59-1-1a



59-1-1b

༄༅༅། །རྒྱ་གར་སྐད་དུ། ཤྲཱི་པ་ར་མཱ་དྱ་བི་བ་ར་ཎཾ། བོད་སྐད་དུ། དཔལ་མཆོག་དང་པོའི་འགྲེལ་པ། བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །རྡོ་རྗེ་འཛིན་པ་ཆེན་
པོའི་ས། །ཐོག་མ་ཐ་མ་མེད་དགེ་བ། །དཔལ་མཆོག་དང་པོའི་རྒྱུད་ལས་གསུངས། །ཆོས་ཀྱི་སྐུ་ལ་སོགས་བསྡུས་པ། །རྡོ་རྗེ་འཛིན་ཆེན་དད་པ་ཡི། །ཡང་དང་ཡང་དུ་ཕྱག་འཚལ་ཏེ། །འགྲོ་བས་དེ་ནི་གནས་
ཐོབ་ཕྱིར། །རབ་ཏུ་ཕྱེ་སྟེ་བཤད་པར་བྱ། །འདི་སྐད་བདག་གིས་ཐོས་པ་ཞེས་བྱ་བ་ལ་སོགས་པ་ཚིག་ཉེ་བར་དགོད་པ་འདིའི་བརྗོད་པར་བྱ་བ་ནི་གང་ཞིག་ཡིན། འབྲེལ་པ་ནི་གང་ཞིག་ཡིན། དགོས་པ་ནི་ཅི་ཞིག་
ཡོད། དགོས་པའི་དགོས་པ་ནི་ཅི་ཞིག་ཡིན་ཞེ་ན། རྒྱུད་འདིའི་མིང་དཔལ་མཆོག་དང་པོ་ཞེས་བྱ་བ་ལ་དཔལ་མཆོག་དང་པོ་ནི་ཆོས་ཀྱི་སྐུ་ལ་སོགས་པའི་མཚན་ཉིད་དེ་ནམ་མཁའི་ཁམས་ཐམས་ཅད་ལྟར་
རྟག་ཏུ་བཞུགས་པ་སྐུ་དང་གསུང་དང་ཐུགས་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་ཐུགས་ལ་བཞུགས་པ། བཅོམ་ལྡན་འདས་རྣམ་པར་སྣང་མཛད་ནི་རྡོ་རྗེ་འཛིན་པ་ཆེན་པོ་སྟེ། དེའི་བརྗོད་པར་བྱ་བའི་

59-1-2a

ངོ་བོ་ཉིད་དོ། །དེ་སྟོན་པར་བྱེད་པའི་སྒྲའི་ཚོགས་ནི་རྒྱུད་ཡིན་ནོ། །རྒྱུད་ཀྱི་བརྗོད་པར་བྱ་བ་དང་། དེ་སྟོན་པར་བྱེད་པའི་མཚན་ཉིད་ནི་འབྲེལ་པ་ཡིན་ནོ། །དེ་ལྟ་བུའི་བཅོམ་ལྡན་འདས་གདུལ་བྱ་རྣམས་འདོད་པ་བསྐྱེད་པ་ནི་
དགོས་པ་ཡིན་ནོ། །འདོད་པ་བསྐྱེད་ནས་ཀྱང་། དཀྱིལ་འཁོར་དུ་འཇུག་པ་ལ་སོགས་པ་འཇིག་རྟེན་དང་འཇིག་རྟེན་ལས་འདས་པའི་འབྲས་བུ་ཐོབ་པར་འགྱུར་བ་ནི། དགོས་པའི་ཡང་དགོས་པར་བཤད་པ་ཡིན་ནོ། །དེ་ལ་བཅོམ་ལྡན་འདས་སེམས་
ཅན་རྣམས་ཀྱི་འདོད་ཆགས་ཀྱིས་འདོད་ཆགས་སྤང་བར་བྱ་བའི་ཕྱིར། དམ་ཚིག་ནི་སེམས་དཔའ་ཆེན་པོར་བྱིན་གྱིས་བརླབས་པ་རྡོ་རྗེའི་དཀྱིལ་འཁོར་ཆེན་པོའི་ཚུལ་གསང་སྔགས་ལ་སོགས་པའི་ཚུལ་གྱིས་བཞུགས་པ་ཡིན་ནོ། །རང་བཞིན་
བཟང་བའི་སེམས་ཅན་རྣམས་འདུལ་བར་བྱ་བའི་ཕྱིར། དེ་བཞིན་གཤེགས་པའི་དཀྱིལ་འཁོར་དང་། གསང་སྔགས་ཀྱི་ཚུལ་གྱིས་བཞུགས་པ་ཡིན་ནོ། །ཁྲོ་བས་ཁྲོ་བ་སྤང་བར་བྱ་བའི་ཕྱིར། ཁམས་གསུམ་རྣམ་པར་རྒྱལ་བའི་ཚུལ་གྱིས་སོ། །
ལོག་པར་ལྟ་བ་སྤང་བར་བྱ་བའི་ཕྱིར། འཕགས་པ་སྤྱན་རས་གཟིགས་དབང་ཕྱུག་གི་དཀྱིལ་འཁོར་དང་སྔགས་ཀྱི་ཚུལ་གྱིས་སོ། །སེར་སྣ་རབ་ཏུ་སྤང་བར་བྱ་བའི་ཕྱིར་དང་། བསམ་པ་ཐམས་ཅད་ཡོངས་སུ་རྫོགས་པར་བྱ་བའི་ཕྱིར། འཕགས་

59-1-2b

པ་ནམ་མཁའི་སྙིང་པོའི་དཀྱིལ་འཁོར་དང་སྔགས་ཀྱི་ཚུལ་གྱིས་སོ། །སྐུ་དང་གསུང་དང་ཐུགས་ཀྱི་མཚན་ཉིད་གཅིག་ཏུ་བྱ་བའི་ཕྱིར། འཕགས་པ་རྡོ་རྗེ་ཁུ་ཚུར་གྱི་དཀྱིལ་འཁོར་གྱི་སྔགས་ལ་སོགས་པའི་ཚུལ་གྱིས་སོ། །ཆོས་བདག་མེད་པ་དང་མ་བྲལ་ན། ཐམས་ཅད་འགྲུབ་པར་འགྱུར་རོ་ཞེས་
བསྟན་པར་བྱ་བའི་ཕྱིར་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་ན་ཐམས་ཅད་འབྱོར་པར་འགྱུར་རོ་ཞེས་བསྟན་པར་བྱ་བའི་ཕྱིར་འཕགས་པ་འཇམ་དཔལ་གྱི་དཀྱིལ་འཁོར་དང་། སྔགས་ལ་སོགས་པའི་སྔགས་དང་ཚུལ་གྱིས་སོ། །དཀྱིལ་འཁོར་དུ་འཇུག་པ་མེད་པར་གསང་སྔགས་ཀྱི་ཚུལ་འགྲུབ་
པར་མི་འགྱུར་རོ་ཞེས་བསྟན་པར་བྱ་བའི་ཕྱིར། འཕགས་པ་རྡོ་རྗེ་འཁོར་ལོའི་དཀྱིལ་འཁོར་དང་གསང་སྔགས་ལ་སོགས་པའི་ཚུལ་གྱིས་སོ། །མཆོད་པས་འགྲུབ་པར་འགྱུར་གྱི། ཚོགས་མེད་པར་མ་ཡིན་ནོ་ཞེས་བསྟན་པར་བྱ་བའི་ཕྱིར། འཕགས་པ་ནམ་མཁའི་མཛོད་ཀྱི་དཀྱིལ་འཁོར་དང་གསང་
སྔགས་ཀྱི་ཚུལ་གྱིས་སོ། །ཉོན་མོངས་པ་ཐམས་ཅད་ཀྱི་གཉེན་པོར་གྱུར་པའི་དགེ་བའི་ཕྱོགས་རྣམས་ལ་ཕྱི་རོལ་གྱི་ལྷའི་བུའི་བདུད་ལ་སོགས་པའི་བདུད་རྣམས་ཚར་གཅོད་པར་ནུས་ན་འགྲུབ་པར་འགྱུར་རོ་ཞེས་བསྟན་པར་བྱ་བའི་ཕྱིར། འཕགས་པ་རྡོ་རྗེ་གནོད་སྦྱིན་གྱི་དཀྱིལ་འཁོར་དང་སྔགས་ལ་
སོགས་པའི་ཚུལ་གྱིས་བཞུགས་པ་ཡིན་ནོ། །དཀྱིལ་འཁོར་གཅིག་ཏུ་ཞུགས་པས་དཀྱིལ་འཁོར་ཐམས་ཅད་དུ་ཞུགས་པར་འགྱུར་བར་བྱ་བའི་ཕྱིར་དང་། ཐམས་ཅད་ཀྱི་ངོ་བོ་ཉིད་བདག་ཡིན་ནོ་ཞེས་བསྟན་པར་བྱ་བའི་ཕྱིར། བསྡུས་པའི་དཀྱིལ་འཁོར་གྱི་ཚུལ་དུ་བཞུགས་པ་ཡིན་ནོ། །ཞི་བའི་དཀྱིལ་
འཁོར་དང་མ་མོ་དང་མིང་པོ་གསུམ་དང་སྲིང་མོ་བཞིའི་དཀྱིལ་འཁོར་ནི་དེ་ལ་མོས་པའི་སེམས་ཅན་རྣམས་དགའ་བར་བྱ་བའི་ཕྱིར། དེ་ལྟར་སྤྲུལ་པར་མཛད་ནས་དོན་གྱི་སྒོ་ནས་བསྟན་པ་ལ་འཇུག་པར་བྱ་བའི་ཕྱིར་རོ། །དེ་ལ་རྡོ་རྗེ་སེམས་དཔའ་ནི་ངོ་བོ་ཉིད་ཀྱི་སྐུ་ཡིན་ལ་དེ་ཉིད་ནི་ཆོས་ཀྱི་སྐུ་སྟེ། གཉིས་སུ་
མེད་པའི་ཐུགས་མེ་ལོང་ལྟ་བུའི་ཡེ་ཤེས་ཏེ། དེ་བཞིན་གཤེགས་པའི་མཚན་དང་དཔེ་བྱད་དང་ལྡན་པ། སྐུ་ཐམས་ཅད་ཀྱི་ངོ་བོ་ཉིད་ཀྱང་ཆོས་ཀྱི་དབྱིངས་རྣམ་པར་དག་པའི་ངོ་བོ་ཉིད་ཡིན་ནོ། །རྡོ་རྗེ་ཧཱུཾ་མཛད་དང་། རྡོ་རྗེ་ཁུ་ཚུར་དང་། རྡོ་རྗེ་གནོད་སྦྱིན་ནི་སྤྲུལ་པའི་སྐུ་སྟེ། བྱ་བ་གྲུབ་པའི་ཡེ་ཤེས་ཀྱི་ངོ་བོ་ཉིད་ཡིན་

59-1-3a

ནོ། །འཕགས་པ་སྤྱན་རས་གཟིགས་དབང་ཕྱུག་དང་། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ནི་ལོངས་སྤྱོད་རྫོགས་པའི་སྐུ་སྟེ། སོ་སོར་རྟོག་པའི་ཡེ་ཤེས་ཀྱི་ངོ་བོ་ཉིད་ཡིན་ནོ། །འཕགས་པ་ནམ་མཁའི་སྙིང་པོ་དང་། ནམ་མཁའི་མཛོད་ནི་རྣམ་པར་སྨིན་པའི་སྐུ་སྟེ། མཉམ་
པ་ཉིད་ཀྱི་ཡེ་ཤེས་ཀྱི་ངོ་བོ་ཉིད་ཡིན་ནོ། །འཕགས་པ་འཇམ་དཔལ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་དང་གཉིས་སུ་མེད་པར་བཞུགས་པའི་ངོ་བོ་ཉིད་ཀྱིས་ན་འདིར་གཉིས་སུ་མེད་པའི་ཐུགས་ཀྱི་མཚན་ཉིད་ཡིན་པས། ངོ་བོ་ཉིད་ཀྱི་སྐུའི་ཁོངས་སུ་གཏོགས་སོ། །འཇིག་རྟེན་པའི་དཀྱིལ་འཁོར་རྣམས་ཀྱང་
སྤྲུལ་པའི་ངོ་བོ་ཉིད་ཡིན་པས། བྱ་བ་སྒྲུབ་པའི་ཡེ་ཤེས་ཀྱི་ངོ་བོ་ཉིད་ཡིན་ནོ། །དེ་ཡང་། རྡོ་རྗེ་སེམས་དཔའི་དབང་བསྐུར་བས། །ངོ་བོ་ཉིད་ཀྱི་སྐུ་རུ་འདོད། །རྡོ་རྗེ་རིན་ཆེན་དབང་བསྐུར་བས། །མཚན་དང་དེ་བཞིན་དཔེ་བྱད་དོ། །རྡོ་རྗེ་ཆོས་ཀྱི་དབང་བསྐུར་བས། །ལོངས་སྤྱོད་རྫོགས་པའི་སྐུ་ཡང་ཡིན། །
རྡོ་རྗེ་ལས་ཀྱི་དབང་བསྐུར་བས། །དེ་བཞིན་སྤྲུལ་པའི་སྐུ་ཡིན་ནོ། །ཞེས་གསུངས་སོ། །རྣམ་པར་སྣང་མཛད་ནི། སངས་རྒྱས་ཐམས་ཅད་གཅིག་ཏུ་བསྡུས་པ་ཡིན་ནོ། །ཇི་ལྟར་ན་མེ་ལོང་ལྟ་བུའི་ཡེ་ཤེས་ལ་སོགས་པ་དང་དཀྱིལ་འཁོར་དང་གསང་སྔགས་ལ་སོགས་པའི་དཀྱིལ་འཁོར་ངོ་བོ་ཉིད་དུ་རྣམ་
པར་གཞག་ཅེ་ན། རྒྱུ་དང་འབྲས་བུའི་ཉེ་བར་གདགས་པའི་ཚུལ་གྱིས་དེའི་རྒྱུ་མཐུན་པ་ལ་། དེ་སྐད་ཉེ་བར་བསྟན་ཏེ། གཟུགས་ཉིད་ནི་སྟོང་པའོ། །སྟོང་པ་ཉིད་ནི་གཟུགས་སོ་ཞེས་གསུངས་པས་ན། ཉེས་པ་མེད་དོ། །དམ་ཚིག་གི་ཕྱག་རྒྱའི་ངོ་བོ་ཉིད་ཀྱིས་ངོ་བོ་ཉིད་དུ་དུམ་བུ་གཉིས་པ་ནི། བདེ་བ་ཆེན་
པོའི་རྡོ་རྗེ་མཆོག་གི་དམ་ཚིག་དམ་པའི་དཀྱིལ་འཁོར་ཡི་གེ་བཅུ་བདུན་པའི་སྔགས་ལ་སོགས་པའི་ཚུལ་ཡིན་ལ། དེ་བཞིན་དུ་དེ་བཞིན་གཤེགས་པ་དང་། རབ་ཏུ་དགའ་བའི་རྡོ་རྗེ་དང་། ཁྲོ་བོ་དང་། འཇིག་རྟེན་དབང་ཕྱུག་དང་། ནམ་མཁའི་སྙིང་པོ་དང་། བསྡུས་པའི་དཀྱིལ་འཁོར་དང་། མིང་པོ་གསུམ་དང་། 
སྲིང་མོ་བཞི་དང་། ལྷ་དང་། ཀླུ་དང་། གསང་བའི་དཀྱིལ་འཁོར་གྱི་ཚུལ་དེ་ཉིད་ཡིན་ཏེ། ཡང་འདི་རྣམས་ཉིད་ཀྱི་རྟོག་པ་ལས་ལས་ཀྱི་སྒྲིབ་པའི་དབང་གིས་དུམ་བུ་དང་པོ་ལས་གསུངས་པ་མ་གྲུབ་པ་རྣམས་མྱུར་དུ་གྲུབ་པར་བྱ་བའི་ཕྱིར་རོ། །བདེ་བ་ཆེན་པོ་རྡོ་རྗེ་ཆེན་པོའི་དཀྱིལ་འཁོར་དང་། དེ་བཞིན་

59-1-3b

གཤེགས་པ་དང་། རྡོ་རྗེ་མེ་ལྟར་རབ་ཏུ་འབར་བ་དང་། སྤྱན་རས་གཟིགས་དབང་ཕྱུག་དང་། ནམ་མཁའི་སྙིང་པོ་དང་། མིང་པོ་གསུམ་དང་། སྲིང་མོ་བཞི་དང་། ཀླུ་དང་སྡུག་བསྔལ་འདོན་པ་དང་། བསྡུས་པའི་དཀྱིལ་འཁོར་དང་། གསང་སྔགས་ལ་སོགས་པའི་ངོ་བོ་ཉིད་དེ། དེ་ཉིད་ནི་ཇི་ལྟར་མངོན་པར་
འདོད་པའི་དཀྱིལ་འཁོར་དུ་ཞུགས་པ་རྣམས་ཀྱང་མྱུར་དུ་འགྲུབ་པར་འགྱུར་བ་དང་། དཔལ་རྡོ་རྗེ་སེམས་དཔའི་གསང་བ་ལྔའི་དེ་ཁོ་ན་ཉིད་ཆེན་པོ་དམ་ཚིག་གསུམ་དང་། རྡོ་རྗེ་མེ་ལྟར་རབ་ཏུ་འབར་བ་དང་། སྤྱན་རས་གཟིགས་དབང་ཕྱུག་དང་། ནམ་མཁའི་སྙིང་པོ་དང་། གསང་བའི་རས་རིས་དང་། དཀྱིལ་འཁོར་
དང་སྔགས་ལ་སོགས་པའི་ཚུལ་ཡིན་ནོ། །ཆོས་ཀྱི་ཕྱག་རྒྱའི་དོན་གྱི་ངོ་བོ་ཉིད་དང་། དངོས་གྲུབ་རྣམས་ཀྱང་མྱུར་དུ་བསྒྲུབ་པར་བྱ་བའི་ཕྱིར། བསྒྲུབ་པའི་ཁྱད་པར་བསྡུས་པའི་ངོ་བོ་ཉིད་དུམ་བུ་གསུམ་པར་ཡང་བདེ་བ་ཆེན་པོ་རྡོ་རྗེ་ཆེན་པོའི་དཀྱིལ་འཁོར་ཆེན་པོ་དེ་བཞིན་གཤེགས་པ་ཐམས་ཅད་དང་། རྡོ་རྗེ་
མེ་ལྟར་རབ་ཏུ་འབར་བ་དང་། འཕགས་པ་སྤྱན་རས་གཟིགས་དབང་ཕྱུག་དང་། ནམ་མཁའི་སྙིང་པོ་དང་། མིང་པོ་གསུམ་དང་། སྲིང་མོ་བཞི་དང་། ཀླུ་དང་སྡུག་བསྔལ་གདོན་པ་དང་། བསྡུས་པའི་དཀྱིལ་འཁོར་དང་སྔགས་ལ་སོགས་པའི་ཚུལ་ཡིན་ནོ། །ཡང་གསང་བའི་དཀྱིལ་འཁོར་དང་། གསང་བ་
ལྔ་པའི་རས་རིས་ཀྱི་དཀྱིལ་འཁོར་དང་། ལྔ་པོ་བསྡུས་པའི་དཀྱིལ་འཁོར་གྱི་ངོ་བོ་ཉིད་དང་། སྒྲུབ་པ་པོ་མྱུར་དུ་འགྲུབ་པར་བྱ་བའི་ཕྱིར་དེས་བཞུགས་པ་ཡིན་ནོ། །ལས་ཀྱི་ཕྱག་རྒྱའི་དོན་གྱི་ངོ་བོ་ཉིད་དང་། དངོས་གྲུབ་རྣམས་ཀྱང་མྱུར་དུ་བསྒྲུབ་པར་བྱ་བའི་ཕྱིར་དང་། བསྒྲུབ་པའི་ཁྱད་པར་བསྡུས་པའི་ངོ་བོ་
ཉིད་ཀྱིས་དུམ་བུ་བཞི་པར་ཡང་བདེ་བ་ཆེན་པོ་རྡོ་རྗེ་ཆེན་པོའི་དཀྱིལ་འཁོར་ཆེན་པོ་དང་། དེ་བཞིན་གཤེགས་པ་དང་། རྡོ་རྗེ་མེ་ལྟར་རབ་ཏུ་འབར་བ་དང་། འཕགས་པ་སྤྱན་རས་གཟིགས་དབང་ཕྱུག་དང་། ནམ་མཁའི་སྙིང་པོ་དང་། མིང་པོ་གསུམ་དང་། སྲིང་མོ་བཞི་དང་། ཀླུ་དང་། སྡུག་བསྔལ་གདོན་པ་དང་། 
བསྡུས་པའི་དཀྱིལ་འཁོར་དང་། སྔགས་ལ་སོགས་པའི་ངོ་བོ་ཉིད་ཀྱང་། གསང་བའི་རས་རིས་དང་། དཀྱིལ་འཁོར་ལྔ་པ་མྱུར་དུ་འགྲུབ་པའི་ཕྱིར། བསྒྲུབ་པའི་ཁྱད་པར་ཉིད་ཀྱིས་བཞུགས་པ་ཡིན་ནོ། །ངོ་བོ་ཉིད་དང་རྣམ་པར་སྨིན་པ་དང་། ལོངས་སྤྱོད་རྫོགས་པ་དང་། སྤྲུལ་པའི་སྐུར་རྣམ་པར་གཞག་པ་

59-1-4a

ནི། ཐམས་ཅད་དུ་སྔ་མ་ཁོ་ན་བཞིན་དུ་བལྟ་བར་བྱའོ། །ངན་སོང་གསུམ་དང་མི་དང་། འདོད་པ་ན་སྤྱོད་པའི་ལྷ་དང་། གཟུགས་ན་སྤྱོད་པའི་ལྷ་རྣམས་རྣམ་པར་སྦྱང་བར་བྱ་བའི་ཕྱིར། དུམ་བུ་བཞི་པ་ལས་བཤད་པའི་བསྒོམ་པ་འགྲོ་བ་ཐམས་ཅད་ཁྱབ་པར་བྱེད་པ་སྔགས་པ་རྣམས་ཀྱིས་
བྱའོ་ཞེས་བསྟན་པའི་ཕྱིར། དུམ་བུ་བཞི་བསྟན་པ་ཡིན་ནོ་ཞེས་གཞན་དག་འཆད་དོ། །ཚུལ་འདི་ནི་རིགས་པའི་ཚུལ་ཡིན་ཏེ། རྒྱ་ཆེ་བ་ལ་སྲེད་པ་རྣམས་ནི་སྤྲོས་པའི་ཡེ་ཤེས་ནས་བརྩམས་པ་ནི་དུམ་བུ་དང་པོའོ། །བསྒྲུབ་པའི་ཁྱད་པར་ཅུང་ཟད་ཅིག་བསྟན་པའི་སྒོ་ནས་ཡང་དག་པར་སྟོན་པ་ནི། དུམ་བུ་གཉིས་
པའོ། །དོན་གསལ་བར་བྱ་བ་ནི་དུམ་བུ་གསུམ་པར་སྟོན་ཏོ། །དུམ་བུ་གསུམ་པའི་འདོད་པའི་དོན་ནི་དུམ་བུ་བཞི་པར་སྟོན་ཏེ། ཡང་དང་ཡང་དུ་དུམ་བུ་གཞན་གྱིས་དེའི་དོན་ཡང་དག་པར་མཚོན་པའི་ཕྱིར་རོ། །འདི་ཉིད་དུ་བཅོམ་ལྡན་འདས་ཉིད་ཀྱིས། དོན་འདི་ཉིད་ཡོངས་སུ་གཟུང་བར་མཛད་ནས། སླར་ཡང་
འདིར་སྟོན་པར་མཛད་ཅིང་། སྙིང་པོ་གསུངས་པར་གྱུར་པ་ནི། ཡང་དང་ཡང་དུ་བསྟན་པས་ཐེ་ཚོམ་དང་བྲལ་བ་ལ་རབ་ཏུ་འཇུག་ཅིང་། ཇི་ལྟར་མངོན་པར་འདོད་པ་འགྲུབ་པར་འགྱུར་བ་ཡིན་ནོ། །དེ་ཡང་། སངས་རྒྱས་བྱང་ཆུབ་སེམས་དཔའ་དག །ཡང་དང་ཡང་དུ་ལེགས་གསུངས་པ། །གསང་སྔགས་དེ་ལ་
དམ་པ་མཆོག །ཟློས་པ་པོ་ནི་འགྲུབ་པར་འགྱུར། །ཞེས་གསུངས་པ་དང་། འཇིག་རྟེན་པའི་བསྟན་བཅོས་ལ་ཡང་ཚུལ་འདི་སྣང་སྟེ་ཆོ་ག་དེ་ཉིད་ཀྱིས་རང་གི་བློའི་མཚན་ཉིད་གང་ལ་སྤྲོས་པར་བྱས་པར་འགྱུར་རོ། །དེ་བས་ན་འདིར་ཟློས་པ་པོའི་ཉེས་པའི་རྟོག་པ་མི་བྱའོ། །དེ་ལ་འདིར་བསྒྲུབ་པའི་ཁྱད་པར་
ཅུང་ཟད་ཅིག་ཡོད་པ་འདི་ལྟ་སྟེ། དཀྱིལ་འཁོར་དང་སྔགས་དང་། ཕྱག་རྒྱའི་ཁྱད་པར་ནི་དུམ་བུ་གསུམ་པར། ལྷ་མོ་བཞི་དང་ཡང་དག་པར་འདུས་པ་ལ་སོགས་པ་གསང་བའི་དཀྱིལ་འཁོར་ལྔ་པ་དང་། གཉིས་པ་ཧེ་མ་ཧཱ་སུ་ཁ་ཞེས་བྱ་བ་ལ་སོགས་པ་སྤྱན་འདྲེན་པའི་སྔགས་དང་། གསུམ་པ་དང་བཞི་
པར་ཧཱུཾ་མ་ཧཱ་སུ་ཁ་ཞེས་བྱ་བ་ལ་སོགས་པ་དང་། གཉིས་པར་ཨོྃ་ཞེས་བྱ་བ་ལ་སོགས་པ་བུམ་པའི་སྔགས་དང་། གསུམ་པ་དང་། བཞི་པར་ཡི་གེ་ཧཱུཾ་ཞེས་བྱ་བ་ལ་སོགས་པ་དང་། དེ་བཞིན་དུ་ཨོཾ་མ་དྷུ་བཛྲི་ཞེས་བྱ་བ་ལ་སོགས་པ་མཆོད་པའི་ལྷ་མོ་རྣམས་ཀྱི་སྔགས་དང་། ཡང་གསང་བ་ལྔའི་དཀྱིལ་འཁོར་ཀྱི་

59-1-4b

གྱི་དེ་ཁོ་ན་ཉིད་ཀྱིས་སྤྱན་དྲང་བའོ། །དེ་བཞིན་དུ་གཞན་དག་ཀྱང་རྒྱུད་ཀྱི་ནང་དུ་བལྟ་བར་བྱའོ། །དེ་ལྟར་ན་དུམ་བུ་དང་པོར་ནི་དཀྱིལ་འཁོར་བཅོ་ལྔ་པའོ། །གཉིས་པར་ནི་རྡོ་རྗེ་གསང་བའི་ཆོ་ག་དང་བཅས་པ་ཉི་ཤུ་རྩ་བདུན་ནོ། །གསུམ་པར་ནི་ཉི་ཤུ་རྩ་གཅིག་གོ། །བཞི་པར་ནི་དཀྱིལ་འཁོར་བཅོ་ལྔ་སྟེ། སྤྱིར་
བསྡུ་ན་དཀྱིལ་འཁོར་བདུན་ཅུ་རྩ་བརྒྱད་དུ་འགྱུར་རོ།    །དེ་ནས་འདི་རྣམས་ཀྱི་གཞི་དང་དབྱིབས་ཀྱི་ཁྱད་པར་མདོར་བསྡུས་ནས་ཇི་ལྟ་བ་བཞིན་དུ་བཤད་པར་བྱ་སྟེ། དེ་ལ་དམ་ཚིག་ཆེན་པོའི་དེ་ཁོ་ན་ཉིད་བྱིན་གྱིས་བརླབས་པ་རྡོ་རྗེའི་དཀྱིལ་འཁོར་ཆེན་པོ་ནི་ཟུར་བཞི་པ་ལ་སོགས་པའི་གཟུགས་ཅན་ཏེ། དེའི་
ནང་དུ་ཕྱིའི་དཀྱིལ་འཁོར་བཞིའི་ཟུར་པ་ལ་སྒོ་བཞི་པའི་དཀྱིལ་འཁོར་དེའི་ཕྱེད་ཀྱི་ཚད་ལ་ཀ་བ་བརྒྱད་ཀྱིས་ཉེ་བར་མཛེས་པར་བྱས་པ། ཕྱི་རོལ་ནས་རྡོ་རྗེ་ཕྲེང་བ་ཟླུམ་པོས་ཉེ་བར་ཡོངས་སུ་བསྐོར་བར་གནས་ལ། ལྷ་ཐམས་ཅད་ཀྱི་གནས་སུ་སྡོང་བུ་དང་བཅས་པའི་སྣ་ཚོགས་པདྨའི་གདན་བྱས་
ལ། དེའི་དབུས་སུ་རྡོ་རྗེ་སེམས་དཔའོ། །མདུན་དུ་རྡོ་རྗེ་ཡིད་ལས་བྱུང་བ། གཡས་སུ་རྡོ་རྗེ་ཀི་ལི་ཀི་ལ། རྒྱབ་ཏུ་རྡོ་རྗེ་དྲན་པ། གཡོན་དུ་རྡོ་རྗེ་སྙེམས་པའོ། །མེའི་ཕྱོགས་ཀྱི་ཆ་ལ་རྡོ་རྗེ་སྦྲང་རྩི། བདེན་བྲལ་གྱི་ཕྱོགས་སུ་རྡོ་རྗེ་སྤྲིན། རླུང་གི་ཕྱོགས་སུ་རྡོ་རྗེ་སྟོན། །དབང་ལྡན་གྱི་ཕྱོགས་ཀྱི་རེའུ་ཆ་ལ་རྡོ་རྗེ་དགུན་
ནོ། །དཀྱིལ་འཁོར་འདིའི་རྒྱབ་རྡོ་རྗེ་སྲད་བུའི་ནང་གི་ཤར་ཕྱོགས་སུ་མི་བསྐྱོད་པ་གཡས་དང་གཡོན་ལོགས་ན་ཕྱག་ན་རྡོ་རྗེ་དང་། འཇམ་དཔལ་འཁོར་དུ་བཞུགས་པའོ། །ལྷོ་ཕྱོགས་སུ་རིན་ཆེན་འབྱུང་ལྡན་ནམ་མཁའི་སྙིང་པོ་དང་། ནམ་མཁའི་མཛོད་ཀྱི་འཁོར་གྱིས་བསྐོར་བའོ། །ནུབ་ཀྱི་ཕྱོགས་སུ་
འོད་དཔག་མེད་པ་འཕགས་པ་སྤྱན་རས་གཟིགས་དབང་ཕྱུག་དང་། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བས་འཁོར་དུ་བྱས་པའོ། །བྱང་གི་ཕྱོགས་སུ་དོན་ཡོད་གྲུབ་པ་རྡོ་རྗེ་ཁུ་ཚུར་དང་། རྡོ་རྗེ་གནོད་སྦྱིན་གྱིས་འཁོར་དུ་བསྐོར་བའོ། །ཕྱིའི་དཀྱིལ་འཁོར་གྱི་མཚམས་རྣམས་སུ་
སྒེག་མོ་དང་བཞད་པ་མོ་དང་། གླུ་མཁན་མ་དང་གར་མཁན་མའོ། །ཤར་ལ་སོགས་པའི་སྒོ་རྣམས་སུ་ནི་གཟུགས་དང་སྒྲ་དང་དྲི་དང་རོ་གཟུགས་ལ་སོགས་པའི་ཕྱག་རྒྱ་ཕྱག་ན་བསྣམས་པའོ། །ཤར་ཕྱོགས་ཀྱི་ཕྱིའི་དཀྱིལ་འཁོར་གྱི་སྣམ་བུ་ལ་འཇིག་རྟེན་པའི་ལྷ་ཕྱེད་ལངས་པ། འདོད་པའི་ལྷ་ཚངས་པ། 

59-1-5a

ཁྱབ་འཇུག། ཀརྟི་ཀ །དབང་པོ་དྲག་པོ་ཆུང་མ་དང་བཅས་པའོ། །ལྷོ་ཕྱོགས་སུ་ཉི་མ། ཟླ་བ། སྤེན་པ། མིག་དམར་ཆུང་མ་དང་བཅས་པའོ། །ནུབ་ཀྱི་ཕྱོགས་སུ་གཏུམ་བག་ཅན་དང་། རླུང་དང་། མེ་དང་། ལུས་ངན་པོ་ཆུང་མ་དང་བཅས་པའོ། །བྱང་གི་ཕྱོགས་སུ་ཕག་དང་། 
གཤིན་རྗེ་དང་། ལོག་འདྲེན་དང་། དབང་པོ་ཆུ་ལྷ། ཆུང་མ་དང་བཅས་པར་གནས་པའོ། །སྒོ་རྣམས་སུ་ནི་སྟོབས་བཟང་དང་། སྦྲང་རྩི་ཅན་དང་། རྒྱལ་བ་དང་རྒྱལ་བ་ཐོབ་པ་ཆུང་མ་དང་བཅས་པའོ།    །ཕྱིའི་དཀྱིལ་འཁོར་དུ་རྡོ་རྗེ་སེམས་དཔའི་དཀྱིལ་འཁོར་དང་འདྲ་བ་ལས་དེའི་ནང་དུ་བཞི་ཆ་བའི་ཚད་
ལ་ཀ་བ་བརྒྱད་ཀྱིས་ཉེ་བར་མཛེས་པར་བྱས་པ། ཟླུམ་པོ་དཀྱིལ་འཁོར་དེའི་ཉིས་འགྱུར་ནི་གཉིས་པའོ། །དེའི་ཕྱི་རོལ་དུ་དེའི་སུམ་འགྱུར་ནི་གསུམ་པ་སྟེ། དེ་ནི་འཁོར་གྱི་དཀྱིལ་འཁོར་རོ། །ལྷ་ཐམས་ཅད་ཀྱི་གནས་སུ་སྣ་ཚོགས་པའི་པདྨའི་སྟན་རྣམ་པར་བཞག་པ་ལ། དབུས་སུ་བཅོམ་ལྡན་འདས་
རྣམ་པར་སྣང་མཛད་སྤྲུལ་པའི་སྐུ་ཏིང་ངེ་འཛིན་ལ་སྙོམས་པར་ཞུགས་པ། སངས་རྒྱས་ཀྱི་སྐུ་གཟུགས་བརྒྱད་ཀྱིས་ཡོངས་སུ་བསྐོར་བའོ། །གཉིས་པ་དཀྱིལ་འཁོར་ཟླུམ་པོའི་ནང་དུ་ཤར་ཕྱོགས་ནས་བརྩམས་ཏེ། མི་བསྐྱོད་པ་ལ་སོགས་པ་སྟེ་བྱང་ཆུབ་སེམས་དཔའ་གཉིས་ཀྱི་དབུས་སུ་བཞུགས་པར་བྱའོ། །
གསུམ་པའི་ཟླུམ་པོའི་ནང་དུ་ཤར་གྱི་ཕྱོགས་སུ་ཕྱག་ན་རྡོ་རྗེ། དེ་བཞིན་དུ་མེ་ལ་སོགས་པའི་ཕྱོགས་མཚམས་རྣམས་སུ་འཇམ་དཔལ་དང་། ནམ་མཁའི་སྙིང་པོ་དང་། ནམ་མཁའི་མཛོད་དང་། འཕགས་པ་སྤྱན་རས་གཟིགས་དབང་ཕྱུག་དང་། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་དང་། 
རྡོ་རྗེ་ཁུ་ཚུར་དང་། རྡོ་རྗེ་གནོད་སྦྱིན་དེར་བཞུགས་པར་བྱའོ། །ཕྱིའི་དཀྱིལ་འཁོར་གྱི་མཚམས་སུ་སྒེག་མོ་དང་། བཞད་མ་དང་། གླུ་མཁན་མ་དང་། གར་མཁན་མའོ། །སྒོ་རྣམས་སུ་ནི་བུམ་པ་བཞི་བྱའོ། །ཡང་ཤར་ཕྱོགས་ཀྱི་སྒོར་དཱུར་བ་ས་དང་བཅས་པའོ། །ལྷོར་ནི་དབྱིག་དང་། གསེར་དང་། རིན་པོ་ཆེ་དང་། 
གོས་ཀྱིས་བརྒྱན་པའི་སྣོད་རོ་དྲུག་གིས་ཡོངས་སུ་གང་བའོ། །ནུབ་ཏུ་ནི་སྟན་ཤིན་ཏུ་འཇམ་པོའོ། །བྱང་དུ་ནི་སངས་རྒྱས་ཀྱི་སྐུ་གཟུགས་རྣམ་པར་གཞག་པར་བྱའོ།    །ཕྱིའི་དཀྱིལ་འཁོར་རྡོ་རྗེ་སེམས་དཔའི་དཀྱིལ་འཁོར་དང་འདྲ་བ་ལས་དེའི་ནང་དུ་དེའི་ཕྱེད་ཀྱི་ཚད་ཟླུམ་པོ་རྡོ་རྗེ་ཐིག་གིས་བསྐོར་བ། དཀྱིལ་

59-1-5b

འཁོར་བརྒྱད་པ་ལྟ་བུར་འབར་བའི་ཕྲེང་བ་ཡོངས་སུ་འཁྲུག་པས་ཁྱབ་པའོ། །དེ་ལྟར་ལྷ་ཐམས་ཅད་ཀྱི་གནས་སུ་སྣ་ཚོགས་པདྨའི་གདན་ལ་དབུས་སུ་རྡོ་རྗེ་ཧཱུཾ་མཛད་དེའི་སྤྱན་སྔར་གཡས་བརྐྱང་པས་བཞུགས་ཏེ། གཡས་པའི་རྡོ་རྗེ་ཁུ་ཚུར་གྱིས་རྡོ་རྗེ་བསྣམས་པ། གཡོན་པའི་ཁྲོ་བོའི་ཁུ་ཚུར་གྱིས་
སྡིགས་མཛུབ་མཛད་པར་བརྩོན་པའོ། །གཡས་སུ་ནི་ལྕགས་ཀྱུ་བསྣམས་པའོ། །རྒྱབ་ཏུ་རལ་གྲི་བསྣམས་པའོ། །གཡོན་དུ་ནི་ཞགས་པ་བསྣམས་པའོ། །མེ་ལ་སོགས་པའི་མཚམས་རྣམས་སུ་ནི་དབྱིག་པ་དང་། ཁ་ཊྭཱཾ་ག་དང་། གྲི་གུག་དང་། ཆུ་གྲི་བསྣམས་པའི་ཁྲོ་བོ་རྣམས་སོ། །ཕྱིའི་དཀྱིལ་
འཁོར་གྱི་མཚམས་རྣམས་སུ་ནི་སྒེག་མོ་ལ་སོགས་པའོ། །ནང་གི་སྣམ་བུ་དེ་ཉིད་ལ་ལྷ་ལ་སོགས་པ་ལས་དབང་ཕྱུག་ཆེན་པོ་ཆུང་མ་དང་བཅས་པ་སྟོན་ལ་རྡོ་རྗེ་སེམས་དཔའི་དཀྱིལ་འཁོར་གྱི་ཚུལ་གྱིས་རང་རང་གི་ཕྱོགས་སུ་གནས་པར་བྱའོ། །ཤར་གྱི་སྒོར་ནི་མདའ་དང་གཞུའོ། །ལྷོར་ནི་རལ་
གྲིའོ། །ནུབ་ཏུ་ནི་འཁོར་ལོའོ། །བྱང་དུ་ནི་མདུང་བསྒྲེང་ནས་གནས་པར་བྱའོ།    །ཕྱིའི་དཀྱིལ་འཁོར་རྡོ་རྗེ་སེམས་དཔའི་དཀྱིལ་འཁོར་དང་འདྲ་བ་ལས་དེའི་ཕྱེད་ཀྱི་ཚད་ལ་མཚམས་སྒོ་ལ་མངོན་པར་ཕྱོགས་པ་གཉིས་ཏེ། ཀ་བ་བརྒྱད་ཀྱི་ཚུལ་དང་པདྨ་འདབ་མ་བརྒྱད་པས་བརྒྱན་པ་ལ་ལྷ་ཐམས་
ཅད་ཀྱི་གནས་སུ་སྣ་ཚོགས་པདྨའི་གདན་ལ་དེའི་དབུས་སུ་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གོ། །དེའི་སྤྱན་སྔ་ནས་བརྩམས་ཏེ། པདྨ་རཱ་ག་དང་། གཏུམ་པོའི་དབང་ཕྱུག་དང་། པདྨ་ཆེན་པོ་དང་། པདྨ་ནག་པོ་དང་། མི་མཇེད་ཀྱི་བདག་པོ་རྣམས་སོ། །མེ་ལ་སོགས་
པའི་འདབ་མ་རྣམས་ལ་པདྨ་ཆེན་མོས་འཛིན་དང་། རྒྱ་མཚོ་དང་ཉི་མ་དང་། རླུང་རྣམས་གཡས་ནས་བསྐོར་བའི་ཚུལ་དུ་གཞག་གོ། །ཕྱིའི་དཀྱིལ་འཁོར་གྱི་མཚམས་རྣམས་སུ་དཔལ་ཆེན་མོ་དང་། དཀར་མོ་དང་། སེར་མོ་དང་། དཀྱིལ་འཁོར་ལ་གནས་པ་རྣམས་ཏེ། ཤྲཱི། ཧྲཱི། གཱི། དྷཱི། ཞེས་
བྱ་བ་རྣམས་སོ། །ཤར་ཕྱོགས་ཀྱི་སྒོར་ནི་བུད་མེད་ཀྱི་གཟུགས་ཅན་ནོ། །ལྷོར་ནི་སྦྲུལ་ལོ། །ནུབ་ཏུ་ནི་ཕག་གོ། །བྱང་དུ་ནི་པདྨའི་གཟུགས་ཅན་ཡང་དག་པར་དགོད་པར་བྱའོ།    །ཕྱིའི་དཀྱིལ་འཁོར་ནི་སྔ་མ་དང་འདྲའོ། །དེའི་ཕྱེད་ཀྱི་ནང་དུ་ནོར་བུ་རིན་པོ་ཆེ་ཟུར་བརྒྱད་པ་རིན་པོ་ཆེའི་ཀ་བ་བརྒྱད་

59-1-6a

དང་ལྡན་པ། རིན་པོ་ཆེའི་ལྕུག་མས་ཡོངས་སུ་བསྐོར་བ། རྡོ་རྗེ་རིན་པོ་ཆེའི་རེ་བས་བསྐོར་བ། མེ་ཏོག་གི་ཆུན་འཕྱང་དང་། དར་དང་གདུགས་དང་། རྔ་ཡབ་ཀྱིས་ཉེ་བར་བསྒྲུབ་པར་བྱས་པས་མཛེས་པར་གནས་པར་བྱའོ། །དེའི་དབུས་སུ་བཅོམ་ལྡན་འདས་ནམ་མཁའི་སྙིང་
པོ་རྟ་དང་ལྡན་པའི་ཤིང་རྟ་ལ་ཆིབས་པས་བཞུགས་པའོ། །དེའི་མདུན་དུ་སྣ་ཚོགས་པདྨས་དབང་བསྐུར་བའི་རིན་ཆེན་རྡོ་རྗེ་རིན་པོ་ཆེའི་ཅོད་པན་ཐོགས་པའོ། །གཡས་སུ་རིན་ཆེན་ནོར་སྦྱིན་གཏེར་གྱི་བུམ་པ་ཕྱག་ན་བསྣམས་པའོ། །རྒྱབ་ཏུ་ཆོས་ཀྱི་རིན་ཆེན་ཕྱག་ན་གླེགས་བམ་བསྣམས་
པའོ། །གཡོན་དུ་རོའི་སྣོད་ཕྱག་ན་བསྣམས་པའོ། །མེ་ལ་སོགས་པའི་མཚམས་སུ་ནི་རིན་པོ་ཆེའི་གདུགས་དང་། རྒྱལ་མཚན་དང་། རྔ་བོ་ཆེ་དང་། རིན་པོ་ཆེའི་སྲོག་ཤིང་ཕྱག་ན་བསྣམས་པའི་ལྷ་མོ་རྣམས་བྱའོ། །ཕྱི་རོལ་གྱི་མཚམས་རྣམས་སུ་ནི་བུམ་པ་གང་བ་གཞག་པར་བྱའོ། །ཤར་ཕྱོགས་
ཀྱི་སྒོར་ནི་རིན་པོ་ཆེའི་ཅོད་པན་ནོ། །ལྷོར་ནི་གཏེར་གྱི་བུམ་པའོ། །ནུབ་ཏུ་ནི་རྒྱལ་མཚན་ནོ། །བྱང་དུ་ནི་རོའི་སྣོད་དོ། །ཕྱི་རོལ་དུ་ནི་རྒྱལ་མཚན་དང་བ་དན་ལ་སོགས་པ་གནས་པར་བྱའོ།    །ཕྱིའི་དཀྱིལ་འཁོར་ནི་སྔ་མ་དང་འདྲའོ། །དེའི་ཕྱེད་ཀྱིས་དེའི་ནང་དུ་རྡོ་རྗེ་ཐིག་ཟླུམ་པོས་བསྐོར་བ་ཀ་བ་
བརྒྱད་ཀྱིས་ཉེ་བར་མཛེས་པར་བྱས་པ། ལྷ་ཐམས་ཅད་ཀྱི་གནས་སུ་སྣ་ཚོགས་པདྨའི་གདན་བྱས་ཏེ། དེའི་དབུས་སུ་བཅོམ་ལྡན་འདས་རྡོ་རྗེ་ཁུ་ཚུར་རོ། །དེའི་མདུན་དུ་ནི་རྡོ་རྗེ་སྐུ་མཆོག་གོ། །གཡས་སུ་ནི་རྡོ་རྗེ་ལྕགས་སོ། །རྒྱབ་ཏུ་ནི་ཏིང་ངེ་འཛིན་རྡོ་རྗེའོ། །གཡོན་དུ་ནི་རྡོ་རྗེའི་རྡོ་རྗེའོ། །མེ་ལ་
སོགས་པའི་མཚམས་སུ་ནི་ཕྱག་རྒྱའི་དོན་དང་། ཡེ་ཤེས་དང་ལས་དང་། ཁུ་ཚུར་བཟང་མོ་ཞེས་བྱ་བའི་མཆོད་པའི་ལྷ་མོ་རྣམས་སོ། །ཕྱིའི་མཚམས་རྣམས་སུ་ནི་སྒེག་མོ་ལ་སོགས་པའོ། །ཤར་ཕྱོགས་ཀྱི་སྒོར་ནི་རྡོ་རྗེ་སྙེམས་མའོ། །ལྷོར་ནི་རྡོ་རྗེ་ལྕགས་མའོ། །ནུབ་ཏུ་ནི་ཏིང་ངེ་འཛིན་རྡོ་རྗེ་མའོ། །
བྱང་དུ་ནི་རྡོ་རྗེ་རྡོ་རྗེ་མའི་ཞེས་བྱ་བའི་ལྷ་མོ་རྣམས་ཡང་དག་པར་གནས་སོ།    །ཕྱིའི་དཀྱིལ་འཁོར་ནི་སྔ་མ་དང་འདྲའོ། །དེའི་ནང་དུ་ནི་དེའི་ཕྱེད་ཀྱི་འཁོར་ལོ་རྩིབས་བརྒྱད་པ། དཀྱིལ་འཁོར་བརྒྱད་པ་འདྲ་བའི་ཚུལ་ལ། འཁོར་ལོའི་སྟེང་དུ་ཤར་ཕྱོགས་ནས་བརྩམས་ཏེ། བསྐོར་བའི་ཕྱོགས་སུ་ཨ་

59-1-6b

ལ་སོགས་པའི་ཡི་གེའི་ཕྲེང་བཞིར་མཐར་ཐུག་པའི་བར་དུ་བྲི་བར་བྱའོ། །དེ་ནི་འདིར་ཨ་ར་པ་ཙ་ན་ཞེས་བྱ་སྟེ། འདོད་པ་ཐམས་ཅད་ཐོབ་པར་བྱེད་པའོ། །དེ་ཅིའི་ཕྱིར་ཞེ་ན། ཡི་གེ་ཨ་ནི་འདོད་པ་ཞེས་བཤད་དོ། །ཡི་གེ་ར་ནི་ཆགས་པ་ཞེས་བཤད་དོ། །ཡི་གེ་པ་ནི་དོན་དམ་པ་ཞེས་བཤད་དོ། །ཡི་གེ་
ཙ་ནི་སྤྱོད་པ་ཞེས་བཤད་དོ། །ན་ཞེས་བྱ་བ་ནི་དངོས་པོ་མེད་པ་ཞེས་བཤད་དོ། །འདོད་པ་དང་། ཆགས་པ་དང་། དོན་དམ་པ་དང་། སྤྱོད་པ་དང་། དངོས་པོ་མེད་པ་ཉིད་དོ། །དེ་ལྟར་འདི་བསྒོམས་ནས་སྙིང་པོ་བསྒྲུབ་པས་འདོད་པ་ཐམས་ཅད་ཐོབ་པར་འགྱུར་རོ། །འདོད་པ་ཐམས་ཅད་ནི་དེ་བཞིན་
གཤེགས་པ་བསྐྱེད་པ་སྟེ། དེས་ན་སྙིང་པོ་འདིས་དེ་བཞིན་གཤེགས་པ་རྣམས་དང་རྡོ་རྗེ་འཛིན་པ་ཉིད་མྱུར་དུ་ཐོབ་པར་འགྱུར་རོ། །དེ་ལ་ལྷ་ཐམས་ཅད་ཀྱི་གནས་སུ་ནི་སྣ་ཚོགས་པདྨ་ཡང་དག་པར་གནས་པ་ལ་འཁོར་ལོའི་ལྟེ་བར་བཅོམ་ལྡན་འདས་འཇམ་དཔལ་ལོ། །དེའི་ངོས་རྣམས་སུ་དེ་བཞིན་
གཤེགས་པའི་སྤྲུལ་པའི་གཟུགས་བརྒྱད་བྱའོ། །ཕྱི་རོལ་གྱི་མཚམས་རྣམས་སུ་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་བཞི་གཞག་པར་བྱའོ། །ཤར་ལ་སོགས་པའི་སྒོ་རྣམས་སུ་ནི་རལ་གྲི་དང་། མདུང་ཐུང་དང་། ལྷུང་བཟེད་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་གཞག་
པར་བྱའོ།    །ཕྱིའི་དཀྱིལ་འཁོར་ནི་རྡོ་རྗེ་སེམས་དཔའི་དཀྱིལ་འཁོར་གྱི་ཚུལ་ཇི་ལྟ་བ་དང་འདྲ་བ་དེའི་ནང་དུ་དེའི་ཕྱེད་ཀྱིས་རྡོ་རྗེའི་ཐིག་ཀ་བ་བརྒྱད་ཀྱིས་ཉེ་བར་མཛེས་པར་བྱའོ། །ཐམས་ཅད་ཀྱི་གནས་སུ་ནི་སྣ་ཚོགས་པདྨའི་གདན་བྱའོ། །དེའི་དབུས་སུ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་
བསྐོར་བའོ། །ཕྱོགས་དང་མཚམས་རྣམས་སུ་ནི་ཕྱག་ན་རྡོ་རྗེ་ལ་སོགས་པའོ། །ཕྱིའི་མཚམས་ཀྱི་ནང་གི་མེ་ལ་སོགས་པའི་མཚམས་རྣམས་སུ་གཡས་ནས་བསྐོར་ཏེ། ཞི་བ་མདུང་གིས་མཚན་པ་དང་། མ་མོ་དང་། མིང་པོ་གསུམ་དང་། སྲིང་མོ་བཞིའི་དཀྱིལ་འཁོར་གནས་པར་བྱའོ། །ཤར་ལ་སོགས་པའི་
སྒོ་རྣམས་སུ་ནི་རྡོ་རྗེ་སེམས་དཔའ་དང་། རྡོ་རྗེ་ཧཱུྃ་མཛད་དང་འཕགས་པ་སྤྱན་རས་གཟིགས་དབང་ཕྱུག་དང་། ནམ་མཁའི་སྙིང་པོ་ཡང་དག་པར་གཞག་པར་བྱའོ།    །ནམ་མཁའི་མཛོད་ཀྱི་དཀྱིལ་འཁོར་ཐམས་ཅད་ནི་ནམ་མཁའི་སྙིང་པོའི་དཀྱིལ་འཁོར་འདྲ་བ་ལས་མཚམས་སུ་ནི་སྒེག་མོ་ལ་སོགས་པ་

59-1-7a

གཞག་པར་བྱའོ། །ལྷ་ཐམས་ཅད་ཀྱི་གནས་སུ་སྣ་ཚོགས་པདྨའི་གདན་ལ་དབུས་སུ་ནམ་མཁའི་མཛོད་སྣ་ཚོགས་རྡོ་རྗེ་བསྣམས་པའོ། །ཕྱོགས་དང་མཚམས་རྣམས་སུ་ནི་ཕྱག་ན་རྡོ་རྗེ་ལ་སོགས་པ་རང་གི་མཚན་མ་བསྣམས་པ་བྱའོ། །ཕྱིའི་མཚམས་སུ་ནི་མེ་ཏོག་དང་། 
བདུག་སྤོས་དང་། མར་མེ་དང་། བྱུག་པ་མའི་ལྷ་མོ་རྣམས་སོ། །ཤར་ལ་སོགས་པའི་སྒོ་རྣམས་སུ་ནི་དོང་ཙེ་དང་གསེར་དང་མུ་ཏིག་དང་རྒྱན་གཞག་པར་བྱའོ།    །ཕྱིའི་དཀྱིལ་འཁོར་ནི་རྡོ་རྗེ་སེམས་དཔའི་དཀྱིལ་འཁོར་དང་འདྲ་བ་ལས་དེའི་ནང་དུ་དེའི་ཕྱེད་ཀྱི་ཚད་ཀྱིས་ཕྱིའི་དཀྱིལ་འཁོར་གཉིས་པ་
དཀྱིལ་འཁོར་ཟུར་བཞི་པ་ལ་ཀ་བ་བརྒྱད་ཀྱིས་ཉེ་བར་མཛེས་པར་བྱས་པའོ། །ལྷ་ཐམས་ཅད་ཀྱི་གནས་སུ་སྣ་ཚོགས་པདྨའི་གདན་ལ་འབར་བའི་དཀྱིལ་འཁོར་གྱིས་བརྒྱན་པར་བྱས་ལ། དཀྱིལ་འཁོར་དབུས་མའི་དབུས་སུ་བཅོམ་ལྡན་འདས་རྡོ་རྗེ་གནོད་སྦྱིན་ནོ། །ཕྱོགས་དང་མཚམས་རྣམས་སུ་
ནི་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེ་ལ་སོགས་པ་བརྒྱད་པོ་རྡོ་རྗེ་གནོད་སྦྱིན་གྱི་གཟུགས་ཅན་ནོ། །ཕྱིའི་དཀྱིལ་འཁོར་གྱི་མཚམས་རྣམས་སུ་ནི་རྡོ་རྗེ་མཆེ་བའི་ཕྱག་རྒྱ་རྣམས་སོ། །སྒོ་རྣམས་སུ་ནི་རྩེ་ལྔ་པའི་ཁྲོ་བོ་རྡོ་རྗེ་བསྣམས་པའི་ཕྱག་ན་རྡོ་རྗེ་གཞག་པར་བྱའོ།    །དཀྱིལ་འཁོར་ཐམས་
ཅད་ཀྱི་ཕྱི་དང་ནང་དུ་བཅས་པ་དང་པོའི་དཀྱིལ་འཁོར་དང་འདྲ་བར་གནས་པ་ལས་དེའི་དབུས་མའི་རེའུ་ཆ་ལ་རྡོ་རྗེ་སེམས་དཔའི་དཀྱིལ་འཁོར་རོ། །ཤར་གྱི་རེའུ་ཆ་ལ་སོགས་པ་ལ་ནི་རྡོ་རྗེ་ཧཱུཾ་མཛད་དང་། ནམ་མཁའི་སྙིང་པོ་དང་འཕགས་པ་སྤྱན་རས་གཟིགས་དབང་ཕྱུག་དང་། རྡོ་རྗེ་ཁུ་ཚུར་གྱི་
དཀྱིལ་འཁོར་རྣམས་ཏེ། ཤར་དང་ལྷོ་དང་ནུབ་དང་བྱང་གི་ཕྱོགས་སུ་བྱའོ། །མེ་ལ་སོགས་པའི་མཚམས་རྣམས་སུ་ནི་འཕགས་པ་འཇམ་དཔལ་དང་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་དང་ནམ་མཁའི་མཛོད་དང་། རྡོ་རྗེ་གནོད་སྦྱིན་གྱི་དཀྱིལ་འཁོར་རྣམས་མཚམས་སུ་གནས་
པར་བྱའོ། །ཕྱིའི་དཀྱིལ་འཁོར་གྱི་མཚམས་རྣམས་སུ་ནི་ཞི་བ་མདུང་གིས་མཚན་པ་དང་། མ་མོ་དང་། མིང་པོ་གསུམ་དང་། སྲིང་མོ་བཞིའི་དཀྱིལ་འཁོར་སྔ་མ་བཞིན་དུ་ཤེས་པར་བྱའོ། །ཕྱིའི་ཤར་ལ་སོགས་པའི་སྒོ་རྣམས་སུ་ནི་རྡོ་རྗེ་སེམས་དཔའ་དང་། རྡོ་རྗེ་ཧཱུཾ་མཛད་དང་། འཕགས་པ་

59-1-7b

སྤྱན་རས་གཟིགས་དབང་ཕྱུག་དང་། ནམ་མཁའི་སྙིང་པོའི་རིགས་བཞིའི་མཚན་མའི་ངོ་བོ་ཉིད་དུ་གནས་པར་བྱའོ། །སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་དཀྱིལ་འཁོར་དུ་རིགས་བཞིའི་མཚན་མ་དེ་ཉིད་ཡིན་པར་བསྟན་པས་ན། འདིར་སོམ་ཉི་མི་བྱའོ། །བསྡུས་པའི་
དཀྱིལ་འཁོར་རོ།    །དཀྱིལ་འཁོར་ཀུན་ནས་ཟླུམ་པོ་རིམ་པ་གསུམ་པོ་ལ་དཀྱིལ་འཁོར་དབུས་མའི་རིམ་པའི་ཉིས་འགྱུར་ནི། རིམ་པ་གཉིས་པའོ། །སུམ་འགྱུར་ནི། རིམ་པ་གསུམ་པ་སྟེ་ཐམས་ཅད་ཀྱང་སྒོ་བཞི་པ་ལ་མཚམས་བཞི་པོར་མདུང་རྩེ་གསུམ་པས་མཚན་པ་གནས་པར་བྱའོ། །
དེ་ལ་དབུས་སུ་དབང་ཕྱུག་ཆེན་པོའོ། །དེའི་ལོགས་ཤར་ལ་སོགས་པ་རྣམས་སུ་ནག་པོ་ཆེན་པོ་དང་། དགའ་བའི་དབང་ཕྱུག་དང་། དྲིལ་བུ་ཆེན་པོ་དང་། གར་གྱི་དབང་ཕྱུག་རྣམས་སོ། །མེ་ལ་སོགས་པའི་མཚམས་རྣམས་སུ་དྲག་པོའི་ཐོད་པ་དང་། གཏུམ་པོའི་དབང་ཕྱུག་དང་། ལག་ན་
ཁ་ཊྭཱཾ་ག་དང་། བ་ལངརྣའི་དབང་ཕྱུག་རྣམས་སོ། །རིམ་པ་གཉིས་པའི་ཤར་ལ་སོགས་པའི་ཕྱོགས་རྣམས་སུ་དྲག་མོ་ལག་ན་མདུང་རྩེ་གསུམ་པ་ཐོགས་པ། ལྷོར་ཚངས་མ་ཕྲེང་བ་ལག་ན་ཐོགས་པའི་རྒྱན་ཅན། ནུབ་ཏུ་ཁྱབ་འཇུག་མ་ལག་ན་འཁོར་ལོ་ཐོགས་པ། བྱང་དུ་གཞོན་ནུ་མ་ལག་ན་
དྲིལ་བུ་ཐོགས་པའོ། །མཚམས་རྣམས་སུ་ནག་མོ་དང་ནག་མོ་ཆེན་མོ་དང་ཟ་བྱེད་མ་དང་། སྲིན་མོ་རྣམས་ཏེ། ལག་ན་དྲིལ་བུ་དང་ཆུ་གྲི་དང་མཆེ་བ་དང་། ཁ་ཊྭཱཾ་ག་ཐོགས་པའོ། །ཞི་བ་མ་དང་། བྷེ་རུ་ཎྜ་དང་། གཏུམ་མ་དང་། འཇིགས་བྱེད་མ་རྣམས་ཀྱང་དེ་ཉིད་དུ་བྱའོ། །ཤར་ལ་སོགས་པའི་སྒོ་
རྣམས་སུ་དབྱིག་པའི་དབང་ཕྱུག་དང་། མུཎྜའི་དབང་ཕྱུག་དང་། དྲིལ་རྣ་དང་། དྲག་པོ་ཆེན་པོ་རྣམས་གནས་པར་བྱའོ། །ཞི་བའི་དཀྱིལ་འཁོར་རོ།    །དཀྱིལ་འཁོར་ཟུར་བཞི་པ་སྒོ་བྱང་དུ་བལྟས་པར་གནས་པ་ལ་དེའི་དབུས་སུ་ནག་པོ་ཆེན་པོ་ཐོད་པ་དང་རུས་པའི་ཕྲེང་བ་ཐོགས་པ་ཁ་གདངས་པ་
མཆེ་བ་ཅན། རིམ་པ་གསུམ་པ་ལ་འབྱུང་པོ་བརྒྱད་དང་རིམ་པ་བརྒྱད་ཀྱིས་ཀུན་ནས་ཕྲེང་དུ་བསྐོར་ནས་གནས་པའོ། །ཤར་ལ་སོགས་པའི་སྒོ་རྣམས་དེའི་བྱང་གི་ཕྱོགས་ནས་བརྩམས་ཏེ། བསྐོར་ཕྱོགས་སུ་དྲག་པོ་ལ་སོགས་པའི་མཚན་མ་སྔར་བཤད་པའི་ཕྱོགས་སུ་དགོད་པར་བྱའོ། །མཚམས་

59-1-8a

ཀྱི་དབང་ལྡན་ནས་བརྩམས་ཏེ། ནག་མོ་དང་ནག་མོ་ཆེན་མོ་དང་། ཟ་བྱེད་མ་དང་སྲིན་མོའི་མཚན་མ་སྔར་བཤད་པ་དགོད་དོ། །སྒོ་རྣམས་སུ་ཞི་བ་དང་ཞི་བ་ཆེན་མོའོ། །གཡས་ཀྱི་ཕྱོགས་སུ་ནི་སྔར་བཤད་པའི་མཚན་མ་རྣམས་ཏེ། བྷེ་རུཎྜ་དང་། འཇིགས་བྱེད་མའོ། །གཡོན་
གྱི་ཕྱོགས་སུ་ནི་སྔར་བཤད་པའི་མཚན་མ་རྣམས་གཞག་པར་བྱའོ། །མ་མོའི་དཀྱིལ་འཁོར་རོ།    །ཕྱིའི་དཀྱིལ་འཁོར་ཟུར་བཞི་པ་ལ་སྒོ་བཞི་པར་བྱས་ལ། དེའི་དབུས་སུ་གཞུ་ལྟ་བུའི་དཀྱིལ་འཁོར་གཉིས་ལ་ཕྱེད་ཀྱི་ཚད་དུ་བྱས་ལ། དེའི་དབུས་སུ་སེང་གེའི་གདན་བྱས་ནས། སེང་གེའི་གདན་
དེ་ལ་མིང་པོ་གསུམ་རིམ་བཞིན་དུ་གནས་པ་སྟན་གཅིག་ལ་འདུག་པ་བྱའོ། །ཕྱིའི་དཀྱིལ་འཁོར་གྱི་ཤར་གྱི་སྒོར་གྲུབ་པ། ལྷོ་རུ་ནི་རྫུ་འཕྲུལ་ལོ། །ནུབ་ཏུ་ནི་ཆེན་པོའོ། །བྱང་དུ་ནི་ཀྵེ་ཏྲའོ། །མེའི་མཚམས་སུ་ནི་གཏུམ་པའོ། །བདེན་བྲལ་གྱི་མཚམས་སུ་ནི་ཁྲོ་བའོ། །རླུང་གི་མཚམས་སུ་ནི་
མཆོག་གོ། །དབང་ལྡན་གྱི་མཚམས་སུ་ནི་གསོད་པར་གནས་པར་བྱའོ། །མིང་པོ་གསུམ་གྱི་དཀྱིལ་འཁོར་རོ།    །དཀྱིལ་འཁོར་ཀུན་ནས་ཟླུམ་པོ་ལ་སྒོ་བཞི་པ་ལ་མཚམས་བཞི་པའི་རི་མོར་ཀ་བ་བཞི་བྱས་ལ། དཀྱིལ་འཁོར་གྱི་ལྟེ་བར་ཆ་བཞི་གནས་པ་ལ། དེ་ལ་ཤར་གྱི་ཆ་ལ་དགའ་མོ་མདའ་དང་
གཞུ་འདྲེན་པར་བརྩོན་པས་རང་གི་སྒོ་ལ་མངོན་པར་ཕྱོགས་ཏེ་འདུག་པའོ། །ལྷོའི་ཆ་ལ་གསོད་མ་ཕུབ་དང་རལ་གྲི་འཛིན་པའོ། །ནུབ་ཏུ་ཕག་མོ་གཏེར་གྱི་བུམ་པ་ལག་ན་ཐོགས་པའོ། །བྱང་དུ་གྲུབ་མ་ཙ་ཤ་ཀ་དང་གྲི་གུག་ལག་ན་ཐོགས་ཏེ་རང་གི་སྒོ་ལ་ཕྱོགས་ཏེ་མངོན་པར་འདུག་པར་
བྱས་ཏེ། རང་རང་གི་མཚན་མ་ཐོགས་ཏེ་རང་གི་སྒོའི་དབུས་སུ་ལེགས་པར་གནས་པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུ་དཀྱིལ་འཁོར་བཅོ་ལྔ་རྣམ་པར་ཕྱེ་བ་ཡིན་ནོ།    །དུམ་བུ་གཉིས་པར་དཀྱིལ་འཁོར་དང་པོ་དང་འདྲ་བར་ཕྱི་ནས་བྱས་པའི་དཀྱིལ་འཁོར་ལྷ་ཐམས་ཅད་ཀྱི་གནས་སུ་སྣ་
ཚོགས་པདྨའི་གདན་རྣམ་པར་གཞག་ལ། དེའི་དབུས་སུ་རྡོ་རྗེ་སེམས་དཔའོ། །དེའི་མདུན་དུ་རྡོ་རྗེ་ཡིད་ལས་བྱུང་བའོ། །གཡས་སུ་རྡོ་རྗེ་ལི་ཀི་ལའོ། །རྒྱབ་ཏུ་ཆགས་པའི་རྡོ་རྗེའོ། །གཡོན་དུ་རྡོ་རྗེ་སྙེམས་པའོ། །མེ་ལ་སོགས་པའི་མཚམས་རྣམས་སུ་ནི་མེ་ཏོག་དང་བདུག་སྤོས་དང་། 

59-1-8b

མར་མེ་དང་། དྲིའི་ལྷ་མོ་རྣམས་སོ། །དཀྱིལ་འཁོར་གྱི་ཕྱིའི་མཚམས་རྣམས་སུ་ནི་སྒེག་མོ་དང་། བཞད་པ་མོ་དང་། གླུ་མཁན་མ་དང་། གར་མཁན་མའོ། །ཤར་ལ་སོགས་པའི་སྒོ་རྣམས་སུ་ནི་རྡོ་རྗེ་ལྕགས་ཀྱུ་དང་། ཞགས་པ་དང་། ལྕགས་སྒྲོག་དང་དྲིལ་བུ་རྣམས་གནས་པར་བྱའོ། །
གཉིས་པོའི་དཀྱིལ་འཁོར་དང་པོའོ།    །ཕྱི་དང་ནང་དུ་བཅས་པ་ཐམས་ཅད་རྡོ་རྗེ་སེམས་དཔའི་དཀྱིལ་འཁོར་དང་འདྲ་བས་གནས་པ་ལ། དེའི་དབུས་སུ་སངས་རྒྱས་བཅོམ་ལྡན་འདས་རྡོ་རྗེ་སེམས་དཔའི་སྐུ་ཅན་ལ་རིན་པོ་ཆེའི་ཅོད་པན་གྱི་དབང་བསྐུར་བའོ། །དེའི་ཤར་ཕྱོགས་ཀྱི་ཆ་ལ་རྡོ་རྗེ་གོ་ཆ། 
ལྷོར་ནི་རྡོ་རྗེ་ཀི་ལི་ཀི་ལའོ། །ནུབ་ཏུ་ནི་རྡོ་རྗེ་ཆགས་པའོ། །བྱང་དུ་ནི་རྡོ་རྗེ་སྙེམས་པའོ། །མཚམས་རྣམས་སུ་ནི་མེ་ཏོག་ལ་སོགས་པའོ། །ཕྱི་རོལ་གྱི་མཚམས་སུ་ནི་སྒེག་མོ་ལ་སོགས་པའོ། །ཤར་ལ་སོགས་པའི་སྒོ་རྣམས་སུ་ནི་ལྕགས་ཀྱུ་ལ་སོགས་པ་ཡང་དག་པར་གནས་པར་བྱའོ།    །
རབ་ཏུ་དགའ་བའི་རྡོ་རྗེ་ཁྲོ་བོའི་དཀྱིལ་འཁོར་དུམ་བུ་གཉིས་པར་བཤད་པ་ཡང་རྡོ་རྗེ་སེམས་དཔའི་དཀྱིལ་འཁོར་དང་པོ་དང་འདྲ་བ་ཡིན་ཏེ། དེ་ལ་རྡོ་རྗེ་སེམས་དཔའ་དང་། རྡོ་རྗེ་ཡིད་ལས་བྱུང་བ་ལ་སོགས་པ་ཉིད་ནས་རྡོ་རྗེ་དྲིལ་བུའི་མཐར་ཐུག་གི་བར་དུ་ཁྲོ་བ་དང་བཅས་པར་གནས་པ་ཡིན་ནོ། །
རབ་ཏུ་དགའ་བའི་རྡོ་རྗེའི་ཁྲོ་བོའི་དཀྱིལ་འཁོར་རོ།    །དུམ་བུ་གཉིས་པར་བཤད་པའི་ཕྱི་དང་ནང་དུ་བཅས་པའི་རྡོ་རྗེ་སེམས་དཔའི་དཀྱིལ་འཁོར་དང་འདྲ་བར་བྱས་པ་ལ་དཀྱིལ་འཁོར་པདྨས་མཚན་པ་བྱས་ལ། དེའི་དབུས་སུ་བཅོམ་ལྡན་འདས་སྤྱན་རས་གཟིགས་དབང་ཕྱུག་གོ། །དེའི་ཤར་
ནས་བརྩམས་ཏེ། རྡོ་རྗེ་ཡིད་ལས་བྱུང་བ་དང་རྡོ་རྗེ་ཀི་ལི་ཀི་ལ་ལ་སོགས་པ་རྡོ་རྗེ་དྲིལ་བུའི་མཐར་ཐུག་གི་བར་དུ་པདྨའི་མདའ་ལ་སོགས་པ་བསྣམས་ནས་བཞུགས་པར་བྱའོ། །འཇིག་རྟེན་དབང་ཕྱུག་གི་དཀྱིལ་འཁོར་རོ།    །དཀྱིལ་འཁོར་ཐམས་ཅད་རྡོ་རྗེ་སེམས་དཔའི་དཀྱིལ་འཁོར་དང་
འདྲ་བ་ལས་རིན་པོ་ཆེ་ལྟ་བུར་བྱས་ལ། དེའི་དབུས་སུ་བཅོམ་ལྡན་འདས་ནམ་མཁའི་སྙིང་པོ། དེའི་ཤར་ནས་བརྩམས་ཏེ། རྡོ་རྗེ་ཡིད་ལས་བྱུང་བ་ལ་སོགས་པ་ཉིད་ནས། རྡོ་རྗེ་དྲིལ་བུའི་མཐར་ཐུག་གི་བར་དུ་རིན་པོ་ཆེའི་མདའ་དང་གཞུ་ལ་སོགས་པ་བསྣམས་ནས་གནས་པར་བྱའོ། །རིན་པོ་ཆེའི་

59-1-9a

དཀྱིལ་འཁོར་རོ།    །དཀྱིལ་འཁོར་གྱི་ཕྱི་དང་ནང་དུ་བཅས་པ་རྡོ་རྗེ་སེམས་དཔའི་དཀྱིལ་འཁོར་དང་འདྲ་བ་ལས་དེའི་དབུས་མའི་རེའུ་ཆ་ལ་རྡོ་རྗེ་སེམས་དཔའི་དཀྱིལ་འཁོར་རོ། །ཤར་ལ་སོགས་པའི་རེའུ་ཆ་རྣམས་ལ། དེ་བཞིན་གཤེགས་པ་དང་རབ་ཏུ་དགའ་བའི་རྡོ་
རྗེ་ཁྲོ་བོ་དང་། འཕགས་པ་སྤྱན་རས་གཟིགས་དབང་ཕྱུག་དང་། རྡོ་རྗེ་རིན་ཆེན་གྱི་དཀྱིལ་འཁོར་བཤད་མ་ཐག་པའོ། །མེ་ལ་སོགས་པའི་མཚམས་སུ་ནི་མེ་ཏོག་མ་ལ་སོགས་པའི་ལྷ་མོ་རྣམས་སོ། །ཕྱིའི་དཀྱིལ་འཁོར་གྱི་མཚམས་ཀྱི་མེའི་ཕྱོགས་ནས་བརྩམས་ཏེ། བསྐོར་ཕྱོགས་སུ་མིང་
པོ་གསུམ་དང་། སྲིང་མོ་བཞི་དང་། ལྷ་མ་ཡིན་དང་། ཀླུའི་དཀྱིལ་འཁོར་འོག་ནས་བཤད་པ་རྣམས་ལ་བྱའོ། །ཤར་ལ་སོགས་པའི་སྒོ་རྣམས་སུ་ནི་ལྕགས་ཀྱུ་ལ་སོགས་པ་གནས་པར་བྱའོ། །བསྡུས་པའི་དཀྱིལ་འཁོར་རོ།།    །།མིང་པོ་དང་སྲིང་མོའི་དཀྱིལ་འཁོར་ནི་སྔ་མ་དང་འདྲ་སྟེ། ཁྲུ་
གང་ཙམ་གྱི་སྐས་བཞི་ལས་བབས་པར་བརྐོས་པ། རྒྱར་ཁྲ་བརྒྱད་པ་ཟུར་བཞི་པ། ཤར་དུ་གྱེན་དུ་བལྟས་པའི་སྒོ་གཅིག་པའི་དཀྱིལ་འཁོར་དུ་གནས་པ་ལ། དེའི་དབུས་སུ་ཁྱབ་འཇུག་གི་འཁོར་རོ། །དེའི་ཤར་ཕྱོགས་ལ་སོགས་པའི་ཆ་ལ་བདེ་མཆོག་དང་ཐགས་བཟངས་རིས་དང་ལག་
བཟངས་དང་། སྲིན་པོ་ཞེས་བྱ་བའི་ལྷ་མ་ཡིན་གྱི་བདག་པོ་འཁོར་དང་བཅས་པ་རྣམས་སོ།    །མཚམས་རྣམས་སུ་ནི་ལྷ་མ་ཡིན་གྱི་བུ་མོ་རྣམས་གནས་པར་བྱའོ། །ལྷ་མ་ཡིན་གྱི་དཀྱིལ་འཁོར་རོ།    །ཟུར་བཞི་པ་ལ་སྒོ་བཞི་པའི་དཀྱིལ་འཁོར་ལ་སྦྲུལ་གྱི་མཇུག་མའི་རི་མོས་མཚམས་བཞིར་མདུད་
པར་བྱས་པ་གདེངས་ཀ་བརྒྱད་བསྒྲེང་བ་སྒོ་བཞི་སྒོ་ཁྱུད་དང་ལྡན་པ་ནི་ཀླུའི་དཀྱིལ་འཁོར་ཏེ། དེ་ལ་ཆུ་སྲིན་ལ་སོགས་པ་དང་། ཆུས་ཡོངས་སུ་གང་བའི་མཚོའི་དབུས་སུ་ཀླུའི་རྒྱལ་པོ་མགོ་བརྒྱད་པའོ། །དེའི་ཕྱོགས་ལོགས་ཀྱི་ཕྱོགས་དང་མཚམས་རྣམས་སུ་མཐའ་ཡས་དང་། ནོར་རྒྱས་དང་། 
འཇོག་པོ་དང་། ཀརྐོ་ཊ་དང་། པདྨ་དང་། པདྨ་ཆེན་པོ་དང་། དུང་སྐྱོང་དང་། རིགས་ལྡན་གདེངས་ཀ་བདུན་བདུན་དང་ལྡན་པ་སྐྱེས་བུའི་གཟུགས་སུ་གནས་པར་བྱའོ། །ཀླུའི་དཀྱིལ་འཁོར་རོ།།    །།ཐམས་ཅད་དཀྱིལ་འཁོར་དང་པོ་དང་འདྲ་བར་བྱས་ལ་དཀྱིལ་འཁོར་གྱི་དབུས་སུ་བཅོམ་ལྡན་

