རང་བཞིན་ཐ་མལ་ཀུན། །རྡོ་རྗེ་ཆེན་པོའི་
ལུས་བདག་ཉིད། །རྣམ་པ་སྣ་ཚོགས་སོ་གསུམ་མཐའ། །དེ་ནི་མིང་བརྗོད་པ་རུ་བརྟགས། །དོན་ཆེན་པོ་ཡི་ཕྱག་རྒྱ་གང་། །དེ་ནི་འདི་རུ་འཛིན་པའོ། །དུས་གསུམ་བྱ་བ་བྱེད་པ་ནི། །ཐེག་གསུམ་རྟོགས་པ་སངས་རྒྱས་སོ། །མ་ཡི་ཡི་གེ་སྦྱོར་བ་ནི། །ཡིག་བྲལ་
གཞན་ཡང་མ་ཡིག་བྲལ། །དེ་ནས་སྒྱུ་འཕྲུལ་དྲ་བར་གསུངས། །ཨ་བ་དྷཱུ་ཏཱིའི་དོན་རྟོགས་པས། །བདག་ཉིད་རྟག་ཏུ་མཆོག་གིས་ཚིམ། །དེ་ལ་རང་བཞིན་མེད་པ་ནི། །མི་བདེན་པ་ལ་བདེན་ལྟར་བྱུང་། །ཡེ་ཤེས་ཆེན་པོ་མ་ལུས་པའི། །འབྲས་བུ་རྒྱུ་ལས་ཡང་དག་བྱུང་། །
རྒྱུ་དང་འབྲས་བུ་དབྱེར་མེད་ལས། །རྣལ་འབྱོར་ལུས་ནི་འབྲས་བུ་མིན། །དེ་སྐད་བྱ་དང་མི་བྱ་ཀུན། །གང་གིས་རྡོ་རྗེ་རྡོ་རྗེ་འཆང་། །ཤེས་བྱ་ཤེས་བྱེད་དབྱེར་མེད་པ། །ཚེ་འདི་ལ་ནི་འབྲས་ལོངས་སྤྱོད། །དེ་ལྟར་གོང་དུ་ཅི་གསུངས་པའི། །བསྡུས་པའི་དོན་འདི་བཤད་པར་བྱ། །

49-1-64a

ཡི་གེ་དང་པོའི་སྦྱོར་བ་ནི། །ཚིགས་སུ་བཅད་པའི་ཚིག་གཅིག་མཐར། །ཨ་བ་དྷཱུ་ཏཱི་ཐམས་ཅད་རྟེན། །དེ་ནི་རྣམ་ཤེས་མཚན་ཉིད་དོ། །རང་བཞིན་མང་པོ་དེ་དག་ཀྱང་། །ངག་གི་བརྡ་རུ་བརྟགས་ལས་སྐྱེས། །དེ་ནས་སྙིང་གའི་ལམ་ཞུགས་ནས། །སྲོག་
དང་རྩོལ་བ་རྣམས་བརྟགས་ཤིང་། །དབུ་མ་ཉིད་དུ་རྣམ་དཔྱད་པས། །རིགས་མེད་ཐམས་ཅད་ཟད་པར་འགྱུར། །གང་ཞིག་རབ་ཏུ་གསལ་གྱུར་པ། །སྲིད་དང་མྱ་ངན་འདས་པ་སྤངས། །ཐ་མལ་དུ་གྱུར་རང་བཞིན་ཀུན། །ཐེག་གསུམ་རྟོགས་པས་སངས་རྒྱས་སོ། །མ་ཡི་
ཡི་གེ་སྦྱོར་བ་ནི། །ཨ་བ་དྷཱུ་ཏཱིའི་དོན་བརྟགས་ནས། །ཡེ་ཤེས་ཆེན་པོ་མ་ལུས་པའི། །འདི་ཉིད་ལ་ནི་འབྲས་ལོངས་སྤྱོད། །དེ་དག་མགྲིན་པའི་འཁོར་ལོ་སྟེ། །ཐོག་མ་ཐ་མར་རྩ་ལས་གྲུབ། །དེ་ཉིད་ལོངས་སྤྱོད་འཁོར་ལོ་སྟེ། །གང་ནས་རྣམ་པར་ཤེས་ལ་འབབ། །ཚིགས་
སུ་བཅད་པ་བཅུ་དྲུག་པོ། །ཕྱག་ན་རྡོ་རྗེས་ཐ་མི་དད། །དེ་ཉིད་གྲུབ་པས་ཐབས་སུ་བརྗོད། །གཞན་ཡང་ཤེས་རབ་བརྗོད་བྱ་སྟེ། །དེ་ནས་ཤཱཀ་ཐུབ་ཅེས་པ་ཡི། །བཅོམ་ལྡན་འདས་ཞེས་པ་ཡི་མཐར། །ནམ་མཁའ་འདི་ནི་འཁོར་ལོ་དྲུག །འཛུམ་པ་གཉིས་གཉིས་གཞན་དོན་
ཏེ། །འཁོར་ལོ་དྲུག་ལ་རྩ་རེ་རེ། །འགོག་པའི་ཚུལ་གྱིས་ནམ་མཁའ་འགེངས། །ཤེས་རབ་དོན་འབྱུང་གསལ་བར་འགྲུབ། །འཇིག་རྟེན་གསུམ་ནི་རྣམ་པ་གསུམ། །ཚངས་པ་རྐང་གི་བུ་ག་འགེངས། །གྱེན་དུ་གསང་བའི་བུག་གཉིས་ནས། །གསུམ་པོས་སོ་སོ་གསུམ་
སྣང་བྱེད། །དེ་ལྟར་འགྲོ་བ་རྡོ་རྗེ་འཛིན། །ལེགས་སོ་ཞེས་ནི་བརྗོད་པའོ། །སྙིང་རྗེས་འགྲོ་བ་མངོན་དུ་བྱས། །དེ་ནི་ཡན་ལག་དྲུག་བཞིའོ། །ཕྱག་རྒྱ་ཆེན་པོའི་ཡན་ལག་རྫོགས། །སྙིང་རྗེའི་དུས་ནི་བཅུ་དྲུག་པའོ། །ཡེ་ཤེས་ལུས་ཀྱི་མཚན་བརྗོད་པ། །བརྡར་བཏགས་
སྦྱོར་བས་ཕ་རོལ་འགྲོ། །དེ་ནི་སྙིང་གའི་དབུས་དང་ནི། །གསང་བ་ལྟེ་བ་དཔྲལ་བ་རུ། །ཡན་ལག་དྲུག་བསམ་རྣལ་འབྱོར་གྱིས། །དེ་དག་སྟོང་པས་ང་བླ་མ། །དེ་དག་གི་ནི་མཚན་ཉིད་དོ། །དོན་ཀུན་བསྡུས་པའི་མཚན་ཉིད་དེ། །དེ་དག་དང་པོའི་ཡི་གེ་ཡིས། །ཇི་ལྟར་ཚིགས་

49-1-64b

སུ་བཅད་པའི་དོན། །ནམ་མཁའ་འདི་ནི་འཁོར་ལོ་དྲུག །ཤེས་རབ་དོན་འབྱུང་གསལ་བར་འགྲུབ། །གསུམ་པོས་སོ་སོར་གསུམ་སྣང་བྱེད། །དེ་ནི་ཡན་ལག་དྲུག་གི་གཞི། །ཕྱག་རྒྱ་ཆེན་པོའི་ཡན་ལག་རྫོགས། །དེ་དག་སྟོན་མས་ང་བླ་མ། །ཚིགས་སུ་བཅད་པ་དེ་དྲུག་གིས། །ཐུབ་
པ་ཆེན་པོའི་བཀའ་སྩལ་ལན། །གང་ཕྱིར་ཐུབ་པའི་རྣལ་འབྱོར་དེ། །རང་རིག་པ་ནི་རྟོགས་པས་ན། །སྒྲ་བརྙན་བྲག་ཅ་ལྟ་བུ་ལས། །ཕྱག་ན་རྡོ་རྗེ་རྟོགས་པ་བྱུང་། །གཉིས་སུ་མེད་པའི་དོན་བརྗོད་པའི། །རིག་པ་ལས་ནི་བརྗོད་པར་བྱ། །དེ་ནས་སོགས་ནས་ཆེར་གཟིགས་མཐར། །
ཚིགས་སུ་བཅད་གཉིས་སྔགས་ལས་སྐྱེས། །རིགས་ཀྱི་སྒྲ་ཡིས་གཉིས་མེད་གྲུབ། །དབང་པོ་ཀུན་ནི་རིགས་ཅན་ཡིན། །འཁོར་ལོ་དྲུག་གི་ཐོག་མ་མཐར། །རླུང་དང་རྣམ་པར་ཤེས་པ་བརྟེན། །རྣལ་འབྱོར་དབང་པོས་ཕྲ་མོར་དབྱེ། །བག་ཆགས་ངན་པའི་དྲི་མ་བཅོམ། དབང་པོའི་
དབུས་ན་སྣང་བྱེད་པ། །རྟག་ཏུ་བདག་གཞན་མེད་པར་འགྲོ། །ཕྱག་རྒྱ་ཆེན་པོའི་མིང་གིས་ནི། །སྣང་ལས་རིགས་ནི་ཡང་དག་བྱུང་། །དེ་དག་གི་ཡང་དོན་བསྡུས་པ། །ཚིགས་བཅད་ཀྱིས་ནི་བདག་གིས་བརྗོད། །འཁོར་ལོ་དྲུག་གི་ཐོག་མ་མཐར། །སྣང་ལས་རིགས་ནི་ཡང་
དག་བྱུང་། །སྟེང་འོག་རླུང་ནི་བཀག་པ་ལས། །གཉིས་དང་གཉིས་མེད་གཉིས་ཀ་མིན། །ཡེ་ཤེས་ལྟ་སྟངས་སྣང་བ་ཡིས། །རིགས་དྲུག་རྒྱུ་བ་བརྗོད་པའོ། །དེ་དག་བདག་ཡིན་བརླབས་གསལ་བ། །གྲངས་མེད་པ་ནི་རབ་ཏུ་སྤྲོ། །དེ་ལྟར་ཀུན་དོན་བདེན་པ་ཡི། །དབུས་སུ་
དོན་དམ་བདེན་པ་སྟེ། །དེ་ནི་མ་སྐྱེས་པ་ཡི་ཆོས། །སྒྱུ་མ་ཡིས་ནི་ཡང་དག་བསྡུས། །གང་ཕྱིར་མངོན་པར་རྟོགས་པ་རུ། །སེམས་ཅན་རྣམས་ལ་ཡི་གེའི་དོན། །དེ་ཕྱིར་རྟག་ཏུ་རབ་བཤད་པ། །ཟབ་མོའི་མན་ངག་དབང་ལས་སོ། །ཉེ་བར་བསྡུས་པ་འདི་དག་གིས་ནི། གསོལ་
བ་བཏབ་པ་དང་། བཀའ་སྩལ་པའི་ལན་དང་། དེ་བཞིན་དུ་རིགས་དྲུག་སྣང་བའི་རྟོགས་པ་ཞེས་བྱ་བ་སྟེ་དང་པོའོ།།      །།ཚིགས་སུ་བཅད་པ་གསུམ་བརྗོད་པས། །ཆོས་ཀྱི་ཕུང་པོ་སྟོང་ཕྲག་ནི། །བརྒྱད་ཅུ་རྩ་བཞི་གྲངས་མེད་དེ། །བསྡུས་ནས་ཉེ་བར་བརྗོད་པ་ཡིན། །འདི་

49-1-65a

འདྲའི་དེ་ཉིད་མང་པོ་དེ། །དང་པོ་ཡི་གེ་བརྡ་རུ་བྱས། །རྣལ་འབྱོར་ཆེན་པོ་བཅུ་གཉིས་ཏེ། །རྡོ་རྗེ་འཛིན་པ་ཉིད་ཀྱིས་གསུངས། །དེ་ཡི་མཚན་ཉིད་རྒྱས་བཤད་བྱ། །ཤེས་དང་ཤེས་པར་བྱ་བའི་དོན། །གུས་པས་དེ་ཡི་མཚན་ཉིད་བཤད་། །རྟག་ཏུ་གཉིས་མེད་
སྦྱོར་བསྡུས་པས། །ནམ་མཁའི་བུ་གའི་དབུས་གནས་ཏེ། །ཨ་བ་དྷཱུ་ཏཱིའི་མཁའ་དྲུག་ནི། །འཁོར་ལོ་དྲུག་གི་དབུས་སུ་འདོད། །གང་ཕྱིར་བུ་ག་གཉིས་གཉིས་པོ། །དྲུག་པོ་ཉིས་འགྱུར་ལས་བཅུ་གཉིས། །དེ་ལ་དེ་དག་ས་བོན་ནི། །ཡི་གེ་གཉིས་གཉིས་རིམ་བཞིན་ཏེ། །
ལྟེ་བའི་བུ་གར་ཨ་ཨཱ་དགོད། །ཨི་ཨཱི་སྙིང་གའི་བུག་གཉིས་སུ། །མགྲིན་པ་དག་ཏུ་ཨུ་ཨཱུའོ། །ཨེ་ཨཻ་དཔྲལ་བའི་བུག་གཉིས་སུའོ། །སྤྱི་བོར་འཁོར་ལོ་ལ་ཨོ་ཨོོ། །ཨཾ་ཨཿགསང་བའི་བུག་གཉིས་ལ། །དེ་དག་དབྱངས་ཡིག་ཐུང་བཤད་པ། །འོག་གི་ཆ་ཡི་བུ་གར་རོ། །རིང་པོ་
དེ་བཞིན་སྟེང་དུ་དགོད། །ཐབས་དང་ཤེས་རབ་ལུགས་ཉིད་དུ། །ནམ་མཁའ་དྲུག་གི་དབུས་ཉིད་དུ། །རྟག་ཏུ་སྲོག་དང་རྩོལ་བ་སྡོམ། །བཅུ་གཉིས་པ་རུ་གནས་པ་སྟེ། །ས་ཡི་རིམ་པར་ཤེས་བྱ་སྟེ། །ཕ་རོལ་ཕྱིན་པ་རྣམ་པར་དག །དེ་དག་གི་ནི་ལུགས་ཉིད་ཀྱང་། །ཇི་ལྟར་
བླ་མའི་མན་ངག་གིས། །ནམ་མཁའི་དབུས་སུ་འཛིན་ཅིང་གནས། །སྔོན་དུ་བསམ་པར་ཤེས་པར་བྱ། །གྱེན་དུ་བཟློག་ཅིང་ཐུར་དུ་ལྟ། །ཨེ་ཨོ་ཡིད་ཀྱིས་ཡང་དག་བསྡུ། །དེ་ལྟར་ཨ་ཨི་གཉིས་པོ་དེ། །ལྟེ་བ་ནས་ཐུར་གསང་གནས་གྱེན། །གཞན་ཡང་ཡི་གེ་ཨཱ་ཨོ་གཉིས། །
ལྟེ་བ་དང་ནི་སྤྱི་བོར་ལྟ། །མགྲིན་ནས་ཐུར་དུ་སྙིང་ནས་གྱེན། །ཨི་ཨུ་གཉིས་པོ་བཤད་པའོ། །དེ་བཞིན་དཔྲལ་བར་ཡི་གེ་ཨེ། །མགྲིན་པར་ཨུ་ཡིག་དེ་བཞིན་ནོ། །དེ་བཞིན་ཨི་ཡིག་ཨ་ཡི་གེ། །འོག་དང་སྟེང་དུ་གཞག་པར་བྱ། །དེ་ལྟར་ཨཱ་ཨི་ཡང་དག་སྦྱོར། །ཨཱ་ཨི་དེ་བཞིན་
ལུས་ཉིད་དོ། །ཨུ་ཨེ་ཨུ་ཨོ་དེ་བཞིན་དུའོ། །གཞན་ཡང་ཨེ་ཨཱ་རྟག་ཏུ་བསམ། །དེ་བཞིན་ཨོ་ཨཱ་ཡང་དག་སྦྱོར། །སྟེང་དང་འོག་ཏུ་བསམ་པར་བྱ། །ལྟ་སྟངས་སུམ་ཅུ་རྩ་དྲུག་གིས། །བླ་ན་མེད་པའི་གནས་ལ་འཇུག །དེ་དག་ལྟེ་བའི་དབུས་ཉིད་དུ། །དང་པོའི་སངས་

49-1-65b

རྒྱས་ཡང་དག་གནས། །དེ་ཡི་མིང་ནི་གཞན་དག་ཀྱང་། །འཇམ་དཔལ་གཞོན་ནུ་ཞེས་བྱར་བཏགས། །དྷཱི། གནས་པའི་སྒྲ་ཡིས་ཡང་དེ་བསྟན། །སུམ་ཅུ་རྩ་གསུམ་ཡི་གེའི་གཙོ། །ཨོཾ་ཨོཾ་ཡི་གེ་ཚངས་པའི་མཆོག །།གནས་པ་ཁམས་གསུམ་ཉིད་དུའོ། །ཛྲ། རོལ་པ་གང་ཕྱིར་
རྟག་ཏུ་བྱེད། །ཏཱི། དྲག་པོ་དམན་པའི་ལས་འཇོམས་པ། །ཀྵྞ། ཡི་གེ་ཕུན་སུམ་ཚོགས་པའོ། །དུཿ། དཀའ་བ་སྲིད་པའི་རྒྱ་མཚོ་ལས། །ཁ། ནམ་མཁའ་འདྲ་བར་སྙིང་རྗེ་དག །ཙྪེ། གཅོད་པ་སེམས་ཀྱི་བག་ཆགས་སོ། །ད། ལྟ་བ་དག་པ་མ་ལུས་པས། །པྲ། ཐ་མར་དྲི་མ་མེད་པར་
གསལ། །ཛྙཱ། ཤེས་དང་ཤེས་བྱའི་ཚིག་དོན་ཏེ། །ཛྙཱ། ཡེ་ཤེས་རྣམ་ཤེས་དབྱེར་མེད་ཐིམ། །ན། མི་གནས་མིང་དང་རྣམ་པར་ཤེས། །མཱུ། རྩ་བ་ཨུ་མ་ནི་རུ་བརྗོད། །རྟ། དཀའ་ཐུབ་དེ་བཞིན་བཟླས་པའོ། །ཡེ། གང་བྱེད་གང་ཕྱིར་ཡིད་ཀྱིས་སོ། །ཛྙཱ། ཡེ་ཤེས་ལ་གོམས་རྣལ་འབྱོར་
གྱིས། །ན། མི་བདེན་བདེན་པའི་རྟོག་པ་མེད། །ཀཱ། ལུས་ཀྱི་ལས་ནི་རྟག་ཏུ་བྱེད། །ཡ། གང་ལས་སངས་རྒྱས་མཆོག་འབྱུང་བའོ། །བཱ། བག་ཆགས་གང་ཕྱིར་རྟག་ཏུ་གནས། །གཱི། བརྗོད་དེ་ཐར་པའི་རྒྱུ་རུའོ། །ཤྭ། དབུགས་དབྱུང་བ་ནི་རླུང་ཆེན་པོ།།      །། བུ་གར་རྣལ་འབྱོར་སྟོབས་ཀྱིས་
དབབ། །ཨ། མི་འགྱུར་བ་ཡི་གནས་སྐབས་དུས།།      །། གསང་བའི་རྣལ་འབྱོར་དུ་བརྗོད་པའོ། །པ། ཇི་ལྟར་པདྨའི་ཟེ་འབྲུའི་སྐུ། །ཙ། ཟླ་བ་འཛག་ལྟར་ཡང་དག་བྱུང་། །ན། ཡོད་མིན་སྐྱེ་བ་ཅུང་ཟད་ཀྱང་། །ཡ། ཐེག་པ་གསུམ་ལས་ཡང་དག་བྱུང་། །ཏེ། དེ་ནས་གཞན་
ཡང་ཐེག་གསུམ་པོར། །ན། མིང་སོགས་རྫོགས་སངས་རྒྱས་ཀྱིས་བསྡམས། །མ། རྡོ་རྗེ་ཆེན་པོའི་ལུགས་དེ་ལས། །བརྗོད་ཀྱིས་མི་ལང་སངས་རྒྱས་འབྱུང་། །དེར་གནས་སངས་རྒྱས་ཞིང་ཉིད་དུ། །སེམས་ཅན་སྨིན་ཕྱིར་རབ་ཏུ་ཞུགས། །དེ་ལྟར་སྔགས་གྱི་ཡི་གེ་ཡིས། །
དོན་གྱི་བརྡར་བཏགས་རབ་བརྗོད་པའོ། །དེ་དོན་རྟག་ཏུ་བསྒོམ་བྱ་བ། །སྙིང་ལ་འཁོར་ལོ་བརྒྱད་དྲུག་སོགས། །དེ་ཕྱིར་བྱང་སེམས་རྡོ་རྗེ་ཡི། །སྤྲུལ་པ་ཐོག་མ་ཐ་མ་ཤེས། །དེ་བཞིན་སྒྱུ་འཕྲུལ་དྲ་བ་ལས། །སྤྲུལ་པ་འབུམ་སོགས་གྲངས་མེད་དོ། །དེ་དག་བདེ་བའི་

49-1-66a

གཟུགས་སུ་སྟེ། །ཚིགས་བཅད་གསུམ་ལས་ཡང་དག་བྱུང་། །དེ་དག་གཞན་ཡང་འདི་ལྟར་སོགས། །བསྐལ་པ་བཟང་པོ་འདི་ལས་སྐྱེས། །ཨ་ཡིག་གསུམ་ལས་ཡང་དག་རྫོགས། །བོ་དྷི་ཙིཏྟའི་ཡི་གེ་དེའོ། །དེ་ལས་སྐུ་རྣམས་སྐྱེས་པ་ནི། །ཆོས་དང་
ལོངས་སྤྱོད་བདེ་ཆེན་པོ། །སྣ་ཚོགས་རྣལ་འབྱོར་སྦྱོར་བ་ལས། །རྟག་ཏུ་སྤྲུལ་པ་ཉིད་ཀྱང་སྐྱེ། །གང་ཕྱིར་དེ་ནི་སྲོག་ཆེན་པོ། །མི་ཟད་སྐྱེ་བ་རྣམ་པར་སྤངས། །སེམས་ཅན་འདུལ་བའི་བསམ་པ་ཡིས། །ངག་གིས་ཐམས་ཅད་བརྗོད་པ་ཡིན། །གང་ཕྱིར་སྒྱུ་འཕྲུལ་དྲ་བ་ཙམ། །
རྒྱུད་མེད་སངས་རྒྱས་རྣམས་ཀྱིས་གསུངས། །དེས་ན་ཚིགས་བཅད་དེ་གཉིས་དང་། །སྒྱུ་འཕྲུལ་དྲ་བའི་དེ་བཞིན་གསུམ། །ལྔ་ཡིས་སྤྱི་གཙུག་འཁོར་ལོ་བཤད། །གཉིས་གཉིས་སྦྱོར་ལས་ཡང་དག་བྱུང་། །ཡང་ནི་འདི་ལྟར་ཤེས་བྱ་སོགས། །དེ་ཡང་ཚིགས་བཅད་བཅུ་
བཞི་སྟེ། །དེ་རྣམས་ཚིགས་བཅད་གཉིས་དང་ནི། །ལྷག་མ་བཅུ་གཉིས་ཀྱི་ནང་ནས། །བརྒྱད་ཀྱིས་སྙིང་གའི་འཁོར་ལོའོ། །གཞན་ཡང་བཞི་ཡིས་ཤེས་བྱ་བ། །འཁོར་ལོའི་ནང་ནས་དཔྲལ་བའི་འོ། །དེ་ལྟར་ཐམས་ཅད་ཤེས་བྱ་བ། །ངག་གི་དབང་ཕྱུག་ཆོས་ཀྱི་
དབྱིངས། །དོན་དམ་ལ་ནི་བསྟོད་པའོ། །ཉེ་བར་བསྡུས་པ་ལས་སྤྱི་གཙུག་གི་འཁོར་ལོའི་རྣམ་པར་རྟོག་གེ་ཞེས་བྱ་བ་སྟེ་གཉིས་པའོ།།      །།གཞན་ཡང་སྙིང་གའི་བུ་ག་ཡི། །ཚིགས་བཅད་བརྒྱད་པ་བརྗོད་པར་བྱ། །སེམས་ཀྱི་ཐིག་ལེ་དག་གི་མིང་། །དང་པོའི་
མིང་ནས་ཀུན་གཞི་མཐར། །དེ་རྣམས་མིང་དུ་བཏགས་པ་ནི། །བརྒྱད་ཅུ་རྩ་དྲུག་དག་ཏུ་བརྗོད། །གཞན་དུ་གསུངས་པས་རྙེད་སླ་བས། །འདི་ནི་བདག་གིས་མ་བརྗོད་དེ། །དེ་དག་ངེས་ཚིག་ཏུ་གྱུར་པ། །ཇི་ལྟར་བསླབ་པའི་མན་ངག་ལས། །ཆེན་པོ་ཆེན་པོ་ཆེན་པོས་
སོགས། །ཐེག་པ་ཆེན་པོའི་ཚུལ་མཆོག་གིས། །ཇི་སྲིད་མཐའ་རུ་ཐུག་པའི་བར། །ཚིག་དག་དྲུག་ཅུ་རྩ་ལྔ་སྟེ། །རྟག་ཏུ་ཞེས་བྱ་ཆེན་པོ་དག །དེ་བཞིན་འདོད་ཆགས་ཞེ་སྡང་སོགས། །ཟླ་བ་ཉི་མའི་དབྱེ་བ་ལས། །དཀྱིལ་འཁོར་དག་ནི་དྲུག་ཅུའོ། །དེ་བཞིན་སྔར་

49-1-66b

ནི་བརྗོད་པ་ལས། །རཱ་ཧུ་ལས་ནི་ལོངས་སྤྱོད་བྱེད། །དེ་དག་གིས་ནི་དང་པོའི་དོན། །ཇི་ལྟར་གསལ་བར་བརྗོད་པར་བྱ། །ཇི་ལྟར་དེ་ཡི་ལྷ་རྣམས་ནི། །ངག་གི་དབང་ཕྱུག་ཆོས་ཀྱི་དབྱིངས། །དང་པོའི་སངས་རྒྱས་སྙིང་ག་རུ། །ཡེ་ཤེས་སེམས་དཔའ་བརྗོད་པའོ། །དེ་ཡི་སྙིང་གར་
ས་བོན་དག །འདོད་ཆགས་ལ་སོགས་ལྔ་ཡི་དངོས། །རེ་རེ་དག་ལ་བཅུ་གཉིས་དངོས། །ཡི་གེ་བཅུ་གཉིས་དག་ཏུ་དབྱེ། །དང་པོ་དབྱངས་ཡིག་ཐུང་ངུ་སྟེ། །གཉིས་པ་དེ་བཞིན་རིང་པོའོ། །གསུམ་པ་ཐིག་ལེར་སྦྱོར་བའོ། །ཚེག་དྲག་སྦྱོར་བ་བཞི་པ་ཡིན། །ལྔ་པ་དྲག་པོའི་
ཐིག་ལེ་ཅན། །དབྱངས་ཡིག་གྲངས་སུ་ཤེས་པར་བྱ། །ཇི་ལྟར་དབུ་ཡི་རྣལ་འབྱོར་ལ། །གཟུང་བས་རྣལ་འབྱོར་ཕ་རོལ་འགྲོ། །དེ་དག་ཐུང་ངུ་ཆེན་པོ་ལྔ། །འདོད་ཆགས་ལ་སོགས་དབུ་མར་གནས། །གང་ཕྱིར་རྟག་ཏུ་རིང་པོ་ནི། །ཆེན་པོ་ཆེན་པོའི་དེ་ལྟར་བརྟགས། །གང་
ཕྱིར་འདོད་ཆགས་ལ་སོགས་བཞི། །དང་པོ་སངས་རྒྱས་དེ་བཞིན་གཉིས། །ནམ་མཁའི་དཀྱིལ་འཁོར་གནས་སུ་ནི། །ཉི་མའི་ལམ་གྱི་ལྷ་རྣམས་སོ། །གཞན་ཡང་གཡོན་པའི་ལམ་གྱི་ནི། །ནམ་མཁའི་དཀྱིལ་འཁོར་དྲུག་ལ་ནི། །དང་པོའི་སངས་རྒྱས་གཉིས་དག་དང་། །
དེ་བཞིན་རྡོ་རྗེ་རྣོན་པོ་གཞན། །རྡོ་རྗེ་རལ་གྲི་ཡེ་ཤེས་སྐུ། །ངག་གི་དབང་ཕྱུག་དྲུག་པའོ། །དེ་བཞིན་གཡོན་པའི་ཟླ་བ་ལས། །རླུང་གི་དཀྱིལ་འཁོར་ལྷ་རྣམས་སོ། །སྣ་ཚོགས་རྡོ་རྗེ་རྡོ་རྗེ་ལས། །བསྲུང་བ་གནོད་སྦྱིན་ཁུ་ཚུར་ཏེ། །རྡོ་རྗེ་དང་པོ་ཀུན་མིང་ལ། །དེ་བཞིན་དུ་
ཡང་རྡོ་རྗེ་གར། །དེ་ལ་མེ་ཡི་དཀྱིལ་འཁོར་ནི། །ཆོས་ཀྱི་རྡོ་རྗེ་རྡོ་རྗེ་ཆོས། །དེ་བཞིན་ནོན་པོ་རྒྱུར་སྨྲ་བ། །དེ་བཞིན་གཞན་ཡང་རྡོ་རྗེ་གླུ། །མིང་གི་དང་པོར་རྡོ་རྗེར་ལྡན། །དེ་དག་གཡོན་གྱི་ཟླ་འབབ་པའོ། །དེ་ལ་དེ་བཞིན་ཆུ་དཀྱིལ་འཁོར། །སེམས་དཔའི་རྡོ་རྗེ་རྡོ་རྗེ་སེམས། །
རྒྱལ་པོ་ཚངས་པ་དེ་བཞིན་ལེགས། །དེ་བཞིན་གཞན་ཡང་རྡོ་རྗེ་སྒེག །དེ་ལས་ས་ཡི་དཀྱིལ་འཁོར་ལས། །རྡོ་རྗེ་རིན་ཆེན་རིན་རྡོ་རྗེ། །ཉི་མ་རྒྱལ་མཚན་དེ་བཞིན་བཞད། །དེ་བཞིན་གཞན་ཡང་རྡོར་ཕྲེང་མའོ། །དེ་བཞིན་གཡས་ཀྱི་ཉི་མ་ཡི། །ས་ལ་སོགས་པའི་དཀྱིལ་

49-1-67a

འཁོར་ཏེ། །སྤོས་ཀྱི་གླང་པོ་ཡེ་ཤེས་ཏོག །འབར་བའི་འོད་དང་ཉི་མའི་འོད། །དེ་བཞིན་མེ་ཏོག་རྡོ་རྗེ་ཞགས། །གཞན་ཡང་ཆུ་ཡི་དཀྱིལ་འཁོར་ལས། །དེ་བཞིན་བྱམས་པ་འཇམ་པའི་དཔལ། །དེ་བཞིན་དུ་ནི་ཐབས་ཀུན་སྐྱེ། མྱ་ངན་མུན་པ་ཐམས་ཅད་ནི། །ངེས་
པར་འཇོམས་པའི་བློ་གྲོས་གཞན། །བདུག་སྤོས་རྡོ་རྗེ་འགུགས་བྱེད་པའོ། །དེ་བཞིན་མེ་ཡི་དཀྱིལ་འཁོར་ནི། །དེ་ལ་རྒྱ་མཚོའི་བློ་གྲོས་དང་། །དེ་བཞིན་བློ་གྲོས་མི་ཟད་རིམ། །ཟླ་བའི་འོད་དང་བདུད་རྩིའི་འོད། །དེ་བཞིན་མར་མེ་ལྕགས་སྒྲོག་མའོ། །དེ་ལ་རླུང་གི་དཀྱིལ་འཁོར་
གྱི། །པྲ་ཏི་བྷ་ན་བརྩེགས་པའི་མཆོག །གནས་ཆེན་པོ་ནི་ཐོབ་པ་དང་། །ནམ་མཁའ་མཛོད་ནི་གསུམ་པའོ། །སྒྲིབ་པ་རྣམ་པར་སེལ་བ་དང་། །འབྱུང་བ་རྡོ་རྗེ་དྲིལ་བུ་མའོ། །དེ་ལྟར་དབུ་མའི་རྣལ་འབྱོར་གྱིས། །རཱ་ཧུ་ལ་ཡི་རྒྱུ་བར་ཤེས། །གང་ཕྱིར་རྟག་ཏུ་ཐིམ་པ་ནི། །འདོད་
ཆགས་ལ་སོགས་དྲུག་ཅུ་ལྔ། །དཀྱིལ་འཁོར་རེ་རེའི་མཐའ་རུ་ནི། །ཡེ་ཤེས་ཕ་རོལ་འགྲོ་བར་ཤེས། །ཆེན་སོགས་ཚིགས་བཅད་བརྒྱད་ཀྱི་མཐའ། །བསམ་པ་ཡེ་ཤེས་རྒྱ་མཚོ་སྟེ། །དེ་བཞིན་བྱམས་སོགས་ཇི་སྲིད་པ། །ཐེག་པ་ཆེན་པོའི་ཚུལ་གྱི་མཆོག །བཞི་དག་སྤྱི་བོ་ནས་
སྐྱེས་པའོ། །བརྒྱད་ནི་སྙིང་ག་ནང་ནས་སོ། །རྡོ་རྗེ་འཇམ་པའི་རང་བཞིན་ལ། །ཡེ་ཤེས་སྐྱེས་པའི་བསྟོད་པའོ། །གང་ཕྱིར་བརྒྱད་ཅུ་རྩ་དྲུག་ཚིག །མཐའ་རུ་བཤད་པར་ཡང་དག་གནས། །དེ་ལྟར་སྙིང་གར་འཁོར་ལོ་ཡི། །ཐིག་ལེའི་སྒྲ་ནི་ཡི་གེ་མེད། །ཉེ་བར་བསྡུས་པ་
ལས་ངག་གི་དབང་ཕྱུག་ཆོས་ཀྱི་དབྱིངས་ཀྱི་དཀྱིལ་འཁོར་གྱི་རྟོག་གེ་ཞེས་བྱ་བ་སྟེ་གསུམ་པའོ།།      །།དེ་བཞིན་དཔྲལ་བའི་འཁོར་ལོ་ཡི། །རྐང་གཅིག་མེད་པ་ཉི་ཤུ་ལྔའི། །ཚིགས་སུ་བཅད་པ་ཆོས་དབྱིངས་ཀྱི། །ཇི་ལྟར་རྒྱལ་བས་གསལ་བར་བྱ། །སངས་རྒྱས་
རྣམ་སྣང་མཛད་ཆེན་སོགས། །དང་པོའི་མིང་དུ་བརྡར་བཏགས་པས། །མཚན་ཉིད་དུ་ནི་བརྗོད་པ་ཡང་། །རང་ཉིད་བསྒོམ་པར་ཀློག་པའོ། །བདག་ཉིད་ཆོས་ཀྱི་དབྱིངས་ལྟ་བུར། །སེམས་དང་སེམས་མིན་བརྟགས་པ་མིན། །དབུ་མའི་ནང་གི་རྣལ་འབྱོར་རོ། །ཡིད་ཀྱི་

49-1-67b

མཐུ་བོའི་གནས་སུ་དེ། །གང་ཕྱིར་རྣམ་པར་སྣང་མཛད་ཆེ། །ལས་དག་པ་ཡི་དབྱངས་ཅན་ཡིན། །ཐེག་པ་ཆེན་པོའི་ཆོས་ཡིན་ཏེ། །སེམས་ཅན་དགོས་པའི་རྒྱུ་ཅན་དུ། །སྐྱེ་བ་མ་ཡིན་འགག་པ་མེད། །རྐྱེན་གྱི་དོན་ཕྱིར་འབའ་ཞིག་པོ། །གཟུགས་བརྙན་སྨིག་རྒྱུ་ལྟ་བུར་ནི། །
མཐོང་སྟེ་སྤྱོད་ཡུལ་དངོས་མ་ཡིན། །སྐྱེས་ཀྱང་བདག་ཏུ་གྲུབ་མ་ཡིན། །དེ་ལས་མ་གཏོགས་གཞན་ཡང་མིན། །དེ་ལ་གང་ཕྱིར་བྱས་སྐྱེས་མིན། །རང་ཉིད་མ་གྲུབ་བྱེད་པོ་གང་། །སེམས་ཅན་ཆེན་པོ་དེ་ཕྱིར་ལས། །བློ་ཡི་མིང་ཙམ་གྱིས་བྱས་པའོ། །དེས་ན་མིང་དང་ཚིག་
གིས་བསྡུས། །རྣམ་སྣང་མཛད་སོགས་ཡང་དག་བྱུང་། །དེ་ལ་སངས་རྒྱས་སེང་གེ་ཞེས་བྱའི་མིང་། །ཐུབ་པ་ཆེན་པོ་རབ་གསལ་བྱེད། །ཐུབ་ཆེན་ཞེས་བྱ་ཐུབ་པའོ། །གསང་སྔགས་ཚུལ་ཆེན་སྐུ་སྡུད་པ། །སྐྱེ་འབྱུང་ཞེས་བྱ་མེ་ཏོག་གོ། །གསང་སྔགས་ཚུལ་ཆེན་བདག་
ཉིད་ཅན། །དེ་བཞིན་གཤེགས་པ་སྤྱན་བཟངས་སོ། །ཕ་རོལ་ཕྱིན་བཅུ་ཐོབ་པ་ནི། །ཀུན་གྱི་དེད་དཔོན་དུ་བརྗོད་པའོ། །ཕ་རོལ་ཕྱིན་པ་བཅུར་གནས་པ། །ཕྱག་རྒྱ་ཆེན་པོའི་མིང་ཉིད་དོ། །ཕ་རོལ་ཕྱིན་བཅུ་དག་པ་ནི། །སྟོབས་པོ་ཆེ་རུ་བརྗོད་པ་ཡིན། །ཕ་རོལ་ཕྱིན་པ་བཅུ་
ཚུལ་ནི། །རྒྱུ་སྐར་རྣམས་ཀྱི་རྒྱལ་པོའི་མིང་། །ས་བཅུ་ཡི་ནི་དབང་ཕྱུག་ནི། །སྨན་ལྡན་བྱང་ཆུབ་སེམས་དཔའོ། །མགོན་པོ་ཞེས་བྱ་དེ་བཞིན་གྲགས། །ས་བཅུ་ལ་ནི་གནས་པ་པོ། །དེ་བཞིན་གཤེགས་པ་རྒྱལ་མཚན་མིང་། །ཤེས་བཅུ་པོ་ནི་འོད་ཟེར་ཆེ། །རྣམ་དག་བདག་ཉིད་
གྲོལ་ཕུང་པོ། །ཤེས་བཅུ་རྣམ་དག་འཆང་བ་ནི། །དེ་བཞིན་གཤེགས་པ་རྣམ་སྣང་མཛད། །རྣམ་པ་བཅུ་པོ་ཉི་མའི་སྙིང་། །དོན་བཅུ་ཞེས་པ་ཟླ་བའི་མིང་། །དོན་ཞེས་དེ་བཞིན་འོད་ཟེར་ཅན། །ཐུག་དབང་ཞེས་པ་འོད་འཕྲོ་བཟང་། །སྟོབས་བཅུ་ཞེས་པ་མྱ་ངན་མེད། །
ཁྱབ་བདག་ཅེས་པ་དེ་བཞིན་སྒེག །ཀུན་གྱི་དོན་ནི་མ་ལུས་བྱེད། །ཕྲེང་བ་འཛིན་པར་བརྗོད་པའོ། །རྣམ་བཅུ་ཞེས་པ་ཡོན་ཏན་འོད། །དབང་ལྡན་ཞེས་པ་དོན་སྟོན་པའོ། །ཆེ་ཞེས་པ་ནི་མེ་མར་ལྡན། །ཐོགས་མེད་ཅེས་པར་འགྲུབ་པའོ། །སྤྲོས་མེད་བདག་ནི་སྨན་ཞེའོ། །

49-1-68a

དམ་པའི་བདག་ནི་དཔལ་ཞེས་བྱ། །དེ་བཞིན་ཉིད་བདག་མཛོད་སྤུ་ཞེའོ། །བདེན་པར་སྨྲ་བ་བརྟག་པའོ། །ཇི་སྐད་སྨྲས་པ་དེ་བཞིན་བྱེད། །དེ་བཞིན་གཤེགས་པ་དཔལ་གྱི་ལྷའོ། །གཞན་གྱི་ཚིག་མིན་མཐོང་བར་དཀའ། །གཉིས་སུ་མེད་པ་ཡོན་ཏན་ཏོག །
གཉིས་མེད་ལྡན་པ་སྒྲ་གཅན་ནོ། །ཡང་དག་མཐའ་ལ་རྣམ་པར་གནས། །བྱང་ཆུབ་སེམས་དཔའ་གྲངས་ཅན་མིན། །བདག་མེད་སེང་གེའི་སྒྲ་དང་ལྡན། །དེ་བཞིན་གཤེགས་པ་ཚངས་པའི་དབྱངས། །མུ་སྟེགས་རི་དྭགས་ཞེས་པའི་སྒྲ། །བསྟན་པའི་མཚམས་ཞེས་བྱ་བའི་
མིང་། །འཇིགས་བྱེད་ཅེས་པ་རིགས་པར་ལྡན། །ཀུན་དུ་འགྲོ་བ་འོད་མཛད་པའོ། །དོན་ཡོད་སྟོབས་པོ་ཞེས་པ་ནི། །རི་བོ་ཆེན་པོ་ཞེས་བརྗོད་པའོ། །དེ་བཞིན་གཤེགས་པའི་ཡིད་མགྱོགས་ནི། །དེ་བཞིན་གཤེགས་པ་རྡོ་རྗེའི་མིང་། །རྒྱལ་བ་རྒྱལ་མིང་ཞེས་པའི་མཚན། །དགྲ་
རྒྱལ་ཞེས་པ་འཇིགས་མེད་པའོ། །རྣམ་པར་རྒྱལ་བའི་རིན་ཆེན་མཚན། །འཁོར་ལོས་སྒྱུར་བ་པདྨར་གསུངས། །སྟོབས་པོ་ཆེ་ནི་སྟོབས་སྡེ་ཅན། །ཚོགས་ཀྱི་གཙོ་བོ་མེ་ཏོག་འོད། །ཚོགས་ཀྱི་སློབ་དཔོན་ཡེ་ཤེས་འོད། །ཚོགས་རྗེ་ཞེས་པ་ལྷ་ཆེན་པོ། །ཚངས་པ་ཚོགས་ཀྱི་
བདག་པོའོ། །བཙུགས་པ་ཆེན་པོ་སྣང་མཐའ་ཡས། །རིང་པོ་སྟེ་ནི་ཀླུས་བྱིན་ནོ། །གཞན་གྱི་ཚུལ་ནི་བསྟན་པའི་རིམ། །ཚུལ་ཆེན་པོ་ནི་དོན་ཡོད་མཐོང་། །ཚིག་རྗེ་ཞེས་པ་དཔའ་བོ་སྦྱིན། །ཚིག་བདག་ཅེས་པ་མི་ལྟུང་བ། །ཚིག་མཁས་པ་ནི་སེང་རྒྱལ་མཚན། །ཚིག་
དབང་ཞེས་པ་རྒྱལ་བའོ། །ཚིག་མཐའ་ཡས་པ་ཆོས་པའོ། །ཚིག་བདེན་པ་ནི་དཀའ་བའི་རྒྱལ། །བདེན་པ་སྨྲ་བ་དོན་འདོད་པའོ། །བདེན་པ་བཞི་ནི་ཉེར་སྟོན་པའོ། །དེ་བཞིན་གཤེགས་པ་དགའ་བ་མཛད། །ཕྱིར་མི་ལྡོག་པ་ཆུ་ཡི་ལྷ། །ཕྱིར་མི་འོང་བ་ཡོན་ཏན་ལག །བསེ་
རུ་ཞེས་པ་ཡངས་པའི་སྤྱན། །འདྲེན་པ་རང་རྒྱལ་ཞེས་བྱ་བ། །དོན་ཡོད་དབྱངས་ཅན་ཞེས་པའི་མཚན། །སྣ་ཚོགས་མྱ་ངན་འདས་ལས་བྱུང་། །ཐུགས་བཟང་པོ་ཞེས་བྱ་བར་བརྗོད། །འབྱུང་བ་ཆེན་པོ་རྒྱུ་གཅིག་པོ། །རྟག་ཏུ་ཟླ་བའི་མཚན་དུ་གནས། །དགྲ་བཅོམ་ཞེས་པའི་

49-1-68b

རི་བོང་ཅན། །ཟག་པ་ཟད་པ་གྲགས་ཆེན་པོ། །དགེ་སློང་ཞེས་པ་གཙུག་ནོར་བུ། །འདོད་ཆགས་བྲལ་བ་ཞེས་གྲགས་པའོ། །ཐུབ་པ་ཞེས་པ་སེང་གེའི་འགྲོས། །བདེ་བ་རྙེད་པ་དང་བའི་མིང་། །འཇིགས་མེད་ཐོབ་པ་ཞེས་པ་ནི། །དེ་བཞིན་གཤེགས་པ་རྣམ་རྒྱལ་དོན། །བསིལ་བར་
གྱུར་པ་ཤེས་རབ་བརྩེགས། །རྙོག་མེད་པ་ནི་ལེགས་གནས་པའོ། །རིག་པ་སྤྱོད་པ་ཕུན་སུམ་ཚོགས། །དེ་བཞིན་གཤེགས་པ་བློ་གྲོས་མཚན། །བདེ་གཤེགས་ཤེས་པ་ཡན་ལག་སྐྱེས། །འཇིག་རྟེན་རིག་པའི་མཆོག་ཅེས་པ། །བདུད་རྩི་བློ་ཞེས་པ་ཡི་མཚན། །བདག་གིར་མི་འཛིན་
གཟུགས་བཟང་པོ། །ངར་མི་འཛིན་ནི་ཡེ་ཤེས་ཅན། །བདེན་པ་གཉིས་ཀྱི་ཚུལ་ལ་གནས། །དེ་བཞིན་གཤེགས་པ་འོད་ཟེར་མཚན། །འཁོར་བའི་ཕ་རོལ་མཐར་སོན་པ། །སངས་རྒྱས་བདར་བའི་དཀར་འོད་ཅན། །བྱ་བ་བྱས་པ་བཀྲ་ཤིས་ལྡན། །སྐམ་སར་གནས་པ་བདེན་པའི་
ཏོག །ཡེ་ཤེས་འབའ་ཞིག་ལས་བྱུང་བ། །དེ་བཞིན་གཤེགས་པ་པདྨའི་མཚན། །ཤེས་རབ་མཚོན་ཆེན་རྣམ་འཇོམས་པ། །མི་ཡི་ཐེག་པ་ཞེས་པའི་མཚན། །དམ་ཆོས་ཞེས་བྱ་བདེ་བའི་ལག །ཆོས་རྒྱལ་ཞེས་པའི་མཚན་ཡང་ནི། །དེ་བཞིན་ཡེ་ཤེས་མཛད་པའི་བློ། །གསལ་ལྡན་
ཞེས་པ་འོད་བྲལ་མིན། །འཇིག་རྟེན་སྣང་བྱེད་ཅེས་པ་ནི། །དེ་བཞིན་གཤེགས་པ་ཚངས་པས་བྱིན། །མཆོག་ནི་དེ་བཞིན་རིན་ཆེན་མཛད། །ཆོས་ཀྱི་དབང་ཕྱུག་མེ་ཏོག་ལྷ། །ཆོས་ཀྱི་རྒྱལ་ནི་ལེགས་བསམ་དོན། །ལེགས་པའི་ལམ་ནི་ཆོས་དབང་ཕྱུག །ཉེ་བར་སྟོན་པ་བློ་གྲོས་
གྲགས། །དོན་ཡོད་གྲུབ་པ་རྡོ་རྗེ་ཏོག །བསམ་པ་འགྲུབ་པ་ཕན་སྒྲུབ་པའོ། །ཀུན་དུ་རྟོག་པ་ཐམས་ཅད་སྤངས། །རྣམ་པར་རོལ་པའི་མིང་ཅན་ནོ། །རྣམ་པར་མི་རྟོག་རྟོགས་པའི་མཆོག །མི་ཟད་ཅེས་པ་དུ་མའི་ལྷ། །ཆོས་དབྱིངས་ཞེས་པ་དྲི་ཡི་ཏོག །ཆོས་ཀྱི་དབྱིངས་ནི་འོད་ཀྱི་ཚོགས། །ཆོས་དབྱིངས་
དམ་པ་མི་ཟད་མིང་། །དམ་པ་དེ་བཞིན་རིན་ཆེན་སྙིང་། །བསོད་ནམས་ལྡན་ཞེས་བྱ་བ་ནི། །བསོད་ནམས་ལྡན་པ་གྲོང་ཁྱེར་མཐོང་། །བསོད་ནམས་ཚོགས་ནི་ཚེས་པའོ། །ཡེ་ཤེས་ཤེས་པ་ཡིད་ཀྱི་ཡུལ། །ཡེ་ཤེས་མཛད་པ་ཡོན་ཏན་གྲོགས། །

49-1-69a

ཆེན་པོ་ཞེས་བྱ་ཟླ་བའི་དོན། །ཡེ་ཤེས་ལྡན་ནི་གསལ་བའི་རོ། །ཡོད་མེད་ཤེས་ཞེས་བྱ་བ་ནི། །དེ་བཞིན་གཤེགས་པ་སེང་གེའི་ཏོག །ཚོགས་གཉིས་ཚོགས་ནི་བསགས་པའོ། །ལུགས་ལས་བཟློག་དཔལ་ཞེས་བྱའི་མཚན། །རྟག་པ་ཞེས་བྱ་སྙིང་པོའི་དཔལ། །
ཀུན་རྒྱལ་དངོས་པོའི་མཐར་སྟོན་པའོ། །རྣལ་འབྱོར་ཞེས་བྱ་ཀློག་གིའོ། །བསམ་བྱ་ཞེས་བྱ་གསེར་གྱི་སྦྱིན། །བསམ་པའི་བདག་པོ་གང་ཕྱིར་ཚིག །དེ་བཞིན་གཞན་གྱིས་མི་ཐུབ་ཏོག །སོ་སོ་རང་རིག་ཅེས་པའི་རྒྱལ། །མི་གཡོ་བ་ནི་རབ་གྲུབ་གྲགས། །མཆོག་གི་དང་པོ་བརྩོན་
འགྲུས་བརྟན། །སྐུ་གསུམ་འཆང་བ་ཞེས་པའི་ཚིག །དཔེ་བྲལ་ཞེས་པ་གྲགས་པའི་མཚན། །སྐུ་ལྔའི་བདག་ཉིད་ཅན་ཞེས་པ། །སངས་རྒྱས་འཇིགས་པ་ཤིན་ཏུ་གྱུར། །སངས་རྒྱས་ཞེས་པ་དགྲ་བཅོམ་ལྷ། །དེ་ལ་ཡེ་ཤེས་ལྔ་བདག་ནི། །མར་མེ་ཆེན་པོ་ཞེས་པའི་མཚན། །
ཁྱབ་བདག་ཅེས་པ་འཇིག་རྟེན་འོད། །སངས་རྒྱས་ལྔ་བདག་ཅེས་བྱ་ནི། །དྲི་ཡི་བདག་པོར་གྲགས་པའོ། །ཡོན་ཏན་རྩེ་འཛིན་ཅོད་པན་ཅན། །སྤྱན་ལྔ་ཞེས་པ་མུན་བྲལ་གྱུར། །ཆགས་མེད་འཆང་བ་སེང་གེ་སྤྲེ། །སངས་རྒྱས་ཐམས་ཅད་སྐྱེད་པའོ། །དེ་བཞིན་གཤེགས་
པ་རིན་ཆེན་གྲགས། །སངས་རྒྱས་སྲས་པོ་སྐྱོ་རང་བཞིན། །དམ་ཆོས་ཡིད་སྐྱེས་ཟླ་བའོ། །ཤེས་རབ་སྲིད་པ་ལེགས་པར་སྟོན། །སྐྱེ་འབྱུང་གཟུགས་བརྙན་བརྒྱན་པའོ། །སྐྱེ་གནས་ཞེས་པ་ནོར་བུ་བཟང་། །ཆོས་ལས་བྱུང་བ་གང་ཕྱིར་ཚིག །རི་བོ་བརྩེགས་པ་ཏོག་གི་མིང་། །
འབྱུང་བ་སྲིད་སེལ་ཆོས་འབྱུང་གནས། །དེ་ལ་གཅིག་པུ་སྲ་མཁྲེགས་གཞན། །རྣམ་པར་དོན་ངེས་ཡེ་ཤེས་ཅན། །རྡོ་རྗེའི་བདག་ནི་ཆེར་སྟེར་བའོ། །སྐྱེས་མ་ཐག་ནི་རིན་ཆེན་གནས། །གང་ཕྱིར་འགྲོ་བའི་བདག་གི་ཚིག །རྒྱལ་བའི་དབང་པོ་བཏགས་པའི་མིང་། །ནམ་མཁའ་
ལས་བྱུང་སྟོན་པ་ནི། །སེང་གེ་རྣམ་གནོན་འགྲོ་བའོ། །རང་བྱུང་བ་ནི་གནས་པའི་བློ། །ཤེས་རབ་ཡེ་ཤེས་ཤེས་པ་ནི། །སྐལ་བྲལ་གདུགས་ཞེས་པ་ཡི་མཚན། །ཆེན་པོ་ཐུ་བོ་དེ་བཞིན་གཤེགས། །རྣམ་པར་སྣང་མཛད་བརྗོད་པའི་དཔལ། །འོད་ཆེན་པོ་ནི་སེང་གེའི་སྒྲ། །སྣང་

49-1-69b

བར་བྱེད་ནི་རྣམ་རོལ་པའོ། །རྣམ་པར་སྣང་བ་ཀླུ་ཡི་འོད། འགྲོ་བའི་མར་མེ་ཞེས་བྱ་ནི། །མེ་ཏོག་རི་ཞེས་བྱ་བའི་མཚན། །ཡེ་ཤེས་སྐར་མ་གླུ་དགའ་ཅན། །གཟི་བརྗིད་ཆེན་པོ་དྲི་དབང་ཕྱུག །འོད་གསལ་བ་ནི་ཤིན་ཏུ་གསལ། །རིག་སྔགས་རྒྱལ་ནི་སྟོབས་ཀྱི་ལྷ། །སྔགས་
མཆོག་ཅེས་པ་ཡོན་ཏན་ཕྲེང་། །གསང་སྔགས་རྒྱལ་པོ་ཀླུ་ཡི་ཕྱག །དོན་ཆེན་བྱེད་ནི་གཟུགས་བརྙན་བརྒྱན། །གཙུག་ཕུད་ཆེན་པོ་རྒྱས་པའི་བློ། །རྨད་བྱུང་གཙུག་ནི་ཡེ་ཤེས་ཁྱབ། །དེ་བཞིན་སྣ་ཚོགས་སྟོན་པ་ནི། །བདུད་རྩི་མིག་ཅན་ཞེས་བྱའོ། །ནམ་མཁའ་བདག་
པོ་བདེན་པར་སྨྲ། །སངས་རྒྱས་ཀུན་གྱི་སྐུ་ཡི་མཆོག །དེ་བཞིན་གཤེགས་པ་རབ་ཞི་བློ། །འགྲོ་ཀུན་དགའ་བའི་མིག་ལྡན་ནོ། །མཐའ་ཡས་གཟུགས་ཞེས་བྱ་བའི་མཚན། །སྣ་ཚོགས་གཟུགས་ནི་རྣམ་སྣང་མཛད། །སྐྱེས་པ་པོ་ནི་རིན་ཆེན་ཏོག །མཆོད་པ་ཞེས་བྱ་འདོད་པ་
བྲལ། །གུས་པ་ལེགས་གཞིབས་ཞེས་པའི་མཚན། །དྲང་སྲོང་ཆེན་པོ་ཞེས་པའི་སྒྲ། །དོན་ཡོད་སངས་རྒྱས་རིམ་པའོ། །གཞན་ཡང་རིགས་གསུམ་འཆང་ཞེས་པ། །དེ་བཞིན་གཤེགས་པ་རྟོགས་པ་འཆང་། །སྔགས་ཅན་ཞེས་པ་མེ་ཏོག་ཏོག །དམ་ཚིག་ཆེན་པོ་སྔགས་འཆང་བ། །
མིང་ནི་རྡོ་རྗེ་དབང་རྒྱལ་པོ། །དཀོན་མཆོག་གསུམ་ཞེས་བྱ་བའི་ཚིག །སངས་རྒྱས་གཟི་བརྗིད་ཆེན་པོ་ཅན། །གཙོ་བོ་འཛིན་པ་དོན་ཡོད་མཛད། །ཐེག་པ་མཆོག་གསུམ་སྟོན་པ་པོ། །དེ་བཞིན་གཤེགས་པ་ཚེ་དཔག་མེད། །དོན་ཡོད་ཞགས་པ་གང་ཕྱིར་གཞན། །ཁྲོ་བོ་དབང་
ཕྱུག་ཏུ་ནི་འདོད། །རྣལ་འབྱོར་དོན་གནས་ཡེ་ཤེས་ཅན། །རྡོ་རྗེ་ཞགས་པ་དེ་བཞིན་དུ། །མི་ཤིགས་གྲགས་པར་མིང་དུ་བཏགས། །འཛིན་པ་ཆེན་པོར་རྣམ་བཤད་པ། །དེ་བཞིན་གཤེགས་པ་མྱ་ངན་མེད། །རྡོ་རྗེ་ལྕགས་ཀྱུ་དྲི་མ་བྲལ། །ཞགས་པ་ཆེ་ནི་ཚ་བའི་ལྷའོ། །དེ་ལྟར་
དེ་དག་མཚན་ཀུན་ནི། །ཨ་བ་དྷཱུ་ཏཱིའི་ནང་ནས་སྐྱེས། །དཀྱིལ་འཁོར་གཅིག་གི་ནང་དུ་ཡང་། །ཞུགས་པས་སངས་རྒྱས་སྤྱོད་ཡུལ་ལོ། །སྐྱེ་དང་འགག་པ་ཤེས་པ་ལས། །ལུས་ཀྱི་སྐྱེ་སོགས་རྣམ་པར་སྤངས། །ཡེ་ཤེས་ཆེན་པོ་ཆོས་ཀྱི་དབྱིངས། །བརྒྱ་དང་བརྒྱད་ཅུ་རྩ་གཅིག་

49-1-70a

གོ། །གང་ཕྱིར་ཐ་མལ་འཁྲུལ་པ་ནི། །དངོས་པོ་སྐྱེ་དང་འཇིག་ལ་སོགས། དེ་ཉིད་སྤངས་པས་གྲོལ་བ་ནི། །མཁས་པས་སྲེད་པ་སྤངས་པས་སོ། །དེ་ལྟར་རྣམ་པར་སྣང་མཛད་རྫོགས། །སྔགས་ཀྱི་མིང་གི་སྦྱོར་བ་ནི། །དེ་རྣམས་བཤད་པར་བྱ་བ་ནི། །ཐེག་
པ་གསུམ་སོགས་ཆོས་ལུགས་སུ། །སློབ་དཔོན་དུ་མ་ཡིས་ནི་གསུངས། །དེ་དག་གིས་ནི་མ་བཤད་དེ། །རོལ་པའི་རྡོ་རྗེ་འགྲེལ་པ་ལས། །མདོ་རུ་བསྡུས་པ་རྒྱུ་གཉིས་ཙམ། །དེ་ཡི་ལྷག་མ་ཤེས་པར་བྱའོ། །ཡང་ན་གཞན་དུ་བསྟན་པ་སྟེ། །འོན་ཀྱང་ཐམས་ཅད་ཡོངས་མ་
རྫོགས། །གང་ཕྱིར་མཐའ་ཡས་སངས་རྒྱས་གསུངས། །ཚད་མར་ཐམས་ཅད་མི་གནས་ཏེ། །དེ་ཕྱིར་ཆོས་ནི་རྒྱལ་བ་ཡིས། །མིང་ཉིད་མང་པོ་ཆོས་མང་པོ། །ཆོས་ཀྱི་དབྱིངས་ཀྱི་ངང་དུ་བཤད། །ཉེ་བར་བསྡུས་པ་ལས་ཆོས་ཀྱི་རྣམ་པར་རྟོག་གེ་ཞེས་བྱ་བ་སྟེ་བཞི་པའོ།།      །།
མིང་ནི་མང་པོ་བསྡུས་པ་ཡིས། །རྣམ་པ་མང་པོ་བཤད་པར་བྱ། །ཅུང་ཟད་མན་ངག་གིས་ཀུན་བསྒྲུབས། །སྔོན་དུ་མེ་ལོང་ཡེ་ཤེས་ཏེ། །རྒྱུད་དང་རྒྱུད་ནང་ཐ་དད་པ། །འདིར་ནི་ཡང་དག་བསྡུས་པའོ། །ཚིགས་སུ་བཅད་པ་བཞི་ཆ་སོགས། །མཚན་ནི་བདུན་ཅུ་རྩ་གཅིག་གིས། །
དེ་ཡི་ནང་ནས་ཚིགས་བཅད་གསུམ། །ཆ་ལྷག་མ་ནི་འབྲལ་བ་རུ། །ལྷག་མ་བདུན་ནི་ཡང་དག་བཤད། །ལྟེ་བའི་འཁོར་ལོའི་སྦུབས་སུ་ནི། །དེ་ཕྱིར་རྡོ་རྗེ་འཇིགས་བྱེད་སོགས། །སྒྲ་དང་ལྡན་པ་ནམ་མཁའོ། །དེ་ལྟ་བུ་ཡི་བར་དུ་ནི། །འཇམ་པའི་རྡོ་རྗེ་རྟག་ཏུ་གནས། །རྡོ་རྗེ་འཇིགས་
བྱེད་རྒྱུད་ལས་ཏེ། །རྡོ་རྗེ་འཇིགས་བྱེད་ཁྲོ་བོ་ནི། །ཕྱག་དང་ཞལ་དང་ཞབས་རྣམས་ནི། །སུམ་ཅུ་རྩ་གསུམ་དགུ་བཅུ་དྲུག །དེ་ལྟར་བརྡ་ཡི་གཟུགས་དང་ནི། །རྣལ་འབྱོར་དུས་ཀྱི་བདག་ཉིད་དོ། །དགའ་བ་བཅུ་དྲུག་ཞབས་ཉིད་དོ། །བུ་ག་དགུ་ནི་ཞལ་ཉིད་དོ། །ཕྱག་ནི་ལྟ་བ་
བདག་ཉིད་བཤད། །གཉིས་པོ་གཞན་ནི་ནང་སོང་བརྟག །དེ་ལྟར་གསུམ་གྱི་ནང་དུ་ནི། །ཡིད་ཀྱི་སྦྱོར་བས་འཇིགས་པར་བྱེད། །ཁྲོ་བོའི་རྒྱལ་པོ་ཞེས་པའི་མཚན། །ཁྲོ་བོ་རྣམ་རྒྱལ་རྒྱུད་ལས་ནི། །རྟོག་པ་ཕུང་པོ་མ་ལུས་པ། །གང་དུ་ལོངས་སྤྱོད་བྱ་ཕྱིར་རོ། །དེ་ལ་འདི་

49-1-70b

ནི་ཞལ་དྲུག་པ། །ཡན་ལག་དྲུག་ཏུ་རྣམ་པར་བསྟན། །དེ་ཉིད་སྒྱུ་འཕྲུལ་དྲ་བ་རུ། །དངོས་པོ་ལྔ་བཅུ་རྩ་དྲུག་སྟེ། །གཞན་ཡང་དེ་བཞིན་བཤད་པར་བྱ། །གཉིས་བསྡོམས་གྲངས་ནི་དྲུག་ཅུ་སྟེ། །ཕྱག་དང་ཞབས་སུ་ཤེས་པར་བྱ། །ཁྲོ་བོའི་རྒྱལ་པོའི་མིང་ཉིད་དོ། །འཇིགས་
པ་འགྲོ་ཀུན་དབང་བྱེད་དེ། །ཁྲོ་བོའི་གཟུགས་ནི་སྤྲོས་པས་སོ། །དེ་དག་གི་ནི་རང་བཞིན་ཀུན། །ཕྱག་ན་རྡོ་རྗེ་དབང་བསྐུར་ལས། །མིག་དྲུག་ཅེས་པ་ཁམས་དྲུག་གི། །ཡེ་ཤེས་ལ་སོགས་པ་ཡི་མཐར། །ལྤགས་སོགས་ལ་ནི་དེ་ཤེས་བྱ། །གང་ཕྱིར་སྡོམ་པ་སོར་ཡང་འགྲུབ། །
ལག་དྲུག་ཅེས་པ་དཀྱིལ་འཁོར་ཏེ། །ཟླ་བ་ཉི་མ་གཉིས་ལ་བརྟེན། །རྟག་ཏུ་ཐིམ་པར་གྱུར་པའོ། །རྡོ་རྗེ་དཀྱིལ་འཁོར་རྒྱུན་ལས་སོ། །སྟོབས་ནི་ཀུན་གཞི་རྣམ་པར་ཤེས། །སྲོག་ནི་མིང་དུ་བརྗོད་པ་ཡིན། །རྣལ་འབྱོར་རྒྱུད་ལས་སྤྱོད་པ་གསུངས། །བླ་མེད་དཔལ་གྱི་རྒྱུད་
ལས་སོ། །ཀེང་རུས་མཚེ་བ་གཙིགས་པའི་སྒྲ། །དེ་ནི་ཉེ་བར་བསྟན་བྱ་སྟེ། །སྔོན་དུ་མཚེ་བ་བསྐུམ་པ་ནི། །ལྕེ་ཡིས་ཧ་ཡིག་ལ་རེག་བྱ། །ཕྱི་ནས་ལྕེས་ནི་རྐན་བསྐྱོད་གསུངས། །རྡོ་རྗེ་ཚོགས་འཐོན་རྒྱུད་ལས་སོ། །ཀེང་རུས་ཞེས་པ་བཤད་པ་ནི། །འཆི་བ་སླུ་བའི་བདག་ཉིད་དེ། །
རཀྟ་འབར་བས་འཛག་པ་སྟེ། །འཁོར་ལོ་སྡོམ་པའི་རྒྱུད་ལས་སོ། །ཧ་ལ་ཧ་ལ་ཞེས་སྡོམ་པ། །ཤེས་རབ་དབུགས་ཀྱི་བར་བྱེད་པ། །གཉིས་གཉིས་སྦྱོར་བ་གསུངས་པ་སྟེ། །དོན་ཡོད་ཞགས་པའི་རྒྱུད་ལས་སོ། །གདོང་བརྒྱ་པ་ཞེས་གསུངས་པ་ནི། །རྩ་བརྒྱ་ཡི་ནི་རང་བཞིན་ཅན། །དེ་ཡི་
གཙོ་བོ་སྟེང་ཉིད་དེ། །རྡོ་རྗེ་རྩེ་མོའི་རྒྱུད་ལས་སོ། །གཤིན་རྗེ་གཤེད་ནི་ཐིག་ལེ་སྟེ། །དྲུག་གི་ནང་དུ་ཡིད་ཉིད་དེ། །དེ་ཡི་མཚན་ཉིད་བཤད་པ་ཡང་། །གསང་འདུས་ཕྱི་མའི་རྒྱུད་ལས་སོ། །བགེགས་ཀྱི་རྒྱལ་ཞེས་བྱ་བའི་མིང་། །བདུད་རྩི་འཁྱིལ་པའི་རྣལ་འབྱོར་ཅན། །འོག་གི་སྒོ་ནས་
བཀུག་པ་སྟེ། །སྒྱུ་འཕྲུལ་དྲ་སོགས་རྒྱུད་ལས་སོ། །རྡོ་རྗེ་ཤུགས་ཞེས་བྱ་བའི་མིང་། །གང་དུ་རྟག་ཏུ་སྐྱེ་ས་བོན། །སྔོན་དུ་བདེ་བ་འདུས་པ་སྟེ། །དམ་ཚིག་ཆེན་པོའི་རྒྱུད་ལས་སོ། །གཞན་ཡང་འཇིགས་བྱེད་གསུངས་པ་ནི། །ལོག་པའི་དཔའ་བོ་རྣམ་པར་འཇོམས། །སྟེང་

49-1-71a

དང་འོག་ཏུ་སོང་ཞིང་བལྟ། །གསང་དབང་ཐིག་ལེའི་རྒྱུད་ལས་སོ། །རྡོ་རྗེ་གྲགས་པ་ཞེས་བཤད་པ། །ལྟེ་བར་གཉིས་མེད་སྤྱོད་ཡུལ་ཅན། །རྟག་ཏུ་ཐབས་དང་ཤེས་རབ་ལས། །གཉིས་མེད་མཉམ་པའི་རྒྱུད་ལས་སོ། །རྡོ་རྗེ་སྙིང་པོ་ཞེས་བྱའི་ཚིག །མཚན་ཉིད་
མཚན་མེད་དང་ལྡན་པ། །གཉིས་ཀ་སྤངས་པར་ཤེས་པར་བྱ། །ཟླ་གསང་ཐིག་ལེའི་རྒྱུད་ལས་གསུངས། །སྒྱུ་འཕྲུལ་རྡོ་རྗེ་ཞེས་པ་ནི། །གཉིས་གཉིས་རྫོགས་པའི་མཚན་ཉིད་ཅན། །དངོས་པོ་དངོས་མེད་ཕྱི་ན་བདེན། །སྒྱུ་འཕྲུལ་དྲ་བ་ལས་གསུངས་པའོ། །གསུས་པོ་ཆེ་
ཞེས་བྱ་བའི་ཚིག །སྟོང་གསུམ་སྟོང་གི་ཆེན་པོར་འགྲོ། །དེ་འོག་ཡང་དག་གསུངས་པ་ཡང་། །ཐམས་ཅད་ཡོད་མིན་ལྷག་མའོ། །རྡོ་རྗེ་བདག་ཅེས་བྱ་བའི་ཚིག །རྡོ་རྗེ་བུ་ག་གཉིས་ནས་ནི། །སྟེང་དང་འོག་ཏུ་ཡང་དག་དབབ། །རྡོ་རྗེ་ས་འོག་རྒྱུད་ལས་སོ། །རྡོ་རྗེ་སྐྱེ་གནས་
ཤེས་པ་ནི། །འབྱུང་བཞི་བདག་ཉིད་ལས་བྱུང་བ། །རྟག་ཏུ་བདུད་རྩི་རྣམ་ལྔ་འཛིན། །འབྱུང་པོ་འདུལ་བའི་རྒྱུད་ལས་སོ། །རྡོ་རྗེ་སྙིང་པོ་ཞེས་བཤད་པ། །སྤྱི་བོར་དྲི་མ་མེད་པར་འགྱུར། །མི་འགྱུར་བ་ཡི་རླུང་ཉིད་དེ། །རྡོར་སྙིང་རྒྱན་གྱི་རྒྱུད་ལས་སོ། །མཁའ་འདྲ་བ་ཞེས་
བྱ་བའི་མིང་། །ཁམས་ནི་སུམ་ཅུ་རྩ་དྲུག་གྲངས། །རིགས་དང་རིགས་ནི་གཉིས་ཀ་བྲལ། །དེ་ཡང་སངས་རྒྱས་རྒྱུད་ལས་སོ། །མི་གཡོ་བྱང་ཆུབ་ས་བོན་ཏེ། །རླུང་དང་སྲོག་ནི་གཡོ་བས་སོ། །དེས་ནི་དེ་ཉིད་འཐོབ་པ་སྟེ། །སྒྱུ་འཕྲུལ་དྲ་བའི་རྒྱུད་ལས་སོ། །རལ་པ་གཅིག་ཅེས་བཤད་
པ་ཡང་། །སྟེང་དང་འོག་གི་ལྕེ་གཉིས་གཉིས། །དེ་དག་བསྡམས་པ་གནད་ཀྱི་སྒོར། །རྡོ་རྗེ་པདྨའི་རྒྱུད་ལས་སོ། །གླང་ཆེན་ཀོ་རློན་ཞེས་པའི་ཚིག །ལྷ་ཡི་ཕྱག་རྒྱའི་སྦྱོར་བ་ཡིས། །ཨ་བ་དྷཱུ་ཏཱིར་ཡིད་སོང་ནས། །ནང་གི་བུ་གའི་དབུས་སུ་བསྒོམ། །འགྲོ་བ་དགའ་དང་
བཅས་པར་བྱེད། །ལུས་དང་ངག་གཉིས་ཡང་དག་བྱུང་། །རྟག་ཏུ་ཆོས་ཀྱི་དབྱིངས་བདག་ལས། །འཁོར་ལོ་སྡོམ་པའི་རྒྱུད་ལས་སོ། །རྣལ་འབྱོར་མ་རྣམས་གནས་ལས་སྐྱེ། །ཚོགས་ཀྱི་དབུས་ན་རོལ་པ་ཡང་། །སྙིང་རྗེ་རོ་ཡི་སྦྱོར་བ་ལས། །བཏུབ་པ་ས་བོན་

49-1-71b

བདེ་ཆེན་པོ། །ཧ་ཧ་ཞེས་སྒྲོགས་པ་ཡི་མིང་། །བསིལ་བ་བཅུ་གཉིས་མཚམས་སུ་སོང་། །དེ་ཡང་སྒྲ་མཚམས་ལྐོག་གཉིས་མཐར། །ཁྲོ་བོ་རྣམ་རྒྱལ་རྒྱུད་ལས་སོ། །དེ་ལ་གྲགས་ཆེན་ཞེས་བྱ་བ། །རང་འབྱུང་སྒྲ་ལ་བརྟེན་ནས་ནི། །མཐིལ་གཉིས་སྤྲད་པས་བདར་བ་སྟེ། །ལྕེ་དང་
ལྕེའུ་ཆུང་ཕྲད་པས་སོ། །ཧི་ཧི་ཞེས་སྒྲོགས་ཞེས་བཤད་པ། །གོང་དུ་བཤད་པའི་ཆིག་བཞིན་ཏེ། །རྣལ་འབྱོར་གྱིས་ནི་འགྲོགས་པར་བྱེད། །ཁྲོ་ཟླའི་ཐིག་ལེ་རྒྱུད་ལས་སོ། །འཇིགས་པར་བྱེད་ཅེས་བྱ་བ་ནི། །འགོག་པ་མཆོག་གི་རིམ་པ་ལས། །ནན་ཏན་གྱིས་ནི་འདུ་བར་འགྱུར། །
རྒྱུད་ཀུན་ལས་ནི་བསྡུས་ལས་གསུངས། །གད་རྒྱངས་ཞེས་པ་མཆོག་ཚིམ་པ། །ལས་ཀྱི་ཕྱག་རྒྱའི་སྦྱོར་བས་སྐྱེ། །རྒྱུན་མི་འཆད་པར་སྦྱོར་བ་ནི། །གད་མོ་ཆེན་པོ་ཞེས་བརྗོད་དོ། །ས་བོན་ཐིམ་པར་གྱུར་པའི་ཕྱིར། །ཡེ་ཤེས་གད་མོ་རྒྱ་ཆེན་པོ། །རྡོ་རྗེ་གད་མོའི་རྣམ་གྲངས་ཏེ། །ཡིད་
ལྡན་རྣལ་འབྱོར་སྤྱོད་པས་སོ། །ཆེར་སྒྲོགས་ཞེས་ནི་རྣམ་བཤད་པ། །རྩ་གསུམ་དག་ནི་གང་བའོ། །ཡང་ན་ཁ་དང་ཁ་སྦྱོར་བ། །རྟག་ཏུ་ཤེས་རབ་ཀྱིས་ནི་བྱེད། །གསང་བ་ཐུན་མོང་མ་ཡིན་དཔལ། །རྒྱན་བཀོད་པ་ཡི་རྒྱུད་ལས་གསུངས། །རྡོ་རྗེ་སེམས་དཔའ་ཞེས་པའི་མཚན། །
མཆོག་གི་ཚིམ་པ་བརྗོད་པའོ། །སེམས་དཔའ་ཆེན་པོ་ཞེས་གསུངས་པ། །རྒྱུན་མི་འཆད་པར་དབབ་པའོ། །དེ་བཞིན་རྡོ་རྗེ་རྒྱལ་པོ་ནི། །ས་བོན་ཐིམ་པར་བྱེད་པའོ། །གང་ཕྱིར་བདེ་བ་ཆེན་པོའི་ཚིག །རྟག་ཏུ་ཤེས་རབ་ལས་ལ་གུས། །དེ་ལྟར་རྡོ་རྗེ་སེམས་དཔའ་སོགས། །གསུམ་
པོ་དག་ནི་གོ་རིམས་བཞིན། །མཆོག་གི་དང་པོ་གསུང་བ་འདུས། །དེ་བཞིན་གསང་མཛད་གཞན་ཡང་ནི། །རྣལ་འབྱོར་རྒྱུད་གསུང་ལས་གསུངས་པའོ། །དེ་དག་ཐབས་ཀྱི་མཚན་ཉིད་དེ། །འཁོར་ལོ་སྡོམ་པ་འབའ་ཞིག་ནི། །ཤེས་རབ་ཀྱི་ནི་རྒྱུད་དུ་བཤད། །དེས་ན་རྡོ་རྗེ་དྲག་
ཅེས་ཏེ། །བརྗོད་པ་ལས་ཀྱི་ཤེས་རབ་ལས། །གཏུམ་པོ་འབར་བའི་སྒྱུ་མ་ནི། །རྡོ་རྗེ་རྩ་བར་ལམ་ཉིད་དེ། །དེ་ནི་མྱུར་འགྲོ་རྣལ་འབྱོར་ཏེ། །བདུད་རྩི་བཏུང་བ་སྟེང་དུ་འགྲོ། །ཡང་དག་འཇུག་ལ་བདག་ལས་མིན། །རྡོ་རྗེ་གསང་བའི་རྒྱུད་ལས་སོ། །དགའ་བ་ཆེ་ཞེས་བྱ་བའི་

49-1-72a

མིང་། །རང་གི་ཡེ་ཤེས་བདག་ཉིད་ཆེ། །གནས་པ་མ་ཡིན་མི་གནས་མིན། །གསང་ནོར་ཐིག་ལེའི་རྒྱུད་ལས་སོ། །རྡོ་རྗེ་ཧཱུཾ་སྟེ་ཧཱུཾ་ཞེས་པ། །བསམ་གཏན་བཞི་པའི་རྣམ་གྲངས་ཏེ། །སུཾ་བྷ་ནི་ལ་སོགས་པའི་སྔགས། །དེ་ཉིད་བསྡུས་པའི་རྒྱུད་ལས་སོ། །མཚོན་དུ་
རྡོ་རྗེ་མདའ་ཐོགས་མིང་། །དོན་ཉིད་ཀྱི་ནི་བཤད་བྱ་སྟེ། །ཇི་ལྟར་ཤུགས་ཀྱིས་སྦྱོར་གསུངས་དང་། །དངོས་པོ་དེ་སྒོམ་གཉིས་པའོ། །དེས་ན་རྡོ་རྗེ་དང་ནི་མདའ། །རྡོ་རྗེ་མདའ་ནི་མཆོག་ཏུ་འཛིན། །དེ་དག་དགོངས་པའི་ཚིག་ཡིན་ཏེ། །དམ་ཚིག་ཆེན་པོའི་རྒྱུད་ལས་སོ། །རྡོ་རྗེ་རལ་གྲི་
ཞེས་པའི་མཚན། །དེ་ཡང་གཉིས་སུ་གསུངས་པ་སྟེ། །ནམ་མཁའ་ལྔ་ཡི་དབུས་རྡོ་རྗེ། །རལ་གྲི་གསང་བའི་པདྨོའོ། །དེ་ལྟར་རྡོ་རྗེ་དང་རལ་གྲི། །གཉིས་ཀ་འཛིན་པས་ཕྱག་མཚན་ཏེ། །ཕན་ཚུན་ལས་ནི་སྲོག་འགུགས་པ། །སྒྱུ་འཕྲུལ་དྲ་བའི་རྒྱུད་ལས་སོ། །དེ་དག་མ་ལུས་
གཅོད་ཅེས་པ། །རྟོག་པ་ཡང་དག་བྱུང་བ་གཅོད། །འོད་གསལ་བར་གསུངས་བདག་ཉིད་དེ། །སེམས་དང་སེམས་བྱུང་རྟོག་པ་གཅོད། །སྣ་ཚོགས་རྡོ་རྗེ་འཆང་ཞེས་པ། །སྲོག་ལ་སོགས་པའི་རླུང་ལྔ་པོ། །རྣལ་འབྱོར་གྱིས་ནི་མ་ལུས་གཟུང་། །མངོན་པར་བྱང་ཆུབ་རྒྱུད་ལས་
སོ། །དེ་ལ་རྡོ་རྗེ་ཅན་ཞེས་པ། །ཡེ་ཤེས་དབྱེར་མེད་ངོ་བོ་སྟེ། །དེ་འཛིན་པས་ནི་རྡོ་རྗེ་ཅན། །ཡང་ན་དུ་བ་ལ་སོགས་ལམ། །རྡོ་རྗེ་གཅིག་པུ་ཞེས་བཤད་པ། །རྣལ་འབྱོར་ངོ་བོ་སྔར་གསུངས་བཞིན། །གཉིས་ཀ་ཐིམ་པར་ཐལ་བར་འགྱུར། །གཉིས་མེད་མཉམ་པའི་རྒྱུད་
ལས་སོ། །གང་ཕྱིར་གཡུལ་ལས་ཞེས་པའི་ཚིག །འདོད་ཆགས་ལ་སོགས་ཉོན་མོངས་གཅོད། །རྒྱལ་བ་རྣམ་པར་རྒྱལ་བ་སྟེ། །ཁམས་གསུམ་རྣམ་རྒྱལ་རྒྱུད་ལས་སོ། །རྡོ་རྗེ་འབར་བ་མིག་མི་བཟང་། །ནང་གི་དོན་དུ་བསྒྲུབ་པ་སྟེ། །ཇི་ལྟར་མེ་ལོང་གཟུགས་བརྙན་
བཞིན། །བདེན་པ་མ་ཡིན་མཐོང་བ་ཙམ། །ཇི་ལྟར་རྨི་ལམ་དེ་བཞིན་སྣང་། །ཇི་ལྟར་སྒྱུ་མ་དེ་བཞིན་གཞན། །དེ་ལྟར་རྡོ་རྗེ་དང་འབར་བའི། །རྡོ་རྗེ་འཇིགས་བྱེད་རྒྱུད་ལས་སོ། །དེ་ལྟ་བུ་ཡི་སྣང་བ་ནི། །མཚོ་སྐྱེས་རྡོ་རྗེ་འབར་བ་སྟེ། །རྩ་རྣམས་པདྨར་ཡང་དག་བཤད། །འབར་

49-1-72b

བས་སེམས་ནི་འགུགས་པའོ། །རྡོ་རྗེ་འབེབས་ཞེས་ལ་སོགས་པ། །ཁྲོ་བོ་བཞི་ཡི་མིང་ཡིན་ཏེ། །རྟག་ཏུ་རྣལ་འབྱོར་དབང་པོ་ལས། །རྟག་ཏུ་རྡོ་རྗེ་དབབ་པར་བྱ། །དེ་བཞིན་གཞན་ཡང་འབེབས་པ་ཆེ། །སྤྱོད་ཡུལ་ཐིམ་པར་ལོངས་སྤྱོད་དོ། །མིག་བརྒྱས་ཐམས་ཅད་མཐོང་བ་དག །
རིགས་མཆོག་གཉིས་སུ་མེད་པ་སྤོང་། །རྡོ་རྗེ་མིག་ཅེས་བྱ་བའི་སྒྲ། །སངས་རྒྱས་གནས་ནི་མི་ཟད་པ། །རྣ་བས་རྣ་བར་བརྒྱུད་པ་ཡིས། །བླ་མས་སློབ་མ་ཤེས་པར་བྱ། །དེ་ལ་རྡོ་རྗེ་བ་སྤུ་སོགས། །གཉིས་སུ་དབྱེ་བར་གསུངས་པ་སྟེ། །དང་པོ་གཅིག་ནི་མི་འགྱུར་དོན། །རྣལ་
འབྱོར་མ་དག་རང་ལས་སྐྱེས། །རྡོ་རྗེ་བ་སྤུ་གཉིས་པ་ནི། །རྩ་ནི་བྱེ་བ་ཕྱེད་དང་བཞི། །ཡང་ན་བརྒྱད་ཅུ་གྲངས་ཀྱིས་ཏེ། །བྱང་ཆུབ་སེམས་ཀྱི་བ་སྤུ་ལས། །མྱུ་གུ་སྐྱེད་པ་དེ་དག་གོ། །ཐ་མལ་པ་ཡི་དྲི་མ་མེད། །དེ་ཡང་ལས་ལ་རབ་འཇུག་ཕྱིར། །རྡོ་རྗེ་སྤུ་ནི་གཅིག་པུ་ལུས། །དེ་ཡི་
དོན་གྱི་ཁྱད་པར་ཡང་། །རྡོ་རྗེ་དཀྱིལ་འཁོར་རྒྱལ་ལས་གསུངས། །རྡོ་རྗེ་རྩེ་ཞེས་བྱ་བའི་མིང་། །འཛག་པ་རུ་ནི་གསུངས་པ་སྟེ། །དེ་ཡི་དུས་ཀྱི་གནས་སྐབས་ཀྱང་། །རྡོ་རྗེ་རྩེ་མོའི་རྒྱུད་ལས་སོ། །དེ་དག་དང་འདྲ་གཞན་ཡང་ནི། །སེན་མོ་སྐྱེས་པ་བརྗོད་བྱ་སྟེ། །མི་འགྱུར་བ་ནི་འབྱུང་
བ་སྟེ། །རྡོ་རྗེ་རྩེ་དེ་སྔར་གཞན་ན། །གང་ཕྱིར་རྡོ་རྗེ་སྙིང་པོའི་ཚིག །ཆོས་འབྱུང་ནང་དུ་ཐིམ་པའོ། །པགས་པ་མཁྲེགས་པ་རྣམ་བཤད་པ། །བླ་མ་བརྒྱུད་པའི་གུས་རིམ་གྱིས། །རྡོ་རྗེ་ཕྲེང་སོགས་ཤེས་པ་ནི། །རྟག་ཏུ་ཕྲ་མོ་བྱ་བ་ལས། །རྟོག་པ་ཐམས་ཅད་རྣམ་འཇོམས་པ། །
དཔལ་དང་ལྡན་པའི་སྒྲར་གསུངས་པའོ། །རྡོ་རྗེ་རྒྱན་གྱིས་ཞེས་པ་ནི། །སྔོན་དུ་གསུངས་པ་རྣལ་འབྱོར་ཚུལ། །བརྒྱན་པ་སྐལ་བ་ཕུན་སུམ་ཚོགས། །ཁྲོ་བོ་རྣམ་རྒྱལ་རྒྱུད་ལས་སོ། །ཧ་ཧ་གད་རྒྱངས་ཞེས་པ་ནི། །རྟག་ཏུ་གོམས་པར་བྱ་བ་སྟེ། །སྤྱི་བོ་སོགས་ནས་ནོར་བུའི་མཐའ། །
འདར་ཞིང་རྒོད་པ་ཐུབ་པའོ། །རྒྱངས་ནི་སྲོག་གི་ཐིག་ལེ་སྟེ། །དེ་དག་ཐིམ་པར་བསམ་པར་བྱ། །དུར་ཁྲོད་ས་ནི་རྐང་མནན་པས། །རྒྱངས་དང་ལྡན་པར་གནས་པ་སྟེ། །དུར་ཁྲོད་བཅུ་དྲུག་རྟག་བཤད་པ། །ཁམས་ནི་བཅུ་ཡི་བདག་ཉིད་དོ། །ཧ་ཧ་གད་རྒྱངས་སྟེང་གི་ལམ། །ལག་

49-1-73a

བཟངས་དཔལ་གྱི་རྒྱུད་ལས་བསྟན། །འོན་ཀྱང་དེ་ཀུན་བརྗོད་པ་ནི། །གསང་བ་ལ་སོགས་ཚིག་གི་རིམ། །ངེས་པར་གྲགས་པ་ཞེས་པའི་ཚིག །ངེས་པར་འབྱུང་ནས་འོག་ཏུ་སོང་། །ཞུགས་པའི་སྒྲ་ནི་རྒྱུ་བ་སྟེ། །དཔའ་བོ་གཅིག་པའི་རྒྱུད་ལས་སོ། །རྡོ་རྗེ་
སྒྲ་ཞེས་བྱ་བ་ནི། །སྒྲ་ཡང་ཨ་བ་དྷཱུ་ཏཱིའི་དབུས། །དགོས་པ་ཐམས་ཅད་ཉན་པ་ནི། །བརྒྱ་སྟོང་བསྡུས་པའི་རྒྱུད་ལས་སོ། །ཡི་གེ་དྲུག་ཅེས་བྱ་བ་ནི། །དཀྱིལ་འཁོར་དྲུག་ཏུ་བསྡམ་བྱ་བ། །མི་འགྱུར་མཆོག་གི་རྣལ་འབྱོར་གྱིས། །ཤེས་རབ་དྲུག་གི་ཚུལ་རྒྱུད་ལས། །འཇམ་པའི་
དབྱངས་ཞེས་བྱ་བའི་ཚིག །རྟག་ཏུ་འཁོར་ལོ་དྲུག་ཏུ་སྲོག །གྲུབ་པའི་རྣལ་འབྱོར་མ་ཡིན་སྡོམ། །འཕགས་པ་འཇམ་དཔལ་རྒྱུད་ལས་གསུངས། །སྒྲ་ཆེ་བ་ཞེས་བྱ་བའི་ཚིག །གཉིས་མེད་ཡེ་ཤེས་སྤྱོད་ཡུལ་ཏེ། །དེ་བས་སྤྲུལ་པ་ཐམས་ཅད་འབྱུང་། །མངོན་པར་རྟོགས་པའི་
རྒྱན་ལས་སོ། །འཇིག་རྟེན་གསུམ་ལས་བྱ་བའི་ཚིག །སེ་ན་ཕྲ་བའི་རང་བཞིན་ཅན། །ནང་དང་ཕྱི་རོལ་དབྱེར་མེད་དེ། །འཇིག་རྟེན་གསུམ་རྒྱལ་རྒྱུད་ལས་སོ། །དེ་ནས་ཆེན་པོ་སྒྲ་གཅིག་སྟེ། །སྒོམ་པ་ཐུ་བོའི་དབུས་སུ་ནི། །སྒྲ་གཅིག་བསྟན་པའི་ཆོས་ཀྱིས་ནི། །ས་འོག་ས་སྟེངས་མཐོ་
རིས་ལ། །ནམ་མཁའི་དབྱིངས་ལ་སོགས་པ་ཡི། །ཚིགས་བཅད་དུ་མས་དེ་ཉིད་སྟོན། །པདྨ་ཡོངས་རྫོགས་ནམ་མཁའ་ཡི། །ཁམས་ནི་རྣམ་ཤེས་བརྒྱད་པ་སྟེ། །རྣལ་འབྱོར་དགོངས་པའི་བར་དུ་འགྲོ། །རང་བྱུང་སྒྲ་ནི་སྒྲོགས་པའོ། །དེ་དག་དུས་ནི་བཞི་རྣམས་སོ། །སངས་
རྒྱས་བྱང་ཆུབ་སེམས་དཔའ་དང་། །ཡང་ན་གཞན་དུའང་བརྗོད་པར་བྱའོ། །སྒྲ་ལྡན་ནམ་མཁའ་ཞེས་བྱ་བ། །སྔགས་ཀུན་གསུངས་པའི་མཚན་ཉིད་ཡིན། །འཇམ་དཔལ་གྱི་ནི་རྒྱུད་ལས་ནི། །རྟག་ཏུ་རྣལ་འབྱོར་པ་ཡིས་བྱ། །དེ་ལྟར་འདིར་ནི་རྣལ་འབྱོར་བཤད། །བདུན་ཅུ་
རྩ་གཅིག་མིང་གིས་སོ། །ཐམས་ཅད་སྤྲོས་པའི་རྒྱུད་ཉིད་ཀྱང་། །ཇི་ལྟར་མངོན་རྟོགས་རིམ་ལས་གསུངས། །རྣལ་འབྱོར་སྤྱོད་དང་བྱ་རྒྱུད་དག །ཤིན་ཏུ་རྒྱས་པ་ཡང་དག་བྱུང་། །སྣ་ཚོགས་གཟུགས་ནི་ཚུལ་ཆེན་པོ། །ཡང་ན་རྣམ་པ་སྣ་ཚོགས་བྱུང་། །མེ་ལོང་ཡེ་ཤེས་ཀྱི་ནི་སྐུའི། །

49-1-73b

ཆོ་ག་རྣམ་པ་དུ་མ་བྱས། །གཞུང་ནི་གསལ་དང་མི་གསལ་བས། །ཞལ་ནས་ཞལ་དུ་བརྗོད་པར་བྱ། །དེ་ལྟར་མི་བསྐྱེད་རྡོ་རྗེ་ཡི། །ཏིང་ངེ་འཛིན་ནི་ཐམས་ཅད་གསུངས། །ཆོས་ཀྱི་དབྱིངས་སོགས་ཡེ་ཤེས་ཀྱི། ནང་ཉིད་དུ་ནི་རྟག་ཏུ་གནས། །སྔོན་དུ་རྣལ་འབྱོར་ཡང་དག་བྱུང་། །སངས་
རྒྱས་ཀྱི་ནི་སོ་སོ་རྟོག །རབ་ཏུ་གསལ་བའི་ཡེ་ཤེས་ནི། །རབ་ཏུ་གསལ་བའི་མེ་ལོང་ངོ་། །ཉེ་བར་བསྡུས་པ་ལས་མེ་ལོང་ལྟ་བུའི་ཡེ་ཤེས་ཀྱི་བསྟོད་པའི་རྟོག་གེ་ཞེས་བྱ་བ་སྟེ་ལྔ་པའོ།།      །།སྔགས་ཀྱི་མཚན་གྱིས་སངས་རྒྱས་ཏེ། །དེ་ཡི་མཚན་ཉིད་བརྗོད་པར་བྱ། །སོ་སོར་རྟོག་
པའི་ཡེ་ཤེས་ཡིན། །རྣལ་འབྱོར་ལ་བརྟེན་རྣལ་འབྱོར་པ། །དེས་ན་བསམ་གཏན་ཡིན་པ་བས། །སངས་རྒྱས་དག་གི་ཕྲིན་ལས་མཛད། །མིང་ནི་དོན་ཅན་འདུས་ཞེས་བྱ། །གཉིས་མེད་ལ་ནི་གཉིས་འབྱུང་བ། །གཉིས་ནི་བདེན་པ་ཡོད་མ་ཡིན། །སྒྱུ་མ་ལྟ་བུར་རབ་ཏུ་གྲགས། །
སེམས་ཅན་གདུལབའི་དོན་དུ་ནི། །སྣང་བ་གཉིས་མེད་རྒྱུ་ཅན་ནོ། །དེ་ལ་ཚིགས་བཅད་བཞི་བཅུ་དང་། །དེ་བཞིན་དུ་ནི་གཉིས་ལྷག་གཞན། །མཚན་དག་ཀྱང་ནི་གཉིས་བརྒྱ་དང་། །དེ་བཞིན་བདུན་ཅུ་རྩ་ལྔ་དང་། །དེ་བཞིན་ཉིད་ཅེས་སོགས་པ་ནས། །ཡེ་ཤེས་འོད་ནི་འོད་གསལ་མཐར། །
དེ་ལྟར་སྔོན་གསུངས་བདུན་པོ་དང་། །དེ་བཞིན་གཞན་ཡང་བཞི་བཅུ་དང་། །གཉིས་ལྷག་པར་ནི་གསུངས་པ་དང་། །བཅོ་ལྔ་མཉམ་ཉིད་ཡེ་ཤིས་ཀྱི། །ཉེར་བསྡུས་ལྟེ་བའི་འཁོར་ལོ་ཡི། །དྲུག་ཅུ་རུ་ནི་གསུངས་པ་ཡིན། །དེ་བཞིན་ཞེས་པ་ཡེ་ཤེས་གྲགས། །ཡང་དག་པ་ཞེས་དེ་
བཞིན་རྒྱལ། །བདག་མེད་ཅེས་པ་ཡོན་ཏན་འོད། །ཡང་དག་མཐར་སྒྲ་ཁྱད་པར་ཆེ། །ཡི་གེ་མེད་པ་ཟླ་བ་གང་། །སྟོང་ཉིད་སྨྲ་བའི་ཁྱུ་མཆོག་ནི། །དེ་བཞིན་གཤེགས་པ་པདྨའི་འོད། །ཟབ་མོ་ཞེས་པ་དཀའ་ཐུབ་བཟང་། །རྒྱ་ཆེ་བ་ནི་མར་མེ་རྒྱལ། །ཆོས་ཀྱི་དུང་སྟེ་གློག་
གི་ཏོག །སྒྲ་ཆེན་པོ་ནི་འོད་ཀྱི་རྒྱལ། །ཆོས་ཀྱི་གཎྜཱི་གསལ་བའི་རྒྱལ། །སྒྲ་བོ་ཆེ་ཞེས་བྱ་བའི་མཚན། །དཔེ་བྲལ་གྲགས་ཞེས་བརྗོད་པ་ཡིན། །མི་གནས་མྱ་ངན་འདས་པ་ནི། །དེ་བཞིན་གཤེགས་པ་པདྨོར་གྲགས། །ཕྱོགས་བཅུའི་ཆོས་ཀྱི་རྔ་བོ་ཆེ། །དེ་བཞིན་གཤེགས་པ་

49-1-74a

མེ་ཏོག་མཚོན། །གཟུགས་མེད་པ་ནི་སྤྱན་བཟང་མཆོག །གཟུགས་བཟང་བ་ནི་གྲགས་མེད་དོན། །དམ་པ་ཞེས་པ་གྲགས་པའི་སྟེ། །སྣ་ཚོགས་གཟུགས་ནི་བསོད་ནམས་འོད། །ཡིད་ལས་སྐྱེས་པ་ཁྱད་པར་རོ། །གཟུགས་རྣམས་ཐམས་ཅད་སྣང་བའི་དཔལ། །
ཚོགས་མེད་བློ་ཅན་ཞེས་པའི་མིང་། །གཟུགས་རྣམས་མ་ལུས་འཆང་བ་ནི། །དེ་བཞིན་གཤེགས་པ་རཱ་ཧུ་ལ། །མཚུངས་མེད་པ་ནི་ཡེ་ཤེས་འོད། །ཆེར་གྲགས་ཞེས་པ་གྲོགས་དང་ལྡན། །ཁམས་གསུམ་དབང་ཕྱུག་ཆེན་པོ་ནི། །མཚན་ནི་ཡེ་ཤེས་དབང་པོར་བཏགས། །
འཕགས་ལམ་ཤིན་ཏུ་མཐོ་ལ་གནས། །དེ་བཞིན་གཤེགས་པ་སྐར་མའི་ཏོག །ཆོས་ཀྱི་ཏོག་ནི་རཱ་ཧུ་ལ། །དར་བ་ཆེན་པོ་སྨན་ཆེན་པོ། །འཇིག་རྟེན་གསུམ་གྱི་སྨན་པའི་རྒྱལ། །གཞོན་ལུས་བསོད་རྣམས་དབང་པོ་ཡི། །གནས་བརྟན་ཞེས་པ་རྒྱུ་བའི་མཚན། །རྒན་པོ་སྐར་མའི་
རྒྱལ་པོའོ། །སྐྱེ་དགུའི་བདག་པོ་ཞེས་པའི་མཚན། །དེ་བཞིན་གཤེགས་པ་རྒྱལ་བའི་སྒྲ། །སུམ་ཅུ་རྩ་གཉིས་མཚན་ཞེས་པ། །ཉི་མའི་འོད་ཟེར་འཆར་བའོ། །སྡུ་གུ་ཞེས་པ་ཆོས་ཀྱི་མཛོད། །འཇིག་རྟེན་གསུམ་ན་མཛེས་ཞེས་པ། །དེ་བཞིན་གཤེགས་པ་བློ་གྲོས་ལེགས། །
ཡོན་ཏན་སློབ་དཔོན་འཇིག་རྟེན་ཤེས། །རྒྱལ་བའི་དབང་པོ་མཚན་དུ་གྲགས། །འཇིག་རྟེན་སློབ་དཔོན་རྡོ་རྗེ་སྡེ། །འཇིགས་པ་མེད་ནི་རྡོ་རྗེ་བརྩེགས། །མགོན་པོ་སངས་རྒྱས་ལེགས་གནས་པ། །སྐྱོབ་པ་ཞེས་པ་རྒྱལ་བའི་བློ། །འཇིག་རྟེན་གསུམ་ཐོབ་ཚངས་པའི་དབྱངས། །
སྐྱབས་ཞེས་བྱ་བ་ཀླུ་ཡི་དབང་། །སྒྲོལ་བ་ཡོན་ཏན་གསལ་དབང་ཕྱུག །གང་ཕྱིར་བླ་ན་མེད་པའི་ཚིག །མིང་གི་མངོན་པར་ཤེས་པའི་ཏོག །ནམ་མཁའི་མཐའ་ལ་ལོངས་སྤྱོད་ནི། །དེ་བཞིན་གཤེགས་པ་འོད་ཀྱི་ཏོག །ཐམས་ཅད་མཁྱེན་པའི་ཡེ་ཤེས་མཚོ། །དེ་བཞིན་གཤེགས་
པ་དགེ་བའི་མཚན། །གཞན་ཡང་ཚངས་པ་ཞེས་སུ་བརྗོད། །མ་རིག་ཅེས་པ་སྒྲ་མི་སྙན། །སྒོ་ངའི་སྦུབས་ནི་རོལ་པའི་གར། །ཡང་དག་འབྱེད་ནི་ཀླུས་བྱིན་ནོ། །སྲིད་པའི་དྲ་བ་བདེན་པའི་ཏོག །འཇོམས་པ་དེ་བཞིན་གཤེགས་པའི་མཚན། །ཉོན་མོངས་མ་ལུས་ཞི་བྱེད་ནི། །

49-1-74b

མཆན་ནི་གཞན་གྱིས་མི་ཐུབ་དབྱངས། །འཁོར་བའི་རྒྱ་མཚོ་ཕ་རོལ་ཕྱིན། །སངས་རྒྱས་རིན་ཆེན་འོད་ཟེར་ཅན། །ཡེ་ཤེས་དབང་བསྐུར་ཅོད་པན་ཅན། །དེ་བཞིན་གཤེགས་པ་གསུང་དབྱངས་སྦྱིན། །རྫོགས་པའི་སངས་རྒྱས་རྒྱན་བྱས་ནི། །མཚན་ནི་སེང་གེ་ཞེས་བཏགས་པའོ། །
སྡུག་བསྔལ་གསུམ་གྱི་སྡུག་བསྔལ་ཞི། །ཉི་མ་སྣ་ཚོགས་ཤེས་པའི་མཚན། །གསུམ་མཐའ་ཡེ་ཤེས་དཔའ་བོ་ཡི། །སེལ་བ་པདྨའི་ཕུང་པོའོ། །གསུམ་གྲོལ་ཞེས་པ་མེ་ཏོག་གོ། །སྒྲིབ་པ་གསུམ་ལས་ངེས་གྲོལ་ནི། །རྣམ་པར་མནན་ཅིང་འགྲོ་བའི་དཔལ། །མཁའ་ལྟར་མཉམ་
པ་ཉིད་སོང་ནི། །དེ་བཞིན་གཤེགས་པ་བསོད་རྣམས་དཔུང་། །ཉོན་མོངས་དྲི་མ་ཀུན་སྤངས་ནི། །མཚན་ནི་མཆོག་ཏུ་གྱུར་པའི་བློ། །དུས་གསུམ་ཞེས་པ་གསལ་བའི་མཚན། །དུས་མེད་པར་སོང་རྟོགས་པ་ནི། །ཟླ་བའི་མར་མེ་ཞེས་པའི་མཚན། །སེམས་ཅན་ཀུན་ནི་མི་ཟད་པའོ། །
གཙོ་བོ་ཆེ་ནི་བློ་བཟངས་སྤྱན། །ཡོན་ཏན་ཐོད་ཅན་རྣམས་ཀྱི་གཙུག །དེ་བཞིན་གཤེགས་པ་ཡན་ལག་བཙུགས། །ཉོན་མོངས་ཀུན་ལས་རྣམ་གྲོལ་བ། །ཤེས་རབ་ཡུལ་ཞེས་བྱ་བའི་མཚན། །ནམ་མཁའ་ལྟ་བུའི་ནོར་བུ་གནས། །དེ་བཞིན་གཤེགས་པ་མཆོག་ཏུ་གྱུར། །ཡིད་
བཞིན་ནོར་བུ་ཆེན་པོ་འཆང་། །རབ་ཏུ་འཇོམས་པའི་འོད་ཟེར་མཚན། །རིན་ཆེན་ཀུན་གྱི་མཆོག་ཅེས་པ། །སངས་རྒྱས་ཤེས་པ་བྱིན་ཞེས་བྱ། །གང་ཕྱིར་ཁྱབ་པ་ཞེས་པའི་ཚིག །དེ་བཞིན་གཤེགས་པ་འཇམ་པའི་དབྱངས། །དཔག་བསམ་ཤིང་ཆེན་ཞེས་པ་ནི། །ཚོགས་
མེད་འདོད་པ་ཞེས་པའི་མཚན། །སངས་རྒྱས་པ་ཞེས་ཐུ་བོ་སྦྱིན། །བུམ་པ་བཟང་པོ་ཆེ་མཆོག་ནི། །དེ་བཞིན་གཤེགས་པ་དག་པའི་མཚན། །སེམས་ཅན་ཀུན་དོན་བྱེད་ཅེས་པ། །ཡེ་ཤེས་རྣམ་རིག་ཅེས་པའི་མཚན། །བྱེད་པ་དེ་བཞིན་གཤེགས་པའི་འོད། །ཕན་དོན་
ཞེས་པ་དབང་པོ་ཡི། །སེམས་ཅན་མཉེས་གཤིན་ཞེས་པ་ནི། །དེ་བཞིན་གཤེགས་པ་ཐུགས་འཆང་བའོ། །བཟང་ངན་ཤེས་པ་ཞེས་པའི་ལྷ། །དུས་ཤེས་པ་ནི་འོད་ཟེར་བཟང་། །དམ་ཚིག་ཅེས་པ་གཟུགས་བཟང་བའོ། །དམ་ཚིག་ལྡན་ནི་རྒྱལ་བའི་མཚན། །ཁྱབ་བདག་

49-1-75a

ཅེས་པ་དོན་གྲུབ་མཛད། །སེམས་ཅན་དབང་པོ་ཞེས་པ་ནི། །དེ་བཞིན་གཤེགས་པ་སེང་གེ་སྟེ། །དུས་ཤེས་ཞེས་ནི་དྲི་ལྡན་ནོ། །རྣམ་གྲོལ་གསུམ་ལ་མཁས་པ་ནི། །དེ་བཞིན་གཤེགས་པ་གྲགས་པའི་མཚན། །ཡོན་ཏན་ལྡན་ནི་རྒྱལ་པོའོ། །ཡོན་ཏན་ཞེས་ནི་
མཆོག་སྙིང་པོའོ། །ཆོས་ཤེས་བསོད་ནམས་འོད་ཟེར་ཅན། །བཀྲ་ཤིས་ཞེས་པ་མདོག་བཟང་པོ། །བཀྲ་ཤིས་འབྱུང་བ་ཉན་འདོད་པའོ། །བཀྲ་ཤིས་ཀུན་ཞེས་བྱ་བ་ནི། །མཚན་ནི་མར་མེའི་རྒྱལ་པོའོ། །བཀྲ་ཤིས་པ་ནི་རིན་ཆེན་བརྩེགས། །གྲགས་པ་ཞེས་བྱ་ཚོགས་
མེད་ལྷ། །དེ་བཞིན་བཀྲ་ཤིས་པ་ཡི་བདག །སྙན་གྲགས་ཞེས་པ་གྲོལ་བར་འགྲོ། །དགེ་བ་གསེར་གྱི་གཙུག་ཕུད་དོ། །གང་ཕྱིར་དག་པ་ཆེན་པོའི་ཚིག །རཱ་ཧུ་ལ་ནི་བཟང་པོའི་མཚན། །དབུགས་ཆེན་ཞེས་པ་ཐུབ་པའོ། །དགའ་ཆེན་ཁྱོད་ནི་རང་བཞིན་ཐུབ། །རོལ་མོ་ཆེན་པོ་
ཟླ་བའི་འོད། །བཀུར་སྟི་ཞེས་པའི་ཚིག་ཉིད་ནི། །གསེར་མདོག་བཟང་པོའི་འོད་ཅེས་བྱ། །རིམ་གྲོ་ཞེས་པ་དགེ་བའི་མཚན། །ཕུན་ཚོགས་ཡོན་ཏན་དཔའ་བོའི་ལྷ། །མཆོག་ཏུ་དགའ་བ་ཆོས་ཀྱི་གདུགས། །གྲགས་བདག་དཔལ་ཞེས་བྱ་བ་ནི། །དེ་བཞིན་གཤེགས་
པ་ཡོན་ཏན་ལེགས། །མཆོག་ལྡན་འགྲོ་མིང་ཞེས་པ་ནི། །མཆོག་སྦྱིན་ཞེས་པ་ཡེ་ཤེས་རྫོགས། གཙོ་བོ་ཞེས་པ་ཞིབ་མོའི་བློ། །སྐྱབས་ནི་འོད་ཟེར་ཀུན་འབར་བའོ། །དམ་པ་སྐྱབས་ཀྱི་སྨན་ཉིད་དོ། །འཇིགས་པ་ཆེན་པོ་དགྲ་ཞེས་པ། །རྣམ་གྲོལ་རྟོག་ཅེས་བྱ་བའི་མཚན། །
རབ་ཀྱི་མཆོག་ནི་ཤེས་རབ་མཆོག །འཇིགས་པ་མ་ལུས་སེལ་བ་ནི། །དེ་བཞིན་གཤེགས་པ་ཡེ་ཤེས་རྒྱལ། །གཙུག་ཕུད་མིང་ནི་འཇིགས་པའི་གཟུགས། །ཕུད་བུ་ཞེས་པ་གློ་བུར་འཇོམས། །ལྕང་ལོ་ཅན་ནི་ཐོགས་མེད་གྲགས། །རལ་པ་ཞེས་པ་བདེན་པ་སྤུངས། །མུནྫར།
མཚན་ནི་ངག་སྙན་པའོ། །ཅོད་པན་ཅན་ནི་ངག་དབང་གྲགས། །གདོང་ལྔ་ཞེས་པ་ཆོས་ཀྱི་བརྩེགས། །གཙུག་ཕུད་ལྔ་ལྡན་གྲོལ་བའི་འོད། །ཟུར་ཕུད་ལྔ་པ་ལེགས་པར་བརྒྱན། །ཐོད་ཅེས་པ་ནི་རབ་ཞི་ལུས། །བརྟུལ་ཞུགས་ཆེན་པོ་འཆང་ཞེས་པ། །ཡིད་ཅེས་དག་

49-1-75b

ཅེས་བྱ་བའི་མཚན། །མགོ་ཟླུམ་སེང་གེ་མཆེ་བ་རྣོ། །ཚངས་པར་སྤྱོད་ནི་སེལ་བ་པོ། །བརྟུལ་ཞུགས་མཆོག་ཅེས་བྱ་བ་ནི། །འགྲོ་བ་མཆོད་པ་ཞེས་པའི་མཚན། །དཀའ་ཐུབ་ཆེན་པོ་སེང་གེ་རེག །དཀའ་ཐུབ་ཆེན་པོ་ཕྱིན་ཞེས་པ། །ཆོས་ཀྱི་མཚན་ཞེས་བྱ་བའི་མིང་། །གཙང་གནས་
ཞེས་བྱ་སྐལ་བ་བཟང་། །གཽ་ཏམ་མི་བསྐྱོད་པ་ཡི་མདོག །དམ་པ་བྱ་ཞེས་འབར་རྒྱལ་བའི། །ཚངས་པ་ཞེས་ནི་རྟོགས་པའོ། །བྲམ་ཟེ་ཞེས་པ་སྤྱན་བཟང་ངོ་། །ཚངས་པ་དོན་རིག་པ་ཡི་བློ། །མྱ་ངན་འདས་པ་ཚངས་པ་ནི། །འཇིགས་པ་མེད་པའི་འོད་ཟེར་མཚན། །ཐོབ་པ་ཞེས་པ་དྲི་ཡི་འོད། །
གྲོལ་བ་དེ་བཞིན་དགའ་བའོ། །ཐར་པ་ཞེས་པ་དོན་ཡོད་འགྲོ། །རྣམ་གྲོལ་ཁྲོ་བོ་ཐལ་བའི་མདོག །རྣམ་གྲོལ་མཆོག་ནི་གཟུགས་ཞེས་བྱ། །ཞི་བ་དེ་བཞིན་ཉན་པའོ། །ཞི་བ་ཞེས་པ་གཙོ་བོར་གྲགས། །མྱ་ངན་འདས་པ་དྲག་པ་སྦྱིན། །མྱ་ངན་འདའ་བ་ཞེས་པ་ནི། །ཉི་མ་ལྷ་ཞེས་
བྱ་བར་གྲགས། །ཞི་བ་ཞེས་པ་ཤེས་རབ་སྣང་། །བཀྲ་ཤིས་ཞེས་བརྗོད་པ་ཡི་ཚིག །གཤིན་རྗེ་འཇོམས་པའི་ཡན་ལག་མཚན། །བདེ་སྡུག་སེལ་བ་མཐར་འགྱུར་བ། །དེ་བཞིན་གཤེགས་པ་ཤིང་རྟ་འགྲོ། །ཆགས་བྲལ་ཞེས་པ་གསེར་བཙོ་མ། །ཉོན་མོངས་ལུས་ཟད་ཅེས་པ་ནི། །
སྐལ་བར་ལྡན་ཞིང་གཙུག་ཕུད་མིང་། །ཐུབ་པ་མེད་པ་དེ་བཞིན་ཕྱུག །དཔེ་མེད་ཅེས་པ་དགའ་བ་བརྟེན། །མི་མངོན་མྱོས་པ་འཇོམས་པའོ། །མི་སྣང་བ་ནི་ཡེ་ཤེས་མཛོད། །གསལ་བྱེད་མིན་ནི་ཚངས་པའི་གྲོང་། །དུས་མེད་ཅེས་པ་ཙནྡན་ནོ། །ཀུན་འགྲོ་ཞེས་པ་མྱ་ངན་མེད། །ཁྱབ་
པ་པོ་ནི་སེང་གེ་འོད། །ཕྲ་ཞིང་ཞེས་པ་ཏོག་གི་ཡུལ། །ས་བོན་པདྨོའི་སྙིང་པོའོ། །གང་ཕྱིར་ཟག་པ་མེད་པའི་ཚིག །འོད་ཟེར་མཐའ་ཡས་ཞེས་པའི་མཚན། །རྡུལ་མེད་ཅེས་པ་ལྷ་ཡི་འོད། །རྡུལ་བྲལ་བསོད་ནམས་མེ་ཏོག་མཚན། །དྲི་མ་མེད་ནི་རིག་པའི་ཧོམ། །ཉེས་པ་སྤངས་པ་ཡེ་
ཤེས་དབང་། །སྐྱོན་མེད་ཚངས་པ་གསལ་བའོ། །ཤིན་ཏུ་སད་པ་རིན་ཆེན་ཕྱག །བློ་གསལ་བདག་ནི་དབང་པོ་ལྡན། །ཀུན་ཤེས་ཞེས་པ་དཔེ་བྲལ་འགྲོ། །ཀུན་རིག་ཐུ་བོ་ཐེ་ཚོམ་ལྡན། །དམ་པ་ཞེས་པ་མཆོད་པའི་མཚན། །རྣམ་པར་ཤེས་པ་འབར་བའོ། །ཆོས་ཉིད་སྤངས་པ་ཞེས་

49-1-76a

པའི་མཚན། །དེ་བཞིན་གཤེགས་པ་སངས་རྒྱས་གདུགས། །ཡེ་ཤེས་ཞེས་པ་འདམ་གྱི་མཆོག །གཉིས་མེད་ཚུལ་འཆང་ཞེས་པ་ནི། །ཡེ་ཤེས་འོད་དང་ལྡན་པའི་མཚན། །མི་་རྟོག་ཅེས་བྱ་གྲུབ་པའོ། །ལྷུན་གྱིས་གྲུབ་པ་རྨ་བྱའི་མཚན། །དུས་གསུམ་སངས་རྒྱས་
ལས་བྱེད་ནི། །དེ་བཞིན་གཤེགས་པ་ཆོས་དང་ལྡན། །ཐོག་མ་ཐ་མ་མེད་ཅེས་པ། །ཕན་པར་ལྡན་པ་གཟུགས་ཞེས་མཚན། །སངས་རྒྱས་ཡེ་ཤེས་མཚན་དེ་བཞིན། །དང་པོ་སངས་རྒྱས་ཞེས་བྱ་བ། །གྲགས་པ་ཡི་ནི་མཚན་དུ་བརྗོད། །རྒྱུད་མེད་པ་ནི་འོད་ཟེར་འབར། །ཡེ་ཤེས་མིག་གཅིག་
ཅེས་པ་ནི། །དེ་བཞིན་གཤེགས་པ་མ་ལུས་པ། །དྲི་མ་མེད་ཅེས་བྱ་བ་ནི། །བཻ་ཌཱུརྱ་ཡི་སྙིང་པོའོ། །ཡེ་ཤེས་ལུས་ནི་རྒྱུ་སྐར་རོ། །དེ་བཞིན་གཤེགས་ནི་ལྷ་ཉིད་ལྡན། །ཚིག་གི་དབང་པོ་ཞེས་པ་ནི། །རི་བོང་ཅན་ཞེས་བྱ་བའི་མཚན། །སྨྲ་བ་ཆེ་ནི་དྲན་པའི་འོད། །སྨྲ་བའི་རྒྱལ་པོ་དགེ་བའི་འོད། །
སྨྲ་བའི་སྐྱེས་བུ་ཞེས་པ་ནི། །ཡོན་ཏན་ཀུན་འབྱུང་འོད་ཟེར་མཚན། །སྨྲ་བའི་དམ་པ་ཞེས་སོགས་ནས། །ཚིགས་བཅད་ཕྱེད་ཀྱི་ནང་དུ་ནི། །རྒྱུ་དང་འབྲས་བུའི་བདག་ཉིད་དུ། །ཚིག་དབང་ཕྱུག་ནི་སྔོན་གསུངས་པ། །བདག་གིས་དེས་ན་འདིར་མ་བཤད། །གཞན་དུ་དགོངས་པ་སྣ་ཚོགས་
གསུངས། །ཀུན་དུ་ལྟ་བ་ཡིད་ལེགས་པའོ། །རབ་ཏུ་དགའ་བའི་ཞེས་པ་ནི། །རིགས་ཀྱི་འོད་ཅེས་བྱ་བའི་མཚན། །གཟི་བརྗིད་ཕྲེང་བ་སྤྱད་པ་ནི། །བལྟ་ན་སྡུག་ནི་ཡེ་ཤེས་མཚོ། །དཔལ་གྱི་བེའུ་ཞེས་བྱ་བ་ནི། །ཆོས་ཀྱི་དབང་ཕྱུག་རི་ཡི་མཚན། །འོད་བཟངས་སྐྲ་ལ་ལྟ་བའོ། །འབར་བའི་ཡོན་
ཏན་བྱེ་བའི་སྟོབས། །ལག་པ་འོད་འབར་ཞེས་པ་ནི། །དེ་བཞིན་གཤེགས་པ་འཁོར་བའི་དབང་། །སྨན་པ་ཆེ་ནི་ལེགས་པའི་དབྱངས། །མཆོག་ཅེས་པ་ནི་ལེགས་པར་རེག །གཙོ་བོ་དོན་གྲུབ་ཅེས་པའི་མཚན། །ཟུག་རྔུ་འབྱིན་པ་ཞེས་པ་ནི། །ཡོན་ཏན་གཟི་བརྗིད་དཔལ་གྱི་མིང་། །དེ་
ལ་བླ་ན་མེད་པའི་ཚིག །ཀུན་དུ་མཉམ་ཉིད་ཡེ་ཤེས་མཚན། །སྨན་རྣམས་མ་ལུས་ལྗོན་པའི་ཤིང་། །བདུད་རྩི་དབྱངས་ཞེས་བྱ་བར་བརྗོད། །ཉོན་མོངས་ནད་ཀྱི་དགྲ་ཆེ་ནི། །དེ་བཞིན་གཤེགས་པ་བདེ་བར་སྣང་། །ཐིག་ལེ་འཇིག་རྟེན་གསུམ་ཞེས་པ། །ལེགས་པའི་བློ་ཞེས་བྱ་བའི་

49-1-76b

མཚན། །མཆོག་ནི་རྣམ་གྲོལ་དོན་ཙམ་མོ། །དཔལ་ལྡན་ཞེས་པ་ཁྱབ་དབང་ཕྱུག །རྒྱུ་སྐར་དཀྱིལ་འཁོར་ཞེས་པ་ནི། །རོལ་པའི་མཆོག་ཅེས་བྱ་བའི་མཚན། །ཕྱོགས་བཅུ་ནམ་མཁའི་མཐར་ཐུག་ནི། །ལྷག་མཐོང་ཞི་གནས་དེ་བཞིན་གཤེགས། །ཆོས་ཀྱི་རྒྱལ་མཚན་ཆེན་པོའི་
ཚོགས། །ཉེས་པ་སྤངས་ཞེས་བྱ་བར་གསུངས། །འགྲོ་ན་གདུགས་གཅིག་ཡངས་པ་ནི། །དེ་བཞིན་གཤེགས་པ་ཉི་མའི་འོད། །བྱམས་དང་སྙིང་རྗེའི་དཀྱིལ་འཁོར་ནི། །བཀྲ་ཤིས་རྒྱས་པ་བློ་ཡི་མཚན། །དཔལ་ལྡན་པདྨ་གར་ཞེས་པ། །དེ་བཞིན་གཤེགས་པ་པདྨའི་མཆོག །རིན་ཆེན་
གདུགས་ནི་ཉི་མའི་འོད། །དེ་བཞིན་ཁྱབ་བདག་ཆེན་པོར་བརྗོད། །སོ་སོར་གསུང་མདོག་ཅེས་པའི་མཚན། །སངས་རྒྱས་ཀུན་གྱི་རྒྱལ་པོ་ཆེ། །དེ་བཞིན་གཤེགས་པ་ལེགས་པའི་མུ། །སངས་རྒྱས་ཀུན་གྱི་དངོས་བདག་འཆང་། །ཚོགས་ཀྱི་དབང་པོ་ཞེས་པའི་མཚན། །སངས་
རྒྱས་ཀུན་གྱི་རྣལ་འབྱོར་ནི། །འཇིགས་པ་བྲལ་བའི་མཚན་ཡིན་ནོ། །སངས་རྒྱས་ཀུན་གྱི་བསྟན་པ་གཅིག །དེ་བཞིན་གཤེགས་པ་ཡེ་ཤེས་སྲེད། །རྡོ་རྗེ་རིན་ཆེན་ཞེས་པའི་ཚིག །སྤྲོས་པའི་མཚན་ཉིད་ཅེས་བྱའི་མཚན། །འོན་ཀྱང་འདི་ལས་གཞན་དུ་ནི། །དེ་བཞིན་གཤེགས་
པ་དྲུག་ཏུ་གསུངས། །དབང་བསྐུར་བ་ནི་བློ་ཡི་མཆོག །རིན་ཆེན་ཀུན་བདག་དབང་ཕྱུག་ནི། །དེ་བཞིན་གཤེགས་པ་རི་བོང་ཅན། །འཇིག་རྟེན་དབང་ཕྱུག་ཀུན་བདག་ནི། །རིན་ཆེན་ཟླ་འོད་ཅེས་པའི་མཚན། །རྡོ་རྗེ་ཟླ་འོད་ཀུན་གྱི་རྗེ། །དེ་བཞིན་གཤེགས་པ་ཐམས་ཅད་ཀྱི། 
སངས་རྒྱས་ཀུན་གྱི་ཐུགས་ཆེ་ནི། །མེ་ལོང་ཆེན་པོ་ཞེས་པའི་མཚན། །སངས་རྒྱས་ཀུན་གྱི་ཐུགས་སོང་ནི། །དེ་བཞིན་གཤེགས་པ་ཚངས་པའི་དབྱངས། །སངས་རྒྱས་ཀུན་གྱི་སྐུ་ཆེ་བ། །སྙན་པའི་གསུང་ཞེས་བྱ་བའི་མཚན། །སངས་རྒྱས་ཀུན་གྱི་གསུང་སྨྲ་ནི། །ཤེས་རབ་ཆེན་
པོའི་མུ་རུ་གསུངས། །རྡོ་རྗེ་ཉི་མ་སྣང་ཆེན་ནི། །ཀུན་དུ་མཉམ་པ་བློ་ཡི་མཚན། །རྡོ་རྗེ་ཟླ་བ་དྲི་མེད་འོད། །རྡོ་རྗེ་ཚོགས་ཀྱི་བློ་ཞེས་བྱ། །ཆགས་བྲལ་ལ་སོགས་ཆགས་ཆེན་ནི། །དེ་བཞིན་གཤེགས་པ་བློ་དང་ལྡན། །ཁ་དོག་སྣ་ཚོགས་འབར་བའི་འོད། །མཚན་ནི་ནམ་མཁའི་

49-1-77a

དབང་པོའོ། །རྡོ་རྗེ་སྐྱིལ་ཀྲུང་རྫོགས་སངས་རྒྱས། །དེ་བཞིན་གཤེགས་པ་ངག་དབང་ཕྱུག །སངས་རྒྱས་ཆོས་འཛིན་ཡང་དག་བརྗོད། །ཡོན་ཏན་ཕྱག་ཅེས་བྱ་བའི་མཚན། །དཔལ་ལྡན་སངས་རྒྱས་པདྨ་སྐྱེས། །དེ་བཞིན་གཤེགས་པ་ཀུན་གྱི་དཔལ། །ཀུན་
མཁྱེན་ཡེ་ཤེས་མཛོད་ཅེས་པ། །མཚན་ནི་འཕགས་པ་འདོད་པའོ། །སྣ་ཚོགས་སྒྱུ་འཕྲུལ་འཆང་ཞེས་པ། །དེ་བཞིན་གཤེགས་པ་གསལ་རྒྱལ་པོ། །རྒྱལ་པོ་ཞེས་པ་གསལ་བའི་རི། །སངས་རྒྱས་རིགས་འཆང་ཞེས་པ་ནི། །རྔ་སྒྲ་ཕུན་སུམ་ཚོགས་དབང་རྒྱལ། །ཆེན་པོ་འདོད་པའི་
སྤྱན་གདོང་ཅན། །རྡོ་རྗེ་རྣོན་པོ་ཞེས་པ་ནི། །ཡེ་ཤེས་ལེགས་པ་ཞེས་བརྗོད་དོ། །རལ་གྲི་ཆེན་མོ་ཞི་གནས་མཚན། །རྣམ་དག་ཅེས་པ་ཡེ་ཤེས་བཟང་། །ཡི་གེ་མཆོག་ནི་རབ་འདུག་མཚན། །སྡུག་བསྔལ་གཅོད་ཅེས་པ་ལ་སོགས། །ཚིགས་བཅད་ཕྱེད་དུ་གསུངས་པ་སྟེ། །དེ་ནི་ཚིག་
རྐང་བཞི་ཡིན་པས། །ཆོས་ཀྱི་རྒྱལ་མཚན་བདེ་གཤེགས་སོ། །རྒྱལ་བ་འཛིན་ནི་དྲི་མ་བྲལ། །རྡོ་རྗེ་ཟབ་པོ་ཡེ་ཤེས་ཕྱུག །རྡོ་རྗེ་བློ་གྲོས་ཞེས་པའི་ཚིག །དེ་བཞིན་གཤེགས་པ་སྐར་བྲལ་སྒྲ། །དེ་བཞིན་རིན་ཞེས་བྱ་བ་ནི། །ཡོན་ཏན་གཟི་བརྗིད་འོད་ཀྱི་མཚན། །ཐམས་ཅད་ཕ་རོལ་ཕྱིན་
པ་འགེངས། །དེ་བཞིན་གཤེགས་པ་དྲང་སྲོང་དབང་། །སངས་རྒྱས་ཀུན་གྱི་རྒྱལ་ཡིན་ནོ། །བློ་གྲོས་ཕན་ཞེས་པ་ཡི་མཚན། །རྣམ་དག་ཆོས་ནི་བདག་མེད་པ། །དེ་བཞིན་སྤྲོས་པའི་འཁོར་ལོའོ། །ཡང་དག་ཡེ་ཤེས་ཟླ་འོད་སྙིང་། །དེ་བཞིན་གཤེགས་པ་ཟླ་བའི་ཞལ། །བརྩོན་ཆེན་
སྒྱུ་འཕྲུལ་དྲ་བ་ནི། །བདེ་གཤེགས་ཉི་མ་ཟླ་བའོ། །རྒྱུད་ཀུན་གྱི་ནི་མཆོག་ཅེས་པ། །ཡོན་ཏན་རྒྱ་མཚོ་ཞེས་པའི་མཚན། །མ་ལུས་རྡོ་རྗེ་སྐྱིལ་ཀྲུང་ནི། །བདེ་གཤེགས་ཡོན་ཏན་བསྡུས་པའི་མཚན། །ཡེ་ཤེས་སྐུ་རྣམས་མ་ལུས་འཆང་། །དེ་བཞིན་གཤེགས་པ་བླ་མེད་ཐོག །ཀུན་དུ་
བཟང་པོ་བསོད་ནམས་ཏོག །བློ་གྲོས་བཟང་ནི་སྤོབས་པའི་ཡུལ། །ས་སྙིང་ཞེས་པ་རིགས་སྐྱེས་མཚན། །འགྲོ་བ་འཛིན་ནི་རྒྱལ་རིགས་སོ། །སངས་རྒྱས་ཀུན་གྱི་སྙིང་པོ་ཆེ། །རྣམ་གྲོལ་དོན་བསམ་ཞེས་པའི་མཚན། །སྤྲུལ་པའི་འཁོར་ལོ་སྣ་ཚོགས་མཚན། །གཉིས་པའི་

49-1-77b

མཚན་དུ་བསྟན་པ་ལས། །ཁྱད་པར་དབང་ཕྱུག་བརྗོད་པའོ། །དངོས་པོ་ཀུན་གྱི་རང་བཞིན་མཆོག །གང་ཕྱིར་དེ་ཡི་ཚིག་གཉིས་ནི། །དེ་བཞིན་གཤེགས་པ་མཆོག་གིའོ། །དངོས་པོ་ཀུན་གྱི་རང་བཞིན་འཛིན། །ཡེ་ཤེས་སྤངས་ཞེས་པ་ཡི་མཚན། །སྐྱེ་མེད་ཆོས་ནི་སྣ་ཚོགས་དོན། །
དེ་བཞིན་གཤེགས་པ་ནམ་མཁའི་ཁམས། །ཆོས་རྣམས་ཀུན་གྱི་རང་བཞིན་འཆང་། །དེ་བཞིན་གཤེགས་པ་མཆོད་བྱེད་མཚན། །སྐད་ཅིག་ལ་སོགས་ཚིག་གཉིས་ནི། །དཔུང་ཚོགས་དཔལ་ཞེས་བྱ་བའི་མཚན། །ཆོས་ཀུན་མངོན་པར་རྟོགས་པ་ནི། །བདེ་གཤེགས་ཡོན་ཏན་ཟླ་
བའི་མཚན། །ཐུབ་པ་བློ་མཆོག་འབྱུང་པོ་སེལ། །ཡང་ནི་རཱ་ཧུ་ལ་ཡི་མཚན། །མི་གཡོ་རབ་ཏུ་དང་བའི་བདག །བདུད་རྩི་འོད་ཅེས་བྱ་བར་བརྗོད། །རྫོགས་པའི་སངས་རྒྱས་བྱང་ཆུབ་འཆང་། །དེ་བཞིན་གཤེགས་པ་རིན་ཆེན་འོད། །སངས་རྒྱས་ཀུན་གྱི་མངོན་སུམ་ནི། །ཟླ་བ་འདོད་
པ་ཞེས་པའི་མཚན། །གང་ཕྱིར་ཡེ་ཤེས་འོད་ཀྱི་ཚིག །བློ་ལྡན་སེང་གེ་སྟོབས་ཀྱི་མཚན། །རབ་ཏུ་འོད་གསལ་ཞེས་པ་ནི། །ཡེ་ཤེས་སྐུ་ཞེས་བྱ་བར་གསུངས། །གཞན་ཡང་རྡོ་རྗེ་འཇམ་པའི་མཚན། །སངས་རྒྱས་ཀུན་ལ་ཁྱབ་པའོ། །གཅིག་དང་དུ་མའི་རང་བཞིན་ལས། །
བསམ་གྱིས་མི་ཁྱབ་ཡང་དག་འབྱུང་། །སོ་སོར་རྟོག་པའི་ཡེ་ཤེས་དང་། །རང་རིག་ཡེ་ཤེས་སྐྱེ་བ་སྟེ། །འོན་ཀྱང་ཇི་ལྟར་ཤིང་ལས་མེ། །མ་གཙུབས་པར་ནི་འབྱུང་མི་འགྱུར། །དེ་བཞིན་ལུས་ལས་ཡེ་ཤེས་ནི། །སྲིད་པས་བསྡམས་ལས་སྐྱེ་མ་ཡིན། །དེ་ཕྱིར་བླ་མ་དམ་པ་ལས། །
བསྲུབས་པས་འབྱུང་བར་ཐེ་ཚོམ་མེད། །རྣམ་པར་རྟོག་པ་ཀུན་འཇོམས་པའི། །གཉིས་མེད་པ་ནི་བསྲུབས་ལས་སྐྱེས། །དེ་ལྟར་མ་ལུས་ཕུན་སུམ་ཚོགས། །གང་ཕྱིར་པ་ནི་སྲིད་མཐར་ཕྱིན། །ཨ་ཝ་དྷཱུ་ཏཱིའི་དབུས་གནས་ཡང་། །སངས་རྒྱས་ལ་སོགས་སྐུ་དག་འབྱུང་། །དཀྱིལ་
འཁོར་གཅིག་གི་དུས་སུ་སྟེ། །སྔར་ལ་ལྟོས་པས་གཉིས་པའོ། །དེ་དག་རྣལ་འབྱོར་མཆོག་གི་གཙོ། །དབང་པོ་འབྲིང་དང་དམན་པ་ལའོ། །དབང་པོ་མཆོག་ཏུ་གྱུར་པ་ལ། །དེ་བཞིན་ཕ་རོལ་ཕྱིན་པའི་ཐེག །མཆོག་གི་མཆོག་ཏུ་གྱུར་པ་ལ། །ཕ་རོལ་ཕྱིན་དང་གསང་སྔགས་

49-1-78a

གཉིས། །དེ་དག་འཁོར་ལོ་དྲུག་གི་ལམ། །སྲིད་པ་འཆིང་ལས་གྲོལ་བར་བྱེད། །ཉེ་བར་བསྡུས་པ་ལས། དཔྲལ་བ་དང་ལྟེ་བའི་འཁོར་ལོ་གནས་པ། སོ་སོར་རྟོག་པའི་ཡེ་ཤེས་ཀྱི་རྣམ་པར་རྟོག་གེ་ཞེས་བྱ་བ་སྟེ་དྲུག་པའོ།།      །།ཇི་ལྟར་མིང་གི་རྣམ་གྲངས་དོན། །
མཉམ་ཉིད་ཡེ་ཤེས་བརྗོད་པར་བྱ། །བརྒྱ་ལས་བཞི་ལྷག་པ་ཡི་མིང་། །ཚིགས་བཅད་ཉི་ཤུ་རྩ་བཞི་ཡིས། །རྣལ་འབྱོར་དང་ནི་ལྡན་པར་བརྗོད། །དང་པོར་འདོད་པའི་དོན་གྲུབ་ནས། །ནོར་བུ་ཆེན་པོ་ཞེས་པའི་མཐར། །ཇི་སྙེད་དབང་པོ་དོན་ཕྱིར་སོང་། །སྐྱེས་སོ་ཅོག་ནི་འགག་པར་འགྱུར། །
དེ་དང་ལྡན་པའི་མཚན་གསུངས་པ། །ཇི་སྐད་དུ་གསུངས་ལས་སྐྱེས་ཏེ། །འདོད་པའི་དོན་གྲུབ་ཅེས་པ་ནི། །དེ་བཞིན་གཤེགས་པ་བསྒྲུབ་པའི་དཔལ། །དམ་པ་ཡེ་ཤེས་ཉི་མའོ། །ངན་སོང་ཐམས་ཅད་རྣམ་སྦྱོང་ནི། །དོན་གྲུབ་ཅེས་ནི་བྱ་བའི་མཚན། །སེམས་ཅན་ཀུན་མཆོག་
ཅེས་པ་ནི། །དེ་བཞིན་གཤེགས་པ་རི་རབ་བརྩེགས། །མགོན་པོ་ཞེས་པ་དྲག་སྦྱིན་མཚན། །སེམས་ཅན་ཀུན་རབ་གྲོལ་ཞེས་པ། །དེ་བཞིན་གཤེགས་པ་པདྨོའི་མཚན། །ཉོན་མོངས་གཡུལ་ལས་གཅིག་དཔའ་ནི། །དྲག་བཅོམ་གྲགས་ཞེས་བྱ་བའི་མཚན། །མི་ཤེས་དགྲ་
ཡི་དྲེགས་འཇོམས་ནི། །དེ་བཞིན་གཤེགས་པ་ཡེ་ཤེས་སྟོབས། །བློ་ལྡན་ཞེས་བྱ་ཉོན་མོངས་འཇོམས། །སྒེག་པར་འཆང་ནི་མེ་ཞེས་པའོ། །དཔའ་བོ་མི་སྡུག་གཟུགས་འཆང་ནི། །དེ་བཞིན་གཤེགས་པ་བདེ་བའི་དྲི། །ལག་བརྒྱ་ཞེས་སོགས་ཚིག་གཉིས་ཀྱི། །དཔེ་བྲལ་
བཀོད་པ་ཞེས་པའི་མཚན། དཔལ་ལྡན་ལག་པ་ཞེས་སོགས་ནི། །དེ་བཞིན་གཤེགས་པ་རི་བོ་གྲགས། །གཅིག་སོགས་ནས་ནི་ཚིག་གཉིས་ཀྱིས། །སྲིད་པའི་མཐའ་སྟོན་པ་ཡི་མཚན། །ཚངས་སོགས་དེ་བཞིན་ཚིག་གཉིས་ནི། །དེ་བཞིན་གཤེགས་པ་ཟླ་བའི་མཚན། །
གཉིས་མེད་ཆོས་ནི་རིན་ཆེན་ཟླ། །དམ་པའི་དོན་ནི་སེང་གེ་རྒྱལ། །འཇིགས་པ་མེད་ནི་བསམ་གཏན་དོན། །ནམ་རིག་སྣ་ཚོགས་གཟུགས་དོན་ནི། །དེ་བཞིན་གཤེགས་པ་དཔེ་དང་བྲལ། །སེམས་ཤེས་པ་ནི་རྣམ་པར་རོལ། རྣམ་ཤེས་ཡོན་ཏན་རིན་ཆེན་ནོ། །རྒྱུད་ལྡན་ཚིག་ནི་

49-1-78b

དོན་གྲུབ་མཚན། །དངོས་དོན་མ་ལུས་དགའ་བ་ནི། །དགྲ་བཅོམ་གྲགས་ཆེན་ཞེས་པའི་མཚན། །སྟོང་ཉིད་དགའ་བ་རིན་ཆེན་འོད། །བློ་མཆོག་ཅེས་པ་གཉིས་སུ་འདོད། །གཅིག་ནི་སྲིད་པས་བཅིངས་པ་སྟེ། །གཉིས་པ་སྤྱོད་པས་རྣམ་པར་འཁྲུལ། །སྲིད་པའི་འདོད་ཆགས་
སྤངས་པ་ནི། །དེ་བཞིན་གཤེགས་པའི་མཛོད་སྤུའོ། །སྲིད་གསུམ་དགའ་བ་ཆེན་པོ་ནི། །སྤོབས་པ་གྲགས་པ་ཞེས་པའི་མཚན། །སྤྲིན་དཀར་དག་པ་ཞེས་པ་ནི། །བདེ་གཤེགས་རྡོ་རྗེ་ནོར་བུའོ། །འོད་བཟང་སྟོན་ཀའི་ཟླ་བ་ནི། །ཚེ་དཔག་མེད་ཅེས་བྱ་བའི་མཚན། །ཉི་མ་ཤར་བའི་
དཀྱིལ་འཁོར་ནི། །དེ་བཞིན་གཤེགས་པ་ནོར་བུ་བཀོད། །སེན་མོའི་མདངས་ནི་ཤས་ཆེར་དམར། །དབང་པོ་ཆེན་པོ་ཞེས་པའི་མཚན། །ཅོད་པན་བཟང་པོ་མཐོན་ཀའི་རྩེ། །དེ་བཞིན་གཤེགས་པ་ཡོན་ཏན་འོད། །སྐྲ་མཆོག་མཐོན་ཀ་ཆེན་པོ་འཆང་། །རི་བོ་གྲགས་པ་བརྩེགས་
པའི་མཚན། །ནོར་བུ་ཆེན་པོ་འོད་དཔལ་ནི། །དེ་བཞིན་གཤེགས་པ་འོད་ཟེར་བཅུ། །སངས་རྒྱས་སྤྲུལ་པའི་རྒྱན་ལྡན་ནི། །གཉིས་དང་བྲལ་ཞེས་བྱ་བའི་མཚན། །འཇིག་རྟེན་ཁམས་བརྒྱ་ཀུན་བསྐྱོད་ནི། །དེ་བཞིན་གཤེགས་པ་ཀླུ་ཡི་སྟོབས། །རྫུ་འཕྲུལ་རྐང་པ་སྟོབས་ཆེན་ནི། །
ཡིད་དུ་འོང་བ་ཞེས་པའི་མཚན། །དྲན་པ་ཆེན་པོ་འཆང་ཞེས་པ། །བདེ་གཤེགས་རིན་ཆེན་ཟླ་བ་ཡིན། །དེ་ཉིད་ཅེས་པ་ཤུགས་ཀྱི་མཚན། །དྲན་པ་བཞི་པོའི་ཏིང་འཛིན་རྒྱལ། །དེ་བཞིན་གཤེགས་པ་གསལ་བར་བྱེད། །བྱང་ཆུབ་ཡན་ལག་མེ་ཏོག་སྤོས། །དགའ་བའི་དབང་ཕྱུག་
ཅེས་པའི་མཚན། །དེ་བཞིན་གཤེགས་པའི་ཡོན་ཏན་མཚོ། །བདེ་གཤེགས་གཙུག་ཕུད་འོད་ཟེར་རོ། །ལམ་གྱི་ཡན་ལག་བརྒྱད་ཚུལ་རིག །འཇིགས་བྲལ་ཞེས་བྱ་བ་ཡི་མཚན། །རྫོགས་པའི་སངས་རྒྱས་ལམ་རིག་ནི། །བདེ་གཤེགས་ཡོན་ཏན་སྙིང་པོའོ། །སེམས་ཅན་
ཀུན་ལ་ཤས་ཆར་ཆགས། །དྲི་མེད་གྲགས་ཞེས་བྱ་བའི་མཚན། །ནམ་མཁའ་ལྟ་བུར་ཆགས་མེད་ནི། །དེ་བཞིན་གཤེགས་པ་གཟི་བརྗིད་ཞི། །སེམས་ཅན་ཀུན་གྱི་ཡིད་འཇུག་ནི། །གདུང་བ་གྲགས་ཞེས་བྱ་བའི་མཚན། །སེམས་ཅན་ཀུན་གྱི་ཡིད་མགྱོགས་ནི། །དེ་བཞིན་

49-1-79a

གཤེགས་པ་ལྷ་མང་པོ། །སེམས་ཅན་ཀུན་གྱི་དབང་དོན་ཤེས། །ལེགས་པར་མཉམ་ཞེས་པ་ཡི་མཚན། །སེམས་ཅན་ཀུན་གྱི་ཡིད་འཕྲོག་ནི། །སངས་རྒྱས་ལྔ་ཡི་འདོད་པའོ། །ཕུང་པོ་ལྔ་དོན་དེ་ཉིད་ཤེས། །དེ་བཞིན་གཤེགས་པ་རིན་ཆེན་གཟུགས། །རྣམ་
དག་བུང་པོ་ལྔ་འཆང་ནི། །རྒྱལ་བའི་སྟོབས་ཞེས་བྱ་བར་འདོད། །ངེས་འབྱུང་ཀུན་གྱི་མཐའ་ལ་གནས། །བདེ་གཤེགས་སེང་གེ་གཤོག་པའོ། །ངེས་པར་འབྱུང་བ་ཀུན་ལ་མཁས། །གྲོང་ཁྱེར་ཆེར་མཐོང་ཞེས་པའི་མཚན། །ངེས་འབྱུང་ཀུན་གྱི་ལམ་གནས་ནི། །དེ་བཞིན་
གཤེགས་པ་བློ་གྲོས་ལེགས། །ངེས་པར་འབྱུང་བ་ཀུན་སྟོན་པ། །འཇིག་རྟེན་འོད་ཅེས་བྱ་བའི་མཚན། །ཡན་ལག་བཅུ་གཉིས་སྲིད་རྩ་འབྱིན། །དེ་བཞིན་གཤེགས་པ་རིན་ཆེན་ལྷ། །དག་པ་རྣམ་པ་བཅུ་གཉིས་འཆང་། །སྐལ་ལྡན་ཤིང་རྟ་ཞེས་པའི་མཚན། །བདེན་བཞིའི་ཚུལ་གྱི་
རྣམ་པ་ནི། །ཡང་དག་རྒྱལ་བ་ཞེས་པའི་མཚན། །ཤེས་པ་བརྒྱད་པོ་རྟོགས་པ་འཆང་། །དེ་བཞིན་གཤེགས་པ་དགའ་བའི་བཀོད། །བདེན་པ་རྣམ་པ་བཅུ་གཉིས་སོ། །འོད་ཀྱི་མུ་ཞེས་བྱ་བའི་མཚན། །དེ་ཉིད་རྣམ་པ་བཅུ་དྲུག་རིག །དེ་བཞིན་གཤེགས་པ་དཀའ་ཐུབ་ཆེ། །རྣམ་
པ་ཉི་ཤུ་མངོན་བྱང་ཆུབ། །བདེ་གཤེགས་ཟླ་བའི་མཚན་ཞེས་པའོ། །རྣམ་པར་སངས་རྒྱས་ཀུན་རིག་མཆོག །དེ་བཞིན་གཤེགས་པ་ཆོས་བརྟན་པ། །སངས་རྒྱས་གྲངས་མེད་སྤྲུལ་པ་ནི། །མི་ཐུབ་ཟླ་བ་ཞེས་པའི་མཚན། །སྐུ་ནི་བྱེ་བ་རྣམ་གྲུབ་པ། །དེ་བཞིན་གཤེགས་པ་རི་བོ་
འོད། །སྐད་ཅིག་ཐམས་ཅད་མངོན་རྟོགས་ནི། །ཚངས་པའི་དབྱངས་ཞེས་བྱ་བའི་མཚན། །སེམས་ཀྱི་སྐད་ཅིག་དོན་ཀུན་རིག །དེ་བཞིན་གཤེགས་པ་བདེན་པའི་ལྷ། །སྣ་ཚོགས་ཐེག་སོགས་ཚིགས་བཅད་གཉིས། །ཡོན་ཏན་བརྩེགས་ཞེས་བྱ་བའི་མཚན། །ཐེག་པ་གསུམ་གྱི་
ངེས་འབྱུང་ནི། །བདེ་གཤེགས་སེང་གེ་ཟླ་བའོ། །ཐེག་པ་གཅིག་གི་འབྲས་བུར་གནས། །ནོར་བུ་གོ་ཆ་ཞེས་པའི་མཚན། །ཉོན་མོངས་ཁམས་རྣམས་དག་པའི་བདག །དེ་བཞིན་གཤེགས་པ་ཟླ་བའི་མཚན། །ལས་ཀྱི་ཁམས་རྣམས་ཟད་བྱེད་ནི། །སྒྲ་དང་མཚུངས་

49-1-79b

པར་བྱ་བའི་མཚན། །ཆུ་བོ་རྒྱ་མཚོ་ཀུན་ལས་རྒལ། །དེ་བཞིན་གཤེགས་པ་གྲགས་ཆེན་ནོ། །སྦྱོར་བའི་དགོན་པ་ལས་རྒལ་བ། །གཟི་བརྗིད་ཤུགས་ཞེས་བྱ་བའི་མཚན། །ཉོན་མོངས་ཞེས་སོགས་ཚིག་གཉིས་ནི། །དེ་བཞིན་གཤེགས་པ་ཆོས་ཀྱི་གྲགས། །སྙིང་རྗེ་ཆེན་པོ་ཤེས་
རབ་ཐབས། །དགའ་བར་ལྡན་ཞེས་བྱ་བའི་མཚན། །དོན་ཡོད་འགྲོ་བའི་དོན་བྱེད་ནི། །དེ་བཞིན་གཤེགས་པ་དྲི་བཟང་པོ། །འདུ་ཤེས་ཀུན་གྱི་དོན་སྤངས་ཤིང་། །རི་བོའི་རྒྱལ་མཚན་ཞེས་པའི་མཚན། །རྣམ་ཤེས་དོན་ནི་དགའ་བའི་འོད། །འགོག་འཆང་ཞེས་བྱ་བ་ཡི་སྒྲ། །དེ་
བཞིན་མཆོད་ཡོན་ཅན་ཞེས་བརྗོད། །སེམས་ཅན་ཀུན་ཡིད་ཡིད་ལྡན་ནི། །སྲིད་མཐའི་ནོར་བུ་ཞེས་པའི་མཚན། །སངས་རྒྱས་ཀུན་གྱི་ཐུགས་རིག་པ། །དེ་བཞིན་གཤེགས་པ་བདེན་པར་གསུངས། །སེམས་ཅན་ཀུན་གྱི་ཡིད་ལ་གནས། །རྣམ་སྣང་མཛད་ཅེས་བྱ་བའི་མཚན། །
དེ་དག་སེམས་དང་མཐུན་པར་འཇུག །རྣམ་པར་ངེས་པ་ཞེས་པའི་མཚན། །སེམས་ཅན་ཀུན་ཡིད་ཚིམ་པ་ནི། །གྲགས་པའི་མཐའ་ཞེས་བྱ་བར་བརྗོད། །སེམས་ཅན་ཀུན་གྱི་ཡིད་དགའ་བ། །དེ་བཞིན་གཤེགས་པ་ཡིད་འཆང་བ། །གྲུབ་པ་མཐར་ཕྱིན་འཁྲུལ་མེད་ནི། །སངས་
རྒྱས་སེང་གེའི་འོད་ཟེར་རོ། །ནོར་བ་ཐམས་ཅད་རྣམ་པར་སྤངས། །སྲོག་དང་ལྡན་ཞེས་བྱ་བའི་མཚན། །དོན་གསུམ་ཐེ་ཚོམ་མེད་བློ་ནི། །དེ་བཞིན་གཤེགས་པ་འགྲོ་བའི་ཐེག །ཀུན་དོན་ཞེས་ནི་བྱ་བའི་མཚན། །དེ་བཞིན་གཤེགས་པ་ཐུན་ཚོད་དོ། །ཡོན་ཏན་ཀུན་གྱི་བདག་
ཅེས་པ། །དེ་བཞིན་གཤེགས་པ་གྲགས་པའི་མཆོག །ཕུང་པོ་ལྔ་དོན་དུས་གསུམ་ནི། །བློ་བཟངས་བྱང་ཆུབ་སེམས་དཔའོ། །སྐད་ཅིག་ཐམས་ཅད་བྱེ་བྲག་ཕྱེད། །ནོར་བུ་ཟླ་བ་ཞེས་པའི་མཚན། །སྐད་ཅིག་གིས་ནི་རྫོགས་སངས་རྒྱས། །དཀའ་ཐུབ་མི་བཟད་ཅེས་པའི་མཚན། །
སངས་རྒྱས་ཀུན་གྱི་རང་བཞིན་འཆང་། །གསལ་ལྡན་སེམས་ཅན་དོན་བྱེད་པའོ། །ལུས་མེད་ལུས་ནི་ནོར་བུས་འཁོར། །ལུས་ཀྱི་མཆོག་ནི་འཇིག་རྟེན་འདས། །ལུས་ཀྱི་མཐའ་ནི་རྟོགས་པ་པོ། །སེང་གེ་གླང་པོ་ཞེས་པའི་མཚན། །གཟུགས་རྣམས་མ་ལུས་ཀུན་སྟོན་ནོ། །

49-1-80a

སངས་རྒྱས་ཡོན་ཏན་རྒྱན་ཞེས་བྱ། །ནོར་བུ་ཆེན་པོ་རིན་ཆེན་ཏོག །དེ་བཞིན་གཤེགས་པ་རིན་ཆེན་འོད། །དེ་ལྟར་དེ་དག་གསུངས་པ་ནི། །མཚན་ནི་སྔགས་ཀྱི་ངོ་བོ་སྟེ། །དཀྱིལ་འཁོར་གཅིག་གི་སྦྱོར་བ་ལས། །སྔར་ལ་ལྟོས་པར་གསུངས་པ་ཡིན། །རྟོགས་
བཅས་ཤེས་པ་མ་ལུས་པ། །རྟོག་བྲལ་བདག་ཉིད་དངོས་པོའོ། །དངོས་པོ་དངོས་པོར་མཉམ་གཞག་པས། །ཆོས་དབྱིངས་ནང་གི་སྤྱོད་ཡུལ་ལོ། །སངས་རྒྱས་བྱང་ཆུབ་སེམས་དཔའ་རྣམས། །དེ་ཉིད་དམིགས་པ་ཐིམ་པ་ནི། །ཀུན་རྫོབ་ཚུལ་ནི་རྣམ་པ་སྟེ། །དོན་དམ་གྱི་ནི་མཐའ་རུ་
ཐིམ། །རང་རིག་པས་ནི་མཆོག་ཡིན་ལ། །གསང་གནས་སྤྱི་བོའི་མཐར་ལམ་སྐྱེ། །གང་ཕྱིར་འདིར་ནི་གལ་ཏེ་ནང་། །དེ་དག་མཚན་ནི་བརྗོད་པ་ནི། །རྣལ་འབྱོར་རྒྱུད་ཀྱི་གཙོ་བོ་སྟེ། །སྒྱུ་འཕྲུལ་དྲ་སོགས་གསུང་ཕྱིར་རོ། །ཇི་ལྟར་ནང་གི་བདག་ཉིད་དེ། །རྣལ་འབྱོར་རྟག་ཏུ་བཤད་དམ་ཅི། །
འདུས་པ་ལ་སོགས་མ་གསུངས་ཕྱིར། །བཅོམ་ལྡན་འདས་ནི་བདེན་པ་མིན། །བྱ་དང་བྱེད་པ་མ་གྲུབ་པས། །རྣམ་པར་འཁྲུལ་པའི་རྣལ་འབྱོར་བསྒོམ། །དེས་ན་འདི་དག་བརྫུན་མིན་ནམ། །ཡིན་ན་དམྱལ་བར་ཡང་ནི་འགྲོ། །ཕྱིན་ཅི་ལོག་ཏུ་བསྟན་པས་ན། །བདག་དང་གཞན་དག་བརླག་
པར་བྱེད། །འདི་ལྟ་བུ་ཡི་དགོངས་པར་ནི། །གྱུར་པ་དེ་ལ་བརྗོད་པར་བྱ། །གང་ཕྱིར་འདི་ནི་བསྟན་པ་སྟེ། །འཇིག་རྟེན་བྱིས་པའི་མ་ཡིན་ཏེ། །གང་ཕྱིར་སྒྱུ་འཕྲུལ་དྲ་བ་ལས། །རྒྱུད་ཀུན་གྱི་ནི་གཙོ་བོར་གསུངས། །གང་དེ་ཇི་ལྟར་སྔོན་དུ་ནི། །བཅོམ་ལྡན་ཤཱཀྱ་ཐུབ་པ་ཡིས། །ཕྱག་ན་རྡོ་རྗེ་
དབང་བསྐུར་ཕྱིར། །ཆོས་དབྱིངས་ངག་གི་དབང་ཕྱུག་གི། །དཀྱིལ་འཁོར་ཆེན་པོར་རབ་ཏུ་བསྐོར། །ཁམས་གསུམ་དག་ཏུ་ལུང་བསྟན་པ། །དེ་ཡང་སྒྱུ་འཕྲུལ་དྲ་བའི་ཚུལ། །གསང་འདུས་ལ་སོགས་དགོངས་པས་མིན། །གལ་ཏེ་འདུ་སོགས་མ་ཡིན་ན། །འོ་ན་བཅོམ་ལྡན་
བརྫུན་སྨྲ་མཛད། །བཅོམ་ལྡན་འདས་ཀྱིས་གསུངས་པ་ཡང་། །རེས་འགའ་དག་ཏུ་པུ་སྟིར་གསུང་། །ཇི་སྲིད་གསུང་འདུས་ལ་སོགས་ནས། །གང་ཕྱིར་ནམ་མཁའ་མཉམ་ལ་སོགས། །གཤིན་རྗེ་གཤེད་མཐར་སྔགས་དང་ནི། །འཁྲུལ་འཁོར་དག་སྟེ་གཉིས་ཀྱི་ཚིག །མ་ཡིན་

49-1-80b

པ་དང་མ་གྲུབ་པར། །བཅོམ་ལྡན་འདས་ཀྱིས་དེ་སྐད་གསུངས། །དེ་ཡང་ལུང་དང་རིགས་པ་མིན། །སྒྱུ་འཕྲུལ་དྲ་བའི་སྦྱོར་བ་ནི། །གང་ཕྱིར་མཚན་ནི་བརྗོད་པ་ཡིན། །རྒྱུད་ཀུན་རྡོ་རྗེའི་ཚིག་རྣམས་ལ། །དེ་བཞིན་གཤེགས་པས་དང་པོར་གསུངས། །ཐོག་མ་མེད་ནས་མི་གནས་མིན། །
འཇིག་རྟེན་པ་ལས་གྲུབ་པའི་གཏམ། །སྦྱིན་བདག་ལེན་པ་པོ་ཡི་དུས། །དབང་པོ་དང་ནི་ལྡན་པར་རོ། །ཕྱི་མའི་དུས་སུ་དག་པར་འགྱུར། །དེ་ལྟར་དེ་དག་ཚིག་མཐུན་པར། །རྡོ་རྗེ་ཅན་ཞེས་བསྟན་པ་དག །གསང་འདུས་ལ་སོགས་ནང་ནས་ནི། །གཙོ་བོར་སྒྱུ་འཕྲུལ་དྲ་བ་སྟེ། །
དབང་བསྐུར་བ་ཡི་ཁྱད་པར་ཡང་། །སྐལ་པར་ལྡན་ཡང་སྐལ་མེད་གྱུར། །གྲུབ་པས་ནང་གི་བདག་ཉིད་སྦྱོར། །མཚན་བརྗོད་པ་ལ་སོགས་པས་གསུངས། །རྣལ་འབྱོར་སྤྱོད་པ་བྱ་བ་སོགས། །དེ་བཞིན་གཞན་ཡང་རྒྱུད་ཀུན་ལས། །མཚན་བརྗོད་པ་ནི་ཐམས་ཅད་ཀྱིས། །བསྟོད་
པ་ཞིབ་མོའི་རྒྱལ་པོ་སྟེ། །གང་དེ་རྨོངས་པའི་བདག་ཉིད་དང་། །སྙིགས་མ་ལྔ་ཡི་དུས་ཡིན་པས། །དཀའ་བའི་སེམས་ནི་འབའ་ཞིག་དག །རྟོག་གེ་སྐམ་པོའི་བདག་ཉིད་དོ། །གཞན་ཡང་རྟོག་གེ་སྐམ་པོ་ཡིས། །གལ་ཏེ་སེམས་ནི་ཞི་གྱུར་ན། །དེས་ན་ཐམས་ཅད་སངས་རྒྱས་སུ། །མངོན་སུམ་ཉིད་དུ་
གདོན་མི་ཟ། །ཉེ་བར་བསྡུས་པ་ལས་མཉམ་པ་ཉིད་ཀྱི་ཡེ་ཤེས་ཀྱི་མིང་བསྟན་པའི་རྣམ་པར་རྟོག་གེ་ཞེས་བྱ་བ་སྟེ་བདུན་པའོ།།      །།འདིར་ནི་གཞན་ཡང་བརྗོད་བྱ་བ། །བྱ་བ་གྲུབ་པའི་ཡེ་ཤེས་ཏེ། །གང་ཕྱིར་ཚིགས་བཅད་བཅོ་ལྔས་འདིར། །དགུ་བཅུ་རྩ་ལྔའི་མིང་ཅན་ཏེ། །འོད་གསལ་
ལས་ནི་ཡང་དག་བྱུང་། །བྱང་ཆུབ་སེམས་དཔའི་ཚོགས་རྣམས་སོ། །དེ་དག་མཚན་ནི་བསྟན་པ་ཡང་། །སེམས་ཉིད་སྒོམ་པར་འགྱུར་ཕྱིར་རོ། །སངས་རྒྱས་ཀུན་ཞེས་རྫོགས་པ་ནས། །དཔལ་དང་ལྡན་པ་མཆོག་མཐར་རོ། །དེ་ལ་མཚན་ནི་འདི་དག་ཀུན། །རྣལ་འབྱོར་སྒོམ་པ་པོ་
ཡི་རྟགས། །སངས་རྒྱས་ཀུན་གྱིས་རྟོགས་བྱ་ནི། །དབང་དུ་བྱེད་པའི་རྒྱལ་པོར་གསུངས། །སངས་རྒྱས་བྱང་ཆུབ་ཅེས་པའི་སྒྲ། །བདུད་རྩི་རབ་ཏུ་ཞི་བའི་མཚན། །བླ་མེད་དེ་བཞིན་གཤེགས་བྱ་བ། །སངས་རྒྱས་མཉམ་པའི་བསམ་གཏན་ཅན། །ཡི་གེ་མེད་ཅིང་རྟོག་བྲལ་བའོ། །

49-1-81a

གསང་སྔགས་ལས་བྱུང་ཞེས་པ་ནི། །དྲི་མ་རབ་ཏུ་ཞི་བའི་མཚན། །གསང་སྔགས་ཞེས་པ་རིགས་གསུམ་པ། །རྨོངས་པ་སྟོན་པའི་སངས་རྒྱས་སོ། །གསང་སྔགས་དོན་ཀུན་སྐྱེད་པ་ནི། །དེ་བཞིན་གཤེགས་པ་རོལ་པའོ། །ཐིག་ལེ་ཆེན་པོ་ཞེས་བཤད་པ། །དགེ་བཟང་པོ་ཡི་
མཚན་ཞེས་བྱ། །གང་ཕྱིར་ཡི་གེ་མེད་པའི་ཚིག །གཞན་ཡང་རྣམ་པའི་ཡེ་ཤེས་ཤུགས། །ཡི་གེ་ལྔ་ནི་སྨྲ་བའི་དབང་། །སྟོང་པ་ཆེ་ནི་ལྷ་ཆེན་པོ། །ཐིག་ལེ་སྟོང་ནི་བློ་གྲོས་ཟབ། །ཡི་གེ་དྲུག་ཅེས་བྱ་བ་ནི། །དེ་བཞིན་གཤེགས་པ་ཚེ་དཔག་མེད། །རྣམ་པ་ཀུན་ལྡན་རྣམ་མེད་ནི། །ཆོས་ཀྱི་སྟོབས་
ཞེས་བྱ་བའི་མཚན། །བཅུ་དྲུག་ཕྱེད་ཕྱེད་ཐིག་ལེ་འཆང་། །འཇིག་རྟེན་གསུམ་མཆོད་སངས་རྒྱས་སོ། །དུས་དང་དུས་མིན་ཞེས་པ་ནི། །དེ་བཞིན་སྒྲ་གཅན་ཉི་མའི་སྙིང་། །བསམ་གཏན་བཞི་ཡི་རྩེ་མོ་ཅན། །དེ་བཞིན་གཤེགས་པ་རྒྱལ་མཚན་གྲོལ། །བསམ་གཏན་དུས་ཀུན་ཤེས་ཞེས་པ། །
སྨན་པ་མཆོད་པའི་མཚན་ཞེས་པ། །ཏིང་འཛིན་རིགས་དང་རྒྱུད་འཛིན་པ། །དེ་བཞིན་གཤེགས་པ་མེ་ཏོག་འོད། །ཏིང་འཛིན་ལུས་ཏེ་ལུས་མཆོག་ནི། །དགེ་བའི་གཙུག་ཕུད་ཅེས་པའི་མཚན། །ལོངས་སྤྱོད་རྫོགས་སྐུ་ཀུན་གྱི་རྒྱལ། །དེ་བཞིན་གཤེགས་པ་བདུད་རྩི་འོད། །སྤྲུལ་པའི་སྐུ་སྟེ་
སྐུ་མཆོག་ནི། །བྱང་ཆུབ་སེམས་དཔའ་རྡོ་རྗེ་འོད། །སངས་རྒྱས་སྤྲུལ་པའི་རྒྱུད་འཆང་བ། །རྒྱ་མཚོ་བརྟན་ཞེས་བྱ་བའི་མཚན། །ཕྱོགས་བཅུར་སྤྲུལ་པ་སྣ་ཚོགས་ནི། །བདེ་གཤེགས་རིན་ཆེན་ཕུང་པོའོ། །ཇི་བཞིན་འགྲོ་བའི་དོན་བྱེད་པ། །རོལ་པའི་སྟོབས་ཞེས་བྱ་བའི་མཚན། །
ལྷ་ཡི་ལྷ་ནི་ཉི་མའི་མཚན། །ལྷ་ཡི་དབང་པོ་དག་པའི་འོད། །ལྷ་མིན་དབང་ནི་རིན་ཆེན་གཙུག །སྲིད་པའི་བདག་པོ་ཞེས་པ་ནི། །དཔལ་ནི་རྗེས་སུ་མཐུན་པའི་མཚན། །འཆི་མེད་དབང་པོ་སེང་གེའི་འགྲོས། །ལྷ་ཡི་བླ་མ་ཞེས་པ་ནི། །དེ་བཞིན་གཤེགས་པས་གསུངས་པའོ། །འཇོམས་
བྱེད་ཅེས་པ་མེ་ཏོག་སྦྱིན། །འཇོམས་བྱེད་དབང་ཕྱུག་གྲོལ་བའི་འོད། །སྲིད་པའི་དགོན་པ་ལས་རྒལ་ནི། །དེ་བཞིན་གཤེགས་པ་པདྨོའི་མཚན། །གཅིག་ཅེས་པ་ནི་ཡེ་ཤེས་འདོར། །སྟོན་པ་རོལ་པ་བཀོད་པའོ། །འགྲོ་བའི་བླ་མ་ཞེས་པའི་ཚིག །དོན་ཡོད་གནས་པ་ཞེས་པའི་མཚན། །

49-1-81b

རབ་གྲགས་ལ་སོགས་བརྟན་པའི་འོད། །ཆེ་བ་པོ་ནི་རྒྱལ་མཚན་ཏོག །བྱམས་པའི་གོ་ཆ་བགོས་པའོ། །དེ་བཞིན་གཤེགས་པ་བདེ་བའི་བསམ། །སྙིང་རྗེའི་ཡ་ལད་གྱོན་པ་ནི། །རྣམ་གྲོལ་རྒྱལ་པོ་ཞེས་པའི་མཚན། །ཤེས་རབ་རལ་གྲི་མདའ་གཞུ་ནི། །བྱང་ཆུབ་སེམས་དཔའི་ཚུལ་ཤེས་
པ། །ཉོན་མོངས་མི་ཤེས་གཡུལ་ངོ་སེལ། །རྒྱ་མཚོ་ཞེས་པའི་སངས་རྒྱས་སོ། །བདུད་དགྲ་ཞེས་པ་རིན་ཆེན་འཛིན། །བདུད་འདུལ་ཞེས་པ་མི་ཐུབ་པའོ། །དཔའ་བོ་འགྲོ་བ་མཉེས་པའོ། །བདུད་བཞིའི་འཇིགས་པ་སེལ་བྱེད་པ། །དེ་བཞིན་གཤེགས་པ་སྒྲ་ཆེན་པོ། །བདུད་ཀྱི་དཔུང་
ལས་རྒྱལ་བྱེད་པ། །དེ་བཞིན་གཤེགས་པ་དུལ་བའི་མཚན། །རྫོགས་སངས་རྒྱས་ཞེས་མངོན་གསུངས་པ། །དཀྱིལ་འཁོར་དྲུག་པོ་དག་གི་ལྷ། །སངས་རྒྱས་བྱང་ཆུབ་སེམས་དཔའ་རྣམས། །དེ་དག་ཀུན་གྱི་རྫོགས་སངས་རྒྱས། །དེ་བཞིན་གཞན་ཡང་ནང་དུ་གནས། །འཇིག་རྟེན་འདྲེན་
པ་ཞེས་པའི་མཚན། །དངོས་པོ་སྲིད་པའི་དྲི་མ་སྤོང་། །ཕྱག་ཅེས་པ་ནི་མཆོག་གི་མུ། །མཆོད་པ་ཞེས་པ་ལྷ་མང་སྒྲ། །བསྟོད་པའི་གནས་ནི་རིན་ཆེན་སྟོབས། །རྟག་ཏུ་རིམ་གྲོ་བྱ་བའི་འོས། །དེ་བཞིན་གཤེགས་པ་པདྨའི་ཕྱག །བཀུར་འོས་མཆོད་ཅེས་བྱ་བ་ནི། །དེ་བཞིན་གཤེགས་པ་
དགྲ་ལས་རྒྱལ། །ཕྱག་ཅེས་པ་ནི་རྟོག་པ་གྲུབ། །བླ་མའི་རབ་ནི་ཡུལ་བཟང་པོ། །འཇིག་རྟེན་གསུམ་པོ་གོམ་གཅིག་བགྲོད། །མི་རྟོག་འོད་ཅེས་བྱ་བའི་མཚན། །མཁའ་ལྟར་མཐའ་མེད་རྣམ་མེད་དེ། །དེ་བཞིན་གཤེགས་པ་སེང་གེའི་སྒྲ། །གསུམ་རིག་པ་ནི་ཟླ་བ་སྨྲ། །ཐོས་
པ་པོ་ནི་རྡུལ་བཀྲུས་པའོ། །གཙང་མ་ཞེས་པ་མི་གཡོའི་མཚན། །མངོན་ཤེས་དྲུག་ནི་བློ་གྲོས་མཚན། །རྗེས་དྲུག་ལྡན་ཞེས་བྱ་བའི་སྒྲ། །བསོད་རྣམས་མར་མེའི་རྒྱལ་པོའོ། །བྱང་ཆུབ་སེམས་དཔའ་ཞེས་པ་ནི། །རྟོག་པའི་སྒྲ་ཞེས་བྱ་བར་བརྗོད། །སེམས་དཔའ་ཆེ་ནི་གཽ་
ཏ་མ། །འཇིག་རྟེན་ལས་འདས་གཟི་བརྗིད་སྟོབས། །སྒྱུ་འཕྲུལ་ཆེ་ཞེས་བྱ་བའི་ཚིག །བློ་རྣམས་གཟུགས་ཞེས་བྱ་བའི་མིང་། །ཤེས་རབ་ཕ་རོལ་ཕྱིན་མཐའ་ནི། །དེ་བཞིན་གཤེགས་པ་ཟླ་བ་བཟང་། །ཤེས་རབ་དེ་ཉིད་ཅེས་པ་ནི། །བྱང་ཆུབ་ཡན་ལག་མེ་ཏོག་མཚན། །ཐོབ་

49-1-82a

ཅེས་པ་ནི་སྟོན་པའོ། །བདག་རིག་ཅེས་པ་གཟི་བརྗིད་བཟང་། །གཞན་རིག་ཅེས་ནི་བྱ་བའི་ཚིག །ཡེ་ཤེས་གཟི་བརྗིད་སྟོབས་ཞེས་བརྗོད་། །ཐམས་ཅད་ཅེས་པ་དགེ་བའི་འོད། །ཀུན་ལ་ཞེས་པ་བརྟེན་པའི་སྟོབས། །གང་ཕྱིར་གང་ཟག་མཆོག་ཅེས་པ། །ལྷ་ཡི་བུ་ཞེས་
པ་ཡི་མཚན། །དཔེར་བྱ་ཀུན་ལས་འདས་པ་ནི། །དེ་བཞིན་གཤེགས་པ་རབ་ཞི་བའོ། །ཤེས་བྱ་ཞེས་པ་ཉི་མའི་ཞལ། །ཤེས་བྱའི་བདག་པོ་གྲོལ་བའི་འོད། །མཆོག་ནི་ཚུལ་ཁྲིམས་འོད་ཅེས་བརྗོད། །ཆོས་ཀྱི་སྦྱིན་བདག་ཅེས་པ་ནི། །དཀའ་ཐུབ་རྣམ་པ་ཞེས་པའི་མཚན། །གཙོ་བོ་དེ་
བཞིན་རྡུལ་མེད་པའོ། །ཕྱག་རྒྱ་བཞི་ཡི་དོན་སྟོན་པའོ། །དེ་བཞིན་གཤེགས་པ་རྒྱ་མཚོའི་གསུང་། །བསྙེན་བཀུར་གནས་ཀྱི་མཆོག་ཅེས་པ། །མིག་སྨན་ཞེས་པའི་མཚན་དུ་བརྗོད། །འགྲོ་བ་ཞེས་པ་ཀུན་ལས་རྒྱལ། །ངེས་འབྱུང་གསུམ་ནི་སེམས་ཅན་འོད། །བགྲོད་རྣམས་
ཤེས་པ་དྲི་མ་མེད། །དམ་པའི་དོན་ཞེས་བྱ་བ་ནི། །དྲན་པའི་དབང་པོ་ཞེས་སུ་བརྗོད། །རྣམ་དག་དཔལ་ནི་ཞལ་རས་སྡུག །འཇིག་རྟེན་གསུམ་སྐལ་བཟང་ཞེས་པ། །རྒྱལ་མཚན་མཐའ་ཡས་ཞེས་པའི་མཚན། །ཆེན་པོ་ཞེས་པ་བློ་མཆོག་གོ། །འབྱོར་པ་ཀུན་ཞེས་བྱ་བ་ནི། །
དེ་བཞིན་དཔུང་ཞི་རབ་ཞིའི་མཚན། །དཔལ་ལྡན་ཞེས་པ་རིན་ཆེན་འདོད། །འཇམ་དཔལ་ཞེས་པ་ཆོས་དབང་ཕྱུག །དཔལ་དང་ལྡན་པ་མཆོག་གི་མིང་། །དེ་བཞིན་གཤེགས་པ་སྣ་ཚོགས་ལྷ། །ཀུན་གྱི་ཚིག་དོན་བརྗོད་པ་དག །མིང་ཉིད་སྔགས་ཀྱི་མཚན་དག་སྟེ། །དེ་དག་ལྟར་
ན་བུ་གའི་མདའ། །སངས་རྒྱས་མཚན་ནི་སྦྱོར་ལ་སྐྱེ། །དཀྱིལ་འཁོར་གཅིག་གི་དབུས་སུ་ཡང་། །སྔར་བཤད་ལྟོས་པས་བཞི་པའོ། །ཨ་ཝ་དྷཱུ་ལ་བརྟེན་རྣལ་འབྱོར། །ས་ལ་སོགས་པའི་དཀྱིལ་འཁོར་བཞི། །གཡས་པ་དང་ནི་གཡོན་གཉིས་ལ། །ཉི་མ་དང་ནི་ཟླ་བ་འབབ། །
དཀྱིལ་འཁོར་རེ་རེ་དག་ལ་ཡང་། །དཀྱིལ་འཁོར་བཞི་བཞི་དག་ཏུ་བརྟགས། །ཡང་ན་དབུས་ནི་གཅིག་ལ་ཡང་། །ཁྱབ་པར་ཐམས་ཅད་སྐྱེ་བར་འགྱུར། །གོ་རིམས་ཇི་ལྟར་བཞི་འགྱུར་གྱིས། །ཉི་ཁྲི་ཆིག་སྟོང་དྲུག་བརྒྱའོ། །དེ་དག་བགྲངས་པའི་ཡོན་ཏན་འགྱུར། །སྟོང་ཕྲག་

49-1-82b

བརྒྱད་ཅུ་རྩ་བཞིའོ། །ལྷག་མ་བརྒྱ་ཕྲག་དྲུག་པོ་ནི། །དྲུག་དང་བརྒྱད་ཀྱི་གྲངས་འགྱུར་ལས། །སྟོང་ཕྲག་བརྒྱ་དང་དྲུག་བརྒྱའོ། །རེ་རེ་ལ་ཡང་གོ་རིམས་བཞིན། །བརྒྱ་ཕྲག་དྲུག་ཏུ་ཤེས་པར་བྱ། །དྲུག་བརྒྱ་དག་གི་ཡོན་ཏན་ནི། །དེ་ཀུན་སྟོན་པའི་གྲངས་ཤེས་ནི། །ཁྲི་ཕྲག་བཞི་དང་སྟོང་
ཕྲག་གསུམ། །དེ་ནི་བརྒྱ་ཕྲག་གཅིག་གི་འགྱུར། །གཉིས་ཀ་བསྡོམ་པའི་གྲངས་ཉིད་ཀྱང་། །འབུམ་ཕྲག་བཞི་བཅུ་རྩ་གསུམ་མོ། །བྱ་དང་བྱེད་པར་གསུངས་པ་སྟེ། །དེ་ལྟར་འཁོར་ལོ་དྲུག་པོ་ལ། །དབུགས་རྒྱུ་བ་ནི་ལྷ་རྣམས་སོ། །འཁོར་ལོ་གཉིས་སུ་བཤད་པར་བྱ། །
གཅིག་ནི་ནང་དུ་བསྒོམ་བྱ་སྟེ། །སྤྱི་གཙུག་སོགས་ནས་གསང་བའི་མཐར། །རྒྱུད་དང་རྒྱུད་ཀྱི་ནང་དུ་གསུངས། །གཉིས་པ་རྡོ་རྗེ་དབྱིངས་ལ་སོགས། །བྱ་བ་གྲུབ་པའི་ཡེ་ཤེས་མཐར། །དེ་དག་ཇི་བཞིན་རིམ་པ་བཞིན། །མགྲིན་པ་སྤྱི་གཙུག་སྙིང་ག་དཔྲལ། །དེ་བཞིན་གསང་བ་ལྟེ་བ་
རུ། །ཡང་ན་མིང་གི་རྣམ་གྲངས་ནི། །ངག་གི་དབང་ཕྱུག་ཆོས་དབྱིངས་ཀྱི། །མིང་ཅན་སྤྱི་གཙུག་འཁོར་ལོའོ། །ཆོས་དབྱིངས་རྣམ་པར་དག་པ་ཡི། །མིང་ནི་མགྲིན་པར་གསུངས་པའོ། །མེ་ལོང་ཡེ་ཤེས་སྐུ་ཡི་ནི། །ཆོས་ཀྱི་དཀྱིལ་འཁོར་འདོད་པའོ། །སོ་སོར་རྟོག་པའི་ཡེ་
ཤེས་ནི། །ལྟེ་བའི་འཁོར་ལོའི་མིང་ཅན་ནོ། །དཔྲལ་བའི་འཁོར་ལོར་གསུངས་པ་ནི། །དེ་བཞིན་མཉམ་ཉིད་ཡེ་ཤེས་ཀྱི། བྱ་བ་གྲུབ་པའི་ཡེ་ཤེས་ནི། །གསང་བའི་འཁོར་ལོའི་བདག་ཉིད་དོ། །དེ་ལྟར་རྣལ་འབྱོར་རྒྱུད་ཀུན་ལ། །སྟོན་པའི་རྒྱལ་པོ་ཆེན་པོས་ཁྱབ། །སྣ་ཚོགས་ཡེ་ཤེས་ལྔ་
བདག་ཉིད། །སངས་རྒྱས་ལྔ་ཡི་བདག་ཉིད་དངོས། །སངས་རྒྱས་བྱང་ཆུབ་སེམས་དཔའ་རྣམས། །གོང་ནས་གོང་དུ་བརྒྱུད་པའོ། །གཞན་དག་ལྷག་མ་གཞན་ཀུན་ནི། །སློབ་དཔོན་ལ་སོགས་བདག་ཆེན་རྣམས། །ཀུན་གྱིས་བསྒོམ་པར་བྱ་བ་དང་། །བཀླགས་པ་ཙམ་གྱིས་གྲོལ་
བར་འགྱུར། །ཉེ་བར་བསྡུས་པ་ལས་བྱ་བ་གྲུབ་པའི་ཡེ་ཤེས་ཀྱི་འཁོར་ལོའི་རྣམ་པར་རྟོག་གེ་ཞེས་བྱ་བ་སྟེ་བརྒྱད་པའོ།།      །།ད་ནི་རྣལ་འབྱོར་དེ་དག་གི། །ཡེ་ཤེས་ལྔ་པོ་བརྗོད་པར་བྱ། །ཕྱག་འཚལ་འདུད་ལ་སོགས་པ་ནས། །ཡེ་ཤེས་སྐུ་ཉིད་ཚིག་གི་མཐར། །གང་ཕྱིར་ཚིགས་

49-1-83a

སུ་བཅད་པའི་ཚིག །ཉི་ཤུ་བྱ་དང་བྱེད་པ་སྟེ། །བདག་ཉིད་ཆེན་པོའི་ཚིགས་བཅད་ནི། །དང་པོ་ཉིད་དུ་བྱེད་པའི་རྒྱུད། །ལྷག་མ་བཞི་ནི་གསུངས་པ་ནི། །གང་ཕྱིར་བྱ་བ་ཇི་ལྟར་རིམ། །དེ་དག་ཡེ་ཤེས་ལྔ་ཉིད་དེ། །རྒྱུ་ལ་སོགས་པ་ཇི་ལྟར་རིམ། །རྒྱུ་དང་རྐྱེན་གྱི་ཡེ་ཤེས་དང་། །
གནད་ཀྱི་ཡེ་ཤེས་དེ་བཞིན་གཞན། །སྒོམ་པའི་ཡེ་ཤེས་གསུངས་པ་དང་། །ལྔ་པ་གྲོལ་བ་ཡེ་ཤེས་སོ། །རྒྱུ་ནི་མེ་ལོང་ཡང་དག་བཤད། །རྐྱེན་ནི་ཆོས་ཀྱི་དབྱིངས་ཉིད་དོ། །སོ་སོར་རྟོག་པ་གནད་ཀྱིའོ། །མཉམ་པ་ཉིད་ནི་བསྒོམ་པའི་མཆོག །གྲོལ་བའི་ཡེ་ཤེས་བྱ་གྲུབ་ཀྱིའོ། །དེ་ལྟར་རིམ་བཞིན་
ཤེས་པར་བྱ། །རྒྱུ་ཡི་ཡེ་ཤེས་རྣམ་པ་བཞི། །ཕྱི་རོལ་དང་ནི་ནང་དུ་འདོད། །ཕྱི་རོལ་དཔེ་ཡི་མཚན་ཉིད་དེ། །ནང་ཉིད་དཔེ་ཡིས་མཚོན་པའོ། །མཆོག་སྦྱིན་རྡོ་རྗེ་འདུད་ཅེས་པ། །དགའ་བ་བཞི་ཡི་རང་བཞིན་ནས། །ཡང་དག་མཐའ་ཡི་བར་དུ་ནི། །བདེ་བའི་ལོངས་སྤྱོད་བཞི་ཡི་མཆོག །གང་ཕྱིར་
སྟོང་པ་ཉིད་ཀྱི་ཚིག །རྟག་ཏུ་གཞི་ལ་དྲན་མེད་ཐོབ། །དེ་བཞིན་སྙིང་པོ་ཞེས་པའི་ཆིག །བདེ་དང་སྟོང་ཉིད་དབྱེར་མེད་པའོ། །སངས་རྒྱས་བྱང་ཆུབ་ཅེས་པ་ཡང་། །རྣལ་འབྱོར་དག་ནི་སྔོན་བྱང་ཆུབ། །དེ་དག་དཔེ་ཙམ་གཞན་ཡོད་མིན། །བདེ་ཡང་གསུངས་ཤིང་བསྟོད་པའི་མཆོག །ཕྱག་
འཚལ་འདུད་པ་རྣམ་བཞི་སྟེ། །མཆོད་དང་མཆོད་བྱའི་རང་བཞིན་ཅན། །རྟག་ཏུ་མཆོད་བྱའི་ལས་བྱ་བའང་། །སྔར་གསུངས་མེ་ལོང་ཡེ་ཤེས་ལའོ། །དེ་བཞིན་དུ་ནི་མཆོད་པའི་མིང་། །བླ་མ་རྡོ་རྗེ་འཛིན་པའི་དངོས། །དེ་ཉིད་འོད་གསལ་བར་ནི་བཤད། །སྟེང་འོག་སྦྱོར་ལ་ཕྱག་འཚལ་ལོ། །དེ་ལྟར་
རྣལ་འབྱོར་རྣམ་གསུངས་པ། །དཔེ་ཡིས་ཉེ་བར་མཚོན་པའི་མཆོག །ཕྱི་རོལ་གཉིས་གཉིས་སྙོམས་འཇུག་པས། །གཞན་ཡང་ཤེས་རབ་ཡེ་ཤེས་སོ། །ཐབས་དང་རྒྱུ་ཡི་སྦྱོར་བས་ནི། །ཕྱི་རོལ་སྟོན་པ་མ་ཡིན་ནོ། །དེས་ན་སངས་རྒྱས་ཆགས་པ་སོགས། །བཅུ་དྲུག་པོ་ཡི་ཚིག་རྣམས་ནི། །
དེ་བཞིན་དགའ་བ་བཅུ་དྲུག་སྟེ། །ཚིག་ནི་རེ་རེའི་མཐའ་ཉིད་དོ། །དེ་ལ་སངས་རྒྱས་ཆགས་པའི་ཆིག །དགའ་བ་བཞི་ཡི་མཚན་ཉིད་དོ། །རྣལ་འབྱོར་དབང་པོ་མཛད་དུས་སུ། །ཐོག་མ་ཐ་མ་དབུས་ཉིད་ཡིན། །དེ་ཡི་ཆགས་ཆེན་ཞེས་པ་ནས། །གང་དེ་བཞི་པ་ཞེས་པའི་མཐར། །གང་

49-1-83b

ཕྱིར་རྟག་ཏུ་ཆོས་དབྱིངས་ནི། །རྡོ་རྗེ་མཆོག་ཅེས་བྱ་བར་གསུངས། །སངས་རྒྱས་སྐུ་ཞེས་བྱ་བའི་གཞི། །ཡང་དག་མཐའ་རུ་གསུངས་པའོ། །ཆོས་ཀྱི་སྐུ་ཞེས་གསུངས་པ་ནི། །དགའ་བྲལ་བ་ནི་བཞི་པའོ། །སངས་རྒྱས་དགྱེས་པའི་ཚིག་ཉིད་ནི། །དེ་བཞིན་སྟོང་ཉིད་སྙིང་པོ་ལས། །ལྷན་ཅིག་སྐྱེས་
པའི་དུས་ཉིད་དུ། །གཉིས་སྤངས་པར་ནི་གསུངས་པའོ། །དེ་བཞིན་སངས་རྒྱས་རོལ་པ་ནི། །སངས་རྒྱས་བྱང་ཆུབ་རྐྱེན་ཅན་ནོ། །དགའ་བ་ལ་སོགས་བཞི་པ་ཡི། །ལྷག་མ་ལྷག་མའི་བར་དུ་སྟེ། །གང་ཕྱིར་སངས་རྒྱས་འཛུམ་པའི་ཚིག །སོ་སོར་རྟོག་པ་གསུང་བའོ། །གནད་ཀྱི་ཡེ་ཤེས་བཤད་པ་
ཡང་། །བཅུ་གཉིས་དང་པོ་གནད་ཀྱི་སྒོ། །སངས་རྒྱས་བཤད་པ་ཞེས་པའི་ཚིག །ལས་ཀྱི་བྱ་བའི་རང་བཞིན་ཅན། །རྣམ་པ་གཉིས་སུ་ཡང་དག་བཤད། །ཕྱི་རོལ་དང་ནི་ནང་དུ་འདོད། །སངས་རྒྱས་ཉིད་ཅེས་བྱ་བའི་མཚན། །ལས་ཀྱི་ཕྱག་རྒྱ་ཉིད་ཀྱི་བརྡས། །དེ་ལ་ཨ་ཝ་དྷཱུ་ཏཱི་གནས། །སྲོག་དང་རླུང་
དུ་རྣམ་པར་གསུངས། །སངས་རྒྱས་འབྱུང་བ་ཞེས་པའི་ཚིག །ལོངས་སྤྱོད་དུ་ཡང་གསུངས་པའོ། །སྤྲུལ་པ་དག་ནི་མ་ལུས་དང་། །ལྷན་ཅིག་སྐྱེས་དང་ཆོས་སྐུ་མཆོག །དེ་དག་གང་ཕྱིར་མེད་ལས་བྱུང་། །མེད་པ་རྟག་ཏུ་སྟོང་པ་སྟེ། །ཡེ་ཤེས་འབྱུང་བ་ཉིད་དུ་བཤད། །སྐུ་བཞི་པོ་དག་གྲངས་
མེད་པའི། །དེ་ལ་གཞན་ཡང་སངས་རྒྱས་འབྱུང་། །རང་བཞིན་ཉིད་ནི་སྐུ་དང་ལྡན། །ནམ་མཁའ་ཞེས་པའི་མཚན་ཉིད་ནི། །བཞི་པ་ལ་ལྟོས་ལྔ་པ་ཡི། །དེ་ཡི་རང་བཞིན་སངས་རྒྱས་ཉིད། །ནམ་མཁའ་ལས་བྱུང་རབ་བརྟགས་པ། །མཁའ་ནི་ལྷན་ཅིག་སྐྱེས་པར་བཤད། །རྣལ་འབྱོར་པ་དང་
རང་ལས་སྐྱེས། །ཡེ་ཤེས་ལས་བྱུང་བ་ཡི་ཚིག །ཇི་ལྟར་སེམས་ནི་བཞི་པའི་མཐའ། །ཡོད་དང་མེད་ལས་རྣམ་པར་འདས། །རང་རིག་པ་ཡི་སངས་རྒྱས་མཆོག །སྒྱུ་འཕྲུལ་ཞེས་པའི་ཚིག་ཉིད་ཀྱང་། །བཤད་པ་ནང་གི་བདག་ཉིད་འདོད། །རྣལ་འབྱོར་མ་རྣམས་སྒྱུ་འཕྲུལ་ཚིག །དྲ་བ་མཆོག་ཏུ་
བདེ་བའོ། །སངས་རྒྱས་རོལ་པ་ཞེས་པའི་ཚུལ། །རྣལ་འབྱོར་རྒྱུད་དང་རྣལ་འབྱོར་མའོ། །ཐམས་ཅད་ལྷན་ཅིག་སྐྱེས་པ་ཙམ། །བསམ་གཏན་བཞི་ཡི་ནང་ལས་སྐྱེ། །ཐམས་ཅད་ཐམས་ཅད་ཅེས་པ་ནི། །བཅུ་དྲུག་ཕྱེད་ཕྱེད་ཐིག་ལེ་ཅན། །ཤེས་དང་ཤེས་བྱ་ཉིད་དུ་གསུངས། །རྡོ་རྗེ་སྙིང་

49-1-84a

པོ་རྩེ་མོ་ཅན། །དགའ་བ་ཞེས་པའི་མིང་ཉིད་ནི། །གསང་བའི་གནས་སུ་སྐྱེ་བ་སྟེ། །བཅུ་དྲུག་ཚིག་ཏུ་ཤེས་པར་བྱ། །དང་པོ་སོགས་ནས་གང་བའི་མཐར། །དང་པོ་རེག་པའི་དགའ་བའོ། །དེ་བཞིན་གཞན་ཡང་ཆགས་པའི་དགའ། །འདོད་པའི་དགའ་བ་གསུམ་པོ་ཡང་། །
རུས་སྦལ་དགའ་བ་མཆོག་ཏུ་འདོད། །ཟླ་བའི་དགའ་བ་དེ་བཞིན་གཤེགས། །ཀེང་རུས་དགའ་བ་དྲུག་པའོ། །བདུན་པ་རུ་ནི་གསུངས་པ་ནི། །སྒྲ་ཡི་དགའ་བ་མ་ལུས་པའོ། །འཇིགས་པའི་དགའ་བ་བརྒྱད་པར་གསུངས། །དེ་བཞིན་གཞན་ཡང་སྣ་ཚོགས་དགའ། །བཅུ་པ་བཅུ་ཡི་དགའ་བའོ། །
གཞན་ཡང་སྙིང་གི་དགའ་བའོ། །བཅུ་གཉིས་པ་ནི་ནམ་མཁའི་དགའ། །དེ་དགའ་བ་དང་མཆོག་ཏུ་དགའ། །བཅོ་ལྔ་པར་ནི་གསུངས་པ་ནི། །ལྷན་ཅིག་སྐྱེས་པའི་དགའ་བར་འདོད། །བཅུ་དྲུག་པ་ཡི་མཚན་ཉིད་ནི། །དགའ་བྲལ་དུ་ནི་བཤད་པ་ཡིན། །དེ་དག་དགའ་ཆེན་བཅུ་དྲུག་ནི། །
ཟླ་བ་ལྟ་བུའི་དབུས་ནའོ། །དཀར་པོའི་ཕྱོགས་ལ་ཡང་དག་བཤད། །གང་བ་གསུམ་གྱི་བྱེ་བྲག་གིས། །གོ་རིམས་ཇི་བཞིན་བཤད་པ་ཡང་། །དགའ་བ་གསུམ་སྟེ་རྩ་གསུམ་པའོ། །ཐམས་ཅད་གཟུང་བར་ལྡན་པ་ནི། །གོ་རིམས་ཇི་བཞིན་འཕོ་བ་སྟེ། །ཤེས་རབ་དེ་ཉིད་ཁྱབ་པར་རོ། །
ཐབས་ནི་བཅུ་དྲུག་གསུངས་པ་ཡང་། །རྟག་ཏུ་སྟོང་པ་ཉིད་ལ་བཤད། །དང་པོ་སོགས་ནས་གནམ་སྟོང་བར། །གང་ཕྱིར་ཕྱག་འཚལ་བ་ཡི་ཚིག །བཅུ་དྲུག་པ་ཡི་མིང་ཅན་ནོ། །གཉིས་མེད་རྣལ་འབྱོར་ཕུན་སུམ་ཚོགས། །དཀར་ནག་ཕྱོགས་ནི་གཉིས་མེད་འདོད། །བདག་ཉིད་ཆེན་པོར་
གང་སྤྱོད་དེ། །སྲིད་པ་ལས་ནི་རྒལ་ནས་འགྲོ། །ལྷན་ཅིག་སྐྱེས་པ་གཙང་བ་ཡིན། །ལྷན་ཅིག་སྐྱེས་པ་རྟོགས་པའང་ཡིན། །ལྷན་ཅིག་སྐྱེས་པ་བླ་མ་ཡིན། །མཆོད་པའི་གནས་ཀྱང་ལྷན་ཅིག་སྐྱེས། །སློབ་མ་ལྟ་བུ་མཁས་པའང་དེ། །མཆོད་པ་པོ་ནི་སྒོམ་པ་དངོས། །གང་ཕྱིར་
ལྷན་སྐྱེས་གཉིས་མེད་ནི། །ལྷན་སྐྱེས་བྱ་བ་དེ་ཡི་མཆོག །ལྷན་སྐྱེས་བྱ་བ་རུ་ཡང་བཤད། །ལྡང་དང་ཉལ་ལ་སོགས་པའང་དེ། །ཇི་སྲིད་ལྷན་སྐྱེས་ཙམ་ཉིད་ལ། །སེམས་ཉིད་ངལ་སོ་སྤྱོད་ཡུལ་ལོ། །དེ་ལ་བྱ་དང་བྱེད་པ་ཡི། །གཉིས་པོ་དག་ལས་གཉིས་མེད་འབྱུང་། །དེ་ནི་རྟོག་མེད་

49-1-84b

མཚན་ཉིད་དེ། །རྣལ་འབྱོར་མ་ཡི་ཁ་ན་ལས། །དེ་དག་དེ་རྣམས་གསུངས་པ་ནི། །བདག་ཉིད་འབའ་ཞིག་དྲན་པའོ། །ཡང་ན་དད་པ་ཅན་དག་གི། །རང་གི་སློབ་མ་བརྒྱུད་པ་ལས། །མངོན་པར་དགའ་དང་ཀླགས་པ་དང་། །མཉན་པ་དང་ནི་སྒོམ་པ་དང་། །གཞན་དག་ལ་ནི་བསྟན་པ་སྟེ། །སྐལ་དང་
སྐལ་མེད་རྣམ་དཔྱད་ནས། །དེ་དག་གསང་བའི་འཁོར་ལོ་ཡི། །ཚིགས་བཅད་དག་ལ་གོ་རིམས་བཞིན། །དགུ་པ་དང་ནི་བཅོ་ལྔ་ལྔ། །དེ་བཞིན་དུ་ནི་སྟེང་འོག་གཉིས། །གཅིག་པ་ཉིད་ནི་སྤྱི་གཙུག་དབུས། །ཀུན་བསྡུས་སུམ་ཅུ་རྩ་གཉིས་མཆོག །ཉེ་བར་བསྡུས་པ་ལས་ཡེ་ཤེས་ལྔའི་བསྟོད་
པ་དོན་བསྡུས་པ་རྣམ་པར་རྟོག་གེ་ཞེས་བྱ་བ་སྟེ་དགུ་པའོ།།      །།དེ་བཞིན་གཞན་ཡང་ཕན་ཡོན་ནི། །ཚིགས་བཅད་ལྔ་ཡི་ནང་དུ་སྟེ། །འདི་དེ་རྡོ་རྗེ་ལ་སོགས་པ། །བསྟོད་པ་ཡི་ནི་ནང་དུ་གསུངས། །གཞན་དག་ཀྱང་ནི་རྙེད་བླ་བ། །ཉེ་བར་བསྡུས་པར་ངས་མ་བཤད། །བླ་མ་རྡོ་རྗེ་འཛིན་
པ་དང་། །སངས་རྒྱས་གཟུགས་ནི་གྲངས་མེད་རྣམས། །བྱང་ཆུབ་སེམས་དཔའི་ཚོགས་མཆོག་ཉིད། །མ་ལུས་བདག་ལ་བཟོད་པར་གསོལ། །སྒྱུ་འཕྲུལ་དྲ་སོགས་མདོར་བསྡུས་ནས། །གླེང་གཞི་མཆོག་ཏུ་གསུངས་པ་སྟེ། །བསོད་རྣམས་དེ་ཡིས་འཇིག་རྟེན་པ། །ཇི་ལྟར་དེ་བཞིན་རོལ་
པར་སྨོན། །གནས་ནི་ཕྲ་བ་པུ་རི་རུ། །གཞན་དག་གིས་ནི་གསོལ་བཏབ་ནས། །མཚོན་མ་མཆོག་དག་མཐོང་གྱུར་པས། །གཉིས་སུ་མེད་པའི་རྡོ་རྗེས་བྱས། །ཉེ་བར་བསྡུས་པ་ལས་ཕན་ཡོན་རྟོགས་པར་སླ་བ་རྣམ་པར་རྟོག་གེ་ཞེས་བྱ་བ་སྟེ་བཅུ་པའོ།།      །།མཚན་ཡང་དག་པར་བརྗོད་
པའི་ཉེ་བར་བསྡུས་པ་རྣམ་པར་རྟོག་གེ་ཞེས་བྱ་བ་མཁས་པ་ཆེན་པོ་ངེས་པར་སྦྱངས་པ་དཔལ་གཉིས་སུ་མེད་པའི་རྡོ་རྗེ་ཞེས་བྱ་བས་མཛད་པ་རྫོགས་སོ།།      །།རྒྱ་གར་གྱི་མཁན་པོ་ཆེན་པོ་ཤྲཱི་བཛྲ་བོ་དྷི་དང་། ཞུ་ཆེན་གྱི་ལོ་ཙཱ་བ་དཔྱལ་སེར་ཙ་བསོད་ནམས་རྒྱལ་མཚན་
གྱིས་བསྒྱུར་ཅིང་གཏན་ལ་ཕབ་པའོ།།      །།བྱང་ཆུབ་སེམས་དཔའི་རྣམ་འཕྲུལ་གྱིས། །གནས་མཆོག་སྨིན་ལུང་གཙུག་ལག་ཁང་། །རྫོགས་པའི་རིམ་པའི་སྐལ་ལྡན་མང་། །དེ་དག་དོན་དུ་ལེགས་པར་བསྒྱུར།།      །།

49-1-85a

འཇམ་དཔལ་གྱི་སྔགས་དོན་རྣམ་གཟིགས་དང་། །ཉེ་བར་བསྟུས་པའི་རྣམ་བར་རྟོག་གི་གཉིས་ཀྱི་དོན་བསྟུས་པ་མཚན་སྒྲིན་མེ་བཞུགས་སོ།།    ༄༅༅། །ཀླུ་རིགས་མཆོག་ཏུ་སངས་རྒྱས་ཀྱང་། །ཀུན་དུ་གཟིགས་པས་གདོད་བྱོན་པ། །སངས་རྒྱས་ཀུན་བསྐྱེད་ཡབ་འགྱུར་ཞེས། །མཚན་གསོལ་འཇམ་དབྱངས་དེར་བཏུད་
ནས། །རྙེད་ལ་གདུ་སོགས་ཕྱིར་མིན་གྱི། །མ་འདྲེས་མཚན་ལ་དད་སེམས་ཀྱིས། །བདག་དྲན་ཕྱིར་བྱས་འགལ་བ་མེད། །གཞན་དུ་གྱུར་ནའང་དེ་མི་འགལ། །སངས་རྒྱས་ཀུན་གྱི་ཡེ་ཤེས་སྐུ། །གཙུག་ཏོར་ཆེན་པོ་ཚིག་བདག་གི། །མཚན་རྣམས་ཡང་དག་བརྗོད་པ་ལ། །སྤྱི་དོན་
བཅུ་བཞི་དེར་བསྡུས་བཞི། །དེ་ལ་སྤྱི་དོན་བཅུ་བཞི་ཡི། །རྣམ་པར་དབྱེ་བར་བྱ་བ་ནི། །ཞུས་ནས་སླར་གསུངས་རིགས་དྲུག་གཟིགས། །རྫུ་འཕྲུལ་མངོན་པར་བྱང་ཆུབ་དང་། །རྡོ་རྗེ་འཆང་ཆེན་དཀྱིལ་འཁོར་དང་། །རྣམ་པར་སྣང་མཛད་མི་བསྐྱོད་དང་། །ཚེ་དཔག་མེད་དང་རིན་ཆེན་འབྱུང་། །དོན་
ཡོད་འཁོར་ལོ་དག་བསྟོད་པ། །ཕན་ཡོན་དང་ནི་སྔགས་རིངས་དང་། །བསྡུས་པའི་ཚིགས་སུ་བཅད་པའོ། །ཞུས་ལ་ཚིགས་བཅད་བཅུ་དྲུག་སྟེ། །དེ་ལ་ནང་གསེས་རྣམ་པ་བདུན། །གང་གིས་ཞུས་ལ་ཚིགས་བཅད་ལྔ། །གང་ལྟར་ཞུས་ལ་ཚིགས་བཅད་གཅིག །གང་ཕྱིར་ཞུས་ལ་གཉིས་སུ་
གནས། །གང་ལ་ཞུས་ལ་གཅིག་ཡིན་ནོ། །གང་ཞུས་པ་ལ་ཚིགས་བཅད་བཞི། །ཇི་སྐད་ཞུས་པའི་དོན་བཞིན་དུ། །སྒྲུབ་པར་ཁས་བླངས་པ་ལ་གཉིས། །དེ་ཕྱིར་གུས་ཉན་ཚིགས་བཅད་གཅིག །སླར་གསུངས་པ་ལ་ཚིགས་བཅད་དྲུག །ནང་གི་དབྱེ་བ་རྣམ་པ་བདུན། །གང་གིས་གསུངས་
ལ་ཚིག་རྐང་གཉིས། །གང་ལྟར་གསུངས་ལཿ ཤློ་ཀ་གཉིས། །གང་ལ་གསུངས་ལཿ ཤློ་ཀ་ཕྱེད། །གང་ཕྱིར་གསུངས་ལ་ཚིག་རྐང་གཉིས། །གང་གསུངས་པ་ལ་རྐང་པ་གསུམ། །རྣ་གཏོད་ཉོན་ཅིག་འདོམས་པ་ལ། །ཚིགས་བཅད་ཕྱེད་དང་གཉིས་སུ་བཞེད། །གནང་ནས་གཏང་རག་
ཕུལ་རྐང་གཅིག །རིས་དྲུག་གཟིགས་ལ་ཚིགས་བཅད་གཉིས། །འདིས་གཟིགས་དང་པོ་ཚིག་རྐང་གཉིས། །དེ་འོག་ཚིག་གཅིག་སྤྱི་ལ་གཟིགས། །ལྷ་དྲུག་དོན་ཡོད་རྣམ་སྣང་མཛད། །མི་བསྐྱོད་མཐའ་ཡས་རིན་ཆེན་འབྱུང་། །རྡོ་རྗེ་སེམས་དང་དྲུག་རིམ་བཞིན། །གཞུང་ལུགས་

49-1-85b

གཞན་ལ་གཞན་དུ་སྣང་། །དེ་ལ་གཟིགས་ནས་འདི་མཚན་བརྗོད། །དཀྱིལ་འཁོར་དྲུག་དང་བསྟོད་པ་དང་། །ཕན་ཡོན་སྔགས་རིགས་བསྡུས་སོགས་ཀྱི། གཞུང་ཚད་མཚན་དོན་གོ་རིམས་བཞིན། །རང་རང་སྐབས་སུ་འོག་ནས་འཆད། །བསྡུས་པའི་དོན་བཞིར་གཞག་པ་ཡིན། །རྣམ་པར་དབྱེ་
བར་བྱ་བ་ནི། །ཞུས་དང་སླར་གསུངས་རིགས་དྲུག་གཟིགས། །དམིགས་པའི་ཡུལ་དུ་གཞག་པར་བྱ། །མངོན་རྟོགས་དཀྱིལ་འཁོར་དྲུག་དང་བསྟོད། །སྔགས་རིངས་དང་དགུས་ཉམས་བླང་ཐབས། །ཕན་ཡོན་གྱིས་ནི་བསྐྱེད་པ་དང་། །ཐོབ་བྱའི་འབྲས་བུ་བསྟན་པ་ཡིན། །བསྡུས་པའི་
ཚིགས་སུ་བཅད་པ་ལྔས། །དམིགས་ཐབས་འབྲས་བུ་གསུམ་བསྡུས་བསྟན། །འདིས་ཞུས་འདིས་གསུངས་འདི་གསུངས་གསུམ། །འཁོར་དང་སྟོན་པ་རྣམ་པ་གསུམ། །མཆོག་གསུམ་རྒྱུ་འབྲས་ཐབས་དང་གསུམ། །ཐོབ་བྱའི་ཡུལ་དུ་གཞག་པ་ཡིན། །གཞན་ཡང་ཞུས་
ལན་གཟིགས་པ་གསུམ། །ཐབས་དང་དེ་བཞིན་ཤེས་རབ་དང་། །གཉིས་སུ་མེད་དང་རྣམ་གསུམ་དུ། །ནང་གི་ཚེ་ན་གཞག་པ་ཡིན། །ཉམས་སུ་བླང་བའི་ཐབས་དག་ནི། །རྣལ་འབྱོར་གཞུང་གི་འཁོར་ལོ་སྟེ། །དེ་ཡང་ཕྱི་ནང་དབྱེ་བ་ཡིས། །རྣམ་པ་གཉིས་སུ་བསྟན་པ་ཡིན། །ཕྱི་རོལ་
ལ་ཡང་རྣམ་གསུམ་སྟེ། །སྙིང་ག་ཤེས་རབ་འཁོར་ལོ་དང་། །ཕོ་བྲང་ལྷ་ཡི་འཁོར་ལོ་དང་། །འཁྲུལ་འཁོར་ལས་ཀྱི་འཁོར་ལོའོ། །ནང་གི་འཁོར་ལོ་གཅིག་ཉིད་དེ། །ལུས་གནས་རྩ་ཡི་འཁོར་ལོའོ། །འཁོར་ལོ་བཞི་པོ་དེ་དག་ལ། །རེ་རེ་ལ་ཡང་བདུན་བདུན་ནོ། །དེ་ལ་ཤེས་རབ་
འཁོར་ལོ་ནི། །ཇི་ལྟར་རྣམ་པར་བསམ་ཞེ་ན། །དང་པོར་རང་རང་འདོད་པའི་ལྷ། །ས་བོན་མདོག་དང་སོ་སོའི་རྒྱ། །དེ་ཐུགས་དང་པོའི་སངས་རྒྱས་ནི། །ཞལ་ལྔ་ཕྱག་བརྒྱད་ཀུན་ཐུན་མོང་། །དེ་ཡི་ཐུགས་ཀར་འཁོར་ལོ་ནི། །རིགས་དྲུག་དབྱེ་བས་རྣམ་པ་དྲུག །བསྡུས་པ་དང་ནི་བདུན་
གྱུར་ཏེ། །ལྟེ་བ་རྩིབས་དང་རྩིབས་རྟེན་ཅན། །ལྟེ་བ་མུ་ཁྱུད་གཉིས་ཀྱིས་བསྐོར། །རྩིབས་རྟེན་མུ་ཁྱུད་གཉིས་ཡོད་པ། །ལྟེ་བའི་མུ་ཁྱུད་ནང་མ་ལ། །སྔགས་རིངས་གཉིས་ཕྱི་རྩ་བ་དགོད། །ཕྱི་ལ་ཨཱ་ལི་རྣམས་དགོད་དེ། །རྩིབས་རྟེན་མུ་ཁྱུད་ནང་མ་ལ། །སྔགས་རིངས་གཉིས་

49-1-86a

ཕྱེ་ཕྲེང་སྔགས་དགོད། །ཕྱི་ལ་ཀཱ་ལི་ལེགས་པར་དགོད། །མུ་ཁྱུད་སྔགས་དང་མདོག་དཀར་མཚུངས། །རྩིབས་གྲངས་སོ་སོའི་དང་པོ་ལ། །དྲུག་སྟེ་སྔགས་དྲུག་མཚན་རེ་དགོད། །མདོག་དྲུག་ལྡན་པར་དགོད་པར་བྱ། །དབུས་སུ་ཨ་ནི་དཀར་པོར་བཀོད། །སོ་སོར་རྟོག་
པའི་རྩིབས་བརྒྱད་ལ། །བཛྲ་ཏིཀྵྞ་ལ་སོགས་དགོད། །ཡིག་འབྲུ་རེ་རེ་ཁ་དོག་དམར། །དབུས་སུ་ཧྲཱིཿཡང་ཁ་དོག་མཐུན། །མེ་ལོང་ལྟ་བུའི་རྩིབས་ཀྱི་བརྒྱད། །དུཿཁ་ཙྪེ་ད་ལ་སོགས་པ། །འབྲུ་རེ་རེ་སྟེ་ཁ་དོག་སྔོ། །ལྟེ་དབུས་ཧཱུཾ་ཡང་མདོག་མཆོག་སྔོ། །ཆོས་དབྱིངས་ཡེ་ཤེས་རྩིབས་
བཅུ་པ། །རྩིབས་རྣམས་ཀུན་ལ་དགོད་པ་ནི། །པྲཛྙཱ་ཛྙཱ་ན་ལ་སོགས་བཅུ། །དབུས་ཀྱི་ཨ་དང་དེ་ཀུན་དཀར། །བྱ་གྲུབ་ཡེ་ཤེས་འཁོར་ལོ་ནི། །རྩིབས་བརྒྱད་ཛྙཱ་ན་ཀཱ་ལ་སོགས། །རྩིབས་རེ་འབྲུ་རེ་ལྟེ་བར་ཨཱ། །ཤིན་ཏུ་མཛེས་པའི་ལྗང་གུའོ། །མཉམ་ཉིད་འཁོར་ལོ་རྩིབས་བརྒྱད་པ། །
དེ་ལ་བཱ་གཱི་ཤྭ་ར་སོགས། །འབྲུ་རེ་དགོད་ཅིང་ཁ་དོག་སེར། །དབུས་སུ་ཨོཾ་ཡང་རབ་ཏུ་སེར། །དྲུག་པའི་འཁོར་ལོ་རྩིབས་བརྒྱད་པ། །ཨ་ར་པ་ཙ་ལ་སོགས་པ། །ཡིག་དགུ་གཅིག་ལ་གཉིས་དགོད་བྱ། །དབུས་སུ་ཨཱ་ནི་རབ་ཏུ་དཀར། །ཤེས་རབ་འཁོར་ལོའི་ལྟེ་བ་རུ། །དང་པོ་
ལ་ནི་ཡེ་ཤེས་སེམས། །ཐུན་མོང་མཚན་དང་ལྡན་པར་བསམ། །གཞན་ལ་མཚན་ཡང་སོ་སོ་སྟེ། །སོ་སོར་རྟོག་ལ་རྡོ་རྗེ་རྣོ། །མེ་ལོང་རལ་གྲི་སྡུག་བསྔལ་གཅོད། །ཆོས་དབྱིངས་ཤེས་རབ་ཡེ་ཤེས་སོ། །བྱ་བ་གྲུབ་པའི་ཡེ་ཤེས་སྐུ། །མཉམ་པ་ཉིད་ལ་ངག་དབང་ཕྱུག །རྡོ་རྗེ་སེམས་
ལ་མཚན་མཆོག་ནི། །ཨ་ར་པ་ཙ་ན་ཞེས་པ། །མདོག་དང་ཕྱག་མཚན་སོ་སོར་བསམ། །མངོན་རྟོགས་ལ་ནི་ཚིགས་བཅད་གསུམ། །ཚིགས་བཅད་དངོས་གཅིག་སྔགས་ལ་གཉིས། །དེ་ལྟར་ཤེས་རབ་འཁོར་ལོ་ནི། །གཞུང་ཚད་བཅས་པ་ལེགས་བསྟན་ནས། །ད་ནི་ཕོ་བྲང་ལྷ་
འཁོར་ལོ། །དེ་ཡི་དབྱེ་བ་བསྟན་པར་བྱ། །རྣམ་པར་སྣང་མཛད་ཆེ་ཞེས་པ། །བྱང་ཆུབ་སེམས་ཀྱི་རྡོ་རྗེ་ནི། །ལྔ་ཡི་རང་བཞིན་དྲུག་པ་སྟེ། །རྩ་བའི་དཀྱིལ་འཁོར་ལྷ་དང་མཚན། །གཙོ་བོའི་ཐུགས་ཀའི་ཡེ་ཤེས་སེམས། །འདི་ལྟར་སངས་རྒྱས་བཅོམ་ལྡན་འདས། །མཚན་

49-1-86b

རྣམས་རྣམ་པ་གཉིས་སུ་བཞེད། །དེ་ཡི་ཐུགས་ཀའི་ཟླ་དཀྱིལ་ན། །མཚན་ནི་རྣམ་པ་གཉིས་ཡིན་ཏེ། །རྫོགས་སངས་རྒྱས་དང་ཨ་ལས་བྱུང་། །དེ་སྟེང་ཨ་ལ་རྣམ་གསུམ་སྟེ། །ཨ་ནི་ཡིག་འབྲུ་ཀུན་མཆོག་དང་། །དོན་ཆེན་ཞེས་ནི་འབྱུང་བ་དང་། །ཡི་གེ་དམ་པ་ཞེས་པ་གསུམ། །དེ་ལྟར་དི་
དག་གསུམ་པོ་ནི། །མཚན་མཆོག་རྣམ་པ་བདུན་དུ་བཞེད། །གསང་བའི་ཡུམ་བཞིའི་རྣམས་ལ་ནི། །ཁོང་ནས་བྱུང་དང་སྐྱེ་མེད་གཉིས། །སཏྭ་བཛྲི་མ་ཡི་མཚན། །ཚིག་ཏུ་བརྗོད་པ་སྤངས་གཅིག་པུ། །རཏྣ་བཛྲི་མ་ཡི་མཚན། །བརྗོད་པ་ཀུན་གྱི་རྒྱུ་མཆོག་ཉིད། །དྷརྨ་བཛྲི་མ་ཡི་མཚན། །
ཚིག་ཀུན་ཤེས་ནི་འབྱུང་བ་དང་། །རབ་ཏུ་གསལ་བྱེད་མ་དང་གཉིས། །ཀརྨ་བཛྲི་མ་ཡི་མཚན། །དེ་དག་ལ་ནི་མཚན་དྲུག་སྟེ། །དང་པོ་ཐ་མ་གཉིས་གཉིས་སོ། །རྒྱལ་བ་ལྔ་ལ་ཚན་གསུམ་གསུམ། །ཚིག་རྐང་དང་པོ་གཉིས་གཉིས་སོ། །གོང་མ་གོང་མ་ལ་གཉིས་གཉིས། །འོག་མ་
འོག་མ་རེ་རེ་ལ། །མཆོད་པ་ཆེན་པོ་ཆགས་ཆེན་ནས། །ཁྲོ་བ་ཆེན་པོ་དགྲ་ཆེའི་མཐར། །རྒྱལ་རྣམས་བཅོ་ལྔ་ཡུམ་བཞི་དྲུག །ཉི་ཤུ་རྩ་གཅིག་དག་ཏུ་བཤད། །འདོད་པ་ཆེ་དང་བདེ་བ་ཆེ། །རྡོ་རྗེ་སེམས་དང་རྒྱལ་པོ་གཉིས། །དགའ་བ་ཆེ་དང་མགུ་ཆེ་གཉིས། །ཆགས་པ་དང་ནི་
ལེགས་པའི་མཚན། །ཚིག་རྐང་གཉིས་ལ་བཞིར་བཞེད་དེ། །བྱང་ཆུབ་སེམས་ཀྱི་མཚན་རྣམས་སོ། །གཟུགས་ཆེ་ལུས་ཀྱང་ཆེ་བ་ནས། དཀྱིལ་འཁོར་ཆེན་པོ་ཡངས་པ་ཡིན། །ཚིགས་སུ་བཅད་པ་གཅིག་ལ་ནི། །སེམས་དཔའ་བཞི་སྟེ་མཚན་རྣམས་ལྔ། །གཟི་བརྗིད་མཆོག་ཆེ་ལུས་ཆེ་གཉིས། དེ་དག་
དབང་བསྐུར་སེམས་དཔའ་བཞི། །ཤེས་རབ་མཚོན་ཆེན་འཆང་བ་ནས། །སྣང་བ་ཆེན་པོ་གསལ་ཆེའི་མཐར། །ཚིགས་སུ་བཅད་པ་གཅིག་ལ་ནི། །སེམས་དཔའ་བཞི་སྟེ་མཚན་མཆོག་བདུན། །རྐང་པ་དང་པོ་རྡོ་རྗེ་ཆོས། །མཚན་མཆོག་གཅིག་ཏུ་ཤེས་པར་བྱ། །རྣོན་པོ་ལ་ནི་
གཉིས་ཡིན་ཏེ། །ཉོན་མོངས་ལྕགས་ཀྱུ་ཆེ་དང་མཆོག །རྒྱུ་ལ་གྲགས་ཆེན་སྙན་གྲགས་གཉིས། །སྨྲ་ལ་སྣང་ཆེ་གསལ་ཆེ་གཉིས། །ཡེ་ཤེས་སེམས་དཔར་གྲགས་པ་ཡིན། །མཁས་པ་སྒྱུ་འཕྲུལ་ཆེ་འཆང་ནས། །སྒྱུ་འཕྲུལ་ཆེན་པོ་མིག་འཕྲུལ་མཐར། །ཚིགས་བཅད་གཅིག་

49-1-87a

ལ་སེམས་དཔའ་བཞི། །མཚན་རྣམས་དྲུག་ཏུ་བཞེད་པ་ཡིན། །མཁས་པ་སྒྱུ་འཕྲུལ་ཆེ་འཆང་གཉིས། །རྡོ་རྗེ་ལས་སུ་ཤེས་པར་བྱ། །སྒྱུ་འཕྲུལ་ཆེ་དང་དོན་གྲུབ་པ། །རྡོ་རྗེ་བསྲུང་བའི་མཚན་ཡིན་ནོ། །ལྷག་མ་གཉིས་ལ་རེ་རེའོ། །སེམས་དཔའ་དེ་དག་བཞི་པོ་ནི། །ལས་
ཀྱི་སེམས་དཔའ་རྣམས་ཡིན་ནོ། །སེམས་དཔའ་བཅུ་དྲུག་རྣམས་ལ་ནི། །ཚིགས་སུ་བཅད་པ་ཕྱེད་དང་བཞི། མཚན་རྣམས་ཉི་ཤུ་རྩ་གཉིས་ཏེ། །སེམས་དཔའི་བསྡུས་དོན་དེ་ཡིན་ནོ། སྦྱིན་བདག་ཆེན་པོ་ཞེས་པ་ནས། །སྨོན་ལམ་ཡེ་ཤེས་རྒྱ་མཚོའི་བར། །ཕ་རོལ་ཕྱིན་བཅུའི་
ཚིགས་བཅད་གཉིས། །ལྷ་མོ་བརྒྱད་དང་སྒོ་མར་བཞེད། །སྦྱིན་བདག་ཆེན་དང་གཙོ་བོ་གཉིས། །སྒེག་མོ་ཡི་ནི་མཚན་ཡིན་ནོ། །ཚུལ་ཁྲིམས་ཆེན་དང་འཆང་མཆོག་ནི། །ཕྲེང་བ་མ་ལ་གཉིས་སུ་བཞེད། །བཟོད་ཆེན་འཆང་དང་བརྟན་པ་གཉིས། །གླུ་མ་ཡི་ནི་མཚན་ཡིན་ནོ། །བརྩོན་འགྲུས་
ཆེ་དང་བརྟུལ་བ་གཉིས། །གར་མཁན་མ་ཡི་མཚན་ཡིན་ནོ། །མེ་ཏོག་མ་ལ་མཚན་གཅིག་སྟེ། །བསམ་གཏན་ཆེན་པོའི་ཏིང་འཛིན་གནས། །ཤེས་རབ་ཆེ་དང་ལུས་འཆང་གཉིས། །བདུག་པ་མ་ཡི་མཚན་ཡིན་ནོ། །བསམ་གཏན་ཞེས་པ་མར་མེ་མ། །ཐབས་ཆེན་ཞེས་པ་དྲི་
ཆབ་མ། །སྟོབས་ནི་དད་སོགས་རྣམ་པ་ལྔ། །ཡེ་ཤེས་རྒྱ་མཚོ་མཐོང་སྒོམ་གཉིས། །ཡན་ལག་བདུན་དང་འཕགས་ལམ་བརྒྱད། །སྟོབས་དང་ཡེ་ཤེས་སྒོམ་པར་བཞེད། །གསང་མཆོད་ལ་བརྒྱད་ཕྱི་ལ་ལྔ། །སྒོ་བ་ལ་གཉིས་སྤྱིར་བཅོ་ལྔ། །བྱམས་ཆེན་རང་བཞིན་ཞེས་པ་ནས། །
མཁས་པ་ཆེན་པོ་ཐབས་ཆེའི་བར། །ཚིག་རྐང་བཞི་ལ་རིམ་བཞིན་དུ། །ཤར་ཕྱོགས་གནས་པའི་སྐལ་བཟངས་བཞི། །ཚིག་རྐང་དང་པོ་བྱམས་པ་ཡིན། །སྙིང་རྗེ་དང་ནི་བློ་མཆོག་གཉིས། །འཇམ་དཔལ་གྱི་ནི་མཚན་ཡིན་ནོ། །སྤོས་གླང་ཤེས་རབ་བློ་ཆེན་གཉིས། །མཁས་པ་
ཆེ་དང་ཐབས་ཆེ་གཉིས། །ཡེ་ཤེས་ཏོག་གི་མཚན་ཡིན་ནོ། །ལྷོ་ཡི་སེམས་དཔའ་རྣམ་བཞི་ནི། །རྫུ་འཕྲུལ་སྟོབས་ལྡན་བཟང་སྐྱོང་གི། །ཤུགས་ཆེན་མགྱོགས་པ་ཆེན་པོ་ནི། །བློ་གྲོས་རྒྱ་མཚོའི་མཚན་ཡིན་ནོ། །རྫུ་འཕྲུལ་ཆེན་པོ་ཆེར་གྲགས་པ། །བློ་གྲོས་མི་བཟད་པ་ཡི་མཚན། །

49-1-87b

སྤོབས་པ་བརྩེགས་པ་ཞེས་བྱ་བ། །སྟོབས་ཆེན་ཕ་རོལ་གནོན་གཅིག་པུ། །ནུབ་ཀྱི་ཕྱོགས་ཀྱི་སེམས་དཔའ་བཞི། །སྲིད་པའི་རི་བོ་ཆེ་འཇོམས་ནས། །འཇིགས་ཆེན་འཇིགས་པར་བྱེད་པའི་མཐར། །མཐུ་ཆེན་ཐོབ་དང་ངན་སོང་འདྲེན། །མྱ་ངན་འཇོམས་དང་དྲ་བ་ཅན། །གོ་རིམས་བཞིན་
དུ་ཚིག་རེ་ལ། །མཚན་ཡང་རེ་རེ་དག་ཏུ་འདོད། །བྱང་ཕྱོགས་ཀྱི་ཡང་སེམས་དཔའ་བཞི། །མགོན་པོ་རིགས་མཆོག་ཆེན་པོ་ནས། །ཐེག་པ་ཆེན་པོ་ཚུལ་མཆོག་མཐར། །གོ་རིམས་བཞིན་དུ་ལེགས་སྦྱར་ཏེ། །མགོན་པོ་རིགས་དང་མཆོག་ཆེན་གཉིས། །ཟླ་འོད་གཞོན་ནུའི་མཚན་
ཡིན་ནོ། །འོད་དཔག་མེད་དང་ནམ་མཁའ་མཛོད། །སྒྲིབ་པ་རྣམ་པར་སེལ་དང་གསུམ། །ཚིག་གསུམ་མཚན་གསུམ་གོ་རིམས་བཞིན། །ཚིགས་བཅད་དག་ནི་བཅུ་བཞི་སྟེ། །མཚན་དོན་བརྒྱད་ཅུ་རྩ་དྲུག་བཞེད། །རིགས་བསྡུས་ཚེ་ན་དབུས་དཀྱིལ་འཁོར། །བདེ་གཤེགས་
དཀྱིལ་འཁོར་ལྷ་རྣམས་ནི། །སེང་གེ་དང་ནི་རབ་གསལ་བྱེད། །ཐུབ་པ་དང་ནི་མེ་ཏོག་དང་། །མེ་ཏོག་མཛེས་དང་སྤྱན་བཟང་པོ། །ཀུན་དེད་དཔོན་དང་ཕྱག་རྒྱ་ཆེ། །སྟོབས་པོ་ཆེ་དང་རྒྱུ་སྐར་རྒྱལ། །སྨན་པ་དང་ནི་གྲགས་པ་དང་། །རྒྱལ་མཚན་དང་ནི་འོད་ཟེར་ཆེ། །གྲོལ་ཕུང་དང་ནི་རྣམ་སྣང་
མཛད། །ཉི་བཟང་པོ་དང་ཟླ་བ་བཟང་། །འོད་ཟེར་ཅན་དང་འོད་འཕྲོ་བཟང་། །མྱ་ངན་མེད་དང་དེ་བཞིན་སྐར། །འོད་འཕྲོ་འཛིན་དང་ཡོན་ཏན་འོད། །དོན་སྟོན་པ་དང་མར་མེ་ལྡན། །རབ་བཟང་དང་ནི་སྨན་བཟང་པོ། །དཔའ་བོ་དང་ནི་མཛོད་སྤུ་དང་། །བརྟན་པོ་དང་ནི་དཔལ་གྱི་ལྷ། །
མཐོང་བར་དཀའ་དང་ཡོན་ཏན་འོད། །སྐྲ་ཅན་དང་ནི་གྲངས་ཅན་དང་། །ཚངས་པའི་དབྱངས་དང་བརྟན་པའི་མཚམས། །རིག་པ་ལྡན་དང་འོད་མཛད་པ། །རི་བོ་ཆེ་དང་རྡོ་རྗེ་ཆེ། །རྒྱལ་མིན་དང་ནི་འཇིགས་མེད་པ། །རིན་པོ་ཆེ་དང་པདྨ་དང་། །སྟོབས་སྡེ་ཅན་དང་མེ་ཏོག་འོད། །ཡེ་ཤེས་
འོད་དང་ལྷ་ཆེན་པོ། །ཚིག་གི་བདག་དང་སྣང་མཐའ་ཡས། །ཀླུས་སྦྱིན་དང་ནི་བསྟན་པའི་རིམ། །དོན་ཡོད་མཐོང་དང་དབང་པོ་སྦྱིན། །མི་ལྷུང་བ་དང་སེང་རྒྱལ་མཚན། །རྒྱལ་བ་དང་ནི་ཚོགས་པ་པོ། །དགའ་བའི་རྒྱལ་དང་དོན་འདོད་པ། །དགའ་བར་མཛད་དང་ཆུ་ཡི་ལྷ། །ཡོན་ཏན་

49-1-88a

ལག་དང་སྤོས་གླང་པོ། །དོན་ཡོད་དབྱངས་དང་ཐུགས་བཟང་པོ། །ཟླ་བ་དང་ནི་རི་བོང་ཅན། །གྲགས་ཆེན་པ་དང་གཙུག་ནོར་བུ། །དྲུག་པོ་དང་ནི་སེང་གེ་འགྲོས། །ངང་པ་དང་ནི་རྣམ་རྒྱལ་དོན། །ཤེས་རབ་བརྩེགས་དང་ལེགས་གནས་པ། །བློ་གྲོས་དང་ནི་ཡན་ལག་སྐྱེ། །
བདུད་རྩི་བུ་དང་གཟུགས་བཟང་པོ། །ཡེ་ཤེས་ཅན་དང་འོད་ཟེར་ཅན། །དཀའ་ཐུབ་བརྟན་དང་བཀྲ་ཤིས་ལྡན། །བདེ་བའི་ཏོག་དང་པདྨ་དང་། །མི་ཡི་ཐེག་དང་བདེ་བའི་ཕྱག །ཡེ་ཤེས་མཛད་བློ་དང་འོད་བྲལ། །ཚངས་པས་བྱིན་དང་རིན་ཆེན་མཛོད། །མེ་ཏོག་ལྷ་དང་ལེགས་པའི་དོན། །
ཆོས་དབང་ཕྱུག་དང་བློ་གྲོས་གྲགས། །རྡོ་རྗེ་ཏོག་དང་པདྨ་སྒྲུབ། །རྣམ་པར་རོལ་དང་དུ་མའི་ལྷ། །རི་ཡི་ཏོག་དང་འོད་ཀྱི་ཚོགས། །མི་ཟད་པ་དང་རིན་ཆེན་སྙིང་། །བཟོད་ཆེན་པ་དང་ཆོས་ཀྱི་བློ། །ཡིད་ཀྱི་ཡུལ་དང་ཡོན་ཏན་གྲགས། །ཟླ་བའི་འོད་དང་གསལ་བའི་རོ། །སེང་གེ་ཏོག་དང་
ལུས་ལས་བཟློག །སྙིང་པོའི་དཔལ་དང་ངེས་པའི་ཏོག །ཀློག་གི་འོད་དང་གསེར་སྦྱིན་ཆ། །གཞན་གྱིས་མི་ཐུབ་ཏོག་གི་རྒྱལ། །རབ་ཏུ་གྲགས་དང་བརྩོན་འགྲུས་བརྟན། །དཔེ་བྲལ་གྲགས་དང་གཤིན་འཇིགས་འགྱུར། །དགྲ་བཅོམ་ལྷ་དང་མར་མེ་ཆེ། །འཇིག་རྟེན་འོད་དང་དྲི་
དང་པོ། །ཡོན་ཏན་འཛིན་དང་མུན་བྲལ་འགྱུར། །སེང་གེ་སྤྲོ་དང་རིན་ཆེན་གྲགས། །སྐྱེ་རང་བཞིན་དང་ཡིད་སྐྱེས་ཟླ། །ལེགས་པར་སྟོན་དང་གཟུགས་བརྙན་བརྒྱན། །ནོར་བུ་བཟང་དང་རིན་ཆེན་ཏོག །ཆོས་འབྱུང་གནས་དང་རྣམ་ངེས་དོན། །ཆོས་སྟེར་བ་དང་རིན་ཆེན་གནས། །
རྒྱལ་དབང་པོ་དང་རིན་ཆེན་མནན། །གནས་པའི་བློ་དང་བསྐལ་བྲལ་གདུགས། །རྣམ་སྣང་དཔལ་དང་སེང་གེ་སྒྲ། །རྣམ་པར་རོལ་དང་ཀླུ་ཡི་འོད། །མེ་ཏོག་རོ་དང་ཀླུ་དབང་ཅན། །རི་དབང་ཕྱུག་དང་ཤིན་ཏུ་བསམ། སྟོབས་ཀྱི་ལྷ་དང་ཡོན་ཏན་ཕྲེང་། །ཀླུ་ཡི་ཕྱག་དང་གཟུགས་བརྙན་
བརྒྱན། རྒྱལ་བའི་བློ་དང་ཡེ་ཤེས་ཁྱབ། །བདུད་རྩི་སྒྲ་དང་བདེན་པར་སྨྲ། །རབ་ཞི་བློ་དང་མཐའ་ཡས་གཟུགས། རྣམ་སྣང་མཛད་དང་རིན་ཆེན་ཏོག །འདོད་པ་བྲལ་དང་ལེགས་གཞིབས་པ། །དོན་ཡོད་སངས་རྒྱས་རྟོགས་པ་འཆང་། །མེ་ཏོག་དང་ནི་རྡོར་དབང་རྒྱལ། །གཟི་བརྗིད་

49-1-88b

ཅན་དང་དོན་སྟོན་པ། །ཚེ་དཔག་མེད་དང་ཁྲོ་དབང་ཕྱུག །དོན་གནས་ཅན་དང་མི་ཤིགས་གྲགས། །མྱ་ངན་མེད་དང་དྲི་མ་བྲལ། །ཚངས་པའི་ལྷ་ཞེས་བྱ་བའོ། །འདི་ཡི་གཞུང་གི་ཚད་དག་ཀྱང་། །ཚིགས་བཅད་ཉི་ཤུ་རྩ་ལྔར་ནི། །ཚིག་རྐང་གཅིག་གིས་མ་ཚང་བ། །རྒྱལ་བ་ལྔ་ལ་རིམ་བཞིན་དུ། །
སུམ་ཅུ་རྩ་དྲུག་རྩ་དྲུག་མཚན། །བསྡོམས་པས་བརྒྱ་དང་བརྒྱད་ཅུ་གཅིག །མི་བསྐྱོད་དཀྱིལ་འཁོར་ལྷ་རྣམས་ནི། །རྡོ་རྗེ་འཇིགས་བྱེད་རྒྱུད་ལས་གཉིས། །ཁྲོ་བོ་རྣམ་རྒྱལ་སྒྱུ་འཕྲུལ་དྲ། །ཕྱག་རྡོར་དབང་བསྐུར་རྒྱུད་ལས་གཉིས། །རྡོ་རྗེ་བརྒྱན་དང་རིག་པ་མཆོག །བདེ་མཆོག་རྒྱན་
དང་རྡོ་རྗེ་འདུས། །དོན་ཡོད་ཞགས་དང་རྡོ་རྗེ་ཐོད། །གསང་བ་འདུས་དང་རྣམ་སྣང་དྲ། །དམ་ཚིག་ཆེ་ནང་ཟླ་གསང་ཐིག །གཉིས་མེད་མཉམ་དང་ཟླ་གསང་ཐིག །རྒྱུ་དེ་རྣམས་ལས་མཚན་རེ་རེ། །སྒྱུ་འཕྲུལ་དྲུག་སྟོང་པ་ལས་གཉིས། །འབྱུང་པོ་ཕྱག་རྡོར་ས་འོག་རྒྱུད། །སྒྱུ་འཕྲུལ་དྲ་
དང་བདེ་མཆོག་རྒྱུད། །ཁྲོ་བོ་བདེ་མཆོག་སད་དང་ནི། །རྒྱུད་དེ་རྣམས་ལ་མཚན་རེ་འབྱུང་། །ཁྲོ་བོ་རྣམ་རྒྱལ་རྒྱུད་གཉིས་ལས། །ཁྲོ་ཟླ་དང་ནི་རྟ་མཆོག་རྒྱུད། །མཚན་ནི་རེ་རེ་ཤེས་པར་བྱ། །མི་མཉམ་མཉམ་དང་གསང་རྒྱུད་དེ། །རྒྱུད་དེ་ལས་ནི་བཞི་འབྱུང་ངོ་། །དཔལ་མཆོག་དང་པོ་གསང་བ་
འདུས། །གསང་བ་མཛོད་དང་གསང་བ་འདུས། །རྡོ་རྗེ་གསང་རྒྱན་ནོར་བུ་གསལ། །དེ་ཉིད་འདུས་པའི་རྒྱུད་དང་ནི། །རྒྱུད་དེ་རྣམས་ལས་མཚན་རེ་རེ། །དམ་ཚིག་ཆེན་པོའི་རྒྱུད་ལས་གཉིས། །རྣམ་སྣང་མངོན་བྱང་ཆུབ་ལས་གཉིས། །གཉིས་མེད་མཉམ་དང་ཁམས་གསུམ་རྒྱལ། །རྒྱུད་དེ་
ལས་ནི་རེ་རེའོ། །རྡོ་རྗེ་འཇིགས་བྱེད་རྒྱུད་ལས་གཉིས། །ཕྱག་ན་རྡོ་རྗེ་དབང་བསྐུར་བའི། །རྒྱུད་ལས་ཁྲོ་བོ་བཞི་འབྱུང་ངོ་། །རྡོ་རྗེ་སྙིང་པོའི་རྒྱུད་ལས་གཉིས། །རྡོ་རྗེ་ཐོད་ཕྲེང་རྒྱུད་ལས་གཉིས། །ཁྲོ་བོ་རྣམ་རྒྱལ་རྒྱུད་ལས་གཉིས། །དཔུང་བཟངས་རྒྱུད་དང་ལེགས་པར་གྲུབ། །ཡི་གེ་དྲུག་
དང་འབུམ་པ་དང་། །འཇམ་དཔལ་རྒྱུད་དང་མངོན་དམ་རྒྱན། །དེ་བཞིན་ཁམས་གསུམ་རྣམ་རྒྱལ་དང་། །རྒྱུད་དེ་རྣམས་ལས་རེ་རེའོ། །འཇམ་དཔལ་རྒྱུད་ལས་གཉིས་འབྱུང་ངོ་། །འདི་ཡི་གཞུང་ཚད་བསྟན་པ་ནི། །ཚིགས་བཅད་བཅུ་དང་རྐང་པ་གཅིག །མཚན་རྣམས་བདུན་ཅུ་རྩ་གཅིག་སྟེ། །

49-1-89a

རྒྱལ་བ་ལྔ་ལ་བཅུ་བཞིའོ། །རྒྱུད་སྡེ་སོ་སོར་ལྷ་དབྱེ་བྱས། །པདྨ་གར་དབང་དཀྱིལ་འཁོར་གྱི། །ལྷ་རྣམས་ངེས་པར་བརྗོད་པ་ནི། །ཡེ་ཤེས་གྲགས་དང་དེ་བཞིན་རྒྱལ། །ཡོན་ཏན་འོད་དང་ཁྱད་པར་ཆེ། །ཟླ་བ་རྒྱལ་དང་པདྨའི་འོད། །དཀའ་ཐུབ་རྒྱལ་དང་མར་མེ་བཟང་། །
ཀློག་གི་ཏོག་དང་འོད་ཀྱི་རྒྱལ། །གསལ་བ་པ་དང་དཔེ་བྲལ་གྲགས། །པདྨ་གྲགས་དང་མེ་ཏོག་མཚན། །སྤྱན་བཟང་མཆོག་དང་གྲངས་མེད་དོན། །དྲག་པོ་སྡེ་དང་བསོད་རྣམས་འོད། །ཁྱད་པར་ཅན་དང་ཐོགས་མེད་བློ། །རཱ་ཧུ་ལ་དང་ཡེ་ཤེས་འོད། །གྲགས་དབང་དང་ནི་ཡེ་ཤེས་དབང་། །
སྐར་མའི་ཏོག་དང་རཱ་ཧུ་ལ། །སྨན་པ་ཆེ་དང་སྨན་པའི་རྒྱལ། །བསོད་ནམས་དབང་དང་རྒྱུ་བ་པོ། །སྐར་མའི་རྒྱལ་དང་རྒྱལ་བ་པ། །ཉི་འོད་འཆར་དང་ཆོས་ཀྱི་མཛོད། །བློ་གྲོས་ལེགས་དང་རྒྱལ་དབང་པོ། །རྡོ་རྗེ་སྡེ་དང་རྡོ་རྗེ་བརྩེགས། །ལེགས་པར་གནས་དང་རྒྱལ་བའི་བློ། །ཚངས་པའི་
དབྱངས་དང་ཀླུ་དབང་པོ། །ཡོན་གསལ་དབང་དང་མངོན་ཤེས་ཏོག །འོད་ཀྱི་ཏོག་དང་དགའ་ཚངས་པ། །སྒྲ་མི་སྙན་དང་རོལ་པའི་གར། །ཀླུ་སྦྱིན་དང་ནི་བདེ་བའི་ཏོག །མཁས་དང་གཞན་གྱིས་མི་ཐུབ་དབྱངས། །རིན་ཆེན་འོད་དང་གསུང་དབྱངས་སྦྱིན། །སེང་གེ་དང་ནི་ཉི་སྣ་ཚོགས། །ཡེ་
ཤེས་དཔལ་དང་པད་ཕུང་པོ། །མེ་ཏོག་དང་ནི་རྣམ་མནན་འགྲོ། །བསོད་ནམས་དཔུང་དང་མཆོག་གྱུར་བློ། །གསལ་བ་དང་ནི་ཟླ་མར་མེ། །མི་བཟད་པ་དང་བློ་བཟངས་སྤྱན། །ཡན་ལག་གཙུག་དང་ཤེས་རབ་ཡུལ། །མཆོག་ཏུ་གྱུར་དང་རབ་འཇོམས་ཟེར། །ཤེས་རབ་སྦྱིན་དང་འཇམ་
པའི་དབྱངས། །ཚིག་མེད་སྤྱོད་དང་ཐུ་བོ་སྦྱིན། །དག་པ་དང་ནི་ཡེ་ཤེས་གནམ། །བདེ་གཤེགས་འོད་དང་དབང་པོའོ། །ཐུབ་པ་འཆང་དང་ལྷ་ཞེས་པ། །འོད་ཟེར་བཟང་དང་གཟུགས་བཟང་པོ། །རྒྱལ་པོ་དང་ནི་དོན་གྲུབ་མཛད། །སེང་གེ་དང་ནི་དྲི་ལྡན་དང་། །གྲགས་པ་ཞེས་དང་རྒྱལ་
བའོ། །མཆོག་སྙིང་དང་ནི་བསོད་ནམས་ཟེར། །མདོག་བཟངས་དང་ནི་ཉན་འདོད་པ། །མར་མེ་དང་ནི་རིན་ཆེན་བརྩེགས། །ཚོགས་མེད་ལྷ་དང་ས་ཡི་བདག །གྲོལ་བར་འགྲོ་དང་གསེར་གཙུག་ཕུད། །སྒྲ་གཅན་བཟང་དང་མི་ཐུབ་པ། །རང་བཞིན་ཐུབ་དང་ཟླ་བའི་འོད། །གསེར་

49-1-89b

མདོག་བཟང་པོ་དང་དགེ་བ། །ཡོན་དབང་ལྷ་དང་ཆོས་ཀྱི་གདུགས། །ཡོན་ཏན་ལེགས་དང་གྲོལ་ཞེས་པ། །ཡེ་ཤེས་རྫོགས་དང་ཞིབ་མོའི་བློ། །འོད་རབ་འབར་དང་སྐྱབས་ཀྱི་སྨན། །རྣམ་གྲོལ་ཏོག་དང་ཤེས་རབ་མཆོག །ཡེ་ཤེས་རྒྱལ་དང་འཇིགས་པའི་གཟུགས། །གློ་བུར་
འཇོམས་དང་ཐོགས་མེད་གྲགས། །བདེན་པར་གསུང་དང་ངག་སྙན་པ། །རི་དབང་གྲགས་དང་ཆོས་བརྩེགས་ལ། །འགྲོ་བའི་འོད་དང་ལེགས་པར་བརྒྱན། །རང་གི་ལུས་དང་ཡེ་ཤེས་དག །སེང་མཆེ་རྣོ་དང་སེལ་བ་པོ། །འགྲོ་བ་མཆོད་དང་སེང་གེ་གྲགས། ཆོས་ཀྱི་མཚན་དང་
སྐལ་བ་བཟང་། །མི་བསྐྱོད་མདོག་དང་འབར་བའི་རྒྱལ། །རྟགས་པ་དང་ནི་སྤྱན་བཟང་པོ། །དོན་རིག་བློ་དང་འཇིགས་མེད་གསེར། །དྲི་ཡི་འོད་དང་དགའ་བའོ། །དོན་ཡོད་འགྲོ་དང་ཁྲོ་ཐལ་མདོག །མཆོག་གི་གཟུགས་དང་ཉན་པ་པོ། །གཙོ་བོ་གྲགས་དང་དྲག་པོ་སྦྱིན། །ཉི་མའི་
ལྷ་དང་གཤིན་འཇོམས་ལྷག །ཤིང་རྟའི་འགྲོས་དང་བློ་གྲོས་བཟང་། །གསེར་འོད་བཅོམ་དང་སྐལ་ལྡན་གཙུག །དབང་ཕྱུག་དང་ནི་དགའ་བ་བསྟན། །མོས་པ་འཇོམས་དང་ཡེ་ཤེས་མཛོད། །ཚངས་པའི་འགྲོས་དང་ཙནྡན་དང་། །མྱ་ངན་མེད་དང་སེང་གེའོ། །རྟོག་གི་ཡུལ་
དང་པདྨའི་སྙིང་། །འོད་མཐའ་ཡས་དང་ལྷ་ཡི་ཡུལ། །བསོད་ནམས་མེ་ཏོག་རིག་པའི་ལྷ། །ཡེ་ཤེས་དབང་དང་ཚངས་པ་གསལ། །རིན་ཆེན་ཕྱག་དང་དབང་པོ་ལྡན། །དཔེ་བྲལ་འགྲོས་དང་ཐེ་ཚོམ་ལྡན། །མཆོད་པ་དང་ནི་འབར་བ་དང་། །སངས་རྒྱས་གདུགས་དང་འདམ་གྱི་མཆོག །
ཡིད་འོང་ལྡན་དང་བྱ་གྲུབ་པ། །རྨ་བྱ་དང་ནི་ཆོས་ལྡན་དང་། །ཕན་ལྡན་གཟུགས་དང་ཡེ་ཤེས་དང་། །གྲགས་པ་དང་ནི་འོད་ཟེར་འབར། །མ་ལུས་ཕན་དང་བཻ་ཌཱུར་སྙིང་། །རྒྱུ་སྐར་དང་ནི་ལྷ་ཉིད་ལྡན། །རི་བོང་ཅན་དང་དྲ་བའི་འོད། །དགེ་བའི་འོད་དང་ཡོན་ཏན་ཟེར། །ཡིད་ལགས་
པ་དང་རིགས་ཀྱི་འོད། །སྤྱོད་པ་པོ་དང་རིགས་ཀྱི་མཚོ། །ཆོས་དབང་ཕྱུག་དང་སྐུ་ཡི་ལྷ། །ཡོན་ཏན་སྟོབས་དང་འཁོར་ལོ་དབང་། །ལེགས་པའི་དབྱངས་དང་ལེགས་པར་རེག །དོན་གྲུབ་པ་དང་གཟི་བརྗིད་དཔལ། །ཀུན་མཉམ་ཉིད་དང་བདུད་རྩི་དབྱངས། །བདེ་བར་སྣང་དང་

49-1-90a

ལེགས་པའི་བློ། །རྣམ་གྲོལ་དོན་དང་ཁྱད་དབང་ཕྱུག །རོལ་པའི་མཆོག་དང་ལྷག་མཐོང་ནས། །ཉེས་པ་སྤངས་དང་ཉི་མའི་འོད། །བཀྲ་རྒྱལ་བློ་དང་པདྨའི་མཆོག །ཉི་མའི་འོད་དང་སོ་སོར་གསུངས། །ལེགས་པ་དང་ནི་ཚོགས་དབང་པོ། །འཇིགས་པ་བྲལ་དང་ཡེ་ཤེས་སྲིད། །སྤོབས་པའི་མཚན་ཉིད་དང་བློ་མཆོག །རི་བོང་ཅན་དང་
རིན་ཆེན་ཟླ། །མི་འཇིགས་པ་དང་མེ་ལོང་ཆེ། །ཚངས་པའི་དབྱངས་དང་སྙན་པའི་གསུང་། །ཤེས་རབ་འོད་དང་ཀུན་མཉམ་བློ། །རྡོ་རྗེ་དང་ནི་བློ་དང་ལྡན། །ནམ་མཁའི་དབང་དང་ངག་དབང་ཕྱུག །ཡོན་ཏན་དཔལ་དང་གནས་ཀྱི་དཔལ། །འཕགས་པའི་འོད་དང་གསལ་བའི་ཤུགས། །གསལ་བའི་རོ་དང་དྲི་དབང་ཕྱུག །འདོད་ཅན་གདོང་
དང་ཡེ་ཤེས་གསུང་། །ཞི་གནས་དང་ནི་ཡེ་ཤེས་ལེགས། །རབ་ཏུ་འདུག་དང་ཆོས་རྒྱལ་མཚན། །དྲི་མ་བྲལ་དང་ཆོས་དབང་ཕྱུག །སྐལ་བྲལ་སྒྲ་དང་གཟི་བརྗིད་འོད། །དྲང་སྲོང་དབང་དང་བློ་གྲོས་ངན། །སྤོབས་པའི་འཁོར་ལོ་དང་ཟླ་ཞལ། །ཉི་ཟླའི་འོད་དང་ཡོན་ཏན་མཚོ། །ཡོན་ཏན་གསུང་པད་བླ་མེད་རྟོག །བསོད་ནམས་རྟོག་དང་སྤོབས་
པའི་ཡུལ། །རིགས་པ་བསྐྱེད་དང་རྒྱལ་རིགས་དང་། །རྣམ་གྲོལ་བསམ་དང་དབང་ཕྱུག་གོ། །མཆོག་ཅེས་པ་དང་ཡེ་ཤེས་དབྱངས། །ནམ་མཁའི་མཐའ་དང་མཆོད་པ་དང་། །དཔུང་ཚོགས་དཔལ་དང་ཡོན་ཏན་ཟླ། །རཱ་ཧུ་ལ་དང་བདུད་རྩི་འོད། །རིན་ཆེན་འོད་དང་ཟླ་བའི་འོད། །སེང་གེ་སྟོབས་དང་ཡེ་ཤེས་སྐུ། །འདི་ཡི་གཞུང་ཚད་བསྟན་པ་ནི། །ཚིགས་
བཅད་བཞི་བཅུ་རྩ་གཉིས་སོ། །མཚན་ནི་ཉིས་བརྒྱ་བདུན་ཅུ་ལྔ། །ཡེ་ཤེས་ལྔ་པོ་རེ་རེ་ལ། །ལྔ་བཅུ་རྩ་ནི་ལྔ་ལྔའོ། །རིན་ཆེན་འབྱུང་ལྡན་དཀྱིལ་འཁོར་གྱི། །ལྷ་རྣམས་མ་ལུས་བསྟན་པ་ནི། །དོན་གྲུབ་དཔལ་དང་ཡེས་ཉི་མ། །དོན་ཡོད་གྲུབ་དང་རི་དབང་བརྩེགས། །དགྲས་སྦྱིན་དང་ནི་པདྨ་དང་། །དགྲ་བཅོམ་གྲགས་དང་ཡེ་ཤེས་ཏོག །ཉོན་མོངས་
འཇོམས་དང་མེ་ཞེས་པ། །བདེ་བ་དྲི་དང་དཔེ་བྲལ་འོད། །རི་བོ་གྲགས་དང་སྲིད་མཐའ་སྟོན། །ཟླ་བ་དང་ནི་རིན་ཆེན་ཟླ། །སེང་གེ་རྒྱལ་དང་བསམ་གཏན་འདོད། །དཔེ་དང་བྲལ་དང་རྣམ་པར་རོལ། །ཡོན་ཏན་རིན་ཆེན་དང་དོན་གྲུབ། །དགྲ་བཅོམ་གྲགས་པ་རིན་ཆེན་འོད། །སྲིད་པ་བཅིངས་དང་སྤྱོད་ལམ་འཕྲུལ། །མཛོད་སྤུ་དང་ནི་སྤོབས་པ་
གྲགས། །རྡོར་ནོར་བུ་དང་ཚེ་དཔག་མེད། །ནོར་བུ་བཀོད་དང་དབང་ཆེན་པོ། །ཡོན་ཏན་འོད་དང་རི་བོ་གྲགས། །འོད་ཟེར་བཅུ་དང་གཉིས་དང་བྲལ། །ཀླུ་ཡི་སྟོབས་དང་ཡིད་དུ་འོང་། །རིན་ཆེན་ཟླ་དང་ཤུགས་ཅན་དང་། །གསལ་བ་དང་ནི་དགའ་དབང་ཕྱུག །གཙུག་ཕུད་འོད་དང་འཇིགས་བྲལ་དང་། །ཡོན་སྙིང་པོ་དང་དྲི་མེད་གྲགས། །

49-1-90b

གཟི་བརྗིད་ཞིང་དང་གདང་བ་གྲགས། །ལྷ་མང་པོ་དང་ལེགས་པར་གྲགས། །སངས་རྒྱས་ལྔ་འདོད་རིན་ཆེན་གཟུགས། །སངས་རྒྱས་སྟོབས་དང་སེང་གེ་གཤོག །གྲོང་ཆེན་མཐོ་དང་བློ་གྲོས་ལེགས། །འཇིག་རྟེན་འོད་དང་རིན་ཆེན་ལྷ། །སྐལ་ལྡན་ཤིང་རྟ་ཡང་དག་རྒྱལ། །དགའ་བ་བཀོད་དང་འོད་ཀྱི་མུ། །དཀའ་ཐུབ་ཆེ་དང་ཟླ་བ་
དང་། །ཆོས་བསྟན་པ་དང་མི་ཐུབ་ཟླ། །རི་བོ་འོད་དང་ཚངས་པའི་དབྱངས། །བདེན་པའི་ལྷ་དང་ཡོན་ཏན་བརྩེགས། །སེང་གེ་ཟླ་དང་ནོར་གོ་ཆ། །ཟླ་བ་དང་ནི་སྐྲ་དང་མཚུངས། །གྲགས་ཆེན་དང་ནི་གཟི་བརྗིད་ཤུགས། །ཆོས་ཀྱི་གྲགས་དང་དགའ་བ་ལྡན། །དྲི་བཟང་པོ་དང་རི་རྒྱལ་མཚན། །དགའ་བའི་འོད་དང་མཆོད་ཡོན་
ཅན། །སྲིད་མཐའི་ནོར་བུ་དང་བདེན་མཚུངས། །རྣམ་སྣང་མཛད་དང་རྣམ་པར་ངེས། །གྲགས་པའི་མཐའ་དང་ཀློག་འཆང་བ། །སེང་གེ་འོད་ཟེར་སྲོག་དང་ལྡན། །འགྲོ་བའི་ཐེག་དང་ཐུན་ཚོད་དང་། །གྲགས་པ་མཆོག་དང་བློ་བཟང་ཆུབ། །ནོར་ལྷ་འོད་སྲུངས་ཐུབ་མི་བཟང་། །སྐར་རྒྱལ་དོན་བྱེད་དང་ནོར་འཁོར། །སེང་གེ་གླང་
དེས་ཡོན་ཏན་བརྒྱན། །རིན་ཆེན་འོད་ས་བྱ་བ་སྟེ། །མཉམ་ཉིད་ཡེ་ཤེས་འཁོར་ལོ་ལ། །གཞུང་ནི་ཚིགས་བཅད་ཉི་ཤུ་བཞི། །མཚན་ནི་བརྒྱ་དང་རྩ་བཞིའོ། །རིགས་རེ་ཉི་ཤུ་ཉི་ཤུ་སྟེ། །ཉི་ཤུ་རྩ་གཅིག་གྲངས་ལྷག་པ། །བཞི་ཕྲག་བཞི་དང་ལྔ་ཕྲག་གཅིག །རིགས་རྣམས་བཞི་དང་གཙོ་བོ་ལ། །གོ་རིམས་བཞིན་དུ་བརྟག་
པར་བྱ། །དེ་ཕྱིར་བརྒྱ་དང་རྩ་བཞིར་ངེས། །དོན་ཡོད་གྲུབ་པའི་དཀྱིལ་འཁོར་ལྷ། །ངེས་པར་སྦྱར་བར་བྱ་བ་ནི། །དབང་བྱེད་རྒྱལ་དང་བདུད་རབ་ཞི། །སངས་རྒྱས་མཉམ་དང་རྟོག་བྲལ་དང་། །དྲི་རབ་ཞི་དང་རྨོངས་ལ་སྟོན། །རོལ་པ་དང་ནི་དགེ་བཟང་པོ། །ཡེ་ཤེས་ཐུགས་དང་སྨྲ་བའི་དབང་། །ལྷ་ཆེན་པོ་དང་བློ་གྲོས་བཟང་། །ཚེ་
དཔག་མེད་དང་ཆོས་ཀྱི་སྟོབས། །འཇིག་རྟེན་མཆོག་དང་སྒྲ་གཅན་ཉི། །རྒྱལ་མཚན་གྲོལ་དང་སྨན་པ་མཆོག །མེ་ཏོག་དང་ནི་དགེ་གཙུག་ཕུད། །བདུད་རྩི་འོད་དང་བྱང་སེམས་རྡོར། །རྒྱ་མཚོ་བརྟན་དང་རིན་ཆེན་དཔུང་། །རོལ་པའི་སྟོབས་དང་ཉི་མའི་དཔུང་། །དགའ་བའི་འོད་དང་རིན་ཆེན་དང་། །རྗེས་མཐུན་དཔལ་དང་
སེང་གེ་འགྲོས། །གསུངས་པ་པོ་དང་མེ་ཏོག་སྦྱིན། །གྲོལ་བའི་འོད་དང་པདྨ་དང་། །ཡེ་ཤེས་འོད་དང་རོལ་པའི་བཀོད། །དོན་ཡོད་གནས་དང་བརྟེན་པའི་འོད། །རྒྱལ་མཚན་ཏོག་དང་བདེ་བའི་བསམ། །རྣམ་གྲོལ་རྒྱལ་དང་སེམས་ཚུལ་ཤེས། །རྒྱ་མཚོ་དགའ་དང་རིན་ཆེན་འཛིན། །མི་ཐུབ་པ་དང་འགྲོ་བ་མཉེས། །སྒྲ་

49-1-91a

ཆེན་པོ་དང་དུལ་བ་དང་། །དཀྱིལ་འཁོར་སྔར་གསུངས་ཀུན་ལྷ་དང་། །སྲིད་དྲི་སྤོང་དང་མཆོག་གི་མུ། །ལྷ་མང་སྒྲ་དང་རིན་ཆེན་སྟོབས། །པདྨའི་ཕྱག་དང་དགྲ་ལས་རྒྱལ། །རྟོགས་གྲུབ་དང་ནི་ཡུལ་བཟང་པོ། །མེ་ཏོག་འོད་དང་སེང་གེ་སྒྲ། །ཟླ་བ་སྨྲ་དང་རྡུལ་སྤངས་པ། །མི་གཡོ་བ་དང་བློ་གྲོས་དང་། །བསོད་ནམས་མར་མེ་
དང་རྟོགས་སྒྲ། །གཽ་ཏ་མ་གཟའ་ཡ་ཏོག །གཟི་བརྗིད་སྟོབས་དང་བློ་གནས་གཟུགས། ཟླ་བ་གསང་དང་བྱང་ཡོན་ཏན། །སྟོན་པ་དང་ནི་གཟི་བརྗིད་བཟང་། །ཡེ་ཤེས་གཟི་སྟོབས་དང་དགེའོ། །བརྟེན་པའི་སྟོབས་དང་ལྷ་ཡི་བུ། །རབ་ཞི་བ་དང་ཉི་མའི་ཞལ། །གྲོལ་བའི་འོད་དང་ཚུལ་ཁྲིམས་འོད། །དཀའ་ཐུབ་དང་ནི་རྡུལ་མེད་དང་། །རྒྱ་
མཚོའི་གསུང་དང་མིག་སྨན་དང་། །ཀུན་ལས་རྒྱལ་དང་སེམས་ཅན་འོད། །དྲི་མེད་འོད་དང་དྲན་པ་པོ། །ཞལ་རས་སྡུག་དང་རྒྱལ་མཐའ་ཡས། །བློ་ཡི་མཆོག་དང་དཔུང་རབ་ཞི། །རིན་ཆེན་འོད་དང་ཆོས་དབང་ཕྱུག །སྣ་ཚོགས་ལྷ་ཞེས་བྱ་བའོ། །བྱ་གྲུབ་ཡེ་ཤེས་འཁོར་ལོ་ལ། །ཚིགས་བཅད་བཅོ་ལྔ་གཞུང་ཚད་ཡིན། །མཚན་ནི་
དགུ་བཅུ་རྩ་ལྔ་སྟེ། །རིགས་རེ་རེ་ལ་བཅུ་དགུ་དགུའོ། །སྒྱུ་འཕྲུལ་མངོན་པར་བྱང་ཆུབ་པ། །ཚིག་གི་བདག་པོས་ཚིགས་བཅད་ནས། །ཡ་ཏེ་ན་མའི་མཐར་ཚིག་གསུམ། །མ་ལུས་པ་དང་དེ་བཞིན་དུ། །རྡོ་རྗེ་དབྱིངས་ཀྱི་དཀྱིལ་འཁོར་གྱི། །འདི་ལྟར་སངས་རྒྱས་བཅོམ་ལྡན་ནས། །ཚིག་ཀུན་གསལ་བར་བྱེད་པའི་མཐར། །གཉིས་ཏེ་
ལྔ་ཡིས་སྤྱི་གཙུག་འཁོར། །བྱམས་ཆེན་རང་བཞིན་ཞེས་པ་ནས། །ཐེག་པ་ཆེན་པོའི་ཚུལ་མཆོག་མཐར། །ཚིགས་བཅད་བཞི་དང་བདེ་གཤེགས་ཀྱི། །ཉི་ཤུ་རྩ་ལྔ་འཆང་བ་དང་། །མེ་ལོང་རྡོ་རྗེ་འཇིགས་བྱེད་ནས། །གླང་ཆེན་ཀོ་རློན་ཞེས་པའི་མཐར། །ཚིགས་བཅད་གསུམ་དང་རྐང་གཅིག་སྟེ། །སུམ་ཅུ་རྩ་གཉིས་དཔྲལ་འཁོར་ལོ། །
རྡོ་རྗེ་དབྱིངས་ཀྱི་དུམ་བུ་ཡི། །མཆོད་པ་ཆེན་པོ་ཆགས་ཆེ་ནས། །སྨོན་ལམ་ཡེ་ཤེས་རྒྱ་མཚོའི་མཐར། །ཚིགས་བཅད་བརྒྱད་ཀྱིས་སྙིང་འཁོར་ལོ། །མེ་ལོང་ལྟ་བུའི་ཡེ་ཤེས། །གྲགས་ཆེན་ཧ་ཧ་ཞེས་སྒྲོགས་ནས། །སྒྲ་དང་ལྡན་མཐར་ཚིགས་བཅད་བདུན། །ལྟེ་བའི་འཁོར་ལོའི་ཚིག་ཏུ་འགྱུར། །སོ་སོར་རྟོག་པའི་ཡེ་ཤེས་
ཀྱི། བཞི་བཅུ་རྩ་གཉིས་འཆང་བ་དང་། །མཉམ་ཉིད་ཡེ་ཤེས་དཀྱིལ་འཁོར་གྱི། །འདོད་པའི་དོན་གྲུབ་དམ་པ་ནས། །རྣམ་པ་ཀུན་རིག་སངས་རྒྱས་པར། །ཚིགས་སུ་བཅད་པ་བཅོ་ལྔ་སྟེ། །སྤྱི་སྡོམ་དྲུག་ཅུ་རྩ་བཞི་ཡིས། །ལྟེ་བའི་འཁོར་ལོར་རབ་ཏུ་གྲགས། །མཉམ་ཉིད་ཡེ་ཤེས་དགུ་ལུས་པའི། །སངས་རྒྱས་ཀུན་གྱི་སྤྲུལ་

49-1-91b

སྐུ་ནས། །སངས་རྒྱས་ཀུན་གྱི་རང་བཞིན་མཐར། །བརྒྱད་ནི་མགྲིན་པའི་འཁོར་ལོར་བཞེད། །བྱ་བ་གྲུབ་པའི་ཡེ་ཤེས་ཀྱི། །ཚིགས་བཅད་བཅོ་ལྔ་ཚང་བ་ལ། །མཉམ་ཉིད་ཐ་མའི་ཚིག་བསྣན་པས། །བཅུ་དྲུག་གསུང་བའི་འཁོར་ལོའོ། །སྒྱུ་འཕྲུལ་མངོན་པར་བྱང་ཆུབ་དང་། །རྡོ་རྗེ་དབྱིངས་དང་དེ་བཞིན་གཤེགས། །རྡོ་རྗེའི་
རིགས་དང་པདྨའི་རིགས། །རིན་པོ་ཆེ་དང་ལས་རིགས་བདུན། །ཚིགས་བཅད་བརྒྱ་དང་སུམ་ཅུ་གསུམ། །ནང་གི་འཁོར་ལོ་དྲུག་པའོ། །འདབ་གྲངས་ཚིགས་བཅད་གྲངས་ཀྱང་མཉམ། །ཚིག་གཅིག་ལྷག་པ་ལྟེ་བར་བརྟགས། །ཀུན་གྱི་ལྟེ་བར་དེ་འགྱུར་བརྟགས། །གནས་ལུགས་གོང་དུ་བསྟན་པ་ཡིན། །ལས་སུ་བྱ་
བའི་འཁྲུལ་འཁོར་ཡང་། །རྒ་ནང་གི་འཁོར་ལོ་ཇི་བཞིན་དུ། །འཁོར་ལོ་ཟླུམ་པོ་རིམ་པ་དྲུག །དང་པོ་འདབ་བདེ་གཉིས་པ་བརྒྱད། །རིམ་པ་གསུམ་ལ་བཅུ་དྲུག་སྟེ། །བཞི་པ་སུམ་ཅུ་རྩ་གཉིས་པོ། །ལྔ་པ་དྲུག་ཅུ་རྩ་བཞིའོ། །དྲུག་པ་ཡང་ནི་སུམ་ཅུ་གཉིས། །ཤྲི་ཁ་དྷ་སོགས་ཀྱི་ནི་བྲིས། །དབུས་སུ་བསྒྲུབ་བྱའི་མིང་
བཞག་ལ། །ཤར་དུ་ཨཿདང་བྱང་དུ་ཨཱཿ། །ནུབ་ཏུ་ཨཿདང་ལྷོ་རུ་ཨཱཿ། །དེ་ཡི་ཕྱི་རོལ་འདབ་བརྒྱད་ལ། །ཤར་དུ་ཨི་དང་ཤར་ལྷོར་ཨཱི། །ལྷོ་རུ་རྀ་དང་ལྷོ་ནུབ་རཱུ། །ནུབ་ཏུ་ལ་དང་ནུབ་བྱང་ལཱྀ། །བྱང་དུ་ཨུ་དང་བྱང་ཤར་ཨཱུ། །དེ་ཡི་ཕྱི་རོལ་འཁོར་ལོ་ནི། །གསུམ་པའི་འདབ་མ་བཅུ་དྲུག་ལ། །ཤར་དུ་ཨེ་ཨཻ་ཤར་ལྷོར་ཡང་། །ཡཾ་ཡཾ་
དེ་བཞིན་ལྷོ་རུ་ནི། །ཨར་ཨཱར་རཱ་བདེན་བྲལ་གཉིས། །ནུབ་ཀྱི་གཉིས་ལ་ཨ་ཨཱ་ལ་ལཱ། །ནུབ་བྱང་ལ་ལཱ་བྱང་དུ་ཨོ་ཨོ། །བྱང་ཤར་རྩིབས་གཉིས་ཝཾ་ཝཾའོ། །རིམ་པ་བཞི་པ་སུམ་ཅུ་གཉིས། །ཤར་གྱི་རྩིབས་ལ་ཙ་སྡེ་ལྔ། །ལྷོའི་རྩིབས་ལ་ཊ་སྡེ་ལྔ། །ནུབ་ཀྱི་འདབ་མ་ཏ་སྡེ་ལྔ། །བྱང་གི་འདབ་མར་པ་སྡེ་ལྔ། །
བྱང་ཤར་མཚམས་ཀྱི་འདབ་གསུམ་ལ། །ཀ་ཁ་ག་ང་ལེགས་པར་དགོད། །ཤར་ལྷོ་མཚམས་སུ་གྷ་ད་ཀྵ། །ལྷོ་ནུབ་མཚམས་ན་ན་ཐཱཥྚ། །ནུབ་བྱང་མཚམས་ན་ཤ་ཐཱ་ཧ། །དེ་ཡི་ཕྱི་རོལ་འདབ་མ་ནི། །དྲུག་ཅུ་རྩ་བཞི་པ་དེ་ལ། །ཕྱོགས་བཞིར་བསྒྲུབ་བྱའི་མིང་བཞི་བྲི། །ཤར་གྱི་འདབ་མ་བཅུ་གཉིས་ལ། །ཡ་ཡཱ་
ཡི་ཡཱི་ཡྲྀ་ཡྲྀ་དྲུག །ཡུ་ཡཱུ་ཡླྀ་ཡླཱྀ་ཡཾ་ཡཾ་དྲུག །དེ་ལྟར་བཅུ་གཉིས་དགོད་པར་བྱ། །དེ་ནས་ལྷོ་ཡི་བཅུ་གཉིས་ལ། །ར་རཱ་རི་རཱི་རྀ་རཱྀ་དྲུག །རུ་རཱུ་རླྀ་ཪླཱྀ་རཾ་ར་སྟེ། །དེ་ལྟར་བཅུ་གཉིས་དགོད་པར་བྱ། །ནུབ་ཀྱི་འདབ་མ་བཅུ་གཉིས་ལ། །ལ་ལཱ་ལི་ལཱི་ལྼྀ་ལྼཱྀ་དང་། །ལུ་ལཱུ་ལླྀ་ལླཱྀ་ལཾ་ལ་དྲུག །དེ་ལྟར་བཅུ་གཉིས་དགོད་པར་བྱ། །བྱང་གི་

49-1-92a

འདབ་མ་བཅུ་གཉིས་ལ། །ཝ་ཝཱ་ཝི་ཝཱི་ཝྼྀ་ཝྼཱྀ་དང་། །ཝུ་ཝཱུ་ཝླྀ་ཝླྀ་ཝཾ་ཝ་དྲུག །དེ་ལྟར་བཅུ་གཉིས་ལེགས་པར་བྲིས། །ཕྱོགས་ཀྱི་བསྒྲུབ་བྱའི་མིང་བཞི་དང་། །ལྷན་ཅིག་ཤར་དུ་ཧ་བྲི་སྟེ། །ནུབ་ཏུའང་ཧ་སྟེ་བྱང་དུ་ཏཱཾ། །ལྷོ་རུ་ཧཱཿནི་ཚེག་དྲག་ཅན། །ཧི་ཧཱི་ཤར་སྟོད་གཡོན་སྐོར་དུ། །
ཧྲྀ་ཧྲཱྀ་ལྷོ་སྟོད་མེ་མཚམས་སུ། །ཧླྀ་ཧླཱྀ་ནུབ་སྟོད་བདེན་བྲལ་དྲུག །ཧུ་ཧཱུ་བྱང་སྟོད་རླུང་མཚམས་སུ། །ཧཱུཾ་ནི་ཤར་དུ་ཨཱཿནི་ལྷོར། །ཧོ་ནི་ནུབ་སྟེ་ཨོཾ་ནི་བྱང་། །དེ་ལྟར་ཡི་གེ་བཞི་པོ་ཡང་། །བསྒྲུབ་བྱའི་མིང་དང་ལྷན་ཅིག་ཏུའོ། །དབུས་ཀྱི་མིང་དང་ལྷན་ཅིག་ཏུ། །ཧཱུཾ་གཅིག་ལེགས་པར་བྲི་བར་བྱ། །དེ་ཡི་
ཕྱི་རོལ་རིམ་དྲུག་པ། །འདབ་མ་སུམ་ཅུ་རྩ་གཉིས་ལ། །ཤར་ནས་བརྩམས་ནས་གཡོན་སྐོར་དུ། །ཕྱོགས་མཚམས་བརྒྱད་ཀྱི་བཞི་བཞི་ལ། །བཛྲ་ཏིཀྵྞ་ཞེས་པ་ནས། །ཡ་ཏེ་ན་མཿཞེས་པའི་མཐར། །རིམ་པ་བཞིན་དུ་གཡས་སྐོར་དུ། །ཡི་གེ་བཞི་བཞི་དགོད་པར་བྱ། །དེ་ཡི་ཕྱི་རོལ་ལས་
ཀྱི་ནི། །དབྱེ་བས་འབྱུང་བ་བཞི་རྣམས་ཀྱི། །ཡི་གེ་ཡ་ར་ཝཾ་ལ་ཡིས། །བསྐོར་བ་འཁྲུལ་འཁོར་འཁོར་ལོ་སྟེ། །ཞུས་ནས་བྱ་གྲུབ་འཁོར་ལོའི་མཐར། །སྤྱི་དོན་བཅུ་བཞིའི་ཚིག་གྲངས་དང་། །བརྒྱ་དང་ལྔ་བཅུ་རྩ་བདུན་མཉམ། །ཚིག་གཅིག་ལྷག་པ་ལྟེ་བར་བརྟག །བསྟོད་པའི་རིམ་པར་ཕྱེ་བ་ལ། །
ཚིག་རྐང་ཉི་ཤུ་ཚིགས་བཅད་ལྔ། །མེ་ལོང་ཆོས་དབྱིངས་སོ་སོར་རྟོག །མཉམ་ཉིད་བྱ་གྲུབ་གོ་རིམས་བཞིན། །བྱང་སེམས་རྡོ་རྗེའི་འཁོར་ལོ་ལ། །ཚིགས་བཅད་ལྔ་པོ་ཀུན་གྱིས་བསྟོད། །ལྷག་མ་འཁོར་ལོ་ལྔ་ལ་ནི། །སྔར་སྨོས་ཡེ་ཤེས་ལྔ་དང་ནི། །འདུད་ཀྱི་ཚིགས་བཅད་རེ་རེ་དང་། །སྦྱར་ཞིང་
སོ་སོར་བསྟོད་པར་བྱ། །རིགས་ཀུན་བསྡུས་པའི་འཁོར་ལོ་ལ། །དང་པོའི་སྒོ་ནས་ཀུན་གྱིས་བསྟོད། །ལྷག་མ་སྒོ་རྣམས་སོ་སོ་ལ། །ཚིགས་བཅད་ཡེ་ཤེས་བསྟུན་ཞིང་བསྟོད། །གསང་བ་ལུས་ཀྱི་འཁོར་ལོ་ལ། །བསྟོད་པ་དག་དང་ཡེ་ཤེས་སུ། །སྦྱར་ཏེ་དང་པོ་འདུད་བཞིའོ། །མཆོག་གི་
དགའ་བཞི་མེ་ལོང་ངོ་། །ལྷག་མ་བཞི་ཚིག་བཅུ་དྲུག་གོ། །དགའ་བ་བཅུ་དྲུག་རིམ་པ་བཞིན། །ཆོས་དབྱིངས་ཀུན་རྟོག་མཉམ་ཉིད་དང་། །བྱ་གྲུབ་རིམ་གཞིན་འདུད་བཞི་བཞི། །ནང་གི་རྒྱས་བཤད་འདིར་མ་བྱས། །གསང་བའི་ཕྱིར་དང་མདོར་བསྡུས་ཕྱིར། །ཕན་ཡོན་བརྗོད་པའི་

49-1-92b

གཞུང་ཚད་ནི། །བརྒྱ་དང་ལྔ་བཅུར་ཤེས་པར་བྱ། །ལག་ན་རྡོ་རྗེ་རྡོ་རྗེ་འཆང་། །ཞེས་པ་པོས་ནས་གསུངས་བདུན་ལ། །དང་པོ་གཉིས་ཀྱི་འཁོར་ལོ་ནི། །དང་པོ་ཡི་ནི་ཕན་ཡོན་བསྟན། །ལྷག་མ་བཞི་ནི་འཁོར་ལོ་བཞིའི། །རིམ་པ་བཞིན་དུ་ཕན་ཡོན་ཡིན། །ཞེས་པ་རང་ལ་བསྡུས་ཕན་ཡོན། །ཡང་ན་
ཀློག་སེམས་ལ་སོགས་སོ། །གསང་སྔགས་རིམ་པར་དབྱེ་བ་ཡིས། །གཞུང་ཚད་ཚིགས་བཅད་བྱེད་དང་བཞི། །དེ་ལ་དབྱེ་ན་རྣམ་གཉིས་ཏེ། །ཨོཾ་ཞེས་པ་ནས་ཨཾ་ཨཿའི་མཐར། །རྩ་བའི་སྔགས་སུ་ཤེས་པར་བྱ། །པྲ་ཀྲྀ་ཏི་ནས་ཨ་ཡི་མཐར། །ཕྲེང་བའི་སྔགས་ཞེས་བྱ་བ་ཡིན། །སྙིང་པོ་ལ་སོགས་སྔགས་ཀུན་ལ། །ཐུན་མོང་མིང་
ནི་རྣམ་བཞི་སྟེ། །མགོ་མེད་མཐའ་མེད་བསྡུས་པ་སྤྲུལ། །འདི་ནི་མཐའ་མེད་ཅེས་བྱ་ཡིན། །སྐུ་ཀུན་བསྐྱེད་པའི་སྔོན་དུ་ནི། །བཟླས་དང་རྒྱུན་དུ་བཟླས་པ་དང་། །འཁོར་ལོ་དགོད་པར་བྱ་བ་དང་། །བྱ་བ་ཐམས་ཅད་འདིས་བྱེད་དེ། །སངས་རྒྱས་མཛད་པ་ཀུན་བྱེད་ཕྱིར། །བསྡུས་པའི་ཚིགས་སུ་བཅད་པ་ལ། །ཚིག་རྐང་ཉི་ཤུ་ཚིགས་བཅད་ལྔ། །
བདེ་གཤེགས་རྣམས་ཀྱི་དྲི་མེད་ཤེས་རབ་སྐུ། །འཇམ་དབྱངས་མཚན་གསོལ་ཟབ་ཅིང་རྒྱ་ཆེ་བ། །དེས་ལུང་མི་འགལ་བླ་མས་མན་ངག་རྒྱུད། །དེ་ལ་བརྟེན་ནས་བདག་དོན་ཙམ་བརྩམས་ཏེ། །བཤད་མཛད་དགོངས་འགྲེལ་བདག་གིས་འགལ་བ་མེད། །ཉེས་པ་ཅི་མཐོང་བདག་བློ་དཔྱད་པའི་རིགས། །བདག་པས་དམན་ལ་ཕན་པ་འགའ་
སྲིད་ན། །དགེ་དེས་འགྲོ་ཀུན་མཚན་མཆོག་རྟོགས་གྱུར་ཅིག།།      །།འཇམ་དཔལ་སྒྱུ་འཕྲུལ་དྲ་བ་ཁྲི་དྲུག་སྟོང་པ་ཏིང་ངེ་འཛིན་དྲ་བའི་ལེའུ་ལས། འཕགས་པ་མཚན་ཡང་དག་པར་བརྗོད་པ་ཕན་ཡོན་དང་བཅས་པའི་བཤད་པ། ནོར་བུའི་གླིང་དུ་སྐུ་འཁྲུངས་པ་དཔལ་ལྡན་བྱང་ཆུབ་མཆོག་གི་སྐལ་བ་ཅན། དཔལ་སྣ་ཚོགས་
གཟུགས་ཀྱིས་མཛད་པའི་འགྲེལ་པ། སྔགས་དོན་རྣམ་པར་གཟིགས་པ་དང་། དེའི་རྗེས་སུ་འབྲངས་པའི་སློབ་དཔོན་ཆེན་པོ་གཉིས་མེད་རྡོ་རྗེས་མཛད་པ། ཉེ་བར་བསྡུས་པའི་རྣམ་པར་རྟོག་གེ་དང་སྦྱར་བའི་བསྡུས་དོན་མཚན་གྱི་སྒྲོན་མ་ཞེས་བྱ་བ་རྫོགས་སོ།།      །།པྲཛྙཱ་གུ་རུས་མཛད་དོ།།      །།
༄༅༅། །རྒྱ་གར་སྐད་དུ། ཨཱརྱ་ཛྙཱ་ན་སཏྭ་མཉྫུ་ཤྲཱི་ནོ་པི་ཀ་ནཱ་མ། བོད་སྐད་དུ། འཕགས་པ་འཇམ་དཔལ་ཡེ་ཤེས་སེམས་དཔའི་མངོན་པར་རྟོགས་པ་ཞེས་བྱ་བ། འཕགས་པ་འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །སངས་རྒྱས་ཀུན་གྱི་མེས་པོ་ནི། །སྐུ་གསུང་ཐུགས་ཀྱི་རྡོ་རྗེ་ཅན། །འཇམ་

49-1-93a

དཔལ་ཡེ་ཤེས་སེམས་དཔའ་ནི། །རྒྱལ་བ་ཀུན་གྱི་ཡབ་གྱུར་ཏེ། །འཁོར་ལོས་སྒྱུར་བཅས་ཐམས་ཅད་ཀྱིས། །རང་གི་རིགས་ལ་བསྟོད་བྱས་ཏེ། །བསྐྱེད་པའི་རིམ་ལས་རྫོགས་འགྱུར་བའི། །བརྗོད་དང་ངེས་བརྗོད་བཤད་པར་བྱ། །ཐོག་མར་བསམ་གཏན་པས་དབེན་ཞིང་ཉམས་
དགའ་བའི་ས་ཕྱོགས་སུ་ཅུང་ཞིག་བློ་བདེ་བར་གནས་ཏེ་སེམས་བསྐྱེད་པར་བྱའོ། །དེ་ནས་རང་གི་སྙིང་གར་ས་བོན་གྱི་ཡི་གེ་གཟི་བརྗིད་དང་ལྡན་པས་འགྲོ་བ་མ་ལུས་པ་སྦྱངས་ཤིང་དག་པར་ཡིད་ཀྱིས་བལྟས་ཏེ། དབྱངས་ཀྱི་ཡི་གེས་བསྟོད་ལ་རྗེས་སུ་བྱ་བ་ཉིད་ཀྱིས་གཞུག་ཅིང་རྣམ་པར་བསྒོམ་པར་བྱའོ། །
དེ་ནས་འཇམ་དཔལ་ཡེ་ཤེས་སེམས་དཔའ་འགྲོ་བའི་བླ་མ་དང་ལྡན་པ་སྤྱན་དྲངས་ཏེ། འདུད་ཉི་ཤུས་བསྟོད་པར་བྱའོ། །དེ་ནས་སྔགས་ཀྱི་ཕྲེང་བ་ལན་བདུན་དུ་བླངས་ཏེ། མེ་ཏོག་གི་མཆོད་པས་སངས་རྒྱས་ཀྱི་དབང་བསྐུར་བ་མི་བཟད་པ་གནང་བས་བྱིན་གྱིས་བརླབས་པའི་སེམས་མི་གཡོ་བར་བྱའོ། །
དེ་ནས་ཡང་ཨཱ་ལིས་སྦྱངས་ཏེ། འོད་ཟེར་རྣོན་པོ་ཅན་དང་ལྡན་པའི་བསྲུང་བའི་འཁོར་ལོ་བྱའོ། །དེའི་དཀྱིལ་དུ་སྣ་ཚོགས་པའི་པདྨ་ཤེས་རབ་དང་ཐབས་ཡང་དག་པར་འདུས་པའི་བློ་གྲོས་ཆེན་པོ་ཡེ་ཤིས་ཀྱིས་མཚན་པའི་ས་བོན་ལས་སྔར་གྱི་བདེ་བར་གཤེགས་པ་བླ་མ་དང་ལྡན་པའི་ཚོགས་ཇི་སྙེད་པ་བཅུག་
སྟེ། དེ་དག་ལས་སྐྱེས་པའི་འཇམ་དཔལ་ཡེ་ཤེས་སེམས་དཔའ་ནི་ཞལ་གསུམ་པ་ཕྱག་དྲུག་པ། རྡོ་རྗེ་སྐྱིལ་མོ་ཀྲུང་ལས་ཅུང་ཞིག་འགྱིང་བ། དཀར་བ་དང་སྔོ་ཞིང་དམར་བ་དང་། དམར་ཞིང་དཀར་བའི་མདོག་ཅན་ཉི་མ་དང་། ཟླ་བ་དང་། ཨུཏྤལ་བློ་གྲོས་ཆེན་པོས་མཚན་པ་དང་། ཟླ་བ་དང་། 
གཞུ་དང་། ཨུཏྤལ་རྩ་བ་དང་ལྡན་པ་ཡེ་ཤེས་ཆེན་པོས་མཚན་པའི་ཕྱག་རྒྱ་ཅན། ཁྲོ་བ་དང་ཞི་བ་མཉམ་པའི་ཉམས་མངའ་བ། རིན་པོ་ཆེའི་རྒྱན་རྣམ་པ་སྣ་ཚོགས་པས་སྤྲས་པ། ཟླ་བ་རྒྱས་པ་ལྟ་བུ་བསྒོམ་པར་བྱའོ། །དེ་ནས་རང་གི་སྙིང་གའི་ས་བོན་གྱིས་འཇམ་དཔལ་ཡེ་ཤེས་སེམས་
དཔའ་འམ། དཀྱིལ་འཁོར་གྱི་འཁོར་ལོ་ཆེན་པོ་སྤྱན་དྲངས་ཏེ། ཡང་བསྟོད་ནས་རབ་ཏུ་གནས་པ་དང་། དབང་བསྐུར་བ་དང་། བྱིན་གྱིས་བརླབས་པ་ནི་དེ་ཉིད་ལས་ཡོངས་སུ་རྫོགས་པར་བྱའོ། །དེ་ནས་ཡང་སངས་རྒྱས་ཐམས་ཅད་ཀྱི་སྣང་བ་ཐོབ་ནས། མཚན་ཡང་དག་པར་བརྗོད་པའི་བསྟོད་པ་བྱའོ། །དེ་དག་

49-1-93b

ནི་བརྗོད་པའོ། །ཡང་སྐད་ཅིག་གིས་འཇམ་དཔལ་ཡེ་ཤེས་སེམས་དཔར་དམིགས་ཏེ། རང་གི་ས་བོན་ལས་སྤྱན་དྲངས་ནས། ཨ་དང་རེ་ཕ་ལས་གྱུར་པའི་ཤེས་རབ་དང་ཐབས་འདུས་བྱས་པའི་དབུས་སུ་ཡི་གེ་མུ་དམར་སེར་གྱིས་འགྲོ་བ་སྦྱངས་ནས། གཅིག་ཏུ་གྱུར་པའི་བཅོམ་ལྡན་འདས་ནམ་མཁའི་ཁམས་སུ་བཞུགས་སུ་གསོལ་ཏེ།
སྟེགས་བུ་དྲི་ཞིམ་པ་རིན་པོ་ཆེའམ། མེ་ཏོག་གིས་གཅལ་བཀྲམ་པའི་སྟེང་དུ་གླེགས་བམ་བཞག་ལ། སརྫ་རརྫ་ལ་སོགས་པ་བཏུལ་ཏེ། ལྐོག་མ་སྦྱང་བ་བྱས་ནས། མཚན་ཡང་དག་པར་བརྗོད་པ་བཀླག་པར་བྱའོ། །དེ་ནས་ཡན་ལག་བདུན་པ་བྱས་ལ། ཡང་སྔར་བཞིན་སངས་རྒྱས་ཐམས་ཅད་ཀྱི་དབང་བསྐུར་བ་རིན་པོ་ཆེ་ཐོབ་
ནས། ལྷན་ཅིག་སྐྱེས་པའི་རྣལ་འབྱོར་ལ་གནས་པར་བྱའོ། །འདི་དག་གི་རྣལ་འབྱོར་ནི་ཞལ་གསུམ་དཀར་ཞིང་ཞི་བ་དང་། ཕྱག་བཞི་པ་ཉི་མ་དང་ཟླ་བ་ཡངས་པའོ། །ཡིད་ལ་མི་བྱེད་པའི་རྣལ་འབྱོར་གླེགས་བམ་གྱི་གོ་འཕང་དང་ལྡན་པ་རྣམས་ཀྱིས་ནི་བྲག་ཅ་ལྟ་བུའི་ཁ་ཏོན་བྱ་སྟེ། ངེས་པར་བརྗོད་པའོ། །བདག་
གིས་མངོན་པར་རྟོགས་པ་འདིས། །བླུན་པོ་རྣམས་ནི་བློ་འཕེལ་ཞིང་། །བློ་གྲོས་ཅན་རྣམས་བདེ་རྙེད་ནས། །ཡེ་ཤེས་སེམས་དཔའི་གནས་འགྱུར་ཤོག །རིན་ཆེན་རྒྱུད་རྒྱལ་འདི་ནི་ས་ཕྱོགས་གང་ན་གནས་པ་དང་། །འདོན་ཅིང་ཀློག་པར་བྱེད་པའི་སྐྱེས་བུ་དེ་ཉིད་ནི། །ཡིད་བཞིན་ནོར་བུ་བརྒྱ་བྱིན་གཙུག་ན་གནས་པ་
བཞིན། །བདུད་རྣམས་ཟིལ་གནོན་འཇིགས་པ་ཐམས་ཅད་བདེ་བར་འགྱུར། །འཕགས་པ་འཇམ་དཔལ་ཡེ་ཤེས་སེམས་དཔའི་མངོན་པར་རྟོགས་པ་ཞེས་བྱ་བ། རྒྱ་གར་གྱི་མཁན་པོ་དཔལ་ལྡན་གཉིས་སུ་མེད་པའི་རྡོ་རྗེས་མཛད་པ། རྣལ་འབྱོར་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།།      །།
༄༅༅། །རྒྱ་གར་སྐད་དུ། ཛྷཱ་ན་སཏྭ་མཉྫུ་ཤྲཱི་ན་བི་མ་ལ་རཏྣ་མུ་དྲ་བི་དྷི་ནཱ་མ། བོད་སྐད་དུ། འཇམ་དཔལ་ཡེ་ཤེས་སེམས་དཔའི་རིན་པོ་ཆེའི་ཕྱག་རྒྱ་དྲི་མ་མེད་པའི་ཆོ་ག་ཞེས་བྱ་བ། འཕགས་པ་འཇམ་དཔལ་ཡེ་ཤེས་སེམས་དཔའ་ཆེན་པོ་ལ་ཕྱག་འཚལ་ལོ། །བདག་བློ་ཡངས་ལྡན་ཆོ་ག་རྫོགས་པ་དང་། །དྲིན་ལྡན་
མཉེས་གཤིན་བྱང་ཆུབ་སེམས་དཔའ་དེས། །རྩོད་དུས་རྐྱེན་དབང་ཤེས་རབ་ཉམ་ཆུང་ལ། །རྒྱུད་ཀྱི་རིན་ཆེན་ཕྱག་རྒྱ་བཏུད་དེ་བཤད། །སྙིང་རྗེ་ཆེ་དང་ཆེན་པོར་ལྡན། །བརྩེ་བས་དོན་བྱེད་སྐྱོ་བ་མེད། །སྤོབས་པ་ཆེ་ཞིང་ཕན་བླར་ལྡན། །ངང་ཚུལ་བཟང་ཞིང་སྐྱོ་བར་བཟོད། །ཤེས་རབ་ཆེ་ཞིང་ནུས་པ་ཡོད། །རྩོད་

49-1-94a

དང་ཚིག་གི་སྦྱོར་སྡེབ་མཁས། །དཔའ་ཞིང་རྟུལ་ཕོད་བརྩོན་འགྲུས་ཆེ། །བཀས་བསྒོ་བ་ལ་དྲིང་མི་འཇོག །དད་དང་ཤེས་རབ་གཙོ་བོར་གནས། །བླ་མའི་བརྒྱུད་ཐབས་སྲོག་བཞིན་སྲུང་། །ཡིད་ལ་མི་བྱེད་དོན་བསྟན་ན། །པདྨའི་མདངས་འཕྲོ་གནས་ལས་ལྡོག །དམ་ཚིག་གསུམ་ནི་མིག་བཞིན་
དུ། །སྲུང་བྱེད་རིན་ཆེན་ཕྱག་རྒྱའི་སྣོད། །དེ་ལ་འཇམ་དཔལ་ཡེ་ཤེས་སེམས་དཔའི་མཚན་ཐོས་པ་ཙམ་གྱིས་ཡིད་ལ་མོས་པར་འགྱུར་བའི་སྐྱེས་བུ་དེས་ནི་གྲུབ་པའི་ཚེགས་ཆུང་ངུས་བདག་གིས་བྱེད་པར་འགྱུར་རོ། །དེ་ཡང་བསམ་གཏན་གྱི་ཁང་པར་ཡིད་དུ་འོང་བའི་རས་རིས་ཀྱི་མདུན་དུ་གླེགས་
བམ་རབ་ཏུ་གནས་པར་བྱས་ཏེ་བཞག་ལ། དེ་དང་ཉེ་བར་ཙནྡན་དཀར་པོས་བྱུགས་པའི་མཎྜལ་ཁྲུ་གང་བ་གྲུ་བཞི་པའི་སྟེང་དུ་མེ་ཏོག་གི་ཚོམ་བུས་མཆོད་ལ། ཙནྡན་གྱི་བདར་བུ་དང་། མེ་ཏོག་དཀར་པོ་སྙིམ་པ་གང་ཐོགས་ཏེ། འཕགས་པ་འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །
ཡེ་ཤེས་སེམས་དཔའ་ཆེན་པོ་མཆོག་ཉིད་ལ་ཕྱག་འཚལ་ལོ། །མཚན་གྱི་འཁོར་ལོ་ཐམས་ཅད་ལ་ཕྱག་འཚལ་ལོ། །བདག་གི་རྣམ་པར་ཤེས་པའི་ཚོགས་ཐམས་ཅད་དང་ཡང་དག་པའི་དོན་གྱི་རྣལ་འབྱོར་དུ་མཛད་དུ་གསོལ་ཞེས་ལན་ཉི་ཤུ་རྩ་གཅིག་ཏུ་བརྗོད་ལ། མེ་ཏོག་དཀར་པོའི་ཕྲེང་བ་མགོ་
ལ་བཅིངས་ཏེ། ཙནྡན་སེན་རྩེ་དང་། ཏིལ་མར་ལ་བདར་བའི་ཆུ་མིག་ལ་བྱུགས་ལ། རྨི་ལམ་བརྟག་པའི་ལྟས་ཀྱང་ཤེས་པར་བྱའོ། །དེ་ནས་ཐོ་རངས་ཅི་རིགས་པའི་རྣལ་འབྱོར་དུ་གནས་ཏེ། སློབ་མ་རྟགས་དང་རྨི་ལམ་གྱིས་ཤེས་པར་ཡོ་བྱད་ཀྱིས་སྤྲས་ནས་ཉེ་བ་དང་ལྷའི་མཎྜལ་དང་། སེམས་བསྐྱེད་པ་རིན་པོ་
ཆེའི་ཕྱག་རྒྱའི་ཡོན་ཕུལ་ཏེ། ཚུལ་དང་མཐུན་པའི་གནས་ལ། ཨོཾ་ཀྱེ་ཀྱེ་ཀྱེ་ཡེ་ཤིས་སེམས་དང་ཞི་བ་རབ་མཛེས་སྐུ། །ཁྱོད་ཐུགས་བསྐྱེད་པ་འགྲོ་ལ་སྨན་པའི་གཙོ། །འཁོར་ལོའི་ཕྱག་རྒྱས་གཏི་མུག་དྲལ་མཛད་ཅིང་། །མེ་ལོང་ལྟ་བུའི་མཚན་བསྟོད་ཐུགས་ཆུད་ལྟར། །སེམས་བསྐྱེད་ལ་མོས་
བདེ་གཤེགས་རིགས་འགྱུར་དག །འགྲོ་བ་རྣམས་ཀྱི་སྐུ་ཡི་གདུལ་བྱའི་ཕྱིར། །བདེ་གཤེགས་རིགས་ཀྱི་སེམས་བསྐྱེད་གཟུང་བར་བགྱི། །དཀྱིལ་འཁོར་འཁོར་ལོ་བདག་བྱིན་བརླབ་ཏུ་གསོལ། །ཞེས་ལན་གསུམ་དང་གསུམ་གསུམ་དུ་བརྗོད་པ་ནི་དབང་པོ་དང་ཤེས་པའི་བྱེ་བྲག་གིས་ཤེས་

49-1-94b

པར་བྱའོ། །ཕྱག་རྒྱའི་བྱེ་བྲག་ནི་མན་ངག་གིས་སོ། །དེ་ནས་ཚེས་གཅིག་ནས་ཉེ་བར་བཟུང་སྟེ། རྣལ་འབྱོར་པས་རང་གི་སྤྱོད་པ་བཅུ་ལ་ཞུགས་ནས། ལྷའི་བསྒྲུབ་པ་ལྡན་པའི་མཚན་ཡང་དག་པར་བརྗོད་པའི་བསྙེན་པ་ཇི་སྲིད་སྤྲོའི་བར་བྱའོ། །ཐུན་མཚམས་དང་ཀློ་བུར་གྱི་ལས་
ནི་མཁས་པ་དག་གིས་ཅི་རིགས་པར་སྦྱར་རོ། །པཎྜི་ཏ་དང་། རྒྱལ་པོ་དང་། བློན་པོ་ཆེན་པོ་དང་། དམག་དཔོན་དང་། བྲམ་ཟེ་སྒོ་བ་དང་། གྲོང་དུ་འཇུག་པ་དང་། དོན་གཉེར་བ་ལ་སོགས་པའི་ཚོགས་ན་གནས་པ་རྣམས་ཀྱིས་ནི་དྲན་པ་གཅིག་པའི་བྱིན་གྱིས་བརླབས་པ་ཙམ་ལ་ཅི་
རིགས་པས་བསྟོད་དེ། བདག་དང་འགྲོ་བ་སྦྱང་ཙམ་བྱའོ། །ཚེ་ལ་སོགས་པའི་སྦྱོར་བ་འཕེལ་བ་དང་། །འདིར་གསུངས་ཡོན་ཏན་རྣམས་ནི་འགྲུབ་པར་འགྱུར། །ལྷ་དང་མི་ཡི་མཆོག་གྱུར་གཙོ་བོ་བཞིན། །ལོ་ཀ་དག་ལས་ལྷག་པའི་གནས་སུ་འགྲོ། །མུན་ནག་མཐུག་པོ་
དག་གིས་དཀྲིས་པ་རྣམས། །ཟད་འགྱུར་དྲི་མ་མེད་པའི་འོད་ཟེར་སྤུང་། །པདྨའི་རྩ་བར་རྩི་ཡིས་མཆོག་གནས་གང་། །གྷ་ཏྲ་ཤིང་གི་འདབ་མས་ལེན་བཞིན་དུ། །བསྐལ་པའི་གྲངས་ལ་རག་ལས་མི་འགྱུར་བར། །མི་ཡི་ཚེ་འདི་ཉིད་ཀྱིས་འདོད་བཞིན་ཐོབ། །ཡང་
དག་མཚན་འདིའི་སྒོ་ལ་དད་པ་གང་། །དེ་ཡི་མཚམས་མེད་ལྔ་ཡང་སྐད་ཅིག་དེས། །དག་ན་འདོན་དང་ཀློག་པ་སྨོས་ཅི་དགོས། །རི་ཁྲོད་མགོན་པོ་ལས་ཐོབ་པའི། །རྒྱུད་ཀྱི་རིན་ཆེན་ཕྱག་རྒྱ་འདི། །སྒྱུ་འཕྲུལ་དྲ་བའི་ཏིང་ངེ་འཛིན། །སྐྱེ་བའི་རིམ་འབྱུང་བྱམས་པས་བྱས། །
རིགས་གང་རིགས་ཀྱི་ལྷ་ལས་ནི། །དངོས་གྲུབ་ཐོགས་མེད་ཐོབ་གྱུར་ཅིག །ནམ་མཁས་གར་ཁྱབ་ལོ་ཀ་འགྲོ་བ་རྣམས། །མ་རིག་ཕྱག་རྒྱས་རབ་ཏུ་བཅིངས་གྱུར་པ། །བློ་གྲོས་ཆེན་པོའི་ཕྱག་རྒྱས་བཅད་ནས་ཀྱང་། །འཇམ་དཔལ་ཡེ་ཤེས་སེམས་དཔའི་ཞབས་གྲུབ་ཤོག །འཕགས་པ་
འཇམ་དཔལ་ཡེ་ཤེས་སེམས་དཔའ་རིན་པོ་ཆེའི་ཕྱག་རྒྱ་དྲི་མ་མེད་པའི་ཆོ་ག་ཞེས་བྱ་བ་རྒྱ་གར་གྱི་མཁན་པོ་དཔལ་ལྡན་གཉིས་སུ་མེད་པའི་རྡོ་རྗེས་མཛད་པ་རྫོགས་སོ།།      །།རྣལ་འབྱོར་པ་བསོད་སྙོམས་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།།      །།

49-1-95a

༄༅༅། །རྒྱ་གར་སྐད་དུ། ཨཱ་རྱ་མཉྫུ་ཤྲཱི་ནཱ་མ་སཾ་གཱི་ཏི་ཊཱི་ཀཱ་སཱ་ར་ནོ་པི་ཀ་ནཱ་མ། བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་འགྲེལ་པ་སྙིང་པོ་མངོན་པར་རྟོགས་པ་ཞེས་བྱ་བ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །
གཟུགས་སོགས་དབང་པོའི་ཡུལ་ལས་འདས་པ་ཡི། །རྣམ་དག་འདུས་མ་བྱས་པའི་ཆོས་ཀྱི་སྐུ། །དབང་པོའི་གཞུ་འདྲས་ས་ལམ་རབ་གྲོལ་ཞིང་། །གཞོན་ནུའི་འོ་མས་བུ་ལྟར་གསོ་མཛད་ལྷ། །དམ་པའི་སྐྱེས་མཆོག་ངེས་སྟོན་མཛད་པ་ཡི། །ཞབས་ཀྱི་མཚོ་སྐྱེས་གནས་དེར་སྤྱིས་བཏུད་
ནས། །ཚིག་རྒྱས་པ་ཡི་ལས་རབ་བསྡུས་པའི་དོན། །དཔག་མེད་འབྱུང་གནས་ཐབས་མང་སྟོན་པའོ། །བློ་ནི་རྨོངས་འགྱུར་རིག་པའི་གནས་མེད་ཀྱང་། །རྗེ་བཙུན་དྲིན་གྱིས་རྒྱུད་རྣམས་ཀུན་གྱི་བཅུད། །རྟོགས་ཤིང་གསུང་རབ་ལ་སོགས་གཞུང་གཞན་ཡང་། །མཐོང་བས་སྙིང་པོའི་མངོན་
རྟོགས་བཤད་པར་བྱ། །རྒྱུད་གཞན་རིམ་པ་མ་ཡིན་པའི། །འཇམ་དཔལ་སྒྱུ་འཕྲུལ་དྲ་བ་ལས། །ཐིག་ལེ་བཞིར་འགྱུར་དགུར་བཅས་པ། །མདའ་གཉིས་རབ་ཏུ་ཕྱེ་བ་ལ། །རིམ་གཉིས་རབ་ཏུ་སྦྱོར་བ་སྟེ། །རྒྱུད་ཀྱི་རྒྱུད་ཉིད་བཤད་ཀྱིས་ཉོན། །དེ་ལ་རྒྱུད་འདི་ནི་རིན་པོ་ཆེ་ལྟ་བུ་ཡིན་ཏེ། དབང་པོ་བཞི་
དང་ཤིན་ཏུ་སྦྱོར་བའི་ཕྱིར་རོ། །ལ་ལ་དག་ནི་བྱ་བ་དང་། སྤྱོད་པ་དང་། རྣལ་འབྱོར་དང་། རྣལ་འབྱོར་ཆེན་པོའི་རྒྱུད་ཀྱི་ཐབས་དང་ཤེས་རབ་ཀྱི་རྒྱུད་ཁོ་ནའོ་ཞེས་ཟེར་ཏེ། དེ་དག་ནི་སྙིང་པོ་ལ་སྤྱོད་པའི་གང་ཟག་མ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ཀྱི་རང་བཞིན་སྤྲོས་པ་ཐམས་ཅད་ཀྱིས་
དབེན་ཞིང་བརྟགས་པའི་རྟོག་པ་གང་གིས་ཀྱང་མ་གོས་པར་གཅིག་པས་དུ་མ་མི་གནས་ཀྱིས་ཀྱང་གདུལ་བྱའི་བློའི་ཁྱད་པར་གྱིས་དུ་མར་སྣང་ཞིང་རང་རང་གི་རྟོག་པ་ལ་བདེན་པར་འཛིན་པའི་ཕྱིར་རོ། །དེའི་ཕྱིར། སངས་རྒྱས་རྣམས་ཀྱིས་འགའ་ཞིག་ཏུ། །ཡི་གེ་གཅིག་ཀྱང་མ་གསུངས་པར། །
ཆོས་ཀྱི་ཆར་གྱིས་ཚིམ་མཛད་པ། །སེམས་ཅན་གཞུག་པའི་ཆེད་དུ་གནས། །ཞེས་གསུངས་པས་སོ། །དེ་བས་ན་ཁོ་བོ་ནི་འོག་ནས་འབྱུང་བའི་འབྲས་བུ་ནི་གཙོ་བོར་སྟོན་ཏོ། །གཞན་གྱི་རིག་པ་མ་ཡིན་པའང་། །ཆོས་ཀྱི་དབྱིངས་ལ་དབྱེར་མེད་ཕྱིར། །གཙོ་བོས་ཐེག་དབྱེ་མ་མཆིས་ཀྱང་། །

49-1-95b

གང་གིས་ཐེག་པ་གསུམ་བསྟན་པ། །ང་ནི་ཐབས་ལ་མཁས་པའི་དངོས། །ཞེས་གསུངས་པས་ན། དམན་པ་དང་འབྲིང་དང་རབ་ཀྱི་ཁྱད་པར་གྱིས་ཉན་ཐོས་དང་། རང་སངས་རྒྱས་དང་། ཐེག་པ་ཆེན་པོ་བསྟན་པ་ཡིན་ནོ། །རྒྱུད་དུ་སྟོན་པ་ཉིད་དུ་ཡང་རིགས་ཏེ། སྔོན་དུ་བྱུང་བས་ཡང་རྒྱུད་གཅིག་ཉིད་
ལ་དུ་མར་གཞག་པ་ཉིད་དེ། དེ་ལྟར་ཡང་རྒྱུད་གཅིག་ཉིད་ལ་དུ་མར་གོ་བའོ། །དེ་ཡང་མཁའ་འགྲོ་མ་རྡོ་རྗེ་དྲ་བའི་གུར་ལས། སྐྱེས་བུ་བསྡུ་བར་བྱ་བའི་ཕྱིར། །རྣལ་འབྱོར་པ་ཡི་རྒྱུད་བཤད་དོ། །བཙུན་མོ་བསྡུ་བར་བྱ་བའི་ཕྱིར། །རྣལ་འབྱོར་མ་ཡི་རྒྱུད་བཤད་དོ། །དམན་པ་ལས་ནི་ལས་ཀྱི་རྒྱུད། །
ལས་ཀྱི་རྣལ་འབྱོར་དེ་ལྷག་ལ། །སེམས་ཅན་མཆོག་ལ་ལྷག་རྣལ་འབྱོར། །བླ་མེད་རྣལ་འབྱོར་དེ་ལྷག་ལ། །ཞེས་གསུངས་པས་ན། རྟེན་ལ་སོགས་པའི་ཁྱད་པར་དུ་ཤེས་པར་བྱའོ། །གླེང་གཞི་བསྟན་པ་ཉིད་ཀྱིས་ཆོག་པ་མ་ཡིན་ཏེ། སྔར་བཞིན་ནོ། །དབང་པོ་རབ་དང་ཡང་རབ་ཏུ་གྱུར་པ་ལ། ཨེ་
ཝཾ་མ་ཡ་ཤྲུ་ཏ་ས་མ་ཡ་ཨེ་ཀ །ཞེས་གསུངས་པ་ཉིད་ཀྱིས་སྙིང་པོ་ལ་འགྲོ་བ་བརྩོན་པར་འགྱུར་རོ། །ཐམས་ཅད་ཀྱང་ལྡན་པ་ཡིན་ཏེ། །ཆོས་ཀྱི་ཕུང་པོ་བརྒྱད་ཁྲི་དང་། །བཞི་སྟོང་གི་ནི་གྲངས་སྙེད་ཀྱི། ཀུན་གྱི་གཞི་དང་ཕ་མ་ནི། །ཡི་གེ་གཉིས་སུ་ཡང་དག་བསྟན། །ཡི་གེ་ཨེ་ནི་མར་གྱུར་ལ། །
ཝཾ་ནི་ཕ་ཞེས་བྱ་བར་གྲགས། །ཐིག་ལེ་དེ་གཉིས་སྦྱོར་བ་སྟེ། །སྦྱོར་དེ་ཤིན་ཏུ་རྨད་དུ་འབྱུང་། །ཞེས་གསུངས་པས་སོ། །ཐམས་ཅད་དུ་མི་འགྱུར་བ་མ་ཡིན་ཏེ། ཐབས་དང་ཤེས་རབ་འདུས་བྱས་པའི་སྦྱོར་བ་ལས་ནམ་མཁའ་དང་མཉམ་པའི་སངས་རྒྱས་ཀྱི་ཆོས་གསུངས་པར་གྱུར་ཏོ། །དེ་བས་ན་
སྐྱེས་པ་དང་བུད་མེད་གཉིས་སྦྱོར་བ་ནི་མ་ནིང་སྟེ། དེ་འཇུག་པའི་ཁྱད་པར་གཅིག་པུ་པ་ལྷན་ཅིག་སྐྱེས་པའི་རང་བཞིན་ཕྱག་རྒྱ་ཆེན་པོ་བརྗོད་པ་ནི་ངེས་པ་སྟེ། དེ་བས་ན།  གཅིག་པུ་ཐམས་ཅད་མཁྱེན་པ་སྟེ། །ཀུན་དུ་འགྲོ་བ་ཤིན་ཏུ་ཕྲ། །ཞེས་གསུངས་པ་དང་། གཞུང་གཞན་གྱིས་ཀྱང་ཤེས་
པར་བྱའོ། །དེ་ལྟར་དོན་གྱི་རང་བཞིན་གཏན་ལ་ཕབ་ནས། ཚིག་གི་ཚོགས་བློ་ལ་རབ་ཏུ་སྦྱོར་བའི་དགོས་པས་དོན་བསྡུས་ནས་བསྟན་པར་བྱ་སྟེ། དེ་ནས་དཔལ་ལྡན་རྡོ་རྗེ་འཆང་། །ཞེས་པ་ནས། ཡང་དང་ཡང་དུ་གསོར་བྱེད་པ། །ཞེས་བྱ་བའི་བར་གྱིས་ཐུན་མོང་མ་ཡིན་པའི་འཁོར་བསྟན་

49-1-96a

ཏོ། །ཁྲོ་གཉེར་རིམ་པར་ལྡན་ལ་སོགས། །ཞེས་པ་ནས། ལུས་བཏུད་རྣམས་དང་ལྷན་ཅིག་ཏུ། །ཞེས་པའི་བར་གྱིས་ཐུན་མོང་གི་འཁོར་བསྟན་ཏོ། །དེ་བཞིན་གཤེགས་པ་བཅོམ་ལྡན་འདས། །ཞེས་པ་ནས། སྤྱན་སྔར་འདུག་སྟེ་འདི་སྐད་གསོལ། །ཞེས་པའི་བར་
གྱིས་མཆོད་པར་བརྗོད་པ་བསྟན་ཏོ། །ཁྱབ་བདག་བདག་ལ་སྨན་པ་དང་། །ཞེས་པ་ནས། བྱང་ཆུབ་ཅི་ནས་བདག་ཐོབ་མཛད། །ཅེས་པའི་བར་གྱིས་བདག་གི་དོན་དུ་གསོལ་བ་བསྟན་ཏོ། །ཉོན་མོངས་པས་ནི་སེམས་དཀྲུགས་ཤིང་། །ཞེས་པ་ནས། བླ་མེད་འབྲས་བུ་ཐོབ་བྱའི་བར་གྱིས་གཞན་
གྱི་དོན་དུ་གསོལ་བ་བསྟན་ཏོ། །རྫོགས་པའི་སངས་རྒྱས་བཅོམ་ལྡན་འདས། །ཞེས་པ་ནས། དབང་པོའི་བསམ་པ་མཁྱེན་མཆོག་གིས། །ཞེས་པའི་བར་གྱིས་སྤངས་པ་དང་ཡེ་ཤེས་ཕུན་སུམ་ཚོགས་པའི་གནས་བསྟན་ཏོ། །བཅོམ་ལྡན་འདས་ཀྱི་ཡེ་ཤེས་སྐུ། །ཞེས་པ་ནས། གླུར་བླངས་གང་
ལགས་བཤད་དུ་གསོལ། །ཞེས་བྱ་བའི་བར་གྱིས་ཡང་དག་པའི་མཚན་གྱི་དོན་གསོལ་བ་བསྟན་ཏོ། །མགོན་པོ་རྫོགས་སངས་རྒྱས་ཀུན་གྱི། །ཞེས་པ་ནས། སེམས་ཅན་རྣམས་ལ་བཤད་པར་འཚལ། །ཞེས་པའི་བར་གྱིས་མི་གནས་པའི་མྱ་ངན་ལས་འདས་པའི་དོན་གྱི་གསོལ་བའོ། །
དེ་དག་ནི་གླེང་གཞིའི་དོན་གླེང་བསླང་བ་དང་འབྲེལ་བར་བསྟན་པ་སྟེ་འཁོར་ཕུན་སུམ་ཚོགས་པའོ། །གསང་དབང་ལག་ན་རྡོ་རྗེ་ཡིས། །ཞེས་པ་ནས། ལུས་བཏུད་ནས་ནི་སྤྱན་སྔར་འདུག །ཅེས་པ་རྒྱུད་ཉན་པ་ལ་གུས་པའི་སྦྱོར་བ་བསྟན་ཏོ། །དེ་ནས་བཅོམ་ལྡན་ཤཱཀྱ་
ཐུབ། །ཅེས་པ་ནས། སྦྱོང་བར་བྱེད་པའི་འཛུམ་བསྟན་ནས། །ཞེས་པའི་བར་གྱིས་ལྗགས་བྱིན་གྱིས་བརླབས་པ་བདུད་མཐར་བྱེད་པའི་སྦྱོར་བ་བསྟན་ཏོ། །ཚངས་པའི་གསུང་ནི་སྙན་པ་ཡིས། །ཞེས་པ་ནས། ལེགས་སོ་དཔལ་ལྡན་རྡོ་རྗེ་འཆང་། །ཞེས་པའི་བར་གྱིས་ཚངས་པའི་
གསུང་གི་འཁོར་ལ་ཆེད་དུ་བརྗོད་པ་བསྟན་ཏོ། །ལག་ན་རྡོ་རྗེ་ཁྱོད་ལེགས་སོ། །ཞེས་པ་ནས། ཁྱོད་ནི་རྩེ་གཅིག་ཡིད་ཀྱིས་ཉོན། །ཞེས་པའི་བར་གྱིས་ཉན་པ་པོ་ཐོས་པ་དང་སྦྱར་བར་བསྟན་ཏོ། །རྐང་པ་ཡ་གཅིག་གིས་མཚམས་སྦྱར་བར་བསྟན་ཏོ། །འདི་དག་ནི་སྦྱོར་བ་ཕུན་

49-1-96b

སུམ་ཚོགས་པའོ། །དེ་ནས་བཅོམ་ལྡན་ཤཱཀྱ་ཐུབ། །ཅེས་པ་ནས། རིགས་ཆེན་གཙུག་ཏོར་ཆེར་གཟིགས་ནས། །ཞེས་པའི་བར་གྱིས་རིགས་ལ་གཟིགས་པ་བསྟན་ཏོ། །ཚིག་གི་བདག་པོས་ཚིགས་སུ་བཅད། །ཅེས་པ་ནས། སྡེ་ཚན་བཞི་པ་དང་ལྔ་པའི་མཐས་བྱང་ཆུབ་ཀྱི་སེམས་
རྡོ་རྗེའི་ཏིང་ངེ་འཛིན་བསྟན་ཅིང་བཤད་དོ། །འདི་ལྟར་སངས་རྒྱས་བཅོམ་ལྡན་འདས། །ཞེས་པ་ནས། ཚིག་ཀུན་རབ་ཏུ་གསལ་བར་བྱེད། །ཅེས་པའི་བར་གྱིས་ཆོས་ཐམས་ཅད་ཡི་གེ་གཅིག་གི་ལུས་ལ་གནས་པར་བསྟན་ཏོ། །མཆོད་པ་ཆེན་པོ་འདོད་ཆགས་ཆེ། །ཞེས་པ་ནས། ཆགས་པ་ཐམས་ཅད་སེལ་བར་བྱེད། །
ཅེས་པའི་བར་གྱིས་ཉོན་མོངས་པ་དང་རིགས་རྣམ་པར་དག་པའི་མཆོད་པ་བསྟན་ཏོ། །འདོད་པ་ཆེན་པོ་བདེ་བ་ཆེ། །ཞེས་པ་ནས། སྒྱུ་འཕྲུལ་ཆེན་པོ་མིག་འཕྲུལ་ཆེ། །ཞེས་པའི་བར་གྱིས་ཁམས་དང་ཆེ་བ་བཅུ་དྲུག་གི་རྣམ་དག་བསྟན་ཏོ། །སྦྱིན་བདག་ཆེན་པོ་གཙོ་བོ་ཆེ། །ཞེས་པ་ནས། བསམ་པའི་ཡེ་ཤེས་
རྒྱ་མཚོ་སྟེ། །ཞེས་པའི་བར་གྱིས་རྣམ་ཤེས་ཚོགས་དང་ལྷ་མོའི་རྣམ་དག་བསྟན་ཏོ། །བྱམས་ཆེན་རང་བཞིན་དཔག་ཏུ་མེད། །ཅེས་པ་ནས། ཐེག་པ་ཆེན་པོའི་ཚུལ་གྱི་མཆོག །ཅེས་པའི་བར་གྱིས་ས་དང་བསྐལ་བཟང་བཅུ་དྲུག་གི་རྣམ་དག་བསྟན་ཏོ། །དེ་དག་ནི་རྡོ་རྗེ་དབྱིངས་ཀྱི་དཀྱིལ་འཁོར་
ཆེན་པོའི་རྣམ་དག་དེ་ཁོ་ན་ཉིད་ཀྱི་སྙིང་པོ་བསྟན་པའོ། །སངས་རྒྱས་རྣམ་པར་སྣང་མཛད་ཆེ། །ཞེས་པ་ནས། གསང་སྔགས་ཚུལ་ཆེན་བདག་ཉིད་ཅན། །ཞེས་པའི་བར་གྱིས་ཆོས་ཀྱི་དབྱིངས་ཀྱི་རང་བཞིན་བསྟན་ཏོ། །ཕ་རོལ་ཕྱིན་བཅུ་ཐོབ་པ་སྟེ། །ཞེས་པ་ནས། རྣམ་བཅུ་དབང་ལྡན་ཆེ་བ་
པོ། །ཞེས་པའི་བར་གྱིས་ལམ་གྱི་ཡོན་ཏན་རྫོགས་པར་བསྟོད་པ་བསྟན་ཏོ། །ཐོག་མ་མེད་པ་སྤྲོས་མེད་བདག །ཅེས་པ་ནས། ཡང་དག་མཐའ་ལ་རྣམ་པར་གནས། །ཞེས་པའི་བར་གྱིས་ཐུགས་ཀྱི་བྱིན་རླབས་ལ་བསྟོད་པ་བསྟན་ཏོ། །བདག་མེད་སེང་གེའི་སྒྲ་དང་ལྡན། །ཞེས་པ་ནས། 
འཁོར་ལོས་སྒྱུར་བ་སྟོབས་པོ་ཆེ། །ཞེས་པའི་བར་གྱིས་གསུང་གི་བྱིན་རླབས་ལ་བསྟོད་པ་བསྟན་ཏོ། །ཚོགས་ཀྱི་སློབ་དཔོན་ཚོགས་ཀྱི་བདག །ཅེས་པ་ནས། ཚུལ་ཆེན་གཞན་གྱི་དྲིང་མི་འཇོག །ཅེས་པའི་བར་གྱིས་སྐུའི་བྱིན་རླབས་ལ་བསྟོད་པ་བསྟན་ཏོ། །ཚིག་རྗེ་ཚིག་བདག་

49-1-97a

སྨྲ་མཁས་པ། །ཞེས་པ་ནས། བདེན་པ་བཞི་ནི་སྟོན་པ་པོ། །ཞེས་པའི་བར་གྱིས་འགྲོ་བའི་འདྲེན་སྟོན་དུ་གྱུར་པ་བསྟན་ཏོ། །ཕྱིར་མི་ལྡོག་པ་ཕྱིར་མི་འོང་། །ཞེས་པ་ནས། བདེ་གཤེགས་འཇིག་རྟེན་རིག་པའི་མཆོག །ཅེས་པའི་བར་གྱིས་ཐེག་པ་གསུམ་གྱི་ལུས་ཡེ་ཤེས་
སུ་བསྟན་ཏོ། །བདག་གིར་མི་འཛིན་ངར་མི་འཛིན། །ཞེས་པ་ནས། འཇིག་རྟེན་སྣང་བར་བྱེད་པའི་མཆོག །ཅེས་པའི་བར་གྱིས་འཇམ་དཔལ་ཡེ་ཤེས་སེམས་དཔའི་ཡེ་ཤེས་བསྟན་ཏོ། །ཆོས་ཀྱི་དབང་ཕྱུག་ཆོས་ཀྱི་རྒྱལ། །ཞེས་པ་ནས། བསམ་གཏན་བསམ་བྱ་བློ་ལྡན་བདག །ཅེས་པའི་བར་
གྱིས་དེ་ཐམས་ཅད་རྣལ་འབྱོར་གྱི་ཡེ་ཤེས་ཀྱི་བདག་ཉིད་དུ་བསྟན་ཏོ། །སོ་སོ་རང་རིག་མི་གཡོ་བ། །ཞེས་པ་ནས། སངས་རྒྱས་སྲས་པོ་དམ་པའི་མཆོག །ཅེས་པའི་བར་གྱིས་རང་རིག་ཏུ་གཞི་གཅིག་པར་བསྟན་ཏོ། །ཤེས་པ་སྲིད་འབྱུང་སྐྱེ་གནས་མེད། །ཅེས་པ་ནས། གཟི་བརྗིད་ཆེན་པོ་འོད་
གསལ་བ། །ཞེས་པའི་བར་གྱིས་དེ་ཉིད་ལ་རྙོག་པ་བཅུས་མ་གོས་པར་བསྟན་ཏོ། །སྔགས་མཆོག་མངའ་བདག་རིག་སྔགས་རྒྱལ། །ཞེས་པ་ནས། དྲང་སྲོང་ཆེ་དགུས་མཆོད་ཅིང་རྗེད། །ཅེས་པའི་བར་གྱིས་སྐུའི་འཁོར་ལོ་བསྟན་ཏོ། །རིགས་གསུམ་འཆང་བ་གསང་སྔགས་འཆང་། །ཞེས་པ་ནས། 
ཐེག་པ་མཆོག་གསུམ་སྟོན་པ་པོ། །ཞེས་པའི་བར་གྱིས་ཡེ་ཤེས་ཀྱི་འཁོར་ལོ་བསྟན་ཏོ། །དོན་ཡོད་ཞགས་པ་རྣམ་པར་རྒྱལ། །ཞེས་པ་ནས། རྡོ་རྗེ་ལྕགས་ཀྱུ་ཞགས་པ་ཆེ། །ཞེས་པའི་བར་གྱིས་རིགས་ཀྱི་འཁོར་ལོ་བསྟན་ཏོ། །རྡོ་རྗེ་འཇིགས་བྱེད་འཇིགས་པར་བྱེད། །ཅེས་པ་ནས། 
སྒྲ་དང་ལྡན་པ་རྣམས་ཀྱི་མཆོག །ཅེས་པའི་བར་གྱིས་མེ་ལོང་ལྟ་བུའི་ཡེ་ཤེས་ཀྱི་འཁོར་ལོ་བསྟན་ཏོ། །ཡང་དག་བདག་མེད་ལ་སོགས་པའི་རྐང་པ་གཉིས་ཀྱིས་དོན་གྱི་རྒྱུད་ལ་བསྟོད་པ་བསྟོན་ཏོ། །སྟོང་ཉིད་སྨྲ་བའི་ཁྱུང་མཆོག་སྟེ། །ཞེས་པ་ནས། ཆོས་ཀྱི་གཎྜཱི་སྒྲ་བོ་ཆེ། །ཞེས་པའི་
བར་གྱིས་ཚིག་གི་རྒྱུད་བསྟན་ཏོ། །མི་གནས་པ་ལ་སོགས་པ་རྐང་པ་གཉིས་ཀྱིས་རབ་ཏུ་བྱེད་པའི་རྒྱུད་བསྟན་ཏོ། །གཟུགས་མེད་གཟུགས་བཟང་དམ་པ་སྟེ། །ཞེས་པ་ནས། གཟུགས་རྣམས་མ་ལུས་འཆང་བ་པོ། །ཞེས་པའི་བར་གྱིས་བདེ་བ་ཆེན་པོའི་རྒྱུད་བསྟན་ཏོ། །མཚུངས་

49-1-97b

པ་མེད་ཅིང་ཆེ་བར་གྲགས། །ཞེས་པ་ནས། དར་བ་ཆེན་པོ་ཆོས་ཀྱི་ཏོག །ཅེས་པའི་བར་གྱིས་བསམ་གྱིས་མི་ཁྱབ་པའི་རྒྱུད་བསྟན་ཏོ། །འཇིག་རྟེན་གསུམ་ན་གཞོན་ལུས་གཅིག །ཅེས་པ་ནས། སྡུ་གུ་འཇིག་རྟེན་གསུམ་ན་མཛེས། །ཞེས་པའི་བར་གྱིས་འབྲས་བུའི་རྒྱུད་བསྟན་
ཏོ། །འཇིག་རྟེན་ཤེས་ལེགས་སློབ་དཔོན་ཏེ། །ཞེས་པ་ནས། སྐྱབས་དང་སྐྱོབ་པ་བླ་ན་མེད། །ཅེས་པའི་བར་གྱིས་ཐབས་ཀྱི་རྒྱུད་བསྟན་ཏོ། །ནམ་མཁའི་མཐའ་ལ་ལོངས་སྤྱོད་པ། །ཞེས་པ་ནས། འཁོར་བའི་རྒྱ་མཚོ་ཕ་རོལ་ཕྱིན། །ཞེས་པའི་བར་གྱིས་ཐབས་ཡེ་ཤེས་སེམས་
དཔའི་རྒྱུད་བསྟན་ཏོ། །ཡེ་ཤེས་དབང་བསྐུར་ཅོད་པན་ཅན། །ཞེས་པ་ནས། གསུམ་སེལ་མཐའ་ཡས་གྲོལ་གསུམ་ཐོབ། །ཅེས་པའི་བར་གྱིས་དྲི་མ་རྣམ་པར་དག་པའི་རྒྱུད་བསྟན་ཏོ། །སྒྲིབ་པ་ཀུན་ལས་ངེས་པར་གྲོལ། །ཞེས་པ་ནས། ལུས་ཀུན་ལས་ནི་རྣམ་པར་གནས། །ཞེས་པའི་བར་
གྱིས་བྱ་བ་དང་བྲལ་བའི་རྒྱུད་བསྟན་ཏོ། །ནམ་མཁའི་མཐའ་ལ་རབ་གནས་པ། །ཞེས་པ་ནས། ཡོན་ཏན་ལྡན་ཞིང་ཡོན་ཏན་ཤེས། །ཞེས་པའི་བར་གྱིས་གཞན་གྱི་དོན་ཕུན་སུམ་ཚོགས་པ་བསྟན་ཏོ། །ཆོས་ཤེས་བཀྲ་ཤིས་བཀྲ་ཤིས་འབྱུང་། །ཞེས་པ་ནས། བཀུར་སྟི་རིམ་གྲོ་ཕུན་སུམ་
ཚོགས། །ཞེས་བྱ་བའི་བར་གྱིས་རང་དོན་བཀྲ་ཤིས་རྒྱུད་ལས་སྐྱེ་བར་བསྟན་ཏོ། །མཆོག་ཏུ་དགའ་བ་གྲགས་བདག་དཔལ། །ཞེས་པ་ནས། འཇིག་རྟེན་སྒྲ་སྟེ་རབ་ཀྱི་མཆོག །ཅེས་བྱ་བའི་བར་གྱིས་རང་བཞིན་བརྟགས་པས་དབེན་པ་བསྟན་ཏོ། །འཇིགས་པ་མ་ལུས་སེལ་བ་པོ། །ཞེས་པ་
ནས། གདོང་ལྔ་གཙུག་ཕུད་ལྔ་དང་ལྡན། །ཞེས་པའི་བར་གྱིས་ཐ་མར་དགེ་བ་ཕྱག་རྒྱ་ཆེན་པོར་བསྟན་ཏོ། །ཟུར་ཕུད་ལྔ་པ་མེ་ཏོག་ཐོད། །ཅེས་པ་ནས། དཀའ་ཐུབ་མཐར་ཕྱིན་དཀའ་ཐུབ་ཆེ། །ཞེས་པའི་བར་གྱིས་བར་དུ་དགེ་བ་ཆོས་ཀྱི་ཕྱག་རྒྱ་བསྟན་ཏོ། །གཙང་གནས་དམ་པ་གཽ་ཏ་མ། །
ཞེས་པ་ནས། །གྲོལ་བ་ཐར་པ་རྣམ་གྲོལ་ལུས། །ཞེས་པའི་བར་གྱིས་ཐ་མར་དགེ་བ་ལས་ཀྱི་ཕྱག་རྒྱ་བསྟན་ཏོ། །རྣམ་གྲོལ་ཞི་བ་ཞི་བ་ཉིད། །ཅེས་པ་ནས། ཡེ་ཤེས་ལུས་ཅན་དེ་བཞིན་གཤེགས། །ཞེས་བྱ་བའི་བར་གྱིས་བདེ་བ་ཆེན་པོའི་ལུས་ལྷན་ཅིག་སྐྱེས་པ་བསྟན་ཏོ། །ཚིག་གི་དབང་ཕྱུག་

49-1-98a

སྨྲ་བ་ཆེ། །ཞེས་པ་ནས།སྨྲ་བའི་སེང་གེ་ཚུགས་པ་མེད། །ཅེས་བྱ་བའི་བར་གྱིས་ཚིག་ལ་མི་གནས་པའི་ཚིག་གི་གནས་སུ་བསྟན་ཏོ། །ཀུན་དུ་དགའ་བ་མཆོག་ཏུ་དགའ། །ཞེས་པ་ནས། ལག་ན་འོད་འབར་སྣང་བ་པོ། །ཞེས་པའི་བར་གྱིས་སྐུ་དང་ཡེ་ཤེས་ལ་སོགས་པའི་སྣང་བ་བསྟན་
ཏོ། །སྨན་པ་ཆེ་མཆོག་གཙོ་བོ་སྟེ། །ཞེས་པ་ནས། ནད་དོ་ཅོག་གི་དགྲ་ཆེ་བ། །ཞེས་པའི་བར་གྱིས་འགྲོ་བ་ལ་སྨན་པར་སྣང་བ་བསྟན་ཏོ། །སྡུ་གུ་འཇིག་རྟེན་གསུམ་གྱི་མཆོག །ཅེས་པ་ནས། ཆོས་ཀྱི་རྒྱལ་མཚན་ལེགས་པར་འཛུགས། །ཞེས་པའི་བར་གྱིས་ཆོས་ཀྱི་རྒྱལ་མཚན་དུ་སྣང་བ་བསྟན་ཏོ། །འགྲོ་ན་
གདུགས་གཅིག་ཡངས་པ་སྟེ། །ཞེས་པ་ནས། སངས་རྒྱས་ཀུན་གྱི་བསྟན་པ་གཅིག །ཅེས་པའི་བར་གྱིས་རིམ་པ་གཉིས་སུ་སྣང་བ་བསྟན་ཏོ། །རྡོ་རྗེ་རིན་ཆེན་དབང་བསྐུར་དཔལ། །ཞེས་པ་ནས། སངས་རྒྱས་ཀུན་གྱི་གསུང་ཡང་ཡིན། །ཞེས་པའི་བར་གྱིས་རིགས་སུ་སྣང་བ་བསྟན་ཏོ། །རྡོ་རྗེའི་
ཉི་མ་ནས་རྐང་པ་གཉིས་ཀྱིས་བཀླག་པའི་ཐབས་དང་མི་གནས་པ་བསྟན་ཏོ། །ཆགས་བྲལ་ལ་སོགས་ཆགས་པ་ཆེ། །ཞེས་པ་ནས། ཡི་གེ་མཆོག་སྟེ་རྣམ་པར་དག །ཅེས་པའི་བར་གྱིས་ལམ་གྱི་ཡེ་ཤེས་ལྷུན་གྱིས་གྲུབ་པ་བསྟན་ཏོ། །ཐེག་པ་ཆེན་པོ་སྡུག་བསྔལ་གཅོད། །ཅེས་པ་ནས། 
རྒྱུད་ཀུན་གྱི་ནི་བདག་པོ་མཆོག །ཅེས་པའི་བར་གྱིས་ཡེ་ཤེས་ལྷུན་གྱིས་གྲུབ་པ་བསྟན་ཏོ། །རྡོ་རྗེ་གདན་ནི་མ་ལུས་ལྡན། །ཞེས་པ་ནས། སྤྲུལ་པའི་འཁོར་ལོ་སྣ་ཚོགས་འཆང་། །ཞེས་པའི་བར་གྱིས་གསང་དོན་ལྷུན་གྱིས་གྲུབ་པ་བསྟན་ཏོ། །དངོས་པོ་ཀུན་གྱི་རང་བཞིན་མཆོག །ཅེས་པ་
ནས། ཡེ་ཤེས་མེ་ལྕེ་འོད་རབ་གསལ། །ཞེས་པའི་བར་གྱིས་ཡེ་ཤེས་ལྷུན་གྱིས་གྲུབ་པ་བསྟན་ཏོ། །འདོད་པའི་དོན་གྲུབ་དམ་པ་སྟེ། །ཞེས་པ་ནས། སེམས་ཅན་ཐམས་ཅད་རབ་གྲོལ་བྱེད། །ཅེས་པའི་བར་གྱིས་མཉམ་པ་ཉིད་ཀྱི་ཡེ་ཤེས་མདོར་བསྟན་ཏོ། །ཉོན་མོངས་གཡུལ་དུ་གཅིག་
དཔའ་བ། །ཞེས་པ་ནས། ཚངས་པའི་གཡུལ་ས་རྩེ་ནས་གནོན། །ཞེས་པའི་བར་གྱིས་ལས་ཀྱི་ཕྱག་རྒྱ་བསྟན་ཏོ། །དོན་གཅིག་གཉིས་མེད་ཆོས་ཀྱི་དོན། །ཞེས་པ་ནས། ཉི་མ་འཆར་ཀའི་དཀྱིལ་ལྟར་མཛེས། །ཞེས་པའི་བར་གྱིས་དཔེ་དོན་གྱི་འབྲེལ་བ་བསྟན་ཏོ། །སེན་མོའི་

49-1-98b

འོད་ནི་ཤས་ཆེར་དམར། །ཞེས་པ་ནས། སངས་རྒྱས་སྤྲུལ་པའི་རྒྱུད་དང་ལྡན། །ཞེས་པའི་བར་གྱིས་མཚན་དཔེ་བསྟན་ཏོ། །འཇིག་རྟེན་ཁམས་བརྒྱ་ཀུན་བསྐྱོད་པ། །ཞེས་པ་ནས། ངེས་པར་འབྱུང་བ་ཀུན་སྟོན་པ། །ཞེས་པའི་བར་གྱིས་ཐུན་མོང་གི་ལམ་རྫོགས་པར་བསྟན་ཏོ། །ཡན་ལག་བཅུ་གཉིས་
སྲིད་རྩ་བཏོན། །ཞེས་པ་ནས། བྱེ་བ་དཔག་མེད་འགྱེད་པ་པོ། །ཞེས་པའི་བར་གྱིས་སྤངས་པ་ཕུན་སུམ་ཚོགས་པ་བསྟན་ཏོ། །སྐད་ཅིག་ཐམས་ཅད་མངོན་པར་རྟོགས། །ཞེས་པ་ནས། ཐེག་པ་གཅིག་གི་འབྲས་བུར་གནས། །ཞེས་པའི་བར་གྱིས་སྐད་ཅིག་གི་ཡེ་ཤེས་བསྟན་ཏོ། །ཉོན་མོངས་
ཁམས་རྣམས་དག་པའི་བདག །ཅེས་པ་ནས། སྦྱོར་བའི་དགོན་པ་ལས་བྱུང་བ། །ཞེས་བྱ་བའི་བར་གྱིས་གསང་སྔགས་མཐའི་དོན་དུ་བསྟན་ཏོ། །ཉོན་མོངས་པ་ལ་སོགས་པ་རྐང་པ་གཉིས་ཀྱིས་འཁོར་བའི་ས་བོན་དང་བྲལ་བར་བསྟན་ཏོ། །སྙིང་རྗེ་ཆེན་པོ་ཤེས་རབ་ཐབས། །ཞེས་པ་ནས། 
ནོར་བ་ཐམས་ཅད་རྣམ་པར་སྤངས། །ཞེས་པའི་བར་གྱིས་གཞན་དོན་མཛད་པ་བསྟན་ཏོ། །དོན་གསུམ་ཐེ་ཚོམ་མེད་པའི་བློ། །ཞེས་པ་ནས། སངས་རྒྱས་ཀུན་གྱི་རང་བཞིན་འཆང་། །ཞེས་པའི་བར་གྱིས་དེ་ཉིད་ཀྱི་འཐད་པ་བསྟན་ཏོ། །ལུས་མེད་ལུས་ཏེ་ལུས་ཀྱི་མཆོག །ཅེས་པ་ནས། ནོར་
བུ་ཆེན་པོ་རིན་ཆེན་ཏོག །ཅེས་པའི་བར་གྱིས་ཡེ་ཤེས་ཀྱི་ལུས་ཀྱི་མཛད་པ་བསྟན་ཏོ། །སངས་རྒྱས་ལ་སོགས་པ་རྐང་པ་གཉིས་ཀྱིས་བྱ་བ་ནན་ཏན་གྱི་ཡེ་ཤེས་མདོར་བསྟན་ཏོ། །གསང་སྔགས་ལས་བྱུང་ཡི་གེ་མེད། །ཅེས་པ་ནས། ཐིག་ལེ་སྟོང་པ་ཡི་གེ་བརྒྱ། །ཞེས་པའི་བར་གྱིས་ཡི་གེ་ཐམས་ཅད་ཚོགས་
གཅིག་པའི་སྟོང་པར་བསྟན་ཏོ། །རྣམ་པ་ཀུན་ལྡན་རྣམ་པ་མེད། །ཅེས་པ་ནས། བསམ་གཏན་བཞི་ཡི་རྩེ་མོ་ཅན། །ཞེས་པའི་བར་གྱིས་ཨེ་ཝཾ་གྱིས་དབུགས་དབྱུང་བ་བསྟན་ཏོ། །བསམ་གཏན་ཡན་ལག་ཀུན་ཤེས་ཤིང་། །ཞེས་པ་ནས། ཕྱོགས་བཅུར་སྤྲུལ་པ་སྣ་ཚོགས་འགྱེད། །ཅེས་པའི་
བར་གྱིས་སྐུ་གསུམ་དུ་བསྟན་ཏོ། །དེ་བཞིན་འགྲོ་བའི་དོན་བྱེད་པ། །ཞེས་པ་ནས། སྲིད་པའི་དགོན་པ་ལས་བརྒལ་བ། །ཞེས་པའི་བར་གྱིས་འགྲོ་བ་གསུམ་གྱི་གཙོ་བོར་སྣང་བ་བསྟན་ཏོ། །སྟོན་པ་གཅིག་པུ་འགྲོ་བའི་བླ། །ཞེས་པ་ནས། བདུད་ཀྱི་དཔུང་རྣམས་ཕམ་བྱེད་པ། །ཞེས་པའི་བར་

49-1-99a

གྱིས་བདུད་ཕམ་པར་བྱེད་པ་བསྟན་ཏོ། །རྫོགས་པའི་སངས་རྒྱས་འཇིག་རྟེན་འདྲེན། །ཞེས་པ་ནས། ཕྱག་བྱར་འོས་པ་བླ་མའི་རབ། །ཅེས་པའི་བར་གྱིས་བསྙེན་བཀུར་གྱི་གནས་སུ་བསྟན་ཏོ། །འཇིག་རྟེན་གསུམ་པོ་གོམ་གཅིག་བགྲོད། །ཅེས་པ་ནས། ཤེས་དང་ཤེས་
བྱའི་བདག་པོ་མཆོག །ཅེས་པའི་བར་གྱིས་འཇིག་རྟེན་དང་འཇིག་རྟེན་ལས་འདས་པའི་སྤྲུལ་པ་མངའ་བར་བསྟན་ཏོ། །གཙོ་བོ་ཆོས་ཀྱི་སྦྱིན་བདག་སྟེ། །ཞེས་པ་ནས། འཇམ་དཔལ་དཔལ་དང་ལྡན་པའི་མཆོག །ཅེས་པའི་བར་གྱིས་མཇུག་བསྡུ་བ་བསྟན་ཏེ། དེ་དག་གིས་ནི་བྱང་ཆུབ་ཀྱི་སེམས་རྡོ་
རྗེ་ཞེས་བྱ་བའི་སྣང་བ་ཡེ་ཤེས་ལྔར་བསྟོད་པའོ། །མཆོག་སྦྱིན་རྡོ་རྗེ་མཆོག་ཁྱོད་འདུད། །ཅེས་པ་ནས། ཡི་གེ་རེ་རེ་ཞིང་ཆོས་ཀྱི་དབྱིངས་ལ་སོགས་པ་ལ་བསྟོད་པ་བསྟན་ཏོ། །རིགས་ཀྱི་བདག་པོ་ནས་བཟུང་སྟེ། ཨནྟསྠ་དང་། ཨུཤྨ་ཥའི་གཉིས་པ་དང་། བཞི་པའི་བར་གྱིས་ཡེ་ཤེས་སྔགས་ཀྱི་རང་
བཞིན་དུ་བསྟན་ཏོ། །རིགས་ཀྱི་བདག་པོ་ནས་བཅུ་དྲུག་པའི་བར་གྱིས་དེ་ཡང་འཇམ་དཔལ་ཡེ་ཤེས་སེམས་དཔའི་སྔགས་ཀྱི་རང་བཞིན་དུ་བསྟན་ཏེ། དེ་དག་ནི་དོན་གྱི་སྙིང་པོ་ཡོན་ཏན་བསྡུས་པའི་དོན་གྱི་བསྟོད་པའོ། །དེ་ནས་དཔལ་ལྡན་རྡོ་རྗེ་འཆང་། །ཞེས་པ་ནས། རྫོགས་སངས་རྒྱས་ལ་ཕྱག་འཚལ་
ནས། །ཞེས་པའི་བར་གྱིས་འཁོར་གྱི་མཆོད་པ་བརྗོད་པར་བསྟན་ཏོ། །དེ་ནི་མགོན་པོ་གསང་བའི་བདག །ཅེས་པ་ནས། རྫོགས་པའི་སངས་རྒྱས་ཀུན་གྱིས་བཤད། །ཅེས་པའི་བར་གྱིས་ཆེད་དུ་བརྗོད་པའི་བསྟོད་པ་བསྟན་ཏོ། །དེ་དག་ནི་ཡེ་ཤེས་ཀྱི་རྗེས་སུ་མཐུན་པའོ། །མཚན་ནས་རྗོད་པའི་
ཡོན་ཏན་གྱི་སྒོ་ནས་བསྟོད་པ་ནི་སྒོ་ལྔའི་ཁྱད་པར་ཤེས་པར་བྱའོ། །དེ་ལྟར་བསྡུས་པའི་དོན་ཡོངས་སུ་ཤེས་ཤིང་། དོན་ལྷག་པར་རྙེད་པའི་གང་ཟག་གིས་རྒྱུད་ཀྱི་རབ་ཏུ་བྱེད་པའི་དོན་འདི་ཉིད་ཀྱང་བདེ་བླག་ཏུ་རྙེད་པར་འགྱུར་རོ། །ད་ནི་ཚིག་གི་དོན་གསལ་བར་དབྱེ་བར་བྱ་སྟེ། དེ་ནས་དཔལ་ལྡན་རྡོ་རྗེ་
འཆང་། །ཞེས་བྱ་བ་ལ་སོགས་པ་ལ་མཆོག་དང་ཐུན་མོང་གི་དངོས་གྲུབ་ཐམས་ཅད་འབྱུང་བའི་གནས་མཚོན་པ་ལ་གང་ནས་ཤེ་ན། མནྟྲའི་རང་བཞིན་ཤེས་ཤིང་སྐྱོབ་པའོ། །དེས་སྤངས་པ་དང་ཡེ་ཤེས་ཕུན་སུམ་ཚོགས་པར་འགྱུར་བའི་ཕྱིར་དཔལ་ལྡན་རྡོ་རྗེ་འཆང་ངོ་། །གདུལ་དཀའ་བ་ནི་ཐེག་པ་

49-1-99b

གསུམ་སྟེ། སྤྲུལ་པ་དང་། ལོངས་སྤྱོད་རྫོགས་པའི་འཁོར་ལོས་སྒྱུར་བ་དང་། ལོངས་སྤྱོད་རྫོགས་པའི་འདུལ་བ་རྣམས་སོ། །ཀྱི་ཞེས་པ་ནི་དྲུག་པའི་དོན་གྱི་གཉིས་པའོ། །འདོད་ཆགས་དང་ཞེ་སྡང་དང་གཏི་མུག་རྣམ་པར་དག་པ་ནི་ཐེག་པའི་ཡང་རྣམ་པར་དག་པ་སྟེ། བདེ་བ་དང་། སྟོང་པ་དང་། 
གཉིས་སུ་མེད་པས་ན་མཆོག་གོ། །དཔའ་བོ་ནི་འཇིགས་ཤིང་ཐུབ་པ་མེད་པ་སྟེ་སྐུ་དང་། གསུང་དང་ཐུགས་ཀྱི་ཁྱད་པར་གྱིས་ས་འོག་དང་ས་སྟེང་དང་། ས་བླ་ལས་རྒྱལ་བའོ། །རྡོ་རྗེ་ནི་སྟོང་པ་ཉིད་བདེ་བ་ཆེན་པོའི་སྙིང་པོ་ཅན་ཏེ། གང་ལ་ཡོད་པ་ནི་དབང་ཕྱུག་གོ། །དེ་ལྔའི་གསང་བ་ལས་ཐོབ་པ་ནི་རྒྱལ་
པོའོ། །པདྨ་དཀར་པོ་ནི་དཀར་བ་ལ་སོགས་པའི་ཡོན་ཏན་ལྔ་དང་ལྡན་པ་སྟེ། འདིར་རྣམ་པར་རྟོག་པ་ཞི་བ་ལ་སོགས་པ་དང་ལྡན་པའོ། །ཡེ་ཤེས་ལ་ཆེད་དུ་བརྗོད་པ་ནི་རང་ལས་ཏེ། འགྲོ་བ་འཛིན་པའི་དོན་གྱིས་ན་ཡང་ཞེས་སྦྱར་རོ། །ཁྲོ་གཉེར་དང་སྐུ་དང་། ཨོག་སྤུ་སེར་ལ་བརྗེས་པ་དང་། མིག་
དམར་དང་། ལྕེ་འདྲིལ་ཞིང་ཡ་སོས་མ་མཆུ་མནན་པ་དང་། ཐུང་ཞིང་གེལ་བ་དང་། གསུས་པ་ཆེ་བ་དང་། ཡན་ལག་རབ་ཏུ་བགྲད་པ་དང་། ཉིང་ལག་རྡོ་རྗེ་རྩེ་མོ་ལྟ་བུ་དང་། དུར་ཁྲོད་དང་། གདུག་པའི་རྒྱན་གྱིས་བརྒྱན་པ་དང་། མཚོན་ཆ་འབར་ཞིང་འཕྲོ་བ་དང་། མགོ་བོའི་དོ་ཤལ་དང་། མེ་འབར་བའི་
གནས་ནི་རིམ་པར་ལྡན་པ་ལ་སོགས་པ་སྟེ། ལག་ན་རྡོ་རྗེ་དང་མཚུངས་པར་མཐའ་ཡས་པ་ལ་ཡོད་པ་ནི་མ་རིག་པ་ལ་སོགས་པ་རྟེན་ཅིང་འབྲེལ་བར་འབྱུང་བ་བཅུ་གཉིས་ཟད་པའི་དོན་ཏོ། །དེ་སྙེད་ཀྱི་བ་སྤུའི་ཁུང་ནས་འཕྲོ་བ་ཡང་རྡོ་རྗེ་རྩེ་མོ་སྟེ་ཁྲོ་བོའི་གཟུགས་སོ། །རང་གི་ལག་གིས་གསོར་བར་བྱེད་
པ་ནི་སྔ་མ་བཞིན་ཏེ། དེའི་དོན་ཀྱང་སྙིང་རྗེ་ཆེན་པོ་དང་ཤེས་རབ་དང་ཞེས་པའོ། །ཐབས་ནི་སྔོན་རང་གི་དོན་དུ་གྱུར་པ་ཇི་ལྟར་དེ་ཉིད་ཀྱིས་གཞན་དོན་དུ་འགྱུར་བའོ། །དེ་ལྟར་སྤྲུལ་པ་དང་ཡང་སྤྲུལ་གྱི་གཟུགས་ཐམས་ཅད་བཅོམ་ལྡན་འདས་རྡོ་རྗེ་འཆང་གི་རང་བཞིན་ལུས་ངག་ཡིད་གསུམ་གྱིས་
མཆོད་པའི་ཕྱིར། དགའ་མགུ་རངས་པའི་བསམ་པ་ཅན་ནོ། །ཁྲོ་བོ་འབའ་ཞིག་མི་རིགས་པ་མ་ཡིན་ཏེ། སངས་རྒྱས་ཀྱི་ཕྲིན་ལས་སེམས་ཅན་གྱི་མགོན་དུ་གྱུར་པས་སོ། །དེ་དང་ལྷན་ཅིག་པ་ནི་ཕྱག་ན་རྡོ་རྗེའོ། །ཐམས་ཅད་བསམ་པ་མཐུན་པར་ཞེས་པའོ། །དེ་བཞིན་གཤེགས་པ་ནི་དེ་

49-1-100a

བཞིན་ཉིད་སྣང་བ་མེད་པའི་ཡེ་ཤེས་ཐུགས་སུ་ཆུད་ནས་འགྲོ་བའི་དོན་ལ་གཤེགས་པས་སོ། །ཤེས་རབ་ཀྱིས་བཅོམ་པ་ཉིད་ཀྱི་ཕྱིར་དང་། དབང་ཕྱུག་ལ་སོགས་པའི་ཡོན་ཏན་དང་ལྡན་པས་མི་གནས་པ་བརྙེས་པས་ན་བཅོམ་ལྡན་འདས་སོ། །དེ་བཞིན་གཤེགས་པ་ཞེས་བྱ་བའི་
སྒྲ་ནི་བྱང་ཆུབ་སེམས་དཔའ་ལ་ཡང་གསུངས་ཤིང་བཤད་པ་སྟེ། ཡང་དག་པར་རྫོགས་པའི་སངས་རྒྱས་ལ་སོགས་པའི་ཡོན་ཏན་ནི་བདེ་བ་ཆེན་པོ་ཐོབ་པ་འབའ་ཞིག་ལའོ། །ཁྱབ་བདག་ནི་ཡོངས་སུ་དག་པའི་ཡེ་ཤེས་ཐམས་ཅད་ལ་ཁྱབ་པའི་བདག་ཉིད་དོ། །ཡང་ན་སེམས་ཅན་ཐམས་ཅད་ཀྱི་སྙིང་
པོར་གནས་པ་དང་། ཆོས་ཐམས་ཅད་ཀྱི་རང་བཞིན་དུ་གནས་པ་དང་། ཀུན་ནས་ཉོན་མོངས་པ་དང་རྣམ་པར་བྱང་བའི་བྱེད་པ་པོ་ཉིད་ཀྱིས་འགྲོ་བ་བཞིའི་དབང་པོ་ལ་ཁྱབ་པའི་བདག་ཉིད་དོ། །བདག་ནི་བདག་ཉིད་ཁོ་ནའོ། །སྨན་པ་ནི་ཚིག་དང་། དོན་དང་སྤོབས་པའི་གཟུངས་ཀྱིས་སོ། །བདག་དོན་
ནི་མཐར་ཐུག་པའི་དོན་ཏོ། །ཕྱིར་ནི་དགོས་པའོ། །ཐབས་ཁྱད་པར་ཅན་གྱི་སྒྱུ་མ་དང་འཕྲུལ་གྱི་རྣམ་པ་ལྟ་བུ་སྟེ། ནང་གི་རྟེན་ཅིང་འབྲེལ་པར་འབྱུང་བའི་སྦྱོར་བར་བདེ་བ་ཆེན་པོའི་དྲ་བས་ཀུན་ལ་གཡོགས་པར་བྱ་བ་ཉིད་ཀྱིས་རྫོགས་པའི་བྱང་ཆུབ་ཏུ་འགྱུར་བར་རོ། །ཅི་ནས་ཞེས་པ་ནི། ནན་ཏན་དུ་
བྱ་བའི་ཐ་ཚིག་གོ། །ཐེག་པ་ཆེན་པོར་འགྱུར་བ་ཉིད་ཡིན་ཏེ། དཔེར་ན་ས་བོན་གྱི་མ་གཏོགས་པར་མྱུ་གུ་ལ་སོགས་པའི་ཡོན་ཏན་འབྱིན་པར་ག་ལ་ནུས། དེ་བས་ན། མ་རྫོགས་རྫོགས་བྱེད་མདའ་ཡིན་ནོ། །ཞེས་གསུངས་པས། རྒྱུའི་གནས་སྐབས་ཀྱི་ཐབས་ཀྱི་སྦྱོར་བ་ལ་ཡང་བཀག་ན། 
ཕུན་སུམ་ཚོགས་པའི་འབྲས་བུའི་ཕྱིར་ལྟ་སྨོས་ཀྱང་ཅི་དགོས། དང་པོར་ནང་གི་བདག་ཉིད་ལ་བཞག་ཅིང་སྦྱར་བར་བྱ་བའི་ཕྱིར། སེམས་ཅན་མོས་པ་སྣ་ཚོགས་པ། །རྒྱལ་བས་ཀྱང་ནི་མ་གསུངས་ན། །བདག་འདྲ་ངན་པ་སྨོས་ཅི་དགོས། །དེ་བས་འཇིག་རྟེན་བསམ་པ་བཏང་། །ཞེས་གསུངས་པའི་
དོན་ཀྱང་དེའོ། །རྒྱུ་འབྲས་རྗེས་སུ་མི་མཐུན་པ་མ་ཡིན་ཏེ། བྱམས་པ་དང་སྙིང་རྗེ་སྔོན་དུ་སོང་བའི་བྱང་ཆུབ་ཀྱི་སེམས་སྨོན་པ་དང་འཇུག་པ་དང་། ཤིན་ཏུ་འཇུག་པ་ལ་སོགས་པས་སེམས་ཅན་གྱི་དོན་གྱི་ཕྱིར་ནང་དུ་གཞག་པའོ། །དེ་བས་ན་རྣམ་པར་རྟོག་པ་གང་གང་གིས། གང་གང་བློ་ནི་བསྒོམས་

49-1-100b

པ་དང་། །བསྒོམས་པའི་སྟོབས་ནི་རྫོགས་པ་དང་། །བདེ་གསལ་མི་རྟོག་བློ་འབྲས་ཅན། །ཞེས་པས་ཀྱང་ཤིས་པར་བྱའོ། །ཉོན་མོངས་པ་ནི་ཐམས་ཅད་རང་བཞིན་དངོས་པོ་དང་། དངོས་པོ་མེད་པ་དང་། བཏང་སྙོམས་ཀྱི་རྙོག་པས་སེམས་དཀྲུགས་པའོ། །མི་ཤེས་པ་ནི་བརྒྱུད་པའི་གཞུང་ལུགས་དང་
བྲལ་བས་དོན་མ་ཕྲད་དེ་སྨིག་རྒྱུ་ལ་ཆུར་བཟུང་བས་དལ་ཞིང་གདུངས་པ་བཞིན། འདིར་ཡང་བརྟགས་པའི་རྙོག་པའི་འདམ་དུ་བྱིང་བར་གྱུར་པ་རྣམས་སོ། །སྨན་པ་ནི་གཞན་ཤེས་རབ་གསུམ་ལ་སྦྱར་རོ། །ནང་གི་བདག་ཉིད་ལ་འཇུག་པའི་དགོས་པས་ན་ཕྱིར་རོ། །བླ་ནི་འབྲས་བུ་སྟེར་བའི་དོན་གྱིས་སོ། །
སྟོན་པ་ནི་ལོག་རྟོག་བཟློག་པའོ། །དམ་ཚིག་ནི་སྡོམ་པ་སྟེ། བདེ་བ་དང་སྟོང་པའི་དྲ་བ་ཕྱེད་པ་དེ་ཉིད་ཇི་ལྟ་བ་མཁྱེན་ཅིང་ཐུགས་སུ་ཆུད་པའོ། །དེ་ཉིད་ཀྱི་ཕྱིར་སངས་རྒྱས་ཀུན་གྱི་སྡོམ་པ་ནི། ཨེ་ཝཾ་ལས་ནི་རབ་ཏུ་ཞུགས། །ཞེས་གསུངས་སོ། །དབང་པོ་གདུལ་བྱའི་རྒྱུད་མཁྱེན་པའོ། །བསམ་པ་
ནི་གདུལ་བྱའི་འདོད་པ་མཁྱེན་པའོ། །དེ་དག་ནི་གནས་སུ་གྱུར་པས་མཆོག་གོ། །གིས་ནི་དྲུག་པའི་དོན་གྱི་གཉིས་པའོ། །ཡེ་ཤེས་སྐུ་ནི་ཡེ་ཤེས་ཕུང་པོ་ཅན་ཏེ་བདེ་བ་ཆེན་པོའི་རང་བཞིན་གྱིས་རྟག་པ་ཉིད་རྟག་ཏུ་འབྱུང་བའོ། །དེ་བས་ན། གང་གིས་ང་ལ་གཟུགས་སུ་མཐོང་། །གང་གིས་ང་ལ་
སྒྲར་ཤེས་པ། །ལོག་པར་རྟོག་པ་སྤང་བ་སྟེ། །སྐྱེ་བོ་དེ་ཡིས་ང་མི་མཐོང་། །སངས་རྒྱས་རྣམས་ནི་ཆོས་ཀྱི་སྐུ། །འདྲེན་པ་རྣམས་ཀྱི་ཆོས་ཉིད་ནི། །དེ་ནི་རྣམ་པར་ཤེས་མི་ནུས། །ཞེས་གསུངས་པའི་ཕྱིར་རོ། །གཙུག་ཏོར་ནི་བལྟར་མི་མངོན་པ་སྟེ། དེ་ཉིད་ཟིལ་གྱིས་མི་ནོན་པའི་རྟགས་ཡིན་པས་ན་གཙུག་ཏོར་ཆེན་
པོའོ། །ཚིག་གིས་རྗོད་པར་བྱེད་པ་སྟེ། མི་ཟད་པའི་གསུང་མངའ་བས་བདག་པོའོ། །ཡེ་ཤེས་ནི་མཐའ་དང་བྲལ་བ་སྟེ་མི་འགྱུར་བས་ན་སྐུའོ། །དེའི་མཚན་ཉིད་ནི་རང་འབྱུང་བ་སྟེ། འཇམ་དཔལ་ཡེ་ཤེས་སེམས་དཔའི་མཚན་གྱི་དོན་བརྗོད་པའོ། །འབྲེལ་པ་གཅིག་པས་མཆོག་གོ། །དོན་ཟབ་པ་ནི་རྟོགས་པར་དཀའ་བའོ། །
དོན་རྒྱ་ཆེ་བ་ནི་བློའི་ཡུལ་མ་ཡིན་པས་སོ། །དོན་ཆེན་པོ་ནི་རང་གཞན་གྲུབ་པས་སོ། །མཚུངས་པ་མེད་པ་ནི་གཅིག་པུར་གྱུར་པས་སོ། །ཞི་བ་ནི་གློ་བུར་ཀྱི་དྲི་མ་དང་བྲལ་བས་སོ། །དགེ་བ་གསུམ་ནི་སྐྱེ་བ་དང་། གནས་པ་དང་། འགག་པས་དབེན་པའོ། །ཡང་ན་ལུས་དང་ངག་དང་། ཡིད་གསུམ་ལས་འབྱུང་བ་གསུམ་མོ། །ཡང་
49-1-101a

ན་དུས་གསུམ་དུ་གསུངས་པ་དང་། གསུང་བར་འགྱུར་བ་དང་གསུང་བའོ། །དེ་ཉིད་ནི་ཡང་དག་པའི་ཤེས་པར་སྒྲུབ་པར་བྱེད་པར་ཡང་སྦྱར་བར་བྱའོ། །རྒྱུད་ནི་ཚིག་དང་དོན་ཏོ། །རྒྱུ་དང་ལམ་དང་འབྲས་བུ་ཆེན་པོ་སྟེ། དེ་རབ་ཏུ་རྒྱས་པར་གསལ་བར་བྱེད་པས་ཚིག་ལ་ཡང་ངོ་། །ཐབས་
ཀྱི་རྒྱུད་སྒྱུ་འཕྲུལ་དྲ་བ་མཚོན་པས་བཏགས་པ་སྟེ། ལྷ་སྦྱིན་ཞང་པོ་ཅན་ཞེས་བྱ་བ་ལྟ་བུའོ། །ལས་ནི་སྐལ་བའི་རྒྱུད་དེ་གོང་དུ་བསྟན་ཟིན་ཏོ། །རྡོ་རྗེ་འཆང་ཆེན་ནི་གྲགས་ཆེན་ལ། གསང་སྔགས་འཆང་ནི་སྙིང་པོ་དོན་གྱི་སངས་རྒྱས་སོ། །ཇི་སྙེད་པ་ནི་དཔག་མེད་རྣམས་ཀྱིས་སོ། །དགྱེས་བཞིན་དུ་གླུར་
བླངས་པ་བཤད་དུ་གསོལ་ཞེས་པ་ནི་ངེས་པའི་དོན་ཏོ། །གསང་འཛིན་ནི་རྒྱུད་འདི་ཉིད་སྔར་བཤད་པའི་དོན་ཡང་ངོ་། །ཕྱིར་ནི་གཙོ་བོར་གྱུར་པ་གཞན་མེད་པའོ། །ངེས་པ་ནི་མི་གནས་པའི་མྱ་ངན་ལས་འདས་པ་སྟེ། དེར་མ་བྱུང་གི་བར་ལ་འབྱུང་གི་བར་ཞེས་བྱའོ། །གཟུང་བ་ནི་བདག་དོན་དུའོ། །
གསང་བ་སྤང་བ་ནི་གཞན་གྱི་དོན་གྱི་ཕྱིར་རོ། །བསམ་པའི་ཁྱད་པར་ནི་དབང་པོའི་བྱེ་བྲག་ལའོ། །བཤད་པར་འཚལ་བ་ནི་དེ་ཁོ་ན་ཉིད་བཅུ་དང་། རིམ་པ་གཉིས་དང་ཟུང་དུ་འཇུག་པའོ། །གསང་དབང་ནི་དུག་བཅོམ་པའི་དེ་ཉིད་ལ་དབང་བའི་ལག་ན་རྡོ་རྗེས་སོ། །དེ་སྐད་དུ་ཞེས་པ་ནི་ལྔའི་གསོལ་
བ་གདབ་བོ། །སྤྱོད་ལམ་ནི་གུས་པའི་རྟགས་སོ། །དེ་ནས་དེ་མ་ཐག་ཏུའོ། །རིགས་དང་སྟོབས་མཚོན་པས་ཤཱཀྱ་ཐུབ་པའོ། །ཀང་གཉིས་ནི་ལྷ་དང་མིའི་སྟེ། དེའི་མཆོག་ཏུ་གྱུར་པའོ། །བཟང་བ་དང་། ཁ་དོག་དང་དབྱིབས་ཕུན་སུམ་ཚོགས་པའོ། །རིང་ཞིང་ཡངས་པ་ནི་ཆུ་དང་ཞེང་ངོ་། །
བརྐྱང་བ་དང་། འོད་ཕྱུང་བ་དང་། འཛུམ་པ་བསྟན་པའི་བདུད་བཏུལ་བ་དང་། འཁོར་བག་དང་ལྡན་པ་ལ་དགོད་པ་དང་། ཐུགས་རྗེ་ཆེན་པོས་སེམས་ཅན་གྱི་ཡིད་དང་མཐུན་པར་བསྟན་པའོ། །ཚངས་པའི་གསུང་དབྱངས་ནི་ཡན་ལག་དྲུག་ཅུ་དང་ལྡན་པ་སྟེ། འདིར་སྙན་པ་དང་། ཆེ་བ་དང་
གསལ་བ་དང་། དོན་གོ་བར་ནུས་པར་འདུས་པ་སྟོན་པའོ། །བཀང་བ་ནི་གྲགས་པའོ། །གསང་བ་ནི་གསང་བ་ཆེན་པོ་ལའོ། །སླར་གསུངས་པ་ནི་ཞུས་པའི་ལན་ནོ། །སྙིང་རྗེ་ཆེན་པོ་ནི་ཐུན་མོང་དང་ཐུན་མོང་མ་ཡིན་པའོ། །དག་པར་བྱེད་པ་ནི་ཉོན་མོངས་པ་དག་པར་བྱེད་པ་སྟེ། བཀྲ་ཤིས་

49-1-101b

པར་རོ། །སྡིག་སེལ་བ་ནི་རྡུལ་དང་བྲལ་བའོ། །བརྩོན་པ་ནི་མ་ཡེངས་པར་རྩེ་གཅིག་པའོ། །རང་དོན་ཉིད་ཀྱིས་ལེགས་སོ་ཞེས་པའོ། །གཉིས་པས་གཞན་དོན་གཟུང་བའོ། །ལེགས་པར་བསྟན་པ་ནི་འབྲས་བུ་དང་བཅས་པའི་ལམ་དུའོ། །ཉོན་ཞེས་པ་ནི། རྡོ་རྗེ་འཆང་སངས་རྒྱས་ཐམས་ཅད་ཀྱི་
རང་བཞིན་དུ་བལྟ་བ་དང་རྒྱུད་ཀྱི་རྒྱལ་པོ་འདི་ཉིད་ཡིད་བཞིན་གྱི་ནོར་བུ་རིན་པོ་ཆེས་བརྟན་པ་ལྟར་བལྟ་བ་དང་། ཐུན་མོང་གི་འཁོར་རིན་པོ་ཆེ་ལྟ་བུའི་གང་ཟག་ཏུ་བལྟ་བ་དང་། བཤད་བྱ་སེམས་ཀྱི་རང་བཞིན་ཤེས་རབ་དང་སྙིང་རྗེ་དབྱེར་མི་ཕྱེད་པར་བལྟ་བ་དང་། གསུང་དྲི་མ་མེད་པའི་བདུད་རྩིས་དབང་པོ་
ཚིམ་ཞིང་ཁྱབ་པར་འགྱུར་བའི་ཕྱིར། གསང་སྔགས་ནི་འགྲོ་བ་འདུལ་བའི་དུམ་བུ་ལྷའི་འཁོར་ལོ་སྟེ། སྙིང་པོ་དང་། ཕྱག་རྒྱ་དང་། རིག་སྔགས་རྣམས་ལ་ཐམས་ཅད་ཅེས་བྱའོ། །དེ་དག་ནི་རྡོ་རྗེ་དབྱིངས་ལ་སོགས་པའི་ལྷའི་འཁོར་ལོ་གཟུང་ངོ་། །དེ་ཉིད་ཀྱི་རིགས་ཤེས་པར་ཡང་བྱའོ། །རིགས་
ཆེན་ནི་རྣམ་པར་སྣང་མཛད་ཆེན་པོའི་རང་བཞིན་ལྔ་པ་དང་དྲུག་པའོ། །ཁོ་བོ་ནི་རིགས་འཕོ་བར་འདོད་པ་སྟེ། དམ་པའི་ཞལ་ལས་འོངས་པ་ནི་རྒྱས་གདབ་གསུམ་གྱི་ངོ་བོ་ཉིད་ཡིན་པའི་ཕྱིར་ཏེ་མདོར་བསྟན་པའོ། །གསང་སྔགས་རིག་སྔགས་འཆང་བའི་རིགས། །ཞེས་པ་ནི་གསང་སྔགས་ལ་
སོགས་པ་ནི་རིག་སྔགས་ཀྱི་ལས་བྱེད་ཅིང་། དོན་བསྒྲུབས་ན་འཆང་བ་སྟེ་ལས་ཀྱི་རིགས་སོ། །ཡང་ན་ཐམས་ཅད་ཤེས་རབ་ཀྱི་རྟགས་སུ་ཤེས་པར་བྱས་ལ། དེས་དེ་ལ་ནན་ཏན་དུ་བྱས་པས་དེ་འགྲུབ་ཅེས་པའོ། །སྐུ་དང་གསུང་དང་ཐུགས་ནི་རིགས་གསུམ་སྟེ། ལ་ནི་དེ་ཉིད་གཞིར་
བྱས་པའོ། །དེ་བཞིན་གཤེགས་པའི་རིགས་ལ་ནི། །ཞེས་བྱ་བ་ལ་རྣམ་པར་གཟིགས་པ་ནི་སྐུའོ། །འཇིག་རྟེན་ནི་ལོག་པའི་ཤེས་པས་བརྟགས་པའི་འཁོར་བ་སྟེ། དེ་ཉིད་རང་གི་ངོ་བོ་རྣམ་པར་དག་པ་ནི་འཇིག་རྟེན་ལས་འདས་པའི་རང་བཞིན་ལ། འཁོར་བའི་སྐྱོན་གྱིས་མ་གོས་པས་ན་
པདྨའི་རིགས་སོ། །དེ་བས་ན། དཔལ་དགྱེས་པའི་རྡོ་རྗེ་ལས་གཏི་མུག་ལ་སོགས་ཀྱིས་མི་འཆིང་། །རང་རང་ཉིད་ནི་རྫོགས་བྱང་ཆུབ། །ཅེས་གསུངས་པའི་ཕྱིར་རོ། །འཇིག་རྟེན་གཟུགས་ལ་སོགས་པ་སྟེ། །སྣང་བའི་དབང་པོའི་ཡུལ་དུ་འགྱུར་བའོ། །དེའི་བྱེད་པ་པོ་ནི་མཉམ་པ་ཉིད་

49-1-102a

ཀྱི་ཡེ་ཤེས་ཏེ། རིན་པོ་ཆེའི་རིགས་ལ་ཕྱོགས་མེད་པས་ན་ཆེན་པོའོ། །ཕྱག་རྒྱ་ནི་ཁྱབ་ཅིང་མི་འདའ་བའི་དོན་གྱིས་ཏེ། འབྲས་བུ་འབའ་ཞིག་པས་ཆེན་པོའོ། །རིགས་མཆོག་ཅེས་པ་ནི། རིགས་ལྔ་དབྱེར་མི་ཕྱེད་པས་རྩོད་འདས་ཀྱི་རིགས་སོ། །རྡོ་རྗེའི་རིགས་ནི་ཆེན་པོ་སྟེ། རིགས་
བཞིའི་བདག་ཉིད་ཡིན་པའི་ཕྱིར་འཁོར་རྣམས་ལ་ཟིལ་གྱིས་མི་གནོན་པའི་སྐྱེ་མཆེད་ཡོད་པ་དང་ཉིད་ཀྱིས་ཟིལ་གྱིས་མི་གནོན་པའི་སྐྱེ་མཆེད་ཀྱི་འཁོར་རྣམས་རིགས་དྲུག་གི་རྒྱུད་དུ་མཁྱེན་པས་གཙུག་ཏོར་ཆེར་གཟིགས་ནས་ཞེས་བྱའོ། །གཙོ་བོ་རྡོ་རྗེ་དབང་ཕྱུག་ལ་དགོངས་པ་དང་། འབྲས་
བུ་ཁོ་ན་ལམ་དུ་བྱ་བའི་ཕྱིར། རིགས་དྲུག་གི་རང་བཞིན་བྱང་ཆུབ་ཀྱི་སེམས་བདེ་བ་ཆེན་པོ་ཉིད་བཤད་པར་བྱ་སྟེ། ཚིག་ཅེས་པ་ནི་ཚིག་གི་རྒྱུད་དོ། །བདག་པོ་ནི་འཇམ་དཔལ་ཡེ་ཤེས་སེམས་དཔའ་སྟེ་རྡོ་རྗེ་འཆང་ངོ་། །ཚིགས་སུ་བཅད་པ་ནི་རྐྱང་བ་བསྡུས་པའོ། །བཀའ་སྩལ་པ་ཤུགས་
ཀྱིས་ཤེས་པར་བྱ་སྟེ། ལོངས་སྤྱོད་རྫོགས་པ་ཆེན་པོ་དང་། འཁོར་ལོས་སྒྱུར་བ་དང་། བསྟན་པའི་བདག་པོས་སོ། །གསང་སྔགས་ནི་སྐྱེ་བ་མེད་པའི་སྙིང་པོ་ཅན་ཡི་གེ་ཨའོ། །རྒྱལ་པོ་ནི་ཐམས་ཅད་ཀྱི་བདག་པོར་གྱུར་པས་སོ། །དྲུག་ནི་སྡེ་ཚན་ཤེས་རབ་ཀྱི་ཡི་གེའོ། །ལྡན་པ་ནི་སྡེ་ཚན་
བདུན་པའི་ཐབས་ཀྱི་ཡི་གེའོ། །དེ་མཚོན་བྱེད་དུ་གྱུར་ཅིང་། ཐུན་མོང་དང་མཆོག་གི་ནུས་པ་འབྱུང་ཞིང་ཤེས་པར་བྱའོ། །གཉིས་སུ་མེད་པར་འབྱུང་བ་དང་། །ཞེས་བྱ་བ་ནི་མ་ནིང་གི་ཡི་གེའི་རང་བཞིན་མཚོན་པར་བྱའོ། །མི་སྐྱེ་བ་ནི་ངོ་བོ་སྟེ་ཆོས་སོ། །ཆོས་ནི་རྐྱེན་ལས་སྐྱེས་པ་སྟེ་ཆོས་
ཅན་ནོ། །ཅན་ནི་ཐ་མི་དད་པའི་རང་བཞིན་འདི་གསུངས་པའོ། །དེ་ལྟར་གཉིས་སུ་མེད་པའི་ཡེ་ཤེས་ཡོངས་སུ་དག་ཅིང་དྲི་མ་མེད་པ་ཇི་ལྟར་གནས་ཤེ་ན། རིང་ཐུང་གི་བྱེ་བྲག་གིས་རིགས་དང་རིགས་ཀྱི་ཡེ་ཤེས་སོ། །དེ་བཞིན་གཤེགས་པའི་རིགས་ནི་མེ་ལོང་ལྟ་བུའི་ཡེ་ཤེས་ཏེ། མཚན་དང་
དཔེ་བྱད་ཀྱི་འཁོར་ལོར་སྣང་བ་དང་། སྣ་ཚོགས་དཀར་དམར་གྱི་རྣམ་པར་སྣང་བ་ནི་གདུལ་བྱའི་སྣང་བའི་ཁྱད་པར་ཏེ། དེ་ཉིད་རྣམ་པར་དག་པ་དང་རྣམ་པས་རང་བཞིན་གྱིས་འོད་གསལ་བ་ཨི་ཨཱི་ཞེས་བྱའོ། །རིན་པོ་ཆེའི་རིགས་ནི་མཉམ་པ་ཉིད་ཀྱི་ཡེ་ཤེས་ཏེ། ཐུན་མོང་མ་

49-1-102b

ཡིན་པའི་དབང་པོའི་ལོངས་སྤྱོད་དུ་གྱུར་པ་དང་། ཐུན་མོང་གི་དབང་པོའི་སྤྱོད་ཡུལ་དུ་གྱུར་པ་ནི་གདུལ་བྱའི་དབང་པོའི་ཁྱད་པར་ཏེ། རྣམ་པར་དག་པ་དང་རྣམ་པར་དག་པས་མཐའ་བཞི་ལ་མི་གནས་པ་ནི་ཨཽ་ཨཽ་ཞེས་བྱའོ། །པདྨའི་རིགས་ནི་སོ་སོར་རྟོག་པའི་ཡེ་ཤེས་ཏེ། 
ཁྲོ་བ་དང་མཉམ་པ་དང་ཞི་བའི་ཁྱད་པར་གྱི་རིགས་བསྡུས་རྒྱས་བྱེ་བྲག་ཏུ་སྣང་བ་དང་། རྣམ་ཤེས་སྐྱེ་བའི་སྒོ་ཐ་དད་པར་སྣང་བ་ནི་གདུལ་བྱའི་དབང་པོའི་ཁྱད་པར་ཏེ། རྣམ་པར་དག་པ་དང་རྣམ་པར་དག་པས་ཀུན་ནས་ཉོན་མོངས་པ་དང་རྣམ་པར་བྱང་བ་རྒྱུད་གཅིག་ཏུ་གནས་པ་ཨུ་ཨཱུ་ཞེས་
བྱའོ། །ལས་ཀྱི་རིགས་ནི་བྱ་བ་ནན་ཏན་གྱི་ཡེ་ཤེས་ཏེ། ཐོགས་པ་མེད་པའི་སྐུས་རིགས་སོ་སོའི་ཕྲིན་ལས་རྟག་ཏུ་རྒྱུན་མི་འཆད་པར་མཛད་པ་དང་། དག་པའི་ཀུན་རྫོབ་ཀྱི་མཚན་ཉིད་རང་དང་མཐུན་པའི་དོན་བྱེད། གདུལ་བྱའི་སྣང་བའི་ཁྱད་པར་ཏེ། རྣམ་པར་དག་པ་དང་རྣམ་པར་དག་པས་
འབད་པ་མེད་པར་རང་གི་ངང་གིས་འབྱུང་བ་ནི་ཨཾ་ཨའོ། །རྡོ་རྗེའི་རིགས་ཆོས་ཀྱི་དབྱིངས་ཀྱི་ཡེ་ཤེས་ཏེ། ཐམས་ཅད་གཅིག་ཏུ་གྱུར་པ་ཉིད་དང་།སྒྲོ་སྐུར་དང་བྲལ་བ་ཉིད་ནི་དེ་བཞིན་གཤེགས་པ་དང་གང་ཟག་གི་ཁྱད་པར་ཏེ། རང་གི་ངོ་བོས་ནི་གཅིག་ལ་རྟག་ཏུ་འབྱུང་བ་དང་རྗེས་འཇོག་ཏུ་གནས་
པས་རྣམ་པར་དག་པ་དང་། རྣམ་པར་དག་པས་འདིའི་ཞེས་འགའ་ལ་ཡང་མི་གནས་པའི་ཨེ་ཨཻ་ཞེས་བྱའོ། །རྡོ་རྗེ་སེམས་དཔའི་རིགས་ནི་བདེ་བ་ཆེན་པོའི་ཡེ་ཤེས་ཏེ། གཟུགས་ཅན་མ་ཡིན་པ་དང་། སྐྱེ་འཇིག་མེད་པ་དང་། ཡུལ་ལ་མི་གནས་པ་དང་། འགྲོ་འོང་མེད་པ་དང་། ཕྱི་དང་
ནང་གི་ཆོས་ཐམས་ཅད་དེའི་ངོ་བོར་གཅིག་པ་དང་། ཟུག་རྔུ་གང་གིས་ཀྱང་མ་གོས་པའི་ཡེ་ཤེས་སྣང་བ་མེད་པ་ལ་སོགས་པ་འབྲས་བུའི་ལུས་བརྒྱད་དང་ལྡན་པ་དང་། མཚན་མ་ཐམས་ཅད་རང་གྲོལ་བས་དབང་པོ་རང་ཞི་ཞིང་མིང་གིས་དབེན་པའི་ཟུང་འཇུག་རྒྱུད་ལས་སྐྱེས་པ་ནི། རིགས་ཐམས་
ཅད་ཡེ་ཤེས་ཐམས་ཅད་ཉིད་ཡིན་པས་རྩོད་འདས་ཞེས་བྱ་སྟེ། དབྱེ་བ་མེད་པ་ལ་ཨ་ཨཱ་ཞེས་བྱའོ། །དེ་རྟོགས་པར་བྱ་བ་ནི་རྣམ་པར་རྟོག་པའི་བློའི་ཁྱད་པར་ནང་རྟེན་ཅིང་འབྲེལ་ཏེ་འབྱུང་བས་འཇུག་པ་སྟེ། སྠི་ཏོ་ཧྲྀ་དི་ཞེས་བྱ་བ་ནི་རེ་ཞིག་པའི་གནས་མཚོན་པ་སྟེ། སྙིང་ག་ཆོས་ཀྱི་འཁོར་

49-1-103a

ལོ་ལ་སོགས་པའོ། །ཛྙཱ་ན་ཞེས་བྱ་བ་ནི་དགའ་བ་དང་མཆོག་ཏུ་དགའ་བ་དང་། དགའ་བྲལ་དང་། ལྷན་ཅིག་སྐྱེས་པའི་དགའ་བའི་ཡེ་ཤེས་གནས་དེ་དག་ཏུ་རྙེད་པར་འགྱུར་བའོ། །མཱུརྟི་ཞེས་བྱ་བ་ནི་སྤྱི་གཙུག་ལ་བྱ་སྟེ། ཕྲ་མོའི་རྣལ་འབྱོར་གྱི་སྦྱོར་བས་འཁྲུལ་འཁོར་གྱི་སྦྱོར་
བས་ལམ་ངེས་པར་སྦྱངས་ནས་ཐིག་ལེའི་རྣལ་འབྱོར་གྱིས་ཤིགས་པ་མེད་པའི་ཡི་གེ་ཧཾ་ལས་བྱང་ཆུབ་ཀྱི་སེམས་འཇག་པ་འདྲེན་ཅིང་རོལ་པས་བདེ་བ་རྙེད་པར་འགྱུར་བའོ། །ར་ག་ར་སྟེ་ཆགས་པ་ཆེན་པོའི་སྦྱོར་བས་འོག་ནས་འབྱུང་བའི་བཅོམ་ལྡན་འདས་མའི་ཡེ་ཤེས་དེ་ཉིད་ཧཾ་ངོ་། །ཇི་ལྟར་རྣལ་
འབྱོར་དུ་བྱ་བ་ནི་ར་སྟེ་རྡོ་རྗེ་དང་པདྨའོ། །དེ་ཡང་ཡེ་ཤེས་ཀྱི་བྱེད་པ་པོ་དང་ཕྲད་པ་ལས་བྱང་ཆུབ་ཀྱི་སེམས་གཉིས་ནི་ཨ་དང་བུདྡྷོའོ། །དེ་ཉིད་ནང་གི་འཇུག་པའི་རིམ་པས་རྟོགས་པར་གྱུར་པ་ནི་བུདྡྷ་ནཱཾ་ནོ། །དགའ་བ་གསུམ་ལྷན་ཅིག་སྐྱེས་པའི་ངོ་བོར་འབྱུང་བ་དང་། ལྷན་ཅིག་སྐྱེས་པ་དུས་
གསུམ་དུ་འབྱུང་བ་ནི་ཏྲྱ་དྷྭ་བརྟི་ནཱིའོ། །མན་ངག་བླ་མའི་ཞལ་ལས་ཤེས་པར་བྱའོ། །ཇི་ལྟར་ཉམས་སུ་བླང་བ་ཡང་དབྱེར་མི་ཕྱེད་པའི་ཡེ་ཤེས་བློའི་ཡུལ་རིང་དུ་གྱུར་པ་ནི་བཛྲ་ཏཱིཀྵྞའོ། །དེ་ལྟར་ཡང་སྡུག་བསྔལ་གཅོད་པར་ནུས་པ་ཡང་མ་ཡིན་ཏེ། དམ་པའི་ཞབས་ཀྱི་པདྨོ་ལ་བཏུད་པའི་
དྲིན་གྱིས། སྐད་ཅིག་ལ་རྙེད་པར་གྱུར་པས་དུཿཁ་ཙྪེ་དའོ། །དེ་བས། ཀྱེ་ཧོ་གྲོགས་དག་ལྷན་ཅིག་སྐྱེས་པ་དེ། །གཞན་ནས་མི་རྙེད་བླ་མའི་ཞལ་ལས་དྲིས། །ཞེས་གསུངས་པས་སོ། །དེས་གནང་བར་གྱུར་པའི་རིམ་པ་ནི་པྲཛྙཱ་གཱ་ནའོ། །མཱུརྟི་ནི་རྒྱུན་ཏེ་བཞི་པའོ། །ཡ་ནི་ཡ་ཏེ་གནས་
པའི་དོན་ཏོ། །དེ་ཉིད་གཉུག་མའི་ཡེ་ཤེས་རང་གི་མཚན་ཉིད་དུ་བྱས་པ་ནི་ཛྙཱ་ན་སྟེ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་ཉིད་ཡིན་པར་ཀཱ་ཡ་ཝཱཀ་གོ། །ཡང་ནི་བཱ་གཱི་ཤྭ་རི་ནི་གསུང་གི་དབང་ཕྱུག་གི་རྒྱུད་པས་དེ་ཉིད་ཤེས་པར་བྱ་སྟེ། ལུང་དང་རང་གི་རིགས་
པ་དང་བླ་མའི་གདམས་ངག་གིས་ཞེས་གཞན་དུ་བསྟན་ཏོ། །ཨ་ལ་སོགས་པའི་དོན་ནི་སྐྱེ་བ་མེད་པའི་བདེ་བ་ཆེན་པོའི་སྙིང་པོ་ཞེས་དང་། མངོན་པར་ཞེན་པ་དང་བྲལ་བའི་སྟོབས་ཀྱིས་དམ་ཚིག་གི་སྤྱོད་པ་དང་། རིགས་པས་ཐམས་ཅད་ཀྱང་དེ་བཞིན་དུ་བསྡུ་བ་དང་། དེ་ཁོ་ན་ཉིད་

49-1-103b

རེ་རེ་དང་བྲལ་བ་དང་ཞེས་བྱ་བའི་དོན་ལ་ཡང་མི་གནས་པའོ། །འདི་ལྟར་ནི་བཤད་ཟིན་པ་དང་སྦྱར་རོ། །ཨ་ལས་འབྱུང་བ་ནི་སངས་རྒྱས་ཀྱི་རྒྱུད་དོན་ཨཱའོ། །དོན་ཆེན་ལ་སོགས་པ་ནི་དོན་ཆེ་བས་ཕན་ཡོན་ཆེ་བ་འབྱུང་བས་ན་སྐྱེ་བ་མེད་པའི་སྙིང་རྗེའི་སྙིང་པོ་ཅན་ནི་ཡི་གེ་དམ་པ་ཨ་ལས་འབྱུང་བའི་
ཡིན་ནོ་ཞེས་བྱའོ། །མཆོག་ནི་མཆོད་པ་དཔ་དང་རྗེད་གཞི་ཐམས་ཅད་ཀྱི་སྲོག་ཏུ་གྱུར་པ་སྟེ། ཁོང་ནས་འབྱུང་བས་ན་སྲོག་གོ། །དེའི་ཕྱིར་སྐྱེ་བ་མེད་པ་མཚོན་པར་ནུས་ཏེ། དཔེར་ན་སྲོག་གི་རླུང་འགགས་ན་ཐམས་ཅད་འགག་པར་འགྱུར་བ་བཞིན་ནོ། །བརྗོད་པ་དང་བྲལ་བས་ཕུན་སུམ་ཚོགས་
པ་འབྱུང་བ་སྟེ། བརྗོད་པ་ནི་མིང་ཡིན་ལ་དེ་ལས་བློ་སྐྱེ་བའི་ཕྱིར་རོ། །ཐམས་ཅད་དུ་བརྗོད་པ་མ་བཀག་པ་ནི་མ་ཡིན་ཏེ། སྲོག་ཡིན་པས་རྒྱུར་འགྱུར་ལ། ཡན་ལག་གི་གསལ་བར་བྱེད་པའོ། །དེ་ལྟར་ཡི་གེ་གཙོ་བོ་ལས་མངོན་པར་འཕེལ་བ་ནི་དཀྱིལ་འཁོར་གྱི་འཁོར་ལོ་ཐམས་ཅད་ཀྱིས་
བོན་དང་། སྙིང་པོ་དང་སྔགས་སུ་གྱུར་པའོ། །གསལ་ཡིག་མ་འཕེལ་བ་མ་ཡིན་ཏེ། སྲོག་ཏུ་བརྗོད་པའི་ཕྱིར་དང་། བཅུ་གཅིག་པའི་ཐིག་ལེས་ཐབས་ཀྱི་རང་བཞིན་གཟུང་བའོ། །ཐབས་སུ་མི་འགྱུར་བ་མ་ཡིན་ཏེ། མཁའ་འགྲོ་མ་དྲ་བའི་གུར་ལས། བདེ་བ་ཆེན་པོ་འཁོར་བ་ཁྱབ། །
བདེ་བ་སྤངས་ནི་དེ་མ་ཡིན། །ཞེས་པས། ཐིག་ལེ་སྤངས་པ་ལ་རྙེད་པར་མ་གསུངས་སོ། །བདེ་བ་ཆེན་པོ་ནི་ཤེས་རབ་མ་ཡིན་ཏེ། དེ་ཉིད་ལས། བུད་མེད་བཟང་མོའི་རེག་བདེ་བ། །གླུ་ཐོས་པ་ཡི་ཞི་བ་བདེ། །དྲི་བསྣམས་པ་ཡི་བདེ་བ་ཆེ། །སྐྱེས་ནས་རེག་པའི་བདེ་བ་ཆེ། །བཅུད་ལེན་
རབ་ཏུ་སྦྱོར་བ་ཡིས། །བདེ་བ་སུ་ཞིག་འགོག་པར་བྱེད། ཅེས་གསུངས་པས་ན། ཤེས་རབ་དང་ཐབས་ཐ་མི་དད་པ་ཉིད་ལས་དཀྱིལ་འཁོར་པ་ཐམས་ཅད་རྫོགས་པར་འགྱུར་བའི་ཕྱིར་མཆོད་པ་ཆེན་པོ་ཞེས་བྱ་བ་ལ་སོགས་པ་གསུངས་ཏེ། འདོད་ཆགས་དང་། འདུ་ཤེས་དང་། མེའི་
ཁམས་རྣམ་པར་དག་པ་ནི་མཆོད་པ་ཆེན་པོ་སྟེ་བདེ་བའོ། །དེས་རྒྱུ་དང་འབྲས་བུའི་སྐབས་སུ་སེམས་ཅན་ཐམས་ཅད་དགའ་བར་བྱེད་དོ། །ཞེ་སྡང་དང་། རྣམ་པར་ཤེས་པ་དང་།ཆུའི་ཁམས་རྣམ་པར་དག་པ་ནི་ཞེ་སྡང་ཆེན་པོ་སྟེ་མཆོད་པའོ། །དེས་ཉོན་མོངས་པ་དང་ཉེ་བའི་

49-1-104a

ཉོན་མོངས་པ་གཅོད་པར་བྱེད་དོ། །གཏི་མུག་དང་གཟུགས་དང་། སའི་ཁམས་རྣམ་པར་དག་པ་ནི་གཉིས་མེད་དེ། གཏི་མུག་ཆེན་པོའི་མཆོད་པའོ། །དེ་མི་ཤེས་ཤིང་ཤེས་པ་མེད་པས་ན་གཏི་མུག་བློ་སྟེ་མ་རིག་པའི་རྩ་བ་ཅན་གྱི་གཏི་མུག་སེལ་ཏོ། །ཕྲག་དོག་དང་། 
འདུ་བྱེད་དང་། རླུང་གི་ཁམས་རྣམ་པར་དག་པ་ནི་འགྲོ་འོང་མེད་པའི་རང་གྲོལ་དུ་གྱུར་པ་སྟེ། ཕྲག་དོག་ཆེན་པོའི་མཆོད་པའོ། །དེ་ཡང་ཐ་མལ་པའི་ཕྲག་དོག་གཅོད་པར་བྱེད་པས་ན་སྒྲ་ཆེ་བ་ཞེས་བྱའོ། །སེར་སྣ་དང་། ཚོར་བ་རྣམ་པར་དག་པའི་ཁམས་ནི་བློ་ཡིས་མ་སྤགས་པ་སྟེ། ཆགས་པ་
ཆེན་པོའི་མཆོད་པའོ། །དེས་མངོན་པར་ཞེན་པ་ཐམས་ཅད་སེལ་བར་བྱེད་དོ། །དེ་ལྟར་འཁོར་བའི་རྣམ་པར་དག་པ་རིགས་དང་དེ་བཞིན་གཤེགས་པར་བསྟན་ལ། དེ་ཡང་ཡེ་ཤེས་ཀྱིས་དག་པར་བྱས་ལ་རྩོད་འདས་སུ་ཤེས་པར་བྱའོ། །བསྟན་པ་ལ་དགོས་པ་མེད་པ་མ་ཡིན་ཏེ། 
ཕལ་པའི་རྣམ་པར་སྤངས་པའི་ཕྱིར། །བསྒོམ་པར་ཡང་དག་རབ་ཏུ་གྲགས། །ཕལ་པའི་རང་བཞིན་སྤངས་ནས་ནི། །བསྒོམ་པ་དེ་ནི་སྒོམ་པ་མིན། །ཞེས་གསུངས་པས་སོ། །འདོད་པ་ཆེན་པོ་ཞེས་བྱ་བ་ལ་སོགས་པ་ལས་སེམས་བསྐྱེད་པའི་རང་བཞིན་དུ་བསྟན་པར་བྱ་སྟེ། དགའ་བ་དང་མཆོག་
ཏུ་དགའ་བ་དང་། ལྷན་ཅིག་སྐྱེས་པའི་དགའ་བ་དང་། དགའ་བྲལ་གྱི་མཚན་ཉིད་ནི། འདོད་ཆགས་ཆེན་པོ་དང་། བདེ་བ་ཆེན་པོ་དང་། མགུ་བ་ཆེན་པོ་སྟེ། དེ་ཡང་། སྣ་ཚོགས་རྣམ་པ་སྣ་ཚོགས་བརྗོད། །འཁྱུད་དང་འོ་བྱེད་ལ་སོགས་པ། །རྣམ་པར་སྨིན་པ་དེ་ལས་བཟློག །བདེ་བའི་
ཡེ་ཤེས་ཟ་བ་ཉིད། །རྣམ་པར་ཉེད་པ་སྤྱད་པ་མཛོད། །བདག་གིས་བདེ་བ་སྤྱད་དོ་ཞེས། །མཚན་ཉིད་བྲལ་ལ་གསུམ་ལས་གཞན། །ཆགས་དང་ཆགས་མེད་རྣམ་པར་སྤངས། །ཞེས་གསུངས་པས་ཤེས་པར་བྱའོ། །གཟུགས་ཆེན་ཞེས་བྱ་བ་ལ་སོགས་པས་ནི་དབང་བསྐུར་བའི་
རང་བཞིན་དུ་བཤད་པར་བྱ་སྟེ། དེ་ཡང་ཡེ་ཤེས་ལ་དབང་བ་དང་། ཉོན་མོངས་པ་ལ་དབང་བ་དང་། རླུང་ལ་དབང་བ་དང་། བདུད་ལ་དབང་བ་སྟེ། དེ་ཡང་གཟུགས་ལུས་ཆེ་བ་དང་།  ཁ་དོག་དང་དབྱིབས་ཆེ་བ་དང་། མིང་དང་རྒྱ་ཆེ་བ་དང་། དཀྱིལ་འཁོར་ཆེ་ཞིང་ཡངས་པ་སྟེ། བརྡ་དང་

49-1-104b

ཉམས་སུ་མྱོང་བ་རྟོགས་པ་དང་། དོན་གཅིག་པ་ཉིད་ཀྱིས་གཟུགས་དང་དོན་ལུས་ནི་སྣང་བ་ཐམས་ཅད་དེ་ཆེན་པོ་ནི་བརྡར་གྱུར་པའི་དོན་བསམ་གྱིས་མི་ཁྱབ་པ་ཉིད་དུའོ། །ཁ་དོག་དང་ལུས་ནི་བྱེ་བྲག་འཛིན་པའི་ཤེས་པ་སྟེ། ཉོན་མོངས་བརྒྱད་ཁྲི་བཞི་སྟོང་ངོ་། །ཆེ་བ་ནི་མཆོད་པ་མཆོག་
གི་དུས་སུའོ། །སྙིང་པོར་གྱུར་པ་ནི་དེ་བཞིན་ཉིད་རིག་པ་སྟེ། དེ་བས་ན། རང་རིག་པ་ཡི་བདག་ཉིད་དེ། །དག་པ་གཞན་གྱིས་གྲོལ་མི་འགྱུར། །ཞེས་གསུངས་པས་སོ། །མིང་དང་རྒྱ་ཆེ་བ་ནི་ཇི་སྲིད་དུ་མིང་དུ་བཏགས་པ་དེ་སྲིད་དུ་བརྟགས་པའི་རྟོགས་པ་སྟེ། དེ་དག་ཐམས་ཅད་ཀྱི་བྱེད་པ་
པོ་ནི་རླུང་ལྔའི་བདག་ཉིད་བཅུའི་མིང་ཅན་རྣམ་ཤེས་ཀྱི་བཞོན་པ་སྟེ། དེ་ཡང་དག་པར་བྱེད་པ་ནི་བླ་མའི་ཞབས་ཀྱི་པདྨོ་ལས་རྙེད་པའོ། །ཐམས་ཅད་ལྷན་ཅིག་སྐྱེས་པའི་འཇུག་པ་ཉིད་ཀྱི་ཆེ་བ་སྟེ། དེ་ནི་ཡང་དག་པ་མ་ཡིན་པའི་རྟོག་པའི་ཆོས་མཐའ་དག་གི་འོབས་ཀྱིས་བསྐོར་བའི་ནང་
དུ་དྲི་མ་དང་བཅས་པའི་སྲིད་པའི་ཆུས་བཀང་བ་སྟེ། སྲིད་པའི་ཤིང་སྦངས་ཤིང་གཏོར་བས་བསྐྱེད་པ་ལས་ཤིན་ཏུ་རིང་དུ་སྐྱེས་ནས་འདོད་པའི་འབྲས་བུ་མིག་དགའ་བ་བསྐྱེད་པ་དང་། རྣ་བ་བདེ་བ་བྱེད་པ་དང་། དྲི་ཞིམ་པ་དང་། རོ་ཞིམ་པ་མཁྲང་ཞིང་སྦོམ་ལ་སྣ་ཚོགས་རྣམ་པ་མང་པོ་ཉམས་
སུ་མྱོང་བར་བྱེད་ཅིང་།རྒྱུ་གསར་དུ་བསྐྱེད་པའི་སྲེད་པ་ལས་ལྡོག་པར་འགྱུར་ཞེས་གསུངས་པས་སོ། །དཀྱིལ་འཁོར་ཆེན་པོ་ནི་སྐུ་བཞི་དབྱེར་མེད་འཁོར་ལོ་སྟེ། བདེ་བ་ཆེན་པོར་གཅིག་པས་ཡངས་པའོ། །དེ་ཉིད་ལ་དངོས་གྲུབ་དང་བར་དུ་གཅོད་པ་མི་གནས་པའི་དོན་ཏོ། །དམན་
པ་རྣམས་ཀྱིས་ནི་ལུས་ངག་གི་བརྡས་སོ། །ཤེས་རབ་མཚོན་ཆེན་པོ་ལ་སོགས་པས་ནི་ཆོས་བཤད་པའི་རང་བཞིན་དུ་བསྟན་པར་བྱ་སྟེ། དོན་གཅིག་པ་དང་། མ་རྨོངས་པ་དང་། ཐབས་མང་བ་དང་། དཀའ་བ་མེད་པའོ། །དེ་ཉིད་དགག་སྒྲུབ་དང་བྲལ་བ་དང་ཉམས་སུ་མྱོང་བ་དང་། 
ཕྱག་རྒྱ་བཞི་པ་དང་། འབྲས་བུ་ལམ་དུ་བྱེད་པའོ། །དེ་ནི་འདི་ལྟར་ཤེས་པར་བྱ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་རིག་པས་དབུ་མར་ཤེས་པར་བྱ་སྟེ། དེ་ནི་མཚོན་ཆེན་པོ་ཡིན་པས། །སྒྲོ་བཏགས་ཀུན་ལས་རྣམ་གྲོལ་བ། །དེ་ནི་དབུ་མ་པ་ཡིས་རིག །ཅེས་བཤད་པ་ཡང་མིང་

49-1-105a

དུ་བཏགས་པ་དང་། བློ་ཡིས་བརྟགས་པ་ཐམས་ཅད་གྲོལ་བ་ཡེ་ཤེས་ཀྱི་རྒྱུད་ཉིད་དུ་འཆང་བའོ། །ཉོན་མོངས་པ་ནི་འདོད་ཆགས་ལ་སོགས་པ་སྟེ། རླུང་གནས་སུ་ཞུགས་པའི་མན་ངག་ནི་ལྕགས་ཀྱུ་ཆེན་པོའོ། །དེ་ཡང་སྤྱིའི་རྣམ་པ་ལས་གྲོལ་བ་སྟེ། སྤྱིའི་རྣམ་
པ་ནི་སློབ་དཔོན་ཀླུ་སྒྲུབ་ཀྱི་ཞལ་སྔ་ནས། འོན་ཀྱང་སྒྲ་ལས་སྐྱེས་པ་ཡི། །རྣམ་རྟག་གཟུགས་བརྙན་ཉིད་ཡིན་ནོ། །ཞེས་གསུངས་པས་སོ། །རང་གི་མཚན་ཉིད་ནི། ལྷན་ཅིག་སྐྱེས་པའི་ངོ་བོ་དང་། །མཆོག་མཐའ་དགའ་བྲལ་དང་པོ་ཅན། །མུན་པ་ལ་ནི་མར་མེ་བཞིན། །དེ་བཞིན་
བུས་ཀྱང་ཡིད་ཆེས་གྱིས། །ཞེས་གསུངས་པའི་ཕྱིར་མཆོག་གོ། །གྲགས་ཆེན་ནི་ཕ་རོལ་ཏུ་ཕྱིན་པ་དྲུག་སྟེ། སྙན་པར་གྲགས་པ་ནི་ཐབས་ཆེ་བ་ལ་སོགས་པའོ། །སྣང་བ་ཆེན་པོ་ནི་བདག་དང་གཞན་གྱི་དོན་ཕུན་སུམ་ཚོགས་པའི་འབྲས་བུ་སྟེ། དེ་ཉིད་རྒྱུའི་དུས་ཉིད་དུ་རང་གི་ངོ་བོར་གྱུར་
པ་གསལ་བ་ཆེ་ཞེས་པའོ། །ཐ་དད་པ་མ་ཡིན་ཏེ། དེ་ཡི་རང་བཞིན་དེ་ཡིན་ཕྱིར། །དེ་ཡི་ནུས་པ་དེ་ལ་གནས། །དེ་ཕྱིར་དེ་ཡི་རང་བཞིན་ནོ། །ལམ་ཉིད་ནས་ནི་བསྒོམ་པར་བྱ། །ཞེས་གསུངས་པས་སོ། །མཁས་པ་ལ་སོགས་པ་ཕྲིན་ལས་ཀྱི་རང་བཞིན་དུ་བཤད་པར་བྱ་སྟེ། དེ་ཡང་
རིགས་མཐའ་ཡས་པ་རིགས་གཅིག་ཏུ་བྱེད་པ་ཡང་རིགས་མཐུན་པ་གཉེན་པོར་བྱེད་པ་དང་། རིགས་ཀྱི་མཚན་མ་དངོས་གྲུབ་བསྒྲུབ་པ་དང་ཆོས་ཐམས་ཅད་ལྷན་ཅིག་སྐྱེས་པར་བྱེད་པའི་ལས་སོ། །དེ་ནི་རྣམ་འཕྲུལ་སྣ་ཚོགས་པ་གཅིག་པ་ཉིད་དང་། ཐབས་ཁྱད་པར་ཅན་ཉིད་
དང་རྗེས་སུ་མཐུན་པས་བྱིན་གྱིས་བརླབས་པ་ཉིད་དང་། འཁྲུལ་པ་ཞིག་པའི་རང་བཞིན་ཏེ། དེ་ནི་དཔེར་ན་ཆུ་ཟླ་དང་། དུག་གིས་དུག་གསོ་བ་དང་། འཁོར་ལོས་སྒྱུར་བའི་རྒྱལ་པོའི་བུ་དང་། ཆུ་རྣམས་རྒྱ་མཚོ་ཆེན་པོར་ལན་ཚྭར་རོ་གཅིག་པ་བཞིན་ནོ། །དེ་ལྟ་བས་ན། 
མཁས་པ་རྣམས་ནི་བདེ་བ་ཆེན་པོ་སྟེ། བདེན་པ་གཉིས་ལས་ཡོངས་སུ་གྲུབ་པས་སོ། །སྒྱུ་འཕྲུལ་ཆེན་པོ་ནི་དེ་ཉིད་ལས་རིགས་སྣང་བའོ། །འཆང་བ་ནི་མངའ་བ་ཞེས་བྱ་བའི་དོན་ཏོ། །དེ་བས་ན། གངྒཱའི་ཀླུང་བཅུའི་བྱེ་མ་དང་མཚུངས་པ། །རིགས་གཅིག་ལ་ནི་དེ་

49-1-105b

བཞིན་གཤེགས་པའི་ཚོགས། །རིགས་ཀྱི་ཚོགས་ལས་རིགས་ནི་དུ་མ་སྟེ། །རིགས་དེ་ལས་ནི་རིགས་ནི་དུ་མ་བརྒྱ། །དེ་ལས་ཡང་ནི་རིགས་འབུམ་ཆེན་པོ་སྟེ། །རིགས་ནི་ས་ཡ་ཕྲག་མང་པོ་ཡིན་པས། །མི་ཡི་རིགས་ནི་གྲངས་མེད་དེ། །དམ་པ་དགའ་བའི་རིགས་ལས་འབྱུང་བའོ། །
ཞེས་གསུངས་པའི་ཕྱིར་རོ། །སྒྱུ་འཕྲུལ་ཆེན་པོ་ནི་བསྐྱེད་པ་ལོངས་སྤྱོད་རྫོགས་པའི་འཁོར་ལོའོ། །དེ་དག་གི་དགོས་པ་ནི་ཀུན་དུ་བརྟགས་པར་བྱེད་པའི་དོན་ཏེ། དེ་ཡང་། བསྐྱེད་པའི་རིམ་པའི་ཡི་གེ་ཕྱོགས། །གང་དང་གང་གིས་འཇིག་རྟེན་བཅིངས། །དེ་
དང་དེ་ནི་བཅིངས་ལས་གྲོལ། །དེ་ཉིད་མི་ཤེས་འཇིག་རྟེན་འཆིང་། །དེ་ཉིད་རྣམ་སྤངས་གྲུབ་མི་ཐོབ། །ཅེས་གསུངས་པས་སོ། །མཚན་མས་མཚན་མ་འཇིག་པ་མི་འཐད་པ་མ་ཡིན་ཏེ། དེ་ཡང་། ཞལ་ཕྱག་ཁ་དོག་དབྱིབས་ལས་ནི། །འོན་ཀྱང་ཐ་མལ་བག་ཆགས་འཇིགས། །དུག་གི་དུམ་བུ་གང་ཉིད་ཀྱིས། །སྐྱེ་བོ་
ཐམས་ཅད་འཆི་བ་སྟེ། །དུག་གི་དེ་ཉིད་ཤེས་དེ་ཡིས། དུག་གིས་དུག་ནི་འཇོམས་པར་བྱེད། །ཅེས་བྱ་བ་ལ་སོགས་པ་གསུངས་སོ། །དེ་བས་ན་དོན་གྲུབ་པ་ཞེས་བྱའོ། །དགའ་བ་ནི་སྔར་བཞིན་ལ། དེ་བས་དགའ་བ་ནི་རིགས་ཀྱི་མཚན་མས་མཚན་པའོ། །དེའི་དགོས་པ་ནི་དགོས་
པས་གཞན་ལྡོག་པ་དང་། དངོས་གྲུབ་མྱུར་དུ་གྲུབ་པའི་ཕྱག་རྒྱའོ། །དེ་ཡང་དབང་བསྐུར་ནས་སྤྱི་བོར་རང་གི་རིགས་ཀྱི་བདག་པོར་གྱུར་པར་བསམ་མོ་ཞེས་གསུངས་པ་ནི་འཁོར་རྣམས་ཡེ་ཤེས་ལ་དམིགས་པ་ཡིན་པའི་ཕྱིར་ལུས་སྤངས་སེམས་སྤངས་ཀྱིས། བསྒྲུབ་བྱ་ཟུང་
འཇུག་བསྒྲུབ་པར་བྱ་བའི་རྒྱུ་ཉིད་དུ་གསུངས་སོ། །མ་ངེས་པ་མ་ཡིན་ཏེ། ཡེ་ཤེས་མངོན་དུ་གྱུར་པ་ཉིད་ཀྱིས། གཙོ་བོས་ནི་བདེ་བ་ཆེན་པོ་མཚོན་པའོ། །སྒྱུ་འཕྲུལ་ཆེན་པོ་ནི་ཆོས་ཐམས་ཅད་དེ། དེའི་མཚན་ཉིད་ནི་མིག་འཕྲུལ་ལྟ་བུའོ། །ཅན་ཞེས་བྱ་བ་ནི་སེམས་ལྷན་ཅིག་སྐྱེས་
པའི་ངོ་བོར་གྱུར་པ་ནི་སངས་རྒྱས་ཉིད་དེ། འཇིག་རྟེན་ཁམས་ནི་གང་ནས་ཀྱང་། །གཞན་དུ་སངས་རྒྱས་མི་རྙེད་དེ། །སེམས་ཉིད་རྫོགས་པའི་སངས་རྒྱས་ཉིད། །སངས་རྒྱས་གཞན་དུ་བསྟན་དུ་མེད། །ཅེས་གསུངས་པས་སོ། །སྦྱིན་བདག་ཆེན་པོ་ལ་སོགས་པའི་ཕ་

49-1-106a

རོལ་ཏུ་ཕྱིན་པའི་རྣམ་པར་དག་པ་བཤད་པར་བྱ་སྟེ། སྦྱིན་བདག་ཆེན་པོ་ནི་སྦྱིན་པའི་ཕ་རོལ་ཏུ་ཕྱིན་པ་སྟེ། ཚུལ་ཁྲིམས་ཆེན་པོ་ལ་སོགས་པ་ཡང་ངོ་། །གཙོ་བོ་ཆེན་པོ་ནི་བདེ་བ་ཆེན་པོའི་ཉམས་མྱོང་གིས་སྒེག་པའོ། །འཆང་བ་ནི་བརྒྱུད་པའི་གཞུང་ལུགས་ཀྱི་ཕྲེང་
བ་འཛིན་པ་སྟེ། དེ་ཉིད་ལས་མི་འདའ་བའི་དོན་གྱིས་ན་མཆོག་གོ། །བསྟན་པ་ནི་རང་བྱུང་གི་ཡེ་ཤེས་ཀྱིས་རྒྱུད་ལ་གོམས་པའོ། །བརྟུལ་བ་ནི་སྣ་ཚོགས་པ་ཐམས་ཅད་རྡོ་རྗེ་འཆང་གི་བར་དུ་གོམས་པ་སྟེ། དེ་ཡང་ཁམས་གསུམ་སྣ་ཚོགས་པ་འདི་ཐམས་ཅད་སེམས་ཀྱི་རང་
བཞིན་དུ་གནས་པ་སྟེ། དེ་ལྟར་ལ་ལར་ནི་སྙིང་རྗེ་དང་སྲིན་པོའི་བདག་ཉིད་དོ། །ལ་ལར་ནི་མི་སྣང་བ་དང་། མུ་ཅོར་དུ་སྨྲ་བར་རོ། །ལ་ལར་ནི་སྲིད་པ་དང་ནོར་བུ་བཞིན་ནོ། །ལ་ལར་ནི་གཉིད་ལོག་པ་དང་སད་ཅིང་བསྡམས་པར་རོ་ཞེས་བྱ་བ་ལ་སོགས་པ་རྒྱ་ཆེར་གསུངས་པས་སོ། །ཏིང་ངེ་
འཛིན་གནས་ནི་བློས་མ་བསླད་པའི་མེ་ཏོག་གོ། །ལུས་འཆང་བ་ནི་དབང་པོ་རང་སྣང་བའི་འཇུག་པའོ། །སྟོབས་དང་ཐབས་ནི་ལྟོས་པ་མེད་པར་རང་ཉིད་གསལ་བ་སྟེ། དེ་ཡང་། ཆུ་བོ་ཀླུང་འབབ་རྒྱུན་དང་ནི། །མར་མེ་འབར་བའི་རྩེ་མོ་བཞིན། །སྔགས་ཀྱི་དེ་རིག་རྣལ་འབྱོར་པས། །
རྒྱུན་མི་འཆད་པའི་བསམ་གཏན་བསྒོམ། །ཞེས་པ་གསུངས་པས་སོ། །རྒྱ་མཚོ་ནི་བདག་གཞན་གྱི་དབྱེ་བ་སྤངས་པའི་ཡེ་ཤེས་ཀྱི་བྱུག་པ་ཆེན་པོའོ། །མ་ཆགས་པ་དང་། མི་འདའ་བ་དང་། མི་འཁྲུག་པ་དང་། བར་ཆད་མེད་པ་དང་། རྩེ་གཅིག་པ་དང་། རྒྱ་ཆེ་བ་དང་། མི་ཐུབ་
པ་དང་། ཚེགས་ཆུང་བ་དང་། དོན་འབྱུང་བ་དང་། ཟུང་དུ་འཇུག་པར་ཡང་སྦྱར་རོ། །གཉིས་ལྡན་པ་ནི་ཐམས་ཅད་ལ་ཁྱབ་པར་སྦྱར་བའི་ཐ་ཚིག་གོ། །བྱམས་ཆེན་ལ་སོགས་པ་ནི་མེ་ལོང་ལྟ་བུའི་ཡེ་ཤེས་སུ་བཤད་པར་བྱ་སྟེ། ཕྱོགས་མེད་པར་སྣང་བ་དང་། ཉམས་སུ་མྱོང་བ་དང་། མཚན་
མའི་རློམ་སེམས་དང་བྲལ་བ་དང་།  འབད་པ་ལ་རག་མ་ལས་པར་སྣང་བའོ། །དེ་ཡང་བྱམས་པ་ནི་བྱམས་པ་ཆེན་པོ་སྟེ།དེའི་རང་བཞིན་དཔག་ཏུ་མེད་པ་སྟེ་ཚད་མ་བཤད་པའོ། །སྙིང་རྗེ་ཆེན་པོ་ནི་བསམ་གྱིས་མི་ཁྱབ་པའི་ཉམས་མྱོང་སྟེ། བློ་ཐམས་ཅད་ལས་མཆོག་ཏུ་གྱུར་པའོ། །

49-1-106b

ཤེས་རབ་ཆེན་པོ་ནི་མི་དམིགས་པ་དང་མི་གནས་པ་སྟེ། འབྲས་བུ་དང་ཤེས་རབ་དང་ལྡན་པའོ། །མཁས་པ་ཆེན་པོ་ནི་འཁྲུལ་པ་ཞིག་པ་སྟེ། རང་གི་ངང་གིས་འབྱུང་བས་ན་ཐབས་ཆེ་བ་ཞེས་བྱའོ། །རྫུ་འཕྲུལ་ཆེན་པོ་མཉམ་སྙོམས་པ་ནི་མཉམ་པ་ཉིད་ཀྱི་ཡེ་ཤེས་སུ་བཤད་པར་བྱ་སྟེ། སྣང་བརྟགས་
མཉམ་པ་ཉིད་དང་། རྒྱུ་འབྲས་དང་། དཔེ་དོན་དང་། འཁོར་འདས་མཉམ་པ་ཉིད་དོ། །དེ་ཡང་རྫུ་འཕྲུལ་ཆེན་པོ་ནི་གཟུགས་ལ་སོགས་པ་སྟེ། རྒྱུ་རྐྱེན་ལ་རག་ལས་པའི་ཕྱིར་སྐྱེ་བ་མེད་པའི་སྟོབས་དང་ལྡན་པའོ། །ཤུགས་ཆེན་ཞེས་བྱ་བ་ནི་ཐེ་ཚོམ་མེད་པ་སྟེ། གཉུག་མའི་ཤེས་པ་རྒྱུར་བརྟགས་
པ་ཉིད་ལ་འབྲས་བུ་ཡང་དེ་ཁོ་ན་ཉིད་ཡིན་པའི་ཕྱིར། བསྐལ་པ་དུ་མ་ལ་རག་མ་ལས་པས་མགྱོགས་པ་ཆེན་པོ་ཐ་དད་པ་མ་ཡིན་ཏེ། ཉེ་བར་ལེན་པའི་རྒྱུ་ནི་འབྲས་བུ་དང་རྗེས་སུ་མཐུན་པར་དགོས་པ་ལས་འདིར་མི་ལྡན་པའི་ཕྱིར་རོ། །རྒྱུ་དང་འབྲས་བུར་མ་གྲུབ་ཕྱིར། །བྱང་ཆུབ་མེད་ཅིང་
བསྒོམ་པ་མེད། །ཅེས་གསུངས་པས་སོ། །རྫུ་འཕྲུལ་ཆེན་པོ་འདྲ་བས་འདྲ་བ་མཚོན་པར་ནུས་པ་སྟེ། དེ་ཡང་དངོས་མ་ཡིན་པ་ཉིད་དོ། །དེ་བས་ན་མེ་ལོང་གི་ནང་དུ་བྱེད་ཀྱི་གཟུགས་བརྙན་འབྱུང་བ་དེ་བྱེད་དུ་མི་འགྱུར་བ་དང་འདྲའོ་ཞེས་གསུངས་སོ། །གཞན་དག་ལ་ཁྱད་པར་ནི་དཔེ་
དོན་དེ་དག་ཡོད་པ་མ་ཡིན་ཏེ། ལས་ཀྱི་ཕྱག་རྒྱ་ལ་བརྟེན་ནས། །ཆོས་ཀྱི་ཕྱག་རྒྱ་རྣམ་པར་བསྒོམ། །དེ་ཡི་སྟེང་དུ་ཕྱག་རྒྱ་ཆེ། །གང་ལས་དམ་ཚིག་འབྱུང་བའོ། །ཞེས་བཤད་པ་ཡང་། དེ་ལྟ་ན་ནི་རྣལ་འབྱོར་པའི། །ཉམས་སུ་མྱོང་བ་སྐྱེ་མི་འགྱུར། །ཞེས་གསུངས་པའི་ཕྱིར་རོ། །དེ་ཉིད་
ཚད་མར་དབྱེ་བ་ཡང་བརྒྱ་ལ་དུལ་བའི་སེམས་ཀྱི་མཚོན་ཆ་མངོན་སུམ་དུ་བྱས་ན་ནི། ཚེ་འདི་ཉིད་ལ་སངས་རྒྱས་སམ་རྡོ་རྗེ་སེམས་དཔའ་ཉིད་ཀྱང་འཐོབ་ལ་སེམས་ཅན་གང་གིས་མཚོན་བྱ་ཇི་ལྟར་བསྟན་པ་བཞིན་མཚོན་ནམ་བསྟན་པ་ཙམ་གྱིས་བསམ་གྱིས་མི་ཁྱབ་པའི་གནས་མ་
རྙེད་ཀྱི་བར་དུ་མཐོ་རིས་དག་ཏུ་བདེ་བླག་ཏུ་འགྱུར་རོ་ཞེས་གསུངས་པས་ན་ཆེར་གྲགས་ཞེས་བྱའོ། །སྟོབས་ཆེན་པོ་ནི་འཁོར་བ་དང་མྱ་ངན་ལས་འདས་པ་སྟེ། རྟོགས་པ་དང་མ་རྟོགས་པའི་ཁྱད་པར་གྱི་ཕ་རོལ་གནོན་པ་སྟེ། བདག་ཉིད་གཅིག་པུ་ཤེས་པར་བྱའོ། །སྲིད་པའི་རི་ལ་

49-1-107a

སོགས་པ་ནི་སོ་སོར་རྟོག་པའི་ཡེ་ཤེས་སུ་བཤད་པར་བྱ་སྟེ། སངས་རྒྱས་དང་སེམས་ཅན་རྒྱུ་གཅིག་པ་དང་། རྟོགས་ཤིང་མྱོང་ནས་རྒྱུད་ལ་གོམས་པར་བྱ་བ་དང་། བག་ཆགས་གཅིག་བཅད་པས་གཅོད་པ་དང་། གཉིས་སུ་ཞེན་པས་གཉིས་མེད་དུ་རྟོགས་པའོ། །དེ་ཡང་སྲིད་པ་ནི་མ་རིག་པ་སྟེ། 
རི་བོ་ཆེན་པོ་ནི་ཁམས་གསུམ་པའོ། །འཇོམས་པ་ནི་སངས་རྒྱས་ཀྱི་ཡེ་ཤེས་འདིར་རིག་པའོ། །མཁྲེགས་ཤིང་ཞེས་བྱ་བ་ནི། རྡོ་རྗེ་ཆེན་པོའི་མཚན་ཉིད་དེ། །སྙིང་པོ་བརྟན་ཞིང་ཁང་སྟོང་མེད། །མི་ཆོད་མི་ཕྱེད་མཚན་ཉིད་ཅན། །མི་ཤིགས་པ་ནི་མི་
ཉམས་པས། །སྟོང་པ་རྡོ་རྗེ་ཞེས་བཤད་དོ། །ཞེས་གསུངས་པས་སོ། །འཆང་བ་ནི་བདེ་བ་དང་ཐ་མི་དད་པ་སྟེ། འབྲས་བུ་ཐམས་ཅད་པ་ཉིད་ཀྱི་བར་དུའོ། །དྲག་པོ་ཆེན་པོ་ནི་རྙེད་པར་གྱུར་པའོ། །དྲག་ཤུལ་ཆེ་ཞེས་པ་ནི་བག་ཆགས་ཐམས་ཅད་ཀྱི་ཡེ་ཤེས་ངོ་བོར་མཁྱེན་ནས་གཉེན་པོ་
མེད་པ་སྟེ། དེ་བས་ན། བསོད་ནམས་སྡིག་པ་དག་དང་འབྲལ་མེད་པ། །ཞེས་གསུངས་སོ། །འཇིགས་པ་ཆེན་པོ་ནི་གཟུང་བ་དང་འཛིན་པ་སྟེ། དེ་ཡང་འཇིགས་པར་བྱེད་པ་ནི་དུས་གསུམ་གྱི་ཆ་དང་བྲལ་བའི་ཡེ་ཤེས་སོ། །མགོན་པོ་རིགས་མཆོག་ལ་སོགས་པ་ནི་བྱ་བ་ནན་
ཏན་གྱི་ཡེ་ཤིས་སུ་བཤད་པར་བྱ་སྟེ། རིགས་གཅིག་ཏུ་ནན་ཏན་བྱ་བ་དང་། བླ་མས་བསྟན་པའི་དོན་དང་། དེ་ཉིད་ལམ་དུ་བྱ་བ་དང་རང་དང་གཞན་གྱི་དོན་དུ་ཕུན་སུམ་ཚོགས་པ་ལ་ནན་ཏན་དུ་བྱ་བའོ། །དེ་ཡང་མགོན་པོ་ནི་སངས་རྒྱས་སོ། །རིགས་མཆོག་ནི་ལྔའོ། །ཆེན་པོ་སྟེ་
ཞེས་བྱ་བ་ནི་བདེ་བ་ཆེན་པོའི་རིགས་སོ། །བླ་མ་གསང་སྔགས་ནི་བླ་མས་བསྟན་པ་གསང་སྔགས་ཀྱི་དེ་ཁོ་ན་ཉིད་དེ། ཆོས་ཐམས་ཅད་ལ་རབ་ཏུ་མི་གནས་པའི་ཟུང་འཇུག་ནི་ཆེ་བའི་མཆོག་གོ། །དེ་ཉིད་ལམ་དུ་བྱེད་པ་ནི་ཚུལ་ལ་གནས་པའོ། །དེ་ཇི་ལྟ་བུར་འགྱུར་ཞེ་ན། རང་དང་
གཞན་གྱི་ཕུན་སུམ་ཚོགས་པ་སྟེ། ཐེག་པ་ཆེན་པོའི་ཚུལ་གྱི་མཆོག །ཅེས་བྱའོ། །དོན་མཆོག་མ་ཡིན་པར་བསྟན་པ་ཡང་། གཞན་དོན་ཕུན་ཚོགས་སངས་རྒྱས་ཀྱི་འབྲས་བུ་གཙོ་བོར་བཤད་པ་སྟེ། སངས་རྒྱས་ལ་སོགས་གོ་འཕང་གཞན། །དེས་ན་དོན་དེ་འབྲས་བུར་

49-1-107b

བརྗོད། །ཅེས་གསུངས་སོ། །མ་ནིང་གི་ཡི་གེ་ནི། སྡུད་པར་བྱེད་པ་ཉིད་ཀྱིས་ལྕགས་ཀྱུ་ལ་སོགས་པའི་རྣམ་པར་དག་པ་སྟེ། ཡེ་ཤེས་མཐར་ཐུག་པ་མཚོན་པའི་ཕྱིར་རོ། །སངས་རྒྱས་ལ་སོགས་པ་རྒྱུད་ཉིད་དུ་བཤད་པར་བྱ་སྟེ། སངས་རྒྱས་ནི་སྤངས་པ་དང་ཡེ་ཤེས་ཕུན་སུམ་
ཚོགས་པའི་བདག་ཉིད་སྤྲོས་པ་ཐམས་ཅད་དང་བྲལ་བའི་དབྱིངས་སོ། །རྣམ་པར་སྣང་བ་ནི་ལོངས་སྤྱོད་རྫོགས་པའི་འཁོར་ལོས་སྒྱུར་བའོ། །མཛད་པ་ནི་སེམས་ཅན་གྱི་དོན་དུ་སྤྲུལ་པའི་སྐུའོ། །དབྱེར་མི་ཕྱེད་པ་ནི་ཆེ་བ་སྟེ། རང་བཞིན་ཉིད་ཀྱིས་གནས་པའི་ངོ་བོ་ཉིད་ཀྱི་སྐུའོ། །ཐུབ་
པ་ཆེན་པོ་ནི་ཡོན་ཏན་བརྗོད་ཀྱིས་མི་ལང་བ་དང་ལྡན་པའོ། །གང་གིས་མཐུ་དང་ལྡན་ཞེ་ན། ཐུབ་ཆེན་ལྡན་ཞེས་བྱ་སྟེ། དུས་རྟག་ཏུ་མཉམ་པར་གཞག་པ་དང་ལྡན་པས་སོ། །འབྲས་བུ་དེ་དང་ཉེ་བར་གྱུར་པ་ནི་གསང་སྔགས་ཀྱི་ཚུལ་ཆེན་པོ་སྟེ། དེ་ཡང་། ཕྱི་རོལ་ནང་དང་གནས་འདི་
ཀུན། །ཡང་དག་ཏུ་ནི་རང་བཞིན་མེད། །གཅིག་དང་དུ་མའི་རང་བཞིན་ནོ། །བྲལ་བའི་ཕྱིར་ནི་གཟུགས་བརྙན་བཞིན། །ཞེས་གསུངས་པ་ནི། མངོན་པར་ཞེན་པ་དང་བྲལ་བའི་གཟུགས་བརྙན་ཙམ་མམ། འདི་ནི་གཟུགས་བརྙན་ནོ་ཞེས་བརྟགས་པ་ཙམ་ཡང་བྲལ་བ་ནི་མཐའ་བཞིས་
དབེན་པའི་དབུ་མ་ཆེན་པོའོ། །དེ་ཉིད་ལ་ཡང་གསུངས་པ། སྣ་ཚོགས་རྟག་པ་མ་ཡིན་ཞིང་། །ཆད་པར་ཡང་ནི་ཁས་མི་ལེན། །རྟག་དང་ཆད་པ་གཉི་ག་མེད། །གཉི་ག་ཡིན་པ་མ་ཡིན་པ། །མཐའ་བཞི་ལས་ནི་རྣམ་གྲོལ་བ། །དེ་ནི་དབུ་མ་པ་ཡི་རིགས། །ཞེས་གསུངས་སོ། །རིག་
པ་རྫས་ཡང་དག་ཏུ་འདོད་པ་དང་བཅས་པ་མ་ཡིན་ཏེ། དཔེར་ན་ཤིང་སྣ་ཚོགས་པ་ལས་མེ་བྱུང་བའི་དུས་ན་མེ་ལྕེ་གཅིག་ཏུ་གནས་སོ། །ཤིང་ཟད་པའི་དུས་ན་མེ་དེ་ཉིད་གནས་པ་བཞིན་དུ་མིང་དུ་བཏགས་པ་དང་བློ་ཡིས་བརྟགས་པ་སྣ་ཚོགས་པ་ལ་སྐྱེ་བ་མེད་པའི་མེ་ལྕེ་གཅིག་ཏུ་གྱུར་ནས་གང་
གཞན་གྱི་སྒྲོ་འདོགས་ཟད་པ་དེའི་ཚེ། སྐྱེ་བ་མེད་པ་ཙམ་ཡང་མི་གནས་པ་སྟེ་ཁོ་བོ་ནི་འདོད་པས་སྟོང་པའི་ཕྱིར། དེ་ཡང་སེམས་རང་གི་སྐལ་བར་བྱ་བའི་ཕྱིར། སློབ་དཔོན་གསང་བ་ཤེས་རབ་དང་། །དེ་ནས་དེ་ལྟར་ཡང་བཞི་པ། །ཞེས་གསུངས་པ་ཉིད་ཀྱིས། ཕྱིའི་ཚུལ་

49-1-108a

ལ་འཇུག་པའི་སྦྱོར་བ་ནི་མ་ཡིན་ཏེ། དབང་བསྐུར་བཞི་ཡི་གྲངས་ཀྱིས་ནི། །དགའ་བ་ལ་སོགས་རིམ་ཞེས་བྱ། །ཞེས་གསུངས་པ་ཉིད་ཀྱིས་ནང་གི་བདག་ཉིད་ཅན་དུ་བྱ་བའི་ཐ་ཚིག་སྟེ། གཞན་དུ་རྒྱས་པར་བསྟན་པས་འདིར་རྒྱ་ཆེར་མ་སྤྲོས་སོ། །འོན་ཀྱང་ཅུང་ཟད་ཙམ་
ཞིག་བསྟན་པར་བྱ་སྟེ། དང་པོར་དགའ་བ་ཙམ་ཉིད་དེ། །མཆོག་ཏུ་དགའ་བ་དེ་ལས་ལྷག །དགའ་བྲལ་དགའ་བ་གསུམ་པ་སྟེ། །བཞི་པ་ལྷན་ཅིག་སྐྱེས་པ་བརྗོད། །ཅེས་གསུངས་པས་གསུམ་པས་མཚོན་པའི་བཞི་པ་བསྟན་པའོ། །མཚོན་པར་བྱེད་པ་དགའ་བྲལ་ནི་མ་ཡིན་ཏེ། དང་པོ་
དགའ་བ་འགྲོ་བའི་ཚུལ། །དེ་བཞིན་མཆོག་དགའ་འགྲོ་བ་ཉིད། །དགའ་བྲལ་དགའ་བ་འགྲོ་བ་སྟེ། །གསུམ་པ་ལྷན་ཅིག་སྐྱེས་མེད་དོ། །ཞེས་གསུངས་པས་སོ། །དེ་དག་ཏུ་ཇི་ལྟར་རིག་པའི་ཚུལ་ནི། དེ་ལྟར་སློབ་མའི་སྤྱོད་ཡུལ་དུ། །རོ་གཅིག་པར་ཡང་བྱ་བ་ཉིད། །རང་རིག་ཡེ་ཤེས་གྱུར་པ་ནི། །རང་བཞིན་རིག་པ་སྤངས་
པ་ཡིན། །མཁའ་མཉམ་རྡུལ་བྲལ་སྟོང་པ་སྟེ། །དངོས་དང་དངོས་མེད་བདག་ཉིད་མཆོག །ཅེས་བྱ་བ་ལ་སོགས་པ་གསུངས་ཏེ། ཞི་བའི་བདེ་བ་རྙེད་པ་ཞེས་བྱ་བའི་དོན་ཏོ། །དེ་ལྟ་བུའི་ཡེ་ཤེས་བརྟན་པར་བྱེད་པ་ཡང་ཐུན་མོང་དང་ཐུན་མོང་མ་ཡིན་པའི་ཁྱད་པར་གྱིས། ཁྱོད་ཀྱིས་སྲོག་
ཆགས་གསད་པར་བྱ། །མ་བྱིན་པར་ཡང་བླང་བར་བྱ། །མི་ཚངས་པར་ཡང་སྤྱད་པར་བྱ། །བརྫུན་གྱི་ཚིག་ཀྱང་སྨྲ་བར་བྱ། །ཞེས་གསུངས་པ་ནི། ཤེས་པའི་གནས་སྐབས་ཀྱིས་ཤེས་པར་བྱའོ། །དེ་ལས་གཞན་པ་ཡང་། ཤ་ཆེན་དམ་ཚིག་མཆོག་གིས་ནི། །རྡོ་རྗེ་གསུམ་མཆོག་
བསྒྲུབ་པར་བྱ། །བཤང་གཅིའི་དམ་ཚིག་མཆོག་གིས་ནི། །རིག་པ་འཛིན་པའི་གཙོ་བོར་འགྱུར། །གླང་པོའི་ཤ་ཡི་དམ་ཚིག་གིས། །མངོན་ཤེས་ལྔ་ཡང་ཐོབ་པར་འགྱུར། །རྟ་ཤ་དག་གི་དམ་ཚིག་གིས། །མི་སྣང་བ་ཡི་བདག་པོར་འགྱུར། །ཁྱི་ཤ་དག་གིས་དམ་ཚིག་གིས། །
དངོས་གྲུབ་ཐམས་ཅད་འགྲུབ་པར་འགྱུར། །བ་ལང་ཤ་ཡི་དམ་ཚིག་གིས། །རྡོ་རྗེ་དགུག་པ་མཆོག་ཏུ་འགྱུར། །ཞེས་བྱ་བ་ལ་སོགས་པ་སྤྱད་པར་བྱའོ། །གལ་ཏེ་རྙེད་པར་དཀའ་བ་དང་། །ལས་དང་པོ་པར་གྱུར་པ་ན། །ཤ་རྣམས་ཐམས་ཅད་མེད་ན་ཡང་། །ཐམས་ཅད་བསམ་པ་རྣམ་

49-1-108b

པར་དག །ཅེས་བསམ་པའི་སྟོབས་ཀྱིས་སྤྱད་པར་བྱའོ། །གཞན། འགྲུབ་པའི་ཐབས་ནི་འགྱུར་ཕྱིར་དང་། །ནོར་ལ་སོགས་པ་བསྒྲུབ་ཕྱིར་དང་། །སེམས་ཅན་དོན་དུ་དེ་ཉིད་བཅས། །བརྟུལ་ཞུགས་ཞལ་གྱིས་བཞེས་པ་ཡིན། །ཞེས་པས་དྲོད་དང་འབྲེལ་བར་སྤྱད་པར་བྱའོ། །གཞན་ཡང་། གང་
གིས་ཤེས་ན་མིང་པོ་སྟེ། །སྲིང་མོ་ཡང་ནི་ཐེ་ཚོམ་མེད། །ཅེས་པས་བརྡ་དང་མཚན་མས་ཤེས་པར་བྱས་ལ། གནས་ལ་སོགས་པ་ཕྱི་ནང་དུ་སྦྱར་བ་དང་། སྐྱེ་བ་བདུན་པའི་བསྒྲུབ་པ་བརྩམ་པར་བྱའོ། །དེ་དག་ཐམས་ཅད་ཀྱི་བྱེད་པ་པོར་གྱུར་པ་ནི་བླ་མ་རྡོ་རྗེ་འཛིན་པས་མཉེས་པར་བྱའོ། །དེ་ལྟ་
བུའི་རྒྱུད་སྦྱང་ཞིང་གྲོལ་བར་བྱ་བ་ནི། རིམ་པ་གཉིས་ཀྱི་ཁྱད་པར་ཏེ། །དེ་ཡང་བསྐྱེད་པའི་རིམ་པ་དང་། །རྫོགས་པ་ཡི་ནི་རིམ་པ་གཉིས། །རིམ་པ་གཉིས་ལ་བརྟེན་ནས་ནི། །རྡོ་རྗེ་འཆང་གིས་ཆོས་སྟོན་ཏོ། །ཞེས་གསུངས་པའི་ཕྱིར། ལས་དང་པོ་པ་རྣམས་ཀྱིས་བསྐྱེད་པའི་རིམ་པའོ། །
རྣལ་འབྱོར་པས་བསྒོམ་པར་བྱ་བ་སྟེ། དེ་ཡང་། བསྐྱེད་པའི་རིམ་པའི་ངོ་བོ་ཉིད། །དང་པོར་རེ་ཞིག་ཤེས་བྱས་ལ། །ཞེས་གསུངས་པ་ཉིད་ཀྱིས་རེ་ཞིག་པའི་རྣལ་འབྱོར་ལ་གནས་པར་བྱའོ། །དེ་དག་གིས་སྦྱོར་བར་འགྱུར་བ་ཡང་། གཟུགས་སོགས་ཡུལ་ནི་གཞན་དག་ཀྱང་། །རྣལ་
འབྱོར་པ་ལ་གང་སྣང་བ། །དེ་ཀུན་དག་པའི་རང་བཞིན་ཏེ། །འགྲོ་བ་སངས་རྒྱས་རང་བཞིན་ཉིད། །ཅེས་གསུངས་པ་བསྒོམ་པར་བྱ་བ་ཁོ་ནའོ། །གཞན་ཡང་རྫོགས་པའི་རིམ་པ་ནི་དབང་པོ་མཆོག་གི་རྣལ་འབྱོར་གྱིས་བསྒོམ་པར་བྱ་སྟེ། དེ་ཡང་། རྫོགས་པའི་རིམ་པའི་རྣལ་འབྱོར་གྱིས། 
འབད་པ་ཐམས་ཅད་སྤང་བར་བྱ། །ཞེས་གསུངས་པས། འབད་པ་མེད་པའི་རྣལ་འབྱོར་བསམ་གཏན་དུ་བྱའོ། །གཞན་ལ་ནི་སེམས་གཞག་པར་བྱ་བའི་ཕྱིར། རིན་ཆེན་ཆེན་པོའི་ཁ་དོག་ལྔ། །ཡུངས་ཀར་གྱི་ནི་འབྲུ་ཚོད་ཙམ། །སྣ་ཡི་རྩེ་མོར་ནན་ཏན་དུ། །རྣལ་འབྱོར་པ་ཡིས་
རྟག་ཏུ་བསྒོམ། །ཞེས་གསུངས་སོ། །དེ་ལ། བརྟན་པ་ཅུང་ཞིག་ཐོབ་པ་ཡིས། །རང་བཞིན་གྱིས་འོད་གསལ་བ། །ཐམས་ཅད་མ་སྐྱེས་ཟག་པ་མེད། །བྱང་ཆུབ་མེད་ཅིང་མངོན་རྟོགས་མེད། །ཅེས་གསུངས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་དམ་ཚིག་རྗེས་སུ་དྲན་པའི་མཆོད་པའོ། །

49-1-109a

གཞན་ཡང་། ཐམས་ཅད་རང་བཞིན་འོད་གསལ་བ། །མཚན་མེད་མི་འགྱུར་ནམ་མཁའ་བཞིན། །གཉིས་མེད་གཉིས་སུ་མེད་མིན་བཞིན། །ཞེས་གསུངས་པས། གོང་དུ་བཤད་པའི་བྱང་ཆུབ་ཀྱི་སེམས་རྡོ་རྗེའི་རྣལ་འབྱོར་དུ་བྱ་བའོ། །དེ་ཡང་ནང་གི་སྤྱོད་པ་ལ་མཉམ་པར་
མ་བཞག་ན། ཡེ་ཤེས་ཆེན་པོ་ལས་སེམས་ཐོགས་པ་མེད་པར་མི་འགྱུར་བའི་ཕྱིར། ཡིད་ཕམ་པར་འགྱུར་བའི་གནས་གསུངས་པ་ནི། ས་ཕྱོགས་གཙང་ཞིང་རྣམ་པར་དབེན་པའམ། །རྒྱལ་ཉིད་སྐྱེ་ཞིང་ཞི་བའི་གནས་རྣམས་ཀུན། །བཤང་གཅི་ཁུ་བ་སོགས་པས་བྱུགས་པའམ། །རྒྱལ་བ་
མཆོད་ཕྱིར་རྟག་པར་རབ་ཏུ་བྱ། །ཞེས་པས་ན། དང་པོ་པས་ཆེད་དུ་བརྗོད་པའི་གནས་བར་དུ་གཅོད་པ་དང་བྲལ་བ། འཚོ་བ་རྙེད་པར་སླ་བ་རྟག་ཏུ་མཆོད་པར་བྱ་བ་ནི། བུད་མེད་སེམས་ནི་རབ་བརྟན་པ། །ལོ་གྲངས་བཅུ་གཉིས་ལོ་རྙེད་པ། །རིགས་ཀྱི་སྦྱོར་བ་རབ་བསྒོམས་ཏེ། །བདག་གི་ཁུ་
བས་མཆོད་པར་བྱ། །ཞེས་གསུངས་པའི་དོན་ནི། དབང་པོ་གཉིས་ནི་མཉམ་གཞག་སྟེ། །མཁས་པས་རང་གི་ཁུ་བ་དག །རྣལ་འབྱོར་པས་ནི་རྟག་ཏུ་དབྱུང་། །དཀྱིལ་འཁོར་དཀྱིལ་འཁོར་ཚུལ་དུ་བྱ། །ཞེས་གསུངས་པས། དེ་ལ་དངོས་གྲུབ་ཏུ་འགྱུར་བ་ནི། དབང་པོ་གཉིས་ནི་
མཉམ་སྦྱོར་བས། །སངས་རྒྱས་དངོས་གྲུབ་ཐོབ་པར་འགྱུར། །ཞེས་གསུངས་པ་དང་། སྐྱེ་བ་མེད་པའི་ཡིད་ངལ་སོས་པའི་བདེ་བས་ནི་ཐམས་ཅད་སྤྱད་པར་བྱ་བ་ཁོ་ན་སྟེ།འདོད་པའི་ལོངས་སྤྱོད་ཐམས་ཅད་ལ། །ཇི་ལྟར་འདོད་པ་བསྟེན་ན་ནི། །འདི་ལྟ་བུ་ཡི་སྦྱོར་བ་ཡིས། །བྱང་ཆུབ་
མྱུར་དུ་ཐོབ་པར་འགྱུར། །ཞེས་བྱ་བ་འདིས་ནི་རྟེན་གྱི་སྐྱེ་འཇིག་མེད་པའི་རྣལ་འབྱོར་དུ་འགྱུར་རོ། །གཞན་ཡང་རིམ་པ་གཉིས་ཀྱི་གནས་སྐབས་འགའ་ལ་ཡང་བདག་དང་གཞན་གྱི་དོན་དུ་དངོས་གྲུབ་སྒྲུབ་པ་དང་། ཞི་བ་ལ་སོགས་པའི་ལས་སྣ་ཚོགས་པ་ནི་རྫས་འབའ་ཞིག་གིས་འབྱུང་བ་དང་། 
བསམ་གཏན་ཙམ་གྱིས་འགྲུབ་པ་དང་། སྔགས་དང་ལྡན་པས་འགྲུབ་པ་དང་། དེ་ཡང་འཁྲུལ་འཁོར་དང་ལྡན་པས་འགྲུབ་པ་སྟེ། དེ་བས་ན། བྱང་ཆུབ་མེད་པར་དགེ་མི་འཇུག །ཅེས་གསུངས་པས།  འགྲོ་བའི་དོན་དུ་དོན་ཆེན་པོ་ལ་དམིགས་པར་བྱ་བ་སྟེ། དེ་ལས་འབྱུང་བ་ནི་

49-1-109b

འབྲས་བུའོ། །དེ་ལྟར་གསང་སྔགས་ཀྱི་ཚུལ་ཆེན་པོའི་བདག་ཉིད་ཅན་ནི་དམན་པའི་གང་ཟག་གིས་མི་འགྲུབ་སྟེ། དེ་ཡང་། ཐོས་པ་ཆུང་ཞིང་ང་རྒྱལ་ལྡན། །སྦ་བ་མེད་པར་མང་དུ་སྨྲ། །རྗེས་སུ་གཟུང་བར་མི་ནུས་པ། །ཙནྡན་ཞེས་བྱ་བའི་གང་ཟག་གོ། །ཞེས་བྱ་བ་ལ་སོགས་པ་ནི་མ་ཡིན་ཏེ།  
དེ་ཡང་གང་ལ་བཤད་པར་བྱ་བ་ནི། རྫོགས་པའི་རིམ་པའི་སྐལ་ལྡན་ཞིང་། །རྟག་ཏུ་སྤྱོད་པས་རྣམ་བརྒྱན་པ། །དེ་ནི་རིན་ཆེན་གང་ཟག་སྟེ། །སློབ་མ་ལ་བཤད་སྣོད་ཡིན་ནོ། །ཞེས་གསུངས་སོ། །དེ་ལྟ་བུའི་གང་ཟག་ནི་ཁྱུ་མཆོག་དང་མཚུངས་པ་སྟེ། མངོན་པར་རྙེད་པའི་དོན་དུ་འགྱུར་རོ། །
ཕ་རོལ་ཏུ་ཕྱིན་པ་བཅུ་ལ་སོགས་པ་ནི་ཕ་རོལ་ཏུ་ཕྱིན་པའི་རང་བཞིན་ཐམས་ཅད་རྫོགས་པར་བཤད་པར་བྱ་སྟེ། བཅུ་ནི་སྦྱིན་པ་ལ་སོགས་པ་ལ་བྱ་ལ། དེ་ཡང་། སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་དང་ནི་ཤེས་རབ་ཐབས། །སྟོབས་དང་སྨོན་ལམ་ཡེ་ཤེས་དང་། །
འདི་དག་ཕ་རོལ་ཕྱིན་བཅུར་འདོད། །ཅེས་གསུངས་པས་ཁོ་བོ་སངས་རྒྱས་ཀྱི་གསུང་གི་སྡོམ་པ་ལས་མ་རྨོངས་པར་བྱ་བའི་ཕྱིར་རབ་ཏུ་དབྱེ་བར་བྱ་སྟེ། ཟང་ཟིང་དང་། སྐྱབས་དང་། ཆོས་ཀྱི་སྦྱིན་པའོ། །སྡོམ་པ་དང་། དགེ་བ་ཆོས་སྡུད་པ་དང་། སེམས་ཅན་དོན་བྱེད་པ་ནི་ཚུལ་ཁྲིམས་སོ། །སྡུག་
བསྔལ་དང་དུ་ལེན་པ་དང་། གནོད་པ་བྱེད་པ་ལ་ཇི་མི་སྙམ་པ་དང་། ཟབ་མོའི་ཆོས་ལ་བཟོད་པའོ། །གོ་ཆ་དང་། སྦྱོར་བ་དང་། མཐར་ཕྱིན་པ་ནི་བརྩོན་འགྲུས་སོ། །ཡོན་ཏན་མངོན་པར་གྲུབ་པ་དང་། མི་གཡོ་བ་དང་། སེམས་ཅན་གྱི་དོན་བྱེད་པ་ནི་བསམ་གཏན་ནོ། །ཐོས་པ་དང་། 
བསམ་པ་དང་། བསྒོམ་པ་ནི་ཤེས་རབ་པོ། །རང་གི་སྐྱོན་མི་སྡུག་པ་དང་། སེམས་ཅན་གྱི་དོན་བྱེད་པ་དང་། མྱུར་དུ་བྱང་ཆུབ་པ་ནི་ཐབས་སོ། །རང་གི་ཚོགས་རྒྱུན་དུ་སོགས་པ་དང་། དེ་སེམས་ཅན་གྱི་དོན་དང་འབྲེལ་པ་དང་། སངས་རྒྱས་ཀྱི་ཞིང་ཡོངས་སུ་དག་པར་སྨོན་པ་ནི་སྨོན་
ལམ་མོ། །ལས་དང་ལས་ཀྱི་རྣམ་པར་སྨིན་པ་མི་འཇུག་པ་དང་། ཉོན་མོངས་པ་མི་སྡུད་པ་དང་། བདུད་དང་རྒོལ་བས་མི་ཚུགས་པ་ནི་སྟོབས་སོ། །རྟོག་པ་དང་མི་རྟོག་པ་མཉམ་པར་འབིགས་པ་དང་། རོ་གཅིག་པ་དང་། ཐམས་ཅད་ལས་མི་འདའ་བ་ནི་ཡེ་ཤེས་སོ། །ཐོབ་པ་ནི་

49-1-110a

དེ་ཐམས་ཅད་ཤེས་རབ་ཀྱིས་ཟིན་པར་ཐུགས་སུ་ཆུད་པའོ། །སྟེ་ཞེས་པས་གཞན་སྡུད་པའོ། །བཅུ་ལ་གནས་པ་ནི་ལེགས་པར་སྦྱངས་པ་དང་། བཅུ་གནས་པ་ཞེས་བྱ་བར་ཡང་སྦྱར་ཏེ། སྟོང་ཉིད་བསྒོམས་པས་གྲོལ་འགྱུར་གྱི། །སྒོམ་པ་ལྷག་མ་དེ་དོན་ཡིན། །ཞེས་
གསུངས་པའི་དོན་ཡིན་ནོ། །བཅུ་པ་དག་ནི་འཁོར་གསུམ་ཡོངས་སུ་དག་པའི་བསྔོ་བ་སྟེ། ལྡན་པ་ཡང་སྦྱར་བར་བྱའོ། །ཤེས་བཅུ་ནི་ཆོས་ཤེས་པ་དང་། རྗེས་སུ་རྟོགས་པ་ཤེས་པ་དང་། ཕ་རོལ་གྱི་སེམས་ཤེས་པ་དང་། ཀུན་རྫོབ་ཤེས་པ་དང་། སྡུག་བསྔལ་ཤེས་པ་དང་།ཀུན་འབྱུང་ཤེས་
པ་དང་། འགོག་པ་ཤེས་པ་དང་། ལམ་ཤེས་པ་དང་། ཟད་པ་ཤེས་པ་དང་། མི་སྐྱེ་བ་ཤེས་པའོ། །རྣམ་པར་དག་པའི་བདག་ཉིད་ནི་ཤེས་པར་བྱས་ཤིང་། དེ་ཉིད་དང་བྲལ་བས་དབུ་མར་འགྱུར་བའོ། །རྣམ་དག་འཆང་བ་པོ་ནི་སྤང་བྱ་དང་སྤོང་བྱེད་གཉིས་གཉིས་མེད་དུ་གྱུར་པའི་བདེ་བ་ཆེན་པོ་
བརྙེས་པའོ། །རྣམ་པ་བཅུ་པོ་ནི་འཇིག་རྟེན་པའི་ལྟ་བར་ཕལ་ཆེར་འགྱུར་བ་སྟེ། གཅིག་པུར་འཛིན་པ་དང་། རྒྱུར་འཛིན་པ་དང་། ཟ་བར་འཛིན་པ་དང་། བྱེད་པ་པོར་འཛིན་པ་དང་། རང་དབང་དུ་འཛིན་པ་དང་། རྟག་པར་འཛིན་པ་དང་། ཀུན་ནས་ཉོན་མོངས་པར་འཛིན་པ་དང་། རྣམ་པར་
བྱང་བར་འཛིན་པ་དང་། རྣལ་འབྱོར་ཅན་དུ་འཛིན་པ་དང་། མ་གྲོལ་བ་གྲོལ་བར་འཛིན་པའོ། །དོན་བཅུ་ཞེས་པ་ནི་འཛིན་པ་བཅུ་རྣམ་པར་དག་པས་དེ་ཁོ་ན་ཉིད་བཅུར་འགྱུར་ལ། དེ་ཉིད་མིང་དང་བྲལ་བར་འགྱུར་བས་དོན་ཞེས་བྱ་བ་སྟེ། དེ་ཡང་རྩ་བའི་དེ་ཁོ་ན་ཉིད་དང་། མཚན་ཉིད་
ཀྱི་དེ་ཁོ་ན་ཉིད་དང་། ཕྱིན་ཅི་མ་ལོག་པའི་དེ་ཁོ་ན་ཉིད་དང་། འབྲས་བུའི་དེ་ཁོ་ན་ཉིད་དང་། རྒྱུའི་དེ་ཁོ་ན་ཉིད་དང་། རྣམ་པར་དག་པའི་སྤྱོད་ཡུལ་གྱི་དེ་ཁོ་ན་ཉིད་དང་། བསྡུ་བའི་དེ་ཁོ་ན་ཉིད་དང་། དབྱེ་བའི་དེ་ཁོ་ན་ཉིད་དང་། མཁས་པའི་དེ་ཁོ་ན་ཉིད་དང་། རགས་པ་དང་ཕྲ་བའི་དེ་ཁོ་ན་
ཉིད་དོ། །ཐུབ་པའི་དབང་པོའི་དོན་ནི་འཇམ་དཔལ་ཡེ་ཤེས་སེམས་དཔའོ། །སྟོབས་བཅུ་ནི་གནས་དང་གནས་མ་ཡིན་པ་མཁྱེན་པའི་སྟོབས་དང་། མོས་པ་སྣ་ཚོགས་པ་མཁྱེན་པའི་སྟོབས་དང་། བསམ་གཏན་དང་ཏིང་ངེ་འཛིན་མཁྱེན་པའི་སྟོབས་དང་། རྣམ་པར་ཐར་པ་

49-1-110b

དང་། སྙོམས་པར་འཇུག་པ་མཁྱེན་པའི་སྟོབས་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་མཁྱེན་པའི་སྟོབས་དང་། ལས་དང་ལས་ཀྱི་རྣམ་པར་སྨིན་པ་མཁྱེན་པའི་སྟོབས་དང་། ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་དང་། སྔོན་གྱི་གནས་རྗེས་སུ་
དྲན་པ་མཁྱེན་པའི་སྟོབས་དང་། འཆི་འཕོ་དང་སྐྱེ་བ་མཁྱེན་པའི་སྟོབས་དང་། ཟག་པ་ཟད་པ་མཁྱེན་པའི་སྟོབས་ཀྱིས་འགྲོ་བའི་དོན་མཛད་པས་ན་ཁྱབ་པའི་སྟོབས་ཀྱི་བདག་ཅེས་བྱའོ། །དེ་དག་ལ་འཁོར་བའི་སྐྱོན་གྱིས་མ་གོས་པ་མ་ཡིན་ཏེ། རྣམ་བཅུ་དབང་ལྡན་ཞེས་བྱ་བ་
ནི་དབང་རྣམ་པ་བཅུ་དང་ལྡན་པ་སྟེ། ཚེ་ལ་དབང་བ་དང་། ལས་ལ་དབང་བ་དང་། ཡོ་བྱད་ལ་དབང་བ་དང་། མོས་པ་ལ་དབང་བ་དང་། སྨོན་ལམ་ལ་དབང་བ་དང་། རྫུ་འཕྲུལ་ལ་དབང་བ་དང་། སྐྱེ་བ་ལ་དབང་བ་ད་ང་། ཆོས་ལ་དབང་བ་དང་། སེམས་ལ་དབང་བ་དང་། ཡེ་ཤེས་ལ་དབང་
བའོ། །ཆེ་བ་པོ་ཞེས་བྱ་བ་ནི་དེ་ལྟར་ཐེག་པ་ཆེན་པོ་དང་། ཐེག་པ་ཆུང་ངུ་དང་། ཕྱི་རོལ་པ་དང་། སངས་རྒྱས་ཀྱི་ཆེ་བ་ཐམས་ཅད་དང་ལྡན་པར་བསྟོད་པའོ། །ཐོག་མ་མེད་པ་ཞེས་བྱ་བ་ལ་སོགས་པས་ནི་བྱིན་རླབས་ཀྱི་རང་བཞིན་དུ་བཤད་པར་བྱ་སྟེ། རྒྱུས་སྟོང་པས་ན་ཐོག་མ་མེད་པའོ། །
རྐྱེན་དང་བྲལ་བས་ན་སྤྲོས་མེད་བདག་ཅེས་བྱའོ། །དེ་བཞིན་ཉིད་བདག་ནི་མི་འགྱུར་བའི་ཡེ་ཤེས་སྣང་བ་མེད་པ་དེ་ཉིད་དོ། །དེ་ཡང་། སྐུ་དང་གསུང་ཐུགས་རབ་ཏུ་དག །ནམ་མཁའ་དང་ནི་མཉམ་པ་ཉིད། །རྣམ་པར་མི་འགྱུར་སྣང་བ་མེད། །རྡོ་རྗེའི་སྐུ་ལ་ཕྱག་འཚལ་འདུད། །
ཅེས་པ་གསུངས་པ་ཉིད་ཀྱིས་དག་པའི་བདག་ཉིད་དོ། །བདེན་པར་སྨྲ་ཞེས་པ་ནི་རྟེན་ཅིང་འབྲེལ་པར་འབྱུང་བའི་དོན་ཟབ་མོ་དབང་པོ་མཆོག་ལས་གསུངས་པ་སྟེ། འདི་ལ་བསལ་བར་བྱ་བ་མེད། །གཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་
ན་རྣམ་པར་གྲོལ། །ཞེས་གསུངས་པ་ལ་སོགས་པའོ། །ཞིང་ཞེས་པ་ནི་གང་དང་གང་འདུལ་བ་ལ་དེ་དང་དེའི་གཟུགས་ཀྱིས་རང་རང་གི་བསམ་པ་དང་རྗེས་སུ་མཐུན་པར་སྟོན་པའོ། །ཚིག་མི་འགྱུར་ཞེས་པ་ནི་ཇི་སྐད་སྨྲས་པ་དེ་བཞིན་དུ་མཛད་པ་སྟེ། ཆོས་ཐམས་ཅད་སྒྱུ་མ་

49-1-111a

དང་། སྨིག་རྒྱུ་དང་། ཆུ་ཟླ་དང་། བྲག་ཅ་དང་། མིག་ཡོར་དང་། སྤྲུལ་པ་ལྟ་བུར་མཁྱེན་ཅིང་གཞན་ལ་ཡང་སྟོན་པར་མཛད་པས། གཉིས་མེད་གཉིས་སུ་མེད་པར་སྟོན། །ཞེས་བྱའོ། །དེའི་རྒྱུས་ཡང་དག་པའི་མཐའ་ལ་རྣམ་པར་གནས་ཤིང་། བྱིན་གྱི་རླབས་མངའ་ཡང་དེ་
ཉིད་ཀྱི་མཐུར་རིག་པར་བྱའོ། །བདག་མེད་ཅེས་བྱ་བ་ནི་དབུགས་དབྱུང་བ་གཉིས་ཀྱིས་ལྟ་བ་གཉིས་མི་གནས་པ་སྟེ། དཔེར་ན་སེང་གེའི་སྒྲས་རི་དྭགས་ལ་སོགས་པ་ཐམས་ཅད་འཇིགས་པར་བྱེད་པ་ལྟར།  བདག་མེད་པའི་སྒྲས་མུ་སྟེགས་ཀྱི་རྟག་ཆད་གཉིས་འཇིག་པར་བྱེད་དོ། །ཀུན་དུ་འགྲོ་
བ་ནི་ཀུན་དུ་བཞུད་པའོ། །ཅི་མཛད་ཅེ་ན། དོན་ཡོད་པའི་སྟོབས་ཀྱིས་བཞུད་པའོ། །ཐམས་ཅད་དུ་མི་འབྱོན་པ་ཡང་མ་ཡིན་ཏེ། དེ་བཞིན་གཤེགས་པ་བཞུད་པ་ནི། དཔེར་ན་སྔོན་དུ་བགྲོད་པའི་ཡུལ་ཡིད་འཇུག་པ་ལྟར་མགྱོགས་པའོ། །ཐོག་མ་དང་བཅས་པ་མ་ཡིན་ཏེ། རྒྱལ་བ་ནི་
འཁོར་བ་ལས་རྣམ་པར་རྒྱལ་བའོ། །བྱང་ཆུབ་སེམས་དཔའ་དང་མཚུངས་པ་མ་ཡིན་ཏེ། བདུད་བཞི་དང་ཉོན་མོངས་པའི་དགྲ་ལས་རྒྱལ་བའོ། །བྱང་ཆུབ་སེམས་དཔར་མཛད་པ་མ་ཡིན་ཏེ། རིགས་ཀྱི་འཁོར་ལོས་སྒྱུར་བས་ཆོས་སྟོན་པའོ། །འགལ་བར་དགོངས་པ་སྟོབས་པོ་ཆེ། །ཞེས་
གསུངས་པ་སྟེ། སྤྲུལ་པ་དང་རང་རྒྱུད་ཀྱི་ཁྱད་པར་གྱིས་སོ། །དགོས་པ་རྣམ་པ་གཉིས་ལྟར་མ་ཡིན་ཏེ། གཅིག་གི་རང་བཞིན་གྱི་ནུས་པས་སྤྲུལ་པ་ཡིན། འདིར་རྟོགས་པ་དང་སྙིང་རྗེ་དང་སྨོན་ལམ་མངོན་དུ་གྱུར་པས་སྣང་བ་ཡིན་ནོ། །ཚོགས་ཞེས་བྱ་བ་ནི་འཕགས་པ་ཉན་ཐོས་ཀྱི་དགེ་འདུན་
དེའི་སློབ་དཔོན་དུ་གྱུར་པ་ནི་སྤྲུལ་པའི་སྐུའོ། །གཉིས་པ་ནི་རང་སངས་རྒྱས་ཀྱི་དགེ་འདུན་ཏེ། དེའི་བདག་པོ་ནི་འཁོར་ལོས་སྒྱུར་བའོ། །གསུམ་པ་ནི་བྱང་ཆུབ་སེམས་དཔའི་དགེ་འདུན་ཏེ། དེའི་རྗེ་ནི་ལོངས་སྤྱོད་རྫོགས་པའི་སྐུའོ། །བཞི་པ་ནི་དེ་བཞིན་གཤེགས་པ་སྟེ། དེའི་བདག་པོ་ནི་རྡོ་རྗེ་འཆང་ངོ་། །
དེ་དག་ཐམས་ཅད་ཀྱི་དབང་དང་ལྡན་པ་ནི་འཇམ་དཔལ་ཡེ་ཤེས་སེམས་དཔའོ། །ཁྱད་པར་བསྟན་པའི་དགོས་པ་ནི་མཐུ་ཆེན་པོ་དང་ལྡན་པའི་རྡོ་རྗེ་འཆང་གིས་སྣོད་དང་ལྡན་པའི་སློབ་མ་ནི་གཅེས་པ་སྟེ། དེ་འཛིན་པར་མཛད་པ་སྟེ། འདིར་ནི་གཞུང་ལུགས་ལ་ཡང་སྦྱར་བར་བྱའོ། །རྣམ་རྟོག་

49-1-111b

མངའ་བ་མ་ཡིན་ཏེ། དཔེར་ན་དཔག་བསམ་ཤིང་ལ་རྣམ་པར་རྟོག་པ་མེད་ཀྱང་འདོད་ཡོན་མི་འདྲ་བར་འབྱུང་བའི་སོ་སོའི་བསམ་པའི་ཁྱད་པར་གྱིས་སོ། །དེ་བཞིན་དུ་འཇམ་དཔལ་ཡེ་ཤེས་སེམས་དཔའ་ལ་རྣམ་པར་རྟོག་པ་མི་མངའ་ཡང་། སེམས་ཅན་གྱི་བསམ་པའི་སྟོབས་ཀྱིས་སྐུ་སྣ་ཚོགས་
སུ་སྣང་བར་འགྱུར་རོ། །སྐྱོན་མེད་པ་མ་ཡིན་ཏེ། བློ་ཆུང་བ་རྣམས་ཟབ་མོ་ལ་འཇིགས་པ་དང་། དངངས་པ་དང་། སྐྲག་པ་དང་། སྐྱི་གཡའ་བ་དང་། སྐུར་པ་འདེབས་པ་དང་། མི་འཇུག་ཅིང་གཞན་འཇུག་ཏུ་མི་སྟེར་བར་འགྱུར་བས་བསྟན་པར་མི་བྱའོ། །དེ་ཡང་། ཆུང་ངུ་རྣམས་མི་བྲིད་པའི་ཕྱིར། །དེ་
ཉིད་ཚོལ་བ་ཐོག་མ་ཡིན། །ཐམས་ཅད་ཡོད་ཅེས་བརྗོད་པར་བྱ། །དོན་རྣམས་མཚུངས་ཤིང་ཆགས་མེད་པ། །ཕྱིས་ནི་རྣམ་པར་བདེན་དོན་ཉིད། །ཅེས་གསུངས་སོ། །རློམ་སེམས་དང་བཅས་པ་མ་ཡིན་ཏེ། ཚུལ་དང་ཚུལ་ཆེན་པོ་འཆད་ཀྱང་གཞན་གྱིས་དྲིང་མི་འཇོག་གོ། །ཡང་ན་
མཆོག་ཏུ་གྱུར་པ་གཞན་མི་གནས་པའོ། །ཚིག་ཅེས་པ་ནི། ཨེ་ཝཾ་སྟ་དེའི་རྗེ་བོ་ནི་བཅོམ་ལྡན་འདས་སོ། །གཉིས་པ་ནི་དབྱངས་དང་གསལ་བྱེད་དེའི་བདག་པོ་ནི་སྐུ་གཉིས་པའོ། །སྨྲ་བ་ནི་མིང་གི་ཚོགས་ཏེ། གཞུང་ལུགས་འཛིན་པས་ན་མཁས་པའོ། །ཚིག་ནི་གླེགས་བམ་གྱི་ཚིག་སྟེ་ལ་ཞེས་
པས་དེ་ཉིད་གཞིར་བྱས་ལ། དབང་ནི་ཐབས་སྣ་ཚོགས་པ་སྟོན་པའོ། །ཚིག་ནི་འགྲོ་བ་མཐའ་ཡས་པའི་སྐད་ལ། གསུང་དབྱངས་ཡན་ལག་དྲུག་ཅུ་དང་ལྡན་པ་སྒྲོགས་པས་མཐའ་ཡས་སོ། །ཚིག་ནི་ཐེག་པ་ཆེན་པོར་གསུངས་ལ་བདེན་པར་སྨྲ་བ་ནི་བཤད་ཟིན་ཏོ། །སྟེ་ཞེས་པས་
ཁྱབ་པར་སྟོན་པའོ། །དེ་ཡང་བརྟགས་པས་སྡུག་བསྔལ་གྱི་བདེན་པ་དང་། རླུང་བཅུ་ཀུན་འབྱུང་གི་བདེན་པ་དང་། སྒྱུ་མ་འགོག་པའི་བདེན་པ་དང་། སྟོང་པ་ལམ་གྱི་བདེན་པའོ། །ཡང་ན་ལོག་པའི་ཀུན་རྫོབ་དང་། ཡང་དག་པའི་ཀུན་རྫོབ་དང་། རྣམ་གྲངས་པའི་དོན་དམ་པའི་བདེན་པ་
དང་། རྣམ་གྲངས་མ་ཡིན་པའི་དོན་དམ་པའི་བདེན་པ་སྟོན་པའོ། །དེ་ལས་གཞན་པ་ནི་སྡུག་བསྔལ་ཤེས་པར་བྱ།  ཀུན་འབྱུང་སྤང་བར་བྱ། འགོག་པ་མངོན་དུ་བྱ། ལམ་སྒོམ་པར་བྱ་བ་སྟོན་པའོ། །དེ་ལས་བྱུང་བའི་འབྲས་བུ་བཤད་པར་བྱ་སྟེ། ཕྱིར་མི་ལྡོག་པ་ཕྱིར་མི་འོང་། །

49-1-112a

ཞེས་པ་ནི་འབྲས་བུ་ཐོབ་པ་སྨོས་པས་རྒྱུ་ལ་ཞུགས་པ་ཤེས་པར་བྱ་སྟེ། ཉན་ཐོས་ཀྱི་ཐེག་པའི་འབྲས་བུའོ། །རང་རྒྱལ་བསེ་རུའི་ཚུལ་ཞེས་བྱ་བ་ནི་ཚོགས་ན་གནས་པ་ཡང་ཤེས་པར་བྱ་སྟེ། རང་སངས་རྒྱས་ཀྱི་འབྲས་བུའོ། །དེ་ཡང་ཁྱད་པར་ཇི་ལྟ་བུ་དང་ལྡན་ཞེ་ན། 
ངེས་པར་འབྱུང་བ་ནི་ངེས་པར་འབྱུང་བའི་ཚུལ་ཁྲིམས་སོ། །སྣ་ཚོགས་ནི་སོ་སོའི་སྒོའི་ཁྱད་པར་རོ། །སྤོང་བ་བདུན་དང་བཅུའོ། །དེ་ལས་འབྱུང་བ་ནི་དགེ་སློང་ལ་སོགས་པའི་ཡོན་ཏན་ནི་འབྱུང་བ་ས་ལ་སོགས་པའོ། །ཆེན་པོ་ནི་ནང་རྟེན་ཅིང་འབྲེལ་པར་འབྱུང་བའི་སྦྱོར་བའོ། །
རྒྱུ་ནི་བྱེད་པ་པོ་སྟེ་གཅིག་པོ་ཞེས་བྱ་བ་ནི་ལྷན་ཅིག་སྐྱེས་པའི་ཡེ་ཤེས་སོ། །དེའི་ཁྱད་པར་ནི་བདེ་བ་ཆེན་པོ་རྙེད་པས་མཐའ་གཉིས་ལ་འཇིགས་པ་མེད་པ་ཐོབ་པའོ། །མངོན་ཞེན་གྱི་གདུང་བ་དང་བྲལ་བས། སྟོང་པ་དང་། གསལ་བ་དང་། བདེ་བ་ངང་གིས་འབྱུང་བས་དྲི་མས་མ་གོས་པ་ནི། 
གསལ་བར་འགྱུར་བས་རྙོག་པ་མེད་ཅེས་པ་སྟེ། ཐུན་མོང་མ་ཡིན་པའི་ཐེག་པ་ཆེན་པོའོ། །རིག་པ་དང་ནི་ཞེས་པ་ནི་ལྷག་པའི་ཚུལ་ཁྲིམས་ཀྱི་བསླབ་པའོ། །རྐང་པར་ལྡན་ཞེས་པ་ནི་ལྷག་པའི་སེམས་དང་ལྷག་པའི་ཤེས་རབ་ཀྱི་བསླབ་པའོ། །དེ་ལས་བདེ་བར་གཤེགས་པ་ལ་
སོགས་པའི་ཡོན་ཏན་འབྱུང་བ་ནི་ཐུན་མོང་གི་ཐེག་པ་ཆེན་པོ་སྟེ། དེ་ཐམས་ཅད་ཀྱི་སྟོན་པར་གྱུར་པའི་འདྲེན་པ་ཞེས་གསུངས་སོ། །བདག་གི་ལ་སོགས་པ་ནི་གཉིས་དང་བྲལ་བའོ། །བདེན་པ་ལ་སོགས་པ་ནི་གཉིས་སུ་མེད་པའོ། །འཁོར་བ་ལ་སོགས་པ་ནི་ཡོངས་སུ་དག་པའི་དྲི་
མ་མེད་པའི་ཆའི་ཕུན་སུམ་ཚོགས་པའོ། །བྱ་བ་དང་བྲལ་བ་ནི་འབད་པ་དང་བྲལ་བའོ། །དེས་ཉོན་མོངས་པའི་འདམ་མི་གནས་པ་ནི་སྐམ་སར་གནས་ཞེས་བྱའོ། །ཡེ་ཤེས་འབའ་ཞིག་ལས་བྱུང་བ། །ཞེས་བྱ་བ་ནི་རྒྱུ་དང་ལམ་དང་འབྲས་བུ་ཐམས་ཅད་ལྷན་ཅིག་སྐྱེས་པ་སྟེ། དེས་
གཟུགས་ལ་སོགས་པ་འཇོམས་པས་ཐམས་ཅད་དམ་པའི་ཆོས་སུ་འགྱུར་ཏེ། གཉུག་མ་འོད་གསལ་བའི་ཆོས་ཀྱི་རྒྱལ་པོ་དང་ལྡན་ནོ། །དེ་བས་ན་འཇིག་རྟེན་པ་ཐམས་ཅད་ལ་སྣང་བར་བྱེད་པ་ནི་མཆོག་རྒྱ་ཆེན་པོ་ཉིད་དོ། །ཁོ་བོ་ནི་མི་གནས་པའི་ས་བོན་ལས་མི་གནས་པའི་

49-1-112b

འབྲས་བུར་འབྱུང་ཞེས་བརྟགས་པ་ལྟར་འདིར་ཡང་རྣལ་འབྱོར་གྱི་ཡེ་ཤེས་སུ་བྱ་བའི་ཕྱིར། ཆོས་ནི་སྣ་ཚོགས་ལ་ཆོས་ཀྱི་དབང་ཕྱུག་ནི་སེམས་སོ། །ཆོས་རྣམས་རིགས་བརྒྱད་ལ་མཆོག་གི་རྒྱལ་པོ་ནི་ལྷན་ཅིག་སྐྱེས་པ་སྟེ། དེ་ལེགས་པར་སངས་རྒྱས་ཀྱི་ལམ་སྟོན་པའི་ཕྱིར།
ཐེ་ཚོམ་ལ་མི་གནས་སོ། །དོན་ནི་གཟུགས་ལ་སོགས་པ་སྟེ། གྲུབ་པ་ནི་རང་གི་ངོ་བོར་རོ། །བསམ་པ་ནི་མ་བཅོས་པ་སྟེ་གྲུབ་པ་ནི་བརྟགས་མི་གནས་པའོ། །རྣམ་པར་མི་རྟོག་པའི་དབྱིངས་ནི་བསྟན་པ་ཐོས་པ་དང་འཕེལ་བ་དང་འགྲིབ་པ་མེད་པས་མི་ཟད་པ་ཞེས་བྱའོ། །དེའི་ཕྱིར་
ཟད་མི་ཤེས་ཞེས་གསུངས་ཏེ། རྒྱུན་ཆད་ལ་མི་གནས་སོ། །བསོད་ནམས་ལྡན་པ་ནི་རྡོ་རྗེ་སློབ་དཔོན་མཆོག་མ་ཡིན་ཏེ། བསོད་ནམས་ཀྱི་ཤུགས་ཀྱིས་བསྐྱེད་པའི་ཕྱག་རྒྱ་སྟེ། ཡེ་ཤེས་ནི་གཟུགས་བརྙན་གྱི་ལྷན་ཅིག་སྐྱེས་པ་བསྒོམས་པ་ལ་སོགས་པའོ། །ཡེ་ཤེས་ཁྱད་པར་ཆེ་ཞེས་བྱ་བ་
ཡོངས་སུ་རྫོགས་པའི་རྣལ་འབྱོར་པ་སྟེ། ངོ་བོ་ཉིད་ཀྱི་རྣལ་འབྱོར་པ་ནི་ཡེ་ཤེས་ལྡན་པའོ། །དེ་ནི་དོགས་པ་མེད་པའི་བདེ་བ་དང་། སྟོང་པ་ཉིད་ཆེན་པོ་གཉིས་ཟུང་འཇུག་ཏུ་ཐ་དད་པ་ཡོད་མེད་ཤེས་ཞེས་བྱའོ། །དེ་ལ་བློ་དང་རང་གི་བྱེ་བྲག་གིས་ཐུན་མོང་དང་ཐུན་མོང་མ་ཡིན་པ་ལ་སྦྱར་བར་བྱ་སྟེ།
སྤང་བྱ་དང་སྤོང་བྱེད་གཉིས་གཉིས་ལ་མི་གནས་ཞེས་བྱ་བ་དང་། སྤང་བྱ་གཉིས་མེད་དང་སྤོང་བྱེད་གཉིས་མེད་ནི་གཉིས་སུ་མེད་པ་སྟེ། དེ་ཡང་མི་གནས་པ་ནི་ཚོགས་གཉིས་ལ་སོགས་པའི་ཡོན་ཏན་དང་ལྡན་པའོ། །རྣལ་འབྱོར་ཅན་ཞེས་པ་ནི་བདེན་པ་ཡང་བྲལ་བའི་མི་གནས་པའོ། །
བསམ་གཏན་ནི་རྩེ་གཅིག་པའོ། །བསམ་བྱ་ནི་བློ་སྟེ། དེ་རང་གི་ངོ་བོར་ལྡན་པས་མཆོག་ཅེས་བྱ་སྟེ། རང་བྱུང་བས་དུས་གསུམ་ལ་མི་གནས་སོ། །དེ་ཡང་རང་རིག་པའི་ངོ་བོར་བསྟན་པའི་ཕྱིར། སོ་སོ་རང་རིག་ཅེས་པ་ནི་རྐྱེན་གཞན་ལ་རག་མ་ལས་པའོ། །མི་གཡོ་བ་ནི་མི་བསྐྱོད་པ་སྟེ། 
གཉིས་མེད་གཉིས་ལ་མི་བསྐྱོད་པ་དང་། གཉིས་ཀྱིས་གཉིས་མེད་མི་བསྐྱོད་པ་སྟེ། འཁྲུལ་པ་དང་མ་འཁྲུལ་པའི་བྱེ་བྲག་གིས་སོ། །དེ་ཉིད་ནི་དཔལ་མཆོག་དང་པོའི་སྐྱེས་བུ་སྟེ། བཅོམ་ལྡན་འདས་སོ། །དང་པོ་ཞེས་པ་ནི་ཟླ་བ་ཚེས་གཅིག་པ་ལྟ་བུ་སྟེ། འཇམ་དཔལ་ཡེ་ཤེས་སེམས་

49-1-113a

སྐུ་གསུམ་ལ་སོགས་པ་ནི་དེ་ཉིད་ལ་ཐམས་ཅད་མངའ་བའོ། །ཅོད་པན་ཞེས་པ་ནི་དཀྱིལ་འཁོར་པ་ཐམས་ཅད་དོ། །སྐྱེད་པ་པོ་ཞེས་པ་ནི་ཐམས་ཅད་ཀྱི་བྱེད་པ་པོའོ། །སྲས་པོ་ཞེས་བྱ་བ་ནི་རྒྱལ་པོའི་ཕྲུ་གུ་ལྟ་བུ་སྟེ། མངོན་སུམ་དུ་མ་གྱུར་པ་ལ་དགོངས་
པའོ། །དམ་པའི་མཆོག་ཅེས་པ་ནི་སྲས་ལ་ཁྱད་པར་དུ་གྱུར་པའོ། །སྐྱེ་གནས་ཀྱི་རྙོག་པ་ཅན་མ་ཡིན་ཏེ། ཤེས་པ་སྲིད་པ་གསུམ་དུ་འབྱུང་ལ། སྲིད་གསུམ་སྐྱེ་བ་མེད་པའི་སེམས་ཀྱི་རང་བཞིན་དུ་རིག་པས་སྐྱེ་གནས་མེད་པའོ། །དངོས་པོའི་རྙོག་པ་ཅན་མ་ཡིན་ཏེ། ཆོས་ནི་གཟུགས་ལ་
སོགས་པའོ། །དེ་ལས་འབྱུང་བ་ནི་སྲིད་པ་གསུམ་མོ། །དེ་རྟེན་འབྲེལ་ལས་སྐྱེས་པའི་སྦྱོར་བའི་རང་བཞིན་མེད་པ་ནི་སེལ་ཞེས་བྱའོ། །དུ་མའི་རྙོག་པ་ཅན་མ་ཡིན་ཏེ། གཅིག་པུ་ཞེས་བྱ་བའི་དོན་བཤད་ཟིན་ཏོ། །ལམ་གྱི་རྙོག་པ་ཅན་མ་ཡིན་ཏེ། སྐྱེས་མ་ཐག་ཏུ་འགྲོ་བའི་བདག །ཅེས་བྱ་བའི་
དོན་ནི། དཔེར་ན་འཁོར་ལོས་སྒྱུར་བའི་རྒྱལ་པོའི་བུ་བཞིན་དུ་ཆོས་ཐམས་ཅད་ཀྱི་བདག་པོར་གྱུར་པས་སོ། །བཅོས་མའི་རྙོག་པ་ཅན་མ་ཡིན་ཏེ། ནམ་མཁའ་ལས་བྱུང་ཞེས་བྱ་བ་ནི་རྒྱུ་ལས་མ་སྐྱེས་པ་སྟེ། རྐྱེན་ལ་རག་མ་ལས་པར་རང་འབྱུང་བའོ། །བཏང་སྙོམས་ཀྱི་རྙོག་པ་ཅན་མ་ཡིན་ཏེ། 
དཔེར་ན་མེས་བསྲེགས་ཤིང་གསལ་བར་བྱེད་པ་ལྟར། འདིར་ཡང་མི་བོ་ཆེ་ཞེས་པ་ནི། མུན་པ་ལ་ནི་མར་མེ་བཞིན། །ཞེས་བྱ་བ་སྟེ་བཤད་ཟིན་ཏོ། །དངོས་པོའི་རྙོག་པ་ཅན་མ་ཡིན་ཏེ། འོད་ཆེན་ལ་སོགས་པའོ། །མ་རིག་པའི་རྙོག་པ་ཅན་མ་ཡིན་ཏེ། ཡེ་ཤེས་སྐར་མ་ལམ་མེ་བ། །ཞེས་བྱ་བ་ལ་རྩོད་
གཞི་ཐེ་ཚོམ་མེད་པར་བྱེད་པའོ། །ཕྱོགས་ཀྱི་རྙོག་པ་ཅན་མ་ཡིན་ཏེ། འགྲོ་བའི་ལ་སོགས་པས་སོ། །གཟི་བརྗིད་ཆེན་པོ་ཞེས་བྱ་བ་ནི་ཡེ་ཤེས་ལྔར་དབྱེར་མི་ཕྱེད་པ་སྟེ། རང་བཞིན་གྱིས་འོད་གསལ་བས་བརྟགས་པའི་རྙོག་པ་ཐམས་ཅད་དང་བྲལ་བའོ། །ད་ནི་དེ་ཉིད་མྱ་ངན་ལས་འདས་པའི་
འཁོར་ལོར་སྣང་བར་བཤད་པར་བྱ་སྟེ། སྔགས་མཆོག་ནི་ཡེ་ཤེས་ལ་གསུངས་ལ། མངའ་བདག་ནི་རིགས་ཐམས་ཅད་ཀྱིའོ། །རིག་སྔགས་ལ་སོགས་པ་ནི་བཤད་ཟིན་ཏོ། །དེས་ཅི་མཛད་ཅེ་ན། འགྲོ་བ་ཀུན་དགའ་བར་བྱེད་པའི་སྙིང་རྗེའི་དམིགས་པ་དང་ལྡན་པས་སོ། །དྲང་སྲོང་ནི་རྒྱུན་

49-1-113b

དག་པ་སྟེ་ཆེ་དགུ་ནི་དེ་བཞིན་གཤེགས་པ་ལ་སོགས་པས་སོ། །དེས་མཆོད་ཅིང་བརྗོད་པའི་གནས་ནི་འཇམ་དཔལ་ཡེ་ཤེས་སེམས་དཔའོ་ཞེས་དགོངས་སོ། །དེ་ལ་རྣལ་འབྱོར་མཆོག་གི་མཆོད་བརྗོད་ཇི་ལྟར་བྱ་བའི་ཚུལ་བཤད་པར་བྱ་སྟེ། རིགས་གསུམ་ནི་སྐུ་གསུང་ཐུགས་འཆང་བ་ནི་གསང་བ་
གསུམ་ཐ་མི་དད་པར་རོ། །གསང་སྔགས་ནི་ཐབས་དང་ཤེས་རབ་སྟེ། ནང་གི་བདག་ཉིད་དུ་ལྡན་པ་ལ་ཅན་ཞེས་བྱའོ། །དེ་ལ་ཡང་། ལ་ལ་ཤེས་རབ་རང་བཞིན་ཏེ། །ར་ས་ཐབས་སུ་ཡང་དག་གནས། །ཨ་ཝ་དྡྷཱུ་ཏཱི་དབུས་ནས་སུ། །གཟུང་དང་འཛིན་པ་སྤངས་པའོ། །ཞེས་གསུངས་པས་སོ། །
དམ་ཚིག་ཆེན་པོ་ནི་ལྷན་ཅིག་སྟེ། གསང་སྔགས་འཛིན་པ་ཡང་ཨེ་ཝཾ་གྱི་རྣམ་གྲངས་ཐམས་ཅད་ཐ་མི་དད་པའོ། །གཙོ་བོ་ནི་འཇིག་རྟེན་གྱི་སྐྱབས་སུ་གྱུར་པའོ། །དཀོན་མཆོག་གསུམ་འཛིན་པ་ནི་ནང་གི་དཀོན་མཆོག་གསུམ་སྟེ། དེ་ཡང་། སྟོང་པ་སྙིང་རྗེ་ཐ་དད་མེད། །སེམས་ནི་གང་དུ་རབ་
བསྒོམ་པ། །དེ་ཉིད་སངས་རྒྱས་ཆོས་དང་ནི། །དགེ་འདུན་གྱི་ཡང་བསྟན་པའོ། །ཞེས་གསུངས་པའི་ཕྱིར་རོ། །ཐེག་པ་ཉན་ཐོས་ལ་སོགས་པ་སྟེ། དཀོན་མཆོག་གསུམ་ནི་རྣམ་དག་ཏུ་སྟོན་པའོ། །དོན་ཡོད་ཞགས་པ་ནི་རྣམ་པར་སྣང་མཛད་དོ། །རྣམ་པར་རྒྱལ་བ་ནི་རིན་ཆེན་འབྱུང་
ལྡན་ནོ། །འཛིན་པ་ཆེན་པོ་ནི་མི་བསྐྱོད་པའོ། །རྡོ་རྗེ་ཞགས་པ་ནི་སྣང་བ་མཐའ་ཡས་སོ། །རྡོ་རྗེ་ལྕགས་ཀྱུ་ཞགས་པ་ཆེ་ནི་དོན་ཡོད་གྲུབ་པའོ། །རྡོ་རྗེ་ཆེན་པོ་ཞགས་པས་ནི་སེམས་ཅན་བསྐྱེད་པ་དང་དབང་བསྐུར་བའི་ཡེ་ཤེས་ཀྱིས་འཁོར་བ་ལས་རྒྱལ་བ་དང་། དེ་ཁོ་ན་ཉིད་ཆེན་པོ་འཛིན་པ་
དང་། སྙིང་རྗེའི་ཞགས་པས་འཁོར་བར་འཇུག་ཀྱང་སྐྱོན་གྱིས་མ་གོས་པ་དང་། དམ་ཚིག་གི་ལྕགས་ཀྱུས་འགྲོ་བའི་དོན་དུ་ཕྲིན་ལས་མཛད་པའི་རིགས་ཀྱི་འཁོར་ལོ་བརྗོད་པ་སྟེ། དེ་དག་ནི་ཆོས་ཀྱི་དབྱིངས་ཀྱི་ཡེ་ཤེས་ལ་བསྟོད་པའོ། །རྡོ་རྗེ་འཇིགས་བྱེད་ལ་སོགས་པའི་རྒྱུད་
ནས་བཤད་པའི་བར་གྱིས་ཡོན་ཏན་གྱི་རྣམ་གྲངས་སུ་བཤད་པར་བྱ་སྟེ། དེ་ལ་རྡོ་རྗེ་འཇིགས་བྱེད་ནི་རྟགས་སོ། །གཉིས་པ་ནི་ཞེ་སྡང་ལ་སོགས་པ་དག་པར་བྱེད་པས་དོན་དེ་ཉིད་ཀྱི་རྒྱུད་ལས་སོ། །ཁྲོ་བོའི་རྒྱལ་པོ་ནི་མ་རྟོགས་པ་དང་རྟོགས་པའི་ཁྱད་པར་གྱིས་བདེ་བ་དང་སྡུག་བསྔལ་

49-1-114a

གཅོད་པ་སྟེ། ཁྲོ་བོ་རྣམ་པར་རྒྱལ་བའི་རྒྱུད་ལས་སོ། །གདོང་དྲུག་ལ་སོགས་པ་ནི་ཕྱག་ན་རྡོ་རྗེ་དབང་བསྐུར་བའི་རྒྱུད་ལས་གསུངས་སོ། །དེ་ཡང་སྐུ་དང་།  གསུང་དང་། ཐུགས་དང་། ཡེ་ཤེས་དང་། དམ་ཚིག་དང་། ཡོན་ཏན་གྱི་མཚན་ཉིད་ཀུན་རྫོབ་ཀྱི་ཐིག་ལེ་དང་།
དབྱངས་ཡིག་བཅུ་གཉིས་དང་། ལྷན་ཅིག་སྐྱེས་པའི་ཡེ་ཤེས་དང་། བསམ་གྱིས་མི་ཁྱབ་པ་དང་། དམིགས་པ་མེད་པའི་སྙིང་རྗེ་དང་། དེ་དང་ཐ་མི་དད་པའི་དམ་ཚིག་ནི་བདེ་བ་དང་།  དུས་ཀྱི་རླུང་ཟིན་པ་དང་། ཟུང་དུ་འཇུག་པ་དང་། ཐམས་ཅད་རོ་གཅིག་པ་དང་། རེ་བ་མེད་པའི་སྨོན་ལམ་དང་། 
སོ་སོར་རྟོག་པའི་ཡེ་ཤེས་ཀྱི་མིག་གིས་བལྟས་ལ་ཟུག་རྔུ་མེད་པ་དང་། རྒྱུན་མི་འཆད་པ་དང་། སྒྲོ་མ་བཏགས་པ་དང་། རང་ཉིད་འབྱུང་བ་དང་། རེ་བ་མེད་པ་དང་སྒྲོ་འདོགས་ཆོད་པའི་ལག་ཏུ་ཐོགས་པས་ཕྱག་རྒྱ་ཆེན་པོའི་སྟོབས་དང་ལྡན་པའོ། །རིག་པ་མཆོག་གི་རྒྱུད་ལས་སོ། །ཀེང་རུས་ནི་
སྙིང་པོ་མཚོན་པ་སྟེ། འཁོར་ལོ་བདེ་མཆོག་གི་རྒྱུད་ལས་སོ། །མཆེ་བ་གཙིགས་པ་ནི་བདུད་བཞི་བཅོམ་ནས་ཡེ་ཤེས་བཞི་སྣང་བར་གྱུར་པ་སྟེ། རྡོ་རྗེ་གསང་ལུས་ཀྱི་རྒྱུད་ལས་སོ། །ཧ་ལ་ཧ་ལ་ནི་གཉིས་མེད་ཀྱི་བཅུད་ཀྱིས་འབིགས་པ་སྟེ། དོན་ཡོད་ཞགས་པའི་རྒྱུད་ལས་སོ། །གདོང་
བརྒྱ་པ་ནི་གདུལ་བྱའི་རྣམ་རྟོག་དང་མཐུན་པར་འབྱུང་བས་རྒྱལ་བ་རྣམས་ནི་ཆོས་ཀྱི་སྐུ་ཡིན་ཏེ། རྡོ་རྗེ་ཐོད་པའི་རྒྱུད་ལས་སོ། །གཤིན་རྗེ་གཤེད་པོ་ནི་འཇིག་རྟེན་པ་དང་། ཐེག་པ་དང་། ཐེག་པ་ཆེན་པོ་ལ་གནས་པ་སྟེ། དེ་རྟགས་དང་ལམ་དང་། རྣལ་འབྱོར་གྱི་འཇོམས་པ་ནི་གསང་བ་
འདུས་པ་ལས་སོ། །བགེགས་ནི་ཉོན་མོངས་པ་དང་། སྣང་བ་དང་། རྣམ་པར་རྟོག་པ་དང་། བདུད་དེ་དག་ལྷན་ཅིག་སྐྱེས་པ་དང་། སྐྱེ་བ་མེད་པ་དང་། གཉུག་མ་དང་། དོན་གཅིག་པ་ཉིད་ཀྱིས་རྒྱལ་བ་ནི་རྣམ་པར་སྣང་མཛད། སྒྱུ་འཕྲུལ་དྲ་བའི་རྒྱུད་ལས་སོ། །རྡོ་རྗེ་ཤུགས་ཆེན་ནི་རྒྱུ་འབྲས་
དབྱེར་མེད་པ་སྟེ། དམ་ཚིག་ཆེན་པོའི་རྒྱུད་ལས་སོ། །འཇིགས་པར་བྱེད་པ་ནི་རིགས་པའི་མཐུས་གཏི་མུག་ཉིད་དེ་བཞིན་ཉིད་དུ་གྱུར་པ་སྟེ། ཟླ་གསང་ཐིག་ལེའི་རྒྱུད་ལས་སོ། །རྡོ་རྗེ་གྲགས་པ་ནི་ཡེ་ཤེས་ཉིད་སྣ་ཚོགས་སུ་གྲགས་པ་སྟེ། གཉིས་མེད་རྣམ་པར་རྒྱལ་བའི་རྒྱུད་ལས་སོ། །

49-1-114b

རྡོ་རྗེ་སྙིང་ཞེས་བྱ་བ་ནི་ཡེ་ཤེས་ལྔའི་བསྙེན་པར་གྱུར་པ་སྟེ། ཟླ་གསང་ནོར་བུ་ཐིག་ལེ་རྒྱན་གྱི་རྒྱུད་ལས་སོ། །སྒྱུ་འཕྲུལ་ཞེས་པ་ནི་ཐམས་ཅད་སྒྱུ་མ་དང་འཕྲུལ་གྱི་རྣམ་པ་དང་འདྲ་བར་བསྟན་པ་སྟེ། ཁྲི་དྲུག་སྟོང་པ་འདི་ཉིད་ལས་སོ། །རྡོ་རྗེ་གསུས་པོ་ཆེ་ནི་ཟུང་འཇུག་གིས་ཡིད་རྒྱས་པ་སྟེ། གསང་
བ་མཆོག་གི་རྒྱུད་ལས་སོ། །རྡོ་རྗེ་ལས་སྐྱེས་ནི་སེམས་བདེ་བ་ཆེན་པོ་ལས་སྣ་ཚོགས་སྐྱེས་པ་སྟེ།  འབྱུང་ཕྱོགས་བཞག་པའི་རྒྱུད་ལས་སོ། །རྡོ་རྗེ་བདག་ཅེས་པ་ནི་སྣ་ཚོགས་བདེ་བ་ཆེན་པོ་ཉིད་དུ་བསྟན་པ་སྟེ། རྡོ་རྗེ་ས་འོག་གི་རྒྱུད་ལས་སོ། །རྡོ་རྗེ་སྙིང་པོ་མཁའ་འདྲ་བ། །ཞེས་པ་ནི་
སྐྱེས་པ་དང་། ཐེག་པ་གཉིས་ཀྱིས་གཅིག་པ་ནི་ནམ་མཁའ་དང་འདྲ་བ་སྟེ། ནམ་མཁའ་འཛིན་གྱི་རྒྱུད་ལས་སོ། །མི་གཡོ་བ་ཞེས་བྱ་བ་ནི་སྔར་བཤད་དོ། །ཧེ་རུ་ཀ་སྒྱུ་འཕྲུལ་དྲ་བའི་རྒྱུད་ལས་སོ། །རལ་པ་གཅིག་གིས་བསྒྱིངས་ཞེས་པ་ནི། རང་གི་ངོ་བོར་འཁོར་འདས་ཐམས་ཅད་ཡེ་ཤེས་
གཅིག་གིས་བསྒྱིངས་ཤིང་། དབང་པོ་ཐམས་ཅད་ཉམས་མྱོང་གཅིག་གིས་བསྒྱིངས་པ་སྟེ། རྡོ་རྗེ་ཅོད་པན་གྱི་རྒྱུད་ལས་སོ། །གླང་ཆེན་ཀོ་རློན་གོས་སུ་གྱོན། །ཞེས་པ་ནི། རྟོགས་པ་ལ་སེམས་བརྟན་པ་དང་། ཐབས་དང་ཤེས་རབ་རྒྱུད་ལ་གོམས་པར་བྱ་བ་སྟེ། འཁོར་ལོ་བདེ་མཆོག་
གི་རྒྱུད་ལས་སོ། །དྲག་ཆེན་ཧ་ཧ་ཞེས་སྒྲོགས་པ། །ཞེས་པ་ནི་མཐའ་གཉིས་སེལ་བ་དང་། ཐབས་དང་ཤེས་རབ་ཀྱི་གསང་བ་གཞན་ལ་བསྒྲག་པར་བྱ་སྟེ། ཁམས་གསུམ་རྣམ་པར་རྒྱལ་བའི་རྒྱུད་ལས་སོ། །ཧི་ཧི་ཞེས་སྒྲོགས་ཞེས་པ་ནི།  རང་རྒྱུད་ལ་སྦྱོར་བ་སྟེ། ཁྲོ་བོ་ཐིག་ལེ་ཟླ་བའི་རྒྱུད་ལས་སོ། །
འཇིགས་པར་བྱེད་པ་ཞེས་པ་ནི། རྟག་ཆད་དད་ཀྱི་མཐའ་དང་བྲལ་བ་སྟེ། ཀུན་ལས་བཏུས་པའི་རྒྱུད་ལས་སོ། །གད་མོ་ཆེན་པོ་ནི་རང་འབྱུང་གསང་བ་མཐོང་བ་སྟེ། སྐུ་ཁྲོས་པའི་རྒྱུད་ལས་སོ། །གད་རྒྱངས་ཅན་ནི་ཟིལ་གྱིས་གནོན་པའི་གསུང་སྟེ། རྡོ་རྗེ་ཐོད་པའི་རྒྱུད་ལས་སོ། །རྡོ་རྗེ་གད་མོ་
ཆེར་སྒྲགས་པས་ཞེས་པ་ནི། རྡོ་རྗེ་ཙཎྜ་ལཱིར་འབར་བ་སྟེ། རྡོ་རྗེ་བསམ་གཏན་གྱི་རྒྱུད་ལས་སོ། །རྡོ་རྗེ་སེམས་དཔའ་ནི་ཆོས་ཀྱི་སྐུ་སྟེ། དེ་ཁོ་ན་ཉིད་བསྡུས་པའི་རྒྱུད་ལས་སོ། །སེམས་དཔའ་ཆེ་ཞེས་པ་ནི་ལོངས་སྤྱོད་རྫོགས་པའི་སྐུ་སྟེ། དགྱེས་པ་རྡོ་རྗེ་ལས་སོ། །རྡོ་རྗེ་རྒྱལ་པོ་བདེ་བ་ཆེ། །ཞེས་

49-1-115a

པ་ནི་བདེ་བ་ཆེན་པོའི་སྐུ་སྟེ། པདྨ་དང་རྡོ་རྗེ་སྙོམས་པར་འཇུག་པའི་རྒྱུད་ལས་སོ། །རྡོ་རྗེ་དྲག་པོ་དགའ་བ་ཆེ། །ཞེས་པ་ནི་སྤྲུལ་པའི་སྐུ་སྟེ། རྟོག་པ་བཞི་པའི་རྒྱུད་ལས་སོ། །རྡོ་རྗེ་ཧཱུཾ་སྟེ་ཞེས་བྱ་བ་ནི་རྒྱུ་མེད་པ་དང་།  ཚིག་དང་བྲལ་བ་དང་། མི་གནས་པ་རང་རྒྱུད་ལ་སྦྱངས་པ་སྟེ། 
ཧེ་རུ་ཀ་མངོན་པར་འབྱུང་བའི་རྒྱུད་ལས་སོ། །ཧཱུཾ་ཞེས་སྒྲོགས་ཞེས་པ་ནི། དེ་ཉིད་གཞན་ལ་སྟོན་པ་སྟེ། །རྡོ་རྗེ་མཆོག་གི་རྒྱུད་ལས་སོ། །མཚོན་དུ་རྡོ་རྗེ་མདའ་ཐོགས་པ། །ཞེས་པ་ནི་ཚོགས་དྲུག་ཐུག་ཕྲད་ཡེ་ཤེས་རང་ཆས་སུ་སྟོན་པ་སྟེ། སྒྱུ་འཕྲུལ་ཆེན་མོའི་རྒྱུད་ལས་སོ། །རྡོ་རྗེ་རལ་གྲིས་མ་
ལུས་གཅོད། །ཅེས་པ་ནི་ཏིང་ངེ་འཛིན་གྱིས་གོམས་པའི་མཐུ་བསྟན་པ་སྟེ། དཔལ་མཆོག་དང་པོའི་རྒྱུད་ལས་སོ། །རྡོ་རྗེ་ཀུན་འཆང་རྡོ་རྗེ་འཆང་། །ཞེས་པ་ནི་སངས་རྒྱས་ཀྱི་ཡེ་ཤེས་ཡོངས་སུ་རྫོགས་པའི་དུས་ཏེ། དགོངས་པ་འདུས་པའི་ལུང་བསྟན་གྱི་རྒྱུ་ལས་སོ། །རྡོ་རྗེ་གཅིག་པུ་ཞེས་པ་ནི་
སྔར་བཤད་ཟིན་ཏོ། །འཇམ་དཔལ་ལུང་བསྟན་པའི་རྒྱུད་ལས་སོ། །གཡུལ་སེལ་ནི་ཕུང་པོ་ལ་སོགས་པའི་ཚོགས་བཟློག་པ་སྟེ། དམ་པ་དང་པོའི་རྒྱུད་ལས་སོ། །རྡོ་རྗེ་འབར་བ་ཞེས་པ་ནི། བདེ་བ་ཆེན་པོ་ཉིད་རིགས་ཀྱི་སྐུ་སྣ་ཚོགས་སུ་སྣང་བའི་སྙིང་རྗེའི་སྤྱན་ཏེ། དམ་ཚིག་བཀོད་པའི་རྒྱུད་
ལས་སོ། །མིག་མི་བཟང་ཅེས་པ་ནི། སྐུ་སྣ་ཚོགས་ཉིད་བདེ་བ་ཆེན་པོའི་སྐུར་གཅིག་པ་ཡེ་ཤེས་ཀྱི་སྤྱན་ཏེ། བསམ་གཏན་རྩེ་མོའི་རྒྱུད་ལས་སོ། །སྐྲ་ཡང་རྡོ་རྗེ་འབར་བ་སྟེ། །ཞེས་པ་ནི་སྙིང་པོ་སྲིད་པ་གསུམ་ལ་ཁྱབ་པ་སྟེ། མངོན་པར་མཐོང་བའི་རྒྱུད་ལས་སོ། །རྡོ་རྗེ་འབེབས་པ་ནི་
སྐུ་གསུང་ཐུགས་རབ་ཏུ་གནས་པས་ཕྱག་གི་འོས་སུ་གྱུར་པ་སྟེ། བདུད་རྩིའི་མཆོག་གི་རྒྱུད་ལས་སོ། །འབེབས་པ་ཆེ་ཞེས་པ་ནི། དམ་པའི་དྲིན་གྱིས་བླ་མའི་བླ་མ་དང་། རྡོ་རྗེ་འཆང་གི་བྱིན་རླབས་ཞུགས་པ་སྟེ། ཐུགས་ཁྲོས་པ་རྡོ་རྗེའི་རྒྱུད་ལས་སོ། །མིག་བརྒྱ་པ་སྟེ་ཞེས་པ་ནི། 
འགྲོ་བ་ཐམས་ཅད་ཀྱི་རྒྱུད་གཟིགས་པ་སྟེ། སྤྱན་རས་གཟིགས་སྙིང་གུར་གཅིག་པའི་རྒྱུད་ལས་སོ། །རྡོ་རྗེ་མིག་ཅེས་བྱ་བ་ནི། སངས་རྒྱས་སྤྱན་དང་ལྡན་པ་སྟེ། རྡོ་རྗེ་ཞི་བའི་བདེ་བའི་རྒྱུད་ལས་སོ། །ལུས་ནི་རྡོ་རྗེའི་བ་སྤུ་ཅན། །ཞེས་པ་ནི། རྡོ་རྗེ་ཡེ་ཤེས་ཀྱི་རྣལ་འབྱོར་རྒྱུད་ལས་སྐྱེས་པའི་བ་

49-1-115b

སྤུའི་བུ་ག་རེ་རེ་ཞིག་ནས་སངས་རྒྱས་ཐམས་ཅད་ཀྱི་ཐབས་དང་ཤེས་རབ་ཀྱི་ཁ་སྦྱོར་བའི་སྡོམ་པ་བཞུགས་སོ། །ཀུན་དུ་ཁ་སྦྱོར་བའི་རྒྱུད་ལས་སོ། །སེན་མོ་སྐྱེས་པ་རྡོ་རྗེའི་རྩེ། །ཞེས་པ་ནི་ས་བཅུའི་ཡེ་ཤེས་ཐུགས་སུ་ཆུད་པའམ། སྟོབས་བཅུ་དང་ལྡན་པ་སྟེ། གཤིན་རྗེ་གཤེད་བཞི་བརྒྱ་ལྔ་བཅུའི་
རྒྱུད་ལས་སོ། །རྡོ་རྗེ་སྙིང་པོ་ཞེས་པ་ནི་འཁོར་བ་བདེ་ཆེན་གྱི་སྙིང་པོ་ཅན་ཏེ། མངོན་པར་བྱང་ཆུབ་པའི་རྒྱུད་ལས་སོ། །པགས་པ་མཁྲེགས་ཞེས་པ་ནི། གོ་ཆ་གསུམ་དང་ལྡན་པ་སྟེ། སྒྱུ་མ་བསྒྲགས་པའི་རྒྱུད་ལས་སོ། །རྡོ་རྗེ་ཕྲེང་ཐོགས་ཞེས་པ་ནི། ཚོགས་གཅིག་པ་དང་།  རྒྱུ་གཅིག་པ་དང་། 
མཚན་ཉིད་གཅིག་པ་སྟེ། ལྷ་མོ་བཞིའི་རྒྱུད་ལས་སོ། །དཔལ་དང་ལྡན་ཞེས་པ་ནི་མི་སློབ་པའི་སྐུ་སྟེ། རྡོ་རྗེ་ཕྲེང་བའི་རྒྱུད་ལས་སོ། །རྡོ་རྗེ་རྒྱན་གྱིས་བརྒྱན་པ་སྟེ། །ཞེས་པ་ནི་ཕུང་པོ་ལ་སོགས་པ་ཐམས་ཅད་ཡེ་ཤེས་རང་ཆས་སུ་ལྡན་པ་སྟེ། མཁའ་འགྲོ་མ་རྡོ་རྗེ་གུར་གྱི་རྒྱུད་ལས་སོ། །གད་
རྒྱངས་ཧ་ཧ་ངེས་པར་སྒྲོགས། །ཞེས་པ་ནི་ཟིལ་གྱིས་མི་གནོན་པའི་ཕུང་པོ་ལ་སོགས་པ་སྟེ། དཔལ་རྡོ་རྗེ་མཁའ་འགྲོ་མའི་རྒྱུད་ལས་སོ། །ཡི་གེ་དྲུག་པ་ཞེས་པ་ནི་འགྲོ་བ་དྲུག་དང་། རིགས་དྲུག་གི་རྣམ་པར་དག་པ་ནི་ཨོཾ་ཝཱ་གཱི་ཤྭ་རི་མུཾ་ཞེས་པ་སྟེ། དེ་ཡང་ཆོས་ཐམས་ཅད་མ་སྐྱེས་པ་སྟེ། 
སྙིང་རྗེ་ཆེན་པོའི་རང་བཞིན་གྱིས་ཨོཾ་མོ། །བསམ་གྱིས་མི་ཁྱབ་པའི་རང་བཞིན་གྱིས་ཨཾ་སྟེ། ཡིད་ཀྱི་རྣམ་པར་ཤེས་པའོ། །ཝ་ཞེས་པ་ནི་བཅོམ་ལྡན་འདས་སོ། །ཨ་ཞེས་པ་ནི་མཚན་དང་དཔེ་བྱད་ཀྱི་བར་དུ་བརྒྱན་པ་སྟེ་གཟུགས་སོ། །གཞེས་པ་ནི་བདེ་བའོ། །ཨཱི་ཞེས་པ་ནི་རྣམ་པར་
རྟོག་པས་དབེན་པ་སྟེ་ཚོར་བའོ། །ཤྭ་ཞེས་པ་ནི་མཚན་མའོ། །བ་ཞེས་པ་ནི་གསུང་སྟེ། ཨ་ཞེས་པ་ནི་མིང་དང་བྲལ་བ་སྟེ། འདུ་ཤེས་སོ། །མ་ཞེས་པ་ནི་ལམ་མོ། །ཨུ་ཞེས་པ་ནི་འགྲོ་བའོ། །ཨ་ཞེས་པ་ནི་གནས་ཏེ་འདུ་བྱེད་དོ། །ཨ་ཞེས་པ་ནི་མཉམ་པ་ཡེ་ཤེས་ཀྱི་ཕུང་པོ་ཅན་ནོ། །དེ་དག་ནི་
ཁྲོ་བོའི་རྒྱལ་པོ་གདོང་དྲུག་གི་རྒྱུད་ལས་སོ། །རྡོ་རྗེ་སྒྲ་ཞེས་པ་ནི་གཉིས་མེད་ཀྱི་གསུང་སྟེ། དེ་གང་ལས་བསྟོད་ཅེ་ན། འཇམ་དཔལ་ཡེ་ཤེས་སེམས་དཔའ་ཞེས་གསུངས་སོ། །སྒྲ་ཆེ་བ་ནི་ཐམས་ཅད་ལ་གྲགས་པའོ། །འཇིག་རྟེན་གསུམ་ན་སྒྲ་ཆེ་བ། །ཞེས་པ་ནི་དེ་དག་ཐམས་ཅད་

49-1-116a

འཇམ་དཔལ་ཡེ་ཤེས་སེམས་དཔའི་རྣམ་གྲངས་ལ་ཆེད་དུ་བརྗོད་པའོ། །དེ་ལ་སོགས་པའི་ནམ་མཁའི་མཐས་ཀླས་པ་ནི། སྒྲ་སྒྲོགས་པ་ཐམས་ཅད་འཇམ་དཔལ་ཡེ་ཤེས་སེམས་དཔའ་ཉིད་ལ་ཆེད་དུ་བརྗོད་པའོ། །གཞན་ཆེད་དུ་བརྗོད་པའི་གནས་སུ་མི་འགྱུར་བ་མ་
ཡིན་ཏེ། འདི་ནི་མཆོག་གོ། །དེ་ཅིའི་ཕྱིར་ཞེ་ན།  ཡོད་པ་དང་ཡིན་པའི་ཁྱད་པར་ཏེ། འདོད་པའི་ཁམས་ལ་སོགས་པའི་ཐེག་པ་གསུམ་ཞེས་གྲགས་པ་ནི་ཡོད་ལ། དོན་ཇི་ལྟ་བ་ནི་མ་ཡིན་ཏེ།  དེ་ཅིའི་ཕྱིར་ཞེ་ན་ཕྱོགས་ན་གནས་པས་སོ། །འཇམ་དཔལ་ཡེ་ཤེས་སེམས་དཔའ་ནི་ཡིན་ནོ། །ཡོད་
པ་ནི་མ་ཡིན་ཏེ།  དེ་ཅིའི་ཕྱིར་ཞེ་ན། རིགས་ཀྱི་བུ་འདི་ལྟར་དཔེར་ན་ནམ་མཁའ་ནི་ཐམས་ཅད་ཀྱི་རྗེས་སུ་སོང་བ་སྟེ། ཆོས་ཐམས་ཅད་ཀྱང་ནམ་མཁའི་ཁོངས་སུ་གཏོགས་པའོ། །ཆོས་དེ་དག་ཐམས་ཅད་ཀྱང་འདོད་པའི་ཁམས་ན་མི་གནས། གཟུགས་ཀྱི་ཁམས་ན་མི་གནས། གཟུགས་
མེད་པའི་ཁམས་ན་མི་གནས། འབྱུང་བ་ཆེན་པོ་བཞི་ལ་ཡང་མི་གནས་སོ། །རིགས་ཀྱི་བུ་ཆོས་ཐམས་ཅད་ཀྱང་དེ་ལྟར་རྗེས་སུ་རིག་པར་བྱའོ་ཞེས་གསུངས་པས་སོ། །དེ་བས་ན་འཇམ་དཔལ་ཡེ་ཤེས་སེམས་དཔའ་ཉིད་གཟུགས་སྣ་ཚོགས་སུ་སྟོན་པ་ནི་མེ་ལོང་ལྟ་བུའི་ཡེ་ཤེས་སོ། །
ཡང་དག་བདག་མེད་ཅེས་པ་ལ་སོགས་པ་ལ་རགས་པའི་རྣམ་པར་རྟོག་པ་ལོག་བཞིན་པས་ན་ཡང་དག་གོ། །ཡང་དག་བདག་མེད་ནི་གྲུབ་པའི་མཐའི་དོན་ལ་དམིགས་པ་མེད་པ་སྟེ། དེ་བཞིན་ཉིད་དོ། །དོན་གྱིས་མིང་མཚོན་པ་ནི་ཡང་དག་མཐའ་སྟེ། དེ་དག་དང་བྲལ་བས་ན། 
ཡི་གེ་མེད་ཅེས་བྱ་བའི་ཆ་རང་བཞིན་མེད་པ་དང་། འཛིན་པས་ཀྱང་སྟོང་པ་སྟེ། དེ་ལས་ཀྱང་མཆོག་ཏུ་གྱུར་པ་ནི་གསང་སྔགས་ཀྱི་ཐེག་པ་ཆེན་པོའོ། །སྟེ་ཞེས་པ་ནི་དེའི་ཡོན་ཏན་བསྡུ་བར་བྱ་བའི་དོན་ཏོ། །ཟབ་ཅིང་ཞེས་པ་ནི་བདེ་བའོ། །རྒྱ་ཆེ་བ་ཞེས་བྱ་བ་ནི་སྟོང་པའོ། །སྒྲ་སྒྲོགས་
པ་ཞེས་བྱ་བ་ནི་གཉིས་མེད་དུའོ། །དེ་ལ་སློབ་མ་ལ་བསྟན་པར་བྱ་བ་ཡིན་པས་ཆོས་ཀྱི་དུང་ཞེས་བྱའོ། །སྟེ་ཞེས་པས་མན་ངག་སྟོན་པ་སྟེ། དེ་ཉིད་ཀྱི་ཡུལ་སོ་སོར་ངེས་པ་ལ་ཡིད་ཆེས་པར་བྱས་ནས་སྤྲོས་པ་མི་གནས་པར་བྱ་བ་ནི། སྒྲ་ཆེ་ལྡན་ཞེས་གསུངས་ཏེ། བླ་མའི་ཞལ་ལས་རིག་པར་

49-1-116b

བྱའོ། །ཆོས་ཀྱི་གཎྜཱི་སྒྲ་བོ་ཆེ། །ཞེས་པ་ནི། ཚོགས་འདུ་བའི་དོན་གྱིས་ན། ཐེག་པ་གསུམ་གྱི་ཚོགས་ལ་བཤད་པའོ། །མི་གནས་མྱ་ངན་འདས་པ་པོ། །ཞེས་པ་ནི། སློབ་མ་ལ་བཤད་པའི་སྙིང་པོ་སྟོན་པར་བྱེད་པ་སྟེ། དེ་ལས་བསྟན་པའི་བདག་པོ་ཉིད་ཀྱང་འབྱུང་བར་འགྱུར་ན། ཨེ་ནི་ཤེས་རབ་
ཉིད་འགྱུར་ལ། །ཝཾ་ནི་རབ་དགའི་བདག་པོ་སྟེ། །ཐིག་ལེ་མི་ཤིགས་དེ་ཉིད་ལས། །དེ་ལ་ཡི་གེ་ཉིད་ཀྱང་སྐྱེས། །ཆོས་ཀྱི་ཕྱག་རྒྱའི་ཡི་གེ་གཉིས། །དེ་ཉིད་ཤེས་པ་གང་གིས་ཤེས། །དེས་ནི་སེམས་ཅན་ཐམས་ཅད་ལ། །ཆོས་ཀྱི་འཁོར་ལོ་བསྐོར་བར་འགྱུར། །ཞེས་གསུངས་པའི་ཕྱིར། 
ཕྱོགས་བཅུ་ཆོས་ཀྱི་རྔ་བོ་ཆེ། །ཞེས་པ་ནི་ཚོགས་ལ་བཤད་པས་བསྟན་པའི་གཟུགས་བརྟན་པར་བྱེད་པའོ། །དེ་ཡང་། རྟགས་ཅན་གཟུགས་ལ་གནས་གྱུར་ན། །འཇིག་རྟེན་སྤྱོད་ལས་འདས་འགྱུར་ཏེ། །གང་ཞིག་ཆོ་ག་འདིར་གནས་པ། །དེ་ནི་བསྟན་པ་འཇིག་བྱེད་གསུངས། །ཞེས་གསུངས་
པས།  ཐུན་མོང་བསྟན་པ་གཟུང་ངོ་། །དེ་ཡང་རང་གི་རང་བཞིན་དུ་བྱ་བའི་ཕྱིར། གཟུགས་མེད་ཅེས་བྱ་བ་ལ་སོགས་པ་བཤད་པར་བྱ་སྟེ། གཟུགས་མེད་ནི་ཕྱག་རྒྱ་ཆེན་པོའོ། །དེ་ཡང་། ཐོག་མ་ཐ་མ་མེད་ཞི་བ། །དངོས་དང་དངོས་མེད་རྣམ་པར་སྤངས། །སྟོང་དང་སྙིང་རྗེ་དབྱེར་མེད་པ། །བྱང་
ཆུབ་སེམས་ཞེས་བཤད་པ་ཡིན། །ཞེས་གསུངས་པས་སོ། །གཟུགས་བཟང་ཞེས་པ་ནི་ལས་ཀྱི་ཕྱག་རྒྱ་སྟེ།  དེ་ཡང་། ན་ཆུང་གཞོན་ནུ་མིག་ཡངས་ལ། །གཟུགས་བཟང་གཞོན་པས་བརྒྱན་པ་ཡིན། །ལོ་གྲངས་ཉི་ཤུ་ལྔ་ལོན་རྙེད། །བྱོལ་སོང་ལས་ཀྱང་རབ་ཏུ་བརྟག །ཅེས་གསུངས་པས་སོ། །
དམ་པ་ནི་ཆོས་ཀྱི་ཕྱག་རྒྱ་སྟེ། དེ་ཡང་།  ཨེ་མ་ཀུན་དུ་བཟང་པོ་ཡི། །སྐུ་དང་གསུང་ཐུགས་རྡོ་རྗེ་ཅན། །སྐྱེ་བ་མེད་པའི་ཚུལ་གྱིས་སུ། །སྐྱེ་བ་དམ་པ་རབ་ཏུ་གྲགས། །ཞེས་གསུངས་པས་སོ། །སྣ་ཚོགས་གཟུགས་ཅན་ནི་དམ་ཚིག་ཕྱག་རྒྱ་སྟེ། དེ་ཡང་། ཡེ་ཤེས་ལ་གཞན་ཕྱོགས་པ་ཡང་། །
སངས་རྒྱས་སྐུ་ནི་ཇི་ལྟར་འགྱུར། །འདི་ལྟར་སངས་རྒྱས་གཟུགས་བརྙན་དུ། །དེ་ལྟར་རྣལ་འབྱོར་སྨྲ་བར་རིགས། །ཞེས་གསུངས་པས་སོ། །ཡིད་ལས་སྐྱེས་ཞེས་པ་ནི་ཕྱག་རྒྱ་ཆེན་པོ་ཡིད་ཀྱི་རང་བཞིན་དུ་བསྟན་པ་སྟེ། དེ་བས་ན། དེ་ཉིད་གཟུགས་རྣམས་ཐམས་ཅད་དུ་སྣང་བའི་དཔལ་ཞེས་

49-1-117a

བྱའོ། །གཟུགས་རྣམས་མ་ལུས་འཆང་བ་པོ། །ཞེས་པ་ནི་སྔར་གྱི་དོན་འདི་ཉིད་དེ་འབྲས་བུ་ཟུང་དུ་འཇུག་པ་འདི་ཉིད་དང་། དོན་དང་། དཔེ་དང་། རྟགས་ཟུང་དུ་འཇུག་པའོ། །མཚུངས་པ་མེད་པ་ལ་སོགས་པ་ནི་བསམ་གྱིས་མི་ཁྱབ་པ་སྟེ། དེ་ཉིད་རྒྱུ་ཡིན་པས་འགྲན་ཟླ་མེད་ཅིང་
བདག་པོ་དང་བྲལ་བས་ཆེ་བར་གྲགས་པའོ། །ཁམས་གསུམ་གྱི་དབང་ཕྱུག་ཆེན་པོ་ནི་ཡུལ་མེད་པའི་ཤེས་པ་སྟེ། བསམ་དུ་མེད་པའོ། །དེ་ཡང་། བསམ་པ་བཞིན་དུ་མི་སེམས་པ། །དེ་ནི་བསམ་གྱིས་མི་ཁྱབ་བརྗོད། །ཅེས་གསུངས་པས་སོ། །འཕགས་པའི་ལམ་ནི་དྲང་པོའོ། །ཤིན་ཏུ་མཐོ་
བ་ནི་རྡོ་རྗེ་འཛིན་པའི་སའོ། །དེ་ལ་གནས་པ་ནི་རང་འབྱུང་སྟེ། དེ་ཡང་། རང་འབྱུང་རྟོགས་པས་བསམ་གཏན་མིན། །སངས་རྒྱས་སྤྲུལ་པ་རྒྱུན་མི་འཆད། །ཅེས་གསུངས་པས་སོ། །དར་བ་ཆེན་པོ་ནི་རྒྱས་པ་སྟེ་དེ་ལས་རང་གི་དོན་དུ་འགྱུར་བའོ། །ཆོས་ཀྱི་ཏོག་ནི་རྒྱལ་མཚན་ཏེ་གཞན་དུའོ། །
འཇིག་རྟེན་ལ་སོགས་པ་ནི་འབྲས་བུར་བཤད་པ་སྟེ། འཇིག་རྟེན་གསུམ་ན་གཞོན་ལུས་གཅིག །ཅེས་པ་ནི། བགྲེས་པ་མི་མངའ་བའི་ཕྱིར་ཆོས་ཀྱི་སྐུའོ། །གནས་བརྟན་ནི་ཐེག་པ་གསུམ་གྱི་ལུས་སུ་གྱུར་པས་སོ། །རྒན་པོ་ནི་ཐོག་མ་མེད་པས་སོ། །སྐྱེ་དགུའི་བདག་ནི་འཁོར་འདས་ཀྱི་སྐྱེད་མར་
གྱུར་པས་སོ། །སུམ་ཅུ་རྩ་གཉིས་ལ་སོགས་པའི་དོན་ནི་བཤད་ཟིན་ཏོ། །དེ་གསལ་བའི་ཐབས་བསྟན་པའི་ཕྱིར། འཇིག་རྟེན་ཞེས་བྱ་བ་ལ་སོགས་པ་སྨོས་ཏེ། འཇིག་རྟེན་ཤེས་པ་ནི་རྣམ་པར་ཤེས་པ་སྟེ། ལུང་དང་རིགས་པས་སོ། །འཇིག་རྟེན་ལེགས་པར་ཤེས་པ་ནི་དེ་ཉིད་སེམས་
ཀྱི་ཁྱད་པར་དུ་ཤེས་པ་སྟེ། རྡོ་རྗེ་སློབ་དཔོན་ལས་སོ། །སྟེ་ཞེས་པ་སློབ་དཔོན་གྱི་བྱེ་བྲག་གཞན་དུ་བསྡུ་བའོ། །འཇིག་རྟེན་སློབ་དཔོན་འཇིགས་པ་མེད། །ཅེས་པ་སྣང་བ་སློབ་དཔོན་དུ་གྱུར་པ་སྟེ། མངོན་ཞེན་དང་བྲལ་བས་འཇིགས་པ་མེད་པའོ། །མགོན་སྐྱབས་འཇིག་རྟེན་ཡིད་
གཅུགས་པ། །ཞེས་པ་ནི་རང་སེམས་བླ་མར་གྱུར་པས་མགོན་པོ་མྱ་ངན་ལས་འདས་པ་དང་། འཇིག་རྟེན་འཁོར་བ་གཉིས་དང་། ཡིད་ཕྱག་རྒྱ་ཆེན་པོ་ཐ་མི་དད་པར་གཅུགས་པའོ། །སྐྱབས་དང་ཞེས་པ་ནི། སྐྱབས་ནི་བླ་མ་སྟེ།  དང་ཞེས་པས་དེའི་ཆེ་བ་དང་དྲིན་དྲན་པར་བྱའོ། །སྐྱོབ་པ་

49-1-117b

ཞེས་པ་ནི་སྣང་བས་ཡིད་སྐྱོབ་པས་དབང་པོ་རང་སྣང་དུ་རོལ་པར་བྱའོ། །བླ་ན་མེད་ཅེས་པ་ནི་སེམས་ཉིད་བླ་མ་བླ་ན་མེད་པ་སྟེ། སྐྱོ་བར་མི་བྱ་བའི་ཐ་ཚིག་གོ། །དེ་ཡང་། ཇི་ལྟར་སྐྱོ་བར་མི་འགྱུར་བར། །ཐམས་ཅད་རིམ་གྱིས་རིམ་གྱིས་བྱ། །སྐྱོ་བར་གྱུར་ནས་སངས་རྒྱས་ཉིད། །ནམ་ཡང་
འགྲུབ་པར་མི་འགྱུར་རོ། །ཞེས་གསུངས་པས་སོ། །ནམ་མཁའི་མཐའ་ལ་ལོངས་སྤྱོད་པ། །ཞེས་པ་ནི་ཐམས་ཅད་ཡེ་ཤེས་སེམས་དཔར་ཤེས་པར་བྱའོ། །ཐམས་ཅད་མཁྱེན་པའི་ཡེ་ཤེས་མཐའ། །ཞེས་པ་ནི་དེ་ལྟ་བུ་ཉིད་རང་ལ་གནས་པར་བསྟན་པའོ། །མ་རིག་སྒོ་ངའི་སྦུབས་འབྱེད་པ། །ཞེས་
པ་ནི་བསྟན་པ་དང་དགེ་བའི་བཤེས་གཉེན་ལ་དགོས་པ་མེད་པ་མ་ཡིན་ཏེ། དབུལ་པོའི་གཏེར་བཞིན་དུ་མཚོན་དགོས་པའི་ཕྱིར་རོ། །དེས་ཇི་ལྟར་འགྱུར་ཞེ་ན། སྲིད་པའི་དྲ་བ་འཇོམས་པ་པོ། །ཞེས་བྱའོ། །དགོས་པ་བཟློག་པའི་ཕྱིར་དཔེར་ན་སཱ་ལུའི་ས་བོན་ལ་སྲིན་བུ་ག་སྔ་ཞུགས་པས་ལྗང་པ་
སྐམས་པར་འགྱུར་བ་བཞིན། དྲ་བ་མ་རིག་པ་བཅོམ་པས་སྔར་བསྐྱེད་པའི་ཉོན་མོངས་པ་མ་ལུས་པར་ཡང་ཞི་བར་བྱེད་པའོ། །དེ་ལས་ཁྱད་པར་མེད་པ་མ་ཡིན་ཏེ། དཔེར་ན་དུག་ལ་སྔགས་ཀྱིས་བཏབ་པས་དུག་ཞི་བ་དང་སྨན་དུ་གྱུར་པ་གཉི་ག་འབྱུང་སྟེ། དེ་བཞིན་དུ་ཐབས་ཡེ་ཤེས་སེམས་དཔའི་
དུས་ན་འཁོར་བཞི་པའམ། སངས་རྒྱས་ཀྱི་ཡོན་ཏན་ཐམས་ཅད་འབྱུང་བས། འཁོར་བའི་རྒྱ་མཚོ་ཕ་རོལ་ཕྱིན། །ཞེས་བྱའོ། །ཡེ་ཤེས་ལ་སོགས་པ་ནི་དྲི་མ་དང་བྲལ་བར་བཤད་པར་བྱ་སྟེ། ཡེ་ཤེས་དབང་བསྐུར་ཅོད་པན་ཞེས་པ་ནི། ཡེ་ཤེས་ཀྱི་བདུད་རྩི་བྱིན་གྱིས་བརླབས་པའི་བུས་དབང་
བསྐུར་བའི་རིགས་ལྔའི་ཅོད་པན་དུ་གྱུར་ཏེ། ཅན་ཞེས་པ་ནི་རྡོ་རྗེ་སེམས་དཔའི་དབང་བསྟན་པ་དེ་དང་པོའོ། །རྫོགས་པའི་སངས་རྒྱས་རྒྱན་དུ་ཐོགས། །ཞེས་པ་ནི་སྐུ་གཉིས་ཀྱིས་སློབ་མའི་འཁོར་ལོ་བཞིར་བྱིན་གྱིས་བརླབས་ཤིང་ཐིག་ལེ་རྒྱན་དང་ལྡན་པ་སྟེ། དེ་བས་ན། ནི་རཾ་སུ་ཡིས་ཡན་
ལག་བརྒྱན། །ཞེས་པ་དང་བླ་མ་ཅོད་པན་དུ་གཟུང་བར་བྱ་བའི་ཐ་ཚིག་ཀྱང་ངོ་། །སྡུག་བསྔལ་གྱི་སྡུག་བསྔལ་ཞེས་པ་ནི། འདུ་བྱེད་དང་། འགྱུར་བ་དང་། སྡུག་བསྔལ་གྱི་སྡུག་བསྔལ་གྱིས་འདུས་པའི་འགྲོ་བ་སྟེ། དེ་ལས་གྲོལ་ཞིང་བདེ་བ་ཆེན་པོ་རྙེད་པར་འགྱུར་བས་ན། གསུམ་

49-1-118a

སེལ་མཐའ་ཡས་ཞེས་བྱའོ། །གྲོལ་གསུམ་ཐོབ་ཅེས་པ་ནི། ཐེ་ཚོམ་དུ་འཛིན་པ་དང་། དུ་མར་འཛིན་པ་དང་། ཕྱོགས་ཆར་འཛིན་པ་ལ་སོགས་པ་ནི་བཞི་པའོ། །དེ་ལྟ་བུའི་རྣལ་འབྱོར་པ་བྱ་བ་དང་བྲལ་བ་སྟོན་ཏེ། སྒྲིབ་པ་ནི་ཉོན་མོངས་པ་ལ་སོགས་པའོ། །དུས་མེད་རྟོགས་
པས་རྒྱུན་མི་འཆད་པའོ། །ཡོན་ཏན་ནི་སྒྲིབ་པ་སྤངས་པ་དང་། ཡེ་ཤེས་ཐོབ་པ་སྟེ། ཅོད་པན་ནི་སངས་རྒྱས་སོ། །དེའི་ཡང་ཐོད་དུ་གྱུར་པ་ནི་བླ་མ་དང་རྡོ་རྗེ་འཛིན་པའོ། །དེ་ཅིའི་ཕྱིར་ཞེ་ན། དམ་ཚིག་དག་ནི་ཐམས་ཅད་ལས། །བླ་མ་མཆོད་པ་མཆོག་ཡིན་ཏེ། །སངས་རྒྱས་རིན་ཆེན་ཟ་མ་ཏོག །
དཔལ་ལྡན་འདུས་པའམ་གཞན་དུ་བསྟན། །ཞེས་གསུངས་སོ། །དོགས་པ་བཟློག་པའི་ཕྱིར། ཁམས་གསུམ་རིན་པོ་ཆེར་གྱུར་པ། །སློབ་དཔོན་ལས་ནི་མཆོག་གཞན་མེད། །གང་ལས་བཀའ་དྲིན་ཐོབ་པ་ཡིས། །མཁས་པས་དངོས་གྲུབ་དུ་མ་ཐོབ། །ཅེས་གསུངས་པས་སོ། །ལུས་
ཀུན་ལས་ནི་རྣམ་གྲོལ་བ། །ཞེས་པ་ནི་འཁོར་འདས་ཀྱི་བྱེ་བྲག་གིས་དཀར་པོའི་ཆོས་དང་། དམ་ཚིག་གི་ནོར་དང་། ཡུལ་ལ་འདོད་པ་དང་། སྡུག་བསྔལ་གྱི་འཇིགས་པ་ལས་གྲོལ་བར་འགྱུར་ཏེ། དེ་ཅིའི་ཕྱིར་ཞེ་ན། འཁྲུལ་པ་ཞིག་པས་གཉེན་པོ་མི་གནས་པའི་ཕྱིར་རོ། །ནམ་
མཁའ་ལ་སོགས་པ་ནི་གཞན་གྱི་གཙོ་བོར་གྱུར་པའོ། །བཟང་ངན་ཤེས་པ་ནི་སྣོད་ཀྱི་བྱེ་བྲག་མཁྱེན་པའོ། །དུས་ཤེས་པ་ནི་བསྟན་པའི་གོ་རིམས་མཁྱེན་པའོ། །དམ་ཤེས་པ་ནི་འཁོར་བའི་སྐྱོན་གྱིས་མ་གོས་པའོ། །རྟག་ཏུ་དོན་མཛད་པ་ནི་དམ་ཚིག་དང་ལྡན་པའོ། །དབང་པོ་ཤེས་པ་
ནི་དུས་ཤེས་པའོ། །རྣམ་གྲོལ་གསུམ་ལ་མཁས་པ་པོ། །ཞེས་པ་ནི་དུས་གསུམ་ལས་རྣམ་པར་གྲོལ་བའི་ཐབས་གསུམ་ལ་མཁས་པའོ། །ཉིད་ཀྱི་ཐུགས་སུ་ཆུད་ཅིང་གཞན་ལ་སྟོན་པས། ཡོན་ཏན་ལྡན་ཞིང་ཡོན་ཏན་ཤེས། །གསུངས་པའོ། །སྭ་སྟི་རྒྱུད་ལས་སྐྱེས་པའི་
རང་བཞིན་དུ་བཤད་པའི་ཕྱིར། ཤེས་པ་ལྔའི་ཁྱད་པར་ནི་བླ་མ་ལ་གུས་པར་འབྱུང་བ་དང་། རྗེས་ཐོབ་མེད་པར་འབྱུང་བ་དང་། འཁོར་བ་ལས་ནི་རིང་དུ་གྱུར་པར་འབྱུང་བ་དང་། སེམས་ལ་དབང་བར་འབྱུང་བ་དང་། ཟུག་རྔུ་མེད་པར་འབྱུང་བ་སྟེ། དེ་ཡང་གཞི་བླ་མ་དང་། དབང་

49-1-118b

དང་། སྒོམ་པ་དང་། རྟོགས་པ་དང་།  བརྡ་ལས་ཆོས་ཀྱི་དེ་ཉིད་ཤེས་པ་དང་། ཉམས་སུ་མྱོང་བ་དང་། རྒྱུན་མི་ཆད་པ་དང་། སྒྲོ་འདོགས་ཆོད་པ་དང་། སྣ་ཚོགས་རོལ་མོ་ལས་འབྱུང་བར་འགྱུར་རོ། །དེ་རང་དབང་དུ་གྱུར་པ་སྟེ། སྤྱོད་པའི་ཁྱད་པར་ནི་འདིས་འགྲོ་བར་འགྱུར་ཏེ། སྙན་གྲགས་དགེ་
དང་ཞེས་པ་ནི་ཀུན་བཟང་དགེ་བའི་སྤྱོད་པ་སྟེ། བླ་མ་ལ་བརྟེན་པར་བྱའོ། །དབུགས་འབྱིན་ཆེན་པོ་ཞེས་པ་ནི། སེམས་དབུགས་འབྱིན་པའི་གསང་སྤྱོད་དོ། །དགའ་སྟོན་ཆེ་ཞེས་པ་ནི་དགའ་བ་སྟོན་པའི་རིག་པའི་སྤྱོད་པའོ། །དགའ་ཆེན་རོལ་མོ་ཆེན་པོ་སྟེ། །ཞེས་པ་ནི་དགའ་བ་ཆེན་པོའི་ཉམས་
ཀྱིས་སྣང་བ་ལ་རོལ་མོ་ལྟ་བུར་སྤྱོད་པ་སྟེ། ཚོགས་ཀྱི་སྤྱོད་པའོ། །བཀུར་སྟི་རིམ་གྲོ་ཕུན་སུམ་ཚོགས། །ཞེས་པ་ནི།  དེ་ཁོ་ན་ཉིད་དང་ལྡན་པའི་སེམས་ལ་སྣ་ཚོགས་ཀྱི་སྤྱོད་པས་བསྙེན་བཀུར་བས་ཕུན་སུམ་ཚོགས་པ་རྙེད་པར་གྱུར་པ་སྟེ་བསྙེན་སྤྱོད་དོ། །དེ་ཡང་། རྟག་ཏུ་ངུ་བའི་སྤྱོད་པ་བཞིན། །
མི་གཡོ་བ་ཡི་སེམས་ཀྱིས་ནི། །དངོས་གྲུབ་སྟེར་བའི་བླ་མ་ལ། །འགྲོ་བའི་མགོན་པོ་བསྙེན་བཀུར་བྱ། །ཞེས་པ་དང་། བུད་མེད་རབ་ཏུ་མདངས་བཟང་མ། །ལོ་གྲངས་བཅུ་གཉིས་ལོན་པ་ནི། །དྲི་དང་མེ་ཏོག་ཕྲེང་བརྒྱན་པའི། །ཡོན་ཏན་སྐེ་རགས་མཱ་མ་ཀཱི། །ཤེས་རབ་ཅན་གྱིས་བྱིན་བརླབས་
ལ། །དེ་ཡི་དབུས་སུ་མཉེས་པར་བྱ། །ཞེས་གསུངས་པ་ལ་སོགས་པའི་རྒྱས་པར་བཤད་པ་སྟེ། རིག་མའི་བྱེ་བྲག་ནི། དབུགས་འབྱིན་མཆོག་དང་བར་མ་དང་། །དྲི་ཡི་ཆུ་དང་བཅས་པས་ཀྱང་། །རྟག་ཏུ་དུས་ཀྱི་ཁྱད་པར་གྱིས། །རིགས་ལྡན་རྣམས་ནི་མཆོད་པར་བྱ། །དོགས་པ་བཟློག་པའི་
ཕྱིར་གསུངས་ལ། །རིགས་ཀྱི་སྨན་པའི་འདུ་ཤེས་དང་། །འཇིགས་པའི་འདུ་ཤེས་མ་བསྐྱེད་ཅིག །དེ་ཅིའི་ཕྱིར་ཞེ་ན། རིགས་ཀྱི་བུ་འདི་ལྟ་སྟེ། སྔགས་ཀྱི་སྤྱོད་པ་ནི་སྤྱོད་པའི་མཆོག་གོ། །འདི་ལྟ་སྟེ། སྔགས་ཀྱི་སྤྱོད་པ་ནི་དེ་བཞིན་གཤེགས་པའི་སྤྱོད་པའོ་ཞེས་གསུངས་པའི་ཕྱིར་རོ། །
གཞན་ཡང་རང་གི་དོན་དང་ཕལ་ཆེར་གཞན་གྱི་དོན་དུ། དག་ཅིང་ཡོན་ཏན་གྱི་ནི་གནས། །སྣ་ཚོགས་ཡོན་ཏན་ཕུན་སུམ་ཚོགས། །ཞེས་པ་ལ་སོགས་པ་ནུས་པ་དགུག་པ་དང་། གྲུབ་པའི་རྣལ་འབྱོར་ལ་ཡང་རུང་། །ཞེས་པ་ནི་བརྡ་མཚོན་པ་དང་། མི་ཡི་བུ་མོ་མཐུ་ཆེན་གྱིས། །ཞེས་པ་ནི་ཡོན་

49-1-119a

ཏན་གྱིས་དགུག་པ་དང་། ལྷ་རྫས་བཙུན་མོ་དགུག་པའོ། །ནུས་པ་གལ་ཏེ་མེད་འགྱུར་རམ། །འདོད་པས་གནོད་པ་ཉིད་འགྱུར་ན། །དེས་ནི་མི་ཡི་བུ་མོ་བསྟེན། །ཞེས་པ་ལ་སོགས་པས་བྱེ་བྲག་ཤེས་པར་བྱས་ལ། བསྟེན་པར་བྱ་བའི་དགོས་པ་ནི། ནོར་ཞེས་པ་དང་འབྲེལ་
ཏོ། །གཞན་ཡང་། ལུས་ཀྱི་སྦྱིན་པ་བྱས་ནས་ནི། །ཕྱིས་ནི་སྤྱོད་པ་ཡང་དག་བརྩམ། །སྐལ་ལྡན་སྐལ་མིན་སྤྱད་ནས་ནི། །དེ་ཡི་སྦྱིན་པ་གཏང་མི་བྱ། །ཞེས་པས། ཅུང་ཟད་ནུས་པ་བསྐྱེད་ནས་ནི། །རོལ་ཞིང་གྲོང་དུ་འཇུག་པར་བྱ། །ཞེས་པ་དང་འབྲེལ་ཏོ། །གཞན་ཡང་བཟའ་བཏུང་
ཐོབ་པ་དང་། །བགྲོད་དང་བགྲོད་མིན་སྤང་བར་བྱ། །ཁྲུས་དང་གཙང་སྦྲ་མི་བྱ་སྟེ། །གྲོང་གི་ཆོས་ནི་སྤང་མི་བྱ། །བློ་ལྡན་སྔགས་ནི་བཟླ་མི་བྱ། །བསམ་གཏན་དམིགས་པར་མི་བྱ་སྟེ། །གཉིད་ནི་སྤང་བར་མི་བྱའོ། །དབང་པོ་དགག་པར་མི་བྱ་སྟེ། །ཤ་རྣམས་ཐམས་ཅད་བཟའ་བའོ། །རིགས་ལྔ་ལ་
ནི་མཉམ་པར་སྤྱོད། །ཅེས་པ་ལ་སོགས་པ་ནི། གཉིས་མེད་ཡེ་ཤེས་སེམས་ཀྱིས་ནི། །མི་བཟའ་ཅུང་ཟད་ཡོད་མ་ཡིན། །ཞེས་པས་འབྲེལ་ཏོ། །དེ་ལྟར་སྤྱོད་པ་བྱེ་བྲག་ནི་གང་ཟག་གི་རིམ་པས་རིམ་དང་ཅིག་ཅར་དང་རང་བཞིན་པའོ། །མཆོག་ཏུ་དགའ་བ་ལ་སོགས་པ་ནི་བཞི་པའི་དོན་དུ་བཤད་པར་
བྱ་སྟེ། མཆོག་ཏུ་དགའ་བ་ནི་དམ་པར་དགའ་བ་སྟེ། རྣམ་གཅོད་ཡོངས་གཅོད་དང་བྲལ་བའོ། །དེ་སྟོན་པར་མཛད་པ་ནི། མཆོག་སྦྱིན་གཙོ་བོ་ཞེས་བྱ་སྟེ། སྙིང་པོ་ནི་དོན་གྱི་སངས་རྒྱས་སོ། །དེས་གང་ལ་བསྟན་པར་བྱ་བ་ཡང་གྲགས་བདག་དཔལ་ནི་བྱང་ཆུབ་སེམས་དཔའོ། །བཅོམ་ལྡན་ནི་དེ་བཞིན་
གཤེགས་པའོ། །དེའི་ཡང་སྐྱབས་ཀྱི་དམ་པར་གྱུར་པ་ནི་བླ་མ་རྡོ་རྗེ་འཛིན་པ་སྟེ། དེ་ཅིའི་ཕྱིར་ཞེ་ན། དངོས་གྲུབ་འབྱུང་བའི་གནས་གཞན་མེད་པའི་ཕྱིར་སྐྱབས་སུ་འོས་ཞེས་བྱའོ། །དེ་ཇི་ལྟར་འགྱུར་བ་ནི། འཇིག་རྟེན་སྒྲ་སྟེ་ཞེས་པས་མ་རྟོགས་པ་ལོག་པར་རྟོག་པ་དང་། ཐེ་ཚོམ་མཐར་བྱེད་
པའི་དོན་ཏོ། །དེ་ནས་གཉུག་མ་སྟོན་པའི་ཕྱིར་རབ་ཀྱི་མཆོག་ཅེས་བྱའོ། །ད་ནི་ཐ་མར་དགེ་བ་སྟོན་ཏེ། སེལ་བ་པོ་ནི་ཕྱག་རྒྱ་ཆེན་པོས་སོ། །གཙུག་ཕུད་ལ་སོགས་པའི་བྱེ་བྲག་ནི་ཡེ་ཤེས་ལྔ་དང་ལྡན་པའོ། །གདོང་ལྔ་ཞེས་པ་ནི་རིགས་ཀྱི་དེ་བཞིན་གཤེགས་པའོ། །གཙུག་ཕུད་ལྔ་

49-1-119b

དང་ལྡན་ཞེས་པ་ནི་དེ་ཉིད་གཞན་གྱི་དོན་དུ་བསྟན་པའོ། །དེས་བར་དུ་དགེ་བ་བསྟན་ཏེ། ཟུར་ཕུད་ལྔ་པ་ཞེས་པ་ནི་འདོད་ཡོན་ལྔ་པའོ། །མེ་ཏོག་ཅེས་པ་ནི་དབང་པོའོ། །ཐོད་ཅེས་པ་ནི་རྒྱན་ཏེ་བདེ་བ་ཆེན་པོའོ། །མགོ་ཟླུམ་དང་བརྟུལ་ཞུགས་ཆེན་པོ་གཉིས་ནི་ཚངས་པར་སྤྱོད་པ་བརྟུལ་ཞུགས་མཆོག་
གི་རྟགས་ཏེ། ཐེག་པ་ཐུན་མོང་བ་ཁྱད་པར་གྱི་བྱེ་བྲག་གིས་སོ། །འདིར་ནི་མཚན་མའི་རྟེན་ལ་ཕྱག་འཚལ་བ་ལ་སོགས་པས་ཏིང་ངེ་འཛིན་རྒྱུན་མི་འཆད་པར་འགྱུར་བའི་ཕྱིར། དཀའ་ཐུབ་མཐར་ཕྱིན་པ་སྟེ་ཚངས་པར་སྤྱོད་པ་ཞེས་བྱའོ། །དེ་ཡང་། ཚངས་པ་མྱ་ངན་འདས་སངས་རྒྱས། །འཇུག་
པས་ཁྱབ་འཇུག་ཏུ་ནི་བརྗོད། །རྟག་པར་དགེ་བ་བཞི་པ་སྟེ། །ཐམས་ཅད་བདག་ཉིད་གནས་པ་ཀུན། །དམ་པའི་བདེ་བ་དེ་ཉིད་དོ། །ཞེས་གསུངས་པའི་ཕྱིར་རོ། །ཉོན་མོངས་པ་མི་སྤོང་བ་ལ་སོགས་པ་ནི་དཀའ་ཐུབ་ཆེན་པོ་སྟེ། ཕྱག་རྒྱ་ཆེན་པོ་ཉིད་ནས་སྨྱོན་པའི་བརྟུལ་ཞུགས་མཆོག་གོ། །དང་
པོར་དགེ་བ་བསྟན་པར་བྱ་སྟེ། གཅང་གནས་ཞེས་པ་ནི་སྐུ་གསུང་ཐུགས་རྡོ་རྗེའོ། །གནས་པ་དམ་པ་ཞེས་པ་ནི་བཙུན་མོའི་བྷ་གའོ། །གོོ་ཏ་མ་ཞེས་པ་ནི་བཅོམ་ལྡན་འདས་སོ། །ཉོན་མོངས་པ་མི་མངའ་བ་བྲམ་ཟེའོ། །ཚངས་པ་ནི་གཟུང་བས་སྟོང་པ་སྟེ་དགའ་བའོ། །གཉིས་པ་ནི་འཛིན་
པས་སྟོང་པ་སྟེ་མཆོག་ཏུ་དགའ་བའོ། །ཤེས་པ་ནི་བདེ་བ་ཆེན་པོ་སྟེ་རྙེད་པའོ། །མྱ་ངན་འདས་ཞེས་པ་ནི་དྲི་མ་དང་བྲལ་བའི་ལྷན་ཅིག་སྐྱེས་པའོ། །ཚངས་པ་ནི་བཏང་སྙོམས་དང་བྲལ་བ་སྟེ་སྙིང་པོ་ལེན་པས་ན་ཐོབ་པའོ། །གྲོལ་བ་ནི་བཞི་པའོ། །ཐར་པ་ནི་བཞི་པའི་མན་ངག་གོ། །རྣམ་གྲོལ་
ལུས་ནི་བཞི་པའི་དབང་ངོ་། །མཚན་ཉིད་གསུམ་ནི་བཤད་ཟིན་ཏོ། །རང་གི་ངོ་བོ་འབའ་ཞིག་བསྟན་པར་བྱ་སྟེ། ཞི་བ་གཉིས་ནི་ནང་དང་ནང་དུ་ཡང་དག་པར་གཞག་པའོ། །མྱ་ངན་ལས་འདས་པ་གསུམ་ནི་གྲགས་ཆེན་དང་སྙིང་པོ་དོན་དང་རྡོ་རྗེ་འཆང་ངོ་། །བདེ་སྡུག་སེལ་བ་ནི་འཁོར་བ་
གཉིས་ཀྱི་སྐྱོན་དང་བྲལ་བའོ། །ཆགས་བྲལ་ལུས་ལས་འདས་པ་པོ། །ཞེས་པ་ནི་ཉན་ཐོས་ཞི་བའི་ས་ལས་འདས་པའོ། །ཐུབ་པ་མེད་པ་ནི་མི་འཇིགས་པ་བཞི་དང་ལྡན་པའོ། །དཔེ་མེད་པ་ནི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་ལྡན་པའོ། །མི་མངོན་པ་ནི་མི་འཇིགས་པའི་

49-1-120a

ཤེས་པས་སོ། །མི་སྣང་བ་ནི་བློའི་ཡུལ་ལ་མི་སྣང་བའོ། །གསལ་བྱེད་མིན་ནི་ལུས་ཀྱིས་གསལ་བར་མི་ནུས་པའོ། །ཕྲ་བ་ནི་རྟོགས་པར་དཀའ་བའོ། །ཟག་མེད་ནི་མངོན་དུ་རྒྱུ་དང་བྲལ་བའོ། །ས་བོན་ཞེས་པ་ནི་མ་རིག་པའི་བག་ཆགས་དང་བྲལ་བའོ། །ཤིན་ཏུ་སད་པ་ནི་མ་
རིག་པའི་གཉིད་སད་པའོ། །སད་པའི་བདག་ནི་རང་བཞིན་གྱིས་གྲོལ་བའོ། །ཀུན་ཤེས་ནི་ཆོས་ཐམས་ཅད་དོ། །ཀུན་རིག་ནི་དོན་ཐམས་ཅད་དོ། །རྣམ་པར་ཤེས་པ་ཆོས་ཉིད་འདས། །ཞེས་པ་ནི་རྟོག་དཔྱོད་དང་བྲལ་བའོ། །ལས་བྱེད་པ་ནི་གདུལ་བྱའི་བློ་ལ་སྣང་བའོ། །ཐོག་མ་ཐ་མ་མེད་པ་ནི་
སྐྱེ་འཇིག་དང་བྲལ་བའོ། །དང་པོའི་སངས་རྒྱས་རྒྱུ་མེད་པ། །ཞེས་པ་ནི། ལོག་རྟོག་ཅན་ཁ་ཅིག་དང་པོའི་འདྲེན་པར་གྱུར་པ་ཐབས་གང་ལ་བརྟེན་ནས་སངས་རྒྱས་ཞེས་ཟེར་བའི་ལོག་རྟོགས་བཟློག་པར་བྱ་སྟེ། དཔེར་ན་ནམ་མཁའ་ལ་སྤྲིན་དང་། འཇའ་ཚོན་དང་། ན་བུན་དང་། ཁུག་རྣ་དང་། 
འབྱུང་བ་ཆེན་པོ་བཞི་འབྱུང་གི།  ནམ་མཁའ་རྒྱུ་རྐྱེན་གང་ལས་སྐྱེ་རྟོགས་ཤིག །གལ་ཏེ་ནམ་མཁའ་ལས་བྱུང་ངོ་ཞེ་ན། ད་ལྟའི་རི་རབ་གླིང་དང་བཅས་པ་འདི་དག་གིས་གོ་ཕྱེ་སྟེ་གང་གིས་རྗེས་སུ་སོང་ཞིང་བསྐྱེད། གལ་ཏེ་བསྐྱེད་ན་ནམ་མཁའ་སྣང་བར་བསྟན་པ་ཡིན་ནོ། །གལ་ཏེ་
མཚན་ཉིད་མི་མཐུན་ན་ཆོས་འདི་དག་ཐམས་ཅད་ཀྱི་མཚན་ཉིད་གང་དུ་ཡིན། གལ་ཏེ་མཚན་ཉིད་གཅིག་ན་ཐ་དད་པ་མེད་པར་འགྱུར་བ་ཉིད་དོ། །དེ་བཞིན་དུ་དང་པོར་རང་བཞིན་གྱི་ཆོས་ལས་ནུས་པ་སྣ་ཚོགས་སུ་འཆར་བར་འགྱུར་ཏེ། དེ་ཉིད་རྒྱུ་རྐྱེན་ལས་སྐྱེས་པར་སྣང་མོད་ཀྱི། 
རང་བཞིན་གྱི་ཆོས་རྒྱུ་དང་རྐྱེན་གང་གིས་བསྐྱེད་རྟོགས་ཤིག །གལ་ཏེ་ཐ་དད་ན་བརྟགས་པ་དང་བརྟགས་པ་ཐམས་ཅད་ཀྱི་རང་བཞིན་གང་དག་ཡིན། མཚན་ཉིད་གཅིག་ནི་འགལ་བ་གང་ལ་ཡོད་དེ་མེད་དོ། །དེ་བས་ན་རང་བཞིན་ཉིད་ལས་ལྷུན་གྱིས་གྲུབ་པ་དང་། མངོན་དུ་
གྱུར་པ་ནི་བདེ་བ་ཆེན་པོར་རོ་གཅིག་པ་ཉིད་དོ། །དེའི་ཕྱིར། དང་པོའི་སངས་རྒྱས་རྒྱུ་མེད་པ། །ཞེས་པས་རྒྱུ་ལ་མི་གནས་པ་ཉིད་དུ་བསྟན་པ་ཡིན་ནོ། །བློ་དངོས་གཅིག་ཏུ་འབྲེལ་པར་བྱེད་པ་ནི། ཡེ་ཤེས་ཀྱི་མིག་གཅིག་པ་སྟེ། དེ་ལ་དྲི་མ་མེད་པའོ། །དོན་མི་འབྱུང་བ་མ་ཡིན་ཏེ། ཡེ་

49-1-120b

ཤེས་ལུས་ཅན་དེ་བཞིན་གཤེགས་། །ཞེས་པ་ཡིན་ནོ། །མི་གནས་པ་ཉིད་དུ་བསྟན་པར་བྱ་སྟེ། ཚིག་གི་དབང་ཕྱུག་ནི་བཅོམ་ལྡན་འདས་སོ། །རྟོགས་པ་དང་མ་རྟོགས་པའི་བྱེ་བྲག་གིས་དོན་གཉིས་སུ་སྟོན་པ་ན་སྨྲ་བ་ཆེ་ཞེས་བྱའོ། །སྨྲ་བའི་སྐྱེས་མཆོག་གིས་ཐོགས་པ་མི་མངའ་བའོ། །
སྨྲ་བའི་རྐྱེན་ནི་དབང་པོ་དང་སྦྱར་བས་སྟོན་པའོ། །སྨྲ་བའི་དམ་པ་ཞེས་པ་ནི་ཐམས་ཅད་སེམས་ཀྱི་རང་བཞིན་གཅིག་པུར་སྟོན་པའོ། །མཆོག་གི་གནས་ནི་མཆོག་གི་དངོས་པོ་གྲུབ་པའི་གསུང་འབྱུང་བའི་གནས་སོ། །སྨྲ་བའི་སེང་གེ་ནི་ཉམ་མི་ང་བས་སོ། །སྨྲ་བའི་རྒྱལ་ནི་ཚུགས་
པ་མེད་པ་ཞེས་པ་ཕྱོགས་སུ་བལྟ་བའི་རིགས་ཀྱིས་སོ། །ད་ནི་སྣང་བའི་རང་བཞིན་དུ་བཤད་པར་བྱ་སྟེ། ཀུན་དུ་བལྟ་བ་ནི་ཡེ་ཤེས་བརྙེས་པས་ཀུན་དུ་བལྟ་བའོ། །མཆོག་ཏུ་བལྟ་བ་ནི་དོན་དང་ཆོས་སོ་སོ་ཡང་དག་པར་རིག་པའི་ཕྱིར་རོ། །གཟི་བརྗིད་ནི་ཡེ་ཤེས་སོ། །སྣང་བ་ནི་ཕུང་པོའོ། །
བལྟ་ན་སྡུག་པ་ནི་ཉམས་མྱོང་དུའོ། །འོད་བཟང་དུ་ནི་སྙིང་པོ་ལེན་པའི་དཀྱིལ་འཁོར་དུའོ། །འབར་བ་ནི་རང་གི་ཤེས་པ་ཉིད་དོ། །དཔལ་བེའུ་ནི་སེམས་ཅན་ཐམས་ཅད་ལ་ཁྱབ་པའི་ཡེ་ཤེས་སོ། །ལག་ན་འོད་འབར་ནི་འཇིག་རྟེན་གྱི་ཁམས་ལག་པའི་འོད་ལ་སོགས་པ་རྣམས་སོ། །སྣང་བ་པོ་
ནི་ཡང་དག་ཐམས་ཅད་ཡེ་ཤེས་ཀྱི་སྣང་བའོ། །སྨན་པ་ཆེ་མཆོག་ནི་མི་ཤིས་པས་ན་ནད་རབ་ཏུ་འཇོམས་པའོ། །གཙོ་བོ་སྟེ་ཞེས་པ་ནི་ཕྱིན་ཅི་མ་ལོག་པའི་སྨན་གྱིས་གསོ་བར་མཛད་པའོ། །ཟུག་རྔུ་ནི་དུག་གསུམ་སྟེ་སེང་ལྡེང་གི་ཚེར་མ་ལྟ་བུའོ། །འབྱིན་པ་ནི་དབང་པོ་ལ་སོགས་པ་
གསུམ་གྱིས་སོ། །བླ་ན་མེད་པ་ནི་ཕྱིས་མི་འབྱུང་བས་སོ། །སྨན་རྣམས་མ་ལུས་པ་ནི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ངོ་། །ལྗོན་པའི་ཤིང་ནི་འཇམ་དཔལ་ཡེ་ཤེས་སེམས་དཔའོ། །འདིར་ནི་རྗེ་བཙུན་པས་གཟུང་བར་བྱའོ། །དེས་ཅི་འགྱུར་ཞེ་ན། ནད་དོ་ཅོག་གི་དགྲ་ཆེ་
བ། །ཞེས་གསུངས་པ་ནི། ཉོན་མོངས་པ་དེ་སྙེད་ཀྱིའོ། །རྡོ་རྗེ་ཉི་མ་སྣང་བ་ཆེ། །ཞེས་པ་ནི། སེམས་ཡེ་ཤེས་ཀྱི་དཀྱིལ་དུ་སྣང་བ་སྟེ་ཐབས་སོ། །རྡོ་རྗེ་ཟླ་བ་དྲི་མེད་འོད། །ཅེས་པ་ནི་དེ་ཉིད་རྣམ་པར་དག་པའི་ངོ་བོ་སྣང་བ་སྟེ་ཤེས་རབ་པོ། །དེ་གཉིས་ཐ་མི་དད་པ་ནི་བསྐྱེད་རྫོགས་

49-1-121a

གཉིས་ཟུང་དུ་འཇུག་པ་སྟེ། ཁོ་བོའི་བླ་མ་རི་ཁྲོད་དགོན་པའི་གཞུང་ལུགས་སོ། །དེ་ཉིད་བཀླག་པའི་མན་ངག་ཏུ་བསྟན་པར་བྱ་སྟེ། བདག་ཉིད་མྱ་ངན་ལས་འདས་པའི་གྲོང་ཁྱེར་དུ་ཞུགས་པའི་ཚེ། རིགས་ཀྱི་ལྷ་དང་མཐུན་པའི་ཆེད་དུ་བརྗོད་པར་བྱ་བ་ནི། དབང་བསྐུར་
བ་དང་དངོས་གྲུབ་གྲུབ་པའི་བྱེ་བྲག་གིས་རང་རང་གི་ང་རྒྱལ་དུ་ཞུགས་ལ་ཇི་ལྟ་བ་བཞིན་དུ་བྱིན་གྱིས་བརླབས་པ་བྱས་ནས་གཉིས་པའམ་སྒྲུབ་བྱེད་དུ་གནས་པའི་རྣལ་འབྱོར་པས་སོ་སོ་རིགས་ཀྱི་ཆེད་དུ་བརྗོད་པ་གདོན་པ་དང་། རིགས་བསྡུས་པའི་ཆེད་དུ་བརྗོད་པ་བསྟན་པའོ། །ཡང་མཆོད་
པ་ལ་སོགས་པས་མཉེས་པར་བྱས་ནས་ཕྱག་བརྒྱ་བཀྲོལ་བའོ། །དེའི་མན་ངག་ནི་རང་གི་སྦྱོར་བ་དང་ལྡན་པས་ཐབས་དང་ཤེས་རབ་ལ་གནས་ཏེ། དབྱངས་ཡིག་དང་པོའི་རང་བཞིན་ལས། །མཆོད་སྦྱིན་སྦྱོར་བར་བྱེད་པ་ཡིན། །ཞེས་གསུངས་པ་ནི་མན་ངག་སྟེ། བསྐྱེད་པའི་ཚུལ་ལོ། །
སྡུ་གུ་འཇིག་རྟེན་གསུམ་གྱི་མཆོག །ཅེས་པ་ནི། རྟགས་དང་དོན་གྱི་ཁྱད་པར་གྱིས་སྲིད་པ་གསུམ་དང་ལུས་ངག་ཡིད་གསུམ་གྱི་མཆོག་གོ། །དཔལ་ལྡན་རྒྱུ་སྐར་དཀྱིལ་འཁོར་ཅན། །ཞེས་པ་ནི་མི་འཆར་བ་མེད་པ་དང་། དེ་མ་ཡིན་པའི་སྲིད་པའོ། །གང་དུ་ཞེ་ན། ཕྱོགས་བཅུ་ཞེས་
པ་ནི་གནས་སོ། །ནམ་མཁའ་ནི་དུས་སོ། །མཐར་ཐུག་པ་ཞེས་པ་ནི་རྒྱ་དེ་སྲིད་དུ་ཆོས་ཀྱི་རྒྱལ་མཚན་ལེགས་པར་འཛུགས་པ་ནི་སྐལ་བ་དང་དབང་པོའི་བྱེ་བྲག་གིས་སྙིང་པོ་དང་སྦུན་པ་ལ་སོགས་པར་རོ། །འགྲོ་ན་གདུགས་གཅིག་ཡངས་པ་སྟེ། །ཞེས་པ་ནི། བླ་ན་མེད་པ་ཐོབ་པར་འདོད་
པ་ཞིག་རང་ལ་ཡོད་པའི་དེ་ཉིད་ཡོད་པར་ཤེས་པ་དང་། ཇི་ལྟ་བ་བཞིན་རྟོགས་པའོ། །དེས་སྣང་བ་མེད་པ་དང་བརྟགས་པར་རང་གྲོལ་བར་གྱུར་པ་ནི་སྤངས་པ་སྟེ། དེའི་སྙིང་པོ་བྱམས་པ་དང་སྙིང་རྗེའི་དཀྱིལ་འཁོར་ཅན་ནོ། །དེའི་རྣལ་འབྱོར་ནི། དཔལ་ལྡན་པདྨ་གར་གྱི་བདག་སྟེ། ནང་རྟེན་
ཅིང་འབྲེལ་པར་འབྱུང་བའི་ཏིང་ངེ་འཛིན་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་གྱིས་ཐམས་ཅད་གར་གྱི་རྣམ་པ་ལྟ་བུར་མཐོང་བའོ། །དེ་གཉིས་ཀ་ལ་ཡང་ཁྱབ་བདག་ཆེན་པོ་རིན་པོ་ཆེས་ཁྱབ་པས་ན་གདུགས་སོ། །སངས་རྒྱས་ཀུན་གྱི་གཟི་བརྗིད་ཆེ། །ཞེས་པ་ནི་སྣང་གྲགས་

49-1-121b

ཐམས་ཅད་ལ་སྐྱེ་མེད་སྟོན་པར་ནུས་པའི་མཐུའི་རང་བཞིན་ཡོད་དེ། དེ་ཅིའི་ཕྱིར་ཞེ་ན། མ་སྐྱེས་པའི་སྙིང་པོ་ཅན་ཡིན་པའི་ཕྱིར་རོ། །དཔེར་ན་རྐུན་མོ་ཞིག་ཆང་གིས་རབ་ཏུ་མྱོས་ན། བདག་གིས་ཆེ་གེ་མོའི་ནོར་བརྐུས་སོ་ཞེས་སྟོན་པར་འགྱུར་ཏེ། དེ་ཅིའི་ཕྱིར་ཞེ་ན། རང་རྒྱུད་ཆང་གིས་བཟི་བ་ཡིན་པའི་
ཕྱིར། དེ་བས་ན་སངས་རྒྱས་ལ་སོགས་པའི་དོན་མཐོང་ནས་ཇི་ལྟར་བྱ་བའི་ཚུལ་ནི་དེ་ཉིད་སངས་རྒྱས་ཀུན་གྱི་རྣལ་འབྱོར་ཆེན་པོ་སྟེ་དེ་ཉིད་བསྒོམ་པར་བྱའོ། །སངས་རྒྱས་ལ་རང་རྒྱུད་མི་གནས་པའི་ཕྱིར་དགོངས་པ་གཅིག་སྟེ། སངས་རྒྱས་ཀུན་གྱི་བསྟན་པ་གཅིག །ཅེས་བྱའོ། །བསྒྲུབ་
པར་མི་ནུས་པ་མ་ཡིན་ཏེ། ཐ་དད་པ་ནི་སེམས་ཅན་གྱི་རྒྱུ་ཡིན་ལ། དེ་ལ་མ་རིག་པ་དང་། གློ་བུར་བ་དང་། བློ་ཡིས་བརྟགས་པ་དང་།  ཕྱོགས་ན་གནས་པ་དང་། འདུས་བྱས་པའོ། །དེ་ལ་སོགས་པའི་སངས་རྒྱས་ཏེ། རང་བཞིན་གྱིས་འོད་གསལ་བ་དང་། གདོད་མ་ནས་ལྷུན་གྱིས་གྲུབ་པ་
དང་། བློ་ཡིས་མ་བརྟགས་པ་དང་། དུས་དང་མཐའ་ལ་མི་གནས་པ་དང་། འདུས་མ་བྱས་པའི་གཅིག་པའོ། །འགལ་བར་གྱུར་པ་མ་ཡིན་ཏེ། ལྡོག་ཆོས་ཐ་དད་ཀྱང་། བདག་ཉིད་གཅིག་པའི་བུམ་པ་བཞིན་ནོ། །ད་ནི་དུ་མར་རིགས་པ་སྟོན་ཏེ། རྡོ་རྗེ་རིན་པོ་ཆེ་ནི་རིན་ཆེན་འབྱུང་ལྡན་ནོ། །
དབང་བསྐུར་དཔལ་ནི་རིན་ཆེན་སེམས་མའོ། །རིན་ཆེན་ཀུན་བདག་ནི་མི་བསྐྱོད་པའོ། །དབང་ཕྱུག་སྟེ་ཞེས་པ་ནི་རྡོ་རྗེ་སེམས་མའོ། །འཇིག་རྟེན་དབང་ཕྱུག་ནི་སྣང་བ་མཐའ་ཡས་སོ། །ཀུན་གྱི་བདག་ཅེས་པ་ནི་ཆོས་ཀྱི་སེམས་མའོ། །རྡོ་རྗེ་འཆང་ཞེས་པ་ནི་དོན་ཡོད་གྲུབ་པའོ། །ཀུན་གྱི་
རྗེ་ཞེས་པ་ནི་ལས་ཀྱི་སེམས་མའོ། །སངས་རྒྱས་ཀུན་གྱི་ཞེས་པ་ནི་རྣམ་པར་སྣང་མཛད་དོ། །ཐུགས་ཆེ་བ་ཞེས་པ་ནི་རྡོ་རྗེ་དབྱིངས་ཀྱི་དབང་ཕྱུག་མའོ། །འདྲེས་ཤིང་གཅིག་པ་ནི། རིགས་ནི་རྣམ་པ་དྲུག་ཏུ་བརྗོད། །མདོར་བསྡུས་པ་ནི་རྣམ་པ་ལྔ། །སྐུ་གསུང་ཐུགས་ཀྱི་དབྱེ་བ་ཡིན། །
ཕྱིས་ནི་རྣམ་པ་གསུམ་དུ་འགྱུར། །ཞེས་གསུངས་པས། སྐུ་གསུང་ཐུགས་རྡོ་རྗེ་འདུས་པ་སྟེ། དེ་ཡང་འཇམ་དཔལ་ཡེ་ཤེས་སེམས་དཔའ་ཁོ་ནར་བསྟོད་པའོ། །རྫོགས་པའི་རིམ་པའི་ཚུལ་གྱིས་ནི། སྤྲོས་པ་མེད་པའི་རང་བཞིན་དུ། །སྔགས་དང་ལྷར་ནི་ཡང་དག་གནས། །ཞེས་

49-1-122a

གསུངས་པས་ན། དོན་དང་དོན་གྱི་ཁྱད་པར་བརླག་པར་བྱའོ། །ཆགས་བྲལ་ལ་སོགས་ཆགས་པ་ཆེ། །ཞེས་པ་ནི། ཕ་རོལ་ཏུ་ཕྱིན་པ་དང་སྔགས་ཀྱི་གཞུང་ལུགས་ནི་ཆོས་ཅན་དང་ཆོས་ཉིད་ཀྱི་ལམ་སྟེ། དེའི་དགོངས་པ་ཡང་འཇམ་དཔལ་ཡེ་ཤེས་སེམས་དཔའ་སེམས་ཅན་རིག་
པ་དང་།  བསམ་པ་དང་དབང་པོ་དང་། མོས་པ་མཁྱེན་པས་ཁ་དོག་སྣ་ཚོགས་འབར་བའི་འོད་དུ་འཕྲོས་ནས་ཆོས་སྟོན་ཏོ། །གཉིས་ཀ་ཐེག་པ་ཆེན་པོར་འཐད་དེ། རྡོ་རྗེ་སྐྱིལ་ཀྲུང་རྫོགས་སངས་རྒྱས། །ཞེས་པས་གཅིག་ནི་བདེན་པ་རྣམ་པ་གཉིས་ལ། འདིར་ནི་པདྨའི་ནམ་མཁར་ཟེའུ་འབྲུ་གང་། །རྡོ་རྗེ་
སྐྱིལ་མོ་ཀྲུང་གིས་གནས་དག་ཏུ། །སེམས་ཀྱི་ནོར་བུ་ནང་དུ་ཆུད་པ་ལ། །ཡེ་ཤེས་གང་སྐྱེས་དེ་ནི་བརྗོད་མེད་གཟུགས། །ཞེས་གསུངས་པའི་མན་ངག་གིས་སངས་རྒྱས་པའོ། །དམན་པ་མ་ཡིན་ཏེ། སངས་རྒྱས་ཀྱི་ཐུགས་རྗེ་ཆེན་པོའི་སྟོབས་ཀྱིས་འགྲོ་བ་དང་མཐུན་པའི་ཚོད་འདོད་ཆགས་ལ་སོགས་པ་
དེ་ཉིད་ཐབས་ཁྱད་པར་ཅན་གྱིས་བྱང་ཆུབ་ཀྱི་ཡན་ལག་ཏུ་འགྱུར་བའི་སྒོ་ནས་སེམས་ཅན་འཛིན་པར་མཛད་པ་སྟེ། དེ་ཡང་། ཐབས་ཆེན་རྣམས་དང་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །སྔགས་ཀྱིས་བསད་པའི་དུག་བཞིན་དུ། །འཁོར་བ་ཞི་བའི་བདག་ཉིད་དོ། །ཞེས་གསུངས་
སོ། །དྲང་བའི་དོན་མ་ཡིན་ཏེ། དཔལ་ལྡན་སངས་རྒྱས་པདྨ་སྐྱེས་། །ཞེས་གསུངས་སོ། །དེ་བས་ནི་ཀུན་མཁྱེན་ཡེ་ཤེས་མཛོད་འཛིན་པར་མཛད་པའོ། །རྒྱལ་པོ་ནི་བདེ་བར་གཤེགས་པ་སྟེ། སྒྱུ་འཕྲུལ་སྣ་ཚོགས་འཆང་བ་ནི། རྟེན་ཅིང་འབྲེལ་བར་འབྱུང་བ་ཟབ་མོའི་མན་ངག་གོ། །
ཆེ་བ་སངས་རྒྱས་རིག་སྔགས་རྒྱལ། །ཞེས་པ་ནི། ཆོས་ཆ་ཤས་དང་བཅས་པར་རིག་པ་དང་། དོན་མ་སྐྱེས་པར་རིག་པ་དང་། སྔགས་ཆོས་ཉིད་ལམ་དུ་རིག་པ་དང་། བཟོད་པ་ཆོས་ཉིད་དུ་རིག་པ་དུས་ཀྱི་ཚེ་ཆེ་བ་སྟེ། སངས་རྒྱས་ཀྱི་རང་བཞིན་ནོ། །དེའི་ཕྲིན་ལས་ནི་རིག་སྔགས་ལ་སོགས་
པའོ། །དེ་ཁོ་ན་མ་ཡིན་པ་ནི་རྡོ་རྗེ་རྣོན་པོ་ཞེས་པས་ཡིད་ལ་མི་བྱེད་པའོ། །རལ་གྲི་ཆེ་ཞེས་པས་དེ་དང་འདྲ་བའི་ཡེ་ཤེས་སོ། །ཡི་གེ་ནི་ལྔ་སྟེ། སྐྱེ་མེད་བདེ་བའི་སྙིང་པོ་ཅན་ནི་མཆོག་སྟེ་ཞེས་པ་དེ་ཉིད་ཀྱང་བཅོས་པར་སྟོན་པའོ། །རྣམ་པར་དག་པ་ནི་སྙིང་རྗེ་ཆེན་པོའི་དམ་ཚིག་གོ། །དེ་ཡང་།

49-1-122b

ཐབས་དང་ཤེས་རབ་སྙོམས་འཇུག་པ། །རྣལ་འབྱོར་ཞེས་ནི་བཤད་པ་ཡིན། །ཞེས་གསུངས་པས། གང་ལ་ཟུང་དུ་འཇུག་པ་གནས་པ་ནི་ཐེག་པ་ཆེན་པོ་སྟེ། དེས་ཉེར་ལེན་གྱི་ཕུང་པོ་ལྔ་འཇོམས་པ་སྡུག་བསྔལ་གཅོད་ཅེས་བྱའོ། །མཚོན་ཆ་ཆེན་པོ་ནི་ལམ་གྱི་བདེན་པ་སྟེ། ལྡང་འཇུག་མེད་པའོ། །
དེ་ཡང་། གཟུགས་ལ་རྣམ་གསུམ་ཤེས་བྱ་སྟེ། །མཆོད་པ་བྱེད་པས་མཆོད་པར་བྱ། །ཞེས་བྱ་བ་ལ་སོགས་པས་སོ། །རྡོ་རྗེ་ནི་ཆོས་སོ། །རྡོ་རྗེ་ཟབ་མོ་ནི་ཐུགས་སོ། །ཛི་ན་ཛི་ཀ་ནི་སྐུ་སྟེ། དེ་གསུམ་དབྱེར་མི་ཕྱེད་པ་ནི་རྡོ་རྗེའོ། །བློ་གྲོས་ནི་ཤེས་རབ་སྟེ། དོན་བཞིན་རིག་པ་ནི་ཇི་བཞིན་པའོ། །ཕ་
རོལ་ཏུ་ཕྱིན་པ་ནི་བཤད་ཟིན་ཏོ། །བརྩོན་ཆེན་ཞེས་པ་ནི་བརྩོན་འགྲུས་ཆེན་པོ་སྒྱུ་འཕྲུལ་དྲ་བར་རྫོགས་པར་མཛད་དེ། དེ་ཅིའི་ཕྱིར་ཞེ་ན། བྱ་བ་ལ་སོགས་པའི་རྒྱུད་ཀུན་གྱི་རྒྱལ་པོ་འཇམ་དཔལ་ཡེ་ཤེས་སེམས་དཔའ་ཉིད་མ་ཡིན་ལ། དེའི་ཆེད་དུ་བརྗོད་པའི་མཆོག་འདིར་སྟོན་པའི་ཕྱིར་
རོ། །རྡོ་རྗེ་གདན་ནི་མ་ལུས་ལྡན། །ཞེས་པ་ནི་གསེར་དང་གསེར་བཞིན་ནམ། རྒྱ་མཚོར་ཆུ་བོ་འབབ་པ་བཞིན་རིག་པར་བྱའོ། །ཡེ་ཤེས་ཀྱི་སྐུ་ནི་ཡེ་ཤེས་སྐུ་རྣམས་སོ། །ཀུན་དུ་བཟང་པོ་དང་བློ་གྲོས་བཟང་པོ་ནི་འཇམ་དཔལ་དང་། སའི་སྙིང་པོ་དང་འགྲོ་བ་འཛིན་ནི་སྤྱན་རས་གཟིགས་
དབང་ཕྱུག་ལ་སོགས་པ་སྟེ། དེའི་རྣམ་པར་དག་པ་ནི་ཐབས་དུ་མ་སྤྲུལ་པའོ། །མཚན་མ་མི་དམིགས་པ་དང་། ཐམས་ཅད་ཡོད་པ་དང་། སྙིང་རྗེའི་སྙིང་པོ་ཅན་ཉིད་ཀྱིས་གསང་བ་ཆེན་པོའོ། །ཡང་ན་ས་དང་འགྲོ་བའི་རྟེན་གཞལ་ཡས་ཁང་དང་། བརྟེན་པ་ལྷའི་འཁོར་ལོས་
མཚོན་པའོ། །སངས་རྒྱས་ཀུན་གྱི་ཞེས་པ་ནི། རིགས་སོ་སོའི་དཀྱིལ་འཁོར་གྱི་འཁོར་ལོའོ། །སྙིང་པོ་ཆེ་ཞེས་པ་ནི་བྱང་ཆུབ་ཀྱི་སེམས་རྡོ་རྗེའོ། །དེ་ལས་ཐམས་ཅད་དུ་སྣང་བས། སྤྲུལ་པའི་འཁོར་ལོ་སྣ་ཚོགས་འཆང་། །ཞེས་སྟོན་ཏེ། འཇིག་རྟེན་དང་འཇིག་རྟེན་ལས་
འདས་པ་ཐམས་ཅད་ལྷའི་འཁོར་ལོར་སྣང་བའོ། །དངོས་པོ་ཀུན་གྱི་རང་བཞིན་མཆོག །ཅེས་པ་ནི་སྟོང་པའོ། །དངོས་པོ་ཀུན་གྱི་རང་བཞིན་འཛིན། །ཞེས་པ་ནི་སྣང་བའོ། །སྐྱེ་མེད་ཆོས་ཏེ་ཞེས་པ་དང་། སྣ་ཚོགས་དོན་ཞེས་པ་ནི་རང་རང་གི་ངོ་བོ་སྟོན་པའོ། །ཆོས་ཀུན་ངོ་བོ་ཉིད་

49-1-123a

འཆང་བ། །ཞེས་པས་ཐུན་མོང་དང་ཐུན་མོང་མ་ཡིན་པའི་དབྱེར་མེད་བསྟན་པའོ། །ཤེས་རབ་ལ་སོགས་པ་ནི་དུས་ཀྱི་མཐའི་སྐད་ཅིག་མའོ། །དེ་ཉིད་འདིར་རྣལ་འབྱོར་གྱི་ལམ་དུ་བྱ་བའི་ཕྱིར་མི་གཡོ་ཞེས་པ་ནི་ཏིང་ངེ་འཛིན་གྱི་སྐྱོན་དྲུག་དང་བྲལ་བའོ། །རབ་ཏུ་དང་བའི་
བདག་ཅེས་པ་ནི། ལམ་གྱི་ལུས་ཀྱི་རྙོག་པ་བརྒྱད་པའོ། །མངོན་སུམ་པ་ཞེས་པ་ནི་མངོན་སུམ་པ་འདིར་རིག་པའོ། །ཇི་ལྟར་ན་ཡེ་ཤེས་ལ་སོགས་པའོ། །དེ་དག་གིས་ནི་སོ་སོར་རྟོག་པའི་ཡེ་ཤེས་ལ་བསྟོད་པའོ།།      །།འདོད་པ་ལ་སོགས་པ་ནི་འདིར་བཤད་པར་བྱ་སྟེ། འདོད་
པ་ནི་མཐུན་པ་སྟེ་རབ་ཏུ་བསྟན་པའི་འདོད་པའོ། །དོན་ནི་བསྒྲུབ་པར་བྱ་སྟེ། རིན་ཆེན་འབྱུང་ལྡན་ནོ། །གྲུབ་པ་ནི་མ་ཆགས་པའོ། །དམ་པ་ནི་སྦྱིན་པའི་ཕ་རོལ་ཏུ་ཕྱིན་པས་སེར་སྣ་དག་པར་བྱས་པའོ། །ངན་སོང་ཐམས་ཅད་རྣམ་སྦྱོང་བ། །ཞེས་པ་ནི། སྦྱིན་པའི་ཕ་རོལ་ཏུ་ཕྱིན་པའི་མ་
ཆགས་པའི་དམྱལ་བ་སྦྱོང་བར་བྱེད་དོ། །བྱིན་པས་ཡི་དྭགས་སྦྱོང་བར་བྱེད་དོ། །རེ་བ་མེད་པས་བྱོལ་སོང་སྦྱོང་བར་བྱེད་དོ། །ཡང་ན་མཉམ་པ་ཉིད་ཀྱི་ཡེ་ཤེས་སོ། །དེ་བས་ན། མགོན་པོ་སེམས་ཅན་ཀུན་གྱི་མཆོག །ཅེས་བྱ་སྟེ། གཞན་གྱི་དོན་ལ་དམིགས་པས་སོ། །ཇི་ལྟར་ན་
སེམས་ཅན་ཐམས་ཅད་སྒྲོལ་བ་ཞེས་པ་ནི་མཛད་པ་སྟེ། རིགས་ལ་སྤྱོད་པ་དང་། བག་ལ་ཉལ་བ་ལ་སྤྱོད་པ་དང་། མོས་པ་ལ་སྤྱོད་པ་དང་། ལས་དང་པོ་པ་རྣམས་ལ་གསང་སྔགས་དང་། ཕ་རོལ་ཏུ་ཕྱིན་པ་བཅུ་དང་། བསླབ་པ་གཉིས་དང་། བདེན་པ་བཞི་བསྟན་པའོ། །ཉོན་
མོངས་པ་ཞེས་བྱ་བ་ལ་སོགས་པ་རྒྱས་པར་བཤད་པ་སྟེ། དེ་ཡང་། འདི་ནི་རང་བྱུང་བཅོམ་ལྡན་འདས། །གཅིག་པུ་ཁོ་ན་ལྷག་པའི་དབྱེ། །ཞེས་གསུངས་པའི་ཕྱིར་རོ། །མི་ཤེས་པ་ནི་གཏི་མུག་གོ། །དགྲའི་དྲེགས་པ་ནི་བདེན་པ་གཉིས་མེད་ལ་ཐེ་ཚོམ་ཟ་བའོ། །དེ་ཡང་རིག་པའི་
ཡེ་ཤེས་ཀྱིས་འཇོམས་པའོ། །དཔལ་ལྡན་བློ་དང་སྟེག་པར་ལྡན། །ཞེས་པ་ནི། དཔལ་ནི་གཞུང་ལུགས་ཀྱི་བྱིན་གྱི་རླབས་སོ། །བློ་ནི་སངས་རྒྱས་ཀྱི་སྙིང་པོའི་ས་བོན་ནོ། །སྟེག་ནི་ལྷག་པ་བྱང་ཆུབ་ཀྱི་སེམས་སོ། །དེ་རྣམས་རོ་གཅིག་ཏུ་སྐྱེས་པ་ནི་ལྡན་པ་སྟེ། དེ་ཡང་བླ་

49-1-123b

མའི་བརྒྱུད་ཐབས་བསྟེན་པ་དང་། བསོད་ནམས་ལས་ནི་ཡང་དག་ཤེས། །ཞེས་གསུངས་པའི་ཕྱིར་རོ། །བརྟན་པོ་མི་སྡུག་གཟུགས་འཆང་བ། །ཞེས་པ་ནི། རྟོག་པ་ལ་སེམས་བརྟན་པས་འཁོར་བ་བསྡིགས་པའི་བརྡའོ། །ལག་པ་བརྒྱད་པོ་ཀུན་བསྐྱོད་ཅིང་། །ཞེས་པ་ནི། ཕྱི་ནང་
གསང་བའི་བྱེ་བྲག་གིས། རྟགས་དང་ཐབས་ཀྱི་བྱེ་བྲག་དང་། ཡུལ་སྣ་ཚོགས་པ་ཐམས་ཅད་བདེ་བར་བསྐྱོད་པའོ། །གོམ་པའི་སྟོབས་ཀྱིས་གར་བྱེད་པ་ཡང་དེ་བཞིན་ཏེ། རྟགས་ལ་འབྱུང་བ་བཞི་བདེ་བས་ནོན་པ་དང་། དགའ་བ་བཞི་དོན་གྱིས་ལྷན་ཅིག་སྐྱེས་པས་གནོན་པ་སྟེ། བཅོམ་
ལྡན་འདས་ཀྱི་ཞབས་ཀྱི་མཐེ་བོ་གཅིག་གིས་གདན་ལ་རེག་པར་བཞེངས་སོ་ཞེས་པའི་དོན་ཏོ། །དེས་དོན་ཀུན་དུ་བསྒྲུབ་པའི་ཕྱིར་རྐང་མཐེབ་ལ་སོགས་པ་གསུངས་ཏེ། སྲིད་པ་དེ་ཉིད་དུ་བྱེད་པར་ཡང་སྦྱར་རོ། །དོན་གཅིག་ཅེས་པ་ལ་སོགས་པ་ནི་འབྲེལ་བ་སྟེ། དེ་ཡང་དོན་གཉིས་མེད་ནི་
གཉུག་མའོ། །ཆོས་ཀྱི་དོན་ནི་དཔེའོ། །དེས་ཅིར་འགྱུར་ཞེ་ན། དམ་པའི་དོན་དེ་ཞེས་པ་ནི་མ་བཅོས་པ་སྟེ། འཁོར་བས་འཇིག་པ་མེད་པ་དེ་ནི་མཚོན་པའོ། །ཉམས་སུ་མྱོང་བ་ནི་རྣམ་པར་རིག་པ་ཉིད་ལས་སྣ་ཚོགས་པར་སྣང་བ་གཟུགས་ལ་སོགས་པའི་དོན་དང་། གཉིས་སུ་མེད་པ་
མྱོང་བས་ན་ཅན་ཞེས་བྱའོ། །རྣམ་པར་ཤེས་པའི་ཚོགས་ནི་ཐམས་ཅད་ལྷན་ཅིག་སྐྱེས་པའི་རྗེས་སུ་འཇུག་པར་འགྱུར་ཏེ། རྣམ་ཤེས་སྣ་ཚོགས་རྒྱུད་དང་ལྡན། །ཞེས་པས། ཐམས་ཅད་དོན་དམ་པ་བྱང་ཆུབ་ཀྱི་སེམས་སུ་ལྡན་ཞེས་བྱའོ། །དེ་བས་བླ་མ་མཉེས་པ་ལས་དེའི་བཀའ་
ལུང་གིས་དེ་ལྟ་བུའི་རླུང་དབང་པོ་རྣམས་ལ་བཀུག་སྟེ། རྒྱུན་དུ་འཇུག་པ་དང་འབྱུང་བའི་བྱ་བ་བྱེད་པའི་རྣལ་མའི་ཡིད་ཉིད་དུ་འཇོག་པར་བྱེད་དོ་ཞེས་གསུངས་པས་སོ། །ཕྱིས་ཞེན་པར་མི་འགྱུར་བ་ནི། དངོས་དོན་མ་ལུས་རྣམས་ལ་དགའ། །ཞེས་བྱ་སྟེ། ཉམས་སུ་མྱོང་བའི་ཕྱིར་
ན་དེས་ན་སྔོན་ཡོངས་སུ་བཏང་བའི་དབང་པོ་དེ་ཡང་ཡིད་དང་བྲལ་བར་བྱེད་པ་མེད་པར་འགྱུར་ཏེ། མས་བོར་བའི་བེའུ་ཉིད་རྗེས་སུ་འཚོལ་བ་བཞིན་དུ་འདིར་ཡང་དབང་པོ་རྣམས་ཡིད་ཀྱི་རྗེས་སུ་འབྲང་བར་འགྱུར་ཏེ། གང་དུ་ཡིད་འཇུག་པ་དེར་རབ་ཏུ་འཇུག་སྟེ། གང་གི་ཕྱིར་དེ་མ་

49-1-124a

རྟོགས་པར་འདི་དག་རབ་ཏུ་སྦྱོར་བར་མེད་པ་མ་ཡིན་ཞེས་གསུངས་པས་སོ། །ཟུང་འཇུག་ཏུ་མི་འགྱུར་བ་མ་ཡིན་པ་ནི། སྟོང་པ་ཉིད་དགའ་འདོད་ཆགས་བློ། །ཞེས་བྱའོ། །སྲིད་པར་གྱུར་པ་མ་ཡིན་པ་ནི། སྲིད་པའི་འདོད་ཆགས་སྤངས་པ་སྟེ། །ཞེས་བྱའོ། །ལོག་
པར་རྟོགས་པ་བསལ་བའི་ཕྱིར་སྲིད་པའི་འདོད་ཆགས་ནི་སྲིད་པའི་འདོད་ཆགས་ཏེ། བརྒྱུད་ཐབས་བསྟེན་པ་ཉིད་ཀྱིས་འདྲ་བར་གྱུར་པ་སྟེ།  ཟངས་ལས་ར་གན་དུ་གྱུར་ཏེ། གསེར་མ་ཡིན་པ་བཞིན་ནོ། །སྤངས་པ་ནི་སྤངས་པ་སྟེ་གསེར་རྙེད་པའི་དུས་ན་སྔར་གྱི་འདྲ་བ་ལ་དགོས་པ་མེད་
པའོ། །བདེ་བ་དང་བྲལ་བ་མ་ཡིན་ཏེ། སྲིད་པ་གསུམ་གྱི་རང་བཞིན་དགའ་བ་ཡིན་ལ། དེ་ལ་ཡང་ཆེན་པོ་པས་དོགས་པ་མེད་པའི་ལྷན་ཅིག་སྐྱེས་པ་ཉིད་དེ། དཔེར་ན་ནམ་མཁའ་ལ་སྤྲིན་ནག་པོ་དང་སེར་པོ་ལ་སོགས་པ་བསལ་བའི་རྗེས་སྤྲིན་དཀར་ཡང་དག་པའི་དཀར་བ་བཞིན་དུ་
དཀར་བའི་བདེ་བ་སྟོང་པ་ཕྲ་མོ་ཙམ་མི་གནས་ཀྱང་བདེ་བར་འཐད་དེ། འོད་བཟངས་སྟོན་ཀའི་ཟླ་བའི་འོད། །ཅེས་པས་ཟླ་བ་དང་འོད་བཞིན་དག་པ་དང་བདེ་བ་ལ་ཐ་མི་དད་པར་འཆར་རོ། །ཕྱིའི་སྒྲོ་འདོགས་ཆོད་པའི་དག་པའི་འཆར་བ་མ་ཡིན་ཏེ། ནང་རྟེན་འབྲེལ་གྱི་དུས་ན་ཉི་མ་
འཆར་ཀ་དང་ཤར་བའི་དཀྱིལ་ལྟར་མཛེས་སོ། །དེས་ཐ་དད་གྱུར་པ་མ་ཡིན་ཏེ། མཚོན་པར་བྱེད་པ་གཅིག་གིས་མཚོན་པའི་ཕྱིར་རོ། །ཕྱིས་རང་རྒྱུད་དུ་འགྱུར་བ་མ་ཡིན་ཏེ། འདི་ནི་ཐབས་དང་ཤེས་རབ་ལས་སྐྱེས་པའི་བདེ་བ་ཆེན་པོ་ཉིད་ཡིན་པས། རྣམ་པར་རྟོག་པའི་ཚོགས་
མཐའ་དག་ཡོངས་སུ་སྤངས་ནས་བླ་ན་མེད་པའི་ལོངས་སྤྱོད་དུ་ཉེ་བར་འགྲོ་ཞིང་། འགྲོ་བ་འདི་དག་ནི་བདེ་བ་ཆེན་པོའི་རྣམ་པར་འགྲོ་བར་འགྱུར་ཏེ། དཔེར་ན་ཉི་མའི་འོད་ཟེར་གྱི་ཚོགས་ཀྱིས་ཕོག་པའི་ཟླ་བའི་དཀྱིལ་འཁོར་གྱི་གཟུགས་བཞིན་དུ། འགྲོ་བ་རྣམས་སྙིང་པོ་མེད་པར་སྣང་
ངོ་ཞེས་གསུངས་པས་སོ། །སེན་མོ་འོད་ལ་སོགས་པ་ལ་ཕྱི་ནང་སྦྱར་བར་བྱ་སྟེ། སྔར་བཤད་པ་དང་འཆད་པར་འགྱུར་བ་ཐམས་ཅད་གྲགས་པའི་མཚན་དཔེ་ལ་སྦྱར་བ་དང་། དེ་ཉིད་རྣམ་པར་དག་པ་བདེ་བ་ལ་སྦྱར་བའོ། །དེ་ལྟར་ན་བདེ་བ་ཉམས་སུ་མྱོང་བའི་གནས་བསྟན་

49-1-124b

པའི་ཕྱིར། ནོར་བུ་ཆེན་པོ་འོད་ཆགས་དཔལ། །ཞེས་གསུངས་ཏེ། ནོར་བུ་ནི་རིན་པོ་ཆེའོ། །ཆེན་པོ་ནི་པདྨའི་ཟེའུའབྲུའོ། །ཆགས་པ་ནི་ཐིག་ལེ་སྟེ་བདེ་བ་དང་ལྡན་པའོ། །དཔལ་ནི་དེས་གཞན་གྱི་དོན་དུ་འགྱུར་བའོ། །ཇི་ལྟར་འགྱུར་བ་བསྟན་པའི་ཕྱིར། །སངས་རྒྱས་ནི་ཤིགས་པ་མེད་པའི་
ཧཾ་ངོ་། །སྤྲུལ་པ་ནི་བྱང་ཆུབ་ཀྱི་སེམས་སོ། །རྒྱུད་ནི་དགའ་བ་བཞིའོ། །མཚན་ཉིད་མི་མཐུན་པས་མཚོན་པར་མི་ནུས་པ་མ་ཡིན་ཏེ། དད་ལྡན་ཞེས་པས་སྔ་མ་བཞིན་ནོ། །འཇིག་རྟེན་ཁམས་བརྒྱ་ཀུན་བསྐྱོད་པ། །ཞེས་པ་ནི། ཕྱི་ནང་གི་བྱེ་བྲག་གིས་སངས་རྒྱས་ཀྱི་རྫུ་འཕྲུལ་དང་། ཡེ་ཤེས་མཐོང་བའི་
དུས་ནི་ས་གཡོས་ལ་སོགས་པའི་རྟགས་འབྱུང་བར་བཤད་པ་བཞིན་ནོ། །རྫུ་འཕྲུལ་རྐང་པའི་སྟོབས་ཆེན་ལྡན། །ཞེས་པ་ནི། སྔར་བཞིན་གྱིས་ཀུན་རྫོབ་ཀྱི་རྫུ་འཕྲུལ་བསྟན་པ་ལས། དོན་གྱི་སྟོབས་ཆེན་པོ་ལྔ་དང་ལྡན་པ་ཐོབ་པར་འགྱུར་རོ། །དེ་ཉིད་དྲན་པ་ཆེན་པོ་འཆང་། །ཞེས་པ་ནི། སྔར་
གྱི་བྱེ་བྲག་གིས་དབང་པོ་དམན་པོས་མཚན་མའི་རྣལ་འབྱོར་དུ་བྱ་བ་དང་། དེ་ལས་གཞན་པས་བདེ་བ་ཆེན་པོའི་དྲན་པ་འཆང་བ་པོ། དྲན་པ་བཞི་པོ་ཞེས་པ་ནི་སྔར་གྱི་བྱེ་བྲག་གིས་ཚོར་བ་དྲན་པ་ཉེ་བར་གཞག་པ་དང་། དུས་ཀྱི་ཡེ་ཤེས་དྲན་པ་དང་། ཆོས་དྲན་པ་ཉེ་བར་གཞག་པ་དང་། དུས་ཀྱི་ཡེ་
ཤེས་སྣང་བར་དྲན་པའོ། །སེམས་དྲན་པ་ཉེ་བར་གཞག་པ་དང་། དུས་ཀྱི་ཡེ་ཤེས་སྡུག་བསྔལ་དུ་དྲན་པའོ། །ལུས་དྲན་པ་ཉེ་བར་གཞག་པ་དང་། དུས་ཀྱི་ཡེ་ཤེས་བདེན་པར་དྲན་པའོ། །ཏིང་ངེ་འཛིན་རྒྱལ་ཞེས་པ་ནི་སྔར་བཞིན་གྱི་བྱེ་བྲག་གིས་སེང་གེ་རྣམ་པར་རྩེ་བ་དང་། ནམ་མཁའ་མཛོད་དང་། 
དྲི་མ་མེད་པ་དང་། ཀུན་དུ་སྣང་བའི་ཏིང་ངེ་འཛིན་དང་། འབྲས་བུ་དང་རྗེས་སུ་མཐུན་པའི་ཁ་སྦྱོར་བ་ལ་སོགས་པའི་ཡན་ལག་བརྒྱད་དོ། །བྱང་ཆུབ་ཀྱི་ཡན་ལག་གི་སྔར་བཞིན་གྱི་བྱེ་བྲག་གིས་བདུན་དང་རྣམ་པར་ཤེས་པའི་བདུན་གྱིས་ལུས་རྒྱུན་གྱིས་རྟག་པ་ཉིད་དོ། །མེ་ཏོག་སྤོས་ནི་དངོས་དང་
མ་བཅོས་ཤིང་རང་སྣང་བའོ། །དེ་བཞིན་གཤེགས་པའི་ཡོན་ཏན་མཚོ། །ཞེས་པ་ནི། སྔར་བཞིན་གྱི་བྱེ་བྲག་གིས་འཕགས་པའི་བདེན་པ་བཞི་ལ་སོགས་པ་ཐམས་ཅད་དང་། ཡོན་ཏན་མཚོ་ཇི་སྙེད་ཀྱི་གནས་བྱང་ཆུབ་ཀྱི་སེམས་སོ། །ལམ་གྱི་ཡན་ལག་བརྒྱད་རིག་པ། །ཞེས་པ་ནི། སྔར་གྱི་

49-1-125a

བྱེ་བྲག་གིས་དེ་ཉིད་དང་འཇིག་རྟེན་ལས་འདས་པའི་ལྟ་བ་གང་གིས་བདག་དང་། སེམས་ཅན་དང་། སྲོག་དང་། གསོ་བ་དང་། སྐྱེས་བུ་དང་། གང་ཟག་དང་། ཤེད་བུ་དང་། ཤེད་ལས་སྐྱེས་པ་དང་། བྱེད་པ་པོ་དང་། ཚོར་བ་པོ་དང་། མཐོང་བ་པོའི་ལྟ་བ་ཀུན་ནས་ལྡང་བར་མི་བྱེད་ཅིང་། 
རྟག་པ་དང་། ཆད་པ་དང་། སྐྱེ་བ་དང་། འགག་པ་དང་། དགེ་བ་དང་། མི་དགེ་བ་ཀུན་ནས་བསླང་བ་དང་། སྲིད་པ་དང་བྲལ་བའི་ལྟ་བ་ཀུན་ནས་བསླང་བ་དང་། སྲིད་པ་དང་བྲལ་བར་བསྟན་པས་ལྟ་བ་ཀུན་ནས་བསླང་བ་དང་། འཁོར་བ་དང་མྱ་ངན་ལས་འདས་པའི་ལྟ་བ་ཀུན་ནས་ལྡང་བར་མི་བྱེད་པ་ནི་
ཡང་དག་པའི་ལྟ་བའོ། །ཀུན་དུ་རྟོག་པ་གང་གིས་འདོད་ཆགས་དང་། ཞེ་སྡང་དང་། གཏི་མུག་གི་ཀུན་ནས་ཉོན་མོངས་པ་སྐྱེ་བ་དང་མཐུན་པར་གང་དུ་མི་རྟོག་ཅིང་ཚུལ་ཁྲིམས་དང་། ཏིང་ངེ་འཛིན་དང་ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་སྐྱེ་བ་དང་
མཐུན་པར་ཀུན་དུ་རྟོག་པ་འདི་ནི་ཡང་དག་པར་རྟོགས་པའོ། །ངག་གང་གིས་བདག་དང་གཞན་གདུང་བར་མི་འགྱུར་བ་དང་། ཉོན་མོངས་པར་མི་འགྱུར་བ་དང་། བསྣུན་པར་མི་འགྱུར་བ་དང་། བཞད་གད་དུ་མི་འགྱུར་ཞིང་། རིགས་པ་དང་བྲལ་བས་ཡང་དག་པའི་ངག་ལ་འཛུད་པར་བྱེད་པ་འདི་
ནི་ཡང་དག་པའི་ངག་གོ། །ལས་གང་ལས་ཀྱང་གནག་ལ་རྣམ་པར་སྨིན་པ་ཡང་གནག་པའི་མངོན་པར་འདུ་མི་བྱེད་པ་དང་། ལས་གང་ལས་ཀྱང་དཀར་བ་རྣམ་པར་སྨིན་པ་ཡང་དཀར་བ་དེ་མངོན་པར་འདུ་བྱེད་པ་དང་། ལས་གང་ལས་དཀར་བ་ཡང་རྣམ་པར་སྨིན་པ་གནག་པ་དེ་མངོན་
པར་འདུ་མི་བྱེད་ཅིང་། ལས་གང་ལས་གནག་ཀྱང་རྣམ་པར་སྨིན་པ་དཀར་ན་ནག་པོ་ཟད་དེ། དཀར་པོའི་ཕྱོགས་འཕེལ་བར་བྱེད་ཅིང་། མངོན་པར་འདུ་བྱེད་ཅིང་དམ་པའི་ལས་ཀྱི་རྗེས་སུ་འབྲང་བ་འདི་ནི་ཡང་དག་པའི་ལས་ཀྱི་མཐའོ། །གང་ལ་ཡང་འཕགས་པའི་རིགས་པ་ཅན་
གྱི་སྦྱངས་པའི་ཡོན་ཏན་ཅུང་ཟད་ལ་གནས་ཤིང་། ཚུལ་འཆོས་དང་ཁ་གསག་ལ་སོགས་པས་འཚོ་བ་སྤངས་ཏེ་རང་གི་སྤྱོད་པའི་ངང་ཚུལ་རིག་པ་དང་ལྡན་པས་སྐྱེ་བོ་གཞན་ལས་རྙེད་ཀྱང་རུང་སྟེ། ཅུང་ཟད་ཙམ་གྱིས་མ་གུས་ཤིང་། ཁ་ན་མ་ཐོ་བ་མེད་པ་དང་། འཕགས་པས་རྗེས་སུ་

49-1-125b

གནང་བའི་འཚོ་བ་འདི་ནི་ཡང་དག་པའི་འཚོ་བའོ། །རྩོལ་བ་གང་གིས་བསགས་པ་རྗེས་སུ་གནང་བའི་འདོད་ཆགས་དང་། ཞེ་སྡང་དང་། གཏི་མུག་ལ་སོགས་པ་སྟོན་པར་མི་བྱེད་ཅིང་། ཡང་དག་པའི་འཕགས་པའི་ལམ་གྱི་བདེན་པར་ཞུགས་ཏེ། མྱ་ངན་ལས་འདས་པའི་འདོད་པ་བསྟེན་
ཅིང་རྗེས་སུ་འགྲོ་བ་འདི་ནི་ཡང་དག་པའི་རྩོལ་བའོ། །གང་དུ་ཉེ་བར་གནས་ན་སྐུ་མི་གཡོ་ཞིང་འཁྱོགས་པ་མ་ཡིན་པར་འགྱུར་བ་སྟེ། འཁོར་བའི་སྐྱོན་རྣམས་དང་མྱ་ངན་ལས་འདས་པ་དང་། ལམ་གྱི་ཡོན་ཏན་རྗེས་སུ་དྲན་ཞིང་ལམ་གྱི་མཐར་ཐུག་པ་ལ་ཡང་དག་པར་སྦྱོར་བ་འདི་ནི་ཡང་དག་པའི་
དྲན་པའོ། །དེ་ཉིད་ཀྱི་ཏིང་ངེ་འཛིན་གང་ལ་གནས་ནས་སེམས་ཅན་ཐམས་ཅད་རྣམ་པར་ཐར་པར་མཛད་ཅིང་། མྱ་ངན་ལས་འདས་པར་བརྟན་པོར་གནོན་པ་འདི་ནི་ཡང་དག་པའི་ཏིང་ངེ་འཛིན་ཏེ་ཞེས་དགོངས་སོ། །དེ་ཉིད་གཅིག་ཏུ་བྱས་པའི་ཡེ་ཤེས་ནི།  ཡང་དག་སངས་རྒྱས་ལམ་རིག་པ། །ཞེས་
བྱ་སྟེ། ལྷན་ཅིག་སྐྱེས་པའི་ཆོས་ཀྱི་དབྱིངས་ཀྱི་ལམ་མོ། །སེམས་ཅན་ཀུན་ལ་ཤས་ཆེར་ཆགས། །ཞེས་པ་ནི་སྔར་བཞིན་གྱི་བྱེ་བྲག་གིས་སྦྱིན་པ་དང་། སྙན་པར་སྨྲ་བ་དང་། དོན་མཐུན་པ་དང་། དོན་བྱེད་པའོ། །གཉིས་པ་ནི་ཐུན་མོང་མ་ཡིན་པའི་སྙིང་རྗེ་དང་། དེ་སྐྱེ་བར་བྱེད་པའི་དབང་ལ་
སོགས་པ་གསུམ་སྟོན་པའོ། །ནམ་མཁའ་ལྟ་བུར་ཆགས་པ་མེད། །ཅེས་པ་ནི། དམིགས་པ་མེད་པའི་སྙིང་རྗེ་དང་། སེམས་ཅན་གྱི་ཡུལ་མི་སྣང་བའོ། །སེམས་ཅན་ཀུན་གྱི་ཡིད་ལ་འཇུག །ཅེས་པ་ནི། ཡེ་ཤེས་ཀྱི་སྙིང་པོ་ཅན་དུ་བསྟན་ཅིང་། དེ་གསལ་བར་མཛད་པ་པོར་ཡང་འགྱུར་
བའོ། །སེམས་ཅན་ཀུན་གྱི་ཡིད་ལྟར་མགྱོགས། ཞེས་པ་ནི། སྔར་བཤད་པ་དང་བྱང་ཆུབ་ལ་མྱུར་བའོ། །དེའི་རྒྱུ་མཚན་ནི། སེམས་ཅན་ཀུན་གྱི་དབང་དོན་ཤེས། །ཞེས་བྱ་སྟེ། དེ་ཉིད་ཀྱི་ཕྱིར། དོན་མཛད་པ་དང་། མྱུར་བ་དང་། སྣང་བ་དང་། སེམས་ལྷན་ཅིག་སྐྱེས་པ་ཤེས་པར་མྱོང་བའོ། །
ལོག་རྟོགས་བཟློག་པའི་ཕྱིར། སེམས་ཅན་ཀུན་གྱི་ཡིད་འཕྲོག་པ། །ཞེས་གསུངས་པ་ནི། གདུལ་བྱའི་དབང་པོ་ལ་མི་བཟད་པའི་གཟུགས་སུ་གྱུར་པ་དང་། ཡིད་རྣམ་པར་དག་ནས་ལྷན་ཅིག་སྐྱེས་པར་གྱུར་པ་ལ་འཕྲོག་ཅེས་བྱ་སྟེ། གསེར་འགྱུར་གྱི་རྩི་བཞིན་ནོ། །ཕུང་པོ་ལྔ་དོན་དེ་ཉིད་ཤེས་

49-1-126a

ཞེས་པ་ནི། ཇི་ལྟར་སྟོན་པ་བསྟན་པ་སྟེ། རིགས་ལྔ་དང་ཟག་པ་མེད་པའི་ཕུང་པོ་ལྔར་ཤེས་པ་དང་། དེ་ཁོ་ན་ཉིད་དུ་དབྱེར་མེད་པའོ། །དེའི་ཕྱིར། རྣམ་དག་ཕུང་པོ་ལྔ་འཆང་བ། །ཞེས་པ་ནི་གཉི་ག་ལའོ། །ངེས་འབྱུང་ཀུན་ནི་ཐེག་པ་གསུམ་སྟེ། མཐའ་ལ་གནས་པ་ནི་ས་གཉིས་སོ། །གཞན་སྤངས་པ་
མ་ཡིན་ཏེ། ངེས་པར་འབྱུང་བ་ཀུན་ལ་མཁས། །ཞེས་པས་སོ། །ངེས་འབྱུང་ཀུན་གྱི་ལམ་ལ་གནས། །ཞེས་པས་ཐེག་པ་གསུམ་གྱི་ལམ་ལ་རིམ་གྱིས་སྦྱངས་པ་དང་། གནས་ཞེས་པས་ལྡན་པ་སྟེ་སྐྱེ་བ་རིམ་པ་བཞིན་ནོ། །ངེས་པར་འབྱུང་བ་ཀུན་སྟོན་པ། །ཞེས་པ་དེ་ནི་བཤད་ཟིན་ཏོ། །ཡན་ལག་ལ་
སོགས་པས་ཕུན་སུམ་ཚོགས་པ་བཤད་པར་བྱ་སྟེ། ཡན་ལག་བཅུ་གཉིས་ནི་མ་རིག་པ་ལ་སོགས་པའོ། །སྲིད་རྩ་བཏོན་པ་ནི་དུས་ཀྱི་གསུམ་པས་བྱིན་རླབས་ཐོབ་པ་དང་། ལམ་གྱི་གསུམ་པ་རྟེན་མེད་པ་ལས་ཐོས་པས་ས་བོན་གྱི་བག་ཆགས་དང་། མངོན་དུ་རྒྱུ་རྩ་བ་ནས་བཏོན་པའོ། །ཕྱིས་དེ་ལྟར་མི་འགྱུར་
བ་ནི། དག་པ་རྣམ་པ་བཅུ་གཉིས་འཆང་། །ཞེས་པས། སྐྱེ་མཆེད་བཅུ་གཉིས་རང་གི་ངོ་བོ་དག་པ་སྟེ། དེ་ཡང་མིག་ཅེས་བྱ་བ་ནི་སྟོང་པ་སྟེ། དབུས་ན་རྣམ་ཤེས་ཇི་ལྟར་མཆིས། །ཞེས་པ་ལ་སོགས་པ་ལ། དེ་ལྟར་ན་གཟུགས་མ་མཆིས་པས་ལྟ་བ་མ་མཆིས་སོ་ཞེས་པས་སོ། །སྲིད་པའི་རྒྱུར་འགྱུར་བ་མ་ཡིན་ཏེ། 
བདེན་བཞིའི་ཚུལ་གྱི་རྣམ་པ་ཅན་ཞེས་པས། སྡུག་བསྔལ་གྱི་རྒྱུ་ཡེ་ཤེས་སུ་ཤེས་པ་དང་། ཀུན་འབྱུང་བ་དེ་བར་སད་པ་དང་། འགོག་པ་རང་འབྱུང་བ་དང་།ལམ་འབྲས་བུ་རང་ཆས་སུ་ལྡན་པའོ། །ཉན་ཐོས་དང་མཚུངས་པ་མ་ཡིན་ཏེ། ཤེས་པ་བརྒྱད་པོ་རྟོགས་པ་འཆང་། །ཞེས་པས་བརྒྱད་ལ་
ཟད་པ་ཤེས་པ་དང་། མི་སྐྱེ་བ་ཤེས་པས་ཁྱབ་པའི་ཕྱིར། དེ་ཉིད་དུ་བྱས་པའོ། །མན་ངག་གི་དྲིན་ཡིན་པས་བསྟན་པའི་ཕྱིར། བདེན་དོན་རྣམ་པ་བཅུ་གཉིས་ལྡན། །ཞེས་པ་སྟེ། བདེན་པ་བཞིའི་ཚུལ་གསུམ་དགའ་བ་བཞིར་རབ་ཏུ་ལྡན་པས་སོ། །དེ་ཉིད་རྣམ་པ་བཅུ་དྲུག་རིག །ཅེས་པ་ནི། 
འདི་དང་ལྡན་པའི་ཕྱག་རྒྱ་ལས་རིག་པར་འགྱུར་བའམ། དགའ་བ་ཉིད་བྱེ་བྲག་གི་དོན་གྱིས་བཅུ་དྲུག་ཏུ་འགྱུར་བའམ། དགའ་བ་ཉིད་བཅུ་དྲུག་འགྱུར་དུ་བཤད་དེ། དེ་ཡང་། ཡེ་ཤེས་སེམས་དཔའ་འཛིན་པའི་བདག །བཅུ་དྲུག་ཆར་ཡང་མི་ཕོད་དོ། །ཞེས་གསུངས་པའི་དོན་གྱིས་སོ། །རྣམ་

49-1-126b

པ་ཉི་ཤུས་བྱང་ཆུབ་པ། །ཞེས་པ་ནི། སྔར་བཞིན་གྱི་བྱེ་བྲག་གིས། ཇི་ལྟར་ས་གསེར་ཟླ་བ་མེ། །ཞེས་པ་ལ་སོགས་པ་དང་། དེ་ཉིད་རྣམ་པར་དག་པའི་རིགས་ལྔ་དང་། སངས་རྒྱས་ལྔ་དང་། སྐུ་ལྔ་དང་། ཡེ་ཤེས་ལྔ་དང་དབྱེར་མི་ཕྱེད་པར་གྱུར་པས། ཕུང་པོ་ལྔ་དང་། འབྱུང་བ་ལྔ་དང་། འདོད་ཡོན་ལྔ་དང་། དུག་
ལྔ་རང་བཞིན་གྱིས་ཞི་བར་གྱུར་པ་ལ་བྱ་སྟེ། དེ་ཡང་ས་དང་བཅས་པ་དང་། ས་ཕྱོགས་པར་ཤེས་པར་བྱའོ། །དེའི་ཕྱིར་རྣམ་པར་དག་པས་སངས་རྒྱས་ཀུན་གྱི་ཡེ་ཤེས་རིག་པ་སྟེ། མཆོག་ཅེས་གསུངས་པ་ནི་རང་གི་དོན་ཏེ། སངས་རྒྱས་དང་ཆོས་ལ་སོགས་པ་ནི་གཞན་གྱི་དོན་ཏོ། །ད་ནི་སྐད་ཅིག་ལ་སོགས་པ་
གཞན་གྱི་དོན་བསྟན་པར་བྱ་སྟེ། སྐད་ཅིག་ནི་མཚན་ཉིད་དང་བྲལ་བའོ། །ཐམས་ཅད་ནི་ཐམས་ཅད་ཀྱི་རང་བཞིན་ནོ། །མངོན་པར་རྟོགས་པ་ནི་བྲེ་ཚོམ་མེད་པའོ། །དེ་ཡང་ཡེ་ཤེས་ཐ་དད་པ་མ་ཡིན་པ་ནི་སེམས་ཀྱི་ཞེས་པ་ནི་ལྷན་ཅིག་སྐྱེས་པ་སྟེ། རང་གི་རང་བཞིན་དུ་བསྟན་པ་ནི་ཀྱི་ཞེས་བྱ། དེ་སྐད་
ཅིག་གི་དུས་དམིགས་པ་ན། དགའ་བ་སྣ་ཚོགས་ཉིད་དུ་བརྗོད། །མཆོག་དགའ་རྣམ་པར་སྨིན་པ་ཉིད། །དགའ་བྲལ་རྣམ་པ་མེད་པ་སྟེ། །ལྷན་ཅིག་དགའ་བ་མཚན་ཉིད་བྲལ། །ཞེས་གསུངས་པས་སོ། །དོན་ཀུན་རིག་ཅེས་པ་ནི། གཞན་མི་དམིགས་པར་བསྟན་པའོ། །འགྲོ་བ་ལ་གདོད་མ་
ནས་བསྟན་པར་རིག་པ་མ་ཡིན་ཏེ། ཐེག་པ་སྣ་ཚོགས་ཐབས་ཚུལ་གྱིས། །འགྲོ་བ་འདོན་པར་མཛད་པ་ཡིན་གྱིས་དོན་ལ་རྟོགས་པ་བསྐྱེད་པའི་ཕྱིར་ཏེ་བཤད་ཟིན་ཏོ། །གོང་མ་ལ་འཇུག་པར་མི་འགྱུར་བ་མ་ཡིན་ཏེ། སྨོན་ལམ་གྱིས་དགེ་བའི་བཤེས་གཉེན་དང་ཕྲད་ལ། དེས་གོ་རིམས་བསྟན་
པའི་ཕྱིར་ཐེག་པ་ཞེས་བྱ་བ་ལ་སོགས་པ་གསུངས་སོ། །ཐེག་པ་བཞི་པོ་ཡོད་པར་ནི་མ་ཡིན་ཏེ། གཅིག་ཉིད་ཁྱད་པར་དུ་བྱས་པའོ། །ཉོན་མོངས་པ་ལ་སོགས་པ་བག་ཆགས་ཀྱི་ས་བོན་མི་གནས་པར་སྟོན་ཏེ། ཉོན་མོངས་པ་ནི་ལྔའོ། །ཁམས་རྣམས་ཞེས་པ་ནི་བཅོ་བརྒྱད་དོ། །དག་པའི་
བདག་ཅེས་པ་ནི་རང་བཞིན་གྱིས་ལུས་སུ་གྱུར་པའོ། །ལས་ཀྱི་ཁམས་རྣམས་ཞེས་པ་ནི་གསུམ་སྟེ་ཟད་པར་བྱེད་པའོ། །ཆུའི་རྒྱ་མཚོ་ནི་འདོད་པ་དང་། སྲིད་པ་དང་། ལྟ་བ་དང་། མ་རིག་པའོ། །བརྒལ་བ་ནི་ཐར་པའོ། །དེ་ཡང་སྦྱོར་བ་ནི་ནང་རྟེན་ཅིང་འབྲེལ་བར་འབྱུང་བའི་སྦྱོར་བའོ། །སེམས་

49-1-127a

དབེན་པ་ཐོབ་པའི་དགོན་པ་ལས་འབྲས་བུ་འབྱུང་བས་ན། ཐེག་པའི་བྱེ་བྲག་བླ་ན་མེད་པ་ལ་དགོས་པ་ཡོད་དོ། །བག་ཆགས་དང་རྗེས་སུ་མཐུན་པར་ས་བོན་བྲལ་བ་ནི་མ་རིག་པ་དང་། སྲེད་པ་དང་། ལེན་པ་ལ་ཉོན་མོངས་པ་ཞེས་བྱའོ། །སྲིད་པ་དང་། འདུ་བྱེད་ལ་ཉེ་བའི་ཉོན་མོངས་
པ་ཞེས་བྱའོ། །རྣམ་པར་ཤེས་པ་དང་། མིང་དང་གཟུགས་དང་། སྐྱེ་མཆེད་དྲུག་དང་། རེག་པ་དང་། ཚོར་བ་དང་། སྐྱེ་བ་དང་། རྒ་ཤི་ནི་ཀུན་ནས་ཉོན་མོངས་པ་ཞེས་བྱ་སྟེ། གཏན་སྤངས་པ་ནི་དུག་སྔགས་ཀྱིས་བཏུལ་བས་དུག་ཏུ་མི་འགྱུར་བ་བཞིན་ནོ། །བདེ་བ་ཆེན་པོའི་ཐབས་ཁོ་ནར་གྱུར་པ་མ་
ཡིན་ཏེ། སྙིང་རྗེ་ཆེན་པོ་ཤེས་རབ་ཐབས། །ཞེས་པས་ཟུང་དུ་འཇུག་པའོ། །དེས་ཇི་ལྟར་འགྱུར་བ་ནི། དོན་ཆེན་འགྲོ་བའི་དོན་བྱེད་པ། །ཞེས་སོ། །དེ་ཡང་འགོག་པའི་སྙོམས་པར་འཇུག་པའི་དོན་དང་། འདུ་ཤེས་མེད་པའི་སྙོམས་པར་འཇུག་པའི་དོན་དང་། གཟུགས་ཀྱི་ཁམས་ཀྱི་དོན་དང་། 
གཟུགས་མེད་པའི་ཁམས་ཀྱི་དོན་སྤོང་བས་ན། འདུ་ཤེས་ཀུན་གྱི་དོན་སྤངས་ཤིང་། །ཞེས་པ་ནི་བཅོམ་ལྡན་འདས་སོ། །རྣམ་ཤེས་ནི་རྣམ་ཤེས་མཐའ་ཡས་ལ་སོགས་པ་སྟེ། གཟུགས་མེད་པའི་སྐྱེ་གནས་ཀྱི་དོན་ནི་འགོག་པར་བྱེད་པའོ། །གང་གི་དོན་བྱེད་པ་བསྟན་པའི་ཕྱིར། སེམས་
ཅན་ཀུན་གྱི་ཡུལ་དང་ལྡན། །ཞེས་གསུངས་ཏེ། ཡིད་དང་མཐུན་པར་རོ། །དེས་ཇི་ལྟར་འགྱུར་ཞེ་ན།  སངས་རྒྱས་ཀུན་གྱི་ཐུགས་སེམས་ཅན་གྱི་རིགས་པར་ནུས་སོ། །དཔེ་ཉེ་བར་གྲུབ་པ་མ་ཡིན་ཏེ། སེམས་ཅན་ཀུན་གྱི་ཡིད་ལ་གདོད་མ་ནས་སངས་རྒྱས་ཀྱི་ཐུགས་གནས་པར་སེམས་
ཅན་དེ་དག་གི་སེམས་དག་དང་། སངས་རྒྱས་ཀུན་གྱི་ཐུགས་ཀྱི་རང་བཞིན་གཅིག་པས་མཐུན་པར་འཇུག་པའོ། །གཞན་གྱི་དོན་གྱིས་འགྱུར་བ་མ་ཡིན་ཏེ། །སེམས་ཅན་གྱི་ཡིད་ཚིམ་པར་མི་ནུས་པའི་ཕྱིར་རོ། །དེ་བས་ན་སེམས་ཅན་ཀུན་གྱི་ཡིད་ཚིམ་པར་བྱེད་པ་སྟེ། རྣམ་རྟོག་ཟད་པར་བྱེད་པའོ། །དེ་ཙམ་
དུ་མ་ཟད་ཀྱི། སེམས་ཅན་ཀུན་གྱི་ཡིད་དགའ་བ། །ཞེས་པས་ལྷན་ཅིག་སྐྱེས་པ་ཐོབ་པའོ། །གཏན་ལ་ཕབ་པའི་ཡིད་མེད་པས་གྲུབ་པའི་མཐར་ཕྱིན་འཁྲུལ་པ་མེད་པའོ། །ནོར་བ་ཐམས་ཅད་རྣམ་པར་སྤངས། །ཞེས་པས། དོན་ཇི་ལྟ་བ་ལ་བློ་ཇི་ལྟ་བ་བཞིན་ཞུགས་པའོ། །དོན་གསུམ་ནི་འདས་པ་

49-1-127b

དང་མ་འོངས་པ་དང་། ད་ལྟར་བྱུང་བ་གསུམ་དུའོ། །ཐེ་ཚོམ་མེད་པའི་བློ་ཞེས་པ་ནི་རྒྱུན་གཅིག་པར་རོ། །ཀུན་དོན་ནི་གཡོ་བ་དང་མི་གཡོ་བ་ཀུན་གྱི་དོན་མཛད་པའོ། །དེའི་འཐད་པ་ནི། ཡོན་ཏན་གསུམ་གྱི་བདག་ཅེས་བྱ་སྟེ། རྡུལ་མུན་པ་སྙིང་སྟོབས་གསུམ་ཡང་འགྲོ་བའི་དོན་དུ་བསྟན་པའོ། །ཉན་ཐོས་ལ་ཕུང་པོ་དང་དོན་
གསུམ་དུ་བདག་མེད་པར་སྟོན་པའོ། །ཐེག་པ་ཆེན་པོ་ལ། སྐད་ཅིག་ཐམས་ཅད་བྱེ་བྲག་ཕྱེད། །ཅེས་པ་སྟེ། རྒྱུའི་དུས་སུ་དགེ་བའི་ཆོས་ཚོལ་བ་དང་ཐོས་པ་དང་བསམ་པ་དང་བསྒོམ་པ་ཐམས་ཅད་ཤེས་རབ་ཀྱིས་སོ་སོར་རིག་པས་སོ། །སྐད་ཅིག་གཅིག་གིས་རྫོགས་སངས་རྒྱས། །ཞེས་པ་ནི་འབྲས་བུའི་དུས་
ན་ཟད་པའི་ཡེ་ཤེས་དང་། མི་སྐྱེ་བའི་ཡེ་ཤེས་ཐོབ་པར་སྟོན་ཏོ། །རྒྱུ་འབྲས་རྗེས་སུ་མཐུན་ཏེ། ལྷན་ཅིག་སྐྱེས་པའི་རྐྱེན་ནི་དུ་མ་ཡིན་ལ། ཉེ་བར་ལེན་པའི་རྒྱུ་ནི་གཅིག་ཁོ་ནས། །སངས་རྒྱས་ཀུན་གྱི་རང་བཞིན་འཆང་། །ཞེས་པས་རྒྱུ་འབྲས་རྗེས་སུ་མཐུན་པས་ཐམས་ཅད་གཅིག་པ་ཉིད་དོ། །ལུས་མི་འབྱུང་བ་མ་ཡིན་ཏེ། 
ལུས་མེད་ཅེས་པས་རྣམ་པར་སྨིན་པའི་ལུས་མེད་ཅེས་ནི་ཆོས་ཀྱི་སྐུ་ཅན་ནོ། །ལུས་ཀྱི་མཆོག་ཅེས་པས་ཡེ་ཤེས་ཀྱི་ཕུང་པོ་ཅན་དུ་སྣང་བའོ། །དུ་མ་དང་སྣ་ཚོགས་འབྱུང་བ་ནི་ལུས་ཀྱི་མཐའ་རྟོགས་པའི་ཕྱིར་རོ། །དེ་བས་ན་གཟུགས་ལ་སོགས་པའོ། །ཇི་ལྟར་འགྱུར་བ་ནི་ནོར་བུ་རིན་ཆེན་ལྟར་རོ། །དགའ་བ་མ་
ཡིན་ཏེ། རིན་ཆེན་རྟོག་ཅེས་པས་ཁམས་གསུམ་གྱི་རྒྱལ་མཚན་ནི། དེ་དག་གིས་མཉམ་པ་ཉིད་ཀྱི་ཡེ་ཤེས་ལ་བསྟོད་པའོ། །ད་ནི་སངས་རྒྱས་ཞེས་བྱ་བ་ལ་སོགས་པས་བསྡུས་ཏེ་བསྟན་པའི་ཕྱིར་རོ། །སངས་རྒྱས་ཀུན་གྱི་རྟོགས་པ་དང་མཁྱེན་པ་དང་། མངོན་དུ་མཛད་པ་ནི་སངས་རྒྱས་ཀྱི་བྱང་ཆུབ་གསུམ་དང་། བླ་ན་
མེད་པའི་བདེ་བ་ཆེན་པོ་སྟེ། བྱ་བ་ནན་ཏན་དེ་བཞིན་དུ་འདིར་ཡང་སངས་རྒྱས་དང་སེམས་ཅན་རྒྱུད་གཅིག་ཏུ་རྟོགས་པར་བྱ་བ་དང་། ཐམས་ཅད་སེམས་ཀྱི་ཁྱད་པར་དུ་ཤེས་པར་བྱ་བ་དང་། འབད་པ་མེད་པ་རང་གི་ངང་གིས་འབྱུང་བ་ལ་མངོན་དུ་བྱུང་བ་ནི་བླ་ན་མེད་པ་སྟེ། བྱ་བ་ནན་ཏན་གྱི་ཡེ་ཤེས་སོ། །དེ་ཉིད་གསལ་བར་
བྱ་བའི་ཕྱིར། གསང་སྔགས་འཆང་ཞེས་བྱ་བ་ལ་སོགས་པ་གསུངས་ཏེ། དེ་ཡང་ཡེ་ཤེས་ཉིད་དང་། དེའི་རྣམ་འཕྲུལ་དང་། མ་རིག་པའི་རླུང་དང་། རླུང་བཅུ་དང་། ངག་དང་། ཡི་གེ་དང་། མིང་དང་། ཚོགས་རྣམས་ནི་བསམ་གྱིས་མི་ཁྱབ་པའི་གསང་སྔགས་འབྱུང་བས་སྐྱེ་གནས་སོ། །ཡི་གེ་མེད་ཅེས་པ་ནི་དེ་ཉིད་གདོད་མའི་

49-1-128a

གནས་སུ་ཐིམ་པས་སྤྲོས་པ་ལས་འདས་པའོ། །དེ་ཉིད་མཚོན་པར་བྱེད་པ་ནི་ཡི་གེ་སྟེ། ཨོཾ་ཨཱཿཧཱུཾ་ངོ་། །དེ་ལ་གསང་སྔགས་ཆེན་པོ་ཞེས་གསུངས་ཏེ། སྐུ་གསུང་ཐུགས་ཀྱི་རིགས་ཡིན་པའི་ཕྱིར་རོ། །དེ་ལས་རིགས་ལྔ་དང་། དྲུག་ཏུ་འགྱུར་ཞིང་གསང་སྔགས་ཀྱི་དོན་མཆོག་དང་ཐུན་མོང་གི་དངོས་
གྲུབ་དོན་ཀུན་སྐྱེད་པ་པོར་བྱེད་པ་ནི་བྱ་བ་ནན་ཏན་ནོ། །དེ་ཡང་ཐབས་དང་ཤེས་རབ་ཀྱི་རིགས་གཉིས་སུ་བསྡུ་བའི་ཕྱིར། ཐིག་ལེ་ཆེན་པོ་ཞེས་བྱ་སྟེ། ཨེ་ཝཾ། དེ་ཡང་བདེ་བ་ཆེན་པོའི་རིགས་གཅིག་ཏུ་བྱ་བའི་ཡི་གེ་མེད་ཅེས་བྱའོ། །དེ་ཉིད་ཡི་གེ་སྣ་ཚོགས་སུ་སྣང་བས་སྟོབས་པོ་ཆེ་ཞེས་བྱའོ། །དབྱངས་ཡིག་བཅུ་
གཉིས་སོ། །ཡི་གེ་ལྔ་སྟེ། ཨོཾ་ཧཱུཾ་ཏྲཱཾ་ཧྲཱིཿཨའོ། །ཐིག་ལེ་རང་གི་ས་བོན་ཏེ། མུཾ་སེམས་ཀྱི་ངོ་བོའོ། །སྟོང་པ་ནི་རིག་པར་འཛིན་པ་མེད་པར་རོ། །ཡི་གེ་བརྒྱ་ཞེས་པ་ནི་ཕྱོགས་གཅིག་མཚོན་པ་ཙམ་དུ་ཟད་ཀྱི རི་རབ་ཀྱི་རྡུལ་ཕྲ་རབ་སྙེད་དུ་ཡང་འགྱུར་ལ། ཡོན་ཏན་ཡང་དེ་སྙེད་དུ་འགྱུར་བ་སྟེ། དོན་སྔར་བཤད་པའི་ཡི་གེ་
དྲུག་གི་རང་བཞིན་དུ་བསྡུ་བར་བྱའོ། །རྣམ་པ་ཀུན་ལྡན་ནི་འཇིག་རྟེན་དང་འཇིག་རྟེན་ལས་འདས་པའོ། །རྣམ་པ་མེད་པ་དེ་ཉིད་གཟུགས་བརྙན་གྱི་རྣམ་པར་རོ། །བཅུ་དྲུག་གི་དབྱངས་ཡིག་གོ། །ཕྱེད་ནི་གྲོང་ཁྱེར་དཀྲུགས་པའོ། །གཉིས་པ་ནི་གླེང་གཞིའོ། །ཐིག་ལེ་ནི་རྡོ་རྗེ་འཆང་དང་མི་བསྐྱོད་པའོ། །འཆང་བ་ནི་དབུགས་དབྱུང་བའོ། །
ཡན་ལག་མེད་པ་ནི་ཕྱི་རོལ་གྱི་རྫས་དགག་པའོ། །རྩིས་ནི་བརྟགས་པའོ། །དེ་ལས་འདས་པ་ནི་བདེ་བ་ཆེན་པོའོ། །བསམ་གཏན་བཞི་ནི་དགའ་བ་དང་། བདེ་བ་དང་། སེམས་རྩེ་གཅིག་པ་དང་། དྲན་པ་སྟེ་དགའ་བ་ལ་སོགས་པ་ཉིད་དོ། །རྩེ་མོ་ཅན་ནི་རོ་གཅིག་པ་ཉིད་དོ། །འཇིག་རྟེན་པར་འགྱུར་བ་མ་ཡིན་ཏེ། བསམ་གཏན་
ཡན་ལག་ཀུན་ཤེས་ཤིང་། །ཞེས་པས་རྟོག་པ་དང་། དཔྱོད་པ་དང་། དགའ་བ་དང་། བདེ་བ་ནི་དང་པོའོ། །རྟོག་པ་དང་བཅས་དཔྱོད་པ་མེད་པའི་དགའ་བ་དང་། བདེ་བ་ནི་གཉིས་པའོ། །དགའ་བ་མེད་པའི་བཏང་སྙོམས་དང་། དྲན་པ་ཡང་དག་པར་བརྗོད་པ་ནི་གསུམ་པའོ། །སྡུག་བསྔལ་དང་། བདེ་བ་མེད་པ་བཏང་སྙོམས་ཀྱི་དྲན་པ་
ཡོངས་སུ་དག་པ་ནི་བཞི་པའོ། །མཁྱེན་པས་དོན་ཡོད་པ་ནི་ཏིང་ངེ་འཛིན་གྱི་རིགས་དུ་མ་དང་། གང་ཟག་གི་རྒྱུད་དུ་མ་རིག་པས་རྩེ་གཅིག་བསྒོམ་པའི་རིགས་ཀྱི་དབྱེ་བས་ཉན་ཐོས་ལ་སོགས་པའི་གཟུང་བའི་མཆོག་ལ་དབུགས་དབྱུང་གཉིས་ལྷག་པར་སྟོན་ཏེ། ཏིང་འཛིན་ལུས་ཅན་ནི་གང་ཟག་གོ། །ལུས་ཀྱི་

49-1-128b

མཆོག་ནི་ཆོས་སྐུའོ། །དེ་ཉིད་ནི་འཇམ་དཔལ་ཡེ་ཤེས་སེམས་དཔའ་སྟེ། ལོངས་སྤྱོད་རྫོགས་པ་ལ་སོགས་པར་སྣང་ངོ་། །ཐུན་མོང་འཕྲུལ་པ་ནི། དེ་བཞིན་འགྲོ་བའི་དོན་བྱེད་པ། །ཞེས་པ་སྟེ། ལྷའི་དབང་པོ་ནི་ཁྱབ་འཇུག་གོ། །ལྷའི་ལྷ་ནི་ཚངས་པའོ། །ལྷའི་བདག་པོ་ནི་བརྒྱ་བྱིན་ནོ། །ལྷ་མ་ཡིན་གྱི་བདག་པོ་ནི་རཱ་ཧུ་ལའོ། །
འཆི་མེད་དབང་པོ་ནི་ཉེ་དབང་ངོ་། །ལྷའི་བླ་མ་ནི་ཕུར་བུའོ། །འཇོམས་བྱེད་ནི་ཐགས་བཟངས་རིས་སོ། །གཉིས་པ་ནི་སྲིན་པོའི་བདག་པོའོ། །དབང་ཕྱུག་ནི་མ་ཧཱ་དེ་བ་སྟེ། བཅོམ་ལྡན་འདས་ལ་སོགས་པའི་རང་རང་གི་རྒྱལ་པོར་བསྟོད་པའོ། །དེ་བས་སེམས་ཅན་ཐམས་ཅད་སྲེད་པའི་དགོན་པ་ལས་རྒལ་བར་མཛད་
པ་ནི་སྟོན་པ་གཅིག་པུ་སྟེ། དེ་བས་ན་འགྲོ་བའི་བླ་མར་གྱུར་པའོ། །དེ་ལྟར་གྱུར་པར་བསྟན་པའི་ཕྱིར་འཇིག་རྟེན་ལ་སོགས་པའོ། །དགོངས་པ་ཇི་ལྟ་བུ་མངའ་བ་བསྟན་པའི་ཕྱིར། བྱམས་པའི་གོ་ཆས་ཆས་པ་སྟེ། །ཞེས་པ་ནི་ཕྱོགས་མེད་པའོ། །སྙིང་རྗེ་ཡི་ནི་ཡ་ལད་བགོས། །ཞེས་པ་ནི་སྡུག་བསྔལ་དང་བྲལ་བར་བྱེད་
པ་སྟེ་བསྲུང་བའོ། །ཤེས་རབ་རལ་གྲི་མདའ་གཞུ་ཐོགས། །ཞེས་པ་ནི་རྟགས་དང་དོན་ཏེ་ཤེས་རབ་དང་རིགས་པས་ནང་དང་། ཕྱིའི་སྒྲོ་འདོགས་མི་མངའ་བ་དང་ཁ་སྦྱོར་སྙོམས་པར་འཇུག་པའོ། །མི་ཤེས་པ་ནི་གཏི་མུག་གོ། །གཡུལ་ངོ་ནི་སེམས་དང་པོ་བསྐྱེད་པའི་དུས་སོ། །སེལ་བ་ནི་དག་པར་མཛད་པའོ། །
དཔའ་བོ་ནི་བཅོམ་ལྡན་འདས་སོ། །བདུད་ནི་བཞིའོ། །དགྲ་ནི་ལོག་པར་འདྲེན་པའོ། །བདུད་འདུལ་བ་ནི་བཏུལ་བ་སྟེ་རྡོ་རྗེ་གདན་ལའོ། །དེའི་མཐུ་ནི་བདུད་བཞི་ལ་སོགས་པའོ། །མཆོད་པའི་འོས་སུ་བསྟན་པའི་ཕྱིར། དེ་བས་ན།  རྫོགས་པའི་སངས་རྒྱས་འཇིག་རྟེན་འདྲེན། །ཞེས་བྱ་སྟེ། ཁྱོད་ཉིད་ཐམས་
ཅད་དུ་འཁྲུལ་ཞིང་རིམ་གྱིས་དབང་པོའི་བྱེ་བྲག་དང་མཐུན་པར་བསྟན་པ་ཁྱོད་ཉིད་དུ་མ་གྱུར་པ་དང་། མི་འགྱུར་བ་མེད་ཅེས་བྱ་བའི་དོན་ཏོ། །དེ་བས་ན་འདི་དག་ལ་གཉིས་སྦྱར་ཏེ། རྟགས་ནི་གཞུང་ལྟར་རོ། །གཞན་པ་ཡང་མཆོད་འོས་ནི་ཐོས་པ་དང་དྲན་པ་མཐར་ཕྱིན་པའོ། །བསྟོད་འོས་ནི་རང་བཞིན་གཅིག་
ཏུ་རྟོགས་པའོ། །ཕྱག་གི་གནས་ནི་ཐམས་ཅད་ཀྱི་སྐྱེ་གནས་སུ་གྱུར་པས་སོ། །རྟག་ཏུ་རི་མོར་བྱ་བའི་འོས་ནི་ཐེག་པ་གསུམ་གྱི་རང་རང་གི་ལམ་རྒྱུད་ལ་སྦྱངས་པའོ། །བཀུར་འོས་ནི་བྱང་ཆུབ་སེམས་དཔའ་རྣམས་ཀྱི་སྟེ།  ལམ་དངོས་བསྟན་པའོ། །བརྗོད་པར་བྱ་བའི་མཆོག་ནི་ཐེག་པ་ཆེན་པོ་པ་རྣམས་

49-1-129a

ཀྱི་སྟེ་རང་བཞིན་གྱིས་དོན་ཕུན་སུམ་ཚོགས་པ་སྣང་བས་སོ། །ཕྱག་བྱ་བའི་འོས་ནི་སྔགས་སྤྱོད་པ་རྣམས་ཀྱི་སྟེ་རང་རིག་སྟོན་པས་སོ། །བླ་མའི་རབ་ནི་དབང་ཐོབ་པ་རྣམས་ཀྱི་སྟེ། དེ་ཁོ་ན་ཉིད་མཐོང་བ་དང་། ཆོས་ཐམས་ཅད་བྱིན་གྱིས་བརླབས་པས་སོ། །བྱ་བ་ནན་ཏན་གྱི་ཡེ་ཤེས་ཐུགས་སུ་ཆུད་པའི་
རྫུ་འཕྲུལ་གྱིས་འཇིག་རྟེན་ལ་སོགས་པའོ། །གསུམ་རིག་ནི་དུས་མཁྱེན་པ་དང་། མཆོད་པ་མཁྱེན་པ་དང་མཉམ་པའི་མཚན་ཉིད་མཁྱེན་པ་ཡིན་ལ། གཙང་མ་དག་པ་སྟེ། ཞེས་བྱ་བ་ནི་མི་སླུ་ཞིང་རིག་པ་ལ་ཐེ་ཚོམ་མི་མངའ་བའོ། །མངོན་ཤེས་དྲུག་ལྡན་ནི་ལྷའི་མིག་ལ་སོགས་པའོ། །རྗེས་དྲན་དྲུག་ནི་
སངས་རྒྱས་དང་ཆོས་དང་དགེ་འདུན་དང་ཡི་དམ་དང་ཚིག་དྲན་པ་མངའ་བའོ། །བྱང་ཆུབ་སེམས་དཔའ་ནི་ཐེག་པ་གཞན་གྱི་ཡབ་ཏུ་གྱུར་པའོ། །སེམས་དཔའ་ཆེན་པོ་ནི་ཐེག་པ་ཆེན་པོའི་ཡང་ཡབ་ཏུ་གྱུར་པའོ། །རྫུ་འཕྲུལ་ཆེན་པོ་ནི་བསོད་ནམས་ཀྱི་ཚོགས་རྫོགས་པའོ། །འཇིག་
རྟེན་འདས་པ་ལ་སོགས་པ་ནི་ཡེ་ཤེས་ཀྱི་ཚོགས་རྫོགས་པའོ། །མཇུག་བསྡུ་བར་བྱ་བའི་ཕྱིར། གཙོ་བོ་ཆོས་ཀྱི་སྦྱིན་བདག་སྟེ། །ཞེས་བྱ་བའི་དོན་ནི་འདིར། ཕྱག་རྒྱ་བཞི་ཡི་དོན་སྟོན་པ། །ཞེས་བྱ་བའི་དོན་ཏེ། རིགས་ཕྱག་རྒྱ་བཞི་ནི་བསྐྱེད་པའི་རིམ་པའོ། །རྟགས་ཕྱག་
རྒྱ་བཞི་ནི་བྱིན་གྱིས་བརླབས་པའི་དུས་སུའོ། །དོན་ཕྱག་རྒྱ་བཞི་ནི་ལམ་གྱི་དུས་སུའོ། །ཉེས་མཆིས་གྱུར་པ་ལ་སོགས་བཟོད་པར་མཛོད། །ཤེས་རབ་ཡུལ་ནི་མཐའ་དང་བྲལ། །ཟབ་མོའི་དོན་ནི་གཞལ་དཀའ་བས། །གཞལ་བྱ་འཇལ་བྱེད་ཀྱིས་སྟོང་པའི། །
འགྲོ་ཀུན་སྙིང་པོ་ལེན་པར་ཤོག །སྔགས་པ་རྣལ་འབྱོར་ལ་མི་མཁས། །ཕལ་ཆེར་བག་མེད་ལམ་འགྲོ་ལ། །སྙིང་པོ་མངོན་རྟོགས་འདི་བརྗོད་པས། །ཐམས་ཅད་རྣལ་འབྱོར་ལ་འཇུག་ཅིང་། །འཇམ་དཔལ་ཡེ་ཤེས་སེམས་དཔའ་ཡི། །དོན་ནི་ངོ་
བོར་འགྱུར་བར་ཤོག །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་འགྲེལ་པ་སྙིང་པོ་མངོན་པར་རྟོགས་པ་ཞེས་བྱ་བ། སློབ་དཔོན་ཆེན་པོ་དཔལ་གཉིས་མེད་རྡོ་རྗེས་མཛད་པ་རྫོགས་སོ།།      །།རྣལ་འབྱོར་པ་ཆེན་པོ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་བྱས་པའོ།།      །།

49-1-129b

༄༅༅། །རྒྱ་གར་སྐད་དུ། ཙརྱ་ད་ཤ་ཀ་སྭ་བྷཱ་བ་ས་ནཱ་མ། བོད་སྐད་དུ། རང་བཞིན་དུ་གནས་པའི་སྔགས་ཀྱི་སྤྱོད་པ་བཅུ་པ་ཞེས་བྱ་བ། འཕགས་པ་འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །བླ་མ་དང་ནི་ལྷག་པའི་ལྷ། །ཐ་དད་མེད་པར་མཆོད་པར་བྱ། །
འགྲོ་བ་རྣམས་དང་རང་ཉིད་ལ། །བདག་གཞན་མི་འབྱེད་དུས་གསུམ་གཏེར། །ལུས་དང་ལོངས་སྤྱོད་སྲག་རྣམས་ཀྱིས། །འགྲོ་བའི་མཆོག་གཙོ་བཙལ་བས་རྙེད། །དེ་ཡིས་དབང་བསྐུར་རིན་པོ་ཆེ། །དུས་གསུམ་དུ་ནི་དྲན་པར་བྱེད། །ཕྱི་དང་ནང་གི་ཆོས་སྤྱོད་ཀུན། །གཉེན་པོ་བསྟེན་པས་
མ་ཡིན་ཞིང་། །དད་པའི་སྟན་ལས་གང་འོངས་པ། །ཁ་ཟས་བཞིན་དུ་བསྟེན་པར་བྱ། །ལྷ་ཡི་རྣལ་འབྱོར་འབྱོར་བ་ཅན། །ཡང་ན་རིགས་གཟུངས་མཆོག་གཙོ་བོར། །བྱས་པའི་གང་ཡིན་དེ་དག་ནི། །ཐུན་བཞིར་བསྟན་པས་བསྒོམ་པར་བྱ། །གལ་ཏེ་རྫོགས་པའི་སྐལ་ཡོད་ན། །ཡེ་ཤེས་སྐུ་སྟེ་
རབ་འབྱུང་བ། །འཇམ་དཔལ་ཡེ་ཤེས་སེམས་དཔའ་ཡི། །མིང་ནི་ཡང་དག་བརྗོད་པའི་མཆོག །བཟླས་བརྗོད་དོན་དང་ཀློག་པ་དང་། །བྱ་བའི་རིམ་པ་ལ་མོས་ན། །རིགས་གཞན་དུ་མ་མ་ཡིན་པའི། །རང་གི་རིགས་ལ་བསླབ་པར་བྱ། །གང་ཟག་འོ་མར་ལྡན་པ་དང་། །དེ་བཞིན་བཟའ་དང་མཐུན་
པའི་དུས། །སངས་རྒྱས་རྣམས་ནི་བསྡུས་བྱས་ལ། །བདུད་རྩི་མྱང་བ་བསྒྲུབ་པར་བྱ། །གླུ་དང་གར་ནི་ཇི་སྙེད་དང་། །དེ་བཞིན་ཡུལ་ལ་རོ་སྙོམས་ན། །ཡུལ་གྱིས་བསླང་བ་མ་ཡིན་ཞིང་། །རང་གི་ཉམས་ཀྱིས་རོལ་པར་བྱ། །དབེན་པའི་གནས་ལ་བརྟེན་དུས་སུ། །གཙང་སྦྲ་ངོ་ཚ་སྤྱོད་པས་མིན། །
དོགས་པ་ཀུན་ལས་གྲོལ་བའི་སེམས། །བསྙུང་དང་དཀའ་ཐུབ་གནས་མི་བྱ། །སྐྱོ་དུབ་སྡུག་བསྔལ་ཅི་བྱུང་ཡང་། །དམ་པའི་དྲིན་གྱིས་གཟེངས་བསྟོད་དེ། །ཡི་ཆད་སྒྱིད་ལུག་མི་འགྱུར་བར། །སེམས་དགེ་བ་ལ་གནས་པར་བྱ། །སྔགས་ཀྱི་སྤྱོད་པ་ལ་གནས་པའི། །སྔགས་པ་མཁའ་
སྤྱོད་གནས་སུ་འགྲོ། །སྔགས་ལ་ཞུགས་ནས་སྤྱོད་པ་སྤོབ། །མཁའ་འགྲོ་སྐྲག་ཅིང་མནར་མེད་འགྲོ། །རང་བཞིན་དུ་གནས་པའི་སྔགས་ཀྱི་སྤྱོད་པ་བཅུ་པ་ཞེས་བྱ་བ། དཔལ་ལྡན་གཉིས་མེད་རྡོ་རྗེས་མཛད་པ་རྫོགས་སོ།།      །།རྣལ་འབྱོར་པ་བསོད་སྙོམས་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།།      །།

49-1-130a

༄༅༅། །རྒྱ་གར་སྐད་དུ། སྭ་པ་ན་ཨི་ཀྵ། བོད་སྐད་དུ། རྨི་ལམ་བརྟག་པ། འཕགས་པ་འཇམ་དཔལ་ཡེ་ཤེས་སེམས་དཔའ་ཆེན་པོ་ལ་ཕྱག་འཚལ་ལོ། །ལུས་ངག་ཡིད་གསུམ་རྟག་ཏུ་དང་བ་ཡིས། །འཇམ་དཔལ་ཡེ་ཤེས་སེམས་དཔའ་ལ་བཏུད་དེ། །རིགས་ཀྱི་ཕྱག་རྒྱ་རིན་ཆེན་ལྟ་བུ་ཡི། །
གང་དགོངས་འགྱུར་ཕྱིར་རྨི་ལམ་བཤད་པར་བྱ། །ཀུ་ཤའི་གདན་ལ་གནས་ནས་ཀྱང་། །དྲི་ལྡན་རྩྭ་ལ་སྔས་སུ་གཞུག །ཛཱ་ཏ་ཀ་ཡི་ཕྲེང་བ་བཅིང་། །བུ་མོ་གཞོན་ནུའི་འོ་མ་ལ། །སྔགས་ཀྱི་ཕྲེང་བ་བཟླས་ཤིང་བདར། །གཞན་དང་ལྡན་པ་མིག་ལ་བྱུགས། །དང་པོའི་ཆ་ནི་བག་ཆགས་འཁྲུག །གཉིས་པར་ཡི་
དྭགས་རྒྱུ་བར་འགྱུར། །ཐ་མར་རྨི་ལམ་བརྟགས་ལ་ཉལ། །མེ་ལོང་ལག་ཏུ་ཐོགས་པ་དང་། །ཚེས་གཅིག་ཟླ་བ་མཐོང་བ་དང་། །ཤིང་རྟའི་འཁོར་ལོ་ཞོན་པ་དང་། །གོས་དཀར་རྒྱན་དཀར་གྱོན་པ་དང་། །གླང་པོ་ལྕགས་ཀྱུས་འདུལ་བ་དང་། །སྙིང་རྗེས་དེད་དཔོན་བྱེད་པའོ། །རྨི་ལམ་ན་ནི་གསེར་རྙེད་
དང་། །རང་བཞིན་ཁྲུས་ལ་འཇུག་པ་དང་། །བུམ་པ་སྤྱི་གཙུག་བཞག་པ་དང་། །གླིང་གཞན་ཀུན་ལ་དབང་སྒྱུར་དང་། །རྟ་ཞོན་ནོར་བུའི་གླིང་འགྲོ་དང་། །མི་ཡི་ཁྱོགས་ཀྱིས་འདེགས་པའོ། །མེ་ཏོག་པདྨོ་ཐུ་བ་དང་། །གླེགས་བམ་ལག་ན་ཐོགས་པ་དང་། །དུང་ལ་སོགས་པ་འབུད་པ་དང་། །མེ་ཏོག་ཕྲེང་
བ་འདོགས་པ་དང་། །རྨ་བྱ་རྙི་ཡིས་འཛིན་པ་དང་། །སྙིང་རྗེས་པདྨ་ཆོས་འཆང་བའོ། །མཚོན་ཐོགས་གཡུལ་ལས་རྒྱལ་བ་དང་། །རྒྱལ་པོ་འཁོར་དུ་གྱུར་པ་དང་། །དམག་མི་གཡུལ་དུ་བསྐོར་བ་དང་། །ཞི་བའི་ལས་ལ་འགོད་པ་དང་། །བྱ་ཤར་ཏེ་རུ་ཕོ་ཉར་གཏོང་། །ནགས་ཚལ་མེ་ཡིས་བསྲེགས་
པའོ། །ཆུ་ལ་མི་ནུབ་རྐྱལ་བ་དང་། །ནམ་མཁའ་ལ་ཡང་འགྲོ་ཞིང་ལྡིང་། །ཉི་ཟླ་རྒྱན་དུ་གོན་པ་དང་། །སེང་གེ་ཁྲི་སྟན་གནོན་པ་དང་། །གདུགས་དཀར་ཕུབ་ཅིང་རྒྱལ་མཚན་བསྒྲེང་། །ཀུན་གྱིས་མཆོད་པའི་འོས་འགྱུར་བའོ། །ཁྲག་དང་ཆུ་སེར་ཟག་པ་དང་། །མེ་དཔུང་རྫི་ཞིང་མི་འཇིགས་དང་། །
སྦྲུལ་དང་སྡིག་པ་ཟ་བ་དང་། །རྡོ་རྗེ་དྲིལ་བུ་འཛིན་པ་དང་། །རི་བོ་རྩེ་ལ་གནོན་པ་དང་། །གྲོང་ཁྱེར་མཛུབ་མོས་སྐྱོར་བའོ། །བླ་མ་ཡི་དམ་མཆོད་པ་དང་། །གླེགས་བམ་འདྲི་ཞིང་མཆོད་རྟེན་བརྩིག །གཅེར་བུར་བྱུང་གླུ་གར་བྱེད་དང་། །དགེ་སློང་ཚོགས་དང་ལྷན་ཅིག་འགྲོགས། །གོས་

49-1-130b

བཟང་གྱོན་ཞིང་ཤིང་འབྲུ་ཟ། །དེ་བཞིན་གཤེགས་པའི་ཕྱག་རྒྱ་སྟེ། །ཤིས་པ་བརྗོད་ཅིང་ལུང་སྟོན་བྱེད། །ཆུ་ཡི་རྫིང་ཆེན་འཁྱིལ་བ་དང་། །གནས་ཁང་མཐོན་པོ་བརྩིག་པ་དང་། །ཡིད་དང་མཐུན་པར་འབྱུང་བའོ། །དགྲ་ཡིས་རྒྱན་དང་བྲལ་བ་དང་། །ན་ཆུང་མྱ་ངན་བྱེད་པ་དང་། །ཁྲི་མོན་ནང་དུ་བཅུག་
པ་དང་། །ནོར་ཕྲོགས་ལྕགས་སུ་བཅུག་པ་དང་། །འགྲོ་བ་ངན་པས་རྫི་བ་དང་། །གཅན་གཟན་ལུས་ལ་འཕྱང་བ་དང་། །སྲད་བུས་དཀྲིས་ཤིང་དྲི་མས་གཡོགས། །དྲི་མ་ཟ་ཞིང་དྲི་མ་འཐུངས། །བླ་མ་སློབ་དཔོན་གྲོགས་པོ་དང་། །ཕ་མ་རྣམས་ནི་མཐོང་ནས་འབྲོས། །ཤིན་ཏུ་གཅོང་རོང་མི་མེད་
དང་། །ཡང་ན་འབྲོག་དགོན་ལ་སོགས་པར། །ཟས་དང་སྐོམ་གྱིས་ཉམ་ཐག་སྟེ། །ཀྱི་ཧུད་བདག་སྡུག་ཟེར་གྱི་གཡའ། །གོ་ཆ་བཤུས་ནས་མཚོན་གྱིས་འདེབས། །ནགས་ཀྱི་དཀྱིལ་ན་ཕྱིན་ནས་ཀྱང་། །སྟག་དང་ཅེ་སྤྱང་དུད་འགྲོ་འདེབས། །དེ་སོགས་ཡིད་གདུང་བར་འབྱུང་བ། །དགེ་དང་མི་
དགེའི་ལྟས་སུ་རིགས། །རྣམ་པར་སྣང་མཛད་རིན་ཆེན་འབྱུང་ལྡན་དང་། །འོད་དཔག་མེད་དང་དོན་ཡོད་གྲུབ་པ་དང་། །མི་བསྐྱོད་པ་དང་རྡོ་རྗེ་སེམས་རིགས་དྲུག །གོ་རིམས་ཉིད་དང་སྣ་ཚོགས་འདྲེས་པའོ། །ཤིས་པའི་རྨི་ལམ་ལ་ནི་སྒྲུབ་པ་རྩ་མ། །རིན་ཆེན་ཕྱག་རྒྱར་བཤད་པའི་ཆོ་ག་བཞིན། །མི་
དགེའི་ལྟས་ལ་ཏིལ་གྱི་སྦྱིན་སྲེག་བྱ། །རིགས་དེ་ཞིག་ལ་སྟོང་གིས་སྦྱངས་པའོ། །བག་ཆགས་ཡི་དྭགས་ཡིད་བྲིད་པ། །འཁོར་བའི་ཆོས་ཀུན་རྨི་ལམ་བཞིན། །རྣལ་འབྱོར་པ་ཡིས་བལྟ་བར་བྱ། །འཁྲུལ་པ་ཡང་དག་མིན་ཕྱིར་རོ། །བཟང་པོ་རྟོགས་ལས་ཡེ་ཤེས་སྐྱེ། །བློས་བརྟགས་དོན་ནི་
སྐྱེ་བ་མེད། །དེ་ཕྱིར་གསང་སྔགས་རྟེན་འབྱུང་གི། །ཐབས་ལ་རག་ལས་གཙོ་བོར་གཟུང་། །བྱང་ཆུབ་སེམས་བསྐྱེད་པ་དང་དབང་བསྐུར་བའི། །རྨི་ལམ་བསྟན་པ་ཀླུ་སྒྲུབ་གཞུང་ལས་བཏུས། ལེགས་དང་ཉེས་པའི་རིམ་པ་གསལ་བྱེད་པས། །འཇམ་དཔལ་ཡེ་ཤེས་སེམས་དཔའི་
ཞལ་མཐོང་ཤོག །རྨི་ལམ་བརྟག་པ། རྒྱ་གར་གྱི་མཁན་པོ་དཔལ་ལྡན་གཉིས་སུ་མེད་པས་མཛད་པ་རྫོགས་སོ།།      །།རྣལ་འབྱོར་པ་བསོད་སྙོམས་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།།      །།

49-1-131a

༄༅༅། །རྒྱ་གར་སྐད་དུ། ས་མཱ་དྷི་བུདྡྷ་བི་ཥ་གཱ་ཏ་བོ་དྷི་དཱི་པཾ་ནཱ་མ། བོད་སྐད་དུ། སངས་རྒྱས་ཀྱི་བྱང་ཆུབ་བསམ་གཏན་གྱི་དུག་སེལ་བར་བྱེད་པའི་མར་མེ་ཞེས་བྱ་བ། འཇམ་དཔལ་ཡེ་ཤེས་སེམས་དཔའ་ཆེན་པོ་ལ་ཕྱག་འཚལ་ལོ། །གང་གིས་དམ་པའི་ཞབས་ཀྱི་པདྨོ་ལ། །
ཡུན་རིང་བཏུད་པའི་མཐུ་ནི་གཟི་བརྗིད་ལྡན། །གང་ཞིག་རྒྱུད་ལ་བཙན་ཐབས་འཇུག་བྱེད་པ། །ཤེས་རབ་མིག་དང་མི་ལྡན་ཉམ་ངར་རྒྱུག །གདུང་བ་གཅོད་བྱེད་རྒྱུ་ནི་སེམས་པའི་ཤེས་རབ་སྟེ། །ཐམས་ཅད་ཐེག་ཆེན་ལམ་དུ་འཇུག་པའི་རིགས། །རབ་ཏུ་བྱེད་པའི་ལམ་དུ་མ་ཞུགས་པའི། །
བསམ་གཏན་པ་ནི་ནགས་ཀླུང་བུང་བ་བཞིན། །རིག་པའི་གནས་ལྔ་རྒལ་ཏེ་ཚར་གཅོད་གང་། །གཞུང་ལུགས་མི་ལྡན་པས་ནི་དོན་མ་རྙེད། །ཚོགས་རྒྱས་པ་ཡིས་རབ་ཏུ་ང་རྒྱལ་བ། །རྒྱལ་པོའི་སྒོ་བ་བཞིན་དུ་བདེ་བླག་བྲལ། །ཡེ་ཤེས་དྲུག་གི་ཡུལ་ལ་མ་ཞུགས་ན། །ཡིད་ནི་ངང་ཚུལ་ངན་པས་རྒྱ་
ཆེར་མིན། །རྟོགས་དང་ཉམས་སུ་མྱོང་བའི་མཐའ་བྲལ་བས། །བརྟེན་དང་གོམས་པ་མ་རྙེད་ཏ་ལ་འདྲ། །ཆོས་རྣམས་རྣམ་པར་དག་པའི་ཡེ་ཤེས་ནི། །གསེར་ལ་རྩིས་བསྒྱུར་རྒྱན་དུ་བྱས་པ་བཞིན། །གང་ཞིག་འབྲེལ་མེད་ཏིང་འཛིན་གང་བསྒོམ་པ། །ཐམས་ཅད་མཁྱེན་པར་མི་རུང་སངས་རྒྱས་མིན། །
བསྐྱེད་པའི་རིམ་ལ་གནས་ན་རྫོགས་རིམ་མཆོག །དེ་ཡང་སྙིང་པོ་སྦྱངས་ནས་གཅིག་འགྱུར་བ། །རྣམ་པའི་མཆོག་དང་ལྡན་པའི་བདེ་ཆེན་དེ། །ཡིད་བཞིན་ནོར་བུ་གཙུག་ཏུ་བཏགས་པ་བཞིན། །བསྐྱེད་པའི་རིམ་པ་གཅེས་སྤྲས་མཛོད་འཛིན་ན། །ལྷ་ཡི་བག་ཆགས་ཉིད་ཀྱིས་གྲོལ་མི་འགྱུར། །དེ་
བཞིན་ནང་དང་ཟབ་མོའང་དེ་ཡིན་ཏེ། །གླང་ཆེན་མིག་སྲུང་ཟུག་རྔུར་གྱུར་པ་བཞིན། །ལྡོག་པ་གཅོད་ལ་ཆོས་རྣམས་བརྒྱད་ཁྲིར་བདེན། །དེ་ཕྱིར་རིགས་དང་ཡེ་ཤེས་བདེ་གཤེགས་གསུང་། །རང་བཞིན་ཤེས་ན་གར་ཡང་བདེ་བ་མེད། །མི་བདེན་མེད་ཕྱིར་ཀུན་མཁྱེན་ཚིག་གིས་དབུལ། །དེ་ལྟར་བྱ་
བའི་རིམ་པ་ཞེས་པ་ནི། །ཀ་ཤི་ཝ་རྣམས་མུ་ཏིག་རྙེད་པ་བཞིན། །སངས་རྒྱས་ཐམས་ཅད་བདེ་བ་ཆེ་ལ་གནས། །གོ་ཅིག་འདྲེས་ཤིང་འདུས་པས་མཉམ་པ་ཉིད། །གཅིག་ལ་བསྟོད་པས་ཐམས་ཅད་བསྟོད་འགྱུར་བ། །ཡེ་ཤེས་སེམས་དཔའ་བརྗོད་པ་ཐུགས་མཐུན་ཡིན། །འཁོར་དང་མྱང་

49-1-131b

འདས་ཆོས་སུ་ཅི་སྣང་དང་། །སྣ་ཚོགས་འབྲུ་དང་སྣ་ཚོགས་བྱེད་པ་དང་། །སོ་སོའི་རྒྱུད་ལ་བདེན་པར་སྣང་མོད་ཀྱང་། །ཡེ་ཤེས་སེམས་དཔའི་སྤྲུལ་པ་ནོར་བུ་བཞིན། །འོད་ཀྱང་ཀུན་རྫོབ་ཙམ་དུ་ཐམས་ཅད་ཡོད། །གསུང་དག་པ་ལ་བརྟེན་ནས་འཕགས་པ་མཐོང་། །ཡིད་འོང་དེ་ནི་དགེ་བའི་ལས་
ལས་བྱུང་། །སྡུག་བསྔལ་མི་བསྟེན་ཕྱིར་ན་སྤང་བས་བྱ། །དེ་ཕྱིར་གསང་སྔགས་རྟེན་འབྲེལ་འབྱུང་བ་ཡི། །མན་ངག་རྒྱ་མཚོའི་གནས་ནི་རིན་ཆེན་བརྒྱུད། །འདི་ལས་འབྱུང་བཞིན་རྣལ་འབྱོར་པ་རྣམས་ཀྱིས། །སྐས་ཀྱི་རིམ་པ་བཞིན་དུ་རིམ་པར་བགྲོད། །མ་རིག་དང་བཅས་ཤེས་པ་འདི་ཡིས་ནི། །
གོ་བར་མི་རིགས་ཞེན་པའི་མཐུ་ལས་བྱུང་། །མི་གནས་སྙིང་པོ་རྒྱུད་ལས་སྐྱེས་པས་ན། །འཁྲུལ་པར་མི་རིགས་གདོད་མའི་མཐུ་ལས་བྱུང་། །རང་བཞིན་རྟག་ཅིང་མི་འགྱུར་རྟག་པ་ཉིད། །དྲི་ལྡན་ངེས་ཤེས་རང་རིག་རྒྱུད་ལས་བྱུང་། །རང་བཞིན་རྒྱུད་ལ་ཇི་ལྟར་ཡང་གནས་པ། །བསམ་པར་མི་ནུས་
ཨེ་མ་ངོ་མཚར་ཆེ། །སངས་རྒྱས་ཀྱི་བྱང་ཆུབ་བསམ་གཏན་གྱི་དུག་སེལ་བའི་མར་མེ་ཞེས་བྱ་བ། རྒྱ་གར་གྱི་མཁན་པོ་དཔལ་ལྡན་གཉིས་སུ་མེད་པའི་རྡོ་རྗེས་མཛད་པ་རྫོགས་སོ།།      །།རྣལ་འབྱོར་པ་བསོད་སྙོམས་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།།      །།
༄༅༅། །རྒྱ་གར་སྐད་དུ། ཛྙཱ་ན་སཏྭ་མཉྫུ་ཤྲཱི་ས་མཱ་དྷི་ཙཀྲ་མཱ་ན་ཨ་བ་ཏཱ་ར་ནཱ་མ། བོད་སྐད་དུ། འཇམ་དཔལ་ཡེ་ཤེས་སེམས་དཔའི་ཡིད་འཇུག་པའི་བསམ་གཏན་གྱི་འཁོར་ལོ་ཞེས་བྱ་བ། འཇམ་དཔལ་ཡེ་ཤེས་སེམས་དཔའ་ཆེན་པོ་ལ་ཕྱག་འཚལ་ལོ། །སྟོན་ཀའི་ཟླ་ལྟར་དཀར་ལ་དྲི་མ་མེད་པའི་སྐུ། །
རབ་ཏུ་སྐུ་མཛེས་གཞོན་ནུར་བཞུགས་ཤིང་ཡིད་དང་གནས། །ཡེ་ཤེས་སེམས་དཔའ་སངས་རྒྱས་ཀུན་གྱི་རང་བཞིན་ནི། །ཐུགས་ཀར་བཞུགས་ཤིང་ཉི་མ་སྟོང་ལྡན་འཁོར་ལོ་འཁྲུག །སེམས་ཅན་ཁུར་ཁྱེར་གླང་པོ་དེ་ལ་ཕྱག་འཚལ་ཏེ། །རྒྱུད་ཀྱི་གསང་སྔགས་འཁོར་ལོ་ཡིད་འཇུག་པ། །
ཀློག་གི་ཕྲེང་བ་ལྟ་བུས་བདུད་ཚོགས་ཟིལ་གནོན་ཅིང་། །བགེགས་དང་ལོག་པར་འདྲེན་པ་ཚར་གཅོད་མཚོན་ཆ་ཆེ། །རིགས་ལྔའི་དཔའ་བོའི་འཁྲུལ་འཁོར་བྲི་བར་བྱ། །དང་པོ་འཇམ་དཔལ་ཡེ་ཤེས་སེམས་དཔའི་རྣལ་འབྱོར་པས། །གནས་ཁོང་ཡིད་དུ་འོང་ཞིང་དབེན་ལ་བཀྲ་ཤིས་པ་ལྟར་

49-1-132a

ཏེ། །སངས་རྒྱས་གངྒཱའི་ཀླུང་གི་བྱེ་མ་དང་མཉམ་པ་ལ་མཆོད་བསྟོད་དེ། །སྔགས་ཀྱི་ཕྲེང་བ་ལན་བདུན་དུ་བརྗོད་པ་པོ། །སངས་རྒྱས་གངྒཱའི་ཀླུང་གི་བྱེ་མ་དང་མཉམ་ས་བོན་ལ་བསྡུས་པས། །འོག་ནས་འབྱུང་བ་དང་མཐུན་པ་ཡི་སྐུར་གྱུར་ཏེ། །སྔགས་ཀྱི་ཕྲེང་བ་འདི་མགལ་
མེའི་འཁོར་ལོ་ལྟ་བུར་སྟོང་ཕྲག་བཅུའི་བཟླས་པ་བྱའོ། །ཨོཾ་སརྦ་དྷརྨཱ་ཨ་བྷཱ་བ་སྭ་བྷཱ་བ་བི་ཤུདྡྷ་བཛྲ་ཙཀྵུ། ཨ་ཨ་ཨཾ་ཨཿཔྲ་ཀྲྀ་ཏི་པ་རི་ཤུདྡྷ། སརྦ་དྷ་རྨཱ་ཡ་དུ་ཏ། སརྦ་ཏ་ཐཱ་ག་ཏ། ཛྙཱ་ན་ཀཱ་ཡ། མཉྫུ་ཤྲཱི། ཤུདྡྷི་ཏ་མུ་པ་ད་ཡེ་ཏི་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿ བྷ་ག་བཱ་ན། ཛྙཱ་ན་མཱུརྟི། བཱ་གཱི་
ཤྭ་ར། མ་ཧཱ་པཱ་ཙ། སརྦ་དྷརྨ། ག་ག་ན་ཨ་མ་ལ་སུ་པ་རི་ཤུདྡྷ། དྷ་རྨ་དྷཱ་ཏུ་ཛྙཱ་ན་གརྦྷ་ཨཱཿ དེ་དག་བསྙེན་པའོ། །དེ་ནས་ལྷག་པའི་རིས་ཀྱི་མདུན་དུ་དམ་ཚིག་དང་ཆང་སྦྱར་བའི་མཎྜལ་གྲུ་བཞི་པ་བྱའོ། །དེ་ནས་དཀྱིལ་དུ་མེ་ཏོག་སྔོན་པོ་དྲི་ཞིམ་པ་སྤུངས་ཏེ། ཨོཾ་སརྦ་དྷརྨ་ཨ་བྷཱ་བ། སྭ་བྷཱ་བ་བི་ཤུདྡྷ་
དྷ་རྨ་དྷཱ་ཏུ་ཛྷཱ་ན་གརྦྷ་ཨཱཿཞེས་ལན་བདུན་བཟླས་པས། འཇམ་དཔལ་མི་བསྐྱོད་པ་སྐུ་མདོག་སྔོན་པོ་རིག་པ་དང་ལྡན་པ་བསྐྱེད་དོ། །དེ་ནས་མེ་ཏོག་སེར་པོ་དྲི་ཞིམ་པ་དང་ལྡན་པ་ལྷོའི་ངོས་སུ་སྤུངས་ཨོཾ་ཙཀྵུ་ཨ་ཨ་ཨཱཾ་ཨ་པྲ་ཀྲྀ་ཏི་པ་རི་ཤུདྡྷ། དྷ་རྨ་དྷཱ་ཏུ་ཛྙཱ་ན་གརྦྷ་ཨཱཿཞེས་ལན་བདུན་བཟླས་པས། 
འཇམ་དཔལ་རིན་ཆེན་འབྱུང་གནས། སྐུ་མདོག་སེར་པོ་རིག་པ་དང་ལྡན་པ་བསྐྱེད་དོ། །དེ་ནས་མེ་ཏོག་དཀར་པོ་དྲི་ཞིམ་པ་ཤར་གྱི་ངོས་སུ་སྤུངས་ཏེ། ཨོཾ་སརྦ་དྷརྨཱ་ཡ་དུ་ཏ་སརྦ་ཏ་ཐཱ་ག་ཏ་ཛྙཱ་ན་ཀཱ་ཡ། དྷརྨ་དྷཱ་ཏུ་ཛྙཱ་ན་གརྦྷ་ཨཱཿཞེས་ལན་བདུན་བཟླས་པས། འཇམ་དཔལ་རྣམ་པར་སྣང་མཛད་སྐུ་མདོག་
དཀར་པོ་རིག་པ་དང་ལྡན་པ་བསྐྱེད་དོ། །དེ་ནས་མེ་ཏོག་དམར་པོ་དྲི་ཞིམ་པ་ནུབ་ཀྱི་ཕྱོགས་སུ་སྤུངས་ཏེ། ཨོཾ་མཉྫུ་ཤྲཱི་ཤུདྡྷི་ཏ་མུ་པ་ཏ་ཡེ། དྷརྨ་དྷཱ་ཏུ་ཛྙཱ་ན་གརྦྷ་ཨཱཿཞེས་ལན་བདུན་དུ་བཟླས་པས་འཇམ་དཔལ་འོད་དཔག་ཏུ་མེད་པ་སྐུ་མདོག་དམར་པོ་རིག་པ་དང་ལྡན་པ་བསྐྱེད་དོ། །དེ་ནས་མེ་ཏོག་
ལྗང་སེར་དྲི་ཞིམ་པ་བྱང་གི་ངོས་སུ་སྤུངས་ཏེ། ཨོཾ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། དྷརྨ་དྷཱ་ཏུ་ཛྷཱ་ན་གརྦྷ་ཨཱཿཞེས་ལན་བདུན་བཟླས་པས་འཇམ་དཔལ་དོན་ཡོད་གྲུབ་པ་སྐུ་མདོག་ལྗང་གུ་རིག་པ་དང་ལྡན་པ་བསྐྱེད་དོ། །དེ་དག་ཐམས་ཅད་ཀྱང་ཞལ་གསུམ་པ་ཕྱག་བཞི་པ་ཁྲོ་ཞིང་ཅུང་ཟད་

49-1-132b

ཞི་བ། རིན་པོ་ཆེའི་རྒྱན་གྱིས་སྤྲས་པའོ། །དང་པོ་ནི་སྔོ་བ་དང་དཀར་བ་དང་དམར་བའི་ཞལ་ཅན། རལ་གྲི་དང་། རྡོ་རྗེ་དང་། པོ་ཏི་དང་།  དྲིལ་བུ་འཛིན་པའོ། །གཉིས་པ་ནི་དཀར་བ་དང་། སྔོ་བ་དང་། དམར་བའི་ཞལ་ཅན། རལ་གྲི་དང་། པོ་ཏི་དང་འཁོར་ལོ་དང་། དྲིལ་བུ་འཛིན་པའོ། །གསུམ་པ་ནི་སེར་
བ་དང་སྔོ་བ་དང་། དཀར་བའི་ཞལ་ཅན། རལ་གྲི་དང་། པོ་ཏི་དང་། རིན་པོ་ཆེ་དང་། དྲིལ་བུ་འཛིན་པའོ། །བཞི་པ་ནི་དམར་བ་དང་། སྔོ་བ་དང་། དཀར་བའི་ཞལ་ཅན། རལ་གྲི་དང་།  པོ་ཏི་དང་། པདྨ་དང་། དྲིལ་བུ་འཛིན་པའོ། །ལྔ་པ་ནི་ལྗང་གུ་དང་། སྔོ་བ་དང་། དཀར་བའི་ཞལ་ཅན། རལ་གྲི་དང་། པོ་ཏི་
དང་།  སྣ་ཚོགས་རྡོ་རྗེ་དང་། དྲིལ་བུ་འཛིན་པའོ། །ཡུམ་རྣམས་ནི་ཞལ་གཅིག་ཕྱག་གཉིས་པ། གཅེར་བུ་སྐྲ་གྲོལ་ཞིང་གཡོན་ནས་གཡས་སུ་འཁྱུད་པ་རྡོ་རྗེའི་དྲིལ་བུ་དང་ལྡན་པའོ། །དེ་དག་ཐམས་ཅད་ཀྱང་སྣ་ཚོགས་པདྨ་དང་ཉི་མའི་དཀྱིལ་འཁོར་བརྒྱན་པ་ལ་བཞུགས་པ་སྟེ། རྣམ་པར་སྣང་མཛད་ནི་ཟླ་
བའི་དཀྱིལ་འཁོར་ལའོ། །དེ་ནས་རབ་ཏུ་གནས་པ་དང་། དབང་བསྐུར་བ་དང་། བྱིན་གྱིས་བརླབ་པ་དང་། རྒྱས་གདབ་པ་དག་གིས་ཡོངས་སུ་རྫོགས་པར་བྱས་ནས། མཆོད་ཅིང་མཚན་ཡང་དག་པར་བརྗོད་པའི་བསྟོད་པ་བརྒྱ་ཕྲག་བཅུའི་བར་དུ་བྱས་ཏེ། དེ་ནས་འཇམ་དཔལ་ཡེ་ཤེས་སེམས་དཔའི་
ཕོ་བྲང་དུ་ཞུགས་པ་ནི་ཐུན་མཚམས་ཀྱི་དེ་ཉིད་དེ་ཉེ་བར་བསྙེན་པའི་ཆོ་གའོ། །དེ་ནས་སྲུང་བའི་འཁོར་ལོ་ཡོངས་སུ་རྫོགས་པའི་ནང་དུ། འཇམ་དཔལ་ཡེ་ཤེས་སེམས་དཔའ་ཞལ་གསུམ་ཕྱག་བཞི་པའི་རྣལ་འབྱོར་ལ་གནས་ཏེ། ཆོ་ག་རྫོགས་པ་དང་། ནམ་མཁའི་བདག་པོ་འཁོར་ལོ་དང་བཅས་
པའི་སྙིང་གར་བཞག་སྟེ། རིགས་ཀྱི་བསྙེན་པ་ཡེ་ཤེས་སེམས་དཔའི་ཡང་ཕོ་བྲང་དུ་ཇི་སྲིད་སྤྲོའི་བར་དུ་བླངས་ཤིང་གོ་རིམས་ཀྱིས་ཁྲི་ཕྲག་རེ་རེ་ཚད་དུ་བྱའོ། །ཐུན་མཚམས་སུ་ནི་སྔར་དང་མཐུན་པའི་མཚན་ཉིད་ཀྱི་བསྟོད་པ་དག་ཀྱང་བྱས་ཏེ། དེ་དག་ནི་སྒྲུབ་པའོ། །དེ་ནས་ནམ་མཁའི་ཕོ་བྲང་ཅི་འབྱོར་པའི་
མཆོད་པས་མཉེས་པར་བྱ་སྟེ། ཚོགས་ཀྱི་འཁོར་ལོའི་མཆོད་པ་ཆེན་པོ་ཡང་བྱས་ལ། མཚན་གྱི་བསྟོད་པ་བྱས་ཏེ། སངས་རྒྱས་གངྒཱའི་ཀླུང་གི་བྱེ་མ་དང་མཉམ་པ་ལ་བདག་ཉིད་ཀྱིས་ཐབས་དང་ཤེས་རབ་ཡན་ལག་མཆོག་གི་དབུས་སུ། ཨ་ཐུང་ངུ་ལ་མ་ལུས་པར་རྫོགས་པར་བསྟིམ་ནས།

49-1-133a

འདོད་པའི་དོན་ཆེན་པོ་ལ་རོལ་ན་བདེ་བའི་ཡེ་ཤེས་ཟད་མི་ཤེས་པའི་རང་རིག་ལ་སྐད་ཅིག་དེ་ཉིད་ལ་རྒྱུན་མི་འཆད་པར་འགྱུར་བ་ནི། རྡོ་རྗེ་རིན་ཆེན་དབང་བསྐུར་དཔལ། །རིན་ཆེན་ཀུན་བདག་དབང་ཕྱུག་སྟེ། །འཇིག་རྟེན་དབང་ཕྱུག་ཀུན་གྱི་བདག །རྡོ་རྗེ་འཆང་བ་ཀུན་གྱི་རྗེ། །
སངས་རྒྱས་ཀུན་གྱི་ཐུགས་ཆེ་བ། །སངས་རྒྱས་ཀུན་གྱི་ཐུགས་ལ་གནས། །སངས་རྒྱས་ཀུན་གྱི་སྐུ་ཆེ་བ། །སངས་རྒྱས་ཀུན་གྱི་གསུང་ཡང་ཡིན། །རྡོ་རྗེ་ཉི་མ་སྣང་བ་ཆེ། །རྡོ་རྗེ་ཟླ་བ་དྲི་མེད་འོད། །ཆགས་བྲལ་ལ་སོགས་ཆགས་པ་ཆེ། །ཁ་དོག་སྣ་ཚོགས་འབར་བའི་འོད། །རྡོ་རྗེ་སྐྱིལ་
ཀྲུང་རྫོགས་སངས་རྒྱས། །སངས་རྒྱས་འགྲོ་བའི་ཆོས་འཛིན་པ། །དཔལ་ལྡན་སངས་རྒྱས་པདྨ་སྐྱེས། །ཀུན་མཁྱེན་ཡེ་ཤེས་མཛོད་འཛིན་པ། །རྒྱལ་པོ་སྒྱུ་འཕྲུལ་སྣ་ཚོགས་འཆང་། །ཆེ་བ་སངས་རྒྱས་རིག་སྔགས་རྒྱལ། །རྡོ་རྗེ་རྣོན་པོ་རལ་གྲི་ཆེ། །ཡི་གེ་མཆོག་སྟེ་རྣམ་པར་དག །ཅེས་
བྱ་བ་ནི་དེའི་བར་དུ་བྱེད་པའོ། །རབ་ཏུ་གནས་པ་ཡང་འདི་ཉིད་ཀྱིས་བྱ་སྟེ། རྫོགས་པའི་སངས་རྒྱས་འཇིག་རྟེན་འདྲེན། །མཆོད་འོས་བསྟོད་འོས་ཕྱག་གི་གནས། །རྟག་ཏུ་རི་མོར་བྱ་བའི་འོས། །བཀུར་འོས་རྗེད་པར་བྱ་བའི་མཆོག །ཕྱག་བྱར་འོས་པ་བླ་མའི་རབ། །ཅེས་བྱའོ། །སྲུང་བའི་འཁོར་
ལོ་ནི་ནས་དཀར་པོའམ་ཏ་ལའི་ལོ་མ་ལ་དྲི་ཞིམ་པ་སྣ་ཚོགས་ཀྱིས་བྱུགས་ཏེ། གུར་གུམ་གྱིས་འཁོར་ལོ་རྩིབས་བཞི་པ་མུ་ཁྱུད་དང་ལྡན་པ་བྲིས་ལ་ཨོཾ་བཱ་གཱི་ཤྭ་རི་མུཾ་ནམ་སྭཱ་ཧཱ། དཀྱིལ་དུའོ། །ཨ་ཨཱ། ཨི་ཨཱི། ཨུ་ཨཱུ། ཨེ་ཨཻ། ཨོ་ཨཽ། ཨཾ་ཨཱཿདེའི་ཕྱི་རིམ་དུའོ། །སྠི་ཏོ་ཧྲྀ་དི་ཛྙཱ་ན་མཱུརྟི།  ར་ཧཾ་བུདྡྷོ་བུདྡྷཱ་ནཱཾ། ཏྲྱེེ་དྡྷཱ་བརྟི་
ནཱཾ་མ་མ་རཀྵ་སྭཱ་ཧཱ། དེའི་ཕྱི་རིམ་དུའོ། །ཨོཾ་བཛྲ་ཏཱིཀྵྞ་དུཿཁ་ཙྪི་ད་པྲཛྙཱ་ཛྙཱ་ན་མཱུརྟ་ཡེ། ཛྙཱ་ན་ཀཱ་ཡ་བཱ་གཱི་ཤྭ་ར་ཨ་ར་པ་ཙ་ན་ཡ་ཏེ་ནཱ་མཿརཀྵ་སྭཱ་ཧཱ། ལྟེ་བའི་མུ་ཁྱུད་ལའོ། །རིགས་ཀྱི་དང་པོ་ནི་ལྟེ་བའི་ཁོར་ཡུག་ཏུའོ། །གཞན་རྣམས་ནི་འཁོར་ལོ་ལའོ། །ཕྲེང་སྔགས་ནི་ཕྱིའི་མུ་ཁྱུད་ལའོ། །དེ་ལ་སྔར་བཞིན་བསྐྱེད་དེ། ཆོ་ག་
རྫོགས་པར་བྱས་ནས་འཁོར་ལོར་གྱུར་པ་དེ་སྤྱི་གཙུག་ཏུ་བཏགས་ན། དུས་སུ་འཆི་བའང་ཟློག་པར་འགྱུར་ཏེ། གཞན་ལྟ་སྨོས་ཀྱང་ཅི་དགོས། དེ་དག་ནི་སྒྲུབ་པ་ཆེན་པོའོ། །བསོད་ནམས་ཡོངས་རྫོགས་ཡེ་ཤེས་ཟླ་བཞིན་འཕེལ། །བཀྲ་ཤིས་ཕུན་ཚོགས་བསྟན་པ་ཡུན་རིང་རྒྱུ། །བདུད་དགྲ་ཕམ་

49-1-133b

པར་བྱེད་པའི་སྒྲུབ་ཐབས་འདིས། །འཇམ་དཔལ་ཡེ་ཤེས་སེམས་དཔའི་ཞབས་གྲུབ་ཤོག །བདག་ནི་བློ་དམན་རབ་འབྱེད་རྒྱུད་ལ་རྨོངས། །དམ་པ་སྙན་བརྒྱུད་ལ་བརྟེན་ཚིག་འགའ་ཞིག །བྲིས་པ་འདི་ལ་བློ་བཟང་དང་གྱུར་ན། །རང་གི་བུ་བཞིན་ཁྱེད་ཀྱིས་བཟོད་པ་མཛོད། །འཇམ་དཔལ་ཡེ་ཤེས་
སེམས་དཔའི་ཡིད་འཇུག་པའི་བསམ་གཏན་གྱི་འཁོར་ལོ་ཞེས་བྱ་བ། རྒྱ་གར་གྱི་མཁན་པོ་དཔལ་ལྡན་གཉིས་སུ་མེད་པས་མཛད་པ་རྫོགས་སོ།།      །།རྣལ་འབྱོར་པ་བསོད་སྙོམས་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།།      །།༄༅༅། །རྒྱ་གར་སྐད་དུ། ཏི་ལ་ཀ་སིདྡྷི། བོད་སྐད་དུ། 
ཐིག་ལེ་གྲུབ་པ། འཕགས་པ་འཇམ་དཔལ་ཡེ་ཤེས་སེམས་དཔའ་ཆེན་པོ་ལ་ཕྱག་འཚལ་ལོ། །གང་བློ་དྲི་མའི་རྒྱུན་འཛག་གང་། །ངེས་པར་བྱེད་པའི་ཐིག་ལེ་རིམ། །གང་གིས་གང་ལ་དེ་བསྟན་ན། །བདེ་བ་ཆེན་པོའི་རྒྱུན་འཛག་འགྱུར། །མཆོག་བཟང་བླ་མའི་ཞབས་པད་ལ། །དཀོན་མཆོག་
གསུམ་དང་མཚུངས་བཏུད་དེ། །ཡེ་ཤེས་རྡོ་རྗེ་འཆང་བླ་མ། །གསང་བའི་ཐིགས་པ་བཤད་པར་བྱ། །བདག་ཉིད་ལྷའི་རྣལ་འབྱོར་གྱིས། །ས་བོན་ཆོ་འཕྲུལ་ཀུན་བསྡུས་ཏེ། །དེ་ཉིད་ལ་ནི་དམིགས་པ་ཡིས། །ཡི་གེ་དྲན་པ་རྫོགས་པར་འགྱུར། །སྐད་ཅིག་ལ་ནི་རྣམ་གྲངས་བརྒྱད། །གོ་རིམས་
བཟླས་པ་བསྟན་པ་དང་། །ཐིག་ལེ་ཆེན་པོར་ཡང་བསྡུས་ཏེ། །རེག་བྱའི་དྲན་པ་རྫོགས་པར་འགྱུར། །དེ་ཉིད་བཅུ་དྲུག་གྱུར་པ་གང་། །ཡི་གེའི་ཕྲེང་བས་བགྲང་བྱས་ཏེ། །འཕོ་དང་འཇུག་པའི་རྣལ་འབྱོར་གྱིས། །རླུང་གི་དྲན་པ་རྫོགས་པར་འགྱུར། །རྣམ་ཤེས་ཡེ་ཤེས་མཐོང་བ་གང་། །ཡུལ་
མིན་ཤེས་པའི་མཚན་ཉིད་ལས། །འགྲོ་དང་འོང་བ་མི་དམིགས་པ། །ཐིག་ལེ་དྲན་པ་རྫོགས་པར་འགྱུར། །སྟེང་དང་འོག་ལ་དམིགས་པའི་ཡིད། །ཐིག་ལེ་སྟོང་པ་ཡི་གེ་བརྒྱ། །ཡིད་གནས་ལྡང་འཇུག་མེད་པ་དང་། །སྟོང་པ་ཆེན་པོ་ཡི་གེ་ལྔ། །འོག་གི་གནས་ལ་དམིགས་ནས་
ཀྱང་། །ཐིག་ལེ་ཆེན་པོ་ཡི་གེ་མེད། །ཕྱེད་ཆ་ལྷག་པ་ཟླ་བའི་གནས། །གསང་སྔགས་ཆེན་པོ་རིགས་གསུམ་པ། །འབྱུང་དང་འཇུག་དང་དྲན་པར་བཟླས། །གསང་སྔགས་ལས་བྱུང་ཡི་གེ་མེད། །གནས་མེད་གནས་ལ་གནས་པ་གང་། །སངས་རྒྱས་ཀུན་གྱིས་རྟོགས་བྱ་བ། །སངས་རྒྱས་