59-1-9b

འདས་རྡོ་རྗེ་སེམས་དཔའོ། །དེའི་ཤར་ཕྱོགས་ནས་བརྩམས་ཏེ། རྡོ་རྗེ་གོ་ཆ་ལ་སོགས་པ་ནས་རྡོ་རྗེ་དྲིལ་བུའི་མཐར་ཐུག་གི་བར་དུ་ཐམས་ཅད་ལྷ་མོའི་ཚུལ་གྱིས་བཞུགས་པར་བྱའོ། །རྡོ་རྗེ་སེམས་དཔའི་གསང་བའི་དཀྱིལ་འཁོར་རོ། །དུམ་བུ་གཉིས་པ་ལས་གསུངས་པའི་རྩ་བའི་རྒྱུད་ཀྱི་
དཀྱིལ་འཁོར་བཅུ་གཅིག་ཡིན་ནོ།    །ཕྱི་དང་ནང་དུ་བཅས་པ་ཐམས་ཅད་དཀྱིལ་འཁོར་དང་པོའི་ཚུལ་དུ་གནས་པའི་དཀྱིལ་འཁོར་ལ། དེའི་དབུས་སུ་བཅོམ་ལྡན་འདས་རྡོ་རྗེ་སེམས་དཔའ་དེའི་ཕྱོགས་ཐམས་ཅད་དུ་འདོད་ཆགས་རྡོ་རྗེ་ལ་སོགས་པའོ། །དེའི་མཚམས་རྣམས་སུ་ཤིན་ཏུ་དགའ་མ་
དང་རབ་ཏུ་དགའ་མ་དང་། སྤྱན་དང་དཔལ་ཆེན་མོའོ། །ཕྱིའི་དཀྱིལ་འཁོར་གྱི་མཚམས་རྣམས་སུ་ནི་སྒེག་མོ་ལ་སོགས་པའོ། །ཤར་ལ་སོགས་པའི་སྒོ་རྣམས་སུ་ནི་རྡོ་རྗེ་ལྕགས་ཀྱུ་ལ་སོགས་པའོ། །ཕྱིའི་མཚམས་རྣམས་སུ་ནི་བུམ་པ་ལ་སོགས་པ་དང་། ཏོག་རྣམས་གནས་པའོ། །བཅོམ་
ལྡན་འདས་ཀྱི་སྤྱན་སྔར་བུམ་པ་གཅིག་གཞག་པར་བྱའོ། །དུམ་བུ་གཉིས་པ་ནས་གསུངས་པའི་རྒྱུད་ཕྱི་མའི་དཀྱིལ་འཁོར་དང་པོའོ།    །ཕྱིའི་དཀྱིལ་འཁོར་དང་པོ་དང་འདྲ་བར་བྱས་པ། དེའི་ནང་དུ་དེའི་ཕྱེད་ཀྱི་ཟླུམ་པོ་ལ་རྡོ་རྗེའི་ཐིག་དང་། ཀ་བ་བརྒྱད་ཀྱིས་ཉེ་བར་མཛེས་པར་བྱས་པ་ལྷ་ཐམས་ཅད་
ཀྱི་གནས་སུ་སྣ་ཚོགས་པདྨའི་གདན་གཞག་པ་ལ་དེའི་དབུས་སུ་བཅོམ་ལྡན་འདས་རྣམ་པར་སྣང་མཛད་དེའི་སྤྱན་སྔར་བཅོམ་ལྡན་འདས་མི་བསྐྱོད་པ་བདུད་ལས་རྣམ་པར་རྒྱལ་བར་མཛད་པ་གཡས་སུ་བཅོམ་ལྡན་འདས་རིན་ཆེན་བྱུང་ལྡན་བྱང་ཆུབ་སེམས་དཔའ་ཕྱག་ན་རིན་ཆེན་ཅོད་པན་ལ་
སོགས་པ་ལ་དབང་བསྐུར་བར་མཛད་པའོ། །རྒྱབ་ཏུ་བཅོམ་ལྡན་འདས་འོད་དཔག་ཏུ་མེད་པ་བྱང་ཆུབ་སེམས་དཔའ་ཆེན་པོ་ཀུན་དུ་བཟང་པོ་ལ་སོགས་པས་ཡོངས་སུ་བསྐོར་བ་ལ་ཆོས་ཀྱི་འཁོར་ལོ་བསྐོར་བར་མཛད་པའོ། །གཡོན་དུ་བཅོམ་ལྡན་འདས་དོན་ཡོད་པར་གྲུབ་པ་འདོད་ཆགས་ལ་
སྤྱོད་པའི་སེམས་ཅན་རྣམས་འདུལ་བར་མཛད་པའོ། །མེ་ལ་སོགས་པའི་མཚམས་རྣམས་སུ་རྡོ་རྗེ་སེམས་མ་དང་། རིན་ཆེན་སེམས་མ་དང་། ཆོས་ཀྱི་སེམས་མ་དང་། ལས་ཀྱི་སེམས་མ་རྣམས་སོ། །ཕྱིའི་དཀྱིལ་འཁོར་གྱི་མཚམས་རྣམས་སུ་སྒེག་མོ་ལ་སོགས་པའོ། །ཤར་ལ་སོགས་པའི་སྒོ་

59-1-10a

རྣམས་སུ་ནི་ལྕགས་ཀྱུ་ལ་སོགས་པ་གནས་པར་བྱས་པ། དེ་བཞིན་གཤེགས་པའི་དཀྱིལ་འཁོར་རོ།    །ཕྱིའི་དཀྱིལ་འཁོར་རྡོ་རྗེ་སེམས་དཔའི་དཀྱིལ་འཁོར་དང་འདྲ་བ་ལས་དེའི་དབུས་སུ་རྡོ་རྗེའི་འཁོར་ལོ་ཟླུམ་པོ་འབར་བ་དང་བཅས་པ་ཀ་བ་བརྒྱད་ཀྱིས་ཉེ་བར་མཛེས་
པར་བྱས་པ་ལ། དེའི་ཕྱི་རོལ་དུ་ཆ་མཉམ་པའི་ཟླུམ་པོ་རིམ་པ་བདུན་པ་བྱས་ཏེ། ལྷ་ཐམས་ཅད་ཀྱི་སྣ་ཚོགས་པདྨར་གནས་པ་ལ་འབར་བའི་འཁོར་ལོའི་དབུས་སུ་བཅོམ་ལྡན་འདས་རྡོ་རྗེ་མེ་ལྟར་རབ་ཏུ་འབར་བའོ། །དེའི་མདུན་དུ་རྡོ་རྗེ་མཚོན་ཆ་འཛིན་མ་གཡོན་བརྐྱང་པས་གནས་པས་
བཞུགས་པ། གཡོན་པའི་ཁྲོ་བོའི་ཁུ་ཚུར་སྡིགས་མཛུབ་བྱེད་པ། གཡས་པའི་རྡོ་རྗེའི་ཁུ་ཚུར་གྱིས་རྡོ་རྗེ་རྩེ་ལྔ་པ་བསྣམས་པའོ། །གཡས་སུ་ནི་མདུང་རྩེ་གསུམ་པ་འཛིན་མའོ། །རྒྱབ་ཏུ་ནི་རལ་གྲི་འཛིན་མའོ། །གཡོན་དུ་ནི་པདྨ་དང་ཐོད་པ་འཛིན་མའོ། །མེ་ལ་སོགས་པའི་མཚམས་སུ་
ནི་མདའ་གཞུ་དང་ཁ་ཊྭཱཾ་ག་དང་འཁོར་ལོ་དང་། བ་དན་སྣ་ཚོགས་འཛིན་པའི་ལྷ་མོ་རྣམས་གཞག་པར་བྱའོ། །དེའི་ཕྱི་རོལ་གྱི་ཐིག་དང་པོའི་ནང་དུ་རྡོ་རྗེ་གཙུག་ཏོར་ལ་སོགས་པ་གོ་རིམས་བཞིན་དུ་བཞུགས་པར་བྱས་ཏེ། དེ་བཞིན་དུ་གཡོན་བརྐྱང་བས་བཞུགས་ཤིང་གཡོན་པའི་ཁྲོ་བོའི་ཁུ་
ཚུར་གྱིས་སྡིགས་མཛུབ་བྱེད་ཅིང་གཡས་པའི་རྡོ་རྗེ་ཁུ་ཚུར་གྱིས་རྡོ་རྗེ་གཙུག་ཏོར་ལ་སོགས་པ་བསྣམས་པར་བྱའོ། །དེ་བཞིན་དུ་གཉིས་པ་ལ་སྔགས་ཀྱི་ལྷ་མོ་རྣམས་ཕྱག་ན་རང་གི་ཕྱག་རྒྱ་དང་ལྡན་པར་བྱའོ། །གསུམ་པར་ནི་རྡོ་རྗེ་རྒྱལ་པོ་ལྷ་མོ་བཞིའི་དབུས་ན་བཞུགས་པ་རྡོ་རྗེ་རྩེ་ལྔ་པ་བསྣམས་
པའོ། །བཞི་པར་ནི་རྡོ་རྗེ་རོལ་མོ་ཆེན་མོ་བཅུ་རྡུང་བར་བྱེད་ཅིང་རྡོ་རྗེ་སྒེག་མོ་རྣམས་གར་བྱེད་ཅིང་གླ་ཞེན་པའོ། །ལྔ་པར་ནི་རཱ་ཛ་ནཱ་ག་དང་པྲ་ཏི་ཧ་ར་དང་། ཚོགས་དང་ཁྲོ་བོ་རྣམས་སོ། །དྲུག་པར་ནི་རྡོ་རྗེ་ཕོ་ཉ་དང་། རྡོ་རྗེ་གནོད་སྦྱིན་དང་། རྡོ་རྗེ་སྲིན་པོ་དང་། རྡོ་རྗེ་མངག་གཞུག་རྣམས་སོ། །བདུན་པར་
ནི་རྡོ་རྗེ་གཙུག་ཏོར་རམ་། རྡོ་རྗེ་སྨིན་མཚམས་ཀྱིས་བརྙེས་པར་གྱུར་ཅིང་། ཆད་པ་བཅད་པ་དང་། རྡོ་རྗེ་རྒྱལ་པོ་དང་། པྲ་ཏི་ཧ་རས་གཡུལ་དུ་བཅོམ་པ་ལ་སོགས་པའི་རིམ་གྱིས་ཏེ། ལྷ་ཆེན་པོ་ལ་སོགས་པ་བཏུལ་བ་ནས་ཆུ་ལྷའི་མཐར་ཐུག་གི་བར་དུ་མ་མོའི་ཚོགས་དང་བཅས་པར་གནས་པ་རྣམས་

59-1-10b

སོ། །རྡོ་རྗེ་གཙུག་ཏོར་ལ་སོགས་པ་ནས་རྡོ་རྗེ་མངག་གཞུག་གི་མཐར་ཐུག་གི་བར་ནི་འཇིག་རྟེན་ལས་འདས་པ་ཉིད་ཡིན་ཏེ། འཇིག་རྟེན་གསུམ་གྱི་གསང་བའི་རྒྱུད་དང་། ལ་ལ་ནི་རྒྱུད་འདི་ཉིད་དུ་བལྟ་བར་བྱའོ། །ཕྱིའི་དཀྱིལ་འཁོར་གྱི་མཚམས་མེའི་ཕྱོགས་ནས་བརྩམས་ཏེ། བསྐོར་ཕྱོགས་སུ་
མིང་པོ་གསུམ་དང་སྲིང་མོ་བཞི་དང་ཀླུ་དང་སྡུག་བསྔལ་གདོན་པའི་དཀྱིལ་འཁོར་དང་སྒོག་མོ་ལ་སོགས་པའོ། །སྒོ་རྣམས་སུ་ནི་ལྕགས་ཀྱུ་ལ་སོགས་པ་བཞུགས་པར་བྱའོ། །རྡོ་རྗེ་མེ་ལྟར་རབ་ཏུ་འབར་བའི་དཀྱིལ་འཁོར་རོ།།    །།ཕྱིའི་དཀྱིལ་འཁོར་རྡོ་རྗེ་སེམས་དཔའི་དཀྱིལ་འཁོར་དང་འདྲ་བར་
བྱས་ལ་དེའི་དབུས་སུ་དེའི་ཕྱེད་ཀྱི་ཚད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུ་ལས་གསུངས་པའི་འཕགས་པ་སྤྱན་རས་གཟིགས་དབང་ཕྱུག་གི་དཀྱིལ་འཁོར་དང་འདྲ་བར་པདྨའི་དཀྱིལ་འཁོར་དུ་ཡང་དག་པར་གནས་པ་ལ་དེའི་དབུས་སུ་བཅོམ་ལྡན་འདས་འཕགས་པ་སྤྱན་རས་གཟིགས་
དབང་ཕྱུག་གོ། །དེའི་མདུན་དུ་སངས་རྒྱས་བཅོམ་ལྡན་འདས་རྣམས་ཕྱག་མཚན་པདྨ་བསྣམས་ཏེ། ཏིང་ངེ་འཛིན་ལ་སྙོམས་པར་ཞུགས་པའོ། །དེ་བཞིན་དུ་ལྷོར་རིན་པོ་ཆེའི་པདྨ་བསྣམས་པའི་སངས་རྒྱས་སོ། །རྒྱབ་ཏུ་རྡོ་རྗེའི་པདྨ་བསྣམས་པའི་སངས་རྒྱས་སོ། །གཡོན་དུ་པདྨ་གཉིས་
བསྣམས་པའི་སངས་རྒྱས་ཏེ། དེ་དག་ཐམས་ཅད་ཀྱང་སྤྲུལ་པའི་སྐུའི་ཚུལ་ཅན་གྱི་སངས་རྒྱས་ཏེ། ཏིང་ངེ་འཛིན་ལ་སྙོམས་པར་ཞུགས་པའོ། །མཚམས་རྣམས་སུ་ཞི་བ་དང་སྲེད་མེད་ཀྱི་བུ་དང་ཚངས་པ་དང་འདོད་པའི་གཟུགས་པདྨ་ཅན་ལ། དེ་བཞིན་གཤེགས་པའི་གཟུགས་ཅན་ནོ། །ཕྱི་རོལ་
གྱི་མཚམས་རྣམས་སུ་པདྨའི་སྒེག་མོ་ལ་སོགས་པའོ། །སྒོ་རྣམས་སུ་ནི་པདྨའི་ལྕགས་ཀྱུ་བཞུགས་པར་བྱའོ། །འཇིག་རྟེན་དབང་ཕྱུག་གི་དཀྱིལ་འཁོར་རོ།།    །།ཕྱིའི་དཀྱིལ་འཁོར་དང་པོའི་དཀྱིལ་འཁོར་དང་འདྲ་བར་བྱས་ལ་དེའི་དབས་སུ་དེའི་ཕྱེད་ཀྱི་ཚད་ཀྱིས་རྡོ་རྗེ་རིན་ཆེན་གྱི་འཁོར་ལོ་ཟླུམ་པོ་ལ་རིན་
པོ་ཆེའི་ཀ་བ་བརྒྱད་དང་ཡང་དག་པར་ལྡན་པ། མདོག་སྔོན་པོ། ཟླ་བ་དང་ཉི་མ་དང་སྐར་མ་ལ་སོགས་པའི་གཟུགས་རྣམས་ཀྱིས་ཉེ་བར་མཛེས་པར་བྱས་ནས་གནས་པ་ལ་ལྷ་ཐམས་ཅད་ཀྱི་གནས་སུ་སྣ་ཚོགས་པདྨའི་གདན་བྱས་ལ་དེའི་དབུས་སུ་བཅོམ་ལྡན་འདས་ནམ་མཁའི་སྙིང་པོ་དེའི་མདུན་དུ་

59-1-11a

རིན་པོ་ཆེའི་ཅོད་པན་ཐོགས་ཏེ་དབང་བསྐུར་བ་ཞེས་བྱའོ། །གཡས་སུ་གཏེར་གྱི་བུམ་པ་ཕྱག་ན་བསྣམས་པའོ། །རྒྱབ་ཏུ་གླེགས་བམ་དང་རིན་པོ་ཆེ་བསྣམས་པར་མཛད་པའོ། །གཡོན་དུ་སྣ་ཚོགས་ནོར་བུ་བསྣམས་པའོ། །མེ་ལ་སོགས་པའི་མཚམས་རྣམས་སུ་རིན་
པོ་ཆེའི་ཅོད་པན་དང་བུམ་པ་དང་རྒྱལ་མཚན་དང་མཆོད་པ་ཐམས་ཅད་ཀྱིས་བཀང་བའི་སྣོད་ཕྱག་ན་བསྣམས་པའི་ལྷ་མོ་རྣམས་སོ། །ཕྱིའི་མཚམས་རྣམས་སུ་རིན་ཆེན་སྒེག་མོ་ལ་སོགས་པའོ། །སྒོ་རྣམས་སུ་རིན་ཆེན་ལྕགས་ཀྱུ་ལ་སོགས་པ་ཡང་དག་པར་གནས་པར་བྱའོ། །རིན་པོ་ཆེའི་དཀྱིལ་
འཁོར་རོ།    །མིང་པོ་གསུམ་དང་། སྲིང་མོ་བཞི་དང་། ཀླུའི་དཀྱིལ་འཁོར་ནི་སྔ་མ་བཞིན་དུ་བལྟ་བར་བྱའོ།    །སྡུག་བསྔལ་འཇིག་པའི་དཀྱིལ་འཁོར་ནི་ཟུར་བཞི་པ་དང་སྒོ་བཞི་པ་ལ་གནས་པ་ལ་དེའི་དབུས་སུ་སྲིན་པོ་དང་། ཡི་དྭགས་དང་། འབྱུང་པོ་དང་། ཀླུ་དང་གནོད་སྦྱིན་དང་། ཕྲ་མེན་མ་དང་།
རིམས་ལ་སོགས་པའི་གདོན་རྣམས་དང་། དམྱལ་བ་རྣམས་ཀྱང་གནས་པར་བྱའོ། །སྡུག་བསྔལ་གྱི་དཀྱིལ་འཁོར་རོ།།    །།ཕྱི་དང་ནང་གི་དཀྱིལ་འཁོར་དང་པོ་དང་འདྲ་བར་བྱས་ལ། དབུས་ཀྱི་རེའུ་ཆ་ལ་ཡང་དང་པོའི་དཀྱིལ་འཁོར། ཤར་ཕྱོགས་ཀྱི་རེའུ་ཆ་ལ་དེ་བཞིན་གཤེགས་པའི་
དཀྱིལ་འཁོར། ལྟོ་ཕྱོགས་སུ་རྡོ་རྗེ་མེ་ལྟར་རབ་ཏུ་འབར་བའི་དཀྱིལ་འཁོར། ནུབ་ཏུ་འཕགས་པ་སྤྱན་རས་གཟིགས་དབང་ཕྱུག་གི་དཀྱིལ་འཁོར། བྱང་གི་རེའུ་ཆ་ལ་འཕགས་པ་ནམ་མཁའི་སྙིང་པོ་རྣམས་གཞག་པར་བྱའོ། །དབུས་སུ་བཅོམ་ལྡན་འདས་རྡོ་རྗེ་སེམས་དཔའི་ལྷ་མོ་ཐམས་ཅད་
ཀྱིས་ཡོངས་སུ་བསྐོར་བའོ། །ཤར་ཕྱོགས་ཀྱི་དཀྱིལ་འཁོར་གྱི་དབུས་སུ་སངས་རྒྱས་བཅོམ་ལྡན་འདས་སྲེད་མེད་ཀྱི་བུའི་གཟུགས་ཅན་ལ་ཟླ་བ་བསྣམས་པའོ། །ལྷོར་རྡོ་རྗེ་མེ་ལྟར་རབ་ཏུ་འབར་བ་གཏུམ་པའི་དབང་ཕྱུག་གི་གཟུགས་ཅན་རྡོ་རྗེ་མདུང་བསྣམས་པའོ། །ནུབ་ཏུ་འཕགས་པ་སྤྱན་
རས་གཟིགས་དབང་ཕྱུག་ཚངས་པའི་གཟུགས་ཅན་རྡོ་རྗེའི་པདྨ་བསྣམས་པའོ། །བྱང་གི་ཕྱོགས་ཀྱི་དཀྱིལ་འཁོར་གྱི་དབུས་སུ་ནམ་མཁའི་སྙིང་པོ་འདོད་པའི་ལྷའི་གཟུགས་ཅན་ཏེ། འདི་དག་ཐམས་ཅད་ཀྱང་འཁོར་དང་བཅས་པར་བཞུགས་པའོ། །མེ་ལ་སོགས་པའི་མཚམས་རྣམས་སུ་

59-1-11b

གཟུངས་ཀྱི་དཀྱིལ་འཁོར་དུ་རྡོ་རྗེ་དཔལ་མོ་དང་། རྡོ་རྗེ་སེར་མོ་དང་། རྡོ་རྗེ་སྒྲོལ་མ་དང་རྡོ་རྗེ་ནམ་མཁའ་མ་འཁོར་ལོ་རྡོ་རྗེ་དང་མདུང་རྩེ་གསུམ་ལ་སོགས་པ་དང་རྡོ་རྗེའི་པདྨ་དང་། རྡོ་རྗེའི་མེ་ཏོག་ཅན་གྱིས་མདའ་དང་གཞུ་བསྣམས་ནས་བཞུགས་པར་བྱའོ། །ཕྱིའི་དཀྱིལ་འཁོར་གྱི་མཚམས་སུ་
ནི་སྒེག་མོ་ལ་སོགས་པ་རྣམས་སོ། །སྒོ་རྣམས་སུ་ནི་ལྕགས་ཀྱུ་ལ་སོགས་པ་རྣམས་སོ། །ཡང་ཕྱིའི་དཀྱིལ་འཁོར་གྱི་སྣམ་བུ་ལ་འདོད་པ་དང་། ཚངས་པ་དང་། ཚངས་པའི་མཆོག་དང་། བདེ་བྱེད་ལ་སོགས་པའི་འཁོར་དང་བཅས་པ་རྣམས་སོ། །ཡང་དུམ་བུ་དང་པོ་ལས་གསུངས་པའི་དཀྱིལ་
འཁོར་གྱི་ཚུལ་དུ་བྱས་པ་ལ་དེ་ཉིད་ཀྱི་ཕྱིའི་དཀྱིལ་འཁོར་གྱི་ཁ་ཁྱེར་ལ་པི་པང་དང་གླིང་བུ་དང་རྔ་བོ་ཆེ་དང་མུ་ཀུནྡ་དང་། ཆ་ལང་དང་བྷི་རི་དང་རྫ་རྔ་དང་རྔ་དང་རྔ་རིངས་དང་རྔ་རྐེད་ཉག་སྟེ། རྡོ་རྗེ་རོལ་མོ་ཆེན་པོ་བཅུ་བརྡུང་པ་ལ་བརྩོན་པའི་ཚོགས་ཀྱི་དབང་ཕྱུག་རྣམས་གནས་པར་བྱའོ། །བསྡུས་
པའི་དཀྱིལ་འཁོར་རོ།།    །།འདི་དག་ནི་དུམ་བུ་གཉིས་པའི་རྟོག་པ་ཐམས་ཅད་ཀྱི་ཕྱི་མ་དང་། རྩ་བའི་རྒྱུད་ཀྱི་དཀྱིལ་འཁོར་བཅུ་སྟེ། རྟོག་པ་ཐམས་ཅད་ཀྱི་རྒྱུད་ཕྱི་མ་དང་རྩ་བའི་རྒྱུད་རྫོགས་སོ་ཞེས་གསུངས་པས་ན་འདིར་སོམ་ཉི་མི་བྱའོ། །འདི་དག་ཉིད་མྱུར་དུ་འགྲུབ་པར་བྱ་བའི་ཕྱིར་རྡོ་རྗེ་
སེམས་དཔའ་དང་། རྡོ་རྗེ་དམ་ཚིག་གསུམ་པ་དང་། རྡོ་རྗེ་མེ་ལྟར་རབ་ཏུ་འབར་བ་དང་སྤྱན་རས་གཟིགས་དབང་ཕྱུག་དང་ནམ་མཁའི་སྙིང་པོའི་རས་རིས་དང་དཀྱིལ་འཁོར་དུ་རྣམ་པར་གནས་པ་འདི་དག་ཐམས་ཅད་ནི་འཁོར་དང་བཅས་པ་ཡིན་ཏེ་སྔར་བཤད་པའི་བདག་ཉིད་ཀྱི་དཀྱིལ་འཁོར་
གྱིས་བསྐོར་བ་ལས་རྡོ་རྗེ་མེ་ལྟར་རབ་ཏུ་འབར་བའི་ཆོ་ག་ལ་ནི་རྡོ་རྗེ་མཚོན་ཆ་དང་མདུང་རྩེ་ཆེན་པོ་དང་རལ་གྲི་དང་ཞགས་པ་འཛིན་པའི་ལྷ་མོ་བྱེད་པ་ལ་དེ་བཞིན་དུ་རིམ་པ་བདུན་གྱི་ནང་དུ་མིང་པོ་གསུམ་དང་སྲིང་མོ་བཞི་དང་། ཀླུ་དང་སྡུག་བསྔལ་གྱི་དཀྱིལ་འཁོར་མེད་པར་བལྟ་བར་བྱའོ། །གསང་
བའི་ཆོ་ག་ཡང་གཞན་ཡིན་ནོ། །འཕགས་པ་སྤྱན་རས་གཟིགས་དབང་ཕྱུག་གི་ཆོ་ག་ནི་སངས་རྒྱས་ཀྱི་སྐུ་གཟུགས་བརྒྱད་མེད་པ་ལ་སྦྲང་རྩི་རྡོ་རྗེ་ལ་སོགས་པ་ནས་པདྨའི་དྲིལ་བུའི་མཐར་ཐུག་པ་དང་ལྡན་པའོ། །ནམ་མཁའི་སྙིང་པོའི་ཡང་སེམས་དཔའ་བཞི་མེད་པའོ། །རས་རིས་ཀྱི་ཆོ་

59-1-12a

ག་ཐམས་ཅད་ལ་ཡང་དེ་བཞིན་ནོ། །རས་རིས་ཀྱི་དཀྱིལ་འཁོར་གྱི་ཆོ་ག་དྲུག་པོ་འདི་དག་ནི་རྒྱུད་ཀྱི་དུམ་བུ་གཉིས་པར་གསུངས་པ་ཡིན་ནོ།།    །།དུམ་བུ་གསུམ་པར་ཡང་རྡོ་རྗེ་སེམས་དཔའ་དང་། དེ་བཞིན་གཤེགས་པ་དང་རྡོ་རྗེ་མེ་ལྟར་རབ་ཏུ་འབར་བ་དང་འཕགས་པ་སྤྱན་རས་གཟིགས་
དབང་ཕྱུག་དང་ནམ་མཁའི་སྙིང་པོ་དང་། མིང་པོ་གསུམ་དང་། སྲིང་མོ་བཞི་དང་། ཀླུ་དང་སྡུག་བསྔལ་ལས་གདོན་པ་དང་། བསྡུས་པའི་དཀྱིལ་འཁོར་རྣམས་དུམ་བུ་གཉིས་པ་ལས་གསུངས་པའི་དཀྱིལ་འཁོར་ལ་བལྟ་བར་བྱའོ། །ཁྱད་པར་ནི་འདི་ཡོད་དེ་རྡོ་རྗེ་མེ་ལྟར་རབ་ཏུ་འབར་བའི་དཀྱིལ་འཁོར་
ལ་ནང་གི་རིམ་པ་བདུན་གྱི་ཕྱི་རོལ་དུ་ཤར་ཕྱོགས་ལ་སོགས་པ་ནས་བརྩམས་ཏེ། འཇིག་རྟེན་གྱི་ཁམས་བརྒྱད་ལ་དེ་རྣམས་སུ་སངས་རྒྱས་རེ་རེ་ཞིང་བྱམས་པ་དང་། མཐོང་བ་དོན་ཡོད་ལ་སོགས་པ་བྱང་ཆུབ་སེམས་དཔའ་གཉིས་གཉིས་ཀྱི་དབུས་ན་བཞུགས་པར་བྱའོ། །ཡང་འདི་ཉིད་མྱུར་དུ་འགྲུབ་
པར་བྱ་བའི་ཕྱིར་རྡོ་རྗེ་སེམས་དཔའ་དང་དེ་བཞིན་གཤེགས་པ་དང་། རྡོ་རྗེ་མེ་ལྟར་རབ་ཏུ་འབར་བ་དང་འཕགས་པ་སྤྱན་རས་གཟིགས་དབང་ཕྱུག་དང་། ནམ་མཁའི་སྙིང་པོ་དང་། གསང་བའི་དཀྱིལ་འཁོར་ལྷ་མོ་བཞི་དང་ཡང་དག་པར་འདུས་པ་ལ་སོགས་པའི་ཚལ་གྱིས་ཡང་དག་པར་གནས་པར་
བྱའོ། །རྡོ་རྗེ་ཁྲོ་བོའི་གསང་བའི་དཀྱིལ་འཁོར་དུ་ནི་ཁྱད་པར་འདི་ཡིན་ཏེ། ཡི་གེ་ཧཱུཾ་བཞིས་སྤྱན་དྲང་བའོ་། །ཧཱུཾ་ཨ་ར་ལི་ཞེས་བྱ་བ་ནི་བསྒྲུབ་པར་བྱ་བའི་སྙིང་པོའོ། །ཡང་གསང་བའི་རས་རིས་ལྔ་པོའི་ཆོ་ག་ནི་སྔ་མ་ཉིད་དང་། རྡོ་རྗེ་མེ་ལྟར་རབ་ཏུ་འབར་བའི་རས་རིས་ཀྱི་ཆོ་ག་ལ་ནི་ཁྱད་པར་འདི་ཡོད་དེ། 
རྡོ་རྗེ་མཚོན་ཆ་འཛིན་པ་ལ་སོགས་པས་སོ། །ཡང་དང་པོའི་དཀྱིལ་འཁོར་དུ་རྡོ་རྗེ་སེམས་དཔའ་ལ་སོགས་པ་ལྷ་མོ་བཞི་དང་ཡང་དག་པར་འདུས་པའི་དཀྱིལ་འཁོར་ལ་སོགས་པ་རྣམ་པར་གནས་སོ། །བསྡུས་པའི་དཀྱིལ་འཁོར་ཉིད་དོ། །ད་ལྟར་དཀྱིལ་འཁོར་ཉི་ཤུ་རྩ་གཅིག་ནི་གསུམ་པའི་ཡིན་ནོ།    །
བཞི་པར་ཡང་རྡོ་རྗེ་སེམས་དཔའ་དང་། དེ་བཞིན་གཤེགས་པ་དང་། རྡོ་རྗེ་མེ་ལྟར་རབ་ཏུ་འབར་བའི་དཀྱིལ་འཁོར་རྣམས་ནི་དུམ་བུ་གཉིས་པར་གསུངས་པ་ཉིད་ཡིན་ནོ། །འཕགས་པ་སྤྱན་རས་གཟིགས་དབང་ཕྱུག་གི་ལ་ནི་ཏིང་ངེ་འཛིན་དང་བཅས་པ་ལ་སོགས་པར་བཞུགས་པའི་སངས་རྒྱས་ཀྱི་སྐུ་

59-1-12b

གཟུགས་ཀྱི་གནས་སུ་འཕགས་པ་སྤྱན་རས་གཟིགས་དབང་ཕྱུག་གི་སྐུ་གཟུགས་བཞི་བཞུགས་པར་བྱའོ། །འཕགས་པ་ནམ་མཁའི་སྙིང་པོ་དང་། མིང་པོ་གསུམ་དང་སྲིང་མོ་བཞི་དང་། ཀླུ་དང་སྡུག་བསྔལ་ལས་གདོན་པ་དང་བསྡུས་པའི་དཀྱིལ་འཁོར་རྣམས་ནི་དུམ་བུ་གཉིས་པ་ལས་
གསུངས་པའི་དཀྱིལ་འཁོར་ཉིད་ཡིན་ནོ། །རས་རིས་ཀྱི་དཀྱིལ་འཁོར་ལྔ་པ་ཡང་སྔ་མ་བཞིན་དུ་བལྟ་བར་བྱའོ། །དེ་ལ་ཡི་གེ་ཧཱུྃ་ལ་སོགས་པའི་ངོ་བོ་ཉིད་དང་། ཕྱག་རྒྱ་དང་ཕྱག་རྒྱ་ཆེན་པོའི་ཚུལ་དང་བསྲུང་བ་དང་གོ་ཆ་དང་བསྐྲད་པ་དང་ཕུར་བུ་ལ་སོགས་པའི་རང་རང་གི་ངོ་བོ་དང་གསང་
བའི་ལྕགས་ཀྱུ་ལ་སོགས་པས་དགུག་པ་དང་སྤྱན་དྲང་བ་དང་མཆོད་ཡོན་དབུལ་བ་དང་། ཕྱག་རྒྱ་བཞི་ལ་སོགས་པས་རྒྱས་གདབ་ཅིང་དབང་བསྐུར་བ་ལ་སོགས་པའི་ཆོ་གའི་ཚུལ་དང་བཟླས་པ་ལ་སོགས་པའི་ཚུལ་དང་། ཕྱི་དང་ནང་གི་མཚན་ཉིད་ཅན་གྱི་སྦྱིན་སྲེག་དང་། ཉེ་བར་བསྡུ་བ་སྟེ་
ཕྱག་རྒྱ་གང་དང་གང་ལས་བྱུང་བ་དེ་དང་དེ་ཉིད་དུ་དགྲོལ་བ་དང་གཤེགས་སུ་གསོལ་བ་སྟེ། རང་གི་ལུས་ལ་དཀྱིལ་འཁོར་ཆུད་པར་བྱ་བ་དང་། ཇི་སྐད་དུ་བཤད་པའི་གཤེགས་སུ་གསོལ་བའོ། །ཇི་སྐད་དུ་བཤད་པའི་དཀྱིལ་འཁོར་ལ་སོགས་པའི་གཟུགས་ཅན་བཅོམ་ལྡན་འདས་
རྡོ་རྗེ་འཛིན་པ་ཆེན་པོ་ནི་དཔལ་མཆོག་དང་པོ་ཞེས་བྱ་བའི་སྒྲར་བརྗོད་དེ། དེ་ལ་འདི་ཉིད་རྒྱུན་གྱི་ངོ་བོ་ཉིད་ཡིན་པས་ན། དེ་སྟོན་པར་བྱེད་པའི་སྒྲའི་རྒྱུན་ནི་རྒྱུད་ཅེས་བྱ་སྟེ། སྐྱེས་པའི་རབས་དང་འདྲའོ། །དེ་ནི་མདོར་བསྡུས་ནས་བཤད་པ་ཡིན་ནོ།    །དེ་ལྟར་གྱུར་པའི་དཔལ་མཆོག་དང་པོའི་
རྒྱུད་རྡོ་རྗེ་འཛིན་པ་ཆེན་པོའི་ངོ་བོ་ཉིད་བློ་ལ་བཞག་ནས་སྡུད་པར་བྱེད་པ། ས་བཅུའི་དབང་ཕྱུག་རྡོ་རྗེ་འཛིན་པས། འདི་སྐད་བདག་གི་ཐོས་པ་ཞེས་བྱ་བ་ལ་སོགས་པ་འདི་གསུངས་པ་ཡིན་ཏེ། འདིས་ནི་བདག་ཉིད་ཀྱིས་མངོན་སུམ་དུ་ཐོས་ཀྱི་གཞན་དག་ལས་བརྒྱུད་པ་ནི་མ་ཡིན་ནོ་ཞེས་བྱང་
ཆུབ་སེམས་དཔའ་ཆེན་པོ་ཀུན་དུ་བཟང་པོ་ལ་སོགས་པ་རྣམས་ལ་སྟོན་པ་ཡིན་ནོ། །ཁྱོད་ཀྱིས་གང་གི་ཚེ་ཐོས་ཤེ་ན། དུས་གཅིག་ན་ཞེས་བྱ་བ་གསུངས་ཏེ། སྐད་ཅིག་མ་གཅིག་ལ་ཞེས་བྱ་བའི་དོན་ཏོ། །འདིས་ནི་རྣམ་པར་ཐར་པ་བསམ་གྱིས་མི་ཁྱབ་པ་ཐོབ་པ་ཉིད་ཀྱིས་དུས་གསུམ་གྱིས་

59-1-13a

བསྐལ་པར་སྤོབས་པ་ལ་སོགས་པ་ཐོས་པར་བྱ་བ་ཅུང་ཟད་ཅི་ཡོད་པ་དེ་ཐམས་ཅད་སྐད་ཅིག་མ་གཅིག་གིས་བདག་གིས་ཐོས་སོ་ཞེས་བདག་ཉིད་ཚད་མའི་སྐྱེས་བུ་ཡིན་པར་སྟོན་ཏོ། །ཁྱེད་ཀྱིས་གང་ལས་གང་དུ་ཐོས་ཤེ་ན། གང་གི་ཚེ་བཅོམ་ལྡན་འདས་འདོད་པའི་
ཁམས་ཐམས་ཅད་ཀྱི་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་གནས་ན་བཞུགས་པ་ཞེས་བྱ་བར་སྦྱར་ཏེ། དེའི་ཚེ་བཅོམ་ལྡན་འདས་ལས་བདག་གིས་ཐོས་སོ་ཞེས་བྱ་བའི་དོན་ཏོ། །གཞན་གྱིས་མི་ཐུབ་པའི་བདུད་བཞི་བཅོམ་པས་ན་བཅོམ་ལྡན་འདས་སོ། །བཅོམ་ལྡན་འདས་དེ་ཡོན་
ཏན་ཅི་ལྟ་བུ་དག་དང་ལྡན་ཞེ་ན། དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་བྱིན་གྱི་རླབས་དང་དམ་ཚིག་དང་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་ཡིན་པས་དེ་བཞིན་གཤེགས་པ་ཐམས་ཅད་དེ་དཀྱིལ་འཁོར་པའི་སངས་རྒྱས་དང་བྱང་
ཆུབ་སེམས་དཔའ་རྣམས་སོ། །དེ་ཉིད་ནི་རྡོ་རྗེ་ཡིན་པས་ན། དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སྟེ། དངོས་པོ་དང་དངོས་པོ་མེད་པ་ཡོངས་སུ་ཚོལ་བ་དང་བྲལ་བའི་གཉིས་སུ་མེད་པའི་སེམས་དང་སེམས་ལས་བྱུང་བའི་ཚུལ་ལོ། །དངོས་པོའི་དོན་ཐམས་ཅད་ཀྱིས་མི་ཕྱེད་པས་ན་རྡོ་
རྗེའོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་དེའི་བྱིན་གྱི་རླབས་ནི་ནུས་པ་ཡིན་པས་ན། དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་བྱིན་གྱི་རླབས་ཏེ། རྡོ་རྗེ་སེམས་དཔའ་ལ་སོགས་པའི་ཚུལ་ལོ། །དེ་ཉིད་དམ་ཚིག་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་བྱིན་གྱིས་རླབས་དང་
དམ་ཚིག་སྟེ། མི་འདའ་བའི་དོན་ནི་དམ་ཚིག་གོ། །དེ་བས་ན། དེ་བཞིན་གཤེགས་པ་ཀུན་གྱིས་ཀྱང་། །འདའ་བ་རུ་ནི་མི་མཛད་པས། །ཕྱག་རྒྱ་དམ་ཚིག་ཡིན་པར་བཤད། །ཡིད་ཀྱི་གཟུགས་ནི་བསྟན་ཕྱིར་རོ། །ཞེས་གསུངས་པའི་ཕྱིར་རོ། །དམ་ཚིག་དེ་རྣམས་ལ་མཁྱེན་པ་ནི་རྡོ་རྗེ་སེམས་
དཔའ་ལ་སོགས་པའི་ངོ་བོ་ཉིད་མངོན་སུམ་དུ་བྱ་བ་ངེས་པའི་ཚུལ་ལོ། །དེ་ཉིད་ནི་བྱེ་བྲག་རྣམ་པ་ཐ་དད་པ་སྟེ། རབ་ཏུ་དགའ་བའི་རྣམ་པར་དག་པའི་གནས་འདི་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །འདོད་ཆགས་ཀྱི་མདའ་རྣམ་པར་དག་པའི་གནས་འདི་ནི་འདི་ལྟ་སྟེ་བྱང་ཆུབ་སེམས་དཔའི་

59-1-13b

གནས་སོ་ཞེས་བྱ་བ་ལ་སོགས་པའི་དབྱེ་བས་ཕྱེ་བ་སྟེ། དེས་ན་དེ་ལྟ་བུའི་ཚུལ་དང་ཡང་དག་པར་ལྡན་ཞིང་བཅས་པའོ་ཞེས་བྱ་བའི་དོན་ཏོ། །འདི་ནི་དེ་བཞིན་གཤེགས་པའི་རིགས་ཀྱི་ངོ་བོ་ཉིད་མངོན་སུམ་དུ་མཛད་པས་དམ་ཚིག་མཁྱེན་པ་ཉིད་དང་དམ་ཚིག་གི་ངོ་བོ་ཉིད་ཡིན་པ་སྟེ། རྡོ་རྗེ་
སེམས་དཔའ་ལ་སོགས་པའི་ཚུལ་གྱིས་སེམས་དཔའ་རེ་རེ་ཞིང་ཐམས་ཅད་རྡོ་རྗེའི་ཡེ་ཤེས་ཀྱི་གཟུགས་བརྙན་ལས་སྐྱེས་པའི་རྒྱུར་ཅན་ཉིད་ཀྱིས་ན། མེ་ལོང་གི་དཀྱིལ་འཁོར་དང་འདྲ་བས་ན་བཅོམ་ལྡན་འདས་མེ་ལོང་ལྟ་བུའི་ཡེ་ཤེས་ཀྱི་ངོ་བོ་ཉིད་དུ་ལུང་སྟོན་པར་མཛད་པ་ཡིན་ནོ། །དེ་ལྟར་རེ་ཞིག་
བཅོམ་ལྡན་འདས་ཉིད་དམ་ཚིག་མཁྱེན་པ་ཉིད་ཡིན་པས་ན། གསང་སྔགས་ཀྱི་སྒོ་ལ་སྤྱད་པ་སྤྱོད་པ་རྣམས་ཀྱིས་ཤིན་ཏུ་ཡང་དམ་ཚིག་ཤེས་པར་བྱའོ་ཞེས་བཤད་པར་གྱུར་པ་ཡིན་ནོ། །ད་ནི་བཅོམ་ལྡན་འདས་དེ་དམ་ཚིག་མཁྱེན་པ་འབའ་ཞིག་ཏུ་མ་ཟད་ཀྱི་དབང་བསྐུར་བ་ཡང་བརྙེས་པ་ཡིན་
ནོ་ཞེས་བསྟན་པའི་ཕྱིར་དེ་བཞིན་གཤེགས་པ་ཐམས་ཅད་ཀྱིས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་བཞིན་གཤེགས་པ་ཐམས་ཅད་ནི་མི་བསྐྱོད་པ་ལ་སོགས་པ་སྟེ། དེ་ཉིད་རིན་པོ་ཆེ་ཡིན་ལ་དེ་རྣམས་ལས་བསྒྲུབས་པའི་རིན་པོ་ཆེའི་ཅོད་པན་ནི་དེ་བཞིན་གཤེགས་པ་ཐམས་
ཅད་ཀྱི་ཅོད་པན་ནོ་ཞེས་དེས་འདོད་པ་དང་གཟུགས་དང་། གཟུགས་མེད་པའི་ཁམས་ཀྱི་ངོ་བོ་ཉིད་ཀྱི་ཁམས་གསུམ་དུ་ཀུན་གཞི་རྣམ་པར་ཤེས་པ་ལ་དམིགས་ཤིང་བདག་ཏུ་རྨོངས་པ་དང་། བདག་ཏུ་ང་རྒྱལ་བ་དང་། བདག་ཏུ་ཆགས་པ་དང་། བདག་ཏུ་ལྟ་བ་སྟེ་ཉོན་མོངས་པ་བཞི་དང་ལྡན་པའི་
ཡིད་སྤངས་པས་མཉམ་པ་ཉིད་ཀྱི་ཡེ་ཤེས་བརྙེས་པར་ཡང་དག་པར་བསྟན་པ་ནི་དབང་བསྐུར་བ་ཉིད་བརྙེས་པ་སྟེ། འདིས་ནི་རིན་པོ་ཆེའི་རིགས་ཐུགས་སུ་ཆུད་ཅིང་མཉམ་པ་ཉིད་ཀྱི་ཡེ་ཤེས་བརྙེས་པར་སྟོན་པ་ཡིན་ནོ། །གསང་སྔགས་ཀྱི་སྒོ་ལ་སྤྱད་པ་སྤྱོད་པ་རྣམས་ཀྱིས་ཀྱང་། དབང་བསྐུར་
བ་དང་ལྡན་པར་བྱའོ་ཞེས་སྟོན་ཏོ། །དེ་ཉིད་རྣལ་འབྱོར་ལ་དབང་ཐོབ་པ་བསྟན་པར་བྱ་བའི་ཕྱིར། དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་ཐམས་ཅད་མཁྱེན་པའི་ཡེ་ཤེས་ནི་དངོས་པོའི་དོན་ཐམས་ཅད་ཇི་ལྟ་བ་བཞིན་དུ་

59-1-14a

ཐུགས་སུ་ཆུད་པ་སྟེ། ལམ་གྱི་རྣམ་པའི་ཡིད་ཀྱི་རྣམ་པར་ཤེས་པའོ། །དེ་ཉིད་ནི་རྣལ་འབྱོར་ཆེན་པོ་སྟེ། ཞི་གནས་དང་ལྷག་མཐོང་ཟུང་དུ་འཇུག་པའི་ལམ་གྱི་ངོ་བོ་ཉིད་དེ། རྣལ་འབྱོར་དེ་གང་ལ་ཡོད་པ་དེ་ལ་དེ་སྐད་ཅེས་བྱའོ། །དབང་ཕྱུག་ཀྱང་དེ་ཉིད་ཡིན་ནོ། །དེ་བས་ན་
དེ་བཞིན་གཤེགས་པ་ཐམས་ཅད་ཀྱི་ཐམས་ཅད་མཁྱེན་པའི་ཡེ་ཤེས་དང་ལྡན་པ་རྣལ་འབྱོར་ཆེན་པོའི་དབང་ཕྱུག་ཅེས་བྱ་སྟེ། འདིས་ཀྱང་ཆོས་ཐམས་ཅད་ཇི་ལྟ་བ་བཞིན་དུ་ཡོངས་སུ་མཁྱེན་པ་ཡིན་པས་སོ་སོར་རྟོག་པའི་ཡེ་ཤེས་བརྙེས་པ་ཡིན་ཏེ། བཅོམ་ལྡན་འདས་ནི་ཡིད་ཀྱི་རྣམ་པར་ཤེས་
པ་རྣམ་པར་དག་པ་པདྨའི་རིགས་ཀྱི་ངོ་བོ་ཉིད་ཐུགས་སུ་ཆུད་པ་ཡིན་པར་སྟོན་ཏོ། །སྔགས་པ་རྣམས་ཀྱིས་ཀྱང་རྣལ་འབྱོར་ལ་གོམས་པར་བྱའོ་ཞེས་སྟོན་པ་ཡིན་ནོ། །བྱ་བ་སྒྲུབ་པ་དང་། ཐུགས་རྗེ་ཆེན་པོས་གཞན་གྱི་དབང་ལ་འཇུག་པ་ཡིན་ནོ་ཞེས་བསྟན་པར་བྱ་བའི་ཕྱིར་དེ་བཞིན་གཤེགས་པ་
ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ནི་ཕྱག་རྒྱ་ཆེན་པོ་ལ་སོགས་པའི་མཚན་ཉིད་ཅན་གྱི་ཕྱག་རྒྱ་རྣམ་པ་བཞིའོ། །དེ་རྣམས་ཀྱི་མཉམ་པ་ཉིད་ནི་དོན་དམ་པར་དངོས་པོ་མེད་པའི་ངོ་བོ་ཉིད་དང་། ཀུན་རྫོབ་ཏུ་དབྱེ་བ་མེད་པ་ཁྱད་པར་
དུ་འབྱེད་པར་བྱེད་པ་ཉིད་དེ་དེས་ཐུགས་སུ་ཆུད་པ་ནི་བརྙེས་པའོ། །སྣ་ཚོགས་པ་ནི་སེམས་ཅན་གྱི་ཁམས་མ་ལུས་པའི་རྒྱུ་དང་འབྲས་བུའི་མངོན་པར་འདོད་པ་མཐོང་བ་དང་། མ་མཐོང་བའི་འབྲས་བུ་ཐོབ་པར་མཛད་པས་ན་སྣ་ཚོགས་པའི་བྱ་བ་མཛད་པ་སྟེ། སྣ་ཚོགས་པའི་བྱ་བ་མཛད་པའི་ངོ་བོ་
ཡིན་པས་ནི། སྣ་ཚོགས་པའི་བྱ་བ་མཛད་པ་ཉིད་དེ་དེ་རྒྱུར་གྱུར་པས་མ་ལུས་པ་སྟེ། ཐམས་ཅད་ལུས་པ་མེད་པ་སྟེ་སེམས་ཅན་གྱི་ཁམས་ཐམས་ཅད་ཀྱི་རེ་བ་ཐམས་ཅད་ཅེས་བྱ་བ་སྲིད་པའི་རྣམ་པ་ཐམས་ཅད་དོ། །དེ་ཡོངས་སུ་བསྐོང་བ་ནི་མངོན་པར་འདོད་པའི་དོན་ཡོངས་སུ་རྫོགས་པར་མཛད་
པའོ། །དེ་ཉིད་ཕྲིན་ལས་ཏེ། དེ་མཛད་པ་ན་རེ་བ་ཐམས་ཅད་ཡོངས་སུ་བསྐོང་བའི་ཕྲིན་ལས་མཛད་པའོ། །འདིས་ཀྱང་བཅོམ་ལྡན་འདས་མིག་དང་། རྣ་བ་དང་། སྣ་དང་། ལྕེ་དང་། ལུས་ཀྱི་རྣམ་པར་ཤེས་པ་རྣམ་པར་དག་པའི་ངོ་བོ་ཉིད་མངོན་སུམ་དུ་མཛད་པས་བྱ་བ་སྒྲུབ་པའི་ཡེ་ཤེས་བརྙེས་ཏེ། 

59-1-14b

ལས་ཀྱི་རིགས་ཀྱི་ངོ་བོ་ཉིད་ཡིན་པར་སྟོན་ཏོ། །སྔགས་པ་རྣམས་ཀྱིས་ཀྱང་ཞི་བ་ལ་སོགས་པའི་ལས་རྣམས་ལ་གོམས་པར་བྱའོ་ཞེས་སྟོན་པ་ཡིན་ནོ། །དེ་ལྟ་བུ་དེ་སུ་ཞིག་ཡིན་ཞེ་ན། ཐུགས་རྗེ་ཆེ་བ་ཞེས་བྱ་བ་ལ་སོགས་པ་གསུངས་ཏེ་རྣམ་པར་སྣང་མཛད་ཀྱང་ཡིན་ལ་ཆེན་པོ་ཡང་ཡིན་པས། རྣམ་
པར་སྣང་མཛད་ཆེན་པོ་སྟེ། རྣམ་པར་སྣང་བར་བྱེད་པ་ཉིད་ཀྱིས་ན་རྣམ་པར་སྣང་མཛད་དོ། །འདི་སྐད་སྟོན་ཏེ་ནམ་མཁའི་ཁམས་ཐམས་ཅད་ལྟར་རྟག་ཏུ་བཞུགས་པ། སྐུ་དང་གསུང་དང་ཐུགས་རྡོ་རྗེ་བཅོམ་ལྡན་འདས་རྣམ་པར་སྣང་མཛད་ཆེན་པོ་བྱང་ཆུབ་པའི་མཚན་ཉིད་རྡོ་རྗེ་སེམས་དཔའ་
གཞིའི་ས་ལ་རྣམ་པར་བཞུགས་པའི་བྱང་ཆུབ་སེམས་དཔའ་ལས་ལྷག་པ་ཉིད་དོ། །དེ་བས་ན་དེ་ལྟར་ཆེན་པོ་ཉིད་དེ་ཐམས་ཅད་དུ་ཁྱབ་པས་ཕྱོགས་བཅུར་སྐད་ཅིག་མ་གཅིག་གི་ཤུགས་ཀྱིས་རྣམ་པར་སྣང་ཞིང་འབར་ལ། གཟུགས་ཐམས་ཅད་ཡང་དག་པར་སྟོན་པར་མཛད་པས་ན་རྣམ་
པར་སྣང་མཛད་ཆེན་པོ་ཞེས་བྱའོ། །དེ་ལྟ་བུའི་བཅོམ་ལྡན་འདས་དུས་ཇི་སྲིད་ཅིག་གི་བར་དུ་བཞུགས་ཤེ་ན། རྟག་པ་ཞེས་བྱ་བ་གསུངས་ཏེ། རྒྱུན་གྱི་རྟག་པ་ཉིད་ཀྱི་དཀྱིལ་འཁོར་བ་ཇི་སྲིད་ཀྱི་བར་དུ་བཞུགས་སོ་ཞེས་བྱ་བའི་དོན་ཏོ། །དེ་ཅིའི་ཕྱིར་ཞེ་ན། ཐུགས་རྗེ་ཆེན་པོའི་གཞན་གྱི་དབང་གིས་
སེམས་ཅན་གྱི་དོན་དུ་བཞུགས་སོ། །ཇི་ལྟར་ན་འདས་པ་དང་མ་འོངས་པ་དང་། ད་ལྟར་བྱུང་བ་ཞེས་བརྗོད་པར་བྱ་ཞེ་ན། དུས་གསུམ་གྱིས་མཉམ་པ་ཉིད་ལ་བཞུགས་ཞེས་བྱ་བ་གསུངས་ཏེ། འདས་པ་དང་མ་འོངས་པ་དང་། ད་ལྟར་བྱུང་བའི་དུས་གསུམ་ནི་དུས་གསུམ་མོ། །དེ་དག་སྤྲུལ་པའི་
སྐུས་ཡོངས་སུ་མྱ་ངན་ལས་འདས་པ་ལ་སོགས་པ་ཡང་དག་པར་སྟོན་པར་མཛད་པས་དུས་གསུམ་གྱིས་མཉམ་པ་ཉིད་ལ་བཞུགས་པ་སྟེ། ཀུན་རྫོབ་ཏུ་བཞུགས་པ་ཞེས་བྱ་བའི་དོན་ཏོ། །ལོངས་སྤྱོད་རྫོགས་པའི་སྐུ་དང་། ཆོས་ཀྱི་སྐུ་དག་ནི་རྒྱུན་ཆད་པ་མེད་པས་འདས་པ་དང་མ་འོངས་པའི་དབྱེ་བ་
ཡོད་པ་མ་ཡིན་ནོ། །ཅི་འདི་དག་གཞན་དུ་རྣམ་པར་དབྱེ་བའམ་འོན་ཏེ་མ་ཡིན་ཞེ་ན། སྐུ་དང་གསུང་དང་ཐུགས་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། སྐུ་ཡང་ཡིན་ལ་ཐམས་ཅད་ཀྱང་ཡིན་པས་། སྐུ་ཐམས་ཅད་དེ་ལོངས་སྤྱོད་རྫོགས་པ་དང་། སྤྲུལ་པའི་སྐུ་ཞེས་བྱ་བའི་དོན་ཏོ། །གསུང་ཐམས་

59-1-15a

ཅད་ནི་བཀའ་རྣམས་སོ། །ཐུགས་ཐམས་ཅད་ནི་མེ་ལོང་ལྟ་བུ་དང་མཉམ་པ་ཉིད་དང་སོ་སོར་རྟོག་པ་དང་། བྱ་བ་གྲུབ་པའི་ཡེ་ཤེས་རྣམས་སོ། །སྐུ་དང་གསུང་དང་ཐུགས་དེ་ཉིད་རྡོ་རྗེར་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་སྟེ་གཉིས་སུ་མེད་པའོ། །དེ་ཡང་རེ་ཞིག་
སེམས་དང་སེམས་ཀྱི་ཚོགས་རྣམས་དེར་རོ་གཅིག་པར་གྱུར་པ་ཉིད་ཀྱིས་རྣམ་པར་རྟོག་པ་ཐམས་ཅད་ཀྱིས་བསྐྱོད་པར་མི་ནུས་པས་རྡོ་རྗེ་དང་འདྲ་བས་རྡོ་རྗེའོ། །བདག་པོ་དེ་ལས་ངེས་པར་བྱུང་བའི་ལོངས་སྤྱོད་རྫོགས་པའི་སྐུ་དང་། གསུང་རྣམས་ཀྱང་དངོས་པོའི་དོན་ཐམས་ཅད་ཀྱིས་
མི་ཕྱེད་པས་ན་རྡོ་རྗེ་སྟེ་དེ་ལྟར་ན་གསུམ་ཆར་ལ་ཡང་རྡོ་རྗེ་ཉིད་དུ་འདོད་པས་སྐུ་དང་གསུང་དང་ཐུགས་རྡོ་རྗེའོ། །དེ་ཡང་ཇི་ལྟར་སྐུ་དང་གསུང་དང་ཐུགས་འདི་དག་རྡོ་རྗེར་གནས་པ་དེ་བཞིན་དུ་བློས་རྟོགས་པར་མཛད་ཅིང་དེ་བཞིན་དུ་གཞན་དག་ལ་སྟོན་པར་མཛད་པ་ནི། ཐུགས་རྗེ་གཞན་གྱི་
དབང་དུ་གྱུར་པ། དེ་བཞིན་གཤེགས་པའོ་ཞེས་གསུངས་ཏེ། སྟོན་པར་མཛད་པའི་ཡོན་ཏན་ཡང་དག་པར་སྟོན་པར་མཛད་པ་འདིས། དག་པའི་ཆོས་ཀྱི་རྗེས་སུ་འབྲང་བ་རྣམས་སྔགས་ཀྱི་ཚུལ་ལ་འཇུག་པར་བྱ་བའི་ཕྱིར་བརྩོན་པར་འགྱུར་བ་དང་། དད་པའི་རྗེས་སུ་འབྲང་བ་རྣམས་རེ་ཞིག་སྟོན་པ་པོའི་
ཡོན་ཏན་ཐོས་པས་འབད་དེ། དང་བས་བཅོམ་ལྡན་འདས་ཀྱིས་བསྟན་པ་ཡིན་ནོ་ཞེས་ངེས་པ་སྐྱེས་པར་གྱུར་ནས་འཇུག་པར་འགྱུར་བ་དང་། ཆོས་ཀྱི་རྗེས་སུ་འབྲང་བ་རྣམས་ཀྱང་ཤེས་རབ་ལ་སྤྱོད་པར་འགྱུར་བ་ཉིད་ཀྱིས་ཉེས་པ་ཐམས་ཅད་དང་བྲལ་བར་གྱུར་ཅིང་ཐུགས་རྗེའི་བདག་ཉིད་ཅན་སླུ་
བར་མི་མཛད་པས་སྔགས་ཀྱི་ཚུལ་འདི་བསྟན་པ་ཡིན་ནོ་ཞེས་ངེས་པ་སྐྱེས་པར་གྱུར་ནས་འཇུག་པར་འགྱུར་ཏེ། ཉེས་པ་ཟད་པ་བརྫུན་གྱི་ཚིག །སྨྲ་བར་མི་འགྱུར་རྒྱུ་མེད་ཕྱིར། །ཞེས་བཤད་པ་སྟེ། དེ་ལྟར་གྱུར་པས་འདི་བཤད་པ་ཡིན་ནོ་ཞེས་ངེས་པ་བསྐྱེད་ནས། གང་དུ་བཞུགས་པས་
འདི་གསུངས་ཞེས་རྣལ་འབྱོར་གྱི་གནས་བསྟན་པར་བྱ་བའི་ཕྱིར་དེ་བཞིན་གཤེགས་པ་ཐམས་ཅད་བཞུགས་ཤིང་ཞེས་བྱ་བ་ལ་སོགས་པ་སྨོས་ཏེ། དེ་བཞིན་གཤེགས་པ་ཐམས་ཅད་བསྟེན་པ་ཡིན་པས་ན་དེ་བཞིན་གཤེགས་པ་ཐམས་ཅད་བཞུགས་ཤིང་ཞེས་བྱའོ། །དེ་ཅིའི་ཕྱིར་ཞེ་ན། སྨྲས་

59-1-15b

པ་གང་གི་ཕྱིར་བསྔགས་པས་སོ། །བསྔགས་པ་ཉིད་ཀྱིས་ན་བསྟོད་པའོ། །དེ་ལྟར་ན་དེ་ནི་དེ་བཞིན་གཤེགས་པ་ཐམས་ཅད་བཞུགས་པ་དང་། བསྔགས་པ་དང་བསྟོད་པ་སྟེ། དེ་བས་ན་དེ་ལྟར་དེ་བཞིན་གཤེགས་པ་ཐམས་ཅད་བཞུགས་ཤིང་བསྔགས་པའང་བསྟོད་པ་དེ་ལྟ་བུའི་གནས་
དེར་བཞུགས་སོ་ཞེས་བྱ་བར་སྦྱར་རོ། །ནོར་བུ་རིན་པོ་ཆེ་དང་ཞེས་བྱ་བ་ལ་སོགས་པ་ལ་ནོར་བུ་རྣམས་དང་། རིན་པོ་ཆེ་རྣམས་ནི་ནོར་བུ་རིན་པོ་ཆེ་སྟེ། ནོར་བུ་ནི་ཡིད་བཞིན་གྱི་ནོར་བུའོ། །རིན་པོ་ཆེ་ནི་པདྨ་རཱ་ག་ལ་སོགས་པའོ། །ནོར་བུ་དང་རིན་པོ་ཆེ་ཡང་ཡིན་ལ། ཆེན་པོ་ཡང་ཡིན་པས་
ནོར་བུ་རིན་པོ་ཆེ་ཆེན་པོ་སྟེ། དེ་རྣམས་ཀྱིས་སྤྲས་པ་ནི་རྣམ་པར་བརྒྱན་པའོ། །དེ་ནོར་བུ་དང་རིན་པོ་ཆེས་སྤྲས་པ་འབའ་ཞིག་ཏུ་མ་ཟད་ཀྱི་ཁ་དོག་སྣ་ཚོགས་པ་ཡང་ཡིན་ཏེ། ཁ་དོག་སྣ་ཚོགས་པ་ནི་སྔོན་པོ་དང་སེར་པོ་ལ་སོགས་པའི་ཁ་དོག་རྣམ་པ་དུ་མའོ། །དྲིལ་བུ་བཏགས་པ་ནི་དྲིལ་བུ་
དང་སྦྲེལ་བའོ། །དྲིལ་བུ་བཏགས་པ་ཡང་ཡིན་ལ་དར་གྱི་བ་དན་ལ་སོགས་པ་རླུང་གིས་བསྐྱོད་པ་ཡང་ཡིན་པས། དེ་སྐད་ཅེས་བྱ་སྟེ། མེ་ཏོག་གི་ཕྲེང་བ་ནི་མེ་ཏོག་བརྒྱུས་པའོ། །རྔ་མ་ནི་རྔ་ཡབ་བོ། །དྲ་བ་ནི་མཆོག་དབུས་ན་ཡོད་པའོ། །དྲ་བ་ཕྱེད་པ་ནི་མཆོག་ཐ་མ་ན་ཡོད་པའོ། །ཟླ་བ་ནི་
ཡེ་ཤེས་ཀྱི་ཕ་རོལ་ཏུ་ཕྱིན་པ་སྟོན་པར་བྱེད་པའི་མེ་ལོང་གི་དཀྱིལ་འཁོར་ཏེ། དེ་རྣམས་རླུང་གིས་བསྐྱོད་པ་ནི་རླུང་གིས་བཏེག་ཅིང་གཡོ་བར་བྱས་པའོ། །དེ་ལྟར་ན་དེ་ལྟ་བུའི་དར་གྱི་བ་དན་དང་། མེ་ཏོག་གི་ཕྲེང་བ་དང་། རྔ་མ་དང་། དྲ་བ་དང་། དྲ་བ་ཕྱེད་པ་དང་། ཟླ་བ་རླུང་གིས་བསྐྱོད་པ་དེ་
རྣམས་ཀྱིས་གཞལ་ཡས་ཁང་དེ་རྣམས་ཉེ་བར་མཛེས་པར་བྱས་པའོ། །དེ་ལྟ་བུར་གྱུར་པ་དང་། གང་ན་བཞུགས་ཤེ་ན། འདོད་པའི་ཁམས་ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་ཏེ། འདོད་པའི་ཁམས་ཀྱང་ཡིན་ལ། ཐམས་ཅད་ཀྱང་ཡིན་པས། འདོད་པའི་ཁམས་ཐམས་ཅད་དེ་
ཕྱོགས་བཅུའི་ནམ་མཁའི་ཁམས་མཐར་ཐུག་པ་ཅི་སྙེད་པའི་འདོད་པའི་ཁམས་དེ་སྙེད་དང་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་གནས་ཇི་སྙེད་པ་དེ་སྙེད་དུ་བདག་ཉིད་ཀྱི་དངོས་པོ་ཚད་མེད་པ་ཉིད་ཀྱིས་བཞུགས་སོ་ཞེས་བྱ་བའི་དོན་ཏོ། །དེ་ཡང་གཞན་རྣམས་ཀྱིས་སྤྲུལ་པས་ན་གཞན་འཕྲུལ་

59-1-16a

ཏེ། ལོངས་སྤྱོད་དེ་རྣམས་ལ་དབང་སྒྱུར་བར་ནུས་པ་དེ་ལ་གནས་པའི་ངང་ཚུལ་ཅན་གྱི་ལྷ་གང་ཡིན་པ་དེ་ལ་དེ་སྐད་ཅེས་བྱའོ། །གཞན་གྱི་སྤྲུལ་པ་ལ་ལོངས་སྤྱོད་པར་ནུས་པའི་ལྷ་དེ་རྣམས་ཉིད་ཀྱི་རྒྱལ་པོ་ཡིན་པས་ན། གཞན་འཕྲུལ་དབང་བྱེད་ཀྱི་ལྷའི་རྒྱལ་པོ་སྟེ། བཅོམ་
ལྡན་འདས་བདེ་བ་ཆེན་པོ་རྡོ་རྗེ་སེམས་དཔའ་འདོད་པའི་ཁམས་ཀྱི་དབང་ཕྱུག་ཆེན་པོ་འདུལ་བར་བྱ་བའི་ཕྱིར། བཙུན་མོའི་འཁོར་གྱི་ནང་ན་བཞུགས་ཏེ། གཞན་དག་གིས་ནི་དེ་བཞིན་གཤེགས་པ་ཐམས་ཅད་བཞུགས་པ་ལ་སོགས་པའི་ཡོན་ཏན་དང་ལྡན་པའི་གཞལ་ཡས་ཁང་ལོངས་
སྤྱོད་པར་འོས་པ་མ་ཡིན་ནོ། །འདིས་ནི་གདུལ་བྱ་རྣམས་འདོད་པ་བསྐྱེད་པར་བྱ་བའི་ཕྱིར། གནས་ཕུན་སུམ་ཚོགས་པ་གསུངས་པ་ཡིན་ནོ། །ཅི་བཅོམ་ལྡན་འདས་འདི་གཅིག་པུ་ཞིག་བཞུགས་སམ་ཞེ་ན། འདི་ལྟ་སྟེ་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱ་བ་ལ་སོགས་
པ་གསུངས་སོ། །དེར་གཙོ་བོ་སུ་ཞིག་ཡིན་ཞེ་ན། ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་བརྒྱད་དེ། བྱང་ཆུབ་སྟོན་པར་བྱེད་པའི་མཚན་མ་ནི་རྡོ་རྗེ་སྟེ། དེས་ཉེ་བར་མཚན་པའི་ཕྱག་མངའ་བས་ན་ཕྱག་ན་རྡོ་རྗེའོ། །གཟིགས་པར་མཛད་པས་ན་སྤྱན་རས་གཟིགས་ཏེ། རང་བཞིན་
གྱིས་རྣམ་པར་དག་པ་ལ་སོ་སོར་རྟོག་པར་མཛད་པ་དང་། སེམས་ཅན་ཐམས་ཅད་ཡོངས་སུ་བསྐྱབ་པ་ལ་སོ་སོར་རྟོག་པར་མཛད་པའོ། །དེའི་དབང་ཕྱུག་ནི་གཙོ་བོ་སྟེ། སྤྱན་རས་གཟིགས་དབང་ཕྱུག་གོ། །ནམ་མཁའ་ནི་མཉམ་པ་ཉིད་ཀྱི་ཡེ་ཤེས་ཏེ། དེའི་སྙིང་པོ་དེ་སྐྱེ་བའི་གནས་མངའ་
བ་གང་ཡིན་པ་དེ་ནི་ནམ་མཁའི་སྙིང་པོའོ། །ཆོས་བདག་མེད་པར་རྗེས་སུ་དྲན་པས་སྐུ་དང་གསུང་དང་ཐུགས་རྡོ་རྗེ་གཅིག་ཏུ་བྱ་བ་ནི་ཁུ་ཚུར་ཏེ། དེ་ལས་བྱུང་བ་ལ་ཡང་ཉེ་བར་གདགས་པས་རྡོ་རྗེ་ཁུ་ཚུར་ཞེས་བྱའོ། །འཇམ་ཞིང་མཉེན་པའི་དཔལ་གང་ལ་ཡོད་པ་ནི་འཇམ་དཔལ་ཏེ། གཞོན་
ནུའི་མདངས་དང་ལྡན་པའི་ངོ་བོ་ཉིད་དང་ལྡན་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པའི་རྒྱུ་མཐུན་པ་ཉིད་ཀྱིས་ཉོན་མོངས་པ་ཅན་དང་། ཉོན་མོངས་པ་ཅན་མ་ཡིན་པའི་རྨོངས་པའི་སྲ་བ་མི་མངའ་བའི་ཕྱིར་རོ། །སེམས་བསྐྱེད་པའི་རྗེས་ཐོགས་ཉིད་ལ་ཆོས་ཀྱི་འཁོར་ལོ་སྟེ། དཀྱིལ་

59-1-16b

འཁོར་བསྐོར་བའི་ངང་ཚུལ་གང་ལ་ཡོད་པ་དེ་ལ་དེ་སྐད་ཅེས་བྱ་སྟེ། བྱང་ཆུབ་སེམས་དཔའ་ཡང་ཡིན་ལ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ཡང་ཡིན་པས་དེ་སྐད་ཅེས་བྱའོ། །ནམ་མཁའ་ནི་གོ་འབྱེད་དེ། དེ་ཉིད་ནི་རྫས་ཀྱི་སྣོད་ཀྱི་ཁང་པར་གྱུར་པ་གང་ཡིན་པ་དེ་ནི་ནམ་
མཁའི་མཛོད་དོ། །བདུད་ཀྱང་ཡིན་ལ་ཐམས་ཅད་ཀྱང་ཡིན་པས་བདུད་ཐམས་ཅད་དེ། ལྷའི་བུ་དང་། ཕུང་པོ་དང་། ཉོན་མོངས་པ་དང་། འཆི་བདག་གི་བདུད་དོ། །དེ་རྣམས་རབ་ཏུ་འཇོམས་ཤིང་ཟློག་པའི་ངང་ཚུལ་གང་ལ་ཡོད་པ་དེ་ནི་དེ་སྐད་ཅེས་བྱའོ། །དེ་དག་ལ་སོགས་པ་ཞེས་བྱ་
བ་ནི་དེ་དག་ཉིད་ཅེས་བྱ་བའི་དོན་ཏོ། །དེ་ལྟར་ན་དེ་དག་ལ་སོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཕྲག་བརྒྱད་ཀྱིས་ཡོངས་སུ་བསྐོར་བ་སྟེ། ཀུན་ནས་ཡོངས་སུ་བསྐོར་བ་དང་། མདུན་གྱིས་བལྟས་པ་སྟེ། མོས་པའི་ཁྱད་པར་ཕུལ་དུ་བྱུང་བས་བློ་ལ་འཇོག་པའོ། །ཅི་
ཞིག་མཛད་ནས་ཆོས་སྟོན་པར་མཛད་ཅེ་ན། ཆོས་ཐམས་ཅད་ཀྱི་ངོ་བོ་ཉིད་རྣམ་པར་དག་པའི་སྒོ་ཞེས་བྱ་བར་རྣམ་པར་སྦྱར་ཏེ། སྟོན་ཏེ་ཞེས་བྱ་བ་ནི་འཆད་པར་མཛད་དོ། །ཁྱད་པར་ཇི་ལྟ་བུ་ཞིག་ཅེ་ན་ཐོག་མར་དགེ་བ་ཞེས་པ་ལ་སོགས་པ་གསུངས་ཏེ། དང་པོར་ཐོས་པར་གྱུར་པ་ནི་གནས་
སྐབས་སུ་མོས་པ་དམ་པའི་རྒྱུར་གྱུར་པས་ན་ཐོག་མར་དགེ་བའོ། །བར་དུ་བསམ་པའི་གནས་སྐབས་ན་དགའ་བའི་རྒྱུར་གྱུར་པས་ན་བར་དུ་དགེ་བའོ། །ཐ་མར་བསྒོམ་པའི་གནས་སྐབས་ན་གྲོལ་བའི་རྒྱུར་གྱུར་པས་ན་ཐ་མར་དགེ་བའོ། །ཡང་ན་ཚུལ་ཁྲིམས་དང་ཏིང་ངེ་འཛིན་དང་ཤེས་
རབ་སྐྱེད་པར་བྱེད་པ་ཉིད་ཀྱིས་ཐོག་མ་དང་བར་དང་ཐ་མར་དགེ་བ་སྟེ་དགེ་བ་ནི་འཚེ་བ་མེད་པའོ། །བྱང་ཆུབ་ཀྱི་སེམས་ལ་སོགས་པའི་ཚིག་གི་ཚུལ་ཡིན་པས་ན་དོན་བཟང་པོའོ། །སྐད་ཟུར་ཆག་པ་ལ་སོགས་པ་དང་བྲལ་བས་ན་ཚིག་འབྲུ་བཟང་པོའོ། །གང་ཟག་དང་ཆོས་སུ་འཛིན་པ་དང་
བྲལ་བས་ནམ་འདྲེས་པའོ། །ཐེག་པ་མ་ལུས་པ་ལ་ལྷག་པར་མོས་པའི་སེམས་ཅན་རྣམས་ཀྱི་མངོན་པར་འདོད་པའི་དོན་ཐོབ་པར་མཛད་པས་ན་ཡོངས་སུ་རྫོགས་པའོ། །ཆོས་ཐམས་ཅད་དངོས་པོ་མེད་པའི་ངོ་བོ་ཉིད་དུ་སྟོན་པའི་རང་བཞིན་ཡིན་པས་ན་ཡོངས་སུ་དག་པའོ། །དེ་ཉིད་ཡང་དང་