49-1-134a

བྱང་ཆུབ་བླ་ན་མེད། །སྦྱོར་བ་རྫོགས་དང་སྦྱོར་བ་གཅིག་པ་དང་། །དྲན་པས་གནས་དང་ལོངས་སྤྱོད་ཆེན་པོ་དང་། །བསམ་མི་ཁྱབ་དང་ལྔ་ཡིས་ཐིག་ལེ་གྲུབ། །དམ་པའི་ཞལ་གྱི་ཚིག་གིས་འཆིང་བ་གྲོལ། །རི་ཁྲོད་མགོན་པོ་ལས་རྙེད་པའི། །མན་ངག་གཞུང་གི་དབུ་མ་ལྔ། །
ནང་གི་ནང་ལ་འཇུག་པའི་རིམ། ཀུན་ཀྱང་བདེ་གཤེགས་གནས་ཐོབ་ཤོག །ཐིག་ལེ་གྲུབ་པ་རྒྱ་གར་གྱི་མཁན་པོ་དཔལ་ལྡན་གཉིས་སུ་མེད་པའི་རྡོ་རྗེས་མཛད་པ་རྫོགས་སོ།།      །།རྣལ་འབྱོར་པ་བསོད་སྙོམས་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།།      །།
༄༅༅། །རྒྱ་གར་སྐད་དུ། ཏི་ལ་ཀ་ཨེ་ཀ་ནཱ་མ། བོད་སྐད་དུ། ཐིག་ལེ་གཅིག་པ་ཞེས་བྱ་བ། འཕགས་པ་འཇམ་དཔལ་ཡེ་ཤེས་སེམས་དཔའ་ཆེན་པོ་ལ་ཕྱག་འཚལ་ལོ། །རང་བཞིན་བདེ་བ་བརྙེས་པ་ཡི། །ཡེ་ཤེས་སེམས་ལ་ཕྱག་འཚལ་ལོ། །དམིགས་པ་ལ་ནི་སེམས་བཞག་ནས། །སྦྱོར་
བ་ཡེ་ཤེས་ཐིག་ལེ་བཤད། །སྣ་ཚོགས་ཆོས་ཀུན་ཤེས་རབ་ཀྱིས་བལྟས་ནས། །གཅིག་དང་དུ་མ་མཐའ་ཡིས་བརྟགས་པ་དང་། །གཅིག་ཀྱང་མི་དམིགས་རང་བཞིན་སྟོང་པ་ཡིན། །ཐམས་ཅད་རིག་པའི་ངོ་བོར་གསལ་འགྱུར་བ། །གཉིས་ཀྱི་མཐའ་ཡིས་དབེན་པ་གཉིས་མེད་དེ། །རྣམ་པ་
ཐམས་ཅད་ལྡན་པ་ཡེ་ཤེས་སྐུར། །བསྒོམས་ཏེ་ས་བོན་ཉིད་དུ་སེམས་གནས་བྱ། །དེ་ལ་དམིགས་པ་ཉེ་བ་ཉིད་དུ་གྱུར་པ་ནི། །གསལ་དང་མི་གསལ་ཕྱི་མའི་བློ་ཡིས་བརྟགས་ན་ཡིད་ཀྱི་ཡི་གེ་ཉིད། །རྗེས་ལ་འགྲོ་བ་རྣམ་པར་དག་བྱས་ལ། །རྟེན་དང་བརྟེན་པ་སྐུལ་བའི་ཀུ་རུ་བཞག །ཡི་གེ་ལ་
སེམས་གཟུང་བའི་ཐིག་ལེ་དང་པོའོ།།      །།ཐབས་དང་ཤེས་རབ་ཁ་སྦྱོར་ལ། །ཤིགས་པ་མེད་པའི་ཡི་གེ་ནས། །ཚངས་པའི་མིག་གསུམ་བཞི་ཡིས་བསྐོར། །དེ་ལ་ནམ་ཤེས་བརྟན་པ་དང་། །འདྲེན་པ་བརྒྱད་དང་དགུར་ལྡན་པའོ། །བདེ་བའི་ལྷག་པའི་བཟླས་པ་བྱ། །རེག་བྱ་ཆེན་པོ་
སྐྱེས་པ་ནི། །ལྷག་པའི་ཐིག་ལེ་ཆེན་པོར་བསྡུ། །མཐར་ཕྱིན་རེག་བྱ་སྐྱེས་པ་ན། །སྟེང་གི་གནས་སུ་འཕོ་བར་བྱ། །རེག་བྱ་ལ་སེམས་གཟུང་བའི་ཐིག་ལེ་སྟེ་གཉིས་པའོ།།      །།ཡེ་ཤེས་སེམས་དཔའ་རབ་མཛེས་སྐུ། །ཟླ་བ་ལྟར་རྒྱས་རྡོ་རྗེ་ལ། །བཅུ་དྲུག་ཐིག་ལེ་གཅིག་པ་གང་། །བཅུ་

49-1-134b

བདུན་ལྡན་པར་བཟླས་བྱ་སྟེ། །འཕོ་བ་འབྱུང་ལ་བཟླས་པ་བྱ། །འཇུག་པ་ཐིག་ལ་བཟླས་པ་བྱ། །གསལ་དང་བདེ་དང་ཡོངས་རྫོགས་ནས། །དབྱུ་གུ་དྲུག་ཅུའི་གྲངས་སུ་བགྲང་། །ཕྲ་མོའི་རྣལ་འབྱོར་རྫོགས་འགྱུར་བ། །བག་དང་ལྡན་པའི་སྦྱོར་བས་བརྩམ། །ཕྲ་མོ་ལ་སེམས་གཟུང་བའི་ཐིག་ལེ་སྟེ་
གསུམ་པའོ།།      །།རྣམ་པར་ཤེས་པའི་རྡོ་རྗེའི་སྐུ། །གངྒཱའི་ཀླུང་གི་སངས་རྒྱས་ཀྱིས། །བྱིན་གྱིས་བརླབས་ལ་བསྒོམ་པར་བྱ། །དེ་ཉིད་ཡེ་ཤེས་ཐིག་ལེ་བསྒོམ། །མི་ཤིགས་ས་བོན་འཛིན་པ་ཅན། །དྲན་པ་ལྷན་ཅིག་སྐྱེས་པ་གསལ། །འགྲོ་འོང་མེད་པར་ཉིན་མཚན་དུ། །ཡུལ་མིན་ཤེས་པའི་མཚན་
ཉིད་ནི། །གནས་པའི་ཐིག་ལེ་རྫོགས་པ་ཡི། །ཅུང་ཟད་མི་གསལ་ཕྲ་མོར་གསང་། །ཡེ་ཤེས་ལ་སེམས་གསང་བའི་ཐིག་ལེ་སྟེ་བཞི་པའོ།།      །།རྣལ་འབྱོར་ལམ་ལ་བསླབ་པ་ནི། །སྟེང་དང་འོག་གི་མདུད་པ་ལ། །ཨོཾ་དང་ཧཱུཾ་གི་ཐིག་ལེ་བལྟ། །ཐིག་ལེ་སྟོང་པའི་ས་བོན་ལས། །ཨཱ་ལི་ཀཱ་ལི་འཛག་
པའི་ཕྲེང་། །རླུང་གིས་མནན་ལ་སོ་ཀར་བསྟིམ། །དེ་ལ་ལེགས་རོལ་སྐྱེས་པ་དང་། །འོག་གི་ཐིག་ལེ་སྟོང་པ་ལས། །ཉིས་འགྱུར་ཕུལ་ལ་སྟེང་དུ་བསྟིམ། །དེ་ལ་ལེགས་རོལ་སྐྱེས་པས་ན། །རང་འབྱུང་ཡེ་ཤེས་ཆེན་པོ་བསྒོམ། །དབང་པོ་ལྔ་ལ་ཡི་གེས་ཁྱབ། །ཡུལ་ལྔ་ལེགས་རོལ་ཆེན་
པོར་བསྒོམ། །དེ་ནས་བཅོམ་ལྡན་འདས་མ་ལས། །ཐིག་ལེ་ཡི་གེ་མེད་པ་གཉིས། །དབུགས་འབྱུང་ཆེན་པོ་བདག་མེད་བསྒོམ། །ལྷན་ཅིག་སྐྱེས་དགའ་རྣ་བའི་དུས། །གསལ་སྟོང་བདེ་བ་དབྱེར་མེད་པ། །གཉུག་མ་ཉམས་སུ་མྱོང་བས་ཤེས། །གལ་ཏེ་མི་གསལ་གྱུར་པ་ན། །རྡོ་རྗེའི་
བཟླས་པ་བརྩམ་པར་བྱ། །སྦྱོར་བ་ལས་བྱུང་འོད་གསལ་སེམས། །རྣམ་པར་ཤེས་པའི་ཆོས་ཉིད་འདས། །ཡེ་ཤེས་གཉིས་མེད་ཚུལ་འཆང་བ། །རྣམ་པར་རྟོག་མེད་ལྷུན་གྱིས་གྲུབ། །དུས་གསུམ་སངས་རྒྱས་ལས་བྱེད་པ། །སངས་རྒྱས་ཐོག་མ་ཐ་མ་མེད། །དང་པོའི་སངས་རྒྱས་རྒྱུ་མེད་
པ། །ཡེ་ཤེས་མིག་གཅིག་དྲི་མ་མེད། །ཡེ་ཤེས་ལུས་ཅན་དེ་བཞིན་གཤེགས། །ཐིག་ལེ་ཆེན་པོ་གྲུབ་པ་བསྟན་པ་སྟེ་ལྔ་པའོ།།      །།མན་ངག་བདུད་རྩི་ལྟ་བུ་གྲོལ་བའི་རིམ་པ་ཐིག་ལེ་གྲུབ་པ་གསལ་བྱེད་གཅིག་པ་བསྟན། འདི་ལས་བྱུང་བའི་བསོད་ནམས་ཇི་སྙེད་དེས། །བདེ་བ་ཆེན་པོའི་

49-1-135a

གནས་དངོས་རྙེད་པར་ཤོག །ཐིག་ལེ་གཅིག་པ་ཞེས་བྱ་བ།  སློབ་དཔོན་དཔལ་ལྡན་གཉིས་སུ་མེད་པའི་རྡོ་རྗེས་མཛད་པ་རྫོགས་སོ།།      །།རྣལ་འབྱོར་པ་བསོད་སྙོམས་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།།༄༅༅། །རྒྱ་གར་སྐད་དུ། ཛྙཱ་ན་སཏྭ་མཉྫུ་ཤྲཱི་ས་ར་སིདྡྷི་
ནཱ་མ། བོད་སྐད་དུ། འཇམ་དཔལ་ཡེ་ཤེས་སེམས་དཔའི་སྙིང་པོ་གྲུབ་པ་ཞེས་བྱ་བ། འཕགས་པ་འཇམ་དཔལ་ཡེ་ཤེས་སེམས་དཔའ་ཆེན་པོ་ལ་ཕྱག་འཚལ་ལོ། །ཕྱག་རྒྱ་ཆེན་པོར་འགྲོ་བ་ཀུན་གནས་པ། །འོད་གསལ་རང་བྱུང་ཡིད་ཀྱིས་གུས་ཕྱག་འཚལ། །འགྲོ་བ་རྣམས་ལ་ཇི་ལྟར་བདེན་
དོན་ཉིད། །སེམས་དཔའི་ཡེ་ཤེས་འགག་པ་མེད་པར་བཤད། །འདས་དང་མ་འོངས་ད་ལྟ་དུས་རྣམས་སུ། །དུས་གསུམ་མཉམ་པའི་སྐུ་ཤར་གཞན་རྒྱུ་མེད། །དེ་ཕྱིར་ཡང་དག་མཚན་བརྗོད་གོ་བ་ཡིས། །འཁོར་འདས་ཡེ་ཤེས་སེམས་དཔའི་ལུས་རིག་བྱ། །རྡུལ་དང་མུན་པ་སྙིང་སྟོབས་གསུམ་
གྱི་བདག །དེ་ཉིད་ཡིན་ཕྱིར་སེམས་ཀྱིས་སུན་མི་དབྱུང་། །ཕུང་པོ་ལྔ་ཡི་ཁུར་བོར་ཉན་ཐོས་རྣམས། །ལམ་གྱི་དང་པོར་འབད་དེ་གཟུང་བར་བྱ། །རང་རྒྱལ་ཐེག་པ་བག་མེད་སྤོང་བའི་ཕྱིར། །རྟེན་ཅིང་འབྲེལ་པར་འབྱུང་བའི་དོན་ལ་བསླབ། །དགེ་ཆོས་ཚོལ་ལ་དགེ་བའི་བཤེས་གཉེན་
བསྟེན། །ཤེས་རབ་གསུམ་ནི་ཤེས་རབ་ཀྱིས་ཤེས་བྱ། །ཟད་པ་ཤེས་པས་རྣམ་པར་དག་འགྱུར་ཏེ། །སྐྱེ་མེད་ཤེས་པས་ཡེ་ཤེས་ལུས་སུ་འགྱུར། །སྐད་ཅིག་གཅིག་ལ་རྣམ་པར་གྲོལ་བ་ནི། །རང་རིག་ངོ་བོར་སངས་རྒྱས་ཐམས་ཅད་འཆང་། །ཡུལ་དང་དབང་པོ་བདེ་བར་བྱིན་བརླབས་པས། །
ཡེ་ཤེས་སེམས་དཔའི་ལུས་སུ་བདག་རྫོགས་འགྱུར། །ཐམས་ཅད་དགེ་བར་མཐོང་བས་མི་དགེ་མེད། །སྙིང་རྗེ་ཆེན་པོའི་ཆ་ལས་སྣ་ཚོགས་གཟུགས། རྒྱུ་ལམ་འབྲས་བུ་ཀུན་དུ་དགག་མི་བྱ། །ཤེས་རབ་ཕ་རོལ་ཕྱིན་པས་སྟོང་པ་ཉིད། །དུས་གསུམ་དུ་ནི་མི་གནས་འཕོ་བ་མེད། །བདེ་བ་
ཆེན་པོའི་མངལ་དུ་ཡིད་ཞུགས་ན། །རྣལ་འབྱོར་ཡིད་ལ་མི་བྱེད་བླ་མའི་སྐུ། །ཡུལ་དང་གཉེན་པོར་བཅས་དང་མཐོང་བ་དང་། །དེར་ཤེས་པ་དང་ནུབ་པའི་ཡེ་ཤེས་ཉིད། །རྩ་བ་བྲལ་བའི་སེམས་ནི་བརྟན་པ་ལ། །རྒོད་དང་གཡེང་བའི་དྲི་མས་གོས་མི་འགྱུར། །རང་འབྱུང་ཡེ་ཤེས་བརྟན་དང་ཐོས་

49-1-135b

པ་ཡིས། །བརྟགས་པའི་རྒྱུ་བ་རྣམས་ལ་གནས་པ་མེད། །འཁྲུལ་པ་ཞིག་པས་སྣང་བའི་རྒྱུ་བ་བྲལ། །དབྱེ་བ་སྤངས་པ་ཡེ་ཤེས་སེམས་དཔའི་གནས། །ཡང་དག་སངས་རྒྱས་ལམ་རིག་བྱིང་རྨུགས་མེད། །ངེས་འབྱུང་མཐའ་ལ་གནས་པ་ཐེ་ཚོམ་མེད། །རྒྱུན་ཆད་མེད་པའི་ཡེ་ཤེས་འགྱོད་པ་སྤངས། །
ཉོན་མོངས་གཉེན་པོ་མི་བྱེད་ལེ་ལོ་མིན། །སངས་རྒྱས་ཐམས་ཅད་གཅིག་པས་ཞུམ་པ་མེད། །འཁོར་བ་རྣམ་པར་དག་པས་གཉིད་སོགས་བྲལ། །ཡོན་ཏན་ཐམས་ཅད་རྫོགས་པས་རྡོ་རྗེ་འཛིན། །རང་བཞིན་ཆོས་ལ་གནས་པས་ཐོབ་བྱ་སྤངས། །རྡོ་རྗེ་ལྟ་བུ་ཡིན་ཕྱིར་བདུད་ཐམ་གྱུར། །དོགས་པ་
མེད་པའི་གནས་ཐོབ་ཤིན་ཏུ་བདེ། །ཀུན་རྫོབ་རྣམ་པར་དག་པས་ཨེ་མ་མཚར། །བཅོམ་ལྡན་མགོན་པོ་གང་གི་ལུང་ཐོབ་པས། །རྒྱུད་དངོས་གྲུབ་པ་སྒྲུབ་པའི་ཐབས་འདི་བྱ། །ཕུན་སུམ་ཚོགས་འགྱུར་ཚོགས་གཉིས་འབྲས་བུ་གང་། །འགྲོ་བ་རྣམས་ཀྱིས་དུས་འདིར་རྙེད་པར་ཤོག །འཇམ་དཔལ་ཡེ་ཤེས་སེམས་དཔའི་
སྙིང་པོ་གྲུབ་པ་ཞེས་བྱ་བ། རྒྱ་གར་གྱི་མཁན་པོ་དཔལ་ལྡན་གཉིས་སུ་མེད་པའི་རྡོ་རྗེས་མཛད་པ་རྫོགས་སོ།།      །།རྣལ་འབྱོར་པ་བསོད་སྙོམས་པ་པྲཛྙཱ་ཤྲཱི་ཛྣཱ་ན་ཀཱིརྟིས་རང་འགྱུར་དུ་མཛད་པའོ།།      །།༄༅༅། །འཕགས་པ་འཇམ་དཔལ་ཡེ་ཤེས་སེམས་
དཔའ་ལ་ཕྱག་འཚལ་ལོ། །ཆོས་ཀུན་རང་བཞིན་འཇམ་དཔལ་ཡེ་ཤེས་སེམས། །མ་ལུས་བདེ་གཤེགས་ཀུན་གྱི་མཚན་གྱུར་པ། །རྡོ་རྗེ་འཆང་ཆེན་རྣམས་ཀྱི་གླུར་བླངས་དོན། །ཟབ་ཅིང་རྒྱ་ཆེའི་སྐྱེ་བོ་བློ་བཟངས་དོན། །བྱང་ཆུབ་སེམས་ལྡན་ལྷག་པའི་ལྷར་མོས་ལ། །སྒྱུ་མའི་རྟེན་འབྲེལ་
རྣམ་གསུམ་སྦྱོར་བ་ལས། །མ་ལུས་གཉིས་མེད་མཁའ་ཁྱབ་སྤྲུལ་ཚོགས་དགུའོ། །མ་སྐྱེས་མི་འགག་སྒྱུ་འཕྲུལ་དྲ་བའི་ཚོགས། །རྡོ་རྗེ་མིག་གིས་སྣང་ཐོབ་བར་དུ་བལྟ། །སྒྱུ་མ་བྲག་ཅ་ནམ་མཁའི་རང་བཞིན་དུ། །ཡོངས་སུ་ཤེས་ནས་མ་ཞེན་སེམས་ཀྱིས་བཀླག །གསང་སྔགས་
ཚུལ་ཆེན་ལམ་ནི་འདི་ཡིན་ཏེ། །ཇི་ལྟར་དངོས་རྣམས་མཁའ་ལ་གནས་པ་བཞིན། །དམ་ཚིག་དཀྱིལ་འཁོར་ཕྱག་རྒྱ་ཆེ་ལ་གནས། །དོན་དེ་མི་ཤེས་དཀའ་བའི་ལམ་གཞན་གྱིས། །འཁོར་བའི་གྲོང་གསུམ་དག་ལ་དེ་མི་གཡོ། །དེ་ལྟའི་དོན་ཤེས་རང་བཞིན་ཉེས་པ་སྤངས། །སྤོས་ཀྱི་

49-1-136a

གླང་པོ་ཀེ་ཏ་ཀ་ཟོས་བཞིན། །ཉེས་པའི་ཚོགས་བཅོམ་གཞུང་ཚོགས་ཡོན་ཏན་ལྡན། །འགག་པ་མེད་པའི་ཆོས་ཀྱི་རྒྱལ་པོར་འགྱུར། །ཐུགས་ཀྱི་གསང་མཛོད་གཙུག་གི་རིན་པོ་ཆེ། །འགྲོ་ཀུན་སེམས་ཀྱི་རང་བཞིན་ཆོས་རྣམས་ལུང་། །རྒྱུད་ཀུན་དབང་པོ་རྡོ་རྗེ་ཚིག་ཏུ་གནས། །
མཁན་པོའི་རྗེས་འབྲང་ཉེ་བར་གྱུར་པ་ཡིན། །སློབ་དཔོན་ཆེན་པོ་དཔལ་མེེ་ཏྲིའི་གདམས་ངག་ཉེ་བར་བསྡུས་པ་རྫོགས་སོ།།      །།༄༅༅། །འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །རྟེན་ལྡན་དེ་
ཉིད་སྒྲུབ་འདོད་པས། །བདག་གཞན་དོན་འབྱུང་སྔགས་ཚུལ་ལམ། །ཡེ་ཤེས་ལྔ་ཁྱབ་ལ་བཏུད་ནས། །ཟབ་ཅིང་རྒྱ་ཆེན་གསལ་བར་དབྱེ། །ཆོས་ཀུན་ཞེས་བྱ་བ་ལ་སོགས་པའི་ངག་དང་པོ་འདིས་བརྗོད་པར་བྱ་བ་དང་། བརྗོད་དགོས་པ་དང་། བརྗོད་བྱའི་དགོས་པ་ལ་སོགས་པ་བརྗོད་པ་ཡིན་
ནོ། །བྱང་ཆུབ་སེམས་བསྐྱེད་ཅེས་བྱ་བ་ནས། ཚུལ་འདི་ཡིན་ཞེས་བྱ་བས་ཐབས་བརྗོད་པ་ཡིན་ནོ། །ཇི་ལྟར་མཁའ་ལ་ཞེས་བྱ་བ་ནས། ཆོས་ཀྱི་རྒྱལ་པོར་འགྱུར་ཞེས་བྱ་བས་ལམ་དམན་པ་དགག་པས་ཁྱད་པར་བརྗོད་པ་ཡིན་ནོ། །ཐུགས་ཀྱི་གསང་མཛོད་ཅེས་བྱ་བ་ནས་ཉེ་བར་བསྡུས་བཤད་ཅེས་
བྱ་བས་བརྗོད་བྱ་དང་རྗོད་པའི་ཁྱབ་པ་བསྟན་པ་ཡིན་ནོ། །དེ་ལྟའི་ལམ་ནི་ཞེས་བྱ་བ་ནས། བྱས་པ་ཡིན་ཞེས་བྱ་བས་གཞུང་ཉེ་བར་བསྡུས་པ་ཡིན་ནོ། །དོན་གྱི་བརྗོད་བྱ་འཇམ་དཔལ་གྱི་ངོ་བོ་གསལ་བར་བྱ་བའི་ཕྱིར། །ཆོས་ཀུན་རང་བཞིན་འཇམ་དཔལ་ཡེ་ཤེས་སེམས། །ཞེས་བྱ་བ་སྨོས་ཏེ། ཆོས་
ནི་ཕུང་པོ་ལྔ་ལ་གོགས་པ་རྣམས་ཏེ། རང་གི་མཚན་ཉིད་འཛིན་པ་རྣམས་སོ། །དེ་དག་གིས་ཤེས་བྱ་བསྡུས་པར་འགྱུར་བའམ། ཡང་ན་དེ་དག་ལ་ཉོན་མོངས་པ་ལྔ་དང་སྤྱི་བསྡུས་པ་དང་ལྡན་པའི་ཆོས་ཀུན་ནི་རྒྱུད་འདིར་འདོད་དོ། །དེའི་རང་བཞིན་ནི་ངོ་བོ་ཉིད་དེ་སྟོང་པ་ཉིད་དང་མཚན་མ་མེད་པ་དང་། 
སྨོན་པ་མེད་པ་དང་། འདུས་མ་བྱས་པ་བཞི་དང་ལྡན་པའོ། །འདིས་ནི་འགྲོ་བ་དབྱིངས་ཉིད་དུ་ཁྱབ་པ་བླངས་པ་ཡིན་ནོ། །ངེས་པའི་ཡུལ་ལ་བྱེད་པ་པོ་མེད་པ་དང་རྒྱུ་ཉིད་ཡིན་པས་ན་འདི་ནི་ངོ་བོ་ཉིད་དུ་རིག་པའོ། །འདིའི་དོན་ཡང་། དངོས་པོ་ཀུན་གྱི་རང་བཞིན་མཆོག །དངོས་པོ་ཀུན་གྱི་རང་

49-1-136b

བཞིན་འཛིན། །སྐྱེ་མེད་ཆོས་དེ་སྣ་ཚོགས་དོན། །ཆོས་ཀུན་ངོ་བོ་ཉིད་འཆང་བ། །སེམས་ཅན་ཀུན་གྱི་ཡིད་ལ་གནས། །ཕྲ་ཞིང་ཟག་མེད་ས་བོན་བྲལ། །ཞེས་གསུངས་པས་གྲུབ་པ་ཡིན་ནོ། །དེ་ཙམ་ཡིན་ཡང་ངེས་པའི་ཡུལ་ལ་བྱེད་པ་པོ་མེད་ན་འགྲོ་བ་དང་སངས་རྒྱས་ཁྱད་པར་མེད་པ་དེའི་
མངོན་དུ་བྱེད་པའི་ལམ་བསྟན་པ་ནི། སེམས་ཞེས་བྱ་བ་ནི་རྒྱུན་མི་འཆད་པ་སྟེ། སེམས་ཀྱི་གནས་སྐབས་འདིར་ནི་ལམ་ཤེས་ལ་རྒྱུན་གྱིས་འཇུག་པ་མི་མཐུན་པ་དང་། གཉེན་པོ་གཉིས་སུ་ཤེས་ནས་ཉམས་སུ་མྱོང་བར་གྱུར་པའི་ལམ་འཆད་པ་རྣམས་སོ། །འདིའི་དོན་ཡང་ཉེས་པ་སྤངས་པ་སྐྱོན་མེད་པ། །
ཤིན་ཏུ་སད་པ་སད་པའི་བདག །ཅེས་གསུངས་པས་བཤད་པ་ཡིན་ནོ། །འདི་ནི་ངོ་བོ་ཉིད་གློ་བུར་བ་དང་ལྡན་པ་དག་ལ་ལམ་གྱིས་འབྱིན་པར་དགོངས་པའོ། །ཡང་སྤོང་བ་དང་སྒྲུབ་པ་རྒྱུན་འཆད་པར་གྱུར་པ་ནི། འཇམ་དཔལ་ཡེ་ཤེས་ལ་བྱ་སྟེ། འབྲས་བུ་ཉིད་དུ་བདག་དགོངས་པའི་རྒྱུད་འདིར་ཟུག་
རྔུ་ལྔ་ལ་སོགས་པ་དང་། འཆིང་བ་ལས་གྲོལ་ཞིང་དབྱིངས་བཞི་ལུས་ལ་ཡེ་ཤེས་རྣམས་རོ་མཉམ་དུ་འདྲེས་པ་དེ་ལ་འཇམ་པ་ཞེས་བྱའོ། །འདི་ཉིད་བདག་དང་གཞན་གྱི་དོན་ཕུན་སུམ་ཚོགས་པ་མ་ལུས་པའི་གཞིར་གྱུར་པས་དཔལ་ཡིན་ནོ། །སེམས་ཞེས་བྱ་བ་ནི་རྒྱུན་དང་ཉིད་དང་རང་བཞིན་ཡིན་པས་
གསུམ་པར་ཡང་སྦྱར་རོ། །དེ་ཡང་སོ་སོ་རང་རིག་མི་གཡོ་བ། །མཆོག་གི་དང་པོ་སྐུ་གསུམ་འཆང་། །སངས་རྒྱས་སྐུ་ལྔའི་བདག་ཉིད་ཅན། །ཁྱབ་བདག་ཡེ་ཤེས་ལྔ་ཡི་བདག །བདག་རིག་གཞན་རིག་ཐམས་ཅད་ལ། །ཀུན་ལ་ཕན་པའི་གང་ཟག་མཆོག །ཅེས་གསུངས་སོ། །དེ་ལྟར་སྟོན་པས་བརྗོད་བྱ་
དམིགས་པའི་ཡུལ་དུ་ཐུགས་ལ་བཞག་ནས། དེ་ཡི་བརྗོད་པ་བསྟན་པ་ནི། །བདེ་གཤེགས་མ་ལུས་ཀུན་གྱི་མཚན་གྱུར་པ། །ཞེས་བྱ་བ་སྨོས་ཏེ་དེ་བཞིན་ཉིད་དུ་གཤེགས་པ་དང་། དེ་བཞིན་ཉིད་དུ་གཤེགས་པ་ལས་བྱོན་ཞིང་སྟོན་པའོ། །མ་ལུས་པ་ཞེས་བྱ་བ་ནི། འགྲོ་བ་ཀུན་རྫོབ་ཅན་གྱི་ངོ་བོར་བྱུང་
བ་དང་། ཀུན་རྫོབ་ཀྱི་ཆར་གཤེགས་ཤིང་སྟོན་པ་སྟེ། དུས་དང་ཕྱོགས་མ་ལུས་པའི་མ་ལུས་པ་ལ་ཀུན་དུ་ཞེས་བསྟན་པ་ནི་ཁ་ཅིག་ཟད་པར་གྱི་མིང་དང་དོན་ལ་ཟེར་རོ། །འདི་ནི་ཀུན་ནས་ཉོན་མོངས་པའི་མཚན་རྣམས་གསུངས་པ་ཡིན་པས་དེ་འཛིན་པའོ། །གང་གི་ཕྱིར་མ་དག་པ་མཚན་དུ་གྱུར་

49-1-137a

པ་ནི། ངོ་བོས་ཁྱབ་པ་དང་། དེའི་རྣམ་པར་འཕྲུལ་པ་དང་། དེ་ལས་བྱུང་བའི་ཕྱིར་རྒྱུ་ལ་གུས་པའོ། །མཚན་གྱུར་ཞེས་བྱ་བ་ནི། མཚན་དག་སྔགས་ཀྱི་སྤྱད་པ་སྤྱོད་པ་ལ་ལྷག་པར་འགྱུར་བའོ། །དེ་ཡང་བཅུ་ཕྲག་བརྒྱད་དང་དྲུག་ཉིད་དང་། བརྒྱ་ཕྲག་གཅིག་དང་བརྒྱད་ཅུ་གཅིག །
བཅུ་ཕྲག་བདུན་ལ་གཅིག་ལྷག་པ། །བརྒྱ་ཕྲག་གཉིས་དང་བདུན་ཅུ་ལྔ། །བརྒྱ་ཕྲག་གཅིག་དང་དེ་ལ་ལྔ། །བརྒྱ་ཕྲག་གཅིག་ལ་ལྔ་མེད་པའོ། །ལྔ་ཕྲག་བཅུ་ལ་གསུམ་ལྷག་དང་། །དེ་བཞིན་དུ་ནི་སྔ་མའི་གྲངས། །ཞེས་བྱ་བའི་ཚིགས་བཅད་ཀྱིས་བསྟན་པའོ། །བརྗོད་པ་དེ་དག་གང་གིས་ཇི་ལྟར་བརྗོད་
པ་ནི། རྡོ་རྗེ་འཆང་ཆེན་རྣམས་ཀྱི་གླུར་བླངས་དོན། །ཞེས་བྱ་བ་ལ། སྟོང་པ་ཉིད་ཀྱི་བདག་ཉིད་ཏིང་ངེ་འཛིན་གྱིས་འཛིན་པ་ནི་རྡོ་རྗེ་འཆང་བ་སྟེ། བདེ་བ་ཆེན་པོ་བློ་མཉམ་པའི་སྐུའོ། །དེ་ཡང་མི་ཉམས་ཤིང་ཀུན་ལ་ཁྱབ་པས་དེ་ལ་དེ་སྐད་ཅེས་བྱའོ། །རྣམས་ཞེས་བྱ་བ་ནི། ཁྱབ་པ་པོའི་སྐུ་ཉིད་ཀུན་རྫོབ་
ཀྱི་ངོར་དུས་མེད་དུས་ཀྱི་རྣམ་པར་སྣང་བ་སྟེ། དངོས་པོའི་ཆ་འཛིན་པའི་ཕྱིར་རོ། །དེ་དག་གིས་སྐུ་ཉམས་སུ་བསྟར་བའི་ཆོས་ཐམས་ཅད་རང་བཞིན་གྱིས་རྣམ་པར་དག་པ་དེ་གསལ་བར་གདུལ་བྱ་ལ་དབྱེ་བ་ནི་གླུར་བླངས་པའོ། །དེ་སྐད་དུ། འདས་པའི་སངས་རྒྱས་རྣམས་ཀྱིས་གསུངས། །མ་བྱོན་
རྣམས་ཀྱང་གསུང་འགྱུར་ལ། །ད་ལྟར་བྱུང་བའི་རྫོགས་སངས་རྒྱས། །ཡང་དང་ཡང་དུ་གསུང་བ་གང་། །རྒྱུད་ཆེན་སྒྱུ་འཕྲུལ་དྲ་བ་ལས། །རྡོ་རྗེ་འཆང་ཆེན་གསང་སྔགས་འཆང་། །དཔག་མེད་རྣམས་ཀྱིས་དགའ་བཞིན་དུ། །གླུར་བླངས་གང་ལགས་བཤད་དུ་གསོལ། །ཞེས་པའོ། །
དོན་དམ་པར་དུས་གསུམ་དུས་མེད་རྟོགས་པའོ། །སེམས་ཅན་ཀུན་གྱི་གཙོ་བོ་ཆེ། །ཞེས་གསུངས་པས་འཆང་བ་ཡིན། དེ་ལྟར་བརྗོད་པ་བསྟན་པ་དེའི་དགོས་པ་ནི། དེ་བཞིན་བྱ་བས་བསྟན་པ་ཡིན་ནོ། །དོན་ནི་གང་གིས་ཇི་ལྟར་བརྗོད་པའི་དོན་ཁོང་དུ་ཆུད་པའི་བྱང་ཆུབ་སེམས་དཔའི་ལམ་
འབྲས་བུ་དང་བཅས་པའི་དམིགས་པའོ། །དེ་ཡང་། ཚིག་གི་བདག་པོས་ཚིགས་སུ་བཅད། །གསང་སྔགས་རྒྱལ་པོ་དྲུག་ལྡན་ཞིང་། །གཉིས་སུ་མེད་པར་འབྱུང་བ་དང་། །མི་སྐྱེའི་ཆོས་ཅན་འདི་གསུངས་པ། །ཞེས་བྱའོ། །ཚིག་གི་བདག་པོ་ནི་བརྗོད་བྱའི་དགོས་པ་མཐོང་བའོ། །ཚིགས་

49-1-137b

སུ་བཅད་པ་ནི། རྗོད་བྱེད་མཚན་དོན་མཐོང་བའོ། །གསང་སྔགས་རྒྱལ་པོ་ནི་བརྗོད་བྱའི་དགོས་པ་ལམ་གྱི་ཁྱད་པར་རོ། །དྲུག་ལྡན་ནི་ལམ་དེའི་དམིགས་པ་དང་། མི་མཐུན་པ་དྲུག་ཏུ་གཟིགས་པ་སྟེ། དེ་ཡང་གསང་སྔགས་རིགས་ཆེན་ཐམས་ཅད་དང་། །རིགས་ཆེན་གཙུག་ཏོར་ཆེར་
གཟིགས་ནས། །ཞེས་པའི་བར་གྱིས་བསྡུས་སོ། །འདི་དག་གི་འབྲེལ་བ་གང་གིས་རྟོགས་པ་ནི། སྐྱེ་བོ་བློ་བཟང་ཉོན་ཞེས་བྱ་བར་འབྲེལ་བའོ། །བློ་བཟང་བ་ནི་རྡོ་རྗེ་འཛིན་པ་རང་དང་མཚུངས་པ་སྟེ། སྐྱེ་བོ་ཞེས་སྨོས་པས་སྒྲུབ་པ་པོ་མཚན་ཟབ་པ་དང་། རྒྱ་ཆེ་བར་གཏོགས་པར་འདྲའི་དབྱིབས་
དང་ཆ་བྱད་ཀྱང་བུམ་པ་ལ་སོགས་པས་ནི་མ་ཡིན་ནོ། །ཉོན་ཞེས་བྱ་བ་ནི་རྟོགས་པ་དང་ལྡན་པས་དགོས་འབྲེལ་ཤེས་ནས་ཉམས་སུ་བླང་བྱ་ལ་གུས་པར་གདམས་པའོ། །ཟབ་ཅིང་རྒྱ་ཆེན་ཞེས་བྱ་བ་ནི། བརྗོད་བྱའི་དགོས་པ་སྟོན་ཏེ། ཟབ་པའི་བདག་གིས་བསྡུས་པའི་སྐུའོ། །རྒྱ་ཆེ་བ་ནི་གཞན་
གྱིས་བསྡུས་པའི་སྐུའོ། །དེ་ཡང་། ལོངས་སྤྱོད་རྫོགས་སྐུ་ཀུན་གྱི་རྒྱལ། །སྤྲུལ་པའི་སྐུ་སྟེ་སྐུ་ཡི་མཆོག །སངས་རྒྱས་སྤྲུལ་པའི་རྒྱུད་འཆང་བ། །ཕྱོགས་བཅུར་སྤྲུལ་པ་སྣ་ཚོགས་འགྱེད། །ཅེས་གསུངས་པ་ཡིན་ནོ། །དེ་ལྟར་དགོས་པ་ལ་སོགས་པས་ཞུགས་པ་རྣམས་ཇི་ལྟར་འབྲས་བུ་དེ་ལྟར་
བསྒྲུབ་པར་བྱ་སྙམ་པ་ལ་ཐབས་བསྟན་པའི་ཕྱིར། བྱང་ཆུབ་སེམས་བསྐྱེད་ལྷག་པས་ལྷར་དམིགས་ལ། །ཞེས་བྱ་བ་སྨོས་ཏེ། བྱང་ཆུབ་ནམ་མཁའ་ལྟ་བུ་དང་སེམས་ཅན་ལ་ཕན་པའི་རྣམ་པའོ། །དེ་ནས་དེའི་ཆེད་དུ་སྤྱོད་པ་དྲི་མ་མེད་པ་སྒྲུབ་པར་འདོད་པའོ། །ཐམས་ཅད་མཁྱེན་པའི་
རྒྱུ་བྱང་ཆུབ་ཀྱི་སེམས་ཡིན་ནོ། །དེ་ཡང་སྙིང་རྗེ་རྩ་བ་ལས་པ་ཡི། །ཐབས་ཀྱི་མཐར་ནི་སོན་པའོ། །ཞེས་གསུངས་སོ། །དེ་ཡང་རྒྱ་ཆེ་བ་དང་སྙིང་རྗེས་རྒྱུན་ཆགས་བྱ་བའི་བསོད་ནམས་ཀྱི་ཚོགས་སོ། །ཆོས་ཐམས་ཅད་དོན་དམ་པར་ལྷག་པར་མོས་པ་ནི་ཡེ་ཤེས་སོ། །དེ་སྐད་དུ་ཡང་།བྱང་ཆུབ་
སེམས་དཔའི་ལམ་ནི་མཐའ་ཡས་ཏེ། མདོར་བསྡུ་ན་བསོད་ནམས་ཀྱི་ཚོགས་དང་། ཡེ་ཤེས་ཀྱི་ཚོགས་ཞེས་པ་དང་། རྒྱུད་འདི་ཉིད་ལས་ཀྱང་། སྙིང་རྗེ་ཆེན་པོ་ཤེས་རབ་ཐབས། །རྫུ་འཕྲུལ་ཆེན་པོ་འཇིག་རྟེན་འདས། །ཚོགས་གཉིས་ཚོགས་ནི་བསགས་པའོ། །རྟག་པ་ཀུན་རྒྱལ་

49-1-138a

རྣལ་འབྱོར་ཅན། །ཞེས་གསུངས་པས། འཁོར་གསུམ་དམིགས་པ་མེད་པ་བྱང་ཆུབ་དང་སེམས་ཅན་ལ་དམིགས་པ་ནི་སེམས་བསྐྱེད་དེ། སྲིད་པ་དང་ཞི་བ་ལས་རྣལ་འབྱོར་བསྲུང་བའོ། །དེས་བདག་གི་སྲུང་བ་ཡང་འགྱུར་ཏེ། ལྷག་པས་ལྷར་དམིགས་ལ་ཞེས་པ་ལ་བདག་གི་
སེམས་ཇི་ལྟར་སྦྱངས་པའི་དག་པ་ནི་ལྷག་པའི་དོན་དང་ཕྲད་པར་བྱེད་པས་ལྷག་པའོ། །དེ་ཉིད་ལས་ཁ་དོག་དང་དབྱིབས་ཀྱི་དམ་ཚིག་ཏུ་ལྟ་བ་ནི་དོན་གྱིས་ལུས་ལས་བྱུང་བས་ལྟ་ཞེས་བྱའོ། །དམིགས་པ་ནི་དེ་དག་གཉིས་མེད་པར་སྦྱོར་བའོ། །འདིས་རྣལ་འབྱོར་པ་ཁྱད་པར་ཅན་དང་།  རྒྱུད་ཁྱད་
པར་ཅན་གྱིས་མཆོག་གི་རྣལ་འབྱོར་པ་བླ་མའི་ཁ་ལས་བརྒྱུད་པར་དགོངས་སོ། །སྲུང་བ་གཉིས་སྔོན་དུ་སོང་བས་ཇི་ལྟར་བསྒྲུབ་སྙམ་པ་ལ། རྟེན་འབྲེལ་རྣམ་གསུམ་སྒྱུ་མའི་སྦྱོར་བ་ཡིས། །མ་ལུས་གཉིས་མེད་མཁའ་ཁྱབ་སྤྲུལ་ཚོགས་དགུ། །ཞེས་བྱ་བ་ལ་རྟེན་འབྲེལ་ནི་རང་བཞིན་གྱིས་མ་བཅོས་
པ་སྟེ། གང་གི་ཕྱིར་མཐའ་གཉིས་རྟེན་འབྲེལ་ལ་མི་སྲིད་པའི་ཕྱིར་རོ། །དེ་ལ་བརྟེན་པ་འདུས་ཤིང་གློ་བུར་དུ་རྟེན་ཅིང་འབྱུང་བ་ནི་མིང་ཙམ་དང་གདོད་མ་ནས་མི་སྐྱེ་བ་དང་འབྲེལ་བའོ། །རང་བཞིན་དེའི་བྱེད་པ་ནི་སྦྱོར་བ་སྟེ།  འདུས་པ་ལ་བརྟེན་པ་དང་འབྲེལ་བ་དང་ཞེས་བྱ་བ་ནི་མ་སྐྱེས་པར་གཏོགས་
པའི་རྣམ་གྲངས་སོ། །འདི་ཉིད་བྱ་བ་གསུམ་གྱིས་བྱེད་དེ། དག་པའི་བྱིན་གྱིས་བརླབ་པ་ནི་རྣལ་འབྱོར་པའི་ཀུན་རྫོབ་པོ། །འདི་ཡང་མི་བདེན་ལྟ་བུར་སྣང་བས་ངོ་བོ་མ་ཡིན་པས་སྒྱུ་མའོ། །དེ་ཡང་རང་བཞིན་མེད་པའི་སྣང་བ་ལ་སྒྱུ་མ་ཞེས་བརྟགས་སོ། །གཉིས་པར་གྱུར་པ་སྒྱུ་མ་དང་རྟེན་འབྲེལ་
ནི་སྐྱེས་བུ་རྣམས་དབྱེར་མེད་པ་ལ་སྒྱུ་མར་མ་རྟོགས་པ་དག་ལ་འདོད་པ་བསྒྲུབས་པའོ། །ཡིད་ཅེས་བྱ་བ་ནི་རྣལ་འབྱོར་གྱི་བྱེད་པ་པོར་དགོངས་པའོ། །དོན་དམ་པར་མ་སྐྱེས་པས་ཀུན་རྫོབ་ཀྱང་ནི་རིགས་པའི་ཡུལ་དུ་གྱུར་པ་ལ་རིགས་པའི་ཡུལ་མ་ཡིན་པས་སྒྱུ་མ་ཉམས་པའོ། །སྒྱུ་
མ་ཡང་སྒྱུ་མ་ཉིད་ལ་སྣང་གི་གཞན་དུ་སྐྱེ་བ་དང་འགག་པ་ལ་སེལ་བ་དང་བསྒྲུབ་པར་མི་འདོད་དོ། །གང་ཡང་རྣམ་པར་རིག་པ་ཙམ་ལ་སོགས་པ་རྟེན་འབྲེལ་དོན་དུ་ཁས་བླངས་པ་ལ་ནི་རྣམ་པར་བཅད་པ་འདོད་པ་ཡིན་གྱི། ཕྱོགས་གཞན་གྱི་ངོར་མི་སྣང་བ་དང་ཡོད་པར་ཡང་མ་ཡིན་ནོ། །

49-1-138b

རིགས་པའི་ཤེས་པའི་ཡུལ་ལ་སྣང་བའི་ཐ་སྙད་འགག་པ་དང་ལྡན་པའི་ཡུལ་མ་ཡིན་ཏེ། རྟོག་པ་དང་བྲལ་བའི་ཕྱིར་རོ། །དེ་ཉིད་ཁོང་དུ་ཆུད་པར་བྱ་བའི་ཕྱིར། མ་ལུས་པ་ནི་སེམས་དང་སེམས་ལས་བྱུང་བའི་ཁྱབ་པའི་ཆོས་རྣམས་སོ། །གཉིས་མེད་པ་ནི་དེ་དག་ལ་གཉིས་མེད་པ་དང་དེ་དག་གཉིས་མེད་
དེ། ཀུན་རྫོབ་དང་དོན་དམ་པའི་འཇུག་པ་གཉིས་མ་གྲུབ་པའི་ཕྱིར་རོ། །གང་གི་ཕྱིར་མི་བདེན་པར་རྟོག་པས་འཇུག་པ་དང་། བདེན་པ་ལ་མི་རྟོག་པས་འཇུག་པ་གཉིས་ཡིན་ནོ་ཞེ་ན། དེ་བཞིན་ཉིད་མ་གཏོགས་པ་རྣམས་ལ་ནི་སྐྱེས་བུས་འདོད་པས་ཀྱང་བཞག །དེ་ཡང་དེ་ཉིད་མཐོང་བ་མ་ཡིན་ཏེ།
ཕ་རོལ་སྨྲ་བ་པོའི་ངོར་རྣམ་པར་བཅད་པ་དང་། ཡོངས་སུ་བཅད་པས་བཞག་པའི་ཕྱིར་རོ། །འདིར་ནི་ཉམས་སུ་མྱོང་བའི་ཡུལ་དུ་གྱུར་པ་ལ་དེ་མེད་པས་རང་ལ་སྣང་བའི་མཁའ་ཁྱབ་པོ། །སྤྲུལ་པ་ནི་རྟེན་འབྲེལ་ལས་བྱུང་བས་སོ། །ཚོགས་ནི་དེའི་བདག་མེད་པའི་ལྷ་ཚོགས་རྣམས་སོ། །
འདི་ཇི་ལྟར་མི་འགལ་ཞེ་ན། མ་སྐྱེས་མི་འགག་ཅེས་བྱ་བ་ནི། གང་སྐྱེ་བའི་ཟླས་དྲང་བ་འགག་པ་ཡིན་ལ་འདི་མ་སྐྱེས་པའི་ཆོས་རྣམས་ལ་འགག་པ་འབྱུང་བ་མ་ཡིན་ཏེ། གང་ནས་གང་སྐྱེ་བ་མེད་པ་ལ་གང་དུ་གང་གནས་པ་དང་འགག་པ་མེད་པའི་ཕྱིར་རོ། །བཅོམ་ལྡན་འདས་ཀྱིས་ཀྱང་
གཟུགས་ནི་གང་ནས་ཀྱང་མ་བྱུང་གང་དུ་ཡང་མི་གནས། གར་ཡང་གནས་པར་འགྱུར་བ་མེད་དོ་ཞེས་གསུངས་སོ། །དེའི་ཕྱིར་མ་སྐྱེས་པ་ཉིད་མི་འགག་པས་འབྱུང་བ་དེའི་སྐྱེ་བ་དང་།  འགག་པ་ཉིད་མ་ཡིན་པའོ། །དེ་བས་ན་སྒྱུ་འཕྲུལ་དྲ་བ་ནི་སངས་རྒྱས་ཐམས་ཅད་ཀྱི་གསང་གསུམ་
བསྡུས་པའི་ཚིག་དགུ་ཡིན་ནོ། །དེ་ཡང་སེམས་དང་སེམས་ལས་བྱུང་བ་ནི་སྒྱུ་མ་ཉིད་དུ་འཕྲུལ་པ་དང་། སྒྱུ་མ་ཉིད་དུ་རྟོགས་པའི་དྲ་བ་ནི་བདག་ཉིད་གཅིག་པའི་འབྲེལ་པའོ། །དེ་ལྟར་རྣལ་འབྱོར་བསྒྲུབས་ནས། ད་ནི་བསྒོམ་པ་དང་བཟླས་པའི་རྣལ་འབྱོར་བསྟན་པའོ། །རྡོ་རྗེ་མིག་གིས་གནང་བ་
མ་གསལ་བར་དུ་བལྟ་ཞེས་བྱ་བ་ལ། འདི་ལྟ་བུའི་རྡོ་རྗེའི་མིག་གི་ཡུལ་ཡིན་པས་རྡོ་རྗེའི་མིག་སྟེ། ཡེ་ཤེས་ཀྱི་མིག་གིས་བལྟ་བར་འདོད་དོ། །གཟུང་བའི་ཆོས་རྣམས་ནི་འདིར་དེ་བཞིན་གཤེགས་པའི་ཕྱག་རྒྱར་བལྟའོ། །དེ་བཞིན་གཤེགས་པ་ནི་མི་བསྐྱོད་པ་ཡོངས་སུ་གྲུབ་པའི་མེ་ལོང་གི་

49-1-139a

གཟུགས་བརྙན་ལྟར་བལྟའོ། །མི་བསྐྱོད་པ་སེམས་དང་སེམས་ལས་བྱུང་བ་ནི་རྡོ་རྗེ་སེམས་དཔའི་མིག་གིས་བལྟ་བའི་ཕྱིར་ཡུལ་ཡིན་པས་རྡོ་རྗེ་སེམས་དཔའ་སྟེ།  དེ་ལྟར་བལྟ་བའི་ཡུལ་ཅན་ལ་ཡང་མིང་དེ་སྐད་ཅེས་གྲགས་སོ། །དེ་ཡང་ཡེ་ཤེས་མིག་གཅིག་དྲི་མ་མེད། །ཡེ་ཤེས་
ལུས་ཅན་དེ་བཞིན་གཤེགས། །ཞེས་བྱ་བ་ལས་དང་། སྟོང་པ་ཉིད་ལ་སྟོང་ཉིད་མཐོང་། །མིག་ནི་མི་འགྱུར་བརྟན་པའོ། །ཞེས་བྱའོ། །སྣང་གསལ་བར་དུ་བལྟ་ཞེས་བྱ་བ་ནི། དོན་དེ་དག་ལ་དང་པོ་རྣལ་འབྱོར་བསྟན་པས། ཡིད་ཆེས་པ་སྔོན་དུ་སོང་བས། ཟག་པ་མེད་པའི་བདུད་རྩིར་གྱུར་པས་
བདག་འདྲིས་པའི་བར་དེ་སྲིད་དུ་ཤེས་རབ་ཀྱིས་བལྟ་ཞིང་བསྒོམ་པར་བྱའོ་ཞེས་བྱ་བའི་དོན་ཏོ། །ཇི་སྐད་དུ། མི་འགྱུར་ཀུན་འགྲོ་ཁྱབ་པ་པོ། །ཡེ་ཤེས་གཉིས་མེད་ཚུལ་འཆང་བ། །རྣམ་པར་རྟོག་མེད་ལྷུན་གྱིས་གྲུབ། །ཅེས་གསུངས་སོ། །དེ་ནས་འབད་པ་མེད་པའི་མཚན་བརྗོད་པ་ནི། 
སྒྱུ་མ་བྲག་ཅ་ནམ་མཁའི་རང་བཞིན་དུ། །ཞེས་བྱ་བ་ལ། ཇི་སྐད་བཤད་པའི་དཀྱིལ་འཁོར་ན་སྒྱུ་མ་ཡིན་པས་ཕྱི་དང་ནང་དང་བྲལ་བའི་སྣང་བར་མཐོང་བ་དང་། མཚན་གྱི་སྔགས་བཟླས་པ་རྣམས་ནི།  བྱེད་པ་པོ་ལ་སོགས་པ་གསུམ་མེད་པས་ཕྱི་དང་ནང་དུ་གསལ་བའི་བྲག་ཅའོ། །འདི་
གཉིས་ནི་གཟུགས་དང་སྒྲའི་རྣམ་པ་སྟེ། མཚན་མའི་རང་བཞིན་དུ་གྱུར་པ་སྟེ། ཇི་སྐད་དུ། སྦྱོར་བའི་ལམ་པ་ནི། སྤྲུལ་སྐུའི་ཡུལ་གསུང་གི་ལོངས་སྤྱོད་དང་། མི་གཡོ་བ་ལ་གནས་པ་ནི་སྐུའི་ཡུལ་ལོ། །དེ་ལྟར་ན་དབྱིབས་དང་སྔགས་ཀྱིས་ནི་འདི་དག་ལ་ཐུགས་རྡོ་རྗེའི་རང་བཞིན་གྱི་ཡེ་
ཤེས་དངོས་སུ་སྐྱེད་པར་བྱེད་པས། སྤྲོ་བ་བསྡུ་བའི་བདག་ཉིད་ཅན་ལ་སོགས་པ་ཀུན་འདིར་ལྡན་པའོ། །དེ་བས་ན་ཡོངས་སུ་ཤེས་ནས་ནི་ཁོང་དུ་ཆུབ་པར་བྱས་ནས་སོ། །དེ་ཡང་སེམས་ཀྱིས་ཏེ། ཡེ་ཤེས་ལས་བྱུང་བས། ཡེ་ཤེས་ཡེ་ཤེས་མཚོན་པའི་བརྡའི་མཚན་གདགས་
པས་བྱ་བ་ནི་རླག་ཅེས་པའི་དོན་ཏོ། །གང་གི་ཕྱིར་སེམས་དང་སེམས་ལས་བྱུང་བའི་སྐུ་དང་གསུང་དང་ཐུགས་ཐམས་ཅད་འདིར་བཤད་ཅེ་ན། དེའི་ཕྱིར། གསང་སྔགས་ལམ་ནི་རྣལ་འབྱོར་ཚུལ་འདིས་བྱེད། །ཅེས་པ་ལ། གསང་བ་ནི་སྔར་བསྟན་པའི་ཟབ་པ་ཉིད་ཀྱི་དཀྱིལ་འཁོར་ཏེ།

49-1-139b

ཉན་ཐོས་ལ་སོགས་པ་དང་ཕ་རོལ་ཏུ་ཕྱིན་པ་ལ་མེད་པའི་ཕྱིར་རོ། །འདི་ཉིད་མྱུར་བ་ཉིད་དུ་དམན་པ་ལས་སྐྱོབ་པས་ན་སྔགས་ཡིན་ཏེ། གང་གི་ཕྱིར་འདིར་ནི་འབྲས་བུ་ཡན་ལག་བདུན་དང་ལྡན་པའི་འབྲས་བུ་ལ་སོགས་པ་དེ་ཡང་ཕུན་སུམ་ཚོགས་པ་བཞི་དང་ལྡན་པའི་འབྲས་བུས་རློབས་ནས།
ཆོས་བདག་མེད་པ་དང་བསྲེས་ནས་ཚོགས་བདུད་རྩི་རྫོགས་པར་གྱུར་པས། འཇིག་རྟེན་པའི་ཞེན་པ་དང་སྣང་བ་མྱུར་དུ་ཉམས་པ་ཡིན་ནོ། །དེ་ཡང་རྒྱུན་མི་འཆད་པར་འབྱུང་བས་རྣལ་འབྱོར་ཏེ། འགྲོ་བ་ལ་དགོངས་པའི་ཡེ་ཤེས་ཁྱད་པར་ཅན་དེས་ལྡོག་པ་ཡིན་པས། ཚུལ་འདིས་བྱེད་པ་
ཡིན་པར་འདོད་དོ། །དེ་ཡང་། གསང་སྔགས་རྒྱལ་པོ་དོན་ཆེན་བྱེད། །ཅེས་བྱ་བས་ནི། གསང་སྔགས་ཀྱི་ལམ་དེ་གསུངས་སོ། །རྣལ་འབྱོར་བསྒོམ་པ་ལས་བྱུང་བ། །ཞེས་པས། ལམ་དེའི་རྒྱུན་གསུངས་པ་ཡིན་ནོ། །བྱེད་པ་སེམས་ཅན་ཀུན་དོན་བྱེད། །ཅེས་བྱ་བས་འབྲས་བུ་གསུངས་པ་ཡིན་
ནོ། །འདི་སྐད་སྟོན་ཏེ། ཡིད་དང་བའམ། མཐུན་པའི་གནས་སུ་སྔ་དྲོ་ལ་སོགས་པའི་དུས་གསུམ་དང་དམ་ཚིག་ཉམས་པ་མེད་པ་གདོང་བཀྲུ་བ་ལ་སོགས་པ་བྱས་ལ། སྟན་བདེ་བ་ལ་འདུག་སྟེ། བྱང་ཆུབ་དང་སེམས་ཅན་ལ་དམིགས་པའི་བློས་རང་ཉིད་ཀྱིས་རྒྱུན་བཤགས་བྱའོ། །འདི་ཉིད་ལ་
འཁོར་གསུམ་དམིགས་པ་མེད་པར་ཆོས་ཐམས་ཅད་ལྷག་པར་མོས་པར་བྱའོ། །དེ་ནས་རང་ཉིད་དམ་ཚིག་དང་དབྱིབས་སུ་ལངས་ལ། ཧྲཱིཿདང་ཧཱུཾ་ལས་ཀྱེ་རྡོ་རྗེར་བྱིན་གྱིས་བརླབ་པར་བྱའོ། །ཨོཾ་ཧཱུཾ་ཨ་ཨོཾ་ཨཱཿཞེས་བྱ་བས། རྡོ་རྗེ་རིན་ཆེན་དབང་བསྐུར་དཔལ། །རིན་ཆེན་ཀུན་བདག་དབང་ཕྱུག་
ཆེ། །འཇིག་རྟེན་དབང་ཕྱུག་ཀུན་གྱི་བདག །རྡོ་རྗེ་འཆང་བ་ཀུན་གྱི་རྗེ། །སངས་རྒྱས་ཀུན་གྱི་ཐུགས་ཆེ་བ། །ཞེས་བྱ་བར་བྱིན་གྱིས་བརླབ་པོ། །དེ་ནས་རྡོ་རྗེ་ཁུ་ཚུར་གཉིས་བཅིངས་ལ། །མཐེ་བོ་མཐེའུ་ཆུང་རྡོ་རྗེར་སྦྲེལ། །རྡོ་རྗེ་འཁོར་ལོའི་མིང་བརྗོད་ཅིང་། །དཀྱིལ་འཁོར་ཐམས་ཅད་སློང་བའོ། །དེའི་མཐར། 
ནམ་མཁའི་བདག་པོ་སྣ་ཚོགས་སྟོན། །ཞེས་གསུངས་པས་སེམས་དང་སེམས་ལས་བྱུང་བའི་དབྱིངས་དང་རིགས་བསྡུས་པའི་ངེས་པ་ལྔ་དང་། ཏིང་ངེ་འཛིན་སུམ་ཅུ་རྩ་གཉིས་དང་། ཕ་རོལ་ཏུ་ཕྱིན་པ་བརྒྱད་དང་། མཐོང་བ་དང་བསྒོམ་པ་ནི་ངོ་བོ་ཉིད་དོ། །དེ་ནས་རིམ་པ་ཕྱི་མ་

49-1-140a

ལ། དྲི་མ་དང་བྲལ་བའི་སངས་རྒྱས་རལ་གྲི་དང་འཁོར་ལོ་ཅན་དང་། བདུད་འདུལ་བར་རལ་གྲི་དང་རྡོ་རྗེ་ཅན་དང་། འདོད་ཆགས་ལ་རལ་གྲི་དང་པདྨ་ཅན་དང་། སྤེལ་དུ་ཡོད་པར་རལ་གྲི་དང་། རིན་པོ་ཆེ་དང་སྣ་ཚོགས་པར་རལ་གྲི་དང་། སྣ་ཚོགས་རྡོ་རྗེ་རྩེ་མོ་བཅུ་གཉིས་པ་
དང་། བླ་མ་དང་སློབ་དཔོན་རྣམས་དང་། དམ་ཚིག་གི་ཕྱག་རྒྱས་བཏབ་པ་པོས་གདུལ་བྱ་གནས་གསུམ་པ་བལྟ་བར་བྱའོ། །དེ་ནས་བརྡ་རྣམས་ནི་སྐུ་རྡོ་རྗེར་བལྟའོ། །མཚོན་ཆ་རྣམས་ནི་གསུང་རྡོ་རྗེར་བལྟའོ། །བདག་ཉིད་ནི་ཐུགས་སུ་བལྟ་བར་བྱའོ། །དེ་ལ་བརྡ་ནི་ངོ་བོ་ཉིད་དོ། །མཚོན་པ་ནི་མཚན་
ཉིད་དོ། །བདག་ནི་རང་བཞིན་གྱིས་སྙིང་སྐུལ་བར་བྱེད་པས་ན་སྐད་ཅིག་མ་དང་པོར་རྣལ་འབྱོར་པ་བདག་ཉིད་ལ་དེ་དག་ངེས་པར་བསྒོམ་མོ། །ཆོས་ཐམས་ཅད་རྟོགས་པའི་མཆོག་སྐྱེས་ནས་སློབ་མ་རྣམས་ལ་བདག་གི་ཁོང་དུ་ཆུད་པར་བྱ་བའི་ཕྱིར། དད་པ་དང་མོས་པ་དང་། ངེས་པར་མཚོན་པ་
བརྗོད་པར་བྱའོ། །དེ་ནས་བསྟོད་པ་དང་སྤྲོ་བསྡུ་དང་དོན་རྟོགས་པ་རྣམས་ཡིན་ཏེ། དེ་ནས་མཐར་ཡང་རིགས་དྲུག་གི་བདག་ཉིད་ལ་རང་ལ་བསྡུས་ལ་ཇི་སྐད་བཤད་པའི་ནང་གི་རྣལ་འབྱོར་ཡེ་ཤེས་གནས་པར་བྱེད་པ་རྟག་ཏུ་བསྒོམ་པར་བྱའོ། །དེ་ཡང་ཆོས་ཀྱི་དབྱིངས་དང་སེམས་ཅན་གྱི་དོན་གྱི་
ཕྱིར་རོ། །དེ་ལྟར་ཐབས་བརྗོད་ནས། ལམ་འདིའི་སའི་ངོ་བོ་བརྗོད་པས་དམན་པ་དགག་པ་ནི། མཁའ་ལ་དངོས་རྣམས་ཇི་ལྟར་གནས་བཞིན་དུ། །ཞེས་བྱ་བ་ནི་དཔེ་བརྗོད་པ་སྟེ། འབྱུང་བ་ཆེན་པོ་རྒྱུ་གཅིག་པོ། །ཞེས་གསུངས་པས་ས་ལ་དང་དེའི་ཁྱབ་པ་ནི། ནམ་མཁས་ཁྱབ་ཅིང་དེ་ལས་མ་
གཡོས་པའི་ཕྱིར་རོ། །རྟེན་ཅིང་འབྲེལ་པ་སེམས་དང་སེམས་ལས་བྱུང་བའི་དམ་ཚིག་གི་དཀྱིལ་འཁོར་རྣམས་ནི་འོད་གསལ་བའི་ཡེ་ཤེས་ལས་བྱུང་ཞིང་མ་གཡོས་པས་བེམས་པོ་དང་དངོས་པོར་ཐང་ཆད་པས་མ་ཡིན་ནོ། །དེ་སྐད་དུ་ཡང་། ལུས་མེད་ལུས་ཏེ་ལུས་ཀྱི་མཆོག །ལུས་ཀྱི་མཐའ་
ནི་རྟོགས་པ་པོ། །གཟུགས་རྣམས་སྣ་ཚོགས་ཀུན་དུ་སྟོན། །ཞེས་གསུངས་སོ། །འདི་ཉིད་དམ་ཚིག་དཀྱིལ་འཁོར་ཡང་ཡིན་ལ། ཕྱག་རྒྱ་ཆེན་པོ་ཡང་ཡིན་པས་ན། དམ་ཚིག་གི་དཀྱིལ་འཁོར་ཏེ། བརྡ་དང་མཚན་པའི་ཕྱིར་རོ། །དེ་ཡང་སྙིང་པོ་ལེན་པའི་དཀྱིལ་འཁོར་ནི་ཕྱག་རྒྱ་ཆེན་པོར་

49-1-140b

གནས་པས། གཞན་དུ་མི་འབྱུང་གཞན་ལ་མི་གནས་ཏེ། ཕྱོགས་གཞན་ནི་ཆད་པ་དང་ངེས་པ་པོ་མེད་པའི་ཕྱིར་རོ། །ཇི་སྐད་དཔལ་མཁའ་འགྲོ་མ་གུར་ལས་ཀྱང་། ཐབས་ནི་སྟོང་པར་མ་བཤད་དོ། །གལ་ཏེ་སྟོང་ཡུལ་ཐབས་ཡིན་ན། །འབྲས་བུ་རྒྱུ་ལས་མི་གཞན་ཕྱིར། །དེ་ནི་སངས་རྒྱས་ཉིད་མི་
འགྱུར། །དེས་ན་དཀྱིལ་འཁོར་འཁོར་ལོ་དང་། །བདེ་བའི་ཐབས་སུ་སྡོམ་པའོ། །ཞེས་གསུངས་སོ། །ངེས་པ་མེད་པར་ཡང་འབྱུང་བ་མ་ཡིན་ཏེ། དཔལ་དམ་ཚིག་བཀོད་པ་ལས་ཀྱང་། སེམས་ནི་དྲི་མེད་པར་རྟོགས་ན། དཀྱིལ་འཁོར་ཐམས་ཅད་འབྱུང་འགྱུར་གྱི། །མཁའ་ལ་རྟོག་པའི་
དྲི་མར་བཅས། །དེ་སྲིད་བར་དུ་དེ་མི་སྣང་། །ཞེས་གསུངས་སོ། །དེ་ལྟར་ན་འགྱུར་གྱི་ཕྱོགས་གཞན་ཡང་མི་འགོག་སྟེ། ངེས་འབྱུང་སྣ་ཚོགས་ལས་བྱུང་བ། །ཞེས་གསུངས་པས་དཀྱིལ་འཁོར་བདག་མེད་པ་ལ་ཐང་ཆད་པ་མ་ཡིན་ཞེན། དོན་དེ་མི་ཤེས་དཀའ་བའི་ལམ་གཡེང་བས། །འཁོར་བའི་
དྲི་གསུམ་དག་ལས་གཡོ་བ་མིན། །ཞེས་བྱ་བ་ནི། གང་ཡང་རྒྱུ་འབྲས་བུ་ཞེས་བྱ་བ་ནི་རྗེས་སུ་མཐུན་པར་འཇུག་པ་ལས་ཐབས་སུ་འོས་ན་ནི་འདིར་མཐུན་པའི་ཕྱིར་རོ། །དེ་ལྟར་མ་ཡིན་ནི་རེ་ཞིག་དབུགས་དབྱུང་བར་དགོངས་ཀྱི། བདག་མེད་པ་ལ་སོགས་པ་ལས་ལྡོག་པ་ནི་ངེས་པའི་ལུང་
དང་རིགས་པས་གནོད་པའི་ཕྱིར་རོ། །གང་འདི་ལྟར་སྣང་བ་ནི་བག་ཆགས་ཀྱི་ཚོགས་ལས་བྱུང་གི། གང་གི་ཕྱིར་སངས་རྒྱས་དང་སེམས་ཅན་འདྲ་བ་ཉིད་དུ་ཐལ་ཞེས་བྱའོ། །ཇི་སྐད་དུ། འཕགས་པ་དྲི་མ་མེད་པར་གྲགས་པ་ལས་ཀྱང་ཤེས་རབ་དང་བྲལ་བའི་ཐབས་ཀྱི་ཡུལ་ནི་བཅིངས་
པའོ། །ཐབས་དང་བྲལ་བའི་ཤེས་རབ་ཀྱང་བཅིངས་པའོ། །དེ་ཡང་ཡོད་པ་དང་མེད་པ་ནི་རྟག་པ་དང་ཆད་པར་འགྱུར་བས། མི་གནས་མྱ་ངན་འདས་པ་པོ། །ཞེས་བྱ་བ་ཡང་མི་འགྲུབ་པས། དོན་དེ་མི་ཤེས་པ་ནི་སྔར་བསྟན་པ་དག་མི་ཤེས་པའོ། །དཀའ་བའི་ལམ་ནི་གཡེང་
བས་ན་ཡུན་རིང་བ་ཉིད་འདོད་པ་བརྟགས་པ་ལ་ཞེན་པའི་ཕྱིར། འཕགས་པ་དང་མི་མཐུན་པའི་རྣམ་པར་རྟོག་པ་འབྱུང་བའོ། །དེ་ཉིད་ཀྱི་ཕྱིར་ཡུལ་དམན་པ་དང་ཞེན་པའི་ཚོགས་ཀྱིས་གནས་གསུམ་གྱི་འཁྲུལ་འཁོར་བཅུ་གཉིས་ལས་མི་གཡོ་བ་དག་གོ། །འདིར་ནི་དེ་གཉིས་

49-1-141a

ཉམས་པའི་ཐབས་དང་ཤེས་རབ་ཕུལ་དུ་ཕྱིན་པ་དང་། འབྲས་བུ་དང་རྗེས་སུ་མཐུན་པས་ལམ་ཆེན་པོ་ཡིན་ནོ། །དེ་ཡང་། སྙིང་རྗེ་ཡི་ནི་ཡ་ལད་བགོས། །ཤེས་རབ་རལ་གྲི་མདའ་གཞུ་ཐོགས། །ཉོན་མོངས་མི་ཤེས་གཡུལ་ངོ་སེལ། །ཞེའོ། །དེའི་ཕྱིར་རྟོགས་པའི་འབྲས་བུ་བསྟན་པ་
ནི། དེ་ལྟའི་དོན་ཤེས་རང་བཞིན་ཉེས་པའི་ཚོགས། །བཅོམ་པ་སྤོས་ཀྱི་གླང་པོ་ཀེ་ཏ་ཀ །ཟོས་བཞིན་བཅོམ་ལྡན་གཞུང་ཚོགས་ཡོན་ཏན་ཐོབ། །འགག་པ་མེད་པའི་ཆོས་ཀྱི་རྒྱལ་པོར་འགྱུར། །ཞེས་བྱ་བ་ལ། དེ་ལྟའི་དོན་ཤེས་པ་ནི་སྔར་བསྟན་པ་དང་རྟགས་པའོ། །རང་བཞིན་ཉེས་པ་ནི་མ་རིག་
པའི་ཡུལ་ལོ། །དེའི་ཚོགས་ནི་ཉོན་མོངས་པ་དང་ལས་དང་སྲིད་པའི་ཆའོ། །དེ་འཇོམས་པ་ནི་དཔེའི་བརྗོད་པའོ། །དེ་ཡང་གཞི་གཅིག་ལ་རྟོགས་པས་རྫས་མི་འཆིང་བའོ། །འདི་ཇི་ལྟར་འགྱུར་ཞེ་ན། རྟོག་པའི་ཡུལ་གྱིས་སྟོང་པ་ཉིད་ནི་གཉེན་པོས་བཅོམ་པའོ། །གཉེན་པོ་དང་མི་མཐུན་པ་
ནི་ནུས་པ་མཉམ་དུ་ཟིན་པས། ཐོག་མ་དང་མཐར་ཡུལ་ཡོད་པ་དང་མེད་པས་ཕྱེ་བས་ཡུལ་ཅན་ཡང་འཐད་པའོ། །དེའི་ཚོགས་ནི་རྒྱུད་མེད་པའི་ཕྱིར་མི་སྐྱེ་བའོ། །གཉིས་པ་ནི་དེའི་ཐབས་མེད་པར་མི་རུང་བའི་ཕྱིར་རོ། །འདིར་ནི་འཕགས་པ་དང་མི་མཐུན་པའི་རྣམ་པར་རྟོག་པའི་སྣང་
བ་ལ་གྲགས་པ་དང་སེམས་ལས་བྱུང་བའི་རྣལ་འབྱོར་པའི་ཀུན་རྫོབ་འཇོམས་པའོ། །གཞུང་ཚོགས་ཡོན་ཏན་ཐོབ་ཅེས་བྱ་བ་ནི། གདུལ་བྱ་འཇུག་པས་གནས་སྐབས་པའོ། །དེའི་མཐར་ཐུག་པ་ནི་ཉན་ཐོས་དང་རང་རྒྱལ་བའི་ངེས་པ་ལ་ནམ་ཡང་འཇུག་པར་མི་འགྱུར་རོ་ཞེས་པ་ནས། འགག་
པ་མེད་པའི་ཆོས་ཀྱི་རྒྱལ་པོར་འགྱུར་བ་མཐར་ཐུག་པ་སྟེ། དཔལ་མཆོག་དང་པོའི་ངོ་བོ་ཉིད་ནི་ཐོག་མ་དང་ཐ་མ་མེད་པའི་རང་བཞིན་ཡིན་པའི་ཕྱིར་རོ། །སངས་རྒྱས་ཞེས་བྱ་བ་ནི་རང་བཞིན་མ་བཅོས་པ་ཉིད་ལ་བཤད་ཀྱི། གཞན་དུ་སྐྱེ་བ་དང་འགག་པ་ལ་སོགས་པ་ནི་བྱས་པ་ཅན་ཉིད་དུ་
འགྱུར་རོ། །དེའི་ཕྱིར་འདི་ལ་རྒྱུའི་རིམ་པས་བྱས་པ་མེད་པས་མཐར་འགག་པ་ཡང་མེད་དོ། །དེ་སྐད་དུ་ཡང་། སངས་རྒྱས་ཐོག་མ་ཐ་མ་མེད། །དང་པོའི་སངས་རྒྱས་རྒྱུ་མེད་པ། །ཞེས་གསུངས་པ་ཡིན་ནོ། །གང་ཡང་དུས་ཀྱི་མཐའི་སྐད་ཅིག་ལ་ཆོས་ཐམས་ཅད་ཁོང་དུ་ཆུད་པ་ནི་རྒྱུ་ཡིན་ལ།

49-1-141b

དེའི་རྒྱུ་ནི་སངས་རྒྱས་ཡིན་པས། སངས་རྒྱས་ཐོག་མ་དང་ལྡན་ལ་མཐའ་ནི་མེད་པ་ཡིན་ཏེ། དེ་ལྟ་མ་ཡིན་ན་ལམ་ལ་སོགས་པའི་འབད་པ་བྱ་མི་དགོས་པར་འགྱུར་རོ་སྙམ་ན་ནི། དེ་ཡང་འདི་ལྟར་ཤེས་པར་བྱ་སྟེ། སངས་རྒྱས་ནི་དབྱིངས་དང་ཡེ་ཤེས་བྱ་བ་ཡིན་གྱི། དབྱིངས་དང་བྲལ་བའི་
ཡེ་ཤེས་ནི་གང་གི་ཡེ་ཤེས་ཀྱང་མ་ཡིན་པས། དབྱིངས་ནི་སྔར་བརྗོད་པ་ཡིན་ཏེ། གནས་སྐབས་ཀྱི་ཡེ་ཤེས་ནི་རྟོགས་པའི་ངེས་པ་སྟེ། དེ་ནི་ཐོག་མ་དང་ཐ་མ་གཉིས་པར་ཡང་གྱུར་པས་ལམ་ཡང་དགོས་པར་སྨྲ་བ་དེའི་མཐོང་བར་བྱས་པ་ནི་ཐོག་མའོ། །དེའི་ཡུལ་མཐའ་དང་བྲལ་བས་ཡུལ་ཡང་མཐའ་
མེད་པར་རིགས་པ་ཡིན་ནོ། །དེའི་ཕྱིར་འདིར་ཐ་སྙད་གཉིས་ཀྱིས་འཇུག་སྟེ། རྒྱུའི་ཐ་སྙད་ནི་ངོ་བོ་ཉིད་དེ་རང་བཞིན་སྟོང་པ་ཉིད་ལ་སོགས་པ་མི་འགྱུར་བའི་རང་བཞིན་ནོ། །དེའི་རྐྱེན་ནི་ཐོས་པ་ལ་སོགས་པའི་དེ་དང་མཐུན་པར་རྗེས་སུ་ཞུགས་པ་ཡིན་ནོ། །དེ་དང་དེའི་བདག་ཉིད་ཕྲད་པ་ནི། 
འབྲས་བུར་ཡང་ཐ་སྙད་བཏགས་ཀྱང་དེའི་ཡུལ་ལས་ངེས་པ་པོ་གཞན་ན་མེད་པའི་ཕྱིར་རོ། །གལ་ཏེ་གཞན་དུ་གྱུར་པ་ནི་ནམ་ཡང་དེ་བཞིན་གཤེགས་པ་མ་ཡིན་ཏེ། ཀུན་དུ་བརྟགས་པའི་ཕྱིར་རོ། །དེ་བས་ན་རྒྱུ་དང་འབྲས་བུའི་ཐ་སྙད་ནི་རྐྱེན་གྱིས་རྣམ་པར་བཞག་གི། དེ་ལ་འཕེལ་བ་དང་
འགྲིབ་པའི་ཆོས་གང་ཡང་ཡོད་པ་མ་ཡིན་ནོ། །འདི་ལྟ་བུའི་འབྲས་བུ་དང་རྗེས་སུ་མཐུན་པའི་ལམ་དེ་ལས་བྱུང་བ་གཞུང་གི་ཚོགས་དུ་མ་བཤད་པའི་མཐར་འབྱུང་བས། ཕྱོགས་བཅུར་དམ་པའི་ཚོགས་ཀྱི་སྣང་བའི་རྒྱུན་མི་འཆད་པའི་ཆོས་ཀྱི་རྒྱལ་པོར་ཞེས་བྱ་བ་དཔལ་མཆོག་དང་པོའི་ཡུལ་ཐོག་
མ་དང་ཐ་མ་མེད་པས་ཡུལ་ཅན་ལ་དགོངས་པའོ། །མ་འགགས་པའི་འབད་པ་ནི་བྲལ་བའི་རང་བཞིན་གྱི་དབང་གིས་འབྱུང་བ་ནི་རྒྱུན་ཆད་པ་ཡིན་པས། རང་གི་དག་པའི་ཡེ་ཤེས་མི་འགག་པས་འདིའི་སྣང་བ་དང་མཛད་པ་དེ་འདྲའོ། །འདི་ནི་མི་གནས་མྱ་ངན་འདས་པ་པོ། །ཕྱོགས་
བཅུ་ཆོས་ཀྱི་རྔ་བོ་ཆེ། །གཟུགས་མེད་གཟུགས་བཟང་དམ་པ་སྟེ། །གཟུགས་རྣམས་ཐམས་ཅད་སྣང་བའི་དཔལ། །གཟུགས་བརྙན་མ་ལུས་འཆང་བ་པོ། །ཞེས་གསུངས་པ་ཡིན་ནོ། །དེ་ལྟར་ལམ་གྱི་ཆེ་བ་བརྗོད་ནས། བརྗོད་བྱ་དང་བརྗོད་པའི་ཁྱབ་པ་བསྟན་པའི་ཕྱིར།

49-1-142a

ཐུགས་ཀྱི་གསང་མཛོད་གཙུག་ན་རིན་པོ་ཆེ། །འགྲོ་ཀུན་སེམས་ཀྱི་རང་བཞིན་ཞེས་བྱ་བས་རིམ་པ་བཞིན་དུ་འབྲས་བུ་དང་ལམ་དང་ངོ་བོ་ཉིད་ལ་ཁྱབ་པར་བསྟན་ཏོ། །ཐུགས་ནི་ཆོས་ཀྱི་དབྱིངས་ལ་ངེས་པའི་བདག་ཉིད་དུ་ཐུགས་རྡོ་རྗེའོ། །དེ་ནི་གསང་བ་ཉན་ཐོས་
ལ་སོགས་པས་མི་རྟོགས་པའི་དོན་ཏོ། །འདི་ལས་དཀྱིལ་འཁོར་ལ་སོགས་པའི་སྒོར་གྱུར་པས་མཛོད་པ་ཡིན་ཏེ། ཇི་སྐད་དུ། ཀུན་མཁྱེན་ཡེ་ཤེས་མཛོད་འཛིན་པ། །རྒྱལ་པོ་སྒྱུ་འཕྲུལ་སྣ་ཚོགས་འཆང་། །ཞེས་གསུངས་སོ། །དེ་ཉིད་གཙུག་ན་གནས་པའི་རིན་པོ་ཆེ་སྟེ། ལམ་གྱི་མཐར་ཐུག་
པའི་སྐད་ཅིག་མ་ལུས་བྱུང་ཞིང་དེའི་གདན་ལ་བཞུགས་པའོ། །ལམ་དེ་ནི་བྱང་ཆུབ་སེམས་དཔའ་རྣམས་ཀྱིས་ཉམས་སུ་མྱོང་བ་སྟེ། ཇི་སྐད་དུ།  ཚིག་གི་བདག་པོས་ཚིགས་སུ་བཅད། །གསང་སྔགས་རྒྱལ་པོ་དྲུག་ལྡན་ཞིང་། །ཞེས་གསུངས་པས་རྟོགས་སོ། །ལམ་དེ་ཉིད་གང་གིས་འགྲུབ་པ་
ནི། འགྲོ་ཀུན་ཞེས་པ་ནི། འགྲོ་བ་ནི་ཉོན་མོངས་པས་དེར་འགྲོ་བ་སྟེ། གང་གི་ཕྱིར་རང་བཞིན་ཞེས་བྱ་བས། ངོ་བོ་ཉིད་དུ་གྱུར་པས་འདི་རྒྱུའི་དོན་དུ་བསྟན་ཏོ། །རང་བཞིན་དེ་ཡང་གནས་སྐབས་གསུམ་དུ་རྒྱུན་མི་འཆད་པས་སེམས་ཞེས་བྱའོ། །དེ་ཡང་། དང་པོ་སངས་རྒྱས་རྒྱུ་མེད་པ། །སངས་
རྒྱས་ཐོག་མ་ཐ་མ་མེད། །ཅེས་གསུངས་སོ། །དེ་ལྟར་བརྗོད་བྱའི་ཁྱབ་པ་བསྟན་ནས་བརྗོད་པའི་ཁྱབ་པ་ནི། ཆོས་རྣམས་ལུང་ཞེས་བྱ་བ་དང་། རྒྱུད་ཀུན་ཞེས་བྱའོ། །ཆོས་རྣམས་ནི་རྣམ་པར་བཀོད་པའི་ཆོས་རྣམས་ཏེ། བསྟན་པའི་ཆོས་རྣམས་དང་དེ་ལས་གཞན་པའོ། །དེ་ལ་བསྟན་པའི་
ཆོས་གསུང་རབ་ཡན་ལག་རྣམས་སོ། །དེ་ལས་གཞན་པ་ནི་སྔར་བསྟན་པ་དང་བསྒྲུབས་པ་ལ་སོགས་པའོ། །དེ་སྐད་དུ། དམ་ཆོས་ཆོས་རྒྱལ་གསལ་བར་ལྡན། །འཇིག་རྟེན་སྣང་བར་བྱེད་པའི་མཆོག །ཆོས་ཀྱི་དབང་ཕྱུག་ཆོས་ཀྱི་རྒྱལ། །ལེགས་པའི་ལམ་ནི་སྟོན་པ་པོ། །ཞེས་པ་དང་། 
འཕགས་ལམ་ཤིན་ཏུ་མཐོ་ལ་གནས། །དར་བ་ཆེན་པོ་ཆོས་ཀྱི་ཏོག །ཅེས་བྱ་བ་དང་། ཕ་རོལ་ཕྱིན་པ་ཀུན་རྫོགས་པ། །ས་རྣམས་ཀུན་གྱི་རྒྱན་དང་ལྡན། །རྣམ་པར་དག་པ་བདག་མེད་ཆོས། །ཞེས་བཤད་པའོ། །རྒྱུད་ཀུན་གྱི་ནི་བྱ་བ་དང་། སྤྱོད་པ་དང་། རྣལ་འབྱོར་དང་། བླ་མའི་

49-1-142b

རྒྱུད་དོ། །ཇི་སྐད་དུ། བརྩོན་ཆེན་སྒྱུ་འཕྲུལ་དྲ་བ་ཆེ། །རྒྱུད་ཀུན་གྱི་ནི་བདག་པོ་མཆོག །ཅེས་བྱ་བས། བདག་པོ་ནི་དེའི་ངེས་པའི་ཡེ་ཤེས་སོ། །དེ་བས་དེ་རྣམས་ཀྱི་དབང་པོ་ནི་ངེས་པའོ། །རྡོ་རྗེ་ཚིག་ཏུ་གཞག་ཅེས་བྱ་བ་ནི། གང་མི་གསལ་བ་དང་ཚིག་རྣམས་ཀྱི་དགོས་པ་རྒྱ་ཆེ་བ་དེ་ལ་དེ་སྐད་ཅེས་
བྱའོ། །འོ་ན་དེ་རྣམས་གང་ལས་རྟོགས་ཏེ་བཤད་པ་ནི། ཟབ་ཅིང་རྒྱ་ཆེ་རྒྱུད་ཀྱི་དགོངས་འགྲེལ་དང་། །དེ་ཡི་མན་ངག་ཉེ་བར་བསྡུས་ནས་བཤད། །ཅེས་བྱ་བ་ལ། ཟབ་ཅིང་རྒྱ་ཆེའི་རྒྱུད་ནི་གསུང་རབ་དེ་ཉིད་དོ། །དེའི་དགོངས་པའི་དོན་འགྲེལ་པ་ནི་དེའི་མན་ངག་ལས་བྱུང་བ་དང་། དོན་ཉེ་
བར་བསྡུས་ཏེ་བཤད་པ་ནི་འདིར་ཉེ་བར་བསྡུས་པའི་བཤད་སྦྱར་མཛད་པའོ། །ཚུལ་གང་གི་ཆེད་དུ་གང་མཛད་པ་ནི། དེ་ལྟའི་ལམ་ནི་མཁན་པོའི་རྗེས་འབྲངས་པས། །ཉེ་བར་སྤྱོད་རྣམས་ལ་ནི་བསྡུས་དོན་བྱས་པ་ཡིན། །ཞེས་བྱ་བ་ལ། དེ་ལྟའི་ལམ་ཞེས་པ་ནི། སྔར་བསྟན་པར་ཟབ་པ་
དང་རྒྱ་ཆེ་བའི་དོན་བསྡུས་པར་གྱུར་པ་ངེས་སོ། །དེ་ཡང་གང་ཞིག་འགྲེལ་པ་རྩོམ་པ་པོར་གྱུར་པས་དེ་དང་མཐུན་པར་དབྱིབས་དང་མིང་རྣམས་སོ། །རིམ་པར་བཀོད་ནས་བྱས་པ་ནི། །མཁན་པོའི་རྗེས་སུ་འབྲངས་པའོ། །ཉེ་བར་འབྱོར་རྣམས་ལ་ཞེས་བྱ་བ་ནི། རྒྱུད་འདི་ལ་གུས་པའི་
སྒོ་ནས་ཉམས་པ་མེད་པར་ཚིག་དང་དོན་འཆང་བ་དང་། བསམ་པ་དང་། ཀླག་པར་འདོད་པའི་དོན་དུའོ། །བསྡུས་ཏེ་བྱས་པ་ཡིན་ཞེས་བྱ་བ་ནི། དེ་ཡང་དམ་ཚིག་མང་པོའི་སྒོ་ནས་སྤངས་པར་གྱུར་ནས་བསྡུས་པའམ། ཡང་ན་དངོས་གྲུབ་ཉེ་བར་འདོད་པ་ལ་སོགས་པ་དང་།  དམ་ཚིག་
དང་ལྡན་པར་བསྒྲུབ་པའི་ལས་རྣམས་ཐམས་ཅད་འདིས་འགྲུབ་པར་འགྱུར་བས། ཟབ་པ་དང་རྒྱ་ཆེ་བ་ནི་ཐེག་པ་ཆེན་པོའི་འཇུག་པ་སྟེ། དེ་དག་བསྡུས་པའི་དངོས་གྲུབ་ནི་ཟབ་ཅིང་རྒྱ་ཆེ་བའི་ཡུལ་དེར་བསྡུས་པའི་དོན་གྱི་སྒྲུབ་ཐབས་བརྩམས་པ་ཡིན་ནོ། །ཟབ་ཅིང་རྒྱ་ཆེ་གང་གིས་
རྟོགས་འགྱུར་བ། །མགོན་པོ་རི་བོ་ལ་གནས་ཉི་ཟེར་དབང་། །མཁན་པོའི་རྗེས་མཐུན་ཉེ་བར་བསྡུས་པ་སྦྱར། །དགོས་དོན་དེ་ཡི་མན་ངག་ཤིན་ཏུ་བསྡུས། །ཤིང་རྟ་ཆེན་པོ་རྒྱ་མཚོ་ཆེན་པོ་ནས། །བློ་ཡུལ་མན་ངག་ཆུ་ཡིས་སྙིམ་པ་གང་། །རྙེད་པ་ཅུང་ཟད་རྣམ་པར་བཀྲོལ་བ་

49-1-143a

ཡི། །བཞད་པའི་རྡོ་རྗེའི་དོན་རྟོགས་ལྡན་པར་ཤོག །དཔལ་མེེ་ཏྲི་པས་མཛད་པ་ཉེ་བར་བསྡུས་ཤིང་། ཟབ་ཅིང་རྒྱ་ཆེ་བའི་འགྲེལ་པ། མཁས་པ་ཆེན་པོ་དྲིལ་བུ་པས་མཛད་པ་རྫོགས་སོ།།      །།རྒྱ་གར་གྱི་མཁན་པོ་མཉྫུ་ཤྲཱི་སཏྭ་དང་དགེ་སློང་བློ་ལྡན་ཤེས་རབ་ཀྱིས་
བསྒྱུར་བའོ།།༄༅༅། །རྒྱ་གར་སྐད་དུ། ཨཱརྱ་མཉྫུ་ཤཱི་ནཱ་མ་སངྒཱི་ཏི་སཱ་དྷ་ན་ནཱ་མ། བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་སྒྲུབ་ཐབས། འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །ཡོན་ཏན་ཡེ་ཤེས་མཆོག་
གི་མཆོག་གྱུར་པའི། །བདེ་བའི་སྟོབས་ཀྱིས་བདེ་བའི་རོ་མྱང་བའི། །རང་གི་རྒྱུད་གསུམ་དག་པའི་འཇམ་དཔལ་དེ་ལ་འདུད། །འཇམ་དཔལ་མཚན་ནི་བརྗོད་པ་ཡི། །གཞུང་ལུགས་ཐོབ་པར་གྱུར་པ་ཡི། །ཡོངས་བསྡུས་སྒྲུབ་ཐབས་གསལ་བར་བསྡེབ། །དེའི་གཞུང་བདག་གིས་བཤད་པར་
བྱ། །ཤེས་རབ་སྙིང་རྗེར་ལྡན་པ་ཡི། །ཟབ་མོའི་དོན་ལ་དགོངས་པ་ཡིས། །ཐེག་ཆེན་སྔགས་པའི་རྣལ་འབྱོར་པས། །ཡིད་དགའ་བ་ཡི་གནས་ཉིད་དུ། །བདེ་བའི་སྟན་ལ་ཉེར་འདུག་སྟེ། །སྙིང་གར་ཉི་དཀྱིལ་ཨ་བསམས་ལ། །འོད་ཕྱུང་འཕགས་པ་བླ་མར་བཅས། །ཡིད་ཀྱིས་མདུན་
དུ་སྤྱན་དྲངས་ལ། །མཎྜལ་མཆོད་པ་ཕུལ་བྱས་ལ། །གསུམ་ལ་སྐྱབས་སུ་གསོལ་བ་དང་། །སྡིག་པ་མ་ལུས་བཤགས་པ་དང་། །བྱང་ཆུབ་མཆོག་ཏུ་སེམས་བསྐྱེད་དོ། །དེ་ཡང་རྒྱུད་ལས། དཔལ་ལྡན་པདྨ་སངས་རྒྱས་སྐྱེས། །ཚོགས་གཉིས་ཚོགས་ནི་བསགས་པ་པོ། །རྟག་པ་ཀུན་
རྒྱལ་རྣལ་འབྱོར་ཅན། །བསམ་གཏན་བསམ་བྱ་བློ་ལྡན་མཆོག །རྡོ་རྗེ་དྲེགས་པ་རྡོ་རྗེའི་སྙིང་། །རྡོ་རྗེ་ཉི་མ་སྣང་བ་ཆེ། །རྡོ་རྗེ་ཟླ་བ་དྲི་མེད་འོད། །རྫོགས་པའི་སངས་རྒྱས་ཨ་ལས་བྱུང་། །ཁ་དོག་སྣ་ཚོགས་འབར་བའི་འོད། །འཕགས་ལམ་ཤིན་ཏུ་མཐོ་ལ་གནས། །བླ་མ་གསང་སྔགས་
ཆེ་བའི་མཆོག །སེམས་ཅན་ཀུན་གྱི་ཡིད་ལྟར་མགྱོགས། །དཀྱིལ་འཁོར་ཆེན་པོ་ཡངས་པ་ཡིན། །མཆོད་ཅིང་བརྗོད་པ་དྲང་སྲོང་ཆེ། །གཙོ་བོ་དཀོན་མཆོག་གསུམ་འཛིན་པ། །དག་པར་བྱེད་པ་སྡིག་སེལ་བ། །སངས་རྒྱས་བྱང་ཆུབ་བླ་ན་མེད། །ཅེས་གསུངས་སོ། །དེ་ནས་

49-1-143b

སྐད་ཅིག་མ་ལ་བདག་ཉིད་འཇམ་དཔལ་དུ་བསྒོམས་ལ། དེའི་ཐུགས་ཀ་ནས་ཨ་ལས།  རྡོ་རྗེ་ཤུགས་ཅན་འཇིགས་པར་བྱེད། །ཧ་ལ་ཧ་ལ་གདོང་བརྒྱ་པ། །དཔལ་ལྡན་ལག་པ་བརྒྱས་གང་ལ། །བརྡུང་བའི་མཚོན་ཆ་སྣ་ཚོགས་འཛིན། །ཕྱོགས་བཅུར་སྤྲུལ་པ་སྣ་ཚོགས་འགྱེད་པའོ། །
ཨོཾ་མཉྫུ་ཤྲཱི་ཀྲོ་དྷ་ཡ་མཱནྟ་ཀ་ཧཱུཾ་ཕཊ། བྷེ་རོ་ཧ་ན་ར་ད་ཧ་ར། པ་ཙ་ར་སརྦ་ཨ་མུ་ཀ་བཛྲ་ཁཌྒ་ཙྪི་ད་རཀྵ་རཀྵ་ཧཱུཾ་ཧཱུཾ་ཕཊ་ཕཊ། ཅེས་བརྗོད་པས་མཚོན་ཆ་དཔག་ཏུ་མེད་པས་མཚམས་བཅད་དོ། །དེ་ནས་ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧཾ་ཞེས་བརྗོད་པས་ན་སྟོང་པར་བསམ། སྙིང་གའི་
ས་བོན་ལས་བྱུང་བའི། །འབྱུང་ལྔའི་ཡི་གེ་རང་བཞིན་ཆད། །ཨེ། ཡཾ། བཾ། རཾ་ལཾ། ནམ་མཁའ་རླུང་ཆུ་རི་རབ་མེ་དང་བཅས། །དེ་སྟེང་པདྨའི་ལྟེ་བ་ལ། །བྷྲཱུཾ་ལས་ཡེ་ཤེས་གཞལ་ཡས་ཁང་། །ཕོ་བྲང་པདྨ་འཁོར་ལོར་བཅས། །གྲུ་ཆད་སྒོ་བཞི་མུ་ཁྱུད་ལྡན། །རྒྱུད་ལས། སྟོང་པ་ཉིད་དགའ་
འདོད་ཆགས་བློ། །རྡོ་རྗེ་སྙིང་པོ་མཁའ་འདྲ་བ། །ཕྲ་ཞིང་ཟག་མེད་ས་བོན་བྲལ། །འབྱུང་བ་ཆེན་པོ་རྒྱུ་གཅིག་པོ། །དཀྱིལ་འཁོར་ཆེན་པོ་ཡངས་པ་ཡིན། །ཞེས་གསུངས། དེ་ནས་གདན་སྒོམ་སྟེ།  པཾ་ལས་པདྨ་ཟླ་བའི་གདན། །ཨ་དང་མ་ལས་ཉི་མའི་གདན། །དེ་སྟེང་ཨ་ཡི་འཕྲོ་འདུ་
ལས། །ཨ་ལས་འཇམ་དབྱངས་རྡོ་རྗེར་གྱུར། །སྐུ་མདོག་དམར་སེར་གདོང་ལྔ་པ། །དཀར་སྔོ་དམར་ལྗང་དམར་སེར་རོ། །ཟུར་ཕུད་ལྔ་ལྡན་ཅོད་པན་ཅན། །མེ་ཏོག་རིན་ཆེན་ཕྲེང་བས་བརྒྱན། །ཕྱག་བརྒྱད་རིམ་པར་བསྣམས་པ་ནི། །རལ་གྲི་མདའ་དང་ལྕགས་ཀྱུ་རྡོ་རྗེ་གཡས། །པོ་ཏི་
གཞུ་དང་ཞགས་པ་པདྨ་གཡོན། །གཞོན་ནུ་མཛེས་པའི་རྒྱན་དང་ལྡན། །ཁ་དོག་ལྔ་ལྡན་འོད་ཀྱི་དབུས། །རྡོ་རྗེ་སྐྱིལ་ཀྲུང་བཞུགས་པ་ལ། །ཐུགས་ཀར་ཤེས་རབ་འཁོར་ལོའི་དབུས། །ཉི་མའི་སྟེང་ན་རལ་གྲི་ཨ་ཡིས་མཚན། །འཁོར་ལོའི་རྩིབས་ལ་གསང་སྔགས་དགོད། །ཡང་ན་གནས་
བཞིར་འཁོར་ལོ་བསམ། །དེ་ལྟར་བསམ་གཏན་ཏིང་འཛིན་དབེན། །དེ་ཡང་རྒྱུད་ལས། དཔལ་ལྡན་སངས་རྒྱས་པདྨ་སྐྱེས། །རྡོ་རྗེ་ཉི་མ་སྣང་བ་ཆེ། །རྡོ་རྗེ་ཟླ་བ་དྲི་མེད་འོད། །རྫོགས་པའི་སངས་རྒྱས་ཨ་ལས་བྱུང་། །ག་ཆེ་ལུས་ཀྱང་ཆེ་བ་སྟེ། །གདོང་ལྔ་ཟུར་ཕུད་ལྔ་དང་ལྡན། །ཟུར་

49-1-144a

ཕུད་ལྔ་པ་མེ་ཏོག་སྤོས། །ལག་པ་བརྒྱ་པོ་ཀུན་བསྐྱོད་ཅིང་། །ཤེས་རབ་རལ་གྲི་མདའ་གཞུ་ཐོགས། །རྡོ་རྗེ་ལྕགས་ཀྱུ་ཞགས་པ་ཆེ། །རྡོ་རྗེ་ལས་སྐྱེས་རྡོ་རྗེའི་བདག །དཔལ་ལྡན་པདྨ་གར་གྱི་བདག །འཇིག་རྟེན་གསུམ་ན་གཞོན་ལུས་གཅིག །ཁ་དོག་སྣ་ཚོགས་འབར་
བའི་འོད། །རྡོ་རྗེ་སྐྱིལ་ཀྲུང་རྫོགས་སངས་རྒྱས། །སྤྲུལ་པའི་འཁོར་ལོ་སྣ་ཚོགས་འཆང་། །ཉི་མ་འཆར་ཀའི་དཀྱིལ་ལྟར་མཛེས། །གསང་སྔགས་ཆེན་པོ་རིགས་གསུམ་པ། །ཞེས་གསུངས་པའི་ཕྱིར་རོ། །སངས་རྒྱས་དེ་ཡི་ཐུགས་ཀ་རུ། །ཨོཾ་ལས་གྱུར་པའི་རྣམ་པར་སྣང་མཛད་ནི། །
སྐུ་མདོག་དཀར་བའི་རང་བཞིན་ལ། །ཞལ་གཅིག་པ་ལ་ཕྱག་བཞི་པ། །དང་པོ་རལ་གྲི་པོ་ཏིའོ། །ཐ་མ་བྱང་ཆུབ་མཆོག་གི་ཕྱག་རྒྱའོ། །སངས་རྒྱས་དེ་ཡི་ཐུགས་ཀ་རུ། །ཡེ་ཤེས་སེམས་དཔའ་མཚོན་གང་པ། །སྐུ་མདོག་དམར་སེར་གསེར་མདོག་ལ། །ཤེས་རབ་རལ་གྲི་མདའ་གཞུ་
བསྣམས། །སངས་རྒྱས་དེ་ཡི་མདུན་ཉིད་དུ། །པདྨའི་གདན་ལ་ཤཱཀ་ཐུབ་བསྒོམ། །ཕོ་བྲང་པདྨ་འདབ་བརྒྱད་ལ། །ཤར་དུ་ཧཱུཾ་ལས་གྱུར་པའི་རྡོ་རྗེ་མི་བསྐྱོད་པ། །སྐུ་མདོག་སྔོ་སྐྱའི་རང་བཞིན་ལ། །དང་པོ་གཉིས་ནི་པོ་ཏི་རལ་གྲི་བསྣམས། །ཐ་མ་གསང་བ་ས་གནོན་ལ། །གཡོན་པ་
མཉམ་གཞག་རྡོ་རྗེ་བསྣམས། །ལྷོ་རུ་ཏྲཱཾ་ལས་རིན་ཆེན་འབྱུང་ལྡན་ནི། །སེར་པོ་ཞལ་གཅིག་ཕྱག་བཞི་པ། །གཡས་གཡོན་ཀུན་གྱི་དང་པོ་འགྲེ། །ཐ་མ་མཆོག་སྦྱིན་རིན་པོ་ཆེ། །ནུབ་ཏུ་ཧྲཱིཿལས་སྣང་བ་མཐའ་ཡས་ནི། །དམར་པོ་ཞལ་གཅིག་ཕྱག་བཞི་པ། །མཉམ་གཞག་ཕྱག་རྒྱ་པདྨ་
བསྣམས། །བྱང་དུ་ཧཱ་ལས་གྱུར་པའི་དོན་ཡོད་གྲུབ་པ་ནི། །ལྗང་གུ་ཞལ་གཅིག་ཕྱག་བཞི་པ། །ཁུ་ཚུར་ཕྱག་ན་རྒྱ་གྲམ་བསྣམས། །ཀུན་ལ་རིན་ཆེན་སྣ་ཚོགས་ཀྱིས་བརྒྱན་པ། །གནས་གསུམ་འབྲུ་གསུམ་བྱིན་གྱིས་བརླབ། །ཞབས་ནི་རྡོ་རྗེ་སྐྱིལ་མོ་ཀྲུང་དུ་བཞུགས། །ཕྱི་རིམ་
འཁོར་ལོ་རྩིབས་བརྒྱད་ལ། །ཨཱ་ལི་ཡོངས་སུ་གྱུར་པ་ལས། །ཉི་ཟླ་པདྨའི་གདན་སྟེངས་སུ། །ཡབ་ཀྱི་ཐུགས་ཀར་ཨ་ཡི་འཕྲོ་འདུ་ལས། །ཨི་ཨཱི་ཨུ་ཨཱུ། ཨེ་ཨཻ་ཨོ་ཨཽ་འཕྲོས།  དབྱངས་ཡིག་འོད་དུ་ཞུ་བ་ལས། །ཆོས་འཁོར་རིམ་བཞིན་བསྐོར་བར་བྱ། །ཀུན་དུ་བཟང་པོ་ནམ་མཁའི་

49-1-144b

སྙིང་པོ་དང་། །འཇམ་དཔལ་ས་ཡི་སྙིང་པོ་དང་། །སྤྱན་རས་གཟིགས་དང་སྒྲིབ་པ་སེལ། །ཕྱག་ན་རྡོ་རྗེ་བྱམས་པའོ། །འཁོར་ལོ་པི་ཝང་ཨུཏྤ་ལ། །དུང་ཕོར་པདྨ་རིན་ཆེན་དང་། །མྱུ་གུ་རྡོ་རྗེ་བུམ་པའོ། །གཡོན་པ་ཐམས་ཅད་མཆོག་སྦྱིན་ནོ། །རིན་ཆེན་ཕྲེང་བའི་རྒྱན་གྱིས་བརྒྱན། །གདན་
ལ་བཞུགས་ཤིང་འགྱིངས་པའི་ཚུལ། །རྒྱུད་ལས། གསང་སྔགས་ཚུལ་ཆེན་ལས་བྱུང་བ། །བྱང་ཆུབ་སེམས་དཔའ་སེམས་དཔའ་ཆེ། །རྣམ་ཤེས་བརྒྱད་པོ་རྟོག་པ་འཆང་། །ཁ་དོག་སྣ་ཚོགས་འབར་བའི་འོད། །དཔལ་ལྡན་བློ་དང་སྒེག་པར་ལྡན། །ཞེས་གསུངས་སོ། །ཕྱོགས་ཀྱི་སྒོ་
བཞིར་བསྒོམ་པ་ནི། །གཙོ་བོའི་ཐུགས་ཀའི་འཕྲོ་འདུ་ལས། །ཛཿ་ཧཱུཾ་བཾ་ཧོཿ བཞི་འཕྲོས་པས། །འོད་ཞུ་འཕྲོས་ཤིང་འདུས་པ་ལས། །ལྕགས་ཀྱུ་ཞགས་པ་ལྕགས་སྒྲོག་དྲིལ། །སྐུ་མདོག་རང་རང་ཕྱོགས་དང་མཐུན། །རྒྱུད་ལས། རྡོ་རྗེ་ལྕགས་ཀྱུ་ཞགས་པ་ཆེ། །འཛིན་པ་ཆེན་པོ་རྡོ་རྗེའི་
ཞགས། །འཇམ་དབྱངས་ཆེན་པོ་སྒྲ་ཆེ་བ། །ཞེས་གསུངས་སོ། །དེ་ནས་ཐུགས་ཀའི་ས་བོན་ཨ་ལས་འོད་འཕྲོས་ཡེ་ཤེས་འཁོར་ལོ་དགུག་གཞུག་བྱ། སངས་རྒྱས་ཐམས་ཅད་སྤྱན་དྲངས་ལ། ཨ་ཨཱ་སརྦ་ཏ་ཐཱ་ག་ཏ་ཀཱ་ཡ་བཱ་ཀ་ཙིཏྟ་ཨ་བྷི་ཥིཉྩ་ཧཱུཾ་ཏྣཾ་ཧི་ཏཾ་ཨོཾ། ཞེས་དབང་བསྐུར་བར་བྱ། རྒྱུད་
ལས། སངས་རྒྱས་བྱང་ཆུབ་བླ་ན་མེད། །ཡེ་ཤེས་དབང་བསྐུར་ཅོད་པན་ཅན། །ཞེས་གསུངས། དེ་ནས་སྙིང་པོ་བཟླས་པར་བྱ། །ཐུགས་ཀའི་ཤེས་རབ་འཁོར་ལོ་ལ། །དེ་དབུས་ལྟེ་བའི་འཁོར་ལོ་ལ། །སྔགས་ཕྲེང་མེ་ཏོག་དཀྱུས་པ་ལྟར། །དེ་ལ་དམིགས་ཏེ་བཟླས་པར་བྱ། །ཨོཾ་ཝཱ་གཱི་
ཤྭ་རི་མུཾ། ཨོཾ་བཛྲ་ཏཱིཀྵྞ་དུཿཁ་ཙྪི། པྲཛྙཱ་ཛྙཱ་ན་མཱུརྟ་ཡེ། ཛྙཱ་ན་ཀཱ་ཡ་ཝཱ་གཱི་ཤྭ་ར་ཨ་ར་པ་ཙ་ན་ཡ་ཏེ་ན་མཿཨ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱི་བྷ་ག་བཱན། ཛྙཱ་ན་མཱུརྟི། གཱི་ཤྭ་ར། མ་ཧཱ་པཱ་ཅ། སརྦ་དྷ་རྨཱ་ག་ག་ན། ཨ་མ་ལ་སུ་པ་རི་ཤུདྡྷ་དྷརྨྨ་དྷཱ་ཏུ་ཛྙཱ་ན་གརྦྷ་ཨ།  དེ་ཡང་རྒྱུད་ལས།  འོད་བཟང་འབར་
བ་དཔལ་གྱི་བེའུ། །འོད་ཆེན་རྣམ་པར་སྣང་བར་བྱེད། །གཟི་བརྗིད་ཕྲེང་བ་བལྟ་ན་སྡུག །གསང་སྔགས་ཆེན་པོ་རིགས་གསུམ་པ། །ཞེས་གསུངས་པས་སོ། །དེ་ནས་མཆོད་པ་རྒྱས་པ་དབུལ། །ཨ་ཨཱ་སརྦ་ཏ་ཐཱ་ག་ཏ་དྷཱུ་པ་པུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། པུཥྤཾ། ཨ་ལོ་ཀེ་གནྡྷེ།

49-1-145a

ནཻ་བི་དྱེ། ཤཔྟ། རྒྱུད་ལས། མཆོད་པ་ཆེན་པོ་འདོད་ཆགས་ཆེ། །སེམས་ཅན་ཐམས་ཅད་དགའ་བར་བྱེད། །ཅེས་པ་ལ་སོགས་པ་དུག་ལྔ་རང་གྲོལ་གྱི་མཆོད་པའོ། །ཨོཾ་བཛྲ་གཱི་ཏི་ཧཱུཾ།  ཨོཾ་བཛྲ་ནྲྀ་ཏྱེ་ཧཱུཾ། ཨོཾ་བཛྲ་མཱ་ལེ་ཏྲཱཾ། ཨོཾ་བཛྲ་ལཱ་སྱེ་ཧྲི།  དེ་ཡང་རྒྱུད་ལས། མཆོད་ཅིང་བརྗོད་
པར་དྲང་སྲོང་ཆེ། །ཞེས་གསུངས་སོ། །དེ་ནས་མཆོད་འོས་བསྟོད་འོས་ཕྱག་གི་གནས། །ཞེས་པས་བསྟོད་དེ། འདི་ལྟར་སངས་རྒྱས་བཅོམ་ལྡན་འདས། །སངས་རྒྱས་རྣམ་པར་སྣང་མཛད་ཆེ། །གདོང་ལྔ་ཟུར་ཕུད་ལྔ་དང་ལྡན། །ལག་པ་བརྒྱ་པོས་ཀུན་བསྐྱོད་ཅིང་། །སྤྲུལ་པའི་འཁོར་
ལོ་སྣ་ཚོགས་འཆང་། །གོམ་པའི་སྟོབས་ཀྱིས་གར་བྱེད་པ། །སུམ་ཅུ་རྩ་གཉིས་མཚན་འཆང་བ། །རྣམ་སྣང་གཙོ་ལ་ཕྱག་འཚལ་འདུད། །རིགས་ལྔ་ལ་འདུད་ཀྱི་བསྟོད་པ་བྱའོ། །འཇམ་དཔལ་དཔལ་དང་ལྡན་པའི་མཆོག །འཇམ་དཔལ་ཡེ་ཤེས་སེམས་དཔའ་ཡི། །མིང་ནི་ཡང་
དག་བརྗོད་པ་མཆོག །འཇམ་དཔལ་དེ་ལ་ཕྱག་འཚལ་འདུད། །གཞོན་ནུའི་སྐུ་ལུས་འཆང་བ་པོ། །ཡེ་ཤེས་སྒྲོན་མེས་རབ་གསལ་ཞིང་། །འཇིག་རྟེན་གསུམ་གྱི་མུན་སེལ་བ། །འཇམ་དཔལ་དེ་ལ་ཕྱག་འཚལ་འདུད། །ཉིད་ཀྱི་འདབ་བཟང་ཚོགས་ཀྱིས་ནི། །ཟླ་བ་རྒྱས་པ་ཟིལ་
གནོན་ཅིང་། །རིག་པ་རྣམ་པར་གསལ་བསྒྱུར་ལ། །འཇམ་དཔལ་དེ་ལ་ཕྱག་འཚལ་འདུད། །མ་བགྱིས་ཟུར་ཕུད་གསལ་བ་ལ། །ནོར་བུ་འབར་བའི་སྐུ་མངའ་ཞིང་། །ཉིད་ནི་ཀུན་དུ་དགའ་བའི་སྐུ། །འཇམ་དཔལ་དེ་ལ་ཕྱག་འཚལ་འདུད། །བདུད་རྩི་འདྲ་ཞིང་འཇམ་ལ་ཟབ། །ཡིད་དང་
གསུང་གི་སྒྲ་སྒྲོགས་པ། །དམ་པའི་ཆོས་ཀྱི་རིན་ཆེན་མཛོད། །འཇམ་དཔལ་དེ་ལ་ཕྱག་འཚལ་འདུད། །གངས་ཀྱི་ཆུ་ལྟར་གདངས་གསལ་བ། །འཇིག་རྟེན་ཁམས་ན་རྣམ་པར་བཞུགས། །ཉོན་མོངས་དྲི་མ་རབ་སྤངས་པ། །འཇམ་དཔལ་དེ་ལ་ཕྱག་འཚལ་འདུད། །མཆེ་བ་གཙིགས་
དང་བསྒྱིངས་པ་ཡི། །འཇིགས་པའི་སྐུ་ཡི་ཚུལ་གྱིས་ནི། །ཡ་མའི་དྲེགས་པ་འཇོམས་མཛད་པ། །འཇམ་དཔལ་དེ་ལ་ཕྱག་འཚལ་འདུད། །རང་གི་སྤྱན་དང་མདངས་འདྲ་བ། །ཨུཏྤ་ལ་སྔོན་པོས་རབ་མཛེས་པ། །ཤེས་རབ་རལ་གྲི་མདའ་གཞུ་འཛིན། །འཇམ་དཔལ་དེ་ལ་ཕྱག་འཚལ་འདུད། །

49-1-145b

ཕྱོགས་བཅུར་བཞུགས་པའི་སངས་རྒྱས་ལ། །རྒྱ་ཆེར་བསྟོད་པས་རབ་བསྟོད་པ། །འགྲོ་བའི་ལམ་ནི་སྟོན་པ་པོ། །འཇམ་དཔལ་དེ་ལ་ཕྱག་འཚལ་འདུད། །དེ་ནས་སེམས་དཔའ་བརྒྱད་ལ་བསྟོད་དེ། མཁས་པ་ཆེན་པོ་ཐབས་ཆེ་བ། །མཁས་པ་སྒྱུ་འཕྲུལ་ཆེན་པོ་འཆང་། །འཇིག་རྟེན་
ཁམས་བརྒྱ་ཀུན་བསྐྱོད་པ། །ཀུན་དུ་བཟང་པོ་ཁྱོད་ལ་འདུད། །རྫུ་འཕྲུལ་ཆེན་པོ་སྟོབས་ཆེན་ལྡན། །ནམ་མཁའི་བདག་པོ་སྣ་ཚོགས་སྟོན། །ནམ་མཁའ་ལས་བྱུང་རང་བྱུང་བ། །ནམ་མཁའི་སྙིང་པོ་ཁྱོད་ལ་འདུད། །ཤེས་རབ་ཆེན་པོ་བློ་ཆེན་ལྡན། །ཤེས་རབ་ཡེ་ཤེས་མེ་བོ་ཆེ། །ཤེས་རབ་ཆེན་
པོ་སྐད་ཅིག་ལ། །འཇམ་དཔལ་ཤེས་རབ་ཁྱོད་ལ་འདུད། །རྫུ་འཕྲུལ་ཆེན་པོ་ཆེར་གྲགས་པ། །རྫུ་འཕྲུལ་རྐང་པའི་སྟོབས་དང་ལྡན། །ས་ཡ་སྙིང་པོ་འགྲོ་བ་འཛིན། །ས་ཡི་སྙིང་པོ་ཁྱོད་ལ་འདུད། །སྙིང་རྗེ་ཆེན་པོ་བློ་ཡི་མཆོག །སྙིང་རྗེ་ཆེ་དང་ཤེས་རབ་དང་། །སངས་རྒྱས་ཀུན་གྱི་སྙིང་པོ་ཆེ། །
སྤྱན་རས་གཟིགས་དབང་ཁྱོད་ལ་འདུད། །ཤུགས་ཆེན་མགྱོགས་པ་ཆེན་པོ་སྟེ། །དེ་བཞིན་གཤེགས་པའི་ཡིད་ལྟར་མགྱོགས། །རྒྱལ་བ་རྣམ་རྒྱལ་དགྲ་ལས་རྒྱལ། །སྒྲིབ་པ་སེལ་བ་ཁྱོད་ལ་འདུད། །སྟོབས་ཆེན་ཕ་རོལ་གནོན་པ་པོ། །སྟོབས་པོ་ཆེ་ལ་ཐབས་ཆེ་བ། །སྨོན་ལམ་ཡེ་ཤེས་
རྒྱ་མཚོ་སྟེ། །ཕྱག་ན་རྡོ་རྗེ་ཁྱོད་ལ་འདུད། །བྱམས་ཆེན་རང་བཞིན་དཔག་ཏུ་མེད། །བྱམས་པའི་གོ་ཆ་ཆས་པ་སྟེ། །བྱམས་དང་སྙིང་རྗེའི་དཀྱིལ་འཁོར་ཅན། །དཔལ་ལྡན་བྱམས་པ་ཁྱོད་ལ་འདུད། །རྡོ་རྗེ་ལྕགས་ཀྱུ་ཞགས་པ་ཆེ། །འཛིན་པ་ཆེན་པོ་རྡོ་རྗེ་ཞགས། །འཇམ་དབྱངས་
ཆེན་པོ་སྒྲ་ཆེ་བ། །ཡེ་ཤེས་སྒོ་མ་ཁྱོད་ལ་འདུད། །རྡོ་རྗེ་སཏྭ་སཏྭ་ཆེ། །རྡོ་རྗེ་དེ་བཞིན་གཤེགས་པ་ཆེ། །རྡོ་རྗེ་དེ་བཞིན་གཤེགས་པ་ཀུན། །རྡོ་རྗེ་དང་པོ་ཀུན་དུ་བཟང་། །ཕྱག་འཚལ་ཕྱག་ན་རྡོ་རྗེ་ལའོ། །རྡོ་རྗེ་རྒྱལ་པོ་སངས་རྒྱས་མཆོག །རྡོ་རྗེ་ལྕགས་ཀྱུ་དེ་བཞིན་གཤེགས། །ངེས་པའི་རྒྱལ་པོ་
སངས་རྒྱས་མཆོག །ཕྱག་འཚལ་རྡོ་རྗེ་འགུགས་ཁྱོད་ལའོ། །རྡོ་རྗེ་ཆགས་པ་བདེ་བ་ཆེ། །རྡོ་རྗེ་མདའ་ནི་དབང་བྱེད་པ། །བདུད་ཀྱི་འདོད་པ་རྡོ་རྗེ་ཆེ། །ཕྱག་འཚལ་རྡོ་རྗེ་གཞུ་ཁྱོད་ལའོ། །རྡོ་རྗེ་ལེགས་པ་བདེ་བ་ཆེ། །རྡོ་རྗེ་མགུ་བ་དགའ་བ་ཆེ། །རབ་དགྱེས་རྒྱལ་པོ་བུདྡྷ་མཆོག །

49-1-146a

ཕྱག་འཚལ་རྡོ་རྗེ་དགྱེས་པ་ལ། །རྡོ་རྗེ་རིན་ཆེན་རྡོ་རྗེའི་དོན། །རྡོ་རྗེ་ནམ་མཁའ་ནོར་བུ་ཆེ། །ནམ་མཁའི་སྙིང་པོ་རྡོ་རྗེ་ཕྱུག །ཕྱག་འཚལ་རྡོ་རྗེ་རིན་ཆེན་ལའོ། །རྡོ་རྗེ་གཟི་བརྗིད་ཆེར་འབར་བ། །རྡོ་རྗེ་ཉི་མ་རྒྱལ་བའི་འོད། །རྡོ་རྗེ་གཟི་བརྗིད་གཟི་བརྗིད་ཆེ། །ཕྱག་འཚལ་རྡོ་རྗེ་འོད་ཁྱོད་
ལའོ། །རྡོ་རྗེ་དོན་རབ་རྡོ་རྗེ་དཔལ། །རྡོ་རྗེ་རྒྱལ་མཚན་རབ་དགའ་བྱེད། །རྡོ་རྗེ་ཆེན་པོ་རིན་ཆེན་ཏོག །ཕྱག་འཚལ་རྡོ་རྗེ་དཔལ་ཁྱོད་ལའོ། །རྡོ་རྗེ་བཞད་མོ་བཞད་པ་ཆེ། །རྡོ་རྗེ་འཛུམ་པ་ངོ་མཚར་ཆེ། །དགའ་ཞིང་རབ་དགའ་རྡོ་རྗེ་སྟོན། །ཕྱག་འཚལ་རྡོ་རྗེ་དགའ་བ་ལའོ། །རྡོ་རྗེ་ཆོས་རབ་དེ་བཞིན་དོན། །
རྡོ་རྗེ་པདྨ་རབ་དགའ་བྱེད། །རྡོ་རྗེ་དབང་རབ་རྡོ་རྗེའི་སྤྱན། །ཕྱག་འཚལ་རྡོ་རྗེ་སྤྱན་ཁྱོད་ལའོ། །རྡོ་རྗེ་རྣོ་བ་ཐེག་པ་ཆེ། །རྡོ་རྗེ་རལ་གྲི་མཚོན་ཆེན་པོ། །འཇམ་དཔལ་རྡོ་རྗེ་རབ་ཏུ་ཟབ། །ཕྱག་འཚལ་རྡོ་རྗེ་བློ་གྲོས་ལའོ། །རྡོ་རྗེ་རྒྱུ་དང་སྙིང་པོ་ཆེ། །རྡོ་རྗེ་འཁོར་ལོ་ཚུལ་ཆེན་པོ། །རབ་བསྐོར་རྡོ་རྗེ་
ལས་བྱུང་བ། །ཕྱག་འཚལ་རྡོ་རྗེ་སྙིང་ཁྱོད་ལའོ། །རྡོ་རྗེ་གསུང་བ་རང་རིག་མཆོག །རྡོ་རྗེ་བཟླས་པ་རབ་འགྲུབ་ཕྱིར། །མི་གསུང་རྡོ་རྗེ་མཆོག་བསྒྲུབ་པ། །ཕྱག་འཚལ་རྡོ་རྗེ་གསུང་ཁྱོད་ལའོ། །རྡོ་རྗེ་ལས་རབ་རྡོ་རྗེ་བཀའ། །ལས་ཀྱི་རྡོ་རྗེ་ཀུན་རབ་འགྲོ། །རྡོ་རྗེ་ངེས་པ་རྒྱ་ཆེ་བ། །ཕྱག་
འཚལ་རྡོ་རྗེ་རྒྱ་གྲམ་ལའོ། །རྡོ་རྗེ་སྐུ་ནི་བརྟན་པ་ཆེ། །རྡོ་རྗེ་གོ་ཆ་སྲ་བ་སྟེ། །བརྩོན་འགྲུས་མཆོག་སྟེ་དཀའ་ཐུབ་ཆེ། །ཕྱག་འཚལ་རྡོ་རྗེ་བརྩོན་འགྲུས་ལའོ། །རྡོ་རྗེ་གནོད་སྦྱིན་ཐབས་ཆེན་པོ། །རྡོ་རྗེ་མཆེ་བ་གཙིགས་པ་ཆེ། །བདུད་འཇོམས་རྡོ་རྗེ་མི་ཟད་པ། །ཕྱག་འཚལ་རྡོ་རྗེ་དྲག་པོ་ལ། །
རྡོ་རྗེ་མཚམས་སྦྱོར་རབ་ཏུ་འདུད། །རྡོ་རྗེ་བཅིངས་པ་རབ་གྲོལ་ཅིང་། །ཕྱག་འཚལ་རྡོ་རྗེ་གཉིས་མེད་ལའོ། །ལྷག་ཆད་ཡི་གེ་བརྒྱ་པས་བཤགས། །ཨ་ཏི་གཙྪ་མུཿ ཡིས་གཤེགས། །བདག་གི་དགེ་བའི་རྩ་བ་འདིས། །འགྲོ་བ་མ་ལུས་འདྲེན་པར་ཤོག །འཇམ་དཔལ་གྱི་སྒྲུབ་ཐབས་ཞི་བ་འོད་ཀྱི་རིམ་
པ་ཞེས་བྱ་བ་རྫོགས་སོ།།      །།སྡོམ་པ་བཟང་པོའི་ཐུགས་དམ། ལོ་ཙཱ་བ་དར་མ་བྷི་ས་བསྒྱུར་བའོ།།      །།༄༅༅། །རྒྱ་གར་སྐད་དུ། མཉྫུ་ཤྲཱི་ཀྲོ་དྷ་སཱ་དྷ་ན་ནཱ་མ། བོད་སྐད་དུ། འཇམ་དཔལ་ཁྲོ་བོའི་སྒྲུབ་ཐབས་ཞེས་བྱ་བ། བཅོམ་ལྡན་འདས་འཇམ་དཔལ་གཤིན་རྗེ་

49-1-146b

གཤེད་ལ་ཕྱག་འཚལ་ལོ། །གདུག་པའི་ཚོགས་རྣམས་ཐམས་ཅད་འཇོམས་མཛད་དེ། །བདུད་ཀྱི་སྙིང་གར་ཞབས་ཀྱིས་གནོན་མཛད་དེ། །བཅོམ་ལྡན་གཤིན་རྗེ་གཤེད་ཀྱི་སྒྲུབ་ཐབས་བཤད། །དད་པའི་སྟོབས་དང་ལྡན་པ་ཡིས། །རྟེན་གྱི་གང་ཟག་ཐོ་རངས་ལངས། །སྙིང་གར་ཉི་དཀྱིལ་ཧཱུཾ་
བསམས་ཏེ། །དེ་ལས་འོད་ཟེར་ལྕགས་ཀྱུ་འཕྲོས། །འཇམ་དཔལ་གཤིན་རྗེ་གཤེད་ཉིད་དང་། །བླ་མ་སངས་རྒྱས་སྤྱན་དྲངས་ལ། །མཎྜལ་མཆོད་པས་མཉེས་པར་བྱས། །ཡན་ལག་བདུན་པས་མཆོད་པ་བྱ། །ཐུགས་ཀར་ཧཱུཾ་གི་འཕྲོ་འདུ་ལས། །རྡོ་རྗེ་ཤུགས་ཅན་སྤྲོས་ཏེ་མཚམས་ཀྱང་བཅད། །
དེ་ནས་ཨོཾ་ཤཱུ་ནྱ་ཏཱ་གཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧོ། ཞེས་བརྗོད་སྟོང་པའི་ངང་ལས་ནི། །ཧཱུཾ་ཉིད་ནམ་མཁའི་དབྱིངས་སུ་བསྒོམ། །དེ་ལས་བྱུང་བའི་ཡིག་འབྲུ་ཆད། །དེ་སྟེང་བྷཱུཾ་གྱི་འཕྲོ་འདུ་ལས། །ཕོ་བྲང་རྒྱ་གྲམ་འཁོར་ལོར་བཅས། །གཞལ་ཡས་སྒོ་བཞི་རྫོགས་པས་བསྐྱེད། །ཨེ་ཡཾ་བཾ་ལཾ་
རཾ་བྷྲཱུཾ་ཞེས་པའོ། །དེ་སྟེང་ཉི་ཟླ་པདྨ་དང་། །དྲེགས་པ་མ་ཧེའི་གདན་ལ་བཞུགས། །ཧཱུཾ་ལས་འཇམ་པའི་རྡོ་རྗེ་བསམ། །དེ་ཞུ་གཤིན་རྗེ་གཤེད་དུ་གྱུར། །ཞལ་དྲུག་པ་ལ་ཕྱག་བཅུ་གཉིས། །སྐུ་མདོག་ནག་པོ་ནམ་མཁའི་མདངས། །གཡས་སྔོ་གཡོན་དམར་དུད་ཁའོ། །སྟེང་དུ་ཞལ་ཉིད་
སེར་པོའོ། །གཡས་པ་གྲི་གུག་རལ་གྲི་མདའ། །འཁོར་ལོ་ཏྲི་ཤུལ་རྩེ་གསུམ་མདུང་། །གཡོན་ན་ཐོད་པ་ཕུབ་དང་གཞུ། །བེ་ཅོན་མགོ་བོ་སྡིགས་མཛུབ་ཞགས། །གླང་སྟག་ཞིང་ཆེན་སྦྲུལ་གྱིས་བརྒྱན། །རྒྱལ་ཐོད་བྲམ་སྙན་རྗེ་མགུར་དམངས་རིགས་ལྷུག །ཐོད་སྐམ་དབུ་རྒྱན་ཐོད་རློན་དོ་
ཤལ་བྱས། །སྐྲ་ཁམ་རྣོ་གདུག་མཆེ་བ་རབ་གཙིགས་ཤིང་། །ཞལ་ནས་ཧ་ལའི་སྒྲ་སྒྲོགས་འཇིགས་པར་བྱེད། །བསྐལ་པའི་མེ་དཔུང་དུས་མཐའི་མེ་ལྟར་འབར། །ཞབས་བཞི་བརྐྱང་བསྐུམ་གྱད་ཀྱི་དོར་སྟབས་བཞུགས། །ཉི་ཟླ་པདྨ་དྲེགས་པ་ཕོ་མོ་དང་། །མ་ཧེ་སྔོ་ནག་བརྗིད་
པའི་གདན་ལ་འཇིགས་ཚུལ་བཞུགས། །བཾ་ལས་བསྐྱེད་པའི་ཡུམ་ཉིད་ནི། །གཡས་པ་གྲི་གུག་ཡབ་ལ་འཁྱུད། །གཡོན་པ་ཐོད་ཁྲག་གཙོ་ལ་སྟོབས། །གཉིས་མེད་འཁྱིལ་པའི་ཚུལ་དུ་གནས། །ཕོ་བྲང་རྡོ་རྗེ་རྒྱ་གྲམ་ལ། །ཡབ་ཡུམ་གཉིས་མེད་སྦྱོར་མཚམས་ནས། །ཤར་

49-1-147a

དུ་ཀྵེ་ལས་གྱུར་པས་དཀར། །ལྷོ་རུ་མ་ལས་གྱུར་པས་སེར། །ནུབ་ཏུ་མེ་ལས་གྱུར་པས་དམར། །བྱང་དུ་ད་ལས་གྱུར་པས་ལྗང་། །ཐམས་ཅད་ཞལ་གསུམ་ཕྱག་ཀྱང་དྲུག །གཏི་མུག་ང་རྒྱལ་གཤིན་རྗེ་གཤེད། །འདོད་ཆགས་ཕྲག་དོག་གཤིན་རྗེ་གཤེད། །རྒྱན་དང་ཆ་ལུགས་
གཙོ་དང་མཐུན། །ཕྱི་རོལ་གྱི་ནི་རྩིབས་བཅུ་ལ། །སྦྱོར་བའི་མཚམས་ནས་ཧཱུཾ་བཅུ་འཕྲོས། །འཕྲོས་ཤིང་འདུས་པས་ཧཱུཾ་བཅུར་གྱུར། །ཤར་དུ་ཤེས་རབ་མཐར་བྱེད་ལ། །ལྷོ་རུ་གཤིན་རྗེ་མཐར་བྱེད་དོ། །ནུབ་ཏུ་པདྨ་མཐར་བྱེད་དོ། །བྱང་དུ་བགེགས་ནི་མཐར་བྱེད་དོ། །ཤར་ལྷོར་
དབྱུག་པ་སྔོན་པོ་ལ། །ལྷོ་ནུབ་མི་གཡོ་མགོན་པོའོ། །ནུབ་བྱང་འདོད་པའི་རྒྱལ་པོ་སྟེ། །བྱང་ཤར་ཁྲོ་བོ་གནོད་མཛེས་སོ། །སྟེང་དུ་ཧཱུཾ་མཛད་འོག་ཏུ་སྟོབས་པོ་ཆེ། །ཞལ་གཅིག་ཕྱག་གཉིས་ཐམས་ཅད་མཐིང་། །གཡས་པ་སྣ་ཚོགས་གཡོན་པ་སྡིགས་མཛུབ་བསྒྲེང་། །བརྐྱང་
བསྐུམ་དུར་ཁྲོད་ཆས་ཀྱིས་བརྒྱན། །བསྐལ་པའི་མེ་འབར་དྲེགས་པའི་གདན་ལ་བཞུགས། །སྦྱོར་མཚམས་ཛཿཧཱུཾ་བཾ་ཧོཿ ལས། །སྒོ་བ་བཞི་རྣམས་རིམ་བཞིན་བསྐྱེད། །ཐུགས་ཀར་ཤེས་རབ་འཁོར་ལོ་ཧཱུཾ། །ཡེ་ཤེས་གསུམ་གྱིས་གནས་གསུམ་བརླབ། །ཛཿཧཱུཾ་བཾ་ཧོཿས། ཡེ་ཤེས་
ཁྲོ་བོ་དགུག་གཞུག་བྱ། །དེ་ནས་བཟླས་པའི་རིམ་པ་ནི། །ཨོཾ་ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡཀྵེ་ཡཙྪ་ནི་རཱ་མ་ཡ། ཡ་ཏ་ཡ་ཡ་ཏ། རྩ་སྔགས་སོ། །ཨོཾ་ཧྲཱིཿཥྚྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ། སྙིང་པོའོ། །ཨོཾ་ཡ་མཱནྟ་ཀ་ཧཱུཾ་ཕཊ།  ཡང་སྙིང་ངོ་། །ཨོཾ་
དེ་ཥ་ར་ཏི་མུ་ཏ་ཧཱུཾ་ཛཿསྭཱ་ཧཱ རྗེ་བཙུན་མའིའོ། །དེ་ཡང་རྒྱུད་ལས། ཁྲོ་བོའི་རྒྱལ་པོ་གདོང་དྲུག་འཇིགས། །མིག་དྲུག་ལག་དྲུག་སྟོབས་དང་ལྡན། །ཀེང་རུས་མཆེ་བ་གཙིགས་པ་པོ། །སྐྲ་ཡང་རྡོ་རྗེ་འབར་བ་སྟེ། །མིག་བརྒྱ་པ་སྟེ་རྡོ་རྗེའི་མིག །ལུས་ནི་རྡོ་རྗེའི་བ་སྤུ་ཅན། །ཁྲོ་བོའི་
ལུས་ཀྱི་གཟུགས་ལྡན་པ། །རྣམ་པ་བཅུ་པོ་དོན་བཅུའི་དོན། །ཁྲོ་གཉེར་རིམ་པར་ལྡན་ལ་སོགས། །རྡོ་རྗེ་ལྕགས་ཀྱུ་ཞགས་པ་ཆེ། །འཇིགས་པ་ཆེན་པོ་རྡོ་རྗེ་ཞགས། །འཇམ་དབྱངས་ཆེན་པོ་སྒྲ་ཆེ་བ། །གད་ཆེན་ཧ་ཧ་ཞེས་སྒྲོགས་པ། །གླང་ཆེན་ཀོ་རློན་གོས་སུ་གྱོན། །གཤིན་

49-1-147b

རྗེ་གཤེད་པོ་བགེགས་ཀྱི་རྒྱལ། །རིགས་གསུམ་འཆང་བ་གསང་སྔགས་འཆང་། །ཞེས་གསུངས་སོ། །དེ་ནས་གཏོར་མ་དབུལ་བ་ནི། །སཾ་དང་རཾ་གྱིས་མེ་རླུང་བསྐྱོད། །ཀཾ་གསུམ་སྒྱེད་པོ་ཨ་ལས་ཐོད་པའི་སྣོད། །གོ་ཀུ་ད་ཧ་ན་བི་མུ་ར་སུ་ཁཾ། །དམ་རྫས་བཅུ་སྦྱར་ཨ་ལས་ཟླ་བའི་ཁབས། །
ཧཱུཾ་ཛཿའི་འཕྲོ་འདུས་བདུད་རྩི་བསྲུབས། །ཨོཾ་སརྦ་དྷརྨཱ་ཨ་བྷཱ་བ་སྭ་བྷཱ་བ་བི་ཤུདྡྷོ྅་ཧཾ། ཞེས་བརྗོད་པས་སྐྱོན་རྣམས་དག་པར་བསམ། འབྲུ་གསུམ་པ་ཡིས་བྱིན་གྱིས་བརླབ། །ཨ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿབྷ་ག་བཱན། ཛྙཱ་ན་ཀཱ་ཡ་ཝཱ་གཱི་ཤྭ་ར། མ་ཧཱ་པ་ཙ་མཉྫུ་ཤྲཱི་པ་རི་
ཤུདྡྷེ་ཨི་དཾ་བ་ལིཾ་གྲྀཧྞ་གྲྀཧྞ། ཁ་ཁ་ཁཱ་ཧི་ཁཱ་ཧི། དེ་ནས་བསྟོད་དེ། ཧཱུཾ་ཆོས་ཉིད་ཞི་བའི་ངང་ལས་མ་གཡོས་ཀྱང་། །གདུག་པ་འདུལ་ཕྱིར་ཁྲོ་བོའི་གཟུགས་སུ་བསྟན། །བཻ་ཌཱུརྱ་ཡི་མདོག་འདྲ་སྐུ་མངའ་ཞིང་། །གདུག་པ་འདུལ་ཕྱིར་འཇིགས་བྱེད་སྐུ་ལ་བསྟོད། །ཤིན་ཏུ་ཁྲོ་ཞིང་གནག་པ་མ་ཧེའི་
ཞལ། །གཡས་དང་གཡོན་གྱི་ཞལ་བཞི་འཇིགས་པའི་ཞལ། །སྟེང་ཞལ་གཙིགས་པའི་ཞལ་ནི་ཤིན་ཏུ་འཁྲུག །ཞལ་དྲུག་སྤྱན་གསུམ་འཇིགས་བྱེད་ཞལ་ལ་འདུད། །གཡས་ཀྱི་ཕྱག་དྲུག་མཚོན་ཆ་གྲི་གུག་དང་། །རལ་གྲི་མདའ་དང་འཁོར་ལོ་ཏྲི་ཤུལ་མདུང་། །གཡོན་ན་ཐོད་པ་
ཕུབ་གཞུ་བེ་ཅོན་མགོ་བོ་བསྣམས། །བསྡིགས་པའི་མཚོན་ཆ་འཇིགས་བྱེད་ཕྱག་འཚལ་བསྟོད། །བརྐྱང་བསྐུམ་ཚུལ་གྱིས་ཞབས་བཞི་ཐུར་དུ་བགྲད། །མ་ཧེ་སྔོ་ནག་བརྫིས་པའི་གདན་ལ་བཞུགས། །འཇིགས་བྱེད་སྟོབས་ལྡན་ཁྱོད་ལ་ཕྱག་འཚལ་བསྟོད། །གླང་སྟག་ཞིང་
ཆེན་སྦྲུལ་གྱི་རྒྱན་གྱིས་བརྒྱན། །རུས་པའི་རྒྱན་ཆ་དྲུག་ནི་དབང་དུ་འཁྲོལ། །ཐོད་སྐམ་དབུ་རྒྱན་ཐོད་ལོན་དོ་ཤལ་བྱས། །རྡོ་རྗེ་འཇིགས་བྱེད་རྒྱན་ལ་རབ་ཏུ་བསྟོད། །དབུ་སྐྲ་དམར་སེར་གྱེན་དུ་བརྗེས། །རྣོ་གདུག་མཆེ་བ་རབ་ཏུ་གཙིགས། །ཧ་ཧ་ཞེས་བཞད་སྲིད་གསུམ་ཟིལ་གྱིས་
གནོན། །ཕེཾ་གྱི་སྒྲ་སྒྲོགས་རྒྱལ་པོ་ཁྱོད་ལ་བསྟོད། །བསྐལ་པ་མེ་ལྟར་འབར་བའི་ཀློང་དཀྱིལ་ནས། །ཞེ་སྡང་རྡོ་རྗེའི་འོད་ཟེར་ཚ་ཚ་འཕྲོ། །བདུད་དང་དགྲ་བགེགས་མ་ལུས་སྐྲག་པར་བྱེད། །མ་ལུས་དབང་དུ་སྡུད་ལ་ཕྱག་འཚལ་བསྟོད། །མུན་ནག་ལྟ་བུའི་སྐུ་བརྗིད་ཅིང་། །ཉི་མ་འབུམ་གྱི་

49-1-148a

གཟི་བརྗིད་ཅན། །གདུག་པའི་མཚོན་ཆ་སྣ་ཚོགས་བསྣམས། །བདུད་འདུལ་ཁྲོ་བོའི་རྒྱལ་པོ་ཁྱེད་ལ་བསྟོད། །ཧཱུཾ་དམར་ཉི་མའི་འོད་འཕྲོ་མ། །ཞལ་གཅིག་ཕྱག་གཉིས་མཛེས་པའི་སྐུ། །གཡས་པ་གྲི་གུག་ཡབ་ལ་འཁྱུད། །གཡོན་པ་ཐོད་ཁྲག་གཙོ་ལ་སྟོབས། །སྤྱན་གསུམ་
མེ་སྟག་རབ་ཏུ་འཕྲོ། །ཞལ་ནས་ཧ་ཧ་ངེས་པར་སྒྲོགས། །དབུ་སྐྲ་དམར་སེར་རབ་ཏུ་འབར། །ཕག་མོ་ཡུམ་ལ་ཕྱག་འཚལ་བསྟོད། །ཧཱུཾ་གཏི་མུག་ང་རྒྱལ་གཤིན་རྗེ་གཤེད། །འདོད་ཆགས་ཕྲག་དོག་གཤེན་རྗེ་གཤེད། །དབུ་གསུམ་ཕྱག་དྲུག་ཞབས་བཞི་བགྲད། །གདུག་པའི་མཚོན་
ཆ་སྣ་ཚོགས་འཛིན། །གླང་སྟག་ཞིང་ཆེན་རྒྱན་གྱིས་བརྒྱན། །ཐོད་པའི་དོ་ཤལ་རྒྱན་དྲུག་ལྡན། །སྐུ་ལས་མེ་འབར་གདུག་པ་འདུལ། །གཤེད་པོ་བཞི་ལ་ཕྱག་འཚལ་བསྟོད། །མི་དགེ་བཅུ་སྤངས་ས་བཅུ་བགྲོད། །ཕྱོགས་བཅུའི་བདུད་འདུལ་ཁྲོ་བོ་བཅུ། །ཞལ་གཅིག་ཕྱག་གཉིས་སྐུ་མདོག་མཐིང་། །གདུག་
པའི་མཚོན་ཆ་སྣ་ཚོགས་འཛིན། །གཡོན་པ་སྡིགས་མཛུབ་ཞགས་པ་བསྣམས། །ལྷ་དང་ལྷ་མིན་ཐམས་ཅད་འདུལ། །རྒྱན་དྲུག་ཐོད་པའི་རྒྱན་གྱིས་བརྒྱན། །འཇིགས་བྱེད་བཅུ་ལ་ཕྱག་འཚལ་བསྟོད། །ཧཱུཾ་ཡེ་ཤེས་རྣམ་བཞི་ཡང་དག་རྟོགས། །གཡོན་པ་ཐོད་པ་ཁ་ཊྭཱཾ་ག །རྒྱན་དང་
ལྔ་བཅུས་སྐུ་ལ་བརྒྱན། །བརྐྱང་བསྐུམ་ཧ་ཧ་ཟིལ་གྱིས་གནོན། །ལྕགས་ཀྱུ་མ་དང་ཞགས་པ་མོ། །ལུ་གུ་རྒྱུད་དང་འབེབས་པ་མོ། །མཁའ་འགྲོ་བཞི་ལ་ཕྱག་འཚལ་བསྟོད། །ལྷག་ཆད་ཡི་གེ་བརྒྱ་པས་བཤགས། །དེ་ནས་དང་ལ་མཇུག་བསྡུ་བ་ནི། ཧཱུཾ་ཞེས་པ་ཡི་སྒྲ་བརྗོད་དེ། །གཅིག་གིས་དང་
ལ་ཡབ་ལ་བསྡུ། །ཡབ་ཉིད་འོད་དུ་ཞུ་ལས་ཧཱུཾ། །ཧཱུཾ་དེ་རིམ་གྱིས་ཞུ་བ་ལས། །ཟག་མེད་བདེ་བའི་ངང་ལ་གནས། །རྟག་པའི་མཐའ་ལས་གྲོལ་བར་འགྱུར། །རྡོ་རྗེ་སྐད་ཅིག་ལྷར་བསྒོམས་ལ། །སྔགས་ཀྱི་འཁོར་ལོ་རབ་བརྗོད་པས། །ཆད་པའི་མཐའ་ལས་གྲོལ་བར་འགྱུར། །
དེ་ནས་སྤྱོད་ལམ་ཅི་བདེར་གནས། །འཇམ་དཔལ་ཁྲོ་བོའི་སྒྲུབ་ཐབས་རྡོ་རྗེ་འོད་ཀྱི་རིམ་པ་ཞེས་བྱ་བ། བླ་མ་སྡོམ་པ་བཟང་པོའི་ཐུགས་དམ། བླ་མ་ལོ་ཙཱ་བ་དྷ་རྨ་བྷིས་བསྒྱུར་བའོ།།      །།

49-1-148b

༄༅༅། །བླ་མ་དམ་པ་རྣམས་ལ་ཕྱག་འཚལ་ལོ། ། ཤཱཀྱ་ཐུབ་པས་གསུངས་པའི་འཇམ་དཔལ་མཚན་བརྗོད་འདི་ལ་ཟབ་པ་དང་རྒྱ་ཆེ་བ་གཉིས་ལས། འདི་རྒྱ་ཆེ་བའི་མན་ངག་གོ། །དོན་བརྒྱད་ལས་འདི་མན་ངག་གི་སའོ། །དེ་ལ་རིམ་གྱིས་པ་དང་ཅིག་ཅར་བ་ལས་འདི་རིམ་གྱིས་པའི་སའོ། །དེ་ལ་བུམ་
པའི་དབང་གི་དུས་སུ།  རྡུལ་ཚོན་གྱི་དཀྱིལ་འཁོར་ལ་བརྟེན་ནས། དེ་ཡང་། ས་ཡི་དཀྱིལ་འཁོར་བཞི་ཡི་ཁྱོན། །ཞེས་ཟེར། དེ་ལ་བརྟེན་ནས་དཀྱིལ་འཁོར་གྱི་ཆོ་ག་བསྟན་ཏེ། སྨོན་འཇུག་གཉིས་ཀྱིས་སློབ་མ་ལས་ལ་འཇུག་པའི་དུས་སུ། རི་ཡི་ཕུག་གམ་ཆུ་འགྲམ་མམ། །ལྷ་ཁང་མཆོད་
རྟེན་དབེན་ས་དང་། །དུར་ཁྲོད་གནས་དང་ཤིང་དྲུང་དུ། །དེ་ལ་སོགས་ཏེ་གནས་ཡིད་དུ་འོང་བར། སློབ་དཔོན་སྟན་བདེ་བ་ལ་འདུག་སྟེ། བསམ་གཏན་ལ་གནས་པར་བྱའོ། །རྒྱུད་ནས། བསམ་གཏན་ཆེན་པོའི་ཏིང་འཛིན་གནས། །གསུངས་སོ། །དེ་ནས་རང་འཇམ་དཔལ་དུ་བསྒོམས་ལ། 
ཚད་མེད་པ་བཞི་བསྒོམ། དེའི་རྗེས་ལ། ཨ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿབྷ་ག་ཝཱན། ཛྙཱ་ན་མཱུརྟི། ཝཱ་གཱི་ཤྭ་ར་མ་ཧཱ་པཱ་ཙ། སརྦ་དྷརྨཱ་ག་ག་ན། ཨ་མ་ལ་སུ་པ་རི་ཤུདྡྷ་དྷརྨ་དྷཱ་ཏུ་ཛྙཱ་ན་གརྦྷ་ཨཿཞེས་པས་བདག་དང་སྣང་སྲིད་སྟོང་པར་བསམ། དེའི་ངང་ལས་བདག་གཤིན་རྗེ་གཤེད་དུ་
བསྒོམས་ལ། ས་སྣང་བ་ལ་བསླང་བ་དང་། མི་སྣང་བ་ལ་བསླང་བ་དང་། བགེགས་བསྐྲད་པ་དང་། ས་སྦྱང་བ་དང་། ས་གཟུང་བ་དང་། མཆོད་གཏོར་གྱིས་མཉེས་པར་བྱ་བ་དང་། ཀློག་འདོན་བྱ་བ་དང་། སྔོན་འགྲོ་རྣམས་བྱའོ། །དེ་ནས་དཀྱིལ་འཁོར་གྱི་སྟ་གོན་ནི་བདུད་རྩིའི་ཆུས་ཆག་ཆག་བཏབ་
ལ། གནམ་ཐིག་གདབ་པ་དང་། ས་ཐིག་གདབ་པ་དང་། བྱིན་གྱིས་བརླབ་པ་དང་། བྲི་བ་ལ་འཇུག་པར་བྱའོ། །དེ་ནས་ལྷ་དང་བུམ་པའི་སྟ་གོན་བྱ་སྟེ། བུམ་པ་དཀར་པོ་ནག་པོ་ར་རི་སྤངས་པ་ལ་རས་ཁ་ཚར་མ་ཉམས་པའི་མགུལ་ཆིངས་བྱས་ལ་ཕྱག་རྒྱ་ལྔ་གདགས། དེ་ལ་སོགས་པའི་
ཡོ་བྱད་རྒྱས་པར་བསོག །དེ་ནི་བུམ་པའི་སྟ་གོན་ནོ། །དེ་ནས་རྣལ་འབྱོར་པ་སྟ་གོན་ལ་གནས་པར་བྱ་སྟེ། སྤྱིར་ཁྲུས་དང་ལྡན་པར་བྱ། སྡིག་བཤགས་བྱ། སྐྱབས་འགྲོ་བྱས་ལ། སློབ་དཔོན་འཇམ་དཔལ་ཡེ་ཤེས་སེམས་དཔའི་ཏིང་ངེ་འཛིན་ལ་གནས་པར་བྱའོ། །དེ་ནི་སློབ་དཔོན་

49-1-149a

གྱི་སྟ་གོན་ནོ། །སློབ་མའི་སྟ་གོན་ནི་ཕྱིར་ཁྲུས་བྱས་ལ། སྡིག་པ་བཤགས་པ་དང་། སྐྱབས་སུ་འགྲོ་བ་དང་། བར་ཆོད་བསྲུང་བའི་ཕྱིར་སྲུང་སྐུད་གདགས་པ་དང་། དཔའ་བོ་འབྲུ་གསུམ་གྱིས་བྱིན་གྱིས་བརླབ་པའོ། །དེ་ནི་སློབ་མའི་སྟ་གོན་ནོ། །བར་དེར་ཞི་བའི་སྦྱིན་སྲེག་རྒྱས་
པར་བྱའོ། །དབང་ཐོབ་པ་དང་མ་ཐོབ་པ་གཉིས་སུ་ཤེས་པར་བྱའོ། །དབང་ཐོབ་ན་སེམས་བསྐྱེད་བྱ་མི་དགོས། མ་ཐོབ་ན་སེམས་བསྐྱེད་བྱ། གཉིས་པ་ལ་འཇུག །གསུམ་པ་ལ་རྫོགས་པར་བྱའོ། །དེ་ཡང་གསུམ་རིག་གཙང་མ་དག་པ་སྟེ། དབང་ཐོབ་པ་ཡིན་ན་བུམ་པ་གཅིག་ལ་
དབང་བཞི་སྟན་ཐོག་ཏུ་བསྐུར། བྱིན་རླབས་བརྟན་པར་བྱ་བའི་ཕྱིར་སློབ་དཔོན་ལ་ཡོན་དབུལ་ལོ། །དེའི་ཆོ་ག་ནི་དང་པོ་ཁོ་ནས་ས་བསླང་སྟེ། ས་བདག་ལྷ་ཀླུ་འཁོར་དང་བཅས་པ་རྣམས། །ས་ཡི་དམིགས་དང་ནེའུ་གསིང་ལུ་མ་རྣམས། །རྫིང་དང་ལྟེང་ཀ་སོ་སོའི་གནས་རྣམས་ནས། །ས་བདག་
ཀླུ་གཉན་སྡེ་དང་འཁོར་དུ་བཅས། །ས་ཡི་ལྷ་མོ་འཁོར་དང་བཅས་པ་རྣམས། །གནས་འདིར་སྤྱན་འདྲེན་མཆོད་ཀྱིས་གཤེགས་སུ་གསོལ། །དཀྱིལ་འཁོར་ཆན་པོ་འདི་ཡི་ས་བསླང་ཕྱིར། །བྱིན་གྱིས་བརླབས་པའི་གཏོར་མ་འདི་བཞེས་ལ། །རིན་ཆེན་གསེར་གྱི་ས་གཞི་བསླང་དུ་གསོལ། །ལག་
པ་གཡས་པ་ས་ལ་བརྡབས་པས། ས་གས་པའི་སེར་གནས་སའི་ལྷ་མོ་རོ་སྟོད་བསྙེམས་ཏེ་བྱུང་ནས། ལག་པ་གཡས་པ་ཁས་ལེན་གྱི་ཕྱག་རྒྱ། གཡོན་པ་བུམ་པ་བསྣམས་པ་དེ་ལྟར་བྱོན་པར་བསམ། དེ་ལ་གཏོར་མ་དང་མེ་ཏོག་དྲི་ཞིམ་པོས་མཆོད་ལ། འདོད་པའི་དོན་ལ་གསོལ་བ་
བཏབ་སྟེ། སྔོན་བཅོམ་ལྡན་འདས་ཤཱཀྱ་ཐུབ་པས་སྲོད་ལ་བདུད་བཏུལ། ཐོ་རངས་མངོན་པར་རྫོགས་པར་སངས་རྒྱས་པ་ཡང་ས་གཞི་རིན་པོ་ཆེ་འདིའི་སྟེང་དུ་མཛད་པ་ལགས་རྣལ་འབྱོར་པ་ཆེ་གེ་མོ་ཞེས་བགྱི་བ་ལ་སོགས་པ་ཡང་། ཚོགས་གཉིས་བསགས་པའི་རྟེན་
འཇམ་དཔལ་ཡེ་ཤེས་སེམས་དཔའི་ཕོ་བྲང་འདེབས་པར་འཚལ་བས་སའི་ལྷ་མོ་འཁོར་དང་བཅས་པས་ས་བདག་ཀླུ་གཉན་ཀུན། ས་རིན་དུ་རིན་པོ་ཆེས་བརྒྱན་པའི་གཏོར་མ་འདི་བཞེས་ལ། དང་པོ་དགེ་སྦྱོར་དབུ་བཟུང་བ་ནས། ཐ་མ་རྫོགས་པ་མཐར་ཕྱིན་དུ་ས་གནས་འདི་བདག་ལ་

49-1-149b

གཡར་ལགས་པས། ས་འདི་བརྟན་པ་དང་བཀྲ་ཤིས་པར་མཛད་དུ་གསོལ་ཞེས་བརྗོད་ལ་གཏོར་མ་སྦྱིན་ནོ། །དེའི་ཆོ་ག་འདི་སྐད་དོ། །ཧཱུཾ་སྐྱོབ་པ་སངས་རྒྱས་རིན་པོ་ཆེ། །ས་དང་ཕ་རོལ་ཕྱིན་པ་ལ། །ལྷ་མོ་འཁོར་བཅས་དཔང་དུ་གྱུར། །ཤཱཀྱ་ཐུབ་པ་སྐྱོབ་པ་ཡིས། །བདུད་ཀྱི་སྡེ་རྣམས་བཅོམ་པ་
ལྟར། །དེ་བཞིན་བདག་གིས་བདུད་རྣམས་གཞོམ། །ཕམ་པར་བྱས་ཏེ་དཀྱིལ་འཁོར་བྲི། །ལྷ་མོ་དེ། དེ་ཉིད་དུ་ཐིམ་པར་བསམ་མོ། །དེ་ནི་ས་བསླང་བའི་ཆོ་གའོ། །དེ་ནས་བདག་ཉིད་འཇམ་དཔལ་དུ་གསལ་བར་བསྒོམས་ལ། དེ་ནས་རྡོ་རྗེ་གསོར་དྲིལ་བུ་གསིལ་ཞིང་། རྡོ་རྗེ་འགྲོས་ཀྱིས་བསྐོར་
ཞིང་ས་གཞི་གཟུང་ངོ་། །དེ་ནས་བདག་ཉིད་དཀྱིལ་འཁོར་གྱི་དབུས་སུ་བསྡད་དེ། ལས་ཐམས་ཅད་པའི་སྔགས་བརྗོད་ཅིང་སྡང་མིག་ཕྱོགས་བཅུར་བལྟ། རྡོ་རྗེ་ནམ་མཁའ་ལ་གསོར་ཞིང་མཚམས་བཅད་དོ། །དེ་ནས་དྲི་སྣ་ཚོགས་དང་སྤོས་ཀྱི་ཆུས་སྦྱར་ལ་ལག་ཏུ་ཐོགས་ལ།  པུས་མོ་
གཡས་པའི་ལྷ་ང་ས་ལ་བཙུགས་ལ་འདི་སྐད་དོ། །ཧཱུཾ་བཅོམ་ལྡན་ཡེ་ཤེས་སེམས་དཔའ་ནི། །དཀྱིལ་འཁོར་ཀུན་གྱི་བདག་པོ་སྟེ། །སློབ་མ་རྣམས་ལ་བརྩེ་བ་དང་། །དཀྱིལ་འཁོར་ཐུགས་རྗེའི་བདག་ཉིད་ཅན། །དེ་དག་སློབ་མར་བཅས་པ་དང་། །མགོན་པོ་བདག་ནི་འབྱུང་བར་འཚལ། །
ལས་ཐམས་ཅད་པའི་སྔགས་ཀྱི་དྲིའི་ཆུས་བྱུག་གོ། །བདག་གི་ཐུགས་ཀར་ཐིག་སྐུད་ཀྱི་སྣ་གཅིག་གཟུང་། སློབ་མ་དེ་ཕྱག་ན་རྡོ་རྗེར་གསལ་བཏབ་ལ། ཐིག་སྐུད་དེ་ལྟེ་བའི་ཁུང་དུ་གཟུང་ལ། ཧཱུཾ་ནམ་མཁའ་གང་བའི་བཅོམ་ལྡན་འདས། །ཁྱོད་ཀྱིས་སེམས་ཅན་འགྲོ་དོན་མཛད། །
ལས་ཐམས་ཅད་པའི་སྔགས་ཀྱིས་ཐིག་གདབ་པོ། །ཐིག་སྐུད་ཀྱི་སྒྲ་ཡིས་བདེ་བར་གཤེགས་པའི་ཐུགས་དམ་བསྐུལ་ནས་སེམས་ཅན་གྱི་དོན་མཛད་པར་བསམ་མོ། །ད་ནི་ས་ཚོན་བྱིན་གྱིས་བརླབ་སྟེ། ཨོཾ་ཧཱུཾ་སྭཱ་ཧྲཱི་ཧཱ་བྲིས་ལ་རིགས་ལྔའི་དགུག་གཞུག་བྱའོ། །དེ་ཞུ་བས་རིན་པོ་ཆེ་ལྔའི་
ཕྱེ་མར་གྱུར་ནས། དེས་བྲིས་ཏེ་གཡོན་པས་དེ་ནས་པདྨའི་གདན་རེ་དགོད། དེ་ལས་ལྷའི་འཕྲོ་འདུ་དང་བསྐྱེད་པ་གཞན་ནས་གསལ་ལོ། །རྒྱུད་ཀྱི་རྒྱལ་པོ་འཇམ་དཔལ་གྱི་དཀྱིལ་འཁོར་གྱི་ཆོ་ག་བླ་མ་སྡོམ་པ་བཟང་པོས་མཛད་པ་རྫོགས་སོ།།

49-1-150a

༄༅༅། །ད་ནི་སྨོན་འཇུག་གཉིས་དང་ལྡན་པའི་སེམས་བསྐྱེད་པར་བྱ་སྟེ། དེ་ལ་ཡང་དང་པོར་སྡིག་པ་བཤགས་པར་བྱ་བ་ནི། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་སྐྱེ་བ་ནས་ད་ལྟའི་ལུས་འདི་བླངས་པ་ཚུན་ཆད་མི་དགེ་བའི་ལས་བགྱིས་པ་དང་། བགྱིད་དུ་སྩལ་བ་དང་། བགྱིད་
པ་ལ་རྗེས་སུ་ཡི་རང་བ་རྣམས་བླ་མ་དཀོན་མཆོག་ཡི་དམ། མཁའ་འགྲོའི་སྤྱན་སྔར་མཐོལ་ལོ་བཤགས་སོ། །ད་ནི་སྐྱབས་སུ་འགྲོ་སྟེ། བདག་མིང་འདི་ཞེས་བགྱི་བ་སྙིང་པོ་བྱང་ཆུབ་ལ་ཐུག་གི་བར་དུ། ཕྱོགས་བཅུ་ན་བཞུགས་པའི་སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་
འདུན་ལ་སྐྱབས་སུ་མཆིའོ། །ད་ནི་ལྡོམ་པ་གཟུང་སྟེ། བླ་མ་དཀོན་མཆོག་གི་སྤྱན་སྔར། །སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་རྟག་པར་གཟུང་བར་བགྱི། །དེ་ནི་སྨོན་
པའི་སེམས་བསྐྱེད་དེ། །ད་ནི་འཇུག་པར་བྱ་སྟེ། དང་པོ་བཤགས་པ་བྱ་སྟེ། བླ་མ་ཡི་དམ་མཁའ་འགྲོ་རྣམས་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་སྐྱེ་བ་ཐོག་མ་མེད་པ་ནས་ད་ལྟའི་ལུས་འདི་བླངས་པ་ཡན་ཆད་དུ་མི་དགེ་བའི་ལས་བགྱིས་པ་དང་། བགྱིད་དུ་སྩལ་བ་དང་། གཞན་
བགྱིད་པ་ལ་རྗེས་སུ་ཡི་རང་བ་རྣམས། བླ་མ་ཡི་དམ་མཁའ་འགྲོ་རྣམས་ཀྱི་སྤྱན་སྔར་མཐོལ་ལོ་བཤགས་སོ། །བདག་མིང་འདི་ཞེས་བགྱི་བ་སྙིང་པོ་བྱང་ཆུབ་ལ་ཐུག་གི་བར་དུ་བླ་མ་ལ་སྐྱབས་སུ་མཆིའོ། །ཡི་དམ་ལ་སྐྱབས་སུ་མཆིའོ། །མཁའ་འགྲོ་ལ་སྐྱབས་སུ་མཆིའོ །། །ད་ནི་སྡོམ་པ་
གཟུང་བར་བྱ་སྟེ། སངས་རྒྱས་ཆོས་དང་དགེ་འདུན་ཏེ། །བླ་མ་ཡི་དམ་མཁའ་འགྲོ་གསུམ། །དེང་ནས་བརྩམས་ཏེ་གཟུང་བར་བགྱི། །ནམ་དུ་ཡང་ནི་མི་གཏོང་ངོ་། །རྡོ་རྗེ་རིགས་མཆོག་ཆེན་པོ་ཡི། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་
བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ཀྱང་གཟུང་བར་བགྱི། །ལས་ཀྱི་

49-1-150b

རིགས་མཆོག་ཆེན་པོ་ཡི། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སེམས་ཅན་རྣམས་ཀྱི་དོན་གྱི་ཕྱིར། །བདག་གིས་སྡོམ་པ་མ་ལུས་གཟུང་། །མ་བསྒྲལ་བ་
རྣམས་བདག་གིས་སྒྲོལ། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་དགོད། །ཅེས་འཇུག་གོ། །ནུབ་དང་པོ་ལ་སྨོན་འཇུག་གི་སེམས་བསྐྱེད་དོ། །སོ་ཤིང་དོར་ལ་རང་རེའི་རྨི་ལམ་བརྟག་གོ། །དེ་ནས་དབང་བསྐུར་
བར་བྱ་སྟེ། དཀྱིལ་འཁོར་སྒྲུབ་པའི་དུས་སུ་བཟླས་པ་བྱ་བ་ནི། ཨོཾ་ཝཱ་གཱི་ཤྭ་རི་མུཾ། ཨོཾ་བཛྲ་ཏཱིཀྵྞ་དུཿཁ་ཙྪི་པྲཛྙཱ་ཛྙཱ་ན་མཱུརྟ་ཡེ། ཛྙཱ་ན་ཀཱ་ཡ་ཝཱ་གཱི་ཤྭ་ར་ཨ་ར་པ་ཙ་ནཱ་ཡ་ཏེ་ན་མཿ། ཨ་ཨཱ་སརྦ་ཏ་ཐཱ་ལ་སོགས་པ་ལས་ཐམས་ཅད་པའི་བསྙེན་པ་རྫོགས་པར་བྱའོ། །ནུབ་གཉིས་པ་ལ་བྱང་ཆུབ་ལམ་དུ་དྲང་
བ་ནི། མིག་རས་ཀྱིས་བཀབ་ལ་ལག་ཏུ་མེ་ཏོག་ཐོགས་ལ། སྒོའི་ཕྱི་ལོགས་སུ་བཞག་ལ། སློབ་དཔོན་ཉིད་ཀྱིས་འདི་སྐད་བརྗོད་དོ། །སྐལ་ལྡན་རིགས་ཀྱི་བུ་མཆོག་ཁྱོད། །དད་དང་མོས་པ་ཅི་ལ་དགའ། །ཞེས་ལན་གསུམ་བརྗོད་པས། སློབ་མས་འདི་སྐད་བརྗོད་དོ། །བདག་ཅག་
འཁོར་བ་ལས་བསྒྲལ་ཕྱིར། །ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་གནས་སྦྱོར་བ། །དི་རིང་བཤད་པའི་རིན་ཆེན་གྱིས། །གཙོ་བོས་བདག་ལ་བཀའ་དྲིན་གསོལ། །ཞེས་ལན་ནོ། །ཡང་སློབ་དཔོན་གྱིས། མ་རིག་རྨོངས་པའི་བུ་མཆོག་ཁྱོད། །རྡོ་རྗེ་བྱང་ཆུབ་ལམ་ནས་
དྲངས་ནས་ནི། །གསང་བའི་དཀྱིལ་འཁོར་བསྟན་པས་བྱ། །བླ་མེད་བྱང་ཆུབ་ལམ་ནས་དྲང་བར་བྱའོ། །བཛྲ་ཨཾ་ཀུ་ཤ་ཛ་ཞེས་བརྗོད་པས་ལས་ཐམས་ཅད་པའི་སྔགས་ཀྱིས་བགེགས་བསྐྲད་དོ། །དེ་ནས་ལས་ཀྱི་སློབ་དཔོན་ལག་ཏུ་རྡོ་རྗེ་གཏད་ལ། ལག་པ་ནས་དྲངས་ནས་གྲལ་སོ་སོར་བྱའོ། །
རང་གི་གདོང་གཡོགས་བྱས་ལ་གཞག་གོ། །ཡང་སློབ་དཔོན་ཁོ་རང་གིས།  སྐལ་ལྡན་རིགས་ཀྱི་བུ་མཆོག་ཁྱེད། །ལས་དང་སྤྱོད་པ་ཅི་ལ་དགའ། །བྱས་པས། ཡང་སློབ་མས། བདག་ནི་སྐལ་ལྡན་བདེ་ཆེན་ལ། །འཕགས་པ་འཇམ་དཔལ་དངོས་གྲུབ་གསོལ། །ཞེས་སོ། །དེ་ནས་

49-1-151a

མེ་ཏོག་ལག་ཏུ་ཐོགས་ལ། ཐལ་མོ་སྦྱར་ལ་འདི་སྐད་བརྗོད་དོ། །བྱང་ཆུབ་རྡོ་རྗེ་འཇམ་དཔལ་ལ། །རིན་ཆེན་མེ་ཏོག་དམ་པ་འབུལ། །བདག་ཀྱང་འཇམ་དཔལ་སྐུར་གྱུར་ཅིག །འཇམ་དཔལ་སྐུ་ཡི་རྡོ་རྗེ་གསོལ། །པྲ་ཏཱིཙྪ་ཧོ་ཞེས་མེ་ཏོག་དབུལ་ལོ། །མེ་ཏོག་ལྷ་ལ་ཚུད་ན་དེས་
ཆོག་གོ། །མ་ཚུད་ན་ལན་གསུམ་བསྐྱར་རོ། །དེ་ཡང་མ་ཚུད་ན་ལས་ཐམས་ཅད་བསྐྱར་རོ། །དེ་ནས་སློབ་དཔོན་གྱིས་འདི་སྐད་བརྗོད་དོ། །དེ་རིང་དང་བའི་ཤུགས་ཀྱིས་ནི། །དཀྱིལ་འཁོར་དམ་པ་བསྟན་པར་བྱ། །སྔགས་དང་ཕྱག་རྒྱས་བྱིན་གྱིས་བརླབ། །དམ་ཚིག་མཆོག་ཏུ་གྱུར་པར་བྱེད། །
བཛྲ་ཙཀྵུ་པྲ་བེ་ཤ་ཕཊ་ཅེས་མིག་དབྱེའོ། །དེ་ནས་དབང་བསྐུར་ཏེ།  དང་པོ་བུམ་པའི་དབང་བསྐུར་ཏེ་བདག་གི་ཐུགས་ཀ་ནས་འོད་འཕྲོས་པས་བུམ་པ་འོད་དུ་ཞུ་བ་ལས་དེ་འཁོར་ལོར་གྱུར། འཁོར་ལོ་འོད་དུ་ཞུ། ཧཱུཾ་དུ་གྱུར། དེ་ལ་རྡོ་རྗེ་མི་བསྐྱོད་པའི་དབང་ངོ་། །དེ་སྤྱི་བོའི་ཐོག་ཏུ་བཞག་ལ་མཆོད་
པ་དབུལ་ཏེ། མཆོད་པ་ཆེན་པོ་འདོད་ཆགས་ཆེ། །སེམས་ཅན་ཐམས་ཅད་དགའ་བར་བྱེད། །མཆོད་པ་ཆེན་པོ་ཞེ་སྡང་ཆེ། །ཉོན་མོངས་ཀུན་གྱི་སྒྲ་ཆེ་བ། །མཆོད་པ་ཆེན་པོ་གཏི་མུག་ཆེ། །གཏི་མུག་བློ་སྟེ་གཏི་མུག་སེལ། །མཆོད་པ་ཆེན་པོ་ཁྲོ་བ་ཆེ། །ཁྲོ་བ་ཆེན་པོ་སྒྲ་ཆེ་བ། །མཆོད་པ་
ཆེན་པོ་ཆགས་པ་ཆེ། །ཆགས་པ་ཐམས་ཅད་སེལ་བར་བྱེད། །ཨོཾ་བཛྲ་པུཥྤེ་ཧཱུཾ། དྷཱུ་པེ། ཨཱ་ལོ་ཀེ། གནྡྷེ། ནེེ་ཝེ་ཏྱེ། ཤབྡ་ཧཱུཾ། ཨོཾ་བཛྲ་ཏཱིཀྵྞ་དུཿཁ་ཙྪི་ད་པྲཛྙཱ་ཛྙཱ་ན་མཱུརྟ་ཡེ་ཛྙཱ་ན་ཀཱ་ཡ་ཝཱ་གཱི་ཤྭ་ར་ཨ་ར་པ་ཙ་ནཱ་ཡ་ཏེ་ན་མཿཨ་ཨཱ་ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨཿསྠི་ཏོ་ཧྲྀ་དི། ཛྙཱ་ན་མཱུརྟི་ར་ཧཾ་བུདྡྷོ་བུདྡྷཱ་ནཱཾ་ཨ་ཨཱ་
སརྦ་ཏ་ཐཱ་ག་ཏ་ལ་སོགས་པ་ལས་ཐམས་ཅད་པའི་སྔགས་བཏང་། དེ་ནི་བུམ་པའི་དབང་བསྐུར་རོ། །དེ་ནས་དབུ་རྒྱན་དང་ཅོད་པན་གྱི་དབང་བསྐུར་ཏེ། དབུ་རྒྱན་དང་ཅོད་པན་མདུན་དུ་བཞག་ལ། བདག་གི་ཐུགས་ཀ་ནས་འོད་ཁ་དོག་ལྔ་འཕྲོས་ཏེ། དབུ་རྒྱན་དང་ཅོད་པན་འོད་དུ་ཞུ་རིན་པོ་ཆེའི་སུལ་
མངས་ཅིག་ཏུ་གྱུར། རིན་པོ་ཆེ་འོད་དུ་ཞུ་བས། རིན་ཆེན་འབྱུང་ལྡན་གྱི་དབང་ངོ་། །སློབ་མའི་མགོ་ལ་བསྐོན་ལ། གོང་གི་མཆོད་པས་མཆོད་དོ། །དེ་ནས་རྡོ་རྗེའི་དབང་བསྐུར་ཏེ་རྡོ་རྗེ་ལས་འོད་འཕྲོས་པས་རྡོ་རྗེ་འོད་དུ་ཞུ་ནས་པདྨ་དམར་པོ་ཅིག་ཏུ་གྱུར། པདྨ་དེ་ཞུ་བས་ཨཾ་དུ་གྱུར།

49-1-151b

ཨཾ་ཞུ་བས་སྣང་བ་མཐའ་ཡས་ཀྱི་དབང་བསྐུར་རོ། །དེ་སློབ་མའི་ལག་ཏུ་བཞག་པས་མཆོད་བསྟོད་གོང་བཞིན་དུ་བྱའོ། །དེ་ནས་དྲིལ་བུའི་དབང་བསྐུར་ཏེ། སློབ་དཔོན་གྱི་མདུན་དུ་དྲིལ་བུ་བཞག་ལ་ཐུགས་ཀ་ནས་འོད་འཕྲོས་པས་དྲིལ་བུ་ཞུ། ཟླ་བའི་དཀྱིལ་འཁོར་ཅིག་ཏུ་གྱུར། ཟླ་བའི་དཀྱིལ་འཁོར་
དེ་ཧ་ཅིག་ཏུ་གྱུར། དེ་ལས་དོན་ཡོད་གྲུབ་པའི་དབང་ངོ་། །དྲིལ་བུ་སློབ་མའི་ལག་ཏུ་བཞག་ལ་མཆོད་བསྟོད་གོང་བཞིན་དུ་བྱའོ། །དེ་ནས་མིང་གི་དབང་བསྐུར་ཏེ། སློབ་དཔོན་གྱི་ཕྱག་གཡས་པའི་སྟེང་དུ་ཐུགས་ཀ་ནས་ཨ་དེ་འོད་དུ་ཞུ་ཟླ་བའི་དཀྱིལ་འཁོར་ཅིག་ཏུ་གྱུར། ཟླ་བ་འོད་དུ་ཞུ་ཨོཾ་དུ་གྱུར། 
དེ་ལས་རྣམ་པར་སྣང་མཛད་ཀྱི་དབང་ངོ་། །སློབ་དཔོན་གྱི་ཕྱག་སློབ་མའི་སྤྱི་བོའི་སྟེང་དུ་བཞག་སྟེ།  མཆོད་བསྟོད་གོང་བཞིན་དུ་བྱའོ། །དེ་ལྟར་དབང་བསྐུར་བ་ནི་ཕུང་པོ་ལྔ་ནི་རིགས་ལྔའི་སངས་རྒྱས་ཏེ། ཡེ་ཤེས་ལྔའི་དབང་ཐོབ་པའོ། །དེས་ནི་བུམ་པའི་དབང་ངོ་། །གསང་བའི་དབང་ནི། བདག་ལྷའི་
རྣལ་འབྱོར་དུ་བྱས་ལ། དེའི་སྤྱི་གཙུག་ཏུ་བླ་མ་བསྒོམ། དེའི་སྤྱི་གཙུག་ཏུ་གཤིན་རྗེ་གཤེད་ཡབ་ཡུམ་བསྒོམ། དེའི་སྤྱི་གཙུག་ཏུ་དུས་གསུམ་གྱི་བདེ་བར་གཤེགས་པ་རྣམས་བསྒོམ་མོ། །དུས་གསུམ་གྱི་སངས་རྒྱས་ཐམས་ཅད་སྙོམས་པར་ཞུགས་པའི་བྱང་ཆུབ་ཀྱི་སེམས་གཤིན་རྗེ་གཤེད་ཡབ་ཡུམ་
ལ་ཐིམ་པར་བསམ།  གཤིན་རྗེ་གཤེད་ཡབ་ཡུམ་སྙོམས་པར་ཞུགས་བྱང་ཆུབ་ཀྱི་སེམས་ལ་བབས་ནས། བླ་མ་ཡབ་ཡུམ་ལ་ཞུགས་པར་བསམ། བླ་མ་ཡབ་ཡུམ་སྙོམས་པར་ཞུགས་པའི་བྱང་ཆུབ་ཀྱི་སེམས་དེ་དག་གི་ལམ་དུ་ཞུགས་ནས་ལྕེ་སྟེང་དུ་སྦྱར་ལ། ཨརྒྷ་དང་བསྲེས་ལ་སློབ་མའི་ལྕེ་སྟེང་
དུ་བཞག་ལ་སློབ་མའི་ངག་སྐྱོན་དག་པར་བསམ། དེ་མགྲིན་པར། དེ་སྙིང་གར། དེ་ལྟེ་བར། དེ་རིམ་གྱིས་ཡར་དྲངས་པས་ངག་གི་ལམ་དུ་ཞུགས། དེ་སྣ་བུག་གཡས་སུ་ཞུགས། དེ་གཡོན་དུ་ཞུགས། ངག་རླུང་ནི་འགྲོ་འོང་བཟླས་པ་བྱས་པས་སྒྲ་ངོས་གཟུང་མེད་པས་ངག་གི་སྒྲ་གྲག་སྟོང་དུ་འགྲོ་སྟེ་ངོ་
སྤྲད་དོ། །ཤེས་རབ་ཡེ་ཤེས་ཀྱི་དབང་ནི། རྣལ་འབྱོར་པ་གཡས་སུ་གཞག །རྣལ་འབྱོར་མ་གཡོན་དུ་གཞག །དེ་ནས་སློབ་དཔོན་གྱིས་རྡོ་རྗེ་དང་དྲིལ་བུ་མདུན་དུ་བཞག་ལ། གཤིན་རྗེ་གཤེད་ཡབ་ཡུམ་དུ་བསྐྱེད་དོ། །རྡོ་རྗེ་དེ་ལ་བདག་གི་ཐུགས་ཀ་ནས་འོད་ཟེར་འཕྲོས་པས་རྡོ་རྗེ་འོད་དུ་ཞུ་འོད་ཟེར་

49-1-152a

གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་དམ་གྱི་རྒྱུད་བསྐུལ། སླར་འདུས་པས་ཡི་གེ་ཧཱུཾ་ཅིག་ཏུ་གྱུར། ཧཱུཾ་འོད་དུ་ཞུ་བ་ལས་འཇམ་དཔལ་གཤིན་རྗེ་གཤེད་སྐུ་མདོག་ནག་པོ་ཞལ་གཅིག་ཕྱག་གཉིས་པ། གཡས་དབྱུག་ཏོ། །གཡོན་སྡིགས་མཛུབ་དང་ཞགས་པ་བཅས་ 
པ། གླང་ཆེན་སྟོད་གཡོགས། ཞིང་ཆེན་གཡང་གཞི་སྟག་གི་ཤམ་ཐབས་དང་། སྦྲུལ་གྱི་ཆུན་པོ་དང་ཐོད་པའི་ཕྲེང་བ་དང་། དུར་ཁྲོད་ཀྱི་ཆས་ཅན་དུ་བསྐྱེད་ལ་སློབ་མའི་ཐུགས་ཀར་བཞག་ལ། ཡེ་ཤེས་སེམས་དཔའ་དགུག་གཞུག་བྱའོ། །དེ་ནས་རྡོ་རྗེ་དེ་སློབ་མའི་ལག་ཏུ་གཏད་ཐབས་ཀྱི་རང་
བཞིན་དུ་དབང་བསྐུར་རོ། །དྲིལ་བུ་ལ་བདག་གི་ཐུགས་ཀ་ནས་འོད་འཕྲོས་པས་དྲིལ་བུ་འོད་དུ་ཞུ། དྲིལ་བུའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་དམ་གྱི་རྒྱུད་བསྐུལ། ཚུར་འདུས་པས་ཡི་གེ་ཨ་ཅིག་ཏུ་གྱུར། ཨ་དེ་འོད་དུ་ཞུ་བ་ལས་རྡོ་རྗེ་ཕག་མོ་སྐུ་མདོག་དམར་མོ། །
གཡས་གྲི་གུག །གཡོན་ཐོད་པ་བསྣམས་པ་ཅིག་ཏུ་བསྐྱེད་ལ་སློབ་མའི་སྤྱི་བོ་ཐོག་ཏུ་བཞག་ལ་ཡེ་ཤེས་དགུག་གཞུག་བྱའོ། །དེ་ནས་མོའི་ལག་པ་གཡོན་དུ་གཞག །དངོས་ཀྱི་རིག་མ་མེད་ན་དྲིལ་བུའི་འོད་ཀྱིས་རིག་མར་བསྒོམ་མོ། །དེ་ལྟར་ཤེས་རབ་ཀྱིས་རིམ་པར་དབང་བསྐུར་རོ། །དེ་ནས་
སློབ་དཔོན་གྱིས་མཁའ་གསང་བྱིན་གྱིས་བརླབ། སློབ་དཔོན་གྱི་གསང་བའི་གནས་ནས་ཧཱུཾ་ཅིག་འཕྲོས་པས་སློབ་མའི་གསང་བར་ཐིམ། རྡོ་རྗེ་རྩེ་ལྔ་པ་ཕྱེད་པ་ཅིག་ཏུ་གྱུར། རྡོ་རྗེའི་བུམ་པར་ཨོཾ་གྱིས་མཚན་པ་ཅིག་ཏུ་གྱུར་པར་བསྒོམ། ཡུམ་གྱི་མཁའ་གསང་བྱིན་གྱིས་བརླབ་སྟེ། 
བདག་གི་ཡུམ་གྱི་མཁའ་ལས་མ་དམར་མོ་ཅིག་འཕྲོས་པས་སློབ་མའི་ཡུམ་གྱི་གསང་བར་ཐིམ། མ་དེ་འོད་དུ་ཞུ་བ་ལས་པདྨ་འདབ་མ་བརྒྱད་ཟེའུ་འབྲུ་དང་བཅས་པ་ཅིག་བསྒོམ། དེ་ནས་སློབ་དཔོན་གྱིས་ཧཱུཾ་ཞེས་བརྗོད་པས་རྡོ་རྗེ་བསྐུལ། ཨ་ཞེས་དྲིལ་བུ་བསྐུལ། ཨ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་
ཧ་ར། ཨོཾ་ཧཱུཾ་ཧྲཱི ཿབྷ་ག་ཝཱན། ཛྙཱ་ན་མཱུརྟི་ཝཱ་གཱི་ཤྭ་ར་མ་ཧཱ་པ་ཙ། སརྦ་དྷ་རྨཱ་ག་ག་ན། ཨ་མ་ལ་སུ་པ་རི་ཤུདྡྷ་དྷ་རྨ་དྷཱ་ཏུ་ཛྙཱ་ན་གརྦྷ་ཨཿཞེས་པས་སྐད་ཅིག་མ་ལ་བསྐྱེད་དེ། བདེ་བ་ངོས་བཟུང་ངོ་། །དེ་ནི་བདེ་བ་བསྐུར་བའི་རིམ་པའོ། །དབང་གི་དོན་ལམ་དུ་བསླང་བ་ནི། དེའི་དུས་ལས་མ་གཡོས་པར་ཡབ་

49-1-152b

ཡུམ་གཉིས་ཀྱི་བསྲུབས་པས་རླུང་མེའི་དྲོད་ཅན་གྱི་མེ་ལྕེ་ཨ་བ་དྷཱུ་ཏཱི་ན་ཡར་ཞུགས་ཏེ། སྤྱི་བོ་གཙུག་ཏོར་གྱི་ཧཾ་ཞུ་བ་ལས། ཀླད་རྒྱས་བདེ་བའི་འཁོར་ལོའི་རྩ་འདབ་མ་སུམ་ཅུ་རྩ་གཉིས་གྲོལ།  དེ་ལ་བདུད་རྩི་བྱང་ཆུབ་ཀྱི་སེམས་བབས་ཏེ་དགའ་བའོ། །བྱང་ཆུབ་ཀྱི་སེམས་དེ་མགྲིན་པ་ལོངས་
སྤྱོད་ཀྱི་འཁོར་ལོར་བསྐྱིལ་བས་རྩ་འདབ་མ་བཅུ་དྲུག་གྲོལ་ཏེ་མཆོག་དགའ།  དེ་ཆོས་ཀྱི་འཁོར་ལོར་བསྐྱིལ་བས་རྩ་འདབ་བརྒྱད་གྲོལ་ཏེ་དགའ་བྲལ། དེ་ལྟེ་བ་སྤྲུལ་པའི་དཀྱིལ་འཁོར་དུ་བབས་རྩ་འདབ་དྲུག་ཅུ་རྩ་བཞི་གྲོལ་ཏེ། དེ་ལྷན་ཅིག་སྐྱེས་པའི་དགའ་བའོ། །དེ་རང་གནས་སུ་འཕངས་ཏེ་ཧ་ཧ་ཞེས་
པས་ལྟེ་བ་ནས་སྙིང་གར་དྲངས། ཧི་ཧི་ཞེས་པས་སྙིང་ག་ནས་མགྲིན་པར་དྲངས། ཧཱུཾ་ཧཱུཾ་ཞེས་པས་མགྲིན་པ་ནས་ཀླད་པ་བདེ་ཆེན་དུ་དྲངས་པས་གཙུག་ཏོར་ཆེན་པོའི་ཧཾ་ལ་སྦུར་ལེན་ལ་སྦུར་འདུས་པའམ་ཁབ་ལེན་ལ་ལྕགས་འདུས་པ་བཞིན་དུ་འུབ་ཀྱིས་འདུས་སོ། །དེ་ལ་སེང་གེ་རྣམ་པར་རོལ་གྱི་ཁྱབ་
པར་བསྒོམ་མོ། །དེ་ལྟར་ཡར་དྲངས་མར་དབབ་བྱེད་ཀྱིན་བདེ་སྟོང་གི་ཉམས་ངོས་ཟིན་པར་བྱའོ། །དབང་བཞི་པ་ནི་བཞི་པར་མིང་བཏགས་ཀྱང་གསུམ་ལས་བསྐུར་བར་མི་འདོད་དོ། །གོང་མའི་ཉམས་དེ་སེམས་ཉིད་ལ་ངོ་སྤྲོད་པ་ལ་བཞི་ལས་ཤེས་ཟེར་རོ། །དེ་ལ་བཞི་པའི་དབང་གི་ངོ་སྤྲད་དེ། གདམས་
ངག་ངོ་སྤྲད་ཀྱིས་སེམས་ངོས་ཟུང་ཤིག་བྱ། དར་ཅིག་ལོན་པ་དང་། དེ་ཀ་རང་ཡིན་བྱས་ལ། ལག་པ་ནམ་མཁའ་ལ་ཡུག་བྱས་ལ། བཞི་པ་བདེ་བའི་དོན་ནོ། །ཕྱག་རྒྱ་ཆེན་པོའི་ལྷན་ཅིག་སྐྱེས་པའི་ཡེ་ཤེས་དེ་གཟུགས་ཁ་དོག་ཏུ་མ་གྲུབ་པས་ནམ་མཁའ་ལ་ངོ་སྤྲད་དོ། །གསུམ་པའི་ཉམས་དེ་ངོས་
གཟུང་དང་བྲལ་བས། གཞོན་ནུ་མའི་བདེ་བ་ཉམས་སུ་མྱོང་དུ་ཡོད་པ་ལ་དངོས་པོ་མངོན་སུམ་དུ་བསྟན་དུ་མེད། དེ་ཀ་ལ་ངོ་སྤྲད་པས་དབང་བཞི་པའི་གདམས་ངག་གོ། །ལྟ་སྟངས་བཞིས་རིགས་པ་སྤྲོས་པ་དང་བྲལ་བར་ངོ་སྤྲད་དོ། །བུམ་པའི་དབང་གི་དུས་སུ་རིགས་ལྔའི་བཀྲ་ཤིས་གསོལ་ཞིང་དབང་
བསྐུར། གསང་དབང་མན་ཆད་དབང་བཞི་པ་རྫོགས་ནས་བཀྲ་ཤིས་ཀྱི་དབང་བསྐུར་ཏེ་དངོས་གྲུབ་བླང་ངོ་། །བཀྲ་ཤིས་གསོལ་བ་ནི། རྒྱུད་ལས། བཀྲ་ཤིས་ཀུན་གྱི་བཀྲ་ཤིས་པ། །གྲགས་པའི་བཀྲ་ཤིས་སྙན་གྲགས་དགེ། །དབུགས་འབྱིན་ཆེན་པོ་དགའ་སྟོན་ཆེ། །ཞེས་སོ། །རྫས་ལ་བརྟེན་པའི་

49-1-153a

བཀྲ་ཤིས་ཀྱི་སྟོན་མོ་ནི། འབྲང་རྒྱས་དང་། མར་དང་། ཐུད་དང་། ཞོ་དང་། མངར་གསུམ་དང་།  ཁུར་བ་དང་།  ལ་ཕུག་དང་། ཟས་སྣ་མང་དུ་ཐོགས་ལ་རིགས་ལྔའི་བཀྲ་ཤིས་གསོལ་ཏེ། བཀྲ་ཤིས་དམ་པ་ཆོས་དབྱིངས་བསྐྱོད་པ་མེད་མོད་ཀྱང་། །རྒྱལ་བ་རིགས་ལྔའི་བཀྲ་ཤིས་བདེ་ལེགས་ཤོག །བཀྲ་
ཤིས་ཀུན་གྱི་བཀྲ་ཤིས་པ། །གྲགས་པའི་བཀྲ་ཤིས་སྙན་གྲགས་དགེ། །དབུས་ཕྱོགས་སངས་རྒྱས་རིགས་ཀྱི་ཞིང་ཁམས་ནས། །སྤྲོས་དང་བྲལ་བའི་བཀྲ་ཤིས་གང་ལགས་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ཤར་ཕྱོགས་རྡོ་རྗེ་རིགས་ཀྱི་ཞིང་ཁམས་ནས། །རྡོ་རྗེ་
རིགས་ཀྱི་བཀྲ་ཤིས་སྐྱེ་འཆི་མེད། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་ཀུན་གྱི་བཀྲ་ཤིས་པ། །གྲགས་པའི་བཀྲ་ཤིས་སྙན་གྲགས་དགེ། །ལྷོ་ཕྱོགས་རིན་ཆེན་རིགས་ཀྱི་ཞིང་ཁམས་ནས། །རིན་ཆེན་རིགས་ཀྱི་བཀྲ་ཤིས་དགོས་འདོད་འབྱུང་། །
བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་ཀུན་གྱི་བཀྲ་ཤིས་པ། །གྲགས་པའི་བཀྲ་ཤིས་སྙན་གྲགས་དགེ། །ནུབ་ཕྱོགས་པདྨ་རིགས་ཀྱི་ཞིང་ཁམས་ནས། །སྐྱོན་མེད་པདྨ་ལྟ་བུའི་བཀྲ་ཤིས་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་ཀུན་
གྱི་བཀྲ་ཤིས་པ། །གྲགས་པའི་བཀྲ་ཤིས་སྙན་གྲགས་དགེ། །བྱང་ཕྱོགས་ལས་ཀྱི་རིགས་ཀྱི་ཞིང་ཁམས་ནས། །ལས་རྣམས་གྲུབ་པའི་བཀྲ་ཤིས་གང་ལེགས་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ཨོཾ་བུདྡྷ་ཀཱ་ལ་ཤ་ཨ་བྷི་ཥིཉྩ་ཨོཾ།  ཨོཾ་བཛྲ་ཀཱ་ལ་ཤ་ཨ་བྷི་ཥིཉྩ་ཧཱུཾ། ཨོཾ་
རཏྣ་ཀཱ་ལ་ཤ་ཨ་བྷི་ཥིཉྩ་ཏྣཾ། ཨོཾ་པདྨ་ཀཱ་ལ་ཤ་ཨ་བྷི་ཥིཉྩ་ཧྲཱི ། ཨོཾ་ཀརྨ་ཀཱ་ལ་ཤ་ཨ་བྷི་ཥིཉྩ་ཨཱཿ། ལོངས་སྤྱོད་རྫོགས་པའི་སྐུ་མཚན་དང་དཔེ་བྱད་ཀྱིས་བརྒྱན་པ་རྒྱལ་བ་རིགས་ལྔའི་བཀྲ་ཤིས་པ་དེ་བཞིན་དུ།བདག་ཅག་དཔོན་སློབ་བཀྲ་ཤིས་པར་གྱུར་ཅིག །བཀྲ་ཤིས་རྫས་བརྒྱད་ཀྱི་བཀྲ་ཤིས་ནི། བཀྲ་
ཤིས་ཀུན་གྱི་བཀྲ་ཤིས་པ། །ཆོས་ཀྱི་རྒྱལ་མཚན་ལེགས་པར་འཛུགས། །སངས་རྒྱས་སྐུ་ཡི་བཀྲ་ཤིས་ཤོག །ཆོས་ཀྱི་དུང་སྟེ་སྒྲ་ཆེན་ལྡན། །བུདྡྷ་གསུང་གི་བཀྲ་ཤིས་ཤོག །འོད་བཟང་འབར་བ་དཔལ་གྱི་བེའུ། །བུདྡྷ་ཐུགས་ཀྱི་བཀྲ་ཤིས་ཤོག །ཁྱབ་བདག་ཆེན་པོ་རིན་

49-1-153b

ཆེན་གདུགས། །བུདྡྷ་དབུ་ཡི་བཀྲ་ཤིས་ཤིས་ཤོག །སྤྱན་ལྔ་ཆགས་པ་མེད་པ་འཆང་། །བུདྡྷ་སྤྱན་གྱི་བཀྲ་ཤིས་ཤོག །བུམ་པ་བཟང་པོ་ཆེ་བའི་མཆོག །བུདྡྷ་མགུལ་གྱི་བཀྲ་ཤིས་ཤོག །ཉིད་ཀྱི་ཞལ་ནས་ལྗགས་བཟང་བ། །བུདྡྷ་ལྗགས་ཀྱི་བཀྲ་ཤིས་ཤོག །བཀྲ་ཤིས་ཀུན་གྱི་བཀྲ་ཤིས་པ། །གྲགས་
པའི་བཀྲ་ཤིས་སྙན་གྲགས་དགེ། །སྤྲུལ་པའི་འཁོར་ལོ་སྣ་ཚོགས་འཆང་། །སངས་རྒྱས་ཞབས་ཀྱི་བཀྲ་ཤིས་ཤོག །སྐྱབས་འགྲོ་སེམས་བསྐྱེད་དབང་བཞིའི་གདམས་པ་སློབ་དཔོན་སྡོམ་པ་བཟང་པོས་མཛད་པ་རྫོགས་སོ།།      །།༄༅༅། །བླ་མ་རྣམས་ལ་ཕྱག་འཚལ་ལོ། །ཐོག་
མར་དགེ་བའི་དོན། སྤྲུལ་སྐུ་ལམ་དུ་བྱེད་པ་རྡོ་རྗེའི་གླུ་ནི། ཨོཾ་བཛྲ་ཏཱིཀྵྞ་རྡོ་རྗེ་རྣོན་པོ་བཅོམ་ལྡན་སྣང་བ་མཐའ་ཡས་སོ། །དུཿཁཙྪེ་ད་མི་མཐུན་པའི་སྡུག་བསྔལ་གཅོད་པ་མི་བསྐྱོད་པའོ། །པྲཛྙཱ་ཛྙཱ་ན་མཱུརྟ་ཡེ། ཤེས་རབ་ཡེ་ཤེས་གཏི་མུག་སེལ་བ་རྣམ་སྣང་ངོ་། །ཛྙཱ་ན་ཀཱ་ཡ། ཡེ་ཤེས་ཀྱི་སྐུ་
ཕྲིན་ལས་བྱེད་པ་དོན་ཡོད་གྲུབ་པའོ། །ཝཱ་གཱི་ཤྭ་ར་ངག་གི་དབང་ཕྱུག་གདུལ་བྱ་ཚིམ་པ། ཨ་ར་པ་ཙ་མ་སྐྱེས་པའི་དོན་རིན་ཆེན་འབྱུང་ལྡན། ཨོཾ་ཏེ་ཏེ་ཧཱུཾ་བདེ་བའི་དོན་རྟོགས། ཏེ་ན་ཧཱུཾ་བདེ་བའི་ལམ་རྙེད། ཏེ་ཏེ་ཏེ་ན་ཧཱུཾ་གཉིས་སུ་མེད་པའི་བདེ་བ་ཐོབ་པའོ། །ཡ་ཏེ་ན་མཿཐེག་ཆེན་མ་ནོར་བ་
ཡིན་ནོ། །བར་དུ་དགེ་བའི་དོན་ནི། ལོངས་སྐུ་ལམ་དུ་བྱེད་པ་རྡོ་རྗེའི་གླུ་ནི།ཨོཾ་སྠི་ཏོ་ཧྲྀ་དི་ཆོས་ཐམས་ཅད་རང་བཞིན་སྐྱེ་མེད་ཀྱི་ངོ་བོར་གནས། ཛྷཱ་ན་མཱུ་རྟི་ར་ཧཾ། ཡེ་ཤེས་ཀྱི་བདེ་བ་རང་ལ་ཡོད། བུདྡྷོ་བུདྡྷཱ་ནཱན། སངས་རྒྱས་སེམས་ཅན་ཡེ་ནས་གཉིས་སུ་མེད། ཏྲྱེེ་དྡྷྭ་བརྟི་ནཱན། དུས་གསུམ་གྱི་
དོན་བརྗོད་པ་ལས་འདས་པའི་གནས་ཡིན། བདེ་བའི་དོན་སྟོན། ཏེ་ན་ཧཱུཾ། བདེ་བའི་ལམ་རྙེད། ཏེ་ཏེ་ཏེ་ན་ཧཱུཾ་ཐབས་ཤེས་རབ་གཉིས་སུ་མེད་པའི་བདེ་བ་ཐོབ་པོ། །མཐར་ཐུག་དག་པའི་དོན་ནི། ཆོས་སྐུ་ལམ་དུ་བྱེད་པ་རྡོ་རྗེའི་གླུ་ནི། ཨོཾ་སརྦ་དྷརྨཱ་ཨུ་ཨཱུ། ཆོས་ཐམས་ཅད་སྐྱེ་བ་མེད་
པ་ཉིད། ཨོཾ་སརྦ་དྷརྨཱ། ཨི་ཨཱི། སྐྱེ་མེད་སྐྱེ་བ་མེད་པ་ཉིད་དུ་སྣང་། །ཨོཾ་སརྦ་དྷརྨཱ་ཨུ་ཨཱུ། མ་སྐྱེས་ཆོས་རྣམས་དུས་གསུམ་ཡིད་ཀྱིས་དྲན། །ཨོཾ་སརྦ་དྷརྨཱ་ཨེ་ཨཻ། ཆོས་རྣམས་སྐྱེ་མེད་མི་འདའ་དམ་ཚིག་ཉིད། །ཨོཾ་སརྦ་དྷརྨཱ་ཨོ་ཨཽ། ཆོས་རྣམས་ཐམས་ཅད་ལོངས་སྤྱོད་མཆོག །ཨོཾ་སརྦ་དྷརྨཱ་

49-1-154a

ཨཾ། ཆོས་ཐམས་ཅད་འབྲས་བུ་བདེ་བ་ཆེ། ཨོཾ་སརྦ་དྷ་རྨཱ་ཨཿ ཆོས་སྐུ་བདེ་བ་ཆེན་པོ་ཉིད་ཀྱི་དོན། ཨོཾ་ཏེ་ཏེ་ཧཱུཾ་བདེ་བའི་དོན་རྟོགས། ཏེ་ན་ཧཱུཾ་བདེ་བའི་ལམ་རྙེད། ཏེ་ཏེ་ཏེ་ན་ཧཱུཾ་གཉིས་སུ་མེད་པའི་བདེ་བ་ཐོབ། ཡ་ཏེ་ན་མཿ ཐེག་པ་ཆེན་པོ་མ་ནོར་བ་ཡིན་གླུ་དང་པོ་བུམ་དབང་ཐོབ་པས་བླང་། 
གླུ་བར་པ་དེ་གསང་དབང་དང་། ཤེས་རབ་ཡེ་ཤེས་ཐོབ་པས་བླང་། གླུ་གསུམ་པ་དེ་དབང་བཞི་ཐོབ་པའི་རྣལ་འབྱོར་པ་ཆེན་པོས་བླང་ངོ་། །རྡོ་རྗེ་གླུའི་གདམས་ངག་རྫོགས་སོ།།      །།༄༅༅། །བླ་མ་དམ་པ་རྣམས་ལ་ཕྱག་འཚལ་ལོ། །ཁྲུས་ཀྱི་ཆོ་ག་བྱ་སྟེ། དེ་ཡང་རྒྱུད་ན།  དག་པར་བྱེད་
ཅིང་སྡིག་སེལ་བ། །ཞེས་པས། ཁྲུས་ཀྱི་ཆོ་ག་བཤད་དེ། དེ་ལ་གཉིས། ཕྱིའི་ཁྲུས་དང་ནང་གི་ཁྲུས་སོ། །དང་པོ་ཕྱིའི་ཁྲུས་བྱ་སྟེ། ས་གཙང་མ་ལ་མཎྜལ་བྱས་ལ། དེའི་སྟེང་དུ་བུམ་པ་སྐྱོན་སྤངས་པ་གཞག །རས་ཁ་ཚར་མ་ཉམས་པས་བུམ་པའི་མགུལ་ཆིངས་བྱ། འབྲས་བུ་ཅན་གྱི་ཤིང་
གིས་བུམ་པའི་ཁ་རྒྱན་བྱ། ནང་དུ་ཆུ་གཙང་མས་བཀང་ལ། སྙིང་པོ་རྣམ་པ་ལྔ་ལ། འབྲུའི་སྙིང་པོ་ཏིལ། རྩི་ཐོག་གི་སྙིང་པོ་མར། ཤིང་ཐོག་གི་སྙིང་པོ་བུ་རམ། མེ་ཏོག་གི་སྙིང་པོ་སྦྲང་རྩི། ཆུའི་སྙིང་པོ་ལན་ཚྭའོ། །འབྲུ་ལྔ་ལ། ནས། གྲོ། ཏིལ། ཁྲེ། འབྲས་སོ། །སྨན་ལྔ་ལ། སྟག་ཚེར་
མ། རྒྱ་མཚོ་དབུ་བ། དབང་པོ་ལག་པ། ཤུ་དག །སླེ་ཏྲེས་སོ། །སྤོས་ལྔ་ལ། ཨ་ག་རུ། ཙནྡན་དཀར་དམར། ག་པུར། ཛཱ་ཏི། གླ་རྩིའོ། །དེ་དུད་འགྲོའི་ས་བོན་ཡིན་པར་འདོད། རྫས་དེ་རྣམས་བུམ་པའི་ནང་དུ་བླུགས་ལ། མཎྜལ་གྱི་སྟེང་དུ་གཞག །དེ་ནས་རང་འཇམ་དཔལ་དུ་སྐད་ཅིག་
གིས་བསྐྱེད་ལ། ལས་ཐམས་ཅད་པའི་སྔགས་ལན་ཅིག་བརྗོད་ལ་སྟོང་བསམ་མོ། །དེའི་ངང་ལས་བུམ་པའི་ནང་དུ་བྷྲཱུཾ་འཕྲོས་འདུས་པས་ཕྱི་རིན་པོ་ཆེ་གསེར་གྱི་བུམ་པ་ལ། ནང་རིན་པོ་ཆེ་ལྔའི་གཞལ་ཡས་ཁང་ཕྱི་ནས་བལྟས་ན་ནང་གསལ་བ། ནང་ནས་བལྟས་ན་ཕྱི་གསལ་
བ་ཅིག་ཏུ་བསྒོམ། བུམ་པའི་ཁར་པདྨ་འདབ་བརྒྱད་པ་ཅིག་བསམ། རྒྱུད་ལ། རྫོགས་པའི་སངས་རྒྱས་ཨ་ལས་བྱུང་། །གསུང་ངོ་། །དེ་ལ་ཛཿཧཱུཾ་བཾ་ཧོཿས་ཨ་ལས་འཇམ་དཔལ་བསྒོམ། རྒྱུད་ལས། རྫོགས་པའི་སངས་རྒྱས་ཨ་ལས་བྱུང་། །གསུང་ངོ་། །དེ་ལ་ཛཿཧཱུཾ་བཾ་ཧོཿས་

49-1-154b

ཡེ་ཤེས་པ་དགུག་གཞུག་བྱ། ལས་ཐམས་ཅད་པའི་བསྔགས་བཟླས་པས། འཇམ་དཔལ་གྱི་གསང་བ་ནས་བདུད་རྩིའི་ཆུ་རྒྱུན་བྱུང་ནས་བུམ་པ་ཁེངས་པར་བསམ་མོ། །ཡེ་ཤེས་པ་གཤེགས་སུ་གསོལ། དམ་ཚིག་པ་འོད་དུ་ཞུ་ནས་ཁྲུས་ཆུ་དང་འདྲེས་པར་བསམ་མོ། །ནང་ཟབ་མོ་སྔགས་ཀྱི་
ཁྲུས་ནི། འཇམ་དཔལ་དུ་སྐད་ཅིག་གིས་བསྒོམས་ལ། འདུད་དང་སྔགས་ཀྱི་མཇུག་ལ་ཨ་ཉི་ཤུ་རྩ་གཅིག་བརྗོད་ལ། དེ་ནས་ཡེ་ཤེས་ཀྱི་མེ་ལོང་གི་ངང་ལ་གཞག་པས་སྒྲིབ་པ་ལྔ་ནི་སེམས་ཉིད་ལ་གསེར་གྱི་གཡའ་ཙམ་ཡང་མ་གོས་ཏེ། དེ་ནི་ནང་གི་ཁྲུས་ཞེས་བྱའོ། །ཕྱིའི་དྲི་མ་འཁྲུ་བ་སྟེ། ནང་གི་རྣམ་རྟོག་
གི་དྲི་མ་རྣམས་འཁྲུད་པའི་བརྡ་ཡིན། ཕྱི་ཁྲུས་ནང་ཁྲུས་སློབ་དཔོན་སྡོམ་པ་བཟང་པོའི་ལུགས་འབྲོ་ལོ་ཙཱ་བ་དྷརྨཱ་བྷིས་བསྒྱུར་བ་རྫོགས་སོ།།      །།༄༅༅། །བླ་མ་རྣམས་ལ་ཕྱག་འཚལ་ལོ། །སྦྱིན་བདག་ཆེན་པོ་གཙོ་བོ་སྟེ། །གསུངས་པས་གཏོར་མ་བཤད་དེ། དེ་ལ་རྣམ་པ་གཉིས་ཏེ། ཕྱིའི་
གཏོར་མ་དང་ནང་གི་གཏོར་མ་གཉིས་སོ། །དང་པོ་ཕྱི་གཏོར་གཏང་བ། རིན་པོ་ཆེའི་སྣོད་དུ་ཁ་ཟས་གཙང་མ་དང་ཆུ་གཙང་མས་བཀང་ལ། དང་པོ་སྐྱབས་འགྲོ་བྱ། ཚད་མེད་པ་བཞི་བསྒོམ། ཨོཾ་ཨཱཿཧཱུཾ། གསུམ་གྱིས་བྱིན་གྱིས་བརླབས། དེ་ནས་ལས་ཐམས་ཅད་པའི་སྔགས་གསུམ་གྱི་རྟིང་ལ། 
ན་མཿ་སརྦ་ཏ་ཐཱ་ག་ཏ་ཨ་བ་ལོ་ཀི་ཏེ། ཨོཾ་སཾ་བྷ་ར་སཾ་བྷ་ར་ཧཱུཾ། ཞེས་པ་གསུམ་གྱིས་བསྔོ། དུས་གསུམ་གྱི་བདེ་བར་གཤེགས་པ་རྣམས་དང་། གཙང་རིགས་ཀྱི་མགོན་པོ་རྣམས་དང་། འགྲོ་བ་རིས་དྲུག་གི་སེམས་ཅན་རྣམས་ལ་འདོད་པའི་ལོངས་སྤྱོད་ཆར་བཞིན་འབབ་པར་གྱུར་ཅིག་ཅེས་བསྔོའོ། །
ནང་གི་གཏོར་མ་ནི། ཡཾ་ལས་རླུང་། རཾ་ལས་མེ། ཀཾ་ལས་ཐོད་པ་གསུམ་གྱི་སྒྱེད་པུ། ཨཱ་ལས་ཐོད་པའི་གཞལ་ཡས་ཁང་གི་ནང་དུ། གོ་ཀུ་ད་ཧ་ན། པི་མུ་ཤུ་ན་ད། དེ་ལ་ཨ་ལས་ཟླ་བའི་ཁམས་རྡོ་རྗེ་རྩེ་ལྔ་པ་སྐྱུག་པ་ཅིག་བསྒོམ་མོ། །དེ་ལ་ཨོཾ་ཧཱུྃ་ཧྲཱིཿཞེས་བརྗོད་པས་ལས་ཀྱི་རླུང་བསྐྱོད་པས་བསོད་
རྣམས་ཀྱི་མེ་སྦར་བས་དམ་ཚིག་གི་བདུད་རྩི་དྲོས་ཡེ་ཤེས་ཀྱི་བདུད་རྩིར་གྱུར། ལས་ཐམས་ཅད་པའི་སྔགས་ཀྱི་མཇུག་ལ། ག་ཎ་ཙཀྲ་ཨི་དཾ་བ་ལིཾ། གྲྀཧྞ་གྲྀཧྞ་ཁཱ་ཧི་ཁཱ་ཧི་ཞེས་ལན་གསུམ་གྱིས་བླ་མ་དམ་པ་རྣམས་དང་ཡི་དམ་གྱི་ལྷ་ཚོགས་རྣམས་དང་། རྡོ་རྗེ་མཁའ་འགྲོ་མའི་ཚོགས་རྣམས་དང་།

49-1-155a

ཆོས་སྐྱོང་བའི་སྲུང་མ་ཐུགས་དམ་ཅན་རྣམས་ཕྱིའི་མཆོད་པ། གསང་བའི་མཆོད་པར་བཞེས་ཤིག །བག་ཆགས་ཀྱི་མི་མཐུན་པའི་ཕྱོགས་ཐམས་ཅད་རྒྱུ་དང་འབྲས་བུ་ནས་ཞི་བར་མཛད་དུ་གསོལ་ལོ་ཞེས་བརྗོད་ལ་གཏོར་མ་གཏང་། དེ་ནས་ཆོས་ཀྱི་སྦྱིན་པ་གཏང་། གཏོར་མའི་ཆོ་ག་
རྫོགས་སོ།།      །།༄༅༅། །བླ་མ་དམ་པ་རྣམས་ལ་ཕྱག་འཚལ་ལོ། །སྔགས་པ་མཚན་ཉིད་དང་ལྡན་པས་ཞག་བདུན་རོའི་རབ་གནས་བྱ་སྟེ། དེ་ཡང་། ངན་སོང་ཐམས་ཅད་རྣམ་སྦྱོང་བ། །མགོན་པོ་སེམས་ཅན་ཀུན་གྱི་མཆོག །གསུང་ངོ་། །ཤི་བ་སྦྱང་བ་བསྟན་ཏེ། དཀྱིལ་འཁོར་ཆོ་ག་རྫོགས་བྱ་སྟེ། །
ཞི་བའི་དཀྱིལ་འཁོར་སྟེང་དུ་བྱ། །ཁྲ་བོ་དེ་ལ་འོག་ཏུ་བྱའོ། །ཐིག་གདབ་ཚོན་གྱི་ཆོ་ག་བྱ། །དཀྱིལ་འཁོར་དབུས་སུ་བུམ་པ་གཙང་མ་ལ་རས་ཁ་ཚར་མ་ཉམས་པས་མགུལ་ཆིངས་བྱ། དེར་སྙིང་པོ་ལྔ་དང་། འབྲུ་ལྔ་དང་། སྨན་ལྔ་དང་། ཆུ་གཙང་མས་དགང་། དཀྱིལ་འཁོར་གྱི་ཟུར་བཞིར་མདའ་
བཞི་ལ་དར་སྣ་ལྔ་བཏགས་ལ་གཞག །གཤིན་བུམ་མགུལ་ཆིངས་སྔོན་པོར་བྱས་ལ་གཞག་གོ། །དེ་ནས་དྲི་མ་བཅའ་སྟེ། དྲི་མ་ལ་མཚན་བྱང་བཏགས་ལ། གདུགས་དང་དར་སྣ་དང་མེ་ལོང་བཏགས་ལ་གཞག་གོ། །དེ་ནས་བགེགས་བསྐྲད་པ་ནི་ལས་ཐམས་ཅད་པའི་སྔགས་བཟླས་ཤིང་
ཉུངས་ཀར་ཕྱོགས་བཞིར་གཏོར་རོ། །དེ་ནས་བགེགས་མཐོང་བ་རྣམས་ལ་ཕྱིའི་གཏོར་མ་བཏང་ལ་བདེན་པ་བདར་ཏེ་འདི་སྐད་དོ། །ཚེ་འདས་པའི་བློ་འདི་རྒྱལ་པོའམ། མ་མོའམ། བཙན་ནམ། བདུད་དམ། དམུའམ། ཀླུའམ། ས་བདག་གམ། ཐེའུ་རང་ལ་སོགས་ཏེ། གང་གི་ལག་ན་ཡོད་ཀྱང་རུང་
སྟེ། ཁྱེད་ལ་གླུད་གཏོར་རིན་པོ་ཆེས་བརྒྱན་པ་འབུལ་གྱིས། འདི་བཞེས་ལ་གསོན་གྱི་ཚེ་ལ་མ་གནོད། གཤིན་གྱི་བླ་མ་བཅད་པར་རྣལ་འབྱོར་པའི་བཀའ་ལ་ཉོན་ཅིག །དེ་སྐད་བྱས་ལ་ལས་རྒྱུ་འབྲས་ཀྱི་ཆོས་བཤད་ལ། གཏོར་མ་སྔགས་དྲུག་ཕྱག་རྒྱ་དྲུག་གིས་བྱིན་གྱིས་བརླབ་པོ། །བགེགས་
དམའ་བ་རྣམས་ལ་ཕོ་ཉ་དགྱེ། རྡོ་རྗེའི་ལེའུ་གདོན། ཉུངས་ཀར་གཏོར་ཏོ། །དེ་ལྟར་བྱས་ལ་དྲི་མ་ལ་བླ་ཡང་ཡང་དགུག་གོ། །དེ་ནས་ཏིལ་ལ་སྡིག་པའི་གཟུགས་བྱས་ལ་ཚེ་འདས་ཀྱི་སྡིག་པ་འདི་ལ་བསྟིམས། དེ་ནས་ཞི་བའི་སྦྱིན་སྲེག་བྱ། དུས་གསུམ་དུ་མཆོད་པ་དང་གཏོར་མ་ཆ་གསུམ་

49-1-155b

གཏོང་ངོ་། །དུག་སྦྱང་བ་ནི་དེ་ཡང་དག་པར་བྱེད་ཅིང་སྡིག་སེལ་བ་ཞེས་སོ། །ཁྲུས་ཆོ་ག་བཤད་དེ། བུམ་པའི་ནང་དུ་ཆུ་དང་སྨན་དང་། སྤོས་ལྔ་ལ་སོགས་པ་བླུགས་ལ། བུམ་པའི་ཁར་པདྨ་འདབ་མ་བརྒྱད་པ་དཀར་པོ་ཅིག་བསམས་ལ། རྒྱུད་ལས། དཔལ་ལྡན་སངས་རྒྱས་པདྨ་སྐྱེས། །ཞེས་སོ། །
དེའི་སྟེང་དུ་ཨ་ལས་འཇམ་དཔལ་ཡེ་ཤེས་སེམས་དཔའ་བསྒོམ་མོ། །རྒྱུད་ལས། རྫོགས་པའི་སངས་རྒྱས་ཨ་ལས་བྱུང་། །གསུང་ངོ་། །དེ་ལ་ཛཿཧཱུཾ་བཾ་ཧོཿས་ཡེ་ཤེས་པ་དགུག་གཞུག་བྱ། ལས་ཐམས་ཅད་པའི་སྔགས་བཟླས། འཇམ་དཔལ་གྱི་གསང་གནས་ནས་བདུད་རྩིའི་ཆུ་རྒྱུན་བྱུང་ནས་བུམ་པ་
དཀར་མེར་གྱིས་ཁེངས་པར་བསམ་མོ། །དེ་ནས་ཁྲུས་བྱས་ཏེ། མེ་ལོང་ནང་དུ་མཚན་བྱང་གསལ་བར་བྱས་ལ། ཨ་འདོད་ཆགས་ཞེ་སྡང་གཏི་མུག་གསུམ། །འདི་དག་འཇིག་རྟེན་དུག་གསུམ་སྟེ། །སངས་རྒྱས་བདེན་པས་དུག་མི་མངའ། །སངས་རྒྱས་བདེན་པས་དུག་བཅོམ་མོ། །ཆོས་དང་
དགེ་འདུན་ཡང་དེ་བཞིན་དུ་སྦྱར་རོ། །ས་ནི་དུག་གི་ཕ་ཡིན་ཏེ། །ས་ནི་དུག་གི་མ་ཡང་ཡིན། །བདེན་པའི་བདེན་ཚིག་འདི་བརྗོད་པས། །ཚེ་འདས་དུག་ནི་དུག་མེད་ཤོག །ལས་ཐམས་ཅད་པའི་སྔགས་ཀྱིས་ཁྲུས་དུས་གསུམ་དུ་བྱའོ། །ཞག་བདུན་པའི་ཐ་མ་ལ་ཕྱིར་མི་ལྡོག་པར་བྱ་བའི་ཕྱིར། བུམ་པས་
དབང་བསྐུར་ལ། ཕྱོགས་བཞིར་ཕྱིན་ལ་འདི་སྐད་དོ། །ཚེ་འདས་ཉོན་མོངས་སྙིང་རེ་རྗེ། །གལ་ཏེ་ལས་ཀྱི་དབང་བཙན་ནས། །ཤར་གྱི་ཕྱོགས་སུ་སྐྱེ་སྲིད་དོ། །ཤར་གྱི་ཕྱོགས་སུ་སྐྱེས་པ་ནི། །དེ་ན་སྐྱོབ་པའི་མགོན་པོ་བཞུགས། །མགོན་པོའི་མིང་ནི་རྣམ་སྣང་མཛད། །མགོན་པོའི་མིང་ནི་ཡུལ་འཁོར་སྲུང་། །
སངས་རྒྱས་དེ་ལ་ཕྱག་འཚལ་ལོ། །མགོན་པོ་དེ་ལ་སྐྱབས་སོང་ཅིག །དེས་ཕྱོགས་འོག་མ་གསུམ་འགྲེའོ། །ལྷོར་རིན་འབྱུང་མགོན་པོའི་མིང་ནི་འཕགས་སྐྱེས་པོ། ནུབ་སྣང་བ་མཐའ་ཡས། མགོན་པོའི་མིང་གི་སྤྱན་མི་བཟང་། བྱང་སངས་རྒྱས་དོན་ཡོད་གྲུབ་པ། མགོན་པོའི་མིང་ནི་
རྣམ་ཐོས་སྲས། དེ་ནས་ཚེ་ལས་འདས་པའི་རིག་པ་ཨ་དཀར་པོ་བསམ། ཨ་དེ་འཇམ་དཔལ་གྱི་ཐུགས་ཀར་འཕང་ངོ་། །དེ་ནས་བྱང་བུ་མར་མེ་ལ་བསྲེག །ཐ་མ་ལ་སཱཙྪ་གདབ། ཚེ་འདས་པའི་དོན་དུ་སྨོན་ལམ་རྒྱ་ཆེན་པོ་གདབ་པོ། །སྡོམ་པ་བཟང་པོས་མཛད་པ་འབྲོ་ལོ་ཙཱ་བ་དྷརྨཱ་བྷིས་བསྒྱུར་བ་རོའི་

49-1-156a

རབ་གནས་ཆོ་ག་རྫོགས་སོ།།      །།༄༅༅། །འཕགས་པ་འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །ཤི་བ་ལ་ཕན་གདགས་པ་རོ་སྲེག་པ་ནི། མཎྜལ་དྲུག་གི་ཆོ་ག་བྱ། དེ་ནས་རོ་ཁང་བུར་བཅུག་ལ། ལས་ཐམས་ཅད་པའི་སྔགས་ཀྱིས་རོ་དེ་ལ་བསྔགས་སམ། 
ཡུངས་ཀར་ལ་བསྔགས་ཏེ་མི་དམིགས་པར་བསམ། དེ་ལ་དང་པོ་འཇམ་དཔལ་ཡེ་ཤེས་སེམས་དཔའ་བསྒོམ། བདག་གི་ཐུགས་ཀའི་ཨ་ལས་འོད་འཕྲོས་པས་འགྲོ་བ་རིགས་དྲུག་གི་སྒྲིབ་པ་སྦྱང་བར་བསམ་མོ། །དེ་ནས་མེ་བཅུག་ལ་ཞི་བའི་སྦྱིན་སྲེག་བྱ། དེ་ནས་མཆོད་པ་དབུལ་འདུད་དང་འཇམ་
དཔལ་གྱི་བསྟོད་པ་བྱ། དེ་ནས་ཡེ་ཤེས་སེམས་དཔའ་གཤེགས་སུ་གསོལ། རོ་སྲེག་པའི་ཆོ་ག་སློབ་དཔོན་སྡོམ་པ་བཟང་པོས་མཛད་པ་རྫོགས་སོ།།      །།༄༅༅། །འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །དེ་ནས་སཱཙྪ་གདབ་པ་ནི། རུས་པ་ལ་ལས་ཐམས་ཅད་པའི་སྔགས་ཀྱིས་
བྲབ་པོ། །དེ་ནས་ལག་པ་རྡོ་རྗེ་རྩེ་གསུམ་པའི་ཕྱག་རྒྱ་བཅས་ལ་ལས་ཐམས་ཅད་པའི་སྔགས་ཀྱིས་བྱིན་གྱིས་བརླབ། ས་རིན་པོ་ཆེ་སྣ་ལྔའི་ཕྱེ་མར་བསམ། དེ་ལ་དྲི་སྣ་ཚོགས་པ་སྦྱར་བའི་ཆུས་སྦྲུས་ཤིང་བརྡུང་ངོ་། །དེ་ལ་རིན་པོ་ཆེ་ཡང་བདར་རོ། །དེ་ནས་འཇིམ་པའི་གོང་བུ་ལ་རྡོ་རྗེ་རྩེ་གསུམ་
པའི་ཕྱག་རྒྱས་རེག་གེ་བྱས་ལ་ལས་ཐམས་ཅད་པའི་སྔགས་ལན་ཉི་ཤུ་རྩ་གཅིག་བཟླས་ལ་རིན་པོ་ཆེའི་གོང་བུར་གྱུར་པར་བསམ། ལས་ཐམས་ཅད་པའི་སྔགས་ཀུན་ལ་སྦྱར་རོ། །འབི་འབི་ཐབས། སྐུ་པར་ཤེས་རབ། འདེབས་པ་ཐམས་ཅད་ཐབས་ཤེས་རབ་ཟུང་དུ་འབྲེལ། 
འབི་འབི་ཟབ་པ། སྐུ་པར་རྒྱ་ཆེ་བ། འབི་འབི་ཆོས་སྐུ། སྐུར་གྱུར་པ་ལོངས་སྐུ། འོད་ཟེར་གྱི་འཕྲོ་འདུ་བྱེད་པ་སྤྲུལ་སྐུའི་དོན་ནོ། །སཱཙྪ་གདབ་པའི་རིམ་པ་སློབ་དཔོན་སྡོམ་པ་བཟང་པོས་མཛད་པ་རྫོགས་སོ།།      །།༄༅༅། །འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །ད་ནི་རབ་
ཏུ་གནས་པ་བྱ་སྟེ། དཀྱིལ་འཁོར་བྲིས་ལ་མཚན་རྣམས་དཀྱིལ་འཁོར་ལ་བཀོད་ལ། སྐུའི་རབ་གནས་རྣམ་སྣང་ལ་བསྟིམ། གསུང་གི་རབ་གནས་སྣང་བ་མཐའ་ཡས་ལ་བསྟིམ། ཐུགས་ཀྱི་རབ་གནས་མི་བསྐྱོད་པ་ལ་བསྟིམ་པར་བྱའོ། །གོང་ལྟར་སཱཙྪ་བཏབ་ནས་མཆོད་རྟེན་

49-1-156b

གྱི་མངའ་གསོལ་ཏེ། མཆོད་པ་རྣམས་གཞུང་བཞིན་དུ་བསམས་ལ། དང་པོ་སྤྱན་དྲང་སྟེ། ཡེ་ཤེས་རང་སྣང་སངས་རྒྱས་ཀུན་གྱི་གནས། །འཁོར་ལོ་ཐིག་མ་ཐིག་བཞི་བང་རིམ་ཅན། །གནས་བཞིའི་དབྱིབས་ཚུལ་སྒོ་བཞི་སྒོ་བརྩེགས་ལྡན། །རང་བཞིན་ལྷུན་གྲུབ་མཆོད་རྟེན་བརྒྱད་པོ་གཤེགས་
སུ་གསོལ། །བཅོམ་ལྡན་སྤྲུལ་སྐུ་མཛད་པ་ལས་བྱུང་བའི། །ལྷ་ལས་བབས་པའི་མཆོད་རྟེན་གཤེགས་སུ་གསོལ། །པདྨ་ཅན་གྱི་མཆོད་རྟེན་གཤེགས་སུ་གསོལ། །བྱང་ཆུབ་ཆེན་པོའི་མཆོད་རྟེན་གཤེགས་སུ་གསོལ། །ཆོ་འཕྲུལ་ཆེན་པོའི་མཆོད་རྟེན་གཤེགས་སུ་གསོལ། །རང་བཞིན་
ལྷུན་གྲུབ་མཆོད་རྟེན་གཤེགས་སུ་གསོལ། །རྣམ་པར་དག་པའི་མཆོད་རྟེན་གཤེགས་སུ་གསོལ། །ཀ་ནི་ཀ་ཡི་མཆོད་རྟེན་གཤེགས་སུ་གསོལ། །བཀྲ་ཤིས་སྒོ་མངས་མཆོད་རྟེན་གཤེགས་སུ་གསོལ། །ཡེ་ཤེས་བློ་སྟེགས་མཆོད་རྟེན་གཤེགས་སུ་གསོལ། །ཆོས་ཀྱི་འཁོར་ལོའི་མཆོད་
རྟེན་གཤེགས་སུ་གསོལ། །མྱ་ངན་འདས་པའི་མཆོད་རྟེན་གཤེགས་སུ་གསོལ། །དྲེགས་པའི་ཕུང་པོ་དུར་ཁྲོད་བརྒྱད་ཀྱི་རྟེན། །མཁའ་འགྲོའི་གནས་དང་དངོས་གྲུབ་ཀུན་གྱི་གཞི། །བདེ་གཤེགས་རྟེན་དང་རི་བོ་ལ་སོགས་པ། །སྒྲུབ་པའི་མཆོད་རྟེན་བརྒྱད་པོ་གཤེགས་
སུ་གསོལ། །དེ་དག་ཀུན་དང་ཐེག་པ་སོ་སོ་ཡི། །ཐ་སྙད་རྣམས་དང་མཐུན་པར་རྟེན་བཞེངས་པའི། །སྤྲུལ་པའི་མཆོད་རྟེན་མཐའ་དག་དང་། །འགྲོ་བའི་དོན་ཕྱིར་གཤེགས་སུ་གསོལ། །ཨེ་ཧྱེ་ཧི་དྷ་རྨ་ཀཱ་ཡ་ཁ་ད་ལ་བྷྱོ་བྲུཾ་དྲྀ་ཤྱ་ཧོ། ས་མ་ཡ་ཧོ། ས་མ་ཡ་སྟྭཾ། ཛཿཧཱུྃ་བཾ་ཧོཿ། 
དེ་ནས་གདན་འབུལ་བ་ནི། དག་པའི་མེ་ཏོག་དཀྱིལ་འཁོར་དང་། །རིན་ཆེན་སྣ་ཚོགས་འབྲུ་ཉིད་དང་། །ཐབས་དང་ཤེས་རབ་ཉི་ཟླའི་གདན། །པདྨའི་གདན་ལ་གཞུགས་སུ་གསོལ། །ཨོཾ་པདྨ་ཀ་མ་ལ་ཡེ་ཧཱུྃ། དེ་ནས་ཕྱག་བྱ་བ་ནི། མཛད་པ་རྫོགས་པའི་བྱིན་རླབས་ལས་
བྱུང་བའི། །ཤར་ནས་བྱམས་ལྡན་མཐར་ལེགས་རྡོ་རྗེ་རྫོགས། །ལྷོ་ནས་ཡིད་བཞིན་ལྷུན་གྲུབ་ཀ་ནི་ཀ །ནུབ་ནས་བསམ་འདས་བདེ་བྱེད་པདྨ་བརྩེགས། །བྱང་ནས་ཁམས་གསུམ་རྨད་གྲགས་བདེ་རྒྱས་སྒྲོན། །བྱིན་རླབས་མཆོད་རྟེན་བརྒྱད་ལ་ཕྱག་འཚལ་ལོ། །དེ་ནས་བསྐོར་

49-1-157a

བ་བྱས། མེ་ཏོག་གཏོར་ལ། དེ་ནས་མཆོད་པ་རྣམས་གཞུང་བཞིན་དུ་བྱ། དེ་ནས་སྨོན་ལམ་གདབ་སྟེ། བདག་ཅག་གིས་དགེ་སྦྱོར་དུ་བྱ་བ་ནི། སེམས་ཅན་མཐུན་པ་བསྐྱེད་ནས་ས་གཞི་ལེགས་པར་སྙོམས་ནས་ཆག་ཆག་བཏབ་པས། སེམས་ཅན་ཐམས་ཅད་བྱང་
ཆུབ་ཀྱི་སེམས་སུ་མཉམ་གྱུར་ཅིག །རྨང་བཏིང་སྟེ་འགྱེད་འདུད་བཏང་ནས་རབ་གནས་དང་མཆོད་པ་གཞུང་བཞིན་དུ་བགྱིས་པས་དགེ་བཅུའི་ལམ་སྤྱོད་ཅིང་མ་ཆགས་པར་གྱུར་ཅིག །བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ལམ་ལ་སྦྱོར་བ་ལ། ཚོགས་ཀྱི་ལམ་སྦྱོར་བའི་ལམ་མཐོང་བའི་
ལམ་བསྒོམ་པའི་ལམ། མཐར་ཕྱིན་པའི་ལམ་མོ། །ཚོགས་ལམ་བཞི་སུམ་ཅུ་གཉིས་ལ་བང་རིམ་དང་པོ་བརྩིགས་ཏེ། རབ་གནས་དང་མཆོད་པ་གཞུང་བཞིན་དུ་བགྱིས་པས་ཚོགས་ཀྱི་ལམ་དུ་དྲན་པ་ཉེ་བར་གཞག་པ་བཞི་ལ། ལུས་དྲན་པ་ཉེ་བར་གཞག་པ་དང་། ཚོར་བ་དྲན་པ་ཉེ་བར་
གཞག་པ་དང་། སེམས་དྲན་པ་ཉེ་བར་གཞག་པ་དང་། ཆོས་དྲན་པ་ཉེ་བར་གཞག་པ་དང་ལྡན་པར་གྱུར་ཅིག །བང་རིམ་གསུམ་པ་བརྩིགས་ཏེ་རབ་གནས་དང་མཆོད་པ་གཞུང་བཞིན་དུ་བགྱིས་པས་ཡང་དག་པར་སྤོང་བ་བཞི་ལ་སྡིག་པའི་ཆོས་མི་སྐྱེ་བ་དང་། སྐྱེས་པ་སྤང་བ་དང་དགེ་བའི་
ཆོས་མ་སྐྱེས་པ་བསྐྱེད་པ་དང་། སྐྱེས་པའི་ཆོས་རྣམས་འཕེལ་བའོ། །བང་རིམ་གསུམ་པ་བརྩིགས་ཏེ། དེ་ལ་རབ་གནས་དང་མཆོད་པ་གཞུང་བཞིན་བགྱིས་པས་རྫུ་འཕྲུལ་གྱི་རྐང་པ་བཞི་ལ་མོས་པའི་ཏིང་ངེ་འཛིན་གྱིས་སྤོང་བའི་འདུ་བྱེད་དང་ལྡན་པ་རྫུ་འཕྲུལ་གྱི་རྐང་པ་དང་། སེམས་ལ་སྤྱོད་
པ་རྫུ་འཕྲུལ་གྱི་རྐང་པ་དང་ལྡན་པ་དང་། བརྩོན་འགྲུས་དང་ལྡན་པ་རྫུ་འཕྲུལ་གྱི་རྐང་པ་དང་། ཏིང་ངེ་འཛིན་དང་ལྡན་པ་རྫུ་འཕྲུལ་གྱི་རྐང་པ་བཞི་དང་ལྡན་པར་གྱུར་ཅིག །བང་རིམ་བཞི་པ་བརྩིགས་ཏེ། བརྩོན་འགྲུས་ཀྱི་དབང་པོ་དང་། དྲན་པའི་དབང་པོ་དང་། ཏིང་ངེ་འཛིན་གྱི་དབང་པོ་དང་། 
ཤེས་རབ་ཀྱི་དབང་པོ་དང་། དད་པའི་དབང་པོ་དང་ལྡན་པར་གྱུར་ཅིག །བུམ་རྟེན་ནོར་བུ་བརྩིགས་ཏེ། དེ་ལ་རབ་གནས་དང་མཆོད་པ་གཞུང་བཞིན་དུ་བགྱིས་པས། དེས་མི་མཐུན་པའི་ཕྱོགས་འཇོམས་པས། སྟོབས་ལྔ་ལ་དད་པའི་སྟོབས་དང་། བརྩོན་འགྲུས་ཀྱི་སྟོབས་དང་། དྲན་པའི་

49-1-157b

སྟོབས་དང་། ཏིང་ངེ་འཛིན་གྱི་སྟོབས་དང་། ཤེས་རབ་ཀྱི་སྟོབས་ལྔ་དང་ལྡན་པར་གྱུར་ཅིག །བུམ་པ་བརྩིགས་ཏེ་རབ་གནས་དང་མཆོད་པ་གཞུང་བཞིན་དུ་བགྱིས་པས། མཐོང་ལམ་ལ། བྱང་ཆུབ་ཡན་ལག་བདུན་ལ་དྲན་པ་ཡང་དག་བྱང་ཆུབ་ཀྱི་ཡན་ལག །ཆོས་རྣམ་པར་འབྱེད་པ་ཡང་
དག་བྱང་ཆུབ་ཀྱི་ཡན་ལག །བརྩོན་འགྲུས་ཡང་དག་བྱང་ཆུབ་ཀྱི་ཡན་ལག །དགའ་བ་ཡང་དག་བྱང་ཆུབ་ཀྱི་ཡན་ལག །ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག །ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག །བཏང་སྙོམས་ཡང་དག་བྱང་ཆུབ་ཀྱི་ཡན་ལག་བདུན་དང་ལྡན་
པར་གྱུར་ཅིག །བྲེ་ལེགས་པར་བརྩིགས་ཏེ། དེ་ལ་རབ་གནས་དང་མཆོད་པ་གཞུང་བཞིན་དུ་བགྱིས་པས། བསྒོམ་པའི་ལམ་འཕགས་པའི་ལམ་ཡན་ལག་བརྒྱད་ལ། ཡང་དག་པའི་ལྟ་བ། ཡང་དག་པའི་རྟོག་པ། ཡང་དག་པའི་ངག །ཡང་དག་པའི་ལས་ཀྱི་མཐའ། ཡང་
དག་པའི་འཚོ་བ། ཡང་དག་པའི་རྩོལ་བ། ཡང་དག་པའི་དྲན་པ། ཡང་དག་པའི་ཏིང་ངེ་འཛིན། འཕགས་པའི་ལམ་ཡན་ལག་བརྒྱད་ལ་རྒྱུན་དུ་གནས་པར་གྱུར་ཅིག །ཨོཾ་བཛྲ་ཨཱ་ཡུ་ཥེ་སྭཱ་ཧཱ། ཆོས་ཀྱི་སྐུའི་སྲོག་ཤིང་ལ།  སྲོག་ཤིང་ཕུལ་བའི་བྱིན་རླབས་ཀྱིས་སེམས་ཅན་ཐམས་
ཅད་ཤེས་པ་བཅུ་དང་ལྡན་པར་གྱུར་ཅིག །ཨོཾ་པྲ་མརྡ་ན་ཡེ་སྭཱ་ཧཱ། དེ་བཞིན་གཤེགས་པའི་མཆོད་རྟེན་ལ། འཁོར་ལོ་ཕུབ་པའི་བྱིན་རླབས་ཀྱིས་མཐར་ཕྱིན་པའི་སེམས་ཅན་ཐམས་ཅད་མ་འདྲེས་པ་རྣམ་པར་ཐར་པ་བརྒྱད་དང་ཡེ་ཤེས་དང་ལྡན་པར་གྱུར་ཅིག །ཨོཾ་བྷྲ་མ་ན་ཡེ་སྭཱ་ཧཱ། ཆོས་
ཀྱི་སྐུའི་མཆོད་རྟེན་ལ་འགྲེ། གདུགས་ཕུལ་བའི་བྱིན་རླབས་ཀྱིས། སེམས་ཅན་ཐམས་ཅད་བླ་ན་མེད་པའི་སྐྱབས་དང་ལྡན་པར་གྱུར་ཅིག །ཨོཾ་ཀུཾ་བྷི་ར་དྷཱ་ཛ་ཡ་སྭཱ་ཧཱ། ཆོས་ཀྱི་སྐུའི་འགྲེ། ཆུ་སྲིན་གྱི་རྒྱལ་མཚན་ཕུལ་བའི་བྱིན་རླབས་ཀྱིས་སེམས་ཅན་ལ་འཁོར་བ་མི་སྤོང་མི་སྟོངས་ཤིས། 
མི་ནུབ་པ་ཆོས་ཀྱི་རྒྱལ་མཚན་ཐོབ་པར་གྱུར་ཅིག །ཨོཾ་པ་ཏཾ་ཀཱ་ཡ་སྭཱ་ཧཱ། ཆོས་ཀྱི་སྐུའི་མཆོད་རྟེན་ལ། བདན་ཕུལ་བའི་བྱིན་བརླབས་ཀྱིས། ཆོས་ཀྱི་སྙན་གྲགས་བསམ་གྱིས་མི་ཁྱབ་པ་ཐོབ་པར་གྱུར་ཅིག །ཨོཾ་པ་ཏཾ་ཀཱ་ལམྤཱ་ཡ་སྭཱ་ཧཱ། ཆོས་ཀྱི་སྐུའི་མཆོད་རྟེན་ལ། དར་གྱི་ཅོད་པན་ཕུལ་

49-1-158a

བའི་བྱིན་རླབས་ཀྱིས། སེམས་ཅན་ཐམས་ཅད་བདེ་བར་གཤེགས་པའི་སྐུར་གྱུར་ཏེ། དར་གྱི་ལྷབ་ལྷུབ་དང་། བསྙེན་བཀུར་མཆོད་པ་རྒྱུན་མི་འཆད་པ་ཐོབ་པར་གྱུར་ཅིག །ཨོཾ་རཏྣ་མཱ་ལ་ཏྣཾ། ཆོས་ཀྱི་མེ་ཏོག་གི་ཕྲེང་བ་ཕུལ་བས། སེམས་ཅན་ཐམས་ཅད་
མཚན་དང་དཔེ་བྱད་ཀྱིས་བརྒྱན་པ་དང་། བལྟ་བས་ཆོག་མི་ཤེས་པར་གྱུར་ཅིག །ཨོཾ་བཛྲ་ད་ར་སྭཱ་ཧཱ། ཆོས་ཀྱི་དར་དཔྱངས་ཕུལ་བའི་བྱིན་རླབས་ཀྱིས། སངས་རྒྱས་ཀྱི་ཆོས་མ་འདྲེས་པར་སོ་སོར་གསལ་བར་གྱུར་ཅིག །ཨོཾ་བཛྲ་གྷཎྚ་སྭཱ་ཧཱ། ཆོས་ཀྱི་དྲིལ་བུ་ཕུལ་བའི་བྱིན་རླབས་
ཀྱིས། སངས་རྒྱས་ཀྱི་གསུང་གི་རྔ་ཐོབ་པར་གྱུར་ཅིག །ཆོས་ཀྱི་མེ་ཏོག་ཕུལ་བའི་བྱིན་རླབས་ཀྱིས། རྣམ་པར་ཐར་པ་མཐར་ཕྱིན་པའི་ལམ་ལ་འཁོར་འདས་དབྱེར་མི་ཕྱེད་པ་ཀུན་དུ་བཟང་པོ་ལྟ་བུ་ཐོབ་པར་གྱུར་ཅིག །ཆོས་ཀྱི་སྐུའི་མཆོད་རྟེན་ལ་ཉི་ཟླ་གཉིས་ཀྱི་རྒྱན་ཕུལ་བའི་བྱིན་རླབས་
ཀྱིས། རང་འབྱུང་གི་ཆོས་རྣམས་རང་བཞིན་གྱིས་འོད་གསལ་བར་གྱུར་ཅིག །དེ་བཞིན་གཤེགས་པའི་སྐུ་གདུང་རྣམས་སྤྱན་དྲངས། གདན་ཕུལ་ཕྱག་བཙལ་མཆོད་པ་ཕུལ་བས། ས་དང་པོ་ནས་ས་བཅུ་གཅིག་གི་བར་དམིགས་པ་མེད་པའི་ཤེས་རབ་ས་བཅུ་པ་དམིགས་པ་མེད་པའི་སྙིང་རྗེ། དེ་གཉིས་དབྱེར་མེད་པ་
རིགས་དྲུག་པ་རྡོ་རྗེ་འཆང་གིས་བཅུ་གསུམ་པ་ཡེ་ཤེས་ཐོབ་པར་གྱུར་ཅིག །སྐུའི་རབ་གནས་ནི།  མཆོད་པ་གོ་རིམས་གཞུང་བཞི་བགྱིས་ལ། སྤྱན་དབྱེ་སྟེ། སྤྱན་ལྔ་རབ་རིབ་རྣམ་དག་སྐྱོན་བྲལ་བ། །གསལ་དང་མི་གསལ་རྣམ་རྟོག་མི་མངའ་ཡང་། །སྲི་ཞུ་བཀུར་སྟི་རིམ་གྲོའི་ཚུལ་དུ་ནི། །སྤྱན་གྱི་དབང་
པོ་གསལ་བའི་ཚུལ་བསྟན་ནས། །ལྷ་ཡི་སྤྱན་དང་རྟག་ཏུ་ལྡན་གྱུར་ཅིག །ཡེ་ཤེས་སྤྱན་དང་རྟག་ཏུ་ལྡན་གྱུར་ཅིག །ཨོཾ་བཛྲ་ཙཀྵུ་སྭཱ་ཧཱ། ལྷན་ཅིག་སྐྱེས་པའི་ནང་གི་གཟུགས། རྒྱལ་བ་རྣམས་ཀྱི་སྤྱན་ལ་འབུལ། །གཟུགས་ཀྱི་ལོངས་སྤྱོད་རྫོགས་གྱུར་ཅིག །ཨོཾ་སརྦ་ཏ་ཐཱ་ག་ཏ་བཛྲ་ཨཱ
ལོ་ཀེ་ཧཱུྃ། སྒྲ་སྐད་ཀུན་ལ་འཕྲུལ་གྱི་སྙན་མངའ་བ། །འོན་དང་རྨོངས་པའི་རྣམ་རྟོག་མི་མངའ་ཡང་། །སྲི་ཞུ་བཀུར་སྟི་རིམ་གྲོའི་ཚུལ་ཙམ་དུ། །སྙན་གྱི་དབང་པོ་གསལ་བའི་ཚུལ་བསྟན་ནས། །ལྷ་ཡི་སྙན་དང་རྟག་ཏུ་ལྡན་གྱུར་ཅིག །སྙན་ཅིང་ཡིད་དུ་འོང་བའི་སྒྲ། །སྒྲ་ཡི་ལོངས་སྤྱོད་

49-1-158b

རྫོགས་གྱུར་ཅིག །ཨོཾ་བཛྲ་གྷཎྜེ་ཧཱུྃ། ཤངས་ཀྱི་དབང་པོ་རྣམ་དག་སྐྱོན་མེད་པ། །དྲི་མིན་དྲི་མའི་རྣམ་རྟོག་མི་མངའ་ཡང་། །སྲིད་ཞུ་བཀུར་སྟི་རིམ་གྲོའི་ཚུལ་ཅན་དུ། །ཤངས་ཀྱི་དབང་པོ་གསལ་བའི་ཚུལ་བསྟན་ནས། །ཡེ་ཤེས་རླུང་གིས་ཉོན་མོངས་གཏོར་བྱས་ཏེ། །རྣམ་པར་བྱང་བའི་ཚོགས་
དང་ལྡན་གྱུར་ཅིག །ལྷན་ཅིག་སྐྱེས་པ་ནང་གི་དྲི། །རྒྱལ་བ་རྣམས་ཀྱི་ཤངས་ལ་འབུལ། །དྲི་ཡི་ལོངས་སྤྱོད་རྫོགས་གྱུར་ཅིག །ཨོཾ་སརྦ་ཏ་ཐཱ་ག་ཏ་བཛྲ་པུཥྤེ་ཧཱུྃ། ལྗགས་ཀྱི་དབང་པོ་ལེ་བརྒན་འབར་བ་ལ། །མངར་དང་ཁ་ཡི་རྣམ་རྟོག་མི་མངའ་ཡང་། །སྲི་ཞུ་བཀུར་སྟི་རིམ་གྲོའི་ཚུལ་ཙམ་དུ། །
ལྗགས་ཀྱི་དབང་པོ་གཞར་པོའི་ཚུལ་བསྟན་ནས། །གསུང་དབྱངས་ཡན་ལག་དྲུག་ཅུ་ལྡན་པ་དང་། །འགྲོ་བ་ཀུན་གྱི་སྒྲ་རུ་ཆོས་སྟོན་ཤོག །རོ་བརྒྱ་ལྡན་པ་བདུད་རྩིའི་ཟས། །ལྷན་ཅིག་སྐྱེས་པ་ནང་གི་རོ། །རྒྱལ་བ་རྣམས་ཀྱི་ལྗགས་ལ་འབུལ། །རོ་ཡི་ལོངས་སྤྱོད་རྫོགས་གྱུར་ཅིག །ཨོཾ་སརྦ་ཏ་ཐཱ་ག་ཏ་བཛྲ་ནཻ་བི་དྱེ་
ཧཱུྃ། རྒྱལ་བའི་སྐུ་མཆོག་ལྟ་བས་མི་འབྲལ་ཡང་། །འདོད་པའི་དྲི་མའི་སྐྱོན་གྱིས་མ་གོས་ཏེ། །སྲི་ཞུ་བཀུར་སྟི་རིམ་གྲོའི་ཚུལ་ཙམ་དུ། །རས་མཆོག་འདི་ཡིས་རྒྱལ་བའི་སྐུ་ཕྱིས་པས། །མཚན་དང་དཔེ་བྱད་ལྡན་པ་དང་། །འགྲོ་བ་ཀུན་གྱི་ཡིད་དུ་འོང་བར་ཤོག །འཇམ་མཉེན་འཁྲིལ་དང་ལྡན་པའི་
མཆོག །ལྷན་ཅིག་སྐྱེས་པ་ནང་གི་རེག །རྒྱལ་བ་རྣམས་ཀྱི་སྐུ་ལ་མཆོད། །རེག་བྱའི་ལོངས་སྤྱོད་རྫོགས་གྱུར་ཅིག །ཨོཾ་སརྦ་ཏ་ཐཱ་ག་ཏ་ཏི་ཀཱི་སིནྟི་རི་ཧཱུྃ། ཀུན་ཏུ་རྟོག་པ་མ་ལུས་པ། །དྲི་མ་བྲལ་བའི་བདག་ཉིད་ཅན། །ཆོས་དབྱིངས་ཡེ་ཤེས་ངོ་བོ་ཉིད། །བདེ་གཤེགས་གཙོ་ལ་ཕྱག་འཚལ་བསྟོད། །
ཕྱོགས་བཅུའི་འཇིག་རྟེན་ཁམས་བཞུགས་པའི། །རྒྱལ་བ་སྲས་དང་བཅས་པ་རྣམས། །སྐུ་ནི་མི་ཡི་རྟེན་ལ་བཞུགས། །གསུང་ནི་བརྗོད་པ་རྣམ་པར་རྒྱལ། །ཐུགས་ནི་མཉམ་གཞག་མི་རྟོག་ཀྱང་། །སེམས་ཅན་རྣམས་ཀྱི་དོན་སླད་དུ། །དབུ་ཡི་གཙུག་ན་ཡི་གེ་ཨོཾ། །རྣམ་སྣང་ཡི་
གེ་ཕྱོགས་བཅུར་འཕྲོས། །སེམས་ཅན་ལུས་ཀྱི་སྒྲིབ་པ་སྦྱོང་། །ལྗགས་ཀྱི་སྟེང་ན་ཡི་གེ་ཨཾ། །སྣང་མཐའ་ཡི་གེ་ཕྱོགས་བཅུར་འཕྲོས། །སེམས་ཅན་རྣམས་ཀྱི་སྒྲིབ་པ་སྦྱོང་། །དེ་ནས་མཆོད་པ་རྣམ་པ་ལྔ་དབུལ། བསྟོད་པ་བྱ། རབ་ཏུ་གནས་པའི་ཆོ་ག་སློབ་དཔོན་སྡོམ་པ་བཟང་པོས་

49-1-159a

མཛད་པ་རྫོགས་སོ།།      །།༄༅༅། །འཇམ་དཔལ་ཡེ་ཤེས་སེམས་དཔའ་ལ། །ཡེ་ཤེས་མེ་ལྕེ་འོད་འབར་གསལ། །འདོད་པའི་དོན་གྲུབ་དམ་པ་སྟེ། །ཞེས་པས། ལས་བཞིའི་སྦྱིན་སྲེག་གི་ཆོ་ག་བསྟན་པར་བྱ་སྟེ། དེ་ཡང་ནུབ་དང་པོ་ལྷན་ཅིག་སྐྱེས་པའི་བདུད་དང་བྲལ་བར་བྱ་བའི་
ཕྱིར། ཞི་བའི་སྦྱིན་སྲེག་བྱ། དེ་ནས་བར་ཆོད་ཀྱི་བདུད་དང་དབྲལ་བར་བྱ་བའི་ཕྱིར་དྲག་པོའི་སྦྱིན་སྲེག་བྱའོ། །དང་པོ་ཐབ་དང་རྫས་ཀྱི་མཚན་ཉིད་བསྟན་ཏེ་ཞི་བ་ལ་དབྱིབས་ཟླུམ་པོ། དཔངས་དང་ཞེང་དུ་སོར་བཞི་པ་བྱའོ། །རྒྱར་ཁྲུ་གང་ཁ་དོག་དཀར་པོའོ། །ཡང་ན་ཆུར་མཛུབ་གང་། 
དཔངས་སུ་ཆག་གང་ངོ་། །རྫས་ལ་མེ་ཏོག་དང་། དཀར་གསུམ་མངར་གསུམ་གུ་གུལ་དཀར་པོ་དེ་རྣམས་སོ། །དྲག་པོ་ལ་ཟུར་གསུམ་དཔངས་སོར་བཞི་ཞེང་ཆུར་ཁྲུ་རེའོ། །རྫས་ཁྲག་དང་དུག་དང་ཏིལ་ནག་དང་ཉུངས་ནག་ལིངྒ་དམར་ནག་དང་རྫས་རྣམས་ཐམས་ཅད་ནག་པོའོ། །དབང་
ལ་ཟླ་གམ་ཞི་བའི་ཕྱེད་དེ་ཁ་ཁྱེར་ལའོ། །དཔངས་དང་ཞེང་གོང་དང་འདྲ། རྫས་དམར་པོ་ལ་སོགས་པ་བྱའོ། །ཙནྡན་དམར་པོ། མེ་ཏོག་དམར་པོ། མར་དང་ནས་སྨུག་པོ་རྣམས་སོ། །རྒྱས་པ་ལ་གྲུ་བཞི་རྩེ་ཁྲུ་གང་ཟེར། ཞེང་ཁྲུ་གང་བ། སྦོམ་ཕྲ་ཆག་གང་བ་མེ་ཏོག་ལ་སོགས་པའི་
རྫས་ཐམས་ཅད་སེར་པོར་བསག་གོ། །ཐུན་མོང་གི་མཆོད་པའི་རྫས་རྣམས་ནི། མར་དང་འབྲས་དང་སྲན་མ་དང་། ཨུ་དུམྺཱ་རའོ། །དུས་ནི་ཞི་བ་ལ་ཉིན་ཕྱེད། ཁ་ཤར་དུ་བལྟའོ། །དྲག་པོ་ལ་ནམ་ཕྱེད་ཁ་ལྷོར་བལྟས་ལ་བྱའོ། །དབང་ལ་ཉི་མ་ནུབ་ཀ་ཁ་ནུབ་ཏུ་བལྟས་ལ་བྱའོ། །
རྒྱས་པ་ལ་དུས་སྔ་དྲོ་ཁ་བྱང་དུ་བལྟས་ལ་བྱའོ། །དགང་གཟར་ནི་ཞི་བ་ལ་དངུལ། དབང་ལ་ཟངས། དྲག་པོ་ལ་ལྕགས། རྒྱས་པ་ལ་གསེར་ལས་བྱའོ། །དེ་ནས་མེ་ལྷ་བསྐྱེད་པ་ནི། རང་འཇམ་དཔལ་དུ་གསལ་བའི་ཐུགས་ཀ་ནས། ཧཱུྃ་དང་ཛཿ འཕྲོས་པས་ཐབ་ཀྱི་ནང་དུ་བབས། ཧཱུྃ་ཞུ་བ་ལས་གུནྡྷེར་
གྱུར། ཛཿལས་ལྕགས་ཀྱུར་གྱུར། གུནྡྷེ་ཞུ་བ་ལས་མེ་ལྷ་སྐུ་མདོག་དཀར་པོར་གྱུར། ཞལ་གཅིག་ཕྱག་བཞི་པ། གསུས་པ་ལྡིར་བ་ཚངས་པའི་སྐུད་པས་བརྒྱན་པ། གཡས་པ་ན་གུནྡྷེ། དེ་འོག་མཆོག་སྦྱིན། གཡོན་དང་པོ་ན་སེ་འབྲུ། དེ་འོག་བགྲང་ཕྲེང་ངོ་། །ཛཿ ཞུ་བ་ལས་ཡུམ་སྐུ་

49-1-159b

མདོག་སེར་མོ་གཡས་ལྕགས་ཀྱུ་གཡོན་ཕྲེང་བ་འཛིན་པའོ། །ཡབ་ཀྱི་གཡོན་ངོས་སུ་འཁྲིལ་པར་བསྒོམ་མོ། །མེ་ལྷའི་ཐུགས་ཀར་མེའི་དཀྱིལ་འཁོར་གྲུ་གསུམ་ཅིག་བསམ། བདག་གི་ཐུགས་ཀ་ནས་མེའི་དཀྱིལ་འཁོར་ལ་བྷྲཱུྃ་ཅིག་འཕྲོས་དེ་ཞུ་བ་ལས་གཞལ་ཡས་ཁང་གདན་དང་བཅས་པ་
བསྒོམ། དེའི་ནང་དུ་ལྷ་ཉི་ཤུ་རྫུས་སྐྱེས་སུ་བསྒོམ། རྣམ་པ་ཉི་ཤུས་བྱང་ཆུབ་པ་གསུང་ངོ་། །རྫུས་སྐྱེས་ནི། སྐད་ཅིག་གཅིག་གིས་རྫོགས་སངས་རྒྱས། །ཞེས་སོ། །དམ་ཚིག་སེམས་དཔའ་བསྐྱེད་པའི་རིམ་པའོ། །དེ་ནས་ཡེ་ཤེས་སེམས་དཔའ་སྤྱན་དྲངས་ཏེ། དད་པ་དང་ནི་དམ་ཚིག་
གིས། །ཚུར་གཤེགས་ཚུར་གཤེགས་སེམས་དཔའ་ཆེ། །ལྷ་ཡི་རྒྱལ་པོ་བྲམ་ཟེ་ཡིན། །འབར་བའི་ནང་དུ་གཤེགས་ནས་ཀྱང་། །སྲེག་རྫས་མཆོད་པ་འདི་བཞེས་ཤིག །ཨགྣི་དྲྀ་ཤྱ་ཨཾ ཀུ་ཤ་ཛཿཧཱུྃ་བཾ་ཧོཿཞེས་གཉིས་སུ་མེད་པར་བསྟིམ། དེ་ནས་མེ་ལྷ་ལ་སྲེག་རྫས་དབུལ་བ་ནི། 
རྫས་གོང་མ་རྣམས་དབུལ་ལོ། །ཨོཾ་ཝཱ་གཱི་ཤྭ་རི་མུ། སརྦ་ཏ་ཐཱ་ག་ཏ་ཨགྣི་ཧ་བྱ་ཀ་བྱ་ཞི་བ་ཤཱནྟིཾ་ཀུ་རུ་སྭཱ་ཧཱ། རྒྱས་པ་ལ་པུཥྚི་ཀུ་རུ་སྭཱ་ཧཱ། དབང་ལ་བ་ཤྱཾ་ཀུ་རུ་སྭཱ་ཧཱ། དྲག་པོ་ལ་མཱ་ར་ཡ་ཕཊ་སྭཱ་ཧཱ། ཉི་ཤུ་རྩ་གཅིག་དབུལ་ལོ། །དེ་ནས་མེ་ལྷ་བསྟོད་དེ།  ཚངས་པ་འཇིག་རྟེན་མགོན་གྱི་སྲས། །
མེ་ལྷའི་རྒྱལ་པོ་དྲང་སྲོང་མཆོག །འཇིག་རྟེན་ཡོངས་ལ་བསྐྱབ་པའི་ཕྱིར། །ཐུགས་རྗེ་དབང་གིས་སྐུ་སྤྲུལ་པ། །རིག་སྔགས་འཛིན་ཅིང་གསང་སྔགས་གསུང་། །བདུད་རྩི་བཅུད་ལྡན་གུནྡྷེ་བསྣམས། །ཐབས་དང་ཤེས་རབ་གཉིས་མེད་པས། །ཐུགས་རྗེའི་སྤྲུལ་པ་ཁྱེད་ལ་བསྟོད། །
ཅེས་བསྟོད་དོ། །དེ་ནས་དཀྱིལ་འཁོར་གྱི་ལྷ་ལ་མཆོད་པ་འབུལ་ཏེ། ཨོཾ་ན་མཿས་མནྟ་མཱ་ར་ཅེ་ཞི་བ་ཤཱནྟིཾ་ཀུ་རུ་སྭཱ་ཧཱ། ཨོཾ་བཛྲ་བི་ཛ་ཡེ་ཞི་བ་ཤཱནྟིཾ་ཀུ་རུ་སྭཱ་ཧཱ། ཨོཾ་བཛྲ་མ་ལེ་པ་ཤ་ཞི་བ་ཤཱནྟིཾ་སྭཱ་ཧཱ། ཨོཾ་བཛྲ་མ་ཧཱ་བ་ལེ་ཞི་བ་ཤཱནྟིཾ་ཀུ་རུ་སྭཱ་ཧཱ། ཨོཾ་ཀ་མ་རི་ཞི་བ་ཤཱནྟིཾ་ཀུ་རུ་སྭཱ་ཧཱ། ཨོཾ་བཛྲ་ཏི་ཏི་པྲ་
བེ་ཞི་བ་ཤཱནྟིཾ་ཀུ་རུ་སྭཱ་ཧཱ། རྒྱས་པ་ལ་པུཥྚི་ཀུ་རུ་སྭཱ་ཧཱ། དབང་ལ་བ་ཤྱཾ་ཀུ་རུ་སྭཱ་ཧཱ། དྲག་པོ་ལ་མཱ་ར་ཡ་ཕཊ་སྭཱ་ཧཱ། ཉི་ཤུ་རྩ་གཅིག་དབུལ་ལོ། །ཨོཾ་བཛྲ་པུཥྤེ་ཞི་བ་ཤཱནྟིཾ་ཀུ་རུ་སྭཱ་ཧཱ། དྷཱུ་པེ་ཞི་བ་ཤཱནྟིཾ་ཀུ་རུ་སྭཱ་ཧཱ། བཛྲ་ཨཱ་ལོ་ཀེ་ཞི་བ་ཤཱནྟིཾ་ཀུ་རུ་སྭཱ་ཧཱ། བཛྲ་གནྡྷེ་ཞི་བ་ཤཱནྟིཾ་ཀུ་རུ་སྭཱ་ཧཱ། བཛྲ

49-1-160a

ནཻ་བི་ཏྱེ་ཞི་བ་ཤཱནྟིཾ་ཀུ་རུ་སྭཱ་ཧཱ། བཛྲ་ཤབྡ་ཞི་བ་ཤཱནྟིཾ་ཀུ་རུ་སྭཱ་ཧཱ། བཾ་ཤྱཾ་ཀུ་རུ་པུཥྚ་ཀུ་རུ། མཱ་ར་ཡ་ཕཊ། མཆོད་པའི་མཇུག་ཏུ་རེ་རེ་བརྗོད་དོ། །དེ་ནས་བསྟོད་པ་བྱ་བ་ནི། །གཞོན་ནུའི་སྐུ་ལུས་འཆང་བ་པོ། །ཡེ་ཤེས་སྒྲོན་མེས་རབ་བརྒྱན་ཅིང་། །འཇིག་རྟེན་གསུམ་གྱི་མུན་སེལ་བའི། །
འཇམ་པའི་དབྱངས་ལ་ཕྱག་འཚལ་བསྟོད། །ཉིད་ཀྱི་འདབ་བཟང་ཚོགས་ཀྱིས་ནི། །ཟླ་བ་རྒྱས་པའང་ཟིལ་གནོན་ཅིང་། །རིག་པ་རྣམ་པར་གསལ་འགྱུར་བ། །འཇམ་དཔལ་དེ་ལ་ཕྱག་འཚལ་ལོ། །མ་བགྱིས་དོན་གྱིས་ཟུར་གསལ་བ། །ནོར་བུ་འབར་བའི་སྐུ་མངའ་ཞིང་། །ཉིད་ནི་ཀུན་དུ་གསལ་
བའི་སྐུ། །འཇམ་དཔལ་དེ་ལ་ཕྱག་འཚལ་བསྟོད། །བདུད་རྩི་དྲི་ཞིམ་འཇམ་པ་ཡི། །ཡིད་འོང་གསུམ་གྱི་སྒྲ་སྒྲོགས་ལ། །དམ་པ་ཆོས་ཀྱི་རིན་ཆེན་མཛོད། །འཇམ་དཔལ་དེ་ལ་ཕྱག་འཚལ་བསྟོད། །གངས་ཀྱི་ཆུ་ལྟར་གསལ་བ་ལ། །འཇིག་རྟེན་ཁམས་རྣམས་རྣམ་པར་བཞུགས། །
ཉོན་མོངས་དྲི་མ་རྣམ་སྤངས་པ། །འཇམ་དཔལ་དེ་ལ་ཕྱག་འཚལ་བསྟོད། །མཆེ་བ་གཙིགས་ཤིང་འཇིགས་པ་ཡི། །འཇིགས་པའི་སྐུ་ཡི་ཚུལ་གྱིས་ནི། །གཤིན་རྗེའི་དྲེགས་པ་འཇོམས་མཛད་པ། །འཇམ་དཔལ་དེ་ལ་ཕྱག་འཚལ་བསྟོད། །རས་ཀྱི་སྤྱན་དང་མདངས་འདྲ་བ། །ཨུཏྤལ་
སྔོན་པོ་རབ་མཛེས་པ། །ཤེས་རབ་རལ་གྲི་མདའ་གཞུ་འཛིན། །འཇམ་དཔལ་དེ་ལ་ཕྱག་འཚལ་བསྟོད། །ཕྱོགས་བཅུར་བཞུགས་པའི་སངས་རྒྱས་ལ། །རྒྱ་ཆེའི་སྤྱོད་པ་རབ་སྟོན་པ། །འགྲོ་བའི་ལམ་ནི་སྟོན་པ་པོ། །འཇམ་དཔལ་དེ་ལ་ཕྱག་འཚལ་བསྟོད། །དེ་ནས་འདུད་པ་ཉི་
ཤུས་བསྟོད་དོ། །དེ་ནས་སྨོན་ལམ་གདབ་སྟེ། བར་ཆད་མ་ལུས་ཞི་བ་དང་། །གདུག་པ་ཚར་ནི་གཅད་པ་དང་། །འཇིག་རྟེན་དབང་དུ་བསྡུ་བ་དང་། །ཚེ་དང་དབང་ཐང་བསྐྱེད་པའི་ཕྱིར། །ཐུན་མོང་མཆོག་གི་དངོས་གྲུབ་སྩོལ། །ཨོཾ་བཛྲ་མུཿ། ཞེས་པས་གཤེགས་སུ་གསོལ། དམ་
ཚིག་སེམས་དཔའ་བདག་ལ་བསྡུ། །སློབ་དཔོན་སྡོམ་པ་བཟང་པོས་མཛད་པ་སྦྱིན་སྲེག་གི་ཆོ་ག་རྫོགས་སོ།།      །།༄༅༅། །འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །ཐུན་མོང་གི་དངོས་གྲུབ་རིན་པོ་ཆེ་གཏེར་སྒྲུབ་པ། འཇམ་དཔལ་གྱི་བསྙེན་པ་གཞུང་བཞིན་

49-1-160b

དུ་བྱས་ལ། དེ་ནས་གྲོང་ཁྱེར་ཆེན་པོའི་དབུས་སམ། རྒྱལ་པོའི་ཕོ་བྲང་དུ་མཎྜལ་མདའ་གང་གྲུ་བཞི་པ་བྱས་ལ། བའི་རྣམ་ལྔ་དང་དྲི་ཞིམ་པོ་སྣ་ཚོགས་ཀྱིས་བྱུགས་ལ།  གླེགས་བམ་གྲུ་བཞི་པ་ཅིག་ལ་པདྨ་འདབ་མ་བརྒྱད་པ་བྲིས་ལ། པདྨའི་ལྟེ་བ་ལ། ཛཾ་བྷ་ལའི་གཟུགས་སེར་པོ། གསུས་པ་ཆེ་བ་བྱིན་ཤ་རྒྱས་པ་རྒྱན་མ་ལུས་པས་
བརྒྱན་པ། གཡས་པ་ན་བཱི་ཛ་པུ་ར་བསྣམས་པ། གཡོན་པ་ན་ནེའུ་ལེའི་རྐྱལ་པ་བསྣམས་པ་བུམ་པའི་གདན་ལ་བཞུགས་པའོ། །དེའི་མདུན་དུ་གནོད་སྦྱིན་སྐུ་མདོག་སེར་པོ་རིན་པོ་ཆེ་བསྣམས་པ། གཡས་སུ་གནོད་སྦྱིན་སྐུ་མདོག་དམར་སེར་བུམ་པ་བསྣམས་པ། རྒྱབ་ཏུ་གནོད་སྦྱིན་སྐུ་མདོག་དཀར་པོ་རིན་པོ་ཆེ་ཐོགས་པ། 
གཡོན་དུ་གནོད་སྦྱིན་སྐུ་མདོག་ནག་པོ་རལ་གྲི་ཐོགས་པ། ཤར་ལྷོར་སྐུ་མདོག་སེར་སྐྱ་རལ་གྲི་བསྣམས་པ། ལྷོ་ནུབ་ཏུ་སྐུ་མདོག་སྨུག་ནག་མདུང་ཐོགས་པ། ནུབ་བྱང་ན་སྐུ་མདོག་སེར་སྐྱ་རིན་པོ་ཆེའི་ཁང་པ་ཐོགས་པ། བྱང་ཤར་ན་སྐུ་མདོག་སེར་པོ་གྲི་ཕུབ་ཐོགས་པ། གཡོན་ཐམས་ཅད་རིན་པོ་ཆེའི་རྒྱལ་མཚན་
ཐོགས་པ། དར་སྣ་ཚོགས་ཀྱིས་ཐོད་བཅིངས་པའོ། །ཡང་གླེགས་བམ་གྲུ་བཞི་པ་ཅིག་ལ་པདྨ་འདབ་མ་བརྒྱད་པ་ལྟེ་བ་ལ་ལྷ་མོ་ནོར་རྒྱུན་མ་སེར་མོ་རིན་པོ་ཆེའི་རྒྱན་གྱིས་བརྒྱན་པ། གཡས་མཆོག་སྦྱིན་གཡོན་འབྲས་ཀྱི་སྙེ་མ་བསྣམས་པའོ། །ལྷ་མོ་བརྒྱད་ཀྱང་གཙོ་མོའི་ཆ་ལུགས་ཅན་ནོ། །དེ་ནས་
མཎྜལ་གྱི་ཁར་བུམ་པ་ནས་དང་འབྲས་ཀྱིས་བཀང་ལ་གཞག་གོ། །དེའི་ཁར་ལྷ་མོའི་གླེགས་བམ་བཞག་ལ། དེའི་ཁར་ཛཾ་བྷ་ལའི་གླེགས་བམ་གཞག །གླེགས་བམ་གཉིས་ཀྱི་བར་དུ་རིན་པོ་ཆེའི་ཀ་བ་གཟུགས། དེ་ལ་དགུག་གཞུག་ལེགས་པར་བྱས་ལ་བདག་འཇམ་དཔལ་དུ་
གསལ་བའི་ཐུགས་ཀ་ནས་ཛཿཧཱུཾ་བཾ་ཧོཿའཕྲོས་པ་མེ་ཏོག་ལུག་རུ་དང་། དཀར་གསུམ་མངར་གསུམ་གྱིས་མཆོད་ལ་གཏོར་མ་སུམ་ཡར་དུ་གཏང་། མཆོད་པ་རྣམ་ལྔ་དབུལ། དེའི་མཇུག་ལ་འཁོར་དང་ལོངས་སྤྱོད་དངོས་གྲུབ་སྩོལ་ཅིག་ཅེས་བྱའོ། །ཉིན་མོ་ལྷ་མོ་རྣམས་ཀྱི་སྙིང་
པོ་བཟླས་ཏེ། ཨོཾ་བ་སུནྡྷཱ་རི་ཎྱཻ་སྭཱ་ཧཱ། ཨོཾ་ཙནྡྲ་ཀནྟྱེེ་སྭཱ་ཧཱ། ཨོཾ་དཏྟྱེེ་སྭཱ་ཧཱ། ཨོཾ་སུ་དཏྟྱེེ་སྭཱ་ཧཱ། ཨོཾ་ཨཱརྱ་ཡེེ་སྭཱ་ཧཱ། ཨོཾ་སུ་བྷ་དྲྱེེ་སྭཱ་ཧཱ། ཨོཾ་གུཔྟྱེེ་སྭཱ་ཧཱ། ཨོཾ་དེ་བཻ་སྭཱ་ཧཱ། ཨོཾ་ས་ར་སྭ་ཏྱཻ་སྭཱ་ཧཱ། ཟས་སྣ་ཚོགས་ཀྱི་གཏོར་མས་མཆོད།  མཆོད་པ་རྣམ་ལྔ་དབུལ། དངོས་གྲུབ་བླང་ངོ་། །ནུབ་མོ་ཕོ་སྔགས་

49-1-161a

ཏེ། ཨོཾ་ཛམྦྷ་ལ་ཛ་ལེནྡྲཱ་ཡ་སྭཱ་ཧཱ། ཨོཾ་མ་ཎི་བྷ་དཱ་ཡ་སྭཱ་ཧཱ། ཨོཾ་པུ་རྞ་བྷ་དྲཱ་ཡ་སྭཱ་ཧཱ། ཨོཾ་དྷ་ན་དཱ་ཡ་སྭཱ་ཧཱ། ཨོཾ་བཻ་ཤྲ་བ་ཎཱ་ཡ་སྭཱ་ཧཱ། ཨོཾ་ཀི་ལི་མཱ་ལ་ཡེ་སྭཱ་ཧཱ། ཨོཾ་པི་ཙི་ཀུཎྜ་ལི་ནི་སྭཱ་ཧཱ། ཨོཾ་མུ་ཁེནྡྲཱ་ཡ་སྭཱ་ཧཱ། ཨོཾ་ཙ་རེནྡྲཱ་ཡ་སྭཱ་ཧཱ། གཏོར་མ་དབུལ། མཆོད་པ་ལྔ་དབུལ། དངོས་
གྲུབ་བླང་། འཇམ་དཔལ་གྱི་བསྙེན་པ་རྫོགས་པའི་གཏོར་མ་ལ། གནོད་སྦྱིན་ཕོ་མོ་ལ་ཟླ་བ་གསུམ་དུ་མཆོད་པ་ན་འདོད་པ་ཕུན་སུམ་ཚོགས་སོ། །མེ་ཏོག་ལུག་རུ་དང་། གུ་གུལ་དཀར་པོ་དང་། དཀར་གསུམ་མངར་གསུམ་དང་ནས་དང་འབྲུ་སྣ་ལྔའི་སྦྱིན་སྲེག་ལན་བརྒྱ་རྩ་བརྒྱད་བྱས་ན་
ལྷའི་ལོངས་སྤྱོད་དང་མཉམ་པར་འགྱུར་རོ། །ཐོ་རངས་བྱ་ཟེ་ཙ་ན་ཕོ་སྔགས་མོ་སྔགས་ཟློས་པ་ཡིན། །ཆུ་སྦྱིན་ཡང་ནས་ཡང་དུ་བཏང་ན་ལོངས་སྤྱོད་ཕུན་སུམ་ཚོགས་པ་དང་ལྡན་ནོ། །དེ་ཡང་འདོད་པའི་དོན་གྲུབ་དམ་པ་སྟེ། །གསུང་ངོ་། །འདི་ནི་རིན་པོ་ཆེ་གཏེར་གྱི་སྒྲུབ་པའོ། །རྒྱུད་ལས། ཡིད་
བཞིན་ནོར་བུ་ཆེན་པོ་འཆང་། །གསུང་ངོ་། །ཐུན་མོང་གི་དངོས་གྲུབ་སྒྲུབ་པའི་ཐབས་ཀྱི་མན་ངག །སློབ་དཔོན་སྡོམ་པ་བཟང་པོས་མཛད་པ་རྫོགས་སོ།།      །།༄༅༅། །དམ་པ་རྣམས་ལ་ཕྱག་འཚལ་ལོ། །དེ་ནས་མཎྜལ་དབུལ་ཏེ། མཎྜལ་ཚད་དང་ལྡན་པ་ལ། བའི་རྣམ་ལྔ་བྱུགས་ལ་བཛྲ་
རེ་ཁེ་ཧཱུྃ་ཞེས་པས་དྲི་ཞིམ་པོའི་འདེ་གུ་བྱས་ལ་བྱུག་པ་བྱ། ཨོཾ་ཧཾ་མ་ཧཱ་མེ་ར་བ་ཡེ་ན་མཿ། ཨོཾ་ཡཿག་ཛ་རཏྣཱ་ཡ་ན་མཿཨོཾ་ར་པུ་རུ་ཥ་རཏྣཱ་ཡ་ན་མཿ། ཨོཾ་ལ་སྟྲི་རཏྣཱ་ཡ་ན་མཿ། ཨོཾ་ཝ་ཨ་ཤྭ་རཏྣཱ་ཡ་ན་མཿ། ཨོཾ་ཡ་ཁཌྒ་རཏྣཱ་ཡ་ན་མཿ། ཨོཾ་ར་མ་ཎི་རཏྣཱ་ཡ་ན་མཿཨོཾ་ཝཿསརྦ་ནི་དྷི་ཀུཾ་བྷཱ་ཡ་ན་མཿཨོཾ་ལ་ཙཀྲ་རཏྣཱ་ཡ་
ན་མཿ། དེ་ལྟར་མེ་ཏོག་ཚོམ་བུ་དགུ་དགུར་བྱའོ། །པཾ་པདྨ་མཎྜལ། མ་སཱུརྱ་མཎྜལ། ཨ་ཙནྡྲ་མཎྜལ་ཞེས་གདན་དབུལ་ལོ། །གདན་དེའི་སྟེང་དུ་ཙནྡྲི་པ་ལ་སོགས་པའི་བླ་མ་རྣམས་སྤྱན་དྲངས་ལ། དེ་ལ་ཕྱག་བྱ་སྟེ། སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་
གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་ལོ། །དེ་ནས་བསྐོར་བ་བྱ། དེ་ནས་མཆོད་པ་བྱ་སྟེ། མཆོད་པ་ཆེན་པོ་འདོད་ཆགས་ཆེ། །སེམས་ཅན་ཐམས་ཅད་དགའ་བར་བྱེད། །མཆོད་པ་ཆེན་པོ་ཞེ་སྡང་ཆེ། །ཉོན་མོངས་ཀུན་གྱི་དགྲ་ཆེ་བ། །མཆོད་པ་ཆེན་པོ་གཏི་མུག་ཆེ། །གཏི་མུག་

49-1-161b

བློ་སྟེ་གཏི་མུག་སེལ། །མཆོད་པ་ཆེན་པོ་ཁྲོ་བ་ཆེ། །ཁྲོ་བ་ཆེན་པོ་དགྲ་ཆེ་བ། །མཆོད་པ་ཆེན་པོ་ཆགས་པ་ཆེ། །ཆགས་པ་ཐམས་ཅད་སེལ་བར་བྱེད། །འདོད་པ་ཆེན་པོ་བདེ་བ་ཆེ། །དགའ་བ་ཆེན་པོ་མགུ་བ་ཆེ། །ཨོཾ་བཛྲ་པུ་ཥྤེ་ཧཱུྃ།  ཨོཾ་བཛྲ་དྷཱུ་པེ་ཧཱུྃ། ཨོཾ་བཛྲ་ཨཱ་ལོ་ཀེ་ཧཱུྃ། ཨོཾ་བཛྲ་གནྡྷེ་ཧཱུྃ། ཨོཾ་བཛྲ་ནཻ་བི་དྱེ་ཧཱུྃ། ཨོཾ་བཛྲ་ཤབྡ་ཧཱུྃ། དེ་ནས་
སྡིག་པ་བཤགས། ཆོས་ཀྱི་འཁོར་ལོ་བསྐོར་བར་བསྐུལ། མྱ་ངན་ལས་མི་འདའ་བར་གསོལ་བ་གདབ། དེ་ནས་དགེ་བའི་རྩ་བར་བསྔོའོ། །དེ་ནས་ཡི་དམ་གྱི་མཎྜལ་དབུལ་ཏེ། མཎྜལ་ཚད་དང་ལྡན་པ་ལ། དྲིའི་འདེ་གུ་བྱུག་པར་བྱ། ཨོཾ་བཛྲ་རེ་ཁེ་ཧཱུྃ། ཨོཾ་བུདྡྷ་མཉྫུ་ཤྲཱི་ན་མཿ། ཨོཾ་བཛྲ་སཏྭ་ཧཱུྃ་ན་མཿ། ཨོཾ་བཛྲ་རཏྣ་ཧཱུྃ་ན་མཿ།
ཨོཾ་བཛྲ་པདྨ་ཧཱུྃ་ན་མཿ། ཨོཾ་བཛྲ་ཀརྨ་ཧཱུྃ་ན་མཿ། པཾ་པདྨ་མཎྜལ། མ་སཱུརྱ་མཎྜལ། དེ་ལ་ཡེ་ཤེས་སེམས་དཔའ་དགུག་གཞུག་བྱ། དེ་ནས་ཕྱག་བྱ་སྟེ། ཆོས་སྐུ་ལོངས་སྐུ་སྤྲུལ་སྐུ་ཉིད། །གཞའ་ཚོན་ནམ་མཁའ་དབྱེར་མེད་ཀྱང་། །རྣམ་སྣང་མི་བསྐྱོད་རིན་ཆེན་འབྱུང་། །སྣང་
མཐའ་དོན་ཡོད་གྲུབ་པ་ལ། །ལུས་ངག་གུས་པས་ཕྱག་འཚལ་ལོ། །གཞོན་ནུའི་སྐུ་ལུས་འཆང་བ་པོ། །ཡེ་ཤེས་སྒྲོན་མས་རབ་བརྒྱན་ཅིང་། །འཇིག་རྟེན་གསུམ་གྱི་མུན་སེལ་བའི། །འཇམ་དཔལ་དབྱངས་ལ་ཕྱག་འཚལ་ལོ། །མཆོད་པ་གོང་དང་མཐུན་པ་བཤམས་ནས་དགེ་བའི་རྩ་བར་བསྔོ་
བ་ཡན་ཆད་གོང་དང་མཐུན། དེ་ནས་ཡེ་ཤེས་པ་གཤེགས་སུ་གསོལ། དམ་ཚིག་པ་རང་ལ་བསྡུ། ཡི་གེ་བརྒྱ་པའི་བཤགས་པ་བྱ། བླ་མའི་མཎྜལ་ཡི་དམ་གྱི་མཎྜལ་གྱི་ཆོ་ག་འབྲོ་ལོ་ཙཱ་བས་བསྒྱུར་བ་རྫོགས་སོ།།      །།༄༅༅། །རྒྱ་གར་སྐད་དུ། ཤྲཱི་ཨེ་ཀ་ཛ་ཊཱི་བྷ་ག་ཝཱན་མཎྜལ་ཙཀྲ་སཱ་དྷ་ནཾ།
བོད་སྐད་དུ། དཔལ་བཅོམ་ལྡན་འདས་རལ་པ་གཅིག་པའི་དཀྱིལ་འཁོར་གྱི་འཁོར་ལོའི་སྒྲུབ་ཐབས། བཅོམ་ལྡན་འདས་རལ་པ་གཅིག་པ་ལ་ཕྱག་འཚལ་ལོ། །ཆོས་སྐུ་རང་སེམས་བདེ་ཆེན་འོད་གསལ་རྣམ་མི་རྟོག །འབར་བའི་སྐུ་མཆོག་སྣ་ཚོགས་ཚུལ་འཆང་མཁའ་འདྲ་བ། །ལོངས་
སྤྱོད་རྫོགས་སྤྲུལ་ཆོས་བདག་དབྱེར་མེད་རོ་གཅིག་ཚུལ། །རལ་པ་གཅིག་འཕྱང་རྡོ་རྗེའི་དཀྱིལ་འཁོར་གཙོ་ལ་འདུད། །ལྔ་ཕུང་དང་ནི་དྲི་མ་བཞི། །ཆེན་པོ་བཞི་དང་སྤྱོད་ཡུལ་བརྒྱད། །རྣམ་བཞི་ཚོར་བ་རྣམ་དག་ལྷ། །ཡེ་ཤེས་འཁོར་ལོ་འདིར་བཤད་བྱ། །དང་པོ་ཁོ་ནར་རྣལ་འབྱོར་

49-1-162a

པས་བླ་མ་མཆོག་ལ་རིམ་གྲོ་ཡོངས་སུ་རྫོགས་པར་བྱས་ཏེ། དེའི་བཀའ་དྲིན་ཐོབ་པས་དཀྱིལ་འཁོར་ཆེན་པོའི་བདག་པོ་ལ་སྐྱབས་སུ་འགྲོ་བ་དང་། མ་སྨིན་པ་ལ་སོགས་པ་ཐམས་ཅད་ལ་སྙིང་རྗེ་ཆེན་པོས་གོ་འཕང་བླ་ན་མེད་པར་སེམས་བསྐྱེད་ལ། སྐུ་གསུང་ཐུགས་ཡེ་
ཤེས་རོལ་པའི་ནང་དུ་ཆུད་པས་དབང་བསྐུར་བ་ཡང་དག་པར་བཟུང་ནས། རྡོ་རྗེའི་དཀྱིལ་འཁོར་ཆེན་པོའི་དེ་ཁོ་ན་ཉིད་ངེས་པར་འབྱུང་བ་འདི་བསྒོམ་པར་བྱའོ། །ཡིད་དང་རྗེས་སུ་མཐུན་ལམ་བསམ། །དུར་ཁྲོད་དང་ནི་ཤིང་དྲུང་སོགས། །ཡང་ན་བདག་པོའི་ཚུལ་འདྲའམ། །དངོས་གྲུབ་གནས་
ནི་རྒྱུད་ལས་བསྔགས། །དེར་བར་ཆད་བསལ་བའི་ཕྱིར་གཏོར་མ་སྦྱིན་པ་སྔོན་དུ་འགྲོ་བས་བཀའ་བསྒོ་ཞིང་ལྷ་ལ་སོགས་པ་ཡང་དག་པར་མཆོད་དེ་སྒྲུབ་པའི་དོན་དུ་གསོལ་བ་གདབ་པར་བྱའོ། །གཞན་ཡང་ཇི་སྙེད་མཆོད་པའི་ཡོ་བྱད་དང་། ཆོ་གའི་ཁྱད་པར་ཐམས་ཅད་ལ་དགོས་པའི་
རྫས་རྣམས་ཐམས་ཅད་བསགས་པ་དང་། གནས་ཉེ་བར་བཀོད་པས་དགྱེས་པ་བསྐྱེད་པའི་རྒྱུར་གྱུར་པ་དང་ཅི་ནས་ཀྱང་བཅོམ་ལྡན་འདས་ཀྱི་མཚན་མ་མཐོང་བར་ཕྱིར་མི་ནུར་འབད་པ་དང་། བརྩོན་པ་དྲག་པོས་སྤྲོ་བར་བྱའོ། །དེ་ནས་སྒྲུབ་པོ་དམ་ཚིག་ཅན། །རབ་ཏུ་བདེ་བའི་སྟན་ལ་
འདུག །ཤེལ་ལྟར་དངས་པའི་ཡིད་ཀྱིས་སུ། །ཚོགས་རྟེན་དཀྱིལ་འཁོར་དགུག་པར་བྱ། །སེ་གོལ་གཏོགས་པས་ལག་པ་གཉིས་རྡོ་རྗེའི་ཁུ་ཚུར་བཅིངས་ཏེ། གར་བསྐོར་ནས་མཛུབ་མོ་གཉིས་ལྕགས་ཀྱུ་ལྟར་བྱས་པས་སྤྱན་དྲང་བ་དང་། མཛུབ་མོ་གཉིས་དང་མཐེའུ་ཆུང་
གཉིས་མདུད་དེ་འཁོར་ལོ་ལྟར་བཞག་ལ་གཞུག་པར་བྱའོ། །ཨོཾ་ཨེ་ཧྱེ་ཧི་བྷ་ག་ཝཱན་ཤྲཱི། ཨེ་ཀ་ཛ་ཊཱི་མཎྜལ་ཙཀྲ་མ་ཧཱ་ཀཱ་རུ་ཎི་ཀ་ཧོ་ས་མ་ཡ་ཛཿས་མ་སྟྭཾ། ས་མ་ཡ་ཧཱུྃ། ས་མ་ཡ་ཧོཿཞེས་བྱ་བའི་སྔགས་ཀྱིས་སོ། །བདག་གི་དད་དང་མགོན་པོ་ཡིས། །ཐུགས་རྗེ་དང་ནི་དམ་
ཚིག་གིས། །ནམ་མཁའ་ལ་ནི་ཉི་མ་ལྟར། །དཀྱིལ་འཁོར་རྒྱལ་པོ་བྱོན་པར་འགྱུར། །ཇི་སྐད་འཆད་པར་འགྱུར་བའི་མཚན་ཉིད་ཅན་གྱི་རྟེན་བལྟ་བས་མ་ངོམས་པའི་རྣམ་པར་བཀོད་པ་རྒྱ་ཆེན་པོ་མདུན་གྱི་ནམ་མཁའི་ངོས་ལ་བྱོན་པར་བལྟས་ལ་བདག་ཉིད་ཀྱི་སྙིང་གར་ཉི་མ་

49-1-162b

ལ་གནས་པའི་ཧཱུྃ་མཐིང་ནག་ལས་འཕྲོས་པའི་ཕྱི་དང་ནང་དང་གསང་བ་དང་དེ་ཁོ་ན་ཉིད་ཀྱི་མཆོད་པ་ཐམས་ཅད་ཀྱིས་རབ་ཏུ་མཆོད་ནས་གུས་པ་དྲག་པོས་སྡིག་པ་བཤགས་པ་ལ་སོགས་པ་བྱའོ། །ཐོག་མེད་དུས་ནས་དེ་རིང་བར། །མི་དགེ་གང་བགྱིས་སོ་སོར་བཤགས། །འཇིག་རྟེན་འཇིག་རྟེན་
འདས་པ་ཡི། །དགེ་བ་ལ་ནི་རྗེས་ཡི་རང་། །རལ་པ་གཅིག་མཆོག་ལྷ་དང་སྔགས། །དེ་ཡི་སྲས་ལ་བདག་སྐྱབས་མཆི། །བདེ་ཆེན་འོད་གསལ་རྣམ་མི་རྟོག །བྱང་ཆུབ་མཆོག་སེམས་སྙིང་རྗེ་གཟུང་། །སྲིད་པ་དུས་གསུམ་ཚོགས་བསགས་པ། །དེ་དག་འགྲོ་བའི་དོན་ཕྱིར་བསྔོ། །བདག་སོགས་
མགོན་མེད་མགོན་གྱུར་པས། །དངོས་གྲུབ་བགྱི་ཕྱིར་བརྟན་པ་དགོངས། །ཞེས་བརྗོད་པར་བྱའོ། །དེའི་འོག་ཏུ་ཚངས་པའི་གནས་པ་བཞིའི་ལྷག་པའི་བསམ་པ་བརྟན་པོས་བློ་གྲོས་ཡོངས་སུ་སྦྱོངས་ལ། ཆོས་ཐམས་ཅད་རང་བཞིན་གྱིས་དེ་ཁོ་ན་ཉིད་ཇི་ལྟ་བ་བཞིན་དུ་ཡིད་ལ་བྱའོ། །ཨོཾ་སྭ་
བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅་ཧཾ། དངོས་ཀུན་མ་ལུས་བསྡུས་པའི་སྔགས། །རྟེན་ཅིང་འབྲེལ་པར་འབྱུང་བ་ཆེ། །དེ་ཡི་རང་བཞིན་རང་བཞིན་མེད། །ནམ་མཁའ་ལྟ་བུར་མཁས་པས་བསྒོམ། །ཨོཾ་ཨ་སརྦ་དྷརྨ་པྲ་ཏཱི་ས་མུཏྤཱ་ད་ཧཱུྃ། ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཨཱཏྨ་ཀོ྅ཧཾ་ཞེས་བྱ་བ་བརྗོད་དོ། །
སྟོང་པ་ཉིད་ཆེན་པོའི་ངང་ལས་རཾ་ལས་བྱུང་བའི་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ཡིག་ལས་དག་པར་སྐྱེས་པའི་སྣ་ཚོགས་རྡོ་རྗེ་འབར་བ་ཆེན་པོ་བསམས་ལ། དེ་ལས་འཕྲོས་པའི་འོད་ཟེར་གྱི་ལྕེ་རབ་ཏུ་རྣོན་པོ་འཁྲིགས་པས་རྡོ་རྗེའི་ས་གཞི་དང་། ར་བ་དང་། དྲ་བ་དང་། གུར་དུ་གྲུབ་པར་
བལྟའོ། །དེ་དབུས་ཨ་དབྱིབས་ནམ་མཁའ་དྲི་མེད་ལ། །ཨིནྡྲ་བྱི་རུ་དུང་དང་གསེར་མདོག་ཅན། །ཡྃ་རྃ་པྃ་ལྃ་གཞུ་དང་མེ་ཐབ་དང་། །ཟླ་རྒྱས་རི་དབྱིབས་དེ་སྟེང་རྣམ་པར་ཤེས། །དེ་དག་ཉིད་གནས་ཡོངས་སུ་གྱུར་པ་ནི་དཀྱིལ་འཁོར་གྱི་འཁོར་ལོ་གྲུ་བཞི་པ་དང་ཀ་བ་བརྒྱད་
ཀྱིས་ཉེ་བར་མཛེས་པའོ། །དྲ་བ་དང་དྲ་བ་ཕྱེད་པ་དང་ཏྭ་ར་ན་ལ་སོགས་པས་མཛེས་པར་བྱའོ། །ཨོཾ་བཛྲ་ཤུདྡྷཿསརྦ་དྷརྨཱ་བཛྲ་ཤུདྡྷོ྅་ཧཾ།  དེའི་དབུས་སུ་བསྒོམ་པར་བྱ་བ་ནི་ཅུང་ཟད་གྱེན་དུ་འཕགས་པའི་པདྨའི་སྡོང་པོ་ཁ་ཕྱེ་བའི་སྟེང་དུ་གནས་པ་དབང་ཕྱུག་ཆེན་པོ་དང་། ཨུ་མ་དེ་བ་བལྟས་

49-1-163a

ལ། དེའི་སྟེང་དུ་ཀཱ་ལི་ལས་གྲུབ་པའི་ཉི་མ་དང་། ཨཱ་ལི་ལས་གྲུབ་པའི་ཟླ་བ་ཁ་སྦྱོར་གྱི་ནང་དུ་ཧཱུྃ་དང་པྃ་གྱི་ས་བོན་རབ་ཏུ་འཕྲོ་བར་བསམས་ཏེ། དེ་གྱུར་པ་ལས་རྡོ་རྗེ་གྲི་གུག་དང་ཐོད་པ་སྙིང་པོ་གཉིས་ཉིད་ཀྱིས་མཚན་པར་བལྟ་ཞིང་། ཡང་འོད་ཟེར་ཅན་གྱི་མཛད་པ་ཡོངས་སུ་
བསྒྲུབ་པས། བདག་ཉིད་བཅོམ་ལྡན་འདས་མི་བསྐྱོད་པ་རལ་པ་གཅིག་པ་སྐུ་མདོག་མཐིང་ནག་གཡས་དང་གཡོན་གྱི་ཞབས་བསྐུམ་པ་དང་བརྐྱངས་པས་འཇིགས་བྱེད་དང་། དུས་མཚན་མནན་ཅིང་བརྫིས་པ། ཞལ་གསུམ་དང་ཕྱག་དྲུག་པ། རྣམ་པར་མི་རྟོག་པའི་ངོ་བོ་ཉིད་ཤིན་ཏུ་དབང་དུ་
གྱུར་པའི། དབུ་སྐྲ་དམར་སེར་རལ་པའི་ཐོར་ཅོག་གཅིག་ཏུ་འཕྱང་བ། རྡོ་རྗེ་རལ་པ་གཅིག་མ་དང་ལྷན་ཅིག་མཆོག་ཏུ་དགའ་བས་འཁྱུད་པ། རྡོ་རྗེ་དང་རིན་པོ་ཆེ་དང་རུས་པ་དང་སྦྲུལ་གྱི་རྒྱན་གྱིས་བརྒྱན་ཅིང་། ཕྱག་རྒྱ་དྲུག་གིས་ཉེ་བར་སྤྲས་པ། མི་མགོ་མང་པོའི་ཕྲེང་བའི་དོ་ཤལ་
བརྒྱུད་པ་དང་། ཌ་མ་རུ་དང་། གཡེར་ཁ་དང་། སིལ་ཁྲོལ་གྱི་རྒྱན་དཔྱངས་པ། ཀེང་རུས་ཀྱི་ཐོད་པ་དང་། ལག་པ་ལོན་པ་དང་། ཨུ་དུམྺཱ་རའི་མེ་ཏོག་གི་ཕྲེང་བས་དབུ་སྤྲས་པ། གླང་པོ་ཆེའི་པགས་པ་དང་། སྟག་གི་པགས་པས་གཡོགས་ཤིང་སྨད་དཀྲིས་པ། ཅུང་ཟད་ཁྲོས་པའི་ཆ་བྱད་
ཅན།འཇིགས་པར་བྱེད་པའི་གད་མོ་དགོད་ཅིང་ཞལ་མཆེ་བ་ཅུང་ཟད་གཙིགས་པའི་བར་ནས་མེ་སྟག་རྣམ་པར་འཕྲོ་བ། ཉིད་ཀྱི་སྐུ་ལས་སྐྱེས་པའི་ཡེ་ཤེས་ཀྱི་མེ་དཔུང་ཆེན་པོ་རྣམ་པར་འཁྱིལ་པའི་དབུས་ན་གར་གྱི་རོལ་པས་ཉེ་བར་མཛེས་པའི་བདག་ཉིད་དོ། །གཡས་དཀར་གཡོན་
དམར་དབུས་མཐིང་ཞལ་སྤྱན་གསུམ། །ཕྱག་དྲུག་གྲི་གུག་ཐོད་པ་རལ་གྲི་དང་། །ཨུཏྤལ་འཁོར་ལོ་ཚངས་པའི་མགོ་བོ་འཛིན། །ཇི་བཞིན་ཞལ་ཕྱག་ཡུམ་ནི་དམར་བའོ། །དེ་ནས་སྙོམ་པར་འཇུག་པའི་སྦྱོར་བ་ལས་ལྷའི་འཁོར་ལོ་དབྱུང་བར་བྱ་སྟེ། ཤར་ལ་སོགས་པའི་ཕྱོགས་ཀྱི་འདབ་
མ་བཞི་ལ་ལྷུང་བའི་ས་བོན་ནི། ཨ་ཨི་ཨུ་ཨེ་ཞེས་བྱ་བ་སྟེ། ཉི་མ་དང་ཟླ་བའི་སྦུབས་སུ་ཆུད་ཅིང་དཀར་པོ་དང་སེར་པོ་དང་དམར་པོ་དང་ལྗང་གུའི་ཁ་དོག་ཅན་འོད་ཀྱི་སྦྱོར་བར་འཁོར་ལོ་དང་རིན་པོ་ཆེ་དང་པདྨ་དང་རྡོ་རྗེ་རྒྱ་གྲམ་སྙིང་པོ་དེ་ཉིད་ཀྱིས་མཚན་པར་གང་གྱུར་པའོ། །དེ་དག་ཡོངས་སུ་

49-1-163b

གྱུར་པ་ནི་རྡོ་རྗེ་འཁོར་ལོ་དང་རྡོ་རྗེ་རིན་ཆེན་དང་རྡོ་རྗེ་པདྨོ་དང་། རྡོ་རྗེ་སྣ་ཚོགས་རྣམས་སུ་གྲུབ་པར་བལྟའོ། །དེ་དག་གི་ས་བོན་ནི་རང་གི་ཉེ་བའི་རྒྱུའོ། །སྐུ་མདོག་ནི་ས་བོན་གྱི་ཁ་དོག་གོ། །བྱང་ཤར་ལ་སོགས་པ་མཚམས་ཀྱི་འདབ་མ་བཞི་ལ་ནི་ས་བོན་གྱི་འོད་ཟེར་ལས་མངོན་པར་གྲུབ་པའི་དྲི་
ཆེན་དང་དྲི་ཆུ་དང་། རཀྟ་དང་། བྱང་ཆུབ་ཀྱི་སེམས་ཡོངས་སུ་དག་པའི་བདག་ཉིད་ཀྱི་བུམ་པ་ཀ་པཱ་ལས་མཚན་པ་དག་བལྟའོ། །དེའི་ཕྱི་རོལ་དུ་འཁོར་ལོ་རྩིབས་བརྒྱད་ལ་ཤར་ནས་བརྩམས་པའི་རིམ་གྱིས་ཕྱོགས་བཞིར་ལྷུང་བའི་ས་བོན་ནི། ཨཱ་ཨཱི་ཨཱུ་ཨཻ་ཞེས་བྱ་བ་སྟེ། སྔ་མ་
བཞིན་དུ་དཀར་པོ་དང་སེར་པོ་དང་། དམར་པོ་དང་། ལྗང་གུའི་ཁ་དོག་ཅན་ནོ། །ཉི་མ་དང་ཟླ་བའི་སྦུབས་སུ་ཆུད་ཅིང་འོད་ཀྱི་སྦྱོར་བས་སྒྲོན་མ་དང་། རྡོ་རྗེ་དང་། ཞགས་པ་དང་། རལ་གྲི་དང་། སྙིང་པོ་དེ་ཉིད་ཀྱིས་མཚན་པར་གང་གྱུར་པའོ། །དེ་དག་ཡོངས་སུ་གྱུར་པ་ནི་གཏི་མུག་རྡོ་རྗེ་དང་
བག་ཆགས་རྡོ་རྗེ་དང་། འདོད་ཆགས་རྡོ་རྗེ་དང་། ཞེ་སྡང་རྡོ་རྗེ་རྣམས་སུ་གྲུབ་པར་བལྟའོ། །དེ་དག་གི་ཕྱག་མཚན་ནི་རང་གི་ཉེ་བའི་རྒྱུའོ། །སྐུ་མདོག་ནི་ས་བོན་གྱི་ཁ་དོག་གོ། །བྱང་ཤར་ལ་སོགས་པ་མཚམས་ཀྱི་རྩིབས་བཞིར་ལྷུང་བའི་ས་བོན་ནི། ཨོ་ཨཽ་ཨཾ་ཨཿཞེས་བྱ་བ་སྟེ། ཉི་
མ་དང་ཟླ་བའི་སྦུབས་སུ་ཆུད་ཅིང་སེར་པོ་དང་དཀར་པོ་དང་། དམར་པོ་དང་། ལྗང་གུའི་ཁ་དོག་ཅན་ནོ། །འོད་ཀྱི་སྦྱོར་བས་རི་རབ་དང་ཟླ་བ་དང་། ཉི་མ་དང་བ་དན་དང་། སྙིང་པོ་དེ་ཉིད་ཀྱིས་མཚན་པར་གང་གྱུར་པའོ། །དེ་དག་ཡོངས་སུ་གྱུར་པས་ནི་བརྟན་པའི་རྡོ་རྗེ་མ་དང་། སྦྱོར་བའི་
རྡོ་རྗེ་མ་དང་། འབར་བའི་རྡོ་རྗེ་མ་དང་། སྟོབས་ཀྱི་རྡོ་རྗེ་མ་ཞེས་བྱ་བའི་ལྷ་མོར་མངོན་པར་གྲུབ་པར་བལྟའོ། །དེ་དག་གི་ཕྱག་མཚན་ནི་རང་གི་ཉེ་བའི་རྒྱུའོ། །སྐུ་མདོག་ནི་ས་བོན་གྱི་ཁ་དོག་གོ། །དཔལ་ལྡན་ལྷ་ཚོགས་འདི་དག་ཐམས་ཅད་ཀྱང་། །ཉི་ཟླ་དབུགས་བྲལ་གདན་ལ་བརྗིད་
པ་དང་། །གཡོན་ཕྱག་བདེ་ཆེན་རོས་གང་ཐོད་པ་འཛིན། །རིན་ཆེན་རུས་པ་སྦྲུལ་རྒྱན་མཚུངས་པ་ཡིན། །དེ་བཞིན་དུ་ཁྱམས་ཤར་ལ་སོགས་པ་ཕྱོགས་བཞིར་ལྷུང་བའི་ས་བོན་ནི། ཀ་ཙ་ཊ་ཏ་ཞེས་པ་སྟེ། དཀར་པོ་དང་། སྔོན་པོ་དང་། སེར་པོ་དང་། དམར་པོའི་ཁ་དོག་ཅན་ཉི་མ་དང་ཟླ་

49-1-164a

བའི་སྦུབས་སུ་ཆུད་ཅིང་འོད་ཀྱི་སྦྱོར་བས་མེ་ལོང་དང་། པི་ཝང་དང་དྲི་མཆོག་དང་། ཞལ་ཟས་སྙིང་པོ་དེ་ཉིད་ཀྱིས་མཚན་པར་གང་གྱུར་པའོ། །དེ་དག་ཡོངས་སུ་གྱུར་པ་ནི་གཟུགས་རྡོ་རྗེ་མ་དང་། སྒྲ་རྡོ་རྗེ་མ་དང་། དྲི་རྡོ་རྗེ་མ་དང་། རོ་རྡོ་རྗེ་མའི་ལྷ་མོ་རྣམས་མངོན་པར་གྲུབ་
པར་བལྟའོ། །དེ་དག་གི་ཕྱག་མཚན་ནི་རང་གི་ཉེ་བའི་རྒྱུའོ། །སྐུ་མདོག་ནི་ས་བོན་གྱི་ཁ་དོག་གོ། །བྱང་ཤར་ལ་སོགས་པའི་ཁྱམས་ཀྱི་གྲར་ལྷུང་བའི་ས་བོན་ནི། ས་ཡ་ཤ་ཀྵ་ཞེས་པ་སྟེ། ལྗང་གུ་དང་། དཀར་པོ་དང་། སྔོན་པོ་དང་། དམར་པོའི་ཁ་དོག་ཅན། ཉི་མ་དང་ཟླ་བའི་སྦུབས་སུ་ཆུད་
ཅིང་། འོད་ཀྱི་སྦྱོར་བ་ནི་ན་བཟའ་དང་། ཆོས་འབྱུང་དང་། མཎྜལ་དང་། མར་མེས་མཚན་པར་གང་གྱུར་པའོ། །དེ་དག་ཡོངས་སུ་གྱུར་པ་ནི། རེག་བྱ་རྡོ་རྗེ་མ་དང་། ཆོས་རྡོ་རྗེ་མ་དང་། ཞིང་རྡོ་རྗེ་མ་དང་། སྣང་བ་རྡོ་རྗེ་མའི་ལྷ་མོ་རྣམས་མངོན་པར་གྲུབ་པར་བལྟའོ། །དེ་དག་གི་ཕྱག་
མཚན་ནི་རང་གི་ཉེ་བའི་རྒྱུའོ། །སྐུ་མདོག་ནི་ས་བོན་གྱི་ཁ་དོག་གོ། །དེ་ནས་ཤར་ལ་སོགས་པའི་སྒོ་བཞིར་ཡང་དེ་བཞིན་དུ་བལྟ་བར་བྱ་སྟེ། རྀ་དཀར་པོ་ལས་བྱུང་བའི་ལྕགས་ཀྱུ་ཡོངས་སུ་གྱུར་པས་ནི་རྡོ་རྗེ་ལྕགས་ཀྱུའོ། །རཱྀ་སེར་པོ་ལས་བྱུང་བའི་ཞགས་པ་ཡོངས་སུ་གྱུར་པར་ནི་རྡོ་རྗེ་
ཞགས་པའོ། །ལྀ་དམར་པོ་ལས་བྱུང་བའི་ལྕགས་སྒྲོག་ཡོངས་སུ་གྱུར་པས་ནི་རྡོ་རྗེ་ལྕགས་སྒྲོག་གོ། །ལཱྀ་ལྗང་གུ་ལས་བྱུང་བའི་དྲིལ་བུ་ཡོངས་སུ་གྱུར་པས་ནི་རྡོ་རྗེ་དྲིལ་བུའོ། །ཁྱམས་ན་ལྷ་བརྒྱད་པདྨ་ཉི་ཟླའི་གདན། །རིན་ཆེན་རུས་བརྒྱན་སྐྱིལ་ཀྲུང་ཕྱག་མཚན་གཅིག །སྒོ་
བཞིར་གནས་ནི་ཉི་ཟླ་དབུགས་བྲལ་གདན། །སྦྲུལ་རྒྱན་སྟང་སྟབས་གཡོན་ཕྱག་ཀ་པཱ་ལའོ། །དེ་ལྟར་འཁོར་ལོ་ཡོངས་སུ་རྫོགས་པའི་ཁོར་ཡུག་ཆེན་པོ་ལ་ནི་གྲུབ་པའི་དུར་ཁྲོད་བརྒྱད་ཀྱིས་ཡོངས་སུ་བསྐོར་བ་སྟེ། ཇི་སྐད་དུ། གཏུམ་དྲག་ཚང་ཚིང་དཀྲིགས་པ་དང་། །འུར་འུར་
འབར་བས་ཁྱབ་པ་དང་། །ཀེང་རུས་འཇིགས་རུང་ཤར་སོགས་ཀྱི། །ཕྱོགས་སུ་གཡོན་སྐོར་གྱིས་ལེགས་གནས། །ཧ་ཧ་དགོད་པ་དབང་ལྡན་དུ། །བྱིན་ཟར་དཔལ་གྱི་ནགས་ཚལ་ལོ། །མུན་པ་མི་བཟད་བདེན་བྲལ་དུ། །རླུང་དུ་ཀཱི་ལ་ཀཱི་ལར་སྒྲོགས། །ཞེས་བྱུང་བ་བཞིན་ནོ། །

49-1-164b

དེ་དག་རེ་རེར་ཡང་ཤིང་དང་ཕྱོགས་སྐྱོང་དང་ཀླུ་དང་། སྤྲིན་དང་ཞིང་སྐྱོང་དང་། དགྲ་བཅོམ་པ་དང་། གྲུབ་པ་དང་མཁའ་འགྲོ་དང་། མཆོད་རྟེན་དང་། མེ་དང་ཆུ་ཆེན་པོ་ལ་དོགས་པ་བརྒྱད་བརྒྱད་ཡོད་པར་བལྟའོ། །དེའི་འོག་ཏུ་བཅོམ་ལྡན་འདས་དཀྱིལ་འཁོར་ཆེན་པོའི་བདག་ཉིད་ཤིན་ཏུ་
མི་འཕྲོགས་པའི་བདེ་བ་བསམ་གྱིས་མི་ཁྱབ་པའི་རོས་རབ་ཏུ་འཇུས་པས་ཧ་ཅང་དགའ་བས་མི་ཟད་པའི་ངོ་བོར་མོས་ཤིང་། རིམ་གྱིས་སྟོང་པ་ཉིད་དུ་ཐིམ་པར་གྱུར་ཏེ། བཅོམ་ལྡན་མ་དང་ལྷན་ཅིག་ཏུ་ཞུ་ནས་རབ་ཏུ་དང་བའི་གཟུགས་ཅན་གྱི་ནཱ་ད་དཀར་བ་དང་དམར་བའི་རྣམ་པར་གནས་པར་
བསམ་མོ། །དེའི་ཚེ་ཕྱོགས་ཀྱི་འདབ་མ་བཞིར་རྒྱལ་བ་བཞིའི་ཐུགས་ཀ་ལས་ཚད་མེད་བཞིའི་ལྷ་མོ་སྤྲུལ་པས་སེམས་ཅན་གྱི་དོན་དུ་སླར་ལྡང་བར་གསོལ་བ་གདབ་པར་བྱའོ། །འཇིག་རྟེན་མགོན་པོ་བཅོམ་ལྡན་བཞེངས། །འགྲོ་བ་ཉོན་མོངས་ཡོངས་སུ་སྐྱོབས། །སྟོང་
པའི་ཏིང་འཛིན་སྤངས་ནས་སུ། །བྱམས་ཆེན་སྐུ་མཆོག་བལྟམས་པར་མཛོད། །ཐུགས་རྗེ་ཆེན་པོ་བཅོམ་ལྡན་བཞེངས། །སེམས་ཅན་སྡུག་བསྔལ་རབ་ཏུ་སྒྲོལ། །ཞི་བའི་མཐའ་ལ་མི་གནས་པར། །བརྩེ་ཆེན་རྣམ་པར་འཕྲུལ་པར་མཛོད། །བདེ་ཆེན་རྒྱལ་པོ་བཅོམ་ལྡན་བཞེངས། །
ལུས་ཅན་བདེ་དོན་ཡང་དག་གཟིགས། །ཟག་མེད་དབྱིངས་ཐུགས་མ་གཞོམ་པར། །དགྱེས་ཆེན་ཀུན་དུ་སྣང་བར་མཛོད། །གཙོ་ཆེན་རྡོ་རྗེ་བཅོམ་ལྡན་བཞེངས། །སྐྱེ་བོ་དུབ་པ་མངོན་དགོངས་ལ། །མཐའ་གཅིག་རྒྱུན་ཆད་མི་བཞུགས་པར། །མ་ལུས་འཚལ་བ་སྒྲུབ་ཏུ་གསོལ། །ཞེས་
བྱ་བའི་གླུས་གཉིད་སད་པ་དང་འདྲ་བར་བྱས་ཏེ། སླར་ས་བོན་གྱི་ཡི་གེ་གཉིས་དང་མཚན་མ་གཉིས་ལས་བཅོམ་ལྡན་འདས་ཡབ་དང་ཡུམ་མངོན་པར་གྲུབ་པའི་རིམ་པ་སྔར་ཇི་སྐད་སྨོས་པ་བཞིན་དུ་སྤྲུལ་པར་བྱའོ། །གསང་སྔགས་ལས་གྲུབ་འཁོར་ལོས་སྒྱུར་རྒྱལ་བཞིན། །ཁྲག་
འཐུང་རལ་པ་གཅིག་འཕྱང་ཐུགས་རྗེ་ཡི། །དབྱིངས་ལས་སྐུ་བལྟམས་མཁའ་ལས་ཉི་མ་ལྟར། །མ་ལུས་དོན་གྲུབ་འབར་བ་དེ་རྗེས་བསམ། །དེ་ནས་གཞལ་ཡས་ཁང་དང་ལྷ་རྣམ་པར་དག་པ་ཁོང་དུ་ཆུད་པར་བྱ་སྟེ། འདི་སྐད་དུ་མི་མཉམ་མེད་པས་ཟུར་བཞི་ཡིན། དྲན་དང་དབང་པོའི་

49-1-165a

སྒོ་བཞི་ཡིན། །བསམ་གཏན་བཞི་ནི་རྟ་བབས་བཞི། །རྣམ་ཐར་བརྒྱད་ཕྱིར་ཀ་བ་བརྒྱད། །བྱང་ཆུབ་ཡན་ལག་བདུན་དག་ཕྱིར། །དྲ་བ་དང་ནི་དྲ་བ་ཕྱེད། །ཕྱོགས་བཞི་ཚད་མེད་བཞི་ཡིན་ཏེ། །པདྨ་འཁོར་ལོ་ཤེས་རབ་ཐབས། །རྣམ་པར་ཤེས་བརྒྱད་ཡོངས་དག་པ། །
དེ་ནི་དུར་ཁྲོད་ཆེན་པོ་བརྒྱད། །ཅེས་བྱ་བ་ལྟ་བུ་དཀྱིལ་འཁོར་ཡོངས་སུ་དག་པ་གང་ཡིན་པའོ། །དཀྱིལ་འཁོར་ཡོངས་སུ་དག་པ་ཡང་། །རེ་ཞིག་ཟླ་བ་ནི་མེ་ལོང་ལྟ་བུའི་རང་བཞིན་ནོ། །ཉི་མ་ནི་མཉམ་པ་ཉིད་ཀྱི་རང་བཞིན་ནོ། །ས་བོན་དང་མཚན་མ་ནི་སོ་སོར་ཀུན་དུ་རྟོགས་པའི་རང་བཞིན་ནོ། །
ཡོངས་སུ་གྱུར་པ་ནི་བྱ་བ་གྲུབ་པའི་རང་བཞིན་ནོ། །གཟུགས་བརྙན་ཉེ་བར་རྫོགས་པ་ནི། །ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་ནོ། །རྣམ་པར་ཤེས་པའི་ཕུང་པོ་རྣམ་པར་དག་པ་ནི་དཔལ་རྡོ་རྗེ་རལ་པ་གཅིག་པའོ། །གཟུགས་ཀྱི་ཕུང་པོ་རྣམ་པར་དག་པ་ནི་རྡོ་རྗེ་འཁོར་ལོའོ། །
ཚོར་བའི་ཕུང་པོ་རྣམ་པར་དག་པ་ནི་རྡོ་རྗེ་རིན་ཆེན་ནོ། །འདུ་ཤེས་ཀྱི་ཕུང་པོ་རྣམ་པར་དག་པ་ནི་རྡོ་རྗེ་པདྨའོ། །འདུ་བྱེད་ཀྱི་ཕུང་པོ་རྣམ་པར་དག་པ་ནི་རྡོ་རྗེ་སྣ་ཚོགས་སོ། །གཏི་མུག་རྣམ་པར་དག་པ་ནི་གཏི་མུག་རྡོ་རྗེའོ། །བག་ལ་ཉལ་རྣམ་པར་དག་པ་ནི་བག་ཆགས་རྡོ་རྗེའོ། །འདོད་ཆགས་
རྣམ་པར་དག་པ་ནི་འདོད་ཆགས་རྡོ་རྗེའོ། །ཞེ་སྡང་རྣམ་པར་དག་པ་ནི་ཞེ་སྡང་རྡོ་རྗེའོ། །སའི་ཁམས་རྣམ་པར་དག་པ་ནི་བརྟན་པའི་རྡོ་རྗེ་མའོ། །ཆུའི་ཁམས་རྣམ་པར་དག་པ་ནི་སྦྱོར་བའི་རྡོ་རྗེ་མའོ། །མེའི་ཁམས་རྣམ་པར་དག་པ་ནི་འབར་བའི་རྡོ་རྗེ་མའོ། །རླུང་གི་ཁམས་རྣམ་པར་དག་
པ་ནི་སྟོབས་ཀྱི་རྡོ་རྗེ་མའོ། །གཟུགས་རྣམ་པར་དག་པ་ནི་གཟུགས་རྡོ་རྗེའོ། །སྒྲ་རྣམ་པར་དག་པ་ནི་སྒྲ་རྡོ་རྗེ་མའོ། །དྲི་རྣམ་པར་དག་པ་ནི་རྡོ་རྗེ་མའོ། །རོ་རྣམ་པར་དག་པ་ནི་རོ་རྡོ་རྗེ་མའོ། །རེག་རྣམ་པར་དག་པ་ནི་རེག་རྡོ་རྗེ་མའོ། །ཆོས་རྣམ་པར་དག་པ་ནི་ཆོས་རྡོ་རྗེ་མའོ། །ཞིང་རྣམ་
པར་དག་པ་ནི་ཞིང་རྡོ་རྗེ་མའོ། །སྣང་བ་རྣམ་པར་དག་པ་ནི་སྣང་བ་རྡོ་རྗེ་མའོ། །ཚོར་བ་བདེ་བ་རྣམ་པར་དག་པ་ནི་རྡོ་རྗེ་ལྕགས་ཀྱུའོ། །ཚོར་བ་སྡུག་བསྔལ་རྣམ་པར་དག་པ་ནི་རྡོ་རྗེ་ཞགས་པའོ། །ཚོར་བ་བཏང་སྙོམས་རྣམ་པར་དག་པ་ནི་རྡོ་རྗེ་ལྕགས་སྒྲོག་གོ། །དེ་དག་གི་བག་

49-1-165b

ཆགས་རྣམ་པར་དག་པ་ནི་རྡོ་རྗེ་དྲིལ་བུའོ། །འོད་གསལ་བདེ་ཆེན་མི་རྟོག་རྟག་ཆད་རྣམ་པར་དག །པདྨོ་ཐོད་པ་དབུགས་བྲལ་དབང་ཕྱུག་ཨུ་མའི་གདན། །དུས་གསུམ་མཐར་ཕྱིན་སྐྱོབ་དྲུག་ཐབས་དང་ཤེས་དག་ཕྱིར། །ཞལ་གསུམ་ཕྱག་དྲུག་ཕྱག་རྒྱ་དྲུག་ཞབས་བརྒྱད་བསྐུམ་ཉིད། །དེ་བཞིན་
དུ་རྡོ་རྗེ་འཁོར་ལོ་ལ་སོགས་ཉི་ཤུ་རྩ་བཞིའི་དཀྱིལ་འཁོར་པ་ཐམས་ཅད་ཀྱི་གདན་དང་ཕྱག་མཚན་ལ་སོགས་པ་རྣམ་པར་དག་པ་ཡང་ཅི་རིགས་སུ་རིག་པར་བྱའོ། །གང་ཡང་དཀྱིལ་འཁོར་པ་ལ་རྒྱས་གདབ་པའི་ཕྱག་རྒྱ་ལྔའམ་དྲུག་ཀྱང་རྣམ་པར་རིག་པར་བྱ་སྟེ། རེ་ཞིག་བླ་མ་དང་ལྷག་པའི་
ལྷ་ལ་ཕྱག་འཚལ་བའི་དོན་དུ་སྤྱི་གཙུག་ཏུ་འཁོར་ལོ་སྟེ། དེ་ནི་མི་བསྐྱོད་པའི་བདག་ཉིད་རྣམ་པར་དག་པའོ། །རྡོ་རྗེ་འཛིན་པའི་བཀའ་བསྒོ་བ་ཉན་པའི་ཕྱིར་རྣ་བ་ལ་རྣ་ཆ་སྟེ། དེའི་འོད་དཔག་མེད་ཀྱི་བདག་ཉིད་རྣམ་པར་དག་པའོ། །གསང་སྔགས་ཟབ་མོ་བཟླས་པའི་ཕྱིར་མགུལ་བ་ལ་མགུལ་
དོ་སྟེ། དེ་ནི་རིན་ཆེན་འབྱུང་བའི་བདག་ཉིད་རྣམ་པར་དག་པའོ། །སྲོག་ཆགས་ཐམས་ཅད་ལ་འཚེ་བ་སྤངས་པའི་ཕྱིར་ལག་པ་ལ་ལག་གདུབ་སྟེ། དེ་ནི་རྣམ་པར་སྣང་མཛད་ཀྱི་བདག་ཉིད་རྣམ་པར་དག་པའོ། །ཕྱག་རྒྱ་ཉེ་བར་བཀོད་པ་བསྟན་པའི་ཕྱིར་རྐེད་པ་ལ་སྐེ་རགས་ཏེ། དེ་ནི་དོན་   
ཡོད་གྲུབ་པའི་བདག་ཉིད་རྣམ་པར་དག་པའོ། །རང་གི་ཤེས་རབ་དང་ལྷན་ཅིག་པའི་ཕྱིར་ཚོམ་བུ་སྟེ། དེ་ནི་རལ་པ་གཅིག་པའི་བདག་ཉིད་རྣམ་པར་དག་པའོ། །དེ་ནས་གཞལ་ཡས་ཁང་གི་ཆ་ཉི་ཤུ་རྩ་བཞི་ཤར་གྱི་འདབ་མ་ནས་བརྩམས་ཏེ་བྱང་གི་སྒོའི་བར་ཡུལ་ཉི་ཤུ་རྩ་བཞིར་རྣམ་པར་དག་པ་སྦྱར་
བར་ཤེས་པར་བྱ་ཞིང་རང་གི་ལུས་ཀྱི་ཆ་ཉི་ཤུ་རྩ་བཞི་ཡང་ཡུལ་ཉི་ཤུ་རྩ་བཞིར་རྣམ་པར་དག་པ་ལྷ་དང་སྦྱར་བ་ཡང་རྟོགས་པར་བྱ་སྟེ། དང་པོ་ཁོ་ནར་དེ་ཁོ་ན་ཉིད་ཀྱི་གནས་སྙིང་གི་དབུས་སུ་དཔལ་རྡོ་རྗེ་རལ་གཅིག་པའོ་ཞེས་པ་འདི་ནི་ཁྱད་པར་རོ། །པུ་ལླི་ར་མཱ་ལ་ཡ་མགོ་ལ་རྡོ་རྗེ་
འཁོར་ལོ་ཞེས་པ་ནས། ཛཱ་ལནྡྷ་ར་སྤྱི་གཙུག་དང་། །ཨཽ་ཏྱན་རྣ་བ་གཡས། །ཨརྦུ་དཱ་སྟེ་གླད་པའི་རྒྱབ། །གོ་དཱ་ཝ་རི་རྣ་བ་གཡོན། །ར་མེ་ཤྭ་ར་སྨིན་མའི་དབུས། །དེ་བཱི་ཀོ་ཊ་མིག་གཉིས་དང་། །མ་ལ་ཝ་ནི་ཕྲག་པ་གཉིས། །ཀཱ་མ་རུ་པ་ནི་མཆན་ཁུང་གཉིས། །ཨོ་ཏྲེ་ནུ་མ་གཉིས་

49-1-166a

ཡིན་ནོ། །ཏྲི་ཤ་ཀུ་ནེ་ལྟེ་བ་དང་། །ཀོ་ས་ལ་ནི་སྣ་ཡི་རྩེ། །ཀ་ལིཾ་ག་ནི་ཁ་ཉིད་དེ། །ལམྦཱ་ཀ་ནི་མགུལ་པའོ། །ཀཱཉྩི་སྙིང་གི་རྩེ་མོ་དང་། །ཧི་མ་ལ་ཡ་ལྒང་བ་གཉིས། །པྲེ་ཏ་པུ་རི་མཚན་མ་དང་། །གྲྀ་ཧ་དེ་བ་གསང་བའི་གནས། །ས་ཽ་རཱཥྚ་ནི་བརླ་གཉིས་ཏེ། །སུ་བརྞ་དྭཱི་པ་བྱིན་
པ་གཉིས། །ན་ག་ར་ནི་སོར་མོ་རྣམས། །སིནྡྷུ་རྐང་པའི་རྒྱབ་ཏུའོ། །མ་རུ་མཐེ་བོ་རྣམ་གཉིས་ཏེ། །ཀུ་ལུ་ཏཱ་ནི་པུས་མོ་གཉིས། །རྡོ་རྗེ་དྲིལ་བུ་ཞེས་བྱ་བའི་བར་དུ་གྲངས་ཇི་ལྟ་བ་བཞིན་དུ་སྦྱར་བར་བྱའོ། །དེ་རྗེས་ཡབ་དང་ཡུམ་རིམ་རྡོ་རྗེ་སྔོན་པོ་དང་། །པདྨ་དམར་པོའི་རྒྱས་གདབ་གོ་ཆ་དྲུག་
དྲུག་བཅིང་། །དུད་མདོག་ཧ་ཧི་ཧུ་ཧེ་ཧོ་ཧཾ་ཞེས་དང་།ཁྲག་མདོག་ཨ་ཨི་ཨུ་ཨེ་ཨོ་དང་ཨཾ་ཉིད་དོ། །དེ་ལ་སྙིང་གར་ནི་ཧའོ། །མགོ་བོ་ལ་ནི་ཧིའོ། །སྤྱི་གཙུག་ཏུ་ཧུའོ། །ཕྲག་པ་གཉིས་ནི་ཧེའོ། །མིག་གཉིས་ལ་ནི་ཧོའོ། །ཡན་ལག་ཐམས་ཅད་ལ་ནི་ཧཾ་ངོ་། །དེ་བཞིན་དུ་ལྟེ་བར་ནི་ཨའོ། །
སྙིང་གར་ནི་ཨིའོ། །ཁར་ནི་ཨུའོ། །མགོ་ལ་ནི་ཨེའོ། །སྤྱི་གཙུག་ཏུ་ཨོའོ། །ཡན་ལག་ཐམས་ཅད་ལ་ནི་ཨཾ་ངོ་། །དེའི་འོག་ཏུ་དམ་ཚིག་པའི་འཁོར་ལོ་ཡོངས་སུ་རྫོགས་པ་ཉིད་བརྟུལ་ཞུགས་དང་། ཆོ་ག་དེ་ཁོ་ན་ཉིད་ཀྱིས་བྱིན་གྱི་རླབས་བཅུག་པས་ངེས་པར་བརྟེན་པར་བྱ་བའི་དོན་དུ། 
ཡེ་ཤེས་པའི་འཁོར་ལོ་དྲི་མ་མེད་པ་དེ་སྤྱན་དྲངས་ཏེ། ཡང་དག་པར་གཞུག་པར་བྱའོ། །མཛུབ་མོ་མདུད་བྱས་གུང་མོ་རྩེ་སྤྲད་ཅིང་། །མཐེ་བོང་རྡོ་རྗེ་བརྟན་པོར་རབ་ཏུ་སྦྱར། །སོར་མོ་གཞན་གདེངས་དཔྲལ་བའི་དབུས་གཞག་ལ། །བསྐོར་ཞིང་བསྐོར་བས་ཡོངས་སུ་བསྒྱུར་བར་བྱ། །གཡོན་
བརྐྱང་གཡས་མནན་གྱེན་དུ་བལྟ། །མིག་སྒྱུར་ཕེཾ་གྱི་སྒྲ་སྒྲོགས་པས། །ཕྱོགས་བཅུའི་འཇིག་རྟེན་ཁམས་བཞུགས་པའི། །དཔའ་བོ་རྣལ་འབྱོར་མ་ཚོགས་དགུག །ཅེས་བྱ་བ་འདི་ལྟ་བུས་ཉིད་ཀྱི་གནས་ནས་དམ་ཚིག་རྗེས་སུ་དྲན་པས་མདུན་གྱི་ནམ་མཁའི་ངོས་འདིར་མངོན་པར་
བྱོན་པར་གྱུར་ཏོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཐོག་མར་སྐུ་ཁྲུས་གསོལ་བའོ། །ཨོཾ་པཱ་དྱཾ་པྲ་ཏཱིཙྪ་སྭཱ་ཧཱ། ཞལ་བསིལ་དབུལ་བའོ། །ཨོཾ་ཨཉྩ་མཱ་ནི་པྲ་ཏཱིཙྪ་སྭཱ་ཧཱ། ཞབས་བསིལ་བའོ། །ཨོཾ་པདྨ་སཱུརྱ་ཙཎྜ་མཎྜལ་མ་ཡེ་སྭཱ་ཧཱ། གདན་དབུལ་ལོ། །དེ་ནས་

49-1-166b

ཐོག་མར་ལུས་ཐམས་ཅད་ཉེ་བར་འདུད་པས་ཕྱག་བྱས་ཏེ། གང་ཞིག་སྣ་ཚོགས་རོ་གཅིག་དབང་པོའི་གཞུ་འདྲ་བ། །ཉོན་མོངས་རྡུལ་བྲལ་བདེ་ཆེན་འོད་གསལ་སྤྲོས་བྲལ་ཞིང་། །ཡེ་ཤེས་རྒྱུན་འབབ་རྡོ་རྗེའི་དཀྱིལ་འཁོར་ཆེར་འབྱུང་ལ། །གུས་པའི་ཁུར་གྱིས་མགྲིན་པ་སྨད་ནས་བདག་ཕྱག་
འཚལ། །དེ་ནས་མཆོད་པ་བྱིན་གྱིས་བརླབས་ནས་དབུལ་བར་བྱ་སྟེ། ཨོཾ་བཛྲ་པུཥྤེ་ཨཱཿཧཱུྃ། ཨོཾ་བཛྲ་དྷཱུ་པེ་ཨཱཿཧཱུྃ། ཨོཾ་བཛྲ་དཱི་པེ་ཨཱཿཧཱུྃ། ཨོཾ་བཛྲ་གནྡྷེ་ཨཱཿཧཱུྃ། ཨོཾ་བཛྲ་ནཻ་བི་དྱེ་ཨཿཧཱུྃ། ལན་གསུམ་གསུམ་གྱིས་སོ། །ཁ་དོག་སྣ་ཚོགས་དྲི་ཞིམ་དབྱིབས་མཛེས་མེ་ཏོག་དང་། །བདུག་སྤོས་
ཨ་ཀ་རུ་དང་སྦྲུལ་གྱི་སྙིང་པོ་དང་། །སྣོད་མཛེས་རིན་ཆེན་སྒྲོན་མེ་སྣང་བ་དྲིར་བཅས་དང་། །ཆུ་གཙང་དྲི་མཆོག་སྙིང་པོ་སྦྱོར་བ་དཔག་མེད་དང་། །མདོག་བཟང་རོ་བརྒྱ་ལྡན་པའི་ཞལ་ཟས་མང་པོ་རྣམས། །གུས་བཅས་ཡིད་འོང་ལྷ་མཆོག་ཚོགས་ལ་འབུལ་ལགས་ཀྱིས། །སེམས་ཅན་
མ་ལུས་སྲིད་པའི་གདུང་བ་ཞི་བ་དང་། །ཟག་མེད་བདེ་ཆེན་ཡེ་ཤེས་བདུད་རྩིས་མྱོས་པར་མཛོད། །ཨོཾ་ན་མོ་བྷ་ག་ཝཱན་ཨེ་ཀ་ཛ་ཊཱི་སརྦ་མཎྜལ་ཙཀྲ་དེ་བ་ཏཱ་པུཥྤེ་པུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་ཞེས་པ་ནས། ནེེ་བི་དྱེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་ཞེས་བྱ་བའི་བར་དུ་སྦྱར་བས་
དབུལ་བར་བྱའོ། །པི་ཝང་གླིང་བུ་རྫ་རྔ་རྔ་ཟླུམ་བཞད་མ་དང་། །སྒེག་མོ་གླུ་མ་གར་མ་གཟུགས་མཛེས་རོ་དང་རེག །མཎྜལ་ཆོས་མ་རྒྱན་སོགས་དེ་བཞིན་བཀོད་པ་ནི། །ཟབ་ཅིང་རྒྱ་ཆེ་རྒྱ་མཚོ་སྤྲིན་འཕྲོ་གཞན་ཡང་མཆོད། །ཨོཾ་ཨཱཿབཛྲ་བི་ནི་ཧཱུྃ། ཨོཾ་ཨཱཿབཛྲ་བཾ་སེ་ཧཱུྃ། ཨོཾ་ཨཱཿབཛྲ་
མུརྫི་ཧཱུྃ། ཨོཾ་ཨཱཿ མྲྀ་ཏཾ་གེ་ཧཱུྃ། ཨོཾ་ཨཱཿབཛྲ་ཧཱ་སྱེ་ཧཱུྃ། ཨོཾ་ཨཱཿབཛྲ་གཱི་ཏི་ཧཱུྃ། ཨོཾ་ཨཱཿབཛྲ་ནྲྀརྟི་ཧཱུྃ། ཨོཾ་ཨཱཿབཛྲ་ཨཱ་དརྵེ་ཧཱུྃ། ཨོཾ་ཨཱཿབཛྲ་ར་སེ་ཧཱུྃ། ཨོཾ་ཨཱཿབཛྲ་སྤཪྵེ་ཧཱུྃ། ཨོཾ་ཨཱཿབཛྲ་མཎྜ་ལེ་ཧཱུྃ། ཨོཾ་ཨཱཿབཛྲ་དྷརྨེ་ཧཱུྃ། ཨོཾ་ཨཱཿབཛྲ་སརྦ་ཨ་ལཾ་ཀཱ་རེ་ཧཱུྃ། ཨོཾ་ཨཱཿབཛྲ་སརྦ་པཱུ་ཛཱརྠ་མེ་གྷ་ས་མུ་
དྲ་སྥ་ར་ཎ་ས་མ་ཡ་ཧཱུྃ། འདི་དག་ནི་ཕྱིའི་ཡོ་བྱད་ཀྱི་མཆོད་པའི་རིམ་པའོ། །དེ་ནས་རྒུན་འབྲུམ་མམ་བུ་རམ་ཤིང་ལ་སོགས་པ་ལས་བཏུང་བ་བཟང་པོ་སྦྱར་ཏེ།  མཚན་མ་བཟང་པོའི་ཀ་པཱ་ལ་གང་བར་བྱས་ནས་སྒྲོན་མ་དང་། བདུད་རྩིའི་རོ་དང་ལྷན་ཅིག་ཏུ་གྱུར་པ་མདུན་དུ་གཞག་སྟེ་སྣོད་སྦྱངས་

49-1-167a

ལ། ཨོཾ་ཨཿབཛྲ་མ་ཧཱ་ས་མ་ཡ་ཧོ་ཞེས་བྱ་བས་དམ་ཚིག་དྲན་པར་བྱའོ། །མན་ངག་ཇི་བཞིན་པས་ལག་པ་རྡོ་རྗེའི་རང་བཞིན་དུ་བྱིན་གྱིས་བརླབས་ཏེ།  གཡས་ཀྱི་མཐེ་བོང་དང་། མཛུབ་མོ་དང་། གུང་མོ་དང་། སྲིན་ལག་དང་། མཐེའུ་ཆུང་དང་།  ལག་མཐིལ་རྣམས་ལ་
གོ་རིམས་ལྟར། ཧ་ཧི་ཧུ་ཧེ་ཧོ་ཧཾ། ཞེས་བྱ་བའི་ཡིག་འབྲུ་གནས་ལ་དཀར་བ་དང་། སྔོ་བ་དང་། སེར་བ་དང་། དམར་བ་དང་། ལྗང་བ་དང་། མཐིང་གའི་མདོག་ཅན་ཡབ་ཀྱི་ཐུགས་ཀའི་ཧཱུཾ་ལས་འཕྲོས་པའི་འོད་ཟེར་རེག་པ་ལས་ཡོངས་སུ་གྱུར་པའི་གཟུགས་ཀུན་དུ་འོད་དང་། རྡོ་རྗེ་འཛིན་པ་དང་། ནོར་
གྱི་དབྱིག་དང་། འོད་ཟེར་ཅན་དང་ལས་ཀྱི་བདེ་དང་། འཇིགས་བྱེད་རྒྱལ་པོ་རྣམས། གཡོན་ཟླ་བའི་གདན་ལ་རྣམ་པར་གནོན་ཅིང་། གཡས་སྐྱིལ་ཀྲུང་ཕྱེད་པའི་གར་གྱིས་མངོན་པར་དགྱེས་པ་རང་གི་ས་བོན་གྱི་ཁ་དོག་ཅན། འཁོར་ལོ་ལ་སོགས་པ་སངས་རྒྱས་ལྔའི་མཚན་མ་དང་། གྲི་
གུག་གིས་གཡས་ཀྱི་ཕྱག་མཚན་པ་དང་། ཐམས་ཅད་ཀྱང་གཡོན་ན་ཁྲག་གི་བདུད་རྩིས་རབ་ཏུ་གང་བའི་ཐོད་པ་ཅན་ནོ། །དེ་བཞིན་དུ་གཡོན་གྱི་མཐེ་བོ་ལ་སོགས་པར་ཡང་གྲངས་ཇི་ལྟ་བས། ཨ་ཨི་ཨུ་ཨེ་ཨོ་ཨཾ་ཞེས་བྱ་བའི་ཡིག་འབྲུ་གནས་པ་ལ་དཀར་བ་དང་། སྔོ་བ་དང་། སེར་བ་དང་། རབ་ཏུ་
དམར་བ་དང་། ལྗང་གུ་དང་། སིནྡྷུ་རའི་མདོག་ཅན། ཡུམ་གྱི་ཐུགས་ཀའི་བཾ་ལས་འཕྲོས་པའི་འོད་ཟེར་རེག་པ་ལས་ཡོངས་སུ་གྱུར་པའི་གཟུགས་རབ་གསལ་མ་དང་། རབ་བརྟན་མ་དང་། རྒྱན་ཅན་མ་དང་། འོད་འཆང་མ་དང་། ཚོགས་ཅན་མ་དང་། སྐྲག་མཛད་མ་རྣམས་གཡས་ཉི་མའི་གདན་
ལ་གནོན་ཅིང་གཡོན་གྱི་སྐྱིལ་ཀྲུང་ཕྱེད་པའི་གར་གྱིས་ཡོངས་སུ་དགྱེས་མ། རང་གི་ས་བོན་གྱི་ཁ་དོག་ཅན་འཁོར་ལོ་ལ་སོགས་པ་སངས་རྒྱས་ལྔའི་མཚན་མ་དང་། ཀ་པཱ་ལ་གཡས་ཀྱི་ཕྱག་མཚན་པ། ཐམས་ཅད་ཀྱང་གཡོན་ན་ཁྲག་གི་བདུད་རྩིས་རབ་ཏུ་གང་བའི་ཐོད་པ་ཅན་ནོ། །དེ་
ནས་གོ་ཆ་དེ་དག་ལ་ཡེ་ཤེས་ཀྱི་ལྷ་ཡང་དག་པར་བཀུག་སྟེ། དམ་ཚིག་ལ་བཅུག་ནས་ཡིད་ལས་བྱུང་བའི་མཆོད་པས་མཆོད་ཅིང་ཐལ་མོ་མཉམ་པར་སྦྱར་བས་ཕན་ཚུན་རྗེས་སུ་ཞུགས་པ་དང་། དེ་བསྡམས་པས་ཕན་ཚུན་ཡོངས་སུ་ཐིམ་པར་བལྟའོ། །གང་ཐིམ་པར་གྱུར་པ་དེ་ཡང་ཧཱུྃ་ཨ་ཞེས་

49-1-167b

གསུང་མཐོན་པོས་བོས་པས་སྟོང་པ་ཉིད་དང་ཐིག་ལེར་མི་གནས་པར་ཡི་གེ་གཉིས་ཀྱི་གཟུགས་སུ་མངོན་པར་བལྟ་བར་འགྱུར་རོ། །དེ་ནས་གཡས་ཀྱི་སྲིན་ལག་གིས་དམ་ཚིག་ལ་རེག་ཅིང་ཆོས་འབྱུང་བསྣོལ་བ་བྲི་བར་བྱ་སྟེ། ཟུར་དྲུག་ལ་གོ་ཆའི་ཡི་གེ་དྲུག་བརྗོད་པས་ཡི་གེ་དེ་དག་གིས་མཚན་པར་བྱ་
བ་དང་། དེའང་གཡས་ཀྱི་མཐིལ་གྱི་ས་བོན་ཧཱུྃ་ལས་མངོན་པར་སྐྱེས་པའི་རྒྱུན་བདུད་རྩིར་འཛག་པ་ནས་འབྱུང་བའོ། །དེ་བཞིན་དུ་གཡོན་པའི་སྲིན་ལག་གིས་དམ་ཚིག་ཅན་ལ་རེག་ཅིང་ཆོས་འབྱུང་བསྣོལ་བ་སྔར་གྱི་རྗེས་སུ་བྲིས་པས་འོག་ཏུ་གསལ་བར་བྱ་སྟེ། ཟུར་དྲུག་ལ་གོ་ཆ་མའི་ཡི་གེ་དྲུག་བརྗོད་
པས་ཡི་གེ་དེ་དག་གིས་མཚན་པར་བྱ་བ་དང་། དེའང་གཡོན་གྱི་མཐིལ་གྱི་སྔར་གྱི་ས་བོན་ཨ་ལས་མངོན་པར་སྐྱེས་པའི་རྒྱུན་བདུད་རྩི་འཛག་པ་ནས་འབྱུང་བའོ། །མཐར་གཡས་དང་གཡོན་གྱིས་ཡབ་དང་ཡུམ་གྱི་ཆོ་གའི་དཀྱིལ་འཁོར་གྱི་དབུས་སུ་རེག་པས་ཧོ་དང་བཾ་ལྷན་ཅིག་གནས་
པ་ཡང་བལྟས་ལ། སེ་གོལ་གཏོགས་ཏེ་ཧ་ཅང་མི་རིང་བའི་སྟེང་གི་མཁར་འཕགས་པར་བཞུགས་སོ། །དེ་རྗེས་གཡས་གཡོན་སྙིང་གར་ཟླ་བ་ཉི་མ་དང་། །ཆུ་སྐྱེས་དབུས་ནས་སྐུ་གསུང་ཐུགས་བལྟས་མིང་བརྗོད་པས། །དཀར་བསིལ་དམར་ཚ་རབ་ཏུ་སྔོ་འཇམ་འོད་རེག་ཕྱིར། །དྲི་མེད་རབ་བཞུ་
ལྷ་ཚོགས་སྦྱོར་བས་བདུད་རྩི་དབབ། །དེ་ལྟར་འོད་ཀྱིས་བསྐུལ་བ་ན་དབུས་ཀྱི་ཡི་གེ་ལས་གྱེན་དུ་འགྲེང་བའི་ཟེར་གྱི་ཆོ་ག་དང་བཅས་པའི་བཅོམ་ལྡན་འདས་ཡབ་ཡུབ་སྤྱན་དྲངས་ནས་ནམ་མཁའི་ཡི་གེ་ལ་བསྟིམས་ཏེ། དེ་མ་ཐག་ཏུ་ལྷ་བཅུ་བཞིའི་བདག་ཉིད་དུ་གྱུར་ནས་སྙོམས་པར་
ཞུགས་པ་དང་། ཐམས་ཅད་ཀྱི་སྦྱོར་མཚམས་ནས་ཐིག་ལེ་བདུད་རྩི་རྒྱུན་ལྟུང་བས་དམ་ཚིག་བཞུ་བའི་ཁུ་བ་བསིལ་ཞིང་རྣམ་པར་དཀར་བ་གྱ་ནོམ་པར་བྱའོ། །རིམ་གྱིས་བདེ་བ་ཆེན་པོའི་རོ་མ་བཟོད་པའི་ཕྱིར་གོ་ཆ་བཅུ་བཞི་འོད་ཀྱི་རྣམ་པར་ཞུ་བ་བདག་པོ་ལ་ཐིམ་པ་དང་། དེ་ཡང་
མི་འཕྲོགས་པའི་དགའ་བས་རྣམ་པར་མྱོས་པའི་ཕྱིར་ས་བོན་གྱི་ངོ་མཚར་ཞུ་བར་བསམ་མོ། །དེ་ནས་བཾ་ཧོ་བརྗོད་པས་བསམ་གྱིས་མི་ཁྱབ་པའི་རོ་ཅན་རྣམ་པ་ཐམས་ཅད་ཕུན་སུམ་ཚོགས་པའི་ཡོན་ཏན་བྱེད་པར་བལྟའོ། །དེ་བཞིན་དུ་ཡི་གེ་དེ་ཡང་རྩ་བའི་ཡི་གེ་ལ་ཐིམ་ཞིང་དེ་ཡང་

49-1-168a

འོད་ཀྱི་གོང་བུར་ཞུ་བས་དམ་ཚིག་ལ་ཁྱབ་པར་བསྟིམས་ལ། མ་ལུས་པའི་དཀྱིལ་འཁོར་པ་ཐམས་ཅད་མཉེས་པར་གྱུར་པས་དགྱེས་པའི་རྒྱུར་བྱིན་གྱིས་བརླབས་ཏེ། རྡོ་རྗེ་ཐལ་མོའི་གར་སྒྱུར་བ་དང་ལྡན་པས་ཡང་དག་པར་མཆོད་པར་བྱའོ། །འདི་དག་ནི་ནང་གི་
དམ་ཚིག་གིས་མཆོད་པའི་ཆོ་གའོ། །ལྟེ་བའི་དབུས་ལས་བྱུང་བ་ཡིས། །དཔལ་མོ་དང་ནི་སྒྲ་ལྡན་མ། །དུང་ཅན་མ་དང་བདུད་རྩི་འཛག །དགའ་བྱེད་མ་དང་མྱོས་བྱེད་མ། །ཞིང་སྐྱོང་མ་དང་འོད་ཀྱི་དཔུང་། །སྣ་ཚོགས་གླུ་གར་རོལ་མོ་བྱེད། །རྫས་བཅུ་དག་པའི་བདུད་རྩིའི་རྒྱུན། །པདྨའི་
སྣོད་ཐོགས་མཆོད་པར་བསམ། །གཙོ་ཆེན་དུར་ཁྲོད་བཅས་དཀྱིལ་འཁོར། །དངོས་དང་བདག་པོ་ལས་སྤྲུལ་པའི། །ཤེས་རབ་ཐབས་ལྡན་སྙོམས་ཞུག་པས། །ཟག་མེད་བདེ་ཆེན་མྱོས་གྱུར་མཆོད། །དགའ་བ་ཆེན་པོ་འོད་སྐྱེད་དེ། །ལུས་ཅན་ཀུན་གྱི་སྡུག་བསྔལ་བསལ། །
སླར་འདུས་ཆགས་པ་ཆེན་པོའི་རོ། །སད་པར་བྱས་ཏེ་སྙིང་རྗེས་བསླང་། །འདི་དག་ནི་གསང་བ་དང་དེ་ཁོ་ན་ཉིད་ཀྱི་མཆོད་པའི་ཁྱད་པར་རོ། །དེའི་འོག་ཏུ་སྡིག་པ་བཤགས་པ་ལ་སོགས་པ་རང་ཉིད་ཀྱི་ཕྲིན་ལས་ལ་ཉེ་བར་སྦྱར་བར་བྱ་སྟེ། འབྲས་བུ་མི་བཟད་རང་བཞིན་མི་དགེ་དཔག་མེད་
དང་། །བགྱི་བ་མ་ལགས་ཐུབ་པའི་བཀའ་ལས་འདས་གྱུར་གང་། །ཟབ་མོ་ལེགས་སྔགས་དམ་ཚིག་རྡོ་རྗེའི་རྒྱ་དྲལ་བ། །རིང་ནས་གང་བསགས་སྡིག་པའི་ཕུང་པོ་དེ་རིང་བཤགས། །དཀྱིལ་འཁོར་བདག་པོ་རྒྱལ་བ་ཡབ་ཡུམ་འགྲོ་དོན་བརྩོན། །ལྷ་ཚོགས་སྲས་མང་དེ་ཡི་
རྗེས་འཇུག་ཕྲིན་ལས་བྱེད། །སྔགས་འཆང་རྣམས་ཀྱང་ཉིན་རེ་མཆོད་པའི་ལས་བརྩོན་པ། །མ་ལུས་ངོ་མཚར་བསོད་ནམས་རྒྱ་མཚོ་རྗེས་ཡི་རང་། །ཁྲག་འཐུང་ཡེ་ཤེས་དཀྱིལ་འཁོར་ལྷ་ཚོགས་གསལ་བ་ལ། །ཐུགས་རྗེའི་རྒྱུན་གྱིས་ཟག་མེད་སྙོམས་འཇུག་རོལ་པ་དང་། །འབར་
བའི་འོད་བཀྱེ་གསང་སྔགས་རྒྱལ་པོ་བཀའ་བསྒོ་ཞིང་། །བླ་མེད་ལམ་སྟོན་ཆོས་ཀྱི་འཁོར་ལོ་བསྐོར་བར་བསྐུལ། །སྟོང་པར་བཞུགས་དང་ཧ་ཅང་མི་བསྙེལ་ཞི་བ་དང་། །སྒྲུབ་པོ་གང་ཞིག་དམ་ཚིག་མེད་དང་བག་མེད་ལ། །སྡང་མཛད་སྙོམས་མཛད་མི་སྣང་སྟོན་པར་བཞེད་

49-1-168b

རྣམས་ལ། །གདུང་བས་ཇི་སྲིད་དངོས་གྲུབ་བར་དུ་བརྟན་བཞུགས་གསོལ། །སྐུ་གསུང་རང་བཞིན་རལ་པ་གཅིག་མཆོག་སྟོན་པ་དང་། །དེ་ཡི་ཉེར་བསྟན་རིམ་གཉིས་བདུད་རྩིའི་རྒྱུན་འདྲའི་ཆོས། །རྗེས་འཇུག་བློ་བཟང་གོ་ཆ་བཟང་ལ་རྟུལ་ཕོད་པ། །མཉམ་མེད་སྐྱབས་མཆོག་རིན་ཆེན་
གསུམ་ལ་བདག་སྐྱབས་མཆི། །ཤིན་ཏུ་ངོ་མཚར་དེ་ཉིད་སྙིང་པོས་ཀུན་ཁྱབ་ཀྱང་། །མ་རྟོགས་སྡུག་བསྔལ་རྣམ་མང་སྐྱོན་གྱིས་གཟིངས་པ་ཡི། །མགོན་མེད་གཉིས་ཚོགས་འགྲོ་བ་ནམ་མཁའ་མཉམ་པའི་ཕྱིར། །ས་གསུམ་དབང་ཕྱུག་རྡོ་རྗེའི་སྐུ་གསུང་ཐུགས་ཐོབ་བགྱི། །རྡོ་རྗེ་
འཁོར་ལོ་པདྨ་ལས་ཀྱི་རིགས། །ཇི་བཞིན་ཇི་སྙེད་དམ་ཚིག་སྡོམ་པ་མ་ལུས་གཟུང་། །གང་ཞིག་སྔོན་ཆད་མ་སྨིན་མ་སྒྲོལ་མ་བསྒྲལ་བ། །དེ་དག་སྨིན་ཅིང་མྱུར་གྲོལ་བསྒྲལ་ཕྱིར་བདག་གིས་འབད། །ཉི་ཟླའི་སྦྱོར་བས་མུན་པ་ཟད་འགྱུར་གྲོང་མཆོག་ལམ། །བདུད་རྩི་སྒྲོན་མ་ཆུ་གཏེར་
ཡིད་འོང་རིན་པོ་ཆེ། །རྡུལ་མེད་རྡུལ་བྲལ་ཡེ་ཤེས་དབང་ཕྱུག་ཕྱག་རྒྱ་ཆེ། །བདེ་ཆེན་འོད་གསལ་མི་རྟོག་འཕྲུལ་པ་ཐོབ་པར་ཤོག །དེ་རྗེས་གཞན་ཡང་སྣ་ཚོགས་མཆོད་བྱས་བསྟོད་སྤྲིན་རྒྱ་མཚོ་རབ་བསྟོད་དེ། །དཀྱིལ་འཁོར་གཙོ་བོར་དབང་བསྐུར་ཕྱིར་ནི་གསོལ་བཏབ་རྩེ་གཅིག་ཡིད་
ཀྱིས་འདུག །དེ་ནས་དེས་སྤྲུལ་སྙིང་ག་ལས་འོངས་བདེ་གཤེགས་ལྔ་བདག་ལྷ་མོ་ལྔས། །རྣམ་དག་ཡེ་ཤེས་བདུད་རྩིའི་རྒྱུན་ཕབ་བདག་ལུས་ངག་ཡིད་དག་པར་བྱ། །རྣམ་པ་སྣ་ཚོགས་རྣམ་པར་སྨིན། །རྣམ་པར་འཇོམས་དང་རྣམ་མཚན་བྲལ། །དགའ་དང་མཆོག་དགའ་དགའ་
བྲལ་དང་། །ལྷན་ཅིག་སྐྱེས་དགའི་མཚན་ཉིད་དོ། །དགོད་དང་འཕྲད་འཁྱུད་འཁྲིག་པ་དག །རྣམ་པར་དག་ཕྱིར་བུམ་པ་དང་། །གསང་དབང་ཤེས་རབ་བདེ་བ་ཆེ། །དབང་བཞིར་རྒྱལ་པོ་ཐོབ་པར་འགྱུར། །ཐ་མའི་ཐིགས་པས་རིགས་འཇོག་པ། །གཙོ་བོ་མི་བསྐྱོད་རྡོ་རྗེས་མཚན། །
རྡོ་རྗེ་འཁོར་ལོ་ལ་སོགས་བཞི། །འཁོར་ལོ་ལ་སོགས་བཞི་ཉིད་དོ། །གཏི་མུག་རྡོ་རྗེ་སོགས་བཞི་ཡང་། །འཁོར་ལོ་ལ་སོགས་རིམ་བཞིན་ཏེ། །སྦྱོར་བའི་རྡོ་རྗེ་མ་ལ་སོགས། །མཚམས་བཞིར་བདག་པོའི་རྒྱ་ཉིད་དམ། །ཡང་ན་འཁོར་ལོ་སོགས་རིམ་ཉིད། །དེ་བཞིན་གཟུགས་མཛེས་རྡོ་རྗེ་

49-1-169a

སོགས། །འཁོར་ལོ་ལ་སོགས་རིམ་བཞིན་ཏེ། །ཕྱོགས་བཞིར་རེག་བྱ་རྡོ་རྗེ་སོགས། །གྲངས་བཞིན་རིགས་བཞིན་ཉིད་དང་ནི། །གཙོ་བོའམ་རིམ་དེ་ཉིད་བཞིན་བརྟག །དེ་ནས་མདུན་གྱི་ནམ་མཁའ་ལ་གནས་པའི་དཀྱིལ་འཁོར་དེ་ཉིད་ཆེར་དགུག་པ་དང་། གཞུག་པ་དང་། 
བཅིང་བ་དང་། མཉེས་པར་བྱ་བའི་ཕྱག་རྒྱ་དང་། སྔགས་ཀྱིས་རང་གི་དམ་ཚིག་ལ་མངོན་པར་གཞུག་པར་བྱའོ། །རྡོ་རྗེ་ཐལ་སྦྱར་མཛུབ་གཉིས་བཀུག །རྡོ་རྗེ་བསྡམས་པ་ཉིད་དང་ནི། །དེ་བཞིན་མཐེ་བོང་གཉིས་ནང་བཅུག །སླར་ཡང་གར་བསྐོར་འདི་ཡི་རྒྱ། །ཛཿཧཱུྃ་བཾ་ཧོཿདེ་ལྟར་དཔལ་ལྡན་
དམ་ཚིག་ཆེ་བཀོད་ཡེ་ཤེས་མཐུ་ལྡན་རོ་གཅིག་གིས། །སྒྲུབ་པོ་མཁས་རྣམས་ང་རྒྱལ་བརྟན་གནས་དངོས་གྲུབ་མཆོག་ཕྱིར་སླར་ཡང་ནི། །གསང་སྔགས་རྒྱལ་པོ་དོན་ཀུན་སྒྲུབ་བྱེད་ཉི་ཤུ་དྲུག་བཅས་མགལ་མེའི་ཚུལ། །དེ་བཞིན་གང་ཡང་སྔགས་རིགས་གཞན་བཟླས་རང་རང་དབུས་
གནས་འོད་འཕྲོ་བའོ། །ཨོཾ་ཡོ་ག་ཤུདྡྷཿསརྦ་དྷ་རྨཱ་ཡོ་ག་ཤུདྡྷོ྅་ཧཾ། དཔལ་ཆེན་དཔལ་མོ་ཆེན་གཉིས་ཐུགས། །འདམ་སྐྱེས་དམར་དབུས་ཧཱུཾ་དང་བཾ། །ཁ་དོག་སྔོན་པོ་དམར་བསམས་ལ། །དེ་མཐའ་ཉིད་གཉིས་སྔགས་ཀྱིས་བསྐོར། །ཨོཾ་ཨཱཿསརྦ་ཏ་ཐཱ་ག་ཏོ་གརྦྷེ་བཛྲ་ཏ་ཏྭ་ཛྙཱ་ན་
ཛཱ་ལ་ཧཱུྃ་ཕཊ་སྭཱ་ཧཱ། ཨོཾ་ཨཱཿསརྦ་ཏ་ཐཱ་ག་ཏོ་མཱ་ཏྲི་བཛྲ་ཏ་ཏྭཱ་པ་ཡ་སྥ་ར་ཎ་བཾ་ཧཱུྃ་ཕཊ་སྭཱ་ཧཱ། བཅོམ་ལྡན་འདས་ཡབ་ཡུམ་གྱི་སྔགས་སོ། །ཨོཾ་ཨཱཿབཛྲ་ཛྙཱ་ན་ཧཱུྃ་ཕཊ། ཨོཾ་ཨཱཿབཛྲོ་པ་ཡ་ཧཱུྃ་ཕཊ། བཅོམ་ལྡན་འདས་ཡབ་ཡུམ་གྱི་ཉེ་བའི་སྙིང་པོའོ། །ཨོཾ་ཨཱཿབཛྲ་ཙཀྲ་ཨ་ཧཱུྃ། 
ཨོཾ་ཨཱཿབཛྲ་རཏྣ་ཨེ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་པདྨ་ཨུ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་བི་ཤྭ་ཨེ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་མོ་ཧ་ཨཱ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་བ་ར་ན་ཨཱི་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་རཱ་ག་ཨཱུ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་དེ་ཥ་ཨཻ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་སྠི་ར་ཨོ་ཧཱུྃ་ཕཊ་
སྭཱ་ཧཱ། ཨོཾ་ཨཱཿབཛྲ་ཡོ་ག་ཨོོ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་ཛྭ་ལ་ཨཾ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་བ་ལ་ཨཿཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་རཱུ་པ་ནི་ཀ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་ཤབྡ་ཙ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་གནྡྷ་ཊ་ཧཱུཾ་ཕཊ་སྭཱ་ཧཱ། ཨོཾ་ཨཱཿབཛྲ་ར་ས་ཏ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་

49-1-169b

སྤཪྵ་པ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་དྷ་རྨ་ཡ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་ཀྵེ་ཏྲ་ཤ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་ཨཱ་ལོ་ཀ་ཀྵ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་ཨཾ་ཀུ་ཤ་རྀ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་པཱ་ཤ་རཱྀ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་བནྡྷ་ལྀ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་གྷཎྜ་ལཱྀ་ཧཱུྃ་ཕཊ་སྭཱ་ཧཱ། ལྷ་ཉི་ཤུ་རྩ་
བཞིའི་སྙིང་པོའི་སྔགས་སོ། །ཡི་གེ་རེ་རེ་འབུམ་ཕྲག་གང་ཡིན་ཡབ་ཡུམ་མཉེས་བྱེད་ཡིན་བཤད་གཞན། །པདྨ་དང་ནི་འཁོར་ལོའི་ལྷ་དང་ཁྱམས་བཅས་གོ་རིམས་བཞིན། །འབུམ་ཕྲག་གསུམ་དང་གཉིས་དང་གཅིག་བཟླས་མངོན་སུམ་གཞལ་ཡས་ཁང་། །མཐོང་བའམ་རྨི་
ལམ་བརྟན་དང་གསལ་སྣང་མཆོག་ཐོབ་ཏིང་འཛིན་མཐུ་གྲུབ་བརྟན་པའི་ལྟས། །དམིགས་པས་དུབ་པར་གྱུར་པ་དང་། །རྩེ་གཅིག་བསམ་གཏན་གོ་འཕང་གཉེར། །རིམ་པ་གཞན་ཡང་གོམས་འདོད་པས། །དེ་ནས་རྣམ་པར་མི་རྟོག་བསྒོམ། །སྤྱི་ཡི་སྙིང་ག་ལྟེ་བར་ནི། །ཟླ་
བ་པདྨ་ཉི་སྟེང་དུ། །ཧཾ་དང་ཧཱུཾ་དང་ཨཾ་ཞེས་ཀྱི། ཡི་གེ་བདེ་གསལ་མི་རྟོག་རྒྱུ། །སྣོད་བཅུད་རླུང་རྒྱུན་བརྟན་གཡོ་མཁའ། །ཉི་མ་ཟླ་བ་སྒྲ་གཅན་འཛིན། །རྨི་ལམ་ནམ་མཁའི་སྦྱོར་བ་ཡིས། །བློ་ཆེན་རྣལ་འབྱོར་བསྒྲུབ་པར་བྱ། །སྤྲོ་དང་སྡུད་དང་གཟུང་བ་དང་། །དམིགས་
བྲལ་དང་ནི་རྣམ་པར་དག །སྣ་ཚོགས་མངོན་པར་སྤྲུལ་པ་ནི། །རིམ་སོགས་བླ་མ་རྒྱས་པར་འཆད། །ཐུན་མཚམས་རྟག་ཏུ་གཏོར་མ་སྔོན་འགྲོ་ཇི་སྙེད་འབྱོར་པའི་ཚོགས་འཁོར་ལོས། །ལེགས་མཆོད་ཐལ་སྦྱར་དངོས་གྲུབ་གསོལ་བཏབ་དམ་ཚིག་མ་གྱུར་ཀུན་བཟོད་གསོལ། །
དེ་རྗེས་མདུད་པས་རྡོ་རྗེའི་གར་བསྐོར་སེ་གོལ་བརྡབས་པས་ཡེ་ཤེས་ཀྱི། །དཀྱིལ་འཁོར་མཁར་བསྐྱོད་ཤིན་ཏུ་ལེགས་ཞེས་དབུགས་ཕྱུང་མི་སྣང་གྱུར་པར་བསམ། །དེ་ལྟར་སྔགས་པ་བློ་གྲོས་ཅན་བརྟུལ་ཞུགས་ཟབ་མོ་སྤྱོད་པར་ནུས་པས་ཇི་སྐད་བཤད་པའི་ཆོ་ག་འདི་དག་ཉིན་
རེ་བཞིན་ཐུན་གསུམ་གསུམ་བསྙེན་པར་བྱེད་ཅིང་། བླ་མ་དང་ལྷག་པའི་ལྷ་ལ་མངོན་པར་དད་པ་རྒྱུན་མི་འཆད་པས་སྦྱོར་བར་བྱེད་ན། དེས་ཅི་ནས་ཀྱང་ཟླ་བ་བདུན་ལས་མི་རིང་བར་བཅོམ་ལྡན་འདས་དཀྱིལ་འཁོར་ཆེན་པོའི་ལྷ་ཉི་ཤུ་རྩ་ལྔའི་བདག་ཉིད་ཀྱི་མཚན་མ་གདོན་མི་ཟ་བར་མཐོང་བར་

49-1-170a

འགྱུར་ཏེ། འདི་ལ་ཐེ་ཚོམ་མི་བྱའོ། །ཇི་སྙེད་འདོད་པའི་དངོས་གྲུབ་དང་ལས་ཐམས་ཅད་ཀྱང་འགྲུབ་པར་འགྱུར་རོ། །ཏིང་ངེ་འཛིན་དང་ཡེ་ཤེས་དང་གཟུངས་ཀྱི་སྒོ་དཔག་ཏུ་མེད་པ་ཡང་མངོན་དུ་འགྱུར་རོ། །སྦྱིན་བདག་དང་སློབ་མའི་ཚོགས་དང་། རྒྱལ་པོ་དང་། 
བྲམ་ཟེ་ལ་སོགས་པ་ཐམས་ཅད་ཀྱི་རྗེ་དཔོན་ཐོབ་པར་འགྱུར་ཞིང་། སྐྱེ་བོ་ཐམས་ཅད་ཀྱི་ཡིད་བཞིན་གྱི་ནོར་བུ་རིན་པོ་ཆེ་ལྟ་བུར་འགྱུར་ཏེ། མདོར་ན་དེ་ནི་ལྷ་དང་མི་དང་ལྷ་མ་ཡིན་དང་བཅས་པའི་འཇིག་རྟེན་ན་སྟོན་པ་ལྟ་བུར་བལྟ་བར་བྱའོ། །དཔལ་ལྡན་བླ་མེད་རྒྱུད་རྒྱལ་དེ་ཉིད་རྒྱལ་བ་
རྣམས་ཀྱི་སྐུ་གསུང་ཐུགས་མཛད་མ་ལུས་པ་ཡི་གཏེར་གང་ཡིན། །སྔགས་འཆང་ཉིད་ཀྱི་ཤིན་ཏུ་བཀའ་བསྒོས་རྡོ་རྗེ་ཅན་དང་ཐོད་ཕྲེང་ཞེས་བྱ་མཁའ་འགྲོ་གཉིས་ཀྱིས་རིམ་གསུམ་རྒྱས་བཏབ་སྦས་པ་ནི། །མགོན་པོ་དེ་ཉིད་མཐོང་བའི་བློ་མངའ་སྤྱན་གསུམ་ལྡན་པས་གློ་བུར་ཁ་ཕྱེ་ཁྲག་འཐུང་
དཀྱིལ་འཁོར་ལས་བྱུང་བ། །སྤྲོས་མེད་རལ་པ་གཅིག་འཆང་ཇི་བཞིན་སྒྲུབ་ཐབས་བདག་གི་བླ་མ་མཆོག་གི་སྒྲོན་མེ་ལ་བརྟེན་མཐོང་། །གནས་འདིར་འབད་བྱས་པ་ལས་རྙེད་པ་ཡི། །དགེ་བ་དྲི་མེད་བདག་ལ་གང་ཞིག་ཡོད། །དེ་མྱུར་འགྲོ་འདིར་རལ་པ་གཅིག་མཆོག་གི། །
གོ་འཕང་ཉི་ཤུ་ལྔ་ཡི་བདག་ཉིད་ཤོག །དཔལ་བཅོམ་ལྡན་འདས་རལ་པ་གཅིག་པའི་དཀྱིལ་འཁོར་གྱི་འཁོར་ལོའི་སྒྲུབ་ཐབས། གྲུབ་པ་བརྙེས་པའི་པཎྜི་ཏ་ཆེན་པོ་ཨ་ཛི་ཏ་མི་ཏྲ་གུཔྟས་མཛད་པ་རྫོགས་སོ།།      །།རྣལ་འབྱོར་གྱི་དབང་ཕྱུག་ཆེན་པོ་ཤྲཱི་ཛ་ག་ཏ་མི་ཏྲ་ཨཱ་ནནྡ་
དང་། དེ་ཉིད་ཀྱི་ཞབས་ཀྱི་པདྨོའི་རྡུལ་ལ་སྤྱི་བོས་རེག་ཅིང་གསུང་གི་བདུད་རྩིའི་རོ་མྱང་བ། བོད་ཀྱི་ལོ་ཙཱ་བ་གནུབས་བྱམས་པ་དཔལ་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །།༄༅༅། །རྒྱ་གར་སྐད་དུ། ཤྲཱི་ཨེ་ཀ་ཛ་ཊཱི་བྷ་ག་ཝཱན་སཱ་དྷ་ནཾ། བོད་སྐད་དུ། དཔལ་
བཅོམ་ལྡན་འདས་རལ་པ་གཅིག་པའི་སྒྲུབ་ཐབས། རྗེ་བཙུན་རལ་པ་གཅིག་པ་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་ཚོགས་བསགས་པ་སྔོན་དུ་འགྲོ་བས་པདྨ་དང་། ཀ་པཱ་ལ་དང་། རོའི་གདན་བལྟས་ལ་དེའི་སྟེང་དུ་ཧཱུྃ་དང་བཾ་ལས་ཡབ་དང་ཡུམ་རལ་པ་

49-1-170b

གཅིག་འཕྱང་བའི་བཅོམ་ལྡན་འདས་བསྒོམ་པར་བྱའོ། །ཤར་དང་། ལྷོ་དང་ནུབ་དང་། བྱང་གི་པདྨའི་འདབ་མ་དག་ལ་ནི་རྡོ་རྗེ་འཁོར་ལོ་དང་། རྡོ་རྗེ་རིན་ཆེན་དང་། རྡོ་རྗེ་པདྨ་དང་། རྡོ་རྗེ་སྣ་ཚོགས་རྣམས་བསམ་མོ། །བྱང་ཤར་ལ་སོགས་པའི་མཚམས་བཞིར་ནི་བདུད་རྩི་ཀ་པཱ་ལ་དག་
གོ། །དེའི་ཕྱི་རོལ་དུ་ཁྱམས་ཀྱི་ཕྱོགས་བཞིར་གཏི་མུག་རྡོ་རྗེ་མ་དཀར་མོ་སྒྲོན་མ་ཐོགས་པ་དང་། བག་ཆགས་རྡོ་རྗེ་མ་སེར་མོ་རྡོ་རྗེ་ཐོགས་པ་དང་། འདོད་ཆགས་རྡོ་རྗེ་མ་དམར་མོ་ཞགས་པ་ཐོགས་པ་དང་། ཞེ་སྡང་རྡོ་རྗེ་མ་ལྗང་གུ་རལ་གྲི་ཐོགས་པ་རྣམས་བསྒོམ་མོ། །ཁྱམས་
ཀྱི་གྲྭ་བཞིར་ནི་བྱང་ཤར་ནས་བརྩམས་ཏེ་བརྟན་པའི་རྡོ་རྗེ་མ་སེར་མོ་རི་རབ་ཐོགས་པ་དང་། སྦྱོར་བའི་རྡོ་རྗེ་མ་དཀར་མོ་ཟླ་བ་ཐོགས་པ་དང་། འབར་བའི་རྡོ་རྗེ་མ་དམར་མོ་ཉི་མ་ཐོགས་པ་དང་། སྟོབས་ཀྱི་རྡོ་རྗེ་མ་ལྗང་གུ་བ་དན་ཐོགས་པ་རྣམས་དགོད་དོ། །བརྒྱད་པོ་འདི་དག་ནི་པདྨ་དང་
རོའི་གདན་ལ་རྣམ་པར་དགོད་པ་ཡིན་ནོ། །དེ་བཞིན་དུ་ཤར་དང་། ལྷོ་དང་ནུབ་དང་། བྱང་གི་སྒོ་བཞིར་ཡང་གོ་རིམས་ལྟར་རྡོ་རྗེ་ལྕགས་ཀྱུ་དང་། ཞགས་པ་དང་། ལྕགས་སྒྲོག་དང་། དྲིལ་བུ་འཛིན་པ་རྣམས་དཀར་བ་དང་། སེར་བ་དང་། དམར་བ་དང་། ལྗང་གུའི་མདོག་ཅན་རྣམས་
བསྒོམ་པར་བྱའོ། །ཇི་ལྟར་དམ་ཚིག་བསྐྱེད་པ་དང་། །ཡེ་ཤེས་སེམས་དཔའ་གཞུག་པ་ཉིད། །གསང་སྔགས་བཟླས་ཤིང་བསྒོམ་པ་དང་། །རྫོགས་པའི་རིམ་སོགས་ཆོ་ག་བཞིན། །དཔལ་བཅོམ་ལྡན་འདས་རལ་པ་གཅིག་པའི་མན་ངག་ཁུངས་ཕྱུང་བ། སློབ་དཔོན་ཆེན་པོ་མི་ཕམ་
སྦས་པས་བསྡུས་པ་རྫོགས་སོ།།      །།རྣལ་འབྱོར་གྱི་དབང་ཕྱུག་ཤྲཱི་མི་ཏྲ་དང་། གནུབས་ལོ་ཙཱ་བ་མཻ་ཏྲི་ཤྲཱིས་བསྒྱུར་བའོ།།      །།༄༅༅། །རྒྱ་གར་སྐད་དུ། ཤྲཱི་བྷ་ག་ཝཱན་ཨེ་ཀ་ཛཱ་ཊི་སཱ་དྷ་ནཾ། བོད་སྐད་དུ། དཔལ་བཅོམ་ལྡན་འདས་རལ་པ་གཅིག་པའི་སྒྲུབ་
ཐབས། རྗེ་བཙུན་རལ་པ་གཅིག་མ་ལ་ཕྱག་འཚལ་ལོ། །ཤིན་ཏུ་གསང་བའི་རྟོག་པ་ལས། །རྣལ་འབྱོར་པ་ལ་ཕན་བྱེད་པ། །བླ་མའི་དྲིན་ཐོབ་དགའ་བའི་མཐུས། །རལ་པ་གཅིག་འཕྱང་སྒྲུབ་ཐབས་བྲི། །རབ་ཏུ་བསྔགས་པའི་གནས་སུ་ནི། །བློ་མཆོག་སྒྲུབ་པ་པོ་

49-1-171a

ཡིད་ཐུལ། །དམ་ཚིག་ཚ་དང་རབ་ལྡན་པས། །དང་པོ་སྟོང་ཉིད་བསྒོམས་པར་བྱ། །ཨོཾ་སྭཱ་བྷཱ་བ་ཤུདྡྷཿསརྦ་དྷརྨཱཿསྭ་བྷ་བ་ཤུདྡྷོ྅་ཧཾ། དེ་རྗེས་འཁོར་ལོ་བཅིང་བྱས་ལ། །སྣ་ཚོགས་པད་སྟེང་ཉི་ཟླ་དང་། །ཐོད་པ་དང་བཅས་དབུགས་བྲལ་ལ། །ཧཱུྃ་ཡིག་འབར་བ་བསམ་
པར་བྱའོ། །ཧཱུྃ་བཾ་མ་ཨ་ཀྵུ་དོན་གཉིས་མཛད་དེ་ཡོངས་གྱུར་པས། །རྡོ་རྗེས་མཚན་པའི་གྲི་གུག་ཅན། །རྡོ་རྗེའི་འོད་ཀྱིས་རྣམ་བརྒྱན་པ། །ཡེ་ཤེས་སྐུ་མཆོག་བསྒོམ་པའོ། །ཨོཾ་ཨཱཿཧཱུྃ་བརྐྱང་བསྐུམ་ཞབས་གཉིས་སྟབས་མཛད་ཅིང་། །ཞལ་གསུམ་ཕྱག་བཞི་འགྱིང་བག་ཅན། །རྡོ་རྗེ་
དང་ནི་ཐོད་ཁྲག་འཛིན། །རལ་གྲི་ཨུཏྤལ་གཡས་དང་གཡོན། །ནམ་མཁའི་མདོག་ཅན་ཞི་ཞིང་ཁྲོ། །དམར་སེར་རལ་པ་གཅིག་འཕྱང་མ། །མི་ཐུང་གཟུགས་ཅན་བཞད་མོ་ཆེ། །རྡོ་རྗེ་རིན་ཆེན་རུས་པས་བརྒྱན། །སངས་རྒྱས་ལྔ་ཡིས་དབུ་བརྒྱན་ཅིང་། །དུས་གསུམ་སངས་རྒྱས་
རྟགས་འཆང་མ། །གར་གྱི་ཉམས་དགུས་དགྱེས་བཞུགས་ཉིད། །ཕྱག་རྒྱ་ལྔ་ཡིས་རྣམ་བརྒྱན་པའོ། །སྐུ་གསུང་ཐུགས་ཀྱི་དག་པ་ཡིས། །རྡོ་རྗེའི་ཕྱག་རྒྱ་བརྟན་བྱས་ལ། །ལྕགས་ཀྱུ་ཞགས་པ་ལྕགས་སྒྲོག་དང་། །རྡོ་རྗེ་དྲིལ་བུའི་རིགས་པས་སྦྱང་། །དེ་རྗེས་མཆོད་གོགས་སྔོན་འགྲོ་བས། །
སྙིང་རྗེ་ཆེན་པོ་མདུན་བཞག་སྟེ། །ས་གསུམ་རྣམ་པར་སྦྱང་བ་ཡི། །རིག་སྔགས་རྒྱལ་པོ་བཟླས་པར་བྱ། །ཧྲཱིཾ་ཏྲིཾ་ཧཱུྃ་ཕཊ། ཏིང་འཛིན་ཚོགས་པ་ཚང་བ་ཡི། །སྒྲུབ་པ་པོ་ནི་རབ་དང་ལྡན། །བླ་མ་མཉེས་བྱེད་རྣལ་འབྱོར་བརྩོན། །འབུམ་ཕྲག་བཞི་ཡིས་དངོས་གྲུབ་བྱེད། །སྡིག་
པ་ཐམས་ཅད་འཇིག་བྱེད་ཅིང་། །དོན་ཀུན་སྒྲུབ་བྱེད་གསང་སྔགས་འདི། །དེ་རྗེས་ལུས་ཅན་སྙིང་བརྩེ་བས། །གཙོ་བོ་ཉེ་བར་བྱ་ཕྱིར་བཟླས། །ཨོཾ་ཨཱཿཧཱུྃ་བཛྲོད་བྷ་བ་ཀ་ར་ཛྙཱ་ན་པྲ་ཏིཥྛ་ཏ་ཧཱུྃ་ཕཊ་སྭཱ་ཧཱ། སངས་རྒྱས་ཀུན་གྱི་ཐུགས་རྗེ་བ། །གསང་སྔགས་རྒྱལ་པོ་རྡོ་རྗེ་ཅན། །རལ་
པ་གཅིག་མཆོག་དཔལ་ལྡན་མ། །དེ་མཉེས་མན་ངག་འདི་ཡིན་ནོ། །དཔལ་བཅོམ་ལྡན་འདས་རལ་པ་གཅིག་མའི་སྒྲུབ་ཐབས་སློབ་དཔོན་ཆེན་པོ་རོལ་པའི་རྡོ་རྗེས་མཛད་པ་རྫོགས་སོ།།      །།རྣལ་འབྱོར་གྱི་དབང་ཕྱུག་མ་ཧཱ་ཤྲཱི་ཛཱ་ག་ཏ་མི་ཏྲ་ཨཱ་ནནྡ་རཱ་ཛ་དང་། གནུབས་

49-1-171b

ལོ་ཙ་བ་མཻ་ཏྲི་ཤྲཱིས་བསྒྱུར་བའོ།།      །།༄༅༅། །རྒྱ་གར་སྐད་དུ། ཤྲཱི་ཨེ་ཀ་ཛ་ཊཱི་བྷ་ག་ཝཱན་སཱ་དྷ་ན། བོད་སྐད་དུ། དཔལ་བཅོམ་ལྡན་འདས་རལ་པ་གཅིག་པའི་སྒྲུབ་ཐབས། བཅོམ་ལྡན་འདས་རལ་པ་གཅིག་པ་ལ་ཕྱག་འཚལ་ལོ། །དངོས་གསུམ་བདག་ཉིད་རྣམ་
གསུམ་པོ། །དེ་དག་དངོས་མེད་དངོས་བྲལ་བ། །མཁའ་འདྲ་དབང་པོ་གཞུ་འདྲ་བ། །འབར་བའི་སྐུ་གསུང་ཐུགས་རྟག་འདུད། །དེ་ཞལ་དེ་ཡི་བཀའ་དྲིན་གྱིས། །མཐོང་ཐོས་བྱིན་གྱིས་བརླབས་པའི་རྒྱུས། །རྒྱ་མཚོ་ཆེ་ལས་མར་བཞིན་དུ། །དད་ལྡན་རྣམས་ལ་བསྡུས་ཏེ་བསྟན། །
དེ་ལ་རེ་ཞིག་སྔགས་པས་ཕུན་སུམ་ཚོགས་པའི་གནས་སུ་འདུག་སྟེ། ཇི་སྐད་འབྱུང་བའི་ལེགས་པར་སྤྱད་པ་རྣམས་ཀྱིས་ལུས་དང་ངག་དང་ཡིད་བསྲུང་བར་བྱའོ། །དེ་ནས་དཀོན་མཆོག་གསུམ་ལ་སྐྱབས་སུ་འགྲོ་བར་བྱས་ལ་ལུས་དང་སེམས་རབ་ཏུ་སྦྱངས་པ་ལས་ངང་གིས་
འབྱུང་བའི་ཏིང་ངེ་འཛིན་རྣམ་པ་གསུམ་བསྒོམ་པ་ནི། སྣ་ཚོགས་པདྨ་མཛེས་པའི་དབུས། །མཚན་ལྡན་ཀ་པཱ་ལ་ཡི་ནང་། །རོལ་པའི་བདུད་རྩིས་རབ་གང་ལ། །མི་རོ་ཡིས་ནི་ཁ་བརྒྱན་པའོ། །དེ་སྟེང་གྲི་གུག་ཐོད་པ་དག །ཤེས་རབ་ཐབས་ཀྱི་བདག་ཉིད་བསམ། །སངས་
རྒྱས་ལ་སོགས་མཆོད་ཚོགས་དང་། །མ་ལུས་འགྲོ་བའི་དོན་བསྒྲུབས་པའོ། །འོད་ཕྲེང་དཀར་པོ་འདུས་པ་ལས། །ཆོས་ཀུན་རོ་གཅིག་ཡེ་ཤེས་དངོས། །ཡེ་ཤེས་སྙིང་པོ་ཧཱུྃ་ཡིག་བསམ། །དེ་བཞིན་དེ་ལས་རྡོ་རྗེར་གྱུར། །དེ་བཞིན་དེ་གྱུར་དཔལ་ཆེན་པོ། །བཅོམ་ལྡན་རལ་
པ་གཅིག་མཆོག་བསྒྲུབ། །དམར་མོ་གཞོན་ནུ་སྒེག་མོ་དཔལ། །རལ་གཅིག་མ་ནི་མདུན་དུའོ། །ནམ་མཁའི་མདོག་ཅན་ཞི་ཞིང་ཁྲོ། །སྣ་ཚོགས་རྒྱན་གྱིས་མཛེས་པར་སྤུད། །གྲི་གུག་ཐོད་ཁྲག་ཕྱག་གཉིས་ཀྱིས། །དམ་པར་འཁྱུད་པས་བདེ་ཆེན་འཆང་། །རལ་གྲི་ཨུཏྤལ་
གཡས་དང་གཡོན། །རྣམ་བཞི་ཡུམ་ཡང་དེ་བཞིན་ནོ། །གཡས་བརྐྱང་གཡོན་བསྐུམ་ལྷ་མོ་དང་། །དབང་ཕྱུག་འཇིགས་པ་མནན་པར་བལྟ། །དེ་ཡི་ཐུགས་ཀར་པད་དབུས་སུ། །རང་རིག་རྒྱལ་པོ་ཧཱུྃ་ཡིག་གོ། །སྙིང་པོ་གསང་བའི་སྔགས་འབྲུ་བཞི། །ཟླ་བ་སྐར་མའི་ཕྲེང་བ་བཞིན། །

49-1-172a

ཧྲཱིཾ་ཏྲིཾ་ཧཱུྃ་ཕཊ། དེ་ནས་ཚད་མེད་རྣམ་བཞི་ཡི། །མི་ཟད་ཡིད་ཀྱི་རླུང་བསྐྱོད་པས། །འོད་ཟེར་མེ་ལྕེ་ལྟར་འབར་གྱུར། །དོན་གཉིས་དོན་གསུམ་བསྒྲུབས་ནས་ནི། །བཟླས་པའི་འཁོར་ལོ་འཁོར་ལོ་བཞིན། །ས་གསུམ་ཡི་གེ་གསུམ་གྱི་འོད། །ས་གསུམ་འཁོར་ལོ་གསུམ་
དངོས་ཏེ། །དངོས་གསུམ་དག་པ་གསུམ་དུ་འདོད། །བདེ་གསལ་རྣམ་པར་མི་རྟོག་དང་། །གདོད་ནས་དེ་བཞིན་ཉིད་རྫོགས་བསྒོམ། །དེ་ནས་གཏོར་མ་སྦྱིན་པ་ནི། །ཆོ་ག་སེམས་བསྐྱེད་སྔོན་བཏང་ནས། །རང་ཉིད་ལྷ་མྱུར་བསྐྱེད་ནས་ནི། །ཆོ་ག་རྣམ་གསུམ་ཕྱག་རྒྱར་བཅས། །
དཔའ་ཆེན་རང་ཉིད་ལྷར་དྲན་ལས། །མཆོད་རྫས་བདུད་རྩི་མཆོག་གྱུར་པར། །བསམ་བྱས་སྙིང་གི་འོད་ཟེར་གྱིས། །དགུག་པའི་འགྲོན་རྣམས་ཚིམ་པར་བྱ། །ཨོཾ་ཨཱཿཧཱུྃ་ཧྲཱིཾ་ཏྲིཾ་ཧཱུྃ་བྱིན་གྱིས་བརླབ་པའོ། །ཨོཾ་ཨཱཿརཏྣ་གུ་རུ་ཤྲཱི་བྷ་ག་ཝཱན་ཨེ་ཀ་ཛ་ཊཱི་སརྦ་ཨཥྚ་དེ་བ་ཏཱ་སརྦ་དྷརྨ་བ་ལིཾ་ཏ་ཁ་ཁ་
ཁཱ་ཧི་ཁཱ་ཧི། མ་མ་རཀྵ་རཀྵ་ཧཱུྃ་ཧཱུྃ་ཕཊ་ཕཊ། ཉེ་བར་སྦྱིན་པའོ། །མ་ལུས་ལྷ་སྐུ་གསང་སྔགས་དང་། །ཏིང་འཛིན་གང་ཞིག་གང་གིས་ནི། །གང་དུ་ཇི་ལྟར་བསྒོམ་པ་ཉིད། །ཀུན་རྫོབ་དོན་དམ་མཚན་ཉིད་ཀྱིས། །རྨི་ལམ་ནམ་མཁའ་དཔེ་ཡིས་ནི། །མཁས་པས་ཆོས་རྣམ་རྟོགས་པར་
འགྱུར། །བློ་སྒྲ་དཔེ་ཞེས་བྱ་བ་ཡིས། །བསམ་བརྗོད་མཚོན་པར་མི་ནུས་པ། །སོ་སོ་རང་རིག་འོད་གསལ་ཡུལ། །གང་དེ་ནམ་མཁའི་མཚན་ཉིད་དོ། །ཇི་སྲིད་སྣ་ཚོགས་སྐུ་གསུང་ཐུགས། །འདི་དག་སྣང་བ་རང་སྣང་བ། །བདེན་བརྫུན་གཉིས་དང་གཉིས་མིན་ཚུལ། །རྨི་ལམ་
གྱི་ནི་གྲོང་སོགས་བཞིན། །དཔལ་ལྡན་ཤར་ཕྱོགས་རིག་འབྱུང་གནས། །ག་ཨུ་ར་ཡི་བྲམ་ཟེའི་གྲོང་། །མཉམ་མེད་ཚངས་དབང་གཙུག་ལག་ཏུ། །གྲོགས་པོའི་མིང་དོན་ལྡན་བསྐུལ་ནས། །རྗེས་འཛིན་འགྲོ་བའི་དོན་དུ་བྱས། །དགེ་བས་རྡོ་རྗེ་འཛིན་ཐོབ་ཤོག །རྒྱ་གར་གྱི་
སློབ་དཔོན་ཆེན་པོ་ཤྲཱི་བཛྲ་ཀཱིརྟིའི་ཞལ་སྔ་ནས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། ཤྲཱི་ཨེ་ཀ་ཛ་ཊཱི་སཱ་དྷ་ནཾ། བོད་སྐད་དུ། དཔལ་རལ་གཅིག་མའི་སྒྲུབ་ཐབས། ཇོ་མོ་བྱིན་རླབས་ཅན་ལ་ཕྱག་འཚལ་ལོ། །དྲན་པ་ཙམ་གྱིས་སེམས་ཅན་རྣམས། །

49-1-172b

ཡོ་བྱད་འཕེལ་ཞིང་བར་ཆད་ཞི། །དགྲ་རྣམས་འདུལ་ཞིང་བྱང་ཆུབ་ཉེ། །རལ་གཅིག་མ་ལ་ཕྱག་འཚལ་ལོ། །སེམས་ཅན་ཉོན་མོངས་བགོད་རྣམས་ཆུང་། །འཁོར་བར་ཡུན་རིང་གནས་པ་ལ། །མཆོག་དང་ཐུན་མོང་ཐོབ་བྱའི་ཕྱིར། །ཇོ་མོའི་སྒྲུབ་ཐབས་
བརྩམ་པར་བྱ། །དུར་ཁྲོད་ལ་སོགས་ཉམ་ང་བར། །མི་རོའི་སྟན་ལ་རབ་འདུག་ནས། །བྱང་ཆུབ་མཆོག་ཏུ་སེམས་བསྐྱེད་ནས། །དངོས་སམ་ཡང་ན་ཡིད་ཀྱིས་ཀྱང་། །ཡན་ལག་བདུན་ནམ་རྣམ་བཞི་སྒོམ། །སྟོང་པའི་ངང་ལས་པདྨའི་གདན། །རོ་དང་ཉི་མ་ཟླ་བ་ལ། །སྐད་ཅིག་
དྲན་པ་ཙམ་གྱིས་ཀྱང་། །དཔལ་ལྡན་ཆེན་མོ་སྐུ་མདོག་གནག །ཞལ་གཅིག་མ་ལ་ཕྱག་བཞི་པ། །གཡས་གཉིས་རལ་གྲི་གྲི་གུག་དང་། །གཡོན་པ་ཨུཏྤལ་ཐོད་པ་བསྣམས། །རལ་པ་སེར་པོའི་ཐོར་ཚུགས་དང་། །འཕྱང་བའི་ཚུལ་ལ་རྣམ་པར་བརྒྱན། །སྤྱན་གསུམ་ཞལ་ནི་
མཆེ་བ་གཙིགས། །འཛུམ་པའི་མདངས་དང་ལྡན་པའོ། །སྟག་གི་ཤམ་ཐབས་བྱས་པའི་ཞབས། །གཡས་པ་བསྐུམ་ནས་གཡོན་པ་བརྐྱང་། །སེམས་དཔའི་སྐྱིལ་ཀྲུང་གར་གྱིས་བཞུགས། །སྦྲུལ་དང་ཐོད་པའི་རྒྱན་ལ་སོགས། །དུར་ཁྲོད་ཆས་ཀྱིས་བརྒྱན་པར་བསྒོམ། །ཡུལ་
གསུམ་སྐུ་གསུང་ཐུགས་ཀྱི་དབང་། །ཕྱི་ནང་གསང་བའི་ཚུལ་དུ་ཡང་། །སྐད་ཅིག་ཉིད་ལ་དབང་བསྐུར་བྱ། །དེ་ལྟ་བུ་ཡི་སྦྱོར་བ་ལ། །བག་ཙམ་སྐྱོ་བར་གྱུར་པ་ན། །རིག་པ་འདི་ཡང་བརྗོད་པར་བྱ། །ཧྲཱིཾ་ཏྲིཾ་ཧཱུྃ་ཕཊ། མཚན་དང་ལྡན་པའི་ཐོད་པའམ། །ཡང་ནི་ཅི་ཡང་རུང་བའི་སྣོད། །
ཤ་ལྔ་བདུད་རྩི་ལ་སོགས་པའི། །བ་ལིཾ་རྒྱན་གྱིས་མཆོད་པ་བྱ། །རྩ་བའི་སྔགས་ཀྱི་བསྟོད་པ་འདིས། །གདངས་དང་ལྡན་པར་བསྟོད་པར་བྱ། །བྲཱ་ཏ་ནི་ནི་ཌ་ལ་ཨ་རོ་པི་ཏ། གྷྲི་ཏ་བྷྲི་ཏ་གྷྲ་ར་ཨཊྚ་ཧཱ་ས་ན་ད། པྲ་ཡ་ཧཱུྃ་ཁཊྚ་གྷཱ་ནཱི་ལ་ལ་གཟུགས་ལ་ཛ་ཏྲ་ཛུ་ཏྲ་ཨུ་གྷཱ་ནི་གྷཱ་པ་རཱ་ག་ཏི་ག་བུ་
ཛྙཱ་ཛ་ཏྲ་མ། ན་ས་ས་ཀ་པཱ་ལ།  ཀི་ཏི་ར་ཛུ་གུ་ཏཾ་ཧཾ་ཨུཏྟ་ར་ཡེ་སཾ། ཐལ་ཆེན་ཁྲག་དང་སྦྱར་བ་ཡི། །དཀྱིལ་འཁོར་དག་ཀྱང་རྟག་ཏུ་དབུལ། །ཟབ་མོའི་དོན་ཡང་བསྒོམ་བྱ་སྟེ། །དེ་ལྟ་བུ་ཡི་སྦྱོར་བ་ཡིས། །མི་ཡི་རོའམ་དུར་ཁྲོད་དམ། །གཙུག་ལག་ཁང་ངམ་ཁྱིམ་དག་ཏུ། །

49-1-173a

ལུས་ངག་ཡིད་གསུམ་འབད་པ་ཡིས། །ཞག་གཅིག་བདུན་བདུན་དང་རྩ་གཅིག །གསུམ་ལོ་གཅིག་གིས་འགྲུབ་པར་འགྱུར། །ཞལ་གྱི་དཀྱིལ་འཁོར་བསྟན་ནས་ནི། །གང་ལྟར་འདོད་པ་དྲི་བ་གྱིས། །དེ་ལྟ་བུ་ཡི་ལུང་བསྟན་ནས། །དངོས་གྲུབ་རྣམ་
པ་གཉིས་ཀྱང་ཐོབ། ཐུན་མོང་ཚེ་རིང་ནད་མེད་ཅིང་། །ཡོ་བྱད་དང་ནི་རིགས་རྒྱུད་འཕེལ། །ཀུན་གྱིས་ལྟ་བའི་འོས་སུ་འགྱུར། །མཆོག་ནི་བྱང་ཆུབ་ཐེ་ཚོམ་མེད། །དཔལ་ལྡན་ཆེན་མོ་གྲུབ་ནས་ཀྱང་། །གདུག་པའི་གནོད་སྦྱིན་རྣམ་པ་གཉིས། །དྲག་པོའི་ཤུགས་ཀྱིས་ཕྲིན་
ལས་བྱེད། །གཡས་ན་ཀཱ་ལ་ནག་པོ་ནི། །རལ་པ་ཁམ་ནག་གྱེན་དུ་བརྗེས། །སྦྲུལ་དང་ཐོད་པའི་རྒྱན་དང་བཅས། །དར་ནག་གོས་ཀྱི་ལའུ་ཅན། །ཞབས་ལ་སག་ཏི་ཡུ་ཐུང་གོན། །སྦྲུལ་ནག་གཅུས་པའི་སྐེ་རགས་བྱས། །གཡས་པ་རལ་གྲི་ཀླད་ལ་བསྐོར། །གཡོན་པ་
ཨུཏྤལ་དཀར་པོ་བསྣམས། །མཆེ་གཙིགས་ཏོག་ཏོག་རྐན་སྒྲ་ཅན། །གཡོན་ན་བྷི་ཀ་ལ་དམར་པོ། །རལ་པ་གསིགས་པས་ས་གཞི་ཁེབས། །ཁྲོ་གཉེར་དཔྲལ་བར་གཡོ་བཞིན་བསྡུས། །ལེ་བརྒན་དམར་པོ་སྐུ་ལ་གསོལ། །རྐང་པ་རྡེབ་ཅིང་གདུག་པ་འདུལ། །གྲི་གུག་གཡས་
པ་ཐོད་པ་གཡོན། །ཞལ་ནས་དྲག་པོའི་ངན་སྔགས་སྒྲོགས། །ཨ་ཡིན་ཧྲིང་སྲིང་ཧས་ཕྲིང་། །ཧང་ས་ཧུ་ཧང་ས་ཧུང་། །ཧས་ཕྲིང་ཨ་ཡིན་ཧྲྀང་སྲིང་། །གདུག་པའི་དྲག་སྔགས་འདི་དག་ཀྱང་། །གནོད་སྦྱིན་གཉིས་ཀྱི་སྲོག་ཀྱང་ཡིན། །དེ་དག་འགྲུབ་པར་གྱུར་པ་ན། །བསམས་
པ་ཙམ་གྱིས་རེངས་པ་དང་། །ཁྲོས་པ་ཙམ་གྱིས་འཆི་བར་འགྱུར། །ཐལ་མོ་བརྡབས་པའི་སྦྱོར་བ་ཡིས། །མི་མ་ཡིན་པའི་འབྱུང་པོ་རྣམས། །སེང་གེ་མཐོང་བའི་རི་དགས་བཞིན། །མཐོང་བ་ཙམ་གྱིས་འབྲོས་པར་འགྱུར། །དེ་ལྟར་ཡིན་གྱིས་གདམས་པ་འདི། །འགྲོ་
བ་རྣམས་ལ་ཕན་གྱུར་ཅིག །འདི་འདྲའི་གདམས་ངག་དམ་པ་འདི། །ཁ་ནས་མེ་འབར་ཁོང་དུ་སྦྲུལ་ཞུགས་པའི། །བུ་ངན་ཕལ་ལ་སྦྱིན་པ་མིན། །དཔལ་རལ་པ་གཅིག་མའི་སྒྲུབ་ཐབས་འཁོར་ལོ་གནོད་སྦྱིན་དང་བཅས་པ་རྫོགས་སོ།།      །།རྗེ་གྲུབ་ཐོབ་ཆེན་པོའི་

49-1-173b

ཐུགས་དམ་གནུབས་ལོ་ཙཱ་བས་བསྒྱུར་བའོ།།      །།༄༅༅། །རྒྱ་གར་སྐད་དུ། མ་ཎི་ཨཱ་ལོ་ཀ་པ་རི་ནཱ་མ། བོད་སྐད་དུ། བསྡོ་བ་ནོར་བུའི་སྒྲོན་མ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཀྱེ་ཀྱེ་རྡོ་རྗེ་འཛིན་སོགས་བདག་དགོངས་གསོལ། །
དཔལ་ཆེན་ཁྱོད་ཀྱི་དྲིན་ཚད་ཀྱིས། །བདག་ཅག་ཉོན་མོངས་དགྲ་ལས་རྒྱལ། །ལེགས་སོ་མགོན་པོ་ཁྱོད་ལེགས་སོ། །ཨེ་མ་ཧོ་རྡོ་རྗེའི་ཐུགས་སངས་རྒྱས། །ཨེ་མ་ཧོ་ཨེ་ཝཾ་རྡོ་རྗེའི་ཆོས། །ཨེ་མ་དེ་སྒྲུབ་དགེ་འདུན་ཚོགས། །སྐྱབས་གསུམ་རྡོ་རྗེ་གཅིག་ཁྱོད་འདུད། །
ས་གསུམ་མཁའ་སྤྱོད་གནས་གསུམ་དང་། །སྒོ་གསུམ་རྡོ་རྗེ་སྐུ་གསུང་ཐུགས། །མངོན་གསུམ་ཟབ་ཞི་དྲི་བྲལ་དུ། །སྟོན་པ་ཁྱོད་ལ་བདག་དགའོ། །དེ་ཕྱིར་བདག་དང་འགྲོ་ཀུན་གྱིས། །བགྱིས་དང་བགྱིད་འགྱུར་དགེ་ཆེན་འདི། །འོད་གསལ་བདེ་ཆེན་རྣམ་མི་རྟོག །སྐུ་
གསུམ་རྣམ་དག་མཐར་ཕྱིན་ཤོག །སྐྱེ་ཞིང་སྐྱེ་བ་ཀུན་དུ་ཡང་། །རིགས་སུ་སྐྱེ་དང་དམ་ཚིག་ཅན། །ལག་ན་རྡོ་རྗེ་དྲིལ་འཛིན་ཅིང་། །ཟག་མེད་བདུད་རྩི་འཐུང་བར་ཤོག །དྲི་མེད་རང་འབྱུང་སྐྱོབ་བདེ་དང་། །དགའ་བདེ་འདུས་མ་བྱས་སྔགས་ཟབ། །དཀྱིལ་འཁོར་མཆོག་
ཚོགས་མི་སླུ་བའི། །བདེན་པས་དངོས་གྲུབ་མཆོག་ཐོབ་ཤོག །རྡོ་རྗེ་ཐེག་པའི་བསྔོ་བ་ནོར་བུའི་སྒྲོན་མ། སློབ་དཔོན་མི་ཕམ་ཟླ་བས་མཛད་པ་རྫོགས་སོ།།      །།རྒྱ་གར་གྱི་པཎྜི་ཏ་སུ་ཤྲཱི་ཤཱནྟི་དང་། བོད་ཀྱི་ལོ་ཙཱ་བ་བྱམས་པའི་དཔལ་གྱིས་བསྒྱུར་བའོ།།༄༅༅། །རྒྱ་གར་སྐད་དུ། ཤྲཱི་
ཨེ་ཀ་ཛ་ཊཱི་བྷ་ག་ཝཱན་སྟོ་ཏྲ། བོད་སྐད་དུ། དཔལ་བཅོམ་ལྡན་འདས་རལ་པ་གཅིག་པ་ལ་བསྟོད་པ། བཅོམ་ལྡན་འདས་རལ་པ་གཅིག་པ་ལ་ཕྱག་འཚལ་ལོ། །དཔའ་བོ་གང་ཞིག་དུས་གསུམ་རྒྱལ་བའི་ཐུགས་རྗེ་ཐུགས་ལས་སྤྲུལ་པའི་སྐུ། །མཁའ་ལྟར་སྟོང་ཉིད་མ་ལྟར་སྙིང་རྗེ་བྱམས་སོགས་
ཚད་མེད་ལས་བྱུང་བ། །པདྨ་ཉི་དབུས་བདེ་ཆེན་ཐོབ་པ་དེ་བཞིན་མི་རོ་ཁྲོས་པ་ཡི། །སྣ་ཚོགས་གདན་སྟེངས་ཡེ་ཤེས་ཡིག་འབྲུ་ཊཾ་ལས་ཡོངས་གྱུར་ཐོད་པ་དང་། །གྲི་གུག་ལས་གྲུབ་ཧཱུྃ་དང་ཕྱག་མཚན་འགྲོ་བའི་དོན་སྒྲུབ་བྱེད་པའི་རྒྱུ། །འབར་ལས་གཏམ་བྱས་འཇིགས་

49-1-174a

པའི་སྐུ་ཆེན་ཤིན་ཏུ་མི་བཟད་རྔམས་པའི་སྐུ། །འགྱིངས་བག་རབ་བརྟན་གཟི་བརྗིད་དཔལ་འབར་ཉོན་མོངས་སྒྲིབ་ཚོགས་བསྲེག་པ་ཡི། །ཡེ་ཤེས་མེ་འབར་ཀུན་ནས་འཁྱིལ་བའི་འོད་ཟེར་དྲག་པོ་དཔུང་འཁྲིགས་ཤིང་། །སྡིག་པའི་རྔོམ་སྟབས་ཧཱུཾ་སྒྲ་དང་བཅས་དྲག་
པོའི་གད་མོ་ཅན། །ཕྱོགས་བཅུར་གར་འགྱེད་མི་ཐུབ་གཅིག་ཏུ་ལྷ་ཀླུ་ལྷ་མིན་དཔུང་ལས་རྒྱལ། །བདེ་ཆེན་རྒྱལ་པོ་གཉིས་མེད་མཆོག་དགས་རྟག་ཏུ་སྡུག་བསྔལ་རྣམས་གནོན་རྩལ། །རྒྱལ་བ་དགྲ་རྒྱལ་སྡུག་བསྔལ་སྡིག་འཇོམས་དཔའ་བོ་དཔའ་ཆེན་ལ་ཕྱག་འཚལ། །གར་
དགུའི་ཉམས་ལྡན་ཅུང་ཟད་ཞི་ལ་ཞི་ཞིང་ཁྲོ་དང་ཁྲོ་ཞིང་ཞི། །བརྟུལ་ཞུགས་མཆོག་འཛིན་སྟོབས་བཅུའི་དབང་ཕྱུག་མི་དང་ལྷ་ལས་རྣམ་པར་རྒྱལ། །ས་གསུམ་བདག་པོ་ལྷ་ཡི་ལྷར་གྱུར་བདེ་གཤེགས་མ་ལུས་ཕྲིན་ལས་བསྒྲུབས། །མི་གཡོ་མི་འགྱུར་རྟག་ཏུ་བརྟན་ནས་དེ་བཞིན་
ཉིད་ཡུལ་ཟབ་མོའི་ལམ། །སྒྱུ་མ་མཁའ་འགྲོ་ཉིད་ཀྱི་ཐུགས་ཆུད་མ་ལུས་འགྲོ་ལ་རྗེས་ཆགས་ནས། །སླར་ཡང་འདིར་ཞུགས་སྐལ་ལྡན་སྲོག་ཆགས་སྙིང་གི་པདྨོ་ཁ་ཕྱེ་ནས། །ཆགས་མེད་ཆགས་བྲལ་གཏི་མུག་ལས་གྲོལ་རབ་ཏུ་སྡང་བ་རྣམ་པར་བཤིག །ཀུན་དུ་རྟོག་
སྤངས་རབ་ཏུ་བརྟན་གནས་ངེས་པའི་སར་ཆུད་དེ་ཉིད་ཐུགས་རྗེས་ཁྲོས་པ་ཡི། །འཇིགས་བྱེད་སྐུར་བསྟན་འབར་བའི་ཞལ་གསུམ་དཀར་དང་དམར་པོ་སྔོན་པོའི་མདོག །སྤྱན་གསུམ་ཐོགས་མེད་སྨྲ་ར་སྨིན་སེར་གཡོ་བའི་བ་སྤུ་གྱེན་དུ་འགྲེང་། །དམར་ཟླུམ་སྤྱན་བཟློག་འོད་འབར་
ལས་བྱུང་བགེགས་ཚོགས་བསྲེག་པའི་མེ་སྟག་འཕྲོ། །ཡེ་ཤེས་རྣོན་པོའི་མཆེ་བ་གཉིས་གཙིགས་རྔམས་ཤིང་བཞད་པའི་ཞལ་བགྲད་དེ། །ཧ་ཧའི་སྒྲ་སྒྲོགས་རྟ་སྐད་མཚེར་བའི་ང་རོ་ཀུ་ཅོ་གད་རྒྱངས་འབྱིན། །རྟབས་ཤིང་རབ་བརྒྱལ་འཁྲུགས་པའི་སྐད་གསང་ངར་ངར་རབ་སེར་
འོ་དོད་འབོད། །གདུག་པའི་སྙིང་འབྱིན་མ་རུངས་སྣང་འཆོད་གཅོང་སྒྲ་དྲག་པོས་ས་འཁྲུགས་པ། །རྣམ་རྒྱལ་ཁྲོ་བོ་བདུད་དགྲ་དཔུང་འདུལ་ཕྲིན་ལས་ལྷ་དབང་ཁྱོད་ཕྱག་འཚལ། །དམར་སེར་འགྱིང་བའི་རལ་པ་གཅིག་བཅས་བདེ་གཤེགས་གཙོ་བོ་མི་བསྐྱོད་པས། །

49-1-174b

དྲེགས་པའི་དབུ་རྒྱན་སངས་རྒྱས་རྣམ་ལྔའི་མི་ཐོད་འཇིགས་པའི་ཕྲེང་བ་ཅན། །ཨུཏྤལ་པདྨོ་མི་ཡི་རྒྱུ་ཞགས་སྦྲུལ་གདུག་ཁྲོས་པའི་རྣ་རྒྱན་ཅན། །དེ་བཞིན་མི་རུས་རིན་ཆེན་སྦྲུལ་རྒྱན་ཤིན་ཏུ་འོད་འབར་འཇིགས་པ་ཡི། །རྒྱན་རྣམས་ཀྱིས་བརྒྱན་སིལ་སིལ་སྒྲ་སྒྲོགས་ཀུན་ནས་
བསྡིགས་པའི་སྟབས་ཀྱིས་འགྱེད་པའི་ཚུལ། །ཕྱག་གཡས་གྲི་གུག་རྡོ་རྗེ་རལ་གྲི་དེ་བཞིན་གཡོན་ཕྱག་མགོ་ཕྱེད་དང་། །ཨུཏྤལ་སྡོང་མཛེས་དྲི་བསུང་ཡིད་འཕྲོག་ཕྱོགས་བཅུར་ངད་ལྡང་ཐུགས་ཀར་འཛིན། །དཔལ་ལྡན་གཙོ་བོའི་ཐུབ་པ་ཐུབ་མཆོག་མི་ཕམ་གཅིག་པུ་རྣམ་པར་གནོན། །
སྟང་སྟབས་བགྲད་པས་ཕཊ་ཅེས་བརྗོད་ཅིང་ལྷ་ཡི་བརྟན་པོ་མི་འགུལ་ཞབས་གཡས་ནི། །དབུགས་བྲལ་གཙོ་བོའི་མགོ་བོ་ནས་བརྫིས་གཡོན་པས་གཞིབས་པའི་རྐང་གཉིས་མནན། །དཔའ་བོ་སྟག་ལྤགས་སྤུ་རྩེ་རབ་འཁྲུག་དུ་བ་འཁྱིལ་འདྲ་གསོན་པ་ནི། །བཤུས་པའི་མོད་ལ་
ད་ལྟར་ཁྲག་འཛག་གློ་བུར་སྟབས་པས་བླངས་ནས་སུ། །ཁྲོས་པས་བསྐྱོད་འདྲ་མི་ཡི་སྐྱོབ་པ་ཕ་རོལ་དཔུང་རྣམས་རྣམ་བཟློག་ཅིང་། །ཉིད་ཀྱི་ཕྱོགས་བསྲུང་ཞི་རྒྱས་དབང་དྲག་མ་ལུས་གསང་སྔགས་མངོན་པར་བསྒྲུབ། །ཐོག་མེད་རབ་ལྟར་ཤིན་ཏུ་མི་ཟློགས་ཀུན་གྱིས་མི་ཐུབ་ཐུབ་དཀའ་
བ། །ནམ་མཁའ་ཀུན་ཁྱབ་ས་ཆེན་གཡོས་མཛད་བདེ་གཤེགས་གཙོ་བོ་ཁྱོད་ཕྱག་འཚལ། །གང་གི་སྙིང་ནི་གཙོ་བོ་ཆུ་སྐྱེས་གསར་འཁྲུངས་ཕྱོགས་ཀྱིས་མཚོན་འདྲའི་ཁ་དོག་ཅན། །དཀར་སེར་དམར་ལྗང་རབ་ཏུ་གསལ་རྒྱལ་དེ་དབུས་རབ་ཏུ་འབར་བའི་ཧཱུྃ། །ཡེ་ཤེས་འོད་
འཕྲོས་འགྲོ་བའི་སྡིག་བསྲེགས་ཕྱོགས་བཅུར་མཁས་ཁྱབ་འགེངས་པ་ཡི། །མེ་ལྕེའི་ཕྲེང་དཀྲིགས་མཁའ་ལ་ཉི་ལྟར་ཀུན་ནས་རྟག་ཏུ་ལྷམ་མེ་བ། །དེ་ཡི་མཐར་ནི་ངག་གི་ཡིག་འབྲུ་སྐར་མའི་འོད་ཅན་རྣམ་པ་བཞི། །གསལ་བར་བལྟས་ཏེ་མཆོད་སོགས་སྔོན་འགྲོ་
ཇི་བཞིན་ཇི་སྙེད་ཚོགས་བསྒྲུབས་ནས། །གྲུབ་པའི་ལས་ནི་རྣམ་བཞིའི་ཕྲིན་ལས་ས་གསུམ་ལུས་ཅན་ཀུན་སྤྲོ་མཛད། །དེ་ལས་སླར་འོངས་དཀར་བསིལ་ལུས་ངག་ཡིད་ཀྱི་དྲི་མ་རྣམ་པར་དག །བྱས་ནས་རྡོ་རྗེས་བླ་མའི་ཞལ་བླངས་དེ་ཉིད་ཡེ་ཤེས་མཉམ་གཞག་སྟེ། །

49-1-175a

སྐུ་གསུང་ཐུགས་དག་དེ་བཞིན་དག་དེའང་དྲི་མེད་གང་ཡིན་གང་། །དེ་ཉིད་ཡེ་ཤེས་ཤེས་དང་ཤེས་བྲལ་མཐའ་རྣམས་ལས་དབེན་ཀུན་སྤྱོད་པ། །ནལ་འབྱོར་ཆེན་པོ་བདེ་ཆེན་དེ་ནི་བླ་མའི་དྲིན་ཐོབ་ཁྱོད་ཀྱིས་བསྒྲུབས། །བརྩེ་བའི་རྒྱུད་བསྐྱོད་བྱིན་རླབས་མེ་ནི་རྣམ་མདུན་རྣམ་
གསུམ་ཡེ་ཤེས་སྙིང་པོ་ལྕེ་མདུད་བཅས། །ས་གསུམ་ན་ཁྱབ་བདག་དང་བདག་མེད་ཡོད་མེད་དྲི་མ་མ་ལུས་ལས། །རྣམ་དབེན་དེ་ནི་རྒྱལ་བའི་སྐུ་ཞེས་འདྲེན་པ་ཁྱོད་ཀྱིས་མཐུ་སྟོན་ཅིང་། །དེ་རྗེས་དྲི་མེད་སྒྱུ་འདྲ་མཁའ་འདྲ་རྣམ་གསུམ་རྣམ་ཐར་སྒོ་སྤྱོད་པ། །སོ་
སོ་རང་རིག་སྙིང་གི་དབུས་གནས་བདེ་གཤེགས་སྙིང་པོ་རྟོགས་དཀའ་བ། །རྟོགས་མཛད་དམ་པ་དྲང་སྲོང་མི་དབང་ལྷ་ཡི་དབང་ཕྱུག་རལ་པ་གཅིག །ཀུན་རྟོག་མི་ཟད་འཆིང་བ་མི་གནས་ཤེས་རབ་ཕ་རོལ་ཕྱིན་དབང་གིས། །གཅོད་པའི་མཚོན་ཆ་ཤེས་རབ་རལ་གྲི་ཆགས་མེད་
ཆགས་བྲལ་ཨུཏྤལ་མཚན། །བཟླས་བརྗོད་དཀའ་ཐུབ་སྦྱིན་སྲེག་གཏོང་སོགས་སྒྲུབ་པའི་མཚན་མ་བརྒྱ་ཕྲག་གིས། །མཉམ་པར་མི་ནུས་གང་ཞིག་ལམ་མིན་དེ་ཉིད་དེ་ལམ་གཞན་མིན་པ། །ཤིན་ཏུ་ཟབ་མོ་གསང་བའི་ལམ་གྱུར་ཡང་དག་སྦས་པ་མངོན་རྙེད་པ། །དཔལ་གྱི་
དཔལ་དབང་སྲིད་གསུམ་ཐིབས་པོའི་མུན་འཇོམས་རལ་པ་གཅིག་འཆང་ཁྱོད། །ཕྱག་འཚལ་དཔལ་ལྡན་འཇིག་རྟེན་གསུམ་རྒྱལ་པོ། །སྐུ་གསུང་ཐུགས་དག་སྲིད་འཇོམས་པ། །ཞི་བས་མི་བསྙེལ་ཕྲིན་ལས་སྒྲུབ། །ལྷ་ཡི་ལྷ་མཆོག་རལ་པ་གཅིག །དུས་གསུམ་རྒྱལ་བའི་
ཡེ་ཤེས་ཀྱི། མཁའ་དབྱིངས་ལས་བྱུང་ལྷ་མཆོག་ཉིད། །ཡེ་ཤེས་འོད་ཟེར་སྟོང་འབར་བ། །གཞན་གྱིས་མི་ཐུབ་རལ་པ་ཐུབ་པ་གཅིག །སྣ་ཚོགས་པད་ཉི་ཐོད་པར་རོ། །ཧཱུྃ་དང་གྲི་གུག་ལས་བྱུང་བ། །ཡེ་ཤེས་སྐུ་མཆོག་ཞལ་གསུམ་ཕྱག །བཞི་ལྡན་བཅོམ་ལྡན་ཁྱོད་ཕྱག་
འཚལ། །གྲི་གུག་རལ་གྲི་ཐོད་པ་དང་། །ཨུཏྤལ་འཛིན་མཛད་འཇིགས་པའི་སྐུ། །པདྨོ་ཡི་གེ་རྣམ་པ་ལྔས། །ས་གསུམ་སྦྱོང་མཛད་ཁྱོད་ཕྱག་འཚལ། །མ་དག་པ་དང་དག་པ་དག །དྲི་མེད་དེ་ནི་ཡེ་ཤེས་དངོས། །ཐོགས་མེད་རྟག་ཏུ་བསྒྱུར་ནས་ནི། །འགྲོ་བའི་དོན་བསྒྲུབ་ཁྱོད་

49-1-175b

ཕྱག་འཚལ། །དྲན་པ་ཙམ་གྱིས་བདུད་འདུལ་ཞིང་། །དགྲ་འཇོམས་ཉོན་མོངས་ཀུན་བསྲེག་པ། །བདེ་ཆེན་སྙིང་རྗེ་སྟོང་པ་ཉིད། །རོ་མྱོང་མཛད་ལ་ཕྱག་འཚལ་ལོ། །བཅོམ་ལྡན་དཔའ་མོ་ཁྲོ་མོའི་སྐུ། །གཞོན་ནུ་སྒེག་མོ་འཇིགས་མ་ཡི། །སྐུ་གསུང་ཐུགས་ཀྱི་དགྱེས་རོལ་གཅིག །
དམ་དུ་འཁྱུད་ཕྱག་བཅས་ཁྱོད་འདུད། །གདུལ་བྱའི་རིགས་ནི་ཇི་བཞིན་དུ། །ཁྱེད་ཀྱིས་མཛད་པའི་རིམ་པ་ཡང་། །དེ་བཞིན་ཉིད་དེ་ཕུན་སུམ་ཚོགས། །རལ་པ་གཅིག་མངའ་ཁྱོད་ཕྱག་འཚལ། །བཅོམ་ལྡན་འདས་དཔལ་རལ་པ་གཅིག་པ་ལ་བསྟོད་པ། ཁ་ཆེའི་པཎྜི་ཏ་ཆེན་པོ་
བུདྡྷ་ཤྲཱི་བྷ་དྲ་དང་། བོད་ཀྱི་ལོ་ཆུང་གནུབས་བྱམས་པའི་དཔལ་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །།༄༅༅། །རྒྱ་གར་སྐད་དུ། སྭ་ཙིཏྟ་བི་ཤྲཱ་མོ་པཉྩི་བཾ་ཤ་ཏི་ཀཱ་གཱ་ཐཱ་ནཱ་མ། བོད་སྐད་དུ། རང་གི་སེམས་ངལ་སོ་བའི་མན་ངག་ཚིགས་སུ་བཅད་པ་ཉི་ཤུ་རྩ་
ལྔ་པ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཨེ་མའོ་གདོད་ནས་མ་སྐྱེས་པ། །འཁོར་དང་འདས་པའི་བྱེད་རྒྱུ་ཅན། །གཞན་མིན་རང་གི་སྙིང་དབུས་ནས། །བླ་མའི་ཞལ་ལས་ཤེས་པར་འགྱུར། །གང་སྐྱེས་གཉུག་མ་ཉིད་ཡིན་ཕྱིར། །གང་ཤར་དྲན་པ་མ་
བརྗེད་ན། །དེ་ཤར་སྟོང་པ་ཉིད་བདག་ཏུ། །རྣལ་འབྱོར་རྒྱལ་པོ་གདོན་མི་ཟ། །གང་ཤར་ཐམས་ཅད་དེ་ཡིན་ཏེ། །དེ་ནི་གང་དུའང་མ་ཤར་བའོ། །དེ་ཕྱིར་གང་སྐྱེས་དེ་མ་སྐྱེས། །མ་སྐྱེས་པ་ཉིད་སྐྱེས་པའི་ཚུལ། །གཡས་བརྐྱང་གཡོན་བསྐུམ་སྡིགས་མཛུབ་གཏད། །རྡོ་རྗེའི་ལྟ་བས་
བལྟས་ནས་ནི། །རྟ་མཆོག་དལ་བུས་འགྲོ་འོང་ལ། །གནས་ནས་དུ་མ་གཅིག་ཏུ་བྱ། །རྐང་པ་རྒྱ་མཚོ་ཆེ་ལ་གཞག །ལག་པ་ས་སྟེང་ཀུན་དུ་ཉུལ། །མིག་གཉིས་ནམ་མཁའ་བལྟ་བྱ་སྟེ། །ཡིད་ནི་གང་དུའང་མི་གཡོའོ། །སྒེག་མོའི་མེ་ལོང་སྟོབས་ཀྱི་གྱད། །ཁྲི་བཙོན་
རྒྱལ་པོའི་བཙུན་མོ་དང་། །ཕྱག་དར་བ་དང་སྨད་འཚོང་བཞིན། །གཅིག་པུར་གྲོགས་དང་འགྲོགས་པར་བྱོས། །སྟག་དང་སེང་གེ་གླང་ཆེན་དང་། །རྔ་མོ་ཁྲི་སྙན་སྤྲེའུ་དང་། །ཙནྡན་སྡོང་པོ་མི་རོ་ལྟར། །མཁས་པས་སྟོང་ཉིད་རྣལ་འབྱོར་བྱ། །རི་གཟར་ཆུ་དང་རྒྱ་མཚོ་ཆེ། །

49-1-176a

བུ་གཅིག་མ་དང་གླང་པོ་སྐྱོང་། །གངས་རི་དག་དང་ཤེལ་དག་བཞིན། །དམིགས་བྲལ་གྱུར་ནས་གཞི་ཚུགས་པའོ། །ཐོག་མ་བར་དང་མཐར་རིམ་བཞིན། །རྩ་བ་ངོ་བོ་བྱེ་བྲལ་བ། །རྨི་ལམ་གྱི་ནི་མར་མེ་བཞིན། །སྙིང་བརྩེ་མི་གཡོ་གོམས་པས་འགྲུབ། །
འགྲོ་འོང་གནས་ནི་སྐྱེ་གནས་འགག །རྣམ་དག་སྟོང་པ་ཉིད་རྣམ་གསུམ། །བདེ་ཆེན་འོད་གསལ་རྣམ་མི་རྟོག །བློ་བཟངས་རྣམས་ཀྱིས་མཉམ་པར་གཞག །སྙིང་རྗེ་ཆེན་པོ་མདུན་གཞག་སྟེ། །དེ་ཉིད་མ་ཡེངས་རྟག་བལྟ་ཞིང་། །ལྷ་དང་བླ་མའི་སྦྱོར་བ་ཡིས། །སྒྲུབ་པ་
པོ་ནི་ངལ་བསོ་བྱ། །བུ་ཉོན་ཁྱོད་གང་རྣམ་པར་རྟོག །འདིར་བདག་མ་བཅིངས་མི་གྲོལ་ཕྱིར། །མ་ཡེངས་མ་བཅོས་རང་དགར་ནི། །ཀྱེ་ཧོ་དུབ་པ་ངལ་སོ་ཅིག །གཟུགས་བརྙན་གཟུགས་དང་བྲག་ཅ་སྒྲ། །དངོས་དང་རྨི་ལམ་དྲན་པའི་ཡིད། །ཏིང་ངེ་འཛིན་དང་འབྲེལ་བ་དང་། །རྟག་ཏུ་རྒྱུན་
མི་འཆད་སྒོམ་པ། །གསེར་བཞིན་མེ་བཞིན་ནམ་མཁའ་བཞིན། །ཤེས་བྱེད་ཞི་བྱེད་དག་པར་བྱེད། །སྣང་མེད་དེ་སྣང་རྐྱེན་གྱིས་སྣང་། །ནམ་མཁའ་མེ་ལོང་ཤེལ་བཞིན་ཏེ། །ཏིང་ངེ་འཛིན་དང་ཡེ་ཤེས་དང་། །གཟུངས་ཀྱི་སྒོ་ཡིས་དེ་རྟོགས་བྱེད། །མཐོང་བ་མཉམ་གཞག་འོད་གསལ་ཏེ། །
དེ་ཚེ་དེ་མཐོང་དེ་མ་སྐྱེས། །ཤིན་ཏུ་མི་རྟོག་རྩེ་གཅིག་གནས། །གཡེང་བའི་རྡུལ་དང་བྲལ་བ་ཉིད། །རླུང་ནི་གར་འགྲོ་དེར་སེམས་འགྲོ། །དེ་ལུས་ཁྱིམ་ནང་བཙོན་བཟུང་ནས། །ཡིད་ཀྱིས་སྐྱེས་བུ་གསད་བྱས་ན། །དེ་མེད་སེམས་ནི་གང་དུ་འགྲོ། །ཐམས་ཅད་རང་བཞིན་མ་བཅོས་
པ། །ཀུན་རྟོག་ཐམས་ཅད་རྐྱེན་གྱི་དབང་། །རང་བཞིན་གསུམ་གྱིས་དེ་ཤེས་ནས། །ཀུན་རྟོག་ཀུན་རྟོག་མེད་པར་བྱེད། །མཐོང་བས་གྲུབ་དང་བཤིག་པ་ནས། །མེད་ཅེས་རྣམ་པར་རྟོག་པར་ཟད། །འདི་ལ་གདོད་ནས་ཅི་ཡང་མེད། །བུ་ཀྱེ་ནམ་མཁའ་བསྒོམ་པར་བྱོས། །ག་བུར་དང་
ནི་དེ་ཡི་དྲི། །ཕན་ཚུན་དེ་མེད་དེ་ཡང་མེད། །དེ་བཞིན་རྐྱེན་དང་རྐྱེན་བྲལ་བ། །སོ་སོ་མ་ཡིན་རང་དགར་བསྒོམ། །མཉམ་པའི་སེམས་ཀྱི་གཡོ་བ་འགོག །མི་མཉམ་དྲན་པས་འཆིང་བར་བྱེད། །དེ་ཚེ་དེ་དང་བྲལ་མཉམ་གཞག །རྣམ་པར་རྟོག་པ་གསོད་པར་བྱེད། །ཁྲུས་བྱས་ནམ་

49-1-176b

མཁའི་གོས་གྱོན་ལ། །རྣམ་པར་རྟོག་པ་སྦྱིན་སྲེག་བྱ། །དྲན་པའི་ཐལ་བ་འཇུག་ངོགས་སུ། །ཆུ་ལྷུང་ལྷན་ཅིག་སྦྱོང་བར་གྱིས། །སྣོད་བཅུད་རླུང་རྒྱུན་བརྟན་གཡོ་མཁའ། །ཉི་མ་ཟླ་བ་སྒྲག་ཅན་འཛིན། །མེ་ཁྱེར་ཆར་དང་བུང་བའི་དཔེས། །དམ་ཚིག་ཕྱག་རྒྱ་དབང་དུ་འགྱུར། །
སྣ་ཚོགས་ཡིད་ཀྱི་མེ་ཏོག་ལས། །དགའ་བ་རྣམ་བཞིའི་བཅུད་བླངས་ཏེ། །ལྷན་ཅིག་སྐྱེས་པའི་རོ་མྱངས་པས། །ཡིད་ཀྱི་སྐྱེས་བུ་ཚིམ་པར་འགྱུར། །ལུས་རླུང་རྩ་ཆེན་ཕྱག་རྒྱ་ཡིས། །ལུས་ངག་ཡིད་ནི་བཅིང་བར་བྱ། །དྲོད་ཐོབ་པ་ལ་ཐོགས་པ་མེད། །ཀུན་སྤྱོད་ངེས་པར་མི་
བྱའོ། །རྣལ་འབྱོར་པ་རང་གི་སེམས་ངལ་སོས་པར་བྱེད་པའི་མན་ངག་ཚིགས་སུ་བཅད་པ་ཉི་ཤུ་རྩ་ལྔ་པ་ཞེས་བྱ་བ་དེ་ཁོ་ན་ཉིད་རྣལ་དུ་མཚོན་པར་བྱེད་པའི་དོ་ཧ་རྫོགས་སོ།།      །།ཇོ་བོ་སྤྱན་རས་གཟིགས་དབང་ཕྱུག་ལས་མན་ངག་གི་ཚིགས་སུ་བཅད་པ་ཉིད་དངོས་སུ་གསན་
ནས་གྲུབ་པ་བརྙེས་པའི་རྣལ་འབྱོར་གྱི་དབང་ཕྱུག་ཆེན་པོ་ཤྲཱི་ཛ་ག་མི་ཏྲ་ཨཱ་ནནྡ་དང་། ལོ་ཙཱ་བ་བྱམས་པའི་དཔལ་གྱིས་དཔལ་གུ་ལང་གསེར་ཁང་གི་ནགས་ཁྲོད་ཨཾ་པ་ར་པ་ར་ཏའི་བསིལ་ཁང་དུ་བསྒྱུར་བའོ།།      །།༄༅༅། །རྒྱ་གར་སྐད་དུ། ཏྲིཾ་ཤཏྟི་ཨ་བ་བྷ་ཥ། བོད་སྐད་དུ། རྟོགས་
པ་བརྗོད་པ་སུམ་ཅུ་པ། ཇོ་བོ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །རྡོ་རྗེ་འཛིན་པ་ཚངས་དབང་གཙུག །ཆུ་སྐྱེས་ཆེ་དབུས་འཇིག་རྟེན་མགོན། །འོད་ཟེར་རྒྱུན་གྱིས་དབང་བསྐུར་བས། །ཨེ་མ་དྲི་གསུམ་དག་མཛད་རྨད། །བསྟན་པའི་ལུས་ནི་རི་བོ་འདྲ། །སྤྲོས་བྲལ་
སེམས་ནི་ནམ་མཁའ་སྟེ། །གཡོན་པའི་སེམས་ནི་རླུང་རྒྱུན་བཅིངས། །ཚུལ་འདིས་རྣལ་འབྱོར་བདག་ལེགས་གྲོལ། །ཡིད་ནི་ཁྱབ་འཇུག་ནམ་མཁའ་སྟེ། །འཁོར་ལོ་ལྔ་ཡི་རང་བཞིན་ལུས། །སྲོག་རྩོལ་ཉི་མ་ཟླ་བ་གཉིས། །བདེ་ཆེན་རྡོ་རྗེའི་ཞགས་པས་འཆིང་། །དྲི་
མ་ལྔ་ནི་ལྔ་ཡིས་སྦྱོང་། །ལུས་ངག་ཡིད་གསུམ་སྐུ་གསུང་ཐུགས། །དེ་དག་མ་བཅོས་སྐྱེ་བ་མེད། །ཨེ་མ་འདི་ནི་བསྒོམ་བྱ་གང་། །རྒྱ་མཚོའི་སྙིང་པོ་མེ་འབར་བས། །རི་རབ་སྲོག་ཤིང་ཤིང་རྟ་བརྒྱུད། །ཚངས་དབང་རྩེ་ནས་ཆར་རྒྱུན་འབབ། །ཐབས་ཀྱིས་ཐབས་བྲལ་དེ་

49-1-177a

ལ་ལྟོས། །གང་མ་རིག་པ་དེ་སྟོང་ཉིད། །ཀུན་ནས་དཀྲིས་པ་བདེ་བའི་ཚལ། །ཞེ་སྡང་འབར་བས་འོད་གསལ་ཆེ། །ལྷ་མཆོག་མི་དེ་གང་གིས་བཅིངས། །ལྟེ་བའི་མར་མེས་མུན་པ་བསལ། །སྙིང་གར་ཤེས་རབ་པདྨ་རྒྱས། །སྤྱི་གཙུག་ཡེ་ཤེས་བདེ་ཆེན་འཛག །
ད་ནི་རང་ལུས་དངོས་གྲུབ་འགྱུར། །རྩ་གསུམ་འཁོར་ལོ་འདུས་པའི་དབུས། །བདེ་ཆེན་དངས་མའི་ཐིག་ལེ་གནས། །དེ་དབུས་རྣམ་པར་མི་རྟོག་པ། །ཡེ་ཤེས་མིག་གཅིག་དྲི་མེད་ཉིད། །གཟུང་འཛིན་མུན་པར་རྟོགས་པའི་འོད། །ནམ་མཁའ་ལ་ནི་ཉི་ཤར་བཞིན། །དེར་ཡང་མི་གནས་གཞན་
དུའང་མིན། །ཀྱེ་ཧོ་ཤིན་ཏུ་ཟབ་པའི་གནས། །འཇིག་རྟེན་ཐམས་ཅད་ནམ་མཁས་བཅིངས། །ནམ་མཁའ་དེ་ཡི་སྤྲིན་གྱིས་བསྒྲིབས། །གང་ཚེ་རྟོག་པའི་སྤྲིན་དག་པ། །དེ་ཚེ་འདི་ལ་ཅི་ཞིག་སྣང་། །སྒྱུ་མས་སྒྱུ་མའི་གྲོང་ཁྱེར་བཅོམ། །སེམས་ཀྱིས་སེམས་ནི་སླུ་བ་སྟེ། །འདི་ནས་བདག་འདྲས་སླུ་
མེད་རིག །ཨེ་མ་ཧོ་ཨེ་མ་བླ་མའི་དྲིན། །འོག་ནི་ལས་ཀྱི་འཁོར་ལོས་བསྡམས། །བར་ནི་རྡོ་རྗེའི་མདུད་པས་བཅིངས། །སྟེང་དུ་ཡི་གེ་གྱེན་དུ་བསྒྱུར། །ཐབས་ནི་བདག་གིས་རང་ལ་རྙེད། །ལུས་ནི་རི་བོ་འདྲ་བྱས་ལ། །ངག་ནི་རླུང་རྒྱུན་ལྟ་བུར་བསྡམས། །སེམས་ནི་ནམ་མཁའི་ངོ་བོ་ཉིད། །དབྱེར་མེད་
ཆོས་ཉིད་ཀུན་གྱི་དངོས། །བརྟན་ལུས་ཤིང་རྟ་རབ་བཅས་པ། །གཡོ་བ་སྲོག་ཤིང་ལམ་དུ་གཞུག །དེ་ལྟར་བཅིངས་པའི་ཏིང་འཛིན་ནི། །འཆི་མེད་ནམ་མཁའི་དངོས་གྲུབ་ཐོབ། །ནམ་མཁའི་རྣལ་འབྱོར་རྣམ་མི་རྟོག །ཡང་དག་ལྷ་ནི་བདེ་བ་ཆེ། །དེ་ཡི་ཟུང་འཇུག་འོད་གསལ་ཉིད། །གནས་འདིར་
ངལ་བསོ་མཁས་པ་དག །རྡོ་རྗེ་འཛིན་པ་རྡོ་རྗེ་འཆང་། །རྡོ་རྗེ་རྒྱལ་པོ་རྡོ་རྗེ་བདེ། །རྡོ་རྗེ་སེམས་དཔའ་སེམས་དཔས་སྟོང་། །ཨེ་མ་རྡོ་རྗེ་ཀུན་རིག་པའོ། །མེ་ཏོག་མཐོང་གི་རྩི་མི་མཐོང་། །ཆབ་རོམ་མཐོང་གི་ཆུ་མ་ཡིན། །ལུས་མཐོང་བདེ་བ་བླང་བར་གྱིས། །སེམས་མཐོང་མཐོང་བ་མ་མཆིས་སོ། །
ཆུ་ནང་སྐྱེས་བུས་སུ་ཡི་བུ། །རྨི་ལམ་གྲོང་ཁྱེར་བདག་པོ་མེད། །མེ་ལོང་གཟུགས་ནི་གང་ལས་འོངས། །འགྲོ་བ་འདི་ཀུན་དེ་དང་འདྲ། །གང་ན་གནས་དང་སྐྱེ་བ་དང་། །འགག་འགྱུར་ཡུལ་རྒྱུ་དུས་མེད་པ། །ནམ་མཁའི་མཚན་ཉིད་ཆོས་འདི་ལ། །ཀྱེ་ཧོ་འཇིགས་པ་གང་ཞིག་ཡོད། །འདི་དག་

49-1-177b

སྣང་བ་སྣང་བརྙན་ཙམ། །རིག་པ་དེ་ཡང་རིག་པས་དབེན། །ཐམས་ཅད་རིག་སྙམ་ཤེས་སྙམ་སྟེ། །ཙམ་དེ་ལ་ཡང་སྙམ་ཉིད་མེད། །སྐྱེས་བུ་དོན་ཀུན་གྲུབ་པ་འདི། །ཞེ་སྡང་ཉི་མ་འོད་གསལ་ལྷ། །འདོད་ཆགས་ཟླ་བ་བདེ་བས་སྤྱོད། །གཏི་མུག་སྒྲག་ཅན་མི་རྟོག་འཇོམས། །ནམ་མཁའི་སྤྲིན་
དང་རྒྱ་མཚོའི་རླབས། །མེ་ཏོག་རྩི་དང་ག་བུར་དྲི། །མེ་ལོང་གཟུགས་དང་ཤེལ་དཀར་བཞིན། །རྣམ་རྟོག་མི་རྟོག་དངོས་དབྱེར་མེད། །འགྲོ་བ་འདི་དག་ལས་ལས་སྐྱེས། །ལས་ནི་ཉོན་མོངས་དེ་ཡི་རྒྱུ། །མཚན་མ་ཡིན་ཏེ་དེ་ཤེས་ནས། །སྐྱེས་བུ་མཚན་མེད་རྣམ་པར་གྲོལ། །རྟོག་པའི་གླང་ཆེན་
ལྕགས་ཀྱུས་དགུག །སེམས་ཀྱི་བུང་བ་རྩི་ཡིས་བསྡུ། །ཏིང་འཛིན་དང་པོ་མཚོ་ནང་རྩེ། །ཤེས་རབ་པདྨོ་ཉི་ཟེར་འབྱེད། །ཡིད་ཀྱི་མར་མེས་མུན་པ་སེལ། །བདེ་བའི་མེ་ཏོག་བུང་བས་འཇིབ། །འཛིན་པའི་རྦ་རླབ་རྒྱ་མཚོར་ཟིམ། །བདེ་སྡུག་སྤྲིན་དེ་ནམ་མཁར་དེངས། །ཡི་གེ་གསུམ་གྱི་བརྡས་མཚོན་
པས། །ཡི་གེ་མེད་པ་བདག་གིས་རྟོགས། །རྣལ་འབྱོར་རྒྱལ་པོ་ཡི་གེ་མཆོག །སེམས་ལ་གཞན་ནི་མ་མཆིས་སོ། །གང་དུ་འགྲོ་མེད་འགྲོ་བ་འདི། །གནས་ཞེས་བྱ་བར་ག་ལ་འགྱུར། །གང་མི་གནས་པ་ཆོས་ཀྱི་དབྱིངས། །དེ་ལ་ཇི་ལྟར་འགག་འགྱུར་སེམས། །རྟག་ཏུ་བྱེད་བྲལ་གཏི་མུག་མེད། །ཁྲོ་
ཁྲོ་བག་ཆགས་གཏན་བཅོམ་པ། །ཞི་བའི་དམ་པ་མྱ་ངན་འདས། །གཏེར་ཆེན་རང་ལ་ཡོད་ཤེས་ཀྱིས། །འཇིག་རྟེན་སྒྱུ་མའི་ལས་ཀྱིས་བསྒྲུབས། །སྒྱུ་མ་སྒྱུ་མའི་ཡིད་ཀྱིས་ཏེ། །འདི་ཀུན་སྒྱུ་མ་ཉིད་ཤེས་ན། །སྒྱུ་མ་ལྟ་བུར་རྣམ་པར་གྲོལ། །སྒྱུ་མར་རྟོགས་པས་བདེན་རྟོག་འཇོམས། །རྟོག་མེད་སྒྱུ་མ་ལ་
མི་གནས། །མི་གནས་འགྲོ་ལ་ཕན་བརྩོན་པས། །ཨེ་མ་ནོར་བུ་རིན་ཆེན་རྙེད། །རྟོགས་པ་བརྗོད་པ་སུམ་ཅུ་པ་ཞེས་བྱ་བ་རྫོགས་སོ།།      །།རྣལ་འབྱོར་གྱི་དབང་ཕྱུག་ཆེན་པོ་མི་ཏྲ་ཛོ་ཀི་དེ་ཉིད་ཀྱི་སྤྱན་སྔར། གནུབས་ལོ་ཙཱ་བ་བྱམས་པའི་དཔལ་གྱིས་བསྒྱུར་བའོ།།      །།༄༅༅། །རྒྱ་གར་སྐད་དུ། ཤྲཱི་ཁརྶ་པཱ་ཎི་མ་ཏྲི་སཱ་དྷ་ནཱི། བོད་སྐད་དུ། དཔལ་ཁརྶ་པཱ་ཎི་ཡབ་ཡུམ་གྱི་སྒྲུབ་ཐབས། འཕགས་པ་སྤྱན་རས་གཟིགས་ལ་ཕྱག་འཚལ་ལོ། །གང་ཞིག་སྤྱན་རས་གཟིགས་དབང་ཡུམ། །ཐུགས་རྗེའི་དབྱིངས་ལས་སྐུ་བཞེངས་པ། །ཡེ་ཤེས་ལྷ་མོ་དམར་མོ་སྒེག །དཔལ་

49-1-178a

མོ་ཉིད་ལ་ཕྱག་འཚལ་ལོ། །དེ་ལ་སྒྲུབ་པོ་དམ་ཚིག་ཅན། །གསང་སྔགས་རྒྱལ་མོ་ལ་མོས་པས། །དུར་ཁྲོད་དམར་བའི་དབུས་སུ་ནི། །ཆོ་ག་རྣམ་གསུམ་བསྒོམ་པར་བྱ། །རེ་ཞིག་སྐྱབས་སུ་འགྲོ་བ་དང་། སེམས་བསྐྱེད་ཁྱད་པར་ཅན་བསྐྱེད་ནས། དམ་ཚིག་རྣམ་ལྔའི་
མཆོད་པ་དང་ལྡན་པས། མེ་ཏོག་དམར་པོའི་མཎྜལ་བཤམས་ཏེ། བསམ་གཏན་བསྐྱོད་པའི་ཕྱག་རྒྱ་བཅས་ལ། ཐོག་མར་སྔགས་འདི་བཟླས་པར་བྱའོ། །ཨོཾ་ཨཱ་བིགྷྣཱན་ཏ་ཀྲྀ་ཏ་ཧཱུཾ་ཕཊ། འབུམ་ཕྲག་གསུམ་གྱིས་བགེགས་བསྐྲད་པར་འགྱུར་རོ། །དེ་ནས་བདག་མེད་ཆེན་མོ་ཡི། །ངང་
ལས་སྐྱེས་གྱུར་ལྷ་མོའམ། །ཡང་ན་ལྟེ་དབུས་སྤྲུལ་པའི་ནང་། །ཆོས་འབྱུང་པདྨ་མི་རོ་ལའོ། །བཾ་ལས་མངོན་གྱུར་དམར་མོ་དཔའ། །བཅུ་དྲུག་ན་ཚོད་ཤིན་ཏུ་སྒེག །ཅུང་ཟད་ཁྲོ་བའི་ཞལ་བཞད་དམ། །གྲི་གུག་ཐོད་འཛིན་ཁ་ཊྭཱཾ་བསྣམས། །མགོ་བོའི་ཕྲེང་བའི་དོ་ཤལ་བརྒྱན། །གཡོན་བསྐུམ་
གཡས་བརྐྱང་དབང་ཕྱུག་དང་། །ཨུ་མའི་ནུ་མ་མཉམ་བརྫིས་མཛད། །ཤིན་ཏུ་འོད་གསལ་འཇིགས་པ་ཡི། །མི་རུས་རྡོ་རྗེའི་ཕྲེང་བས་སྤྲས། །དྲིལ་བུ་གཡེར་ཀའི་སྒྲ་སྒྲོགས་ལའོ། །སྐྲ་གྲོལ་གཅེར་བུ་བདེ་བའི་ཉམས། །རྡོར་ཕྲེང་རྡོ་རྗེ་ཟུར་ཕུད་ལྡན། །གཡུང་དྲུང་འཁྱིལ་པས་སྨིན་མཚམས་
བརྒྱན། །སྔགས་གསུམ་གྱིས་བཀང་བྷ་གའོ། །དེ་སྙིང་པདྨོ་དམར་དབུས་སུ། །ཡེ་ཤེས་རྡོ་རྗེ་ཕྱག་རྒྱས་འཛིན། །བཾ་ཞེས་བྱ་བ་རྣམ་ཤེས་ཁྱིམ། །རྣམ་རྟོག་བསྡུས་དང་མི་རྟོག་གྲོལ། །གོ་རིམས་ཇི་བཞིན་ཇི་གནས་དང་། །ལྷག་མཐོང་རྣལ་འབྱོར་བསྒོམ་པར་བྱ། །དེ་ཚེ་དམིགས་པ་རང་དགའ་
དང་། །འཆིང་བ་ཞི་བས་བདེ་ཆེན་རྙེད། །འོད་ཟེར་བཞུ་བའི་སྦྱོར་བ་ཡིས། །སྣང་བ་ཐིམ་དང་སེམས་ཅན་ཐིམ། །ལུས་ཐིམ་སྲོག་ཐིམ་ནམ་མཁའ་ཡི། །རྣལ་འབྱོར་ཉི་ཟླ་ཟུང་དུ་འཇུག །དཔལ་འཕགས་པ་སྤྱན་རས་གཟིགས་ཀྱི་སྒྲུབ་ཐབས། རྣལ་འབྱོར་གྱི་དབང་ཕྱུག་ཆེན་པོ་ཤྲཱི་མི་ཏྲའི་གདམས་
པ་རྫོགས་སོ།།      །།གནུབས་ལོ་ཙཱ་བས་བསྒྱུར་བའོ།།      །།༄༅༅། །རྒྱ་གར་སྐད་དུ། ཤྲཱི་དྭ་ཡ་བྷྲ་ཏ་ར་ཡཀྵ་སཱ་དྷ་ནཾ། བོད་སྐད་དུ། གནོད་སྦྱིན་སྤུན་གཉིས་ཀྱི་སྒྲུབ་ཐབས། །དཔལ་རྡོ་རྗེ་འཛིན་པ་ལ་ཕྱག་འཚལ་ལོ། །གང་གི་བཀའ་སྡོད་འཇིགས་པའི་གཟུགས། གཞོན་ནུ་

49-1-178b

ཁྲོས་པ་རྔམསཔའི་ཚུལ། །གནོད་སྦྱིན་རྒྱལ་པོ་ནོར་སྦྱིན་དང་། །གྲགས་ཆེན་འཇིགས་པ་མཁས་པས་བསྒྲུབས། །དུར་ཁྲོད་ལ་སོགས་ཡ་ང་བར། །འཇིག་རྟེན་མགོན་པོའི་ལྟས་མཐོང་བས། །དེ་ཉིད་རིག་པ་དྲན་བྱས་ལ། །ཚར་གཅོད་རྗེས་སུ་འཛིན་པ་ཡིས། །བྱང་ཆུབ་སེམས་གཉིས་ཡང་དག་བསྒོམ། །
སྟོང་དང་སྙིང་རྗེ་དབྱེར་མེད་ལས། །རང་ཉིད་སྤྱན་རས་གཟིགས་ཁྲོར་བསྒོམ། །ཞབས་མཐིལ་འཁོར་ལོའི་ཧཱུཾ་གཉིས་ལས། །རི་རབ་བྱང་ནས་གནོད་སྦྱིན་དགུག །འདམ་སྐྱེས་ཐོད་པ་དབུགས་བྲལ་གྱི། །གདན་ནི་གཡས་དང་གཡོན་བསམས་ལ། །དེ་སྟེང་ཟར་མ་ལི་ཁྲིའི་མདོག །ཧཱུཾ་ལས་གནོད་སྦྱིན་
གཉིས་གཟུགས་བལྟ། །བསད་གྲི་ཙིཏྟ་གཡས་དང་གཡོན། །དེ་བཞིན་རྔ་ཆེན་མགོ་ཕྱེད་འཛིན། །རུས་པ་རིན་ཆེན་སྟག་ལྤགས་བརྒྱན། །ཁྲོ་ཞིང་ཞི་ལ་རབ་ཏུ་མཛེས། །མཆོད་ཅིང་བྱིན་རླབས་དབང་བསྐུར་དང་། །རྒྱས་གདབ་བཀའ་ལ་གདགས་པ་དང་། །དམ་ཚིག་བརྗོད་ཅིང་བསྐུལ་བ་དང་། །ཐམས་
ཅད་བདག་པོའི་བཀའ་ཡིས་བྱ། །དཀར་དམར་བ་དན་གྱིས་མཚན་པའི། །དཀར་དམར་གཏོར་མ་གཉིས་བཤམས་ལ། །རང་སྔགས་འབྲུ་གསུམ་ལྡན་པ་ཡིས། །བདུད་རྩིར་བསྒྱུར་ལ་ཐོག་མར་སྦྱིན། །དེ་རྗེས་འགྲོ་ལ་ཕན་ཡིད་ཀྱིས། །ནོར་འཕེལ་གནོད་སྦྱིན་སྲོག་སྙིང་ནི། །སྙིང་གར་བཀོད་ལ་འདོད་པས་
བཟླས། །འོད་འཕྲོས་རིན་ཆེན་ཆར་ཕབ་བསམ། །ཨོཾ་ཨཱཿཧཱུཾ་ཀཾ་བཛྲ་ཀཱ་ལ་མ་ཧཱ་དྷ་ནཾ་ཧཱུཾ་ཕཊ་སྭཱ་ཧཱ། གནོད་སྦྱིན་ཀཱ་ལའི་སྙིང་པོའོ། །དེ་བཞིན་ཕྱོགས་བཅུར་གྲགས་འདོད་པས། །གཉིས་པའི་སྙིང་གར་འབབ་པའི་སྔགས། །ཕྱོགས་བཅུར་སྣང་བྱེད་གསལ་བྱས་ལ། །གང་འདོད་འདུན་པས་རིག་པ་
བཟླས། །ཨོཾ་ཨཱཿཧཱུཾ་བཾ་བཛྲ་པི་ཀ་ལ་མ་ཧཱ་ཀཱིརྟི་ཧཱུཾ་ཕཊ་སྭཱ་ཧཱ། གནོད་སྦྱིན་བི་ཀ་ལའི་སྙིང་པོའོ། །ཡིག་འབྲུའི་གྲངས་ཀྱིས་ཁྲིར་བསྙེན་ལ། །སྦྱིན་སྲེག་བརྒྱ་རྩ་བརྒྱད་སྔོན་འགྲོས། །མགོན་པོས་སྲོག་སྙིང་དབང་མཛད་དེ། །ལས་སྒྲུབ་སྔགས་ནི་དེ་རྗེས་སོ། །ཨོཾ་ཨཱཿ་ཧྲཱིཿཤྲཱི་ཀཱ་ལ་མ་མ་དྷ་ན་པུཥྚི་ཀུ་རུ་
ཡེ་ཧཱུཾ་སྭཱ་ཧཱ། གནོད་སྦྱིན་ཀཱ་ལའི་ལས་སྔགས་སོ། །ཨོཾ་ཨཱཿ་ཧྲཱིཿཤྲཱི་བི་ཀཱ་ལ་མ་མ་པྲ་སིདྡྷཾ་སྥ་ར་ཡེ་ཧཱུཾ་སྭཱ་ཧཱ། གནོད་སྦྱིན་བི་ཀ་ལིའི་ལས་སྔགས་སོ། །གལ་ཏེ་འདི་དག་ཁྲོ་བྱེད་ནས། །བསྒོ་བའི་ལས་མྱུར་མི་བྱེད་ན། །དཔའ་མོ་རལ་པ་གཅིག་ཁྲོས་པས། །བདུན་ཕྲག་བདུན་དུ་གཟིར་བར་བྱ། །སྒྲུབ་

49-1-179a

པོ་རྣམས་ལ་ཕན་གདགས་ཕྱིར། །ཕྱི་ནང་རྙེད་གྲགས་སྒྲུབ་བྱེད་འདི། །རྐུན་པོས་རྙེད་པའི་ནོར་བཞིན་དུ། །འབད་དེ་གསང་བས་བསྒྲུབ་པར་བྱ། །དཔལ་གནོད་སྦྱིན་སྤུན་གཉིས་ཀྱི་སྒྲུབ་ཐབས། སློབ་དཔོན་ཨ་ཛི་མི་ཏྲས་མཛད་པ་རྫོགས་སོ།།      །།རྣལ་འབྱོར་གྱི་དབང་ཕྱུག་མི་
ཏྲ་ཨཱ་ནནྡ་འི་ཕྲིན་ལས་ཀྱི་ལྷའི་རིགས་གནུབས་ལོ་ཙཱ་བ་བྱམས་པའི་དཔལ་གྱིས་བསྒྱུར་བའོ།།༄༅༅། །རྒྱ་གར་སྐད་དུ། ཀུ་ལ་ལོ་ཀཱ་ནཱ་ཐ་སཱ་དྷ་ན་ཨཱ་ལོ་ཀ་ནཱ་མ། བོད་སྐད་དུ། རིགས་ཀྱི་འཇིག་རྟེན་མགོན་པོའི་སྒྲུབ་ཐབས་ཀྱི་སྣང་བ་ཞེས་བྱ་བ། འཕགས་པ་སྤྱན་རས་གཟིགས་
དབང་ཕྱུག་ཐུགས་རྗེ་ཆེན་པོ་དང་ལྡན་པ་ལ་ཕྱག་འཚལ་ལོ། །རི་བོའི་མཆོག་ལ་རབ་ཏུ་རེག །སྔགས་ཀྱི་གཟུགས་ཀྱིས་རབ་ཏུ་ཤར། །དྲི་མེད་འོད་ཟེར་སྣང་བར་མཛད། །རང་བདག་དེ་ཉིད་འཕྲོ་བ་ཡི། །མ་ལུས་རིགས་ཚོགས་རྣམ་པ་ཅན། །སྲིད་པ་ཞི་མཛད་འཇིག་རྟེན་དབང་། །ནམ་མཁའ་ཡི་ནི་
ཉི་མ་སྟེ། །འོད་ཟེར་རབ་དམར་རྒྱལ་གྱུར་ཅིག །གཉིས་མེད་སྣང་བ་སྔགས་ཀྱི་བདག །ཟབ་ཅིང་རྒྱ་ཆེའི་ཚུལ་དང་ལྡན། །རིགས་དང་རིགས་བྱུང་རྣམ་གྲངས་ཀྱིས། །གདུལ་དཀའ་རྣམས་ནི་རྣམ་པར་གདུལ། །གང་དེའི་རྗེས་མཆོག་བདག་ཉིད་ཀྱིས། །རིག་ནས་ཁྱབ་བདག་རྣམས་ཀྱིས་གསལ། །
མ་ལུས་སེམས་ཅན་ཚོགས་རྣམས་ལ། །རྣམ་པར་དག་པས་ཚིམ་མཛད་པ། །སྔགས་ཆེན་སྙིང་པོའི་ཚུལ་འཛིན་པའི། །བླ་མ་དེ་ནི་རྒྱལ་གྱུར་ཅིག །དཔལ་ལྡན་རྗེ་བཙུན་བྷྲྀངྒ་རས། །ཡང་དག་བདུད་རྩི་ཆ་རྟོགས་ནས། །དེ་མཁྱེན་རྗེས་རྟོགས་ལས་བྱུང་བའི། །གསུང་གིས་ཡོངས་སུ་ལེགས་པར་
འགྲོ། །དཔལ་ལྡན་འཇིག་རྟེན་རིགས་དབང་སྒྲས། །དེ་ཉིད་བརྒྱད་ཅུ་རྩ་ལྔ་མཆོག །དེ་དོན་རྣམ་འགྲེལ་རབ་ཏུ་གསལ། །དེ་ཉིད་གསུམ་གྱི་རིམ་པ་སྦྱོར། །རང་གི་རྗེས་རྟོགས་སྣང་བ་ཡིས། །སྒྲུབ་ཐབས་སྣང་བ་བདག་གིས་བརྗོད། །དང་པོར་པདྨའི་རིགས་དོན་ཤེས། །སློབ་མའི་གང་ཟག་རྣམ་
པར་བརྟག །འཇིག་རྟེན་སྤྱོད་པ་རྣམ་སྤངས་ཤིང་། །སེམས་ཉིད་དག་པས་མཉམ་གཞག་པ། །བླ་མ་དམ་པའི་མན་ངག་ཐོབ། །ཏིང་འཛིན་བདེ་བ་ཕུན་སུམ་ཚོགས། །ཤིན་ཏུ་བདེ་བའི་ངོ་བོ་ཉིད། །བག་ཆགས་དང་ནི་ཆགས་པ་སྤངས། །སྔགས་དང་ཕྱག་རྒྱའི་སྦྱོར་བ་ཤེས། །བརྩེ་བའི་བདུད་རྩིས་

49-1-179b

ཡོངས་སུ་གང་། །དེ་འདིར་འཇིག་རྟེན་དབང་ཕྱུག་གིས། །ཚུལ་ལྡན་པདྨའི་རིགས་ལས་བྱུང་། །འདི་ཡིས་སྤོབས་པ་རབ་ཐོབ་ནས། །སྒྲུབ་པ་པོ་ཡིས་དབེན་པའི་ཕྱོགས། །འཇིག་རྟེན་རིགས་དབང་བདག་ཉིད་ཀྱི། །མཚུངས་མེད་སྔགས་ནི་བརྩམ་པར་བྱ། །སྔོན་དུ་ཐུགས་ཀར་ཆུ་སྐྱེས་དམར། །ཟླ་
བའི་དཀྱིལ་འཁོར་དབུས་སུ་ནི། །ཉིད་ཀྱི་ས་བོན་ལས་བྱུང་བའི། །རིགས་ལྔ་འོད་ཟེར་རབ་འཕྲོ་བར། །བསྒོམ་བྱ་དེ་འོད་སྣང་བ་ཡིས། །སྐུ་ལ་སོགས་པ་རྗེས་སུ་དྲན། །དེ་ནས་ཐུགས་པད་ལས་བྱུང་བའི། །བ་སྤུའི་ཁུང་ནས་འོད་འཕྲོས་པས། །འོད་ཟེར་ནམ་མཁའི་ཁམས་སུ་གནས། །མཐའ་ཡས་
རྒྱལ་བ་རྣམ་བལྟ་ཞིང་། །བླ་མ་ཡི་དམ་དཀྱིལ་འཁོར་ལ། །དེ་མཆོད་འོད་ཟེར་ལྷ་རྣམས་ནི། །སྤྲོ་བྱ་དེ་ཡིས་ཀུན་ནས་གང་། །གུས་པས་ཐལ་མོ་སྦྱར་བར་བྱ། །དཀོན་མཆོག་གསུམ་ལ་བདག་སོགས་ཞེས། །ཚིགས་བཅད་དམ་པ་ལན་གསུམ་བརྗོད། །དེ་ནས་སེམས་ཅན་ལ་ཕན་བྱམས། །གཞན་
དོན་ངེས་དགའ་སྙིང་རྗེ་དང་། །འགྲོ་རྣམས་བདེ་ཕྱིར་དགའ་བ་དང་། །འགྲོ་བའི་སྐྱོན་ལ་བཏང་སྙོམས་བསྟེན། །རང་ཉིད་ཕྱི་ནས་འདི་ཀུན་ལ། །མཁས་པས་བསམ་པར་མི་བྱའོ། །ཕྱི་རོལ་དུ་ནི་དེ་མི་འཐོབ། །སད་དང་རྨི་ལམ་ཉམས་མྱོང་ལས། །བག་ཆགས་ས་བོན་འབའ་ཞིག་གིས། །འདུ་བྱེད་ཁམས་
གསུམ་འགྲོ་བར་བྱེད། །སོ་སོར་སྣང་བ་རྣམ་སྤང་ནི། །སེམས་ལ་དེ་བཞིན་གསལ་བ་མིན། །དེ་ཕྱིར་བདེན་མེད་གྱུར་པ་ཡིས། །འགྲོ་བ་འདི་རྣམས་རང་བཞིན་མེད། །སྲིད་གསུམ་གནས་ཀྱི་སྒྲིབ་ཀུན་ལས། །ངེས་པར་གྲོལ་བར་བསྒོམ་པར་བྱ། །ཉི་མས་མུན་པ་ངེས་བཅོམ་ལྟར། །དྲི་མེད་ནང་དུ་རྣམ་
པར་བལྟ། །བྱང་ཆུབ་སེམས་ནི་གསལ་བྱས་ནས། །བྱང་ཆུབ་སྐུ་ནི་རབ་ཏུ་འཐོབ། །མ་རིག་ལས་སྐྱེས་ང་རྒྱལ་དང་། །དེ་སྐྱེས་ཕུང་པོ་དེ་བདག་ཉིད། །ཡང་དག་སྤྱད་པར་བྱ་བའི་ཕྱིར། །གང་ལ་སྔགས་ནི་བརྗོད་པར་བྱ། །མཚམས་སྦྱོར་ལུང་བསྟན་ལས་གསུངས་པའི། །རིགས་དྲུག་པ་ཡི་རང་བཞིན་ཉིད། །
ཚིག་དྲུག་པ་ཡི་སྔགས་འདི་ཡིས། །དེ་ནི་བྲི་བར་ཤེས་བྱ་སྟེ། །དང་པོ་འདི་ལ་ཨོཾ་ཞེས་གཅིག །སྟོང་པ་ཉིད་ནི་གཉིས་པ་སྟེ། །གསུམ་པ་ཡེ་ཤེས་ཞེས་གསུངས་ཏེ། །བཞི་པ་ལ་ནི་རྡོ་རྗེ་ཞེས། །ལྔ་པ་རང་བཞིན་ཉིད་དུ་བཤད། །དྲུག་པ་ང་རྒྱལ་ཉིད་དུ་བརྗོད། །དེ་ནས་བག་ཆགས་ས་བོན་ལས། །

49-1-180a

སངས་རྒྱས་ཉིད་ཀྱི་འབྲས་བུར་སྒྲུབ། །སྔགས་པས་གཉིས་མེད་ཡིད་དེ་ཡིས། །ཁམས་གསུམ་པོ་ནི་རྟོགས་པར་བྱ། །སྒྱུ་མའི་སྤྲུལ་པ་དཔག་མེད་རྣམས། །ཕྱི་རོལ་དུ་ནི་དམིགས་པར་བྱ། །པད་ཉིའི་དཀྱིལ་འཁོར་ས་བོན་ལས། །སྐྱེས་ཤིང་ཁྲོ་བོའི་འོད་ཟེར་འགྱེད། །བགེགས་
ལ་བསྒོ་ཞིང་དེ་ནས་ནི། །དེ་ཡི་དབུས་ལ་རྡོ་རྗེའི་གུར། །ནམ་མཁའི་དབྱིངས་སུ་ཤིན་ཏུ་དཀར། །སྟེང་དུ་ས་བོན་ལས་སྐྱེས་པའི། །ཆུ་སྐྱེས་དམར་པོའི་ཟེ་འབྲུ་བཞིན། །བརྩེ་བས་ཆགས་ཤིང་འོད་དམར་གསལ། །རིགས་ཀྱི་འཇིག་རྟེན་དབང་ཕྱུག་བདག །ཧྲཱི་གི་ས་བོན་འོད་ལྕགས་ཀྱུས། །རང་ཉིད་
བསྒོམ་ཞིང་བསམ་པར་བྱ། །བསམ་གཏན་རང་བཞིན་ཡང་དག་ལྡན། །སྐད་ཅིག་ཉིད་ཀྱིས་རྫོགས་བྱང་ཆུབ། །གཟུགས་ལས་ཞལ་ནི་གཅིག་གྱུར་པ། །རྡོ་རྗེ་གསུམ་གྱི་ཐབས་ཐོབ་ཕྱིར། །དེ་ཉིད་གསུམ་དང་ཡང་དག་ལྡན། །འགྲོ་བ་གསུམ་ཟད་སྙིང་གཟུགས་མིག །སྔགས་གསུམ་ས་བོན་དགོད་པར་བྱ། །
གང་ལས་སྤྱན་ནི་གསུམ་གྱུར་པ། །འོད་དཔག་མེད་ཀྱིས་དབུ་བརྒྱན་པ། །ཞི་བ་ལ་སོགས་ལས་མཛད་ཅིང་། །རོལ་པ་ལས་ནི་ལྷ་ཡི་མཆོག །བདུད་བཞིའི་དགྲ་ནི་འདུལ་མཛད་ལས། །ཕྱག་ནི་བཞི་ཡིས་རྣམ་པར་བརྒྱན། །དམ་ཆོས་བདུད་རྩི་སྦྱིན་པའི་ཕྱིར། །ཕྱག་ན་རིན་ཆེན་རབ་ཏུ་
བརྐྱང་། །གདུག་པ་འགུགས་ཕྱིར་ཕྱག་གཡས་ན། །པདྨ་ལྕགས་ཀྱུ་གྱེན་དུ་འཕྱར། །པདྨའི་ཕྱག་དང་ཞགས་པས་མཚན། །ཕྱག་རྒྱ་གཅིག་སྦྱོར་རྒྱ་ཡིས་གདབ། །གྲོལ་བ་ནོར་བུའི་དཔལ་གྱིས་འཁྱུད། །མུ་ཏིག་ནོར་བུས་རྣམ་པར་བརྒྱན། །རྫོགས་པའི་བྱང་ཆུབ་བརྟན་པ་ཐོབ། །
སེམས་དཔའི་སྐྱིལ་ཀྲུང་ལེགས་པར་བཞུགས། །ཕྱག་རྒྱའི་པདྨ་མཉམ་སྦྱོར་ལས། །འདོད་ལྷ་དང་མཚུངས་གཟི་བརྗིད་དང་། །སྒེག་པའི་ཉམས་ལས་སྐྱེས་པའི་ཕྱིར། །རྣལ་འབྱོར་མ་རྣམས་ཐུགས་ནི་དགའ། །དངོས་ཀུན་གཅིག་གི་གཟུགས་ཉིད་ཕྱིར། །སྣ་ཚོགས་གཟུགས་ཀྱི་སྐུ་འཛིན་
པ། །ཉོན་མོངས་ཆེན་པོའི་དགྲ་འཇོམས་པའི། །དཔའ་བོའི་དབང་ཕྱུག་འཇིགས་ཆེན་པོ། །རྣལ་འབྱོར་མ་རྣམས་ཡེ་ཤེས་ཆུས། །དབང་བསྐུར་དེ་ཡི་སྟེང་དུ་གང་། །སྙིང་གའི་ས་བོན་ལྕགས་ཀྱུ་ཡིས། །ཡེ་ཤེས་སེམས་དཔའ་དགུག་པར་བྱ། །དེ་བཞིན་ཡེ་ཤེས་གཅིག་གནས་པའི། །

49-1-180b

སྔགས་ཀྱི་དེ་ཉིད་རབ་གསལ་བྱ། །ཕུང་པོ་ཁམས་དང་སྐྱེ་མཆེད་རྣམས། །རང་བཞིན་བྲལ་ཞིང་མཚན་ཉིད་གཅིག །ཟབ་དང་བརླིང་བའི་བཀོད་པ་རྣམས། །བླ་མའི་ཞལ་གྱིས་བརྗོད་པར་བྱ། །དེར་གྱུར་མཆོག་གི་ངག་གཟུགས་རྣམས། །སྲོག་གི་ཤིང་རྟ་སྟེང་དུ་འགྲོ། །ཀུན་རྫོབ་དོན་གྱི་བྱ་བྱེད་
རྣམས། །ཡི་གེའི་རྣམ་པ་ཉིད་ལས་ཐོབ། །ཧ་ཡིག་མཐའ་ལ་ཚེག་དྲག་བཅས། །རི་གཅིག་གཞན་ནི་ཧ་ཡུ་དང་། །རྫས་གསུམ་ས་བོན་གསུམ་པོ་ནི། །བརྒྱད་ཅུ་ལྔ་ལས་བསྡུ་བ་གསུངས། །བསྐྱེད་པའི་རིམ་པ་འདི་ཡིས་ནི། །རང་ལུས་ལྷ་སྐུའི་བདག་ཉིད་དོ། །ལྷ་དང་སྔགས་དང་དབྱེར་མེད་
ཅིང་། །སྔགས་ཀྱི་དེ་ཉིད་བསམ་གཏན་བྱ། །དེ་ཡི་མཐའ་ལ་དེ་བརྡ་ཡི། །གནས་ལ་ལྷ་ཡི་སྐུ་རུ་བསྒོམ། །བླ་མའི་མན་ངག་བཀའ་སྩལ་གསུངས། །བདག་གིས་དེ་ཉིད་རྗེས་སུ་མྱོང་། །སྔགས་དང་ཕྱག་རྒྱའི་སྐུ་ལ་འཁྱུད། །དང་པོར་མཚན་ཉིད་དེ་བཞིན་སྒྲུབ། །གཉིས་གསུམ་གཞན་དག་
དེ་སྤངས་ནས། །བདེ་ཆེན་དེ་ལ་ཀུན་ཁྱད་འཕགས། །དེ་བཞིན་ལྟེ་བའི་པད་མཐར་ཡང་། །སྐུ་གསུང་ཐུགས་རྣམས་གསལ་བ་ཡིས། །གཟུང་དང་འཛིན་པའི་རྟོག་པ་ཡི། །མཚན་མ་རྣམས་ཀྱིས་མ་མཚན་པ། །དེ་ཐོབ་རོ་གཅིག་ཉམས་མྱོང་གནས། །སྙིང་གའི་འཁོར་ལོའི་དབུས་སུ་འགྲོ། །བསྒོམ་
བྱའི་མཆོག་གི་ཕ་རོལ་ཕྱིན། །ཟླ་བ་ཁུ་བའི་འོད་རབ་གསལ། །དེ་མཐར་ལོངས་སྤྱོད་རྫོགས་པ་ཐོབ། །གསལ་བར་ཐོབ་པ་ཁུ་བའི་བདག །བདེ་ཆེན་གནས་སུ་འགྲོ་བར་བྱེད། །ནམ་མཁའི་ཕྱག་རྒྱ་མཆོག་ལ་བརྟེན། །ལྷན་ཅིག་སྐྱེས་ཆེན་གནས་ཞི་བའི། །རང་གི་དོན་ནི་ཡང་དག་རིག །ཟག་པ་
ཀུན་ལས་རྣམ་པར་གྲོལ། །དཔེར་ན་སྤྲིན་མེད་ནམ་མཁའ་བཞིན། །དེ་ནས་སྨོན་ལམ་གདབ་བྱ་གང་། །གཞན་གྱི་དོན་དུ་རབ་ཏུ་གྲགས། །དེ་ཡི་རང་བཞིན་ཀུན་རྫོབ་ཀྱི། །སྔགས་ཀུན་ཡིད་ཀྱིས་བཟླས་པར་བྱ། །བདག་མེད་ཆེན་པོ་དེ་ཉིད་མཆོག །ཕུང་པོའི་བུད་ཤིང་ཡང་དག་སྲེག །
ཆགས་སོགས་ས་བོན་སྦྱིན་སྲེག་བྱ། །ཕྱི་རོལ་ཚོགས་ཀྱང་སྦྱོར་བ་ལས། །པདྨའི་ཕྱག་རྒྱ་ནམ་མཁའ་ཡི། །ཕྱག་རྒྱ་རྣམ་རྒྱས་འོད་རབ་གསལ། །འཇིག་རྟེན་དབང་ཕྱུག་སྣང་བ་ནི། །ཤེས་བྱ་སྤྱོད་ལམ་གཏོར་མ་བཏང་། །བདག་གི་དེ་ཉིད་ཅེས་བཤད་པ། །བསྐྱེད་པའི་རིམ་པ་སྦྱོར་བ་

49-1-181a

ལས། །དེ་ཡི་དེ་ཉིད་གོམས་བསྟན་ནས། །སྣ་ཚོགས་པ་ཡི་རྐྱེན་ནི་མཐོང་། །འདི་ནི་རིགས་ལྔའི་རྣམ་པ་ཡི། །མངོན་རྫོགས་བྱང་ཆུབ་བསྒོམ་པར་བྱ། །རིག་པ་ཉིད་དུ་གསུངས་པ་ཡང་། །ད་ནི་ལྷ་ཡི་དེ་ཉིད་བརྗོད། །རིན་ཆེན་ཆེན་པོའི་ཡོན་ཏན་ཁྱིམ། །ཡེ་ཤེས་ཡིད་བཞིན་ནོར་
བུ་གསལ། །དཔལ་ལྡན་འཇིག་རྟེན་དབང་ཕྱུག་སྐུ། །འོད་ཟེར་ཁ་དོག་རྣམ་ལྔ་བརྟེན། །ཞི་བའི་དོན་གསུངས་བྱང་ཆུབ་ནི། །རྣམ་སྣང་དཀར་པོ་འོད་དང་ལྡན། །བདག་ཉིད་གསུང་བ་རང་བཞིན་མེད། །གཏི་མུག་ཆེན་པོའི་རིགས་ཀྱི་བདག །དབང་དགུག་དག་ལ་དམར་པོ་སྟེ། །འོད་དཔག་མེད་
དང་མཚུངས་པའི་འོད། །སེམས་ཅན་དྲང་ཕྱིར་སྙིང་རྗེ་ཅན། །འདོད་ཆགས་ཆེན་པོའི་རིགས་ཀྱི་བདག །སྔོ་སེར་དམར་བ་ཞེ་སྡང་སྟེ། །དོན་ཡོད་གྲུབ་པ་དང་མཚུངས་འབར། །བདག་གིས་དེ་ཉིད་བྱས་ནས་ནི། །རྣམ་པར་ཞེ་སྡང་སྐྱེ་བོ་འགུགས། །སེམས་ཅན་དོན་ཕྱིར་རྒྱ་ཆེན་ཉིད། །ཕྲག་དོག་ཆེན་
པོའི་རིགས་ཀྱི་བདག །བདུད་དགྲ་འཇོམས་པ་ནག་པོ་སྟེ། །མི་བསྐྱོད་པ་ནི་ནམ་མཁར་གནས། །འཁོར་བའི་རྩ་དོན་སྤྲོ་བ་ཡི། །ཞེ་སྡང་ཆེན་པོའི་རིགས་བདག་ཉིད། །མཐོ་རིས་ལ་སོགས་རེངས་བྱེད་སེར། །རིན་ཆེན་འབྱུང་ལྡན་དང་མཚུངས་སོ། །ཕྱག་རྒྱ་རྣམས་བརྟེན་གཞན་དོན་གྱིས། །
ང་རྒྱལ་ཆེན་པོའི་རིགས་ཀྱི་བདག །དེ་བཞིན་ཁྱོད་ཀྱིས་དགའ་བ་ཆེ། །ཡེ་ཤེས་ལྔ་ཡི་རྣམ་དབྱེའོ། །དེ་ནི་དག་པའི་གཞི་ལ་བྲི། །རིགས་དང་ཁ་དོག་ཉམས་དང་ལྡན། །ཕྱག་མདོག་དབུ་རྒྱན་ཕུན་སུམ་ཚོགས། །སྔོན་བཞིན་མཚན་མ་བསྟེན་ལ་བརྟེན། །རིགས་ཀྱི་འཇིག་རྟེན་དབང་ཕྱུག་
བདག །གང་གི་ལས་ཀུན་འདི་ཡིས་སོ། །བརྒྱད་ཅུ་ལྔ་གསལ་ཁྲི་ཤིང་འབྲས། །རྣལ་འབྱོར་དབང་ཕྱུག་རྣམས་ཀྱི་སྤྱོད། །དེ་ཕྱིར་གཅིག་ཏུ་བསམ་གཏན་དགའ། །རྣལ་འབྱོར་རོལ་པས་ཀུན་དུ་ཆགས། །བླ་མར་གུས་པའི་ཁུར་གྱིས་བཀུར། །དེ་ཤེས་དེ་བཞིན་རབ་གསལ་བྱ། །བླ་མ་
དང་ནི་སློབ་མ་དག །གཞན་དུ་དམ་ཚིག་ཉམས་པར་འགྱུར། །འདི་ནི་མ་ཧི་མ་ཞེས་པའི། །བསྒོམ་པ་གོམས་པའི་གསུང་གིས་བྲིས། །འདིར་བསྡུས་མཛེས་པར་གྱུར་པ་ཡིས། །བླ་མ་ལས་འོངས་ཐོབ་པ་ཡིས། །རྒྱལ་བའི་ཚུལ་གྱིས་རིགས་དེ་ཉིད། །རང་གིས་རྗེས་མྱོང་གཅིག་ཏུ་

49-1-181b

རིགས། །འཇིག་རྟེན་མཐའ་དག་དེ་ཡིས་ནི། །རྫོགས་པའི་བྱང་ཆུབ་མཆོག་ཐོབ་ཤོག །དཔལ་ལྡན་རྗེ་བཙུན་རིགས་ཀྱི་འཇིག་རྟེན་མགོན་པོའི་སྒྲུབ་ཐབས་ཀྱི་སྣང་བ་རྗེ་བཙུན་མ་ཧི་མས་མཛད་པ་རྫོགས་སོ།།      །།རྒྱ་གར་གྱི་མཁན་པོ་དྷ་རྨ་དྷ་ར་དང་། ཡར་ལུངས་པ་གྲགས་པ་རྒྱལ་
མཚན་གྱིས་དཔལ་ལྡན་ས་སྐྱའི་གཙུག་ལག་ཁང་དུ་བསྒྱུར་བའོ།།      །།༄༅༅། །རྒྱ་གར་སྐད་དུ། པཉྩ་ཤི་ཀཱ་ཊི་པི་ནི། བོད་སྐད་དུ། ལྔ་བཅུ་པའི་བཤད་པ། དཔལ་ལྡན་འཇིག་རྟེན་དབང་ཕྱུག་ལ་ཕྱག་འཚལ་ལོ། །གང་གི་སྐྱེ་བ་ལ་སོགས་འགྲོ་རྣམས་སྡུག་བསྔལ་མཐའ་
དག་འདི་ཡིས་དང་པོར་བཅོམ། །སླར་ཡང་དེ་རིང་དེ་བཞིན་མ་འོངས་རབ་གསལ་འཁོར་ལོ་གསུམ་ལ་ཁྱབ་གྱུར་པ། །ཤེས་རབ་པདྨར་ཤར་བས་ལྷན་ཅིག་སྐྱེས་པའི་དགའ་བ་རབ་ཏུ་གསལ་གྱུར་པའི། །དྲི་མེད་འཇིག་རྟེན་མགོན་ལ་ཕྱག་འཚལ་ནས་ནི་ལྔ་བཅུ་པ་ནི་རབ་བཤད་བྱ། །དེ་ནས་
འདི་ནི་ཞེས་པ་ལ་སོགས་པའི་དེ་ནས་ཞེས་པའི་སྒྲ་ནི་གཞུང་རྩོམ་པ་སྟེ། དེའི་མཐར་ཞེས་རིག་པར་བྱའོ། །འདི་ནི་ཞེས་པ་ནི་འཆད་པར་འགྱུར་བའི་རིགས་ཀྱི་འཇིག་རྟེན་དབང་ཕྱུག་གི་ངོ་བོའི་སྔགས་རབ་ཏུ་བཤད་པར་བྱའོ་ཞེས་འབྲེལ་ལོ། །དེ་བཞིན་དུ་རྣམ་པ་ནི་སྔགས་སོ། །མཆོག་ཏུ་
ཞེས་པ་ནི་དོན་དམ་པའི་བདེན་པའི་ངོ་བོ་ཉིད་དེ། གཉིས་སུ་མེད་པའི་ཡེ་ཤེས་ཀྱི་ངོ་བོ་ཉིད་དོ། །དེ་བཞིན་དུ་གསང་བ་ནི་ཉན་ཐོས་ལ་སོགས་པའི་སྤྱོད་ཡུལ་མ་ཡིན་པའི་ཕྱིར་རོ། །འཇིག་རྟེན་ཡང་དག་རྨོངས་ཞེས་པ་ནི་འཇིག་རྟེན་པ་ནི་མུ་སྟེགས་པ་རྣམས་སོ། །དེ་རྣམས་ཡང་དག་རྨོངས་
པ་ནི་རང་གི་གྲུབ པའི་མཐའི་སེམས་མེད་པར་བྱེད་པ་དེ། དེའི་ཕྱིར་ཡང་གང་དག་རྨོངས་པར་འགྱུར་བ་ནི་དེའི་སེམས་པར་འགྱུར་བའོ། །མཆོག་ནི་ཕུལ་དུ་བྱུང་བ་སྟེ། དེའི་ཕྱིར་ཡང་དག་རྨོངས་པའོ། །གང་གི་ཕྱིར་རིགས་དང་རིགས་བྱུང་མངོན་བརྗོད་པ་ནི་འཆད་པར་འགྱུར་བའི་ཕྱིར་
གང་ལས་མུ་སྟེགས་པའི་གྲུབ་མཐའི་ཕྱིར། རིགས་དང་རིགས་ལས་བྱུང་བའི་རྣམ་པར་གཞག་པ་སྟེ། དེའི་ཕྱིར་མུ་སྟེགས་བྱེད་རྣམས་ཀྱིས་དེའི་ལུགས་ཀྱིས་དེ་བཞིན་དུ་གདུལ་བྱར་གྱུར་པ་སྣ་ཚོགས་པའི་གདུལ་བྱ་གདུལ་བའི་ལུགས་ནི་དེ་བཞིན་གཤེགས་པ་རྣམས་ཀྱིས། ཡང་དག་

49-1-182a

པའི་བཞེད་པས་སོ་ཞེས་སོ། །དེའི་ཕྱིར་གང་ལས་མུ་སྟེགས་པ་རྣམས་རིགས་དང་རིགས་ལས་བྱུང་བའི་སྒྲ་ཐོས་ནས་དེ་ལས་འདིར་བཅོམ་ལྡན་འདས་ལ་དད་པ་སྐྱེ་བར་འགྱུར་ཞིང་། དད་པ་ལས་མན་ངག་ལ་རབ་ཏུ་འཇུག་པར་འགྱུར་ཏེ། བདག་ཉིད་ཆེན་པོའི་ཁྱད་པར་ཡོངས་
སུ་ཤེས་ནས་རང་གི་གྲུབ་པའི་མཐའ་ལོག་པར་ལྟ་བ་ཡོངས་སུ་སྤངས་ཏེ་ཡང་དག་པའི་ཚུལ། བདེ་བར་གཤེགས་པའི་ལམ་ལ་རབ་ཏུ་ཞུགས་པར་གྱུར་ནས་བྱང་ཆུབ་ཆེན་པོའི་ཚོགས་སོགས་པར་འགྱུར་ཏེ། དེ་ཉིད་བཅོམ་ལྡན་འདས་ཀྱིས་འདུལ་བའི་ཐབས་སོ། །དེའི་ཕྱིར། རིགས་དང་རིགས་
བྱུང་མངོན་བརྗོད་པས། །འཇིག་རྟེན་ཡང་དག་རྨོངས་པ་ཉིད་ནི་སྔགས་ཏེ། རིགས་ཀྱི་འཇིག་རྟེན་མགོན་པོའི་ངོ་བོ་ཉིད་ཀྱིས་བཤད་པར་བྱའོ་ཞེས་པ་ནི་འབྲེལ་པའོ། །འདི་ནི་དྲང་བའི་དོན་ནོ། །ད་ནི་ངེས་པའི་དོན་བརྗོད་པར་བྱ་སྟེ། སྔགས་ནི་མནྟྲ་ཞེས་པ་སྟེ་སྐྱོབ་པར་འགྱུར་བའི་ཕྱིར་མནྟྲ་
ཞེས་བརྗོད་དོ། །བྱང་ཆུབ་ཀྱི་སེམས་ཀྱི་ཐིག་ལེ་ལྷན་ཅིག་སྐྱེས་པའི་དགའ་བའི་རང་བཞིན་ནི་སྔགས་སོ། །རབ་བཤད་བྱ་བ་ནི་མངོན་སུམ་དུ་བྱ་བའོ། །དེའི་ཕྱིར་ཡང་ན་ཐིག་ལེ་ལྷན་ཅིག་སྐྱེས་པའི་ངོ་བོ། ། ཨ་ཐའི་ཨ་ཡིག་བཅོམ་ལྡན་འདས་མ་ཤེས་རབ་སྟེ། དེའི་ཕྱིར་ཕུལ་དུ་བྱུང་བའི་
ཤེས་པ་ནི་ཤེས་རབ་སྟེ། ཤེས་རབ་འདི་ཡང་ཕུལ་དུ་བྱུང་བའི་ཡེ་ཤེས་བདག་མེད་པའི་ངོ་བོ་རང་བཞིན་མེད་པ་ཞེས་བཤད་དོ། །ཡང་ན་ཨའི་ཡི་གེ་ཆོས་ཐམས་ཅད་ཀྱི་སྒོ་ཞེས་བྱའོ། །ཐ་ཡིག་ནི་བཅོམ་ལྡན་འདས་ཉིད་དེ་ཐབས་སོ། །ཅིའི་ཕྱིར་གསུངས་ན། ཐབས་དང་ཤེས་རབ་ཀྱི་བདག་ཉིད་
ཅེས་བྱ་བའི་དོན་ནོ། །ཐིག་ལེ་ཁུ་བའི་ཚུལ་གྱིས་ཐབས་ཀྱི་ངོ་བོ་ཉིད་དོ། །འདིར་ཡང་ལྷན་ཅིག་སྐྱེས་པའི་དགའ་བ་ནི་ཤེས་རབ་ཀྱི་ངོ་བོ་ཉིད་དོ། །འདི་ནི་ཞེས་པའི་ཨ་ཡིག་ནི་དབང་ཕྱུག་གོ། །དམ་པ་ཨི་དཾ་ཞེས་པ་ཡང་དག་པར་རྫོགས་པའི་བྱང་ཆུབ་ཀྱི་མཚན་ཉིད་དབང་ཕྱུག་སྟེ། དམ་
པ་ནི་སྟེར་བར་བྱེད་པའི་ཕྱིར་རོ། །ཨི་དཾ་ནི་འདི་ནའོ། །པ་ར་མ་ཞེས་པའི་པཾ་ནི་པདྨ། དེ་ལས་རྩེ་བར་བྱེད་དེ། ར་མི་ཀྲ་ཌཱ་ཡཾ་ཞེས་པའི་ཁམས་ལས་ཤེས་རབ་ཀྱི་ཆོས་འབྱུང་དུ་རོལ་པའོ། །དེའི་ཕྱིར་གསང་བ་ནི་གསང་བའི་འཁོར་ལོ་ལ་གནས་པ་ཉིད་དོ། །འཇིག་རྟེན་ཡང་དག་རྨོངས་པ་ཞེས་པའི་

49-1-182b

འཇིག་རྟེན་གྱི་སྒྲ་ནི་དབང་པོ་རྣམས་སོ། །དེ་རྣམས་ཡང་དག་པར་རྨོངས་པ་ནི་ལྷན་ཅིག་སྐྱེས་པའི་དགའ་བ་ཐོབ་པའི་མཐར་དབང་པོ་རྣམས་འགག་པའི་ཕྱིར་རོ། །མཆོག་ཅེས་པ་ནི་རབ་ཏུའོ། །རིགས་དང་རིགས་བྱུང་མངོན་བརྗོད་པས་རིགས་ཀྱི་སྒྲས་འབྱུང་བ་ཆེན་པོ་ལྔར་གྱུར་པའི་དེ་བཞིན་
གཤེགས་པ་ལྔའི་ངོ་བོའོ། །དེ་ལས་བྱུང་བའི་ཕྱིར་རིགས་ལས་བྱུང་བའོ། །དེའི་ཕྱིར་རྡོ་རྗེ་དང་པདྨ་སྦྱར་བ་ལས་སྲ་བར་གྱུར་པའི་སྲ་བ་ནི་སའི་ངོ་བོར་གྱུར་པའི་རྣམ་པར་སྣང་མཛད་ཉིད་དོ། །དེའི་རྗེས་སུ་བྱང་ཆུབ་ཀྱི་སེམས་བསྐྱེད་པ་དེ་ཡང་ཁུ་བའི་ངོ་བོ་ཉིད་ཆུའི་ཁམས་ཀྱི་ངོ་བོ་མི་བསྐྱོད་པའི་ངོ་བོ་
ཉིད་དོ། །རྡོ་རྗེ་དང་པདྨ་གཉིས་པོ་ཡང་དག་པར་སྦྱར་བ་ལས་མེ་སྐྱེ་བར་འགྱུར་ཏེ་ཆགས་པའི་མེ་ལས་སྐྱེས་པའོ། །དེ་ཡང་འོད་དཔག་ཏུ་མེད་པའི་ངོ་བོ་ཉིད་དོ། །དེ་ནས་ཤེས་རབ་ཀྱི་ཆོས་འབྱུང་དུ་བྱང་ཆུབ་ཀྱི་སེམས་ཡང་དག་པར་འབབ་པ་དེ་ནི་རླུང་གི་དབང་ལས་སོ། །རླུང་ཡང་དོན་ཡོད་
གྲུབ་པའི་ངོ་བོ་ཉིད་དོ། །དེ་ནས་ཡང་ཤིན་ཏུ་དགའ་བའི་མཚན་ཉིད་ཆགས་པ་ཡང་དག་པར་སྐྱེས་པའི་བདེ་བ་ལ་ཆགས་པ་ནི་ནམ་མཁའི་ངོ་བོ་ཉིད་དེ། དེ་ཡང་རིན་ཆེན་དབང་པོའི་ངོ་བོ་ཉིད་དོ། །དེ་ཉིད་འབྱུང་བ་ཆེན་པོ་ལྔའི་རང་བཞིན་གྱིས་དེ་བཞིན་གཤེགས་པ་རྣམས་སུ་འགྱུར་བའི་ཕྱིར་རོ། །
དེའི་རིགས་མངོན་པར་བརྗོད་པའི་སྒྲས་རིགས་ཀྱི་འཇིག་རྟེན་མགོན་པོའི་ངོ་བོ་ལྷན་ཅིག་སྐྱེས་པའི་དགའ་བའི་རང་བཞིན་བཤད་པར་བྱའོ། །དམ་ཚིག་སྤྱོད་པ་ཞེས་པ་ལ་སོགས་པའི་དམ་ཚིག་ནི་དམ་ཚིག་གི་ཕྱག་རྒྱའོ། །དེ་ཡིས་ལྷན་ཅིག་སྤྱོད་པ་ནི་སྦྱོར་བའོ། །དེ་རྣམས་དང་ངེས་
པར་བྲལ་བ་སྟེ། འདིར་དམ་ཚིག་གི་ཕྱག་རྒྱ་ནི་ཀུན་རྫོབ་ཀྱི་ངོ་བོ་ཉིད་དོ། །འདིར་དོན་དམ་པའི་བདེན་པའི་ངོ་བོ་ཉིད་ནི་ཕྱག་རྒྱ་ཆེན་མོ་དེ་ཉིད་གཟུང་བའི་ཕྱིར་རོ། །བྱ་བ་དུས་ཞེས་པ་ལ་སོགས་པའི་བྱ་བ་ནི་བྱེད་པ་པོ་དང་། དུས་ནི་དུས་ཚོད་དེ་དག་ལས་རྣམ་པར་གྲོལ་བ་ཉིད་ནི་དོན་དམ་པའི་
བདེན་པའོ། །དེ་ཉིད་གསུམ་ལྡན་ཡང་དག་ལྷ། །ཞེས་པའི་དེ་ཉིད་གསུམ་ནི་སྔགས་ཀྱི་དེ་ཉིད་དང་། བདག་གི་དེ་ཉིད་དང་། ལྷའི་དེ་ཉིད་དེ། དེ་རྣམས་དང་ཡང་དག་པར་ལྡན་པའི་ལྷ་ནི་རྩའི་འཁོར་ལོ་ཐམས་ཅད་དུ་ཐིག་ལེ་རོལ་པ་སྟེ། དེ་བུ་ཀྲི་ཌཱ་ཡཾ་ཞེས་པའི་ཁམས་ལས་འཇིག་རྟེན་དབང་

49-1-183a

པོ་རྣམས་ལ་ཁྱབ་པའོ། །མགོན་ནི་འཇིག་རྟེན་མགོན་ནོ། །འགྲོ་བ་ནི་ལུས་ངག་ཡིད་ཀྱི་ངོ་བོ་ཉིད་དབང་དུ་བྱེད་པ་སྟེ།བདག་པོ་ནི་འགྲོ་བའི་བདག་པོའོ། །འདོད་པའི་དབང་ཕྱུག་ཅེས་བྱ་བ་ལ་སོགས་པའི་འདོད་པ་རྣམས་ནི་གཟུགས་ལ་སོགས་པའི་ཡུལ་ལྔའི་རང་བཞིན་དེ་བཞིན་
གཤེགས་པའི་བདག་པོ་ཉིད་ཀྱིས་ཁྱབ་པའི་ཕྱིར་རོ། །དབང་ཕྱུག་ནི་ལྷན་ཅིག་སྐྱེས་པའི་དགའ་བའི་ངོ་བོ་ཉིད་ཀྱིས་བདེ་བ་དམ་པར་བྱེད་པའི་ཕྱིར་འདོད་པའི་ལྷའོ། །མཐོང་དང་མ་མཐོང་འབྲས་རབ་སྟེར། །ཞེས་པའི་མཐོང་བ་ནི་འདིའི་འབྲས་བུའོ། །མ་མཐོང་བ་ནི་འཇིག་རྟེན་ཕ་རོལ་ཏེ། གཉིས་ཀའི་འབྲས་བུ་རབ་
ཏུ་སྟེར་བའི་ཕྱིར་རོ། །དེའི་བདག་པོ་ནི་བཅོམ་ལྡན་འདས་སོ། །སྔགས་ནི་བླ་མའི་ཞལ་ལ་གནས། །ཞེས་པ་ནི་བླ་མའི་ཞལ་ལས་བླང་བར་བྱ་སྟེ། ལྷན་ཅིག་སྐྱེས་པའི་དགའ་བའི་ངོ་བོ་ཉིད་དེ་པོ་ཏི་ལ་སོགས་པའི་སྤྱོད་ཡུལ་མ་ཡིན་པའི་ཕྱིར་ཏེ། བླ་མའི་ཞལ་ལས་བླང་བར་བྱའོ་ཞེས་པའི་དོན་ཏོ། །ད་ནི་
སྔགས་རབ་ཏུ་བཤད་པར་བྱ་སྟེ། དྲག་ཆེན་ཞེས་པ་ལ་སོགས་པའི་དྲག་ཆེན་གྱི་སྒྲས་ཧ་ཡིག་ཏུ་བརྗོད་པར་བྱ་སྟེ། ཧེ་རུ་ཀའི་ཨཥྚ་དགོད་པའི་ངོ་བོ་ཉིད་ཀྱི་ཧའི་ཡི་གེའོ། །འཇིགས་བྱེད་ལུས་ཀྱི་སྒྲས་ར་ཡིག་གོ། །ལྔ་པའི་ཐིག་ལེའི་སྒྲས་ཨཱི་ཡིག་གོ། །རྣམ་གཅོད་དང་པོ་ཡང་དག་ལྡན་ནི་དེ་ལ་པོ་
ཏིའི་རིམ་པ་ནི་ཨཿཞེས་པ་ནི་རྣམ་པར་གཅོད་པའོ། །དེའི་དང་པོ་ནི་ཐིག་ལེའོ། །དེ་དང་ཡང་དག་ལྡན་པ་ནི་ཧྲིའོ། །བླ་མ་བརྒྱུད་པའི་རིམ་པས་རྣམ་པར་བཅད་པ་ནི་ཀ་ཡིག་གོ། །དེའི་དང་པོ་ནི་ཚེག་དྲག་གོ། །དེ་དང་ཡང་དག་པར་ལྡན་པ་ནི་ཧྲཱིཿཞེས་སོ། །ཆེན་པོ་ལྔ་པའི་ལྔ་པ་ནི་མ་ཧཱའི་སྒྲས་
ཧཱ་ཡིག་གོ། །ལྔ་པའི་སྒྲས་དབྱངས་རྣམས་ཀྱི་ལྔ་པ་ཨུ་ཡིག་སྟེ། དེ་དང་ལྡན་པའོ། །ལྔ་པ་གཉིས་པའི་སྒྲས་སྡེ་པ་ལྔ་པའི་ལྔ་པ་མ་ཡིག་སྟེ་དེ་དང་ལྡན་པ་ནི་ཧཱུཾ་སྟེ་ཧྲཱིཿ་ཧཱུཾ་གཉིས་སོ། །ལྕེ་གཉིས་ཀྱི་སྒྲས་ཡོན་ཏན་ཉིས་འགྱུར་ཛ་ཡིག་སྟེ་ཛྫ་བརྩེགས་དང་། ཡན་ལག་
མེ་གཉིས་ཀྱི་སྒྲས་ཐིག་ལེ་སྟེ། དེ་དག་གི་ཐིག་ལེ་གཉིས་སོ། །དེ་དག་དང་ལྷན་ཅིག་ཏུ་གནས་པ་ནི་ཛྫཿཚེག་དྲག་དང་བཅས་པ་ཞེས་པའི་དོན་ནོ། །དེའི་ཕྱིར་ཧྲཱིཿཧྲཱིཿ་ཧཱུཾ་ཛྫཿདེ་ཉིད་གསུམ་གྱི་སྔགས་ཀྱི་ཡི་གེའི་རང་བཞིན་ཞེས་པའི་དོན་ནོ། །དེ་ཉིད་ཆོ་ག་བཞིན་དུ་འབུམ་དུ་བཟླས་པར་བྱ་

49-1-183b

སྟེ། ཆོ་ག་འདི་ཡིས་ཇི་ལྟར་ན་ཡི་གེ་རྣམས་ཀྱི་བསྡུ་བ་ལས་ཡི་གེ་རྣམས་ཀྱི་གྲངས་འབུམ་ཕྲག་གསུམ་གྱི་གྲངས་ཀྱི་སྔགས་བཟླས་པར་བྱའོ། །འདི་ནི་རྗེས་སུ་དྲན་བྱས་ནས། །ཞེས་པ་ལ་སོགས་པ་འདི་ནི་དེ་ཉིད་དེ་རིགས་ཀྱི་འཇིག་རྟེན་དབང་ཕྱུག་གི་ངོ་བོ་ཡི་གེ་གསུམ་གྱི་རང་བཞིན་གྱི་སྔགས་
རྗེས་སུ་དྲན་པའོ། །སྔགས་པས་ཞེས་པ་ནི་སྒྲུབ་པ་པོའོ། །གཙང་ངམ་ཡང་ན་མི་གཙང་ཡང་རུང་སྟེའོ། །ལྷ་བཞིན་མཐོང་བ་ལྷ་མོ་སྟེ། །ཞེས་པ་ནི་ལྷའི་བུ་མོ་རྣམས་ཀྱིས་འདོད་པའི་ལྷ་བཞིན་དུ་མཐོང་བཞིན་ཤིན་ཏུ་མཛེས་པ་རྣམ་པ་ཉིད་དེ་དབང་བྱེད་པའི་གཙོ་བོའི་ཕྱིར་གྱི་སྔགས་སོ། །འདི་ནི་དེ་
བཞིན་ཞེས་པ་ལ་སོགས་པ་འདི་ནི་དེ་བཞིན་སྔོན་དུ་གསུངས་པའི་སྔགས་ཀྱི་མགོན་པོ་ལ་བྱ་བ་འཁྲུལ་པ་ལ་སོགས་པའི་མཚན་ཉིད་བླང་བར་མི་བྱའོ། །སྒྲུབ་པའང་མེད་ནི་སྤྱོད་པའི་བརྟུལ་ཞུགས་ལ་སོགས་པའོ། །མཆོད་དང་མེ་ལ་སྦྱིན་སྲེག་མེད། །ཅེས་པ་ནི་དེ་རྣམས་ཐམས་ཅད་དེ་རྣམས་ཀྱི་
གནས་སྐབས་ཀུན་རྫོབ་ཀྱི་ངོ་བོ་ཉིད་ཀྱི་ཕྱིར་རོ། །འདིར་དོན་དམ་པའི་བདེན་པའི་བདག་ཉིད་ཀྱི་ཕྱིར་རོ། །དེ་ཉིད་ཀྱི་ཆོ་གའི་སྔགས་ཀྱི་སྒྲུབ་ཐབས་ཀྱི་གནས་སྐབས་ཀྱི་རྣལ་འབྱོར་པས་སོ། །མཆོག་ནི་རབ་པོ། །བསམ་གཏན་ཡང་དག་སྤྱད་པར་བྱ་བ་ནི་སྒྲིབ་པ་དང་བྲལ་བ་མཚུངས་པའི་སྒྲིབ་པ་ནི་
ཉོན་མོངས་པ་སྟེ། དེ་དང་བྲལ་བའི་གནས་སྐབས་དང་ལྡན་པ་ནི་རྣལ་འབྱོར་ཅན་ནོ། །རྣལ་འབྱོར་སྟན་དང་ཡང་དག་ལྡན་ནི་རྣལ་འབྱོར་དང་སྟན་ཐ་དད་པ་སྟེ། དེ་ལ་རྣལ་འབྱོར་ནི་དབང་པོ་རྣམས་ཐམས་ཅད་རོ་གཅིག་ཏུ་བྱེད་པའོ། །སྟན་ནི་བརྗོད་པར་
བྱ་བའི་བཀོད་པ་སྟེ། དེ་ཡང་མ་འོངས་པ་ན་འཆད་པར་འགྱུར་བ་དེ་དག་དང་ལྡན་པའོ། །དུས་ནི་འདས་པ་དང་མ་འོངས་པ་ལ་སོགས་པའོ། །ཚོད་ནི་སྔ་དྲོ་ལ་སོགས་པའི་ཐུན་ཚོད་དང་བྲལ་བའོ། །རྩེ་གཅིག་སེམས་ནི་གཉིས་སུ་མེད་པའི་སེམས་སོ། །ཡང་ན་མི་གཡོ་བའོ། །
གཡོ་བ་མེད་ནི་བརྟན་པ་དང་བྲལ་བའོ། །དེ་ལྟ་བུར་གྱུར་པའི་རྣལ་འབྱོར་པས་མཆོག་གི་བསམ་གཏན་བྱའོ་ཞེས་པ་ནི་རིགས་ཀྱི་འཇིག་རྟེན་མགོན་པོ་ལྔ་བཅུ་པ་ལས་སྔགས་ཀྱི་དེ་ཁོ་ན་ཉིད་བཤད་པའི་ལེའུ་སྟེ་དང་པོའོ།།      །།ད་ནི་བདག་གི་དེ་ཁོ་ན་ཉིད་བརྩམ་པར་བྱ་སྟེ། སྙིང་གའི་

49-1-184a

འཁོར་ལོའི་ནང་སོན་པའི། །ཞེས་པ་ལ་སོགས་པ་ལ་འདིར་དང་པོར་ཐིག་ལེའི་རྣལ་འབྱོར་གྱི་རིམ་པས་གཏུམ་མོ་སྒོམ་པའི་རྣལ་འབྱོར་བརྗོད་པར་བྱ་སྟེ། དང་པོར་རེ་ཞིག་ལྟེ་བ་སྤྲུལ་པའི་འཁོར་ལོ་ཁ་དོག་སེར་པོའི་ཆུ་སྐྱེས་འདབ་མ་དྲུག་ཅུ་རྩ་བཞིའོ། །དེའི་དབུས་སུ་ཟླ་ཕྱེད་ཐིག་
ལེས་བརྒྱན་པའི་དབྱངས་དང་པོ་ཨ་ཡིག་གོ། །ཤར་ལ་སོགས་པའི་འདབ་མ་བརྒྱད་པོ་རྣམས་ལ་ཨ་ཀ་ཙ་ཊ་ཏ་པ་ཡ་ཤ་རྣམས་ལ་ཟླ་ཕྱེད་ཐིག་ལེས་བརྒྱན་པའོ། །དེའི་ཕྱི་རོལ་གྱི་དབང་ལྡན་ལ་སོགས་པའི་འདབ་མ་རྣམས་ལ་ཨ་ཡིག་ལ་སོགས་པའི་དབྱངས་བཅུ་དྲུག་དང་། ཀ་ཡིག་
ལ་སོགས་པའི་གསལ་བྱེད་སུམ་ཅུ་སོ་བཞི་དང་ཅུང་ཟད་གསལ་བའི་ཌཌྷ་ད་དྷ་ཡ་ལ་རྣམས་སོ། །དེ་བཞིན་དུ་རྩ་བཞི་རྣམས་ལ་སྦྱར་བར་བྱའོ། །སྙིང་གའི་ཆུ་སྐྱེས་ཁ་དོག་དཀར་པོ་འདབ་མ་བརྒྱད་པའོ། །དེའི་དབུས་སུ་ཧཱུཾ་ཡིག་མགོ་ཐུར་དུ་བསྟན་པའོ། །ཤར་ལ་སོགས་པའི་འདབ་མ་བཞི་ལ་ཨ་ཨི་ཨུ་
ཨེ་དབྱངས་ཡིག་བཞི་པོ་རྣམས་ལ་ཟླ་ཕྱེད་ཐིག་ལེས་བརྒྱན་པའོ། །དབང་ལྡན་ལ་སོགས་པའི་འདབ་མ་བཞི་ལ་རིམ་པ་ཇི་ལྟ་བ་བཞིན་དུ་ས་ལ་སོགས་པའི་ངོ་བོ་ལྷ་མོ་བཞིའི་རང་བཞིན་ཡ་ར་ལ་ཝ་རྣམས་ལ་ཟླ་ཕྱེད་ཐིག་ལེས་བརྒྱན་པའོ། །མགྲིན་པ་ལོངས་སྤྱོད་ཀྱི་འཁོར་ལོ་ཆུ་སྐྱེས་དམར་པོ་འདབ་
མ་བཅུ་དྲུག་པའོ། །དེའི་དབུས་སུ་མགོ་ཐུར་དུ་བསྟན་པའི་ཨོ་ཡིག་གོ། །ཤར་ལ་སོགས་པའི་འདབ་མ་བཞི་ལ་རིམ་པ་བཞིན་དུ་ཨཱ་ཨཱི་ཨཱུ་ཨཻའི་དབྱངས་རིང་པོ་བཞི་ལ་ཟླ་ཕྱེད་ཐིག་ལེས་བརྒྱན་པའོ། །དབང་ལྡན་ལ་སོགས་པའི་འདབ་མ་བཞི་ལ་དེ་བཞིན་དུ་ཡ་ར་ལ་ཝ་རྣམས་སོ། །སྨིན་
མའི་དབུས་སུ་ཆུ་སྐྱེས་འདབ་མ་སུམ་ཅུ་སོ་གཉིས་པ་ཁ་དོག་སྣ་ཚོགས་པའོ། །དེའི་ཟེའུ་འབྲུ་ལ་མགོ་ཐུར་དུ་བསྟན་པའི་ཧཾ་ཡིག་གོ། །ཤར་ལ་སོགས་པའི་འདབ་མ་རྣམས་ལ་རེ་རེ་སྤངས་ནས་དབྱངས་ཡིག་བཅུ་དྲུག་ལ་ཟླ་ཕྱེད་ཐིག་ལེས་བརྒྱན་པའོ། །དེ་ལ་སྤྲུལ་པའི་འཁོར་ལོ་ལ་གང་
དབྱངས་ཡིག་དང་པོ་ལ་ཨ་ཡིག་དབྱུག་པའི་རྣམ་པ་སྟེ། དེ་ཉིད་གཏུམ་མོ་འབར་བ་ཞེས་བརྗོད་དེ། དེས་དེ་བཞིན་དུ་པདྨའི་དར་བའི་སྐུད་པ་བཞིན་དུ་ཤིན་ཏུ་ཕྲ་བ་སྟེང་དུ་འགྲོ་བས་ཧཱུཾ་དང་ཨོཾ་ཡིག་དག་ཆོས་དང་ལོངས་སྤྱོད་དུ་སོང་ནས་ཐིག་ལེ་གཉིས་བཞུ་སྟེ་བདེ་བ་ཆེན་པོའི་འཁོར་ལོར་སོང་ནས་

49-1-184b

ཧཾ་ཡིག་གི་ཐིག་ལེ་བཞུ་སྟེ་དེ་ནས་ཧཾ་ཡིག་ཐིག་ལེ་བཞུ་བས་ཡང་སྐྲའི་རྩེ་མོ་བརྒྱ་སྟོང་གི་ཆའི་འོད་ཟེར་གྱིས་ཁྱབ་པས་ཨ་ཡིག་གི་རང་བཞིན་གཏུམ་མོ་འབར་བའི་ཐིག་ལེ་ལ་རབ་ཏུ་ཞུགས་ཏེ། ཕྱི་ནས་དེ་ཡང་གཏུམ་མོ་ཡིས། །དེ་ཡང་ཐིག་ལེ་སྔོན་བཞིན་དུ་བསྒྲུབ་པར་བྱའོ། །འདི་ནི་ཐིག་
ལེའི་རྣལ་འབྱོར་རོ། །འདིར་དེ་བཞིན་དུ་ཕྲ་མོའི་རྣལ་འབྱོར་དུ་འགྱུར་ཏེ། དེ་བཞིན་དུ་ཡང་ལྟེ་བའི་སོར་བཞི་ཙམ་སྤངས་ནས་འོག་ནས་འོད་ཟེར་སྟོང་དུ་བདུད་རྩིའི་ཐིག་ལེ་སྦྱོར་བར་འགྱུར་བའི་གནས་ལས་ཐིག་ལེ་གཡོ་བ་ཙམ་གྱིས་ཡང་ཐིག་ལེ་འཛིན་པ་ནི་ཕྲ་མོའི་རྣལ་འབྱོར་རོ། །དེ་བཞིན་དུ་
ཐིག་ལེ་དང་ཕྲ་མོའི་རྣལ་འབྱོར་དག་གང་གཏུམ་མོ་འབར་བ་དེ་བཞིན་དུ་བརྗོད་པར་བྱ་སྟེ། སྙིང་གའི་འཁོར་ལོར་ནང་དུ་བསྟན་པ་སྙིང་གར་ཐབས་དང་ཤེས་རབ་ཀྱི་བདག་ཉིད་གཉིས་ཀའི་དམ་པའི་བདེ་བ་འཛིན་པར་གྱུར་པ་སྤྲུལ་པའི་འཁོར་ལོ་མཚན་བཟང་པོ་སུམ་ཅུ་སོ་གཉིས་དང་དཔེ་བྱད་བཟང་པོ་
བརྒྱད་ཅུ་རྣམ་པར་དག་པ་ཉི་མ་དང་ཟླ་བའི་རང་བཞིན་ཐབས་དང་ཤེས་རབ་ཀྱི་བདག་ཉིད་ཀ་ཡིག་ལ་སོགས་པ་ཧ་ཡིག་གི་མཐར་ཐུག་པའི་གསལ་བྱེད་སུམ་ཅུ་རྩ་བཞི་ཌ་ཌྷ་ད་དྷ་ཡ་ར་ལ་རྣམས་དང་ཡང་དག་པར་ལྡན་པ་གསལ་བྱེད་བཞི་བཅུ་ཐབས་དང་ཤེས་རབ་ཀྱི་དབྱེ་བས་ཡོན་ཏན་ཉིས་འགྱུར་དུ་
བྱས་པས་བརྒྱད་ཅུའི་གྲངས་གསལ་བྱེད་དང་། ཨ་ཡིག་ལ་སོགས་པ་ཨཿཡིག་གི་མཐར་ཐུག་དབྱངས་ཡིག་བཅུ་དྲུག་ཐབས་དང་ཤེས་རབ་ཡང་དག་པར་སྦྱོར་བས་ཡོན་ཏན་ཉིས་འགྱུར་དུ་སུམ་ཅུ་སོ་གཉིས་ཀྱི་བདག་ཉིད་གཉིས་ཀའི་སྒྲས་ཕྲེང་བ་གཉིས་ཀྱི་དབུས་སུ་རླུང་གི་ལས་ཀྱིས་བདས་ཏེ་ཨ་ཡིག་གི་
རང་བཞིན་གཏུམ་མོའི་མེ་འབར་བའི། ཕ་རོལ་ཕ་རོལ་རྣམ་པར་འགྲོ། །ཞེས་པའི་ཕ་རོལ་ནི་དེ་བཞིན་དུ་འབར་བས་སྤྲུལ་པའི་འཁོར་ལོའི་ནང་དུ་སོན་པར་གྱུར་པ། དེ་ལས་བཞེངས་ཏེ་ཆོས་ཀྱི་འཁོར་ལོ་ཐོབ་སྟེ། དེར་གྱུར་ནས་དེ་བཞིན་གཤེགས་པ་ལྔ་བསྲེགས་ཏེ་རང་བཞིན་མེད་པར་བྱེད་དོ། །དེ་ལས་
བཞེངས་ཏེ་ལོངས་སྤྱོད་ཀྱི་འཁོར་ལོ་དེར་སོང་སྟེ། ཡུལ་རྣམས་ཟོས་ནས་སྤྱན་མ་ལ་སོགས་པའི་ལྷ་མོ་རྣམས་བསྲེགས་ཏེ། དེའི་རྗེས་ལ་རིམ་པ་འདིས་ཕ་རོལ་ནི་བདེ་བ་ཆེན་པོའི་འཁོར་ལོ་རབ་ཏུ་བརྐྱང་སྟེ་དེར་སོང་ནས་ཧཾ་ཡིག་དེ་བསྲེགས་ནས་རང་བཞིན་མེད་པར་བྱེད་ཅིང་རི་བོང་འཛིན་པ་འཇུག་

49-1-185a

པར་བྱེད་དོ། །རིམ་པ་འདི་གཏུམ་མོའི་རྣལ་འབྱོར་ཞེས་བརྗོད་དོ། །དེ་སྐད་དུ་ཡང་ཀྱེ་རྡོ་རྗེ་ལས་གསུངས་ཏེ། ལྟེ་བར་གཏུམ་མོ་སྦར་བ་ཡིས། །དེ་བཞིན་གཤེགས་པ་ལྔ་བསྲེགས་ཏེ། །ཞེས་པ་དེ་ཉིད་དེ་བཞིན་དུ་དེ་གཏུམ་མོའི་རང་བཞིན་བསྟན་པ་སྟེ་རྣམ་པར་གྲོལ་བ་ཉིད་དོ། །དེ་བཞིན་དུ་
གཞན་དུ་རྣམ་པར་འགྲོ་བའོ། །དེ་ཉིད་གཏུམ་མོའི་བདེ་བ་ཆེན་པོའི་འཁོར་ལོ་ནས། འོག་ཏུ་སྤྲུལ་པའི་འཁོར་ལོ་རྣམ་པར་འབབ་པའོ། །དེ་ལ་སྤྲུལ་པའི་འཁོར་ལོ་ཨ་ཡིག་གི་ནམ་པའི་ཐིག་ལེ་ལ་རབ་ཏུ་ཞུགས་ནས་སླར་ཡང་ཐིག་ལེ་དེ་ཡང་མི་སྣང་བར་ནང་དུ་ཐིམ་སྟེ། སླར་ཡང་རླུང་གི་ལས་
ཀྱིས་བསྐུལ་ནས་རྣམ་པར་ལངས་ཏེ་ཡང་སྔོན་བཞིན་དུ་བྱ་བའོ། །དེ་ཉིད་གཞན་དང་གཞན་དུ་འགྲོ་སྟེ། དབྱེ་བ་གཉིས་སུ་གྱུར་པ་སྟེང་དུ་འགྲོ་བ་དང་འོག་ཏུ་འབབ་པའི་མཚན་ཉིད་ཀྱི་དབྱེ་བ་གཉིས་སུ་འགྲོའོ། །དེ་ལ་རྣམ་པ་དེ་ཉིད་ཀྱིས་རང་བཞིན་མེད་པའི་མཚན་ཉིད་གཏུམ་མོའི་རྣལ་འབྱོར་པས་
ཤེས་པར་བྱས་ནས། རྡོ་རྗེ་སེམས་དཔའི་གོ་འཕང་གི་ངོ་བོ་ཉིད་ཐོབ་པར་འགྱུར་རོ། །ཐམས་ཅད་དུ་འགྲོ་བ་ཞེས་པ་ནི་ཁྱབ་པའི་ཕྱིར་རོ། །གཞན་ཡང་དེ་ཅིའི་ཕྱིར་ན་མི་གཡོ་བ་ཞེས་པ་ལ་སོགས་པའི་དེ་ལ་གཏུམ་མོ་སྟེ་གཉིས་སུ་མེད་པའི་ཤེས་པའི་རང་བཞིན་ནི་ཡང་དག་པའི་ཤེས་པ་ཞེས་
བརྗོད་དོ། །འཛག་པ་མེད་པའི་དགའ་བའི་ཡུལ་ནི་མི་འཛག་སྟེ་མི་གཡོ་བའོ། །དེ་ཉིད་ཀྱི་དགའ་བ་ནི་ལྷན་ཅིག་སྐྱེས་པའི་དགའ་བ་ཞེས་པའི་དོན་ནོ། །དེའི་ཡུལ་དེ་བཞིན་དུ་གསུངས་ཏེ། སྔོན་དུ་གསུངས་པའི་རིམ་པས་ཆགས་པ་ཆེན་པོའི་མེས་གཏུམ་མོ་རབ་ཏུ་གསལ་བ་ཤར་ནས། བདེ་
བ་ཆེན་པོའི་འཁོར་ལོར་སོང་སྟེ་ཐིག་ལེ་ཞུ་ནས་མི་འཛག་པ་ཉིད་བཞི་པའི་སྐད་ཅིག་གི་རང་བཞིན་ལྷན་ཅིག་སྐྱེས་པའི་དགའ་བ་ཐོབ་པར་འགྱུར་རོ། །དེའི་ཕྱིར་དེ་ཉིད་རིག་པས་ལྷན་ཅིག་སྐྱེས་པའི་མཚན་ཉིད་ལ་རང་བཞིན་གྱི་སེམས་གཉིས་སུ་སྣང་བའི་ཚུལ་ལ་རྗེས་སུ་རྟོགས་པས་གཉིས་སུ་མེད་
པའི་ཡེ་ཤེས་རྟོགས་པ་ཞེས་པའི་དོན་ནོ། །དེ་བཞིན་དུ་བཞི་པའི་སྐད་ཅིག་ལྷན་ཅིག་སྐྱེས་པའི་བདེ་བའི་ཡུལ་རྣལ་འབྱོར་པས་རིག་པར་བྱ་བ་ནི་གོམས་པར་བྱའོ། །དམ་པའི་བདེ་བ་འདོད་ཕྱིར་ནི་ལྷན་ཅིག་སྐྱེས་པའི་བདེ་བ་འདོད་པ་ཞེས་པའི་དོན་ནོ། །རྣལ་འབྱོར་པས་ཡང་དེ་ནི་རྟོགས་ཤིང་འཇུག་

49-1-185b

པར་བྱེད་པ་ནི་དེ་འདིར་ལྷན་ཅིག་སྐྱེས་པའི་དགའ་བའི་རང་བཞིན་གཉིས་སུ་མེད་པའི་རྟོགས་པ་ནི་ཁོང་དུ་ཆུད་པའོ། །དེའི་འཇུག་པ་མངོན་སུམ་དུ་བྱེད་པའོ། །དེ་བཞིན་དུ་དེའི་རང་བཞིན་གང་ལ་དེ་ཡིས་རྟོགས་པ་འཇུག་པ་རྣལ་འབྱོར་པས་འདིར་གོམས་པར་བྱའོ། །དེ་བཞིན་དུ་ལྷག་པར་རྟོགས་
པའི་བདག་གི་དེ་ཉིད་རྣལ་འབྱོར་པའི་བསྔགས་པ་གསུངས་ཏེ། དེའི་ངོ་བོ་ཞེས་པ་ལ་སོགས་པའི་དེ་སེམས་དགའ་བའི་སྤྱོད་ཡུལ་ནི་ལྷན་ཅིག་སྐྱེས་པའི་དགའ་བའི་སྤྱོད་ཡུལ་ལོ། །སེམས་ནི་ཡང་དག་པར་རིག་པའོ། །གང་གི་ཚེ་དེའི་ངོ་བོ་རྟོགས་པ་ཉིད་འཇུག་པར་འགྱུར་བ་ནི་དེའི་ཚེ་གཉིས་སུ་
མེད་པའི་ངོ་བོ་འཇུག་པར་འགྱུར་། རྣམ་པ་དེ་ལྟ་བུའི་སེམས་རྣལ་འབྱོར་པ་གང་གིས་མངོན་སུམ་དུ་བྱས་པ་དེའི་ཚེ་ལས་ཐམས་ཅད་བྱེད་པར་འགྱུར་ཏེ། ཚིག་དང་བཅས་པ་སྟེ་ཚིག་ཙམ་གྱིས་དེ་བཞིན་དུ་བྱེད་དོ་ཞེས་པའི་དོན་ཏེ་འདིར་ཐེ་ཚོམ་མེད་པ་ཞེས་པའི་དོན་ནོ། །བསམ་གཏན་ཞེས་པ་ལ་སོགས་
པ་ནི་སྔོན་དུ་གསུངས་པའི་བསམ་གཏན། རྣལ་འབྱོར་ཡང་དག་ལྡན་ནི་བསམ་གཏན་དང་བསམ་གཏན་པའི་མཚན་ཉིད་བསམ་གཏན་གྱིས་སྦྱོར་བ་རྒྱུ་འབྲས་བུར་གྱུར་པའི་སྙིང་རྗེ་དང་ཤེས་རབ་དག་གཅིག་པ་ཉིད་ཀྱིས་ཐབས་དང་ཤེས་རབ་གཅིག་པ་ཉིད་དོ་ཞེས་པའི་དོན་ནོ། །དེ་དག་དང་ཡང་
དག་ལྡན་ནི་དེ་དང་བཅས་པའི་རྣལ་འབྱོར་པའོ། །གཞན་ཡང་ཅིའི་ཕྱིར་ན་དགོད་པར་བྱ་བ་ནི་བྱེད་པ་སྟེ། སེམས་ལ་དགོད་པ་སྟེ་གང་གིས་མི་གཡེང་བའི་གོ་འཕང་ལ་གནས་པ་ཉིད་དོ། །དེའི་ཕྱིར་གནས་པ་ནི་གཡོ་བ་མེད་པའི་སེམས་སོ། །བློ་ལྡན་ནི་བློ་གྲོས་གང་ཞིག་དགེ་བའི་བློ་དང་ལྡན་པ་
ཞེས་པའི་དོན་ནོ། །དེ་ལྟ་བུའི་རྣལ་འབྱོར་པས་སྟེངས་ས་འོག་བསྒྲུབ་པར་བྱ་བ་ནི་མཐོ་རིས་སྟེངས་ས་འོག་ཐམས་ཅད་བསྒྲུབ་པར་བྱའོ་ཞེས་པའི་དོན་ནོ། །འདིར་མཐོ་རིས་དངོས་སུ་གཟུང་བ་མེད་ཀྱང་ས་སྟེངས་ས་འོག་གཟུང་བས་དེ་བཞིན་དུ་མཐོ་རིས་ཀྱང་ཤུགས་ལ་ཤེས་པར་བྱའོ། །
འགྲོ་བ་ཀུན་ངག་གི་རང་བཞིན་བསྒྲུབ་པ་ནི་རྣམ་པར་རྟོག་པ་ཙམ་བསྒྲུབ་པར་བྱའོ་ཞེས་པའི་དོན་ནོ། །ད་ནི་ལྷན་ཅིག་སྐྱེས་པའི་དགའ་བའི་རང་བཞིན་འཇིག་རྟེན་དབང་ཕྱུག་གི་གོ་འཕང་ཐོབ་པའི་ཚིགས་སུ་བཅད་པ་གཉིས་གསུངས་ཏེ། ལྟེ་བ་ཞེས་པ་ལ་སོགས་པ་ལ། དེ་རྣལ་འབྱོར་པས་དེ་

49-1-186a

བཞིན་ཉིད་རབ་ཏུ་དགོད་པར་བྱས་ན་འཇིག་རྟེན་མགོན་པོའི་སྐུར་གྱུར་ཏེ། ཨེ་ཝཾ་ཞེས་པ་ནི་འཆད་པར་འགྱུར་བའིའོ། །ཡང་ན་དེ་བཞིན་ཞེས་པའི་ཨེ་ཡིག་ནི་པདྨ། ཝཾ་ཡིག་ནི་རྡོ་རྗེ་རབ་ཏུ་དགོད་པ་སྟེ། གང་གི་ཚེ་ཐབས་དང་ཤེས་རབ་སྙོམས་པར་འཇུག་པར་བྱེད་པ་དེའི་ཚེ་དེའི་
རྣལ་འབྱོར་པས་འཇིག་རྟེན་དབང་ཕྱུག་གི་ངོ་བོ་ཉིད་ཐོབ་པར་འགྱུར་རོ། །ལྟེ་བའི་དབུས་སུ་པདྨ་ཆེན་པོ་ནི་ལྟེ་བར་འདབ་མ་དྲུག་ཅུ་རྩ་བཞི་ནི་པདྨ་ཆེན་པོའོ། །དེའི་དེ་བཞིན་དུ་པདྨའི་ནམ་མཁའི་ནང་ནི་ཟེ་འབྲུའི་མཐའོ། །དེ་ལ་གང་གི་ཚེ་གཏུམ་མོ་འབར་བས་ཐིག་ལེ་ཞུ་བར་འགྱུར་རོ། །ཇི་ལྟར་རྣམ་
གསུམ་པ་ཞེ་ན། འགྲོ་བའི་རྣམ་པ་གསུམ་སྟེ། དེ་ལ་གང་གི་ཚེ་གཡོ་བར་གྱུར་པ་ན་བདེ་བ་ཆེན་པོའི་འཁོར་ལོ་འགྲོའོ། །གང་གི་ཚེ་འཛག་པར་འགྱུར་བ་ནི་སྙིང་གའི་འཁོར་ལོ་ཐོབ་པར་འགྱུར་རོ། །གང་གི་ཚེ་མི་འཛག་པར་གྱུར་པ་ན་ལྟེ་བའི་འཁོར་ལོ་ཐོབ་པར་འགྱུར་རོ། །དེ་བཞིན་རྣམ་གསུམ་ནི་
རྣམ་པ་གསུམ་དུ་འགྲོ་བས་ནམ་མཁའི་ནང་དུ་སོང་བའི་ཐིག་ལེའོ། །དེ་བཞིན་རྣམ་པ་འདིས་ལྷན་ཅིག་སྐྱེས་པའི་དགའ་བའི་རང་བཞིན་གྱི་ཐིག་ལེ་ནི་པདྨའི་ཕྱག་རྒྱ་ཡང་དག་ལྡན་པའོ། །དེ་ལ་པདྨའི་ཕྱག་རྒྱ་ནི་འཇིག་རྟེན་ལས་འདས་པའི་ཡེ་ཤེས་དང་ཐབས་སུ་གྱུར་པ་ཝཾ་དང་། ཨེ་ཡིག་གི་
རྣམ་པ་ཤེས་རབ་ཀྱི་པདྨའོ། །ཧཱུཾ་ཡིག་གི་ལྷག་མར་གནས་པ་ནི་ཐབས་ཏེ་རྡོ་རྗེའི་རྩེ་མོར་སོན་པས་འོད་ཟེར་རྣམ་པར་གསལ་བ་ནི་དགའ་བ་ཆེན་པོའི་ཆ་གང་ཡིན་རྒྱས་གདབ་སྟེ་རང་གིས་མངོན་སུམ་དུ་བྱས་པའོ། །དེའི་པདྨ་ནི་ཕྱག་རྒྱ་ཞེས་བརྗོད་དོ། །ཤེས་རབ་ཀྱི་རང་བཞིན་ནི་དེ་བཞིན་དུ། ཡང་
རྡོ་རྗེ་ཉི་མ་རེག་འོད་ཀྱིས། །རབ་པད་རྒྱ་ཡིས་གདབ་པ་ཡིས། །པདྨར་བདེ་ཆེན་ཆེ་ཤེས་ནི། །པདྨའི་ཕྱག་རྒྱར་ཤེས་པར་བྱ། །གཞན་ཡང་། བསྒྲུབ་བྱ་སྒྲུབ་ཐབས་ཡང་དག་སྦྱོར། །གང་དེ་བསྙེན་པ་ཞེས་བརྗོད་དོ། །རྡོ་རྗེ་པདྨ་མཉམ་སྦྱོར་བ། །ཉེ་བར་སྒྲུབ་པ་ཞེས་བྱར་བརྗོད། །བསྐྱོད་པར་གསུངས་
པ་སྒྲུབ་པ་སྟེ། །ཧཱུཾ་ཕཊ་ཡི་གེ་ཡང་དག་ལྡན། །རང་བཞིན་ཤིན་ཏུ་ཞི་བདེ་བ། །སྒྲུབ་པ་ཆེན་པོ་ཞེས་བརྗོད་དོ། །འོད་གསལ་གྱི་ཤེས་པའི་ཐབས་སུ་གྱུར་པ་སྒྲིབ་པ་དང་བྲལ་བའི་བདག་ཉིད་ཝཾ་ཡིག་རྡོ་རྗེ་ནོར་བུ་བདེ་བ་ཆེན་པོའི་ཆ་གང་གིས་རྒྱས་གདབ་པ་ནི་མངོན་སུམ་དུ་བྱས་པའོ། །དེ་ནམ་མཁའི་ཕྱག་

49-1-186b

རྒྱ་ཞེས་བརྗོད་པ་དེ་དེའི་བདག་ཉིད་དོ། །གཞན་ཡང་རྡོ་རྗེ་རྩེ་མོར་རྫོགས། །གང་གིས་བདེ་ཆེན་རི་བོང་འཛིན། །ཤར་ནས་བདེ་བ་རྒྱ་ཡིས་བཏབ། །ནམ་མཁར་ཕྱག་རྒྱར་ཤེས་པར་བྱ། །དེ་བཞིན་དུ་བསྡུས་པའི་དོན་ནི། པདྨའི་ཕྱག་རྒྱ་ནི་པདྨ་སྟེ་ཤེས་རབ་པོ། །ནམ་མཁའི་ཕྱག་རྒྱ་ནི་རྡོ་རྗེ་སྟེ་ཐབས་སོ། །
དེ་ཡང་འདིར་པདྨའི་ཕྱག་རྒྱ་ནི་ལྟེ་བར་རྣམ་པར་གནས་པའི་ཨ་ཡིག་གི་རང་བཞིན་ནོ། །ནམ་མཁའི་ཕྱག་རྒྱའི་རང་བཞིན་ཡང་ཐབས་ཏེ། ཧཱུཾ་ཡིག་གི་རང་བཞིན་སྙིང་གའི་འཁོར་ལོ་དེས་ཀྱང་ཐབས་དང་ཤེས་རབ་སྙོམས་པར་ཞུགས་པ་སྟེ། ཡང་དག་པར་སྦྱོར་བ་ཞེས་བཤད་དོ། །དེའི་ཕྱིར། པདྨའི་ཕྱག་
རྒྱ་ཡང་དག་ལྡན། །དེ་བཞིན་ནམ་མཁའི་ཕྱག་རྒྱས་གདབ། །ཅེས་པ་ཐབས་དང་ཤེས་རབ་ཀྱི་བདག་ཉིད་དུ་གསུངས་ཏེ། སྲོག་འབབ་པའི་ཚད་ཀྱིས་ནི། དེ་བཞིན་དུ་གང་གིས་ཐིག་ལེ་འགུགས་པ་དེ་ནི་སྲོག་རབ་ཏུ་འབབ་པ་ཡིས་སོ། །ཅིའི་ཕྱིར་ཞེ་ན། གནས་གཉིས་གོམས་པར་བྱས་པ་
ཡིས། །ཞེས་ཏེ། ལན་གཉིས་ནི་གཉིས་སུ་དབུགས་འབྱུང་བ་དང་རྔུབ་པའི་ངོ་བོ་ཉིད་ཅེས་པའི་དོན་ནོ། །དེ་ལྟ་བུའི་རིམ་པས་རྣལ་འབྱོར་པས་ཨེ་ཡིག་དང་ཝཾ་ཡིག་རབ་ཏུ་དགོད་པར་བྱའོ། །དེས་འཇིག་རྟེན་མགོན་པོའི་སྐུ་རུ་འགྱུར་ཏེ། རིགས་ཀྱི་འཇིག་རྟེན་དབང་ཕྱུག་གི་ངོ་བོ་ཉིད་ཐོབ་པ་ཞེས་པའི་དོན་ནོ། །
གཞན་དུ་ཞེས་པ་ལ་སོགས་པ་ནི་འདིར་གསུངས་པའི་རིམ་པ་ལས་འདས་ཏེ་བཟླས་པ་བྱེད་ཅིང་རྣམ་པ་སྣ་ཚོགས་པའི་ལས་སྤྱད་ཀྱང་སྐྱེས་བུ་དེ་ནི་ནམ་མཁའ་ལ་ཁུ་ཚུར་བསྣུན་པ་དང་སྦུན་སྟོང་འཇོམས་པར་བྱེད་དོ། །དཔེར་ན་ནམ་མཁའ་ལ་ཁུ་ཚུར་བསྣུན་པ་དང་སྦུན་སྟོང་བརྡུང་ཀྱང་དགོས་པ་
མེད་པ་དེ་བཞིན་དུ། འདིར་ཡང་སྔོན་དུ་གསུངས་པའི་རིམ་པ་ལས་འདས་ཏེ་བཟླས་པ་ལ་སོགས་པ་བྱེད་པ་བཞིན་ནོ། །ཆོ་ག་བཞིན་དུ་ཞེས་པ་ལ་སོགས་པའི་ཆོ་ག་དང་ལྡན་པའི་བསམ་གཏན་གྱི་རྣལ་འབྱོར་པ་ལས་གང་དང་གང་བྱེད་པ་སྟེ། རྒྱུན་མི་འཆད་པར་བྱེད་པའི་ལས་ནི་ཡིད་ཀྱིར་
འདོད་པ་སྟེ། དེ་ནི་མྱུར་དུ་འགྲུབ་པར་བྱེད་པར་ཐེ་ཚོམ་མེད་དོ། །འདི་ནི་པདྨ་འབར་བ་ལས་བྱུང་བའི་རིགས་ཀྱི་འཇིག་རྟེན་དབང་ཕྱུག་གི་ལྔ་བཅུ་པའི་བདག་གི་དེ་ཁོ་ན་ཉིད་ཀྱི་ལེའུའི་རྣམ་པར་འགྲེལ་པ་སྟེ་གཉིས་པའོ།།      །།ད་ནི་ལྷའི་དེ་ཁོ་ན་ཉིད་བཤད་པར་བྱའོ། །དང་པོར་བཅོམ་ལྡན་འདས་

49-1-187a

ཀྱི་སྒྲུབ་ཐབས་བཤད་པ་ནི་ཚིགས་སུ་བཅད་པ་བཞི་པའི་སྒོ་ནས་བཅོམ་ལྡན་འདས་ཀྱི་ངོ་བོ་བཤད་པར་བྱ་སྟེ། རང་བཞིན་བསམ་གཏན་བཅས་པ་ཡིས། །ཞེས་བྱ་བ་ལ་སོགས་པ་ལ། དེ་ལ་དང་པོ་རེ་ཞིག་གང་གི་ཚེ་སྒྲུབ་པ་པོའི་རྣལ་འབྱོར་པས་བཅོམ་ལྡན་འདས་ཀྱི་སྒྲུབ་ཐབས་རྩོམ་
པར་བྱེད་པ་དེའི་ཚེ་རང་གི་སྙིང་གར་པཾ་ཡིག་ལས་སྐྱེས་པའི་པདྨ་ལས་ཨ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་བསྒོམ་པར་བྱའོ། །དེའི་སྟེང་དུ་བཅོམ་ལྡན་འདས་ཀྱི་ས་བོན་གྱི་ཡི་གེ་ཧྲཱིཿབསྒོམ་པར་བྱའོ། །དེ་ལས་འོད་ཟེར་འཕྲོས་ཏེ་འོད་ཟེར་གྱི་ཚོགས་ཀྱིས་རང་གི་ལུས་རབ་ཏུ་གསལ་བར་བྱས་
ནས་རྗེས་སུ་དྲན་པ་བཞི་བསྒོམ་པར་བྱའོ། །དེ་སླར་ཡང་དེ་བཞིན་དུ་འོད་ཟེར་གྱི་ཚོགས་ཀྱིས་སེམས་ཅན་གྱི་ཁམས་ཐམས་ཅད་རྣམ་པ་སྣ་ཚོགས་པའི་སྡུག་བསྔལ་གྱིས་མནར་བར་བལྟས་ནས། དེ་ལ་སེམས་ཅན་གྱི་ཁམས་རྣམས་སྡུག་བསྔལ་དེ་ལས་ཉེ་བར་བསྒྲལ་ཏེ་བསོད་ནམས་ཀྱི་ཚོགས་འཕེལ་
བར་བྱ་བའི་ཕྱིར་ནམ་མཁའི་དཀྱིལ་ཐམས་ཅད་རང་གི་ཡི་དམ་གྱི་ལྷ་དང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཡོངས་སུ་གང་བར་བསྒོམས་ཏེ། སླར་ཡང་ས་བོན་གྱི་ཡི་གེའི་འོད་ཟེར་རྣམས་ཀྱིས་མེ་ཏོག་མ་ལ་སོགས་པའི་མཆོད་པའི་ལྷ་མོ་རྣམས་སྤྲོས་ནས་ལྷའི་ཚོགས་ལ་མཆོད་པར་བྱས་ལ། 
སླར་ཡང་། དཀོན་མཆོག་གསུམ་ལ་བདག་སྐྱབས་མཆི། །ལ་སོགས་པའི་ཚིགས་སུ་བཅད་པ་བརྗོད་པར་བྱའོ། །ཡང་དེའི་འོད་ཟེར་ལྕགས་ཀྱུའི་རྣམ་པ་དེས་ལྷའི་ཚོགས་བཀུག་ནས་ས་བོན་གྱི་ཡི་གེ་ལ་ཞུགས་པར་བསྒོམ་པར་བྱའོ། །དེ་བཞིན་དུ་སེམས་ཅན་གྱི་ཁམས་ཐམས་ཅད་ཀྱང་དེའི་འོད་ཟེར་གྱིས་
སྦྱངས་ཏེ་སངས་རྒྱས་ཉིད་ལ་བཀོད་ནས་སངས་རྒྱས་ཀྱི་གཟུགས་ཀྱིས་ཡང་སེམས་ཅན་གྱི་ཁམས་ཐམས་ཅད་ས་བོན་གྱི་ཡི་གེ་ལ་རབ་ཏུ་ཞུགས་པར་བསྒོམ་པར་བྱའོ། །རང་གི་ལུས་ཀྱང་ངོ་། །ར་ཡིག་ཀྱང་ཧ་ཡིག་དང་ཨཱི་ཡིག་དང་ཐིག་ལེ་རྣམས་ཀྱང་ཕྱི་མ་ཕྱི་མའི་ནང་དུ་ཞུགས་པར་བསྒོམ་པར་བྱའོ། །
དེ་ཡང་དང་པོའི་ཐིག་ལེའི་ནང་དུ་རབ་ཏུ་ཞུགས་པར་བསྒོམས་ནས་ཐིག་ལེ་དེ་ཡང་མི་དམིགས་པར་བྱའོ། །དེ་ནས་དེ་བཞིན་དུ་ཤུ་ནྱ་ཏཱས་བརྟན་པར་བྱེད་པའི་སྔགས་འདི་བརྗོད་པར་བྱ་སྟེ། རིགས་དྲུག་གི་བདག་ཉིད་ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པའི་ཨོཾ་ནི་རྣམ་པར་སྣང་མཛད་དོ། །

49-1-187b

ཤུ་ནྱ་ཏཱ་ཞེས་པ་ནི་རིན་ཆེན་འབྱུང་ལྡན་ནོ། །ཛྙཱ་ན་ཞེས་པ་ནི་མི་བསྐྱོད་པའོ། །བཛྲ་ཞེས་པ་ནི་འོད་དཔག་མེད་དོ། །སྭ་བྷཱ་ཝ་ཨཱཏྨ་ཀོ྅་ཧཾ་ཞེས་པ་ནི་དོན་ཡོད་གྲུབ་པའོ། །ཨ་ཧཾ་ཞེས་པ་ནི་དྲུག་པ་རྡོ་རྗེ་སེམས་དཔའོ། །དེ་ཉིད་བསྡུས་པའི་རང་བཞིན་སྟོང་པ་ཉིད་དུ་ལྟ་བ་དང་སྤྲོ་བར་ལྟ་བའོ། །བསྡུ་བ་ཞེས་
པ་ནི་དོན་དམ་པའི་བདེན་པ་སྟེ་དེ་ཉིད་ཤེས་རབ་ཏུ་བརྗོད་དོ། །སྤྲོ་བ་ནི་ཀུན་རྫོབ་ཀྱི་བདེན་པ་སྟེ་ཐབས་སོ། །དེའི་དོན་དམ་པའི་བདེན་པ་འབའ་ཞིག་ནི། གཞན་དོན་རྫོགས་པར་འགྱུར་བ་མ་ཡིན་ཏེ། དོན་དམ་པའི་བདེན་པའི་མཐར་སངས་རྒྱས་ཉིད་ཐོབ་པར་འགྱུར་རོ། །དེ་ལྟར་ན་གཞན་གྱི་
དོན་ཡོངས་སུ་རྫོགས་པའི་ཕྱིར་ཀུན་རྫོབ་ཀྱི་བདེན་པའི་བདག་ཉིད་སྤྲོ་བར་བལྟ་བར་བྱའོ། །དེའི་ཕྱིར་ཐབས་དང་ཤེས་རབ་ཀྱི་བདག་ཉིད་དེ། དེ་ཉིད་ཀྱིས་ཐམས་ཅད་འགྲུབ་པར་འགྱུར་རོ། །དེ་ལ་དང་པོར་ར་ཡིག་ཡོངས་སུ་གྱུར་པ་ལས་ཉི་མའི་དཀྱིལ་འཁོར་རོ། །དེའི་སྟེང་དུ་ཧཱུཾ་ཡིག་ཡོངས་སུ་
གྱུར་པ་ལས་རྡོ་རྗེ་རྩེ་ལྔ་པ། དེ་ལས་འོད་ཟེར་རྡོ་རྗེའི་གཟུགས་ཀྱིས་འཕྲོས་ཏེ། དེ་ལས་འོད་ཟེར་འབར་བས་རྡོ་རྗེའི་ས་གཞི་དང་རྡོ་རྗེའི་གུར་རྣམས་བསྒོམ་པར་བྱའོ། །དེའི་དབུས་སུ་ཧཱུཾ་ཡིག་ཡོངས་སུ་གྱུར་པ་ལས་ཆོས་ཐམས་ཅད་རང་བཞིན་མེད་པར་བསྒོམས་ལ་ཕྱི་ནས་ཆོས་འབྱུང་དཀར་པོ་བསྒོམ་
པར་བྱ་སྟེ། དཀར་པོ་ཉིད་ནི་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཉིད་དོ། །དེའི་སྟེང་དུ་པཾ་ཡིག་ཡོངས་སུ་གྱུར་པ་ལས་པདྨ་དམར་པོ་འདབ་མ་བརྒྱད་པའོ། །དེའི་སྟེང་དུ་ཨོཾ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་རོ། །དེའི་སྟེང་དུ་ཧྲཱིཿཧཱུཾ་ཛཿཞེས་པའི་ཡི་གེ་གསུམ་
ཡོངས་སུ་གྱུར་པ་ལས་ལྕགས་ཀྱུ། དེ་ཡོངས་སུ་གྱུར་པ་ལས་རང་ཉིད་དཔལ་ལྡན་རིགས་ཀྱི་འཇིག་རྟེན་དབང་ཕྱུག་གི་ངོ་བོར་བསྒོམ་པར་བྱའོ་ཞེས་པ་ནི་འབྲེལ་པའོ། །རང་བཞིན་བསམ་གཏན་བཅས་པ་ཡིས་ནི་གནས་ཀྱི་དོན་ཐམས་ཅད་ཀྱི་གང་གི་རང་བཞིན་མེད་པ་ཞེས་བཤད་དོ། །
དེའི་བསམ་གཏན་ནི་དྷ་ཙིནྟ་ཡཾ་ཞེས་པའི་ཁམས་ལས་དེ་དང་བཅས་པའི་བསམ་གཏན་དུ་བལྟ་ཞིང་ལྡན་པ་ཞེས་པའི་དོན་ནོ། །ཛཱ་ཏི་མཚལ་གྱི་འོད་ཟེར་མཚུངས། །ཞེས་པའི་ཛཱ་ཏི་དང་མཚལ་ཞེས་པ་ནི་ཚོན་གྱི་བྱེ་བྲག་གོ། །དེ་དང་མཚུངས་པའི་འོད་ཟེར་དམར་པོ་ཞེས་པའི་དོན་ནོ། །ཟེའུ་

49-1-188a

འབྲུ་ལེ་བརྒན་རྩི་དང་འདྲ་བ་ནི་འོད་འབར་ཞིང་སིནྡྷུ་ར་ལྟར་དམར་བ་སྟེ་གཙོ་བོ་ལི་ཁྲི་ལྟར་དམར་བའོ། །འདིར་ཡང་གཙོ་བོ་ནི་ཡང་འོད་དཔག་ཏུ་མེད་པ་སྟེ་དེ་དང་བཅས་པའོ། །གཞན་ཡང་སྔགས་ཀྱི་གཟུགས་ཀྱི་ནི་ཡི་གེ་གསུམ་གྱི་རང་བཞིན་གྱི་སྔགས་དང་ལྷ་ཉིད་དབྱེར་
མེད་པའོ། །ལྷའི་ལྷ་ནི་ལྷ་རྣམས་ཀྱི་བདག་པོར་གྱུར་པའི་ཕྱིར་ལྷའི་ལྷའོ། །སྐད་ཅིག་གིས་མངོན་པར་བྱང་ཆུབ་པའི་ཕྱིར་ཞལ་གཅིག་པའོ། །ཕྱག་ནི་བདུད་བཞི་ལས་རྣམ་པར་རྒྱལ་བའོ། །མཁའ་པད་ཟླ་བའི་གདན་ལ་བཞུགས། །ཞེས་པ་ནི་སྔོན་དུ་བཤད་པའི་ཆོས་འབྱུང་པདྨ་ཟླ་བའི་
གདན་ལ་བཞུགས་པའོ། །ཞགས་པ་ལྕགས་ཀྱུ་བསྣམས་པ་ནི་གདུལ་བྱའི་སྐྱེ་བོ་རྣམས་འཛིན་པའི་ཕྱིར་ཞགས་པ་དང་གདུག་པ་ཅན་རྣམས་འགུགས་པའི་ཕྱིར་ལྕགས་ཀྱུ་བསྣམས་པའོ། །ཁྱབ་བདག་ནི་དབང་ཕྱུག་ལ་སོགས་པ་གཙོ་བོ་ཡོན་ཏན་སྦྱོར་བའོ། །མཆོག་སྦྱིན་ཕྱག་རྒྱ་
ནི་ནོར་བུ་སྟེ། ཕྱག་རབ་ཏུ་བརྐྱང་ན་གཞན་གྱི་དོན་གྱི་ཕྱིར་ནོར་བུ་དང་བཅས་པའི་ཕྱག་གིས་ཆུ་སྐྱེས་ཞེས་པའི་དོན་ནོ། །ཡང་དག་རོལ་པ་ཉིད་ནི་སྒེག་པའི་ཉམས་གཙོ་བོའི་ཕྱིར་ཏེ་སྒེག་པ་དང་བཅས་པ་ཞེས་པའི་དོན་ནོ། །མུ་ཏིག་ནོར་བུས་རྣམ་པར་བརྒྱན་ནི་རང་བཞིན་གྱིས་དྲི་མ་མེད་པའི་
ཕྱིར་ནོར་བུས་རྣམ་པར་བརྒྱན་པའོ། །ཐམས་ཅད་ལ་རབ་ཏུ་འགྲོ་བ་སྟེར་བའི་ཕྱིར་མུ་ཏིག་གིས་རྣམ་པར་བརྒྱན་པའོ། །པདྨའི་ཕྱག་ནི་པདྨའི་ཕྱག་རྒྱ་དང་ཡང་དག་པར་ལྡན་པའི་ཕྱིར་རོ། །ཡང་ན་པདྨ་བཞིན་དུ་སེམས་ཅན་གྱི་དོན་ལ་འཁོར་བའི་ནང་དུ་གནས་ཀྱང་འཁོར་བའི་སྐྱོན་གྱིས་
མ་གོས་པའི་ཕྱིར་རོ། །པདྨའི་ཕྱག་རྒྱ་ནི་ཕྱག་གཡོན་པདྨ་ས་བརྒྱན་པ་ཞེས་པའི་དོན་ནོ། །སྐུ་གསུང་ཐུགས་རྣམ་པར་དག་པའི་ཕྱིར་སྤྱན་གསུམ་མོ། །གདུལ་བྱ་སྣ་ཚོགས་གདུལ་བར་དགོངས་པས་སྣ་ཚོགས་པའི་ཚུལ་འཛིན་པ་ནི་སྣ་ཚོགས་སྐུའོ། །འོད་ཟེར་སྟོང་ལྡན་བཞིན་དུ་
མ་རིག་པའི་མུན་པ་སེལ་བར་བྱེད་པས་གཟི་བརྗིད་ཆེན་པོ་སྟེ་འོད་གསལ་ཆེན་པོ་ཞེས་པའི་དོན་ནོ། །གདུག་པ་ཅན་ཐམས་ཅད་ལས་རྣམ་པར་རྒྱལ་བའི་དཔའ་བོའི་དབང་ཕྱུག་གོ། །འགྲོ་བ་རྣམས་ཀྱི་བདག་པོའི་ཕྱིར་འགྲོ་བའི་མགོན་ནོ། །རྣལ་འབྱོར་མ་རྣམས་ཐུགས་དགྱེས་པ་ནི་ལྷན་

49-1-188b

ཅིག་སྐྱེས་པའི་དགའ་བའི་ངོ་བོ་ཉིད་ཀྱིས་རྣལ་འབྱོར་མ་རྣམས་ཀྱི་ཡིད་ཚིམ་པར་བྱེད་པ་ཞེས་པའི་དོན་ནོ། །སྔགས་རྣམས་ཀུན་ལ་ཞེས་པ་ནི་སྔགས་ཐམས་ཅད་ཀྱི་གནས་སུ་གྱུར་པ་ཞེས་པའི་དོན་ནོ། །རྣམ་པ་དེ་ལྟ་བུས་བཅོམ་ལྡན་འདས་རིགས་ཀྱི་འཇིག་རྟེན་དབང་ཕྱུག་བསྒོམ་པར་བྱའོ། །
དངོས་གྲུབ་ཐམས་ཅད་རབ་སྟེར་བ་ནི་ཕྱག་རྒྱ་རབ་ཏུ་སྟེར་བ་ཞེས་བྱ་བའི་དོན་ནོ། །རྣམ་པ་དེ་ལྟ་བུའི་དམ་ཚིག་སེམས་དཔའི་ངོ་བོར་བསྒོམས་ནས། སླར་ཡང་ནམ་མཁའི་མཐིལ་དུ་རྣམ་པ་དེ་ལྟ་བུ་ཉིད་ཀྱི་བཅོམ་ལྡན་འདས་ཡེ་ཤེས་སེམས་དཔའི་ངོ་བོར་བསྒོམ་པར་བྱའོ། །དེ་ལྟ་བུའི་
ཡེ་ཤེས་སེམས་དཔའ་ཛཿཧཱུཾ་བཾ་ཧོཿཞེས་པའི་ཡི་གི་རྣམ་པ་བཞིས་དགུག་པ་དང་། གཞུག་པ་དང་། བཅིང་བ་དང་། མཉེས་པ་རྣམས་དམ་ཚིག་སེམས་དཔའི་ནང་དུ་བྱའོ། །སླར་ཡང་ཡེ་ཤེས་སེམས་དཔའི་ཐུགས་ཀར་པདྨ་དང་ཟླ་བ་ལ་ཧྲཱིཿཡིག་གི་ས་བོན་ཏིང་ངེ་འཛིན་སེམས་དཔའི་ངོ་བོར་
བསྒོམ་པར་བྱའོ། །དེའི་ས་བོན་གྱི་འོད་ཟེར་གྱིས་ནམ་མཁའི་མཐིལ་དུ་དེ་བཞིན་གཤེགས་པ་དང་ལྷ་མོའི་ཚོགས་བསམ་པར་བྱའོ། །དེ་རྣམས་རྣལ་འབྱོར་པས་དབང་བསྐུར་བར་གསོལ་བ་གདབ་པར་བྱ་སྟེ། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཱཾ། ཕྱི་ནས་དེ་བཞིན་གཤེགས་པ་དང་
ལྷ་མོའི་ཚོགས་སུ་བཅས་པས་དབང་བསྐུར་བར་བསམས་ཏེ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ་ཞེས་པའི་སྔགས་བརྗོད་པར་བྱའོ། །དེ་ལྟ་བུའི་བསམ་གཏན་བྱས་ཏེ་སྔགས་བཟླས་པར་བྱའོ། །འདི་ནི་མདོར་བསྡུས་པའི་སྒྲུབ་ཐབས་ཀྱི་རིམ་པའོ། །དེ་ལྟ་བུའི་རྣམ་པས་
སྔོན་དུ་གསུངས་པའི་བཅོམ་ལྡན་འདས་བསྒོམ་པར་བྱའོ། །གང་དང་གང་གིས་ཞེས་པ་ལ་སོགས་པ་ནི་སྒྲུབ་པ་པོའི་རྣལ་འབྱོར་པ་གང་གིས་གང་བསྒོམ་པའི་བསམ་པས་རྣལ་འབྱོར་གོམས་པ་སྟེ། བཅོམ་ལྡན་འདས་ཀྱི་རྣལ་འབྱོར་རྫོགས་པར་བསྒོམ་པར་བྱའོ། །དེ་དང་དེའི་བསམ་
པའི་དབང་གིས་དེ་བཅོམ་ལྡན་འདས་དེའི་རང་བཞིན་ཏེ་དེའི་ངོ་བོ་ཉིད་དུ་འགྱུར་ཏེ་ཡིད་བཞིན་གྱི་ནོར་བུ་མཆོག་ལྟ་བུའོ། །ད་ནི་ཞི་བ་ལ་སོགས་པ་ནི་སྒྲུབ་པའི་ལས་ཀྱི་རྗེས་སུ་འབྲངས་ནས་བཅོམ་ལྡན་འདས་བསྒོམ་པ་བརྗོད་པར་བྱ་སྟེ། ལྷ་ནི་དཀར་པོས་ཞི་རབ་སྟེར། །དེ་བཞིན་དག་ནི་རབ་

49-1-189a

སད་བྱེད། །ཅེས་པ་སྟེ། གང་གི་ཚེ་རྣལ་འབྱོར་པས་ཞི་བའི་ལས་འགའ་ཞིག་བྱེད་ན། དེའི་ཚེ་དེས་བཅོམ་ལྡན་འདས་སྐུ་མདོག་དཀར་པོ་བསྒོམ་པར་བྱ་སྟེ། བཅོམ་ལྡན་འདས་སྐུ་མདོག་དཀར་པོས་ཞི་བ་རབ་ཏུ་སྟེར་བའི་ཕྱིར་རོ། །འདིར་བསྒོམ་པའི་རིམ་པས་ནི་ཞི་བའི་ལས་
བྱེད་པའི་སྐབས་སུ་རྣལ་འབྱོར་པ་ཞལ་བྱང་དུ་ཕྱོགས་ཏེ་བསྒོམ་པར་བྱའོ། །དེ་ལ་དང་པོར་ཝ་ཡིག་དཀར་པོ་ཡོངས་སུ་གྱུར་པ་ལས་ཆུའི་དཀྱིལ་འཁོར་ཟླུམ་པོ་བསྒོམ་པར་བྱའོ། །དེའི་སྟེང་དུ་བདག་ཉིད་རིགས་ཀྱི་འཇིག་རྟེན་དབང་ཕྱུག་སྐུ་མདོག་དཀར་པོ་རྣམ་པར་སྣང་
མཛད་ལྟ་བུ་རྣམ་པར་སྣང་མཛད་ཀྱིས་དབུ་བརྒྱན་པ་བསྒོམ་པར་བྱའོ། །དེ་ལ་ཡང་ཡེ་ཤེས་སེམས་དཔའི་ངོ་བོའི་རིགས་ཀྱི་འཇིག་རྟེན་དབང་ཕྱུག་གི་རང་བཞིན་གཞན་བསྒོམ་པར་བྱའོ། །ཡེ་ཤེས་སེམས་དཔའ་དེའི་ཐུགས་ཀར་པདྨ་དང་ཟླ་བ་ལ་བསྒྲུབ་བྱའི་ལུས་བཀུག་སྟེ། ཉོན་མོངས་པ་རྣམས་ཐིམ་པར་
བསམ་མོ། །དེའི་རྗེས་ལ་ཡེ་ཤེས་སེམས་དཔའི་ཐུགས་ཀའི་ཟླ་བ་ལ་ཡི་གེ་གསུམ་གྱི་རང་བཞིན་གྱི་སྔགས་ཀྱི་ཕྲེང་བ་བཞེངས་ཏེ་བདུད་རྩིའི་རྒྱུན་འབབ་པར་བྱེད་པས་བསྒྲུབ་བྱའི་ལུས་ལ་དམིགས་ཤིང་སྣང་བར་བྱས་ཏེ། རང་གི་ལུས་ལས་འོད་ཟེར་རྣམ་པར་འཕྲོས་ཏེ་རྩེ་མོའི་ཆ་ལས་དཔག་ཏུ་
མེད་པའི་ལྷ་མོའི་ཚོགས་སུ་གྱུར་ནས། བདུད་རྩིས་ཡོངས་སུ་གང་བའི་བུམ་པ་ཕྱག་ན་བསྣམས་པས། བསྒྲུབ་བྱ་ལ་མངོན་པར་དབང་བསྐུར་ཏེ། དེ་བཞིན་དུ་རྒྱུན་དུ་གྱུར་པའི་ལྷ་མོ་དང་སྙོམས་པར་ཞུགས་པའི་བདག་པོ་ཐབས་དང་ཤེས་རབ་སྙོམས་པར་ཞུགས་པ་ལས་ཡང་དག་པར་བྱུང་
བའི་བྱང་ཆུབ་ཀྱི་སེམས་ཀྱི་རྒྱུན་གྱིས་ཀྱང་དབང་བསྐུར་ཞིང་ཉེས་པ་རྣམས་ཉེ་བར་ཞི་བར་བྱའོ་ཞེས་པ་ནི་ཞི་བའི་ལས་ཀྱི་ཆོ་གའོ། །དེའི་རྗེས་སུ་ངག་རབ་ཏུ་སད་པར་བྱེད་པ་ནི་ཤེས་པར་བྱ་སྟེ། ངག་རབ་ཏུ་སད་པ་ནི་ཞལ་དང་ཕྱག་དང་སྐུ་མདོག་དང་དབྱིབས་ལ་སོགས་པ་ཐམས་ཅད་སྔ་མ་
བཞིན་དུའོ། །འོན་ཀྱང་རང་གི་སེམས་ཐོག་མ་མེད་པའི་མ་རིག་པའི་བག་ཆགས་ཀྱི་མི་ཤེས་པས་རབ་ཏུ་བཅིངས་པའི་བདག་དང་བདག་གིར་འཛིན་པས་ཟིན་པའི་སེམས་ཉིད་ཀྱི་ཉོན་མོངས་པ་མ་ལུས་པ་ཉེ་བར་ཞི་བ་རབ་ཏུ་སྟེར་བ་རྣམ་པར་སྣང་མཛད་དཀར་པོ་མེ་ལོང་ལྟ་བུའི་ཡེ་ཤེས་

49-1-189b

ཀྱི་ངོ་བོར་བསྒོམ་པར་བྱའོ། །དེའི་ངག་རབ་ཏུ་སད་པར་འགྱུར་རོ། །དེ་ཉིད་ཞི་བའི་ལས་དང་། ངག་རབ་ཏུ་སད་པ་ལས་བཅོམ་ལྡན་འདས་སྐུ་མདོག་དཀར་པོ་བསྒོམ་པར་བྱའོ། །དེ་ནི་དབང་དང་དགུག་པའི་ཆོ་ག་སྟེ། དབང་དང་དགུག་པའི་དེ་ཉིད་ལ་སྐུ་མདོག་དམར་པོ་རྣམ་པར་བསམ་པར་
བྱ་སྟེ། དེ་ནི་དབང་དང་དགུག་པའི་ལས་ལ་བཅོམ་ལྡན་འདས་སྐུ་མདོག་དམར་པོ་བསྒོམ་ཞིང་ཞལ་དང་ཕྱག་མཚན་ལ་སོགས་པ་སྔོན་མ་བཞིན་དུའོ། །འདིར་བསྒོམ་པའི་རིམ་པ་ནི་རྣལ་འབྱོར་པས་ཞལ་ནུབ་ཏུ་མངོན་པར་ཕྱོགས་ཏེ། ཡ་ཡིག་ཡོངས་སུ་གྱུར་པ་ལས་རླུང་གི་དཀྱིལ་འཁོར་
གྱི་སྟེང་དུ་འོད་དཔག་ཏུ་མེད་པས་དབུ་བརྒྱན་པ་སྒེག་པའི་ཉམས་གཙོ་བོར་མཛད་པའི་རང་ཉིད་རིགས་ཀྱི་འཇིག་རྟེན་དབང་ཕྱུག་གི་རྣམ་པར་བསྒོམས་ཏེ། ཕྱི་ནས་རང་གི་སྙིང་གའི་ཧྲཱིཿཡིག་ཡོངས་སུ་གྱུར་པ་ལས་ཧཱུཾ་ལས་བྱུང་བའི་པདྨའི་སྡོང་བུ་ལས་འོད་ཟེར་གྱི་སྐུད་པ་དང་བཅས་པ་འབྱུང་བའི་
འདབ་མ་བརྒྱད་པའི་པདྨ་དམར་པོ་བསམ་པར་བྱའོ། །འདབ་མ་སོ་སོ་ལས་བོན་གྱི་ཡི་གེ་དམར་པོ་གསུམ་སྟེ་ཧྲཱིཿཧྲཱིཿ་ཧཱུཾ་ཛྫཿརྣམས་བསམ་ཞིང་གེ་སར་བཀོད་པའི་ཟེ་འབྲུ་ལ་ཧྲཱིཿཡིག་གཉིས་ཀྱིས་རྣམ་པར་བརྟེན་པའི་བཅོམ་ལྡན་འདས་ཀྱི་ཡི་གེ་གསུམ་གྱི་སྔགས་རྣམ་པར་བསྒོམས་ཏེ། དེའི་
སྔགས་ལས་འོད་ཟེར་དམར་པོས་མྱོས་བྱེད་མྱོས་པར་བྱེད་པས་རླུང་གི་དཀྱིལ་འཁོར་བསྐྱེད་དེ། ཕྱོགས་ཀྱི་འཁོར་ལོ་ཐམས་ཅད་ཁྱབ་ནས་བསྒྲུབ་བྱའི་ལུས་འདོད་པས་ཕ་རོལ་གྱི་དབང་དུ་འགྱུར་ཞིང་མྱོས་པར་བྱས་པ་མདུན་དུ་བལྟ་བར་བྱ་སྟེ། ཞགས་པས་མགུལ་པ་བཅིངས་ཤིང་སྙིང་གའི་
པདྨ་ལྕགས་ཀྱུས་ཕུག་སྟེ། བྷ་གའི་པདྨར་དེ་བཞིན་དུ་འདོད་པའི་མཚོན་གྱིས་བསྣུན་པས་འཁྲུགས་ཤིང་རབ་ཏུ་མྱོས་པ་རྣམ་པར་བསམ་མོ། །དེ་ནས་ཕྱིས་དེའི་སྙིང་གའི་ཆུ་སྐྱེས་ཀྱི་ཟེ་འབྲུ་ལ་ཧྲཱིཿཡིག་གཉིས་ཀྱིས་རྣམ་པར་བརྟེན་པའི་མིང་གི་ཡི་གེ་བླངས་ཏེ་ཕྱིས་རང་གི་མགུལ་པ་ལ་
བཅིངས་པར་བསམ་པར་བྱའོ། །སླར་ཡང་རང་གི་སྙིང་གའི་པདྨའི་ཟེ་འབྲུར་གནས་པའི་ཟླ་བ་ལ་གནས་པའི་ཧཱུཾ་ཡིག་ལས་འོད་ཟེར་གྱི་དྲ་བ་དམར་པོ་སྲོག་གི་རླུང་གིས་བདས་ཏེ་འདབ་མ་ལ་གནས་པའི་ཡི་གེ་གསུམ་གྱི་རང་བཞིན་གྱི་སྔགས་ཀྱང་སྟེང་དུ་སོང་སྟེ། རང་གི་སྣ་བུག་གཡས་པའི་

49-1-190a

ལམ་ནས་འཐོན་ནས་མྱོས་པའི་སྙིང་གའི་པདྨའི་ཟེ་འབྲུར་གནས་པའི་མིང་གི་ཡི་གེ་བཀུག་སྟེ། བསྒྲུབ་བྱའི་སྣ་བུག་གཡོན་གྱི་བུ་གའི་ལམ་ནས་བྱུང་སྟེ། མིང་ལ་ཤིན་ཏུ་འཁྱུད་ནས་དེའི་སེམས་དང་རང་སེམས་ལྷན་ཅིག་ཏུ་བྱའོ། །འདི་
ནི་དབང་གི་རབ་ཏུ་སྦྱོར་བའོ། །དགུག་པའི་རབ་ཏུ་སྦྱོར་བ་ཡང་འདི་ཉིད་དོ། །ད་ནི་བསྐྲད་པའི་རབ་ཏུ་སྦྱོར་བ་གསུངས་ཏེ། དུ་བ་དམར་པོའི་ཞེས་པ་ལ་སོགས་པ་ནི་བསྐྲད་པའི་དུས་སུ་དུ་བ་དམར་པོའི་ཁ་དོག་གི་བཅོམ་ལྡན་འདས་བསྒོམ་པར་བྱའོ། །རླུང་གི་དཀྱིལ་འཁོར་གྱིས་དཀྲིས་པའི་
ཞེས་པ་ནི་རླུང་གི་དཀྱིལ་འཁོར་གྱིས་བསྐོར་བ་ཞེས་པའི་དོན་ནོ། །ཆོ་ག་འདི་ལྟ་བུས་བཅོམ་ལྡན་འདས་ཀྱི་དགྲ་བོ་རྣམས་སྐྲོད་པར་བྱེད་དེ་འདིར་ཐེ་ཚོམ་མེད་པར་བྱེད་པར་འགྱུར་རོ། །དགྲ་བོ་རྣམས་སྐྲོད་པར་བྱེད་པའི་འདིར་བསྒོམ་པ་རིམ་པའི་ནི་རྣལ་འབྱོར་པས་ཉི་མ་གུང་གི་དུས་སུ་ཁ་ལྷོར་མངོན་
པར་ཕྱོགས་ཏེ་དུ་བ་དམར་པོའི་མདོག་ཅན་དོན་ཡོད་གྲུབ་པ་ལྟ་བུ་སེར་སྣའི་རིགས་དོན་ཡོད་གྲུབ་པས་དབུ་བརྒྱན་པ་རླུང་གི་དཀྱིལ་འཁོར་གྱིས་དཀྲིས་པ་བདག་ཉིད་རིགས་ཀྱི་འཇིག་རྟེན་དབང་ཕྱུག་གི་སྐུར་བསྒོམ་པར་བྱའོ། །ཕྱག་མཚན་ལ་སོགས་པ་རྣམས་སྔ་མ་བཞིན་ནོ། །བསྒྲུབ་བྱ་
ཡང་རྔ་མོའི་སྟེང་དུ་གནས་པ་ལ་རང་གི་འོད་ཟེར་དུ་བ་དམར་པོའི་ཁ་དོག་ལྟ་བུས་རང་གི་གནས་ནས་བསྐྱོད་པར་བསམ་པར་བྱའོ། །བདག་ཉིད་ཀྱང་དུ་བ་དམར་པོའི་མདོག་ཅན་ལྕགས་ཀྱུའི་རྣམ་པས་མཚན་པའི་མཚོན་ཆ་བཟུང་བར་བསྒོམ་མོ། །དེ་བཞིན་དུ་བསྒོམ་པས་དགྲ་བོ་རྣམས་ངེས་པར་སྐྲོད་པར་
འགྱུར་ཏེ། འདིར་ཐེ་ཚོམ་མེད་དོ། །ད་ནི་རྣམ་པར་ཞེ་སྡང་བའི་རབ་ཏུ་སྦྱོར་བ་གསུངས་ཏེ། དུ་བ་དངུལ་གཟུགས་དམར་བ་ནི། །རྣམ་པར་ཞེ་སྡང་ལ་ངེས་སྦྱར། །ཞེས་པའི་དུ་བ་དངུལ་གཟུགས་དམར་པོའི་མདོག་ནི་དེ་མ་ཐག་ཏུ་གསུངས་པའི་དོན་ཡོད་གྲུབ་པས་དབུ་བརྒྱན་པའོ། །སྔོན་དུ་གསུངས་
པའི་ཞལ་དང་ཕྱག་མཚན་དང་ལྡན་པའོ། །རང་གི་སྙིང་ག་ནས་བསྐུལ་ཏེ་ཞེ་སྡང་རྣམ་པར་དག་པ་དུ་བ་དངུལ་གཟུགས་དམར་པོའི་འོད་ཟེར་གྱིས་ཞེ་སྡང་ཡང་དག་པར་བསྐྱེད་དེ། བསྒྲུབ་བྱ་མ་ཧེ་དང་རྟའི་སྟེང་དུ་གནས་ཏེ་ཕན་ཚུན་དུག་དང་མཚོན་ཆ་ས་འཐབ་ཅིང་ཁྲོ་བའི་སེམས་དང་བཅས་

49-1-190b

པར་བསམ་པར་བྱའོ། །དེ་ལྟ་བུ་ཉིད་དུ་བསྒོམ་ཞིང་རྣལ་འབྱོར་པས་དུ་བ་དང་དངུལ་གཟུགས་དམར་པོའི་འཇིག་རྟེན་དབང་ཕྱུག་གི་རྣམ་པར་བྱས་ཏེ། དེས་དགྲ་བོ་རྣམ་པར་ཞེ་སྡང་ངེས་པར་སྦྱོར་བར་འགྱུར་ཏེ། འདིར་ནི་ཐེ་ཚོམ་མེད་དོ། །ད་ནི་གདུག་པ་ཅན་གྱི་སེམས་སོ་སོར་བསད་པ་དང་རེངས་པའི་རབ་
ཏུ་སྦྱོར་བ་གཉིས་གསུངས་ཏེ། བསད་པ་ལ་ནི་ཁ་དོག་གནག །རེངས་པ་ལ་ནི་སེར་པོར་ཤེས། །ཞེས་པ་ལ་སོགས་པའི་བསད་པ་ལ། སྐུ་མདོག་ནག་པོར་བསྒོམ་པར་བྱའོ། །རེངས་པ་ལ་ནི་སེར་པོར་བསྒོམ་པར་བྱའོ། །འདིར་བསྒོམ་པའི་རིམ་པ་ནི་རྣལ་འབྱོར་པས་ཁ་ལྷོར་ཕྱོགས་ཏེ། རང་ཉིད་
མི་བསྐྱོད་པ་བཞིན་དུ་སྐུ་མདོག་ནག་པོ་མི་བསྐྱོད་པས་དབུ་བརྒྱན་པ། སྔོན་དུ་གསུངས་པའི་ཕྱག་མཚན་ལ་སོགས་པ་དང་ལྡན་པའི་རིགས་ཀྱི་འཇིག་རྟེན་དབང་ཕྱུག་གི་སྐུར་བསྒོམ་པར་བྱའོ། །ཕྱི་ནས་བསྒྲུབ་བྱ་ཡང་ཡཾ་ཡིག་ཡོངས་སུ་གྱུར་པ་ལས་དུ་བའི་མདོག་གཞུའི་དབྱིབས་ཅན་རླུང་གི་དཀྱིལ་
འཁོར་ལ་གནས་པའི་རཾ་ཡིག་ཡོངས་སུ་གྱུར་པ་ལས་མེའི་དཀྱིལ་འཁོར་གྲུ་གསུམ་དམར་པོ་ལ་གནས་པར་བསམ་པར་བྱའོ། །རང་གི་སྙིང་གའི་པདྨའི་ཟེ་འབྲུ་ལ་ཟླ་བའི་དཀྱིལ་འཁོར་ལ་གནས་པའི་ཧྲཱིཿཧཱུྃ་ཛྫཿཞེས་པའི་ཡི་གེ་གསུམ་གྱི་སྔགས་ཀྱི་བདག་ཉིད་ཀྱི་ལྕགས་ཀྱུས་བསྒྲུབ་བྱའི་ལུས་
ངག་ཡིད་གསུམ་གྱི་སྣང་བ་བླངས་ཏེ། དེའི་ནང་དུ་སོང་ནས་ཡི་དམ་གྱི་ལྷ་དང་ཡེ་ཤེས་སེམས་དཔའ་ལ་གསོལ་བ་གདབ་པར་བྱའོ། །ནམ་མཁའི་མཐིལ་དུ་བྱོན་པའི་དེ་བཞིན་གཤེགས་པ་རྣམས་ལ་ཡང་གསོལ་བ་བཏབ་ནས། དེ་རྣམས་ཀྱི་མདུན་དུ་སྡིག་པ་བཤགས་པར་བྱ་སྟེ། འདི་ནི་
དཀོན་མཆོག་གསུམ་ལ་གནོད་པར་བྱེད་པའི་སེམས་ཀྱིས་དམྱལ་བ་ལ་སོགས་པར་འགྲོ་བར་འགྱུར་བ་ལས་བཟློག་པའི་ཕྱིར། དེ་བཞིན་དུ་སྨོན་ལམ་གདབ་སྟེ་དེ་ལྟ་བུའི་ངོ་བོའི་ཉིད་ཀྱིས་སྙིང་རྗེ་བསྐྱེད་པར་བྱའོ། །དེའི་ཕྱིར་ཡང་། སྙིང་རྗེ་དམན་པས་འགྲུབ་མི་འགྱུར། །ཞེས་སོ། །དེ་ནས་སྔོན་དུ་གནང་བ་
ཐོབ་ནས་ཡེ་ཤེས་སེམས་དཔའི་དེ་བཞིན་གཤེགས་པའི་གཏི་མུག་རྡོ་རྗེ་ལ་སོགས་པའི་ལྷ་རྣམས་རང་རང་གི་འཁོར་ལོ་ལ་སོགས་པའི་ཕྱག་མཚན་དང་ལྡན་པས་བསྒྲུབ་བྱའི་ལུས་མར་ནག་གིས་བྱུགས་པ་ལྟ་བུ་རབ་ཏུ་གཡོ་བ་ལས་བསྲུང་བ་ལ་སོགས་འཐོན་པར་བསམ་མོ། །ཇི་སྲིད་བསྒྲུབ་བྱའི་

49-1-191a

སྦྱོར་བ་ཡང་དག་པར་སྦྱོར་བར་བྱེད་པར་འགྱུར་ཏེ། ཕྱི་ནས་བསྒྲུབ་བྱའི་བློ་དང་ཤེས་པ་མར་མེ་གཡོ་བ་མེད་བཞིན་དུ་བསམ་མོ། །མཁའ་པད་ཟླ་བའི་སྟེང་དུ་ཧཱུྃ་ཡིག་ལས་སྐྱེས་པའི་ལྕགས་ཀྱུ་ཡོངས་སུ་གྱུར་པ་ལས་དེ་ཉིད་དུ་དེའི་བློ་དང་ཤེས་པ་རིགས་ཀྱི་འཇིག་རྟེན་དབང་ཕྱུག་
སྐུ་མདོག་ནག་པོར་གྱུར་ནས་རླུང་གིས་བསྐྱོད་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་འདས་ནས་དེ་བཞིན་གཤེགས་པ་རྣམས་རྒྱལ་ཚབ་ཏུ་དབང་བསྐུར་བར་བསམ་པར་བྱའོ། །འདི་ནི་མན་ངག་གི་རིམ་པའོ། །དེ་བཞིན་དུ་བྱས་ན་སྡིག་པར་མི་འགྱུར་ཏེ། སྙིང་རྗེ་སྔོན་དུ་འགྲོ་བའི་ཕྱིར་རོ། །
གཞན་དུ་ན་སྡིག་པར་འགྱུར་རོ། །འདི་ནི་གསད་པའི་རབ་ཏུ་སྦྱོར་བའོ། །རེངས་པ་ལ་ནི་སེར་པོར་ཤེས། །ཞེས་པ་ནི་མདོར་བསྟན་པ་སྟེ། རྒྱས་པར་བཤད་པ་ནི་ཚིགས་སུ་བཅད་པ་གཞན་གྱིས་བཤད་དེ། རེངས་པར་བྱ་བ་སེར་པོ་ཉིད་ལས་གཙོ་བོར་ཕྱིར་རྒོལ་བའི་ངག་རེངས་པར་བྱེད་པའི་ལས་
སུ་བརྗོད་དོ། །ལུག་གི་སྟེང་ཞེས་པ་ལ་སོགས་པའི་ལུག་ནི་དུད་འགྲོ་སྟེ། རྣལ་འབྱོར་པས་སྟེང་དུ་ཞོན་པའོ། །རྣལ་འབྱོར་པས་དེ་བཞིན་དུ་བསྒོམ་པར་བྱའོ། །ཡང་ན་བསྒྲུབ་བྱའི་སྟེང་དུ་ལུག་གིས་ཞོན་པ་བཞིན་དུ་ཡང་དག་པས་གནས་པའོ། །རྐན་གྱི་བར་དུ་རྣམ་ཕུག་ནས། །ཞེས་པ་ནི་
རིགས་ཀྱི་འཇིག་རྟེན་དབང་ཕྱུག་སེར་པོར་བསྒོམས་ཤིང་ལུག་གི་སྟེང་དུ་གནས་ནས་ལྕགས་ཀྱུས། བསྒྲུབ་བྱའི་རྐན་ཕུག་ནས་ཞེས་པ་ནི་དེའི་ཕྱིར་ཐམས་ཅད་བསྒྲུབ་བྱ་ལ་ཉེ་བར་མཚོན་པ་སྟེ། སྲིད་པ་གསུམ་དུ་གང་གནས་པ། །ཞེས་པ་ནི་ཐམས་ཅད་རྨོངས་པར་བྱེད་པའོ། །འདི་ནི་
རེངས་པའི་རབ་ཏུ་སྦྱོར་བའོ། །གཞན་དག་སྨོས་པས་ཅི་ཞིག་བྱ། །དོན་མང་ཚིག་ནི་རབ་འདུས་པ། །ཞེས་པ་ནི་དོན་མང་པོ་ཚིག་ཉུང་ཤས་ལ་འདུས་པ་ཞེས་པའི་དོན་ནོ། །འཇིག་རྟེན་གསུམ་དུ་གང་གནས་པའི། །ལས་རྣམས་ཡོན་ཏན་བརྒྱད་ལྡན་པའི། །དེ་ལ་ཡོན་ཏན་བརྒྱད་ནི་ཡང་
དག་པའི་ལྟ་བ་དང་། འཚོ་བ་དང་། སྩོལ་བ་དང་། དྲན་པ་དང་། ཏིང་ངེ་འཛིན་དང་། ངག་དང་། ལས་ཀྱི་མཐའ་དང་། ཡང་དག་པའི་རྟོག་པ་ཞེས་པ་རྣམས་ཏེ། འདིར་འཕགས་པའི་ལམ་ཡན་ལག་བརྒྱད་པོ་ཞི་བ་ཞེས་སོ། །ཡོན་ཏན་བརྒྱད་དང་ལྡན་པ་ནི་གཞན་ཡང་གསུངས་པ་དང་མ་

49-1-191b

གསུངས་པའི་ལམ་རྣམས་རྒྱུད་གཞན་རྣམས་ལས་ཉེ་བར་སྤྱོད་པ་སྟེ། རྒྱུད་གཞན་རྣམས་སུ་ཇི་ལྟར་ཉེ་བར་སྤྱོད་པའི་རབ་ཏུ་སྦྱོར་བའི་ལས་རྣམས་གལ་ཏེ་རང་བཞིན་བསམ་གཏན་སྦྱོར་བ་ཡིས་ཏེ། ཆོ་ག་ཇི་ལྟ་བ་བཞིན་བྱས་པས་འདིར་འགྲུབ་པར་འགྱུར་བར་ཐེ་ཚོམ་མེད་དོ། །གང་ཞིག་ལྷ་ནི་ནམ་
མཁའ་མཚུངས། །ཞེས་པ་ལ་སོགས་པའི་དངོས་པོ་ལས་རེ་ཞིག་བཅོམ་ལྡན་འདས་ནམ་མཁའ་དང་མཚུངས་པའོ། །ཁ་དོག་དབྱེ་བས། སླར་ཡང་གཞན་དུ་ཐ་དད་པས། །འཇིག་རྟེན་གསུམ་ན་གང་སྤྱོད་པའི། །ལས་རྣམས་ཐམས་ཅད་བྱ་བའོ། །སྐལ་བཟང་བྱེད་པའི་ཞེས་བྱ་བ་ལ་སོགས་པ་
ནི་འདིར་རེ་ཞིག་ཡི་གེ་གསུམ་གྱི་རང་བཞིན་རིགས་ཀྱི་འཇིག་རྟེན་དབང་ཕྱུག་གི་ངོ་བོའི་སྔགས་ཀྱིས་སྐལ་བ་བཟང་པོ་ཅན་དུ་འགྱུར་རོ། །འདོད་པའི་གཞན་དབང་བསྒྲུབ་བྱའི་སྙིང་གའི་ཆུ་སྐྱེས་དབུས་སུ་སོན་པའོ། །དེའི་ཕྱིར་བསྒྲུབ་བྱའི་སྙིང་གའི་ཆུ་སྐྱེས་སྦྱོར་བས་འདིར་རང་ཉིད་རིགས་ཀྱི་འཇིག་
རྟེན་དབང་ཕྱུག་གི་རང་བཞིན་ཡེ་ཤེས་སེམས་དཔའི་ངོ་བོར་འདོད་པས་གཟིར་ཏེ། བསྒྲུབ་བྱའི་སྙིང་གའི་ཆུ་སྐྱེས་ལ་རབ་ཏུ་ཞུགས་པའི་སྦྱོར་བས་དབང་པོ་ལ་སོགས་པ་ཡང་དག་པར་བསྒྲུབ་པར་བྱེད་དོ་ཞེས་པའི་དོན་ནོ། །དེ་ནི་དེ་ཁོ་ན་ཉིད་ཀྱི་ཆོགས་གསང་སྔགས་ཀྱི་མགོན་པོ་གང་དུ་གནས་པ་ཞེས་
གསུངས་ཏེ། ཡི་གེ་གསུམ་དང་བཅས་པ་ཞེས་པ་ལ་སོགས་འདིར་སྔགས་ནི་ཡི་གེ་གསུམ་དང་བཅས་པ་སྟེ། ཡི་གེ་གསུམ་གྱི་རང་བཞིན་ཞེས་པའི་དོན་ནོ། །ལྷ་ནི་དེ་ལྟ་བུ་ཀྲི་ཌ་ཡཾ་ཞེས་པའི་ཁམས་ལས་རྩའི་འཁོར་ལོ་ཐམས་ཅད་དུ་ཐིག་ལེའི་གཟུགས་ཉིད་ཀྱིས་རྣམ་པར་རོལ་པའོ། །
སྟེང་དུ་འགྲོ་བ་གསུམ་ནི་ཐུགས་དང་གསུང་དང་སྐུའི་འཁོར་ལོ་རྣམས་སུ་དེས་རོ་གཅིག་ཏུ་གྱུར་པ་ནི་སྟེང་དུ་འགྲོ་བའོ། །དེ་དང་ལྡན་པ་ནི་བཅས་པ་ཞེས་པའི་དོན་ནོ། །ཡང་ན་རླུང་གི་དེ་ཉིད་ཀྱི་རིམ་པ་གཞུག་པ་དང་གནས་དབྱུང་བའི་ངོ་བོ་ཉིན་མཚན་དུ་བཟླས་པ་ནི་སྟེང་དུ་འགྲོ་བ་གསུམ་ལྡན་པའོ། །
དེ་ལྟར་ཡང་རླུང་ནི། ཨོཾ་ཡིག་གིས་ནི་རབ་ཏུ་གཞུག །ཨཱཿཡིག་སྔགས་ཀྱི་དབུས་གནས་དེས། །ཧཱུྃ་ཡིག་སྔགས་ཀྱིས་དབྱུང་བྱས་ནས། །བཟླས་བྱ་མཆུ་དང་རྐན་སྦྱོར་མིན། །ཞེས་སོ། །ལས་གསུམ་བྱེད་པ་ནི་དེ་ཁོ་ན་ཉིད་གསུམ་མངོན་སུམ་དུ་བྱེད་པའི་མཚན་ཉིད་ནི་ལས་བྱེད་པ་སྟེ། རྟག་

49-1-192a

ཏུ་རྒྱུན་མི་འཆད་པ་ཉིད་དོ། །རྣལ་འབྱོར་མ་རྣམས་ཞལ་ལ་གནས་ནི་བདེ་བའི་བདག་ཉིད་ཐིག་ལེ་དེ་ཉིད་ལ་རབ་ཏུ་འཇུག་པར་བྱེད་པའི་ཕྱིར་རོ། །དེའི་ཕྱིར་རྣལ་འབྱོར་མ་རྣམས་ཀྱི་ཞལ་ནི་ཆོས་འབྱུང་གི་བདག་ཉིད་དུ་གནས་སོ། །དེ་བཞིན་དུ་དཔལ་བདེ་མཆོག་གི་རྒྱུད་ལས་ཀྱང་
གསུངས་ཏེ། རྣལ་འབྱོར་མ་རྣམས་ཀུན་རྫོབ་སྤྱོད། །མཁས་པ་ཡི་ནི་མཆོད་པར་འོས། །རང་ཉིད་ཡང་དག་མདུན་ཕྱོགས་ནས། །རྣལ་འབྱོར་པ་ཡིས་ནོར་ཀུན་དབུལ། །ཞེས་སོ། །ཡང་ན་རྣལ་འབྱོར་ནི་འཇིག་རྟེན་ལས་འདས་པའི་ཏིང་ངེ་འཛིན་ཐོབ་སྟེ། གང་རང་གི་བདེ་བ་ལ་ཞུགས་པ་དེ་
རྩ་སུམ་ཅུ་རྩ་གཉིས་པོ་དེ་རྣམས་ཀྱི་ཞལ་ལ་གནས་པ་སྟེ། མཐའ་གཉིས་ཀྱི་རྩེ་མོར་གནས་ཤིང་རིག་པ་བརྟན་པར་གྱུར་པའོ། །དེ་བཞིན་དུ་ཡང་རྣལ་འབྱོར་མ་ནི་དེ་རྣམས་རྩ་སུམ་ཅུ་རྩ་གཉིས་རྣམས་སྤྱི་བོ་ལས་སྐྱེས་པར་ཤེས་པར་བྱ་སྟེ། དེ་རྣམས་ཡང་དག་པར་བསྐུལ་བས་ཡེ་ཤེས་ནི་
མཆོག་ཏུ་དགའ་བའི་ངོ་བོ་ཉིད་དོ། །རྣམ་པ་གསུམ་ནི་འགུགས་པར་བྱེད། །ཅེས་པ་ལ་སོགས་པ་ནི་རྣལ་འབྱོར་པས་གང་གི་ཚེ་ཐིག་ལེའི་རྣལ་འབྱོར་ལ་གོམས་པར་བྱས་པས། དེའི་ཚེ་ལྷན་ཅིག་སྐྱེས་པའི་དགའ་བའི་རང་བཞིན་ཐིག་ལེའོ། །མཛེས་པ་ནི་ཡང་དག་པར་རྫོགས་པའི་བྱང་ཆུབ་ཐོབ་པའི་
ཕྱིར་རོ། །པདྨ་ཟུང་དང་ལྡན་པ་ནི་སྤྲུལ་པ་དང་བདེ་བ་ཆེན་པོའི་པདྨར་གྱུར་པ་སྟེ། འགྲོ་བ་དང་འོང་བའི་ཚུལ་ཉིད་ཀྱིས་སོ། །དེ་ལྟ་བུའི་རྣམ་པས་རྣམ་པ་གསུམ་འགུགས་པར་བྱེད་དེ།རྣམ་གསུམ་གྱུར་པའི་དབང་ལས་དེ་གཡོ་བར་འགྱུར་བ་ནི་བདེ་བ་ཆེན་པོའི་འཁོར་ལོ་ལས་འཛག་པའོ། །དེའི་རྗེས་སུ་
འཛག་པར་གྱུར་པ་ནི་སྙིང་གའི་འཁོར་ལོར་བབས་པའོ། །དེའི་རྗེས་སུ་མི་འཛག་པར་གྱུར་པ་ནི་སྤྲུལ་པའི་འཁོར་ལོར་གྱུར་པའོ། །དེའི་ཚེ་དབུ་མར་མར་མེ་གཡོ་བ་མེད་པ་བཞིན་དུ་གནས་པར་འགྱུར་རོ། །དེ་བཞིན་དུ་རྣལ་འབྱོར་པས་ཀྱང་རྟག་ཏུ་སྦྱོར་བ་ནི་རྣམ་པ་དེ་ལྟ་བུས་རྟག་ཏུ་གཅིག་ཏུ་གནས་
པ་སྟེ། རྟག་ཏུ་རྒྱུན་མི་འཆད་པའོ། །མར་མེ་རླུང་གིས་མ་བསྐྱོད་པ་བཞིན་དུ་རབ་ཏུ་གནས་པ་ཐོབ་པར་འགྱུར་རོ་ཞེས་པའི་དོན་ནོ། །སྔོན་གསུངས་ཞེས་པ་ལ་སོགས་པ་ནི་སྔོན་དུ་བཤད་པའི་ལྷའི་ལྷ་དབང་པོའི་ངོ་བོར་སྒྲུབ་པ་པོ་སྐྱ་རེངས་དམར་པོ་དང་མཚུངས་པའི་འོད་དུ་བསྒོམ་མོ། །ཐབས་

49-1-192b

ཤེས་རབ་གཉིས་རྣམ་པར་དག་པས་མཚན་མོ་ཕྱེད་ཀྱི་དུས་སུ་སྟེ། སྲིད་པ་དང་མྱ་ངན་ལས་འདས་པ་དག་གི་དབུས་སུ་གནས་པའོ། །དེ་ལྟ་བུའི་རྣལ་འབྱོར་ནི་སྔོན་དུ་གསུངས་པའོ། །ཡང་ན་ཨེ་ཡིག་དང་ཝཾ་ཡིག་གི་མཚན་ཉིད་རྣལ་འབྱོར་ཡང་དག་པར་སྤྱོད་པའོ། །ད་ནི་དཀོན་མཆོག་གསུམ་ལ་
གནོད་པ་བྱེད་པ་རྣམས། དེའི་གཟུགས་འཛིན་དེ་ཞེས་པ་ལ་སོགས་པས་སླར་བཤད་དེ། སྔོན་དུ་གསུངས་པའི་བཅོམ་ལྡན་འདས་སྐུ་མདོག་ནག་པོའི་རང་བཞིན་དུ་སྒྲུབ་པ་པོའི་ལུས་འཛིན་པའོ། །དེ་ལྟ་བུའི་ཆོགས་སྒྲུབ་པ་པོ་གང་གིས་དེ་བཞིན་ལྷ་ནི་བཅོམ་ལྡན་འདས་ཏེ་ཞགས་པ་ལྕགས་ཀྱུ་འཛིན་
པས་བསྒྲུབ་བྱའི་ལུས་ལ་སྤྱོད་པར་བྱེད་པ་ནི་ཡང་དག་པར་བླང་བར་བྱ་ཞེས་པའི་དོན་ནོ། །འདིར་བཅོམ་ལྡན་འདས་གང་ཞགས་པ་དང་ལྕགས་ཀྱུ་འཛིན་པ་ཉིད་ཀྱི་འོད་ཟེར་ཆེན་པོ་ཉིད་ཀྱིས་སོ། །དེ་བླ་མའི་ཞལ་ལ་རྣམ་པར་གནས་ནི་བླ་མའི་ཞལ་ལས་བླང་བར་བྱ་ཞེས་པའི་དོན་ནོ། །འདིར་གསུངས་
པ་ནི་སྔོན་དུ་གསུངས་པའི་ཞགས་པས་བཅིངས་པ་ལ་སོགས་པ་དང་། ལྕགས་ཀྱུས་ཀྱང་གང་དགུག་པ་སྟེ། དེ་བླ་མའི་ཞལ་ལས་རྟོགས་པར་བྱའོ་ཞེས་པའི་དོན་ནོ། །དེ་བསྒྲུབ་བྱའི་ལུས་ལ་གཞན་ཅི་འདྲ་ན་ཞགས་པས་ཡང་དག་པར་བཀུག་ཅིང་ལྕགས་ཀྱུས་བསྣུན་པས། གཞན་ཡང་
རྣམ་པར་མྱོས་པ་ནི་རྣམ་པར་འཁྲུགས་པས་ཞེས་པའི་དོན་ནོ། །འཇིགས་པ་དང་བཅས་པའི་ཕྱིར་ལུས་དམར་ནི་ལུས་དམར་པོར་གྱུར་ཏེ། ཡང་ནས་ཡང་དུ་བརྒྱལ་བར་འགྱུར་ཏེ་སྒོ་དགུ་རྣམས་སུ་བསྣུན་པས་ཁྲག་མང་དུ་འབབ་པ་ཞེས་པའི་དོན་ནོ། །དེ་བཞིན་དུ་སྔོན་དུ་མདོར་བསྟན་པའི་
རྗེས་སུ་འབྲང་ནས་འདི་ནི་རྒྱས་པར་བཤད་པའི་རིམ་པ་སྟེ། དཀོན་མཆོག་གསུམ་ལ་གནོད་པར་བྱེད་པ་གསད་པའི་རིམ་པའོ། །གཞན་དུ་བཤད་པའི་གསད་པའི་རིམ་པ་ནི་བསྒྲུབ་བྱའི་ལུས་ལས་བྱང་ཆུབ་ཀྱི་སེམས་ཡང་དག་པར་ལེན་པར་བྱེད་པ་སྟེ། ཞགས་པས་འགུགས་པ་
དང་ལྡན་པའི་ལྟེ་བའི་འཁོར་ལོ་ལ་གནས་པའི་ཨཾ་ཡིག་ཡོངས་སུ་གྱུར་པ་ལས་གཏུམ་མོ་འབར་བའི་གཟུགས་ནི་ཞགས་པས་འགུགས་པ་སྟེ། སྟེང་དུ་སོང་ནས་བདེ་བ་ཆེན་པོའི་འཁོར་ལོར་གནས་པའི་མགོ་ཐུར་དུ་བསྟན་པའི་ཧཾ་ཡིག་གི་གཟུགས་ལྕགས་ཀྱུས་བསྣུན་པའོ། །རྣམ་

49-1-193a

པར་མྱོས་པའི་ཞེས་པ་ནི་རང་གི་གནས་ནས་འབབ་པ་སྟེ། བདེ་བ་ཆེན་པོའི་འཁོར་ལོ་ལས་ཞེས་པའི་དོན་ནོ། །ལུས་དམར་ནི་ལྷན་ཅིག་སྐྱེས་པའི་དགའ་བའི་ངོ་བོ་ཉིད་དོ། །ཡང་དང་ཡང་དུ་བརྒྱལ་བ་ནི་འཁོར་ལོ་ལས་འཁོར་ལོའི་མཐར་འབབ་པའོ། །ཁྲག་འབབ་པ་
ནི་བདེ་བ་ཆེན་པོ་དཔག་ཏུ་མེད་པའོ། །སྒོ་དགུ་རྣམས་སུ་བསྣུན་པ་ནི་ཆོས་ཀྱི་འཁོར་ལོར་གྱུར་པའི་ལྷ་མོ་བཞི་དང་དེ་བཞིན་གཤེགས་པ་ལྔའི་རིགས་སྒོར་བསྣུན་པས་སྤྲུལ་པའི་འཁོར་ལོའི་ནང་དུ་འབབ་པའོ། །འདིར་ཡང་བྱང་ཆུབ་སེམས་ཀྱི་ཐིག་ལེ་མི་ལྷུང་ཞིང་སྟེང་དུ་འདྲེན་པར་བྱེད་པའི་མཚན་
ཉིད་ཡིན་པ་ནི་གཟི་བརྗིད་ཆེན་པོའོ། །སྔོན་དུ་གསུངས་པའི་ཞགས་པ་ལྕགས་ཀྱུས་འཛིན་པ་དག་གིས་དེ་ཐམས་ཅད་ལ་གཟི་བརྗིད་ཆེན་པོ་ཉིད་དོ། །བླ་མའི་ཞལ་ལ་གནས་ནི་སྙིང་གའི་འཁོར་ལོ་དང་སྤྲུལ་པའི་འཁོར་ལོ་སྟེ། འཁོར་ལོ་གཉིས་ཀྱི་བར་དུ་གནས་པ་ཞེས་པའི་དོན་ནོ། །ད་ནི་
སྔགས་ཀྱིས་ཕན་པར་བྱེད་པ་སྲོག་བཞིན་བསྲུང་བར་བྱ་བ་ཚིགས་སུ་བཅད་པ་དྲུག་གིས་གསུངས་ཏེ། སྒྲིབ་པ་དང་བྲལ་མཚུངས་པའོ། །ཞེས་བྱ་བ་ལ་སོགས་པ་ནི་སྒྲུབ་པ་པོས་དང་པོར་རེ་ཞིག་སྒྲིབ་པ་དང་བྲལ་མཚུངས་པ་ནི་སྒྲིབ་པ་ལས་ངེས་པར་གྲོལ་བའོ། །རང་ལུས་རྣམ་པར་བལྟ་བར་བྱ་བ་ནི་དེ་
རང་ལུས་ལ་བལྟ་བར་བྱ་སྟེ། དེ་ལ། སྒྲིབ་པ་དང་བྲལ་མཚུངས་པའོ། །ལུས་ཀྱི་དབུས་སུ་རབ་ཏུ་བཞེངས་པའི་སྔགས་ནི་ཧྲཱིཿཡིག་དམར་པོ་ཞེས་ཏེ་དེ་ཉིད་དང་པོའི་ཡི་གེའི་རང་བཞིན་ཡི་གེའི་དབང་པོར་ཤེས་པར་བྱའོ། །དེ་བཞིན་དུ་འབར་ཞིང་འབབས་པའི་དབྱིབས་ནི་མར་མེ་འབར་བ་དང་། མེ་ལྟ་
བུས་ཞེས་པའི་དོན་ནོ། །གཞན་ཡང་ཁ་དོག་དམར་པོ་ནི་པདྨའི་ག་འཛིན་པའོ། །རང་གི་ཞལ་གྱི་ནང་ནས་འཐོན་ཏེ་ཁའི་སྒོར་རོལ་ནི་བསྒྲུབ་བྱའི་སྒོ་སྟེ་བསྒྲུབ་བྱའི་ཁའི་སྒོ་རུ་ཞེས་པའི་དོན་ནོ། །དེ་ལ་མངོན་འདོད་རོལ་པ་སྟེ་བསྒྲུབ་བྱའི་ཁའི་སྒོར་ཡོངས་སུ་འཁོར་བ་ཞེས་པའི་དོན་ནོ། །ཕྱི་
ནས་དེ་ཉིད་ཡི་གེ་རྣམས་བསྒྲུབ་བྱའི་ཁར་ཐིམ་ནས་ཇི་སྲིད་བསྒྲུབ་བྱའི་སྙིང་གའི་རུ་སྐྱེས་ལ་ཐིམ་པར་བསམ་པར་བྱའོ། །ཕྱི་ནས་དེའི་མཐར་སྙིང་གར་ཅུང་ཟད་གནས་པ་ཐམས་ཅད་དེའི་མཐར་ཞེས་པ་ནི་དང་པོའི་ཡི་གེའི་མཐར་ནི་ཧཱུཾ་ཡིག་གོ། །དེ་ཉིད་ཀྱི་གཟུགས་ཀྱིས་དེ་ཡང་རབ་ཏུ་ཞུགས་

49-1-193b

ཏེ་བསྒྲུབ་བྱའི་སྙིང་གར་གང་ཅུང་ཟད་གནས་པ་ཐམས་ཅད་ཕྲོགས་ཏེ། དེ་ཡང་མེར་མེར་པོའི་རང་བཞིན་དཀར་དམར་གྱི་རང་བཞིན་སྒྲོལ་མའི་གཟུགས་ག་བུར་གྱི་རྣམ་པ་དེ་ཉིད་དེ། ཡིད་འཕྲོག་པ་ཐམས་ཅད་དེས་ཡི་གེ་བླང་བར་བྱ་བ་ལེན་པ་ཞེས་པའི་དོན་ནོ། །ཕྱི་ནས་གང་བསྒྲུབ་བྱའི་ལུས་སྟོང་པར་བྱ་སྟེ། 
དེའི་ཚེ་ཛྫཿཞེས་པའི་གསུམ་པའི་ཡི་གེས་རླུང་གིས་ལོ་མ་གཡོ་བ་ལྟར་བྱས་ཏེ། རང་གི་ཁྱིམ་ནི་རང་གི་ལུས་ལ་ཐིམ་ནས་ལུས་བསྒྲུབ་བྱའི་ལུས་དང་ངོ་བོ་གཅིག་ཏུ་གྱུར་པར་བསྒོམ་པར་བྱའོ། །དེ་ལྟ་བུའི་རྣམ་པ་འདིས་ལྷའི་ལྷ་ནི་བཅོམ་ལྡན་འདས་རིགས་ཀྱི་འཇིག་རྟེན་དབང་ཕྱུག་ཞག་བདུན་དུ་བསྒྲུབ་པར་
བྱས་པས་དེའི་ནོར་དང་བཅས་པའི་སྐྱེ་བོ་ཐམས་ཅད་ཀྱིས་བྲན་བྱེད་པར་འགྱུར་རོ། །འཚོ་བ་དང་ནི་ནོར་གྱིས་ཀྱང་། །ས་སྟེང་འཇིག་རྟེན་སླར་ཅི་སྨོས། །འགྲུབ་འགྱུར་འདི་ལ་ཐེ་ཚོམ་མེད། །དེ་བཞིན་ཐེ་ཚོམ་མེད་པ་ཞེས་པའི་དོན་ནོ། །ད་ནི་འདིའི་སྔགས་ཀྱི་དབང་དུ་བྱ་བའི་ཡུལ་གྱི་རྣམ་པར་དབྱེ་བ་ཚིགས་
སུ་བཅད་པ་གཉིས་ཀྱིས་གསུངས་སོ། །རང་དབང་མེད་རྣམས་ཞེས་པ་ལ་སོགས་པའི་འདིར་སྔགས་ཀྱི་དབང་པོ་ནི་རྒྱལ་པོ་སྟེ། སྒྲུབ་པ་པོས་འདིར་རང་དབང་མེད་པ་ནི་གཞན་གྱིས་གཟུང་བའི་བུད་མེད་ལ་རབ་ཏུ་སྦྱར་བར་མི་བྱའོ། །རྒྱལ་སྲིད་སྒྲུབ་པ་མཆོག་ནི་ངེས་པ་སྟེ། །འདིར་སྔགས་ཀྱི་རྒྱལ་པོ་
བཟླས་པར་བྱའོ་ཞེས་པའི་དོན་ནོ། །སྒྲུབ་པ་པོ་གང་གིས་སླར་ཡང་གཞན་དུ་སྟེ་གཞན་གྱིས་བདག་ཏུ་བཟུང་བའི་བུད་མེད་སྒྲུབ་པ་ནི་འདོད་པ་ལ་ལོངས་སྤྱོད་ཅིང་འདོད་པ་ལ་ཆགས་པ་སྟེ། དེས་དེ་བཞིན་དུ་དབང་བྱས་པས་ལྷུང་བར་འགྱུར་ཏེ་སྡིག་པར་འགྱུར་རོ་ཞེས་པའི་དོན་ནོ། །རྒྱུ་གང་གི་ཕྱིར་ན་དེ་
གཞན་གྱིས་ཡོངས་སུ་བཟུང་བའི་བུད་མེད་བསྒྲུབས་ན་འོང་མི་ནུས་པའི་ཕྱིར་དེའི་སྐད་ཅིག་ལ་འཆི་བར་འགྱུར་ཏེ་དེ་མ་མཐོང་བའི་ཕྱིར་རོ། །གལ་ཏེ་ལྷའི་བུ་མོ་ཡིན་ཡང་འདིར་ཐེ་ཚོམ་མེད་དོ་ཞེས་པ་ནི་ལྷའི་བུ་མོ་ཡང་ངེས་པར་འོང་བར་འགྱུར་རོ་ཞེས་པའི་དོན་ནོ། །རིགས་ཀྱི་འཇིག་རྟེན་མགོན་པོའི་
ལྔ་བཅུ་པ་ལས་ལྷའི་དེ་ཁོ་ན་ཉིད་རིམ་པར་ཕྱེ་བ་སྟེ་གསུམ་པའོ།།      །།ཡང་དག་སྲུང་ཞེས་པ་ལ་སོགས་པ་ནི་དེ་རྣལ་འབྱོར་པས་དམ་ཚིག་སྤྱོད་པ་དམན་པས་འདྲེན་པའི་སྔགས་ཉིད་བཟླས་པར་བྱའོ། །སྦ་ཞིང་སྲོག་བཞིན་བསྲུང་བར་བྱ་སྟེ། འདིར་སྔགས་ནི་འཇིག་རྟེན་དབང་ཕྱུག་གི་སྙིང་པོའོ། །

49-1-194a

མཆོག་ནི་ཕུལ་དུ་བྱུང་བའོ། །གཅིག་པུ་གྲོགས་དང་བྲལ་བྱས་ཏེ། །ཞེས་པ་ལ་སོགས་བཞི་རྣལ་འབྱོར་པས་གང་གི་ཚེ་སྔགས་ཟློས་པར་བྱེད་པ་དེའི་ཚེ་གཅིག་པུ་ནི་གནས་ཀྱི་དོན་ཐམས་ཅད་ལ་ཆགས་པ་སྤངས་པའོ། །འབུམ་དང་ལྡན་ནི་འབུམ་ཕྲག་གསུམ་གྱི་གྲངས་ཀྱི་སྔགས་
བཟླས་པར་བྱའོ། །དེ་ཡང་འཁོར་ལོ་གསུམ་སྟེ་སྐུ་གསུང་ཐུགས་ཀྱི་མཚན་ཉིད་དོ། །བདེ་གཤེགས་མངོན་སུམ་ཞེས་པ་ནི་སྐུ་གསུང་ཐུགས་མངོན་སུམ་དུ་བྱེད་པར་འགྱུར་རོ་ཞེས་པའི་དོན་ནོ། །ད་ནི་སྔགས་བཟླས་པའི་འབྲས་བུའི་བདག་ཉིད་ཆེན་པོར་གསུངས་ཏེ། འཇིག་རྟེན་ཐམས་ཅད་འབྱིན་པ་དང་། །ཞེས་པ་
ལ་སོགས་པ་ནི་གང་སྔོན་དུ་གསུངས་པའི་ཆོས་གསང་སྔགས་བཟླས་པ་དང་ལྡན་པའི་རྣལ་འབྱོར་པ་དེས་འཇིག་རྟེན་ཐམས་ཅད་སྐད་ཅིག་ཙམ་ལ་དེ་བཞིན་དུ་འབྱིན་པར་བྱེད་པ་དང་སྐད་ཅིག་ཙམ་ལ་དེ་བཞིན་དུ་སྡུད་པར་བྱེད་དེ། ཡང་ནས་ཡང་དུ་འབྱིན་པ་དང་སྡུད་པར་བྱེད་པའི་ནུས་པ་དང་ལྡན་པ་ཞེས་པའི་
དོན་ནོ། །ནམ་མཁའི་གོ་འཕང་འགྲོ་ཞེས་པ་ནི་ནམ་མཁའ་ལ་འགྲོ་བར་བྱེད་པ་ནི་ཕྱག་ན་རྡོ་རྗེ་ལ་སོགས་པ་སྟེ་རྫུ་འཕྲུལ་དང་ལྡན་པའོ། །དེ་རྣམས་ཀྱི་གོ་འཕང་ནི་དེ་དག་གི་གནས་སུ་འགྲོ་བ་སྟེ་སྒྲིབ་པ་དང་བྲལ་བའི་གནས་སུ་འགྲོ་བ་ཞེས་བྱ་བའི་དོན་ཏེ། དྲན་པས་འདི་ལ་ཐེ་ཚོམ་མེད་པའོ། །ད་ནི་ཕ་རོལ་གྱི་གྲོང་
དུ་འཇུག་པ་བཤད་པར་བྱ་སྟེ། སེམས་དང་སེམས་མེད་སྦྱོར་བ་ཞེས་པ་ལ་སོགས་པ་ནི་སེམས་ནི་རྣལ་འབྱོར་པའི་ཤེས་པའོ། །ལུས་སྐྱེས་ནི་ལུས་ལས་སྐྱེས་པའི་འབྱུང་བ་ཆེན་པོར་གྱུར་པ་རྣམས་འཇུག་པར་བྱེད་པའོ། །གང་ལ་སེམས་མེད་པ་ནི་རོའི་ལུས་སོ། །སྦྱོར་བ་ནི་འཇུག་པའོ། །སེམས་ནི་
རྣལ་འབྱོར་པའི་ཤེས་པ་སེམས་མེད་པའི་རོའི་ལུས་ལ་ཡང་དག་པར་ཐིམ་པའོ། །ལུས་སྐྱེས་མང་པོ་རྣམས་ལ་རབ་ཏུ་ཞུགས་ནས་སེམས་ནི་སེམས་ལས་ངེས་པར་མཐོང་སྟེ། རོའི་ལུས་ལ་སེམས་དེ་བཞིན་དུ་འདིར་སེམས་དང་བཅས་པ་སྟེ། ངེས་པར་མཐོང་བ་ནི་རོ་དེ་ལ་ངེས་པར་མཐོང་བར་འགྱུར་
རོ་ཞེས་པའི་དོན་ནོ། །འདིར་ཚོགས་པའི་དོན་ནི་སེམས་ཅན་ཐམས་ཅད་ཀྱི་སྲོག་གི་གཟུགས་སེམས་ཀྱི་རྟེན་དུ་གྱུར་པ་དེ་ཉིད་རིམ་པས་ཕ་རོལ་གྱི་གྲོང་ལ་འཇུག་པའི་དུས་སུ་རྣལ་འབྱོར་པས་སྟེང་དུ་བླང་བར་བྱ་སྟེ། ཇི་སྲིད་ལྟེ་བའི་འོག་ནས་དེ་ཡང་སྟེང་དུ་མགྲིན་པའི་ཕྱོགས་ཀྱི་མཐར་ཐུག་པ་བཀང་ནས་

49-1-194b

སྣའི་བུ་ག་ནས་འཐོན་ཏེ་རོ་མཉམ་པའི་ལུས་ལ་ཡང་དག་པར་ཞུགས་པར་བྱའོ། །ཇི་སྲིད་རོའི་ལུས་གཡོ་བ་སྟེ། སྦལ་པ་བཞིན་དུའོ། །ཅིའི་ཕྱིར་ཡང་རབ་ཏུ་གཡོ་བ་ན་སླར་ཡང་དེ་ལས་རོའི་ལུས་ལ་མྱུར་དུ་སྲོག་ཚུར་དགུག་པར་བྱའོ། །དེ་བཞིན་དུ་ཕ་རོལ་གྱི་གྲོང་དུ་འཇུག་པ་ལ་གོམས་པར་བྱའོ།།      །།
ད་ནི་སྔགས་ཀྱི་བདག་ཉིད་ཀྱི་ཆེ་བ་བཤད་པར་བྱ་སྟེ། ནད་བཅས་ཞེས་བྱ་བ་ལ་སོགས་པ་ནི་ནད་དང་ལྡན་པའོ། །ནད་མེད་ནི་ནད་ལས་ངེས་པར་གྲོལ་བར་བྱེད་པའོ། །དེ་བཞིན་དུ་ནད་མེད་པ་ཡང་བདེ་བ་དང་བཅས་པར་བྱེད་དོ། །དེ་བཞིན་དུ་སྔགས་ཀྱི་རྒྱལ་པོའི་དབང་པོས་བྱེད་དེ། ཞགས་པ་ལྕགས་
ཀྱུས་འཛིན་པ་ཞེས་པ་འདིའི་ཞགས་པ་ལྕགས་ཀྱུས་འཛིན་པའི་ཚིག་བརླིང་བ་ནི་སྔོན་བཤད་ཟིན་ཏོ། །གཞན་དུ་ཞེས་པ་ལ་སོགས་པ་ནི་རང་བཞིན་གྱི་སྦྱོར་བ་སྔོན་དུ་གསུངས་པའི་ཆོ་ག་མ་ཡིན་པ་གང་གི་ལས་ཀྱི་རྗེས་སུ་འབྲངས་ནས་སྒྲུབ་པ་དེ་ནི་གཞན་དུ་སྟེ་བྱིས་པ་རྨོངས་པས་ཟླ་བ་འཛིན་པར་འདོད་
པ་དང་འདྲའོ། །གསུམ་གསུམ་ཞེས་བྱ་བ་ལ་སོགས་པ་ནི་སྒྲུབ་པ་པོ་གང་གིས་འཇིག་རྟེན་མགོན་པོའི་སྐུ་གསུམ་གསུམ་དུ་རིག་པ་སྟེ། གསུམ་ནི་རྣམ་པ་གསུམ་སྟེ། དེ་ལས་དེ་ཉིད་གསུམ་ནི་སྔགས་ཀྱི་དེ་ཉིད་དང་། བདག་གི་དེ་ཉིད་དང་། ལྷའི་དེ་ཉིད་དོ། །གཞན་ཡང་གསུམ་ནི་སྐུ་གསུམ་སྟེ། ཆོས་
དང་། ལོངས་སྤྱོད་རྫོགས་པ་དང་། སྤྲུལ་པའི་སྐུའོ། །གཞན་ཡང་སྐུ་གསུམ་གསུམ་ནི་ཡི་གེ་རྣམ་པ་གསུམ་མོ། །དེ་བཞིན་དུ་གསུམ་གསུམ་དུ་རིག་པར་བྱའོ། །གནས་སྐབས་གསུམ་ནི་ཞི་བ་དང་། གཉིས་སུ་མེད་པ་དང་། ལམ་རྣམ་པར་སྦྱང་བའི་ཡེ་ཤེས་ཀྱི་སྐབས་སོ། །དེ་བཞིན་དུ་སྐུ་གསུམ་དང་
གནས་སྐབས་གསུམ་ནི་འཇིག་རྟེན་མགོན་པོའི་གོ་འཕང་སྟེ། འཇིག་རྟེན་མགོན་པོའི་རང་བཞིན་དུ་སྒྲུབ་པ་པོ་གང་གིས་ཤེས་པ་དེས་ངེས་པར་འཇིག་རྟེན་མགོན་པོའི་གོ་འཕང་དུ་འགྲོའོ་ཞེས་པའི་དོན་ནོ། །འདི་ནི་རིགས་ཀྱི་འཇིག་རྟེན་མགོན་པོའི་ལྔ་བཅུ་པའི་འགྲེལ་པ་མདོར་བསྡུས་པ་སྟེ། ཁ་
ཆེའི་པཎྜི་ཏ་དྲི་མེད་དཔལ་བཟང་པོའི་ཞལ་སྔ་ནས་མཛད་པ་རྫོགས་སོ།།      །།དཔལ་ས་སྐྱའི་གཙུག་ལག་ཁང་དུ་མི་ཆེན་ལྷ་རྗེ་མེ་ག་ལིང་གིས་ཞུས་ཤིང་། ཡར་ལུངས་པ་ཤུད་ཀེ་གྲགས་པ་རྒྱལ་མཚན་གྱིས་བསྒྱུར་བའོ།།      །།

49-1-195a

༄༅༅། །འཇིག་རྟེན་དབང་ཕྱུག་ལ་ཕྱག་འཚལ་ལོ། །རིགས་ཀྱི་འཇིག་རྟེན་དབང་ཕྱུག་བསྒོམ་པའི་རིམ་པ་ནི། གནས་དབེན་པར་སྟན་བདེ་བ་ལ་སེམས་དཔའི་སྐྱིལ་ཀྲུང་ངམ་ཇི་ལྟར་བདེ་བས་
འདུག་ལ། སྐྱབས་སུ་འགྲོ་བ་དང་། སྡུག་བསྔལ་བ་དུ་མས་གདུངས་པའི་སེམས་ཅན་འདི་རྣམས་ཀྱི་དོན་དུ། བདག་གིས་རིགས་ཀྱི་འཇིག་རྟེན་དབང་ཕྱུག་སྒྲུབ་སྙམ་དུ་བྱང་ཆུབ་ཀྱི་སེམས་བསྐྱེད་པ་སྔོན་དུ་འགྲོ་བས། རང་གི་སྙིང་གར་པཾ་ལས་པདྨ་དམར་པོའི་ལྟེ་བར་ཨ་ལས་ཟླ་བའི་དཀྱིལ་འཁོར་གྱི་སྟེང་
དུ། ཡི་གེ་ཧྲཱིཿའོད་ཟེར་འཕྲོ་བ་དང་བཅས་པ་བསམ། དེ་ལས་འོད་ཟེར་ལུས་ཀྱི་ནང་ཀུན་དུ་འཕྲོས་པས། ལུས་མི་གཙང་བའི་རྫས་སུམ་ཅུ་རྩ་གཉིས་ཀྱིས་གང་བ་སྙིང་པོ་མེད་པར་བསམ་པ་ལུས་རྗེས་སུ་དྲན་པ་དང་། དེ་ལ་བརྟེན་པའི་སེམས་གཟུང་འཛིན་སྣ་ཚོགས་སུ་སྣང་བ་ངོ་བོས་མ་གྲུབ་པར་
བསམས་པ་སེམས་རྗེས་སུ་དྲན་པ་དང་། དེ་དག་ལས་བྱུང་བའི་ཚོར་བ་བདེ་སྡུག་བཏང་སྙོམས་ཀྱིས་བསྡུས་པ་རྣམས་རང་བཞིན་གྱིས་མ་གྲུབ་པར་བསམ་པ་ཚོར་བ་རྗེས་སུ་དྲན་པ་དང་། དེ་རྣམས་ཀྱིས་ཆོས་རང་བཞིན་གྱིས་སྤྲོས་པའི་མཐའ་དང་བྲལ་བར་བསམ་པ་ཆོས་རྗེས་སུ་དྲན་པ་རྣམས་བསྒོམ། 
དེའི་རྗེས་སུ་འོད་ཟེར་རྣམས་བ་སྤུའི་བུ་ག་ནས་ཕྱོགས་ཀུན་དུ་འཕྲོས་པས། མདུན་གྱི་ནམ་མཁར་རིགས་ཀྱི་འཇིག་རྟེན་དབང་ཕྱུག་སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པ་སྤྱན་དྲངས། དེ་ལ་ཡིད་ཀྱིས་ཕྱག་བྱ། རང་གི་སྙིང་གའི་ས་བོན་ལས་འཕྲོས་པའི་མཆོད་པའི་ལྷ་མོ་རྣམས་ཀྱིས་
མཆོད། དེ་ནས། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་དོན་དྲན་བཞིན་པས་བརྗོད། དེ་ནས་སེམས་ཅན་ཐམས་ཅད་ལ་བྱམས་པ་དང་། སྙིང་རྗེ་དང་དགའ་བ་དང་བཏང་
སྙོམས་ཏེ།  ཚངས་པའི་གནས་བཞི་བསྒོམ། དེའི་རྗེས་སུ་ཐུགས་ཀའི་ས་བོན་ལས་འོད་ཟེར་འཕྲོས་པས་མཆོད་བྱའི་ཡུལ་རྣམས་དང་སྣོད་བཅུད་ཀྱིས་བསྡུས་པ་རྣམས་དང་། རང་གི་ལུས་ཀྱང་ས་བོན་ལ་ཐིམ་པར་བསམ། དེ་ནས་ས་བོན་ཡང་ནམ་མཁའ་ལ་འཇའ་ཡལ་བ་བཞིན་དུ་བསམས་ལ།

49-1-195b

ཨོཾ་ཤཱ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨ་ཧཾ། ཞེས་རིགས་དྲུག་གི་ང་རྒྱལ་བྱ། དེ་ནས་པཾ་ལས་པདྨའི་དཀྱིལ་འཁོར་གྱི་སྟེང་དུ་ཧཱུྃ་ལས་ཁྲོ་བོའི་རྡོ་རྗེ་གདེངས་པ་ཁ་དོག་ནག་པོ་ལྟེ་བ་ལ་ཧཱུྃ་གིས་མཚན་པར་བསམ། དེ་ལས་འོད་ཟེར་དབང་པོ་དང་གཤིན་རྗེ་ལ་སོགས་པའི་ཕྱོགས་སུ་ཀུན་དུ་འཕྲོས་པས་བདུད་དང་བགེགས་ལ་སོགས་པ་
ཚར་བཅད་ནས། སླར་འདུས་རྡོ་རྗེའི་ས་གཞི་ར་བ་དྲ་བ་གུར་བླ་རེ་ཡེ་ཤེས་ཀྱི་མེ་འབར་བ་དང་བཅས་པར་གྱུར་པར་བསམ། དེའི་ནང་དུ་ཧཱུྃ་ཡོངས་སུ་གྱུར་པ་ལས་བྱུང་བའི་ཆོས་ཀྱི་འབྱུང་གནས་ཕྱི་དཀར་ལ་ནང་དམར་བ་གདེངས་ཀ་གྱེན་དུ་ཕྱོགས་པ་བསྒོམ། དེའི་ནང་དུ་པཾ་ལས་པདྨ་དམར་པོའི་ལྟེ་བར་ཨ་ལས་ཟླ་བའི་
དཀྱིལ་འཁོར་དཀར་པོའི་སྟེང་དུ་ཧྲཱིཿལས་བྱུང་བ་ལྕགས་ཀྱུ་དམར་པོའི་འོད་ཟེར་འཕྲོ་བ་དང་བཅས་པའི་ཧྲཱིཿཡིག་གིས་མཚན་པ་བསམ། དེ་ཡོངས་སུ་གྱུར་པ་ལས་རིགས་ཀྱི་འཇིག་རྟེན་དབང་ཕྱུག་ཡུམ་དང་བཅས་པ་གཉིས་ཀའང་སྐུ་མདོག་དམར་པོ་ཞལ་གཅིག་ཕྱག་བཞི་པ་སྤྱན་གསུམ་པ། ཕྱག་
གཡས་ཀྱི་དང་པོ་ལྕགས་ཀྱུ། གཉིས་པ་རིན་པོ་ཆེ་དང་མཆོག་སྦྱིན། གཡོན་གྱི་དང་པོ་ན་ཞགས་པ་དང་བཅས་པས་འཁྱུད་པ། གཉིས་པ་ན་པདྨ་དམར་པོ་འཛིན་པ། མུ་ཏིག་དང་ནོར་བུའི་ཚོགས་ཀྱིས་བརྒྱན་པ། འོད་དཔག་ཏུ་མེད་པའི་ཅོད་པན་ཅན་སེམས་དཔའི་སྐྱིལ་ཀྲུང་གིས་བཞུགས་པ། ཤིན་ཏུ་
དགྱེས་པའི་ཉམས་དང་ལྡན་པ་བསྒོམ། དེ་ནས་ཐུགས་ཀའི་ས་བོན་ལས་འོད་འཕྲོས་པས། རིགས་ཀྱི་འཇིག་རྟེན་དབང་ཕྱུག་མདུན་གྱི་ནམ་མཁར་སྤྱན་དྲང་། མཆོད་པ་རྣམས་ཀྱིས་མཆོད། ཛཿཧཱུྃ་བཾ་ཧོཿཞེས་པས་རང་གི་ལུས་དང་གཉིས་སུ་མེད་པར་བསྟིམ་སླར་ཡང་ཐུགས་ཀར་ཡི་གེ་གསུམ་གྱི་སྔགས་བས་
བསམ། དེ་དག་ལས་འོད་ཟེར་འཕྲོས་པས། དབང་གི་ལྷ་སྤྱན་དྲངས་མཆོད་པས་མཆོད། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཱཾ་ཞེས་དབང་བསྐུར་བར་གསོལ་བ་གདབ། དེ་བཞིན་གཤེགས་པ་དེ་རྣམས་ཀྱིས་ཡེ་ཤེས་ཀྱི་ཆུས་གང་བའི་བུམ་པས་དབང་བསྐུར་བར་བསམས་ལ། ལྷའི་སྐུ་ལ་དམིགས་
པའི་བསམ་གཏན་བྱ། དེ་ལས་སྐྱོ་ན་སྔགས་ཀྱི་བཟླས་པ་ནི་ཐུགས་ཀ་ནས། ཧྲཱིཿཧཱུཾ་ཛཿཞེས་པའི་སྔགས་ཀྱི་ཕྲེང་བ་ཞལ་ནས་འཐོན། ཡུམ་གྱི་ཞལ་དུ་ཞུགས་མཁའ་དང་གསང་བའི་རིམ་པ་བཞིན་བརྒྱུད་ནས་ཐུགས་ཀར་ཐིམ་ཞིང་འཁོར་བ་ལ་དམིགས་ནས་སེམས་གཞན་དུ་མ་འཕྲོ་བར་བཟླས་པར་
49-1-196a

བྱ། ཐུན་མཚམས་སུ་མཆོད་པ་དང་གཏོར་མ་བཏང་ཞིང་། གནས་སྐབས་ཐམས་ཅད་དུ་ལྷའི་ང་རྒྱལ་དང་མི་འབྲལ་བར་བྱ། རྫོགས་པའི་རིམ་པ་བསྒོམ་པ་ནི། ལྔ་བཅུ་པ་དང་། དེ་ཉིད་ཀྱི་དོན་གྲུབ་མ་ཧི་མས་བླངས་པའི་སྒྲུབ་ཐབས་ལས་འབྱུང་བ་བཞིན་ཉམས་སུ་བླང་བར་བྱའོ།།      །།
དེ་ལྟར་ན་རིང་པོར་མི་ཐོགས་པར་འཇིག་རྟེན་དབང་ཕྱུག་གི་སྐུར་འགྱུར་རོ། །རིགས་ཀྱི་འཇིག་རྟེན་དབང་ཕྱུག་བསྒོམ་པའི་རིམ་པ་པཎྜི་ཏ་ཆེན་པོ་བི་མ་ལ་ཤྲཱིའི་ཞལ་སྔ་ནས་འབྱུང་བ་བཞིན་བྲིས་པ་འདི་རྫོགས་སོ།།      །།ཀུ་ལ་ལོ་ཀ་ནཱ་ཐཱ་ཡ། འཕགས་པ་སྤྱན་རས་གཟིགས་རིགས་ཀྱི་འཇིག་
རྟེན་མགོན་པོའི་རྗེས་གནང་གི་ཆོ་ག་ནི། གནས་དབེན་པར་མཎྜལ་འདབ་མ་བརྒྱད་བྱས་ལ། དེའི་དབུས་སུ་མཚན་ཉིད་དང་ལྡན་པའི་བུམ་པ་བཤམས་ལ་གཞན་ཡང་ཇི་ལྟར་འབྱོར་པའི་ཡོ་བྱད་སྟ་གོན་བྱས་ནས་སློབ་དཔོན་བདག་ཉིད་ཀྱིས་རྣལ་འབྱོར་རྣམས་རྫོགས་པར་བསྒོམ་སྟེ། སྔགས་ཅི་རིགས་པར་
བཟླས་ལ། དེའི་རྗེས་ལ་བུམ་པ་ཆོ་ག་བཞིན་དུ་ལྷར་བསྐྱེད་ལ། མཆོད་བསྟོད་བཟླས་པ་རྣམས་རྫོགས་པར་བྱའོ། །དེ་ནས་སློབ་མ་ཁྲུས་བྱས་ནས། ཕྱག་དང་མཎྜལ་ཕུལ་ནས། དེ་ནས་དགའ་ཆེན་ཁྱོད་བདག་སྟོན་པ་སྟེ། །ཞེས་པ་ལ་སོགས་པས་གསོལ་བ་བཏབ་ནས། བུ་ཚུར་ཐེག་པ་ཆེན་པོ་ཞེས་པ་ལ་
སོགས་པའི་སྔགས་ཀྱིས་ཐེག་པ་ལ་སྤྲོ་བ་བསྐྱེད་ནས། དཀོན་མཆོག་གསུམ་ལ་བདག་སྐྱབས་མཆི། །ཞེས་པ་ལ་སོགས་པ་སྡིག་པ་བཤགས་པ་དང་། ཇི་ལྟར་དུས་གསུམ་མགོན་པོ་རྣམས། །ཞེས་པ་ལ་སོགས་པས་རིགས་ལྔའི་ཁྱད་པར་གྱི་སྡོམ་པ་སྦྱིན་པ་དང་། དེ་རྣམས་མི་ཉམས་པར་བྱ་བའི་
ཕྱིར། ཕན་ཡོན་དང་། ཉེས་དམིགས་དང་། མནའི་ཆུ་དང་། རྡོ་རྗེ་སློབ་དཔོན་གྱི་བཀའ་མཉན་པའི་སྒོ་ནས་དམ་ལ་གཞག །སྒྲུབ་པའི་ཐབས་ལྟར་སློབ་མ་ལྷར་བསྐྱེད་ལ། ཨོཾ་ཨཱཿཧཱུྃ་གིས་སྐུ་གསུང་ཐུགས་བྱིན་གྱིས་བརླབས་ཡེ་ཤེས་པ་གཞུག་པ་དང་། བུམ་པའི་ཆུས་དབང་བསྐུར་བ་རྣམས་བྱས་ནས། །
གསང་སྔགས་འབྲུ་གསུམ་སྙན་ནས་བརྒྱུད། །བཀའ་དྲིན་གྱི་ལན་མཆོད་པ་དང་། །བསྙེན་བཀུར་ཚུལ་བཞིན་དུ་བྱེད་དུ་གཞུག །དགེ་བའི་རྩ་བ་རྫོགས་པའི་བྱང་ཆུབ་ཏུ་བསྔོའོ། །སློབ་མས་བླ་མ་ལ་ཡོན་ཕུལ་ཏེ། ཙཱ་རུའི་བཟའ་བ་ལ་ལོངས་སྤྱད། ལྷག་མའི་བར་རྫོགས་པ་དང་། བསྔོ་བ་དང་། བཟོད་གསོལ་

49-1-196b

དང་། གཤེགས་སུ་གསོལ་བ་རྣམས་ཆོ་ག་བཞིན་བྱའོ། །དེ་ནས་ལས་ཀྱི་རྗེས་མི་མངོན་པར་བསྡུས་ཏེ། བདག་ཉིད་སྤྱོད་ལམ་གྱི་རྣལ་འབྱོར་གྱིས་གནས་པར་བྱའོ། །ཀུ་ལ་ལོ་ཀ་ནཱ་ཐཱའི་བྱིན་རླབས་དང་རྗེས་གནང་བྱ་བའི་རིམ་པ་ཁ་ཆེའི་པཎྜི་ཏ་བི་མ་ལ་ཤྲཱིའི་ཞལ་སྔ་ནས་བྲིས་པ་རྫོགས་སོ།།      །།
སངས་རྒྱས་ལྔ་ཡི་རྣམ་དག་པའི། །མ་རིག་གསལ་བའི་རིམ་པ་ལས། །དབང་བསྐུར་བྱེད་པའི་རིམ་པ་ཡིས། །ཡེ་ཤེས་ལྔ་ནི་ཐོབ་པར་འགྱུར། །ཞེས་རྡོ་རྗེ་ཕྲེང་བ་ལས་གསུངས་པས། མ་རིག་པ་ལྔ་བསལ་ནས་རིག་པ་ཡེ་ཤེས་ལྔ་རྟོགས་པར་བྱེད་པས་ན་རིག་པའི་དབང་ངོ་། །ལོ་ཙཱ་བ་བློ་བརྟན་གྱིས་བསྒྱུར་བའོ།།      །།
༄༅༅། །རྒྱ་གར་སྐད་དུ། ཀུ་ལ་ལོ་ཀི་ཤྭ་ར་སཱ་དྷ་ནཾ། བོད་སྐད་དུ། རིགས་ཀྱི་འཇིག་རྟེན་དབང་ཕྱུག་སྒྲུབ་པའི་ཐབས། །དེ་ནས་བདག་གིས་བཤད་པར་བྱ། །རིགས་འཇིག་དབང་ཕྱུག་སྒྲུབ་པའི་ཐབས། །གསང་སྔགས་རིགས་ཀྱི་རིམ་པ་ནི། །བླ་མའི་ཞལ་ལས་རྗེས་སུ་ཐོབ། །མཚན་མོ་ཐ་
མའི་བརྒྱད་ཆ་ལུས། །ཐུགས་རྗེའི་བདག་ཉིད་ལངས་ནས་ནི། །འཇམ་པའི་གདན་ལ་རྣལ་འབྱོར་པས། །སྐྱིལ་ཀྲུང་བཅས་ལ་འདུག་པར་བྱ། །བདུད་རྩི་ལྔ་ནི་བླངས་ནས་སུ། །ཐོད་པར་རྟོག་མེད་སེམས་ཀྱིས་གཞག །ཤེས་རབ་ཅན་གྱིས་མེ་རླུང་སྟེ། །དག་དང་ཁོལ་དང་འབར་བར་བྱ། །རྣལ་འབྱོར་
སྐྱེས་ཕྱིར་ཕྱི་དང་ནི། །ནང་གི་གཟུགས་ནི་དག་པར་བྱ། །དེ་རྗེས་ཐུགས་ཀར་པདྨ་དང་། །ཉི་མའི་དབུས་སུ་ཧྲཱིཿབསྒོམ་བྱ། །ཁམས་གསུམ་མ་ལུས་ཁྱབ་པ་ཡི། །འགྲོ་བའི་འོད་ཟེར་རབ་དགྲོལ་གྱིས། །བླ་མས་སངས་རྒྱས་འཇིག་རྟེན་མགོན། །སྤྱན་དྲངས་ནས་ནི་མཆོད་པར་བྱ། །དེ་རྗེས་རང་བཞིན་སྟོང་
པ་ཉིད། །སེམས་ནི་ཅུང་ཟད་ནམ་མཁའོ། །དེ་ལས་ལངས་ནས་ཕྱོགས་བཅུར་ཡང་། །ཁྲོ་བོ་བཅུ་ནི་བསྒོམ་པར་བྱ། །དཔག་ཚད་བྱེ་སྙེད་ཚད་དུ་ནི། །རྡོ་རྗེའི་དཀྱིལ་འཁོར་བསྒོམ་པར་བྱ། །དེ་ཡི་དཀྱིལ་དུ་རང་གི་ལུས། །ཁྲུ་བཞི་པོ་ནི་མཉམ་པ་པོ། །ཀ་བ་བརྒྱད་ལྡན་སྒོ་བཞི་པ། །ཐར་པ་ཡི་ནི་གྲོང་མཆོག་
ལྟོས། །དེ་དབུས་ཆོས་ཀྱི་པདྨ་ལ། །འཆར་ཁ་ཉི་མའི་སྟེང་དུ་ནི། །ཤེས་རབ་ཐབས་ཀྱི་ཡི་གེ་ལས། །མཆོག་གི་པདྨ་མཛེས་པ་སྐྱེས། །འཕྲོས་ཤིང་འདུས་པར་གྱུར་པ་ལས། །རྣམ་པ་ལྔ་ནི་བསྒོམ་པར་བྱ། །དེ་གྱུར་པ་ལས་བདག་ཉིད་ནི། །རིགས་འཇིག་དབང་ཕྱུག་ཁྱབ་བདག་ནི། །འཆར་ཁ་ཉི་མ་

49-1-197a

བརྒྱ་ཡི་འོད། །ཞལ་གཅིག་རལ་པ་འཆང་བ་པོ། །ཅུང་ཟད་མཆེ་གཙིགས་མི་བཟད་པ། །པདྨ་གར་དབང་དཔྲལ་བར་བརྒྱན། །ཟླ་བ་ཉི་མ་མེ་ཡི་སྤྱན། །དེ་ཡི་དཀྱིལ་དུ་རང་གི་ལུས། །ཁྲུ་བཞི་པོ་ནི་མཉམ་པ་པོ། །ཕྱག་བཞི་པར་ནི་བལྟ་བར་བྱ། །རྡོ་རྗེ་སྐྱིལ་ཀྲུང་གིས་གནས་པ། །
སྒེག་པའི་ཉམས་ཀྱིས་ཡོངས་གང་བ། །གཡས་པ་མཆོག་སྦྱིན་ལྕགས་ཀྱུ་དང་། །གཡོན་པ་པདྨ་ཞགས་པ་འཛིན། །དཔའ་བོ་ཕྱག་རྒྱ་དྲུག་གིས་བརྒྱན། །པདྨའི་ཕྲེང་བའི་དོ་ཤལ་ཅན། །དེ་ཡི་ཐུགས་ཀར་བསྒོམ་བྱ་བ། །ཧྲཱིཾ་གི་ཡི་གེ་དམར་པོ་ལས། །འཕྲོས་ཤིང་འདུས་པར་གྱུར་པ་ལས། །
ཡེ་ཤེས་འཁོར་ལོ་གཞུག་པར་བྱ། །དེ་ནས་བདེ་གཤེགས་དངོས་གྲུབ་ཀུན། །སྟེར་ལ་དབང་བསྐུར་མཛད་པར་གསོལ། །རླུང་གི་སྔགས་ཀྱི་ཕྲེང་བའོ། །འཇུག་པ་གནས་པ་འབྱུང་བའོ། །ཧ་ཅང་མྱུར་བུལ་མ་ཡིན་པས། །ཡི་གེ་ཡི་གེ་འབྲེལ་བར་བྱ། །སྔགས་ཀྱི་བཟླས་པ་འབུམ་ཕྲག་གཅིག །སུམ་
ཅུ་རྩ་གསུམ་པ་བླང་བྱ། །ར་ནི་འོག་ཏུ་གདན་དུ་བྱ། །བཞི་པ་སྦྱར་བར་བརྟན་པ་ལ། །ཐིག་ལེ་ཟླ་ཚེས་འབྲེལ་བའོ། །ཨུཥྨ་ཎ་ཡི་བཞི་པ་ཟུང་། །དྲུག་པ་གདན་དུ་ལྡན་པའོ། །སྟོང་པ་དབུ་ལ་ལྕེ་གཉིས་པ། །ཚེག་དྲག་གཉིས་ནི་བལྟ་བར་བྱ། །འདི་ལྟར་ཡི་གེ་དོན་མང་པོ། །གཉིས་མེད་ཡེ་ཤེས་ཀྱིས་
རྟོགས་འགྱུར། །བླ་མའི་མན་ངག་ལམ་གྱིས་ནི། །རིམ་པ་རྒྱས་པར་རྟོགས་པར་བྱ། །རྣ་ནས་རྣ་རུ་བརྒྱུད་པ་ཡིས། །གསང་བ་མཆོག་གིས་ཞི་བ་ཡི། །བརྗོད་པས་མྱུར་དུ་གྲུབ་པ་ཐོབ། །བདུད་སྔགས་ཟློག་པར་བྱེད་མི་ནུས། །དང་པོར་བསྙེན་པའི་ཆོ་ག་བྱ། །མཉམ་པར་གཞག་པས་ཁྲི་བཟླས་བྱ། །
མི་གང་བསོད་ནམས་དམན་པ་ལ། །འགྲུབ་འགྱུར་འདི་ལ་ཐེ་ཚོམ་མེད། །ཞགས་པ་ལྕགས་ཀྱུ་སྟག་ཤམ་ཐབས། །རྩེ་གཅིག་སེམས་ཀྱིས་སྒོམ་བྱེད་ན། །འགྲོ་བ་གསུམ་པོ་འགུགས་པར་བྱེད། །བརྟན་དང་གཡོ་བ་དབང་དུ་འགྱུར། །རང་གི་སྙིང་གར་བུཾ་བརྒྱད་ལངས། །སྣ་བུག་གཡས་ལས་ཕྱིར་ཕྱུང་སྟེ། །
བསྒྲུབ་བྱའི་སྣ་བུག་གཡོན་པར་གཞུག །སྙིང་གའི་བློ་ནི་དགུག་པར་བྱ། །དེ་ལྟར་ཡང་ཡང་ཆོ་ག་ནི། །དབང་དུ་མ་གྱུར་བར་དུ་བྱ། །བསྒྲུབ་བྱ་རྐང་པའི་འོག་ཏུ་བསམ། །ཁོལ་པོ་ལྟ་བུར་འགྱུར་བ་ཡིན། །ཁྱབ་འཇུག་མེ་ལྷ་དབང་ཕྱུག་ཆེ། །དབང་པོ་ཀླུ་དང་སྲིན་པོ་སྲོག །སྔགས་ཀྱི་རྒྱལ་པོའི་ནུས་པ་ཡིས། །

49-1-197b

སྐད་ཅིག་ཉིད་ལ་དབང་དུ་འགྱུར། །དེ་ནས་ཕྱི་རོལ་མཆོག་ཆོ་ག །མཉམ་པར་གཞག་པའི་རྣལ་འབྱོར་བྱ། །ཞ་ཉེ་ལས་བྱུང་ཆེས་དམར་བ། །གྲུ་དྲུག་འཁོར་ལོ་བྲི་བར་བྱ། །དེ་ཡི་ནང་དུ་དཔའ་བོ་བྲི། །འཇིག་རྟེན་དབང་ཕྱུག་སྔགས་གཟུག་འཆང་། །དང་པོར་སྨོས་པའི་ཆོ་ག་ནི། །ཙཱ་རུ་སྣ་ཚོགས་ལྷ་བཤོས་དང་། །
བ་ལ་སྣ་ཚོགས་མ་ད་ན། །མང་པོས་གཞོན་ནུ་མ་ཡང་མཆོད། །དེ་བཞིན་མཁའ་འགྲོ་མ་ཀུན་ཡང་། །སྣ་ཚོགས་རྔ་ཆེན་པ་ཊ་ཧ། །གླུ་དང་རོལ་མོ་ཡིད་འཕྲོག་མ། །མེ་ཏོག་སྣ་ཚོགས་ཆོ་ག་ཡང་། །རྡོ་རྗེ་འཛིན་གྱིས་མཉེས་པར་བྱ། །དེ་ནས་གཏོར་མའི་ལས་བྱ་སྟེ། །རྣལ་འབྱོར་དབང་ཕྱུག་ནུབ་ཏུ་བལྟ། །སྐྲ་གྲོལ་གཅེར་
བུ་བྱས་ནས་ནི། །ལངས་ཏེ་རྐང་པ་གཡོན་པ་བརྐྱང་། །དེ་ནས་པདྨའི་ཕྱག་རྒྱས་སྦྱིན། །འགྲོ་བ་གསུམ་པོ་མཉེས་པར་འགྱུར། །འདི་ནི་སྔགས་ཀྱི་རྒྱལ་པོའོ། །ཐམས་ཅད་དངོས་གྲུབ་འབྲས་བུ་ཉེ། །ཨོཾ་ཨཱཿཨཱ་རོ་ལྀ་ཀ་ཨི་མཾ་པཉྩ་ཨ་མྲྀ་ཏ་པ་ལིཾ་པྲ་ཏཱིཙྪ་གྲྀཧྞཱ་མ་མ་སརྦྦ་ཀར་ཡཾ་ས་ཧ་ཡ་ཧཱུྃ་ཕཊ། དེ་ལྟ་བུ་ནི་ཨུ་རྒྱན་དཔལ། །བླ་མ་
རྣལ་འབྱོར་འདྲེན་དབང་པོ། །བླ་མ་མཁའ་འགྲོ་མའི་ཞལ་ལས། །ཐོབ་ནས་བདག་ལ་བཤད་པ་མཛད། །རིགས་ཀྱི་འཇིག་རྟེན་དབང་ཕྱུག་སྒྲུབ་པའི་ཐབས། །སློབ་དཔོན་བྷྲྀངྒི་ར་བྲམ་ཟེས་མཛད་པ་འཇམ་དཔལ་སྒེག་པས་བསྒྱུར་བ་རྫོགས་སོ།།      །།༄༅༅། །རྒྱ་གར་སྐད་དུ། ཤྲཱི་ཨཱརྱཱ་བ་ལོ་ཀི་ཏེ་ཤྭ་ར་སཔྷཱ་ཀྵ་ར་སཱ་དྷ་ནཾ། བོད་
སྐད་དུ། འཕགས་པ་སྤྱན་རས་གཟིགས་དབང་ཕྱུག་ཡི་གེ་བདུན་པའི་སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ཡེ་ཤེས་འཁོར་ལོ་ལ་ཕྱག་འཚལ་ལོ། །དཔལ་ལྡན་བདེ་ཆེན་ཡེ་ཤེས་སྐུ་མདོག་ཐུགས་རྗེ་འབར་བས་རོལ་པའི་ཚུལ། །ཤེས་རབ་མཆོག་དང་གཉིས་མེད་སྙོམས་ཞུགས་དངོས་
གྲུབ་གཞི་གྱུར་ཅིང་། །མཆོག་དྲུག་ལྷ་མོའི་སྤྱི་བོས་ཞབས་བཏུད་ཡང་དག་དཀྱིལ་འཁོར་ཆེན་པོའི་བདག །སྤྱན་རས་གཟིགས་དབང་མགོན་པོ་ཉིད་རྟག་གུས་པས་རབ་ཏུ་བཏུད་པར་བྱ། །རྣལ་འབྱོར་ཆེན་པོ་གདོང་སོགས་དག་བྱས་བསིལ་ཞིང་རབ་འབྱམ་དབེན་པ་ཡི། །གནས་ཁང་ཡིད་དགའ་སྣ་ཚོགས་མེ་
ཏོག་ཆལ་པར་བཀྲམ་པའམ། །ཡང་ན་རབ་འཇིགས་ཕུག་དང་དུར་ཁྲོད་ལྷ་གནས་ཆུ་འགྲམ་ཤིང་གཅིག་དྲུང་། །བརྩེ་བས་སེམས་བརླན་རྩེ་གཅིག་ཡིད་བྱེད་ཆོས་ཀུན་མཁའ་འདྲར་བསམ་པར་བྱ། །དེ་རྗེས་སྙིང་དབུས་ཉི་མ་ལ་གནས་ཧཱུྃ། །མཁའ་འདྲའི་མགོན་ཅན་འོད་ཟེར་ཟབ་མོ་ཡིས། །འཕགས་

49-1-198a

ཚོགས་བླ་མ་ལྷར་བཅས་དགུག་ནས་ནི། །མཆོད་ཚོགས་ཆོ་ག་ཇི་བཞིན་མཁས་པས་སྤྱད། །དེ་ནས་ཡང་ཆོས་ཐམས་ཅད་སྟོང་པ་ཉིད་ཀྱི་རྣམ་པར་ཐར་པ་ཟབ་མོ་མངོན་དུ་བྱ་སྟེ། ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧཾ། སླར་ནི་སྔོན་གྱི་སྨོན་ལམ་དང་། །སྙིང་རྗེ་ཆེན་པོའི་ཤུགས་ཀྱིས་ནི། །
མཁའ་ལ་གློ་བུར་སྤྲིན་བཞིན་དུ། །སྔགས་པས་ལྷ་མཆོག་རྣམ་པར་འཕྲུལ། །ཡཾ་རཾ་བཾ་ལཾ། སྔོ་དང་དམར་དང་དཀར་དང་སེར། །གཞུ་དབྱིབས་རླུང་གི་དཀྱིལ་འཁོར་དང་། །གྲུ་གསུམ་མེ་དཔུང་འབར་བ་ཉིད། །ཆུ་གཏེར་ཕུང་པོ་ཟླུམ་པོ་དང་། །དེ་བཞིན་གྲུ་བཞི་གསེར་གྱི་དཀྱིལ་འཁོར་དང་། །དེ་སྟེང་སྣ་ཚོགས་
མདོག་གསུམ་ཡིག །ཡོངས་གྱུར་རི་དབང་གྲུ་བཞི་ཆ། །དེ་ནས་དཀྱིལ་འཁོར་མཆོག་བསྒོམ་བྱ། །དེའི་རྗེས་ལ་སྲུང་བའི་འཁོར་ལོ་བསྒོམ་པར་བྱ། ཨོཾ་མེ་དི་ནཱི་བཛྲི་བྷ་བ་བནྡྷ་ཧཱུྃ། ཨོཾ་བཛྲ་པྲཱ་ཀ་ར་ཧཱུྃ་བཾ་ཧཱུྃ། ཨོཾ་བཛྲ་པཉྩ་ར་ཧཱུྃ་བཾ་ཧཱུྃ། ཨོཾ་བཛྲ་བི་ཏ་ན་ཧཱུཾ་ཁཾ་ཧཱུྃ། ཨོཾ་བཛྲ་ས་ར་ཛཱ་ལ་ཏྲོྃ་མྃ་ཏྲོྃ། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུྃ་ཧཱུྃ་ཧཱུྃ། 
སྔགས་འདི་དག་ཉིད་ཀྱིས་མེ་རི་དང་། རྡོ་རྗེ་ར་བ་ལ་སོགས་པས་རྣམ་པར་བཅད་དོ། །དེ་དབུས་པདྨར་འཁོར་ལོ་ལ་གནས་རཾ་ཡིག་ལས་བྱུང་ཉི་དཀྱིལ་དུ། །ཨ་དང་ཀ་སོགས་ཟླ་བ་ཉི་ཕྲག་རྡོར་སེམས་གཙོ་བོ་ཧཱུྃ་བསམས་ལ། །སྤྲོ་ཞིང་བསྡུ་བའི་འོད་ཚོགས་ཞུ་བས་སྤྱན་རས་གཟིགས་བཞད་ཡུམ་བཅས་ནི། །
ཆུ་ཟླའི་གཟུགས་ལྟར་དང་བས་རྩེ་གཅིག་རྟག་ཏུ་ཡང་དག་མཉམ་གཞག་བྱ། །དེ་ལ་དཔལ་ཆེན་ཞལ་གསུམ་མཛེས། །གཡས་དཀར་གཡོན་དམར་དབུས་མཐིང་ག །སྤྱན་གསུམ་པདྨ་བྱེ་བས་མཛེས། །ཕྱག་དྲུག་རྣམ་པར་རོལ་པའོ། །དང་པོའི་ཕྱག་གཉིས་ཀྱིས་རྡོ་རྗེ་དྲིལ་བུ་འཛིན་པས་ནི་ཡུམ་ལ་འཁྱུད་
པའོ། །གཉིས་པ་གཉིས་ཀྱིས་མིའི་པགས་པ་བཤུས་མ་ཐག་པ་བསྣམས་པའོ། །ཐ་མའི་གཡས་དང་གཡོན་ན་མཆན་ཁུང་ན་རྩེ་གསུམ་དང་ཐོད་པ་ཁྲག་གིས་བཀང་བ་དང་ཁ་ཊྭཱཾ་ག་འཛིན་པ་ཉིད་དོ། །མི་ཐོད་དཀར་པོ་དང་ལག་པའི་མཁྲིག་མ་དང་རྡོ་རྗེ་དང་རུས་པའི་ཕྲེང་བ་ཉིད་དང་། མེ་ཏོག་སྣ་ཚོགས་པའི་
ཆུན་འཕྱང་གིས་དབུ་རབ་ཏུ་བརྒྱན་ཏོ། །དེ་བཞིན་དུ་རིན་པོ་ཆེ་དང་རུས་པ་དང་། གདུག་པ་ཅན་གྱི་རྒྱན་དུ་མས་ནི་སྐུ་ལ་བརྒྱན་པའོ། །ཞབས་གཡོན་བརྐྱང་བས་ནི་དབང་ཕྱུག་ཆེན་པོའི་སྟེང་ནས་མནན་ཏོ། །གཡས་བརྐྱང་བས་ནི་ལྷ་མོ་ཆེན་མོའི་བྲང་ཕྲག་ནས་བརྫིས་པའོ། །དེའི་དབུ་སྐྲ་རལ་པའི་ཅོད་པན་

49-1-198b

དམར་སེར་བསྒྱིངས་པ་ཉིད་ཨུ་དུམྺཱ་རའི་མེ་ཏོག་གིས་མཚན་པ་ནི་ཁྱད་པར་རོ། །དེའི་མདུན་དུ་ཡུམ་དམར་མོ་སྒེག་མོ་ལང་ཚོ་ཕུན་སུམ་ཚོགས་མ་གཡས་གཡོན་མདའ་གཞུ་འཛིན་པས་འཁྱུད་པ། མཆོག་ཏུ་དགའ་བས་རྣམ་པར་མྱོས་པའོ། །དེ་ནས་འཁོར་ལོ་རྩིབས་དྲུག་ལ། །རྡོ་རྗེ་ལྷ་མོ་དྲུག་དགོད་
བྱ། །ཤར་ནས་བརྩམས་པའི་རིམ་གྱིས་སུ། །མེ་ལོང་ལ་ནི་བྱད་གཟུགས་བཞིན། །ཕཊ་ལས་སྐྱེས་པའི་ཧེ་རུ་ཀ་མ་སྔོན་མོ་དང་། །ཧཱུྃ་ལས་ཡོངས་གྱུར་རྡོ་རྗེ་འཇིགས་མ་སེར་མོ་ཉིད། །ཧ་ལས་རབ་གྲུབ་འཇིགས་བྱེད་དྲག་མོ་དམར་མོ་དང་། །དེ་བཞིན་ཧ་ལས་རྡོ་རྗེ་དབང་བྱེད་ལྗང་གུ་མ། །ཧྲཱིཿལས་
རྣམ་བལྟས་རྡོ་རྗེ་དྲག་མོ་དུད་མདོག་ཉིད། །ཨོཾ་ལས་མངོན་གྲུབ་རྡོ་རྗེ་མཁའ་འགྲོ་དཀར་མོ་སྟེ། །འདི་དག་ཅིག་ཅར་ཞལ་གཅིག་ཕྱག་བཞི་གཡང་གཞི་དང་། །ཌ་མ་རུ་དང་དྲིལ་བུ་ལེགས་བསྣམས་འདུད་པའོ། །གཙོ་བོ་དང་འཁོར་གྱི་དཀྱིལ་འཁོར་ཆེན་པོའི་ལྷ་ཆེན་པོ། འདི་དག་ནི་ཐམས་ཅད་ཀྱང་
གཞོན་ནུ་མཚན་དང་དཔེ་བྱད་འབར་བ་དང་། ཕྱོགས་གོས་ཅན་མི་མགོའི་ཕྲེང་བའི་དོ་ཤལ་དང་། ཡི་དགས་དང་ཉི་མའི་གདན་ལ་རྣམ་པར་གནས་པ། མེ་དཔུང་འབར་བའི་ནང་ན་སྐུ་གསུང་ཐུགས་ཤིན་ཏུ་རོལ་པའི་བདག་ཉིད་ཕྱག་རྒྱ་ལྔས་བརྒྱན་པ། དངོས་གྲུབ་ཐམས་ཅད་སྟེར་བའི་དོན་དུ་བརྩོན་པས་
བཞེངས་པར་བསྒོམ་པར་བྱའོ། །དེ་རྗེས། བདག་སྙིང་ས་བོན་ལས་འཕྲོས་ཟེར་གྱིས་ཡེ་ཤེས་འཁོར་ལོ་བཀུག་ནས་ནི། །རང་ལུས་ལེགས་བཅུག་ཚུལ་བཞིན་བཅིང་བྱ་གཉིས་མེད་རོལ་པས་དགྱེས་བྱ་ཞིང་། །ལཾ་མཾ་པཾ་ཏཾ་ཁཾ་ཞེས་བྱ་བས་ཁམས་ལྔ་བྱིན་བརླབས་དེ་རྗེས་ཉིད། །ཨོཾ་ཨྃ་ཧྲི་ཧོཾ་ཧཱུྃ་
གི་ཡི་གེས་ཕུང་སོགས་གཞུག །དེ་བཞིན་དུ་བྷྲཱུཾ་ཧཱུྃ་ཨཾ་ཁཾ་དང་ཧཾ་ཧཾ་ཡི་གེ་རྣམས་ཀྱིས་ཀྱང་། །སྐྱེ་མཆེད་ཡོངས་སུ་སྦྱངས་ནས་ནི། །ཆོ་ག་ཇི་བཞིན་གོ་ཆ་བགོ། །ཨོཾ་ཧ། ན་མཿཧི། སྭ་ཧཱ་ཧཱུ། པཽ་ཥཌ་ཧེ། ཧཱུཾ་ཧཱུཾ་ཧོ། ཕཊ་ཧཾ་ཡབ་ཀྱི་གོ་ཆའོ། །ཨོཾ་བཾ་ཧཾ་ཡོཾ་ཧྲིཾ་མོ་ཧྲེཾེ་ཧྲིཾ་ཧུཾ་ཧཱུྃ་ཕཊ་ཕཊ་ཡུམ་གྱི་གོ་ཆའོ། །ཨོཾ་ཨཱཿཧཱུྃ་སྐུ་
གསུང་ཐུགས་བྱིན་གྱིས་བརླབ་པའོ། །དེ་ནས་མགོན་པོ་སྤྱན་དྲངས་ལ། །དབང་བསྐུར་མཆོག་གིས་དབང་མཆོག་ནོད། །བླ་མའི་མན་ངག་ཇི་བཞིན་དུ། །ཆོ་གའི་རིམ་པས་ཤེས་པར་བྱ། །དཔག་མེད་མཆོད་པའི་ལྷ་ཚོགས་ཀྱིས། །མཆོད་བྱ་བདུད་རྩི་མྱང་བར་བྱ། །ཏིང་ངེ་འཛིན་ལ་རབ་བརྟན་པས། །

49-1-199a

གསང་སྔགས་རྒྱལ་པོ་བཟླ་བར་བྱ། །ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ། དེ་ནས་དག་པ་རྟོགས་བྱ་བ། །དྲན་དང་བརྩོན་འགྲུས་དགའ་བ་དང་། །ཤིན་ཏུ་སྦྱངས་དང་ཏིང་ངེ་འཛིན། །བཏང་སྙོམས་བྱང་ཆུབ་ལྷ་རིམ་བཞིན། །ཕ་རོལ་ཕྱིན་དྲུག་རྣམ་དག་ཕྱིར། །རྒྱན་དྲུག་ཐབས་དང་ཤེས་རབ་ཀྱི། །རྣམ་
དག་བརྟན་ཕྱིར་ཡབ་དང་ཡུམ། །དབྱེར་མེད་ཕྱིར་ནི་སྙོམས་པར་ཞུགས། །བར་སྐབས་ཀྱི་ཉེ་བར་སྤྱད་པ་གཏོར་མ་སྦྱིན་པ་ནི། དངོས་གྲུབ་ཉེ་བའི་ཕྱིར་ཏེ། རྣལ་འབྱོར་ཟབ་མོ་ལ་བཤད་པའི། །མན་ངག་གིས་ནི་མཆོད་སྦྱིན་བྱ། །གསང་ཆེན་སྔགས་དང་ཕྱག་རྒྱར་བཅས། །བླ་མེད་ཏིང་འཛིན་རྒྱ་
མཚོས་འགྲུབ། །ཨོཾ་ཨ་རལླི་ཧོ་ཛཿཧཱུྃ་བཾ་ཧོཿ། བཛྲ་ཌཱ་ཀི་ནི་ས་མ་ཡ་སྟྭཾ་དྲྀ་ཤྱ་ཧོཿསྤྱན་དྲང་བའོ། །ཨོཾ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ་རཱཀྵ་ས་བྷཱུ་ཏ་པྲེ་ཏ་པི་ཤཱ་ཙ་ཨུན་མན་ད་ཨ་པ་སྨ་ར་ཌཱ་ཀི་ནྱ་ད་ཡ་ཨི་མཾ་བ་ལིཾ་གྲྀཧྞཾ་ཏུ་མ་མ་སརྦ་སིདྡྷི་མྨེ་པྲ་ཡཙྪནྟུ་ཡ་ཐཻ་བཾ་ཡ་ཐཻཥྚཾ་བྷུ་ཛ་ཐཱ་པི་བ་ཐ་ཛི་གྷྲ་ཐཱ། མཱ་ཏི་ཀྲ་མ་ཐཱ། མ་མ་སརྦ་
ཀ་ཏ་ཡ། སཏྶུ་ཁ་བི་བྲྀདྡྷ་ཡེ་སྭཱ་ཧཱ། ཉེ་བར་སྦྱིན་པའོ། །ཟླ་བ་གསུམ་དུ་འབུམ་ཕྲག་གསུམ་མམ་གཉིས་སམ་ཡང་ན་གཅིག །མི་ཚིག་མ་འདྲེས་བརྩོན་པས་ཏིང་འཛིན་བརྟན་བྱས་ན། །འཇིག་རྟེན་དབང་ཕྱུག་བདེ་ཆེན་འཁོར་ལོ་ལྷ་མཆོག་ཉིད། །ཐོ་རངས་དུས་ཚེ་རྨི་ལམ་མངོན་སུམ་ཞལ་སྟོན་གྱུར། །
དཔལ་སྤྱན་རས་གཟིགས་ཡི་གེ་བདུན་པའི་སྒྲུབ་ཐབས། གནུབས་ལོ་ཙཱ་བ་བྱམས་པའི་དཔལ་གྱིས་བསྒྱུར་བའོ།།      །།༄༅༅། །རྒྱ་གར་སྐད་དུ། ཤྲཱི་མ་ཧཱ་ཀཱ་རུ་ཎི་ཀ་ཨ་བྷི་ཥེ་ཀ་པྲ་ཀ་ར་ཎ་ཨུ་པ་དེ་ཤ་ནཱ་མ། བོད་སྐད་དུ། དཔལ་ཐུགས་རྗེ་ཆེན་པོའི་དབང་བསྐུར་བའི་མན་ངག་
གི་རབ་ཏུ་བྱེད་པ་ཞེས་བྱ་བ། བཅོམ་ལྡན་འདས་དཔལ་པདྨའི་སྣང་བ་ཆེན་པོ་རབ་ཏུ་རྒྱས་པ་ལ་ཕྱག་འཚལ་ལོ། །དང་པོ་རེ་ཞིག་རྣལ་འབྱོར་གྱི་དབང་ཕྱུག་གང་ཞིག །པདྨ་རབ་ཏུ་ཟབ་པའི་དཀྱིལ་འཁོར་རམ། པདྨ་རྒྱལ་པོ་གང་ཡང་རུང་བའི་དབང་དང་གནང་བ་ཐོབ་པས། རྩ་བའི་སྔགས་ལ་
བསྙེན་པ་འབུམ་ཕྲག་གསུམ་སོང་ནས། སློབ་མ་རྗེས་སུ་གཟུང་བར་འདོད་ན། གནས་དབེན་ཞིང་ཉམས་དགའ་བའི་སར། སློབ་མ་ནི་དད་པ་དང་སྙིང་རྗེ་དང་ཤེས་རབ་ཆེ་བ། འཁོར་བ་ལ་སྐྱོན་དུ་མི་ལྟ་ཞིང་། མང་དུ་ཐོས་པ་བླ་མ་ལ་གུས་ཤིང་། ཐེག་པ་ཆེན་པོའི་ཆོས་ལ་ཐེ་ཚོམ་མེད་པ། ཁྱད་

49-1-199b

པར་དུ་ངེས་པའི་དོན་དང་། སྤྱན་རས་གཟིགས་ལ་མོས་ཤིང་། དབང་པོ་རྣོ་བའི་གང་ཟག་དེས། བླ་མ་ལ་གསོལ་བ་འདེབས་པ་ནི། སངས་རྒྱས་སྣང་བ་མཐའ་ཡས། །པདྨའི་རིགས་ཀྱི་དམ་ཚིག་དང་། །པདྨའི་དཀྱིལ་འཁོར་ཆེན་པོ་རུ། །པདྨའི་དབང་བསྐུར་ཞུ་བར་བགྱི། །དེ་ནས་བླ་མས་གནང་བ་སྦྱིན་
པ་ནི། །བཅོམ་ལྡན་འདས་ཀྱི་དཀྱིལ་འཁོར་འདིར། །མི་མཁས་པ་ནི་འཆིང་བར་འགྱུར། །མཁས་པ་རྣམས་ནི་གྲོལ་བར་འགྱུར། །སེམས་ཅན་དད་ཅན་སྨིན་པར་བྱེད། །དུས་གསུམ་སངས་རྒྱས་ཐམས་ཅད་ཀྱང་། །སྲིད་པའི་འདམ་ལས་འདི་ཡིས་བརྒལ། །པདྨའི་རིགས་ཀྱི་དཀྱིལ་འཁོར་འདིར། །ང་ཡིས་
འབོད་ཀྱི་ཡིད་གཉིས་སྤོངས། །ཞེས་བརྗོད་ཅིང་སློབ་མ་གཟུང་བར་བྱའོ། །དེ་ནས་སློབ་དཔོན་གྱིས་དཀྱིལ་འཁོར་བྲི་བ་ནི། པདྨ་ཟབ་པ་དང་། པདྨ་རྒྱལ་པོ་གང་གིས་བྱེད་ཀྱང་རུང་སྟེ། དེ་ལ་དང་པོ་ས་བརྟག་པ་དང་། ས་བསླང་བ་དང་། ས་སྦྱང་བར་བྱ་བ་ནི། ལྟོ་འཕྱེའི་ལྟོ་བ་ནས་བརྐོས་ཏེ། ས་བསླངས་ནས། 
གནས་ཁང་དང་འཚམ་པར་ས་སྟེགས་གྲུ་བཞི་པ་བྱས་ལ། སའི་ལྷ་མོ་ལ་གཏོར་མ་ཕུལ་ཏེ། ས་བྱིན་གྱིས་བརླབ་པོ། །དེ་ནས་བའི་རྣམ་ལྔ་དང་། དྲི་བཟང་གི་ཆུས་བྱུགས་ལ། ཐིག་གི་ཆོ་ག་ལག་ལེན་བཞིན་དུ་གདབ་པོ། །ཚོན་གྱིས་བྲི་བ་ནི། ཚོན་ཁ་དོག་ལྔ་ཡེ་ཤེས་ལྔར་བྱིན་གྱིས་བརླབས་ལ། པདྨ་ཟབ་
པའི་དཀྱིལ་འཁོར་ལ་དབུས་ཀྱི་ལྟེ་བ་དང་ཕྱོགས་བཞིར་པདྨ་འདབ་བཞི་དམར་པོ་ལ། མཚམས་ཀྱི་འདབ་མ་དང་གོང་རས་མཛེས་ཚོན། མུ་ཁྱུད་ལ་པདྨའི་ཕྲེང་བ་བྲིའོ། །པདྨ་རྒྱལ་པོའི་དཀྱིལ་འཁོར་ནི། ལྟེ་བ་དམར་པོ་ལ་ཟེའུ་འབྲུ་དང་གོང་རས་ཅི་མཛེས་འདབ་བརྒྱད་ཀྱི་ཕྱོགས་བཞི་དམར་པོ་མཚམས་བཞི་
དང་མུ་ཁྱུད་རྣམས་མཛེས་ཚོན་དུ་བྱའོ། །དེའི་རྒྱབ་ཏུ་པདྨ་འདབ་བརྒྱད་ཕྱོགས་བཞི་ཕྱོགས་ཚོན་ལ། མཚམས་མཛེས་ཚོན་དུ་བྱའོ། །དེའི་ཕྱི་རོལ་ཡང་པདྨ་འདབ་མ་བཅུ་དམར་པོའམ་སེར་པོར་བྱ་བའམ། ལྷ་སྣམ་དམར་པོའམ། ཡང་ན་ཁྱམས་ཕྱིན་ཆད་སྤྱི་དང་འདྲ་བར་བྲིས་ལ། རྒྱན་དགྲམ་པ་ནི། བླ་
རེ་དང་། ཡོལ་བ་བྲེ། རྟེན་དགྲམ་མོ། །མཆོད་པ་ལྔ་དང་། གཏོར་མ་ལྔ་ལ་སོགས་པས་མཐའ་མ་ལེགས་པར་བསྐོར། གཞན་ཡང་དགོས་པ་རྣམས་གཞུང་བཞིན་བཤམ་མོ། །བུམ་པ་གཙང་མ་ལ་བགེགས་བསྐྲད་པ་ནི། གུ་གུལ་གྱིས་བདུག་ཅིང་ཁྲོ་བོའི་སྔགས་བཟླས་ཏེ། ནང་དུ་བཅུད་

49-1-200a

ཆུ་གཙང་མ་དང་། སྨན་དང་། དྲི་ལྔ་དང་། འབྲུ་ལྔ་དང་། སྙིང་པོ་ལྔ་དང་། རཏྣ་ལྔ། འོ་མ་ལ་སོགས་པ་བླུགས་ལ། དར་རམ། རས་ཀྱིས་མགུལ་ཆིངས་དང་གཟུངས་ཐག་བཏགས་ཏེ། འབྲས་བུ་ཅན་གྱི་ཤིང་ལོ་ལོན་པས་བརྒྱན་པའི་བུམ་པ་གཉིས་ལ་རྣམ་རྒྱལ་གྱི་བུམ་པ་དང་ལས་ཐམས་ཅད་པའི་
བུམ་པ་དང་། དབང་གི་བུམ་པ་ལ་སོགས་ཅི་འབྱོར་བཤམས། ནང་དུ་ལྷ་བསྐྱེད་ལ། མཆོད་པ་ཕུལ་ནས། དབང་གི་བསྙེན་པ་བྱའོ། །རྣམ་རྒྱལ་གྱི་བུམ་པ་དཀྱིལ་འཁོར་གྱི་དབུས་སུ་གཞག་གོ། །ལས་བུམ་གང་བདེར་དགོད། དེ་ནས་རང་སྟན་བདེ་བ་ལ་འདུག་ནས། བྲིས་པའི་དཀྱིལ་འཁོར་དང་། བུམ་པའི་
ནང་དུ་དཀྱིལ་འཁོར་རྒྱས་པ་བསྒོམ། ལས་བུམ་ནང་དུ་རྟ་མགྲིན་བསྒོམ་པ་ནི། ཧྲཱིཿལས་རྟ་མགྲིན་དམར་པོ་ཞལ་གསུམ་ཕྱག་དྲུག་པ། ཞལ་དབུས་དམར་བ། གཡས་དཀར། གཡོན་སྔོ། དབུ་སྐྲ་དམར་སེར་གྱེན་དུ་འབར་བ། རྟ་མགོ་ལྗང་ཞུར་རྔོག་མ་དམར་བ། རྟ་སྐད་སྒྲོགས་པ། ཕྱག་གཡས་ཁ་ཊྭཱཾ་
ག་རྩེ་གསུམ་བསྣམས་པ། གཡོན་ན་རྔེའུ་ཆུང་འཁྲོལ་བ། བར་མ་གཉིས་ཀྱིས་ལྷ་སྲིན་སྡེ་བརྒྱད་ཀྱི་ཙིཏྟའི་ཕྲེང་བ་བསྣམས་པ། གཡས་འོག་མས་ཞིང་དབྱུག །གཡོན་གྱི་འོག་མས་ཐོད་པ་ལྕང་ལོ་ཅན་ལྷ་སྲིན་སྡེ་བརྒྱད་ཀྱི་ཁྲག་གིས་བཀང་བ་ཞལ་དུ་གསོལ་བ། ཞབས་གཡས་བསྐུམ། གཡོན་བརྐྱང་
པས་བཞུགས་པ། སྐུ་སྨད་སྟག་གི་པགས་པའི་ཤམ་ཐབས་བྱས་པ། སྐུ་སྟོད་ཞིང་ལྤགས་ཀྱི་གཡང་གཞི་མནབས་པ། སྦྲུལ་རིགས་བཞིས་དབུ་དང་ཡན་ལག་བརྒྱན་པ། མེ་དཔུང་གི་དབུས་སུ་བཞུགས་པར་བསམ། སྔགས་ནི། ཨོཾ་ཧྲཱིཿཧ་ཡ་གྲཱི་ཝ་པདྨཱནྟ་ཀྲྀཏ་བཛྲ་ཀྲོ་དྷ་ཧ་ཡ་གྲཱི་ཝ་ཧུ་ལུ་ཧུ་ལུ་སརྦ་
པཱ་བཾ་ཤུདྡྷེ་ཤུདྡྷེ་ཡེ་ཧཱུཾ་ཕཊ་སྭཱ་ཧཱ། ཞེས་བརྗོད་པས། ཁྲོ་བོའི་སྐུ་གསུང་ཐུགས་ཀྱི་བདུད་རྩིའི་ཆུས་གང་བར་བསམ། དེ་ནས་སློབ་མ་རྣམས་ལ། ལས་བུམ་གྱིས་ཕྱིར་ཁྲུས་བྱས་ཏེ། ནང་དུ་བཏང་ལ་མཎྜལ་ཕུལ་ནས་གྲལ་ལ་རིམ་པར་གཞག་གོ། །དེ་ནས་གདོང་གཡོགས་བཅིངས་ལ། ལག་ཏུ་
མེ་ཏོག་བཟུང་ལ་གསོལ་བ་གདབ་པོ། །དེ་ནས་བདག་ཉིད་དང་། དཀྱིལ་འཁོར་དང་། བུམ་པ་གསུམ་ག་མི་དམིགས་པའི་ངང་ལས། བསོད་ནམས་ཀྱི་སྤྲིན་ཁ་དོག་ལྔ་ལྔ་ལས་འོག་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་ཁྱབ། དེའི་སྟེང་དུ་རྣམ་པར་ཤེས་པ་ཡི་གེ་ཧྲཱིཿདཀར་པོ་ཐིག་ལེ་

49-1-200b

གཉིས་ག་དང་བཅས་པ་བསྒོམ། དེ་ལས་ཡིག་འབྲུ་ཁ་དོག་སྣ་ཚོགས་པ་སྤྲིན་གྱི་ཐོག་ཏུ་འཕྲོས་པ་ལས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་འོད་ཟེར་ལས་གྲུབ་པའི་གཞལ་ཡས་ཁང་ཆེན་པོ། ཤར་ཤེལ་དཀར་པོ། ལྷོ་བཻ་ཌཱུརྱ། ནུབ་པདྨ་རཱ་ག །བྱང་ཨིནྡྲ་ནཱི་ལ་ལས་གྲུབ་པ། 
གྲུ་བཞི་པ། སྒོ་བཞི་པ། ཀ་བ་དང་རྟ་བབས་བཞིས་མཛེས་པ། རིན་པོ་ཆེའི་ཕ་གུ་དང་། དྲ་བ་དྲ་ཕྱེད་ཀྱིས་བརྒྱན་པ། རི་དགས། གདུགས། ཆོས་འཁོར་དང་བཅས་པ་མཐོ་བ། འདོད་ཡོན་གྱི་སྣམ་བུ་དམར་པོ་ལ། མཆོད་པའི་ལྷ་མོས་བསྐོར་བའི་ནང་དུ། པདྨ་རིམ་པ་གཉིས་པའི་གདན་གྱི་དབུས་སུ་
ཡི་གེ་ཧྲཱིཿལས་པདྨ་དང་ཉི་མ་ཟླ་བའི་གདན་གྱི་དབུས་སུ། རང་ཉིད་ཐུགས་རྗེ་ཆེན་པོ་སྐུ་མདོག་དཀར་བ། ཞལ་བཅུ་གཅིག་པ། རྩ་བའི་ཞལ་དཀར་པོ། གཡས་ལྗང་བ། གཡོན་དམར་བ། དེའི་སྟེང་མ་དབུས་ལྗང་གུ། གཡས་དམར། གཡོན་དཀར། དེའི་སྟེང་མ་དབུས་དམར་བ། གཡས་དཀར་བ། 
གཡོན་ལྗང་གུ། ཞལ་དེ་རྣམས་ནི། ཀུན་ནས་ཞི་བ། བཞད་པ་འཛུམ་པ། སྤྱན་གསུམ་གསུམ་ཞི་བས་གཟིགས་པ། དེའི་སྟེང་དུ་ཁྲོ་བོའི་ཞལ་ནག་པོ། མཆེ་བ་གཙིགས་པ། སྤྱན་གསུམ་པ། དབུ་སྐྲ་དམར་སེར་མེ་ལྟར་འབར་བའོ། །ཞལ་དགུ་པོ་ནི། དབུ་སྐྲ་ནག་པོ་ལ་རིན་པོ་ཆེས་བརྒྱན་པའོ། །
ཞལ་ནག་པོའི་སྟེང་ན་འོད་དཔག་མེད་ཀྱི་ཞལ་དམར་པོ་མགྲིན་པ་ཡན་ཆད་ཕྱུང་བ། སྤྱན་གསུམ་པ། གཙུག་ཏོར་དང་བཅས་པའོ། །ཕྱག་བརྒྱད་ཀྱི་དང་པོ་གཉིས་ཀྱིས་ཡུམ་ལ་འཁྱུད་པ། ཐལ་མོ་སྦྱར་བའོ། །གཡས་འོག་མས་མུ་ཏིག་གི་ཕྲེང་བ། གཡོན་འོག་མས་པདྨ་དམར་པོ། གཡས་
གསུམ་པས་མཆོག་སྦྱིན། གཡོན་གསུམ་པས་སྤྱི་བླུགས། གཡས་བཞི་པས་ཆོས་ཀྱི་འཁོར་རོ། །གཡོན་བཞི་པས་པདྨའི་མདའ་གཞུའོ། །སྐུ་དང་ཡན་ལག་ཐམས་ཅད་ལ་རིན་པོ་ཆེས་བརྒྱན་པའོ། །ཡུམ་རྡོ་རྗེ་རྣལ་འབྱོར་མ་སྐུ་མདོག་དམར་མོ། །ཞལ་གཅིག་ཕྱག་གཉིས་མ། སྤྱན་
གསུམ་པ། གཡས་ཀྱིས་ཟངས་གྲི་བསྣམས་པ།  གཡོན་ཐོད་ཁྲག་བསྣམས་པས་ཡབ་ལ་འཁྱུད་པ། སྐྲ་གྲོལ་བ་རུས་པའི་རྒྱན་གྱིས་བརྒྱན་པ། ཞབས་གཡོན་ཡབ་དང་སྦྱར་ནས་བརྐྱང་བ། གཡས་ཀྱིས་ཡབ་ཀྱི་དར་ཤམ་གྲོལ་བ་ལ་འཁྱུད་པའོ། །ཡབ་ཀྱི་ཕྱག་དགུ་བརྒྱ་དགུ་བཅུ་རྩ་གཉིས།

49-1-201a

མཆོག་སྦྱིན་པའི་ཕྱག་མཐིལ་ལ་མཛེས་པར་གཟིགས་པའི་སྤྱན་སྟོང་མངའ་བ། སྐུའི་ཕྱག་སྟོང་དང་སྤྱན་སྟོང་ལས་འོད་ཟེར་ཁ་དོག་སྣ་ལྔས་འཇིག་རྟེན་གྱི་ཁམས་མ་ལུས་པ་ཁྱབ་པར་བསམ་མོ། །མདུན་གྱི་པདྨ་ལ་རྡོ་རྗེ་ཕག་མོ་དམར་མོ་ཞལ་གཉིས་མའི་སྤྱི་བོར་ཕག་ཞལ། གཡས་གྲི་
གུག །གཡོན་ཐོད་པ། མཆན་ཁུང་ན་ཁ་ཊྭཱཾ་ག་བསྣམས་པ། རུས་པའི་རྒྱན་གྱིས་བརྒྱན་པའོ། །གཡས་སུ་ཡུམ་ཆེན་མོ་སེར་མོ་ཞལ་གཅིག་ཕྱག་བཞི་མ། གཡས་ཐུགས་ཀར་རྡོ་རྗེ་འཛིན་པ། གཡོན་པ་ཨུཏྤ་ལའི་སྟེང་ན་པོ་ཏི་བསྣམས་པ། འོག་མ་གཉིས་མཉམ་གཞག་མཛད་པའོ། །རྒྱབ་
ཕྱོགས་སུ་སྒྲོལ་མ་ལྗང་གུ། ཞལ་གཅིག་ཕྱག་བཞི་མ། ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་སྐྱབ་སྦྱིན། གཡོན་འོག་མས་ཨུཏྤ་ལ་འཛིན་པའོ། །གཡོན་ཕྱོགས་སུ་ཡུམ་ཡི་གེ་དྲུག་མ་དཀར་མོ་ཞལ་གཅིག་ཕྱག་བཞིའི། དང་པོ་གཉིས་ཐུགས་ཀར་ཐལ་མོ་སྦྱོར་བ། གཡས་འོག་
མས་མུ་ཏིག་གི་ཕྲེང་བ་འཛིན་པ། གཡོན་འོག་མས་པདྨ་བསྣམས་པའོ། །མཚམས་བཞིར་བུམ་པ་བདུད་རྩིས་བཀང་བའི་སྟེང་དུ་ཀ་པཱ་ལ་རེ་རེ་གནས་པར་བསམ་མོ། །ལྷ་མོ་བཞི་པོ་དར་གྱི་ཤམ་ཐབས་ཅན། རིན་པོ་ཆེའི་རྒྱན་དང་བཅས་པའོ། །དེའི་ཕྱིའི་པདྨའི་གདན་ལ། ཤར་ཕྱོགས་སུ་མི་བསྐྱོད་པ་
སྐུ་མདོག་སྔོན་པོ།  ཞལ་གཅིག་ཕྱག་བཞི་པ། དང་པོ་གཉིས་ཀྱིས་ཡུམ་མཱ་མ་ཀཱི་ལ་འཁྱུད་པས་ཐལ་མོ་སྦྱར་བ།  གཡས་འོག་མས་རྡོ་རྗེ། གཡོན་འོག་མས་པདྨ་འཛིན་པ། ཞབས་གཡས་བརྐྱང་བ། མཱ་མ་ཀཱི་སྔོན་མོ་གྲི་གུག་དང་ཐོད་པ་འཛིན་པས་འཁྱུད་པའོ། །ལྷོ་ཕྱོགས་སུ་རིན་ཆེན་འབྱུང་
ལྡན་སེར་པོ་ཞལ་གཅིག་ཕྱག་བཞི་པ། དང་པོ་གཉིས་ཀྱིས་ཡུམ་སངས་རྒྱས་སྤྱན་མ་སེར་མོ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པའི་རྒྱབ་ཏུ་ཐལ་མོ་སྦྱོར་བ། གཡས་འོག་མ་རིན་པོ་ཆེ། གཡོན་འོག་མས་པདྨ་འཛིན་པའོ། །རྒྱབ་ཕྱོགས་སུ་རྣམ་པར་སྣང་མཛད་དཀར་པོ་ཞལ་གཅིག་ཕྱག་
བཞི་པ། དང་པོ་གཉིས་ཀྱིས་ཡུམ་གོས་དཀར་མོ་མེ་ཏོག་དཀར་དམར་གཉིས་བསྣམས་པ་ལ་འཁྱུད་པས་ཐལ་མོ་སྦྱོར་བ། གཡས་འོག་མས་འཁོར་རོ། །གཡོན་འོག་མས་པདྨ་བསྣམས་པའོ། །བྱང་ཕྱོགས་སུ་དོན་ཡོད་གྲུབ་པ་ལྗང་གུ། ཞལ་གཅིག་ཕྱག་བཞིའི་དང་པོ་གཉིས་ཀྱིས་ཡུམ་

49-1-201b

དམ་ཚིག་སྒྲོལ་མ་སྐུ་མདོག་ལྗང་སེར་ཨུཏྤ་ལ་དང་པདྨ་བསྣམས་པ་ལ་འཁྱུད་པས། ཐལ་མོ་སྦྱོར་བ། གཡས་འོག་མས་རལ་གྲི། གཡོན་འོག་མས་ཨུཏྤ་ལ་བསྣམས་པའོ། །ཞབས་གཡས་བརྐྱང་གཡོན་བསྐུམ་པའོ། །དར་ཤམ་དང་རིན་པོ་ཆེས་བརྒྱན་པའོ། །ཡུམ་གཉིས་ནི། ཞལ་གཅིག་ཕྱག་
གཉིས་ཀྱིས་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ། རུས་པའི་རྒྱན་ཅན་སྐུ་མདོག་ཡབ་དང་མཐུན་པ། ཞབས་གཉིས་ཀྱིས་ཡབ་ཀྱི་དར་ཤམ་ཅུང་ཟད་གྲོལ་བ་ལ་འཁྱུད་པར་བསྒོམ།  ཡབ་ཀྱི་གཡོན་གྱི་གཉིས་པ་ནི་པདྨ་འཛིན་པའོ། །མཚམས་བཞིར་ནི། མཁའ་འགྲོ་མ་བཞི་ཞལ་གཅིག་
ཕྱག་དང་པོ་གཉིས་ཐུགས་ཀར་ཐལ་མོ་སྦྱོར་བ། གཡས་གྲི་གུག་གཡོན་ཐོད་ཁྲག་བསྣམས་པ། སྐུ་མདོག་ནི་དཀར་མོ་དང་། སེར་མོ་དང་། དམར་མོ་དང་། ལྗང་གུའོ། །ཞབས་གཡས་བརྐྱང་བ། གཡོན་བསྐུམ་པའོ། །དེའི་ཕྱིའི་རྒྱབ་པད་འདབ་བཅུའི་གདན་ལ། ཕྱོགས་བཅུའི་པདྨ་རིགས་ཀྱི་སངས་
རྒྱས་བཅུ་པོ་ནི། གསེར་གྱི་མདོག་ཅན། ཆོས་གོས་དམར་སེར་གསོལ་བ། ཕྱག་ན་པདྨ་སྟོང་དང་ལྡན་པ་རེ་རེ་བསྣམས་པ། དབུ་རེག་ཞབས་རྗེན་ནོ། །གྲྭ་བཞི་ལ་ལྷ་སྣམ་གྱི་མཚམས་བཞིར་། བྱང་དུ། འཇམ་དཔལ་དམར་སེར། གཡས་རལ་གྲི། གཡོན་ཨུཏྤ་ལའི་སྟེང་དུ་པོ་ཏི་བསྣམས་པའོ། །
ཤར་ལྷོར་ཕྱག་ན་རྡོ་རྗེ་ལྗང་གུ། གཡས་རྡོ་རྗེ། གཡོན་ཨུཏྤ་ལའོ། །ལྷོ་ནུབ་ཏུ་བྱམས་པ་དམར་སེར། གཡས་ཀླུ་ཤིང་། གཡོན་ཨུཏྤ་ལའི་སྟེང་ན་བུམ་པའོ། །ནུབ་བྱང་དུ་སྒྲིབ་པ་རྣམ་པར་སེལ་བ་སེར་སྐྱ། གཡས་ནོར་བུ། གཡོན་གྱིས་ཨུཏྤ་ལའོ། །ཞབས་གཉིས་བཞེངས་པ། རིན་པོ་ཆེ་
དང་། དར་གྱིས་བརྒྱན་པའོ། །ཤར་སྒོར་འདོད་པའི་རྒྱལ་པོ་དཀར་པོ་ཞལ་གཅིག་པ། གཡས་འཁོར་རོ། །གཡོན་སྡིགས་མཛུབ་མཛད་པའོ། །ལྷོ་སྒོར་གཤིན་རྗེ་གཤེད་སེར་ནག །ཞལ་གཅིག་པ། གཡས་བེ་ཅོན། གཡོན་སྡིགས་མཛུབ། ནུབ་སྒོར་རྟ་མགྲིན་དམར་པོ། རྟ་མགོ་
ལྗང་གུ། ཕྱག་གཡས་པདྨའི་དབྱུག་པ། གཡོན་སྡིགས་མཛུབ་མཛད་པའོ། །བྱང་སྒོར་བདུད་རྩི་འཁྱིལ་པ་ལྗང་ནག །ཞལ་གཅིག་ཕྱག་གཡས་རལ་གྲི། གཡོན་སྡིགས་མཛུབ་མཛད་པ། དབུ་སྐྲ་དམར་སེར་འབར་བ། སྦྲུལ་རིགས་བཞིས་བརྒྱན་པ། སྐུ་སྨད་སྟག་གི་ཤམ་ཐབས་

49-1-202a

ཅན། །ཞབས་གཡས་བརྐྱང་གཡོན་བསྐུམ་གྱིས་བཞུགས་པའོ། །ཕྱི་རོལ་དུ་ལྷ་མོ་མེ་ཏོག་མ་དཀར་མོ། །བདུག་སྤོས་མ་སེར་མོ། །མར་མེ་མ་དམར་མོ། །དྲི་ཆབ་མ་ལྗང་གུ། ཞལ་ཟས་མ་སེར་མོ། །སིལ་སྙན་མ་ཟླ་བའི་མདོག་ཅན་མ་རྣམས་ཀྱིས་མཆོད་པར་བསམ་མོ། །
སྒོ་ཁང་དུ་ཚད་མེད་པའི་ལྷ་མོ་བཞི། བྱམས་པ་ཚད་མེད་པའི་ལྷ་མོ་དངུལ་གྱི་མེ་ལོང་བལྟ་བ། སྙིང་རྗེའི་ལྷ་མོ་སེར་མོ་གསེར་གྱི་མེ་ལོང་བལྟ་བ། དགའ་བའི་ལྷ་མོ་དམར་མོ་ཟངས་ཀྱི་མེ་ལོང་བལྟ་བ། བཏང་སྙོམས་ཀྱི་ལྷ་མོ་སྔོན་མོ་གཡུའི་མེ་ལོང་བལྟ་བའོ། །དེའི་ཕྱི་རོལ་དུ་རྒྱལ་པོ་ཆེན་པོ་བཞི་ནི། 
བྱང་ཕྱོགས་སུ་རྣམ་ཐོས་སྲས་སེར་པོ། གཡས་མེ་ཏོག་ཨུ་དུམྺཱ་ར་གཙོ་བོ་ལ་འབུལ་བ། གཡོན་ནེའུ་ལེའི་རྐྱལ་པ་འཛིན་པའོ། །ཤར་ཕྱོགས་སུ་ཡུལ་འཁོར་སྲུང་དཀར་པོ། གཡས་མེ་ཏོག །གཡོན་པི་ཝང་འཛིན་པའོ། །ལྷོ་ཕྱོགས་སུ་འཕགས་སྐྱེས་པོ་སྔོན་པོ། གཡས་མེ་ཏོག །གཡོན་རལ་གྲི་
འཛིན་པའོ། །ནུབ་ཕྱོགས་སུ་སྤྱན་མི་བཟང་དམར་པོ། གཡས་མེ་ཏོག །གཡོན་སྦྲུལ་ཞགས་འཛིན་པའོ། །དེའི་ཕྱི་རོལ་དུ་ཡེ་ཤེས་ལྔའི་འོད་ཁ་དོག་ལྔ་རྡོ་རྗེའི་གུར་དུ་བསམ་མོ། །འོད་ཀྱི་ནང་དུ་ཡི་གེ་དྲུག་པའི་གསུང་གི་སྒྲ་རང་བཞིན་གྱིས་བསྒྲག་པར་བསམ་མོ། །དེ་ནས་ཐུགས་ཀའི་ཧྲཱིཿལས་འོད་ཟེར་ཁ་
དོག་ལྔ་འཕྲོས་ནས། འོག་མིན་གྱི་གནས་ནས། ཡེ་ཤེས་སེམས་དཔའ་རང་གིས་བསྒོམས་པ་དང་འདྲ་བ་སྤྱན་དྲངས་ལ་མདུན་གྱི་ནམ་མཁར་བཞུགས་པ་ལ། དཔལ་ལྡན་སངས་རྒྱས་སྐུ་འཆང་བ། །ཞེས་པའི་ཚིགས་སུ་བཅད་པ་བརྗོད་ཅིང་ཡེ་ཤེས་པ་དགུག་གཞུག་བྱ་སྟེ། སྐུ་གསུང་ཐུགས་བྱིན་གྱིས་བརླབ་
པར་བྱའོ། །དེ་ནས་ལྷ་ཐམས་ཅད་གསལ་བཏབ་ལ་བསྙེན་པ་བྱ་བ་ནི། ཐུགས་ཀའི་ཧྲཱིཿལ། ཨོཾ་ཨཱཿཧཱུྃ་ཧྲཱིཿ། ཨོཾ་མ་ཎི་པདྨེ་ཧཱུྃ་ཕཊ་སྭཱ་ཧཱ། ཨོཾ་བཛྲ་བཱ་རཱ་ཧཱི། ཨོཾ་སརྦ་བུདྡྷ་ཌཱ་ཀི་ནཱི་ཡེ། བཛྲ་ཝརྞྞ་ནཱི་ཡེ། བཛྲ་བཻ་རོ་ཙ་ནཱི་ཡེ་ཧཱུྃ་ཕཊ། ཧ་རི་ནི་ས་ཧཱུྃ་ཕཊ་སྭཱ་ཧཱ། ཞེས་པའི་སྔགས་ཀྱིས་བསྐོར་བ་ལ་དམིགས་ནས་བཟླས་པ་བྱ་བ་
དང་། འོད་ཟེར་གྱིས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ལ་མཆོད་པ་ཕུལ་ཏེ། དེ་རྣམས་ཀྱི་བྱིན་བརླབས་རང་གི་ཐུགས་ཀའི་ཧྲཱིཿལ་བསྡུའོ། །བུམ་པའི་ནང་དུ་དེ་བཞིན་གཤེགས་པ་རྣམས་བསམས་ལ། དེ་དག་ཞུ་བས་བདུད་རྩིའི་ཆུར་བསམ་ཞིང་བསྙེན་པ་བྱའོ། །པདྨ་ཟབ་པ་བྱེད་ན་ནི། །སྒྲུབ་