59-1-17a

ཡང་དུ་མངོན་སུམ་དུ་བྱེད་པར་འགྱུར་བའི་བསྒོམ་པའི་ལམ་ནི་ཡོངས་སུ་བྱང་བའོ། །ཆོས་ཀྱང་ཡིན་ལ་ཐམས་ཅད་ཀྱང་ཡིན་པས་ན་ཆོས་ཐམས་ཅད་དེ། རབ་ཏུ་དགའ་བ་ལ་སོགས་པའོ། །དེ་རྣམས་ཀྱི་རྣམ་པར་དག་པ་ཡིན་པས་ན། ཆོས་ཐམས་ཅད་རྣམ་པར་
དག་པ་སྟེ། རབ་ཏུ་དགའ་བ་ལ་སོགས་པའི་སྐྱེ་བ་མེད་པ་མངོན་སུམ་དུ་བྱས་པའོ། །ཆོས་ཐམས་ཅད་རྣམ་པར་དག་པའི་སྒོ་ནི་ཐབས་ཏེ། གང་གི་རབ་ཏུ་དགའ་བ་ལ་སོགས་པ། ཐོས་པ་དང་། བསམ་པ་དང་། བསྒོམ་པའི་ཚུལ་གྱིས་རྣམ་པར་དག་པ་ཐོབ་པའོ། །མིང་དེ་སྐད་ཅེས་བྱ་
བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གང་ཡིན་པ་དེ་ལ་དེ་སྐད་ཅེས་བྱ་སྟེ། དེ་ལ་ཤེས་རབ་ནི་ཆོས་ཐམས་ཅད་བདག་མེད་པར་རྣམ་པར་འབྱེད་པའི་རྣམ་པའི་བློ་གྲོས་སོ། །དེ་ཉིད་ནི་བདག་ཉིད་ཀྱི་ཕུན་སུམ་ཚོགས་པའི་ཕ་རོལ་ཏུ་སོན་ཅིང་ཕྱིན་པ་ཡིན་པས་ན། ཤེས་རབ་ཀྱི་ཕ་རོལ་ཏུ་
ཕྱིན་པ་སྟེ། ཉོན་མོངས་པ་ཅན་དང་། ཉོན་མོངས་པ་ཅན་མ་ཡིན་པའི་རྨོངས་པ་དང་བྲལ་བས་ཆོས་ཐམས་ཅད་བདག་མེད་པའི་རྣམ་པར་ལྷུན་གྱིས་གྲུབ་པ་ཐོབ་པའི་བློ་གྲོས་ཞེས་བྱ་བའི་དོན་ཏོ། །དེའི་ཚུལ་ནི་རབ་ཏུ་དགའ་བ་རྣམ་པར་དག་པའི་གནས་ལ་སོགས་པ་ཐོས་པ་དང་། བསམ་པ་དང་
བསྒོམ་པའི་མཚན་ཉིད་ནི་ཚུལ་ཏེ་ཐོབ་པར་བྱེད་པའོ། །དེས་དེ་རྟོགས་པར་མཛད་ནས་དེ་ལྟ་བུའི་ཚུལ་ཏེ། ཡང་དག་པར་སྟོན་ཏེ་ཞེས་བྱ་བ་ནི་གསུང་གིས་སྟོན་ཅིང་འཆད་པར་མཛད་པའོ། །ཆོས་ཐམས་ཅད་རྣམ་པར་དག་པའི་སྒོ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཡང་དག་
པར་སྟོན་ཏེ་ཞེས་བྱ་བ་འདི་གང་ཞིག་ཡིན་ཞེ་ན། འདི་ལྟར་རབ་ཏུ་དགའ་བ་རྣམ་པར་དག་པའི་གནས་ནས། རོ་རྣམ་པར་དག་པའི་གནས་ཀྱི་བར་དུ་གསུངས་པའོ། །འདི་ལྟར་ཞེས་བྱ་བ་ནི་གང་ཞེ་ན་ཞེས་བྱ་བའི་དོན་ཏོ། །རབ་ཏུ་དགའ་བ་རྣམ་པར་དག་པ་ལ་སོགས་པའི་རང་བཞིན་ཅན་འདི་
ཡིན་ནོ་ཞེས་བྱ་བའི་དོན་ཏེ། དེ་ལ་སྐྱེས་པ་དང་བུད་མེད་ཀྱི་དབང་པོ་གཉིས་སྙོམས་པར་འཇུག་པ་ལས་བྱུང་བའི་ཚིམ་པའི་ཁྱད་པར་ནི་རབ་ཏུ་དགའ་བའོ། །དེའི་རྣམ་པར་དག་པ་ནི་རབ་ཏུ་དགའ་བ་རྣམ་པར་དག་པ་སྟེ། དོན་དམ་པ་ཉིད་དོ། །དེ་ཡང་རབ་ཏུ་དགའ་བའི་ངོ་བོ་ཉིད་མེད་པ་ནི་རབ་

59-1-17b

ཏུ་དགའ་བ་རྣམ་པར་དག་པའོ། །རབ་ཏུ་དགའ་བ་རྣམ་པར་དག་པའི་གནས་ནི་རབ་ཏུ་དགའ་བ་རྣམ་པར་དག་པའི་གཞིའོ། །འདི་ནི་ཞེས་བྱ་བ་ནི་གནས་ནི་འདི་ཡིན་ནོ་ཞེས་སྟོན་པ་སྟེ། དེས་ན་གནས་ཀྱི་སྒྲ་གཉིས་པ་དང་འདི་སྦྱར་བར་བྱའོ། །འདི་ལྟ་སྟེ་ཞེས་བྱ་བ་ནི་སྔ་མ་དང་སྦྱར་བར་
བྱའོ། །བྱང་ཆུབ་སེམས་དཔའི་གནས་སོ་ཞེས་བྱ་བ་ནི་ངོ་བོ་ཉིད་ཀྱིས་བྱང་ཆུབ་སེམས་དཔའི་གནས་ཡིན་ཏེ། དེའི་དོན་ནི་འདི་ཡིན་ནོ། །གང་གི་ཚེ་བཅོམ་ལྡན་འདས་རྡོ་རྗེ་སེམས་དཔའ་འདི་བྱང་ཆུབ་སེམས་དཔའི་དཀྱིལ་འཁོར་ལ་སོགས་པའི་ཚུལ་གནས་ཀྱི་རྣམ་པ་བཅུ་བདུན་པོ་
ལ་སེམས་ཅན་རྣམས་གདུལ་བར་བྱ་བའི་ཕྱིར་བསྟེན་པར་མཛད་པའམ། ཕྱག་རྒྱ་ཆེན་པོ་ལ་སོགས་པ་བསྒོམ་པའི་ཚུལ་དེ་ནི་རབ་ཏུ་དགའ་བ་རྣམ་པར་དག་པའི་གནས་སམ། རབ་ཏུ་དགའ་བ་རྣམ་པར་དག་པའི་དོན་དུའམ། རབ་ཏུ་དགའ་བ་རྣམ་པར་དག་པའི་རྒྱུའོ། །གསང་
སྔགས་ཀྱི་སྤྱད་པ་སྤྱོད་པ་རྣམས་ཀྱིས་ནི། དེས་དཀྱིལ་འཁོར་ལ་སོགས་པ་ལ་དགོངས་པར་གྱུར་ན་གསང་སྔགས་ཀྱི་སྒོའི་སྤྱད་པ་སྤྱོད་པ་རྣམས་ཀྱིས་རབ་ཏུ་དགའ་བ་རྣམ་པར་དག་པ་ཐོབ་པར་འགྱུར་རོ། །དེ་བས་ན་རབ་ཏུ་དགའ་བ་རྣམ་པར་དག་པ་དེ་ནི་གནས་སུ་འགྱུར་རོ། །ཡང་ན་
ཐམས་ཅད་ལ་མཆོག་ཏུ་འགྱུར་བའི་དངོས་གྲུབ་ཟག་པ་མེད་པའི་བདེ་བ་དང་ཡིད་བདེ་བའི་ངོ་བོ་ཉིད་བཅོམ་ལྡན་འདས་རྡོ་རྗེ་སེམས་དཔའ་ནི་རབ་ཏུ་དགའ་བ་སྟེ། དེ་ཉིད་ནི་རབ་ཏུ་དགའ་བ་རྣམ་པར་དག་པའོ། །དེ་ཉིད་ནི་གནས་ཡིན་པས་ན་རབ་ཏུ་དགའ་བ་རྣམ་པར་དག་པའི་གནས་སོ། །
འདི་གང་གི་གནས་ཡིན་ཞེ་ན། བཅོམ་ལྡན་འདས་རྡོ་རྗེ་སེམས་དཔའ་བྱང་ཆུབ་སེམས་དཔའིའོ། །འདིས་ནི་འདི་སྐད་སྟོན་པར་འགྱུར་ཏེ། གང་འདི་རབ་ཏུ་དགའ་བ་རྣམ་པར་དག་པའི་གནས་གང་ཡིན་པ་དེ་ནི་བཅོམ་ལྡན་འདས་རྡོ་རྗེ་སེམས་དཔའ་བྱང་ཆུབ་སེམས་དཔའི་གནས་ཏེ། སེམས་ཅན་
གདུལ་བར་བྱ་བའི་ཕྱིར་རྟེན་དུ་གྱུར་པའོ། །དེ་ཡང་གང་གི་ཕྱིར་རབ་ཏུ་དགའ་བ་རྣམ་པར་དག་པའི་གནས་འདི་དེས་འདུལ་བའི་སེམས་ཅན་གྱི་ཁམས་རྣམས་ལ་འདོད་ཆགས་ཀྱིས་འདོད་ཆགས་རབ་ཏུ་སྤོང་བར་མཛད་པའམ། གསང་སྔགས་ཀྱི་སྒོའི་སྤྱད་པ་སྤྱོད་པའི་བྱང་ཆུབ་སེམས་དཔའ་

59-1-18a

རྣམས་ཀྱི་གནས་དེ་ནི་བཅོམ་ལྡན་འདས་རྡོ་རྗེ་སེམས་དཔའི་གནས་ཏེ། སེམས་ཅན་རྣམས་གདུལ་བའི་ཕྱིར་རྟེན་དུ་འགྱུར་བའོ། །གང་གི་ཕྱིར་རབ་ཏུ་དགའ་བ་རྣམ་པར་དག་པའི་གནས་དེས་རབ་ཏུ་དགའ་བ་རྣམ་པར་དག་པ་ལ་བརྟེན་ཏེ་བསྒོམ་པའི་སྟོབས་ཀྱིས་གནས་
དེ་ཉིད་ཐོབ་པར་འགྱུར་རོ། །དེ་བས་ན་རབ་ཏུ་དགའ་བ་ནི་བཅོམ་ལྡན་འདས་རྡོ་རྗེ་སེམས་དཔའ་ཡིན་པས་སོམ་ཉི་མི་བྱའོ། །དེ་ཡང་དེ་ཉིད་ལས། ཀུན་གྱི་དམ་པ་དངོས་གྲུབ་མཆོག །དབང་ཕྱུག་ཆེན་པོ་ཐོག་མའི་ལྷ། །རྡོ་རྗེ་འཛིན་པ་རྒྱལ་པོ་ཆེ། །རབ་ཏུ་དགའ་བ་མི་འགྱུར་མཆོག །
ཅེས་གསུངས་པའི་ཕྱིར་རོ། །ཤིན་ཏུ་དགའ་བས་ན་རབ་ཏུ་དགའ་བའོ་ཞེས་བཤད་དེ། གསང་བ་ལྔས་སེམས་ཅན་རྣམས་སྨིན་པ་ལ་སྤྱོད་པར་མཛད་དོ་ཞེས་བྱ་བའི་དོན་ཏེ། དེ་ལྟར་ན་རབ་ཏུ་དགའ་བ་རྣམ་པར་དག་པའི་གནས་འདིས་ནི་རྡོ་རྗེ་སེམས་དཔའི་ངོ་བོ་ཉིད་འདི་བཤད་པ་ཡིན་
ནོ། །བུད་མེད་དང་སྐྱེས་པའི་དབང་པོ་གཉིས་སྙོམས་པར་འཇུག་པའི་བདེ་བ་དང་ཡིད་བདེ་བའི་དུས་ཀྱི་རྗེས་ཐོགས་ལ་ཕན་ཚུན་ཀུན་དུ་ཆགས་པ་ཉེ་བར་སྐྱེ་བར་འགྱུར་རོ་ཞེས་བསྟན་པར་བྱ་བའི་ཕྱིར། འདོད་ཆགས་ཀྱི་མདའ་ཞེས་བྱ་བ་ལ་སོགས་པ་གསུངས་ཏེ། འདོད་ཆགས་ནི་
ཞེན་པའི་མཚན་ཉིད་ཅན་ནོ། །འདོད་ཆགས་ཉིད་མདའ་ཡིན་པས་ན་འདོད་ཆགས་ཀྱི་མདའ་སྟེ། སེམས་དང་སེམས་ལས་བྱུང་བ་ཕྲ་མོ་འབིགས་པའི་ཕྱིར་རོ། །འདོད་ཆགས་ཀྱི་མདའི་རྣམ་པར་དག་པ་ཞེས་སྦྱར་ཏེ། ཕན་ཚུན་ཀུན་དུ་ཆགས་པ་ལས་འཁྱུད་པ་དང་། རེག་པར་བྱེད་ལ་
རེག་པར་གྱུར་པ་ལས་ནི་ཕན་ཚུན་གཅིག་ལ་གཅིག་ཡོངས་སུ་མི་འདོར་བའི་ཆགས་པ་འབྱུང་ངོ་། །ཆགས་པར་གྱུར་པ་ལས་ནི་ཕན་ཚུན་ཉེ་བར་སྦྱོར་བའི་ཕྱིར། རྒྱལ་པོ་ལ་སོགས་པའི་ལོངས་སྤྱོད་ཐམས་ཅད་ཀྱི་དབང་ཕྱུག་གི་བདག་པོ་ནི་འདོད་ཆགས་ཀྱི་མདས་རྣམ་པར་བཅོམ་པ་ནི་
བདག་ཏུ་འཛིན་པའི་རྣམ་པའི་ཤེས་རབ་ནི་ལྟ་བའོ། །ཕན་ཚུན་རེག་པ་ལས་ཀུན་དུ་བྱུང་བའི་མགུ་བ་ནི་དགའ་བའོ། །ཆགས་པས་ཟིལ་གྱིས་ནོན་པ་རྣམས་ནི་མ་འོངས་པ་ནའང་འབྲལ་བར་མི་འགྱུར་བར་འདོད་པ་ནི་སྲེད་པའོ། །དབང་ཕྱུག་གི་གནས་ཀྱིས་མྱོས་པ་རྣམས་ཀྱི་ང་རྒྱལ་གྱི་ངོ་བོ་

59-1-18b

ཉིད་ནི་སྙེམས་པའོ། །བདག་ཏུ་ལྟ་བ་ལ་ཞུགས་པ་རྣམས་ཀྱི་མེ་ཏོག་ལ་སོགས་པས་བདག་ཉིད་བརྒྱན་པ་ནི་རྒྱན་ནོ། །མགུ་བ་དང་དགའ་བའི་བདེ་བས་ཡིད་ཚིམ་པའོ། །མངོན་པར་སྦྱོར་བར་འདོད་པའི་མར་མེ་ལ་སོགས་པ་ནི་སྣང་བའོ། །ང་རྒྱལ་གྱིས་ཟིལ་གྱིས་ནོན་པ་རྣམས་མཐོ་བ་
ལས་ཉམས་པ་ནི་འཇིགས་པས་ཁྲུས་ལ་སོགས་པས་ལུས་ཀྱི་དྲི་མ་བསལ་བ་ནི་ལུས་ཀྱི་བདེ་བའོ། །བདག་ཉིད་ཀྱི་རྒྱན་གྱི་རྒྱུར་གྱུར་པ་རབ་ཏུ་དང་བ་ལ་སོགས་པ་ནི་གཟུགས་སོ། །ཡིད་ཚིམ་པ་ཐོབ་པ་རྣམས་ཀྱིས་གཅིག་ལ་གཅིག་སྨྲ་བ་ནི་སྒྲའོ། །སྣང་བ་ཡོད་པས་ན་གཅིག་
གིས་གཅིག་མཐོང་བས་དྲིས་ཉུག་པ་ནི་དྲིའོ། །ལུས་ཀྱི་དྲི་མ་དང་བྲལ་ནས་ཕན་ཚུན་ཟས་སྙོད་པ་ནི་རོའོ། །དེ་ནས་དེའི་རྗེས་སུ་མྱོང་བ་སྟེ། འདི་ནི་འཁོར་བར་འཇུག་པའི་རིམ་པ་ཡིན་ནོ། །གང་གི་ཚེ་རྡོ་རྗེ་ཡིད་ལས་བྱུང་བ་ལ་སོགས་པ་ཉིད་འདོད་ཆགས་ཀྱི་མདའ་ཞེས་བཤད་པ་དེའི་ཚེ། རྡོ་རྗེ་
སེམས་དཔའི་བདེ་བ་མྱོང་བ་རྣམས་སམ་བདེ་བ་མ་མྱོང་བ་རྣམས་དེ་ཐོབ་པར་འདོད་པས་ཡང་དང་ཡང་དུ་རྡོ་རྗེ་སེམས་དཔའི་ངོ་བོ་ཉིད་ལ་ཀུན་དུ་ཞེན་པར་སྒོམ་པ་ནི་འདོད་ཆགས་ཏེ། དེ་སྐད་དུ། འདོད་ཆགས་དམ་ཚིག་ཡིན་པར་བཤད། །ཆོས་ཀྱི་འདོད་པ་ཡིད་དུ་འོང་། །ཞེས་གསུངས་
པའི་ཕྱིར་རོ། །འདི་བསྒོམས་པས་ཀྱང་རྡོ་རྗེ་སེམས་དཔའི་ངོ་བོ་ཉིད་མངོན་སུམ་དུ་བྱེད་པ་ནི་རེག་པའོ། །རེག་པ་ལས་ནི་ཆོས་ཐམས་ཅད་དངོས་པོ་མེད་པའི་ངོ་བོ་ཉིད་ཡང་དག་པར་སྐྱེས་པ་ལས་ཀྱེ་མའོ་སེམས་ཅན་འདི་དག་ནི་ངོ་བོ་ཉིད་ཀྱིས་སྡུག་བསྔལ་བ་སྟེ། བདག་དང་བདག་གིར་
འཛིན་པ་ལ་མངོན་པར་ཞེན་པའི་ཁམས་གསུམ་པ་རྣམས་ནི། ཟོ་ཆུན་གྱི་རྒྱུད་མོ་ལྟར་འཁོར་བ་ནི་ཆོས་ཐམས་ཅད་དངོས་པོ་མེད་པའི་ངོ་བོ་ཉིད་དུ་མ་མཐོང་བ་ཡིན་གྱི་གང་བདག་གིས་འདི་རྣམས་ལ་ལམ་ཡང་དག་པར་བསྟན་པར་བྱའོ་ཞེས་བྱ་བའི་སྙིང་རྗེ་ཆེན་པོའི་མཚན་ཉིད་ཅན་གྱིས་
སེམས་ཅན་རྣམས་ལ་ཆགས་པ་ཉེ་བར་སྐྱེ་བར་འགྱུར་ཏེ། ཇི་ལྟར་རྟོགས་པའི་ཡེ་ཤེས་ཉིད་དང་མི་བྲལ་བར་འདོད་པ་ནི་ཆགས་པ་སྟེ་སྡུག་པའོ། །སྙིང་རྗེ་ཆེན་པོ་གཞན་གྱི་དབང་དུ་གྱུར་པས་སེམས་ཅན་ཐམས་ཅད་ཀྱི་དོན་བྱ་བའི་ཕྱིར། རྡོ་རྗེ་ཧཱུྃ་མཛད་ལ་སོགས་པའི་སྤྲུལ་པས་ཐམས་

59-1-19a

ཅད་ལ་དབང་ཕྱུག་དང་། དབང་རྣམ་པར་དག་པ་ནི་དབང་ཕྱུག་སྟེ། དབང་ཕྱུག་ནི་ལོངས་སྤྱོད་མ་ལུས་པ་ཕུན་སུམ་ཚོགས་པའོ། །དབང་ནི་དེ་ལ་དབང་དུ་གྱུར་བ་ཉིད་དོ། །བསྒོམ་པ་ལ་ཀུན་དུ་ཞེན་པ་རྣམས་ཀྱི་ཡང་དག་པའི་དོན་རབ་ཏུ་འབྱེད་པའི་ཤེས་རབ་ནི་ལྟ་བའོ། །
རྡོ་རྗེ་སེམས་དཔའི་ངོ་བོ་ཉིད་མངོན་སུམ་དུ་བྱེད་པའི་མགུ་བ་ནི་དགའ་བའོ། །སྡུག་པར་སེམས་པ་ཐམས་ཅད་ཡོངས་སུ་མྱ་ངན་ལས་འདས་པར་འདོད་པ་ནི་སྲེད་པའོ། །ཐམས་ཅད་ལ་དབང་ཕྱུག་དང་རྣམ་པར་དག་པ་ལ་གནས་པ་རྣམས་སེམས་ཅན་རྣམས་ཀྱི་དོན་བྱ་བའི་ཕྱིར་
བདག་ཉིད་ལས་གཉིས་སུ་མེད་པ་ཉིད་དུ་ཡང་དག་པར་སྟོན་པའི་དྲེགས་པ་ནི་སྙེམས་པ་སྟེ། སྤྲོ་བའི་མཚན་ཉིད་ཅན་ནོ། །བདག་ཏུ་ལྟ་བ་དང་བྲལ་བ་རྣམས་ཀྱི་བྱང་ཆུབ་ཀྱི་ཡན་ལག་བདུན་གྱི་མཚན་ཉིད་ཅན་གྱི་རྒྱན་ནི་རྒྱན་ནོ། །དེ་ནས་ཀྱང་བར་ཆད་མེད་པའི་ལམ་གྱི་མཚན་ཉིད་ཅན་གྱི་ཤེས་
རབ་ནི་ཡིད་ཚིམ་པར་བྱེད་པའོ། །དེ་ནས་ཀྱང་སྤྱན་ལྔའི་རང་བཞིན་ཅན་ནི་སྣང་བའོ། །སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱི་མཚན་ཉིད་ནི་ལུས་བདེ་བའོ། །དཔེ་བྱད་བཟང་པོ་བརྒྱད་ཅུ་ནི་གཟུགས་ཏེ། སྐུ་དེས་མངོན་པར་དད་པར་བྱས་པའི་སེམས་ཅན་རྣམས་ལ་ཕ་རོལ་ཏུ་ཕྱིན་པ་
བཅུ་ལ་སོགས་པའི་སྒྲ་ཐོས་པར་མཛད་པ་ནི་སྒྲའོ། །དེའི་དོན་ལ་ལྷག་པར་མོས་པ་ནི་དྲིའོ། །ལྷ་དང་རོ་གཅིག་ཏུ་གྱུར་པའི་སེམས་ནི་རོའོ། །དེ་ནས་ཀྱང་རྡོ་རྗེ་སེམས་དཔའ་ལ་སོགས་པའི་ངོ་བོ་ཉིད་ཀྱིས་རབ་ཏུ་དགའ་བ་མངོན་སུམ་དུ་བྱེད་དོ། །འདོད་ཆགས་ཀྱི་མདའ་ལ་སོགས་པའི་
གནས་རྣམས་ཀྱིས་ཀྱང་རིམ་པ་ཅི་ལྟ་བ་བཞིན་དུ་རྡོ་རྗེ་ཡིད་ལས་བྱུང་བ་དང་ཀི་ལི་ཀི་ལ་དང་། རྡོ་རྗེ་སྡུག་པ་དང་། རྡོ་རྗེ་སྙེམས་པ་དང་། སྒེག་མོ་དང་། བཞད་པ་མོ་དང་། གླུ་མཁན་མོ་དང་། རྡོ་རྗེ་དཔྱིད་དང་། རྡོ་རྗེ་སྤྲིན་དང་། རྡོ་རྗེ་སྟོན་དང་། རྡོ་རྗེ་དགུན་དང་། གཟུགས་དང་སྒྲ་དང་དྲི་དང་རོའི་
ལྷ་མོའི་ངོ་བོ་ཉིད་དུ་ཡང་དག་པར་སྟོན་པ་ཡིན་ཏེ། རབ་ཏུ་དགའ་བ་རྣམ་པར་དག་པའི་གནས་བཞིན་དུ་ཐམས་ཅད་ལ་ཡང་བཤད་པར་བྱའོ། །བཅོམ་ལྡན་འདས་རྡོ་རྗེ་སེམས་དཔའ་འདོད་པའི་ཁམས་ཀྱི་དབང་ཕྱུག་གདུལ་བར་བྱ་བའི་ཕྱིར། བཙུན་མོའི་འཁོར་གྱི་ནང་ན་བཞུགས་པའི་རབ་ཏུ་

59-1-19b

དགའ་བའི་སྐུར་སྤྲུལ་པར་མཛད་པ་དང་། དེ་མཐོང་ནས་འདོད་པའི་ཁམས་ཀྱི་དབང་ཕྱུག་རང་གི་ཆུང་མའི་འཁོར་རྣམས་ལ་སྡུག་བསྔལ་བསྐྱེད་པའི་བློ་སྐྱེས་པ་དང་བཅོམ་ལྡན་འདས་ལ་ཡང་མངོན་པར་དད་པས་བཅོམ་ལྡན་འདས་ལ་ཕྱག་བྱས་སོ། །དེ་ལྟ་བས་ན་བཅོམ་ལྡན་འདས་ཀྱིས་
གཟུགས་རྣམ་པར་དག་པའི་གནས་སོ་སྙམ་ནས་བཅོམ་ལྡན་འདས་ཇི་ལྟར་ན་ཁྱེད་ཀྱི་ཕུན་སུམ་ཚོགས་པ་འདི་དག་ཐོབ་པར་འགྱུར་ཞེས་ཞུས་པ་དང་། དེའི་ཕྱིར་དེ་གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་ལ་རབ་ཏུ་བཀོད་ནས་དེ་ཉིད་ལ་དམིགས་ཏེ། བཅོམ་ལྡན་
འདས་ཀྱིས་རབ་ཏུ་དགའ་བ་རྣམ་པར་དག་པའི་གནས་ལ་སོགས་པ་སྟོན་པར་མཛད་པ་གང་ཡིན་པ་དེ་ནི་སྒྲའོ། །སྒྲ་དེ་ཐོས་པ་དང་དེའི་དོན་དེ་ལ་ལྷག་པར་མོས་པའི་ངོ་བོ་ཉིད་ཀྱི་ཚུལ་ཁྲིམས་ནི་དྲིའོ། །དེ་སྐད་དུ། གལ་ཏེ་བྱང་ཆུབ་སེམས་དཔའ་འདོད་ཡོན་ལྔ་སྤྱོད་ཀྱང་། །ཞེས་གསུངས་པ་དང་། 
གཞན་ཡང་། ཚུལ་ཁྲིམས་དྲི་ནི་བླ་ན་མེད། །ཅེས་གསུངས་པའི་ཕྱིར་རོ། །དེ་ཉིད་ལ་ལྷག་པར་མོས་པའི་ཤིན་ཏུ་མཐར་ཐུག་པ་ནི་རོའོ། །དེ་ནས་ཀྱང་བྱང་ཆུབ་ཀྱི་ཡན་ལག་བདུན་གྱི་མེ་ཏོག་གི་མཚན་ཉིད་ཅན་གྱི་བསམ་གཏན་ནི་རྒྱན་ནོ། །དེ་ནས་ཀྱང་ངེས་པར་འབྱེད་པའི་ཆ་དང་
ལྡན་པའི་ཆོས་རབ་ཏུ་རྣམ་པར་འབྱེད་པ་ཅན་གྱི་མཚན་ཉིད་ཅན་གྱི་ཤེས་རབ་ནི་ཡིད་ཚིམ་པར་བྱེད་པའོ། །དེ་ནས་ཀྱང་སྣང་བ་ཐོབ་པ་དང་སྣང་བ་མཆེད་པ་དང་། དེ་ཁོ་ན་ཉིད་ཀྱི་དོན་ལ་ཕྱོགས་གཅིག་པ་ལས་བྱུང་བའི་བར་ཆད་མེད་པའི་ཏིང་ངེ་འཛིན་གྱི་མཚན་ཉིད་ནི་སྣང་བའོ། །དེ་ཉིད་ལ་
ཡང་སེམས་ཅན་དང་བདག་ཏུ་ལྟ་བའི་རྣམ་པར་རྟོག་པ་ལ་སོགས་པ་དེའི་དྲི་མ་དང་བྲལ་བའི་ལུས་ཀྱི་བདེ་བའི་རྒྱུར་གྱུར་པའི་ཕྱིར་ལུས་སོ། །དེ་ནས་བདག་མེད་པར་མཐོང་བ་ནི་ལྟ་བའོ། །དེའི་རྒྱུ་ལ་རབ་ཏུ་མགུ་བ་ནི་དགའ་བའོ། །དེ་ནས་ཇི་ལྟར་མཐོང་བའི་དོན་ཡང་དང་ཡང་དུ་མངོན་
སུམ་དུ་བྱེད་པར་མངོན་པར་འདོད་པ་ནི་སྲེད་པའོ། །མངོན་པར་འདོད་པར་གྱུར་པ་དེ་ལ་སྤྲོ་བའི་གྲགས་པ་ནི་སྙེམས་པའོ། །སྤྲོ་བར་གྱུར་པ་དང་ཡང་དང་ཡང་དུ་རབ་ཏུ་དགའ་བ་རྣམ་པར་དག་པའི་གནས་ལ་ཀུན་དུ་ཞེན་པར་བསྒོམ་པ་ནི་འདོད་ཆགས་ཀྱི་མདའོ། །དེས་ཀྱང་རབ་ཀྱི་མཐར་

59-1-20a

ཐུག་པར་གྱུར་པ་དང་། དེ་ལ་སྤྱན་ལྔ་སྟེ། ཤའི་སྤྱན་དང་། ལྷའི་སྤྱན་དང་། ཤེས་རབ་ཀྱི་སྤྱན་དང་།ཆོས་ཀྱི་སྤྱན་དང་། སངས་རྒྱས་ཀྱི་སྤྱན་ཏེ། དེ་ནས་ཕུང་པོ་ལྔའི་མཚན་ཉིད་ཅན་ཚུལ་ཁྲིམས་འཆལ་པ་ལ་སོགས་པའི་དྲི་མ་དང་བྲལ་བ་ཆོས་ཀྱི་སྐུ་ལ་སོགས་པའི་རང་
རང་གི་ངོ་བོ་ཉིད་དེ་མངོན་སུམ་དུ་བྱེད་པ་ནི་རེག་པའོ། །རབ་ཏུ་དགའ་བ་རྣམ་པར་དག་པའི་གནས་མངོན་སུམ་དུ་བྱས་པ་དང་། དེ་ཡོངས་སུ་མི་སྤོང་བའི་ཆགས་པ་ནི་སྡུག་པའོ། །དེས་ན་ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་པའི་རྨོངས་པས་སྐབས་མི་ཕྱེད་པར་རང་བཞིན་གྱིས་
འོད་གསལ་བའི་རྣམ་པར་ཐར་པ་ཐོབ་པས་ལྷུན་གྱིས་གྲུབ་པར་འཇུག་པ་ནི་ཐམས་ཅད་ལ་དབང་ཕྱུག་དང་། དབང་རྣམ་པར་དག་པ་ཐོབ་པ་སྟེ། བདེ་བ་ཆེན་པོ་རབ་ཏུ་དགའ་བའི་བདེ་བས་བརྒྱད་པའི་དབང་ཕྱུག་ཏུ་གྱུར་པ་སྟེ། འདི་ནི་དེའི་སྒོའི་རིམ་པ་ཡིན་ནོ། །ཡུལ་སྤངས་པའི་ཐར་པས་སྐྲག་པ་
རྣམས་ལ་ནི་ཚུལ་འདི་ཡིན་ཏེ། དེ་རྣམས་ཀྱིས་འཁོར་བའི་གཟུགས་མི་བརྟན་པ་སྤངས་ནས། ལྟ་བས་མི་ངོམས་པའི་གཟུགས་ཐོབ་སྟེ། བདེ་བ་ཆེན་པོ་མྱོང་བར་འགྱུར་རོ་ཞེས་ངེས་པར་དགོད་པར་བྱ་བའི་ཕྱིར་བཅོམ་ལྡན་འདས་ཀྱིས་ཇི་སྐད་དུ་བཤད་པའི་གཟུགས་ཡང་དག་པར་སྟོན་པར་
མཛད་པ་ནི་གཟུགས་སོ། །པི་ཝང་ལ་སོགས་པའི་སྒྲ་ནི་པི་ཝང་གི་གཟུགས་ཙམ་གྱིས་དགའ་བ་སྐྱེད་པར་མི་འགྱུར་ཏེ། དེ་བས་ན་པི་ཝང་བརྡུངས་པ་ལ་བརྩོན་པ་ནི་སྒྲའོ། །དེ་མེད་པར་ཡང་མ་ཡིན་ནོ་ཞེས་བསྟན་པའི་ཕྱིར་ཕྱག་ན་དྲི་བསྣམས་པ་ནི་དྲིའོ། །བཟའ་བ་མེད་པར་ཤིན་ཏུ་དགའ་
བར་མི་འགྱུར་ཏེ། དེ་བས་ན་རོའི་སྣོད་ཕྱག་ན་བསྣམས་པ་ནི་རོའོ། །མེ་ཏོག་གི་རྒྱན་མེད་ན་དེ་དང་འདྲ་སྟེ། དེ་བས་ན་མེ་ཏོག་གི་གཟུགས་ནི་རྒྱན་ནོ། །བདུག་སྤོས་མེད་པར་ཡིད་ཚིམ་པར་མི་འགྱུར་ཏེ་དེ་བས་ན་སྤོས་སོ། །མུན་པར་ནི་གཅིག་གིས་གཅིག་མཐོང་བ་མེད་པས་དེའི་ཕྱིར་དེ་བས་
ན་ནོར་བུ་རིན་པོ་ཆེ་ལ་སོགས་པའི་སྣང་བ་ཕྱག་ན་བསྣམས་པའོ། །དྲི་བྱུག་པ་མེད་པར་ལུས་ཀྱིས་བདེ་བའི་རྒྱུར་མི་འགྱུར་ཏེ། དེ་བས་ན་དྲི་བྱུག་པའོ། །ལས་བྱེད་པའི་བྲན་མོ་དང་སླས་ཀྱི་ཚོགས་མེད་པར་རབ་ཏུ་དགའ་བར་མི་འགྱུར་ཏེ། དེ་བས་ན་སྒེག་མོ་ལ་སོགས་པ་སྟེ། མིག་གི་ཆགས་

59-1-20b

པ་དང་ལྟ་བ་དང་དགའ་བ་དང་སྲེད་པ་དང་། རབ་ཏུ་དགའ་བའི་སྤྲོས་པས་མཐོ་བའི་སྙེམས་པའི་ངོ་བོ་ཉིད་དོ། །གཞན་མ་ཡིན་པར་གྱུར་པ་ནི་འཁྱུད་པར་བྱེད་པ་སྟེ། ནམ་ཡང་ཡོངས་སུ་སྤོང་བར་མི་བྱེད་ཅིང་འདི་རྣམས་ལ་རྣམ་པ་ཐམས་ཅད་དུ་དབང་དུ་གྱུར་པ་ཉིད་ཀྱིས་རབ་ཏུ་བདེ་བ་ཆེན་པོ་མྱོང་བར་
འགྱུར་པས་འདོད་ཆགས་ཀྱི་མདའ་དང་། རེག་པ་དང་། སྡུག་པའི་འཆིང་བ་དང་ཐམས་ཅད་ལ་དབང་ཕྱུག་དང་དབང་རྣམ་པར་དག་པའི་རབ་ཏུ་དགའ་བའི་གནས་ཀྱིས་ཡང་དག་པར་སྟོན་པར་མཛད་པ་འདི་ནི་འདོད་ཆགས་དང་ལྡན་པ་རྣམས་འདོད་ཆགས་ཀྱིས་འདོད་ཆགས་ཡང་དག་པར་སྤོང་
བའི་རིམ་པ་ཡིན་ནོ། །དེ་སྐད་དུ་དམ་ཚིག་ཆེན་པོ་ལས་དམ་ཚིག་ཆེན་པོའི་དཀྱིལ་འཁོར་ལ་འཇུག་པར་བྱ་བའི་ཕྱིར། རྟག་ཏུ་འདོད་ལ་གནས་པ་ཡི། །ལྷ་ཡི་བུ་ནི་འདི་རྣམས་དང་། །འདོད་ཆགས་ཅན་ནི་གཞན་གྱི་ཕྱིར། །རབ་དགའི་དཀྱིལ་འཁོར་བཤད་པ་ཡིན། །ཞེས་གསུངས་པ་དང་། 
གཞན་དག་ལས་ཀྱང་། བིན་དའི་ནགས་ནི་ཉམས་དགའ་བའི། །ཝ་ཉིད་གྱུར་ཀྱང་མཆོག་ཡིན་གྱི། །གོ་ཏམ་ཡུལ་རྣམས་སྤངས་པ་ཡི། །ཐར་པ་ནམ་ཡང་མི་འཚལ་ལོ། །ཞེས་འབྱུང་སྟེ་དེ་བས་ན་ཡོན་ཏན་ཡིན་ནོ། །དེ་ཅིའི་ཕྱིར་ཞེ་ན་ཞེས་བྱ་བ་ནི་གཏན་ཚིགས་གང་གི་ཕྱིར། རབ་ཏུ་
དགའ་བ་རྣམ་པར་དག་པའི་གནས་འདི་ནི། འདི་ལྟ་སྟེ་བྱང་ཆུབ་སེམས་དཔའི་གནས་སོ་ཞེས་བྱ་བའི་གཏམ་རྒྱུད་བསྟན་པའི་ཕྱིར་གསུངས་པ་ཡིན་ཏེ། དེ་ཡང་འདི་ལྟར་ཆོས་ཐམས་ཅད་ནི་ངོ་བོ་ཉིད་ཀྱིས་རྣམ་པར་དག་པ་སྟེ་ཞེས་གསུངས་ཏེ་དེ་ཡང་གང་གི་ཕྱིར་རབ་ཏུ་དགའ་བ་ལ་སོགས་པ་ནས། 
རོའི་མཐར་ཐུག་པ་རྣམས་ནི་དོན་དམ་པར་དངོས་པོ་མེད་པའི་ངོ་བོ་ཉིད་དོ་ཞེས་བྱ་བའི་དོན་ཏོ། །དེ་ལྟ་ཡིན་དུ་ཟིན་ཀྱང་། ཤེས་རབ་ཡོངས་སུ་དག་པ་མེད་པར་འདི་དག་ཇི་ལྟར་ཐོབ་པར་འགྱུར་ཞེ་ན། དེའི་ཕྱིར་ཆོས་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། ཆོས་ཐམས་ཅད་ངོ་བོ་ཉིད་
ཀྱིས་དངོས་པོ་མེད་པའི་ངོ་བོ་ཉིད་དུ་གྱུར་པ་གང་ཡིན་པ་དེ་ཉིད་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ཏེ། ཆོས་རྣམས་ནི་ཆོས་ཉིད་ལས་མི་འགྱུར་བ་ཡིན་པའི་ཕྱིར་རོ། །གང་གི་ཕྱིར་སྟོང་པ་ཉིད་ཀྱི་སྒྲས་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ཡིན་པར་བཤད་དེ། དེ་བས་ན་རབ་ཏུ་

59-1-21a

དགའ་བ་རྣམ་པར་དག་པའི་གནས་འདི་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ་ཞེས་བྱ་བ་ནས། རོ་རྣམ་པར་དག་པའི་གནས་འདི་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ་ཞེས་བྱ་བའི་བར་དུ་གྲུབ་པར་གྱུར་པ་ཡིན་ཏེ། གང་གི་ཕྱིར་དེ་མངོན་སུམ་
དུ་བྱས་པའི་ངོ་བོ་ཉིད་ཡིན་པའི་ཕྱིར་རོ། །ད་ནི་ཕན་ཡོན་བསྟན་པར་བྱ་བའི་ཕྱིར། གང་ལ་ལ་ཞེས་བྱ་བ་ལ་སོགས་པ་གསུངས་པ་ཡིན་ཏེ། ཆོས་ཐམས་ཅད་ནི་རབ་ཏུ་དགའ་བ་ལ་སོགས་པའོ། །དེ་རྣམས་ཀྱི་ངོ་བོ་ཉིད་རྣམ་པར་དག་པ་ནི་སྔ་མ་དང་འདྲའོ། །དེ་ཉིད་ནི་གནས་སོ། །
དེ་མངོན་པར་བསྒྲུབ་པ་ནི་མངོན་སུམ་དུ་བྱེད་ཅེས་བྱ་བའི་དོན་ཏོ། །སྒྲིབ་པ་ཐམས་ཅད་ཅེས་བྱ་བ་ནི་བསྟན་པའོ། །མཆོད་པ་དང་ཞེས་བྱ་བ་ལ་སོགས་པ་ནི་བཤད་པ་ཡིན་ཏེ། སྒྲིབ་པ་ནི་རྣམ་པ་ལྔ་སྟེ། འདོད་པ་ལ་འདུན་པ་དང་། གནོད་སེམས་དང་། གཉིད་དང་། རྨུགས་པ་དང་། 
རྒོད་པ་དང་། འགྱོད་པ་དང་། ཐེ་ཚོམ་གྱི་ངོ་བོ་ཉིད་དང་། ཉོན་མོངས་པའི་སྒྲིབ་པ་ནི་འདོད་ཆགས་ཆེན་པོ་ལ་སོགས་པ་ཉོན་མོངས་པ་རྣམས་སོ། །ཆོས་ཀྱི་སྒྲིབ་པ་ནི་འཕགས་པའི་ལམ་སྐྱེས་པའི་གེགས་སུ་གྱུར་པ་སྟེ། དམ་པའི་ཆོས་སྤོང་བ་ལ་སོགས་པའོ། །ལས་ཀྱི་སྒྲིབ་པ་ནི་
མཚམས་མེད་པ་ལྔ་ལ་སོགས་པའོ། །འཛིན་པ་ནི་ཚིག་དང་དོན་གྱི་ཚུལ་མ་བརྗེད་པར་དེ་སེམས་ལ་ངེས་པར་འཇོག་པའོ། །ཀློག་པ་ནི་གླེགས་བམ་དུ་བྱས་ནས་ཀློག་པའོ། །ཁ་ཏོན་དུ་བྱེད་པ་ནི་དམ་ཚིག་ཏུ་བཟུང་བ་དེ་ཡང་དང་ཡང་དུ་གོམས་པར་བྱེད་པའོ། །ཚུལ་བཞིན་དུ་ཡིད་ལ་
བྱེད་པ་ནི་སེམས་པ་དང་སྒོམ་པའོ། །ཆོས་ཐམས་ཅད་ཀྱི་མཉམ་པ་ཉིད་རྡོ་རྗེ་འཛིན་ནི་སྟོང་པ་ཉིད་ཀྱི་ཏིང་ངེ་འཛིན་ཏེ་དེ་ཐོབ་པའོ། །ཆོས་ཐམས་ཅད་ལ་དབང་ཕྱུག་ཏུ་འགྱུར་རོ། །དགའ་བ་ནི་ཏིང་ངེ་འཛིན་གྱི་རྒྱུར་གྱུར་པའི་ཡིད་བདེ་བའོ། །དེ་ཉིད་འབྲིང་དང་ཆེན་པོ་ལ་སོགས་པའི་དབྱེ་བས་
མགུ་བ་དང་། མཆོག་ཏུ་དགའ་བའི་སྒྲར་བཤད་དོ། །བྱང་ཆུབ་སེམས་དཔའ་ཞེས་བྱ་བ་ལ་སོགས་པ་ནི་གཟུགས་ལ་སོགས་པ་ནས་རྡོ་རྗེ་བསྙེམས་པའི་བར་གྱི་ཏིང་ངེ་འཛིན་ཐོབ་པས་ཞེས་བྱ་བའི་དོན་ཏོ། །དེ་ལྟར་རེ་ཞིག་བཅོམ་ལྡན་འདས་རྣམ་པར་སྣང་མཛད་ཀྱི་རབ་ཏུ་དགའ་བ་རྣམ་པར་

59-1-21b

དག་པ་ལ་སོགས་པ་སྟོན་པས་དཀྱིལ་འཁོར་སྤྲུལ་པར་བྱ་བའི་ཕྱིར་བསྐུལ་བ་དང་། དེའི་ཕྱིར་བཅོམ་ལྡན་འདས་རྡོ་རྗེ་སེམས་དཔའ་རང་གི་དེ་ཁོ་ན་ཉིད་ཀྱི་སྙིང་པོ་གསུངས་པ་ནི་དེ་ནས་ཞེས་བྱ་བ་ལ་སོགས་པས་སྟོན་པ་ཡིན་ཏེ། དེ་ནས་ཞེས་བྱ་བ་ནི་བར་མ་ཆད་པ་སྟེ། བསྐུལ་བའི་རྗེས་
ཐོགས་ཉིད་ལ་ཞེས་བྱ་བའི་དོན་ཏོ། །སྐལ་བ་ཕུན་སུམ་ཚོགས་པ་དང་ལྡན་པའི་ཕྱིར་བཅོམ་ལྡན་འདས་ཏེ། བྱང་ཆུབ་སེམས་དཔའི་ལམ་འབྲས་བུ་དང་བཅས་པ་ཐུགས་སུ་ཆུད་པའི་ངོ་བོ་ཉིད་དུ་གྱུར་པས་ན་བཅོམ་ལྡན་འདས་རྡོ་རྗེ་སེམས་དཔའོ། །དཀྱིལ་འཁོར་པའི་སངས་རྒྱས་དང་
བྱང་ཆུབ་སེམས་དཔའ་མ་ལུས་པའི་ངོ་བོ་ཉིད་དུ་གྱུར་པས་ན་དེ་བཞིན་གཤེགས་པ་ཐམས་ཅད་པའོ། །དེ་བཞིན་གཤེགས་པ་ཐམས་ཅད་པ་ཡང་ཡིན་ལ་ཐེག་པ་ཆེན་པོའི་མངོན་པར་རྟོགས་པ་ཡང་ཡིན་པས། དེ་བཞིན་གཤེགས་པ་ཐམས་ཅད་པ་ཐེག་པ་ཆེན་པོ་མངོན་པར་རྟོགས་པའོ། །
དེ་ཉིད་ནི་དཀྱིལ་འཁོར་ཐམས་ཅད་པ་སྟེ་གང་གི་ཕྱིར་དཀྱིལ་འཁོར་ཐམས་ཅད་ནི་རྡོ་རྗེ་སེམས་དཔའ་ཡོངས་སུ་གྱུར་པའི་ངོ་བོ་ཉིད་ཡིན་པའི་ཕྱིར་རོ། །འདིས་ཀྱང་དམ་ཚིག་ཆེན་པོའི་དེ་ཁོ་ན་ཉིད་རྡོ་རྗེ་དང་པོའོ། །བྱིན་གྱིས་བརླབས་པ་ཞེས་བྱ་བའི་རབ་ཏུ་དགའ་བའི་རྡོ་རྗེའི་དཀྱིལ་འཁོར་གྱི་ངོ་བོ་
ཉིད་ནི། བཅོམ་ལྡན་འདས་རྡོ་རྗེ་སེམས་དཔའི་ངོ་བོ་ཉིད་ཡིན་པར་བཤད་པ་ཡིན་ནོ། །རྡོ་རྗེ་དབྱིངས་ཀྱང་ཡིན་ལ་མཐའ་དག་ཀྱང་ཡིན་པས་ན་རྡོ་རྗེ་དབྱིངས་མཐའ་དག་ཡིན་ཏེ། དེ་བཞིན་གཤེགས་པའི་དཀྱིལ་འཁོར་གྱི་ངོ་བོ་ཉིད་དོ། །དེ་དག་གི་སེམས་དཔའི་མཆོག་ནི་རྣམ་པར་སྣང་མཛད་
ཅེས་བྱ་བའི་དོན་ཏོ། །ཁམས་གསུམ་མཐའ་དག་ནི་ཁམས་གསུམ་རྣམ་པར་རྒྱལ་བ་སྟེ། འདིས་ནི་རྡོ་རྗེ་ཧཱུྃ་མཛད་ཀྱི་ངོ་བོ་ཉིད་ཡིན་ནོ་ཞེས་པའོ། །འཇིག་རྟེན་གསུམ་པོ་མ་ལུས་པ་ཞེས་བྱ་བ་ལ་སོགས་པ་ནི་འགྲོ་བ་འདུལ་བའི་ངོ་བོ་ཉིད་དོ། །དོན་ཐམས་ཅད་གྲུབ་པ་ཞེས་བྱ་བ་ནི་ནམ་མཁའི་
སྙིང་པོའི་ངོ་བོ་ཉིད་དོ། །ལག་ན་རྡོ་རྗེ་ཐམས་ཅད་དམ་ཚིག་ཆེན་པོ་ཞེས་བྱ་བ་ནི་དཀྱིལ་འཁོར་མ་ལུས་པའི་ངོ་བོ་ཉིད་དོ། །དེ་ལྟར་གྱུར་པ་འདི་གཅིག་པུ་ཞིག་ཡིན་ནམ་འོན་ཏེ་མ་ཡིན་ཞེ་ན། རྡོ་རྗེ་གསང་བའི་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་ཞེས་བྱ་བ་ནི་གཙུག་ཏོར་ལ་སོགས་པ་སྟེ། 

59-1-22a

དེ་ཉིད་ནི་སེམས་ཅན་ཆེན་པོ་དུ་མས་གཡོག་བྱས་པ་གང་ཡིན་པ་དེ་ནི་རྡོ་རྗེ་གསང་བའི་སེམས་ཅན་ཆེན་པོ་དུ་མས་གཡོག་བྱས་པའོ། །དོན་ཅི་ཞིག་སྟོན་པར་མཛད་ཅེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བ་ལ་སོགས་པ་གསུངས་ཏེ། རབ་ཏུ་དགའ་བ་རྣམ་
པར་དག་པའི་གནས་ལ་སོགས་པའི་མཚན་ཉིད་ཅན་ཞེས་བྱ་བའི་དོན་ཏོ། །དེ་ལས་གཞན་ཡང་གང་རྡོ་རྗེ་དབྱིངས་སུ་བདེ་བ་ཆེན་པོ་དོན་ཡོད་པའི་སྒྲར་བཤད་པ་དེ་ནི་རྡོ་རྗེ་སེམས་དཔའི་དཀྱིལ་འཁོར་ཡིན་པར་བཤད་ལ་དེའི་དམ་ཚིག་ནི་རྒྱུ་སྟེ། དེ་སྐད་ཅེས་བྱ་བའི་རང་གི་དེ་ཁོ་ན་ཉིད་ཀྱི་
སྙིང་པོ་གང་ཡིན་པ་དེ་སྨྲས་པའོ། །དེ་ལ་རང་གི་བདག་ཉིད་ཀྱི་དེ་ཁོ་ན་ཉིད་ནི་རང་གི་དེ་ཁོ་ན་ཉིད་དེ་རབ་ཏུ་དགའ་བ་རྣམ་པར་དག་པའི་ཚུལ་ལོ། །དེ་ཉིད་ནི་སྙིང་པོ་སྟེ་དེ་སྨྲས་སོ་ཞེས་བྱ་བ་ནི་དེ་སྟོན་པར་བྱེད་པའི་སྒྲ་གསུངས་སོ་ཞེས་བྱ་བའི་དོན་ཏོ། །དེ་ཡང་དེ་བཞིན་གཤེགས་པའི་ཞི་བའི་
ཚུལ་རྣམ་པར་སྤངས་ནས་རྡོ་རྗེ་སེམས་དཔའི་སྐུ་ལ་སོགས་པ་སྒེག་པའི་གཟུགས་སུ་འཇོག་པར་མཛད་ཅིང་བཅིངས་ལ། དེས་འདུལ་བ་རྣམས་ལ་གཟུགས་ལ་སོགས་པའི་དངོས་པོ་གྲུབ་ཏུ་གྱུར་པ་ནི་དངོས་གྲུབ་ཐམས་ཅད་གྲུབ་པ་སྟེ། དེ་བཞིན་གཤེགས་པ་རྣམ་པར་སྣང་མཛད་
བདེ་བ་ཆེན་པོ་རྡོ་རྗེ་འབེབས་པས་ཞུགས་ནས། བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་པའོ། །དེ་བཞིན་གཤེགས་པ་ཐམས་ཅད་ཀྱི་གསང་བའི་རྡོ་རྗེ་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱང་ཡིན་ལ་གསང་བའི་རྡོ་རྗེ་ཡང་ཡིན་པས་དེ་སྐད་ཅེས་བྱ་སྟེ། 
བཅོམ་ལྡན་འདས་རྡོ་རྗེ་སེམས་དཔའ་ནི་དེ་བཞིན་གཤེགས་པ་ཐམས་ཅད་ཀྱི་གསང་བའི་ངོ་བོ་ཉིད་ཡིན་པའི་ཕྱིར་རོ། །དེ་ལ་དམིགས་པའི་ཏིང་ངེ་འཛིན་མིང་དེ་སྐད་ཅེས་བྱ་བ་གང་ཡིན་པའི་ཏིང་ངེ་འཛིན་དེ་ལ་སྙོམས་པར་ཞུགས་པས་བཞུགས་པ་ནི། ཞི་བའི་ཚུལ་སྤངས་ནས་རྡོ་རྗེ་སེམས་
དཔའི་སྐུ་དང་གཅིག་ཏུ་གྱུར་ནས་བཞུགས་སོ་ཞེས་བྱ་བའི་དོན་ཏོ། །འོག་མིན་དུ་མངོན་པར་རྫོགས་པར་སངས་རྒྱས་ནས་ལྷའི་རྒྱལ་པོའི་གནས་ན་བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱིས་ཡོངས་སུ་བསྐོར་ནས་བཞུགས་སོ་ཞེས་བྱ་བའི་དོན་ཏོ། །འདིས་ནི་སྔགས་པ་རྣམས་ཀྱི་དམ་

59-1-22b

ཚིག་པའི་སྦྱོར་བ་དང་དཀྱིལ་འཁོར་གྱི་མཆོག་གི་ཏིང་ངེ་འཛིན་སྟོན་པ་ཡིན་ནོ། །རབ་ཏུ་དགའ་བ་རྣམ་པར་དག་པ་ལ་སོགས་པ་ནས་བརྩམས་ཏེ། བཅོམ་ལྡན་འདས་རྣམ་པར་སྣང་མཛད་གསང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་བཞུགས་སོ་ཞེས་བྱ་བའི་བར་འདིས་དཀྱིལ་
འཁོར་གྱི་རྒྱལ་པོ་མཆོག་གི་ཏིང་ངེ་འཛིན་སྟོན་ཏོ། །ཏིང་ངེ་འཛིན་གཉིས་པོ་དེ་དག་མངོན་སུམ་དུ་བྱས་ནས་བདེ་བ་ཆེན་པོའི་གནས་ལ་གནས་པའི་སྔགས་པས་བསྡུ་བར་བྱས་ཏེ། དེ་བཞིན་གཤེགས་པ་ཐམས་ཅད་ལས་རྡོ་རྗེ་འཛིན་པ་ཆེན་པོའི་དབང་བསྐུར་བ་བླངས་ལ་རྡོ་རྗེ་གཟུགས་
ལ་སོགས་པས་དཀྱིལ་འཁོར་དུ་དེ་བཞིན་གཤེགས་པ་ཐམས་ཅད་བཀུག་ནས་བཅུག་སྟེ། བཅིངས་ནས་དབང་དུ་བྱས་ནས། ལས་ཀྱི་ཕྱག་རྒྱ་རྣམས་ཀྱི་རང་གི་ལས་རྣམས་ལ། བདེ་བ་ཆེན་པོ་རྡོ་རྗེ་སེམས་དཔའ་ལ་སོགས་པ་ངེས་པར་སྦྱར་བ་ནི་ལས་ཀྱི་མཆོག་ཅེས་བྱ་བའི་ཏིང་ངེ་
འཛིན་ཏོ། །དེ་ལྟར་ན་ཏིང་ངེ་འཛིན་གསུམ་པོ་དེ་དག་ནི་དཀྱིལ་འཁོར་གྱི་བརྟུལ་ཞུགས་ལ་གནས་པའི་སློབ་དཔོན་གྱིས་ངེས་པ་ཁོ་ནར་སྙོམས་པར་འཇུག་པར་བྱས་ཏེ། རྣལ་འབྱོར་གྱི་གསང་བ་ལས་དང་པོའི་སྦྱོར་བ་དང་དཀྱིལ་འཁོར་གྱི་མཆོག་དང་ལས་ཀྱི་མཆོག་གི་ཏིང་ངེ་འཛིན་
རྣམས་ལ་སྙོམས་པར་འཇུག་པར་བྱའོ་ཞེས་གསུངས་པའི་ཕྱིར་རོ། །དེ་ནས་རྒྱུད་ཕྱི་མ་ལས་གསུངས་པའི་ཚུལ་དུ་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པས་ཏིང་ངེ་འཛིན་ལ་སྙོམས་པར་འཇུག་སྟེ། དཀྱིལ་འཁོར་གསུངས་པ་ཡིན་ནོ། །དེ་ཡང་དེ་ནས་ཞེས་བྱ་བའི་
སྒྲ་ནི་བར་མ་ཆད་པ་སྟེ། གསོལ་བ་བཏབ་པའི་རྗེས་ཐོགས་ལ་ཞེས་བྱ་བའི་དོན་ཏོ། །གསང་བ་ཡང་ཡིན་ལ་ཆེན་པོ་ཡང་ཡིན་པས་གསང་བ་ཆེན་པོ་སྟེ། དེ་ཉིད་རྡོ་རྗེ་ཡིན་པས་ན་གསང་བ་ཆེན་པོའི་རྡོ་རྗེའོ། །གསང་བ་ཆེན་པོའི་རྡོ་རྗེ་ཉིད་དམ་ཚིག་ཡིན་པས་ན་གསང་བ་ཆེན་པོའི་རྡོ་རྗེའི་
དམ་ཚིག་སྟེ། དམ་ཚིག་ནི་དཀྱིལ་འཁོར་རོ། །དེ་ལས་བྱུང་བའི་དཀྱིལ་འཁོར་བྱིན་གྱིས་རློབ་པའི་ཡེ་ཤེས་གང་ལས་བྱུང་བའི་ཡེ་ཤེས་གང་ཡིན་པ་དེ་ལ་དེ་སྐད་ཅེས་བྱའོ། །དེ་ཉིད་ནི་ཕྱག་རྒྱ་སྟེ། མིང་དེ་སྐད་ཅེས་བྱ་བའི་ཏིང་ངེ་འཛིན་གང་ཡིན་པ་དེ་ལ་སྙོམས་པར་ཞུགས་པ་སྟེ། དཀྱིལ་

59-1-23a

འཁོར་གྱི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །དམ་ཚིག་ཀྱང་ཡིན་ལ་ཆེན་པོ་ཡང་ཡིན་པས་ན་དམ་ཚིག་ཆེན་པོ་སྟེ། བཅོམ་ལྡན་འདས་བྱང་ཆུབ་པའི་མཚན་ཉིད་ཅན་རྡོ་རྗེ་སེམས་དཔའོ། །དེའི་དེ་ཁོ་ན་ཉིད་ནི་རབ་ཏུ་དགའ་བའི་ངོ་བོ་ཉིད་ལ་
སོགས་པར་སྟོན་པའོ། །དེ་ཉིད་ནི་རྡོ་རྗེ་སྟེ་རྡོ་རྗེ་བྱིན་གྱིས་བརླབས་པའི་དཀྱིལ་འཁོར་རོ། །མིང་དེ་ཉིད་ཅེས་བྱ་བའི་དཀྱིལ་འཁོར་དེ་ཉིད་གང་ཡིན་པ་དེ་གསུངས་པ་ནི་བཀའ་སྩལ་ཏོ་ཞེས་བྱ་བའི་དོན་ཏོ། །དེ་ནས་ཞེས་བྱ་བ་ནི་གཏན་ཚིགས་འདིའི་ཕྱིར་ཞེས་བྱ་བའི་དོན་ཏོ། །གང་གི་
ཕྱིར་དཀྱིལ་འཁོར་དུ་འཇུག་པ་ནི་མེད་པར་སེམས་ཅན་རྣམས་སངས་རྒྱས་ཀྱི་བྱང་ཆུབ་མཐོང་བའི་སྐལ་བ་ཅན་དུ་མི་འགྱུར་རོ་ཞེས་བྱ་བའི་དོན་ཏོ། །དེ་བས་ན་ཡང་དག་པར་བཤད་པར་བྱ་སྟེ། ཡང་དག་པ་དང་བཅས་པར་རབ་ཏུ་ཕྱེ་བ་བཤད་པར་བྱའོ་ཞེས་བྱ་བའི་དོན་ཏོ། །ཅི་ཞིག་ཅེ་
ན་དཀྱིལ་འཁོར་ཆེན་པོ་སྟེ། དཀྱིལ་འཁོར་ཡང་ཡིན་ལ་ཆེན་པོ་ཡང་ཡིན་པས་ན་དཀྱིལ་འཁོར་ཆེན་པོ་སྟེ། ཕྱག་རྒྱ་ཆེན་པོའི་གཙོ་བོ་ཡིན་གྱི། གཟུངས་ལ་སོགས་པའི་ཕྱག་རྒྱ་གཙོ་བོར་གྱུར་པ་ནི་མ་ཡིན་ནོ་ཞེས་བྱ་བའི་དོན་ཏོ། །དབྱིབས་ཇི་ལྟ་བུ་ཞེ་ན་དམ་པ་ཞེས་བྱ་བ་སྟེ། 
མཆོག་ཅེས་བྱ་བའི་དོན་ཏོ། །མིང་དེ་སྐད་ཅེས་བྱ་བ་ཞིག་ཅེ་ན། དེ་ཉིད་དང་པོ་དམ་ཚིག་སྟེ། །རྡོ་རྗེ་བྱིན་རླབས་ཞེས་བྱ་བའོ་ཞེས་བྱ་བ་སྟེ། མིང་དེ་སྐད་ཅེས་བྱ་བ་ཞེས་བྱ་བའི་དོན་ཏོ། །དབྱིབས་ཇི་ལྟ་བུ་ཞེ་ན། གྲུ་བཞིར་བགྱི་ཞིང་ཞེས་བྱ་བ་སྟེ། གྲྭ་བཞི་དང་ལྡན་པ་ཞེས་བྱ་བའི་དོན་ཏོ། །
ཁྱམས་རྣམས་ཀྱིས་ཡོངས་སུ་བསྐོར་བ་ཞེས་བྱ་བ་ནི་གཞལ་ཡས་ཁང་གི་ཕྱི་རོལ་ཀུན་ནས་བསྐོར་ཕྱོགས་སུ་ཁྱམས་ཀྱིས་བསྐོར་བ་ལ་ནི་ཁྱམས་རྣམས་ཞེས་བྱའོ། །རྡོ་རྗེ་དང་། རྡོ་རྗེ་རིན་པོ་ཆེ་དང་། རྡོ་རྗེ་པདྨ་དང་། སྣ་ཚོགས་རྡོ་རྗེ་ནི་རྡོ་རྗེ་ཀུན་ནོ། །སྣ་ཚོགས་པའི་བ་དན་གྱི་
རྩེ་མོར་དྲིལ་བུའི་མཆོག་བཏགས་པ་གང་ཡིན་པ་དེ་ལ་དེ་སྐད་ཅེས་བྱའོ། །དེ་ལྟར་ཕྱིའི་དཀྱིལ་འཁོར་བྲིས་ནས་དེའི་ནང་དུ་དཀྱིལ་འཁོར་གཉིས་པ་དེའི་ཕྱེད་ཀྱི་ཚད་ལ། ཕྱིའི་དཀྱིལ་འཁོར་དང་འདྲ་བར་སྒོ་བཞི་དང་ལྡན་པ། ཀ་བ་བརྒྱད་ལ་སོགས་པའི་གཟུགས་ཅན་དུ་ཡང་དག་

59-1-23b

པར་བྲིས་ལ། དེ་ཉིད་ཕྱི་རོལ་དུ་རྡོ་རྗེ་ཕྲེང་བ་ཟླུམ་པོས་བསྐོར་བར་བྱའོ། །དེ་ནས་ལྷ་ཐམས་ཅད་ཀྱི་གནས་སུ་པདྨའི་གདན་བྲི་བར་བྱའོ། །སངས་རྒྱས་སྐུ་ནི་ཞེས་བྱ་བ་ལ་སོགས་པ་ནི། རྡོ་རྗེ་སེམས་དཔའི་སྐུ་གཟུགས་ཏེ། །སངས་རྒྱས་རྡོ་རྗེ་འཛིན་ཕྱིར་བཤད། །ཅེས་གསུངས་པའི་
ཕྱིར་རོ། །རྡོ་རྗེ་ཕྲེང་བ་ལ་སོགས་ཀྱིས་སྤྲས་ཤིང་ཞེས་བྱ་བ་ནི་རྡོ་རྗེའི་ཕྲེང་བས་མཛེས་པར་བྱས་པའོ། །སོགས་པའི་སྒྲས་ནི་པདྨ་དང་རིན་པོ་ཆེ་དང་སངས་རྒྱས་ཀྱི་ཕྲེང་བ་གཟུང་བར་བྱ་སྟེ། རྡོ་རྗེ་སེམས་དཔའི་གཟུགས་ཅན་ཡིན་པའི་ཕྱིར། དབང་བསྐུར་བའི་ངོ་བོ་ཉིད་ནི་ཕྲེང་བ་ཡིན་ཏེ། 
དཀྱིལ་འཁོར་གཉིས་པར་དེ་བཞིན་གཤེགས་པའི་སྐུ་བསྟན་པས་འདིར་ཡང་སོམ་ཉི་མི་བྱའོ། །མདུན་དུ་རྡོ་རྗེ་སེམས་དཔའ་ཞེས་བྱ་བ་ནི་རྡོ་རྗེ་ཡིད་ལས་བྱུང་བ་སྟེ། ཕྱག་གཡོན་ན་གཞུ་བསྣམས་པ་ཕྱག་གཡས་ཀྱི་མཐེ་བོ་དང་མཛུབ་མོ་གཉིས་ཀྱིས་རྡོ་རྗེ་མདའ་འདྲེན་པ་ལ་བརྩོན་པར་
མཛད་པའོ། །གཡས་སུ་ནི་རྡོ་རྗེ་ཀི་ལི་ཀི་ལ་དཀར་སེར་རྡོ་རྗེ་དམར་པོ་བསྣམས་པའོ། །ཡན་ལག་ཀུན་གྱིས་ཡོངས་འཁྱུད་ཅེས་བྱ་བ་སྐུ་ཀུན་གྱིས་ཡོངས་སུ་འཁྱུད་པའོ། །དེ་ཅིའི་ཕྱིར་ཞེ་ན། རྡོ་རྗེ་གཟུགས་ཏེ་ཞེས་བྱ་བ་སྟེ། རྡོ་རྗེ་རྩེ་ལྔ་པའི་གཟུགས་ཅན་ནོ། །སྐུ་མདོག་ཇི་ལྟ་བ་ཞེ་ན། ཉི་
མའི་འོད་ཅེས་བྱ་བ་སྟེ། ཉི་མའི་འོད་ཀྱིས་མདངས་དམར་པོར་སྣང་བའོ། །རྒྱབ་ཏུ་ནི་རྡོ་རྗེ་འདོད་པ་ཆུ་སྲིན་གྱི་རྒྱལ་མཚན་ཐོགས་པ། སྐུ་མདོག་ལྗང་སེར་དང་ལྡན་པར་ཅི་རིགས་པར་བློ་དང་ལྡན་པས་གཞག་པར་བྱའོ། །གཡོན་དུ་རྡོ་རྗེ་སྙེམས་པ་རྡོ་རྗེ་ཁུ་ཚུར་གཉིས་ཀྱིས་རྡོ་རྗེ་སྙེམས་པའི་
ཚུལ་གཉིས་འཛིན་པ་བཙོ་མའི་གསེར་གྱི་འོད་འདྲ་བ་དགོད་པར་བྱའོ། །མཚམས་རྣམས་སུ་ནི་སྤྱི་གཙུག་ཏུ་ཐལ་མོ་ཁ་ཕྱེ་བས་མེ་ཏོག་དང་བདུག་སྤོས་དང་མར་མེ་དང་དྲི་འཛིན་པ་རྡོ་རྗེ་ཡིད་ལས་བྱུང་བ་ལ་སོགས་པའི་སྐུ་མདོག་དང་མཐུན་པ་རྡོ་རྗེ་སྦྲང་རྩི་ལ་སོགས་པ་གཞག་པར་བྱའོ། །ཕྱིའི་
དཀྱིལ་འཁོར་གྱི་མཚམས་རྣམས་སུ་ནི་རྡོ་རྗེ་དང་རིན་པོ་ཆེའི་ཕྲེང་བ་དང་པི་ཝང་དང་། རྡོ་རྗེ་ཐོགས་པའི་ལག་པས་གར་བྱེད་པའི་སྒེག་མོ་ལ་སོགས་པ་བྲི་བར་བྱའོ། །ཤར་ཕྱོགས་ཀྱི་སྒོར་ནི་རྡོ་རྗེ་གཟུགས་ཕྱག་ན་མེ་ལོང་བསྣམས་པ་སྟེ། རྡོ་རྗེ་སེམས་དཔའ་ལ་སོགས་པའི་སེམས་

59-1-24a

དཔའ་ཐམས་ཅད་ཀྱི་གཟུགས་བརྙན་སྐྱེད་པའི་རྒྱུར་གྱུར་པའོ། །ལྷོར་ནི་སྒྲ་པི་བང་བརྡུང་བ་ལ་བརྩོན་པའོ། །ནུབ་ཏུ་ནི་དྲི་སྟེ། དྲིའི་སྣོད་ཕྱག་ན་བསྣམས་པའོ། །བྱང་དུ་ནི་རོའི་སྣོད་ཕྱག་ན་བསྣམས་པའོ། །ནང་གི་སྒོ་རྣམས་ལ་ཡང་དེ་བཞིན་དུ་བལྟ་བར་བྱའོ། །
དེ་ལྟར་མེ་ལོང་དང་པི་བང་དང་དྲིའི་སྣོད་དང་། རོའི་སྣོད་ཀྱི་མཚན་མ་རྣམས་ནི་དམ་ཚིག་ཆེན་པོ་དང་ཁམས་གསུམ་རྣམ་པར་རྒྱལ་བ་ལ་སོགས་པའི་རྒྱུད་རྣམས་ལ་སྟོན་པས་འདིར་སོམ་ཉི་མི་བྱའོ། །མི་བསྐྱོད་པ་ལ་སོགས་པའི་དེ་བཞིན་གཤེགས་པ་རྣམས་ལ། རྡོ་རྗེ་སེམས་
དཔའ་ལ་སོགས་པའི་འཁོར་གྱིས་བསྐོར་བ་སྔར་བཤད་པའི་ཚུལ་དུ་བྲི་བར་བྱའོ། །ཕྱིའི་དཀྱིལ་འཁོར་གྱི་ནང་གི་སྣམ་བུ་ལ་འདོད་པའི་ཁམས་ཀྱི་དབང་ཕྱུག་དང་ཚངས་པ་དང་ཁྱབ་འཇུག་དང་ཀརྟི་ཀ་དང་དབང་པོ་དང་བདེ་བྱེད་ཆུང་མ་དང་བཅས་པར་ཀུན་དུ་བྲི་བར་བྱ་སྟེ། གང་གི་
ཕྱིར་མཆོག་གི་སྒྲས་ནི་ཁྱབ་འཇུག་དང་། ཀརྟི་ཀ་དང་དབང་པོ་ཡིན་པར་མངོན་པར་འདོད་དོ། །ལྷོ་ཕྱོགས་སུ་ནི་ཟླ་བ་དང་ཉི་མ་དང་སྤེན་པ་དང་མིག་དམར་ཆུང་མ་དང་བཅས་པ་རྣམས་སོ། །ནུབ་ཕྱོགས་སུ་ནི་གཏུན་དང་རླུང་ལྷ་དང་མེ་ལྷ་དང་ལུས་ངན་པོ་ཆུང་མ་དང་བཅས་པའོ། །བྱང་
གི་ཕྱོགས་སུ་ནི་ཕག་དང་གཤིན་རྗེ་དང་ཚོགས་ཀྱི་བདག་པོ་ཆུང་མ་དང་བཅས་པའོ། །སྒོ་རྣམས་སུ་ནི་སྟོབས་བཟངས་དང་སྦྲང་རྩིས་མྱོས་པ་དང་རྒྱལ་བ་དང་རྒྱལ་བ་ཐོབ་པ་ཆུང་མ་དང་བཅས་པ་བྲི་བར་བྱའོ། །རྡོ་རྗེ་སེམས་དཔའ་ལ་སོགས་པ་འདི་དག་ཐམས་ཅད་ཀྱང་རྡོ་རྗེ་ཧཱུྃ་ཟློས་
ཤིང་བྲི་བར་བྱའོ་། །སྒོ་ནི་ཐམས་ཅད་ཀྱང་ཆ་བརྒྱད་པར་བྱའོ། །དེ་ལྟར་དཀྱིལ་འཁོར་ལེགས་པར་བྲིས་ནས་ཐ་མ་རྣམས་སྤོས་ཆུས་བྱུགས་ལ་མེ་ཏོག་གི་སིལ་མ་བཀྲམ་སྟེ། བུམ་པ་དང་བུམ་པ་གང་བ་བཞག་ལ་མཆོད་ཡོན་མངོན་པར་བཟླས་པ་བྱས་ནས། རྡོ་རྗེ་ཁུ་ཚུར་གཉིས་
ཀྱི་མཛུབ་མོ་ལྕགས་ཀྱུ་གཉིས་སུ་བྱས་ལ། མཁྲིག་མ་གཉིས་རྡོ་རྗེ་བཅིངས་པ་གཉིས་བསྣོལ་ལ། རྡོ་རྗེ་སེ་གོལ་བརྡབ་པ་བྱས་པས་དཔལ་རྡོ་རྗེ་སེམས་དཔའི་སྦྱོར་བ་དང་། སངས་རྒྱས་ཐམས་ཅད་བསྡུ་བར་བྱའོ། །དེ་ནས་མྱུར་དུ་ཕྱག་རྒྱ་ཆེ། །རྡོ་རྗེ་སེམས་དཔའི་རྟེན་བྱེད་ཅིང་། །