49-1-202b

ཐབས་ལས་བྱུང་བ་བཞིན་དུ། །བསྒོམ་ཞིང་བཟླས་པར་བྱའོ། །ཆོ་ག་གཞན་དག་རྣམས་ནི་འདྲ་བས་ཐུན་མོང་དུ་ཤེས་པར་བྱའོ། །དེ་ནས་སློབ་མ་ལ་སྐྱབས་སུ་འགྲོ་བ་ཐུན་མོང་བ་བྱིན་ལ། སེམས་བསྐྱེད་པ་ནི། སྒྲོལ་མའི་རྒྱུད་ནས་གསུངས་པ། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་མི་དགེ་སོ་སོར་
བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །སེམས་ཅན་རྣམས་ལ་ཕན་སླད་དུ། །བྱང་ཆུབ་མཆོག་ཏུ་སེམས་བསྐྱེད་དོ། །དེ་ལྟར་སྐྱབས་སུ་འགྲོ་བ་དང་། སེམས་བསྐྱེད་ལ། ཡང་དམ་ཚིག་དང་སྡོམ་པ་བྱིན་པ་ནི། སངས་རྒྱས་ཆོས་དང་དགེ་འདུན་ལ། །རྟག་ཏུ་བདག་
ནི་སྐྱབས་སུ་མཆི། །སངས་རྒྱས་པདྨ་རྣམ་རྒྱལ་དང་། །གསང་སྔགས་རྒྱལ་བ་མཁའ་འགྲོ་མ། །བདག་ནི་རྟག་ཏུ་སྐྱབས་སུ་མཆི། །བྱང་ཆུབ་སེམས་དཔའ་བདག་ཉིད་ཆེ། །ཁྱད་པར་དུ་ཡང་སློབ་དཔོན་ལ། །རྟག་པར་བདག་ནི་སྐྱབས་སུ་མཆི། །མགོན་པོ་སྤྱན་རས་གཟིགས་དབང་པོ། །རྣལ་འབྱོར་
མ་དང་སྣང་མཛད་ཚོགས། །ཐམས་ཅད་བདག་ལ་དགོངས་སུ་གསོལ། །བདག་ནི་དུས་འདི་ནས་བཟུང་སྟེ། །ཇི་སྲིད་གཉིས་མེད་ལ་གནས་པར། །དེ་ཡི་ཚངས་སྤྱོད་གཉིས་མེད་པ། །ཉི་ཤུ་རྩ་གཉིས་ལེགས་པར་བསྲུང་། །ཞེས་ཁས་བླང་ངོ་། །དེ་ནས་ཟབ་པ་དང་རྒྱ་ཆེ་བའི་ཆོས་བཤད་དེ་ངེས་ཤེས་བསྐྱེད་པ་ནི།
རྣམ་སྣང་མངོན་བྱང་ནས་གསུངས་ཏེ། འཇིག་རྟེན་དུ་ནི་ཀུན་མཁྱེན་ཉིད། ཨུ་དུམྺཱ་རའི་མེ་ཏོག་བཞིན། །བརྒྱ་ལམ་ན་ནི་རེ་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གི་སེམས་ཅན་མཉམ་མེད་དོན། །མྱ་ངན་མི་
འདའ་བྱེད་པར་ནུས། །བསྐལ་པ་བྱེ་བ་དུ་མ་རུ། །སྔོན་ཆད་སྡིག་པ་བགྱིས་པ་གང་། །དེ་ཀུན་དཀྱིལ་འཁོར་འདི་འདྲ་བ། །མཐོང་བས་བྱང་བར་འགྱུར་བས་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ནས་ནི། །གོ་འཕང་
བླ་ན་མེད་པར་འགྲོ། །གང་དག་སྤྱོད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་བ། །དེ་དག་གིས་ནི་ངན་འགྲོའི་རྒྱུ། །སྡུག་བསྔལ་ཀུན་འབྱུང་རབ་ཏུ་བཤད། །བདག་ཉིད་ཆེན་པོ་ཁྱེད་རྣམས་ཀྱི། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པ། །བདག་ཉིད་ཆེན་པོ་ཀུན་གྱི་

49-1-203a

ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་ལ་སྐྱེ་བཞིན་པར། །དེ་ཕྱིར་ཁྱེད་རྣམས་ཐེག་ཆེན་ལ། །དབང་བསྐུར་བ་རུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བ། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་ལམ་འདིར་འགྲོ་བ་ན། །དེ་བཞིན་གཤེགས་
པ་རྣམས་སུ་འགྱུར། །ཞེས་བརྗོད། དེ་ནས་སློབ་མའི་མགོ་བོར་རྡོ་རྗེ་བཟུང་ལ། ཁྱོད་ཀྱིས་པདྨ་རྒྱལ་པོ་དང་། པདྨ་ཟབ་པའི་དཀྱིལ་འཁོར་ཆེན་པོ་འདི། སྣོད་མིན་པ་ལ་བསྟན་ན། དམ་ཚིག་ཉམས་པར་འགྱུར་བའི་ཕྱིར། སྔོན་དཀྱིལ་འཁོར་མ་མཐོང་བ་དང་། འདི་ལ་མ་དད་པའི་སྣོད་ལ། 
འདི་ལྟ་བུ་འདི་ཁྱོད་ཀྱིས་ཡང་སུ་རུང་རུང་ལ་སྨྲ་ཞིང་བརྗོད་པར་མི་བྱའོ། །དེ་ནས་ཀ་པཱ་ལའི་ནང་གི་བདུད་རྩི་བྱིན་ལ། འདི་ནི་རྡོ་རྗེ་བདུད་རྩིའི་ཆུ། མ་བསྲུངས་སྲེག་པར་བྱེད་པའི་དུག །བསྲུངས་ན་དངོས་གྲུབ་ཐོབ་པ་ནི། །བདུད་རྩི་ལྔ་ཡི་ཆུས་གྲུབ་པོ། །ཨོཾ་པཉྩ་ཨ་མྲྀ་ཏ་ཨུ་ད་ཀ་ཋ་ཋ། དེ་ནས་སློབ་
མའི་སྙིང་གར་རྡོ་རྗེ་བཞག་སྟེ། སྤྱན་རས་གཟིགས་དབང་རྡོ་རྗེ་ཕག་མོ་དེང་། །ཁྱོད་ཀྱི་སྙིང་ལ་ཡང་དག་ཞུགས་པར་གྱུར། །གལ་ཏེ་ཚུལ་འདི་གཞན་ལ་སྨྲ་མི་བྱ། །སྨྲས་ན་དེ་མ་ཐག་ཏུ་དྲལ་ཏེ་གཤེགས། །ཡང་སྤྱི་བོར་རྡོ་རྗེ་བཞག་ལ་དེ་རིང་ཁྱོད་དཔའ་བོ་དང་རྣལ་འབྱོར་མ་རྣམས་ཀྱི་རིགས་སུ་
ཞུགས། ངས་ཁྱོད་ལ་སངས་རྒྱས་པདྨ་རྣམ་རྒྱས་སྤྱན་རས་གཟིགས་ཀྱི་ཡེ་ཤིས་བསྐྱེད་པར་བྱ་སྟེ། ཡེ་ཤེས་གང་གིས་ཁྱོད་དེ་བཞིན་གཤེགས་པ་ཐམས་ཅད་དང་། སྤྱན་རས་གཟིགས་དང་། དཔའ་བོ་དང་རྣལ་འབྱོར་མ་ཐམས་ཅད་ཀྱི་དངོས་གྲུབ་ཀྱང་ཐོབ་པར་འགྱུར་ན། དངོས་གྲུབ་གཞན་ལྟ་
ཅི་ཞིག་སྨོས། ཁྱོད་ཀྱིས་དཀྱིལ་འཁོར་མ་མཐོང་བ་རྣམས་ཀྱི་མདུན་དུ་བརྗོད་པར་མི་བྱ་སྟེ། དམ་ཚིག་ཉམས་པར་གྱུར་ཏ་རེ། ཡང་རྡོ་རྗེ་སྤྱི་བོར་གཞག །དེང་ཕྱིན་ཆད་ཁྱོད་ཀྱི་སྤྱན་རས་གཟིགས་ང་ཡིན་གྱི། གང་ངས་པདྨའི་རྒྱལ་པོ་སྤྱན་རས་གཟིགས་ཀྱི་དཀྱིལ་འཁོར་ཆེན་པོ་སྒོམས་ཤིག་ཅེས་
བསྒོ་བ་དེ་ཁྱོད་ཀྱིས་བྱའོ། །ཁྱོད་ཀྱིས་ང་ལ་བརྙས་པར་མི་བྱ་སྟེ། ཁྱོད་མི་བདེ་བ་མ་སྤངས་པར་ཚེའི་དུས་བྱས་ནས། དམྱལ་བར་ལྷུང་བར་གྱུར་ཏ་རེ་ཞེས་བརྗོད་དོ། །ཡེ་ཤེས་ཀྱི་དཀྱིལ་འཁོར་དུ་གཞུག་པ་ནི། བདག་ཉིད་ཀྱི་དཀྱིལ་འཁོར་གསལ་བར་བསྒོམས་ནས། སློབ་མ་རྣམས་སྤྱན་རས་

49-1-203b

གཟིགས་སུ་གསལ་བར་བསྐྱེད་ལ། འོག་མིན་གྱི་གནས་གཙང་མའི་གཞལ་ཡས་ནས། སངས་རྒྱས་པདྨའི་རྒྱལ་པོ་དང་། སྤྱན་རས་གཟིགས་ཀྱི་དཀྱིལ་འཁོར་གྱི་ལྷ་ཚོགས་ཐམས་ཅད་སྤྱན་དྲངས་ལ། བདག་ཉིད་ད་ང་སློབ་མ་རྣམས་ལ་གཞུག་གོ། །སྤོས་ལ་སོགས་པའི་མཆོད་པའི་བྱེ་བྲག་རྣམས་
ཀྱང་དབུལ། ངག་ཏུ། དཔལ་ལྡན་སངས་རྒྱས་སྐུ་འཆང་བ། །རྡོ་རྗེ་མི་ཕྱེད་གསུམ་གྱི་སྐུ། །བདག་ལ་བྱིན་གྱིས་བརླབ་ཏུ་གསོལ། །ཕྱོགས་བཅུར་བཞུགས་པའི་སངས་རྒྱས་ཀུན། །རྡོ་རྗེ་མི་ཕྱེད་གསུམ་བསྒོམ་པས། །སྐུ་ཡི་བྱིན་གྱིས་བརླབ་ཏུ་གསོལ། །ཨོཾ་དཔལ་ལྡན་སངས་རྒྱས་གསུང་འཆང་བ། །
ཞེས་ཚིག་བསྒྱུར་ལ་ཤེས་པར་བྱའོ། །ཨཱཿཞེས་པ་དང་། དཔལ་ལྡན་སངས་རྒྱས་ཐུགས་འཆང་བ། །ཧཱུཾ་ཞེས་པ་དང་། ཨོཾ་ཨཱཿཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ། ཨོཾ་བཛྲ་བཱ་རཱ་ཧཱི། སརྦ་བུདྡྷ་ཌཱ་ཀི་ནཱི་ཡེ། བཛྲ་ཝརྞ་ནཱི་ཡེ། བཛྲ་བཻ་རོ་ཙ་ནཱི་ཡེ། ཧ་རི་ནི་ས། ཨཱ་བེ་ཤ་ཡ་ཨཱ་བེ་ཤ་ཡ། སརྦ་ཏ་ཐཱ་ག་ཏ་ཨ་བྷི་ཥིཉྩ་ཧཱུྃ་ཨཱཿ
ཞེས་བརྗོད་ཅིང་ཡེ་ཤེས་པ་གཞུག་གོ། །ཡེ་ཤེས་པ་ཞུགས་པའི་རྟགས་སེམས་བདེ་གསལ་མི་རྟོག་པ་ལ་སོགས་པ་བྱུང་བ་དང་། ལྷ་ལ་དབང་བསྐུར་བར་གསོལ་བ་གདབ་པ་ནི། སངས་རྒྱས་པདྨ་རྣམ་རྒྱས་དཀྱིལ་འཁོར་དུ། །འོད་དཔག་མེད་པའི་རྒྱལ་སྲས་སྤྱན་རས་གཟིགས། །པདྨའི་རིགས་ཀྱི་
མཆོག་གྱུར་ཆེན་པོ་ཡི། །སྐལ་ལྡན་རྣམས་ལ་དབང་བཞི་བསྐུར་དུ་གསོལ། །ཞེས་མཎྜལ་དབུལ་ལ་གསོལ་བ་གདབ་པོ། །དེ་ནས་བུམ་དབང་བསྐུར་བ་ནི། བདག་དཀྱིལ་འཁོར་གཙོ་བོར་གསལ་བའི་ཐུགས་ཀ་ནས། རྡོ་རྗེ་རྣལ་འབྱོར་མ་དང་། མཁའ་འགྲོ་མ་བཞི་དང་ལྔ་སྤྲོས་ཏེ། བུམ་པ་ཐོགས་
ནས། སློབ་མའི་སྤྱི་བོར་དབང་བསྐུར་བར་བསམ་ཞིང་།  བཀྲ་ཤིས་བརྗོད་པ་དང་།  ཡིད་ལ་སྤྱན་རས་གཟིགས་ཀྱི་དཀྱིལ་འཁོར་དུ་བུམ་པའི་ཆུས་དབང་བསྐུར་བར་བསམ་ཞིང་། དངོས་སུ་རྣམ་རྒྱལ་བུམ་པ་སློབ་མའི་སྤྱི་བོར་བཟུང་ནས། ཇི་ལྟར་སངས་རྒྱས་པདྨ་རྣམ་རྒྱས་ཀྱི། །འོད་དཔག་མེད་པའི་
རྒྱལ་སྲས་སྤྱན་རས་གཟིགས། །ཆོས་ཀྱི་རྒྱལ་སྲིད་ཆེན་པོར་དབང་བསྐུར་ལྟར། །དེ་བཞིན་བདག་གིས་ཁྱོད་ལ་དབང་བསྐུར་རོ། །ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ལ་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །སྤྱན་རས་གཟིགས་དབང་དབང་ཐོབ་པོ། །ཨོཾ་ཨཱཿཧཱུྃ་ཧྲཱིཿ།

49-1-204a

ཨོཾ་མ་ཎི་པདྨེ་ཧཱུྃ། ཨོཾ་བཛྲ་བཱ་རཱ་ཧཱི། ཨོཾ་སརྦ་བུདྡྷ་ཌཱ་ཀི་ནཱི་ཡེ། བཛྲ་ཝརྞྞ་ནཱི་ཡེ། བཛྲ་བཻ་རོ་ཙ་ནཱི་ཡེ། ཧ་རི་ནི་ས། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་མཱཾ། ཞེས་བརྗོད་དེ། སློབ་མ་མགོན་པོ་པདྨའི་སྣང་བ་རབ་ཏུ་རྒྱས་པའི་དཀྱིལ་འཁོར་དུ་བྱིན་གྱིས་བརླབས་ཏེ། བསྐྱེད་རིམ་རྒྱས་པར་བསྒོམ་པ་ལ་དབང་།
བུམ་ཆུ་ཡར་འཁྱིལ་པ་ལས་འོད་དཔག་མེད་པས་དབུ་བརྒྱན་པར་བསྒོམ། དེས་ལུས་དག་པ་ཡེ་ཤེས་ལྔའི་ངོ་བོ་མགོན་པོ་སྤྱན་རས་གཟིགས་ཀྱི་སྐུའི་དཀྱིལ་འཁོར་དུ་དབང་ཐོབ་པ་ཡིན་ནོ། །སློབ་མ་ལ་མཆོད་པ་རྣམ་ལྔ་དབུལ་ལོ། །དེ་ནས་གསང་བའི་དབང་ནི། ཀ་པཱ་ལ་བདུད་རྩིས་བཀང་བ་ལག་ཏུ་བཟུང་ལ། 
དེའི་དབུས་སུ། སངས་རྒྱས་པདྨ་རྣམ་རྒྱལ་ཡབ་ཡུམ་གྱི་སྦྱོར་མཚམས་ནས་བདུད་རྩི་བབས་པར་བསམས་ལ། དེའི་འོད་ཟེར་ཡི་གེ་དྲུག་པའི་སྒྲ་དང་བཅས་པ་ཕྱོགས་བཅུར་འཕྲོས་པས། ཕྱོགས་བཅུའི་དེ་བཞིན་གཤེགས་པ་དང་། བདག་གིས་གསང་བའི་དབང་བསྐུར་བར་བསམ་ཞིང་། འོད་དཔག་
མེད་པ་སྤྱན་རས་གཟིགས་དབང་གསུང་གི་མཛོད། །ཡི་གེ་དྲུག་པ་ཕྱོགས་བཅུར་ཆོས་འཁོར་བསྐོར་བའི་གསུང་། །རྒྱལ་བའི་གསུང་དབྱངས་ཡན་ལག་དྲུག་ཅུའི་དབང་ཐོབ་པས། །བརྒྱད་ཁྲི་བཞི་སྟོང་གསང་བའི་ཆོས་ཀྱི་དབང་བསྐུར་རོ། །སྔགས་གོང་མ་དང་། སརྦ་ཏ་ཐཱ་ག་ཏ་ཨ་བྷི་ཥིཉྩ་ཧཱུྃ། ཞེས་
བརྗོད་དོ། །དེས་ངག་གི་སྒྲིབ་པ་དག་ནས སྐྱེ་བ་མེད་པའི་གསུང་ཆོས་ཀྱི་འཁོར་ལོ་བསྐོར་བ་གསང་བའི་དབང་བསྐུར་བ་ཐོབ་པ་ཡིན་ནོ། །དེ་ནས་ཤེས་རབ་ཡེ་ཤེས་ཀྱི་དབང་ནི། མེ་ལོང་གཡའ་དག་པ་ལ། རྡོ་རྗེ་ཕག་མོའི་གཟུགས་བརྙན་འཆར་དུ་བཅུག་ལ། དེ་ལ་སྤྱན་རས་གཟིགས་ཀྱི་ཡུམ་མར་མེ་ལས་
མར་མེ་ཆད་པ་བཞིན་དུ་ཆད་ནས་དེ་དང་གཉིས་སུ་མེད་པར་ཞུགས་ཏེ། ཐུགས་ཀ་ནས་འོད་ཟེར་གྱི་ཕྲེང་བ་ཁ་དོག་སྣ་ལྔ་འཕྲོས། ཕྱོགས་བཅུའི་དེ་བཞིན་གཤེགས་པ་རྣམས་ཀྱི་ཡུམ་རྣམས་བསྐུལ་ནས། དེ་དག་རྣལ་འབྱོར་མ་ལ་ཐིམ། དེ་མཐོང་བ་ཙམ་གྱིས་ཟག་མེད་ཀྱི་བདེ་བ་སྟེར་ནུས་པའི་ལྷ་མོ་མེ་ལོང་
ནང་གི་གཟུགས་བརྙན་ལྟ་བུ། བདག་དང་། དཀྱིལ་འཁོར་གྱི་ལྷ་ཚོགས་དེ་ཡང་། མེ་ལོང་ནང་གི་གཟུགས་བརྙན་ལྟ་བུ། མེ་ལོང་ནང་གི་ལྷ་མོ་ལག་པ་གཡོན་པས་གཏད་ལ། དུས་གསུམ་བྱང་ཆུབ་སེམས་དཔའ་རྣམས། །ཤེས་རབ་རྡོ་རྗེ་རྣལ་འབྱོར་མ། །བདེ་ཆེན་ཉིད་དུ་རྣམ་སྦྱར་བས། །ཉོན་མོངས་

49-1-204b

ཤེས་བྱའི་སྒྲིབ་པ་སྤངས། །ཤེས་རབ་ནམ་མཁའ་ལྟ་བུ་ཡི། །རྣལ་འབྱོར་མ་དང་འབྲལ་མི་བྱ། །གོང་གི་སྔགས་དང་། ཙིཏྟ་པྲཛྙཱ་སརྦ་ཏ་ཐཱ་ག་ཏ་ནཱ་མ་ཨ་བྷི་ཥིཉྩ་མཱཾ། དེས་ཤེས་རབ་ཡེ་ཤེས་ཀྱི་དབང་ཐོབ་པ་ཡིན་ནོ། །ད་ནི་ཚིག་དབང་རིན་པོ་ཆེ་བསྐུར་བ་ན། བཞི་པ་མི་དམིགས་པ་ཡེ་ཤེས་ཀྱི། འགྲོ་བ་དྲུག་གི་
སྣང་བའི་ཡུལ་མེད་དེ། །སྣང་མེད་ཡེ་ཤེས་ནམ་མཁའ་དང་མཉམ་པས། །ཆོས་ཀྱི་སྐུ་ལས་ལོངས་སྤྱོད་རྫོགས་སྐུ་དང་། །སྤྲུལ་པའི་སྐུ་ནི་ཡེ་ཤེས་དཔག་མེད་ཆེ། །མཁའ་དང་མཉམ་ལ་བདག་མེད་དོན་མཛད་དོ། །ཞེས་བརྗོད་དོ། །རྗེས་ལ་སློབ་མ་ལྷར་གྱུར་པ་ལ་མཆོད་པ་ལྔ་འབུལ། བཀྲ་ཤིས་ཀྱི་ཚིག་རྣམས་
བརྗོད་དོ། །དེ་ནི་ཚིག་དབང་ངོ་། །དེ་ནས་ཚོགས་ཀྱི་འཁོར་ལོ་ཆོ་ག་བཞིན་དུ་བསྐོར་བར་བྱའོ། །གཏོར་མ་རྣམས་རྒྱས་པར་བསྔོས་ལ་བཏང་བ་དང་། རྗེས་ཀྱི་ཆོ་ག་རྣམས་བྱས་ལ། སློབ་དཔོན་ལ་མེ་ཏོག་དབུལ་བ་དང་། དགེ་བའི་རྩ་བ་བསྔོས་ཏེ། དཀྱིལ་འཁོར་མི་དམིགས་པར་བྱའོ། །སྦྱིན་སྲེག་བྱ་བར་འདོད་ན། 
ནང་གི་སྦྱིན་སྲེག་རྩ་གསུམ་འདུས་མདོར། མ་ལས་ཐོབ་པའི་ཉི་མ་བྱང་ཆུབ་ཀྱི་སེམས་མེ་འབྱུང་བ་བཞིའི་རླུང་གིས་སྦར་ནས། གཟུང་འཛིན་གྱི་རྟོག་པ་སྐྱེ་བ་མེད་པར་བསྲེག་པའི་མེ་དབུ་མ་ནས་སྙིང་གར་ཕྱིན་པས། ཕ་ལས་ཐོབ་པའི་ཟླ་བ་བྱང་ཆུབ་ཀྱི་སེམས་དང་སྙིང་གར་འཛོམ་པས་ལུས་སེམས་མི་
དམིགས་པའི་བདེ་གསལ་ཆེན་པོ་ནི། སྦྱིན་སྲེག་རྣམས་ཀྱི་མཆོག་གོ་ཞེས་སྤྱན་རས་གཟིགས་ཀྱི་རྒྱུད་ནས་གསུངས་སོ། །ཕྱིའི་སྦྱིན་སྲེག་ནི། ས་ཁྲུ་གང་ལ་མཛུབ་གང་བར་བྲུས། ཁ་ཁྱེར་མཛུབ་གང་ཕྱིར་བསྐྱེད། དབུས་སུ་པདྨ་དམར་པོ་འདབ་མ་བརྒྱད་པ་བྱ། མུ་ཁྱུད་པདྨའི་ཕྲེང་
བས་བསྐོར། །དེའི་ནང་དུ་ཙནྡན་གྱིས་ཟླ་གམ་དུ་བརྩིགས། དབང་གི་སྲེག་རྫས་དང་། དགང་བླུགས་དང་། གཏོར་མ་དང་དེ་རྣམས་གཡས་གཡོན་དང་མདུན་དུ་བཞག་རྒྱན་དང་། གོས་དང་། ལྟ་སྟངས་རྣམས་ལས་དང་མཐུན་པར་བྱས་ཏེ། མེ་ལྷ་བསྐྱེད་ལ་མཆོད་པ་དང་སྲེག་རྫས་
དབུལ། བསྟོད་པ་བྱའོ། །དེ་ནས་མེ་ལྷ་མེར་གྱུར་པའི་དབུས་སུ། སྤྱན་རས་གཟིགས་ཀྱི་དཀྱིལ་འཁོར་རྒྱས་བསྡུས་གང་རུང་བསྐྱེད། སྲེག་རྫས་རྣམས་བྱིན་གྱིས་བརླབས་ཏེ། དབུལ་བ་ནི་རྒྱལ་པོའི་རིམ་པ་ཅན་ནམ། རྒྱལ་པོའི་རིམ་པ་དང་། བྲམ་ཟེའི་རིམ་པ་མེད་དེ། གང་འཐད་

49-1-205a

ཀྱིས་དབུལ་ལོ། །གསོལ་བ་གདབ་པ་དང་། སྔགས་ཀྱི་འོད་ཟེར་ནི་ཞི་བ་དང་། དབང་རྒྱས་དང་། དྲག་པོ་རྣམས་གང་བྱེད་ཀྱང་། རྩ་བའི་སྔགས་ཀྱི་གཤམ་དུ་ལས་བཞིའི་སྔགས་བཏགས་པས་དངོས་གྲུབ་བསྒྲུབ་པའོ། །སྦྱིན་སྲེག་གི་རིམ་པའོ། །སྤྱན་རས་གཟིགས་ཀྱི་རྒྱུད་པདྨ་ཟབ་པ་དང་། 
པདྨ་རྒྱལ་པོའི་དཀྱིལ་འཁོར་དུ་དབང་བསྐུར་བའི་རབ་ཏུ་བྱེད་པ་འདི། དཔལ་ཛཱ་ལནྡྷ་ར་པས་མཛད་པའོ། །མངའ་བདག་མཻ་ཏྲི་པའི་ཕྱག་དཔེ་ལས། རྒྱ་གར་ཕྱག་ནའི་ཞལ་སྔ་ནས་དང་། བོད་ལོ་ཙཱ་བ་པྲཛྙཱ་ཀཱིརྟིས་བསྒྱུར་ཞིང་ཞུས་ཏེ་གཏན་ལ་ཕབ་པའོ།།      །།
༄༅༅། །རྒྱ་གར་སྐད་དུ། ཨཱརྱ་ལོ་ཀེ་ཤྭ་ར་གུ་ཧྱ་སཱ་དྷ་ན་ནཱ་མ། བོད་སྐད་དུ། འཕགས་པ་འཇིག་རྟེན་དབང་ཕྱུག་གསང་བའི་སྒྲུབ་ཐབས་ཞེས་བྱ་བ། དཔལ་པདྨ་གར་གྱི་དབང་ཕྱུག་ལ་ཕྱག་འཚལ་ལོ། །པདྨ་རྣམ་རྒྱས་ཕྱག་འཚལ་ནས། །མཆོག་དང་ཐུན་མོང་དངོས་གྲུབ་ནི། །ཚེ་འདི་ཉིད་ལ་ཐོབ་བྱེད་
པའི། །སྤྱན་རས་གཟིགས་དབང་གསང་སྒྲུབ་བཤད། །དད་དང་བརྩོན་འགྲུས་སྙིང་རྗེར་ལྡན། །དབང་དང་དམ་ཚིག་ལྡན་བྱས་ནས། །དུར་ཁྲོད་གཡའ་རི་གངས་བྲག་གམ། །ཉམས་དགའ་དབེན་པའི་གནས་དག་ཏུ། །ཕྱི་རྒྱུད་པ་ལ་གཏོར་མ་གཏང་། །མཎྜལ་གྲུ་བཞི་དྲིས་བྱུགས་ལ། །ཆང་དང་བདུད་རྩིས་
ཆག་ཆག་གདབ། །ཆོས་འབྱུང་བསྣོལ་མ་པད་འདབ་བརྒྱད། །མུ་ཁྱུད་གྲུ་ཆད་ལྡན་པ་བྲི། །སྒོ་བཞི་རྒྱན་ལྡན་བྲིས་ཀྱང་རུང་། །རྡོ་རྗེ་ར་བ་མེ་རིས་བསྐོར། །ཆོས་འབྱུང་དམར་པོ་རེ་ཁཱ་དཀར། །མཚམས་སུ་གཡུང་དྲུང་འཁྱིལ་པ་བྲི། །པད་འདབ་ཕྱོགས་ཚོན་མཚམས་མཛེས་ཚོན། །གྲུ་ཆད་ལྗང་ལ་
སྒོ་བཞི་ཕྱོགས། །སྒོ་རྒྱན་ལ་སོགས་སྤྱི་དང་མཐུན། །དཀྱིལ་འཁོར་དབུས་བུམ་རྒྱན་ལྡན་དུ། །ཆང་དང་བདུད་རྩི་རིལ་བུ་བླུགས། །དགོས་པའི་ཆ་རྐྱེན་ཚང་བར་གཞག །ཐོད་པ་ཆང་དང་བདུད་རྩིས་བཀང་། །བུམ་པའི་ཁར་བཞག་དར་དམར་དགབ། །མེ་ལོང་ཆང་གིས་བྱུགས་པ་ལ། །པདྨ་ཆོས་
འབྱུང་སིནྡྷུ་རས། །ས་བོན་ཡི་གེ་བཅས་པ་དགོད། །ཐོད་པའི་ཁ་རུ་བཞག་པའི་སྟེང་། །སྨན་སྣ་རིན་ཆེན་སྣ་ཚོགས་དང་། །དྲི་བཟང་དག་དང་སྙིང་པོའི་ཚོགས། །ཀ་ར་བུ་རམ་སྦྲང་རྩི་སོགས། །འབྲུ་སྣ་ཚོགས་ཀྱི་ཕྱེ་མ་ལ། །གུར་གུམ་གི་ཝང་སིནྡྷུ་ར། །ཤ་ལྔ་བདུད་རྩི་ལྔ་སྦྱར་ནས། །ཆང་གིས་

49-1-205b

སྦྲུས་པའི་རིལ་བུ་ལ། །སིནྡྷུ་ར་དང་པད་མཚལ་བྱུག །མོ་གསར་ཕྲུ་ལ་འཁོར་ལོ་བྲི། །དེ་ལ་གོང་གི་རྫས་ཀྱིས་བྱུག །རིལ་བུ་འཁོར་ལོའི་ལྟེ་བར་གཞག །དར་གྱིས་བཀབ་ལ་མེ་ལོང་ཁར། །བཞག་སྟེ་སྟེང་དུ་དར་གདུགས་ཕུབ། །སྦ་ལྕག་དཀར་པོ་ཚིགས་གསུམ་པའི། །ནང་དུ་སྔགས་དང་འཁོར་ལོ་
གཞག །རིལ་བུ་ལྷ་གྲངས་ལ་སོགས་བཅུག །ཁ་བཅད་མགོ་མཇུག་ཟངས་ཀྱིས་དཀྲིས། །ཞིང་ལྤགས་ལྕག་འབྲས་བཏགས་པ་ལ། །རིན་ཆེན་ལྔ་དང་དུང་སོགས་དང་། །ཤེལ་དང་ཕ་ཝང་ལོང་བུ་བཏགས། །དར་ཚོན་སྣ་ལྔ་སྔགས་ལྡན་རྒྱན། །དཀྱིལ་འཁོར་དབུས་སུ་གཟུགས་པར་བྱ། །གཏོར་
མ་མཆོད་པ་ཚོགས་ཀྱི་རྫས། །ཇི་ལྟར་འབྱོར་པའི་བྱེ་བྲག་བཤམ། །རྐང་གླིང་ཐོད་རྔ་ཚིལ་ཆེན་སྤོས། །ཞུན་ཆེན་མར་མེ་ལ་སོགས་བྱ། །བགེགས་ལ་གླུད་བྱིན་མཚམས་བཅད་ལ། །སྲུང་བའི་འཁོར་ལོ་བརྟན་པར་བསྒོམ། །དཀོན་མཆོག་སྤྱན་དྲངས་ཕྱག་བྱས་ནས། །མཆོད་ཅིང་མཎྜལ་དབུལ་བ་
སྟེ། །བདུན་པོ་རྣམ་པར་དག་པ་དང་། །གསོལ་བ་དྲག་ཏུ་གདབ་པར་བྱ། །དེ་དག་སྔོན་དུ་འགྲོ་བའོ། །དངོས་གཞི་ཕྱི་ནང་གསང་གསུམ་ལས། །ཕྱི་ལྟར་རྒྱལ་བ་རྒྱ་མཚོའི་ཚོགས། །ནང་ལྟར་ལུས་ལ་དགོད་པ་དང་། །གསང་བ་རྩ་ལ་དགོད་པ་དང་། །ཡང་གསང་དེ་ཉིད་སེམས་ལ་དགོད། །
དང་པོ་བསྙེན་སྒྲུབ་ལས་གསུམ་སྟེ། །ཡང་གསང་འབྲས་བུའི་ངོ་སྤྲོད་དོ། །ཕྱི་ལྟར་བསྙེན་པ་བྱ་བ་ནི། །བདེ་བའི་སྟན་ལ་བསམ་གཏན་གྱི། །ཕྱག་རྒྱས་བསྡད་ལ་སྐྱབས་འགྲོ་དང་། །སེམས་བསྐྱེད་བྱས་ལ་སྟོང་པའི་ངང་། །པད་སྡོང་ཁ་གསུམ་གྱེས་པའི་དབུས། །ཉི་ཟླའི་གདན་ལ་རང་སེམས་ཧྲཱིཿ། །
འོད་འཕྲོས་སེམས་ཅན་སྒྲིབ་པ་སྦྱངས། །རྒྱལ་བ་རྒྱ་མཚོའི་ཚོགས་སུ་གྱུར། །ཚུར་འདུས་སངས་རྒྱས་བྱིན་རླབས་བསྡུས། །ཧྲཱིཿལ་ཐིམ་པས་འོད་དུ་ཞུ། །རང་ཉིད་སྤྱན་རས་གཟིགས་དབང་སྐུ། །དམར་གསལ་ཞལ་གཅིག་ཕྱག་བཞི་པ། །རིན་ཆེན་རྒྱན་རྫོགས་སྐྱིལ་ཀྲུང་བཞུགས། །དང་པོའི་ཕྱག་
གཉིས་ཐལ་མོ་སྦྱར། །གཡས་འོག་པདྨའི་བགྲང་ཕྲེང་དམར། །གཡོན་པ་ཨུཏྤལ་དམར་པོ་འཛིན། །རལ་པའི་ཅོད་པན་དར་གྱིས་མཛེས། །རིན་ཆེན་ཟེའུ་འབྲུའི་པྲོག་ལྡན་པ། །སྤྱན་དམར་ཞལ་འཛུམ་ཐུགས་རྗེ་ཡིས། །སེམས་ཅན་ཡོངས་ལ་གཟིགས་པ་ལ། །བསྐལ་བཟང་སངས་རྒྱས་སྟོང་
49-1-206a

རྩས་བསྐོར། །དེ་ལྟར་རང་ཉིད་གཙོ་བོ་ནི། །རྒྱལ་བ་རྒྱ་མཚོ་མ་ལུས་པ། །དཀྱིལ་འཁོར་ཐམས་ཅད་འདུས་པའོ། །བདག་གི་སྤྱི་གཙུག་པད་ཟླའི་སྟེང་། །རྩ་བའི་བླ་མ་དེ་ཉིད་ནི། །འོད་དཔག་མེད་པའི་ངོ་བོ་སྟེ། །སྐྱིལ་ཀྲུང་མཉམ་གཞག་ཕྱག་རྒྱ་ཅན། །སྤྲུལ་པའི་སྐུ་རུ་
བསྒོམས་པ་ལ། །བཀའ་བརྒྱུད་བླ་མ་རིག་འཛིན་རྣམས། །གཅེར་བུ་སྤྱན་གསུམ་རུས་རྒྱན་ཅན། །རྡོ་རྗེ་དྲིལ་བུས་འཁྱུད་པ་ཡི། །རྡོ་རྗེ་འཆང་གི་རྣམ་པས་བསྐོར། །བྱིན་རླབས་དབང་བསྐུར་བྱས་པར་བསྒོམ། །གཡས་ཕྱོགས་པད་སྡོང་ཉི་མའི་སྟེང་། །བདུད་བཞིའི་གདན་ལ་རྟ་མཆོག་སྐུ། །དམར་ནག་
ཞལ་གཅིག་ཕྱག་གཉིས་པ། །གཡས་པ་ཌ་རུ་གཡོན་སྡིགས་མཛུབ། །དྲིལ་བུར་བཅས་པ་ས་དཀུ་ལ་བརྟན། །སྟག་ལྤགས་དུར་ཁྲོད་སྦྲུལ་རྒྱན་ཅན། །ཁྲོ་ཞལ་སྤྱན་གསུམ་མཆེ་བཞི་གཙིགས། །རལ་པ་དམར་སེར་འཁྱིལ་པའི་དབུས། །རྟ་མགོ་ལྗང་གུ་རྟ་སྐད་མཚེར། །རྔོག་མ་དམར་པོ་མེ་ལྟར་
འབར། །མ་མོ་མཁའ་འགྲོ་ལ་སོགས་པ། །སྣང་སྲིད་ལྷ་འདྲེ་ཐམས་ཅད་དང་། །ཀླུ་རྣམས་དབང་དུ་སྡུད་པར་བྱེད། །ཞབས་གཉིས་གཡས་བསྐུམ་གཡོན་བརྐྱང་ནས། །ཡེ་ཤེས་མེ་དཔུང་དབུས་ན་བཞུགས། །འཁོར་དུ་དཔའ་བོ་རྒྱ་མཚོའི་ཚོགས། །ཡེ་ཤེས་མཁའ་འགྲོ་བརྒྱད་ཅུ་སོགས། །ཧ་ཧ་
ཧཱུྃ་ཧཱུྃ་ཕཊ་སྒྲ་སྒྲོགས། །སྣང་སྲིད་ཟིལ་གྱིས་གནོན་པར་བསྒོམ། །གཡོན་ཕྱོགས་པད་སྡོང་ཆོས་འབྱུང་བསྣོལ། །དེ་དབུས་པད་ཉི་རོ་ཡི་སྟེང་། །གསང་བ་ཡེ་ཤེས་སྐུ་མདོག་དམར། །ཞལ་གཅིག་ཕྱག་བཞི་སྤྱན་གསུམ་དམར། །ཁྲོ་འཛུམ་མཆེ་གཙིགས་སྤྱན་རྩ་དམར། །དབུ་སྐྲ་གྲོལ་ཞིང་སྐུ་སྟོད་
ཁེབས། །གཡས་བསྐུམ་གཡོན་བརྐྱང་རོ་གདན་བརྫིས། །སྐྱིལ་ཀྲུང་ཕྱེད་པའི་གར་གྱིས་བཞུགས། །གཡས་ཀྱི་དང་པོ་གྲི་གུག་འཕྱར། །འོག་མ་རལ་གྲི་བསྣམས་པའོ། །གཡོན་གྱི་དང་པོ་ཐོད་ཁྲག་འཛིན། །འོག་མ་ཁ་ཊྭཱཾ་བསྣམས་པའོ། །ཐོད་སྐམ་ལྔ་ཡིས་དབུ་བརྒྱན་ཞིང་། །ཐོད་རློན་ལྔ་
བཅུའི་དོ་ཤལ་ཅན། །རུས་པའི་རྒྱན་ཆ་ལྔ་ཡིས་མཛེས། །རིན་ཆེན་དར་དཔྱངས་བརྒྱན་པར་བསྒོམ། །མེ་རི་འབར་བའི་དབུས་བཞུགས་ཤིང་། །དཔའ་བོ་མཁའ་འགྲོ་རྒྱ་མཚོས་བསྐོར། །ཨ་རལླི་དང་ཕོཾ་སྒྲ་སྒྲོགས། །མ་མོ་མཁའ་འགྲོ་དབང་དུ་སྡུད། །སྣང་སྲིད་དབང་དུ་སྡུད་པར་བསྒོམ། །འོག་

49-1-206b

ཕྱོགས་མེ་དཔུང་འཁྲུགས་པ་ཡི། །འབྱུང་བའི་དཀྱིལ་འཁོར་དབུས་སུ་ནི། །རིགས་བཞི་མཁའ་འགྲོ་དཔའ་བོ་དང་། །ཆོས་སྐྱོང་དམ་ཅན་ཕོ་ཉའི་ཚོགས། །ཕྱི་ནང་སྲུང་མ་མ་ལུས་རྣམས། །མཁའ་འགྲོ་སྡེ་བཞིའི་ངོ་བོར་གྱུར། །གྲི་གུག་ཐོད་ཁྲག་ཁ་ཊྭཱཾ་བསྣམས། །ཐོད་པ་སྐམ་རློན་རུས་རྒྱན་ཅན། །
རིན་ཆེན་རྒྱན་དང་དར་གྱིས་མཛེས། །ཧ་རི་ནི་སའི་སྒྲ་སྒྲོགས་ཤིང་། །གདན་འོག་པདྨ་འདེགས་པར་བསམ། །དེ་ལྟར་དཀྱིལ་འཁོར་ཡོངས་རྫོགས་པའི། །སྤྱི་བོར་ཟླ་སྟེང་ཨོཾ་དཀར་པོ། །མགྲིན་པར་པད་སྟེང་ཨཱཿདམར་པོ། །སྙིང་གར་ཉི་སྟེང་ཧཱུྃ་སྔོན་པོ། །སྐུ་གསུང་ཐུགས་སུ་བྱིན་གྱིས་བརླབ། །དེ་ནས་
གཙོ་བོའི་ཐུགས་ཀ་རུ། །པདྨ་ཉི་མའི་གདན་སྟེང་དུ། །ཧྲཱིཿལས་འོད་ཟེར་འཕྲོས་པ་ཡིས། །ཡེ་ཤེས་སྤྱན་དྲངས་མཆོད་ལ་བསྟིམ། །རིགས་ལྔ་ཡབ་ཡུམ་སེམས་དཔའ་དང་། །ཁྲོ་བོའི་ཚོགས་དང་མཆོད་པ་ཡི། །ལྷ་མོར་བཅས་པ་སྤྱན་དྲངས་ལ། །མཆོད་དེ་དབང་བསྐུར་གསོལ་བ་བཏབ། །
རྒྱལ་བས་དབང་བསྐུར་དགོངས་པ་མཛད། །ཁྲོ་བོ་རྣམས་ཀྱིས་བགེགས་བསྐྲད་ཅིང་། །མཆོད་པའི་ལྷ་མོས་མཆོད་པ་དང་། །ཡུམ་ལྔས་བུམ་པའི་དབང་བསྐུར་བས། །སྡིག་སྒྲིབ་དག་ནས་སྤྱི་བོ་རུ། །རིགས་བདག་སྣང་བ་མཐའ་ཡས་དང་། །རིགས་ལྔས་དབུ་ལ་བརྒྱན་པར་བསྒོམ། །དེ་ལྟར་ཇི་
སྲིད་མི་སྐྱོའི་བར། །གསལ་བར་བསྒོམ་པ་བསྐྱེད་རིམ་ཡིན། །བཟླས་པ་བྱེད་པའི་དུས་སུ་ནི། །བདག་དང་རང་བཞིན་གསང་བའི་ཡུམ། །སྤྱི་བོར་བླ་མ་རིགས་བདག་དང་། །ཀུན་གྱི་ཐུགས་ཀར་པད་ཉི་དང་། །ཟླ་བའི་གདན་ལ་ཧྲཱིཿཡིག་མཐར། །སྔགས་ཀྱིས་གཡས་སུ་བསྐོར་བ་
ལས། །འོད་འཕྲོས་ཕྱོགས་བཅུའི་བདེ་གཤེགས་མཆོད། །མཉེས་ནས་བྱིན་རླབས་དངོས་གྲུབ་རྣམས། །བདག་ལ་ཐིམ་པས་སྡིག་སྒྲིབ་དག །ཚོགས་རྫོགས་དབང་བཞི་ཐོབ་པར་བསམ། །ཁམས་གསུམ་འགྲོ་དྲུག་སེམས་ཅན་ལ། །འོད་ཟེར་ཕོག་པས་སྒྲིབ་སྦྱང་ནས། །ཕྱི་སྣོད་
གཞལ་ཡས་ཁང་དུ་གྱུར། །ནང་བཅུད་ལྷ་ཡི་རང་བཞིན་ལ། །ཕོ་རྣམས་སྤྱན་རས་གཟིགས་སུ་གྱུར། །མོ་རྣམས་གསང་བ་ཡེ་ཤེས་ལ། །བདུད་དང་ལོག་འདྲེན་རྟ་མགྲིན་སྐུ། །འོད་དང་མེ་དཔུང་རབ་འབར་ཞིང་། །གཟུགས་སྣང་ལྷ་ཡི་རང་བཞིན་ལ། །སྒྲ་གྲགས་ཐམས་ཅད་སྔགས་ཀྱི་

49-1-207a

སྒྲ། །སེམས་ཀྱི་དྲན་རྟོག་ཆོས་སྐུའི་ངང་། །དེ་ལྟར་བཟླས་པ་ཅི་རིགས་བྱ། །རྗེས་སུ་ཕྱི་སྣོད་ནང་བཅུད་རྣམས། །རིམ་གྱིས་ཐམས་ཅད་བདག་ལ་བསྡུ། །བདག་ཀྱང་ཧྲཱིཿནས་སྟོང་པའི་བར། །མི་དམིགས་མ་བཅོས་སྤྲོས་བྲལ་བ། །མི་དམིགས་ཅི་ཡང་མི་བསམ་
པར། །ཆོས་སྐུའི་ངང་ལ་ཅི་གནས་གཞག །དགེ་བ་བསྔོ་ཞིང་སྨོན་ལམ་གདབ། །ཐུན་མཚམས་ལྷ་ཡི་ང་རྒྱལ་དང་། །སྤྱོད་ལམ་རྣམ་བཞི་ཐམས་ཅད་བྱ། །ཨོཾ་ཨཱཿཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ། ཡབ་ཀྱི་སྙིང་པོའོ། །ཨོཾ་ཧྲཱིཿབཛྲ་ཀྲོ་དྷ་ཧ་ཡ་གྱི་ཝ་ཧུ་ལུ་ཧུ་ལུ་ཧཱུྃ་ཛཿ། རྟ་མགྲིན་གྱི་སྙིང་པོའོ། །ཨོཾ་
དྷུ་མ་གྷ་ཡེ་ན་མ་སྭཱ་ཧཱ། གསང་བ་ཡེ་ཤེས་ཀྱི་སྙིང་པོའོ། །ཌཱ་ཀི་ནཱི་ཧ་རི་ནི་ས་ར་ཙ་ཧྲི་ཡ་ཧཱུྃ་ཛཿ། མཁའ་འགྲོ་སྡེ་བཞི་ཡུམ་གྱི་སྙིང་པོའོ། །བ་སུ་སིདྡྷཾ་ན་ན། ཁ་དྷེ་སིདྡྷི། སརྦ་སིདྡྷི་ཕ་ལ་ཧཱུྃ། སིདྡྷི་སིདྡྷི་ས་མ་ཡ། བསྡུས་བསྡུས། ཧཱུྃ་ཧཱུྃ། པུཥྚི༑ ཝ་ཤཾ་ཀུ་རུ་ཧཱུྃ་ཧཱུྃ། རཏྣ་སིདྡྷི་ས་མ་ཡ། ཧྲིཾ་ཧྲིཾ། 
ཛ་ཛ། དབང་དུ་བསྡུ་བའི་སྙིང་པའོ། །དེ་ལྟར་ཕྱི་སྒྲུབ་བསྙེན་པ་ལ། །དཀྱིལ་འཁོར་བཅུ་བཞི་མི་དགོས་སོ། །རྒྱུན་དུ་ཡི་དམ་ནར་མར་བྱ། །ཨཱི། ནང་ལྟར་འཇིག་རྟེན་དབང་ཕྱུག་གི། །ལྷ་རྣམས་ལུས་ལ་དགོད་པ་ནི། །སྔོན་འགྲོ་ཡན་ལག་བདུན་པ་དང་། །སྐྱབས་སུ་འགྲོ་ཞིང་སེམས་
བསྐྱེད་ནས། །ཚད་མེད་བཞི་ཡིས་བློ་སྦྱངས་ཏེ། །སྟོང་པའི་ངང་ལས་པད་ཉི་དང་། །ཟླ་བའི་གདན་ལ་ཧྲཱིཿདམར་པོ། །འོད་འཕྲོས་ཚུར་ལ་འདུས་པ་ལས། །གོང་ལྟར་བདག་ཉིད་སྤྱན་རས་གཟིགས། །འཇིག་རྟེན་དབང་ཕྱུག་སྐུ་མདོག་དམར། །ཞལ་གཅིག་ཕྱག་བཞི་ཞབས་སྐྱིལ་ཀྲུང་། །
རྒྱན་རྫོགས་འཇའ་འོད་དཀྱིལ་བཞུགས་པ། །ཕྱི་སྒྲུབ་ཇི་ལྟ་བ་རུ་གསལ། །བླ་མ་རིགས་བདག་བཀའ་བརྒྱུད་བཅས། །སྤྱི་བོར་རྡོ་རྗེ་འཆང་ལྟར་བསྒོམ། །སྙིང་ནི་པདྨ་འདབ་བརྒྱད་དེ། །ཉི་ཟླའི་གདན་ལ་རྟ་མགྲིན་ནི། །དམར་ནག་དུར་ཁྲོད་ཆས་ཀྱིས་བརྒྱན། །གཡས་པ་དབང་སྡུད་ཕྱག་རྒྱ་
ཡིས། །པདྨའི་ཕྲེང་བ་དམར་པོ་འདྲེན། །གཡོན་པ་ཨུཏྤལ་དམར་པོ་ཡི། །ཞགས་པར་བཅས་པའི་སྡིགས་མཛུབ་ཀྱིས། །དཀུ་ལ་བརྟེན་ནས་གར་སྟབས་མཛད། །དེ་ཡི་ཐུགས་ཀར་པདྨ་དང་། །ཉི་ཟླའི་དབུས་སུ་ཧྲཱིཿལ་སྔགས། །གཡས་སུ་འཁོར་བར་བསྒོམ་པའོ། །ལྟེ་བར་ཆོས་འབྱུང་བསྒོམས་

49-1-207b

པའི་སྟེང་། །པདྨ་ཉི་མ་རོ་སྟེང་དུ། །གསང་བ་ཡེ་ཤེས་མཁའ་འགྲོ་མ། །གསང་གནས་པདྨ་འདབ་བཞིའི་སྟེང་། །རིགས་བཞི་མཁའ་འགྲོ་ཡབ་ཡུམ་སྟེ། །ཤར་དུ་རྡོ་རྗེ་མཁའ་འགྲོ་དཀར། །ལྷོ་རུ་རིན་ཆེན་མཁའ་འགྲོ་སེར། །ནུབ་ཏུ་པདྨ་མཁའ་འགྲོ་དམར། །བྱང་དུ་ལས་ཀྱི་མཁའ་འགྲོ་ལྗང་། །
ཡབ་རྣམས་ཡུམ་དང་མཚུངས་པ་སྟེ། །གྲི་གུག་ཐོད་ཁྲག་རྒྱན་དང་ལྡན། །ལྟེ་བའི་ཡུམ་གྱི་གདན་ནས་བཏེག །དེ་ནས་སྐུ་གསུང་ཐུགས་བྱིན་བརླབ། །ཡེ་ཤེས་བསྟིམས་ནས་དབང་བསྐུར་རོ། །ལྟེ་བར་བདེ་ཆེན་གཏུམ་མོའི་མེ་འབར་དམིགས། །རླུང་བཟུང་དབང་བསྡུས་བྱང་སེམས་རིན་ཆེན་བཞུ། །རྔུབས་
ནས་མེ་ལ་བསྟིམས་པས་ཡེ་ཤེས་འབར། །འཁོར་འདས་གཉིས་མེད་དགོངས་པ་བསྐྱང་བར་བསམ། །ཕྱོགས་བཅུའི་སངས་རྒྱས་སྤྱན་དྲངས་རླུང་དང་བསྲེ། །མེ་ལ་བསྟིམས་ལ་ལོངས་སྐུ་བདེ་ཆེན་བསྐྱེད། །འགྲོ་དྲུག་སེམས་ཅན་དབང་བསྡུས་བྱང་སེམས་བསྒོམ། །སྙིང་རྗེ་བསྐྱེད་དུས་རླུང་རྔུབ་མེ་ལ་བསྟིམ། །
སྤྲུལ་སྐུས་འགྲོ་འདུལ་ཕྲེང་ལས་ཅི་ཡང་སྟོན། །དམིགས་མེད་ངང་ནས་རླུང་བཟུང་ཅིར་མི་དགོངས། །མཁའ་ལྟར་དག་པ་ཆོས་སྐུ་མངོན་དུ་གྱུར། །སྔགས་བཟླས་དུས་སུ་འོད་ཟེར་ལྕགས་ཀྱུའི་དབྱིབས། །མེ་ལྟར་ཚ་ལ་གདུང་བའི་ཚོགས་འཕྲོས་པས། །སྐྱེ་འགྲོའི་སྙིང་ནས་བཟུང་སྟེ་བཀུག་བྱས་ལ། །
རིག་པའི་ངོ་བོ་ཐུགས་ཀའི་ཧྲཱིཿལ་ཐིམ། །ལུས་པོ་འོད་དུ་ཞུ་ནས་ལྟེ་བར་སྡུད། །མཁའ་འགྲོ་ཡབ་ཡུམ་ཕོ་མོའི་སྙིང་པོ་ལ། །དངོས་གྲུབ་སྡུད་པའི་སྔགས་ལྟར་བཟླས་པ་བྱ། །རྗེས་སུ་ལྷ་རྣམས་ཐམས་ཅད་རང་སར་ཞུ། །མཁའ་ལ་སྤྲིན་དེངས་ལྟ་བུར་ཡལ་བའི་ངང་། །མ་བཅོས་དམིགས་གཏད་
མེད་པའི་ངང་ཉིད་ལས། །མ་བཅོས་བློ་ཡིས་མི་དཔྱད་མི་བསྒོམ་པར། །གཟུང་འཛིན་བླང་དོར་ཡིད་བྱེད་མེད་པའི་ངང་། །དངོས་པོའི་རང་བཞིན་གསལ་དང་བདེ་སྟོང་དང་། །ཆགས་འཛིན་མི་བྱ་རྣམ་དག་དེ་རང་བསྐྱོང་། །རྗེས་སུ་ཐུན་མཚམས་བྱ་བ་གོང་ལྟར་བྱ། །ནང་དུ་ལུས་ལ་ལྷ་དགོད་བསྒྲུབ་པའོ། །
གསང་བ་རྩ་ལ་དགོད་པ་ནི། །རིམ་པར་ཉམས་སུ་བླང་བྱ་བ། །སྟན་ལ་བསམ་གཏན་ཕྱག་རྒྱས་གནས། །སྔོན་འགྲོ་ཡན་ལག་བདུན་པ་བྱ། །སྐྱབས་འགྲོ་སེམས་བསྐྱེད་ཚད་མེད་བཞི། །ཤཱུ་ནྱ་ཏཱ་ཡིས་སྟོང་པར་བསྒོམ། །ཆོས་ཉིད་སྟོང་པར་བྱང་ཆུབ་དང་། །ཆོས་ཀྱི་དབྱིངས་ཀྱི་ཡེ་ཤེས་

49-1-208a

སོ། །སྟོང་པའི་ངང་ལས་པད་ཉི་དང་། །ཟླ་བ་རྒྱས་པའི་གདན་བསྒོམ་སྟེ། །ཉི་ཟླའི་གདན་ལ་མངོན་བྱང་ཆུབ། །མེ་ལོང་ལྟ་བུའི་ཡེ་ཤེས་སོ། །གདན་སྟེང་རང་རིག་ཡི་གེ་ཧྲཱིཿ། །གསུང་ཡིག་འབྲུ་ལ་མངོན་བྱང་ཆུབ། །མཉམ་པ་ཉིད་ཀྱི་ཡེ་ཤེས་སོ། །ཧྲཱིཿལས་པདྨ་ཧྲཱིཿས་
མཚན་པ། །ཐུགས་ཀྱི་ཕྱག་མཚན་མངོན་བྱང་ཆུབ། །སོ་སོར་རྟོག་པའི་ཡེ་ཤེས་སོ། །པདྨ་ཧྲཱིཿས་མཚན་འོད་ཟེར་གྱིས། །འགྲོ་བའི་རྒྱུད་སྦྱངས་ལྷར་གྱུར་ནས། །སངས་རྒྱས་རྣམས་ཀྱི་བྱིན་རླབས་བསྡུས། །སྔར་གྱི་ཧྲཱིཿས་མཚན་པདྨར་ཐིམ། །དེ་ཉིད་ཡོངས་སུ་གྱུར་པ་ལས། །བདག་ཉིད་
ལྷ་ཡི་སྐུར་རྫོགས་པ། །ཡོངས་སུ་རྫོགས་ལས་མངོན་བྱང་ཆུབ། །བྱ་བ་ནན་ཏན་ཡེ་ཤེས་སོ། །དེ་ཡང་བདག་ཉིད་སྤྱན་རས་གཟིགས། །ཞལ་གཅིག་ཕྱག་གཉིས་སྐུ་མདོག་དམར། །གཡས་བརྐྱང་གཡོན་བསྐུམ་གར་གྱིས་འགྱིང་། །དབུ་སྐྲ་གྱེན་བརྗེས་དར་གྱིས་བརྒྱན། །རིན་ཆེན་དར་གྱིས་
མཛེས་པར་སྤྲས། །ཕྱག་གཡས་པད་ཕྲེང་གཡོན་པད་དམར། །གསང་བ་ཡེ་ཤེས་ཡུམ་གྱིས་འཁྱུད། །དམར་མོ་གཅེར་བུ་སྤྱན་གསུམ་མ། །ཕྱག་གཡས་གྲི་གུག་གཡོན་ཐོད་ཁྲག །ཐོད་པ་སྐམ་རློན་རུས་རྒྱན་ཅན། །རིན་ཆེན་སྣ་ཚོགས་དར་དཔྱངས་བརྒྱན། །ཡེ་ཤེས་མེ་རིའི་དབུས་སུ་
བཞུགས། །དེ་ཡི་སྐུ་ཡི་རྩ་གསུམ་དང་། །འཁོར་ལོ་བཞི་སོགས་གསལ་བཏབ་ལ། །སྤྱི་བོར་བདེ་ཆེན་འཁོར་ལོ་ལ། །རྩ་འདབ་སུམ་ཅུ་རྩ་གཉིས་ཀྱི། །དབུས་སུ་བདེ་གཤེགས་སྤྱན་རས་གཟིགས། །དཀར་པོ་འཁོར་ལོ་དྲིལ་བུ་ཅན། །བདེ་གཤེགས་མཁའ་འགྲོ་སུམ་ཅུ་གཉིས། །འཁོར་
ལོ་གྲི་གུག་ཐོད་ཁྲག་ཅན། །རུས་པ་རིན་ཆེན་རྒྱན་ལྡན་བསྐོར། །མགྲིན་པ་ལོངས་སྤྱོད་འཁོར་ལོ་ན། །རྩ་འདབ་བཅུ་དྲུག་དབུས་སུ་ནི། །པདྨ་རིགས་ཀྱི་སྤྱན་རས་གཟིགས། །དམར་པོ་པདྨ་དྲིལ་བུ་ཅན། །པདྨའི་མཁའ་འགྲོ་བཅུ་དྲུག་ནི། །པདྨ་གྲི་གུག་ཐོད་ཁྲག་ཅན། །རུས་པ་རིན་ཆེན་
རྒྱན་ལྡན་བསྐོར། །སྙིང་ག་ཆོས་ཀྱི་འཁོར་ལོ་ན། །རྩ་འདབ་བརྒྱད་ཀྱི་དབུས་སུ་ནི། །རྡོ་རྗེ་རིགས་ཀྱི་སྤྱན་རས་གཟིགས། །མཐིང་ལ་རིན་ཆེན་དྲིལ་བུ་ཅན། །རྡོ་རྗེ་རིགས་ཀྱི་མཁའ་འགྲོ་བརྒྱད། །རྡོ་རྗེ་གྲི་གུག་ཐོད་ཁྲག་ཅན། །རུས་པ་རིན་ཆེན་རྒྱན་ལྡན་བསྐོར། །ལྟེ་བ་སྤྲུལ་

49-1-208b

པའི་འཁོར་ལོ་ན། །རྩ་འདབ་དྲུག་ཅུ་རྩ་གཉིས་དབུས། །རིན་ཆེན་རིགས་ཀྱི་སྤྱན་རས་གཟིགས། །སེར་པོ་རིན་ཆེན་དྲིལ་བུ་ཅན། །རིན་ཆེན་མཁའ་འགྲོ་དྲུག་ཅུ་བཞི། །རིན་ཆེན་གྲི་གུག་ཐོད་ཁྲག་ཅན། །རུས་པ་རིན་ཆེན་རྒྱན་ལྡན་བསྐོར། །གསང་གནས་ནོར་བུའི་འཁོར་ལོ་རུ། །རྩ་འདབ་
བཞི་ཡི་དབུས་སུ་ནི། །ལས་ཀྱི་རིགས་ཀྱི་སྤྱན་རས་གཟིགས། །ལྗང་གུ་རྒྱ་གྲམ་དྲིལ་བུ་ཅན། །ལས་ཀྱི་མཁའ་འགྲོ་ལྗང་གུ་བཞི། །རྒྱ་གྲམ་གྲི་གུག་ཐོད་ཁྲག་ཐོགས། །རུས་པ་རིན་ཆེན་རྒྱན་ལྡན་བསྐོར། །དེ་ལྟར་འཁོར་ལོའི་ལྷ་རྣམས་ཏེ། །སླར་ཡང་སྙིང་པོ་རྒྱན་གྱི་ལྷ། །ཡབ་ཀྱི་ཐུགས་
ཀར་རྟ་མགྲིན་དང་། །སྤྱི་བོར་བླ་མ་ལྟེ་བ་རུ། །དཔའ་བོ་སྡེ་བཞི་བསྒོམ་པར་བྱ། །དེ་བཞིན་ཡུམ་གྱི་ཐུགས་ཀར་ཡང་། །རྡོ་རྗེ་ཕག་མོ་ཞལ་གཉིས་མ། །སྤྱི་བོར་ན་བཟའ་དཀར་མོ་དང་། །ལྟེ་བར་རིགས་བཞི་མཁའ་འགྲོ་བསྒོམ། །ཀུན་ཀྱང་ཐོད་པ་སྐམ་རློན་དང་། །རིན་ཆེན་རུས་རྒྱན་དར་
གྱིས་མཛེས། །པདྨ་ཉི་ཟླ་རོ་གདན་ཅན། །མེ་དཔུང་འབར་བའི་དབུས་ན་བཞུགས། །དེ་ལྟར་གསལ་བར་བསྒོམ་བྱས་ནས། །སྐུ་གསུང་ཐུགས་ལྡན་བྱིན་རླབས་ཏེ། །ཡེ་ཤེས་སེམས་དཔའ་སྤྱན་དྲངས་བསྟིམ། །དབང་བསྐུར་དབང་རྟགས་དབུ་རྒྱན་ལ། །དེ་ནས་རང་གི་མདོམས་
པར་ནས། །ཡཾ་ལས་རླུང་གི་དཀྱིལ་འཁོར་གཡོས། །གསང་གནས་ལྷ་ཚོགས་མེ་འབར་ཏེ། །འཁོར་ལོ་བཞི་ཡི་གཙོ་བོ་རྣམས། །ལྟོས་ཆགས་མེད་པའི་མེ་འབར་ཏེ། །ལྟེ་བའི་ཨ་ལ་གཏུགས་ནས་ནི། །མེ་འབར་ཧཾ་ལ་རེག་པ་ཡིས། །བྱང་ཆུབ་སེམས་ཀྱི་རྒྱུན་བབ་པས། །
འཁོར་ལོ་བཞི་གང་ལྷ་ཚོགས་རྣམས། །བདེ་བ་ཆེན་པོར་འབར་བ་དང་། །དུས་གསུམ་སངས་རྒྱས་མ་ལུས་དང་། །སྐྱེ་འགྲོ་སེམས་ཅན་བྱམས་སྡང་སོགས། །དུས་དང་གནད་དུ་གང་འགྲོ་བ། །རླུང་དང་དབྱེར་མེད་བསྡུས་ལ་བསྟིམ། །མེ་འབར་ཉོན་མོངས་རབ་བསྲེགས་ནས། །
སྟོང་ཉིད་སྙིང་རྗེ་ཆེན་པོའི་ངང་། །གཉུག་མ་ཡིད་ལ་མི་བྱེད་པ། །ཐ་མལ་ཤེས་པ་མ་བཅོས་ངང་། །རང་རིག་དྲི་མེད་བསྐྱང་བྱས་ལ། །རླུང་བཟུང་རིག་པ་ཕྱོགས་མེད་སྦྱང་། །མདུན་གྱི་དཀྱིལ་འཁོར་བུམ་པ་དང་། །ཐོད་པ་མེ་ལོང་འཁོར་ལོ་དང་། །དྲིལ་བུ་སྦ་ལྕག་དག་ལ་

49-1-209a

ཡང་། །རང་ཉིད་ཇི་ལྟའི་བསྐྱེད་བསྟིམ་བྱ། །བདག་དང་དེ་རྣམས་ཐུགས་ཀ་ནས། །འོད་ཟེར་དམར་པོ་ལྕགས་ཀྱུའི་དབྱིབས། །མེ་ལྟར་ཚ་ལ་གདུང་འཕྲོས་པས། །གང་དམིགས་ལ་སོགས་སྐྱེ་འགྲོ་ཡི། །ཕོ་ཡི་སྙིང་དང་མོ་ཡི་ནི། །གསང་
བའི་གནས་ནས་བཟུང་ནས་ནི། །རང་དབང་མེད་པར་མདུན་དུ་བཀུག །འོད་ཟེར་འཕྲོས་པས་ཕོག་པ་ཡིས། །དེ་རྣམས་འོད་དུ་ཞུ་ནས་ནི། །བྱང་སེམས་དཀར་དམར་རྣམ་པར་གྱུར། །རིལ་བུ་ལ་སོགས་རྫས་རྣམས་དང་། །རང་གི་གསང་བར་བསྡུས་ལ་བསྟིམ། །
ཐུགས་ཀའི་ཧྲཱིཿལ་འདུས་པར་བསམ། །བྱམས་དང་སྙིང་རྗེ་དྲག་ཏུ་བསྒོམ། །རླུང་བཟུང་སྔགས་བཟླས་གང་གོམས་བྱ། །ཐུན་རྗེས་ཐོགས་རིམ་ཐུན་མཚམས་སུ། །བསྔོ་བ་སྨོན་ལམ་སྤྱོད་ལམ་བྱ། །ཐུན་བཞི་ཐུན་དྲུག་ལ་སོགས་སྤྱད། །ཚོགས་དང་གཏོར་མས་
ཐུན་མཚམས་མཆོད། །བསྟོད་པས་བསྟོད་ཅིང་བཀྲ་ཤིས་བརྗོད། །ཡིག་བརྒྱ་ལ་སོགས་བཤགས་པ་བྱ། །རྟགས་དང་ཆོ་འཕྲུལ་མཁའ་འགྲོའི་ལྟས། །དངོས་གྲུབ་མཚན་མ་ལ་སོགས་པ། །བཟང་ངན་བྱེ་བྲག་ཇི་ལྟར་ཡང་། །རྨི་ལམ་བཟང་དང་ངན་ལ་
སོགས། །གང་ལའང་དགའ་དང་མི་དགའ་ཡི། །མཚན་མར་འཛིན་པར་མི་བྱའོ། །དེ་ལྟར་ཞག་བདུན་ཉེར་གཅིག་དང་། །ཟླ་གསུམ་ཟླ་དྲུག་ལ་སོགས་པར། །མཆོག་དང་ཐུན་མོང་དངོས་གྲུབ་བསྒྲུབ། །དེ་ནས་སྒྲུབ་པ་ཚར་རྗེས་སུ། །རིལ་བུ་འཁོར་ལོ་ལུས་ལ་
བཅང་། །སི་ར་ཡིས་སྤྱི་བོར་བྱུག །དཔྲལ་བ་མགྲིན་པ་སྙིང་ག་དང་། །ལྟེ་བ་གསང་གནས་དག་ཏུ་བྱུག །བུམ་པའི་ཆུ་ཡིས་བཀྲུ་བཏུང་བྱ། །ཐོད་ཆང་བཏུང་ལ་དངོས་གྲུབ་བླང་། །གཏོར་མ་ལ་སོགས་སྦྱིན་སྲེག་བྱ། །བུམ་ཆུ་གང་བླུད་དབང་དུ་འགྱུར། །སྦ་
ལྕག་བཟད་ཞིང་གླད་ལ་བསྐོར། །འགྲོ་བ་དབང་དུ་འདུས་པར་བསྒོམ། །སྦྱིན་སྲེག་དཀྱིལ་འཁོར་ཟླ་གམ་ཁར། །དབང་གི་ཤིང་དམར་ཟླ་གམ་བརྩིགས། །མེ་སྦར་ལྷ་ཚོགས་བསྐྱེད་པར་བྱ། །ཡེ་ཤེས་པ་བསྟིམ་མཆོད་བསྟོད་དབུལ། །སྲེག་རྫས་འདོད་ཡོན་

49-1-209b

སྣ་ཚོགས་དང་། །རིལ་བུ་མར་དང་འབྲུ་སྣ་བསྲེག །ཟས་ནོར་གོས་དང་རིན་པོ་ཆེ། །ཤིང་ཐོག་འབྲུ་སྣ་ཇི་སྙེད་འབུལ། །གསོལ་བ་གདབ་ཅིང་མཆོད་བསྟོད་བྱ། །རྗེས་སུ་ཡེ་ཤེས་སེམས་དཔའ་གཤེགས། །ཐལ་བ་ཆུ་བོའི་གཞུང་དུ་དོར། །དེ་ཡིས་སྣང་བ་དབང་དུ་འགྱུར། །
རྩ་ལ་བཀོད་པའི་སྒྲུབ་ཐབས་འདི། །ལས་སྦྱོར་ལྟ་བུར་བཞེད་པ་ཡིན། །ཡང་གསང་སེམས་ལ་བཀོད་པ་ནི། །དབེན་གནས་ཕྱི་རུ་མི་བཙལ་ཏེ། །ལུས་འདི་གཞལ་ཡས་ཁང་ཉིད་ཡིན། །ལྷ་སྐུ་ལོགས་སུ་མི་བཙལ་ཏེ། །སེམས་ཉིད་སྐྱེ་འགག་མེད་པ་དེ། །
རིགས་ཀྱི་བདག་པོ་བླ་མ་ཡིན། །མ་རྟོགས་ཉོན་མོངས་གཏི་མུག་འདི། །རྟོགས་གྲོལ་ཐུགས་རྗེ་ཆེན་པོ་ཡིན། །ཡིད་བྱེད་རྟོག་ཚོགས་འཕྲོ་བ་དེ། །རྟོགས་པས་སངས་རྒྱས་སྟོང་རྩ་ཡིན། །ཞེ་སྡང་གདུག་རྩུབ་ལྡན་པ་དེ། །གཞི་མེད་རྟོགས་པས་རྟ་མགྲིན་ཡིན། །
འདོད་སེམས་གདུང་བ་ཏུར་ཏུར་དེ། །རྩ་བྲལ་རྟོགས་པས་གསང་ཡེ་ཡིན། །ཉོན་མོངས་ང་རྒྱལ་རྟོག་ཚོགས་རྣམས། །ངར་འཛིན་བྲལ་བས་དཔའ་བོ་ཡིན། །ཕྲག་དོག་རླུང་ལྟར་འཚུབ་པ་དེ། །རེ་དོགས་ཟད་པས་དཔའ་མོ་ཡིན། །ཆུ་ཁམས་ཁྲག་དང་
རྣམ་ཤེས་དག །རྡོ་རྗེ་རིགས་ཀྱི་མཁའ་འགྲོ་མ། །ས་ཁམས་ཤ་དང་ཚོར་བ་དེ། །རིན་ཆེན་མཁའ་འགྲོ་ཞེས་སུ་གྲགས། །མེ་ཁམས་དྲོད་དང་འདུ་ཤེས་དེ། །པདྨ་རིགས་ཀྱི་མཁའ་འགྲོ་ཡིན། །རླུང་ཁམས་དབུགས་དང་འདུ་བྱེད་དེ། །ལས་ཀྱི་མཁའ་
འགྲོ་ཞེས་སུ་གྲགས། །ནམ་མཁའི་ཁམས་དང་སེམས་ཉིད་གཟུགས། མཁའ་འགྲོ་པདྨའི་དྲ་བའོ། །སྐྱེ་མཆེད་ཚོགས་དྲུག་དེ་ཡི་ཡུལ། །འདོད་ཡོན་མཆོད་པའི་ལྷ་མོ་ཡིན། །དགེ་དང་མི་དགེའི་རྟོགས་ཚོགས་རྣམས། །དམ་ཅན་བཀའ་སྡོད་
སྲུང་མར་བཤད། །དེ་ལྟར་སེམས་ཀྱི་ངོ་བོ་དེ། །མ་རྟོགས་འཁྲུལ་པས་འཁོར་བ་སྟེ། །དེ་ཤེས་རྟོགས་པས་མྱ་ངན་འདས། །ལྷ་སྐུ་སེམས་ཀྱི་རང་རྩལ་དེ། །དངོས་པོར་བཟུང་བས་འཁྲུལ་པ་སྟེ། །ལྷ་ཡང་སེམས་ཉིད་ཆོས་སྐུར་གསལ། །སྔགས་

49-1-210a

ནི་སྨྲ་བརྗོད་བྲལ་བའི་ཕྱིར། །ཕྱི་ནང་རླུང་གི་རྒྱུ་བ་ཡང་། །སྨྲས་ཚད་གྲག་སྟོང་བརྗོད་མེད་ཡིན། །གདོད་ནས་དག་པའི་རིག་པ་འདི། །ཡེ་ནས་ཆོས་སྐུར་གནས་པ་ལ། །ངོ་སྤྲད་དེ་ངོ་ཤེས་པ་ཡིན། །ཆོས་དབྱིངས་ཡེ་ཤེས་རྟོགས་པ་ལ། །སངས་རྒྱས་ཞེས་
སུ་གྲགས་པའོ། །གོམས་འདྲིས་བརྟན་ན་དྲོད་རྟགས་འཆར། །དེ་སྦྱངས་ཆོས་སྐུའི་ངོ་བོ་ལ། །གཟུང་བར་བྱ་བའི་ཡུལ་ཙམ་མེད། །དྲོད་རྟགས་ཚད་དང་ཉམས་མྱོང་ལ། །མ་ཆགས་རང་བྱུང་རྩད་ནས་དག །རང་དོན་ཆོས་སྐུ་མངོན་གྱུར་ཏེ། །གཞན་དོན་གཟུགས་སྐུ་ལྷུན་གྲུབ་
འབྱུང་། །འཁོར་བ་མྱ་ངན་འདས་པར་འགྱུར། །སྙན་བརྒྱུད་དྲི་མ་མེད་པའོ། །མ་གཅིག་གྲུབ་པའི་རྒྱལ་མོ་ནས་བརྒྱུད་པ་འཇིག་རྟེན་དབང་ཕྱུག་གི་གསང་བའི་སྒྲུབ་ཐབས་རྫོགས་སོ།།      །།་༄༅༅། །རྒྱ་གར་སྐད་དུ། ཨ་པ་ར་མི་ཏ་ཨཱ་ཡུརྫྙཱ་ན་མཎྜལ་བི་བྷི་ནཱ་མ། བོད་སྐད་དུ། ཚེ་
དང་ཡེ་ཤེས་དཔག་ཏུ་མེད་པའི་དཀྱིལ་འཁོར་གྱི་ཆོ་ག་ཞེས་བྱ་བ། བཅོམ་ལྡན་འདས་ཚེ་དཔག་ཏུ་མེད་པ་ལ་ཕྱག་འཚལ་ལོ། །རང་བཞིན་ཚེ་དཔག་མེད་པའི་སྐུ། །ཡེ་ཤེས་ལྔ་ལྡན་གསུང་གི་བདག །ཐུགས་རྗེའི་ཐུགས་ཀྱིས་རྗེས་འཛིན་པའི། །བླ་མ་ཚེ་དཔག་མེད་ལ་འདུད། །
རྩ་རྒྱུད་བཤད་རྒྱུད་ལས་བྱུང་བའི། །ཆོ་ག་བཟང་པོས་ཡོངས་བཟུང་བཤད། །སློབ་དཔོན་མཚན་ཉིད་ཀུན་ལྡན་ཞིང་། །གཞན་ཕན་སྒྲུབ་པའི་བློ་གྲོས་ཅན། །རང་དང་གཞན་གྱི་དོན་སྒྲུབ་ཕྱིར། །ཡིད་འོང་ཉམས་དགའི་གནས་ཉིད་དུ། །ལྷ་ཡི་རྣལ་འབྱོར་གསལ་བ་དང་། །གཙོ་
བོ་འབུམ་ལ་འཁོར་རྣམས་ཁྲི། །རབ་འབྲིང་མཚན་མ་ཐོབ་པ་དང་། །སློབ་མས་མེ་ཏོག་དང་བཅས་པས། །གུས་པས་གསོལ་བ་གདབ་པར་བྱ། །དེ་ནས་དཀྱིལ་འཁོར་བྲི་བའི་ཕྱིར། །ས་གཞི་བརྟགས་ཤིང་བཟུང་དང་སྦྱང་། །ཉེས་པ་མེད་པའི་ས་ཕྱོགས་དེར། །
བསྐྱེད་པའི་རིམ་པ་གསལ་བྱས་ནས། །བཾ་ལས་བསྐྱེད་པའི་ལྷ་མོ་སེར། །མཛེས་པའི་རྒྱན་ལྡན་ལུས་ཕྱེད་སྣང་། །བུམ་པ་འཛིན་ལ་མཆོད་ཅིང་བསྟོད། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་

49-1-210b

མོ་ཁྱོད་ནི་དཔང་དུ་འགྱུར། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་སྡེ་བཅོམ་ལྟར། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ཏེ་དཀྱིལ་འཁོར་བྲི། །ལག་པ་ས་ལ་བསྣུན་པ་ཡིས། །དགའ་བའི་མདངས་ལྡན་ལྷ་མོ་ཡིས། །ཁྱོད་ནི་སློབ་
དཔོན་མཆོག་ཡིན་གྱིས། །དཀྱིལ་འཁོར་ལས་ནི་རབ་ཏུ་བསྒྲུབས། །བརྗོད་ནས་ས་ལ་ཐིམ་པ་ལྟར། །ཕྱོགས་སྐྱོང་གཏོར་མ་འབུལ་བ་དང་། །མཐུན་པའི་གྲོགས་དང་གསོལ་བ་གདབ། །རོ་བསལ་ཉེས་པ་སྤངས་པ་དེ། །འཐས་པར་བཅག་ཅིང་རྣམ་ལྔ་དང་། །བདུད་རྩི་ལྔ་
ནི་ཁྱབ་པར་བྱུག །མེ་ཡིས་ཞི་བའི་ལས་ཀུན་གྱི། །སྦྱིན་སྲེག་སྦྱངས་དང་སྔགས་ཀྱིས་ནི། །བྱིན་བརླབས་ལྷ་ཡི་ཁང་པར་བསམ། །བསྐྱེད་པའི་ཡན་ལག་ཀུན་རྫོགས་པས། །སློབ་དཔོན་དཀྱིལ་འཁོར་སྟེང་འདུག་ལ། །སློབ་མ་གུས་པས་སྤོས་ཐོགས་ཏེ། །མཆོད་
ཅིང་བསྟོད་དང་གསོལ་བ་གདབ། །བཅོམ་ལྡན་མགོན་པོ་ཚེ་དཔག་མེད། །སྐྱོན་གྱིས་མ་གོས་ལི་ཁྲི་ལྟར། །མཁའ་དང་མཉམ་པའི་སྐུ་མངའ་བ། །མཉམ་ཉིད་སྐུ་ལ་ཕྱག་འཚལ་བསྟོད། །དཀྱིལ་འཁོར་ལྷ་ཚོགས་ཐམས་ཅད་ནི། །ཡོན་ཏན་མ་ལུས་བསྐྱེད་
མཛད་ཅིང་། །ཡིད་བཞིན་ནོར་བུ་མཚུངས་ལྡན་པའི། །འགྲོ་བ་སྐྱོབ་ལ་ཕྱག་འཚལ་བསྟོད། །ཚེ་དཔག་མེད་པ་གསུང་གི་བདག །འཆི་བདག་མ་ལུས་འཇོམས་མཛད་པའི། །ཚེ་ཡི་དངོས་གྲུབ་སྩོལ་བའི་སྐུ། །དཀྱིལ་འཁོར་དམ་པ་བཤད་དུ་གསོལ། །
དེ་ནས་རྡོ་རྗེ་སློབ་དཔོན་གྱིས། །དཀྱིལ་འཁོར་བསྡུས་ཏེ་རྟ་མཆོག་སྐུ། །ཁྲོ་ཞིང་རབ་བརྗིད་ང་རྒྱལ་དང་། །རྐང་པ་ཧཱུྃ་ལས་རྡོ་རྗེར་བྱས། །མིག་གཉིས་ཉི་ཟླ་འབར་བ་སྟེ། །རྡོ་རྗེ་དྲིལ་བུའི་ཕྱག་རྒྱ་ཡིས། །འཇིགས་མེད་བྱང་ཤར་མཚམས་སོང་ནས། །དཀྱིལ་འཁོར་
ས་གཞི་ལ་གནས་པའི། །ལྷ་དང་ལྷ་མིན་བགེགས་ཚོགས་ཉོན། །ང་ནི་དཔལ་ལྡན་རྡོ་རྗེ་འཛིན། །ང་ཡི་བཀའ་ལས་མ་འདའ་བར། །བགེགས་ཀྱི་ཚོགས་རྣམས་འགྲོ་བར་གྱིས། །གལ་ཏེ་མི་འགྲོ་འདུག་གྱུར་ན། །ཡེ་ཤེས་རྡོ་རྗེ་འབར་བ་ཡིས། །མགོ་བོ་ཚར་པ་བརྒྱར་འགས་ཤིང་། །

49-1-211a

ལུས་རྣམས་སྟོང་དུ་གྱུར་ནས་ནི། །རྣམ་པར་འཇོམས་པར་གདོན་མི་ཟ། །དེ་བས་ཁྱེད་རྣམས་གཞན་དུ་དེངས། །རྟ་མཆོག་སྔགས་དང་རྡོ་རྗེ་འགྲོས། །དཀྱིལ་འཁོར་ལན་གསུམ་བསྐོར་བར་བྱ། །དེ་ནས་ཁྲོ་བོའི་ཕུར་པ་རྣམས། །ཀཱི་ལ་ཡ་ཞེས་བཏབ་ནས་ཀྱང་། །
ཨཱ་ཀོ་ཊ་ཡིས་བརྡུང་བར་བྱ། །མེ་དའི་སྔགས་ཀྱིས་བྱིན་གྱིས་བརླབ། །ས་ཡི་ལྷ་དང་ལྷ་ཚོགས་རྣམས། །སྟ་གོན་གནས་པར་བྱ་བ་ནི། །ལྷ་རྣམས་རྫོགས་པར་བསྐྱེད་པ་དང་། །མཆོད་ཅིང་བསྟོད་དེ་སྤོས་ཐོགས་ལ། །བཅོམ་ལྡན་མགོན་པོ་ཚེ་དཔག་མེད། །དཀྱིལ་འཁོར་
ལྷ་ཚོགས་ཐམས་ཅད་དང་། །རིག་པའི་ལྷ་མོ་རྫུ་འཕྲུལ་ཅན། །བྱང་ཆུབ་སེམས་དཔའ་ལ་སོགས་ཀུན། །ཐམས་ཅད་བདག་ལ་དགོངས་སུ་གསོལ། །ཁྱེད་རྣམས་ལ་ཡང་མཆོད་པ་དང་། །སློབ་མ་རྣམས་ལ་ཕན་པའི་ཕྱིར། །རྡོ་རྗེ་ཅན་བདག་ཆེ་གེ་ཞེས། །དཀྱིལ་
འཁོར་དམ་པ་བཞེངས་སུ་གསོལ། །རྗེས་སུ་བརྩེ་བར་ཉེར་དགོངས་ནས། །སོང་ནུབ་དགྱེས་པར་འབྱོན་པར་འཚལ། །དེ་ནས་ཕྱི་ནང་མཆོད་པས་མཆོད། །དཀྱིལ་འཁོར་ལྷག་པར་གནས་པའོ། །རིན་ཆེན་རྒྱུ་ལས་བྱུང་བ་ཡིས། །ལྟོ་ཆེ་མགྲིན་པ་རིང་བ་དང་། །མཆུ་འཕྱངས་ནག་ནོག་
ར་རི་མེད། །ལྷ་གྲངས་མཉམ་པ་ལས་བུམ་དང་། །རང་རང་ཕྱག་མཚན་རྫོགས་པར་བྱ། །ཧ་ས་དེ་བ་གསེར་དངུལ་དང་། །མུ་ཏིག་མུ་མེན་བྱི་རུ་གཞུག །ནས་ཏིལ་གྲོ་སྲན་མུངྒ་དང་། །ག་པུར་ཛཱ་ཏི་གུར་གུམ་མཆོག །ཙནྡན་གཉིས་དང་ཨ་ག་རུ། །མར་དང་བུ་རམ་སྦྲང་རྩི་དང་། །ལན་
ཚྭ་རྣམས་ཀྱིས་ལྟོ་བ་དགང་། །ཁ་ཚར་མ་ཉམས་རས་ཟུང་གིས། །མགྲིན་པར་རབ་ཏུ་བརྒྱན་པ་དང་། །ཁ་རྒྱན་ཀུ་ཤ་འབྲས་བུ་ཅན། །སྣ་ཚོགས་པདྨ་རས་ཀྱི་སྟེང་། །ཡང་ན་ཀུ་ཤའི་གདན་ལ་བཞུགས། །བྷྲཱུྃ་ལས་བསྐྱེད་པའི་གཞལ་ཡས་ཁང་། །ཆུ་སྐྱེས་ཉི་ཟླའི་གདན་སྟེངས་
སུ། །ལྷ་རྣམས་རྫོགས་པར་བསྐྱེད་པ་དང་། །སྔགས་བཟླས་ཡེ་ཤེས་བདུད་རྩིའི་རྒྱུན། །བུམ་པ་གང་བར་བསམ་པ་དང་། །ལྷ་རྣམས་རང་རང་བསྟོད་པ་བྱ། །ལས་བུམ་རྟ་མགྲིན་བསྐྱེད་པ་དང་། །སྔགས་བཟླས་བར་ཆད་བསྲུང་བ་དང་། །ཤ་ལྔ་བདུད་རྩིའི་གཏོར་མས་

49-1-211b

མཆོད། །འདོད་པའི་དོན་ལ་གསོལ་བ་གདབ། །སློབ་མ་ལྷག་པར་གནས་པ་ཡང་། །སྙིམ་པ་མེ་ཏོག་དང་བཅས་པ། །སྐྱེ་རྒས་འཆི་བ་ན་ཀྲ་ཡི། །ཆུ་སྲིན་ལ་སོགས་འཇིགས་རུང་བ། །སྲིད་པའི་མཚོ་ལས་བདག་སྒྲོལ་མཛོད། །དགའ་ཆེན་ཁྱོད་བདག་སྟོན་པ་པོ། །སློབ་དཔོན་ཁྱོད་
ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པའི། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ནི་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དེ་ནི་བདག་ལ་སྩོལ། །ཐར་པ་ཆེན་པོའི་
གྲོང་མཆོག་ཏུ། །མགོན་པོ་བདག་ནི་འཇུག་པར་འཚལ། །འོད་ཀྱིས་བུར་བྱས་སྡིག་པ་སྦྱངས། །བུ་ཚུར་ཐེག་པ་ཆེན་པོ་པ། །ཁྱོད་ནི་ཚུལ་ཆེན་སྣོད་ཡིན་ཏེ། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །སྐུ་གསུང་ཐུགས་ཀྱི་རྡོ་རྗེ་ཅན། །སངས་རྒྱས་
དུས་གསུམ་འབྱུང་བ་རྣམས། །རྡོ་རྗེ་གསང་སྔགས་རབ་བསྒོམས་པས། །ཡེ་ཤེས་མཉམ་མེད་ཡང་དག་བརྙེས། །སྐྱོབ་པ་ཤཱཀྱ་སེང་གེ་ཡིས། །དྲག་པོ་ཆེན་པོ་བདུད་ཀྱི་སྡེ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་
འདི་གྱིས་ཤིག །དེ་ནས་རྡོ་རྗེ་སློབ་དཔོན་གྱིས། །སྡིག་པ་བཤགས་པ་ལ་སོགས་ཀུན། །སྔོན་དུ་འགྲོ་བའི་ཆོ་ག་བྱ། །ཚེ་དཔག་མེད་པ་བདག་ལ་དགོངས། །མ་ལུས་བཞུགས་པའི་བདེ་གཤེགས་རྣམས། །འདི་ཉིད་ནས་བཟུང་སངས་རྒྱས་བར། །བླ་མེད་བདག་ལ་གཟིགས་པར་མཛོད། །དམ་
ཚིག་སྡོམ་པ་བཟུང་བ་ནི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་སྡོམ་པ་ནི། །ཡང་དག་ཉིད་དུ་གཟུང་བར་བྱ། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བྱ། །སློབ་དཔོན་
དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་ལན་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་དང་གསང་བའི་ཐེག་པ་གསུམ། །

49-1-212a

དམ་པའི་ཆོས་ཀྱང་གཟུང་བར་བྱ། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་མི་ནུས་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་
གསུམ། །བདག་གིས་བརྟན་པོར་གཟུང་བར་བགྱི། །གཉིས་སུ་མེད་པའི་ཚངས་སྤྱོད་དང་། །རང་གི་དམ་ཚིག་བསྲུང་བར་བགྱི། །བདག་གི་དགེ་བའི་ལས་ཀྱིས་ནི། །སངས་རྒྱས་མྱུར་དུ་བསྒྲུབ་བྱ་སྟེ། །སེམས་ཅན་འཁོར་བའི་རྒྱ་མཚོ་ལས། །བླ་མེད་གནས་སུ་བསྒྲལ་བར་བགྱི། །གུས་པས་ལན་གསུམ་བརྗོད་
པར་བྱ། །དཔྲལ་བ་མགྲིན་པ་སྙིང་ག་རུ། །དྲི་ཡི་ཐིག་ལེ་གསུམ་བྱས་ཏེ། །རྟ་བདུན་ཆུ་སྐྱེས་འཁོར་ལོའི་སྟེང་། །ཐུགས་གསུང་སྐུ་ཡི་སྙིང་པོས་བརྒྱན། །རིགས་ཀྱི་ལྷ་ལས་འོད་འཕྲོས་པས། །ཡེ་ཤེས་གཉིས་སུ་མེད་པར་བསྟིམ། །ཆུ་གཉིས་སྔོན་དུ་འགྲོ་བས་མཆོད། །དེང་ནས་བཟུང་ནས་བུ་ཁྱོད་ཀྱིས། །
འཁོར་བའི་ཉེས་པས་མ་གོས་པར། །མཆོད་པ་ཀུན་དང་ལྡན་པར་ནི། །བུ་ཡིས་བློ་གྲོས་འདི་གྱིས་ཤིག །ཨ་ཤྭདྠ་དང་པ་ལ་ཤ །ཨུ་དུམྺཱ་ར་ལ་སོགས་པ། །བཅུ་གཉིས་སོར་གྱི་ཚད་ཙམ་ལ། །རྩེ་མོར་མེ་ཏོག་གིས་བརྒྱན་ནས། །མཎྜལ་འདབ་བརྒྱད་རྣམ་ལྔས་བྱུག །ཤར་ནས་དབུས་སུ་དོར་བ་ནི། །པདྨའི་
ཕྱག་རྒྱ་དང་བཅས་པ། །སྟེང་དུ་མཆོག་གི་དངོས་གྲུབ་ཡིན། །ཕྱོགས་སུ་ཕྲིན་ལས་གྲུབ་པ་དང་། །ཐུར་བལྟས་ས་འོག་འགྲུབ་པ་ཡིན། །མཚམས་སུ་འཇིག་རྟེན་དངོས་གྲུབ་པོ། །དེ་ནས་སྐྱོར་ཆུ་སྦྱིན་པ་ནི། །ཨོཾ་ཧྲཱིཿ་བི་ཤུདྡྷ་སྶརྦ་དྷརྨཱཿསརྦ་པཱ་པཱ་ནི་ཙཱསྱ་བི་ཤོ་དྷ་ཡ་སརྦ་བི་ཀ་ལ་པཱན་ཨ་པ་ན་ཡ་ཧཱུྃ། ཞེས་པས་སྒོ་
གསུམ་དག་སྦྱངས་ནས། །སྐུད་པ་དམར་པོ་སུམ་སྒྲིལ་ལ། །རྟ་མགྲིན་སྔགས་ཀྱིས་བཅིང་བར་བྱ། །ཀུ་ཤ་གཙང་མ་སྔས་དང་སྟན། །མ་ནོར་སེང་གེའི་ཉལ་སྟངས་བཞིན། །ཐུབ་པས་ཏིང་འཛིན་འགྲུབ་པ་ལྟར། །མཚན་མ་གང་བྱུང་བརྗོད་པར་བྱ། །བཟང་ན་དངོས་གྲུབ་སྤྲོ་བ་བསྐྱེད། །ངན་ན་སྦྱིན་སྲེག་
གིས་ནི་བཟློག །ཟབ་ཅིང་རྒྱ་ཆེའི་ཆོས་བཤད་ནི། །འཇིག་རྟེན་དུ་ནི་ཀུན་མཁྱེན་དག །ཨུ་དུམྺཱ་རའི་མེ་ཏོག་བཞིན། །བརྒྱ་ལམ་ན་ནི་རེ་འགའ་ཞིག །འབྱུང་ངམ་ཡང་ན་མི་འབྱུང་སྲིད། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །བླ་མ་རྡོ་རྗེ་ཅན་མཆོད་ལ། །ནང་པར་

49-1-212b

ལངས་ཏེ་དཀྱིལ་འཁོར་ལྷ། །ནམ་མཁར་བཏེག་སྟེ་ཐིག་གདབ་སྟེ། །བུ་མོ་གཙང་མ་སྡོམ་ལྡན་གྱིས། །རས་བལ་ལས་བྱུང་བཀལ་བ་དང་། །ཡེ་ཤེས་ལྔའམ་སྐུ་གསུང་ཐུགས། །ཨོཾ་ཨ་ནཱོ་ནྱ་ཨ་ནུ་ག་ཏ་སརྦ་དྷ་རྨཱ། བརྗོད་ནས་བསྒྲིལ་བར་བྱ་བ་ནི། །པདྨའི་སྣོད་དུ་བཞག་ནས་ཀྱང་། །མི་འཆི་ལྔ་ཡིས་སྤངས་
བྱས་ལ། །བློ་ལྡན་ཡེ་ཤེས་བསྟིམ་བྱས་ནས། །ནམ་མཁར་ཡེ་ཤེས་ཛ་ཛས་གདབ། །སྒོ་ཡི་བཅུ་གཉིས་ཆ་དང་ལྡན། །སྲིད་ཀྱང་ཁང་པ་ཉིས་འགྱུར་ལ། །ཚངས་པའི་ལས་ཐིག་དྲངས་པ་ལ། །ཨོཾ་བཛྲ་སཱུ་ཏྲ་ས་མ་ཡེ་མ་ཏི་ཀྲ་མ་ཧཱུྃ། ཚངས་དང་ཟུར་ཐིག་ལ་སོགས་པ། །བསྟན་བཅོས་མཐོང་ཞིང་བློ་ལྡན་
དེས། །ཆ་ནི་གང་ཡིན་རྣམ་པར་དབྱེ། །གལ་ཏེ་ཉེས་པའི་འབྲས་བུ་ནི། །ཆད་ན་བླ་མའི་སྲོག་གཡོ་ཞིང་། །དམན་ལྷག་ནད་ཀྱིས་བཏབ་པར་འགྱུར། །ཕྱོགས་འཁྲུལ་སློབ་མ་རྨོངས་པར་འགྱུར། །བློ་ལྡན་ཉེས་པ་མེད་པར་བྱ། །གྲུ་བཞི་སྒོ་བཞི་རྟ་བབས་བཅས། །དྲ་བ་དྲ་བ་ཕྱེད་པས་བརྒྱན། །ཉི་ཟླ་དྲིལ་བུ་
གཡེར་ཁས་སྤྲས། །ཕོ་བྲང་ཆུ་སྐྱེས་རིམ་པ་གཉིས། །མུ་ཁྱུད་པདྨའི་ཕྲེང་བ་དང་། །ཁྱམས་དང་ཕྱི་རོལ་པད་ར་དང་། །རྡོ་རྗེ་མེ་རི་ལ་སོགས་པ། །རྣམ་པ་མ་ལུས་རྫོགས་པར་བྱ། །རིན་ཆེན་ལྔ་དང་འབྲུ་ཕྱེ་འམ། །པདྨའི་སྣོད་དུ་སོ་སོར་བཞག །ས་བོན་བྲིས་ལ་ཡེ་ཤེས་བསྟིམ། །སྐུ་གསུང་ཐུགས་
ཀྱིས་བྱིན་གྱིས་བརླབ། །སྔོན་པོ་སེར་པོ་དཀར་པོ་ལྗང་། །དམར་པོ་འདི་ནི་ནང་དུ་འདོད། །གཡས་སྐོར་རྒྱུན་མ་ཆད་པར་བྲི། །དབང་ལྡན་མཚམས་སུ་དྲང་བ་བྱ། །པདྨའི་སྣོད་ཀྱིས་སྟེང་ནས་བཀབ། །འདི་ནི་ཆོས་དབྱིངས་དག་པ་སྟེ། །སེམས་ཅན་ཁམས་ནི་རབ་སྒྲོལ་བྱེད། །བཅོམ་ལྡན་
མགོན་པོ་ཚེ་དཔག་མེད། །ཚོན་གྱི་ལས་ནི་ཡང་དག་བརྩམ། །མེ་ཏོག་དོར་ལ་མཚན་མ་བརྟག །ཤར་སྔོ་ལྷོ་སེར་ནུབ་དཀར་པོ། །བྱང་ཕྱོགས་ཨིནྡྲ་ནཱི་ལའི་མདོག །པདྨ་ལྷ་སྣམ་དམར་པོའོ། །དེ་ལྟར་རྫོགས་པའི་དཀྱིལ་འཁོར་དུ། །ཁྲུས་བྱས་དྲི་ཞིམ་ལུས་བྱུགས་ནས། །གོས་བཟང་བརྒྱན་ལ་
ལན་གསུམ་བསྐོར། །ཚེ་དཔག་མེད་པའི་ང་རྒྱལ་གྱིས། །ཤར་གྱི་སྒོ་ནས་ནང་དུ་ཞུགས། །ཡིད་ཀྱིས་སྒོ་བཞི་དབྱེ་བར་བསམ། །ཨོཾ་བཛྲ་མུརྒྷ་ཊ། ས་མ་ཡ་པྲ་བེ་ཤ་ཡེ་ཧཱུྃ།  རྣམ་རྒྱལ་ལ་སོགས་བུམ་པ་རྣམས། །གནས་དང་གོ་རིམས་བཞིན་དུ་དགོད། །སྣ་ཚོགས་གོས་དང་རྒྱན་ཕྲེང་སོགས། །མཆོད་

49-1-213a

པའི་རྫས་ཀྱིས་ལེགས་པར་བརྒྱན། །དཀྱིལ་འཁོར་ལྷ་རྣམས་རྫོགས་པར་བསྐྱེད་། །ཡེ་ཤེས་བསྟིམས་ལ་མཆོད་བསྟོད་བྱ། །ཚོགས་ཀྱི་འཁོར་ལོས་ཚིམ་པ་དང་། །བར་ཆད་ཞི་ཕྱིར་ཤར་ཕྱོགས་སུ། །ཞི་བའི་སྦྱིན་སྲེག་བྱ་བ་དང་། །སློབ་མའི་ཆོ་ག་ཇི་ལྟ་བར། །སློབ་དཔོན་བདག་ཉིད་དབང་དང་
ལྡན། །ཤར་གྱི་ཕྱོགས་ནས་འཇུག་པ་དང་། །དེ་ནས་སློབ་མ་གཞུག་པའི་ཕྱིར། །ཁྲུས་བྱས་བགེགས་དང་སྡིག་པ་སྦྱང་། །གདོང་པ་རས་ཀྱིས་བཀབ་ནས་ནི། །བུ་ཁྱོད་སུ་ཡིན་ཅི་ལ་དགའ། །བདག་ནི་སྐལ་བཟང་རིགས་ཡིན་ནོ། །སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་སྐྱབས་སུ་མཆི། །གཙོ་བོ་
ལྷ་མོར་བཅས་པ་ཡི། །ལྷ་རྣམས་ལ་ཡང་ཕྱག་འཚལ་ལོ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། །དེ་ནས་ཚིག་འདིས་གསོལ་བ་གདབ། །དེ་བཞིན་གཤེགས་པ་ཀུན་གྱི་གནས། །ཚེ་དཔག་མེད་པའི་གྲོང་ཁྱེར་མཆོག །སྙིང་པོའི་དཀྱིལ་འཁོར་འདི་རུ་ནི། །
བདག་གིས་སློབ་མ་གཞུག་པར་བྱ། །ཨོཾ་ཨཱ་ཁཾ་བཱི་ར་ཧཱུྃ། མེ་ཏོག་ཕྲེང་བ་གཏད་པ་དང་། །དཀྱིལ་འཁོར་ལྷ་ལ་ཕྱག་འཚལ་ཏེ། །ཨོཾ་ན་མ་སྟེ་ཧཱུྃ། ཨོཾ་ན་མ་མི་ཧཱུྃ། ན་མོ་ན་མཿཧཱུྃ་སྭཱ་ཧཱ། ཤར་ནས་ཞུགས་ནས་ལྷོ་ནས་དབང་། །ནུབ་ནས་ཆོས་བཤད་བྱས་ནས་ནི། །ཕྲིན་ལས་སྒྲུབ་པ་ལ་སོགས་པའི། །དོན་དུ་
གསོལ་བ་གདབ་པ་ནི། །ཨོཾ་སརྦ་ཏ་ཐཱ་ག་ཏ་པཱུ་ཛ་ཨུ་པ་ཐཱ་ན་ཡ་ཨཱཏྨ་ནཱཾ། ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་སཏྭ་ཨ་དྷི་ཏིཥྛ་ན་སྭ་མཾ། ཨོཾ་སརྦ་ཏ་ཐཱ་ག་ཏ་པཱུ་ཛ་ཨ་བྷི་ཥེ་ཀ་ཏ་ཨཱཏྨ་ནཱཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་རཏྣ་ཨ་བྷི་ཥིཉྩ་མཱཾ། ཨོཾ་སརྦ་ཏ་ཐཱ་ག་ཏ་པཱུ་ཛ་པྲ་བར་དྷ་ན་ཡ་ཨཱཏྨ་ནཱཾ་ནིརྱཱ་ཏ་ཡཱ་མི། སརྦ་
ཏ་ཐཱ་ག་ཏཱ་བཛྲ་དྷརྨ་ནཾ་པྲ་ཝར་དྷ་ཡ་མཾ། སརྦ་ཏ་ཐཱ་ག་ཏཱ་པཱུ་ཛ་ཀརྨཱ་ནཾ། ཨཱཏྨ་ནཱཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་ཀརྨ་ཀུ་རུ་མཾ། དམ་ཚིག་སྡོམ་པ་སྦྱིན་པ་དང་། །རྣལ་འབྱོར་དུ་ནི་སེམས་བསྐྱེད་དོ། །ཨོཾ་སརྦ་ཡོ་ག་ཙིཏྟ་ཨུད་པཱ་ད་ཡཱ་མི། རྡོ་རྗེ་སྙིང་གར་བཞག །ཨོཾ་སུ་ར་ཏེ་ས་མ་ཡ་སྟྭཾ། སིདྡྷི་བཛྲ་ཡ་ཐཱ་སུ་ཁཾ། 
དེང་ཁྱོད། དེ་བཞིན་གཤེགས་པ་ཐམས་ཅད་དང་། །ཚེ་དཔག་མེད་ཀྱི་དངོས་གྲུབ་ཐོབ། །དངོས་གྲུབ་གཞན་དག་ལྟ་ཅི་སྨོས། །དཀྱིལ་འཁོར་མ་ཞུགས་མི་སྨྲའོ། །དམ་ཚིག་ཉམས་པར་གྱུར་ཏ་རེ། །འདི་ནི་དམ་ཚིག་རྡོ་རྗེ་སྟེ། །གལ་ཏེ་ཁྱོད་ཀྱིས་སྨྲས་གྱུར་ན། །དམ་ཚིག་ཆེན་པོའི་རྡོ་རྗེ་ཡིས། །རང་གི་མགོ་

49-1-213b

བོ་འགས་པར་འགྱུར། །ཚེ་དཔག་མེད་པ་དེང་ཁྱོད་ཀྱི། །སྙིང་ལ་དེ་རིང་ཡང་དག་ཞུགས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །འདི་ནི་ཁྱོད་ཀྱི་དམྱལ་བའི་ཆུ། དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་རྣམས། །རྡོ་རྗེ་བདུད་རྩིའི་ཆུ་འདིས་འགྲུབ། །
བཛྲ་ཨུ་ད་ཀ་ཨོཾ་ཨཱཿཧཱུྃ། དེང་ནས་བརྩམས་ནས་བུ་ཁྱོད་ཀྱི། ཚེ་དཔག་མེད་པ་ང་ཡིན་གྱིས། །ཁྱོད་ཀྱིས་ང་ལ་བརྙས་པ་ན། །མི་བདེ་མ་སྤངས་དུས་བྱས་ནས། །དམྱལ་བར་ལྟུང་བར་གྱུར་ཏ་རེ། །དེ་ནས་སློབ་མའི་གཙོ་བོ་ཡིས། །དེ་བཞིན་གཤེགས་པ་ཐམས་ཅད་ཀྱིས། །བདག་ལ་བྱིན་གྱིས་རློབས་མཛོད་
ལ། །ཚེ་དཔག་མེད་པ་དབབ་པར་མཛོད། །རྐང་མཐིལ་རླུང་གི་དཀྱིལ་འཁོར་ཛྷེེ། །སྙིང་གར་ལཾ་ལས་སའི་དཀྱིལ་འཁོར། །མགྲིན་པར་བཾ་ལས་ཆུའི་དཀྱིལ་འཁོར། །སྤྱི་བོར་ཡཾ་ལས་རླུང་དང་ཧཾ། །དེ་ཡི་སྤྱི་བོར་ཚེ་དཔག་མེད། །ཡབ་ཡུམ་འོད་ཀྱི་རང་བཞིན་དུ། །གར་བྱེད་སྐུ་ལས་ཡེ་ཤེས། །བདུད་
རྩི་བབས་ནས་སྐུ་ལ་ཐིམ། །ཟག་མེད་བདེ་བས་གང་བར་བསྒོམ། །ཨོཾ་ཧྲཱིཿབྷྲཱུཾ་བཛྲ་ཛྙཱ་ན་ཨཱ་ཡུ་ཥེ་ཨཱ་བེ་ཤ་ཡ་ཨཱ་བེ་ཤ་ཡ་ཨ། སྟྭཾ་བྷ་ཡ། ར་ར་ཙ་ལ་ཡ་ཧཱུྃ་ཨ་ཧཿཛྷྱེེ། ཞེས་བརྗོད་རོལ་མོའི་སྒྲ་དང་ནི། །གུ་གུལ་ཟླ་མཚན་ཐོད་པ་རུ། །དུར་ཁྲོད་སོལ་བའི་མེ་ཡིས་བསྲེག །བབ་གྱུར་ཟླ་བའི་དཀྱིལ་འཁོར་དུ། །ཨཿ
ལས་གསུང་གི་བདུད་རྩི་བསམ། །བྷྲཱུཾ་ཧྲཱིཿབཛྲ། དགེ་དང་མི་དགེ་ལ་སོགས་པ། །སྨྲོས་ཤིག་རྡོ་རྗེ་ཅན་གྱི་རིགས། །ཏིཥྛ་བཛྲ་བརྟན་པར་བྱའོ། །ཚེ་དཔག་མེད་པའི་དཀྱིལ་འཁོར་དུ། །རིག་པའི་མེ་ཏོག་འདི་དོར་བས། །སྔོན་ཚེ་ཡེ་ཤེས་བརྙེས་པའི་ལྷ། །གང་ཡིན་དེ་ལ་འབབ་པར་ཤོག །
པྲ་ཏཱིཙྪ་བཛྲ་ཧོ། བྱེ་བྲག་དང་དངོས་གྲུབ་བརྟག་པར་བྱ། པྲ་ཏི་གྲྀཧྞ་ཧི་མཾ་སཏྭ་མ་ཧཱ་བ་ལ། སློབ་མའི་མགོ་ལ་བཅིང་བར་བྱ། །ཚེ་དཔག་མེད་པ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་བར་འགྱུར། །རྡོ་རྗེའི་མིག་ནི་བླ་ན་མེད། །ཨོཾ་བཛྲ་ནེ་ཏྲ་ཨ་པ་
ཧ་ར་པ་ཊ་ལཾ་ཧྲཱིཿ། དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་པས་རབ་ཏུ་བསྐྱེད། །ཁྱོད་ནི་ཚེ་དཔག་མེད་དུ་སྐྱེ། །སྔགས་དང་ཕྱག་རྒྱས་བྱིན་གྱིས་བརླབ། །འགྲོ་དོན་ཕུན་ཚོགས་དངོས་གྲུབ་ཀྱང་། །ཐམས་ཅད་ཁྱོད་ལ་མངོན་དུ་འགྱུར། །དངོས་གྲུབ་ཐོབ་ཅིང་དམ་ཚིག་སྲུངས། །

49-1-214a

གསང་སྔགས་ལ་ཡང་བརྩོན་པར་གྱིས། །རིམ་གྱིས་རྣམ་པར་དག་པ་བསྟན། །དེ་ནས་སློབ་མ་དད་ལྡན་དེས། །བླ་མའི་ཞབས་ལ་ཕྱག་འཚལ་ནས། །ཡོན་མཆོག་དམ་པ་འབུལ་བ་དང་། །དབང་བསྐུར་དོན་དུ་གསོལ་བ་གདབ། །བཅོམ་ལྡན་མགོན་པོ་ཚེ་དཔག་མེད། །ཡབ་ཡུམ་གཉིས་མེད་
བདེ་ཆེན་སྐུ། །འཆི་མེད་བདུད་རྩིའི་ཆུ་རྒྱུན་གྱིས། །དབང་བསྐུར་བ་ནི་བདག་ལ་སྩོལ། །ལན་གསུམ་བརྗོད་ནས་ཤར་ཕྱོགས་སུ། །པདྨ་འདབ་བརྒྱད་ཁྲི་ལ་འདུག །རྣམ་རྒྱལ་བུམ་པ་ལ་སོགས་ནས། །ཆུ་རྣམས་དུང་ཆོས་བུམ་པར་བསྡུས། །གླུ་དང་རོལ་མོའི་སྒྲ། །རིགས་ལྔ་རིག་མའི་ལྷ་མོ་དང་། །
བྱང་ཆུབ་སེམས་དཔའ་བཀྲ་ཤིས་བརྗོད། །ཁྲོ་བོ་རྣམས་ཀྱིས་བགེགས་བསྲུང་ངོ་། །གསང་གསུམ་དམ་ཚིག་ལས་བྱུང་བའི། །ཡེ་ཤེས་བདུད་རྩིའི་དྲི་མ་མེད། །ལྷ་ཡི་ཆུ་ནི་དག་པ་ཡིས། །མི་བསྐྱོད་རྡོ་རྗེ་དབང་བསྐུར་རོ། །ཨོཾ་བཛྲ་ཨ་དྷི་ཏིཥྛ་དྷཱཱུ་ན་ཨ་བྷི་ཥིཉྩ་ཧཱུྃ། གསེར་ལ་སོགས་པའི་དབུ་རྒྱན་ལ། །རིན་
འབྱུང་བསྐྱེད་ཅིང་ཡེ་ཤེས་བསྟིམ། །དར་དཔྱངས་བཅིངས་ལ་ཚིག་འདི་བརྗོད། །ཐོར་ཚུགས་ཅོད་པན་གྱིས་བརྒྱན་པ། །སངས་རྒྱས་ཀུན་གྱིས་རབ་བསྔགས་པའི། །རིན་ཆེན་དབུ་རྒྱན་དམ་པ་དང་། །དར་དཔྱངས་དབང་བསྐུར་སྦྱིན་པར་བྱ། །ཨོཾ་སརྦ་ཏ་ཐཱ་ག་ཏ་རཏྣ་མུ་ཀུ་ཊ་ཨ་བྷི་ཥིཉྩ་མཱཾ། རིན་ཆེན་ལ་སོགས་
རྡོ་རྗེ་ལ། །སྣང་བ་མཐའ་ཡས་བསྐྱེད་ཅིང་བསྟིམ། །སངས་རྒྱས་ཀུན་གྱི་རྡོ་རྗེའི་དབང་། །དི་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་དུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ཟུང་། །ཨོཾ་བཛྲ་ཨ་དྷི་པ་ཏི་སྟྭཾ། ཨ་བྷི་ཥིཉྩ་མཱཾ། དྲིལ་བུ་དོན་གྲུབ་བསྐྱེད་བྱས་ལ། །ཡེ་ཤེས་བསྟིམས་ལ་ཚིག་འདི་བརྗོད། །ཐབས་དང་
ཤེས་རབ་ལྡན་པ་ཡི། །འགྲོ་དོན་མཉམ་མེད་བྱེད་པ་ཡི། །མཆོད་པའི་ཕྲིན་ལས་རྫོགས་བྱེད་པའི། །དྲིལ་བུ་ལས་ཀྱི་དབང་བསྐུར་རོ། །ཨོཾ་ཨ་དྷི་པ་ཏ་ཡེ་ཨ་བྷི་ཥིཉྩ་མཱཾ། སློབ་མ་ཨོཾ་ལས་རྣམ་སྣང་བསྐྱེད། །ཡེ་ཤེས་སྤྱན་དྲངས་གཉིས་སུ་མེད། །རྡོ་རྗེ་མིང་གི་དབང་བསྐུར་བས། །བྱང་ཆུབ་སྙིང་པོའི་བར་དུ་ནི། །ཅིས་ཀྱང་
གཞོམ་པར་མི་ནུས་པའི། །རྡོ་རྗེའི་མིང་དུ་རབ་ཏུ་གྲགས། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་མཱཾ། ཆུ་དང་ཅོད་པན་རྡོ་རྗེ་དང་། །དྲིལ་བུ་དང་ནི་མིང་གི་དབང་། །རིག་པ་ཡི་ནི་དབང་ལྔའོ། །ཉོན་མོངས་ལྔ་ནི་རྣམ་དག་པས། །དབང་བསྐུར་ལྔ་ནི་ཐོབ་པ་ཡིན། །མ་རིག་པ་ལས་འདས་ནས་ཀྱང་། །ཡེ་ཤེས་ལྔ་ནི་རིམ་གྱིས་

49-1-214b

ཐོབ། །དེ་ནས་སྤྱི་བོ་མགྲིན་པ་དང་། །སྙིང་ག་ལྟེ་བ་གསང་གནས་རྣམས། །འཁོར་ལོ་ལྔ་ཡི་གནས་ཉིད་དུ། །རིགས་ལྔ་ཚེ་དཔག་མེད་རྣམས་ཀྱི། །དབང་བསྐུར་ལྷ་རྣམས་ཡབ་ཡུམ་སྟེ། །འཆི་མེད་བྱང་ཆུབ་སེམས་སུ་གྱུར། །རྩ་གསུམ་འཁོར་ལོ་ལྔ་རྣམས་གང་། །བྱང་ཆུབ་སེམས་ཀྱི་དབང་བསྐུར་རོ། །འཆི་མེད་རྡོ་
རྗེའི་ལུས་སུ་གྱུར། །རྡོ་རྗེ་སེམས་དཔའི་སྐུ་རུ་བསྒོམ། །འདི་ནི་སངས་རྒྱས་ཐམས་ཅད་ཀྱི། །རྡོ་རྗེ་སེམས་དཔའི་ཕྱག་ན་འདུག །ཁྱོད་ཀྱིས་ཀྱང་ནི་རྟག་ཏུ་བཅང་། །རྡོ་རྗེ་སེམས་དཔའི་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་སྟྭཾ་དྷ་ར་ཡ་མི་བཛྲ་སཏྭ་ཧི་ཧི་ཧཱུྃ་ཧཱུྃ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་
སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །དཔའ་མཆོག་དང་པོའི་སྐྱེས་བུའོ། །འདི་ནི་སངས་རྒྱས་ཐམས་ཅད་ཀྱི། །ཤེས་རབ་དབྱིངས་ཀྱི་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་བཅང་། །བྱང་ཆུབ་མཆོག་ཏུ་རྒྱལ་བ་བཞེད། །སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་
དངོས་བྲལ་བྱས། །རང་བཞིན་དག་པའི་སེམས་དཔའ་ནི། །མཆོག་གི་སྲིད་པ་བྱེད་པར་འགྱུར། །མཚན་མ་མེད་པར་འགྲོ་བའི་དོན། །གང་དག་བདག་གིས་བྱེད་ནུས་པས། །ཕྱིར་མི་ལྡོག་པ་དབང་བསྐུར་ཆེ། །དཔའ་བོ་ཆེན་པོ་བདག་ལ་སྩོལ། །ཤར་དུ་སེང་གེའི་ཁྲི་ལ་འདུག །སྟེང་དུ་གདུགས་དཀར་ཕུབ་ནས་ཀྱང་། །རྣམ་
རྒྱལ་བུམ་པས་དབང་བསྐུར་ཏེ། །དབང་བསྐུར་རྡོ་རྗེ་ཆེན་པོ་ལ། །ཁམས་གསུམ་པ་ཡིས་ཕྱག་བྱས་ཏེ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་བཛྲ་ཨ་བྷི་ཥེ་ཀ་ཏ་ཨ་བྷི་ཥིཉྩ་མཱཾ། དྲིལ་བུ་གླེགས་བམ་ལག་ཏུ་གཏད། །ཕྲིན་ལས་ཐོགས་པ་མེད་པ་རྣམས། །བུ་ཡིས་
གཞན་དོན་བླ་མེད་བྱོས། །ཁྱོད་ནི་རྡོ་རྗེ་སློབ་དཔོན་ཡིན། །ཆོས་ཀྱི་རྒྱལ་པོར་དབང་བསྐུར་རོ། །ལྷ་ཡི་སྙིང་པོ་ལན་གསུམ་བརྗོད། །མེ་ཏོག་ཕྲེང་བ་སྤྱི་བོར་བཞག །བཅོམ་ལྡན་བདག་གིས་གཟུང་ལགས་ཀྱིས། །བདག་ལ་ཉེ་བར་མཛད་དུ་གསོལ། །བཅོམ་ལྡན་བདག་གིས་སྦྱིན་ལགས་ཀྱིས། །འདི་ལ་འགོ་
བར་མཛད་དུ་གསོལ། །འཇིག་རྟེན་ཁམས་ནི་མ་ལུས་པར། །སེམས་ཅན་མ་ལུས་དྲང་བའི་ཕྱིར། །ཆགས་པ་མེད་པའི་བསམ་པ་ཡིས། །ཇི་ལྟར་གདུལ་བྱ་སྣ་ཚོགས་ལ། །ཆོས་ཀྱི་འཁོར་ལོ་བསྐོར་བར་གྱིས། །དེ་བཞིན་རིགས་ཀྱིས་གང་འདུལ་བ། །ཁྱོད་ཀྱི་ཕྲིན་ལས་མཆོག་ཡིན་ནོ། །དེང་ནས་བཟུང་ནས་

49-1-215a

བུ་ཁྱོད་ཀྱི། །ཞི་རྒྱས་དབང་དང་བསད་པ་དང་། །དགུག་དང་བཅིང་དང་བསྲེག་པ་དང་། །བསྐྲད་དང་དབྱེ་བ་ལ་སོགས་པ། །ཕྲིན་ལས་སྣ་ཚོགས་གྲུབ་པར་གྱིས། །རལ་གྲི་མིག་སྨན་ས་འོག་དང་། །མཆིལ་ལྷམ་དེ་བཞིན་རི་ལུ་སྟེ། །མི་སྣང་བཅུད་ལེན་མཁའ་ལ་སྤྱོད། །ཐུན་མོང་དངོས་གྲུབ་མ་
ལུས་པ། །དེ་དག་ཁྱོད་ཀྱིས་གྲུབ་པར་བྱ། །ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་སེལ་བ་ལྟར། །བུ་ཁྱོད་ཀྱི་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནེ་ཏྲ་ཨ་པ་ཧ་ར་པ་ཊ་ལཾ་ཧྲཱིཿ། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་དྲི་མ་མེད། །གཟུང་
དུ་མེད་ཅིང་བརྗོད་དུ་མེད། །ཆོས་རྣམས་དེ་ལྟར་ཤེས་པར་གྱིས། །ཧོཿཡིས་མདའ་གཞུ་ཕྱོགས་བཞིར་འཕངས། །མཚན་མོ་གནས་ཁང་དབེན་པ་རུ། །བཞིན་བཟངས་མིག་ཡངས་ལང་ཚོར་ལྡན། །ལུས་ལ་དྲི་ཡིས་བྱུགས་བྱས་ཏེ། །རྩེ་དང་དགོད་པ་ལ་སོགས་པས། །ཐབས་དང་ཤེས་རབ་གཉིས་ཕབ་སྟེ། །ནོར་བུ་
བྱང་ཆུབ་སེམས་ལྟུང་བས། །ཉ་ཕྱིས་དུང་ཆོས་ལ་སོགས་སུ། །དྲིར་བཅས་སློབ་མའི་ཁ་རུ་ནི། །མཐེ་བོ་སྲིན་ལག་དག་གིས་སྦྱིན། །ཨ་ཧོ་སུ་ཁས་དེ་བཏུང་ངོ་། །ཟག་མེད་བདེ་ཆེན་ལུས་ལ་རྒྱས། །རྡོ་རྗེ་དེ་ཡིས་ཉོན་མོངས་འཇོམས། །མཚན་ལྡན་ཤེས་རབ་རང་བཞིན་ཏེ། །ལྷ་མོ་འདི་ནི་ཕྱག་རྒྱ་ཆེ། །
མཐའ་ཡས་བདེ་བ་སྦྱིན་པ་མོ། །རྣམ་པ་ཀུན་དུ་ཕྱག་རྒྱ་ལོང་། །བུ་ཡིས་བླ་མེད་མཆོད་པར་གྱིས། །ཡོལ་བས་བར་བཅད་སྙོམས་འཇུག་གིས། །སྲུབ་དང་བསྲུབ་པའི་སྦྱོར་བ་ཡིས། །མི་རྟོག་ཡེ་ཤེས་སྐྱེ་བར་འགྱུར། །ལྟོས་ཤིག་ལྟོས་ཤིག་སེམས་ལ་ལྟོས། །སེམས་ཉིད་ཅིར་ཡང་གྲུབ་པ་མེད། །བསལ་
གཞག་དགག་སྒྲུབ་གར་ཡང་མེད། །འདིས་ནི་རང་རིག་ཡེ་ཤེས་ཡིན། །བླ་མ་སྤྲུལ་པའི་སྐུར་བྱས་ཏེ། །ཆོས་གོས་བཟུང་ལ་ལུང་བསྟན་བྱ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པའི་མཐའ་ནི་གྲུབ་པའི་ཕྱིར། །སྲིད་པའི་ངན་འགྲོ་ཉིད་ལས་བཏོན། །འདི་ནི་ངས་ཁྱོད་ལུང་བསྟན་ཡིན། །ཨོཾ་སརྦ་
ཏ་ཐཱ་ག་ཏ་སིདྡྷི་ས་མ་ཡ་སྟྭཾ་བྷུར་བྷུ་བ་སྭཿ། ཁམས་གསུམ་པ་ཡི་རྒྱལ་སྲིད་ཆེ། །རྒྱལ་བའི་བདག་པོར་བརྟན་པ་དང་། །དེས་ནི་བདུད་ལས་རྣམ་རྒྱལ་ཞིང་། །གྲོང་ཁྱེར་མཆོག་ཏུ་ཞུགས་པ་ཡིན། །དེང་བདག་སྐྱེ་བ་འབྲས་བུར་བཅས། །བདག་གི་གསོན་པའང་འབྲས་བུར་བཅས། །དི་རིང་སངས་རྒྱས་

49-1-215b

སྲས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །རྟ་དང་གླང་པོ་མ་ཧེ་དང་། །བུ་དང་ཆུང་མ་ལ་སོགས་དབྱིག །ཕྱག་བྱ་བླ་མ་དམ་པ་ལ། །མ་ཞེན་སེམས་ཀྱིས་དབུལ་བར་བྱ། །དཀྱིལ་འཁོར་ལྷ་ཚོགས་མཆོད་བྱས་ཏེ། །ཚོགས་ཀྱིས་རྣལ་འབྱོར་ཚིམ་བྱས་ནས། །ལྷག་མས་འབྱུང་པོ་ཚིམ་པར་བྱ། །བཀྲ་ཤིས་
བརྗོད་ཅིང་སྨོན་ལམ་གདབ། །དགེ་བའི་རྩ་བ་བསྔོ་བ་དང་། །རོལ་མོའི་སྒྲ་དང་བཅས་པ་ཡིས། །རྡུལ་ཚོན་ཆུ་བོ་ཆེན་པོར་དོར། །དྲི་བཟངས་ཀྱིས་ནི་ཐིག་ཕྱིས་ཏེ། །ལྷག་ཆད་བསྐང་ཕྱིར་སྦྱིན་སྲེག་བྱ། །ཆོ་ག་བཟང་པོ་ཡོངས་བཟུང་འདི། །རྩ་རྒྱུད་ལེའུ་འབུམ་པ་དང་། །བཤད་རྒྱུད་འོད་ཟེར་དྲ་བ་ལ། །བརྟེན་
ནས་གྲུབ་པའི་རྒྱལ་མོས་མཛད། །དེ་ཡི་དགེ་བ་གང་ཡོད་པ། །རིགས་དྲུག་སེམས་ཅན་མ་ལུས་པ། །ཚེ་དཔག་མེད་པའི་ལམ་ཞུགས་ནས། །དེ་ཡི་འབྲས་བུ་མྱུར་ཐོབ་ཤོག།།      །།བཅོམ་ལྡན་འདས་མགོན་པོ་ཚེ་དཔག་ཏུ་མེད་པའི་དཀྱིལ་འཁོར་གྱི་ཆོ་ག་བཟང་པོ་ཡོངས་བཟུང་ཞེས་བྱ་བ་རྫོགས་སོ།།      །།
རྒྱ་གར་གྱི་པཎྜི་ཏ་ཟླ་བ་བཟང་པོ་དང་། བོད་ཀྱི་ལོ་ཙཱ་བ་གླན་དར་མ་ཚུལ་ཁྲིམས་ཀྱིས་བསྒྱུར་ཞིང་ཞུས་ཏེ་དག་པར་བྱས་སོ།།      །།༄༅༅། །རྒྱ་གར་སྐད་དུ། ཧ་ཡ་གྲཱི་བ་སཱ་དྷ་ན། བོད་སྐད་དུ། རྟ་མགྲིན་གྱི་སྒྲུབ་ཐབས། པདྨ་གསུང་གི་ལྷ་ལ་ཕྱག་འཚལ་ལོ། །ཡིད་འོང་གནས་སུ་ཉེར་འདུག་ནས། །བདེ་བའི་
སྟན་ལ་གནས་པ་དང་། །བྱང་ཆུབ་མཆོག་ཏུ་སེམས་བསྐྱེད་ནས། །ཟླ་བམ་སྨུག་ནག་དཀྱིལ་འཁོར་དུ། །པཾ་ལས་ཆུ་སྐྱེས་འདབ་མ་བརྒྱད། །མཾ་ལས་ཉི་མའི་གདན་སྟེངས་སུ། །ཧྲཱིཿདམར་རྒྱུ་ཡི་ས་བོན་ལས། །ཡེ་ཤེས་བསྐལ་པའི་མེ་ལྟར་འབར། །གདུག་པ་ཅན་རྣམས་མ་ལུས་བསྲེག །མེ་དཔུང་འབར་བའི་དཀྱིལ་འཁོར་
དུ། །ཧྲཱིཿལས་བསྐྱེད་པའི་རྟ་མཆོག་ནི། །ཞལ་གཅིག་ཕྱག་གཉིས་སྐུ་མདོག་དམར། །སྟེང་ཞལ་རྟ་མགོ་ལྗང་གུ་ནི། །དྲག་པོ་རྟ་སྐད་རབ་ཏུ་བཞད། །ཁམས་གསུམ་མ་ལུས་དབང་དུ་སྡུད། །ཕྱག་གཡས་ཐོད་དབྱུག་དཀར་པོ་བསྣམས། །བགེགས་དང་འབྱུང་པོ་མ་ལུས་འཇོམས། །གཡོན་པ་སྡིགས་མཛུབ་མེ་
ལྟར་འབར། །གནོད་བྱེད་མ་ལུས་སྲེག་པར་བྱེད། །གཡས་བསྐུམ་གཡོན་བརྐྱང་བདུད་བཞི་མནན། །སྤྱན་གསུམ་སྡང་མིག་ཁྲོ་གཉེར་བསྡུས། །ལྗགས་འདྲིལ་མཆེ་བ་མེ་སྟག་འཕྲོ། །སྐྲ་སེར་དབུ་རྒྱན་ཐོད་སྐམ་ཅན། །ཁྲག་འཛག་བརྒྱ་ཕྱེད་དོ་ཤལ་བྱས། །སྟག་གི་པགས་པའི་ཤམ་ཐབས་ཅན། །ཀླུ་ཆེན་

49-1-216a

བརྒྱད་ཀྱིས་ཉེ་བར་བརྒྱན། །འཇིགས་བྱེད་གཤིན་རྗེའི་གཟུགས་འཆང་བ། །གང་གིས་མི་ཚུགས་རྡོ་རྗེའི་སྐུ། །ཐུགས་ཀར་ཉི་མའི་དཀྱིལ་འཁོར་དུ། །ཧྲཱིཿཡིག་སྔགས་ཀྱིས་བསྐོར་བ་ལས། །འོད་འཕྲོས་ཡེ་ཤིས་དགུག་གཞུག་བྱ། །སངས་རྒྱས་རྣམས་
ཀྱིས་དབང་བསྐུར་རོ། །དེ་ནས་སྔགས་ཀྱི་བཟླས་པ་ནི། །ཨོཾ་བཛྲ་ཀྲོ་དྷ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུྃ་ཕཊ། འབུམ་དུ་བཟླས་ནས་ལས་རྣམས་འགྲུབ། །དེ་ནས་གཏོར་མ་དབུལ་བ་ནི། །ཡཾ་ལས་རླུང་དང་རཾ་ལས་མེ། །ཨཱ་ལས་ཐོད་པ་ཡངས་པ་རུ། །ཤ་ལྔ་བདུད་རྩི་ལྔ་ཡིས་གང་། །
ཡེ་ཤེས་བདུད་རྩི་གཉིས་སུ་མེད། །ཨོཾ་ཨཱཿཧཱུྃ། ཨི་དཾ་བ་ལིཾ་ཨ་མྲྀ་ཏ་ཁ་ཁ་ཁཱ་ཧི་ཁཱ་ཧི། རྩ་སྔགས་བཏགས་ལ་ལན་གསུམ་གྱིས། །ཕུལ་ནས་བསྟོད་དང་གསོལ་བ་གདབ། །ཧྲཱིཿལས་བསྐྱེད་པའི་རྟ་མཆོག་སྐུ། །ཉི་མའི་འོད་མཚུངས་ཉོན་མོངས་བསྲེག །བདུད་བཞི་མ་ལུས་
འཇོམས་མཛད་པའི། །དཔའ་བོ་རྟ་མགྲིན་ཕྱག་འཚལ་ལོ། །སློབ་མའི་བར་ཆད་བསྲུང་བའི་ཕྱིར། །གཏོར་མ་བྱིན་གྱིས་བརླབ་པ་ནི། །ཨོཾ་ཨཱཿཧཱུྃ། སྐུ་གསུང་ཐུགས་རྣམས་བསྟིམ་པའོ། །ལྷ་དང་སྔགས་ཀྱི་རྗེས་གནང་བྱ། །སློབ་མས་ཕྱག་འཚལ་ཡོན་དབུལ་ལོ། །དཔའ་བོ་རྟ་མགྲིན་སྒྲུབ་པའི་ཐབས། །འོད་དཔག་མེད་
ཀྱིས་ལུང་བསྟན་པའི། །མཁའ་འགྲོ་གྲུབ་པའི་རྒྱལ་མོས་བརྩམས། །དགེ་བས་རྟ་མཆོག་སྐུ་ཐོབ་ཤོག།།      །།པཎྜི་ཏ་ཟླ་བ་བཟང་པོ་དང་གླན་ཆུང་དར་མ་ཚུལ་ཁྲིམས་ཀྱིས་བསྒྱུར་ཅིང་ཞུས་ཏེ་དགེའོ།།      །།༄༅༅། །རྒྱ་གར་སྐད་དུ། ཨ་པ་རི་མི་ཏ་ཨཱ་ཡུརྫྙཱ་ན་སཱ་དྷ་ན་ནཱ་མ། བོད་སྐད་དུ། ཚེ་དང་ཡེ་ཤེས་དཔག་
ཏུ་མེད་པ་ཞེས་བྱ་བའི་སྒྲུབ་ཐབས། བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པ་ལ་ཕྱག་འཚལ་ལོ། །རིགས་དྲུག་སེམས་ཅན་ཐམས་ཅད་ཀྱི། །ཚེ་ཉམས་པ་ལ་གསོ་བའི་ཕྱིར། །བཅོམ་ལྡན་ཡེ་ཤེས་ཚེ་དཔག་མེད། །སྒྲུབ་ཐབས་ཡང་དག་བཤད་པར་བྱ། །དད་བརྩོན་དབང་ཐོབ་དམ་ཚིག་
ལྡན། །ཚེ་ཉམས་པ་རྣམས་གསོ་འདོད་པས། །དབེན་ཞིང་ཉམས་དགའི་གནས་འདུག་ནས། །བསོད་ནམས་ཚོགས་ཀྱི་སྔོན་འགྲོ་ནི། །བླ་མ་དཀྱིལ་འཁོར་ལྷ་ཚོགས་རྣམས། །ནམ་མཁར་སྤྱན་དྲངས་ཕྱག་འཚལ་ནས། །མཆོད་ཅིང་སྡིག་པ་བཤགས་པ་དང་། །ཚངས་པའི་གནས་བཞི་བསྒོམ་པར་

49-1-216b

བྱ། །རང་གི་སྙིང་གར་ཧྲཱིཿདམར་ལས། །ཡེ་ཤེས་མེ་འབར་རྣམ་སྨིན་བསྲེགས། །སྔགས་ཀྱི་དོན་ལ་སྟོང་ཉིད་བསྒོམ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅་ཧཾ། སྟོང་པའི་ངང་ལས་སེམས་ཉིད་ནི། །ཧྲཱིཿདམར་ཚེག་དྲག་ཐིག་ལེ་ལས། །དབང་ཆེན་ཞལ་གཅིག་ཕྱག་གཉིས་པ། །སྤྱན་གསུམ་ཁྲོ་གཉེར་
ལྗགས་འདྲིལ་བ། །སྟེང་ཞལ་རྟ་མགོ་ལྗང་གུ་ལ། །དྲག་པོས་རྟ་སྐད་རབ་ཏུ་མཚེར། །དབྱུག་པའི་སྡིགས་མཛུབ་མེ་ལྟར་འབར། །ཐུགས་ཀར་པདྨ་རྒྱས་པ་ཡིས། །སྟེང་དུ་ཟླ་བ་ཉི་མ་ལ། །ཧྲཱིཿལས་འོད་ཟེར་འཕྲོས་པ་ཡིས། །ཨེ་ལས་ཆོས་འབྱུང་ཡངས་པ་རུ། །ཡཾ་ལས་རླུང་དང་རཾ་ལས་མེ། །
བཾ་ལས་ཆུ་དང་ལཾ་ལས་ས། །སུཾ་ལས་རི་རབ་ལྷུན་པོ་དང་། །དེ་སྟེང་བྷཱུཾ་ལས་གཞལ་ཡས་ཁང་། །གྲུ་བཞི་སྒོ་བཞི་རྟ་བབས་བརྒྱན། །འདོད་ཡོན་ཕ་གུ་དྲ་ཕྱེད་མཛེས། །ཁོར་ཡུག་ཆུ་སྐྱེས་སྣ་ཚོགས་དང་། །རྡོ་རྗེ་མེ་རི་ཐོགས་པ་མེད། །ཕོ་བྲང་ཆུ་སྐྱེས་འཕང་རིམ་གཉིས། །འདབ་མ་བཞི་
དང་བརྒྱད་པ་ལ། །མུ་ཁྱུད་པད་མས་མཛེས་པ་དང་། །ལྷ་སྣམ་པན་རེག་ལྔ་དང་ལྡན། །འོད་ཟེར་སྣ་ཚོགས་འཕྲོ་བ་ལས། །ཨ་ལས་ཆུ་ཤེལ་དཀྱིལ་འཁོར་དང་། །རཾ་ལས་རྟ་བདུན་དག་ཏུ་གྱུར། །སྟེང་དུ་པདྨ་ཧྲཱིཿཡིས་མཚན། །དེ་ལས་འོད་འཕྲོས་དོན་གཉིས་བྱས། །ཚུར་འདུས་ཧྲཱིཿལ་ཐིམ་པ་ཡི། །
ལི་ཁྲི་ལྟ་བུའི་ཐིག་ལེ་ལས། །བཅོམ་ལྡན་ཚེ་དཔག་མེད་པ་ནི། །འགྱིང་བཅས་འོད་འཁྲུག་སྐྱིལ་ཀྲུང་བཞུགས། །ཕྱག་གཉིས་པདྨ་རཱ་ག་ཡི། །བུམ་པ་འཆི་མེད་བདུད་རྩིས་གང་། །འགྲོ་རྣམས་རེ་སྐོང་དཔག་བསམ་ཤིང་། །བུམ་པའི་ཁ་རྒྱན་ཐུགས་ཀར་འཛིན། །ཡུམ་ལ་འཁྱུད་ཅིང་གཉིས་སུ་མེད། །
བཾ་ལས་ཡུམ་མཆོག་གོས་དཀར་མོ། །ལི་ཁྲི་ལྟ་བུར་འཛུམ་ཞིང་སྒེག །གཡས་པ་པདྨ་གཡོན་པ་ནི། །བུམ་པ་ཡོངས་སུ་འཛིན་པ་ལ། །ཡབ་ལ་གཉིས་མེད་ལེགས་པར་འཁྲིལ། །དར་དང་ནོར་བུ་དུ་མས་བརྒྱན། །ཆུ་སྐྱེས་བརྒྱད་དང་ལྷ་སྣམ་ལ། །པདྨ་ཟླ་བ་ཉི་མའི་གདན། །མཚམས་བཞིའི་
སྒོ་བཞི་ཟླ་བའི་གདན། །ཤར་དུ་རྡོ་རྗེ་ཧཱུཾ་གིས་མཚན། །དེ་ལས་མི་བསྐྱོད་ཚེ་དཔག་མེད། །ལྷོ་རུ་རིན་ཆེན་ཏཱཾ་གིས་མཚན། །རིན་ཆེན་རིགས་ཀྱི་ཚེ་དཔག་མེད། །ནུབ་ཏུ་འཁོར་ལོ་ཨོཾ་གྱིས་མཚན། །རྣམ་པར་སྣང་མཛད་ཚེ་དཔག་མེད། །བྱང་དུ་རལ་གྲི་ཨ་ཡིས་མཚན། །དོན་ཡོད་གྲུབ་པ་ཚེ་

49-1-217a

དཔག་མེད། །ཤར་ལྷོར་མཾ་ལས་མཱ་མ་ཀཱི། །ལྷོ་ནུབ་ཏཱཾ་ལས་ལྷ་མོ་སྒྲོལ། །ནུབ་བྱང་ལཾ་ལས་སངས་རྒྱས་སྤྱན། །བྱང་ཤར་ཏཱཾ་ལས་དམ་ཚིག་སྒྲོལ། །རིགས་བཞི་མཉམ་གཞག་ཕྱག་རྒྱ་ལས། །ཤེལ་དང་བཻ་ཌཱུརྱ་གསེར་དང་ནི། །ཨིནྡྲ་ནཱི་ལའི་བུམ་པ་འཛིན། །ཡུམ་ལྔ་
གཡས་པ་རང་རྟགས་དང་། །གཡོན་པ་བུམ་པ་འཛིན་པའོ། །ཤར་དུ་རྡོ་རྗེ་སེམས་དཔའ་བཞི། །ལྷོ་རུ་རིན་ཆེན་སེམས་དཔའ་བཞི། །ནུབ་ཏུ་རྣམ་སྣང་སེམས་དཔའ་བཞི། །བྱང་དུ་ལས་ཀྱི་སེམས་དཔའ་བཞི། །གཡས་པ་རང་རྟགས་འཛིན་པ་ལ། །གཡོན་པས་ཚེ་ཡི་བུམ་པ་འཛིན། །ཐམས་
ཅད་དར་དང་ནོར་བུས་བརྒྱན། །རྡོ་རྗེ་སྐྱིལ་ཀྲུང་བཞུགས་པའོ། །མཚམས་བཞི་ལ་ནི་མཆོད་པ་ཡི། །བདུག་སྤོས་མར་མེ་མེ་ཏོག་མ། །དྲི་ཆབ་མ་དང་ལྷ་མོ་བཞི། །སྣ་ཚོགས་འོད་ཀྱིས་བསྐོར་བའོ། །ཤར་སྒོར་ཛཿལས་ལྕགས་ཀྱུ་དཀར། །ལྷོ་སྒོར་ཧཱུྃ་ལས་ཞགས་པ་སེར། །ནུབ་སྒོར་བཾ་ལས་
ལྕགས་སྒྲོག་དམར། །བྱང་སྒོར་ཧོཿལས་དྲིལ་བུ་ལྗང་། །སྒོ་བ་བཞི་པོ་དེ་དག་ནི། །འཁྲིལ་ལྡེམ་བཞེངས་ནས་བཞུགས་པའོ། །དེ་ནས་ཐུགས་ཀའི་འོད་ཟེར་གྱིས། །རང་བཞིན་གནས་ནས་ཡེ་ཤེས་པ། །ཚིག་འདིས་སྤྱན་ནི་དྲང་བར་བྱ། །གདོད་ནས་རང་བཞིན་ནམ་མཁའ་ལྟར། །ཐུགས་རྗེ་
འཇའ་ཚོན་སྐུར་སྟོན་པའི། །བཅོམ་ལྡན་གསུང་མཆོག་ཚེ་དཔག་མེད། །རང་བཞིན་ལྷུན་གྲུབ་གཞལ་ཡས་ནས། །ཏིང་འཛིན་གཟུགས་བརྙན་དམ་པ་འདིར། །འགྲོ་བའི་དོན་ཕྱིར་སྤྱན་འདྲེན་ན། །ཚེ་ཟད་ཚེ་ཉམས་གསོ་བའི་ཕྱིར། །འདི་ཉིད་དུ་ནི་གཤེགས་སུ་གསོལ། །རྡོ་རྗེ་རིན་ཆེན་
རྣམ་སྣང་དང་། །ལས་ཀྱི་རིགས་མཆོག་ཚེ་དཔག་མེད། །ཡུམ་བཞི་མཆོད་པའི་ལྷ་མོ་དང་། །སེམས་དཔའ་བཅུ་དྲུག་སྒོ་མར་བཅས། །རང་བཞིན་བདེ་ཆེན་དཀྱིལ་འཁོར་ནས། །ཏིང་འཛིན་གཟུགས་བརྙན་དམ་པ་འདིར། །ཚེ་དང་ཡེ་ཤེས་རྒྱས་པ་དང་། །ཐུགས་མཆོག་ཡེ་ཤེས་ཐོབ་བྱའི་
ཕྱིར། །འདི་ཉིད་དུ་ནི་སྤྱན་འདྲེན་ན། །བྱིན་གྱིས་རློབ་ཅིང་གཤེགས་སུ་གསོལ། །ཛཿཧཱུྃ་བཾ་ཧོཿས་དགུག་གཞུག་བྱ། །སྐུ་གསུང་ཐུགས་ནི་བྱིན་གྱིས་བརླབ། །སངས་རྒྱས་ཀུན་གྱིས་དབང་བསྐུར་ནས། །རིགས་བདག་རྣམས་ཀྱིས་དབུ་བརྒྱན་ཏེ། །མཉེས་པར་གྱུར་ལ་མཆོད་པ་དང་། །

49-1-217b

བསྟོད་པ་རྒྱས་དང་བསྡུས་པ་བྱ། །དེ་ནས་བྱིང་རྒོད་རབ་སྤངས་ནས། །མ་ཡེངས་ལྷ་རྣམས་གསལ་སྟོང་བསྒོམ། །དེ་རྗེས་བཟླས་པ་བྱ་བ་ནི། །ལྷ་རྣམས་ཐུགས་ཀའི་བུམ་པ་རུ། །ཧྲཱིཿཧཱུྃ་ཏྲཱཾ་བྷྲཱུཾ་ཨ་ལས་ནི། །རང་རང་སྔགས་ཀྱིས་བསྐོར་བར་བསྒོམ། །ཨོཾ་ཧྲཱིཿབྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། 
ཨོཾ་ཧཱུྃ་བྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། ཨོཾ་སྭཱ་བྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། ཨོཾ་ཨོཾ་བྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། ཨོཾ་ཨཱཿབྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། དེ་རྣམས་ཡབ་ཀྱི་སྙིང་པོའི་སྔགས་སོ། །ཡུམ་གྱི་བུམ་པར་པཾ་མཾ་ཏྲཾ་ལཾ་ཏཾ་རྣམས་ལས་སྔགས་ཀྱིས་བསྐོར། ཨོཾ་བྷྲཱུཾ་ཨ་པ་རི་མི་ཏ་ཨཱ་ཡུརྫྙཱ་ན་སུ་
བི་ནི་ཤྩི་ཏ་ཏེ་ཛོ་རཱ་ཛཱ་ཡ། ཡུམ་མཆོག་ལྔ་ཡི་སྙིང་པོའོ། །ཕྱོགས་བཞི་སེམས་དཔའ་བཅུ་དྲུག་ལ། །རང་གི་ས་བོན་རྣམས་ལ་ནི། །གཙོ་བོའི་སྔགས་ཀྱིས་བསྐོར་བར་བསམས། །ཛཿཧཱུྃ་བཾ་ཧོཿཨ་པ་རི་མི་ཏ་ཨཱ་ཡུརྫྙཱ་ན་སུ་བི་ནི་སྭཱ་ཧཱ། སྒོ་མ་བཞིའི་སྙིང་པོའི་སྔགས་སོ། །དེ་ལྟར་བུམ་པའི་སྔགས་
རྣམས་ལ། །དམིགས་ཏེ་གསང་སྔགས་བཟླས་པ་ཡིས། །ཡིག་འབྲུ་རྣམས་ལ་བདུད་རྩིའི་ཆུ། །བབས་པས་བུམ་པ་གང་བར་བསམ། །བུམ་ནང་ཡེ་ཤེས་བདུད་རྩིའི་རྒྱུན། །རང་གི་གནས་གསུམ་ཐིམ་པ་ཡིས། །ལུས་ངག་ཡིད་གསུམ་ནད་གདོན་དང་། །སྡིག་སྒྲིབ་དག་ནས་
དབང་བཞི་ཐོབ། །འཆི་མེད་དངོས་གྲུབ་ཐོབ་པར་བསམ། །དེ་ནས་རང་གིས་སྔགས་བཟླས་པས། །དཀྱིལ་འཁོར་ལྷ་ཚོགས་ཐམས་ཅད་ཀྱི། །རང་རང་གསང་སྔགས་བཟླས་པར་བསྒོམ། །སྙིང་གའི་ས་བོན་འོད་ཟེར་ལས། །ལྷ་མོ་དཀར་མོ་ལྕགས་ཀྱུ་ཐོགས། །བསམ་གྱིས་མི་
ཁྱབ་ཤར་དུ་འཕྲོས། །ནད་གདོན་ཞི་བའི་ལས་བྱས་ཏེ། །དྲི་ཟའི་ལག་ནས་ཚེ་བཀུག་ནས། །བདག་བསྐྱོད་ལྷ་དང་བུམ་པར་བསྟིམ། །དེ་བཞིན་ལྷོ་ཡི་ཞགས་པ་མོས། །ཚེ་དང་ལོངས་སྤྱོད་རྒྱས་བྱས་ནས། །གཤིན་རྗེའི་ལག་ནས་ཚེ་བཀུག་སྟེ། །གོང་བཞིན་དུ་ནི་
བསྟིམ་པར་བྱ། །ནུབ་ཀྱི་ལྕགས་སྒྲོག་དམར་མོ་ཡིས། །སྲིད་གསུམ་མ་ལུས་དབང་བསྡུས་ཏེ། །ཆུ་ལྷའི་ལག་ནས་ཚེ་བཀུག་ནས། །བསྟིམ་ཞིང་ཀླུ་གདོན་དག་པར་བསམ། །བྱང་གི་དྲིལ་བུ་དགྱེས་མཛེས་མས། །ནད་གདོན་ལོག་འདྲེན་ཚར་བཅད་ནས། །གནོད་

49-1-218a

སྦྱིན་ལག་ནས་ཚེ་བཀུག་ནས། །གོང་བཞིན་དམིགས་པ་གསལ་བས་བསྟིམ། །བུམ་པ་དག་ལ་བརྟེན་ནས་ནི། །འཆི་མེད་ཚེ་སྒྲུབ་བཤད་པ་ནི། །རྣམ་རྒྱལ་ལས་བུམ་གཉིས་པོ་ལ། །རྫས་དང་ཁ་རྒྱན་མགུལ་འཆིངས་བཅས། །ཕྱག་མཚན་བྲིས་
ལ་གདགས་པར་བྱ། །མཎྜལ་སྟེང་དུ་ལེགས་པར་གཞག །ཕྱི་ནི་བུམ་པའི་རྣམ་པ་ལ། །ནང་དུ་གཞལ་ཡས་ཁང་དུ་བསྒོམ། །གསང་སྔགས་རྒྱལ་པོའི་བཟླས་པ་བྱ། །གོང་བཞིན་བདུད་རྩིས་བུམ་པ་གང་། །དེ་ཡིས་རང་གཞན་ཐམས་ཅད་ཀྱི། །ནད་གདོན་སྡིག་
སྒྲིབ་མ་ལུས་དག །འཆི་མེད་དངོས་གྲུབ་ཐོབ་པར་བསམ། །ལས་བུམ་རྟ་མགྲིན་གོང་བཞིན་བསྐྱེད། །ཐུགས་ཀའི་ས་བོན་སྔགས་ཀྱིས་བསྐོར། །ཨོཾ་བཛྲ་ཀྲོ་དྷ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུྃ་ཕཊ། དེ་ཡིས་རང་གཞན་བར་ཆད་བསྲུང་། །འཆི་མེད་བདུད་རྩིའི་ཁྲུས་བྱའོ། །དེ་
ལྟར་རང་དོན་གཞན་དོན་ལ། །མ་ཡེངས་བསྐྱེད་རིམ་གསལ་བ་ཡིས། །ཏིང་འཛིན་གཅིག་ཏུ་སྔགས་བཟླས་ན། །རྟགས་རྫོགས་ཟླ་དྲུག་ཞལ་མཐོང་འགྱུར། །དེ་ནས་རྒྱུན་དུ་ཉམས་སུ་ལེན། །ཁྭ་ཏའི་སྐད་ཀྱིས་མ་ནོན་པར། །བདག་ཉིད་གཞན་དང་ངག་མ་འདྲེས། །
མདུན་དུ་ཆུ་སྐྱེས་སྟོང་དང་ལྡན། །གཙོ་བོ་ཡབ་ཡུམ་གསལ་བར་བསྒོམ། །ཨོཾ་ཨཱ་ཡུ་ཥེ་ས་ར་ཧ་ཀ་ར་རི་ཤ་ར་རི་ཧཱུྃ། གསོལ་བ་བཏབ་ལ་མཆོད་བསྟོད་བྱ། །བུམ་པ་དག་ལ་དམིགས་ནས་ནི། །སྒྲུབ་བྱེད་སྔགས་ཀྱི་རྒྱལ་པོ་འདི། །ཨོཾ་ཨ་མ་ར་ཎི་ཛཱི་ཝནྟཱི་ཡེ་སྭཱ་ཧཱ། གསང་
སྔགས་ཉི་ཤུ་རྩ་གཅིག་བཟླས། །དེ་ཡིས་བདུད་རྩིའི་རྒྱུན་བྱུང་ནས། །རང་གི་སྤྱི་གཙུག་ཐིམ་པ་ཡིས། །ནད་གདོན་སྡིག་སྒྲིབ་ཐམས་ཅད་དག །བདུད་རྩིས་རང་ལུས་གང་བ་ཡིན། །འཆི་མེད་ཚེ་ཡི་དངོས་གྲུབ་ཐོབ། །ཚེ་དཔག་མེད་པར་གྱུར་པར་བསམ། །བརྟན་པའི་ཡན་
ལག་ལྔ་བཟླས་སོ། །མདུན་བསྐྱེད་བདག་ལ་བསྟིམ་པ་དང་། །དེ་ཡི་ཚེ་ཚད་ཉི་ཟླར་འགྱུར། །ཚེ་ཉམས་ལ་སོགས་སྨོས་ཅི་དགོས། །གསང་ནས་སྒྲུབ་པ་རབ་ཏུ་བསྔགས། །དེ་ནས་གསང་སྒྲུབ་བཤད་པར་བྱ། །དཀྱིལ་འཁོར་གོང་དང་འདྲ་བ་ལ། །ལྷ་ཚོགས་ཐམས་

49-1-218b

ཅད་ལི་ཁྲི་ལྟར། །སྣ་ཚོགས་རིན་ཆེན་རྒྱན་གྱིས་མཛེས། །བུམ་པ་ཐོད་པར་བཅས་པ་འཛིན། །རྡོ་རྗེ་སྐྱིལ་ཀྲུང་བཞུགས་པའོ། །བཅུ་དྲུག་ལོན་པ་སྐུ་ཤ་རྒྱས། །འཇམ་ཞིང་ནུ་མ་འབུར་བ་ལ། །པདྨ་རྡོ་རྗེ་རིན་ཆེན་དང་། །འཁོར་ལོ་སྣ་ཚོགས་རྡོ་རྗེ་སྟེ། །གཡས་པ་
རང་གི་ཕྱག་མཚན་འཛིན། །གཡོན་པ་ཐོད་པ་བདུད་རྩིས་གང་། །ཡབ་ལ་སྟོབས་ཤིང་གཉིས་སུ་འཁྲིལ། །ཐབས་དང་ཤེས་རབ་གཉིས་སུ་མེད། །ཡབ་ཡུམ་འོད་ཟེར་ཚོགས་འཁྲུགས་ཤིང་། །སྙོམས་འཇུག་ཟག་མེད་བདེ་བ་རྒྱས། །མཚམས་བཞིར་བདུད་
རྩིའི་བུམ་པ་བཞི། །ཕྱོགས་ཀྱི་ལྷ་ཡི་སྣམ་བུ་ལ། །ཤར་དུ་རྡོ་རྗེ་ཁྲོ་བོ་དང་། །ལྷོ་རུ་རིན་ཆེན་ཁྲོ་བོ་དང་། །ནུབ་ཏུ་པདྨའི་ཁྲོ་བོ་དང་། །བྱང་དུ་ཕྲིན་ལས་ཁྲོ་བོ་དང་། །སྟེང་འོག་རྣམ་སྣང་ཁྲོ་བོ་གཉིས། །ཕྱོགས་བཞིར་ཁྲོ་བོ་གཉིས་གཉིས་ནི། །རིགས་ཀྱི་ཡུམ་
དང་བཅས་པ་ལ། །གཡས་བསྐུམ་གཡོན་བརྐྱང་བཞེངས་པའོ། །ཐམས་ཅད་གཡས་པ་རང་རྟགས་འཛིན། །གཡོན་པ་ཚེ་ཡི་བུམ་པ་དང་། །སྦྲུལ་དང་རིན་ཆེན་སྣ་ཚོགས་བརྒྱན། །མེ་རི་འབར་བའི་ཀློང་ན་བཞུགས། །ལྷ་མོ་བཞི་དང་སྒོ་བ་བཞི། །བཞེངས་པ་ཁྲོ་བོའི་ཚུལ་དུ་གནས། །འབྲུ་
གསུམ་སྔགས་ཀྱིས་བྱིན་གྱིས་བརླབས། །ཡེ་ཤེས་སྤྱན་དྲང་གཉིས་མེད་བསྟིམ། །དབང་བསྐུར་རིགས་ཀྱིས་དབུ་བརྒྱན་པ། །གཙོ་བོ་ལྔ་དང་ཁྲོ་བོ་བཅུའི། །བུམ་པ་དག་ལ་དམིགས་ནས་ནི། །གསང་སྔགས་འདི་ནི་བཟླས་པར་བྱ། །ཨོཾ་ཧྲཱིཿཧཱུྃ། སྭཱ་བྷྲཱུཾ་ཨཱཿ
ཛཿཧཱུྃ་བཾ་ཧོཿཨ་པ་རི་མི་ཏ་ཨཱ་ཡུརྫྙཱ་ན་མ་ཧཱ་སིདྡྷི་ཧ་ས་ནི་རི་ཏི་སྭཱ་ཧཱ། དེ་ནས་རང་ཉིད་བཟླས་པ་བྱ། །བུམ་པ་ལེགས་པར་བཅས་པ་ལ། །ལྷ་རྣམས་གོང་བཞིན་བསྐྱེད་པ་དང་། །རང་དང་ལྷ་རྣམས་སྔགས་བཟླས་པས། །འཆི་མེད་བདུད་རྩིའི་བུམ་པ་གང་། །རྗེས་སུ་
ལྷ་རྣམས་ཞུ་བའི་ཆུས། །རང་གཞན་ཐམས་ཅད་ཁྲུས་བྱའོ། །དེ་ཡིས་མཆོག་དང་ཐུན་མོང་གི། །དངོས་གྲུབ་ཐམས་ཅད་ཐོབ་པར་འགྱུར། །བདུད་རྩི་ལྔ་ཡི་གཏོར་མ་འདི། །སྙིང་པོ་སྔགས་ཀྱིས་འབུལ་བར་བྱ། །ལས་བཞིའི་སྦྱིན་སྲེག་བྱ་བ་དང་། །ལོངས་སྤྱོད་

49-1-219a

སྤེལ་ལ་ཐོད་པ་མཆོད། །དེ་ནས་དེ་ཁོ་ན་ཉིད་སྒྲུབ། །རང་ཉིད་མགོན་པོར་གསལ་བ་ཡི། །གསང་གནས་ཆོས་འབྱུང་གྲུ་གསུམ་དུ། །ཧྲཱིཿདང་པཾ་ལས་མེ་འབར་བས། །ལུས་ཀྱི་ནད་རྣམས་ཐམས་ཅད་ཁེངས། །སྤྱི་བོའི་ཧཾ་བརྒྱད་ཞུ་བ་ལས། །བདེ་ཆེན་བདུད་རྩིའི་ཆུ་རྒྱུན་འབབ། །རྩ་གསུམ་གང་བས་བདེ་བ་རྒྱས། །དྲོད་
དང་བདེ་བའི་ཁྱད་པར་རྣམས། །སྟེང་འོག་རླུང་གིས་མནན་ཞེས་བྱ། །རྟ་བདུན་རི་བོ་རྒྱས་འདྲ་ནས། །མཐར་ཐུག་ལྷུན་གྲུབ་རྣམ་གསུམ་ཐོབ། །བཅུ་གསུམ་ས་རྣམས་རྫོགས་པར་འགྱུར། །ཚེ་དཔག་མེད་པའི་སྒྲུབ་པའི་ཐབས། །རྩ་རྒྱུད་ལེའུ་འབུམ་པ་དང་། །བཤད་རྒྱུད་འོད་ཟེར་དྲ་བ་ལ། །བརྟེན་ནས་གྲུབ་
པའི་རྒྱལ་མོས་མཛད། །འཆི་མེད་ཚེ་སྒྲུབ་འདི་བརྩམས་པས། །བདག་དང་རིགས་དྲུག་སེམས་ཅན་རྣམས། །འཆི་མེད་དངོས་གྲུབ་ཐོབ་གྱུར་ནས། །ཚེ་དཔག་མེད་པ་ཐོབ་པར་ཤོག།།      །།རྒྱ་གར་གྱི་པཎྜི་ཏ་ཟླ་བ་བཟང་པོ་དང་། བོད་ཀྱི་ལོ་ཙཱ་བ་གླན་དར་མ་ཚུལ་ཁྲིམས་ཀྱིས་བསྒྱུར་བའོ།།      །།
༄༅༅། །རྒྱ་གར་སྐད་དུ། ཨ་པ་རི་མི་ཏ་ཨཱ་ཡུ་ཧོ་མ་བི་དྷི་ནཱ་མ། བོད་སྐད་དུ། ཚེ་དཔག་ཏུ་མེད་པའི་སྦྱིན་སྲེག་གི་ཆོ་ག་ཞེས་བྱ་བ། མགོན་པོ་ཚེ་དཔག་ཏུ་མེད་པ་ལ་ཕྱག་འཚལ་ལོ། །སྦྱིན་སྲེག་མ་བྱས་འབྲས་མི་འབྱིན། །སྦྱིན་སྲེག་གིས་ནི་ལས་རྣམས་འགྲུབ། །ལས་ཀྱི་མཆོག་རབ་སྦྱིན་སྲེག་གོ། །ཞི་བ་དང་ནི་རྒྱས་པ་དང་། །
དབང་དང་དྲག་པོ་མངོན་སྤྱོད་དོ། །ཞི་བ་ཐབ་ཁུང་ཟླུམ་པོ་ཉིད། །རྒྱས་པ་གྲུ་བཞི་ཟླ་གམ་དབང་། །མངོན་སྤྱོད་ཟུར་གསུམ་ཉིད་དུ་བྱ། །ཁྲུ་གང་ཁྲུ་དོ་ཁྲུ་གང་བ། །སོར་མོ་ཉི་ཤུ་ཁ་དོག་ནག །དཀར་སེར་དམར་བ་ཉིད་དུ་བྱ། །མཆོད་རྫས་ཡམ་ཤིང་དཱུར་བ་སོགས། །སྲེག་རྫས་གཡས་གཡོན་རིམ་པ་བཞིན། །ཤར་དུ་ཞི་བ་བྱང་དུ་རྒྱས། །
དབང་ལ་ནུབ་དང་དྲག་པོ་ལྷོ། །རཾ་ལས་མེ་ལྷ་ཁ་དོག་དམར། །དབྱུ་གུ་རིལ་བ་སྤྱི་བླུགས་དང་། །བགྲང་ཕྲེང་གཡོན་དང་གཡས་སུ་བསམ། །རལ་པ་ཅོད་པན་གསུས་ཁྱིམ་ཆེ། །ཚངས་སྐུད་འཆང་ལ་ཡེ་ཤེས་བསྟིམ། །རིགས་བདག་རྣམས་ཀྱིས་དབུ་བརྒྱན་ནས། །མཆོད་ཡོན་ཞབས་བསིལ་ལ་སོགས་དབུལ། །དགང་
བླུགས་དབུལ་ལ་མཚན་མ་བརྟགས། །ཁ་དོག་སྒྲ་དང་དབྱིབས་དང་དྲི། །ཟླ་བ་རྒྱས་པ་དུ་བ་མེད། །ནད་མེད་སྡིག་པ་མ་ལུས་ཟད། །དུང་དང་རྫ་རྔ་པི་ཝང་དང་། །བདེ་བ་མ་ལུས་འཕེལ་བར་བྱེད། །ཙནྡན་ག་པུར་ཨ་ག་རུ། །དགེ་ཞིང་ཚེ་རིང་དཔལ་གྱི་གནས། །བཀྲ་ཤིས་རྫས་བརྒྱད་རྒྱལ་མཚན་གདུགས། །

49-1-219b

སྒྲུབ་པ་པོ་རྣམས་དགེ་བའི་རྟགས། །ངན་པ་དེ་ལས་བཟློག་པའོ། །རྟ་མགྲིན་རྒྱལ་པོས་བསྲུང་བ་བྱ། །དེ་ནས་སྲེག་རྫས་རིམ་གྱིས་དབུལ། །མར་དང་ཡམ་ཤིང་ཏིལ་དང་ཞོ། །འབྲས་སོ་ནས་དང་སྲན་མ་དང་། །གྲོ་དང་དཱུར་བ་ཀུ་ཤ་རྣམས། །ཨོཾ་ཨགྣ་ཡེ་སྭཱ་ཧཱ། ཨོཾ་བོ་དྷི་བྲྀཀྵཱ་ཡ་སྭཱ་ཧཱ། ཨོཾ་སརྦ་པཱ་
པཾ་ད་ཧ་ན་བཛྲཱ་ཡེ་སྭཱ་ཧཱ། ཨོཾ་སརྦ་སཾ་པ་དེ་སྭཱ་ཧཱ། ཨོཾ་བཛྲ་པུཥྚ་ཡེ་སྭཱ་ཧཱ། ཨོཾ་བཛྲ་བི་ཛ་ཡེ་སྭཱ་ཧཱ། ཨོཾ་མ་ཧཱ་བེ་ག་ཡེ་སྭཱ་ཧཱ། ཨོཾ་མ་ཧཱ་བ་ལ་ཡེ་སྭཱ་ཧཱ། ཨོཾ་བཛྲ་གྷསྨ་རི་ཡེ་སྭཱ་ཧཱ། ཨོཾ་བཛྲ་ཨཱ་ཡུ་ཥེ་ཡེ་སྭཱ་ཧཱ། ཨོཾ་ཨ་པྲ་ཏི་ཧ་ཏ་བཛྲ་ཡེ་སྭཱ་ཧཱ། མེ་ལྷ་བསྟོད་ཅིང་གསོལ་བ་གདབ། །དེ་ནས་མེ་ལྷའི་ཐུགས་
ཀ་རུ། །དཀྱིལ་འཁོར་བསྐྱེད་ཅིང་ཡེ་ཤེས་བསྟིམ། །མཆོད་ཡོན་ཞབས་བསིལ་ལ་སོགས་དབུལ། །ཁུ་བ་ལ་སོགས་ཞལ་དུ་མཆོད། །ཡམ་ཤིང་ཀུ་ཤ་འོད་ལ་དབུལ། །ཞོ་ཟན་འཐོར་འཐུང་ཕྱག་ཏུ་དབུལ། །ཁྱད་པར་དཱུར་བ་བརྒྱ་རྩ་ནི། །ཚེ་འཕེལ་ཆེད་དུ་དབུལ་བར་
བྱ། །ཨཱ་ཡུ་པུཥྚིཾ་ཀུ་རུ་ཨོཾ། །འོ་མ་སྦྲང་རྩི་ཀ་ར་དང་། །བདུད་རྩི་ལྔ་དང་སྦྱར་བའི་རྫས། །སློབ་དཔོན་གཡོན་གྱི་མཐེའུ་ཆུང་གིས། །སློབ་མའི་གཡས་ཀྱི་མཐེའུ་ཆུང་གཟུང་། །ལན་གསུམ་བསྐོར་བས་ལྷ་ལ་དབུལ། །དངོས་གྲུབ་རྫས་ཀྱི་ལྷག་མ་དེ། །སློབ་མ་རྣམས་
ལ་སྦྱིན་པར་བྱ། །ཨོཾ་བཛྲ་ཨཱ་ཡུ་ཥེ་ཨ་མྲྀ་ཏ་སིདྡྷི་ཧཱུཾ། ཞི་བ་སྭཱ་ཧཱ་དང་སྦྱར་བ། །རྒྱས་པ་ཨོཾ་ལ་དབང་ལ་ཧོ། །དྲག་པོ་མ་རཱ་ཡ་ཕཊ་སྦྱར། །དཀྱིལ་འཁོར་ལྷ་ལ་མཆོད་ཅིང་བསྟོད། །ཡེ་ཤེས་གཤེགས་སུ་གསོལ་བ་དང་། །དམ་ཚིག་བདག་ལ་བསྡུ་བར་བྱ། །
དཀྱིལ་འཁོར་ལྷ་ནི་མཆོད་སྟེར་རོ། །མེ་ཡིས་འདོད་པའི་དོན་གྲུབ་བྱེད། །ཡམ་ཤིང་གཟི་བརྗིད་སྟེར་བར་བྱེད། །མར་གྱིས་འབྱོར་པ་འཕེལ་བ་ཡིན། །ཏིལ་གྱིས་སྡིག་པ་འདག་པ་དང་། །ཞོ་ཟན་གྱིས་ནི་རིག་པ་འཕེལ། །ནས་ཀྱིས་བརྩོན་འགྲུས་འཕེལ་བར་འགྱུར། །འབྲས་
ཀྱིས་ནུས་པ་འཕེལ་བྱེད་པ། །སོ་བས་འབྲུ་འཕེལ་ལས་ཡིན་ནོ། །གྲོ་དང་སྲན་མས་ནད་ཀུན་སེལ། །དཱུར་བས་ཚེ་རིང་ནད་མེད་དོ། །ཀུ་ཤས་བར་ཆད་སྲུང་བར་བྱེད། །འོ་མ་སྦྲང་རྩིས་དངོས་གྲུབ་སྟེར། །དཔལ་འཕེལ་བ་ནི་བུད་ཤིང་ངོ་། །སྦྱིན་བདག་བཀྲ་ཤིས་ཐབས་

49-1-220a

ཡིན་ནོ། །ཚོགས་གཉིས་རྫོགས་པ་མཆོད་པའི་རྫས། །ཐབས་དང་ཤེས་རབ་གཟར་བུ་སྟེ། །བདུད་རྩི་མར་གྱིས་ཚིམ་བྱེད་པ། །མཆོད་པ་གཞན་གྱིས་ཅི་ཞིག་བྱ། །ཐོག་མར་དབེན་པའི་གནས་ཉིད་དུ། །ཐབས་དང་མཆོད་རྫས་བཤམས་པ་ནི། །ཞི་བ་ཙནྡན་དཀར་པོའོ། །རྒྱས་པ་འབྲས་བུ་
ཅན་གྱི་ཤིང་། །དབང་ལ་ཙནྡན་དམར་པོ་དང་། །དྲག་པོ་ཚེར་མ་ཅན་ལ་བྱ། །རྒྱ་ཕྱིད་དཔངས་དང་ལྡན་པ་དང་། །སྣ་ཚོགས་པདྨ་འདབ་བརྒྱད་ལ། །སློབ་དཔོན་བདག་ཉིད་འདུག་པ་དང་། །གཡས་གཡོན་པདྨ་འདབ་བརྒྱད་ལ། །གཡས་སུ་སྲེག་རྫས་རིམ་གྱིས་གཞག །གཡོན་དུ་བུམ་པ་མཆོད་རྫས་བཤམ། །ལྷ་ཡི་
རྣལ་འབྱོར་བསྐྱེད་པ་དང་། །སྔགས་ཀྱི་བཟླས་པས་རབ་ཏུ་ཚིམ། །བུམ་པར་རྟ་མཆོག་བསྐྱེད་པར་བྱ། །སྔགས་བཟླས་བར་ཆད་བསྲུང་བར་བྱ། །དེ་བས་བྲམ་ཟེ་རྒྱུན་བཞག་མེ། བསླངས་ལ་སྦར་བར་བྱ་བ་དང་། །དང་པོ་འཇིག་རྟེན་མེ་ལྷ་མཆོད། །གཉིས་པ་དཀྱིལ་འཁོར་དགྱེས་པར་ཚིམ། །
གསུམ་པ་མེ་ལྷ་གཏང་རག་དབུལ། །དེ་ནས་ཡེ་ཤེས་གཤེགས་དང་དམ་ཚིག་བསྡུ། །མེ་མནལ་ཐལ་བ་ཆུ་བོར་དོར། །སྦྱིན་སྲེག་ལས་ཀྱི་འབྲས་འབྱིན་འདི། །མཁའ་འགྲོ་གྲུབ་པའི་རྒྱལ་མོས་བརྩམས། །དགེ་བ་འདི་ཡིས་འགྲོ་བ་ཀུན། །ཚེ་དཔག་མེད་པ་རེད་འགྱུར་ཤོག།།      །།རྒྱ་གར་གྱི་མཁན་པོ་ཝ་
ལ་ཙནྡྲ་བླ་མ་དང་། ལོ་ཙཱ་བ་གླན་དར་མ་ཚུལ་ཁྲིམས་ཀྱིས་བསྒྱུར་བའོ།།      །།༄༅༅། །རྒྱ་གར་སྐད་དུ། ཨ་པ་རི་མི་ཏ་ཡཱ་ཡུརྫྙཱ་ན་སཱ་དྷ་ན་ནཱ་མ། བོད་སྐད་དུ། ཚེ་དང་ཡེ་ཤེས་དཔག་ཏུ་མེད་པའི་སྒྲུབ་ཐབས། མགོན་པོ་ཚེ་དང་ཡེ་ཤེས་དཔག་ཏུ་མེད་པ་ལ་ཕྱག་འཚལ་ལོ། །དད་བརྩོན་འགྲོ་རྣམས་
བསྒྲལ་འདོད་པ། །བསོད་ནམས་ཚོགས་ནི་སྔོན་སོང་བས། །ཚངས་པའི་གནས་བཞི་བསྒོམ་པར་བྱའོ། །རང་གི་སྙིང་གའི་ཧྲཱིཿདམར་ལས། །ཡེ་ཤེས་མེ་འབར་རྣམ་སྨིན་བསྲེགས། །དེ་རྗེས་རང་སེམས་ཐིག་ལེ་དང་། །ཧྲཱིཿདམར་ཚེག་དྲག་གྱུར་པ་ལས། །རྟ་མཆོག་སྤྱན་གསུམ་ཞལ་བགྲད་པ། །
དབྱུག་པ་སྡིགས་མཛུབ་འབར་འཇིགས་བསྒོམ། །དེ་ཡི་ཐུགས་ཀར་པད་ཟླའི་སྟེང་། །ཧྲཱིཿལས་བཅོམ་ལྡན་ཚེ་དཔག་མེད། །མདོག་དམར་རྒྱན་མཛེས་བུམ་པ་བསྣམས། །ཐུགས་ཀར་པད་ཟླའི་སྟེང་དུ་ཧྲཱིཿ། །དེ་ལས་བྷྲཱུཾ་ཆད་འཁོར་ལོ་ནི། །རྩིབས་བརྒྱད་ཡོངས་སུ་གྱུར་པ་ལས། །

49-1-220b

གཞལ་ཡས་གྲུ་བཞི་སྒོ་བཞི་པ། །འདབ་བརྒྱད་ཁྱམས་དང་པད་ར་དང་། །འདོད་ཡོན་ཕ་གུ་དྲ་ཕྱེད་དང་། །རྟ་བབས་མཆོད་རྟེན་ཡོངས་མཛེས་པ། །རྡོ་རྗེ་མེ་རི་དམར་སྨུག་འཁྲུག །དངས་ཤིང་ཐོགས་པ་མེད་པ་ཡི། །འོད་ཟེར་ཚོགས་འཁྲུག་བསྒོམ་
པར་བྱ། །དེ་ཡང་ཧྲཱིཿལས་ཕོ་བྲང་གི། །དབུས་སུ་སཾ་ཅིག་ཆད་པ་ལས། །མི་འཇིགས་བརྒྱད་དུ་གྱུར་པར་བསྒོམ། །དེ་སྟེང་པཾ་ཨ་རཾ་ཆད་པས། །པད་ཟླ་རྟ་བདུན་དག་ཏུ་འགྱུར། །དེ་ཡི་སྟེང་དུ་ཧྲཱིཿལས་ནི། །འོད་འཕྲོས་དོན་བྱས་ཚུར་འདུས་པས། །པདྨ་དམར་པོ་འདབ་ལྔར་གྱུར། །དེ་ལས་བཅོམ་
ལྡན་ཚེ་དཔག་མེད། །མདོག་དམར་གཞོན་སྒེག་རྒྱན་གྱིས་མཛེས། །འགྲོ་རྣམས་རེ་སྐོང་དཔག་བསམ་ཤིང་། །བུམ་པའི་ཁ་རྒྱན་ཐུགས་ཀར་འཛིན། །འགྱིང་བཅས་འོད་འཁྲུག་སྐྱིལ་ཀྲུང་བཞུགས། དེ་ཡི་གཡོན་དུ་པཾ་དང་ཨ། །གྱུར་པས་ཟླ་བའི་གདན་སྟེངས་སུ། །ཨ་ལས་ཡུམ་མཆོག་གོས་དཀར་མོ། །
མཚལ་མདོག་འགྱིང་བཅས་འཛུམ་ཞིང་སྒེག །ཐུགས་ཀར་པདྨ་རཱ་ག་ཡི། །བུམ་པ་ཡོངས་སུ་འཛིན་པའོ། །ཤར་དུ་པད་ཟླ་ཉི་མ་ཡི། །སྟེང་དུ་ཧཱུྃ་ལས་རྡོ་རྗེར་གྱུར། །དེ་ལས་མི་བསྐྱོད་ཚེ་དཔག་མེད། །བཻ་ཌཱུར་སྔོན་པོའི་མདོག་འདྲ་བ། །སྐྱིལ་ཀྲུང་དང་བཅས་བུམ་པ་འཛིན། །དེ་ཡི་གཡོན་དུ་པད་ཟླའི་སྟེང་། །
ས་ལས་ཡུམ་མཆོག་སངས་རྒྱས་སྤྱན། །མདོག་དཀར་ཕྱག་གཉིས་བུམ་པ་བསྣམས། །གཞོན་སྒེག་སྐྱིལ་ཀྲུང་བཞུགས་པའོ། །ལྷོ་རུ་པདྨ་ཉི་ཟླའི་སྟེངས། །སྭ་ལས་རིན་འབྱུང་ཚེ་དཔག་མེད། །བཙོ་མ་གསེར་མདོག་སྐྱིལ་ཀྲུང་བཞུགས། །བུམ་འཛིན་རིན་ཆེན་རྒྱན་གྱིས་སྤྲས། །གཡོན་དུ་པད་ཟླ་ཏྲཱཾ་ཉིད་
ལས། །བྱུང་བའི་ཡུམ་མཆོག་མཱ་མ་ཀཱི། །ནམ་མཁའི་མདོག་ཅན་འཛུམ་སྒེག་མཛེས། །བུམ་པ་བསྣམས་ཤིང་སྐྱིལ་ཀྲུང་བཞུགས། །ནུབ་ཏུ་པད་ཟླ་ཉི་མ་ཡི། །སྟེང་དུ་བྷྲཱུཾ་ལས་འཁོར་ལོར་གྱུར། །དེ་ལས་སྣང་མཛད་ཚེ་དཔག་མེད། །དཀར་ཞིང་སྐྱིལ་ཀྲུང་བཞུགས་པའོ། །གཡོན་དུ་པད་ཟླ་
མཾ་ལས་ནི། །དབྱིངས་ཕྱུག་མ་ནི་དུང་གི་མདོག །འགྱིང་བཅས་རིན་ཆེན་རྒྱན་གྱིས་སྤྲས། །ཞབས་གཉིས་རྡོ་རྗེ་སྐྱིལ་ཀྲུང་ངོ་། །བྱང་དུ་པད་ཟླ་རཾ་ཉི་ཡི། །སྟེང་དུ་ཨ་ལས་རྒྱ་གྲམ་པ། །དེ་ལས་དོན་གྲུབ་ཚེ་དཔག་མེད། །མདོག་ལྗང་བུམ་པ་སྐྱིལ་ཀྲུང་མཛེས། །གཡོན་དུ་པདྨ་ཟླ་བའི་སྟེང་། །ཏཱཾ་ལས་

49-1-221a

དམ་ཚིག་སྒྲོན་མ་ནི། །སྔོ་ལྗང་སྣ་ཚོགས་རྒྱན་གྱིས་མཛེས། །ཐུགས་ཀར་བུམ་པ་འཛིན་པའོ། །ཤར་ཁྱམས་ཟླ་བའི་གདན་སྟེངས་སུ། །ཧཱུྃ་བཞི་རྡོ་རྗེ་བཞིར་གྱུར་པས། །རྡོ་རྗེ་རིགས་ཀྱི་སེམས་དཔའ་བཞི། །གཡས་པ་རང་རྟགས་རྡོ་རྗེ་འཛིན། །གཡོན་པ་ཚེ་ཡི་བུམ་པ་
འཛིན། །རྒྱན་མཛེས་རྡོ་རྗེ་སྐྱིལ་ཀྲུང་བཞུགས། །ལྷོ་ཕྱོགས་པདྨ་ཟླ་བའི་སྟེང་། །སྭཱ་ལས་རིན་ཆེན་འབར་བ་བཞི། །རིན་ཆེན་རིགས་ཀྱི་སེམས་དཔར་གྱུར། །གཡས་པ་རིན་ཆེན་གཡོན་པ་ནི། །ཚེ་ཡི་བུམ་པ་ཐུགས་ཀར་འཛིན། །བཙོ་མ་གསེར་འདྲ་སྐྱིལ་ཀྲུང་བཞུགས། །ནུབ་ཏུ་པད་ཟླ་ཧྲཱིཿབཞི་
ལས། །པདྨ་འདབ་ལྔར་གྱུར་པ་ལས། །པདྨའི་སེམས་དཔའ་བཞི་རུ་གྱུར། །ཕྱག་གཡས་རང་རྟགས་པདྨ་བསྣམས། །གཡོན་པ་བུམ་འཛིན་རྒྱན་སྤྲས་ཤིང་། །རྡོ་རྗེ་སྐྱིལ་ཀྲུང་གིས་བཞུགས་པའོ། །བྱང་དུ་གདན་སྟེངས་ཨ་བཞི་ལས། །རྡོ་རྗེ་རྒྱ་གྲམ་ལས་བྱུང་བའི། །ལས་ཀྱི་སེམས་དཔའ་
བཞི་རུ་གྱུར། །སྔོ་ལྗང་རྒྱ་གྲམ་བུམ་པ་བསྣམས། །གཞོན་སྒེག་མཛེས་ཤིང་སྐྱིལ་ཀྲུང་བཞུགས། །འོད་ཟེར་ཚོགས་ཀྱིས་བསྐོར་བའོ། །ཤར་སྒོར་ཛཿདང་ལྕགས་ཀྱུ་ལས། །ལྕགས་ཀྱུ་མ་ནི་མུ་ཏིག་མདོག །ལྷོ་སྒོར་ཧཱུྃ་ལས་ཞགས་པ་སེར། །ནུབ་ཏུ་བཾ་ལས་ལྕགས་སྒྲོག་དམར། །བྱང་དུ་ཧོཿལས་
དྲིལ་བུ་ལྗང་། །ལྷ་མོ་དེ་དག་ཐམས་ཅད་ཀྱང་། །འཁྲིལ་ལྡེམ་གཞོན་སྒེག་རྒྱན་སྤྲས་མཛེས། །ཞལ་ནི་ཕྱིར་གཟིགས་བཞེངས་པའོ། །སྒོ་བཞིར་རྒྱལ་ཆེན་བཞི་ཡང་བསམ། །ཡང་ན་ཕྱི་རོལ་དག་ཏུའོ། །གྲུ་ཆད་བཞི་ལ་མཆོད་པ་ཡི། །ལྷ་མོ་སྤྱི་དང་མཐུན་པར་བསམ། །དེ་ནས་ཐུགས་ཀའི་
འོད་ཟེར་གྱིས། །རང་བཞིན་གནས་ནས་ཡེ་ཤེས་པ། །འདི་བརྗོད་སྤྱན་ནི་དྲང་བར་བྱ། །གདོད་ནས་རང་བཞིན་མཁའ་ལྟར་དག །ཐུགས་རྗེས་འཇའ་ཚོན་སྐུར་སྟོན་པའི། །བཅོམ་ལྡན་གསུང་མཆོག་ཚེ་དཔག་མེད། །རང་བཞིན་ལྷུན་གྲུབ་གཞལ་ཡས་ནས། །ཏིང་འཛིན་གཟུགས་བརྙན་དམ་པ་
འདིར། །འགྲོ་བའི་དོན་ཕྱིར་སྤྱན་འདྲེན་ན། །ཚེ་ཟད་ཚེ་ཉམས་བསལ་མཛད་ཕྱིར། །གནས་འདི་ཉིད་དུ་གཤེགས་སུ་གསོལ། །རྡོ་རྗེ་རིན་ཆེན་པདྨ་དང་། །ལས་ཀྱི་རིགས་མཆོག་ཚེ་དཔག་མེད། །རིགས་ཀྱི་ཡུམ་མཆོག་ལྔ་དང་ནི། །མཆོད་པའི་ལྷ་མོ་རྣམ་བཞི་དང་། །སེམས་དཔའ་བཅུ་

49-1-221b

དྲུག་སྒོ་མར་བཅས། །རང་བཞིན་བདེ་ཆེན་དཀྱིལ་འཁོར་ནས། །ཏིང་འཛིན་གཟུགས་བརྙན་དམ་པ་འདིར། །ཚེ་དང་ལོངས་སྤྱོད་རྒྱས་པ་དང་། །ཐུགས་མཆོག་ཡེ་ཤེས་ཐོབ་བྱའི་ཕྱིར། །གནས་འདི་ཉིད་དུ་སྤྱན་འདྲེན་གྱི། །བྱིན་གྱིས་བརླབ་ཕྱིར་གཤེགས་སུ་གསོལ། །ཛཿཧཱུྃ་བཾ་ཧོཿས་དགུག་གཞུག་
བཅིང་། །མཉེས་པར་གྱུར་ལ་མཆོད་པ་དང་། །བསྟོད་པ་རྒྱས་དང་བསྡུས་པ་བྱ། །སྐུ་གསུང་ཐུགས་ནི་བྱིན་གྱིས་བརླབ། །དེ་ནས་བྱིང་རྒོད་རབ་སྤངས་ནས། །མ་ཡེངས་ལྷ་རྣམས་གསལ་བར་བསྒོམ། །དེ་རྗེས་བཟླས་པ་བྱ་བ་ནི། །ལྷ་རྣམས་ཐུགས་ཀའི་བུམ་པའི་ནང་། །ཧྲཱིཿཧཱུྃ་སྭཱ་བྷྲཱུཾ་ཨཱཿལ་
ནི། །རང་རང་སྔགས་ཀྱིས་བསྐོར་བར་བསྒོམ། །ཨོཾ་ཧྲཱིཿབྷྲཱུ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། ཨོཾ་ཧཱུྃ་བྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། ཨོཾ་སྭཱ་བྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། ཨོཾ་བྷྲཱུཾ་བྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། ཨོཾ་ཨཱཿབྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། དེ་རྣམས་ཡབ་ཀྱི་སྙིང་པོའོ། །ཡུམ་གྱི་བུམ་པར་ཨ་པ་རི་མི་ཏ་
བསམས་ལ་སྔགས་འདིས་བསྐོར། ཨོཾ་བྷྲཱུཾ་ཨ་པ་རི་མི་ཏ་ཨཱ་ཡུརྫྙཱ་ན་སུ་བི་ནི་ཤྩི་ཏ་ཏེ་ཛོ་རཱ་ཛཱ་ཡ་སྭཱ་ཧཱ། ཡུམ་མཆོག་ལྔ་ཡི་སྙིང་པོར་བརྗོད། །ཕྱོགས་བཞིའི་སེམས་དཔའ་བཅུ་དྲུག་པོ། །གཙོ་བོའི་སྔགས་རྣམས་བསྐོར་བར་བསམས། །ཛཿཧཱུྃ་བཾ་ཧོཿཨ་པ་རི་མི་ཏ་ཨཱ་ཡུརྫྙཱ་ན་སུ་བི་ནིཿསྭཱ་ཧཱ། སྒོ་མ་བཞི་ཡི་
སྙིང་པོའོ། །དེ་ལྟར་བུམ་པའི་སྔགས་རྣམས་ལ། །དམིགས་ནས་བཟླས་པ་བྱས་པ་ཡིས། །ཡིག་འབྲུ་རྣམས་ལས་བདུད་རྩིའི་རྒྱུན། །བྱུང་བས་བུམ་པ་ཁེངས་པར་བསམ། །བུམ་ནང་ཡེ་ཤེས་བདུད་རྩིའི་རྒྱུན། །རང་གི་གནས་གསུམ་ཐིམ་པ་ཡིས། །ལུས་ངག་ཡིད་གསུམ་ནད་གདོན་དང་། །
སྡིག་སྒྲིབ་དག་ནས་དབང་བཞི་ཐོབ། །འཆི་མེད་དངོས་གྲུབ་ཐོབ་པར་བསམ། །དེ་ནས་རང་གི་སྔགས་བཟླས་པས། །དཀྱིལ་འཁོར་ལྷ་ཚོགས་ཐམས་ཅད་ཀྱང་། །རང་རང་གསང་སྔགས་ཟློས་པར་བསམ། །རང་སྙིང་ས་བོན་ཤར་སྒོ་ནས། །ལྷ་མོ་དཀར་མོ་ལྕགས་ཀྱུ་ཐོགས། །དཔག་མེད་ཤར་
དུ་སྤྲོས་པ་ཡིས། །ནད་གདོན་ཞི་བའི་ལས་བྱས་ནས། །དྲི་ཟའི་ལག་ནས་ཚེ་བཀུག་ལ། །རང་དང་བུམ་པར་བསྟིམ་པར་བྱ། །དེ་བཞིན་ལྷོ་ཡི་ཞགས་པ་བསམ། །ཚེ་དང་ལོངས་སྤྱོད་རྒྱས་བྱས་ནས། །གཤིན་རྗེའི་ལག་ནས་ཚེ་བཀུག་སྟེ། །གོང་བཞིན་དུ་ནི་བསྟིམ་པར་བྱའོ། །ནུབ་ཀྱི་ལྕགས་

49-1-222a

སྒྲོག་དམར་མོ་ཡིས། །སྲིད་གསུམ་མ་ལུས་དབང་བསྡུས་ཏེ། །ཆུ་ལྷའི་ལག་ནས་ཚེ་བཀུག་ལ། །བསྟིམ་ཞིང་ཀླུ་གདོན་དག་པར་བསམ། །བྱང་གི་དྲིལ་བུ་དགྱེས་མཛད་མས། །ནད་གདོན་ལོག་འདྲེན་ཚར་བཅད་ནས། །གནོད་སྦྱིན་ལག་ནས་ཚེ་བཀུག་ལ། །གོང་བཞིན་དམིགས་པ་གསལ་
བས་བསྟིམ། །ཤར་ཕྱོགས་རྣམ་རྒྱལ་བུམ་པ་ནི། །རྫས་དང་མགུལ་ཆིངས་ཁ་རྒྱན་བཅས། །ཕྱག་མཚན་བྲིས་ནས་གཞུག་པར་བྱ། །ཕྱི་ནི་བུམ་པའི་རྣམ་པ་ལ། །ནང་ནི་གཞལ་ཡས་ཁང་དུ་བསམ། །གོང་བཞིན་བདུད་རྩིས་བུམ་པ་དགང་། །དེ་ཡིས་རང་གཞན་ཐམས་ཅད་ཀྱི། །ནད་གདོན་སྡིག་སྒྲིབ་སངས་དག་
ནས། །འཆི་མེད་དངོས་གྲུབ་ཐོབ་པར་བསམ། །ལས་བུམ་རྟ་མགྲིན་བསྐྱེད་པ་ཡང་། །བགེགས་ཀྱི་སྟེང་དུ་གཞག་པར་བྱ། །དེ་ཡིས་རང་གཞན་བར་ཆད་བསྲུང་། །བདུད་རྩི་དཀར་དམར་ཁྲུས་བྱའོ། །དེ་ལྟར་རང་དོན་གཞན་དོན་ལ། །མ་ཡེངས་བསྐྱེད་རིམ་གསལ་པོ་ཡིས། །ཟླ་བ་གཅིག་ཏུ་སྔགས་བཟླས་ནས། །
རྟགས་རྫོགས་ཟླ་དྲུག་ཞལ་མཐོང་འགྱུར། །དེ་ཡང་རྒྱུན་དུ་ཉམས་ལེན་ན། །ཁྭ་དའི་སྐད་ཀྱིས་མ་ནོན་པར། །མདུན་དུ་གཙོ་བོ་ཡབ་ཡུམ་བསམ། །གསོལ་བ་བཏབ་ལ་མཆོད་བསྟོད་བྱ། །བུམ་པ་དག་ལ་དམིགས་ནས་ནི། །ཨོཾ་ཨཱ་ཡུ་དྷེ་ས་ར་ཧ་ཀ་ར་རེ་ཤ་ར་རེ་ཧཱུཾ། གསང་སྔགས་ཉི་ཤུ་རྩ་གཅིག་བཟླས། །དེ་ཡིས་བདུད་
རྩིའི་རྒྱུན་བྱུང་ནས། །རང་གི་སྤྱི་གཙུག་ཐིམ་པ་ཡིས། །ནད་གདོན་སྡིག་སྒྲིབ་སངས་དག་ནས། །བདུད་རྩིས་རང་ལུས་ཁེངས་པ་ཡིས། །འཆི་མེད་ཚེ་ཡི་དངོས་གྲུབ་ཐོབ། །ཚེ་དཔག་མེད་པར་གྱུར་པར་བསམ། །བརྟན་པའི་ཡན་ལག་སྔགས་བཟླས་སོ། །ཨོཾ་ཨཱ་ཡུ་ཨ་མ་ར་ཎ་ཛྲི་བནྟི་ཡེ་སྭཱ་ཧཱ། དེ་ཡི་ཚེ་ཚད་ཉི་ཟླར་
འགྱུར། །ཚེ་ཉམས་ལ་སོགས་སྨོས་ཅི་དགོས། །གསང་ནས་སྒྲུབ་པ་རབ་ཏུ་བསྔགས། །དེ་ནས་གསང་སྒྲུབ་བཤད་པར་བྱ། །དཀྱིལ་འཁོར་གོང་དང་འདྲ་བ་ལས། །ཡབ་ལྔ་སྐུ་མདོག་འཚེར་ཞིང་དམར། །སྣ་ཚོགས་རིན་ཆེན་རྒྱན་གྱིས་སྤྲས། །བུམ་པ་ཐོད་པར་བཅས་པ་འཛིན། །རྡོ་རྗེ་སྐྱིལ་ཀྲུང་བཞུགས་
པའོ། །ཡུམ་ལྔ་སྐུ་མདོག་འདྲ་བ་དང་། །གཞོན་སྒེག་རྒྱན་མཛེས་སྐུ་ཤ་རྒྱས། །འཛུམ་ཞིང་ནུ་མ་འབུར་བ་ཡིས། །གཡས་པ་པདྨ་རྡོ་རྗེ་དང་། །རིན་ཆེན་འཁོར་ལོ་རྒྱ་གྲམ་སྟེ། །གཡས་པ་རང་རྟགས་ཕྱག་མཚན་འཛིན། །གཡོན་པ་ཐོད་པ་བདུད་རྩིས་བཀང་། །ཡབ་ལ་སྟོབས་ཤིང་སྐྱིལ་ཀྲུང་འཁྲིལ། །

49-1-222b

ཡབ་ཀྱི་འོད་ཟེར་དམར་བའི་མདངས། །ཡབ་ཡུམ་འོད་ཟེར་ཚོགས་འཁྲུག་ཅིང་། །སྙོམས་འཇུག་ཟག་མེད་བདེ་བས་རྒྱས། །གཉིས་སུ་མེད་པའི་སྦྱོར་མཚམས་ནས། །བྱང་སེམས་དཀར་དམར་བདུད་རྩིའི་རྒྱུན། །རང་གི་གནས་གསུམ་ཕོག་པ་ཡིས། །ལུས་ངག་ཡིད་གསུམ་སྡིག་སྒྲིབ་དག །ཐུན་མོང་མ་ཡིན་
དབང་བཞི་ཐོབ། །རང་ལུས་ཟག་མེད་བདེ་བས་རྒྱས། །ཡེ་ཤེས་ལུས་ལ་མགོན་པོར་བསྐྱེད། །ཤར་གྱི་ཁྱམས་སུ་རྡོ་རྗེའི་རིགས། །ཁྲོ་བོ་ཞལ་གཅིག་ཕྱག་གཉིས་པ། །མདོག་དམར་ཕྱག་གཡས་རྡོ་རྗེ་བསྣམས། །གཡོན་པ་རཱ་གའི་བུམ་པ་འཛིན། །སྦྲུལ་དང་རིན་ཆེན་སྣ་ཚོགས་བརྒྱན། །མེ་རི་འབར་བའི་ཀློང་དཀྱིལ་ནས། །
གཡས་བསྐུམ་གཡོན་བརྐྱང་བཞེངས་པའོ། །ཡུམ་ཡང་མདོག་དམར་རྡོ་རྗེ་དང་། །བུམ་པ་འཛིན་ཅིང་ཡབ་ལ་འཁྲིལ། །ཁྲོ་ཞིང་ཅུང་ཟད་སྒེག་པར་བསམ། །ལྷོ་ཕྱོགས་སུ་ནི་རིན་ཆེན་རིགས། །ཡབ་ཡུམ་གཡས་པ་རིན་པོ་ཆེ། །གཡོན་པ་ཚེ་ཡི་བུམ་པའོ། །ནུབ་ཕྱོགས་བུདྡྷའི་ཁྲོ་བོ་ནི། །ཡབ་ཡུམ་གཡས་པ་
འཁོར་ལོ་སྟེ། །གཡོན་པ་ཚེ་ཡི་བུམ་པའོ། །བྱང་ཕྱོགས་ཕྲིན་ལས་ཁྲོ་བོ་ནི། །ཡབ་ཡུམ་གཡས་པ་རྒྱ་གྲམ་བསྣམས། །གཡོན་པ་ཚེ་བུམ་འཛིན་པའོ། །དབུས་ཀྱི་སྟེང་དང་འོག་ཏུ་ནི། །ཁྲོ་བོ་ཡབ་ཡུམ་ཕྱག་གཡས་ན། །པདྨ་འདབ་ལྔ་བསྣམས་པ་སྟེ། །གཡོན་པ་ཚེ་ཡི་བུམ་པའོ། །ཕྱོགས་བཞིར་
ཁྲོ་བོ་གཉིས་གཉིས་བསྒོམ། །རྒྱན་དང་ཆ་ལུགས་སྐུ་མདོག་རྣམས། །ཤར་ཕྱོགས་བཞིན་དུ་བསམ་པར་བྱ། །སྒོ་མ་བཞི་ནི་མདོག་དམར་ཞིང་། །ཞལ་ནི་ཕྱིར་གཟིགས་ཁྲོ་མོའོ། །གཙོ་བོ་ལྔ་དང་ཁྲུས་ཆུ་ཡི། །བུམ་པ་བདག་ལ་དམིགས་བྱས་ནས། །གསང་བའི་སྔགས་ནི་
བཟླས་པར་བྱ། །ཨོཾ་ཧྲཱིཿཧཱུྃ་སྭཱ་ཨཱཿབྷྲཱུཾ་ཛཿཧཱུྃ་བཾ་ཧོཿཨ་པ་རི་མི་ཏ་ཨཱ་ཡུརྫྙཱ་ན་མ་ཧ་སིདྡྷི་ཧ་ས་ནི་རི་སྭཱ་ཧཱ། དེ་སྐད་མ་ཡེངས་བཟླས་པ་ཡིས། །བུམ་པའི་ཆུ་རྒྱུན་སྤྱི་བོར་ཕོག །སྡིག་སྒྲིབ་དག་ནས་དབང་བཞི་ཐོབ། །དེ་ནས་རང་ཉིད་ཡབ་ཡུམ་དུ། །བསམས་ལ་གསང་བའི་སྔགས་བརྗོད་དོ། །ཤར་
དང་བྱང་ཤར་མཚམས་སུ་ནི། །བུམ་པ་ལྷ་རྣམས་གོང་བཞིན་བསམ། །རང་དང་ལྷ་རྣམས་སྔགས་བཟླས་པས། །འཆི་མེད་བདུད་རྩིའི་བུམ་པ་ཁེངས། །རྗེས་སུ་ཆགས་རྣམས་ཞུ་བའི་ཆུས། །རང་གཞན་ཐམས་ཅད་ཁྲུས་བྱའོ། །དེ་ཡིས་མཆོག་དང་ཐུན་མོང་གི། །དངོས་

49-1-223a

གྲུབ་ཐམས་ཅད་འབྱུང་བར་འགྱུར། །དེ་ནས་ཁོ་ན་ཉིད་འདི་བསྒྲུབ། །རང་ཉིད་མགོན་པོར་གསལ་བ་ཡི། །གསང་གནས་ཆོས་འབྱུང་གྲུ་གསུམ་དུ། །ཧྲཱིཿདང་རཾ་ལས་མེ་འབར་བས། །ཁོག་པའི་ནང་རྣམས་ཐམས་ཅད་ཁེངས། །སྤྱི་བོའི་ཧཾ་བརྒྱད་ཞུ་བ་ལས། །བདེ་ཆེན་བདུད་རྩིའི་
ཆུ་རྒྱུན་བབ། །རྩ་རྣམས་ཁེངས་པས་བདེ་བ་རྒྱས། །དྲོད་དང་བདེ་བའི་ཁྱད་པར་ཀུན། །སྟེང་འོག་རླུང་གི་གནད་ཤེས་བྱ། །རྟ་བདུན་རི་བོང་རྒྱས་བརྟན་ནས། །མཐར་ཐུག་ལྷུན་གྲུབ་རྣམ་གསུམ་ཐོབ། །བཅུ་གསུམ་ས་རྣམས་རྫོགས་པར་འགྱུར། །བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པ་ཞེས་བྱ་
བའི་སྒྲུབ་ཐབས། ཡེ་ཤེས་ཀྱི་མཁའ་འགྲོ་མ་གྲུབ་པའི་རྒྱལ་མོས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། བྷ་ག་བ་ཏི་ཨ་པ་རི་མི་ཏ་ཨཱ་ཡུརྫྙཱ་ན་མཎྜལ་བི་དྷི་ནཱ་མ། བོད་སྐད་དུ། བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པའི་དཀྱིལ་འཁོར་གྱི་ཆོ་ག་ཞེས་བྱ་བ། 
མགོན་པོ་ཚེ་དཔག་ཏུ་མེད་པ་ལ་ཕྱག་འཚལ་ལོ། །དད་ལྡན་མགོན་ལ་གུས་པ་ཡིས། །ནགས་འདབ་ཆུ་གླིང་དགོན་པར་ནི། །རང་དང་སློབ་མའི་དོན་གྱི་ཕྱིར། །བསྙེན་པས་ཆོ་ག་སྟ་གོན་དང་། །དཀྱིལ་འཁོར་ཆེན་པོ་བསྒྲུབ་པར་བྱ། །དེ་ལ་དང་པོ་བསྙེན་པ་ནི། རབ་དཀྱིལ་འཁོར་གྱི་ལྷ་ཚོགས་དངོས་སུ་
མཐོང་བ། འབྲིང་རྨི་ལམ་དུ་མཐོང་བ། ཐ་མ་ཡང་ལུང་བསྟན་ཐོབ་པའོ། །གྲངས་ཀྱི་བསྙེན་པ་འབུམ་ཚོ་བདུན། འབྲིང་གསུམ། ཐ་མ་ཁྲིའམ་བླ་མའི་རྗེས་གནང་ཐོབ་པའོ། །སའི་ཆོ་ག་ནི་རྒྱུད་ལས། དཀྱིལ་འཁོར་སོ་ནི་བརྟག་པ་བླང་བ་དང་། །སྦྱང་བ་དང་ནི་བྱིན་བརླབས་གཟུང་བའོ། །ཞེས་གསུངས་པས། 
ས་ཆོག་རྒྱས་པར་གཞན་དུ་ཤེས་པར་བྱའོ། །སྟ་གོན་ལ་བཞི་སྟེ། ལྷ་སྟ་གོན། བུམ་པ་སྟ་གོན། སའི་ལྷ་མོ་སྟ་གོན། སྦྱིན་སྲེག་སྟ་གོན། སློབ་མ་སྟ་གོན་རྣམས་གཞན་བཞིན་བྱའོ། །དེ་ནས་དཀྱིལ་འཁོར་ཆེན་པོའི་ཆོ་ག་བཤད་པར་བྱའོ། །དང་པོ་ནི་ཚོན་སྣ་ལྔའི་ཐི་གུ་རིགས་ལྔ་ཡབ་ཡུམ་དང་བཅས་པ། 
བདེ་སྟོང་དབྱེར་མེད་དུ་བྱིན་གྱིས་བརླབ་པར་བྱའོ། །དེ་ནས་ནམ་མཁའ་ལ་དམ་ཚིག་གི་ཐིག་ཆེན་བརྒྱད་བཏབ་ལ། མཆོད་བསྟོད་བྱས་ནས་སྟ་གོན་གྱི་ལྷ་དང་དབྱེར་མེད་དུ་བསམ་མོ། །དེ་ལྟར་ཡེ་ཤེས་ཀྱི་ཐིག་གི་རྗེས་སུ་དམ་ཚིག་གི་ཐིག་གདབ་པ་ནི། སློབ་དཔོན་ཤར་དུ་བལྟ། སློབ་མ་ནུབ་ཏུ་བལྟ། ཚངས་

49-1-223b

ཐིག་དང་པོ་གདབ། དེ་ནས་ལྷོ་བྱང་དང་མཚམས་སུ་ཐིག་ཆེན་བརྒྱད་གདབ། དེ་ལ་བཅུ་དྲུག་ཏུ་བགོས་ནས་གསུམ་པ་མན་ཆད་ལ་འདབ་བརྒྱད་ཕྱོགས་ཚོན་དབུས་དམར་པོའོ། །བཞི་པ་ཁྱམས་ལ་ཤར་དཀར་པོའམ་མཐིང་ག །ལྷོ་སེར་ནུབ་དམར་བྱང་ལྗང་། རྩིག་པ་ལྔ་དང་ལྡན་པ། འདོད་ཡོན་དམར་ཕ་གུ་སེར། 
དྲ་ཕྱེད་སྔོ་མདའ་ཡབ་དམར་པོ་མཆོད་རྟེན་དང་ལྡན་པ། རྟ་བབས་ཆ་བཞི་མཆོད་རྟེན་དུ་ཡོད་པའོ། །དེ་ཡང་རྡོ་རྗེ་མེ་རི་རབ་ཏུ་འབར་བ་དང་བཅས་པ་བྲི་བར་བྱའོ། །དེ་ཡང་ཚོན་བྱིན་གྱིས་བརླབ་པ་ནི། ཡབ་ཡུམ་བདེ་སྟོང་དབྱེར་མེད་དུ་བསམ་པའོ། །ཚོན་ལྔ་ཕྱོགས་བཞི་དང་དབུས་སུ་བཞག་ལ་ས་བོན་བྲིས་ཏེ་རིགས་
ལྔར་བསྐྱེད་ནས་མཆོད་བསྟོད་བྱས་ལ་བྲིའོ། །དེ་ཡང་ཤར་དུ་སློབ་དཔོན་གྱིས་པན་རག་སོར་བརྒྱད་བྲིས་ལ་གྲ་བརྟག་པར་བྱའོ། །དེ་ནས་སྐུ་ཙ་ཀ་ལི་འམ་མེ་ཏོག་ཚོམ་བུ་བཀོད་པའམ།ཕྱག་མཚན་རྣམས་བཀོད་པའོ། །དེ་ལྟར་སྐུ་གསུང་ཐུགས་གང་བཀོད་པའི་རྗེས་ལ། གཙོ་བོའི་བུམ་པ་ཤར་ཕྱོགས་རྡོ་རྗེ་
ར་བའི་ནང་དུའོ། །ལས་བུམ་ཤར་མེ་རིའི་སྟེང་དུ་བུམ་པ་རྒྱས་པར་དགོད་ན་གོང་བཞིན་ནོ། །དེ་ནས་མཆོད་པ་དང་གཏོར་མ་དང་འབྱོར་པའི་ཡོ་བྱད་ཀྱིས་དཀྱིལ་འཁོར་གྱི་མཐའ་མ་བསྐོར། མདའ་དང་ཕུར་པ་དང་གྲི་བརྒྱད་ཕྱོགས་མཚམས་སུ་བཙུགས་ལ་སྟེང་འཁོར་ལོ་རྩིབས་བརྒྱད་ལ་ཕྱོགས་དྲ་མིག་ཏུ་
ཡོད་པ་བྱའོ། །དེ་ནས་རང་ཉིད་བསྐྱེད་ཆོག་ཇི་ལྟ་བ་བཞིན་དུ་བསྒོམ། དཀྱིལ་འཁོར་དང་བུམ་པའི་ནང་དུ་ལྷ་ཚོགས་བསྐྱེད་ལ་སྒྲུབ་ཐབས་བཞིན་འཆི་མེད་ཡེ་ཤེས་བདུད་རྩིས་གང་བ་ལ་རང་གིས་དབང་བླང་བར་བྱའོ། །སློབ་མ་ལ་ཇི་ཙམ་བསྐུར་བ་དེ་རང་གིས་བླང་བར་བྱའོ། །དེ་ནས་སློབ་མ་རྣམས་ཁྲུས་
བྱས་གོས་སོ་མ་གོན་ནས་ཡོལ་བའི་ཕྱི་རོལ་དུ་འཁོད་པ་ལ་བགེགས་བསྐྲད། ཀྲྀ་ཡ་དཔུང་བཟང་ལྟར་གཏོར་མ་གཏང་ངོ་། །དེ་ནས་སློབ་མ་རྣམས་ཕྱག་བྱས་ལ་མེ་ཏོག་དང་བཅས་པས། གོང་བཞིན་དུ། དགའ་ཆེན་ཁྱོད་བདག་སྟོན་པ་བས། །གསོལ་བ་ལན་གསུམ་གདབ་པར་བྱའོ། །དེ་ནས་སྡིག་
པ་བཤགས་པ་དང་རྗེས་སུ་ཡི་རང་བ་ལ་སོགས་པ་ཡང་གོང་བཞིན་བྱས་ལ། མེ་ཏོག་དང་བཅས་པས་གསོལ་བ་གདབ་པ་ནི། སློབ་དཔོན་བདག་ལ་དགོངས་སུ་གསོལ། །ཐུབ་ཆེན་ཉི་མ་མ་ལུས་པ། །སངས་རྒྱས་རྣམས་ནི་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །སློབ་དཔོན་ཡེ་

49-1-224a

ཤེས་སྤྱན་མངའ་བའི། །སངས་རྒྱས་རོལ་མོ་ལས་བྱུང་བའི། །མི་ལྡོག་འཁོར་ལོའི་འབྱོར་པར་ལྡན། །ཐར་པ་ཆེན་པོའི་གྲོང་ཁྱེར་མཆོག །གསང་བ་ཆེན་པོར་འཇུག་པར་བགྱི། །གསང་བ་མཆོག་ཏུ་ཐམས་ཅད་དུ། །སློབ་དཔོན་གྱིས་ནི་བདག་འཇུག་འཚལ། །ཕྱིར་མི་
ལྡོག་པར་དབང་བསྐུར་བའི། །སྐལ་བ་ཆེན་པོ་བདག་ལ་སྩོལ། །མཚན་རྣམས་ཀུན་གྱིས་རྒྱས་བཏབ་ཅིང་། །དཔེ་བྱད་རྣམས་དང་ཡང་དག་ལྡན། །སངས་རྒྱས་སྐུ་ནི་ཡིད་འོང་བ། །སློབ་དཔོན་ཆེན་པོ་བདག་ལ་སྩོལ། །དབང་བསྐུར་བ་ནི་རྨད་འབྱུང་ཆེ། །སེམས་ཅན་ཀུན་གྱི་དོན་གྱི་ཕྱིར། །རྟག་ཏུ་བདག་ནི་སློབ་
དཔོན་འགྱུར། །སློབ་དཔོན་ཆེན་པོ་བདག་ལ་སྩོལ། །ཞེས་ལན་གསུམ་གསོལ་བ་བཏབ་པར་བྱའོ། །དེ་ནས་སློབ་དཔོན་གྱིས་སློབ་མ་ལ་དྲི་བ་ནི། བཅོམ་ལྡན་ཚེ་དཔག་མེད་པ་ཡི། །གསང་བ་ཡོངས་སུ་འཛིན་པར་ནི། །བདག་ཉིད་ཆེན་པོ་ཁྱེད་འདོད་དམ། །སློབ་མས་འཚལ་ལགས་ཞེས་བརྗོད་དོ། །དེ་
ནས་རིགས་ཀྱི་སྡོམ་པའི་དམ་ཚིག་བསྒྲགས་པ་ནི། སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང་། །འདི་དེ་སངས་རྒྱས་རིགས་དག་པའི། །སྡོམ་པ་བརྟན་པོར་གྱུར་པ་ཡི། །རྡོ་རྗེ་དྲིལ་བུ་ཕྱག་རྒྱ་ཡང་། །བློ་ཆེན་ཁྱོད་ཀྱིས་གཟུང་བར་བགྱི། །བྱང་ཆུབ་སེམས་གང་རྡོ་རྗེ་དེ། །
ཤེས་རབ་དྲིལ་བུ་ཞེས་བཤད་དོ། །སློབ་དཔོན་ཉིད་ཀྱང་གཟུང་བར་བགྱི། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེ་རིགས་དག་པའི། །སྡོམ་པ་དམ་ཚིག་ཡིན་པར་གསུངས། །རིན་ཆེན་རིགས་མཆོག་ཆེན་པོ་ལ། །ཉིན་དང་མཚན་མོ་ལན་གསུམ་དུ། །ཟང་ཟིང་ཆོས་དང་མི་འཇིགས་བྱམས། །
སྦྱིན་པ་རྣམ་བཞི་རབ་ཏུ་སྦྱིན། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ཀྱང་གཟུང་བར་བགྱི། །འདི་ནི་པདྨའི་རིགས་དག་པའི། །དམ་ཚིག་སྡོམ་པ་ཡིན་པར་གསུངས། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་
པའི་ལས་ཀྱང་ཅི་ནུས་བགྱི། །དེ་ལས་གཞན་པ་བཅུ་བཞི་ནི། །སྤང་ཞིང་དོར་བར་མི་བྱ་སྟེ། །ཕས་ཕམ་པར་ནི་རབ་བཤད་དེ། །རྩ་བའི་ལྟུང་བ་ཞེས་བཤད་དོ། །ཉིན་དང་མཚན་མོ་ལན་གསུམ་དུ། །ཉིན་རེ་བཞིན་དུ་བླང་བར་བྱ། །གང་ཚེ་ཉམས་གྱུར་རྣལ་འབྱོར་པ། །ཁ་ན་མ་ཐོ་སྦོམ་པོར་འགྱུར། །

49-1-224b

ཁྱོད་ཀྱིས་སྲོག་ཆགས་གསད་མི་བྱ། །མ་བྱིན་པར་ཡང་མི་བླང་ངོ་། །འདོད་པ་ལོག་པར་མི་སྤྱད་ཅིང་། །བརྫུན་དུ་སྨྲ་བར་མི་བྱའོ། །ཕུང་ཁྲོལ་ཀུན་གྱི་རྩ་བ་སྟེ། །ཆང་ནི་ཡོངས་སུ་སྤང་བར་བྱ། །སེམས་ཅན་དོན་ཕྱིར་མ་གཏོགས་པར། །བྱ་བ་མ་ཡིན་ཐམས་ཅད་སྤང་། །དམ་པ་ཉེ་བར་བསྟེན་བྱ་ཞིང་། །རྣལ་
འབྱོར་པ་རྣམས་བསྙེན་བཀུར་བྱ། །ལུས་ཀྱི་ལས་ནི་རྣམ་གསུམ་དང་། །ངག་གི་ལས་ནི་རྣམ་བཞི་དང་། །ཡིད་ཀྱི་ལས་ནི་རྣམ་གསུམ་པོ། །ཅི་ནུས་པར་ནི་རྣམ་པར་སྤང་། །ཐེག་པ་དམན་ལ་འདོད་མི་བྱ། །སེམས་ཅན་དོན་ལ་རྒྱབ་ཕྱོགས་མིན། །འཁོར་བ་དག་ཀྱང་ཡོངས་མི་སྤང་། །རྟག་ཏུ་མྱ་
ངན་འདས་མི་ཆགས། །ལྷ་དང་ལྷ་མིན་གསང་བ་ལ། །ཁྱོད་ནི་བསྙེན་པར་མི་བྱ་ཞིང་། །ཕྱག་རྒྱ་མཚོན་ཆ་བཞོན་པ་དང་། །མཚན་མ་བགོམ་པར་མི་བྱ་ཞིང་། །འདི་དག་དམ་ཚིག་ཡིན་པར་གསུངས། །འདི་ལས་རྟག་ཏུ་མི་འདའ་བར། །ཁྱོད་ཀྱིས་རྟག་ཏུ་བསྲུང་བར་གྱིས། །ཞེས་ལན་གསུམ་བརྗོད་པའི་
ཚེ་སློབ་མས་ཉན་པར་བྱའོ། །དེ་ནས་སློབ་མས་སྡོམ་པ་འདི་ལྟར་ཁས་བླང་བར་བྱ་སྟེ། སློབ་དཔོན་དེང་འདིར་བདག་ལ་གསོན། །གཙོ་བོས་ཇི་ལྟར་བཀའ་སྩལ་པ། །དེ་ལྟར་བདག་གིས་བགྱིད་པར་འཚལ། །ཞེས་ལན་གསུམ་བརྗོད་དོ། །དེ་ནས་རིགས་ལྔའི་སྡོམ་པ་ཁས་བླང་བ་ནི། སངས་རྒྱས་བྱང་
ཆུབ་སེམས་དཔའ་རྣམས། །ཅི་ཙམ་དུས་ནས་བཟུང་ནས་སུ། །མ་ལུས་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བས་སུ། །ནམ་ཞིག་བྱང་ཆུབ་སྙིང་པོ་ལ། །ཡོངས་སུ་གནས་ཀྱི་བར་དག་ཏུ། །བདག་གིས་བྱང་ཆུབ་མཆོག་གི་སེམས། །མ་ལུས་པར་ནི་བསྐྱེད་པར་བགྱི། །ཇི་
ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་ལྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །
བདག་གིས་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །ནམ་དུ་ཡང་ནི་མི་སྤང་ངོ་། །རྡོ་རྗེ་རིགས་མཆོག་ཆེན་པོ་ཡི། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་

49-1-225a

བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམས་བཞི་རབ་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་མཆོག་ཆེན་པོ་ལ། །ཕྱི་དང་གསང་བ་
ཐེག་པ་གསུམ། །དམ་པའི་ཆོས་ནི་གཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་
དོན་གྱི་ཕྱིར། །བདག་གིས་སྡོམ་པ་མ་ལུས་གཟུང་། །མ་གྲོལ་བ་རྣམས་དགྲོལ་བར་བགྱི། །མ་བསྒྲལ་བ་རྣམས་བསྒྲལ་བར་བགྱི། །དབུགས་མ་ཕྱུང་རྣམས་དབུགས་དབྱུང་ཞིང་། །སེམས་ཅན་མྱ་ངན་འདས་ལ་དགོད། །ཅེས་ལན་གསུམ་བརྗོད་པར་བྱའོ། །དེ་ནས་སེམས་བསྐྱེད་པ་ནི། སློབ་
མ་སྐད་ཅིག་གིས། ཚེ་དཔག་མེད་མགོན་པོར་བསྐྱེད་ལ། རྡོ་རྗེས་དྲིའི་ཐིག་ལེ་སྙིང་གར་བྱས་ལ། དེ་ཟླ་བའི་དཀྱིལ་འཁོར་དུ་བསམས་ནས། ཨོཾ་ཧྲཱིཿབྷྲཱུཾ་ཨཱ་ཡུརྫྙཱ་ན་བཛྲ་ཡོ་ག་ཙིཏྟ་ཨུཏྤཱ་ད་ཡཱ་མི་ཞེས་བརྗོད་པ་ནི་ཀུན་རྫོབ་བྱང་ཆུབ་ཀྱི་སེམས་སོ། །ཡང་སྙིང་གར་རྡོ་རྗེ་བཞག་ལ། ཟླ་བའི་སྟེང་དུ་རྡོ་རྗེ་རྩེ་
ལྔ་པ་བསྒོམ་དུ་གཞུག །དེ་ནས་ཨོཾ་བཛྲ་སུ་ར་ཏ་ས་མ་ཡ་སྟྭཾ་བོ་དྷི་ཙིཏྟ་ཡ་ཐཱ་སུ་ཁཾ་ས་མ་ཡ་ཧོ། ཞེས་དོན་དམ་བྱང་ཆུབ་ཀྱི་སེམས་བསྐྱེད་པར་བྱའོ། །དེ་ལྟར་སློབ་མ་ལྷར་བསྐྱེད་པ་དེའི་སྐུ་གསུང་ཐུགས་བྱིན་གྱིས་བརླབ། མཆོད་པ་རྣམ་པ་ལྔ་དབུལ་བར་བྱའོ། །དེའི་རྗེས་ལ་སློབ་མ་དེ་རྣམས་ཤར་སྒོ་དང་
ལྷོ་སྒོ་ནུབ་སྒོ་བྱང་སྒོ་རྣམས་ནས་ཡིད་ཀྱིས་འཇུག་པར་བྱའོ། །དེ་ནས་སློབ་མ་ལ་སྤྲོ་བ་བསྐྱེད་པའི་སྒོ་ནས་དམ་བསྒྲག་པ་ནི། སྙིང་གར་རྡོ་རྗེ་བཞག་ལ། མི་ཡི་སྲིད་པ་ལེགས་ཐོབ་པས། །དུས་འདིར་སངས་རྒྱས་རིགས་སུ་ཆུད། །ང་ཡིས་ཡེ་ཤེས་དབང་ཐོབ་པས། །ཚེ་འདི་ཉིད་ལ་སངས་རྒྱས་ཐོབ། །
གང་ཞིག་འདི་ཉིད་མ་མཐོང་བའི། །མདུན་དུ་སྨྲ་བར་མ་བྱེད་ཅིག །གལ་ཏེ་སྨྲས་ན་དམ་ཚིག་ཉམས། །དེས་ན་མཆོག་ཏུ་གསང་བར་བགྱི། །ལན་ཅིག་བརྗོད་དོ། །དེ་ནས་ཡེ་ཤེས་སེམས་དཔའི་སྒོ་ནས་དམ་བསྒྲག་པ་ནི། སློབ་མའི་སྤྱི་བོར་རྡོ་རྗེ་བཞག་ནས་ཚེ་དཔག་མེད་ཏུ་བསམས་ནས་ལུས་

49-1-225b

ལ་བསྟིམས་ལ།  འདི་ནི་ཁྱོད་ཀྱི་དམ་ཚིག་སྟེ། །གང་ལ་སྨྲས་ན་ཀླད་པ་འགེམས། །སྲོག་ལ་བབས་ཀྱང་མི་སྨྲའོ། །གསང་བས་དངོས་གྲུབ་མཆོག་ཏུ་འགྱུར། །ཞེས་བརྗོད་དོ། །དེ་ནས་དམ་ཚིག་གི་ཆུ་སྦྱིན་པ་ནི། སྦྲང་གི་ཆུ་དང་ཡབ་ཡུམ་ཞུ་བ་གཉིས་སུ་མེད་པར་བསམས་ནས་སློབ་མ་ལ་བྱིན་ལ། འདི་ནི་ཁྱོད་
ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ཐོབ། །ཡེ་ཤེས་བདུད་རྩིའི་ཆུ་འདི་འཐུང་། །ཨོཾ་ཧྲཱིཿབྷྲཱུཾ་ཛྙཱ་ན་བཛྲ་ཡ་ཏ་ཧཱུྃ་ཞེས་བརྗོད་དོ། །དེ་ནས་ཁྱད་པར་དུ་རྡོ་རྗེ་སློབ་དཔོན་གྱི་དམ་བསྒྲག་པ་ནི། རྡོ་རྗེ་དྲིལ་བུ་མགོར་བཞག་ལ། །དུས་འདི་ཉིད་ནས་བུ་ཁྱོད་ཀྱི། །རྡོ་རྗེ་འཛིན་པ་
ང་ཡིན་གྱི། །ང་ཡིས་འདི་སྐད་བཀའ་སྩལ་པ། །ཁྱོད་ཀྱིས་གུས་པས་ཉན་པར་གྱིས། །གལ་ཏེ་ང་ལ་བརྙས་པ་ན། །སངས་རྒྱས་ཐམས་ཅད་བརྙས་པ་ཡིན། །མོས་དང་གུས་པ་མ་བྱས་ན། །བདུད་ཀྱིས་བཅོམ་ནས་དམྱལ་བར་འགྲོ། །དེ་བས་དམ་ཚིག་གནས་པར་གྱིས། །དམ་ཚིག་དག་ལས་མི་འདའ་བ། །
ཚེ་འདིར་སངས་རྒྱས་ཐོབ་པར་འགྱུར། །ཞེས་བརྗོད་པར་བྱའོ། །དེ་ནས་གདོང་གཡོགས་ཨོཾ་ཨཱཿཧཱུྃ་གསུམ་གྱིས་བྱིན་གྱིས་བརླབས་ལ་བཅིངས་ནས་ལུས་ཀྱི་གཤིས་ནི་འདི་ལྟར་བྱ་སྟེ། རྐང་པ་གཉིས་གཤིབས་ལ་ལངས་ནས་ཐལ་མོ་སྤྱི་བོར་སྦྱར་རླུང་བཟུང་ནས་ཡིད་ཀྱིས་གསོལ་བ་གདབ་པ་ནི། བཅོམ་
ལྡན་མགོན་པོ་ཚེ་དཔག་མེད། །ཡབ་ཡུམ་འཁོར་དང་བཅས་པ་ཡིས། །བདག་ལ་ཡེ་ཤེས་དབབ་ཏུ་གསོལ། །དུས་འདིར་བྱིན་གྱིས་བརླབ་པར་རིགས། །ཞེས་ལན་གསུམ་དུ་གསོལ་བ་གདབ་པར་བྱའོ། །དེ་ནས་སློབ་དཔོན་གྱིས་སློབ་མའི་སྤྱི་བོར་ཚེ་དཔག་མེད་ཡབ་ཡུམ་འོད་དང་འོད་ཟེར་གྱི་རང་བཞིན་
གར་བྱེད་པ་ལ་དམིགས་པ་གཏད་པ་དང་སྐུ་ལས་ཡེ་ཤེས་ཀྱི་བདུད་རྩི་ཁ་དོག་ལྔ་བྱུང་ནས་ལུས་ལ་ཐིམ་པར་བསམ། ཡང་ཡབ་ཀྱི་གཡས་སུ་གྲུབ་པའི་རྒྱལ་མོ་གཡས་ཌ་མ་རུ་གཡོན་ཐོད་པ་བསྣམས་པ། སྐུ་མདོག་སྨུག་ནག་རུས་པའི་རྒྱན་གྱིས་བརྒྱན་པ་གར་བྱེད་པ་ལ་ཤེས་པ་གཏད། གཡོན་
དུ་བརྒྱུད་པ་རྣམས་བསམ། དེ་ནས་སློབ་མ་ལ་དམིགས་པ་དེ་རྣམས་བསྟན་ནས་རང་དང་སློབ་མས་མོས་གུས་བྱས་པ་དང་། སྤྱི་བོའི་ལྷ་ཚོགས་རྣམས་གར་ཐབས་སུ་ལིང་ལིང་ལ་སྤྱི་བོར་སིབ་སིབ་ཐིམ་པར་བསམས་ནས། རོལ་མོ་སྣ་ཚོགས་སྒྲོགས་སྤོས་དཀར་ནག་དུད་པས་བདུག་ཅིང་ངག་ཏུ།

49-1-226a

ཨོཾ་ཧྲཱིཿབྷྲཱུཾ་བཛྲ་ཨཱ་ཡུརྫྙཱ་ན་ཨཱ་བེ་ཤ་ཡ་ཨཱཿཨཱཿཞེས་མང་དུ་བརྗོད་པས། ལུས་ངག་ཡིད་གསུམ་ལ་ཕེབས་པར་འགྱུར་རོ། །དེའི་རྟགས་ནི་འཕར་བ་དང་གར་བྱེད་པ་དང་། སཾ་སྐྲྀ་ཏའི་སྐད་དང་རྡོ་རྗེའི་གླུ་དང་། རྟོག་མེད་ཏིང་འཛིན་དཔག་མེད་འབྱུང་ངོ་། །དེ་ནས་དཀྱིལ་
འཁོར་དུ་འཇུག་པ་ནི། ལས་ཀྱི་སློབ་དཔོན་གཅིག་གིས་རྡོ་རྗེ་ཐོགས་ལ་སློབ་མ་དཀྱིལ་འཁོར་གྱི་ཤར་དུ་ཁྲིད་ནས། ཡང་དག་པ་ཡི་དཀྱིལ་འཁོར་འདིར། །བདག་གིས་སློབ་མ་འཇུག་པར་བགྱི། །ལྷ་རྣམས་ཀྱི་ནི་རིགས་ཇི་བཞིན། །དངོས་གྲུབ་བསོད་ནམས་དེ་བཞིན་ཤོག །ཅེས་
བརྗོད་དོ། །དེ་ནས་མེ་ཏོག་ཐོགས་ལ། སྔོན་ནས་བསྒྲུབས་པའི་ཡི་དམ་ལྷ། །གང་ཡིན་དེ་རིང་བདག་བསྙེན་གྱི། །རིགས་དང་མཐུན་པའི་དངོས་གྲུབ་དང་། །ལྷ་དང་མ་ནོར་མཇལ་བར་ཤོག །ཅེས་མེ་ཏོག་དོར་ལ་མེ་ཏོག་གང་ལ་ཕོག་པའི་རིགས་ཀྱི་མིང་བདེ་ཆེན་འོད་དཔག་མེད་དང་མི་བསྐྱོད་
ཚེ་དཔག་མེད་དང་། རིན་ཆེན་ཚེ་དཔག་མེད་ལ་སོགས་པའི་རིགས་མཐུན་མིང་རྣམས་གདགས་པར་བྱའོ། །དེ་ནས་མེ་ཏོག་དེ་མགོ་ལ་བཅིངས་ནས་ཚེ་དཔག་མེད་དུ་བསམས་ནས། ཕྱོགས་བཅུའི་སངས་རྒྱས་བྱིན་བརླབས་པའི། །མེ་ཏོག་འོད་དཔག་མེད་པ་འདི། །སྟོབས་ཆེན་ཁྱོད་ཀྱིས་
རབ་བཅིངས་པའི། །རིགས་ཀྱི་བདག་པོར་དབང་བསྐུར་རོ། །ཞེས་པས་སྤྱི་བོར་གདགས་སོ། །དེ་ནས་གསེར་གྱི་ཐུར་མས་མིག་ཕྱེ་ལ། ཚེ་དཔག་མེད་པས་དེང་ཁྱོད་ཀྱིས། །མིག་ནི་ཡང་དག་འབྱེད་པར་མཛད། །རྡོ་རྗེའི་མིག་ནི་བླ་ན་མེད། །ཕྱེ་བས་ཐམས་ཅད་མཐོང་བར་འགྱུར། །
ཞེས་བརྗོད་ལ་གདོང་གཡོགས་དགྲོལ་བར་བྱའོ། །དེ་ནས་དཀྱིལ་འཁོར་བསྟན་པ་ནི། དཀྱིལ་འཁོར་བཟང་པོ་འདི་ལ་ལྟོས། །མཐོང་ནས་དང་བ་རབ་ཏུ་བསྐྱེད། །ཁྱོད་ནི་ཚེ་དཔག་རིགས་སུ་སྐྱེས། །སྔགས་དང་ཕྱག་རྒྱའི་བྱིན་རླབས་ཀྱིས། །འགྲོ་དོན་ཕུན་སུམ་ཚོགས་ཀུན་དང་། །
དངོས་གྲུབ་ཐམས་ཅད་མངོན་དུ་འགྱུར། །དམ་ཚིག་ཐམས་ཅད་བསྲུང་བ་དང་། །གསང་སྔགས་ལ་ཡང་བརྩོན་པར་གྱིས། །ཞེས་བརྗོད་ལ་དཀྱིལ་འཁོར་གྱི་རྣམ་དག་བསྟན། དེ་ནས་ཕུང་པོ་ལྔ་ཡབ་ལྔ། ཚེ་དཔག་ཏུ་མེད་པ་ཡབ་ཡུམ་དུ་ངོ་སྤྲད་པར་བྱའོ། །དེ་ནས་ཕྱག་རྒྱ་བྱ་སྟེ། གླིང་

49-1-226b

བཞིས་བརྒྱན་པའི་མཎྜལ་དང་། ལུས་ལོངས་སྤྱོད་གསེར་གྱི་མཎྜལ་ཕུལ་ནས། དབང་བསྐུར་བར་གསོལ་བ་གདབ་པ་ནི། བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་མཆོད་ཆེན་སྩལ་བ་ལྟར། །བདག་ཀྱང་རབ་ཏུ་བསྒྲལ་བའི་ཕྱིར། །ནམ་མཁའི་རྡོ་རྗེ་བདག་ལ་སྩོལ། །གཙོ་བོ་མགོན་པོ་ཚེ་དཔག་མེད། །
ཡབ་ཡུམ་འཁོར་དང་བཅས་པ་ཡི། །འཆི་མེད་བདུད་རྩིའི་ཆུ་རྒྱུན་གྱིས། །དབང་བསྐུར་དེང་འདིར་བདག་ལ་སྩོལ། །ཞེས་ལན་གསུམ་གསོལ་བ་གདབ་པོ། །དེ་ནས་དབང་བསྐུར་བ་ནི། སངས་རྒྱས་དང་དཀྱིལ་འཁོར་གྱི་ལྷ་ཚོགས་ཐམས་ཅད་ཀྱིས་བྱིན་གྱིས་བརླབ། ཁྲོ་བོ་ཐམས་ཅད་ཀྱིས་བར་ཆད་
བསྲུང་། མཆོད་པའི་ལྷ་མོ་ཐམས་ཀྱིས་ཕྱི་ནང་གསང་གསུམ་གྱིས་མཆོད། བྱང་ཆུབ་སེམས་དཔའ་ཐམས་ཅད་ཀྱིས་བཀྲ་ཤིས་ཀྱི་ཚིགས་སུ་བཅད་པ་བརྗོད། རིགས་ཀྱི་ཡུམ་ལྔས་རིན་པོ་ཆེའི་བུམ་པ་ནས་ཡེ་ཤིས་ཀྱི་བདུད་རྩིས་དབང་བསྐུར་བར་བསམས་ལ། སློབ་མའི་སྤྱི་གཙུག་ཏུ་བུམ་པ་བཞག་ནས། ཇི་
ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ན་མཿསརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཱཾ། ཕྱོགས་དུས་སངས་རྒྱས་ཐམས་ཅད་ཀྱི། །གསང་གསུམ་གནས་ལས་བྱུང་བ་ཡི། །ཁམས་གསུམ་ཀུན་གྱིས་ཕྱག་
བྱས་པའི། །རྡོ་རྗེ་དབང་བསྐུར་ཆེན་པོ་སྦྱིན། །ཞེས་པ་ནི་སྤྱིར་བསྐུར་བའོ། །དེ་ནས་རིགས་པའི་དབང་ལྔ་བསྐུར་བ་ནི། བུམ་པ་མི་བསྐྱོད་པར་བསྐྱེད་ལ་དགུག་གཞུག་བྱ། རང་དང་སློབ་མ་གཉིས་ཀ་མི་བསྐྱོད་པར་བསྐྱེད་ནས་དབང་བསྐུར་བ་ནི། ཀུན་གཞི་རྣམ་ཤེས་རྣམ་དག་པ། །མེ་ལོང་ཡེ་ཤེས་ངོ་བོ་
ཉིད། །བཅོམ་ལྡན་མི་བསྐྱོད་པ་ཡི་ནི། །བདུད་རྩིའི་ཆུ་རྒྱུན་དབང་བསྐུར་རོ། །ཞེས་བརྗོད་ནས། ཆུ་རྒྱུན་སྤྱི་བོར་བླུགས་པས་ལུས་བདེ་བས་ཁྱབ་ཅིང་། ཞེ་སྡང་ཐམས་ཅད་དག་ནས་མེ་ལོང་ཡེ་ཤེས་རྒྱུད་ལ་སྐྱེས་པར་བསྒོམ་མོ། །དེ་ནས་དབུ་རྒྱན་སྟོང་པའི་ངང་ལས་རིན་འབྱུང་དུ་བསྐྱེད། ཡེ་ཤེས་པ་
གཞུག །རང་དང་སློབ་མ་གཉིས་ཀ་ཡང་རིན་འབྱུང་དུ་བསམས། དབུ་རྒྱན་དེ་སློབ་མའི་སྤྱི་བོར་བཞག་ལ། ཐོར་གཙུག་ཅོད་པན་གྱིས་བརྒྱན་པ། །སངས་རྒྱས་ཀུན་གྱིས་རབ་བསྔགས་པ། །རིན་ཆེན་དག་གི་དབུ་རྒྱན་དང་། །དར་དཔྱངས་དབང་བསྐུར་སྦྱིན་པར་བྱ། ཨོཾ་རཏྣ་ཨ་བྷི་ཥིཉྩ་མཱཾ་ཞེས་བརྗོད་

49-1-227a

པས། ང་རྒྱལ་དག་ནས་མཉམ་པ་ཉིད་ཀྱི་ཡེ་ཤེས་རྒྱུད་ལ་སྐྱེས་པར་བསམ་མོ། །དེ་ནས་རྡོ་རྗེ་དང་རང་གི་སློབ་མ་སྣང་བ་མཐའ་ཡས་སུ་བསྐྱེད་ལ་རྡོ་རྗེ་མགོར་བཞག་ནས། སངས་རྒྱས་ཀུན་གྱི་རྡོ་རྗེའི་དབང་། །དེང་འདིར་ཁྱོད་ལ་བསྐུར་བྱར་བྱ། །སངས་རྒྱས་ཀུན་དུ་རབ་བསྒྲུབ་ཕྱིར། །
རྡོ་རྗེ་འདི་ནི་ཁྱོད་ཀྱིས་ལོང་། །ཞེས་པ་ལག་པ་གཡས་སུ་བྱིན་ལ། ཨོཾ་པདྨ་བཛྲ་ན་ཡ་ཧྲཱི་ཨ་བྷི་ཥིཉྩ་མཱཾ་ཞེས་བརྗོད་དོ། །དེས་འདོད་ཆགས་དག་ནས། སོ་སོར་རྟོག་པའི་ཡེ་ཤེས་རྒྱུད་ལ་སྐྱེས་པར་བསྒོམ་མོ། །དེ་ནས་དྲིལ་བུ་དང་སློབ་མ་དོན་ཡོད་གྲུབ་པར་བསྐྱེད་ལ། དྲིལ་བུ་མགོར་བཞག་ལ། 
སངས་རྒྱས་ཀུན་གྱི་དྲིལ་བུའི་དབང་། །དེང་འདིར་ཁྱོད་ལ་བསྐུར་བར་བྱ། །སངས་རྒྱས་ཀུན་དུ་རབ་བསྒྲུབ་ཕྱིར། །དྲིལ་བུ་འདི་ནི་ཁྱོད་ཀྱིས་ལོང་། །ཨོཾ་ཨ་ཏི་པ་ཏ་ཡེ་ཨ་བྷི་ཥིཉྩ་མཱཾ་ཞེས་ལག་པ་གཡོན་དུ་སྦྱིན་ནོ། །དེས་ཕྲག་དོག་དག་ནས་བྱ་བ་གྲུབ་པའི་ཡེ་ཤིས་རྒྱུད་ལ་སྐྱེས་པར་བསྒོམ་མོ། །དེ་
ནས་རྡོ་རྗེ་དང་དྲིལ་བུ་རྣམ་པར་སྣང་མཛད་དུ་བསྐྱེད་ལ། རང་སློབ་མ་ཡང་དེ་བཞིན་དུ་བསམས་ནས། རྡོ་རྗེ་དང་དྲིལ་བུ་ལྕེ་ཐོག་ཏུ་བཞག་ནས། སངས་རྒྱས་ཀུན་གྱི་མིང་གི་དབང་། །དེང་འདིར་ཁྱོད་ལ་བསྐུར་བར་བྱ། །སངས་རྒྱས་ཀུན་དུ་རབ་བསྒྲུབ་ཕྱིར། །མིང་གི་དབང་འདི་ཁྱོད་ཀྱིས་ལོང་། །
ཨོཾ་བཛྲ་ས་ཏྭ་ཡ་ཏྭཾ་ཨ་བྷི་ཥིཉྩ་ཏུ་མཱཾ་ཞེས་བརྗོད་པས། གཏི་མུག་དག་ནས་ཆོས་ཀྱི་དབྱིངས་ཀྱི་ཡེ་ཤེས་རྒྱུད་ལ་སྐྱེས་པར་བསྒོམ་མོ། །དེ་དག་གིས་བྱེ་བྲག་ཏུ་རིགས་པའི་དབང་ལྔ་བསྐུར་བ་བསྟན་ནོ། །དེ་ནས་ཁྱད་པར་དུ་འཆི་མེད་ཡེ་ཤེས་བདུད་རྩིའི་ཕྱི་ནང་གསང་བ་དེ་ཁོ་ན་ཉིད་ཀྱི་དབང་བསྐུར་བ་བཤད་
པར་བྱ་སྟེ། དེ་ཡང་སློབ་མས་གསེར་གྱི་མཎྜལ་ཕུལ་ནས། གསོལ་བ་གདབ་པ་ནི། བླ་མ་མགོན་པོ་ཚེ་དཔག་མེད། །ལྷ་ཚོགས་འཁོར་དང་བཅས་པ་རྣམས། །བདག་ལ་བརྩེ་བར་དགོངས་ནས་ཀྱང་། །འཆི་མེད་ཚེ་ཡི་དབང་བསྐུར་སྩོལ། །ཞེས་གསོལ་བ་ལན་གསུམ་གདབ་པོ། །དེ་ནས་
དབང་བསྐུར་བ་ནི། གོང་བཞིན་དུ་སྤྱིར་དཀྱིལ་འཁོར་གྱི་ལྷ་ཚོགས་དང་། ཁྱད་པར་དུ་བཅོམ་ལྡན་འདས་ཚེ་དཔག་ཏུ་མེད་པའི་བདུད་རྩིའི་རྒྱུན་བུམ་པ་བཀང་ནས་དབང་བསྐུར་བས། སྤྱིར་ལུས་ངག་ཡིད་གསུམ་གྱི་སྡིག་པ་དང་སྒྲིབ་པ་དང་། ཁྱད་པར་དུ་ཚེ་ཟད་པ་དང་ཉམས་པ་དང་འགྲིབས་པ་

49-1-227b

ཐམས་ཅད་སངས་ཀྱིས་དག་པར་བསམས་ནས། བུམ་པ་སྤྱི་བོའི་ཐོག་ཏུ་བཞག་ལ་དབང་བསྐུར་བ་ནི། སོ་སོར་ཀུན་རྟོག་རང་བཞིན་གྱི། །བཅོམ་ལྡན་ཚེ་དཔག་མེད་པ་ནི། །སྐུ་མདོག་དམར་པོ་འོད་ཟེར་འབར། །འཆི་མེད་བདུད་རྩིའི་ཆུ་རྒྱུན་དང་། །བུམ་པ་ཚེ་ཡིས་བཀང་ནས་ཀྱང་། །ཚེ་དབང་ཐམས་
ཅད་བདག་ལ་སྩོལ། །ཨོཾ་ཧྲཱིཿབྷྲཱུཾ་བཛྲ་དྷཱཱུ་ན་ཨཱ་ཡུ་ཥེ་སྭཱ་ཧཱ། དེ་ནས་དམིགས་པ་ཐམས་ཅད་གོང་བཞིན་དུ་རང་དང་སློབ་མ་གཉིས་ཀས་བསམས་ལ། དབང་བསྐུར་བ་ནི། མེ་ལོང་ཡེ་ཤེས་རང་བཞིན་གྱི། །མི་བསྐྱོད་ཚེ་དཔག་མེད་པ་ནི། །སྐུ་མདོག་སྔོན་པོ་འོད་ཟེར་འབར། །འཆི་མེད་བདུད་རྩིའི་ཆུ་རྒྱུན་
དང་། །བུམ་པ་ཚེ་ཡིས་བཀང་ནས་ཀྱང་། །ཚེ་དབང་ཐམས་ཅད་བདག་ལ་སྩོལ། །ཨོཾ་ཧཱུཾ་བྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། མཉམ་ཉིད་ཡེ་ཤེས་རང་བཞིན་གྱི། །རིན་འབྱུང་ཚེ་དཔག་མེད་པ་ནི། །སྐུ་མདོག་སེར་པོ་འོད་ཟེར་འབར། །འཆི་མེད་བདུད་རྩིའི་ཆུ་རྒྱུན་དང་། །བུམ་པ་ཚེ་ཡིས་བཀང་ནས་ཀྱང་། །
ཚེ་དབང་ཐམས་ཅད་བདག་ལ་སྩོལ། །ཨོཾ་སྭཱ་བྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། ཆོས་དབྱིངས་ཡེ་ཤེས་རང་བཞིན་གྱི། །རྣམ་སྣང་ཚེ་དཔག་མེད་པ་ནི། །སྐུ་མདོག་དཀར་པོ་འོད་ཟེར་འབར། །འཆི་མེད་བདུད་རྩིའི་ཆུ་རྒྱུན་དང་། །བུམ་པ་ཚེ་ཡིས་བཀང་ནས་ཀྱང་། །ཚེ་དབང་ཐམས་ཅད་བདག་ལ་སྩོལ། །ཨོཾ་
དྷཱུཾ་བྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། བྱ་གྲུབ་ཡེ་ཤེས་རང་བཞིན་གྱི། །དོན་གྲུབ་ཚེ་དཔག་མེད་པ་ནི། །སྐུ་མདོག་ལྗང་གུ་འོད་ཟེར་འབར། །འཆི་མེད་བདུད་རྩིའི་ཆུ་རྒྱུན་དང་། །བུམ་པ་ཚེ་ཡིས་བཀང་ནས་ཀྱང་། །ཚེ་དབང་ཐམས་ཅད་བདག་ལ་སྩོལ། །ཨོཾ་ཨཱཿབྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། དེ་དག་གིས་ཕྱི་ཡབ་
ལྔའི་སྒོ་ནས་དབང་བསྐུར་བ་བསྟན་ཏོ། །དེ་ནས་ཡུམ་གོས་དཀར་མོས་དབང་བསྐུར་བས་ལུས་ངག་ཡིད་གསུམ་གྱི་སྡིག་སྒྲིབ་དང་ཚེ་ཉམས་པ་དང་འགྲིབས་པ་ཐམས་ཅད་སངས་ཀྱིས་དག་ནས་ལུས་ཕྲུ་མ་ཕུས་བཏབ་པ་བཞིན་དུ་གྱུར་ཏོ། །དེ་ནས་བདུད་རྩི་རྐང་མཐིལ་ནས་ཡར་སྐྱ་མེ་རེ་རེ་བྱུང་ནས་སྤྱི་བོར་སླེབ་
པ་དང་རང་གི་ལུས་ཡེ་ཤེས་ཀྱི་ལུས་སུ་གྱུར་པར་བསམས་ལ་བུམ་པ་སྤྱི་བོར་བཞག་ནས། འོད་དཔག་ཡུམ་མཆོག་གོས་དཀར་མོ། །ཕྱག་ན་རཱ་གའི་བུམ་པ་བསྣམས། །ཚེ་དང་བདུད་རྩིས་བཀང་ནས་ཀྱང་། །ཚེ་དབང་ཐམས་ཅད་དེང་འདིར་སྩོལ། །ཨོཾ་བྷྲཱུཾ་ཨ་པ་རི་མི་ཏ་ཨཱ་ཡུརྫྙཱ་ན་སུ་བི་ནིཤྩི་ཏ་ཏེ་ཛོ་རཱ་

49-1-228a

ཛཱ་ཡ་སྭཱ་ཧཱ། ཞེས་ཡུམ་ཐམས་ཅད་ལ་དམིགས་པ་དང་སྔགས་གོང་བཞིན་ནོ། །མི་བསྐྱོད་ཡུམ་མཆོག་སངས་རྒྱས་སྤྱན། །ཕྱག་ན་ཤེལ་གྱི་བུམ་པ་བསྣམས། །ཚེ་དང་བདུད་རྩིས་བཀང་ནས་ཀྱང་། །ཚེ་དབང་ཐམས་ཅད་དེང་འདིར་སྩོལ། །རིན་ཆེན་ཡུམ་མཆོག་མཱ་
མཱ་ཀི། །ཕྱག་ན་བཻ་ཌཱུར་བུམ་པ་བསྣམས། །ཚེ་དང་བདུད་རྩིས་བཀང་ནས་ཀྱང་། །ཚེ་དབང་ཐམས་ཅད་དེང་འདིར་སྩོལ། །སྣང་མཛད་ཡུམ་མཆོག་དབྱིངས་ཕྱུག་མ། །ཕྱག་ན་གསེར་གྱི་བུམ་པ་བསྣམས། །ཚེ་དང་བདུད་རྩིས་བཀང་ནས་ཀྱང་། །ཚེ་དབང་ཐམས་ཅད་དེང་འདིར་སྩོལ། །དོན་
གྲུབ་ཡུམ་མཆོག་དམ་ཚིག་སྒྲོལ། །ཕྱག་ན་ཨིནྡྲའི་བུམ་པ་བསྣམས། །ཚེ་དང་བདུད་རྩིས་བཀང་ནས་ཀྱང་། །ཚེ་དབང་ཐམས་ཅད་འདིར་སྩོལ་ཅིག །དེ་དག་གིས་ཡུམ་ལྔའི་དབང་བསྟན་ཏོ། །དེ་ནས་སེམས་དཔའ་བཅུ་དྲུག་གི་བཤད་པར་བྱ་སྟེ། ཤར་ཕྱོགས་ཀྱི་སེམས་དཔའ་བཞིས་དབང་
བསྐུར་བས་འཆི་མེད་ཚེའི་དངོས་གྲུབ་ཐོབ་པར་བསམས་ལ། བུམ་པ་སྤྱི་གཙུག་ཏུ་བཞག་ནས་འདི་སྐད་བརྗོད་པར་བྱ་སྟེ། ཤར་ཕྱོགས་མི་བསྐྱོད་སེམས་དཔའ་བཞི། །བཻ་ཌཱུར་སྔོན་པོའི་མདོག་འདྲ་བ། །ཕྱག་གཡས་རྡོ་རྗེ་རྩེ་ལྔ་བསྣམས། །གཡོན་ན་ཚེ་ཡི་བུམ་པ་འཛིན། །ཚེ་དང་བདུད་རྩིས་
བཀང་ནས་ཀྱང་། །ཚེ་དབང་ཐམས་ཅད་འདིར་སྩོལ་ཅིག །སྔགས་ནི་གཙོ་བོ་མི་བསྐྱོད་པའོ། །ལྷོ་ཕྱོགས་རིན་ཆེན་སེམས་དཔའ་བཞི། །བཙོ་མ་གསེར་གྱི་མདོག་འདྲ་བ། །ཕྱག་གཡས་རིན་ཆེན་འབར་བ་བསྣམས། །གཡོན་པས་ཚེ་ཡི་བུམ་པ་འཛིན། །ཚེ་དང་བདུད་རྩིས་བཀང་ནས་ཀྱང་། །
ཚེ་དབང་ཐམས་ཅད་འདིར་སྩོལ་ཅིག །ནུབ་ཕྱོགས་པདྨའི་སེམས་དཔའ་བཞི། །པདྨ་རཱ་གའི་མདོག་འདྲ་བ། །ཕྱག་གཡས་ཆུ་སྐྱེས་འདབ་ལྔ་བསྣམས། །གཡོན་པས་ཚེ་ཡི་བུམ་པ་བསྣམས། །ཚེ་དང་བདུད་རྩིས་བཀང་ནས་ཀྱང་། །ཚེ་དབང་ཐམས་ཅད་འདིར་སྩོལ་ཅིག །བྱང་ཕྱོགས་ཕྲིན་ལས་
སེམས་དཔའ་བཞི། །ཨིནྡྲ་ནཱི་ལའི་མདོག་འདྲ་བ། །ཕྱག་གཡས་རྡོ་རྗེ་རྒྱ་གྲམ་འཛིན། །གཡོན་པ་ཚེ་ཡི་བུམ་པ་བསྣམས། །ཚེ་དང་བདུད་རྩིས་བཀང་ནས་ཀྱང་། །ཚེ་དབང་ཐམས་ཅད་འདིར་སྩོལ་ཅིག །དེ་ནས་འཆི་མེད་ཚེའི་དངོས་གྲུབ་ཐོབ་པ་ཡིན་སྙམ་པའི་ངེས་ཤེས་བསྐྱེད་དོ། །དེས་ནི་

49-1-228b

གསང་བ་སེམས་དཔའ་བཅུ་དྲུག་གི་དབང་བསྟན་ཏོ། །དེ་ནས་དེ་ཁོ་ན་ཉིད་བཤད་པར་བྱ་སྟེ། རང་དང་སློབ་མའི་སྙིང་གའི་ཧྲཱིཿདང་དཀྱིལ་འཁོར་གྱི་ཤར་ཕྱོགས་ནས་ལྷ་མོ་ལྕགས་ཀྱུ་མ་དཀར་མོ་གཅིག་ལས་བཅུ། བཅུ་ལས་བརྒྱ་ལ་སོགས་པ་མང་པོ་དཔག་ཏུ་མེད་པ་སྤྲོས་ནས་རང་གཞན་ཐམས་ཅད་ཀྱི་ནད་
གདོན་ཞི་བའི་ལས་བྱས། ཁྱད་པར་དུ་ཤར་དྲི་ཟའི་ལག་ནས་རང་གི་ཚེ་ཉམས་པ་འགྲིབས་པ་ཟད་པ་རྣམས་བཀུག་ནས་སློབ་མ་ལ་བསྟིམས་པས་ནད་གདོན་ཐམས་ཅད་ཞི་ནས་ཚེ་རྒྱས་པར་བསམས་ལ་སྤྱི་གཙུག་ཏུ་བུམ་པ་བཞག་ནས། ཤར་ཕྱོགས་དཀར་མོ་ཞི་མཛད་ལྷ། །དྲི་ཟའི་ལག་ནས་ཚེ་ཁུག་ལ། །ནད་དང་
གདོན་རྣམས་ཞི་མཛད་པའི། །དབང་བསྐུར་དེང་འདིར་བདག་ལ་སྩོལ། །ཛཿ་ཧཱུཾ་བཾ་ཧོཿཨ་པ་རི་མི་ཏ་ཨཱ་ཡུརྫྙཱ་ན་སུ་བི་ནིཿསྭཱ་ཧཱ། དེ་ནས་རང་དཀྱིལ་འཁོར་གྱི་ལྷོ་ནས་ཞགས་པ་མ་སེར་མོ་སྤྲོས་ལ་ཚེ་དང་ལོངས་སྤྱོད་ལ་སོགས་པ་རྒྱས་པའི་ལས་བྱས་ཏེ། གཤིན་རྗེའི་ལག་ནས་ཚེ་བཀུག་ལ་བསྟིམས་
ནས། ལྷོ་ཕྱོགས་སེར་མོ་རྒྱས་མཛད་མ། །གཤིན་རྗེའི་ལག་ནས་ཚེ་ཁུག་ལ། །ཚེ་དང་ལོངས་སྤྱོད་རྒྱས་པ་ཡི། །དབང་བསྐུར་བདག་ལ་དེང་འདིར་སྩོལ། །ཡང་ས་བོན་དང་ནུབ་ནས་ལྕགས་སྒྲོག་མ་ནུབ་ཏུ་སྤྲོས་ཆུ་ལྷའི་ལག་ནས་ཚེ་ཁུག་ལ། སྲིད་གསུམ་དབང་དུ་བྱས་པར་བསམས་
ནས། ནུབ་ཕྱོགས་དམར་མོ་དབང་གི་ལྷ། །ཆུ་ལྷའི་ལག་ནས་ཚེ་ཁུག་ལ། །སྲིད་གསུམ་དབང་དུ་སྡུད་མཛད་པའི། །དབང་བསྐུར་དེང་འདིར་བདག་ལ་སྩོལ། །ཡང་ས་བོན་དང་བྱང་ཕྱོགས་ནས་དྲིལ་བུ་མ་མང་པོ་སྤྲོས་ནས་ནད་གདོན་ཚར་བཅད་ནས། གནོད་སྦྱིན་གྱི་ལག་ནས་ཚེ་བཀུག་ལ་
བསྟིམས་ཏེ། བྱང་ཕྱོགས་ལྗང་གུ་དྲག་པོའི་ལྷ། །གནོད་སྦྱིན་ལག་ནས་ཚེ་ཁུག་ལ། །ནད་གདོན་ཐམས་ཅད་ཚར་བཅད་པའི། །དབང་བསྐུར་དེང་འདིར་བདག་ལ་སྩོལ། །དེས་ཡུམ་བཞི་ཕོ་ཉ་མོར་བྱས་ནས་དབང་བསྐུར་བའོ། །དེ་ལྟར་དབང་བཞི་པོ་དེ་རྣམས་བསྐུར་བས་ཉོན་མོངས་པ་དག་འཆི་
བ་མེད་པའི་དངོས་གྲུབ་ཐོབ་པ་དེའི་ངང་ལས་བདག་ཉིད་གཙོ་བོ་ཡབ་ཡུམ་དུ་བསམ་མོ། །དེ་ནས་དེ་ཉིད་བརྟན་པར་བྱ་ཞིང་དབང་རྟགས་སུ་རིགས་ལྔས་དབུ་བརྒྱན་པར་བྱ་སྟེ། དེ་ཡང་བུམ་པ་སྤྱི་བོར་བཞག་སྟེ་གཙོ་བོ་ཡབ་ཡུམ་དུ་བསྐྱེད། དེ་ལས་འོད་ཟེར་དམར་པོ་ལུས་ལ་ཐིམ་པས་འདོད་

49-1-229a

ཆགས་དག་ནས་སོ་སོར་ཀུན་རྟོག་རྒྱུད་ལ་སྐྱེས་ནས་འོད་དཔག་མེད་ཀྱིས་དབུ་བརྒྱན་པར་བསམས་ནས། འདོད་ཆགས་རྣམ་པར་དག་ནས་ནི། །འོད་དཔག་མེད་པས་དབུ་བརྒྱན་ཏེ། །སོ་སོར་ཀུན་རྟོག་དོན་རྟོགས་ནས། །མཛེས་ཤིང་པདྨའི་ལུས་ཐོབ་ཤོག །ཨོཾ་ཧྲཱིཿབྷྲཱུཾ་པདྨ་ཀ་མ་ལ་
ཨ་བྷི་ཥིཉྩ་ཏུ་མཱཾ། ཡང་བུམ་པ་མི་བསྐྱོད་པར་བསམས་ནས་དཔྲལ་བར་བཞག་འོད་འཕྲོས་པས། ཞེ་སྡང་དག་ནས་མེ་ལོང་ཡེ་ཤེས་སྐྱེས་ཏེ། མི་བསྐྱོད་པས་དབུ་བརྒྱན་པར་བསམས་ནས། ཞེ་སྡང་རྣམ་པར་དག་ནས་ནི། །བཅོམ་ལྡན་མི་བསྐྱོད་དབུ་བརྒྱན་ཏེ། །མེ་ལོང་ཡེ་ཤེས་དོན་རྟོགས་ཤིང་། །
འགྱུར་མེད་རྡོ་རྗེའི་ལུས་ཐོབ་ཤོག །ཨོཾ་ཧཱུྃ་བྷྲཱུཾ་བཛྲ་ཀ་ལ་ཤ་ཨ་བྷི་ཥིཉྩ་ཏུ་མཱཾ། ཡང་བུམ་པ་རྣ་བ་གཡས་ཀྱི་སྟེང་དུ་བཞག་ནས་རིན་འབྱུང་དུ་བསམ། དེའི་འོད་ཀྱིས་ང་རྒྱལ་དག་ནས་མཉམ་ཉིད་ཡེ་ཤེས་རྒྱུད་ལ་སྐྱེས་ཏེ། རིན་འབྱུང་གིས་དབུ་བརྒྱན་པར་བསམས་ནས། ང་རྒྱལ་རྣམ་པར་དག་ནས་ནི། །རིན་
ཆེན་འབྱུང་ལྡན་དབུ་བརྒྱན་པས། །མཉམ་ཉིད་ཡེ་ཤེས་དོན་རྟོགས་ནས། །བདེ་ཆེན་ལྷུན་གྲུབ་དོན་རྟོགས་ཤོག །ཨོཾ་སྭཱ་བྷྲཱུཾ་རཏྣ་ཀ་ལ་ཤ་ཨ་བྷི་ཥིཉྩ་ཏུ་མཱཾ། ཡང་ལྟག་པར་བུམ་པ་བཞག་ནས་རྣམ་པར་སྣང་མཛད་དུ་བསྐྱེད། དེའི་འོད་ཀྱིས་གཏི་མུག་དག་སྟེ་ཆོས་དབྱིངས་ཡེ་ཤེས་རྒྱུད་ལ་སྐྱེས། 
དེས་དབུ་བརྒྱན་པར་བསམས་ནས། གཏི་མུག་རྣམ་པར་དག་ནས་ནི། །སངས་རྒྱས་རིགས་ཀྱིས་དབུ་བརྒྱན་ཏེ། །ཆོས་དབྱིངས་ཡེ་ཤེས་དོན་རྟོགས་ནས། །ཆོས་ཀྱི་འཁོར་ལོ་བསྐོར་བར་ཤོག །ཨོཾ་བྷྲཱུཾ་བུདྡྷ་ཀ་ལ་ཤ་ཨ་བྷི་ཥིཉྩ་ཏུ་མཱཾ། ཡང་རྣ་བ་གཡོན་པར་བུམ་པ་གཞག །དོན་ཡོད་གྲུབ་པར་བསྐྱེད། 
དེའི་འོད་ཀྱིས་ཕྲག་དོག་དག །བྱ་བ་གྲུབ་པའི་ཡེ་ཤེས་རྒྱུད་ལ་སྐྱེས། དེས་དབུ་བརྒྱན་པར་བསམས་ནས། ཕྲག་དོག་རྣམ་པར་དག་ནས་ནི། །དོན་གྲུབ་རིགས་ཀྱིས་དབུ་བརྒྱན་ཏེ། །ཁྱ་གྲུབ་ཡེ་ཤེས་དོན་རྟོགས་ནས། །ཅི་བསམས་མ་ལུས་འགྲུབ་པར་ཤོག །ཨོཾ་ཨཱ་བྷྲཱུཾ་ཀ་ལ་ཤ་ཨ་བྷི་ཥིཉྩ་ཏུ་མཱཾ། 
ཞེས་རིགས་ལྔས་དབུ་བརྒྱན་པར་བསམས་ནས། བཀྲ་ཤིས་ཀྱི་ཚིགས་སུ་བཅད་པ་བརྗོད་ཅིང་མེ་ཏོག་འཐོར་རོ། །བདག་ཁོ་ན་མགོན་པོ་ཚེ་དཔག་མེད་ཡིན་ཞིང་། ཚེ་དཔག་མེད་ཁོ་ན་བདག་ཡིན་སྙམ་པའི་ང་རྒྱལ་བརྟན་པོས་གནས་པར་བྱའོ། །དེ་རྣམས་ཀྱིས་ཐུན་མོང་མ་ཡིན་

49-1-229b

པ་ཁྱད་པར་གྱི་དབང་བསྟན་ནོ། །དེ་ནས་རྗེས་གནང་བཤད་པར་བྱ་སྟེ། དང་པོ་གཙོ་བོ་ཡབ་ཡུམ་བསྟན་ནས་འདི་ཁོ་ན་ལྟར་ཡིད་ལ་བྱོས་ཤིག་བྱས་ལ། འདོད་ཆགས་བྲལ་བ་ལྟ་བུ་ཡི། །ཁམས་གསུམ་ན་ནི་སྡིག་མེད་དེ། །དེ་བས་འདོད་ལ་ཆགས་བྲལ་བར། །ཁྱོད་ཀྱིས་ནམ་དུའང་མ་བྱེད་
ཅིག །ཅེས་བརྗོད། སྔགས་ཀྱི་རྗེས་གནང་ནི། པདྨའི་ཕྲེང་བ་ལ་གཙོ་བོའི་སྔགས་ཀྱིས་བསངས་ཏེ། བཅོམ་ལྡན་འདི་ལ་སྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །ཞེས་པས་གསོལ་བ་གདབ་བོ། །དེ་ནས་སློབ་མས་ཕྲེང་བ་སྙིང་གར་བཟུང་སྟེ། བཅོམ་ལྡན་བདག་ལ་སྩལ་ལགས་
ཀྱིས། །བདག་ལ་འགོ་བར་མཛད་དུ་གསོལ། །ཞེས་གཙོ་བོ་ཡབ་ཡུམ་འཁོར་དང་བཅས་པའི་སྔགས་ལན་ལྔར་རྗེས་ཟློས་བྱའོ། །དེ་ནས་མཆོད་པ་ཕྱི་ནང་གསང་བ་གསུམ་དུ་གུས་པས་ཕུལ་ཅིག་ཅེས་པའི་རྗེས་སུ་གནང་བར་བྱའོ། །དེ་ནས་དམ་ཚིག་གསུམ་གྱི་དབང་བསྐུར་བར་བྱ་
སྟེ། དེ་ཡང་སློབ་མ་དང་རྡོ་རྗེ་ཧཱུྃ་ལས་རྡོ་རྗེ་སེམས་དཔར་བསྐྱེད་དེ། གཞན་དོན་བསམས་པས། ཐོག་མ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་བོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །བཅོམ་ལྡན་དཔལ་མཆོག་དང་པོའི་སྐྱེས་
བུའོ། །ཞེས་རྡོ་རྗེ་ལག་པ་གཡས་སུ་གཏད་དེ་སྙིང་གར་བཟུང་ནས་ཐུགས་གཉིས་སུ་མེད་པའི་ཡེ་ཤེས་རྟོགས་པར་གྱིས་ཤིག་པའོ། །དེ་ནས་སྣང་བ་མཐའ་ཡས་གསུང་གི་རང་བཞིན་དུ་བསྐྱེད་ནས། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་
སེམས་དཔའ་མཆོག །སྲིད་པའི་མཆོད་ནི་བྱེད་པ་པོ། །སྒྲ་ཐམས་ཅད་ཆོས་ཉིད་ཀྱི་རང་སྒྲར་རྟོགས་པར་གྱིས་ཤིག་པའོ། །དེ་ནས་རང་གི་སྙིང་གར་གཙོ་བོ་ཡབ་ཡུམ་བསམས་ནས། ཡི་དམ་གཟུགས་ནི་བརྟན་བྱའི་ཕྱིར། །དམ་ཚིག་ཕྱག་རྒྱ་རབ་ཏུ་བརྗོད། །དམ་ཚིག་འདི་ལ་རྟག་
གནས་པས། །ལྷ་ཡི་སྦྱོར་བ་རབ་ཏུ་གྲགས། །ཞེས་པས་ལྷ་སྐུ་སྣང་སྟོང་སྒྱུ་མའི་སྐུར་བལྟ་བར་བྱའོ། །དེ་ནས་སྤྱི་དང་བྱེ་བྲག་གི་དབང་བཤད་པར་བྱ་སྟེ། དང་པོ་སློབ་མ་སྐྱིལ་ཀྲུང་དུ་འདུག་པའི་རྐང་པའི་བར་དུ་ཆོས་ཀྱི་འཁོར་རོ། །ལག་པ་གཡས་སུ་དུང་། གཡོན་དུ་གླེགས་བམ། སྟེང་

49-1-230a

དུ་གདུགས་ཕུབ་ལ། དེང་ནས་བརྩམས་ཏེ་སེམས་བསྐྱེད་པ། །ཙམ་གྱིས་ཆོས་ཀྱི་འཁོར་ལོ་བསྐོར། །དེ་རིང་ཕན་ཆད་འཇིག་རྟེན་ལ། །སྐྱོབ་པ་ཆོས་ཀྱི་འཁོར་ལོ་བསྐོར། །ཆོས་ཀྱི་དུང་ནི་བླ་ན་མེད། །ཀུན་དུ་མ་ལུས་གང་བར་གྱིས། །སོམ་ཉི་ཡིད་གཉིས་མ་ཟ་ཅིག །
དོགས་པ་མེད་པའི་སེམས་ཀྱིས་སུ། །གསང་སྔགས་སྤྱོད་པའི་ཚུལ་གྱི་མཆོག །འཇིག་རྟེན་འདི་ལ་རབ་ཏུ་སྒྲོགས། །དེ་ལྟར་བྱས་ནས་སངས་རྒྱས་ལ། །ཕན་འདོགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཡང་། །ཀུན་དུ་ཁྱོད་ལ་བསྲུང་བར་གྱིས། །ཞེས་པའོ། །དེ་ནས་བྱེ་བྲག་ཏུ་
བསྐུར་བ་ནི། རང་དང་སློབ་མ་གཉིས་ཀ་རྣམ་སྣང་དུ་བསྐྱེད་ལ་རིགས་ལྔའི་སྒོ་ནས་དོན་བྱ་སྙམ་དུ་བསམས་ནས། འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་གྱུར་པའི། །ཆོས་ཀྱི་འཁོར་ལོ་རབ་ཏུ་བསྐོར། །ཞེས་བརྗོད་ལ་སངས་
རྒྱས་ཀྱི་རིགས་ཀྱིས་གདུལ་བྱ་གཏི་མུག་ཅན་གྱི་དོན་བྱ་སྙམ་དུ་བསམ་མོ། །དེ་བཞིན་དུ་རྡོ་རྗེ་དང་ནོར་བུ་དང་པདྨ་དང་། རྒྱ་གྲམ་རྣམས་ཀྱིས་འཁོར་ལོ་བསྐོར་བ་རྣམས་ལ་ཆོ་ག་གོང་བཞིན་སྤེལ་བར་བྱའོ། །དེ་ནས་རྗེས་ཀྱི་ཆོ་ག་བསྟན་པར་བྱ་སྟེ། དེ་ཡང་ལུང་བསྟན་པ་ནི། ཁྱོད་
ཀྱི་ཕུང་པོ་ལྔ་ཁམས་ལྔ་ཚེ་དཔག་མེད་ཡབ་ཡུམ་ཡིན་པར་བདག་གིས་ལུང་བསྟན་གྱིས། དེང་འདིར་ངས་ཁྱོད་ལུང་བསྟན་བྱ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་རང་བཞིན་རྣམ་དག་པས། །ལྷ་ཡི་འཁོར་ལོར་གནས་པའོ། །ཞེས་བརྗོད་པའོ། །དེ་ནས་གཟེངས་བསྟོད་པ་
ནི། ཡི་དམ་ལྷ་དང་མཉམ་པར་ནི། །དུས་འདི་ཉིད་ནས་འགྱུར་བ་སྟེ། །དགའ་ཞིང་སྤྲོ་བ་ཆེན་པོ་ཡིས། །ཕྱི་རོལ་མི་བསམས་ནང་དུའོ། །ཞེས་བརྗོད་དོ། །དེ་ནས་དབུགས་དབྱུང་བ་ནི། བདེ་ཆེན་ཐེག་པ་འདི་ལ་ནི། །སླན་ཆད་འཆི་བ་ཡོད་མིན་ཏེ། །མི་ཚུགས་པ་དང་མི་གསོད་པས། །
ཅིས་ཀྱང་མི་འཇིགས་དགའ་བར་གྱིས། །ཞེས་བརྗོད་དོ། །དེ་རྣམས་བསྟན་པའི་ཡན་ལག་ཏུ་བརྟུལ་ཞུགས་ཀྱི་དབང་སྦྱིན་པ་ནི། སྦྲང་དང་བདུད་རྩི་བསྲེས་ལ། འཆི་མེད་ཡེ་ཤེས་བདུད་རྩིར་བྱིན་གྱིས་བརླབས་ལ་སློབ་མ་ལ་བྱིན་ཏེ། འདི་ནི་འཆི་མེད་ཡེ་ཤེས་ཆུ། །གང་གིས་རེག་དང་

49-1-230b

འཐུངས་པ་ཡིས། །མཆོག་དང་ཐུན་མོང་དངོས་གྲུབ་ཀུན། །ཐམས་ཅད་ད་ལྟ་མངོན་དུ་འགྱུར། །བགེགས་དང་ལོག་འདྲེན་ཀུན་འཇོམས་ཤིང་། །གཞན་གྱིས་རྫི་བར་མི་ནུས་པའི། །མི་ཤིགས་རྡོ་རྗེ་ཕ་ལམ་འགྱུར། །ལྷུན་གྲུབ་བདེ་བ་ཆེན་པོའོ། །ཞེས་ལན་གསུམ་བརྗོད་པར་བྱའོ། །དེ་ནས་
དཀྱིལ་འཁོར་གྱི་ནུབ་ཕྱོགས་སུ་པདྨ་དམར་པོ་འདབ་མ་བརྒྱད་པའི་སྟེང་དུ་ཚེ་དཔག་མེད་ཡབ་ཡུམ་ཞལ་སྦྱོར་དུ་བསམ། དེ་ལ་ཡེ་ཤེས་པ་གཞུག་སྐུ་གསུང་ཐུགས་བྱིན་གྱིས་བརླབས་ནས། མཆོད་པ་དང་བསྟོད་པ་བྱས་ནས་གསང་སྒྲུབ་ལྟར་བཟླས་པ་བྱས། རང་ཡང་གཙོ་བོ་ཡབ་ཡུམ་དུ་བསམས་ནས་
སྙོམས་འཇུག་བྱས་པས་བྱང་སེམས་དཀར་དམར་གསང་གནས་ནས་དོན། ཡབ་ཡུམ་རྣམས་ཀྱང་སྙོམས་འཇུག་བྱས་ནས་གསང་གནས་ནས་བྱང་སེམས་དཀར་དམར་ན་རར་བྱུང་བར་བསམ། དེ་ནས་ཀ་པཱ་ལར་སྦྲང་བུ་རམ་བདུད་རྩི་བསྲེས་ལ། དེར་བྱང་སེམས་དཀར་དམར་བསྟིམ་པ་དང་ཀ་པཱ་ལ་
འཆི་མེད་ཡེ་ཤེས་ཀྱི་བདུད་རྩི་བྱང་སེམས་དཀར་པོས་མེར་གྱིས་ཁེངས་པར་བསམ་མོ། །དེ་ནས་མཎྜལ་སྟེང་དུ་བླ་མ་དང་གཙོ་བོ་ཡབ་ཡུམ་གཉིས་སུ་མེད་པའི་གསང་གནས་ནས་བྱང་སེམས་ཀྱི་རྒྱུན་བྱུང་སྟེ། སློབ་མའི་ལྕེ་ཐོག་ཏུ་ཐིམ་པས་བདེ་སྟོང་གི་ཉམས་རྒྱུད་ལ་སྐྱེས་པ་དང་། ལུས་
བྱང་སེམས་དམར་པོས་ཁེངས་པར་བསམས་ནས་ཀ་པཱ་ལའི་བདུད་རྩི་བྱིན་ལ། ཕྱོགས་བཅུ་རྡོ་རྗེ་འཆང་རྣམས་ཀྱི། །གསང་བའི་གནས་ལས་བྱུང་བ་ཡི། །ང་ཡི་བྱང་ཆུབ་སེམས་ཀྱི་རྒྱུན། །དེ་རིང་ཁྱོད་ལ་བསྐུར་བར་བྱ། །ཞེས་བརྗོད་པར་བྱའོ། །ཤེས་རབ་ཡེ་ཤེས་ཀྱི་དབང་ནི། དཀྱིལ་
འཁོར་གྱི་ལྷོ་ཕྱོགས་སུ་པདྨ་འདབ་མ་བརྒྱད་ཕྱོགས་ཚོན་གྱི་སྟེང་དུ་སློབ་མ་ཡབ་ཡུམ་དུ་བསྐྱེད། དེ་ནས་ཡུམ་གོས་དཀར་མོ་དང་། གཉིས་སུ་མེད་པའི་སྦྱོར་བ་བྱས་པས། ཡུམ་གྱི་བྱང་སེམས་དམར་པོས་རྩ་གསུམ་འཁོར་ལོ་རིམ་གྱིས་དམར་མེར་གྱིས་ཁེངས་པར་བསམས་ལ། གཞོན་
ནུ་ཡིད་འོང་བདེ་བའི་མཆོག །ཐེ་ཚོམ་སྤངས་ནས་བསྟེན་པར་བྱ། །བརྗོད་བྲལ་ལྷན་ཅིག་སྐྱེས་དགའ་བ། །དུས་འདི་ཉིད་དུ་མངོན་དུ་འགྱུར། །ཞེས་དངོས་སམ། ཡིད་ཀྱིས་བསྟན་པར་བྱའོ། །དེ་ནས་དབང་བཞི་པ་བྱང་དུ་རས་དཀར་པོའི་སྟེང་དུ་བསྐུར་བར་བྱའོ། །རང་གཙོ་བོ་ཡབ་ཡུམ་དུ་

49-1-231a

གསལ་བའི་གནས་བཞིར་ཚེ་དཔག་མེད་ཚོན་གང་ཙམ་པ་ཞལ་སྦྱོར་དུ་བསམ། དེ་རྣམས་དམིགས་པ་མེད་པའི་ངང་ལ་གནས་པར་བྱ་སྟེ། དེ་ཡང་མ་བཅོས་པར་རང་གྲོལ་དུ་བཞག་ལ། ལྟོས་ཤིག་ལྟོས་ཤིག་སེམས་ལ་ལྟོས། །སེམས་ཉིད་ཅིར་ཡང་གྲུབ་
པ་མེད། །བསལ་གཞག་དགག་སྒྲུབ་མ་ལུས་པ། །རང་གྲོལ་ཉིད་དུ་གནས་པའོ། །ཞེས་ཕྱག་རྒྱ་ཆེན་པོའི་ངོ་སྤྲོད་ཀྱང་བྱ། དུས་འདིར་རང་གྲོལ་ལྷུན་གྲུབ་ཏུ་རྟོགས་པར་འགྱུར་རོ། །བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པའི་དབང་བཞི་བསྐུར་བའི་ཆོ་གའི་ལས་
ཁྲིགས་འཆི་མེད་ཡེ་ཤེས་བདུད་རྩིའི་བུམ་པ་ཞེས་བྱ་བ། ཡེ་ཤེས་ཀྱི་མཁའ་འགྲོ་མ་གྲུབ་པའི་རྒྱལ་མོས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། ཨཱརྱ་ནཱི་ལཱམྦ་ར་དྷ་ར་བཛྲ་པཱ་ཎི་རུ་ཏྲ་བི་ཏི་ཏནྟྲ་བྲྀ་ཏྟི་ནཱ་མ། བོད་སྐད་དུ། འཕགས་པ་ལག་ན་རྡོ་རྗེ་གོས་
སྔོན་པོ་ཅན་དྲག་པོ་གསུམ་འདུལ་ཞེས་བྱ་བའི་རྒྱུད་ཀྱི་འགྲེལ་པ། བཅོམ་ལྡན་འདས་འཇམ་པའི་རྡོ་རྗེ་ལ་ཕྱག་འཚལ་ལོ། །གང་ཞིག་ཉོན་མོངས་དུག་ལས་སྒྲོལ་མཛད་པ། །དོན་དམ་དབྱེར་མེད་ཁྲོ་ཆགས་སྐུར་སྣང་བ། །གདུག་པའི་དུག་རྣམས་འཇོམས་པར་མཛད་པ་ཡི། །
ཐུགས་རྗེ་ཅན་ལ་རབ་ཏུ་གུས་བཏུད་དེ། །དུག་ཟན་ཆུ་དང་འོ་མ་དབྱེ་བ་ཡི། །བླ་མའི་རིམ་གྱིས་རྒྱུད་འདིར་ཕན་ཕྱིར་བརྩམ། །ཐབས་དང་ཤེས་རབ་གཉིས་མེད་པའི། །མི་འགྱུར་དབྱེར་མེད་རྟགས་ཀྱིས་མཚན། །དྲག་པོ་རྣམ་གསུམ་ཉོན་མོངས་འཇོམས། །ཉོན་མོངས་ཤེས་བྱ་ལས་
འཕགས་པའི། །བརྗོད་མེད་རྟོག་བྲལ་སྐུ་དོན་བཤད། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་བདུད་རྣམ་པར་འཇོམས་པ་བདུད་ཀྱི་སྡེ་དང་། ལྷན་ཅིག་ཏུ་འོག་མིན་གཞན་འཕྲུལ་དབང་བྱེད་ཀྱི་ཕོ་བྲང་ན་ཐབས་ཅིག་ཏུ་བཞུགས་ཏེ་ཞེས་བྱ་བ་ནི་བཅོམ་ལྡན་
འདས་བྱང་ཆུབ་ཏུ་སེམས་བསྐྱེད་ནས་བཅོམ་ལྡན་འདས་མར་མེ་མཛད་ཀྱིས་ལུང་སྟོན་པ་བསྟན་པར་མཛད་ནས། གདུལ་བྱ་གདུལ་བར་མཛད་པ་ནི། བཅོམ་ལྡན་འདས་མངོན་པར་རྫོགས་པར་སངས་རྒྱས་པར་མཛད་དེ། འོད་བྱེ་བ་དཔག་ཏུ་མེད་པས་ཁྱབ་པར་མཛད་ནས་ངན་

49-1-231b

སོང་གསུམ་སྦྱོང་བར་མཛད་དེ།  གཡོ་བ་དང་། འགུལ་བ་དང་། ལྡིག་པ་སྟོན་པ་མཛད་ནས། རྡོ་རྗེ་གདན་བྱང་ཆུབ་ཀྱི་སྙིང་པོ་དེ་ཉིད་དུ་བཞུགས་སོ། །དེ་ནས་བདུད་དགའ་རབ་དབང་ཕྱུག་འཁོར་དང་བཅས་པ་ཏིང་ངེ་འཛིན་གྱི་མཐུས་དེ་ཉིད་དུ་ལྷགས་ནས་བར་དུ་གཅོད་པར་བྱ་བའི་ཕྱིར་ཚིག་འདི་སྨྲས་
ཏེ། སེམས་ཅན་ཡོངས་སུ་སྨིན་མ་བྱས། །ཕ་རོལ་ཕྱིན་དྲུག་རྫོགས་མ་བྱས། །སྤྱོད་པ་དེ་གཉིས་རྫོགས་བྱས་ནས། །མངོན་པར་རྫོགས་པར་སངས་རྒྱས་ཏེ། །དེ་མེད་ཕྱིར་ན་མི་རིགས་སོ། །ཞེས་སྨྲས་སོ། །དེའི་དོན་ནི་སེམས་ཅན་ཡོངས་སུ་སྨིན་པར་མ་བྱས་པ་དང་བསྐལ་པ་དཔག་ཏུ་མེད་
པར་སེམས་སྦྱངས་ཤིང་།  ཕ་རོལ་ཏུ་ཕྱིན་པ་དྲུག་སྤྱད་དགོས་པ་ལས་ཁྱོད་ཀྱིས་དེ་མ་སྤྱད་པས་སངས་རྒྱས་པར་མི་རིགས་སོ་ཞེས་སྨྲས། བདུད་དེའི་བསམ་པ་ཕྱིན་ཅི་ལོག་བཟློག་པར་བྱ་བའི་ཕྱིར་བཅོམ་ལྡན་འདས་ཀྱིས་ཕྱག་གཡས་པ་ས་ལ་བརྡབས་པས་ས་གཞི་ཐམས་ཅད་གཡོས་
འཁྲུགས་ནས། བཅོམ་ལྡན་འདས་ཀྱི་མདུན་དེ་ཉིད་དུ་སའི་ལྷ་མོ་གསེར་བཙོ་མ་ལྟ་བུ་འཐོན་ཏེ། འཐོན་པ་ཙམ་གྱིས་བདུད་བྱེད་བཞིན་དུ་འདུག་པར་འགྱུར་རོ། །དེ་ནས་བཅོམ་ལྡན་འདས་ཀྱིས་སའི་ལྷ་མོ་དེ་ལ་བསྒོ་བ་མཛད་ནས་དེ་སའི་སྟེང་ནས་རྡུལ་ཕྲ་མོ་བླངས་ཏེ། སངས་རྒྱས་པར་
རིགས་སོ་ཞེས་སྨྲས་པས་བདུད་འཁྲུགས་ནས་ནམ་མཁའ་ལ་སོང་ངོ་། །ད་ནས་བདུད་དེ་གཞན་འཕྲུལ་དབང་བྱེད་ཀྱི་ལྷའི་བུའི་བདུད་དང་།  ས་འོག་ན་གནས་པའི་ཀླུ་དང་། ས་སྟེང་ན་གནས་པའི་གནོད་སྦྱིན་ལག་ན་རྡོ་རྗེ་ལ་སོགས་པ་བདུད་ཀྱི་འཁོར་ཐམས་ཅད་བསྡུས་པར་གྱུར་ཏོ། །
དེ་ནས་བཅོམ་ལྡན་འདས་ལ་བདུད་འཁོར་དང་བཅས་པས་མཚོན་རྣམ་པ་དུ་མ་དང་། འབྲུག་དང་ཐོག་དང་། ལྕགས་ཀྱི་སེར་བ་དྲག་པོ་དབབ་པ་དང་། ཅན་གཟན་གདུག་པ་བཞིན་ཁྲོས་པ་རྦད་པ་དང་། རི་དང་བྲག་ཐོགས་པ་མེད་པར་འཕངས་པ་དེ་ཐམས་ཅད་ཞི་བར་མཛད་དེ། 
གང་གིས་ཀྱང་མཐོང་བར་མ་གྱུར་ཏོ། །དེ་ནས་ནམ་མཁའི་དཀྱིལ་དེ་ཉིད་དུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་འོད་ཟེར་གྱིས་བྱིན་གྱིས་བརླབས་པའི་སྐུ་ཕྱག་ན་རྡོ་རྗེའི་ཏིང་ངེ་འཛིན་ལ་སྙོམས་པར་བཞུགས་སོ། །ཞུགས་པའི་དེ་མ་ཐག་ཏུ་གཡོ་བ་དང་འགུལ་བ་དང་།

49-1-232a

ལྡིག་པ་ལ་སོགས་པ་བྱུང་སྟེ། བདུད་དེ་རྣམས་ཅི་བྱུང་སྙམ་པའི་བསམ་པས་ཕྱོགས་སུ་བལྟ་བ་ནི་བྱེད་ཅིང་སྡུག་བསྔལ་བའི་བསམ་པས་སོ། །དེ་ནས་ནམ་མཁའ་ལ་བལྟས་ཏེ། མཐོང་བར་གྱུར་ནས་སྙིང་འགས་པའི་ཚུལ་གྱིས་ས་ལ་འགྱེལ་བར་གྱུར་ཏེ། ས་དང་
པོའི་བསམ་པ་དང་ལྡན་པར་གྱུར་ཏོ། །དེ་ནས་སྤྲུལ་པའི་ཕྱག་ན་རྡོ་རྗེ་བྱང་ཆུབ་སེམས་དཔའ་དཔག་ཏུ་མེད་པ་དང་བཅས་པ་འཇིག་རྟེན་གྱི་ཁམས་གཞན་ནས་འཐོན་ཏེ། བཅོམ་ལྡན་འདས་དེ་ལ་བསྐོར་བ་བྱས་ནས། བྱང་ཆུབ་སེམས་དཔའ་ཕྱག་ན་རྡོ་རྗེའི་ཕྱག་གིས། བདུད་དེ་རྣམས་ལ་
རེག་མ་ཐག་ཏུ་དྲན་པ་རྙེད་པར་གྱུར་ཏེ། སྙིང་རྗེའི་བསམ་པ་རྒྱུད་ལ་སྐྱེས་ནས་ནམ་མཁའི་ཁྲོ་བོ་ཆེན་པོ་ཡང་མཐོང་བར་གྱུར་ཏེ། ཕྱག་ན་རྡོ་རྗེ་ལ་མྱུར་བའི་ཚུལ་གྱིས་སྐྱབས་སུ་འགྲོ་བའི་ཚིག་བརྗོད་པ་ནི། གཙོ་བོ་བདག་ཅག་རྣམས་ལ་བསྐྱབ་ཏུ་གསོལ། འཇིགས་པ་ཆེན་པོ་འདི་ལས་
བསྐྱབ་ཏུ་གསོལ་ཞེས་སྨྲས་པ་དང་། ཕྱག་ན་རྡོ་རྗེས་དེ་ཉིད་ལ་སོང་ཞེས་པའི་ལེན་བརྗོད་ནས་སྐྱབས་སུ་སོང་ངོ་། །དེ་ནས་དུས་དེའི་དུས་སུ་ཞུ་བ་ཕྱག་ན་རྡོ་རྗེ་བདག་གིས་ཐོས། དུས་གཅིག་ན་ཐོས་པའོ། །འོ་ན་གང་ལས་ཐོས་ཤེ་ན། བཅོམ་ལྡན་འདས་བདུད་རྣམ་པར་འཇོམས་པའི་
ཕྱག་ན་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་པའི་བཅོམ་ལྡན་འདས་ལའོ། །གནས་གང་དུ་ཞེ་ན། འདོད་པ་ཁམས་ཀྱི་རྩེ་མོ་གཟུགས་ཀྱི་ཁམས་ཀྱི་ཐ་མ་སྟེ། གཞན་འཕྲུལ་དབང་བྱེད་ཀྱི་གནས་སུའོ། །འཁོར་གང་དང་ལྡན་ཞེ་ན། ས་བླ་ས་སྟེང་། ས་འོག་གི་གདུག་པ་ཅན་
རྣམས་དང་ཐབས་ཅིག་ཏུ་བཞུགས་སོ། །འོ་ན་རྒྱུ་དེ་རྣམས་དང་ལྷན་ཅིག་ཏུ་བཞུགས་ཤེ་ན། འདས་པའི་སངས་རྒྱས་མར་མེ་མཛད་ལ་སོགས་པ་གང་གཱའི་ཀླུང་གི་བྱེ་མ་དང་མཉམ་པ་ཇི་སྙེད་ཅིག་བཞུགས་པ་རྣམས་ཀྱིས་བྱང་ཆུབ་ཏུ་སེམས་སྐྱེད་པར་མཛད་པའི་རྗེས་ལ། མ་འོངས་པར་
ལུང་སྟོན་པར་མཛད་དེ། ཁྱོད་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བ་མི་མཇེད་དུ་འབྱུང་ངོ་ཞེས་ལུང་བསྟན་ནས ། གདུག་པ་ཅན་རྣམ་པ་འདི་གསུམ་ཐུལ་ཅིག་ཅེས་གནང་བ་སྦྱིན་པས་ན། གནོད་སྦྱིན་གྱི་སྡེ་དཔོན་དང་བཅས་པ་ཕམ་པར་བྱེད་པ་དང་། བདུད་ཀྱི་སྡེ་དཔོན་དང་བཅས་པ་

49-1-232b

ཕམ་པར་བྱེད་པ། ཀླུའི་སྡེ་དཔོན་དང་བཅས་པ་ཕམ་པར་བྱེད་པའི་དབྱིངས་དང་ཡེ་ཤེས་གཉིས་སུ་མེད་པའི་ཕྱག་ན་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་པའོ། །དེའི་ཕྱིར་དུས་གསུམ་གྱི་སངས་རྒྱས་འདས་པས་བྱིན་གྱིས་བརླབས་པ། ད་ལྟར་བྱུང་བས་བྱིན་གྱིས་རློབ་པ། མ་འོངས་
པས་བྱིན་གྱིས་བརླབ་པར་འགྱུར་བ་འདི་ལག་ན་རྡོ་རྗེས་ཟུང་ཤིག་ཅེས་བཀའ་སྩལ་པའོ། །དེ་ལྟར་བཅོམ་ལྡན་འདས་ཀྱིས་བསྐུལ་ནས། ཕྱག་ན་རྡོ་རྗེས་གསོལ་བ་ཞེས་བྱ་བ་ནི་གུས་པའི་ཚུལ་གྱིས་བསྟོད། གནོད་སྦྱིན་སྟོང་ཕྲག་བྱེ་བ་དཔག་ཏུ་མེད་པའི་ཚོགས་ཀྱིས་ཡོངས་སུ་བསྐོར་
བ། མཆེ་བ་གཙིགས་པ་དང་། འཚམ་པ་ཞེས་བྱ་བ་ནི་མཆེ་བ་ནི་ཉོན་མོངས་པ་ཅན་དང་། ཉོན་མོངས་པ་ཅན་མ་ཡིན་པ་གཅོད་པ་སྟེ། མཚམས་ནི་གཡོ་བའོ། །ཡང་ན་གདུག་པ་ཅན་ལའོ། །དེའི་དོན་ནི་སྒྲིབ་པ་རྣམ་པ་གཉིས་རྩད་ནས་གཅོད་ཅིང་ཐུགས་རྗེས་འགྲོ་བའི་དོན་ལ་སྤྱོད་པའོ། །མིག་
མེ་མདག་གི་ཕུང་པོ་འདྲ་བ་ཞེས་བྱ་བ་ནི། མིག་ནི་ཤེས་རབ་པོ། །དམར་བ་ནི་ཆགས་པའོ། །ཡང་ན་གདུག་པ་ཅན་སྲེག་པར་བྱེད་པའི་སྤྱན་ནོ། །དེའི་དོན་ནི་མ་རིག་པ་འཇོམས་པའོ། །ཤེས་རབ་མེ་མདག་གི་ཕུང་པོ་འདྲ་བ་ནི་ཡེ་ཤེས་ཆེན་པོ་རང་འབར་བའོ། །དབུགས་ནི་ཐུགས་རྗེའོ། །མེ་ལྕེ་ནི་སྨིན་
པར་བྱེད་པ་སྟེ། གཞན་སྨིན་པར་བྱེད་པའོ། །ཡང་ན་འཇིགས་པའི་ང་རོ་ནི་ཧཱུྃ་ངོ་། །སྒྲ་ནི་ཕྱིར་སྒྲོགས་པ་སྟེ། དབུགས་ནི་ཕྱིར་འཕྲོ་བའོ། །དེ་ནི་མེ་ལྕེ་བཞིན་འབར་ཞིང་གདུག་པ་ཅན་སྲེག་པར་མཛད་པའོ། །དེའི་དོན་ནི་དབུགས་ནི་རྒྱུན་མི་འཆད་པའི་ཡེ་ཤེས་སོ། །མེ་ལྟར་འབར་བ་ནི་གསལ་
བའོ། །འཇིགས་པ་ནི་འཇིགས་པ་ཐམས་ཅད་དོ། །ང་རོ་ཅན་ནི་དབུགས་འབྱིན་པ་སྟེ། འཇིགས་པ་ཐམས་ཅད་ལས་ཐར་པར་བྱེད་པའོ། །དེ་བས་ན་འདོད་ཆགས་ཀྱི་དབུགས་འབྱིན་པ་ལ་དེ་སྐད་བྱའོ། །འོ་ན་འབྲས་བུ་ཅི་ཞེ་ན། སྨིན་མ་ཁྲོ་གཉེར་བསྡུས་པ་ཞེས་བྱ་བ་སྟེ། སྐུ་གསུམ་གྱིས་
འགྲོ་བའི་དོན་བྱེད་པ་དང་ལྡན་པ་སྟེ། རྣམ་པར་དག་ཅིང་སྐུ་གསུམ་གྱི་འབྲས་བུ་དང་ལྡན་པ་ལ་བསྟོད་པའོ། །པདྨ་དང་ཆུ་ལྷས་ལག་པ་དང་དཔུང་པ་བརྒྱན་པ་ཞེས་བྱ་བ་ནི་སྦྲུལ་དཀར་པོས་སོ། །ནོར་རྒྱས་དང་དུང་སྐྱོང་གིས་དབུ་ལ་བརྒྱན་ཞེས་བྱ་བ་ནི་ཅོད་པན་བྱས་པའོ། །སྦྲུལ་རིན་པོ་ཆེ་

49-1-233a

འབར་བ་ཅོད་པན་ཐོགས་པ་ནི་སྦྲུལ་དེ་བཞི་ལ་རྣ་བའི་སྟེང་ན་རིན་པོ་ཆེ་འབར་བའི་འོད་དང་བཅས་པ་ཡོད་པའོ། །དེ་ཡང་ཅོན་པན་བྱས་པའི་ནོར་བུ་ནི་ཡིད་བཞིན་གྱི་ནོར་བུ་འབར་བའོ། །གཞན་གྱི་ནོར་བུ་ནི་མཐོན་ཀ་དང་། པདྨ་རཱ་ག་དང་། ཨིནྡྲ་ནཱི་ལའོ། །ཀླུ་དགའ་བོ་དང་ཉེ་དགའ་བོ་
འབར་བས་སྙན་ཆ་བྱས་པ་ཞེས་བྱ་བ་ནི་སྦྲུལ་དམར་པོ་གཉིས་སོ། །འབར་བ་ནི་སྤྱི་གཙུག་ན་པདྨ་རཱ་ག་འབར་བའོ། །རྐང་པས་སྦྲུལ་གདུག་པ་འབར་བ་མནན་ཞིང་ཟ་བ། ཀླུའི་རྒྱལ་པོ་འདབ་བཟངས་སྐ་རགས་སུ་བཅིངས་ཤིང་། ཀླུ་ནག་པོ་སེ་རལ་ཁར་ཐོགས་པ་ཞེས་བྱ་བ་ནི་སྟོབས་ཀྱི་རྒྱུ་
དང་། རིགས་ལྡན་གཉིས་ནག་པོ་ཁར་བཅུག་ནས་སེ་རལ་ཁར་དྲངས་པ་སྟེ། ཁ་ནས་དུག་ནག་པོ་འཕྲོ་བ་སྤྱི་བོ་ན་ཨིནྡྲ་ནཱི་ལའི་ནོར་བུ་ལྗང་ནག་འབར་བའོ། །དེས་ནི་ཞེ་སྡང་ཅན་འདུལ་བར་བྱེད་པའི་མཚན་མའོ། །བཞིན་རྒྱས་པ་ཡ་སོས་མ་མཆུ་མནན་པ་ཞེས་བྱ་བ་ནི་ཐབས་དང་ཤེས་རབ་དབྱེར་
མེད་པའམ། དབྱིངས་དང་ཡེ་ཤེས་གཉིས་སུ་མེད་པ་སྟེ། རྒྱས་པས་ནི་བདེ་བ་ཆེན་པོའི་ཡེ་ཤེས་ཀྱི་རང་བཞིན་དུ་རྒྱས་པའོ། །དེའི་དོན་ནི་འདོད་ཆགས་ཅན་འདུལ་བར་བྱེད་པའི་མཚན་མ་དང་ལྡན་པའོ། །གཤིན་རྗེའི་ཆ་བྱད་ནི་སྐུ་ཆེ་བ་དང་། ཤིན་ཏུ་ཁྲོས་པའོ། །དེ་དང་ལྡན་པའི་བཅོམ་ལྡན་
འདས་དེ་ནི་ཕྱིན་ཅི་ལོག་ལ་ཞུགས་པ་ལ་ཁྲོས་ཤིང་ལྗགས་འཁྱུག་པ་དང་། གསུས་པ་འཁྱིལ་ཞིང་སྦྲུལ་ཟ་བར་སྟོན་པའོ། །དེའི་དོན་ནི་གཤིན་རྗེ་ནི་ཕྱིན་ཅི་ལོག་གི་གང་ཟག་ལ་བྱ་ལ། དེ་ལ་ཤེས་རབ་ཀྱི་སྣང་བ་སྟོན་པར་བྱེད་པས་ན་གསུང་གི་སྒོ་ནས་སྣང་བ་བསྐྱེད་པའི་ལོག་གོ། །གསུས་
པ་ནི་ཡངས་པ་ཡིན་ལ། སྦྲུལ་ནི་གཏི་མུག་གི་རང་བཞིན་ནོ། །དེ་འཇོམས་པར་བྱེད་པ་ལ་ཟ་བ་ཞེས་བྱ་བའོ། །དེས་ནི་གཏི་མུག་ཅན་འདུལ་བའོ། །དེ་ལྟར་དུག་གསུམ་འདུལ་བར་བྱེད་པའི་མཚན་མ་དང་ལྡན་པའི་བསྟོད་པའོ། །འོ་ན་ཡོན་ཏན་གྱི་ཁྱད་པར་ཅི་ཞེ་ན། རྒྱ་མཚོའི་ཟབས་སུ་
དཔག་ཚད་བརྒྱད་ཁྲི་བཞི་སྟོང་ཡོད་པ་རྐང་པའི་པུས་མོར་ཕྱིན་པ་ཞེས་བྱ་བ་ནི་སྐུའི་ཚད་སྟོན་པ་སྟེ། ཤིན་ཏུ་ཆེ་ཞེས་བྱ་བའི་དོན་ཏོ། །དབང་པོ་དང་ཉི་མའི་སྟེང་ན་བཞུགས་པ་ཞེས་བྱ་བ་ནི། དབང་པོ་ནི་འདོད་པའི་ཁམས་ཀྱི་བརྒྱ་བྱིན་དང་། གཟུགས་ཀྱི་ཁམས་ཀྱི་ཚངས་པ་སྟེ། ཁ་སྦུབ་ཏུ་

49-1-233b

བསྣོལ་བའི་ཚངས་པའི་ཕྲག་པའི་སྟེང་ན་ཟླ་བ་ཉ་གང་བ་ལྟ་བུའོ། །བརྒྱ་བྱིན་གྱི་ཕྲག་པའི་སྟེང་ན་ཉི་མ་སྟེ། དེ་གཉིས་ཀྱེ་སྟེང་ན་བཞུགས་པ་ནི་བརྐྱང་བསྐུམ་དུ་བཞུགས་པའོ། །ལག་པ་བརྡབས་པའི་སྒྲས་འཇིགས་པར་བྱེད་པ་ཞེས་བྱ་བ་ནི། སྟོབས་ཕུལ་དུ་བྱུང་བ་སྟེ། ལག་པ་བརྡབས་པས་
འཇིག་རྟེན་གྱི་ཁམས་རློག་པར་བྱེད་པའི་སྟོབས་མངའ་བའོ། །ཨ་ལ་ལ་ཞེས་བྱ་བ་ནི་སྟོང་པ་ཉིད་ལ་ངོ་མཚར་བའམ། གདུལ་བྱ་ལ་ངོ་མཚར་བའི་སྒྲ་བསྒྲགས་པས་སྐྲག་པར་བྱེད་པ་ཞེས་བྱ་བ་ནི་ས་བླ་དང་ས་སྟེང་ངོ་། །ཀླུ་རྣམས་རློག་པར་བྱེད་ཅེས་པ་ནི་ས་འོག་ན་གནས་པའོ། །དེ་རྣམས་
གད་མོ་དྲག་པོ་སྒྲོགས་པའི་བཅོམ་ལྡན་འདས་སྐུ་དེ་དང་ལྡན་པའི་གད་རྒྱངས་ཆེན་པོ་དགོད་པ་དེས་རློག་པར་བྱེད་པའོ། །འོ་ན་ཕྲིན་ལས་ནི་མི་མངའ་འམ་ཞེ་ན། ཀུན་དུ་འཁྲུགས་པར་བྱེད་ཅིང་གཤིན་རྗེའི་གཟུགས་ཅན་ནོ། །ཁམས་གསུམ་འཇིགས་པར་བྱེད་པ། ཀླུ་རྣམ་འདུལ་བར་བྱེད་པ་ཞེས་བྱ་
བ་ནི་ཀུན་དུ་འཁྲུགས་པར་བྱེད་པའི་སྐུ་དེ་ལས་འོད་ཟེར་ཀུན་དུ་འཁྲུགས་ཤིང་འཕྲོ་བ་དེ་ལས་སྤྲུལ་པ་དཔག་ཏུ་མེད་པ་ཕྱག་ན་རྡོ་རྗེ་ལྟ་བུའི་སྤྲུལ་པ་འཕྲོ་བས་ན་གཤིན་རྗེའི་གཟུགས་ཅན། ས་འོག་ས་སྟེངས་ས་བླ་གསུམ་འཇིགས་པར་བྱེད་པས་ཁམས་གསུམ་འཇིགས་པར་བྱེད་པའོ། །དེ་ཡང་
གདུལ་བྱ་རྣམ་པ་གསུམ་འདུལ་བར་བྱེད་པས་ན། ཀླུ་རྣམས་འདུལ་བར་བྱེད་པའོ། །དེའི་ཕྱིར་དེ་ལ་ཕྱག་འཚལ་ལོ་ཞེས་བྱ་བ་ནི། བཅོམ་ལྡན་འདས་དེ་ལ་བྱང་ཆུབ་སེམས་དཔའ་ཕྱག་ན་རྡོ་རྗེས་ཕྱག་འཚལ་ནས་སྤོབས་པ་དང་ལྡན་པའི་ཕྱིར་ན་ཕྱག་འཚལ་ལོ་ཞེས་པའི་དོན་ཏོ། །དེ་ལ་དགོས་པ་ཅི་
ཡོད་ཅེ་ན། བྱང་ཆུབ་སེམས་དཔའ་ཕྱག་ན་རྡོ་རྗེས་བསྟོད་ནས་གསུང་དུ་གསོལ་ཞེས་སྨྲས་པའོ། །དེ་ནས་བཅོམ་ལྡན་འདས་གཞན་འཕྲུལ་དབང་བྱེད་ཀྱི་གནས་ཀྱི་བདུད་ཀྱི་ཁང་པ་དེ་ཉིད་དུ་ཏིང་ངེ་འཛིན་ལ་བཞུགས་པ་ནི། དེ་ནས་ནམ་མཁའ་དེ་ཉིད་ལ་གཞལ་ཡས་ཁང་དང་ཞེས་བྱ་བ་ནི་ཏིང་ངེ་འཛིན་གྱི་
འཕྲུལ་པས་བདུད་ཀྱི་ཁང་པ་དེ་ཉིད་གཞལ་ཡས་ཁང་དུ་སྤྲུལ་ཏེ། གྲུ་བཞི་པ་ལ་སྒོ་བཞི་པ། །འཁོར་ལོ་རྩིབས་བཞིས་རྣམ་པར་མཛེས། །དྲ་བ་དྲ་བ་ཕྱེད་པ་དང་། །བདུད་རྣམས་འདུལ་བར་ཏྭ་ར་ནའོ། །དྷརྨ་དྷཱ་ཏུ་ནམ་མཁའི་དཀྱིལ། །དུར་ཁྲོད་འཇིགས་པའི་དབུས་སུའོ། །འཁོར་ལོ་ཆེན་པོའི་

49-1-234a

ཏིང་ངེ་འཛིན་དང་ལྡན་པའི་དྲག་པོ་ཆེན་པོས་འཁོར་བསྡུས་ནས་ཞེས་བྱ་བ་ནི། གཞལ་ཡས་ཁང་དེའི་དབུས་སུ་བཅོམ་ལྡན་འདས་ཕྱག་ན་རྡོ་རྗེ་ཞལ་གསུམ་པ་སྟེ། འདོད་པ་དང་གཟུགས་དབང་དུ་སྡུད་པའི་ཞལ་གཡས་གཡོན་དཀར་པོ་དང་དམར་སེར་དབུས་མཐིང་ནག་གཏི་མུག་ཅན་
འདུལ་བའི་ཞལ་ལོ། །ཡང་ན་ཁྲོས་པ་དང་། བཞད་པ་དང་། གཙིགས་པས་དྲག་པོ་གསུམ་འདུལ་བར་བྱེད་པ། ཡང་ན་གཞན་འཕྲུལ་དབང་བྱེད་ཀྱིས་བདུད་ཀྱི་གཙོ་བོའི་ཆ་ལུགས་འཛིན་པས་བདུད་དབང་དུ་སྡུད་པའི་རྟགས་སོ། །ཕྱག་དྲུག་ནི་རྡོ་རྗེ་རྩེ་ལྔ་པ་དང་། སྡིགས་མཛུབ་དང་། བར་མ་
གཉིས་ཐལ་མོ་རྡེབས་པ། ཐ་མ་གཉིས་སྦྲུལ་ཟ་བ། ཞབས་བཞིས་ཉི་ཟླ་དང་ཚངས་པ་དང་། བརྒྱ་བྱིན་མནན་པ། སྟག་གི་ཤམ་ཐབས་དང་། རིགས་བཞིའི་ཀླུས་སྐུ་ལ་བརྒྱན་པའོ། །གང་གི་བསྟོད་པའི་ཡོན་ཏན་སྐུ་ལ་རྫོགས་པའི་བཅོམ་ལྡན་འདས་དང་ལྷན་ཅིག་ཏུ་ལྷ་མོ་མཛེས་ལྡན་མ་མཐིང་ནག་གྲི་
གུག་དང་ཐོད་པ་བསྣམས་ཤིང་། སྐུ་ལ་འཁྱུད་པ་དང་ལྷན་ཅིག་ཏུ་གནས་ཏེ། བདུད་འདུལ་བའི་ཚུལ་ཅན་ནོ། །ཤར་ཕྱོགས་སུ་དྲི་ཟའི་རིགས་ཀྱི་གནོད་སྦྱིན་འདུལ་བར་བྱེད་དེ། དྲི་ཟ་ཕོ་མོའི་སྟེང་དུ་ཁྲོ་བོ་བདུད་ལས་རྒྱལ་བར་བྱེད་པ་ཞེས་བྱ་བ་སྐུ་མདོག་དཀར་པོ། ཕྱག་བཞི་པ། རྡོ་རྗེ་རྩེ་ལྔ་པ་དང་།
ཁ་ཊྭཱཾ་ག་འཛིན་པ། འོག་མ་གཉིས་པ་སྡིགས་མཛུབ་བཅས་ཤིང་ཡུམ་ལ་འཁྱུད་པ། ལྷ་མོ་འོད་ཟེར་ཅན་སྐུ་མདོག་དཀར་མོ་སྤུ་གྲི་དང་ཐོད་པ་བསྣམས་ཤིང་གཡོན་ཕྱོགས་ནས་འཁྲིལ་བའོ། །ལྷོ་ཕྱོགས་སུ་གཤིན་རྗེའི་རིགས་ཀྱི་གནོད་སྦྱིན་འདུལ་བར་བྱེད་པ། གཤིན་རྗེ་ཕོ་མོའི་སྟེང་ན་ཁྲོ་བོ་གཟི་
བརྗིད་འབར་བ་ཞེས་བྱ་བ་མདོག་སེར་པོ། ཕྱག་བཞི་པ་རྡོ་རྗེ་དང་དབྱུག་ཏོ་འཛིན་པ། འོག་མ་གཉིས་པ་སྡིགས་མཛུབ་བཅས་ཤིང་ཡུམ་ལ་འཁྱུད་པ། ལྷ་མོ་མདངས་ཅན་མ་སྐུ་མདོག་སེར་མོ་ཟངས་གྲི་དང་ཐོད་པ་བསྣམས་ཤིང་གཡོན་ཕྱོགས་སུ་འཁྲིལ་བའོ། །ནུབ་ཕྱོགས་སུ་ཆུ་ལྷའི་རིགས་ཀྱི་གནོད་
སྦྱིན་འདུལ་བར་བྱེད་པ་ཆུ་ལྷ་ཕོ་མོའི་སྟེང་དུ་ཁྲོ་བོ་རྔམ་པའི་སྒྲ་སྒྲོགས་ཞེས་བྱ་བ་མདོག་དམར་པོ། ཕྱག་བཞི་པ་རྡོ་རྗེ་དང་སྦྲུལ་ཞགས་འཛིན་པ། འོག་མ་གཉིས་པ་སྡིགས་མཛུབ་བཅངས་ཤིང་ཡུམ་ལ་འཁྱུད་པ། ལྷ་མོ་སྒྲ་དབྱངས་ཅན་སྐུ་མདོག་དམར་མོ་སྟ་རེ་དང་ཐོད་པ་བསྣམས་ཤིང་

49-1-234b

གཡོན་ཕྱོགས་ནས་འཁྲིལ་བའོ། །བྱང་ཕྱོགས་སུ་གནོད་སྦྱིན་གྱི་རིགས་ཀྱིས་གནོད་སྦྱིན་འདུལ་བར་བྱེད་པའི་བགེགས་ཀྱི་རྒྱལ་པོ་ཕོ་མོ་བསྣོལ་བའི་སྟེང་ན་ཁྲོ་བོ་བདུད་རྩི་འཁྱིལ་པ་ཞེས་བྱ་བ་སྐུ་མདོག་ལྗང་གུ་ཕྱག་བཞི་པ། རྡོ་རྗེ་དང་བེ་ཅོན་བསྣམས་པ། ཐོག་མ་གཉིས་སྡིགས་མཛུབ་བཅངས་
ཤིང་ཡུམ་ལ་འཁྱུད་པ། ལྷ་མོ་རླུང་འབྱིན་མ་སྐུ་མདོག་ལྗང་གུ་འཁོར་ལོ་དང་ཐོད་པ་བསྣམས་ཤིང་། གཡོན་ཕྱོགས་ནས་གཙོ་བོ་ལ་འཁྲིལ་བའོ། །ཤར་ཕྱོགས་ཀྱི་སྒོར་སྒོ་བ་གཉིས་ཏེ། ལྕགས་ཀྱུ་མདོག་དཀར་པོ་ཟླ་བའི་སྟེང་ན་ཕྱིར་བརྐྱང་ཞིང་། ལྕགས་ཀྱུས་འདྲེན་ཞིང་སྡིགས་
མཛུབ་མཛད་པའོ། །ལྷོ་ཕྱོགས་ཀྱི་སྒོར་སྒོ་བ་གཉིས་ཏེ། ཞགས་པ་གསེར་མདོག་སེར་པོ། ཟླ་བའི་སྟེང་ན་ཕྱིར་བརྐྱང་ཞིང་། ཞགས་པ་འཕེན་ཞིང་སྡིགས་མཛུབ་མཛད་པའོ། །ནུབ་ཕྱོགས་ཀྱི་སྒོར་སྒོ་བ་གཉིས་ཏེ། ལྕགས་སྒྲོག་མདོག་དམར་པོ་ཟླ་བའི་སྟེང་ན་ཕྱིར་བརྐྱང་ཞིང་། ལྕགས་སྒྲོག་
བསྣམས་ཤིང་སྡིགས་མཛུབ་མཛད་པའོ། །བྱང་ཕྱོགས་ཀྱི་སྒོར་སྒོ་བ་གཉིས་ཏེ། དྲིལ་བུ་མདོག་ལྗང་གུ་ཟླ་བའི་སྟེང་ན་ཕྱིར་བརྐྱང་ཞིང་རྡོ་རྗེ་དང་དྲིལ་བུ་སྡིགས་མཛུབ་བསྣོལ་བའོ། །དེ་ལྟར་དཀྱིལ་འཁོར་རབ་ཏུ་སྤྲུལ་ནས་གདུག་པ་ཅན་རྣམས་དབང་དུ་བསྡུས་ནས་གཙོ་བོ་འཁོར་ལོ་ཆེན་པོ་ལ་
གདུག་པ་འདུལ་ཕྱིར་བསྟོད་པ་ནི། ཕྱག་ན་རྡོ་རྗེ་དྲག་པོ་ཆེ། །རྡོ་རྗེ་ཁྲོ་བོ་དྲག་ཆེན་འཇོམས། །རྡོ་རྗེ་མི་ཐུབ་འཇིགས་བྱེད་ཆེ། །རྡོ་རྗེ་གཟི་བརྗིད་སྔགས་ཀྱི་གཙོ། །རྡོ་རྗེ་ཕྲིན་ལས་ཀུན་དོན་མཛད། །ཐབས་འདུལ་འཁོར་ལོ་ཆེ་སྐུ་ལ། །འབྱུང་བ་ལྔ་ཡི་བདག་ཉིད་ཆེ། །མཛེས་ལྡན་འོད་ཟེར་
ཅན་དང་ནི། །མདངས་ཅན་སྒྲ་དབྱངས་རླུང་འབྱིན་ཏེ། །སྐྱེད་བྱེད་ལས་ཀུན་སྒྲུབ་པ་ལ། །འགུགས་ཤིང་སྡུད་དང་སྡོམ་ཞིང་འཛིན། །མཐའ་བརྟུལ་ལས་རྣམས་གྲུབ་པ་ལ། །ཞེས་བྱ་བས་བསྐྱེད་པའི་རིམ་པའི་དཀྱིལ་འཁོར་གྱི་དབང་དུ་བྱས་ནས་བསྟོད་པའོ། །ད་ནི་རྫོགས་པའི་རིམ་པ་
དེ་ཁོ་ན་ཉིད་དབང་དུ་བྱས་ནས་བསྟོད་པ་ནི། ཐིག་ལེའི་རང་བཞིན་མི་ཤིགས་ལ། །ཁ་སྦྱོར་ཉི་ཟླའི་འཕྲོ་འདུ་ལས། །བགེགས་རིགས་སྟོང་ཕྲག་འཇོམས་མཛད་པ། །འཁོར་ལོའི་བདག་པོ་ཁྱོད་ལ་བསྟོད། །ཅེས་བྱ་བ་ལ་བདག་པོ་ནི་བཅོམ་ལྡན་འདས་ཀྱི་སྐུ་སྟེ། ལྷའི་བདག་ཉིད་དོ། །

49-1-235a

འཁོར་ལོ་ནི་སྤྲུལ་པ་དང་། ཆོས་དང་། ལོངས་སྤྱོད་དང་། བདེ་བ་ཆེན་པོའོ། །ཐིག་ལེ་ནི་བྱང་ཆུབ་ཀྱི་སེམས་ཞུ་བའོ། །རང་བཞིན་ནི་དེ་ཁོ་ན་ཉིད་ཀྱི་རང་བཞིན་མི་རྟོག་པའོ། །མི་ཤིགས་པ་ནི་དབྱེར་མི་ཕྱེད་པའམ། ཐ་མི་དད་པ་སྟེ། དེ་བས་ན་ཐབས་ཤེས་རབ་དབྱེར་མེད་ཅེས་བྱ་བའི་
དོན་ཏོ། །དེ་རང་བཞིན་ཇི་ལྟར་རྟོགས་པར་བྱ་ཞེ་ན། ཁ་སྦྱོར་ཞེས་བྱ་བ་ནི་འཁོར་ལོའོ། །ཉི་ཟླ་ཞེས་བྱ་བ་ནི་ལ་ལ་ནཱ་དང་ར་ས་ནཱའོ། །འཕྲོ་འདུ་ཞེས་བྱ་བ་ནི་བསྲེག་པ་དང་། གསོ་བ་དང་། སྲོག་དང་གནད་དུ་འཕྲོ་ཞིང་འདུ་བའོ། །དགོས་པ་ཅི་ཞེ་ན། བགེགས་རིགས་སྟོང་ཕྲག་འཇོམས་མཛད་པ། །
ཞེས་བྱ་བ་ནི་རྣམ་པར་རྟོག་པ་འཇོམས་པ་ལ་བྱའོ། །ཡང་ན་འཁོར་ལོ་ནི་རྣམ་པ་བཞིའོ། །བདག་པོ་ནི་ཕྱག་མཚན་རྡོ་རྗེའི་རང་བཞིན་ཏེ། སྲོག་དང་རྩོལ་བའི་རང་བཞིན་ནོ། །དེའི་ཕྱིར་མི་ཤིགས་རྡོ་རྗེ་ཞེས་བྱ་བའི་དོན་ཏོ། །ཁ་སྦྱོར་ནི་རྡོ་རྗེའི་ར་དང་བུམ་པའི་རང་བཞིན་འཁོར་ལོ་བཞིའོ། །དེ་ཡང་ཐབས་
ཤེས་རབ་ཀྱི་རང་བཞིན་ཏེ། ཉི་ཟླ་ནམ་པ་གཉིས་སོ། །འཕྲོ་འདུའི་ཚུལ་གྱིས་ནི་བསྲེག་པ་དང་། གསོ་བ་དང་སྤྲོ་བ་དང་བསྡུ་བའོ། །ཇི་ལྟར་ཞེ་ན། བགེགས་རིགས་སྟོང་ཕྲག་ཞི་བར་མཛད་པའི་ཕྱིར། རྣམ་པར་རྟོག་པ་ཐམས་ཅད་སྤངས་ཤིང་ཞི་བས་ན་བགེགས་ལ་སོགས་པ་ཞི་བའོ། །དེ་བས་ན་ཕྱིའི་
བགེགས་དང་། ནང་གི་བགེགས་ཞི་བར་མཛད་ནས་ཕན་པ་བསྐྱེད་པའི་ཕྱིར་དགོས་པ་ནི་དེའོ། །ཡང་གསུངས་པ། ས་བོན་རབ་ཏུ་འབར་བ་ཡིས། །ཐབས་དང་ཤེས་རབ་བསྲེགས་གསོ་མཛད། །བདེ་ཆེན་རབ་ཏུ་གསོད་མཛད་པ། །སྡུག་བསྔལ་ཉོན་མོངས་འཇོམས་ལ་འདུད། །ཅེས་གསུངས་སོ། །
དེས་ནི་གོང་དང་ཡང་འབྲེལ་ལོ། །དེའི་དོན་ནི་འདིའོ། །བགེགས་ཇི་ལྟར་ཞི་བར་མཛད་ཅེ་ན། གཏོར་མས་ཞི་བར་མཛད་པའི་ཕྱིར། །ས་བོན་རབ་ཏུ་འབར་བ་ཡིས། །ཞེས་བྱའོ། །དེ་ལྟར་དཀྱིལ་འཁོར་གྱི་དེ་ཁོ་ན་ཉིད་བསྟན་ནས། གསང་སྔགས་སྟོན་པའི་སྒོ་ནས་འཁོར་རྣམས་ལ་དམ་བསྒྲག་
པ་ནི། ཏདྱ་ཐཱ་བྷོ་བྷོ་བཱན་ནཱ་ག་ཨ་དྷི་པ་ཏ་ཡེ། ཨི་དཾ་ནཱི་ལཱམྦ་ར་དྷ་ར་ཤ་རཱི་རཾ་བཛྲ་པཱ་ཎི་ཧྲྀ་ད་ཡ་ནི། ཡ་ས་མ་ཏི་ཀྲ་མ་ཏེ། ཨུཏྶཱ་ད་ནཾ་བྷ་བི་ཤུདྡྷི་ཞེས་བྱ་བ་སྟེ། འདི་ལྟ་སྟེ། ཀྱེ་ཀྱེ་བྲང་གིས་འགྲོ་བའི་ཀླུའི་བདག་པོ་ལ་སོགས་པ་རྣམས་འདི་ལས་འདའ་བར་མ་བྱེད་ཅིག །གང་ལས་ཤེ་ན། ཕྱག་ན་

49-1-235b

རྡོ་རྗེ་གོས་སྔོན་པོ་ཅན་གྱི་སྐུ་འཛིན་པའི་སྙིང་པོ་འདི་ལས་སོ། །འདས་ན་ཅི་ཞེ་ན། འདས་ན་བརླག་པར་འགྱུར་རོ། །འདས་པར་གྱུར་ན་ཉེས་པ་ཇི་ལྟ་བུ་འབྱུང་ཞེ་ན། ཏདྱ་ཐཱ་བུདྡྷ་བུདྡྷ་བི་བུདྡྷ་མ་ཏི་ཀྲ་མ་ཏ་ཞེས་བྱ་བ་ནི་འདས་པ་དང་། ད་ལྟར་དང་། མ་འོངས་པའི་སངས་རྒྱས་རྣམས་ཀྱི་བཀའ་བཅག་
པས། ཧ་ར་ཧ་ར་ནཱ་ག་ནན། པྲ་ཧ་ར་པྲ་ཧ་ར་ནཱ་ག་ནན། ཚིནྡ་ཚིནྡ་ནཱ་ག་ཧྲྀ་ད་ཡ་ནི་བྷིནྡ་བྷིནྡ་ནཱ་ག་དྷ་མ་ནི། བཱི་སཱི་མཏྟ་ནཱ་ག་ཤ་རཱི་ཎི། བི་སྥོ་ཊ་ཡ་ནཱ་ག་ན་ཡ་ན་ནི། ནཱ་ག་བི་དར་ཎཱ་ཡ་ཧཱུཾ་ཕཊ། ནཱ་ག་ཀྲོ་དྷ་སཱ་དྷ་ནཱ་ཡ་ཕཊ། ཅེས་བྱ་བ་ནི་ས་འོག་ན་གནས་པ་རྣམས་ལ་གནོད་པ་མདོར་བསྟན་ཏེ། འདི་འདྲ་བ་འབྱུང་
བའོ། །ཀླུ་རྣམས་གདན་དུ་བྱས་ནས་ཟ་བ་དང་། མནན་ནས་གཙོ་བོ་ལ་སྟེར་བ་དང་། དབང་པོའི་རྟེན་གཅོད་པ་དང་། ལུས་བཅིང་བ་དང་། ཀླུའི་ལུས་དང་སྙིང་འདྲལ་བར་བྱེད་པ་དང་། ཀླུའི་ལུས་གཤོག་པ་དང་། ཀླུ་རྣམས་འཇོམས་པ་དང་། ཀླུ་ཁྲོ་བོས་རློག་པར་བྱེད་དོ། །དེའི་ལས་ལ་སྦྱར་བ་ནི། 
དཀྱིལ་འཁོར་གྲུ་གསུམ་པ་བསྒྲུབ་པའི་དཀྱིལ་འཁོར་གྱི་བྱང་དུ་བཅས་ཏེ། བསྒྲུབ་བྱའི་གཟུགས་སྤྲ་ཚིལ་ལམ་རྟེན་གྱི་ས་ལས་བྱས་ཏེ། དེ་ཡང་གྲུ་གསུམ་དུ་བཅུག་ནས་བདག་ཉིད་གོང་དུ་བསྟན་པའི་འཁོར་ལོ་ཆེན་པོ་བསྒོམས་ལ། སྒྲུབ་པའི་སྔགས་ལ་ལས་ཀྱི་སྔགས་དེ་རྣམས་བཏགས་ཏེ།  ཡུངས་
ཀར་སྦྲུ་བར་བྱས་ལ་ལས་བརྩམ་མོ། །དེ་ནི་ཕུཿལས་བསྐྱེད་ཅིང་། དགུག་གཞུག་བཅིང་བ་བྱ་ཞིང་ས་བོན་ཕུཿལ་ལས་བྱའོ། །དེ་ནས་མནན་ནོ། །ས་སྟེང་གི་གནོད་སྦྱིན་ལ་གནོད་པ་དོར་བ་ནི། ཏདྱ་ཐཱ། བི་དཱ་ར་ཎཱ་ཡ་ཧཱུཾ་ཕཊ་ཀྲོ་དྷ་སཱ་དྷ་ནཱ་ཡ་ཧཱུཾ་ཕཊ། ནཱི་ལཱཾ་བ་ས་ནཱ་ཡ་ཕཊ། ཨ་པྲ་ཏི་ཧ་ཏ་བ་ལ་ཡ་ཕཊ། 
བ་ལ་ཀྲ་མ་ཡ་ཕཊ། ཀྲྀ་ཏཱནྟ་ཡ་ཕཊ། ཀྲྀ་ཏཱནྟ་རཱུ་པ་ཡ་ཕཊ། རོ་ཥ་ཎཱ་ཡ་ཕཊ་ཅེས་བྱ་བ་ནི་ཁྲོ་མོ་འཇོམས་མ་དང་། སྒྲུབ་པའི་ཁྲོ་མོ་དང་། སྒྲུབ་པའི་གོས་སྔོན་མ་དང་། ཐོགས་མེད་སྟོབས་མའོ། །ཕ་རོལ་གནོན་མ་དང་། མཐར་བྱེད་གནོན་མ་དང་། མཐར་གཟུགས་གནོན་པ་དང་། གཏུམ་ཆེན་
གནོན་པའོ། །ཡཀྵ་ཨ་པ་མྨཱ་ར་ཕཊ་ཅེས་བྱ་བ་ནི་གནོད་སྦྱིན་གྱིས་འགལ་བ་ནི་འདི་ལྟ་སྟེ། ཧ་ས་ཧ་ས། དྷ་ར་དྷ་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། ཞེས་བྱ་བ་ནི་བརྡེག་པ་དང་། འཇོམས་པ་དང་། གསོད་པ་དང་། གནོད་པར་བྱེད་པའོ། །དེའི་ལས་སྦྱོར་ནི། སྒྲུབ་པ་དང་འབྲེལ་བའི་ལས་

49-1-236a

སྦྱོར་གྱི་དཀྱིལ་འཁོར་བྱས་ཏེ། དེ་ཡང་གྲུ་གསུམ་མཛུབ་གང་བ་བྱས་ཏེ། སྤྲ་ཚིལ་ལས་གཟུགས་སོར་བརྒྱད་པ་སྙིང་གར་ཡི་གེ་ཀྵ་གཞུག་པར་བྱའོ། །འཁོར་གྱི་སྤྲུལ་པས་ཡུངས་ཀར་ལ་གསད་པའི་ལས་བྱའོ། །དེ་ནས་མནན་པའི་ལས་བྱའོ། །ཏདྱ་ཐཱ། བི་དཱ་ར་ཎ་ཡ་ཧཱུྃ་ཕཊ། 
ཀྲོ་དྷ་སཱ་དྷ་ཡ་ཕཊ། ནཱི་ལཱཾ་བ་ས་ན་ཡ་ཕཊ། ཨ་པྲ་ཏི་ཧ་ཏ་བ་ལ་ཡ་ཕཊ་ཅེས་བྱ་བ་ནི་ས་དང་། མེ་དང་ཆུ་དང་། རླུང་ངོ་། །སའི་ལྷ་མོས་ནི་རིན་པོ་ཆེ་དང་། པདྨ་དང་། ཀུ་མུ་ཏར་བྱིན་གྱིས་བརླབས་སོ། །མེའི་ལྷ་མོས་ནི་འོད་གསལ་བ་དང་། འབར་བ་དང་། འོད་གཞན་ཟིལ་གྱིས་མནོན་པར་མཛད་དོ། །
ཆུའི་ལྷ་མོས་ནི་འབབ་ཆུ་དང་། བདུད་རྩིའི་མཚོ་དང་། ཡིད་དུ་འོང་བའི་ཆར་དུ་ཕྱིན་གྱིས་བརླབས་སོ། །རླུང་གི་ལྷ་མོས་ནི་སྒྲ་སྙན་པ་དང་། ཡིད་དུ་འོང་བ་དང་། སིམ་པའི་ངད་དང་། སྤོས་ཀྱི་ངད་དུ་བྱས་ཏེ་བདུད་རྩིའི་ཆོ་འཕྲུལ་ལེགས་པར་བྱིན་གྱིས་བརླབས་པའོ། །པ་ར་ཀྲ་མ་ཡ་ཕཊ། ཀྲྀ་ཏཱནྟཱ་ཡ་ཧཱུྃ་
ཕཊ། ཀྲྀ་ཏཱནྟ་རཱུ་པཱ་ཡ་ཧཱུྃ་ཕཊ། རོ་ཥ་ཎཱ་ཡ་ཕཊ། ཅེས་བྱ་བ་ནི་ཚོར་བ་དང་། འདུ་ཤེས་དང་། འདུ་བྱེད་དང་། གཟུགས་དང་། རྣམ་པར་ཤེས་པའོ། །མཚན་མར་འཛིན་པ་ལ་བརྟེན་ནས་རྣམ་པར་འབྱེད་ཅིང་ཕྲག་དོག་ཞི་ནས་སྡུག་བསྔལ་ཅན་རྣམས་བདེ་བར་བྱིན་གྱིས་བརླབས་སོ། །མི་དགེ་བའི་
བསམ་པ་དང་ལྡན་པ་དགེ་བར་བྱིན་གྱིས་བརླབས་སོ། །གཟུགས་མི་སྡུག་པ་མཛེས་པར་བྱིན་གྱིས་བརླབས་སོ། །ཞེ་སྡང་དང་བཅས་པ་བྱམས་པ་དང་སྙིང་རྗེ་དང་ལྡན་པར་བྱིན་གྱིས་བརླབས་སོ། །རྣམ་པར་ཤེས་པ་ནི་གཏུམ་པའམ་འབར་བའོ། །གཟུགས་ནི་བརྟན་པའི་རང་བཞིན་ནོ། །
འདུ་ཤེས་ནི་མཚན་མར་འཛིན་པའི་བདག་ཉིད་ཅན་ནོ། །འདུ་བྱེད་ནི་ཐོགས་པ་མེད་པའམ་ཆགས་པ་དང་བྲལ་བའོ། །ཚོར་བ་ནི་བདེ་བའམ་རྒྱུད་ལ་སྲོག་འཛིན་པའི་རང་བཞིན་ནོ། །གཞན་རྒྱུད་སྲེག་པའི་ཁྲོ་བོའི་གཟུགས་མཐར་འཇོམས་པར་བྱེད་ཅིང་ཕ་རོལ་གནོན་པར་བྱེད་པས། ཏྲཱ་ས་
ནཱ་ཡ་ཕཊ། ཀུཥྨཎྜོཏྶཱ་ད་ནཱ་ཡ་ཕཊ། པྲེ་ཏ་པི་ཤཱ་ཙ་བི་ནཱ་ཤཱ་ཀ་རཱ་ཡ་ཕཊ། ཅེས་བྱ་བ་འཆིང་བ་དང་། འཛིན་པ་དང་། གསོད་པ་དང་། གནོན་པ་ལ་སོགས་པའི་གནོད་པར་འགྱུར་རོ། །དེའི་ལས་སྦྱོར་ནི་འདི་ལྟ་སྟེ། བདུད་རྣམས་དང་། གྲུལ་བུམ་རྣམས་དང་། སྲོག་འཕྲོག་པར་བྱེད་པའི་ཡི་དགས་

49-1-236b

རྣམས་དང་། ཤ་ཟ་ལ་སོགས་པ་བདུད་དང་བདུད་ཀྱི་རིགས་མ་རུངས་པ་རྣམས་དང་། དེ་རྣམས་བཀའ་ལས་འདས་ན་བརླག་པར་འགྱུར་ཏེ། ཧ་ས་ཧ་ས། དྷ་ར་དྷ་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ་ཞེས་བྱ་བ་སྟེ། འཆིང་བ་དང་འཛིན་པ་དང་། གསོད་པ་དང་གནོན་པ་ལ་སོགས་པའི་གནོད་པར་འགྱུར་རོ། །
དེའི་ལས་སྦྱོར་ནི་བསྐྲད་པ་དང་། གསད་པའོ། །བསྐྲད་པ་ནི་གྲོ་གའམ་ཤིང་ཤུན་ལ་གདོན་གྱི་གཟུགས་བརྙན་བྲིས་ཏེ། རྡོ་རྗེས་མེ་ལ་བསྲོ་ཞིང་བྱབ་པ་བྱའོ། །སྔགས་ཆེ་གེ་མོ་ཨུ་ཙ་ཏ་ཡ་ཕཊ་ཅེས་བརྗོད་ནས་བསྐྲད་པར་བྱའོ། །གསད་པ་ནི་སྒྲུབ་པའི་དཀྱིལ་འཁོར་དང་འབྲེལ་བའི་གསད་པའི་དཀྱིལ་
འཁོར་བྱས་ཏེ། གྲུ་གསུམ་པ་ནི་ནིམ་པའི་ཁུ་བས་བྱུགས་ཏེ། ནང་དུ་རྡོ་རྗེ་རྩེ་མོ་གྱེས་པ་ནག་པོ་བྲི་བར་བྱའོ། །ཟུར་གསུམ་ལ་ལྕགས་ཀྱུ་བྲི་བར་བྱའོ། །མཐའ་མ་ལ་མེ་རི་དང་གྲི་གུག་གིས་བསྐོར་བར་བྱའོ། །དེའི་གཟུགས་བརྙན་སོར་བརྒྱད་སྙིང་གར་བྲེ་དང་བཅས་པ་དེ་ར་བཅུག་ནས་ནིམ་པའི་
ཁུ་བ་དང་ཡུངས་ཀར་དང་ཕྱེ་མ་གསུམ་ལ་སྤྲུལ་པའི་ཁྲོ་བོར་བྱས་ལ་གསད་པའི་ལས་བྱའོ། །ཆས་གོས་ནི་ནག་པོར་བྱའོ། །བདག་ཉིད་བསྒོམ་པ་ནི་འཁོར་ལོ་ཆེན་པོ་ཇི་ལྟ་བ་བཞིན་དུ་གསལ་བར་བྱའོ། །ཕྱིར་གསད་ཐབས་སྦྱར་བ་ནི། སརྦ་བིགྷྣཱཾ་བི་ནཱ་ཤ་ཀ་རཱ་ཡ་ཕཊ། ཅེས་བྱ་བས་ལས་ཐམས་
ཅད་བྱའོ། །བསྟན་པ་འཇིག་པ་རྣམས་ལ་ནི། །གུ་ཧྱ་འདི་ནི་རབ་ཏུ་བསྟན། །རབས་ཆད་ཐོད་པའི་སྣོད་ནང་དུ། །ཛཿབརྒྱད་བཅས་པའི་གཟུགས་བརྙན་གཞུག །གྲུ་གསུམ་རྒྱ་གྲམ་སྐུ་གཟུགས་ཏེ། །བསྙེན་པ་རྫོགས་ནས་ལས་བརྩམ་མོ། །ཏདྱ་ཐཱ། བྷོ་བྷོ་བཱན་ནཱ་ག་ཨ་དྷི་པ་ཏ་ཡེ་ཨི་དཾ་
ནཱི་ལཱམྦ་ར་དྷ་ར་ཤ་རཱི་རཾ་བཛྲ་པཱ་ཎི་ཧྲྀ་ད་ཡཾ། ཡཿས་མ་ཏི་ཀྲ་མ་ཏེ་ཨུཏྶཱ་ད་ནཾ་བྷ་བི་ཤུདྡྷི་སརྦ་ཤ་ཏྲཱུཾ་བུདྡྷྱ་བི་ནཱ་ཤ་ཀ་རཱ་ཡ་ཕཊ། སརྦ་ཤ་ཏྲཱུཾ་དྷརྨཱ་ཡ། བི་ནཱ་ཤ་ཀ་རཱ་ཡ་ཕཊ། སརྦ་ཤ་ཏྲཱུན་སཾ་གྷ་ཏ་བི་ནཱ་ཤ་ཀ་རཱ་ཡཱ་ཕཊ། ཅེས་བཟླས་ཤིང་ལན་བདུན་བསྐོར་བས་བཟློག་པར་བྱའོ། །དེ་ཐིམ་པ་དང་ཤར་
ཕྱོགས་སུ་འདུག་སྟེ། གཏོར་མ་བཏང་ནས་བསླབ་པ་གསོ་སྟེ་གསོལ་བ་གདབ་པོ། །དེ་ནས་རྡོ་རྗེ་རྩེ་དགུ་པས་བརྡུང་བ་ནི། ཧ་ར་ཧ་ར། པྲ་ཧ་ར་པྲ་ཧ་ར། ཚིནྡ་ཚིནྡ། བྷིནྡ་བྷིནྡ། སརྦ་ཤ་ཏྲཱུན་བི་ནཱ་ཤ་ཀ་རཱ་ཡ་ཕཊ། ཅེས་བྱ་བས་བརྡེག་པར་བྱའོ། །དེ་ཡང་དབང་དུ་བསྡུ་བ་དང་།

49-1-237a

བསད་པ་དང་། འདྲེན་པ་དང་། བཅིང་བ་སྟེ། སྒོ་བའི་གཙོ་བོ་ལ་བརྟེན་པའི་སྔགས་སོ། །རྡོ་རྗེ་རྩེ་མོ་གཡས་རྩེས་བསྐོར་ཞིང་བརྡུད་བར་བྱའོ། །ཧ་ས་ཧ་ས། དྷ་ར་དྷ་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ་ཞེས་བྱ་བ་ནི། རྐང་པའི་འོག་ནས་མནན་ཞིང་བརྡེག །དགུག་དང་དབང་དུ་
བསྡུ་བ་དང་། །གསད་དང་མནན་པའི་ལས་ཡིན་ཏེ། །དཀྱིལ་འཁོར་ལྷའི་དབང་དུ་བྱས་པའི་སྒོ་མ་བཞིའི་ལས་སྦྱོར་རོ། །ཁྲོ་མོ་བཞིས་ནི་མཆོད་པ་འབུལ། །ཁྲོ་བོ་བཞི་ཡིས་ལས་བརྩམ་མོ། །མཆོད་རྟེན་བཅས་པའི་རི་རྩེར་སྦ། དེ་ཡིས་ལས་རྣམས་འགྲུབ་པར་འགྱུར། །འཁར་གཞོང་དཀར་
པོའི་སྣོད་ནང་དུ། །ནཱ་ག་བརྒྱད་ཀྱི་གཟུགས་བྱས་ཏེ། །འཕེལ་བའི་དུས་ཀྱི་ཚེས་གྲངས་ལ། །བདུད་རྩི་འོ་མས་དུས་གསུམ་མཆོད་། །བསྙེན་པ་འབུམ་དུ་ཐིམ་པ་དང་། །ལྟོ་འཕྱེའི་གཟུགས་ནང་མིང་གཞུག་བྱ། །མ་ཏི་པྲ་པ་ཏ་ཧ་ར་ཧ་ར་ནཱ་ག་ནཱན། པྲ་ཧ་ར་པྲ་ཧ་ར་ནཱ་ག་ནཱན། ཚིནྡ་ཆིནྡ་ནཱ་ག་ཧྲྀ་
ད་ཡ་ནི། བྷིནྡ་བྷིནྡ་ནཱ་ག་དྷ་མ་ནི། བྷི་སི་མ་ཏ་ནཱ་ག་ཤ་རཱི་ར་ཎི། བི་སྥོ་ཊ་ཡ་ནཱ་ག་ཡ་ན་ནི། ནཱ་ག་བི་དྷ་ར་ཎ་ཧཱུྃ་ཕཊ། ནཱ་ག་ཀྲོ་དྷ་སཱ་དྷ་ནཱ་ཡ་ཕཊ། ཀླུ་བརྒྱད་དྲག་པོའི་གསང་སྔགས་ཏེ། །བསྙེན་པ་གཙོ་བོའི་བསྙེན་པ་ལ། །ཕུ་བཏབ་འདི་ཡི་རྩ་སྔགས་ཏེ། །འབུམ་བཟླས་འདི་ཡི་ལས་བརྩམ་མོ། །བསྲུང་
བ་ལུས་ལ་གདགས་པར་བྱ། །ལས་ཐེབས་ལྟོ་འཕྱེའི་ཐོད་བཅུག་ལ། །བྱང་བལྟས་གདོལ་པ་ཅན་ལ་གཏད། །མཆོད་རྟེན་རབ་གནས་སྒྲུབ་སྔགས་སོ། །ཐོད་པ་བྱིན་རླབས་བསྐོར་བའི་སྔགས། །ཕུར་བུ་ཧཱུྃ་དང་ཕཊ་ཀྱིས་སོ། །ལྟ་འཕྱེ་ལ་ནི་ཀླུ་བརྒྱད་སྔགས། །འཁོར་ལོ་གཉིས་སུ་ཤེས་པས་
གཞུག །གདོན་སྔགས་གསལ་བྱེད་དབྱངས་ཡིག་བསྐོར། །བསྙེན་སྒྲུབ་ལས་རྣམས་རྫོགས་གྱུར་ན། །རང་འོག་ཐམས་ཅད་འདུ་བར་སྦའོ། །འདག་པ་ལ་སོགས་བྱིན་བརླབས་ནས། །གྲུ་གསུམ་རྡོ་རྗེས་མཚན་པའོ། །སུམ་བརྩེགས་དྲག་པོའི་མཆོད་རྟེན་ལ། །བུམ་པར་གདུང་དང་བཅས་
པས་མཆོད། །ཞག་གསུམ་བསྙེན་པ་རྫོགས་བྱས་ནས། །བྱིན་རླབས་ཅན་གྱིས་རབ་ཏུ་མནན། །ཀླུ་འདུལ་བ་ཡི་གཟུགས་བྱ་སྟེ། །གཙོ་བོའི་སྔགས་ཀྱིས་ལེགས་བསྒྲུབས་ནས། །གྲུ་གསུམ་གཟུགས་བརྙན་བཅས་པ་ནི། །གདམས་ངག་ལྡན་པས་ལེགས་པར་སྦ། །འཁོར་ལོ་གྲོ་ག་

49-1-237b

ཤིན་ཤུན་ལ། །ནིམ་པའི་ཆུ་ཡིས་བྲི་བ་ནི། །ཐིག་བཞི་ལིང་རྩེ་དགུ་པ་ལ། །མ་ནོར་སྔགས་རྣམས་དགོད་པ་ནི། །བི་དཱ་ར་ཎཱ་ཡ་ཧཱུྃ་ཕཊ། ཀྲོ་དྷ་སཱ་དྷ་ནཱ་ཡ་ཕཊ། ནཱི་ལཱཾ་བ་ས་ནཱ་ཡ་ཕཊ། ཨ་པྲ་ཏི་ཧ་ཏ་བ་ལཱ་ཡ་ཕཊ། ཧ་ས་ཧ་ས། དྷ་ར་དྷ་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ་ཧཱུྃ་ཕཊ་ཅེས་བྱ་བ་དགོད། པ་ར་ཀྲ་
མཱ་ཡ་ཕཊ། ཀྲྀ་ཏཱནྟཱ་ཡ་ཕཊ། ཀྲྀ་ཏཱན་ཏ་རཱུ་པཱ་ཡ་ཕཊ། རོ་ཥ་ཎཱ་ཡ་ཕཊ། ཧ་ར་ཧ་ར། པྲ་ཧ་ར་པྲ་ཧ་ར། ཚིནྡ་ཚིནྡ། བྷིནྡ་བྷིནྡ་ཧཱུཾ་ཕཊ། ཟུར་ལ་གཟུགས་དང་མིང་བཅས་ལ། །འཁྲུལ་འཁོར་གཙོ་བོའི་ལྟེ་བར་བསྐོར། །བི་དཱ་ར་ཎཱ་ཡ་ཕཊ། པ་ར་ཀྲ་མཱ་ཡ་ཕཊ། ཅེས་བྱ་བས། ས་ཡི་དཀྱིལ་འཁོར་སྟེང་གནས་པས། །ཞི་
ཞིང་སྦྱང་བའི་ལས་བསྐོར་རོ། །ཀྲོ་དྷ་སཱ་དྷ་ནཱ་ཡ་ཕཊ། ཀྲྀ་ཏཱནྟཱ་ཡ་ཕཊ། ཅེས་བྱ་བས། མེ་ཡི་གདན་ལ་རབ་བཞུགས་པས། །རྒྱས་ཤིང་སྨིན་པའི་ལས་བྱའོ། །དེ་གཉིས་རྩིབས་བཞིའི་འཁོར་ལོ་སྟེ། །དང་པོའི་མཚམས་སུ་ལཾ་བསམས་ཏེ། །གཉིས་པའི་མཚམས་སུ་རཾ་བསམ་མོ། །ནཱི་ལཱཾ་བ་ས་
ནཱ་ཡ་ཕཊ། ཀྲྀ་ཏཱནྟ་རཱུ་པཱ་ཡ་ཕཊ། ཨ་པྲ་ཏི་ཧ་ཏ་བ་ལཱ་ཡ་ཕཊ། རོ་ཥ་ཎ་ཧ་ཏ་བ་ལཱ་ཡ་ཕཊ། དང་པོའི་འཁོར་ལོ་རྩིབས་དྲུག་སྟེ། །ཆུ་ཡི་གདན་བཞུགས་འཁྲུལ་འཁོར་ནི། །དབང་དུ་བྱ་དང་སྡུད་པའི་ཕྱིར། །ཆུ་ཡི་འཁོར་ལོ་བསྐོར་བར་བྱ། །ཐ་མའི་འཁོར་ལོ་རྩིབས་བརྒྱད་དེ། །རླུང་གི་དཀྱིལ་
འཁོར་ལ་གནས་ཏེ། །དབྱེ་ཞིང་རླག་པའི་ལས་བརྩམས་ཏེ། །རླུང་གི་འཁོར་ལོ་བསྐོར་བར་བྱའོ། །དང་པོའི་རྩིབས་མཆན་བཾ་བསམས་ནས། །ཐ་མའི་རྩིབས་ལ་ཡཾ་དགོད་བྱ། །ཐུན་མཚམས་གཅོད་ཅིང་གཏོར་མ་བཏང་། །འཁོར་རྣམས་སྣ་ལ་གཙོ་བོས་གསད། །དེ་ཐམས་ཅད་
ཀྱི་བསྙེན་པ་ནི་བཅོ་ལྔ་པའམ། ཉི་ཤུ་རྩ་གཉིས་པས་བྱའོ། །བསྒྲུབ་པར་བྱ་བའི་རིམ་པ་ནི། བདག་ཉིད་འཁོར་ལོ་ཆེན་པོའི་ཏིང་ངེ་འཛིན་དུ་བསྒོམས་ཏེ། ཏདྱ་ཐཱ་བྷོ་བྷོ་བཱན་ནཱ་ག་ཨ་དྷི་པ་ཏ་ཡེ། ཨི་དཾ་ནཱི་ལཱཾ་བ་ར་དྷ་ར་ཤ་རཱི་རཾ། ཀྲོ་དྷ་སཱ་བྷ་བཛྲ་པཱ་ཎི་ཧྲྀ་ད་ཡཾ། ཡཿས་མ་ཏི་ཀྲ་མ་ཏེ། ཨུཏྶཱ་དྷ་ནཾ། 
བྷ་བི་ཤུདྡྷི་རཱ་ཛྙཱ་པ་ཡ་ཏི་སྭཱ་ཧཱ། ཞེས་བྱ་བ་ནི་གཙོ་བོ་དང་ཡུམ་དང་བཅས་པའོ། །ཨོཾ་བི་དཱ་ར་ཎཱ་ཡ་ཧཱུཾ་ཕཊ། ཨོཾ་ཀྲོ་དྷ་སཱ་དྷ་ནཱ་ཡ་ཕཊ། ཨོཾ་ནཱི་ལཱཾ་བ་ས་ནཱ་ཡ་ཕཊ། ཨོཾ་ཨ་པྲ་ཏི་ཧ་ཏ་བ་ལཱ་ཡ་ཕཊ། ཅེས་བྱ་བ་ནི་ཁྲོ་མོ་བཞིའོ། །ཨོཾ་པ་ར་ཀྲ་མཱ་ཡ་ཕཊ། ཨོཾ་ཀྲྀ་ཏཱནྟཱ་ཡ་ཕཊ། ཨོཾ་ཀྲྀ་ཏཱནྟ་རཱུ་པཱ་ཡ་ཕཊ།

49-1-238a

ཨོཾ་རོ་ཥ་ཎ་ཧ་ཏ་བ་ལཱ་ཡ་ཕཊ། ཅེས་བྱ་བས་ནི་གཙོ་སྔགས་བསྟན་པ་སྟེ། འབུམ་དུ་རྫོགས་ནས་ལས་བརྩམ་མོ། །ཨོཾ་ཧ་ས་ཧ་ས་ཧཱུྃ། ཨོཾ་དྷ་ར་དྷ་ར་ཛཿཨོཾ་མཱ་ར་ཡ་མཱ་ར་ཡ་བཾ། ཨོཾ་ནཱ་ཤ་ཡ་ནཱ་ཤ་ཡ་ཧོཿའཁོར་ཉིད་ལ་ནི་རབ་ཏུ་སྦྱར། ཨོཾ་ཧ་ར་ཧ་ར་ཧོཿཨོཾ་པྲ་ཧ་ར་པྲ་ཧ་ར་བཾ། 
ཨོཾ་ཚིནྡ་ཚིནྡ་ཛཿ། ཨོཾ་བྷིནྡ་བྷིནྡ་ཧཱུྃ། གཙོ་བོ་ཉིད་ལ་སྦྱར་བར་བྱ། །ལས་ཀྱི་སྔགས་ནི་དེ་ཉིད་དོ། །སྔགས་ཀྱི་དོན་ནི་བསྟན་པའོ། །ད་ནི་བརྗེད་པ་གསོ་བར་བྱ་སྟེ། གནོད་སྦྱིན་རྣམས་ཀྱིས་བརྗེད་ན་ཆུ་ཁྱོར་བ་གང་ལ་སྔགས་བཏབ་སྟེ། ནམ་མཁའ་ལ་གཏོར་རོ། །ས་འོག་ན་གནས་པས་བརྗེད་ན་
བལ་པོ་སེའུས་སམ་ཉ་བྲིད་ལྕུག་མས་བྲབ་བོ། །བདུད་དང་ལོག་འདྲེན་གྱིས་བརྗེད་ན་ནི་སྐུད་པ་ལ་བརྗོད་པས་གསོའོ། །གལ་ཏེ་དེ་ལས་འདས་ན་གོང་དུ་བསྟན་པའི་ཉེས་པ་དེར་འགྱུར་རོ། །ཨརྫ་གའི་དོག་པ་བཞིན་དུ་ཡང་འགས་པས་དྲན་པར་གྱིས་ཞེས་བརྗོད་དོ། །དེའི་ཆོ་ག་ནི་ཞེས་བྱ་བའི་
དོན་ནི་གདོན་གསུམ་པོ་དེའི་འོ། །དེ་ལས་གནོད་སྦྱིན་གྱི་ཆོ་ག་ནི་དང་པོར་བདག་ཉིད་བསོད་ནམས་དང་ཡེ་ཤེས་ཀྱི་ཚོགས་གཉིས་སྔོན་དུ་སོང་བའི་བདུད་རྩི་ཐིགས་པའི་སྒྲུབ་ཐབས་བཞིན་བསྒོམས་ཏེ། ཞག་གསུམ་བསྙུང་བར་འདུག་སྟེ། མཎྜལ་གྱི་ཐོག་ཏུ་ཡུངས་ཀར་ལ་སྔགས་བཟླས་ཏེ། ཞག་
གསུམ་ཐིམ་པ་དང་ནད་པའི་སྤྱི་བོར་གཞག །ལག་ཏུ་ཡང་བྱིན་པས་དངངས་པ་དང་། ཁྲོ་བ་དང་། བཞིན་མི་སྡུག་པ་སྟོན་ཅིང་ཕྱིར་འབྲོས་སོ། །དེ་ལ་མཎྜལ་གྲུ་བཞི་པ་མདའ་གང་བ་བྱས་ཏེ་སྤོས་ཀྱིས་བྱུགས། དབུས་སུ་འཁོར་ལོ་རྩིབས་བརྒྱད་པའི་ཐིག་གདབ་སྟེ། ཚོན་སེར་པོས་བྲི་བར་བྱའོ། །
བུམ་པ་ཁ་དོག་སྔོན་པོ་མགུལ་ཆིངས་སྔོན་པོ་ཅན་བརྒྱད་དགོད་དོ། །མདའ་དང་གྲི་དང་མེ་ལོང་བཞི་གྲྭ་བཞིར་གཟུགས་སོ། །རས་སམ་དར་སྔོན་པོས་གུར་དུ་དབུབ་པོ། །གཏོར་མ་དམར་གཏོར་ཆ་བརྒྱད་ཀྱང་བཀྲམ་མོ། །མདུན་དུ་བུམ་པ་སྔོན་པོ་མགུལ་ཆིངས་སྔོན་པོ་དང་བཅས་པ་གཞག་
གོ། །ནད་པ་བྱང་དུ་ཁྲུས་བྱས་ཏེ་ཀུ་ཤའི་སྟེང་དུ་གཞག་པར་བྱའོ། །དེ་ནས་བུམ་པ་བྱིན་གྱིས་བརླབ་པ་ནི་བྷྲཱུཾ་ལས་བསྐྱེད་ཅིང་ཟླ་བའི་སྟེང་དུ་ཧཱུྃ་ལས་ཁྲོ་བོ་བདུད་རྩི་འཁྱིལ་པ་སྔོན་པོ་ཕྱག་བྲང་དུ་བསྣོལ་བ་མཆེ་བ་ཅུང་ཞིག་གཙིགས་པ་བསྐྱེད་ལ་ཡེ་ཤེས་བསྟིམ་པ་ལ་སོགས་པ་བྱའོ། །དེ་ནས་

49-1-238b

བདག་ཉིད་བདུད་རྩི་ཐིགས་པ་བཞིན་བསྒོམས་ལ། བུམ་པ་བསྒྲུབ་པའི་སྔགས་རིངས་བརྒྱ་རྩ་བརྒྱད་བཟླས་པས་ཞུ་བར་བསམ་མོ། །དེ་ནས་རང་གཙོ་བོར་བསམས་ལ་དཀྱིལ་འཁོར་གྱི་འཁོར་ལོ་ལ། གནོད་སྦྱིན་ཆེན་པོ་བརྒྱད་ཀུ་ལས་བསྐྱེད། དགུག་པ་དང་བགེགས་བསྐྲད་པ་དང་། བསྟིམ་པ་
དང་བདུད་རྩི་མྱོང་བ་ཡན་ཆད་རྫོགས་པ་དང་སྔགས་རིངས་བཟླས་སོ། །དེ་ནས་གཏོར་མ་བྱིན་གྱིས་བརླབ་པ་ནི། ཨོཾ་ཧཱུྃ་ཧྲཱིཿཞེས་བྱ་བས་སྦྱང་བ་དང་སྤེལ་བ་དང་། སྦར་བས་བྱིན་གྱིས་བརླབས་ནས། གནོད་སྦྱིན་འཁོར་དང་བཅས་པས་བཅོམ་ལྡན་འདས་མཆོད་པ་ནི། ཨོཾ་ནཱི་ལཱཾ་བ་ར་དྷ་ར་ཀྲོ་དྷ་སཱ་དྷ་
བཛྲ་པཱ་ཎི་ཧཱུྃ་ཧཱུྃ་མ་ཧཱ་ཡཀྵ་བ་ལིཾ་ཏ་ཁ་ཁ་ཁཱ་ཧི་ཁཱ་ཧཱི་ཞེས་བྱ་བས་ཕུལ་ཏེ།  དེའི་རྗེས་ལ་བུམ་པའི་ཆུས་ནད་པའི་ལུས་བཀྲུ་བར་བྱས་ལ་གཏོར་མ་བཏང་ན་ཟློག་པར་འགྱུར་རོ། །དེའི་ཕྱིར་གནོད་སྦྱིན་གྱི་གདོན་གྱིས་ཟིན་པ་ལ་ཆུ་ལ་སྔགས་བཏབ་སྟེ་གཏོར་ན་གཏང་བར་འགྱུར་རོ་ཞེས་བྱའོ། །ཀླུ་ཟློག་པར་
བྱེད་ན་བདུད་རྩི་ཐིགས་པ་ནས་འབྱུང་བ་བཞིན་དུ་ཞག་གསུམ་བསྙུང་བར་འདུག་སྟེ། བདག་ཉིད་ལྷར་བསྒོམས་ནས་མདུན་དུ་མཎྜལ་མཆོད་པ་དང་བཅས་པའི་ཐོག་ཏུ་ཀུ་ཀུ་རའི་མིང་ཉ་ཕྱིས་སམ། དངུལ་ལས་བྱས་པའི་ག་འུར་བཅུག་ནས། གསང་སྔགས་སུ་སྔགས་རིངས་འབུམ་བཟླས་པའམ། 
བརྒྱ་རྩ་བརྒྱད་བཟླས་ནས་ནད་པ་ལ་བྱིན་ན། འཕྲིག་པ་དང་སྙིང་མི་དགའ་བ་དང་། སྣ་འགགས་པ་དང་། ངུ་སྙིང་འདོད་པ་དང་། ལུས་བེར་བ་དང་བཅས་པར་འགྱུར་རོ། །བརྟག་པ་དང་། རྨི་ལྟས་ནི་མཛེ་ནད་བརྟག་པ་དང་། རིམ་པ་དྲུག་པར་ཤེས་པར་བྱས་ནས། གསོ་རུང་མི་རུང་ཤེས་པའི་
རྟགས་འབྱུང་ངོ་། །དེ་ལ་ནི་བུ་མོ་ལོ་བརྒྱད་ནས་བཅུ་དྲུག་ལོན་པས་ཁྲུས་བྱས་ཏེ་ས་བླངས་ལ་ཀླུ་སྒྲུབ་བཞིན་དཀྱིལ་འཁོར་བཞེངས་ལ་བསྒྲུབ་པར་བྱ་བ་ནི་ཀླུ་སྒྲུབ་ཏུ་ཤེས་པར་བྱའོ། །དེ་ནས་ནད་པ་ལ་རྨ་བྱའི་སྒྲོའམ་སྨྱུག་ཤད་ཀྱི་ལྕུག་མས་བྱབ་པར་བྱ་ཞིང་། བདག་ཉིད་བདུད་རྩི་ཐིགས་
པ་བཞིན་དུ་བསྐྱེད་ལ་ཀླུ་བརྒྱད་འཁོར་དང་བཅས་པ་མཆོད་པ་ནི།  གཏོར་མ་པ་ལས་པདྨའི་སྣོད་དུ་བྱིན་གྱིས་བརླབས་ལ། ཕྱག་ལས་བདུད་རྩིའི་རྒྱུན་དབབ་པ་ནི་ལག་མཐིལ་དུ་ཟླ་བ་ལ་ཨ་བསམས་ལ། དེ་ལས་ཆུ་རྒྱུན་རྣམ་པ་ལྔ་འབབ་པར་བསམ་ཞིང་སྔགས་འདི་བཟླས་སོ། །

49-1-239a

ཨོཾ་ཨ་མྲྀ་ཏེ་ཧཱུྃ་ཕཊ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཏད་ཁཾ་ཨུངྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ཞེས་པའི་སྔགས་ལན་གསུམ་བཏབ་སྟེ་བྱིན་གྱིས་བརླབས་ལ། ཨོཾ་ནཱི་ལཱཾ་བ་ར་དྷ་ར་ཀྲོ་དྷ་སཱ་དྷ་བཛྲ་པཱ་ཎི་ཨི་དཾ་བ་ལཱིཾ་ཁ་ཁ་ཨི་དཾ་བ་ལིཾ་ཧ་ར་ཧ་ར་ནཱ་ག་ཨི་དཾ་བ་ལཱིཾ་པྲ་ཧ་ར་
པྲ་ཧ་ར་ནཱ་ག་ཨི་དཾ་བ་ལིཾ་ཚིནྡ་ཚིནྡ་ནཱ་ག་ཨི་དཾ་བ་ལིཾ་བྷིནྡ་བྷིནྡ་ནཱ་ག་ཨི་དཾ་བ་ལིཾ་ནཱ་ག་ཤ་རཱི་ར་ཎི་ཨི་དཾ་བ་ལཱི་ནཱ་ག་དྷརྨ་ནི་ཨི་དཾ་བ་ལཱིཾ་ནཱ་ག་བི་དྷ་ར་ཎི། ཨི་དཾ་བ་ལིཾ་ནཱ་ག་ཀྲོ་དྷ་སཱ་དྷ་ན་ཡ་ཁ་ཁ་ཁཱ་ཧི་ཁཱ་ཧི་ཕུ་ཕུ་ཕུ་ཕུ་ཕུ་ཕུ་ཕུ་ཕུ་སྭཱ་ཧཱ། ཞེས་པས་གཏོར་མ་སྦྱིན་པར་བྱའོ། །མཆོད་པ་སྔོན་དུ་སོང་ནས་གསོལ་བ་བཏབ་
སྟེ། རྟགས་བརྟག་པ་ནི་རིམ་པ་དྲུག་པར་ཤེས་པར་བྱའོ། །དེའི་ཕྱིར་ཀླུ་ཟློག་པར་བྱེད་ན་སྨྱག་ཤད་ཀྱི་ལྕུགས་མའམ། བལ་པོ་སེའུའི་ལྕུག་མས་བྱབ་པར་བྱའོ་ཞེས་པའི་དོན་ཏོ། །ཆར་དབབ་པར་འདོད་ན་གཞན་ཀླུ་སྒྲུབ་ཏུ་ཤེས་པར་བྱའོ། །ཁྱད་པར་ནི་དེ་ན་གནས་པའི་ཀླུ་དེ་ཀླུའི་རྒྱལ་པོ་དུང་སྐྱོང་
དུ་བྱས་ཏེ། སྔགས་རིངས་ཀྱེས་གཟེར་རོ། །སེར་བ་བསྲུངས་ན་སྟེང་འོག་འཁོར་ལོ་བསམས་ལ་སྔགས་རིངས་བཟླས་སོ། །ཡི་དགས་དང་བརྗེད་བྱེད་རྣམས་ལ་ནི་ནད་པའི་ལག་པ་དང་རྐང་པ་ཚོན་སྣ་ལྔའི་སྐུད་པས་དཀྲིས་ཏེ། བདག་ཉིད་བདུད་རྩི་ཐིགས་པ་བཞིན་དུ་བསྐྱེད་ལ་ནད་པའི་
སྲིན་ལག་ནས་བཟུང་སྟེ། སྔགས་བཏབ་ན་ལུས་འདར་བ་དང་རྔུལ་བ་དང་སྨྲ་བ་འོང་། དེ་ལ་ནི་བདག་ཉིད་གོང་བཞིན་དུ་བསྐྱེད་ལ་ཉི་ཟླའི་བར་དུ་གདོན་པྲེ་ལས་བསྐྱེད་པར་བྱ་སྟེ། ཕྱག་རྒྱ་བཞིས་རྒྱས་བཏབ་ལ་རླུང་ལྷ་ལ་བསྐྱོན་ལ་འཕང་ངོ་། །གཟུགས་བརྙན་ནི་ཚོན་སྣ་ལྔའི་སྐུད་པས་
བཅིངས་ལ་བྱའོ། །དེའི་ཕྱིར་བརྗེད་བྱེད་དང་སྨྱོ་བྱེད་ལ་ནི་སྐུད་པས་བྱའོ། །རིམས་ནད་མེད་པར་བྱ་བ་དང་གཞོགས་ཕྱེད་ན་བ་དང་། ཡི་ག་འཆུས་པ་དང་། གནོད་སྦྱིན་དང་། ཀླུ་དང་ཡི་དགས་ལ་སོགས་པའི་ནད་འདི་གསུམ་བཟློག་པ་ལ་ནི་སྐུད་པ་སྔོན་པོས་བྱ་སྟེ། མེ་ཏོག་སྔོན་པོའི་ཆུས་
བསྒྱུར་ལ་མཎྜལ་བྱས་ཏེ། བདག་ཉིད་བདུད་རྩི་ཐིགས་པ་བཞིན་བསྒོམས་ཏེ། གའུའི་ནང་དུ་བཞག་སྟེ། ཞག་གསུམ་བསྙུང་བ་དང་བཅས་པས་བསྒྲུབ་པོ། །མདུད་པ་བྱིན་གྱིས་བརླབ་པ་ནི། སྟོང་པ་ལས་ཞལ་ནས་རྡོ་རྗེའི་ཕྲེང་བ་མདུད་པ་ལ་ཁྲོ་བོ་རྡོ་རྗེ་ཕྱིར་འཕྱར་བ་ཟླ་བའི་སྟེང་དུ་བསམ་

49-1-239b

ཞིང་རབ་གནས་སྔགས་རིངས་བདུན་བདུན་གདབ་པོ། །དེ་བས་ན་སྐུད་པ་སྔོན་པོ་གདགས་སོ། །ནོར་འདོད་ན་ཞག་གཅིག་བསྙུང་བར་འདུག་སྟེ་ཞེས་བྱ་བ་ནི་བདག་ཉིད་ཁྲུས་བྱས་གོས་གཙང་མ་བགོས་ཏེ། ཟ་གཅིག་པར་བྱས་ལ་སྦྲུལ་དཀར་པོའི་ཚིལ་བུ་དང་། དུར་ཁྲོད་ཀྱི་རས་ལ་མེ་བཏང་སྟེ་
བསྒྲུབ་པོ། །དེ་ནས་ལྕགས་ཀྱུ་ལྔ་དག་དང་། །ས་བོན་གཉིས་དང་རྐྱེན་གསུམ་གྱིས། །སྒྲུབ་པའི་རྫས་ཀྱིས་དེ་རྣམས་སྦྱར། །སྤེན་མ་དུམ་བུ་གཅིག་ཏུ་གཞག །མཎྜལ་སྔོན་པོ་ལེགས་བྱས་ཏེ། །བདག་ཉིད་ལྷ་ཡི་སྐུར་གསལ་བས། །འོད་ཟེར་འཕྲོ་འདུའི་བཟླས་པ་བྱ། །འོད་དང་སྒྲ་དག་བྱུང་བ་ན། །
བྱུག་པ་ལུས་ལ་བྱུགས་བྱས་ནས། །མཆོད་པས་མཆོད་ནས་གསོལ་བ་གདབ། །ཅེས་བྱ་བ་ནི། སྤོས་ཀྱིས་བདུགས་ནས་ཞེས་བྱ་བའོ། །དེ་ལ་དབང་པོ་རབ་ལ་ནི་དངོས་སུ། ཐ་མ་ལ་རྨི་ལམ་དུ་དགེ་བ་སྟེ། གཏེར་ཡོད་པ་དང་མི་དགེ་བ་སྟེ། གཏེར་མེད་ཅེས་སྟོན་ནོ། །ནོར་ལྷ་སྒྲུབ་པ་ནི་དབེན་པའི་
གནས་སུ་སོང་སྟེ། སྟན་བདེ་བ་ལ་འདུག་ནས་མཎྜལ་སྔོན་པོ་བྱས་ཏེ། དེའི་སྟེང་དུ་གཞག་པ་ནི། མཆོད་རྟེན་སྐུ་གདུང་དང་ལྡན་པའི་དྲུང་དུ་མེ་ཏོག་སྔོན་པོ་ལ་སོགས་པས་མཆོད་ལ་ཞེས་བྱ་བ་ནི་འདག་པ་ལས་མཆོད་རྟེན་སྔོན་པོ་གདུང་ཤ་རཱི་རམ་བུམ་པ་ན་ཡོད་པའི་འཁོར་ལོ་དང་གདུགས་དང་བཅས་པ་
དབུས་སུ་གཞག་གོ། །བུམ་པ་སྔོན་པོ་མེ་ཏོག་སྔོན་པོའི་ཁ་རྒྱན་ཅན་བཞི་ཡང་མཆོད་ཡོན་གྱི་རྫས་སུ་ཕྱོགས་བཞིར་གཞག་གོ། །མཆོད་པ་རྣམ་པ་ལྔ་ནི་མེ་ཏོག་ལ་སོགས་པ་ཅི་འབྱོར་པའི་མཆོད་པའི་རྫས་རྣམས་གཞག་གོ། །ཆོས་སྐྱོང་གི་གཏོར་མ་རྒྱ་ཆེན་པོ་ཡང་བཤམས་ནས། སྒྲུབ་པ་ནི་བདག་ཉིད་
བསྙུང་བར་འདུག་སྟེ། ཚོགས་གཉིས་སྔོན་དུ་སོང་བ་བདག་ཉིད་བདུད་རྩིའི་ཐིགས་པ་བཞིན་བྱས་ཏེ།  མཆོད་རྟེན་ལས་ནོར་ལྷ་སེར་པོ་ཞལ་གཅིག་ཕྱག་གཉིས་པ། ཕྱག་གཡས་ན་ནོར་བུ་རིན་པོ་མཆོད་རྟེན། ཕྱག་གཡོན་ནེའུ་ལེའི་རྐྱལ་པ་རིན་པོ་ཆེ་འབྲུལ་བ། ཞབས་
བརྐྱང་བསྐུམ་དུ་བྱི་ན་ཡ་ཀའི་སྟེང་དུ་བསམ་མོ། །དེའི་སྙིང་གར་ཧྲཱིཿདམར་པོ་བསམས་ལ། སྤྱན་དྲང་ཞིང་བསྟིམ་པ་ལ་སོགས་པ་རྫོགས་པ་དང་། གསང་སྔགས་ཀྱི་འཕྲོ་འདུ་བྱའོ། །དེ་ཡང་སྔགས་སྟོང་བཟླས་ནས་གསོལ་བ་བཏབ་ན་གསེར་གྱི་དོང་ཚེ་བདུན་སྟོང་སྦྱིན་པར་བྱེད་དོ་ཞེས་

49-1-240a

བྱ་བ་ནི་སྔགས་སྟོང་ཐིམ་པའི་ཆུས་ལན་བདུན་མཆོད་པ་ནི་ཆུ་ཐིགས་པ་རེ་རེ་ལ་སྔགས་ལན་བདུན་བདུན་གདབ་པོ། །དེ་ནས་གསོལ་བ་གདབ་སྟེ། བདག་ཆེ་གེ་མོ་འདི་ཞེས་བྱ་བ་ལ་འདུས་བྱས་ཀྱི་དངོས་པོ་འདི་དང་འདི་སྩོལ་ཅིག་བྱས་ནས་ཆོས་སྐྱོང་རྣམས་ལ་གཏོར་མ་བཏང་ནས་
ཉིན་རེ་ལ་ཅི་འདོད་པའི་རྫས་གསེར་གྱི་དོང་ཚེ་བདུན་སྟོང་བདུན་སྟོང་རི་བ་འབྱུང་ངོ་། །རྒྱས་གདབ་པ་དགྲོལ་བར་འདོད་ན་ཐལ་བས་བྱའོ་ཞེས་བྱ་བ་ནི་རྒྱས་བཏབ་པ་ནི་བན་བོན་གྱི་བྱད་དུ་བཅུག་པའོ། །མཆོད་པ་སྔོན་དུ་སོང་བས་གསོལ་ཏེ་བརྟག་པ་ནི། རིམ་པ་དྲུག་པར་ཤེས་པར་བྱའོ། །
དེ་དགྲོལ་བའི་ཐབས་ནི་སྔོན་དུ་བསྙེན་པ་རྫོགས་པའི་གང་ཟག་གིས་ཐབ་ཁུང་གྲུ་གསུམ་བཅས་ཏེ་དྲག་པོའི་སྦྱིན་སྲེག་བྱས་ནས་དེའི་ཐལ་བ་དང་སྔགས་པ་དེ་ཉིད་ཀྱི་དྲི་ཆུ་སྦྱར་ཏེ། ནག་པོའི་ཕྱོགས་ཀྱི་ཚེས་གྲངས་ཀྱི་དུས་སུ་ཁྲུས་བྱས་ན་དྲང་སྲོང་དམོད་མོ་ཡང་བཟློག་གོ། །བསྲུང་བར་
འདོད་ན་དྲག་པོའི་སྦྱིན་སྲེག་གི་ཐལ་བ་དང་། སྐྱེ་བ་བདུན་པའི་ཐལ་ཆེན་ལ་སྔགས་ཉི་ཤུ་རྩ་གཅིག་བཟླས་ཏེ། སྐྱབས་འགྲོ་སྔོན་དུ་སོང་བ་ལ་བཏགས་ན་བསྲུང་བའི་མཆོག་ཏུ་འགྱུར་རོ། །སྒོ་ལྕགས་དབྱེ་བར་འདོད་པས་ཡུངས་ཀར་གྱིས་བྱའོ་ཞེས་བྱ་བ་ནི་ཐབ་ཁུང་གྲུ་བཞི་བྱས་ཏེ། ཡུངས་ཀར་
སེར་པོ་སྒྲུབ་པ་བྱས་ལ་ཤིང་ཀ་ར་བཱི་རའི་མེ་ལ་ཟླ་བ་རྒྱས་པའི་དུས་སུ་སྦྱིན་སྲེག་བྱས་པའི་ཐལ་བ་དང་། ཡུངས་ཀར་བསྲེས་པས་མིག་ནས་མར་བླུགས་ནས་སྔགས་བརྒྱ་རྩ་བརྒྱད་བཟླས་ན་འབྱེ་བར་འགྱུར་རོ། །འཇིགས་པ་ཐམས་ཅད་ཅེས་བྱ་བ་ནི་རྣམ་པ་བརྒྱད་དེ། མེའི་འཇིགས་པ་དང་། 
ཆུའི་འཇིགས་པ་དང་། སྦྲུལ་དུག་ཅན་གྱིས་འཇིགས་པ་དང་། རྒྱལ་པོའི་ཆད་པས་འཇིགས་པ་དང་། ཤུགས་ཅན་གཅན་གཟན་གདུག་པས་འཇིགས་པ་དང་། རྡོ་རྗེ་འབར་བས་འཇིགས་པ་དང་། དུས་མ་ཡིན་པར་འཆི་བའི་བར་དུ་གཅོད་པས་འཇིགས་པ་དང་། སྲིན་པོ་ཁྲོས་ཤིང་
རྔམ་པས་འཇིགས་པའོ། །དེ་ལ་བསྲུང་བ་ནི་རྩི་མར་གྱི་སྙིང་པོ་དང་། ཞི་བའི་སྦྱིན་སྲེག་བྱས་པའི་ཐལ་བ་དང་། ཡུངས་ཀར་ལ་སྔགས་བརྒྱ་རྩ་བརྒྱད་བཟླས་བརྗོད་བྱས་ཏེ། བསྲུང་བའི་འཁོར་ལོའི་བར་དུ་བླུགས་ཏེ། ཡོངས་སུ་རྫོགས་པའི་པགས་པའི་མཐའ་མར་གཏུམས་ཏེ།

49-1-240b

མགུལ་དུ་བཏགས་ན་བསྲུང་བའི་མཆོག་ཏུ་འགྱུར་རོ། །ནད་ཀྱི་འཇིགས་པ་ཐམས་ཅད་ཅེས་བྱ་བ་ནི་རླུང་དང་། མཁྲིས་པ་དང་། བད་ཀན་དང་ལྡན་པ་དང་། འདུས་པ་དང་། ཡམས་དང་། རིམས་དང་། འབྲུམ་བུ་དང་། ཤུ་བ་དང་། མེ་དབལ་དང་། གཡན་པ་ལ་སོགས་པ་ཐམས་ཅད་དོ། །དེ་
བསྲུང་བ་ནི་སྐུད་པ་མེ་ཏོག་སྔོན་པོའི་ཆུས་སྐུད་པ་སྔོན་པོར་བསྒྱུར་བ་ལ་རང་ལྷའི་སྐུར་གསལ་བས་མི་དམིགས་པ་ལས་རྡོ་རྗེའི་རང་བཞིན་རྒྱ་གྲམ་དང་ལྡན་པའི་བསྲུང་བའི་མདུད་པ་བྱས་ཏེ་མགུལ་དུ་བཏགས་ན་བསྲུང་བའི་མཆོག་ཏུ་འགྱུར་རོ། །བྱིས་པ་གདོན་གྱིས་ཉེན་པ་ཞེས་བྱ་བ་ནི་གདོན་
གྱི་ཟ་འཕྲོའོ། །ཐམས་ཅད་ནི་ཕོ་མོའོ། །དེ་བསྲུང་བ་ནི་ཚོན་སྣ་ལྔའི་སྐུད་པ་ལ་བདག་ཉིད་ལྷའི་སྐུ་དང་ལྡན་པས་འོད་ཁ་དོག་ལྔ་དང་ལྡན་པའི་འོད་ཀྱི་གོང་བུའི་ནང་དུ་ཨོཾ་ཧཱུཾ་སྭཱ་ཨཾ་ཧཱ་ཞེས་བྱ་བ་བསམས་ཏེ། རབ་ཏུ་གནས་པ་བྱས་ལ་དེ་ལ་སྐྱབས་སུ་འགྲོར་བཅུག་སྟེ། མགུལ་དུ་བཏགས་ན་
བསྲུང་བའི་མཆོག་ཏུ་འགྱུར་རོ། །ཆོམ་རྐུན་བཟློག་པ་ཞེས་བྱ་བ་ནི་ལམ་དུ་ཞུགས་པ་ལ་སོགས་པའི་དུས་སུའོ། །སས་བྱའོ་ཞེས་བྱ་བ་ནི་དང་པོ་མལ་ས་ནས་གོམ་པ་འདོར་བའི་ཚེ་སྐྱེས་པའི་གཡས། བུད་མེད་ཀྱི་གཡོན་ནས་སྲིན་ལག་མ་གཏོགས་པའི་ལག་པས་ས་བླངས་ཏེ་
སྔགས་ལན་བདུན་བཏབ་ནས་བྱུང་བའི་ཚེ་བྱམས་པ་དང་ལྡན་པའི་བསམ་པས་གདོང་དུ་གཏོར་ན་ཞི་བར་འགྱུར་རོ། །དུག་ལ་ནི་རྩྭ་ཀུ་ཤས་བྱབ་པར་བྱའོ་ཞེས་བྱ་བ་ནི་དུག་རང་ལ་མི་བྱབ་པོ། །དུག་གིས་ན་བ་ལ་ནི་རྩྭ་ཀུ་ཤ་བསྲེགས་པ་དང་། ཡུན་རིང་པོ་ལོན་པའི་དམར་པོའི་ས་ཁྲུ་གང་འོག་ནས་
འཇམ་པོ་བྲུད་དེ་ལོ་བརྒྱད་པའི་ཆུས་སྦྱར་ནས་སྔགས་བཏབ་སྟེ་བཏང་ན་འཚོ་བར་འགྱུར་རོ། །བདག་བསྲུང་བ་ལ་ཡིད་ཀྱིས་ཞེས་བྱ་བ་ནི་དུས་ཐམས་ཅད་དུ་ལྷར་མོས་པའོ། །ཡང་ན་ཆུ་ལ་སྔགས་བཏབ་སྟེ་བྱའོ། །གཞན་ལ་ནི་གོང་གི་སྐུད་པ་སོ་སོས་བྱའོ། །ལས་དེ་ཐམས་ཅད་ལ་སྔགས་
བརྗོད་པ་ནི་གཅིག་གམ།  གསུམ་མམ། ལན་བཅུ་བཞིའམ་ཉི་ཤུ་རྩ་གཅིག་གམ་བརྒྱ་རྩ་བརྒྱད་བཟླས་ན་འགྲུབ་པར་འགྱུར་རོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་དང་། འཁོར་རྣམས་ལ་དེ་སྐད་ཅེས་བཀའ་སྩལ་ནས་བྱང་ཆུབ་སེམས་དཔའ་ཕྱག་ན་རྡོ་རྗེ་དང་།
49-1-241a

བདུད་དཔུང་དང་བཅས་པ་རྗེས་སུ་ཡི་རངས་ཏེ། ཡི་རངས་ནས་བསྟན་པ་ལ་འཁོད་དོ། །དྲག་པོ་གསུམ་ནི་ས་བླ་ས་སྟེངས། ས་འོག་གསུམ་དྲག་ནི་མ་རུངས་པའོ། །དེ་ལ་འདུལ་བར་དུས་ལ་བབ་པར་གཟིགས་ནས་བསྟན་པ་ལ་བཀོད་པའོ། །དེའི་འགྲེལ་པ་བདག་གིས་
བརྩམས། ལུང་དང་མན་ངག་རྟོགས་པས་དེ་དོན་བསྒྲུབས། །འབྲས་བུ་བདུད་རྩི་ལྟ་བུ་བདག་གིས་འཐུངས། །སིང་ག་ལ་ཡི་ཡུལ་དུ་དེ་ཐོབ་ནས། །ཕྱི་རབས་རྣམས་ལ་ཕན་ཕྱིར་དེ་དོན་བརྩམས། །མོས་ཤིང་འཇུག་པས་ཕྱག་ན་རྡོ་རྗེའི་ཞལ་མཐོང་ཤོག །དྲག་པོ་གསུམ་འདུལ་ཞེས་བྱ་བའི་རྒྱུད་ཀྱི་
འགྲེལ་པ་བདུད་རྩི་མྱུ་གུ་ཞེས་བྱ་བ། དངོས་གྲུབ་བརྙེས་པའི་ཛཱ་བ་རི་པས་ས་བ་རི་པ་ལ་མན་ངག་ཏུ་ཞུས་པ་རྫོགས་སོ།།      །།པཎྜི་ཏ་དེ་ཉིད་དང་པཎྜི་ཏ་དེ་བ་པུནྱ་མ་ཏི་དང་། ལོ་ཙཱ་བ་ཆོས་ཀྱེ་བཟང་པོས་བསྒྱུར་བའོ།།      །།༄༅༅། །རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ཎི་
མ་ཧཱ་ཡཀྵ་ཀ་ལ་བཾ་མ་ཧཱ་ཙཀྲ་སཱ་དྷ་ན་ནཱ་མ། བོད་སྐད་དུ། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་པའི་ཐབས་འཁོར་ལོ་ཆེན་པོ་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །འགྲོ་བ་ཁ་ཅིག་ས་བོན་གནས་དང་རྩོལ་རྐྱེན་གྱིས། །གདུག་པས་ཟིན་ཅིང་དུག་དང་ཁྲག་
ནི་འདྲེས་གྱུར་པ། །ཐབས་གཞན་དུ་མ་གང་གིས་འབྱེད་པར་མི་ནུས་ཏེ། །འདབ་བཟངས་རྒྱལ་པོས་ཆུ་དང་འོ་མ་འབྱེད་པ་བཞིན། །གདུག་པ་འདུལ་ཕྱིར་དབང་བསྐུར་ཇི་སྲིད་མཉེས་བྱས་པས། །དེས་ནི་འབྱེད་ཅིང་གསལ་བར་ཕོད་པ་ཡིན་པ་སྟེ། །བརྒྱད་ཁྲིར་ཞབས་ནུབ་འཇིག་དུས་མེ་དཔུང་ནང་
འདུག་པ། །གདུག་པའི་དགྲར་གྱུར་ལྗགས་འདྲིལ་དབུགས་ཚ་མི་ཤིགས་འཛིན། །བྱོལ་སོང་རྒྱན་ལྡན་མཆེ་བ་གཙིགས་ཤིང་ང་རོ་འཇིགས། །དེ་ལ་ལུས་ངག་ཡིད་གསུམ་དང་བས་གུས་བཏུད་དེ། །ཇི་སྲིད་མཉེས་བྱས་དམ་པའི་དྲིན་གྱིས་མན་ངག་རི། །རང་ཉམས་མྱོང་བས་དུག་
ཟིན་སྒྲུབ་པོ་རྗེས་སུ་དྲན། །དེ་ལ་རྒྱལ་པོ་དང་རྐུན་པོ་དང་སྟག་ལ་སོགས་པ་ཡ་ང་བ་ཐམས་ཅད་དང་བྲལ་བའི་རིའམ། ཡིད་དུ་འོང་བའི་གནས་འདུ་འཛི་མེད་པ་གང་ཡང་རུང་བར་རྣལ་འབྱོར་པས་ཁྲུས་བྱས་ཏེ། སྟན་བདེ་བ་ལ་འདུག་ནས་རང་གི་སྙིང་གར་ཉི་མ་ལ་གནས་པའི་ཡི་གེ་ཧཱུྃ་བསམས་

49-1-241b

ཏེ། དེའི་འོད་ཟེར་གྱིས་ཕྱོགས་བཅུ་ན་བཞུགས་པའི་གངྒཱའི་ཀླུང་གི་བྱེ་མ་སྙེད་ཀྱི་སངས་རྒྱས་རྣམས་དང་། བླ་མ་དང་བྱང་ཆུབ་སེམས་དཔའ་རྣམས་བསྐུལ་ཏེ་བྱོན་པར་བསམས་ལ་མཆོད་པ་ལྔས་ཡང་དག་པར་མཆོད་ལ་སྡིག་པ་བཤགས་པ་ལ་སོགས་པ་བྱའོ། །དེའི་རྗེས་ལ་བྱམས་པ་དང་སྙིང་
རྗེ་དང་དགའ་བ་དང་བཏང་སྙོམས་ཞེས་བྱ་བ་ཚངས་པའི་གནས་བཞི་བསྒོམ་པར་བྱའོ། །དེ་ནས་གཅིག་དང་དུ་མ་དང་བྲལ་བའི་བློས་ཕྱི་ནང་གི་དངོས་པོ་ཐམས་ཅད་སྟོང་ཞིང་བདག་མེད་པར་བསམ་མོ། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བྱ་བས་མི་གཡོ་བར་བྱའོ། །དེ་ནས་
གུར་དང་ར་བ་ལ་སོགས་པ་ས་བོན་ལས་བསམས་ཏེ། ས་བོན་གྱི་ཡི་གེ་ལས་བྱུང་བ་ཡོངས་སུ་གྱུར་པ་ལས་གཞལ་ཡས་ཁང་གྲུ་བཞི་འཁོར་ལོ་རྩིབས་བཞི་མུ་ཁྱུད་དང་བཅས་པ་སྒོ་བཞི་རྟ་བབས་བཞི་དང་ལྡན་པ་དུར་ཁྲོད་ཆེན་པོའི་དབུས་སུའོ། །དེའི་ལྟེ་བ་ལ་ཚངས་པ་དང་། བརྒྱ་བྱིན་གྱི་ཐོག་
ན་ཉི་མ་དང་ཟླ་བ། ཤར་དྲི་ཟ། ལྷོར་གཤིན་རྗེ། ནུབ་ཆུ་ལྷ། བྱང་གནོད་སྦྱིན་དེ་རྣམས་ཀྱི་སྟེང་དུ་ཉི་མའོ། །ཡི་གེ་ཧཱུྃ་ལས་བྱུང་བའི་ཉི་ཟླའི་ཐོག་ཏུ་ནི། སྤྲིན་སྒྲའི་ཡི་གེ་ཡོངས་སུ་གྱུར་པ་ལས་ཐོད་པ་དང་ཁྲོ་བོའི་རྡོ་རྗེ་རྩེ་ལྔ་པ་བསམ་མོ། །དེའི་འོད་ཀྱིས་ཕྱོགས་བཅུ་གངྒཱའི་ཀླུང་གི་བྱེ་མ་སྙེད་ཀྱི་
སངས་རྒྱས་རྣམས་སྤྱན་དྲངས་ཏེ། བསྟིམས་ནས་དེ་ཡོངས་སུ་གྱུར་པ་ལས་སངས་རྒྱས་གོས་སྔོན་པོ་ཅན་ཞལ་གསུམ་ཕྱག་དྲུག་པ། ཞབས་གཡས་བསྐུམ་གཡོན་བརྐྱང་བ།  སྐུ་མདོག་མཐིང་ནག་སྤྱན་གསུམ་མེའི་ཕུང་པོ་འདྲ་བ། སྨིན་མ་དང་དཔྲལ་བར་ཁྲོ་གཉེར་དུ་བསྡུས་པ། ལྗགས་འདྲིལ་
ཞིང་མཆེ་བ་གཙིགས་པ། ང་རོའི་སྒྲ་འབྱུང་ཞིང་དབུགས་མེ་ལྟར་འབར་བ། དབུ་སྐྲ་ཁམ་པ་གྱེན་དུ་བརྗེས་པ། རལ་པའི་ཅོད་པན་ལ་སོགས་པ་ལ་སྦྲུལ་མགོ་བརྒྱད་ཀྱི་གདེངས་ཀ་ཡོད་པ། དེའི་དཀྱིལ་ན་སངས་རྒྱས་ཐམས་ཅད་ཀྱི་ངོ་བོ་མི་བསྐྱོད་པ་སྐུ་མདོག་སྔོན་པོ་གཡོན་བརྐྱང་གཡས་
བསྐུམ་པས་བཞུགས་པ། གདུག་པ་ཅན་ཞལ་མནན་ནས་སྡིགས་མཛུབ་ཅན་ནོ། །ཞལ་གཡས་དུང་དང་འདྲ་བ་གཡོན་པདྨ་རཱ་ག་འདྲ་བ་དབུས་སྐུ་དང་མཐུན་པ་ཟླ་བའི་དཀྱིལ་འཁོར་ལྟར་རྒྱས་པའོ། །གསུས་པ་ཡངས་ཤིང་གསུས་པ་འཁྱིལ་བ་སྟེ། ཕྱག་གཡས་ཀྱི་དང་པོ་རྡོ་རྗེ་འཕྱར་

49-1-242a

བ། གཡོན་དང་པོ་སྡིགས་མཛུབ་འཆང་བ། བར་པ་གཉིས་ཡུམ་ལ་འཁྱུད་པ། ཐ་མ་གཉིས་སྦྲུལ་རྐེད་པ་ནས་གཟུང་ཞིང་ཟ་བའོ། །རང་གི་སྙིང་གར་ཉི་མ་ལ་གནས་པའི་ཡི་གེ་ཧཱུྃ་དང་ལྡན་པའི་གོས་སྔོན་པོ་སྟག་གི་རིས་ཅན་མནབས་པའོ། །ཀླུ་རིགས་བཞི་རྒྱན་དུ་བྱས་པ་ནི་
ནོར་རྒྱས་དང་དུང་སྐྱོང་གིས་དབུ་ལ་བརྒྱན་པ། དགའ་བོ་དང་ཉེ་དགའ་འབར་བས་སྙན་ཆ་བྱས་པ། པདྨ་དང་ཆུ་ལྷས་ལག་པ་བརྒྱན་པ། སྟོབས་ཀྱི་རྒྱུ་དང་རིགས་ལྡན་ཁར་ཟ་བ་ཅན་གྱི་སྐ་རགས་བྱས་པ་སྟེ།  དེ་ལྟར་བདུད་ལ་སོགས་པ་བརླག་པ་ཅན་དུ་བདག་ཉིད་བསྒོམ་མོ། །ལྷ་མོ་མཛེས་
ལྡན་སྐུ་མདོག་མཐིང་ནག་ཞལ་གཅིག་ཕྱག་གཉིས་པ། ཕྱག་གཡས་པ་གྲི་གུག་གཙོ་བོ་ལ་འཁྱུད་པ། གཡོན་པ་ཐོད་པ་ཁྲག་གིས་གང་བ་གཙོ་བོའི་ཞལ་དུ་སྟོབས་པའོ། །དེའི་སྦྱོར་བའི་མཚམས་ནས་ཤར་ཕྱོགས་ཀྱི་པདྨའི་སྟེང་དུ་ཐིག་ལེ་ཁ་སྦྱོར་འཕྲོས་པ་ལས་ཐོད་པ་དང་། རྡོ་རྗེར་གྱུར་ཏེ་རྡོ་རྗེ་
ཡོངས་སུ་གྱུར་པ་ལས། ཁྲོ་བོ་བདུད་ལས་རྒྱལ་བྱེད་སྐུ་མདོག་དཀར་པོ་ཞལ་གཅིག་ཕྱག་བཞི་པ་གཡས་ཀྱི་དང་པོ་རྡོ་རྗེ་འཕྱར་བ། གཡོན་གྱི་དང་པོ་རྩེ་གསུམ་པ་འཛིན་པ། འོག་མ་གཉིས་སྡིགས་མཛུབ་བྲང་དུ་བསྣོལ་བས་ཡུམ་ལ་འཁྱུད་པ། གོས་སྔོན་པོ་སྟག་གི་རིས་ཅན་མནབས་པའོ། །
ཐོད་པ་དེ་ཡོངས་སུ་གྱུར་པ་ལས་ལྷ་མོ་འོད་ཟེར་ཅན་སྐུ་མདོག་དཀར་མོ་ཞལ་གཅིག་ཕྱག་གཉིས་པ་ཕྱག་གཡས་པ་སྤུ་གྲིས་གཙོ་བོ་ལ་འཁྱུད་པ། གཡོན་པ་བྷན་དྷ་ཁྲག་གིས་བཀང་བ་གཙོ་བོའི་ཞལ་དུ་སྟོབས་པའོ། །ལྷོ་ཕྱོགས་ཀྱི་པདྨའི་སྟེང་དུ་ཐིག་ལེ་ཁ་སྦྱོར་འཕྲོས་པས་ཐོད་པ་དང་རྡོ་རྗེར་གྱུར་ཏེ། རྡོ་
རྗེ་དེ་ཡོངས་སུ་གྱུར་པ་ལས་ཁྲོ་བོ་རྡོ་རྗེ་གཟི་བརྗིད་འབར་བ་སྐུ་མདོག་སེར་པོ་ཞལ་གཅིག་ཕྱག་བཞི་པ། གཡས་དང་པོ་རྡོ་རྗེ་འཕྱར་བ། གཡོན་གོང་མ་དབྱུག་ཏོ་འཛིན་པ་འོག་མ་གཉིས་སྡིགས་མཛུབ་བསྣོལ་མ་ཡུམ་ལ་འཁྱུད་པ། གོས་སྔོན་པོ་སྟག་གི་རིས་ཅན་མནབས་
པའོ། །ཐོད་པ་དེ་ཡོངས་སུ་གྱུར་པ་ལས་ལྷ་མོ་མདངས་ཅན་མ་སྐུ་མདོག་སེར་མོ་ཞལ་གཅིག་ཕྱག་གཉིས་པ་གཡས་ན་ཟངས་གྲི། གཡོན་ན་ཐོད་པ་ཁྲག་གིས་བཀང་ནས་ཞལ་དུ་སྟོབ་ཅིང་གཙོ་བོ་ལ་འཁྱུད་པའོ། །ནུབ་ཕྱོགས་ཀྱི་པདྨའི་སྟེང་དུ་ཐིག་ལེ་ཁ་སྦྱོར་འཕྲོས་པ་ལས་ཐོད་

49-1-242b

པ་དང་རྡོ་རྗེར་གྱུར་ཏེ། རྡོ་རྗེ་ཡོངས་སུ་གྱུར་པ་ལས་ཁྲོ་བོ་རྔམ་པ་སྒྲ་སྒྲོགས་སྐུ་མདོག་དམར་པོ་ཞལ་གཅིག་ཕྱག་བཞི་པ། གཡས་དང་པོ་རྡོ་རྗེ་འཕྱར་བ། གཡོན་དང་པོ་སྦྲུལ་ཞགས་འཛིན་པ། འོག་མ་གཉིས་སྡིགས་མཛུབ་བསྣོལ་མ་ཡུམ་ལ་འཁྱུད་པའོ། །ཐོད་པ་དེ་ཡོངས་སུ་གྱུར་པ་ལས། 
ལྷ་མོ་སྒྲ་ཅན་མ་སྐུ་མདོག་དམར་མོ་ཞལ་གཅིག་ཕྱག་གཉིས་པ། གཡས་པ་ན་སྟ་རེ་གཡོན་པ་ཐོད་པ་གཙོ་བོ་ལ་འཁྱུད་པའོ། །བྱང་ཕྱོགས་སུ་པདྨའི་སྟེང་དུ་ཐིག་ལེ་ཁ་སྦྱོར་འཕྲོས་པ་ལས་རྡོ་རྗེ་དང་ཐོད་པར་གྱུར་ཏེ། རྡོ་རྗེ་དེ་ཡོངས་སུ་གྱུར་པ་ལས་ཁྲོ་བོ་བདུད་རྩི་འཁྱིལ་པ་སྐུ་མདོག་ལྗང་གུ་ཞལ་
གཅིག་ཕྱག་བཞི་པ་ཕྱག་གཡས་ཀྱི་དང་པོ་རྡོ་རྗེ་འཕྱར་བ། གཡོན་གོང་མ་བེ་ཅོན་འཛིན་པ། འོག་མ་གཉིས་སྡིགས་མཛུབ་བསྣོལ་བས་ཡུམ་ལ་འཁྱུད་པ། གོས་སྔོན་པོ་སྟག་གི་རིས་ཅན་མནབས་པའོ། །ཐོད་པ་དེ་ཡོངས་སུ་གྱུར་པ་ལས་ལྷ་མོ་རླུང་འབྱིན་མ་སྐུ་མདོག་ལྗང་གུ་ཞལ་
གཅིག་ཕྱག་གཉིས་པ་ཕྱག་གཡས་ན་འཁོར་ལོ། །གཡོན་ན་ཐོད་པ་གཙོ་བོ་ལ་འཁྱུད་པའོ། །ཤར་གྱི་སྒོར་ཐིག་ལེ་འཕྲོས་པ་ལས། ལྕགས་ཀྱུ་དེ་ཡོངས་སུ་གྱུར་པ་ལས་ལྷ་མོ་ལྕགས་ཀྱུ་མ་སྐུ་མདོག་དཀར་མོ་ཞལ་གཅིག་ཕྱག་གཉིས་པ་ཕྱག་གཡས་ན་ལྕགས་ཀྱུ་ཐོགས་པའོ། །ལྷོའི་སྒོར་
ཐིག་ལེ་འཕྲོས་པ་ལས་ཞགས་པར་གྱུར་ཏེ། དེ་ཡོངས་སུ་གྱུར་པ་ལས་ལྷ་མོ་ཞགས་པ་མ་སྐུ་མདོག་སེར་མོ་ཞལ་གཅིག་ཕྱག་གཉིས་པ་ཞགས་པ་བསྣམས་པའོ། །ནུབ་ཀྱི་སྒོར་ཐིག་ལེ་འཕྲོས་པ་ལས་ལྕགས་སྒྲོག་ཏུ་གྱུར་ཏེ།  དེ་ཡོངས་སུ་གྱུར་པ་ལས་ལྷ་མོ་ལྕགས་སྒྲོག་མ་སྐུ་མདོག་དམར་མོ་
ཞལ་གཅིག་ཕྱག་གཉིས་ན་ལྕགས་སྒྲོག་བསྣམས་པའོ། །བྱང་གི་སྒོར་ཐིག་ལེ་འཕྲོས་པ་ལས་དྲིལ་བུར་གྱུར་ཏེ།  དེ་ཡོངས་སུ་གྱུར་པ་ལས་ལྷ་མོ་དྲིལ་བུ་མ་སྐུ་མདོག་ལྗང་གུ་ཞལ་གཅིག་ཕྱག་གཉིས་པ། ཕྱག་ན་དྲིལ་བུ་བསྣམས་པ་ཟླ་བའི་སྟེང་ན་ཐབས་ཤེས་རབ་ཀྱི་ཚུལ་གྱིས་བཞུགས་
པའོ། །དེ་ནས་རང་གི་སྙིང་གའི་ཉི་མའི་དཀྱིལ་འཁོར་ལ་གནས་པའི་ཡི་གེ་ཧཱུྃ་ལས་འོད་ཟེར་འཕྲོས་པས་དམ་ཚིག་གི་དཀྱིལ་འཁོར་ཅི་འདྲ་བའི་ཡེ་ཤེས་ཀྱི་དཀྱིལ་འཁོར་སྤྱན་དྲངས་ནས་མདུན་གྱི་ནམ་མཁའ་ལ་བཞུགས་པ་ལ་ཕྱག་འཚལ་ཞིང་། སྙིང་ག་ནས་མཆོད་པའི་ལྷ་མོ་རྣམས་ཀྱིས་ཡང་

49-1-243a

དག་པར་མཆོད་པ་ལ་སོགས་པ་བྱས་ཏེ། དེ་ནས་ཛཿཧཱུྃ་བཾ་ཧོཿཞེས་པའི་ཕྱག་རྒྱ་བཞིས་དགུག་པ་དང་། གཞུག་པ་དང་བཅིང་བ་ལ་སོགས་པས་ཐ་མི་དད་པར་བྱའོ། །དེའི་རྗེས་ལ་སངས་རྒྱས་གངྒཱའི་ཀླུང་གིས་སྐུ་དང་གསུང་དང་ཐུགས་བྱིན་གྱིས་བརླབ་པའི་ཕྱིར། ཨོཾ་དང་ཨཱཿདང་
ཧཱུྃ་སྟེ་དཀར་པོ་དང་དམར་པོ་དང་མཐིང་གའི་རིམ་པས་སྤྱི་བོ་དང་མགྲིན་པ་དང་། སྙིང་གར་ཉི་མའི་དཀྱིལ་འཁོར་ལ་གནས་པར་བསྒོམ་མོ། །དེ་ནས་སྙིང་ག་ན་གནས་པའི་ཧཱུྃ་ལས་འོད་ཟེར་འཕྲོས་པས་གངྒཱའི་ཀླུང་གི་སངས་རྒྱས་རྣམས་སྤྱན་དྲངས་ཏེ། དེ་དག་ཀུན་གྱི་ཕྱག་ན་བུམ་པ་རྡོ་རྗེ་རྩེ་ལྔ་པས་མཚན་
པས་སྙོམས་པར་འཇུག་པའི་དམ་ཚིག་གི་དཀྱིལ་འཁོར་ལ་དབང་བསྐུར་རོ། །དེ་ནས་གཙོ་བོ་ནས་བྱང་སྒོ་ལ་ཐུག་པར་བསྒོམ་མོ། །སྐྱོ་ན་ཐུན་མཚམས་བཞིར་རྣལ་འབྱོར་པས་བསྙེན་པ་དབུལ་བར་བྱའོ། །དེ་ལྟར་ལྷ་ནི་གསལ་བ་དང་། །ས་བོན་རབ་ཏུ་འབར་བ་ཡིས། །ཁ་སྦྱོར་ཉི་ཟླའི་འཕྲོ་འདུ་ལས། །
ཐབས་དང་ཤེས་རབ་སྦྱོར་བས་ནི། །བདེ་ཆེན་རབ་ཏུ་གསོ་མཛད་ནས། །སྡུག་བསྔལ་ཉོན་མོངས་འཇོམས་མཛད་པའི། །ཐིག་ལེའི་རང་བཞིན་མི་ཤིགས་ཀྱིས། །བགེགས་རིགས་སྟོང་ཕྲག་འཇོམས་པར་མཛད། །ཅེས་བྱ་བས་བསྒོམ་པ་བསྟན་ནས། གཏོར་མ་བཏང་ལ་ཡང་དག་པར་མཆོད་ནས་
སྐྱོ་བར་གྱུར་ན་སངས་རྒྱས་གངྒཱའི་ཀླུང་གིས་གསུངས་པ་འདི་བཟླས་པ་བྱ་བ་སྟེ། ཏདྱ་ཐཱ། བྷོ་བྷོ་བཱན་ནཱ་ག་ཨ་དྷི་པ་ཏ་ཡེ་ཨི་དཾ་ནཱི་ལཱམྦ་ར་དྷ་ར་ཤ་རཱི་རཾ་བཛྲ་པཱ་ཎི་ཧྲྀ་ད་ཡ་ན་ཡ་ས་མ་ཏི་ཀྲ་མ་ཏི་ཨུཏྶཱ་དྷ་ནཾ་བྷ་བི་ཤུདྡྷི་ཧཱུྃ་ཧཱུྃ། ཨོཾ་བཛྲ་ཀྲ་མ་ཡ་ཕཊ། ཀྲྀ་ཏཱནྟཱ་ཡ་ཕཊ། ཀྲྀ་ཏཱནྟ་རཱུ་པ་ཡ་ཕཊ། རོ་ཥ་ཎཱ་ཡ་ཕཊ། 
ཨོཾ་བི་དཱ་ར་ཎཱ་ཡ་ཕཊ། ཀྲྀ་དྷ་སཱ་དྷ་ནཱ་ཡ་ཕཊ། ནཱི་ལཾ་བ་ས་ནཱ་ཡ་ཕཊ། ཨ་པྲ་ཏི་ཧ་ཏ་བཱ་ལ་ཡ་ཕཊ། ཧ་ར་ཧ་ར། དྷ་ར་དྷ་ར། པྲ་ཧ་ར་པྲ་ཧ་ར། མཱ་ར་ཡ་མཱ་ར་ཡ། ཚིནྡ་ཚིནྡ། ཧ་ས་ཧ་ས། བྷིནྡ་བྷིནྡ། དྷཱ་ར་ཡ་དྷཱ་ར་ཡ། ཞེས་བྱ་བའི་གསང་སྔགས་བཟླས་པར་བྱའོ། །དེ་ནས་སྤྱོད་ལམ་གྱིས་གནས་པར་བྱའོ། །རིགས་པས་རང་
བྱུང་སྐུ་ཉིད་རང་གསལ་རྟོགས། །བླ་མ་དང་འགྲོགས་དམ་པའི་དྲིན་གྱིས་ཐོབ། །རྗེས་སུ་གཟུང་ཕྱིར་རང་ཉམས་མྱོང་བས་བརྩམས། །ཟླ་བ་ལྟར་གསལ་དག་ཅིང་དྲི་མེད་དེས། །འགྲོ་ཀུན་རྟོག་པའི་དྲི་མ་རབ་ཞི་ནས། །འབྲས་བུ་ཕྱག་ན་རྡོ་རྗེ་དང་འདྲར་ཤོག །སློབ་དཔོན་ཆེན་པོ་ཛཱ་བ་རི་

49-1-243b

པས་མཛད་པའི་སྒྲུབ་ཐབས་འཁོར་ལོ་ཆེན་པོ་ཞེས་བྱ་བ་རྫོགས་སོ།།      །།པཎྜི་ཏ་དེ་བ་པཱུརྞ་མ་ཏི་དང་། ལོ་ཙཱ་བ་དགེ་སློང་ཆོས་ཀྱི་བཟང་པོས་བསྒྱུར་བའོ།།      །།༄༅༅། །རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ཎི་མ་ཧཱ་ཡཀྵ་ཀ་ཝཾ་ནཱ་མ་དྷཱ་ར་ཎི་སཱ་དྷ་ན་ཨ་མྲྀ་ཏ་བིནྡུ། བོད་སྐད་དུ། 
གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་གྱི་གཟུངས་ཀྱི་སྒྲུབ་ཐབས་བདུད་རྩི་ཐིགས་པ་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །སེམས་ཅན་རྣམས་ནི་ས་བོན་གནས་དང་རྩོལ་རྐྱེན་གྱིས། །གདུག་པས་ཟིན་གྱུར་དུག་དང་ཁྲག་ནི་འདྲེས་གྱུར་པ། །ཐབས་གཞན་དུ་མས་
དབྱེ་ཞིང་བསལ་བར་མི་ནུས་ཏེ། །འདབ་བཟང་རྒྱལ་པོས་ཆུ་དང་འོ་མ་འབྱེད་པ་ལྟར། །གདུལ་བྱ་གདུལ་ཕྱིར་དབང་བསྐུར་ཇི་སྲིད་མཉེས་གྱུར་པས། །དེས་ནི་འབྱེད་ཅིང་གསལ་བར་ཕོད་པ་ཡིན་པ་སྟེ། །རྒྱ་མཚོར་ཞབས་ནུབ་འཇིག་དུས་མེ་དཔུང་ནང་འདུག་པ། །གདུག་པའི་དགྲར་གྱུར་ལྗགས་འདྲིལ་
དབུགས་ཚ་མི་ཤིགས་འཛིན། །དེ་ལ་བཏུད་དེ་ཇི་སྲིད་མཉེས་བྱས་མན་ངག་བྲི། །རང་ཉམས་མྱོང་བས་དུག་ཟིན་སྒྲུབ་པ་རྗེས་དྲན་གཟུང་། །རྒྱལ་པོ་དང་། རྐུན་པོ་དང་། སྟག་ལ་སོགས་པའི་འཇིགས་པ་ཐམས་ཅད་དང་བྲལ་བའི་རི་བོའམ། ཡིད་དུ་འོང་བ་འདུ་འཛི་མེད་པའི་གནས་སུ་བྱམས་པ་དང་ལྡན་པའི་
སྒྲུབ་པ་པོས་ཁྲུས་ཉེ་བར་བྱས་ཏེ། སྟན་བདེ་བ་ལ་འདུག་ནས། རང་གི་སྙིང་གར་ཉི་མའི་དཀྱིལ་འཁོར་ལ་གནས་པའི་ཡི་གེ་ཧཱུྃ་བསམས་ཏེ། དེའི་འོད་ཟེར་གྱིས་ཕྱོགས་བཅུ་ན་གནས་པའི་གངྒཱའི་ཀླུང་གི་བྱེ་མ་སྙེད་ཀྱི་སངས་རྒྱས་རྣམས་དང་། བླ་མ་དང་བྱང་ཆུབ་སེམས་དཔའ་རྣམས་ལ་བསྐུལ་ནས་མཆོད་
པ་རྣམ་ལྔས་ཡང་དག་པར་མཆོད་དེ། སྡིག་པ་བཤགས་པ་ལ་སོགས་པ་བྱའོ། །དེའི་རྗེས་ལ་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཞེས་བྱ་བ་ཚངས་པའི་གནས་བཞི་ལ་འདྲིས་པར་བྱའོ། །དེ་ནས་གཅིག་དང་དུ་མ་དང་བྲལ་བའི་བློས་ཕྱི་ནང་གི་དངོས་པོ་ཐམས་ཅད་སྟོང་
ཞིང་བདག་མེད་པར་བསམ་མོ། །ཨོཾ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བྱ་བས་མི་གཡོ་བར་བྱའོ། །དེ་ནས་པཾ་ལས་པདྨའི་ལྟེ་བ་ལ། ཨ་ལས་ཟླ་བ་དང་ཉི་མའི་དཀྱིལ་འཁོར་དབང་པོ་གཉིས་ཀྱི་སྟེང་དུ་བསམས་ཏེ། ཡི་གེ་ཧཱུཾ་རིང་པོའི་སྒྲ་དང་བཅས་པ་འོད་འཕྲོས་པ་ལས་ཁྲོ་

49-1-244a

བོའི་རྡོ་རྗེ་རྩེ་ལྔ་པ་བསམས་ཏེ། དེའི་འོད་ཟེར་གྱིས་ཕྱོགས་བཅུ་གངྒཱའི་ཀླུང་གི་བྱེ་མ་སྙེད་འབུམ་ཕྲག་གི་སངས་རྒྱས་རྣམས་སྤྱན་དྲངས་ལ། དེའི་འོད་ཟེར་དེ་ཉིད་དུ་ཐིམ་སྟེ། དེ་ཡོངས་སུ་གྱུར་པ་ལས། སངས་རྒྱས་གོས་སྔོན་པོ་ཅན། ཞལ་གསུམ་ཕྱག་དྲུག་དང་ལྡན་པ། 
ཞབས་གཡོན་བརྐྱང་བ། གཡས་བསྐུམ་པ། སྐུ་མདོག་མཐིང་ནག་ཏུ་འདུག་པ། སྤྱན་གསུམ་མེའི་ཕུང་པོ་འདྲ་བ། དབུ་སྐྲ་ཁམ་པ་གྱེན་དུ་བརྗེས་པ་རལ་པའི་ཅོད་པན་ལ། སྦྲུལ་མགོ་བརྒྱད་ཀྱི་ཅོད་པན་ཡོད་པ། སྨིན་མ་དང་དཔྲལ་བའི་མཚམས་སུ་ཁྲོ་གཉེར་བསྡུས་པ། ལྗགས་འདྲིལ་ཞིང་མཆེ་
བ་གཙིགས་པ། ཁ་རླངས་ཚ་ཞིང་ང་རོའི་སྒྲ་འབྱུང་བ། དེའི་དཀྱིལ་ན་སངས་རྒྱས་མི་བསྐྱོད་པ་སྐུ་མདོག་སྔོན་པོ་གཡོན་བརྐྱང་བས་བཞུགས་པ། གདུག་པ་ཞེ་ལ་མནན་ནས་སྡིགས་མཛུབ་མཛད་པ་ཅན་ནོ། །ལྟོ་བ་ཡངས་ཤིང་གསུས་པའི་སྨད་འཁྱིལ་པ། ཞལ་གཡས་དུང་དང་འདྲ་བ། གཡོན་པདྨ་རཱ་ག་འདྲ་
བ་དབུས་སྐུ་དང་མཐུན་པ། ཟླ་བའི་དཀྱིལ་འཁོར་ལྟར་རྒྱས་པའོ། །ཕྱག་དང་པོ་ཁྲོ་བོའི་རྡོ་རྗེ་རྩེ་ལྔ་པ་འཛིན་པ། གཡོན་སྡིགས་མཛུབ་མཛད་པ། བར་མ་གཉིས་ཐལ་མོ་བརྡེབས་པའི་སྒྲ་སྒྲོགས་པ། ཐ་མ་གཉིས་སྦྲུལ་གདུག་པའི་རྐེད་པ་ནས་བཟུང་ཞིང་མགོ་ནས་ཟ་བའོ། །རང་གི་སྙིང་གར་ཉི་མ་ལ་གནས་
པའི་ཡི་གེ་ཧཱུཾ་དང་ལྡན་པའོ། །གོས་སྔོན་པོའི་སྟོད་གཡོགས་དང་། ཤམ་ཐབས་སྟག་གི་རིས་ཅན་བསྣམས་པའོ། །ལྟ་བ་ཕྱིན་ཅི་ལོག་ཐམས་ཅད་ཀྱི་གཞུང་འཇོམས་པའི་རྟགས་སུ་ཉི་མ་དང་ཟླ་བའི་སྟེང་ན་བཞུགས་པ། ཚངས་པ་དང་བརྒྱ་བྱིན་གྱི་སྟེང་ན་རིགས་བཞིའི་ཀླུ་ཡིས་རྒྱན་དུ་བྱས་པ་ནི་དགའ་
བོ་དང་ཉེ་དགའ་འབར་བས་སྙན་ཆ་བྱས་པ། ལག་པ་དང་དཔུང་པ་པདྨ་དང་ཆུ་ལྷས་བརྒྱན་པ། སྟོབས་ཀྱི་རྒྱུ་དང་རིགས་ལྡན་ཁར་ཟ་བའི་སྐ་རགས་ཅན་ནོར་རྒྱས་དང་དུང་སྐྱོང་གིས་དབུ་ལ་བརྒྱན་ཞིང་རྒྱན་དུ་བྱས་པ་ནི་སེར་པོ་དང་དམར་པོ་དང་དཀར་པོ་དང་ནག་པོ་སྟེ། རིན་པོ་ཆེ་སྤྱི་བོའི་སྟེང་དུ་ན་ཡོད་པའོ། །དེ་ལྟར་
བདུད་ལ་སོགས་པ་རློག་པར་བྱེད་པ་ཅན་དུ་བདག་ཉིད་རྣམ་པར་བསམ་མོ། །དེ་ནས་རང་གི་སྙིང་གའི་ཧཱུཾ་ལས་འོད་འཕྲོས་པས། རང་འདྲའི་ཡེ་ཤེས་སེམས་དཔའ་སྤྱན་དྲངས་ཏེ། སྙིང་ག་ལས་འཕྲོས་པའི་འོད་ཟེར་གྱིས་མཆོད་པའི་ལྷ་མོ་རྣམས་ཀྱིས་ཡང་དག་པར་མཆོད་དེ། ཛཿ་ཧཱུཾ་བཾ་ཧོཿ

49-1-244b

བཞིས་དགུག་པ་དང་། གཞུག་པ་དང་། བཅིང་བ་དང་། ཐ་མི་དད་པའི་ཕྱིར་དབང་དུ་བྱའོ། །དེའི་རྗེས་ལ་སངས་རྒྱས་གངྒཱའི་ཀླུང་གིས་སྐུ་དང་གསུང་དང་ཐུགས་བྱིན་གྱིས་བརླབ་པའི་ཕྱིར། ཨོཾ་དང་ཨཱཿདང་ཧཱུཾ་མཐིང་ག་དང་། དམར་པོ་དང་། དཀར་པོའི་རིམ་པས་སྤྱི་བོ་དང་། སྙིང་ག་དང་། མགྲིན་པར་ཉི་མའི་
དཀྱིལ་འཁོར་ལ་རྣམ་པར་བསམ་མོ། །དེ་ནས་དུས་གསུམ་གྱི་སངས་རྒྱས་ལག་ན་བདུད་རྩིའི་བུམ་པ་ཁྲོ་བོའི་རྡོ་རྗེ་རྩེ་ལྔ་པས་མཚན་པས་དབང་བསྐུར་རོ། །དེ་ནས་ཇི་སྲིད་སྐྱོ་བར་མ་གྱུར་གྱི་བར་དུ་བསྒོམ་པར་བྱའོ། །སྐྱོ་བར་གྱུར་ན་སངས་རྒྱས་གངྒཱའི་ཀླུང་གིས་རྗེས་སུ་གནང་བའི་གཟུངས་ཀྱི་ཕྲེང་བ་ཁོ་
ན་བཟླས་པར་བྱ་སྟེ། ཉུང་དུ་འདོད་པ་རྣམས་ཀྱིས་ནི། །ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་ཧྲྀ་ད་ཡ་མ་ཧཱ་ཀྲོ་དྷ་སཱ་དྷ་ཧཱུཾ་ཕཊ་ཅེས་སྙིང་པོའི་སྔགས་ཡི་གེ་ཉི་ཤུ་རྩ་གཅིག་པའོ། །ངག་གི་བརྗོད་པས་ཀྱང་སྐྱོ་བར་གྱུར་ན། ཨོཾ་ཨ་ཀཱ་རོ་མུ་ཁཾ་ཞེས་བྱ་བ་ལ་སོགས་པས་གཏོར་མ་ཉེ་བར་ཕུལ་ཏེ། རྡོ་རྗེ་སེམས་དཔའི་སྙིང་
པོས་ལྷག་པ་དང་མ་ཚང་བ་དག་པར་བྱའོ། །དེ་ནས་ལྡང་བར་འདོད་ན་ཡེ་ཤེས་སེམས་དཔའ་ཕྱུང་སྟེ། ཡང་དག་པར་མཆོད་ལ་ཨོཾ་ཀྲྀ་ཏོ་བ་ཞེས་བྱ་བའི་སྔགས་ཀྱིས་གཤེགས་སུ་གསོལ་ལོ། །དེ་ནས་དེའི་ང་རྒྱལ་གྱིས་ལྡང་བར་བྱའོ། །བླ་མ་མཉེས་བྱས་དང་ལྡན་སྙིང་རྗེར་བཅས། །བརྩོན་འགྲུས་དྲག་
ལྡན་དྲན་ལྡན་བརྟན་བློ་ཅན། །སྐད་ཅིག་ཙམ་ཡང་གཉིད་ནི་ལོག་པ་མིན། །དེ་བཞིན་གཉིད་ལས་རྒྱལ་བྱེད་ཤེས་རབ་ཀྱིས། །ཏཀྵ་ཀ་ཡིས་ཟིན་པར་གྱུར་པ་ཡང་། །ཟླ་བ་དྲུག་གིས་ངེས་པར་བཟུང་འགྱུར་ཟློགས། །བླ་མ་ལ་གུས་བརྩེ་བས་བདུད་རྩི་ཐིགས་པ་ལྷུང་། །བདག་གིས་བླངས་ཏེ་མིད་པས་ལུས་རྒྱས་ཏེ། །ལུས་རྒྱས་
སྟོབས་ཀྱིས་སྒྲུབ་པོ་རྗེས་གཟུང་སྒྲུབ་ཐབས་དྲན། །བསོད་ནམས་གང་ཡོད་སྒྲུབ་པོའི་རྟོག་པའི་ནད་མེད་ཤོག །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་གྱི་གཟུངས་ཀྱི་སྒྲུབ་ཐབས་བདུད་རྩི་ཐིགས་པ་ཞེས་བྱ་བ།ནམ་གྲུའི་རིགས་ལས་བྱུང་བ་དངོས་གྲུབ་བརྙེས་པའི་སློབ་དཔོན་ཛཱ་བ་རི་པས་
མཛད་པ་རྫོགས་སོ།།      །།བལ་པོའི་མཁན་པོ་དེ་བ་པཱུརྞ་མ་ཏི་དང་། བོད་ཀྱི་ལོ་ཙཱ་བ་ཆོས་ཀྱི་བཟང་པོས་བསྒྱུར་བའོ།།      །།༄༅༅། །རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ཎི་སཱ་དྷ་ན་ནོ་པི་ཀ་ཙནྡྷ་ནཱ་མ། བོད་སྐད་དུ། ལག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་པའི་ཐབས་
ཐབས་

49-1-245a

མདོར་བསྡུས་པ་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །སྔར་ཉིད་དོན་དམ་ཐུགས་ཆུད་འགྲོ་བའི་དོན་དུ་རྡོ་རྗེའི་སྐུ། །གནས་མཛད་མཐུ་སྟོབས་ཁྱད་འཕགས་གདུག་པ་རྣམས་ཀྱི་དགྲར་གྱུར་པ། །རྒྱ་མཚོར་ཞབས་གཞག་འཇིག་དུས་མེ་དཔུང་དང་ལྡན་སྙིང་
རྗེས་ཁྲོས། །རྟོག་པའི་སྡུག་བསྔལ་ཐར་མཛད་ཁྱོད་ལ་དངོས་པོ་ཀུན་གྱིས་འདུད། །རྩོད་པའི་དུས་གང་ཕྲད་གྱུར་བརྩོན་འགྲུས་ཆུང་ཞིང་བློ་ཞེན་པས། །ཤིན་ཏུ་བསྡུས་ལ་དགའ་ཞིང་མ་བཙལ་འབྲས་བུ་འདོད་ལ་གཟུད་ཕྱིར་དྲན། །དེ་ལ་སྙིང་རྗེ་ཆེན་པོ་དང་ལྡན་པའི་རྣལ་འབྱོར་པས་ཁྲུས་བྱས་ཏེ། 
ཡིད་དུ་འོང་བའི་བསམ་གཏན་གྱི་ཁང་པར་སྟན་བདེ་བ་ལ་འདུག་ནས་རང་གི་སྙིང་གའི་ས་བོན་གྱི་འོད་ཟེར་གྱིས་ཕྱོགས་བཅུ་གངྒཱའི་ཀླུང་གི་སངས་རྒྱས་རྣམས་དང་དེའི་སྲས་རྣམས་མདུན་དུ་སྤྱན་དྲངས་ཏེ། མཆོད་པའི་ཡོ་བྱད་ལྔས་ཡང་དག་པར་མཆོད་པ། སྡིག་པ་བཤགས་པ་ལ་སོགས་པ་བྱའོ། །དེའི་
རྗེས་སུ་ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བརྗོད་པ་དང་བཅས་པས་སྟོང་པ་ཉིད་དུ་བསྒོམ་མོ། །དེ་ནས་པཾ་ལས་པདྨའི་སྟེང་དུ་ཟླ་བའི་དཀྱིལ་འཁོར་ཧཱུཾ་དང་བཅས་པ་བསམས་ཏེ། དེ་ཡང་རིང་པོའི་སྒྲ་དང་ལྡན་ཞིང་འོད་ཟེར་འཕྲོ་བ་ཅན་ནོ། །དེ་ཡོངས་སུ་གྱུར་པ་ལས་རྡོ་རྗེ་རྩེ་ལྔ་དང་ལྡན་
པའི་ས་བོན་ལས་འོད་འཕྲོས་ཏེ། ཕྱོགས་བཅུ་གངྒཱའི་ཀླུང་གི་བྱེ་མ་སྙེད་ཀྱི་སངས་རྒྱས་སྤྱན་དྲངས་ཏེ། དེ་ཉིད་ལ་ཐིམ་ནས། དེ་ཡོངས་སུ་གྱུར་པ་ལས་སངས་རྒྱས་གོས་སྔོན་པོ་ཅན། ཞལ་གཅིག་ཕྱག་གཉིས་པ། གཡོན་བརྐྱང་བ་གཡས་བསྐུམ་པ། སྐུ་མདོག་མཐིང་ནག་སྤྱན་མེའི་ཕུང་
པོ་འདྲ་བ། ཡ་སོས་མ་མཆུ་མནན་པ། འབྲུག་སྒྲ་ཅན་གྱི་དབུགས་ཚ་བ། སྐྲ་གྱེན་དུ་བརྗེས་པ། ཕྱག་གཡས་ན་རྡོ་རྗེ་རྩེ་ལྔ་པ་བསྣམས་པ། གཡོན་ན་སྡིགས་མཛུབ་མཛད་པ། གོས་སྔོན་པོ་ཅན་ལ་ལྟོས་འགྲོ་བརྒྱད་ཀྱིས་བརྒྱན་པ། བདུད་ལ་སོགས་པ་ཚར་གཅོད་པའི་ཚུལ་ཅན་དུ་
བདག་ཉིད་བསམ་མོ། །རང་གི་སྙིང་གའི་ས་བོན་གྱིས་རང་དང་འདྲ་བའི་ཡེ་ཤེས་སེམས་དཔའ་སྤྱན་དྲངས་ཏེ། སྙིང་པོ་བཞིས་ཐ་མི་དད་པར་བྱ། དེ་ནས་བྱིན་གྱིས་བརླབ་ཅིང་དབང་བསྐུར་རོ། །ཇི་སྲིད་སྐྱོ་བར་མ་གྱུར་གྱི་བར་དུ་བསྒོམ་ཞིང་། སྐྱོ་བའི་ཚེ་སངས་རྒྱས་གངྒཱའི་ཀླུང་གི་རྗེས་སུ་

49-1-245b

གནང་བའི་ཕྲེང་བའི་སྔགས་ཁོ་ན་བཟླས་པར་བྱའོ། །བསྡུས་པ་དག་ལ་དགའ་བས་ནི། ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་ཧྲྀ་ད་ཡ་མ་ཧཱ་ཀྲོ་དྷ་སཱ་དྷ་ཧཱུཾ་ཕཊ། སྙིང་པོའི་སྔགས་ཉི་ཤུ་རྩ་གཅིག་པའོ། །ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་དྷ་ར་མ་ཧཱ་ཀྲོ་དྷ་སཱ་དྷ་ཧཱུཾ། ཉེ་བའི་སྙིང་པོ་དང་། ཡང་སྙིང་སྟེ་བཅུ་བདུན་པའོ། །གཏོང་བར་འདོད་པའི་
ཚེ་གཏོར་མ་ཕུལ་ལ། ཡེ་ཤེས་སེམས་དཔའ་ཕྱུང་སྟེ་གཤེགས་སུ་གསོལ་ལོ། །སྤྱོད་ལམ་ཐམས་ཅད་དུ་ཡང་རང་ལྷའི་ང་རྒྱལ་དང་ལྡན་པས་གནས་པར་བྱའོ། །ཁ་ཟས་གོས་སོགས་ཟས་སྐོམ་དང་། །དབུལ་བ་ཀུན་ཟད་ནད་མེད་དང་། །འཇིགས་ཆེན་བརྒྱད་དང་སྡུག་བསྔལ་སོགས། །འཇིགས་པ་མེད་ཅིང་གང་བསམ་པའི། །འདོད་
པའི་དོན་རྣམས་ཐམས་ཅད་ནི། །སྒྲུབ་ཐབས་འདི་ལས་འབྱུང་འགྱུར་རོ། །འགྲོ་རྣམས་འདོད་པ་ཐ་དད་པས། །དེ་ལ་དགོངས་ནས་བདེ་གཤེགས་ཀྱིས། །བྱང་ཆུབ་ལམ་ནི་སྣ་ཚོགས་གསུངས། །རང་འདོད་ལམ་ནི་ཐོབ་བྱའི་ཕྱིར། །དད་པས་བླ་མ་བཟང་བཙལ་ཏེ། །ཇི་སྲིད་བླ་མ་མཉེས་བྱས་ནས། །འདོད་དོན་མན་ངག་བླང་བར་བྱ། །མཉེས་པས་
ཡིན་གྱི་གཞན་གྱིས་མིན། །བདག་གིས་སྒྲུབ་ཐབས་མདོར་བསྡུས་སྨྲས། །སྨྲས་པས་ཟླ་བ་ལྟར་གསལ་བའི། །དག་ཅིང་ནམ་མཁར་མི་ཤོང་བའི། །དགེ་བ་གང་གིས་ཐོབ་པ་གང་། །འདིར་བཞུགས་འདོད་ལྷའི་ཞལ་མཐོང་ཤོག །དཔལ་ཕྱག་ན་རྡོ་རྗེའི་སྒྲུབ་ཐབས་མདོར་བསྡུས་པ་ཞེས་བྱ་བ། ནམ་གྲུའི་རིགས་ལས་བྱུང་བ། དངོས་
གྲུབ་བརྙེས་པའི་སློབ་དཔོན་ཆེན་པོ་ཛཱ་བ་རི་པས་མཛད་པ་རྫོགས་སོ།།      །།བལ་པོའི་པཎྜི་ཏ་དེ་ཝ་པཱུརྞ་མ་ཏི་དང་། བོད་ཀྱི་ལོ་ཙཱ་བ་ཆོས་ཀྱི་བཟང་པོས་བསྒྱུར་བའོ།།      །།༄༅༅། །རྒྱ་གར་སྐད་དུ། ནཱ་ག་ཀུ་ལ་ཙ་ཏྭ་རི་སཱ་དྷ་ནཱཾ་ནཱ་མ། བོད་སྐད་དུ། ཀླུ་རིགས་བཞིའི་སྒྲུབ་ཐབས་ཞེས་བྱ་བ། ཕྱག་ན་རྡོ་རྗེ་ལ་ཕྱག་འཚལ་ལོ། །
ཐུགས་རྗེ་བྱམས་པས་འགྲོ་བ་རྣམས་ལ་མ་བཞིན་བརྩེ་བར་མཛད། །གདུག་པ་འདུལ་ཕྱིར་ཁྲོ་རྒྱལ་འབར་བའི་སྐུར་སྟོན་པ། །བྱོལ་སོང་རྒྱན་ལྡན་བསྐལ་པའི་མེ་ལྟར་འབར། །བཟོད་དཀའ་གདུག་པའི་ནད་ལས་ཐར་མཛད་དེ་ལ་དངོས་པོ་ཀུན་གྱིས་འདུད། །བྱམས་པས་ཞེ་སྡང་ཞི་བ་དང་། །དྲག་པོས་ཉེ་རིངས་གསང་བའི་
ཕྱིར། །དེ་ཡི་སྒྲུབ་ཐབས་གཟུང་བའི་ཕྱིར། །བླ་མའི་དྲིན་གྱིས་ཐོབ་ནས་བརྩམ། །གང་ཞིག་བསྙེན་པ་རྫོགས་པ་ཡིས། །གང་ཞིག་དབང་དུ་བསྡུ་འདོད་ན། །ཀླུ་ཡི་སྒྲུབ་དང་འཁྲུལ་འཁོར་དང་། །སྦྱོར་བ་བརྩམ་པར་བྱ་བ་ཡིན། །དང་པོ་གནས་ཆེན་ཡིད་འོང་དུ། །བསྙེན་པ་སྔོན་དུ་རྫོགས་བྱས་ཏེ། །ཀླུ་བརྒྱད་གཟུགས་

49-1-246a

ནི་འཁར་གཞོང་གཞག །རང་ཉིད་ལྷ་ཡི་སྐུར་བསྒོམས་ན། །དུས་གསུམ་ཀླུ་ལ་མཆོད་པ་བྱ། །རྟགས་དང་རྨི་ལམ་བརྟགས་ནས་ནི། །དེ་ལས་བཟློག་པའི་ལས་བརྩམ་སྟེ། །མཚམས་བཅད་ས་ཡི་ཆོ་ག་བྱ། །སྟེགས་བུ་བྱི་དོར་ལེགས་བྱས་ཏེ། །སྟ་གོན་ཆོ་ག་རྒྱས་བྱས་ལ། །དེ་ནས་རྫས་རྣམས་བསག་པར་བྱ། །འབྲས་ཀྱི་རྒྱུ་ལས་
བྱས་པ་ཡི། །ཀླུ་ཆེན་བརྒྱད་ནི་སྦྲུལ་མགོ་ཅན། །དངུལ་གཞོང་ནང་དུ་བསག་པར་བྱ། །ཁ་དོག་ཚོན་གྱིས་བསྒྱུར་ལ་གཞག །སོ་སོ་ལྟོ་འཕྱེའི་མགོ་བོ་ནི། །དགུ་དང་བདུན་དང་ལྔ་དང་གསུམ། །སྐྱེས་པ་བུད་མེད་མཛེས་པ་དང་། །སྦྲུལ་དང་སྦལ་པ་ལྕོང་མོ་དང་། །ཉ་དང་རུས་སྦལ་རྐང་མངས་དང་། །སྡིག་པ་ཕག་དང་མཛོ་རྟོལ་དྲེ། །གཞན་
ཡང་གང་བྱུང་གཟུགས་བྱའོ། །དེ་ནས་ཐིག་དང་ཚོན་དགྱེ་ཞིང་། །དབུས་ཀྱི་ལྟེ་བ་ཟླུམ་པོ་ལ། །གཙོ་བོ་དབུས་སུ་བྲིས་ནས་ནི། །འདབ་མ་བརྒྱད་ལ་ཀླུ་བརྒྱད་བྲི། །ཕྱི་རོལ་གྱི་ནི་འདབ་མ་ལ། །འཁོར་དུ་གཏོགས་པ་སོ་སོར་བྲི། །ཤར་ལ་སོགས་པའི་ཕྱོགས་རྣམས་སུ། །སྐྱེས་པ་བུད་མེད་ལ་སོགས་བྲི། །མཚམས་སུ་ལྕོང་མོ་ཉ་སོགས་དགོད། །
སྟེང་དུ་སྡིག་པ་ཕག་སོགས་བྲིའོ། །སྟེང་དུ་འཁར་གཞོང་ཀླུ་ཆེན་བརྒྱད། །བར་ཁྱམས་ལྷ་ཡི་སྣམ་བུ་ལ། །ཀླུ་དང་གཉན་དང་ས་བདག་གསུམ། །རིམ་གྱིས་མཉམ་པར་དགོད་པར་བྱ། །བླ་རྒྱན་འོག་རྒྱན་འབྱོར་ཚད་དགྲམ། །འབྲུ་ལྔ་སྨན་ལྔའི་གཏོར་མ་དང་། །ནཱ་ག་གེ་སར་ཀཎྜ་ཀ་རི་དང་། །ནཱ་ག་པུཥྤ་རྒྱ་མཚོ་དབུ་བ་དང་། །ཆུ་སྲིན་སྡེར་མོ་དབང་
པོ་ལག་པ་དང་། །བལ་པོའི་སེའུ་སྨྱག་ཤད་ལྕུག་མ་དང་། །ནཱི་ལོཏྤ་ལ་འདམ་བུའི་རྩ་བ་དང་། །དར་ཚོན་སྣ་ལྔ་རས་སྐུད་དམར་པོ་དང་། །ལི་ཁྲི་དམར་པོ་དང་ནི་ག་བུར་ཤེལ། །པུ་ཤེལ་ཙེ་དང་ལྗོན་ཤིང་འདམ་བུ་ཚལ། །དཀར་གསུམ་མངར་གསུམ་འབྲས་ཆན་ཁུར་བའོ། །དེ་ནས། འདོད་ཡོན་ལྔ་ཡི་འཁོར་ལོ་ནི། །
གྲུ་བཞི་སྒོ་བཞི་བྷྲཱུཾ་ལས་ནི། །འདབ་བཞི་འདབ་བརྒྱད་བསྐྱེད་པར་བྱ། །ཕུཿལས་ཀླུ་བརྒྱད་ཀླུ་ཆེན་ཏེ། །འཁོར་ཡང་དེ་བཞིན་བསྐྱེད་བྱས་ནས། །གཙོ་བོ་སྒྲུབ་ཐབས་ལས་གསུངས་བཞིན། །སྤྱན་དྲངས་བསྟིམ་པ་ལ་སོགས་ཀྱིས། །ཀླུ་ལ་སོགས་པ་དེ་བཞིན་དགུག །ཨོཾ་རྒྱ་མཚོ་ཆེན་པོའི་ཀློང་དཀྱིལ་ནས། །གཙུག་ན་རིན་ཆེན་ཀླུ་ཡི་རྗེ། །ནོར་རྒྱས་བུ་དང་དུང་
སྐྱོང་དང་། །དགའ་བོ་དང་ནི་འཇོག་པོ་དང་། །པདྨ་དང་ནི་ཆུ་ལྷ་དང་། །སྟོབས་ཀྱི་རྒྱུ་དང་མ་དྲོས་དང་། །ཀླུ་ཆེན་བརྒྱད་པོ་འཁོར་དང་བཅས། །གནས་འདིར་མཆོད་ཀྱིས་གཤེགས་སུ་གསོལ། །རྒྱལ་རིགས་དང་ནི་བྲམ་ཟེའི་རིགས། །རྗེ་རིགས་དང་ནི་གདོལ་པའི་རིགས། །གནས་འདིར་མཆོད་ཀྱིས་གཤེགས་སུ་གསོལ། །

49-1-246b

ཀླུ་བྲན་གཉན་དང་ས་བདག་ཚོགས། །སྤྲུལ་པ་འབུམ་སྡེ་འཁོར་དང་བཅས། །གནས་འདིར་མཆོད་ཀྱིས་གཤེགས་སུ་གསོལ། །མེ་ཏོག་ལ་སོགས་མཆོད་པ་ལྔ། །འདོད་པའི་ལྷ་ལ་དབུལ་བར་བྱ། །གཏོར་མ་རྣམས་ཀྱང་སོ་སོར་དབུལ། །ནཱ་ག་གེ་སར་སྨན་གྱི་མཆོག །སྔགས་དང་ཕྱག་རྒྱས་བྱིན་བརླབས་ནས། །ཏིང་འཛིན་འཕྲོ་འདུའི་
བརྡས་བཀྲོལ་ཏེ། །ཀླུ་ཆེན་བརྒྱད་ལ་མཆོད་པ་དབུལ། །སྔོན་གྱི་དམ་ཚིག་སླར་དུལ་ལ། །ཞེ་རིངས་དུག་ལས་སླར་དུལ་ཞིག །ཀཎྜ་ཀ་རི་ནཱ་ག་པུཥྤ་དང་། རྒྱ་མཚོ་དབུ་བ་ཆུ་སྲིན་སྡེར་མོ་དང་། །དབང་པོ་ལག་པ་ནཱ་ག་གེ་སར་དང་། །བལ་པོ་སེའུ་སྨྱག་ཤད་ལྕུག་མ་དང་། །ནཱི་ལ་ཨུཏྤལ་འདམ་བུའི་ནགས་ཚལ་དང་། །དར་ཚོན་སྣ་ལྔའི་རས་
སྐུད་དམར་པོ་དང་། །ལི་ཁྲི་དམར་པོ་ག་བུར་ཤལ་དང་ནི། །པུ་ཤེལ་རྩེ་དང་དུང་གཡས་འཁྱིལ་བ་དང་། །ཤུ་དག་དཀར་པོ་སྙིང་ནི་ཞོ་ཤ་དང་། །མཁལ་མ་ཞོ་ཤ་སྟག་པའི་ཤུན་པ་དང་། །སེང་ལྡེང་དཀར་དམར་ཀླུ་སྨན་སྣ་ཚོགས་ཀྱིས། །ཀླུ་རྣམས་ཀུན་ལ་རབ་ཏུ་མཆོད་པར་བྱ། །མཆོད་པ་ཕུལ་ནས་བཟླས་པ་བྱ། །ཨོཾ་ནཱ་ག་ཧ་ར་
ཧ་ར་ནཱ་ག་ཕུ། པྲ་ཧ་ར་པྲ་ཧ་ར་ནཱ་ག་ཕུ། ཚིནྡ་ཚིནྡ་ནཱ་ག་ཕུ་ཧྲྀ་ད་ཡ་ནི་ཕུ། བྷིནྡ་བྷིནྡ་ནཱ་ག་དྷ་མ་ནི་ཕུ། བི་སི་མ་ཏ་ནཱ་ག་ཤ་རཱི་ར་ཎི་ཕུ། བི་སྥོ་ཊ་ཡ་ནཱ་ག་ན་ཡ་ནི་ཕུ། ནཱ་ག་བི་དཱ་ར་ཎ་ཡ་ཕུ། ནཱ་ག་ཀྲོ་དྷ་ན་ཡ་ཕུ་སྭཱ་ཧཱ། ཨོཾ་ཨ་ནནྟ་ཡ་ཧཱུཾ་ནཱཾ་ཧཱུཾ་སྭཱ་ཧཱ། ཨོཾ་བཱ་སུ་ཀི་ཧཱུཾ་ནཱཾ་ཧཱུཾ་སྭཱ་ཧཱ། ཨོཾ་ཏཀྵ་ཀ་ཧཱུཾ་ནཱཾ་ཧཱུཾ་སྭཱ་ཧཱ། ཨོཾ་པདྨ་ཧཱུཾ་ནཱཾ་ཧཱུཾ་སྭཱ་ཧཱ། ཨོཾ་མ་ཧཱ་པདྨ་
ཧཱུཾ་ནཱཾ་ཧཱུཾ་སྭཱ་ཧཱ། ཨོཾ་ཤཾ་ཁ་པཱ་ལ་ཧཱུཾ་ནཱཾ་ཧཱུཾ་སྭཱ་ཧཱ། ཨོཾ་ཀརྐོ་ཊ་ཧཱུཾ་ནཱཾ་ཧཱུཾ་སྭཱ་ཧཱ། ཨོཾ་ཨ་ཎ་ཝ་ཏ་ཧཱུཾ་ནཱཾ་ཧཱུཾ་སྭཱ་ཧཱ། ཨོཾ་ནཱ་ག་ཀུ་ལ་ཙ་ཏྭ་རི་ཤཱནྟི་སྭཱ་ཧཱ། ཨོཾ་ནཱ་ག་པྲ་ཏི་སྥོ་ཊ་ཡ་སྭཱ་ཧཱ། ཨོཾ་ནཱ་ག་པྲ་པཉྩ་བུ་ཉེ་བ་སྭཱ་ཧཱ། ཨོཾ་ཏ་ཐཱ་ག་ཏ་ཧྲྀ་ད་ཡ་ཧཱུཾ་སྭཱ་ཧཱ། ཨོཾ་ཏ་ཐཱ་ག་ཏ་ཧྲྀ་ད་ཡ་ཙ་ལེ་ཙ་ལེ་ཧཱུཾ་ཕཊ། ཀུན་ལ་བརྒྱ་བརྒྱ་བཟླས་པར་བྱ། །གཙུག་ན་ཡིད་བཞིན་ནོར་
བུ་ཅན། །མིག་ནི་གདེངས་པ་ལྟོ་འཕྱེའི་རིགས། །ཀླུ་ཆེན་བརྒྱད་པོ་མཐོང་བའི་དུག །བཟོད་དཀའི་དུག་རྣམས་ཕྱིར་ཕྱུང་ཤིག །ལུས་ཆེན་མགོ་བོ་ཐ་དད་པའི། །ཞེ་སྡང་དྲག་པོ་རྒྱས་པ་ཡི། །རིགས་བཞི་ཀླུ་རྒྱལ་ཡིད་ཀྱི་དུག །བཟོད་དཀའི་དུག་རྣམས་ཕྱིར་ཕྱུང་ཤིག །གཤེར་ལ་གནས་པ་མཛངས་པའི་རིགས། །གཙང་མ་
ཕལ་ལ་གནོད་མི་བྱེད། །ཀླུ་བྲན་འབུམ་སྡེ་རེག་པའི་དུག །བཟོད་དཀའི་དུག་རྣམས་ཕྱིར་ཕྱུང་ཤིག །ཞེ་རིངས་ནག་པོ་བྱོལ་སོང་རིགས། །རྨིག་བཞི་ལྕགས་ལས་ན་བུན་འཐིབས། །གཉེན་ཆེན་འབུམ་སྡེ་ཁ་བླངས་དུག །བཟོད་དཀའི་དུག་རྣམས་ཕྱིར་ཕྱུང་ཤིག །དམན་པའི་ཆ་འཛིན་ཞེ་སྡང་ཅན། །བདེན་པ་མི་ཉན་

49-1-247a

ཀུན་ལ་གནོད། །ས་བདག་འབུམ་སྡེ་མཆེ་བའི་དུག །བཟོད་དཀའི་དུག་རྣམས་ཕྱིར་ཕྱུང་ཤིག །དྲེགས་པ་ཞེ་སྡང་འབར་བ་ཡི། །གླེན་པ་ང་རྒྱལ་མཐུ་བོ་ཆེ། །འགྲོ་བ་འདི་ལ་གང་གནོད་པ། །བཟོད་དཀའི་དུག་རྣམས་ཕྱིར་ཕྱུང་ཤིག །སྦྱོར་གཞན་རབ་ཏུ་ཁྲོས་པའི་ཕོ་ཉ་ནི། །སྤྲུལ་པ་འབུམ་སྡེ་འགྲོ་བའི་
གནོད་པ་སྐྱེལ། །སྨན་དང་སྔགས་དང་ཕྱག་རྒྱ་ཏིང་འཛིན་གྱིས། །བཟོད་དཀའི་དུག་རྣམས་ཕྱིར་ཕྱུང་ཤིག །དེ་ལྟར་བསྙེན་པ་སྔོན་སོང་བས། །མཆོག་ཏུ་སྒྲུབ་པོས་དུག་ཕྱུང་ནས། །རྨི་ལྟས་རིམ་པ་སོ་སོར་གསལ། །ཐུབ་རྟགས་བྱུང་ན་རྫས་རྣམས་ནི། །རྟེན་ཡོད་གནས་སུ་སྦ་བར་བྱའོ། །གལ་ཏེ་མི་ཐུབ་རྟགས་བྱུང་ནས། །
ཆོ་འཕྲུལ་དྲག་པོ་སྟོན་བྱེད་ན། །འཁྲུལ་འཁོར་ལས་ཀྱི་སྦྱོར་བ་བརྩ་མ། །བསད་པའི་ལས་ཀྱི་སྦྱོར་བ་ནི། །འཁོར་ལོ་ཆེན་པོ་ལ་བརྟེན་ནས། །ཀླུ་གྲུབ་དཀྱིལ་འཁོར་ཤར་ཕྱོགས་སུ། །ཐབས་བཟློག་པ་ཡི་ལས་བྱ་སྟེ། །བྱང་དུ་གསད་པའི་ལས་བྱའོ། །སྲོག་ནན་ནན་ཕཊ་ཕཊ། པྲ་རཾ་པྲ་རཾ་ཛྭ་ལ་ཛྭ་ལ་ཕཊ་ཕཊ།  ཤད་ཤད་
ཤིག་ཤིག་ཕཊ་ཕཊ། མཱ་ར་ཡ་ཧཱུཾ་ཕཊ། རིགས་བཞི་ཀླུ་ལ་མནན་པ་བྱ། །རཱ་ཛ་ཀུ་ལེའི་ཐེམ་པའམ། །ཡང་ན་སྒྲུབ་ཁང་ཐེམ་འོག་ཏུ། །དབྱར་གྱི་ཁྱིམ་གསུམ་ཐ་མ་ལ། །དྲུག་གཉིས་བཞི་ཡི་ཉིན་ཕྱེད་ན། །ཤིན་ཏུ་དམ་པར་སྦ་བར་བྱ། །རྒྱ་གྲམ་འབར་བས་སྟེང་ནས་མནན། །ཇི་ལྟར་བསྟན་པའི་ཏིང་འཛིན་གྱིས། །
རི་རབ་གླང་ལ་བསྐོར་ནས་ནི། །བསྐལ་པའི་མཐའ་རུ་མནན་པར་བསམ། །མཐུ་སྟོབས་ཆེན་པོའི་ང་རོ་ཡིས། །ཕྲེང་བའི་སྔགས་ནི་རབ་བཟླས་ཤིང་། །རྒྱ་གྲམ་འབར་བས་སྟང་སྟབས་བྱ། །མོས་པ་རང་འདོད་ལྷ་མཉེས་ཏེ། །སྒྲུབ་པས་མངོན་སུམ་སྣང་བར་མཛད། །རྩོལ་བ་དྲག་པོས་རྟོག་པའི་ནད་ལས་ཐར། །
ཡུན་དུ་མ་བཏང་དད་ལྡན་ངང་བསྲིངས་ན། །ཏཀྵ་ཀ་ཡིས་བཟུང་བར་གྱུར་པ་ཡང་། །ཟླ་བ་དྲུག་གིས་བཟློག་འགྱུར་ཐེ་ཚོམ་མེད། །གང་ཞིག་རང་སེམས་དཔང་དུ་བཙུགས་ནས་ནི། །ཐེ་ཚོམ་མེད་པར་རྟག་ཏུ་མ་བརྗེད་ན། །རྟོག་པའི་ནད་ལས་ཐར་ཅིང་དངོས་གྲུབ་
འབྱུང་བར་ངེས། །འགྲོ་ལ་བརྩེ་བས་ཀླུ་སྒྲུབ་འཁྲུལ་འཁོར་བརྩམས། །འདི་ལས་བསོད་ནམས་དགེ་རྩ་ཅི་ཡོད་པ། །གང་མོས་རྟོག་པའི་ནད་ལས་ཐར་གྱུར་ནས། །དེ་བཞིན་གཤེགས་པ་རྣམས་ཀྱི་ཞལ་མཐོང་ཤོག །རིན་ཆེན་དཀོན་མཆོག་གསུམ་ལ་ཕྱག་འཚལ་ནས། །དངོས་གྲུབ་སྡུག་

49-1-247b

བསྔལ་ཐམས་ཅད་ཞི་བར་ཤོག །སློབ་དཔོན་ཛཱ་བ་རི་པས་མཛད་པའི་ཀླུ་སྒྲུབ་ཐབས་རྫོགས་སོ།།      །།བལ་པོའི་པཎྜི་ཏ་དེ་བ་པཱུརྞ་མ་ཏི་དང་། ལོ་ཙཱ་བ་དགེ་སློང་ཆོས་ཀྱི་བཟང་པོས་བསྒྱུར་བའོ།།      །།༄༅༅། །རྒྱ་གར་སྐད་དུ། ཡཀྵ་སེ་ནཱ་པ་ཏ་ཡེ་བི་ཤོ་དྷ་ན་ཧ་ར་སཱ་དྷ་ནཱ་མ། བོད་སྐད་དུ། གནོད་
སྦྱིན་གྱི་སྡེ་དཔོན་རྣམས་སྦྱོང་ཞིང་སེལ་བ་ཞེས་བྱ་བའི་སྒྲུབ་ཐབས། དཔལ་ཕྱག་ན་རྡོ་རྗེ་གོས་སྔོན་པོ་ཅན་ལ་ཕྱག་འཚལ་ལོ། །སྐུ་མདོག་མཐིང་ནག་ཁྲོས་པའི་གཟུགས་ལྡན་ཤིན་ཏུ་འཇིགས། །གནོད་སྦྱིན་འདུལ་མཛད་མེ་འབར་རྡོ་རྗེ་འཛིན་ལ་གུས་བཏུད་དེ། །ལས་དང་ཉོན་མོངས་ལས་དང་རྐྱེན་གྱིས་
རབ་བསྐུལ་ནས། །འབྲས་བུ་སྡུག་བསྔལ་གནོད་སྦྱིན་དུག་ནི་བསལ་ཕྱིར་བྲི། །ལྷ་ཡི་བསྙེན་པ་རབ་རྫོགས་ཤིང་། །དུལ་ལ་སྙིང་བརྩེར་ལྡན་པ་དང་། །ཆོ་ག་ཐབས་ལ་མཁས་པ་དང་། །དབང་རྫོགས་ནུས་པ་ལྡན་པས་བཟློག །ཁྲུས་ལ་སོགས་པ་དང་ལྡན་པས། །བུམ་པ་ཡུངས་ཀར་ལེགས་
པར་རྟག །རྟགས་བྱུང་སྒྲུབ་པ་རབ་ཏུ་བརྩམ། །གནས་ནི་ཡིད་འོང་དེར་འདུག་སྟེ། །བསྲུང་དང་ས་ཆོག་རྫོགས་པ་དང་། །མཎྜལ་ལེགས་པར་བྱས་ནས་ནི། །སྟ་གོན་རྫོགས་པར་བྱས་པ་དང་། །དམར་གཏོར་བུམ་པ་ལྔ་རྣམས་དང་། །འབྲུ་སྣ་སྨན་སྣ་རིན་ཆེན་དང་། །ཁྲག་དང་ཤ་དང་སྙིང་ལ་སོགས། །རྫས་
དང་སྟ་གོན་རྫོགས་པར་བསགས། །དེ་ནས་ཐིག་གིས་གདབ་བྱ་བ། །བྱིན་རླབས་དམ་ཚིག་ཅན་གྱིས་བྱ། །དང་པོ་ཚངས་ཐིག་གདབ་པ་དང་། །ཟུར་དང་ལོགས་དང་ཆ་ཆེན་དབྱེ། །སྒོ་རྒྱན་ལྷ་སྣམ་གཉིས་བཏབ་ནས། །དེ་ནས་ཚོན་རྣམས་བྱིན་གྱིས་བརླབ། །དགེ་བ་འཁོར་ལོ་ལྟེ་བར་བཅས། །ལྟེ་བར་ཉི་
མའི་དཀྱིལ་འཁོར་ལ། །རྡོ་རྗེ་སྔོན་པོ་བྲི་བར་བྱ། །འཁོར་ལོའི་རྩིབས་བརྒྱད་སེར་པོ་སྟེ། །ཤར་དུ་རལ་གྲི་ལྷོར་དབྱུག་པ། །ནུབ་ཏུ་མདུང་སྟེ་དགྲ་སྟ་བྱང་། །ཤར་ལྷོ་འཁོར་ལོ་ལྷོ་ནུབ་མདའ། །ནུབ་བྱང་གྲི་གུག་བྱང་ཤར་ཏྲི་ཤུལ་དགོད། །ལྷ་སྣམ་ཕྱོགས་སྐྱོང་བཅུ་དགོད་དོ། །དེ་ནས་རྫས་རྣམས་དགྲམ་
པ་ནི། །དབུས་སུ་བུམ་པ་སྔོན་པོ་དགོད། །ཕྱོགས་བཞིར་རིགས་དང་བསྟུན་པའོ། །མཚམས་བཞིར་ཁྲག་གི་གཏོར་མ་གཞག །གྲྭ་རྣམས་མཆོད་པ་སྔོན་པོ་བཤམ། །ཕྱོགས་སྐྱོང་གཏོར་མ་སྒོ་བཞིར་གཞག །ནད་པ་ཁྲུས་བྱས་བྱང་འདུག་ལྷོ། །བདག་ཉིད་ལྷོར་འདུག་བྱང་དུའོ། །ལས་

49-1-248a

ཀྱི་བུམ་པ་བྱང་དུའོ། །དེ་ལྟར་རྫས་རྣམས་རྫོགས་པ་དང་། །མཆོད་བསྟོད་སྔོན་དུ་རྫོགས་པ་དང་། །སྔགས་ཀྱིས་སྟོང་ཉིད་བསྒོམས་ནས་ནི། །དེ་རྗེས་ས་བོན་ཧཱུཾ་ཡིག་ལས། །རྡོ་རྗེ་ར་གུར་ས་གཞིར་གྱུར། །དེ་སྟེང་བྷྲཱུཾ་ལས་གཞལ་ཡས་ནི། །དུར་ཁྲོད་འཇིགས་པར་བསྐྱེད་པར་བྱ། །
དེ་ནས་གྲུ་བཞི་སྒོ་བཞི་པ། །འཁོར་ལོ་རྩིབས་བརྒྱད་མུ་ཁྱུད་བཅས། །དྲ་བ་དྲ་ཕྱེད་རྟ་བབས་སོ། །དབུས་སུ་ཉི་མ་དབང་པོའི་སྟེང་། །ཧཱུཾ་ལས་བསྐྱེད་པའི་རྡོ་རྗེ་ཅན། །ཞལ་གསུམ་ཕྱག་དྲུག་རབ་བསྐྱེད་ནས། །རེ་ཕ་ལ་གནས་ཧཱུཾ་མཐིང་ནག །ཐུགས་ཀར་རབ་ཏུ་བསྒོམས་པ་ལས། །རྩིབས་བརྒྱད་རེ་ཕ་བརྒྱད་སྟེང་
དུ། །ཀྵ་ལས་བསྐྱེད་པའི་གནོད་སྦྱིན་ནི། །ཤ་ཟ་དང་ནི་རལ་པ་ཅན། །གདོང་སེར་དང་ནི་སེང་གདོང་སྟེ། །མོ་བཞི་མཚམས་སུ་རབ་བསམ་བྱ། །རབ་ཏུ་སྨུག་ནག་ཤིན་ཏུ་དམར་བ་དང་། །རབ་ཏུ་འབར་བའི་གསེར་བསྲེགས་དུང་མདོག་གོ། །འཁོར་ལོ་མདའ་དང་གྲི་གུག་ཏྲི་ཤུ་ལ། །གཡས་ན་དེ་རྣམས་གཡོན་ཐོད་པའོ། །
ཤིན་ཏུ་འཇིགས་པའི་གནོད་སྦྱིན་མོ། །ཉི་མའི་དཀྱིལ་ན་གཡས་བསྐུམ་བཞུགས། །བོང་བུ་སྣ་དང་རྣ་བ་འཕྱང་། །རལ་པ་གྱེན་འགྲེང་རལ་གྲི་སོ། །ཐལ་བའི་མདོག་དང་དུད་ཀ་དང་། །དམར་ནག་ཤིན་ཏུ་གནག་པའོ། །རལ་གྲི་དབྱུག་པ་མདུང་དང་སྒྲ་སྟ་དང་། །གཡས་ན་དེ་རྣམས་གཡོན་ན་ཐོད་པའོ། །ཤིན་ཏུ་
འཇིགས་པའི་གནོད་སྦྱིན་ནི། །ཉི་མའི་དཀྱིལ་ན་བརྐྱང་བསྐུམ་བཞུགས། །ཡེ་ཤེས་སྤྱན་དྲངས་མཆོད་ནས་བསྟིམ་པར་བྱའོ། །ཡཀྵ་བི་དྷ་ར་ཎཱ་ཡ་ཧཱུཾ་ཕཊ། ཡཀྵ་ཀྲོ་དྷ་སཱ་དྷ་ནཱ་ཡ་ཧཱུཾ་ཕཊ། ཡཀྵ་ནཱི་ལཱཾ་བ་ས་ན་ཡ་ཧཱུཾ་ཕཊ། ཡཀྵ་ཨ་པྲ་ཏི་ཧ་ཏ་པཱ་ལ་ཡ་ཧཱུཾ་ཕཊ། གནོད་སྦྱིན་མ་རྣམས་གཡོན་སྐོར་ནས། །འཇིགས་
བྱེད་གནོད་སྦྱིན་གསང་སྔགས་བཟླས། །ཡཀྵ་པ་ར་ཀྲ་མཱ་ཡ་ཕཊ། རཀྵ་ཀྲྀ་ཏཱནྟ་ཡ་ཕཊ། ཡཀྵ་བི་དྷ་ན་ཏ་རཱུ་པ་ཡ་ཕཊ། རཀྵ་རོ་ཥ་ཎཱ་ཡ་ཕཊ། ཅེས་པ་བརྒྱ་རྩ་བརྒྱད་དུ་བཟླས། །དུས་གསུམ་མཆོད་པ་རྣམ་ལྔས་མཆོད། །བཟློག་དང་ལས་བཅལ་མན་ངག་བཞིན། །བགེགས་དང་ལོག་འདྲེན་ལས་བཅོལ་
བྱ། །ཐོད་པ་དུར་དུ་ངེས་པར་གཞུག །བཟློག་ན་ཡུངས་ཀར་རྟགས་ཀྱིས་བརྟག །མི་ལྡོག་རྟགས་སུ་ཤེས་པར་བྱའོ། །ཧཱུཾ་ཞལ་གསུམ་ཕྱག་དྲུག་འཇིགས་པའི་སྐུ། །མཐིང་ནག་མི་འགྱུར་ཐུགས་རྗེ་ཅན། །གནོད་སྦྱིན་གདུག་པ་འདུལ་མཛད་པ། །རྡོ་རྗེ་བསྣམས་ལ་ཕྱག་འཚལ་བསྟོད། །ཨོཾ་བཛྲ་

49-1-248b

མུཿཞེས་པས་གཤེགས་སུ་གསོལ་ལོ། །བདག་གིས་འགྲོ་ལ་ཕན་ཕྱིར་བརྩམས། །དེས་ནི་འབྲས་བུ་བདེ་ཐོབ་ཤོག །གནོད་སྦྱིན་གྱི་སྒྲུབ་པའི་ཐབས་ནམ་གྲུའི་རིགས་ལས་བྱུང་བ་དངོས་གྲུབ་བརྙེས་པའི་སློབ་དཔོན་ཛཱ་བ་རི་པས་མཛད་པ་རྫོགས་སོ།།      །།བལ་པོའི་མཁན་པོ་དེ་བ་
པཱུརྞ་མ་ཏི་དང་། ལོ་ཙཱ་བ་བནྡེ་ཆོས་ཀྱི་བཟང་པོས་བསྒྱུར་བའོ།།      །།༄༅༅། །རྒྱ་གར་སྐད་དུ། ཀུཥྨཎྜོཏྶཱ་དྷ་པྲེ་ཏ་པི་ཤཱ་ཙ་ཡེ་བི་ཤོ་དྷ་ཡ་ཧ་ར་སཱ་དྷ་ནཱ་མ། བོད་སྐད་དུ། ཡི་དགས་དང་ཤ་ཟ་དང་གྲུལ་བུམ་དང་སྲུལ་པོ་རྣམས་རྣམ་པར་སྦྱོང་ཞིང་སེལ་བའི་སྒྲུབ་ཐབས་ཤེས་བྱ་བ། འཕགས་
པ་ལག་ན་རྡོ་རྗེ་ལ་ཕྱག་འཚལ་ལོ། །སྐུ་གསུམ་ཕ་རོལ་ཕྱིན་དྲུག་ལྡན། །སྡུག་བསྔལ་རྒྱ་མཚོ་ལས་སྒྲོལ་བའི། །རྡོ་རྗེ་ཅན་ལ་གུས་བཏུད་དེ། །སེམས་ཅན་རྣམས་ལ་ཕན་ཕྱིར་བྲི། །སྔོན་དུ་བསྙེན་པ་རབ་རྫོགས་པས། །ཡན་ལག་ཚོན་སྣས་རབ་བཅིངས་ནས། །ལྷ་ཡི་རྣམ་པ་གསལ་བསྒོམས་ཏེ། །རྟགས་
ནི་རབ་ཏུ་གསལ་བ་བརྟག །བརྟགས་ཟིན་ནས་ནི་སྒྲུབ་པ་བརྩམ། །ས་ཡི་ཆོ་ག་རྫོགས་བྱས་ལ། །སྟ་གོན་ལེགས་པར་རྫོགས་ནས་ནི། །དཀྱིལ་འཁོར་ཐིག་སྐུད་བྱིན་རླབས་གདབ། །ཡེ་ཤེས་ཐིག་གདབ་ས་ཐིག་ནི། །ཆངས་ཐིག་ནས་བཟུང་སྒོ་རྒྱན་བར། །ལེགས་ཤིང་རྫོགས་པར་གདབ་པར་བྱ། །
དེ་ནས་ཚོན་དགྱེ་དབུས་ཉི་དཀྱིལ། །པདྨ་འདབ་བརྒྱད་གེ་སར་བཅས། །ཁ་དོག་སོ་སོ་གྲུ་ཆད་ལྗང་། །རྡོ་རྗེ་ར་བ་ལྷ་སྣམ་རིགས། །མཚན་མ་ས་བོན་རབ་ཏུ་དགོད། །ཤར་ནས་བརྩམས་ཏེ་འཁོར་ལོ་རལ་གྲི་དང་། །དགྲ་སྟ་རྡོ་རྗེ་ཁ་དོག་སོ་སོར་བྲི། །ཤར་ལྷོ་ནས་བཟུང་ལྕགས་ཀྱུ་གྲི་གུག་དང་། །མི་
མགོ་དང་ནི་རྒྱུ་མའི་ཞགས་པ་བྲི། །མཚམས་སུ་གཏོར་མ་ཕྱོགས་སུ་ཐོད་པ་བཀྲམ། །དབུས་སུ་སྐུ་གདུང་གུར་དང་བླ་རེ་བྲེ། །ལྷ་སྣམ་ཕྱོགས་སྐྱོང་གཏོར་མ་སོ་སོར་དགྲམ། །བུམ་པ་ཕྱོགས་བཞིར་ལས་བུམ་ཤར་སྒོར་གཞག །མདུན་དུ་བླ་མ་ཡི་དམ་ལྷ། །སྤྱན་དྲངས་མཆོད་ནས་སྟོང་ཉིད་
བསྒོམ། །དེ་ནས་ཧཱུཾ་ལས་ས་གཞི་ར་བ་གུར་དུ་གྱུར་པའི་རྡོ་རྗེ་མེ་འོད་བཅས། །དེ་ནས་བྷྲཱུཾ་ལས་གྲུ་བཞི་སྒོ་བཞི་རྟ་བབས་བཅས་ཤིང་དབང་པོ་ཉི་ཟླའི་གདན། །དེ་སྟེང་བདག་ཉིད་གསུམ་གྱི་ཚུལ་གྱིས་ཞལ་གསུམ་ཕྱག་དྲུག་བསྐྱེད། །མདུན་དུ་ཧཱུཾ་ལས་དགའ་རབ་དབང་ཕྱུག་ཐོད་ཕྲེང་ཅན་དང་བུམ་རྣ་ཤ་

49-1-249a

ཟན་སེན་དགུ་བསྐྱེད། ཐལ་དཀར་མདོག་དང་གནག་དང་སྔོ་དང་ཤིན་ཏུ་གནག །གཡས་ན་འཁོར་ལོ་རལ་གྲི་དགྲ་སྟ་རྡོ་རྗེ་དང་། །གཡོན་ན་བསྡིགས་པའི་སྡིགས་མཛུབ་བོ། །ཤིན་ཏུ་འཇིགས་པའི་བདག་ཉིད་ཅན། །ཐལ་བས་ལུས་བྱུགས་ཁྲག་འཛག་པའོ། །མཚམས་རྣམས་སུ་ནི་མེ་ཏོག་མ་དང་མཛེས་ལྡན་དང་ནི་འོད་ཟེར་
འཕྲོག་དང་མདངས་འཕྲོག་མའོ། །གཡས་ན་ལྕགས་ཀྱུ་གྲི་གུག་མི་མགོ་རྒྱུ་མའི་ཞགས། །གཡོན་ན་ཐོད་པ་ཁྲག་གིས་བཀང་བའོ། །སྨུག་ནག་མཐིང་ནག་དམར་ནག་ལྗང་ནག་འཇིགས་པའི་གཟུགས་ཅན་བདུད་མོ་བཞིའོ། །ཐུགས་ཀའི་རེ་ཕའི་ཧཱུཾ་ལས་སྤྱན་དྲངས་བསྟིམ་སོགས་རྫོགས་བྱས་ནས། །གསང་བའི་སྔགས་ནི་རབ་ཏུ་
བཟླས། །ཨོཾ་ཀུཥྨ་ཎ་བི་དྷ་ར་ཡ་ཧཱུཾ་ཕཊ། ཌོཏྶཱ་དྷ་ན་ཀྲོ་དྷ་ཡ་ཧཱུཾ་ཕཊ། པྲེ་ཏ་བི་ས་ན་ཡ་ཕཊ། པི་ཤཱ་ཙ་ཧ་ཏ་བ་བ་ཕཊ་སྭཱ་ཧཱ། ཀུཥྨཎ་ཀྲ་མཱ་ཡ་ཕཊ།ཌོཏྶཱ་ཏ་ན་ཀྲི་ཏཱ་ན་ཡ་ཕཊ། པྲེ་ཏ་ཀྲི་ཏཱནྟ་རཱུ་པ་ཡ་ཕཊ། པི་ཤཱ་ཙེ་རོ་ཥ་ཎ་ཡ་ཕཊ་སྭཱ་ཧཱ། ཞེས་པ་བཟླས་ཏེ། སྔོན་དུ་བསྙེན་པས་བསྒྲུབ་བྱའི་རྟགས་ནི་རིམ་པ་དྲུག་པར་བརྟག །རྟགས་བྱུང་བསྐྲད་པའི་ལས་བརྩམ་མོ། །
ཡཾ་ལས་རླུང་བསམས་སྟེང་དུ་བསྐྱེད། །དགུག་ཅིང་ཨུཙྪ་ཏ་ཡས་བསྐྲད། །ལས་བཅོལ་ཕྲིན་ལས་གཞན་ཡང་བརྩམ། །རབས་ཆད་ནག་པོའི་ཐོད་པར་ནི། །གཟུགས་གཞུག་བསད་པས་དུར་ཁྲོད་སྦ། ཧཱུཾ་མེ་དཔུང་འབར་བ་བརྗིད་པའི་སྐུ། །གད་རྒྱངས་བཞད་མཛད་ཐལ་མོ་རྡེབས། །རྒྱ་མཚོར་ཞབས་ནུབ་དབང་པོ་མནན། །སྐུ་གསུམ་དོན་ལྡན་ཞལ་འཛུམ་
བཞད། །ཕྱག་དྲུག་བདུད་འདུལ་མཚོན་ཆ་འཛིན། །རྡོ་རྗེ་ཅན་ལ་ཕྱག་འཚལ་འདུད། །ཨོཾ་བཛྲ་མུཿཞེས་པས་གཤེགས་སུ་གསོལ་ནས་བསྡུ་བའོ། །བདག་གིས་གཞན་ལ་ཕན་ཕྱིར་བརྩམས། །དགེ་བ་དེ་ཡིས་འགྲོ་བ་ཀུན། །བླ་མེད་བྱང་ཆུབ་ཐོབ་པར་ཤོག །ནམ་གྲུའི་རིགས་ལས་བྱུང་བའི་སློབ་དཔོན་ཛཱ་བ་རི་པས་མཛད་པའི་བདུད་བཟློག་པའི་ཆོ་ག་རྫོགས་
སོ།།      །།བལ་པོའི་བླ་མ་དེ་བ་པཱུརྞ་མ་ཏི་དང་། ལོ་ཙཱ་བ་ཆོས་ཀྱི་བཟང་པོས་བསྒྱུར་བའོ།།      །།༄༅༅། །རྒྱ་གར་སྐད་དུ། ཤྲཱི་བཛྲ་པཱ་ཎི་ནཱི་ལཱཾ་བ་ར་དྷ་ར་བ་ལིཾ་དྷཱ་ར་ཎི་བི་དྷི་ནཱ་མ། བོད་སྐད་དུ། དཔལ་ཕྱག་ན་རྡོ་རྗེ་གོས་སྔོན་པོ་ཅན་གྱི་གཟུངས་ཀྱི་གཏོར་མའི་ཆོ་ག་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །བསོད་ནམས་འདོད་དང་འདོད་ལ་མཉེས། །
བར་ཆོད་སྤོང་དང་དུག་ཞི་ཕྱིར། །ཐུགས་རྗེ་ཅན་ལ་གུས་བཏུད་དེ། །གཏོར་མའི་ལས་འདི་བརྩམ་པར་བྱ། །དད་ལྡན་བྱང་སེམས་རྣལ་འབྱོར་པ། །སེར་སྣ་མེད་ཅིང་གཏོང་བརྩོན་པས། །བཟའ་བཅའ་བ་འཇིབ་དང་བཏུང་། །རིན་ཆེན་སྣོད་དུ་རབ་ཏུ་བཤམ། །ཧཱུཾ་ཧྲཱིཿཨོཾ་གྱིས་བྱིན་བརླབ་བྱ། །བདུད་རྩི་ཤ་ལྔ་ཅི་འབྱོར་པ། །མཚན་ལྡན་པདྨའི་སྣོད་

49-1-249b

དུའོ། །སྔོ་དང་དམར་བའི་དཀྱིལ་འཁོར་གཉིས། །དེ་སྟེང་ཨ་ལས་ཀ་པཱ་ལ། །ལྕགས་ཀྱུ་ལྔ་དང་ས་བོན་ལྔ། །དེ་ནས་མདུན་གྱི་བར་སྣང་ལ། །ཟླ་དཀྱིལ་སྟེང་ན་ཡི་གེ་ཧཱུཾ། །དེ་གྱུར་རྩེ་ལྔ་དེ་ཉིད་ཅན། །སྔོ་བསྐྱོད་མེ་འབར་རྫས་རྣམས་ཁོལ། །འོད་ཀྱིས་ཟླ་བ་རྡོ་རྗེ་ཞུ། །ཐིམ་པས་དངུལ་ཆུ་ལྟ་བུར་གནས། །དེ་ཡི་སྟེང་དུ་ཨོཾ་དཀར་པོའི། །འོད་ཀྱིས་གངྒཱའི་ཀླུང་
སོགས་བཀུག །བདུད་རྩི་དྲངས་ཏེ་གཉིས་མེད་བསྟིམ། །འབྲུ་གསུམ་སྔགས་ཀྱིས་བྱིན་བརླབ་བྱ། །དེ་རྗེས་མདུན་གྱི་མཁའ་སྟོང་ལ། །པཾ་ལས་ཆུ་སྐྱེས་འདབ་བརྒྱད་བསྐྱེད། །དེ་དབུས་ཧཱུཾ་ལས་འདོད་ལྷ་བསྐྱེད། །ལྟེ་འཁོར་དག་ལ་ཨོཾ་ལས་ནི། །ཕྱོགས་བཞིར་སངས་རྒྱས་བཞི་ཡང་བསྐྱེད། །འདབ་མ་མཚམས་བཞིར་ཁྲོ་མོ་སྟེ། །གོང་རས་སྒོ་བ་བཞི་པོའོ། །
དམར་བའི་ས་བོན་འདབ་བརྒྱད་དམར། །ཕུཿལས་འདབ་མར་ཀླུ་བརྒྱད་བསྐྱེད། །ཟེ་འབྲུ་བཅུ་དྲུག་སྣ་ཚོགས་ལ། །བདུད་དང་གནོད་སྦྱིན་སྣ་ཚོགས་བསྐྱེད། །རང་གི་སྙིང་གའི་འོད་ཀྱིས་ནི། །འཕྲོས་པས་སངས་རྒྱས་གངྒཱ་ཡི། །བྱེ་སྙེད་དཀྱིལ་འཁོར་ལྷ་ལ་བསྟིམ། །ཀླུ་དང་གནོད་སྦྱིན་བདུད་དང་ནི། །ས་འོག་ས་སྟེང་ས་བླ་ཡི། །ཐམས་ཅད་དེ་གསུམ་དག་ལ་
བསྟིམ། །སྤྱན་ལ་སོགས་པས་དབང་བསྐུར་ཏེ། །སྐུ་དང་གསུང་དང་ཐུགས་ལྷར་གྱུར། །མཆོད་པ་རྣམས་ཀྱིས་ཡང་དག་མཆོད། །སངས་རྒྱས་རྣམས་དང་མགྲོན་རྣམས་ཀྱི། །རང་རང་ལྕེ་ལ་རྡོ་རྗེ་ནི། །ཧཱུཾ་ལས་ནས་ཚད་ཙམ་ནི་བསྐྱེད། །རྩེ་མོ་དག་ལ་ཨོཾ་བསམས་ཏེ། །འོད་འཕྲོས་དྲངས་པས་གསོལ་བར་བསམ། །གཉིས་མེད་ཡེ་ཤེས་ཐོབ་འགྱུར་
ཏེ། །ཉི་ཤུ་རྩ་གཅིག་སྔགས་ཀྱིས་མཆོད། །གཙོ་བོ་ཉིད་ལ་གཙོ་བོ་སྟེ། །འཁོར་ནི་སོ་སོའི་སྔགས་རིམ་བཞིན། །ཨ་ཀཱ་རོ་མུ་ཁཾ་སརྦ་དྷ་རྨཱ་ཎཱཾ་ཨཱ་དྱ་ནུཏྤནྣ་ཏྭཱ་ཏ། གཉིས་ལ་སྦྱིན་པ་གོང་དང་འབྲེལ། །དེ་ནས་བསྟོད་ཅིང་གསོལ་བ་གདབ། །སོ་སོ་ཡི་ནི་སྔགས་ཀྱིས་ནི། །རང་རང་གནས་སུ་གཤེགས་སུ་གསོལ། །སྤྱོད་ལམ་གྱི་ནི་དུས་དག་ཏུ། །
རང་ཉིད་ལྷ་ཡི་རྣལ་འབྱོར་བྱ། །འདི་ཡིས་ཕན་དང་བསོད་རྣམས་ཅི་བསགས་པ། །འབྲས་བུ་མྱུར་ཞིང་ལོངས་སྤྱོད་རྣམས་ནི་ཐོབ། །བགེགས་རྣམས་ཞི་དང་གདུག་པ་ཞི་བྱེད་ཤོག །བདེ་བ་མཆོག་ཆེན་བདག་གིས་ཐོབ་པར་ཤོག །དཔལ་ཕྱག་ན་རྡོ་རྗེ་གོས་སྔོན་པོ་ཅན་གྱི་གཟུངས་ཀྱི་གཏོར་མའི་ཆོ་ག་ཞེས་བྱ་བ་ནམ་གྲུའི་
རིགས་ལས་བྱུང་བ་དངོས་གྲུབ་བརྙེས་པ། སློབ་དཔོན་ཆེན་པོ་བྲམ་ཟེའི་བཙུན་པ་ཛཱ་བ་རི་པའི་ཞལ་སྔ་ནས་མཛད་པ་རྫོགས་སོ།།      །།བླ་མ་དེ་བ་པཱུརྞ་མ་ཏི་དང་། ལོ་ཙཱ་བ་ཤེའུ་བཛྲ་དེ་བས་བསྒྱུར་བ་ལས། སླད་ཀྱི་བདག་དགེ་སློང་ཆོས་ཀྱི་བཟང་པོས་བླ་མ་ལ་ཤིན་ཏུ་ལེགས་པར་ཞུས་ཏེ། ཕྲན་བུ་ཚོ་བཅོས་པ་ལགས་སོ།།

49-1-250a

༄༅༅། །རྒྱ་གར་སྐད་དུ། ཀྲ་མ་ཥ་ཊ་ནཱ་མ། བོད་སྐད་དུ། རིམ་པ་དྲུག་པ་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །འགྲོ་རྣམས་རྟོག་པའི་ངོར་གྱུར་རྟོག་གནས་ཏེ། །དེ་ལ་རྟོག་ཅིང་དགེ་དང་མི་དགེར་འཛིན། །དུག་དགྲའི་གསེབ་ཐར་ཆུ་སྲིན་ཁ་རུ་ནི། །གྲུ་ཆད་
བཞིན་དུ་དགའ་དང་མི་དགའ་སྟེ། །རྟག་ཏུ་བརྩེ་བས་འཛིན་ཅིང་ང་རོས་འཇིགས། །དེ་ལ་དངོས་པོ་ཀུན་གྱིས་འདུད་ཅིང་འདུད། །བཀའ་དྲིན་ཐོབ་དང་རང་ཉམས་རྟོག་དེ་དྲན། །དེ་འདིར་འདོད་ལྷ་མཉེས་དང་ངེས་འབྱུང་དང་། །སྦྱོར་བ་གཞན་གྱིས་ངེས་པར་འབྱུང་བ་ཡིན། །དང་པོ་གཉིས་ཡིན་
གཉིས་པ་བཞི་རུ་སྣང་། །དང་པོ་བཟླས་པ་འགྲུབ་དང་གྲུབ་པའི་རྟགས། །གསང་སྔགས་འགྲུབ་པའི་རྟགས་དང་མཚན་མ་ནི། །གླེགས་བམ་དུ་མ་འཚེར་མཐོང་ལག་གིས་ལེན། །རྔ་ཆེན་དུང་དང་ཆ་ལང་དྲིལ་བུ་དང་། །མཆོད་པའི་སྒྲ་སྒྲོགས་དུ་མའི་གཟུགས་མཐོང་བ། །མཎྜལ་དཀྱིལ་འཁོར་ལས་
བྱེད་ཆོས་འཆད་ཉན། །གླེགས་བམ་ཀློག་ཅིང་དཀྱུས་ལྟར་འདྲི་བ་སྨྲ། །རས་རིས་ལ་ནི་བདེ་གཤེགས་གཟུགས་བརྙན་ནི། །དུ་མ་མཐོང་ཞིང་རྟེན་གྱི་གཟུགས་མཐོང་བ། །རོལ་མོའི་གཟུགས་བྱེད་མཆོད་རྟེན་གདུགས་སོགས་བྱེད། །རྡོ་རྗེ་ལ་སོགས་མཚན་མ་རྙེད་དམ་མཐོང་། །མེ་ཏོག་སྣ་ཚོགས་གསལ་
བར་མཐོང་བ་དང་། །ཉི་ཟླའི་འོད་འབབ་གཟའ་སྐར་གོ་མཐོང་དང་། །མེ་གཏོང་དུ་ལངས་ནམ་མཁའ་ཡང་ནི་འཁྲིགས། །རྫིང་ལ་ཆུ་འདྲེན་ཁྲོན་པ་ལས་ནི་ལེན། །འབྲས་ཀྱི་མྱུ་གུ་བཟང་དང་ལོ་མ་བཟང་། །ཅེ་སྤྱང་ལ་སོགས་ཐུལ་བ་གོས་བཟངས་གྱོན། །རྒྱན་ཆ་བཟང་ཞིང་མཚོན་ཆ་རྣོ་བ་འཛིན། །དེ་རྣམས་བྱུང་གྱུར་
གསང་སྔགས་གྲུབ་པའི་རྟགས། །རྣལ་འབྱོར་པས་གསང་སྔགས་འགྲུབ་པའི་རྟགས་ཀྱི་རིམ་པ་སྟེ་རིམ་པ་དང་པོའོ།།      །།མིག་ལ་སོགས་པའི་དབང་པོས་སྲིད་གསུམ་མཐོང་། །ཐོས་དང་སྔ་ཕྱིའི་སྐྱེ་དྲན་རྫས་ཀུན་ལུད། །རས་རིས་བཞད་ཅིང་རོ་སོགས་འོད་འབྱུང་དྲི། །མུན་ནག་མེ་ཏོག་ཆར་འབབ་འཇའ་ཚོན་
སྣང་། །ཚོགས་ན་ཆོས་འཆད་མུན་ནག་གླེགས་བམ་དཔྱོད། །ནམ་མཁའ་སྟོང་ལས་སྣ་ཚོགས་རོལ་མོའི་སྒྲ། །འབྲུག་སྒྲ་ཀློག་འགྱུ་ཐོག་ཆེན་འབེབས་པ་དང་། །ནམ་མཁའ་སྟོང་ཞིང་སྤྲིན་སྔོན་མཐོང་བ་དང་། །དེ་བཞིན་མཐིང་ནག་སྤྲིན་སྔོན་ངེས་འགྱུར་དང་། །ཉི་ཟླའི་དཀྱིལ་འཁོར་འོད་ལྡན་ས་གཞི་བདལ། །

49-1-250b

རས་རིས་ལུགས་མ་ལ་སོགས་བདེ་གཤེགས་གཟུགས། མཆོད་ཅིང་སྐོར་བ་བྱེད་དང་རྟེན་ལ་སྐོར། །དཀྱིལ་འཁོར་བྲིས་ནས་མཆོད་དམ་དབང་བསྐུར་བ། །མཛེས་པའི་སྣོད་དུ་མེ་ཏོག་སྣ་ཚོགས་ཐུ། །རིན་ཆེན་སྣ་ཚོགས་མེ་ཏོག་བཻ་ཌཱུར་རྙེད། །ཤིན་ཏུ་སྐམ་པའི་ས་ལས་ཆུ་རྡོལ་བ། །བདག་ཉིད་མེ་དཔུང་ནང་
འདུག་སྲོག་ཆགས་ཚིག །ཏིང་འཛིན་གསལ་ཞིང་ཡི་དགས་གཟུགས་ལ་བརྩོན། །དབེན་ཞིང་ཉམས་དགའི་གནས་ནི་དུ་མ་མཐོང་། །རྩེ་གཅིག་པ་ཡི་བསམ་གཏན་བྱེད། །སེང་གེའི་ཁྲི་སྟེང་གནས་པ་རྨི། །ལྷ་ཁང་གནས་གཞི་རྩིག་མཚུངས་དང་། །ཆུ་བོ་ཆེ་དང་རྒྱ་མཚོའི་སྟེང་ནས་འགྲོ། །བར་སྣང་
འཕུར་ཞིང་བསྡིགས་པའི་ལྟོས་འགྲོ་ལེན། །འདི་འདྲའི་རྨི་ལམ་གསང་སྔགས་གྲུབ་པའི་རྟགས། །རྣལ་འབྱོར་པས་གསང་སྔགས་གྲུབ་པའི་རྟགས་ཀྱི་རིམ་པ་སྟེ་གཉིས་པའོ།།      །།གཉིས་པ་བཞི་པའི་དང་པོའི་མཚན་ཉིད་ནི། །སྦྱོར་བ་གཞན་བྱུང་རྣལ་འབྱོར་ཉིད་ལ་འོང་། །རི་གཟར་དག་
ལ་མི་ཐར་མཐར་ཟད་ལྷུང་། །རི་བྲགས་འཛུལ་འདོད་ཆུ་དོང་ལྷུང་བ་དང་། །ཕྱུགས་ལྷས་འདམ་རྫབ་བཤང་གཅིའི་ནང་དང་ནི། །ཁ་དོག་དམར་དང་སྐྱ་བའི་ཆུ་དག་ལ། །རྩུབ་དང་གནག་པའི་གོས་དང་དམར་བའི་གོས། །ཤིན་ཏུ་ཧྲུལ་པོའི་ཚེ་ཏའི་པགས་པ་གྱོན། །ཤིང་རྩི་རི་ལས་
ལྷུང་དོགས་རྟེན་མེད་འདུག །གཅེར་བུར་འདུག་ཅིང་ལྕག་ལྕིག་ཆུ་ནང་འགྲོ། །གཟུང་འཛིན་ཡོད་པའི་རྟེན་ས་དེ་རུ་ནི། །ཉིན་དང་མཚན་དུ་རྟག་ཏུ་འགྲོ་བ་རྨི། །གླང་ནག་གླང་དམར་བ་ནག་བ་དམར་ཞོན། །རྩུབ་པའི་གོས་གྱོན་ག་ཏ་ལ་ཞོན་པ། །མ་ཧེ་བ་ལང་ཁྱུས་འགྲོ་སོགས་རྨི་
བ། །གནག་དང་བ་ལང་ཁྱུས་འགྲོ་སོགས་མཐོང་དང་། །རྟ་དང་ག་ཏ་མིག་ཟླུམ་ཁྱུས་འགྲོ་སོགས། །བེ་ཏ་ཚེ་ཏ་ཁྱུས་འགྲོ་སོགས་མཐོང་བ། །སེང་གེ་སྤྱང་དང་ཁྱི་སོགས་མཆེ་ཅན་རྨི། །བསེ་དང་བྱི་བ་སྡེར་ཆགས་རྨི་འགྱུར་བའོ། །སྦྱོར་བ་གཞན་གྱིས་གནོད་པ་འགྱུར་བ་རྣལ་འབྱོར་པ་ལ་
མཚན་མ་འོང་བའི་རིམ་པ་སྟེ་གསུམ་པའོ།།      །།གཉིས་པའི་བཞི་པ་གཉིས་ཀྱི་མཚན་ཉིད་ནི། །རྣལ་འབྱོར་སྟོབས་ཀྱིས་མི་ཐུབ་མཚན་ཉིད་ནི། །བྱ་དང་བྱི་བ་སྦྲུལ་གདུག་གནས་པའི་མཚོ། །ཆུ་སྲིན་ཉ་དང་ཆུ་སོགས་གནས་པ་དང་། །སྡིག་པ་སྡོམ་དང་རྩངས་པ་རྐང་མངས་དང་། །སྦྲང་བུ་མཆུ་རིངས་

49-1-251a

སྲོག་ཆགས་ཕྲ་མོ་རྣམས། །དེ་རྣམས་རྨི་གྱུར་བྲན་རྣམས་སྦྱོར་བ་གནོད། །སྦྲུལ་དང་སྦལ་པ་སྡོམ་དང་སྡིག་པ་དང་། །བྱ་སོགས་ལུས་འབྱར་མཆུས་འདེབས་གཤོག་སྤྲུག་དང་། །བེ་ཏ་ལ་སོགས་རྫི་མེད་མདོག་རྒོད་རྨི། །མི་ཐུབ་རྟགས་ཏེ་བུད་མེད་སྨྱོ་བ་དང་། །མི་ཐུབ་ཀུན་ལ་བརྡེག་
འགྱུར་མདོག་རྒོད་མ། །རྒྱན་བཟངས་མཛེས་པའི་སྣོད་དུ་ཟས་སོགས་བཀང་། །རྟག་ཏུ་རྒན་མོར་འོང་འགྱུར་མི་ཐུབ་རྟགས། །ལྟོས་འགྲོས་ལུས་དཀྲིས་ལྡན་ཞིང་མི་ཕྲེལ་དང་། །སྡིག་དང་རྩངས་སོགས་འབྱར་ཞིང་མཆུས་བཙུགས་པ། །སྦྲང་བུ་མཆུ་རིངས་སྲོག་ཆགས་ཕྲ་མོ་རྣམས། །ཁྲག་འཇིབ་ལུས་
ནང་ཞུགས་གྱུར་མི་ཐུབ་རྟགས། །ཆུ་སྲིན་ཉ་སོགས་ཆུ་ཆེན་འཕྱོ་ཞིང་འཁྱུ། །གནག་དང་དམར་སྲོག་ཆུ་ཡིས་ཁྱེར་བ་རྨི། །དེ་ཡང་མི་ཐུབ་རྟགས་ཏེ་བརྩོན་པར་བཟློག །དད་ལྡན་བརྩོན་པས་མི་འགྲུབ་གང་ཡང་མེད། །སྦྱོར་བ་གཞན་ལས་བྱུང་བའི་གནོད་པ་རྣལ་འབྱོར་པའི་སྟོབས་ཀྱིས་མི་ཐུབ་པའི་
རྟགས་ཀྱི་རིམ་པ་སྟེ་བཞི་པའོ།།      །།གཉིས་པ་བཞི་པ་གསུམ་པའི་མཚན་ཉིད་ནི། །རྣལ་འབྱོར་རྩལ་གྱིས་ཐུབ་ཅིང་ནོན་པའི་རྟགས། །མ་ཧེ་གནག་སོགས་རྗུད་ཅིང་རིད་པ་དང་། །དུད་འགྲོ་རྣམས་ནི་བཏགས་སམ་བརྟོད་གྱུར་པ། །དུད་འགྲོ་དགྲས་ཁྱེར་བརྟོད་དམ་རྐུན་མོས་ཁྱེར། །དུད་འགྲོ་
འཚོ་དང་འབྲས་ཀྱི་ཕུབ་མ་འཆག །དུད་འགྲོ་འཁོར་དང་རྫི་ཡིས་སྐྱོང་བ་དང་། །དུད་འགྲོ་ཡོར་དང་འགབ་ཐེགས་ཐུབ་པའི་རྟགས། །དུད་འགྲོ་གསད་དང་བཙོས་ནས་ཟ་བ་དང་། །རང་གཞན་མེ་བྱུང་དུད་འགྲོ་ཚིག་གྱུར་དང་། །དེ་ནི་ངེས་པར་དབང་དུ་འདུས་པའི་རྟགས། །བུད་མེད་རྒུད་ཅིང་ངོ་དམའ་ཤི་བ་དང་། །ངུ་ཞིང་རྒྱན་བཟང་གུས་པས་
ཕྱག་བྱེད་དང་། །གནས་ནས་གཞན་འགྲོ་ཐུབ་པའི་རྟགས་སུ་བསྟན། །སྦྲུལ་ལ་སོགས་པའི་སྲོག་ཆགས་དུ་མ་རྣམས། །བསད་དམ་ཟོས་སམ་ཤིའམ་དེད་གྱུར་དང་། །སྐེམ་དང་ཚིག་གྱུར་ཐུབ་པའི་རྟགས་ཡིན་ནོ། །བྱ་དང་བྱི་བ་སྦྲུལ་གདུག་གནས་མཚོ་སྐམས། །བུད་མེད་ཞུམ་ཞིང་ངུ་བ་ཐུབ་པའི་
རྟགས། །སྦྱོར་བ་གཞན་རྣལ་འབྱོར་པའི་རྩལ་གྱིས་ནོན་པའི་ལྟས་ཀྱི་རིམ་པ་སྟེ་ལྔ་པའོ།།      །།གཉིས་པ་བཞི་པ་བཞི་པའི་མཚན་ཉིད་ནི། །སྦྱོར་གཞན་རབ་ཏུ་ཁྲོས་པར་གྱུར་པ་ནི། །རང་ཉིད་མི་གཡོ་གནས་ན་གནས་ནས་ནི། །སྤྲུལ་པ་སྣ་ཚོགས་གཟུགས་ནི་སྟོན་ཅིང་ཕྱོགས། །འཁོར་དང་

49-1-251b

བཀའ་ཡི་ཕོ་ཉ་འགྱེད་ཅིང་འདུག །རིགས་མཐོའི་འདྲ་འབག་བུ་ཆུང་རབ་བྱུང་གཟུགས། འོང་གྱུར་ཐང་ལས་སྐྱེས་པའི་ཕོ་ཉ་ཡིན། །དེ་ནི་བཟློག་པར་བྱ་བའི་ཐབས་ནི་གཟུགས། བློན་པོ་ཡུལ་གྱི་རྒན་རབས་འོང་འགྱུར་དང་། །བྲོད་པ་སྐྱེས་པ་གཞོན་ནུ་བོན་པོའི་གཟུགས། སྔགས་པའི་གཟུགས་ནི་
འོང་འགྱུར་བྲག་སྐྱེས་ཡིན། །དེ་བཅོས་བྱ་བའི་ཐབས་ནི་བསྟན་པ་ཡིན། །དཀར་དམར་གནག་ཅིང་ཤིན་ཏུ་མང་བ་ཡི། །བ་ལང་འཚོ་ཞིང་ཕྱུགས་ནང་འདུག་པ་དང་། །རལ་པ་བཟང་པོ་བུད་མེད་སྨུག་ནག་དང་། །གཡའ་རི་གངས་རི་ལས་སྐྱེས་ཕོ་ཉ་ཡིན། །དེ་ཕྱིར་ཐབས་ནི་དུ་མ་ཡོད་པར་གསུངས། །བུད་
མེད་གཞོན་ཞིང་རྒྱན་བཟངས་རབ་བྱུང་མ། །མ་དང་སྲུ་མོ་སྲིང་མོ་ནེ་ནེ་མོ་ཡི་གཟུགས། ཉེ་དུ་ཉེ་འབྲེལ་ཁྲོམ་ཆེན་བུད་མེད་དང་། །བུ་མོ་ཆུང་མ་མཚོ་ལས་སྐྱེས་པ་ཡིན། །དེ་ནི་མནན་པའི་ཐབས་ནི་བྱ་བ་དང་། །དེ་རྣམས་ཞི་འགྱུར་འགའ་ཞིག་དབང་དུ་འདུ། །དབང་དུ་འགྲོ་བ་རྟོག་པའི་ནད་
ལས་ཐར། །ཁྱི་ལ་སོགས་པ་དུད་འགྲོ་ཕལ་ཆེར་ནི། །སྦྱོར་བ་གཞན་གྱི་ཕོ་ཉ་ཡིན་པས་བཟློག །རང་གི་ངོ་བོ་གཙོ་བོའི་གཟུགས་ཅན་ཏེ། །དུད་འགྲོའི་གཟུགས་ལྡན་རྒྱན་ལྡན་དེ་ཉིད་དོ། །ནམ་མཁའི་མཐོངས་ན་གནས་ཤིང་སྤྲུལ་པ་ཡི། །གཟུགས་ནི་མ་ལུས་བརྗོད་ཀྱིས་མི་ལང་སྟེ། །དེ་ཡང་
དཔག་ཏུ་མེད་པའི་མཐའ་མི་རྟོགས། །དེ་ཕྱིར་བདེ་གཤེགས་མཐུ་དང་མཚུངས་པ་ཡིན། །སྦྱོར་བ་གཞན་གྱིས་བཀའི་ཕོ་ཉ་བཀྱེ་བའི་རིམ་པ་སྟེ་དྲུག་པའོ།།      །།བླ་མའི་བཀའ་དང་ལྷག་ལྷས་གནང་བ་བྱིན། །འགྲོ་ལ་བརྩེ་བས་རྟོག་པ་ཅུང་ཞིག་སྦྱར། །དེ་ཡི་དགེ་བ་ཅི་བསགས་པ། །
རྟོག་ལ་ངེས་ཤིང་ངེས་རྟོགས་ཤོག །རིམ་པ་དྲུག་པ་ཞེས་བྱ་བ་རྟགས་གསལ་བར་བྱེད་པ། ནམ་གྲུའི་རིགས་ལས་བྱུང་བ་དངོས་གྲུབ་བརྙེས་པའི་སློབ་དཔོན་ཛཱ་ཝ་རི་པས་མཛད་པ་རྫོགས་སོ།།      །།པཎྜི་ཏ་པུ་ཎྱ་མ་ཏི་དང་ལོ་ཙཱ་བ་ཆོས་ཀྱི་བཟང་པོས་བསྒྱུར་བའོ།།      །།༄༅༅། །རྒྱ་གར་སྐད་
དུ། མ་རི་ན་མ་རི་ཨ་མྲྀ་ཏ་ནཱ་མ། བོད་སྐད་དུ། བསད་པ་བདུད་རྩིའི་གསོ་བ་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །བསད་པ་གསོ་བ་མ་བྱས་ན། །གང་ཞིག་ལ་ནི་སྡིག་པ་དང་། །གང་ཞིག་ཤིན་ཏུ་ཁྲོས་འགྱུར་བ། །དེ་ཕྱིར་གསོ་བའི་ཆོ་ག་དྲན། །རིན་ཆེན་གའུ་པདྨ་ཅན། །དེ་མཚུངས་གའུ་སྟེང་

49-1-252a

འགེབས་བྱ། །ཕྱོགས་བཞི་པདྨའི་སྟེང་དུ་ནི། །འབྲས་ཕྱེའི་རྒྱུ་ལས་བྱུང་བ་ཡི། །ཙནྡན་ཆུས་བཀྲུས་སྦྲུས་པ་ཡིས། །རིགས་བཞི་ཀླུ་ཡི་གཟུགས་གཞག་སྟེ། །གདོང་པ་མཚལ་གྱིས་བྱུག་པར་བྱ། །བཙུན་མོ་བཞི་དང་ཁྱེའུ་བཞི། །བུ་མོ་བཞི་ཡི་གཟུགས་
ཀྱང་གཞག །དེ་དག་མཛེས་པའི་གཟུགས་བྱའོ། །པདྨའི་ལྟེ་བར་རིན་ཆེན་ལྔ། །མཚམས་ཀྱི་པདྨ་བཞི་པོ་ལ། །དཀར་སེར་དམར་སེར་བུད་མེད་ཀྱི། འོ་མ་བཞི་ནི་མཚོ་བཞི་སྟེ། །དེར་ནི་ཀླུ་གཟུགས་སྣ་ཚོགས་གཞག །ལྗང་གུ་དར་གྱིས་སྟེང་དགབ་པོ། །དེ་ནས་
རང་ལྷའི་ས་བོན་ལས། །འོད་ཟེར་ལྕགས་ཀྱུ་ལྟ་བུ་ལས། །འགའ་ཞིག་རྣམ་སྨིན་ལུས་བོར་བ། །བར་དོའི་སེམས་དེ་བཀུག་བྱས་ཏེ། །དྲི་ཆུ་ཡིས་ནི་གཉིས་ཀ་བསང་། །གཟུགས་ལ་བསྟིམ་ཞིང་འོ་མར་བདར། །སྣ་ཚོགས་སྨན་གྱིས་གཏོར་བར་བྱ། །དེ་ལྟར་དགུག་པ་ལན་
གསུམ་བྱ། །དེ་ལྟར་གསོ་བ་ཕྱི་ནང་གཉིས། །རང་ལྷའི་ས་བོན་འོད་འཕྲོས་པས། །འགའ་ཞིག་སེམས་ཀྱི་བག་ཆགས་སྦྱངས། །ལྕེ་ཡི་རྡོ་རྗེ་ལྟེ་བར་ཨ། །ཨ་ཡི་འོད་ཟེར་ཕུས་བཏབ་པས། །འགའ་ཞིག་སེམས་ཀྱི་ཨ་ལ་ཐིམ། །བདུད་རྩིའི་རྒྱུན་ཕབ་སེམས་གསོའོ། །སེམས་དང་ཤེས་པ་
དྲན་གསལ་བསམ། །འཆི་མེད་བདུད་རྩི་འོ་རྒྱུན་འདིས། །ཀླུ་བརྒྱད་འཁོར་བཅས་ཁྱེད་རྣམས་ཀུན། །སེམས་དང་ཤེས་པ་གསལ་གྱུར་ཅིག །ལུས་དང་དབང་པོ་རྒྱས་གྱུར་ཅིག །དྲིན་ལན་དམ་ཚིག་དྲན་གྱིས་ལ། །བཀའ་དང་དམ་ལས་མ་འདའ་བར། །ཤིན་ཏུ་ཁྲོས་པ་ཞི་གྱུར་ཅིག །དེ་ལྟར་
རིམ་པས་ལན་གསུམ་བར། །དེ་ནི་ནང་གི་གསོ་བ་ཡིན། །དེ་ནས་མངར་གསུམ་འབྲས་ཆན་མར། །གསེར་དང་ཁྱི་ཡི་འོ་མ་དང་། །ནཱ་ག་གེ་སར་ལ་སོགས་པའི། །གསོ་བའི་སྨན་ནི་སྣ་ཚོགས་བསགས། །བདུད་རྩིའི་འོ་རྒྱུན་བྱིན་བརླབས་ཏེ། །དེ་ཡི་ཉམས་པ་རྣམས་སོས་བསམ། །གསོ་
སྨན་ལ་སོགས་རིམ་པ་ནི། །མཆོད་ཅིང་འདི་སྐད་བརྗོད་པར་བྱ། །ཧཱུཾ་ང་ནི་ཐུགས་རྗེ་ཆེན་པོ་ཡི། །བ་སྤུའི་བུ་ག་ཐམས་ཅད་ནས། །གསོ་བའི་བདུད་རྩི་རྒྱུན་ཕབ་ནས། །ཀླུ་བརྒྱད་འཁོར་བཅས་ཁྱེད་རྣམས་ཀུན། །དྲག་པོའི་སྔགས་ཀྱི་གཟི་བརྗིད་ཀྱིས། །བསྲེག་དང་བཙོ་བའི་སྡུག་བསྔལ་དང་། །

49-1-252b

མཚོན་ཆ་རྣམ་པ་སྣ་ཚོགས་ཀྱིས། །བསྣུན་ཞིང་གཏུབས་པའི་སྡུག་བསྔལ་དང་། །སྡུག་བསྔལ་རྣམ་པ་སྣ་ཚོགས་མྱོང་། །འཆི་མེད་གསོ་བའི་སྨན་ཚོགས་ཀྱིས། །བསྲེགས་ཤིང་བཙོས་པ་སོས་གྱུར་ཅིག །བསྣུན་ཞིང་གཏུབས་པ་སོས་གྱུར་ཅིག །ལུས་དང་དབང་པོ་རྒྱས་གྱུར་ཅིག །མཐུ་སྟོབས་ལྡན་ཞིང་བདེ་གྱུར་ཤོག །སྡུག་
བསྔལ་ཀུན་ལས་ཐར་བར་ཤོག །བྱང་ཆུབ་སེམས་བསྐྱེད་དགའ་སེམས་ལྡན། །དབང་པོ་རྣམས་ཀྱི་སྤྱོད་ཡུལ་དུ། །མཁོ་དགུ་ལོངས་སྤྱོད་ཐམས་ཅད་ནི། །འདོད་པ་ཐམས་ཅད་ལྡན་གྱུར་ཅིག །ཉམས་པའི་ལུས་སོགས་རྒྱས་གྱུར་ཅིག །ཡན་ལག་ཐམས་ཅད་བདེ་གྱུར་ཅིག །ཀླུ་ནད་ཐམས་
ཅད་སོས་གྱུར་ནས། །སྡུག་བསྔལ་ནད་ལས་ཐར་བར་ཤོག །ངན་སོང་གསུམ་ལས་ཐར་ནས་ནི། །ཚངས་པའི་ཚེ་དང་ལྡན་གྱུར་ཏེ། །ཆོས་སྤྱོད་དབང་པོ་ཐུལ་ནས་ནི། །ཕྱག་ན་རྡོ་རྗེའི་ཞལ་མཐོང་ཤོག །འཇིགས་པ་ཀུན་ལས་སྐྱབས་ལྡན་ཤོག །ལོངས་སྤྱོད་ཆེན་པོ་ཐོབ་གྱུར་ཅིག །སྔགས་
དང་སྨན་སོགས་བྱིན་རླབས་ཀྱིས། །ནད་དང་ཉེར་འཚེ་ཀུན་སོས་པས། །དྲིན་ལན་དམ་ཚིག་དྲན་པར་གྱིས། །ཕྱག་ན་རྡོ་རྗེའི་བཀའ་མ་འདའ། །ཞེ་སྡང་གདུག་པ་ཞི་གྱུར་ལ། །དེ་རིང་ཆེ་གེ་མོ་ལ་ནི། །བསམ་ངན་སྦྱོར་རྩུབ་ཞི་གྱུར་ཅིག །ཀླུས་བྱས་བཅིངས་པ་གྲོལ་གྱུར་ཅིག །ལེགས་
བསམས་ཐམས་ཅད་འགྲུབ་པ་དང་། །དར་ཞིང་རྒྱས་པའི་དངོས་གྲུབ་སྩོལ། །ནཱ་ག་རཱ་ཛ་ཕུཿ ཤཱནྟི་ཀུ་རུ་སྭཱ་ཧཱ་ཞེས་པའི་ཚིག །རིམ་པས་ཀུན་ནས་གདགས་པར་བྱ། །གདེངས་ཀའི་ཕྱག་རྒྱ་བཅས་ནས་ནི། །དམ་ཚིག་འདི་ཡིས་བསྒྲག་པར་བྱ། །ཧཱུྃ་ང་ནི་ཕྱག་ན་རྡོ་རྗེ་སྟེ། །ཀླུ་བརྒྱད་འཁོར་དང་བཅས་
པ་ཉོན། །ཆོས་བཤད་བདེན་པ་མི་ཉན་དང་། །རིག་སྔགས་རྒྱལ་པོའི་བཀའ་བཅག་ན། །གསོ་བའི་སྨན་ནི་ཐམས་ཅད་ཀུན། །མཚོན་ཆའི་ཆར་དུ་གྱུར་ནས་ནི། །ལུས་ཀྱི་གནད་ལ་གཟིར་བར་བྱེད། །བསད་ཅིང་བཅད་ཅིང་དུམ་བུར་འགྱུར། །མངར་གསུམ་ལ་སོགས་གཏོར་མ་ཡང་། །
དུག་ཆེན་ཧ་ལར་གྱུར་ནས་ནི། །མྱོས་དང་རྨོངས་པར་གྱུར་ནས་ནི། །ཚ་བ་ཆེན་པོས་གཟིར་བར་བྱེད། །དེ་བས་དུས་རྣམས་ཐམས་ཅད་དུ། །དམ་ཚིག་འདི་ནི་རྟག་ཏུ་སྲུངས། །ཨོཾ་ནཱི་ལཱཾ་བ་ར་དྷ་ར་ས་མ་ཡ་ནཱ་ག་རཀྵ་རཀྵ་ཧཱུཾ་ཕཊ། དེ་འདྲའི་མཆོད་པ་གསུམ་བྱས་ཏེ། །དཀར་གསུམ་

49-1-253a

མངར་གསུམ་གཏོར་མ་ནི། །ཆོ་གའི་རིམ་པས་གཏང་བར་བྱ། །དེ་ནི་ཕྱི་ཡི་གསོ་བ་ཡིན། །ཉམས་དགའ་བ་ཡི་གཞལ་ཡས་ཁང་། །འཛམ་གླིང་ཕོ་བྲང་ཆེན་པོ་སྟེ། །རྟེན་ཡོད་གནས་སུ་དམ་དུ་སྦ། ཐམས་ཅད་ཞི་བར་འགྱུར་བ་ཡིན། །གསོ་བའི་དེ་ནི་རིམ་པ་
སྟེ། །ཆོ་ག་འདི་ནི་ཤིན་ཏུ་ལེགས། །བདག་གིས་མན་ངག་རིམ་པ་འདི། །གང་ཞིག་འགའ་ལ་ཕན་ཕྱིར་བྱས། །ཟླ་བ་ལྟ་བུ་གང་ཐོབ་དེས། །འགྲོ་རྣམས་རྟོག་པའི་ནད་གྲོལ་ཤོག །བསད་པ་གསོ་བའི་ཆོ་ག་རྫོགས་སོ།།      །།༄༅༅། །རྒྱ་གར་སྐད་དུ། དུ་ཧི་ཨ་མྲྀ་ཏ་པཱུ་ཛ་ནཱ་
མ། བོད་སྐད་དུ། བདུད་རྩི་འོ་མའི་མཆོད་པ་ཞེས་བྱ་བ། རྡོ་རྗེ་བསྣམས་ལ་ཕྱག་འཚལ་ལོ། །ཉོན་མོངས་དུག་རྣམས་འཇོམས་མཛད་པའི། །བདུད་རྩི་ལྟ་བུ་ཁྱོད་ལ་འདུད། །འགྲོ་བ་རྣམས་ལ་ཕན་པའི་ཕྱིར། །བསད་པ་གསོ་བའི་ཐབས་འདི་བྲི། །གསེར་ཟངས་ལ་སོགས་སྣོད་དུ་
བཤམ། །ས་བོན་གསུམ་གྱིས་བྱིན་གྱིས་བརླབས། །རྗེས་སུ་གཟུང་ཕྱིར་སྐུ་བསྐྱེད་ནས། །དེ་ནས་དེ་ལ་མཆོད་པ་འབུལ། །རྡོ་རྗེ་བསྣམས་ལ་ཕྱག་འཚལ་ལོ། །ཧཱུཾ་འགྲོ་བའི་མགོན་པོ་ཐུགས་རྗེ་ཅན། །གཟུང་འཛིན་དྲི་མའི་སྐྱོན་སྤངས་ནས། །མཉེས་པས་སྐུ་གསུང་ཐུགས་ལ་དབུལ། །
ཐུགས་རྗེས་དགོངས་ནས་བཞེས་སུ་གསོལ། །ཨོཾ་སརྦྦ་ཏ་ཐཱ་ག་ཏ་བཛྲ་པཱ་ཎི་ནཱི་ལཱཾ་བ་ར་དྷ་ར་མ་ཧཱ་ཀཱ་ཡ་ཨཱ་ཧ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཞེས་མཆོད་ཡོན་དབུལ། ཧཱུཾ་མེ་ཏོག་དམ་པ་འདི་དག་དང་། །དེ་བཞིན་མཛེས་པའི་མེ་ཏོག་རྣམས། །བདེ་གཤེགས་ཐུགས་ལ་དབུལ་བར་
བགྱི། །ཆགས་མེད་ཐུགས་རྗེས་བཞེས་སུ་གསོལ། །ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ་སྭཱ་ཧཱ། ལྷན་ཅིག་སྐྱེས་དང་སྦྱར་བ་ཡི། །ལྷ་རྫས་བདུག་སྤོས་དམ་པ་འདི། །གཙོ་འཁོར་བཅས་ལ་དབུལ་བར་བགྱི། །རྟོག་མེད་ཐུགས་རྗེས་བཞེས་སུ་གསོལ། །ཨོཾ་
བཛྲ་པཱ་ཎི་ནཱི་ལཱཾ་བ་ར་དྷ་ར་དྷཱུ་པེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ་སྭཱ་ཧཱ། མུན་པའི་ཕྱོགས་ནི་འཇོམས་བྱེད་ཅིང་། །ཕྱོགས་བཅུ་གསལ་བའི་མར་མེ་འདི། །ཀུན་མཁྱེན་ཡེ་ཤེས་ཐོབ་བྱའི་ཕྱིར། །ཡེ་ཤེས་ཐུགས་མཆོག་བཞེས་སུ་གསོལ། །ཨོཾ་བཛྲ་པཱ་ཎི་ནཱི་ལཱཾ་བ་ར་དྷ་ར་ཨཱ་ལོ་ཀེ་པཱུ་ཛ་མེ་གྷ་ས་མུ་

49-1-253b

དྲ་སྥ་ར་ཎ་ས་མ་ཡེ་ཧཱུཾ་སྭཱ་ཧཱ། ལྷན་ཅིག་སྐྱེས་དང་སྦྱར་བའི་དྲི། །དྲི་མཆོག་དམ་པ་འདི་དག་ནི། །རང་རང་ཐུགས་ལ་དབུལ་བར་བགྱི། །ཀུན་བཟང་ཐུགས་རྗེས་བཞེས་སུ་གསོལ། །ཨོཾ་བཛྲ་པཱ་ཎི་ནཱི་ལཱཾ་བ་ར་དྷ་ར་གནྡྷེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ་སྭཱ་ཧཱ། ཁ་དོག་དྲི་དང་ལྡན་པའི་མཆོག །བཟའ་བའི་
མཆོག་དང་ཡང་དག་ལྡན། །ཐམས་ཅད་སྦྱར་བའི་བཤོས་འདི་དག །རང་རིག་ཡེ་ཤེས་བརྙེས་ལ་དབུལ། །ཨོཾ་བཛྲ་པཱ་ཎི་ནཱི་ལཱཾ་བ་ར་དྷ་ར་པཱུ་ལཱཾ་ཛ་ཡན་ན་པྲ་ཎ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ་སྭཱ་ཧཱ། བླ་མེད་ཐེག་པ་མཆོག་གི་དོན་སྟོན་པ། །ཤེས་རབ་མཆོག་གི་རྗེས་འགྲོ་རོལ་མོའི་
སྒྲ། །བདུད་ཀྱི་འཁོར་ལོ་གཞོམ་ཕྱིར་དབུལ་བར་བགྱི། །ཐུགས་ཀྱིས་འགྲོ་ལ་མངའ་བརྙེས་འདི་བཞེས་ཤོག །ཨོཾ་བཛྲ་པཱ་ཎི་ནཱི་ལཱཾ་བ་ར་དྷ་ར་བུདྡྷ་ཀྵེ་ཏྲ་པྲ་ཙ་ལི་ཏི་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡཱེ་ཧཱུཾ་སྭཱ་ཧཱ། ནོར་རྒྱས་དང་ནི་དུང་སྐྱོང་དང་། །དགའ་བོ་དང་ནི་འཇོག་པོ་དང་། །པདྨ་དང་ནི་ཆུ་ལྷ་
དང་། །སྟོབས་ཀྱི་རྒྱུ་དང་རིགས་ལྡན་ལ། །བདུད་རྩི་འོ་མའི་མཆོད་པ་འབུལ། །ཀླུ་ཡི་ནད་ལས་ཐར་གྱུར་ཅིག །གནོད་སྦྱིན་ནད་ལས་ཐར་གྱུར་ཅིག །བདུད་ཀྱི་ནད་ལས་ཐར་གྱུར་ཅིག །རྫས་སྦའོ། །དཔལ་ཕྱག་ན་རྡོ་རྗེའི་མཆོད་པའི་རིམ་པ་རྫོགས་སོ།།      །།༄༅༅། །རྒྱ་གར་སྐད་དུ། 
ནཱ་ག་ཀརྨ་ཀྲོ་དྷ་མ་ར་ན་ནཱ་མ། བོད་སྐད་དུ། ཀླུ་ཁྲོ་བོས་གསད་པའི་ཕྲིན་ལས་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དེ་བསྙེན་བཟླས་པའི་རྟགས་བྱུང་ན། །འགའ་ཞིག་དབང་དུ་བསྡུ་དགོས་པས། །དེ་དབང་བྱ་ཕྱིར་མན་ངག་རིམ། །མགོན་ལ་ལུས་བཏུད་མན་ངག་དྲན། །
དུར་ཁྲོད་ལ་སོགས་གནས་དག་ཏུ། །སྔོན་དུ་བསྙེན་པ་རྫོགས་པ་ཡི། །ནག་པོའི་ཕྱོགས་ཀྱི་ཟླ་བ་ལ། །བདུན་དང་དགུ་དང་ལྔ་དུས་ལ། །དཀྱིལ་འཁོར་གྲུ་གསུམ་ཁྲུ་གང་ཚད། །མགོ་ནི་ལྷོ་རུ་བསྟན་པར་བྱ། །སྦྲུལ་དང་སྦལ་པའི་ཤ་དང་ནི། །སྐེ་ཚེ་ཇུ་ཚེ་ཁྲེ་དང་ཏིལ། །ཐལ་བ་ས་དང་ལན་ཚྭ་
དང་། །བུ་རམ་འབྲས་ཕྱེ་རྣམས་ལས་ནི། །སོར་བརྒྱད་ཚད་ཀྱི་སྨད་འཁྱིལ་བ། །དགུ་དང་བདུན་དང་ལྔ་དང་གསུམ། །ཀླུ་ཡི་རྒྱལ་པོའི་གཟུགས་བྱས་ཏེ། །མཐིང་ནག་ཧཱུཾ་ཕཊ་སྙིང་གར་གཞུག །གྲུ་གསུམ་ནང་དུ་མགོ་བོ་ལྷོར། །བསྟན་ཏེ་གན་རྐྱལ་ལྟ་བུར་གཞག །དེ་ལྟར་རྫས་རྣམས་

49-1-254a

བསགས་ནས་ནི། །ལྷ་ཡི་རྣལ་འབྱོར་བདག་ལྡན་པས། །ལྕགས་ཀྱུ་ལྔ་དང་ས་བོན་ལྔ། །འདོད་པའི་ལྷ་ལ་དབུལ་བ་སྟེ། །སྦྲུལ་དང་སྦལ་པའི་ཤ་ཁྲག་སོགས། །བསྒྲུབ་བྱ་དེ་ཉིད་ལ་ནི་སྦྱིན། །རྟ་ཤ་ལ་སོགས་སྣ་ཚོགས་ཤ །ནང་གི་བཀའ་སྲུང་རྣམས་ལ་སྦྱིན། །
འབྲས་ཆན་ལ་སོགས་གཏོར་མ་ནི། །ཕྱི་ཡི་བསྟན་སྲུང་རྣམས་ལ་སྦྱིན། །བདག་ཉིད་ལྷ་ཡི་རྣལ་འབྱོར་བྱ། །ས་བོན་ལས་ནི་སྣ་ཚོགས་པའི། །ཁྲོ་བོ་མཚོན་ཆ་འཛིན་པ་ཡིས། །བསྒྲུབ་བྱའི་ཆོ་ག་དང་བྲལ་ནས། །དྲངས་ཏེ་ས་བོན་ལ་ནི་བསྟིམ། །སྔ་མའི་ས་བོན་ཉིད་གྱུར་པས། །འགུགས་
པར་བྱེད་པའི་ས་བོན་བྱུང་། །ཛཿ་ཧཱུཾ་བཾ་ཧོཿནཱི་ལཱཾ་བ་ར་བཛྲ་པཱ་ཎི་ཨཾ་ཀུ་ཤ་ཛཿཨཱ་ཀཪྵ་ཡ་ཆེ་གེ་མོ་ཧཱུཾ་ཛཿཧཱུཾ་ཕཊ། གསང་སྔགས་འདི་ནི་བརྗོད་པ་ལས། །ལྕགས་ཀྱུ་ཐོགས་པའི་ལྷ་མོ་ནི། །དཔག་ཏུ་མེད་པ་བཀུག་པར་བསམ། །ཛཿ་ཧཱུཾ་བཾ་ཧོཿནཱི་ལཱཾ་བ་ར་བཛྲ་པཱ་ཎི་ཆེ་གེ་མོ་པྲ་བེ་ཤ་ཡ་ཕཊ། 
གཟུགས་བརྙན་ཁ་ཕྱེ་བསྟིམས་ལ་གཞག །སྣ་ཚོགས་ནད་ཀྱིས་གཟིར་བ་དང་། །ལུས་འདར་སེམས་ནི་གདུང་བར་བསམ། །སྟ་རེ་ལ་སོགས་མཚོན་གྱིས་གཟིར། །རླུང་ནག་གིས་གཡེངས་གྲང་བས་ཁྱབ། །གཅན་གཟན་སོགས་ཀྱིས་ལུས་ཟོས་བསམ། །དམ་ཚིག་བསྲུང་ཕྱིར་གཏོར་
མ་སྦྱིན། །དེ་ནས་ཕུར་བུ་མཚོན་ཆ་ཐོགས། །གསད་ཐབས་གསུམ་གྱིས་གསད་པར་བྱ། །གནས་བདུན་དུ་ནི་ཕུར་བུས་གདབ། །ཧཱུཾ་ང་ནི་ཕྱག་ན་རྡོ་རྗེ་སྟེ། །དུས་གསུམ་སངས་རྒྱས་ཐམས་ཅད་ཀྱིས། །གདུག་པ་འདུལ་ཕྱིར་དབང་བསྐུར་བས། །སྟོབས་ཆེན་ཕྲིན་ལས་དྲག་པོ་ཡིས། །སྐད་
ཅིག་ཙམ་ཡང་མི་གནས་ཕྱིར། །ལུས་ཀྱི་གནད་དུ་གཟིར་བར་གྱིས། །ཨོཾ་ནཱི་ལཱཾ་བ་ར་བཛྲ་པཱ་ཎི་ཆེ་གེ་མོ་ཀཱི་ལི་ཀཱི་ལ་ཡ་ཧཱུཾ་ཧཱུཾ་ཕཊ་ཕཊ། གསང་བའི་བདག་པོར་བཀའ་སྲུང་ཕྱིར། །གསང་བའི་དམ་ཚིག་བསྟན་པར་བྱ། །ཨོཾ་ནཱི་ལཱཾ་བ་ར་བཛྲ་པཱ་ཎི་ས་མ་ཡེ་ཧཱུཾ་ཕཊ། ཕྱག་ན་རྡོ་རྗེའི་དམ་
ཚིག་སྟེ། །ཕུར་པའི་ལྷ་དང་ཆེ་གེ་མོ། །དམ་ཚིག་གཉན་གྱིས་མ་འདའ་བར། །ཅི་བསྒོ་ཐམས་ཅད་མཉན་པར་གྱིས། །ཧཱུཾ་ང་རོ་སྟོབས་ཆེན་དྲག་པོའི་སྒྲ། །གདུག་པ་གང་ཞིག་འདའ་མི་བྱེད། །ང་ཡི་མཐུ་སྟོབས་དྲག་པོའི་སྒྲ། །མགོ་བོ་ཚལ་པ་བརྒྱ་རུ་འགེམས། །ཉོན་ཅིག་ལྟོས་འགྲོ་

49-1-254b

ཐམས་ཅད་ཀུན། །མཐུ་སྟོབས་དྲག་པོའི་བཀའ་མ་འདའ། །ཨོཾ་ནཱི་ལཱཾ་བ་ར་བཛྲ་པཱ་ཎི་ཆེ་གེ་མོ་ཧ་ར་ཧ་ར། པྲ་ཧ་ར་པྲ་ཧ་ར།  ཙྪིནྡ་ཙྪིནྡ། བྷིནྡྷ་བྷིནྡྷ་ཧཱུཾ་ཕཊ། ཧཱུཾ་རྡོ་རྗེ་ཆེན་པོ་རབ་འབར་ཐོ། །བཀའ་ལས་འདའ་བྱེད་ཆེ་གེ་མོ། །རྡོ་རྗེ་ཆེན་པོས་སྙིང་བསྲེགས་ནས། །ལུས་སེམས་ཕྲ་རབ་རྡུལ་དུ་རློག །
རྡོ་རྗེ་ཐོ་བའི་གཏུན་ཁུང་དུ། །རྡོ་རྗེ་ཐོ་བས་གཏམས་བྱས་ནས། །ལྷ་ཡང་ཐལ་བར་རླག་བྱེད་འགྱུར། །ལྷ་ཡི་ཆེ་གེ་མོ་དེས་གསོད། །ཨོཾ་ནཱི་ལཱཾ་བ་ར་བཛྲ་བཱ་ཎི་ཆེ་གེ་མོ་ཧ་ན་ཧ་ན། ཧ་ས་ཧ་ས་དྷ་ར་དྷ་ར། མཱ་ར་ཡ་མཱ་ར་ཡ།  ནཱ་ཤ་ཡ་ནཱ་ཤ་ཡ། ཧཱུཾ་ཕཊ། ཏདྱ་ཐཱ་ཧཱུཾ་ཕཊ། རིམ་པས་གཏོར་མ་འདི་སྦྱིན་ནོ། །
བདག་མེད་དངོས་པོས་བཏབ་ཅིང་དབུལ། །ངེས་པར་སོད་ནས་མནན་པ་བྱ། །དཀོན་མཆོག་གསུམ་ལ་སྡང་བའི་དགྲ། །མན་ངག་རིམ་པས་གསད་པར་བྱ། །ཐོས་པ་མང་ཞིང་ཤེས་རབ་ཅན། །བླ་མ་ལ་གུས་སེར་སྣ་མེད། །ཡིན་གྱི་གཞན་དུ་སྦྱིན་མི་བྱ། །བག་མེད་པས་ནི་གལ་ཏེ་བྱིན། །
འབྲས་བུ་མི་འདོད་སྣ་ཚོགས་ནི། །ཚེ་འདི་ཉིད་ལ་མྱོང་བར་འགྱུར། །སྡང་དང་གདུག་པས་ཟིན་པའི་ཐབས། །ཟབ་མོའི་མན་ངག་ཅུང་ཟད་སྨྲས། །དེ་ཡི་བསོད་ནམས་ཅི་བསགས་པ། །སྡང་དང་གདུག་པ་འདུལ་བར་ཤོག །།སློབ་དཔོན་ཛཱ་བ་རི་པའི་ཞལ་སྔ་ནས་མཛད་པའི་ཁྲོ་བོས་གསད་
པའི་ཕྲིན་ལས་པཎྜི་ཏ་དེ་བ་པཱུརྞ་མ་ཏི་དང་། ལོ་ཙཱ་བ་ཆོས་ཀྱི་བཟང་པོས་བཅོས་པའོ།།      །།༄༅༅། །རྒྱ་གར་སྐད་དུ། ནཱ་ག་ཀུ་ལ་ཙ་རི་སྟཾ་བྷ་བི་དྷི་ནཱ་མ། བོད་སྐད་དུ། ཀླུ་རིགས་བཞི་མནན་པའི་ཆོ་ག་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །གང་ཞིག་དབང་
དུ་འདུས་གྱུར་པས། །བསྐལ་པ་བྱེ་བའི་མཐའ་རུ་ཡང་། །ལྡང་བར་མི་ནུས་བྱ་བའི་ཕྱིར། །རྡོ་རྗེ་ཅན་ལ་གུས་བཏུད་ནས། །སྒྲུབ་པ་པོ་ལ་ཕན་གདགས་ཕྱིར། །དེ་ཡི་མནན་པའི་ཆོ་ག་བསྟན། །གསེར་ལས་བྱས་པའི་མཆོད་རྟེན་ནམ། །ཡང་ན་རིན་ཆེན་ལྔ་ལས་བྱས། །ཁྲུ་གང་ཚད་ཀྱི་
མཆོད་རྟེན་བརྩིག །བུམ་པ་ཁོག་སྟོང་བྱས་པའི་ནང་། །ཀུ་ལ་ཙ་རིའི་གཟུགས་བྱས་ཏེ། །ཁོང་སྟོང་ཕྱོགས་བཞིར་དགོད་པར་བྱ། །དེ་འོག་ཕྱོགས་བཞིའི་རྨང་དུ་ནི། །ཀུ་ལ་ཙ་རིའི་བྲན་རྣམས་གཞུག །དེ་ནས་ལྷ་ཡི་རྣལ་འབྱོར་གྱིས། །ཕྲེང་བའི་སྔགས་ཀྱིས་བཟླས་པ་ལས། །སྔགས་ཀྱི་འོད་ཟེར་

49-1-255a

ལྕགས་ཀྱུ་ཡིས། །བསྒྲུབ་བྱ་བཀུག་སྟེ་གཉིས་མེད་བསྟིམ། །ཡང་ན་རང་ལྷའི་ས་བོན་ལས། །ཁྲོ་བོ་སྣ་ཚོགས་སྤྲོས་པ་ཡིས། །བསྒྲུབ་བྱ་བཀུག་སྟེ་སྔ་མ་བཞིན། །མངོན་སུམ་ལྟ་བུར་ཁུགས་པར་བསམ། །ཀུ་ལ་ཙ་རིའི་སྤྱི་སྟེང་དུ། །རྡོ་རྗེ་རྒྱ་གྲམ་མེ་རི་འབར། །དེ་ཡི་ལྟེ་བའི་
དཀྱིལ་དུ་ནི། །མི་འཁྲུགས་རྒྱལ་པོ་གཡོན་བརྐྱང་བཞུགས། །བསྐལ་པའི་མཐའ་རུ་མནན་པར་བསམ། །དེ་ནས་བདུད་རྩི་ལྔར་བཅས་པ། །རང་གི་འདོད་པའི་ལྷ་ལ་དབུལ། །དམ་ལ་གནས་པར་བྱ་བའི་ཕྱིར། །སྦྲུལ་དང་སྦལ་པའི་ཤ་དང་ཚིལ། །གླང་དམར་བ་དམར་ལ་སོགས་པའི། །ཁྲག་
ལ་སོགས་པ་རྣམས་ཀྱིས་ནི། །བསྒྲུབ་བྱ་ལ་ནི་གཏོར་མ་སྦྱིན། །དབྱར་གྱི་ཁྱིམ་གསུམ་ཐ་མ་ཡི། །དྲུག་གཉིས་བཞི་ཡི་ཉིན་ཕྱེད་ན། །སྒྲུབ་ཁང་ཐེམ་རྩའི་འོག་ཏུ་ནི། །ཤིན་ཏུ་དམ་པར་སྦ་བར་བྱ། །ཕྱག་ན་རྡོ་རྗེ་ཁྲོ་བོ་ཆེ། །རབ་ཏུ་ཁྲོས་པའི་མཐུ་སྟོབས་ཀྱིས། །རི་རབ་ཀླད་ལ་བསྐོར་ནས་ནི། །
དེ་འོག་ཀུ་ལ་ཙ་རི་ནི། །རིགས་དེ་རྣམས་ནི་མནན་བྱས་ཀྱིས། །ཐར་བ་ཡི་ནི་དུས་མེད་པར། །དམ་ཚིག་གཉན་གྱིས་མ་འདའ་ཅིག །ཉེས་པ་འདི་ལས་མ་ལྡོག་ཅིག །ལུས་འདི་རུལ་ཅིང་མྱགས་གྱུར་ནས། །སྙིང་ནི་འགེམས་ཤིང་ཟགས་པར་བྱེད། །ཚེ་ཡི་འདུ་བྱེད་བྱས་ནས་
ནི། །མནར་མེད་པར་ནི་འགྲོ་བ་ཡིན། །བྱང་ཆུབ་སེམས་བསྐྱེད་བྱམས་པའི་སེམས། །སྐྱེས་པའི་ཚེ་ན་གཏང་བར་བྱ། །ཕྲེང་བའི་སྔགས་ནི་བརྒྱ་རྩ་བརྒྱད། །ཤིན་ཏུ་ཁྲོས་པས་བཟླས་པར་བྱ། །མཐུ་སྟོབས་དྲག་པོའི་ང་རོ་ཡིས། །སྟང་སྟབས་ཀྱིས་ཀྱང་མནན་པར་བྱ། །ངང་ཚུལ་
བཟང་ཞིང་ཤེས་རབ་ཅན། །བླ་མ་ལ་གུས་གཏོང་ཕོད་པ། །གལ་ཏེ་རྨོངས་པས་གཞན་དུ་སྦྱིན། །ཚ་བ་ཆེན་པོར་ཡུན་རིང་གནས། །ཨོཾ་ནཱི་ལཱཾ་བ་ར་བཛྲ་པཱ་ཎི་ས་མ་ཡ་ནཱ་ག་ཀུ་ལ་ཙ་རི་ཨི་མཱཾ་བ་ལིཾ་ཁཱ་ཧི་ཁཱ་ཧི་སྭཱ་ཧཱ། གཏོར་མ་སྦྱིན་པའི་སྔགས་སོ། །ཀླུ་རིགས་བཞིའི་མནན་པ་ནམ་གྲུའི་རིགས་
ལས་བྱུང་བའི་སློབ་དཔོན་ཛཱ་བ་རི་པས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ཎི་ཧོ་མ་བི་དྷི་ནཱ་མ། བོད་སྐད་དུ། ཕྱག་ན་རྡོ་རྗེ་གོས་སྔོན་པོ་ཅན་གྱི་སྦྱིན་སྲེག་གི་ཆོ་ག་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །གང་ཞིག་མེད་པར་

49-1-255b

དེ་མི་འབྱུང་། །དེས་ན་དེ་ལ་འཇུག་པ་དྲན། །གང་ཞིག་འདིར་རྒྱར་ཁྲུ་གང་བ། །ཀུན་ནས་ཟླུམ་པོའི་ཐབ་ཁུང་ནང་དུ་རྡོ་རྗེ་སོར་བརྒྱད་པ་བཀོད་དེ། ས་དཀར་པོས་བྱུགས་ལ་ཙནྡན་དཀར་པོ་ལ་སོགས་པའི་དྲིས་ཀྱང་གཏོར་རོ། །དེར་རྒྱ་ཤུག་གམ་དགོན་པའི་བ་ལང་གི་ལྕི་བ་བཙར་ཏེ། ནས་དང་། གྲོ་
དང་། འབྲས་དང་། སྲན་མ་དང་། བདུད་རྩི་ལྔ་དང་། མེ་ཏོག་དཀར་པོ་དང་ལྡན་པའི་མཆོད་ཡོན་ནོ། །སྤོས་དང་། མར་མེ་དང་། དྲི་ཆབ་དང་། ལྷ་བཤོས་ཏེ་མཆོད་པའི་རྫས་ཏེ་གཡོན་དུའོ། །ཏིལ་དང་། ཡམ་ཤིང་དང་། མར་དང་། ཡུངས་ཀར་དང་། ཞོ་དང་། འོ་མ་དང་། ཟས་དཀར་
གསུམ་དང་།མངར་གསུམ་དང་། ཀུ་ཤ་དང་། དཱུར་བ་དང་། ནས་དང་། འབྲས་དང་། གྲོ་དང་། སོ་བ་དང་། སྲན་མ་དང་། བིལ་བ་དང་། སུརྒ་དང་། ཛཱ་ཏི་ཕ་ལ་རྣམས་ནི་གཡས་སུ་གཞག་པར་བྱའོ། །རང་ལྷའི་རྣལ་འབྱོར་བྱས་ལ་མཆོད་རྫས་དང་སྲེག་རྫས་རྣམས་བྱིན་གྱིས་བརླབས་ཏེ། 
བགེགས་བསྐྲད་ནས་བྲམ་ཟེའམ། ཐ་མལ་པའམ། རྒྱུན་ཞགས་སམ། འོ་མ་ཅན་གྱི་མེ་བླངས་ཏེ། ཨོཾ་བཛྲ་པཱ་ཎི་ཛྭ་ལ་ཇྭཱ་ལ་ཧཱུཾ་ཧཱུཾ་ཕཊ་ཕཊ་ཅེས་བྱ་བས་མེ་སྦར་བར་བྱའོ། །དེ་ནས་ཧཱུཾ་ལས་ཐབ་ཁུང་བསྐྱེད་པ་ནི། རཾ་ལས་མེའི་དཀྱིལ་འཁོར་གྲུ་གསུམ་ལ་ཡི་གེ་ཨོཾ་ཨཱཿཧཱུཾ་ལས་འཁོར་
ལོ་དང་པདྨ་དང་རྡོ་རྗེར་གྱུར་པ་ལས་ཞི་བའི་རང་བཞིན་གྱི་མེ་ལྷ་མཆོད་ཕྱིར་ཐོགས་པ་དཀར་པོ་དང་ལྡན་པ་བ་སྤུའི་བུ་ག་ཐམས་ཅད་ནས་བདུད་རྩི་དཀར་པོའི་རྒྱུན་འབྱུང་བ་ཞལ་གཅིག་ཕྱག་བཞི་པ། གཡས་ན་རྡོ་རྗེ་དང་སྤྱི་བླུགས་འཛིན་པ།  གཡོན་དྲིལ་བུ་དང་བགྲང་ཕྲེང་འཛིན་པ་ཅན་ཆུའི་དཀྱིལ་
འཁོར་ལ་གནས་པར་བསྒོམ་མོ། །ཡེ་ཤེས་སེམས་དཔའ་ཕྱག་རྒྱ་བཞིས་དགུག་པ་ལ་སོགས་པ་བྱས་ཏེ། བྱིན་གྱིས་བརླབ་པ་དང་། དབང་བསྐུར་བ་དང་། ཁྲུས་བྱས་ནས་མཆོད་པ་རྣམས་ཀྱིས་ཡང་དག་པར་མཆོད་དོ། །མར་ལ་སོགས་པའི་སྲེག་རྫས་རྣམས་རིག་སྔགས་འདིས་དབུལ་ཏེ། ཨོཾ་མ་
ཧཱ་བྷཱུ་ཏ་ཛྭ་ལཱ་ཡ་སརྦྦ་བྷསྨི་ཀུ་རུ་སརྦྦ་བིགྷྣཱཾ་ཧཱུཾ་ཕཊ། ཆེ་གེ་མོ་ཤཱནྟིཾ་ཀུ་རུ་སྭཱ་ཧཱ། ཞེས་པས་ཞི་བར་བསམ་མོ། །དེའི་རྗེས་ལ་མེ་འབར་བའི་རྒྱུར་གྱུར་པའམ་དེའི་སྙིང་གར་དཔལ་ཕྱག་ན་རྡོ་རྗེ་སྒྲུབ་ཐབས་ལས་ཇི་སྐད་གསུངས་པ་བཞིན་དུ་བསྐྱེད་ལ་ཡེ་ཤེས་སེམས་དཔའ་སྤྱན་དྲངས་ཏེ། གཉིས་

49-1-256a

སུ་མེད་པར་བྱས་ལ། རང་གི་ལྷ་ལ་མཆོད་རྫས་དང་སྲེག་རྫས་རྣམས་ལ་ཕྲེང་བའི་སྔགས་ལ་ཆེ་གེ་མོ་ཤཱནྟིཾ་ཀུ་རུ་བཏགས་ལ་དབུལ་ཞིང་ཞི་བར་བསམ་མོ། །དེ་ནས་དགང་བླུགས་ཕུལ་ཏེ། སྔགས་འདིས་གཤེགས་སུ་གསོལ་ལོ། །ཨོཾ་ཀྲྀ་ཏོ་བ་སརྦྦ་སཏྭཱརྠ། སིདྡྷི་མ་དཏྟཱ་ཡ་
ཐཱ་ནུ་ག་གཙྪ་ཏཱཾ་བུདྡྷ་བི་ཥ་ཡཾ། པུ་ན་ར་ག་མ་ན་ཡཙྪ་ཞེས་པའོ། །དེ་ནས་ཡང་ཐབ་བསངས་ལ་རྫས་ལྷག་མ་རྣམས་ཀྱིས་མེ་ལྷ་ལ་ཕུལ་ཏེ། ཨོཾ་ཁྱོད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་
འབྱོན་པར་མཛད་དུ་གསོལ། །ཞེས་མེ་ལྷ་གཤེགས་སུ་གསོལ། དེ་ནས་དམ་ཚིག་རང་ལ་བསྡུས་ནས་འབྲས་ཆན་ལ་སོགས་པའི་གཏོར་མ་ཕྱོགས་སྐྱོང་ལ་སོགས་པ་ལ་སྦྱིན་ནོ། །ཉུང་བར་འདོད་ན་བླ་མའི་ཞལ་ནས་ཇི་སྐད་གསུངས་པ་བཞིན་འདི་ལ་འཇུག་པར་བྱའོ། །དཔལ་ཕྱག་ན་རྡོ་རྗེའི་སྦྱིན་
སྲེག་གི་ཆོ་ག་ནམ་གྲུའི་རིགས་ལས་བྱུང་བ་དངོས་གྲུབ་བརྙེས་པའི་སློབ་དཔོན་ཛཱ་བ་རི་པས་མཛད་པ་རྫོགས་སོ།།      །།བལ་པོའི་པཎྜི་ཏ་དེ་བ་པུརྞ་མ་ཏི་དང་། ལོ་ཙཱ་བ་ཆོས་ཀྱི་བཟང་པོས་བསྒྱུར་ཞིང་ཞུས་སོ།།      །།༄༅༅། །རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ཎི་ཧོ་མ་
བི་དྷི་ནཱ་མ། བོད་སྐད་དུ། ཕྱག་ན་རྡོ་རྗེ་གོས་སྔོན་པོ་ཅན་གྱི་སྦྱིན་སྲེག་གི་ཆོ་ག་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །གང་ཞིག་མེད་པར་དེ་མི་འབྱུང་། །དེས་ན་དེ་ལ་འཇུག་པ་བརྩམ། །དེ་ལ་འདིར་ཐབ་ཁུང་གྲུ་གསུམ་པ་མགོ་ལྷོར་བ་སྟན་པའི་ནང་དུ། ཁྲོ་བོའི་རྡོ་རྗེ་སོར་
བརྒྱད་པ་བཀོད་དེ། ཐལ་བ་དང་སོལ་བས་ནག་པོར་བྱུགས་ལ་དྲི་ཆུ་དང་བོང་བུ་དང་རྔ་མོའི་རྟུག་པས་བྱུག་པར་བྱའོ། །དེར་མགལ་དུམ་མམ། ཚེར་མ་ཅན་ནམ། སྐམ་པོའི་ཤིང་བཅེར་ཏེ། ཁྲག་དང་། བའི་གཅིན་དང་། བདུད་རྩི་དང་། མེ་ཏོག་ནག་པོ་ནི་མཆོད་ཡོན་ནོ། །དྲི་མི་ཞིམ་པ་དང་། རོ་
ཁ་བ་དང་། སྔོན་པོའི་མེ་ཏོག་གོ། །བདུད་རྩི་ལྔ་སྦྱར་བའི་སྤོས་སོ། །མར་ཆེན་པོའི་མར་མེ། དྲི་ཆུ་དང་ཏིལ་ནག་པོ་སྦྱར་བ་ནི་དྲི་ཆབ། དྲི་ཆེན་དང་མི་ཤ་བསྲེས་པའི་ལྷ་བཤོས་ཏེ། དེ་རྣམས་གཡས་སུ་གཞག་པར་བྱའོ། །དུག་དང་། ཁྲག་དང་། སྐེ་ཚེ་དང་། ལན་ཚྭ་དང་། ནིམ་པ་དང་།

49-1-256b

ད་དུ་ར་དང་། བདུད་རྩི་ལྔ་དང་བསྲེས་པའི་ཡུངས་མར་རྣམས་ནི་དགང་གཟར་དུ་བླུགས་ཏེ་ཁྲག་ཏུ་བྱས་ལ་དབུལ་ལོ། །ཤིང་ཚེར་མ་ཅན་གྱི་ཡམ་ཤིང་དང་། མར་ནག་དང་། ཁྲག་དང་། དྲི་ཆེན་དང་། དྲི་ཆུ་དང་། མི་རུས་དང་། སྐྲ་དང་། སོར་མོ་དང་། དུག་དང་། སྐེ་ཚེ་དང་། 
ལན་ཚྭ་དེ་རྣམས་དང་། རྐང་རྗེས་དང་། ཁྱིམ་བྱའི་སྒོ་ང་དང་། བྱ་རོག་གི་ཤ་རྣམས་དང་། བོང་བུ་དང་།  རྔ་མོའི་རྟུག་པ་རྣམས་ནི་སྲེག་རྫས་ཏེ། ཤ་དང་རུས་པར་བསམ་མོ། །དེ་རྣམས་ནི་གཡོན་དུའོ། །རང་ལྷའི་རྣལ་འབྱོར་བྱས་ལ་རྫས་བྱིན་གྱིས་བརླབས་ནས་བགེགས་
བསྐྲད་དོ། །རྡོལ་པའམ། སྨེ་ཤ་ཅན་ནམ་རྡོ་ལས་བྱུང་བའམ། རིའི་མེ་བླངས་ཏེ། བསང་ཞིང་། ཨོཾ་བཛྲ་པཱ་ཎི་མ་ཧཱ་ཀྲོ་དྷ་ཛྭཱ་ལ་ཛྭ་ལ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། ཞེས་པས་མེ་སྦར་རོ། །མེ་འབར་བའི་ནང་དུ་རཾ་ལས་ཐབ་ཁུང་བསྐྱེད་ལ་དེའི་ནང་དུ་ཧཱུཾ་ལས་ཉི་མའི་སྟེང་དུ་ཨོཾ་ཨཱཿཧཱུཾ་
ལས་འཁོར་ལོ་དང་། པདྨ་དང་། རྡོ་རྗེར་གྱུར་ཏེ། དེ་ནས་ཁྲོ་བོའི་མེ་ལྷ་ཤིན་ཏུ་ཁྲོས་པ། སྐྲ་ཁམ་པ་གྱེན་དུ་བརྫེས་པ། འོད་ཟེར་དཔག་ཏུ་མེད་པ་འཕྲོ་བ། ཞལ་གཅིག་ཕྱག་བཞི་པ། གཡས་ན་རྡོ་རྗེ་དང་སྐྱབས་སྦྱིན། གཡོན་ན་དྲིལ་བུ་དང་དབྱུག་པ། རཾ་ལས་མེ་དང་རླུང་གི་
དཀྱིལ་འཁོར་ལ་བསམས་ཏེ། ཡེ་ཤེས་སེམས་དཔའ་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ནས་དེར་བྱིན་རླབས་དང་།  དབང་བསྐུར་ཏེ། ཁྲུས་གསོལ་ནས་ཞལ་གདངས་པའི་ནང་དུ་མཆོད་རྫས་དང་སྲེག་རྫས་རྣམས་འདིས་དབུལ་ཏེ། ཨོཾ་བཛྲ་པཱ་
ཎི་མ་ཧཱ་བྷཱུ་ཏ་ཛྭ་ལ་ཡ་སརྦ་བྷསྨི་ཀུ་རུ་སརྦ་དུཥྚཱཾ་མ་མ་ཆེ་གེ་མོ་མཱ་ར་ཡ་ཧཱུཾ་ཕཊ་ཅེས་པས་གསད་པར་བྱའོ། །དེ་ནས་མེ་འབར་བས་རྒྱུར་གྱུར་པའམ། ཡང་ན་དེའི་སྙིང་གར་དཔལ་ཕྱག་ན་རྡོ་རྗེ་གོས་སྔོན་པོ་ཅན་སྒྲུབ་ཐབས་ལས་ཇི་སྐད་གསུངས་པ་བཞིན་ཉི་མའི་དཀྱིལ་འཁོར་ལ་གནས་
པར་བསྐྱེད་ནས་ཡེ་ཤེས་སེམས་དཔའ་སྔ་མ་བཞིན་བསྟིམས་ལ། དེ་བཞིན་དུ་བྱིན་གྱིས་བརླབས་པ་དང་དབང་བསྐུར་བར་བྱའོ། །དེ་ནས་ཕྲེང་བའི་སྔགས་ལ་མཱ་ར་ཡ་དང་བཅས་པས་མཆོད་རྫས་སྔ་མ་བཞིན་དུ་དབུལ་ལོ། །ཡང་དགང་བླུགས་ཕུལ་ཏེ། ཡེ་ཤེས་སེམས་དཔའ་

49-1-257a

གཤེགས་སུ་གསོལ་ལོ། །དེ་ནས་ཐབ་བསངས་ཏེ། རྫས་ལྷག་མ་རྣམས་མེ་ལྷ་ལ་ཕུལ་ནས། ཨོཾ་བདག་དང་གཞན་གྱི་དོན་རྣམས་ནི། །བསྒྲུབས་ཏེ་སྦྱིན་སྲེག་བཞེས་ནས་ཀྱང་། །སླར་ཡང་འབྱོན་པར་མཛད་ནས་ཀྱང་། །བདག་ལ་སྔགས་ཀྱི་དངོས་གྲུབ་སྩོལ། །ཞེས་
མེ་ལྷ་གཤེགས་སུ་གསོལ་ལོ། །དེའི་རྗེས་སུ་དམ་ཚིག་པ་རང་ལ་བསྡུས་ཏེ། གཏོར་མ་སྦྱིན་པར་བྱའོ། །ཉུང་བར་འདོད་ན་བླ་མའི་ཞལ་ནས་ཇི་སྐད་གསུངས་པ་བཞིན་དུ་འདི་ལ་འཇུག་པར་བྱའོ། །ཕྱག་ན་རྡོ་རྗེའི་སྦྱིན་སྲེག་གི་ཆོ་ག་མདོར་བསྡུས་པ་ཞེས་བྱ་བ་ནམ་གྲུའི་རིགས་ལས་བྱུང་བ་
དངོས་གྲུབ་བརྙེས་པའི་སློབ་དཔོན་ཛཱ་བ་རི་པས་མཛད་པ་རྫོགས་སོ།།      །།བལ་པོའི་པཎྜི་ཏ་དེ་བ་པཱུརྞ་མ་ཏི་དང་། ལོ་ཙཱ་བ་དགེ་སློང་ཆོས་ཀྱི་བཟང་པོས་བསྒྱུར་བའོ།།      །།༄༅༅། །རྒྱ་གར་སྐད་དུ། མ་ཧཱ་ཡཀྵ་སེ་ནཱ་པ་ཏ་ཡེ་ནཱི་ལཱཾ་བ་ར་དྷ་ར་བཛྲ་པཱ་ཎི་མཎྜལ་བི་དྷི་ནཱ་
མ། བོད་སྐད་དུ། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་གྱི་དཀྱིལ་འཁོར་གྱི་ཆོ་ག་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །འགྲོ་བ་རྣམས་ནི་མ་རིག་མུན་པས་བསྒྲིབས་ཤིང་རྐྱེན་གྱི་རི་བོས་ནོན་པ་རྣམས། །གསལ་བའི་ཡེ་ཤེས་ནུབ་ཅིང་འཁོར་བའི་འདམ་དུ་
བྱིང་། །དེ་འདྲའི་འགྲོ་བ་མང་པོ་ཡིད་ཀྱིས་མངོན་སུམ་མཐོང་། །འགྲོ་བ་དེ་དག་ས་བོན་གནས་དང་རྩོལ་རྐྱེན་གྱིས། །སྡུག་བསྔལ་མང་པོ་སྤྱོད་ཅིང་གདུག་པས་ཟིན་གྱུར་པ། །དེ་ལས་ཐར་པའི་ཐབས་དག་གཞན་གྱིས་མི་ནུས་ཏེ། །སྲིད་འཇོམས་སྡུག་བསྔལ་ཐལ་མཛད་དབུགས་ཚ་
མི་ཤིགས་འཛིན། །གདུག་པའི་ནད་རྣམས་མ་ལུས་ཐར་མཛད་སྙིང་རྗེས་ཁྲོས། །འཇིགས་བྱེད་ཁྲོ་རྒྱལ་རྔམ་པའི་གཙོ་ལ་དངོས་པོ་ཀུན་གྱིས་འདུད། །དེ་ལ་རྟག་ཏུ་མོས་ཤིང་དང་བས་མངོན་སུམ་སྣང་བར་མཛད། །ཇི་སྲིད་མཉེས་བྱས་ལྷག་པའི་ལྷ་ཡིས་གནང་བ་བྱིན། །རང་ཉམས་མྱོང་
ལ་གདུག་པ་འདུལ་ལ་དབང་བསྐུར་གཅེས། །དེ་དབང་བསྐུར་ཕྱིར་འཁོར་ལོ་ཆེན་པོའི་ཆོ་ག་དྲན། །དེ་ནས་རྡོ་རྗེ་སློབ་དཔོན་མདུན། །སློབ་མ་སྣོད་དང་ལྡན་པ་ཡིས། །མཎྜལ་ཟླུམ་པོ་ཁྲུ་གང་ཚད། །བྱི་དོར་ལེགས་བྱས་མེ་ཏོག་དགྲམ། །མཁའ་འགྲོ་མ་ཡི་གཏོར་མ་བཤམ། །སྣོད་ལྡན་

49-1-257b

སྤྱོད་ལམ་ལེགས་བྱས་ཏེ། །སློབ་དཔོན་ཁྱོད་ནི་དགོངས་སུ་གསོལ། །བདག་མིང་འདི་ཞེས་བགྱི་བ་ནི། །དུས་འདི་ཉིད་ནས་བཟུང་ནས་ནི། །སྙིང་པོ་བྱང་ཆུབ་ཐོབ་ཀྱི་བར། །བླ་མ་དམ་པར་གསོལ་འདེབས་ཀྱིས། །བདག་གི་བླ་མ་མཛད་དུ་གསོལ། །སེམས་ཅན་མ་བརྒལ་བསྒྲལ་བ་དང་། །
མ་གྲོལ་བ་རྣམས་དགྲོལ་བ་དང་། །དབུགས་མ་ཕྱུང་བ་དབུགས་ཕྱུང་དང་། །མྱ་ངན་མི་འདའ་བཟླ་བ་དང་། །རྫོགས་པའི་སངས་རྒྱས་བསྒྲུབ་པ་དང་། །བླ་མར་ཞུ་བར་ཁྱོད་སྤྲོ་འམ། །སློབ་དཔོན་གནང་བ་བྱིན་ནས་ནི། །སློབ་མས་ཅི་འབྱོར་པས་མཆོད་ནས། །དགོས་པ་ཐམས་ཅད་དྲི་བར་བྱ། །ལུང་
རྣམས་ཕོག་ལ་བསྙེན་པ་བྱ། །ཐིམ་ནས་སྡིག་པ་སྦྱང་བའི་ཕྱིར། །ཞི་བའི་སྦྱིན་སྲེག་བདུན་བྱས་ཏེ། །བར་ཆད་བསལ་ཕྱིར་གཏོར་མ་གཏང་། །ཚོགས་བསགས་ཕྱིར་ནི་མཆོད་པ་བཤམ། །མཁའ་འགྲོ་མ་ལ་གཏོར་མ་གཏང་། །དེ་ནས་གོང་མའི་མཎྜལ་དེ། །བྱི་དོར་ལེགས་བྱས་མེ་ཏོག་དགྲམ། །
སྤྱོད་ལམ་ལེགས་བྱས་མཆོད་པ་དབུལ། །ཕྱོགས་བཅུའི་སངས་རྒྱས་ཐམས་ཅད་དང་། །དཀྱིལ་འཁོར་གསང་བའི་ལྷ་ཚོགས་དང་། །བྱང་ཆུབ་སེམས་དཔའ་ཐམས་ཅད་ལ། །སྒོ་གསུམ་དང་བས་ཕྱག་འཚལ་ལོ། །སངས་རྒྱས་ཆོས་དང་དགེ་འདུན་ལ། །མཆོད་པ་བླ་ན་མེད་པས་
མཆོད། །འཁོར་བ་ཐོག་མ་མེད་པ་ནས། །མཚམས་མེད་ལྔ་དང་ཉེ་བ་ལྔ། །མི་དགེ་བཅུ་དང་ལྕི་བ་བརྒྱད། །ཁ་ན་མ་ཐོ་ལ་སོགས་པ། །འཕགས་པའི་ཚོགས་ལ་སོ་སོར་བཤགས། །རྐང་གཉིས་གཙོ་བོ་སངས་རྒྱས་དང་། །འདོད་ཆགས་བྲལ་བའི་ཆོས་རྣམས་དང་། །ཚོགས་
ཀྱི་གཞིར་གྱུར་དགེ་འདུན་ལ། །དང་བའི་སེམས་ཀྱིས་སྐྱབས་སུ་མཆི། །ཕྱོགས་བཅུ་མཐའ་ཡས་ཞིང་རྣམས་ན། །མངོན་པར་རྫོགས་པའི་སངས་རྒྱས་རྣམས། །རིང་པོ་མ་ལོན་ཐམས་ཅད་ལ། །ཆོས་ཀྱི་འཁོར་ལོ་བསྐོར་བར་བསྐུལ། །ཇི་སྲིད་འཁོར་བ་མ་སྟོངས་པར། །མྱ་
ངན་མི་འདའ་གསོལ་བ་གདབ། །འཇིག་རྟེན་དགེ་བཅུ་ཇི་སྙེད་པ། །ཉན་ཐོས་རང་རྒྱལ་དགེ་སོགས་བཅས། །སངས་རྒྱས་སྲས་བཅས་འགྲོ་དོན་མཛད། །དེ་དག་ལ་ནི་ཡི་རང་ངོ་། །དགེ་བཅུ་ཇི་སྙེད་སྤྱོད་པ་དང་། །བསྡུ་བའི་དངོས་པོ་བཞི་དང་ནི། །ཕ་རོལ་ཕྱིན་པ་བཅུ་ལ་སོགས། །

49-1-258a

བྱང་ཆུབ་ཆེན་པོར་བསྔོ་བར་བགྱི། །བདག་གི་ལུས་འདི་ཇི་སྲིད་དུ། །ལེན་པ་རྡོ་རྗེ་སློབ་དཔོན་དང་། །འཁོར་ལོ་ཆེན་པོའི་ལྷ་ཚོགས་དང་། །སངས་རྒྱས་སྲས་དང་བཅས་པ་ལ། །ངག་ཡིད་དང་བས་དབུལ་བར་བགྱི། །བྱང་ཆུབ་མཆོག་གི་རང་བཞིན་ཅན། །
སེམས་ཅན་ཀུན་ལ་ཁྱབ་པར་གནས། །མ་རྟོགས་འཁོར་བར་འཁྱམས་པ་རྣམས། །དེ་དག་དོན་དུ་སེམས་བསྐྱེད་དོ། །དུས་གསུམ་སངས་རྒྱས་སྲས་བཅས་པའི། །བསླབ་དང་སློབ་པར་གྱུར་པ་ཡིས། །སེམས་ཅན་དོན་བྱེད་ཚུལ་ཁྲིམས་དང་། །སྡོམ་པའི་ཚུལ་ཁྲིམས་
ལྡན་པ་དང་། །དགེ་བའི་ཆོས་སྡུད་ཚུལ་ཁྲིམས་དག །ཡང་དག་བླངས་ཏེ་གནས་བགྱིད་དོ། །དུས་འདི་ཉིད་ནས་བཟུང་ནས་ནི། །འཁོར་བའི་ཉེས་པས་མ་གོས་པར། །མཆོད་པ་ཀུན་དང་ལྡན་པར་ནི། །དུས་ཀུན་དུ་ནི་ལགས་པར་ནོས། །སྡིག་སྒྲིབ་སྦྱང་ཕྱིར་སློབ་མ་ནི། །མང་
པོར་སློབ་མ་ཟློས་སུ་གཞུག །ཨོཾ་ཨ་མྲྀ་ཏེ་ཧཱུཾ། དེ་ནས་རྡོ་རྗེ་སློབ་དཔོན་གྱིས། །ཏིང་ངེ་འཛིན་ནི་གསུམ་བསྒོམས་ཏེ། །མཆོད་པ་དང་ནི་གཏོར་མ་བཤམ། །ས་ཡི་བདག་པོ་རྒྱས་པར་མཆོད། །སྣང་དང་མི་སྣང་ས་བདག་ལ། །ས་བླང་བ་ཡི་གསོལ་བ་གདབ། །བྱིན་ནམ་
མ་བྱིན་རྟགས་ཀྱིས་བརྟག །ལས་དང་སྔགས་དང་སྦྱིན་སྲེག་དང་། །མཚན་མ་མེད་པས་སྦྱར་བའོ། །བློ་དང་ལྷ་ཡིས་ས་གཟུང་ངོ་། །ལྟོ་འཕྱེ་བརྟགས་ལ་ས་བརྐོ་སྟེ། །སྟེགས་བུ་བྱི་དོར་ལེགས་བྱས་ལ། །རྣལ་འབྱོར་ལུས་ཀྱི་ཁྲུ་གང་ཚད། །འཕང་དུ་ཁྲུ་གང་ཚད་དང་སྦྱར། །
གསེར་རམ་དངུལ་ལམ་འཇིམ་པ་ལས། །བྱས་པའི་བུམ་པ་བཅུའམ་དྲུག །བཙལ་ཏེ་ལེགས་པར་བཀྲུས་པ་དང་། །དྲི་ཞིམ་བསྒོ་ཞིང་དཀར་པོར་བྱའོ། །དེ་ནས་བུམ་པའི་ནང་དུ་ནི། །ཀཎྜ་ཀ་རི་བྲྀ་ཧ་ཏི། །ཤན་ཏཱ་ཀ་ནི་དཎྜོཏྤ་ལ་དང་། །ཏིག་ཏའི་མེ་ཏོག་སྨན་ལྔར་བླུགས། །
འབྲས་དང་སོ་བ་སྲན་ཏ་ཀ །ནས་དང་གྲོ་དང་ཏིལ་དང་ནི། །འབྲུ་སྣ་བུམ་པའི་ནང་དུ་བླུགས། །གསེར་དང་དངུལ་དང་བྱི་རུ་དང་། །མུ་ཏིག་མན་ཤེལ་རིན་ཆེན་ལྔ། །བུམ་པའི་ནང་དུ་བླུགས་པར་བྱ། །བུ་རམ་སྦྲང་རྩི་ལན་ཚྭ་དང་། །མར་དཀར་ཏིལ་གྱི་མར་དང་ལྔ། །བུམ་པའི་

49-1-258b

ནང་དུ་བླུགས་པར་བྱའོ། །འོ་མ་ཆུ་ཡིས་སྦྱངས་པ་ཡང་། །བུམ་པའི་ནང་དུ་བླུགས་ལ་གཞག །དེ་དག་ཐམས་ཅད་བླུགས་པ་ལ། །གཟུངས་ཀྱི་ཕྲེང་བ་བཟླས་པར་བྱའོ། །ཁ་ཚར་མ་ཉམས་རས་ཡུག་གིས། །བུམ་པའི་མགུལ་པ་བཅིངས་ཏེ་གཞག །དེ་ནས་སྟེགས་བུ་
གྲུ་བཞིའི་སྟེང་། །མཎྜལ་ཟླུམ་པོ་ལྔ་བྱས་ཏེ། །དབུས་ཀྱི་མཎྜལ་མཐིང་ག་ལ། །ཤར་དང་ལྷོ་དང་ནུབ་དང་བྱང་། །དཀར་དང་སེར་དང་དམར་དང་ལྗང་། །ཁ་དོག་ཚོན་གྱིས་བསྒྱུར་ལ་གཞག །གཙོ་བོའི་བུམ་པ་དབུས་སུ་གཞག །འཁོར་གྱི་བུམ་པ་ཕྱོགས་མཚམས་དང་། །ལས་
ཀྱི་བུམ་པ་བྱང་ཤར་མཚམས། །བུམ་པ་མི་དམིགས་སྟོང་པ་ལས། །ཐིག་ལེ་དཀར་པོ་བཾ་དུ་གྱུར། །དེ་གྱུར་བདུད་རྩིས་བཀང་བ་ཡི། །རིན་པོ་ཆེ་ཡི་བུམ་པར་བསམ། །དེ་ཡི་སྟེང་དུ་སུཾ་ལས་ནི། །རིན་ཆེན་སྣ་བཞིའི་རི་རབ་བསམ། །སྟེང་དུ་སྤྲིན་སྒྲ་བསྣོལ་མ་ལས། །སྣ་
ཚོགས་རྡོ་རྗེ་བསམ་པར་བྱ། །དེ་ཡི་ལྟེ་བར་པཾ་ལས་ནི། །པདྨ་འདབ་བརྒྱད་གེ་སར་བཅས། །པདྨའི་ལྟེ་བའི་བྷྲཱུཾ་ལས་ནི། །གཞལ་ཡས་ཁང་ནི་མཛེས་པར་བསམ། །དེ་ཡི་ནང་དུ་པཾ་ལས་ནི། །ཆུ་སྐྱེས་པདྨ་གེ་སར་བཅས། །དམ་ཚིག་འཁོར་ལོ་བསྐྱེད་པར་བྱ། །དེ་ནས་ཡེ་
ཤིས་འཁོར་ལོ་ནི། །ཏིང་ངེ་འཛིན་གྱིས་སྤྱན་དྲངས་ནས། །ཕྱག་རྒྱ་བཞི་ཡིས་གཉིས་མེད་བསྟིམ། །སྐུ་གསུང་ཐུགས་ཀྱིས་བྱིན་གྱིས་བརླབ། །སྤྱན་ལ་སོགས་པས་དབང་བསྐུར་རོ། །མཆོད་ཡོན་སྔོན་དུ་འགྲོ་བ་ཡིས། །མཆོད་པ་ལྔ་ནི་ཕུལ་ལ་གཞག །ཕྲེང་བའི་སྔགས་
ནི་རྩ་གཅིག་བཟླས། །དེ་ནས་བུམ་པའི་སྙིང་པོ་ནི། །འབུམ་ཚོ་གཅིག་ནི་བསྙེན་པ་དབུལ། །དུས་དང་གྲངས་དང་མཚན་མ་ཡིས། །ཐུན་མཚམས་སྦྱོར་བ་རེ་རེ་ལ། །གཙོ་བོའི་བསྙེན་པ་བརྒྱ་རུ་དབུལ། །འཁོར་ལ་ལྔ་བཅུ་རིམ་གྱིས་དབུལ། །ཚོན་སྣ་ལྔ་ཡི་
སྐུད་པ་ཡིས། །གཙོ་བོའི་བུམ་པའི་མགུལ་ནས་བཅིང་། །གཟུངས་ཐག་སློབ་དཔོན་ལག་ཏུ་གཟུང་། །བུམ་པ་ཆོས་ཉིད་ངང་དུ་བསམ། །སྔགས་ནི་ཡེ་ཤེས་ཆུ་རྒྱུན་ནོ། །མཆོད་པ་གཏོར་མ་ཅི་རིགས་བཤམ། །མཆོད་དང་སྐྱབས་འགྲོ་སེམས་བསྐྱེད་ནས། །ཡང་

49-1-259a

དང་ཡང་དུ་བརྟན་པོར་བྱ། །དཀྱིལ་འཁོར་གཙོ་བོ་བསྐྱེད་པ་ནི། །སྦྱོར་བ་དང་པོའི་ཏིང་ངེ་འཛིན། །སྟོང་པ་ཉིད་ནི་བསྒོམ་པའོ། །དཀྱིལ་འཁོར་རྒྱལ་མཆོག་ཏིང་ངེ་འཛིན། །ལྷ་བསྐྱེད་གསལ་བར་བསྒོམ་པའོ། །ལས་རྒྱལ་མཆོག་གི་ཏིང་
ངེ་འཛིན། །ཡེ་ཤེས་ལྷ་ལ་མཆོད་པ་ནས། །དབང་བསྐུར་ཡན་ཆད་བསྒོམ་པའོ། །སྐད་ཅིག་མ་ཡི་ཏིང་འཛིན་གྱིས། །མིག་ཏུ་མ་དང་ཊ་ལས་ནི། །ཉི་མ་ཟླ་བ་བསམ་པར་བྱའོ། །ལྷ་ཡི་དཀྱིལ་འཁོར་མཁའ་ལ་གདེག །སྔགས་ནི་བཟླས་ཤིང་གསལ་བར་
བསྒོམས། །སྐད་ཅིག་མ་ཡི་ཏིང་འཛིན་གྱིས། །ཕྱག་ན་རྡོ་རྗེ་ཕྱག་གཉིས་པ། །མུན་ནག་ཆེན་པོའི་སེར་སྤྲིན་འདྲ། །མདོག་ལྟར་འདུག་པ་ང་རོ་ཅན། །ཞེ་སྡང་མེ་ལྟར་འབར་བ་བསྒོམ། །རྡོ་རྗེའི་ལྟ་སྟངས་བགེགས་བསྐྲད་དོ། །ཧཱུྃ་ལུས་ངག་སེམས་ལ་གནས་པའི་
བགེགས། །བགེགས་ཀྱི་ཚོགས་ཀུན་ང་ལ་ཉོན། །ང་ནི་དཔལ་ལྡན་རྡོ་རྗེའི་སྟོབས། །བཀའ་ཡི་འཁོར་ལོ་རབ་སྦྱོར་བས། །ང་ཡི་བཀའ་ལས་སུ་འདའ་བ། །སྐུ་གསུང་ལས་བྱུང་དགས་པར་བྱ། །གལ་ཏེ་དམ་ཚིག་ལས་འདས་ན། །ཞིག་འགྱུར་འདི་ལ་ཐེ་ཚོམ་མེད། །
གདོན་གྱི་རིགས་སུ་གཏོགས་པ་རྣམས། །མི་དང་མི་མིན་འབྱུང་པོའི་ཚོགས། །འདི་རུ་མ་གནས་གཞན་དུ་དེངས། །སུཾ་བྷ་ནི་ཡི་སྔགས་བཟླས་ཤིང་། །བྱང་ཤར་མཚམས་ནས་བསྐོར་བར་བྱ། །གོམ་སྟབས་བརྒྱད་པའི་གར་བྱས་ཏེ། །ལག་པ་བསྐྱོད་དང་རྐང་པ་བསྐྱོད། །
སྨིན་མ་བསྐྱོད་དང་རབ་འདེགས་དང་། །ཅུང་ཟད་ངོ་ཚའི་ཟུར་མིག་དང་། །བརླ་རྒྱས་སྟན་ལ་འདུག་པ་དང་། །ཁ་ཡི་པདྨ་འཛུམ་དང་བཅས། །ཅུང་ཟད་དམར་བའི་མཆེ་བ་འཆང་། །ཀུནྡ་ལྟར་དཀར་ཕྲེང་བ་དང་། །སྐད་ཅིག་མ་ཡི་ཏིང་འཛིན་གྱིས། །ར་བ་དྲ་བར་གྱུར་
པའོ། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་ལས། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །སྐྱོབ་པ་ཤཱ་ཀྱ་སེང་གེ་ཡིས། །ཇི་ལྟར་བདུད་སྡེ་བཅོམ་པ་ལྟར། །དེ་བཞིན་དུ་ནི་བདུད་ཀྱི་སྡེ། །ཕམ་པར་བྱ་སྟེ་དཀྱིལ་

49-1-259b

འཁོར་བྲི། །ལྷ་མོ་ས་ལ་ཐིམ་པར་བསམ། །བདག་ཉིད་ཕྱག་ན་རྡོ་རྗེ་ཡི། ང་རྒྱལ་ཅན་དང་ཆ་ལུགས་བཅས། །དཔྲལ་བར་དྲི་ཡིས་ཐིག་ལེ་བྱ། །མཆོད་རྫས་བཀྲམ་ལ་བྱིན་གྱིས་བརླབ། །སྤྲོ་བ་བསྐྱེད་པའི་ཚིགས་བཅད་བརྗོད། །ལྷ་ཡི་ང་རྒྱལ་བྱས་པ་ཡིས། །
ལུས་པོས་ཕྱོགས་བཅུ་སྐོར་གྱིས་བསྐོར། །སྤོས་དང་དྲིལ་བུ་ལག་ཏུ་ཐོགས། །མ་ལུས་ཕྱོགས་ན་བཞུགས་པ་ཡི། །དཔའ་བོ་རྣལ་འབྱོར་དགོངས་སུ་གསོལ། །བདག་ནི་མིང་འདི་ཞེས་བགྱི་བས། །རྡོ་རྗེ་ཅན་གྱི་དཀྱིལ་འཁོར་འདྲི། །དིང་འདིར་ཐམས་ཅད་
ཀུན་གཤེགས་ཤིག །དངོས་གྲུབ་འདིར་ནི་སྩལ་དུ་གསོལ། །སྟེགས་བུ་ཆེན་པོའི་དབུས་གནས་ཏེ། །ཡང་ན་དེ་ན་གནས་པར་བསམ། །གྲུབ་པའི་གྲོགས་མཆོག་མཁས་པ་ཡིས། །ལྷ་མོ་བཞི་ཡི་ཏིང་འཛིན་ཞུགས། །ཚུལ་བཞིན་དང་ནི་ལྡན་པ་ཡིས། །ཕྱོགས་
བཞི་ནས་ནི་གསོལ་བ་གདབ། །དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་དངོས། །དཀྱིལ་འཁོར་དམ་པ་བཤད་དུ་གསོལ། །མཚན་རྣམས་ཐམས་ཅད་ཡང་དག་རྫོགས། །མཚན་མིན་ཐམས་ཅད་རྣམ་པར་སྤངས། །ཀུན་དུ་བཟང་པོ་སྐུ་
ཡི་མཆོག །དཀྱིལ་འཁོར་དམ་པ་བཤད་དུ་གསོལ། །ཞི་བའི་མཆོག་ནི་ཆོས་ལས་བྱུང་། །ཡེ་ཤེས་སྤྱོད་པ་རྣམ་སྦྱོང་བ། །ཀུན་དུ་བཟང་པོ་གསུང་གི་མཆོག །དཀྱིལ་འཁོར་དམ་པ་བཤད་དུ་གསོལ། །སེམས་དཔའ་ཀུན་གྱི་སེམས་ཆེན་པོ། །རང་བཞིན་
དག་ཅིང་དྲི་མ་མེད། །ཀུན་བཟང་ཐུགས་ཀྱི་འཁོར་ལོས་སྒྱུར། །དཀྱིལ་འཁོར་དམ་པ་བཤད་དུ་གསོལ། །དེ་ཡིས་དྲི་ཡི་ཐིག་ལེ་ནི། །སྟེགས་བུའི་སྟེང་དུ་དགུག་བྱ་སྟེ། །དབུས་སུ་མཎྜལ་གྲུ་བཞི་པ། །ཕྱོགས་མཚམས་རྣམས་སུ་ཟླུམ་པོར་བྱའོ། །དེ་ཡི་སྟེང་
དུ་སྐད་ཅིག་མས། །མཁའ་ལ་བཏེག་པའི་འཁོར་ལོ་རྣམས། །ཕབ་ལ་གདན་དུ་དབུལ་བར་བྱའོ། །ཡེ་ཤེས་འཁོར་ལོ་སྤྱན་དྲངས་ལ། །ཕྱག་རྒྱ་བཞི་ཡིས་གཉིས་མེད་བསྟིམ། །གྲུ་གསུམ་སྔགས་ཀྱིས་བྱིན་གྱིས་བརླབ། །སྤྱན་ལ་སོགས་པས་དབང་བསྐུར་རོ། །མཆོད་

49-1-260a

པ་རྣམས་ཀྱིས་ལེགས་པར་མཆོད། །བསྙེན་པ་རྫོགས་པའི་བུམ་པ་ལ། །བྱིན་གྱིས་བརླབ་ལ་སོགས་པ་ནས། །མཆོད་པ་ཡན་ཆད་རྫོགས་པར་བྱའོ། །དྲི་ཡི་ཐིག་ལེ་རེ་རེ་ལ། །རང་རང་བུམ་པ་དགོད་པར་བྱ། །མཆོད་པའི་རྫས་རྣམས་ཐམས་ཅད་
ལ། །བསང་གཏོར་བྱས་ལ་དངོས་གྲུབ་ཀྱི། རྫས་སུ་གསོལ་བ་བཏབ་ལ་གཞག །སྔར་གྱི་སྟེགས་བུ་ཡོལ་བས་གཅད། །སློབ་དཔོན་ཡོལ་བའི་ནང་འདུག་ལ། །སློབ་མ་ཁྲུས་བྱས་སྤྱོད་ལམ་མཛེས། །དགའ་ཆེན་ཁྱོད་ལ་བདག་སྟོན་ཏོ། །སློབ་དཔོན་ཁྱོད་ནི་
དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པའི། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ནི་སྩལ་དུ་གསོལ། །བྱང་ཆུབ་སེམས་ནི་བདག་ལ་གསོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དེ་ནི་བདག་ལ་གསོལ། །ཐར་པ་ཆེན་
པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་འཚལ། །བུ་ཚུར་ཐེག་པ་ཆེན་པོ་ཡི། །གསང་སྔགས་སྤྱོད་ལམ་ཆེན་པོ་དག །ཁྱོད་ལ་ཡང་དག་བསྟན་པར་བྱ། །ཁྱོད་ནི་ཚུལ་ཆེན་སྣོད་ཡིན་ཏེ། །དུས་གསུམ་འབྱུང་བའི་སངས་རྒྱས་རྣམས། །སྐུ་
གསུང་ཐུགས་ཀྱི་རྡོ་རྗེ་ཅན། །རྡོ་རྗེ་གསང་སྔགས་འདི་བསྒོམས་པས། །དཔའ་བོ་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པའི་མཚན་མ་བརྙེས། །གསང་སྔགས་སྦྱོར་བ་མཉམ་མེད་དེ། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་
དེ་དག་དེ་ཡིས་བཅོམ། །འཇིག་རྟེན་རྗེས་འཇུག་པར་རྟོགས་ནས། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །དེ་ནས་རྡོ་རྗེ་སློབ་དཔོན་གྱིས། །མདུན་དུ་མཎྜལ་ཟླུམ་པོ་ནི། །ལེགས་བྱས་མེ་ཏོག་ཚོམ་བུ་
དགྲམ། །མཆོད་པ་རྣམས་ཀྱིས་ལེགས་པར་མཆོད། །སྔོན་དུ་འགྲོ་བའི་ཆོ་ག་རྣམས། །བྱ་ཞིང་སེམས་ནི་གནས་པར་བྱའོ། །སློབ་མ་མི་དམིགས་སྟོང་པ་ལས། །ལྷ་ཡི་ང་རྒྱལ་བྱས་པ་ལས། །དཔྲལ་བ་སྙིང་ག་མགྲིན་པ་རུ། །དྲི་ཡི་ཐིག་ལེ་གསུམ་བྱ་སྟེ། །སློབ་

49-1-260b

དཔོན་ཐུགས་ཀའི་ས་བོན་ལ། །སྐུ་གསུང་ཐུགས་ཀྱི་སྙིང་པོ་སྤྲོ། །ཕྱག་མཚན་གསུམ་དུ་གྱུར་པ་ལས། །རྡོ་རྗེ་སློབ་མའི་མདུན་ལོགས་སུ། །མཎྜལ་ཟླུམ་པོ་རེ་རེ་བྱ། །མེ་ཏོག་ཚོམ་བུ་དགྲམ་པར་བྱ། །བསང་གཏོར་བྱ་ཞིང་མཆོད་པ་དབུལ། །དེང་ནས་བཟུང་ནས་བུ་ཁྱོད་
ཀྱིས། །འཁོར་བའི་ཉེས་པས་མ་ཕོག་པས། །མཆོད་པ་ཀུན་དང་ལྡན་པར་ནི། །བུ་ཡིས་བློ་གྲོས་འདི་གྱིས་ཤིག །དེ་ནས་རྡོ་རྗེ་སློབ་མས་མདུན། །མཎྜལ་བྱས་ཏེ་མེ་ཏོག་དགྲམ། །དེ་ནས་རྡོ་རྗེ་སློབ་དཔོན་གྱིས། །སོ་ཤིང་སོར་ནི་བརྒྱད་པ་ལས། །ཕྲེང་བའི་སྔགས་
ནི་ལན་གསུམ་བཟླས། །སློབ་མ་ལ་ནི་སྦྱིན་པར་བྱ། །ཁ་ནི་ཕྱིར་བལྟས་སོ་ཤིང་བཅའ། །མཎྜལ་ཕྱོགས་སུ་སོ་ཤིང་དོར། །ལྟས་ཀྱི་རིམ་པ་བརྟག་པ་དང་། །སྤྲོ་བ་བསྐྱེད་པའི་ཚིག་བརྗོད་དེ། །འཇིག་རྟེན་དུ་ནི་ཀུན་མཁྱེན་རྣམས། །ཨུ་དུམྺཱ་རའི་མེ་ཏོག་བཞིན། །བརྒྱ་
ལམ་ན་ནི་རེ་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་ཞིག་མཉམ་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །བསྐལ་པ་བྱེ་བ་དུ་མ་རུ། །ཆོས་ཀྱི་འཁོར་ལོ་བསྐོར་བ་དང་། །
འགྲོ་དོན་མཉམ་མེད་བྱེད་པར་ནུས། །གཞན་ཡང་ཐེག་པ་ཆེན་པོ་ཡི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེ་རིང་དེ་བས་ན། །ཐམས་ཅད་མཁྱེན་པའི་འབྲས་བུ་ཐོབ། །རྫོགས་པའི་སངས་རྒྱས་ཉིད་དུ་འགྱུར། །དེས་ན་བུ་ཡིས་བརྩོན་པར་གྱིས། །དེ་ནས་རྡོ་རྗེ་
སློབ་དཔོན་གྱིས། །ཕྲེང་བའི་སྔགས་སམ་ཨ་མྲྀ་ཏས། །སྲུང་སྐུད་བྱས་ལ་བཏགས་ལ་གཞག །ཡང་ན་རཀྵ་རཀྵ་ཡིས། །སློབ་མ་དེ་ཉིད་བསྲུང་བར་བྱ། །གྲུབ་ན་བསྲུང་བའི་འཁོར་ལོ་བྱ། །ཀུ་ཤའི་གདན་བཏིང་ཨ་མྲྀ་ཏའི། །སྔགས་བཟླས་བྱང་ཤར་མཚམས་སུ་ཉལ། །
ལྷ་ཡི་ང་རྒྱལ་གསལ་བ་ལས། །སྐད་ཅིག་མ་ཡི་ཏིང་འཛིན་གྱིས། །མ་དང་ཨ་ཡི་ཏིང་འཛིན་བྱ། །ཨུ་ཏིཥྛ་ཡི་སྔགས་བརྗོད་ཅིང་། །ལྷ་ཡི་འཁོར་ལོ་མཁའ་ལ་གདེག །འཇམ་ལ་ཕྲ་བའི་ཐིག་སྐུད་ལ། །དྲི་བཟངས་རྣམས་ཀྱིས་སྦངས་ལ་གཞག །ས་བོན་ལས་ནི་འོད་འཕྲོ་

49-1-261a

བས། །ཡེ་ཤེས་ཐིག་སྐུད་སྤྱན་དྲངས་ལ། །གཉིས་སུ་མེད་པར་བསྟིམས་ལ་གཞག །དེ་ནས་འདོད་ལྷའི་ང་རྒྱལ་བྱས། །ཐིག་སྣ་འདྲེན་པའི་སློབ་མ་ནི། །མཛེས་པའི་ལྷ་མོར་བསམ་པར་བྱ། །ཛྫ་ཛྫ་ཛྫ། བརྗོད་ཅིང་ཐིག་སྐུད་བསྒྱུར། །དེས་ཀྱང་གསུམ་བརྗོད་བླང་
བར་བྱ། །དེ་ནས་གནམ་ཐིག་ཅི་རིགས་གདབ། །ཨོཾ་ཨཱཿཧཱུྃ་སྭཱ་ཧཱ། སྔགས་འདི་བརྗོད་ཅིང་གདབ་པར་བྱ། །དང་པོར་ཐིག་ཆེན་བརྒྱད་པ་ལ། །ཆ་ནི་བཅུ་དྲུག་ཕྱེ་སྟེ་གདབ། །དེ་ནས་ཆ་ཆུང་སུམ་ཅུ་གཉིས། །ཕྱོགས་རེར་ཆ་ཆེན་བཅུ་དྲུག་པ། །ཆ་ཆེན་
བརྒྱད་ནི་ནང་དུ་གཏང་། །ཆ་ཆེན་བརྒྱད་ནི་ཕྱི་རུ་གཏང་། །ཕྱི་དང་ནང་གི་ཆ་བརྒྱད་ལ། །ཆ་ཕྲན་སུམ་ཅུ་རྩ་གཉིས་གདབ། །ཚངས་པའི་ཐིག་ནས་བགྲངས་པ་ཡིས། །ཆ་ཕྲན་བཅུ་དྲུག་ཕྱོགས་བཞིར་གདབ། །ཕྱོགས་རེ་དག་ནས་བརྩིས་པ་ཡིས། །དབུས་ཀྱི་ལྟེ་བའི་ཆ་ཕྲན་གཉིས། །པདྨའི་ཟེ་འབྲུའི་ཆ་ཕྲན་གཅིག །
འདབ་མ་བརྒྱད་ལ་ཆ་ཕྲན་གསུམ། །མུ་ཁྱུད་ཉི་མའི་ཟེའུ་འབྲུ་ལ། །ཆ་ཕྲན་རེ་རེ་མཉམ་པར་གདབ། །བཅུ་དྲུག་པ་ལ་ཆ་ཕྲན་བཞི། །མུ་ཁྱུད་ཆ་ཕྲན་གཉིས་སུ་གདབ། །གྲུ་ཆད་ལ་ནི་ཆ་ཕྲན་གཅིག །དེ་བས་ཆ་ཆེན་བཞིར་གནས་ཏེ། །སྒོ་དང་བཅུ་གཅིག་རྡོ་རྗེ་ལ། །ཆ་ཆེན་གཉིས་
ནི་མཉམ་པར་གདབ། །ཆ་ཆེན་གཅིག་ལ་རྟ་བབས་ཏེ། །ཆ་ཕྲན་བཞི་རུ་གདབ་པར་བྱ། །ཆ་ཆེན་གཅིག་ལ་ཆ་ཕྲན་བཞི། །ཆ་ཕྲན་ཕྱིད་ནི་པདྨའོ། །གཉིས་ནི་ཆོས་ཀྱི་འཁོར་ལོ་ལའོ། །ཆ་ཕྱེད་གདུགས་ཀྱི་ཡུ་བ་སྟེ། །ཆ་གཅིག་མཛེས་པའི་གདུགས་སུ་བྱ། །རྡོ་རྗེ་མེ་རི་མ་གཏོགས་
པའོ། །ཚོན་སྣ་ལྔ་ནི་སྟོང་པར་བསམ། །ཡི་གེ་འབྲུ་ལྔ་བྱུང་བར་བསམ། །ཨོཾ་ཧཱུྃ་ཧྲཱི་ཁཾ་ཏྣཾ། ཐུགས་ཀ་ཡི་ནི་ས་བོན་ལས། །འོད་འཕྲོས་ཡེ་ཤེས་ཚོན་རྩི་དབབ། །ཐིམ་པས་ཚོན་རྩི་ལྔ་རུ་བསམ། །སློབ་མ་ལག་པ་བདེ་བ་ཡིས། །རྡུལ་ཚོན་གཞལ་ཡས་བྲི་བར་བྱ། །དབུས་ཀྱི་
ལྟེ་བ་སེར་པོ་ལ། །གེ་སར་འོད་དང་བཅས་པའོ། །འཁོར་ལོ་རྩིབས་ནི་མཐིང་གའོ། །དབུས་སུ་ཉི་མའི་དཀྱིལ་འཁོར་ལ། །གཙོ་བོའི་གདན་སྟེང་ཕྱག་མཚན་དགོད། །འཁོར་ལོའི་ལྟེ་བར་དེ་བཀོད་ནས། །རྩིབས་སུ་འཁོར་རྣམས་དགོད་པ་ནི། །ཐོད་པ་གྲི་གུག་ནག་པོའོ། །མུ་

49-1-261b

ཁྱུད་ཟླུམ་པོ་མཐིང་ག་ལ། །རྩེ་གསུམ་འབར་བས་བསྐོར་བར་བྱ། །མུ་ཁྱུད་ཟླུམ་པོ་མཐིང་ག་ལ། །ཐོད་པའི་ཕྲེང་བས་བསྐོར་བར་བྱ། །སྒོ་བཞི་གྲུ་ཆད་ཕྱོགས་དང་བསྟུན། །དཀར་དང་སེར་དང་དམར་དང་ལྗང་། །ཀུན་གྱི་ནང་རོལ་ནག་པོར་བྱ། །རྒྱན་ལ་སོགས་པ་སྤྱི་དང་མཐུན། །
རྡོ་རྗེ་མེ་རི་བཅས་པ་བྲི། །ཕྱི་རོལ་དུར་ཁྲོད་འཇིགས་པས་བསྐོར། །དེ་ནས་རྡོ་རྗེ་སློབ་དཔོན་ནི། །ཚོགས་གཉིས་ཡོངས་སུ་རྫོགས་བྱས་ནས། །ཕྱི་ནང་སྟོང་པ་ཉིད་དུ་བསམ། །ཤུ་ནྱ་ཏཱ་ཡིས་བརྟན་པར་བྱ། །དེ་ནས་བདག་ཉིད་ཧཱུྃ་དུ་བསམ། །གུར་དང་ར་བ་མེ་རིར་བཅས། །ཡཾ་དང་
པྃ་ལས་རླུང་དང་ཆུ། །ལྃ་དང་རྃ་དང་ཨེ་ལས་ནི། །འབྱུང་བ་ལྔའི་ནི་གྱུར་པ་ལས། །འཁོར་ལོ་རྩིབས་བཞི་མུ་ཁྱུད་བཅས། །སྒོ་བཞི་རྒྱན་དང་ལྡན་པར་བསམ། །ཚངས་དང་བརྒྱ་བྱིན་དྲི་ཟ་དང་། །ཆུ་ལྷ་ཀུ་བེ་ར་ཡི་གདན། །དབུས་སུ་ཉི་མ་ཟླ་བའི་སྟེང་། །ཧཱུྃ་དང་ཉི་མ་ཟླ་བ་བསམ། །
དེ་ཡི་བར་དུ་ས་བོན་ལས། །གཙོ་བོ་ཡབ་ཡུམ་སྐུ་བསྐྱེད་དོ། །དེ་ནས་རྡོ་རྗེ་སློབ་དཔོན་ནི། །རང་འདོད་ལྷ་ཡི་ང་རྒྱལ་བྱ། །ཞལ་གཅིག་ཕྱག་གཉིས་གསལ་བ་དང་། །དཔྲལ་བར་ཁྲག་གི་ཐིག་ལེ་བྱ། །སྔགས་འདི་བརྗོད་ཅིང་དཀྱིལ་འཁོར་བསྐོར། །ལན་གསུམ་བསྐོར་ལ་
ཤར་དུ་འཇུག །ཨོཾ་བཛྲ་དྷ་རོད་ས་མ་ཡ་སྭཱ་ཧཱ། སྔགས་དེ་བརྗོད་ཅིང་ཏིང་འཛིན་གྱིས། །གཞལ་ཡས་ཁང་ནི་སྒོ་དབྱེའོ། །བླ་རེ་རྒྱལ་མཚན་བ་དན་གདུགས། །དར་དཔྱངས་དང་ནི་ཡོལ་བར་བཅས། །ལྡ་ལྡི་དར་དང་རས་ཀྱིས་བཀླུབས། །གྲྭ་བཞིར་མདའ་བཞི་མེ་ལོང་བཞི། །
སྟེགས་བུའི་ཟུར་ལ་དགོད་པར་བྱ། །ཞལ་བསིལ་ལ་སོགས་མཆོད་པའི་རྫས། །ཇི་ལྟར་འབྱོར་པར་དགྲམ་པར་བྱ། །ཕྱི་ནང་མཁའ་འགྲོའི་གཏོར་མ་དང་། །ཚོགས་ཀྱི་ཞལ་ཟས་ཕྱོགས་བཞིར་དགྲམ། །སྐད་ཅིག་མ་ཡི་ཏིང་འཛིན་དང་། །བསྐྱེད་ཚུལ་རྒྱས་པའི་རིམ་པ་
ཡིས། །འདོད་ཡོན་ལྔ་དང་བདུད་རྩི་ལྔ། །སྐད་ཅིག་མ་ཡིས་ཡེ་ཤེས་སུ། །གསལ་བར་བྱིན་གྱིས་བརླབས་ལ་གཞག །དེ་ནས་རྡོ་རྗེ་སློབ་དཔོན་གྱིས། །ལས་ཀྱི་ཕྱག་རྒྱ་བྱིན་བརླབས་ལ། །མཁའ་གསང་བྱིན་གྱིས་བརླབས་བྱས་ནས། །གཉིས་སུ་མེད་པའི་སྦྱོར་བ་བྱ། །ཐུགས་

49-1-262a

ཀ་ཡི་ནི་ས་བོན་ལས། །ཕྱོགས་བཅུར་འོད་ཟེར་འཕྲོས་པ་ལས། །དུས་གསུམ་སངས་རྒྱས་ཡབ་ཡུམ་བཅས། །སྤྱི་བོའི་གཙུག་ཏུ་སྤྱན་དྲངས་ལ། །ཚངས་པའི་བུ་གའི་ནང་ནས་གཞུག །གསང་བའི་རྡོ་རྗེའི་ལམ་ནས་དབྱུང་། །ཡུམ་གྱི་པདྨའི་གེ་
སར་ལ། སྒྲུབ་པའི་ཐབས་ནས་གསུངས་པ་བཞིན། །ཡབ་ཡུམ་སྒོ་མར་བཅས་པ་བསམ། ཨོཾ་སྥ་ར་ཎ་ཧཱུྃ་ཕཊ། སྔགས་དེ་བརྗོད་པས་རང་རང་གི། །གནས་སུ་གདན་ལ་བཞུགས་པར་བསྒོམ། །དེ་ནས་ས་བོན་འོད་ཟེར་གྱིས། །ཕྱག་རྒྱ་ཡེ་ཤེས་འཁོར་ལོ་རྣམས། །མདུན་
གྱི་མཁའ་ལ་སྤྱན་དྲངས་ཏེ། །བསང་གཏོར་བྱ་ཞིང་མཆོད་པ་དབུལ། །ཕྱག་རྒྱ་བཞི་ཡིས་གཉིས་མེད་བསྟིམ། །མཁའ་ལ་བཏེག་ལ་བསྟིམ་བྱས་ནས། །ནུས་པར་ལྡན་ནས་བྱིན་བརླབས་ནི། །འབྲུ་གསུམ་སྔགས་ཀྱིས་བྱིན་གྱིས་བརླབ། །སྤྱན་ལ་སོགས་པས་དབང་བསྐུར་རོ། །མི་
བསྐྱོད་དབུ་ལ་བརྒྱན་པར་བསམ། །སྐད་ཅིག་མ་ཡི་ཏིང་འཛིན་གྱིས། །ཕྱི་ནང་བསྟན་སྐྱོང་སྤྱན་དྲང་ངོ་། །ཞལ་བསིལ་གདན་དང་སྐུ་ཁྲུས་གསོལ། །དེ་ནས་མཆོད་པ་རྣམ་ལྔ་དབུལ། །བཤོས་དང་ཞལ་ཟས་སྣ་ཚོགས་དབུལ། །རྒྱན་དང་ན་བཟའ་སྣ་ཚོགས་དབུལ། །གོང་གི་མཆོད་རྫས་ལྷག་མ་ཡིས། །ཕྱི་ཡི་
བསྟན་སྐྱོང་རྒྱས་པར་མཆོད། །དེ་ནས་སྒྲུབ་ཁང་ཕྱི་རོལ་དུ། །འབྱུང་པོའི་གཏོར་མ་གཏང་བར་བྱའོ། །ལས་ཀྱི་རིམ་པ་དེ་རྣམས་ནི། །ཞལ་གཅིག་ཕྱག་གཉིས་པ་ཡིས་བྱའོ། །དེ་ནས་སྐད་ཅིག་ཏིང་འཛིན་གྱིས། །ཞལ་གསུམ་ཕྱག་དྲུག་ང་རྒྱལ་བྱས། །ནང་དང་གསང་བ་བླ་མེད་
དང་། །དངོས་དང་ཏིང་ངེ་འཛིན་གྱིས་དབུལ། །ཐབས་དང་ཤེས་རབ་གཉིས་མེད་པའི། །ཁ་སྦྱོར་ཉི་ཟླའི་འཕྲོ་འདུ་ལས། །བགེགས་རིགས་སྟོང་ཕྲག་འཇོམས་མཛད་པའི། །འཁོར་ལོའི་བདག་པོ་ཕྱག་འཚལ་བསྟོད། །ཐབས་དང་ཤེས་རབ་སྦྱོར་བ་ཡི། །ཁ་སྦྱོར་ཉི་ཟླའི་འཕྲོ་འདུ་ལས། །
དྲི་ཟའི་གདུག་པ་འདུལ་མཛད་པའི། །བདུད་ལས་རྒྱལ་ལ་ཕྱག་འཚལ་བསྟོད། །ཐབས་དང་ཤེས་རབ་སྦྱོར་བ་ཡི། །ཁ་སྦྱོར་ཉི་ཟླའི་འཕྲོ་འདུ་ལས། །གཤིན་རྗེའི་གདུག་པ་འདུལ་མཛད་པའི། །རྡོ་རྗེ་གཟི་བརྗིད་ཕྱག་འཚལ་བསྟོད། །ཐབས་དང་ཤེས་རབ་སྦྱོར་བ་ཡིས། །ཁ་སྦྱོར་ཉི་ཟླའི་

49-1-262b

འཕྲོ་འདུ་ལས། །ཆུ་ལྷའི་གདུག་པ་འདུལ་མཛད་པའི། །རྔམ་སྒྲ་སྒྲོགས་ལ་ཕྱག་འཚལ་བསྟོད། །ཐབས་དང་ཤེས་རབ་སྦྱོར་བ་ཡི། །ཁ་སྦྱོར་ཉི་ཟླའི་འཕྲོ་འདུ་ལས། །གནོད་སྦྱིན་གདུག་པ་འདུལ་མཛད་པའི། །རྡོ་རྗེ་ཕྲིན་ལས་ཕྱག་འཚལ་བསྟོད། །འབྱུང་བ་ལྔ་ཡི་བདག་ཉིད་ཆེ། །
མཛེས་ལྡན་འོད་ཟེར་ཅན་དང་ནི། །མདངས་ལྡན་སྒྲ་དབྱངས་རླུང་འབྱིན་ཏེ། །སྐྱེད་བྱེད་ལས་ཀུན་སྒྲུབ་པ་ལ། །འགུགས་ཤིང་སྒྲུབ་པ་སྡོམ་ཞིང་འཛིན། །མཐའ་རྟུལ་ལས་རྣམས་སྒྲུབ་ལ་བསྟོད། །ཅེས་བསྟོད་པ་རྣམས་ཀྱང་དབུལ་བར་བྱ། མཁའ་འགྲོའི་གཏོར་མ་བྱིན་གྱིས་
བརླབ། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་བྱུང་། །དེ་བཞིན་ཉིད་ལས་ངེས་པར་སྐྱེས། །བདེན་པ་དེས་ནི་དཀྱིལ་འཁོར་དུ། །གཟུགས་བརྙན་གསལ་བའི་སློབ་མ་ནི། །ཀུན་
གྱིས་དྲི་མ་མེད་མཐོང་ཤོག །དེ་ནས་རྡོ་རྗེ་སློབ་མ་ནི། །ཁྲུས་བྱས་སྤྱོད་ལམ་མཛེས་པ་ཡིས། །སྒྲུབ་པའི་གྲོགས་མཆོག་མཁས་པ་ཡིས། །སྒྲུབ་ཁང་ཕྱི་རུ་ཚིག་འདི་བསྒྲགས། །དེ་བཞིན་གཤེགས་པ་ཐམས་ཅད་ཀྱི། །མཆོག་ཏུ་གསང་བའི་དཀྱིལ་འཁོར་དུ། །མ་མཐོང་སྣོད་
དང་མི་ལྡན་ན། །སུ་ལའང་སྟོན་པར་མ་བྱེད་ཅིག །དེ་ནས་བདུད་རྩི་ལྔ་ཡི་ཆུ། །བླངས་ནས་བྱིན་གྱིས་བརླབ་པར་བྱ། །སྐུ་གསུང་ཐུགས་ཀྱི་སྙིང་པོ་འདི། །ཉི་ཤུ་རྩ་གཅིག་བཟླས་ལ་སྦྱིན། །འདི་ནི་རྡོ་རྗེ་དམ་ཚིག་ཆུ། སྲུངས་ཤིག་མ་བསྲུངས་སྲེག་པར་བྱེད། །
བསྲུངས་ན་དངོས་གྲུབ་སྟེར་བར་བྱེད། །བདུད་རྩི་འདི་ནི་མྱང་བར་གྱིས། །ཨོཾ་པཉྩ་ཨ་མྲྀ་ཏ་ཨུ་ད་ཀ་ཋ་ཋ་ཞེས་བླུད། དེ་ནས་རྡོ་རྗེ་སློབ་དཔོན་གྱིས། །སློབ་མ་ལྷ་རུ་བྱིན་གྱིས་བརླབ། །སྒྲུབ་པའི་གྲོགས་མཆོག་དམ་པ་ཡིས། །གདོང་གཡོགས་དར་རམ་རས་ཀྱིས་བཅིངས། །རྡོ་རྗེ་
དྲིལ་བུ་ལག་ཏུ་གཏད། །རྡོ་རྗེ་ནས་བཟུང་ཧ་ཧ་ཡིས། །སྔགས་ཀྱི་དཀྱིལ་འཁོར་ལན་གསུམ་བསྐོར། །དེ་ནས་ཡོལ་བའི་ནང་ཁྲིད་ལ། །ཕྱག་འཚལ་མེ་ཏོག་དོར་བར་བྱ། །ལྷ་རྣམས་གང་ལ་ཕོག་པ་སྟེ། །སློབ་དཔོན་གྱིས་ནི་བལྟ་བར་བྱ། །དེ་ནས་རྫས་ཀྱི་དུད་པ་བཏང་། །རྡོ་རྗེ་

49-1-263a

སློབ་དཔོན་ཐུགས་ཀ་ནས། །ཁ་དོག་དམར་པོའི་ཨ་བཏོན་ཏེ། །སློབ་མའི་སྙིང་གར་གཞུག་པར་བྱ། །སློབ་མས་ཉམས་ཀྱི་བདེ་བ་བསྒོམ། །འཕར་དང་ལྡེག་པའི་རྟགས་བྱུང་ན། །དེ་ཉིད་བརྟན་པའི་ཡན་ལག་བྱ། །དེ་ནས་ཕྱག་ན་རྡོ་རྗེ་ཉིད། །སློབ་མའི་སྤྱི་བོར་སྤྱན་
དྲངས་ལ། །ཡི་གེ་ཧཱུྃ་དུ་གྱུར་པར་བསམ། །དེ་གྱུར་རྩེ་ལྔ་དེ་ཉིད་ཅན། །ཞུ་ནས་ཚངས་པའི་བུ་གར་ཞུགས། །སྙིང་གི་དཀྱིལ་དུ་ལྷ་རུ་གྱུར། །ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་ཙིཏྟ་མཎྜལ་བཛྲ་ས་མ་ཡ་ལྷན། སྔགས་འདི་བརྗོད་ལ་གསལ་བར་བསམ། །མཐུ་སྟོབས་ཕྱག་ན་རྡོ་རྗེ་ནི། །
ཁྱོད་ཀྱི་སྙིང་དུ་ཡང་དག་ཞུགས། །རྟག་ཏུ་ཡི་དམ་ལྷ་ཡིན་གྱིས། །ཚུལ་འདི་སྨྲ་བར་མ་བྱེད་ཅིག །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ང་ནི་ཕྱག་ན་རྡོ་རྗེ་སྟེ། །ང་ཡིས་བསྒོ་བའི་ལས་ཉོན་ཅིག །མ་མོས་བརྙས་པར་མ་བྱེད་ཅིག །གལ་ཏེ་ཁྱོད་
ཀྱིས་བརྙས་ན་ནི། །དམ་ཚིག་འདིས་ནི་སྲེག་པར་བྱེད། །ཚ་བ་ཆེན་པོའི་གནས་སུ་སྲེག །རང་བཞིན་རྣམ་དག་བདག་ཉིད་ལུས། །དཔའ་བོ་དབང་ཕྱུག་མ་ཡི་གནས། །དྲི་མེད་རང་བཞིན་དཀྱིལ་འཁོར་ནི། །བུ་ཁྱོད་ཀྱིས་ནི་བལྟ་བར་གྱིས། །གདོང་ནས་དཀྲོལ་ཏེ་འཁོར་ལོ་ཡིས། །
དེ་བཞིན་ཉིད་ནི་བསྟན་པར་བྱ། །གཙོ་བོ་སྒོ་བར་བཅས་པར་བསྟན། །དེ་ནས་རྡོ་རྗེ་སློབ་མ་ཡིས། །སྤྱོད་ལམ་ལེགས་པར་བསྲུངས་པ་ཡིས། །བསམ་གྱིས་མི་ཁྱབ་དམ་ཆོས་སྣོད། །དབང་བསྐུར་དམ་པ་མཛད་དུ་གསོལ། །དེ་ནས་བུམ་པ་རྣམས་ཀྱི་ཆུ། །རྣམ་རྒྱལ་ལས་ཀྱི་བུམ་
པར་བླུགས། །ཆུ་དེ་མི་དམིགས་སྟོང་པ་ལས། །མཐིང་གའི་མདོག་ཅན་ཧཱུྃ་དུ་གྱུར། །དེ་གྱུར་རྩེ་ལྔ་དེ་ཉིད་ཅན། །དེ་ལས་འོད་འཕྲོས་འདུས་པ་ལས། །སངས་རྒྱས་མི་བསྐྱོད་པ་རུ་གྱུར། །ས་བོན་ལས་ནི་འོད་འཕྲོས་ནས། །ཡེ་ཤེས་མི་བསྐྱོད་སྤྱན་དྲངས་ཏེ། །ཕྱག་རྒྱ་བཞི་
ཡི་གཉིས་མེད་བསྟིམ། །དེ་ལ་མཆོད་པ་རྣམ་ལྔ་དབུལ། །དེ་ཉིད་ཆུ་རུ་གྱུར་པ་ཡིས། །སློབ་མ་ལ་ནི་དབང་བསྐུར་རོ། །སྐུ་གསུམ་དམ་ཚིག་ལས་བྱུང་བའི། །ཡེ་ཤེས་བདུད་རྩི་དྲི་མ་མེད། །ལྷ་ཡི་ཆུ་ནི་དག་པ་ཡིས། །མི་བསྐྱོད་པར་ནི་དབང་བསྐུར་རོ། །ཨོཾ་བཛྲ་ཨ་དརྴ་ཤཱུ་ནྱ་ཏཱ་ཨ་

49-1-263b

བྷི་ཥིཉྩཱ་མི། སློབ་མ་མི་བསྐྱོད་པ་རུ་བསམ། །དེ་ལ་མཆོད་པ་རྣམ་ལྔ་དབུལ། །ཅོན་པན་མི་དམིགས་ཨཱ་རུ་གྱུར། །ཨཱཾ་གྱུར་རིན་ཆེན་ཨཱཾ་གིས་མཚན། །དེ་ལས་འོད་འཕྲོས་འདུས་པ་ལས། །སངས་རྒྱས་རིན་ཆེན་འབྱུང་ལྡན་བསམ། །ས་བོན་ལས་ནི་འོད་
འཕྲོས་པས། །ཡེ་ཤེས་རིན་ཆེན་འབྱུང་ལྡན་ནི། །མདུན་གྱི་མཁའ་ལ་སྤྱན་དྲངས་ཏེ། །ཕྱག་རྒྱ་བཞི་ཡིས་གཉིས་མེད་བསྟིམ། །འབྲུ་གསུམ་སྔགས་ཀྱིས་བྱིན་གྱིས་བརླབ། །དེ་ནས་མཆོད་པ་རྣམ་ལྔ་དབུལ། །དེ་ཉིད་ཅོད་པན་གྱུར་པ་ཡིས། །སློབ་མ་ལ་ནི་དབང་བསྐུར་
རོ། །སངས་རྒྱས་ཀུན་གྱི་རྒྱལ་སྲིད་དེ། །དབུ་རྒྱན་རིན་ཆེན་བླ་ན་མེད། །དབུ་རྒྱན་རིན་ཆེན་མཆོག་འགྲོ་མ། །རྫོགས་སངས་རྒྱས་སུ་དབང་བསྐུར་རོ། །ཨོཾ་བཛྲ་ས་མ་ཡ་ཏཱ་ཛྙཱ་ན་རཏྣ་སཾ་བྷ་ཧཱུྃ་ཨ་བྷི་ཥིཉྩཱ་མི། སློབ་མ་རིན་ཆེན་འབྱུང་ལྡན་བསམ། །དེ་ལ་མཆོད་པ་རྣམ་ལྔས་
མཆོད། །རྡོ་རྗེ་མི་དམིགས་ཛྲཱྀ་དུ་གྱུར། །དེ་གྱུར་པདྨ་ཛྲཱྀ་གིས་མཚན། །དེ་ལས་འོད་འཕྲོས་འདུས་པ་ལས། །སངས་རྒྱས་འོད་དཔག་མེད་དུ་གྱུར། །ས་བོན་ལས་ནི་འོད་ཟེར་འཕྲོས། །ཡེ་ཤེས་སེམས་དཔའ་འོད་དཔག་མེད། །མདུན་གྱི་མཁའ་ལ་སྤྱན་དྲངས་ཏེ། །ཕྱག་རྒྱ་
བཞི་ཡིས་གཉིས་མེད་བསྟིམ། །འབྲུ་གསུམ་སྔགས་ཀྱིས་བྱིན་གྱིས་བརླབ། །དེ་ལ་མཆོད་པ་རྣམ་ལྔ་དབུལ། །དེ་ཉིད་རྡོ་རྗེར་གྱུར་པ་ཡིས། །སློབ་མ་ལ་ནི་དབང་བསྐུར་རོ། །སངས་རྒྱས་ཀུན་གྱི་རྡོ་རྗེའི་དབང་། །མི་ཕྱེད་རྡོ་རྗེ་གསལ་བ་ལས། །ཆོས་རྣམས་ཀུན་གྱི་
སྒོར་གྱུར་པ། །རྡོ་རྗེ་ཆོས་ཀྱི་དབང་བསྐུར་རོ། །ཨོཾ་པྲཛྙཱ་ཨཱ་བེ་ཤ་ཛྙཱ་ན་ཨ་བྷི་ཥིཉྩཱ་མི། སློབ་མ་འོད་དཔག་མེད་དུ་བསམ། །དེ་ལ་མཆོད་པ་རྣམ་ལྔ་དབུལ། །དྲིལ་བུ་མི་དམིགས་ཁཾ་དུ་གྱུར། །དེ་གྱུར་རལ་གྲི་ཁཾ་གིས་མཚན། །དེ་ལས་འོད་འཕྲོས་འདུས་པ་ལས། །སངས་རྒྱས་དོན་ཡོད་གྲུབ་
པར་གྱུར། །ས་བོན་ལས་ནི་འོད་འཕྲོས་པས། །ཡེ་ཤེས་དོན་ཡོད་གྲུབ་པ་ནི། །མདུན་གྱི་མཁའ་ལ་སྤྱན་དྲངས་ཏེ། །ཕྱག་རྒྱ་བཞི་ཡིས་གཉིས་མེད་བསྟིམ། །འབྲུ་གསུམ་སྔགས་ཀྱིས་བྱིན་གྱིས་བརླབ། །དེ་ལ་མཆོད་པ་རྣམ་ལྔ་དབུལ། །དེ་ཉིད་དྲིལ་བུར་གྱུར་པ་ཡིས། །སློབ་

49-1-264a

མ་ལ་ནི་དབང་བསྐུར་རོ། །ཐབས་དང་ཤེས་ལྡན་ལྡན་པ་ཡིས། །འགྲོ་དོན་མཉམ་མེད་བྱེད་པ་ཡིས། །མཆོད་པའི་རྫས་རྣམས་རྫོགས་བྱེད་པ། །དྲིལ་བུ་ལས་ཀྱི་དབང་བསྐུར་རོ། །ཨོཾ་ཏིཥྛ་ཨ་ནུ་ཏ་ན་ཛྙཱ་ན་པ་ཏེ་བཛྲ་ཨ་བྷི་ཥིཉྩཱ་མི། དེ་ནས་རྡོ་རྗེ་དྲིལ་བུ་གཉིས། །ཁ་
སྦྱར་ཚུལ་དུ་བསྣོལ་ལ་སྦྱིན། །ལག་ཏུ་གཏད་ལ་གསིལ་དུ་གཞུག །སློབ་མ་དོན་ཡོད་གྲུབ་པར་བསམ། །དེ་ལ་མཆོད་པ་རྣམ་ལྔས་མཆོད། །སློབ་མ་མི་དམིགས་ཨོཾ་དུ་གྱུར། །དེ་གྱུར་འཁོར་ལོ་ཨོཾ་གྱིས་མཚན། །དེ་ལས་འོད་འཕྲོས་འདུས་པ་ལས། །སངས་རྒྱས་
རྣམ་པར་སྣང་མཛད་གྱུར། །ས་བོན་ལས་ནི་འོད་ཟེར་འཕྲོས། །ཡེ་ཤེས་རྣམ་པར་སྣང་མཛད་ནི། །མདུན་གྱི་མཁའ་ལ་སྤྱན་དྲངས་ཏེ། །ཕྱག་རྒྱ་བཞི་ཡིས་གཉིས་མེད་བསྟིམ། །འབྲུ་གསུམ་སྔགས་ཀྱིས་བྱིན་གྱིས་བརླབ། །རྡོ་རྗེ་མིང་གིས་དབང་བསྐུར་བས། །བྱང་ཆུབ་སྙིང་
པོའི་བར་དུ་ནི། །ཅིས་ཀྱང་མི་ཆོད་མི་ཤིགས་པའི། །རྡོ་རྗེ་མིང་དུ་རབ་ཏུ་གྲགས། །ཨོཾ་ཏྲེ་ཙཀྲ་ཨ་མོ་གྷ་ཛྙཱ་ན་བཛྲ་ཨ་བྷི་ཥིཉྩ་མི། སློབ་མ་རྣམ་པར་སྣང་མཛད་བསམ། །དེ་ལ་མཆོད་པ་རྣམ་ལྔ་དབུལ། །ཆུ་དང་ཅོད་པན་རྡོ་རྗེ་དང་། །དྲིལ་བུ་དང་ནི་མིང་གི་དབང་། །རིག་པ་
ཡི་ནི་དབང་ལྔའོ། །སངས་རྒྱས་ལྔ་ནི་རྣམ་དག་རྒྱུ། །དབང་ལྔ་ཡིས་ནི་ཐོབ་པ་ཡིན། །མ་རིག་པ་ལས་འདས་ནས་ཀྱང་། །ཡེ་ཤེས་ལྔ་ནི་རིམ་གྱིས་འཐོབ། །དེ་ནས་རྡོ་རྗེ་སློབ་དཔོན་གྱིས། །ལག་ཏུ་སྤོས་ཐོགས་དྲིལ་བུ་གསིལ། །དཀྱིལ་འཁོར་འཁོར་ལོ་རྒྱས་པར་མཆོད། །
ཡི་གེ་ཉི་ཤུ་རྩ་གཅིག་པ། །ལན་གསུམ་བར་དུ་བཟླས་པར་བྱའོ། །བཅོམ་ལྡན་བདག་གིས་བྱིན་རླབས་ནི། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །སློབ་མའི་ལག་ཏུ་མེ་ཏོག་གཏད། །ཉི་
ཤུ་རྩ་གཅིག་ལན་གསུམ་བཟླས། །དེ་ནས་རྡོ་རྗེ་སློབ་མ་ཡིས། །ལྷ་དང་སློབ་དཔོན་བཅས་པ་ལ། །མེ་ཏོག་ཕུལ་ཏེ་ཚིག་འདི་བརྗོད། །བཅོམ་ལྡན་བདག་གིས་བཟུང་ལགས་ཀྱིས། །བདག་ལ་འགོ་བར་མཛད་དུ་གསོལ། །དེ་ནས་རྡོ་རྗེ་སློབ་དཔོན་གྱིས། །རྡོ་རྗེ་ལག་ཏུ་བླང་

49-1-264b

བྱས་ཏེ། །ཡེ་ཤིས་རྡོ་རྗེར་བྱིན་བརླབས་ནས། །འདི་ནི་སངས་རྒྱས་ཐམས་ཅད་ཀྱི། །མཐུ་སྟོབས་མངའ་བདག་ཕྱག་ན་གནས། །ཁྱོད་ཀྱིས་ཀྱང་ནི་རྟག་ཏུ་གཟུང་། །ཕྱག་ན་རྡོ་རྗེའི་བརྟུལ་ཞུགས་བརྟན། །ཨོཾ་བཛྲ་ས་མ་ཡ་སྟྭཾ་བྷ་ཡ་ཨ་བྷི་ཥིཉྩ་མི། སྔགས་དེ་བརྗོད་ལ་སློབ་མ་ཡི། །
ལག་ཏུ་རྡོ་རྗེ་གཏད་པར་བྱའོ། །དེ་ནས་རྡོ་རྗེ་སློབ་དཔོན་གྱིས། །རྒྱན་དང་ཆ་ལུགས་ཐམས་ཅད་པ། །སློབ་མ་ལ་ནི་བསྐོན་ནས་གཞག །ཞལ་གསུམ་ཕྱག་དྲུག་སྒོམ་དུ་གཞུག །རྒྱན་དང་ཆ་ལུགས་འབར་བ་ནི། དཔའ་བོ་བུ་ཡིས་བླང་བར་གྱིས། །ཕྱག་ན་རྡོ་རྗེའི་བརྟུལ་ཞུགས་
བརྟན། །ཕྱི་རོལ་ནང་ན་ཡང་དག་གནས། །ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་ཧེ་ཧེ།སྔགས་དེ་བརྗོད་ལ་བརྟན་པར་བྱའོ། །དེ་ནས་རྡོ་རྗེ་སློབ་དཔོན་གྱིས། །ཐུབ་པ་ཆེན་པོའི་ཆ་ལུགས་ཞུགས། །སློབ་མ་ལ་ནི་ཆོས་གོས་བསྐོན། །ང་ནི་ཤཱཀྱ་སེང་གེ་སྟེ། །རྒྱན་ཆ་ཕྱག་ན་རྡོ་རྗེ་བཅས། །
འདི་ཀུན་ང་ཡི་སྤྲུལ་པ་སྟེ། །མ་འཇིགས་འཇིགས་པར་མ་བྱེད་ཅིག །ཁྱོད་ནི་འཁོར་བའི་འཇིགས་ལས་ཐར། །མི་བསྐྱོད་སངས་རྒྱས་ཞིང་དག་ཏུ། །རྒྱལ་བའི་སྲས་སུ་སྐྱེ་བར་འགྱུར། །ཨོཾ་བཛྲ་རཀྵ་རཀྵ་ཧཱུྃ་ཨ་བྷི་ཥིཉྩ་མི། སྔགས་དེ་བརྗོད་ལ་བསྲུངས་ལ་གཞག །བུ་ཁྱོད་
འཁོར་ལོའི་དབང་བསྐུར་གྱིས། །སངས་རྒྱས་ཀུན་གྱི་བདག་ཉིད་ཡིན། །ཕྱག་ན་རྡོ་རྗེའི་མཐུ་སྟོབས་ཅན། །དེ་བཞིན་གཤེགས་པར་ལུང་བསྟན་ནོ། །ཁམས་གསུམ་བདག་པོ་རྒྱལ་སྲིད་ཆེ། །དཔལ་ལྡན་ཡོན་ཏན་འབྱུང་བའི་གནས། །བདུད་ཀྱི་སྡེ་རྣམས་བཅོམ་ཟིན་གྱིས། །
ཁྱོད་ཀྱིས་གྲོང་ཁྱེར་མཆོག་ཏུ་ཞུགས། །ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་སིདྡྷི་ས་མ་ཡ་སྟྭཾ་བྷ་ཡ་ཨ་བྷི་ཥིཉྩ་མི། སྔགས་དེ་བརྗོད་ལ་ལུང་བསྟན་ནོ། །སློབ་མ་སྤྱོད་ལམ་མཛེས་པ་ཡིས། །མཚན་མ་མེད་པ་འགྲོ་བའི་དོན། །གང་དག་བདག་གིས་བྱེད་ནུས་པས། །ཕྱིར་མི་ལྡོག་པའི་
དབང་བསྐུར་ཆེ། །དཔའ་བོ་ཆེན་པོ་བདག་ལ་གསོལ། །དེ་ནས་རྡོ་རྗེ་སློབ་དཔོན་གྱིས། །དཀྱིལ་འཁོར་འཁོར་ལོ་མཆོད་པར་བྱ། །དེ་ནས་སེང་གེའི་ཁྲི་བཤམས་ལ། །སློབ་མ་གཞག་སྟེ་དབང་བསྐུར་རོ། །ཇི་ལྟར་བལྟམས་པ་ཙམ་གྱིས་ཀྱང་། །ལྷ་རྣམས་ཀྱིས་ནི་སྐུ་ཁྲུས་གསོལ། །

49-1-265a

དེ་བཞིན་ལྷ་ཡི་བདུད་རྩི་ཡིས། །སྐུ་ཁྲུས་དམ་པ་གསོལ་བར་བྱ། །ཨོཾ་བཛྲ་ཨ་བྷི་ཥེ་ཀ་ཨ་བྷི་ཥིཉྩཱ་མི། དུང་བུད་རྔ་ཆེན་རྡུང་དུ་གཞུག །པོ་ཏི་གླེགས་བམ་ལག་ཏུ་གཏད། །ཆོས་ཀྱི་རྒྱལ་པོར་དབང་བསྐུར་རོ། །སློབ་དཔོན་ཐུགས་ཀར་ཟླ་བ་བསམ། །
དེ་ཡི་སྟེང་དུ་ཡིག་འབྲུ་བསམ། །དེ་གྱུར་རྩེ་ལྔ་དེ་ཉིད་ཅན། །དེ་ཡི་ལྟེ་བའི་ནང་དུ་ནི། །ལྷ་ཡི་འཁོར་ལོ་བསམ་པར་བྱ། །རྡོ་རྗེ་སློབ་མའི་སྙིང་གར་ཡང་། །ཟླ་བ་ཧཱུྃ་དང་རྡོ་རྗེ་བསམ། །ང་ཡི་ལྟེ་བ་སྟོང་པ་རུ། །སློབ་དཔོན་ཐུགས་ལས་འཁོར་ལོ་བཏོན། །སློབ་མའི་སྙིང་
གར་བསྟིམས་ལ་གཞག །ཡེ་ཤེས་འཁོར་ལོ་སྤྱན་དྲངས་ལ། །ཕྱག་རྒྱ་བཞི་ཡིས་གཉིས་མེད་བསྟིམ། །འབྲུ་གསུམ་སྔགས་ཀྱིས་བྱིན་གྱིས་བརླབ། །སྤྱན་ལ་སོགས་པས་དབང་བསྐུར་རོ། །རྣལ་འབྱོར་འདི་ནི་ཤེས་པ་ཡིས། །མི་བྱ་བ་ནི་གང་ཡང་མེད། །དཔའ་བོ་ཆེན་པོ་
ང་ཡི་བཀས། །འདོད་ཡོན་ལྔ་ལ་སྤྱད་པར་གྱིས། །ཨོཾ་སུ་པྲ་ཏིཥྛ་སྭཱ་ཧཱ། དེ་ནས་རྗེས་སུ་གནང་བའི་དབང་། །སློབ་མ་ལ་ནི་བསྐུར་བར་བྱ། །དེང་ནས་བཟུང་ནས་བུ་ཁྱོད་ཀྱིས། །ལུས་དང་སྲོག་ལ་མི་ཕོངས་པར། །ཆོས་ཀྱི་འཁོར་ལོ་བསྐོར་བ་དང་། །འགྲོ་བའི་དོན་ནི་
དཔག་མེད་བྱོས། །སེམས་ཅན་གཟུགས་བརྙན་ལྟ་བུ་སྟེ། །རྟེན་ཅིང་འབྲེལ་པའི་ཆོས་དང་ལྡན། །ཁམས་གསུམ་དེ་ལྟར་ཤེས་ནས་ནི། །སེམས་ཅན་དོན་ནི་མཚུངས་མེད་བྱོས། །དེ་ནས་སློབ་མའི་དབང་བཅུ་སྟེ། །ཕལ་ཆེར་བུམ་པ་ལ་བརྟེན་པས། །བུམ་པའི་དབང་ཞེས་
བརྗོད་པ་ཡིན། །ཕྱིར་མི་ལྡོག་དང་རྗེས་སུ་གནང་། །རྡོ་རྗེ་སློབ་དཔོན་དབང་ཡིན་ནོ། །ལུས་ནི་དྲི་མ་འཁྲུད་པའོ། །ཉོན་མོངས་པ་ཡི་སྒྲིབ་པ་སྤངས། །ས་ནི་དང་པོ་ཐོབ་པར་བྱེད། །དབང་བསྐུར་རིམ་པ་བཅུ་གཉིས་སོ། །དེ་ནས་གསང་བའི་དབང་བསྐུར་ཏེ། །དང་པོར་སྣོད་ལྡན་
སློབ་མ་ཡིས། །ཚོགས་དང་དཔའ་བོའི་སྟོན་མོ་བྱ། །ཤེས་རབ་མ་ནི་བཅུ་གཉིས་སམ། །བཅུ་དྲུག་ཉི་ཤུ་རྩ་བཞིའི་བར། །རྒྱལ་རིགས་རྗེའུ་རིགས་བྲམ་ཟེའི་རིགས། །མིག་དཀྱུས་རིང་ཞིང་ཤ་མདངས་དཀར། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །ལུས་ལ་ནུ་

49-1-265b

འབུར་ཁ་དྲི་ཞིམ། །སྨྲ་ན་ངག་འཇམ་མཛེས་པར་འགྲོ། །ཡོན་ཏན་གཞན་ཡང་ལྡན་བཙལ་ཏེ། །སློབ་དཔོན་མདུན་དུ་མཎྜལ་ནི། །གྲུ་བཞི་ལྷམ་པ་ཁྲུ་གང་ཚད། །བྱི་དོར་ལེགས་བྱས་མེ་ཏོག་དགྲམ། །སློབ་དཔོན་ཁྱོད་ནི་དགོངས་སུ་གསོལ། །གསང་སྤྱོད་ཐབས་
དང་ལྡན་པ་ཡི། །ཤེས་རབ་ཆེན་པོའི་སྣོད་འགྱུར་ཕྱིར། །དབང་བསྐུར་ཆེན་པོ་མཛད་དུ་གསོལ། །གསང་སྤྱོད་ཐབས་དང་ལྡན་པ་ཡི། །ཡེ་ཤེས་བདུད་རྩི་དྲི་མ་མེད། །བདུད་རྩི་ཆེན་པོའི་རོ་མྱང་ཕྱིར། །དབང་བསྐུར་འདི་ལ་ཁྱོད་སྤྲོའམ། །སློབ་དཔོན་ཁྱོད་ནི་དགོངས་སུ་
གསོལ། །ལྷ་མོ་འདི་ནི་ཁྱད་པར་ཅན། །ཡོན་ཏན་མཐའ་ཡས་ལྡན་པ་སྟེ། །གསང་སྤྱོད་ཐབས་ཀྱི་སྦྱོར་བ་ལས། །གསང་བའི་དབང་བསྐུར་མཛད་དུ་གསོལ། །དེ་ནས་རྡུལ་ཚོན་གཞལ་ཡས་ཁང་། །ནང་དུ་གསང་བའི་ཡུམ་བཞག་ནས། །དེ་ནས་ས་བོན་འོད་ཟེར་
གྱིས། །དུས་གསུམ་རྒྱལ་བ་རྣམས་ཀྱི་ཡུམ། །ཕང་ན་གནས་པའི་ལྷ་མོ་རྣམས། །སྤྱི་བོའི་གཙུག་ཏུ་སྤྱན་དྲངས་ཏེ། །ཚངས་པའི་བུ་གའི་ལམ་དུ་ཞུགས། །གསང་བའི་པདྨའི་གེ་སར་ལ། །མཛེས་པའི་ལྷ་མོ་ལྔ་རུ་བསམ། །རྒྱན་དང་ཆ་ལུགས་གསལ་
བར་བསྒོམ། །དེ་ནས་རྡོ་རྗེ་སློབ་དཔོན་གྱིས། །དུས་གསུམ་སངས་རྒྱས་ཐམས་ཅད་ནི། །སྤྱི་བོའི་གཙུག་ཏུ་སྤྱན་དྲངས་ནས། །ཚངས་པའི་བུ་གའི་ལམ་ཞུགས་ནས། །རྡོ་རྗེ་བུམ་པའི་འཁོར་ལོ་ལ། །རྒྱལ་བ་སངས་རྒྱས་ལྔ་རུ་གྱུར། །རྒྱན་དང་ཆ་ལུགས་གསལ་བར་བསྒོམ། །མཁའ་
གསང་བྱིན་གྱིས་བརླབ་པ་དང་། །གཉིས་སུ་མེད་པའི་སྦྱོར་བ་བྱ། །ཡབ་ཡུམ་འཁྲིལ་སྦྱོར་བསྒོམ་པ་ཡིས། །ཡེ་ཤེས་གསལ་བའི་བྱང་ཆུབ་སེམས། །ཕབ་ནས་མཚན་དང་ལྡན་པར་བླུགས། །དཔའ་བོ་རྣལ་འབྱོར་མ་ཀུན་གྱིས། །དམ་ཚིག་འདི་ནི་ངོ་མཚར་ཆེ། །ཁམས་
ལྔ་ཡི་ནི་རོ་ཡིས་གང་། །བདེ་བ་ཆེན་པོ་མྱང་བར་གྱིས། །རྫས་དེ་སློབ་མའི་ལྕེ་ལ་གཞག །ཨ་ཧོ་སུ་ཁ་སྐལ་ཆེན་པོ། །དངོས་གྲུབ་དམ་པ་སྩལ་དུ་གསོལ། །འདས་པའི་རྡོ་རྗེ་འཆང་སོགས་ཀྱིས། །ཇི་ལྟར་སངས་རྒྱས་སྲས་དབང་བསྐུར། །བྱང་ཆུབ་སེམས་ནི་ཡིད་འོང་བས། །

49-1-266a

དེ་བཞིན་བུ་ཁྱོད་དབང་བསྐུར་རོ། །དེ་ནས་ཤེས་རབ་ཡེ་ཤེས་དབང་། །ཤིན་ཏུ་ཟབ་པའི་ཚུལ་དུ་བསྐུར། །བདུད་རྩི་ལྔ་ཡི་ཆུ་ལ་སོགས། །ཤེས་རབ་མ་ཡི་ལུས་ཀུན་བཀྲུ། །ཛཱ་ཏི་ཙནྡན་ག་བུར་དྲིས། །ཤེས་རབ་མ་ཡི་ལུས་ལ་བྱུགས། །ལྷ་མོ་འདི་ནི་ཁྱད་
པར་ཆེ། །བདེ་བ་མཐའ་ཡས་སྟེར་བྱེད་མ། །བླངས་ནས་རྣམ་པ་ཐམས་ཅད་དུ། །བུ་ཡིས་བླ་མེད་མཆོད་པར་གྱིས། །བྱང་ཆུབ་སེམས་ནི་བླ་ན་མེད། །བུ་ཡིས་ཅི་དགར་ཟ་ནུས་སམ། །ཕྱག་རྒྱ་ལྔ་ལས་བྱུང་བ་ཡི། །རིག་མ་དད་པས་མཆོད་ནུས་སམ། །བཤང་གཅི་ཁུ་བ་རཀྟ་
སོགས། །འདི་ཉིད་དུ་ནི་ཟ་ནུས་སམ། །ང་ཡི་གསང་བའི་པདྨ་འདི། །བདེ་བ་མྱུར་དུ་སྐྱེད་པ་སྟེ། །ཁྱོད་ཀྱིས་རྟག་ཏུ་མཆོད་ནུས་སམ། །ཇི་སྐད་བཤད་པའི་དམ་ཚིག་རྣམས། ལྷ་མོའི་པདྨ་མཆོད་པར་བགྱི། །དེ་ནས་རྡོ་རྗེ་སློབ་དཔོན་གྱིས། །ཤེས་རབ་ལག་པ་གཡོན་པ་དང་། །
སློབ་མའི་ལག་པ་གཡས་པ་གཉིས། །དར་གྱིས་མདུད་པ་བྱས་ལ་གཞག །བརྡ་ཡི་དཀྱིལ་འཁོར་བྲིས་པའི་སྟེང་། །པི་དར་སྟན་ལ་སོགས་པའམ། །དར་གྱི་བློ་སྟན་འཕར་མ་བཏིང་། །རྡོ་རྗེ་ཁྲོ་བོ་རྟག་ཏུ་བསྐྱོད། །མེ་འོད་འབར་བ་བསྒོམ་པར་བྱ། །སྟེང་གི་པདྨའི་སྙིང་པོ་བཅུ། །
ཤེས་པ་རང་གསལ་ངང་ལ་གཞག །སློབ་མའི་ལག་པ་གཡས་པ་ཡིས། །ཤེས་རབ་མཁལ་མ་གཡོན་མནན་ནས། །སློབ་མའི་ལག་པ་གཡོན་པ་ཡིས། །གསང་བའི་པདྨ་ཁ་ཕྱེ་སྟེ། །པདྨ་གེ་སར་སྙིང་པོ་བཙལ། །ཤེས་རབ་བུམ་པའི་མགུལ་ཆིངས་ཀྱིས། །
སློབ་མའི་བུམ་པ་མགུལ་པ་བཅིང་། །བདེ་བ་ཁ་སྦྱོར་བསྒོམ་པར་བྱའོ། །པདྨ་ཟེ་འབྲུ་རྒྱས་པ་དང་། །རྡོ་རྗེ་ལག་གི་ཁྲིག་སྒོ་གཞུག །གཉིས་སུ་མེད་པའི་སྦྱོར་བ་བྱ། །རླུང་ལ་གོམས་པས་རླུང་ལ་གཏང་། །སྔགས་ཀྱི་རྩ་སྒོ་དགག་པ་དང་། །སོར་མོས་
བསྡམ་ཞིང་གློད་པ་དང་། །པདྨའི་གེ་སར་སྙིང་པོ་དེ། །རྡོ་རྗེ་བུ་གར་བཅུག་ལ་གཟུང་། །ཉམས་ཀྱི་སྟོབས་ཀྱིས་ནང་དུ་འཐེན། །བདེ་བ་གསལ་ལ་མི་རྟོག་པ། །ལྷན་ཅིག་སྐྱེས་པའི་ཡེ་ཤེས་མྱོང་། །དེ་ཡི་ཉམས་དང་མི་འབྲལ་བར། །ཅུང་ཞིག་དེ་ལ་གནས་པར་བྱ། །དེ་ནི་རྡོ་རྗེ་ཆུ་

49-1-266b

འཐུང་གིས། །བསྒོམ་པ་ཅུང་ཞིག་བྱ་བ་ཡིན། །མི་གསལ་ཡེ་ཤེས་མ་ཡིན་ན། །རོལ་པའི་སྒྲ་ལ་སེམས་གཏད་ལ། །ཡང་དང་ཡང་དུ་ཉམས་སུ་བླང་། །དེ་ཡིས་ཡེ་ཤེས་སྐྱེ་བར་འགྱུར། །དེ་ནས་གཉིས་ཀ་ངལ་བར་ལྡང་། །པདྨ་དང་ནི་རྡོ་རྗེ་ནས། །བྱང་ཆུབ་
སེམས་ཀྱི་ཀུནྡ་ལ། །རྡོ་རྗེ་སེམས་དཔའི་རང་བཞིན་པས། །ལྕེ་ཡིས་བླང་ཞིང་གཞིབ་པར་བྱ། །ཀུནྡ་ལྟ་བུའི་བྱང་ཆུབ་སེམས། །རང་གི་སེམས་ལ་བསྟིམ་པར་བྱ། །གཉིས་མེད་ཡེ་ཤེས་གསལ་བར་འགྱུར། །ཤེས་རབ་མ་ཡི་རྐང་པ་གཡོན། །སློབ་མའི་སྤྱི་བོར་
བཞག་ནས་ནི། །ང་དང་རྡོ་རྗེ་སློབ་དཔོན་དང་། །མཆེད་དང་ལྕམ་བྲལ་ཐམས་ཅད་ལ། །ཁམས་གསུམ་སེམས་ཅན་མ་ལུས་པ། །མ་མོས་བརྙས་པར་མ་བྱེད་ཅིག །གཞན་ཡང་དམ་ཚིག་བཤད་པ་རྣམས། །རྟག་ཏུ་ཁྱོད་ཀྱིས་བསྲུང་བ་གྱིས། །དེང་ནས་བཟུང་ནས་
བུ་ཁྱོད་ཀྱིས། །ཇི་སྲིད་བྱང་ཆུབ་མ་ཐོབ་པར། །སེམས་ཅན་ཀུན་གྱི་དོན་རྣམས་ནི། །རྟག་ཏུ་རྨི་ལམ་བཞིན་དུ་གྱིས། །ཞེས་བརྗོད་པར་བྱའོ། །དེ་ནས་བཞི་པ་ཚིག་གི་དབང་། །བླ་མའི་ཞལ་ལས་ཤེས་པར་བྱའོ། །མཇུག་གི་ལས་ཀྱི་ཆོ་ག་ནི། །མཁའ་ལ་བཏེག་ནས་
བཞུགས་པ་ཡི། །འཁོར་ལོ་ཆེན་པོའི་ལྷ་ཚོགས་ལ། །མཆོད་པའི་ཡོ་བྱད་འབྱོར་ཚད་དབུལ། །དེ་ནས་དཀྱིལ་འཁོར་རྒྱན་རྣམས་བསྡུ། །རྡོ་རྗེ་སེམས་དཔའི་སྙིང་པོ་ཡིས། །བཤགས་པ་ཅི་ཙམ་འགྲུབ་པར་བྱ། །མཁའ་འགྲོ་རྣམས་ལ་གཏོར་མས་མཆོད། །ཚོགས་
དང་དཔའ་བོའི་སྟོན་མོ་བྱ། །ཨོཾ་ཀྲྀ་ཏོ་བ་ལ་སོགས་པ་ཡིས། །ཡེ་ཤེས་འཁོར་ལོ་གཤེགས་སུ་གསོལ། །ཛཿ་ཧཱུཾ་བཾ་ཧོཿས་དམ་ཚིག་བསྡུ། །འགྲོ་བ་འདོད་པ་ཐ་དད་པས། །དེ་ལ་དགོངས་ནས་བདེ་གཤེགས་ཀྱིས། །མོས་པ་ཐ་དད་དྲང་བའི་ཕྱིར། །འགྲོ་ལ་བརྩེ་བས་
བྱང་ཆུབ་ལམ། །སྣ་ཚོགས་ཐ་དད་གསུངས་པ་ཀུན། །གང་ཞིག་འགའ་ལ་ཕན་ཕྱིར་དུ། །གསལ་བའི་སྒྲོན་མར་གསུངས་པ་ཡིན། །དེ་ལ་བརྟེན་ནས་ཡུན་རིང་མོས་པ་ཡིས། །འདོད་ལྷའི་ཞལ་མཐོང་དེ་ཚེ་ལྷག་ལྷས་གནང་བ་བྱིན། །མ་སྨིན་སྨིན་བྱེད་ཡོན་

49-1-267a

ཏན་ཀུན་འབྱུང་བའི། །ཤེས་རབ་བཟང་ཞིང་མང་ཐོས་རློམ་སེམས་མེད། །བརྩོན་འགྲུས་དྲག་ཅིང་སྲན་ཐུབ་བརྟན་བློ་ཅན། །བླ་མ་ལ་གུས་དད་ལྡན་སྙིང་རྗེར་ལྡན། །དེ་འདྲའི་སློབ་མ་བཟང་པོ་བཙལ་ནས་ནི། །རྫོགས་པའི་བྱང་ཆུབ་མཆོག་ཏུ་དབང་བསྐུར་
རོ། །འགྲོ་ལ་བརྩེ་བས་དབང་བསྐུར་ཆོ་ག་སྦྱར། །ཡུན་རིངས་བསྒོམས་པས་མི་འགྲུབ་གང་ཡང་མེད། །དལ་བའི་དགེ་རྩ་ཅི་ཡོད་བསོད་ནམས་ཀྱིས། །སྒྲུབ་པོ་དངོས་གྲུབ་རྣམ་གཉིས་ཐོབ་པར་ཤོག །དཔལ་ཕྱག་ན་རྡོ་རྗེའི་དཀྱིལ་འཁོར་གྱི་ཆོ་ག་ནམ་གྲུའི་རིགས་ལས་བྱུང་བའི་
དངོས་གྲུབ་བརྙེས་པ་སློབ་དཔོན་ཛཱ་བ་རི་པའི་ཞལ་སྔ་ནས་མཛད་པ་རྫོགས་སོ།།      །།བལ་པོའི་མཁན་པོ་པཎྜི་ཏ་དེ་བ་པཱུརྞ་མ་ཏི་དང་། བོད་ཀྱི་ལོ་ཙཱ་བ་དགེ་སློང་ཆོས་ཀྱི་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །།༄༅༅། །རྒྱ་གར་སྐད་དུ། ཙི་
ཏི་ཛྭ་ལ་ལཀྵ་ཎ་ནཱ་མ། བོད་སྐད་དུ། མཛེ་ནད་ཀྱི་མཚན་ཉིད་ཅེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །འགྲོ་རྣམས་རྡུལ་དང་མུན་པ་སྙིང་སྟོབས་ཀྱི། །འདམ་ལ་གནས་ཏེ་རྐྱེན་གྱི་རི་བོས་ནོན། །དེ་བསལ་ཤེས་ཕྱིར་རང་གི་རྟོགས་པས་བྲི། །དམ་པའི་དྲིན་ཐོབ་མགོན་ལ་
སྤྱི་བཏུད་བཤད། །དེ་ལ་འདིར་ནད་ཀྱི་མཚན་ཉིད་དང་། བཟླས་པའི་མཚན་ཉིད་དང་། དེ་བཟློག་པའི་ཐབས་སོ། །དེ་ལ་མཚན་ཉིད་ལ་བཅུ་གཉིས་སུ་ཤེས་པར་བྱ་སྟེ། གལ་ཏེ་བཅུ་གཉིས་ཀྱིས་མ་བཟློག་ན་དེ་འཕྲོ་བཅད་དོ། །འབད་པ་དང་བཅས་པས་ཚོགས་བསག་གོ། །
ཐབས་ནི་འདོད་པའི་ལྷ་མཉེས་པས་བཟློག་པ་དང་། རྟེན་ཅིང་འབྲེལ་པའི་ནུས་པས་བཟློག་པའོ། །འདོད་པའི་ལྷ་མཉེས་པས་བཟློག་པ་ནི་སྒྲུབ་ཐབས་ལས་ཤེས་པར་བྱའོ། །རྟེན་ཅིང་འབྲེལ་པའི་ནུས་པས་བཟློག་པ་ནི་བླ་མའི་མན་ངག་ལས་ཤེས་པར་བྱའོ། །མཚན་ཉིད་རྣམས་ནི་
འདི་ལྟ་སྟེ། །རུས་དང་ཤ་དང་པགས་པ་དང་། །རྩ་དང་ཁྲག་དང་ནང་གྲོལ་དང་། །བཅུད་དང་ཆུ་སྟེ་ལུས་ཀྱི་སྟོབས། །ལུས་ཀྱི་རྩ་དང་མདོག་དང་དབྱིབས། །རེག་པ་ཆུ་བ་ཆུ་སེར་དང་། །ཀླད་པ་ལྷ་བ་ལུས་ཀུན་ལ། །ཞུགས་པ་རྣམ་པ་བཅོ་བརྒྱད་ཡིན། །རིགས་ཀྱིས་

49-1-267b

མ་ཡིན་གཅིག་ཅིག་མིན། །འོན་ཀྱང་གཅིག་སོགས་རིམ་གྱིས་བརྟག །རུས་པ་ལ་ཞུགས་པ་ནི་བཞི་སྟེ། ལུས་སྐེམ་པ་དང་། གཟེར་ཆེ་བ་དང་། ན་ཐང་ངེ་བ་དང་། ཐིག་ལེར་ནའོ། །ཤ་ལ་ཞུགས་པ་ནི་ལྔ་སྟེ། ལུས་བེམ་མེ་འདུག་པ་དང་། ལུས་ལྕི་བ་དང་། མདོག་གནག་
པ་དང་། དྲི་ངས་པ་སྣར་འོང་བ་དང་། ཤ་རོ་འབྱུང་བའོ། །པགས་པ་ལ་ཞུགས་པ་ནི་གཉིས་ཏེ། ཤ་འཕྲིག་པ་དང་། མདོག་སྐྱ་བའོ། །རྩ་ལ་ཞུགས་པ་ནི་བཅུ་སྟེ། ལུས་སྦྲིད་བེར་བེར་བ་བརྟག་པ་ནི་བཟློག་པར་དཀའོ། །སྒྱིད་ལུག་པ་དང་། སྒྱིད་ལྕིག་ལྕིག་པ་དང་། ཚ་
བ་འཛག་པ་སྙམ་པ་དང་། ཚ་རབ་རབ་པ་དང་། ཚ་ཀེར་ཀེར་བ་དང་། ཚ་བྲེང་བྲེང་བ་དང་། ལུས་ལ་སོགས་པ་ཚ་ཐང་ངེ་བ་དང་། ཚ་བིར་བིར་བ་དང་། ཡན་ལག་ཕྲབའོ། །ཁྲག་ལ་ཞུགས་པ་ནི་བཞི་སྟེ། སྣ་ནས་སྐབས་སྐབས་སུ་ཡང་ཡང་འཛག་པ་དང་། ཚ་བེར་བེར་བ་
དང་། ལུས་ལྕི་ཡོར་ཡོར་བ་དང་། གདོང་དམར་བ་ལ་སྟག་པའི་ལོ་མའི་བྲིས་མ་ལྟར་འོང་ངོ་། །ནང་གྲོལ་ལ་ཞུགས་པ་ནི་བཞི་སྟེ། ཀློ་སྙིང་མི་བདེ་བ་དང་། སྐྱུར་ཐིབ་ཐིབ་པ་དང་། སྙིང་འདར་ཕྲིལ་ཕྲིལ་དང་། སྙིང་མི་དགའ་བ་སྟེ་བཟློག་དཀའོ། །བཅུད་ལ་ཞུགས་པ་ནི་བཞི་
སྟེ། །ཁུ་བ་མི་འབྱུང་བ་དང་། དབང་པོ་ལྡང་མི་ནུས་པ་དང་། ཁུ་བ་སྐྱོ་མའི་མདོག་ཏུ་འོང་བ་དང་། ཁུ་བ་དངས་སྙིགས་བྱེ་ནས་འོང་བའོ། །ཆུ་ལ་ཞུགས་པ་ནི་གསུམ་སྟེ། སྦུབས་ཀྱི་ཆུ་རྒྱ་སྐྱེགས་ཀྱི་ཁུ་བ་ལྟར་འོང་བ་དང་། སྣའི་ཆུ་རྟག་ཏུ་སྐྱོ་མར་འཛག་པ་དང་།  མིག་ཆུ་རྟག་
པར་འཛག་པ་སྟེ། དུ་བ་དང་སེར་བུ་བྱུང་བ་ཙམ་གྱིས་མྱུར་བར་འཛག་པའོ། །ལུས་ཀྱི་སྟོབས་ལ་ཞུགས་པ་ནི་གསུམ་སྟེ།  ལུས་སྒྱིད་ལུག་པ་དང་། ལུས་སྒྱིད་ཞུམ་པ་དང་། ལུས་མྱལ་མྱལ་བ་ཡིན་ནོ། །ལུས་ཀྱི་རྩ་ལ་ཞུགས་པ་ནི་གཉིས་ཏེ། སྭ་རྩི་ལ་སོགས་པ་
ལུས་ཀྱི་དྲི་མ་བྱའི་པགས་པ་བཞིན་སངས་ཀྱིས་འགྲོའོ། །མདོག་ལ་ཞུགས་པ་ནི་གཅིག་སྟེ། ལྕེ་བཙོད་ཀྱི་མདོག་བཞིན་དུ་སོང་བའོ། །དབྱིབས་ལ་ཞུགས་པ་ནི་གཉིས་ཏེ། ལུས་གཉེར་ཆུང་གིས་ཁེབས་པ་དང་། ཡན་ལག་གི་སོར་མོ་རྣམས་བྱི་བའི་མཇུག་མ་ལྟར་

49-1-268a

སོང་བའོ། །རེག་པ་ལ་ཞུགས་པ་ནི་བཞི་སྟེ།  སྣ་རྩེ་ལ་སོགས་པར་ཚ་ཡམ་ཡམ་འོང་བ་དང་། ཚ་བེར་བེར་འོང་བ་དང་། ལུས་བརྩེ་བ་དང་།  གཡའ་བེར་འོང་བ་བཞིན་ནོ། །ཆུ་བ་ལ་ཞུགས་པ་ནི་བཞི་སྟེ། ཡན་ལག་རེངས་ཤིང་ན་བ་དང་། ཤ་འབུར་
བ་དང་། གྲང་སིང་སིང་བ་དང་། ཚིགས་རྣམས་འཁོར་བ་བཞིན་ནོ། །ཆུ་སེར་ལ་ཞུགས་པ་ནི་ལྔ་སྟེ། ལུས་ཟ་གོལ་གོལ་བ་དང་། ལུས་ཟ་ཙག་ཙག་པ་དང་། ལུས་ཟ་ལྕིབ་ལྕིབ་པ་དང་། ལུས་ལ་ཆུ་རྒང་འོང་བ་དང་། ཆུ་རྒང་བྱུང་ན་ཡུན་རིང་པོར་མི་ཐོགས་
པར་འོང་ངོ་། །ལུས་ལ་འབྲུམ་པའི་རྗེས་སྲན་ཆུང་ལྟ་བུ་བྱུང་ན་བཟློག་པར་ཡང་སླའོ། །ཀླད་པ་ལ་ཞུགས་པ་ནི་བཞི་སྟེ། མགོ་ཕྱིང་ཕྱིང་སྐྲང་བ་དང་། འཐོམ་པ་དང་། བེམ་མེ་བ་དང་། སྐྲ་ནུལ་ནུལ་འབྱི་བ་ལ་སོགས་པའོ། །ལྷ་བ་ལ་ཞུགས་པ་ལ་ནི་གསུམ་སྟེ། གདོང་པ་
ལ་སོགས་པ་ཚ་ལམ་ལམ་འོང་བ་དང་། གདོང་པ་ལ་སོགས་པ་གྲང་སེང་སེང་འོང་བ་དང་། དེ་བཟློག་པར་སླའོ། །ལུས་རིད་ཅིང་གདོང་ཐལ་སྐྱའི་མདོག་ཏུ་སོང་བ་ནི་བཟློག་པར་དཀའོ། །ལུས་ཀུན་ལ་ཞུགས་པ་ནི་གསུམ་སྟེ། ཚོར་བ་མེད་པར་གདོང་པ་ལ་སོགས་པའི་ཤ་
འགྱུར་ཡིན་ནོ། །ཤིན་ཏུ་ཡང་བཟློག་པར་དཀའོ། །ཀླུ་ཤིན་ཏུ་ཡང་ཁྲོ་བོ་དག་གིས་ཀྱང་རྟགས་དང་མི་ལྡན་པར་ཐུགས་ཀྱིས་ཀྱང་འགྲོའོ། །བཟློག་པར་དཀའོ། །རྨ་ལ་སོགས་པ་འཚོར་མི་འདོད་པའི་རྟགས་དང་མི་ལྡན་པ་ནི་བཟློག་པར་སླའོ། །གཞན་ཡང་ཡན་ལག་
ཕྲ་བ་དང་། སྦོམ་པ་དང་། ཐུང་བ་དང་། འཁུམས་པ་དང་། རེངས་པ་ལ་སོགས་པ་ལ་ཀླུའི་མཚན་ཉིད་དུ་ཤེས་པར་བྱའོ། །རྟགས་དེ་རྣམས་ལས་འགའ་འགའ་ནི་ནད་ཀྱི་གཞི་ལས་ཀྱང་ཤེས་པར་བྱའོ། །འགའ་ལ་ནི་ཀླུའི་གདོན་མ་ཡིན་པ་ལས་ཀྱང་འབྱུང་བས་
མཚན་ཉིད་སོ་སོར་ཤེས་པར་བྱ་སྟེ། ནད་གཞི་ལས་བྱུང་བའི་སྨན་ལ་སོགས་པ་དང་། འཕྲོད་པའི་ཟས་ཀྱིས་ཕན་པའོ། །གཞན་གྱི་ནི་ཡུན་མི་རྟག་པ་འཕྲོ་འཆད་དོ། །འདི་འདྲའི་མཚན་ཉིད་མངོན་དུ་ཤིས། །ཤེས་ནས་མྱུར་བའི་བརྩོན་འགྲུས་ཀྱི། །སྣ་ཚོགས་

49-1-268b

ཐབས་ལ་མ་རྨོངས་པས། །བཟློག་པའི་ཐབས་ལ་འབད་པར་བྱ། །ཆུ་རྒྱུན་ཡུན་རིངས་འབབ་པས་ནི། །རྡོ་བ་དག་ཀྱང་དུས་སུ་འབིགས། །གདུག་པའི་དབང་བྱས་ཞེ་རིངས་ཡང་། །ལེ་ལོ་དང་བྲལ་རྩེ་གཅིག་སེམས། །རྒྱུན་དུ་བསྒོམས་ན་བཟློག་སེམས་ཀྱིས། །གདུག་པའི་
ནད་ལས་ཐར་པར་ངེས། །རྩོལ་བ་ཅན་གྱི་སོམ་ཉི་བྲལ། །གང་བསམ་དེ་ལ་མི་འགྲུབ་མེད། །དེས་ན་འཁོར་བ་གཅེས་པ་ནི། །ཕུང་པོ་སྲོག་ནི་དང་བ་ལ། །མངོན་སུམ་ཉིད་དུ་མཐོང་འགྱུར་གྱིས། །རྩོལ་བ་དོར་བར་མི་བྱའོ། །འགྲོ་བ་སྙིང་རྗེ་རང་གིས་རྟོགས་དང་བཀའ་དྲིན་གྱིས། །
བདག་གིས་ནད་ཀྱི་མཚན་ཉིད་འདི་སྦྱར་ཡོན་ཏན་གྱིས། །འགྲོ་བས་མངོན་དུ་དེ་རྟོགས་བརྩོན་པས་དེ་བཟློག་བྱ། །ཅི་ཡོད་དགེ་བས་འགྲོ་བ་འཚོ་དཀའི་ནད་ལས་གྲོལ་བར་ཤོག །མཛེ་ནད་ཀྱི་མཚན་ཉིད་ཅེས་བྱ་བ། ནམ་གྲུའི་རིགས་ལས་བྱུང་བ། དངོས་གྲུབ་བརྙེས་པ་ཛཱ་བ་རི་པས་
མཛད་པ་རྫོགས་སོ།།      །།བལ་པོའི་པཎྜི་ཏ་པཱུརྞེ་དང་། བོད་ཀྱི་ལོ་ཙཱ་བ་ཆོས་ཀྱི་བཟང་པོས་བསྒྱུར་ཞིང་གཏན་ལ་ཕབ་པའོ།།      །།༄༅༅། །རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ཎི་མ་ཧཱ་ཡཀྵ་ཙཀྲ་མ་ཧཱ་དེ་བ་ག་ཎ་མཎྜལ་སྟོ་ཏྲ་ནཱ་མ། བོད་སྐད་དུ། གནོད་
སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་འཁོར་ལོ་ཆེན་པོའི་ལྷ་ཚོགས་ལ་བསྟོད་པ་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །ཧཱུྃ་ལྕང་ལོ་ཅན་གྱི་གནས་མཆོག་དམ་པ་ན། །ས་བཅུའི་བྱང་ཆུབ་སེམས་དཔའི་གཙོ་བོ་སྟེ། །སྐྱེ་མེད་ངང་ལས་ལོངས་སྤྱོད་
རྫོགས་པའི་སྐུ། །ཡོན་ཏན་མ་ལུས་རྫོགས་པ་ཁྱོད་ལ་འདུད། །སྤྲུལ་པའི་སྐུ་མཆོག་གདུག་པ་འདུལ་མཛད་པ། །བརྗིད་པའི་སྐུ་མངའ་སྦྲུལ་བརྒྱད་སྐུ་ལ་བརྒྱན། །སྣང་སྲིད་དབང་དུ་སྡུད་པའི་མཐུ་སྟོབས་ཅན། །སྲིད་གསུམ་སྡུག་བསྔལ་མཐར་མཛད་ཁྱོད་ལ་འདུད། །ཞབས་
གཉིས་བརྐྱང་བསྐུམ་མཐིང་ནག་འབར་བའི་ཞལ། །གཡས་དཀར་གཡོན་དམར་སྤྱན་ནི་གསུམ་གསུམ་ལྡན། །ཕྱག་དྲུག་རྡོ་རྗེ་གཡས་འཆང་གཡོན་སྡིགས་མཛུབ། །བར་གཉིས་ཐལ་རྡེབས་མཐའ་གཉིས་སྦྲུལ་གསོལ་འདུད། །དཔྲལ་བའི་ཁྲོ་གཉེར་སྨིན་མ་གཡོ་ཞིང་འཁྲུག །དབུ་

49-1-269a

སྐྲ་ཁམ་ནག་གྱེན་བརྗེས་མེ་སྟག་འཕྲོ། །རལ་པའི་ཅོད་པན་སྦྲུལ་གྱི་གདེངས་ཀས་བརྒྱན། །རིགས་ཀྱི་བདག་པོས་དབུ་བརྒྱན་ཁྱོད་ལ་འདུད། །ལྗགས་འདྲིལ་མཆེ་གཙིགས་ང་རོས་འབྲུག་སྒྲ་སྒྲོགས། །ཁ་རླངས་མེ་ལྟར་འབར་བས་གདུག་པ་བསྲེག །མཆེ་བ་
གཙིགས་པས་དུག་གསུམ་རྩད་ནས་གཅོད། །ཉོན་མོངས་འཇོམས་པར་མཛད་པ་ཁྱོད་ལ་འདུད། །འཇིག་རྟེན་གསུམ་སླེབ་སྐུ་མཆོག་ཤིན་ཏུ་བརྗིད། །སྔོན་པོ་འཆད་པའི་ན་བཟའ་སྐུ་ལ་གསོལ། །དུས་མཐའི་མེ་ལྟར་འོད་ཟེར་འབར་བའི་སྐུ། །སྲིད་གསུམ་ཟིལ་གནོན་ཁྱད་
འཕགས་ཁྱོད་ལ་འདུད། །གསུས་པའི་སྨད་འཁྱིལ་སྟག་གི་ཤམ་ཐབས་ཅན། །ཚངས་པ་བརྒྱ་བྱིན་ཉི་ཟླ་འབར་བའི་སྟེང་། །ཞབས་གཉིས་ཕྲག་བཞག་ཡོན་ཏན་རྫོགས་པའི་སྐུ། །མཐའ་གཉིས་རྟག་ཆད་སེལ་མཛད་ཁྱོད་ལ་འདུད། །རྔམ་པའི་སྐུ་ཡིས་བདུད་རྣམས་འདུལ་
བར་མཛད། །བྲང་འགྲོ་བརྒྱད་ཀྱིས་སྐུ་བརྒྱན་ཀླུ་དབང་འདུལ། །བརྐྱང་བསྐུམ་བརྗིད་པས་གནོད་སྦྱིན་ཟིལ་གྱིས་གནོན། །ཕྲིན་ལས་མཐར་མཛད་ཁྱོད་ལ་ཕྱག་འཚལ་འདུད། །སྤྲུལ་པའི་ཁྲོ་ཚོགས་བྱེ་བ་སྐུ་ལས་འཕྲོ། །ཧཱུཾ་ཕཊ་སྒྲ་འབྱིན་མཚོན་ཆ་མང་པོས་འདེབས། །མཐིང་ནག་སྐུ་
ཡིས་ཁམས་གསུམ་ཆོ་ངེས་འདེབས། །སྤྲུལ་པས་སྐྲག་མཛད་ཁྱོད་ལ་ཕྱག་འཚལ་འདུད། །ཡུམ་མཆོག་མཛེས་ལྡན་མཐིང་ནག་ཞལ་གཅིག་མ། །ཕྱག་གཡས་གྲི་གུ་གདུང་དམར་ཞལ་དུ་སྟོབས། །རུས་པའི་ཕྲེང་བརྒྱན་བསྐལ་པའི་འོད་ཟེར་འཕྲོ། །སྤྲུལ་པ་གྲངས་མེད་ཁྲོ་ཆུང་
འཕྲོ་ལ་འདུད། །དྲི་ཟའི་རིགས་འདུལ་ཁྲོ་རྒྱལ་བདུད་ལས་རྒྱལ། །སྐུ་ཡི་རང་བཞིན་ཞི་བའི་ལས་མཛད་པ། །དཀར་གསལ་ཞལ་གཅིག་ཕྱག་བཞི་རྡོ་རྗེ་འཕྱར། །རྩེ་གསུམ་སྡིགས་མཛུབ་གཏི་མུག་འཇོམས་ལ་འདུད། །བརྐྱང་བསྐུམ་བཞུགས་ནས་ན་བཟའ་སྔོན་པོ་གསོལ། །
བྲང་འགྲོ་བརྒྱད་ཀྱིས་སྐུ་བརྒྱན་མཐུ་སྟོབས་ཅན། །གསུང་གི་ང་རོས་ལོག་འདྲེན་གདུག་པ་འདུལ། །རྔམ་མཛད་བདུད་ལས་རྒྱལ་བྱེད་ཁྱེད་ལ་འདུད། །མཉེས་བྱེད་ཡུམ་ནི་ལྷ་མོ་འོད་ཟེར་ཅན། །དཀར་མོ་འཛུམ་ཅན་ཞལ་གཅིག་ཕྱག་གཉིས་ལྡན། །སྤུ་གྲི་གཙོ་འཁྱུད་

49-1-269b

དུང་དམར་ཡབ་ལ་སྟོབས། །ཁྲོ་ཆུང་བྱེ་འགྱེད་ལྷ་མོ་ཁྱོད་ལ་འདུད། །གཤིན་རྗེ་འདུལ་མཛད་ཡོན་ཏན་རང་བཞིན་སྐུ། །རྒྱས་པའི་ཕྲིན་ལས་མཐར་ཕྱིན་སྐུ་མདོག་སེར། །ཞལ་གཅིག་ཕྱག་བཞིས་བདུད་འདུལ་རྡོ་རྗེ་འཕྱར། །དབྱུག་ཏོ་གཡོན་འཛིན་སྡིགས་མཛུབ་འཁྱུད་ཁྱོད་
འདུད། །ཞབས་གཉིས་བརྐྱང་བསྐུམ་གཤིན་རྗེ་གནོན་མཛད་འགྱིང་། །བརྗིད་སྐུ་ན་བཟའ་སྔོན་པོ་སྟག་རིས་གསོལ། །རིགས་བཞི་གདུག་པས་སྐུ་བརྒྱན་ཡོན་ཏན་རྒྱས། །སྤྲུལ་པའི་ཁྲོ་འགྱེད་གཟི་བརྗིད་འབར་ཁྱོད་འདུད། །དགྱེས་མཛད་ལྷ་མོ་དབྱངས་ཅན་གསེར་མདོག་ཞལ། །
ཞལ་གཅིག་ཕྱག་གཉིས་རལ་གྲི་གཙོ་ལ་འཁྱུད། །བནྡྷ་ཁྲག་བཀང་ཡབ་ཀྱི་ཞལ་དུ་སྟོབས། །སྤྲུལ་པ་གྲངས་མེད་འགྱེད་མཛད་ཁྱོད་ལ་འདུད། །ཀླུ་དབང་འདུལ་མཛད་གསུང་གི་རང་བཞིན་སྐུ། །དབང་གི་ཕྲིན་ལས་མཐར་ཕྱིན་སྐུ་མདོག་དམར། །འགྱིང་བག་ཞབས་
གཉིས་བརྐྱང་བསྐུམ་ས་བདག་གནོན། །རྔམ་ཆེན་མེ་ལྟར་འབར་བ་ཁྱོད་ལ་འདུད། །ཞལ་གཅིག་ཕྱག་བཞིས་རྡོ་རྗེ་སྦྲུལ་ཞགས་བསྣམས། །སྡིགས་མཛུབ་འཁྱུད་མཛད་གསུང་གི་རྔམ་སྟབས་ཅན། །སྦྲུལ་རིགས་བཞིས་བརྒྱན་གོས་སྔོན་སྟག་རིས་གསོལ། །ཀླུ་རིགས་དབང་
སྡུད་རྔམ་སྒྲ་སྒྲོགས་ཁྱོད་འདུད། །མཉེས་མཛད་ལྷ་མོ་དམར་མོ་མཛུམ་བག་ཅན། །ཞལ་གཅིག་ཕྱག་གཉིས་ཏེའུ་གཙོ་ལ་འཁྱུད། །དུང་དམར་སྟོབས་མཛད་སྤྲུལ་པའི་ཁྲོ་ཚོགས་སྤྲུལ། །ཐབས་མཁས་སྒྲ་ཅན་ཡུམ་མཆོག་འཁྱུད་ལ་འདུད། །གནོད་སྦྱིན་རིགས་འདུལ་ཕྲིན་ལས་རང་བཞིན་
སྐུ། །རྟོག་པའི་ཕྲིན་ལས་མཐར་ཕྱིན་སྐུ་མདོག་ལྗང་། །ཞལ་གཅིག་ཕྱག་བཞི་སྐུ་མཆོག་ཕྱག་མཚན་ལྡན། །ཕྲིན་ལས་བཞི་མཛད་རྡོ་རྗེ་བེ་ཅོན་འཛིན། །སྡིགས་མཛུབ་གཉིས་མཛད་ཡུམ་ལ་འཁྱུད་ཁྱོད་འདུད། །བརྐྱང་བསྐུམ་མཛད་པ་རིགས་བཞིའི་སྦྲུལ་གྱིས་བརྒྱན། །སྟོད་
གཡོགས་སྔོན་པོ་སྟག་རིས་ན་བཟའ་གསོལ། །ཕྲིན་ལས་ཐམས་ཅད་རྫོགས་མཛད་མཐུ་སྟོབས་ཅན། །བགེགས་རྣམས་འཇོམས་མཛད་བདུད་རྩི་འཁྱིལ་ཁྱོད་འདུད། །ཐོད་གྱུར་ལྗང་གུ་ཞལ་གཅིག་ཕྱག་གཉིས་མ། །ཐབས་ཤེས་ཚུལ་ལྡན་འཁོར་ལོ་གཙོ་ལ་འཁྱུད། །སྙིང་རྗེའི་རང་བཞིན་

49-1-270a

ལྷན་དམར་ཡབ་ལ་སྟོབས། །སྤྲུལ་ལྔ་འགྱེད་མཛད་རླུང་འབྱིན་སྐུ་ལ་འདུད། །ཛཿཧཱུྃ་བཾ་ཧོཿ འཇིགས་སྟོན་རྒྱས་འདེབས་མ། །བདུད་དང་མུ་སྟེགས་སྐྲག་མཛད་སྙིང་ནས་འདྲེན། །ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ། །བདུད་དཔུང་འཇོམས་མཛད་སྒོ་མ་
བཞི་ལ་འདུད། །རང་གི་དད་པའི་སྟོབས་ཀྱིས་བསྐུལ་གྱུར་ནས། །མོས་པའི་དབང་གིས་བསྟོད་པ་འདི་བྱས་པའི། །བསོད་ནམས་ཚོགས་གྱུར་སྒྲིབ་པ་གཉིས་བྱང་ནས། །རྒྱུད་ཤེལ་ལྟར་དག་སེམས་ཅན་དོན་བྱེད་ཤོག །བསྟོད་པ་མོས་པའི་རྒྱུད་ངན་ཐ་བ་བཏུལ། །མ་རིག་
མུན་སེལ་དག་པ་ཟླ་ཟེར་འདྲ། །དྲི་མེད་གསལ་བ་གང་ཐོབ་སེམས་ཅན་རྣམས། །འཁོར་ལོ་ཆེན་པོའི་ལྷ་ཞལ་མཐོང་བར་ཤོག །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་འཁོར་ལོ་ཆེན་པོའི་ལྷ་ཚོགས་ལ་བསྟོད་པ་ཞེས་བྱ་བ། ནམ་གྲུའི་རིགས་ལས་བྱུང་བ་
དངོས་གྲུབ་བརྙེས་པའི་སློབ་དཔོན་ཛཱ་བ་རི་པས་མཛད་པ་རྫོགས་སོ།།      །།རྒྱ་གར་གྱི་པཎྜ་ཏ་ཆེན་པོ་དེ་བ་པཱུརྞ་མ་ཏི་དང་། བོད་ཀྱི་ལོ་ཙཱ་བ་དགེ་སློང་འགར་ཆོས་ཀྱི་བཟང་པོས་བསྒྱུར་བའོ།།      །།༄༅༅། །རྒྱ་གར་སྐད་དུ། པྲ་ཏྱ་ས་མུཏྤད་སྱ་ནཱ་མ་རཀྵ། བོད་
སྐད་དུ། རྟེན་ཅིང་འབྲེལ་པར་འབྱུང་བའི་སྲུང་བ་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །བདེ་གཤེགས་མཐུ་དང་སེམས་ཅན་ལས། །བསམ་གྱིས་མི་ཁྱབ་པར་བཤད་པས། །དེ་བཞིན་རྟེན་འབྲེལ་ནུས་པའི་མཐུ། །བསམ་གྱིས་མི་ཁྱབ་པ་ཡིན་པས། །
གནོད་བྱེད་རྣམས་ཀྱི་དགྲར་གྱུར་པ། །མདོར་བསྡུས་བདག་གིས་བཤད་པར་བྱ། །སྲུང་བྱེད་རྣམ་རྒྱལ་ཨ་རུ་ར། །བཅངས་སམ་ལུས་ལ་བརྟེན་པ་ཡིས། །མར་མེའི་སྣང་བས་མུན་སེལ་ལྟར། །ཕྱོགས་སུ་གནས་པར་མི་ནུས་སོ། །དོན་ཀུན་གྲུབ་བྱེད་ནོར་བུ་དང་། །དེ་བཞིན་ཚེ་
བསྲིང་ནོར་བུ་དང་། །ཨིནྡྲ་ནཱི་ལ་སྦུར་ལོང་དང་། །རིན་ཆེན་ནོར་བུ་སྣ་ཚོགས་ནོར། །གང་ཞིག་ལུས་ལ་འཆང་བྱེད་པ། །ནོར་བུའི་མཐུ་ནི་བསམ་མི་ཁྱབ། །ཉི་མ་ཤར་སར་གྲིབ་མི་གནས། །དེ་བཞིན་གདོན་དེ་མི་གནས་སོ། །བདེ་གཤེགས་དགྲ་བཅོམ་བྱང་ཆུབ་སེམས། །དེ་

49-1-270b

བཞིན་རྣལ་འབྱོར་པ་ཡི་གདུང་། །མཆོད་ཅིང་བཅངས་པ་ཙམ་གྱིས་ནི། །ཞེ་སྡང་ཞི་ནས་མཆོད་བྱེད་འགྱུར། །ལྔ་བརྒྱ་སྟོང་དུ་ལོན་པ་ཡི། །རྨང་གི་ས་འམ་ཐབ་ཀྱི་ས། །སྔགས་བཏབ་བསྐུས་པ་ཙམ་གྱིས་ནི། །དཔག་ཚད་བྱེ་བ་བརྒྱ་རུ་འབྲོས། །དུག་དགྲའི་མཁྲིས་པ་མ་རུལ་བ། །
མན་ངག་གིས་ནི་བརྟེན་བྱས་ན། །ཀླུ་ཡི་རྒྱལ་པོ་འཇོག་པོ་ཡིས། །བཟུང་བ་ཡང་ནི་གཏོང་བར་འགྱུར། །གསེར་ཆུ་དངུལ་ཆུ་མུ་ཟི་ཡི། །བཅུད་ལེན་ལ་སོགས་སྦྱོར་བས་ནི། །གདོན་དེ་ཉེ་བར་མི་འགྱུར་རོ། །འདི་ལ་མ་དད་རིགས་མ་ཡིན། །འབྲས་བུ་གསུམ་དང་བྷྲྀངྒ་ར། །སྦྲང་རྩི་
མར་དང་ལྡན་པ་དང་། །སྣ་ཚོགས་པ་ཡི་སྨན་རྣམས་ཀྱི། །ནུས་པ་བརྗོད་ཀྱིས་མི་ལང་བས། །རྟག་ཏུ་གོམས་པར་བྱས་པས་ནི། །གདོན་དེ་བཟློག་པར་འགྱུར་བ་ཡིན། །ག་པུར་ལ་སོགས་བདུད་རྩི་ལྔ། །རྒྱུན་དུ་ལས་ལ་བསྟེན་པ་ཡིས། །གདོན་དེ་ཕྱོགས་སུ་མི་ཉེའོ། །
འདི་ཡི་ནུས་པ་བསམ་མི་ཁྱབ། །ག་པུར་ཛཱ་ཏི་ཙནྡན་དང་། །གླ་རྩི་གུར་གུམ་དྲི་ལྔ་ནི། །རྟག་ཏུ་ལུས་ལ་བརྟེན་པ་ཡིས། །ཚོར་བ་ཙམ་གྱིས་བྱེ་བར་འབྲོས། །གུ་གུལ་ལ་སོགས་སྦྱར་བའི་སྤོས། །བཅངས་སམ་བདུགས་པ་ཙམ་གྱིས་ནི། །ཀླད་པ་འགས་ཤིང་འཐོམས་གྱུར་
པས། །སྐད་ཅིག་ཙམ་ཡང་མི་གནས་སོ། །གསུམ་ལྔ་བདུན་དགུ་ལོན་པ་ཡི། །ཤིན་ཏུ་སྐྱུར་བའི་སྦྱོར་བ་ཡིས། །མེ་ཡི་ཕུང་པོའི་རྩེ་མོ་ལ། །སྦྲང་བུ་ལ་སོགས་མི་གནས་ལྟར། །ཤིན་ཏུ་འཇིགས་པས་འབྲོས་པར་འགྱུར། །སྦྱོར་བ་འདི་ནི་བསྔགས་པ་ཡིན། །དགུ་གསུམ་
ཉི་ཤུ་ལྔ་བཅུ་གཅིག །བརྒྱ་ལ་སོགས་པ་ལོན་པ་ཡིན། །རྩི་མར་གྱི་ནི་འཁྲུ་སྨན་བཞིན། །མོད་ལ་དེ་ནི་འབྱུང་འགྱུར་རོ། །ཟླ་བའི་ཤེལ་ལས་ཆུ་འབྱུང་དང་། །ཉི་མའི་ཤེལ་ལས་མེ་འབྱུང་བ། །མི་རིགས་པར་ནི་སྨྲ་མིན་པས། །དེ་བཞིན་སྣ་ཚོགས་རྟེན་འབྲེལ་མཐུ། །མེད་པ་
རུ་ནི་མི་སྨྲའོ། །མཐུ་ནི་མངོན་དུ་འབྱུང་བས་ན། །མ་དད་པ་ནི་རིགས་མེད་པས། །དེ་ལ་ཡིད་ཆེས་བརྟན་པར་བཟུང་། །རྟེན་འབྲེལ་སྦྱོར་བ་བཅུ་གཉིས་ལ། །དད་པས་བླ་མ་མཉེས་བྱས་ཏེ། །མན་ངག་རིམ་པ་བླང་བར་བྱ། །མཉེས་པ་ཡིས་ནི་གཞན་དུ་མིན། །རྟེན་འབྲེལ་

49-1-271a

ནུས་པ་བརྗོད་མི་ལང་། །རང་ཉིད་ཀྱིས་མཐོང་འགའ་ཙམ་སྨྲས། །འདི་ལ་དགེ་རྩ་ཅི་ཡོད་པས། །གདུག་པ་རྣམས་ནི་སྲུང་བྱེད་ཤོག །རྟེན་ཅིང་འབྲེལ་པར་འབྱུང་བའི་སྲུང་བ་ཞེས་བྱ་བ། ནམ་གྲུའི་རིགས་ལས་བྱུང་བ། དངོས་གྲུབ་བརྙེས་པ་ཛཱ་བ་
རིའི་ཞལ་སྔ་ནས་མཛད་པ་རྫོགས་སོ།།      །།པཎྜི་ཏ་དེ་བ་པཱུརྞ་མ་ཏི་དང་། ལོ་ཙཱ་བ་ཤེའུ་བཛྲ་དེ་བའི་འགྱུར།།      །།༄༅༅། །རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ཎི་ཡཀྵ་མ་ཧཱ་རུ་དྲ་བཛྲ་ཨགྣེ་ཛི་ཧྭ་ཏནྟྲ་བྲྀ་ཏྟི་ནཱ་མ། བོད་སྐད་དུ། ཕྱག་ན་རྡོ་རྗེ་གོས་
སྔོན་པོ་ཅན་གནོད་སྦྱིན་དྲག་པོ་ཆེན་པོ་རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་ཞེས་བྱ་བ། འཕགས་པ་ཕྱག་ན་རྡོ་རྗེ་ལ་ཕྱག་འཚལ་ལོ། །གང་ཞིག་ཉོན་མོངས་སྐྱོན་གྱིས་མ་གོས་རིན་ཆེན་བཻ་ཌཱུརྱ་ལྟར་དང་ཞིང་རབ་འབར་རི་རབ་ལྟར་བརྗིད་དང་། །འགྲོ་ལ་རིག་པས་མྱུར་བར་སྟོན་དང་ཧཱུྃ་ལས་
རབ་བྱུང་སྟོང་གསུམ་སྐྲག་པར་མཛད་པ་ཉིད། །གདོད་ནས་མི་རྟོག་ཞི་བའི་ངང་ལས་སྙིང་རྗེའི་སྟོབས་ཀྱིས་མཐའ་དག་སྡུད་མཛད་ཞེ་སྡང་ཆེན་པོར་གསལ། །དུས་གསུམ་སངས་རྒྱས་ཀུན་གྱི་གསང་བའི་མཛོད་དུ་རབ་གྱུར་རྡོ་རྗེ་འཛིན་པའི་བདག་ཉིད་དེ་ལ་ཕྱག་འཚལ་ནས། །རྒྱུད་
ཀྱི་རྒྱལ་པོ་འགྲོ་དོན་མཛད་པ་ཉིད་ལ་ཕྱི་ནང་སྡུག་བསྔལ་ཞི་མཛད་གསང་བ་ཟབ་མོའི་དོན། །བླ་མ་བརྒྱུད་པའི་སྟོབས་ལས་རང་བྱུང་བདག་ཉིད་རབ་སྦྱོར་དྲག་པོ་དེ་ཡི་བདུད་རྩིའི་འོད་ཟེར་ངེས་པར་རབ་བརྙེས་ནས། །དང་པོའི་མིང་ལ་ལག་ན་རྡོ་རྗེས་སྣང་བ་ཞེས་བྱར་འཇིག་རྟེན་ཀུན་ལས་
གྲགས་པ་རབ་ཐོབ་སྟེ། །བདག་གིས་འགྲེལ་འདི་རྙེད་དང་བཀུར་སྟི་གྲགས་པ་རློམ་སེམས་ཕྱིར། །མིན་འདི་དྲན་དང་འགྲོ་ལ་ཕན་ཕྱིར་རྒྱས་པ་བྲི་བར་བྱ། །དེ་ལ་དེ་ཁོ་ན་ཉིད་སྣང་བ་ཞེས་བྱ་བ་འདིས་རིམ་པ་ཇི་ལྟ་བ་བཞིན་དུ་བླ་མའི་མན་ངག་ལ་རག་ལས་པ་རྣམས་བཤད་པར་བྱ་སྟེ། འདི་
སྐད་བདག་གིས་ཐོས་པའི་དུས་གཅིག་ན་ཞེས་བྱ་བ་ལ། ཨེ་ཝཾ་མ་ཡཱའི་བཤད་པ་ནི་འོག་ནས་རིག་པར་བྱའོ། །བདག་ནི་སྡུད་པ་པོ་ཉིད་དུ་རིག་པར་བྱ་སྟེ། དེ་ཡིས་དེའི་སྐད་ཅིག་དེ་ཉིད་ལ་ཐོས་པས་ན་ཐོས་པའི་དུས་གཅིག་ནའོ། །བཅོམ་ལྡན་འདས་ཐམས་ཅད་འབྱུང་བའི་

49-1-271b

ཡུམ་བཙུན་མོའི་བྷ་ག་ལ་བཞུགས་ཏེ་ཞེས་བྱ་བ་ལ། བཅོམ་ལྡན་འདས་རྡོ་རྗེ་གར་མཁན་ཉིད་སྔ་མའི་ཆ་བྱད་རྣམས་ཡང་དག་པར་སྤངས་ཏེ་བྷ་ག་ལ་བཞུགས་པའོ། །བཅོམ་ལྡན་འདས་མའི་སྒྲས་ནི་ཟ་བ་དང་འཇོམས་པ་ཉིད་དང་ལྡན་པར་སྟོན་ཏོ། །ཐམས་ཅད་འབྱུང་
བའི་སྒྲས་ནི་འབྱུང་བ་བཞིའི་ས་བོན་རྣམས་ནམ་མཁའ་ལ་ཡང་དག་པར་བརྟེན་ཏེ་གནས་པ་དེའི་ས་བོན་གྱི་གཟུགས་དྲག་པོའི་དཀྱིལ་འཁོར་ལ་བཞུགས་ཏེ། དེ་ཉིད་བུད་མེད་ཀྱི་བྷ་ག་དང་དབྱིབས་མཐུན་པས་བྷ་ག་ལ་བཞུགས་སོ། །དེ་ལས་འགྲོ་བ་རྣམས་བྱུང་བས་ན་ཐམས་
ཅད་བྱུང་བ་ཉིད་དོ། །ཡང་ན་སྟོང་པ་ཉིད་ལས་དངོས་པོ་ཐམས་ཅད་འབྱུང་ཞིང་དེའི་ངང་ལ་གནས་པས་བཞུགས་སོ། །ཡུམ་ནི་དངོས་པོ་རྣམས་བསྐྱེད་པའོ། །བཙུན་མོ་ནི་བདེ་བ་བསྐྱེད་པའི་རྒྱུ་ཡིན་ཏེ། དེ་དང་མཐུན་པར་སྟོང་པ་ཉིད་ལ་སྦྱོར་བས་བདེ་བའི་འབྲས་བུ་སྐྱེའོ། །བྷ་གའི་
སྒྲས་ངེས་པའི་རྟགས་སྟོན་པའམ། ཡང་ན་གོང་མའི་སྒྲ་དང་མཐུན་པར་གདུག་པ་རྣམས་འཇོམས་པས་ན་བྷ་གའོ། །འབྱུང་བ་དང་ཡུམ་དང་བཙུན་མོའི་སྒྲ་ནི་དུས་རྣམ་པ་གསུམ་ལའང་འཇུག་སྟེ།  དུས་གསུམ་དུ་ངེས་པའི་དོན་བསྟན་པ་ལའང་སྦྱར་རོ། །དེ་ན་གནོད་སྦྱིན་ལ་སོགས་
པ་གདུག་པའི་རིགས་ཐམས་ཅད་དང་ཐབས་ཅིག་ཅེས་པ་ནི་ཅིའི་ཕྱིར་འདུས་ཤེ་ན། དེ་དག་འདུལ་བའི་ཕྱིར་ཉིད་ཀྱིས་བྱིན་གྱི་རླབས་ཀྱིས་བཀུག་པའོ། །དེ་ནའི་སྒྲས་ནི་ཉིད་ཀྱི་དྲུང་ན་གནས་པས་ཐབས་ཅིག་པའོ། །དེ་ནས་བཅོམ་ལྡན་འདས་དྲག་པོའི་སྐྱིལ་མོ་ཀྲུང་བཅས་
ནས་ཞེས་པ་ནི། དྲག་པོ་རྣམས་བསྒྲལ་བར་བྱ་བའི་ཕྱིར་ཞབས་ཀྱི་མཐིལ་གཉིས་སྦྱར་ནས་ཚིགས་གཉིས་བཅག་པས་བཞུགས་སོ། །ཕྱག་གཡས་པ་སྟེང་དུ་བསྒྲེང་། གཡོན་པ་ས་ལ་བསྒྲེང་ནས་སྤྱན་བཟློག་པས་ཕྱོགས་བཅུར་གཟིགས་པ་ནི་གདུག་པ་རྣམས་འདུལ་བའི་
ཕྱིར་དྲག་པོའི་ཕྱག་རྒྱར་ཤེས་པའོ། །ཧཱུྃ་དང་ཧ་ནི་སྔགས་སུ་རིག་པར་བྱ་སྟེ་སྡུད་པ་དང་འཇོམས་པའོ། །ཡང་ན་ཐབས་དང་ཤེས་རབ་ཀྱི་བདག་ཉིད་ཀྱིས་འདུལ་བར་ཤེས་པར་བྱའོ། །སྒྲ་ཆེར་ཕྱུང་བ་ནི་ལྟེ་བས་ཡོངས་སུ་བསྐྱོད་པའོ། །དེ་ནས་འཁོར་ཐམས་ཅད་གཙོ་བོ་མི་སྣང་བས་ཡུན་

49-1-272a

རིང་ཞིག་ཏུ་བརྒྱལ་བར་གྱུར་ཏོ་ཞེས་བྱ་བ་ལ་གོང་མའི་སྔགས་ཀྱིས་བརྒྱལ་བ་ལས་ཕྱོགས་རྨོངས་པར་གྱུར་ཏེ་དེ་ཉིད་ཀྱང་མི་སྣང་བའོ། །དེའི་སྐད་ཅིག་དེ་ཉིད་ལ་བཅོམ་ལྡན་འདས་ཀྱིས་སྤྱི་བོ་ནས་སངས་རྒྱས་ཐམས་ཅད་ཀྱི་གནང་བ་ཞེས་བྱ་བ་ནི་དབུའི་གཙུག་ཏོར་
ནས་ཕྱུང་བ་ལ་བྱ་སྟེ། གནང་བ་ནི་དུས་གསུམ་གྱི་སངས་རྒྱས་རྣམས་ཀྱིས་དབང་བསྐུར་བར་བྱས་ནས་གསང་བའི་བདག་པོར་གནང་བ་བྱིན་ཏེ་བསྒོ་བའོ། །སྔགས་རྣམ་པ་གསུམ་གྱི་བདག་པོ་ཞེས་བྱ་བ་ནས། རྒྱ་མཚོར་བཞུགས་སོ་ཞེས་བྱ་བའི་བར་ལ་སྔགས་རྣམ་པ་གསུམ་
ནི་སྐུ་གསུང་ཐུགས་ཀྱི་ཡི་གེ་གསུམ་ལས་སྔགས་ཐམས་ཅད་འབྱུང་བས་དེའི་བདག་པོ་ཡིན་པར་བསྟན་པ་དང་། རིག་སྔགས་དང་། གསང་སྔགས་དང་།གཟུངས་སྔགས་གསུམ་གྱི་བདག་པོ་ཡིན་པར་བསྟན་པའོ། །ཕྱག་བརྙན་ཞེས་པ་ནི་དང་པོའི་ཚིག་ལ་འཇུག་པ་དང་ཕོ་ཉ་ཡིན་པར་
བསྟན་པའོ། །ཁ་དོག་སྔོན་པོའི་སྒྲས་ནི་རྣམ་པར་རྟོག་པ་ཐམས་ཅད་སྤངས་པ་ཉིད་དང་། ཉེས་པའི་སྐྱོན་གྱིས་མ་གོས་པར་བསྟན་པའོ། །ལྷག་མ་ནི་གོ་སླའོ། །ནམ་མཁའ་ལྡིང་གཤོག་པ་བསྐྱོད་ནས་ཞེས་བྱ་བ་ནས། རང་གི་བདག་པོའི་ལག་པར་སླར་སོང་ངོ་ཞེས་བྱ་བའི་
འབར་ལ་ནམ་མཁའ་ལྡིང་གི་བདག་པོའི་རྒྱན་བླང་བའི་ཕྱིར་རྒྱ་མཚོར་ཞུགས་ཏེ། ཀླུ་རྣམས་ཀྱི་གཟུགས་བརྙན་བསྒྱུར་ནས་སྦྲུལ་གྱིས་སྐུ་ལ་རྒྱན་ཆ་བདུན་དུ་བརྒྱན་པའོ། །ནམ་མཁའ་ལྡིང་ཡང་དེ་ཉིད་ཀྱི་བྱིན་གྱི་རླབས་ཀྱིས་བསྐྱེད་པ་སྟེ། སླར་བདག་པོའི་ཕྱག་མཚན་དུ་གནས་
པའོ། །དེ་ནས་གནོད་སྦྱིན་བྱེ་བ་ཕྲག་བཅུ་དང་ཞེས་པ་ནས། མདུན་དུ་སྙིང་པོ་དང་ལྡན་པའི་སྐྱིལ་མོ་ཀྲུང་བཅས་ཏེ་འདུག་གོ་ཞེས་བྱ་བའི་བར་དུ་གོ་སླ་བས་འདིར་མ་བཤད་དོ། །དེ་ཉིད་ནི་བདེ་བར་གཤེགས་པའི་བཀའ་ལ་རག་ལས་པར་མ་གྱུར་པའི་གང་ཟག་ཁ་ཅིག་ན་རེ་
གནོད་སྦྱིན་དངོས་ཡིན་པར་འདོད་ན་དེ་ནི་བཀའ་ལ་རྨོངས་པར་གྱུར་པས་དེ་ལྟར་མི་བལྟའོ། །དེ་ནི་ལག་ན་རྡོ་རྗེ་དབང་བསྐུར་བའི་རྒྱུད་ལས་འབྱུང་བ་དང་མཐུན་པར་རིག་པར་བྱ་སྟེ། བཅོམ་ལྡན་འདས་ཕྱག་ན་རྡོ་རྗེ་དངོས་སོ། །དེ་ནས་བཅོམ་ལྡན་འདས་ཀྱིས་ནམ་མཁའ་དང་