59-1-24b

མཚན་བརྒྱ་རྩ་བརྒྱད་དམ་པ་ཡིན། །ལན་ཅིག་བར་དུ་བརྗོད་པར་བྱ། །དཔལ་མཆོག་དང་པོའི་སེམས་དཔའ་སྟེ། །ཞེས་བྱ་བ་ལ་སོགས་པའོ། །རྡོ་རྗེ་ཅན་ནི་མདུན་གནས་ཏེ། །སེམས་དཔའི་སྐྱིལ་ཀྲུང་གིས་ལེགས་གནས། །བདེ་ཆེན་རྡོ་རྗེ་བཟང་པོ་མཆོག །བདག་པོ་ལན་
གཅིག་ཡང་དག་འགུག །ཡི་གེ་ཧཱུྃ་ཉིད་དང་དང་པོའི་རྡོ་རྗེ་མཉམ་པར་གཞག་པ་དང་བཅས་པ་ཉིད་ཀྱིས། དབུས་མའི་རྡོ་རྗེ་ལྕགས་ཀྱུ་གཉིས་དང་དགུག་པའི་སྦྱོར་བས་སྙིང་པོ་དང་རང་གི་ལྕགས་ཀྱུས་དགུག་པར་བྱའོ། །དེ་ནས་རྡོ་རྗེའི་མཆོད་ཡོན་དབུལ་བར་བྱ་སྟེ། ཡི་གེ་ཧཱུྃ་ཉིད་དང་
རྡོ་རྗེའི་མེ་ཏོག་གི་ཐལ་མོ་ཁ་ཕྱེ་བའི་མཆོད་ཡོན་གྱི་ཕྱག་རྒྱ་བཅོམ་ལྡན་འདས་འཁོར་དང་བཅས་པའི་ཐུགས་ཀའི་ཟླ་བའི་རྡོ་རྗེ་སེམས་དཔའི་ཕྱག་རྒྱ་བཅིངས་ལ། ཛཿཧཱུྃ་བཾཾ་ཧོཿ་ཞེས་བརྗོད་ལ། ཧཱུྃ་གི་མཐར་བཅོམ་ལྡན་འདས་འཁོར་དང་བཅས་པ་ལེགས་པར་བཞག་ལ་དེ་ཉིད་བརྗོད་
ཅིང་རྡོ་རྗེའི་ལྟ་བས་བལྟས་ལ། ཡི་གེ་ཧཱུྃ་གིས་ལྗགས་ལ་རྡོ་རྗེ་བཟང་པོ་བསྐྱེད་དེ། བཅོམ་ལྡན་འདས་འཁོར་དང་བཅས་པའི་ཐུགས་ཀའི་ཟླ་བའི་དཀྱིལ་འཁོར་ལ་ཡི་གེ་ཧཱུྃ་བཀོད་ལ། ཡི་གེ་ཨ་ལས་རང་གི་སྙིང་གར་སྣ་ཚོགས་རྡོ་རྗེ་བསྐྱེད་ལ་གར་ལས་བྱུང་བ་ནི་ལས་ཀྱི་ཕྱག་རྒྱ་སྟེ། 
ཐམས་ཅད་ལ་བསྟན་པར་བྱའོ། །བདེ་བའི་ཐུགས་མཆོག་ཀུན་ལ་རྗེས་སུ་ཆགས། །རྡོ་རྗེ་སེམས་ཁྱོད་རབ་ཏུ་བདེ་བའི་མཆོག །བདེ་བ་ཆེན་པོ་བསྟན་ཞིང་མཐོ་བར་མཛད། །གྲུབ་པར་བྱེད་ཅིང་མྱུར་དུ་འདུད་པར་བགྱི། །ཞེས་བྱ་བའི་རྡོ་རྗེའི་གླུ་ལེན་པ་དང་། བ་དན་གསུམ་པ་རྩེ་
གསུམ་ཅན། །བསྒྱིངས་བཅས་མཐའ་ནས་དགྲོལ་བ་དང་། །མདུན་དུ་བསྐོར་ཞིང་གློག་ལྟར་གདེག །དེ་ནི་རྡོ་རྗེའི་གར་ཞེས་བཤད། །དེ་ནས་རྡོ་རྗེ་ཁུ་ཚུར་གཉིས་བཅིངས་ལ་གཡོན་པ་དཀུར་བསྟེན་ནས། གཡས་པས་འདེགས་པའི་ཚུལ་གྱིས་སྙིང་གར་འཇོག་པ་ནི་ལས་ཀྱི་ཕྱག་རྒྱའོ། །
རྡོ་རྗེ་ཁུ་ཚུར་གཉིས་ཀྱིས་མདའ་འཕེན་པའི་ཚུལ་དུ་བྱེད་པ་ནི་རྡོ་རྗེ་ཡིད་ལས་བྱུང་བའོ། །རྡོ་རྗེ་ཁུ་ཚུར་གཉིས་པོ་དེ་ཉིད་ཀྱིས་རང་ལ་འཁྱུད་པ་ནི་ཀི་ལི་ཀི་ལའོ། །རྡོ་རྗེ་ཁུ་ཚུར་གཉིས་པོ་དེ་ཉིད་ཀྱིས་རྒྱལ་མཚན་བསྒྲེང་བའི་ཚུལ་དུ་བྱེད་པ་ནི། རྡོ་རྗེ་འདོད་པའི་འོ། །རྡོ་རྗེ་ཁུ་ཚུར་དེ་ཉིད་བཀན་ཏེ་བཞག་

59-1-25a

པ་གཉིས་ནི་བཅོམ་ལྡན་འདས་ཀྱི་ལས་ཀྱི་ཕྱག་རྒྱ་གཉིས་ལྟ་བུ་ནི་རྡོ་རྗེ་སྙིམས་པའི་འོ། །རྡོ་རྗེ་ཐལ་མོ་གཉིས་བསྐོར་ལ། སྙིང་གའི་ཕྱོགས་སུ་བྱུག་པ་ལྟར་བྱ་བ་ནི་རྡོ་རྗེ་དགུན་གྱིའོ། །མདུད་པ་བྱས་ནས་སྤྱི་བོར་བཞག་ནས་ཕབ་སྟེ། འཐོར་བ་ལྟར་བྱས་པ་ནི་རྡོ་རྗེ་
སྦྲང་རྩིའོ། །དེ་ཉིད་ཐུར་དུ་ལྡུགས་པ་ལྟར་བྱེད་པ་ནི་རྡོ་རྗེ་སྤྲིན་ནོ། །དེ་ཉིད་ལས་མཐེ་བོ་བསྙམས་ནས་བསྐོར་བ་ནི་རྡོ་རྗེ་སྟོན་གྱིའོ། །དེ་ཉིད་ཤིན་ཏུ་བརྐྱང་ནས་བྱུག་པ་ནི་རྡོ་རྗེ་དགུན་གྱིའོ། །མི་བསྐྱོད་པ་ལ་སོགས་པའི་ས་གནོན་པའི་ཕྱག་རྒྱ་ནི་རྒྱུད་ཕྱི་མ་ལ་བལྟ་བར་བྱའོ། །
རྡོ་རྗེ་མདའ་ནི་རྡོ་རྗེ་སེམས་དཔའི་ལས་ཀྱི་ཕྱག་རྒྱ་ཉིད་དོ། །འཕགས་པ་འཇམ་དཔལ་ལ་སོགས་པ་བྱང་ཆུབ་སེམས་དཔའ་བདུན་གྱི་ཕྱག་རྒྱ་ནི་དེ་རྣམས་ཉིད་ཀྱི་དཀྱིལ་འཁོར་ལས་ཤེས་པར་བྱའོ། །ཕྱི་རོལ་གྱི་མཚམས་རྣམས་སུ་རྡོ་རྗེ་ཐལ་མོ་སྙིང་གར་བསྐོར་བ་ནི་སྒེག་མོའི་
ཕྱག་རྒྱའོ། །དེ་ཉིད་གཡོན་ནས་བསྐོར་ཏེ། སྤྱི་བོར་བཞག་པ་ནི་བཞད་པ་མོའི་ཕྱག་རྒྱའོ། །དེ་ཉིད་ལས་གཡོན་པའི་མཛུབ་མོ་བཀུག་པ་ཡུ་བར་བྱས་ལ་གཡས་པའི་མཛུབ་མོ་བཀུག་པས་པི་ཝང་བརྡུང་བའི་ཚུལ་དུ་བྱེད་པ་ནི་རྡོ་རྗེ་གླུ་མཁན་མའི་ཕྱག་རྒྱའོ། །རྡོ་རྗེ་ཁུ་ཚུར་
གཉིས་ཀྱིས་གར་བྱས་ནས་སྤྱི་བོར་རྡོ་རྗེ་ཐལ་མོ་བཅིང་བ་ནི་རྡོ་རྗེ་གར་མཁན་མའི་ཕྱག་རྒྱའོ། །རྡོ་རྗེ་བསྡམས་པ་བསྙེམས་པའི་མཐིལ་ལྟ་བ་ནི་རྡོ་རྗེ་གཟུགས་ཀྱིའོ། །རྡོ་རྗེ་བསྡམས་པའི་མཛུབ་མོ་གཡོན་པ་ཡུ་བར་བྱས་པ་ལ་མཛུབ་མོ་གཡས་པ་བཀུག་ནས་བརྡུང་བ་ནི་སྒྲའིའོ། །
རྡོ་རྗེ་བསྡམས་པ་བརྐྱང་བས་སྙིང་གར་བྱུག་པ་ནི་དྲིའོ། །རྡོ་རྗེ་བསྡམས་པ་ཉིད་བསྡམས་ནས་བཀན་ལ་རོའི་སྣོད་ལྟར་བྱ་བ་ནི་རོ་རྡོ་རྗེའི་ཕྱག་རྒྱའོ། །དེ་ནས་བཅོམ་ལྡན་འདས་འཁོར་དང་བཅས་པ་རྣམས་སངས་རྒྱས་ཀྱི་རིན་པོ་ཆེའི་དབང་བསྐུར་བས་དབང་བསྐུར་བར་བྱའོ། །མི་བསྐྱོད་
པ་ལ་སོགས་པའི་དེ་བཞིན་གཤེགས་པ་རྣམས་ནི་རྡོ་རྗེ་རིན་པོ་ཆེའི་དབང་བསྐུར་བས་དབང་བསྐུར་བར་བྱའོ། །དེ་ནས་བུམ་པ་གང་བ་དང་མེ་ཏོག་ལ་སོགས་པ་ཅི་སྙེད་པ་རྣམས་ཀྱིས་ཡང་དག་པར་མཆོད་པར་བྱ་བ་སྟེ། དེ་ལ་སོགས་པར་བྱ་བར་བལྟ་བར་བྱའོ། །དེ་ལྟར་དཀྱིལ་འཁོར་

59-1-25b

རྫོགས་པར་བྱས་ནས། དེ་ནས་དཀྱིལ་འཁོར་འདིར་ཞེས་བྱ་བ་ལ་སོགས་པས་སྟོན་ཏེ། དེ་ནས་ཞེས་བྱ་བ་ནི་དེའི་རྗེས་ཐོགས་ལའོ། །འདིར་ཞེས་བྱ་བ་ནི་དཀྱིལ་འཁོར་འདིར་རོ། །འཇུག་པ་ལ་སོགས་པའི་ཆོ་ག་ནི་དབབ་པ་དང་དབང་བསྐུར་བ་དང་། སྙིང་པོ་འཛིན་དུ་གཞུག་
པ་རྣམས་ནི་སྩོགས་པ་ཞེས་བྱ་བའི་སྒྲས་སྟོན་ཏོ། །འཇུག་པས་ཅིར་འགྱུར་ཞེ་ན། རྡོ་རྗེ་སེམས་དཔའ་ཉིད་ཀྱི་བར་དུ་ཐོབ་པར་འགྱུར་ཏེ། དེ་ནི་དེ་ལ་དང་པོ་ཉིད་དུ་ཞེས་བྱ་བ་ལ་སོགས་པས་སྟོན་ཏོ། །དེ་ལ་དང་པོ་ཉིད་དུ་ཇི་སྐད་དུ་བཤད་པའི་ཆོ་གས་ཞུགས་པའི་སློབ་དཔོན་ནི། 
རྡོ་རྗེ་སེམས་དཔའི་གཟུགས་སུ་བྱིན་གྱིས་བརླབས་ལ། ཕྱག་བཞི་བྱ་བ་སྔོན་དུ་འགྲོ་བས་སྡོམ་པ་བཟུང་ལ། སྒོར་བཞག་པའི་བུམ་པའི་ཆུ་ཡི་གེ་ཧཱུྃ་སྔོན་པོར་བཟླས་པས་དབང་བསྐུར་ཏེ། གོས་དམར་པོ་ལ་སོགས་པ་བགོའོ་ཞེས་བྱ་བའི་དོན་ཏོ། །རྡོ་རྗེ་ཆེན་པོའི་སློབ་དཔོན་ཞེས་
བྱ་བ་ནི་བཅོམ་ལྡན་འདས་ཀྱིས་རྡོ་རྗེ་སེམས་དཔའི་དཀྱིལ་འཁོར་གྱི་སློབ་དཔོན་དུ་བྱིན་གྱིས་བརླབས་པར་འགྱུར་རོ་ཞེས་བྱ་བའི་དོན་ཏོ། །དཀྱིལ་འཁོར་ཐམས་ཅད་ཀྱི་སློབ་དཔོན་དང་ཞེས་བྱ་བ་ནི། དེ་བཞིན་གཤེགས་པའི་དཀྱིལ་འཁོར་གྱི་སློབ་དཔོན་ཞེས་བྱ་བའི་དོན་ཏོ། །དམ་
ཚིག་ཐམས་ཅད་ཤེས་པ་དང་ཞེས་བྱ་བ་ནི་རྡོ་རྗེ་རིགས་ཀྱི་སློབ་དཔོན་དུའོ། །ཆོས་ཐམས་ཅད་རིག་པ་དང་ཞེས་བྱ་བ་ནི་པདྨའི་རིགས་ཀྱི་སློབ་དཔོན་དུའོ། །ལས་ཐམས་ཅད་བསྒྲུབ་པ་དང་ཞེས་བྱ་བ་ནི། རིན་པོ་ཆེའི་རིགས་ཀྱི་སློབ་དཔོན་ནོ། །དངོས་གྲུབ་ཐམས་ཅད་གྲུབ་པ་དང་ཞེས་བྱ་
བ་ནི་རྡོ་རྗེ་ཁུ་ཚུར་ལ་སོགས་པའི་དཀྱིལ་འཁོར་གྱི་སློབ་དཔོན་ཉིད་དུ་འགྲུབ་པར་འགྱུར་རོ་ཞེས་བྱ་བའི་དོན་ཏོ། །བཅོམ་ལྡན་འདས་རྡོ་རྗེ་སེམས་དཔས་བྱིན་གྱིས་བརླབས་པ་དང་ཞེས་བྱ་བ་ནི་ངེས་པ་ཐམས་ཅད་དང་ལྡན་པར་མཛད་དོ་ཞེས་བྱ་བའི་དོན་ཏོ། །གང་གི་ཕྱིར་དེ་ལྟར་འགྱུར་བ་
དེས་ན་དེ་བཞིན་གཤེགས་པ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་ཀྱི་དབང་བསྐུར་བ་ཐམས་ཅད་ཐོབ་པར་འགྱུར་བ་དང་། འདི་ལ་རིགས་ཐམས་ཅད་ཤེས་པ་དང་ལྡན་པ་མངོན་དུ་ཕྱོགས་པར་འགྱུར་རོ། །མཆོད་པ་ཐམས་ཅད་དང་ཞེས་བྱ་བ་ནི་སངས་རྒྱས་དང་བྱང་ཆུབ་སེམས་

59-1-26a

དཔའ་རྣམས་དང་ལྟ་དང་བཅས་པའི་འཇིག་རྟེན་གྱིས་མཆོད་པར་འོས་པ་ཞེས་བྱ་བའི་དོན་ཏོ། །བྱིན་གྱིས་བརླབས་པ་ལ་སོགས་པའི་གནས་ཀྱིས་ནི་དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་རྟོགས་པར་འགྱུར་བར་སྟོན་པ་
ཡིན་ལ། འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་ཐམས་ཅད་ཅེས་བྱ་བ་ལ་སོགས་པས་ནི། རྡོ་རྗེ་ཁུ་ཚུར་གྱི་དཀྱིལ་འཁོར་གྲུབ་པའི་ཡེ་ཤེས་སྟོན་ཏེ། འདིའི་སྙིང་ལ་ཞུགས་ཤིང་དོན་ཡོད་པའི་ཕྱིར་ཞེས་བྱ་བ་ནི་ཐོགས་པ་མེད་པའི་ནུས་པ་དང་ལྡན་པར་འགྱུར་རོ་
ཞེས་བྱ་བའི་དོན་ཏོ། །རྡོ་རྗེའི་ཕྱག་རྒྱ་བཅིངས་ལ་ཞེས་བྱ་བ་ནི་དང་པོའི་རྡོ་རྗེ་ནི་རྡོ་རྗེའི་ཕྱག་རྒྱ་སྟེ། དེའི་མཚན་ཉིད་ནི་འདི་ཡིན་ནོ། །ལྔ་པོ་བསྡུས་པ་བཅིངས་ནས་ནི། །གུང་བསྒྲེང་སྲིན་ལག་ནང་དུ་གཞུག །མཐེ་བོང་མཐེ་ཆུང་བསྙམས་རྡོ་རྗེ། །དེ་ནི་དང་པོའི་རྡོ་རྗེ་མཆོག །ཅེས་བྱ་བའོ། །
རྡོ་རྗེའི་ལྟ་བ་ནི་ཀུན་དུ་ཆགས་ཤིང་རབ་ཏུ་དགའ་བས་མིག་གདངས་པའོ། །སྙིང་པོ་ལན་ཅིག་བརྗོད་ནས་ཞེས་བྱ་བ་ནི་ཡི་གེ་ཧཱུྃ་ངོ་། །བསྒྲུབ་པར་བྱའོ་ཞེས་བྱ་བ་ནི་སྔར་བཤད་པའི་ཚུལ་ཉིད་ཀྱིས་དམ་ཚིག་གི་ཕྱག་རྒྱས་གཞག་པར་བྱའོ་ཞེས་བྱ་བའི་དོན་ཏོ། །རྡོ་རྗེ་རྣམ་པར་སྒེག་པའི་
ཞེས་བྱ་བ་ལ་སོགས་པ་ནི་རྣམ་པར་སྒེག་པའི་དགའ་བའི་རྡོ་རྗེ་ཞེས་བྱ་བའི་དོན་ཏོ། །འདི་ཡང་རྡོ་རྗེ་གར་དང་བཅས་པའི་མཆོད་པས་རྣམ་པར་འགྱུར་ཞིང་འཛུམ་པ་དང་བཅས་པའི་མིག་གིས་འདུད་པའི་ཕྱག་བྱས་པས། རྡོ་རྗེ་སེམས་དཔའ་ཡང་དེ་བཞིན་གཤེགས་པ་ཐམས་ཅད་རྗེས་
སུ་མཉེས་པར་ཕྱག་བྱའོ། །རྡོ་རྗེ་ཐལ་མོས་རྡོ་རྗེའི་གར་བྱེད་ཅིང་བསྐོར་བས་སྙིང་གར་མེ་ཏོག་ཐོགས་ཏེ་བདག་ཉིད་འཇུག་པར་བྱའོ་ཞེས་བྱ་བ་ནི་རྡོ་རྗེ་སེམས་དཔའི་སྦྱོར་བས། བཛྲ་བཛྲ་ཞེས་སྨྲས་ཤིང་། ཡི་གེ་ཧཱུཾ་ཡང་ཟློས་བཞིན་དུ་འཇུག་པར་བྱའོ། །དེ་བཞིན་དུ་འདུག་ནས་བཅོམ་
ལྡན་འདས་བསྒྲུབ་པར་བྱའོ་ཞེས་བྱ་བ་ནི། སེམས་དཔའི་སྐྱིལ་མོ་ཀྲུང་གིས་འདུག་ལ། དེ་བཞིན་དུ་ཕྱག་རྒྱ་ཆེན་པོ་བཅིངས་ལ་ཡི་གེ་ཧཱུཾ་ཟློས་ཤིང་ཇི་སྲིད་བཅོམ་ལྡན་འདས་ཇི་སྐད་དུ་བཤད་པའི་མཚན་མ་སྟོན་པར་མཛད་པ་དེ་སྲིད་ཀྱི་བར་དུ་བྱའོ་ཞེས་བྱ་བའི་དོན་ཏོ། །བྱ་བ་ཐམས་ཅད་

59-1-26b

ནི་འདིར་ཡི་གེ་ཧཱུཾ་ཉིད་ཀྱིས་བྱ་བ་ཡིན་ནོ། །རབ་ཏུ་དགའ་བའི་དམ་ཚིག་གི་ཕྱག་རྒྱ་ནི་ལྔ་པོའི་བསྡུས་པའི་ཕྱག་རྒྱའོ། །གང་ཡང་དེ་བཞིན་གཤེགས་པ་ལ་སོགས་པ་ལ། མོས་པ་དེ་རྣམས་ཀྱིས་ཀྱང་རང་གི་དམ་ཚིག་གི་ཕྱག་རྒྱ་རྣམས་དང་། རང་གི་དཀྱིལ་འཁོར་དུ་འཇུག་པའི་ཆོ་
གས་འཇུག་པར་བྱ་ཞིང་དབང་བསྐུར་བ་ལ་སོགས་པའི་ཆོ་ག་རྣམས་ཀྱང་བླང་ཞིང་། ཕྱག་རྒྱ་རྣམས་ཀྱིས་རྒྱས་གདབ་པར་བྱ་སྟེ། ཕྱག་རྒྱ་རྣམས་ནི་རྒྱས་འདེབས་པར་བྱེད་པ་ཡིན་ནོ། །དེ་ཡང་ཅི་སྟེ་ཞེ་ན་གཟུགས་བརྙན་གྱི་ཚུལ་དུ་དེ་བཞིན་གཤེགས་པ་ལ་སོགས་པའི་ཕྱག་རྒྱ་
རྣམས་གདུལ་བྱ་རྣམས་ལ་སྐྱེད་པར་བྱེད་པ་ཡིན་ནོ། །བདེ་བ་ཆེན་པོ་རྡོ་རྗེའི་དམ་ཚིག་ཅེས་བྱ་བ་ནི་བདེ་བ་ཡང་ཡིན་ལ་ཆེན་པོ་ཡང་ཡིན་པས་བདེ་བ་ཆེན་པོ་སྟེ། ཟག་པ་མེད་པའི་རྒྱུན་དང་ལྡན་པའི་བདེ་བ་དང་། ཡིད་བདེ་བ་ཡིན་ལ། དེའི་རྒྱུ་མཐུན་པ་ལས་འབྱུང་བའི་རྡོ་རྗེ་སེམས་དཔའི་
སྐུ་ལ་རྡོ་རྗེའི་སྒྲར་བཤད་དེ། དཔེར་ན་བདེན་པར་སྨྲ་བ་ལ་བདེན་པར་སྨྲ་བ་པོ་ཞེས་ཟེར་བ་ལྟ་བུའོ། །དེའི་དམ་ཚིག་ནི་དཀྱིལ་འཁོར་རོ། །རྡོ་རྗེ་ཆོས་ཀྱི་ཞེས་བྱ་བ་ལ་སོགས་པ་ལ་གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བའི་སེམས་ཀྱི་གསང་བ་ནི་རྡོ་རྗེ་ཆོས་ཡིན་ལ། དེ་
རྣམས་ཀྱི་མཉམ་པ་ཉིད་ནི་དེ་ཁོ་ན་ཉིད་དེ། དེ་རྒྱུར་གྱུར་པས་སེམས་ཅན་གྱི་ཁམས་མ་ལུས་ཤིང་ལུས་པ་མེད་པར་ཕྱག་རྒྱས་རྒྱས་གདབ་པར་བྱེད་པ་འདི་ནི་དམ་ཚིག་གོ། རབ་ཏུ་དགའ་བའི་རྡོ་རྗེའི་ཕྱག་རྒྱ་ལྔ་པོ་བསྡུས་པ་བཅིངས་ལ་བྱིན་གྱིས་བརླབ་པར་བྱ་སྟེ་བཟླས་བརྗོད་
བྱའོ་ཞེས་བྱ་བར་སྦྱར་རོ། །རྡོ་རྗེ་བྲི་བའི་ཕྱག་རྒྱ་ནི་འཕགས་པ་རྡོ་རྗེ་དམ་ཚིག་གི་ཕྱག་རྒྱའོ། །ཕྱག་རྒྱ་དགྲོལ་ལ་ཞེས་བྱ་བ་ནི་ངལ་བར་གྱུར་ན། ཕྱག་རྒྱ་དམ་པ་བཅིང་བར་མ་བྱས་པར་ཡང་བཟླས་བརྗོད་བྱའོ་ཞེས་བྱ་བའི་དོན་ཏོ། །དཀྱིལ་འཁོར་དུ་ཞུགས་པ་ཙམ་གྱིས་ཞེས་བྱ་བ་
ནི་སྔོན་དུ་བསྙེན་པ་མེད་པར་ཏེ། རིམ་པ་འདི་ནི་ཡེ་ཤེས་བབས་པར་གྱུར་པ་ཡིན་ནོ། །གཞན་དག་གི་ནི་མཚན་མ་ཐོབ་པར་གྱུར་པས་ན། ལས་རྣམས་འགྲུབ་པར་འགྱུར་བ་ཡིན་ནོ། །འདོད་ཆགས་ལ་སོགས་པའི་བདེ་བ་ཐམས་ཅད་ཕུལ་བས་སོ་ཞེས་བྱ་བ་ལ་འདོད་ཆགས་ཐོག་མར་

59-1-27a

བྱས་པའི་བདེ་བ་ཐམས་ཅད་གང་ཡིན་པ་དེ་ནི་འདོད་ཆགས་ལ་སོགས་པའི་བདེ་བ་སྟེ། འདིར་འདོད་ཆགས་ལ་སོགས་པའི་སྒྲས་ནི་རྡོ་རྗེ་སེམས་དཔའ་ལ་སོགས་པ་སྟོན་ཏོ་། །འདོད་ཆགས་དམ་ཚིག་ཡིན་པར་བཤད། །ཆོས་ཀྱི་འདོད་པ་ཡིད་དུ་འོང་། །
ཞེས་རྒྱུད་ཕྱི་མའི་ལས་སྟོན་པའི་ཕྱིར་རོ། །དེ་ཡང་རྡོ་རྗེ་སེམས་དཔའ་ལ་སོགས་པ་བསྒོམས་པས་དུབ་པར་གྱུར་ན། ཕྱག་བཞི་ཡང་དང་ཡང་དུ་བྱས་པས་ངལ་བ་བསལ་བ་ནི་བདེ་བ་ཐམས་ཅད་ཕུལ་བ་སྟེ། ཕྱག་བཞིའི་མཆོད་པ་ཕུལ་བས་གྲུབ་པར་འགྱུར་རོ་ཞེས་གསུངས་
པའི་ཕྱིར་རོ། །དེ་ཡང་འདི་ནི་རང་གི་སེམས་བརྟན་པར་བྱ་བ་ཡིན་ཏེ། དེ་ལྟ་བུས་ནི་དེ་བཞིན་གཤེགས་པ་ཐམས་ཅད་མཉེས་པར་བྱས་པར་འགྱུར་རོ། །དེ་སྐད་དུ། དེའི་རྗེས་སུ། སྒྲུབ་པའི་སྦྱོར་བས་རྗེས་མཉེས་པ། །རྡོ་རྗེ་སེམས་དཔའ་ཉིད་ནི་ཡིན་པར་བཤད། །ཅེས་བཤད་
པའམ། རྡོ་རྗེ་སེམས་དཔའ་ལ་སོགས་པའི་བསྒོམ་པས་བདེ་བར་གྱུར་ན། བདེ་བ་འདིས་སེམས་ཅན་ཐམས་ཅད་བདེ་བར་གྱུར་ཅིག་ཅེས་བྱ་བ་ནི་ཕུལ་བ་ཡིན་ནོ། །རྡོ་རྗེ་སེམས་དཔའ་དང་འཁྱུད་ཅིང་འོ་བྱེད་པས་སོ་ཞེས་བྱ་བ་ནི་རྡོ་རྗེ་སེམས་དཔའ་མདུན་དུ་བཞུགས་སུ་གསོལ་ཏེ་བཅིངས་
ལ། འཁྱུད་ཅིང་འོ་བྱའོ། །འཁྱུད་པ་དང་འོ་བྱེད་པ་ལ་སོགས་པའི་ཕྱག་རྒྱ་ནི། འདི་ཉིད་ཀྱི་འོག་ནས་འཆད་དོ། །ཡང་ན་ཁམས་གསུམ་རྣམ་པར་རྒྱལ་བའི་མཆོག་ལས་བཏུས་པའི་བཟླས་པའི་རྣམ་པ་ཡིན་པར་བསྟན་ཏེ། གཟུགས་དེ་ལ་ནི་བཞུགས་བཞིན་ནམ་ཞེས་བཤད་པའི་
ཕྱིར་རོ། །བྱང་ཆུབ་སེམས་དཔའ་ཞེས་བྱ་བ་ལ་སོགས་པས། དེ་བསམ་པས་ཡི་གེ་ཧཱུྃ་ཉིད་དཔག་ཏུ་མེད་པར་བཟླས་པས་བྱང་ཆུབ་སེམས་དཔའ་ཐམས་ཅད་རྗེས་སུ་མཉེས་པར་བྱས་པར་འགྱུར་རོ། །རྡོ་རྗེ་ཐམས་ཅད་ནི་རྡོ་རྗེ་ཡིད་ལས་བྱུང་བ་ལ་སོགས་པ་སྟེ། དེ་རྣམས་
ཀྱིས་ནི་ཨོཾ་ན་མོ་བྷ་བ་བཛྲ་ཞེས་བྱ་བ་ལ་སོགས་པ་རང་གི་སྙིང་པོ་བཟླས་པས་ནང་གི་དབང་དུ་གྱུར་པ་ཉིད་དུ་བྱས་པ་ནི་རྗེས་སུ་མཉེས་པར་བྱས་པར་འགྱུར་རོ། །ལྷ་ཞེས་བྱ་བ་ལ་སོགས་པ་ལ། བརྒྱ་བྱིན་ལ་སོགས་པའི་གཟུགས་བརྙན་གྱི་མདུན་དུ་དེ་རྗེས་སུ་ཆགས་པར་བྱ་བའི་

59-1-27b

བསམ་པས་ཡི་གེ་ཧཱུྃ་བཟླས་བརྗོད་འབུམ་བྱས་ན། དེ་ནས་དེ་རྗེས་སུ་ཆགས་པས་བདག་ཉིད་ཀྱི་ཐམས་ཅད་ཉེ་བར་སྟོབས་པར་འགྱུར་རོ། །གནོད་སྦྱིན་མོ་ལ་སོགས་པ་ཡང་ཆུང་མ་ལ་སོགས་པའི་གཟུགས་ཀྱིས་བདག་ཉིད་སྟོབས་པར་བྱེད་དོ། །བདག་བསྲུང་བ་ལ་ནི་
ཡུངས་ཀར་ཧཱུྃ་ལས་རྡོ་རྗེ་རྩེ་ལྔ་པའི་གཟུགས་སུ་བསྐྱེད་ལ་རང་གི་སྤྱི་བོར་བཞག་ལ། རྡོ་རྗེ་འབར་བའི་ནང་དུ་བདག་ཉིད་ཚུད་པར་བསམས་ན་བདག་ཉིད་བསྲུང་བར་བྱས་པར་འགྱུར་རོ། །གཞན་བསྲུང་བ་ནི་གཡས་པའི་རྡོ་རྗེ་ཁུ་ཚུར་གྱིས་རྡོ་རྗེ་རྩེ་ལྔ་པ་བླངས་ལ། ཕ་རོལ་གྱི་ཡན་
ལག་དང་ཉིང་ལག་ཐམས་ཅད་དུ་རྡོ་རྗེར་བྱ་བའི་བསམ་པས་ཧཱུྃ་ཟློས་ཤིང་རྡོ་རྗེ་བསྐོར་བས་བྱ་སྟེ། དེ་ལྟ་བུས་ནི་གཞན་བསྲུང་བར་འགྱུར་རོ། །འོན་ཏེ་སྐྱེ་བོའི་ཚོགས་ཆེན་པོ་སྲུང་བར་བྱེད་པར་འདོད་པ་དེས། ཡིད་ཀྱི་རྡོ་རྗེ་བསམས་ལ། དེ་རྣམས་ཀྱི་ཡན་ལག་དང་ཉིང་ལག་
རྣམས་སུ་དེ་བཞིན་དུ་བསྐོར་ཞིང་ཕུར་བུ་དང་མཚམས་དང་། དཀྱིལ་འཁོར་གྱིར་བ་ལ་སོགས་པའི་ཚུལ་དུ་བྱས་པས་བསྲུང་བར་བྱའོ། །དེ་བཞིན་དུ་མིག་གཉིས་སུ་ཡི་གེ་ཧཱུྃ་ལས་རྡོ་རྗེ་བསྐྱེད་ལ། སྔ་མ་བཞིན་དུ་མཚམས་ལ་སོགས་པ་བཅིང་བར་བྱའོ། །དེ་བཞིན་དུ་རེངས་
པར་བྱ་བ་ལ་ནི་སེང་གེ་ལ་སོགས་པའི་མདུན་དུ་རྡོ་རྗེ་སེམས་དཔའ་བསམ་པར་བྱའོ། །རྨུགས་པར་བྱ་བ་ལ་ནི་བསྒྲུབ་པར་བྱ་བའི་ལྕེ་གཟུང་བའི་ཚུལ་གྱིས། རྡོ་རྗེ་བསྡམས་པས་རྡོ་རྗེ་བཟུང་ལ་དེ་བཅིང་བའི་ཚུལ་དུ་བྱས་ན་དེ་ལྐུགས་པར་འགྱུར་ཏེ། ཚིག་འཕྲོག་པར་འགྱུར་རོ་
ཞེས་བྱ་བའི་དོན་ཏོ། །རྨོངས་པར་བྱ་བ་ལ་ནི་བསྒྲུབ་པར་བྱ་བ་དང་གཅིག་ཏུ་བྱས་ལ་མིག་བཙུམས་ཏེ་བཟླས་པ་བྱའོ། །ཐམས་ཅད་བསད་པ་ལ་ནི་ལག་པ་གཡས་དང་གཡོན་པ་ལ་ཡང་ཧཱུྃ་ལས་རྡོ་རྗེ་བསྐྱེད་ལ། ལག་པ་གཡོན་པའི་རྡོ་རྗེ་ལ་བསྒྲུབ་པར་བྱ་བའི་མིང་བློས་བསམས་
ཏེ། ལག་པ་གཡས་པའི་རྡོ་རྗེས་བསྣུན་ན་ཐམས་ཅད་གསོད་པར་འགྱུར་རོ། །སེམས་ཅན་ཐམས་ཅད་ཅེས་བྱ་བ་ལ་སོགས་པ་ལ་དེ་རྣམས་རྒྱས་གདབ་པ་ལ་ནི། ཕྱག་ན་རྡོ་རྗེས་བཅོམ་ལ། དབང་པོ་ཉི་མ་གཞན་གྱི་དབང་དུ་འགྱུར་ཏེ། ཇི་ལྟར་དེས་མཐོང་དུ་ཟིན་ཀྱང་ཅི་ཡང་མི་དྲན་

59-1-28a

པ་དང་། དེ་བཞིན་དུ་རྣ་བ་ལ་སོགས་པས་ཀྱང་མི་ཐོས་པ་དང་། དྲི་མི་ཚོར་བ་དང་། རོ་མི་ཚོར་བ་དང་། རེག་པ་མྱོང་བར་མི་འགྱུར་བ་དང་། སེམས་ཀྱིས་ཀྱང་ཅི་ཡང་ཤེས་པར་མི་འགྱུར་རོ། །དེ་གང་གིས་འགྱུར་ཞེ་ན། རྡོ་རྗེ་མཁའ་འགྲོ་མའི་ཕྱག་རྒྱས་སོ་ཞེས་
བྱ་བ་གསུངས་ཏེ། མདའ་འཛིན་མའི་ལས་ཀྱི་ཕྱག་རྒྱས་སོ་ཞེས་བྱ་བའི་དོན་ཏོ། །གང་གི་ཕྱིར་དེ་ནི་རྡོ་རྗེ་མེ་ལྟར་རབ་ཏུ་འབར་བའི་དཀྱིལ་འཁོར་རྒྱས་འདེབས་པའི་ལས་ཅན་ཡིན་པར་བསྟན་པའི་ཕྱིར་རོ། །འདི་ཡང་ཁྲོ་བོ་ཆེན་པོའི་ཁུ་ཚུར་གཉིས་ཀྱིས་གར་བྱས་ལ། བསྟོད་པ་དང་
བཅས་པ་ཉིད་ཀྱིས་མདའ་འཕེན་པའི་ཚུལ་ཡིན་ནོ། །སྙིང་ཐམས་ཅད་ཅེས་བྱ་བ་ལ་སོགས་པ་ལ་ལྷའི་སྦྱོར་བས་བསྒྲུབ་པར་བྱ་བའི་ལུས་ལ། ཡིད་ཀྱིས་ཞུགས་ལ། སྙིང་གི་པདྨ་དང་། མིག་ལ་སོགས་པའི་དབང་པོ་དྲངས་ལ། དེ་རང་གི་ལག་གིས་བཏོན་ཏེ། དེ་རང་གི་སྙིང་
གར་བཞག་ནས་གཅིག་ཏུ་འདྲེས་པར་གྱུར་པར་བསམ་པར་བྱ་སྟེ། དེ་ལྟ་བུས་ནི་སྙིང་ཐམས་ཅད་འདྲེན་ཅིང་འབྱིན་པར་འགྱུར་རོ། །སེམས་ཅན་ཐམས་ཅད་ཅེས་བྱ་བ་ལ་སོགས་པ་ལ། བདག་ཉིད་རྡོ་རྗེ་གནོད་སྦྱིན་གྱི་གཟུགས་ནམ་མཁའི་ཁམས་ཐམས་ཅད་ཁྱབ་པར་བསམས་ལ། 
སྤྲིན་ལ་སོགས་པའི་བགེགས་ཐམས་ཅད་ཁར་བཅུག་ནས། བསྙེམས་པ་དང་བཅས་པས་ཧཱུྃ་བཟླས་པར་བྱའོ། །ཐམས་ཅད་ཅེས་བྱ་བ་ལ་སོགས་པ་ལ་མྱུར་ཞིང་མྱུར་བ་ཉིད་དུ་གར་ལས་བྱུང་བའི་རྡོ་རྗེ་ཁུ་ཚུར་གཉིས་ཀྱིས་བཅིངས་ལ་ཁ་ཕྱེ་སྟེ། དེ་ཉིད་ཞལ་ཤིན་ཏུ་འཇིགས་པ་དང་
དབུ་སྐྲ་གྱེན་དུ་བརྫེས་པ། དབུ་འོག་ནས་བསྟོད་པའི་ཚུལ་གྱིས་བྷྱོ་ཞེས་བྱ་བ་བརྗོད་པར་བྱ་སྟེ། དེ་ལྟ་བུ་ནི་རྡོ་རྗེ་འཇིགས་བྱེད་ཀྱི་ཕྱག་རྒྱ་ཡིན་ནོ། །ནོར་ཐམས་ཅད་ཅེས་བྱ་བ་ལ་སོགས་པ་ལ། དོང་རྩེ་དགུག་པ་ལ་སོགས་པའི་ཚུལ་གྱིས་བཟླས་བརྗོད་བྱ་བ་ནི། ནོར་ཐམས་ཅད་འགུགས་
པ་ཡིན་ནོ། །ནོར་དང་འབྲུ་ཞེས་བྱ་བ་ལ་སོགས་པ་ལ། རྡོ་རྗེ་ཧཱུྃ་ལས་བྱུང་བའི་ལག་པ་གཡས་པའི་མཛུབ་མོའི་རྩེ་མོ་དེ་དང་། གཡོན་པའི་ཧཱུྃ་གི་གཞུ་རྒྱུད་འདྲེན་པའི་ཚུལ་ནི་རྡོ་རྗེ་རྣལ་འབྱོར་མའི་ཕྱག་རྒྱ་སྟེ། རྡོ་རྗེ་མེ་ལྟར་རབ་ཏུ་འབར་བའི་ཕྱིའི་དཀྱིལ་འཁོར་དུ་འདིས་ནོར་དང་འབྲུ་

59-1-28b

ཐམས་ཅད་འགུགས་པ་ཡིན་ནོ། །ཐམས་ཅད་ཅེས་བྱ་བ་ལ་སོགས་པ་ལ་རྡོ་རྗེ་སྒྲའི་ཕྱག་རྒྱ་བཅིངས་ལ། རང་གི་མདུན་དུ་ཧཱུྃ་གི་གླུ་བྱས་པ་དེ་དབང་དུ་འགྱུར་རོ། །རྡོ་རྗེ་ཡིད་ལས་བྱུང་བའི་ལས་ཀྱི་ཕྱག་རྒྱ་ནི་རྡོ་རྗེ་མདའི་ཕྱག་རྒྱ་སྟེ། འདིས་ནི་ཐམས་ཅད་འབིགས་པ་དང་། རྗེས་
སུ་ཆགས་པར་འགྱུར་རོ། །ཀི་ལི་ཀི་ལའི་ལས་ཀྱི་ཕྱག་རྒྱས་ཕྱོགས་བཅུའི་དེ་བཞིན་གཤེགས་པ་ཐམས་ཅད་འཁྱུད་པས་ནི་ཐམས་ཅད་མཉེས་པར་འགྱུར་རོ། །གནོད་སྦྱིན་མའི་གཟུགས་བརྙན་ལ་སོགས་པ་ལ་ཡང་འཁྱུད་ནས་བསྒྲུབ་པར་བྱའོ། །སྡུག་པའི་བཅིང་བ་
བསྟན་པ་ལ་ནི་རྡོ་རྗེ་སྡུག་པའི་ཕྱག་རྒྱས་སྙིང་བཙིར་བར་བྱའོ། །རྡོ་རྗེ་སྙེམས་པ་ལ་ནི་རྡོ་རྗེ་སྙེམས་པའི་ལས་ཀྱི་ཕྱག་རྒྱས་མ་རུངས་པ་རྣམས་རབ་ཏུ་བསྒྲུབ་པར་བྱའོ། །འབར་བའི་ལྟ་བ་གཉིས་ཀྱིས་དབྲོག་པ་ལ་ནི་ལྟ་བས་དབྲོག་པའོ། །རྡོ་རྗེ་ཁུ་ཚུར་སྙིང་གར་བཞག་པ་ནི་གོས་
ལའོ། །སྣང་བར་བྱ་བ་ལ་ནི་རྡོ་རྗེ་ཐོགས་ལ་རྩེ་མོ་འབར་བ་འཕྲོ་བའི་ཚུལ་གྱིས་བསྐོར་བ་བྱ་བ་ཡིན་ནོ། །ལུས་བདེ་བར་བྱ་བ་ལ་ནི་རྡོ་རྗེ་བསྡམས་པས་རང་གི་མཚན་མ་བཟུང་ནས་བཟླས་བརྗོད་བྱ་སྟེ། འདི་ནི་བཅོམ་ལྡན་འདས་ཀྱིས་གཡོགས་ཏེ་བྱ་བ་ཡིན་ནོ་ཞེས་གསུངས་པ་ཡིན་
ནོ། །རྡོ་རྗེ་མཆོག་གི་གཟུགས་ཀྱི་ཕྱག་རྒྱ་ནི་གར་ལས་བྱུང་བའི་རྡོ་རྗེ་བསྡམས་པ་བཅིངས་ལ་གུང་མོ་གཉིས་མཛུབ་མོས་འཁྱུད་དེ། མཐེ་བོང་གཉིས་ཀྱི་མཛུབ་མོའི་རྩེ་མོ་སྦྱོར། མཐེའུ་ཆུང་གཉིས་ཀྱང་སྦྱར་བར་བྱ་བ་འདི་ནི་རྡོ་རྗེའི་གཟུགས་ཀྱི་མཆོག་སྟེ། འདི་བཅིངས་ལ་རྡོ་རྗེ་
ཡིད་ལས་བྱུང་བར་ལྷག་པར་མོས་པས་ཐམས་ཅད་དུ་གཟུགས་སུ་སྣང་བར་བྱའོ། །སྒྲ་ཐམས་ཅད་ཅེས་བྱ་བ་ལ་སོགས་པ་གར་ལས་བྱུང་བའི་རྡོ་རྗེ་བསྡམས་པ་ལས་གཡོན་པའི་མཛུབ་མོའི་རྩེ་མོ་བཀུག་པ་ནི་ཡུ་བ་ཡིན་ལ་གཡས་པའི་མཛུབ་མོས་དེ་ལ་བརྡུང་བ་སྟེ། འདིར་
སྒྲ་ཐམས་ཅད་ཐོས་པར་བྱའོ། །གར་ལས་བྱུང་བའི་རྡོ་རྗེའི་ལག་མཐིལ་མཉེད་ཅིང་དབུགས་འབྱིན་པ་དང་བཅས་པའི་ཧཱུྃ་གི་གླུས་དྲི་ཞིམ་པོ་ཚོར་བར་བྱའོ། །རྡོ་རྗེ་བསྡམས་པས་བཟུང་ལ་མངོན་པར་འདོད་པའི་གནས་སུ་བཞག་པ་ནི་རྡོ་རྗེ་སྤོ་བར་བྱའོ། །ལག་པ་གཉིས་ཀྱིས་སེ་

59-1-29a

གོལ་བརྡེབས་ཤིང་བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་དམར་པོས་བསྒྲུབ་པར་བྱ་བ་ཀུན་དུ་གང་བར་བསམས་ལ། ཡི་གེ་ཧཱུྃ་གིས་གླུ་ལེན་པར་བྱེད་པ་ནི་དབབ་པའོ། །གར་བྱེད་དུ་འཇུག་པ་ལ་ནི་ལྷའི་སྦྱོར་བས་བསྒྲུབ་པར་བྱ་བའི་ལུས་ལ་ཡིད་ཀྱིས་
ཞུགས་ཏེ་རང་ཉིད་གར་བྱེད་ཅིང་བཟླས་པ་བྱའོ། །ཐམས་ཅད་གླུ་ལེན་དུ་གཞུག་པ་ལ་ནི་དེ་བཞིན་དུ་བསྒྲུབ་པར་བྱ་བའི་ལུས་ལ་ཡི་གེ་ཧཱུྃ་ལས་རང་གི་ལྕེ་ལས་རྡོ་རྗེ་བསྐྱེད་དེ་གླུ་ལེན་དུ་གཞུག་པའི་བསམས་པས་ལྕེ་བསྐྱོད་ཅིང་ཧཱུྃ་གི་བཟླས་བརྗོད་བྱའོ། །སྨྲར་གཞུག་པ་ལ་ནི་དྲི་ཆབ་
ཀྱིས་རྡུལ་ཕྲ་རབ་ཡི་གེ་ཧཱུྃ་ལས་རྡོ་རྗེ་རྩེ་ལྔ་པའི་འབར་བའི་ངོ་བོ་ཉིད་དུ་བསྐྱེད་ལ། ཧཱུྃ་དེ་ཉིད་ཡོངས་སུ་བཟླས་ལ། གདོན་ལ་སོགས་པས་ཟིན་པ་རྣམས་ཆུ་དེ་འཐུང་དུ་བཅུག་ན་ཐམས་ཅད་སྨྲ་བར་འགྱུར་རོ། །བབས་ནས་ལན་སྟོན་པ་ལ་ནི་རྡོ་རྗེ་དབབ་པ་ལས་རྡོ་རྗེ་བཅིངས་པའི་རང་གི་
སྲིན་ལག་དང་མཐེའུ་ཆུང་གི་བར་དུ་མཐེ་བོང་བཅུག་ལ་བསྐྱོད་པ་འདི་དང་། ཡི་གེ་ཧཱུྃ་གི་བཟླས་པས་ཐམས་ཅད་བབས་ནས་ལན་སྟོན་པ་ལ་ནི་སྦྱོར་རོ། །གདོན་ཐམས་ཅད་ལས་ཐར་བར་བྱ་བ་ལ་ནི། གཾ་ལས་བྱུང་བའི་བ་དན་གསུམ་པ་གཉིས་བྱས་ལ། མཐེའུ་ཆུང་གཉིས་གཤིབས་
ཏེ། མཛུབ་མོ་གཉིས་རྡོ་རྗེར་བྱ། གུང་མོ་གཉིས་མདུད་དེ་བཟློག་ནས་དབང་བསྐུར་བའི་གནས་སུ་མཛུབ་མོའི་རྩེ་མོ་གཉིས་སྦྱར་ལ་བཞག་ནས་འདི་དང་ཡི་གེ་མུས་གདོན་ཐམས་ཅད་ལས་ཐར་བར་བྱའོ། །གདོན་ཐམས་ཅད་འཛིན་དུ་གཞུག་པ་ལ་ནི་ཚོགས་ཀྱི་བདག་པོ་བཀུག་སྟེ།
དེའི་མདུན་དུ་རང་གིས་རྡོ་རྗེ་གསོར་ཞིང་ཧཱུྃ་ཞེས་བྱ་བ་བཟླས་ལ། ཆེ་གེ་མོ་གདོན་གྱིས་འཛིན་དུ་ཆུག་ཤིག་ཅེས་བསྐུལ་བར་བྱའོ། །རིམས་ཐམས་ཅད་འཛིན་དུ་གཞུག་པ་ལ་ནི་རྡོ་རྗེ་བསྡམས་པ་བརྐྱང་ལ་སྙིང་གར་འདར་བར་བྱ་ཞིང་རྡོ་རྗེ་རིམས་ཀྱི་གདོན་གྱིས་འཛིན་དུ་གཞུག་པ་ནི་རིམས་
ཐམས་ཅད་འཛིན་དུ་གཞུགས་པ་སྟེ། རྡོ་རྗེ་བཅིང་བས་ནམ་མཁའ་ལས་རིམས་བླངས་ཏེ་བསྒྲུབ་པར་བྱ་བའི་སྙིང་པོ་ལ་བཅུག ནི་འཛིན་དུ་གཞུག་པའོ། །རིམས་ཐམས་ཅད་བསལ་བ་ལ་ནི་རྡོ་རྗེ་ལྟ་བས་བྱ་བ་ཅིང་རིམས་ཐམས་ཅད་བསལ་བར་བྱ་བའོ། །སྦྱར་བ་ལ་ནི་ཁྲོས་པས་མིག་མི་འཛུམས་

59-1-29b

པར་ལྟ་བས་བལྟ་བར་བྱ་བ་ནི་རྡོ་རྗེ་ལྟ་བའི་དུག་གི་ཕྱག་རྒྱའོ། །བྱ་བ་པ་ནི་གོ་སླའོ། །དུག་ཐམས་ཅད་བཟའ་བ་ལ་ནི་དང་པོའི་རྡོ་རྗེའི་མཛུབ་མོ་གཉིས་སྦྱར་ལ་རྐང་པའི་སོར་མོ་སྒྱུར་བར་བྱེད་ཅིང་། དུག་གི་སྟེང་དུ་བཞག་ལ། ཡི་གེ་ཧཱུྃ་གིས་བདུད་རྩིས་དུག་བདུད་རྩིར་གྱུར་པར་བསམ་པ་ནི། 
རྡོ་རྗེའི་བདུད་རྩི་སྟེ། འདིས་དུག་ཐམས་ཅད་བཟའ་བར་བྱའོ། །བདུད་ལ་སོགས་པ་ཞེས་བྱ་བ་ལ་བགེགས་ཐམས་ཅད་བསྐྲད་ཅིང་གཞིག་པ་ལ་ནི་འཁྲུགས་པས་དཔག་ཏུ་མེད་པར་བཟླས་པ་བྱས་ཏེ། མ་རུངས་པ་ཐམས་ཅད་བསད་པ་ལ་སོགས་པ་ནི་བརླག་པའོ། །མཁའ་འགྲོ་
མ་ཞེས་བྱ་བ་ལ་སོགས་པ་ལ་རྡོ་རྗེ་བསྙེམས་པས་རྡོ་རྗེ་གསོར་ཞིང་རྡོ་རྗེ་འབར་བས་མཁའ་འགྲོ་མའི་གདོན་རྣམས་བསྲེག་པར་གྱུར་པར་བསམ་ཞིང་ཧཱུྃ་ཞེས་བྱ་བ་བརྗོད་ན་མཁའ་འགྲོ་མའི་གདོན་ཐམས་ཅད་ལས་གྲོལ་བར་འགྱུར་རོ། །ཕྱག་རྒྱ་ཞེས་བྱ་བ་ལ་སོགས་པ་ལ་རྡོ་རྗེ་ཁུ་
ཚུར་གཉིས་རྡོ་རྗེ་འཕེན་པའི་ཚུལ་དུ་འཕངས་ན་གདོན་ཐམས་ཅད་ལ་སོགས་པའི་ཕྱག་རྒྱ་རྣམས་འཇིག་པར་འགྱུར་རོ། །མཁའ་འགྲོ་མ་ཞེས་བྱ་བ་ལ་སོགས་པ་ལ་རྡོ་རྗེ་ཧཱུྃ་མཛད་ཀྱི་ཕྱག་རྒྱས་གཡོན་པའི་མཛུབ་མོ་ཐད་ཀར་ཕྲེད་དུ་བཞག་སྟེ། གཡས་པའི་མཐེའུ་ཆུང་བརྐྱང་ལ། 
ཕྱག་རྒྱ་སྟེང་དུ་བཏེག་ནས་བཞག་པ་འདི་ནི་རྡོ་རྗེ་ཁ་ཊྭཱཾ་གའི་ཕྱག་རྒྱའོ། །མ་མོ་ཐམས་ཅད་ཀྱི་ཞེས་བྱ་བ་ལ་སོགས་པ་ལ་ཁྲོས་པས་རྡོ་རྗེ་ཁྲོ་བོའི་ཁུ་ཚུར་གྱིས་ལྟུང་བར་བྱེད་པའི་ཚུལ་དུ་སྡིགས་མཛུབ་བྱེད་ཅིང་ཧཱུྃ་ཕཊ་ཟློས་པ་འདི་ནི། རྡོ་རྗེ་ཁྲོ་བོའི་ཕཊ་ཀྱི་ཁྲོ་བོ་སྟོང་གི་ཕྱག་རྒྱ་སྟེ། འཇིག་
རྟེན་དང་འཇིག་རྟེན་ལས་འདས་པའི་རྡོ་རྗེར་བཤད་དོ། །མ་མོའི་གནས་སུ་ཁྲོས་པར་རྡོ་རྗེ་གསོར་ཞིང་བཟླས་བརྗོད་འབུམ་བྱས་ན་མཁའ་འགྲོ་མ་ཐམས་ཅད་དབང་དུ་གྱུར་ནས་ཅི་བགྱི་ཞེས་བྱ་བའི་མངག་གཞུག་མར་འགྱུར་རོ། །ཁྲོས་པས་ཧ་ཧ་ཧ་ཧ་ཧཱུྃ་ཞེས་ཟློས་ཤིང་རྡོ་རྗེ་ཁུ་ཚུར་གཉིས་
བཟློག་སྟེ། ཁའི་གྲྭར་བཞག་པ་འདི་ནི་རྡོ་རྗེ་དྲག་པོའི་ཧ་ཧ་ཞེས་བྱ་བའི་གད་རྒྱངས་སོ། །གཞན་གྱི་དཔུང་ཐམས་ཅད་གཞོམ་པ་ལ་ནི་ལག་པ་གཡས་པར་ཡི་གེ་ཧཱུྃ་ལས་རྡོ་རྗེ་རྩེ་ལྔ་པ་འབར་བའི་ཕྲེང་བ་ཀུན་དུ་རྣམ་པར་བསམས་ལ་ལག་པ་དེ་ཉིད་ཀྱིས་རྡོ་རྗེ་ཁུ་ཚུར་བཅིངས་ལ་མངོན་པར་བཟླས་

59-1-30a

ཏེ། བསྐལ་པའི་མེ་ལྟར་འབར་བའི་ཁུ་ཚུར་དེ་ཉིད་ཀྱིས་ཡང་དང་ཡང་དུ་འཕང་བར་བྱའོ། །རབ་ཏུ་དགའ་བའི་རྡོ་རྗེའི་ཕྱག་རྒྱ་བཅིངས་ལ་སྲིན་ལག་དང་མཐེའུ་ཆུང་བསྙམས་ལ་ཕྱེ་སྟེ་བརྐྱང་ནས། བ་དན་གྱི་རྩེ་མོ་ལྟ་བུར་བྱས་ལ་གྱེན་དུ་བསྒྲེང་བ་དེ་ནི་རྡོ་རྗེ་རྒྱལ་མཚན་
གྱི་ཕྱག་རྒྱ་སྟེ། འཐབ་པ་ཐམས་ཅད་ལས་ཐར་བར་བྱེད་པའོ། །རྡོ་རྗེ་བསྡམས་པ་བཅིངས་ལ་འཕེན་པ་འཕང་བ་འདི་ནི་རྡོ་རྗེ་འཇིགས་བྱེད་དོ། །ལྕགས་སྒྲོག་དང་འཁྲུལ་འཁོར་ཐམས་ཅད་དགྲོལ་བ་ལ་ནི་རྡོ་རྗེ་ཧཱུྃ་མཛད་ཀྱི་ཕྱག་རྒྱ་རྡོ་རྗེ་གར་ལས་བྱུང་བ་འཕང་བས་ཏེ། འདི་ནི་ཁབ་
ལོང་ངོ་། །དང་པོའི་རྡོ་རྗེའི་ཕྱག་རྒྱ་བཅིངས་ལ་མཐེ་བོང་དང་མཐེའུ་ཆུང་གི་རྩེ་མོ་བཞི་ལས་མེ་སྟག་རྣམ་པར་འཕྲོ་བའི་ཚུལ་དུ་བྱ་བ་འདི་ནི་རྡོ་རྗེ་མེ་ཤེལ་ལོ། །དེ་བཞིན་གཤེགས་པའི་སྐུའི་མཆོག་གི་ཕྱག་རྒྱ་བཅིངས་ལ་སྙིང་གར་བཞག་པ་ལ་ཁྲོ་བའི་ལྟ་བས་བལྟ་བ་ནི་ཆུ་མེད་པར་ཆུ་ཡང་
དག་པར་བསྐྱེད་པ་སྟེ། འདི་ནི་རྡོ་རྗེ་ཆུ་ཤེལ་ལོ། །རྡོ་རྗེ་བསྡམས་པ་ལས་མཐེ་བོང་གཡས་པ་བསྒྲེང་ལ་གཡོན་པའི་མཛུབ་མོ་ལྕགས་ཀྱུར་བྱ་བ་ནི་པྲ་སེ་ན་ཐམས་ཅད་དབབ་པའོ། །ལག་ངར་རྡོ་རྗེར་མཉམ་བཞག་སྟེ། །མཐེའུ་ཆུང་གཉིས་ནི་ལྕགས་ཀྱུར་བཅིངས། །མཛུབ་མོ་གཉིས་ནི་
སྡིགས་མཛུབ་བསྒྲེང་། །ཁམས་གསུམ་རྣམ་རྒྱལ་ཞེས་བྱའོ། །ཞེས་བྱ་བ་འདི་ནི་རྡོ་རྗེ་ཁུ་ཚུར་ལས་བྱུང་བ་ཡིན་ཏེ། རྡོ་རྗེ་ཧཱུཾ་མཛད་འདིས་ལན་གློན་པ་ཐམས་ཅད་སྟོན་པ་ཡིན་ནོ། །དང་པོ་རྡོ་རྗེའི་ཕྱག་རྒྱ་བཅིངས་ལ་ནམ་མཁའི་རྡོ་རྗེ་སེམས་དཔའ་ལ་སོགས་པ་བྱང་ཆུབ་སེམས་དཔའ་
ཆེན་པོ་བསྐྱེད་པའི་ཚུལ་དུ་བྱ་བ་ནི་རྫུ་འཕྲུལ་ཐམས་ཅད་བསྟན་པའོ། །ཏིང་ངེ་འཛིན་གྱི་མཆོག་ནི་བཅོམ་ལྡན་འདས་འོད་དཔག་ཏུ་མེད་པའི་ཏིང་ངེ་འཛིན་གྱི་ཕྱག་རྒྱ་སྟེ། དེས་ཆོ་འཕྲུལ་ཐམས་ཅད་བསྟན་པར་བྱའོ། །རྫུ་འཕྲུལ་དང་ཆོ་འཕྲུལ་དག་གི་ཁྱད་པར་ནི་ནམ་མཁའ་ལ་འགྲོ་བ་ནི་རྫུ་
འཕྲུལ་ལོ། །འོད་ཟེར་རབ་ཏུ་འགྱེད་པ་ལ་སོགས་པ་ནི་ཆོ་འཕྲུལ་ཡིན་ནོ། །རྡོ་རྗེ་ཁུ་ཚུར་གཉིས་གློག་འགྱུ་བ་འདེབས་པའི་ཚུལ་དུ་ནམ་མཁའ་ལ་བསྐོར་བར་བྱ་བ་འདི་ནི་རྡོ་རྗེ་རྫུ་འཕྲུལ་རྣམ་པར་འཕྲུལ་པའོ། །རྡོ་རྗེ་ཁུ་ཚུར་གྱི་མཛུབ་མོ་གཉིས་ལྕགས་ཀྱུར་བྱས་ལ་གཅིག་ལ་གཅིག་

59-1-30b

མདུད་པ་བྱས་ལ་གཅུ་ཞིང་གཅུ་བར་བྱ་བ་འདི་ནི་ལྷ་ཐམས་ཅད་དབབ་པར་བྱེད་པའི་རྡོ་རྗེ་སྐོར་བར་བྱེད་པའི་ཕྱག་རྒྱའོ། །ཀླུའི་གཟུགས་བརྙན་བྱས་ལ་ཀླུ་ཡོད་པའི་མཚོར་ཞུགས་ཏེ། ཀླུ་དེ་ཉིད་གཡོན་བརྐྱང་བས་མནན་ལ་བཟླས་བརྗོད་བྱས་ན་རྗེས་སུ་འབྲང་བར་འགྱུར་རོ། །རྡོ་རྗེ་
བཀའ་བསྒོ་བ་ནི་རྡོ་རྗེ་ཁུ་ཚུར་གཉིས་ཀྱི་ལུང་བསྒོ་བར་བྱེད་པའོ། །ལྷ་ཆེན་པོ་གཡོན་བརྐྱང་བའི་གནས་པས་མནན་ལ་ཁྲོས་པས་བཟླས་བརྗོད་བྱས་ན་འབྱུང་པོ་ཐམས་ཅད་འདུལ་བ་ཡིན་ནོ། །དང་པོའི་རྡོ་རྗེའི་ཕྱག་རྒྱ་བཅིངས་ལ། མཛུབ་མོ་བསྒྲེང་བས་བཟློག་པ་ནི་རྡོ་རྗེ་སྲིད་སྲུང་གི་ཕྱག་
རྒྱ་སྟེ། སེར་བ་ཐམས་ཅད་ཟློག་པར་བྱེད་པའོ། །རྡོ་རྗེ་ཐལ་མོ་ལས་མཛུབ་མོ་གཉིས་གཤིབས་ལ་དཔྲལ་བར་བཞག་ནས། སོར་མོ་ལྷག་མ་རྣམས་འོད་ཟེར་འགྱེད་པའི་ཚུལ་དུ་བྱས་པ་འདི་ནི་རྡོ་རྗེ་ཁྲོ་གཉེར་ཅན་གྱི་ཕྱག་རྒྱ་སྟེ་གློག་འབབ་པ་ཐམས་ཅད་ཟློག་པར་བྱེད་པའོ། །ཆར་དབབ་པ་
དང་ཆར་གཅད་པ་དང་། སྤྲིན་བསྐྱེད་པ་ནི་གོ་སླའོ། །དང་པོའི་རྡོ་རྗེ་ནི་ཕྱག་རྒྱ་བཅིངས་ལ། རྡོ་རྗེ་ལྟ་བས་བལྟ་བ་ནི་སྤྲིན་གཞིག་པ་སྟེ། རྡོ་རྗེ་ནམ་མཁའི་སྤྲིན་ནོ། །དང་པོའི་རྡོ་རྗེ་ཕྱག་རྒྱ་བཅིངས་ལ་མཐེ་བོང་གཉིས་གདེངས་ཀ་བསྒྱིངས་པའི་ཚུལ་དུ་བསྟན་པ་བྱས་པ་འདི་ནི་རྡོ་རྗེ་གླུའི་ཕྱག་
རྒྱའོ། །ཟངས་མའི་བུམ་པ་སྤོས་ཆུས་ཡོངས་སུ་གང་བ་རྡོ་རྗེ་ཁུ་ཚུར་གྱིས་བཟུང་ལ། ཇི་སྲིད་ཆུ་ལུད་པར་གྱུར་པ་དེ་སྲིད་ཀྱི་བར་དུ་བཟླས་བརྗོད་བྱ་སྟེ། འདི་ནི་གཏེར་ཤེས་པར་བྱ་བའི་ཕྱག་རྒྱའོ། །དང་པོའི་རྡོ་རྗེའི་ཕྱག་རྒྱ་དབང་བསྐུར་བའི་གནས་སུ་བཞག་ལ་གཏེར་བརྐོ་བའི་ཚུལ་དུ་
བྱ་བ་ནི་རྡོ་རྗེ་འཇོར་གྱི་ཕྱག་རྒྱའོ། །འདི་ཉིད་ནོར་ལེན་པའི་ཚུལ་གྱིས་དཔྲལ་བར་བཞག་པ་ནི་གཏེར་ཐམས་ཅད་རྙེད་པའོ། །མདུན་དུ་རྒྱལ་སྲིད་ཐོབ་པ་ཉིད་ཀྱི་ཚུལ་དུ་དཔྲལ་བར་བཞག་པ་འདི་ནི་རྡོ་རྗེ་དབང་བསྐུར་བ་སྟེ། འདིས་རྒྱལ་སྲིད་ཐམས་ཅད་ཐོབ་པར་འགྱུར་རོ། །མདུན་
ཉིད་དུ་ས་རྣམས་ཐོབ་པའི་ཚུལ་དུ་དཔྲལ་བར་བཞག་པ་འདི་ནི་རྡོ་རྗེ་དབང་བསྐུར་བ་སྟེ། འདིས་ས་ཐམས་ཅད་ཀྱི་བདག་ཉིད་དུ་འགྱུར་རོ། །རྡོ་རྗེ་འཁོར་ལོ་ནི་འོག་ནས་བཤད་པའི་རྡོ་རྗེ་འཁོར་ལོའི་དཀྱིལ་འཁོར་དེས་དཀྱིལ་འཁོར་ཐམས་ཅད་བསྒྲུབ་པར་བྱའོ། །དང་པོའི་རྡོ་རྗེའི་ཕྱག་རྒྱ་

59-1-31a

ནི་བདེ་བ་ཆེན་པོའི་དམ་ཚིག་གི་ཕྱག་རྒྱའོ། །རབ་ཏུ་དགའ་བའི་རྡོ་རྗེ་ཞེས་བཤད་པ་ནི་བཅོམ་ལྡན་འདས་རྡོ་རྗེ་སེམས་དཔའི་ལས་ཀྱི་ཕྱག་རྒྱའོ། །གང་ལག་པ་གཡས་པའི་མཛུབ་མོ་ལྕགས་ཀྱུར་བྱ་བ་ནི་རྡོ་རྗེ་བསྙེམས་པའི་ལྕགས་ཀྱུའི་ཕྱག་རྒྱའོ། །དང་པོའི་
རྡོ་རྗེའི་ཕྱག་རྒྱ་ཉིད་ནི་རྡོ་རྗེ་གྲུབ་པའི་ཕྱག་རྒྱའོ། །བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་རབ་སམས་ལ། ཟླ་བའི་གཟུགས་ལ་གནས་ནས་ནི། །ནམ་མཁའི་སྟེང་དུ་འདུག་ནས་སུ། །ལག་ཏུ་རྡོ་རྗེ་བསྒོམས་ན་ནི། །རྡོ་རྗེ་རིག་པ་འཛིན་པར་འགྱུར། །ཞེས་བྱ་
བ་འདི་ནི་རྡོ་རྗེ་རིག་པ་འཛིན་པའི་ཕྱག་རྒྱའོ། །རིག་པ་ཐམས་ཅད་ཀྱི་མཆོག་གི་ཕྱག་རྒྱ་ནི་དང་པོའི་རྡོ་རྗེ་ཉིད་རྡོ་རྗེ་ཕྲ་མོའི་སྦྱོར་བ་ཤིན་ཏུ་མཉམ་པར་གཞག་ལ་བསྒོམ་པར་བྱའོ། །བྱང་ཆུབ་སེམས་དཔའ་ཐམས་ཅད་བསྒོམ་པ་ལ་ནི་ཐུགས་ཀྱི་ཕྱག་རྒྱས་སོ་ཞེས་བྱ་བ་ནི་གང་ཐུགས་
ཀྱི་རྡོ་རྗེ་འདི་ཉིད་ཀྱིས་བྱང་ཆུབ་སེམས་དཔའ་ཐམས་ཅད་བསྒྲུབ་པར་བྱའོ། །རྡོ་རྗེ་སེམས་དཔའི་ཕྱག་རྒྱ་ཆེན་པོ་ནི་གོ་སླའོ། །བྱང་ཆུབ་མཆོག་གི་ཡེ་ཤེས་ཀྱི་ཕྱག་རྒྱ་སྟེ་དེས་སངས་རྒྱས་ཉིད་བསྒྲུབ་པར་བྱའོ། །དཔལ་མཆོག་དང་པོའི་ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུ་ལས་
རབ་ཏུ་དགའ་བའི་རྡོ་རྗེའི་དཀྱིལ་འཁོར་གྱི་འགྲེལ་པ་མདོར་བཤད་པ་རྫོགས་སོ།།      །།རང་བཞིན་མཉམ་ཞིང་ཆ་མཉམ་པ་ལ་སྤྱོད་པའི་སེམས་ཅན་རྣམས་རྗེས་སུ་གཟུང་བར་བྱ་བའི་ཕྱིར། དེ་བཞིན་གཤེགས་པའི་དཀྱིལ་འཁོར་སྟོན་པར་མཛད་པར་བཞེད་པས་དེ་རྣམས་ཞེས་
བྱ་བ་ལ་སོགས་པར་ཉེ་བར་དགོད་པར་མཛད་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། རབ་ཏུ་དགའ་བའི་དཀྱིལ་འཁོར་གྱི་རྗེས་སུ་ཐོགས་ལ་ཞེས་བྱ་བའི་དོན་ཏོ། །ཡང་ཞེས་བྱ་བའི་སྒྲ་ནི་སླར་ཡང་ཞེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་
ཞི་བའི་ཆོས་ཉིད་ནི་དེ་བཞིན་ཉིད་དུ་རོ་གཅིག་པའི་ཡེ་ཤེས་ཏེ། ཟད་པ་དང་མི་སྐྱེ་བ་ཤེས་པའི་མཚན་ཉིད་ཅན་ནོ། །དེ་ཉིད་ནི་མངོན་པར་རྫོགས་པར་བྱང་ཆུབ་པ་སྟེ། དེ་མངོན་པར་བསྒྲུབ་ཅིང་མངོན་སུམ་དུ་མཛད་པར་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གང་གིས་འགྱུར་བ་འདི་ཉིད་

59-1-31b

སྟོན་པར་མཛད་ཅིང་གསུངས་པའོ། །རྡོ་རྗེ་རྣམས་ཀྱི་མཉམ་པ་ཉིད་ཡིན་པས་ན་རྡོ་རྗེ་མཉམ་པ་ཉིད་དེ། གཟུང་བ་དང་འཛིན་པ་དང་བྲལ་བ་ཉིད་དོ། །དེ་བས་ན་རྡོ་རྗེའི་སྒྲས་ནི་སེམས་དང་སེམས་ལས་བྱུང་བ་གཉིས་སུ་མེད་པ་ཉིད་ཡིན་པར་མངོན་པར་འདོད་ལ། དེའི་མངོན་
པར་རྫོགས་པར་བྱང་ཆུབ་པ་ནི་མངོན་སུམ་དུ་བྱེད་པའོ། །དེ་ཉིད་ནི་བྱང་ཆུབ་བོ། །གཏན་ཚིགས་གང་གི་ཕྱིར་ཞེ་ན། རྡོ་རྗེ་སྲ་བ་ཉིད་ཀྱི་ཕྱིར་ཞེས་བྱ་བ་གསུངས་ཏེ། གང་གི་ཕྱིར་དེ་བཞིན་ཉིད་དང་སྟོང་པ་ཉིད་དང་། འདུས་མ་བྱས་པའི་ངོ་བོ་ཉིད་ཡིན་པས་རྡོ་རྗེ་དེ་ནི་རོ་གཅིག་པའི་ཡེ་
ཤེས་ཏེ། དེ་ཐོབ་པས་སྲོག་ཆགས་དང་སྲོག་ཆགས་མ་ཡིན་པ་རྣམས་དང་། འདོད་ཆགས་དང་ཞེ་སྡང་ལ་སོགས་པ་གཉིས་སུ་རྟོག་པ་རྣམས་ཀྱིས་མི་ཕྱེད་པས་ན། རྡོ་རྗེ་ལྟར་སྲ་བ་ཡིན་ཏེ། དེ་བས་ན་རྡོ་རྗེ་སྲ་བ་ཉིད་ཀྱི་ཕྱིར་ཞེས་བྱ་བ་གསུངས་པ་ཡིན་ནོ། །དོན་ཞེས་བྱ་བའི་སྒྲས་ནི་
གཟུགས་ལ་སོགས་པའི་དོན་ནོ། །ཡུལ་རྣམས་ལ་བྱ་བར་བཤད་ལ། དོན་རྣམས་ཀྱི་མཉམ་པ་ཉིད་ནི་དོན་གྱི་མཉམ་པ་ཉིད་དེ། དོན་དམ་པར་དངོས་པོ་མེད་པའི་ངོ་བོ་ཉིད་དོ། །ཡང་ན་བདག་གི་རྣམ་པའི་ཉོན་མོངས་པ་ཅན་གྱི་ཡིད་ནི་དོན་ཡིན་ལ། དེ་དེའི་མཉམ་པ་ཉིད་ཡིན་པས་ན་
དོན་གྱི་མཉམ་པ་ཉིད་དེ་སྔ་མ་བཞིན་ནོ། །དེ་མངོན་པར་རྫོགས་པར་བྱང་ཆུབ་པ་ཡང་སྔ་མ་དང་འདྲའོ། །དེ་ཉིད་ནི་བྱང་ཆུབ་ཆེན་པོ་ཡང་ཡིན་ནོ། །ཅིའི་ཕྱིར་ཞེ་ན། དོན་གཅིག་པ་ཉིད་ཀྱི་ཕྱིར་ཞེས་བྱ་བ་སྟེ། དོན་གཅིག་པ་ནི་དེ་བཞིན་ཉིད་ཡིན་ལ། དོན་གཅིག་པའི་དངོས་པོར་གྱུར་པས་
ན་དོན་གཅིག་པ་ཉིད་ཅེས་བྱ་བ་སྟེ། དེ་རྒྱུར་གྱུར་པས་དོན་གྱི་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །ཆོས་ཞེས་བྱ་བ་ནི་ལུང་གི་ཆོས་ཏེ། ཐེག་པ་གསུམ་ལ་སོགས་པ་བཤད་པའི་ཚུལ་ལམ་ཡང་ན་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་། 
སངས་རྒྱས་ཀྱི་ཆོས་མ་འདྲེས་པ་ལ་སོགས་པ་ནི་ཆོས་སོ། །དེ་རྣམས་ཀྱི་མཉམ་པ་ཉིད་ནི་སྔ་མ་བཞིན་དུ་བལྟ་བར་བྱའོ། །འདིའི་མངོན་པར་རྫོགས་པར་བྱང་ཆུབ་པ་ཡང་སྔ་མ་བཞིན་དུ་བཤད་པར་བྱ་སྟེ་དེ་ཉིད་ནི་བྱང་ཆུབ་ཆེན་པོའོ། །གཏན་ཚིགས་གང་གི་ཕྱིར་ཞེ་ན། ངོ་བོ་ཉིད་