49-1-272b

ས་ལ་གཟིགས་ནས་བར་སྣང་དུ་ཡང་སྤྱན་གྱིས་འཁོར་བར་གཟིགས་སོ་ཞེས་བྱ་བ་ནི་ནམ་མཁའ་དང་ས་ལ་གཟིགས་པ་དང་བར་སྣང་དུ་ཡང་གཟིགས་པ་ནི་ཕྱོགས་བཅུ་ན་གནས་པའི་གདུག་པ་མ་ལུས་པ་འདུལ་བར་བསྟན་པའོ། །དེ་ནས་ཁཾ་བྲུཾ་སཾ་ཞེས་པའི་སྔགས་བརྗོད་
པ་ནི། ཁཾ་གི་སྙིང་པོས་སྟེང་གི་ཕྱོགས་སུ་འདུལ་བའོ། །བྲུཾ་གྱི་སྙིང་པོས་འོག་གི་ཕྱོགས་སུ་འདུལ་བར་བསྟན་པའོ། །སཾ་གི་སྙིང་པོས་ཕྱོགས་མཚམས་བརྒྱད་པོ་འདུལ་བར་བསྟན་པའོ། །དེ་ནས་ཕྱག་ན་རྡོ་རྗེ་སྟན་ལས་ལངས་ཏེ། རྡོ་རྗེ་ཐལ་མོ་རང་གི་སྙིང་གར་
སྦྱར་བ་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ་ཞེས་བྱ་བ་ལ། རྡོ་རྗེ་ཐལ་མོ་ནི་རྡོ་རྗེ་རྩེ་ལྔ་པའི་ཕྱག་རྒྱའོ། །དེ་ཉིད་ཐུགས་ཀར་སྦྱར་ནས་བཅོམ་ལྡན་འདས་ལ་འོག་ནས་འབྱུང་བའི་ཚིག་གསོལ་བའོ། །ཀྱེ་མ་བཅོམ་ལྡན་འདས་ལ་གསང་བ་དྲག་པོའི་དོན་
བདག་དང་སེམས་ཅན་ཐམས་ཅད་ལ་སྨན་པའི་ཕྱིར་ཞུ་ན་ཅི་བཅོམ་ལྡན་འདས་ཀྱིས་སྐབས་དབྱེ་བར་གནང་ཞེས་བྱ་བ་ལ། དང་པོའི་ཚིག་ལ་ཀྱེའི་སྒྲ་དང་ལྡན་པ་ནི་ཤིན་ཏུ་ངོ་མཚར་དུ་གྱུར་པའོ། །གསང་བ་ནི་ཉན་ཐོས་དང་རང་སངས་རྒྱས་ལ་སོགས་པ་རྣམས་ལ་ཤིན་ཏུ་གསང་
བར་གྱུར་པའི་ཕྱིར་གསང་བའོ། །དྲག་པོ་ནི་གདུག་པའི་ཚོགས་འདུལ་བ་དང་། གཞན་ཡང་ཤིན་ཏུ་དྲག་པོའི་ཆོས་ཉེ་བར་སྟོན་པས་ན་དེའི་དོན་ཉིད་དང་། སེམས་ཅན་ཐམས་ཅད་ལ་ཕན་པར་བྱ་བའི་ཕྱིར་རྒྱས་པར་གསོལ་བའོ། །ཅང་མི་གསུང་ཞེས་བྱ་བ་ལ་སོགས་པ་ལ། 
ཅང་མི་གསུང་བ་ནི་སྒྲའི་དོན་ལས་ཟབ་མོའི་དོན་རྒྱས་པར་གསུང་བར་རིག་པར་བྱའོ། །གདུག་པའི་ཚོགས་འདུལ་བ་ཞེས་བྱ་བ་ནི་བླ་མའི་ངག་ལས་ཤེས་པར་བྱའོ། །ལྷག་མ་ནི་གོ་སླའོ། །དེ་ནས་བཅོམ་ལྡན་འདས་ཏིང་ངེ་འཛིན་དེ་ལས་བཞེངས་ནས་ལག་ན་རྡོ་རྗེ་ལ་གཟིགས་
ཏེ། བྱེད་པ་གཡོན་པ་ཆུའི་སྙིང་པོ་ནས་དངས་ཏེ་ཞེས་བྱ་བ་ནི། གཟིགས་པ་ནི་ཞུ་བ་པོའི་རེ་བ་སྐོང་བའི་རྟགས་སོ། །བྱེད་པ་ཞེས་བྱ་བ་ནི། ལས་ཀྱི་སྒྲ་དོན་ལ་ཉེ་བར་སྦྱོར་བ་ཞེས་བྱ་སྟེ་ལུས་ཀྱི་ཡན་ལག་རྣམས་ལས། ལག་པས་བྱ་བ་བྱེད་ཅེས་འབྲུ་མང་པོ་པ་ཀུན་དུ་རྒྱུའི་སྒྲ་ཡིན་ཏེ།

49-1-273a

ལག་པ་ལ་རིག་པར་བྱའོ། །ཆུའི་སྙིང་པོ་ནས་དྲང་བ་ནི་རྔའི་སྒྲ་ལ་ཉེ་བར་སྦྱོར་བ་སྟེ། ཀ་ཏ་ལའི་སྒྲ་གང་འོག་དང་སྡེ་བར་ལྡན་པ་དང་། སྟོབས་ཆེ་བའི་ཕྱིར་དང་།གཅིག་ལ་གྲོགས་ཀྱིས་སྒྲོགས་པས་ཆུ་ཤིང་ནི་མཛུབ་མོའོ། །སྙིང་པོ་ནས་དྲངས་པ་ནི་ཀུན་རྫོབ་
ཏུ་དྲག་པོའི་སྙིང་པོ་ཉིད་དེ། དེའི་ཐད་ཀ་ནས་དྲངས་ནས་ལྕགས་ཀྱུའི་ཕྱག་རྒྱ་བཅས་ནས་གནས་པའོ། །བྱེད་པ་སྐྱེད་པ་ཆུ་ཤིང་སྒྲ་དང་བཅས་པས་བརྐྱང་སྟེ་གནས་སོ་ཞེས་བྱ་བ་ནི་དེ་ལ་ཡང་གོང་མའི་སྒྲ་སྦྱོར་གྱིས་འཇུག་སྟེ། སྐྱེས་པ་ནི་དྲག་པོའི་སྒྲ་དང་ལྡན་པ་དང་སྟོབས་ཆེ་བའི་ཕྱིར་
ཏེ། གཡས་པ་ལ་རིག་པར་བྱའོ། །སྒྲ་དང་བཅས་པ་ནི་རང་གི་རིགས་ལ་དང་པོ་དང་གཉིས་པའི་སྦྱོར་བའི་སྒྲ་དང་བཅས་པའོ། །བརྐྱང་བ་ནི་དངོས་སུ་སྟེ། དེ་ཡང་གནས་ནི་སྒོའི་ཐད་ཀར་གནས་པའོ། །དེ་ནས་ཕྱག་ན་རྡོ་རྗེས་ཕྱག་རྒྱ་དེ་ཉིད་ཡང་དག་པར་རིག་སྟེ་ཞེས་པ་ནི། 
དེའི་དོན་བརྡའི་སྒོ་ནས་རིག་ནས་ཚིག་བརྗོད་པའོ། །ཁྱེད་ལ་སོགས་པའི་འཁོར་དག་ཅེས་པ་ནས་སྔ་མ་བཞིན་དུ་འཁོད་དོ་ཞེས་པའི་བར་ལ། དྲག་པོའི་ཆོས་སྟོན་པས་དེ་དང་མི་མཐུན་པ་རྣམས་དེའི་སྐད་ཅིག་དེ་ལ་མི་ཐོས་པར་བྱ་བའི་ཕྱིར་བརྗོད་པའོ། །སྒྲ་གནས་ཀྱི་ཁུང་བུར་
སྒྲིབ་བྱེད་ཀྱི་ཚིག་སོང་སྟེ་ཞེས་པ་ནི། སྒྲ་གནས་པ་ནི་རྟེན་བྱེད་པའི་ཕྱིར་རྣ་བ་ལའོ། །ཁུང་བུར་ནི་དངོས་སོ། །སྒྲིབ་བྱེད་ཀྱི་ཚིག་ནི་ཚིག་དེ་དངོས་ལ་བྱ་སྟེ། ཅིའི་ཕྱིར་སྒྲིབ་པར་བྱེད་ཅེ་ན། གཉིས་ཀྱིས་བྱིན་གྱི་རླབས་ཀྱིས་བཅིངས་པ་གཉིས་ཀྱིས་ཡང་དག་པར་གནས་
བཅིངས་ནས་ཏེ། བསྒྲིབས་ནས་འཁོད་པའོ། །འཁོད་པ་ནི་དེ་དང་འདྲའོ། །སྔ་མ་ནི་དང་པོ་ལ་འདུས་བཞིན་དུའོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ནས་བྱ་བ་ལས་ལེའུ་དང་པོའི་བཤད་པའོ།།      །།དེ་ནས་ཕྱག་ན་རྡོ་རྗེ་ཡིས། །ཞེས་བྱ་བ་ནས། 
མཚན་མ་ངེས་པར་བཤད་པར་བྱ། །ཞེས་པའི་བར་དུ་ནི་སྤྱི་དོན་རྒྱས་པར་ཞུ་བ་གསོལ་བ་དང་། ནན་ཏན་དུ་བྱ་བ་གནང་བ་ལེགས་པར་བྱིན་པ་དང་། ལག་ན་རྡོ་རྗེ་ཉིད་ཀྱི་རྒྱུད་བཤད་པར་མཚོན་པ་དང་། སེམས་ཅན་ཐམས་ཅད་ལ་ཕན་པའི་དོན་དུ་བཤད་པར་དམ་བཅའ་བར་

49-1-273b

ཤིས་པར་བྱའོ། །བ་ནི་རྣམ་པར་སྣང་མཛད་དེ། །ཛ་ནི་མི་བསྐྱོད་ཐུབ་པའོ། །ར་ནི་རིན་ཆེན་ཀུན་འབྱུང་སྟེ། །ཞེས་བྱ་བ་ལ་སྐུ་གསུང་ཐུགས་རྣམ་པ་གསུམ་ལ། རྡོ་རྗེའི་ཚིག་ཉེ་བར་སྦྱར་བ་སྟེ། སྐུ་གསུམ་ལ་སྒྲའི་སྦྱོར་བའི་སྒོ་ནས་གང་གཞིའི་ཡི་གེ་ལ་གྲོགས་ཉེ་བར་བརྟགས་པར་
སྐུ་གསུམ་ལ་འཇུག་པའོ། །མེ་ལྕེའི་ཡིག་འབྲུ་གསུམ་པ་ལ། །དང་པོའི་གཙོ་བོ་བཤད་བྱ་བ། །ཞེས་བྱ་བ་ནི་འོག་ཏུ་བཏགས་པའི་འཁོར་མ་གཏོགས་པར་དང་པོ་ཡང་ཡིན་ལ་གཙོ་བོ་ཡང་ཡིན་པས་དང་པོའི་གཙོ་བོའོ། །དེ་དག་ཡོངས་སུ་འཆད་པས་བཤད་པར་བྱ་བར་སྦྱར་
རོ། །པ་ནི་རྡོ་རྗེ་འཇོམས་བྱེད་མ། །ན་ནི་པདྨ་འཇོམས་བྱེད་མ། །ཨི་ནི་ཀུན་འགྲོ་འཇོམས་བྱེད་མ། །ཞེས་བྱ་བ་ལ། དེ་ཡང་དང་པོ་མཐུན་པར་གཞིའི་ཡི་གེ་ལ་གྲོགས་ཉེ་བར་སྦྱར་བས་ཤེས་པར་བྱ་སྟེ། འཇོམས་པར་བྱེད་པའི་སྒྲ་ནི་གྲོགས་དང་བསྡོངས་པས་འོག་
བཏགས་གསུམ་པོ་ཡོད་པས་ན། འོག་བཏགས་གསུམ་པོའི་མིང་མཐར་སྦྱོར་ཞེས་པའོ། །ཨེ་ནི་ཀུན་དུ་གོ་བྱེད་དེ། །མ་ནི་སྨིན་པར་བྱེད་པ་སྟེ། །ཝཾ་ནི་ཀུན་ནས་སྡུད་པ་ཡིན། །ལ་ནི་ཡོངས་སུ་བརྟེན་པའི་ལས། །ཡ་ནི་ཡང་དག་བསྐྱོད་པར་བཤད། །གོ་འབྱེད་གཉིས་དང་
སྟེང་གནས་པའི། །སྣ་ལྡན་དག་ཏུ་ཤེས་པར་བྱ། །ཞེས་བྱ་བ་ལ། རང་བཞིན་གྱིས་གྲུབ་པའི་ས་བོན་སྔར་ཡོངས་སུ་གསུངས་ཏེ། མེ་དང་། ཆུ་དང་། ས་དང་། རླུང་དང་། ནམ་མཁའི་འབྱུང་བར་རྒྱུད་གཞན་དང་མཐུན་པར་ཤེས་པར་བྱ་སྟེ། ངེས་ཚིག་ཀྱང་བཤད་པའི་ཕྱིར་རོ། །
དེ་ལ་རྒྱུད་འདིར་མ་གསུངས་མོད་ཀྱང་སྒྲོལ་མ་ལ་སོགས་པ་ལྷ་མོ་ལྔ་དང་། དགའ་བ་བཞི་དང་། སྡེ་པ་ལ་སོགས་པ་མཐའ་དག་རྒྱས་པར་ཤེས་པར་བྱའོ། །དེ་ལ་ངེས་པར་འབྱུང་བས་ན། ཀུན་སྣང་གང་ཡིན་དངོས་དང་སྦྱར། །བསམ་པའི་དངོས་ལ་འཇུག་རྣམས་ཀྱི། །
ཡན་ལག་རྣམས་ལ་ཐམས་ཅད་དུ། །གོང་དུ་སྨོས་པ་བརྗོད་པ་ཡིན། །ཞེས་བྱ་བ་ལ། དེ་ཞེས་པ་ནི་གོང་དུ་སྨོས་པའི་ས་བོན་རྣམས་སོ། །དེ་ལ་དངོས་པོ་ཐམས་ཅད་ཡང་དག་པར་འབྱུང་བས་ན། དེ་ལས་ངེས་པར་འབྱུང་བར་སྦྱར་རོ། །ཀུན་དུ་སྣང་བ་ནི། ཀུན་དུའི་སྒྲས་བདག་དང་

49-1-274a

གཞན་གྱི་རྒྱུད་ལ་ཡང་དག་པར་འཇུག་སྟེ། འདི་ལྟར་སྣང་བ་ནི་གཡོ་བ་དང་མི་གཡོ་བའོ། །དེའི་དངོས་ལ་སྦྱར་བ་དང་བསམ་པའི་དངོས་པོ་ནི་རྣལ་འབྱོར་པ་གང་ཞིག་ཆོས་ཉིད་བསྒོམ་པའོ། །དེ་ཡང་སྐྱེས་བུའི་སྤྱིའི་སྒྲ་འབྲུ་མང་པོ་པར་སྦྱར་བར་
བྱའོ། །ཡན་ལག་དེའི་ལས་ལ་འཇུག་པའི་ཡན་ལག་གམ། ཐབས་སུ་གསུངས་པས་ན་ཡན་ལག་ཐབས་རྣམས་སུ་སྦྱར་རོ། །གོང་དུ་སྨོས་པས་ནི་གོང་མའི་ས་བོན་ལ་སྦྱར་བར་བྱའོ། །དོན་དུ་གསལ་བར་ཟློས་པ་ཡི། །ཚིག་ནི་རྒྱས་པར་བརྗོད་མི་དགོས། །ཞེས་བྱ་
བ་ནི་འདི་སྐད་བདག་གིས་ཐོས་པའི་དུས་ཏེ། དེའི་ཚིག་ལ་གསལ་བར་བརྗོད་མི་དགོས་པའོ། །ལས་ལས་སྐྱེས་པའི་གཟུགས་རྣམས་ལ། །དྲག་པོ་ཡོངས་སུ་སྟོན་པ་དང་། །གནོད་སྦྱིན་བེ་ཅོན་ཐོགས་རྣམས་ལ། །གཙོ་བོའི་དོན་དུ་བཤད་པས་ན། །ཚིག་ཏུ་ངེས་པར་ཡང་
དག་བརྗོད། །ཅེས་བྱ་བ་ནི་ལས་ལས་གྲུབ་པ་ནི་གནོད་སྦྱིན་ཏེ།  དེ་རྣམས་ཀྱི་གཟུགས་སོ། །དྲག་པོ་ཡོངས་སུ་སྟོན་པ་ནི་སྔགས་དང་ཕྱག་རྒྱ་དང་ཐབས་རྣམས་དྲག་པོའི་སྟོན་པའོ། །སུ་ལ་སྟོན་ཞེ་ན། ལས་ལས་གྲུབ་པའི་གཟུགས་དྲག་པོའི་རིགས་ཐམས་ཅད་ལའོ། །
གནོད་སྦྱིན་བེ་ཅོན་ཐོགས་པ་ལ་སོགས་པ་གནོད་སྦྱིན་གྱི་རིགས་ཐམས་ཅད་ལ་གཙོ་བོ་ལག་ན་རྡོ་རྗེ་ཉིད་གཙོ་བོར་བཤད་ཅིང་སྦྱོར་བས་ན་གཙོ་བོའི་དོན་དུ་ཡོངས་སུ་ཤེས་པར་བྱའོ། །ཚིག་ཏུ་ངེས་པར་བརྗོད་པ་ནི་ངེས་པའི་ཚིག་རྒྱུད་ལ་ཡང་དག་པར་གོང་འོག་དང་སྦྱར་ཏེ་གསུངས་
པ་དང་གསུང་བར་སྦྱར་རོ། །ཁྱོད་ཀྱི་ཚུལ་འཆང་རབ་དགའ་བས། །དེ་ཉིད་རིགས་སུ་འབྱུང་བ་སྟེ། །ཀུན་ཀྱང་ནག་པོའི་ལས་ལ་དགའ། །གནང་བ་དག་པར་མི་མཐོང་ཞིང་། །དེ་ཉིད་ལ་ནི་ངེས་པར་བརྗོད། །ཅེས་བྱ་བ་ནི་ཁྱོད་ཀྱི་ཚུལ་འཆང་ཞེས་པ་ནི་ལག་ན་རྡོ་རྗེ་ཉིད་ཀྱི་ཚུལ་
འཆང་བའོ། །རབ་དགའ་ནི་གདུག་པ་གཞན་རྣམས་སོ། །དེ་ལ་རབ་ཏུ་དགའ་བས་གདུག་པ་གཞན་རྣམས་དེ་ཉིད་གནོད་སྦྱིན་གྱི་རིགས་སུ་འབྱུང་བར་སྦྱར་རོ། །དེ་དག་ཐམས་ཅད་ནག་པོའི་ལས་སྡིག་པ་ལ་དགའ་བས་སྣང་བ་ནི་ཡེ་ཤེས་ལ་སྦྱར་ཏེ། དེ་དག་ཐམས་ཅད་

49-1-274b

ཀྱིས་མི་མཐོང་བཞིན་དུ།  དེ་ཉིད་ནི་སྡིག་པ་ལ་གྲོལ་བ་དང་། ཐར་བར་ལྟ་བ་དེ་ཉིད་ལ་ངེས་པར་བརྗོད་པའམ་འདོད་པའོ། །གོང་དུ་བསྟན་པ་གང་ཡིན་པ། །སོ་སོར་དག་ལ་གདོན་མི་ཟ། །སྦྱོར་བ་སྣ་ཚོགས་ངེས་བསྒྲུབས་ནས། །རྣལ་འབྱོར་པ་ནི་སྣ་ཚོགས་པ། །མངོན་
དུ་རྒྱས་ཤིང་ངེས་པར་གསལ། །ཞེས་བྱ་བ་ལ། གོང་དུ་བསྟན་པ་ནི་འདི་ཉིད་དུའོ། །གང་ཡིན་པ་ནི་སྦྱོར་བ་དང་ཐབས་རྣམས་སུ་སྦྱར་རོ། །སོ་སོ་དག་ལ་ནི་གདུག་པའི་རིགས་རང་རང་ལའོ། །གདོན་མི་ཟ་བ་ནི་ཐེ་ཚོམ་མེད་པར་འགྲུབ་པར་སྦྱར་རོ། །སྦྱོར་བ་སྣ་ཚོགས་
པ་ནི་འདིར་བསྟན་པ་རྣམས་ཏེ། དེ་དག་ངེས་པར་བསྒྲུབས་པས་སྣང་བ་ཡེ་ཤེས་དང་། འབྱོར་པ་སྣ་ཚོགས་པ་རྣམས་མངོན་པར་འགྲུབ་ཅིང་ངེས་པར་གསལ་བའོ། །སྣང་བ་ཆེན་པོ་བདག་མེད་པར། །བརྒྱུད་པས་ཡོངས་སུ་འགྲུབ་པ་ཡིན། །ཞེས་བྱ་བ་ལ། རྣམ་པར་མི་རྟོག་པའི་ཡེ་
ཤེས་དང་ཆོས་ཉིད་སྟོང་པ་ཉིད་བདག་དང་གཞན་དུ་མི་དམིགས་པའི་ཕྱག་རྒྱ་ཉིད་གནང་བ་དང་། གནང་བ་ཉེ་བར་ཐོབ་པས། བརྒྱུད་པས་འགྲུབ་པའོ། །ཀུན་རྫོབ་གོང་མའི་དངོས་པོ་ལྟར། །བརྟན་པ་ལྟ་བུར་རབ་ཏུ་མཐོང་། །དོན་དམ་འོག་མའི་སྒྲ་ལྟ་བུར། །ཉོན་མོངས་ཀུན་སྲེག་
རང་བཞིན་གྱིས། །འོད་གསལ་བ་རུ་གནས་པ་ཡིན། །ཞེས་བྱ་བ་ལ། ངེས་པའི་ཚིག་སྒྲ་སྦྱོར་གྱི་སྒོ་ལས་དོན་དམ་པ་དང་། ཀུན་རྫོབ་གཉིས་ལ་ཡང་དག་པར་སྦྱར་ཏེ་གསུངས་པ་ལས། གོང་མའི་དངོས་པོ་ནི་སྣ་ཚོགས་པ་དང་། བརྟན་པ་མི་འཇིག་པར་མཐོང་བས་ན། 
ཀུན་རྫོབ་གོང་མའི་ཚིག་ཏུ་སྦྱར་རོ། །དོན་དམ་པ་ནི་ཉོན་མོངས་པའི་བུད་ཤིང་རྣམས་བསྲེགས་པའི་ཚུལ་དུ་སྦྱངས་པ་དང་། རྣམ་པར་རྟོག་པ་མེད་པས་རང་བཞིན་གྱིས་འོད་གསལ་བར་གནས་པས་ན་འོག་མའི་དགྲ་ལྟ་བུར་ཤེས་པར་བྱའོ། །སྙིང་པོ་དོན་དམ་ལ་འཇུག་པ། །ཕྱི་རིམ་
ཀུན་རྫོབ་ལ་བརྟེན་པ། །དང་པོར་སངས་རྒྱས་མི་གནས་ཤིང་། །སྔ་མ་བྱ་བའི་སྦྱོར་བས་བརྩོན། །ཞེས་བྱ་བ་ལ། སྙིང་པོ་དོན་དམ་པའི་ནི་བསྒྲུབ་པའི་བྱ་བའི་དངོས་པོ་བརྟན་པ་མི་འཇིགས་པ་ལ་བྱ་སྟེ། དེ་ལ་འཇུག་པར་འདོད་པས་ཕྱི་རིམ་ཞེས་བྱ་བ་ནི་གསོག་དང་

49-1-275a

གསོབ་ཏུ་གྱུར་པ་དངོས་པོ་ཇི་ལྟ་བ་བཞིན་དུ་ལས་དང་པོ་པ་རྣམས་ཀྱིས་ཐབས་ལ་མཁས་པས་ཡོངས་སུ་བསྒྲུབ་པར་བྱའོ། །དང་པོར་སངས་རྒྱས་མི་གནས་པ་ནི་ཐེག་པ་ཆེན་པོའི་སྔགས་ལ་ཞུགས་པ་ཙམ་གྱིས་རྨོངས་པ་ཁ་ཅིག་སངས་རྒྱས་པར་འདོད་དེ། 
དེ་ལྟ་བུའི་ང་རྒྱལ་ལ་བརྟེན་ནས་ཐབས་ཀྱི་ཡན་ལག་མ་ཤེས་པས་ངན་འགྲོར་ལྟུང་བར་འགྱུར་རོ། །དེ་ནས་སྔ་མའི་བྱ་བ་ལས་དང་པོ་པ་རྣམས་ཀྱི་ཐབས་ཀྱི་སྦྱོར་བ་རིམ་པ་ཇི་ལྟ་བ་བཞིན་དུ་བརྩོན་པར་བསྒྲུབ་པར་སྦྱར་རོ། །དབང་ཐོབ་པ་ལ་རློམ་སེམས་བྱེད། །བླ་མའི་
མན་ངག་ངེས་པ་ལས། །བླ་མ་ཉིད་ལ་ཅི་ནུས་ཀྱིས། །ཡང་དག་པར་ནི་མཆོད་པར་བྱ། །ཞེས་བྱ་བ་ལ། དབང་ཐོབ་པ་ཙམ་དག་ལ་བདག་རྡོ་རྗེ་སེམས་དཔར་ཁ་ཅིག་ལོམ་སེམས་པར་བྱེད་དེ། དེ་ལྟར་རློམ་སེམས་པར་ནི་མི་བྱ་བར་བླ་མ་དམ་པའི་མན་ངག་ངེས་པར་རྙེད་
པ་རྟོག་པ་དང་བྲལ་བའི་རིམ་པ་ཇི་ལྟ་བ་བཞིན་དུ་ཐབས་ཀྱི་ཡན་ལག་ཡང་དག་པར་ཤེས་པར་བྱས་ནས། བླ་མ་དམ་པ་ལ་བུ་དང་ཆུང་མ་དང་རིན་པོ་ཆེ་སྣ་ཚོགས་པས་ཡོངས་སུ་མཆོད་པར་བྱའོ། །ཅིའི་ཕྱིར་མཆོད་ཅེ་ན། བླ་མ་ལས་དངོས་གྲུབ་ཐོབ་པར་གསུངས་པས་
དངོས་གྲུབ་ཉེ་བར་བྱ་བའི་ཕྱིར་མཆོད་པའོ། །རྡོ་རྗེ་ངོ་བོ་ཀུན་འབྱུང་དང་། །གདུག་པ་ཐམས་ཅད་སྲེག་ཕྱིར་དང་། །དངོས་ལ་འཇུག་པ་ངེས་པའི་སྒྲས། །གོང་མའི་ཚིག་ཏུ་བརྗོད་པ་ཡིན། །ཞེས་བྱ་བ་ལ། རྡོ་རྗེ་ངོ་བོ་ཀུན་འབྱུང་བ་ནི་སྔགས་རྣམ་པ་གསུམ་དང་། ཕྱག་རྒྱའི་
སྙིང་པོ་ཡེ་ཤེས་ཀྱི་ཐབས་དང་། དེ་ཁོ་ན་ཉིད་ཐམས་ཅད་འབྱུང་བས་ན་ངོ་བོ་ཀུན་འབྱུང་ངོ་། །གདུག་པ་ཐམས་ཅད་མ་ལུས་པར་སྐྲག་ཅིང་རླག་པར་བྱེད་དེ། སྲེག་པས་ནི་སྲེག་པ་སྟེ་དངོས་པོ་འདི་ཉིད་དོ། །དངོས་པོ་ཉིད་ལ་མཐུན་པའི་ངེས་པའི་སྒྲ་སྦྱར་ན་གོང་མའི་རྡོ་རྗེ་མེ་ལྕེར་
གསུངས་པར་སྦྱར་རོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ཞེས་བྱ་བ་ལས་ལེའུ་གཉིས་པའི་བཤད་པའོ།།      །།གོས་སྔོན་ལག་ན་རྡོ་རྗེ་ཡིས། །ཞེས་པ་ནས། ལྷ་ཡི་སྦྱོར་བ་བཤད་པར་བྱ། །ཞེས་བྱ་བའི་བར་དུ་ནི། ལག་ན་རྡོ་རྗེ་གང་དག་སྒྲུབ་པའི་

49-1-275b

ཐབས་སུ་དཀྱིལ་འཁོར་ཞུས་པ་དང་། བཅོམ་ལྡན་འདས་ཀྱིས་ཡང་དག་པའི་དོན་དངོས་པོར་གྱུར་ན་ཁ་དོག་དང་དབྱིབས་དང་ལྷ་དང་སྔགས་ལ་སོགས་པ་མེད་དེ། འོ་ན་ཡང་འགྲོ་བའི་རྟོག་པ་བསལ་བ་དང་། ལས་དང་པོ་པས་སྒྲུབ་པའི་ཐབས་སུ་བཤད་པར་དམ་
བཅས་པར་ཤེས་པར་བྱའོ། །གང་ཞིག་མོས་པར་བྱེད་པ་ཡིས། །ཁྲུ་གསུམ་དཀྱིལ་འཁོར་ཕྱོགས་བཞི་པ། །ནགས་སམ་དུར་ཁྲོད་ཁང་སྟོང་ངམ། །གཙུག་ལག་ཁང་དང་མཆོད་རྟེན་ནང་། །དེ་དག་རྣམས་སུ་ངེས་པར་བརྩམ། །ཞེས་བྱ་བ་ལ། མོས་པར་རམ་
གྲུབ་པར་བྱེད་པའི་གང་ཟག་གིས་ཕྱོགས་བཞི་རུ་ཁྲུ་གསུམ་གསུམ་པའི་དཀྱིལ་འཁོར་གནས་གོ་སླ་བ་རྣམས་སུ་ངེས་པའམ། གདོན་མི་ཟ་བར་བརྩམ་པར་བྱ་བར་སྦྱར་བར་བྱའོ། །དང་པོ་བསྙེན་པ་རབ་གནས་པས། །བུ་མོ་བཅུ་དྲུག་སྟོན་མོ་བྱས། །བདག་གིས་
ཞག་གསུམ་ཁྲུས་བྱ་ཞིང་། །སྤྱི་བོ་ལྐོག་མ་སྙིང་ག་རུ། །གསང་བ་གསུམ་གྱི་ཡི་གེ་བརྟག །ཅེས་བྱ་བ་ལ་དང་པོ་བསྙེན་པ་ལ་བུ་མོ་ལོ་བཅུ་དྲུག་ལོན་པ་རྒྱལ་རིགས་སམ་བྲམ་ཟེའི་རིགས་སམ། རྗེའུ་རིགས་ལ་གཟུགས་དང་ཁ་དོག་ཕུན་སུམ་ཚོགས་པར་ལྡན་པ། ཞི་བ་བྱང་
ཆུབ་ཀྱི་སེམས་ལ་ལྷག་པར་ཆགས་པ་ལ། བདག་གི་སྔགས་ཆུ་དང་ལྡན་པའི་བུམ་པས་ཁྲུས་ཉི་མ་གསུམ་དུ་བྱས་ལ། ཙནྡན་དམར་པོའི་ལྡེ་གུས་གནས་རྣམ་པ་གསུམ་པོ་རུ་གསང་བ་གསུམ་གྱི་ཡི་གེའི་གདན་ཐིག་ལེ་ལེགས་པར་བསྐུ་བར་བྱའོ། །དེ་ཡང་བ་བ་སི་ཏ་བཛྲ་
ཧཱུཾ་ཞེས་པའི་སྔགས་ཀྱིས་ཡོངས་སུ་བསྐུས་ལ། སྐུ་གསུང་ཐུགས་ཀྱི་ཡི་གེ་བརྟན་པར་བྱ་བར་འབྲེལ་ཏོ། །རམས་སུ་བཙོས་པའི་གོས་ཉིད་ལ། །གུར་གུམ་ཐིག་ལེས་ངེས་བཏབ་སྟེ། །དེ་ཉིད་ལ་ནི་བསྐོན་པར་བྱ། །ཞེས་བྱ་བ་ལ། གོས་སྔོན་པོ་ལ་གུར་གུམ་གྱི་
ཐིག་ལེས་གནས་བཅུ་བདུན་དུ་བསྐུ་བར་བྱའོ། །སྐྱེས་པ་དང་ནི་སྤྲད་མི་བྱ། །ཞེས་པ་ནས། གནས་གང་ཡིན་པར་བདག་ལ་གཏད། །ཅེས་པའི་བར་ལ་སྐྱེས་པ་དང་ནི་སྤྲད་མི་བྱ་ནི་དེའི་བར་དུའོ། །དཀར་གསུམ་ནི་འོ་མ་དང་ཞོ་དང་འབྲས་གསུམ་མོ། །དེ་ཡོངས་

49-1-276a

སུ་གསལ་ལ་སྙིང་པོ་ནི་འདི་ཡིན་ཏེ། དེ་ཡིས་འབུམ་དུ་བཟླས་པའོ། །ཨོཾ་ཨ་མྲྀ་ཏེ་སིདྡྷ་བཛྲ་ཧཱུཾ་ཞེས་བསྔགས་ལ། རང་གི་སྔགས་བུ་མོའི་ཁར་བཏབ་པ་དང་། དེ་ཉིད་ལ་ཡང་བསླབ་པའོ། །དེ་ནས་བསྙེན་པ་རྫོགས་པ་དང་། །བུ་མོ་ལ་ཉོས་ཤིག་
དང་ལོངས་ཤིག་པའི་ཚིག་བརྗོད་ནས། ཀུན་འདུས་པ་ནི་ཚོང་འདུས་སོ། །དེར་མི་སྒེག་པར་དངོས་པོ་གང་ཡིན་པ་ཉོས་ལ། རིགས་མཐུན་པ་ནི་གོས་སྔོན་པོ་དེར་གཏུམས་ལ། གནས་ནི་གང་ན་གནས་པའི་ས་རུ། བདག་ནི་སྒྲུབ་པ་པོ་ལ་གཏད་པར་འབྲེལ་ཏོ། །དེ་ཡིས་
ཞག་གསུམ་སྦྱོར་བ་ཡིས། །ཕྱག་རྒྱ་ངེས་པ་ཉིད་དང་ཡང་། །སྙིང་པོ་གང་གི་སྦྱོར་བ་ཡིས། །དྲི་ཆུ་བཏབ་ལ་གྲངས་ཚད་དུ། །ཕྱིན་པར་ཡང་དག་བཟླས་པར་བྱ། །ཞེས་བྱ་བ་ལ། དེ་ཡིས་ཞེས་པ་ནི་རྣལ་འབྱོར་པའོ། །རྣལ་འབྱོར་པས་ནི་བའི་རྣམ་པ་ལྔ་ལ་སོགས་པ་
ལ་ཞག་གསུམ་གྱི་བར་དུ་བདག་གི་ཕྱག་རྒྱ་ནི་རྡོ་རྗེ་རྩེ་གཅིག་པའོ། །ལྷའི་སྙིང་པོ་ཀུན་ལ་གྲངས་ཉི་ཤུ་རྩ་གཅིག་ཏུ་ཡང་དག་པར་བཟླས་ལ། དྲི་ཆུས་ཀུན་ལ་ཕོག་པར་གཏོར་བར་བྱ་བར་འབྲེལ་ཏོ། །ལྷག་མ་ནི་གོ་སླ་བས་འདིར་མ་བཤད་དོ། །དང་པོར་བྱང་ཤར་མཚམས་
ཉིད་ནས། །ཀུན་བརྟེན་ཁ་དོག་རིགས་མཐུན་བླང་། །ཡོངས་སུ་བསྡུས་བྱས་ཉིད་དུ་ངེས། །གཉིས་པ་གཉིས་པར་ཡང་དག་ལྡན། །གསུམ་པ་གཅིག་གིས་ཚད་བྱས་ལ། །ཞེས་བྱ་བ་ལ། བྱང་ཤར་མཚམས་ནས་ཀུན་བརྟེན་པའི་སྟོབས་དང་ལྡན་པའི་སྒྲ་རྟགས་ཀྱིས་
དབྱེ་བས་འཇུག་སྟེ་ས་ལ་ངེས་པའོ། །ས་ཁ་དོག་རིགས་མཐུན་པ་ནི་སྔོན་པོར་ཤེས་པར་བྱའོ། །ས་དེ་ཡོངས་སུ་བསྡུས་པ་ལ་དཀྱིལ་འཁོར་ངེས་པར་བྱ་བར་འབྲེལ་ཏོ། །གཉིས་པ་གཉིས་པར་ཡང་དག་ལྡན་པ་ནི། །རབ་འབྲིང་ཐ་མའི་ཚད་ལ་བྱ་སྟེ། རབ་
ནི་གོང་དུ་བསྟན་པར་ཟད་དོ། །འབྲིང་ནི་གཉིས་པ་སྟེ་ཁྲུ་གཉིས་པ་ལས་བྱས་པའོ། །གསུམ་པ་གཅིག་པ་ནི་ཁྲུ་གཅིག་པ་ལ་ངེས་པར་བྱའོ། །དེ་ལྟར་ཚད་དུ་བྱས་པ་ལས། །ཤིན་ཏུ་མཉམ་པར་འཐས་པར་བྱ། །དེ་ཉིད་རྗེས་སུ་འཇུག་པ་ཡིས། །དང་པོར་སྲད་

49-1-276b

བུ་གང་ཡིན་པས། །ཁ་དོག་སེར་པོས་ཐིག་གདབ་བྱ། །ཞེས་བྱ་བ་ལ། རབ་འབྲིང་ཐ་མའི་ཚད་དུ་བྱས་པ་ལས་མཉམ་པ་དང་འཐས་པ་དང་ལེགས་པར་བྱས་ལ་དེ་ཉིད་རྗེས་སུ་འཇུག་པ་ནི་གང་ཟག་རྣལ་འབྱོར་པའོ། །དེ་ཡི་དང་པོ་སྲད་བུ་ནི། །བུ་མོས་བཀལ་བའི་དགུ་སྒྲིལ་ལོ། །
ཁ་དོག་སེར་པོ་ནི་ཡུང་བ་ལ་སོགས་པ་གང་ཡང་རུང་བའི་ཐིག་གདབ་པར་སྦྱར་རོ། །དཀྱིལ་འཁོར་དགུ་རུ་ངེས་པ་ལས། །འབྲུ་དང་ས་དང་རིན་ཆེན་གང་། །ཕྱེ་མ་ཉིད་དུ་བཏགས་པ་ཡིས། །དཀྱིལ་དུ་པདྨ་བཅུ་དྲུག་པ། །འདབ་མར་ལྡན་པར་བྲི་བར་བྱ། །ཞེས་བྱ་བ་ལ། ཐིག་
བཏབ་པའི་ལེ་ཚེ་དགུ་ལ་དཀྱིལ་དུ་རྒྱལ་པོ་དང་། བློན་པོ་དང་། བྲམ་ཟེ་དང་། དམངས་རིགས་ལ་རིམ་པར་སྦྱར་ལ། རིན་པོ་ཆེ་མུ་ཏིག་ལ་སོགས་པས་བྲི་བ་དང་། འབྲས་བཏགས་པ་ལ་རམས་ལ་སོགས་པས་ཁ་དོག་བསྒྱུར་བ་དང་། ས་ཁ་དོག་ལྔ་པ་ལ་ཞིབ་པར་བཏགས་པས་པདྨ་
བཅུ་དྲུག་དང་ལྡན་པ་བྲི་བར་སྦྱར་བར་བྱའོ། །ཤར་དང་ལྷོ་དང་ཞེས་བྱ་བ་ནས། ཀུན་ཀྱང་སྟག་གི་པགས་པ་ཡིས། །སྨད་ནི་ཡོངས་སུ་དཀྲིས་པ་ཡིན། །ཞེས་བྱ་བའི་བར་ནི་གོ་སླ་བས་འདིར་མ་བཤད་དོ། །དེ་སྟེང་གདན་ནི་རབ་གནས་པས། །གཙོ་བོ་ཉིད་ལ་ཉི་ཟླ་
ཡིས། །ཕྲག་པ་ལ་ནི་འཁོར་བར་རྒྱུ། །ཚངས་པ་དབང་པོ་ལྷ་ཆེན་གཉིས། །ཞབས་ཀྱིས་ཡོངས་སུ་མནན་པ་ཡིན། །ཞེས་བྱ་བ་ལ། ལྷའི་བུ་ཉི་མ་དང་ཟླ་བ་གཉིས་ཕྲག་པ་ལ་རྒྱུ་བར་བྱེད་དོ། །དེ་ཅིའི་ཕྱིར་ཞེ་ན། བདེ་བར་གཤེགས་པས་ལུང་གཉིས་སུ་གསུངས་
ཏེ། གཅིག་ནི་ལག་ན་རྡོ་རྗེའི་སྐུས་རི་རབ་ཀྱི་རྐེད་པར་སླེབ་པས་ཉི་མ་དང་ཟླ་བ་ཡང་རི་རབ་ཀྱི་རྐེད་པ་ནས་རྒྱུ་བས་ལག་ན་རྡོ་རྗེའི་ཕྲག་པ་ལ་ཕོག་པའོ། །གཅིག་ནི་འཇིག་རྟེན་པ་རྣམས་ལ་ཕྲིན་ལས་རྣམ་པ་གཉིས་ཀྱིས་འདུལ་བ་དང་། ཐབས་དང་ཤེས་རབ་ཏུ་ལྡན་པས་ཨཱ་
ལི་ཀཱ་ལི་སྙོམས་པར་འཇུག་པའི་དོན་གསུམ་དུ་རིག་པར་བྱའོ། །དེ་ཡང་ལུང་གང་ལས་གྲུབ་ཅེ་ན་རིམ་པ་ཇི་ལྟ་བ་བཞིན་དུ་ལག་ན་རྡོ་རྗེ་དབང་བསྐུར་བའི་རྒྱུད་དང་ལག་ན་རྡོ་རྗེ་བདེ་བར་རོལ་པའི་རྒྱུད་དང་ལག་ན་རྡོ་རྗེ་ཡུམ་ལྕང་ལོ་མའི་རྒྱུད་ལས་རིག་པར་བྱའོ། །ཚངས་པ་དང་

49-1-277a

དབང་པོ་གཉིས་སྲིད་པ་དང་། མྱ་ངན་ལས་འདས་པའི་རྟགས་སུ་བརྟེན་ནས་དེ་གཉིས་ཀ་ལ་མི་གནས་པ་དང་། ཡང་ན་རྟོག་པ་དང་མི་རྟོག་པ་གཉིས་ཀ་ལ་མི་གནས་པའི་རྟགས་དང་། ཡང་ན་བདུད་ཀྱི་སྙིང་ག་ཉམས་དགའ་བར་བཅོམ་ལྡན་འདས་རོལ་པས་
བཞུགས་པའོ། །ཤར་གྱི་ལྷ་ཆེན་རྣམ་རྒྱལ་ཉིད། །ཀེང་རུས་སྟེང་ན་གནས་པ་བཞིན། །གཞན་ཡང་དེ་ལྟར་གནས་པ་ཡིན། །ས་བོན་གནས་པ་གང་ཡིན་པ། །སྒྲ་དང་བཅས་པས་ཤེས་པར་བྱ། །ཞེས་བྱ་བ་ལ། ཤར་ན་བཞུགས་པའི་ཁྲོ་བོ་ཁམས་གསུམ་རྣམ་པར་
རྒྱལ་བ་ཀེང་རུས་སྐམ་པོའི་སྟེང་ན་བཞུགས་པ་བཞིན་དུ་ནག་པོ་ཆེན་པོ་ལ་སོགས་པའང་ཀེང་རུས་སྐམ་པོའི་སྟེང་ན་བཞུགས་པར་འབྲེལ་ཏོ། །དེ་ཡང་ཅིའི་ཕྱིར་ཀེང་རུས་སྐམ་པོའི་སྟེང་ན་བཞུགས་ཤེ་ན། ཐམས་ཅད་ཀྱང་རྣམ་པར་རྟོག་པ་དང་བྲལ་བའི་ཕྱིར་དང་། སྒྲའི་སྦྱོར་
བས་ཀ་རང་ཀ་ལ་གདུག་པ་རྣམས་སྐྲག་པར་བྱ་བའི་ཕྱིར་དང་། དྲག་པོའི་ལས་སུ་སྦྱོར་བས་ན་ཀེང་རུས་ལ་བཞུགས་པའོ། །ས་བོན་གནས་པ་དེ་ནི་དེ་དག་ཐམས་ཅད་སྐྱེད་པའི་ས་བོན་ལ་བྱ་སྟེ་ཡིག་འབྲུ་རྣམས་སོ། །སྒྲ་དང་བཅས་པ་ནི་བཅོམ་ལྡན་འདས་རྡོ་རྗེ་གར་མཁན་གྱི་
ཞལ་ནས་སྒྲ་དང་བཅས་པར་ཕྱུང་བའོ། །དེ་ཡང་ཇི་ལྟ་བུ་ཞེ་ན། ས་བོན་གྱི་ཡི་གེ་རེ་རེ་ལ་འོད་ཟེར་རིགས་མི་འདྲ་བ་རེ་རེ་དང་།  སྒྲ་མི་འདྲ་བ་རེ་རེ་ཡང་དག་པར་ཕྱུང་སྟེ་བསྒྲགས་པར་སྦྱར་རོ། །དང་པོ་གཙོ་བོ་སྐྱེད་བྱེད་གང་། །ཧཱུཾ་ལས་ངེས་པར་རྫོགས་བྱ་ཞིང་། །གཞན་རྣམས་
འདི་ལས་འབྱུང་བར་བསམ། །ཞེས་བྱ་བ་ལ། དང་པོར་གཙོ་བོ་ཕྱག་ན་རྡོ་རྗེ་ཉིད་ཀྱི་བསྐྱེད་པར་བྱ་བའི་ས་བོན་དུ་ཧཱུཾ་ནག་པོ་ལས་ཡང་དག་པར་ཤེས་པར་བྱའོ། །གཞན་རྣམས་འདི་ལས་ཞེས་པ་ནི་འོག་ནས་འབྱུང་བའི་ས་བོན་བཅུ་དྲུག་པོ་རིམ་པ་ཇི་ལྟ་བ་བཞིན་དུ་ཁམས་གསུམ་
རྣམ་པར་རྒྱལ་བ་ནས།  ཤ་ཟ་མའི་བར་དུ་ཁ་དོག་མི་འདྲ་བ་ནི་བླ་མའི་ངག་ལས་ཡོངས་སུ་རིག་པར་བྱ་ཞིང་དེ་རྣམས་ལས་འབྱུང་བའམ་བསྐྱེད་པར་འབྲེལ་ཏོ། །ལྷག་མ་ནི་གོ་སླའོ། །ེ། དེ་ལས་རགས་པ་གང་ཞིག་གིས། །བར་འཕྲ་ངེས་པར་བསྐྱེད་པར་བྱ། །དང་པོར་ཀུན་ཀྱང་

49-1-277b

བརྩིགས་པ་ཡིས། །པཾ་ལས་གྱུར་པ་སྣ་ཚོགས་པ། །ཡང་དག་པར་ནི་བསྐྱེད་པར་བྱ། །དེ་འོག་ཀཾ་ལས་རབ་སྐྱེས་པ། །སྐམ་པོར་ཡོངས་སུ་བརྟགས་པ་ཡིན། །ཞེས་བྱ་བ་ལ། རགས་པ་ནི་སྐུ་ཉིད་དོ། །བར་འཕྲ་ནི་དང་པོར་གཅིག་པའི་པཾ་དམར་པོ་ལས་བྱུང་བའི་པདྨ་
འདབ་མ་བཅུ་དྲུག་པ་སྣ་ཚོགས་པ་བསྐྱེད་པར་བྱའོ། །དེ་འོག་ཅེས་པ་ནི། དེའི་རྟིང་ལ་བྱུང་བས་དེའི་འོག་སྟེ། དེའི་སྟིང་དུ་ཀཾ་དཀར་པོ་ལས་ཡང་དག་པར་བྱུང་བའི་ཀེང་རུས་སྐམ་པོ་རབ་ཏུ་གནས་པའོ། །ལྷག་མ་ནི་བླ་མའི་མན་ངག་ལས་ཤེས་པར་བྱའོ། །
དེ་དག་རྣམས་ནི་རབ་རྫོགས་པའི། །སྐུ་རུ་ཡོངས་སུ་རྫོགས་བྱས་ལ། །བདག་གིས་རྣལ་འབྱོར་ཡང་དག་བསྒྲུབ། །ཅེས་བྱ་བ་ལ། དེ་དག་གི་ནི་གོང་དུ་སྨོས་པའི་གདན་དང་ཡིག་འབྲུ་དང་བླ་མའི་ངག་ལ་སོགས་པའི་ལས་རྫོགས་པའོ། །སྐུ་རུ་ནི་རང་རང་གི་ཆོ་ག་གསུམ་ལས་
རང་རང་གི་སྐུར་རྫོགས་པར་བྱས་ལ་ཞེས་པར་འབྲེལ་ཏོ། །དེ་ནས་བདག་རྣལ་འབྱོར་པས་མཆོད་པ་ལ་སོགས་པའི་རྣལ་འབྱོར་ཡང་དག་པར་སྒྲུབ་པར་འབྲེལ་ཏོ། །དེ་ནས་སྔགས་པ་བློ་ལྡན་པས། །རིགས་སུ་ངེས་པ་གང་ཡིན་པ། །ཐབས་འདི་ལ་ནི་འཇུག་
པར་བྱ། །ཞེས་བྱ་བ་ནི་རིགས་རྣམ་པ་ལྔ་ལས་མི་འདའ་བས་རིགས་ཀྱི་རྗེས་སུ་འབྲང་བས་རྣལ་འབྱོར་ཡང་དག་པར་བསྒྲུབ་པར་གསུངས་ཏེ།  སུ་ཡིས་ཤེ་ན། སྔགས་པ་ཤེས་རབ་ཅན་གྱིས་སོ། །དེ་ཡང་སྤྱིར་རིགས་ལ་བརྟེན་ཏེ་བསྒྲུབ་པར་གསུངས་སོ། །ཐབས་ནི་
འོག་ནས་སྟོན་པ་རྣམས་ལ་འཇུག་པར་འབྲེལ་ཏོ། །ཀུན་ལ་འཇུག་པར་འགྱུར་བ་ཡི། །ཁྱབ་པའི་བདག་པོ་ཆེན་པོ་ནི། །རིགས་ཀྱི་གཙོ་བོས་སྤྱི་ལ་ཁྱབ། །ཅེས་བྱ་བ་ནི་སྤྱིར་ཁྱབ་པ་རྣམ་པ་གསུམ་གྱིས་ཡོངས་སུ་སྟོན་ཏེ་སྐུ་གསུང་ཐུགས་ཀྱིས་ཁྱབ་པའོ། །ཀུན་ལ་
འཇུག་པ་ནི་ལས་ཀྱི་བྱ་བ་ཐམས་ཅད་ལའོ། །ཁྱབ་པའི་བདག་པོ་ནི་རིགས་ཀུན་ལ་འཇུག་པ་དང་། གཙོ་བོ་དང་བདག་པོར་འབྲེལ་པས་ན་བདག་པོར་འབྲེལ་ཏོ། །རིགས་ཀྱི་གཙོ་བོ་ནི་རིགས་ཐམས་ཅད་དེ་ལས་འབྱུང་བས་ན་གཙོ་བོ་ཡིན་ཏེ་དེ་ཡིས་ཀུན་ལ་ཁྱབ་པར་འཇུག་པར་

49-1-278a

བསྟན་པའོ། །མདུན་ནི་རྡོ་རྗེའི་རིགས་ཡིན་ཏེ། །ལྷ་མིན་ལ་སོགས་ངེས་པར་གཟིགས། །གཡས་ནི་རིན་ཆེན་རིགས་ཡིན་ཏེ། །ཤ་ཟ་ལ་སོགས་ཡང་དག་འཇིགས། །རྒྱབ་ན་གནས་པ་གང་ཡིན་པ། །པདྨའི་རིགས་སུ་ཡང་དག་ལྡན། །ནོར་ལ་
སོགས་པ་གང་དགོས་པ། །རེ་བ་བཞིན་དུ་སྐོང་བར་བྱེད། །གཡོན་ན་གནས་པ་གང་ཡིན་པ། །ལས་ཀྱི་རིགས་ཀྱི་ངེས་པ་ལས། །ཀླུ་དང་གནོད་སྦྱིན་ལ་སོགས་པ། །མ་རུངས་པ་རྣམས་ཡོངས་སུ་འཇིགས། །ཞེས་བྱ་བ་ལ། མདུན་ནི་ཤར་དུ་རིག་པར་བྱ་སྟེ། ཁམས་གསུམ་རྣམ་
པར་རྒྱལ་བ་ནི་རྡོ་རྗེའི་རིགས་སུ་ངེས་པས་ཚངས་པ་དང་ལྷ་མ་ཡིན་རྣམས་འཇིགས་པའོ། །གཡས་པ་ནི་ལྷོར་རིག་པ་སྟེ། ནག་པོ་ཆེན་པོ་རིན་པོ་ཆེའི་རིགས་སུ་ངེས་པས་གཤིན་རྗེ་དང་ཤ་ཟ་རྣམས་འཇིགས་པའོ། །རྒྱབ་ནི་ནུབ་ཡིན་ཏེ་རྣམ་ཐོས་སྲས་པདྨའི་རིགས་སུ་ངེས་ཏེ། ནོར་དང་
བཞོན་པ་ལ་སོགས་པ་རྣམས་ངེས་པར་སྟེར་བ་དང་གནོད་སྦྱིན་རྣམས་འདུལ་བར་གསུངས་སོ། །གཡོན་ནི་བྱང་དུ་རིག་པར་བྱ་སྟེ། བདུད་རྩི་ཐབ་སྦྱོར་གྱིས་ཀླུ་དང་ཡང་མ་རུངས་པ་རྣམས་ཡོངས་སུ་འཇིགས་པར་གསུངས་སོ། །གཞན་ཡང་ལྷག་མ་ཐམས་ཅད་ཀུན། །ཕོ་ཉའི་
ཚུལ་དུ་ངེས་པར་གནས། །ཞེས་པ་ནི་རྡོ་རྗེ་གནོད་སྦྱིན་ལ་སོགས་པ་ཐམས་ཅད་ཕོ་ཉའི་ཚུལ་དུ་ཡང་དག་པར་གནས་པར་འབྲེལ་ཏོ། །དང་པོ་ཉི་མ་ཤར་བ་ནས། །ལས་ཀྱི་སྦྱོར་བ་སྣ་ཚོགས་པ། །སོ་སོ་དག་པ་སྙིང་པོ་ནི། །གང་དུ་འབུམ་ལས་རབ་རྫོགས་པ། །བརྒྱ་རྩ་བརྒྱད་དུ་ངེས་པར་
བཟླས། །ཞེས་པ་ལ་དཀྱིལ་འཁོར་བྲི་བའི་སྔ་དྲོ་ཚོན་རྩི་ལྔ་ལ་ལས་ཀྱི་སྦྱོར་བ་སྣ་ཚོགས་པ་ཞེས་བྱ་བ་བརྗོད་དེ། དེ་ལ་སྙིང་པོ་བརྒྱ་རྩ་བརྒྱད་ཡང་དག་པར་བཟླས་ཞེས་པ་ནི། གོང་གི་བསྙེན་པའི་དུས་སུ་སྙིང་པོ་འབུམ་ལ་སོགས་པ་བཟླས་པའོ། །དེ་ནས་སྔ་དྲོའི་དུས་སུ་བརྒྱ་
རྩ་བརྒྱད་བཟླས་པས་སྦྱོར་བ་བྲི་བར་བྱའོ། །ཧཱུཾ་གི་སྒྲ་དང་རབ་ལྡན་པས། །བདག་ཉིད་ཁ་ནས་མེ་འབར་གསལ། །ཕྱག་རྒྱ་གནང་བར་རབ་བཅས་ཏེ། །དེ་ཉིད་སྟང་སྟབས་བསྐྱོད་པ་ཡིས། །གདུག་པ་ཐམས་ཅད་སྐྲག་བྱེད་པ། །བདེ་གཤེགས་མངོན་པར་དགྱེས་པར་བྱ། །

49-1-278b

ཞེས་བྱ་བ་ལ། སྔ་དྲོའི་དུས་སུ་རྒྱན་ཆ་ལྔ་ལ་སོགས་པ་ཡོངས་སུ་བགོས་ལ། རྡོ་རྗེ་དྲིལ་བུ་ངེས་པར་བཟུང་སྟེ་ཧཱུཾ་ཧཱུཾ་ཧཱུཾ་ཞེས་པའི་སྔགས་ཀྱིས་ཁ་ནས་མེ་འབར་བར་བསམས་ལ། ཕྱག་རྒྱ་ནི་གར་གྱིས་ཡང་དག་པར་བྱས་ལ། དེ་ཉིད་ཅེས་པ་ནི། དོན་དམ་པ་གཉིས་ལ་སྒྲ་རྣམ་པ་
གཉིས་འཇུག་སྟེ། རྣལ་འབྱོར་པ་དེ་ཉིད་ཀྱིས་ལག་ན་རྡོ་རྗེ་དེ་ཉིད་ཀྱི་སྟང་སྟབས་བྱ་བར་གསུངས་པ་སྟེ།  གཡས་པ་བརྐྱང་ལ་གཡོན་པ་ངེས་པར་བཀུག་ནས། རྡོ་རྗེ་རྒྱ་གྲམ་འགྲོས་ཀྱིས་ཕྱོགས་བཞིར་བསྐྱོད་པས་གདུག་པ་ཅན་ཐམས་ཅད་སྐྲག་པར་འགྱུར་བ་དང་། བདེ་བར་གཤེགས་
པ་རྣམས་གར་གྱིས་མངོན་པར་དགྱེས་པའོ། །རྡོ་རྗེ་དྲིལ་བུ་བཟུང་བྱས་ནས། །ཁྲོ་བོའི་ཆ་ལུགས་གང་ཡིན་པས། །ཕྱོགས་རྣམས་རྨོངས་པར་བྱེད་པ་ཡིན། །ལྷ་མོའི་གཟུགས་འཆང་གང་ཡིན་པས། །གཞན་གྱི་སེམས་ཀྱང་འཕྲོག་པར་བྱེད། །ཅེས་པ་ལ། དུས་རྣམ་
པ་གཉིས་ཀྱི་སྦྱོར་བས་གསུངས་པ་ཡིན་ཏེ། བགེགས་བསྐྲད་པ་དང་མཆོད་པ་ཉིད་ལ་སྦྱོར་བ་གསུངས་སོ། །དེ་ལ་ཁྲོ་བོའི་སྟང་སྟབས་ཀྱིས་རྡོ་རྗེ་དང་དྲིལ་བུ་བཟུང་བས་ཁ་ནས་ཧཱུཾ་འབར་བས་ཡང་དག་པར་བསྐྱོད་པས་གདུག་པ་རྣམས་བསྒྱེལ་ཏེ། ཅིའི་ཕྱིར་འཁྲུགས་ཤེ་ན་བརྒྱལ་
བས་སོ། །བརྒྱལ་བས་ཤར་ཕྱོགས་ལ་སོགས་པ་མི་ཤེས་སོ། །ལྷ་མོའི་གཟུགས་སུ་བདག་ཉིད་ཡང་དག་པར་བསྒྲུབས་ལ་གནས་པར་བྱ་སྟེ། ཇི་ལྟ་བུ་ཞེ་ན། ལས་ཀྱི་ལྷ་མོ་སྣ་ཚོགས་པ། །དབུ་རྒྱན་དང་གདུ་བུ་དང་། སྟོད་གཡོགས་ལ་སོགས་པ་རྒྱན་ཆ་བཅུ་
གཅིག་གིས་ཡང་དག་པར་བརྒྱན་ལ། ནུ་མ་ཅུང་ཟད་འབུར་བར་བྱ་སྟེ། མཆོད་པའི་རྫས་ཐམས་ཅད་རྡོ་རྗེའི་གླུ་དང་། གར་དང་། ཕྱག་རྒྱ་ལ་སོགས་པས་ཡང་དག་པར་མཆོད་པ་དང་།  འདོད་པའི་ཡོན་ཏན་ལྔས་སྐུ་ལ་ཡོངས་སུ་མཆོད་
པར་བྱའོ། །དེའི་གཟུགས་ཀྱིས་ལྷ་རྣམས་མཉེས་པ་དང་། འཇིག་རྟེན་པ་རྣམས་དབང་དུ་སྡུད་པར་འབྲེལ་ཏོ། །རེ་མིག་རྣམས་ཀྱི་བར་གང་ཡིན། །མེ་ལྕེའི་ཕྲེང་བས་ཡོངས་སུ་བྲི། །འཁོར་ལོའི་འོག་ཏུ་གནས་བྱ་བ། །ཆོས་འབྱུང་ཕྱག་རྒྱ་ངེས་པར་བྲི། །

49-1-279a

ཞེས་བྱ་བ་ལ། དང་པོར་དཀྱིལ་འཁོར་བྲི་བའི་སྐབས་སུ་ཤེས་པར་བྱ་སྟེ། རེ་མིག་ནི་དཀྱིལ་འཁོར་ལྔ་ལ་བྱ་སྟེ། དེའི་བར་དག་མེའི་འོད་ཀྱིས་བྲི་བར་འབྲེལ་ཏོ། །འཁོར་ལོ་ནི་དཀྱིལ་འཁོར་ལ་ཤེས་པར་བྱ་སྟེ། དེའི་འོག་ཏུ་ཆོས་འབྱུང་གི་ཕྱག་རྒྱ་གྲུ་གསུམ་པ། 
མཚན་མ་ཀུན་ལ་ཁྱབ་པར་བྲི་བར་བྱ་བར་འབྲེལ་ཏོ། །དེ་ཡང་ཅིའི་ཕྱིར་ཆོས་འབྱུང་གི་ཕྱག་རྒྱ་བྲི་ཞེ་ན། བཅོམ་ལྡན་འདས་ཀྱིས་འདི་སྐད་གསུངས་པའོ། །ཐབས་དང་ཤེས་རབ་ལྡན་པ་དང་། །ཀུན་འབྱུང་ཡུམ་དུ་ངེས་པར་གསལ། །རྟེན་འབྲེལ་ཡང་དག་འབྱུང་བ་ཡིན། །ཀུན་
རྫོབ་ལ་ནི་དོན་དམ་བརྟེན། །དོན་དམ་ཉིད་ལ་ཀུན་རྫོབ་ཡང་། །བརྟེན་པ་ཉིད་དུ་འགྱུར་བ་ཡིས། །དེ་བས་གནང་བ་མི་གསལ་བར། །ཆོས་འབྱུང་ཕྱག་རྒྱ་ངེས་པར་བྲི། །རྒྱས་པ་ལ་སོགས་མ་ཡིན་གྱི། །དྲག་པོའི་དཀྱིལ་འཁོར་ཡིན་པ་དང་། །དེ་བཞིན་དབྱིབས་སུ་རབ་གསལ་
བས། །དྲན་དང་བཅས་པས་བྲི་བར་བྱ། །ཞེས་བྱ་བ་ལ། ཆོས་ཐམས་ཅད་ཐབས་དང་ཤེས་རབ་ཏུ་འབྲེལ་པར་གནས་པ་དང་། ཆོས་ཐམས་ཅད་དེ་ལས་འབྱུང་བས་ན། དེ་ཡང་དག་པར་བྲི་བར་འབྲེལ་ཏེ། ཡང་རྟེན་ཅིང་འབྲེལ་པར་འབྱུང་བའི་ཆོས་སུ་དངོས་པོ་ཀུན་གྲུབ་
པས་བྲི་བར་བྱའོ། །ཇི་ལྟར་རྟེན་ཅིང་འབྲེལ་ཞེ་ན། ཀུན་རྫོབ་ལ་ཞེས་པ་གསུངས་ཏེ། ཀུན་རྫོབ་ལ་དོན་དམ་པ་བརྟེན་པ་དང་། དོན་དམ་པ་ལ་ཀུན་རྫོབ་བརྟེན་པའི་ཕྱིར་ཏེ། ཆོས་འབྱུང་ནི་དོན་དམ་པའི་ཕྱག་རྒྱ་ཡིན་པ་དང་། དཀྱིལ་འཁོར་ནི་ཀུན་རྫོབ་ཀྱི་ཕྱག་རྒྱ་ཡིན་པར་
འབྲེལ་ཏོ། །ཡང་ན་དྲག་པོའི་དཀྱིལ་འཁོར་ཡིན་པར་གསུངས་པས། སྐབས་འདིར་ཡང་དྲག་པོའི་སྐབས་ལ་བབ་པས་ན། དེ་ལ་ཡང་དབྱིབས་མཐུན་པའི་ཕྱིར་སྣང་བ་མི་གསལ་བར་བྲི་བར་བྱའོ། །སྣང་བ་མི་གསལ་བ་ནི་གོང་དུ་བསྟན་པར་ཟད་དོ། །དེ་བས་ན་རྣམ་པ་
ཐམས་ཅད་དུ་ཡང་རྣལ་འབྱོར་པས་ཆོས་འབྱུང་བའི་ཕྱག་རྒྱ་མཉམ་པར་གཞག་ཅིང་དྲན་པ་དང་བཅས་པས་བྲི་བར་གསུངས་སོ། །མཐུ་དང་ལྡན་པའི་གང་ཟག་ལ། །སྟོབས་ནི་ཤིན་ཏུ་ངེས་པར་སྐྱེད། །དཀྱིལ་འཁོར་ལྷ་ཉིད་མངོན་བསྒྲུབས་པས། །ལུས་ལ་གཟི་བརྗིད་འཇུག་

49-1-279b

པའོ། །ཞེས་བྱ་བ་ལ། མཐུ་ཞེས་པ་ནི། ཨ་ནུ་བྷ་བའི་སྦྱོར་བས་སྐབས་མང་པོ་ལ་འཇུག་སྟེ། སྐབས་འདིར་ནི་སྔོན་གྱི་ལས་འཕྲོ་དང་ལྡན་པ་ལ་བྱའོ། །དེ་དང་ལྡན་པའི་གང་ཟག་ལ་ནི་ཕྱག་ན་རྡོ་རྗེའི་སྟོབས་སྐྱེ་བར་འགྱུར་རོ། །དེ་ནས་དཀྱིལ་འཁོར་གྱི་ལྷ་རྣམས་མངོན་པར་
བསྒྲུབས་པས་ནི། ལུས་ནི་བདག་གི་ཕུང་པོའི་རྒྱུད་ལ་གཟི་བརྗིད་ཡེ་ཤེས་འཇུག་པར་གསུངས་སོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ཞེས་བྱ་བ་ལས་ལེའུ་གསུམ་པའི་བཤད་པའོ།།      །།ལག་ན་རྡོ་རྗེ་ཞེས་བྱ་བ་ནས། ཐབས་དེ་གང་ལགས་གསུང་
དུ་གསོལ་ཞེས་པའི་བར་དུ་ནི་གོ་སླའོ། །ནང་གི་བདག་ཉིད་ཅན་དང་ཡང་། །ཕྱི་ཡི་ཁྲུས་སོགས་རབ་བྱས་ལ། །རབ་གསལ་ལ་སོགས་རྒྱུན་ཆད་ནས། །གང་ཡང་རུང་བའི་ལོ་ཉིད་ལ། །སྟོན་ཟླ་ར་བ་ནས་བརྩམས་ལ། །ལྷ་མིན་ལྷ་དང་མེ་ཏོག་མཛེས། །དྲག་པོའི་དང་པོ་འདི་ཉིད་ལ། །
བདག་གིས་ངེས་པར་སྦྱོར་བ་བརྩམ། །ཞེས་བྱ་བ་ལ། དང་པོར་ནང་གི་བདག་ཉིད་ནི་ནང་སྟེ། ཕྱི་རོལ་གྱི་དངོས་པོར་མི་འཛིན་པ་དང་། བདག་དང་གཞན་དུ་མི་རྟོག་པ་དང་། སྟོང་པ་དང་མི་སྟོང་པའི་མཐའ་གཉིས་དང་བྲལ་བའོ། །ཕྱིའི་ཆོས་དང་ནང་གི་ཆོས་ཐམས་ཅད་རང་བཞིན་གྱིས་རྣམ་
པར་དག་པར་བྱེད་པས་ཁྲུས་མཆོག་ཏུ་གསུངས་སོ། །ཕྱིའི་ཁྲུས་ནི་གོ་སླའོ། །ཁྲུས་རྣམ་པ་གཉིས་བྱས་ནས་རབ་གསལ་ལ་སོགས་ཞེས་སྨོས་ཏེ། ཤེས་རབ་གསལ་བས་ན་རབ་གསལ་ལོ། །དེ་ཡང་ཤེས་པ་ལྔ་དང་རྒྱུན་ཆད་མེད་པ་ནི། རྣམ་པར་བཟའ་བར་མི་བྱ་བ་དང་། སོགས་
པ་ནི་མྱོས་འགྱུར་ཡང་ལོངས་སྤྱོད་པར་མི་བྱའོ། །གང་ཡང་རུང་བ་ནི་བྱི་བ་ལ་སོགས་པའི་ལོ་གང་ཡང་རུང་བའོ། །སྟོན་ཟླ་ར་བ་སྨོས་པ་ནི་སྟོན་ཟླ་ར་བ་ལ་མེ་ཏོག་དང་ལོ་ཏོག་ཀུན་དུ་རྒྱས་པས་དེའི་ཕྱིར། དེ་ནས་བརྩིས་པའི་ལྷ་མ་ཡིན་གྱི་བླ་མ་དོན་ཐམས་ཅད་ཀུན་དུ་འགྲུབ་པ་དང་། མེ་
ཏོག་མཛེས་བཀྲ་ཤིས་པར་གསུངས་པ་དེ་དང་། དྲག་པོ་བྱ་བ་ནི་འོད་ཟེར་དྲག་པོ་གང་ལ་ཡོད་པ་ལ་དྲག་པོ་ཞེས་སྨོས་པའོ། །དང་པོའི་ཞེས་བྱ་བ་ནི་ཆ་བཞིར་བགོས་པའི་དང་པོའོ། །དེ་གསུམ་ཡོངས་སུ་འཇོམས་པས་ན་བདག་རྣལ་འབྱོར་པས་སྦྱོར་བ་ཡང་དག་པར་བརྩམ་པར་

49-1-280a

བྱ་བར་གསུངས་སོ། །དེ་ནས་བདག་ཉིད་ལུས་ཉིད་ལ། །རྒྱན་ཆ་ལྔ་ཡིས་རབ་བརྒྱན་ཏེ། །ལུས་ལ་གོས་དག་སྔོན་པོ་ཉིད། །བླ་གོས་སྨད་གཡོགས་ཡང་དག་བཅིངས། །སྤྱི་བོ་ལ་སོགས་གནས་ལྔ་རུ། །སྦྲུལ་གྱིས་ཡོངས་སུ་བཅིང་བར་བྱ། །རང་ཉིད་དཀྱིལ་
འཁོར་ཤར་སྒོ་རུ། །འདུག་པས་སྦྱོར་བ་བརྩམ་པར་བྱ། །ཞེས་བྱ་བ་ལ། རྣལ་འབྱོར་པའི་ལུས་ལ་དབུ་རྒྱན་ལ་སོགས་པ་ལྔས་བརྒྱན་པར་བྱའོ། །སྟོད་གཡོགས་སྔོན་པོས་ལུས་ལ་བགོ་བར་བྱ་བ་དང་། སྲོག་སོང་བའི་སྦྲུལ་ལམ། ཡང་ན་ཤིང་ཤིང་ཤུན་ལས་གཟུགས་བྱས་པ་སྔ་མའི་
རྒྱན་ཆའི་རྩར་བཅིང་བར་སྦྱར་རོ། །བདག་ཉིད་ཤར་གྱི་ཕྱོགས་སུ་འདུག་པས་ལས་བྱ་བར་འབྲེལ་ཏོ། །དེ་ནས་དང་པོར་བླ་རེ་གང་། །ཞེས་བྱ་བ་ནས། གོས་སར་ཡང་དག་གཙང་བར་བྱ། །ཞེས་བྱ་བའི་བར་དུ་ནི་གོ་སླ་བས་འདིར་མ་བཤད་དོ། །དེ་ནས་སྔགས་པ་བློ་ལྡན་པས། །བདག་
ཉིད་བསྲུང་བའི་འཁོར་ལོ་བརྩམ། །རང་གི་ཕྱི་རོལ་མཚམས་རྣམས་སུ། །མི་འགྱུར་བས་ནི་བསིལ་ལྡན་བསྒོམ། །དེ་སྟེང་སྡུད་པའི་དངོས་པོ་གང་། །ཁ་དོག་ནག་པོ་ཡང་དག་བསམ། །དེ་ལས་ཁྱབ་བྱེད་རིགས་ལྔ་པ། །ཡང་དག་པར་ནི་བསམ་པར་བྱ། །དེ་དག་ཡོངས་སུ་
རྫོགས་བྱས་པས། །བདུད་རྩི་འཁྱིལ་པར་བདག་བསམས་ཏེ། །རྡོ་རྗེ་སྡིགས་མཛུབ་ཕྱག་རྒྱ་ཡིས། །སྔགས་བཟླས་པ་ཡིས་བགེགས་བསྐྲད་བྱ། །རིགས་གཙོའི་རྩེ་མོ་དེ་ཉིད་ལ། །ཀཾ་ལས་ལུས་སྐྱོབ་བསམ་བྱས་ཏེ། །སྤྱི་བོར་གནས་པར་ཁྱབ་པར་བསམ། །ཞེས་བྱ་བ་
ལ། སྐབས་འདིར་དང་པོར་འཇུག་པའི་ལས་ལ། བདག་ཉིད་ལ་བསྲུང་བའི་འཁོར་ལོ་བྱ་བར་གསུངས་ཏེ། དེའི་དང་པོར་བླ་མའི་མན་ངག་ལས་ཡང་དག་པར་ཤེས་པར་བྱ་བ་ནི། རྒྱུད་ལས་འབྱུང་བས་བདག་གིས་དོན་གསལ་བར་བརྗོད་པ་ནི་འགལ་བ་ཡོད་པའི་ཕྱིར་ཏེ། མི་གོ་བ་ཡིན་
པའོ། །དེ་ནས་ཞེས་པ་ནི་ཚིག་གི་ལྷག་མ་ལུས་པ་དང་། གཞན་ཉེ་བར་སྟོན་པའི་ཚིག་སྟེ། སྔགས་པ་ཤེས་རབ་ཅན་གྱིས་བསྲུང་བའི་འཁོར་ལོ་བྱ་བར་སྟོན་པའོ། །རང་གི་ཕྱི་རོལ་ནི་རང་གི་རྒྱུད་ལས་མ་གཏོགས་པའི་ཕྱི་རོལ་ལོ། །མཚམས་ནི་རྒྱུད་ལས་མ་གཏོགས་པ་དང་། ཕྱི་

49-1-280b

རོལ་གྱི་དངོས་པོའི་མཚམས་སུ་མི་འགྱུར་བ་ནི་ཡི་གེ་དང་པོའོ། །བསིལ་ལྡན་ནི་འོད་ཟེར་ཁ་དོག་དཀར་པོ་དང་ལྡན་པའོ། །དེའི་སྟེང་ནི་བསིལ་ལྡན་གྱི་སྟེང་དུ། སྡུད་པའི་དངོས་པོ་ནི། ཐུགས་ཀྱི་ཡི་གེ་ལ་ཁ་དོག་ནག་པོར་བསམ་པར་བྱ་བར་འབྲེལ་ཏོ། །དེ་ལས་ནི་སྡུད་པའི་
དངོས་པོ་ལ་སྟེ། ཁྱབ་བྱེད་ནི་ཀུན་དུ་ཁྱབ་པར་བྱེད་པ་དང་། མི་འཇིགས་པའི་གནས་པ་ལ་བྱ་སྟེ། དངོས་པོ་དེ་རིགས་ལྔ་པའི་འཁོར་ལོའི་རིགས་ལ་སོགས་པ་དང་ལྡན་པའོ། །དེ་ཡང་དག་པར་བསྒོམ་པར་འབྲེལ་ཏོ། །དེ་དག་ཡོངས་སུ་རྫོགས་པ་ནི། །གོང་དུ་སྨོས་པའི་
ཆོ་ག་རྣམ་པ་གསུམ་པའོ། །དེ་གསུམ་རྫོགས་པ་ལས་བདག་ཉིད་ཁྲོ་བོ་བདུད་རྩི་ཐབ་སྦྱོར་དུ་ཡང་དག་པར་བསམ་པར་བྱ་སྟེ། སྐུ་མདོག་ལྗང་གུ་ཕྱག་གཉིས་པ་ལ་ཐལ་མོ་ཕན་ཚུན་དུ་བསྣོལ་བ་ནི། དམ་ཚིག་གི་ཕྱག་རྒྱ་བཅས་ལ། དེ་ནས་ལས་ཀྱི་ཕྱག་རྒྱ་ནི། །གཡོན་
པ་དཀུར་བརྟེན་ཏེ་གཡས་པ་ནི། རྡོ་རྗེ་བཅིང་བའི་ཕྱག་གིས་སྡིགས་མཛུབ་ཏུ་བྱས་ལ། སྔགས་འདིས་བགེགས་བསྐྲད་པར་བྱའོ། །ཨོཾ་བིགྷྣཱཾ་ཀྲོ་དྷ་ཡ་ཧཱུཾ་ཕཊ། རིགས་གཙོའི་རྩེ་མོ་ནི་གོང་མའི་རིགས་ལྔ་ལས་མ་གཏོགས་པའི་ནང་གི་རྒྱུད་ཀྱི་རིགས་ལྔ་པ་དང་པོའི་རྩེ་མོ་ལ་ཡི་གེ་ཀཾ་
དཀར་པོ་ལས་ལུས་སྐྱོབ་པར་བྱེད་པ་ཡོངས་སུ་བསམ་པར་བྱས་ལ། སྤྱི་བོ་ནས་རྩེ་མོ་ཡང་དག་པར་བཙུགས་ཏེ། ཨོཾ་བཛྲ་ཀ་པ་ཙ་ཧཱུཾ་ཕཊ་སྭཱ་ཧཱ། ཞེས་པའི་སྔགས་ཀྱིས་ལུས་ཐམས་ཅད་ལ་ཁྱབ་པར་བསམ་མོ། །དེ་ཡང་འོད་ཟེར་གདུག་པ་དང་བཅས་པ་འབར་བར་
བསམ་པར་འབྲེལ་ཏོ། །འདིས་ནི་སའི་ཆོ་ག་དང་ཐིག་གི་ཆོ་ག་གཉིས་ཡོངས་སུ་རྒྱས་པར་སྟོན་པའི་སྐབས་ཏེ། དེ་ནས་གཏོར་མ་ཞེས་བྱ་བ་ནས། ཕྱོགས་བཞི་མཚམས་སུ་ངེས་པར་གདབ། །ཅེས་པའི་བར་དུ་གོ་སླ་བས་འདིར་མ་བཤད་དོ། །ཁ་ནས་ཧཱུཾ་གི་སྒྲ་འབར་ཞིང་། །
སྣ་ཚོགས་རྡོ་རྗེའི་གར་ཐབས་ཀྱིས། །ལན་གསུམ་བར་དུ་བསྐོར་བ་བྱ། །དེ་ནས་གདུག་པ་གང་ཡིན་པས། །ཕྱོགས་བཞི་དག་ཏུ་སོང་བ་ལ། །ས་ཕྱོགས་ངེས་པར་གཙང་བར་འགྱུར། །ཞེས་བྱ་བ་ལས། ཁ་ནས་ཧཱུཾ་ཧཱུཾ་ཧཱུཾ་ཞེས་པའི་སྒྲ་དྲག་པོ་དག་ཕྱུང་བས་གདུག་པ་རྣམས་ཀྱི་ཁ་

49-1-281a

ནས་མེ་འབར་བ་མཐོང་བའོ། །སྣ་ཚོགས་རྡོ་རྗེ་གར་ཐབས་ནི། །ལག་པ་གཡས་པར་བེ་ཅོན་སྔོན་པོ་བཟུང་ནས། གཡོན་པ་རྡོ་རྗེ་ཐོགས་པས་སྙིང་གར་བཟུང་ལ། རྐང་པ་གཡོན་པ་ལྟེ་བར་གནས་ཏེ། གཡས་པ་ཕྱོགས་བཞི་རུ་རྡོ་རྗེ་རྩེ་གསུམ་པའི་
གོམ་པ་འདོར་བ་དང་། དེ་དང་མཐུན་པར་བེ་ཅོན་གྱིས་ཐབས་དང་། ཤེས་རབ་ལ་བསྐོར་བས་ས་ལ་གདབ་པར་བྱའོ། །དེ་ནས་གོམ་པ་གཅིག་གིས་བར་དུ་གསལ་བར་འབྲེལ་ཏོ། །དེ་ལྟར་ཡན་ལག་གསུམ་གྱི་བར་དུ་བསྐོར་བས། གདུག་པ་རྣམས་ཕྱོགས་གཞན་དུ་
བྱེར་ཏེ། ས་ཕྱོགས་དེ་གདུག་པས་གཙང་བར་གྱུར་པར་འབྲེལ་ཏོ། །དེ་ནས་ཐིག་སོགས་བཏབ་པ་ཡིས། །ཞེས་པ་ནས། ཤེས་རབ་ཐབས་ཀྱིས་གསལ་བར་བརྟགས། །ཞེས་པའི་བར་དུ་ནི། སྟ་གོན་གྱི་ཆོ་ག་རྒྱས་པར་བསྟན་པར་རིགས་པ་ནི་རྒྱུད་གཞན་དང་མཐུན་པར་
འབྲེལ་ཏོ། །སངས་རྒྱས་དཀྱིལ་འཁོར་བཞེངས་བྱའི་ཕྱིར། །བདག་གིས་དྲག་པོ་དང་པོ་ལ། །ཕྱེ་མ་ལྔ་དང་སྔགས་དག་དང་། །ཕྱག་རྒྱ་བཅས་པས་བྱིན་གྱིས་བརླབ། །ཅེས་བྱ་བ་ལ། བདག་རྣལ་འབྱོར་པས་འོད་ཟེར་དྲག་པོ་དང་བཅས་པའི་དང་པོའི་ཉི་མ་ཤར་བའོ། །ཕྱེ་མ་
ནི་རབ་འབྲིང་ཐ་མ་གསུམ་གྱིས་ཕྱེ་མའོ། །དེ་ལ་སྔགས་ནི་འདི་དག་གོ། །དཀར་པོ་ལ་སོགས་པ་ཐམས་ཅད་ལ། རིམ་པ་བཞིན་དུ་རིན་པོ་ཆེ་འབར་བའི་ཕྱག་རྒྱ་བཅས་ལ། ཨོཾ་སྭ་སྟི་མུཀྟི་བྷ་བ་ཏི་ཧཱུཾ། ཨོཾ་པི་ཏ་སུ་དྷ་ར་བྷ་ར་ན་བྷ་བ་ཏི་ཧཱུཾ། ཨོཾ་རཀྟོ་བོ་བ་ལ་བྷ་བ་བ་ཏི་ཧཱུཾ།  ཨོཾ་ཧ་རི་
ཏ་མ་ར་ཀ་ཏ་བྷ་བ་ཏི་ཧཱུཾ། ཨོཾ་ཀྲྀཥྞ་ཀཾ་ཀ་ནི་བྷ་བ་ཏི་ཧཱུཾ། ཞེས་བྱིན་གྱིས་བརླབ་པ་ནི་རིམ་པ་ཇི་ལྟ་བ་བཞིན་དུ། མུ་ཏིག་དང་།  གསེར་དང་། བྱི་རུ་དང་། སློག་བཙོང་དང་། མུ་མེན་དུ་བརླབ་པར་སྦྱར་རོ། །དེ་ནས་སྣོད་དག་ཐོད་པ་ལ། །བྱས་པས་རྡོ་རྗེའི་ཕྱག་རྒྱ་རབ། །ངེས་པས་
ལས་ཀྱི་སྦྱོར་བ་བརྩམ། །ཕྱོགས་སུ་ལེགས་པར་བསྐོར་བ་ཡིས། །དབུགས་རྒྱུ་བ་ཡི་དངོས་པོ་གང་། །ཡི་གེ་མངོན་པར་གསལ་བ་ཡིས། །རྒྱུན་མི་འཆད་པར་བྲི་བར་བྱ། །ཞེས་བྱ་བ་ལ། སྣོད་ནི་ཐོད་པའི་དུམ་བུ་ལས་བྱས་པས་ཕྱེ་མ་དེར་བླུགས་པར་བྱ་བར་འབྲེལ་ཏོ། །

49-1-281b

རྡོ་རྗེ་ཕྱག་རྒྱ་ནི་རྡོ་རྗེ་རྩེ་གཅིག་པའི་ཕྱག་རྒྱ་དང་། གུང་མོ་མཐེ་བོང་སྦྱར་བའི་བར་ནས་ཚོན་རྩི་དགྱེ་བར་བྱ་སྟེ། མཛུབ་མོ་བརྐྱང་བའོ། །དེ་ཡིས་རབ་ཏུ་གསུངས་པས་སྦྱོར་བ་ནི་བྲི་བར་བྱའོ། །ཕྱོགས་སུ་ལེགས་པར་བསྐོར་བ་ཡིས། །ཞེས་པ་ནི། ཕྱོགས་སུ་
གཡས་ཕྱོགས་སུ་མ་འཁྲུལ་པར་བྲི་བར་འབྲེལ་ཏོ། །དབུགས་རྒྱུ་བའི་དངོས་པོ་ནི་བླ་མའི་མན་ངག་གིས་ཤེས་པར་བྱ་སྟེ། སྡུད་པའི་དངོས་པོའོ། །དེའི་ཡི་གེ་མངོན་པར་གསལ་བ་ནི་མངོན་པ་ནི་ས་ལ་ཕྲེང་བར་འབྱུང་བའོ། །གསལ་བ་ནི་སྒྲ་དག་པར་བརྗོད་པ་ཉིད་དོ། །དབུགས་རྒྱུན་མི་འཆད་
པར་བྲི་བར་འབྲེལ་ཏོ། །སྐབས་ཀྱི་སྐད་ཅིག་ཤེས་པ་ལས། །བར་དུ་ཁྲོ་གཉེར་བསྟན་པར་བྱ། །དང་པོ་ནག་པོ་བྲི་བྱ་ཞིང་། །གཉིས་པ་དཀར་པོ་ངེས་པར་དགྱེ། །གསུམ་པ་ཉིད་ལ་སེར་པོ་སྟེ། །བཞི་པ་དམར་པོ་ཡང་དག་ལྡན། །ལྔ་པ་ལྗང་གུ་བྲི་བྱ་ཞིང་། །དྲུག་པ་ཁ་དོག་
སྣ་ཚོགས་རྒྱས། །ཞེས་བྱ་བ་ལ། སྐབས་ནི་ཕྱོགས་དང་མཚམས་སུ་བབ་པ་ལའོ། །ཕྱོགས་གང་ཡང་རུང་བ་དང་མཚམས་སུ་བབ་ན་ཧཱུཾ་ཕཊ་ཅེས་པའི་སྔགས་བཏོན་ལ། ཁྲོ་གཉེར་སྟོན་པར་འབྲེལ་ཏོ། །ལྷག་མ་ནི་གོ་སླའོ། །དྲུག་པ་ཁ་དོག་སྣ་ཚོགས་རྒྱས། །ཞེས་བྱ་བ་ནི།  
ཁ་དོག་སྣ་ཚོགས་ཕན་ཚུན་དུ་བསྲེས་ནས་དམར་སྐྱ་ལ་སོགས་པར་སྦྱར་བ་ལ་བྱའོ། །དཀྱིལ་འཁོར་ལས་ཉིད་རྫོགས་པ་དང་། །རྫས་སུ་ཡང་དག་ལྡན་བྱས་ཏེ། །གྲུ་བཞི་དག་ཏུ་བྱང་ཤར་གྱི། །མཚམས་ནི་ས་གང་བུ་མོ་ཡིས། །བླངས་པ་ལས་བྱས་མཆོད་རྟེན་ནི། །
སྔོན་པོ་བཞི་དག་ཡོངས་སུ་གཞག །དེ་ཡི་འཁོར་ལོའི་རྩེ་མོ་ལ། །གོང་གི་སྲད་བུ་གདགས་བྱ་སྟེ། །མེ་ཏོག་སྔོན་པོའི་ཕྲེང་བ་ཡིས། །འཁོར་བར་ཡོངས་སུ་བརྒྱན་པར་བྱ། །བུམ་པ་སྔོན་པོ་བཅུ་བདུན་ཉིད། །མཐའ་ཡི་ཕྱོགས་སུ་ངེས་པར་གཞག །ཅེས་བྱ་བ་ལ། 
དཀྱིལ་འཁོར་བྲི་བ་རྫོགས་པ་དང་། །འདི་ནས་མར་མཆོད་པའི་རྫས་བཤམ་པ་གསུངས་ཏེ། དཀྱིལ་འཁོར་གྱི་ཟུར་བཞི་དག་ཏུ། བྱང་ཤར་མཚམས་ནས་བུ་མོས་སྔོན་པོ་བླངས་པ་ལ། སྐུ་གདུང་རྒྱར་སོར་བཅུ་གཉིས་པ་ལས། དཔང་དུ་སོར་ཉི་ཤུ་རྩ་བཞི་པ་བྱས་ལ།

49-1-282a

དེའི་འཁོར་ལོའི་རྩེ་མོ་ལ་ཚོན་སྐུད་སྣ་ལྔས་བརྒྱན་པ་སྟེ། མེ་ཏོག་གིས་ཡོངས་སུ་བྲི་བར་འབྲེལ་ཏོ། །བུམ་པ་སྔོན་པོས་བསྐུས་པའི་ལྷའི་གྲངས་སུ་སྦྱར་བས། དཀྱིལ་དུ་གཅིག་དང་ཕྱོགས་མཉམ་པར་བཀོད་པའོ། །སྨན་དང་སྤས་དང་ཞེས་པ་ནས། །ལུས་
ལ་མངོན་པར་ཕྱོགས་པས་གཞག །ཅེས་པའི་བར་དུ་གོ་སླའོ། །དེ་ནས་སྔགས་པ་བློ་ལྡན་པས། །ཞེས་པ་ནས། ཕྱི་མ་རྣམས་ཀྱིས་སྣང་མི་བྱ། །ཞེས་པའི་བར་དུ་ནི།  བཅུ་བདུན་བཅུ་བདུན་དུ་རྫས་ཀུན་ལ་ཤེས་པར་བྱའོ། །དེ་ལ་གདུགས་དང་རྒྱལ་མཚན་དང་། བ་དན་ནི་
བུམ་པ་ལ་གཟུགས་པར་བྱའོ། །ཕྲེང་བ་ནི་བེ་ཅོན་ལ་གདགས་པར་བྱ་བ་དང་། ཚངས་པའི་སྐུད་པ་ནི་རལ་གྲིའི་རྩེ་མོ་ལ་གདགས་པར་བྱའོ། །བདག་པོ་ནི་ལག་ན་རྡོ་རྗེ་དངོས་ཏེ། དེའི་ན་བཟའ་དར་རམ་རས་སམ་སྣམ་བུ་ལ་གུར་གུམ་གྱི་ཐིག་ལེ་ཡོངས་སུ་བྲིས་ལ་དབུལ་བར་བྱའོ། །ཡོལ་
བ་སྔོན་པོས་དཀྱིལ་འཁོར་བསྐོར་བར་བྱ་བ་དང་། བླ་རེས་སྟེང་ནས་ཕུབ་ནས་གཞན་ལ་སྣང་བར་མི་བྱ་བར་འབྲེལ་ཏོ། །གལ་ཏེ་སྣང་བར་གྱུར་པ་ན།  རང་གི་ལུས་ནི་མ་གཏོགས་པའི། །གཞན་རྣམས་བརླག་པར་འགྱུར་བ་ཡིན། །དེ་བས་ལེགས་པར་བསྒྲིབས་པ་ཡིས། །
ཕྱི་རོལ་གཞན་ལ་བསྟན་མི་བྱ། །ཞེས་བྱ་བ་ལ། གལ་ཏེ་གཞན་རྣམས་ཀྱིས་མཐོང་བར་འགྱུར་བ་ན། རང་གི་ལུས་ནི་ལག་ན་རྡོ་རྗེ་གོས་སྔོན་པོ་ཅན་གྱི་རིམ་པ་དང་དབང་ལེགས་པར་ཐོབ་པ་ལ་བྱ་སྟེ། དེ་མ་ཡིན་པ་རྣམས་བརླག་པར་འགྱུར་བ་ནི། དམ་ཚིག་ལས་འདས་པས་
ནད་དང་གདུག་པས་འཚེ་བར་བྱེད་དོ། །དེ་བས་ན་བདག་རྣལ་འབྱོར་པས་ལེགས་པར་བསྒྲིབས་པས་ཅི་ནས་ཀྱང་ཕྱི་རོལ་གཞན་ལ་བསྟན་པར་མི་བྱ་བར་སྦྱར་རོ། །གང་ཟག་གཅིག་པུ་གནས་པ་ཡིས། །ལས་ཀྱི་སྦྱོར་བ་འདི་བརྩམ་བྱ། །ཞེས་པ་ལ། མི་མང་པོ་རྣམས་ཡོངས་
སུ་མི་བསྙེན་པར་བདག་ཉིད་གཅིག་པུས་འོག་ནས་འབྱུང་བའི་ལས་རྣམས་སྤྱད་པར་གསུངས་སོ། །ཕྱག་དག་སྔོན་དུ་འགྲོ་བ་ཡིས། །མཆོད་པའི་ལས་ལ་མཉམ་པར་གཞག །བདག་ཉིད་ལས་ཀྱི་ཕྱག་རྒྱས་གནས། བསམ་པ་སྔོན་དུ་གྱུར་པ་ཡིས། །ཀུན་གྱི་འབྲས་བུ་གང་

49-1-282b

ཡིན་པ། །བདག་གིས་གསལ་བ་རབ་ཏུ་བརྟག །སྔགས་དང་ཕྱག་རྒྱ་རབ་ལྡན་པའོ། །མཆོད་པ་འདི་དག་ངེས་པ་ལས། །བགེགས་བསལ་ཡེ་ཤེས་རབ་དབབ་པའི། །རྣལ་འབྱོར་རྫོགས་པས་ཡང་དག་གནས། །རང་རང་རིགས་ཀྱི་ཕྱག་རྒྱ་ཡིས། །སྔགས་བཟླས་པ་
ཡིས་དབུལ་བར་བྱ། །ཞེས་བྱ་བ་ལ། འདི་ནས་མར་མཆོད་པའི་རིམ་པར་གསུངས་ཏེ། དང་པོར་བླ་མའི་མན་ངག་གིས་སྤྱན་དྲང་བར་བྱ་བ་དང་། ཚིག་གིས་ཀྱང་འདི་ལྟར་སྤྱན་དྲང་བར་བྱའོ། །ཨོཾ་བདེ་གཤེགས་གཙོ་བོ་ཀུན་ཁྱབ་དང་། །ལྷ་རྣམས་ཕྱོགས་སུ་འཁོར་བ་རྣམས། །
བདག་དང་སེམས་ཅན་རྒྱུད་སྦྱངས་ཕྱིར། །སྐད་ཅིག་ཙམ་གྱིས་གཤེགས་སུ་གསོལ། །ཞེས་བརྗོད་ལ་སྤྱན་དྲང་བར་བྱའོ། །དེ་ནས་བཞུགས་སུ་གསོལ་བ་ལ་སོགས་པ་ཡོངས་སུ་རྫོགས་པར་བྱས་ལ། དེ་ནས་ཕྱག་འཚལ་བ་དང་། མཆོད་པའི་ལས་ལ་མཉམ་པར་གཞག་པ་ནི་
ཡང་དག་པར་སྤྱད་པར་བྱ་སྟེ། བདག་ཉིད་ལས་ཀྱི་ཕྱག་རྒྱ་ནི། །དངོས་པོ་མ་བསྒྱུར་བར་དམ་ཚིག་སེམས་དཔའི་ངོ་བོས་གནས་པ་ལ་བྱའོ། །བསམ་པ་སྔོན་དུ་གྱུར་པའི་གང་ཟག་རྣལ་འབྱོར་པས་དམིགས་པར་བྱ་སྟེ། ཀུན་གྱི་འབྲས་བུ་ནི་སྟོང་པ་ཉིད་ལ་བདག་གིས་གསལ་བར་
སྐད་ཅིག་ཡུན་རིང་བར་རབ་ཏུ་བརྟག་པར་འབྲེལ་ཏོ། །སྔགས་དང་ཕྱག་རྒྱ་ནི་འདི་ལྟར་སྦྱར་ཏེ། སྔགས་ནི་འོག་ནས་སྟོན་ཏོ། །ཕྱག་རྒྱ་ནི་དང་པོར་གར་གྱིས་སྐུ་གསུང་ཐུགས་སུ་ངེས་པར་སྦྱར་ནས། བསམ་པས་ཀྱང་མཆོད་པའི་སྤྲིན་རྒྱས་པར་སྤྲོས་ལ། པདྨ་ཁ་འབུས་ལྟར་
བྱས་ལ། སྤྱི་བོའི་སྟེང་དུ་གནས་པ་དང་། གཡས་གཡོན་གྱི་མཐེབ་སྲིན་ངེས་པར་སྦྱར་ལ་འདུད་དེ། གཞན་རྣམས་བཀུག་པས་གཡོན་པའི་མཛུབ་མོ་བསྒྲེང་ནས་སྣའི་ཐད་ཀར་གནས་པ་དང་། གཡས་གཡོན་གུང་མཐེབ་སྦྱར་ནས་སྣ་སྤྲད་དེ། མཛུབ་མོ་གཉིས་ཀྱིས་
ཀྱང་བསྒྲེང་བས་སྣ་སྤྲད་པར་བྱས་ནས། གཞན་རྣམས་ཡོངས་སུ་བརྐྱང་ནས་མིག་གི་ཐད་ཀར་གནས་པ་དང་། མཐེབ་སྲིན་གཉིས་སྦྱར་བས་སྟེང་དུ་བསྟན་ཏེ། སྙིང་གར་གནས་པ་དང་། ལག་པ་གཉིས་ཀྱིས་ཐི་བ་ལྟར་སྦྱར་ནས། སྣ་སྒོའི་ཐད་ཀར་གནས་པ་དང་། ལག་

49-1-283a

པ་གཉིས་བསྐོར་ཏེ། མཐེ་བོང་གཉིས་ཅུང་ཟད་བསྣོལ་ཏེ། གུང་མོ་གཉིས་ཅུང་ཟད་བརྐྱང་བས་ཁ་སྦྱོར་དུ་གནས་ཏེ། རྣ་བ་གཡས་པའི་ཐད་ཀར་གནས་ཏེ། གཟུང་བ་དང་། གར་གྱི་ཕྱག་རྒྱ་དངོས་དང་། ཕྲེང་བ་འཛིན་པའི་ཚུལ་དང་། འཁྱུད་པའི་ཕྱག་རྒྱ་དང་། སྣ་
ཚོགས་པའི་ཕྱག་རྒྱ་ཡང་དག་པར་བཅས་ལ་དབུལ་བར་སྦྱར་རོ། །དེའི་དང་པོར་བགེགས་ནི་དྲི་ཆུ་ལ་སྔགས་ཀྱིས་བཏབ་ལ་བསྐྲད་པ་དང་། ཡེ་ཤེས་དབབ་པས་ཡོངས་སུ་གཟུང་བའོ། །དེ་ཡི་སྔགས་དང་མཆོད་པ་དང་། །སྡིག་པ་བཤགས་པའི་ཕྱག་རྒྱ་ཡིས། །ཡང་དག་པར་
ནི་བཤགས་པ་ནི། །ཕྱག་རྒྱ་གསུམ་ལས་ཤེས་པར་བྱའོ། །སྔགས་ནི་པ་བ་དྷེ་ས་ན་ལ་སོགས་པའི་སྔགས་ཀྱིས་ཡང་དག་པར་ཤེས་པའོ། །སྡིག་པ་བཤགས་པ་ནི་སྨྲེ་སྔགས་ཞེས་པ་ནས། གནས་བཞིའི་བར་དུ་ནི་གོ་སླ་བས་མ་བཤད་དོ། །གོང་དུ་བསྟན་པའི་ཕྱག་རྒྱ་ནི། །
སྐབས་འདི་དག་ཏུ་བསམ་པར་བྱ། །དང་པོ་རྒྱུད་ལས་སྐྱེས་པ་ལས། །ཕྱི་ནས་རིང་པོ་མི་གནས་ཤིང་། །རང་བཞིན་དུ་ནི་འོད་གསལ་བསྒོམ། །ཞེས་བྱ་བ་ལ། ཡན་ལག་བདུན་རྣམ་པར་དག་པར་བ་སྒོམ་པ་དང་། སྤྱད་པ་ལས་དང་གོང་དུ་བསྟན་པ་ནི། སྟོང་པ་ཉིད་
སྐབས་འདིར་བསྒོམ་པར་གསུངས་སོ། །དང་པོ་རྒྱུ་ལས་སྐྱེས་ཞེས་བྱ་བའི་ཚིག་འདི་ནི་སྐབས་གཉིས་སུ་ཤེས་པར་བྱ་སྟེ། གཅིག་ནི་བདུན་རྣམ་པར་དག་པ་དང་། སེམས་ཙམ་དུ་དམིགས་པའི་རྒྱུ་ལས་སྐྱེས་པ་ལས། ཕྱི་ནས་སྟོང་པ་ཉིད་སྔ་མའི་དངོས་པོར་མི་གནས་པར་རང་བཞིན་དུ་
འོད་གསལ་བར་བསྒོམ་པའོ། །གཅིག་ནི་དཀྱིལ་འཁོར་གྱི་རྒྱུ་ཡི་རྒྱུ། དེ་ལས་སྐྱེས་པ་ནི་སྒྲའི་སྦྱོར་བས་བསྡུས་པ་ལ་འཇུག་པས། རྒྱུའི་འབྲས་བུ་སྟོང་པ་ཉིད་ཀྱིས་གཤེགས་སུ་གསོལ་བར་འབྲེལ་ཏོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ལས་ལེའུ་བཞི་པའི་བཤད་པའོ།།      །།
དེ་ནས་ཕྱག་ན་རྡོ་རྗེ་ཡིས། །གསང་བའི་མགོན་ལ་འདི་སྐད་གསོལ། །བསམ་པ་རབ་ཏུ་རྫོགས་པ་ཡིས། །ནང་གི་རྣལ་འབྱོར་གསུང་དུ་གསོལ། །ཞེས་བྱ་བ་ལ། ལག་ན་རྡོ་རྗེ་གསང་བའི་མགོན་ནི་གསང་བ་རྣམ་པ་གསུམ་གྱི་བདག་པོར་གྱུར་པ་སྟེ།  དེ་མགོན་དུ་ཇི་ལྟར་འོང་ཞེ་ན། གསང་བ་དང་ལྡན་པ་ལ་

49-1-283b

ལ་གསང་བའི་མགོན་ནོ། །དཔེར་ན་རལ་གྲིའི་འཁོར་ལོ་མཁས་པའི་མི་ལ། རལ་གྲིའི་མགོན་པོ་ཞེས་ཟེར་བ་དང་འདྲ་བར། སྐབས་འདིར་ཡང་གསང་བའི་དོན་རྒྱས་པར་སྟོན་པའི་སྐབས་སུ་བབ་པ་དང་། དེ་དང་ལྡན་པས་གསང་བའི་མགོན་ནོ། །དེ་ལ་བསམ་པ་རབ་ཏུ་རྫོགས་པ་ནི། དཔེར་
ན་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བར། འདིས་ཀྱང་འཇིག་རྟེན་དང་འཇིག་རྟེན་ལས་འདས་པའི་དགོས་པ་ཐམས་ཅད་འགྲུབ་པའི་ཐབས་ནང་གི་རྣལ་འབྱོར་གསུང་བར་ཞུ་བར་འབྲེལ་ཏོ། །བདེ་གཤེགས་གསང་བས་བཀའ་སྩལ་པ། །གང་གིས་བསྒྲུབ་པར་བྱ་བ་ལ། །ཐབས་
ཀྱིས་དངོས་གྲུབ་ཐོབ་པར་འགྱུར། །ཞེས་བྱ་བ་ལ། བདེ་བར་གཤེགས་པ་ཡང་དག་པའི་དོན་གསང་བ་དང་ལྡན་པས། བདེ་བར་གཤེགས་པ་གསང་བའོ། །དེ་ཡིས་ཡོངས་སུ་གསུང་བ་ནི་འོག་མ་རྣམས་སོ། །གང་གིས་ཞེས་པ་ནི་གང་གིས་བསྒྲུབ་པར་བྱ་བ་ལ། ཐབས་ཁྱད་པར་ཅན་
གྱིས་དངོས་གྲུབ་བསྒྲུབ་པའོ། །ཐོབ་པ་ནི་མྱུར་བའི་སྒྲ་དང་ལྡན་པའོ། །དང་པོར་ཤེས་རབ་ཅན་དག་གིས། །བདག་གིས་དངོས་པོར་སྣང་བ་ལས། །དེ་ཉིད་སྣང་ལ་མཆོག་ཉིད་ལས། །འོད་ཟེར་བསིལ་ལྡན་ཡང་དག་བསམ། །ཞེས་བྱ་བ་ལ། དང་པོར་ཤེས་རབ་ཅན་རིགས་དང་ལྡན་
པ་ལས། བདག་གིས་དངོས་པོར་སྣང་བ་ནི་བདག་ཏུ་སྣང་བའོ། །དེ་ཉིད་ནི་སྒྲའི་སྦྱོར་བས་བདུན་པ་ལ་སོགས་པའི་སྒྲ་ལ་མངོན་པར་ཞེན་པ་ཡིན་ཏེ། རྫིང་བུ་ལ་འཇུག་པའོ། །རྫིང་བུའི་ནང་ན་འོད་ཟེར་བསིལ་ལྡན་ནི་ཆུ་ཤེལ་བསམ་པའོ། །འདི་ནས་མར་ནི་ཕྲན་ཚེགས་སུ་བྱ་སྟེ། དེ་ལས་
གོང་ནི་ཆུ་ཤེལ་ལས་གོང་དུ་སྟེ། དབུགས་རྒྱུ་བ་ནི་ཁ་སྦྱོར་སྦུ་གུ་ཅན་ནོ། །དེ་བསམས་ལ་དེ་ལས་གསལ་ལྡན་ནི་མེ་ལོང་སྟོང་སྟེ། མེ་ལོང་ལ་རྡོ་རྗེ་ལ་སོགས་པའི་ཕྲེང་བ་ལྔ་དང་ལྡན་པའོ། །དེ་སྟོང་པའི་དཔེ་ནི་རྣམ་པར་རྟོག་པ་དང་བྲལ་བའི་རི་ལ་སོང་བས་གཟུགས་བཟང་མ་དང་། སྟོང་འཇོམས་མ་
ལ་སོགས་པའི་རིག་མ་ལྔས་དེ་ལ་ལེན་པའོ། །མི་འཆི་བ་ནི་དབུགས་ཏེ། དུས་འགྱུར་ནི་དུས་ཀྱི་སྐད་ཅིག་འགྱུར་བའོ། །དེ་ཡིས་འཛིན་པ་ཅན་ལ་བྱིན་པར་བསམས་པ་སྟེ། འཛིན་པ་ཅན་ནི་བརྐམ་པའོ། །དེ་ནས་སྔགས་འོག་མ་འདིས་རབ་ཏུ་གནས་པར་བྱས་ནས། བདག་ཉིད་

49-1-284a

རིགས་སུ་ལྡན་པ་ནི་ལྕགས་ཏེ། ཐོ་བས་བདག་པོ་ཡིན་པའི་ཕྱིར་རོ། །ཕྱག་རྒྱ་ནི་རྗེས་སམ་རྟགས་གསལ་བར་སྦྱར་རོ། །སྔགས་ནི་ཨོཾ་ཨ་བྷི་ཥིཉྩ་ཞེས་པ་ནས་སྟུ་སྟིམ་ཧཱུཾ་ཞེས་པའི་བར་དུའོ། །བདག་ཉིད་དངོས་པོ་ལ་བརྟེན་ནས། །མཚན་མར་མི་གསལ་མ་སྐྱེས་པའི། །
གདོད་ནས་གྲུབ་པར་བསམ་བྱ་སྟེ། །སངས་རྒྱས་དངོས་ལ་རབ་སྦྱོར་བས། །དང་པོར་དངོས་དག་བསམ་བྱ་སྟེ། །བདག་ཉིད་གོང་གི་གཟུགས་གནས་ལ། །སྟེང་དུ་མི་འདྲ་དངོས་པོར་བསྒོམ། །ཞེས་བྱ་བ་ལས། བདག་ཉིད་དངོས་པོ་ནི་རྫིང་བུའོ། །རྫིང་བུ་ལ་ཡོངས་སུ་བརྟེན་ཏེ། མཚན་མར་མི་
གནས་པ་དང་།གདོད་ནས་གྲུབ་པ་དང་། མ་སྐྱེས་པ་གསུམ་རྫིང་བུ་རུ་བསམ་པར་བྱའོ། །དེ་ཡང་ཇི་ལྟ་བུ་ཞེ་ན། སངས་རྒྱས་དངོས་ལ་རབ་སྦྱོར་བས། །ཞེས་གསུངས་པ་སྟེ། གང་ཟག་སངས་རྒྱས་ཉིད་ལ་རབ་ཏུ་དང་བས། དངོས་པོར་རྫིང་བུ་ཉིད་བསམ་པར་བྱས་ལ། བདག་ཉིད་གོང་གི་
གཟུགས་གནས་ལ་ཞེས་པ་ནི། སྔ་མའི་མི་དངོས་སུ་ཡང་དག་པར་གནས་ཏེ། སྟེང་དུ་མིག་འདྲ་བའི་དངོས་པོ་ནི་མེ་ཤེལ་དུ་ཤེས་པར་བྱ་སྟེ་རྫིང་བུའི་སྟེང་དུའོ། །དེ་ལས་གོང་དུ་གྱུར་པ་ཡིས། །འཇིགས་བྱེད་རིགས་དགུ་ངེས་པར་བསྒོམ། །མིག་འདྲའི་སྦུ་གུར་རབ་འབྱར་བས། །སྙིང་པོའི་སྟེང་དུ་
གསལ་བར་སྣང་། །ཞེས་བྱ་བ་ལ། དེ་ལས་ནི་མེ་ཤེལ་ལས་གོང་དུ་གྱུར་པའོ། །འཇིགས་བྱེད་ནི་སྟ་རི་ལ་བྱ་སྟེ། རིགས་དགུ་ནི་སྟ་རིའི་ལོགས་ཐིག་ལེ་དགུ་བྲིས་པ་བསམ་པར་བྱའོ། །དེ་ཡང་གང་དུ་གནས་ཤེ་ན། མིག་འདྲའི་བུ་གུར་རབ་འབྱར་བས། །ཞེས་གསུངས་ཏེ། མེ་ཤེལ་
གྱི་མིག་ལ་འབྱོར་བར་བསྒོམ་པའོ། །སྙིང་པོ་སྟེང་ནི་མེ་ཤེལ་གྱི་སྙིང་པོའི་སྟེང་ངོ་། །གསལ་བར་སྣང་བ་ནི་ཆུད་པར་སྣང་བར་འབྲེལ་ཏོ། །སྙིང་པོའི་སྟེང་དུ་ཆུ་བསྒྲུབས་པས། །ཡན་ལག་སྟོང་དང་ལྡན་པ་ཉིད། །སྤུན་ལ་ཕྱོགས་པར་ཁ་བལྟས་ནས། །བདག་ལས་གོང་དུ་གྱུར་པ་ཡི། །
ཞེས་བྱ་བ་ལ། སྙིང་པོ་ནི་མེ་ཤེལ་ཏེ། དེའི་སྟེང་དུ་ཆུ་བསྒྲུབས་པ་ནི་ཉ་ལ་བྱ་སྟེ། ཉའི་ཁ་ནས་ཡན་ལག་བརྒྱད་དང་ལྡན་པའི་ཆུ་འབབ་པ་ལ་བྱའོ། །སྤུན་ལ་ཕྱོགས་པ་ནི་མི་མཐུན་པས་ཟླ་བ་ཉ་ལ་བྱ་སྟེ། དེ་ལ་ཕྱོགས་པར་ཁ་བལྟས་པའོ། །དེ་ལ་ཁ་བལྟས་ནས། བདག་ལས་

49-1-284b

གོང་དུ་གྱུར་ན་ནི་ཐོད་པ་ལ་བྱ་སྟེ། དེ་ཡང་ཇི་ལྟ་བུ་ཞེ་ན། ཧཱུཾ་གཉིས་ལས་བསྒྲུབས་ཏེ་མེའི་ངེས་པར་གསལ་བྱེད་སྦར་བ་ལས། དངོས་པོར་སྙིང་པོར་རབ་སོང་བས། །དེ་ལས་མི་འཆི་འོད་ལྡན་པས། །འཇོམས་བྱེད་སྟེང་ན་རབ་གནས་པའི། །མིག་འདྲའི་ཡན་ལག་བརྒྱད་དང་ལྡན། །
འཇོམས་བྱེད་མིག་འདྲར་གར་མ་འབྱོར། །ཞེས་གསུངས་ཏེ། ཐོད་པ་ནི་ཧཱུཾ་གཉིས་ལས་གྲུབ་པ་ཡིན་པས་ན། ཧཱུཾ་གཉིས་ལས་བསྒྲུབས་པས་སོ། །ངེས་པར་གསལ་བྱེད་སྦར་བ་ལས། ཐོད་པ་ལས་མེ་སྦར་བ་ལས། དངོས་པོ་ནི་དངོས་པོ་ཐམས་ཅད་ལ་བྱ་སྟེ། དེ་རྣམས་ཀྱི་
སྙིང་པོ་ནི་ནམ་མཁའོ། །དེ་བས་ནི་ནམ་མཁའ་ལ་མེ་ལྕེ་གོང་བས། ནམ་མཁའ་ལས་མི་འཆི་བར་བྱེད་པའི་སྨན་རེག་འོད་དང་ལྡན་པ་མཐོང་བར་བྱེད་དེ། དེ་ཡི་འཇོམས་བྱེད་ནི་སྟ་རི་སྟེ། སྟ་རི་ལ་གནས་པའི་མིག་འདྲ་བ་ནི་མེ་ཤེལ་ཏེ། དེ་ལ་ཡན་ལག་བརྒྱད་དང་ལྡན་པའི་
སྨན་གནས་པས་ན། ཡན་ལག་བརྒྱད་དང་ལྡན་པར་འབྲེལ་ཏོ། །འཇོམས་བྱེད་སྟ་རི་དང་མིག་འདྲར་མེ་ཤེལ་དུ་གར་མའམ་དམ་པོར་སྦྱོར་ཏེ།  སྤྱིར་གནས་པ་ནི་ཐམས་ཅད་དུ་ཡང་དག་པར་འབྱོར་བའོ། །ཐབས་དང་ཤེས་རབ་གསུམ་དུ་ངེས། །དངོས་པོ་གསུམ་དུ་རབ་ངེས་ཏེ། །
སྙིང་པོའི་སྟེང་ན་གནས་པ་ཡིན། །མིག་འདྲའི་སྟེང་ན་ངེས་པར་སོང་། །ཞེས་བྱ་བ་ལས། ཐབས་སྟ་རི་དང་ཤེས་རབ་མེ་ཤེལ་གསུམ་དུ་ངེས་པར་གནས་པར་སྦྱར་རོ། །དངོས་པོ་གསུམ་ནི་སྟ་རི་དང་། མེ་ཤེལ་གཉིས་ལ་དངོས་པོ་གསུམ་སྟེ།  དེ་གསུམ་ལ་བརྒྱུད་ནས་སྙིང་པོ་ནི་རྫིང་བུ་ལ་བྱ་སྟེ། རྫིང་བུའི་
སྟེང་ན་གནས་པའི་མེ་ཤེལ་ལ་ངེས་པར་སོང་བར་འབྲེལ་། རང་གི་གར་མའི་ཁྱོན་ཙམ་ལ། །སྐད་ཅིག་བྱེ་བྲག་བཅུ་དྲུག་པའི། །ཐབས་སུ་ཡོངས་སུ་རྫོགས་པ་ཡིས། །དང་པོའི་དངོས་པོ་བརྟག་མི་བྱ། །ཞེས་བྱ་བ་ལ། རང་གི་གར་མ་ནི་སྐབས་འདིར་སོ་གཉིས་སྦྱར་བ་
ལ་བྱ་སྟེ། སོ་གཉིས་བསྣམས་པའི་ནང་གི་ཁྱོན་ཙམ་ལ། །སྐད་ཅིག་བྱེ་བྲག་བཅུ་དྲུག་ནི། །དབྱུ་གུའི་ཆ་ཡིས་ཡོངས་སུ་བརྩིས་ལ། དེའི་ཐབས་ཀྱིས་ཡོངས་སུ་རྫོགས་པའོ། །གང་ལ་རྫོགས་ཤེ་ན་སྨན་ལ་རྫོགས་པའོ། །དང་པོའི་དངོས་པོ་ནི་མེ་ཤེལ་ལ་སོགས་པ་སྟེ།  དེའི་ཡོངས་སུ་མི་རྟག་

49-1-285a

པའོ། །རྫོགས་པ་གཉིས་ལ་མེ་འབར་བས། །རིམ་པ་དེ་གཉིས་མི་གནས་ཤིང་། །དངོས་པོར་སྣང་བ་གང་ཡིན་པ། །མར་མེའི་རྩེ་མོ་ལྟ་བུ་སྟེ། །ཕྱི་ནས་དེ་ནི་འོད་གསལ་བའོ། །ཞེས་བྱ་བ་ལ། རྫོགས་པ་ཉིད་ནི་གོང་མའི་སྨན་རྫོགས་པའོ། །དེ་ལས་མེ་འབར་
བས་རིམ་གྱིས་དེ་རྣམས་དངོས་པོར་མི་གནས་པའོ། །དངོས་པོ་སྣང་བའི་སྨན་ལ་བྱ་སྟེ། དེ་ཡང་མར་མེའི་རྩེ་མོ་ལྟར་རིམ་པས་ཕྲ་བར་བསམས་ཏེ། ཕྱི་ནས་རང་བཞིན་གྱིས་འོད་གསལ་བའོ། །དངོས་པོ་རབ་ཏུ་བརྟག་བྱ་བ། །རིམ་པ་གསུམ་ལས་རབ་རྫོགས་ཡིན། །སྟེང་དུ་པཾ་ཉིད་
རབ་འབར་དང་། །ཧཱུཾ་ལས་སྐྱེས་པ་ཐུབ་པའི་སྐུ། །ཡང་དག་པ་རུ་བརྟག་པར་བྱ། །འོན་ཀྱང་གོང་མའི་ས་བོན་ལས། །བསྐྱེད་པར་བྱ་བ་ཁོ་ན་ཡིན། །ཞེས་བྱ་བ་ལ། དང་པོར་དེ་དག་རྣམ་པར་རབ་ཏུ་བརྟགས་པ་ནི། སྟེང་ཞེས་པ་སྟེ། རྫིང་བུའི་སྟེང་དང་། སྟ་རིའི་སྟིང་སྟེ། དེ་གཉིས་
ནི་པཾ་ལས་བསྐྱེད་པར་བྱའོ། །ཧཱུཾ་ལས་སྐྱེས་པ་ནི་སྟ་རི་སྟེ། ཐུབ་པའི་སྐུའོ། །འོག་ཅེས་བྱ་བ་ནི་རྫིང་བུའི་འོག་ན་གནས་པའི་མེ་ཤེལ་ནི་གོང་མའི་ས་བོན་ལས་བསྐྱེད་པར་གསུངས་སོ། །སེམས་དཔའ་གཉིས་སུ་ངེས་པ་ལས། །འཁོར་ལོ་སྤྲོས་པས་ཆར་ལྟ་བུའི། །ལོ་ཏོག་ཤིན་ཏུ་སྨིན་བྱེད་
པ། །སྐྱོན་རྣམས་བསལ་ནས་དེ་བཞིན་དུ། །སླར་ཡང་ངོ་བོས་ཡང་དག་གནས། །ཞེས་བྱ་བ་ལ། སེམས་དཔའ་གཉིས་ནི་གོ་སླ་སྟེ། ཡེ་ཤེས་དང་དམ་ཚིག་སེམས་དཔའོ། །འཁོར་ལོ་སྤྲོས་པ་ནི་ཕྱོགས་བཅུ་རྣམས་སུ་སྟེ། དེ་ཡང་དང་པོ་ནམ་མཁའ་ལས། །ཡེ་ཤེས་སེམས་དཔའ་
སྤྱན་དྲངས་པ་ལ་སོགས་པ་མ་ལུས་པར་བྱས་ནས། དེ་ནས་དམ་ཚིག་གི་འཁོར་ལོ་མྱུར་དུ་གཞུག་པའོ། །ལོ་ཏོག་ལྟ་བུའི་སེམས་ཅན་ལ། །ཆར་ལྟ་བུའི་འཁོར་ལོ་སྤྲོས་པས། སྐྱོན་རྣམས་དང་བྲལ་ཏེ། སླར་དེའི་ངོ་བོར་གནས་པའོ། །དེ་ལྟར་གསལ་བར་མ་འཁྲུལ་པར། །སྐྱོན་
གྱིས་མ་གོས་དྲི་མེད་དོ། །ཞེས་བྱ་བ་ནི། གོང་མ་ལྟར་གསལ་ཞིང་མི་སྣང་བར་བསྒོམས་ན། འཁོར་བའི་བག་ཆགས་ཀྱི་སྐྱོན་གྱིས་མི་གོས་ཏེ། ནམ་མཁའ་དངས་པ་ད་ལྟར་དྲི་མ་མེད་པར་གསུངས་སོ། །དེ་ཡང་ལས་ཀྱི་སྦྱོར་བ་ལས་ཡང་དག་པར་གསུངས་སོ། །མཁའ་

49-1-285b

ཀུན་ཞེན་པའི་སེམས་ཀྱིས་སུ། །རྡོ་རྗེ་ལམ་དུ་རབ་ཞུགས་ནས། །ནོར་བུ་དྲི་མེད་ཟླ་བ་ཡི། །ལས་ཀྱི་སྦྱོར་བ་སྣ་ཚོགས་པར། །མཉམ་པར་སྦྱོར་བས་བདེ་བའི་མཆོག །མི་འཛག་གནས་དང་ལྡན་པར་འགྱུར། །ཞེས་བྱ་བ་ལ། ནམ་མཁའ་ལ་ཡང་དག་པར་ཞེན་པ་སྟེ། ནམ་མཁའ་
དང་དབྱིབས་མཐུན་པའི་ཆོས་འབྱུང་ངོ་། །དེ་ལ་ཞེན་པས་ནོར་བུ་འབར་བ་དང་། ཟླ་བ་ལྟ་བུའི་བྱང་ཆུབ་ཀྱི་སེམས་རྡོ་རྗེའི་ལམ་དུ་ཡོངས་སུ་ཞུགས་པས། ལས་ལ་སྦྱོར་བ་དང་མཉམ་པར་སྦྱར་བས་བདེ་བའི་མཆོག་ཅིར་ཡང་མི་རྟོག་པ་སྐྱེས་ནས་ཕྱིས་མི་འཛག་པར་འབྲེལ་ཏོ། །མཁས་པ་
སངས་རྒྱས་བདེ་བས་བདེ། །ལུས་ལ་ཆགས་པར་མི་ལྟ་ཞིང་། །སེམས་ལ་ཆགས་པ་ཆེན་པོར་སྐྱེད། །ཅེས་བྱ་བ་ལ། ལུས་དངོས་པོར་སྣང་བའི་དབྱིབས་དང་། ཁ་དོག་ལ་ཆགས་པར་མི་ལྟ་བར་སེམས་ནི་ཡེ་ཤེས་ཏེ། ཡེ་ཤེས་ལ་ཀུན་ནས་ཞེན་པའམ། ཡང་དག་པར་ཆགས་པར་
ལོངས་སྤྱོད་པའོ། །དེ་ལྟར་སྤྱད་པས་མཁས་པ་དེ་ཉིད་སངས་རྒྱས་ཀྱི་བདེ་བ་དངོས་ཡིན་པས་ན། བདེ་བས་བདེ་བར་འབྲེལ་ཏོ། །དེ་འདྲའི་སྤྱོད་པས་ཡོངས་བསྡུས་ནས། །གང་ཞིག་མྱ་ངན་འདས་པ་ལས། །མཆོག་གྱུར་མི་གནས་མྱ་ངན་འདས། །ཞེས་པ་ནི།  གང་ཟག་རྣལ་
འབྱོར་པ་གང་ཞིག་གིས་གོང་དུ་བསྟན་པའི་སྤྱོད་པ་དེ་ལྟ་བུས་བདག་གི་རྒྱུད་ཡོངས་སུ་བསྡུས་ན། མི་དེ་མྱ་ངན་ལས་འདས་པ་ལ་མཆོག་ཏུ་གྱུར་པའི་མི་གནས་པའི་མྱ་ངན་ལས་འདས་པ་ཐོབ་པར་འགྱུར་རོ། །ས་ལ་མངོན་པར་མི་གནས་ཤིང་། །ཀུན་དུ་མངོན་པར་བསྒྲོད་པས་ནི། །ཡེ་
ཤེས་རྡོ་རྗེ་གོ་འཕང་ཉིད། །བརྒྱུད་པས་མངོན་དུ་བྱེད་པ་ལ། །ཞེས་བྱ་བ་ལ། ས་ནི་བཅུ་གཅིག་ལ་སོགས་པ་སྟེ། དེ་ལའང་མི་གནས་པ་དང་། གཞན་ཐམས་ཅད་ལ་མངོན་པར་མི་དགའ་བས། ཡེ་ཤེས་རྡོ་རྗེ་ནི་ཕྱག་རྒྱ་ཆེན་པོ་ཉིད་དོ། །དེའི་གོ་འཕང་ཡང་ཀུན་དུ་བརྒྱུད་པས་མངོན་དུ་བྱེད་ན། ཞེས་པ་ནི་
གང་བསྒྲུབ་པར་བྱ་བ་གཞན་ལ་དཀའ་སླ་མེད་པར་གསུངས་པའོ། །འདི་ནི་རྫས་ལ་སོགས་པ་ཡི། །འདི་ཡི་དངོས་གྲུབ་གང་ཡིན་པ། །ངེས་པར་འགྲུབ་པ་སྨོས་ཅི་དགོས། །ཤེས་རབ་ཅན་གྱིས་ལས་འདི་ལ། །ཆགས་པ་ཆེན་པོ་ཡང་དག་འགྲུབ། །ཅེས་བྱ་བ་ལ། འདི་ཞེས་བྱ་བ་ནི་

49-1-286a

ཚེ་འདི་ལ་སྟེ། ཚེ་འདིའི་རྫས་ནི་དངུལ་ཆུ་དང་རལ་གྲི་གྲུབ་པར་འཇིག་རྟེན་འདིའི་དངོས་གྲུབ་གང་ཡིན་པ་རྣམས་ངེས་པར་རམ་གདོན་མི་ཟ་བར་སྨོས་ཅི་དགོས་པར་འབྲེལ་ཏོ། །ཤེས་རབ་ཅན་བློ་དང་ལྡན་པས་འདི་ལྟ་བུ་ལ་ཆགས་སམ་ཞེན་པ་ཆེན་པོས་ཡང་
དག་པར་བསྒྲུབ་པར་བྱའོ། །ལུས་ལ་མེ་འབར་ཆེན་པོ་ཡིས། །སྙིང་པོ་འདི་ཉིད་བཟླས་པ་ལས། །རང་ཉིད་པདྨ་གསང་བ་ཡིས། །དྲག་པོའི་རྟགས་སུ་ངེས་སོང་སྟེ། །དེ་བཞིན་རྟག་ཏུ་བསྒྲུབ་པར་བྱ། །ཞེས་བྱ་བ་ལ། ལུས་ལ་མེ་འབར་བ་ནི་ལག་ན་རྡོ་རྗེའི་རིགས་ཏེ་གཟི་
བརྗིད་ཆེན་པོ་དང་ལྡན་པའི་ཕྱིར་རོ། །དེའི་སྙིང་པོ་འོག་ནས་འབྱུང་བ་འདི་ཉིད་བཟླས་པའི་ཐབས་ནི་རང་ཉིད་པདྨ་དང་གསང་བའི་ཁ་སྦྱོར་བར་བྱས་ལ། དྲག་པོའི་རྟགས་ནི་ཐ་མ་མེའི་དཀྱིལ་འཁོར་ལ་བྱ་སྟེ། དེ་ལྟར་བརྒྱུད་པས་རྟག་ཏུ་བཟླས་པ་བྱ་བར་འབྲེལ་ཏོ། །དེ་ལ་ཨོཾ་བྷྱོ་བྷྱོ་ཞེས་
པ་ནས་རཱ་ཛྙཱ་པ་ཡ་ཏིའི་བར་དུ་ནི་རྩ་བའི་སྔགས་སུ་ཤེས་པར་བྱའོ། །ཨོཾ་དཾཥྚ་ཀ་ར་ལོ་ཞེས་པ་ནས། བྷཀྵ་ཡ་ཞེས་པའི་བར་དུ་ནི། རྐང་པ་བརྒྱད་པའི་སྔགས་སོ། །ལྷག་མ་ནི་རིམ་པ་ཇི་ལྟ་བ་བཞིན་རྣམ་པར་རྒྱལ་བ་ལ་སོགས་པའི་སྙིང་པོའོ། །དེའི་ལྷག་མ་བདུན་དོན་བསྒྲུབ་པ་དང་། 
བསྲུང་བའི་ལས་དང་། ས་ཚོན་བྱིན་གྱིས་བརླབ་པ་དང་། དྲི་ཆུ་སྔགས་པ་དང་། སྲད་བུ་སྔགས་པ་དང་། བུ་མོ་སྔགས་པ་དང་། བདེ་བྱེད་སྔགས་པའི་སྔགས་ཏེ། དེ་ཡང་སྐབས་ཀྱི་དུས་སུ་བླ་མའི་མན་ངག་ལས་ཤེས་པར་བྱའོ། །དེ་ནས་ཕྱོགས་བཅུར་འཁྲུགས་པ་ལས། 
ཡི་གེ་ངེས་པར་གང་ཡིན་པ། །བླ་མའི་མན་ངག་རབ་གསལ་བས། །གཅིག་ཏུ་བསྡུས་ནས་བཟླས་པར་བྱ། །ཞེས་བྱ་བ་ལ། རྩ་བའི་སྔགས་བསྟོད་པ་ལ་སོགས་པ་དང་། བཟླས་པ་ཉིད་སྙིང་པོའི་སྔགས་ཕྱོགས་ཀུན་དུ་འཁྲུགས་པ་དེ་རྣམས་ཡི་གེའི་ཕྱོགས་གཅིག་ཏུ་བསྡུས་ནས་བཟླས་
པ་ངེས་པར་བྱ་བ་ནི། བླ་མའི་མན་ངག་ལས་ཤེས་པར་བྱའོ། །རང་འབྱུང་སྔགས་པ་བདག་ཉིད་ལ། །གྲངས་ཚད་གཟུང་བ་གང་ཡིན་པ། །རིགས་ཀྱི་དབང་གིས་ངེས་པར་བཤད། །ཅེས་བྱ་བ་ལ་རྣལ་འབྱོར་པའི་འཁོར་བ་ལས་རབ་ཏུ་བྱུང་བའི་སྔགས་པས། བདག་ཉིད་

49-1-286b

བཟླས་པའི་གྲངས་ཚད་ནི་ཕྲེང་བ་སྟེ། དེ་ནི་རིགས་ཀྱི་དབང་གིས་ཡང་དག་པར་བཤད་པ་ལས་ཤེས་པར་བྱ་བ་ནི་དྲག་པོ་ལ་སོགས་པའི་ལས་ལ་རང་རང་གི་ཕྲེང་བས་འོག་ནས་འབྱུང་བས་བཟླས་པར་གསུངས་སོ། །ཀུན་དུ་སྣང་བ་གང་ཡིན་པས། །རིགས་སུ་བསྡུས་ནས་ངག་གི་ཡང་། །
སྤྱོད་ཡུལ་མ་ཡིན་ཐ་མ་ཉིད། །ཅེས་པ་ནི།  ཀུན་དུ་སྣང་བའི་ལུས་ལ་འཇུག་པ་དང་། རིགས་སུ་བསྡུས་པའི་ངག་གི་བཟླས་པ་དང་།  ཐ་མལ་པ་ནི་ཡིད་ཀྱི་བཟླས་པར་གསུངས་པ་སྟེ། དེ་ཡང་སྐྱེས་བུ་དགུག་པའི་དོན་ལ་ལོག་པར་བསྐོར་བའི་སྒྲས་ཡང་མ་ནི་བྱེད་པ་ལ་འཇུག་པའོ། །དྲག་
པོའི་སྙིང་པོ་ཉིད་དང་ཡང་། །རང་བཞིན་རྡོ་རྗེ་བཟླས་པ་ཡིས། །རིགས་གསུམ་ཡང་དག་བཟླས་པ་ནི། །ཞེས་བྱ་བ་ནི། སྤྱིར་བཟླས་པ་རྣམ་པ་གསུམ་དུ་གསུངས་ཏེ། དྲག་པོའི་བཟླས་པ་དང་། རང་བཞིན་གྱི་བཟླས་པ་དང་། རྡོ་རྗེའི་བཟླས་པ་དང་གསུམ་དུ་གསུངས་ཏེ། དེའི་རིགས་
གསུམ་ནི་སྐུ་གསུང་ཐུགས་དང་། རྡོ་རྗེ་དང་། རིན་པོ་ཆེ་དང་། པདྨ་དང་གསུམ་དུ་གསུངས་སོ། །གོང་མའི་སྔགས་ལ་རབ་བསྔགས་པས། །མཐའ་རུ་ཀུན་ལ་ཧཱུཾ་གིས་བརྒྱན། །དེ་མཐར་སྐྲོད་པའི་ཚིག་དག་གིས། །ཡོངས་སུ་བརྒྱན་པ་ངེས་པར་བཟླས། །གང་དང་གང་ལ་ལས་སྦྱོར་བ། །
དེ་དང་དེ་ལ་མན་ངག་གིས། །མངོན་པར་ཤེས་པར་ཡང་དག་བཤད། །ཅེས་བྱ་བ་ལ། གོང་མ་རྣམས་ཀྱི་སྔགས་ལ། སྡུད་པ་ལ་ནི་ཧཱུཾ་གདགས་སོ། །སྐྲོད་པ་ལ་ཕཊ་ཀྱི་སྒྲ་ཡོངས་སུ་གདགས་སོ། །དེ་ལ་སོགས་པ་གསོད་པ་དང་། བཅིང་བ་དང་། སྨྱོ་བ་རྣམས་ལ་རང་རང་གི་
སྔགས་ཀྱིས་སྦྱར་བ་ནི་བླ་མ་ལས་ཤེས་པར་བྱ་བར་འབྲེལ་ཏོ། །བཟླས་པ་ཕུན་སུམ་ཚོགས་ལྡན་པས། །རབ་འབྲིང་ཐ་མར་ལྡན་པ་ཡི། །དང་པོར་སྦྱོར་བ་ངེས་པ་དང་། །ཐ་མ་ལས་ལ་འཇུག་པ་ལ། །གྲངས་དང་ཆ་རུ་རྣམ་པར་ལྡན། །སྤྱོད་ཡུལ་བསྡུས་པར་ངེས་བསལ་བར། །བདག་
གིས་ངག་ལ་བརྟན་པར་བྱ། །ཞེས་བྱ་བ་ལ། ཕུན་སུམ་ཚོགས་པ་ནི་དམིགས་པ་དང་། ཚད་དང་། ཕྲེང་བ་དང་། གང་ལས་དྲང་བ་རྣམས་དང་ལྡན་པའོ། །རབ་ནི་འབུམ་མོ། །འབྲིང་ནི་ཁྲིའོ། །ཐ་མ་ནི་སྟོང་དུ་ཤེས་པར་བྱའོ། །དང་པོར་སྦྱོར་བ་ནི་བསྙེན་པའི་ཚད་དང་། ཐ་མར་

49-1-287a

ལས་ལ་འཇུག་པ་ནི་དེའི་དུས་ལ་སྦྱོར་བའོ། །སྤྱོད་ཡུལ་བསྡུས་པ་ནི་ལུས་དང་ངག་དང་། ཡིད་ཀྱི་སྤྱོད་ཡུལ་མཐུན་པར་ངེས་པར་སྦྱར་བའོ། །ངག་ལ་བརྟག་པ་ནི་ཀུན་ལ་འཇུག་པའི་སྒྲས་འཇུག་པའོ། །དང་པོར་སྲིད་པ་ཆགས་པ་དང་། །བར་དུ་གང་ཞིག་
གནས་པ་ཉིད། །ཐ་མར་འཇིག་པ་གང་ཡིན་པས། །སྔགས་རྣམས་ཐམས་ཅད་རྒྱས་པར་གསུངས། །ཞེས་བྱ་བ་ལ། སྲིད་པ་ཆགས་པ་དང་། བར་དུ་གནས་པ་དང་། ཐ་མར་འཇིག་པ་ལ་སྦྱར་ཏེ། སྔགས་ཐམས་ཅད་ལས་དང་པོ་དང་། བར་དང་ཐ་མའི་རིམ་པས་འབྱུང་བར་
གསུངས་སོ། །དེ་ཡང་ཇི་ལྟ་བུ་ཞེ་ན། འབྱུང་བ་ལྔ་དང་རབ་ལྡན་ནས། །དེ་ལ་ཆོས་རྣམས་ཐམས་ཅད་པ། །ཡོངས་སུ་བསྡུས་པས་ཡང་དག་གནས། །དེ་དང་སྦྱོར་དང་དང་པོའི་དོན། །འདི་ལས་སྒྲུབ་པར་འགྱུར་བ་གང་། །ལས་རྣམས་སྣ་ཚོགས་གང་ཡིན་པ། །གདོན་མི་ཟ་བར་
འགྲུབ་པ་ཡིན། །ཞེས་བྱ་བ་ལ། ཡི་གེ་གང་ལས་འབྱུང་བ་ལྔའི་ས་བོན་ཡང་དག་པར་གནས་པས། འབྱུང་བ་ལྔ་དང་ལྡན་པའོ། །འབྱུང་བ་ལྔ་ལས་ཆོས་ཐམས་ཅད་བསྐྱེད་པར་གསུངས་ཏེ། དེ་བས་ན་འདིར་ཡང་དང་པོའི་ཡི་གེ་ལྔ་པོ་སྨོས་པ་ནི། དེ་ལས་ཡོངས་སུ་འབྱུང་བར་བྱའོ། །
དེའི་དོན་དངོས་པོ་ཐམས་ཅད་ལ་རྒྱས་པར་བྱ་བ་དང་། དེའི་དོན་ཤེས་པ་དེ་སྒྲུབ་པ་ནི་ལས་སྣ་ཚོགས་པ་ཐམས་ཅད་གདོན་མི་ཟར་སྦྱོར་བའོ། །དེ་དག་ལ་སོགས་པ་ནང་དང་སྔགས་ཀྱི་ལེའུ་ཐམས་ཅད་དུ་ཡང་དག་པར་ནི་བླ་མའི་མན་ངག་ལས་ཤེས་པར་བྱའོ། །སྒྲ་ཇི་བཞིན་པ་དང་ཇི་བཞིན་
པ་མ་ཡིན་པ་ལས། ཇི་བཞིན་མ་ཡིན་པའི་སྒྲ་ལོག་པར་གོ་བར་བྱའོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ཞེས་བྱ་བ་ལས་ལེའུ་ལྔ་པའི་བཤད་པའོ།།      །།ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །སེམས་ཅན་སྨིན་པར་བྱ་བ་
ཡི། །འཇུག་པའི་ཐབས་ཉིད་གསུང་དུ་གསོལ། །ཞེས་བྱ་བ་ལས། སེམས་ཅན་སྨིན་པར་བྱ་བའི་འཇུག་པའི་ཐབས་ཡོངས་སུ་ཞུས་པའོ། །ཀུན་མཁྱེན་མགོན་པོས་བཀའ་སྩལ་པ། །དང་པོར་ས་བརྟག་ལ་སོགས་པ། །ངེས་པར་གོང་དུ་བསྟན་པ་ལྟར། །ལས་རྣམས་ངེས་པར་

49-1-287b

རྫོགས་པར་བྱ། །ཞེས་བྱ་བ་ལ། ཀུན་དངོས་པོ་མ་ལུས་པར་ཐམས་ཅད་མཁྱེན་པ་ཡང་ཡིན་ལ། ལྷ་ལ་སོགས་པའི་མགོན་པོ་ཡང་ཡིན་པས་ཀུན་མཁྱེན་མགོན་པོའོ། །དེའི་ཡོངས་སུ་བཤད་པར་གསུངས་ཏེ། ས་བརྟག་པ་དང་། བསླང་བ་ལ་སོགས་པ་དཀྱིལ་འཁོར་དང་།
མཆོད་པའི་སྐབས་སུ་བཤད་པ་ལྟར་མ་ལུས་པར་རྫོགས་པར་བྱ་བར་གསུངས་སོ། །ས་ཕྱོགས་དབེན་པའི་ཁྱིམ་རྣམས་སུ། །བ་ཡི་རྣམ་ལྔ་ལ་སོགས་དང་། །རམས་སོགས་མདུན་དུ་ངེས་པར་སྦྱར། །ཐ་མའི་ཚུལ་དུ་རབ་བྱས་ལ། །གུར་གུམ་ཆུ་ཡིས་ཡོངས་སུ་གདབ། །ཅེས་པ་
ནི། བའི་རྣམ་ལྔ་ལ་སོགས་པ་རྣམས་ཀྱིས་ལེགས་པར་བྱུགས་ལ། ཐ་མའི་ཚད་ནི་ཁྲུ་གང་གིས་ཡང་དག་པར་བྱས་པའོ། །དེ་གང་དུ་བྱ་ཞེ་ན། ས་ཕྱོགས་དབེན་པའི་ཁྱིམ་དུའོ། །ཞལ་ཟས་སྣ་ཚོགས་ཞེས་པ་ནས་སེམས་བསྐྱེད་པ་དང་ཞེས་བྱ་བའི་བར་དུ་ནི་གོ་སླ་བས་མ་བཤད་དོ། །
གསང་བ་གསུམ་གྱི་གནས་རྣམས་སུ། །དྲི་ཡི་ཐིག་ལེ་རྡོ་རྗེ་དང་། །བཅས་པའི་གུང་མོས་ངེས་པར་བསྐུ། །མི་འགྱུར་གསུམ་ལས་སྐུ་གསུམ་དུ། །སྔགས་འདི་དག་གིས་བྱིན་གྱིས་བརླབ། །ཅེས་པ་ལ། གསང་བ་གསུམ་ནི་དཔྲལ་བ་དང་། ལྐོག་མ་དང་། སྙིང་ག་གསུམ་དུ་དྲིའི་
ཐིག་ལེ་རྡོ་རྗེ་དང་བཅས་པའི་གུང་མོས་བསྐུས་ལ། དེའི་སྟེང་དུ་དང་པོའི་ཡི་གེ་གསུམ་ལས་མི་བསྐྱོད་པ་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་གསུམ་དུ་ཡང་དག་པར་བརྟགས་ལ་སྔགས་འདིས་བྱིན་གྱིས་བརླབ་པོ། །ཨོཾ་ཏྲི་མ་ཏ་བི་ཤོ་དྷ་ཡ་ཧཱུཾ། དེ་ནས་སོ་ཤིང་དག་ལ་ནི། །
ཞེས་པ་ནས། ཡང་དག་པར་ནི་སྦྱོར་བ་བརྩམ། །ཞེས་པའི་བར་དུ་ནི་གོ་སླ་བས་འདིར་མ་བཤད་དོ། །སྔགས་གཉིས་པོ་ནི་གོང་མར་ཤེས་པར་བྱའོ། །རང་བཞིན་མི་གནས་དགོས་པ་ཡིས། །ཀུན་རྫོབ་དྲི་མ་སྤང་བར་བྱ། །ཞེས་བྱ་བ་ནི། དབང་ནོད་པའི་དུས་སུ་སློབ་མ་ཁྲུས་ཡང་དག་
པར་བྱེད་དུ་གཞུག་པའོ། །དེ་ནས་སྣ་ཚོགས་ཞེས་བྱ་བ་ནས་མཆོད་པར་བྱ་ཞེས་པའི་བར་དུ་ནི་གོ་སླའོ། །དེ་ཉིད་གཟུགས་ལ་རབ་ཏུ་ཡང་། །གནས་པའི་བདག་ཉིད་དེ་ཉིད་དུ། །ཡང་དག་པར་ནི་བསྐྱེད་པར་བྱ། །ཞེས་པ་ནི། དེ་ཉིད་ནི་ཕྱག་ན་རྡོ་རྗེ་ཉིད་དེ། དབང་གི་དུས་སུ་ལག་ན་རྡོ་རྗེའི་

49-1-288a

གཟུགས་བྲིས་སྐུའམ། འཇིམ་པའམ། ལུགས་སུ་བླུགས་པའི་གཟུགས་ལ་མཆོད་པས་ཡང་དག་པར་མཆོད་ལ། རིམ་པ་ཇི་ལྟ་བ་བཞིན་དུ་ཡང་རབ་ཏུ་གནས་པར་བྱས་ལ། ཕྱི་ནས་ཆོ་ག་གསུམ་ལས་བདག་ཉིད་དེའི་སྐུར་ཡང་དག་པར་བསྐྱེད་པར་བྱའོ། །པདྨ་
ཉིད་ལས་གོས་ལ་སོགས། །ཞེས་པ་ནས། རགས་པ་རྣམ་པར་དག་པར་འདོད། །ཅེས་པའི་བར་དུ། མིག་བཀབ་པས་བདུད་རྩི་འཁྱིལ་པའི་སྔགས་ཀྱིས་ཡང་དག་པར་ནང་དུ་བཅུག་ལ། ཡོལ་བའི་ཕྱི་རོལ་གནས་པས་རང་གི་འབྱོར་པས་ཡོན་ཁས་ལེན་དུ་གཞུག་པ་དང་། དེ་ནས་
སྣང་བ་ཇི་ལྟ་བུ་ལ་དངོས་གྲུབ་བརྗོད་པ་དང་། སྔགས་ཀྱིས་མེ་ཏོག་དོར་དུ་བཅུག་ལ། ལྷ་རྣམས་རིམ་པ་ཇི་ལྟ་བ་བཞིན་དུ་བསྟན་པ་དང་། དེ་ནས་སེམས་བསྐྱེད་པ་ལ་སོགས་པ་བྱས་ནས། རྣམ་པར་རྒྱལ་བའི་བུམ་པའི་ཆུས་དབང་བསྐུར་བར་བྱའོ། །དེ་ཡང་དང་པོར་རིམ་པ་ཇི་
ལྟ་བ་བཞིན་དུ་ཅོད་པན་ལ་སོགས་པའི་དབང་རིམ་པར་བསྐུར་བ་དང་། སློབ་དཔོན་ཡང་བུམ་པར་ཤེས་པར་བྱས་ལ། དེ་ཡིས་བསྐུར་བ་ནི་ལུས་ཏེ། ལུས་རྣམ་པར་དག་པར་གསུངས་སོ། །དེ་ནས་ཕྱག་རྒྱ་བཅས་པ་ལས། །བྱང་ཆུབ་སེམས་ལྡན་མ་ཉམས་པས། །བདག་དང་
གཞན་རྣམས་གང་རུང་བཅས། །བདེ་བ་མངོན་དུ་རབ་སྤྱད་དེ། །བསམ་པས་ཡང་དག་སྦྱང་བྱས་ནས། །ཐབས་དང་ཤེས་རབ་ཕྱག་རྒྱ་ཡིས། །དེ་ཡི་ཁ་རུ་སྦྱིན་པར་བྱ། །ཞེས་བྱ་བ་ལ། ཕྱག་རྒྱ་ནི་ལས་རྣམ་པ་གཉིས་ཀྱིས་ཡང་དག་པར་སྤྱད་པར་བྱའོ། །དེ་ཡང་ཇི་ལྟ་བུ་
ཞེ་ན། ཕོ་ཉ་དང་དངོས་པོ་ལ་ཞེན་པ་ནི། ཤེས་རབ་མ་གཟུགས་དང་ཁ་དོག་ཕུན་སུམ་ཚོགས་པ་ལ་ཕྱག་རྒྱ་བཅས་ཏེ། དེ་ཡང་བདག་རང་གིའམ། གཞན་གྱི་ཡང་རུང་སྟེ། བདག་བྱང་ཆུབ་ཀྱི་སེམས་མ་ཉམས་པས། བདེ་བ་མངོན་དུ་སྤྱད་ལ། དེ་བསམས་པ་དང་
ལག་པ་གཉིས་ཀས་སྦྱངས་ཏེ། ཐབས་བདག་དང་ཤེས་རབ་ཀྱི་ཕྱག་རྒྱ་གཉིས་ཀས་དེའི་པདྨར་སྦྱིན་པར་གསུངས་ཏེ། དེ་ནི་གསང་བའི་དབང་ཡིན་པས། །དེའི་འོག་ཅེས་པ་ནི་ངག་སྟེ། དེ་རྣམ་པར་དག་པར་གསུངས་སོ། །རྣལ་འབྱོར་དང་མི་དམིགས་པ་ལ་འཇུག་པ་ནི་

49-1-288b

འདི་ལྟར་ཤེས་པར་བྱའོ། །ནང་དུ་ཤེས་པའི་སྒོ་དག་ལ། །དེ་ལ་མི་བརྟེན་བདག་ཉིད་གནས། །ཞེས་གསུངས་པ། རྟགས་དང་མིང་འདྲ་བ་དེ་ལ་བརྟེན་ནས། བདག་ཉམས་པར་འགྱུར་བའི་ཕྱིར། བླ་མའི་ངག་ལས་ཡང་དག་པར་ཤེས་པར་བྱའོ། །དེ་ནས་བདག་གི་དངོས་པོ་གང་། །བུ་མོ་
མདོག་བཟངས་སྔོན་མོ་ལ། །གང་དང་ལྡན་པའི་ཡང་བས་བསྐྱོད། །ཆོ་གས་ཡང་དག་གཟུང་བྱས་ལ། །ཐབས་གཉིས་རབ་ཏུ་བསྐྱོད་པ་ཡིས། །སྣ་ཚོགས་དངོས་པོ་གནས་པ་ཡིས། །དེ་འོག་སོར་བཞི་གཞལ་བྱས་ནས། །ཤེས་རབ་གཉིས་ལ་མནན་པ་ཡིས། །བདེ་བ་དཔག་ཏུ་
མེད་པ་མྱོང་། །དེ་མྱོང་སྐད་ཅིག་རྫོགས་པ་ཡིས། །དེ་ལ་བལྟ་བ་ཡིན་པར་བསྟན། །དེ་ཡིས་ཤེས་རབ་ཡེ་ཤེས་ཀྱི། །དབང་ཉིད་མངོན་པར་རྫོགས་པར་འགྱུར། །ཞེས་བྱ་བ་ལ། དེ་ཡང་གོང་མའི་ལམ་གྱིས་ཤེས་པར་བྱ་སྟེ། བདག་གང་ཟག་རྣལ་འབྱོར་པས།དངོས་པོ་
བུ་མོ་མདོག་དང་ལྡན་པ་སྔོན་མོ་ཉིད་ལ། གར་དང་ལྡན་པ་ནི་སྒེག་པ་ལ་སོགས་པ་དང་ལྡན་པའོ། །གཞན་ཡང་རོལ་པའི་སྐབས་སུ་སྒྱུ་རྩལ་བཅུ་དང་ལྡན་ཞིང་། དེ་ལ་ཡང་བག་དང་ལྡན་པའོ། །དེ་ལ་ཆོ་ག་ནི་སྔགས་བཟླ་བ་དང་བསམ་པས་ཡོངས་སུ་བཟུང་བ་ལ་བྱའོ། །ཐབས་ནི་གོ་
སླའོ། །དེའི་སྣ་ཚོགས་དངོས་པོ་གནས་པ་ནི། བུ་ག་འཕྲེད་ལ་ཡོད་པའི་སའོ། །དེ་ནས་སོར་བཞི་གཞལ་བ་དང་། ཤེས་རབ་མ་གཉིས་ལ་མནན་ཅིང་མཉམ་པར་སྦྱར་བས། དེའི་མོད་ལ་བདེ་བ་དཔག་ཏུ་མེད་པ་མྱོང་བར་འགྱུར་རོ། །དེ་མྱོང་བའི་སྐད་ཅིག་ཐ་མ་ལ་དཔེའི་ཡེ་ཤེས་
ཡིན་པར་བསྟན་པ་སྟེ། དེ་ཡེ་ཤེས་དངོས་མཚོན་པའི་ཕྱིར་དེ་གསུངས་པའོ། །དེ་ཡིས་ཤེས་རབ་ཡེ་ཤེས་ཀྱི་དབང་ཐོབ་པ་སྟེ། སེམས་རྣམ་པར་དག་པར་འགྱུར་བའོ། །བཞི་པ་ཆོས་ཉིད་མངོན་རྟོགས་དབང་། །མེད་པ་མངོན་པར་སྣང་བར་འགྱུར། །དེ་ཡི་སྤྱི་ལ་ཁྱབ་གནས་ཏེ། །
རང་ལ་ཡོད་བཞིན་ངེས་པར་རྨོངས། །ཞེས་བྱ་བ་ལ། བཞི་པའི་དབང་ཆོས་ཉིད་མངོན་པར་རྟོགས་པ་ཞེས་བྱ་སྟེ། དེ་ཡང་ཇི་ལྟ་བུ་ཞེ་ན། ཤེས་རབ་ཡེ་ཤེས་ལ་སོགས་པའི་དབང་རྣམས་རྟོགས་པའམ། གསལ་བར་བྱེད་པ་ཡིན་ནོ། །མེད་པ་མངོན་པར་སྣང་བ་ནི། །ཡོད་པའི་

49-1-289a

མེད་པ་དང་། མེད་པའི་ཡོད་པ་དང་། མེད་པ་ལ་སྣང་བ་དང་། ཡོད་པ་མི་སྣང་བར་སྦྱར་རོ། །དེ་ཡང་ཇི་ལྟ་བུ་སྙམ་པ་ལ། རང་ལ་ངེས་པར་ཡོད་བཞིན་དུ། །བདག་རྨོངས་པ་སྟེ། གདོད་ནས་ཡེ་ཤེས་ཡོད་པ་ལ་མ་རིག་པས་ཡང་དག་པར་བསྒྲིབས་པའོ། །དེ་
མངོན་པར་རྟོགས་པས་ནི་མངོན་པར་རྟོགས་པའི་དབང་ངོ་། །ཅི་དེ་ལོགས་ཤིག་པའམ། སྤྱི་ལ་ཁྱབ་སྙམ་པ་ལ།  དེ་ཡིས་སྤྱི་ལ་ཁྱབ་གནས་ཏེ། །ཞེས་གསུངས་ཏེ། དེ་ནི་དབང་ཐམས་ཅད་ལ་སྤྱི་ལ་ཁྱབ་པར་གནས་པའོ། །སྔགས་རྣམ་པ་གཉིས་པོ་ནི། གཞུག་པ་དང་མེ་ཏོག་
དོར་བའི་སྔགས་སུ་རིག་པར་བྱའོ། །སངས་རྒྱས་ཀུན་གྱི་ཕྱག་བརྙན་པར། །དེ་ཉིད་དུ་ནི་སློབ་མ་བསྒྲུབ། །དར་ལ་སོགས་པ་སྔོན་པོ་ཡིས། །སློབ་མ་ཉིད་ལ་དབང་བསྐུར་བྱ། །ཞེས་བྱ་བ་དང་། ལག་ན་རྡོ་རྗེ་དངོས་སུ་སློབ་མ་བསྒྲུབ་པ་ལ་ཐུན་མོང་གི་དབང་མ་གཏོགས་པ་དབང་ལྔས་སློབ་མ་བསྒྲུབ་
པར་གསུངས་ཏེ། དར་རམ་རས་སོགས་སྔོན་པོ་ཚད་མེད་པ་ལ་སྔགས་འོག་མ་ཉིད་དང་། ཕྱག་རྒྱ་དང་པོ་དང་། གཉིས་པས་བཟུང་ལ་བསྐོན་པར་བྱ་བར་འབྲེལ་ཏོ། །མཁའ་ལྡིང་སྔོན་པོ་འདབ་རྒྱས་ལ། །མགུལ་དུ་དར་དཔྱངས་བཅིངས་པ་ཡིས། །བུ་ཉིད་ལ་ནི་ངེས་པར་སྦྱིན། །ཞེས་
བྱ་བ་ནི་ཤོག་བུ་ལ་ནམ་མཁའ་ལྡིང་གི་གཟུགས་བྱས་ལ་སློབ་མ་ལ་སྔགས་དང་བཅས་པས་སྦྱིན་པར་འབྲེལ་ཏོ། །དངོས་གྲུབ་སྣ་ཚོགས་གྲུབ་པ་དང་། །ཞེས་པ་ནས། ཕྱར་ཏེ་བྱེད་པ་པོ་ལ་གཞག །ཅེས་བྱ་བའི་བར་ལ། གདོན་ཐམས་ཅད་ཞི་བར་བྱ་བའི་ཕྱིར་ཤིང་ལ་བེ་ཅོན་ཁྲུ་དོ་པ་བྱས་ལ། རྩེ་མོ་སྦོམ་
པ་དང་། རྩ་བ་ཕྲ་བ་རམས་ཀྱིས་ཡོངས་སུ་བྱུགས་ཏེ། དེའི་རྩེ་མོའི་ཕྱོགས་སུ་མེ་ཏོག་སྔོན་པོའི་ཕྲེང་བས་བཅིངས་ཏེ། ལག་པ་གཡས་པའི་མཐེ་བོང་དང་། གུང་མོ་ལ་སོགས་གསུམ་དུ་སྦྱར་བས་བེ་ཅོན་བཟུང་སྟེ། གཡོན་པས་དཀུ་ལ་ཡོངས་སུ་བརྟེན་པས། བེ་ཅོན་སྤྱི་བོའི་
སྟེང་དུ་བཟུང་བས་སྔགས་བཟླས་ཏེ། སློབ་མའི་ལག་པ་གཡས་པར་སྦྱིན་པའོ། །དེ་ནས་རས་བལ་གསར་པ་ལས་སྐུད་པ་བཞིན་དུ་ཡང་དག་པར་བཀལ་ཏེ། རྩ་བའི་སྔགས་དང་དྲི་ཆུས་ཡང་དག་པར་བསངས་ཏེ། ལྷས་མར་བྱས་ཏེ། གཡས་པས་སྟེང་དུ་དྲངས་གཡོན་པ་ས་ལ་བཙུགས་

49-1-289b

པས། འོག་མའི་སྔགས་བཟླས་པས་གང་ཤར་བཅིང་བར་བྱའོ། །དེ་ཅིའི་ཕྱིར་བཅིང་ཞེ། ཚངས་པ་ཆེན་པོ་ལག་ན་རྡོ་རྗེ་མཐོང་བར་བྱ་བ་དང་། མཆོད་པ་རྣམས་བསྡུ་བའི་ཕྱིར་བཅིང་བར་བྱའོ། །དེ་ཡང་ཁྲོ་གཉེར་གཡོན་དུ་ཕྱོགས་པས་སྦྱིན་པར་འབྲེལ་ཏོ། །
སྔགས་ནི་རྒྱུད་ནས་འབྱུང་བར་ཤེས་པར་བྱའོ། །དེའི་ལག་པ་བསྒོམ་བྱས་ལ། །དེ་ཡི་ལག་པའང་བསྒོམ་བྱ་སྟེ། །ཞེས་བྱ་བ་ལ། བདག་དང་དེའི་ལག་པ་གཉིས་ཀ་ཁུ་ཚུར་བརྩེགས་མ་ལ་སྦུ་གུར་བྱ་སྟེ། དྲག་པོའི་ཕྲེང་བ་ནང་ནས་བཏོན་པ་འོག་ནས་འབྱུང་བའི་སྙིང་པོ་འདི་ཉིད་
ལན་གྲངས་བརྒྱ་རྩ་བརྒྱད་དུ་བཟླས་ལ་སྙིང་པོ་སྦྱིན་པར་བྱའོ། །སྙིང་པོ་ནི་རྒྱུད་ལས་འབྱུང་བའོ། །དེ་ནས་ལེགས་པའི་མཚན་མ་ལ། །ཆོས་ལ་དབང་སོགས་མི་གནས་ན། །འཇུག་པར་འགྱུར་བ་ག་ལ་སྲིད། །ཅེས་བྱ་བ་ལ། ལེགས་པའི་མཚན་མ་ནི་གང་ཟག་འཇུག་པ་པོ་སྟེ། 
དེ་ལ་དབང་དང་དམ་ཚིག་ཏུ་མི་ལྡན་ན་ཆོས་འདི་ལ་འཇུག་པ་མི་སྲིད་དོ། །མི་སྲིད་པ་ནི་སྟོབས་ལ་འཇུག་པའི་སྒྲས་གཞུག་པར་མི་བྱ་བར་འབྲེལ་ཏོ། །རྒྱུད་གཞན་ལ་ནི་སྤྱིར་དབང་གནས། །དེས་ནི་ཀུན་ལ་འཇུག་པར་འགྱུར། །སྤྱི་ཉིད་དབང་ལ་མི་ལྟོས་པར། །འདི་ཉིད་ལ་ནི་རྟོགས་པའི་མཆོག །
དེ་ཡིས་འཇུག་པ་ཁོ་ན་ཡིན། །ཞེས་བྱ་བ་ལ། བདེ་བར་གཤེགས་པས་གསུངས་པའི་རྒྱུད་གཞན་ཐམས་ཅད་ལ་སྤྱིའི་དབང་གིས་འཇུག་པར་གསུངས་ཏེ། འདི་ལ་ནི་སྤྱིའི་དབང་ལ་མི་ལྟོས་པར་འདི་ཉིད་ལ་རྟོག་པའི་མཆོག་འདི་ཁོ་ན་ལ་བྱ་བར་གསུངས་སོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་
པ་དེ་ཁོ་ན་ཉིད་སྣང་བ་ཞེས་བྱ་བ་ལས་ལེའུ་དྲུག་པའི་བཤད་པའོ།།      །།ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །གང་དག་ཀླུ་ཡིས་ཟིན་པ་ལ། །ཐབས་དེ་གང་ལགས་གསུང་དུ་གསོལ། །ཞེས་པ་ནི། སེམས་ཅན་ལ་ཕན་གདགས་པའི་
ཕྱིར་ལས་རྣམ་པ་བཞི་རུ་གསུངས་ཏེ། གང་དུ་བསྡུས་པའི་ཐབས་ངེས་པར་བསྟན་པར་གསུངས་སོ། །ཀུན་མཁྱེན་གཙོ་བོ་ཞེས་པ་ནས། །བུ་མོ་ལ་ནི་ཡོངས་སུ་བསྔགས། །ཞེས་བྱ་བའི་བར་དུ་ནི་གོ་སླ་བས་འདིར་མ་བཤད་དོ། །རྒྱན་ཆ་ལྔ་ཡིས་རྒྱན་བཏགས་ལ། །རྐང་པའི་རྒྱུད་

49-1-290a

མར་ལོང་བཏགས་ཏེ། །ལག་པའི་རྒྱུད་པར་དབང་སྒྱུར་དུ། །ཡན་ལག་གནས་པས་ཕྱག་རྒྱ་བཅས། །ཞེས་བྱ་བ་ལ། བུ་མོ་ལ་དབུ་རྒྱན་ལ་སོགས་པ་ལྔས་ཡང་དག་པར་བཏགས་ལ། རྐང་པའི་རྒྱུད་མར་ནི་གོམ་པའི་འགྲོས་སོ། །ལག་པའི་རྒྱུད་མར་ནི་ཕྱག་རྒྱ་བཅས་
པ་སྟེ། དེ་ཡང་ཇི་ལྟ་བུ་ཞེ་ན། ལག་པ་གཉིས་ཕན་ཚུན་དུ་ནང་ནས་ནང་དུ་བསྐོར་ཞིང་ཡང་དག་པར་གནས་པའོ། །ཀླུ་ཡི་མཚན་མ་གང་ཡིན་པའི། །དངོས་པོ་གང་ལ་རབ་སྦྱར་ནས། །གཙོ་བོ་ཀུན་འབྱུང་མཆོག་ཉིད་ལ། །འཁོར་རྣམས་བརྒྱད་ཀྱིས་ངེས་བསྐོར་ཏེ། །ཞེས་བྱ་བ་ནི། ཀླུའི་
མཚན་མ་ནི་ཀླུའི་མིང་ལ་བྱ་སྟེ། དངོས་པོ་གང་ནི་ཀུན་འབྱུང་བའི་ཡི་གེའོ། །གཙོ་བོའི་ཐུགས་ཀའི་ཧཱུཾ་ལས་ས་བོན་བརྒྱད། །དེ་ལ་རབ་ཏུ་སྦྱར་ནས་འཁོར་བརྒྱད་ནི། །ནཱ་ག་བ་ཤི་ཀ་ར་ཡཾ་ཧཱུཾ་ཞེས་བྱ་བར་ཡང་དག་པར་བསྐོར་བ་སྤྱད་པའོ། །ནུབ་ཏུ་དངོས་པོ་སྟོན་བྱེད་པ། །གྲུ་བཞི་པ་དག་
རབ་ཏུ་གདགས། །དེ་ཉིད་ས་རུ་རབ་ཏུ་ཐོབ། །དེ་སྟེང་ཅི་ནུས་སྦྱོར་བ་བསྒྲུབ། །ཅེས་བྱ་བ་ལ། ནུབ་ནི་སྐྱེས་བུ་ལ་འཇུག་པའི་སྒྲ་རྒྱབ་ལ་འཇུག་སྟེ། རྒྱབ་ཏུ་དངོས་པོ་འདི་ས་ལས་བྱ་སྟེ། ས་དེ་རྟེན་པར་བྱེད་པའི་སྣོད་ཕ་ཚེ་ཡོངས་སུ་གདགས་པར་བྱ་བའོ། །དེ་ཉིད་ས་ནི་ནའི་སྟེང་དུ་
ཕྱིན་པས་ཐོབ་པའོ། །དེ་སྟེང་ཞེས་པ་ནི། ནའི་སྟེང་ནས་ས་ཅི་འབྱོར་པའམ། ནུས་པས་བླང་བར་བྱ་བར་འབྲེལ་ཏོ། །དེ་ཐོབ་རབ་ཏུ་བྲལ་བ་ལས། །དེ་ཡི་ཕྱོགས་སུ་མི་བལྟ་ཞིང་། །དྲག་པོ་ཆེན་པོའི་སྔགས་བཟླས་བྱ། །ཞེས་པ་ནི། ས་དེ་ཐོབ་པ་ལས་བདག་དེ་དང་བྲལ་བར་བྱས་ལ། 
སའི་ཕྱོགས་སུ་མི་ལྟ་བར་བདུད་རྩི་འཁྱིལ་པའི་སྔགས་བཟླས་པར་བྱའོ། །དེ་ཉིད་བདག་གིས་མཐོང་བ་ལས། །ལེགས་སོ་སྙམ་པའི་ཚིག་ཀྱང་བརྗོད། །དེ་ནས་ས་ཕྱོགས་རབ་དབེན་པར། །བདག་གིས་སྦྱོར་བ་ལེགས་བརྩམ་བྱ། །ཞེས་པ་ལ། དེ་ཞེས་པའི་བུ་མོ་དེ་བུ་མོ་བདག་གིས་
ས་བླངས་ནས་འོང་བ་མཐོང་བ་དང་ལེགས་སོ་ཞེས་བྱ་བའམ། ཡང་ན་རྗེས་སུ་ཡི་རང་བའི་ཚིག་གིས་བརྗོད་པར་བྱའོ། །དེ་ཀུན་ནས་དབེན་པའི་ས་རུ་བདག་རྣལ་འབྱོར་པས་དཀྱིལ་འཁོར་ལ་སོགས་པའི་སྦྱོར་བས་བརྩམ་པར་གསུངས་སོ། །རྒྱར་ནི་ཁྲུ་དོ་ངེས་པ་ལས། །ཞེས་པ་ནས།

49-1-290b

ཡང་དག་པར་ནི་བསྐོར་བར་བྱ། །ཞེས་པའི་བར་ནི་གོ་སླ་བས་འདིར་མ་བཤད་དོ། །སྔུན་དུ་སོར་བརྒྱད་བསྐོར་བ་ནི། །མདོག་དམར་ཀུན་ནས་ཟླུམ་པར་བྱ། །དེ་སྟེང་ཀླུ་རིགས་དྲུག་པོ་དག །ཉ་དང་སྦལ་པ་ལྕོང་མོ་དང་། །སྦྲུལ་དང་རྩངས་པ་ཆུ་སྲིན་དང་། །མི་དང་རུས་སྦལ་བ་ལང་དང་། །
བྱི་ལ་ནོར་བུ་རྒྱལ་འབུད་རྣམས། །གཙོ་བོའི་ཆ་ཡིས་གཟུང་བྱས་ནས། །ཤུལ་དུ་དྲག་པར་དྲངས་བྱས་ལ། །ཞེས་བྱ་བ་ལ། སྔོན་དུ་ནི་དཀྱིལ་འཁོར་ཆེན་པོའི་ཡང་སྔུན་དང་། བདག་གི་ཡང་སྔུན་དུ་སོར་མོ་བརྐྱང་བ་ནི་མཐོ་སྟེ། མཐོ་གང་ཟླུམ་པོར་བསྐོར་བར་བྱས་ལ། ཁ་
དོག་མཚལ་ལ་སོགས་པས་ཡོངས་སུ་བྱུག་པར་བྱ་བའོ། །དེའི་སྟེང་དུ་ཀླུ་བ་སུ་ཏ་རིགས་དྲུག་པོ་རྣམས་བག་ཟན་ལས་གཟུགས་བྱ་སྟེ། ཤུལ་དུག་གི་ཤུལ་ནས་དྲག་པར་དྲངས་ནས་བཀུག་པའོ། །དེ་ཡང་ཅི་ཀུན་ནམ་འོན་ཏེ་འགའ་མཉམ་པ་ལས། གཙོ་བོའི་ཆ་ཡིས་གཟུང་བྱས་
ནས། །ཞེས་གསུངས་ཏེ།  གཙོ་བོ་ནི་ཟུང་དུ་བསྡེབས་པའི་དང་པོ་རྣམས་སོ། །མ་ཏུ་ལུང་ཀའི་ཕྱེ་མ་ཡིས། །གཞི་བཀང་རིགས་མཐུན་དངོས་པོ་ནི། །རབ་ཏུ་གསལ་བར་བྱ་བ་ཡིན། །ཞེས་པ་ལ། མ་ཏུ་ལུང་ཀའི་ཤིང་གི་ལོ་མའི་ཕྱེ་མས་དེའི་སྟེང་ཡོངས་སུ་བཀང་ལ། རིགས་མཐུན་
པ་ནི་ལི་ཁྲིའི་ཕྱེ་མས་གསལ་བར་བྱས་པ་ནི་མཚམས་ཡོངས་སུ་གཅད་པར་བྱ་བར་གསུངས་སོ། །མཚན་མོ་དྲག་པོའི་གཏོར་མ་ལ། །སྣང་བ་ཞི་བ་ངེས་པར་བྱ། །བཟླས་པའི་སྔགས་ནི་རབ་འབར་བས། །དྲག་པོའི་ཕྲེང་བ་གཟུང་བྱས་ནས། །གུར་དག་སྔོན་པོས་ཕུབ་བྱས་ཏེ། །ཞེས་བྱ་བ་ལ། 
མཚན་མོ་ལ་དྲག་པོའི་གཏོར་མ་གཏང་བར་བྱ་བ་དང་། ཉིན་མོ་ལ་ཞི་བའི་གཏོར་མ་གཏང་བར་གསུངས་པ་དང་། དྲག་པོའི་ཕྲེང་བས་དྲག་པོའི་རིགས་ལ་ཉེ་བར་བཟུང་སྟེ། བཟླས་པའི་སྔགས་བཟླས་པར་འབྲེལ་ཏོ། །གུར་སྔོན་པོས་ནི་དཀྱིལ་འཁོར་ཕུབ་པར་གསུངས་སོ། །ཇི་
སྲིད་དེ་ཉིད་མ་རྫོགས་པར། །བདག་གིས་བལྟ་བར་མི་བྱ་ཞིང་། །དྲག་པོ་ཉིད་ལ་མངོན་པར་བཟླས། །ཞེས་བྱ་བ་ལ། བཟླས་པའི་སྔགས་འབུམ་དུ་མ་རྫོགས་པར་བདག་གིས་དཀྱིལ་འཁོར་བལྟ་བར་མི་བྱ་བ་དང་།  དྲག་པོ་ཉིད་ནི་དྲག་པོ་ཉིད་ལ་ངེས་པར་བཟླས་པར་འབྲེལ་ཏོ། །དེ་ཡི་

49-1-291a

ཕྱི་རིམ་དག་ལ་ནི། །ཞེས་པ་ནས། རབ་འབྲིང་ཐ་མར་ཡང་དག་ལྡན། །ཞེས་པའི་བར་དུ་གོ་སླའོ། །བདག་གིས་གཙོ་བོའི་ཆ་ལུགས་ལ། །སྔགས་དང་ཕྱག་རྒྱ་ཡང་དག་བགོ། །བཟླས་པའི་གྲངས་སུ་རྫོགས་བྱས་ལ། །ནད་པ་དེར་ནི་བཀུག་བྱས་ཏེ། །
ཞེས་བྱ་བ་ལ། བླ་གོས་ལ་སོགས་པ་ལ་སྔགས་ཀྱིས་བསྔགས་ལ། གོན་པའི་དུས་སུ་བཛྲ་པཱ་ཎི་ཧཱུཾ་ཞེས་པས་རྡོ་རྗེ་རྩེ་ལྔ་པའི་ཕྱག་རྒྱས་རྒྱན་ཆ་བདུན་དུ་བགོ་བར་གསུངས་སོ། །བཟླས་པའི་གྲངས་འབུམ་དུ་ཐིམ་པར་བྱ་ལ་ནད་པ་དེར་ཞེས་པ་ནི་དཀྱིལ་འཁོར་གྱི་རྩར་བཀུག་པར་འབྲེལ་
ཏོ། །དེ་ཡང་དཀྱིལ་འཁོར་གྱི་བྱང་ཕྱོགས་སུ་ཡང་དག་པར་གནས་པར་བྱའོ། །དངུལ་གྱི་རྫིང་བུ་ཉིད་དུ་ཡང་། །བྲང་གི་ས་བོན་དཀར་པོ་ཡིས། །ཡོངས་སུ་གང་བར་བྱ་བར་ཡིན། །ཞེས་བྱ་བ་ལ། དངུལ་གྱི་རྫིང་བུ་ནི་གཞོང་བ་ལ་བྱ་སྟེ། དེ་དང་བྲང་གི་ས་བོན་ནི་ནུ་ཞོས་ཡོངས་སུ་
གང་བར་འབྲེལ་ཏོ། །རྫོགས་པའི་སྒྲ་ལྡན་བཅུ་དྲུག་གིས། །ལྕགས་ཀྱི་སྐམ་པས་ཀ་བི་ཙའི། །ཤིང་དག་སོར་ནི་བཅུ་གཉིས་པར། །ཡོངས་སུ་གཅད་པར་བྱས་པ་ལས། །སྔགས་ཀྱིས་མངོན་པར་བཟླས་བྱ་སྟེ། །དེ་ཉིད་དག་ཏུ་སྦང་བར་བྱ། །ཞེས་བྱ་བ་ལ། རྫོགས་པའི་སྒྲ་དང་
ལྡན་པ་ནི་པུ་རུ་ཥའི་སྒྲས་བྱེད་པ་ལ་འཇུག་པ་དང་། བསྲུང་བྱ་ལ་ངེས་པའི་སྒྲ་སྦྱར་བས་ནི་སྐྱེས་བུ་ལ་འཇུག་སྟེ།  སྐྱེས་པ་ལོ་བཅུ་དྲུག་ལོན་པས། ལྕགས་ཀྱི་སྐམ་པ་ངེས་པར་བཟུང་ནས། དེ་ཡིས་ཤིང་ཀ་བི་ཙ་འམ། བལ་པོ་སེའུའི་ལྕུག་མ་ལ་སོ་སོར་བཅུ་གཉིས་པ་བཅད་ནས་
དེ་ཉིད་དྲག་པའི་སྔགས་ཀྱིས་བཏབ་ལ། །འཁོར་གཞོང་དེ་ཉིད་དུ་སྦང་བར་འབྲེལ་ཏོ། །རྨ་བྱའི་མདོངས་ལ་ཞེས་པ་ནས། །རིགས་དྲུག་པོ་ལ་ངེས་པར་གདབ། །ཅེས་པའི་བར་དུ་ནི་གོ་སླ་བས་འདིར་མ་བཤད་དོ། །དེ་ནས་དེ་ཉིད་སྙིང་གར་ནི། །ཐིག་ལེ་དྲུག་ཏུ་ངེས་པར་བྲི། །དེ་སྟེང་རིགས་
དྲུག་བསམ་བྱས་ནས། །གཡོན་ན་གནས་པའི་ང་རྒྱལ་མཆོག །སྔགས་ཀྱིས་མངོན་པར་བསྐུལ་བྱས་པས། །དྲག་པོའི་ཤུགས་ཀྱིས་རབ་སོང་སྟེ། །རྔམ་པའི་ཞལ་དུ་ངེས་པར་བསྟབས། །ཞེས་བྱ་བ་ལ། དེ་ནས་དེའི་སྙིང་ག་ནི་ནད་པའི་སྙིང་ག་ལ་སོར་བཞིས་བར་ཆོད་པར་བྱས་ལ།

49-1-291b

སྟེང་འོག་ཏུ་ཙནྡན་གྱི་ཐིག་ལེ་དྲུག་བསྐུ་བར་བྱས་ཏེ།  དེའི་སྟེང་དུ་དང་པོའི་གཙོ་བོ་རྣམས་གསལ་བར་བསམས་པའོ། །དེ་ནས་གཡོན་ན་གནས་པ་ནི་ནམ་མཁའ་ལྡིང་སྟེ། དེ་ནི་ང་རྒྱལ་གྱི་རང་བཞིན་ཡིན་པས། དེ་སྔགས་ཀྱིས་ཡང་དག་པར་བསྐུལ་བས་ཤུགས་དྲག་པོ་དང་ལྡན་པར་
དེར་སོང་སྟེ། དེ་དག་ངེས་པར་བླངས་ནས་རྔམ་པ་ལག་ན་རྡོ་རྗེའི་ཞལ་དུ་ངེས་པར་བསྟབས་པས་གསོལ་བར་བསམ་པར་འབྲེལ་ཏོ། །དེ་ལྟར་བསམ་པ་རབ་བརྟན་པས། །ཡོངས་སུ་བསྒོམ་པར་བྱ་བ་ཡིན། །དེ་ཡིས་དེ་ལ་གནོད་བྱེད་པ། །སྐད་ཅིག་ཙམ་ཡང་མི་གནས་ཤིང་། །མྱུར་བར་སྐྲག་
པར་ཕྱོགས་བཅུར་འབྲོས། །ཞེས་བྱ་བ་ལ། གོང་དུ་བསྟན་པ་དེ་ལྟར་བསམ་པ་རབ་ཏུ་བརྟན་པར་བསྒོམས་པས། བསམ་པ་དེའི་སྟོབས་ཀྱིས་ནད་པ་དེ་ལ་གནོད་པའི་བགེགས་དེ་ཤིན་ཏུ་སྐྲག་པས་མྱུར་བར་ཕྱོགས་བཅུར་འབྲོས་པར་སྦྱར་རོ། །དེ་ལ་གོང་དུ་སྔགས་རྣམ་པ་མང་པོར་
གསུངས་པ་ཐམས་ཅད་ནི་རིམ་པ་ཇི་ལྟ་བ་བཞིན་དུ་འདི་ལས་ཤེས་པར་བྱའོ། །ཨོཾ་བཛྲ་ཀྲོ་དྷ་ཞེས་པ་ནས། བི་དྷྭནྶ་ན་ཧཱུཾ་ཕཊ། ཅེས་པའི་བར་ལ་བླ་མའི་མན་ངག་ལས་ཡང་དག་པར་ཤེས་བྱའོ། །བཞིན་ནི་རབ་ཏུ་འབར་བ་དང་། །ཞེ་སྡང་རྡོ་རྗེའི་ཏིང་འཛིན་གྱིས། །འབྲུག་སྒྲར་ལྡན་པས་
ཡོངས་སུ་གཏུབ། །ཅེས་པ་ནི། དེའི་ཕྱི་ནས་བདག་རྣལ་འབྱོར་པས་ཞེ་སྡང་དྲག་པོ་བསྐྱེད་ལ་བཞིན་ཁྲོ་གཉེར་བཟློག་པས་ཁ་ནས་སྔགས་གོང་མས་འབྲུག་སྒྲ་དྲག་པོ་བརྗོད་དེ། སེང་ལྡེང་གི་ཕུར་པས་རིགས་དྲུག་པོ་ཡང་དག་པར་གཏུབ་པར་འབྲེལ་ཏོ། །དེ་ནས་དྲག་པོའི་སྲས་ཀྱིས་སུ། །
ཞེས་པ་ནས། དེ་ཡང་རྟག་ཏུ་ངེས་པ་ཡིན། །ཞེས་པའི་བར་དུ་ནི་གོ་སླ་བས་འདིར་མ་བཤད་དོ། །དང་པོར་རབ་ཏུ་འབྱོར་པ་ལས། །ནང་གི་བགེགས་ཉིད་བསལ་བ་ཡིས། །ཕྱི་ནས་ཕྱི་ཡི་ནད་བསལ་བ། །སྨན་ལ་སོགས་པའི་སྦྱོར་བ་ཡིས། །མཁས་པས་ཕྱི་ཡི་ནད་བསལ་ཏེ། །
ཞེས་བྱ་བ་ལ། དང་པོ་ནི་བསྒྲུབ་པ་དང་། བསྙེན་པ་རྣམས་ཡོངས་སུ་འབྱོར་པ་ལས་ནང་གི་བགེགས་བསལ་བར་བྱ་སྟེ། ཕྱི་ནས་ཕྱིའི་ནད་བསལ་བར་བྱ་བའི་ཕྱིར་སྨན་སྣ་ཚོགས་པའི་སྦྱོར་བས་རྟེན་ཅིང་འབྲེལ་པར་འབྱུང་བའི་སྟོབས་ལ་བརྟེན་ནས་མཁས་པས་ནད་བསལ་བར་གསུངས་

49-1-292a

སོ། །དེ་ལ་སྨན་ནི་འདི་དག་གོ། །བརྒྱལ་ཀ་ལ་སོགས་སྨན་རྣམས་ཀྱིས། །མར་ནག་ཉིད་ལ་ངེས་བཏབ་ལ། །ཞག་གྲངས་བདུན་ནི་མནན་པ་ཡིས། །སྦུ་ཆུང་ལེགས་པར་ཁྱབ་པར་སྣང་། །ཞེས་བྱ་བ་ལ། བརྒྱལ་ཀ་ཞེས་པ་ནི་སྒྲའི་སྟོབས་ལས་རྣམ་པར་གཅོད་པ་ལ་
བྱ་སྟེ། རྣམ་པར་གཅོད་པ་ལྔ་ཏིལ་མར་གྱི་ནང་དུ་བླུགས་ཏེ། ཞག་གྲངས་བདུན་དུ་ཡོངས་སུ་མནན་པ་ལས་དེའི་ཁ་རུ་སྦུ་ཆུང་མུ་ཏིག་ལྟ་བུས་ཀུན་ལ་ཁྱབ་པར་མཐོང་བ་དང་། ཁ་བསངས་ལ་ཁྱིམ་གཙང་མར་གཞག་གོ། །དེ་ནས་སྦྱོར་བ་འདིས་ཡང་དག་པར་བྱ་སྟེ། འདི་སྐད་གསུངས་སོ། 
སུག་པ་ལ་སོགས་གཙང་སྦྱར་བས། །གོང་དུ་སྔགས་ཀྱིས་བསྙེན་པར་གནས། །འོད་ཟེར་དཀར་པོ་ཡོངས་གནས་པའི། །ཉི་མ་ཉིད་ལ་ཁྲུས་བྱས་ཏེ། །དྲི་མ་དག་པར་བསལ་བ་ལ། །དྲུག་སྦྱར་ངེས་པར་བསྐུ་བར་བྱ། །ཞེས་པ་ལ། སུག་པ་དང་། སྤུ་དང་། ཙནྡན་དང་། སྦྲང་རྩི་
ལ་སོགས་པ་དྲུག་གིས་ཡང་དག་པར་སྦྱར་བར་བྱ་ལ། གོང་དུ་གོང་གི་སྔགས་ཀྱི་བསྙེན་པས་སྔགས་ཀྱི་ཆུ་ལ་འབུམ་དུ་ཡོངས་སུ་བཏབ་པས་དེ་ནས་འོད་དཀར་པོ་གང་ལ་ཡོད་པ་དེ་ལ་འོད་ཟེར་དཀར་པོ་ཅན་ཏེ། དེ་ཡོངས་སུ་རྫོགས་པའི་ཉི་མ་དང་པོ་ལ་ཁ་ཤར་དུ་བལྟས་ཏེ། སྔགས་ཀྱི་སྦྱོར་
བས་ཁྲུས་བྱ་བར་འབྲེལ་ཏོ། །དེ་ནས་དྲི་མ་དག་པ་ལ། །དྲུག་སྦྱོར་ནི་རྣམ་གཅོད་ལྔ་དང་ཏིལ་མར་དང་དྲུག་ཏུ་སྦྱར་བར་བྱ་སྟེ། དེ་ཡི་ལུས་ལ་བསྐུ་བར་བྱའོ། །དེ་འོག་མཆོག་གི་སྨན་ཉིད་གང་། །གྲགས་ལྡན་ཆེན་པོ་སྲང་གཅིག་ནི། །ལེགས་པར་བསྐོལ་བས་ཁ་ཉིད་དུ། །ཞག་དག་
ངེས་པར་འཆགས་པར་འགྱུར། །དེ་ཡིས་ལུས་ལ་བསྐུ་བྱ་ཞིང་། །ཚིགས་མ་ཞོ་གསུམ་བཟའ་བར་བྱ། །ཞེས་བྱ་བ་ལ། དེའི་འོག་ཏུ་མཆོག་གི་སྨན་ཉིད་ཀྱིས་སྦྱར་བར་གསུངས་ཏེ། དེ་ཡང་གང་ཞེ་ན་གྲགས་ལྡན་ཆེན་པོ་ནི་འཇིག་རྟེན་པ་ཀུན་ལ་གྲགས་པའི་རིགས་སྡུད་དོ། །དེ་སྲང་ནི་
བདེ་སྤྱོད་གཅིག་གོ། །དེ་ངེས་པར་བཞུ་བ་ལས་མར་ཁ་རུ་འཆགས་ཏེ། མར་དེས་ལུས་ལ་བསྐུ་བ་དང་། དེའི་ཚིགས་མ་ཞོ་གསུམ་ཟ་རུ་གཞུག་པར་བྱའོ། །སྙིང་པོ་གསུམ་ལ་ཤ་བཙོས་ཏེ། །ཁུ་བ་ངེས་པར་གཏང་བར་བྱ། །ཞེས་པ་ལ། སྙིང་པོ་གསུམ་ནི་པདྨ་དང་། ཨུཏྤལ་དང་།

49-1-292b

ནཱ་ག་གེ་སར་གསུམ་གྱི་སྙིང་པོ་ལ་བྱ་སྟེ། དེ་རྣམས་ཉྭ་ཤའི་ནང་དུ་བཙོས་ལ། དེ་ཡི་ཁུ་བ་ངེས་པར་བླུད་པར་བྱའོ། །གནམ་སྒྲོ་ནག་པོ་ཟུར་གསུམ་པ། །རྩེ་མོ་ཤིན་ཏུ་རྣོ་བ་ལ། །རི་མོ་སྣ་ཚོགས་ཡོད་གྱུར་པ། །བརྒྱ་དག་ཤིན་ཏུ་གདུས་བྱས་ལ། །བཅུ་དྲུག་ཆ་རུ་ངེས་པར་
བསྐོལ། །དེ་ཡིས་ལུས་ལ་བསྐུ་བ་དང་། །ཁ་རུ་ངེས་པར་བླུད་པར་བྱ། །ཞེས་བྱ་བ་ནི། གནམ་སྒྲོ་ནི་གོང་ཀའི་ས་ལ་བྱ་སྟེ་དེ་ཁ་དོག་ནག་པོ་ཟུར་གསུམ་པ་དང་ལྡན་པའི་རི་མོ་སྣ་ཚོགས་པ་དང་ལྡན་པ། སྐམ་པོར་གྱུར་པ། བརྒྱ་ནི་ཤིན་ཏུ་གདུས་པར་བྱ་སྟེ། དེ་ཡང་ཚད་ཇི་ཙམ་དུ་
བསྙམས་པ་ལ། བཅུ་དྲུག་ཆ་རུ་ཞེས་གསུངས་པ་སྟེ། བྲེ་བཅུ་དྲུག་ལ་བྲེ་གང་དུ་བསྐོལ་ཏེ། དེ་ཡིས་ལུས་ལ་བསྐུ་བ་དང་། །ཁ་རུ་ཡང་བླུད་པར་སྦྱར་རོ། །དེ་ཡིས་ཀུན་ཀྱང་སྐྱུག་འགྱུར་ཏེ། །ནད་ནི་ངེས་པར་འབྱུང་བར་འགྱུར། །ཞེས་པ་ནི། དེ་བླུད་པས་ནང་ན་གནས་པའི་ནད་སྐྱུག་
པར་འགྱུར་བ་དང་། འབྱང་བར་འགྱུར་བས་ན་འཚོ་བར་འགྱུར་བར་སྦྱར་རོ། །དྲི་ཞིམ་སྣ་ཚོགས་སྦྱར་བ་ཡིས། །ཆང་དུ་ཞག་བཅུ་ངེས་པར་སྦང་། །དེ་ནས་སྔོན་པོར་གྱུར་པ་དང་། །ལན་ཚྭ་ཕུལ་གང་ངེས་པར་གདབ། །དེ་བཏབ་ཞག་བཞི་སྦང་བྱས་ནས། །བཅུ་བཞི་པ་ལ་ལོ་མར་ཉིད། །
ཕུལ་དོ་དང་ནི་བསྲེས་བྱས་ལ། །སྦུ་བ་དངས་པར་ཡང་དག་བསྐུལ། །དེ་ཡིས་ལུས་ལ་བསྐུ་བ་དང་། །སུམ་གཉིས་ནང་དུ་ངེས་པར་བླུད། །ཅེས་བྱ་བ་ལ། དྲི་ཞིམ་པོ་སྣ་ཚོགས་པ་ནི་ག་པུར་ལ་སོགས་པ་བཅུ་བདུན་ནོ། །དེ་རྣམས་སྲང་གསུམ་གསུམ་དུ་སྦྱར་ཏེ། ཆང་གི་ནང་དུ་
ཞག་བཅུའི་བར་དུ་སྦངས་ལ། དེ་ནས་ལན་ཚྭ་ཕུལ་གང་བླུགས་ནས་ཞག་བཞིའི་བར་དུ་གཞག་པར་བྱའོ། །དེ་ནས་ལོ་མར་ཕུལ་དོ་དང་བསྲེས་ལ། །བསྐོལ་བའི་སྦུ་བ་དང་ས་པར་སྦྱར་རོ། །དེ་ཡང་དང་པོར་ཆང་ནི་བྲེ་དོར་ཤེས་པར་བྱའོ། །མར་ནི་དེའི་ལུས་ལ་སུམ་ཆ་བསྐུ་བར་
བྱ་བ་དང་། ཁར་སུམ་གཉིས་བླུད་པར་བྱའོ། །སྦྱོར་བ་དེ་ལ་རབ་བརྟེན་ན། །གདོན་མི་ཟ་བར་འཚོ་བར་འགྱུར། །ཞེས་གསུངས་ཏེ། དེ་ལྟ་བུའི་སྦྱོར་བ་དེ་ལ་བརྟེན་ནས་ངེས་པར་བྱས་ན་ཤ་བརྩེགས་ཞེས་བྱ་བའི་ནད་གདོན་མི་ཟ་བར་འཚོ་བར་གསུངས་ཏེ། བདག་གིས་ཀྱང་

49-1-293a

ཡང་དག་པར་འཚོ་བར་མཐོང་བའི་ཕྱིར་ངེས་པར་འགྲུབ་པའོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ཞེས་བྱ་བ་ལས་ལེའུ་བདུན་པའི་བཤད་པའོ།།      །།དེ་ནས་ལག་ན་རྡོ་རྗེ་ཡིས། །ཞེས་པ་ནས། ཐ་མལ་པ་ཡི་འགྲོ་བ་མིན། །
ཞེས་པའི་བར་དུ་ནི་གོ་སླ་བས་འདིར་མ་བཤད་དོ། །བྲམ་ཟེའི་སྔགས་དང་མི་བཟད་པ། །ཡང་ན་དྲག་པོའི་སྒྲ་ལྡན་པ། །སྟོན་མོ་བཅུ་བཞི་བྱས་པ་ལས། །ཞག་གསུམ་བར་དུ་དཀར་གསུམ་ཟས། །རྒྱུན་མི་འཆད་པར་སྦྱིན་པར་བྱ། །ཞེས་བྱ་བ་ལ། བྲམ་ཟེ་སྔགས་པ་མི་བཟད་
པ་ནི་བུ་མོ་རྒྱལ་རིགས་ཅན་ལ་བྱ་སྟེ། ཅིའི་ཕྱིར་སྔགས་པ་མི་བཟད་ཅེ་ན། བྲམ་ཟེའི་རྒྱུད་དྲང་སྲོང་མངོན་པར་རྟོགས་པ་ལས་འདི་སྐད་འབྱུང་ངོ་། །རྒྱལ་རིགས་བུ་མོ་བཅུ་བཞི་མ། །དམར་སེར་མདོག་ཏུ་འདུག་པ་ལ། །འཇིག་རྟེན་འདི་དང་འདས་པ་ཡི། །དངོས་གྲུབ་བདེ་བ་ཐམས་ཅད་
གནས། །ཞེས་འབྱུང་བས་ན། རྒྱལ་པོའི་བུ་མོ་ལོ་བཅུ་བཞི་ལོན་པའམ། ཡང་ན་དྲག་པོའི་སྒྲ་དང་ལྡན་པའི་སྐྱེས་པ་ལ་བྱ་སྟེ། དེ་ཡང་ལོ་ནི་བཅུ་བཞི་ལོན་པ་ལ་བྱ་སྟེ། ཞག་གསུམ་གྱི་བར་དུ་ཟས་དཀར་གསུམ་བྱིན་ལ། བདག་གི་འོག་ནས་འབྱུང་བ་རྣམས་སྒྲུབ་པར་
འབྲེལ་ཏོ། །རིག་བྱེད་སྔགས་སུ་ལྡན་པ་ཉིད། །དེ་ལ་བསླབ་པར་བྱ་བ་ཡིན། །ཚངས་པའི་སྐུད་པས་སྟོད་དཀྲིས་ལ། །གོས་དག་དཀར་པོ་ཡོངས་སུ་བསྐོན། །ཞེས་པ་ནི། རིག་བྱེད་ཀྱི་སྔགས་འོག་ནས་འབྱུང་བ་དེ་ཁྱེའུ་ལ་བསླབས་ཏེ། ཚངས་པའི་སྐུད་པ་དཀར་པོ་ལ་སྤོས་ཆུས་
བཏབ་སྟེ། སེ་རལ་ཁར་བཅིངས་ནས་གོས་དཀར་པོ་བསྐོན་པར་བྱའོ། །སྤྱི་བོར་ཐོར་ཅོག་བཅིང་བྱ་སྟེ། །ལག་པ་གཡས་བཞི་པ་ཉིད་ལ། །དཀྲི་ཞིང་དངོས་པོ་ཡོངས་སུ་བསྡམ། །ཞེས་བྱ་བ་ནི། སྤྱི་བོར་སྐྲའམ་ཡང་ན་རས་ལས་ཐོར་ཅོག་བཅིངས་ཏེ། ལག་པ་གཡས་པའི་
སོར་མོ་བཞི་པ་ལ་ཀུ་ཤས་ཡོངས་སུ་བསྡམས་ནས། ཤར་ཕྱོགས་སུ་གཏང་བར་བྱའོ། །ཤར་ཕྱོགས་དག་ཏུ་སོང་བ་ལས། །ཤིང་ཆེན་རྩ་ནས་ཁྲུ་གང་ཉིད། །འོག་ནས་བརྐོས་པའི་ས་བླང་བྱ། །དེ་སྟེང་རས་ཡུག་དཀར་པོ་ཡིས། །ཐོབ་པའི་ཕྱོགས་སུ་མི་ལྟ་ཞིང་། །ཤར་

49-1-293b

ཕྱོགས་ཁྲོ་བོའི་སྔགས་བཟླས་བྱ། །ཞེས་བྱ་བ་ལ། ཁྱེའུ་དེ་ཤར་ཕྱོགས་སུ་སོང་བ་ལས། ཤིང་ཆེན་པོའི་རྩ་བ་ནས་ཁྲུ་གང་འོག་ཏུ་བརྐོས་པའི་ས་བླངས་ནས། རས་དཀར་པོའི་ཕ་ཚེའི་ནང་དུ་བླུགས་ཏེ།  ཕྱིར་འོངས་པ་ལས་ཕྱི་མིག་མི་ལྟ་བར་ཁམས་གསུམ་རྣམ་པར་རྒྱལ་བའི་སྔགས་
འོག་ནས་འབྱུང་བ་བཞིན་བཟླས་པར་བྱའོ། །དེ་ནས་དེ་ཉིད་མཐོང་བ་དང་། །ཧ་ལ་ཧ་ལའི་སྒྲ་ཡང་བརྗོད། །ཅེས་པ་ནི། དེ་ཉིད་ནི་ཁྱེའུ་སྟེ། ཁྱེའུ་དེ་མཐོང་བ་དང་། རྣལ་འབྱོར་པས་ཧ་ལ་ཧ་ལ་ཧཱུཾ་ཞེས་བྱ་བའི་སྔགས་བཟླ་བར་བྱའོ། །བ་ཡི་རྣམ་ལྔ་ཉིད་དང་ཡང་། །ཞེས་པ་ནས།
མཐའ་མ་ཡོངས་སུ་འཁོར་བར་བྱ། །ཞེས་པའི་བར་དུ་ནི་གོ་སླ་བས་འདིར་མ་བཤད་དོ། །སྟེང་ཡང་ཕུབ་པས་ཡུངས་ཀར་ལ། །སྔགས་བཟླས་པ་ཡིས་ཡོངས་སུ་བསྣུན། །གཏོར་མ་སྟོབས་རྣམས་སྐྱེད་བྱེད་དང་། །མཆོད་པ་ལྔ་ཡིས་དུས་གཉིས་སུ། །ཡང་དག་པར་ནི་མཆོད་
པར་བྱ། །ཞེས་བྱ་བ་ལ། སྟེང་དུ་ཕུབ་པ་ནི་སྐྱེར་པའི་ཕུར་པས་ཕུབ་ལ། འོག་ནས་འབྱུང་བའི་སྔགས་ཀྱིས་ཡུངས་ཀར་ལ་བསྔགས་ལ། ཚངས་པའི་གཟུགས་ལབ་རྡེག་པར་གསུངས་སོ། །གཏོར་མ་ལས་སྣ་ཚོགས་འགྲུབ་པར་བྱེད་པ་དང་། སྟོབས་སྐྱེད་པར་བྱེད་པ་ཡིན་
པས་དེ་དང་མཆོད་པ་རྣམ་པ་ལྔ་ནི་ལྷ་རྣམས་ལ་ཉིན་མཚན་གཉིས་ལ་ཉིན་ལན་ཅིག་མཚན་ལན་ཅིག་དབུལ་བར་བྱ་སྟེ། གཏོར་མ་ནི་སེམས་ཅན་ཐམས་ཅད་ལའོ། །རང་ཉིད་སྔ་མའི་ཚུལ་གནས་ལ། །ཡིད་ཆེས་ཕྲེང་བ་རྣམས་བཟུང་བས། །དྲག་པོའི་རིགས་ལ་རྩ་བའི་སྔགས། །
ཚད་དུ་ཕྱིན་པར་ཡོངས་སུ་བཟླས། །ཞེས་བྱ་བ་ལ། རང་ཉིད་སྔ་མའི་ཚུལ་ནི་ལག་ན་རྡོ་རྗེ་ཉིད་ཀྱི་ཚུལ་དུ་གནས་པར་བྱས་ལ། ཡིད་ཆེས་ནི་མི་ལ་བྱ་སྟེ། མི་རུས་ཀྱི་ཕྲེང་བ་དྲག་པོའི་རིགས་སོར་མོ་ལྔ་པ་ལས་ཡོངས་སུ་བཟུང་ནས་རྩ་བའི་སྔགས་རྣམས་ཚད་འབུམ་དུ་ཕྱིན་པར་
བཟླས་པར་འབྲེལ་ཏོ། །དེ་མཐར་སྙིང་པོ་མ་ལུས་པར། །བརྒྱ་རྩ་བརྒྱད་དག་བཟླས་པར་བྱ། །དེ་ཡི་མཐའ་རུ་བཟླས་བྱ་བ། །དེ་ཡི་སྲོག་སྙིང་ངེས་པར་བཟླས། །ཞེས་པ་ལ། རྩ་བའི་སྔགས་ཐིམ་ནས་ལྷ་ཐམས་ཅད་ཀྱི་སྙིང་པོ་རེ་རེ་ལ་བརྒྱ་རྩ་བརྒྱད་དུ་བཟླས་པར་འབྲེལ་ཏོ། །

49-1-294a

དེའི་མཐར་ཚངས་པ་སྲིན་པོའི་སྲོག་སྙིང་བཟླས་པར་བྱའོ། །སྐྱེར་པའི་ཚེར་མར་རབ་སྦངས་ལ། །དཀྱིལ་འཁོར་མཐའ་རུ་གནས་པར་བྱ། །དེ་ནས་འགུགས་པའི་སྔགས་བཟླས་པ། །ཚད་དུ་ངེས་པར་ཐེམ་བྱས་ལ། །ཞེས་བྱ་བ་ལ། སྐྱེར་པའི་ཚེར་མ་བམ་
པོར་སྦངས་ལ་མིའི་སྐྲས་ཡོངས་སུ་བཅིངས་ལ་དཀྱིལ་འཁོར་གྱི་རྩར་གཞག་པའོ། །དེ་ནས་ཚངས་པ་འགུགས་པའི་སྔགས་བརྒྱ་རྩ་བརྒྱད་ཡོངས་སུ་བཟླས་པའོ། །དེ་ཉིད་འོངས་པར་མ་གྱུར་ན། །ཞེས་པ་ནས། བདག་ཉིད་སྙིང་ལས་ཆུང་ངུ་ཡིན། །ཞེས་བྱ་བའི་བར་དུ་ནི་གོ་སླ་བས་
འདིར་མ་བཤད་དོ། །འོན་ཏེ་འགྲོ་བར་མི་འགྱུར་ན། །བདག་གི་སྦྱོར་བ་འདི་བརྩམ་བྱ། །ཞེས་བྱ་བ་ནི་འདི་ལྟར་ཤེས་པར་བྱའོ། །འོངས་པར་གྱུར་ན་གོང་མའི་སྔགས་དང་ཕྱག་རྒྱས་དགུག་པ་དང་། བཀུག་ནས་རིམ་པའི་སྦྱོར་བས་མདུན་དུ་གནས་པར་བྱ་བ་དང་། འོངས་པའི་
རྟགས་བརྟན་པ་དང་། དང་ལ་ཞི་བའི་ཚིག་གིས་གདགས་པར་བྱས་ལ། གལ་ཏེ་སོང་ན་རྣལ་འབྱོར་པས་སྙིང་ལས་ཆུང་ངུས་གནས་པར་བྱའོ། །གལ་ཏེ་འགྲོ་བར་མི་འགྱུར་ན། འོག་ནས་འབྱུང་བའི་སྦྱོར་བར་བརྩམ་པར་གསུངས་པ་ནི་འདི་ལྟར་རོ། །སྐུད་པ་སྣ་ལྔར་ལྡན་པ་ལ། །
ཁྲོ་བོའི་སྔགས་ཀྱིས་རབ་བསྔགས་ཏེ། །ཞགས་མིག་དམ་པོས་ནད་པ་བཅིངས། །ལྕགས་ཀྱུས་སྙིང་ནས་དྲངས་བྱས་ནས། །གཡོན་དུ་རྡོ་རྗེ་གཟུང་བྱས་ནས། །གཡས་པས་ཡིད་ཆེན་ཕྲེང་བ་ལ། །ལུས་ངག་ཡིད་གསུམ་རབ་དྲག་པ། །སྔགས་སོགས་ཡོངས་སུ་བཟླས་
པར་བྱ། །ཞེས་བྱ་བ་ལ།  ཚོན་སྐུད་སྣ་ལྔ་ལ་རྣམ་པར་རྒྱལ་བའི་སྔགས་ཀྱིས་བསྔགས་ལ། སྲད་བུ་དེ་ཡིས་ནད་པ་དེའི་སྐེ་ལ་ཞགས་མིག་གིས་བསྡམས་ཏེ། ལྕགས་ཀྱུ་དང་། རྡོ་རྗེ་དང་། ཞགས་པ་གསུམ་ལག་པ་གཡོན་པས་བཟུང་ལ། གཡས་པས་མི་རུས་ཀྱི་ཕྲེང་
བས་དྲག་པོའི་རིགས་ལ་བཟུང་བས་སྔགས་འོག་མ་རྣམས་བཟླས་པར་བྱའོ། །ཕྱག་རྒྱ་ལྔ་ཡིས་བསྡམས་བྱས་ལ། །དེ་ཉིད་ལ་ནི་ཡོངས་སུ་དབབ། །ཅེས་པ་ནི། ཞགས་པ་ལ་སོགས་པ་ལྔས་ཡང་དག་པར་བཅིངས་ལ། དེ་ཉིད་གཟུགས་ལ་ཡང་དག་པར་དབབ་པའོ། །

49-1-294b

དེ་ནས་སྐྱེར་པའི་བམ་པོ་ལ། །ཞེས་པ་ནས། གསང་བའི་དོན་དུ་ཁ་དགབ་བྱ། །ཞེས་པའི་བར་དུ་ནི་གོ་སླའོ། །དང་པོ་ནས་སྔགས་རྣམས་ནི་རིམ་པ་ཇི་ལྟ་བ་བཞིན་དུ་འདི་ལས་ཤེས་པར་བྱའོ། །ཨོཾ་བྷུ་ར་ཊ་ཞེས་པ་ནས་ཕཊ་གསུམ་པོའི་བར་དུ་ནི་སྔགས་སུ་རིག་པར་བྱའོ། །དེ་
བསྲེགས་བདག་གི་ལུས་ངག་ནི། །ཚིག་པས་དེ་ལ་འགྱོད་པའི་ངག །བདག་གིས་ངེས་པར་བརྗོད་པར་བྱ། །དེ་ཡིས་དེ་ལ་ལུས་ལ་སོགས། །གདོན་དང་བྲལ་བས་ཞི་བར་འགྱུར། །ཞེས་པ་ལ། ཚངས་པ་དེ་བསྲེགས་པས་ལུས་ངག་རྣམས་ཚིག་པས། དེ་ལ་ནི་ཚངས་པ་ལ་
སྟེ། འགྱོད་པའི་ཚིག་གིས་རང་ལ་གནོད་པ་རྣམས། །བྱས་པས་རང་ཉིད་སྡུག་བསྔལ་མྱོང་། །དེ་མྱོང་དགའ་བར་ཚོར་རམ་འདི། །ཞེས་བྱ་བ་ལ་སོགས་པའི་ཚིག་བརྗོད་པར་བྱའོ། །གོང་མའི་སྦྱོར་བས་ནད་པ་དེའི་སྡུག་བསྔལ་དང་བྲལ་ནས་ཞི་བར་སྦྱར་རོ། །དེ་ནས་ཐལ་བས་
ནད་པ་ལ། །ལུས་ལ་བསྐུས་ནས་སྲུང་བ་ཡི། །འཁོར་ལོ་འདི་ལྟར་གདགས་པར་བྱ། །ཞེས་བྱ་བ་ལ། ཚངས་པའི་གཟུགས་བསྲེགས་པའི་ཐལ་བས་ལུས་ལ་བསྐུས་ན་གདོན་རྣམས་འཇིགས་པས་ཕྱིས་མི་འཇུག་པར་འགྱུར་རོ། །དཔེར་ན་བྱ་རོག་བསད་པའི་རོ་ཤིང་བ་ཀ་ཏི་
བསྲུང་བའི་ཁར་བཞག་པས། བྱ་རོག་གཞན་མ་རྣམས་བསད་དེ་འོང་བའི་བསམ་པས་སྐྲག་སྟེ། ཤིང་དེ་ལེགས་པར་བསྲུང་བའོ། །དེ་བཞིན་དུ་བགེགས་རྣམས་ཐལ་བ་ལ་སྔགས་དང་བླ་མའི་མན་ངག་གིས་བཏབ་པས་སྐྲོད་པ་སྟེ། ཕྱིས་མི་འཇུག་པར་འབྲེལ་ཏོ། །སྲུང་བའི་འཁོར་ལོ་
ནི་འོག་ནས་འབྱུང་བ་སྟེ་གོ་སླའོ། །ཁམས་གསུམ་རྣམ་པར་རྒྱལ་འབར་བའི། །ཞེས་པ་ནས། ཕྱག་རྒྱ་བཅས་པས་སྔགས་པ་ཡིན། །ཞེས་པའི་བར་དུ་ནི་ཕྱི་ནས་སྔགས་པ་ལ་ལུས་ལ་གཟི་བྱིན་བསྐྱེད་པར་བྱ་བའི་དོན་ཏོ། །སངས་རྒྱས་བྱང་ཆུབ་སེམས་དཔའ་དང་། །བླ་མ་
རྡོ་རྗེ་འཛིན་པ་ལ། །གུས་པ་ཡིས་ནི་སངས་རྒྱས་བདེ། །ཞེས་བྱ་བ་ལ། སངས་རྒྱས་དང་བྱང་ཆུབ་སེམས་དཔའ་དང་། བླ་མ་རྣམ་པ་གསུམ་ལ་མཆོད་པ་དང་། ཕྱག་བཙལ་བ་ལ་སོགས་པ་གུས་པར་བྱས་པས་འབྲས་བུ་སངས་རྒྱས་པས་བདེ་བའི་འབྲས་བུ་ཐོབ་པར་གྱུར་པ་ཁོ་

49-1-295a

ནའོ། །མཆོད་པ་རབ་ཏུ་རྒྱས་པ་ཡིས། །སྔོན་དུ་བསྙེན་པ་ཡོངས་སུ་བསྒྲུབ། །ཅེས་བྱ་བ་ནི། སྤྱིར་ཁྱབ་པར་གནས་པ་དང་རྣམ་པར་རྒྱལ་བའི་བསྒྲུབ་པ་དང་། གོང་དུ་བསྙེན་པ་ཡོངས་སུ་སྒྲུབ་པར་འབྲེལ་ཏོ། །ཁམས་གསུམ་རྣམ་པར་རྒྱལ་ཞེས་བྱ། །ཞེས་པ་
ནས། སྟག་གི་པགས་པས་སྨད་དཀྲིས་བྱ། །ཞེས་པའི་བར་དུ་ནི་གོ་སླའོ། །དོན་དང་ལྡན་པའི་སྙིང་པོ་བསམ། །ཁྲག་གིས་ངོ་ཡང་བསྐུས་བྱས་ལ། །ནག་པོར་གཏོགས་པའི་འཕྲོ་བ་བརྒྱད། །ཡོལ་བའི་མིང་ལ་ཞུགས་བྱས་ལ། །སྐར་མ་དག་ལ་ངེས་པར་བསྒོམ། །ཞེས་བྱ་
བ་ལ། དོན་དང་ལྡན་པའི་སྙིང་པོ་ནི། །བླ་མའི་མན་ངག་ལས་སྤྲོས་པ་ཐམས་ཅད་དང་བྲལ་བའི་ས་བོན་གྱི་གཞི་ངེས་པར་བསྐྱེད་པར་བྱའོ། །ཁྲག་ནི་མིའི་ཁྲག་གིས་ལུས་བསྐུས་ནས་ནག་པོར་གཏོགས་ནག་པོར་གཏོགས་པ་སྟེ། དེའི་ཚེས་བརྒྱད་ལ་མིག་དམར་གྱི་སྐར་མ་ལ་རྣལ་
འབྱོར་པས་ཞུགས་ལ་སྐར་མ་ལ་ཡོངས་སུ་བསྒོམ་པར་བྱའོ་། །ཆང་འདུ་བ་ལ་གནས་བྱས་ལ། །ཤེས་རབ་ཟུང་དུ་འབྲེལ་པ་ཡིས། །སྐར་མ་ཉིད་ལ་མཉམ་སྦྱར་ལ། །བརྒྱུད་པ་ཡི་ནི་སྔགས་བཟླས་བྱ། །ཞེས་བྱ་བ་ལ། ཆང་འཚོང་མའི་ཁང་པར་གནས་བྱས་ལ། བུ་
མོ་གཞོན་ནུ་མ་ལོ་སུམ་ཅུ་ལས་མི་རྒན་པ་གཉིས་ལ་ཆོ་གས་ཡོངས་སུ་བཟུང་ལ། གཡས་དང་གཡོན་དུ་བསྙེན་པས་སྐར་མ་མཉམ་པར་སྦྱར་ཏེ། ཐབས་དང་ཤེས་རབ་ཀྱི་འཁོར་ལོ་བརྒྱུད་པས་སྔགས་བཟླས་པར་གསུངས་སོ། །ཞག་གྲངས་བརྒྱ་རྩ་བརྒྱད་པ་ཡིས། །
ཞེས་པ་ནས། སྙིང་དུ་སྡུག་པར་ངེས་པ་ཡིན། །ཞེས་བྱ་བའི་བར་དུ་གོ་སླའོ། །མཁའ་འགྲོ་མ་སོགས་ཕྲ་མེན་མས། །བདག་ལ་ལུས་ནི་ངེས་པར་སྟོན། །ཞེས་བྱ་བ་ནི། མཁའ་འགྲོ་མ་དང་ཕྲ་མེན་མ་ལ་སོགས་པས་སྣ་ཚོགས་པའི་གཟུགས་སྟོན་པ་ན་རྣལ་འབྱོར་གྲུབ་པ་ཡིན་པས་ན་
བདག་གིས་འཇིགས་པ་བསྐྱེད་པར་མི་བྱའོ། །དེའི་དགོངས་པ་ཇི་ལྟ་བུར་འགྲུབ་ཅེ་ན། སྡུག་བསྔལ་རྟག་ཏུ་མི་འབྱུང་ཞིང་། །ལྷ་མིན་ལ་སོགས་གདུག་པ་ཡིས། །མེ་ཡི་ཕུང་པོར་མཐོང་བ་ཡིན། །ཞེས་པ་ནི། ཚེ་འདི་དང་ཕ་རོལ་དུ་སྡུག་བསྔལ་མི་འབྱུང་བ་དང་། ལྷ་མ་ཡིན་

49-1-295b

ལ་སོགས་པ་གདུག་པ་ཐམས་ཅད་ཀྱིས་མེའི་ཕུང་པོར་མཐོང་བའོ། །བདག་ལ་སྡིག་པ་དམར་པོས་འཇུས། །དེ་ལས་འཇིགས་པ་བསྐྱེད་མི་བྱ། །བདག་ལ་གདུག་པ་སྣ་ཚོགས་པས། །གནོད་པ་སྣ་ཚོགས་བྱེད་པ་ན། །དེ་ལ་འཇིགས་པ་མི་བསྐྱེད་ཅིང་། །སེམས་དགའ་བ་
ཡིས་ཡོངས་སུ་མཆོད། །ཅེས་བྱ་བ་ལ། སྡིག་པ་དམར་པོ་འཇིགས་པའི་གཟུགས་བདག་ལ་སྙིང་གར་འཇུས་པ་ན་སྐྲག་པར་མི་བྱེད་པ་དང་། བདག་ལ་གདུག་པ་སྣ་ཚོགས་པ་གནོད་པའི་ལས་བྱེད་ན། དེ་ལ་བག་ཚའི་སེམས་མི་བསྐྱེད་མཆོད་པས་དགའ་བར་བྱ་བར་སྦྱར་རོ། །དེ་ནི་དངོས་གྲུབ་
ཡིན་པས་ན་དགའ་བའི་སེམས་བསྐྱེད་པའོ། །དེ་ལ་སྤྱོད་པའི་སྔགས་ནི་འདི་ལ་རིག་པར་བྱའོ། །ཨོཾ་ཀ་པ་ལ་ཞེས་པ་ནས། ས་མ་ཡ་ཞེས་པའི་བར་དུ་ནི་རིམ་པ་ཇི་ལྟ་བ་བཞིན་དུ་དངོས་གྲུབ་བསྒྲུབ་པའི་སྔགས་སུ་ཤེས་པར་བྱའོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ཞེས་བྱ་བ་ལས་
ལེའུ་བརྒྱད་པའི་བཤད་པའོ།།      །།ལག་ན་རྡོ་རྗེ་གོས་སྔོན་གྱིས། །ཞེས་པ་ནས། ཐབས་འདི་ཡང་དག་སྦྱར་བར་བྱ། །ཞེས་བྱ་བའི་བར་དུ་ནི་གོ་སླའོ། །རང་གི་སྦྱོར་བས་གཟུང་བྱས་ནས། །དྲག་པོའི་སྒྲ་ལྡན་ཉི་ཤུ་པ། །ཤིན་ཏུ་དཔའ་ཞིང་དད་ལྡན་པ། །སྟོབས་ལྡན་
གཏུམ་པའི་བདག་ཉིད་ཅན། །ཞག་དྲུག་བར་དུ་བསྙེན་བྱ་བ། །ཞེས་པ་ནི་རང་གི་སྦྱོར་བས་གཟུང་བ་ནི་འོག་ནས་འབྱུང་བ་སྟེ། དེ་ཡིས་ཡོངས་སུ་གཟུང་བར་འབྲེལ་ཏོ། །དྲག་པོའི་སྒྲ་དང་ལྡན་པ་ནི་སྐྱེས་པ་ལ་བྱ་སྟེ། སྐྱེས་པ་ལོ་ཉི་ཤུ་ལོན་པ་ཤིན་ཏུ་དཔའ་བ་དང་ལྡན་པ་སྟོབས་ཆེ་བ། 
གཏུམ་བག་ཅན་ལ་བདག་རྣལ་འབྱོར་པས་ཞག་དྲུག་གི་བར་དུ་བསྙེན་པར་སྦྱར་རོ། །ཤ་ལྔ་ལ་སོགས་ཆང་བྱིན་ལ། །དེ་ལའང་སྔགས་ཀྱིས་དེས་བཏབ་ནས། །ཤ་གོས་ཁྲ་བོས་ཡོངས་སུ་བསྐོན། །ཞེས་བྱ་བ་ལ། མི་ལ་སོགས་པའི་ཤ་ལྔ་དང་། །ཆང་ལ་སྔགས་འོག་མ་བཏབ་ལ་
སྦྱིན་པའོ། །ཤ་གོས་ནི་སྨད་གཡོགས་ལ་བྱ་སྟེ། དེ་ཁྲ་བོར་བསྐོན་པར་འབྲེལ་ཏོ། །མེ་ཏོག་ཕྲེང་བས་བརྒྱན་བྱས་ལ། །སྔགས་འདི་དག་གིས་འབུམ་དུ་བཟླས། །དེ་ནས་དེ་ཡི་གཡས་ཉིད་དུ། །ཞགས་པ་ངེས་པར་བསྐུར་བྱས་ལ། །ག་ས་ག་སའི་སྙིང་པོ་བརྗོད། །གཡོན་དུ་

49-1-296a

དངོས་པོ་ལྡུགས་བྱེད་པ། །ཡིད་ཆེན་ལས་ནི་རབ་ཏུ་བརྩམས་། །ཞེས་པ་ནི་གོ་སླའོ། །ནག་པོར་གཏོགས་པའི་གསུམ་པ་ལ། །སྐར་མ་ཉིད་ལ་རབ་བསྐུལ་ཏེ། །མཉམ་པ་ཡིས་ནི་བླང་བར་བྱ། །ཞེས་བྱ་བ་ལ། ནག་པོར་གཏོགས་པའི་ཚེས་གསུམ་གྱི་
མཚན་མོ་གཏང་བར་བྱ་བའོ། །དེ་ནས་དེ་ཡིས་མཉམ་པ་ཡིས་ནི་དུར་ཁྲོད་ཀྱི་ས་ལས་བྱ་སྟེ་དེ་ཡིས་བླང་བར་བྱའོ། །ཅིའི་ཕྱིར་མཉམ་པ་ཞེས་བྱ་ཞེ་ན། རྣམ་པར་རྟོག་པ་ཐམས་ཅད་དང་བྲལ་བས་ཡིན་པས་ན་མཉམ་པའོ། །དེ་ཐོབ་སྔགས་པ་བློ་ལྡན་པས། །ཞེས་པ་ནས། འབུམ་
དུ་ཚང་བར་བཟླས་པར་བྱ། །ཞེས་པའི་བར་དུ་གོ་སླ་བས་འདིར་མ་བཤད་དོ། །བདག་ཉིད་སྔ་མའི་དབྱིབས་གནས་ཏེ། །འབོར་གཉིས་རུས་པའི་ཕྲེང་བ་ལ། །དྲག་པོའི་རིགས་ལ་གཟུང་བྱ་སྟེ། །རྩ་བའི་སྔགས་དང་མགོན་པོ་སོགས། །ཐིམ་པར་བཟླས་ཞེས་བྱ་བ་ལ། །བདག་
ཉིད་ལག་ན་རྡོ་རྗེ་སྔ་མའི་གཟུགས་སུ་གནས་པར་བྱས་ལ། འབོར་གཉིས་ཞེས་བྱ་བ་ནི་རྔ་མོ་ལ་བྱ་སྟེ། འབོར་གཉིས་དང་ལྡན་པའི་ཕྱིར་རོ། །དེའི་རུས་པ་ལས་བྱས་པའི་ཕྲེང་བ་བཟུང་སྟེ། དྲག་པོའི་རིགས་ལ་རྩ་བའི་སྔགས་དང་། མགོན་པོ་ནག་པོའི་སྔགས་རྣམས་གྲངས་སུ་
ཐིམ་པར་བཟླས་པར་སྦྱར་རོ། །མཆོད་པ་རྣམ་པ་ལྔ་དག་དང་། །ཞེས་པ་ནས། དེ་སྟེང་དར་གྱིས་ངེས་པར་གདིང་། །ཞེས་པའི་བར་དུ་ནི་གོ་སླའོ། །དེ་ལྟར་ཞག་གྲངས་སུམ་ཅུའི་བར། །ཡོངས་སུ་བསྙེན་པ་བྱས་པ་ལས། །ནད་པའི་གོས་ལ་སོགས་པ་དང་། །ཁ་འཕྲོ་ལ་
སོགས་བདག་གི་རྣམས། །སྣོད་དུ་ཐམས་ཅད་བསོགས་བྱ་སྟེ། །སྔགས་ཆེན་གྱིས་ནི་ཡང་དག་བསྔགས། །ཞེས་བྱ་བ་ནི། ཟླ་བ་ནི་ཟླ་བ་གཅིག་ཏུ་གོང་དུ་བསྟན་པ་ལྟར་བསྙེན་པས་ནད་པའི་ཁ་འཕྲོ་དང་། གོས་ཀྱི་སྣལ་མ་དང་དྲི་མ་ལ་སོགས་པ་རྣམས་ཟངས་ཀྱི་སྣོད་དུ་བསོགས་ལ། 
སྔགས་ཆེན་པོ་ནི་གཙོ་བོའི་སྔགས་ཀྱིས་ཡང་དག་པར་བསྔགས་ལ། གཏོར་མ་གཏང་བར་འབྲེལ་ཏོ། །དེ་ལྟར་བསྙེན་པ་རྫོགས་པ་དང་། །ནད་པ་ཡོངས་སུ་བཀུག་བྱས་ལ། །ཐལ་མོ་ཡོངས་སུ་སྦྱར་བྱས་ཏེ་། །སེམས་བསྐྱེད་པ་དང་སྐྱབས་འགྲོ་བྱ། །ཞེས་བྱ་བ་ལ། བསྙེན་པ་

49-1-296b

རྫོགས་ནས་ནད་པ་བཀུག་ལ་བྱང་ཆུབ་ཏུ་སེམས་བསྐྱེད་པ་དང་། གསུམ་ལ་སྐྱབས་སུ་འགྲོ་བ་དང་། སྡོམ་པ་ནོད་པ་ལ་སོགས་པ་བྱས་ལ་གསོ་བར་བྱ་བར་འབྲེལ་ཏོ། །རྡོ་རྗེ་འབར་བའི་ལྕགས་ཀྱུ་ཡིས། །དེ་ཡི་སྙིང་ལས་དྲངས་བྱས་ལ། །ཧཱུཾ་ཛ་ཕཊ་ཀྱི་སྒྲ་ཡང་བསྒྲགས། །ཞེ་སྡང་
རྡོ་རྗེའི་ཏིང་འཛིན་དང་། །ཁྲོ་བོའི་གཟུགས་དང་དྲག་པོའི་སྒྲས། །གཡས་པར་ཕྲེང་བ་ཐོགས་བྱས་ལ། །གཡོན་པས་རལ་གྲི་འབར་བ་གཟུང་། །ནག་པོ་ཆེན་པོ་རབ་རྦད་ལ། །དེ་ཡི་ཕུང་པོ་འཇོམས་པར་བསམ། །ཞེས་བྱ་བ་ལ། ལག་པ་གཡོན་པས་ལྕགས་ཀྱུ་དང་། །
རལ་གྲི་བཟུང་ནས་གཡས་པ་ཕྲེང་བ་བཟུང་སྟེ། ཞེ་སྡང་ཆེན་པོར་བསྐྱེད་ལ་བཞིན་བཟློག་ནས། དང་པོར་ཛ་ཞེས་པའི་ངག་དྲག་པོར་བཏོན་ཏེ། ནག་པོ་ཆེན་པོ་རྦད་ལ་གཤིན་རྗེ་འཇོམས་པར་བསམ་པའོ། །དེ་ནས་སྔགས་པ་བློ་ལྡན་པས། །ཞེས་པ་ནས། ཕྱི་ནས་བགེགས་
མི་འཇུག་པ་ཡིན། །ཞེས་པའི་བར་ནི་གོ་སླའོ། །དེ་ལ་གོང་དུ་སྔགས་སྨོས་པ་ཐམས་ཅད་ནི་རིམ་པ་ཇི་ལྟ་བས་འདི་ལས་ཤེས་པར་བྱའོ། །ཨོཾ་ཕཊ་ཕཊ་ཅེས་པ་ནས། རཀྵ་རཀྵ་སྭཱ་ཧཱ་ཞེས་པའི་བར་ལ་སྔགས་རྣམས་རིག་པར་བྱའོ། །དེ་ལྟར་གནོད་པ་ངེས་བསལ་ནས། །
ནལ་འབྱོར་པ་ལ་གནོད་བྱེད་པའི། །དངོས་པོ་གང་དག་གསད་བྱའི་ཕྱིར། །ནག་པོ་ཆེན་པོ་དེ་བསྒྲུབ་བྱ། །ཞེས་བྱ་བ་ལ། ཕན་པ་དང་གནོད་པ་རྣམ་པ་གཉིས་ཀྱིས་གནོད་པར་བྱེད་པ་རྣམ་པ་གཉིས་བསལ་ཏེ། གོང་དུ་བསྟན་པ་དེ་ལྟར་བྱས་པས་སེམས་ཅན་ནད་པ་ལ་གནོད་པའི་
བགེགས་བསལ་བར་སྦྱར་རོ། །འདི་ནས་མར་ལ་རྣལ་འབྱོར་པ་ལ་གནོད་པར་བྱེད་པའི་གང་ཟག་བསྟན་ཏེ། འདི་ལྟར་གོ་བར་བྱའོ། །རྣལ་འབྱོར་པ་ལ་གནོད་པར་བྱེད་པའི་དགྲ་གསད་པར་བྱ་བའི་ཕྱིར་ནག་པོ་ཆེན་པོ་བསྒྲུབ་པར་བྱ་བར་འབྲེལ་ཏོ། །སྙིང་རྗེ་ཆེན་པོས་སྦྱོར་བ་
བརྩམ། །ཤིན་ཏུ་བརྟགས་ལ་མངོན་པར་བསྒྲུབ། །ཕྲ་མོ་ཙམ་ལ་བྱ་བ་མིན། །བསྟན་པ་ཡོངས་སུ་འཇིག་ལ་སོགས། །ཞེས་བྱ་བ་ལ། སྙིང་རྗེ་ཆེན་པོ་ནི་མི་དེས་གཞན་བསྟེན་ནས་སྡིག་པའི་ལས་མང་པོར་བསགས་པས་དེ་ཡུན་རིང་དུ་གནས་ན་དེ་ཉིད་ལ་གནོད་པས། བདག་

49-1-297a

གིས་སྙིང་རྗེ་རབ་བལྟས་པས། །དེ་གསད་པའི་སྦྱོར་བ་བརྩམ་པར་བྱའོ། །ཤིན་ཏུ་བརྟགས་པ་ནི་དེ་ལྟ་བུའི་མི་བརྟག་པར་བྱའོ། །ཕྲ་མོ་ཙམ་ལ་བྱ་བ་མིན་པ་ནི་རང་གི་ཆེད་དམ་རྫས་ཕྲ་མོ་ཙམ་ལ་བྱ་བ་མིན་པའོ། །ཇི་ལྟ་བུ་ལ་བྱ་ཞེ་ན། བསྟན་པ་དངོས་སུ་
འཇིག་པ་ལ་བྱ་བར་གསུངས་སོ། །དེ་ཡང་གནས་ཇི་ལྟ་ཇི་ལྟ་བུར་བྱ་སྙམ་པ་ལས། དངོས་པོར་གཙུག་ལག་ཁང་ཆེན་ནམ། །མཆོད་རྟེན་ཁང་སྟོང་ཆེན་པོ་འམ། །རབ་ཏུ་སྔགས་པས་དུར་ཁྲོད་མཆོག །བདག་གིས་ནག་པོ་ཆེན་པོ་ཡི། །གཟུགས་བརྙན་ལེགས་པར་བྲིས་པ་
ལས། །ཞེས་བྱ་བ་ལ། གཙུག་ལག་ཁང་ཆེན་པོ་དང་། མཆོད་རྟེན་དང་། ཁང་པ་སྟོང་པ་དང་། དུར་ཁྲོད་རྣམས་སུ་མཆོག་ཡིན་པར་གསུངས་པས་དེ་རུ་བདག་གིས་ནག་པོ་ཆེན་པོའི་གཟུགས་བརྙན་གོང་ནས་འབྱུང་བ་བཞིན་དུ་བྲིས་ལ་བྱ་བར་འབྲེལ་ཏོ། །མཆོད་
པ་སྣ་ཚོགས་འབྱོར་པ་དང་། །རབ་གསལ་ལྔ་ཡི་དུད་པ་དང་། །མི་འཆི་ལྔ་ཡི་དུད་པ་ཡིས། །ཞག་བདུན་བར་དུ་བདུག་པར་བྱ། །ཞེས་བྱ་བ་ལ། མཆོད་པ་སྣ་ཚོགས་པ་ནི་ཅི་འབྱོར་པའི་མེ་ཏོག་ལ་སོགས་པ་སྟེ། དེས་མཆོད་པར་གསུངས་གོ། །རབ་གསལ་ལྔ་ནི་མི་ལ་
སོགས་པའི་ཤ་ལྔའོ། །མི་འཆི་ལྔ་ནི་སྟོབས་མཆོག་ལ་སོགས་པ་སྟེ། དེ་རྣམས་ཀྱི་དུད་པས་ཞག་བདུན་གྱི་བར་དུ་དེའི་གཟུགས་བརྙན་བདུག་པར་བྱའོ། །དང་པོར་གཞི་མའི་དངོས་པོ་གང་། །ཡིད་ཆེན་པགས་པ་ངེས་པ་ལས། །དེ་ལས་བྱུང་བ་གང་ཡིན་པ། །
ཡང་དག་པར་ནི་བྲི་བར་བྱ། །ཞེས་བྱ་བ་ལ། གཟུགས་བརྙན་བྲི་བའི་གཞི་ནི་ཡིད་ཤས་ཆེ་བའི་པགས་པ་ལ་བྱ་བ་དང་། དེ་བྲི་བའི་ཚོན་རྩི་ནི། དེ་རང་ལས་བྱུང་བའི་ཁུ་བ་དང་སྣག་ཚ་བསྲེས་ལ་བྲི་བར་བྱའོ། །དེ་ནས་གནས་གང་ཡིན་པ་རུ། །སྐར་མ་དག་
ལ་ཡོངས་མཆོད་པ། །རབ་གསལ་ལྔ་དང་མི་འཆི་ལྔ། །གཞན་ཡང་རབ་གསལ་སྣ་ཚོགས་པ། །ཡང་དག་པ་རུ་མཆོད་པར་བྱ། །ཞེས་པ་ནི། གནས་གཙུག་ལག་ཁང་ལ་སོགས་པ་རུ་མི་ལ་སོགས་པའི་རབ་གསལ་ལྔ་དང་།སྟོབས་མཆོག་ལྔ་ལ་སོགས་པའི་མི་

49-1-297b

འཆི་ལྔ་དང་། གཞན་ཡང་རབ་གསལ་སྣ་ཚོགས་པས་སྐར་མ་ལ་མཆོད་པར་འབྲེལ་ཏོ། །དཔའ་བོ་སྣ་ཚོགས་འབྱོར་པ་དང་། །མཆོད་པ་སྣ་ཚོགས་ཅི་འབྱོར་པས། །ཟླ་གསུམ་བར་དུ་མཆོད་བྱ་ཞིང་། །རང་ཉིད་ཆ་ལུགས་བསྒྱུར་བ་ཡི། །ལུས་ལ་ཁྲག་གིས་རྣམ་
པར་བསྐུ། །ཞེས་བྱ་བ་ལ། དཔའ་བོ་ནི་དཔའ་བར་བྱེད་པའི་རྒྱུ་ལ་དཔའ་བོ་ཞེས་ཟེར་ཏེ་། དེ་བས་ན་སྣ་ཚོགས་པས་མཆོད་པ་དང་། གཞན་ཡང་མཆོད་པ་སྣ་ཚོགས་པས་ཟླ་བ་གསུམ་གྱི་བར་དུ་བདག་ཆ་ལུགས་ནག་པོར་བསྒྱུར་ལ། ལུས་ལ་ཁྲག་གིས་བསྐུས་ནས་མཆོད་
པར་སྦྱར་རོ། །རླག་བྱེད་དངོས་པོ་གང་ཡིན་པ། །འབར་བའི་དཀྱིལ་འཁོར་ཕྱོགས་ཀུན་དུ། །སྟོད་ཀྱི་ཚིགས་གཉིས་བཀུག་པ་ཡིན་། །ཡོངས་སུ་བྲི་བར་བྱ་བ་ཡིན། །དེ་ཡི་ནང་དུ་དངོས་པོ་གང་། །ཡང་དག་པར་ནི་བླུགས་བྱས་ལ། །ཞེས་བྱ་བ་ལ། སྟོད་ཀྱི་ཚིགས་
གཉིས་ནི་གྲུ་མོ་གཉིས་བཀུག་པར་འབར་བའི་དཀྱིལ་འཁོར་ཟུར་གསུམ་པ་བྲི་བར་བྱས་ལ། དེའི་ནང་དུ་ཕྱོགས་ཀུན་ཁྱབ་པར་རླག་པར་བྱེད་པ་དང་། འདར་ཤ་དང་། མགོ་ཚོ་བ་དང་གསུམ་བསྲེས་པས་བླུགས་པར་བྱ་བར་འབྲེལ་ཏོ། །གང་ལ་དམིགས་པར་བྱ་བ་ཡིས། །
དངོས་པོ་ཡང་དག་དེར་བསམ་བྱ། །སྔགས་དང་ཕྱག་རྒྱ་སྦྱོར་ཤེས་པས། །གསལ་བར་དམིགས་ཏེ་དབུལ་བར་བྱ། །ཞེས་བྱ་བ་ལ། གང་ལ་དམིགས་པར་བྱ་བ་ནི་གནོད་པར་བྱེད་པ་སྟེ། དེའི་དངོས་པོ་དེ་རུ་བསམས་ལ། སྔགས་འོག་མ་དང་ཕྱག་རྒྱ་བཅས་ལ་ནག་པོ་ཆེན་
པོ་ལ་དབུལ་བར་བྱ་བར་འབྲེལ་ཏོ། །གཏོར་མ་ཉིད་ལ་སྣ་ཚོགས་པའོ། །དངོས་པོ་ཡོངས་སུ་བླུགས་བྱས་ལ། །མཚན་མོ་ཕྱེད་པས་ཡོངས་སུ་གཏང་། །ཞེས་བྱ་བ་ནི་གོ་སླའོ། །དེ་ཡི་ཐུགས་ཀ་ཉིད་ནས་ནི། །ཐུགས་ཡིག་བསྡུ་བ་ཡོངས་སུ་བསམ། །འདི་ཡི་སྟོད་ཀྱི་ཆ་གང་
ལ། །མི་འགྱུར་གནས་པ་རབ་ཏུ་བསྒོམ། །ཞེས་བྱ་བ་ལ། དེ་ཞེས་པ་ནི་ནག་པོ་ཆེན་པོ་སྟེ། དེའི་ཐུགས་ཀ་ནས་ཐུགས་ཀྱི་ཡི་གེ་སྡུད་པའི་དངོས་པོ་བསམ་པ་དང་། འདི་ཞེས་བྱ་བའི་རྣལ་འབྱོར་པའི་རོ་སྟོད་སྙིང་ག་ལ་མི་འགྱུར་བ་གནས་པའི་ཡི་གེ་བསྒོམ་པར་བྱའོ། །འདི་

49-1-298a

གཉིས་ཀྱི་དགོས་པ་ནི་ཁ་དོག་ཇི་ལྟ་བུ་སྙམ་པ་ལ། དེ་གཉིས་དཀར་དང་ནག་པ་སྟེ། །འདི་ལས་འབྲེལ་པར་གྱུར་པ་ཡིས། །དང་པོ་ནག་པོ་དེ་ཉིད་ལས། །དངོས་པོ་དཀར་པོ་གང་ཡིན་པ། །སྟོབས་སྐྱེད་གསལ་བར་གནས་པར་བྱ། །ཞེས་གསུངས་
ཏེ། དེ་ཡང་ཇི་ལྟ་བུ་སྙམ་པ་ལ་འདི་ལྟར་ཤེས་པར་བྱའོ། །སྡུད་པ་དང་གནས་པའི་ཡི་གེ་གཉིས། སྡུད་པ་ནི་གནག་ལ་གནས་པ་ནི་དཀར་པོའོ། །འདི་ལས་ཞེས་པ་ནི་རྣལ་འབྱོར་པས་འདི་ལ་འགྲེལ་པར་གྱུར་པས། སྡུད་པ་པོ་ཡི་དངོས་པོ་ནས། །གནས་པའི་དངོས་
པོ་ལ་སྟོབས་སྐྱེད་པར་བྱེད་པའི་དངོས་པོ་ནི་ནག་པོས་གནས་པར་བྱ་བར་འབྲེལ་ཏོ། །དེ་ལྟར་སྐད་ཅིག་དུ་མ་ཡིས། །ཞེས་པ་ནས། ངེས་པ་ཉིད་དུ་འགྲུབ་པ་ཉིད། །ཅེས་པའི་བར་དུ་ནི་གོ་སླ་བས་འདིར་མ་བཤད་དོ། །དེ་འགྲུབ་བསྒྲུབ་བྱ་གང་ཡིན་པ། །དེ་ཉིད་རྣམ་
གསུམ་བསྲེས་པ་ཡིས། །ཆག་གང་བ་ཡི་དབྱིབས་བྱས་ལ། །ཞེས་བྱ་བ་ལ། དེ་འགྲུབ་ཅེས་པ་ནི་ནག་པོ་ཆེན་པོ་དེའོ། །དེ་བསྒྲུབ་པ་དང་། དེ་ཉིད་རྣམ་གསུམ་བསྲེས་པ་ལ་བྱའོ། །དེ་ཉིད་རྣམ་གསུམ་ནི་རང་བྱུང་རྣམ་པ་གསུམ་ལ། ཆག་གང་བའི་གཟུགས་བྱ་
བར་འབྲེལ་ཏོ། །དེ་ཡི་དཀྱིལ་དུ་སྲོག་སྙིང་གཞུག །དེ་ནས་ནག་པོ་ཆེན་པོ་ལ། །མ་ཉེས་པ་ཡི་ཚིག་འདི་བརྗོད་། །ནག་པོ་ཆེན་པོ་ཉིད་ལ་བསྟབས། །ཞེས་བྱ་བ་ལ། དེ་ནི་ཆག་གང་བའི་གཟུགས་བྱས་ལ།  དེའི་དཀྱིལ་དུ་དེའི་སྲོག་སྙིང་བཅུག་ལ། རང་གིས་མ་
ཉེས་པའི་ཚིག་སྐད་དྲག་པོ་བཏོན་ཏེ། ནག་པོ་ཆེན་པོ་ལ་བསྟབས་པར་འབྲེལ་ཏོ། །ཇི་ལྟར་བསྟབས་ཤེ་ན། འདི་ལྟར་བསྟབས་པར་གསུངས་སོ། །དེ་ཡི་སྔགས་དག་བཟླས་པ་ཡིས་། །རབ་གསལ་ལྔ་དང་མི་འཆི་ལྔ། །དཔའ་བོ་ལ་སོགས་ཐམས་ཅད་ཀྱིས། །
ཡོངས་སུ་སྦྱར་བ་དེ་ཉིད་གསུམ། །དངོས་པོ་གང་ཉིད་ལ་སོགས་པ། །མཚོན་གྱིས་ཡོངས་སུ་གཏུབ་པར་བྱ། །ཞེས་བྱ་བ་ལ། དེའི་སྔགས་ནི་དྲག་པོ་ཆེན་པོའི་སྔགས་བཟླས་པས། རབ་གསལ་ལྔ་དང་། དཔའ་བོ་ལ་སོགས་པ་ཐམས་ཅད་དང་། དེ་ཉིད་གསུམ་ནི་དུག་ལ་

49-1-298b

སོགས་པ་གསུམ་དུ་སྦྱར་ལ། དངོས་པོ་གང་ནི་དགྲ་བོའི་གཟུགས་རལ་གྲིས་ཡོངས་སུ་གཏུབས་ལ་བསྲེག་པར་བྱའོ། །དེ་ནས་མེ་ནི་རབ་སྦར་བས། །སྔགས་དང་ཕྱག་རྒྱ་རབ་ལྡན་པས། །ལུས་ངག་ཡིད་གསུམ་དྲག་པོ་ཡིས། །ལས་ཀྱི་སྦྱོར་བ་ངེས་པར་སྤྱད། །ཅེས་བྱ་
བ་ལ། དྲག་པོའི་ཤིང་ལ་མེ་ལེགས་པར་སྦར་ལ། སྔགས་འོག་མ་དང་ཕྱག་རྒྱ་བཅས་པས། ལུས་ཁྲོ་བོའི་ཆ་ལུགས་སུ་བསྒྱུར་ལ། ངག་སྔགས་དྲག་པོ་ལྡན་པས་སེམས་ཞེ་སྡང་ཆེན་པོར་བསྐྱེད་ལ། དེ་རྣམས་སྲེག་བླུགས་སྟོང་དུ་ཚང་བར་བྱའོ། །སྔགས་
རྣམས་ནི་འོག་མ་འདི་ལས་རིག་པར་བྱའོ། །ཨོཾ་མ་ཧཱ་ཀཱ་ལ་ཡཱ་ཞེས་པ་ནས་སྭཱ་ཧཱ་ཞེས་པའི་བར་དུ་གོ་བར་བྱའོ། །དེ་ནས་སྔགས་པ་ཡོངས་རྟོགས་པས། །ཞེས་པ་ནས། གོང་མའི་སེམས་ཀྱིས་ཡང་དག་སྦྱར། །ཞེས་པའི་བར་དུ་གོ་སླ་བས་མ་བཤད་དོ། །དེ་ལ་བླ་མའི་
མན་ངག་གིས། །ཡང་དག་པར་ནི་དབྱེ་བར་བྱ། །བླ་མ་ཉིད་ལ་ཅི་ནུས་པས། །ཡོངས་སུ་མཆོད་པས་མན་ངག་བྲལ། །ཞེས་བྱ་བ་ལ། དེ་ལ་ཞེས་པ་ནི་གོང་དུ་སྨོས་པའི་སྦྱོར་བ་རྣམས་ལ་སྟེ། སྦྱོར་བ་དེ་རྣམས་ལ་བླ་མའི་མན་ངག་གིས་རིམ་པ་ཇི་ལྟ་བ་བཞིན་དུ་ཐབས་
དང་མན་ངག་རྣམས་ཀྱིས་ཡང་དག་པར་དབྱེ་བའོ། །བླ་མ་ལ་ཇི་ལྟར་བྱས་པས་དབྲལ་སྙམ་པ་ལ་ཅི་ནུས་པས་ཡོངས་སུ་མཆོད་པས་དབྲལ་བར་སྦྱར་རོ། །འདིས་ནི་ངེས་པར་འགྲུབ་པས་ན། །ཡིད་ཆེས་པ་ཡིས་ཡོངས་སུ་འགྲུབ། །ཅེས་པ་ནི། སྦྱོར་བ་གོང་མ་
དེས་ངེས་པར་འགྲུབ་པས་ན་བདག་གིས་ཡིད་ཆེས་པས་ཡོངས་སུ་འགྲུབ་པར་འབྲེལ་ཏོ། །ཡིད་ཆེས་པ་ཞེས་བྱ་བ་ཅིའི་ཕྱིར་སྨོས་ཤེ་ན། ཡིད་མ་ཆེས་པར་སོམ་ཉི་ཟ་བས་མི་འགྲུབ་པར་གསུངས་སོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ཞེས་བྱ་བ་ལས་ལེའུ་
དགུ་པའི་བཤད་པའོ།།      །།ལག་ན་རྡོ་རྗེ་ཞེས་པ་ནས། །ཐབས་འདི་ཡང་དག་བརྩམ་པར་བྱ། །ཞེས་པའི་བར་ནི་གོ་སླ་བས་མ་བཤད་དོ། །དྲག་པོའི་སྒྲ་དང་རབ་ལྡན་པའི། །ཁ་དོག་སེར་བ་སུམ་ཅུའི་གཟུགས། སྟོབས་དང་ལྡན་ཞིང་རབ་ཏུ་གུས། །

49-1-299a

ཟས་སུ་སྦྲང་རྩི་ཟར་བཅུག་ལ། །ཞག་བདུན་བར་དུ་ངེས་པར་བསྙེན། །ཞེས་བྱ་བ་ལ། དྲག་པོའི་སྒྲ་དང་ལྡན་པ་ནི་སྐྱེས་པའོ། །ཅིའི་ཕྱིར་དྲག་པོའི་སྒྲ་དང་ལྡན་ཞེ་ན། །ཡི་གེ་ངེས་པར་སྦྱོར་བ་ཡི། །ཕོ་ཡི་རྟགས་ནི་འཛིན་པས་ན། །དྲག་པོའི་སྒྲ་དང་ལྡན་པའོ། །
སྐྱེས་པ་ལོ་སུམ་ཅུ་ལོན་པ་ལ་ཁ་དོག་སེར་པོ་སྟོབས་དང་ཉམས་རྩལ་ཆེ་བ། རབ་ཏུ་གུས་པར་ལྡན་པ་ལས། ཟས་རྣམས་ལ་སྦྲང་རྩི་བསྲེས་ཏེ། ཟས་བྱིན་ཞིང་ཞག་བདུན་གྱི་བར་དུ་རྣམ་ཐོས་སྲས་ཀྱི་སྔགས་ཀྱིས་བསྔགས་ལ། སྤྱི་བོར་མེ་ཏོག་བོར་བར་བྱས་ལ་བསྙེན་པར་
བྱའོ། །གོས་དག་ལྗང་གུ་བསྐོན་བྱས་ལ། །ཞེས་པ་ནས། སྙིང་པོ་ཉིད་ཀྱང་གདོན་བྱ་ཞིང་། །ཞེས་པའི་བར་དུ་ནི་གོ་སླའོ་། །དེ་ཐོབ་བྱང་ཕྱོགས་ཁྲོ་བོ་ཡི། །སྔགས་བཟླས་པ་ཡིས་ཕྱིར་མི་བལྟ། །ཞེས་བྱ་བ་ནི། དེ་ཞེས་པ་ནི་ས་ལ་བྱ་སྟེ། ས་དེ་ཐོབ་པ་
དང་། བྱང་ཕྱོགས་ན་གནས་པའི་ཁྲོ་བོ་བདུད་རྩི་ཐབ་སྦྱོར་གྱི་སྔགས་བཟླས་ཤིང་ཕྱི་མིག་མི་ལྟར་འོང་བའོ། །སྔགས་མ་བཟླས་ན་སྐྱོན་ཅི་ཡོད་ཅེ་ན། གནོད་སྦྱིན་གྱིས་གནོད་པར་བྱེད་པའི་ཕྱིར་རོ། །དེ་ནས་སྔགས་པ་བླ་ལྡན་པས། །ཞེས་པ་ནས། ཡོངས་སུ་གཏང་བར་
བྱ་བ་ཡིན། །ཞེས་པའི་བར་དུ་ནི་གོ་སླ་བའོ། །སྒྲ་སྐད་ཆེན་པོའི་རུས་པ་ལས་། །ཕྲེང་བ་བྱས་པས་དྲག་པོའི་རིགས། །དེ་ཉིད་ལ་ནི་བཟུང་བ་ཡིས། །རྩ་བའི་སྔགས་སོགས་འབར་བ་བཟླ། །ཞེས་བྱ་བ་ལ། སྒྲ་སྐད་ཆེན་པོ་ནི་བོང་བུ་སྟེ། དེའི་རུས་པ་ལས་ཕྲེང་བ་བྱས་ལ། 
སོར་མོ་དྲག་པོའི་རིགས་ལ་བཟུང་བས་ལག་ན་རྡོ་རྗེའི་རྩ་བའི་སྔགས་དང་། རྣམ་པར་རྒྱལ་བ་ལ་སོགས་པའི་སྔགས་རྣམས་ཚད་དུ་ཕྱིན་པར་བཟླས་པར་འབྲེལ་ཏོ། །དེ་དག་གོང་དུ་ཐིམ་འགྱུར་བས། །ལུས་ངན་སྲས་པོའི་སྔགས་བཟླས་པས། །དེ་ཡང་གོང་མའི་
ཚད་ཉིད་དུ། །ཕྱིན་པས་ཡོངས་སུ་བཟླས་པར་བྱ། །ཞེས་བྱ་བ་ལ། དེ་དག་ཅེས་ནི་རྩ་བའི་སྔགས་ལ་སོགས་པ་ལ་བྱ་སྟེ། དེ་དག་གོང་དུ་ཐིམ་པ་ལས། །ཕྱི་ནས་རྣམ་ཐོས་སྲས་ཀྱི་སྔགས་གོང་མའི་ཚད་དུ་ཕྱིན་པར་བཟླས་པར་སྦྱར་རོ། །ཡིད་ཆེན་ཕུར་བུ་སོར་

49-1-299b

བཅུ་པ། །ཞེས་པ་ནས། སྔགས་ཆུ་ཡིས་ནི་ཁྲུས་བྱས་ཏེ། །ཞེས་བྱ་བའི་བར་དུ་ནི་བཤད་དུ་མེད་པའི་ཕྱིར་མ་བཤད་དོ། །ལུས་ངག་ཡིད་གསུམ་དྲག་པོ་ཡིས། །དངོས་པོ་ཡོངས་སུ་བཅིང་བྱས་ལ། །ཁྲུ་གང་བརྐོས་པའི་ནང་དུ་གཞུག་། ཕུར་བུས་སྟེང་དུ་གཟིར་
བྱས་ལ། །ཕཊ་ཀྱི་སྔགས་ཀྱིས་ཡང་དག་མནན། །ཞེས་བྱ་བ་ལ། ལུས་ཁྲོ་བོའི་གཟུགས་སུ་བསྒྱུར་ལ། ངག་དྲག་ཅིང་གཏུམ་པ་དང་། ཡིད་ཞེ་སྡང་ཆེན་པོར་ཡང་དག་པར་བསྐྱེད་ལ། དངོས་པོ་ནི་བྲིས་སྐུ་དེའི་གཟུགས་བྱས་ཏེ། དེ་ཡང་དག་པར་སྐུད་པས་
བཅིངས་ལ། དང་པོའི་ཁུང་བུ་ཁྲུ་གང་བ་རུ་བཅུག་ལ། མི་རུས་ཀྱི་ཕུར་བུས་སྟེང་དུ་བཙུགས་ལ། ཕཊ་ཉི་ཤུ་རྩ་བཞི་བཟླས་པས་མནན་པར་འབྲེལ་ཏོ། །དེས་ནི་ཞེས་པ་ནས། ཕྱི་ནས་མི་འཇུག་པ་ཡང་ཡིན། །ཞེས་པའི་བར་དུ་ནི་གོ་སླའོ། །གོང་དུ་སྨོས་པའི་
སྔགས་རྣམས་ནི་རིམ་པ་ཇི་ལྟ་བུ་བཞིན་དུ། ཨོཾ་བཻ་ཤྲ་བ་ཎ་ཡེ་ཞེས་པ་ནས་ཧཱུཾ་ཞེས་པའི་བར་གྱིས་ཤེས་པར་བྱའོ། །སངས་རྒྱས་བྱང་ཆུབ་སེམས་དཔའ་དང་། །བདག་ལ་སོགས་པ་ཕན་གནོད་གཉིས། །ཡོངས་སུ་སྦྱར་བ་ཡང་དག་བཤད། །དེ་གཉིས་ལུས་ངན་སྲས་
པོ་ལས། །གང་བསྟབས་ངེས་པར་དེ་ཉིད་འཇིག །ཅེས་བྱ་བ་ལ། སངས་རྒྱས་དང་བྱང་ཆུབ་སེམས་དཔའ་དང་བདག་ལ་སོགས་པ་རྣམས་ལ་གནོད་པ་དང་། ཕན་པར་གྱུར་པའི་སྒྲུབ་པ་ཡང་དག་པར་བཤད་པར་བྱ་བར་གསུངས་ཏེ། དེ་ཡང་ལུས་ངན་སྲས་པོ་ལ་
ཡོངས་སུ་བསྟབས་པས་ངེས་པར་འཇིག་སྟེ། སྒྲའི་སྦྱོར་བས་བསྟབས་པ་དང་། འཇིག་པ་དང་ནི་དོན་གཉིས་ལ་འཇུག་གོ། །དེ་ཡང་ཇི་ལྟ་བུ་ཞེ་ན། ལུས་ངན་སྲས་པོ་ལ་གནོད་པར་བྱེད་པ་བསྟབས་པས་དེའི་ལུས་འཇིག་པར་འགྱུར་བའོ། །ལུས་ངན་སྲས་པོ་ལ་བདག་གིས་
བསྟབས་པས་འཇིག་པར་སྦྱར་རོ། །དེ་ཡི་སྦྱོར་བ་བྱ་བའི་ཕྱིར། །ལུས་ངན་སྲས་པོའི་སྒྲུབ་པ་བཤད། །དང་པོ་དེ་ཡི་གཟུགས་བྱ་བ། །རམས་དང་ཡུང་བ་རབ་སྦྱར་བས། །བ་དན་ནེའུ་ལེའི་རྐྱལ་པ་དང་། །སྐུ་གདུང་གཡས་ཕྱོགས་གཞག་བྱས་ལ། །གོང་མ་ལྟ་བུའི་གཟུགས་

49-1-300a

སུ་བྲི། །ཞེས་པ་ནི་གོ་སླའོ་། །གཡས་གཡོན་གཉིས་སུ་དེ་ཉིད་ཀྱི། །ཡི་གེ་གཉིས་པོ་བྲིས་བྱས་ལ། །དེ་མཐར་དྲག་པོའི་སྙིང་པོ་བྲི། །ཞེས་བྱ་བ་ནི། གཟུགས་ཀྱི་གཡས་གཡོན་དུའོ། །དང་པོར་འབྱུང་བ་དང་བསྡུས་པའི་གཙོ་བོས་བྱས་ནས་དེའི་མཐར་
དྲག་པོའི་སྙིང་པོ་བྲི་བར་བྱའོ། །གསུམ་སྦྱར་དངོས་པོ་འགུགས་བྱེད་པ། །ཚིག་གིས་གསུམ་དུ་ངེས་པ་ལས། །དར་དག་དམར་པོ་ཁ་ཚོན་གང་། །མེ་ཏོག་ཕྲེང་བས་ཡོངས་སུ་བརྒྱན། །ཞེས་བྱ་བ་ལ། གསུམ་སྦྱར་བ་ལས་དངོས་པོ་མི་ལ་སོགས་པ་འགུགས་པར་བྱེད་
པའི་ཚིག་གསུམ་པ་ལ་དར་དམར་པོ་ཁ་ཚོན་གང་བཏགས་ལ།  མེ་ཏོག་གི་ཕྲེང་བས་བརྒྱན་པར་བྱས་ལ་ཕྱི་ནས་འདི་སྐད་ཡོངས་སུ་གསུངས་པའོ་། །དྲི་ཡི་ཕྱེ་མ་སྣ་ཚོགས་དང་། །རིན་ཆེན་སྣ་ལྔའི་ཕྱེ་མ་ཡིས། །ཕུར་མ་བྱས་པ་གདགས་པར་བྱ། །ཞེས་པ་ནི་གོ་སླའོ་། །སྲོག་གི་སྙིང་པོ་
བྲིས་བྱས་ལ། །དེ་ཡི་མིང་རུས་ཁྲག་གིས་བྲི་། །འབྲུ་དག་དཀར་པོའི་སྟེང་བཙུགས་ལ། །དེ་ཉིད་ལ་ནི་ཆགས་པར་འགྱུར། །ཞེས་བྱ་བ་ལ། ལུས་ངན་སྲས་པོའི་སྲོག་སྙིང་བླ་མའི་མན་ངག་གིས་འོ་མས་བྲིས་ལ། དེའི་འོག་ཏུ་དགྲ་བོའི་མིང་རུས་རའི་ཁྲག་གིས་བྲིས་ལ། འབྲས་དཀར་
པོའི་སྟེང་དུ་བཙུགས་པས་དེ་ལ་ལུས་ངན་སྲས་པོ་འཆགས་པར་འགྱུར་རོ། །དཀྱིལ་འཁོར་ཁྲུ་གང་ཞེས་པ་ནས། །ཡོངས་སུ་ཤེས་པར་བྱ་བ་ཡིན། །ཞེས་པའི་བར་དུ་ནི་གོ་སླ་བས་འདིར་མ་བཤད་དོ། །སྔགས་ནི་བླ་མའི་ངག་ལས་ཤེས་པར་བྱའོ། །ལྷག་མ་ནི་གོ་སླའོ་། །རྡོ་རྗེ་མེ་ལྕེའི་རྒྱུད་ཀྱི་
འགྲེལ་པ་དེ་ཁོ་ན་ཉིད་སྣང་བ་ཞེས་བྱ་བ་ལས་ལེའུ་བཅུ་པའི་བཤད་པའོ།།      །།ལག་ན་རྡོ་རྗེ་གོས་སྔོན་གྱིས། །ཞེས་པ་ནས། ཡང་དག་པར་ནི་བསྒྲུབ་པར་བྱ། །ཞེས་པའི་བར་དུ་གོ་སླའོ་། །དུར་ཁྲོད་ལ་སོགས་གང་ཡིན་པར། །རི་མོ་མཁན་ནི་རིམ་པ་བཞིན། །ཡང་དག་པར་ནི་དབང་བསྐུར་
བྱ། །ཐ་ག་མ་ཡང་བསྙེན་བྱས་ལ། །དྲི་ཞིམ་པ་ཡིས་ཡོངས་སུ་བྱུག །ཅེས་བྱ་བ་ལ། དུར་ཁྲོད་དང་ཤིང་གཅིག་ལ་སོགས་པའི་གནས་སུ། རི་མོ་མཁན་དང་ཐ་ག་མ་གཉིས་ཀ་དབང་བསྐུར་ལ། ཐ་ག་མའི་སྣལ་མ་ལ་དྲི་ཞིམ་པོ་གུར་གུམ་ལ་སོགས་པས་ཡོངས་སུ་བྱུག་པར་བྱའོ། །སྟེང་འོག་གཉིས་

49-1-300b

དང་མཐའ་གཉིས་གསུམ། །མཉམ་པར་བཞག་པས་ཡང་དག་བརྟག །ཅེས་པ་ནི་གོ་སླ་སྟེ། ཐ་ག་པས་ཡང་དག་པར་བྱ་བའི་ལས་སོ། །དམར་པོ་ལྔ་ཡིས་རབ་བྱུགས་ལ། །ས་བོན་ཡང་དག་ལྡན་པ་དང་། །དྲི་ཞིམ་པ་ནི་སྣ་ཚོགས་པས། །ཡང་དག་པར་ནི་བྱུག་པར་བྱ། །ཞེས་བྱ་བ་ལ། 
དམར་པོ་ལྔ་ནི་རབ་གསལ་ལྔའི་ཁུ་བ་ལ་བྱ་སྟེ། དེ་དང་ས་བོན་ནི་ཡིད་ཆེས་སྐྱེད་པའི་ས་བོན་ལ་བྱ་སྟེ། ས་བོན་དང་ག་བུར་ལ་སོགས་པའི་དྲི་ཞིམ་པ་སྣ་ཚོགས་པས་རས་ལ་བྱུག་པར་སྦྱར་རོ། །ཚོན་རྩི་རྣམ་པ་སྣ་ཚོགས་ལ། །ཡིད་ཆེན་རྣམས་ཀྱི་ཚོན་རྩི་རྣམས། །མཉམ་པར་སྦྱར་བས་བྲི་བར་བྱ། །ཞེས་པ་
ནི། རམས་ལ་སོགས་པའི་ཚོན་ཐམས་ཅད་ལ་མི་འཆི་བ་རྣམ་པ་ལྔ་ཡིས་སྦྱར་ལ་བྲི་བར་བྱའོ། །སྣོད་དག་ཐོད་པ་ཉིད་ལ་ནི། །པིར་ནི་ཞིང་གི་སྐྲ་ཡིས་བྱ། །དུར་ཁྲོད་ལ་སོགས་ཁང་སྟོང་ངམ། །གནས་དབེན་པར་ནི་ཡོངས་སུ་བྲི། །ཞེས་པ་ནི། ཚོན་རྣམས་ཀྱི་སྣོད་ནི་ཐོད་པའི་དུམ་བུ་ལས་
བྱས་ལ། པིར་ནི་ཞིང་ཆེན་གྱི་སྐྲ་ལས་བྱ་སྟེ། ཁང་སྟོང་ལ་སོགས་པ་གནས་དབེན་པར་བྱའོ། །ལས་མཁན་སྔོན་པོའི་གོས་བགོས་ཏེ། །ཁྲག་གིས་གདོང་ཡང་བྱུགས་བྱས་ལ། །སྔགས་འདི་དག་ནི་རྟག་ཏུ་བཟླས། །ཞེས་བྱ་བ་ལ། ལས་མཁན་ནི་རི་མོ་མཁན་ཏེ། དེའི་གོས་སྔོན་པོ་བགོས་ཏེ། 
མི་ཁྲག་གིས་གདོང་བྱུགས་ཏེ། སྔགས་འོག་མ་བཟླ་ཞིང་བྲི་བར་གསུངས་སོ། །སྔགས་ནི་ཨོཾ་ཙཎྜ་ཞེས་པ་ལ་སོགས་པའོ། །གཏོར་མ་དྲག་པོ་གང་ཡིན་པ། །བྲི་བའི་དུས་སུ་གཞག་བྱས་ལ། །ཟིན་ནས་གཏོར་མ་གཏང་བར་བྱ། །ཞེས་བྱ་བ་ལ། དྲག་པོའི་གཏོར་མ་ནི་རམས་དང་ཤ་སྣ་ཚོགས་པ་དང་། 
ཁྲག་སྣ་ཚོགས་ལ་སོགས་པའི་གཏོར་མ་དང་པོ་བྲི་དུས་སུ་བཞག་ལ་བྲིས་པའི་འཕྲོ་བཅད་པ་དང་དེ་གཏང་བར་འབྲེལ་ཏོ། །དང་པོར་ཚོན་རྩི་ཐམས་ཅད་ལ། །རིན་ཆེན་སྣ་ལྔར་བྱིན་གྱིས་བརླབས། །རྡོ་རྗེ་རྩེ་གཅིག་ཕྱག་རྒྱ་ཡིས། །ཡང་དག་པ་རུ་བྲི་བྱ་སྟེ། །སྐྱེད་བྱེད་དང་ནི་ཡོན་བདག་གིས། །
བསམས་ལ་ཡོངས་སུ་བྲི་བར་བྱ། །དང་པོ་ཚོན་རྩི་དཀར་པོ་ལ་སོགས་པ་ཐམས་ཅད་ལ་མུ་ཏིག་ལ་སོགས་པ་ལྔར་སྔགས་དང་ཕྱག་རྒྱས་བྱིན་གྱིས་བརླབ་པ་དང་། རྡོ་རྗེ་རྩེ་གཅིག་པ་ནི་མཐེ་བོང་དང་གུང་མོའི་བར་དུ་བཅུག་ལ་མཛུབ་མོ་ངེས་པར་བརྐྱང་བས་བྲི་བར་བྱའོ། །སྐྱེད་བྱེད་ཅེས་པ་ནི་

49-1-301a

མེ་ལ་བྱ་སྟེ། དེ་ཡང་སྐུ་ཉིད་འདྲི་ཙམ་ན། །ཕྱག་རྒྱ་ཆེན་མོའི་ཡུམ་དུ་བྱིན་གྱིས་བརླབས་ལ་དེ་ལས་སྐྱེད་པར་བསམ་སྟེ་བྲིའོ། །དེ་ནས་རྒྱན་འདོགས་པའི་དུས་སུ་ནི་བདག་ཡོན་གྱི་བདག་པོས་རྒྱན་འབུལ་བར་བསམས་ལ་བྲི་བ་ཉིད་དོ། །དཀྱིལ་དུ་པདྨ་བཅུ་
དྲུག་པ། །ཞེས་པ་ནས། སྦྱོར་བ་ལེགས་པར་བརྩམ་པར་བྱའོ། །ཞེས་བྱ་བའི་བར་དུ་གོ་སླ་བས་འདིར་མ་བཤད་དོ། །ལེགས་བམ་ངེས་པར་བྲི་བར་བྱ། །ཞེས་པ་ནས། མཉེན་པར་བྱས་པ་ཡོངས་སུ་བསྡམས། །ཞེས་པའི་བར་ནི་གོ་སླའོ། །དེ་ནས་ལག་གཡོན་སྟོད་ཀྱི་བར། །དེ་ཉིད་
དག་ཏུ་ཡོངས་སུ་སྦ། ཞེས་བྱ་བ་ནི། ལག་པ་གཡོན་པའི་སྟོད་ཀྱི་བར་གང་ཡིན་པར་གླེགས་བམ་སྦ་བར་གསུངས་སོ། །སངས་རྒྱས་ལྔ་ཡི་བདག་པོ་མཆོད། །ངེས་པར་རྡོ་རྗེ་རྣོན་པོ་ཉིད། །སྡང་བ་ཐམས་ཅད་འདུལ་བྱེད་ཅིང་། །དངོས་སུ་དཔའ་བོ་རབ་འབར་བ། །ཞེས་པ་ནི། དཔལ་རྡོ་རྗེ་
འཛིན་པ་ཉིད་ཡིན་པའི་ཕྱིར། སངས་རྒྱས་ལྔ་ཡང་དེའི་ངོ་བོ་ལས་མི་འདའོ། །གསུང་གིས་འདུལ་བའི་བར་དུ་ངེས་པར་བརླག་ཅིང་འཆད་པས་ན་རྡོ་རྗེ་རྣོན་པོ་ཉིད་དོ། །དེ་སྐུ་གསུང་ཐུགས་ཀྱི་བྱིན་གྱི་རླབས་ཀྱིས་གདུག་པ་ཐམས་ཅད་འདུལ་བར་བྱེད་པའོ། །དངོས་སུ་ན་མིག་གི་སྣང་བར་མེའི་ཕུང་པོར་
མཐོང་བའི་ཕྱིར་རབ་ཏུ་འབར་བའོ། །ཆེན་པོ་ཡི་ནི་ཆེན་པོ་ཉིད། །ཀུན་ལ་མཁའ་འགྲོ་ཆེན་པོ་སྟེ། །སྐུ་ཆེན་རབ་དྲག་འཇིགས་གཟུགས་ཅན། །མཁའ་ལྟར་མཉམ་ལ་ཕྱག་འཚལ་བསྟོད། །ཅེས་བྱ་བ་ལ། འཇིག་རྟེན་པ་རྣམས་ཀྱི་ཆེན་པོ་ནི་དབང་ཕྱུག་ཆེན་པོ་ལ་སོགས་པ་སྟེ། དེའི་ཡང་
ཆེན་པོ་ཡིན་པའི་ཕྱིར་ཆེན་པོའི་ཆེན་པོའོ། །ཀུན་ནི་སེམས་ཅན་ཐམས་ཅད་ལ་ཐུགས་ཀྱིས་ནམ་མཁའ་ལས་འགྲོ་བའི་དོན་མཛད་ཅིང་གཤེགས་པས་ན་ཀུན་ལ་མཁའ་འགྲོའོ། །སྐུ་ཆེན་རབ་དྲག་ནི་སྐུ་ཤིན་ཏུ་ཆེ་བ་ལ་རབ་ཏུ་དྲག་པའི་གཟུགས་འཇིགས་པ་དང་བཅས་པས་ན་། 
རབ་དྲག་འཇིགས་གཟུགས་ཅན་ནོ། །མཁའ་ལྟར་མཉམ་པ་ནི་ཐུགས་ཀྱི་ཡེ་ཤེས་ལ་བྱ་སྟེ། སྐུའི་སྤྲུལ་པ་ནི་སྣ་ཚོགས་པར་འགྱེད། གསུང་གི་སྒྲ་ནི་སྣ་ཚོགས་པར་སྒྲོགས་ཀྱང་ཐུགས་ཀྱི་ཡེ་ཤེས་མཁའ་དང་འདྲ་བ་ཀུན་ལ་མཉམ་པར་བཞུགས་པའོ། །དེ་ལ་བདག་རི་མོ་མཁན་

49-1-301b

ལ་སོགས་པས་ཕྱག་འཚལ་ཞིང་བསྟོད་པར་བྱའོ། །ལས་ལ་འཇུག་པ་སྣང་བ་ཉིད། །ཀུན་བཏུད་པས་ནི་དེ་བརྗོད་བྱ། །ཞེས་པས་ནི། རི་མོ་མཁན་དང་འདྲི་མཁན་གྱིས་ལས་ལ་འཇུག་པས་ན།  སྐུ་གཟུགས་སམ་པུ་སྟི་སྣང་བ་མཐོང་བ་ནི་།  ཀུན་ནི་ཡང་དག་
ཀུན་བཏུས་པས། །གོང་མའི་བསྟོད་པ་བརྗོད་པར་བྱ་ཞིང་ཕྱག་འཚལ་བར་འབྲེལ་ཏོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ཞེས་བྱ་བ་ལས་ལེའུ་བཅུ་གཅིག་པའི་བཤད་པའོ།།      །།ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་
ལ་འདི་སྐད་གསོལ། །གང་ཞིག་རྒྱུད་འདི་ལ་སྦྱོར་བས། །ཐབས་ཀྱི་ཡན་ལག་སྣ་ཚོགས་པ། །ཡང་དག་རྒྱས་པར་བཤད་དུ་གསོལ། །ཞེས་བྱ་བ་ལ། ལག་ན་རྡོ་རྗེ་གོས་སྔོན་པོ་དང་ལྡན་པ་དེས་བདག་དང་སེམས་ཅན་ཐམས་ཅད་ཀྱི་མགོན་པོ་བཅོམ་ལྡན་
འདས་ལ་གང་ཞིག་རྒྱུད་འདི་ལ་སྦྱོར་བ་ན། ཀུན་རྫོབ་ཏུ་འཇུག་པའི་ཐབས་སྣ་ཚོགས་པ་རྣམས་ཡང་དག་པར་མ་ནོར་བ་བདེན་པ་ཉིད་རྒྱས་པའམ་གསལ་བར་བཤད་དུ་གསོལ་ཞེས་ཞུས་པར་སྦྱར་རོ། །བདེ་གཤེགས་མཆོག་གིས་བཀའ་སྩལ་པ། །དད་པའི་རང་
བཞིན་ཅན་གྱི་མིས། །འདི་ཉིད་ལ་ནི་མངོན་པར་བསྒྲུབ། །ཅེས་བྱ་བ་ལ། བདེ་བར་གཤེགས་པ་ཐམས་ཅད་ཀྱི་མཆོག་གིས་རྒྱས་པར་བཤད་པར་གནང་བ་བྱིན་པ་དང་དད་པ་དང་ལྡན་པའི་རང་བཞིན་ཅན་ངེས་པར་ཡིད་ཆེས་པས་འོག་ནས་གསུངས་པའི་ཐབས་འདི་ལ་མངོན་
པར་བསྒྲུབ་པར་གསུངས་སོ། །ཀླུ་གདུག་འབར་བས་ཟིན་པས་ནི། །ཞེས་བྱ་བ་ནས། གནོད་སྦྱིན་གདོན་དུ་ཡིན་པར་བཤད། །ཅེས་པའི་ཚིག་ཐ་མའི་བར་དུ་ནི་ན་བའི་རྟགས་བསྟན་པ་དང་། མཚན་མོའི་རྨི་ལམ་བསྟན་པ་དང་། སྔགས་ཀྱི་སྦྱོར་བས་གནོད་པའི་
རྟགས་བསྟན་པར་ཤེས་པར་བྱའོ། །དེ་ཡང་གོ་སླ་བའི་ཕྱིར་མ་བཤད་དོ། །ཆོམ་པོ་དང་ནི་ཕྲད་པ་དང་། །སྦྱོར་བ་འདི་ཡིས་ཡང་དག་སྦྱར། །དུར་ཁྲོད་མི་མང་བསྲེགས་པ་ཡི་། །སྣ་ཚོགས་ཐལ་བ་བླང་བྱས་ལ། །ཞེས་བྱ་བ་ལ། དུར་ཁྲོད་ཀྱིས་གང་དུ་མི་མང་པོ་

49-1-302a

བསྲེགས་པའི་ཐལ་བ་ནི་སྣ་ཚོགས་པའི་ཐལ་བའོ། །ཅིའི་ཕྱིར་སྣ་ཚོགས་པ་ཞེ་ན། སྣ་ཚོགས་པ་ནི་དུ་མ་ལ་བྱ་སྟེ། རིགས་རྣམ་པ་བཞི་དང་། གླང་པོ་ཆེན་པོ་ལ་སོགས་པའི་ཐལ་བ་ཡིན་པའི་ཕྱིར་སྣ་ཚོགས་ཐལ་བའོ། །དེ་བདག་གིས་ལག་ན་རྡོ་རྗེའི་
སྔགས་བཟླས་ཤིང་གཟའ་ཕུར་བུའི་ཉི་མ་ལ་བླངས་ལ་སྦྱོར་བར་འབྲེལ་ཏོ། །ཆང་དང་ངེས་པར་སྦྲུས་བྱས་ཏེ། །སྦྲུལ་གྱི་པགས་པར་གཏུམས་བྱས་ནས། །ཏིལ་གྱི་གང་བུའི་འབྲས་བུ་ལ། །འབུམ་དུ་ཡང་དག་བཟླས་བྱས་ཏེ། །བདག་ཉིད་གོས་ལ་ཡོངས་སུ་གཏུམས། །ཞེས་
པ་ལ། ས་དེ་དང་ཆང་གཉིས་སྦྲུས་ལ། སྦྲུལ་གྱི་པགས་པར་གཏུམས་ཏེ། ལག་ན་རྡོ་རྗེ་རྩ་བའི་སྔགས་འབུམ་དུ་ཐེམ་པར་བྱ་སྟེ། དེ་ཡང་ཏིལ་གྱི་འབྲས་བུ་བརྒྱ་ལ་སྔགས་རེ་རེ་དང་སྦྱར་ལ། དེའི་མཐར་སྦྱོར་བའི་ལས་ཀྱི་སྔགས་བཏགས་ཏེ། ལུས་ངག་ཡིད་གསུམ་དྲག་
པོ་དང་། །རྨུགས་པ་དངས་པར་བསམས་པས་བསྣུན་པར་འབྲེལ་ཏོ། །དེ་ནས་ཐེམ་པ་དང་། བདག་ཉིད་ཀྱི་གོས་འོག་མ་ལ་ཡང་དག་པར་གཏུམས་ལ་གར་འགྲོ་བའི་ཕྱོགས་སུ་བཀྱེར་བར་འབྲེལ་ཏོ། །དེ་ནས་དེ་དང་ཕྲད་པ་ན། །དྲག་པོའི་ལས་ནི་སྦྱོར་བ་ཡིས། །དེ་ཉིད་ལ་
ནི་ཕོག་པར་གཏོར། །དེ་ཡིས་དེ་ལ་གཏོར་བ་ཡིས། །དེ་ནི་རེངས་དང་རྨོངས་པར་འགྱུར། །ཞེས་བྱ་བ་ལ། དེ་ནས་དེ་དང་ནི་ཆོམ་པོ་ལ་བྱ་སྟེ། དེ་དང་ཆོམ་པོ་དང་ཕྲད་པ་ན། བདག་གིས་ཞེ་སྡང་དྲག་པོ་བསྐྱེད་ལ། ལུས་རྩ་རྒྱུས་བསྒྲིམས་པས་མིག་བཟློག་སྟེ། སྔགས་
དྲག་པོ་བཟླས་པས་ལན་བདུན་གྱི་བར་དུ་ལུས་ལ་ཕོག་པར་གཏོར་བར་འབྲེལ་ཏོ། །དེ་གཏོར་བས་ཆོམ་པོ་དེ་རེངས་པར་འགྱུར་བ་དང་། རྨོངས་པར་འགྱུར་བ་ནི་ངེས་པའོ། །སྦྱོར་བ་ལས་ཀྱི་སྔགས་ཀྱིས་ནི། །ཨོཾ་མ་ནུ་ཞེས་བྱ་བ་ལ་སོགས་པས་དྲག་པོ་ལ་སྐད་ཆེན་གྱི་ཕྲེང་
བས་སོ། །སྒྱུ་མ་དབང་དུ་བསྡུ་བྱས་ནས། །སྦྱོར་བ་འདི་ནི་བརྩམ་པར་བྱ། །ཞེས་པ་ནི། བྲམ་ཟེ་མོ་ལ་སོགས་པ་ཆོ་གའི་ཕྱིར་འགུགས་པར་བྱེད་ན་འོག་ནས་འབྱུང་བའི་སྦྱོར་བ་རྣམས་སྤྱད་པར་བྱའོ། །ངོ་འཇམ་རྔུལ་དང་ཟླ་བ་དང་། །བགེགས་ཀྱི་གཉེན་པོའི་ཁུ་བ་དང་། །

49-1-302b

སྒོ་ཆེན་ལས་ཀྱི་ཁུ་བས་སུ། །བྱེད་པ་གཉིས་ཀའི་བར་སྦྲུས་ལ། །དེ་དང་མཐུན་པ་ཉིད་ལ་ནི། །ཡོངས་སུ་བསྐུས་ནས་སྦྱིན་པར་བྱ། །ཞེས་བྱ་བ་ལ། ངོ་འཇམ་ནི་ཤའི་མེ་ལོང་ལ་བྱ་སྟེ། ཤའི་མེ་ལོང་ནི་རྔུལ་དྲིའི་བཞུན་པ་དང་། ཟླ་བ་ནི་བདག་གི་ཟླ་བ་དང་། བགེགས་
ཀྱི་གཉེན་པོ་ནི་ཉུངས་ཀར་ལ་བྱ་སྟེ། དེ་དང་སྒོ་ཆེན་ལས་ཀྱི་ཁུ་བ་ནི་གང་དུ་རྒྱུན་ལུགས་ཀྱི་སྦྱོར་བ་མང་པོ་ལ་སྒོ་ཆེན་ཞེས་ཟེར་ཏེ། དབྱིབས་ཆེ་བ་ནི་མི་ཡིན་ཏེ། དཔེར་ན་ཡོན་ཏན་དུ་མ་དང་ལྡན་པའི་མི་ལ་མི་ཆེན་པོ་ཞེས་ཟེར་བ་དང་འདྲ་བ་སྟེ། དེ་བས་ན་དེའི་ཁུ་བ་དང་ངོ་། །
བྱེད་པ་གཉིས་ཀ་ནི་ལག་པ་གཉིས་ལ་བྱ་སྟེ། ལག་པ་གཉིས་ཀྱི་བར་དུ་སྦྲུས་ལ། དེ་ལ་མཐུན་པའི་དངོས་པོ་གང་ལ་བསྐུས་པས་བུ་མོ་ལ་སྦྱིན་པར་བྱའོ། །དེ་ཡང་དང་པོར་རང་གི་རྟགས་ལ་ཞག་གསུམ་བར་དུ་བཅིངས་པས་སོ། །དེ་ནས་ངེས་པའི་དུས་བཏབ་ལ། །
ཁ་སྦྱོར་བ་ནི་ཡང་དག་བསྔགས། །ཞེས་པ་ནི། བདག་གིས་ཡིད་ལ་བྱའོ། །ངེས་པའི་དུས་ས་ཕྱོགས་དབེན་པར་བཏབ་ལ། དེར་བྱུང་བ་ན་བདག་གིས་ཆོ་གའི་མཆོག་ཁ་སྦྱར་བས་སྔགས་པའོ། །སྔགས་ནི་ཨོཾ་ན་མོ་ཀ་ཞེས་པ་ནས་སྭཱ་ཧཱ།  ཞེས་པའི་བར་དུ་གོ་
བར་བྱའོ། །ལྷག་མ་ནི་གོ་སླའོ་། །ནོར་དག་སྒྲུབ་པར་འདོད་པ་ན། །ནོར་འཛིན་ལྷ་མོ་ཡོངས་སུ་བྲི། །ཞེས་པ་ནི། རྣལ་འབྱོར་པས་སྦྱིན་པ་ལ་སོགས་པ་གཏང་བའི་ཕྱིར། ནོར་སྒྲུབ་པར་འདོད་ན། ནོར་འཛིན་གྱི་ལྷ་མོའི་གཟུགས་བྲི་བར་བྱའོ། །དེ་ཡང་ཇི་ལྟ་བུར་བྲི་
བར་བྱ་ཞེ་ན། འདི་སྐད་གསུངས་ཏེ། ཁ་དོག་སེར་བ་ཉིད་ལ་ནི། །ཕྱག་བཞི་པར་ནི་ཡང་དག་བྲི། །ཞལ་གཅིག་ནུ་མ་འབུར་བ་ལ། །གཡས་ཀྱི་དང་པོས་པུ་སྟི་འཛིན། །གཉིས་པས་འབྲས་ཀྱི་སྙེ་མ་འཛིན། །གཡོན་གྱི་དང་པོ་ཉིད་ན་ནི། །རིན་ཆེན་འབར་བ་ཡང་དག་བསྣམས། །
གཉིས་པས་ནེའུ་ལེའི་རྐྱལ་པ་བསྣམས། །ཞེས་བྱ་བ་ལ། དེ་ཇི་ལྟ་བ་བཞིན་དུའོ། །དེ་ལ་རྒྱན་ཆ་ལྔ་དང་སྨད་གཡོགས་ལ་སོགས་པས་ཡང་དག་པར་བརྒྱན་ཏེ། པདྨ་དམར་པོའི་སྟེང་ན་བཞུགས་པ་བྲི་བར་བྱའོ། །དེ་ལྟ་བུ་ཡི་གཟུགས་བྱས་ལ། །སྣ་ཚོགས་དྲི་ཡིས་ཡང་དག་མཆོད། །

49-1-303a

མཆོད་པ་རྣམ་པ་ལྔ་དག་དང་། །ན་བཟའ་དང་ལ་སོགས་པ་ནི། །ཡང་དག་པ་རུ་མཆོད་པར་བྱ། །ཞེས་པ་ནི། གོང་མ་ལྟ་བུའི་གཟུགས་བྱས་ལ་དྲི་སྣ་ཚོགས་པའི་ཐིག་ལེ་བསྐུ་བ་དང་།  མཆོད་པ་རྣམ་པ་ལྔ་ཉིན་མཚན་དུས་དྲུག་ཏུ་དབུལ་བ་དང་། དཀྱིལ་འཁོར་
ཡང་ལེགས་པར་ཕུབ་པས་བསྒྲུབ་པའོ། །ཞག་གྲངས་བརྒྱ་རྩ་བརྒྱད་བར་དུ། །ཡོངས་སུ་བསྙེན་པས་སྔགས་བཟླས་བྱ། །ཞེས་པ་ནི། ཆོ་ག་དེ་ལྟ་བུས་ཞག་བརྒྱ་རྩ་བརྒྱད་དུ་སྔགས་འདི་བཟླས་པར་གསུངས་སོ། །ཨོཾ་བ་སུ་དྷ་ར་ཡེ་ཧཱུཾ།  དེ་ནས་འགྲུབ་པར་འགྱུར་བའི་རྟགས། །
དེ་ཉིད་གཡོ་བར་འགྱུར་བ་ཡིན། །དེ་འགྲུབ་གཏེར་ནི་རྙེད་པ་རུ། །དེ་ཡིས་ལུང་ནི་སྟོན་པར་བྱེད། །དེ་ནས་དབྱིག་ནི་མི་ཟད་པའི། །བདག་པོར་མི་དེ་ངེས་པར་འགྱུར། །ཞེས་བྱ་བ་ལ། དེ་གྲུབ་པའི་རྟགས་ནི་སྐུ་གཡོ་བའོ། །ལྷ་མོ་གྲུབ་པ་ནི་བདག་ལ་ས་ཕྱོགས་ཆེ་གེ་མོ་འདི་
ན་གཏེར་འདི་ལྟ་བུ་ཡོད་པས་ལོང་ཤིག་ཅེས་པའི་ལུང་སྟོན་པར་བྱེད་པ་ནི་། མཚན་མོའི་རྨི་ལམ་ནའོ། །དེ་ནས་བླངས་པ་ལས་དབྱིག་མི་ཟད་པའི་བདག་པོར་སྒྲུབ་པ་པོ་དེ་འགྱུར་བར་ངེས་པར་སྦྱར་རོ། །དེ་ཡང་བླ་མའི་མན་ངག་ལས་ཡིད་ཆེས་པས་སྤྱད་པར་བྱའོ། །མ་རུངས་པ་
དག་སྦྱོར་གཞུག་ན། །སྦྱོར་བ་འདི་དག་ངེས་པར་བརྩམ། །ཞེས་བྱ་བ་ནི། མི་གང་དག་རྣལ་འབྱོར་པ་རྣམས་ལ་གནོད་པ་དང་། འཚེ་བར་བྱེད་པའི་མ་རུངས་པ་རྣམས་བཟོད་པ་ལ་ཉེ་བར་སྦྱོར་བའི་ཕྱིར་འོག་ནས་འབྱུང་བའི་སྦྱོར་བ་རྣམས་བརྩམ་པར་གསུངས་སོ། །དེ་ཡི་ཀུན་
གྲགས་ཉིད་དང་ནི། །ཁུ་ཆེན་པ་ལ་སོགས་པ་ལ། །སྔགས་འདི་ཡིས་ནི་འབུམ་དུ་བཟླས། །དེ་ནས་བསྙེན་པ་རྫོགས་པ་ལ། །ཡིད་ཆེན་དུང་ལ་སྦུ་གུ་ཅན། །སོར་བདུན་ཉིད་ལ་དུག་བླུགས་ཏེ། །ཞེས་པ་ལ། དེའི་ཞེས་པ་ནི་མ་རུངས་པའི་དེའིའོ། །དེའི་ཀུན་གྲགས་ནི་
འཇིག་རྟེན་པ་ཀུན་ལ་གྲགས་པ་ཆེན་པོ་ཐོབ་པ་དེ་ལ་བྱ་སྟེ། དེ་དང་ཁུ་ཆེན་འཛག་པ་དང་དེའི་རྗེས་ཀྱི་ས་བླངས་ལ་དེ་གསུམ་དང་དུག་བསྲེས་ནས་ཡིད་ཆེན་གྱི་དུང་སྦུ་གུ་ཅན་སོར་བདུན་བཅང་ལ།  དེའི་ནང་དུ་དངོས་པོ་རྣམས་བླུགས་ཏེ། འོག་ནས་འབྱུང་བའི་སྔགས་

49-1-303b

འབུམ་བཟླས་པར་འབྲེལ་ཏོ། །སྐུད་པ་སྔོན་པོས་རབ་བཅིངས་ལ། ནུབ་ཕྱོགས་དག་ཏུ་ངེས་པར་གདགས། །དེ་ཡིས་འབྱུང་བས་བསྐྱོད་པས་ན། །མི་དེ་ངེས་པར་སྨྱོ་བར་འགྱུར། །ཞེས་བྱ་བ་ལ། སྐུད་པ་སྔོན་པོ་མེ་ཏོག་པ་ལི་ཀའི་ནང་དུ་བཙོས་པས་ཡོངས་སུ་བཅིངས་ལ། 
ནུབ་ཕྱོགས་ངོས་སུ་ཀ་ར་བཱི་རའི་ལྕུག་མ་ལ་བཏགས་ཏེ་བཞག་པས། དངོས་པོ་དེ་འབྱུང་བ་རླུང་གིས་བསྐྱོད་པས་མི་དེ་ངེས་པར་སྨྱོ་བར་གསུངས་སོ། །སྔགས་ནི་ཨོཾ་མོ་ཧ་ཡ་ཞེས་པ་ལ་སོགས་པའོ། །མིང་རྣམས་ངེས་པར་མི་གསལ་བས། །རྡོ་རྗེ་མོ་ནི་ཡོངས་
སུ་བསྒྲུབ་། །ཅེས་བྱ་བ་ལ། མངོན་པར་ཤེས་པ་དང་མི་ལྡན་པས་བསྒྲུབ་པར་བྱ་བ་གཞན་ལ་མིང་མི་གསལ་བའི་ཕྱིར་རྡོ་རྗེ་མོ་སྒྲུབ་པར་འབྲེལ་ཏོ། །དེ་ཡང་ཇི་ལྟ་བུར་བསྒྲུབ་སྙམ་པ་ལ་འདི་སྐད་གསུངས་སོ་། །ས་ལ་ཕྱོགས་བཞི་མཚམས་བརྒྱད་དུ། །རེའུ་མིག་
བཅུ་གཉིས་བྲི་བྱས་ལ། །མ་རིག་ལ་སོགས་རྟགས་ཀྱིས་ནི། །དངོས་པོ་ཡང་དག་བྲི་བར་བྱ། །ཞེས་བྱ་བ་ལ། ས་ལ་རི་མོ་བཞི་བསྣོལ་ཏེ། །ཟུར་བཞི་རུ་ཡང་རི་མོ་བཞི་བྲིས་པས་ལེའུ་ཚེ་བཅུ་གཉིས་སུ་འགྱུར་རོ། །དེ་ནས་ལེའུ་ཚེ་བཅུ་གཉིས་ལ་མ་རིག་པ་ལ་སོགས་
པའི་རྟགས་རིམ་པ་ཇི་ལྟ་བ་བཞིན་དུ་ཨ་ལ་སོགས་པ་བྲིས་ལ་བརྟག་པར་གསུངས་སོ། །དེ་ནས་སྔགས་པས་རབ་བསྔགས་ལ། །བསམ་པ་རབ་ཏུ་རྫོགས་བྱས་ཏེ། །དེ་ཉིད་དངོས་པོ་གང་ཡིན་པས། །བསམ་པ་སྦྱོར་བས་མེ་ཏོག་བོར། །ཞེས་པ་ལ། བདག་
སྔགས་པས་རྣམ་པར་རྒྱལ་བའི་སྔགས་ཀྱིས་མེ་ཏོག་ལ་བསྔགས་ཏེ། བཟང་ངན་གང་ཡིན་པ་སྟོན་ཅིག་པའི་བསམ་པས་རང་གི་མེ་ཏོག་བོར་བར་འབྲེལ་ཏོ། །གང་དུ་བབ་པ་དེར་གནས་ལ། །ཤེས་རབ་ཅན་གྱིས་རྣམ་དཔྱད་ནས། །བཟང་ངན་ལྟས་
རྣམས་ཡོངས་སུ་བཤད། །ཅེས་བྱ་བ་ལ། རྟེན་འབྲེལ་བཅུ་གཉིས་པོ་གང་ལ་བབ་པ་དེ་ལ་བཟང་བ་དང་ངན་པའི་ལྟས་རྣམས་ཤེས་རབ་དང་ལྡན་པས་དཔྱད་ལ་བཤད་པར་བྱའོ། །རིག་པ་ལེགས་པར་སྦས་པ་ཡིས། །བ་ཡི་ལྕི་བར་རབ་གཏུམས་

49-1-304a

ལ། །དང་པོ་གཉིས་སུ་ཤེས་པར་བྱ། །རི་ལུ་བྱེ་བྲག་མེད་པ་ཡིས། །བཅོམ་ལྡན་སྔོན་དུ་གཞག་བྱས་ལ། །ཞེས་བྱ་བ་ལ། རིག་པ་ཞེས་བྱ་བ་ནི་བཟང་བ་དང་ངན་པའི་རིམ་པ་ལ་བྱ་སྟེ། དེའི་མིང་སུ་དང་ཧ་གཉིས་བྲིས་ལ་རམས་ཀྱིས་
བཙོས་ལ་བའི་ལྕི་བའི་ནང་དུ་གཏུམས་ཏེ། གཉིས་སུ་བྱས་ནས་རི་ལུ་འདྲ་བ་མཉམ་པར་བྱས་ལ། བདེ་བར་གཤེགས་པའི་མདུན་དུ་གཞག་པར་བྱའོ། །དང་པོར་མཆོད་པ་ཡང་དག་སྦྱོར་། །དམོད་དག་ཡོངས་སུ་བཙུགས་པ་ཡིས། །ཞེས་པ་ནི། དང་
པོར་བདེ་བར་གཤེགས་པ་མཆོད་པ་རྣམ་པ་ལྔས་ཡང་དག་པར་མཆོད་ནས་ཕྱག་འཚལ་ཏེ།  ལྟས་འདི་ངེས་པར་བསྟན་དུ་གསོལ། །ཞེས་པའི་དམོད་གཟུགས་པར་འབྲེལ་ཏོ། །ཤེས་རབ་བཅུ་གསུམ་བདག་ཉིད་ཅན། །དམར་པོ་གོས་ཀྱིས་རབ་བརྒྱན་ཏེ། །
ཁྲུས་དག་ངེས་པར་བྱས་པ་དང་། །དྲི་ཡིས་ལུས་ལ་བྱུགས་བྱས་ལ། །ཞེས་པ་ནི། བུད་མེད་ཤེས་རབ་ཀྱི་བདག་ཉིད་ཡིན་པས།  བུ་མོ་ལོ་བཅུ་གསུམ་ལོན་པ་ལ་གོས་དམར་པོས་ཡང་དག་པར་བསྐོན་པ་དང་། དང་པོར་ཁྲུས་ལེགས་པར་བྱས་ཏེ་ཙནྡན་
གྱིས་ལུས་ལ་བསྐུས་ལ་སྦྱོར་བ་བརྩམ་པར་འབྲེལ་ཏོ། །དཔྲལ་བར་ཐིག་ལེ་དམར་པོ་བསྐུ། །མེ་ཏོག་དྲི་ཞིམ་ཕྲེང་བ་ཉིད། །དེ་ཡི་ལག་ཏུ་སྦྱིན་པར་བྱ། །དེ་ཡིས་དེ་ལས་བླངས་པ་ལས། །དེ་ཉིད་དངོས་པོ་བསམ་བྱ་སྟེ། །བཟང་ངན་ལྟས་སུ་ངེས་པར་སྟོན། །
ཞེས་བྱ་བ་ལ། བུ་མོའི་དཔྲལ་བ་ལ་ཐིག་ལེ་དམར་པོ་ལི་ཁྲིས་བསྐུས་ལ། མེ་ཏོག་དྲི་ཞིམ་པོ་བུ་མོའི་ལག་པར་སྦྱིན་ཏེ། བུ་མོས་ཀྱང་དེ་བདེ་བར་གཤེགས་པ་ལ་དབུལ་བར་བྱའོ། །དེ་ནས་བུ་མོ་ལ་བདག་རྣལ་འབྱོར་པས་ཚིག་ཁྱོད་ཀྱིས་གང་ཡང་རུང་བ་ཅིག་
ལོང་ཤིག་པར་བརྗོད་པར་བྱའོ། །དེ་ན་ས་གཅིག་ཕྱེ་བས་ལས་བཟང་ངན་གང་ཡང་རུང་བ་སྟོན་པར་འགྱུར་རོ། །གཞན་ཡང་སྣ་ཚོགས་པའི་ལས་རྣམས་ཡང་དག་པར་སྤྱད་པར་གསུངས་སོ། །དེ་ཡང་ཇི་ལྟ་བུ་ཞེ་ན། ལག་ན་རྡོ་རྗེ་བཀོད་པའི་རྒྱུད་

49-1-304b

ལས་ཤེས་པར་བྱའོ། །འདི་ནས་མར་ནི་སྤྱིའི་བགེགས་འདུལ་བའི་ཐབས་སྟོན་པར་ཤེས་པར་བྱའོ། །སྤྱིར་ན་སྣ་ཚོགས་གདོན་ལ་ནི། །འབར་བ་ཆེན་པོའི་སྔགས་བཟླས་ལ། །གུ་གུལ་ནག་པོའི་དུད་པ་དག །དེ་ཡི་སྣ་རུ་གཏུལ་བྱས་ལ། །ཞེས་བྱ་བ་ནི། 
གདོན་ཆེན་པོ་བཞི་ལས་མ་གཏོགས་པ་གདོན་བྱིན་པོ་ཐམས་ཅད་ལ་སྦྱོར་བ་འདི་ཡང་དག་པར་སྦྱར་བར་བྱའོ། །འབར་བ་ཆེན་པོ་ནི་ལག་ན་རྡོ་རྗེ་དངོས་ལ་བྱ་སྟེ། དེའི་རྩ་བའི་སྔགས་སྟོང་དུ་ཐེམ་པར་བཟླས་ལ་གུ་གུལ་ནག་པོའི་དུད་པས་ནད་པའི་སྣ་རུ་གཏུལ་བར་བྱའོ། །
ཡུངས་ཀར་གུ་གུལ་མེ་ཏོག་དང་། །དེ་ཡི་སྙིང་པོ་བསྲེག་པར་བྱའོ། །དེ་ཡིས་ནད་པ་གང་ཡིན་པ། །བགེགས་དང་ངེས་པར་དབྲལ་བར་བྱ། །ཞེས་བྱ་བ་ལ། གུ་གུལ་དང་མེ་ཏོག་དང་། ཡུངས་ཀར་གསུམ་ལ། དེ་རེ་རེ་བཞིན་དུ་བགེགས་ཐམས་ཅད་ཀྱི་སྙིང་
པོ། སརྦ་བིགྷྣཱཾ་ཧ་ན་ཧ་ན་ཧཱུཾ་ཀཿ་ཞེས་པས་སྲེག་བླུགས་སྟོང་དུ་ཚང་བར་བྱའོ། །དེས་ནད་པ་དེ་བགེགས་དང་བྲལ་བར་འགྱུར་རོ། །སྲིན་ལག་གཉིས་ལ་སྐུད་པ་ནི། །སྔོན་པོས་ཡང་དག་བསྡམས་བྱས་ལ། །སྤྱི་བོའི་སྐྲ་ལ་སྲད་བུ་གང་། །བཅིངས་པས་
སྔགས་ནི་ངེས་པར་བཟླས། །ཞེས་བྱ་བ་ལ། ནད་པའི་སྲིན་ལག་ལ་སྐུད་པ་སྔོན་པོས་ཡང་དག་པར་བཅིངས་ལ།  སྲུང་བའི་འཁོར་ལོ་ཡང་གདགས་པར་བྱའོ། །དེ་ཡང་སྔགས་གོང་མས་ཡང་དག་པར་བྱ་བར་འབྱུང་ངོ་། །ཅིའི་ཕྱིར་བྱ་ཞེས་པ་
ལ་སོགས་པ་ནི་རྒྱུད་གཞན་ལས་གོ་བར་བྱའོ། །འཁྲུག་པའི་སྡེ་དག་རྒྱལ་འདོད་ན། །ཁམས་གསུམ་རྣམ་རྒྱལ་སྙིང་པོ་ཡིས། །འབུམ་དུ་བཟླས་པས་བསྙེན་པ་བྱ། །ཞེས་པ་ནི་གཡུལ་ངོ་བཟློག་པའི་ཕྱིར། ཁམས་གསུམ་རྣམ་པར་རྒྱལ་བའི་སྙིང་
པོས། གི་ཝང་ལ་ཡང་དག་པར་འབུམ་དུ་བཟླས་པར་འབྲེལ་ཏོ། །དེ་ནས་ཨ་མྲ་ཏ་ཡི་ལོ་མ་ལ། །ཡུང་བས་ཡོངས་སུ་བྲི་བྱས་ལ། །གི་ཝང་གིས་ནི་རབ་ཏུ་བསྐུ། །ཞེས་པ་ནི། ཨ་མྲའི་ལོ་མ་ལ་གི་ཝང་གིས་ཡང་དག་པར་བསྐུས་ལ།

49-1-305a

ཡུང་བས་ཁམས་གསུམ་རྣམ་པར་རྒྱལ་བའི་སྙིང་པོ་སྟེང་དུ་བྲི་ལ། སྦྱོར་བ་བརྩམ་པར་གསུངས་སོ། །ཅོད་པན་སྤྱི་བོར་གཏུམས་བྱས་ལ། །རང་ཉིད་སྐུ་རུ་བསྒོམ་བྱས་ལ། །ལག་པ་གཡས་པ་ཡུངས་ཀར་དང་། །སྐེ་
ཚེ་ཉིད་དུ་སྦྱོར་བ་ཡིས། །སྔགས་བཟླས་སྡིགས་མཛུབ་ཕྱག་རྒྱ་ཡིས། །ཡོངས་སུ་བྲིས་པས་སྡེ་རྒྱལ་འགྱུར། །ཞེས་བྱ་བ་ལ། རྣམ་པར་རྒྱལ་བའི་སྙིང་པོ་ཉིད་དམིགས་ཀྱི་སྤྱི་བོར་གཏུམས་ཏེ། རང་ཉིད་རྣམ་པར་རྒྱལ་བའི་སྐུ་རུ་བསམས་ནས་སྐེ་ཚེ་
དང་། ཡུངས་ཀར་གཉིས་བསྲེས་ཏེ། སྔགས་བཟླས་ཞིང་སྡིགས་མཛུབ་ཀྱི་ཕྱག་རྒྱ་བཅས་པས་གཡུལ་གྱི་ཕྱོགས་སུ་རྒྱ་གྲམ་བྲི་བར་བྱ་བར་གསུངས་སོ། །དེ་ཡང་སྐེ་ཚེ་དང་ཡུངས་ཀར་གཉིས་ལ་ཡང་གང་དུ་སྔགས་བཟླས་པར་ཤེས་པར་བྱའོ། །
རྣལ་འབྱོར་པ་ཡི་བདག་ཉིད་ལ། །འཆི་བ་བསླུ་བར་ཡང་དག་བྱ། །ཞེས་བྱ་བ་ལ། བདག་རྣལ་འབྱོར་ལ་ཡུན་རིང་དུ་རྣལ་འབྱོར་བསྒྲུབ་པའི་ཕྱིར། དུས་མ་ཡིན་པར་འཆི་བ་བདག་གིས་བསླུ་བར་བྱའོ། །དེ་ལ་ཇི་ལྟ་བུས་འཆི་བར་འགྱུར་ཞེ་ན། 
བདག་གི་རྒྱུད་ལ་འཆི་ལྟས་ནི། །ཕྱི་ནང་བཅུ་གཉིས་ཡང་དག་ལྡན། །བདག་གི་བྲང་ལ་ཤ་མཚན་དག །དམར་པོ་བྱུང་བར་གྱུར་པ་ནི། །ཟླ་བ་གསུམ་ན་འཆི་བར་འགྱུར། །རིག་པའི་རྒྱལ་མོའི་སྔགས་ཀྱིས་སུ། །ཏིལ་ལ་སྲེག་བླུགས་
སྟོང་དུ་ནི། །ཚང་བར་བྱས་པས་དེ་བཟློག་འགྱུར། །ཞེས་བྱ་བ་ལ། བདག་རྣལ་འབྱོར་པའི་རྒྱུད་ལ་ཕྱིའི་འཆི་ལྟས་དྲུག་དང་། ནང་གི་འཆི་ལྟས་དྲུག་སྟེ་བཅུ་གཉིས་དང་ཡང་དག་པར་ལྡན་པར་འགྱུར་རོ། །དེ་དག་གང་ཞེ་ན་སྙམ་པ་ལ། 
བདག་གི་བྲང་ལ་ཤ་མཚན་དག །ཅེས་གསུངས་ཏེ། བདག་ལ་ཤ་མཚན་དམར་པོ་བྲང་གི་གཡོན་ཕྱོགས་སུ་བྱུང་བ་ན། བདག་ཟླ་བ་གསུམ་ན་འཆི་བའི་ལྟས་ཡིན་པས། དེ་ལ་བདག་གིས་རིག་པའི་རྒྱལ་པོ་ཁྲོ་བོ་རྣམ་པར་རྒྱལ་བའི་སྔགས་

49-1-305b

དང་སྦྱར་བས། དཀྱིལ་འཁོར་ལྷ་དང་བཅས་པ་བྲིས་ལ། མེ་ཏོག་དང་ཏིལ་བསྲེགས་པའི་སྲེག་བླུགས་ལན་གྲངས་སྟོང་དུ་ཚང་བར་བྱ་བར་འབྲེལ་ཏོ། །དེ་ལ་ཡང་བདག་ཉིད་འཆི་བ་སླུ་བའི་སྔགས་མཐར་གདགས་ཏེ་བསམ་པ་དང་ལྡན་པས་བྱས་ལ་དེ་
ངེས་པར་བཟློག་པར་འགྱུར་རོ། །དེ་དང་ཆ་མཐུན་གང་ཡིན་པས། །རྐན་ལ་འབྲུམ་བུ་གསུམ་པ་དང་། །ལྕེ་ཡི་རྩེ་མོར་སྨེ་བ་དང་། །རྡོ་རྗེའི་ལམ་ནས་ཁྲག་འཛག་དང་། །འཛག་གཉིས་དབུགས་དག་གསུམ་པ་དང་། །རི་ཡི་རྩེ་མོར་ཤུ་བ་
བྱུང་། །ནང་གི་འཆི་ལྟས་ངེས་པ་སྟེ། །ཞེས་བྱ་བ་ལ། དེ་དང་ཞེས་པ་ནི་གོང་མ་དང་གཉིས་ཆ་མཐུན་པའི་འཆི་ལྟས་གསུངས་སོ། །དེ་ཡང་ཇི་ལྟ་བུ་སྙམ་པ་ལ། རྐན་ལ་འབྲུམ་བུ་གསུམ་པ་ཞེས་གསུངས་ཏེ། རྐན་གྱི་དཀྱིལ་དུ་འབྲུམ་བུ་ཡུངས་
ཀར་གྱི་ཁོ་བུ་ཙམ་པ་གསུམ་ཚུལ་དུ་གནས་པའམ། ཡང་ན་གསུམ་ཚོམས་སུ་བྱུང་ན་དེ་ཡང་ནང་གི་འཆི་ལྟས་ཡིན་པ་སྟེ། འཆི་བའི་དུས་འོག་ནས་རིག་པར་བྱའོ། །དེ་བཞིན་དུ་འཆི་བ་བཟློག་པའི་ཐབས་ཀྱང་འོག་ནས་འབྱུང་བས་རིག་པར་བྱའོ། །
གཞན་ཡང་ལྕེའི་རྩེ་མོ་ལ་སྨེ་བ་ནག་པོ་མེ་ཏོག་དུ་རུ་ཀའི་སྙིང་པོ་ཙམ་བྱུང་ན། དེ་ཡང་ནང་གི་འཆི་ལྟས་སུ་རིག་པར་བྱ་སྟེ། དུས་དང་བཟློག་པ་ནི་གོང་མ་བཞིན་ནོ། །ཡང་བདག་གི་གསང་བའི་རྡོ་རྗེའི་ལམ་ནས་མར་ཁྲག་འཛག་པའམ། ཆུ་
སེར་པོ་གུར་གུམ་གྱི་ཁུ་བ་ལྟ་བུ་བྱུང་ན། དེ་ཡང་ནང་གི་འཆི་ལྟས་སུ་རིག་པར་བྱའོ། །དུས་དང་བཟློག་པ་ནི་གོང་མ་བཞིན་ནོ། །ཡང་བདག་གི་ལུས་ལ་དུས་མཉམ་པར་འཛག་པ་གཉིས་དང་དབུགས་གཅིག་སྟེ། གསུམ་དུ་བྱུང་བ་དེ་ཡང་
ནང་གི་འཆི་ལྟས་སུ་རིག་པར་བྱའོ། །ཡང་བདག་གི་རིའི་རྩེ་མོ་རུ་ཤུ་བ་མདོག་སྔོ་བ་ཟར་མའི་མེ་ཏོག་ལྟ་བུ་བྱུང་བ་ནི། དེ་ཡང་ནང་གི་འཆི་ལྟས་སུ་རིག་པར་བྱའོ། །དེ་ཡོད་པ་དང་བསྒྲུབ་ཅེས་པ་གསུངས་ཏེ། དེ་ཡང་བཟློག་པའི་ཐབས་སུ་གསུངས་སོ། །

49-1-306a

སྟག་དང་འབྲུག་དང་བྱི་ལ་དང་། །རྩངས་པ་བྱ་གག་ནག་པོ་རུ། །ཡོངས་སུ་སྦྱོར་བས་རིག་པ་བཟླས། །གི་ཝང་འུག་པ་རུས་སྦལ་དང་། །ཙམ་པ་ག་དང་ཨུཏྤལ་དང་། །སེང་ལྡེང་འབྲས་བུ་གང་ཡིན་པ། །འུག་པའི་སྒྲོ་ལ་སྦྱོར་བར་བྱ། །ཞེས་བྱ་བ་ནི། སྨན་དང་སྔགས་ཀྱི་སྦྱོར་བས་འཆི་བའི་ལྟས་བཟློག་པར་
གསུངས་སོ། །ད་ནི་ཕྱིའི་འཆི་ལྟས་ཡང་དག་པར་སྟོན་ཏེ། བྱ་རོག་མཁའ་ལ་འཕུར་བ་ཡི། །དཀར་པོས་བདག་ལ་ཕོག་པ་ན། །ཕྱི་ཡི་འཆི་ལྟས་ཡིན་པ་སྟེ། །གང་དུ་གྲགས་པའི་སར་སོང་སྟེ། །རིག་པ་ལ་སོགས་སྦྱོར་བ་ཡི། །ཡོངས་སུ་བཟློག་པར་བྱ་བ་ཡིན། །ཞེས་བྱ་བ་ལ། བྱ་རོག་ནམ་མཁའ་ལ་འཕུར་བའི་བྱ་ཐལ་
དཀར་པོས་བདག་གི་ལུས་གང་ཡང་རུང་བ་ལ་ཕོག་པར་གྱུར་ན་ཕྱིའི་འཆི་བའི་རྟགས་ཡིན་པས། གོང་དུ་ཕོག་པའི་མི་ལ་གྲགས་པའི་སར་སོང་ལ་སྔགས་དང་སྨན་དང་དགེ་བ་ལ་སྦྱོར་བས་ཡོངས་སུ་བཟློག་པར་བྱའོ། །དེའི་འཆི་ལྟས་སུ་བབས་ནས་དུས་ངེས་པ་ནི་འོག་ནས་རིག་པར་བྱའོ། །གཞན་ཡང་ཕྱིའི་འཆི་
ལྟས་རྣམས་འདི་ལྟར་གོ་བར་བྱའོ། །ནམ་མཁའ་ལ་སྣ་ལྔ་མཐོང་བ་དང་། ཆུ་ལ་མི་གཟུགས་མཐོང་གྱུར་པ། །ཤིན་ཏུ་སྡིག་པའི་ལྟས་སུ་བསྟན། །རྨི་ལམ་ན་ནི་སྟག་ལ་ཞོན། །མཆོད་སྡོང་ཉིད་ལ་འཛེག་པ་དང་། །སེང་གེའི་ཁར་ནི་ཞུགས་རྨི་དང་། །ཡོངས་སུ་སྡིག་པའི་ལྟས་ཡིན་པས། །ཞེས་བྱ་བ་ལ། མཁའ་ལ་སྣ་ལྔ་
ནི། ནམ་མཁའ་ལ་འཇའ་ཚོན་ཁ་དོག་སྣ་ལྔའི་ཉི་མ་ཕྱེད་ན་མཐོང་བ་དང་། ཆུའི་ནང་ན་མིའི་གཟུགས་མཐོང་བ་དང་། རྨི་ལམ་དུ་རང་སྟག་ལ་ཞོན་པ་རྨི་བ་དང་། པདྨ་ལ་སོགས་པའི་མཆོད་སྡོང་ལ་འཛེག་པ་རྨི་བ་དང་།  རང་གི་ལུས་པོ་སེང་གེའི་ཁར་ཞུགས་པར་རྨི་བ་རྣམས་ཡོངས་སུ་སྡིག་པའི་འཆི་ལྟས་སུ་ངེས་པར་
ཡིན་པར་རིག་པར་བྱའོ། །དེ་ལ་འཆི་བའི་དུས་ངེས་པ་ནི་རིམ་པ་ཇི་ལྟ་བ་བཞིན་དུ་འདི་ལྟར་ཤེས་པར་བྱའོ། །ལོགས་ཤིང་སོར་མོ་རྩེ་གསུམ་དང་། །བསེ་རུ་ཕྱོགས་དང་ཀུནྡའི་འདབ། །ཡོན་ཏན་རྒྱ་མཚོ་མཚན་བཟངས་དང་། །སྐྱེ་མཆེད་འཕགས་ལམ་ཆུ་སྲིན་སོ། །ལོ་གསུམ་ཞག་བཞི་ཟླ་བ་ལྔ། །མི་དེ་ངེས་པར་འཆི་
བ་ཡིན། །ཞེས་བྱ་བ་ལ། ལོགས་ཤིང་དང་།  བསེ་རུ་དང་། ཆུ་སྲིན་གྱི་སོ་རྣམ་པ་གསུམ་ནི་ལོ་རུ་ཤེས་པར་བྱའོ། །མཚན་བཟངས་དང་། སྐྱེ་མཆེད་དང་། སོར་མོ་དང་། ཕྱོགས་རྣམ་པ་བཞི་ནི་ཞག་ཏུ་རིག་པར་བྱའོ། །རྩེ་གསུམ་དང་ཀུནྡའི་འདབ་མ་དང་། འཕགས་པའི་ལམ་དང་། ཡོན་ཏན་དང་། རྒྱ་མཚོ་རྣམ་པ་ལྔ་ནི་ཟླ་

49-1-306b

བར་ཤེས་པར་བྱའོ། །དེ་ལྟར་སྔགས་པ་བློ་དང་ལྡན་པས་།  བླ་མའི་ངག་ལས་ཡང་དག་པར་ཤེས་པར་བྱས་ལ། མཉམ་པར་གཞག་པས་དུས་ཐམས་ཅད་དུ་བརྟག་པར་བྱའོ། །དེ་ནས་རྟོག་པ་དང་། བདག་གིས་སྲུང་བའི་འཁོར་ལོ་བསམ་པ་དང་། འཆི་བ་བཟློག་པའི་ཐབས་གང་ལ་གང་གིས་བཟློག་པ་ནི་འདི་ལས་
ཤེས་པར་བྱའོ། །རིག་པའི་རྒྱལ་པོ་བདུད་རྩི་འཁྱིལ། །རྟེན་འབྲེལ་ཡི་གེ་བརྒྱ་པ་ཡི། །སྔགས་ཀྱིས་སྨན་ལ་བསྲུང་བར་བྱ། །ཁམས་གསུམ་རྣམ་རྒྱལ་འཇིག་རྟེན་མགོན། །དེ་དག་གི་ནི་སྙིང་པོ་ཡིས། །སྟག་སོགས་གསོབ་ལ་ངེས་པར་བཟླས། །རྨ་བྱ་ཆེན་མོའི་སྔགས་དག་གིས། །འུག་པའི་སྒྲོ་སྩོགས་ངེས་པར་
བསྔགས། །ཕྱག་ན་རྡོ་རྗེ་འཇམ་དབྱངས་དང་། །སྟོབས་ཆེན་ཁྲོ་བོ་གང་དག་གི་། །སྔགས་ཆེན་སེང་ལྡེང་འུག་སྒྲོ་དང་། །ཀུ་ཤ་བྱི་ལ་ལ་སོགས་པའི། །གསོབ་ལ་སོགས་པས་ཡོངས་སུ་བཟློག །གཏོར་མ་སྦྱིན་སྲེག་ལས་ཀྱིས་ནི། །ཡོངས་སུ་བཟློག་པར་བྱ་བ་ཡིན། །ཞེས་བྱ་བ་ལ། རིག་པའི་རྒྱལ་མོ་སོ་སོར་
འབྲང་མའི་སྔགས་ནི། ཨོཾ་མུ་ནི་མུ་ནི། བི་མུ་ནི་བི་མུ་ནི། དྷ་རི་ཙ་ལ་ཙ་ལ་ནི་བྷ་ག་བ་ཏི་བྷ་ཡ་བི་ག་ཏེ། བྷ་ཡ་ཧ་རི་ཎི། བོ་དྷི་བོ་དྷི།  བོ་དྷ་ཡ་བོ་དྷ་ཡ།  བུདྡྷི་ལི་བུདྡྷི་ལི། ཙུཾ་བུ་ལི་ཙུཾ་བུ་ལི་སྭཱ་ཧཱ། སརྦ་ཏ་ཐཱ་ག་ཏ་ཧྲྀ་ད་ཡ་དུཥྚེ་ཤེ་སྭཱ་ཧཱ།  ཨོཾ་མུ་ནི་མུ་ནི་མུ་ནི་། བ་རེ་སརྦ་ཏ་ཐཱ་ག་ཏ་ཧྲྀ་ད་ཡ་ཨ་དྷིཥྛཱ་ན་ཨ་དྷིཥྛི་ཏེ་བཛྲ་སྭཱ་ཧཱ། ཞེས་བྱ་
བའི་སྔགས་ཀྱིས་སྨན་ག་པུར་དང་།  ཛཱ་ཏི་ཕ་ལ་དང་། གུར་གུམ་གསུམ་སྲང་ལྔ་ལྔ་ཆ་བསྙམས་ལ། ཞག་གི་དང་པོ་ལ་སྔགས་འབུམ་དུའམ། ཡང་ན་སྟོང་ངམ། ཡང་ན་ཁྲི་བཟླས་པས་བདག་ཉིད་བཏུང་བར་བྱས་པས་ལོ་དང་པོའི་འཆི་བ་བཟློག་པར་གསུངས་སོ། །དེ་ནས་བདུད་རྩི་འཁྱིལ་པའི་སྔགས་
གོང་མས་ཙམ་པ་ཀ་དང་ཨུཏྤལ་ལན་གྲངས་སྟོང་དུ་བཟླས་ནས་ས་གཙང་སར་བོར་ན། ཟླ་བ་དང་པོའི་འཆི་བ་བཟློག་པར་འགྱུར་རོ། །རྟེན་འབྲེལ་གྱི་སྙིང་པོ་ཡེ་དྷ་རྨཱ་ཞེས་བྱ་བས། གི་ཝང་ལ་ལན་སྟོང་དུ་བསྔགས་ནས་དབྲལ་བར་ཐིག་ལེ་བྱས་ན། ལོ་བར་མའི་འཆི་བ་བཟློག་པར་བྱའོ། །ཡི་གེ་
བརྒྱ་པའི་སྔགས་ཀྱིས་སེང་ལྡེང་གི་ལྕུག་མ་ལ་ལན་སྟོང་དུ་བཟླས་པས། ས་ལ་ལན་གསུམ་དུ་བརྡབས་པས་ལོ་ཐ་མའི་འཆི་བ་བཟློག་པར་འགྱུར་རོ། །འཇིག་རྟེན་མགོན་གྱི་སྙིང་པོ་ནི། །ན་མོ་རཏྣ་ཏྲ་ཡཱ་ཡ་ཞེས་བྱ་བ་ལ་སོགས་པས། སྟག་གི་གསོབ་ལ་ལན་སྟོང་དུ་བཟླས་པས་། ཆུའི་ནང་

49-1-307a

དུ་བསྐྱུར་བས་ཟླ་བ་གཉིས་པའི་འཆི་བ་བཟློག་པར་འགྱུར་རོ། །ཕྱག་ན་རྡོ་རྗེའི་སྙིང་པོ་གོང་ནས་འབྱུང་བའི་ཨོཾ་ཙཎྜ་མ་ཧཱ་ཞེས་པའི་སྔགས་ཀྱིས་འབྲུག་གི་གསོབ་ལ་ལན་སྟོང་དུ་བཟླས་ཏེ། མེའི་ནང་དུ་བསྲེགས་པས་ཟླ་བ་གསུམ་པའི་འཆི་བ་བཟློག་པར་འགྱུར་རོ། །འཇམ་དབྱངས་
ཀྱི་སྔགས་ཡི་གེ་འབྲུ་གཅིག་པས་བྱི་ལའི་གསོབ་ལ་ལན་སྟོང་དུ་བཟླས་ནས་སའི་འོག་ཏུ་བཅུག་པས་ཟླ་བ་བཞི་པའི་འཆི་བ་བཟློག་པར་འགྱུར་རོ། །ཁྲོ་བོ་སྟོབས་པོ་ཆེའི་སྙིང་པོ་ཨོཾ་མ་ཧཱ་བ་ལ་རུ་རུ་པ་ར་ཧ་ར་ཡ་བ་ཏི་ཕཊ་ཅེས་བྱ་བའི་སྔགས་སྟོང་དུ་བཟླས་ལ་བྱ་གག་ནག་པོའི་གསོ་བ་ལ་སྔགས་བཏབ་སྟེ་མེའི་
ནང་དུ་བོར་བས་ཟླ་བ་ལྔ་པའི་འཆི་བ་བཟློག་པར་འགྱུར་རོ། །ཞག་དང་པོ་ནི་ཁམས་གསུམ་རྣམ་པར་རྒྱལ་བའི་སྦྱོར་བས་འཆི་བ་བཟློག་པར་བྱའོ། །ཞག་གཉིས་པའི་འཆི་བ་བཟློག་པ་ནི་རུས་སྦལ་དང་འུག་པའི་སྒྲོ་ལ་རྨ་བྱ་ཆེན་མོའི་སྔགས། ཨོཾ་མ་ཧཱ་མ་ཡཱུ་རི་རཀྵ་པ་ཡ་ནི་མེ་གྷུ་པུ་ཏི་བ་བི་ཤཱནྟི་ཡ་ཧཱུཾ། 
ཞེས་པས་བསྔགས་ལ་ལུས་ལ་བྱབས་ཏེ། ཆུ་མིག་ཏུ་བོར་བས་བཟློག་པར་འགྱུར་རོ། །ཞག་གསུམ་པའི་འཆི་བ་ནི་གཏོར་མ་འབྱུང་པོ་ཐམས་ཅད་ལ་ལན་བརྒྱ་རྩ་བརྒྱད་བཏང་བས་བཟློག་པར་བྱའོ། །ཞག་བཞི་པའི་འཆི་བ་ནི་ཞི་བའི་སྦྱིན་སྲེག་ཉི་ཤུ་རྩ་གཅིག་བྱས་པས་འཆི་བ་བཟློག་པར་བྱའོ། །དེ་ཡང་རྣལ་
འབྱོར་པས་ལུས་ངག་ཡིད་གསུམ་རང་གི་རྒྱུད་ལ་ནད་དང་སྡུག་བསྔལ་ལ་སོགས་པ་མི་འོང་བ་དང་། དུས་མ་ཡིན་པར་འཆི་བ་རྣམས་བཟློག་པའི་ཕྱིར་གོང་མའི་སྦྱོར་བ་རྣམས་ཡང་དག་པར་བསྙེན་པ་དང་། ལས་སྣ་ཚོགས་སུ་གང་གིས་གང་ལ་བསྲུང་བ་དང་། སྦྱོར་བ་ཐམས་ཅད་ལ་མཆོད་པ་རྣམ་པ་
ལྔའི་དངོས་པོས་མཆོད་པར་བྱའོ། །སྐྱབས་སུ་གསོལ་བ་ལ་སོགས་པ་ནི་རིམ་པ་ཇི་ལྟ་བ་བཞིན་དུ་ངེས་པར་སྤྱད་པར་བྱའོ། །ཤིན་ཏུ་དཔའ་དང་དད་པར་ལྡན། །ཤེས་རབ་ཆེ་དང་ཐོས་པ་བསགས། །བླ་མ་ལ་གུས་གཏོང་བ་ཕོད། །ལྟུང་བས་མ་གོས་གཙང་མ་ལ། །ཞེས་བྱ་བ་ལ། འདི་ནས་མར་
ལ་སློབ་མའི་རྒྱུད་བརྟག་པར་གསུངས་ཏེ། དེ་ཡང་འདིས་ཡང་དག་པར་ཤེས་པར་བྱའོ། །ཤིན་ཏུ་སྤྱོད་པ་ལ་སོགས་པ་ཐམས་ཅད་ལ་ཞུམ་པ་མེད་པར་དཔའ་བ་དང་། ཆོས་ལ་དད་པ་དྲག་པོ་ཡུན་རིང་བར་གནས་པ་དང་། ཤེས་རབ་ཆེ་བ་ལ་བསྟན་བཅོས་ལ་སོགས་པ་ཐོས་པ་སྣ་ཚོགས་པ་

49-1-307b

བསགས་པ་དང་། བླ་མ་ལ་ལྷག་པར་གུས་པ་ལ་སྦྱིན་པ་གཏོང་ཕོད་པ་དང་། གསང་སྔགས་ཀྱིའམ། བྱང་ཆུབ་སེམས་དཔའ་འམ། ཉན་ཐོས་ཀྱི་ལྟུང་བ་རྣམ་པ་གསུམ་གྱིས་མ་གོས་པ་ནི་སློབ་མ་སྣོད་དང་ལྡན་པ་ཡིན་པས་ན་དེ་ལ་བདག་གིས་སྦྱོར་བ་འདི་ལྟ་བུས་ཡོངས་སུ་སྦྱང་བར་བྱའོ། །དེ་
ཡང་གང་ཞེ་ན་སྙམ་པ་ལ་འདི་སྐད་གསུངས་ཏེ། རིམ་པ་བཞིན་དུ་དབང་བསྐུར་ནས། །ཚོགས་ཀྱི་འཁོར་ལོ་ལྔ་བསྐོར་ནས། །ཤེས་རབ་ལྡན་ལ་བསྟན་བྱ་ཡི། །གསང་བ་དྲག་པོའི་རྒྱུད་རྒྱལ་འདི། །གཞན་ལ་བཤད་པར་བྱ་བ་མིན། །ཞེས་བྱ་བ་ལ། བུམ་པ་ལ་སོགས་པའི་དབང་རིམ་པ་བཞིན་དུ་བསྐུར་
ནས་བསོད་ནམས་ཀྱི་ཚོགས་བསག་པ་དང་། སྡིག་པ་སྦྱང་བའི་ཕྱིར་ཚོགས་ཀྱི་འཁོར་ལོ་རིམ་པ་ལྔ་རུ་ཡང་དག་པར་བྱས་ལ། ཤེས་རབ་དང་ལྡན་པ་ལ་གསང་བ་དྲག་པོའི་རྒྱུད་ཀྱི་རྒྱལ་པོ་འདི་བསྟན་པར་བྱའི་དེ་རྣམས་དང་མི་ལྡན་པ་ལ་ནི་བཤད་པར་མི་བྱའོ། །གསང་བའི་བདག་པོ་ཁྱོད་ཀྱིས་ནི། །
ཕན་དང་གནོད་བྱ་གང་ཡིན་ལ། །རིམ་པ་བཞིན་དུ་ཤེས་པ་ཡིས། །ལེགས་པར་སྦ་དང་བཤད་པ་ཡིན། །ཞེས་བྱ་བ་ལ། བཅོམ་ལྡན་འདས་ཀྱིས་ལག་ན་རྡོ་རྗེ་གསང་བ་རྣམ་པ་གསུམ་གྱི་བདག་པོ་ནན་ཏན་དུ་ཡང་དག་པར་གསུངས་ཏེ་གཏད་པའོ། །དེ་ལ་ཁྱོད་ཀྱིས་ཕན་པ་སེམས་ཅན་ཐམས་
ཅད་ལ་རྒྱུད་སྦྱང་བའི་ཕྱིར་ལེགས་པར་བཤད་པར་སྦྱར་རོ། །གང་ཟག་སྣོད་དང་མི་ལྡན་པ་ལ་ནི་སྦ་བར་བྱའོ། །དེ་ཡང་རིམ་པར་བརྟག་པར་བྱ་བར་འབྲེལ་ཏོ། །གནས་སྐབས་དུ་མར་རབ་ལྡན་ཞིང་། །ཀུན་ལ་ངེས་པར་ཞུགས་པ་ཡིས་། །རྒྱུད་འདི་ལ་ནི་ངེས་པར་བརྟག །ཅེས་པ་ནི་གནས་
སྐབས་དུ་མར་ནི་ཕན་པར་བྱ་བ་དང་།  གནོད་པར་བྱ་བའི་ལས་ལ་སོགས་པ་ལ་དབང་བསྐུར་བ་ལ། ངེས་པར་ཞུགས་པས་རྒྱུད་འདི་ལ་གཞུག་པར་གསུངས་སོ། །རྒྱུད་འདི་གང་ན་གནས་པ་ན། །ཕྱོགས་དེ་ན་ནི་གདུག་པ་རྣམས། །རིང་དུ་བསྲིངས་པས་གནས་མི་བྱེད། །གལ་ཏེ་གནས་པར་བྱེད་པ་
ན། །དེ་རྣམས་ཀུན་གྱི་རྒྱུད་ཚིག་འགྱུར། །ཞེས་པ་ལ། རྒྱུད་འདི་གང་ན་གནས་པ་ན་གདུག་པ་ཐམས་ཅད་གནས་པར་མི་བྱེད་པའོ། །དེ་ཅིའི་ཕྱིར་ཞེ་ན། དྲག་པོའི་སྦྱོར་བ་གསུངས་པས་གདུག་པ་རྣམས་གལ་ཏེ་གནས་ན་གདུག་པ་རྣམས་ཀྱི་རྒྱུད་ཚིག་པར་འགྱུར་བའོ། །དྲག་པོའི་རྒྱུད་ཀྱི་རྒྱལ་པོ་

49-1-308a

ལ། །གང་ཞིག་གུས་པར་གྱུར་པ་དེས། །དུག་གསུམ་སྐུ་ལ་རབ་རྒྱས་ཏེ། །བཙུན་མོའི་བྷ་ག་ལ་གནས་ནས། །ཉོན་མོངས་འཁོར་གྱིས་རབ་བསྐོར་ཏེ། །བདེ་བ་ཆེན་པོའི་རོལ་པས་གནས། །ཞེས་བྱ་བ་དང་། དྲག་པོའི་ཆོས་སྟོན་པས་དྲག་པོའོ། །
དེ་རྒྱུད་རྣམས་ཀྱི་རྒྱལ་པོ་ཡིན་པས་ན་རྒྱུད་ཀྱི་རྒྱལ་པོ་སྟེ། དེ་ལ་གང་ཞིག་གུས་པའམ་སྒྲུབ་པ་དེས་འདོད་ཆགས་ལ་སོགས་པ་དུག་གསུམ་ནི་མེ་ལོང་ལྟ་བུའི་ཡེ་ཤེས་ལ་སོགས་པ་གསུམ་དུ་རྒྱས་ནས་བཙུན་མོའི་བྷ་ག་ནི་སྟོང་པ་ཉིད་དེ། དེ་ལ་གནས་ཏེ་ཉོན་མོངས་པ་གཞན་
རྣམས་རང་གི་རྒྱུད་ལ་ཡེ་ཤེས་ཕྲ་མོ་རུ་གྱུར་ནས་གནས་པ་ནི་བསྐོར་བར་འབྲེལ་ཏོ། །དེ་བས་ན་བདེ་བ་ཆེན་པོའི་རོལ་པས་སྟོང་པ་ཉིད་ལ་གནས་པའོ། །ལག་ན་རྡོ་རྗེ་དེ་ཉིད་དུ། །སྐད་ཅིག་ཙམ་གྱིས་བསྐོར་བ་ནི། །འབུམ་ཕྲག་དུ་མས་རབ་བསྐོར་ནས། །བདེ་བར་གཤེགས་
ལ་འདི་སྐད་གསོལ། །བདག་གིས་རྒྱུད་ཀྱི་རྒྱལ་པོ་འདི། །ངེས་པའི་དོན་དང་རབ་སྦྱོར་ནས། །གསང་བ་ཉིད་དུ་སྦ་བར་བགྱི། །ཞེས་བྱ་བ་ལ། ལག་ན་རྡོ་རྗེས་ཞབས་གཅིག་པའི་གོམ་པས་སྐད་ཅིག་ཙམ་གྱིས་བདེ་བར་གཤེགས་པ་ལ་བསྐོར་བ་ལན་འབུམ་བྱས་ནས་བདེ་བར་གཤེགས་
པས་བཀའ་སྩལ་པ་བཞིན་དུ་རྒྱུད་ཀྱི་རྒྱལ་པོ་འདི་ངེས་པའི་དོན་བཀའ་སྩལ་པ་བཞིན་དུ་གསང་བར་སྦ་བར་བགྱི་ཞེས་གནང་བ་བླངས་པར་སྦྱར་རོ། །བདག་གི་རྒྱུད་ཀྱི་རྒྱལ་པོ་གང་། །དྲག་པོའི་འགྲེལ་པ་འདི་བྱས་པའི། །བསོད་རྣམས་རྒྱ་ཆེན་གང་ཐོབ་དེས། །
སྐྱེ་བ་བཞིས་བསྡུས་སེམས་ཅན་རྣམས། །ཀུན་རྫོབ་དོན་དམ་རིམ་ཞུགས་ལ། །ཐབས་དང་ཤེས་རབ་མཉམ་སྦྱར་བས། །ཕྱི་ནང་བགེགས་གཉིས་རྣམ་བསལ་ཏེ། །མྱུར་དུ་རྡོ་རྗེ་འཛིན་པར་ཤོག །སློབ་དཔོན་ཆེན་པོ་འཕགས་པ་ཕྱག་ན་རྡོ་རྗེའི་དངོས་གྲུབ་བརྙེས་པ་
དེའི་སྐུར་སྤྲུལ་ནུས་པ་ཕྱག་ན་རྡོ་རྗེས་མཛད་པ་རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ཞེས་བྱ་བ་རྫོགས་སོ།།      །།རྒྱ་གར་གྱི་མཁན་པོ་མཉྫུ་ཤྲཱི་དང་། བོད་ཀྱི་ལོ་ཙཱ་བ་དགེ་སློང་གཞོན་ནུ་ཚུལ་ཁྲིམས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །།

49-1-308b

༄༅༅། །རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ཎི་སཱ་དྷ་ནཾ་ནཱ་མ་ཨཱརྱ། བོད་སྐད་དུ། འཕགས་པ་ཕྱག་ན་རྡོ་རྗེ་གོས་སྔོན་ཅན་གྱི་སྒྲུབ་ཐབས་ཞེས་བྱ་བ། འཕགས་པ་ཕྱག་ན་རྡོ་རྗེ་ལ་ཕྱག་འཚལ་ལོ། །ཨོཾ་གཏུམ་ཞིང་རབ་དྲག་འཇིགས་པའི་སྐུ། །ཨཱཿགད་རྒྱངས་
ཆེན་པོས་སྐྲག་མཛད་གསུང་། །ཧཱུཾ་རྔམ་ཞིང་མི་བཟད་རྟོག་བྲལ་ཐུགས། །དེ་ཉིད་གསུམ་ལ་ཕྱག་འཚལ་ལོ། །ཕྱག་ན་རྡོ་རྗེ་གོས་སྔོན་གྱི། །སྒྲུབ་ཐབས་རྡོ་རྗེ་མེ་ལྕེ་འདི། །ཕྱག་ན་རྡོ་རྗེས་འགྲོ་བ་ལ། །ཕན་ཕྱིར་རྒྱས་པར་བཤད་པར་བྱ། །ནགས་ཚལ་ཁང་སྟོང་དུར་ཁྲོད་དང་། 
མཆོད་རྟེན་ལ་སོགས་གནས་རྣམས་སུ། །དྲི་ཞིམ་ཆུ་ཡིས་ལེགས་བཏབ་སྟེ། །མེ་ཏོག་སྔོན་པོ་དགྲམ་བྱས་ལ། །སྟན་བདེ་བ་ལ་འདུག་ནས་ནི། །དང་པོར་བྱང་ཆུབ་སེམས་བསྐྱེད་ལ། །སྙིང་གར་ཨ་ལས་གྱུར་པ་ཡི། །ཟླ་བའི་དཀྱིལ་འཁོར་དཀར་པོ་བསམ། །དེ་སྟེང་ཧཱུཾ་ལས་འོད་
འཕྲོས་པས། །ཐོག་མ་ཉིད་ནས་གྲུབ་པ་ཡི། །ཕྱག་ན་རྡོ་རྗེ་ཉིད་དང་ཡང་། །སངས་རྒྱས་བླ་མ་ལ་སོགས་པ། །མདུན་དུ་ཉེ་བར་མངོན་བལྟས་ནས། །ཞལ་བསིལ་ཉེ་རེག་ལ་སོགས་པ། །ཡང་དག་པ་རུ་མཆོད་བྱས་ལ། །སྡིག་པ་བཤགས་དང་ཡི་རང་བ། །བསོད་ནམས་བསྔོ་དང་
སྐྱབས་འགྲོ་དང་། །རྡོ་རྗེ་ལ་སོགས་བཞི་པོ་དང་། །དེ་ནས་སྟོང་པ་ཉིད་བསྒོམ་བྱ། །སྟོང་པའི་སྔགས་ནི་ཉིད་བརྗོད་བྱ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་བི་ཤུདྡྷོ྅་ཧཾ། ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། མདུན་དུ་རཾ་ལས་ཉི་མ་བསྒོམ། །དེ་སྟེང་ཧཱུཾ་མཆོག་རབ་བསམས་
ལ། །དེ་གྱུར་སྣ་ཚོགས་རྡོ་རྗེར་བསམ། །དེ་ལས་འཕྲོས་པའི་ས་གཞི་དང་། །ར་བ་གུར་དང་བླ་རེ་དང་། །དྲ་བ་ལ་སོགས་ངེས་པ་ལ། །བདག་ཀྱང་དེར་ནི་ཁྱབ་པ་སྟེ། །མཚན་མར་བསམ་པར་མི་བྱ་སྟེ། །དེ་ཡི་ནང་དུ་བསམ་བྱ་བ། །ནམ་མཁའ་ཁྱབ་པར་ཆོས་འབྱུང་བསྒོམ། །
ཨེ་ཡཾ་རཾ་བཾ་ལཾ་སུཾ་བྷྲཱུཾ་ལ་སོགས་པས། །རིམ་པ་བཞིན་དུ་ཆོས་འབྱུང་ནང་། །རླུང་དང་མེ་དང་ཆུ་དང་ས། །གཞུ་དབྱིབས་གྲུ་གསུམ་ཟླུམ་པོ་དང་། །གྲུ་བཞི་པ་ལ་སྔོ་དང་དམར། །དཀར་སེར་ལྗང་གུར་རབ་ཏུ་གྲགས། །གྲྭར་ནི་བ་དན་བུམ་པ་དང་། །མེ་རི་རྡོ་རྗེས་རྣམ་པར་

49-1-309a

བརྒྱན། །དེ་སྟེང་རི་རབ་རྐེང་རུས་གཟུགས། །དེ་དག་རླུང་གིས་རབ་སྦར་ནས། །ཡོངས་སུ་ཞུ་བར་གྱུར་པ་ལས། །གྲུ་བཞི་པ་ལ་སྒོ་བཞི་པ། །ཀ་བ་བརྒྱད་ཀྱིས་ཉེ་བར་བརྒྱན། །རིན་ཆེན་ཕ་གུ་འདོད་ཡོ་ནས། །དྲ་བ་དྲ་ཕྱེད་ཡང་དག་ལྡན། །གདུགས་
དང་རི་དགས་ངེས་པར་གནས། །ཏྭ་ར་ན་ནི་བཞིས་བརྒྱན་ཅིང་། །ཀེང་རུས་རྡོ་རྗེ་སྦྲུལ་མགོ་དང་། །འབར་བའི་ཕྲེང་བས་ཡང་དག་བརྒྱན། །རྡོ་རྗེ་ར་བའི་ནང་ལོགས་སུ། །དུར་ཁྲོད་བརྒྱད་དང་ཅེ་སྤྱང་སོགས། །འཇིགས་པར་རོལ་པས་གནས་པའོ། །དྲག་པོ་ཆེན་པོའི་དཀྱིལ་འཁོར་
ལ། །གདན་ནི་ཉི་ཤུ་གཉིས་ཀྱིས་ངེས། །དཀྱིལ་དུ་ཚངས་པ་བརྒྱ་བྱིན་གཉིས། །ཕན་ཚུན་ཁ་བལྟས་ཡོངས་སུ་དགོད། །དེ་ཡི་མཐའ་ལོགས་མཚམས་རྣམས་སུ། །འཇིགས་པའི་ཀེང་རུས་ཉི་ཤུར་གནས། །དེ་སྟེང་ས་བོན་རྣམས་བསམས་ཏེ། །འདི་དག་རིམ་པས་ཤེས་པར་བྱ། །
ཧཱུཾ་ཧཱུཾ། མཾ་བཾ་ཨཾ། ཡཾ་བཾ་ཙཾ་ཏཾ། པཾ་མཾ་རཾ་གཾ། ཚཾ་ལཾ་པཾ་བཾ། དེ་དག་ཡོངས་སུ་གྱུར་པ་ལས། །མཚན་མ་ངེས་པར་བསམ་པར་བྱ། །ཧཱུཾ་གཉིས་པཾ་ལས་རཾ་བྱུང་བས། །རྡོ་རྗེ་གཉིས་དང་ཡང་དག་ལྡན། །རྩང་དང་དབྱུག་པ་མཆོད་རྟེན་དང་། །སྡིགས་མཛུབ་གྲི་གུག་རྣོན་པོ་དང་། །
ལྕགས་སྒྲོག་མེ་ལྕེ་གླང་ཆེན་ལྤགས། །མེ་ཏོག་དུང་ཕོར་རོ་མཆོག་དང་། །དྲིལ་བུ་ཐོ་བ་རྐྱལ་པ་དང་། །ཧོམ་གཟར་གྲི་གུག་རྣོན་པོ་ངེས། །དེ་དག་ཡོངས་ལས་ས་བོན་ཏེ། །དེ་གཉིས་ཡོངས་སུ་གྱུར་པ་ལས། །སྐུ་རྣམས་རིམ་པ་བཞིན་བསྒོམ་བྱ། །དབུས་ཀྱི་ཁྱབ་བདག་ཆེན་པོ་ནི། །
སྐུ་མདོག་སྔོན་པོ་གཏུམ་བག་ཅན། །དབུ་སྐྲ་ཁམ་པ་གྱེན་དུ་འཕགས། །སྤྱན་ནི་བསྐལ་པའི་མེ་ལྟར་འབར། །མཆེ་བ་གཙིགས་ཤིང་གསུས་པ་འཁྱིལ། །ཕྲག་པ་གཡས་ན་ཉི་མ་ལ། །གཡོན་ན་ཟླ་བ་ངེས་པར་རྒྱུ། །ཕྱག་གཡས་རྡོ་རྗེ་རྩེ་དགུ་པ། །གཡོན་པས་མཁའ་ལྡིང་
དྲག་པོ་འཛིན། །ཐོད་པ་ལྔ་ཡིས་རྣམ་པར་བརྒྱན། །སྦྲུལ་གྱི་རྒྱན་ཆ་བདུན་དང་ལྡན། །ཅུང་ཟད་གཡོན་དུ་གཟིགས་པར་བསམ། །ཤར་དུ་ཁམས་གསུམ་རྣམ་རྒྱལ་ཏེ། །དབུ་གསུམ་ཕྱག་ནི་དྲུག་པའི་དབྱིབས་། །ཁ་དོག་དམར་པོ་དེ་ཉིད་ལ། །ཞབས་བཞི་བརྐྱང་བསྐུམ་