59-1-32a

ཀྱིས་རྣམ་པར་དག་པའི་ཕྱིར་ཞེས་བྱ་བ་གསུངས་ཏེ། གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བ་ཉིད་ཀྱི་ཕྱིར་ཞེས་བྱ་བའི་དོན་ཏོ། །ཐམས་ཅད་ནི་མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་ཚོགས་རྣམས་ཏེ། དེ་རྣམས་ཀྱི་མཉམ་པ་ཉིད་ནི་ཐམས་ཅད་ཀྱི་མཉམ་
པ་ཉིད་དེ་དངོས་པོ་མེད་པའི་ངོ་བོ་ཉིད་དེ། དེའི་མངོན་པར་རྫོགས་པར་བྱང་ཆུབ་པ་ནི་རྟོགས་པར་གྱུར་པའོ། །དེ་ཉིད་ནི་བྱང་ཆུབ་ཆེན་པོ་སྟེ། ཉན་ཐོས་དང་རང་སངས་རྒྱས་ཀྱི་བྱང་ཆུབ་ཆེན་པོ་ལ་ལྟོས་ན་བྱང་ཆུབ་ཀྱང་ཡིན་ལ། ཆེན་པོ་ཡང་ཡིན་པས་ན་བྱང་ཆུབ་ཆེན་པོ་སྟེ། བླ་ན་མེད་པ་ཡང་དག་པར་
རྫོགས་པའི་བྱང་ཆུབ་བོ། །གཏན་ཚིགས་གང་གི་ཕྱིར་ཞེ་ན། ཐམས་ཅད་ལ་རྣམ་པར་མི་རྟོག་པའི་ཕྱིར་ཞེས་བྱ་བ་གསུངས་ཏེ། མིག་ལ་སོགས་པའི་རྣམ་པར་ཤེས་པའི་རྣམ་པར་རྟོག་པ་མེད་པ་ཉིད་ཀྱི་ཕྱིར་ཞེས་བྱ་བའི་དོན་ཏོ། །ཡང་ན་དེ་བཞིན་གཤེགས་པ་དང་། རིན་པོ་ཆེ་དང་། པདྨ་དང་ལས་
ཀྱི་རིགས་རྣམས་ལ་རྡོ་རྗེ་དང་དོན་དང་ཆོས་དང་ཐམས་ཅད་ཀྱི་སྒྲས་བཤད་ལ། དེ་རྣམས་ཀྱི་མཉམ་པ་ཉིད་དེ། དེ་ཉིད་མངོན་པར་རྫོགས་པར་བྱང་ཆུབ་པ་ཡིན་ལ། བྱང་ཆུབ་ཆེན་པོ་ཡང་དེ་ཉིད་ཡིན་ཞེས་སྔ་མ་བཞིན་དུ་ཐམས་ཅད་བརྗོད་པར་བྱའོ། །ཡེ་ཤེས་ཀྱི་ཁུ་ཚུར་ཡོངས་སུ་འཛིན་པ་
ཞེས་བྱ་བ་ནི། བྱང་ཆུབ་མཆོག་གི་ཕྱག་རྒྱ་བཅིངས་པ་ཞེས་བྱ་བའི་དོན་ཏོ། །དོན་གྱི་གནས་འདི་ཉིད་ཅེས་བྱ་བ་ནི། རྡོ་རྗེ་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ཞེས་བྱ་བ་ལ་སོགས་པ་ཚིག་བཞི་པོའི་དོན་སླར་ཡང་རྒྱ་ཆེར་སྟོན་ཅིང་ཡང་རྣམ་གྲངས་གཞན་གྱིས་འཆད་པར་མཛད་པའོ། །
འཛུམ་པ་ཞེས་བྱ་བ་ནི་ཅུང་ཟད་བཞད་པ་སྟེ། དེ་དང་བཅས་པས་འདི་གསུངས་སོ་ཞེས་བྱ་བར་སྦྱར་རོ། །ཆོས་ཐམས་ཅད་ནི་ཚིག་བཞིར་གསུངས་པའོ། །དེ་རྣམས་ཀྱིས་མཉམ་པ་ཉིད་ནི་ཆོས་ཐམས་ཅད་ཀྱི་མཉམ་པ་ཉིད་དེ། དེ་ལ་དམིགས་པའི་ངེས་པའི་ཚུལ་གྱིས་ཐུགས་ནི་སྙིང་སྟེ་དེ་སྟོན་
པར་བྱེད་པའི་ཡི་གེ་ལ་ཡང་ཉེ་བར་གདགས་པས་སྙིང་པོ་ཞེས་བྱ་སྟེ། དེ་གསུངས་པ་ནི་བཀའ་སྩལ་པའོ། །བཞད་པ་ཆེན་པོས་བཞད་ཅིང་ཞེས་བྱ་བ་ནི་དེ་བཞིན་གཤེགས་པས་འདུལ་བའི་སེམས་ཅན་གྱི་ཁམས་རྣམས་ཀྱིས་དེ་བཞིན་གཤེགས་པའི་ཆ་ལུགས་ཀྱིས་སངས་རྒྱས་ཀྱི་བྱང་

59-1-32b

ཆུབ་ཐོབ་པར་མཐོང་བ་དང་། དགའ་ཞིང་རབ་ཏུ་མགུ་བ་སྐྱེས་ནས་བཞད་པ་ཆེན་པོས་བཞད་པ་མཛད་དོ། །དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་ཡིན་པས་དེ་བཞིན་གཤེགས་པ་ཐམས་ཅད་དེ། དེ་ཉིད་ནི་རྡོ་རྗེ་ཡིན་ལ། དེ་རྣམས་ཀྱི་དཀྱིལ་འཁོར་ཏེ། དེ་བྱིན་གྱིས་
རློབ་པ་ནི་བསྟན་པར་བྱས་པ་དེ་ལ་དམིགས་པའི་སེམས་རྩེ་གཅིག་པ་གང་གིས་ཁྱད་པར་དུ་བྱས་པ་གང་ཡིན་པ་དེ་ལ་ནི་མིང་འདི་ཉིད་ཅེས་བྱ་སྟེ། ཏིང་ངེ་འཛིན་དེ་ལ་སྙོམས་པར་ཞུགས་ནས་དཀྱིལ་འཁོར་ཆེན་པོ་འདི་གསུངས་སོ་ཞེས་བྱ་བར་སྦྱར་རོ། །མིང་འདི་སྐད་ཅེས་བྱ་ཞེ་ན། དེ་
བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་ནི་རྡོ་རྗེའི་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ལ་སོགས་པའི་མཚན་ཉིད་ཅན་ནོ། །དེ་ཉིད་ནི་རྡོ་རྗེ་སྟེ། དེ་སྟོན་པར་བྱེད་པ་ཉིད་ཀྱིས་ན་མིང་དེ་ཉིད་ཅེས་བྱ་
བའི་དཀྱིལ་འཁོར་ཆེན་པོ་གང་ཡིན་པ་འདི་གསུངས་སོ་ཞེས་བྱ་བ་ནི་བཀའ་སྩལ་པའོ། །དཀྱིལ་འཁོར་ནི་སྔར་བཤད་པ་ཉིད་དེ་ཐམས་ཅད་དུ་སྒོ་ནི་བརྒྱད་ཆར་བྱའོ། །འདིར་སྒྲུབ་པ་ཐམས་ཅད་ནི་ཡི་གེ་ཨཱ་ཉིད་ཀྱིས་བྱའོ། །དེ་བཞིན་གཤེགས་པ་ཞེས་བྱ་བ་ལ་སོགས་པ་ལ་དེ་བཞིན་
གཤེགས་པ་ཐམས་ཅད་ཀྱི་རྡོ་རྗེའི་ཕྱག་རྒྱ་བཅིང་བ་ལས་བྱུང་བའི་དང་པོའི་རྡོ་རྗེ་ཉིད་བཅིངས་ལ། བཛྲ་བཛྲ་ཨ་ཞེས་ཟློས་ཤིང་ཆོ་ག་ཇི་ལྟ་བ་བཞིན་དུ་འཇུག་པར་བྱའོ། །རྣམ་པར་མི་རྟོག་སྦྱོར་བ་ཡི། །ཞེས་བྱ་བ་ནི་ཆོས་བདག་མེད་པ་བསྒོམས་པས་སོ། །སློབ་མ་རྣམས་ལ་སྦྱིན་ཞེས་བྱ་བ་ནི་
འབྱོར་པ་ཅི་ཡོད་པས་ཁ་ཟས་སྦྱིན་ནོ་ཞེས་བྱ་བའི་དོན་ཏོ། །མཚན་མ་བཞི་ཞེས་བྱ་བ་ནི་རྡོ་རྗེ་དང་རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེ་སྐལ་བ་ཇི་ལྟ་བ་བཞིན་དུ་མེ་ཏོག་གང་ལ་བབས་པ་དེ་ལ་མཚན་མ་དེ་སྦྱིན་པར་བྱའོ། །དཀྱིལ་འཁོར་དུ་ཞུགས་པ་ཙམ་ཉིད་ཀྱིས་ལས་རྣམས་འགྲུབ་པར་
འགྱུར་ཞེས་བྱ་བ་འདི་ནི་ཡེ་ཤེས་བབས་པར་གྱུར་པ་རྣམས་ཀྱི་ཡིན་པར་ཐམས་ཅད་བལྟ་བར་བྱའོ། །དེ་བཞིན་གཤེགས་པ་ཐམས་ཅད་ཀྱི་བདེ་བ་ནི་རྡོ་རྗེ་སེམས་དཔའ་ལ་སོགས་པ་བསྒོམས་པའི་བདེ་བ་སྟེ། དེས་དེ་བཞིན་གཤེགས་པ་ཐམས་ཅད་ཚིམ་པར་བྱ་བའི་ཕྱིར། རྡོ་རྗེ་སེམས་དཔའ་

59-1-33a

ལ་སོགས་པ་བབས་པས་སོ། །བདག་ཕུལ་བ་ནི་ཕྱག་བཞིའི་སྦྱོར་བས་སོ། །མེ་ཏོག་ལ་སོགས་པ་ལ་བཟླས་པ་ནི་རྡོ་རྗེ་སྦྲང་རྩི་དང་། རྡོ་རྗེ་སྤྲིན་དང་། རྡོ་རྗེ་སྟོན་དང་། རྡོ་རྗེ་དགུན་རྣམས་ཀྱི་སྔགས་བརྗོད་པ་སྟེ། དེས། སངས་རྒྱས་ཆོས་དང་དགེ་འདུན་ནི། །དམ་
ཚིག་ཆེན་པོ་གསུམ་འདི་ཡིན། །ཞེས་འོག་ནས་བཤད་དེ། དེ་ལྟ་བུས་དཀོན་མཆོག་གསུམ་མཆོད་པར་བྱའོ། །ཐམས་ཅད་ལ་བྱམས་པའི་བཟླས་པ་ནི་ཕྱོགས་བཅུའི་སེམས་ཅན་གྱི་ཁམས་ཐམས་ཅད་ལ་བྱམས་པས་ཁྱབ་པར་སྤྲོ་སྟེ་བཟླས་པ་ནི་བྱམས་པའི་བཟླས་པའོ། །ས་གནོན་གྱི་ཕྱག་རྒྱ་
བཅིངས་ལ། སྟོང་པ་ཉིད་ཀྱི་ཏིང་ངེ་འཛིན་ལ་ལྷག་པར་མོས་པར་བྱས་པའི་བཟླས་པ་ནི་བརྟན་ཞིང་ངེས་པའི་བཟླས་པའོ། །ནམ་མཁའི་སྙིང་པོའི་ཏིང་ངེ་འཛིན་ལ་གནས་ཏེ། རྡོ་རྗེ་རིན་ཆེན་གྱི་ཏིང་ངེ་འཛིན་གྱི་ཕྱག་རྒྱ་བཅིངས་ལ། རྒྱན་ཐམས་ཅད་ཀྱིས་དེ་བཞིན་གཤེགས་པ་རྣམས་ཡང་དག་པར་
མཆོད་ལ། བདག་ཉིད་ཀྱིས་རང་ཉིད་ལ་རྣམ་པ་ཐམས་ཅད་བཅིང་བར་བྱའོ། །ལག་པ་གཡོན་པས་པདྨ་བཟུང་ལ། རང་གི་སྙིང་གར་བཞག་སྟེ། ལག་པ་གཡས་པས་དབྱེ་བར་བྱ་བ་འདི་ནི་རྡོ་རྗེ་པདྨ་ལ་ལྟ་བའོ། །འཕགས་པ་རྡོ་རྗེ་ཉིད་ནི་རྡོ་རྗེ་ལས་ཀྱི་མཆོག་གོ། །ཡེ་ཤེས་ཀྱི་ཁུ་ཚུར་ནི་བྱང་
ཆུབ་ཀྱི་མཆོག་གོ། །དེ་བཞིན་གཤེགས་པའི་དཀྱིལ་འཁོར་གྱི་འགྲེལ་པའོ།    །ད་ནི་ཁྲོ་བས་ཁྲོ་བ་སྤང་བར་བྱ་བའི་ཕྱིར། རྡོ་རྗེ་ཧཱུྃ་མཛད་ཀྱི་དཀྱིལ་འཁོར་སྟོན་པར་བཞེད་པ། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །མ་རུངས་པ་ཡང་ཡིན་ལ་ཐམས་
ཅད་ཀྱང་ཡིན་པས་མ་རུངས་པ་ཐམས་ཅད་དེ། ལྷ་ཆེན་པོ་ལ་སོགས་པའོ། །མ་རུངས་པ་ཐམས་ཅད་འདུལ་བར་མཛད་པས་ན་མ་རུངས་པ་ཐམས་ཅད་འདུལ་བ་སྟེ་འདུལ་བར་མཛད་ཅིང་དེས་ཁྲོ་བ་སྤོང་བར་མཛད་པས་འདུལ་བའོ། །དེ་ནི་རྡོ་རྗེ་ཧཱུྃ་མཛད་ཀྱི་གཟུགས་ཅན་གྱི་དེ་བཞིན་གཤེགས་
པ་ཤཱཀྱ་ཐུབ་པའོ། །ཡང་ཞེས་བྱ་བ་ནི་སླར་ཡང་ཞེས་བྱ་བའི་དོན་ཏོ། །ཆོས་ཀྱང་ཡིན་ལ་ཐམས་ཅད་ཀྱང་ཡིན་པས་ཆོས་ཐམས་ཅད་དེ། འདོད་ཆགས་ལ་སོགས་པའོ། །དེ་རྣམས་ཀྱི་མཉམ་པ་ཉིད་ནི་དེ་བཞིན་ཉིད་དོ། །དེས་རྣམ་པར་རྒྱལ་བ་ནི་མཉམ་པ་ཉིད་བསྒོམས་པས། ཞེ་སྡང་ལ་སོགས་

59-1-33b

པ་ངེས་པར་བསྩལ་བ་ཞེས་བྱ་བའི་དོན་ཏོ། །རྣམ་པར་རྒྱལ་བ་དེའི་བསྡུ་བ་ཤེས་རབ་ཀྱི་ཕ་རོལ་ཏུ་ཕྱིན་པ་སྒྲུབ་པ་གང་གིས་མངོན་སུམ་དུ་བྱེད་པར་འགྱུར་བ་གང་ཡིན་པ་དེ་ལ་མིང་འདི་ཉིད་ཅེས་བྱ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་སྒྲུབ་པ་དེ་གསུངས་པའོ། །འདོད་ཆགས་ཀྱི་ཞེས་བྱ་བ་ལ་
སོགས་པ་ལ། དེ་ལ་འདོད་ཆགས་ནི་ཀུན་དུ་ཞེན་པའི་མཚན་ཉིད་ཅན་ནོ། །དེའི་སྤྲོས་པ་ནི་ཁ་དོག་དང་དབྱིབས་དང་རེག་པ་དང་ཉེ་བར་སྤྱོད་པའི་མཚན་ཉིད་ཅན་ནོ། །སྤྲོས་པ་ཡོད་པ་མ་ཡིན་པས་ན་སྤྲོས་པ་མེད་པ་སྟེ། འདོད་ཆགས་ཀྱི་སྤྲོས་པ་རྣམས་མཉམ་པ་ཉིད་དུ་བསྒོམས་པས་འདོད་
ཆགས་ཉེ་བར་མི་དམིགས་སོ་ཞེས་བྱ་བའི་དོན་ཏོ། །འདོད་ཆགས་ཀྱི་སྤྲོས་པ་མེད་པའི་ངོ་བོ་ཉིད་ནི་འདོད་ཆགས་ཀྱི་སྤྲོས་པ་མེད་པ་ཉིད་དོ། །དེས་ཞེ་སྡང་སྤྲོས་པ་མེད་པ་ཉིད་དོ། །དེ་ཡང་ཞེ་སྡང་ནི་སེམས་ཅན་ལ་གནོད་པར་བྱ་བར་འདོད་པ་སྟེ། དེའི་སྤྲོས་པ་ནི་མནར་སེམས་རིང་པོ་དགུ་དང་། 
བཅུ་པོ་གནས་མ་ཡིན་པ་ལ་ཁྲོ་བའོ། །སྤྲོས་པ་ཡོད་པ་མ་ཡིན་པས་ན་སྤྲོས་པ་མེད་པ་སྟེ། མནར་སེམས་ཅན་གྱི་དངོས་པོ་དམིགས་སུ་མེད་པའོ། །འདི་སྐད་སྟོན་པར་འགྱུར་ཏེ། གང་ལ་རྗེས་སུ་ཆགས་པ་མེད་པ་དེ་ལ་ཁོང་ཁྲོ་བར་འགྱུར་ཏེ། རྗེས་སུ་ཆགས་པའི་དངོས་པོ་དམིགས་སུ་མེད་པས་ཁོང་
ཁྲོ་བ་འདིའི་དངོས་པོ་ཡང་ཉེ་བར་དམིགས་པར་མི་འགྱུར་རོ། །དེ་བས་ན་འདོད་ཆགས་ཀྱི་སྤྲོས་པ་མེད་པ་ཉིད་ཀྱི་ཞེ་སྡང་གི་སྤྲོས་པ་མེད་པ་ཉིད་དུ་འགྱུར་རོ། །ཞེ་སྡང་གི་དངོས་པོ་ཉེ་བར་མི་དམིགས་པས་གཏི་མུག་གི་དངོས་པོ་དམིགས་པར་མི་འགྱུར་ཏེ། དེ་བས་ན་གཏི་མུག་གི་སྤྲོས་པ་མེད་པ་ཉིད་དུ་
འགྱུར་རོ། །དེ་ཡང་གཏི་མུག་ནི་མ་རིག་པ་སྟེ་དེའི་སྤྲོས་པ་ནི་དབང་ཕྱུག་རྒྱུར་འདོད་པ་ལ་སོགས་པར་ཡོངས་སུ་བཏགས་པའོ། །གཏི་མུག་གི་དངོས་པོ་དམིགས་སུ་མེད་པས་ཀྱང་ཆོས་ཐམས་ཅད་དམིགས་སུ་མེད་པ་ཡིན་ཏེ། དེ་བས་ན་གཏི་མུག་གི་སྤྲོས་པ་དམིགས་སུ་མེད་པ་ཉིད་ཀྱིས་
ཆོས་ཐམས་ཅད་སྤྲོས་པ་མེད་དོ་ཞེས་གསུངས་ཏེ། ཆོས་ཐམས་ཅད་ནི་ཁམས་གསུམ་ན་སྤྱོད་པའི་སེམས་སམ་སེམས་ལས་བྱུང་བ་རྣམས་སམ། བྱང་ཆུབ་ཀྱི་ཕྱོགས་ཀྱི་ཆོས་རྣམས་དང་། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་སོགས་པའོ། །དེ་རྣམས་ཀྱི་སྤྲོས་པ་ནི་དབྱེ་བར་ཡོངས་

59-1-34a

སུ་བརྟགས་པའོ། །འདོད་པའི་ཁམས་ན་སྤྱོད་པ་ལ་སོགས་པའི་ཚུལ་གྱིས་ཆོས་ཐམས་ཅད་ལ་མ་སྤྲོས་པས་ན་སྤྲོས་པ་མེད་པ་སྟེ། སྔ་མ་བཞིན་ནོ། །ཆོས་ཐམས་ཅད་དམིགས་སུ་མེད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་སྤྲོས་པ་མེད་པ་ཉིད་དུ་རིག་པར་བྱའོ་ཞེས་བྱ་
བ་སྟེ། གང་ཆོས་ཐམས་ཅད་དམིགས་སུ་མེད་པ་དེ་ཉིད་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ནོ་ཞེས་བྱ་བའི་དོན་ཏོ། །དེ་ཉིད་ཀྱིས་ན་འདི་ནི་ཆོས་ཐམས་ཅད་ཀྱི་མཉམ་པ་ཉིད་ཀྱིས་རྣམ་པར་རྒྱལ་བ་བསྡུ་བ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པ་བསྒྲུབ་པར་འགྱུར་རོ། །འཇིག་རྟེན་གསུམ་
ལས་རྣམ་པར་རྒྱལ་བའི་རྡོ་རྗེའི་ཕྱག་རྒྱ་ནི་རྡོ་རྗེ་ཧཱུྃ་མཛད་ཀྱི་ཕྱག་རྒྱའོ། །པདྨའི་གདོང་ཁྲོ་གཉེར་དང་བཅས་པ་ལ་སོགས་པས་སྙིང་པོའི་ཡན་ལག་འདི་གསུངས་སོ་ཞེས་པར་སྦྱར་རོ། །ཁྲོ་བར་སྟོན་པར་བྱེད་པའི་དཔྲལ་བའི་གཉེར་མ་ནི་ཁྲོ་གཉེར་གྱི་སྒྲར་བཤད་དོ། །ཁྲོ་གཉེར་དང་བཅས་
ཤིང་སྨིན་མ་བཏེག་པ་དང་ལྡན་པས་ཁྲོ་གཉེར་དང་བཅས་ཤིང་སྨིན་མ་བཏེག་པའོ། །རབ་ཏུ་མྱུར་བར་གཡོ་བའི་མིག །མིག་གི་རྫི་མ་འདྲེན་པ་ནི། །འབར་བའི་ལྟ་བ་ཡིན་པར་བཤད། །ཅེས་བྱ་བ་ནི་འབར་བར་ལྟ་བ་སྟེ། དེས་ན་ཁྲོ་གཉེར་དང་བཅས་ཤིང་སྨིན་མ་བཏེག་པ་དང་། འབར་
བར་ལྟ་བ་དང་པདྨའི་གདོང་ཁྲོ་ཞིང་དགོད་དེ་མཆེ་བ་ཅུང་ཟད་གཙིགས་ནས་ཞལ་བསྟོད་པ་གང་ཡིན་པ་དེ་ལ་དེ་སྐད་ཅེས་བྱའོ། །དེ་ནས་རྡོ་རྗེ་ཁྲོ་བོ་སྟེ་ཁྲོ་བོ་ཆེན་པོ་རྡོ་རྗེ་ཧཱུྃ་མཛད་ཕྱུང་ནས་བཞུགས་སོ་ཞེས་བྱ་བར་སྦྱར་རོ། །བདག་ཉིད་དངོས་པོ་ཅི་ལྟ་བུ་ཞེ་ན་ཕྱག་ན་རྡོ་རྗེ་དང་འདྲ་བའི་དངོས་པོའི་བདག་ཉིད་
ཅན་ནོ་ཞེས་བྱ་བའོ། །ཁ་དོག་ལ་སོགས་པ་ཅི་ལྟ་བུ་ཞེ་ན། ཁ་དོག་སྣ་ཚོགས་པ་ལ་སོགས་པ་སྟེ། ཁ་དོག་སྣ་ཚོགས་པ་ནི་སྔོན་པོ་དང་སེར་པོ་ལ་སོགས་པའོ། །རྒྱན་ནི་སྦྲུལ་གྱི་གདུ་བུ་དང་རྣ་ཆ་དང་དཔུང་རྒྱན་དང་ཅོད་པན་ལ་སོགས་པའོ། །མཚོན་ཆ་ནི་རྡོ་རྗེ་ལ་སོགས་པའོ། །དེ་ལྟར་ན་ཁ་
དོག་དང་རྒྱན་དང་མཚོན་ཆ་རྣམ་པ་སྣ་ཚོགས་པ་འཆང་བར་མཛད་པས་ན་ཁ་དོག་དང་རྒྱན་དང་མཚོན་ཆ་རྣམ་པ་སྣ་ཚོགས་བསྣམས་པའོ། །རྡོ་རྗེ་མཆེ་བ་གཙིགས་པ་ནི་རྡོ་རྗེ་མཆེ་བ་ལྷག་གིར་བྱུང་བའོ། །མཆེ་བ་རྣམ་པར་གཙིགས་པ་ཉིད་ཀྱི་ཚེམས་ཀྱི་སྦྲོས་མ་མཆུ་གནོན་པ་གང་ཡིན་པ་བདེ་ལ་དེ་

59-1-34b

སྐད་ཅེས་བྱའོ། །དེ་ལྟ་བུའི་ཚེམས་ཀྱི་སྒྲོས་རྣོན་པོ་མི་བཟད་པ་དང་ཁྲོ་གཉེར་བསྙེར་བ་དང་། སྨིན་མ་འབར་བ་དང་། དབུ་སྐྲ་དང་། ཨག་ཚོམ་རྣམས་འབར་ཞིང་འཇིགས་སུ་རུང་བའི་ཞལ་གང་ལ་མངའ་བ་དེ་ལ་ནི་རྣམ་པར་འགྱུར་བའི་མཆེ་བ་གཙིགས་པ་ཚེམས་ཀྱི་སྒྲོས་གནོན་པ་སྨིན་མ་མི་
བཟད་ཅིང་ཁྲོ་གཉེར་བསྙེར་བ་སྤྱན་དང་དབུ་སྐྲ་དང་ཨག་ཚོམ་འབར་བ་ཞལ་འཇིགས་པ་ཞེས་བྱའོ། །ཐུགས་རྗེ་ཆེན་པོའི་ཐབས་དེས་བསྐྱེད་པའི་ཁྲོ་བོ་ཡིན་པས་ན་ཐུགས་རྗེ་ཆེན་པོའི་ཐབས་ཀྱི་ཁྲོ་བོ་སྟེ། དེ་ཉིད་ནི་རྡོ་རྗེ་ཡིན་ལ་དེ་ལ་དམིགས་པའི་ཏིང་ངེ་འཛིན་ནི་རྡོ་རྗེ་ཧཱུྃ་མཛད་ལ་སེམས་རྩེ་
གཅིག་པའོ། །ཕྱོགས་བཅུའི་འདོད་པ་གཟུགས་དང་གཟུགས་མེད་པའི་ཁམས་རྣམས་ལ་ཁམས་གསུམ་ཞེས་བྱ་བའི་སྒྲར་བཤད་དོ། །དེར་གནས་པ་ལ་སོགས་པའི་ལྷ་ཆེན་པོ་ལ་སོགས་པ་གདུལ་བར་མཛད་པས་ན་ཁམས་གསུམ་པོ་མཐའ་དག་ལས་རྣམ་པར་རྒྱལ་བ་སྟེ། རྣམ་
པར་རྒྱལ་བ་དེ་དཀྱིལ་འཁོར་གང་དུ་མཛད་པ་དེ་ནི་དཀྱིལ་འཁོར་ཆེན་པོའོ། །ཡང་ན་ཁམས་གསུམ་པོ་མཐའ་དག་ལས་རྣམ་པར་རྒྱལ་བ་ཞེས་བྱ་བ་ལ་ཁམས་གསུམ་རྣམ་པར་རྒྱལ་བ་ནི། རྡོ་རྗེ་ཧཱུྃ་མཛད་སྟེ། དེས་བྱིན་གྱིས་བརླབས་པའི་གཞལ་ཡས་ཁང་ལ་མིང་དེ་ཉིད་ཅེས་བྱ་སྟེ། དཀྱིལ་
འཁོར་མིང་དེ་སྐད་ཅེས་གསུངས་སོ། །རྡོ་རྗེ་ནི་བཅོམ་ལྡན་འདས་ཧཱུྃ་མཛད་ཉིད་དེ་དེའི་དཀྱིལ་འཁོར་རོ། །འདུལ་བ་ཆེན་པོ་འདུལ་བྱེད་པ། །ཞེས་བྱ་བ་ལ། ཆེན་པོ་ནི་དབང་ཕྱུག་ཆེན་པོ་ལ་སོགས་པ་སྟེ། དེ་རྣམས་འདུལ་བས་འདུལ་བར་མཛད་པ་འམ་དེ་རྣམས་ཀྱིས་འདུལ་བའི་ཁྲོ་བོ་འདི་
ཉིད་ཀྱིས་འདུལ་བས་ན་འདུལ་བ་སྟེ། ཁྲོ་བོ་སྤང་བར་མཛད་ཅེས་བྱ་བའི་དོན་ཏོ། །དེ་ལྟར་ན་བཅོམ་ལྡན་འདས་རྡོ་རྗེ་ཧཱུྃ་མཛད་ནི་འདུལ་བ་ཆེན་པོ་ཡིན་ལ་དེ་ཉིད་དཀྱིལ་འཁོར་གང་དུ་འདུལ་བ་པོར་གྱུར་པ་དེ་ནི་འདུལ་བ་ཆེན་པོ་འདུལ་བར་བྱེད་པའོ། །དཀྱིལ་འཁོར་དང་པོ་ནི་རྡོ་རྗེ་སེམས་
དཔའི་ཕྱིའི་དཀྱིལ་འཁོར་ཏེ། བརྒྱད་ཆ་བའི་སྒོ་དང་ལྡན་པར་བྲིས་ལ་ནང་དུ་དེའི་ཕྱེད་ཀྱི་ཚད་ཀྱིས་རྡོ་རྗེའི་ཕྲེང་བ་ཟླུམ་པོ་དང་ལྡན་པའི་འཁོར་ལོ་ལ་རྡོ་རྗེ་ཀ་བ་བརྒྱད་དང་ལྡན་པར་བྲི་བར་བྱའོ། །ལྷ་ཐམས་ཅད་ཀྱི་གནས་སུ་ནི་སྣ་ཚོགས་པདྨའི་གདན་བྱས་ལ་དབུས་སུ་བཅོམ་ལྡན་འདས་རྡོ་རྗེ་ཧཱུྃ་

59-1-35a

མཛད་རྡོ་རྗེ་དང་དྲིལ་བུ་བསྣམས་པ་རྡོ་རྗེ་ཧཱུྃ་མཛད་ཀྱི་ཕྱག་རྒྱས་བཞུགས་པ་ཇི་སྐད་དུ་བཤད་པའི་གཟུགས་དང་ལྡན་པར་བྲི་བར་བྱའོ། །དེ་བཞིན་དུ་གཞན་དག་ཀྱང་སྔར་བཤད་པ་ཉིད་ཡིན་ཏེ། འདིར་ཡི་གེ་ཧཱུྃ་ཉིད་ཀྱིས་དཀྱིལ་འཁོར་བྲི་བ་ལ་སོགས་པ་བྱའོ། །རྡོ་རྗེ་བསྡམས་པ་
ནང་དུ་བཅིངས་ལ་སོར་མོ་རྣམས་འབར་བ་ནང་དུ་བསྣོལ་ལ། མཐེ་བོའི་རྡོ་རྗེ་བསྒྲེང་བ་འདི་ནི་རྡོ་རྗེ་དམ་ཚིག་གི་ཕྱག་རྒྱ་སྟེ་འདིས་བཛྲ་བཛྲ་ཧཱུྃ་ཞེས་ཟློས་ཤིང་དཀྱིལ་འཁོར་དུ་འཇུག་པར་བྱའོ། །ལག་པ་གཉིས་ཀྱིས་ཕྱག་རྒྱ་བཅིངས་ཏེ་ཞེས་བྱ་བ་ནི་ལག་པ་གཉིས་ཀྱིས་རྡོ་རྗེ་ཧཱུྃ་མཛད་ཀྱི་
ཕྱག་རྒྱ་བཅིངས་ལ་ཞེས་བྱ་བའི་དོན་ཏོ། །ལྔ་པོ་བསྡུས་པའི་ཕྱག་རྒྱ་བཅིངས་ལ། བཟློག་སྟེ་ཁའི་གྲྭར་མཆེ་བ་བསྟན་པ་འདི་ན་རྡོ་རྗེ་ཁྲོ་བོ་མཐར་བྱེད་དོ་ཞེས་བྱ་བ་ནི་ཁྲོ་བོའི་ལྟ་བ་སྟེ། འདི་ནི་རྡོ་རྗེ་ཧཱུྃ་མཛད་ཀྱི་ཕྱག་རྒྱ་བཅས་པས་ཐམས་ཅད་རྒྱས་གདབ་པར་བྱའོ། །རྡོ་རྗེ་ཕྲ་མོའི་རྩེ་ལྔ་པ་རྡོ་རྗེ་ཁུ་
ཚུར་གྱིས་ཁྲོས་པར་འགྱུར་བས། བསྒྲུབ་པར་བྱ་བ་གཞིག་པའི་བསམ་པར་བྱ་བ་སྟེ། འདིས་ནི་ཐམས་ཅད་གཞིག་པར་འགྱུར་རོ། །ངེས་པར་གནོན་པ་ནི་ལྟུང་བར་བྱ་བ་སྟེ། ཡུངས་ཀར་ལ་སོགས་པའི་ཡི་གེ་ཧཱུྃ་ལས་རྡོ་རྗེ་རྩེ་ལྔ་པ་བསམས་ལ་དེ་དང་ཁྲོས་པར་གྱུར་པས་བསྒྲུབ་པར་བྱ་བ་
ལྟུང་བར་བྱ་བའི་བསམ་པས་ཕྱོགས་དེར་བརྡེག་པར་བྱའོ། །རྡོ་རྗེ་ཧཱུྃ་མཛད་ཀྱི་ཕྱག་རྒྱའི་ལག་པ་གཡས་པའི་མཛུབ་མོའི་ལྕགས་ཀྱུ་གཡོན་ལོགས་ནས་གཡོན་པའི་མཛུབ་མོ་དྲང་བར་བྱས་ཏེ། འདི་ནི་རྡོ་རྗེ་གླུའི་ཁྲོ་བོའི་ཕྱག་རྒྱ་ཕྲ་མོ་འབིགས་པར་བྱེད་པའོ། །འདིས་ནི་གནོད་པ་ཐམས་
ཅད་དགུག་པར་བྱའོ། །སྙིང་འབྱིན་པ་དང་གདུག་པ་ཐམས་ཅད་ཚར་གཅད་པ་ནི་གོ་བར་ཟད་དོ། །རལ་གྲི་ལ་སོགས་པའི་ཕྱེ་མའི་སྦྱིན་སྲེག་ནི་ལྕགས་ཕྱེའི་སྦྱིན་སྲེག་གོ། །རང་གི་ས་བོན་ནི་སྒྲ་ཇི་བཞིན་པར་ཡང་འདོད་མོད་ཀྱི། གཞན་དག་ནི་རྡོ་རྗེ་ཅན་གྱིའོ། །མ་ཡིན་པར་འཆད་དོ། །རྡོ་རྗེ་
ཧཱུྃ་མཛད་ཀྱིས་དགོད་པའི་ཚལ་དུ་བྱེད་པ་སྟེ། ཧ་ཧ་ཧ་ཧ་ཧཱུྃ་ཞེས་བཟླས་པས་གནོད་སྦྱིན་ཐམས་ཅད་སྐྲོད་པར་འགྱུར་རོ། །རྡོ་རྗེ་ས་ལ་བརྡེབས་ཤིང་བཟླས་པས་སོ་ཞེས་བྱ་བ་ནི་གོ་སླའོ། །རྡོ་རྗེ་ཧཱུྃ་མཛད་ཀྱི་མཛུབ་མོ་ལྕགས་སྒྲོག་ཏུ་བཅིངས་ལ་སྤྱི་བོར་བརྡེག་གནས་ལྟུང་བར་བྱ་བ་འདིས་ལྷ་ཐམས་ཅད་

59-1-35b

བསྡུ་བར་བྱའོ། །སྲིད་པ་གསུམ་པོ་འདུལ་བར་བྱེད་པ་ནི་རྡོ་རྗེ་ཧཱུྃ་མཛད་དེ། ཧྲི་ཞེས་བྱ་བས་གཡོན་བརྐྱང་བའི་གནས་པས་གནས་ལ་རྐང་པ་གཡོན་པས་རྣམ་ཐོས་སྲས་ཀྱི་གཟུགས་བརྙན་མནན་ལ། རྡོ་རྗེ་ཧཱུྃ་མཛད་ཀྱི་ཕྱག་རྒྱ་བཅིངས་ཏེ་ཁྲོས་པས་བཟླས་ན་རྗེས་སུ་འབྲང་བར་འགྱུར་རོ། །རྡོ་རྗེ་ཧཱུྃ་
མཛད་ཀྱི་ཕྱག་རྒྱ་ལས་གཡས་དང་གཡོན་གྱི་ཁུ་ཚུར་གྱིས་མནན་ལ། གཡོན་པའི་མཛུབ་མོའི་ཕྲ་སྐམ་གྱིས་བཟུང་ལ་དྲང་བར་བྱ་བ་ནི་རྡོ་རྗེ་སྐྱེས་བུ་སྟེ། འདིས་ལུས་ངན་པོ་མནན་ལ་དཔལ་དབྲོག་པར་བྱའོ། །རྡོ་རྗེ་ཧཱུྃ་མཛད་ཀྱི་ཕྱག་རྒྱ་བཅིངས་ལ། འདོད་པའི་ལྷའི་མདུན་དུ་བཟླས་བརྗོད་
བྱའོ། །ལྔ་པོ་བསྡུས་པ་ནི། རྡོ་རྗེ་རབ་ཏུ་དགའ་བའི་ཕྱག་རྒྱ་སྟེ། དེས་ཚངས་པ་ལྟུང་བར་བྱའོ། །རྡོ་རྗེ་ཧཱུྃ་མཛད་ཀྱི་ཕྱག་རྒྱས་གཡོན་པའི་ཁྲོ་བོའི་ལྟེ་བ་དང་། འཁོར་ལོའི་ཚུལ་དུ་བྱས་ལ་གཡས་པའི་ཁྲོ་བོའི་མཛུབ་མོ་ཡང་དང་ཡང་དུ་བརྡབ་པ་འདི་ནི་རྡོ་རྗེ་འཁོར་ལོ་དྲལ་བའོ། །རྡོ་རྗེ་ཧཱུཾ་མཛད་
ཀྱི་ཕྱག་རྒྱས་ལག་པ་གཡོན་པའི་མདུང་རྩེ་གསུམ་པ་ལག་པ་གཡས་པའི་མཛུབ་མོས་བརྡེབ་པ་འདི་ནི་དབང་ཕྱུག་ཆེན་པོའི་འདུལ་བའོ། །རྡོ་རྗེ་ཧཱུྃ་མཛད་ཀྱི་མཛུབ་མོ་གཉིས་ཀྱི་ལྕགས་ཀྱུ་ནི་རྡོ་རྗེ་ཁྲོ་བོའི་ཚོགས་ཀྱི་སྲིན་མོའོ། །རྡོ་རྗེ་ཧཱུྃ་མཛད་ནི་རྡོ་རྗེ་ཁྲོ་བོའི་གདུག་པའི་དམ་ཚིག་འཇིག་པར་
བྱེད་པའོ། །རྡོ་རྗེ་ཁྲོ་བོའི་ཁུ་ཚུར་གཉིས་དང་མིག་བསྒུལ་བས་དེའི་བསམ་པས་རྡོ་རྗེ་ལྟུང་བར་བྱ་བ་ནི་ཐམས་ཅད་ལྟུང་བའོ། །རྡོ་རྗེ་ཧཱུྃ་མཛད་དང་བསླང་བའི་ཚུལ་དུ་བྱ་བ་ནི་རྡོ་རྗེ་ཁྲོ་བོ་བསླང་བའོ། །གར་ལས་བྱུང་བའི་རྡོ་རྗེའི་ཁྲོ་བོའི་ཁུ་ཚུར་གཉིས་ཀྱིས་བཟུང་ནས་དྲངས་ལ་གཞན་དུ་བཞག་པ་ནི་
རྡོ་རྗེ་ཁྲོས་པའི་རྣལ་འབྱོར་མའི་ཕྱག་རྒྱའོ། །ཁྲོ་བའི་ཁུ་ཚུར་གཉིས་ཀྱིས་བླངས་ནས་འབྲོག་པ་ནི་ཐམས་ཅད་འཕྲོག་པའོ། །ཁྲོ་བོའི་ལྟ་བས་བལྟ་བ་ནི་གོ་བར་ཟད་དོ། །རྡོ་རྗེ་ཁུ་ཚུར་གཉིས་བཅིངས་ལ་ཁ་ཕྱེ་སྟེ་གདོང་འཇིགས་སུ་རུང་ཞིང་སྐྲ་གྱེན་དུ་བརྫེས་པ་མགོ་འོག་ནས་བསྟོད་དེ་བཏེག་
ཅིང་བྷྱོ་ཞེས་བྱ་བ་སྨྲ་བ་འདི་ནི་རྡོ་རྗེ་ཁྲོ་བོའི་གནོད་སྦྱིན་མ་སྟེ་འདིས་བདུད་ཀྱི་དཔུང་ཐམས་ཅད་གསོད་པར་བྱེད་དོ། །རྡོ་རྗེ་ཁུ་ཚུར་གཉིས་བཅིངས་ལ་མཐེའུ་ཆུང་གཉིས་ཁའི་གྲྭ་གཉིས་སུ་བཞག་སྟེ། མཛུབ་མོ་གཉིས་ཀྱི་ལྕགས་ཀྱུས་མཆེ་བ་ལྟར་བྱ་བ་འདི་ནི་རྡོ་རྗེ་ཁྲོ་བོ་མ་རུངས་པའི་སྲིན་མོའི་

59-1-36a

ཕྱག་རྒྱའོ། །སྦྱིན་སྲེག་ནི་གོ་སླའོ། །གཞིག་པ་དང་བསྲེག་པའང་གོ་སླ་བ་ཡིན་ནོ། །རྡོ་རྗེ་ཧཱུྃ་མཛད་ཟློས་ཤིང་ནུབ་པའི་ཚུལ་གྱིས་ས་ཐམས་ཅད་ནུབ་པར་བྱའོ། །རྡོ་རྗེ་མེ་ལྟར་རབ་ཏུ་འབར་བའི་ཕྱག་རྒྱ་ཆེན་པོ་དང་། རྡོ་རྗེ་གསོར་བའི་མཚན་ཉིད་ཅན་ནི་རྡོ་རྗེ་འཇིགས་
པའི་ཕྱག་རྒྱའོ། །འདི་ཉིད་དང་ཧི་ཞེས་བྱ་བས་འཇིག་རྟེན་གསུམ་པོ་ཐམས་ཅད་ལས་རྣམ་པར་རྒྱལ་བར་བྱ་སྟེ། ཧཱུྃ་ཧི་ཞེས་བྱ་བའོ། །རྡོ་རྗེ་ཧཱུྃ་མཛད་ཀྱི་མཛུབ་མོ་གཉིས་རྩེ་མོར་སྦྱར་བ་ནི་རྡོ་རྗེ་སེམས་དཔའི་ཁྲོ་བོའི་ཕྱག་རྒྱའོ། །རྡོ་རྗེ་བསྡམས་པ་ནང་དུ་བཅིངས་ལ་སོར་མོ་ཐམས་ཅད་
འབར་བའི་དབུས་སུ་མཐེ་བོང་བཞག་པའི་རྡོ་རྗེ་འདི་ནི་བདེ་བ་ཆེན་པོའི་རྡོ་རྗེའི་དམ་ཚིག་གི་ཁྲོ་བོའོ། །ཁམས་གསུམ་རྣམ་པར་རྒྱལ་བའི་དཀྱིལ་འཁོར་གྱི་འགྲེལ་པའོ།    །ད་ནི་གཏི་མུག་གི་གཉེན་པོར་གྱུར་པ་པདྨའི་རིགས་སྟོན་པར་བཞེད་པས། དེ་ནས་ཞེས་བྱ་བ་ལ་སོགས་པ་གསུངས་
ཏེ། དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །ངོ་བོ་ཉིད་ཀྱི་དག་པ་ཡང་ཡིན་ལ་ཆོས་ཉིད་ཀྱང་ཡིན་པས་ན་ངོ་བོ་ཉིད་དག་པའི་ཆོས་ཉིད་དེ་དེ་བཞིན་ཉིད་དོ། །དེ་ཐོས་པ་ནི་དེ་བཞིན་ཉིད་དུ་རོ་གཅིག་པའི་ཡེ་ཤེས་ཐོབ་པར་གྱུར་ཏོ་ཞེས་བྱ་བའི་དོན་ཏོ་། །ཡང་ཞེས་བྱ་བའི་སྒྲ་ནི་སྔ་མ་ལ་ལྟོས་པ་ཡིན་
ཏེ། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་གསུངས་ཏེ་ཞེས་བྱ་བར་སྦྱར་རོ། །དེ་ལ་ཆོས་ཐམས་ཅད་ནི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་སོགས་པའོ། །དེ་རྣམས་ཀྱི་མཉམ་པ་ཉིད་ཀྱི་གཟུང་བ་དང་འཛིན་པ་དང་བྲལ་བ་ཉིད་
དེ། ཆོས་ཐམས་ཅད་མཉམ་པ་ཉིད་ལ་སྤྱན་རས་ཀྱིས་གཟིགས་པ་ནི་མངོན་སུམ་དུ་མཛད་པ་སྟེ། དེ་ལ་དབང་ཕྱུག་ཏུ་གྱུར་པས་ན་ཆོས་ཐམས་ཅད་ཀྱི་མཉམ་པ་ཉིད་སྤྱན་རས་གཟིགས་དབང་ཕྱུག་གོ། །དེའི་ཡེ་ཤེས་ནི་དཀྱིལ་འཁོར་ལ་སོགས་པའི་ངེས་པའོ། །དེ་ཉིད་ནི་ཕྱག་རྒྱ་སྟེ། མིང་དེ་
ཉིད་ཅེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གང་ཡིན་པ་དེ་གསུངས་པའོ། །འདོད་ཆགས་ཀྱང་ཡིན་ལ་ཐམས་ཅད་ཀྱང་ཡིན་པས་འདོད་ཆགས་ཐམས་ཅད་དེ། སྔར་བཤད་པའི་སེམས་ཅན་སྨིན་པ་དང་གྲོལ་བ་དང་ཀུན་དུ་ཞེན་པའམ་སེམས་ཅན་ལ་དམིགས་པ་དང་ཆོས་ལ་དམིགས་

59-1-36b

པའི་ཐུགས་རྗེ་ཆེན་པོ་ནི་འདོད་ཆགས་སོ། །དེའི་རྣམ་པར་དག་པ་ནི་དགེ་བ་བཅུའི་ལས་ཀྱི་ལམ་མ་འདྲེས་པ་དང་། དོན་དམ་པར་དངོས་པོ་མེད་པའི་ངོ་བོ་ཉིད་དོ། །འདོད་ཆགས་ཐམས་ཅད་རྣམ་པར་དག་པར་གྱུར་པའི་ངོ་བོ་ཉིད་ཡིན་པས་ན་འདོད་ཆགས་ཐམས་ཅད་རྣམ་པར་དགཔ་ཉིད་དེ། 
དེ་ནི་ཞེ་སྡང་རྣམ་པར་དག་པ་ཉིད་དེ། དེ་ནི་ཞེ་སྡང་རྣམ་པར་དག་པའི་ཕྱིར་འབྱུང་བར་འགྱུར་ཏེ། རྒྱུའི་ངོ་བོ་ཉིད་དུ་གནས་པར་འགྱུར་རོ། །གང་དག་གནས་པར་འགྱུར་ཞེ་ན། འཇིག་རྟེན་ན་ཞེས་བྱ་བ་སྟེ་འཇིག་པས་ན་འཇིག་རྟེན་ཏེ། སེམས་ཅན་གྱི་ཁམས་ཉིད་དོ། །འདི་དག་ཀྱང་སྔ་མ་ཁོ་ན་
བཞིན་དུ་བལྟ་བར་བྱའོ། །མ་རིག་པའི་རྣམ་པ་ཐམས་ཅད་ནི་དྲི་མ་སྟེ། དེའི་རྣམ་པར་དག་པ་ནི་དོན་དམ་པར་བདག་ལ་སོགས་པ་དམིགས་སུ་མེད་པའོ། །བདག་མི་དམིགས་པ་དེ་ལས་ནི་སྡིག་པའི་སེམས་འབྱུང་མི་སྲིད་པས་དེའི་ཕྱིར་སྡིག་པ་ཐམས་ཅད་རྣམ་པར་དག་པར་འགྱུར་རོ། །
ཆོས་ཐམས་ཅད་ནི་སེམས་དང་སེམས་ལས་བྱུང་བ་སྟེ། དེ་རྣམས་ཀྱི་རྣམ་པར་དག་པ་ནི་གཟུང་བ་དང་འཛིན་པ་རྣམ་པར་དག་པས་རྣམ་པར་རྟོག་པ་མེད་པའོ། །དེ་བས་ན་དེ་ནི་སེམས་ཅན་ཐམས་ཅད་རྣམ་པར་དག་པའི་རྒྱུར་འགྱུར་རོ། །ཡང་ན་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ནི། 
ཆོས་ཐམས་ཅད་དོ། །ཤེས་པ་ཐམས་ཅད་ནི་ཤེས་པ་བཅུ་སྟེ། སྡུག་བསྔལ་ཤེས་པ་དང་། ཀུན་འབྱུང་དང་། འགོག་པ་དང་། ལམ་དང་། ཀུན་རྫོབ་དང་། གཞན་གྱི་སེམས་དང་། ཆོས་དང་། ཟད་པ་དང་། མི་སྐྱེ་བ་ཤེས་པ་རྣམས་སམ། ཡང་ན་མིག་གི་རྣམ་པར་ཤེས་པ་ལ་སོགས་པའམ། 
མེ་ལོང་ལྟ་བུ་དང་མཉམ་པ་ཉིད་དང་། སོ་སོར་རྟོག་པ་དང་། བྱ་བ་སྒྲུབ་པའི་ཡེ་ཤེས་རྣམས་སོ། །ཡང་ན་བྱ་བ་སྒྲུབ་པའི་ཡེ་ཤེས་ནི་དགེ་བའི་རྩ་བ་ཐམས་ཅད་སྤྲུལ་པའི་རྒྱུར་གྱུར་པ་ཡིན་པས་ན་ཤེས་པ་ཐམས་ཅད་དེ། དེའི་རྣམ་པར་དག་པ་ནི་དེ་བཞིན་ཉིད་དེ། དགེ་བ་བཅུ་ཀུན་ནས་སློང་བ་དང་། 
དོན་དམ་པར་གཉིས་སུ་མེད་པའོ། །དེ་རྣམ་པར་དག་པས་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པར་འགྱུར་ཏེ། གང་དེ་རྣམས་ཀྱི་རྣམ་པར་དག་པ་དེ་ཉིད་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ནོ་ཞེས་བྱ་བའི་དོན་ཏོ། །སྤྱན་རས་གཟིགས་པ་ནི་ལྟ་བ་སྟེ་སེམས་ཅན་ཡོངས་སུ་བསྐྱབ་པ་ལ་

59-1-37a

གཟིགས་པ་དང་། ངོ་བོ་ཉིད་ཀྱིས་རྣམ་པར་དག་པའི་ཆོས་ཉིད་ལ་གཟིགས་པ་སྟེ། དེ་ལ་དབང་ཕྱུག་ཏུ་གྱུར་པའོ། །དེ་ཉིད་བྱང་ཆུབ་སེམས་དཔའ་ཆེན་པོ་སྟེ། བྱང་ཆུབ་ཆེན་པོའི་ངོ་བོ་ཉིད་ཀྱི་སེམས་དཔའ་ཡིན་པས་ན་བྱང་ཆུབ་སེམས་དཔའ་ཆེན་པོའོ། །འདོད་ཆགས་
ལ་སོགས་པའི་དྲི་མས་མི་གོས་པ་ནི་ཇི་སྐད་དུ་བཤད་པའི་རྣམ་པ་བཞི་པའོ། །འགྲོ་བ་ཐམས་ཅད་ནི་ཁམས་གསུམ་པ་ཐམས་ཅད་དོ། །དེར་སྣ་ཚོགས་པ་སྟེ། ཐ་དད་པའི་གཟུགས་ཐམས་ཅད་སྟོན་པའོ། །འགྲོ་བ་ཐམས་ཅད་ཀྱི་གཟུགས་སྣ་ཚོགས་པ་དེ་ཉིད་ནི་འཁོར་བའི་ཉེས་པ་
རྣམས་ཀྱིས་མི་གོས་པས་པདྨ་སྟེ། དེ་སྐད་ཅེས་བྱ་བའི་སྙིང་པོ་གསུངས་སོ་ཞེས་པའོ། །དེ་ཡང་སྙིང་པོ་ནི་གཟུགས་ཐམས་ཅད་སྟོན་པའི་ངེས་པའི་ཡེ་ཤེས་ཡིན་ལ་དེ་སྟོན་པར་བྱེད་པའི་སྒྲ་ལ་ཡང་ཉེ་བར་གདགས་པས་སྙིང་པོ་ཞེས་བྱའོ། །ཆོས་ཐམས་ཅད་ནི་འགྲོ་བ་འདུལ་བའི་དཀྱིལ་
འཁོར་ལ་སོགས་པའི་ངོ་བོ་ཉིད་དོ། །དེ་རྣམས་ལ་གཟིགས་པ་ནི་དཀྱིལ་འཁོར་གྱི་དེ་ཁོ་ན་ཉིད་ལ་སོགས་པ་ཡོངས་སུ་ཤེས་པའོ། །དེ་ཉིད་ནི་ཡེ་ཤེས་ཏེ་དེའི་དབང་ཕྱུག་ཡིན་ལ་དེའི་ཕྱག་རྒྱ་ནི་དཀྱིལ་འཁོར་ལ་སོགས་པ་སྟེ། མིང་དེ་ཉིད་ཅེས་བྱ་བའི་ཏིང་ངེ་འཛིན་གང་ཡིན་པ་དེ་ལ་སྙོམས་
པར་ཞུགས་པ་སྟེ། དཀྱིལ་འཁོར་གྱི་བྱ་བའི་རྣམ་པར་ཐུགས་རྩེ་གཅིག་ཏུ་མཛད་པ་ལ་མངོན་དུ་ཕྱོགས་པར་མཛད་ཅེས་བྱ་བའི་དོན་ཏོ། །དཀྱིལ་འཁོར་ནི་ལྷ་རྣམས་ཀྱི་གནས་ཏེ་སྔར་བཤད་པའི་ཡི་གེ་ཧྲི་ཉིད་ཀྱིས་འདིར་བྱ་བ་ཐམས་ཅད་བྱའོ། །དཀྱིལ་འཁོར་དུ་འཇུག་པ་ན་ཡང་པདྨ་ཆེན་
པོ་སྙིང་གར་བཅིངས་ཏེ་བཛྲ་བཛྲ་ཧྲི་ཞེས་ཟློས་ཤིང་འཇུག་པར་བྱའོ། །འདི་ཡང་རྡོ་རྗེ་ཐལ་མོ་ཁོང་སྟོང་དང་བཅས་པ་ལས་གུང་མོ་དང་མཐེ་བོང་ཁ་ཕེ་ལ་འདབ་མ་བཞི་པ་བྱའོ། །རྡོ་རྗེ་བསྡམས་པ་བཅིངས་ལ་མཛུབ་མོ་གཉིས་བརྐྱང་ནས་བསྙམས་ཏེ་བཀུག་ནས་མིག་ལྟ་བུར་བྱས་ནས་ཁྲོ་
གཉེར་དུ་གཞག་ལ་འདི་ཐམས་ཅད་གསད་པར་བྱའོ། །གདེང་བའི་ཚུལ་གྱིས་ལག་པ་གཡོན་པ་བསྐུམས་ལ་ལག་པ་གཡས་པ་རང་གི་མགོ་བོའི་སྟེང་དུ་བཞག་པ་ནི་པདྨ་ཆེན་པོའི་ཕྱག་རྒྱའོ། །གཡོན་པ་དཀུར་བསྟན་པས་པདྨ་བཟུང་ལ། ལག་པ་གཡས་པས་སྙིང་གའི་ཕྱོགས་སུ་

59-1-37b

ཁ་འབྱེད་ཅིང་རྣམ་པར་བལྟ་ལ། རྡོ་རྗེ་ལྟ་བས་བལྟ་བར་བྱེད་པ་འདི་ནི་པདྨ་ཆེན་པོ་རྣམ་པར་གཟིགས་པའི་ཕྱག་རྒྱའོ། །རྡོ་རྗེ་བསྡམས་པ་བསྟན་བྱས་ལ། །སྙིང་གར་རབ་ཏུ་བརྐྱང་བ་ཡི། །སོར་མོ་ཐམས་ཅད་རབ་ཟླུམ་པའི། །པདྨའི་ཉི་མ་ཞེས་བྱར་བཤད། །རྡོ་རྗེ་ཁུ་ཚུར་
གཉིས་ཀྱིས་བ་དན་གྱི་ཚུལ་དུ་བྱ་བ་ནི། པདྨ་ཆེན་པོ་རླུང་གི་ཕྱག་རྒྱའོ། །པདྨའི་རིགས་ཀྱི་འགྲེལ་པའོ།།    །།ད་ནི་སེར་སྣའི་གཉེན་པོར་གྱུར་པ་རིན་པོ་ཆེའི་རིགས་སྟོན་པར་བཞེད་པས་དེ་ནས་ཞེས་བྱ་བ་ལ་སོགས་པ་གསུངས་ཏེ། ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་
པའི་ཀུན་དུ་རྨོངས་པ་དང་བྲལ་བས་ཁམས་གསུམ་གྱི་བདག་པོར་གྱུར་པ་ནི། དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་ཞེས་བྱ་བས་ན་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་སྟེ། ཆོས་ཀྱི་ཅོད་པན་གྱིས་ཁམས་གསུམ་གྱི་ཆོས་ཀྱི་རྒྱལ་སྲིད་ཐོབ་པའི་ཕྱིར། 
ཡེ་ཤེས་གང་གིས་མཉམ་པར་གྱུར་པ་དེ་ནི་དབང་བསྐུར་བ་ལས་བྱུང་བའི་ཡེ་ཤེས་སོ། །དེ་ཉིད་ནི་སྙིང་པོ་སྟེ། བསྐྱེད་པའི་གནས་སུ་གྱུར་པ་གང་ཡིན་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་དེ་ནི་དབང་བསྐུར་བ་ལས་བྱུང་བ་ཡེ་ཤེས་ཀྱི་སྙིང་པོ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་
ཚུལ་ཏེ། དེ་བཤད་པའོ། །དབང་བསྐུར་བ་སྦྱིན་པ་ཞེས་བྱ་བ་ནི་དཀྱིལ་འཁོར་དུ་སྤྱན་དྲངས་པར་གྱུར་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་དབང་བསྐུར་བའི་ཕྱག་རྒྱ་རྣམས་ཀྱིས་གང་དབང་བསྐུར་བ་བསྟན་པ་དང་། སློབ་མ་རྣམས་ལ་དཀྱིལ་འཁོར་དུ་གང་སྦྱིན་པར་གྱུར་
པའོ། །ནོར་ནི་དབྱིག་དང་གསེར་ལ་སོགས་པའོ། །ཆོས་སྦྱིན་པ་ནི་མདོ་སྡེ་ལ་སོགས་པ་རྣམས་ཟང་ཟིང་མེད་པའི་སེམས་ཀྱིས་ཇི་ལྟ་བ་བཞིན་དུ་སྟོན་པའོ། །ཟང་ཟིང་གི་སྦྱིན་པ་ནི་ཟས་དང་སྐོམ་དང་མལ་ཆ་དང་སྟན་ལ་སོགས་པའི་རྣམ་པའོ། །དབང་བསྐུར་བ་ཐམས་ཅད་ཀྱི་རིན་པོ་ཆེ་ནི་རིན་པོ་ཆེའི་
རིགས་ཀྱི་ངོ་བོ་ཉིད་དེ་འབྲས་བུའོ། །དེ་རྣམས་ཀྱི་དམ་ཚིག་ནི་རྒྱུ་སྟེ། སྙིང་པོ་གང་ངེས་པར་གྱུར་པས་རིན་པོ་ཆེའི་རིགས་བསྐྱེད་པ་དེ་ནི་སྙིང་པོ་ཡིན་ལ། དེ་སྟོན་པར་བྱེད་པའི་སྒྲའི་སྙིང་པོ་སྟེ། དེ་སྟོན་པར་བྱེད་པའི་སྒྲའི་ཚོགས་ལ་ཡང་སྙིང་པོ་ཞེས་བྱའོ། །དཀྱིལ་འཁོར་ནི་སྔར་བསྟན་པ་ཉིད་དང་

59-1-38a

འདྲའོ། །འདིར་བྱ་བ་ཐམས་ཅད་ལ་ཡི་གེ་ཏྲྃ་ཞེས་བྱ་བ་བཟླས་པར་བྱའོ། །བཛྲ་བཛྲ་ཏྲྃ་ཞེས་ཟློས་ཞིང་དམ་ཚིག་གི་ཕྱག་རྒྱ་སྙིང་གར་བཅིངས་ལ་འཇུག་པར་བྱའོ། །དེ་ལ་ཕྱ་རྒྱ་ནི་འདི་ཡིན་ཏེ་རྡོ་རྗེ་ཐལ་མོ་ལས་མཐེ་བོང་དང་མཛུབ་མོའི་གོར་མོ་བཞི་ཁ་ཐུར་དུ་བརྐྱང་ལ། 
དེའི་དབུས་སུ་དབང་བསྐུར་བའི་གནས་སུ་བཞག་པ་ནི་རྡོ་རྗེ་རིན་ཆེན་གྱི་དབང་བསྐུར་བའོ། །ཕྲེང་བ་དང་རིན་པོ་ཆེའི་ཁུ་ཚུར་གཉིས་ཀྱིས་ཕྲེང་བ་བཅིང་བའི་ཚུལ་ལོ། །རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་ཉིད་ལས་གུང་མོ་དང་སྲིན་ལག་དང་མཐེའུ་ཆུང་གི་སོར་མོ་བརྐྱང་ལ་སྲིན་ལག་དང་། 
མཐེའུ་ཆུང་ཕན་ཚུན་སྦྱར་བར་བྱས་པ་ནི་རིན་པོ་ཆེའི་རྒྱལ་མཚན་མཆོག་གིའོ། །རིན་པོ་ཆེའི་ཁུ་ཚུར་གཉིས་ཀྱིས་རིན་པོ་ཆེའི་སྲོག་ཤིང་འཛིན་པའི་ཚུལ་དུ་བྱ་བ་ནི་རིན་པོ་ཆེའི་སྲོག་ཤིང་གི་ཕྱག་རྒྱའོ། །རིན་པོ་ཆེའི་རིགས་ཀྱི་འགྲེལ་པའོ།།    །།སྐུ་དང་གསུང་དང་ཐུགས་གཅིག་ཏུ་བྱས་
པ་ནི་མཚན་ཉིད་ཀྱི་དེ་བཞིན་ཉིད་དུ་རོ་གཅིག་པ་ཡིན་ལ། དེ་དྲན་པས་ཕྱག་རྒྱ་འགྲུབ་པར་འགྱུར་རོ་ཞེས་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱ་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་ཡེ་
ཤེས་ཀྱི་ཕྱག་རྒྱ་སྟེ། དེ་ནི་འདི་ལྟར། བདེན་ཞིང་དེ་ཉིད་མི་སླུ་གང་། །དེ་ནི་རྡོ་རྗེ་ཁུ་ཚུར་ཞེས། །ཡེ་ཤེས་ཕྱག་རྒྱ་ལྡན་སྦྱོར་ཉིད། །ཐོབ་པ་དོན་གསུམ་ཡིན་པར་བཤད། །ཅེས་གསུངས་པ་འདི་ནི་དེ་བཞིན་གཤེགས་པ་ཐམས་ཅད་ཀྱི་བསྡུས་པའི་ཡེ་ཤེས་ཀྱི་ཕྱག་རྒྱ་སྟེ། དེ་ཐོབ་པ་ནི་
མངོན་སུམ་དུ་མཛད་ཅེས་བྱ་བའི་དོན་ཏོ། །དེ་ཐོབ་པར་སྟོན་པར་བྱེད་པའི་དམ་ཚིག་གི་ཁུ་ཚུར་དེ་འཛིན་པར་མཛད་པས་ན་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་འཛིན་པའོ། །དེ་སུ་ཞིག་ཡིན་ཞེ་ན། དེ་བཞིན་གཤེགས་པ་ཞེས་བྱ་བ་སྟེ། དངོས་པོའི་དོན་ཇི་ལྟར་གནས་པ་དེ་བཞིན་
དུ་ཐུགས་སུ་ཆུད་པས་ན་དེ་བཞིན་གཤེགས་པ་ཞེས་བྱའོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱ་ནི་སྔར་བཤད་པ་ཡིན་ནོ། །དེའི་བྱིན་གྱིས་བརླབས་པ་ནི་འཁོར་བ་ཇི་སྲིད་པའི་བར་དུ་བསྟན་པར་མཛད་པའོ། །དེ་ཉིད་ནི་རྡོ་རྗེ་སྟེ། མིང་དེ་སྐད་ཅེས་བྱ་བའི་ཤེས་རབ་

59-1-38b

ཀྱི་ཕ་རོལ་ཏུ་ཕྱིན་པའི་ཚུལ་བཤད་པའོ། །དེ་བཞིན་གཤེགས་པ་ཐམས་ཅད་ཀྱི་སྐུའི་ཕྱག་རྒྱ་ནི་ཕྱག་རྒྱ་ཆེན་པོའོ། །དེ་ཡོངས་སུ་འཛིན་པ་ན་གཞན་དང་མ་འདྲེས་པས་ཀུན་ནས་དེ་རྗེས་སུ་དྲན་པའོ། །གནས་སྐབས་དེ་ཉིད་དུ་གསུང་གི་ཕྱག་རྒྱ་ཡོངས་སུ་འཛིན་པ་ནི་ལྕེ་ལ་རྡོ་རྗེ་
དཀར་པོ་རྩེ་ལྔ་པ་བསམས་ལ་སྔགས་ཐམས་ཅད་བརྗོད་པའོ། །སོ་སོ་ཡང་དག་པར་རིག་པ་བཞི་ཐོབ་པ་ནི་ཆོས་ཐམས་ཅད་ཐོབ་པའོ། །རང་གི་སྙིང་གའི་ཟླ་བ་ལ་རྡོ་རྗེ་རྩེ་ལྔ་པ་བསམ་པ་ནི་ཐུགས་ཀྱི་ཕྱག་རྒྱ་ཡོངས་སུ་འཛིན་པའོ། །རང་གི་སྙིང་གའི་ཟླ་བ་ལ་སྣ་ཚོགས་རྡོ་རྗེ་
བསམས་ལ་ལས་ཀྱི་ཕྱག་རྒྱ་བཅིངས་པ་ནི་རྡོ་རྗེའི་ཕྱག་རྒྱ་ཡོངས་སུ་འཛིན་པའོ། །དེ་ལྟར་ན་ཕྱག་རྒྱ་བཞི་པོ་འདི་དག་གིས་ནི་དངོས་གྲུབ་ཀྱི་ཐབས་བཤད་པ་ཡིན་ནོ། །དམ་ཚིག་ཆེན་པོའི་རྡོ་རྗེའི་ཕྱག་རྒྱ་ཡོངས་སུ་འཛིན་པ་ཞེས་བྱ་བ་ནི། དམ་ཚིག་གི་རྡོ་རྗེའི་ཁུ་ཚུར་བཅིངས་ལ་ཞེས་བྱ་
བའི་དོན་ཏོ། །རྡོ་རྗེ་སྲ་བའི་ཕྱག་རྒྱ་ཐམས་ཅད་ཀྱི་དངོས་གྲུབ་ཀྱི་ཕྱིར་ཏེ། དེ་ལ་དམ་ཚིག་གི་ནི་རྒྱུ་ཡིན་པས་རྡོ་རྗེ་སྲ་བའི་ཕྱག་རྒྱ་ཐམས་ཅད་དེ། ཕྱག་རྒྱ་ཆེན་པོ་དང་། དམ་ཚིག་གི་ཕྱག་རྒྱ་དང་། ཆོས་ཀྱི་ཕྱག་རྒྱ་དང་ལས་ཀྱི་ཕྱག་རྒྱ་སྟེ། ཕྱག་རྒྱ་འདི་ཐམས་ཅད་ཀྱིས་ཀུན་དུ་རྒྱས་བཏབ་
པའོ་ཞེས་བྱ་བར་སྦྱར་རོ། །ཕྱག་རྒྱ་ཆེན་པོ་དང་། ཕྱག་རྒྱ་ཐམས་ཅད་ཀྱིས་རྡོ་རྗེ་སེམས་དཔའ་ཉིད་དུ་ཞེས་བྱ་བ་རྡོ་རྗེ་སེམས་དཔའི་ངོ་བོ་ཉིད་དོ། །རྡོ་རྗེ་སེམས་དཔའ་དེའི་དངོས་གྲུབ་མཆོག་གི་རྒྱུར་རྒྱས་བཏབ་པའོ། །རྡོ་རྗེ་ཁུ་ཚུར་གྱི་རྣམ་པར་ཐུགས་རྩེ་གཅིག་པ་ནི་དེ་བཞིན་གཤེགས་པ་
ཐམས་ཅད་ཀྱི་ཡེ་ཤེས་ཀྱི་ཕྱག་རྒྱའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཡེ་ཤེས་ཀྱི་ཕྱག་རྒྱ་ལྔའི་རྡོ་རྗེའི་ཏིང་ངེ་འཛིན་སུམ་ཁྲི་ལྔ་སྟོང་ཇི་སྙེད་པ་ཅིག་བསྟན་པ་ཡང་འདིར་བསྡུས་པ་ཡིན་ནོ། །ཕྱག་རྒྱ་ཐམས་ཅད་ཉིད་ནི་རྡོ་རྗེ་ཡིན་པས་ན་ཕྱག་རྒྱ་ཐམས་ཅད་ཀྱི་རྡོ་རྗེ་སྟེ། དེ་རྣམས་ཀྱི་དམ་ཚིག་ཡིན་
པས་ན་དེ་སྐད་ཅེས་བྱ་སྟེ། མིང་དེ་ཉིད་ཅེས་བྱ་བའི་དཀྱིལ་འཁོར་གང་ཡིན་པ་དེ་གསུངས་པའོ། །དཀྱིལ་འཁོར་ནི་སྔར་བཤད་པ་ཉིད་དང་འདྲའོ། །བཅོམ་ལྡན་འདས་རྡོ་རྗེ་ཁུ་ཚུར་གྱི་མདུན་དུ་ནི་རྡོ་རྗེ་སྙེམས་མ་སྟེ། རྡོ་རྗེ་སེམས་དཔའ་གཉིས་པའི་གཟུགས་ཅན་ནོ། །རྡོ་རྗེ་ལྗགས་ནི་རྡོ་རྗེ་སྨྲ་བའི་

59-1-39a

གཟུགས་ཅན་ནོ། །ཏིང་ངེ་འཛིན་རྡོ་རྗེ་ཡང་ཏིང་ངེ་འཛིན་མཆོག་གི་ཕྱག་རྒྱས་རྡོ་རྗེ་རྩེ་ལྔ་པ་བསྣམས་པའོ། །རྡོ་རྗེ་རྡོ་རྗེ་ནི་སྣ་ཚོགས་རྡོ་རྗེ་བསྣམས་པའི་རྡོ་རྗེ་ལས་སོ། །དེ་བཞིན་དུ་ལྷོའི་མཚམས་ཏེ། མེ་ལ་སོགས་པའི་མཚམས་རྣམས་སུ་རྡོ་རྗེ་དང་རྡོ་རྗེ་རིན་ཆེན་དང་
རྡོ་རྗེ་པདྨ་དང་། སྣ་ཚོགས་རྡོ་རྗེ་འཛིན་པའི་དམ་ཚིག་གི་རྡོ་རྗེའི་ཁུ་ཚུར་དང་། དམ་ཚིག་གི་རིན་པོ་ཆེའི་ཁུ་ཚུར་དང་། དམ་ཚིག་གི་པདྨའི་ཁུ་ཚུར་དང་། དམ་ཚིག་གི་ལས་ཀྱི་ཁུ་ཚུར་རིམ་པ་ཇི་ལྟ་བ་བཞིན་དུ་བྱའོ། །དཀྱིལ་འཁོར་གྱི་ཕྱིའི་མཚམས་རྣམས་སུ་ནི་སྒེག་མོ་ལ་སོགས་
པའོ། །སྒོ་རྣམས་སུ་ནི་རྡོ་རྗེ་སྙེམས་མ་ལ་སོགས་པ་རྡོ་རྗེ་སེམས་དཔའ་དང་། རྡོ་རྗེ་སྨྲ་བ་དང་། རྡོ་རྗེ་ཏིང་ངེ་འཛིན་དང་། རྡོ་རྗེ་ལས་ཀྱི་མཚན་མ་འཛིན་པའི་ལྷ་མོ་དེའི་དབྱིབས་དང་མཐུན་པ་ཉིད་དུ་བྲི་བར་བྱའོ། །འདིར་བྱ་བ་ཐམས་ཅད་ནི་ཡི་གེ་ཨ་ཞེས་བྱ་བ་བརྗོད་ཅིང་བྱའོ། །དེའི་འོག་ཏུ་
སྤྱན་དྲངས་པ་ལ་སོགས་པ་ཐམས་ཅད་བྱས་ལ་དམ་ཚིག་གི་ཁུ་ཚུར་བཅིངས་ཏེ། བཛྲ་བཛྲ་ཨ་ཞེས་བྱ་བ་བརྗོད་ཅིང་འཇུག་པར་བྱའོ། །རྡོ་རྗེ་བསྡམས་པ་བཅིངས་ལ་རང་གི་སྲིན་ལག་དང་། མཐེའུ་ཆུང་གི་བར་དུ་མཐེ་བོ་བཅུག་ལ་མཛུབ་མོ་བཀུག་ལ་བཙིར་བ་འདི་ནི་དམ་ཚིག་གི་ཁུ་ཚུར་
གྱི་མཚན་ཉིད་དོ། །རྡོ་རྗེ་ཁུ་ཚུར་གཉིས་ཕན་ཚུན་ཁ་སྦྱོར་ལ་སྙིང་གར་བཞག་ནས་བཙིར་བ་འདི་ནི་སྙིང་གའི་རྡོ་རྗེའི་ཁུ་ཚུར་གྱི་ཕྱག་རྒྱའོ། །རྡོ་རྗེ་ཆེན་པོའི་ཁུ་ཚུར་ནི་བཅོམ་ལྡན་འདས་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱའོ། །རྡོ་རྗེ་ཧཱུྃ་མཛད་ཀྱི་ཕྱག་རྒྱ་ལས་མཛུབ་མོ་གཉིས་ལྕགས་སྒྲོག་ཏུ་
བཅིང་བ་བྱས་ལ། མཐེ་བོང་གཉིས་གཤིབས་ལ་སྙིང་གར་བཞག་པ་འདི་ནི་རྡོ་རྗེ་འདོད་པའི་ཁུ་ཚུར་རོ། །རྡོ་རྗེ་ཁུ་ཚུར་གཉིས་བཅིངས་ལ། མདའ་འཕེན་པའི་ཚུལ་དུ་བྱ་བ་ནི་རྡོ་རྗེ་ཆགས་པའི་ཁུ་ཚུར་རོ། །རྡོ་རྗེ་བཞེད་པའི་དམ་ཚིག་གི་ཕྱག་རྒྱ་ནི་རྡོ་རྗེ་བཞེད་པའི་ཁུ་ཚུར་ཏེ། དེས་ཐམས་
ཅད་དབང་དུ་བྱའོ། །རྡོ་རྗེ་བཅིངས་པ་ཉིད་ནི་རྡོ་རྗེ་བསྡམས་པ་སྟེ། དེས་ཐམས་ཅད་བཅིང་བར་བྱའོ། །ཡང་རྣམ་པ་གཞན་གྱིས་ཀྱང་ཐམས་ཅད་བཅིང་བ་བསྟན་པ་ནི། ཐམས་ཅད་བསྡམས་པ་ལ་ནི་རྡོ་རྗེ་ལུ་གུ་རྒྱུད་ཀྱི་ཁུ་ཚུར་གིས་སོ་ཞེས་བྱ་བ་སྟེ། དེ་ཡང་འདི་ཡིན་ཏེ། རྡོ་རྗེ་

59-1-39b

བསྡམས་པ་ནང་དུ་བཅིངས་ལ་མཛུབ་མོ་དང་མཐེ་བོང་ལྕགས་སྒྲོག་ཏུ་བྱ་བའོ། །རྡོ་རྗེ་དགུན་གྱི་ཕྱག་རྒྱ་ནི། རྡོ་རྗེ་ཞལ་ཞལ་གྱི་ཁུ་ཚུར་ཏེ། དེས་ཐམས་ཅད་ལྐུགས་པར་བྱའོ། །རྡོ་རྗེ་བསྡམས་པ་བཅིངས་ལ་དེས་བསྒྲུབ་པར་བྱ་བ་བཟུང་ནས་མདུན་དུ་བཙིར་བ་འདི་ནི་རྡོ་རྗེ་བསྡམས་པའི་ཁུ་ཚུར་
རོ། །གཡས་པའི་ཁྲོ་བོའི་ཁུ་ཚུར་གྱིས་རྡོ་རྗེ་བཟུང་ལ་བསྒྲུབ་པར་བྱ་བ་བཙིར་བའི་བསམ་པས་བཙིར་བ་འདི་ནི་རྡོ་རྗེ་ངེས་པར་བཙིར་བའི་ཁུ་ཚུར་རོ། །རྡོ་རྗེ་ཁུ་ཚུར་གཉིས་བཅིངས་ལ། དྲལ་བ་འདི་ནི་རྡོ་རྗེ་དྲལ་བའི་ཁུ་ཚུར་ཏེ་རལ་གྲི་དང་ལྡན་པས་སོ། །རྡོ་རྗེ་བསྡམས་པ་ནང་དུ་བཅིངས་
ལ། རང་གི་སྲིན་ལག་དང་མཐེའུ་ཆུང་གི་བར་དུ་མཐེ་བོ་བཞག་པ་འདི་ནི་རྡོ་རྗེ་འབེབས་པའི་ཁུ་ཚུར་རོ། །རྡོ་རྗེ་གར་གྱི་ཕྱག་རྒྱ་ནི་རྡོ་རྗེ་གར་གྱི་ཁུ་ཚུར་རོ། །རྡོ་རྗེ་ཁུ་ཚུར་གཉིས་ཀྱིས་པི་བང་བརྡུང་བའི་ཚུལ་དུ་བྱེད་པ་ནི་རྡོ་རྗེ་བརྡུང་བའི་ཁུ་ཚུར་རོ། །སྙིང་གའི་ཟླ་བ་ལ། རྡོ་རྗེ་རྩེ་ལྔ་པ་འོད་
ཟེར་གྱི་ཕྲེང་བ་ཀུན་དུ་འཁྲིགས་པ་དང་ལྡན་པ་བསམས་ལ། རྡོ་རྗེ་འབར་བ་དེས་ཕྱོགས་བཅུའི་བསྒྲུབ་པར་བྱ་བ་ཐམས་ཅད་རེངས་པར་བྱ་བ་འདི་ནི་རྡོ་རྗེ་དམིགས་པའི་ཁུ་ཚུར་རོ། །གཞན་གྱི་དཔུང་ཐམས་ཅད་རྨོངས་ཤིང་སྐུགས་པར་བྱ་བ་ནི་གཞན་གྱི་དབང་དུ་བྱ་བའོ། །རྡོ་རྗེ་རྔ་བོ་ཆེའི་ཁུ་
ཚུར་གྱིས་ཞེས་བྱ་བ་ནི་རྡོ་རྗེ་ཧཱུྃ་མཛད་ཀྱི་ཕྱག་རྒྱ་ལས་མཛུབ་མོ་གཉིས་ལ་བརྟེན་པ་ལ་བལྟས་པ་དང་། ཕྱག་རྒྱ་བཅིངས་པ་དེ་ལས་རྡོ་རྗེ་ཁྲོ་བོ་འབར་བའི་ཕྲེང་བ་ཀུན་དུ་འཁྲིགས་པའི་འོད་དང་ལྡན་པའི་གཟུགས་ཅན་ཕྱུང་ལ། དེས་གཞན་གྱི་དཔུང་རྨོངས་པར་བྱ་ཞིང་བརྒྱལ་བར་བྱ་སྟེ་འདི་ནི་རྔ་བོ་
ཆེའི་ཁུ་ཚུར་རོ། །དམ་ཚིག་གི་རྡོ་རྗེའི་ཁུ་ཚུར་གྱི་ལག་མཐིལ་གཉིས་ཀྱིས་མཐེ་བོང་བཟུང་ལ་ཕྱག་རྒྱ་ཐམས་ཅད་དགྲོལ་བར་བྱ་སྟེ། འདི་ནི་རྡོ་རྗེ་ཐལ་བའི་ཁུ་ཚུར་རོ། །རྡོ་རྗེ་ཧེ་རུ་ཀའི་ཁུ་ཚུར་ནི་རྡོ་རྗེ་ཧཱུྃ་མཛད་ཀྱི་རྡོ་རྗེ་ཁུ་ཚུར་ཏེ། དེས་མཁའ་འགྲོ་མ་ཐམས་ཅད་ཀྱི་ཕྱག་རྒྱ་གཞིག་པར་བྱའོ། །
རྡོ་རྗེ་ཧཱུྃ་མཛད་ཀྱི་ཕྱག་རྒྱ་ལས་དེ་ཉིད་མཁྲིག་མ་བསྣོལ་ཏེ་བརྡབ་པ་ནི་རྡོ་རྗེ་ཧཱུྃ་མཛད་ཀྱི་རྡོ་རྗེ་ཁུ་ཚུར་རོ། །རྡོ་རྗེ་ཁུ་ཚུར་གཉིས་མདུན་དུ་ཁ་སྤྲད་ལ་བཙིར་བ་ནི་རྡོ་རྗེ་ཁུ་ཚུར་གྱི་ཁུ་ཚུར་རོ། །རྡོ་རྗེ་ཁུ་ཚུར་གཉིས་ཀྱིས་ཡན་ལག་དང་ཉིང་ལག་རྣམས་སུ་བྱུག་པ་ནི་རྡོ་རྗེར་བྱ་བའོ། །རྡོ་རྗེ་ཁུ་ཚུར་གཉིས་

59-1-40a

ཁར་བཞག་པ་འདི་ནི་རྡོ་རྗེ་མ་མོའི་ཁུ་ཚུར་ཏེ། འདི་ཐམས་ཅད་རྒྱས་གདབ་པར་བྱའོ། །དམ་ཚིག་གི་རྡོ་རྗེའི་ཁུ་ཚུར་གྱིས་བསྒྲུབ་པར་བྱ་བ་ཕྱེ་མར་བརླག་པའི་བསམ་པས་ས་ལ་བཙིར་བ་འདི་ནི་རྡོ་རྗེ་བཟང་པོའི་ཁུ་ཚུར་རོ། །རྡོ་རྗེ་ཁུ་ཚུར་གཉིས་བཅིངས་ལ་རྣམ་པར་
གཞིག་པའི་ཚུལ་དུ་བྲི་བ་འདི་ནི་རྡོ་རྗེ་བདུག་པའི་ཁུ་ཚུར་རོ། །རྡོ་རྗེ་བསྡམས་པ་བཅིངས་ལ། གཉིས་སུ་བྱས་ནས་ལག་པ་གཡས་པས་གཡོན་པ་བསྡམས་ལ། དེ་ཡང་གཉིས་སུ་བྱས་ཏེ། ཁུ་ཚུར་གཉིས་བཅིངས་ལ་གཡས་པའི་མཐེ་བོང་གི་སྟེང་དུ་གཡོན་པའི་ཁུ་ཚུར་བཞག་པ་འདི་
ནི་དབང་དེའི་རྡོ་རྗེའི་ཁུ་ཚུར་རོ། །ཆུའི་ནང་དུ་གནས་ཤིང་ཞེས་བྱ་བ་ལ་སོགས་པར་ཇི་ལྟར་འགྱུར་ཞེ་ན། རྡོ་རྗེ་གནོན་པའི་ཁུ་ཚུར་གྱིས་སོ་ཞེས་བྱ་བ་ལ། དང་པོའི་རྡོ་རྗེའི་ཕྱག་རྒྱའི་མཛུབ་མོས་གུང་མོ་མནན་ལ་མཐེ་བོང་དང་སྦྱར་ཏེ། མིག་གི་འབྲས་བུ་ལྟ་བུར་བྱས་ནས་སྲིན་ལག་དང་། མཐེ་
ཆུང་མཉམ་པོར་བརྐྱང་བ་བཅིངས་ནས་བལྟབ་ཅིང་འགྲོ་བས་ཆུ་སྟེང་དུ་བཏེག་སྟེ། རང་གི་ཕྱག་རྒྱ་ལས་བྱུང་བའི་འོད་ཟེར་གྱི་ཚོགས་རྣམས་ཀྱིས་ཚོགས་པར་བྱས་ལ་ཆུའི་ནང་དུ་གནས་ཏེ། འཆགས་པར་བྱ་སྟེ། འདི་ནི་རྡོ་རྗེ་གནོན་པོའི་ཁུ་ཚུར་རོ། །རྡོ་རྗེ་ཁུ་ཚུར་གཉིས་བཅིངས་ལ་གཡོན་
པའི་མཛུབ་མོ་དང་མཐེ་བོའི་བུ་གར་གཡས་པའི་མཛུབ་མོ་བཅུག་པ་འདི་ནི་སྣ་ཚོགས་རྡོ་རྗེའི་ཁུ་ཚུར་ཏེ། འདིས་གཟུགས་མང་པོར་བསྟན་པར་བྱའོ། །འདི་ཉིད་མོས་པའི་ཁྱད་པར་གྱིས་མི་སྣང་བར་འགྱུར་ཏེ། དེས་ན་འདི་ནི་མི་སྣང་བའི་རྡོ་རྗེ་ཁུ་ཚུར་རོ། །འཕགས་པ་ནམ་མཁའི་སྙིང་
པོའི་དམ་ཚིག་གི་ཕྱག་རྒྱ་ནི་རྡོ་རྗེ་ནམ་མཁའི་ཁུ་ཚུར་ཏེ། དེས་རྒྱུ་བ་དང་མི་རྒྱུ་བའི་དངོས་པོ་རྣམས་འབྱུང་བར་འགྱུར་ཏེ། དེ་ལྟར་མོས་པ་ལས་སྣང་བ་ཡིན་ནོ། །རྡོ་རྗེ་བསྡམས་པ་བཅིངས་པ་ནི་རྡོ་རྗེ་ཁུ་ཚུར་ཏེ། རྣལ་འབྱོར་པ་ཟླ་བའི་དཀྱིལ་འཁོར་ལ་འདུག་ནས་ནམ་མཁའ་ལ་འགྲོ་བར་
བསམས་ན་ནམ་མཁའ་ལ་འགྲོ་བར་འགྱུར་རོ། །རྡོ་རྗེ་རལ་གྲིའི་ཁུ་ཚུར་ནི་འཕགས་པ་འཇམ་དཔལ་གྱི་ཕྱག་རྒྱ་ཆེན་པོའོ། །རྡོ་རྗེ་ཁུ་ཚུར་གཉིས་ཀྱིས་སྣ་ཚོགས་རྡོ་རྗེ་འཛིན་པ་ནི་རྡོ་རྗེ་ལས་ཀྱི་ཁུ་ཚུར་རོ། །པདྨའི་དམ་ཚིག་གི་ཁུ་ཚུར་གྱིས་རྡོ་རྗེའི་པདྨ་ཡོངས་སུ་འཛིན་པ་ནི་རྡོ་རྗེ་ཡེ་ཤེས་ཀྱི་ཁུ་ཚུར་

59-1-40b

རོ། །རིན་པོ་ཆེའི་རིགས་ཀྱི་དམ་ཚིག་གི་ཕྱག་རྒྱས་རྡོ་རྗེ་རིན་ཆེན་ཡོངས་སུ་འཛིན་པ་ནི་རྡོ་རྗེ་ནོར་གྱི་ཁུ་ཚུར་རོ། །རྡོ་རྗེ་ཁུ་ཚུར་གྱི་དམ་ཚིག་གི་ཁུ་ཚུར་གྱིས་རྡོ་རྗེ་རྩེ་ལྔ་པ་ཡོངས་སུ་འཛིན་པ་ནི་རྡོ་རྗེ་ནོར་གྱི་ཕྱག་རྒྱའི་ཁུ་ཚུར་རོ། །ཕྱག་རྒྱ་འདི་རྣམས་ནི་སྔར་བཤད་ཟིན་ཏོ། །རྡོ་རྗེ་ལས་ཀྱི་
ཕྱག་རྒྱ་ཆེན་པོ་ནི་རྡོ་རྗེ་ཐལ་མོའི་ཁུ་ཚུར་རོ། །རྡོ་རྗེ་ཏིང་ངེ་འཛིན་གྱི་ཕྱག་རྒྱ་ཆེན་པོ་ནི་རྡོ་རྗེ་འཛིན་པའི་ཁུ་ཚུར་རོ། །དེ་ཡང་ཕྱག་རྒྱ་ཆེན་པོའི་ཏིང་ངེ་འཛིན་མཆོག་གི་ཕྱག་རྒྱས་རྡོ་རྗེ་འཛིན་པས་ན། དེའི་ཕྱིར་རྡོ་རྗེ་འཛིན་པའི་ཁུ་ཚུར་ཞེས་བྱ་བའོ། །རྡོ་རྗེ་སྨྲ་བའི་ཕྱག་རྒྱ་ཆེན་པོ་ནི་རྡོ་རྗེ་ལྗགས་
ཀྱི་མཆོག་གི་ཁུ་ཚུར་རོ། །རྡོ་རྗེ་སེམས་དཔའི་ཕྱག་རྒྱ་ཆེན་པོ་ནི་རྡོ་རྗེ་བསྙེམས་པའི་ཁུ་ཚུར་རོ། །བྱང་ཆུབ་མཆོག་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཁུ་ཚུར་རོ། །རྡོ་རྗེ་ཁུ་ཚུར་གྱི་དཀྱིལ་འཁོར་གྱི་འགྲེལ་པའོ།།    །།གསང་སྔགས་ནི་ཤེས་རབ་ཉིད་ཀྱིས་གྲུབ་པར་འགྱུར་
གྱི། གཞན་དུ་ནི་མ་ཡིན་ནོ་ཞེས་བསྟན་པའི་ཕྱིར། འཕགས་པ་འཇམ་དཔལ་གྱི་དཀྱིལ་འཁོར་སྟོན་པར་བཞེད་པས། དེ་ནས་ཞེས་བྱ་བ་ལ་སོགས་པ་གསུངས་ཏེ། ཆོས་ཐམས་ཅད་ཅེས་བྱ་བ་ནི་གཟུགས་ལ་སོགས་པ་སྟེ། དེ་རྣམས་ལས་སྤྲོས་པ་ནི་སྔོན་པོ་ལ་སོགས་པར་རྣམ་པར་རྟོག་
པའོ། །ཆོས་ཐམས་ཅད་ལ་སྤྲོས་པ་མི་མངའ་བ་གང་ཡིན་པ་དེ་ནི་ཆོས་ཐམས་ཅད་ལ་སྤྲོས་པ་མེད་པ་སྟེ་བཅོམ་ལྡན་འདས་སོ། །གཏན་ཚིགས་གང་གི་ཕྱིར་ཞེ་ན། གཟུགས་ལ་སོགས་པའི་ངོ་བོ་ཉིད་དོ། །འཁོར་ལོ་ལྟར་ཡི་གེ་བསྐོར་བ་ཞེས་བྱ་བ་ནི། ཨ་ར་པ་ཙ་ན་ལ་སོགས་པའི་འཁོར་ལོ་དང་འདྲ་
བ་སྟེ། ཨ་ནི་འདོད་པའོ་ཞེས་བྱ་བ་ལ་སོགས་པ་སྟོན་པར་བྱེད་པས་ཡོངས་སུ་འཁོར་བར་འཇུག་ཅིང་མངོན་སུམ་དུ་གྱུར་པའི་ཐོས་པ་དང་བསམ་པ་དང་བསྒོམ་པའི་རང་བཞིན་ཅན་གྱི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་དུ་འཁོར་ལོ་ལྟར་ཡི་གེ་
བསྐོར་བ་ཞེས་བྱ་བ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་བཤད་པ་ནི་གསུངས་པའོ། །ཆོས་ཐམས་ཅད་ནི་མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོག་པ་དང་། བྱ་བ་སྒྲུབ་པའི་ཡེ་ཤེས་ཀྱི་ངོ་བོ་ཉིད་དང་། དེ་བཞིན་དུ་ཕུང་པོ་ལྔ་དང་། སྐྱེ་མཆེད་བཅུ་གཉིས་དང་། ཁམས་བཅོ་བརྒྱད་

59-1-41a

དེ། དེ་རྣམས་ནི་དོན་དམ་པར་དངོས་པོ་མེད་པའི་ངོ་བོ་ཉིད་ཡིན་པས་སྟོང་པའོ། །ཅིའི་ཕྱིར་དེ་དག་སྟོང་པ་ཉིད་ཡིན་ཞེ་ན། ངོ་བོ་ཉིད་མེད་པའི་ཚུལ་གྱིས་སོ་ཞེས་བྱ་བ་གསུངས་ཏེ། གང་གི་ཕྱིར། དེ་རྣམས་ལ་ཤེས་རབ་ཀྱི་སྟོབས་ཀྱིས་རྣམ་པར་བརྟགས་པར་
གྱུར་ན། ངོ་བོ་ཉིད་དམིགས་སུ་མེད་དེ། དེ་བས་ན་དེ་ནི་སྟོང་པ་ཉིད་ཡིན་ནོ། །མཚན་མ་ནི་རྒྱུ་སྟེ། བདག་ལ་སོགས་པ་རྣམ་པར་ཤེས་པ་བསྐྱེད་པའི་རྒྱུའོ། །མཚན་མ་མེད་པས་ན་མཚན་མ་མེད་པ་སྟེ། རྒྱུ་མེད་པའི་སྟོང་པ་ཉིད་ཀྱིས་ན་མཚན་མ་མེད་པའོ། །ཆོས་ཐམས་
ཅད་ནི་ཆོས་ཐམས་ཅད་དམིགས་སུ་མེད་པ་སྟེ། དེ་ཉིད་ནི་མཚན་མ་མེད་པའོ། །སྨོན་པ་མེད་པ་ཞེས་བྱ་བ་ལ་སོགས་པ་ལ། གསོལ་བ་འདེབས་པ་མེད་པས་ན་སྨོན་པ་མེད་པའོ། །རང་བཞིན་ནི་ངོ་བོ་ཉིད་ཀྱི་སྐྱེ་བ་མེད་པ་ཉིད་ཀྱིས་ཉོན་མོངས་པ་ཅན་དང་ཉོན་མོངས་པ་ཅན་
མ་ཡིན་པའི་ཀུན་དུ་རྨོངས་པ་དང་བྲལ་བས་ན་རང་བཞིན་གྱིས་འོད་གསལ་བའོ། །དེ་ཇི་ལྟར་རྟོགས་པར་འགྱུར་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཞེས་བྱ་བ་གསུངས་ཏེ། གཟུང་བ་དང་འཛིན་པ་དམིགས་སུ་མེད་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་
དག་པ་ཡིན་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པའི་རྒྱུར་གྱུར་པ་དེས་རྟོགས་པར་འགྱུར་རོ། །ཚིག་འདི་དག་གིས་ནི་མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོག་པ་དང་། བྱ་བ་སྒྲུབ་པའི་ཡེ་ཤེས་རྣམ་པར་བརྟགས་པ་ཡིན་པར་རིམ་གྱིས་སྟོན་ཏོ། །
དེ་བཞིན་དུ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། རང་བཞིན་གྱིས་འོད་གསལ་བའི་རྣམ་པར་ཐར་པའི་སྒོ་བཞི་བཤད་པ་ཡིན་ནོ། །རལ་གྲི་དེས་ཞེས་བྱ་བ་ནི་འོག་ནས་བཤད་པའི་རལ་གྲི་བཞི་སྟེ། གྲངས་སམ་རིགས་ལས་ཚིག་གཅིག་པར་བྱས་པ་ཡིན་
ནོ། །འདེབས་ཤིང་ཞེས་བྱ་བ་ནི་མི་སྣང་བར་མཛད་པའོ། །དེ་ཡང་འདིས་ནི་ཆོས་ཀྱི་སྐུར་ཡང་དེ་བཞིན་གཤེགས་པ་རྣམས་རྗེས་སུ་མ་མཐོང་བ་ཡིན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་མཆོག་སྟེ། དམ་པར་གྱུར་པ་ཡིན་པས་ན་ཤེས་རབ་ཀྱི་ཕ་རོལ་ཏུ་ཕྱིན་པའི་མཆོག་གོ། །

59-1-41b

དེ་སྟོན་པར་བྱེད་པའི་སྒྲའི་ཚུལ་ཡང་ངེས་པའི་དོན་སྟོན་པར་བྱེད་པ་ཡིན་པའི་ཕྱིར་རོ། །སྙིང་པོ་དང་འདྲ་བས་ན་སྙིང་པོ་སྟེ། དེ་གསུངས་པ་ནི་བཀའ་སྩལ་པའོ། །ཆོས་ཐམས་ཅད་ངོ་བོ་ཉིད་ཀྱིས་སྤྲོས་པ་མེད་པ་ཞེས་བྱ་བ་ལ། ཆོས་ཐམས་ཅད་ཀྱི་ངོ་བོ་ཉིད་ནི་སྲ་བ་ལ་སོགས་པའི་ཚུལ་
ཏེ། དེ་རྣམས་ལ་སྲ་བ་ལ་སོགས་པར་རྣམ་པར་རྟོག་པ་ནི་སྤྲོས་པའོ། །སྤྲོས་པ་མེད་པས་ན་སྤྲོས་པ་མེད་པ་སྟེ། ཆོས་ཐམས་ཅད་ངོ་བོ་ཉིད་ཀྱིས་རྣམ་པར་རྟོག་པ་དང་བྲལ་བ་སྟེ། དོན་དམ་པར་ཆོས་ཐམས་ཅད་དམིགས་སུ་མེད་པའི་ཕྱིར་རོ། །ཆོས་ཐམས་ཅད་ལ་སྦྲོས་པ་མེད་པ་
ཉིད་ནི་གཟུང་བ་དང་འཛིན་པའི་རྣམ་པར་རྟོག་པ་གཅོད་པར་བྱེད་པའི་ངོ་བོ་ཉིད་ཡིན་པས་ན་རལ་གྲི་དང་ཆོས་མཐུན་པའི་ཕྱིར་རལ་གྲི་ཞེས་བྱ་བ་ལ། དེའི་རྒྱུ་མཐུན་པ་ལས་བྱུང་བའི་འཕགས་པ་འཇམ་དཔལ་གྱི་དཀྱིལ་འཁོར་ལ་ཡང་དེ་སྐད་ཅེས་བྱ་སྟེ། དེ་ལ་དམིགས་ཤིང་མིང་དེ་སྐད་
ཅེས་བྱ་བའི་ཏིང་ངེ་འཛིན་ལ་སྙོམས་པར་འཇུག་གོ། །འཁོར་ལོ་ལྟར་ཡི་གེ་བསྐོར་བའི་དམ་ཚིག་ཅེས་བྱ་བ་ལ། འཁོར་ལོ་ལྟར་ཡི་གེ་བསྐོར་བ་ནི་བཤད་ཟིན་ཏེ་དེའི་དམ་ཚིག་གི་གནས་སྐབས་སོ། །ཕྱིའི་དཀྱིལ་འཁོར་ཇི་ལྟ་བ་ཞེས་བྱ་བ་ནི། སྔར་ཐམས་ཅད་བཤད་ཟིན་པས་སླར་
མ་བཤད་པའོ། །འདིར་བྱ་བ་ཐམས་ཅད་ནི་ཡི་གེ་ཨ་བརྗོད་པས་བྱ་སྟེ། དེ་ནས་རལ་གྲི་དང་གླེགས་བམ་གྱི་ཕྱག་རྒྱ་དང་། བཛྲ་བཛྲ་ཨ་ཛ་ཞེས་ཟློས་ཤིང་པདྨའི་དཀྱིལ་འཁོར་དུ་འཇུག་པར་བྱའོ། །ལག་པ་གཡས་པའི་རྡོ་རྗེ་ཁུ་ཚུར་གྱི་མཛུབ་མོ་བརྐྱང་ལ་རྩེ་མོ་ཅུང་ཟད་བཀུག་ནས་
རལ་གྲིའི་ཚུལ་དུ་བཞག་པ་འདི་ནི་རལ་གྲིའི་ཕྱག་རྒྱའོ། །གཡོན་པའི་རྡོ་རྗེ་ཁུ་ཚུར་གྱིས་སྙིང་གར་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་འཛིན་པ་ལྟར་བྱ་བ་འདི་ནི་གླེགས་བམ་གྱི་ཕྱག་རྒྱའོ། །ཨ་ལ་སོགས་པའི་ཡི་གེ་ངོ་བོ་ཉིད་བསྒོམས་པ་ནི་ཨ་ར་པ་ཙ་ན་ལ་སོགས་པའོ། །རྡོ་རྗེ་
རལ་གྲིའི་ཕྱག་རྒྱ་ནི། རྡོ་རྗེ་བསྡམས་པ་ལས་མཐེ་བོང་གཉིས་གཤིབས་ལ། མཛུབ་མོ་གཉིས་པདྨར་བྱ། གུང་མོ་གཉིས་གཤིབས་ལ་ཚིགས་གསུམ་པ་བཀུག་ལ་རལ་གྲི་ལྟ་བུར་བྱའོ། །འཕགས་པ་འཇམ་དཔལ་གྱི་དཀྱིལ་འཁོར་གྱི་འགྲེལ་པའོ།།    །།དཀྱིལ་འཁོར་དུ་

59-1-42a

འཇུག་པ་མེད་པར་ནི། དངོས་གྲུབ་ཐོབ་པར་མི་འགྱུར་ཏེ། དེ་བས་ན་དཀྱིལ་འཁོར་དུ་འཇུག་པར་བྱའོ་ཞེས་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱི་ངོ་བོ་འཁོར་ལོ་ནི་དཀྱིལ་འཁོར་རོ། །དེའི་ནང་
དུ་འདུས་པ་ནི་ཞུགས་པ་སྟེ། དེ་ཡང་དེ་རྣམས་དེར་ཆུད་ཅིང་ཞུགས་པར་གྱུར་ཏོ་ཞེས་བྱ་བའི་དོན་ཏོ། །དེ་ནི་དེ་བཞིན་གཤེགས་པ་ཐམས་ཅད་ཀྱི་འཁོར་ལོའི་ནང་དུ་འདུས་པ་ཞེས་བྱའོ། །འཁོར་ལོ་ཡང་ཡིན་ལ་ཆེན་པོ་ཡང་ཡིན་པས་ན་འཁོར་ལོ་ཆེན་པོ་སྟེ། དེ་རྣམས་སུ་ཞུགས་པ་ཡིན་
པས་ན་འཁོར་ལོ་ཆེན་པོར་འཇུག་པའོ། །འཇུག་པ་དེ་ཡང་ཕྱི་དང་གསང་བའི་དབྱེ་བས་རྣམ་པ་གཉིས་ཏེ། ཕྱིའི་འཇུག་པ་ནི་ཇི་སྐད་དུ་བཤད་པའི་མངོན་པར་རྟོགས་པའི་ཕྱག་རྒྱ་རྣམས་ཀྱིས་སོ། །གསང་བའི་འཇུག་པ་ནི་དེར་ཞུགས་པའི་བཤད་པར་རྟོགས་པར་གྱུར་ཅིང་། སློབ་དཔོན་
ལས་དེ་ཁོ་ན་ཉིད་བཅུ་གཉིས་ཐོས་པའོ། །འཇུག་པ་དེར་གང་གིས་འགྱུར་བའི་མིང་དེ་སྐད་ཅེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་བཤད་པ་འདི་གསུངས་པའོ། །རྡོ་རྗེ་མཉམ་པ་ཉིད་ཅེས་བྱ་བ་ལ་རྡོ་རྗེ་ནི་དེ་བཞིན་གཤེགས་པ་དང་། དེ་བཞིན་གཤེགས་པའི་རིགས་རྣམས་སོ། །
དེ་རྣམས་ཀྱི་མཉམ་པ་ཉིད་ནི་སྟོང་པ་ཉིད་དོ། །ཀུན་རྫོབ་ཀྱང་དབྱེར་མི་ཕྱེད་པ་ཉིད་ཀྱིས་རྣམ་པར་བཤིག་པའམ། གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བའི་སེམས་དང་སེམས་ལས་བྱུང་བའི་རྡོ་རྗེ་ཡིན་ལ། དེའི་མཉམ་པ་ཉིད་ནི་དེ་ཁོ་ན་ཉིད་དེ་རྡོ་རྗེ་མཉམ་པ་ཉིད་དེས་རང་
གི་ངོ་བོ་ཉིད་ཡོངས་སུ་ཤེས་པ་ནི་འཇུག་པའོ། །དེར་ཇི་ལྟར་འཇུག་པར་འགྱུར་ཞེ་ན། དེ་བཞིན་གཤེགས་པ་ཐམས་ཅད་ཀྱི་འཁོར་ལོ་འཇུག་པར་འགྱུར་རོ་ཞེས་བྱ་བ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་མངོན་སུམ་དུ་འཇུག་པའི་དོན་དུ་འགྱུར་རོ་ཞེས་བྱ་བའི་
དོན་ཏོ། །དོན་དུ་གཉེར་བར་བྱ་བ་ཡིན་པས་ན་དོན་ཏོ། །གཟུགས་ལ་སོགས་པ་གཟུང་བར་བྱ་བའི་ངོ་བོར་ཡོངས་སུ་ཆད་པའམ། རིན་པོ་ཆེའི་རིགས་ནི་དོན་ཏོ། །དེའི་མཉམ་པ་ཉིད་ནི་དེ་བཞིན་ཉིད་དོ། །ཆོས་ནི་སྟོབས་དང་མི་འཇིགས་པ་ལ་སོགས་པ་དང་པདྨའི་རིགས་ལ་ཆོས་ཞེས་

59-1-42b

བཤད་དེ། དེའི་མཉམ་པ་ཉིད་ནི་སྔ་མ་བཞིན་ནོ། །འཇུག་པ་ལ་ཡང་སྔ་མ་དང་འདྲའོ། །ཐམས་ཅད་ནི་ཕྱག་རྒྱ་བཞི་དང་ལས་ཀྱི་རིགས་ལ་བྱ་བར་བཤད་ལ། དེ་རྣམས་ལ་ཞུགས་པ་ནི་སྔར་ཇི་སྐད་དུ་བཤད་པའོ། །དེའི་དོན་གྱི་དམ་ཚིག་ནི་རྒྱུ་སྟེ། མིང་དེ་ཉིད་ཅེས་བྱ་བ་གང་ཡིན་
པ་དེ་གསུངས་པའོ། །དཀྱིལ་འཁོར་ཐམས་ཅད་དུ་འཇུག་པའི་རྒྱུར་གྱུར་པའི་ཕྱག་རྒྱ་ནི་དཀྱིལ་འཁོར་ཐམས་ཅད་ལ་རབ་ཏུ་འཇུག་པའི་ཕྱག་རྒྱ་སྟེ། རྡོ་རྗེ་འཁོར་ལོའི་དཀྱིལ་འཁོར་ལ་དམིགས་པའི་ཏིང་ངེ་འཛིན་ཏོ། །དེ་ལྟར་ན་མིང་དེ་ཉིད་ཅེས་བྱ་བའི་ཏིང་ངེ་འཛིན་གང་ཡིན་པ་
དེ་ལ་སྙོམས་པར་ཞུགས་པའོ། །དཀྱིལ་འཁོར་ཆེན་པོ་ཡང་ཡིན་ལ་ཐམས་ཅད་ཀྱང་ཡིན་པས་དཀྱིལ་འཁོར་ཆེན་པོ་ཐམས་ཅད་དེ། འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་ཐམས་ཅད་དོ། །དེ་རྣམས་སུ་འཇུག་པའི་ཕྱིར། དམ་ཚིག་ནི་མི་འདའ་བའི་དོན་
དུ་རྣམ་པར་གཞག་པའོ། །དེ་ཡང་གང་གི་ཕྱིར། དཀྱིལ་འཁོར་འདིས་དཀྱིལ་འཁོར་ཐམས་ཅད་དུ་ཞུགས་ཤིང་ནང་དུ་ཆུད་པར་བྱེད་པ་ཡིན་ནོ་ཞེས་བྱ་བའི་དོན་ཏོ། །དཀྱིལ་འཁོར་འདིར་ནི་དང་པོ་ཉིད་དུ་གསུངས་པའི་ཧཱུྃ་ཉིད་ཟློས་ཤིང་དཀྱིལ་འཁོར་གྱི་བྱ་བ་ཐམས་ཅད་བྱའོ། །
དེ་ནས་བཛྲ་བཛྲ་ཞེས་ཟློས་ཤིང་རྡོ་རྗེ་འཁོར་ལོའི་དམ་ཚིག་གི་ཕྱག་རྒྱ་བཅིངས་ལ་འཇུག་པར་བྱའོ། །རྡོ་རྗེ་ཁུ་ཚུར་གཉིས་བཅིངས་ལ་མཛུབ་མོ་གཉིས་དང་མཐེ་ཆུང་གཉིས་རྡོ་རྗེར་བཅིངས་པ་ནི་རྡོ་རྗེ་འཁོར་ལོའི་དམ་ཚིག་གི་ཕྱག་རྒྱའོ། །དཀྱིལ་འཁོར་བཞི་ཐིག་གདབ་པ་ཞེས་
བྱ་བ་ནི། རྡོ་རྗེ་འཁོར་ལོའི་དཀྱིལ་འཁོར་ལེགས་པར་ཐིག་གདབ་པའི་རྗེས་ཐོགས་ཉིད་ལ། ཞི་བ་མདུང་གིས་མཚན་པ་དང་། མ་མོ་དང་། མིང་པོ་གསུམ་དང་། སྲིང་མོ་བཞིའི་དཀྱིལ་འཁོར་བཞི་པོ་ཐིག་གདབ། དེའི་འོག་ཏུ་འཇུག་པའི་ཚེ་རྡོ་རྗེ་འཁོར་ལོའི་དཀྱིལ་འཁོར་དུ་གཞུག་
ལ། ཞི་བ་མདུང་གི་དཀྱིལ་འཁོར་ལ་སོགས་པར་དེ་ཉིད་ལས་བཤད་པའི་ཆོ་གས་འཇུག་པར་བྱའོ། །རྡོ་རྗེ་འཁོར་ལོའི་ཕྱག་རྒྱའི་དཀྱིལ་འཁོར་དུ་འཇུག་པར་བསྟན་པས་དཀྱིལ་འཁོར་ཐམས་ཅད་དུ་འཇུག་པར་འགྱུར་རོ། །རྡོ་རྗེ་ཁུ་ཚུར་གཉིས་བཅིངས་ལ། མགལ་མེ་ལྟར་

59-1-43a

བསྐོར་བ་ནི་རྡོ་རྗེ་འཁོར་ལོ་ཆེན་པོ་སྟེ། འདིས་དཀྱིལ་འཁོར་ཆེན་པོར་འཇུག་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཕྱག་རྒྱ་ནི་དང་པོའི་རྡོ་རྗེའོ། །དམ་ཚིག་ཆེན་པོའི་འཁོར་ལོ་ནི་རྡོ་རྗེ་བསྡམས་པ་བཅིངས་ལ། གུང་མོ་གཉིས་བརྐྱང་ནས་མཛུབ་མོ་གཉིས་ཀྱང་བརྐྱང་ལ་གུང་མོའི་རྡོ་རྗེ་དེ་ཉིད་ཀྱི་རྒྱབ་ཏུ་བཞག་པ་འདི་ནི་དམ་ཚིག་ཆེན་པོའི་འཁོར་ལོ་སྟེ། འདིས་དམ་ཚིག་གི་དཀྱིལ་འཁོར་དུ་འཇུག་གོ། །ཐམས་ཅད་ཀྱི་འཁོར་ལོ་ནི་ནམ་མཁའ་མཛོད་ཀྱི་དམ་ཚིག་གི་ཕྱ་རྒྱ་ཡིན་ནོ། །གཞན་དག་ནི་རྡོ་རྗེ་འཛིན་མ་ཐམས་ཅད་
ཀྱི་འཁོར་ལོ་ཡིན་པར་འཆད་དོ། །རྡོ་རྗེ་སེམས་དཔའ་དང་། འཇམ་དཔལ་གཞོན་ནུ་དང་། ནམ་མཁའི་སྙིང་པོ་དང་། ནམ་མཁའི་མཛོད་དང་། འཕགས་པ་སྤྱན་རས་གཟིགས་དབང་ཕྱུག་དང་། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་དང་། རྡོ་རྗེ་ཁུ་ཚུར་དང་། རྡོ་རྗེ་
གནོད་སྦྱིན་གྱི་ཕྱག་རྒྱ་རྣམས་ནི་གཡོན་ན་འཁོར་ལོ་དང་བཅས་པ་སྟེ། དབང་དུ་བྱ་བ་ལ་སོགས་པ་དངོས་གྲུབ་བྱེད་དོ། །དེ་ལ་རྡོ་རྗེ་སེམས་དཔའི་དམ་ཚིག་གི་ཕྱག་རྒྱས་ནི་དབང་དུ་བྱའོ། །འཕགས་པ་སྤྱན་རས་གཟིགས་དབང་ཕྱུག་གི་དམ་ཚིག་གི་ཕྱག་རྒྱས་ནི་དབང་དུ་བྱའོ། །
འཕགས་པ་ནམ་མཁའི་སྙིང་པོའི་དམ་ཚིག་གི་ཕྱག་རྒྱས་ནི་དོན་ཐོབ་པའོ། །རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱས་ནི་རྒྱས་བཏབ་པའོ། །འཕགས་པ་འཇམ་དཔལ་གྱི་དམ་ཚིག་གི་ཕྱག་རྒྱས་ནི་བཅད་པའོ། །རྡོ་རྗེ་འཁོར་ལོའི་དམ་ཚིག་གི་ཕྱག་རྒྱས་ནི་དཀྱིལ་འཁོར་དུ་འཇུག་
པའོ། །ནམ་མཁའ་མཛད་ཀྱི་དམ་ཚིག་གི་ཕྱག་རྒྱས་ནི་མཆོད་པའོ། །རྡོ་རྗེ་གནོད་སྦྱིན་གྱི་དམ་ཚིག་གི་ཕྱག་རྒྱས་ནི་གདུག་པ་འདུལ་བའོ། །རྡོ་རྗེ་འཁོར་ལོའི་དཀྱིལ་འཁོར་གྱི་འགྲེལ་པའོ།།    །།མཆོད་པས་གསང་སྔགས་འགྲུབ་པར་འགྱུར་རོ་ཞེས་བསྟན་པའི་ཕྱིར། དེ་ནས་
ཞེས་བྱ་བ་ལ་སོགས་པས། ནམ་མཁའ་མཛད་ཀྱི་དཀྱིལ་འཁོར་སྟོན་ཏོ། །མཆོད་པ་ཡང་ཡིན་ལ་ཐམས་ཅད་ཀྱང་ཡིན་པས་མཆོད་པ་ཐམས་ཅད་དེ། དེའི་ཆོ་ག་རྒྱས་པ་ནི་རྣམ་པ་རྒྱ་ཆེ་བའོ། །ལུས་དང་ངག་དང་ཡིད་ཀྱིས་ཕྱག་འཚལ་བ་ནམ་མཁའི་ཁམས་ཐམས་ཅད་ཁྱབ་པར་

59-1-43b

བྱེད་པ་ནི་མཆོད་པ་ཐམས་ཅད་དེ། བཤད་མ་ཐག་པ་དེ་ཉིད་མཆོག་སྟེ། དམ་པ་ཡིན་པས་ན་མཆོད་པ་ཐམས་ཅད་ཀྱི་མཆོག་གོ། །མིང་དེ་ཉིད་ཅེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གང་ཡིན་པ་དེ་ནི་མཆོད་པ་ཐམས་ཅད་ཀྱི་མཆོག་ཅེས་བྱ་བའི་ཤེས་རབ་ཀྱི་ཕ་
རོལ་ཏུ་ཕྱིན་པའི་ཚུལ་ལོ། །དེ་བཤད་པ་ནི་བཀའ་སྩལ་པའོ། །ཨོཾ་སརྦ་ཡོ་ག་ཙིཏྟཾ་ཨུཏྤ་ད་ཡཱ་མི་ཞེས་བྱ་བ་ནི་སྨོན་པ་བྱང་ཆུབ་ཀྱི་སེམས་སོ། །གཉིས་པ་སེམས་བསྒོམ་པའི་མཚན་ཉིད་ཅན་ནི་འཇུག་པ་བྱང་ཆུབ་ཀྱི་སེམས་སོ། །གསུམ་པ་ནི་བྱང་ཆུབ་ཀྱི་ངོ་བོ་ཉིད་ཀྱི་
སེམས་ནི་བྱང་ཆུབ་སེམས་སོ། །དེ་ལྟར་ན་གསུམ་པོ་འདི་དག་བསྐྱེད་པ་ནི་བྱང་ཆུབ་ཏུ་སེམས་བསྐྱེད་པས་ཏེ། དེའི་ངོ་བོ་ཉིད་ནི་བྱང་ཆུབ་ཀྱི་སེམས་བསྐྱེད་པ་ཉིད་དོ། །དེ་ནི་སྒྲུབ་པའི་མཆོད་པའི་ངོ་བོ་ཉིད་ཡིན་པས་དེའི་ཕྱིར། དེ་བཞིན་གཤེགས་པ་ཐམས་ཅད་ལ་མཆོད་
པའི་ཆོ་ག་རྒྱས་པའོ་ཞེས་གསུངས་སོ། །བྱང་ཆུབ་ཏུ་སེམས་བསྐྱེད་པས་ནི་ངེས་པ་ཁོ་ནར་སེམས་ཅན་གྱི་དོན་བྱ་བ་ཡིན་ནོ་ཞེས་བསྟན་པའི་ཕྱིར། སེམས་ཅན་གྱི་ཁམས་ཐམས་ཅད་ཡོངས་སུ་སྐྱོབ་པ་ཉིད་ནི་ཞེས་བྱ་བ་གསུངས་ཏེ། ཕྱོགས་བཅུ་མ་ལུས་པའི་སེམས་ཅན་གྱི་
ཁམས་ཐམས་ཅད་ཀྱི་ངན་སོང་དང་བསད་པ་དང་བཅིངས་པ་ལ་སོགས་པའི་སྡུག་བསྔལ་ཡོངས་སུ་བསལ་བ་ནི་ཡོངས་སུ་སྐྱོབ་པའོ། །དམ་པ་ནི་སངས་རྒྱས་དང་བྱང་ཆུབ་སེམས་དཔའ་དང་། རང་སངས་རྒྱས་དང་ཉན་ཐོས་རྣམས་སོ། །དེ་རྣམས་ཀྱི་ཆོས་ཡིན་པས་ན་དམ་
པའི་ཆོས་སོ། །དེ་ཡོངས་སུ་བཟུང་བ་ནི་ཐོས་པ་དང་བསམ་པ་དང་སྒོམ་པའི་རྗེས་སུ་སྦྱོར་བས་སོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཡི་གེ་འདྲི་བ་དང་ཞེས་བྱ་བ་ནི་གོ་སླའོ། །ལས་ཐམས་ཅད་ནི་མཆོད་པ་རྣམ་པ་བཞི་སྟེ། དེའི་དོན་ཡོད་པའི་དམ་ཚིག་ནི་ཟློག་པར་དཀའ་
བའི་རྒྱུའོ། །མཆོད་པ་ཐམས་ཅད་ཀྱི་ཆོ་ག་རྒྱས་པ་དེའི་བྱིན་གྱིས་རློབ་པ་ནི་ནམ་མཁའི་མཛོད་ཀྱི་དཀྱིལ་འཁོར་རོ། །དེ་ལ་དམིགས་ཤིང་མིང་དེ་སྐད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པའོ། །རྡོ་རྗེ་ནི་བྱང་ཆུབ་སེམས་དཔའ་རྣམས་ཏེ། དེ་རྣམས་ཀྱི་མཆོད་པ་

59-1-44a

ཡིན་པས་ན་རྡོ་རྗེའི་མཆོད་པ་སྟེ། དེ་ཉིད་ནི་མཆོག་གོ། །དེའི་དོན་ཡོད་པའི་དམ་ཚིག་ནི་ངེས་པ་ཉིད་དུ་གྲུབ་པའི་རྒྱུ་སྟེ། མིང་དེ་སྐད་ཅེས་བྱ་བའི་དཀྱིལ་འཁོར་འདི་གསུངས་པའོ། །དཀྱིལ་འཁོར་ནི་སྔར་བཤད་པ་ཉིད་དོ། །དེའི་དབུས་སུ་བཅོམ་ལྡན་
འདས་མཚོན་ཆ་སྣ་ཚོགས་འཛིན་པ་ཞེས་བྱ་བ་ནི་གཡོན་པའི་རྡོ་རྗེ་ཁུ་ཚུར་དཀུར་བརྟེན་པས་སྣ་ཚོགས་རྡོ་རྗེས་མཚན་པའི་རྡོ་རྗེ་དྲིལ་བུ་བསྣམས་པ་ཕྱག་གཡས་པའི་རང་གི་ཐུགས་ཀར་བསྟོད་པའི་ཚུལ་གྱིས་སྣ་ཚོགས་རྡོ་རྗེ་བསྣམས་པའོ། །སྐུ་དང་ཡན་ལག་ཟླ་བའི་
མདོག་ལ་སོགས་པའི་ཁ་དོག་ལྔ་པའི་མདོག་ཅན་ཞེས་བྱ་བ་ལ་ཞལ་ནི་དཀར་པོའོ། །ཐུགས་ཀ་ནི་དམར་པོའོ། །ཕྱག་ནི་སེར་པོའོ། །ཕྱག་གཉིས་ནི་ལྗང་གུའོ། །སྐུ་སྨད་ནི་ནག་པོའོ། །དེའི་ཐམས་ཅད་དུ་ཞེས་བྱ་བ་ནི་ཕྱོགས་དང་མཚམས་རྣམས་སུའོ། །མཆོད་པའི་
དམ་ཚིག་ཅེས་བྱ་བ་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པ་རྫོགས་པར་བྱེད་པའི་རྒྱུའོ། །དེ་རྣམས་ཀྱི་གནས་སྐབས་ནི་སྔར་བཤད་པ་ཉིད་དོ། །དེ་རྣམས་ལས་གང་ཞིག་གཞག་ཅེ་ན། ཕྱག་ན་རྡོ་རྗེ་དང་ཞེས་བྱ་བ་ལ་སོགས་པ་བརྒྱད་པོ་གསུངས་སོ། །ཕྱག་ན་
ཅི་ཞིག་བསྣམས་ཤེ་ན། བྱང་ཆུབ་ཀྱི་སེམས་ལ་སོགས་པ་བླ་ན་མེད་པའི་མཆོད་པའི་ཆོ་ག་རྒྱས་པ་ཕྱག་ན་འཛིན་པའི་ཚུལ་གྱིས་ཞེས་བྱ་བ་གསུངས་སོ། །དེ་ལ་བྱང་ཆུབ་ཀྱི་སེམས་ཕྱག་ན་བསྣམས་པ་ནི་རྡོ་རྗེ་སེམས་དཔའ་སྟེ། ཕྱག་ན་རྡོ་རྗེ་རྩེ་ལྔ་པ་བསྣམས་ཞེས་བྱ་བའི་དོན་
ཏོ། །ཕྱག་ན་ཏིང་ངེ་འཛིན་ནི་འཕགས་པ་སྤྱན་རས་གཟིགས་དབང་ཕྱུག་སྟེ། འདིར་པདྨ་ནི་ཏིང་ངེ་འཛིན་སྟོན་པས་ཏིང་ངེ་འཛིན་ཞེས་བཤད་དོ། །ནམ་མཁའི་སྙིང་པོ་ནི་ཕྱག་ན་དབང་བསྐུར་བ་སྟེ། རྡོ་རྗེ་རིན་ཆེན་བསྣམས་ཞེས་བྱ་བའི་དོན་ཏོ། །རྡོ་རྗེ་ཁུ་ཚུར་ནི་ཕྱག་གི་ཕྱག་
རྒྱས་ཡོངས་སུ་འཛིན་པ་སྟེ། དམ་ཚིག་གི་ཁུ་ཚུར་གྱིས་རྡོ་རྗེ་བཙིར་ཞིང་བཞུགས་པའོ། །འཕགས་པ་འཇམ་དཔལ་ནི་ཕྱག་ན་སྟོང་པ་ཉིད་སྨྲ་བ་སྟེ། ཕྱག་ན་རལ་གྲི་བསྣམས་ཞེས་བྱ་བའི་དོན་ཏོ། །སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ནི་ཕྱག་ན་དཀྱིལ་འཁོར་

59-1-44b

འདྲི་བ་སྟེ། རྡོ་རྗེ་འཁོར་ལོ་བསྣམས་པ་ཞེས་བྱ་བའི་དོན་ཏོ། །ནམ་མཁའ་མཛོད་ནི་ཕྱག་ན་མཆོད་པ་ཐམས་ཅད་དེ། སྣ་ཚོགས་རྡོ་རྗེ་བསྣམས་པ་ཞེས་བྱ་བའི་དོན་ཏོ། །རྡོ་རྗེ་གནོད་སྦྱིན་ཕྱག་ན་སེམས་ཅན་རྣམས་ཡོངས་སུ་སྐྱོབ་བ་སྟེ། རྡོ་རྗེ་མཆེ་བ་བསྣམས་ཞེས་བྱ་བའི་དོན་ཏོ། །
འདིར་བྱ་བ་ཐམས་ཅད་ནི་ཡི་གེ་ཨོཾ་བརྗོད་ལ་བྱའོ། །དེ་ནས་བཛྲ་བཛྲ་ཨོཾ་ཞེས་ཟློས་ཤིང་དཀྱིལ་འཁོར་དུ་འཇུག་པར་བྱའོ། །རྡོ་རྗེ་ཐམས་ཅད་བཅིངས་ལ་ཞེས་བྱ་བ་ལ། དེ་ལ་རྡོ་རྗེ་ཐམས་ཅད་ནི་འདི་ཡིན་ཏེ། རྡོ་རྗེ་བསྣམས་པ་ལས་བྱུང་བའི་རྡོ་རྗེ་རིན་ཆེན་གྱི་དམ་ཚིག་གི་
ཕྱག་རྒྱ་ལས་སྲིན་ལག་དང་མཐེའུ་ཆུང་གཉིས་བརྐྱང་ལ་རྒྱལ་མཚན་དང་། བ་དན་གྱི་རྩེ་མོ་ལྟར་བྱའོ། །ལུས་དང་ངག་དང་ཡིད་ཀྱིས་ཕྱག་བྱ་བ་ནི་ཡིད་ཀྱི་མཆོད་པའོ། །རང་གི་སྙིང་གར་རྡོ་རྗེ་རྩ་ལྔ་པ་བསྒོམ་པ་དང་། རྡོ་རྗེ་སྦྲང་རྩི་ལ་སོགས་པའི་ཕྱག་རྒྱ་རྣམས་ཀྱིས་ཀྱང་མཆོད་པར་
བྱའོ། །བྱང་ཆུབ་ཀྱི་སེམས་ཀྱི་མཆོད་པ་དང་ཏིང་ངེ་འཛིན་གྱི་མཆོད་པ་ནི་གོ་སླའོ། །རྡོ་རྗེ་རིན་ཆེན་གྱི་དམ་ཚིག་ནི་རྡོ་རྗེ་དབང་བསྐུར་བ་སྣ་ཚོགས་སོ། །རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་ནི་རྡོ་རྗེ་ཐམས་ཅད་ཀྱི་སྣ་ཚོགས་སོ། །སྟོང་པ་ཉིད་ཀྱི་མཆོད་པ་ལ་ནི་ཨ་ལ་སོགས་པའི་
ཡི་གེའི་ལུང་བསྟན་པས་སོ་ཞེས་བྱ་བ་ནི་གོ་བར་ཟད་དོ། །རྡོ་རྗེ་འཁོར་ལོའི་དམ་ཚིག་གི་ཕྱག་རྒྱ་ནི་རྡོ་རྗེ་འཁོར་ལོ་སྣ་ཚོགས་སོ། །ནམ་མཁའ་མཛད་ཀྱི་དམ་ཚིག་གི་ཕྱག་རྒྱ་ནི་སྣ་ཚོགས་རྡོ་རྗེའོ། །རྡོ་རྗེ་གནོད་སྦྱིན་གྱི་དམ་ཚིག་གི་ཕྱག་རྒྱས་ནི་གདུག་པ་ཐམས་ཅད་གདུལ་བར་བྱའོ། །
རྡོ་རྗེ་སྦྲང་རྩི་ལ་སོགས་པའི་ཕྱག་རྒྱས་ནི་མེ་ཏོག་དོར་བ་ལ་སོགས་པ་བྱའོ། །ནམ་མཁའ་མཛད་ཀྱི་དཀྱིལ་འཁོར་གྱི་འགྲེལ་པའོ།།    །།བསྲུང་བ་ཡོངས་སུ་བསྐྱངས་པས་གསང་སྔགས་ཡོངས་སུ་འགྲུབ་པར་འགྱུར་རོ་ཞེས་བསྟན་པར་བྱ་བའི་ཕྱིར། དེ་ནས་ཞེས་པ་ལ་སོགས་
པས་རྡོ་རྗེ་གནོད་སྦྱིན་གྱི་དཀྱིལ་འཁོར་སྟོན་པར་མཛད་པ་ཡིན་ཏེ། གདུག་པ་ཅན་ཐམས་ཅད་ཀྱི་སྲོག་གཅོད་པ་ལ་སོགས་པ་ལས་བཟློག་པ་ནི་ཐམས་ཅད་འདུལ་བ་སྟེ། ཐམས་ཅད་འདུལ་བར་ནུས་པ་ནི་སྤྱོད་པའོ། །དེ་སུ་ཞིག་ཡིན་ཞེ་ན། བཅོམ་ལྡན་འདས་ཡེ་ཤེས་ཀྱི་ཁུ་ཚུར་ཏེ། བྱང་ཆུབ་

59-1-45a

མཆོག་ཡོངས་སུ་འཛིན་པའོ། །སེམས་ཅན་ཐམས་ཅད་འདུལ་བ་ཡེ་ཤེས་ཀྱི་སྙིང་པོ་ཞེས་བྱ་བ་ལ་སེམས་ཅན་ཐམས་ཅད་ནི་སྡིག་པ་ཐམས་ཅད་བྱེད་པའོ། །དེ་ལྟ་བུའི་སེམས་ཅན་འདུལ་བས་སེམས་ཅན་ཐམས་ཅད་འདུལ་བ་སྟེ། སྡིག་པ་ཐམས་ཅད་
ཡོངས་སུ་སྤངས་ནས་དགེ་བ་ལ་ངེས་པར་སྦྱོར་བར་མཛད་པའོ། །དེའི་དོན་གྱི་ཡེ་ཤེས་ཡིན་པས་ན་སེམས་ཅན་ཐམས་ཅད་འདུལ་བའི་ཡེ་ཤེས་ཏེ། རྡོ་རྗེ་གནོད་སྦྱིན་གྱི་ཁྲོ་བོར་ཡང་དག་པར་སྟོན་པའི་ཡེ་ཤེས་སོ། །དེ་ཉིད་ནི་བསྐྱེད་པའི་གནས་ཡིན་པས་ན་སྙིང་པོ་སྟེ། མིང་དེ་
ཉིད་ཅེས་བྱ་བ་གང་ཡིན་པ་དེ་བཤད་པའོ། །སེམས་ཅན་ཐམས་ཅད་ནི་མཛའ་བོ་དང་། ཐ་མལ་པ་དང་། དགྲ་བོ་རྣམས་སོ། །དེ་རྣམས་ལ་མཉམ་པ་ཉིད་ནི་བུ་གཅིག་པ་ལྟ་བུར་སྡུག་པར་སེམས་པ་དང་། དོན་དམ་པར་སེམས་ཅན་ཐམས་ཅད་མི་དམིགས་པའི་མཉམ་
པ་ཉིད་དོ། །སེམས་ཅན་ཐམས་ཅད་ལ་མཉམ་པ་ཉིད་ཀྱི་ཐུགས་རྗེ་ཆེན་པོའི་མཚན་ཉིད་ཅན་དེས་གདུག་པ་ཐམས་ཅད་གདུལ་བའི་ཕྱིར། ཁྲོ་བའི་གཟུགས་སུ་ཡང་དག་པར་སྟོན་པ་ནི་ཁྲོ་བོ་མཉམ་པ་ཉིད་དོ། །ཁྲོ་བོའི་གཟུགས་དེ་གང་གི་ཚེ་ལྡོག་པར་འགྱུར་ཞེ་ན། སེམས་
ཅན་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། གང་གི་ཚེ་སེམས་ཅན་ཐམས་ཅད་འདུལ་བ་དེའི་ཚེ་ཁྲོ་བོ་ཉིད་ཀྱང་དུལ་ཞིང་ལྡོག་གོ་ཞེས་བྱ་བའི་དོན་ཏོ། །དེའི་ངོ་བོ་ཉིད་ཅི་ཞིག་ཡིན་ཞེ་ན། སེམས་ཅན་ཐམས་ཅད་ཆོས་ཉིད་པས་ཁྲོ་བོ་ཆོས་ཉིད་དོ་ཞེས་བྱ་བ་གསུངས་ཏེ། 
སེམས་ཅན་ཐམས་ཅད་ཀྱི་ཆོས་ཉིད་ནི་དོན་དམ་པར་དངོས་པོ་མེད་པའི་ངོ་བོ་ཉིད་དོ། །སེམས་ཅན་ཐམས་ཅད་ཀྱི་ངོ་བོ་ཉིད་ཀྱི་ཆོས་ཉིད་གང་ཡིན་པ་དེ་ཉིད་ནི་ཆོས་ཉིད་ཡིན་ནོ་ཞེས་བྱ་བའི་དོན་ཏོ། །ཁྲོ་བོའི་གཟི་བརྗིད་འདི་ཅི་ཞིག་ཡིན་ཞེ་ན། སེམས་ཅན་ཐམས་ཅད་ཅེས་བྱ་བ་ལ་སོགས་
པ་གསུངས་ཏེ། དོན་དམ་པར་སེམས་དང་སེམས་ལས་བྱུང་བ་རྣམས་ནི་གཟུང་བ་དང་འཛིན་པ་དང་བྲལ་བ་ཉིད་ཡིན་པས་ན་སེམས་ཅན་ཐམས་ཅད་རྡོ་རྗེ་ཉིད་དེ། སེམས་ཅན་ཐམས་ཅད་རྡོ་རྗེ་ཉིད་ཡིན་པ་དེས་ན་ཁྲོ་བོ་རྡོ་རྗེ་ཉིད་དོ་ཞེས་བྱ་བ་སྟེ། སེམས་ཅན་ཐམས་ཅད་ཀྱི་གཟུང་

59-1-45b

བ་དང་འཛིན་པ་དང་བྲལ་བ་གང་ཡིན་པ་དེ་ཉིད་ནི་ཁྲོ་བོའི་རྡོ་རྗེ་ཉིད་དོ། །དེ་ཅིའི་ཕྱིར་ཞེ་ན་ཞེས་བྱ་བ་ནི་རྒྱུ་གང་གིས་ན་སེམས་ཅན་ཐམས་ཅད་མཉམ་པ་ཉིད་ནས་ཁྲོ་བོ་རྡོ་རྗེ་ཉིད་དོ་ཞེས་བྱ་བའི་བར་ཡིན་ཞེ་ན། གང་གི་ཕྱིར་འདི་ལྟར་སེམས་ཅན་ཐམས་ཅད་འདུལ་བ་ནི་བྱང་ཆུབ་པོ་ཞེས་
བྱ་བ་གསུངས་ཏེ། དེ་ཉིད་ནི་བྱང་ཆུབ་ཀྱི་མཚན་ཉིད་དོ། །དེ་ཡང་འདི་ལྟར་ཁྲོ་བོ་མཉམ་པ་ཉིད་ལ་སོགས་པས་སེམས་ཅན་རྣམས་འདུལ་བར་བྱེད་ཅིང་སངས་རྒྱས་ཀྱི་བྱང་ཆུབ་ཐོབ་པར་མཛད་པས་ན། དེའི་ཕྱིར་སེམས་ཅན་ཐམས་ཅད་འདུལ་བ་ནི་བྱང་ཆུབ་པོ་ཞེས་གསུངས་
པ་ཡིན་ནོ། །དཀྱིལ་འཁོར་ནི་སྔར་བཤད་པ་ཁོ་ནར་ཟད་དོ། །འདིར་བྱ་བ་ཐམས་ཅད་ནི་ཡི་གེ་ཧ་ཟློས་ཤིང་བྱའོ། །དེ་ནས་བཛྲ་བཛྲ་ཧ་ཞེས་བརྗོད་ལ། མཆེ་བའི་ཕྱག་རྒྱ་བཅིངས་ནས་དཀྱིལ་འཁོར་དུ་འཇུག་པར་བྱའོ། །རྡོ་རྗེ་ཐལ་མོ་བཅིངས་ལ། མཐེ་བོ་གཉིས་སོ་སོར་བསྒྲེང་
ལ་མཛུབ་མོ་གཉིས་ལྕགས་ཀྱུ་ལྟ་བུར་བཀུག་པའི་ཕྱག་རྒྱ་ཁར་བཞག་པ་འདི་ནི་མཆེ་བ་སྟེ། འདི་ནི་མཆེ་བའི་ཕྱག་རྒྱའོ། །རྡོ་རྗེ་ཁུ་ཚུར་གྱི་ཕྱག་རྒྱས་ཐམས་ཅད་ཕྱེ་མར་བརླག་པ་ནི་གོ་བར་ཟད་དོ། །རྡོ་རྗེ་གནོད་སྦྱིན་གྱི་དཀྱིལ་འཁོར་གྱི་འགྲེལ་པའོ།།    །།སྦྱོར་བ་གཅིག་གིས་
དམ་ཚིག་ཐམས་ཅད་ཐོབ་པར་མི་འགྱུར་བ་དང་། དཀྱིལ་འཁོར་ཐམས་ཅད་ནི་རྡོ་རྗེ་སེམས་དཔའ་ཡོངས་སུ་གྱུར་པའི་ངོ་བོ་ཉིད་ཡིན་ནོ་ཞེས་བསྟན་པའི་ཕྱིར། བསྡུས་པའི་དཀྱིལ་འཁོར་སྟོན་པར་བཞེད་པས། དེ་ནས་ཞེས་བྱ་བ་ལ་སོགས་པ་གསུངས་ཏེ། འཇིག་རྟེན་དང་
འཇིག་རྟེན་ལས་འདས་པའི་དཀྱིལ་འཁོར་རྣམས་ཀྱི་ངོ་བོ་ཉིད་གཅིག་པ་ཉིད་ནི་ཐམས་ཅད་མཉམ་པ་ཉིད་དེ། དོན་དམ་པར་དངོས་པོ་མེད་པའི་ངོ་བོ་ཉིད་དོ། །དེ་རབ་ཏུ་གནས་པ་ནི་མཉམ་པ་ཉིད་ལ་རབ་ཏུ་གནས་པ་སྟེ། མི་ཟད་པ་ཐུགས་སུ་ཆུད་པའི་ཚུལ་གྱིས་བཞུགས་པའོ། །
དེ་སུ་ཞིག་ཡིན་ཞེ་ན། དེ་བཞིན་གཤེགས་པ་ཞེས་བྱ་བ་སྟེ། དེ་བཞིན་དུ་གཤེགས་ཤིང་ཐུགས་སུ་ཆུད་པའོ། །ཆོས་ཐམས་ཅད་ཀྱི་མཆོག་ཅེས་བྱ་བ་ནི། རིགས་ཐམས་ཅད་ཀྱི་ཆོས་ཉིད་ནི་དེ་བཞིན་ཉིད་དེ། དེ་ཉིད་ནི་མཆོག་ཡིན་པས་ཆོས་ཐམས་ཅད་ཀྱི་མཆོག་སྟེ། མིང་དེ་ཉིད་

59-1-46a

ཅེས་བྱ་བ་གང་ཡིན་པ་དེ་བཤད་པའོ། །དེ་བཞིན་གཤེགས་པའི་རིགས་དེ་ཐམས་ཅད་ཀྱི་མཉམ་པ་ཉིད་ནི་གཉིས་སུ་མེད་པ་ཉིད་དེ། དེ་ལྟ་བུའི་ཐམས་ཅད་མཉམ་པ་ཉིད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་མཉམ་པ་ཉིད་དེ། ཤེས་རབ་ཀྱི་ཕ་རོལ་ཏུ་ཕྱིན་པ་དབྱེར་
མི་ཕྱེད་པ་ཉིད་དོ། །དེ་ཉིད་ནི་དེ་བཞིན་གཤེགས་པའི་རིགས་ཀྱི་གཉིས་སུ་མེད་པ་ཉིད་དེ་དེ་ཉིད་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་གཉིས་སུ་མེད་པ་དང་ཐ་མི་དད་པ་ཡིན་ནོ། །ཐམས་ཅད་དོན་ཉིད་ཅེས་བྱ་བ་ལ་སོགས་པ་ལ་དོན་ནི་རིན་པོ་ཆེའི་རིགས་སོ། །ཐམས་ཅད་ཀྱང་ཡིན་
ལ། དོན་ཡང་ཡིན་པས་ན་ཐམས་ཅད་དོན་ཞེས་བྱ་བའམ། ཐམས་ཅད་ཀྱི་དོན་ཡིན་པས་ན་ཐམས་ཅད་དོན་ཏོ། །ཐམས་ཅད་ཀྱི་དོན་གྱི་ངོ་བོ་ཉིད་ཡིན་པས་ན། ཐམས་ཅད་དོན་ཉིད་དོ། །ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ཉིད་དོ། །འདི་སྐད་སྟོན་པར་འགྱུར་ཏེ། རིན་པོ་ཆེའི་
རིགས་ནི་ཁམས་གསུམ་ན་སྤྱོད་པའི་ཉོན་མོངས་པ་ཅན་དང་། ཉོན་མོངས་པ་ཅན་མ་ཡིན་པའི་ཀུན་དུ་རྨོངས་པའི་བག་ཆགས་དང་བཅས་པར་སྤངས་པའི་ཡེ་ཤེས་ཏེ། དེ་ཉིད་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཐམས་ཅད་ཆོས་ནི་སྟོབས་དང་མི་འཇིགས་པ་ལ་སོགས་པ་དང་། 
པདྨེའི་རིགས་སོ། །ཐམས་ཅད་ཀྱི་ཆོས་ཡིན་པས་ན་ཐམས་ཅད་ཀྱི་ཆོས་ཏེ་སངས་རྒྱས་ཐམས་ཅད་ཀྱི་ཆོས་ཡིན་པའི་ཕྱིར་རོ། །ཡང་ན་ཐམས་ཅད་ཀྱང་ཡིན་ལ་ཆོས་ཀྱང་ཡིན་པས་ན་ཐམས་ཅད་ཆོས་ཏེ། དེའི་ངོ་བོ་ཉིད་ཡིན་པས་ན་ཐམས་ཅད་ཆོས་ཉིད་དེ། དེས་ཤེས་རབ་ཀྱི་
ཕ་རོལ་ཏུ་ཕྱིན་པའི་ཆོས་ཉིད་དོ། །ཐམས་ཅད་ལས་ཞེས་བྱ་བ་ལ་ཐམས་ཅད་ཀྱང་ཡིན་ལ་ལས་ཀྱང་ཡིན་པས་ན་ཐམས་ཅད་ལས་ཏེ། སེམས་ཅན་གྱི་དོན་མཛད་པའི་མཚན་ཉིད་དང་སངས་རྒྱས་ལ་མཆོད་པའི་ལས་ཀྱི་རིགས་སོ། །ལས་ཐམས་ཅད་ཀྱི་ངོ་བོ་ཉིད་དུ་གྱུར་པས་
ན་ཐམས་ཅད་ལས་ཉིད་དེ། དེས་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ཉིད་དུ་རིག་པར་བྱའོ། །འདིས་ཀྱང་འདི་སྐད་སྟོན་པར་འགྱུར་ཏེ། ཐམས་ཅད་ལས་ཉིད་ནི་བྱ་བ་གྲུབ་པའི་ཡེ་ཤེས་ཡིན་ལ། དེ་ལ་དོན་དམ་པར་གཉིས་སུ་མེད་པ་ཡིན་ནོ། །དེ་བས་ན་ཐམས་ཅད་ལས་ཉིད་

59-1-46b

པས་ཤེས་རབ་ཀྱི་ཕ་རོལ་ཏུ་ཕྱིན་པ་ནི་དབྱེར་ཕྱེད་པ་ཡིན་ཏེ། དེ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ནོ། །དེ་བཞིན་གཤེགས་པ་རྣམས་དང་བྱང་ཆུབ་སེམས་དཔའ་ཐམས་ཅད་ནི་དེ་བཞིན་གཤེགས་པ་དང་བྱང་ཆུབ་སེམས་དཔའ་ཐམས་ཅད་དེ། དེ་རྣམས་ཀྱི་དོན་ཡོད་
པའི་དམ་ཚིག་ནི་འདའ་བར་མི་བྱེད་པ། དེ་ཉིད་ནི་དཀྱིལ་འཁོར་ཡིན་པས་ན་དོན་ཡོད་པའི་དམ་ཚིག་གི་དཀྱིལ་འཁོར་རོ། །དེ་བྱིན་གྱིས་བརླབ་པར་བྱ་བ་ནི་བསྟན་པར་བྱ་བའི་ཕྱིར་བྱིན་གྱིས་རློབ་པ་སྟེ། ཏིང་ངེ་འཛིན་ཡང་མིང་དེ་ཉིད་ཅེས་བྱ་བ་སྟེ། དེ་ལྟ་བུའི་ཏིང་ངེ་འཛིན་གང་ཡིན་
པ་དེ་ལ་སྙོམས་པར་ཞུགས་པ་ནི་མངོན་སུམ་དུ་མཛད་པའོ། །དོན་ཡོད་པ་ཐམས་ཅད་ཀྱི་དམ་ཚིག་ནི་དཀྱིལ་འཁོར་ཏེ། དེའི་སྙིང་པོ་ནི་བསྡུས་པའི་དཀྱིལ་འཁོར་ལྟ་བུར་ངེས་པའོ། །དེ་སྟོན་པར་བྱེད་པའི་སྒྲ་ལ་ཡང་སྙིང་པོ་ཞེས་བྱའོ། །དམ་ཚིག་ཀྱང་ཡིན་ལ། ཐམས་
ཅད་ཀྱང་ཡིན་པས་དམ་ཚིག་ཐམས་ཅད་དེ། རིགས་ལྔའི་ངོ་བོ་ཉིད་དོ། །དེ་ཉིད་ནི་རྡོ་རྗེ་ཡིན་པས་ན་དམ་ཚིག་ཐམས་ཅད་ཀྱི་རྡོ་རྗེ་སྟེ་དེ་རྣམས་བྱིན་གྱིས་རློབ་པའོ། །དཀྱིལ་འཁོར་ནི་གཞལ་ཡས་ཁང་སྟེ། དེ་ལ་དམིགས་པའི་ཏིང་ངེ་འཛིན་ལ་ཡང་དེ་སྐད་ཅེས་བྱ་སྟེ། བསྡུས་
པའི་དཀྱིལ་འཁོར་ལྟ་བུར་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །འདི་དག་ཀྱང་སྔར་ཐམས་ཅད་བཤད་ཟིན་པས་ཡང་མ་བཤད་དོ། །འདིར་དང་པོར་རྡོ་རྗེ་ཕྱག་རྒྱ་བཅིངས་ལ། ཐོག་མ་ཁོ་ནར་འཇུག་པར་བྱའོ། །དེ་ནས་རང་ཉིད་ཀྱི་དམ་ཚིག་གི་དཀྱིལ་འཁོར་ལ་
སོགས་པས་དཀྱིལ་འཁོར་ཐམས་ཅད་དུ་འཇུག་པར་བྱའོ། །བསྡུས་པའི་དཀྱིལ་འཁོར་གྱི་འགྲེལ་པའོ།།  །།ད་ནི་འཇིག་རྟེན་པའི་ལྷ་རྣམས་ལ་མོས་པ་རྣམས་ལ་དེ་ཉིད་ཀྱི་སྒོ་ནས་བསྟན་པ་ལ་འཇུག་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་དཀྱིལ་
འཁོར་བཞི་སྟོན་པར་མཛད་པ་ཡིན་ནོ། །སེམས་ཅན་ཡང་ཡིན་ལ་ཐམས་ཅད་ཀྱང་ཡིན་པས་སེམས་ཅན་ཐམས་ཅད་དེ། དེ་རྣམས་ཀྱིས་བྱིན་གྱིས་རློབ་པ་ཡིན་པས་སེམས་ཅན་ཐམས་ཅད་བྱིན་གྱིས་རློབ་པ་སྟེ། རྡོ་རྗེ་སེམས་དཔའ་ལ་ལྷག་པར་མོས་པ་བསྐྱེད་པའོ། །སེམས་

59-1-47a

ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་ནོ་ཞེས་བྱ་བ་ནི་ཁམས་གསུམ་པའི་རྣམ་པའི་སེམས་དང་སེམས་ལས་བྱུང་བ་ནི་དེ་བཞིན་གཤེགས་པའི་ཡེ་ཤེས་མཐོང་བའི་སྒྲིབ་པར་གྱུར་པ་ལ་སྙིང་པོ་ཞེས་བྱ་བའི་སྒྲར་བཤད་དོ། །དེ་ཉིད་ནི་སེམས་
ཅན་ཐམས་ཅད་དོ། །དེ་བཞིན་གཤེགས་པའི་སྙིང་པོ་གཞན་གང་ཡིན་པ་དེ་ནི་དེ་བཞིན་གཤེགས་པའི་སྙིང་པོ་སྟེ། ཁམས་གསུམ་པའི་རྣམ་པར་ཡང་དག་པ་མ་ཡིན་པའི་ཀུན་དུ་རྟོག་པའོ། །དེ་སྐད་དུ་དེ་བཞིན་གཤེགས་པའི་སྙིང་པོ་ནི་དག་ཅིང་གསལ་ལ་དྲི་མ་མེད་
པར་སེམས་ཅན་ཐམས་ཅད་ཀྱི་རྒྱུད་ལ་རྗེས་སུ་ཞུགས་པ་སྐྱེས་བ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ། དཔེ་བྱད་བཟང་པོ་བརྒྱད་ཅུས་རྣམ་པར་མཛེས་པ་ཡིན་ནོ་ཞེས་གསུངས་པ་ཡིན་ནོ། །འདིས་ནི་འདི་སྐད་སྟོན་པར་འགྱུར་ཏེ། དོན་དམ་པར་སེམས་ཅན་ཐམས་
ཅད་ནི་གཉིས་སུ་མེད་པའི་ཡེ་ཤེས་ཀྱི་ངོ་བོ་ཉིད་ཡིན་ཏེ། ཁམས་གསུམ་པའི་རྣམ་པའི་སེམས་དང་སེམས་ལས་བྱུང་བ་ནི་ཤིན་ཏུ་སྐྱེས་པ་མེད་པ་ཉིད་ཡིན་པའི་ཕྱིར་རོ། །དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་ཐམས་ཅད་ཀྱི་རང་བཞིན་ཡིན་པས་
ཞེས་བྱ་བ་གསུངས་ཏེ། ལྷ་ཆེན་པོ་ལ་སོགས་པ་གཟུགས་སུ་སྟོན་པར་མཛད་ཀྱང་། ཞེ་སྡང་ལ་སོགས་པས་གོས་པ་མི་མངའ་བས་ན་ཀུན་ནས་བཟང་བ་ཡིན་པའི་ཕྱིར་ཀུན་དུ་བཟང་པོའོ། །བྱང་ཆུབ་སེམས་དཔའ་ཆེན་པོ་ཡང་ཡིན་ལ་ཀུན་དུ་བཟང་པོ་ཡང་ཡིན་པས་ན་བྱང་ཆུབ་
སེམས་དཔའ་ཀུན་དུ་བཟང་པོ་སྟེ། བྱང་ཆུབ་སེམས་དཔའི་ངོ་བོ་ཉིད་ཀྱི་སེམས་དཔའ་གཉིས་སུ་མེད་པའི་ཡེ་ཤེས་ཅན་ཞེས་བྱ་བའི་དོན་ཏོ། །བྱང་ཆུབ་སེམས་དཔའ་ཆེན་པོ་ཀུན་དུ་བཟང་པོ་ཐམས་ཅད་ཀྱི་རང་བཞིན་ནི་ཐུགས་ཐམས་ཅད་ཀྱི་བདག་ཉིད་ཐམས་ཅད་དུ་གྱུར་པས་ན་ཐམས་
ཅད་ཀྱི་རང་བཞིན་ཏེ། དེ་རྒྱུར་གྱུར་པས་ན་སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་ནོ། །སེམས་ཅན་ཐམས་ཅད་ནི་དོན་དམ་པར་བག་ཆགས་དང་བཅས་པའི་ཉོན་མོངས་པ་མ་སྐྱེས་པའི་དབང་བསྐུར་བའི་ངོ་བོ་ཉིད་ཡིན་པས་ན་རྡོ་རྗེའི་སྙིང་པོ་ཅན་ནོ། །ཆོས་ཀྱི་སྙིང་