49-1-309b

ཚུལ་དུ་བཞུགས། །དང་པོ་གཡས་ན་རྡོ་རྗེ་ལ། །གཡོན་ན་དགྲ་སྟ་ཡང་དག་ལྡན། །བར་མ་གཉིས་ཀྱིས་འཛིན་བྱེད་པ། །གུང་མོ་སྲིན་མཐེབ་གཉིས་མདུད་ནས། །གཞན་རྣམས་ཡོངས་སུ་བརྐྱང་བ་ཡིན། །དེ་ཉིད་ཐུགས་ཀར་གཟུང་བྱས་ལ། །དེ་འོག་གཡས་ན་ཞགས་པ་
འཛིན། །གཡོན་ན་རལ་གྲི་ཡང་དག་ལྡན། །ལྷོར་ནི་ནག་པོ་ཆེན་པོ་སྟེ། །ཁ་དོག་དུད་སྤྲིན་ལྟ་བུ་ལ། །ཞལ་གཅིག་ཕྱག་ནི་གཉིས་པའི་དབྱིབས། །གཡས་ན་ཙནྡན་བིང་ཆེན་བསྣམས། །གཡོན་ན་ཞགས་པ་འཛིན་པ་ཉིད། །ནུབ་ཏུ་ལུས་ངན་རྒྱལ་པོ་ནི། །ཁ་དོག་ལྗང་གུ་ཉིད་ལ་
ཡང་། །སྤྱི་བོར་རྡོ་རྗེ་མིག་གིས་བརྒྱན། །ཞལ་གཅིག་ཕྱག་ནི་གཉིས་པ་ལ། །གཡས་པ་ཉིད་ན་མཆོད་རྟེན་ལ། །གཡོན་ནེའུ་ལེའི་རྐྱལ་པ་འཛིན། །བྱང་ཕྱོགས་སུ་ནི་དགོད་བྱ་བ། །བདུད་རྩི་འཁྱིལ་པ་ཡོངས་སུ་གནས། །ཁ་དོག་སྔོན་པོ་ཁྲོ་གཉེར་ཞལ། །གཡས་བསྐུམ་
གཡོན་བརྐྱང་སྟང་སྟབས་ཚུལ། །ཕྱག་གཉིས་བྲང་དུ་བསྣོལ་མཛད་དེ། །གཡོན་དུ་ཅུང་ཟད་གཟིགས་པ་ཡིན། །བྱང་ཤར་རྡོ་རྗེ་གནོད་སྦྱིན་ཏེ། །ཁ་དོག་དམར་ནག་འཇིགས་པ་སྟེ། །ཞལ་གཅིག་ཕྱག་ནི་གཉིས་པ་ལ། །གཡས་པས་གྲི་གུག་རྣོན་པོ་འཕྱར། །གཡོན་ན་ཅང་ཏེའུ་
དྲག་པོ་བརྡུང་། །གཡས་བརྐྱང་གཡོན་བསྐུམ་གར་ཐབས་ཚུལ། །ཤར་ལྷོར་རྡོ་རྗེ་རོ་ལངས་ཉིད། །ཁ་དོག་སྔོ་སྐྱ་འཇིགས་པའི་གཟུགས། ཞལ་གཅིག་ཕྱག་ནི་གཉིས་པ་དང་། །རྡོ་རྗེ་ལྕགས་སྒྲོག་རབ་བཟུང་ནས། །གུང་སྲིན་ལ་སོགས་གསུམ་པོ་རྣམས། །དམ་པོར་བཟུང་ནས་
ཡོངས་སུ་བསྡམས། །མཐེབ་མཛུབ་བཞི་རྣམས་རབ་བརྐྱང་སྟེ། །སྤྱི་བོར་བསྣོལ་བ་རེངས་པར་གནས། །ལྷོ་ནུབ་རྡོ་རྗེ་མཁའ་འགྲོ་སྟེ། །ཁ་དོག་དམར་སྐྱ་དེ་ཉིད་ལ། །ཞལ་གཅིག་ཕྱག་ནི་གཉིས་པའི་གཟུགས། ཤིན་ཏུ་མི་བཟད་དྲག་པོ་ལ། །ཞབས་གཉིས་མཐིལ་སྦྱར་བཙུགས་
པ་སྟེ། །ནམ་མཁའ་གྲུ་བཞི་པ་རུ་འདོད། །ཕྱག་གཉིས་སྤྱི་བོར་ཐལ་སྦྱར་ནས། །མེ་ལྕེ་འབར་བ་ཡོངས་སུ་འཛིན། །ནུབ་བྱང་རྡོ་རྗེ་འཇིགས་བྱེད་དེ། །ཁ་དོག་སྔོ་ནག་འཇིགས་པའི་གཟུགས། ཞལ་གསུམ་ཕྱག་ནི་དྲུག་པ་ལ། །ཞབས་གཉིས་དག་ནི་རབ་ཏུ་བཤད། །གཡས་

49-1-310a

གཡོན་དང་པོ་གླང་ཆེན་གྱི། །པགས་པས་ཡོངས་སུ་བརྒྱན་པ་ཡིན། །དེ་འོག་གཡོན་ན་དགྲ་སྟ་དང་། །རྡོ་རྗེས་ཡང་དག་བརྒྱན་པ་སྟེ། །གསུམ་པའི་གཡས་ན་ལྕགས་ཀྱུ་དང་། །གཡོན་པས་མི་མགོ་རློན་པ་འཛིན། །མཚམས་ཀྱི་གྲུ་ཆད་གང་ཡིན་པར། །
འོད་སྐྱེད་མ་དང་ཡིད་འཕྲོག་མ། །ཀུན་བཟང་མ་དང་གླུ་སྒྲ་ཅན། །ཞལ་གཅིག་ཕྱག་ནི་གཉིས་པ་ལ། །དཀར་སེར་དམར་དང་སྔོན་པོ་ཡི། །ཁ་དོག་ཅན་ལ་ལྡེམ་བག་ཅན། །ཤིན་ཏུ་མཛེས་པའི་ཕྱག་གཉིས་ཀྱིས། །སྤྱི་བོར་རབ་ཏུ་བཟུང་བ་ནི། །མེ་ཏོག་དྲི་དང་ཞལ་ཟས་དང་། །
སྒྲ་སྙན་གར་གྱི་རོལ་པས་གནས། །སྒོ་རྣམས་སུ་ནི་སྒོ་སྲུང་བ། །སྲོག་གཅོད་མ་དང་དབུགས་རྔུབ་མ། །ཁྲག་འཐུང་མ་དང་ཤ་ཟ་མ། །ཞལ་གཅིག་ཕྱག་ནི་གཉིས་པ་ལ། །སྟག་དང་སེང་གེ་སྦྲུལ་དང་ནི། །བྱི་ལའི་གདོང་དུ་གནས་པ་སྟེ། །རང་རང་རིགས་ཀྱི་ཁ་དོག་དང་། །
གཡས་པ་རྣམས་སུ་ཐོགས་པ་ནི། །ཐོ་བ་རྐྱལ་པ་ཧོམ་གཟར་དང་། །གྲི་གུག་རྣོན་པོ་ཡོངས་སུ་འཛིན། །གཡོན་པ་རྣམས་ན་ཐོགས་པ་ནི། །ཞགས་པ་ཐོགས་པར་གཅིག་པ་སྟེ། །མཆེ་བ་གཙིགས་ཤིང་རྔམས་པའི་སྐུ། །ཤིན་ཏུ་ཁྲོ་གཉེར་བརྗིད་པའི་ཞལ། །གཡས་བསྐུམ་
གཡོན་དུ་ཅུང་ཟད་གཟིགས། །ཧ་ལ་ཧ་ལ་སྒྲ་ཡང་སྒྲོགས། །གཞན་ཡང་ལྷ་རྣམས་དེ་དག་ཀུན། །ཐོད་པ་ལྔ་ཡིས་དབུ་ལ་བརྒྱན། །རྒྱན་ཆ་དང་ཡང་ཡང་དག་ལྡན། །སྟག་གི་པགས་པས་སྨད་དཀྲིས་པའོ། །པདྨ་འདབ་མ་བརྒྱད་པ་ཡ། །སྙིང་པོ་ལ་ནི་གཙོ་བོ་བཞུགས། །
འདབ་མ་ལ་ནི་ལྷ་རྣམས་དང་། །ཕྱི་རོལ་ཀེང་རུས་ཕྲེང་བས་བརྒྱན། །གྲུ་ཆད་ལ་ནི་ལྷ་མོ་བཞི། །སྒོ་རྣམས་ལ་ནི་སྒ་སྲུང་དང་། །དཀྱིལ་འཁོར་རྫོགས་པར་བསམ་བྱས་ནས། །སྙིང་གར་རང་གི་ས་བོན་བསམ། །འོད་ཟེར་ཕྱུང་སྟེ་དེ་ནས་ནི། །ཡེ་ཤེས་འཁོར་ལོ་དགུག་བྱས་ལ། །
མདུན་དུ་གནས་པ་ཉིད་ལ་ཡང་། །ཞལ་བསིལ་ཉེ་རེག་འཐོར་འཐུང་སོགས། །ཡང་དང་ཡང་དུ་མཆོད་བྱས་ལ། །ལྕགས་ཀྱུ་ཞགས་པ་ལྕགས་སྒྲོག་དང་། །དྲིལ་བུའི་ཕྱག་རྒྱ་བཞི་པོ་ཡིས། །ཛཿ་ཧཱུཾ་བཾ་ཧོཿངེས་བརྗོད་ལ། །སྔགས་དང་ཕྱག་རྒྱ་སྦྱོར་ཤེས་པས། །དམ་ཚིག་འཁོར་

49-1-310b

ལོ་མྱུར་དུ་གཞུག །དེ་ནས་ཡེ་ཤེས་སེམས་དཔའ་ཡི། །ཐུགས་ནས་འོད་ཟེར་འཕྲོས་བྱས་ནས། །ཀུན་བཟང་མ་སོགས་ལྷ་མོ་བཞི། །རྡོ་རྗེ་བུམ་པ་བཟུང་ནས་ནི། །མི་འཆི་ལྔ་ཡི་སྦྱོར་བ་ཡིས། །བདག་ལ་དབང་བསྐུར་ངེས་པར་བསྒོམ། །དེ་བསྐུར་དེ་ཡིས་སྐད་ཅིག་ལ། །སྔགས་
འདི་དག་ནི་རབ་ཏུ་བརྗོད། །ཨོཾ་ཨ་བྷི་ཥིཉྩ་ཏུ་མཱཾ་བཛྲ་པཱ་ཎི་ཡེ་ཧཱུཾ། དེ་ནས་ཁྱབ་པའི་བདག་པོ་ཡིས། །ཀུན་གྱི་སྤྱི་བོར་མཚན་མར་བྱ། །དེ་ནས་གོ་ཆ་བགོ་བ་སྟེ། །ཆུ་ཤིང་སྟེང་དུ་ཧཱུཾ་བསམས་ལ། །དེ་གྱུར་རྡོ་རྗེ་གོ་ཆར་བསྒོམས་། །སྔགས་འདི་ཡིས་ནི་སྤྱི་བོར་གཟུགས། དེ་ཡིས་ཀུན་ལ་
ཁྱབ་པར་བསམ་། །བཛྲ་ཀ་བ་ཧཱུཾ། བདག་ཉིད་གོང་གི་གཟུགས་གནས་ལ། །སྟེང་དུ་མིག་འདྲའི་དངོས་པོ་བསྒོམ། །དེ་ལས་གོང་དུ་གྱུར་པ་ལས། །འཇིགས་བྱེད་རིགས་དགུ་རྣམ་པར་བསམ་། །མི་འདྲ་སྦུ་གུ་རབ་སྦྱར་བས། །སྙིང་པོའི་སྟེང་དུ་གསལ་བར་སྣང་། །སྙིང་པོའི་སྟེང་དུ་ཆུ་
བསྒྲུབས་པས། །ཡན་ལག་སྟོང་དང་ལྡན་པ་ཉིད། །སྤུན་ལ་ཕྱོགས་པར་ཁ་བལྟས་ལ། །བདག་ལས་གོང་དུ་གྱུར་པ་ཡིས། །ཧཱུཾ་གཉིས་ལ་ནི་སྟེང་མ་ཡི། །ངེས་པར་གསལ་བར་རབ་བྱས་ལ། །དང་པོའི་སྙིང་པོར་རབ་སོང་སྟེ། །དེ་ལས་མི་འཆི་རབ་ལྡན་པས། །འཇིགས་བྱེད་སྟེང་ན་
རབ་གནས་པའི། །མིག་འདྲའི་ཡན་ལག་བརྒྱད་དང་ལྡན། །འཇོམས་བྱེད་མིག་འདྲའི་གར་མར་སྦྱོར། །ཐབས་དང་ཤེས་རབ་གསུམ་དུ་ངེས། །དངོས་པོ་གསུམ་དུ་རབ་བརྒྱུད་དེ། །སྙིང་པོའི་སྟེང་ན་གནས་པ་ཡི། །མི་འདྲའི་སྟེང་དུ་ངེས་པར་སོང་། །རང་གི་གར་མའི་ཁྱོན་ཙམ་ལ། །
སྐད་ཅིག་བྱེ་བྲག་བཅུ་དྲུག་པའི། །ཐབས་སུ་ཡོངས་སུ་རྫོགས་པ་སྟེ། །དང་པོ་དངོས་པོ་བརྟག་མི་བྱ། །རྫོགས་པ་ཉིད་ལས་མེ་འབར་བས། །རིམ་པ་དེ་ཉིད་མི་གནས་ཤིང་། །དང་པོའི་སྣང་བ་གང་ཡིན་པ། །མར་མེའི་རྩེ་མོ་ལྟ་བུ་ཡི། །ཕྱི་ནང་རང་བཞིན་འོད་གསལ་བའི། །དང་པོ་
རབ་ཏུ་བརྟག་བྱ་ཡི། །རིམ་པ་གསུམ་པར་རབ་རྫོགས་ཡིན། །སྐད་ཅིག་བྱེ་བྲག་བཅུ་པ་ཡི། །སྟེང་དུ་པད་གཉིས་རབ་འབར་དང་། །ཧཱུཾ་ལས་སྐྱེས་པ་ཐུབ་པའི་སྐུ། །ཡང་དག་པར་ནི་བརྟག་པ་ཡིན། །འོན་ཀྱང་གོང་མའི་ས་བོན་ལས། །བསྐྱེད་པར་བྱ་བ་ཁོ་ན་ཡིན། །སེམས་

49-1-311a

དཔའ་གཉིས་སུ་ངེས་པ་དང་། །འཁོར་ལོ་སྤྲོས་པས་ཆར་ལྟ་བུ། །ལོག་རྟོག་ཤིན་ཏུ་སྨིན་བྱེད་པ། །སྐྱོན་བསལ་ནས་ནི་དེ་ཉིད་དུ། །སླར་ཡང་ངོ་བོས་ཡང་དག་གནས། །དེ་ལྟར་གསལ་བར་མ་འཁྲུག་པར་། །སྐྱོན་གྱིས་མ་གོས་དྲི་མེད་དོ། །སྔགས་
ཀྱི་ཆོ་ག་གསུམ་ལས་ནི། །ཁྱབ་པར་ངེས་པར་དམིགས་བྱས་ལ། །བདག་ཉིད་ཐ་མལ་གཟུགས་ཀྱིས་གནས། །དེ་དག་ཕན་ཚུན་བརྒྱུད་པ་ཡིན། །ཟོ་ཆུའི་ཁྱུད་མོ་བཞིན་དུ་བསམ། །དྲག་པོའི་བཟླས་པ་དེ་ཉིད་དང་། །རང་བཞིན་རྡོ་རྗེ་བཟླས་པའོ། །རིགས་གསུམ་ཡང་དག་བསྡུས་
པ་ཡིན། །ཨོཾ་བྷོ་བྷོ་བཱན་ནཱ་ག་ཨ་དྷི་པ་ཏ་ཡེ།  ཨི་དཾ་ནཱི་ལཱཾ་བ་ར་དྷ་ར་ཤ་རཱི་རཾ། བཛྲ་པཱ་ཎི་ཧྲྀ་ད་ཡ། ཡཿས་མཱ་ཏཾ་ཀྲ་མཱ་ཏ། ཨུཏྶཱ་ད་ནཱཾ་བྷ་བིཥྱནྟི་། ཏདྱ་ཐཱ། བུདྡྷ་བུདྡྷ། བི་བུདྡྷ་བི་བུདྡྷ་། མ་ཏི་ཀྲ་མཱ་ཐ། ཧ་ར་ཧ་ར་ནཱ་གཱ་ནཱཾ། པྲ་ཧ་ར་པྲ་ཧ་ར་ནཱ་གཱ་ནཱཾ། ཚིནྡ་ཚིནྡ་ནཱ་ག་ཧྲྀ་ད་ཡ་ནི། བྷིནྡ་
བྷིནྡ། ནཱ་ག་མརྨ་ཎི་། བི་སི་མ་ད་ན་ག་ཤ་རཱི་རཾ། བི་སྥོ་ཊ་ཡ་ནཱ་ག་ན་ཡ་ན་ནི།ཏདྱ་ཐཱ་ཧཱུཾ་ཕཊ། ནཱ་ག་བི་དཱ་ར་ཎཱ་ཡ་ཧཱུཾ་ཕཊ། ནཱ་གོཏྶཱད་ནཱ་ཡ་ཧཱུཾ་ཕཊ། ནཱི་ལཱཾ་བ་ས་ནཱ་ཡ་ཧཱུཾ་ཕཊ། ཨ་པྲ་ཏི་ཧ་ཏ་བ་ལ་ཡ་ཧཱུཾ་ཕཊ། པ་ར་པྲ་མ་ཡ་ཧཱུཾ་ཕཊ། ཀྲྀ་ཏཱནྟཱ་ཡ་ཧཱུཾ་ཕཊ། ཀྲྀ་ཏཱནྟ་རཱུ་པ་ཡ་ཧཱུཾ་ཕཊ། རོ་
ཥ་ཎཱ་ཡ་ཧཱུཾ་ཕཊ། ཏྲཱ་ས་ནཱ་ཡ་ཧཱུཾ་ཕཊ། ཀུསྨ་ཎྜོཏྶཱད་ནཱ་ཡ་ཧཱུཾ་ཕཊ། པྲེ་ཏ་པི་ཤཱ་ཙ་བི་ནཱ་ཤ་ཀ་རཱ་ཡ་ཧཱུཾ་ཡཀྵ་ཨ་པསྨཱ་ར་བི་ནཱ་ཤ་ཀ་རཱ་ཡ་ཧཱུཾ་ཕཊ། ཧ་ས་ཧ་ས། དཱ་ར་དཱ་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། སརྦ་བིགྷྣཱཾ་བི་ནཱ་ཤ་ཀ་རཱ་ཡ་ཧཱུཾ་ཕཊ། སརྦ་ཤ་ཧྲཱུཾ་སཾ་གྷ་བི་ནཱ་ཤ་ཀ་རཱ་ཡ་
ཧཱུཾ་ཕཊ། ནཱི་ལཱཾ་བ་ར་དྷ་ར་བཛྲ་པཱ་ཎི་རཱ་ཛྙཱ་པ་ཡ་ཏི་སྭཱ་ཧཱ། ཨོཾ་ཏྲ་ཏ་ཀ་རཱ་ལ་ཀྲ་བི་ཤ་ན་ནཱི་ལཱཾ་བ་ར་དྷ་ར་བཛྲ་པཱ་ཎ་ཡེ། ནཱ་གཱ་ལཾ་ཀ་ར་ས་ས་ཀོ་ཏ། བྱ་ཙ་ར་ཎི་བ་ས་ནཱ་ཡ་བྷ་མ་ཀ་རི་གྷ་ར་ཧ་ས་ཧ་ཡེ། ཏོད་ཏ་མུ་ཏེ་ན་ཏྲེེ་ལོཀྱ་དྷ་ཧ་པ་བྷྲ་མནྡྲ་མ་ས་ར་ན་རུ་ཏ་ཡ། ནཱ་ག་ཙ་ཏུ་རཾ་བྷཀྵ་ཧཱུཾ་ཕཊ། ཨོཾ་ཏྲེེ་ལོཀྱ་
བི་ཛ་ཡ་ཧཱུཾ་ཕཊ། ཨོཾ་མ་ཧཱ་ཀཱ་ལ་རོ་ཥ་ན་ཧཱུཾ་ཕཊ། ཨོཾ་བཻ་ཤྲ་མ་ཎ་ཡེ་ཧཱུཾ་ཕཊ།  ཨོཾ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཨོཾ་བཛྲ་ཡཀྵ་ཧཱུཾ་ཕཊ། ཨོཾ་བཛྲ་བེ་ཏཱ་ལི་ཧཱུཾ་ཕཊ། ཨོཾ་བཛྲ་བྷཻ་ར་བཱ་ཡ་ཧཱུཾ་ཕཊ། ཨོཾ་བཛྲ་པྲ་བི་ཏ་པ་ཏ་ཡེ་ཧཱུཾ་ཕཊ། ཨོཾ་མ་ནོ་ཧ་ར་ནཱ་ཡ་ཧཱུཾ་ཕཊ།  ཨོཾ་ས་མནྟ་བྷ་དྲ་ཡེ་ཧཱུཾ་

49-1-311b

ཕཊ། ཨོཾ་ཤཔྟ་གཱི་ཏི་ཡ་ཧཱུཾ་ཕཊ། ཨོཾ་པྲཔྟི་ཏ་ནཱ་ཡ་ཧཱུཾ་ཕཊ། ཨོཾ་སོ་ཤོ་སོ་ག་པ་ཡ་ཧཱུཾ་ཕཊ། ཨོཾ་ར་ཀ་ཏི་བྲ་ཡ་ནི་ཧཱུཾ་ཕཊ། ཨོཾ་མ་ས་བྷཀྵི་ཧཱུཾ་ཕཊ། དེ་ནས་ཕྱོགས་བཅུ་འཁྲུགས་པ་ལས། །ཡི་གེ་ངེས་པ་གང་ཡིན་པ། །བླ་མའི་མན་ངག་རབ་གསལ་བས། །གཅིག་ཏུ་བསྡུས་ཏེ་བཟླས་པར་
བྱ། །རང་བྱུང་སྔགས་པ་བདག་ཉིད་ལ། །གྲངས་ཚད་བཟུང་བ་གང་ཡིན་པ། །རིགས་ཀྱི་དབང་གིས་བཤད་པར་བྱ། །ཐ་མལ་པ་ཡི་གཟུགས་སུ་གནས། །གཙོ་བོ་ཉིད་ལ་འདི་བསྟོད་བྱ། །ཧཱུཾ་གནོད་སྦྱིན་སྡེ་དཔོན་ཆེན་པོ་ནི། །གདུག་པ་རྣམས་ལ་མེ་ལྟར་འབར། །སྟོང་
གསུམ་མ་ལུས་སྐྲག་མཛད་པའི། །འབར་བ་ཆེ་ལ་ཕྱག་འཚལ་ལོ། །ཧ་ཧ་ངེས་པར་སྒྲོགས་པ་ཡིས། །སྲིད་གསུམ་མ་ལུས་གཡོ་མཛད་པའི། །རྔམ་ཞིང་གློག་ལྟར་འགྱུར་བའི་སྒྲ། །གསུས་པོ་ཆེ་ལ་ཕྱག་འཚལ་ལོ། །ཤིན་ཏུ་མི་བཟད་གདུག་པའི་ཐུགས། །གཤེ་དང་
རྔམས་པ་གདུག་པའི་བདག །ཆོས་ཉིད་དང་ལས་རྟོག་བྲལ་བ། །རྡོ་རྗེའི་ཐུགས་ལ་ཕྱག་འཚལ་ལོ། །རྡོ་རྗེའི་དཀྱིལ་འཁོར་མེ་ལྕེ་ཡིས། །སྤྲིན་དམར་རབ་ཏུ་འཕྲོ་མཛད་པ། །ཁྲོ་བོ་ཁྲོ་མོ་འོད་ཟེར་ཆེ། །གཙོ་འཁོར་ལྡན་ལ་ཕྱག་འཚལ་འདུད། །དེ་ནས་སྲུང་བའི་འཁོར་ལོ་
ནི། །བྱས་པས་བགེགས་ནི་མི་འཇུག་ཡིན། །དེས་ན་སྲུང་བའི་འཁོར་ལོས་བསྲུང་། །འོག་ཏུ་ཧཱུཾ་ལས་སྐྱེས་པ་ཡི་། །རྡོ་རྗེ་ཀུན་འབྱུང་ཡང་དག་བསམ། །དེ་སྟེང་ཧཱུཾ་ལས་སྐྱེས་པ་ཡི། །རྡོ་རྗེ་རྩེ་ལྔར་བདག་སེམས་ཏེ། །འགྲོ་དང་འཆག་དང་འདུག་ཀྱང་རུང་། །ཉལ་ལ་སོགས་
པའི་སྤྱོད་ལམ་ལ། །དེ་གྱུར་ལག་ན་རྡོ་རྗེར་བསམ། །ཀུན་ལ་དེ་ཡི་འོད་འཕྲོས་པས། །མེ་ལྕེའི་ཕུང་པོ་འབར་བར་བསྒོམ། །དེ་ཡིས་ཐམས་ཅད་བསྲུང་བར་འགྱུར། །ཟས་ཀྱི་རྣལ་འབྱོར་སྤྱད་པར་བྱ། །ཨ་ལས་དགེ་སྦྱོང་རབ་བསམས་ལ། །དེ་འོག་འབྱུང་བའི་ས་བོན་
ཉིད། །བསམས་ལ་དེ་རྒྱུད་དངོས་པོ་ལ། །ཤར་ལ་སོགས་པའི་ཕྱོགས་རྣམས་སུ། །མི་འཆི་ལྔ་ནི་ཡང་དག་བསྒོམ། །དེ་ཡི་ནང་དུ་ཧཱུཾ་འབར་བས། །དངོས་པོ་ཐམས་ཅད་ཞུ་བར་བསམ། །དེ་བསམས་དེ་ཡི་ཚེ་ན་ནི། །སྔགས་ནི་བཛྲ་ཨ་མྲྀ་ཏ་ཧ། །དེ་སྟེང་ཨོཾ་གྱིས་རབ་

49-1-312a

མཚན་ལ། །མཐའ་མར་ཧཱུཾ་གིས་རབ་ཏུ་བརྒྱན། །དེ་ནས་སྙིང་གའི་ས་བོན་ལས་། །འོད་ཟེར་ནམ་མཁའ་ཕྱོགས་སྤྲོས་པས། །བདེ་བར་གཤེགས་པའི་བདུད་རྩིས་གང་། །དེ་ནི་ཡོངས་སུ་འདྲེས་པར་བསམ། །རང་གི་གནས་ན་གནས་པ་ལས། །རེ་ཕ་ལ་ནི་
ཤིང་རྟ་བཅུ། །དེ་ལས་དེ་ཡི་སྟེང་དུ་ནི། །པཾ་ལས་པདྨ་འདབ་བཅུ་དྲུག །ངེས་པར་ཡང་དག་ལྡན་པར་བྱ། །དེ་ཡང་གེ་སར་སྙིང་པོར་ལྡན། །སྙིང་པོ་ལ་ནི་གཙོ་བོ་སྟེ། །འདབ་མ་དག་ལ་ལྷ་རྣམས་ཉིད། །རང་བཞིན་གསལ་བར་ཡོངས་སུ་བརྟག །འོག་ཏུ་རཾ་ལས་མེ་ཡི་ནི། །
དཀྱིལ་དུ་འབར་བར་ངེས་པར་བསམ། །དེ་ནས་ལག་པ་གཡས་པ་ལ། །བཞི་པོ་དགང་གཟར་ངོ་བོ་ཉིད། །དང་པོར་བླུགས་གཟར་བསམས་བྱས་ལ། །སྔགས་འདི་བརྗོད་ལ་བཟའ་བར་བྱ། །དེས་ཟོས་ཚོགས་ཀྱི་འཁོར་ལོ་ལ། །མཆོད་པ་རྒྱ་ཆེན་བྱས་པར་འགྱུར། །ཨོཾ་བཛྲ་
པཱ་ཎི་ག་ཎཱ་ཡ་སྭཱ་ཧཱ། སྐྱེས་བུ་ཁྲུས་ལ་རབ་བརྩོན་ན། །ཆུ་བོའི་འགྲམ་དུ་སོང་བ་ལས། །དང་པོར་གཙོ་ལ་ཕྱག་འཚལ་ནས། །ཆུ་ལ་སྔགས་ཀྱིས་གདབ་པར་བྱ། །དེ་ནས་ཁྲུས་དག་བྱས་པ་ཡིས། །ཕྱི་ནས་ལྔ་ཡི་དང་པོ་ལ། །ཧཱུཾ་ལས་རྡོ་རྗེ་རྩེ་ལྔ་བསྒོམ། །བཞི་པོ་འདི་བསྐྱེད་
ས་ལ་སོགས། །ལྷ་མོ་རྣམས་ཀྱི་བུམ་པ་ལས། །བདུད་རྩིའི་དབང་བསྐུར་ཁྲུས་བྱེད་ཡིན། །དེ་ནས་ཁུ་ཚུར་བཅངས་པ་ལས། །མཐེ་བོང་བསྒྲེང་སྟེ་སྤྱི་བོར་ནི། །སྔགས་འདི་ཡིས་ནི་ཆུས་མནན་བྱ། །དེ་བྱས་དབུ་ལ་ཁྲུས་བྱེད་དེ། །འགྲོ་བ་མ་ལུས་དག་པར་བཤད། །ཨོཾ་བཛྲ་
སྣ་ན་ཧཱུཾ། བཟླས་པ་བྱེད་ཅིང་ཁྲུས་བྱས་ན། །ཡོན་ཏན་བརྗོད་ཀྱིས་མི་ལང་བས། །ཕྱི་ཡི་ཁྲུས་ནི་དེ་དག་ལ། །ནང་གི་ཁྲུས་ནི་མི་རྟོག་པས། །ཐམས་ཅད་དག་པར་འགྱུར་བ་ཡིན། །བདག་གིས་འཇིག་རྟེན་དོན་དུ་ནི། །སྒྲུབ་པའི་ཐབས་འདི་བྱས་པ་ལ། །དགེ་བ་དྲི་མེད་གང་
ཐོབ་དེས། །འགྲོ་བ་མཐའ་དག་མ་ལུས་པར། །ལམ་འདི་ལ་ནི་བརྟེན་བྱས་ནས། །སངས་རྒྱས་ཀུན་གྱི་ངོ་བོ་ཉིད། །ཕྱག་ན་རྡོ་རྗེ་ཐོབ་པར་ཤོག །སློབ་དཔོན་ཆེན་པོ་ཕྱག་རྒྱའི་དངོས་གྲུབ་བརྙེས་པ་ཕྱག་ན་རྡོ་རྗེས་མཛད་པ་མེ་ལྕེ་ཕྲེང་བའི་སྒྲུབ་ཐབས་རྫོགས་སོ།།      །།

49-1-312b

༄༅༅། །རྒྱ་གར་སྐད་དུ། མ་ཧཱ་ཡཀྵ་སེ་ནཱ་པ་ཏི་ནཱི་ལཱམྦ་ར་དྷ་ར་བཛྲ་པཱ་ཎི་སཱ་དྷ་ནཾ། བོད་སྐད་དུ། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་ཐབས། དཀོན་མཆོག་གསུམ་ལ་ཕྱག་འཚལ་ལོ། །དང་པོར་རེ་ཞིག་རང་གི་སྙིང་གར་ཟླ་བའི་དབུས་སུ་ཡི་
གེ་ཧཱུཾ་བསམས་ཏེ། དེའི་འོད་ཟེར་གྱིས་བླ་མ་དང་སངས་རྒྱས་ལ་སོགས་སྣང་བྱ་སྟེ། མཆོད་པ་བྱ་བ་ནི་དཀོན་མཆོག་གསུམ་ཞེས་བྱ་བ་ལ་སོགས་པའི་ཚིགས་སུ་བཅད་པ་བརྗོད་ནས། བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་བསྒོམ་མོ། །དེ་ནས་རང་གི་སེམས་རིག་
པར་བྱ་སྟེ། ཆོས་ཐམས་ཅད་གདོད་མ་ནས་མ་སྐྱེས་པ་སྟེ། རང་བཞིན་གྱིས་འོད་གསལ་བས་བདག་མེད་པ་སེམས་ཀྱི་སྤྲུལ་པ་ཙམ་སྟེ། འདི་ལྟར་བསམས་ནས་དེ་ཉིད་ཀྱི་སྔགས་བརྗོད་པར་བྱའོ། །དེ་ནས་རྣམ་པ་ལྔ་མངོན་པར་བྱང་ཆུབ་པའི་རིམ་པས། བཅོམ་ལྡན་
འདས་དཔལ་ཕྱག་ན་རྡོ་རྗེ་བསྒོམ་པར་བྱ་སྟེ། སྐུ་མདོག་ནག་པོ་ཡི་གེ་ཧཱུཾ་ལས་བྱུང་བ། ཞལ་གཅིག་ཕྱག་གཉིས་རྡོ་རྗེ་དྲིལ་བུ་བསྣམས་པ། སྤྱན་གསུམ་པ་སྦྲུལ་གྱིས་བརྒྱན་པ། གོས་སྔོན་བསྣམས་པ་མཆེ་བ་གཙིགས་པ། འདོད་དགུར་བསྒྱུར་བའི་གཟུགས་ཅན། གསང་
སྔགས་ལས་ཇི་སྐད་བརྗོད་པའི་ཚུལ་འཛིན་པར་བསྒོམས་ནས། ཡེ་ཤེས་སེམས་དཔའ་སྤྱན་དྲངས་ཏེ་ཡང་དག་པར་མཆོད་ནས། དགུག་པ་དང་། གཞུག་པ་དང་། བཅིང་བ་དང་། རྗེས་སུ་མཉེས་པར་བྱས་ལ། ལུས་ངག་ཡིད་གསུམ་བྱིན་གྱིས་བརླབ་པ་དང་། ཕུང་པོ་དང་སྐྱེ་
མཆེད་ལྷའི་ང་རྒྱལ་བྱས་ཏེ་དབང་བསྐུར་ནས། ཡང་མཆོད་པ་དང་བསྟོད་པ་དང་། བདུད་རྩི་མྱང་བ་ལ་ཐུག་པ་བྱས་ནས། ཨོཾ་ནཱི་ལཱཾ་བ་ར་དྷ་ར་ཡ། ཞེས་བྱ་བ་ལ་སོགས་པའི་སྔགས་བཟླས་པར་བྱའོ། །བཟླས་པས་སྐྱོ་ན་ཅུང་ཟད་བསྒོམ་པར་བྱའོ། །དེ་ནས་ལྡང་བར་འདོད་
ན་གཏོར་མ་བྱིན་གྱིས་བརླབས་ཏེ་བསྔོས་ལ། དེ་ནས་ཡེ་ཤེས་ཀྱི་ལྷ་གཤེགས་སུ་གསོལ་ཏེ། བདག་ཉིད་དཔལ་ཕྱག་ན་རྡོ་རྗེའི་ང་རྒྱལ་དང་ལྡན་པས་སྤྱོད་ལམ་བྱའོ། །དེ་ལ་རྣམ་པ་ལྔས་མངོན་པར་བྱང་ཆུབ་པ་བསྐྱེད་པ་ནི་ཆོས་ཐམས་ཅད་གདོད་མ་ནས་མ་སྐྱེས་པར་བསམས་ཤིང་

49-1-313a

བརྗོད་པས། སེམས་ཙམ་གྱི་རྣམ་པར་དམིགས་ཏེ། སེམས་ཀྱི་བདག་ཉིད་ཟླ་བའི་དཀྱིལ་འཁོར་ཨ་ཡིག་གི་རྣམ་པ་ཅན་བསྒོམས་ལ། ཨོཾ་པྲ་ཏི་བེ་དྷཾ་ཀ་རོ་མི་ཞེས་བརྗོད་པ་ནས། ཡང་ཟླ་བའི་དཀྱིལ་འཁོར་བསྒོམས་ནས། ཨོཾ་བོ་དྷི་ཙིཏྟ་ཨུཏྤཱ་དཱ་ཡཱ་མི་ཞེས་
བརྗོད་པས་། ཀ་ཡིག་གི་རྣམ་པ་ཅན་གྱི་ཟླ་བ་བསྒོམ་མོ། །དེའི་སྟེང་དུ་ཡི་གེ་ཧཱུཾ་ལས་བྱུང་བའི་རྡོ་རྗེ་འབར་བ་བུམ་པ་ཧཱུཾ་གིས་མཚན་པ་བསྒོམས་ཏེ། ཨོཾ་ཏིཥྛ་བཛྲ་ཞེས་བརྗོད་པར་བྱའོ། །གསང་སྔགས་ཀྱི་བྱིན་གྱི་རླབས་ཀྱིས་བདག་ཉིད་རྡོ་རྗེར་གྱུར་ནས། ཨོཾ་བཛྲ་ཨཱཏྨ་ཀོ྅་ཧཾ། 
ཞེས་བརྗོད་པར་བྱའོ། །སངས་རྒྱས་ཐམས་ཅད་ཀྱི་རྣམ་པའི་འོད་ཟེར་བསྡུས་པའི་སྦྱོར་བ་བྱས་པས། ཇི་སྐད་དུ་བརྗོད་པའི་དཔལ་ཕྱག་ན་རྡོ་རྗེར་གྱུར་པར་བྱས་ལ། ཡ་ཐཱ་བཛྲ་དྷ་ར་ཤཱ་ཨ་ཧཾ་ཞེས་བརྗོད་པར་བྱའོ། །སྔོན་དུ་གནས་བསྐྱེད་པར་འདོད་པ་རྣམས་ཀྱིས་སྟོང་པ་ཉིད་
ལས་བཀའི་འཁོར་ལོ་རྩིབས་བཅུ་པ་རབ་ཏུ་འབར་བ་བསམས་ཏེ། དབུས་སུ་ཁྲོ་བོ་གནོད་མཛེས་རྒྱལ་པོ། རྩིབས་རྣམས་ལ་ཁྲོ་བོ་བཅུ་རིམ་བཞིན་བསམས་ཏེ། ཧཱུཾ་བཞིའི་སྔགས་བརྗོད་པས་ཁྲོ་བོ་བཅུའི་འོད་ཟེར་གྱིས་གདུག་པ་ཅན་ཐམས་ཅད་བཀུག་སྟེ་སྐུ་གསུང་
ཐུགས་ཀྱི་ཕུར་པ་བཏབ་པས་ཁྲོ་བོ་བཅུའི་འོད་ཟེར་གྱིས་ཐམས་ཅད་བཏུལ་ཞིང་སྦྱངས་ཏེ་ནམ་མཁའི་ངོ་བོ་ཉིད་དུ་གྱུར་པར་བྱའོ། །དེ་ནས་ཡང་ནམ་མཁའ་ལ་རཾ་ཉི་མ་ལ་གནས་པའི་ཧཱུཾ་ལས་བྱུང་བའི་རྡོ་རྗེའི་འོད་ཟེར་གྱིས་རྡོ་རྗེ་ར་བ་དང་ས་གཞི་དང་དྲ་བས་བསྐོར་བའི་དཀྱིལ་དུ་ཁང་
པ་བརྩེགས་པ་བསྒོམ་པར་བྱའོ། །དེ་ཡང་ཁ་ཅིག་ནི་རླུང་གི་དཀྱིལ་འཁོར་ནི་རི་རབ་ལ་ཐུག་གི་བར་དུ་རིམ་པ་བཞིན་བསྐྱེད་ནས་དེ་ཡོངས་སུ་གྱུར་པ་ལས་ཁང་པ་བརྩེགས་པ་བྱ་ཞེས་འདོད་དོ། །ཁ་ཅིག་ནི་རི་རབ་ཀྱི་སྟེང་ན་ཁང་པ་བརྩེགས་པ་ཞེས་འདོད་དོ། །ཁ་ཅིག་ནི་ཆོས་ཀྱི་འབྱུང་
གནས་ཀྱི་དཀྱིལ་དུ་བསྐྱེད་པར་འདོད་དོ། །འདིར་ཇི་ལྟར་འདོད་པ་བཞིན་བསྐྱེད་པར་བྱའོ། །དེ་ཡང་། གྲུ་བཞི་པ་ལ་སྒོ་བཞི་པ། །ཏྭ་ར་ན་བཞིས་མཛེས་པར་བྱས། །དྲ་བ་དང་དྲ་བ་ཕྱེད་པ་ལ་སོགས་པས་བརྒྱན་པའི་དབུས་སུ་སྣ་ཚོགས་པདྨ་ལ་ཉི་མའི་དཀྱིལ་འཁོར་གྱི་སྟེང་དུ་རྣམ་

49-1-313b

པ་ལྔས་མངོན་པར་བྱང་ཆུབ་པའི་རིམ་པས་སྐུ་བསྐྱེད་པར་བྱའོ། །ཡེ་ཤེས་སེམས་དཔའ་སྤྱན་དྲང་བའི་སྔགས་ནི་ཛཿཧཱུཾ་བཾ་ཧོཿཞེས་བྱ་བས་དགུག་པ་ལ་སོགས་པ་མཉེས་པ་ལ་ཐུག་པར་བྱའོ། །དེ་ལ་བྱིན་གྱིས་བརླབ་པ་ཁམས་དང་སྐྱེ་མཆེད་དག་པར་བྱ་བ་ནི་རིགས་གསུམ་
དང་རིགས་ལྔའི་རང་བཞིན་དུའོ། །དབང་བསྐུར་བ་ནི་མི་བསྐྱོད་པས་དབུ་བརྒྱན་པའོ། །མཆོད་པ་རྣམས་ནི་ཕྱི་རོལ་དག་གིས་ཏེ་ཕྱི་རོལ་གྱི་མཆོད་པ་རྣམས་ནི་ཨརྒྷ་དང་མེ་ཏོག་ལ་སོགས་རང་གི་མིང་གི་དང་པོ་དང་། ཐ་མའི་ཕྱག་དང་བཅས་པས་དབུལ་བར་བྱའོ། །བསྟོད་པ་ནི་མིང་
ལྔའི་ལོ་ཀ་གཅིག་གམ། མིང་བཅུ་པའམ་མིང་བརྒྱ་རྩ་བརྒྱད་པ་ལ་སོགས་པས་བསྟོད་པ་བྱའོ། །བཟླས་པའི་དུས་སྐུ་གསུང་ཐུགས་ཀྱི་ལྷ་དང་ཡེ་ཤེས་སེམས་དཔའི་ཐུགས་ཀར་གདན་དང་མཚན་མ་ཇི་ལྟ་བ་བཞིན་བསམས་ཏེ། རང་གི་ས་བོན་གྱིས་མཚན་པར་བྱས་ལ། བརྟེན་
ནས་གསང་སྔགས་ཀྱི་ཕྲེང་བ་རབ་ཏུ་འོད་འབར་བ་དང་བཅས་པ་སྤྲོ་བ་དང་བསྡུ་བར་བྱའོ། །ཡེ་ཤེས་སེམས་དཔའི་ཐུགས་ཀར་ཟླ་བའི་དཀྱིལ་འཁོར་ཧཱུཾ་གིས་མཚན་པ་སྔགས་ཀྱི་ཕྲེང་བ་ཅན་ནོ། །སླར་གཤེགས་སུ་གསོལ་བ་ནི་ས་བོན་སྙིང་པོའམ་དེ་ཉིད་གསུམ་གྱི་སྔགས་མུཿཞེས་བྱ་བ་
དང་ལྡན་པའོ། །ལག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་ཐབས་སློབ་དཔོན་བྷ་བས་མཛད་པའི་མན་ངག་རྫོགས་སོ།།      །།༄༅༅། །རྒྱ་གར་སྐད་དུ། མ་ཧཱ་ཡཀྵ་སེ་ནཱ་པ་ཏི་ནཱི་ལཱཾ་བ་ར་དྷ་ར་བཛྲ་པཱ་ཎི་སཱ་དྷ་ནཾ། བོད་སྐད་དུ། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་
གོས་སྔོན་པོ་ཅན་གྱི་སྒྲུབ་ཐབས། བཅོམ་ལྡན་འདས་མཐུ་སྟོབས་ཀྱི་བདག་པོ་དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །ཉོན་མོངས་གདུང་བ་སེལ་མཛད་པའི། །ཟླ་བ་ལྟ་བུའི་མཐུ་མངའ་བའི། །ཐམས་ཅད་སེལ་ཞིང་སྣང་བར་བྱེད། །མཐུ་སྟོབས་ཅན་ལ་ཕྱག་འཚལ་ལོ། །ལས་
མཐའི་རྩོད་པའི་དུས་སུ་ནི། །ལས་ངན་རྩོད་པ་ཞེས་བྱེད་པ། །ཉི་མ་ལྟ་བུའི་འོད་ཟེར་ནི། །བདག་གིས་ཕན་ཕྱིར་བཤད་པར་བྱ། །ལས་ཀྱི་དབང་གིས་མི་མཐུན་པའི། །ནད་ལ་སོགས་པ་སྣ་ཚོགས་འབྱུང་། །དེ་ཉིད་འཇོམས་བྱེད་མཐུ་ཡི་མཆོག །གསང་སྔགས་འཁོར་ལོ་

49-1-314a

བཤད་པར་བྱ། །དང་པོར་སྣོད་རྣམས་བསྟན་པའི་ཕྱིར། །སློབ་དཔོན་སྒྲུབ་པོ་གཉིས་སུ་དབྱེ། །ཤེས་རབ་སྙིང་རྗེ་ལྡན་པ་དང་། །དམ་ཚིག་སྡོམ་པ་གནས་པ་དང་། །སྣོད་རྣམས་དབྱེ་བའི་རིམ་ཤེས་དང་། །འགྲོ་དོན་ཕན་སེམས་བརྩོན་པ་དང་། །དབང་རྣམས་
རྫོགས་ཤིང་མན་ངག་ཐོབ། །རྒྱུད་དོན་གཞན་རྣམས་ཤེས་པ་དང་། །ཕ་རོལ་ཕྱིན་པའི་དོན་ལ་མཁས། །བདེན་པ་རྣམ་གཉིས་གཏན་ལ་འབེབས། །ཉོན་མོངས་ཆུང་ཞིང་སེམས་རྣམས་ཐུལ། །ལུས་ངག་ཡིད་གསུམ་སྤྱོད་ལམ་མཁས། །དུས་དང་གནས་སྐབས་དབྱེ་བ་ཤེས། །བྱ་
དང་མི་བྱའི་རིམ་པ་དང་། །གནང་དང་དགག་པའི་རིམ་བརྩོན་རྣམས། །ཤེས་པ་དེ་ནི་སློབ་དཔོན་ཉིད། །དད་ལྡན་བླ་མ་ལ་ནི་གུས། །གཡོ་སྒྱུ་མེད་པའི་བསམ་པ་ཡིས། །རྫས་དང་ལུས་སྲོག་འབུལ་བྱེད་དང་། །ཡང་ནས་ཡང་དུ་གསོལ་འདེབས་པ། །སྤྱོད་ལམ་ལ་སོགས་མཛེས་
པ་ཡིས། །དུས་རིམ་དུ་ནི་འཁོར་བྱེད་པ། །མཎྜལ་མེ་ཏོག་བཅས་པ་ཡིན། །གུས་པས་ཞབས་ལ་ཕྱག་བྱེད་པ། །སློབ་མར་ཞུགས་ཀྱི་ཤེས་པར་བྱ། །ཕྱག་རྒྱ་མཆོག་ནི་དོན་དུ་གཉེར། །མི་རྣམས་ཀུན་གྱིས་དབེན་པ་ཡི། །ཡིད་དུ་འོང་བའི་གནས་དག་ཏུ། །ཡོ་བྱད་རྫས་རྣམས་
འཚོགས་པ་ཡིས། །དག་པ་ལ་སོགས་སྔོན་འགྲོ་བས། །ཡིད་གཉིས་མེད་པའི་བརྩོན་འགྲུས་ལྡན། །གུས་པས་མན་ངག་བདུད་རྩི་འདི། །གླེགས་བམ་ལ་ནི་བརྟེན་པ་བརྩམས་། །ངེས་པའི་མན་ངག་བདུད་རྩི་འདི། །རྣ་བརྒྱུད་འོངས་ཏེ་ཐུགས་ལ་གནས། །ཞལ་གྱི་སྒོ་རུ་བཏོན་ནས་
ཀྱང་། །དེ་བཞིན་སྒྲུབ་པོས་བླང་བར་བྱ། །ཐབས་ཀྱི་སྦྱོར་བ་མཁས་པ་ཡིས། །དང་པོ་དུས་སུ་རྫོགས་པ་དང་། །རིམ་བཞིན་ལྔ་ཡི་བར་དུ་བླང་། །དེ་ལྟར་བླངས་པའི་དོན་ཤེས་ན། །གང་འདོད་པ་ཡི་དོན་རྣམས་འགྲུབ། །རྒྱུད་སོགས་གཞན་ནས་འབྱུང་བ་ཡི། །དེ་ལྟ་བུ་ཡི་དོན་
ཤེས་པས། །སྒྲུབ་པོ་ཞེས་ནི་བཏགས་པ་ཡིན་། །སྒྲུབ་པ་པོ་ནི་དེ་དག་ཀྱང་། །ཤེས་རབ་སྙིང་རྗེ་ཆེ་བརྩོན་ནི། །དང་པོ་བླ་མ་བསྟེན་གྱུར་ནས། །དེ་ནས་རང་ཉིད་འཇུག་པར་འགྱུར། །ཡང་ན་དེ་ཙམ་མི་ལྡན་ཡང་། །ཡུལ་དང་དུས་ཀྱིས་བསྐལ་གྱུར་ན། །ཆ་རྐྱེན་རྫོགས་པར་ཚང་

49-1-314b

དགོས་པས། །བླ་མ་ལ་ནི་གུས་པ་ཡིས། །སྐྱོབ་བྱེད་མཐུ་རྣམས་མི་འདྲ་བས། །བསམ་གྱིས་མི་ཁྱབ་མཐུ་ལྡན་པ། །ངེས་པར་ཤིན་ཏུ་རྫོགས་པར་བྱ། །དེ་རྣམས་དགོས་པའི་བསྟན་པ་ནི། །དཔེར་ན་དཔའ་བོ་གཡུལ་ཞུགས་ན། །གོ་རྣམས་རྫོགས་པར་མ་གྱུར་པས། །མཚོན་
གྱིས་ཕོག་སྟེ་སླར་ལོག་ལྟར། །དེ་བཞིན་བསྒྲུབ་པའི་ཆ་རྐྱེན་ཡང་། །མ་ཚང་སླར་ལ་ལྡོག་ཉན་ཡོད། །ཡང་ན་མཐུ་རྣམས་བསམ་མི་ཁྱབ། །སྨན་གྱི་མཐུ་རྣམས་ཇི་བཞིན་ཏེ། །གང་ལ་གང་འཕྲོད་ལས་དང་རྐྱེན། །མཁས་པ་ཡིས་ནི་ཤེས་པར་བྱ། །དེ་ཡི་དོན་རྣམས་ཤེས་བྱ་བ། །
བདེ་གཤེགས་སྲས་པོ་མཁས་པས་སུ། །རྒྱུད་དུ་བྱ་བ་བརྒྱད་ཅེས་བྱ། །དངོས་གྲུབ་རྣམ་གཉིས་ཐོབ་བྱེད་པའི། །བསྐྱེད་རྫོགས་ཤེས་པའི་གཙོ་བོ་ཡིས། །དེ་ཡི་ཡན་ལག་འཁོར་བཤད་པ། །ཚོགས་འཁོར་སྦྱིན་སྲེག་གཏོར་ཆེན་པོ། །འཁྲུལ་འཁོར་ལས་རྣམས་ཕྲན་ཚེགས་
སོགས། །དེ་རྣམས་ལས་རྣམས་ཐམས་ཅད་རྫོགས། །དམ་ཚིག་ཉམས་པ་ཆེར་བྱུང་ན། །གཟུགས་བརྙན་དཀྱིལ་འཁོར་བཞེངས་གསོལ་ཕྱིར། །དཀྱིལ་འཁོར་ཆོ་ག་ཤེས་པར་བྱ། །དེ་མ་ནུས་པའི་རྣལ་འབྱོར་པས། །མཎྜལ་མེ་ཏོག་བཅས་པ་ལ། །བརྟེན་ནས་སྡིག་བཤགས་ཆོ་
ག་བྱའོ། །དམ་ཚིག་ཉམས་པ་ཆེན་པོ་དང་། །དང་པོ་དབང་ཡང་ཐོབ་པའི་ཕྱིར། །དབང་མཆོག་ཆོ་ག་ཤེས་པར་བྱ། །བར་ཆོད་མྱུར་དུ་བྱུང་བ་ན། །སྟང་སྟབས་བགེགས་བསྐྲད་ཤེས་པར་བྱ། །རྣལ་འབྱོར་འཆི་བའི་རྟགས་བྱུང་ན། །འཆི་བསླུའི་ཆོ་ག་ཤེས་པར་བྱ། །ཡིད་ཆེས་བྲོད་པ་
བསྐྱེད་པའི་ཕྱིར། །མཁའ་འགྲོའི་ལུང་བསྟན་ཤེས་པར་བྱ། །དེ་ཀུན་རྩ་བའི་དམ་ཚིག་ཡིན། །བཟླས་བརྗོད་བྱས་པས་དོན་རྣམས་འགྲུབ། །བདུད་རྩི་ལ་སོགས་རྫས་རྣམས་ནི། །སྒྲུབ་ཐབས་སྦྱོར་ཐབས་མཁས་པས་སུ། །ལུས་སོགས་ལས་སུ་རུང་བར་བྱ། །དེ་ལྟར་ཆ་རྐྱེན་ཚང་བ་
ཡིས། །ཕྱག་རྒྱའི་མཆོག་ནི་དོན་དུ་གཉེར། །དངོས་གྲུབ་ཕྲན་ཚེགས་ཞར་ལས་འབྱུང་། །དེ་ལྟར་གདེང་ལྡན་རྣལ་འབྱོར་གྱིས། །ཡིད་དུ་འོང་བའི་གནས་དག་ཏུ། །ཚེས་གྲངས་བཟང་པོ་ཤིས་པ་ལ། །ཆོས་སྐྱོང་སྲུང་མ་ལ་སོགས་ལ། །བསྒོ་ཞིང་བགེགས་རྣམས་ཞི་བར་བྱེད། །ཡི་དམ་ལྷ་

49-1-315a

དང་སློབ་དཔོན་དང་། །མཁའ་འགྲོ་རྣམས་ཀྱི་སྤྱན་སྔ་རུ། །དམ་བཅའ་བྱས་ཏེ་བསྒྲུབ་པར་བྱའོ། །ཡི་གེ་བརྒྱ་སོགས་ཆོ་ག་ཡིས། །ཉེས་པ་ཀུན་ནི་སྦྱངས་ནས་ཀྱང་། །ས་གཞི་ལེགས་པའི་གནས་དག་ཏུ། །མཎྜལ་མེ་ཏོག་ལེགས་པར་བཀྲམ། །ཕྱི་ནང་མཆོད་པའི་རྫས་
རྣམས་ཀུན། །བསགས་ཏེ་མ་ལུས་རྒྱན་རྣམས་དགྲམ་། །རང་ཉིད་ལྷག་པའི་ལྷར་གྱུར་པའི། །བདེ་བར་གཤེགས་པའི་གླེགས་བམ་དེ། །རིན་ཆེན་ན་བཟའ་མཛེས་བྱས་ལ། །སྟོན་པ་མྱ་ངན་འདས་འོག་ཏུ། །གསུང་གི་རྟགས་སུ་གཞག་པར་བྱ། །འབུར་རམ་ལུགས་སམ་རིས་སུ་བྲིས། །
ཤིན་ཏུ་མཛེས་པའི་སྐུ་མཆོག་དེ། །སྐུ་ཡི་རྟགས་སུ་གཞག་པར་བྱ། །རྡོ་རྗེ་དྲིལ་སོགས་ཕྱག་མཚན་རྣམས། །ལུགས་དང་མཐུན་པའི་མཛེས་པ་དེ། །ཐུགས་ཀྱི་རྟགས་སུ་གཞག་པར་བྱ། །དེ་དག་ཀུན་ལ་དོན་དམ་དུ། །རབ་ཏུ་གནས་པ་མེད་མོད་ཀྱང་། །ཡང་དག་ཀུན་རྫོབ་ཉིད་དུ་ནི། །རྒྱལ་
བ་ལྷུམས་ཞུགས་ཇི་བཞིན་ནོ། །དེ་ལྟར་བྱིན་རླབས་མཐུ་ཆེན་པ། །ཅི་བྱས་ཐམས་ཅད་རྫོགས་ཆེན་འགྱུར། །དེ་བས་བརྩོན་འགྲུས་བསྐྱེད་དེ་བྱ། །གལ་ཏེ་རྣལ་འབྱོར་དབུལ་གྱུར་ན། །ཐམས་ཅད་མོས་པའི་སྤྱོད་ཡུལ་ན་། །དབུལ་བར་མ་གྱུར་སེར་སྣ་ཡིས། །སོགས་པར་དེ་ནི་མི་བྱེད་པར། །ཆོས་
དང་མི་མཐུན་སྤྱོད་པ་ཡིན། །དེ་བས་གུས་པས་བརྩོན་འགྲུས་བྱ། །རྣལ་འབྱོར་དབང་ཕྱུག་རྣམས་ཀྱིས་ནི། །བསྐྱེད་དང་རྫོགས་ལ་བརྟེན་བྱ་སྟེ། །དང་པོ་བསྐྱེད་པའི་ཚུལ་རྣམས་ནི། །སྐད་ཅིག་སྤྲུལ་དང་ཆོ་ག་ལྔ། །གསུམ་གྱི་ཚུལ་དུ་བསྟན་པ་དང་། །གཉིས་ལས་འབྱུང་བྱེད་ཚུལ་དང་ནི། །
གཅིག་ལ་འཇུག་པའི་ཚུལ་གྱིས་སུ། །ཆོ་གའི་རིམ་པར་ཤེས་པར་བྱ། །རྫོགས་པའི་གཉིས་སུ་བསྟན་པ་ལ། །ཐབས་ཀྱི་ཚུལ་གྱིས་འཇུག་པ་དང་། །ཤེས་རབ་ཚུལ་གྱིས་འཇུག་པ་པོ། །ཐབས་ཀྱིས་འཇུག་པའི་ཚུལ་རྣམས་ནི། །བརྒྱད་དཀྱིལ་དགུ་ཡི་བདག་པོ་ལ། །མན་ངག་སྟོབས་
ཀྱིས་འཇུག་པ་དང་། །བཅུ་དྲུག་བཞི་ཡི་བདག་དཀྱིལ་ལ། །སྦྱོར་བའི་ཐབས་ཀྱིས་འཇུག་པ་དང་། །དེ་དང་དེ་ལས་ཁྱད་པར་འཕགས། །ཤིན་ཏུ་བསྐོར་བའི་གནས་དག་ཏུ། །རིམ་པ་བཞིན་དུ་འཇུག་པ་དང་། །དང་པོ་འབྱུང་བྱེད་གནས་དག་ཏུ། །ཐ་མ་ཅིག་ཤོས་འབྱུང་བ་ལ། །

49-1-315b

མགལ་མེའི་འཁོར་ལོ་བསྐོར་བ་ཡིས། །རིམ་སོགས་མན་ངག་ཤེས་པར་བྱ། །ཤིན་ཏུ་འཇམ་པའི་སྟན་དག་ལ། །རྣལ་འབྱོར་ཅི་བདེར་གནས་ནས་ནི། །སྙིང་གར་ཟླ་བའི་དཀྱིལ་འཁོར་ལ། །ས་བོན་སྤྲོས་པས་ལྷ་རྣམས་གསལ། །བླ་མ་མི་བསྐྱོད་གཟུགས་འཛིན་པ། །མཁའ་འགྲོའི་
ཚོགས་ཀྱིས་བསྐོར་བ་ལ། །དང་པོ་ལུས་ངག་གུས་པ་ཡིས། །ཕྱག་འཚལ་ཞབས་ལ་རེག་པར་བྱ། །ཕྱི་མཆོད་ནང་མཆོད་གསང་མཆོད་རྣམས། །རིམ་པས་ཕུལ་ནས་སྡིག་པ་བཤགས། །སྒྱུ་མའི་མཚན་ཉིད་ཤེས་པར་བྱ། །སངས་རྒྱས་ལ་སོགས་བདེ་བ་ལ། །དགའ་བ་བསྐྱེད་དེ་རྗེས་ཡི་
རང་། །ཆོས་ཀྱི་འཁོར་ལོ་བསྐོར་བར་བསྐུལ། །འགྲོ་བའི་དོན་དུ་གསོལ་བ་གདབ། །དཀྱིལ་འཁོར་ལྷ་ལ་སྐྱབས་སུ་མཆི། །ལུས་ཀྱང་གུས་པར་དབུལ་བར་བྱ། །སེམས་བསྐྱེད་ལམ་ལ་གནས་པར་བྱ། །ཕྱག་རྒྱ་མཆོག་ཏུ་གཟུང་བར་བྱ། །སླར་ཡང་སྡོམ་པ་བརྟན་པར་གཟུང་། །
ཚད་མེད་བཞི་ཡང་བསྒོམ་པར་བྱ། །དག་པར་བྱེད་པའི་སྔགས་བརྗོད་པས། །མཐའ་དག་སྟོང་པ་ཉིད་དུ་བསྒོམ། །ཡོད་པ་མ་ཡིན་མེད་པ་མིན། །སྣང་བ་མ་ཡིན་འགག་མེད་མིན། །སྐྱེ་བ་མ་ཡིན་འགག་པ་མིན། །དེ་ལ་སོགས་པའི་ཚིག་རྣམས་ཀྱིས། །མཚོན་ཏེ་སྟོང་ཉིད་གཏན་
ལ་དབབ། །སྟོང་ཉིད་དངོས་པོའི་གནས་ཚུལ་ནི། །གང་དུའང་བསམ་དུ་མེད་མོད་ཀྱང་། །མ་རྟོགས་ལོག་རྟོགས་ཐེ་ཚོམ་ཅན། །དེ་རྣམས་བསལ་བའི་དོན་ཆེད་དུ། །སྐྱེ་མེད་འགག་མེད་ལ་སོགས་བརྗོད། །དེ་ལས་སྟོང་པའི་ངང་ལས་ནི། །འབྱུང་བའི་དཀྱིལ་འཁོར་རིམ་བརྩེགས་
འཕྲོས། །དེ་སྟེང་སུཾ་ལས་བྱུང་བ་ལས་། །རི་རབ་ཆེན་པོ་བསྐྱེད་པར་བྱ། །དེ་སྟེང་ཧཱུཾ་ལས་རྡོ་རྗེ་ནི། །རྒྱ་གྲམ་ལྗང་གུའི་དཀྱིལ་དུ་ནི། །ས་བོན་འོད་ཟེར་ལས་འཕྲོས་པས། །གསེར་གྱི་འཁོར་ལོ་རྩིབས་བཅུ་བསྐྱེད། །སྐད་ཅིག་རྫུས་སྐྱེས་ཚུལ་དུ་ནི། །དབུས་ཀྱི་གཙོ་བོས་ཁྲོ་བཅུ་
བསྐྱེད། །ཧཱུཾ་བཞི་གསང་སྔགས་བརྗོད་པ་ཡིས། །བཀའ་བསྒོ་བས་ནི་སྤྲུལ་པ་འཕྲོས། །གདུག་པ་ཅན་ནི་མ་ལུས་བཀུག །རྡོ་རྗེ་ཕུར་བུའི་སྔགས་བརྗོད་པས། །ཤིན་ཏུ་ཁྲོས་པས་སྤྲུལ་ནས་ནི། །བརྡེག་པའི་སྔགས་ཀྱིས་བཏབ་ནས་ནི། །བརྡུང་བའི་སྔགས་ཀྱིས་བརྡུང་བར་བྱའོ། །

49-1-316a

མེ་དཔུང་ཚོགས་ཀྱིས་ཐལ་བར་བསྲེག །ནམ་མཁའི་མཐས་ཀླས་ཚུན་ཆད་དུ། །ཁྲོ་བོ་རྣམས་ཀྱི་ནང་ལོགས་སུ། །རྡོ་རྗེ་གུར་དང་ར་བ་གཏམས། །རྡོ་རྗེ་གུར་གྱི་ནང་ལོགས་སུ། །གཞལ་ཡས་ཁང་ནི་མཛེས་པར་བསྐྱེད། །དེ་སྟེང་པདྨ་འདབ་བརྒྱད་གདན། །
ལྟེ་བར་ཉི་ཟླའི་གདན་ནི་བརྩེགས། །གདན་དང་རྒྱན་རྣམས་ཀུན་ནི་རྫོགས། །མངོན་པར་བྱང་ཆུབ་ཆོ་ག་ཡིས། །གཙོ་བོའི་སྐུ་ནི་བསྐྱེད་པར་བྱ། །དང་པོ་སྟོང་དང་ཟླ་བ་ལ། །ཡིག་འབྲུ་ལ་སོགས་ཆོ་ག་རྫོགས། །རྡོ་རྗེ་ལ་ནི་བྱིན་རླབས་བསྡུ། །སྔགས་བརྗོད་པས་ནི་སྐུ་བསྐྱེད་དོ། །གཙོ་བོ་སྐུ་
མདོག་མཐིང་ནག་ནི། །ཞལ་གཅིག་པ་ལ་ཕྱག་གཉིས་པ། །མཆེ་བ་གཙིགས་པ་འདོད་དགུར་བསྒྱུར། །སྐུ་ལ་སྦྲུལ་གྱི་རྒྱན་གྱིས་བརྒྱན། །གཡོན་བརྐྱང་གཡས་བསྐུམ་འབྱུང་པོ་འདུལ། །ཕྱག་གཡས་རྡོ་རྗེ་ཁྲོ་བོ་བསྡམས། །གཡོན་ནས་མཁའ་ལྡིང་རྒྱལ་པོ་སྤྲོ། །གཙོ་བོ་དེ་ལྟར་བསྐྱེད་
ནས་ནི། །ཤར་གྱི་པདྨའི་འདབ་མ་ལ། །རྣམ་རྒྱལ་སྐུ་མདོག་དམར་པོ་སྟེ། །ཕྱག་གཡས་དང་པོ་རྡོ་རྗེ་འཛིན། །གཡོན་པས་དགྲ་སྟ་འཛིན་པ་སྟེ། །བར་མ་ཕྱག་གཉིས་གུང་མོ་དང་། །མཐེ་བོང་ངོས་མདུང་གཞན་རྣམས་བརྐྱང་། །དེ་ཉིད་སྙིང་གར་བཟུང་ནས་ནི། །དེ་འོག་ཞགས་པ་
རལ་གྲི་བསྣམས། །ལྷོ་ཡི་པདྨར་མགོན་པོ་ནི། །སྐུ་མདོག་ནག་པོ་ཞལ་གཅིག་པ། །ཕྱག་ཀྱང་དེ་བཞིན་གཉིས་པ་སྟེ། །གཡས་གཡོན་ཙནྡན་བིང་ཆེན་བསྣམས། །ནུབ་ཀྱི་པདྨར་ལུས་ངན་པོ། །སྐུ་མདོག་ལྗང་གུ་ཞལ་གཅིག་པ། །ཕྱག་གཉིས་མཆོད་རྟེན་ནེའུ་ལེ་བསྣམས། །བྱང་གི་
པདྨར་བདུད་རྩི་འཁྱིལ། །སྐུ་མདོག་སྔོན་པོ་ཞལ་གཅིག་པ། །ཕྱག་གཉིས་བྲང་བསྣོལ་སྡིགས་མཛུབ་འཕྱར། །ཤར་ལྷོའི་འདབ་མར་གནོད་སྦྱིན་བསྐྱེད། སྐུ་མདོག་དམར་ནག་ཞལ་གཅིག་པ། །ཕྱག་གཉིས་གྲི་གུག་ཅང་ཏེའུ་བསྣམས། །ལྷོ་ནུབ་འདབ་མར་རོ་ལངས་མ། །སྐུ་མདོག་སྔོ་
སྐྱ་ཞལ་གཅིག་པ། །ཕྱག་ན་རྡོ་རྗེ་ལྕགས་སྒྲོག་བཟུང་། །གུང་མོ་སྲིན་ལག་ལ་སོགས་རྣམས། །དམ་པོར་བཀུག་ནས་ཡོངས་སུ་བསྡམས། །མཐེབ་མཛུབ་བཞི་རྣམས་རབ་བརྐྱང་ནས། །སྤྱི་བོར་ངེས་པར་བསྣོལ་བ་རྣམས། །ནུབ་བྱང་རྡོ་རྗེ་མཁའ་འགྲོ་མ། སྐུ་མདོག་དམར་སྐྱ་ཞལ་གཅིག་པ། །

49-1-316b

ཕྱག་གཉིས་སྤྱི་བོར་སྦྱར་ནས་སུ། །མེ་ལྕེ་ཕྲེང་བ་ཡོངས་སུ་འཛིན། །བྱང་ཤར་མཚམས་ཀྱི་འདབ་མ་ལ། །འཇིགས་བྱེད་ཁ་དོག་སྔོ་ནག་མ། །ཞལ་གསུམ་ཕྱག་དྲུག་ཞབས་གཉིས་པ། །གཡས་ཀྱི་དང་པོས་གླང་པོ་བསྣམས། །གཡོན་གྱིས་གླང་ཆེན་པགས་པ་བསྣམས། །དེ་འོག་
དགྲ་སྟ་རྡོ་རྗེ་བསྣམས། །ཐ་མ་མི་མགོ་ལྕགས་ཀྱུ་བསྣམས། །གྲུ་ཆད་བཞི་ལ་ལྷ་མོ་བཞི། །འོད་སྐྱེད་མ་ནི་སྐུ་མདོག་དཀར། །ཞལ་གཅིག་ཕྱག་གཉིས་རྡོ་རྗེ་བསྣམས། །ཡིད་འཕྲོག་མ་ནི་སྐུ་མདོག་སེར། །ཞལ་གཅིག་ཕྱག་གཉིས་སྤོས་ཕོར་བསྣམས། །ཀུན་བཟང་མ་སྐུ་མདོག་དམར་མོ། །
ཞལ་གཅིག་ཕྱག་གཉིས་རོ་མཆོག་བསྣམས། །གླུ་སྒྲ་ཅན་སྐུ་མདོག་སྔོན་པོ། །ཞལ་གཅིག་ཕྱག་གཉིས་སྒྲ་སྙན་གར། །ཤར་སྒོར་ཁྲོ་མོ་སྲོག་གཅོད་མ། །ཞལ་གཅིག་ཕྱག་གཉིས་སྐུ་མདོག་མཐིང་། །ཕྱག་གཉིས་ཐོད་པ་ཞགས་པ་བསྣམས། །ལྷོ་སྒོར་དབུགས་རྔུབ་སྐུ་མདོག་སེར། །
ཞལ་གཅིག་ཕྱག་གཉིས་ཧོམ་གཟར་ཞགས། །ནུབ་སྒོར་ཁྲག་འཐུང་སྐུ་མདོག་དམར། །ཞལ་གཅིག་ཕྱག་གཉིས་གྲི་གུག་ཞགས། །བྱང་སྒོར་ཤ་ཟ་སྐུ་མདོག་སྔོ། །ཞལ་གཅིག་ཕྱག་གཉིས་རྣོན་པོ་ཞགས། །དེ་རྣམས་བསྐྱེད་པའི་ཚུལ་རྣམས་ཀྱང་། །རྣལ་འབྱོར་སྤྲོས་དགའི་སེམས་
བྱང་ཕྱིར། །ས་བོན་དག་ལས་འོད་འཕྲོས་པས། །སོ་སོའི་ཐུགས་ཀྱི་མཚན་མའི་རྟགས། །དང་པོ་གསུངས་ཏེ་གསུམ་པ་དགུ། །ལས་ཀྱི་འཁོར་ལོ་མྱུར་བརྩོན་པ། །བསྐྱེད་པའམ་སྐད་ཅིག་ཀློག་འགྱུའི་ཚུལ། །ཅུང་ཞིག་གསལ་བར་བལྟས་ནས་ནི། །སྔགས་ཀྱི་ཆོ་ག་ཤེས་པས་སུ། །
ཡེ་ཤེས་དཀྱིལ་འཁོར་བཅས་པ་རྣམས། །སྲི་ཞུ་གུས་པའི་ཚུལ་གྱིས་སུ། །ཡེ་ཤེས་དཀྱིལ་འཁོར་སྤྱན་དྲངས་ནས། །མདུན་གྱི་མཁའ་ལ་བཞུགས་སུ་གསོལ། །མཆོད་ཡོན་ལ་སོགས་དབུལ་བར་བྱ། །གནོད་སྦྱིན་དྲག་པོའི་སྔགས་ཀྱིས་ནི། །བགེགས་རྣམས་མ་ལུས་བཟློག་
པར་བྱ། །རྣམ་པར་རྟོག་པ་སྤང་བ་དང་། །ལུས་ངག་ནུས་པ་མཐུ་བསྐྱེད་ཕྱིར། །ལྷ་རྣམས་སོ་སོར་བསྟིམ་པར་བྱ། །ཡི་གེ་རྣམ་པ་གསུམ་དག་ནི། །དག་བྱེད་སྐུ་གསུང་ཆོ་གར་ལྡན། །དང་པོར་གསོལ་འདེབས་ཆོ་ག་ཡིས། །མཆོག་རྣམས་ཀུན་དུ་བསྐུལ་བས་སུ། །བདེ་

49-1-317a

གཤེགས་ཐམས་ཅད་མཉེས་ནས་ཀྱང་། །ལྷ་མོ་གླུ་ལེན་གར་བྱེད་མས། །བདུད་རྩིའི་བུམ་པ་ཐོགས་ནས་ཀྱང་། །རིམ་བཞིན་དབང་ནི་བསྐུར་བར་བྱས། །སོ་སོའི་རིགས་ཀྱི་ལྷ་འཛིན་འགྱུར། །མཆོག་རྣམས་ཀུན་དུ་བསྐུལ་བས་སུ། །བདེ་གཤེགས་ཐམས་ཅད་
མཉེས་ནས་ཀྱང་། །སློབ་དཔོན་མི་བསྐྱོད་ཡབ་ཡུམ་ལ། །གཉིས་དང་གསུམ་གྱི་མན་ངག་བླང་། །དེ་ནས་ལྷ་ལ་མཆོད་པ་དབུལ། །ཕྱི་མཆོད་ནང་མཆོད་གསང་བའི་མཆོད། །མཆོད་པ་ཚུལ་བཞིན་དབུལ་བར་བྱ། །ཕྱི་ནི་ཇི་བཞིན་གཞན་དང་མཐུན། །ནང་གི་ལྷ་ཡི་བདེ་བསྐྱེད་
པ། །ཅིག་ཤོས་ལྔ་རུ་བྱས་པ་ཡིན། །རྟག་པ་ལྡན་པ་དེ་དག་ནི། །གཙོ་བོ་ལྔ་ཡང་བྱས་པ་ཡིན། །ཐབས་དང་ཤེས་རབ་ལྡན་པ་ཡིས། །གཉིས་པ་ལ་སོགས་སྦྱར་བ་དང་། །དེས་ནི་དང་པོའི་དོན་ཀྱང་བྱ། །རིགས་དང་རྟགས་ནི་ལྡན་གྱུར་པའི། །དེ་ཉིད་སྙིང་པོ་དེ་ལས་བྱུང་། །དེ་དང་
དུར་ཁྲོད་བྱུང་བ་ཡིན་། །སྣང་བ་མེད་པ་མཆོག་ཡིན་ནོ། །ལྔ་དང་བཅུ་རུ་སྦྱར་བ་ཡི། །ཡིད་དུ་འོང་བ་དཔག་མེད་མཆོག །དེ་ནི་ནང་གི་དོན་བསྟན་ཏོ། །གུ་ཧྱ་དོན་ནི་བསྟན་བྱ་བ། །གྲོལ་དང་ཕྱག་རྒྱ་གཉིས་སུ་བསྟན། །གྲོལ་གྱིས་ཡིད་ཀྱི་གཟུགས་སྤྲུལ་ཏོ། །ཕྱག་རྒྱ་རྟགས་ལྡན་དངོས་སུ་
འཇུག །མི་ལྡན་བྱིན་གྱིས་བརླབ་པར་བྱ། །དེ་རྣམས་ཆོ་གའི་ཡན་ལག་ནི། །རྟེན་དང་བརྟེན་པའི་ཚུལ་ཉིད་ཀྱིས། །དང་པོར་བྱིན་གྱིས་བརླབ་པར་བྱའོ། །རྟེན་ནི་ཨས་སུ་བྱིན་གྱིས་བརླབ། །བརྟེན་པ་ཧཱུཾ་གིས་བྱིན་གྱིས་བརླབ། །རྟེན་དང་བརྟེན་པའི་གཙོ་བོ་དང་། །ཡན་ལག་རྣམས་ལ་ལྷ་རྣམས་
ཀྱིས། །བྱིན་གྱིས་བརླབ་པ་བསྟིམ་པར་བྱ། །དྷརྨ་ཨེ་ཡི་ནང་ཤེད་དུ། །གསུམ་རྩ་མ་ཡི་དཀྱིལ་འཁོར་བསམ། །རིན་ཆེན་ཕོ་བྲང་ནང་ཤེད་དུ། །རྟག་པ་ཉིད་ཀྱང་བསམ་པར་བྱ། །གཡས་དང་གཡོན་གྱི་ཐབས་ཤེས་རབ། །ལྔ་ལྔ་ཡིས་ནི་གནས་སུ་བསྟན། །བསྐྱེད་ཅིང་དགྱེད་པར་
བྱེད་པ་ཉིད། །དེ་ཡི་གྲོགས་འགྱུར་གཉིས་དང་བཞི། །འབྱེད་པར་བྱེད་དང་སྐྲོད་པར་བྱེད། །སྤྲོ་བར་བྱེད་དང་སྡུད་པར་བྱེད། །དེ་ཉིད་སྤྲོ་བར་བྱེད་པ་ཡི། །བདེ་དང་ཤིན་ཏུ་བདེ་བ་ནི། །ཁྱད་པར་མཆོག་ཏུ་གྱུར་པ་ནི། །གསང་དོན་མཆོག་ཏུ་སྤྲོ་བའོ། །གཉིས་མེད་སྤྲོ་བའི་འོད་ཟེར་སོགས། །

49-1-317b

དེ་སོགས་ཆོ་ག་རྒྱས་པར་བྱའོ། །རྡོ་རྗེ་དྲིལ་བུ་ལྡན་པ་ཡིས། །རྡོ་རྗེ་གླུ་དང་ལྡན་པས་བསྟོད། །ཧཱུཾ་གསང་བའི་དཀྱིལ་འཁོར་ཕོ་བྲང་མཆོག །སྐུ་གསུང་ཐུགས་ཀྱི་དཀྱིལ་འཁོར་མཆོག །མཐུན་པའི་དོན་རྣམས་སྟོན་མཛད་པ། །རྡོ་རྗེ་འཁོར་བཅས་ཕྱག་འཚལ་བསྟོད། །རྡོ་རྗེ་མི་འགྱུར་འཇིགས་བྱེད་
པ། །ཁམས་གསུམ་རྒྱལ་བར་བྱེད་པའི་མཆོག །དཔལ་ལྡན་ནག་པོ་ཡོན་ཏན་མཆོག །གསུང་གི་སྒྲ་སྒྲོགས་རྒྱལ་པོ་མཆོག །ཕྲིན་ལས་རང་བཞིན་བདུད་རྩི་འཁྱིལ། །འབྱུང་པོ་འཇིགས་བྱེད་གནོད་སྦྱིན་མཆོག །དགྲ་ལ་རྔམས་པའི་ཟ་བྱེད་མ། །རྡོ་རྗེ་ནམ་མཁར་འགྲོ་བའི་མཆོག །འཇིགས་
པར་བྱེད་པའི་སྐུ་འཆང་མ། །འོད་ཀྱིས་གསལ་བྱེད་མཛེས་པའི་མཆོག །ཡིད་དུ་འོང་བའི་ཡོན་ཏན་མ། །ལྟ་སྤྱོད་བཟང་བར་བྱེད་པའི་མཆོག །སྒྲ་དང་གར་གྱིས་མཉེས་མཛད་མ། །རྣམ་པར་རྟོག་པ་གཅོད་པའི་མཆོག །འབྱུང་པོ་ཞལ་དུ་རྔུབ་བྱེད་མ། །ཆགས་པའི་མདོག་ཅན་ཁྲག་འཐུང་
མ། །ས་བདག་དང་ནི་དྲི་ཟའི་མཆོག །ལྷ་ཡི་འཁོར་ལོ་ཚོགས་རྣམས་ལ། །བསྟོད་ཅིང་གུས་པས་ཕྱག་ཀྱང་འཚལ་། །དྲག་པོ་འཇིགས་པའི་དཀྱིལ་འཁོར་ལ། །བསྟོད་ཅིང་གུས་པས་ཕྱག་འཚལ་ལོ། །བསྟོད་ཅིང་མཆོད་པའི་མན་ངག་ནི། །ཉིད་ཀྱི་ཐུགས་ཀྱི་དཀྱིལ་འཁོར་ལས། །སྤྲུལ་ནས་ཉིད་ལ་མཆོད་པར་བྱ། །
འཁོར་ལོ་གཞན་རྣམས་ཀྱང་ནི་མཆོད། །བསྐྱེད་པའི་རིམ་པ་བསྒོམ་པ་ནི། །དང་པོ་གཙོ་བོ་བསྟན་བྱས་ལ། །དེ་ནས་འཁོར་ལོ་རིམ་གྱིས་བསྟན། །གཙོ་བོ་རིམ་གྱིས་བསྟན་པ་དང་། །འཁོར་ལོ་རིམ་གྱིས་བསྟན་པ་དང་། །རྫོགས་པར་ལྟ་བ་གཉིས་སུ་བྱ། །དང་པོར་དབྱུག་ཚོད་ཕྱེད་ཙམ་ལ། །དེ་འོག་
དབྱུག་ཚོད་གཅིག་ཙམ་ལ། །དེ་འོག་འཕོ་བ་གཅིག་ཏུ་བྱ། །ཐུན་ཚོད་རྣམས་ཀྱང་རིམ་གྱིས་སོ། །དེ་ལྟར་བརྟན་པར་གྱུར་ནས་ནི། །ཆེ་བར་འདོད་ན་ཆེ་བར་རོ། །ཆུང་བར་འདོད་ན་ཆུང་བ་ཉིད། །མང་པོར་སྤྲོས་ནས་ཉུང་བར་བསྡུ། །ཉུང་བར་སྡུད་ནས་མང་པོར་སྤྲོ། །ཁ་དོག་ཇི་ལྟར་འདོད་པ་
བཞིན། །ལྡང་བ་ཡང་ཞིང་གཟི་བརྗིད་ལྡན། །ཡུན་རིང་བཏང་ཡང་མི་འཆོར་ལ། །རླང་ཡང་ཇི་ལྟར་འདོད་པར་ཐུབ། །བདུད་རྩི་ཟས་ཀྱིས་འཚོ་བར་བྱེད། །དེས་སུ་བསྐྱེད་པ་མཐར་ཕྱིན་ཏེ། །བསྐྱེད་པ་མཐར་ཕྱིན་དུས་སུ་མི། །མཁའ་འགྲོ་མ་ཡི་མཛད་སྤྱོད་སྟོན། །མཛད་སྤྱོད་བསྟན་པའི་

49-1-318a

དུས་དག་ཏུ། །མཛད་སྤྱོད་བསྟན་པའི་ལས་རྣམས་བསྟན། །དེ་དུས་གསལ་ཞིང་གསལ་གྱུར་ནས། །ཡང་ནས་ཡང་དུ་བརྟག་པར་བྱའོ། །མན་ངག་ཟབ་མོ་དོན་སྟོན་པ། །གུས་པས་གསོལ་བ་གདབ་པར་བྱ། །དེ་རུ་བཟློག་པའི་དོན་སྟོན་ཡང་། །མི་
འཇིགས་ཐེ་ཚོམ་མེད་པས་སུ། །མན་ངག་བདུད་རྩི་བླང་བར་བྱའོ། །གལ་ཏེ་བསྐྱེད་པས་སྐྱོ་གྱུར་ན། །བསྒོམ་པ་མ་ནུས་ལས་གཞན་ཕྱིར། །བཟླས་བརྗོད་མན་ངག་རྒྱས་པ་རྣམས། །གཞན་དུ་བསྟན་པ་མང་མོད་ཀྱང་། །བཟླས་བརྗོད་མན་ངག་བདུད་རྩི་འདི། །རིན་ཆེན་ལྟ་
བུའི་གང་ཟག་ལ། །རྣ་བ་བརྒྱུད་དེ་འོང་བ་འདི། །བསྟན་པར་བྱ་ཡིས་གུས་པར་ཉོན། །སྙིང་གའི་འཁོར་ལོའི་མན་ངག་ལ། །སེམས་དཔའ་གསུམ་གྱི་མན་ངག་རྫོགས། །འོད་ཟེར་དཀར་པོ་འཇའ་ཚོན་ཚུལ། །ཡི་གེ་འཕྲོ་བའི་མན་ངག་དགོད། །འཁོར་ཞིང་སྤྲོས་པས་གྱེན་དུ་
སྤྲོས། །ལྕེ་ཡི་རྡོ་རྗེ་རྩེ་མོ་ལས། །ལྷ་ཡི་ཞལ་དུ་སྤྲོ་བར་བྱ། །མཆོད་དེ་གནས་ནི་གང་འདོད་ནས། །སླར་ལ་འཁོད་པས་སྒྲིབ་པ་སྦྱང་། །སྒྲ་ཆེར་མ་ཡིན་སྒྲ་ཆུང་མིན། །ཡན་ལག་མ་ཉམས་བཟླས་བརྗོད་བྱ། །དེ་ནི་ཕྱི་ཡི་ཚུལ་དུ་བསྟན། །ནང་གི་བཟླས་བརྗོད་བསྟན་པ་ནི། །ཨ་ཝ་
དྷཱུ་ཏཱིའི་ནང་ཤེད་ནས། །ཁ་དོག་ལྔ་ལྡན་རླུང་བྱུང་སྟེ། །དེ་ཉིད་རྟ་ཡི་ཚུལ་དུ་བསྟན། །ཕྱིར་འབྱུང་རྟ་ལ་ཨོཾ་ནི་ཞོན། །ནང་དུ་ཞོན་པ་ཧཱུཾ་ཡིན་ནོ། །གནས་པར་བྱེད་པ་ཨཱཿཉིད་ཡིན། །དེ་ལྟར་སྤྲོ་ཞིང་བསྡུ་བ་ལ། །དང་པོར་བཅུ་ལ་བསྟན་པར་བྱ། །དེ་ནས་ཉི་ཤུ་ལ་བསྟན་ནོ། །དེ་
ལྟར་གྱུར་པའི་རིམ་པའི་མཐར། །ནང་གི་རིམ་གྱིས་བསྡུ་བར་བྱའོ། །སྙིང་གའི་ཐིག་ལེའི་གནས་དག་ལ། །འཛིན་པར་ནུས་སོ་མཆོག་ཡིན་ནོ། །དེ་ཉིད་གཏན་ལ་དབབ་ན་ནི། །ཉི་ཁྲི་ཆིག་སྟོང་དྲུག་བརྒྱ་ནི། །ཉིན་མཚན་གཅིག་ལ་རྒྱུ་བ་ཡིན། །དེ་ཡང་གནས་ཀྱི་སྡེ་ཚན་བསྡུ་བ་ནི། །དང་
པོར་བཅུ་དྲུག་གཉིས་པར་ནི། །སུམ་ཅུ་རུ་ནི་ཤེས་པར་བྱ། །བཅུ་དྲུག་བཅུ་གཉིས་བརྒྱད་དུ་བསྡུ། །བཞི་དང་གཉིས་སུ་བསྡུ་བའོ། །ཕྱིར་ཕྱུང་སྒོ་ཡིས་འབྱེད་ཚུལ་ནི། །གཡས་དང་གཡོན་དང་གཉིས་ཀ་ཡང་། །ཤིན་ཏུ་ཕྲ་བའི་ཚུལ་དུ་བྱེད། །མེ་དང་རླུང་དང་ས་དང་ནི། །ཆུ་ཡི་

49-1-318b

རང་བཞིན་དམར་དང་སྔོ། །སེར་དང་དཀར་བ་ཉིད་དུ་འདོད། །པདྨ་ལས་དང་རིན་ཆེན་དང་། །རྡོ་རྗེ་ཐབས་དང་ཤེས་རབ་ནི། །དེ་ཡི་ནུས་པ་དེ་ལྟར་སྣང་། །དང་པོ་འབྱུང་བྱེད་གནས་དང་ནི། །ལོངས་སྤྱོད་ཆོས་དང་སྤྲུལ་པ་དང་། །རྡོ་རྗེ་འཛིན་པ་ཉིད་དུ་འདོད། །དེ་ཡང་བསྡུ་ན་གཉིས་སུ་སྣང་། །
གསོ་བར་བྱེད་པ་སྲོག་འཛིན་ཡིན། །ཕྱི་དང་ནང་གིས་ཞེས་ཀྱང་བྱ། །འཆི་བྱེད་ཆ་རྣམས་མ་ཉམས་པར། །རྣམ་པ་གཉིས་སུ་བསྟན་པ་ཡིན། །དེ་ལྟར་སྤྱོད་པ་ལ་སོགས་རྣམས། །དངོས་པོའི་གནས་ལུགས་ཡིན་པས་ན། །སྔོན་དུ་འགྲོ་བ་ཤིན་ཏུ་གཅེས། །བཟླས་པའི་དོན་ལ་མི་འཇུག་གི། །
ཡང་ན་སྔོན་དུ་སོང་བ་ཡིས། །རྫོགས་པའི་དོན་ལ་འཇུག་པར་བྱ། །དངོས་པོའི་གནས་ལུགས་བསྟན་པ་ནི། །རྩ་དང་རླུང་དང་བྱང་ཆུབ་སེམས། །དེ་ཡི་སྤྲོས་པས་མ་བསྟན་ཡང་། །བསྡུས་པའི་དོན་ནི་གསུང་དུ་འདུས། །ཐུགས་ཀྱི་འཁོར་ལོ་གནས་དག་ཏུ། །རྩ་ཡི་འདབ་མ་བརྒྱད་
ཡིན་ཏེ། །དེ་ཡི་དབུས་སུ་དྷཱུ་ཏཱི་གནས། །དེ་ཡི་དཀྱིལ་ན་འོད་ཀྱི་ནི། །ཁ་དོག་ལྔ་ལྡན་དཀྱིལ་ཤེས་ནས། །ཐིག་ལེའི་རང་བཞིན་བྱང་ཆུབ་སེམས། །བཞུགས་པ་དེ་ལ་ཕྱག་འཚལ་ལོ། །དེ་ཉིད་ལ་ནི་མུ་སྟེགས་ཀྱིས། །ལོག་པར་རྟོགས་པས་བདུད་དུ་འགྱུར། །ནལ་འབྱོར་དབང་ཕྱུག་མཆོག་གིས་
ནི། །དེ་ཉིད་ངེས་པར་རྟོགས་པས་སུ། །དངོས་གྲུབ་རྣམ་ཉིད་དེ་ལས་འབྱུང་། །དེ་བས་རྣལ་འབྱོར་ནན་ཏན་གྱིས། །བླ་མ་མཉེས་པར་བྱས་ནས་ཀྱང་། །བླ་མའི་ཞལ་གྱི་སྒོ་ནས་ནི། །དེ་ཉིད་མན་ངག་ཤེས་པར་བྱ། །ཁ་དོག་ལྔ་ལྡན་དེ་ཉིད་ལ། །དང་པོ་བརྟན་པར་བལྟས་ནས་ནི། །དེ་ནས་
རྟགས་རྣམས་བྱུང་བ་དང་། །ཐིག་ལེ་ཉིད་ལ་བརྟན་པར་བྱ། །དེ་ལ་བརྟན་ནས་སྤྲོ་བ་དང་། །བསྡུ་བའི་སྦྱོར་བ་ཤེས་པར་བྱ། །དེ་ཉིད་བརྟན་པར་གྱུར་པ་ན། །བདེ་དང་ཤིན་ཏུ་བདེ་བ་དང་། །བདེ་བ་ཆེན་པོ་ཐོབ་པར་འགྱུར། །དེ་འོག་ནམ་མཁའི་དཀྱིལ་འཁོར་ལ། །ཞག་བདུན་བར་དུ་གནས་པ་
འབྱུང་། །བདུད་རྩི་འདོམ་གང་ལུས་ཁྱབ་པས། །བདུད་རྩི་ཟས་ཀྱིས་གསོ་བར་བྱེད། །དེ་འོག་སྒྱུ་མ་ལྟ་བུ་ཡིས། །དཔེ་བརྒྱད་དག་ལ་བལྟས་པས་སུ། །དེ་ཉིད་ངེས་པར་ཐུགས་སུ་ཆུད། །དེ་འོག་སྟོང་པའི་མན་ངག་ལ། །མན་ངག་སྟོབས་ཀྱིས་ཞུགས་པས་སུ། །དེ་ཉིད་ཁོ་ནར་

49-1-319a

ངེས་པར་མཐོང་། །དེ་ནས་འགྲོ་བ་གཞན་དོན་ལ། །མོས་པ་མ་ཡིན་དངོས་སུ་ནི། །འཇུག་པའི་སྟོབས་དང་ལྡན་པར་གྱུར། །ཉིན་མཚན་ཕྲུགས་རེ་དག་ལ་ཡང་། །བདེ་གཤེགས་མང་པོས་དཀྱིལ་འཁོར་སྟོན། །དེ་ཡི་མན་ངག་དོན་རྣམས་ནི། །མ་ལུས་ཤེས་པར་འགྱུར་
བ་ཡིན། །དེ་ལྟར་གཞན་དོན་མཐར་ཕྱིན་པས། །རང་དོན་ལྷུན་གྲུབ་ཕྱག་རྒྱའི་མཆོག །སྐད་ཅིག་གཅིག་ལ་ཤེས་པར་བྱ། །ཕྱག་རྒྱ་དང་ནི་ཕྱག་རྒྱའི་མཆོག །ཁྱད་པར་ཕྱག་རྒྱ་མཆོག་རྣམས་ནི། །རིམ་པ་བཞིན་དུ་འགྲུབ་པ་སྟེ། །སྲས་པོའི་ཚུལ་ནི་རྫོགས་ནས་ཀྱང་། །ཡབ་ཀྱི་དོན་ནི་
རྫོགས་པ་ཡིན། །དེ་ལྟར་རྫོགས་པའི་མན་ངག་ནི། །ནལ་འབྱོར་གྲོལ་ལམ་པ་ལ་བསྟན། །ཕྱག་རྒྱའི་ལམ་ལ་འཇུག་ཚུལ་ནི། །རྟགས་དང་ལྡན་པའི་ཕྱག་རྒྱ་མ། །རྟགས་དང་ལྡན་པར་བཙལ་བར་བྱ། །དེ་ལ་བརྟེན་ནས་ཡེ་ཤེས་ནི། །སྐྱེ་བ་ཐབས་ཀྱི་མན་ངག་ཀྱང་། །དང་པོར་བྱིན་
རླབས་ལ་སོགས་བྱ། །དེ་ནས་མན་ངག་ཐུན་ཚོད་དང་། །གཟུང་བའི་ཐབས་ནི་ཤེས་པར་བྱ། །དེ་ལ་བརྟེན་པར་གྱུར་ནས་ནི། །དངོས་གྲུབ་ཀྱང་ནི་ཐོབ་པར་འགྱུར། །དེ་ལ་མངོན་པར་ཞེན་ཆགས་ན། །མཆོག་ནི་འབྱུང་བར་མི་འགྱུར་རོ། །དེ་ཡི་ཞེན་པ་བཟློག་པའི་ཕྱིར། །ནང་གི་ཕྱག་རྒྱ་ཉིད་
ལ་བསླབ་། །དེ་ལ་བརྟན་པར་གྱུར་ནས་ནི། །དེ་ཡི་ཞེན་པ་བཟློག་པའི་ཕྱིར། །གསང་བའི་ཕྱག་རྒྱ་གཏུམ་མོའི་མཆོག །དེ་ཉིད་ལ་ནི་བསླབ་པའི་ཕྱིར། །འཁོར་ལོ་ལ་སོགས་རྫོགས་བྱས་ལ། །དང་པོ་འབྱེད་འཛུམས་འབྱོར་པ་ཡིས། །ཐབས་ཀྱི་རིམ་པ་བསླབ་པར་བྱ། །དམར་པོ་ཆེན་
པོ་སྤྲོས་ཤེས་ལ། །རྟགས་རྣམས་རིམ་པ་ལྔ་པོ་འབྱུང་། །དེ་འོག་སྤྲོ་བསྡུའི་སྦྱོར་བ་ཡིས། །དགུག་དང་མནན་པའི་རིམ་པ་ཡང་། །དང་པོ་བསླབས་ནས་འདི་ལ་བསྟན། །དེ་ལ་ལྡོག་པར་མ་གྱུར་ན། །འདི་རུ་བཟློག་པའི་མན་ངག་བསྟན། །དེ་འོག་ལྷན་ཅིག་སྐྱེས་མ་ཡི། །མན་ངག་
སྟོབས་ལ་ཞུགས་པ་ཡིས། །ནམ་མཁའི་བདུད་རྩི་འཁོར་ལོ་ནི། །རིམ་པ་བཞིན་དུ་འབྱུང་བར་འགྱུར། །དེ་ནས་རྟེན་མེད་རྣལ་འབྱོར་མ། །དེ་ཉིད་ལ་ནི་འཇུག་པར་བྱ། །ཡོད་དང་མེད་པའི་མཐའ་སོགས་ཀྱི། །རྟོག་པ་ཐམས་ཅད་འཇིག་པའི་མཆོག །ཀུན་དུ་བཟང་པོའི་དོན་རྟོགས་

49-1-319b

འགྱུར། །དེ་ལྟར་རྟོག་པའི་མན་ངག་ནི། །ཤེས་རབ་སྙིང་རྗེ་ལྡན་པ་དང་། །བླ་མ་ལ་གུས་བརྩོན་འགྲུས་ལྡན། །གཡོ་སྒྱུ་མེད་པའི་བསམ་པ་ཡིས། །ཡིད་དུ་འོང་བའི་རྫས་ཀྱི་མཆོག །འབུལ་བར་བྱེད་པ་བསྟན་པར་བྱ། །འདི་ནི་རིན་ཆེན་གང་ཟག་ཡིན། །དང་པོ་མན་ངག་ཐོབ་བྱའི་
ཕྱིར། །གཡོ་སྒྱུའི་བསམ་པ་ལྡན་པས་སུ། །ཤིན་ཏུ་གུས་པས་ཚུལ་དུ་བྱེད། །མན་ངག་ཐོབ་པར་གྱུར་ནས་ནི། །བླ་མ་ལ་ནི་རྒྱབ་ཀྱིས་ཕྱོགས། །དམྱལ་བ་ཡི་ནི་རྒྱུ་སོགས་པ། །དེ་ནི་རྒྱུན་དུ་སྤོང་བ་ཡིན། །རྫོགས་པའི་རིམ་པ་བསྟན་ནས་ནི། །སྐབས་འདིར་སྲུང་བའི་འཁོར་
ལོ་ནི། །སྲུང་བའི་འཁོར་ལོར་བསྟན་པ་ཡིན། །དུར་ཁྲོད་ཀྱི་ནི་རས་དག་ལ། །འཁོར་ལོའི་རིམ་པ་བརྩམ་པ་ཡིན། །དེ་མེད་གྱུར་ན་གྲོ་ག་འམ། །ཤིང་ཤུན་དག་ལས་བྱ་བ་ཡིན། །འཁོར་ལོ་རྩིབས་བརྒྱད་བྲིས་ནས་ནི། །དབུས་སུ་སྙིང་པོའི་དོན་བསྟན་ལ། །ཕྱོགས་སུ་
བཞི་པོ་དོན་ནི་བསྟན། །མཚམས་ནི་འགྲུབ་པར་བྱེད་པ་ཡིན། །འཁོར་ལོ་རྩིབས་ཀྱི་མཚམས་སུ་ནི། །གང་ཡིན་པ་ཡི་མིང་རྣམས་ནི། །ཕྱི་རོལ་མུ་ཁྱུད་བཟང་པོ་ལ། །ཐབས་དང་ཤེས་རབ་ཡི་གེ་དགོད། །དེ་ལྟར་འཁོར་ལོ་བརྩམས་ནས་ནི། །མཎྜལ་མཆོད་པ་ལ་སོགས་
བཤམས་། །བདག་ཉིད་རྣལ་འབྱོར་རྫོགས་བྱས་ལ། དེ་ཡང་ལྷ་ཡིས་འཁོར་ལོ་བསྐྱེད། །ཡེ་ཤེས་ལྷ་ལ་མཆོད་བྱས་ལ། །གསོལ་བ་བཏབ་སྟེ་གཉིས་སུ་བསྲེ། །དེ་ནས་བསྲུང་བའི་སྔགས་བཟླས་བྱ། །སོ་སོའི་རྩ་བའི་སྔགས་འདི་ལ། །བར་དུ་མིང་རྣམས་བཅུག་ནས་ནི། །
དེ་ནས་བསྲུང་བའི་སྔགས་གདགས་བྱ། །སྔགས་རྣམས་ཀྱང་ནི་བསྟན་བྱ་སྟེ། །ཨོཾ་ན་མོ་ནཱི་ལཱཾ་བ་ར་དྷ་ར་བཛྲ་པཱ་ཎི་མ་ཧཱ་ཡཀྵ་སེ་ནཱ་པ་ཏ་ཡེ་ཧཱུཾ་ཧཱུཾ་ཕཊ། ཨོཾ་ཏྲེེ་ལོཀྱ་པི་ཛ་ཡ་ཧཱུཾ་ཕཊ། ཨོཾ་མ་ཧཱ་ཀཱ་ལ་རོ་ཥ་ཎ་ཧཱུཾ་ཕཊ། ཨོཾ་བཻ་ཤྲ་བ་ཎ་ཡེ་ཧཱུཾ་ཕཊ། ཨོཾ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཨོཾ་བཛྲ་
ཡཀྵ་ཧཱུཾ་ཕཊ། ཨོཾ་བཛྲ་བཻ་ཏ་ལི་ཧཱུཾ་ཕཊ། ཨོཾ་བཛྲ་ཌཱ་ཀཱི་ཡ་ཧཱུཾ་ཕཊ། ཨོཾ་བཛྲ་བྷཻ་ར་ཡ་ཧཱུཾ་ཕཊ། ཨོཾ་བིད་ཏ་ཡ་ཧཱུཾ་ཕཊ། ཨོཾ་མ་མོ་ཧ་ར་ཡ་ཧཱུཾ་ཕཊ། ཨོཾ་ས་མནྟ་བྷ་དྲི་ཡ་ཧཱུཾ་ཕཊ། ཨོཾ་ཤཔྟ་གཱི་ཏི་ཡ་ཧཱུཾ་ཕཊ། ཨོཾ་པྲ་ཏི་ས་ཏ་མི་ཡ་ཧཱུཾ་ཕཊ། ཨོཾ་ཤོ་ས་ག་པ་ཡེ་ཧཱུཾ་ཕཊ། ཨོཾ་ར་ག་ཏ་པྲི་ཏ་

49-1-320a

ཡ་ཧཱུཾ་ཕཊ། ཨོཾ་མ་ས་བྷཀྵི་ནི་ཧཱུཾ་ཕཊ། ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་ཧཱུཾ་ཕཊ། ཅེས་པ་ནི་དྲག་པོའི་སྔགས་བསྡུས་པའོ། །སྭཱ་ཧཱ་ཞེས་པ་ནི་ཞི་བའིའོ། །ཨོཾ་ཞེས་པ་ནི་རྒྱས་པའི་འོ། །ཧོ་ཞེས་པ་ནི་དབང་གིའོ། །རཀྵ་རཀྵ་ཞེས་པ་ནི་བསྲུང་བའི་འོ། །བསྲུང་བའི་སྔགས་
ནི་འདི་དག་ལ། །བར་དུ་མིང་ནི་གཞུག་པར་བྱ། །སྲུང་བའི་འཁོར་ལོ་དེ་དག་ཀྱང་། །བཞི་ཚན་བཞི་ཡིས་བསྲུང་བ་དང་། །གཙོ་བོ་ཉིད་དང་བཅས་ཏེ་བསྲུང་། །ཡང་ན་སྡེ་ཚན་སོ་སོར་བསྲུང་། །གཙོ་བོ་གཅིག་པུས་བསྲུང་བ་ཡིན། །ཡང་ན་སོ་སོར་རེ་རེས་ཀྱང་། །བསྲུང་བའི་ཆོ་ག་
ཤེས་པར་བྱ། །ཐམས་ཅད་ཀུན་གྱིས་བསྲུང་བ་ཡི། །འཁོར་ལོ་བཅའ་བའི་ཐབས་བསྟན་པ། །དང་པོ་འཁོར་ལོ་བརྒྱད་པ་ལ། །རིམ་པ་གཉིས་པ་བཅུ་གཉིས་དང་། །དེ་འོག་རིམ་པ་བཅུ་དྲུག་པའོ། །མཐའ་མ་མུ་ཁྱུད་གཉིས་དང་ལྡན། །དང་པོ་གཙོ་བོའི་རིམ་པས་དགོད། །དེ་འོག་སྡེ་ཚན་
གཉིས་པ་དགོད། །ཐ་མ་སྡེ་ཚན་གཉིས་སུ་བསྟན། །མུ་ཁྱུད་ཟླུམ་པོ་གཉིས་ལ་ནི། །ཤེས་རབ་ཐབས་ཀྱི་ཡི་གེ་འགོད། །འཁོར་ལོ་རིམ་པ་མི་འདྲའི་གཞུང་། །རྣམ་པ་གསུམ་དུ་ཤེས་པར་བྱ། །ཞི་བར་བྱ་དང་དབང་དུ་བསྡུ། །རྒྱས་དང་དྲག་སོགས་གཞན་དག་ཀྱང་། །མན་ངག་གིས་
ནི་སྦྱོར་ཞེས་བྱའོ། །ལས་བཞི་ཡི་ནི་འཁོར་ལོ་ལ། །བཟླས་པ་ཁྲི་ཚོ་གཅིག་གིས་འགྲུབ། །དེ་ཡང་བསྙེན་པ་རྫོགས་པ་ཡིས། །བསྲུང་བ་ལ་སོགས་གཞན་དག་ལ། །དེ་ལྟར་བཟླས་ན་མཆོག་ཏུ་བསྟན། །ཉི་ཤུ་རྩ་གཅིག་ཙམ་བཟླས་ཀྱང་། །སྔགས་ཀྱི་ནུས་པ་མཐུ་རྣམས་ཀྱིས། །བསྲུང་
དང་བསྐྱབ་པ་འགྲུབ་པར་གསུངས། །ལྷ་ཡི་འཁོར་ལོ་འདི་ཉིད་ལ། །བརྟེན་ན་ཆོ་ག་གཞན་དག་ནི། །ཐམས་ཅད་ཀུན་ལ་འགྲུབ་པར་གསུངས། །དེ་ལྟར་འཁོར་ལོའི་མན་ངག་སོགས། །གབ་པའི་དོན་དང་སྦས་པའི་དོན། །དགོངས་པའི་དོན་དང་དགྲ་བཟློག་དོན། །རྣམ་བརྒྱུད་འོངས་པ་ལ་
བརྟེན་ནས། །མན་ངག་ཅན་གྱིས་ཤེས་པར་བྱའོ། །རྣལ་འབྱོར་བསྡུས་པའི་དོན་ཆེད་དུ། །རང་གི་ལྷག་པའི་ལྷར་གྱུར་རམ། །ལས་རྣམས་གཞན་ལ་འཇུག་འདོད་པས། །བཅུ་བདུན་ལྷ་ཡི་དཀྱིལ་འཁོར་ལས། །བཅུ་གསུམ་དག་ཏུ་བསྡུ་བ་དང་། །དེ་ལ་དགུ་རུ་བསྡུ་བ་དང་། །ལྔ་རུ་ཡང་ནི་

49-1-320b

བསྡུ་བར་བྱ། །གཉིས་སུ་བསྡུ་བ་བཅུ་དྲུག་ཚོགས། །ཡང་ན་རྒྱན་ཅིག་རྣལ་འབྱོར་གྱིས། །བཅུ་བདུན་དུ་ཡང་ཤེས་པར་བྱ། །དེ་ལྟར་བསྙེན་པ་སྔོན་སོང་བས། །ཕན་གདགས་པ་དང་ཚར་བཅད་པའོ། །ལས་དང་སྒྲུབ་པ་ཐམས་ཅད་ལ། །ངེས་པར་འཇུག་པར་ཤེས་པར་བྱའོ། །སྦྱོར་
བའི་ཆ་རྐྱེན་གཞན་དག་ཀྱང་། །དུས་སྐབས་སྦྱར་ཏེ་ཤེས་པར་བྱ། །དེ་ལྟར་ཐེ་ཚོམ་མེད་གྱུར་ན། །མཁའ་འགྲོ་མ་ཡི་རྟགས་སྟོན་པས། །དེ་ལ་སོགས་པའི་ལས་རྣམས་ནི། །བསྒྲིམས་ཏེ་ཤེས་པར་མ་བྱས་ན། །རྣལ་འབྱོར་པ་ནི་བརླག་པར་འགྱུར། །དེ་བས་མཁས་པས་ནན་ཏན་དུ། །
སྔགས་ཀྱི་ལྟ་བ་སྤྱོད་པ་ནི། །བླ་མ་མཁས་ལ་མཉན་པར་གྱིས། །མི་མཁས་ཚུལ་འཆོས་གཡོན་ཅན་གྱིས། །གཉི་ག་བརླག་སྟེ་དམྱལ་བར་ལྷུང་། །མཁས་པ་རྣ་བརྒྱུད་ཐོས་པ་ནི། །འདི་དང་ཕ་རོལ་གཉིས་སུ་ཡང་། །བདག་དང་གཞན་ནི་གཉི་ག་ཡང་། །འབྲས་བུ་བཟང་པོ་ངེས་པར་
འབྱིན། །དེ་བས་བླ་མ་མཁས་པ་ནི། །དང་པོ་ཉིད་དུ་བཙལ་བར་བྱ། །མན་ངག་ཅན་ནི་རྙེད་ནས་ཀྱང་། །ཚུལ་འཆོས་གཡོན་ཅན་ཕྱིར་འབྲེང་ན། །ངལ་བ་དོན་མེད་འབྲས་བུ་མེད། །ལས་ངན་དུས་ཀྱི་ཐ་མ་ལ། །གང་ཟག་འདོད་པའི་དབང་གིས་ནི། །ལྟ་སྤྱོད་སྣ་ཚོགས་སྟོན་པ་
འབྱུང་། །གསང་སྔགས་དངོས་གྲུབ་མ་ཐོབ་པར། །སྒྲ་དང་མཚན་མ་ལ་བརྟེན་ནས། །ང་རྒྱལ་འདོད་པའི་དབང་གྱུར་ནས། །གསང་སྔགས་འཁོར་ལོ་རྩོམ་པ་འབྱུང་། །དེ་ནས་ཡང་དག་དོན་མི་རྙེད། །ལ་ལ་མུ་སྟེགས་དག་དང་བསྲེ། །དེས་ནི་དམྱལ་བའི་གནས་སུ་ཁྲིད། །གསང་
སྔགས་འཁོར་ལོ་འདི་དག་ལ། །དེ་ལྟའི་སྤྱོད་པ་མ་བྱུང་ཡང་། །མཐུ་རྣམས་ཇེ་ཆུང་ཇེ་ཆུང་འབྱུང་། །ནད་དང་མུ་གེ་ལ་སོགས་པ། །སྣ་ཚོགས་དག་ནི་འབྱུང་བར་འགྱུར། །ལས་ངན་དུས་ཀྱི་ཐ་མ་ལ། །སློབ་དཔོན་སྐུ་ལ་བདོ་བ་དང་། །བསྟན་པ་འཇིག་སོགས་འབྱུང་འགྱུར་
བས། །དེ་ལ་བཟོད་པ་མི་བསྒོམ་སྟེ། །གསང་སྔགས་འཁྲུལ་འཁོར་བསྐོར་བར་བྱ། །དེ་ལས་གཞན་དུ་བྱས་གྱུར་ན། །དམ་ཚིག་ཉམས་ཏེ་དམྱལ་བར་འགྲོ། །དཔལ་ལྡན་རྡོ་རྗེ་མཐུ་སྟོབས་ཅན། །དུས་གསུམ་བདེ་གཤེགས་ཐམས་ཅད་ཀྱིས། །རིག་སྔགས་གསང་

49-1-321a

སྔགས་བདག་པོ་རུ། །དབང་བསྐུར་མངའ་གསོལ་མཛད་ནས་ནི། །གསང་སྔགས་འཁོར་ལོ་མཐའ་དག་ནི། །ཁྱོད་ཀྱིས་བསྡུས་ལ་ཁྱོད་ཀྱིས་བསྐོར། །བདེ་གཤེགས་རྣམས་ཀྱི་བཀའ་ཡང་བསྒོ། །འཁོར་ལོ་རྒྱས་པར་བསྐོར་ནས་ཀྱང་། །དེ་འོག་རང་གི་འཁོར་
ལོ་ནི། །རྩོད་པ་རྒྱས་པའི་དུས་དག་ཏུ། །བསྐོར་ན་ལས་རྣམས་འགྲུབ་པ་དང་། །དེ་ལས་གུས་པ་མང་འགྱུར་བས། །དེ་ཡི་དུས་སུ་བསྟན་པར་བྱ། །རྒྱལ་བ་ཉིད་ཀྱིས་དེ་སྐད་གསུང་། །དེ་བཞིན་བདག་ནི་རྗེས་མཐུན་པས། །འདི་ལ་མོས་པའི་རྣལ་འབྱོར་ནི། །ཕྱོགས་རྣམས་ཀུན་གྱིས་
གསོལ་གདབ་དང་། །བདག་རང་བསོད་ནམས་བསགས་པའི་ཕྱིར། །འདི་བསྟན་པ་ཡི་སེམས་པ་སྐྱེས། །བརྩོན་འགྲུས་དག་པའི་སྒོ་ནས་ནི། །ལྷ་རྣམས་སྒྲུབ་ཅིང་གསོལ་གདབ་པས། །གསང་སྔགས་དོན་དང་མཐུན་པ་ཡིས། །སེམས་པ་སྐྱེ་བ་དེ་ཉིད་སྲུང་། །དཔེར་ན་ཉི་མའི་
འོད་ཟེར་ནི། །བྱེ་བ་བརྒྱ་ཕྲག་མང་པོ་ལས། །གཟི་བརྗིད་ཁང་པའི་ནང་དུ་ཤར། །དེ་བཞིན་འོད་ཟེར་ཕྲ་མོ་གཅིག །བདག་བློ་ཡི་ནི་མུན་པར་སྣང་། །སྣང་བ་དེ་ཡང་བདག་གིས་ནི། །གཞན་རྣམས་ཀུན་ལ་བསྟན་པར་བྱ། །མན་ངག་འདི་བཀོད་ཆོ་ག་ཡིས། །བདག་དང་
སེམས་ཅན་ཐམས་ཅད་ཀུན། །བསོད་ནམས་འདི་ལ་བརྟེན་ནས་ནི། །ཐམས་ཅད་བྱང་ཆུབ་ཐོབ་པར་ཤོག །སློབ་དཔོན་བྷ་བས་མཛད་པའི་སྒྲུབ་ཐབས་ཆེན་པོ་རྫོགས་སོ།།      །།༄༅༅། །རྒྱ་གར་སྐད་དུ། མ་ཧཱ་ཡཀྵ་སེ་ན་པ་ཏི་ནཱི་ལཱཾ་བ་ར་དྷ་ར་བཛྲ་པཱ་ཎི་སཱ་
དྷ་ནཾ། བོད་སྐད་དུ། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་ཐབས། དཀོན་མཆོག་གསུམ་ལ་ཕྱག་འཚལ་ལོ། །རྡོ་རྗེ་མཁའ་འགྲོའི་རྒྱུད་དག་ལ། །བརྟེན་ནས་ནང་གི་སྒྲུབ་ཐབས་འདི། །བདག་གིས་དྲན་ཕྱིར་བཤད་པར་བྱ། །ལྷ་ཡི་རྣལ་འབྱོར་ཡུད་ཙམ་
བསམ། །རང་གི་སྙིང་གར་ཟླ་དཀྱིལ་བསམ། །དེ་ཡི་སྟེང་དུ་ཧཱུཾ་ཡིག་བསམ། །ཧཱུཾ་ལས་འོད་ཟེར་འཕྲོས་པ་ལས། །ཕྱི་ནང་གསལ་ནས་འོད་ཟེར་འཕྲོས། །བླ་མ་དང་ནི་གོས་སྔོན་ཅན། །དཀོན་མཆོག་ལ་སོགས་སྤྱན་དྲངས་ནས། །ཕྱག་འཚལ་མཆོད་ཅིང་བཤགས་པ་དང་། །རྗེས་སུ་

49-1-321b

ཡི་རང་བསྐུལ་ཞིང་གསོལ་བ་གདབ། །སྐྱབས་གསོལ་ལུས་དབུལ་དགེ་རྩ་བསྡོ། །ཚད་མེད་བཞི་ཡང་བསྒོམ་པར་བྱ། །དེ་ནས་སྟོང་པའི་ཏིང་འཛིན་བསྒོམས། །དེ་ལ་འོད་ཕུང་ཚུལ་དུ་བདག་རང་ཉིད། །དེ་ཡི་ནང་ན་ཧཱུཾ་གནས་ལ། །དེ་ལས་ཙཾ་འཕྲོས་འཁོར་ལོར་གྱུར། །ལྟེ་བར་ཉིད་
བསམས་ཧཱུཾ་དེ་ཉིད། །དེ་ལས་གནོད་མཛེས་རྒྱལ་པོར་གྱུར། །དེ་ཡི་ཧཱུཾ་གི་འཕྲོ་འདུ་ཡིས། །ཁྲོ་བོ་ཆེན་པོ་བཅུ་རུ་གྱུར། །ཧཱུཾ་བཞིའི་གསང་སྔགས་བརྗོད་པ་ཡིས། །ཁྲོ་བཅུའི་སྤྲུལ་པས་གདུག་པ་བཀུག །སྐུ་གསུང་ཐུགས་ཀྱི་ཕུར་བུས་གདབ། །བཏུལ་ཞིང་སྦྱངས་ནས་ནམ་མཁར་གྱུར། །དེ་ནས་
ཧཱུཾ་གི་འཕྲོ་འདུ་ཡིས། །རྡོ་རྗེ་གུར་དང་ར་བ་དང་། །དྲ་བ་ཉིད་དུ་གྱུར་པའོ། །ཧཱུཾ་གི་འཕྲོ་འདུས་སླར་ལ་ཞུ། །སྟོང་པ་ཉིད་ལས་འོད་སྤུང་བྱུང་། །དེ་ལས་ཉི་ཟླ་ཁ་སྦྱར་གྱུར། །ཨཱ་ལི་ཀཱ་ལིས་ཉི་ཟླ་བརྒྱན། །དབུས་སུ་ཨ་དང་ཧཱུཾ་སྦྱར་ཏེ། །ཁ་དོག་དཀར་དམར་ཉིད་དུ་བལྟ། །འོད་ཟེར་དཀར་དམར་འཕྲོ་འདུ་
ལས། །ཞུ་བས་རྡོ་རྗེ་པདྨར་གྱུར། །པད་སྟེང་རྡོ་རྗེ་རྐང་ནུབ་ཙམ། །ལྟེ་བ་གཉིས་ལ་སྙིང་པོས་བསྐོར། །དེ་གཉིས་ལས་ནི་ཐུགས་དང་གསུང་། །གཉི་གས་སྐུ་བསྡུས་བྱིན་གྱིས་བརླབ། །དེ་ཉིད་འོད་དུ་ཞུ་བ་ལས། །རྡོ་རྗེ་ལས་ནི་ཁྲོ་བོར་གྱུར། །པདྨ་ལས་ནི་ཁྲོ་མོར་གྱུར། །ཁྲོ་བོ་རྡོ་རྗེ་གོས་སྔོན་ཅན། །
སྐུ་མདོག་མཐིང་ནག་ཞལ་གཅིག་པ། །ཕྱག་གཉིས་རྡོ་རྗེ་དྲིལ་བུ་བསྣམས། །མཆེ་བ་གཙིགས་པས་འདོད་དགུར་གྱུར། །ཞབས་གཉིས་བརྐྱང་བསྐུམ་འཁྲིལ་པའི་ཚུལ། །གཡོན་དུ་རྡོ་རྗེ་ཁྲོ་མོ་ནི། །སྐུ་མདོག་ལྗང་དམར་ཞལ་གཅིག་མ། །ཕྱག་གཡས་རྡོ་རྗེ་གྲི་གུག་གཙོ་ལ་འཁྱུད། །གཡོན་
པ་བྷན་དམར་གཙོ་ལ་སྟོབ། །གཉིས་མེད་འཁྲིལ་པའི་ཚུལ་བསྒོམས་ནས། །ཡེ་ཤེས་སེམས་དཔའ་སྤྱན་དྲངས་ཏེ། །ཕྱི་ནང་བདུད་རྩི་མཆོད་ནས་བསྟིམ། །འོད་ཟེར་འཕྲོ་འདུ་བྱིན་གྱིས་བརླབ། །དེ་བཞིན་ཁྲོ་ཆུང་ལུས་བྱིན་བརླབ། །དབང་བསྐུར་བས་ནི་མི་བསྐྱོད་འགྱུར། །དེ་ལྟར་བསྒོམས་ནས་
བཟླས་པ་བྱ། །དེ་སྟེང་ཡེ་ཤེས་སེམས་དཔའ་ཡི། །མཚན་མ་ལ་སོགས་བསྒོམས་ནས་སུ། །ཐུགས་ཀར་འཁོར་རམ་ཡུལ་འཁོར་བ། །འོད་ཟེར་ལ་ནི་ཡིག་འབྲུ་བསྐྱོན། །མ་གསལ་བར་དུ་བསྒོམ་པར་བྱ། །དེ་ལྟར་རབ་འབྲིང་ཐ་མ་ཡིས། །འབུམ་མམ་ཉིས་འབུམ་སུམ་འབུམ་

49-1-322a

འགྲུབ། །ཐེ་ཚོམ་མེད་ན་དངོས་གྲུབ་འགྲུབ། །དམ་ཚིག་ཉམས་སམ་སྡིག་ཆེ་བས། །སྦྱིན་སྲེག་ལ་སོགས་མང་དུ་བྱ། །མཚན་མ་གསུམ་མམ་ནུས་པ་བརྟག །དེ་ལྟར་བྱུང་ན་སྒྲུབ་པ་བརྩམ། །སྔོན་དུ་བསྙེན་པའི་ཆོ་གའོ། །སྒྲུབ་པའི་རིམ་པ་བསྟན་པ་ནི། །མཁའ་
འགྲོ་འདུ་བའི་གནས་ཕྱིན་ལ། །དཀྱིལ་འཁོར་གྲུ་གསུམ་ནག་པོར་བྱ། །རྡོ་རྗེ་གྲི་གུག་ནང་དུ་སྟེ། །བར་དུ་མེ་རི་གཏང་བར་བྱ། །གཞུ་དང་དགྲ་སྟ་མདུང་དང་གསུམ། །མེ་རིའི་ཟུར་ནས་གཏང་བར་བྱ། །ཚུབ་མ་དུར་ཁྲོད་སོལ་བ་དང་། །བདུད་རྩི་བག་ཟན་གཟུགས་བརྙན་བྱ། །སྙིང་གར་
གྲུ་གསུམ་གཟུགས་བརྙན་གཞུག །ཁ་བཅད་སེང་ལྡེང་ཕུར་ལ་བཏོད། །མཚན་ལྡན་ཀ་པཱ་ལ་རུ་ནི། །བདུད་རྩི་ལྔ་དང་ཤ་ལྔས་དགང་། །དེ་ནི་གོས་སྔོན་ཉིད་ལ་མཆོད། །ལྕགས་ཀྱི་གྲུབ་གསུམ་ནང་དུ་ནི། །བདུད་རྩི་ཤ་ལྔ་ཁྲག་གསུམ་དགང་། །དེ་ནི་ནག་པོའི་གཏོར་གཏའོ། །
རྣེལ་གྲེའི་སྣོད་དུ་དུག་གཏོར་བསགས་། །ཕྱེ་མ་གསུམ་དང་ཡུངས་ཀར་གདབ། །སློབ་དཔོན་སློབ་མ་གཉིས་ཀ་ཡང་། །གོས་སྔོན་གོས་ནག་རྒྱན་ཆ་བགོ། །རཀྵ་རུས་པའི་ཕྲེང་བ་བགྲང་། །ནུབ་དང་ལྷོ་རུ་ཁ་བལྟས་ཏེ། །བསྐྱེད་པའི་རིམ་པ་ཚུལ་བཞིན་བསྒོམ། །ཐུན་མོང་སྔགས་དང་ཁྱད་
པར་སྔགས། །དགྲའམ་འབྱུང་པོ་ཀླུ་རྣམས་ལ། །བཟླས་པས་གསང་བའི་རིམ་པ་བརྩམ། །སྙིང་གའི་མཚན་མ་ལ་སོགས་གསལ། །ལྕེ་ནི་ཧཱུཾ་གི་རྡོ་རྗེར་བསྒྱུར། །འོད་ཟེར་དཀར་དམར་འཕྲོས་པ་ལས། །དེ་ལ་ཁྲོ་ཚོགས་བྱུང་བས་དགུག །ཡང་ན་མགོན་པོ་བསྐུལ་བས་བསམ། །ཁྲི་ཡི་
བར་དུ་བཟླས་ནས་ནི། །ཐུན་བར་དུ་ནི་ཕྱེ་མ་གསུམ། །མགོན་པོས་ལས་ཀྱི་གཏོར་མར་གདབ། །ཡུངས་ཀར་གོས་སྔོན་ཅན་གྱིས་སོ། །ཕྱེ་མ་དུག་ནག་འོད་ཟེར་དགང་། །ཡུངས་ཀར་ཁྲོ་ཆུང་ཉིད་དུ་སྤྲོ། །རྟགས་བྱུང་ནས་ནི་གཟུགས་བརྙན་གཞུག །དེ་ནས་སྒྲུབ་ཁང་ཐེམ་རྩ་རུ། །
གྲུ་གསུམ་ནག་པོའི་བྲུབ་ཁུང་དུ། །དེ་ཉིད་བཅུག་ལ་ཁ་བཅད་རི་རབ་བྲི། །དེ་སྟེང་མནན་ཞིང་སྟང་སྟབས་བྱ། །དེ་ནི་མནན་པའི་སྦྱོར་བའོ། །ཕུར་བུས་གདབ་ཅིང་གྲི་གུག་གཏུབ། །དེ་ནས་གྲུ་གསུམ་གཏོར་མར་དབུལ། །ནག་པོ་ཆེན་པོ་ཉིད་ལ་བསྟབས། །དྲག་སྔགས་བཟླས་པའི་གཏོར་

49-1-322b

མ་ཡི། །གསང་བའི་མན་ངག་ཤེས་པར་བྱའོ། །ཡང་ན་སྦྱིན་སྲེག་ཉིད་ཀྱིས་བྱ། །དེ་རྣམས་གསད་པའི་སྦྱོར་བའོ། །པདྨ་འདབ་བརྒྱད་བསྐྱེད་པ་ཡི། །ལྟེ་བར་གཙོ་བོ་བསྐྱེད་ནས་ནི། །ཀླུ་ཆེན་བརྒྱད་པོ་འདབ་མར་བསྐྱེད། །རིན་ཆེན་སྣོད་དུ་གཏོར་མ་བཤམ། །ཆུ་གཙང་སྨན་ལ་སོགས་
པ་དང་། །ཁྱད་པར་ཀླུ་སྨན་སྣ་ཚོགས་དང་། །དཀར་གསུམ་མངར་གསུམ་རྣམས་ཀྱིས་བྱ། །སྦྱང་ཞིང་བྱིན་གྱིས་བརླབ་སོགས་བྱ། །ཀླུ་ལ་བྱིན་པས་ཞེ་སྡང་ཞི། །ལྷག་མ་འཁོར་ལ་བྱིན་པ་ཡིས། །གནོད་པ་རྣམས་ནི་ཞི་བར་འགྱུར། །སྔགས་བཟླས་འོད་ཟེར་ཕོག་པ་ཡིས། །གཙོ་
བོའི་དམ་ཚིག་རྗེས་དྲན་པས། །འཁོར་རྣམས་ཞེ་སྡང་ཞི་བར་འགྱུར། །ཡང་ན་ཞི་བའི་སྦྱིན་སྲེག་བྱ། །བསྐྲད་དང་བཅིང་དང་དགུག་པ་ཡིས། །དེ་ལ་སོགས་པའི་སྦྱོར་བ་ནི། །སྦྱོར་ཀ་ཆེན་པོར་ཤེས་པར་བྱ། །འཁོར་ལོ་སེར་པོའི་ལྟེ་བར་གཙོ། །མདུན་དུ་རྒྱལ་པོ་བསྐྱེད་པར་བྱ། །
དེ་ཡི་གཡས་སུ་ནོར་ལྷ་ནི། །སྐུ་མདོག་དཀར་པོ་འཛུམ་བག་ཅན། །ནོར་བུའི་སྒྲོམ་ནི་གཡས་གཡོན་བསྣམས། །མཆོད་ཅིང་བསྟོད་པ་གསང་སྔགས་བཟླས། །གཟུགས་བརྙན་འདི་ལ་རིན་ཆེན་བརྟེན། །ཁ་དོག་ལྔ་དང་གསེར་གྱིས་མཚོན། །ཁ་དོག་སེར་པོའི་བཟླས་ཐེམས་
ནས། །ཅི་འདོད་པ་ཡི་ནོར་རྣམས་སྟེར། །དེ་ནི་ཐུན་མོང་དངོས་གྲུབ་པོ། །བདུད་རྩི་རྩ་བ་ལྔ་བཙལ་ལ། །བདག་ཉིད་ལྷ་ཡི་རྣལ་འབྱོར་བྱ། །དཀར་གསུམ་མངར་གསུམ་ཉིད་ལ་ནི། །སྔགས་བཟླས་རི་ལུ་བྱས་ཏེ་བཟའ། །ཟས་དང་སྨན་ནི་སྲང་ལ་བརྗེ། །བརྗེས་ཟིན་ཞིག་
གསུམ་འབྲས་བུ་འབྱུང་། །དེ་གསུམ་སྐྱེ་བ་བདུན་པ་དང་། །ཡུལ་གྱི་ཆ་བསྲེས་སྨན་རྣམས་སྦྱར། །དེ་སྒྲུབ་འོད་ཟེར་བཏུལ་ཞིང་སྦྱང་། །རྟགས་བྱུང་ནས་ནི་བཟའ་ཞིང་བྱུག །དེ་ཡིས་ཐུན་མོང་དངོས་གྲུབ་འགྲུབ། །མཆོག་གི་ཡང་ནི་གྲོགས་སུ་འགྱུར། །མཆོག་གི་དངོས་གྲུབ་
བསྒྲུབ་པ་ཡང་། །ཐུགས་ཀ་ཡི་ནི་དཀྱིལ་འཁོར་དུ། །རྩ་རྒྱུད་འདབ་མ་བརྒྱད་དུ་བསམ། །དེ་དཀྱིལ་རྩ་ནི་རྟ་རྔའི་ཚད། །དེ་ཡི་ནང་དུ་དབུགས་ཀྱི་ལྷ། །ཁ་དོག་ལྔ་དང་ལྡན་པའོ། །དེ་དཀྱིལ་ཐིག་ལེ་བྱང་ཆུབ་སེམས། །དེ་ལ་ལྟ་ཞིང་བསྒོམ་པ་ནི། །རྟགས་ལྔའི་མཐར་ནི་སྟོང་ཉིད་

49-1-323a

འགྱུར། །དེ་ཉིད་སྤྲོ་ཞིང་བསྡུ་བ་དང་། །དགུག་ཅིང་བསྐྱིལ་བའི་རིམ་པའམ། །མནན་ཅིང་བཟློག་པའི་མན་ངག་གིས། །རིམ་གྱིས་ཡེ་ཤེས་སྐྱེ་བར་འགྱུར། །དེ་ནས་ཕྱག་རྒྱའི་དངོས་གྲུབ་འཐོབ། །ནང་སྒྲུབ་རིམ་པ་འདི་ཡིས་ནི། །བདག་དང་མཐའ་ཡས་སེམས་
ཅན་དང་། །འདི་ལ་བརྟེན་པའི་རྣལ་འབྱོར་པ། །བླ་མེད་བྱང་ཆུབ་ཐོབ་པར་ཤོག །གནོད་སྦྱིན་གྱི་སྡེ་དཔོན་ཆེན་པོ་ཕྱག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་ཐབས། སློབ་དཔོན་བྷ་བས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། མ་ཧཱ་ཡཀྵ་སེ་ནཱ་པ་ཏ་ཡེ་
ནཱི་ལཱཾ་བ་ར་དྷ་ར་བཛྲ་པཱ་ཎི་མཎྜལ་བི་དྷི་ནཱ་མ། བོད་སྐད་དུ། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་གྱི་དཀྱིལ་འཁོར་གྱི་ཆོ་ག་ཞེས་བྱ་བ། བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ལོ། །བདུད་རྣམས་ཐམས་ཅད་ཚར་གཅོད་པའི། །མཐུ་སྟོབས་ཅན་ལ་ཕྱག་འཚལ་
ནས། །ཆགས་ལ་མོས་པར་གྱུར་པ་ཡི། །རྣལ་འབྱོར་ལམ་པའི་དོན་ཆེད་དུ། །རྒྱུད་རྣམས་ཀུན་དང་མི་འགལ་བའི། །དཀྱིལ་འཁོར་ཆོ་ག་བཤད་པར་བྱ། །སློབ་དཔོན་མཚན་ཉིད་ལྡན་པ་ཡིས། །སྔོན་དུ་བསྙེན་པ་རྫོགས་བྱས་ཏེ། །དེ་ནས་དཀྱིལ་འཁོར་བྲི་བར་བྱ། །ཡིད་དུ་འོང་བའི་
གནས་དག་ཏུ། །དྲི་བཟང་ཙནྡན་སྤོས་ཀྱིས་བྱུགས། །དྲི་ཞིམ་མེ་ཏོག་མཆོད་བཀྲམ་ནས། །ལྷོ་རུ་ཁ་བལྟས་རོལ་པའི་འདུག་སྟངས་བྱ། །ཡང་ན་བསྙེན་པ་ཞི་བའི་ཚུལ་ཡིན་པས། །ཤར་དུ་ཁ་བལྟས་སེམས་དཔའི་སྐྱིལ་ཀྲུང་བཅའ། །འཁོར་བའི་འདམ་དུ་བྱིང་བ་ཡི། །འགྲོ་ལ་
ཕན་དང་སྐྱོབ་པའི་ཕྱིར། །སྙིང་རྗེ་ཆེན་པོས་དམིགས་པར་བྱ། །བསྐྱེད་པའི་རིམ་པའི་ཚུལ་བསྒོམ་བྱ། །དེ་ནས་བཟླས་བརྗོད་ཚུལ་བཞིན་བྱ། །དཀྱིལ་འཁོར་གཙོ་བོའི་འབུམ་དུ་བཟླས། །དེ་ལས་གཞན་པ་ཁྲི་རུ་བཟླས། །མཚན་མ་རྣམ་གསུམ་ཐོབ་པ་ཡིས། །ཡང་ན་བསྙེན་སྦྱོར་
གོམས་པས་ནི། །རྡུལ་ཚོན་དཀྱིལ་འཁོར་བརྩམ་པར་བྱའོ། །སློབ་མ་སྣོད་དང་ལྡན་པ་ཡིས། །དང་པོར་གསོལ་གསུམ་བཏབ་ནས་ནི། །བསྙེན་རྫོགས་གཏིང་ལ་གདབ་པར་བྱ། །དང་པོར་ས་ནི་བརྟག་པར་བྱ། །ཕྱོགས་གཅད་དབྱིབས་ལྡན་སྐྱོན་བྲལ་བའི། །མཁས་པས་ཅི་

49-1-323b

ནུས་བརྟག་པར་བྱ། །མཎྜལ་ལགས་བྱས་མེ་ཏོག་དགྲམ། །ལྷ་ཡི་གནས་དང་གདན་དུ་བསམ། །ལྷ་བསྐྱེད་ལ་སོགས་བྱས་ནས་ནི། །མཆོད་དང་བསྟོད་པ་ཚུལ་བཞིན་བྱ། །དགོངས་ཤིག་དུས་གསུམ་མགོན་པོ་རྣམས། །སངས་རྒྱས་ཐམས་ཅད་མཆོད་པ་དང་། །སློབ་མ་རྣམས་
ལ་སྨན་སླད་དུ། །བདག་མིང་འདི་ཞེས་བགྱི་བ་ཡིས། །དཔལ་ལྡན་རྡོ་རྗེ་འཛིན་པ་ཡི་། །དཀྱིལ་འཁོར་དམ་པ་འདྲི་བར་འཚལ། །རྒྱལ་བ་སྲས་དང་བཅས་རྣམས་ཀྱིས། །བདག་ལ་བྱིན་གྱིས་བརླབ་ཏུ་གསོལ། །ཞེས་ལན་གསུམ་དུ་བརྗོད་དེ་གསོལ་བ་གདབ་པར་བྱའོ། །དེ་ནས་ཆོས་
སྐྱོང་བའི་སྲུང་མ་རྣམས་ལ། །མཆོད་དང་གཏོར་མ་བྱིན་ནས་ནི། །བསྟོད་ཅིང་གསོལ་བ་གདབ་པར་བྱ། །དེ་ནས་ལས་ཐམས་ཅད་པའི་ཐབ་ཁུང་དུ་སྦྱིན་སྲེག་གིས་སྦྱར་བར་བྱའོ། །སྦྱིན་སྲེག་གྲུབ་པར་མ་གྱུར་ན། །ལས་ཐམས་ཅད་པའི་གསང་སྔགས་ཆུས། །བགེགས་ནི་ཉེ་བར་ཞི་
བར་བྱའོ། །དེ་ནས་ཇི་ལྟར་བརྟགས་པའི་དབུས་སུ། བྱིན་རླབས་རྡོ་རྗེས་ཁྲུ་གང་བརྐོ། །སྐྱོན་རྣམས་སྤངས་ནས་ས་རིམ་བཅལ། །འཐས་པར་བཅགས་ལ་བྱུག་པར་བྱ། །སྔགས་དང་ཕྱག་རྒྱས་བྱིན་རླབས་པའི། །རི་རབ་གཞལ་ཡས་བསྐྱེད་ནས་ནི། །ལྷ་བསྐྱེད་ལ་སོགས་
རྫོགས་བྱས་ལ། །དེ་ནས་སྐད་ཅིག་མྱུར་དུ་ཁྲོས། །འཁོར་རྣམས་ཀྱིས་ནི་གསོལ་བ་གདབ། །ཁྲོ་བོའི་མིག་དང་རྐང་སོགས་བྱིན་གྱིས་བརླབ་། །རྡོ་རྗེ་དྲིལ་བུ་གཉིས་བཟུང་ནས། །སྟང་སྟབས་སྦྱོར་བ་ལ་སོགས་ཀྱིས། །བགེགས་རྣམས་མ་ལུས་ཚར་བཅད་དོ། །དེ་ནས་ས་ཡི་ལྷ་མོ་ལ། །
མཆོད་བསྟོད་གསོལ་བ་བཏབ་པ་ཡིས། །དཔང་པོ་ཕྱིར་ནི་སྟ་གོན་གནས། །བདུད་རྩི་ཐིག་ལེ་ལ་སོགས་བྱ། །ལྷ་རྣམས་ཆོ་ག་ལ་སོགས་རྫོགས། །དེ་ནས་གསོལ་བ་གདབ་པར་བྱ། །བདུག་སྤོས་ལག་ཐོགས་པུས་བཙུགས་ལ། །བཅོམ་ལྡན་རྡོ་རྗེ་འཛིན་པ་མཆོག །རིག་སྔགས་
རྒྱལ་ལ་ཕྱག་འཚལ་ལོ། །ཐུགས་རྗེའི་བདག་ཉིད་ཅན་རྣམས་ཀྱིས། །དཀྱིལ་འཁོར་དག་ནི་བྲི་བར་བྱ། །སློབ་མ་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །བཅོམ་ལྡན་བདག་ནི་གུས་པ་ལ། །དེ་ནི་གནང་བ་མཛད་པར་རིགས། །སངས་རྒྱས་འགྲོ་དོན་བྱ་དོན་

49-1-324a

གསོལ། །བྱང་ཆུབ་སེམས་དཔའ་གསང་སྔགས་ལྷ། །འཇིག་རྟེན་སྐྱོང་དང་མཐུ་ཆེན་དང་། །གང་ཡང་རྡོ་རྗེའི་སྤྱན་མངའ་བའི། །སེམས་ཅན་བསྟན་ལ་དགའ་བ་རྣམས། །བདག་མིང་འདི་ཞེས་བགྱི་བ་ཡིས། །རྡོ་རྗེ་འཛིན་གྱི་དཀྱིལ་འཁོར་དུ། །ཡོ་བྱད་ཅི་
ཡོད་པས་འདྲི་ན། །དེང་བདག་སློབ་མར་བཅས་པ་ལ། །ཐུགས་བརྩེ་བར་ནི་དགོངས་སུ་གསོལ། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབ་པར་མཛད་དུ་གསོལ། །དེ་ལྟར་ལན་གསུམ་གསོལ་བཏབ་ནས། །ར་བ་དྲ་བས་མཚམས་བྱའོ། །གསེར་ལ་སོགས་
པའི་བུམ་པ་ཡི། །ལྟོ་བ་ཆེ་བ་མགྲིན་རིང་བ། །སྐྱོན་སྤངས་ཉེས་པ་བྲལ་བ་དང་། །ཡོན་ཏན་ལ་སོགས་ལྷ་གྲངས་བསྟུན། །རྫས་དང་ཁ་རྒྱན་མགུལ་ཆིངས་ལྡན། །མཚན་མ་རྫོགས་ནས་བྱིན་གྱིས་བརླབ། །རྣམ་རྒྱལ་ལས་ཀྱི་བུམ་པ་ལ། །ཁྱད་པར་ཆོ་ག་ལ་སོགས་བྱ། །
དེ་ནས་སློབ་མ་བློ་ལྡན་ལ། །སློབ་དཔོན་གྱིས་ནི་ཆོ་ག་བྱ། །སློབ་མ་སྒོ་ཡི་དྲུང་གནས་ཏེ། །དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ནི་སྩལ་དུ་
གསོལ། །བྱང་ཆུབ་སེམས་ནི་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ནི་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ཉིད་འཇུག་པར་འཚལ། །དེ་ལྟར་ལན་གསུམ་གསོལ་བཏབ་ནས། །སློབ་དཔོན་གཙོ་བོའི་
ཏིང་འཛིན་ཞུགས། །ཚིགས་བཅད་འདི་ནི་གསང་སྔགས་སྦྱིན། །བུ་ཚུར་ཐེག་པ་ཆེན་པོ་ཡིས། །གསང་སྔགས་ཚུལ་སྤྱོད་ཆོ་ག་འདི། །ཁྱོད་ལ་ཡང་དག་བསྟན་པར་བྱ། །ཁྱོད་ནི་ཚུལ་ཆེན་སྣོད་ཡིན་ཏེ། །དུས་གསུམ་འབྱུང་བའི་སངས་རྒྱས་རྣམས། །སྐུ་གསུང་
ཐུགས་ཀྱི་རྡོ་རྗེ་དང་། །རྡོ་རྗེ་གསང་སྔགས་རབ་བསྒོམ་པའི། །དཔའ་བོ་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། །གསང་སྔགས་སྦྱོར་བ་མཉམ་མེད་དེ། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་ཏུ་མི་བཟད་པའི། །དཔུང་ཆེན་དག་ཀྱང་དེ་ཡིས་

49-1-324b

བཅོམ། །འཇིག་རྟེན་རྗེས་འཇུག་པར་རྟོགས་ནས། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་སྨྲས་སོ། །དེ་ནས། སྐྱབས་འགྲོ་སྡིག་བཤགས་ལ་སོགས་ཀུན། །ཕྱག་རྒྱའི་དཀྱིལ་འཁོར་ཉིད་དུ་ཤེས་པར་བྱ། །
སྲོག་ཆགས་རྣམས་ནི་གསད་མི་བྱ། །མ་བྱིན་པར་ཡང་མི་བླང་ངོ་། །འདོད་པ་དག་ཀྱང་སྤྱད་མི་བྱ། །བརྫུན་དུ་སྨྲ་བར་མི་བྱའོ། །ཉེས་པ་ཀུན་གྱི་རྩ་བ་ཡི། །ཆང་ནི་མྱོས་པར་བཏུང་མ་ཡིན། །སེམས་ཅན་གདུལ་བྱ་མ་གཏོགས་པ། །བྱ་བ་མ་ཡིན་ཐམས་ཅད་སྤང་། །དམ་པ་ཉེ་བར་བསྙེན་
བྱ་ཞིང་། །རྣལ་འབྱོར་ཅན་དུ་བསྙེན་བཀུར་བྱ། །ལུས་ཀྱི་ལས་ནི་རྣམ་གསུམ་དང་། །ངག་གི་ལས་ནི་རྣམ་པ་བཞི། །ཡིད་ཀྱི་ལས་ནི་རྣམ་གསུམ་དང་། །ཅི་ནུས་པ་རུ་རྗེས་སུ་བསྲུང་། །སེམས་ཅན་དོན་ལ་རྒྱབ་མི་ཕྱོགས། །ཐེག་པ་དམན་ལ་འདོད་མི་བྱ། །འཁོར་བ་དག་ཀྱང་སྤང་མི་
བྱ། །རྟག་ཏུ་མྱ་ངན་འདའ་མི་བྱ། །ལྷ་དང་ལྷ་མིན་གསང་བ་པ། །དེ་ལ་བརྙས་པར་མི་བྱ་ཞིང་། །ཕྱག་རྒྱ་བཞོན་པ་མཚོན་ཆ་དང་། །མཚན་མ་འགོམ་པར་མི་བྱའོ། །དེ་ལྟར་དམ་ཚིག་ཕོག་པ་དག །བློ་ལྡན་ཁྱོད་ཀྱིས་རྟག་ཏུ་བསྲུང་། །མདོར་ན་རྩ་བ་ཡན་ལག་གི། །དམ་ཚིག་ཉིན་
མཚན་བགྲང་ཞིང་བསྲུང་། །དེ་ནས་བླ་མས་གསུངས་པ་ཡི། །སྡོམ་པ་ལེགས་པར་གཟུང་བར་བྱ། །ཚུལ་ཁྲིམས་ཞེས་བྱ་སོགས་པ་ནི། །དུས་འདི་ནས་ནི་བཟུང་ནས་ནི། །ཇི་སྲིད་བྱང་ཆུབ་སྙིང་པོའི་བར། །བདག་ནི་རབ་ཏུ་ལྡོག་པར་བགྱི། །དེ་ལྟར་སྡོམ་པ་དང་ལྡན་པའི་སློབ་མ་ལ། སྙིང་
ག་དང་མགྲིན་པ་དང་དཔྲལ་བ་གསུམ་དུ་རྡོ་རྗེ་ཁུ་ཚུར་གྱིས་དྲིའི་ཐིག་ལེ་གསུམ་དུ་བྱ་སྟེ། ཉི་མ་དང་ཟླ་བ་དང་པདྨ་གསུམ་ལ་ཡི་གེ་གསུམ་སོ་སོར་བཀོད་ལ། སྐུ་གསུང་ཐུགས་སུ་བྱིན་གྱིས་བརླབ་ཅིང་ལས་ཐམས་ཅད་པའི་སྔགས་ཀྱིས་བསྲུང་བར་བྱའོ་། །དེ་ནས་མཆོད་པ་བྱ་སྟེ། 
སྤྱི་བོར་མེ་ཏོག་དང་སྤོས་སོ། །མར་མེ་དང་དྲི་ནི་སྙིང་གར་རོ། །ལྷ་བཤོས་མདུན་དུའོ། །དེ་ནས་ཚིག་ནི་འདིས་སུ་སྦྱིན། །དུས་འདི་ནས་ནི་བཟུང་ནས་སུ། །འཁོར་བའི་ཉེས་པས་མ་གོས་པར། །མཆོད་པ་དག་དང་ལྡན་པར་ནི། །དུས་ཀུན་དུ་ནི་བདེ་བར་མནོས། །དེ་ནས་ཚེམས་ཤིང་ལ་

49-1-325a

སོགས་སྦྱིན་པར་བྱ། །འཇིག་རྟེན་དུ་ནི་ཀུན་མཁྱེན་རྣམས། །ཨུ་དུམྺཱ་རའི་མེ་ཏོག་བཞིན། །བརྒྱ་ལམ་ཞེས་བྱ་བ་ལ་སོགས་པའི་ཆོས་བཤད་པར་བྱའོ། །དེ་ནས་ཐིག་བྱིན་གྱིས་བརླབ་པ་ལ་སོགས་པ་ཤེས་པར་བྱའོ། །དེ་ནས་ཐིག་སྐུད་གདབ་པ་ནི། །དཀྱིལ་
འཁོར་སྤྱི་དང་མཐུན་པས་ན། །ཚོན་རྣམས་བྱིན་གྱིས་བརླབས་ནས་ནི། །ཚོན་རྣམས་བཀྱེ་བའི་ལས་བྱའོ། །པདྨ་འདབ་མ་བརྒྱད་དཀྱིལ་དུ། །ཟླ་བ་ཉི་མའི་གདན་སྟེངས་སུ། །གཙོ་བོ་བྲི་བར་བྱ་བ་ཡིན། །འདབ་མ་བརྒྱད་ལ་ལྷ་བརྒྱད་བྲི། །གྲུ་ཆད་བཞི་ལ་ལྷ་མོ་བཞི། །སྒོ་བཞིར་སྒོ་
བ་བཞི་བྲིའོ། །དེ་ནས་རྒྱན་སོགས་བྲི་བར་བྱ། །དེ་འོག་ལྷག་ཆད་བསྐང་བྱའོ། །ནམ་མཁའ་འདེགས་པར་འདོད་པ་དང་། །ཡང་བསྐྱེད་ཡང་སྡུད་བྱེད་པ་གཉིས། །གོང་ལྟར་མོས་པ་འཇུག་པ་ཡིས། །གཙོ་བོ་སྔོན་དུ་འགྲོ་བ་རྫོགས་པ་ཡིན། །འཁོར་རྣམས་སྤྲུལ་པའམ་ཆོ་གས་བསྐྱེད། །
དབུས་སུ་གཙོ་བོ་སྐུ་མདོག་སྔོན་པོ་སྟེ། །ཞལ་གཅིག་ཕྱག་གཡས་རྡོ་རྗེ་བསྣམས། །གཡོན་ནི་གདུལ་བྱའི་སྐབས་དང་སྦྱར། །ཤར་གྱི་པདྨར་རྣམ་པར་རྒྱལ། །སྐུ་མདོག་དམར་པོ་དབུ་གསུམ་པ། །ཕྱག་གཡས་རྡོ་རྗེ་རྩེ་ལྔ་འཛིན། །གཡོན་པས་དགྲ་སྟ་བར་མ་གཉིས། །གུང་
མོ་མཐེ་བོ་ངོས་མདུད་ནས། །གཞན་རྣམས་ཡོངས་སུ་དཔྱང་བ་ཡིན། །དེ་ཉིད་སྙིང་གར་བཟུང་ནས་ནི། །དེ་འོག་ཞགས་པ་རལ་གྲི་བསྣམས། །ལྷོ་ཡི་པདྨར་མགོན་པོ་ནི། །སྐུ་མདོག་ནག་པོ་ཞལ་གཅིག་ཕྱག་གཉིས་པ། །གཡས་གཡོན་ཙནྡན་བིང་ཆེན་ཞགས་པ་བསྣམས། །
ནུབ་ཀྱི་འདབ་མར་ལུས་ངན་པོ། །སྐུ་མདོག་ལྗང་གུ་ཞལ་གཅིག་པ། །ཕྱག་གཉིས་མཆོད་རྟེན་ནེ་ལེ་བསྣམས། །བྱང་གི་འདབ་མར་བདུད་རྩི་འཁྱིལ། །སྐུ་མདོག་སྔོན་པོ་ཞལ་གཅིག་པ། །ཕྱག་གཉིས་བྲང་བསྣོལ་སྡིགས་མཛུབ་འཕྱར། །ཤར་ལྷོའི་འདབ་མར་གནོད་སྦྱིན་
བསྐྱེད། །སྐུ་མདོག་དམར་ནག་ཞལ་གཅིག་པ། །ཕྱག་གཉིས་གྲི་གུག་ཅང་ཏེའུ་བསྣམས། །ལྷོ་ནུབ་པདྨར་རོ་ལངས་མ། །སྐུ་མདོག་སྔོ་སྐྱ་ཞལ་གཅིག་མ། །ཕྱག་གཉིས་རྡོ་རྗེ་ལྕགས་སྒྲོག་བཟུང་ནས་སུ། །གུང་མོ་སྲིན་ལག་ལ་སོགས་གསུམ་པོ་རྣམས། །དམ་པོར་བཀུག་

49-1-325b

ནས་ཡོངས་སུ་བསྡམ། །མཐེབ་མཛུབ་བཞི་རྣམས་རབ་བརྐྱང་སྟེ། །སྤྱི་བོར་ངེས་པར་བསྣོལ་བ་བསྣམས། །ནུབ་བྱང་འདབ་མར་རྡོ་རྗེ་མཁའ་འགྲོ་མ། །སྐུ་མདོག་དམར་སྐྱ་ཞལ་གཅིག་མ། །ཕྱག་གཉིས་སྤྱི་བོར་སྦྱར་ནས་སུ། །མེ་ལྕེ་ཕྲེང་བ་ཡོངས་སུ་འཛིན། །བྱང་ཤར་
མཚམས་ཀྱི་འདབ་མ་ལ། །འཇིགས་བྱེད་ཁ་དོག་སྔོ་ནག་ལ་། །ཞལ་གསུམ་ཕྱག་དྲུག་ཞབས་གཉིས་པ། །གཡས་ཀྱི་དང་པོས་གླང་པོ་བསྣམས། །གཡོན་པས་གླང་ཆེན་པགས་པ་བསྣམས། །དེ་འོག་དགྲ་སྟ་རྡོ་རྗེ་བསྣམས། །ཐ་མས་མི་མགོ་ལྕགས་ཀྱུ་བསྣམས། །གྲུ་
ཆད་བཞི་ལ་ལྷ་མོ་བཞི། །འོད་བསྐྱེད་སྐུ་མདོག་དཀར་མོ་ལ། །ཞལ་གཅིག་ཕྱག་གཉིས་མེ་ཏོག་བསྣམས། །ཡིད་འཕྲོག་མ་སྐུ་མདོག་སེར་མོ། །ཞལ་གཅིག་ཕྱག་གཉིས་དྲིའི་སྤོས་ཕོར་བསྣམས། །ཀུན་བཟང་མ་སྐུ་མདོག་དཀར་མོ། །ཞལ་གཅིག་ཕྱག་གཉིས་རོ་མཆོག་
བསྣམས། །གླུ་སྒྲ་མ་སྐུ་མདོག་སྔོན་མོ། །ཞལ་གཅིག་ཕྱག་གཉིས་སྒྲ་སྙན་གར། །ཤར་གྱི་སྒོ་རུ་སྲོག་གཅོད་མ། །ཞལ་གཅིག་ཕྱག་གཉིས་སྐུ་མདོག་མཐིང་། །ཕྱག་གཉིས་ཐོ་བ་ཞགས་པ་བསྣམས། །ལྷོ་སྒོར་དབུགས་རྔུབ་མ་སེར་མོ། །ཞལ་གཅིག་ཕྱག་གཉིས་ཧོམ་
གཟར་ཞགས། །ནུབ་སྒོར་ཁྲག་འཐུང་མ་སྐུ་མདོག་དམར་མོ། །ཞལ་གཅིག་ཕྱག་གཉིས་གྲི་གུག་ཞགས། །བྱང་སྒོར་ཤ་ཟ་མ་སྐུ་མདོག་སྔོན་མོ། །ཞལ་གཅིག་ཕྱག་གཉིས་རྣོན་པོ་ཞགས། །དེ་ལྟར་གསལ་བར་བསྐྱེད་ནས་སུ། །ཡེ་ཤེས་དཀྱིལ་འཁོར་སྤྱན་དྲངས་
ནས། །ནམ་མཁར་བཞུགས་པ་དེ་ཉིད་ལ། །མཆོད་བསྟོད་བྱས་ནས་དམ་ཚིག་གི། །དཀྱིལ་འཁོར་དག་ལ་བསྟིམ་པར་བྱ། །དེ་ནས་བདག་ཉིད་ཤར་སྒོ་རུ། །དང་པོ་ཉིད་ནས་མེས་པོའི་ཚུལ། །ཤར་སྒོ་རུ་ནི་གནས་པ་འམ། །ཡང་ན་ཕྱི་ནས་སྲས་ཀྱི་ཚུལ། །དེ་ནས་བྱིན་རླབས་དབང་
བསྐུར་བྱ། །མཆོད་དང་བསྟོད་པ་རྫོགས་བྱས་ལ། །སྒྲུབ་པའི་བཟླས་བརྗོད་ཐིམ་པ་དང་། །སློབ་མ་དཀྱིལ་འཁོར་གཞུག་པར་བྱ། །དེ་ནས་ཡོལ་བས་བཅད་བར་དུ། །ལས་ཀྱི་ཆུ་བོ་གཏོར་བ་དང་། །གདོང་གཡོགས་བཅིང་བ་དང་། ཡོན་ཕུལ་ནས་ནི་མཐོང་བ་དྲི། །ཆུ་བླུད་

49-1-326a

བཀའ་བསྒོ་བྱས་ནས་མེ་ཏོག་དོར། །མིག་དབྱེ་ལྷ་ངོ་དེ་ནི་རིམ་བཞིན་བསྟན། །དེ་ནས་དབང་བསྐུར་རིམ་བཞིན་བྱ། །ཡབ་ཡུམ་སྙོམས་ཞུགས་འོད་ཟེར་ལས། །བདེ་གཤེགས་འོད་བསྐུལ་བུམ་པར་ཐིམ། །མ་འདྲེས་པས་ནི་འོད་ཞུ་ནས། །སྤྱི་བོར་ཆུ་ཡི་དབང་
བསྐུར་རོ། །ཚིགས་བཅད་འདིས་ནི་སྦྱིན་པར་བྱ། །སྐུ་གསུང་དམ་ཚིག་ལས་བྱུང་བའི། །ཡེ་ཤེས་བདུད་རྩི་དྲི་མ་མེད། །ལྷ་ཡི་ཆུ་ནི་དག་པ་ཡིས། །མི་བསྐྱོད་པ་ཡི་དབང་བསྐུར་རོ། །ཨོཾ་བཛྲ་ཨཱ་དརྴ་ཛྙཱ་ན་ཨ་བྷི་ཥིཉྩ་ཞེས་པས་སོ། །དབུ་རྒྱན་མན་ངག་ཤེས་བྱས་ལ། །འདི་སྐད་
དོ། །སངས་རྒྱས་ཀུན་གྱི་རྒྱལ་སྲིད་དེ། །དབུ་རྒྱན་རིན་ཆེན་དམ་པ་སྟེ། །དབུ་རྒྱན་རིན་ཆེན་མཆོག་འགྲོ་བས། །རྫོགས་སངས་རྒྱས་ལ་ཕྱག་འཚལ་ལོ། །ཨོཾ་ས་མནྟ་ཛྙཱ་ན་རཏྣ་ནཱ་མ་ཧཱུཾ་ཏིཥྛ་ཨ་བྷི་ཥིཉྩ་ཞེས་པས་སོ། །རྡོ་རྗེའི་མན་ངག་ཤེས་བྱས་ལ། །སངས་རྒྱས་
ཀུན་གྱི་རྡོ་རྗེའི་དབང་། །མི་ཕྱེད་རྡོ་རྗེ་འོད་གསལ་བ། །དམ་ཆོས་འབྱུང་བའི་སྒོར་གྱུར་པ། །རྡོ་རྗེ་ཆོས་ཀྱི་དབང་བསྐུར་རོ། །ཨོཾ་པྲ་ཏོ་ཨ་བྷི་ཥེ་ཀ་ཛྙཱ་ན་བཛྲ་ཨ་བྷི་ཥིཉྩ། དྲིལ་བུའི་མན་ངག་ཤེས་བྱས་ལ། །ཐབས་དང་ཤེས་རབ་ལྡན་པ་ཡིས། །འགྲོ་དོན་མཉམ་མེད་བྱེད་པ་དང་། །
མཆོད་པའི་ལས་རྣམས་རྫོགས་བྱེད་པས། །རྡོ་རྗེ་ལས་ཀྱི་དབང་བསྐུར་རོ། །ཨོཾ་ཀྲི་ཏ་ཨ་ནུཏྟ་ཛྙཱ་ན་བཛྲ་ཨ་བྷི་ཥིཉྩ།  མིང་གི་མན་ངག་ཤེས་བྱས་ལ། །རྡོ་རྗེ་མིང་གི་དབང་བསྐུར་བས། །བྱང་ཆུབ་སྙིང་པོའི་བར་དུ་ནི། །ཅིས་ཀྱང་མི་ཤིགས་མི་གཡོ་བས། །རྡོ་རྗེའི་མིང་དུ་རབ་ཏུ་གྲགས། །
ཨོཾ་པྲ་ཏི་ཤོ་དྷ་དྷརྨ་དྷཱ་ཏུ་ཛྙཱ་ན་ནཱ་མ་ཨ་བྷི་ཥིཉྩ་མི། དེ་ནས་དམ་ཚིག་གསུམ་གྱི་དབང་བསྐུར་བྱ་སྟེ། །དཀྱིལ་འཁོར་ཕྱི་རྒྱུད་ཆོ་ག་བཞིན། །ཚིགས་བཅད་རྣམས་ཀྱང་བསྒྲག་པར་བྱ། །ཨོཾ་ཨཱཿཧཱུཾ། དེ་གསུམ་མན་ངག་འོད་ཟེར་ནི། །བླ་མ་ལས་ནི་ཤེས་པར་བྱ། །དེ་ནས་མེ་ལོང་
དབང་བསྐུར་བྱ། །གོང་མ་བཞིན་དུ་མན་ངག་གཙོ། །དེ་ནས་ཁྱད་པར་དབང་བསྐུར་ནི། །ཕྱག་རྒྱའི་དཀྱིལ་འཁོར་ཇི་བཞིན་ནོ། །གོས་སྔོན་སྒྲུབ་པའི་དབང་བསྐུར་བ་རྫོགས་སོ།།      །།རྡོ་རྗེ་སློབ་དཔོན་འདོད་པ་ཡིས། །ཡོན་གྱིས་བླ་མ་མཉེས་བྱས་ལ། །ཕྱག་འཚལ་ནས་ནི་

49-1-326b

གསོལ་བ་གདབ། །བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་མཆོད་ཅིང་སྩོལ་མཛད་པ། །བདག་ལ་སྲུང་བའི་དོན་གྱི་ཕྱིར། །ནམ་མཁའི་རྡོ་རྗེ་བདག་ལ་སྩོལ། །ཞེས་གསོལ་བ་གདབ་པོ། །དེ་ནས་ཤར་ཕྱོགས་སུ་དཀྱིལ་འཁོར་ཆེན་པོ་དང་། བར་དུ་འདོམ་གྱིས་ཆོད་པར་ནི་
དབང་གི་དཀྱིལ་འཁོར་ཚུལ་བཞིན་བྲིས་ལ་དེའི་སྟེང་དུ་དབང་སྟེགས་ཀྱི་ཁྲི་བྱས་ལ་རས་ལ་གདན་པདྨ་འདབ་མ་བརྒྱད་པ་སེང་གེས་མཚན་པ་བཞག་སྟེ།  དེ་ལ་གདུགས་ལ་སོགས་པ་ཐམས་ཅད་ཀྱིས་བཀླུབས་ལ། རྣམ་པར་རྒྱལ་བ་དང་། ལྷ་ཐམས་ཅད་ཀྱི་བུམ་པ་དང་ལས་ཐམས་ཅད་
ཀྱི་བུམ་པས་མན་ངག་ཇི་ལྟ་བ་བཞིན་དབང་བསྐུར་རོ། །དེ་ནས་རྡོ་རྗེ་བརྟུལ་ཞུགས་དང་། ལུང་བསྟན་པ་དང་། རྡོ་རྗེ་འཛིན་པ་དབུགས་དབྱུང་བ་དང་། དུང་དང་འཁོར་ལོ་ལ་སོགས་པའི་དབང་བྱིན་ལ། དེ་ནས་དཀྱིལ་འཁོར་དེ་ཉིད་བསྟན། །དེ་ནས་ཡོན་ཕུལ་ལ།  དེ་ནས་གསང་བའི་དབང་
བསྐུར་བར་གསོལ་བ་གདབ་པོ། །གསང་བའི་དབང་བསྐུར་བ་ཡང་འོད་དང་གྲིབ་མའི་ཚུལ་དུ་གཡོན་དུ་བསམས་ལ། མན་ངག་བཞིན་དུ་བྱང་སེམས་དབབ། །ཕབ་པས་སྦྱིན་པར་བྱ་བ་དང་། །ཡང་ན་བདུད་རྩི་རྣམ་ལྔ་ནི། །མཚན་དང་ལྡན་པའི་སྣོད་བཞག་ནས། །ས་བོན་ལྔ་ལ་
རིགས་ལྔ་ནི། །སྙོམས་ཞུགས་བདུད་རྩིར་ཞུ་བར་བསམ། །ཡང་ན་དབབ་པའི་ཚུལ་དུ་བྱ། །ཡང་ན་དངོས་སུ་དབབ་པ་དང་། །ཡང་ན་གཉིས་ཀས་བྱ་བ་ཡིན། །ཅུ་གང་གིས་ནི་འདེ་གུ་སྦྱར། །ཆ་གཉིས་བསྲེས་པས་གོང་བཞིན་ནོ། །ཚིགས་བཅད་འདིས་ནི་གསོལ་བ་གདབ། །
རྡོ་རྗེ་སེམས་དཔའ་ཁྱོད་ཀྱི་མཐུས། །སངས་རྒྱས་ཀྱི་ནི་བདེ་བ་འགྲུབ། །རྣམ་དག་བྱང་ཆུབ་སེམས་དཔའ་ནི། །རྒྱ་ཆེར་སྲས་སུ་བཅས་པ་ནམས། །ཡུན་རིང་སྟོང་ཉིད་སྒོམ་གདུང་ལ། །དགའ་བས་ཡིད་འོང་བདེ་ཆེན་གྱིས་ནི་དགྱེས་པར་མཛོད། །ཀྱེ་འདོད་ཆགས་དྲི་མེད་ཀུན་
དུ་བཟང་པོའི་སྤྱོད་པ་སྟེ། །དགའ་བའི་འདོད་ཆགས་རྡོ་རྗེའི་དམ་ཚིག་ལ་ནི་ཕྱེ་མཛད་ནས། །དགའ་བ་རྣམ་པ་དྲུག་པོ་སྤྱོད་པས་ཤིན་ཏུ་གདུང་བ་ནི། །རབ་ཏུ་དགྱེས་དབང་འདོད་པའི་བདེ་བ་ཉིད་ཀྱིས་འཇུག་པར་འཚལ། །བྱང་ཆུབ་སེམས་ནི་རིན་ཆེན་འབར་འབྱུང་བའི། །མ་ལུས་རྒྱལ་

49-1-327a

བ་རྣམས་ནི་ལུས་སྐམས་ལ། །རྣམ་དག་རྡོ་རྗེ་ལས་བྱུང་ཡེ་ཤེས་ཆུ། དྲི་མེད་རིན་ཆེན་སྦྱིན་དབབ་དབང་བསྐུར་རོ། །མཉམ་དང་མི་མཉམ་འདོད་ཆགས་ཚུལ་དག་པས། །པདྨའི་གནས་སུ་རྡོ་རྗེ་གཏོང་མཛད་པ། །སྣ་ཚོགས་སེམས་དཔའ་སེམས་ཅན་བརླག་གྱུར་པ། །
སྦྱོར་བ་གཞན་པ་ཡིན་པ་མ་ཐོགས་བཤད་པར་གསོལ། །རྡོ་རྗེ་སེམས་ཁྱོད་དབང་མཆོག་བདེ་བར་བྱེད་པ་ཡི། །རྡོ་རྗེ་པདྨ་དབྱེ་བའི་ཚུལ་གྱིས་སྦྱོར་མཛད་དེ། །རྒྱལ་བ་ཀུན་གྱི་གཟུགས་སྐུ་རབ་སྟོན་ནས། །ཐམས་ཅད་བདེ་གྲུབ་ཉིད་ཀྱིས་བདག་ལ་དགྱེས་པར་མཛོད། །དེ་ནས་ཚོགས་ཀྱིས་
མཆོད་བྱས་ལ། །མཚན་ལྡན་སྣོད་ནས་བླངས་ནས་ནི། །རྡོ་རྗེ་སྲིན་མཐེབ་བྱིན་རླབས་ལ། །ཨོཾ་ཨ་མྲྀ་ཏ་གུ་ཧྱ་ཨ་བྷི་ཥིཉྩ་ཞེས་པས་མགྲིན་པར་གསུང་ལ་དབུལ་བར་བྱའོ། །སློབ་མས་ཀྱང་བདུད་རྩི་ཆེན་པོར་བསམས་ལ་ཨ་ཧོ་སུ་ཁ་ཞེས་པས་བཏུང་བར་བྱའོ། །དེ་ནས་གསང་
བའི་དབང་བསྐུར་བའི་བསྟོད་པ་ཡང་བྱའོ། །ད་ནི་ཤེས་རབ་ཡེ་ཤེས་ཀྱི་དབང་བསྐུར་བར་བྱ་སྟེ། ཕྱག་རྒྱ་ལ་བརྟེན་མི་འཇུག་ལ། །མན་ངག་འདི་ནི་བསྟན་པ་ཡིན། །ཡིད་ཀྱི་ལྷ་མོ་གཟུགས་མཛེས་ལ། །བདུད་རྩི་ཆེན་པོ་མན་ངག་སྦྱར་བར་བྱ། །ཡང་ན་རྡོ་རྗེ་ལྕེ་ཐུང་གི། །སྦྱོར་
བའི་མན་ངག་བསྟེན་པ་དང་། །ཡང་ན་རྩ་ནི་གཉིས་པོ་ལ། །ཕྱག་རྒྱའི་སྦྱོར་བ་བསྟན་པ་དང་། །ཡང་ན་རྫས་རྣམས་མཐུ་ཆེན་གྱིས། །བྱུགས་པས་དགའ་བ་སྐྱེ་འགྱུར་རོ། །སློབ་མས་ཡོན་དབུལ་གསོལ་བ་གདབ། །མཆོད་ཅིང་བསྟོད་པས་མཉེས་བྱས་ལ། །འདི་སྐད་ཚིག་ཀྱང་
བརྗོད་པར་བྱ། །ཁམས་གསུམ་ལས་ནི་རྣམ་གྲོལ་ཞིང་། །ནམ་མཁའ་དང་ནི་མཉམ་གྱུར་པ། །འདོད་པ་རྣམས་ཀྱིས་མ་གོས་པ། །དམིགས་མེད་ཁྱོད་ལ་ཕྱག་འཚལ་ལོ། །ཕུང་པོ་རྣམས་དང་ཁམས་རྣམས་དང་། །སྐྱེ་མཆེད་རྣམས་ལ་མི་བརྟེན་ཅིང་། །ཕྱིན་ཅི་ལོག་པས་རྣམ་
གྲོལ་ཞིང་། །ནམ་མཁའ་དང་ནི་མཉམ་འགྱུར་ཞིང་། །འདོད་པ་དག་གིས་མ་གོས་པ། །དམིགས་མེད་ཁྱོད་ལ་ཕྱག་འཚལ་ལོ། །རྣམ་རྟོག་མེད་ཅིང་ཀུན་རྟོག་མེད། །ཐུགས་ནི་རབ་ཏུ་མི་གནས་པ། །བསམ་གྱིས་མི་ཁྱབ་པ་ཡི་ཐུགས། །དམིགས་མེད་ཁྱོད་ལ་ཕྱག་འཚལ་ལོ། །

49-1-327b

ཇི་ལྟར་ནམ་མཁའ་གནས་མེད་ཅིང་། །སྤྲོས་མེད་གོས་པ་མེད་པ་ལྟར། །མཁའ་དང་མཉམ་པའི་ཐུགས་མངའ་བའི། །དམིགས་མེད་ཁྱོད་ལ་ཕྱག་འཚལ་ལོ། །ཐམས་ཅད་སྟོང་པའི་རང་བཞིན་ཅན། །མངོན་པར་བྱང་ཆུབ་བལྟ་བར་འཚལ། །དགའ་མཆོག་སྒོ་ནས་བསྟོད་མཛད་
པ། །ལྷན་ཅིག་ཡེ་ཤེས་ཁྱོད་ཕྱག་འཚལ། །དེ་ནས་སྔགས་འདི་བརྗོད་པར་བྱའོ། །ཨོཾ་པྲཛྙཱ་ཛྙཱ་ན་ཨ་བྷི་ཥིཉྩ་མི།  ཞེས་པ་ལན་བདུན་ནམ་ཉི་ཤུ་རྩ་གཅིག་བཟླས་སོ། །དེ་ནས་དབང་བཞི་བསྟན་པ་ནི། །གཞུང་ལུགས་མི་འདྲ་མང་མོད་ཀྱང་། །དང་པོའི་ཚིག་རྟེན་མན་ངག་ནི། །
རྣ་བ་དག་ཏུ་བརྒྱུད་པ་ཡིན། །ཐ་མ་ལྷན་ཅིག་དགའ་བ་ཡིན། །དང་པོ་བུམ་པའི་དབང་གིས་ནི། །མན་ངག་རྣམས་ནི་བསྟན་པ་ཡིན། །དེ་ནས་གསང་བ་ཡི་བསྟན་ལ། །ཁྱད་པར་སྔགས་ཀྱི་དོན་རྣམས་བསྟན། །སྔགས་རྣམས་དོན་དང་བཅས་རྣམས་ནི། །རྣ་བ་བརྒྱུད་པར་བྱ་བ་ནི། །
ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་ཧཱུཾ་ཧཱུཾ་ཕཊ། ཨོཾ་པྲཛྙཱ་ཏི་ས་ཏ་ནི་ཡ་ཧཱུྃ་ཕཊ། ཨོཾ་ཤ་སྭ་གཱ་པ་ཡ་ཧཱུཾ་ཕཊ། ཨོཾ་ག་ཏི་པྲྀ་ཡ་ནི་ཧཱུཾ་ཕཊ། ཨོཾ་མཾ་ས་བྷཀྵ་ནི་ཧཱུཾ་ཕཊ། ཨོཾ་ཏྲེེ་ལོཀྱ་བི་ཛ་ཡ་ཧཱུཾ་ཕཊ། ཨོཾ་བཛྲ་ཡཀྵ་ཧཱུཾ་ཕཊ།  ཨོཾ་མ་ཧཱ་ཀཱ་ལ་རོ་ཥ་ཎ་ཧཱུཾ་ཕཊ། ཨོཾ་བཛྲ་བེ་ཏཱ་ལཱི་ཧཱུཾ་ཕཊ། ཨོཾ་བཻ་ཤྲ་བ་ཎ་ཡེ་ཧཱུཾ་
ཕཊ། ཨོཾ་བཛྲ་ཌཱ་ཀི་ཡེ་ཧཱུཾ་ཕཊ། ཨོཾ་ཨ་མྲི་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཨོཾ་བཛྲ་བྷ་ར་ཡ་ཧཱུཾ་ཕཊ། ཨོཾ་པྲ་བིད་པ་ན་ཡ་ཧཱུཾ་ཕཊ། ཨོཾ་མ་ན་མ་ཧ་ར་ནཱ་ཡ་ཧཱུཾ་ཕཊ། ཨོཾ་ས་མནྟ་བྷ་དྲ་ཡ་ཧཱུཾ་ཕཊ། ཨོཾ་ཤཔྟ་གཱི་ཏི་ཡ་ཧཱུཾ་ཕཊ། ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་མ་ཧཱ་ཡཀྵ་སེ་ན་པ་ཏ་ཡཱེ་ཧཱུཾ་ཧཱུཾ་ཕཊ།  
སྔགས་ཀྱི་དོན་རྣམས་མ་ཤེས་ན། །ངག་གི་སྒྲིབ་པ་མི་འདག་ཕྱིར། །དེས་ན་སློབ་དཔོན་རྣ་བརྒྱུད་ཀྱི། མན་ངག་དེ་ལ་ནན་ཏན་བྱ། །དེ་ནས་ཤེས་རབ་ཡེ་ཤེས་ཀྱི། །མན་ངག་དེ་ནི་བསྟན་པར་བྱ། །དགའ་བ་བུམ་པའི་དོན་བསྟན་ལ། །མཆོག་དགའ་གསང་བའི་དོན་བསྟན་ནོ། །ཁྱད་
པར་ཤེས་རབ་ཡེ་ཤེས་བསྟན། །ལྷན་ཅིག་སྐྱེས་པའི་དགའ་བ་ནི། །བཞི་པ་ཁོ་ན་བསྟན་པ་ཡིན། །ཡང་ན་བུམ་པའི་དབང་བསྐུར་ནས། །བསྐྱེད་པའི་རིམ་པ་བསྟན་པ་ཡིན། །དེ་ནས་གསང་བའི་དབང་བསྐུར་ན། །རྡོ་རྗེ་བཟླས་པ་བསྟན་པར་བྱ། །ཤེས་རབ་ཡེ་ཤེས་དབང་བསྐུར་

49-1-328a

ནས། །སེམས་དབེན་པར་ནི་བསྟན་པར་བྱ། །དེ་ནས་སྒྱུ་མ་ལ་གནས་པས། །བཞི་པའི་མན་ངག་བསྟན་པར་བྱ། །དེ་ནས་འོད་གསལ་ལ་བརྟེན་ནས། །ཟུང་འཇུག་ཏིང་འཛིན་བསྒོམ་པར་བྱ། །ཟུང་འཇུག་ཏིང་འཛིན་མཐར་ཕྱིན་པ། །ཆོས་ཀྱི་སྐུ་ཞེས་དེ་ལ་བྱ། །
དེ་ལྟར་བཞི་པའི་རྣ་བརྒྱུད་བསྟན། །དབང་བསྐུར་རྫོགས་ནས་ཚོགས་འཁོར་བྱ། །གཏོར་མ་བཏང་ནས་མཁའ་འགྲོ་བསྐང་། །སྦྱིན་སྲེག་གིས་ནི་ལྷག་ཆད་བསྐང་། །ཡི་གེ་བརྒྱ་པ་ཟློས་བྱེད་ཅིང་། །དཀྱིལ་འཁོར་བསྐོར་ཞིང་སྒྲ་རྣམས་བརྡུང་། །ཡེ་ཤེས་གཤེགས་ནས་ཏིང་འཛིན་བསྡུ། །
རྡུལ་ཚོན་ཕྱགས་ལ་ཆུ་ལ་དོར། །མཎྜལ་ཞལ་བསིལ་དགའ་སྟོན་བྱ། །རྣལ་འབྱོར་ལམ་པའི་དོན་ཆེད་དུ། །རྒྱུད་རྣམས་ཀུན་དང་མི་འགལ་བའི། །དཀྱིལ་འཁོར་ཆོ་ག་འདི་བྱས་པས། །འདི་བྱས་དགེ་བའི་རྩ་བ་ཡིས། །བདག་དང་མཐའ་ཡས་སེམས་ཅན་རྣམས། །ཐམས་ཅད་
བྱང་ཆུབ་ཐོབ་པར་ཤོག །དཀྱིལ་འཁོར་གྱི་ཆོ་ག་སློབ་དཔོན་བྷ་བས་མཛད་པ་རྫོགས་སོ།།      །།ལོ་ཙཱ་བ་དགེ་སློང་གཞོན་ནུ་ཚུལ་ཁྲིམས་ཀྱིས་བསྒྱུར་ཅིང་གཏན་ལ་ཕབ་པ།།      །།༄༅༅། །བཅོམ་ལྡན་འདས་རྡོ་རྗེ་འཛིན་པ་ལ་
ཕྱག་འཚལ་ལོ། །ལུང་བསྟན་སྦྱོར་བའི་མན་ངག་འདི། །རྒྱུད་རྣམས་ཀུན་ལས་མི་གསལ་བའི། །མཁའ་འགྲོ་མ་ཡིས་རྒྱས་བཏབ་ལ། །རྣལ་འབྱོར་བློ་དམན་དོན་དུ་ནི། །ཡང་ནས་ཡང་དུ་གསོལ་བཏབ་ནས། །ཡིད་ཆེས་བྲོད་པ་བསྐྱེད་པའི་ཕྱིར། །མན་ངག་རིམ་པ་བསྟན་པ་ལ། །
བླ་མ་ལས་ནི་མཉན་པར་གྱིས། །གསང་སྔགས་སྒོ་ནི་དཔག་མེད་ནས། །ཐབས་ཀྱི་རིམ་པ་མང་གསུངས་པ། །སེམས་ཅན་ལས་ནི་སྣ་ཚོགས་པས། །སོ་སོ་མོས་པ་མི་མཐུན་ཕྱིར། །དཔེར་ན་སྨན་རྣམས་ནུས་པ་ཡིས། །ནད་རྣམས་སོ་སོར་སེལ་བ་བཞིན། །མན་ངག་ཐབས་
རྣམས་སོ་སོས་ཀྱང་། །དུག་གི་ནད་རྣམས་འཇོམས་པར་བྱེད། །དཔེར་ན་སྨན་ནུས་གཅིག་གིས་ཀྱང་། །ཕྲད་པ་ཙམ་གྱིས་ནད་འཇོམས་པའོ། །ཡང་ན་གཉིས་འཇོམས་གསུམ་འཇོམས་དང་། །བཞི་འཇོམས་ལྔ་འཇོམས་ལ་སོགས་དང་། །མང་པོ་འདུས་ནས་འཇོམས་པ་དང་། །དེ་དག་

49-1-328b

ཀུན་གྱིས་མ་ཆོམས་པ། །སྦྱོར་བ་གཞན་ལོག་འཇོམས་པ་དང་། །གཉན་པ་ཁོ་ནས་འཇོམས་པ་དང་། །སྨན་དང་སྤྱོར་བ་དེ་དག་ཀྱང་། །མཁས་པ་ཡིས་ནི་འཇོམས་པར་འགྱུར། །མི་མཁས་པས་ནི་གནོད་པར་འགྱུར། །སྨན་པ་མཁས་པར་གྱུར་ཀྱང་ནི། །བརྩོན་འགྲུས་ནན་ཏན་མ་
བྱས་ན། །ནད་རྣམས་འཇོམས་པར་མི་འགྱུར་རོ། །དེ་བཞིན་མཐུན་པའི་དཔེ་རྣམས་ཀྱང་། །མཁའ་འགྲོ་མ་ཡིས་ལུང་བསྟན་ན། །ཞིབ་པས་འདི་རུ་མ་ཕྱེའོ། །བསྒོམས་པའི་སྟོབས་ཀྱིས་ཉོན་མོངས་འཇོམས། །བསྒོམས་པ་ལས་བྱུང་དངོས་གྲུབ་ཀྱིས། །མཆོག་གི་དངོས་གྲུབ་ཐོབ་
པར་འགྱུར། །ཏིང་འཛིན་ཐོབ་པར་མ་གྱུར་པས། །ཚོགས་འཁོར་ཚོགས་མཆོད་དངོས་གྲུབ་པོ། །དེ་མ་བྱུང་ན་སྦྱིན་སྲེག་གིས། །དངོས་གྲུབ་སྒྲུབ་པར་གསུངས་པ་ཡིན། །དེ་མ་བྱུང་བ་བཟླས་བརྗོད་དོ། །དེ་ནི་མ་བྱུང་གཏོར་མ་བྱ། །དེ་རྣམས་ཀུན་ལས་མ་བྱུང་ན། །ལས་ནི་ཕྲན་ཚེགས་
གཞན་ཡང་བསྟན། །ཡང་ན་དེ་དག་ཐམས་ཅད་ཀྱང་། །གཅིག་འདུས་གཉིས་འདུས་གསུམ་འདུས་དང་། །བཞི་འདུས་ལྔ་འདུས་ལ་སོགས་པས། །འབྱུང་བར་འགྱུར་བ་གསུངས་པ་ཡིན། །ཡང་ན་མཆོག་འདོད་པ་ལ་ནི། །ཐམས་ཅད་རྫོགས་པར་དགོས་པར་གསུངས། །ཐུན་མོང་
དངོས་གྲུབ་སྒྲུབ་པ་ལ། །ཆེ་ཆུང་གིས་ན་རིམ་པས་གསུངས། །སྦྱོར་བ་རེ་རེས་ཀྱང་ནི་འགྲུབ། །གསང་སྔགས་ལ་ལའི་བཞེད་ཀྱིས་ནི། །དཔེར་ན་སྦྲུལ་ནི་གཤུ་བུར་ཞུགས། །རྩ་བར་འགྲོ་དང་ཅོ་ཏོར་འགྲོ། །དེ་བཞིན་རྣལ་འབྱོར་སྔགས་པ་ཡང་། །རིག་འཛིན་ས་དང་རྡོ་རྗེ་དམྱལ། །ལ་ལ་དག་
གི་གཞུང་གིས་ནི། །བར་མ་དོ་ནས་འགྲོ་བའོ། །ལ་ལ་སྐྱེ་བ་ཕྱི་མ་ལ། །ལ་ལ་དག་གིས་བཞེད་ཀྱིས་ནི། །གཉིས་དང་གསུམ་པ་དག་ལའོ། །བཞི་པའམ་ལྔ་པར་འདོད་པའང་ཡོད། །ལ་ལ་སྐྱེ་བ་བདུན་པ་ལ། །ཕྱག་རྒྱའི་དངོས་གྲུབ་ཐོབ་པར་འདོད། །དེ་ལྟར་གཞུང་ལུགས་མི་
འདྲ་བ། །མང་དུ་གསུངས་པ་དེ་དག་ཀྱང་། །འགལ་བ་མེད་དེ་ཀུན་ཀྱང་བདེན། །གསང་སྔགས་ཀྱི་ནི་གཞུང་གིས་ཀྱང་། །སྐྱེ་བ་བདུན་ལས་མི་དམའ་བས། །སྐྱེ་བ་བདུན་གྱི་ཐ་མ་ལ། །མ་བསྒོམས་ཀྱང་ནི་སངས་རྒྱས་ས། །ཞེས་སུ་རྒྱུད་ལས་བསྟན་པ་ཡིན། །སྐྱེ་བ་བདུན་ཞེས་བྱ་

49-1-329a

བ་ཡང་། །སྔགས་པའི་བྱང་ཆུབ་སེམས་དཔའ་ཡིན། །སྔགས་དང་སྨན་ལ་སོགས་པ་ཡི། །སྟོབས་ཀྱིས་ལུས་སེམས་ལས་རུང་བས། །ཤ་དང་ཐོད་པ་ལ་སོགས་པ། །བསྟེན་ཅིང་ཟོས་པས་དངོས་གྲུབ་ཐོབ། །དེ་བས་སྔགས་མཐུའི་ཡོན་ཏན་ནོ། །ས་དང་ཕ་
རོལ་ཕྱིན་པ་ལ། །སྐྱེ་བ་བདུན་པ་འོང་སྲིད་ཀྱང་། །དེ་ལྟར་འོང་བ་ཤིན་ཏུ་དཀོན། །སྐྱེ་བ་བདུན་པ་ཞེས་བྱའི་གནས། །ཕལ་ཆེར་དུར་ཁྲོད་ཆེན་པོ་ཡི། །མཁའ་འགྲོ་མ་ཡི་གནས་སུ་སྐྱེ། །རིག་འཛིན་ས་ཞེས་བྱ་བ་ཡང་། །གཅིག་ནི་དེ་ལའང་བྱ་བ་ཡིན། །རིག་འཛིན་ས་ལའང་
གསུམ་ཡོད་དེ། །དུར་ཁྲོད་རིན་ཆེན་ས་དང་ནི། །བར་སྣང་ལྷ་གནས་ལྷ་རྟན་ས། །མཁའ་སྤྱོད་འོག་མིན་སྟུག་པོའི་ས། །གནས་ནི་དེ་གསུམ་ཡིན་པར་གསུངས། །སྐྱེ་བ་བདུན་པའི་གང་ཟག་ནི། །ལུས་དང་གནས་ནི་ཁྱད་པར་ཅན། །སྔགས་སྤྱོད་པ་ཡི་ཡུལ་དག་ཏུ། །འགའ་ཙམ་
བྱུང་བ་དག་ཀྱང་ཡོད། །སྐྱེ་བ་གཅིག་སོགས་གཞན་པ་ནི། །དེ་རྣམས་གནས་ཀྱང་དེ་བཞིན་ནོ། །སྐྱེ་བ་བདུན་པའི་གང་ཟག་ནི། །དད་དང་སྙིང་རྗེ་ལ་སོགས་ལྡན། །ཕ་རོལ་ཕྱིན་བཅུའི་ཆོས་ལ་སྤྱོད། །མཐུན་འཇུག་སྤྱོད་པ་ཀུན་ལ་མཁས། །བཟོ་དང་རིག་པ་གནས་ལ་མཁས། །ལྟ་བ་
མ་ནོར་གདེང་དུ་གྱུར། །སྤྱོད་པ་ལ་དོར་ཐབས་ལ་མཁས། །མན་ངག་མཐོང་བ་ཙམ་གྱིས་ནི། །ཐེ་ཚོམ་མེད་པར་འཇུག་པར་བྱེད། །མན་ངག་བསྒོམས་མ་ཐག་ཏུ་ནི། །ཏིང་འཛིན་སྐྱེ་འགྱུར་རང་གི་ནི། །ཁམས་དང་དུས་ཀྱི་བྱེ་བྲག་ཤེས། །རྒྱུད་ལུས་མཚན་གྱི་མན་ངག་ལ། །ཐོས་པ་
ཙམ་གྱིས་དབུ་ཞབས་ཀྱི། མན་ངག་རྣམས་ནི་ཁོང་དུ་ཆུད། །བཤད་པའི་རྒྱུད་དང་འགྲེལ་པ་དང་། །མངོན་རྟོགས་པ་ཡི་རིམ་པ་རྣམས། །མ་ཐོས་པ་རུ་ཤེས་པར་འགྱུར། །དཔེར་ན་ཤིང་འཛེར་སྩལ་པ་ཙམ། །རྒྱུད་ལུས་མན་ངག་མདོ་མདོ་ཡི། །མཁས་པ་ལ་ནི་བརྟེན་པ་
སུ། །ཐམས་ཅད་དོན་རྣམས་ཁོང་ཆུད་ནས། །སྐབས་ཕྱེད་སྤྱི་དོན་ཤིན་ཏུ་རྒྱས། །དཀའ་འགྲེལ་མངོན་རྟོགས་རིམ་པ་ནི། །རྩོམ་ནུས་དོན་ལ་ཤིན་ཏུ་མཁས། །མིག་ནི་ཡུན་རིང་མི་འཛུམ་ཞིང་། །ཡི་དམ་ལྷ་བསྒོམ་དུས་སུ་ནི། །སྐྱེ་བ་བདུན་པའི་གྲིབ་མ་སྣང་། །སྐྱེ་བ་

49-1-329b

གཉིས་གོགས་གཞན་པོ་ལ། །གྲིབ་མའི་རྟགས་ཀྱང་དེ་བཞིན་ནོ། །བསྒོམས་པའི་སྟོབས་ཀྱི་ཁྱད་པར་གྱིས། །ཞག་བདུན་ཟླ་གཅིག་ཟླ་བདུན་དུ། །མཁའ་འགྲོ་མས་ནི་ལུང་སྟོན་ཞིང་། །ཆོས་བཤད་རྟགས་རྣམས་སྟོན་པར་མཛད། །ཆོས་པ་ཡི་ནི་མཛད་སྤྱོད་ཀྱང་། །དངོས་
སུ་སྤྲུལ་ནས་སྟོན་པ་དང་། །ཡང་སྤྲུལ་སུམ་སྤྲུལ་ལ་སོགས་སུ། །སྤྲུལ་ནས་སྟོན་དང་ཡང་ན་ནི། །སྐུ་ནི་མི་སྣང་སྒྲ་ཡིས་སུ། །ནམ་མཁའ་ལས་སུ་སྟོན་པ་དང་། །ཡང་ན་ཕྱག་མཚན་ལ་སོགས་ལ། །སྒྲ་བྱུང་ནས་ནི་སྟོན་པ་དང་། །ཡང་ན་རྨི་ལམ་མཚན་མས་སུ། །དུས་བཞི་
དུས་གསུམ་དུས་གཅིག་ཏུ། །ཡང་ནས་ཡང་དུ་སྟོན་པའོ། །མ་ཐོས་པ་ཡི་མན་ངག་རྣམས། །སྟོན་མོར་བྱེད་ན་སྐྱེ་བདུན་སོགས། །སྔགས་ཀྱི་དངོས་གྲུབ་ཐོབ་པ་ཡི། །རྣལ་འབྱོར་རིག་འཛིན་བྱང་ཆུབ་སེམས། །ཡང་ན་དང་པོ་སྐྱེས་ནས་ནི། །ཐེག་ཆེན་ཆོས་ལ་མོས་ནས་ཀྱང་། །མན་
ངག་བསྒོམས་ལ་ཤིན་ཏུ་དགའ། །སློབ་དཔོན་ལ་ནི་མན་ངག་གི། །རྣ་བརྒྱུད་གཅིག་ཙམ་ཐོས་པས་སུ། །བསྒོམས་པས་དངོས་གྲུབ་ཐོབ་པར་འགྱུར། །དེ་ནས་གོང་བཞིན་བྱུང་ནས་སུ། །གཞན་ལ་ཡང་ནི་སྟོན་པར་ནུས། །ཡང་ན་སྐྱེ་བདུན་གང་ཟག་སྟེ། །སྐྱེས་མ་ཐག་ཏུ་ཡི་དམ་
ལྷས། །རྨི་ལམ་ན་ནི་ཆོས་བསྟན་ནས། །མན་ངག་དེ་བསྒོམས་དངོས་གྲུབ་ནི། །ཕྲ་མོ་དག་ནི་ཐོབ་ནས་ཀྱང་། །གཞན་ལ་ཆོས་ནི་སྟོན་པར་ནུས། །དེ་ནས་རིམ་གྱིས་གཞན་ཡང་འབྱུང་། །ཡང་ན་སྐྱེ་བདུན་གང་ཟག་དེ། །རྐྱེན་ནི་གཉིས་པོ་འཛོམ་པ་ལས། །བསྒོམ་པ་ལ་ནི་དགའ་བར་འགྱུར། །
སོན་གྱི་བསྒོམས་པའི་སྟོབས་ཀྱིས་ནི། །འབད་རྩོལ་དྲག་པོ་མ་བྱས་པར། །ཐུན་གཅིག་ལ་ནི་སྒོམ་པ་རྙེད། །དེ་ནས་རིམ་གྱིས་བསྒོམས་པས་སུ། །ཞག་བདུན་ནས་ནི་ལུང་སྟོན་འབྱུང་། །དེ་ནས་རིམ་གསུམ་གོང་མ་བཞིན། །དེ་ནས་མངོན་ཤེས་དྲུག་ལྡན་ནས། །ཕྱག་རྒྱའི་དངོས་
གྲུབ་ཐོབ་པར་འགྱུར། །སྔགས་པའི་དངོས་གྲུབ་ཐམས་ཅད་ཀུན། །སྐྱེ་བ་འདི་ལ་ཕྱག་རྒྱ་ཐོབ། །དེ་ལྟར་མ་གྱུར་རྣལ་འབྱོར་པ། །གོང་མ་བཞིན་དུ་སྐྱེ་བདུན་དུ། །ལེན་པའི་རྟགས་ནི་གོང་བཞིན་འབྱུང་། །སྐྱེ་བ་འདི་ཐོབ་ཚུལ་རྣམས་ཀྱང་། །ཐེག་ཆེན་སྣོད་དུ་རུང་བ་ལ། །དབང་བསྐུར་

49-1-330a

མན་ངག་ཐོབ་པ་ཡིས། །དམ་ཚིག་མ་ཉམས་བཤགས་ལ་བརྩོན། །བསྐྱེད་རིམ་བརྟན་པར་གྱུར་པས་ནི། །ལུས་ཀྱི་རྣམ་རྟོག་བཟློག་ནས་ཀྱང་། །རྡོ་རྗེ་བཟླས་ལ་བརྟེན་ནས་ཀྱང་། །ངག་གི་རྣམ་རྟོག་བཟློག་ནས་ནི། །སེམས་དབེན་པ་ལ་བརྟེན་པར་བྱ། །སེམས་ཀྱི་འཁྲུལ་
རྟོག་བཟློག་ནས་ཀྱང་། །སྒྱུ་མའི་ཏིང་འཛིན་ལ་གནས་ནས། །འོད་གསལ་ལ་ནི་འཇུག་པར་བྱ། །དེ་ནས་སྤྲོས་མེད་མན་ངག་ལ། །ལྷུན་གྱིས་གྲུབ་འགྱུར་ཕྱག་རྒྱའི་མཆོག །ཡང་ན་བསྐྱེད་རིམ་ལ་བརྟེན་ནས། །ཚེ་ལ་དབང་བའི་རིག་འཛིན་སྒྲུབ། །ཚེ་ལ་དབང་སྒྲུབ་རིག་འཛིན་གྱི་། །རྫོགས་
པའི་མན་ངག་བསྒོམ་པར་བྱ། །དེས་སུ་ཕྱག་རྒྱའི་དངོས་གྲུབ་འཐོབ། །ཡང་ན་བསྐྱེད་རིམ་བརྟན་པ་ཡིས། །རྫོགས་པའི་མན་ངག་གང་བསྒོམས་ཀྱང་། །ཟླ་བ་དྲུག་གིས་ཕྱག་རྒྱ་འཐོབ། །རྫོགས་རིམ་བསྐྱེད་པ་ལ་བརྟེན་ནས། །དེ་ནས་རྫོགས་པའི་རྫོགས་པས་ནི། །ཕྱག་རྒྱའི་དངོས་གྲུབ་
ཐོབ་པར་གསུངས། །དེ་ནི་སློབ་དཔོན་ཆེན་པོའི་གཞུང་། །སྦྱོར་ན་ལྟ་བ་གདེང་འགྱུར་གཙོ། །ལྷན་ཅིག་ལྡོག་བྱའི་ཚུལ་དུ་ནི། །བྱས་ནས་ཛེ་ཚོམ་མི་སྐྱེ་ཞིང་། །ལྡོག་པར་མི་འགྱུར་འབྱུང་པོས་ཀྱང་། །ཚུགས་པར་མི་འགྱུར་འབྲས་བུ་མྱུར། །དེ་ལྟར་མ་གྱུར་རྣལ་འབྱོར་པས། །མན་ངག་
ཉམས་སུ་ལོན་པར་བྱ། །མན་ངག་བསྒོམས་པའི་སྟོབས་ཀྱིས་ནི། །མཁའ་འགྲོ་མ་ཡིས་ལུང་སྟོན་པས། །ལུང་བསྟན་པ་ཡི་དུས་སུ་ནི། །ལྟ་བ་མན་ངག་ཟབ་མོ་ནི། །བསྟན་པ་བསྒོམས་པས་ཕྱག་རྒྱ་འཐོབ། །ཡང་ན་རྣལ་འབྱོར་རིམ་པས་ནི། །བློ་ཡི་རབ་འབྲིང་ཁྱད་པར་ནི། །བག་ཆགས་
རྐྱེན་ལ་སོགས་པ་ཡིས། །རབ་འབྲིང་དགུ་དང་གསུམ་དང་ནི། །དབྱེ་བར་བྱ་བའི་དོན་ཤེས་བྱ། །རྒྱུ་རྐྱེན་འཇོམ་པའི་གང་ཟག་ནི། །སྐྱེ་བ་འདི་ལ་ལུང་སྟོན་པས། །ཕྱག་རྒྱའི་དངོས་གྲུབ་ཐོབ་པར་འགྱུར། །རྐྱེན་ནི་རབ་ཏུ་མང་གྱུར་པའི། །རབ་ཀྱི་འབྲིང་སོགས་ལྡན་པ་ཅན། །བར་མ་
དོ་ལ་ལུང་བསྟན་ནོ། །རབ་ཀྱི་ཐ་མ་ལྡན་པ་ནི། །སྐྱེ་བ་ཕྱི་མ་ལུང་སྟོན་ནོ། །འབྲིང་གི་གསུམ་པོའི་རིགས་ལྡན་ཡང་། །གཉིས་དང་གསུམ་དང་བཞི་རུ་སྦྱར། །ཐ་མའི་རིགས་ལྡན་གསུམ་པོ་ཡང་། །ལྔ་དང་དྲུག་དང་བདུན་དུ་སྦྱར། །ཡང་ན་རྐྱེན་སོགས་ལྡན་གྱུར་ཀྱང་། །རྒྱུ་ལ་སོགས་

49-1-330b

པའི་ནུས་པ་རྣམས། །དྲག་ཞན་གྱི་ནི་རིམ་པ་ཡིས། །རྐྱེན་གྱི་ཚུལ་བཞིན་སྦྱོར་ཤེས་བྱའོ། །རྒྱུ་རྐྱེན་གཉི་ག་འབྲིང་སོགས་ཀྱི། རིམ་པ་དང་ནི་ལྡན་པ་རྣམས། །གོང་མ་གཉིས་དང་མི་མཐུན་པས། །གསུམ་དང་བདུན་དུ་སྦྱར་ཤེས་བྱ། །གཉིས་ཀ་ཞན་པར་གྱུར་པ་ན། །གསང་སྔགས་
སྣོད་དུ་མི་རུང་བས། །དབང་བསྐུར་མི་བྱ་འཇུག་པ་ཙམ། །དགེ་བའི་ས་བོན་ཆུང་གྱུར་ཀྱང་། །སྨོན་ལམ་བཏབ་པའི་དད་ལྡན་དེ། །གསང་སྔགས་ལ་ནི་མོས་གྱུར་ནས། །ཡང་ནས་ཡང་དུ་གསོལ་འདེབས་ལ། །ཕྱི་མའི་དབང་བསྐུར་ཙམ་བྱས་ལ། །མི་ཟབ་དབྱིབས་ཀྱི་མན་ངག་བསྟན། །
དེ་ལས་བསྟན་པའི་གང་ཟག་ལ། །ལྷག་མ་རྣམས་ནི་རིམ་གྱིས་བསྟན། །ཡང་ན་རྣལ་འབྱོར་རིམ་པ་ནི། །ཡི་དམ་ལྷ་ཚོགས་སོ་སོ་རུ། །སོ་སོ་བག་ཆགས་གཞག་པ་དང་། །མོས་པ་ལ་སོགས་རིམ་པ་ཡིས། །ཐེ་ཚོམ་ལ་སོགས་མེད་མོད་ཀྱང་། །དངོས་གྲུབ་འགྲུབ་པར་མ་གྱུར་
ན། །སྒྱུ་མ་ལྟ་བུའི་འདུ་ཤེས་ཀྱི། །ཐ་མི་དད་པར་བསྒོམས་ནས་ཀྱང་། །མན་ངག་ཡང་ཡང་སྤྲོས་ཀྱང་ནི། །འགལ་བ་མེད་དེ་དངོས་གྲུབ་འགྲུབ། །དེ་ལྟར་བྱས་ཀྱང་མ་བྱུང་ན། །སྒྲིབ་པ་ཤིན་ཏུ་ཆེ་གསུངས་པས། །སྦྱིན་སྲེག་ཚོགས་འཁོར་བཟླས་བརྗོད་དང་། །གཏོར་མ་ལ་སོགས་
ཆོ་ག་ཡིས། །བདུན་ནས་སྟོང་གི་བར་དུ་ནི། །མཁས་པས་ཅི་ནུས་རྒྱུད་བརྟགས་ལ། །སྣ་ཚོགས་སྡིག་པ་སྦྱང་བ་གསུང་། །ལུས་ཀུན་ལ་ནི་གནོད་པ་ཡི། །ཚེར་མའི་ཕུང་པོས་ལམ་རྣམས་འགགས། །མེ་ཡི་སྦྱོར་བ་མཁས་པ་ཡིས། །བསྲེགས་པས་ཐམས་ཅད་མེད་པར་བྱེད། །
དེ་ནས་ལམ་ནི་རྙེད་ནས་ནི། །གང་དུ་ཕྱིན་པར་འགྲོ་བར་བྱེད། །དེ་བཞིན་སྔགས་སོགས་མཐུན་རྣམས་ཀྱིས། །སྒྲིབ་པ་ལ་སོགས་བཅོམ་ནས་ཀྱང་། །ཏིང་ངེ་འཛིན་གྱི་ལམ་རྙེད་ནས། །དངོས་གྲུབ་ཀྱང་ནི་ཐོབ་པར་འགྱུར། །དངོས་གྲུབ་ཁྱད་པར་མ་ཐོབ་ཀྱང་། །ཕྲ་མོ་ལ་སོགས་ཐོབ་
པར་འགྱུར། །མཚན་མའི་ལུང་སྟོན་ཕྲ་མོ་འབྱུང་། །གལ་ཏེ་དེ་ལྟར་མ་གྱུར་པར། །ཚེ་དབང་མ་ཐོབ་རྣལ་འབྱོར་པས། །སྒྲིབ་པ་རྣམས་ནི་བྱང་གྱུར་ནས། །སྐྱེ་བ་ཕྱི་མ་ལ་སོགས་སུ། །དངོས་གྲུབ་ཀྱང་ནི་ཐོབ་པར་འགྱུར། །ཡང་ན་སྔགས་ཀྱི་མཐུ་རྣམས་ཀྱིས། །སྡིག་སྒྲིབ་རྩད་

49-1-331a

ནས་མ་ཆོད་ཀྱང་། །ཆེ་ལོང་རགས་པ་མགོ་བཅོམ་ནས། །གཞན་དག་མི་སྐྱེ་མགོ་གནོན་ཞིང་། །དམ་ཚིག་མ་ཉམས་བཤགས་ལ་བརྩོན། །སྨོན་ལམ་དགེ་རྩ་བསྔོ་ལེགས་པས། །སྐྱེ་བ་འདི་རྗེས་གཞན་དག་ཏུ། །དུས་དང་གནས་དང་སློབ་དཔོན་དང་། །གྲོགས་དང་
ཕྱག་རྒྱ་མན་ངག་སོགས། །སྐྱེས་མ་ཐག་ཏུ་རྙེད་པར་འགྱུར། །དེ་རུ་དམ་ཚིག་ལྡན་སོགས་པས། །རིམ་གྱིས་སྐྱེ་བདུན་བརྒྱུད་ནས་སུ། །འབད་རྩོལ་དྲག་པོ་མ་བྱས་པར། །སངས་རྒྱས་ས་ལ་འགྲོ་བར་གསུངས། །དེ་སོགས་ལུང་བསྟན་སྦྱོར་བ་རྣམས། །མཁའ་འགྲོ་མ་ཡི་ལུང་
སྟོན་དུ། །རྣལ་འབྱོར་མཁས་པས་ཤེས་པར་བྱ། །འདི་ནི་བློ་དམན་དོན་ཆེད་དུ། །ཅུང་ཟད་བསྡུས་ཏེ་བསྟན་པ་ཡིན། །མཁའ་འགྲོ་མ་ཡིས་ལུང་སྟོན་ཀྱང་། །འཇིག་རྟེན་འདས་དང་འཇིག་རྟེན་པ། །འཇིག་རྟེན་འདས་པ་གཉིས་ཡོད་དེ། །ས་ནས་རིག་འཛིན་མཁའ་འགྲོ་དང་། །བདེ་
གཤེགས་བྱིན་རླབས་མཁའ་འགྲོའོ། །མཁའ་འགྲོ་དེ་དག་གཉི་ག་ཡང་། །མཛེས་པའི་གཟུགས་དང་མི་མཛེས་པའི། །གཟུགས་ནི་སྣ་ཚོགས་སྤྲུལ་ནས་སྟོན། །དེ་ལ་འཇིགས་དང་མི་འཇིགས་དང་། །རེ་དང་དོགས་པའི་སེམས་སྤངས་ཏེ། །ཕྱག་རྒྱ་བརྡ་ལ་སོགས་པ་ཡིས་། །སྟོན་
པའི་དུས་སུ་ལས་རྣམས་ནི། །སྟོན་པར་ཤེས་པར་མ་གྱུར་ན། །དངོས་གྲུབ་མེད་དེ་ཉམས་པར་འགྱུར། །དེ་བས་ནན་ཏན་ཆེར་བསྐྱེད་ལ། །མན་ངག་ཐོས་པ་ཆེ་བ་གཅེས། །ཐོས་པ་ཆེ་བར་མ་གྱུར་ཡང་། །གང་སྒྲུབ་རྒྱུད་སྐོར་ལ་སོགས་ལ། །སློབ་དཔོན་ལ་ནི་ཡང་ནས་ཡང་། །ཐེ་
ཚོམ་ཆོད་པར་མཉན་པར་བྱ། །རྒྱུད་རྣམས་ཐོས་པར་མི་ནུས་པས། །སྒྲུབ་པའི་ཆ་རྐྱེན་བཅུ་བདུན་པོ། །ཤེས་པར་དེ་ནི་མ་བྱས་ན། །དངོས་གྲུབ་འགྲུབ་པར་མི་འགྱུར་རོ། །སློབ་དཔོན་ལ་ནི་བརྟེན་པ་ཡིས། །མ་ཚང་ཡང་ནི་འགྲུབ་པར་གསུངས། །འཇིག་རྟེན་པ་ལ་གཉིས་ཡོད་དོ། །
རྒྱལ་བས་བཀའ་ལ་བཏགས་པ་ཡིས། །སངས་རྒྱས་བསྟན་པ་བསྲུང་བ་དང་། །བདུད་ནི་ནག་པོ་ལ་སོགས་པ། །དམ་ལ་མ་ཐོགས་བར་ཆོད་མཁན། །དེ་ལྟར་གཉིས་སུ་མ་ཤེས་ན། །དངོས་གྲུབ་ཐོབ་ཀྱང་སླར་ལ་འཚོར། །དེ་གཉིས་གཟུགས་དང་རྟགས་སོགས་པ། །གོང་མ་

49-1-331b

བཞིན་དུ་སྟོན་པས་ན། །དེ་ཡི་རིམ་པ་གོང་བཞིན་བྱ། །དེ་དག་བརྟགས་པའི་ཆོ་ག་ཡང་། །ཞག་གསུམ་ཞག་བདུན་རྩ་གཅིག་ཏུ། །རེ་དོགས་ལ་སོགས་ཐམས་ཅད་ཀུན། །སྤངས་ནས་རྣལ་འབྱོར་ཏིང་འཛིན་ལ། །ནན་ཏན་དུ་ནི་བརྩོན་འགྲུས་བྱ། །ཚོགས་འཁོར་ལ་སོགས་ཡང་དང་ཡང་། །
བྱེད་པའི་དུས་སུ་རྡོ་རྗེ་གླུ། ལེན་ཅིང་ཕྱག་རྒྱ་སོགས་བསྟན་པས། །ཏིང་འཛིན་ཕྱག་རྒྱ་གསལ་བ་དང་། །མཚན་མ་ལ་སོགས་གསལ་འབར་ཞིང་། །གཟུགས་དང་སྒྲ་དང་དྲི་ལ་སོགས། །ཐམས་ཅད་བརྟན་ཞིང་མི་འགྱུར་ན། །ལྷ་ཡི་མཚན་མར་ཤེས་པར་བྱ། །དེ་ལས་བཟློག་པ་
ཐམས་ཅད་ཀུན། །བདུད་ཀྱི་རྟགས་སུ་ཤེས་པར་བྱ། །དེ་ལ་སོགས་པ་མཐའ་ཡས་མཆོག །མཁའ་འགྲོའི་ལུང་དུ་བསྟན་པས་ན། །འདིར་ནི་སྒྲུབ་པོའི་དོན་དུ་བསྡུས། །སྒྲུབ་པའི་ཆ་རྐྱེན་མན་ངག་རྣམས། །སྒྲུབ་པོ་ཉམས་སུ་ལེན་པ་ལ། །བསྟན་ཞིང་སྤེལ་ན་བསོད་ནམས་
འཕེལ། །ཉམས་སུ་མི་ལེན་སེར་སྣ་ཅན། །རྫས་དང་ལུས་སྲོག་ལ་སོགས་པ། །བླ་མ་ལ་ནི་འབུལ་མི་ནུས། །དེ་ལ་མན་ངག་བསྟན་མི་བྱ། །དེ་ལ་མན་ངག་བསྟན་པ་ན། །དངོས་གྲུབ་ཉམས་ཏེ་སྡིག་པ་འཕེལ། །དམ་ཚིག་ཉམས་ནས་མཁའ་འགྲོས་གསོད། །ཆ་རྐྱེན་ལ་སོགས་
བཅུ་བདུན་པོ། །སྟོན་པ་ཕྱག་ན་རྡོ་རྗེ་ཡིས། །སེམས་དཔའ་ཕྱག་ན་རྡོ་རྗེ་ལ། །རྣ་བ་བརྒྱུད་པའི་གདམས་ངག་དེ། །རྡོ་རྗེ་མཁའ་འགྲོ་མ་ལ་བསྟན། །དེས་ནི་རོ་ལངས་མ་ལ་བསྟན། །གནོད་སྦྱིན་ཕྱག་ན་རྡོ་རྗེ་དང་། །སློབ་དཔོན་ཕྱག་ན་རྡོ་རྗེ་ཡིས། །བརྒྱུད་པའི་གདམས་ངག་རིམ་པ་
རྣམས། །ནན་ཏན་གྱིས་ནི་བཙལ་བར་བྱ། །དེ་ལ་བཙལ་བ་མ་ཤེས་ན། །དཔེར་ན་ཡིད་བཞིན་ནོར་བུ་ནི། །ཀླུ་རྒྱལ་གཙུག་ནས་རྙེད་ནས་ནི། །འདམ་རྫབ་ནང་དུ་སྟོར་བ་བཞིན། །དེ་བཞིན་མན་ངག་རིན་ཆེན་འདི། །ལུས་ངག་ཡིད་གསུམ་དཀའ་བ་ཡི། །སྒོ་ནས་སློབ་དཔོན་ལ་བཙལ་
ནས། །དམ་མེད་རྨོངས་པའི་ལག་ཤོར་ན། །དངོས་གྲུབ་མི་ཐོབ་ཉམས་པར་འགྱུར། །དེ་བས་ནན་ཏན་བསྐྱེད་དེ་བཙལ། །ལུང་བསྟན་པའི་རིམ་པའི་སྦྱོར་ཀའོ། །སློབ་དཔོན་ཆེན་པོ་བྷ་བས་མཛད་པ་རྫོགས་སོ།།      །།ལོ་ཙཱ་བ་ཚུལ་ཁྲིམས་གཞོན་ནུས་བསྒྱུར་ཅིང་གཏན་ལ་ཕབ་པ།།      །།

49-1-332a

༄༅༅། །རྒྱ་གར་སྐད་དུ། བཛྲ་ཀརྨ་སཾ་གྷ་ཀྲ་མོདྒྷ་ཊ་བི་དྷིཿ། བོད་སྐད་དུ། རྡོ་རྗེ་ལས་ཀྱི་ཚོགས་རིམ་པར་ཕྱེ་བའི་ཆོ་ག །བཅོམ་ལྡན་འདས་རྡོ་རྗེ་བསྣམས་པ་ལ་དད་ཅིང་གུས་པས་ཕྱག་འཚལ་ལོ། །སེམས་ཅན་ལ་ནི་ཕན་པའི་ཕྱིར། །ལས་ཀྱི་ཚོགས་ནི་བདུད་རྩི་མཚུངས། །
རྒྱུད་རྣམས་ཀུན་ལས་བཏུས་ནས་ནི། །བདག་གིས་སྒྲུབ་པའི་དོན་དུ་བཤད། །ལས་རྣམས་ཐམས་ཅད་ཅི་བྱེད་ཀྱང་། །གཏོར་མའི་ལས་འདི་གྲོགས་སུ་འགྱུར། །དེ་བས་གཏོར་མ་སྔོན་ལ་བཤད། །གཏོར་མའི་ལས་རྣམས་ཀུན་ལ་ཡང་། །ཏིང་འཛིན་སྔགས་དང་ཕྱག་རྒྱ་དང་། །ཚིགས་
བཅད་རྫས་ཀྱི་ནུས་པའི་མཐུས། །དེ་ལྔ་ཚོགས་ན་ལས་རྣམས་འགྲུབ། །དེ་ཡང་ཏིང་འཛིན་རྒྱལ་པོའི་རྒྱལ། །བྲམ་ཟེ་སྔགས་ཀྱི་ནུས་མཐུ་ཅན། །རྗེའུ་རིགས་ཕྱག་རྒྱ་ཉིད་དང་མཐུན། །ཚིགས་བཅད་ཐ་མལ་སྤྱོད་པ་འདྲ། །རྫས་ནི་ཀུན་གྱི་གཞི་རྟེན་འགྱུར། །དེ་ཡང་སྤྱི་དང་ཁྱད་པར་
རོ། །སྤྱི་ནི་ཀུན་གྱི་ནུས་མཐུ་ཅན། །ནུས་པ་དྲག་པོ་འབྱིན་པ་ཡིན། །ཁྱད་པར་སོ་སོ་ཀུན་ལ་ཡང་། །ནུས་པ་ཆེ་ཆུང་རིམ་པ་འབྱུང་། །དེ་ཡི་རྣལ་འབྱོར་རིམ་པ་ཡང་། །ལས་དང་པོ་ནི་མོས་པ་འཇོག །དངོས་གྲུབ་ཕྲ་མོ་ཕྲིན་ལས་དབང་། །ཡེ་ཤེས་ཕྲ་མོས་ཕྲིན་ལས་རྫོགས། །ཡེ་
ཤེས་ཅན་ནི་དེ་ཉིད་འཐོབ། །ཡང་དག་པས་ནི་བྱ་བ་རྫོགས། །རྣལ་འབྱོར་དེ་ལྔའི་རིམ་པས་ཀྱང་། །གཏོར་མ་ལ་སོགས་ལས་རྣམས་ལ། །ཏིང་འཛིན་ལ་སོགས་འཇུག་ཐབས་ལྔ། །མན་ངག་ཅན་གྱིས་ཤེས་པར་བྱ། །དེ་བཞིན་ལས་རྣམས་ཀུན་ལ་ཡང་། །མན་ངག་ཅན་གྱིས་སྦྱར་
བར་བྱའོ། །གཏོར་མ་དབུལ་བའི་རིམ་པ་ཡང་། །མགྲོན་གྱི་ལྷ་ནི་གཉིས་སུ་བྱ། །འཇིག་རྟེན་འདས་དང་འཇིག་རྟེན་པ། །འཇིག་རྟེན་འདས་ལ་གཉིས་ཡོད་དེ། །བདེ་གཤེགས་སྤྲུལ་དང་ས་ལ་གནས། །དེ་དག་གཉིས་ལའང་སྤྱི་དང་ནི། །སོ་སོའི་ཁྱད་པར་ཤིས་པར་བྱ། །འཇིག་
རྟེན་པ་ལ་གཉིས་ཡོད་དེ། །སྤྱི་དང་སོ་སོའི་ཁྱད་པར་རོ། །སྤྱི་ནི་ཁམས་གསུམ་སེམས་ཅན་ཀུན། །ཁྱད་པར་ཆོས་སྐྱོང་སྲུང་མ་རྣམས། །དེ་ལ་ཁྱད་པར་སོ་སོ་ལ། །དཔག་ཏུ་མེད་པ་ཡོད་མོད་ཀྱང་། །དགོས་པ་བསྡུས་པ་བསྟན་པར་བྱ། །གཏོར་མའི་རྫས་རྣམས་བསྟན་པ་ནི། །ཐུན་

49-1-332b

མོང་རྫས་དང་ཁྱད་པར་རྫས། །ཐུན་མོང་དྲུག་ཅུར་སྦྱར་ཞེས་བྱ། །ཁྱད་པར་བདུད་རྩི་རྣམ་ལྔ་དང་། །དཀར་གསུམ་མངར་གསུམ་ལ་སོགས་དང་། །ཤ་སྣ་ཁྲག་ལ་སོགས་པ་དང་། །མགྲིན་གྱི་སྐབས་དང་སྦྱར་བར་བྱ། །ཏིང་འཛིན་བསྟན་པའི་རིམ་པ་ཡང་། །བདག་ཉིད་ལྷག་པའི་ལྷར་བསྐྱེད་
ལ། །མཚན་དང་ལྡན་པའི་སྣོད་མཆོག་ཏུ། །ཉི་ཟླའི་གདན་བསམ་བདུད་རྩི་བསམ། །ས་བོན་ལས་བསྐྱེད་དེས་སུ་མཚན། །དེ་འོག་མེ་དང་རླུང་ནི་བསམ། །དེ་ཡི་སྟེང་དུ་རྡོ་རྗེ་བསམ། །དེ་ཡི་སྟེང་དུ་རི་བོང་ཅན། །ཡི་གེ་ཨོཾ་གྱིས་མཚན་པ་ཡིན། །ཧཱུཾ་བསྐྱེད་པས་ནི་རླུང་བྱུང་བས། །མེ་འབར་
བདུད་རྩི་དྲོས་པར་འགྱུར། །ཨོཾ་གྱིས་ཡེ་ཤེས་བདུད་རྩི་ཕབ། །རྡོ་རྗེས་དཀྲུག་ཅིང་འབྲུ་གསུམ་བཟླས། །དྲི་མེད་དག་པའི་བདུད་རྩིར་གྱུར། །དེ་ནི་ཐུན་མོང་ཏིང་འཛིན་ཡིན། །ཁྱད་པར་སོ་སོའི་སྐབས་སུ་བསྟན། །ཐུན་མོང་གི་ནི་སྔགས་བསྟན་པ། །ཨོཾ་བུདྡྷ་ཌཱ་ཀི་ནཱི་སརྦ་བ་ལིཾ་ཏ་ཁ་ཁ་ཁཱ་ཧི། 
ཨོཾ་བཛྲ་ཌཱ་ཀི་ནཱི་སརྦ་བ་ལིཾ་ཏ་ཁ་ཁ་ཁཱ་ཧི། ཨོཾ་རཏྣ་ཌཱ་ཀི་ནཱི་སརྦ་བ་ལིཾ་ཏ་ཁ་ཁ་ཁཱ་ཧི། ཨོཾ་པདྨ་ཌཱ་ཀི་ནཱི་སརྦ་བ་ལིཾ་ཏ་ཁ་ཁ་ཁཱ་ཧི། ཨོཾ་བི་ཤྭ་ཌཱ་ཀི་ནཱི་སརྦ་བ་ལིཾ་ཏ་ཁ་ཁ་ཁཱ་ཧི། ཨོཾ་སརྦ་ཌཱ་ཀི་ནཱི་སརྦ་བ་ལིཾ་ཏ་ཁ་ཁ་ཁཱ་ཧི། ཁྱད་པར་གྱི་སྔགས་བསྟན་པ་ནི། །ཨོཾ་བཛྲ་ཌཱ་ཀི་བྱ་བ་ཁྱེར་ཙི། རཱུ་པ་ཀཱ་ཀཱ་སྱ་ཙི་ལ་
ཀཱ་ལ་རཱུ་པ། ཨི་མཾ་བ་ལིཾ་གྲྀཧྣཾ་ཏུ་ས་མ་ཡཾ་རཀྵནྟུ་ཡ་ཐཻཥྚཾ་སརྦ་སིདྡྷིམྨེ་པྲ་ཡཙྪནྟུ། ཧཱུཾ་ཧཱུཾ་ཕཊ་སྭཱ་ཧཱ། ཚིགས་བཅད་ཀྱི་ནི་རིམ་པ་ཡང་། །སྤྱི་དང་ཁྱད་པར་གཉིས་སུ་བསྟན། །སྤྱི་ཡི་ཚིགས་བཅད་བསྟན་པ་ནི། །མཁའ་དབྱིངས་རྣམ་དག་ཀློང་དཀྱིལ་ནས། །སྨོན་ལམ་ཐུགས་རྗེའི་དབང་གིས་
ན། །མཁའ་འགྲོ་མི་བཟད་སྐུ་སྤྲུལ་ནས། །འཇིགས་བྱེད་འཇིགས་པའི་སྐུ་འཆང་མ། །སྐུ་ལ་བསྒྲིབས་པ་མི་མངའ་ཡང་། །འགྲོ་བ་སེམས་ཅན་དོན་སླད་དུ། །བདུད་རྩི་ལ་སོགས་གསོལ་མཛད་མ། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །བུདྡྷ་མཁའ་འགྲོ་དཔལ་
འབར་བ། །སྨུག་ནག་འབར་བའི་རལ་པ་ཅན། །སྟོབས་ལྡན་དྲག་ཤུལ་སྐུ་འཆང་མ། །སྐུ་ཡི་སྟོབས་ལྡན་མཐུ་ཆེན་ལས། །སྐུ་ཡི་ལྷ་མོའི་སྤྲུལ་པ་འགྱེད། །བུདྡྷ་མཁའ་འགྲོ་འཁོར་བཅས་རྣམས། །ཡང་སྤྲུལ་སྨུག་མོ་འབུམ་གྱིས་བསྐོར། །དགྱེས་པའི་ཚུལ་གྱིས་འདིར་གཤེགས་

49-1-333a

མཆོད་པ་བཞེས། །རྡོ་རྗེ་མཁའ་འགྲོ་དཔལ་འབར་མ། །མཐིང་ནག་འབར་བའི་རལ་པ་ཅན། །ཐུགས་མཆོག་འབར་བའི་རིགས་ལྡན་མ། །མི་འགྱུར་ཐུགས་ཀྱི་དཔལ་བེའུ་ནས། །ཐུགས་ཀྱི་ལྷ་མོ་སྤྲུལ་པ་འགྱེད། །རྡོ་རྗེ་མཁའ་འགྲོ་འཁོར་བཅས་རྣམས། །འཁོར་
དུ་ནག་མོ་འབུམ་གྱིས་བསྐོར། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །རིན་ཆེན་མཁའ་འགྲོ་དཔལ་འབར་མ། །སེར་ནག་འབར་བའི་རལ་པ་ཅན། །ཡོན་ཏན་རྒྱས་པའི་རིགས་ལྡན་མ། །རིན་ཆེན་འབར་བའི་མཛོད་སྤུ་ནས། །རིན་ཆེན་རིགས་ཀྱི་སྤྲུལ་པ་འགྱེད། །རིན་ཆེན་
མཁའ་འགྲོ་འཁོར་བཅས་རྣམས། །འཁོར་དུ་སེར་མོ་འབུམ་གྱིས་བསྐོར། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །པདྨ་མཁའ་འགྲོ་དཔལ་འབར་མ། །དམར་ནག་འབར་བའི་རལ་པ་ཅན། །གསུང་མཆོག་འབར་བའི་རིགས་ལྡན་མ། །དྲི་མེད་གསུང་གི་བུམ་པ་
ནས། །གསུང་གི་ལྷ་མོའི་སྤྲུལ་པ་འགྱེད། །སྒྲ་རྣམས་སྒྲོགས་པའི་མཁའ་འགྲོ་མ། །འཁོར་དུ་དམར་མོ་འབུམ་གྱིས་བསྐོར། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །ལས་ཀྱི་མཁའ་འགྲོ་དཔལ་འབར་མ། །ལྗང་ནག་འབར་བའི་རལ་པ་ཅན། །ལས་རྣམས་མཛད་
པའི་རིགས་ལྡན་མ། །ཕྱག་ཞབས་པདྨའི་འཁོར་ལོ་ལས། །ལས་ཀྱི་ལྷ་མོའི་སྤྲུལ་པ་འགྱེད། །དྲག་ཤུལ་ལས་ཀྱི་མཁའ་འགྲོ་མ། །འཁོར་དུ་ལྗང་ནག་འབུམ་གྱིས་བསྐོར། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །མཁའ་ལ་འགྲོ་བའི་མཁའ་འགྲོ་མ། །རྡོ་རྗེ་ནམ་
མཁར་འགྲོ་མ་རྣམས། །ས་ལ་འགྲོ་བའི་མཁའ་འགྲོ་མ། །རྡོ་རྗེ་ས་འོག་འགྲོ་མ་དང་། །བར་སྣང་འགྲོ་བའི་མཁའ་འགྲོ་མ། །མཁའ་འགྲོ་མ་དང་ཤུགས་འགྲོ་མ། །མ་མོའི་ཚོགས་དང་སྲིང་མོའི་ཚོགས། །ནག་མོ་དབང་ཕྱུག་ཚོགས་རྣམས་ཀུན། །དགྱེས་པའི་ཚུལ་གྱིས་འདིར་གཤེགས་
མཆོད་པ་བཞེས། །གནོད་སྦྱིན་ཚོགས་རྣམས་མ་ལུས་དང་། །ཞེས་བྱ་བ་ལ་སོགས་པ་ཀློག་ཕྲེང་ནས་འབྱུང་བའི་རྒྱུད་བཞིན་དུ་གཏོང་ངོ་། །ཁྱད་པར་སོ་སོའི་ཚིགས་བཅད་ནི། །མཁའ་ལ་སྤྱོད་པའི་མཁའ་འགྲོ་མ། །བྱ་རོག་གཟུགས་ཅན་འཇིགས་པའི་གཟུགས། །པདྨ་ལ་

49-1-333b

གནས་ཁྭ་གདོང་མ། །ཐོད་པ་ཁ་ཊྭཱཾ་ག་ཡིས་བརྒྱན། །གྲི་གུག་གཅོད་མཛད་ཐོད་ཁྲག་འཐུང་། །ཕྱག་བཞི་དེ་བཞིན་རོལ་པ་མཛད། །ཞལ་གྱི་ང་རོས་བདུད་རྣམས་བརྒྱལ། །སྤྱན་གསུམ་སྨིན་མའི་དཀྱུས་ལྡན་མ། །སྤྱན་གསུམ་འོད་ཀྱིས་ཁམས་གསུམ་གསལ། །རོལ་པའི་འདུག་སྟངས་
གར་དང་ལྡན། །སྒེག་པ་ལ་སོགས་རོ་ལྡན་པ། །གར་གྱི་སྤྱོད་ལྡན་མཁའ་འགྲོ་མ། །ཁྲོ་བོའི་རྒྱལ་པོ་སྟོངས་ཆེན་རྣམས། །སྦྱོར་ལྡན་ཚུལ་གྱི་འཁོར་གྱིས་བསྐོར། །འཁོར་བཅས་མ་ལུས་ཐམས་ཅད་ཀྱང་། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །མཁའ་
འགྲོ་ཆེན་མོ་ས་སྤྱོད་མ། །ཁྱི་ཡི་གདོང་ཅན་འཇིགས་པའི་གཟུགས། སྤྱན་མིག་ཀློག་འགྱུ་སྟོང་མཛད་མ། །ཞལ་གདངས་པས་ནི་ཁམས་གསུམ་རྔུབ་། །ཕྱག་གི་གར་གྱིས་དགྱེས་པར་མཛད། །སྐུ་ཡི་སྒེག་པས་རོལ་པར་ལྡན། །ཞབས་ཀྱིས་འབྱུང་པོ་ཟིལ་གྱིས་གནོན། །དྲག་པོ་
འཁོར་དང་བཅས་པ་རྣམས། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །ས་འོག་གནས་པའི་མཁའ་འགྲོ་མ། །གཽ་རཱི་ནག་མོ་ཆེན་མོ་ནི། །ཉ་ཡི་གདོང་ཅན་འཇིགས་པའི་གཟུགས། སྤྱན་གསུམ་འོད་ཟེར་འབར་བ་ཡིས། །ཁམས་གསུམ་མ་ལུས་སྐྲག་
པར་བྱེད། །ཞལ་གྱིས་ས་འོག་སེམས་ཅན་གསོལ། །ཕྱག་གི་གྲི་ཡིས་ཉམས་རྣམས་གཏུབས། །ཞབས་རྣམས་རོལ་པས་ས་འོག་གནོན། །གར་གྱི་འགྱིང་ཚུལ་ལ་བརྩོན་པ། །ཧ་ཧ་ཧི་ཧི་སྒྲ་སྒྲོགས་མ། །དྲག་པོའི་འཁོར་དང་བཅས་པ་རྣམས། །དགྱེས་པའི་ཚུལ་གྱིས་འདིར་
གཤེགས་མཆོད་པ་བཞེས། །ཕྱོགས་སྐྱོང་གནས་པའི་མཁའ་འགྲོ་མ། །ཐོད་པ་འབར་བའི་གཞལ་ཡས་ནས། །རྡོ་རྗེ་ཧཱུཾ་བདག་གཙོ་བདག་མཛད། །སྡིགས་མཛུབ་རྡོ་རྗེ་འགྱིང་བག་ཅན། །ཤིན་ཏུ་མི་བཟད་འཇིགས་མཛད་མ། །སྤྱན་ནི་སྔོན་པོའི་མདོག་དང་ལྡན། །འབར་བ་
སྔོན་པོར་རབ་ཏུ་ཁྱབ། །ཞབས་བསྐུམ་ཚུལ་གནས་མ་མོ་གནོན། །དེ་འཁོར་ཕྱོགས་སྐྱོང་མཁའ་འགྲོ་མ། །ཤར་གྱི་ཕྱོགས་ཀྱི་ཚངས་པ་མོ། །ཞལ་གཅིག་སྤྱན་གསུམ་གར་ལ་བརྩོན། །རྔུབ་དང་སྐྲག་དང་འཛིན་པའི་ལས། །ཕྲེང་བ་སྤྱི་བླུགས་བསྣམས་པའི་མཁའ་འགྲོ་མ། །

49-1-334a

དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །ལྷོ་ན་གནས་པའི་ཁྱབ་འཇུག་མ། །ཞལ་གཅིག་སྤྱན་གསུམ་གར་ལ་བརྩོན། །རྔུབ་དང་སྐྲག་དང་འཛིན་པའི་ལས། །འཁོར་ལོ་པདྨ་བསྣམས་པའི་མཁའ་འགྲོ་མ། །དགྱེས་པའི་ཚུལ་གྱིས་
འདིར་གཤེགས་མཆོད་པ་བཞེས། །ནུབ་ན་གནས་པའི་གཞོན་ནུ་མ། །ཞལ་གཅིག་སྤྱན་གསུམ་གར་ལ་བརྩོན། །རྔུབ་དང་སྐྲག་དང་འཛིན་པའི་ལས། །རྩེ་གསུམ་ཕྲེང་བ་བསྣམས་པའི་མཁའ་འགྲོ་མ། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །བྱང་ན་གནས་
པའི་གཤིན་རྗེ་མ། །ཞལ་གཅིག་སྤྱན་གསུམ་གར་ལ་བརྩོན། །རྔུབ་དང་སྐྲག་དང་འཛིན་པའི་ལས། །དབྱུག་པ་མི་མགོ་བསྣམས་པའི་མཁའ་འགྲོ་མ། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །མེ་ཡི་ཕྱོགས་ན་གནས་པའི་ཙ་མུཎྜཱི། །ཞལ་གཅིག་སྤྱན་གསུམ་
གར་ལ་བརྩོན། །རྔུབ་དང་སྐྲག་དང་འཛིན་པའི་ལས། །འཁོར་ལོ་སེང་གེ་བསྣམས་པའི་མཁའ་འགྲོ་མ། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །སྲིན་པོའི་ཕྱོགས་ན་གནས་པའི་ཙ་མུཎྜཱི། །ཞལ་གཅིག་སྤྱན་གསུམ་གར་ལ་བརྩོན། །རྔུབ་དང་སྐྲག་དང་འཛིན་
པའི་ལས། །རལ་གྲི་རྒྱལ་མཚན་བསྣམས་པའི་མཁའ་འགྲོ་མ། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །དབང་ལྡན་མཚམས་ན་གནས་པའི་དབང་ལྡན་མ། །ཞལ་གཅིག་སྤྱན་གསུམ་གར་ལ་བརྩོན། །རྔུབ་དང་སྐྲག་དང་འཛིན་པའི་ལས། །མདུང་ཐུང་ཐོད་པ་
བསྣམས་པའི་མཁའ་འགྲོ་མ། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །རླུང་གི་ཕྱོགས་ན་གནས་པའི་རླུང་ལྷ་མོ། །ཞལ་གཅིག་སྤྱན་གསུམ་གར་ལ་བརྩོན། །རྔུབ་དང་སྐྲག་དང་འཛིན་པའི་ལས། །གོས་དང་ཐོད་པ་བསྣམས་པའི་མཁའ་འགྲོ་མ། །མ་མོ་
མཁའ་འགྲོ་འཁོར་བཅས་རྣམས། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །མཁའ་འགྲོ་ཆེན་མོ་ཐང་སྤྱོད་མ། །ཁྱུ་མཆོག་རྡོ་རྗེ་འཇིགས་པའི་གཟུགས། དེ་ཡིས་ཐུགས་ལས་སྤྲུལ་པ་མོ། །མཁའ་འགྲོ་དྲག་མོ་མཐུ་མོ་ཆེ། །རོ་ལངས་མ་ནི་ཟ་ལ་དགའ། །

49-1-334b

གཏུམ་མོ་འཇིགས་པའི་ཆ་ལུགས་ཅན། །སེང་གེ་ཆེན་མོ་མཆོད་བྱེད་མ། །སྟག་མོ་ཆེན་མོ་འཁྱུག་བྱེད་མ། །འུག་གདོང་ཆེན་མོ་མུན་པ་འཇོམས། །ཅེ་སྤྱང་མ་ནི་ཁྲག་ཏུ་ཟ། །མཁའ་འགྲོ་ཆེན་མོ་འཁོར་བཅས་ཀྱང་། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །
མཁའ་འགྲོ་ཆེན་མོ་གཞོན་ནུ་མ། །སྐུ་མདོག་སེར་མོ་འོད་ཟེར་འབར། །འོད་ཟེར་ཕྲེང་བ་སྟོང་ཕྲག་འཕྲོ། །མཛེས་པའི་རྒྱན་རྣམས་ཀུན་གྱིས་བརྒྱན། །རྣམ་སྣང་མཛད་ཀྱི་དབུ་རྒྱན་ཅན། །མྱ་ངན་མེད་པའི་མེ་ཏོག་ཕྲེང་། །དབུ་ལ་མཛེས་པའི་རྒྱན་དུ་བྱས། །ཞལ་གསུམ་ཕྱག་
དྲུག་མཐུ་མོ་ཆེ། །སྒེག་ཅིང་རོལ་དང་བཅས་པ་མོ། །གཞོན་ནུ་ཆེན་མོ་འཁོར་བཅས་ཀྱང་། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །མཁའ་འགྲོ་ཆེན་མོ་ལྷག་སྡུད་མ། །དུར་ཁྲོད་བརྒྱད་ཀྱི་དབུས་གནས་པ། །བཅོམ་ལྡན་འཁོར་བ་སྒྲོལ་བའི་མཆོག །དར་བབ་
ལོ་ཡི་ན་ཚོད་གནས། །ལྗང་གུའི་མདོག་ཅན་འགྱིང་བག་ཅན། །གྲུ་གསུམ་ནང་གི་ཕྱོགས་དག་ན། །ཡེ་ཤེས་ཅན་དང་མཁའ་འགྲོ་མ། །སྐྱོན་མ་གོས་པའི་གོས་དཀར་མོ། །ཉོན་མོངས་འཁྲུ་བྱེད་མཱ་མ་ཀཱི། །འབར་བའི་ཕྲེང་བས་ཁྱབ་ཅིང་དྲག །མཁའ་འགྲོ་ཆེན་མོ་ཁྱེད་བཞི་ཡང་། །
ལྷག་སྡུད་རྣམས་ཀྱི་གཙོ་མོར་གྲགས། །མཁའ་འགྲོ་ཆེན་མོ་ལྷག་སྡུད་རྣམས། །དུར་ཁྲོད་བརྒྱད་ཀྱི་ཕྱོགས་དག་ན། །ཁ་ཊྭཱཾ་ག་དང་མགོ་ལ་སོགས། །ཐོད་པ་རྣམས་ཀྱིས་ཡོངས་སུ་བརྒྱན། །ཤིང་གཅིག་དང་ནི་ལྡན་པ་ཉིད། །ཁྲ་དང་ཁྱི་དང་སྤྱང་ཀི་དང་། །སེང་གེ་སྟག་དང་བྱི་ལ་
དང་། །བྱ་རྒོད་ལ་སོགས་འཁོར་གྱིས་བསྐོར། །དཔའ་བོ་རྣལ་འབྱོར་མ་ཚོགས་ཀྱིས། །མཉེས་པར་སྤྲས་པའི་གཟུགས་འཛིན་མ། །མཁའ་འགྲོ་ཆེན་མོ་ཀེང་རུས་མ། །དྲག་པོ་གྲི་གུག་སྣོད་ཐོགས་པ། །གྲི་གུག་གཅོད་པའི་ལས་མཛོད་ཅིག །ཐོད་པའི་ཁྲག་ནི་འཐུང་བར་བྱེད། །
སྐྲ་བཤིག་པ་ལ་སྤྱན་གསུམ་པ། །ཡི་དགས་ཞལ་དུ་རྔུབ་པར་བྱེད། །དྲག་པོ་མི་བཟད་གསུས་པ་འཕྱང་། །ཐོད་པ་འབར་བའི་རྒྱན་དང་ལྡན། །རྒྱུ་མའི་ཕྲེང་བས་ངེས་པར་བརྒྱན། །སྟག་གི་པགས་པའི་ཤམ་ཐབས་ཅན། །མི་ཡི་རུས་པའི་ཕྲེང་ལྡན་པའི། །སྐ་རགས་ཁྲག་གི་

49-1-335a

ཐིག་ལེ་ཅན། །ཡི་དགས་ཀླད་པ་ཚིལ་དང་ཞག །ལུས་ལ་བྱུག་པ་ལ་དགྱེས་པ། །ལག་འགྲོ་ཆེན་མོའི་རྣ་ཆ་ཅན། །བྲང་འགྲོའི་རྐང་གདུབ་འཇིགས་རུང་བ། །ཁ་དོག་དཀར་པོ་འབར་བའི་ཚོགས། །གཟི་བརྗིད་ཐུབ་པ་དག་པ་ཡིས། །ཤིན་ཏུ་མི་བཟད་ཁྲོས་
པས་ནི། །གནོད་སྦྱིན་ལ་སོགས་སྡིགས་པར་བྱེད། །ཧ་ཧ་ཆེན་པོའི་སྒྲ་སྒྲོགས་པ། །མཁའ་འགྲོ་ཆེན་མོ་དུད་སོལ་གདོང་། །དེ་འདྲའི་མཁའ་འགྲོ་དཔག་མེད་དང་། །ཤ་ཟ་ལ་སོགས་འཁོར་གྱིས་བསྐོར། །འཁོར་བཅས་མ་ལུས་ཐམས་ཅད་ཀྱིས། །འདིར་གཤེགས་ལྷག་
མའི་གཏོར་མ་བཞེས། །ལྷག་མའི་གཏོར་མ་འདི་བཞེས་ལ། །ལས་རྣམས་མ་ལུས་མྱུར་དུ་མཛོད། །ཁྱེད་ཀྱིས་ལས་རྣམས་མཛད་ཚུལ་ནི། །རྒྱལ་བ་ཤཱཀ་ཐུབ་བསྟན་པ་ལ། །གནས་པའི་རྣལ་འབྱོར་བསྲུང་བ་དང་། །བསྟན་པ་གཉེན་པོ་བསྲུང་བ་དང་། །ནད་རྣམས་མ་ལུས་བཟློག་
པ་དང་། །དེ་ལ་སོགས་པའི་ལས་རྣམས་ཀུན། །མྱུར་དུ་མཛད་ཅིང་སྲུང་དུ་གསོལ། །གཞན་ཡང་བཅོལ་བའི་ལས་རྣམས་ནི། །རྡོ་རྗེ་སློབ་དཔོན་སྨོད་པ་དང་། །སངས་རྒྱས་བསྟན་པ་བཤིག་པ་དང་། །རྒྱལ་ཁམས་ཡོངས་སུ་སྨོད་པ་དང་། །དགེ་འདུན་འདུ་བའི་སྒོ་འཕྲོག་དང་། །
གསང་སྔགས་ཐེག་ཆེན་སྨོད་པ་དང་། །རྣལ་འབྱོར་སྤྱི་ཡི་དགྲར་གྱུར་རྣམས། །མཁའ་འགྲོ་ཁྱེད་ཀྱིས་མྱུར་དུ་སྒྲོལ། །ཤ་ཟ་མོ་ནི་འཇིགས་པའི་གཟུགས། དུར་ཁྲོད་གནས་པའི་ཤིང་གཅིག་ལ། །རྩེ་མོར་གནས་བཅས་ཀུན་དུ་བལྟ། །གཅེར་བུ་སྐྲ་བཤིག་ཤ་ཟ་མ། །རྟག་ཏུ་ཤ་ནི་ཟ་བར་བྱེད། །ཤ་ཟ་
འཁོར་དང་བཅས་པ་རྣམས། །འདིར་གཤེགས་མཆོད་པ་དམ་པ་བཞེས། །མཁའ་ལྡིང་རྒྱལ་པོ་གསེར་མིག་ཅན། །གདོང་གཅིག་པ་ལ་ལག་བཞི་པ། །ཁ་དོག་དཀར་པོའི་འོད་ཆེན་ལྡན། །གསེར་གྱི་གཤོག་པའི་དབུ་རྒྱན་ཅན། །ནོར་བུ་བཻ་ཌཱུརྱ་ཡི་མཆུ། །
རྐང་གཟེར་བྱི་རུ་ལས་བྱུང་བ། །ཤེལ་ལྟར་དཀར་བའི་མདོག་དང་ལྡན། །སྐྱེ་བའི་གནས་སུ་བདུད་རྩིས་བཀང་། །ཕྱག་གིས་བུམ་འཛིན་ཕྱག་འཚལ་བསྟོད། །འོད་ཟེར་དམར་པོའི་ཚོགས་ཀྱིས་ནི། །མཁའ་ལྡིང་དབང་ཕྱུག་འཁོར་བཅས་སྤྲོས། །གཤོག་ཟུར་བརྒྱབ་པས་རྒྱ་

49-1-335b

མཚོ་སྐེམས། །ཀླུ་རྣམས་མ་ལུས་ཟས་སུ་ཟ། །མཁའ་ལྡིང་རྒྱལ་པོ་འཁོར་བཅས་རྣམས། །འདིར་གཤེགས་མཆོད་པ་དམ་པ་བཞེས། །ཀླུ་ཡི་རྒྱལ་པོ་གཟི་བརྗིད་ཅན། །ཀླུ་ཆེན་བརྒྱད་དུ་སྐུས་སྤྲུལ་པ། །ཀླུ་ཆེན་རྒྱལ་པོ་ནོར་རྒྱས་བུ། །སྐུ་མདོག་དཀར་པོ་སྐྱོན་མ་གོས། །
ཤར་ཕྱོགས་ཀླུ་རྣམས་འདུལ་མཛད་པ། །སྦྲུལ་མགོ་ཅན་ལ་ཕྱག་འཚལ་བསྟོད། །ཀླུ་ཡི་རྒྱལ་པོ་འཇོག་པོ་ནི། །སྐུ་མདོག་སེར་པོ་སྦྲུལ་མགོ་ཅན། །བྱང་ཕྱོགས་ཀླུ་རྣམས་འདུལ་མཛད་པ། །སྦྲུལ་ཞགས་བསྣམས་ལ་ཕྱག་འཚལ་བསྟོད། །ཀླུ་ཆེན་རྒྱལ་པོ་སྟོབས་ཀྱི་རྒྱུ། །སྐུ་
མདོག་དམར་པོ་སྦྲུལ་མགོ་ཅན། །ནུབ་ཕྱོགས་ཀླུ་རྣམས་འདུལ་མཛད་པ། །མཐུ་ཆེན་ཁྱོད་ལ་ཕྱག་འཚལ་བསྟོད། །ཀླུ་ཆེན་རྒྱལ་པོ་པདྨའི་རྒྱལ། །སྐུ་མདོག་སྔོན་པོ་སྦྲུལ་མགོ་ཅན། །ལྷོ་ཕྱོགས་ཀླུ་རྣམས་འདུལ་མཛད་པ། །ཡོན་ཏན་རྒྱལ་ལ་ཕྱག་འཚལ་བསྟོད། །ཀླུ་ཆེན་རྒྱལ་
པོ་པདྨ་ཆེ། །སྐུ་མདོག་དཀར་སེར་སྦྲུལ་མགོ་ཅན། །དབང་ལྡན་ཀླུ་རྣམས་འདུལ་མཛད་པ། །སྐྱོན་མ་གོས་ལ་ཕྱག་འཚལ་བསྟོད། །ཀླུ་ཆེན་རྒྱལ་པོ་དུང་སྐྱོང་ནི། །སྐུ་མདོག་དཀར་སྔོ་སྦྲུལ་མགོ་ཅན། །ཤར་ལྷོའི་ཀླུ་རྣམས་འདུལ་མཛད་པ། །དུག་རྣམས་འཇོམས་ལ་ཕྱག་འཚལ་བསྟོད། །
ཀླུ་ཆེན་རྒྱལ་པོ་རིགས་ལྡན་ནི། །སྐུ་མདོག་སྔོན་དམར་སྦྲུལ་མགོ་ཅན། །ལྷོ་ནུབ་ཀླུ་རྣམས་འདུལ་མཛད་པ། །སྟོབས་པོ་ཆེ་ལ་ཕྱག་འཚལ་བསྟོད། །ཀླུ་ཆེན་རྒྱལ་པོ་པདྨ་འཁྱིལ། །སྐུ་མདོག་དམར་སེར་སྦྲུལ་མགོ་ཅན། །ནུབ་བྱང་ཀླུ་རྣམས་འདུལ་མཛད་པ། །ནད་རྣམས་སེལ་ལ་ཕྱག་འཚལ་
བསྟོད། །ཨོཾ་མཐའ་ཡས་དང་ནི་ནོར་རྒྱས་བུ། །འཇོག་པོ་དང་ནི་སྟོབས་ཀྱི་རྒྱུ། །པདྨ་པདྨ་ཆེན་པོ་དང་། །དུང་སྐྱོང་དང་ནི་རིགས་ལྡན་དང་། །ལྷ་མོ་ལྷ་མོ་ཆེན་མོ་དང་། །ཟླ་བ་སྤྱི་གཙུག་སྤྱི་གཙུག་ཆེ། །བེ་ཅོན་འཛིན་དང་བེ་ཅོན་ཆེ། །སྙིང་པོ་མེད་དང་གུ་ལ་ཏི། །དགའ་བོ་དང་ནི་ཉེར་
དགའ་དང་། །རྒྱ་མཚོ་དང་ནི་རྒྱ་མཚོ་ཆེ། །གདུང་བ་དང་ནི་གདུང་ཆེན་མོ། །དཔལ་གྱི་འོད་དང་འོད་པོ་ཆེ། །རིན་ཆེན་འོད་དང་གཟུགས་བཟང་དང་། །གཟུགས་ཆེན་སྦྲུལ་བཟངས་ལྟོ་འཕྱེ་ཆེ། །སྨིག་རྒྱུ་དང་ནི་སྨིག་རྒྱུ་ཆེ། །ཀླུ་ཆེན་བརྒྱད་པོ་འཁོར་བཅས་རྣམས། །འདིར་གཤེགས་མཆོད་

49-1-336a

སྦྱིན་གཏོར་མ་བཞེས། །དཔལ་ལྡན་མགོན་པོ་ནག་པོ་ཆེ། །སྐུ་མདོག་མཐིང་ནག་ཞལ་གཅིག་པ། །གཡོན་བརྐྱང་གཡས་བསྐུམ་འབྱུང་པོ་འདུལ། །མཐུ་སྟོབས་ཅན་ལ་ཕྱག་འཚལ་ལོ། །ནམ་མཁའི་གོས་ཅན་མཐུ་བོ་ཆེ། །སྟག་གི་པགས་པའི་ཤམ་ཐབས་
ཅན། །སྦྲུལ་དང་ཐོད་པའི་ཕྲེང་བར་ལྡན། །མཐུ་ཆེན་ཐོབ་ལ་ཕྱག་འཚལ་བསྟོད། །མཆེ་བ་གཙིགས་པ་མི་བཟད་པ། །ཐོད་པའི་ཕྲེང་བ་བཀོད་པ་ཡིས། །མགྲིན་པ་རྐང་པ་རྣམ་བརྒྱན་པ། །མི་བཟད་ཐོད་ཕྲེང་ཅན་ལ་བསྟོད། །སྨིན་མ་ཁམ་པའི་སྨིན་འཁྱུག་ཅན། །སྤྱན་གསུམ་གྱིས་
ནི་རྣམ་པར་སྤྲས། །ཁམས་གསུམ་ལ་ནི་གཟིགས་པའི་རྟགས། །སྐུ་གསུང་ཐུགས་ལྡན་ཁྱོད་ལ་བསྟོད། །དང་པོ་སྤྱན་ནི་ནག་པོ་མཚུངས། །གཡས་པ་སྔོན་པོར་སྣང་བ་སྟེ། །གཡོན་པ་དམར་པོར་ཤིན་ཏུ་མཛེས། །གསལ་བར་མཁྱེན་ལ་ཕྱག་འཚལ་བསྟོད། །ཡེ་ཤེས་སྤྱན་ནི་
གསུམ་པོ་ཡང་། །མི་འགྱུར་ཕྲིན་ལས་ཆགས་པའི་རྟགས། །ཉི་མ་ཁྲི་དང་མཚུངས་པའི་འོད། །འོད་ལྡན་ཁྱོད་ལ་ཕྱག་འཚལ་བསྟོད། །ཕ་རོལ་ཕྱིན་བཅུའི་མཐུ་ལྡན་པའི། །ཕྱོགས་བཅུའི་འགྲོ་བའི་དོན་མཛད་པའི། །ཤེས་རབ་རལ་གྲི་རྣོན་པོ་ཡིས། །ཉོན་མོངས་གཅོད་མཛད་ཁྱོད་ཕྱག་
འཚལ། །ཐུགས་རྗེས་འབར་བའི་ཐོ་བ་ཡིས། །དགྲ་བགེགས་ཐལ་བར་ལོག་མཛད་པ། །རྩེ་གསུམ་འབར་བའི་འོད་ཟེར་གྱིས། །དུག་གསུམ་རྩད་གཅོད་ཁྱོད་ཕྱག་འཚལ། །རྒྱུད་སྦྲེང་ལ་ནི་བརྩོན་གྱུར་པ། །མཁའ་འགྲོ་རྣམས་ནི་བསྐུལ་བའི་རྟགས། །གཡས་ཀྱི་ཐབས་ཀྱི་ཕྱག་
རྣམས་ནི། །ལས་རྣམས་མཛད་པ་ཁྱོད་ཕྱག་འཚལ། །གཡོན་གྱི་ཐོད་པས་ཁྲག་བཀང་བ། །དགྲ་བགེགས་ཞལ་དུ་རྔུབ་མཛད་པ། །ཁ་ཊྭཱཾ་རྩེ་གསུམ་བསྣམས་པ་ནི། །ཉོན་མོངས་གདུང་བ་སེལ་མཛད་པ། །གར་གྱི་ཐབས་ཀྱི་ཕྱག་རྒྱ་ནི། །ལས་ལ་སྐུལ་མཛད་ཁྱོད་ཕྱག་འཚལ། །མི་
ཡི་པགས་པ་ཁྲག་འཛག་པ། །སྟེང་གི་ཕྱག་ནི་གཉིས་ན་བསྣམས། །དྲག་པོའི་ལས་ལ་རོལ་པའི་རྟགས། །དྲག་པོའི་ལས་མཛད་ཁྱོད་ཕྱག་འཚལ། །དེ་ཡི་བཀའ་སྟོད་ཕོ་ཉ་མོ། །མཁའ་འགྲོ་ཆེན་མོ་མི་སྡུག་གདོང་། །ཁྱོད་ཀྱིས་དྲག་པོའི་ལས་མཛོད་ཅིག །དྲག་པོའི་ལས་མཛད་

49-1-336b

ཁྱོད་ཕྱག་འཚལ། །སེང་གདོང་ཆེན་མོ་རྩལ་མོ་ཆེ། །འབྱུང་པོ་ཐམས་ཅད་འཇིགས་མཛད་མ། །འབྱུང་པོ་བསྒྲལ་བའི་ལས་མཛོད་ཅིག །སྒྲོལ་མཛད་ཁྱོད་ལ་ཕྱག་འཚལ་བསྟོད། །མཁའ་འགྲོ་ཆེན་མོ་གླང་པོའི་གདོང་། །ཁྱོད་ཀྱི་སྟོབས་ཀྱིས་བདུད་རྣམས་འདུལ། །བདུད་རྣམས་
མ་ལུས་ཁྱོད་ཀྱིས་འདུལ། །བདུད་འདུལ་ཆེན་མོ་ཁྱོད་ཕྱག་འཚལ། །མཁའ་འགྲོ་ཆེན་མོ་དྲེད་མོའི་གདོང་། །རྡོ་རྗེའི་བྲག་ཀྱང་འགས་པར་བྱེད། །བྲག་འགས་ཆེན་མོ་མཐུ་རྩལ་ཅན། །མཐུ་རྩལ་ཅན་ལ་ཕྱག་འཚལ་བསྟོད། །མཁའ་འགྲོ་ཆེན་མོ་སྦྲུལ་གྱི་གདོང་། །གསོད་བྱེད་
གསོད་བྱེད་མཐུ་མོ་ཆེ། །སྨན་དང་དུག་གི་སྦྱོར་མཁན་མ། །སྦྱོར་མཁན་མ་ལ་ཕྱག་འཚལ་བསྟོད། །མཁའ་འགྲོ་ཆེན་མོ་བྱི་ལའི་གདོང་། །མགྱོགས་བྱེད་རྩལ་དང་ལྡན་པ་མོ། །གང་ལ་བྱ་བའི་དོན་གྲུབ་མ། །དོན་གྲུབ་མ་ལ་ཕྱག་འཚལ་བསྟོད། །མཁའ་འགྲོ་ཆེན་མོ་ཁྱི་ཡི་གདོང་། །
གཙང་སྨེ་མེད་པར་ཟ་བའི་མཆོག །ཤ་ཁྲག་དུས་གསུམ་གསོལ་མཛད་མ། །གསོལ་མཛད་མ་ལ་ཕྱག་འཚལ་བསྟོད། །མཁའ་འགྲོ་ཆེན་མོ་སྟག་གི་གདོང་། །དཔལ་བརྟུལ་ཆེན་མོ་མཐུ་མོ་ཆེ། །གསོད་ལ་དགའ་བའི་མཁའ་འགྲོ་མ། །གསོད་བདག་ཆེན་མོ་ཁྱོད་ཕྱག་འཚལ། །
མཁའ་འགྲོ་ཆེན་མོ་ཁྱོད་རྣམས་ཀྱང་། །འཁོར་དུ་ཡང་སྤྲུལ་འབུམ་གྱིས་བསྐོར། །ཧ་ཧ་ཞེས་པའི་སྒྲ་སྒྲོགས་ཤིང་། །རྨོངས་པ་རྣམས་ནི་སྐྲག་བྱེད་ཅིང་། །ཐོད་པའི་ནང་དུ་བླུགས་པའི་ཁྲག །འཐུང་བར་བྱེད་པའི་མཁའ་འགྲོ་མ། །སྐད་ཅིག་ཡུད་ལ་སྒྲོལ་བར་བྱེད། །འཁོར་
བཅས་ཁྱེད་ལ་ཕྱག་འཚལ་བསྟོད། །དཔལ་ལྡན་མགོན་པོ་ནག་པོ་ལ། །མཆོད་པ་དམ་པ་འབུལ་བ་ནི། །མེ་ཏོག་སྤོས་དང་མར་མེ་དང་། །དྲི་ལ་སོགས་པ་འབུལ་གྱིས་བཞེས། །མཐུན་པའི་གཏོར་མ་འབུལ་བ་ནི། །ཐུག་པ་ནག་པོའི་འོ་ཐུག་དང་། །སྦྱར་བ་ལ་སོགས་མི་བཟད་དབུལ། །
བསྟན་པ་བསྲུང་བའི་ལས་མཛོད་ཅིག །ལོན་པ་དང་ནི་བཙོས་པ་དང་། །བསྲེགས་པའི་ཤ་ཡི་བྱེ་བྲག་རྣམས། །མི་བཟད་དབུལ་གྱིས་བཞེས་སུ་གསོལ། །བསྟན་པ་བསྲུང་བའི་ལས་མཛོད་ཅིག །ཞག་དང་ཀླད་པའི་ཚིལ་རྣམས་དང་། །ཁྲག་དང་ཀློ་བ་ལ་སོགས་པ། །ཉ་ལ་

49-1-337a

སོགས་པ་མི་བཟད་དབུལ། །བསྟན་པ་བསྲུང་བའི་ལས་མཛོད་ཅིག །རྒུན་ཆང་དང་ནི་སྦྱར་བའི་ཆང་། །འབྲུ་ཡི་ཆང་ལ་སོགས་པ་དང་། །འབྲེང་བུའི་ཆུན་པོ་མི་བཟད་དབུལ། །སྒོག་པའི་བྱེ་བྲག་བདུན་རྣམས་དང་། །སྣུམ་ཁུར་འབྲུ་ལ་སོགས་པ་དང་། །ཟངས་
ལྕགས་ལ་སོགས་མི་བཟད་དབུལ། །བསྟན་པ་བསྲུང་བའི་ལས་མཛོད་ཅིག །གཞན་ཡང་མཁའ་འགྲོ་ཆེན་མོ་རྣམས། །སྤྱང་གདོང་མ་དང་སེང་གདོང་མ། །གླང་པོའི་གདོང་དང་བྱི་ལའི་གདོང་། །ཁྱི་གདོང་མ་དང་སྟག་གདོང་མ། །མཁའ་འགྲོ་ཆེན་མོ་འཁོར་བཅས་ལ། །ཤ་ཁྲག་
གཏོར་མ་མི་བཟད་དབུལ། །མཆོད་པ་དམ་པ་འདི་བཞེས་ལ། །ཁྱེད་ལ་བཅོལ་བའི་ཕྲིན་ལས་ནི། །རྡོ་རྗེ་སློབ་དཔོན་སྨོད་པ་དང་། །སངས་རྒྱས་བསྟན་པ་བཤིག་པ་དང་། །རྒྱལ་ཁམས་ཡོངས་ལ་གནོད་པ་དང་། །དགེ་འདུན་འདུ་བའི་སྒོ་འཕྲོག་དང་། །ཐེག་ཆེན་ཆོས་ལ་སྨོད་པ་དང་། །རྣལ་
འབྱོར་སྤྱི་ཡི་དགྲར་གྱུར་རྣམས། །མ་ཐོགས་མྱུར་དུ་བསྒྲལ་དུ་གསོལ། །ཕྱི་ནང་ཚུལ་དུ་སྐུ་སྤྲུལ་པའི། །རྒྱལ་པོ་ཆེན་པོ་བཞི་རྣམས་ནི། །སོ་སོའི་ཕྱོགས་ཀྱི་འཁོར་སྐྱོང་བ། །དྲག་པོའི་ལས་མཛད་རྒྱལ་པོ་བཞི། །ཡུལ་འཁོར་སྐྱོང་གི་རིགས་རྣམས་ཀུན། །ཆང་སྤངས་པ་ཡི་གཏོར་མ་ལོང་། །
རྒྱལ་པོ་ཆེན་པོ་རྣམ་ཐོས་སྲས། །གནོད་སྦྱིན་སྟོང་ལ་མངའ་མཛད་པ། །ཁྱེད་ཀྱི་མཐུན་པའི་དམ་རྫས་ནི། །ཤ་ཆང་ལ་སོགས་གཏོར་མ་ལོང་། །རྒྱལ་པོ་ཆེན་པོ་འཕགས་སྐྱེས་པོ། །གྲུལ་བུམ་སྟོང་ལ་མངའ་མཛད་པའི། །ཤིན་ཏུ་ཁྲག་ལ་དགྱེས་པའོ། །ཁྲག་གིས་བཀང་བའི་གཏོར་མ་
ལོང་། །རྒྱལ་པོ་ཆེན་པོ་སྤྱན་མི་བཟང་། །ཀླུ་རྣམས་སྟོང་ལ་མངའ་མཛད་པ། །འོ་མ་དག་ལ་ཤིན་ཏུ་དགྱེས། །འོ་མས་བཀང་བའི་གཏོར་མ་ལོང་། །རྒྱལ་པོ་ཆེན་པོ་འཁོར་བཅས་ཀྱང་། །འདིར་གཤེགས་མཆོད་སྦྱིན་གཏོར་མ་བཞེས། །དྲི་ཟའི་རྒྱལ་པོ་ཟུར་ཕུད་ཅན། །སྤོས་ངད་
ལྡན་པའི་རྩེ་ལ་གནས། །དྲི་རྣམས་ཞིམ་པས་ལུས་ལ་བྱུགས། །མེ་ཏོག་ཕྲེང་བས་ལུས་ནི་བརྒྱན། །དྲི་ཟའི་བུ་མོ་ལུས་ལ་འཁྲིལ། །ས་འཛིན་ལ་སོགས་གླུ་ཡི་ནི། །བྱེ་བྲག་བདུན་གྱི་སྒྲ་རྣམས་སྒྲོགས། །ཟས་སུ་དྲི་རྣམས་ཟ་བར་བྱེད། །དྲི་ཟ་འཁོར་དང་བཅས་པ་རྣམས། །འདིར་

49-1-337b

གཤེགས་ཚུལ་བཞིན་གཏོར་མ་བཞེས། །ཤ་ཟའི་རྒྱལ་པོ་མཐུ་བོ་ཆེ། །ཤིན་ཏུ་འཇིགས་པའི་ང་རོ་སྒྲོགས། །ཞལ་གདངས་པས་ནི་ཤ་རྣམས་གསོལ། །ཤ་ཟ་འཁོར་དང་བཅས་པ་རྣམས། །འདིར་གཤེགས་ཚུལ་བཞིན་གཏོར་མ་བཞེས། །རྣལ་འབྱོར་ཆེན་མོ་འཕྲོག་མའི་གདོང་། །
མཆེ་བ་གཙིགས་པ་འཇིགས་སུ་རུང་། །ཁ་ནས་ལྕེ་འདྲིལ་མཐུ་མོ་ཆེ། །གར་གྱི་ཚུལ་དུ་མཆོད་མཛད་མ། །གནོད་སྦྱིན་འཕྲོག་མ་འཁོར་བཅས་རྣམས། །འདིར་གཤེགས་མཆོད་པ་དམ་པ་བཞེས། །ལྷ་དང་ལྷ་མིན་རྒྱལ་པོ་ནི། །རྒྱུ་བ་དང་ནི་ཆེར་རྒྱུ་བ། །ཡི་དགས་རྒྱུ་བ་ཉི་མ་ཟླ། །དངོས་གྲུབ་
གདོང་དང་རྒྱལ་པོ་དང་། །རྟ་ཡི་རྒྱལ་པོ་ཟླ་བའི་རྒྱལ། །ལྷ་མོ་ཀླུ་མོ་འགའ་འགའ་དང་། །གཟུགས་མཛེས་སྐར་མ་འདུས་པ་དང་། །གཟའ་རྣམས་ཀུན་དང་ཚོགས་ཀྱི་གཙོ། །ཀརྟི་ཀ་དང་དཔལ་ལྡན་མ། །ལྷ་མོ་རི་བོང་འཛིན་པ་ཉིད། །ལྷག་མ་དང་ནི་ལྷག་མ་ཆེ། །ལྷ་ཡི་རྒྱལ་པོ་ལྷ་
མིན་རྒྱལ། །པུཀྐ་སཱི་དང་སྦོམ་ཆེན་མོ། །ལྷ་དང་ལྷ་མིན་རྒྱལ་པོ་ཆེ། །འཁོར་བཅས་མ་ལུས་ཐམས་ཅད་ཀྱང་། །འདིར་གཤེགས་མཆོད་པ་དམ་པ་བཞེས། །གནོད་སྦྱིན་རྒྱལ་པོ་ཆེན་པོ་ནི། །ནོར་བུ་བཟང་དང་གང་བ་བཟང་། །རྒྱལ་བ་བཟང་པོ་དགའ་བྱེད་ཕུར། །ཕུར་བུ་ཆེ་དང་པདྨའི་
གཙུག །ཐུང་གི་གཙུག་ཕུད་གར་དང་ནི། །གར་ཆེན་འབིགས་པར་བྱེད་པ་དང་། །གཅོད་པར་བྱེད་དང་གང་བར་བྱེད། །ནོར་དང་ནོར་མིན་ཤིན་ཏུ་ནོར། །གཟུགས་བཟང་རོལ་པ་རོལ་ཆེན་པོ། །དགོད་དང་རྩེ་ལྡན་རྣམ་པར་སྤྱོད། །དཔལ་བཟངས་དང་ནི་གཟུགས་མཛེས་རྣམས། །བདེ་
བ་ཆེན་པོའི་བཀའ་འདི་ཡིས། །གནོད་སྦྱིན་གནོད་སྦྱིན་མ་འདིར་ཤོག །གནོད་སྦྱིན་འཁོར་བཅས་མ་ལུས་ཀྱང་། །འདིར་གཤེགས་མཆོད་སྦྱིན་གཏོར་མ་ལོང་། །མཁའ་འགྲོ་ནག་མོ་ཆེན་མོ་ནི། །ཨོཾ་ཤིང་གཅིག་དང་ནི་དུར་ཁྲོད་དང་། །རི་བོ་དང་རི་རི་སུལ་ཕུག །གྲོང་དང་བཞི་མདོ་ཞིང་
དང་ནི། །ཁྱད་པར་དུ་ནི་ཁང་སྟོང་དང་། །སེམས་ཅན་གནོད་དང་ཐང་དང་ནི། །ཁྱད་པར་དུ་ནི་ཆུ་ལ་གནས། །ནག་པོ་ཆེན་པོ་དྲག་ཆེན་པོ། །ལྷ་སྦྱིན་མཉམ་དུ་སྟོན་པ་དང་། །ནག་པོ་གཙིགས་དང་འཇིགས་བྱེད་དང་། །དགའ་ལས་འདས་དང་ལོག་འདྲེན་རྣམས། །རྒན་བྱེད་མོ་དང་

49-1-338a

དྲག་མོ་དང་། །འཇིགས་བྱེད་མོ་དང་ཨུ་མ་དང་། །རྒྱལ་དང་རྣམ་པར་རྒྱལ་བ་དང་། །མི་ཐུབ་གཞན་གྱིས་མི་ཐུབ་མ། །ནག་མོ་བཟང་མོ་ནག་མོ་ཆེ། །ནག་མོ་སྦོམ་དང་རྣལ་འབྱོར་མ། །དབང་མོ་དང་ནི་ཟླ་བ་ཆེ། །དྲག་ཏུ་སྡང་དང་འཆང་བ་མོ། །འཕྲོག་བྱེད་མ་
དང་མར་མེ་མ། །འཇིགས་བྱེད་གྲོང་གནས་རྣལ་འབྱོར་མ། །དྲག་མོའི་གཟུགས་དང་གཟུགས་ཆེན་མོ། །མཆེ་བ་གཙིགས་དང་ཐོད་ཆེན་མ། །ཐོད་ཕྲེང་ཕྲེང་ཅན་ཁ་ཊྭཱཾ་ག །སྦྲུལ་ཆེན་རལ་གྲི་དགྲ་སྟ་ཅན། །རྡོ་རྗེ་དེ་བཞིན་གཞུ་ཅན་མ། །དེ་ཉིད་ཆེན་མོ་མཁའ་འགྲོ་མ། །ལུས་ཀུན་རྗེས་
སུ་གྲུབ་བྱེད་མ། །སྦྱོར་བའི་དཀྱིལ་འཁོར་རྒྱ་ཆེན་མོ། །དེ་བཞིན་རྡོ་རྗེ་དབང་ཕྱུག་གཙོ། །དེ་བཞིན་གཤེགས་པའི་སྐུ་ཆེན་ཏེ། །རྡུལ་མེད་རྣལ་འབྱོར་འབྱིན་པ་མོ། །རྡོ་རྗེ་དབང་པོའི་བཀའ་འདི་ཡིས། །ཐམས་ཅད་ཀུན་ནས་འདིར་སྤྱོན་ཅིག །མཁའ་འགྲོ་ནག་མོ་འཇིགས་པའི་
གདོང་། །ནག་མོ་ཆེན་མོའི་ཚོགས་ཀྱིས་བསྐོར། །དུར་ཁྲོད་ཀུན་དུ་རྒྱུག་མཛད་མ། །དཔག་ཚད་བརྒྱད་ཁྲི་བཞི་སྟོང་ནས། །སྐད་ཅིག་ཡུད་ལ་ཕྱིན་མཛད་མ། །ཁྲག་གི་དྲི་སྣོམ་མཐུ་མོ་ཆེ། །འཁོར་བཅས་འདིར་གཤེགས་གཏོར་མ་ལོང་། །ཁྱེད་ལ་བཅོལ་བའི་ཕྲིན་ལས་ནི། །
རྡོ་རྗེ་སློབ་དཔོན་སྨོད་པ་དང་། །སངས་རྒྱས་བསྟན་པ་འཇིག་པ་དང་། །རྒྱལ་ཁམས་ཡོངས་སུ་གནོད་པ་དང་། །དགེ་འདུན་འདུ་བའི་སྒོ་འཕྲོག་དང་། །གསང་སྔགས་ཐེག་ཆེན་སྨོད་པ་དང་། །རྣལ་འབྱོར་སྤྱི་ཡི་དགྲར་གྱུར་རྣམས། །མ་ཐོགས་མྱུར་དུ་བསྒྲལ་དུ་གསོལ། །རྣལ་འབྱོར་
ལྕམ་དྲལ་བསྲུང་བ་དང་། །རིམས་ནད་ཡམས་ནད་བཅད་པ་དང་། །མི་མཐུན་རྐྱེན་དབང་བཟློག་ཏུ་གསོལ། །དེ་ནས་གསང་སྔགས་བསྟན་བྱ་སྟེ། །སྔགས་རྣམས་ནུས་པའི་མཐུ་ཡིས་ནི། །དུག་རྣམས་འཇོམས་ཤིང་ཐམས་ཅད་སྦྱང་། །སྔགས་རྣམས་སོ་སོའི་ཚིགས་བཅད་དང་། །
སྦྱར་བ་རུ་ནི་ཤེས་པར་བྱ། །ཡང་ན་སྔགས་རྣམས་ཕྱོགས་གཅིག་གཏང་། །ཚིགས་བཅད་ཀྱང་ནི་ཕྱོགས་གཅིག་གཏང་། །དེ་ནི་མན་ངག་སྐབས་ཤེས་བྱའོ། །སྐབས་རྣམས་དེ་ནི་མ་ཤེས་ན། །ནུས་པའི་མཐུ་ནི་ཉམས་པར་འགྱུར། །ཡང་ན་ཚིགས་བཅད་གཅིག་པུས་ཀྱང་། །

49-1-338b

གང་ཡིན་དོན་རྣམས་འགྲུབ་པར་འགྱུར། །རྡོ་རྗེའི་ཚིགས་བཅད་དོན་ལྡན་ནི། །སྔགས་དང་འདྲ་བ་ཉིད་དུ་གསུངས། །རྡོ་རྗེ་ཚིག་གི་ཁྱད་པར་གྱི། །སྔགས་ཀྱི་ལྷ་ཡི་ཡོན་ཏན་གྱི། །དོན་རྣམས་ཀུན་ནི་བརྗོད་པས་སུ། །དོན་དམ་ཀུན་རྫོབ་ལས་མི་འདའ། །དོན་དམ་ཀུན་རྫོབ་བརྗོད་ཚིག་
ཏུ། །སྔགས་མཚོན་བྱེད་པའི་རྡོ་རྗེའི་ཚིག །དེ་ལ་སྔགས་ཞེས་བྱ་བ་ཡིན། །ཨོཾ་ན་མཿ་ཤྲཱི་བཛྲ་ཌཱ་ཀི་ཡ། ཨོཾ་ཀ་ཀཱ་སྱེ་ཧཱུཾ་ཧཱུཾ་ཕཊ། ཨོཾ་ཨ་ཡན་ཏྭ་ཡནྡུ་ཌཱ་ཀི་བྱ་ཤན་རྦག་ཏྲ་མ་ཧོ། བྲ་བྷི་མ་ཝ། ཨི་ཤ་ཨི་མཾ་བ་ལིཾ། བྷུཉྫ་ཛི་གྷ་པི་པ་གྲྀཧྣ་ཏ། ཨཱཏྨ་ཀཾ་པུཥྚིཾ་ཀུ་རུ། ས་མ་ཡ་མ་
ནུ་སྨ་ར་ཨ་ཧཱུཾ་ཕཊ་སྭཱ་ཧཱ། ཨོཾ་ཤྭ་ན་སེ་བྷཱུ་ཙ་རི་ཡེ་ཨི་མཾ་བ་ལིཾ། གྲྀཧྣ་གྲྀཧྣ། ཧཱུཾ་ཧཱུཾ་ཕཊ། ཨོཾ་ཨེ་ཧྱེ་ཧི་མ་ཧཱ་པཱ་ལ་བིརྱ་བར་གྲ་མ་ཡོ་ཛ་ན་ས་ཧཱ་སྲ་བྲ་ལཾ་བརྦ་པུ་ཤཾ། ཏི་ལི་ཏི་མི་གི་ལི་མ་ཧཱ་ཏི་མིངྒི་ལ་བྲི་བྷི་ཏ་ཡོ་མ་ཧཱ་མི་ན་ཨ་དྷི་པ་ཏི་ཡ་ཨ་སནྣི་ཧི་ཏོ་བྷ་བནྟུ། མ་མ་ཨ་བ་མ་བེ་ཏ་ཝ་སིདྡྷི་མ་བི་ཏ་ར་
ན་ཏུ་སྭཱ་ཧཱ། ཨོཾ་ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཿསྭཱ་ཧཱ། ཨོཾ་ན་མོ་བྷ་ག་བ་ཏེ་བཛྲ་ཧཱུཾ་ཀ་ར། ཧྲིཾ་ཥྚཾ་སརྦ་བྷཱུ་ཏ་ནི་སྟམྦྷ་སྭཱ་ཧཱ། ཨོཾ་བྲཧྨཻ་ཧཾ་ཧཱུཾ་ཧཱུཾ་ཕཊ། ཨོཾ་བ་ཤ་བི་ཧཱུཾ་ཕཊ། ཨོཾ་ཀཽ་མཱ་རཱི་ཡ་ཧྲི་ཧཱུཾ་ཕཊ། ཨོཾ་ཡ་མེ་ཧྲི་ཧཱུཾ་ཕཊ། ཨོཾ་ཀོ་བཱི་རཱི་ཡེ་ཧཱུཾ་ཕཊ། ཨོཾ་ཙ་མུཎྜཱི་ཡེ་ཧྲི་ཡེ་
ཧཱུཾ་ཕཊ། ཨོཾ་ཨཻ་ཤཱནྱཻ་ཧྲི་ཧཱུཾ་ཕཊ། ཨོཾ་མ་བྷེེ་ཧྲིཾ་ཧཱུཾ་ཕཊ། ཨོཾ་ཨ་ཨཱ་ཨཾ་ཨ་ཨ་ཀཱ་རོ་མུ་ཁཾ་སརྦ་དྷ་རྨཱ་ཎཱཾ་ཨཱ་དྱ་ནུཏྤནྣ་ཏྭཱ་ཏ་ཨོཾ་ཨཱཿཧཱུཾ་ཕཊ་སྭཱ་ཧཱ། ཨོཾ་ཏཱ་རེ་ཏུཏྟཱ་རེ་ཨཱཿཧཱུཾ་ཕཊ་སྭཱ་ཧཱ། ཨོཾ་མཱ་རཱི་ཙྱེེ་བ་ར་ལི་བ་དཱ་ལི་བཱ་ར་ཧཱ་མུ་ཁི་སརྦ་དུཥྚ་ནཾ་མུ་ཁཾ། བནྡྷ་བནྡྷ་ཧཱུཾ་ཧཱུཾ་ཕཊ། ཨི་མཾ་བ་ལིཾ་པྲ་
ཏཱིཙྪ་ས་མ་ཡ་མ་ནུ་སྨ་ར་ཧཱུཾ་ཕཊ་སྭཱ་ཧཱ། ཨོཾ་མ་ཧཱ་ཀཱ་ལ་ཨ་ཡ་ཧི་ཨ་ཨཱ་ཧི། མ་ཧཱ་བི་ཧ་ར་བ་ལ་ན་བརྦ་ཌཱ་ཀི་ནཱི་ཡཀྵ་རཱཀྵ་ས་བ་རི་བ་རོ། །ཨད་ཏྲ་སནྣི་ཧི་ཏོ་བྷ་བ་སྭཱ་ཧཱ། ཨོཾ་ཨད་ཤ་དིཀ་ཏྲི་ཨཱརྱ་སཾ་བྱ་བྱ་བ་ཏིཥྛ་ཏ། སརྦ་ད་ཤ་དིཀ་ལོ་ཀ་དྷཱ་ཏུ་བ་ར་མནྱ་པ་རན་ཏད་པར་ཏིང་། སརྦ་ཏིག་ལོ་ཀ་པ་
ཡ། མ་ཧཱ་ཀཱ་ལ་བཛྲ་ཨཱ་ཡུ་དྷ་མཱ་ཡ་བཛྲ། བཛྲ་ན་མ། བཛྲ་ག་ལ། བཛྲ་མུ་ས་ལ། ནཱ་ག་བཛྲ། བཛྲ་ཨ་ནི་ལ། བཛྲ་ཤོན་ཌཱ། བཛྲ་ཀྲོ་དྷ། བཛྲ་པྲ་པ། བཛྲ་ཀནྡྷ་ལི། མོན་བཛྲ། མེ་མ་ཙི་ཏྲ། པྲྀ་ཐི་བི་བབྷྱེེ་བ་ཧཱ། སརྦ་ཨིཏྱ་པ་ས་ར་ག་ཨུ་པ་ཤནྟེ་ཡེ། སརྦ་གནྡྷ་པུཥྤ་དྷཱུ་པ། དཱི་པ། ནེེ་བི་དྱེ།

49-1-339a

སརྦ་པ་ཏ་ཨ་ལཾ་ཀཱ་ར་དྷ་ནི་ཤྣ་པྲ་ཏཱིཙྪ་ཨུ་པ་དུ་ཛ། སརྦ་དུཥྚ་ནཱཾ་། ཀཱ་ཡ་བཱཀ་ཙིཏྟཾ་། སྟཾ་བྷ་ཡ་སྟཾ་བྷ་ཡ། མ་མ་སརྦ་ཨ་ཤཾ་པ་རི་པུ་ར། ཡ་ཐཱ་ཡ་བཱ། ཧཱ་སཱཾ་ས་རཾ་མ་མ་སརྦ་ས་ས་ཏཾ་ནཾ་ཙ། སཏྶུ་ཁ་སིདྡྷི་ཡེ་སྭཱ་ཧཱ། ཡཱ་ཀཱ་བྷཱ་བནྟུ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་བཛྲ་ཌཱ་ཀི་ས་མ་ཡ་མ་ནུ་པཱ་ལ་ཡ། བཛྲ་ཌཱ་ཀི་
ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿ་ཀུ་རུ་ཧཱུཾ། ཧ་ཧ་ཧ་ཧ་ཧོཿ་། བྷ་ག་ཝཱན། སརྦ་ཏ་ཐཱ་ག་ཏ་ཌཱ་ཀི་མ་མེ་མེ་མུཉྩ། ཌཱ་ཀི་བྷ་བ་མ་ཧཱ་ས་མ་ཡ་སཏྭ་ཨཿམུཿཨོཾ་དྲི་ཏ་རཥྚ་ཡ་ག་ག་ན་དྷ་ཝ་སེ་ནཱ་དྷི་པ་ཏ་ཡེ་ཨི་མཾ་བ་ལིཾ་པྲ་ཏཱིཙྪ་ས་མ་
ཡ་མ་ནུ་སྨ་ར་ཡ་ཧཱུཾ་ཧཱུཾ་ཕཊ་སྭཱ་ཧཱ་ཨོཾ་བཻ་ཤ་ར་མ་ཎ་ཡ་ཡཀྵ་སེ་ནཱ་དྷི་པ་ཏ་ཡེ་ཨི་མཾ་བ་ལིཾ་པྲ་ཏཱིཙྪ་ས་མ་ཡེ་མ་ནུ་སྨ་ར་ཨ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་བཱི་རུ་ཌཱ་ཀ་ཡ་མ་ཧཱ་ཀུམྦྷ་དྷཱ་དྷི་པ་ཏ་ཡེ། ཨི་མཾ་བ་ལིཾ་པྲ་ཏཱིཙྪ་ས་མ་ཡ་མ་ནུ་སྨ་ར་ཨཱཿཧཱུཾ་ཧཱུཾ་ཕཊ་སྭཱ་ཧཱ། ཨོཾ་བི་རུ་པཀྵ་མ་ཧཱ་ནཱ་གཱ་དྷི་པ་ཏ་ཡེ་ཨི་མཾ་བ་ལིཾ་པྲ་ཏཱིཙྪ་།
ས་མ་ཡ་མ་ནུ་སྨ་ར་ཨཿཧཱུཾ་ཧཱུཾ་ཕཊ་སྭཱ་ཧཱ། ཨོཾ་ག་ན་དྷརྦ་ཨ་དྷི་པ་ཏ་ཡེ་བི་ཙ་ཏྲ། ཨ་གནྡྷ་ཡོ། མ་མ་ཀརྱ་ས་ཏ་ཡེ། ཨི་ཧ་ཡནྟུ། བྷ་ག་བཱཾ་བཛྲ་དྷ་ར་ཤས་ནེ་ཏིཥྛནྟུ། ཨ་ཏྲ་སནྣི་ཧི་ཏོ་བྷ་བན་སྭཱ་ཧཱ། ཨོཾ་སྭ་བྷཱ་ཝ་ཤུདྡྷ་སརྦ་དྷ་རྨཱཿསྭ་བྷཱ་ཝ་ཤུདྡྷོ྅་ཧཾ། ཨོཾ་
ཨ་ཀཱ་རོ་མུ་ཁཾ་སརྦ་དྷ་རྨཱ་ཎཱཾ་ཨཱ་དྱ་ནུཏྤནྣ་ཏྭཱ་ཏ་ཨོཾ་ཨཱཿཧཱུཾ་ཕཊ་སྭཱ་ཧཱ། ཨོཾ་ཨ་རལླི་ཧོ་ཛཿཧཱུཾ་བཾ་ཧོཿ། བཛྲ་ཌཱ་ཀི་ནྱ་ས་མ་ཡ་སྟྭཾ་དྲྀ་ཤྱ་ཧོ༑ ཨོཾ་པི་ཙི་པི་ཙི་སྨ་ཤན་རྦ་སི་བྷྱོ། མ་ཧཱ་པི་ཤཱ་ཙ་བྷྱ། ཨི་མཾ་བ་ལིཾ་གྲྀཧྣ་ཏ་བྷུཉྫ་ཐ་པི་པ་ཐ། མ་མེཥྚ་སིདྡྷི་མྨེ་པྲ་ཡ་ཙྪནྟུ་སྭཱ་ཧཱ། ཨོཾ་དྷི་པཀྵི་རཱ་ཛ་ཡ། ཨཱ་གཙྪ་ཨཱ་གཙྪ་སརྦ་དུཥྚཾ་ནཾ་མུ་ཁཾ་བྷནྡྷ་ཀུ་རུ་མ་ཧཱ་ཀཱ་ལ་ཀུ་ཏ་
བི་ཤ་པ་ཧི་རི་ཤྲཱི་གྲ་ས་མ་ཡེ་ཏིཥྛ་། སྟུཾ་སྟུཾ་སྟུཾ་ས་ས་ས་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། ཨོཾ་སརྦ་ཏ་ཐཱ་ག་ཏ་ནེེ་བི་ཏྱེ་ས་མ་ཡ་ས་མུ་དྲ། སྥ་ར་ཎ་ཤྲི་ཡེ་ཧཱུཾ་ཨོཾ་ན་མོ་བྷ་ག་བ་ཏེ་ཨཱརྱ་པ་ར་མ་ཨ་ཤྲཱ་ཡ་ཏ་ཐཱ་ག་ཏཱ་ཡ། ཨརྟ་ཏེ་སམྱཀྶཾ་བུདྡྷཱ་ཡ་ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཨོཾ་གྲྀཧྞཱ་གྲྀཧྞཱ་པུཥྤ་དྷཱུ་པ་བ་ལིཾ་ཨི་མཾ་
སརྦ་ཨུ་པ་ཙ་ར་སམྦནྣམ། ཁ་གཱ་དྷི་བ་ཏེ་ཁ་ཁ་ཁཱ་ཧི་ས་མ་ཡ་མ་ནུ་སྨ་ར་ཨཿཧཱུཾ་ཕཊ་སྭཱ་ཧཱ། ཨོཾ་ཨེ་ཛ་ཧྱ་ཛ་ཧིཤྨ་ཤཱ་ན་ཝ་སེ་ནི་མ་མ་ས་པ་རི་བཱ་ར་རཀྴ་ཀུ་རུ་ཨི་ཧ་སནྣི་ཧི་ཏོ་བྷ་བ་སྭ་བ་སྭཱ་ཧཱ། ཨོཾ་ཀུ་རུ་ཝད་ཏྲ་ལི། སིདྡྷི་མུ་ཁིཤྨ་ཤ་ན་ཁ་སི་ནི། པྲེ་ཏ་ཝ་ཏ་ནི་ཙཎྜི་ཀ་ར་ལི། རུ་དྷི་ར་པྲི་ཡེ།

49-1-339b

ས་མ་ཡ་རཀྵ་ཏི། གོ་གད་ཙི། ཀི་ལི་ཀི་ལི། ར་བེ་བཛྲ་པྲི་ཏི་ཝན་མི་དྷ་བྷུཉྫ་ཏི། བྷ་ག་ནི་གུ་ཧྱ་ན་དུ་ཏེ། དྷུ་མཾ་ག་རི། ཙཎྜ་ཀཱ་ར་ལི། ཏིཥྛ་ཏིཥྛ། ཨི་མཾ་ཨུཙྪཥྛ། བ་ལིཾ་གྲིཧྣ་སརྦ་དུཥྚ་བྷཀྵ་ཡ་། ཧཱུཾ་ཕྲུཾ་ཕྲེཾ་ཕཊ་སྭཱ་ཧཱ། ཨོཾ་བ་ལེ་པ་ཏ་ལེ་མ་ཧཱ་པ་ཏ་ལེ་ཧཱུཾ་ཧཱུཾ་ཛྷ་སྭཱ་ཧཱ། ཧཱུཾ་ཧཱུཾ་ཧོ་ཧོ་ཨཱ་ཀཪྵ་ཡ། ཨཱ་ཀཪྵ་ཡ། ས་
མ་ཡ་ཨ་དྷི་པ་ཏེ་ཧཱུཾ་ཕཊ་སྭཱ་ཧཱ། ཨོཾ་ཨཱ་གཙྪ་ཨཱ་གཙྪ་མ་ཧཱ་ནཱ་ག་ཨ་དྷི་པ་ཏེ་སརྦ་བྷུརྦྷུ་བ་ཧཱུཾ་ཕཊ་སྭཱ་ཧཱ། ཧཱུཾ་ཨ་བརྡ་ར་ཨ་བརྡ་ར༑ ཨོཾ་པ་ཏ་ལེ་པ་ཏ་ལེ་བྷཀྵ་པྲི་ཡ། ཨོཾ་ཀི་ནི་མ་དྷེ་ཧཱུཾ་ཧཱུཾ་སྭཱ་ཧཱ། ཨོཾ་དྷ་ན་ཨ་དྷི་པ་ཏ་ཡེ་པ་ཏ་ལ་བྲུཾ་སྭཱ་ཧཱ། ཨོཾ་ཀ་ཀ་ཀནྡྷ་བ་བ་བནྡྷ་ན། ཁ་ཁ་ཁནྡྷ་ན། སརྦ་དུཥྚཱཾ་ནཾ། 
ཧ་ན་ཧ་ན། ག་ག་ག་ཏ་ཡ། ཨ་མུ་ཀ་སྱ།ཤཱནྟིཾ་ཀུ་རུ་ཧཱུཾ་ཧཱུཾ་ཕཊ་ཛ་སྭཱ་ཧཱ། ཨོཾ་ཏིཥྛ་ཧཱུཾ་བཀྵ་བཀྵ་ཛྫ་ཛྫ་སྭཱ་ཧཱ།།      །།དེ་ལྟར་སྔགས་རྣམས་བསྟན་ནས་ནི། །ཁྱད་པར་བྱིན་རླབས་བསྟན་པ་ནི། །དེ་ནས་བློ་དང་ལྡན་པ་ཡིས། །གལ་ཏེ་སྦྱོར་བ་གཞན་དང་བཅས། །ཚོན་ཆེན་གྱིས་ནི་གོས་དག་གམ། །
དར་ལ་སོགས་པ་གོན་ནས་ནི། །རྡོ་རྗེ་དྲིལ་བུ་དེ་བཞིན་དུ། །རྒྱན་རྣམས་ཀུན་གྱིས་མཛེས་པར་བརྒྱན། །ཤར་ལ་སོགས་པའི་ཕྱོགས་རྣམས་སུ། །ལས་ཀྱི་སྐབས་དང་བསྟུན་ཏེ་བལྟ། །འདུག་སྟངས་ལ་སོགས་དེ་བཞིན་སྦྱར། །བསྐྱེད་པའི་རིམ་པ་ཚུལ་བཞིན་བསྒོམ། །མྱུར་བར་འདོད་
ན་རྫུས་སྐྱེས་ཚུལ། །མཆོད་བྱ་སྤྲུལ་དང་སྤྱན་དྲང་བ། །གང་འདོད་པ་ནི་བྱ་བ་ཡིན། །གཉིས་ཀས་བྱ་བར་འདོད་པའང་ཡོད། །ཐུན་མོང་བྱིན་རླབས་གོང་བཞིན་ནོ། །ཁྱད་པར་བྱིན་རླབས་བསྟན་པ་ནི། །ཟླ་བ་ཨོཾ་ནི་བསམས་ནས་སུ། །འོད་ཟེར་སྟོབས་ཀྱིས་རྣམ་རྟོག་སྦྱོང་། །ཉི་མར་ཨ་ནི་
བསམས་ནས་ཀྱང་། །དྲི་མ་མེད་པར་བསམ་པར་བལྟ། །གཉིས་ཀའི་ཧཱུཾ་གིས་འོད་དུ་འབར། །ཧས་སུ་བདུད་རྩི་ཞུ་བར་བསམ། །ཡི་གེ་རཾ་གྱིས་མཚན་མ་བསྲེགས། །ཡཾ་གིས་བདུད་རྩི་དྲི་མེད་འགྱུར། །ཨོཾ་གྱིས་གང་འདོད་དོན་རྣམས་འགྲུབ། །ཧཱུཾ་གིས་སྦྱངས་ནས་ཨཱཿས་སུ་འབར། །
ཨོཾ་གྱིས་རྟོགས་པར་བྱ་བ་ཡིན། །ཧས་སུ་གཟུགས་བཅོམ་ཧྲཱིཿཡིག་ནི་། །རོ་ལ་སོགས་པ་བཅོམ་པ་ཡིན། །ཧོས་སུ་བདུད་རྩི་འབར་བར་བསམ། །ཡང་ན། ཧྲཱིཿས་སུ་རོ་དང་ཧོས་སུ་དྲི། །བདུད་རྩིའི་རང་བཞིན་ཉིད་དུ་བལྟ། །རི་རབ་རྡོ་རྗེས་དཀྲུགས་ནས་ཀྱང་། །ཡེ་ཤེས་བདུད་རྩི་བསྟིམ་

49-1-340a

པའམ། །ཧཱུཾ་ནི་གཅིག་པུས་སྦྱང་ཞིང་བསྲེག །ཡེ་ཤེས་ཀྱང་ནི་དེས་སུ་དབབ། །སོ་སོ་རྩ་བའི་སྔགས་ཀྱིས་ནི། །ལན་གསུམ་ལན་བདུན་བརྗོད་པས་སུ། །སྦྱང་ཞིང་བྱིན་གྱིས་བརླབ་པ་དང་། །སྔགས་རྣམས་སོ་སོའི་ནུས་མཐུ་ནི། །རྒྱུད་རྣམས་སོ་སོར་
དག་ནས་ནི། །འབྱུང་བ་དག་གིས་བརླབ་པ་འམ། །སྔགས་ནི་གོང་མ་ལེན་ཞེས་བྱ། །སོ་སོ་ལྷ་ཡི་ཡིག་འབྲུས་ཀྱང་། །ལན་གསུམ་ལན་བདུན་སྦྱང་བ་ཡིན། །དེ་ལྟར་བྱིན་རླབས་མན་ངག་རྣམས། །འཇིག་རྟེན་འདས་དང་འཇིག་རྟེན་པའི། །བྱིན་རླབས་མན་ངག་སྐབས་དང་
སྦྱར། །བྱིན་གྱིས་བརླབས་པའི་ལས་རྣམས་སོ། །ཕྱག་རྒྱ་བཅིངས་པའི་སྦྱོར་བ་ནི། །ཐུན་མོང་ཕྱག་རྒྱ་ཐམས་ཅད་ནི། །རྡོ་རྗེ་ཐལ་མོའི་ཚུལ་དུ་ནི། །བཅངས་ནས་ཁ་ནི་དབྱེ་བ་དང་། །རྡོ་རྗེ་སེ་གོལ་གཏོགས་ལའོ། །ལག་པ་གཡོན་པའི་གུང་མོ་བསྒྲེང་། །མཐེ་ཆུང་མཐེ་བོས་སོ་
སོར་བཀུག །མཛུབ་མོ་སྲིན་ལག་ཅུང་ཟད་དགུག །མཁའ་ལྡིང་དགུག་པའི་ཕྱག་རྒྱའོ། །རྩེ་གསུམ་ཕྱག་རྒྱས་བྱིན་གྱིས་བརླབ། །རྡོ་རྗེ་ཁུ་ཚུར་གཉིས་བཅིངས་ནས། །རྒྱབ་དང་རྒྱབ་ཏུ་སྦྱར་བར་བྱ། །པདྨ་ས་གདུགས་སྦྲེལ་ནས་སུ། །དཀར་པོ་དང་ནི་གི་ཝང་བསྒྲེང་། །དཀར་
པོ་ཅུང་ཟད་བཀུག་པ་ཡིས། །ལྷ་མིན་དགུག་པའི་ཕྱག་རྒྱ་ཡིན། །ཟླ་བ་སྣོད་ལ་རེག་ནས་ནི། །ཉི་མ་རྡོ་རྗེ་ཁུ་ཚུར་བཅིང་། །དཀར་པོ་བསྒྲེངས་ཏེ་བྱིན་གྱིས་བརླབ། །ཟླ་བ་ཁུ་ཚུར་བསྟན་བཅིངས་ལ། །རྣམ་ཤེས་ཀྱང་ནི་ས་གདུགས་བརྐྱང་། །ཉི་མ་ལག་པ་ལེགས་བརྐྱང་སྟེ། 
གདེངས་པའི་ཚུལ་དུ་སྟེང་དུ་སྦྱར། །ཕྱག་རྒྱས་སྣོད་ལ་རེག་པར་བྱ། །ཁུ་ཚུར་གཉིས་ནི་སྦྱར་ནས་སུ། །སྙིང་གའི་ཕྱོགས་སུ་སྦྱར་བར་བྱ། །རྡོ་རྗེ་ཁུ་ཚུར་གཉིས་སྦྱངས་ནས། །རྒྱབ་དང་རྒྱབ་ཏུ་སྦྱར་བར་བྱ། །པདྨ་དག་ནི་ས་གདུགས་སྦྲེལ། །དཀར་པོའི་གི་ཝང་སྒྲོག་ཏུ་བྱ། །
དེ་བཞིན་ཕྱག་རྒྱས་བྱིན་བརླབ་ཅིང་། །དགུག་པ་ཡང་ནི་ཤེས་པར་བྱ། །ཕྱག་རྒྱའི་མན་ངག་གཞན་སོགས་ཀྱང་། །སྐབས་དང་སྦྱར་ཏེ་ཤེས་པར་བྱ། །གཏོར་མའི་རྫས་རྣམས་སོ་སོ་དང་། །མཎྜལ་ལ་སོགས་ཆོ་ག་དང་། །དེ་ལ་སོགས་པའི་མན་ངག་རྣམས། །ཐབས་

49-1-340b

རྣམས་ཐོབ་པའི་སློབ་དཔོན་གྱིས། །སྣ་ཚོགས་གཏོར་མས་རྒྱས་པར་བསྟན། །དེ་དང་མཐུན་པར་ཤེས་པར་གཏོར་མའི་ལས་སྣ་ཚོགས་པའི་ཆོ་ག་སྟེ་དང་པོའོ།།      །།ཚོགས་ཀྱི་ལས་ཀྱི་སྦྱོར་ཀ་བསྟན་པ་ནི། །ཚོགས་ཀྱི་བྱ་བའི་རིམ་པ་རྣམས། །ཚོགས་ཀྱི་འཁོར་
ལོར་ཤེས་པར་བྱ། །ཆོ་གའི་ལས་རྣམས་འདི་རུ་བསྟན། །འཁོར་ལོ་ཕྱི་ནང་གསལ་བ་ལ། །ཆོ་གའི་རིམ་པ་སྐབས་དང་སྦྱར། །ཕྱི་མཆོད་ནང་མཆོད་གསང་བའི་མཆོད། །ཕྱི་མཆོད་རིམ་པ་བསྟན་པ་ནི། །ཕྱི་ལ་ཡང་ནི་གཉིས་སུ་བསྟན། །མི་ཟད་དབྱིབས་ཀྱི་མཆོད་པ་ནི། །རྣལ་འབྱོར་
རྒྱུད་དུ་ཤེས་པར་བྱ། །མཚན་ལྡན་དྲི་མེད་སྣོད་མཆོག་ཏུ། །བྱང་ཆུབ་སེམས་ཀྱི་དྲི་མེད་ཆུ། དཀྱིལ་འཁོར་བཞུགས་པའི་ལྷ་ལ་དབུལ། །ཐུགས་རྗེས་དགོངས་ལ་བཞེས་སུ་གསོལ། །ཞེས་བྱ་བ་ལ་སོགས་པས་བཏང་ངོ་། །ཨོཾ་ན་མོ་ནཱི་ལམྦ་ར་དྷ་ར་བཛྲ་པཱ་ཎི་མཎྜལ་དེ་བ་ཏ་
ནན་ཏཱ་ནཱན། ཨ་ཧ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དྷཱུ་པ་ནི་རྱཱ་མི་ཧཱུཾ། ཨཱ་རོ་ལྀཀ་ནི་རྱཱ་མི་ཧཱུཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་བི་དྱེ། ཤཔྡེ། ནྀ་ཏ། ན་མ་པ་ས། སྤརྴ། ནན་ནན་རད་ན། སརྦ་བསྟུ། གནྡྷརྦ། བཛྲ་ལཱ་སྱེ་ཧཱུཾ། བཛྲ་མཱ་ལེ་ཧཱུཾ། བཛྲ་གཱི་ཏི་ཧཱུཾ། བཛྲ་ནྲྀ་ཏྱ་ཧཱུཾ། 
བཛྲ་དྷཱུ་པེ་ཧཱུཾ། བཛྲ་པུཥྤེ་ཧཱུཾ། བཛྲ་ཨཱ་ལོ་ཀེ་ཧཱུཾ་ཧཱུཾ། བཛྲ་གནྡྷེ་ཧཱུཾ། རེ་རེ་ལ་ཡང་རྡོ་རྗེའི་གླུ་གསུམ་གསུམ་བརྗོད་ལ། །ལྷ་མོ་དཔག་མེད་སྤྲུལ་ནས་ཀྱང་། །དཀྱིལ་འཁོར་ལྷ་ལ་མཆོད་པ་དབུལ། །དེ་ནས་མཆོད་པ་ཉི་ཤུ་ནི། །རྡོ་རྗེ་གླུ་ནི་ཕྲ་མོ་ཡིས། །ཧཱུཾ་གི་གླུ་དང་
སྦྱར་བར་བྱ། །དེ་ནས་པད་ཀོར་སྔོན་འགྲོ་བའི། །སྒེག་པའི་ཚུལ་གྱིས་སྒེག་པ་དང་། །པི་ཝང་ཚུལ་གྱིས་འབུད་པ་དང་། །གླིང་བུའི་ཚུལ་གྱིས་འབུད་པ་དང་། །སིལ་སྙན་ཚུལ་གྱིས་དཀྲོལ་བ་དང་། །བརྡབ་པའི་ཚུལ་གྱིས་རྡེབས་པ་དང་། །གར་གྱི་ཚུལ་གྱིས་ཡན་ལག་བསྐྱོད། །
རླུང་གི་ཚུལ་གྱིས་གཡོབ་པ་དང་། །རྒྱལ་མཚན་ཚུལ་གྱིས་བསྒྲེང་བ་དང་། །བླ་རེའི་ཚུལ་གྱིས་བྲེ་བ་དང་། །བ་དན་ཚུལ་གྱིས་སྒེག་པ་དང་། །ཅང་ཏེའུའི་ཚུལ་གྱིས་རྡེབས་པ་དང་། །གདུགས་ཀྱི་ཚུལ་གྱིས་དབུབ་པ་དང་། །རྔ་ཡི་ཚུལ་གྱིས་འཛུམ་པ་དང་། །གར་གྱི་ཚུལ་གྱིས་

49-1-341a

གར་བྱེད་དང་། །ཁྲོ་བོའི་ཚུལ་གྱིས་ཁྲོ་བ་དང་། །སྒེག་པའི་ཚུལ་གྱིས་སྒེག་པ་དང་། །འགྱིང་བའི་ཚུལ་གྱིས་འགྱིང་བ་དང་། །མདའ་འདྲེན་བུམ་པ་འཁྱུད་པ་དང་། །རྡོ་རྗེ་གསོར་ཞིང་ཕྱག་འཚལ་བའི། །ཚུལ་གྱིས་འདུད་པར་བྱེད་པ་སྟེ། །ཕྱག་རྒྱའི་མཆོད་པ་ཉི་ཤུ་ཉིད། །རྡོ་རྗེ་
དྲིལ་བུ་རོལ་བཅས་པའི། །གླུ་ཡི་སྒྲ་ཡིས་དགའ་བར་བྱ། །ལྷ་མོ་དཔག་མེད་སྤྲུལ་ནས་ནི། །ཇི་ལྟར་མཉེས་པའི་མཆོད་པ་དབུལ། །དེ་ནས་བདུད་རྩི་ལྔ་པོ་ཉིད། །ལྷ་གསུམ་གྱིས་ནི་བསྒྲུབས་ནས་ཀྱང་། །མཚན་ལྡན་སྣོད་མཆོག་བཀྲམ་ནས་ཀྱང་། །ཉི་མ་པདྨར་གཞག་པར་བྱ། །
རྡོ་རྗེ་སྲིན་མཐེབ་སྦྱར་ནས་ཀྱང་། །ཐིགས་པའི་གཏོར་མ་ཀུན་ལ་དབུལ། །རྣལ་འབྱོར་ཤེས་རབ་གར་རྣམས་བསྐོར། །ཡང་ན་བཟློག་པས་ཐབས་ཀྱང་དེ། །ལན་གསུམ་མཆོད་པས་གནས་གསུམ་གྱི། །སྐུ་གསུང་ཐུགས་ཀྱི་ལྷ་གསུམ་མཉེས། །རྡོ་རྗེ་གླུ་དང་ལྡན་པ་ཡིས། །སྔགས་ནི་
ལན་གསུམ་བརྗོད་པར་བྱ། །སོ་སོའི་རྩ་བའི་སྔགས་མཐའ་ལ། །བདུད་རྩིའི་སྔགས་ནི་གདབ་པར་བྱ། །དེ་ནས་ལྕགས་ཀྱུ་ལྔ་པོ་ནི། །གོང་མ་བཞིན་དུ་དབུལ་བར་བྱ། །ལྷ་མོ་དྲུག་གི་མཆོད་པ་ནི། །གཟུགས་ཀྱི་རྡོ་རྗེའི་ལྷ་མོ་ནི། །གཟུགས་བརྙན་བཞིན་དུ་རྒྱས་མཛད་མ། །ཁ་དོག་དབྱིབས་ལྡན་མཆོད་པ་དབུལ། །
བདེ་གཤེགས་སྤྱན་མཆོག་རྒྱས་གྱུར་ཅིག །སྒྲ་ཡི་རྡོ་རྗེ་ལྷ་མོ་ནི། །གསུང་དབྱངས་ཡན་ལག་བརྒྱད་ལྡན་པའི། །སྒྲ་སྙན་ཡིད་འོང་མཆོད་པ་དབུལ། །བདེ་གཤེགས་སྙན་མཆོག་རྒྱས་གྱུར་ཅིག །རྡོ་རྗེ་ལྷ་མོ་དྲི་ལྡན་མ། །དྲི་ཞིམ་བདུག་སྤོས་ངད་བསུང་ལྡན། །དྲི་ཞིམ་ཡིད་འོང་མཆོད་
དབུལ་བས། །ཤངས་ཀྱི་མཆོག་རྣམས་རྒྱས་གྱུར་ཅིག །རྡོ་རྗེ་ལྷ་མོ་རོ་ལྡན་མ། །རོ་མཆོག་རྒྱས་ལྡན་མཛེས་པ་འདི། །ཡིད་འོང་དཔག་མེད་མཆོད་པ་འབུལ། །བདེ་གཤེགས་ལྗགས་ནི་རྒྱས་གྱུར་ཅིག །རྡོ་རྗེ་ལྷ་མོ་རེག་ལྡན་མ། །ན་བཟའ་ལི་ཀ་མཛེས་པ་བསྣམས་། །ཡིད་འོང་དཔག་མེད་མཆོད་
པ་འབུལ། །བདེ་གཤེགས་སྐུ་རྣམས་རྒྱས་གྱུར་ཅིག །རྡོ་རྗེ་ལྷ་མོ་ཆོས་ལྡན་མ། །རིན་ཆེན་འབར་བའི་ཆོས་སྒྲོགས་མ། །ཡིད་འོང་དཔག་མེད་མཆོད་པ་འབུལ། །བདེ་གཤེགས་ཐུགས་མཆོག་རྒྱས་གྱུར་ཅིག །སེམས་དཔའ་ཆེན་པོ་དང་པོ་མཆོག །དགྱེས་ཆེན་རྣམས་ཀྱི་

49-1-341b

དགའ་བ་ཆེ། །ཀུན་དུ་བཟང་པོ་ཀུན་གྱི་བདག །རྡོ་རྗེ་སྙེམས་པ་བདག་པོའི་བདག །ཐུགས་ཀྱི་སེམས་དཔའ་ཏིང་འཛིན་མཆོག །རྡོ་རྗེའི་རྡོ་རྗེ་སྟོབས་པོ་ཆེ། །ཀུན་དུ་བཟང་པོ་སྤྱོད་པའི་མཆོག །བདུད་ཀྱི་བདུད་སྡེ་འཇོམས་པ་པོ། །སེམས་དཔའ་ཀུན་གྱི་སེམས་བྱང་ཆུབ། །སངས་
རྒྱས་བྱང་ཆུབ་མཆོག་སྐྱེས་མཆོག །རྡོ་རྗེ་ཧཱུཾ་སྟེ་ཧཱུཾ་མཛད་པ། །འཇིག་རྟེན་དབང་ཕྱུག་ནོར་སྦྱིན་པ། །འདོད་ཆགས་ཆེན་པོ་བདེ་བ་ཆེ། །འདོད་དང་ཐར་པ་ནོར་ཆེ་བ། །དུས་གསུམ་སྲིད་གསུམ་མཆོག་གསུམ་སྟེ། །འཇིག་རྟེན་གསུམ་མཆོག་ཁམས་གསུམ་པ། །མི་རྒྱུ་བ་ནི་མཆོག་
ཏུ་གསོལ། །ཤིན་ཏུ་ཕྲ་དང་སྦོམ་པོའི་ཚོགས། །རྒྱུ་བ་རྣམས་ཀྱི་རབ་མཆོག་བརྙེས། །སྲིད་པའི་འཁོར་ལོ་སྦྱོང་མཛད་པ། །ཐོག་མཐའ་མེད་ཅིང་གསལ་བ་མིན། །ཤེས་རབ་སྡུད་ལ་རྣམ་པར་གནས། །ཐུགས་ཀྱི་ཕྱག་རྒྱ་སྙོམས་ཞུགས་པ། །དེ་ཉིད་རྡོ་རྗེ་སེམས་དཔའ་ཡི། །རྡོ་རྗེ་ཁྲོ་
བོ་ཁྲོ་ཆེན་པོ། །འཇིགས་པའི་མེ་ནི་འདུལ་མཛད་པ། །གདུག་པའི་མཆོག་ནི་འདུལ་བ་ཆེ། །དྲག་པོའི་དྲག་མཆོག་འཇིགས་བྱེད་པ། །དེ་བཞིན་གཤེགས་པའི་དངོས་གྲུབ་ཆེ། །ཆོས་ཀྱི་ལས་ཆེན་འཛིན་པ་པོ། །དམ་ཆོས་ལས་ནི་བཟང་བའི་ལམ། །བྱང་ཆུབ་སེམས་ནི་སྤྱོད་པར་
མཛད། །ཐམས་ཅད་དག་ཏུ་པདྨ་ཆེ། །ཤེས་རབ་ཐབས་ཀྱི་ནོར་ཆེ་བ། །འདོད་ཆགས་དག་པའི་ཏིང་འཛིན་མཆོག །སྣ་ཚོགས་ཆགས་པའི་དབང་ཕྱུག་ཆེ། །ནམ་མཁའ་མཐའ་ལས་བརྟགས་པའི་དོན། །སེམས་ཅན་ཀུན་གྱི་གནས་ཆེན་པོ། །དཔལ་གྱི་འབྱོར་བ་འབྱོར་པའི་དོན། །སེམས་ཅན་ཀུན་གྱི་གནས་ཆེན་པོ། །དཔལ་གྱི་འབྱོར་པ་འབྱོར་པའི་རྒྱལ། །
བསམ་པ་ཐམས་ཅད་རྫོགས་མཛད་པ། །ཕྱག་འཚལ་ཕྱག་འཚལ་ཕྱག་འཚལ་འདུད། །ཕྱག་འཚལ་འདུད་ཅིང་ཕྱག་འཚལ་འདུད། །དད་པས་ཁྱེད་ལ་འདུད་བགྱིས་པས། །བདག་སེམས་རྡོ་རྗེ་སེམས་གྲུབ་མཛོད། །རྡོ་རྗེ་ལྷ་མོའི་མཆོད་པ་དང་། །ཏེ་ན་ཏེ་ཏེ་ཧཱུཾ་ཞེས་བྱ་བ་ལ་སོགས་
པ་ཡང་གཏང་ངོ་། །དང་པོ་འདྲེན་པའི་ཚིགས་བཅད་ནི། །འཁོར་ལོ་ཉིད་དང་མཐུན་པར་བྱ། །བསྟོད་པ་ལ་སོགས་རྒྱས་པར་བྱའོ། །ཐ་མ་འདྲེན་པའི་ཚིགས་བཅད་ནི། །དམ་ཚིག་སྤྱོད་པ་ཐམས་ཅད་ལ། །ཚིགས་བཅད་འདིས་ནི་སྦྱིན་པར་བྱ། །ལྟོས་ཤིག་མཛེས་པ་དམ་པའི་ཆོས། །

49-1-342a

འདི་ལ་ཐེ་ཚོམ་བྱར་མི་རུང་། །ཁྱི་དང་བྲམ་ཟེ་གདོལ་པ་གསུམ། །རང་བཞིན་གཅིག་པས་ལྷན་ཅིག་བཟའ། །པདྨའི་གར་སྐོར་སྔོན་འགྲོ་བས། །གཞན་གྱིས་དེ་བཞིན་བཟུང་ནས་ཀྱང་། །སྦོམ་པོས་ཆུང་ངུ་མནན་ནས་ཀྱང་། །ལྷག་མ་རྩེ་
གསུམ་ལྟ་བུར་བྱ། །ཉི་མར་ཟླ་བ་བཞག་ནས་ནི། །ཚིགས་བཅད་འདི་ནི་རྗེས་སུ་བཟླ། །རིན་ཐང་མེད་པའི་དམ་པའི་ཆོས། །འདོད་ཆགས་དྲི་བྲལ་ལེགས་འོང་ཅིང་། །གཟུང་དང་མཚན་མ་རྣམ་སྤངས་པ། །དེ་ཉིད་གནས་ལ་ཕྱག་འཚལ་ལོ། །དེ་ནས་རྣལ་འབྱོར་སོ་སོ་ཡིས། །
ནང་གི་འཁོར་ལོ་གསལ་བསྒོམས་ནས། །ཁྲུས་ནི་རྣམ་གསུམ་བྱ་བར་གསུངས། །དེ་ནས་རྣལ་འབྱོར་ཅི་དགར་རོལ། །རྡོ་རྗེ་སྨེ་གདུང་བཤགས་པ་ནི། །བདག་ཅག་རྣལ་འབྱོར་སྒྲུབ་པ་པོས། །བླ་མ་ཡི་དམ་ལྷ་དང་ནི། །དཀྱིལ་འཁོར་བཞུགས་པའི་སྤྱན་ལམ་དུ། །སྡོམ་པ་
གསུམ་ལ་གནས་པ་དང་། །ཁྱད་པར་ནང་གི་སྡོམ་པ་ནི། །བསྔོ་ཞིང་བགྲང་བར་ཁས་བླངས་ནས། །ཚུལ་བཞིན་མ་གྱུར་བཤགས་པར་བགྱི། །བླ་མ་རྡོ་རྗེ་སློབ་དཔོན་ལ། །གཤེ་ཞིང་སྨད་པ་ལ་སོགས་བཤགས། །བདེ་གཤེགས་བཀའ་ཡི་ཆོས་རྣམས་ལ། །གཞུང་བཞིན་
མ་གྱུར་འཁྲུལ་པ་བཤགས། །རྣལ་འབྱོར་ལམ་གཅིག་སྤུན་རྣམས་ལ། །རྩོད་པ་ལ་སོགས་བགྱིས་པ་བཤགས། །སྙིང་རྗེའི་ཡུལ་གྱུར་སེམས་ཅན་ལ། །སྙིང་རྗེ་ལ་སོགས་སྤངས་པ་བཤགས། །ཆོས་རྣམས་ཀུན་གྱི་རྩ་བ་སྟེ། །བྱང་སེམས་ཕྱི་ནང་སྤངས་པ་བཤགས། །རང་
དང་གཞན་གྱི་གྲུབ་མཐའ་ལ། །སྨད་ཅིང་སྤངས་པར་གྱུར་པ་བཤགས། །མ་སྨིན་པ་ཡི་སེམས་ཅན་ལ། །མན་ངག་གསང་བ་བསྒྲགས་པ་བཤགས། །ཕུང་པོ་ལྷ་ཡི་དཀྱིལ་འཁོར་ལ། །སྨད་ཅིང་སྤངས་པ་ལ་སོགས་བཤགས། །རང་བཞིན་དག་པའི་ཆོས་རྣམས་ལ། །ཐེ་ཚོམ་
ལ་སོགས་བགྱིས་པ་བཤགས། །བསྟན་པ་ལ་གནོད་སེམས་ཅན་ལ། །མ་བསྒྲལ་བྱམས་པ་བགྱིས་པ་བཤགས། །ཆོས་ཉིད་སྤྲོས་དང་བྲལ་བ་ལ། །ཡོད་མེད་མཚན་མར་བརྟགས་པ་བཤགས། །སེམས་ཅན་དད་དང་ལྡན་པ་ལ། །སེམས་སུན་ཕྱུང་བར་བྱས་པ་བཤགས། །

49-1-342b

དམ་ཚིག་རྣམས་ལས་ཐམས་ཅད་འབྱུང་། །མ་བརྟེན་བགྲང་བསྔོ་མ་བགྱིས་བཤགས། །བུད་མེད་ཤེས་རབ་རང་བཞིན་ལ། །མ་སྨིན་སྤངས་པ་ལ་སོགས་བཤགས། །རྩ་བའི་དམ་ཚིག་ཇི་སྙེད་ཀུན། །ཚུལ་བཞིན་མ་བསྲུངས་རྔོ་མ་ཐོག །བདེ་གཤེགས་བཀའ་དང་མ་མཐུན་པ། །
ཇི་སྙེད་བགྱིས་པ་དེ་དག་ཀུན། །རྡོ་རྗེ་སློབ་དཔོན་ཡི་དམ་ལྷ། །གསང་བའི་དཀྱིལ་འཁོར་ལྷ་རྣམས་དང་། །མ་མོ་མཁའ་འགྲོའི་ཚོགས་བཅས་ལ། །འགྱོད་པའི་སེམས་ཀྱིས་མཐོལ་ལོ་བཤགས། །རྣལ་འབྱོར་བྱིན་རླབས་མ་བགྱིས་པར། །ནན་རྟགས་འཇུག་པ་བགྱིས་པ་
བཤགས། །བླ་མའི་མན་ངག་མ་ཐོབ་པར། །ནན་རྟགས་ཆོས་རྣམས་བགྱིས་པ་བཤགས། །མི་ཟབ་ལམ་གཅིག་སྤུན་རྣམས་ལ། །རྩོད་པ་ལ་སོགས་བགྱིས་པ་བཤགས། །གསང་བའི་མན་ངག་ཤེས་གྱུར་ཀྱང་། །སྣོད་ལྡན་རྣམས་ལ་མ་བསྟན་བཤགས། །དད་
དང་ལྡན་པའི་སེམས་ཅན་ལ། །ཆོས་རྣམས་ལོག་པར་བསྟན་པ་བཤགས། །རྣལ་འབྱོར་ལ་སོགས་མི་ཤེས་པར། །སྔགས་པར་ང་རྒྱལ་བགྱིས་པ་བཤགས། །ལྟ་བ་སྤྱོད་པ་མི་གཅིག་པའི། །ཉན་ཐོས་ལམ་དུ་ཞག་འདས་བཤགས། །ཕྱི་ཡི་ཆོས་བཤད་ཡིན་
པ་ལ། །གསང་བའི་ཆོས་རྣམས་བཤད་པ་བཤགས། །མདོར་ན་ཡན་ལག་དམ་ཚིག་རྣམས། །ཉིན་མཚན་བགྲང་བསྔོ་མ་བགྱིས་དང་། །བླ་མ་མཆོད་པ་ལ་སོགས་དང་། །བཤགས་པ་ལ་སོགས་མ་བགྱིས་རྣམས། །རྡོ་རྗེ་སློབ་དཔོན་ཡི་དམ་ལྷ། །དཀྱིལ་འཁོར་
གསང་བའི་ལྷ་རྣམས་དང་། །མ་མོ་མཁའ་འགྲོའི་ཚོགས་ལ་བཤགས། །མཚམས་མེད་མི་དགེ་བཤགས་པ་དང་། །མཁའ་འགྲོ་མ་ཡི་བཤགས་པ་ནི། །མཁའ་འགྲོའི་གསང་རྒྱུད་དེ་བཞིན་བྱ། །དེ་ལ་སོགས་པའི་ཆོ་ག་རྣམས། །མན་ངག་བསྡེབས་སུ་
ཤེས་པར་བྱ། །ཚོགས་ཀྱི་ལས་ཀྱི་སྦྱོར་ཀ་སྟེ་གཉིས་པའོ།།      །།སྦྱིན་སྲེག་ལས་ཀྱི་ཆོ་ག་ནི། །སྤྱིར་ན་སྦྱིན་སྲེག་ལས་རྣམས་ལ། །སེམས་ཅན་རྣམ་རྟོག་མ་ཟད་པར། །བསམ་གྱིས་མི་ཁྱབ་གསུངས་མོད་ཀྱང་། །བསྡུས་ན་བཅུ་དྲུག་དག་ཏུ་འདུས། །

49-1-343a

དེ་ཡང་བཞི་རུ་འདུས་པ་ན། །བཞི་པོ་རེ་རེ་དག་ལ་ཡང་། །རྒྱས་དང་བསྡུས་དང་ཤིན་ཏུ་བསྡུས། །གསུམ་གསུམ་དག་ཏུ་ཤེས་པར་བྱ། །དང་པོ་ས་ཡི་ཆོ་ག་ནི། །བརྟག་པ་ལ་སོགས་རྒྱས་པ་ཡང་། །ཆོ་ག་ལ་སོགས་གཞན་དང་མཐུན། །
བསྡུས་པའི་ཆོ་ག་བསྟན་པ་ནི། །ལྷག་པའི་ལྷ་ཡི་ཏིང་འཛིན་གནས། །ས་ཡི་བདག་པོ་རྣམས་ལ་ནི། །གཏོར་མ་ཕུལ་བས་ས་རྣམས་བླང་། །ཁྲོ་བོའི་ལས་རྣམས་ཐམས་ཅད་པའི། །ཕྱག་རྒྱ་བཅས་ནས་སྔགས་རྣམས་བརྗོད། །ཐུགས་ཀྱི་འོད་ཟེར་དག་གིས་ནི། །
ས་རྣམས་སྦྱང་ཞིང་བྱིན་གྱིས་བརླབ། །ཤིན་ཏུ་བསྡུས་པའི་ཆོ་ག་ནི། །འོད་ཟེར་སྟོབས་ཀྱི་བྱིན་རླབས་ཀྱིས། །ཐབ་ཁུང་གང་འདོད་བྱིན་གྱིས་བརླབ། །མཚན་མ་ལ་སོགས་དགའ་བ་དང་། །རྒྱས་པར་སྤྲོ་བའི་གང་ཟག་དང་། །ལས་དང་པོ་ཡི་གང་ཟག་གིས། །ཐབ་རྣམས་
བྲུ་བ་རྒྱས་པར་བསྟན། །མཚན་མ་ལ་སོགས་མི་དགའ་ལ། །ཐབ་རྣམས་བྲི་འམ་མེ་ཏོག་དགྲམ། །རྣལ་འབྱོར་ནུས་པ་ཐོབ་པ་ཡིས། །རིན་ཆེན་སྣོད་དུ་བྱ་ཡང་བཟོད། །ཡང་ན་དེ་དག་ཤེས་རབ་ཆུང་། །རྒྱས་པ་མི་ནུས་དག་ལ་བསྟན། །ཐབ་རྣམས་བྲུ་བའི་རིམ་
པ་ཡང་། །རྒྱ་རུ་ཇི་ཙམ་ཡོད་པའི་ཚད། །དེ་ཡི་ཕྱེད་ནི་ཐུར་ལ་བྲུ། །ཡང་ན་སུམ་ཆ་བྲུ་བ་འམ། །མཐོ་གང་དག་ཏུ་བྲུ་བ་འམ། །རྒྱ་ཡི་ཚད་ཙམ་བྲུ་བ་ནི། །རྒྱུད་རྣམས་ཀུན་དང་མཐུན་པར་ནི། །མཁས་པ་ཡིས་ནི་ཤེས་པར་བྱ། །ཁ་ཁྱེར་མུ་རན་ཚད་སོགས་ཀྱང་། །
སོ་སོའི་གཞུང་དང་མཐུན་པར་བྱ། །ཐབ་ཀྱི་དབྱིབས་རྣམས་བསྟན་པ་ཡང་། །ཞི་བ་ལ་ནི་ཟླུམ་པོར་རོ། །རྒྱས་པ་གྲུ་བཞིའམ་རིན་ཆེན་དབྱིབས། །དབང་ལ་ཟླ་གམ་ཚུལ་དུའོ། །དྲག་པོ་གྲུ་གསུམ་རྣམ་པར་བསྟན། །མདོར་ན་དབང་དང་དྲག་པོ་གཉིས། །གོ་བཟློག་
པར་ཡང་བསྟན་པ་ཡང་། །དེ་ཡིས་དགོངས་པས་ཤེས་པར་བྱ། །གཞན་ཡང་ཐུན་མོང་ལས་རྣམས་ལ། །ཟླ་བ་ཁམ་པ་ལྟ་བུ་འམ། །གོ་ཆ་རིན་ཆེན་པདྨ་དང་། །རྡོ་རྗེ་ལྕགས་ཀྱུ་ལ་སོགས་སུ། །མི་འདྲ་ཐབ་ཀྱི་དབྱིབས་བསྟན་པ། །རྒྱུད་རྣམས་ཀུན་དུ་ཤེས་

49-1-343b

པར་བྱ། །ཚེ་བསྲིང་ལ་སོགས་ལས་ལ་བསྔགས། །ཐབ་ཀྱི་རྒྱ་ཡི་ཚད་རྣམས་ཀྱང་། །ཁྲུ་བཞི་ཁྲུ་གསུམ་ཁྲུ་དོ་དང་། །ཁྲུ་གང་ཁྲུ་ཕྱེད་སུམ་ཆའོ། །དེ་ལ་སོགས་པའི་ཚད་རྣམས་ཀྱང་། །རྒྱུད་དང་མཐུན་པར་ཤེས་པར་བྱ། །ཚོན་རྣམས་བྲི་བའི་རིམ་པ་ཡང་། །གཞན་
དང་མཐུན་ཏེ་ཁྱད་པར་ནི། །ཞི་ལ་དཀར་ཏེ་རྒྱས་ལ་སེར། །དབང་ལ་དམར་པོ་དྲག་ལ་གནག །ལས་ནི་ཐམས་ཅད་ཐབ་ཁུང་ལ། །ཁ་དོག་ལྔ་ཚར་ཚང་བ་འམ། །ཡང་ན་ལས་ཀྱི་སྐབས་དང་སྦྱར། །ལས་ནི་ཐམས་ཅད་པ་ཡི་དབྱིབས། །ཨ་ཤྭད་ལོ་མ་ལྟ་བུ་དང་། །
པདྨ་འདབ་གཅིག་ལྟ་བུ་འམ། །པདྨ་ཁ་ཕྱེ་ལྟ་བུ་འམ། །ཁ་ཡི་གེ་སར་ལྟ་བུ་འམ། །དེ་སོགས་གཞུང་ནི་མང་ཡོད་ཀྱང་། །རྣལ་འབྱོར་མོས་ལ་གཙོ་ཞེས་བྱ། །གཟར་བུའི་མཚན་ཉིད་བསྟན་པ་ནི། །ཡུ་བ་ཆང་པ་ལྔ་ཡི་ཚད། །གཟར་བུའི་ཀོང་བུ་སོར་བཞིའི་
ཚད། །མཆུ་ཡང་སོར་བཞིའི་ཚད་དུ་བྱ། །ཟབས་སུ་སོར་གཅིག་བརྐོ་བ་འམ། །སོར་གཉིས་བརྐོ་བ་སོ་སོའི་གཞུང་། །དེ་ནི་རབ་ཡིན་འབྲིང་ནི་ཕྱེད། །ཐ་མ་དེ་བས་ཅུང་ཟད་ཆུང་། །ཁུང་བུ་ཆེ་ཆུང་མཚན་ཉིད་དོ། །ཡུ་བའི་ཚད་ནི་མཉམ་ཞེས་བྱ། །རྒྱུད་གཞན་
དག་ལ་བརྟེན་ནས་ནི། །སློབ་དཔོན་གཞན་གྱི་གཞུང་དག་གིས། །ཡུ་བ་ཡང་ནི་ཆེ་ཆུང་འདོད། །སྙོམས་འཇུག་རྒྱུད་ལ་བརྟེན་ནས་ཀྱང་། །ཡུ་བ་སོར་ནི་ཉི་ཤུ་བཞི། །ཁུང་བུར་རྒྱར་ནི་སོར་བཞི་ལ། །ཟབས་སུ་སོར་གཉིས་ཁོ་ན་སྟེ། །མཆུ་ཡང་རྡོ་རྗེ་རྩེ་གསུམ་
དབྱིབས། །སོར་བཞིའི་ཚད་དུ་ཤེས་པར་བྱ། །ལས་ནི་ཐམས་ཅད་གཟར་བུ་ཡང་། །པདྨའི་དབྱིབས་སམ་འདབ་མའི་དབྱིབས། །མཆུ་ཡང་པདྨའི་འདབ་འདྲ་དང་། །ཨ་ཤྭ་རྡོ་རྗེའི་རྣམ་པར་རོ། །ཞི་བ་ལ་ནི་ཟླུམ་པོ་སྟེ། །རྒྱས་པ་ལ་ནི་གྲུ་བཞིའོ། །དབང་
ནི་ཟླ་གམ་ལྟ་བུ་སྟེ། །དྲག་པོ་གྲུ་གསུམ་རྣམ་པར་བྱ། །པདྨ་ཁྲོ་བོ་རྡོ་རྗེ་བྲི། །ཡང་ན། རྒྱུད་གཞན་དག་ལ་བརྟེན་ནས་ནི། །སློབ་དཔོན་གཞན་དག་འདོད་གཞུང་ནི། །སུམ་ཆ་སུམ་ཆ་ཕྲི་བས་སུ། །རབ་འབྲིང་གསུམ་དུ་འདོད་པ་ཡིན། །དེ་ནི་དགང་གཟར་མཚན་

49-1-344a

ཉིད་དོ། །བླུགས་གཟར་མཚན་ཉིད་བསྟན་པ་ནི། །ཡུ་བ་ཆང་པ་ལྔ་ཡི་ཚད། །ཁུང་བུར་རྒྱར་ནི་སོར་གཉིས་ལ། །ཟབས་སུ་སོར་གཅིག་ཤེས་པར་བྱ། །དེ་ནི་རབ་ཡིན་འབྲིང་ནི་ཕྱེད། །ཐ་མ་ཅུང་ཟད་ཆུང་བའོ། །ཡང་ན་སློབ་དཔོན་
གཞན་དག་ནི། །མཐེ་བོ་སེན་མོ་གང་ལས་ནི། །རབ་འབྲིང་གསུམ་ནི་དབྱེ་བར་བྱའོ། །དེ་རྣམས་སོ་སོའི་མཚན་མ་ཡང་། །གོང་མ་བཞིན་དུ་ཤེས་པར་བྱ། །མེ་ལྷའི་མཚན་ཉིད་བསྟན་པ་ནི། །པ་བ་ཀ་ཞེས་བྱ་བ་ཡི། །ཞི་བའི་མེ་ལྷ་སྐུ་མདོག་དཀར། །ཆུ་ཡི་
དཀྱིལ་འཁོར་དག་ལ་གནས། །རྒྱས་པའི་མེ་ལྷ་སྐུ་མདོག་སེར། །དབང་ཆེན་དཀྱིལ་འཁོར་དག་ལ་གནས། །དབང་གི་མེ་ལྷ་སྐུ་མདོག་དམར། །མེ་ཡི་དཀྱིལ་འཁོར་དག་ལ་གནས། །དྲག་པོའི་མེ་ལྷ་སྐུ་མདོག་གནག །རླུང་གི་དཀྱིལ་འཁོར་དག་ལ་གནས། །
དེ་དག་ཀུན་ཁ་མཐུན་པར་ནི། །ཞལ་གཅིག་ཕྱག་ནི་བཞི་པ་སྟེ། །ཕྱག་གཡས་དབྱུག་པ་མཆོད་སྦྱིན་ཅན། །གཡོན་པས་ཕྲེང་བ་རིལ་བ་བསྣམས། །མི་ཏྲ་ཞེས་པའི་མེ་ལྷ་ནི། །ལས་རྣམས་ཀུན་ལ་བསྔགས་པ་སྟེ། །མིད་པ་རིང་ལ་གཟི་མདངས་ཅན། །ཐོར་ཚུགས་
སེར་པོའི་སྤུ་ཅན་ལས་། །ལས་ལ་རྗེས་མཐུན་ཁ་དོག་གམ། །དུད་པ་ལྟ་བུའི་མདོག་ཏུ་སྟེ། །ཕྱག་ནི་བགྲང་ཕྲེང་རིལ་བ་ནི། །སྤྱི་བླུགས་དག་ནི་བསྣམས་པ་ཡིན། །འཇིག་རྟེན་པ་ཡི་མེ་ལྷ་དང་། །འཇིག་རྟེན་འདས་པའི་མེ་ལྷ་དང་། །བཅུ་གཉིས་བཞི་རུ་རྩ་
སོགས་ནི། །རྒྱུད་ཀྱི་ནང་དུ་ཤེས་པར་བྱ། །འཇིག་རྟེན་མེ་ལྷའི་ཐུགས་ཀར་ནི། །འཇིག་རྟེན་འདས་པ་བསྐྱེད་པ་དང་། །འཇིག་རྟེན་པ་ནི་སྦྱངས་ནས་ཀྱང་། །དམ་ཚིག་མེ་ལྷ་བསྐྱེད་པ་དང་། །ཡེ་ཤེས་མེ་ལྷ་བསྐྱེད་པ་དང་། །འཇིག་རྟེན་མེ་ལྷའི་ཁོང་པ་རུ། །
དམ་ཚིག་མེ་ལྷ་བསྐྱེད་ནས་ཀྱང་། །ཡེ་ཤེས་མེ་ལྷ་བསྟིམ་པ་འམ། །འཇིག་རྟེན་འདས་པ་ཉིད་ལ་ཡང་། །དམ་ཚིག་བསྐྱེད་དང་ཡེ་ཤེས་བསྟིམ། །སྤྲུལ་པའི་མེ་ལྷ་ཉིད་ཀྱིས་ཀྱང་། །འཇིག་རྟེན་པ་དང་མཐུན་པའི་ཕྱིར། །འཇིག་རྟེན་པ་དང་མཐུན་པར་བསྟན། །

49-1-344b

དེ་ལ་སོགས་པའི་ཐེ་ཚོམ་དང་། །མེ་ཉིད་ཆོ་ག་ཟིན་པ་དང་། །ཤར་ལྷོ་མཚམས་སུ་གནས་པ་དང་། །མེ་ལྷའི་ཐུགས་ཀར་བསྐྱེད་པ་དང་། །འབར་དང་གཤེགས་དང་སྟོང་པ་རྣམས། །སློབ་དཔོན་མན་ངག་ཉིད་ཀྱིས་བཤད། །དང་པོས་ས་ཆོ་ག་རྫོགས་བྱས་ལ། །
དེ་ནས་ཐབ་ཀྱི་ཆོ་ག་བྱ། །དེ་ནས་རྫས་རྣམས་རིམ་པ་དང་། །མཆོད་ཡོན་གྱི་ནི་ཆོ་ག་བསྟན། །དེ་ནས་བུད་ཤིང་ཡམ་ཤིང་དང་། །བསགས་དང་དགྲམ་པ་ལ་སོགས་ཀུན། །གཞན་དང་མཐུན་པར་ཤེས་པར་བྱ། །ཚེས་གྲངས་དུས་དང་འདུག་སྟངས་དང་། །རྒྱན་ཆ་ལ་
སོགས་བགོ་བ་ཡང་། །ལས་ཀྱི་སྐབས་དང་སྦྱར་བར་བྱ། །བདག་ཉིད་ལྷག་པའི་ལྷར་བསྐྱེད་ནས། །མེ་ལྷའི་ཆོ་ག་རྒྱས་པར་བྱ། །མེ་ཡི་ཆོ་ག་ཟིན་ནས་ཀྱང་། །དེ་ནས་ལྷ་ཡི་ཆོ་ག་བྱ། །ཐ་མ་མེ་ཡི་ཆོ་གས་བསྡུ། །མེ་ཡི་རྒྱས་འདེབས་བཞི་པོ་ཡང་། །བསམ་དང་
བཅིངས་དང་བརྗོད་པ་གསུམ། །བཞི་ཀ་ལ་ནི་སྦྱར་བར་བྱ། །ཐུགས་ཀར་རྡོ་རྗེ་བསམས་ནས་ཀྱང་། །ལག་པའི་སོར་མོ་བཅིངས་ནས་ཀྱང་། །གཡས་པ་འབར་བ་ལྟ་བུར་བྱ། །སྔགས་ནི། ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭ་ལ་སརྦ་བྷསྨི་ཀུ་རུ་སརྦ་དུཥྚཾ་ཧཱུཾ། ས་མ་ཡ་སྟྭཾ། 
ས་མ་ཡ་སྟྭཾ། ཨཱ་ཧཱུཾ། ལྕེ་ལ་རྡོ་རྗེ་རྩེ་ལྔ་བསམས་ལ། ཨོཾ་ཛྭ་ལ་ཛྭ་ལ་ཧཱུཾ་ཞེས་བརྗོད་ཅིང་བསམ་པར་བྱའོ། །རྡོ་རྗེ་རྒྱ་གྲམ་ཐུགས་ཀར་བསམས་ནས། ཕྱག་མཚན་མེད་པར་བསམ་ཞིང་། བཅིངས་པ་ནི་ལས་ཀྱི་ཕྱག་རྒྱའོ། །རྡོ་རྗེ་རྩེ་ལྔ་པ་ཐུགས་ཀར་བསམས་ཏེ། 
ཕྱག་མཚན་དང་བཅས་ཤིང་བསམས་པ་ནི་ཕྱག་རྒྱ་ཆེན་པོའོ། །ཕྱག་རྒྱ་བཞི་ཡིས་རྒྱས་གདབ་པ་ནི། བསམ་པ་ཙམ་དུ་འདོད་པའང་ཡོད། །ཐམས་ཅད་ཚང་བར་འདོད་པའང་ཡོད། །རྒྱས་འདེབས་གཅིག་ཏུ་འདོད་པའང་ཡོད། །ཐ་དད་རྟོག་པ་མེད་པས་སུ། །ཇི་ལྟར་མོས་
པ་གཙོ་བོར་བྱ། །དབང་བསྐུར་ལ་ཡང་དེ་བཞིན་ནོ། །མེ་ལྷའི་བསྟོད་པ་བྱ་བ་ཡང་། །གཟི་བརྗིད་ཆེན་པོ་མེ་ཡི་ལྷ། །བདག་གཞན་དོན་གྲུབ་ས་ལ་གནས། །འདོད་པ་ཐམས་ཅད་སྩོལ་མཛད་པ། །འཛིན་བྱེད་མེ་ལྷ་ཉིད་ལ་འདུད། །མེ་ལྷའི་རྒྱལ་པོ་དྲང་སྲོང་

49-1-345a

མཆོག །བསྐལ་པའི་མེ་དཔུང་གཟི་བརྗིད་འབར། །ཉོན་མོངས་ཐམས་ཅད་སྲེག་པའི་མཆོག །ཡེ་ཤེས་མེ་ལྷ་ཁྱོད་ལ་འདུད། །མེ་ལྷ་རྣམས་ཀྱི་གཙོ་ཆེན་པོ། །འཁོར་རྣམས་འདུལ་ཞིང་སྐྱོང་མཛད་པ། །དུག་རྣམས་འཇོམས་ཤིང་མཐུ་
ལྡན་པ། །དུག་འཇོམས་སྨན་པ་ཁྱོད་ལ་འདུད། །མེ་ལྷའི་རྒྱལ་པོ་གཟི་བརྗིད་ཅན། །འགྲོ་བ་མི་མཐུན་གདུལ་སླད་དུ། །འདོད་དགུར་བསྒྱུར་བའི་གཟུགས་སྟོན་པ། །ལས་རྣམས་ཀུན་མཛད་ཁྱོད་ལ་འདུད། །དེ་ནི་ཐུན་མོང་གི་བསྟོད་པའོ། །ཁྱད་པར་གྱི་བསྟོད་པ་
ནི་རྒྱུད་དུ་ཤེས་པར་བྱའོ། །སྦྱིན་སྲེག་གི་ལས་ཀྱི་རིམ་པ་སྟེ་བཞི་པའོ།།      །།དང་པོ་ཡི་ནི་རྣལ་འབྱོར་དང་། །རྡོ་རྗེ་སློབ་དཔོན་བྱེད་པས་སུ། །བདག་གཞན་ཚོགས་ནི་བསགས་པའི་ཕྱིར། །སློབ་དཔོན་ལ་ནི་སྲོག་ལུས་དང་། །ཡུལ་ཞིང་སྣེ་བྲན་ཆུང་མར་
བཅས། །སྒྱུ་མའི་སེམས་ཀྱིས་ཕུལ་ནས་སུ། །ཡང་དང་ཡང་དུ་གསོལ་བཏབ་ལ། །མན་ངག་ལས་ཀྱི་རིམ་པ་འདི། །ཉམས་སུ་བླང་ཞིང་ཐེ་ཚོམ་གཅད། །དེ་ནས་གཞུང་བཞིན་སྤྱད་པར་བྱ། །དེ་ལྟར་བྱས་ན་ངེས་པར་ནི། །དངོས་གྲུབ་རྣམ་གཉིས་ཐོབ་པར་འགྱུར། །
དྲང་བའི་དོན་ནི་མ་ཡིན་ནོ། །དེ་ལྟར་མི་བྱེད་སེར་སྣ་ཅན། །བདག་འཛིན་དམ་པོས་བཟུང་ནས་སུ། །སློབ་དཔོན་མཉེས་པར་མི་འགྱུར་ཏེ། །སློབ་དཔོན་མཉེས་པར་མ་གྱུར་ན། །དབང་དང་མན་ངག་ཐོབ་མི་འགྱུར། །ཡང་ན་མན་ངག་ཐོབ་ནས་ཀྱང་། །སློབ་དཔོན་ལ་ནི་རྒྱབ་ཀྱིས་ཕྱོགས། །
དམ་ཚིག་མེད་པར་ཉམས་པ་སྟེ། །རྡོ་རྗེ་དམྱལ་བར་འཚེད་པར་འགྱུར། །དེ་ནས་རང་གི་རྒྱུད་བརྟགས་ལ། །སྐྱོན་དེ་ཡོད་ན་སྤང་བར་བྱའོ། །བདག་གིས་འགྲོ་བའི་དོན་དུ་ནི། །ཆོ་ག་འདི་བརྩམས་དགེ་བ་ཡིས། །བདག་དང་མཐའ་ཡས་སེམས་ཅན་རྣམས། །བླ་མེད་བྱང་ཆུབ་ཐོབ་པར་
ཤོག །རྡོ་རྗེ་ལས་ཀྱི་ཚོགས་རིམ་པར་ཕྱེ་བའི་ཆོ་ག །སློབ་དཔོན་བྷ་བས་མཛད་པ་རྫོགས་སོ།།      །།ལོ་ཙཱ་བ་ཁུ་བ་བཱིརྱ་དང་། དགེ་སློང་གཞོན་ནུ་ཚུལ་ཁྲིམས་ཀྱིས་བསྒྱུར་ཅིང་གཏན་ལ་ཕབ་པ་ལགས་སོ།།      །།

49-1-345b