59-1-47b

པོ་ཅན་ཞེས་བྱ་བ་ནི། དེ་བཞིན་དུ་ངག་རབ་ཏུ་འབྱུང་བའི་གནས་སུ་གྱུར་པ་མ་སྐྱེས་པ་ཡིན་པའི་ཕྱིར་རོ། །སོ་སོ་ཡང་དག་པར་རིག་པ་ཐོབ་པའི་ངོ་བོ་ཉིད་ཀྱིས་ན། ངག་ཐམས་ཅད་རབ་ཏུ་འབྱུང་བས་སོ། །མྱ་ངན་ལས་འདས་པ་དང་འགལ་བའི་ལས་ཐམས་ཅད་ཤིན་ཏུ་མ་སྐྱེས་
པས་ན། བྱ་བ་མ་གྲུབ་པ་ཐམས་ཅད་རབ་ཏུ་འཇུག་པ་ཡིན་ནོ། །དེ་བས་ན་བྱ་བ་བྱེད་པ་ཐམས་ཅད་ལ་རབ་ཏུ་སྦྱོར་བས་ཞེས་བྱ་བ་གསུངས་ཏེ། བྱ་བ་བྱེད་པ་ཐམས་ཅད་ནི་སེམས་ཅན་གྱི་དོན་བྱ་བ་དང་སངས་རྒྱས་ལ་མཆོད་པའོ། །བྱ་བ་བྱེད་པ་ཐམས་ཅད་ཀྱི་ངོ་བོ་ཉིད་ཡིན་པས་ན་
བྱ་བ་ཐམས་ཅད་བྱེད་པ་ཉིད་དོ། །དེའི་རབ་ཏུ་སྦྱོར་བ་ནི་སོ་སོར་སྟོན་པ་སྟེ། སྤྲུལ་པ་སྐུ་ལ་རབ་ཏུ་འཇུག་པའོ། །དཀྱིལ་འཁོར་ནི་ཀུན་ནས་ཟླུམ་བོ་ལ་རིམ་པ་གསུམ་པ་སྟེ། རིམ་པ་གཉིས་པ་དབུས་མའི་ཉིས་འགྱུར་ནི་རིམ་པ་གཉིས་པའོ། །སུམ་འགྱུར་ནི་རིམ་པ་གསུམ་པ་
སྟེ་ཐམས་ཅད་ཀྱང་སྒོ་བཞི་པར་བྱའོ། །མཚམས་བཞིར་ནི་མདུང་རྩེ་གསུམ་གྱིས་མཚན་པ་བྲི་བར་བྱའོ། །དེ་ལ་དབུས་སུ་ནི་ལྷ་ཆེན་པོ་གདོང་བཞི་པ་དགོད་པར་བྱ་སྟེ། གདོང་དང་པོ་ཞི་བ་ལ་ཞལ་ཐམས་ཅད་དྲག་ཅིང་འཇིགས་སུ་རུང་བ་དེའི་སྤྱི་བོར་ཁྲོ་བོ་ཕྱག་བཞི་པ་བྱའོ། །ལག་པ་
བཞི་ཡོད་པ་བྱ་སྟེ། མདུང་དང་། ཁ་ཊྭཱཾ་ག་ནི་ལག་པ་གཡོན་ན་ཐོགས་པར་བྱའོ། །དེ་བཞིན་དུ་ལག་པ་གཡས་པ་གཉིས་སུ་ནི་ཕྲེང་བ་དང་། གཡུང་དྲུང་ཐོགས་པར་བྱའོ། །དེའི་ཤར་ཕྱོགས་སུ་ནག་པོ་ཆེན་པོ་མདུང་རྩེ་གསུམ་ཐོགས་པའོ། །ལྷོ་ཕྱོགས་སུ་ནི་དགའ་བྱེད་དབང་
ཕྱུག་རྫ་རྔ་བརྡུང་བར་བརྩོན་པའོ། །ནུབ་ཏུ་ནི་དྲིལ་ཆེན་ལག་ན་དྲིལ་བུ་ཐོགས་པའོ། །བྱང་དུ་ནི་གར་གྱི་དབང་ཕྱུག་ལག་ན་མདུང་རྩེ་གསུམ་པ་ཐོགས་པའོ། །ཤར་ལྷོའི་མཚམས་སུ་ནི་ཐོད་པ་བཟང་པོ་མདུང་རྩེ་གསུམ་དང་ཐོད་པ་ལག་ན་ཐོགས་པའོ། །ལྷོ་ནུབ་མཚམས་སུ་ནི་གཏུམ་
པོའི་དབང་ཕྱུག་དབྱིག་པ་ལ་དབང་བྱེད་པའི་ངོ་བོར་དབྱིག་པ་ལ་དབང་བྱེད་པའོ། །ནུབ་བྱང་མཚམས་སུ་ནི་ལག་ན་ཁ་ཊྭཱཾ་ག་དང་ཐོད་པ་ལག་ན་ཐོགས་པའོ། །བྱང་ཤར་མཚམས་སུ་ནི་བ་ལང་སྣའི་དབང་ཕྱུག་མདུང་རྩེ་གསུམ་པ་ལག་ན་ཐོགས་པའོ། །རིམ་པ་གཉིས་པའི་ཤར་ཕྱོགས་

59-1-48a

སུ་དྲག་མོ་ལག་ན་མདུང་རྩེ་གསུམ་པ་ཐོགས་པའོ། །ལྷོ་ཕྱོགས་སུ་ཚངས་མ་ལག་ན་ཕྲེང་བ་ཐོགས་པའོ། །ནུབ་ཕྱོགས་སུ་ཁྱབ་འཇུག་མ་ལག་ན་འཁོར་ལོ་ཐོགས་པའོ། །བྱང་དུ་གཞོན་ནུ་མོ་ལག་ན་དྲིལ་བུ་ཐོགས་པའོ། །དེ་བཞིན་དུ་གཞན་
དག་ཀྱང་སྔར་བཤད་པ་བཞིན་དུ་བལྟ་བར་བྱའོ། །ཤར་ཕྱོགས་ཀྱི་སྒོར་ནི་དབྱིག་པའི་དབང་ཕྱུག་ལག་ན་དབྱིག་པ་དང་ཐོད་པ་ཐོགས་པའོ། །ལྷོའི་སྒོར་ནི་མགོའི་དབང་ཕྱུག་མདུང་རྩེ་གསུམ་པ་དང་ཐོད་པ་ཐོགས་པའོ། །ནུབ་ཕྱོགས་ཀྱི་སྒོར་ནི་དྲིལ་རྣ་དྲིལ་བུ་ཐོགས་པའོ། །
བྱང་ཕྱོགས་ཀྱི་སྒོར་ནི་དྲག་པོ་ཆེན་པོ་མདུང་དང་ཐོད་པ་ལག་ན་ཐོགས་པ་བྲི་བར་བྱའོ། །འདིར་བྱ་བ་ཐམས་ཅད་ནི་ཏྲི་ཞེས་བྱ་བ་ཟློས་ཤིང་བྱའོ། །ལྷག་མ་རྣམས་ནི་སྔ་མ་དང་འདྲ་བའོ། །དེ་ནས་མདུང་རྩེ་གསུམ་པའི་ཕྱག་རྒྱ་བཅིངས་ལ། བཛྲ་བཛྲ་ཏྲི་ཞེས་བརྗོད་ལ་འཇུག་པར་བྱའོ། །
ལག་པ་གཉིས་ཀྱི་མཐེ་བོས་མཐེའུ་ཆུང་མནན་ལ། ལུ་གུ་རྒྱུད་དུ་སྦྲེལ་བ་ནི་མདུང་རྩེ་གསུམ་པའོ། །དབང་ཕྱུག་ཆེན་པོའི་དཀྱིལ་འཁོར་གྱི་འགྲེལ་པའོ།།    །།མ་མོའི་དཀྱིལ་འཁོར་ནི་སྔར་བཤད་པ་ཉིད་དེ། འདིར་བྱ་བ་ཐམས་ཅད་ལ་ཡི་གེ་བྷྱོ་ཞེས་བྱ་བ་བརྗོད་པར་བྱའོ། །དེ་
ནས་ཅེ་སྤྱང་ཕོ་ཉ་མོའི་སྤྱོད་པས་བཛྲ་བཛྲ་བྷྱོ་ཞེས་བརྗོད་ལ་དཀྱིལ་འཁོར་དུ་འཇུག་པར་བྱའོ། །མཁྲིག་མ་བསྣོལ་བས་ལག་པ་གཉིས་བརྐྱང་ལ་ས་ལ་བཞག་སྟེ། ཙོག་པུས་མཆོངས་ལ། ཅེ་སྤྱང་གི་སྒྲ་སྒྲོགས་ཤིང་འཇུག་པར་བྱ་སྟེ། འདི་ནི་ཅེ་སྤྱང་ཕོ་ཉ་མོའི་ཕྱག་རྒྱའོ། །ལག་
པ་གཡོན་པའི་ལག་ངར་མདུན་དུ་བཀུག་པ་ནི་ཁ་ཊྭཱཾ་ག་འཛིན་པའི་ཕྱག་རྒྱའོ། །ལག་པ་གཡས་པ་གྱེན་དུ་བཏེག་ལ། བ་དན་གསུམ་པར་བྱས་པ་ལ་མཐེ་བོང་དང་སྲིན་ལག་གིས་ཐོད་པ་བཟུང་བ་ནི་བཏུང་བ་འཕྲོག་པའི་ཕྱག་རྒྱ་སྟེ། ནག་པོ་ཆེན་པོའི་དམ་ཚིག་གོ། །གཞན་
དག་ནི་གོ་སླའོ། །མ་མོའི་དཀྱིལ་འཁོར་གྱི་འགྲེལ་པའོ།།    །།མིང་པོ་གསུམ་གྱི་དཀྱིལ་འཁོར་ཡང་སྔར་བཤད་པ་ཉིད་དོ། །འདིར་སྭ་ཞེས་བྱ་བ་ཟློས་ཤིང་ཐམས་ཅད་བྱའོ། །དེ་ནས་བཛྲ་བཛྲ་སྭཾ་ཞེས་བརྗོད་ནས་དམ་ཚི་གི་ཕྱག་རྒྱ་བཅིངས་ལ་འཇུག་པར་བྱའོ། །མདུང་རྩེ་གསུམ་

59-1-48b

པ་མཚན་པ་ཉིད་ནི་དམ་ཚིག་གི་ཕྱག་རྒྱའོ། །མིང་པོ་གསུམ་གྱི་དཀྱིལ་འཁོར་གྱི་འགྲེལ་པའོ།།     །།སྲིང་མོ་བཞིའི་དཀྱིལ་འཁོར་ཡང་སྔར་བཤད་པ་ཉིད་དོ། །འདིར་བྱ་བ་ཐམས་ཅད་ནི་ཧཾ་ཞེས་བྱ་བ་བརྗོད་པར་བྱའོ། །དེ་ནས་སློབ་དཔོན་དྲིལ་བུ་དཀྲོལ་ཞིང་ལག་པ་གཡོན་ན་ཁ་ཊྭཱཾ་
ག་ཐོགས་པ་དང་བཅས་པས་བཛྲ་བཛྲ་ཧཾ་ཞེས་བརྗོད་དེ་འཇུག་པར་བྱའོ། །སྲིང་མོ་བཞིའི་དཀྱིལ་འཁོར་གྱི་འགྲེལ་པའོ།།    །།མཐའ་ཡས་མུ་མེད་པས་མཐར་ཐུག་ཅིང་ཞེས་བྱ་བ་ལ། དེ་ལ་མཐའ་ཡས་པ་ནི་ཆོས་ཀྱི་དབྱིངས་དང་། ནམ་མཁའི་ཁམས་རྣམས་སོ། །དེ་ཉིད་
དུ་མུ་མེད་པ་ཡིན་པས་ན་མཐའ་ཡས་མུ་མེད་པའོ། །དེ་ལྟར་ན་མཐའ་ཡས་པ་ཡང་ཡིན་ལ་མུ་མེད་པ་ཡང་ཡིན་པས་ན་མཐའ་ཡས་མུ་མེད་པའོ། །དེ་ཉིད་ནི་མཐར་ཐུག་པ་སྟེ། ཡོངས་སུ་རྫོགས་པར་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་སྟེ། ནམ་མཁའི་ཁམས་ཐམས་ཅད་
ཁྱབ་པ་ཞེས་བྱ་བའི་དོན་ཏོ། །དེ་གང་ཞིག་ཡིན་ཞེ་ན། དེ་བཞིན་གཤེགས་པ་ཞེས་བྱ་བ་གསུངས་སོ། །དེའི་ཆོས་ཉིད་གང་ཡིན་ཞེ་ན། མཐར་ཐུག་ཅིང་མུ་མེད་པའི་ཆོས་དང་ལྡན་པ་ཞེས་བྱ་བ་གསུངས་ཏེ། དེ་ལ་ནམ་མཁའི་ཁམས་ཐམས་ཅད་ལྟར་རྟག་ཏུ་གནས་པའི་སྐུ་དང་
གསུང་དང་ཐུགས་རྡོ་རྗེ་དང་ལྡན་པས་ན་མུ་མེད་པའོ། །དེ་ཉིད་ནི་མཐར་ཐུག་པ་མེད་པའི་ཆོས་ཏེ། ཡོངས་སུ་རྫོགས་པའི་ཆོས་སོ། །དེ་ལྟར་ན་མུ་མེད་པ་ཡིན་ལ། མཐར་ཐུག་པ་ཡང་ཡིན་པའོ། །ཆོས་གང་ཡིན་པ་དེ་ནི་མུ་མེད་ཅིང་མཐར་ཐུག་པའི་ཆོས་ཏེ། དེ་ལྟ་བུའི་ཤེས་
རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ་ཞེས་བྱ་བར་སྦྱར་རོ། །དེ་ཅིའི་ཕྱིར་ཞེ་ན། མཐར་ཐུག་པར་བྱིན་གྱིས་རློབ་པའི་ཕྱིར་ཞེས་པ་སྟེ་ཡོངས་སུ་རྫོགས་པར་བྱ་བའི་ཕྱིར་རོ། །མིང་ཅི་སྐད་བྱ་ཞེ་ན། ཆོས་ཐམས་ཅད་ཀྱི་ཞེས་བྱ་བ་ལ་སོགས་པ་སྟེ། དེ་ལ་ཆོས་ཐམས་ཅད་ནི་རིགས་
ལྔའི་ངོ་བོ་ཉིད་ཡིན་ལ། དེ་རྣམས་ཀྱི་མཉམ་པ་ཉིད་ཡིན་པས་ན་ཆོས་ཐམས་ཅད་ཀྱི་མཉམ་པ་ཉིད་དོ། །དེ་ཐམས་ཅད་ཀྱང་མཐའ་ཡས་ཤིང་མཐར་ཐུག་པ་མེད་པར་མཉམ་པ་ཉིད་ཡིན་ལ། མཉམ་པ་ཉིད་དེས་མཐར་ཐུག་པར་བྱིན་གྱིས་བརླབས་པ་སྟེ། མདོར་བྱས་ནས་བསྡུས་ཏེ་

59-1-49a

བཤད་པའོ། །དེ་ཉིད་ནི་རྡོ་རྗེ་སྟེ། དེ་ནི་ཚད་ཀྱིས་གཞལ་བར་ནུས་པ་མ་ཡིན་པའི་ཕྱིར་རོ། །དེ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཕྱོགས་བཅུར་འདས་པ་དང་། མ་འོངས་པ་དང་། ད་ལྟར་བྱུང་བའི་ཆོས་ཐམས་ཅད་ཇི་ལྟ་བ་བཞིན་དུ་ཡོངས་སུ་ཤེས་པའི་ཚུལ་གྱིས་
ཐམས་ཅད་དུ་ཁྱབ་པའི་ཕྱིར་དང་། དེའི་ངོ་བོ་ཉིད་ཀྱི་དེ་བཞིན་གཤེགས་པ་རྣམས་ནི་མཐའ་ཡས་པ་ཉིད་དེ། འདིས་ནི་དེ་བཞིན་གཤེགས་པའི་རིགས་མཐའ་ཡས་པ་ཉིད་དུ་སྟོན་ཏོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི་སྔར་བཤད་པ་དང་འདྲའོ། །རྡོ་རྗེ་ཐམས་ཅད་མུ་མེད་པ་ཉིད་
ནི་རིན་པོ་ཆེའི་རིགས་མུ་མེད་པ་ཉིད་དེ། མཉམ་པ་ཉིད་ཀྱི་ཡེ་ཤེས་ཉིད་ཀྱིས་ཐམས་ཅད་དུ་ཁྱབ་པ་ཉིད་ཡིན་པའི་ཕྱིར་རོ། །སྟོབས་དང་མི་འཇིགས་པ་ལ་སོགས་པའི་དབྱེ་བས་ཤེས་རབ་ཀྱི་ཕ་རོལ་ཏུ་ཕྱིན་པ་དུ་མ་ཉིད་པས། ཆོས་ཐམས་ཅད་དུ་མ་ཉིད་དོ། །པདྨའི་རིགས་ཚད་མེད་པ་
ཉིད་དོ། །བྱ་བ་གྲུབ་པའི་ཡེ་ཤེས་ཀྱི་ངོ་བོ་ཉིད་ཀྱིས་འཁོར་བ་དང་མྱ་ངན་ལས་འདས་པ་ཇི་སྲིད་པར་རབ་ཏུ་འཇུག་པའི་ཤེས་རབ་ཀྱི་ཕ་རོལ་ཏུ་ཕྱིན་པ་མཐར་ཐུག་པ་མེད་པ་ཉིད་དེ། ཡོངས་སུ་རྫོགས་པ་མེད་པ་ཉིད་དོ། །ཆོས་ཐམས་ཅད་མཐར་ཐུག་པ་མེད་པ་ཉིད་ཀྱིས་ན། བྱ་བ་གྲུབ་
པའི་ཡེ་ཤེས་ཡོངས་སུ་རྫོགས་པ་མེད་པ་ཉིད་དེ། སྐད་ཅིག་མ་རེ་རེ་ཞིང་སྤྲུལ་པའི་སྤྲིན་རྣམས་ཀྱིས་སེམས་ཅན་ཐམས་ཅད་ཀྱི་དོན་ཏོ། །ཐུག་པ་མེད་པ་ཞེས་བྱ་བ་ནི་ཚད་མེད་པ་རྣམས་སོ། །མཐར་ཕྱིན་པ་ཞེས་བྱ་བ་ནི་ཡོངས་སུ་རྫོགས་པར་འགྱུར་བའོ། །སྒྲིབ་པ་ཐམས་ཅད་
ཟད་ནས་ཞེས་བྱ་བ་ནི་སྒྲིབ་པ་རྣམས་གཏུགས་པར་གྱུར་པས་སོ། །འདུས་ཏེ་ཞེས་བྱ་བ་ནི་ཚོགས་པར་མཛད་པའོ། །བདེ་བ་ཡང་ཡིན་ལ་ཆེན་པོ་ཡང་ཡིན་པས་ན་བདེ་བ་ཆེན་པོ་སྟེ། དངོས་གྲུབ་ཀུན་གྱི་མི་འགྱུར་བའི་བདེ་བ་ཆེན་པོ་ཞེས་བཤད་དོ་ཞེས་འདི་ཉིད་ཀྱི་འོག་ནས་བཤད་པའི་
ཕྱིར། ཟག་པ་མེད་པའི་སེམས་དང་སེམས་ལས་བྱུང་བའི་ཚོགས་ནི། དེ་བཞིན་གཤེགས་པའི་བདེ་བ་ཆེན་པོའོ། །དེ་ཉིད་རྡོ་རྗེ་ཆེན་པོ་ཡིན་པས་ན། བདེ་བ་ཆེན་པོ་རྡོ་རྗེ་སྟེ། དེའི་དོན་ཡོད་པའི་དམ་ཚིག་ཏུ་གྱུར་པས་ན་བདེ་བ་ཆེན་པོའི་རྡོ་རྗེ་དོན་ཡོད་པའི་དམ་ཚིག་སྟེ། རྡོ་རྗེ་སེམས་

59-1-49b

དཔའ་ལ་སོགས་པའི་དཀྱིལ་འཁོར་དང་ཕྱག་རྒྱའི་ཚུལ་ལོ། །དཔལ་མཆོག་དང་པོ་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུའི་འགྲེལ་པ། སློབ་དཔོན་ཀུན་དགའ་སྙིང་པོས་མཛད་པ་རྫོགས་སོ།།      །།རྒྱ་གར་གྱི་མཁན་པོ་པདྨ་ཀ་ར་བརྨ་དང་། ཞུ་ཆེན་གྱི་ལོ་ཙཱ་བ་དགེ་
སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །།༄༅༅། །རྒྱ་གར་སྐད་དུ། ཤྲཱི་པ་ར་མཱ་ཏྱ་ཊཱི་ཀ། བོད་སྐད་དུ། དཔལ་མཆོག་དང་པོའི་རྒྱ་ཆེར་བཤད་པ། གསུང་གི་མངའ་བདག་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་
ལོ། །ཁྱབ་བདག་དངོས་ཀུན་བདག་ཉིད་ཅན། །རྡོ་རྗེ་སེམས་དཔའ་ཕྱག་འཚལ་ཏེ། །དཔལ་མཆོག་དང་པོ་བདེ་བ་ཆེ། །ཅི་ནུས་པར་ནི་རྣམ་པར་དབྱེ། །འདི་སྐད་བདག་གིས་ཐོས་པ་ཞེས་བྱ་བ་ལ་སོགས་པ་འདིའི་བརྗོད་པར་བྱ་བ་དང་། འབྲེལ་པ་ནི་གང་ཞིག་ཡིན། དགོས་
པ་དང་། དགོས་པའི་ཡང་དགོས་པ་ནི་ཅི་ཞིག་ཡོད་ཅེ་ན། དེ་བརྗོད་པར་བྱ་སྟེ། དཔལ་མཆོག་དང་པོ་ཞེས་བྱ་བ་ནི་རྒྱུད་འདི་ཉིད་ཡིན་ལ། འདི་ཉིད་ཀྱི་འདི་སྐད་བདག་གིས་ཞེས་བྱ་བ་ནས་བརྩམས་ཏེ། རྡོ་རྗེ་འཛིན་པ་ཉིད་ཅེས་བྱ་བ་ལ། དཔལ་མཆོག་དང་པོ་ནི་རྡོ་རྗེ་འཆང་ཆེན་པོའི་
མཚན་ཉིད་བདག་དང་གཞན་གྱི་དོན་ཕུན་སུམ་ཚོགས་པ་སྟོན་པར་བྱེད་པ་གླེང་གཞི་སྟེ། དང་པོ་སྦྱོར་བའི་ཏིང་ངེ་འཛིན་སྟོན་པ་ཡིན་ཏེ། དེ་ཡང་དཔལ་མཆོག་དང་པོ་རྡོ་རྗེ་འཆང་ཆེན་པོའི་བདག་དང་གཞན་གྱི་དོན་ཕུན་སུམ་ཚོགས་པ་ཆེན་པོས་གདུལ་བྱ་རྣམས་ཀྱི་མངོན་པར་འདོད་
པ་བསྐྱེད་པར་བྱ་བའི་ཕྱིར། གསུངས་པའི་ཐབས་ཀྱི་ཕྱོགས་གཅིག་གིས་ངོ་བོ་དང་པོའི་སྦྱོར་བའི་ཏིང་ངེ་འཛིན་བསྒོམས་པས་མངོན་པར་འདོད་པ་སྐྱེས་པའི་གདུལ་བྱ་རྣམས་ཀྱིས། དཔལ་མཆོག་དང་པོ་སྟེ་རྡོ་རྗེ་འཛིན་པ་ཆེན་པོ་མངོན་དུ་བྱ་བའི་ཕྱིར་ཐབས་མ་ལུས་པར་བསྟན་པའི་དོན་
ཏོ། །དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། རྡོ་རྗེ་སེམས་དཔའ་ཆེན་པོས་གསུངས་པ་ལ་མངོན་པར་བསྟོད་དོ་ཞེས་བྱ་བའི་བར་གྱིས་རྒྱུད་སྟོན་པར་མཛད་པ་ཡིན་ནོ། །དེ་ལ་ཐབས་ཀྱི་རབ་ཏུ་དབྱེ་བ་བརྗོད་པར་བྱ་སྟེ། དེ་ཡང་ཏིང་ངེ་འཛིན་ཉིད་ནི་རྡོ་རྗེ་འཛིན་པ་ཆེན་པོ་

59-1-50a

མངོན་སུམ་དུ་བྱ་བའི་ཐབས་ཡིན་པས། འདི་སྐད་བདག་གིས་ཐོས་པ་ཞེས་བྱ་བ་ནས་བརྩམས་ཏེ། གསང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སོ་ཞེས་བྱ་བའི་བར་གྱིས་དེའི་བཤད་པས་ནི་དང་པོའི་སྦྱོར་བ་ལ་སོགས་པའི་ཏིང་ངེ་
འཛིན་གསུམ་གསུངས་པ་ཡིན་ཏེ། དབང་བསྐུར་བ་དང་། དམ་ཚིག་ཐོབ་པས་ནི་ཐབས་དེ་ལ་འཇུག་པར་བྱའོ་ཞེས་འདིའི་དོན་བསྟན་པར་བྱ་བའི་ཕྱིར་དེ་ནས་རྡོ་རྗེ་ཞེས་བྱ་བ་ནས་བརྩམས་ཏེ། དཀྱིལ་འཁོར་ཆེན་པོ་ཞེས་བྱ་བའི་བར་འདིའི་བཤད་པས་ནི། སློབ་དཔོན་གྱི་ལས་དང་
འཇུག་པ་ལ་སོགས་པའི་ཆོ་ག་རྒྱ་ཆེར་གསུངས་པ་ཡིན་ནོ། །དབང་བསྐུར་བ་དང་དམ་ཚིག་ཐོབ་པ་ལ་སློབ་དཔོན་གྱི་དངོས་གྲུབ་གྱི་ཡེ་ཤེས་བསྟན་པར་བྱའོ་ཞེས་པ་འདིའི་དོན་བསྟན་པར་བྱ་བའི་ཕྱིར། དེ་ནས་ཆོ་ག་བཤད་དེ་ཞེས་བྱ་བ་ནས། དམ་ཚིག་ཆེན་པོ་འདི་དེ་ཁོ་ན་ཉིད་རྡོ་རྗེ་ཞེས་
བྱ་བའི་རྟོག་པའི་རྒྱལ་པོ་རྫོགས་སོ་ཞེས་བྱ་བ་འདིའི་བར་གྱི་བཤད་པས་ནི་དངོས་གྲུབ་ཀྱི་ཡེ་ཤེས་གསུངས་པ་ཡིན་ནོ། །བཅོམ་ལྡན་འདས་རྡོ་རྗེ་འཛིན་པ་ཆེན་པོ་ཞེས་བྱ་བ་ནི། དམ་ཚིག་ཆེན་པོའི་དེ་ཁོ་ན་ཉིད་རྡོ་རྗེ་བྱིན་གྱིས་རློབ་པའི་དཀྱིལ་འཁོར་ཆེན་པོའི་བསྡུས་པའི་དོན་བསྟན་པ་
ཡིན་ཏེ། འདོད་ཆགས་ཀྱིས་འདོད་ཆགས་སྤང་བར་བྱ་བའི་ཕྱིར་འདི་ལྟར་དཀྱིལ་འཁོར་ཆེན་པོ་གསུངས་པ་ཡིན་ནོ།    །ཆ་མཉམ་པ་ལ་སྤྱོད་པའི་སེམས་ཅན་རྣམས་རྗེས་སུ་འཛིན་པར་བྱེད་པ། དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་རྡོ་རྗེ་དམ་ཚིག་ཆེན་པོའི་དཀྱིལ་འཁོར་
གྱི་བསྡུས་པའི་དོན་བཤད་པར་བྱ་སྟེ། དེ་ལ་དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། དེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་བྱ་བའི་བར་གྱི་བཤད་པས་ནི་འདིར་དང་པོའི་སྦྱོར་བ་གསུངས་པ་
ཡིན་ནོ། །དེ་སྐད་ཅེས་བྱ་བ་ནས་བརྩམས་ཏེ། སེམས་དཔའ་ཆེན་པོ་བཞད་པ་ཆེན་པོ་ཞེས་པའི་བར་གྱི་བཤད་པས་ནི། དཀྱིལ་འཁོར་གྱི་རྒྱལ་པོ་ཞེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །འཕགས་པ་གསང་བའི་ཚོགས་མཐོན་པོ་ལས་གསུངས་པའི་ཚུལ་གྱིས་

59-1-50b

ནི་ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུངས་པ་ཡིན་པར་ཤེས་པར་བྱའོ། །དབང་བསྐུར་བ་དང་དམ་ཚིག་ཐོབ་པས་བཟླས་བརྗོད་དང་བསྒོམ་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། དམ་ཚིག་ཆེན་པོའི་
དཀྱིལ་འཁོར་རོ་ཞེས་བྱ་བའི་བཤད་པས་ནི་སློབ་དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །དབང་བསྐུར་བ་དང་དམ་ཚིག་ཐོབ་པ་ལ་འདི་ལྟར་སློབ་དཔོན་གྱིས་དངོས་གྲུབ་ཀྱི་ཡེ་ཤེས་བསྟན་པར་བྱའོ་ཞེས་བྱ་བ་འདིའི་
དོན་བསྟན་པར་བྱ་བའི་ཕྱིར། དེ་ནས་སྒྲུབ་པ་བཤད་དེ་ཞེས་བྱ་བ་ནས་བརྩམས་ཏེ། དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་རྡོ་རྗེ་དམ་ཚིག་ཅེས་བྱ་བའི་རྟོག་པའི་རྒྱལ་པོ་རྫོགས་སོ་ཞེས་བྱ་བའི་བར་གྱི་བཤད་པ་བརྗོད་པ་ཡིན་ཏེ། དེ་བཞིན་གཤེགས་པའི་དཀྱིལ་འཁོར་
གྱི་བསྡུས་པའི་དོན་རྫོགས་སོ།།  །།ཁྲོས་པས་ཁྲོ་བ་སྤང་བར་བྱ་བའི་ཕྱིར་གདུག་ཅིང་གཏུམ་པའི་སེམས་ཅན་རྣམས་རྗེས་སུ་འཛིན་པར་བྱེད་པ་ཁམས་གསུམ་རྣམ་པར་རྒྱལ་བ་རྡོ་རྗེ་བྱིན་གྱིས་རློབ་པའི་དཀྱིལ་འཁོར་ཆེན་པོའི་བསྡུས་པའི་དོན་བཤད་པར་བྱ་སྟེ། དེ་ལ་དེ་ནས་བཅོམ་
ལྡན་འདས་ཞེས་བྱ་བ་ནས་བརྩམས་ཏེ། གདུལ་བའི་དབང་དུ་ཉེ་བར་བཟུང་སྟེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་བྱ་བའི་བར་གྱི་བཤད་པས་ནི་དང་པོའི་སྦྱོར་བའི་ཏིང་ངེ་འཛིན་གསུངས་པ་ཡིན་ནོ། །དེ་ནས་
ཕྱག་ན་རྡོ་རྗེ་ཞེས་བྱ་བ་ནས་བརྩམས་ཏེ། བཟའ་ལ་སོགས་པའི་དཀྱིལ་འཁོར་གྱི་ཕྱི་རོལ་ན་གནས་པ་དེ་དག་ཀྱང་ཞེས་བྱ་བའི་བར་གྱི་བཤད་པས་ནི། ཁྲོ་བོའི་དཀྱིལ་འཁོར་གྱི་དཀྱིལ་འཁོར་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །འདུས་ན་བྱིན་གྱིས་བརླབས་
ཏེ་ཞེས་བྱ་བ་ནས་བརྩམས་ཏེ། ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་པ་གསུངས་པ་ཡིན་ནོ། །ཁམས་གསུམ་རྣམ་པར་རྒྱལ་བ་རྡོ་རྗེས་བྱིན་གྱིས་བརླབས་པའི་དཀྱིལ་འཁོར་ཆེན་པོ་གསུངས་པའི་དངོས་གྲུབ་དེ་ལ་དབང་བསྐུར་བ་དང་། དམ་ཚིག་ཐོབ་པ་དེས་བསྒྲུབ་པར་

59-1-51a

བྱའོ་ཞེས་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། རྡོ་རྗེའི་དཀྱིལ་འཁོར་ཞེས་བྱ་བའི་བར་གྱི་བཤད་པས་ནི། སློབ་དཔོན་གྱི་ལས་ཀྱི་ཆོ་ག་དང་སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ལ། 
དཀྱིལ་འཁོར་འདི་ཉིད་དུ་དབང་བསྐུར་བ་དང་། དམ་ཚིག་ཐོབ་པ་རྣམས་ལ་སློབ་དཔོན་གྱི་དངོས་གྲུབ་ཀྱི་ཡེ་ཤེས་ཉེ་བར་བསྟན་པར་བྱའོ་ཞེས་བྱ་བ་འདིའི་དོན་བཤད་པར་བྱ་བའི་ཕྱིར། དེ་ནས་སྒྲུབ་པ་བཤད་དོ་ཞེས་བྱ་བ་ནས་བརྩམས་ཏེ། ཁམས་གསུམ་རྣམ་པར་རྒྱལ་བ་རྡོ་རྗེ་
དམ་ཚིག་ཅེས་བྱ་བའི་རྟོག་པའི་རྒྱལ་པོ་རྫོགས་སོ་ཞེས་བྱ་བའི་བར་གྱིས་བཤད་པར་མཛད་པ་ཡིན་ཏེ། ཁམས་གསུམ་རྣམ་པར་རྒྱལ་བ་རྡོ་རྗེས་བྱིན་གྱིས་བརླབས་པའི་དཀྱིལ་འཁོར་ཆེན་པོའི་བསྡུས་པའི་དོན་རྫོགས་སོ།།    །།གཏི་མུག་གི་གཉེན་པོར་གྱུར་པ་འགྲོ་བ་ཐམས་ཅད་
འདུལ་བའི་དཀྱིལ་འཁོར་ཆེན་པོའི་བསྡུས་པའི་དོན་བཤད་པར་བྱ་སྟེ། དེ་ནས་བཅོམ་ལྡན་འདས་ངོ་བོ་ཉིད་ཀྱིས་དག་པ་ཞེས་བྱ་བ་ནས་བརྩམས་ཏེ། ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་བྱ་བའི་བར་གྱི་བཤད་པས་ནི་དང་པོའི་སྦྱོར་
བའི་ཏིང་ངེ་འཛིན་གསུངས་པ་ཡིན་ནོ། །དེ་ནས་བཅོམ་ལྡན་འདས་འཇིག་རྟེན་དབང་ཕྱུག་ཅེས་བྱ་བ་ནས་བརྩམས་ཏེ། དཀྱིལ་འཁོར་དང་པོའི་སྦྱོར་བས་བཞུགས་སོ་ཞེས་བྱ་བའི་བར་གྱི་བཤད་པས་ནི། འགྲོ་བ་ཐམས་ཅད་འདུལ་བའི་དཀྱིལ་འཁོར་ཆེན་པོའི་དཀྱིལ་འཁོར་གྱི་རྒྱལ་པོ་
མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །འདུས་ནས་བྱིན་གྱིས་བརླབས་ཏེ་ཞེས་བྱ་བ་ནས་བརྩམས་ཏེ། ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་པ་གསུངས་པ་ཡིན་པར་ཤེས་པར་བྱའོ། །འདི་ཉིད་དུ་དབང་བསྐུར་བ་དང་དམ་ཚིག་ཐོབ་པས་བཟླས་
བརྗོད་དང་། བསྒོམ་པ་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར་དེ་ནས་བཅོམ་ལྡན་འདས་སྤྱན་རས་གཟིགས་དབང་ཕྱུག་ཅེས་བྱ་བ་ནས་བརྩམས་ཏེ། ཡེ་ཤེས་ཀྱི་དཀྱིལ་འཁོར་རོ་ཞེས་བྱ་བའི་བར་གྱི་བཤད་པས་ནི། སློབ་དཔོན་གྱི་ལས་ཀྱི་ཆོ་ག་དང་སློབ་མ་གཞུག་པ་ལ་སོགས་

59-1-51b

པའི་ལས་ཀྱི་ཆོ་ག་རྒྱས་པར་གསུངས་པ་ཡིན་ནོ། །འདི་ཉིད་དུ་དབང་བསྐུར་བ་དང་དམ་ཚིག་ཐོབ་པ་རྣམས་ལ། སློབ་དཔོན་གྱིས་རྒྱུད་ལས་གསུངས་པའི་དངོས་གྲུབ་ཀྱི་ཡེ་ཤེས་བསྟན་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར་དེ་ནས་བསྒྲུབ་པ་བཤད་དེ་ཞེས་བྱ་བ་ནས་ཉོན་མོངས་
པ་ཐམས་ཅད་རྣམ་པར་དག་པའི་དམ་ཚིག་ཅེས་བྱ་བའི་རྟོག་པའི་རྒྱལ་པོ་རྫོགས་སོ་ཞེས་བྱ་བའི་བར་གྱིས་བཤད་པར་མཛད་པ་ཡིན་ཏེ། འགྲོ་བ་ཐམས་ཅད་འདུལ་བའི་དཀྱིལ་འཁོར་ཆེན་པོའི་བསྡུས་པའི་དོན་བསྟན་པ་རྫོགས་སོ།།    །།སེར་སྣའི་གཉེན་པོར་གྱུར་པ་བསམ་པ་
ཐམས་ཅད་ཡོངས་སུ་རྫོགས་པ་ནོར་བུ་རིན་པོ་ཆེའི་དམ་ཚིག་གི་དཀྱིལ་འཁོར་བསྡུས་པའི་དོན་བཤད་པར་བྱ་སྟེ། དེ་ནས་བཅོམ་ལྡན་འདས་ཁམས་གསུམ་གྱི་བདག་པོ་ཞེས་བྱ་བ་ནས་བརྩམས་ཏེ། ལུས་དང་ངག་དང་ཡིད་ཐམས་ཅད་ཀྱི་བདེ་བ་རབ་ཏུ་ཐོབ་པས་ཡང་དག་པར་
གནས་སོ་ཞེས་བྱ་བའི་བར་གྱིས་དང་པོའི་སྦྱོར་བའི་ཏིང་ངེ་འཛིན་གསུངས་པ་ཡིན་ནོ། །དེ་ནས་ནམ་མཁའི་སྙིང་པོ་ཞེས་བྱ་བ་ནས་བརྩམས་ཏེ། བྱང་ཆུབ་སེམས་དཔའི་གཟུགས་ཀྱིས་གནས་སོ་ཞེས་བྱ་བའི་བར་གྱི་བཤད་པས་ནི་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་ནོར་བུ་
རིན་པོ་ཆེའི་དམ་ཚིག་གི་དཀྱིལ་འཁོར་གྱི་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །འདུས་ནས་བྱིན་གྱིས་བརླབས་ཏེ་ཞེས་བྱ་བ་ནས་བརྩམས་ཏེ། ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་པ་གསུངས་པ་ཡིན་པར་ཤེས་པར་བྱའོ། །དཀྱིལ་འཁོར་འདི་ཉིད་དུ་
དབང་བསྐུར་བ་དང་དམ་ཚིག་ཐོབ་པས་བཟླས་བརྗོད་དང་བསྒོམ་པར་བྱའོ་ཞེས་བྱ་བའི་དོན་བཤད་པར་བྱ་བའི་ཕྱིར། དེ་ནས་བཅོམ་ལྡན་འདས་ནམ་མཁའི་སྙིད་པོ་ཞེས་བྱ་བ་ནས་བཙམས་ཏེ། རྡོ་རྗེ་རིན་ཆེན་གྱི་དཀྱིལ་འཁོར་རོ་ཞེས་བྱ་བའི་བར་གྱི་བཤད་པས་ནི་སློབ་དཔོན་གྱི་ལས་ཀྱི་
ཆོ་ག་དང་སློབ་མ་གཞུག་པ་ལ་སོགས་པའི་ཆོ་ག་གསུངས་པ་ཡིན་ནོ། །དབང་བསྐུར་བ་དང་། དམ་ཚིག་ཐོབ་པ་རྣམས་ལ་སློབ་དཔོན་གྱི་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བའི་དོན་བཤད་པར་བྱ་བའི་ཕྱིར། དེ་ནས་སྒྲུབ་པ་བཤད་དེ་ཞེས་བྱ་བ་ནས་རྟོག་པའི་རྒྱལ་པོ་ཆེན་པོ་ཞེས་

59-1-52a

པའི་བར་གྱིས་བཤད་པར་མཛད་དེ་རྡོ་རྗེ་རིན་ཆེན་གྱི་དཀྱིལ་འཁོར་གྱི་བསྡུས་པའི་དོན་རྫོགས་སོ།།    །།དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་དང་གཅིག་ཏུ་བྱས་ནས་རང་བཞིན་གྱིས་འོད་གསལ་བར་བསྟན་ཅིང་བརྩོན་འགྲུས་
ཀྱི་ཕ་རོལ་ཏུ་ཕྱིན་པའི་མཚན་ཉིད་ཅན། རྡོ་རྗེ་ཁུ་ཚུར་གྱི་བསྒོམ་པ་གཙོ་བོར་བྱས་པའི་ཕྱག་རྒྱ་དང་དམ་ཚིག་གི་རྣམ་པ་ཐམས་ཅད་ཀྱི་དཀྱིལ་འཁོར་ཆེན་པོའི་བསྡུས་པའི་དོན་བཤད་པར་བྱ་སྟེ། དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། མངོན་པར་རྫོགས་པར་
འཚང་རྒྱ་བར་འགྱུར་རོ་ཞེས་བྱ་བའི་བར་གྱི་བཤད་པས་ནི་དང་པོའི་སྦྱོར་བའི་ཏིང་ངེ་འཛིན་གསུངས་པ་ཡིན་ནོ། །དེ་ནས་བཅོམ་ལྡན་འདས་རྡོ་རྗེ་ཁུ་ཚུར་ཞེས་བྱ་བ་ནས་དཀྱིལ་འཁོར་གྱི་ཚུལ་གྱིས་བཞུགས་སོ་ཞེས་བྱ་བའི་བར་གྱི་བཤད་པས་ནི་ཕྱག་རྒྱ་དང་། རྡོ་རྗེའི་དམ་ཚིག་ཐམས་
ཅད་ཀྱི་དཀྱིལ་འཁོར་ཆེན་པོའི་དཀྱིལ་འཁོར་གྱི་མཆོག་ཏིང་ངེ་འཛིན་གཉིས་པ་གསུངས་པ་ཡིན་ནོ། །འདུས་ནས་བྱིན་གྱིས་བརླབས་ཏེ་ཞེས་བྱ་བ་ནས་བརྩམས་ཏེ། ལས་ཀྱི་མཆོག་གི་ཏིང་ངེ་འཛིན་གསུམ་པ་གསུངས་པ་ཡིན་པར་ཤེས་པར་བྱའོ། །དབང་བསྐུར་བ་དང་དམ་
ཚིག་ཐོབ་པས་བཟླས་བརྗོད་དང་བསྒོམ་པ་བྱའོ་ཞེས་བྱ་བའི་དོན་བཤད་པར་བྱ་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ནས་ཕྱག་རྒྱ་ཐམས་ཅད་ཀྱི་དཀྱིལ་འཁོར་རོ་ཞེས་བྱ་བའི་བར་གྱི་བཤད་པས་ནི། སློབ་དཔོན་གྱི་ལས་ཀྱི་ཆོ་ག་དང་སློབ་མ་ཞུགས་པ་ལ་སོགས་པའི་
ལས་ཀྱི་ཆོ་ག་རྒྱས་པར་གསུངས་པ་ཡིན་ནོ། །དབང་བསྐུར་བ་དང་དམ་ཚིག་ཐོབ་པ་ཉིད་ལ་སློབ་དཔོན་གྱི་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དངོས་གྲུབ་སྒྲུབ་པ་ཡང་དེ་བཞིན་ཏེ་ཞེས་བྱ་བ་ནས་ཕྱག་རྒྱ་དཀྱིལ་འཁོར་ཐམས་ཅད་
ཀྱི་ཁུ་ཚུར་གྱི་དམ་ཚིག་ཅེས་པ་རྟོག་པའི་རྒྱལ་པོ་ཞེས་བྱ་བའི་བར་གྱིས་བཤད་པར་མཛད་པ་ཡིན་ཏེ། ཕྱག་རྒྱ་ཐམས་ཅད་ཀྱི་དཀྱིལ་འཁོར་གྱི་བསྡུས་པའི་དོན་བསྟན་པ་རྫོགས་སོ།།    །།ཤེས་རབ་ཀྱི་ཕ་རོལ་ཏུ་ཕྱིན་པ་གཙོ་བོར་གྱུར་པའི་འཁོར་ལོ་ལྟར་ཡི་གེ་བསྐོར་བའི་དམ་ཚིག་གི་

59-1-52b

དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། དེ་ནས་བཅོམ་ལྡན་འདས་ཞེས་བྱ་བ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པའོ་ཞེས་བྱ་བའི་བར་གྱི་བཤད་པས་ནི་དང་པོའི་སྦྱོར་བའི་ཏིང་ངེ་འཛིན་གསུངས་པ་ཡིན་ནོ། །དེ་ནས་བཅོམ་ལྡན་འདས་འཇམ་དཔལ་ཞེས་བྱ་
བ་ནས་གཅིག་ཏུ་འདུས་པར་གྱུར་པས་དང་པོའི་སྦྱོར་བའི་དཀྱིལ་འཁོར་གྱི་སྦྱོར་བས་གནས་སོ་ཞེས་བྱ་བའི་བར་གྱི་བཤད་པས་ནི་འཁོར་ལོ་ལྟར་ཡི་གེ་བསྐོར་བའི་དཀྱིལ་འཁོར་གྱི་དཀྱིལ་འཁོར་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །འདུས་ནས་བྱིན་
གྱིས་བརླབས་ཏེ་ཞེས་བྱ་བ་ནས་བརྩམས་ཏེ། ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་གསུངས་པ་ཡིན་པར་ཤེས་པར་བྱའོ། །དབང་བསྐུར་བ་དང་དམ་ཚིག་ཐོབ་པས་བཟླས་བརྗོད་དང་བསྒོམ་པར་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར། དེ་ནས་འཇམ་དཔལ་
གཞོན་ནུར་གྱུར་པ་ཞེས་བྱ་བ་ནས་ཆོས་ཀྱི་དཀྱིལ་འཁོར་རོ་ཞེས་བྱ་བའི་བར་གྱི་བཤད་པས་སློབ་དཔོན་གྱི་ལས་ཀྱི་ཆོ་ག་དང་སློབ་མ་ཞུགས་པ་ལ་སོགས་པ་ཆོ་ག་རྒྱས་པར་གསུངས་པ་ཡིན་ནོ། །དབང་བསྐུར་བ་དང་དམ་ཚིག་ཐོབ་པ་ཉིད་ལ་སློབ་དཔོན་གྱི་དངོས་གྲུབ་ཀྱི་ཡེ་ཤེས་
བསླབ་པར་བྱའོ་ཞེས་བྱ་བའི་ཆོ་ག་བསྟན་པར་བྱ་བའི་ཕྱིར། བསྒྲུབས་ནས་དེ་བཞིན་དུ་ཞེས་བྱ་བ་ནས་འཁོར་ལོ་ལྟར་ཡི་གེ་བསྐོར་བའི་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཞེས་བྱ་བའི་བར་གྱིས་བཤད་པ་མཛད་པ་ཡིན་ཏེ་ཆོས་ཀྱི་དཀྱིལ་འཁོར་གྱི་བསྡུས་པའི་དོན་རྫོགས་སོ།།    །།
རིགས་ཐམས་ཅད་ཀྱི་དཀྱིལ་འཁོར་དུ་འཇུག་པའི་རྒྱུར་གྱུར་པའི་རྡོ་རྗེའི་འཁོར་ལོའི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་འཁོར་ལོའི་ནང་དུ་རྟོགས་པ་ཞེས་བྱ་བ་ནས་རྡོ་རྗེ་ཐམས་ཅད་ལ་འཇུག་པ་ལ་
ཡང་དག་པར་གནས་སོ་ཞེས་བྱ་བའི་བར་གྱི་བཤད་པས་ནི། དང་པོའི་སྦྱོར་བའི་ཏིང་ངེ་འཛིན་གསུངས་པ་ཡིན་ནོ། །དེ་ནས་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ཞེས་བྱ་བ་ནས། དང་པོའི་དཀྱིལ་འཁོར་གྱི་སྦྱོར་བས་གནས་སོ་ཞེས་བྱ་བའི་བར་གྱི་བཤད་པས་ནི་དཀྱིལ་

59-1-53a

འཁོར་གྱི་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །འདུས་ནས་བྱིན་གྱིས་བརླབས་ཏེ། ལས་བྱ་བ་ལ་སོགས་པས་ནི་ལས་ཀྱི་མཆོག་གསུངས་པ་ཡིན་པར་ཤེས་པར་བྱའོ། །དབང་བསྐུར་བ་དང་དམ་ཚིག་ཐོབ་པས་བཟླས་
བརྗོད་དང་བསྐོམ་པ་བྱའོ་ཞེས་བྱ་བར་བསྟན་པར་བྱ་བའི་ཕྱིར་དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། སློབ་མ་རྣམས་ཀྱི་ཞེས་བྱ་བའི་བར་གྱི་བཤད་པ་རྣམས་སློབ་དཔོན་གྱི་ལས་ཀྱི་ཆོ་ག་དང་། སློབ་མ་ཞུགས་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །
དབང་བསྐུར་བ་དང་། དམ་ཚིག་ཐོབ་པ་ཉིད་ལ་སློབ་དཔོན་གྱིས་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བའི་ཆོ་ག་བསྟན་པར་བྱ་བའི་ཕྱིར། བསྒྲུབས་ན་ཞེས་བྱ་བ་ནས་བརྩམས་ཏེ། དཀྱིལ་འཁོར་ཐམས་ཅད་ཀྱི་རྡོ་རྗེ་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཞེས་བྱ་བའི་བར་གྱིས་
བཤད་པར་མཛད་པ་ཡིན་ཏེ། རྡོ་རྗེ་འཁོར་ལོའི་དཀྱིལ་འཁོར་གྱི་བསྡུས་པའི་དོན་རྫོགས་སོ།།    །།ཚོགས་ཡོངས་སུ་རྫོགས་པར་བྱེད་པའི་རྒྱུར་གྱུར་པ་ནམ་མཁའ་མཛོད་ཀྱི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། དེ་ནས་བཅོམ་ལྡན་འདས་མཆོད་པ་ཐམས་ཅད་
ཀྱི་ཆོ་ག་རྒྱས་པར་ཞེས་བྱ་བ་ནས་བརྩམས་ཏེ། མཆོད་པའི་ཆོ་ག་རྒྱས་པའོ་ཞེས་བྱ་བའི་བར་གྱི་བཤད་པས་དང་པོའི་སྦྱོར་བའི་ཏིང་ངེ་འཛིན་གསུངས་པ་ཡིན་ནོ། །དེ་ནས་བཅོམ་ལྡན་འདས་ནམ་མཁའི་མཛོད་ཅེས་བྱ་བ་ནས་དཀྱིལ་འཁོར་ཆེན་པོའི་སྦྱོར་བས་གནས་སོ་ཞེས་བྱ་བའི་
བར་གྱི་བཤད་པས་མཆོད་པ་ཐམས་ཅད་ཀྱི་མཆོག་དོན་ཡོད་པའི་དམ་ཚིག་གི་དཀྱིལ་འཁོར་གྱི་མཆོག་གསུངས་པ་ཡིན་ནོ། །འདུས་ནས་བྱིན་གྱིས་བརླབས་ཏེ་ཞེས་བྱ་བ་ནས་བརྩམས་ཏེ། ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུངས་པ་ཡིན་པར་ཤེས་པར་བྱའོ། །དབང་
བསྐུར་བ་དང་དམ་ཚིག་ཐོབ་པས་བཟླས་བརྗོད་དང་བསྒོམ་པ་བྱའོ་ཞེས་བྱ་བ་འདིའི་ཆོ་ག་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་ནམ་མཁའི་མཛོད་ཅེས་བྱ་བ་ནས་ལས་ཀྱི་དཀྱིལ་འཁོར་རོ་ཞེས་བྱ་བའི་བར་གྱི་བཤད་པས། སློབ་དཔོན་གྱི་ལས་ཀྱི་ཆོ་ག་དང་། སློབ་མ་

59-1-53b

ཞུགས་པ་ལ་སོགས་པ་ལས་ཀྱི་ཆོ་ག་རྒྱས་པར་གསུངས་པ་ཡིན་ནོ། །དབང་བསྐུར་བ་དང་། དམ་ཚིག་ཐོབ་པ་ཉིད་ལ་སློབ་དཔོན་གྱི་དངོས་གྲུབ་བསྒྲུབ་པའི་ཡེ་ཤེས་བསླབ་པར་བྱའོ་ཞེས་བྱ་བའི་དོན་བཤད་པར་བྱ་བའི་ཕྱིར། དེ་ནས་སྒྲུབ་པ་ཞེས་བྱ་བ་ནས་བརྩམས་ཏེ། རྡོ་རྗེ་སྣ་
ཚོགས་པའི་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཞེས་བྱ་བའི་བར་གྱིས་བསྟན་པར་མཛད་པ་ཡིན་ཏེ། ནམ་མཁའི་མཛོད་ཀྱི་དཀྱིལ་འཁོར་གྱི་བསྡུས་པའི་དོན་རྫོགས་སོ།།    །།བསྲུང་བའི་ལས་ཀྱི་གཙོ་བོར་གྱུར་པ་རྡོ་རྗེ་གནོད་སྦྱིན་གྱི་དཀྱིལ་འཁོར་གྱི་བསྡུས་པའི་དོན་བཤད་
པར་བྱ་སྟེ། དེ་ནས་བཅོམ་ལྡན་འདས་གདུག་པ་ཐམས་ཅད་འདུལ་བ་ལངས་ཏེ་ཞེས་བྱ་བ་ནས། ཐམས་ཅད་འདུལ་བ་ནི་བྱང་ཆུབ་བོ་ཞེས་བྱ་བའི་བར་གྱི་བཤད་པས་དང་པོའི་སྦྱོར་བའི་ཏིང་ངེ་འཛིན་གསུངས་པ་ཡིན་ནོ། །དེ་ནས་བདུད་ཐམས་ཅད་རབ་ཏུ་འཇོམས་པ་ཞེས་བྱ་བ་ནས་དང་
པོའི་དཀྱིལ་འཁོར་གྱི་སྦྱོར་བས་འདུག་གོ་ཞེས་བྱ་བའི་བར་གྱི་བཤད་པས་གདུག་པ་ཐམས་ཅད་འདུལ་བར་བྱིན་གྱིས་བརླབས་པ་རྡོ་རྗེ་གནོད་སྦྱིན་གྱི་དཀྱིལ་འཁོར་གྱི་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་ནས་བྱིན་གྱིས་བརླབས་ཏེ་
ཞེས་བྱ་བ་ནས་བརྩམས་ཏེ། ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་པ་གསུངས་པ་ཡིན་པར་ཤེས་པར་བྱའོ། །དབང་བསྐུར་བ་དང་དམ་ཚིག་ཐོབ་པས་བཟླས་བརྗོད་དང་བསྒོམ་པ་བྱའོ་ཞེས་བྱ་བ་འདིའི་དོན་བསྟན་པར་བྱ་སྟེ། དེ་ནས་རྡོ་རྗེ་གནོད་སྦྱིན་ཞེས་བྱ་བ་ནས་
བརྩམས་ཏེ། ཕྱག་ན་རྡོ་རྗེའི་དཀྱིལ་འཁོར་རོ་ཞེས་བྱ་བའི་བར་གྱི་བཤད་པས་ནི། སློབ་དཔོན་གྱི་ལས་ཀྱི་ཆོ་ག་དང་སློབ་མ་གཞུག་པ་ལ་སོགས་པའི་ལས་ཀྱི་ཆོ་ག་རྒྱས་པར་གསུངས་པ་ཡིན་ནོ། །དབང་བསྐུར་བ་དང་དམ་ཚིག་ཐོབ་པ་ཉིད་ལ་སློབ་དཔོན་གྱིས་བསྒྲུབ་པའི་ཡེ་
ཤེས་བསླབ་པར་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར། དེ་ནས་བསྒྲུབས་ན་ཞེས་བྱ་བ་ནས། རྟོག་པའི་རྒྱལ་པོ་ཆེན་པོ་རྫོགས་སོ་ཞེས་བྱ་བའི་བར་གྱིས་བཤད་པ་མཛད་པ་ཡིན་ཏེ་རྡོ་རྗེ་གནོད་སྦྱིན་གྱི་དཀྱིལ་འཁོར་གྱི་བསྡུས་པའི་དོན་རྫོགས་སོ།།    །།རིགས་ཐམས་

59-1-54a

ཅད་ཀྱི་རང་གི་སྐུའི་དཀྱིལ་འཁོར་སེམས་ཅན་ཐམས་ཅད་རྗེས་སུ་འཛིན་པར་བྱེད་པའི་བསྡུས་པའི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། དེ་ནས་བཅོམ་ལྡན་འདས་ཐམས་ཅད་མཉམ་པ་ཉིད་ལ་རབ་ཏུ་གནས་པ་ཞེས་བྱ་བ་ནས་བརྩམས་ཏེ། ཤེས་
རབ་ཀྱི་ཕ་རོལ་ཏུ་ཕྱིན་པ་ཉིད་དུ་ཤེས་པར་བྱའོ་ཞེས་བྱ་བའི་བར་གྱི་བཤད་པས་ནི་དང་པོའི་སྦྱོར་བའི་ཏིང་ངེ་འཛིན་གསུངས་པ་ཡིན་ནོ། །དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། དཀྱིལ་འཁོར་ཆེན་པོར་རབ་ཏུ་ཞུགས་སོ་ཞེས་བྱ་བའི་བར་གྱི་བཤད་པས་ནི། དམ་ཚིག་
ཐམས་ཅད་ཀྱི་རྡོ་རྗེ་དམ་ཚིག་ཆེན་པོའི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུལ་ནས་བྱིན་གྱིས་བརླབས་ཏེ་ཞེས་བྱ་བ་ནས་བརྩམས་ཏེ། ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་པ་གསུངས་
པ་ཡིན་པར་ཤེས་པར་བྱའོ། །དབང་བསྐུར་བ་དང་དམ་ཚིག་ཐོབ་པས་བཟླས་བརྗོད་དང་བསྒོམ་པར་བྱའོ་ཞེས་བྱ་བ་བསྟན་པར་བྱ་བའི་ཕྱིར། དེ་ནས་ཕྱག་ན་རྡོ་རྗེ་ཞེས་བྱ་བ་ནས་བརྩམས་ཏེ། དེ་ནི་ཆོ་ག་རྒྱས་པ་ཡིན་ནོ་ཞེས་བྱ་བའི་བར་གྱི་བཤད་པས་སློབ་དཔོན་གྱི་ལས་ཀྱི་ཆོ་ག་
དང་སློབ་མ་ཞུགས་པ་ལ་སོགས་པ་ལས་ཀྱི་ཆོ་ག་རྒྱས་པར་གསུངས་པ་ཡིན་ནོ། །བསྡུས་པའི་དཀྱིལ་འཁོར་གྱི་དོན་རྫོགས་སོ།།    །།འཇིག་རྟེན་པའི་ལྷ་རྣམས་ལ་ལྷག་པར་མོས་པའི་སེམས་ཅན་རྣམས་རྗེས་སུ་འཛིན་པར་བྱེད་པ་ཞི་བ་རྩེ་གཅིག་པས་མཚན་པ་ལ་སོགས་པ་
དཀྱིལ་འཁོར་བཞིའི་བསྡུས་པའི་དོན་བཤད་པར་བྱ་སྟེ། དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། རབ་ཏུ་སྦྱོར་བའོ་ཞེས་བྱ་བའི་བར་གྱི་བཤད་པས་འཇིག་རྟེན་པའི་དཀྱིལ་འཁོར་བཞི་པོའི་ཐུན་མོང་གི་དང་པོའི་སྦྱོར་བའི་ཏིང་ངེ་འཛིན་གསུངས་པ་ཡིན་ནོ། །དེ་ནས་ཕྱི་
རོལ་གྱི་རྡོ་རྗེ་རིགས་ཞེས་བྱ་བ་ནས་བརྩམས་ཏེ། སྔགས་ཀྱི་བར་གྱི་མིང་གིས་ནི་ཞི་བ་རྩེ་གཅིག་པས་མཚན་པའི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་ནས་བྱིན་གྱིས་བརླབས་ཏེ་ཞེས་བྱ་བ་ནས་བརྩམས་ཏེ། 

59-1-54b

ཞི་བ་རྩེ་གཅིག་པའི་དཀྱིལ་འཁོར་གྱི་ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་པ་གསུངས་པ་ཡིན་པར་ཤེས་པར་བྱའོ། །དེ་ནས་དཀྱིལ་འཁོར་བཤད་དེ་ཞེས་བྱ་བ་ནས་བརྩམས་ཏེ། དཀྱིལ་འཁོར་ཞི་བ་རྩེ་གཅིག་པས་མཚན་པའོ་ཞེས་བྱ་བའི་བར་གྱི་བཤད་པས་ནི་སློབ་
དཔོན་གྱི་ལས་ཀྱི་ཆོ་ག་དང་། སློབ་མ་ཞུགས་པ་ལ་སོགས་པའི་ལས་ཀྱི་ཆོ་ག་རྒྱས་པར་གསུངས་པ་ཡིན་ནོ།    །མ་མོའི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། དེ་ལ་དང་
པོའི་སྦྱོར་བའི་ཏིང་ངེ་འཛིན་ནི་བཤད་ཟིན་ཏོ། །དེ་ནས་ཞེས་བྱ་བ་ནས་བརྩམས་ཏེ་ཡི་གེ་
ཞེས་བྱ་བའི་བར་གྱི་བཤད་པས་དཀྱིལ་འཁོར་གྱི་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་ནས་བྱིན་གྱིས་བརླབས་ཏེ་ཞེས་བྱ་བ་ནས་བརྩམས་ཏེ། ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་པ་གསུངས་པ་ཡིན་པར་ཤེས་པར་
བྱའོ། །དེ་ནས་དཀྱིལ་འཁོར་བཤད་དེ་ཞེས་བྱ་བ་ནས་བརྩམས་ཏེ། ཕྱག་རྒྱའི་དཀྱིལ་འཁོར་དངོས་གྲུབ་ཐམས་ཅད་ཀྱི་རྣལ་འབྱོར་གྱི་རང་བཞིན་ཞེས་བྱ་བའི་བར་གྱི་བཤད་པས་ནི་སློབ་དཔོན་གྱི་ལས་ཀྱི་ཆོ་ག་དང་སློབ་མ་ཞུགས་པ་ལ་སོགས་པའི་ལས་ཀྱི་ཆོ་ག་རྒྱས་པར་
གསུངས་པ་ཡིན་ནོ།    །མིང་པོ་གསུམ་གྱི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། འདིར་ཡང་དང་པོའི་སྦྱོར་བ་ནི་བཤད་ཟིན་ཏོ། །དེ་ནས་སྦྲང་རྩི་བྱེད་པ་ལ་སོགས་པ་ཞེས་བྱ་བ་ནས་བརྩམས་ཏེ། སྭ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་
པ་ཡིན་ནོ། །གསུམ་པ་ནི་སྔ་མ་བཞིན་དུ་ཤེས་པར་བྱའོ། །དེ་ནས་དཀྱིལ་འཁོར་བཤད་དེ་ཞེས་བྱ་བ་ནས་བརྩམས་ཏེ། དམ་ཚིག་གི་དཀྱིལ་འཁོར་རོ་ཞེས་བྱ་བའི་བར་གྱི་བཤད་པས་ནི། སློབ་དཔོན་གྱི་ལས་ཀྱི་ཆོ་ག་དང་སློབ་མ་ཞུགས་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་
ནོ།    །སྲིང་མོ་བཞིའི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། འདིར་ཡང་དང་པོའི་སྦྱོར་བ་ནི་སྔ་མ་དེ་ཉིད་དོ། །དེ་ནས་སྲིང་མོ་བཞིས་རང་གི་སྙིང་པོ་འདི་སྨྲས་སོ། །ཧཾ་ཞེས་བྱ་བ་འདིས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་གསུམ་པའང་སྔ་མ་བཞིན་དུ་ཤེས་པར་

59-1-55a

བྱའོ། །དེ་ནས་འདིའི་དཀྱིལ་འཁོར་བཤད་དེ་ཞེས་བྱ་བ་ནས་བརྩམས་ཏེ། ལས་ཀྱི་དཀྱིལ་འཁོར་རོ་ཞེས་བྱ་བའི་བར་གྱི་བཤད་པས་ནི། དེ་བཞིན་དུ་སློབ་དཔོན་གྱི་ལས་ཀྱི་ཆོ་ག་དང་སློབ་མ་གཞུག་པ་ལ་སོགས་པའི་ཆོ་ག་རྒྱ་ཆེར་གསུངས་པ་ཡིན་ནོ། །ཕྱི་རོལ་
གྱི་རྡོ་རྗེ་རིགས་ཀྱི་རྟོག་པའི་བསྡུས་པའི་དོན་རྫོགས་སོ།།    །།འཇིག་རྟེན་པ་དང་འཇིག་རྟེན་ལས་འདས་པའི་དཀྱིལ་འཁོར་དང་གཞན་དག་འབྲི་བ་ནི། སློབ་དཔོན་གྱིས་ཇི་ལྟ་བ་དེ་བཞིན་དུ་གཤེགས་སུ་གསོལ་བ་དང་། སྤྲུལ་པ་རང་གི་ལུས་ལ་བཅུག་ནས། རང་གི་རྟོག་པ་ལས་
གསུངས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་བཤད་དེ། ཤེས་རབ་ཀྱི་ཕ་རོལ་ཏུ་ཕྱིན་པའི་ཚིག་བཞི་འདོན་ཅིང་། དེའི་དོན་ལ་ལྷག་པར་མོས་ནས་དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་གྱིས་བྱིན་གྱིས་བརླབས་ཏེ། ཕྱག་ན་རྡོ་རྗེའི་སྐུར་ལྷག་པར་མོས་ནས་ལེགས་
སོ་ཞེས་བྱ་བས་ཡང་དག་པར་དགའ་བར་བྱས་ཤིང་བདག་ཉིད་བསྲུང་བ་བྱས་ལ་ལྡང་བར་བྱ་ཞེས་པ་ནི་གཞུང་ལྷག་མ་རྣམས་ཀྱིས་སྟོན་པ་ཡིན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུ་ཕྱག་རྒྱ་ཆེན་པོ་གཙོར་བྱས་པ་ཀུན་གཞིའི་རྣམ་པར་ཤེས་པའི་གཉེན་པོར་གྱུར་པའི་བསྡུས་
པའི་དོན་རྫོགས་སོ།།    །།ད་ནི་ནམ་མཁའ་ལྟ་བུར་མཉམ་པ་ཉིད་ཀྱི་ཡེ་ཤེས་སྦྱིན་པའི་ཕ་རོལ་ཏུ་ཕྱིན་པའི་དམ་ཚིག་གི་ཕྱག་རྒྱའི་ངོ་བོ་ཉིད་ཉོན་མོངས་པ་ཅན་གྱི་ཡིད་ཀྱི་གཉེན་པོར་གྱུར་པ་དུམ་བུ་གཉིས་པ་རྩ་བའི་རྒྱུད་ཀྱི་བསྡུས་པའི་དོན་བཤད་པར་བྱ་སྟེ། དེ་ནས་བཅོམ་ལྡན་འདས་
ཞེས་བྱ་བ་ནས་བརྩམས་ཏེ། མིང་གི་དབང་བསྐུར་བས་དབང་བསྐུར་རོ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་དང་པོ་གསུངས་པ་ཡིན་ནོ། །དེ་ནས་བཅོམ་ལྡན་འདས་རྡོ་རྗེ་འཛིན་པ་ཆེན་པོ་ཞེས་བྱ་བ་ནས་བརྩམས་ཏེ། བྲན་དག་གོ་ཅེས་བྱ་བའི་བར་གྱི་བཤད་པས་ནི་ཏིང་ངེ་
འཛིན་གཉིས་པ་གསུངས་པ་ཡིན་ནོ། །ལས་ཀྱི་མཆོག་ཅེས་བྱ་བའི་ཏིང་ངེ་འཛིན་ནི་སྔ་མ་བཞིན་དུ་ཤེས་པར་བྱའོ། །དབང་བསྐུར་བ་དང་དམ་ཚིག་ཐོབ་པས་བཟླས་བརྗོད་དང་བསྒོམ་པ་བྱའོ་ཞེས་བྱ་བའི་ཆོ་ག་བསྟན་པའི་ཕྱིར། དེ་ནས་བཅོམ་ལྡན་འདས་དེ་བཞིན་གཤེགས་པ་ཞེས་བྱ་བ་

59-1-55b

ནས་བརྩམས་ཏེ། ཕྱག་རྒྱའི་ཆོ་ག་རྒྱས་པའོ་ཞེས་བྱ་བའི་བར་གྱི་བཤད་པས་ནི་སློབ་དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པ་ལ་སོགས་པའི་ལས་ཀྱི་ཆོ་ག་རྒྱས་པར་གསུངས་པ་ཡིན་ནོ། །དབང་བསྐུར་བ་དང་། དམ་ཚིག་ཐོབ་པ་ཉིད་ལ་སློབ་དཔོན་གྱིས་དངོས་གྲུབ་
ཀྱི་ཡེ་ཤེས་བསླབ་པར་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། གསང་བའི་ཆོ་ག་རྒྱས་པའོ་ཞེས་བྱ་བའི་བར་གྱིས་བཤད་པ་མཛད་པ་ཡིན་ཏེ། རྩ་བའི་རྒྱུད་ལས་དུམ་བུ་གཉིས་པའི་རྡོ་རྗེ་སེམས་དཔའི་དཀྱིལ་འཁོར་གྱི་
བསྡུས་པའི་དོན་རྫོགས་སོ།།    །།དེ་བཞིན་གཤེགས་པའི་དཀྱིལ་འཁོར་གྱི་ཡང་བསྡུས་པའི་དོན་བཤད་པར་བྱ་སྟེ། འདིར་དང་པོའི་སྦྱོར་བ་ནི་རྡོ་རྗེ་སེམས་དཔའི་དཀྱིལ་འཁོར་དུ་གསུངས་པའི་བཤད་མ་ཐག་པ་ཉིད་ཡིན་པར་ཤེས་པར་བྱའོ། །དེ་ནས་བཅོམ་ལྡན་འདས་ཞེས་
བྱ་བ་ནས་བརྩམས་ཏེ། བཤད་པ་ཆེན་པོ་ཁྱོད་རབ་ཏུ་བཤད་ཅིང་ངོ་མཚར་ཆེན་པོར་གྱུར་ཏོ་ཞེས་བྱ་བའི་བར་གྱི་བཤད་པས་ནི། ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་གསུངས་པ་ཡང་སྔ་མ་བཞིན་དུ་ཤེས་པར་བྱའོ། །དེ་ནས་བཅོམ་ལྡན་འདས་ཞེས་བྱ་བ་ནས་
བརྩམས་ཏེ། ཆོ་ག་རྒྱས་པའོ་ཞེས་བྱ་བའི་བར་གྱི་བཤད་པས་ནི། དེ་བཞིན་དུ་སློབ་དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པ་ལ་སོགས་པའི་ལས་ཀྱི་ཆོ་ག་རྒྱས་པ་གསུངས་པ་ཡིན་ནོ། །དབང་བསྐུར་བ་དང་དམ་ཚིག་ཐོབ་པ་ཉིད་ལ་སློབ་དཔོན་གྱིས་དངོས་གྲུབ་ཀྱི་ཡེ་ཤེས་
བསླབ་པར་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར། དེ་བཞིན་དུ་བསྒྲུབས་ན་ཞེས་བྱ་བ་ནས་བརྩམས་ཏེ། བདེ་བ་ཆེན་པོ་རྡོ་རྗེ་གསང་བའི་ཆོ་ག་རྒྱས་པའོ་ཞེས་བྱ་བའི་བར་གྱིས་བཤད་པ་མཛད་པ་ཡིན་ཏེ། དེ་བཞིན་གཤེགས་པའི་དཀྱིལ་འཁོར་གྱི་བསྡུས་པའི་དོན་རྫོགས་སོ།།    །།
ཁྲོ་བོའི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། འདིར་དང་པོའི་སྦྱོར་བའི་ཏིང་ངེ་འཛིན་ནི་སྔར་བཤད་པ་ཉིད་དོ། །དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། རྡོ་རྗེ་ཆེན་པོའི་དམ་ཚིག་གི་དཀྱིལ་འཁོར་གྱི་བྱིན་གྱིས་བརླབས་པའོ་ཞེས་བྱ་བའི་བར་གྱི་བཤད་པས་ནི་

59-1-56a

ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་ལས་ཀྱི་རྒྱལ་པོ་མཆོག་གི་ཏིང་ངེ་འཛིན་ནི་སྔ་མ་བཞིན་དུ་ཤེས་པར་བྱའོ། །དཀྱིལ་འཁོར་ཆེན་པོའི་ཚུལ་གྱིས་ཞེས་བྱ་བ་ནས་བརྩམས་ཏེ། གཞན་དག་གོ་ཞེས་བྱ་བའི་བར་གྱི་བཤད་པས་ནི། དེ་བཞིན་དུ་སློབ་
དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །དབང་བསྐུར་བ་དང་དམ་ཚིག་ཐོབ་པ་ཉིད་ལ་སློབ་དཔོན་གྱིས་དངོས་གྲུབ་བསྒྲུབ་པའི་ཡེ་ཤེས་བསླབ་པར་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར། དེ་ནས་དེ་བཞིན་དུ་ཞེས་
བྱ་བ་ནས་བརྩམས་ཏེ། རབ་ཏུ་དགའ་བ་འབྱུང་བ་གསང་བའི་རྡོ་རྗེ་དམ་ཚིག་གི་ཆོ་ག་རྒྱས་པའོ་ཞེས་བྱ་བའི་བར་གྱིས་བཤད་པར་མཛད་པ་ཡིན་ཏེ། རབ་ཏུ་དགའ་བའི་རྡོ་རྗེ་ཁྲོ་བོའི་དཀྱིལ་འཁོར་གྱི་བསྡུས་པའི་དོན་ནོ།    །སྤྱན་རས་གཟིགས་དབང་ཕྱུག་གི་དཀྱིལ་འཁོར་གྱི་བསྡུས་པའི་
དོན་བཤད་པར་བྱ་སྟེ། ཏིང་ངེ་འཛིན་དང་པོ་ནི་རྡོ་རྗེ་སེམས་དཔའི་དཀྱིལ་འཁོར་དུ་བཤད་པ་ཉིད་དོ། །དེ་ནས་ཞེས་བྱ་བ་ནས་བརྩམས་ཏེ། རྡོ་རྗེ་སྐྱིལ་ཀྲུང་གིས་གནས་སོ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་ལས་ཀྱི་རྒྱལ་པོ་མཆོག་
གི་ཏིང་ངེ་འཛིན་ཀྱང་དེ་བཞིན་དུ་ཤེས་པར་བྱའོ། །དཀྱིལ་འཁོར་ཞེས་བྱ་བ་ནས་བརྩམས་ཏེ། ཆོ་ག་རྒྱས་པ་ཐམས་ཅད་ཀྱང་དེ་བཞིན་ནོ་ཞེས་བྱ་བའི་བར་གྱི་བཤད་པས་ནི། དེ་བཞིན་དུ་སློབ་དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་
ཡིན་ནོ། །དབང་བསྐུར་བ་དང་། དམ་ཚིག་ཐོབ་པ་ཉིད་ལ་སློབ་དཔོན་གྱིས་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བའི་དོན་བསྟན་པའི་ཕྱིར་དེ་ནས་བསྒྲུབས་ན་ཞེས་བྱ་བ་ནས་བརྩམས་ཏེ། བདེ་བ་ཆེན་པོ་པདྨའི་ཆོ་ག་རྒྱས་པའོ་ཞེས་བྱ་བའི་བར་གྱིས་བཤད་པར་མཛད་པ་ཡིན་ནོ།།    །།
ནོར་བུ་རིན་པོ་ཆེའི་རིགས་ཀྱི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། དེ་ལ་དང་པོའི་སྦྱོར་བའི་ཏིང་ངེ་འཛིན་ནི་རྡོ་རྗེ་སེམས་དཔའི་དཀྱིལ་འཁོར་དུ་བཤད་པ་ཉིད་དུ་གཟུང་ངོ་། །དེ་ནས་བཅོམ་ལྡན་འདས་ཐམས་ཅད་དང་ལྡན་པའི་བདག་པོ་ཞེས་བྱ་བ་ནས་དཀྱིལ་འཁོར་ཆེན་

59-1-56b

པོའི་ཚུལ་གྱིས་གནས་སོ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་ལས་ཀྱི་རྒྱལ་པོའི་མཆོག་གི་ཏིང་ངེ་འཛིན་ཏེ་སྔ་མ་བཞིན་དུ་ཤེས་པར་བྱའོ། །དེ་ནས་དཀྱིལ་འཁོར་ཞེས་བྱ་བ་ནས་བརྩམས་ཏེ། ཆོ་ག་རྒྱས་པའོ་ཞེས་བྱ་བའི་བར་གྱི་
བཤད་པས་སྔ་མ་བཞིན་དུ་སློབ་དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པ་ལ་སོགས་པའི་ལས་ཀྱི་ཆོ་ག་རྒྱས་པར་གསུངས་པ་ཡིན་ནོ། །དབང་བསྐུར་བ་དང་། དམ་ཚིག་ཐོབ་པ་ཉིད་ལ་སློབ་དཔོན་གྱིས་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བའི་དོན་བསྟན་པའི་ཕྱིར་དེ་ནས་
ལས་བསྒྲུབས་ན་ཞེས་བྱ་བ་ནས་བརྩམས་ཏེ། ནོར་བུའི་རྒྱལ་མཚན་གྱི་ཆོ་ག་རྒྱས་པར་བཤད་པར་མཛད་པ་ཡིན་ནོ།    །དུམ་བུ་གཉིས་པའི་རྩ་བའི་རྒྱུད་ལས་གསུངས་པའི་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་དུ་འཇུག་པ་དང་། དབང་བསྐུར་བ་དང་། དངོས་གྲུབ་ཐམས་
ཅད་སྡུད་པར་བྱེད་པའི་བསྡུས་པའི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། དེ་ལ་དང་པོའི་སྦྱོར་བའི་ཏིང་ངེ་འཛིན་ནི་སྔར་གསུངས་པ་ཉིད་འདིར་ཤེས་པར་བྱའོ། །དེ་ནས་བཅོམ་ལྡན་འདས་རིགས་ཐམས་ཅད་སྡུད་པ་ཞེས་བྱ་བ་ནས་བརྩམས་ཏེ། དཀྱིལ་འཁོར་དུ་གྱུར་ཏོ་ཞེས་
བྱ་བའི་བར་གྱི་བཤད་པས་ནི། ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་གསུམ་པ་ནི་རྒྱ་ཆེན་པོས་ཤེས་པར་བྱའོ། །དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། ཆོ་ག་ཐམས་ཅད་རྒྱས་པའོ་ཞེས་བྱ་བའི་བར་གྱི་བཤད་པས། དེ་བཞིན་དུ་སློབ་དཔོན་གྱི་ལས་ཀྱི་
ཆོ་ག་དང་སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །དབང་བསྐུར་བ་དང་དམ་ཚིག་ཐོབ་པ་ཉིད་ལ་སློབ་དཔོན་གྱི་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར་དངོས་གྲུབ་ཐམས་ཅད་དང་ལས་ཐམས་ཅད་དོ་ཞེས་བཤད་པ་ཡིན་ནོ།།    །།
མིང་པོ་གསུམ་གྱི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། དེ་ལ་འདིར་དང་པོའི་སྦྱོར་བ་ནི་ལྷ་ལ་སོགས་པ་དང་ལྷན་ཅིག་རྡོ་རྗེ་སེམས་དཔའི་དཀྱིལ་འཁོར་དུ་གསུངས་པ་ཡིན་ནོ། །ལྷ་ལ་སོགས་པ་ཞེས་བྱ་བ་ནས་བརྩམས་ཏེ། ཧྲཱི། ཞེས་བྱ་བའི་བར་གྱི་བཤད་པས་འདིར་ཏིང་ངེ་

59-1-57a

འཛིན་གཉིས་པ་གསུངས་པ་ཡིན་ནོ། །གསུམ་པ་ཡང་དེ་བཞིན་དུ་ཤེས་པར་བྱའོ། །དེ་ནས་དཀྱིལ་འཁོར་ཞེས་བྱ་བ་ནས་བརྩམས་ཏེ། འདོད་པའི་ཡོན་ཏན་དམ་པ་ལྔས་ཞེས་བྱ་བའི་བར་གྱི་བཤད་པས་ནི། དེ་བཞིན་དུ་སློབ་དཔོན་གྱི་ལས་ཀྱི་ཆོ་ག་དང་། སློབ་མ་
གཞུག་པ་ལ་སོགས་པའི་ལས་ཀྱི་ཆོ་ག་རྒྱས་པར་གསུངས་པ་ཡིན་ནོ།།    །།ད་ནི་སྲིང་མོ་བཞིའི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། དེ་ལ་ཏིང་ངེ་འཛིན་དང་པོ་ནི་མིང་པོ་གསུམ་གྱི་དཀྱིལ་འཁོར་གྱི་བཤད་པ་ཉིད་དོ། །དེ་ནས་གསང་བའི་ལྷ་མོ་རྣམས་ཀྱི་རང་གི་ཕྱག་རྒྱ་ཕུལ་
བ། ཧྲཱིཿཧཱུཾ་ཤྲཱི་བྷྱོ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་གསུམ་པ་ཡང་དེ་བཞིན་དུ་ཤེས་པར་བྱའོ། །དེ་ནས་དཀྱིལ་འཁོར་ཞེས་པ་ནས་བརྩམས་ཏེ་གཉིས་པའི་བར་དུ་ཤེས་པར་བྱའོ་ཞེས་བྱ་བའི་བར་གྱི་བཤད་པས་ནི། དེ་བཞིན་དུ་སློབ་དཔོན་གྱི་
ལས་ཀྱི་ཆོ་ག་དང་སློབ་མ་གཞུག་པ་ལ་སོགས་པའི་ལས་ཀྱི་ཆོ་ག་རྒྱས་པར་གསུངས་པ་ཡིན་ནོ།།    །།ལྷ་མ་ཡིན་གྱི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། དེ་ལ་དང་པོའི་ཏིང་ངེ་འཛིན་ནི་མིང་པོ་གསུམ་གྱི་དཀྱིལ་འཁོར་དུ་བཤད་པ་ཉིད་དོ། །དེ་ནས་ལྷ་མ་ཡིན་ཐམས་ཅད་ཅེས་བྱ་
བ་ནས་བརྩམས་ཏེ། ཇི་སྲིད་ཕཊ་ཅེས་བྱ་བའི་བར་གྱི་བཤད་པས་ནི་འདིར་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་ནས་བྱིན་གྱིས་བརླབས་ཏེ་ཞེས་བྱ་བ་ནས་བརྩམས་ཏེ། གསུམ་པ་གསུངས་པ་ཡིན་པར་ཤེས་པར་བྱའོ། །དེ་ནས་དཀྱིལ་འཁོར་ཞེས་བྱ་བ་ནས་བརྩམས་
ཏེ་སློབ་མ་གཞུག་པ་ཡང་དེ་བཞིན་ནོ་ཞེས་བྱ་བའི་བར་གྱིས་སྔ་མ་བཞིན་དུ་སློབ་དཔོན་གྱི་ལས་ཀྱི་ཆོ་ག་དང་སློབ་མ་གཞུག་པ་ལ་སོགས་པའི་ལས་ཀྱི་ཆོ་ག་རྒྱས་པར་གསུངས་པ་ཡིན་ནོ།    །ཀླུའི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། འདིར་ཡང་ཏིང་ངེ་འཛིན་དང་པོ་ནི་མིང་པོ་གསུམ་
གྱི་དཀྱིལ་འཁོར་དུ་གསུངས་པ་ཉིད་དོ། །དེ་ནས་ཀླུ་རིགས་བཞིའི་རང་གི་སྙིང་པོ་ཕུལ་བ། བླ་ཞེས་བྱ་བའི་བར་གྱི་བཤད་པས་ནི་གཉིས་པ་གསུངས་པ་ཡིན་ནོ། །དེ་ནས་འདུས་པ་ལ་སོགས་པས་ནི་གསུམ་པ་ཤེས་པར་བྱའོ། །དབང་བསྐུར་བ་དང་དམ་ཚིག་ཐོབ་པས་འདིར་ཡང་བཟླས་བརྗོད་

59-1-57b

དང་བསྒོམ་པར་བྱའོ་ཞེས་བསྟན་པར་བྱ་བའི་ཕྱིར་དེ་ནས་དཀྱིལ་འཁོར་ཞེས་བྱ་བ་ནས་བརྩམས་ཏེ། གལ་ཏེ་གྲུབ་པར་གྱུར་པ་དགའ་བར་འགྱུར་རོ་ཞེས་བྱ་བའི་བར་གྱི་བཤད་པས་སློབ་དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །
རྟོག་པ་དང་པོ་ལ་སོགས་པ་གསུངས་པའི་ཆོ་ག་ཐམས་ཅད་དང་། དུམ་བུ་གཉིས་པའི་རྩ་བའི་རྒྱུད་ལས་གསུངས་པའི་ཆོ་ག་ཐམས་ཅད་གདུལ་བྱ་རྣམས་ཀྱི་ཉེས་པ་ཇི་ལྟ་བ་བཞིན་དུ་འགྲུབ་པར་མི་འགྱུར་བ་རྣམས་ཀྱི་བསྒྲུབ་པའི་ཁྱད་པར་གྱིས་མྱུར་དུ་དངོས་གྲུབ་བསྒྲུབ་པའི་ལས་
དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། དེ་ནས་རྡོ་རྗེ་རི་རབ་ཆེན་པོའི་རིའི་རྩེ་མོ་ཐམས་ཅད་ཅེས་བྱ་བ་ནས་བརྩམས་ཏེ། བཙུན་མོའི་ཚོགས་སྣ་ཚོགས་པའི་རྡོ་རྗེ་ལྷ་མོ་དང་བཅས་པས་མདུན་དུ་བྱས་ཏེ། ཅེས་བྱ་བའི་བར་གྱི་བཤད་
པས་དང་པོའི་སྦྱོར་བའི་ཏིང་ངེ་འཛིན་གསུངས་པ་ཡིན་ནོ། །བདེ་བ་ཆེན་པོ་རབ་ཏུ་འགྲུབ་པའི་ཕྱིར་ཞེས་བྱ་བ་ནས་བརྩམས་ཏེ། མངོན་དུ་གྱུར་ཏོ་ཞེས་བྱ་བའི་བར་གྱི་བཤད་པས་གཉིས་པ་གསུངས་པ་ཡིན་ནོ། །དེ་ནས་གསུམ་པ་ཡང་སྔ་མ་བཞིན་དུ་ཤེས་པར་བྱའོ། །དབང་བསྐུར་བ་
དང་དམ་ཚིག་ཐོབ་པས་བཟླས་བརྗོད་དང་བསྐོམ་པ་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར། དེ་ནས་བདེ་བར་གཤེགས་པ་དེ་དག་ཐམས་ཅད་ཅེས་བྱ་བ་ནས་བརྩམས་ཏེ། དངོས་གྲུབ་ཐམས་ཅད་ཤིན་ཏུ་དོན་ཡོད་པ་ཉིད་དོ། །ཅེས་བྱ་བའི་བར་གྱི་བཤད་པས་སློབ་དཔོན་གྱི་
ལས་ཀྱི་ཆོ་ག་དང་སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ།།   །།རྟོག་པ་ཐམས་ཅད་ལས་གསུངས་པའི་དངོས་གྲུབ་རྣམས་རང་གི་ལྷའི་ཕྱག་རྒྱ་བཞིས་རང་གི་ལྷའི་རྣལ་འབྱོར་བྱས་ལ་མདུན་དུ་ཡང་རང་གི་ལྷག་པའི་ལྷ་རང་གི་ཕྱག་རྒྱ་བཞིས་ཀུན་ནས་རྒྱས་
བཏབ་ནས། མངོན་པར་འདོད་པའི་ཕྱག་རྒྱ་བཅིངས་པས་བསྒྲུབ་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་དང་པོའི་དཀྱིལ་འཁོར་གྱི་གསང་བའི་དམ་ཚིག་གི་ཕྱག་རྒྱ་བཅིང་བར་བྱ་སྟེ། ཞེས་བྱ་བ་ནས་བརྩམས་ཏེ། དངོས་གྲུབ་མྱུར་དུ་ཐོབ་པར་འགྱུར་རོ་ཞེས་བྱ་བའི་

59-1-58a

བར་གྱི་བཤད་པས་རང་གི་ལྷའི་སྙིང་པོ་བརྗོད་ཅིང་དམ་ཚིག་གི་ཕྱག་རྒྱ་ལ་སོགས་པ་ཕྱག་རྒྱ་ཐམས་ཅད་བཅིང་བར་བྱའོ་ཞེས་བྱ་བའི་ཆོ་ག་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས་བརྩམས་ཏེ། མདོར་བསྡུས་པའོ་ཞེས་བྱ་བའི་བར་གྱིས་བཤད་པ་ཡིན་ནོ། །
དེ་ལྟར་རང་གི་ལྷའི་སྙིང་པོ་བརྗོད་ཅིང་ཕྱག་རྒྱ་ཐམས་ཅད་བཅིངས་ལ། དེའི་འོག་ཏུ་རང་གི་ལྷའི་སྙིང་པོ་ཉེ་བའི་སྙིང་པོ་དང་བཅས་པ་བཟླས་པ་བྱས་ན་འགྲུབ་པར་འགྱུར་རོ་ཞེས་བཤད་པར་བྱ་བའི་ཕྱིར། དེ་ནས་ཕྱག་རྒྱ་ཐམས་ཅད་ཀྱི་གསང་བ་སྒྲུབ་ན་ཞེས་བྱ་བ་ནས་བརྩམས་ཏེ། དངོས་
གྲུབ་འཐོབ་པར་འགྱུར་རོ་ཞེས་བྱ་བའི་བར་གྱིས་བཤད་པ་ཡིན་ཏེ། དུམ་བུ་གཉིས་པའི་རྩ་བའི་རྒྱུད་ཀྱི་བསྡུས་པའི་དོན་རྫོགས་སོ།།    །།དུམ་བུ་གཉིས་པ་འདི་ཉིད་ཀྱི་རྩ་བའི་རྒྱུད་ཀྱི་དྲིས་པ་ལ་སོགས་པ། གང་རྟོག་པ་ཐམས་ཅད་བསྡུས་པ་གང་ཡིན་པ་དང་། རྟོག་པ་ཐམས་ཅད་ཀྱིས་རྒྱུད་
ཕྱི་མའི་ཆོ་ག་རྒྱས་པར་གསུངས་པ་གང་ཡིན་པ་དེའི་ཡང་བསྡུས་པའི་དོན་བཤད་པར་བྱ་སྟེ། ཕྱག་རྒྱ་ཆེན་པོ་ལ་སོགས་པའི་རྟོག་པ་ངེས་པར་ཤེས་པས་དངོས་གྲུབ་འཐོབ་པར་འགྱུར་རོ། །དེ་བས་ན་དེ་གསུངས་པའི་སྙིང་པོ་རྒྱུད་ཤེས་པས་སོ། །དེས་ན་རྒྱུད་དེར་ཇི་ལྟར་སྤྲུལ་པའི་
དཀྱིལ་འཁོར་འདྲི་བ་སྟེ། དེ་བས་ན་དཀྱིལ་འཁོར་བཤད་པའི་རྒྱུད་དང་དཀྱིལ་འཁོར་ཡང་དག་པར་ཤེས་པ་དང་བཅས་པས་དཀྱིལ་འཁོར་ལ་ཡང་ཡེ་ཤེས་དམ་པ་དང་བཅས་པར་གསུངས་སོ། །རིགས་ཐམས་ཅད་ཀྱི་རྡོ་རྗེའི་བྱེ་བྲག་ཤེས་པས་ན་དེ་གསུངས་པ་ཡིན་ནོ། །དེ་བས་ན་དཀྱིལ་
འཁོར་ཐམས་ཅད་ཤེས་པས་དེ་བསྟན་པ་ཡིན་ནོ། །རྡོ་རྗེ་སེམས་དཔའི་དམ་ཚིག་ཆེན་པོའི་དེ་ཁོ་ན་ཉིད་ཐོག་མ་དང་ཐ་མ་མེད་པ་རབ་ཏུ་དགའ་བའི་སྙིང་པོ་དེ་ཁོ་ན་ཉིད་སྟོན་པ་ཧཱུྃ་ཞེས་བྱ་བས་གླུ་ལེན་ཅིང་ཧཱུྃ་གི་གླུའི་བཟླས་པའི་དོན་བཤད་པ་ཤེས་པས་དེའི་ཕྱིར་རྒྱུད་དེ་གསུངས་སོ། །དེ་ནས་སེམས་
ཀྱི་རྡོ་རྗེ་སེམས་དཔའི་ཡེ་ཤེས་ཀྱིས་དེ་སྐད་གསུངས་པ་ཡིན་ནོ། །ཡང་རྡོ་རྗེ་སེམས་དཔའ་འབྱུང་བ་དང་། དེ་བཞིན་གཤེགས་པ་འབྱུང་བ་དང་། རིགས་འབྱུང་བ་དང་། མངོན་པར་བྱང་ཆུབ་པ་འབྱུང་བའི་ཡེ་ཤེས་བསྒོམ་པས་དེ་གསུངས་པ་ཡིན་ནོ། །ཡང་བདུད་ཉིད་ཤེས་པ་དང་རྟོག་པ་ཐམས་ཅད་

59-1-58b

བསྒྲུབ་པ་ཤེས་པ་ལ་སོགས་པའི་སྙིང་པོ་དང་། བསྒྲུབ་པ་དང་། སྙིང་པོ་དང་། ཕྱག་རྒྱ་དང་རིགས་པ་བསྒྲུབ་པའི་དངོས་གྲུབ་ཤེས་པ་དང་། བསོད་ནམས་གྲུབ་པ་ཤེས་པ་དང་སློབ་དཔོན་གྲུབ་པ་ཤེས་པ་དང་། མེ་ཏོག་ལ་སོགས་པ་མཆོད་པ་དབུལ་བ་དང་། གར་གྱི་མཆོད་པ་བསྒྲུབ་པ་ཤེས་
པ་དང་། གསང་བའི་མཆོད་པ་ཤེས་པ་སྟེ། དེ་བས་ན་དེ་བསྟན་པ་དང་། ཡང་ཕྱག་རྒྱ་ཆེན་པོ་ལ་གནས་པས་སྡིག་པ་མེད་པ་ཡང་འགྲུབ་པར་འགྱུར་བ་དང་། བདག་ལ་སྨད་པ་ཡོངས་སུ་སྤང་བའི་ཕྱིར་དེ་གསུངས་པ་དང་། བྱང་ཆུབ་ཀྱི་སེམས་སྨད་པས་དངོས་གྲུབ་ཏུ་མི་འགྱུར་བ་སྟེ། དེ་བས་
ན་བརྙས་པར་མི་བྱའོ་ཞེས་གསུངས་སོ། །དེ་རང་གི་ལྷའི་ཆ་ལུགས་འཆང་བའི་དཀྱིལ་འཁོར་ནི། གང་གི་ཕྱིར་དངོས་གྲུབ་མཆོག་ཏུ་འགྱུར་ཏེ། དེ་བས་དངོས་གྲུབ་མཆོག་གི་བསྒྲུབ་པ་ཤེས་པའི་རྒྱུད་གསུངས་པ་ཡིན་ནོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཅེས་བྱ་བ་ནས་
དངོས་གྲུབ་ཀྱི་ཆོ་ག་རྒྱས་པའོ་ཞེས་བྱ་བའི་བར་གྱི་བཤད་པས། དཔལ་རྡོ་རྗེ་སེམས་དཔའ་དེ་ཉིད་ཀྱི་དཀྱིལ་འཁོར་དུ་བཤད་པའི་འབྲས་བུའི་ཁྱད་པར་དུ་བསྒྲུབ་པ་གསུངས་པ་ཡིན་ནོ། །རྟོག་པ་ཐམས་ཅད་ལ་སྒྲུབ་པ་པོས་དང་པོའི་རྡོ་རྗེའི་ཕྱག་རྒྱའི་ཡི་གེ་ཧཱུྃ་བརྗོད་ཅིང་བཅིངས་ལ་དེའི་འོག་ཏུ་
དེ་དག་རྒྱས་བཏབ་པ་འདིའི་དོན་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། ཕྱིས་མ་བསྒྲུབས་པས་སོ་ཞེས་བྱ་བའི་བར་གྱིས་བཤད་པ་ལ་སྤྱོད་ལམ་རྣམ་པ་བཞིར་ཆོས་ཀྱི་ཕྱག་རྒྱ་ཐམས་ཅད་བསྒྲུབ་པར་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར། དེ་ནས་
ཞེས་བྱ་བ་ནས་བརྩམས་ཏེ། དངོས་གྲུབ་ཐོབ་པའི་བར་གྱིས་བཤད་དོ། །ལས་ཀྱི་ཕྱག་རྒྱ་གྲུབ་པའི་སྒྲུབ་པ་པོས་ཡི་གེ་ཨ་ལས་རང་གི་སྙིང་གར་སྣ་ཚོགས་རྡོ་རྗེ་བསམས་ལ། ལས་ཀྱི་ཕྱག་རྒྱ་བཅིངས་ཏེ། རང་གི་ལྷའི་སྙིང་པོ་བརྗོད་ཅིང་གར་གྱི་ཚུལ་གྱིས་རང་གི་ལྷ་བསྒོམ་པར་བྱ་
བའམ། ཕྱག་རྒྱའི་མཆོད་པ་བཅུ་གཉིས་འདི་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས་བརྩམས་ཏེ། དངོས་གྲུབ་མཆོག་གོ་ཞེས་བྱ་བའི་བར་གྱིས་བཤད་དོ། །རང་གི་སྙིང་པོ་བརྗོད་ཅིང་རང་གི་ལྷའི་ཕྱག་རྒྱ་ཆེན་པོ་བསྒོམ་པར་བྱའོ་ཞེས་བྱ་བའི་དོན་བསྟན་པར་བྱ་བའི་

59-1-59a

ཕྱིར། དེ་ནས་ཞེས་བྱ་བ་ནས་བརྩམས་ཏེ། བདག་པོ་བསྒྲུབ་པོ་ཞེས་བྱ་བའི་བར་གྱིས་བཤད་དོ། །དཔལ་རྡོ་རྗེ་སེམས་དཔའི་སྒྲུབ་པ་པོས་རཱི་བྷི་ཏྲི་ལ་སོགས་པ་བྱེད་པ་ལྔའི་ཁམས་ཀྱིས་རྒྱན་དང་བཅས་པས་ཡི་གེ་ཧཱུྃ་འདོན་ཅིང་བཅོམ་ལྡན་འདས་བསྒྲུབ་པར་བྱའོ་
ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས་བརྩམས་ཏེ། སྒྲུབ་པའི་རྒྱུད་དོ་ཞེས་བྱ་བའི་བར་གྱིས་བཤད་པ་ཡིན་ནོ། །དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་གྱི་སྒྲུབ་པ་པོས་ཡི་གེ་ཧཱུྃ་འདོན་ཅིང་ལས་ཀྱི་ཕྱག་རྒྱ་ཉི་ཤུ་རྩ་ལྔ་བཅིངས་ལ། ཨ་ནུ་རཱ་ག་
ཡཱ་མི་ཧཱུྃ་ཞེས་བྱ་བའི་སྙིང་པོ་དང་ཧཱུྃ་བཟླས་ལ་དཔལ་རྡོ་རྗེ་སེམས་དཔའ་རབ་ཏུ་འགྲུབ་པར་བྱ་བའི་ཕྱིར་ལས་ཀྱི་ཕྱག་རྒྱ་བསྒོམ་པར་བྱའོ་ཞེས་བྱ་བ་འདིའི་དོན་རབ་ཏུ་བསྟན་པར་བྱ་བའི་ཕྱིར། དེ་ནས་རྟོག་པ་ཐམས་ཅད་ཀྱི་ལས་ཀྱི་ཕྱག་རྒྱ་ཞེས་བྱ་བ་ནས་བརྩམས་ཏེ། ཆོ་ག་རྒྱས་པ་རྫོགས་
སོ་ཞེས་བྱ་བའི་བར་གྱིས་བཤད་པ་ཡིན་ནོ། །གཞུང་ལྷག་མ་རྣམས་ཀྱིས་ནི་ཇི་ལྟར་བྲི་བའི་དཀྱིལ་འཁོར་གཤེགས་སུ་གསོལ་ལ། སྤྲུལ་པ་རྣམས་སློབ་དཔོན་གྱིས་རང་གི་ལུས་ལ་བཅུག་ནས། དེ་བཞིན་གཤེགས་པ་ཐམས་ཅད་ཀྱིས་རྟོག་པ་འདི་ལ་བྱིན་གྱིས་བརླབ་པར་
མཛད་པའི་ཕྱིར་བདག་ཉིད་གསོལ་བ་འདེབས་པར་གྱུར་པར་བསམས་ལ། མཐར་ཐུག་པར་བྱིན་གྱིས་རློབ་པའི་ཚིགས་སུ་བཅད་པ་བརྗོད་ལ། བདག་ཉིད་བསྲུང་བ་བྱས་ཏེ་ལྡང་བར་བྱའོ་ཞེས་སྟོན་པ་ཡིན་ནོ། །རྒྱུད་ཀྱི་དུམ་བུ་གཉིས་པའི་བསྡུས་པའི་དོན་རྫོགས་སོ།།    །།ད་ནི་དུམ་
བུ་གཉིས་པ་ཉིད་ཀྱི་རྟོག་པ་ཐམས་ཅད་ཀྱི་རྒྱུད་ཕྱི་མའི་རྩ་བའི་རྒྱུད་ཀྱི་ངོ་བོ་ཉིད་སྒྲུབ་པ་པོས་མྱུར་དུ་འགྲུབ་པའི་བསྡུས་པའི་དོན་བཤད་པར་བྱ་སྟེ། དེ་ནས་འདིའི་གནས་ཀྱི་དབང་ཕྱུག་གི་ཞེས་བྱ་བ་ནས་བརྩམས་ཏེ། བཙུན་མོའི་འཁོར་དང་བཅས་པའི་ཆོ་གས་སྣ་ཚོགས་པའི་རྡོ་རྗེ་ལྷ་མོས་
ཡོངས་སུ་བསྐོར་བས་ཞེས་བྱ་བའི་བར་གྱི་བཤད་པས་ནི། ཏིང་ངེ་འཛིན་དང་པོ་གསུངས་པ་ཡིན་ནོ། །བདེ་བ་ཆེན་པོ་རབ་ཏུ་བསྒྲུབ་པའི་ཕྱིར་ཞེས་བྱ་བ་ནས་བརྩམས་ཏེ། ཆོ་ག་ཇི་བཞིན་བསྒྲུབས་པས་སོ་ཞེས་བྱ་བའི་བར་གྱིས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་ནས་

59-1-59b

བྱིན་གྱིས་བརླབས་ཏེ་ཞེས་བྱ་བ་ནས་བརྩམས་ཏེ། ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །དམ་ཚིག་ཐོབ་པ་དང་དབང་བསྐུར་བ་ཐོབ་པས་བཟླས་བརྗོད་དང་བསྒོམ་པ་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། 
དཀྱིལ་འཁོར་ཆེན་པོ་རྫོགས་སོ་ཞེས་བྱ་བའི་བར་གྱི་བཤད་པས། སློབ་དཔོན་གྱི་ལས་དང་སློབ་མ་གཞུག་པ་ལ་སོགས་པའི་ཆོ་ག་ཡང་རྒྱས་པར་གསུངས་པ་ཡིན་ནོ། །དམ་ཚིག་ཐོབ་པ་ཉིད་དང་དབང་བསྐུར་བ་ཉིད་དག་ལ་སློབ་དཔོན་གྱིས་བསྒྲུབ་པའི་ཡེ་ཤེས་བསླབ་པར་བྱའོ་ཞེས་བྱ་
བ་འདིའི་དོན་བསྟན་པར་བྱ་བའི་ཕྱིར། དེ་ནས་དེའི་ཕྱིར་སྒྲུབ་པ་བཤད་དེ་ཞེས་བྱ་བ་ནས་བརྩམས་ཏེ། བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་ཆོ་ག་རྒྱས་པའོ་ཞེས་བྱ་བའི་བར་གྱིས་བཤད་པ་ཡིན་ནོ། །དཔལ་རྡོ་རྗེ་སེམས་དཔའི་དཀྱིལ་འཁོར་གྱི་བསྡུས་པའི་དོན་རྫོགས་སོ།།    །།
དེ་བཞིན་གཤེགས་པའི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། འདིར་ཏིང་ངེ་འཛིན་དང་པོ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་དུ་བཤད་པ་ཉིད་དོ། །དེ་ནས་སྟོན་པ་རྡོ་རྗེ་འཛིན་ཞེས་བྱ་བ་ནས་བརྩམས་ཏེ། བྱང་ཆུབ་ཀྱི་སྙིང་པོ་ལ་བཞུགས་སོ་ཞེས་བྱ་བའི་བར་གྱི་བཤད་
པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་གསུམ་པ་ནི་སྔ་མ་བཞིན་དུ་ཤེས་པར་བྱའོ། །དེ་ནས་རྡོ་རྗེ་འཛིན་པས་ཞེས་བྱ་བ་ནས་བརྩམས་ཏེ། བསྒྲུབ་པའི་ཆོ་ག་རྒྱས་པའི་རྒྱུད། །ཅེས་བྱ་བའི་བར་གྱི་བཤད་པས་ནི། སློབ་དཔོན་གྱི་ཆོ་ག་དང་། སློབ་མ་གཞུག་པ་ལ་
སོགས་པའི་ཆོ་ག་ཡང་སྔ་མ་བཞིན་དུ་རྒྱ་ཆེར་གསུངས་པ་ཡིན་ནོ། །དམ་ཚིག་དང་དབང་བསྐུར་བ་ཐོབ་པ་ཉིད་ལ་སློབ་དཔོན་གྱིས་སྒྲུབ་པའི་ཡེ་ཤེས་བསླབ་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་དངོས་གྲུབ་མཆོག་བསྒྲུབ་པ། །ཞེས་བྱ་བ་ནས་བརྩམས་ཏེ། དེ་བཞིན་
གཤེགས་པ་ཐམས་ཅད་ཀྱི་བྱང་ཆུབ་ཀྱི་རྡོ་རྗེའི་རྟོག་པའི་ཆོ་ག་རྒྱས་པའོ་ཞེས་བྱ་བའི་བར་གྱིས་བཤད་པ་ཡིན་ནོ།    །རྡོ་རྗེ་མེ་ལྟར་རབ་ཏུ་འབར་བའི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། འདིར་ཏིང་ངེ་འཛིན་དང་པོ་ནི་རྡོ་རྗེ་སེམས་དཔའི་དཀྱིལ་འཁོར་དུ་གསུངས་པ་ཉིད་ཡིན་ནོ། །

59-1-60a

དེ་ནས་རྡོ་རྗེ་འཛིན་པ་ཞེས་བྱ་བ་ནས་བརྩམས་ཏེ། བྱིན་གྱིས་བརླབས་སོ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བྱིན་གྱིས་བརླབས་ཏེ་ཞེས་བྱ་བ་ནས་བརྩམས་ཏེ་ཏིང་ངེ་འཛིན་གསུམ་པ་གསུངས་པ་ཡིན་ནོ། །
དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་ནི་བཟླས་བརྗོད་དང་བསྒོམ་པ་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་གསོལ་བ་བཏབ་ནས་ཞེས་བྱ་བ་ནས་བརྩམས་ཏེ། དམ་ཚིག་ཆེན་པོའི་ཆོ་ག་རྒྱས་པའི་རྒྱུད་དོ་ཞེས་བྱ་བའི་བར་གྱི་བཤད་པས་ནི་སློབ་དཔོན་གྱི་
ལས་ཀྱི་ཆོ་ག་དང་སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །དམ་ཚིག་དང་དབང་བསྐུར་བ་ཐོབ་པ་ཉིད་ལ་སློབ་དཔོན་གྱིས་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར། དེ་ནས་བསྒྲུབ་ན་ཞེས་བྱ་བ་ནས་བརྩམས་ཏེ་རྡོ་རྗེ་
མེ་ལྟར་འབར་བའི་རྟོག་པའི་ཆོ་ག་རྒྱས་པའོ་ཞེས་བྱ་བའི་བར་གྱིས་བཤད་པ་བསྟན་པ་ཡིན་ནོ།    །འཕགས་པ་སྤྱན་རས་གཟིགས་དབང་ཕྱུག་གི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། འདིར་དང་པོའི་སྦྱོར་བའི་ཏིང་ངེ་འཛིན་ནི་དཔལ་རྡོ་རྗེ་སེམས་དཔའི་དཀྱིལ་འཁོར་དུ་གསུངས་
པ་ཉིད་དོ། །དེ་ནས་ཏིང་ངེ་འཛིན་ཐམས་ཅད་ཅེས་བྱ་བ་ནས་བརྩམས་ཏེ། དེར་ནི་པདྨ་བཟང་དེ་གནས། ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་པ་མཛད་དེ་ཞེས་བྱ་བ་ནི་ཏིང་ངེ་འཛིན་གསུམ་པ་གསུངས་པ་ཡིན་པར་ཤེས་པར་
བྱའོ། །དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པ་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། འགྲོ་བ་ཐམས་ཅད་ལེགས་པར་སྦྱངས་ཏེ་ཞེས་བྱ་བ་ནས་སྒྲུབ་པ་ཆེན་པོའི་ཆོ་གའི་རྒྱུད་དོ་ཞེས་བྱ་བའི་བར་གྱི་བཤད་པས་བསྟན་པ་ཡིན་ནོ། །དམ་
ཚིག་དང་དབང་བསྐུར་བ་ཐོབ་པ་ཉིད་ལ་སློབ་དཔོན་གྱིས་བསྒྲུབ་པའི་ཡེ་ཤེས་བསླབ་པར་བྱའོ་ཞེས་བྱ་བ་འདིའི་ཆོ་ག་བསྟན་པར་བྱ་བའི་ཕྱིར། དེ་ནས་བསྒྲུབས་ནས་ཞེས་བྱ་བ་ནས་བརྩམས་ཏེ་ཡེ་ཤེས་རྡོ་རྗེ་རྟོག་པའི་ཆོ་ག་རྒྱས་པའོ་ཞེས་བྱ་བའི་བར་གྱི་བཤད་པས་བསྟན་པ་ཡིན་ནོ།    །ནམ་

59-1-60b

མཁའི་སྙིང་པོའི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། འདིར་ཡང་ཏིང་ངེ་འཛིན་དང་པོ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་དུ་གསུངས་པ་ཉིད་དོ། །དེ་ནས་ཞེས་བྱ་བ་ནས་བརྩམས་ཏེ་ཡང་དཀྱིལ་འཁོར་གྱི་ཚུལ་གྱིས་བཞུགས་སོ་ཞེས་བྱ་བའི་བར་གྱི་བཤད་པས་ནི་
ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་པ་མཛད་དེ་ཞེས་བྱ་བ་ལ་སོགས་པས་ནི་ཏིང་ངེ་འཛིན་གསུམ་པ་གསུངས་པ་ཡིན་ནོ། །དེ་ནས་དེ་བཞིན་གཤེགས་པ་བརྒྱད་ཀྱི་ཞེས་བྱ་བ་ནས་བརྩམས་ཏེ། སྒྲུབ་པ་ཆེན་པོའི་རྒྱུད་དོ་ཞེས་བྱ་བའི་བར་གྱི་བཤད་པས་ནི་སྔ་
མ་བཞིན་དུ་སློབ་དཔོན་གྱི་ཆོ་ག་དང་། སློབ་མ་ཞུགས་པའི་ཆོ་ག་ཡང་རྒྱས་པར་གསུངས་པ་ཡིན་ནོ། །དབང་བསྐུར་བ་དང་དམ་ཚིག་ཐོབ་པ་ཉིད་ལ་སློབ་དཔོན་གྱིས་བསྒྲུབ་པའི་ཡེ་ཤེས་བསླབ་པར་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས་བརྩམས་ཏེ། རྡོ་རྗེ་རིན་
ཆེན་གྱི་ཆོ་ག་རྒྱས་པའོ་ཞེས་བྱ་བའི་བར་གྱི་བཤད་པས་བསྟན་པ་ཡིན་ནོ།    །ཕྱི་རོལ་གྱི་རྡོ་རྗེ་རིགས་ཀྱི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། འདིར་ཏིང་ངེ་འཛིན་དང་པོའི་དཔལ་རྡོ་རྗེ་སེམས་དཔའི་དཀྱིལ་འཁོར་དུ་གསུངས་པ་ཉིད་དོ། །དེ་ནས་རྒྱལ་པོ་རྡོ་རྗེ་འཛིན། །ཞེས་བྱ་བ་
ནས་བརྩམས་ཏེ། ཨོཾ་བྷུར་བྷུ་བ་སྭཿ ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་པ་མཛད་དེ་ཞེས་བྱ་བ་ནས་བརྩམས་པ་ནི་གསུམ་པ་ཡིན་པར་ཤེས་པར་བྱའོ། །གྲུ་བཞི་ཞེས་བྱ་བ་ནས་བརྩམས་ཏེ། འཇིག་རྟེན་གསུམ་བསྐྱེད་པའི་རྒྱུད་དོ་
ཞེས་བྱ་བའི་བར་གྱི་བཤད་པས་ནི། སྔ་མ་བཞིན་སློབ་དཔོན་གྱི་ལས་ཀྱི་ཆོ་ག་དང་སློབ་མ་གཞུག་པ་ལ་སོགས་པའི་ལས་ཀྱི་ཆོ་ག་རྒྱས་པར་ཡང་གསུངས་པ་ཡིན་ཏེ། མིང་པོ་གསུམ་གྱི་དཀྱིལ་འཁོར་གྱི་བསྡུས་པའི་དོན་བསྟན་པ་ཡིན་ནོ།    །སྲིང་མོ་བཞིའི་དཀྱིལ་འཁོར་གྱི་བསྡུས་པའི་དོན་
བཤད་པར་བྱ་སྟེ། འདིར་ཏིང་ངེ་འཇིན་དང་པོ་ནི་མིང་པོ་གསུམ་གྱི་དཀྱིལ་འཁོར་དུ་བཤད་པ་ཉིད་དོ། །དེ་ནས་རྡོ་རྗེ་འཛིན་པ་ཞེས་བྱ་བ་ནས་བརྩམས་ཏེ། བྷྱོ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་པ་མཛད་ནས་ཞེས་བྱ་བ་ལ་སོགས་པ་

59-1-61a

ནི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །ཐིག་གསུམ་གྱི་དཀྱིལ་འཁོར་ཞེས་བྱ་བ་ནས་བརྩམས་ཏེ། སྲིང་མོ་བཞི་རྣམས་སོ་ཞེས་བྱ་བའི་བར་གྱི་བཤད་པས་ནི་སྔ་མ་བཞིན་དུ་སློབ་དཔོན་གྱི་ལས་ཀྱི་ཆོ་ག་དང་སློབ་མ་གཞུག་པ་ལ་སོགས་པའི་ལས་ཀྱི་ཆོ་ག་རྒྱས་
པར་གསུངས་པ་ཡིན་ནོ།    །ཀླུའི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། འདིར་ཏིང་ངེ་འཛིན་དང་པོ་ནི་སྲིང་མོ་བཞིའི་དཀྱིལ་འཁོར་གྱི་སྐབས་སུ་བཤད་པ་ཉིད་དོ། །དེ་ནས་ཞེས་བྱ་བ་ནས་བརྩམས་ཏེ། བླ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་
ཡིན་ནོ། །དེ་ནས་འདུས་པ་མཛད་ནས་ཞེས་བྱ་བ་ལ་སོགས་པ་ནི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །ཟུར་བཞི་ཞེས་བྱ་བ་ནས་བརྩམས་ཏེ། ཀླུའི་དཀྱིལ་འཁོར་གྱི་རྒྱུད་དོ་ཞེས་བྱ་བའི་བར་གྱི་བཤད་པས་ནི་སྔ་མ་བཞིན་དུ་སློབ་དཔོན་གྱི་ལས་ཀྱི་ཆོ་ག་དང་སློབ་མ་གཞུག་པ་ལ་སོགས་
པའི་ལས་ཀྱི་ཆོ་ག་རྒྱས་པར་གསུངས་པ་ཡིན་ནོ།    །གདོན་གྱི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། འདིར་དང་པོའི་ཏིང་ངེ་འཛིན་ནི་ཀླུའི་དཀྱིལ་འཁོར་དུ་བཤད་པ་ཉིད་དོ། །དེ་ནས་ཞེས་བྱ་བ་ནས་བརྩམས་ཏེ། ཧཱུྃ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་
ཡིན་ནོ། །དེ་ནས་འདུས་པར་མཛད་དེ་ཞེས་བྱ་བ་ལ་སོགས་པས་ནི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །ཟུར་བཞི་ཞེས་བྱ་བ་ནས་བརྩམས་ཏེ་སྡུག་བསྔལ་ཐམས་ཅད་ལས་འདོན་པའི་རྒྱུད་རྫོགས་སོ་ཞེས་བྱ་བའི་བར་གྱི་བཤད་པས་ནི། སློབ་དཔོན་གྱིས་གདོན་ཐམས་ཅད་
གཞིག་པའི་ལས་གསུངས་པ་ཡིན་ནོ།    །འཇིག་རྟེན་པ་དང་འཇིག་རྟེན་ལས་འདས་པའི་དཀྱིལ་འཁོར་གྱི་ལྷ་ཐམས་ཅད་ལ་ལྷག་པར་མོས་པའི་སེམས་ཅན་རྣམས་རྗེས་སུ་འཛིན་པར་བྱེད་པའི་བསྡུས་པའི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། འདིར་ཏིང་ངེ་འཛིན་དང་པོ་ནི་དཔལ་
རྡོ་རྗེ་སེམས་དཔའི་དཀྱིལ་འཁོར་དུ་གསུངས་པ་ཉིད་ཡིན་ནོ། །དེ་ནས་རྒྱལ་པོ་རྡོ་རྗེ་འཛིན། །ཀུན་མཆོག་ཅེས་བྱ་བ་ནས་བརྩམས་ཏེ། འགྲོ་བ་འདུལ་བའི་དམ་པ་ཡིན། །ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འཛུམ་པ་མཛད་ཅེས་བྱ་བ་ནས་བརྩམས་

59-1-61b

ཏེ་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །དེ་ནས་ཞེས་བྱ་བ་ནས་བརྩམས་ཏེ་རྟོག་པ་ཐམས་ཅད་ཀྱི་རྒྱུད་ཕྱི་མ་དང་རྩ་བའི་རྒྱུད་རྫོགས་སོ་ཞེས་བྱ་བའི་བར་གྱི་བཤད་པས་ནི། སྔ་མ་བཞིན་དུ་སློབ་དཔོན་གྱི་ལས་དང་སློབ་མ་གཞུག་པ་ལ་སོགས་པའི་ཆོ་ག་རྒྱས་པ་ཉིད་གསུངས་པ་
ཡིན་ནོ།    །ལས་ཀྱི་སྒྲིབ་པའི་དབང་གིས་རྟོག་པ་ཐམས་ཅད་ཀྱི་རྒྱུད་ཕྱི་མའི་སྦྱོར་བས་ཀྱང་གྲུབ་པར་མ་གྱུར་པའི་རྣལ་འབྱོར་པ་རྣམས་ཀྱི་གསང་བའི་རས་རིས་ཀྱི་དཀྱིལ་འཁོར་གང་དག་གསུངས་པ་དེས་མྱུར་དུ་འགྲུབ་པར་བྱེད་པས་དེ་རྣམས་ཀྱི་བསྡུས་པའི་དོན་བཤད་པར་བྱ་སྟེ། སངས་རྒྱས་
ཀུན་གྱི་གསང་བ་ཆེ། །ཞེས་བྱ་བ་ནས་བརྩམས་ཏེ། རྡོ་རྗེ་སྙེམས་པ་བདག་པོའི་བདག །ཅེས་བྱ་བའི་བར་གྱི་བཤད་པས་ནི་ཏིང་ངེ་འཛིན་དང་པོ་གསུངས་པ་ཡིན་ནོ། །འདོད་ཆགས་ཆེན་པོ་ཐམས་ཅད་ཀྱི་མཆོག་ཅེས་བྱ་བ་ནས་བརྩམས་ཏེ། མཆོག་ཏུ་གསང་བའོ་ཞེས་བྱ་བའི་བར་གྱི་བཤད་
པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་པ་མཛད་ནས་ཞེས་བྱ་བ་ནས་བརྩམས་པ་ནི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །དེ་ནས་འདིར་སྒྲུབ་པ་བཤད་དེ་ཞེས་བྱ་བ་ནས་བརྩམས་ཏེ། དམ་ཚིག་གི་དཀྱིལ་འཁོར་ཆེན་པོ་རྫོགས་སོ་ཞེས་བྱ་བའི་བར་གྱི་
བཤད་པས་ནི་སྔ་མ་བཞིན་དུ་སློབ་དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །དཔལ་རྡོ་རྗེ་སེམས་དཔའི་རས་རིས་ཀྱི་དཀྱིལ་འཁོར་གྱི་བསྡུས་པའི་དོན་རྫོགས་སོ།།    །།དེ་བཞིན་གཤེགས་པའི་རས་རིས་ཀྱི་དཀྱིལ་འཁོར་གྱི་
བསྡུས་པའི་དོན་བཤད་པར་བྱ་སྟེ། འདིར་ཏིང་ངེ་འཛིན་དང་པོ་ནི་དཔལ་རྡོ་རྗེ་སེམས་དཔའི་རས་རིས་ཀྱི་དཀྱིལ་འཁོར་དུ་གསུངས་པ་ཉིད་དོ། །དེ་ནས་ཞེས་བྱ་བ་ལ་སོགས་པ་ནས་བརྩམས་ཏེ། ཨོཾ་བྷུ་ཁཾ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་
པར་མཛད་དེ་ཞེས་བྱ་བ་ནས་བརྩམས་པ་ནི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །གནས་ཁང་ཞེས་བྱ་བ་ནས་བརྩམས་ཏེ། དེ་ནི་འགྲུབ་པར་འགྱུར་ཞེས་བྱ་བའི་བར་གྱི་བཤད་པས་ནི། སྔ་མ་བཞིན་དུ་སློབ་དཔོན་གྱི་ལས་ཀྱི་ཆོ་ག་དང་སློབ་མ་གཞུག་པ་ལ་སོགས་པའི་ལས་ཀྱི་ཆོ་ག་རྒྱས་

59-1-62a

པར་གསུངས་པ་ཡིན་ནོ།    །རྡོ་རྗེ་མེ་ལྟར་རབ་ཏུ་འབར་བའི་རས་རིས་ཀྱི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། འདིར་ཏིང་ངེ་འཛིན་དང་པོ་ནི་དཔལ་རྡོ་རྗེ་སེམས་དཔའི་རས་རིས་ཀྱི་དཀྱིལ་འཁོར་དུ་གསུངས་པ་ཉིད་དོ། །དེ་ནས་ཁྲོ་བོའི་ཧཱུྃ་མཛད་ཀྱིས་རང་གི་རས་རིས་
ཀྱི་དཀྱིལ་འཁོར་གྱི་ཆོ་ག་སྤྲུལ་པར་བྱ་བའི་ཕྱིར། ལྷ་ཐམས་ཅད་ཀྱི་སྙིང་པོ་བརྗོད་ནས་གནས་ཇི་ལྟ་བ་བཞིན་དུ་བཀོད་དོ་ཞེས་བྱ་བའི་ཏིང་ངེ་འཛིན་གཉིས་པའོ། །དེ་ནས་འདུས་པར་མཛད་དེ་ཞེས་བྱ་བ་ནས་བརྩམས་ཏེ་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །དེ་ནས་རྡོ་རྗེ་ཁྲོ་བོའི་རྒྱལ་
པོ་ཆེན་པོའི་མཆོག་ཏུ་གསང་བའི་ཆོ་ག་ཞེས་བྱ་བ་ནས་བརྩམས་ཏེ། རྡོ་རྗེ་རྣལ་འབྱོར་གྱི་ཆོ་གའོ་ཞེས་བྱའི་བར་གྱི་བཤད་པས་ནི། དེ་བཞིན་དུ་སློབ་དཔོན་གྱི་ལས་ཀྱི་ཆོ་ག་དང་སློབ་མ་གཞུག་པ་ལ་སོགས་པའི་ལས་ཀྱི་ཆོ་ག་རྒྱས་པར་གསུངས་པ་ཡིན་ནོ།    །ད་ནི་རྡོ་རྗེ་མེ་ལྟར་རབ་ཏུ་འབར་བའི་རིགས་
ཀྱི་དཀྱིལ་འཁོར་ཉིད་ཀྱི་དཀྱིལ་འཁོར་གྱི་རྣལ་འབྱོར་གྱི་བསྒྲུབ་པར་བྱ་བའི་ཕྱིར། ཕྲ་མོའི་ཆོ་ག་གང་གསུངས་པ་དེ་ཉིད་བསྡུས་པའི་དོན་བརྗོད་པར་བྱ་སྟེ། དེ་ལ་དང་པོའི་སྦྱོར་བའི་ཏིང་ངེ་འཛིན་ནི་དཔལ་རྡོ་རྗེ་སེམས་དཔའི་རིགས་ཀྱི་དཀྱིལ་འཁོར་དུ་གསུངས་པ་ཉིད་དོ། །ཡི་གེ་ཧཱུྃ་གིས་དཀྱིལ་འཁོར་
སྤྲུལ་ནས་རང་གི་སྙིང་པོས་ལྷ་ཐམས་ཅད་གནས་ཇི་ལྟ་བ་བཞིན་བཀོད་དོ་ཞེས་བྱ་བས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་པར་མཛད་ནས་ཞེས་བྱ་བ་ནས་བརྩམས་པ་ནི་གསུམ་པ་ཡིན་པར་ཤེས་པར་བྱའོ། །དེ་ནས་ཤིན་ཏུ་ཕྲ་བ་ཞེས་བྱ་བ་ནས་བརྩམས་ཏེ། ཚོགས་ཀྱི་
དཀྱིལ་འཁོར་གྱི་ཆོ་ག་མཆོག་ཏུ་རབ་ཏུ་གྲུབ་པའོ་ཞེས་བྱ་བའི་བར་གྱི་བཤད་པས་ནི་སློབ་དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་ཡང་གསུངས་པ་ཡིན་ནོ།    །འཕགས་པ་སྤྱན་རས་གཟིགས་དབང་ཕྱུག་གི་རིགས་ཀྱི་དཀྱིལ་འཁོར་གྱི་བསྡུས་པའི་དོན་བཤད་པར་
བྱ་སྟེ། འདིར་དང་པོའི་སྦྱོར་བ་ནི་དཔལ་རྡོ་རྗེ་སེམས་དཔའི་རིགས་ཀྱི་དཀྱིལ་འཁོར་དུ་གསུངས་པ་ཉིད་ཡིན་ནོ། །སྔ་མ་བཞིན་དུ་སྔགས་ཇི་ལྟ་བས་དཀྱིལ་འཁོར་བྱིན་གྱིས་བརླབས་ནས། རང་གི་སྙིང་པོས་ལྷ་ཐམས་ཅད་གནས་ཇི་ལྟ་བ་བཞིན་བཀོད་དོ་ཞེས་བྱ་བ་འདིས་ནི་དཀྱིལ་འཁོར་གཉིས་

59-1-62b

པ་གསུངས་པ་ཡིན་ནོ། །དེ་ནས་འདུས་པ་མཛད་དེ་ཞེས་བྱ་བ་ལ་སོགས་པ་ནི་གསུམ་པ་ཡིན་པར་ཤེས་པར་བྱའོ། །དེ་ནས་སྤྱན་རས་གཟིགས་དབང་ཕྱུག་ཅེས་བྱ་བ་ནས་བརྩམས་ཏེ། འགྲོ་བ་འདུལ་བའི་ཆོ་གའོ་ཞེས་བྱ་བའི་བར་གྱི་བཤད་པས་ནི། སྔ་མ་བཞིན་དུ་སློབ་དཔོན་གྱི་ལས་ཀྱི་ཆོ་
ག་དང་། སློབ་མ་གཞུག་པ་ལ་སོགས་པའི་ལས་ཀྱི་ཆོ་ག་རྒྱས་པར་གསུངས་པ་ཡིན་ནོ།    །ནམ་མཁའི་སྙིང་པོའི་རིགས་ཀྱི་དཀྱིལ་འཁོར་གྱི་བསྡུས་པའི་དོན་བཤད་པར་བྱ་སྟེ། ཏིང་ངེ་འཛིན་དང་པོའི་དཔལ་རྡོ་རྗེ་སེམས་དཔའི་རིགས་ཀྱི་དཀྱིལ་འཁོར་དུ་གསུངས་པ་ཉིད་དོ། །སྔ་མ་བཞིན་
དུ་རང་གི་སྙིང་པོས་རིགས་ཀྱི་དཀྱིལ་འཁོར་སྤྲུལ་ལ་རང་གི་སྙིང་པོས་ལྷ་ཐམས་ཅད་གནས་ཇི་ལྟ་བ་བཞིན་གཞག་པར་བྱའོ་ཞེས་བྱ་བ་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་པ་མཛད་དེ་ཞེས་བྱ་བ་ལ་སོགས་པ་ནི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །དམ་ཚིག་
དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པ་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ནམ་མཁའི་སྙིང་པོ་ཞེས་བྱ་བ་ནས་བརྩམས་ཏེ། རྟོག་པ་ཐམས་ཅད་ཀྱི་ཆོ་གའོ་ཞེས་བྱ་བའི་བར་གྱི་བཤད་པས་ནི། སློབ་དཔོན་གྱི་ལས་ཀྱི་ཆོ་ག་
དང་སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །ནམ་མཁའི་སྙིང་པོའི་རིགས་ཀྱི་དཀྱིལ་འཁོར་གྱི་བསྡུས་པའི་དོན་རྫོགས་སོ།།    །།བདག་ལ་བྱིན་གྱིས་བརླབ་པའི་རྣལ་འབྱོར་གྱི་ཕྱག་རྒྱའི་ཐབས་ཀྱི་ངོ་བོ་ཉིད་ཀྱིས་རྟོག་པ་ཐམས་ཅད་འགྲུབ་པར་འགྱུར་རོ་
ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས་བརྩམས་ཏེ། ཕྱག་རྒྱ་ཐམས་ཅད་ཀྱི་རྒྱུད་རྫོགས་སོ་ཞེས་བྱ་བའི་མཐར་ཐུག་པའི་བར་གྱི་བཤད་པས་བསྟན་པ་ཡིན་ནོ།    །འདི་དག་ཉིད་ཀྱི་དུམ་བུ་གཉིས་པ་ལས་གསུངས་པའི་རྟོག་པ་ཐམས་ཅད་ཀྱི་རྒྱུད་ཕྱི་མ་དང་རྩ་བའི་རྒྱུད་
དང་། རྟོག་པ་ཐམས་ཅད་བསྒྲུབ་པའི་ཆོ་ག་དང་། ཕྱག་རྒྱའི་རྒྱུད་ཐམས་ཅད་ཀྱི་དྲིས་པ་སྔོན་དུ་འགྲོ་བ་གང་རྟོག་པ་ཐམས་ཅད་བསྡུས་པ་ཞེས་བྱ་བ་རྟོག་པ་ཐམས་ཅད་ཀྱི་རྒྱུད་ཕྱི་མ་ལས་གསུངས་པའི་བསྡུས་པའི་དོན་བརྗོད་པར་བྱ་སྟེ། ཕྱག་རྒྱ་ཆེན་པོ་ལ་སོགས་པའི་རྟོག་པ་ངེས་པའི་ཡེ་ཤེས་

59-1-63a

ཀྱིས་འགྲུབ་པར་འགྱུར་རོ། །དེ་བས་ན་དེ་དག་བཤད་པར་བྱ་སྟེ། རྒྱུད་ཕྱི་མའི་ཡེ་ཤེས་ལ་སོགས་པ་ལ་ཐོག་མ་དང་ཐ་མ་མེད་པ་དང་། རྡོ་རྗེ་སེམས་དཔའ་དང་། དགའ་བ་ཆེན་པོ་ཉིད་དང་། ཀུན་ཏུ་བཟང་པོ་ཉིད་དང་། རྡོ་རྗེ་སྙེམས་པའི་བདག་པོ་ཉིད་དང་། ཐུགས་ཀྱི་སེམས་
དཔའ་དང་། རྡོ་རྗེ་དང་། རྡོ་རྗེ་འཛིན་པ་དང་། རྡོ་རྗེ་འཛིན་པ་ཆེན་པོ་དང་། ཀུན་ཏུ་བཟང་པོའི་སྤྱོད་པ་དང་། བདུད་དང་བདུད་ལས་རྒྱལ་བ་དང་། སངས་རྒྱས་ཀྱི་བྱང་ཆུབ་དང་། ཕྱག་ན་རྡོ་རྗེ་ལ་སོགས་པའི་རིགས་ཀུན་འབྱུང་བ་དང་། འདོད་པ་དང་། ཐར་པ་དང་། རྣམ་པ་གསུམ་དང་། སེམས་
ཅན་ཐམས་ཅད་ལ་སོགས་པའི་ཀླུ་ལས་འབྱུང་བ་དང་། དང་པོའི་ཀླུའི་ངོ་བོ་ཉིད་དུ་སྟོན་པ་དང་། ཉེ་བའི་སྙིང་པོ་དང་། དེ་ཁོ་ན་ཉིད་དང་། བདེ་བ་ཆེན་པོ་དང་། རྡོ་རྗེ་དོན་ཡོད་པའི་དེ་ཁོ་ན་ཉིད་བཤད་པའི་དཀྱིལ་འཁོར་གྱི་དོན་དང་། རྒྱུད་དང་དཀྱིལ་འཁོར་གྱི་འབྲས་བུ་དང་། ཐིག་གདབ་པའི་
ཆོ་ག་དང་། དཀྱིལ་འཁོར་བྲི་བའི་ཆོ་ག་དང་། གསང་བ་ཆེན་པོ་ལྔའི་དེ་ཁོ་ན་ཉིད་བཤད་པ་དང་། དེ་བཞིན་གཤེགས་པ་ཐམས་ཅད་ཀྱི་གསང་བ་ཆེན་པོ་ལྔའི་དེ་ཁོ་ན་ཉིད་ལྔ་དང་། རིགས་ཀྱི་དེ་ཁོ་ན་ཉིད་དང་རྡོ་རྗེ་རིགས་ཐམས་ཅད་ཀྱི་བདག་པོའི་དེ་ཁོ་ན་ཉིད་དང་། རྡོ་རྗེ་རིགས་ཀྱི་དེ་ཁོ་ན་ཉིད་དང་།
འཕགས་པ་སྤྱན་རས་གཟིགས་དབང་ཕྱུག་གི་དེ་ཁོ་ན་ཉིད་དང་། དེའི་རིགས་ཀྱི་དེ་ཁོ་ན་ཉིད་དང་། ནམ་མཁའི་སྙིང་པོའི་དེ་ཁོ་ན་ཉིད་དང་། དེའི་རིགས་ཀྱི་དེ་ཁོ་ན་ཉིད་དང་། རིགས་ཐམས་ཅད་ཀྱི་དབང་བསྐུར་བའི་དེ་ཁོ་ན་ཉིད་དང་། དཔལ་མཆོག་དང་པོའི་མཚན་མའི་དེ་ཁོ་ན་ཉིད་དང་། རིགས་
ཐམས་ཅད་ཀྱི་མཚན་མའི་དེ་ཁོ་ན་ཉིད་དང་། ཐམས་ཅད་འགུགས་པའི་དེ་ཁོ་ན་ཉིད་དང་། མཆོད་པ་ཆེན་པོ་ཐམས་ཅད་ཀྱི་དེ་ཁོ་ན་ཉིད་དང་། དངོས་གྲུབ་ཐམས་ཅད་ཀྱི་བྱིན་གྱིས་བརླབ་པའི་ཆོ་ག་རྒྱས་པའི་རྒྱུད་དང་། རང་གི་ལྷག་པའི་ལྷ་ཐམས་ཅད་ཀྱི་སྒྲུབ་པ་ཆེན་པོའི་རྒྱུད་དང་། ཐམས་ཅད་
སྒྲུབ་པ་པོ་ལ་སྤྲོ་བའི་རྒྱུད་ཡེ་ཤེས་རྣམས་གསུངས་པ་ཡིན་ནོ། །དེ་ནས་གཞུང་ལྷག་མ་རྣམས་ཀྱིས་དཀྱིལ་འཁོར་ཐམས་ཅད་ཇི་ལྟ་བ་བཞིན་གཤེགས་སུ་གསོལ་ཏེ། སྤྲུལ་པ་རང་གི་ལུས་ལ་ཉེ་བར་བསྡུ་བར་བྱས་ནས། བདག་ཉིད་ཀྱང་ཇི་ལྟ་བ་བཞིན་དུ་བསྲུངས་ལ། དེ་བཞིན་གཤེགས་

59-1-63b

པ་ཐམས་ཅད་ཀྱིས་བདག་ཉིད་ལ་མཉེས་པས་ལེགས་སོ་ཞེས་བྱ་བ་བྱིན་ནས། སློབ་དཔོན་ལྡང་བར་བྱའོ་ཞེས་སྟོན་པ་ཡིན་ཏེ། དུམ་བུ་གཉིས་པའི་བསྡུས་པའི་དོན་རྫོགས་སོ།།    །།ད་ནི་སོ་སོར་རྟོག་པའི་ཡེ་ཤེས་ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་ཀྱི་ཕྱག་རྒྱའི་ངོ་བོ་ཉིད་རྟོག་པ་དང་
བཅས་པ་དང་། རྟོག་པ་མེད་པ་ཡིད་ཀྱི་རྣམ་པར་ཤེས་པའི་གཉེན་པོར་གྱུར་པ་དུམ་བུ་གསུམ་པའི་བསྡུས་པའི་དོན་བཤད་པར་བྱ་སྟེ། དེ་ནས་དང་པོའི་ཡིད་འོང་གནས་ཞེས་བྱ་བ་ནས་བརྩམས་ཏེ། གང་དུམ་བུ་གཉིས་པའི་བསྡུས་པའི་དོན་བཤད་པ་ལས། རྡོ་རྗེ་མེ་ལྟར་འབར་བའི་ཕྲ་མོའི་
གསང་བའི་ཆོ་ག་མ་གཏོགས་པ་དེ་དག་ནི་གསུམ་པའི་ཡང་ཡིན་པར་ཤེས་པར་བྱའོ། །གང་དག་ཁྱད་པར་གཞན་དག་ཡོད་པ་དེ་དག་ནི་ཕྱིས་བཤད་པར་བྱའོ། །དུམ་བུ་གསུམ་པའི་བསྡུས་པའི་དོན་རྫོགས་སོ།།    །།ད་ནི་བྱ་བ་གྲུབ་པའི་ཡེ་ཤེས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལས་ཀྱི་
ཕྱག་རྒྱའི་ངོ་བོ་ཉིད་མིག་དང་། རྣ་བ་དང་། སྣ་དང་། ལྕེ་དང་། ལུས་ཀྱི་རྣམ་པར་ཤེས་པའི་གཉེན་པོར་གྱུར་པ་དུམ་བུ་བཞི་པའི་བསྡུས་པའི་དོན་བཤད་པར་བྱ་སྟེ། དེ་ནས་གནས་ཡིད་དུ་འོང་བར་ཞེས་བྱ་བ་ནས་བརྩམས་ཏེ། གང་དུམ་བུ་གཉིས་པའི་བསྡུས་པའི་དོན་བཤད་པ་ལས་རྡོ་རྗེ་མེ་ལྟར་
འབར་བའི་ཕྲ་མོའི་གསང་བའི་ཆོ་ག་མ་གཏོགས་པ་གཞན་པ་དེ་དག་ཐམས་ཅད་ནི་འདིའི་ཡང་ཡིན་པར་ཤེས་པར་བྱས་ལ། གང་འདི་ལ་ཁྱད་པར་དུ་གྱུར་པ་དེ་དག་ནི་ཕྱིས་བཤད་པར་བྱའོ། །དུམ་བུ་བཞི་པའི་བསྡུས་པའི་དོན་རྫོགས་སོ།།    །།ཇི་སྐད་དུ་བཤད་པའི་བསྡུས་པའི་དོན་བཤད་པས། 
བཅོམ་ལྡན་འདས་དཔལ་མཆོག་དང་པོའི་རྡོ་རྗེ་འཛིན་པ་ཆེན་པོའི་བརྗོད་པར་བྱ་བ་བཤད་པ་ཡིན་ལ། དེ་སྟོན་པའི་སྒྲའི་ཚོགས་ནི་རྒྱུད་དེ་རྒྱུད་ནི་བརྗོད་པའོ། །དེ་ལྟར་ན་བརྗོད་པར་བྱ་བ་དང་། བརྗོད་པའི་མཚན་ཉིད་ནི་འབྲེལ་པའོ། །གདུལ་བྱ་རྣམས་དཔལ་མཆོག་དང་པོའི་རྡོ་རྗེ་འཛིན་པ་ཆེན་པོ་
ལ་འདོད་པ་བསྐྱེད་པ་ནི་དགོས་པའོ། །འདོད་པ་བསྐྱེད་པ་དེ་དག་ཀྱང་དཀྱིལ་འཁོར་དུ་འཇུག་པ་ལ་སོགས་པས་དེའི་ངོ་བོ་ཉིད་མངོན་སུམ་དུ་བྱས་པ་ནི་དགོས་པའི་ཡང་དགོས་པ་ཡིན་ནོ། །དེ་ལ་དཀྱིལ་འཁོར་གྱི་གྲངས་བཤད་པར་བྱ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུ་ལ་ནི་དཀྱིལ་

59-1-64a

འཁོར་བཅོ་ལྔ་པའོ། །དུམ་བུ་གཉིས་པའི་རྩ་བའི་རྒྱུད་ལ་ནི་བཅུ་གཅིག་གོ། །དེ་ཉིད་རྟོག་པ་ཐམས་ཅད་ཀྱི་ཕྱི་མའི་རྒྱུད་དང་། རྩ་བའི་རྒྱུད་ལ་ནི་བཅུའོ། །ཡང་འདིའི་རིགས་ཀྱི་དཀྱིལ་འཁོར་ནི་དྲུག་གོ། །དུམ་བུ་གསུམ་པ་ལ་ནི་ཉི་ཤུ་རྩ་གཅིག་གོ། །དུམ་བུ་བཞི་པ་ལ་
ཡང་དཀྱིལ་འཁོར་ཉི་ཤུ་རྩ་གཅིག་ཡོད་དོ། །དེ་ལ་རྡོ་རྗེ་འཛིན་པ་ཆེན་པོའི་ནམ་མཁའི་ཁམས་ཐམས་ཅད་དང་མཉམ་པར་བཞུགས་ཤིང་རིགས་ཐམས་ཅད་ཀྱི་ངོ་བོ་ཉིད་སྐུ་དང་གསུང་དང་ཐུགས་རྡོ་རྗེའི་གཟུགས་ཅན་སེམས་ཅན་རྣམས་ཀྱི་དོན་མཛད་པར་རོ་གཅིག་པ་ནི་དཔལ་ལོ། །དེ་ཉིད་
ནི་མཆོག་དང་པོ་སྟེ། མཆོག་ནི་ཕུལ་དུ་བྱུང་བའོ། །བསྐལ་པ་བཟང་པོ་ལ་སོགས་པ་ད་ལྟར་བྱུང་བ་ནས་ཐོག་མ་དང་ཐ་མ་མེད་པའི་ངོ་བོ་ཉིད་ཀྱིས་རྟག་པ་ཉིད་དུ་བཞུགས་པས་ན་དེའི་ཕྱིར་དང་པོ་ཞེས་བྱའོ། །དེ་སྟོན་པའི་དེ་ཁོ་ན་ཉིད་བཅུའི་མིང་གི་ཚོགས་ནི་རྒྱུད་ཅེས་བྱ་སྟེ། རྒྱུད་ནི་རྒྱུན་ཞེས་བྱ་བར་
བཤད། ཅེས་གསུངས་པའི་ཕྱིར་རོ། །དེ་ལ་དེ་ཁོ་ན་ཉིད་བཅུའི་དཀྱིལ་འཁོར་དང་། སྔགས་དང་ཕྱག་རྒྱ་དང་། བསྲུང་བ་དང་། སྤྱན་དྲང་བ་དང་། སློབ་དཔོན་གྱི་ལས་ཀྱི་དབྱེ་བ་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པ་དང་། བཟླས་བརྗོད་དང་། བསྒོམ་པ་དང་། སྦྱིན་སྲེག་དང་། 
ཉེ་བར་བསྡུ་བ་དང་། མཆོད་ནས་སླར་ཤེགས་སུ་གསོལ་བའོ། །དཔལ་མཆོག་དང་པོའི་རྒྱུད་ཀྱི་བསྡུས་པའི་དོན་རྫོགས་སོ།།    །།དེ་ལྟ་བུའི་དཔལ་མཆོག་དང་པོའི་རྒྱུད་སྡུད་པར་བྱེད་པས་བཅུའི་དབང་ཕྱུག་ལྕང་ལོ་ཅན་གྱི་ཕོ་བྲང་ན་གནས་པའི་རྡོ་རྗེ་འཆང་བས་བློ་ལ་གཞག་ནས་འདི་
སྐད་ཅེས་བྱ་བ་ལ་སོགས་པ་སྨྲས་སོ། །དེ་ལ་འདི་སྐད་ཅེས་བྱ་བ་ནི་ཡང་དག་པར་བསྡུས་པའི་བཤད་མ་ཐག་པའི་གཞུང་དང་དོན་གྱི་ངོ་བོ་ཉིད་ཅེས་བྱ་བའི་དོན་ཏོ། །བདག་གིས་ཞེས་བྱ་བ་ནི་བདག་ཉིད་ཡིན་པར་སྟོན་པ་སྟེ། བདག་ཉིད་ཀྱིས་ཐོས་ཀྱི་གཞན་ལས་བརྒྱུད་དེ་འོངས་པ་ནི་མ་ཡིན་ནོ་ཞེས་
བྱ་བའི་དོན་ཏོ། །ཐོས་པ་ཞེས་བྱ་བ་ནི་ཐོས་པའི་རང་བཞིན་གྱིས་ཤེས་རབ་འཁྲུལ་པ་མེད་པའི་རྣམ་པར་ཤེས་པས་ཐོས་ཀྱི་རྟོགས་པ་ནི་མ་ཡིན་ནོ་ཞེས་བྱ་བར་སྟོན་ཏེ། འདིས་ནི་བདག་ཉིད་ཀྱིས་མངོན་སུམ་དུ་ཐོས་པ་དང་། མཉམ་པར་གཞག་པ་ཡང་ཡིན་པར་སྟོན་ཏོ། །གང་གི་ཚེ་ཁྱོད་ཀྱིས་ཐོས་

59-1-64b

ཤེ་ན། དུས་གཅིག་ན་ཞེས་བྱ་བ་སྨྲས་ཏེ། དུས་གཅིག་ནི་དུས་ཚོད་གཅིག་ན་ཐོས་ཀྱི། གཞན་དག་ཏུ་ནི་གཞན་དག་ཐོས་སོ་ཞེས་བྱ་བ་སྟེ། འདིས་ནི་བདག་ཉིད་ཐོས་པ་མང་བར་སྟོན་ཏོ། །ཡང་ན་དུས་གཅིག་ན་ཞེས་བྱ་བ་ནི་སྐད་ཅིག་མ་གཅིག་ལ་རྣམ་པར་ཐར་པ་བསམ་གྱིས་མི་ཁྱབ་པ་ཐོས་
པས། སྐད་ཅིག་མ་གཅིག་ལ་ཡང་དུས་གསུམ་གྱི་བསྐལ་པ་རྣམས་སོ་སོར་སྣང་བའམ། ཐམས་ཅད་ཤེས་པ་སྟེ། འདིས་ནི་བདག་ཉིད་ཚད་མའི་སྐྱེས་བུ་ཡིན་པར་སྟོན་ཏོ། །ཁྱོད་ཀྱིས་གང་ལས་གང་དུ་ཐོས་ཞེས་རྟོག་པ་དེ་དག་གི་ཕྱིར། བཅོམ་ལྡན་འདས་ཞེས་བྱ་བ་ལ་སོགས་པ་སྨོས་ཏེ། 
འདིར་འབྲེལ་པ་ནི་འདི་ཡིན་ཏེ། བཅོམ་ལྡན་འདས་གནས་གང་དུ་ཞུགས་ཤེ་ན། བཅོམ་ལྡན་འདས་ལྷའི་རྒྱལ་པོ་གཞན་འཕྲུལ་དབང་བྱེད་ཀྱི་གནས་ན་བཞུགས་ཏེ། དེ་ལས་བདག་གིས་རྒྱུད་ཐོས་སོ་ཞེས་པའོ། །ཉོན་མོངས་པ་དང་ལྷའི་བུ་དང་ཕུང་པོ་དང་འཆི་བདག་གི་མཚན་ཉིད་ཅན་དུ་
གནས་པའི་བདུད་རྣམས་བཅོམ་པས་ན། བཅོམ་ལྡན་འདས་སོ། །གང་གི་ཕྱིར་བཅོམ་ལྡན་འདས་དེ་ཡང་ཁྱད་པར་ཇི་ལྟ་བུ་ཞིག་ལས་ཁྱོད་ཀྱིས་ཐོས་ཤེ་ན། དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་སྨྲས་ཏེ། དེ་ལ་དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་ཡིན་
པས་དེ་བཞིན་གཤེགས་པ་ཐམས་ཅད་དེ། འཇིག་རྟེན་གྱི་ཁམས་ཀྱི་རྡུལ་ཕྲ་རབ་དང་མཉམ་པའི་སངས་རྒྱས་རྣམས་ཀྱི་སེམས་དང་སེམས་ལས་བྱུང་བ་གཉིས་སུ་མེད་པའི་བྱང་ཆུབ་ཀྱི་སེམས་ཀྱི་ངོ་བོ་ཉིད་དོ། །དེ་ཉིད་ནི་གཟུང་བ་དང་འཛིན་པའི་རྣམ་པ་ཅན་གྱི་རྣམ་པར་རྟོག་པ་འཇོམས་པས་
ན་རྡོ་རྗེའོ། །དེ་རྣམས་ཀྱི་བྱིན་གྱི་རླབས་ནི་སྔོན་གྱི་འཕེན་པའི་ཤུགས་སོ། །དེའི་དམ་ཚིག་ནི་དེ་བཞིན་གཤེགས་པའི་རིགས་ཏེ། དེ་ལས་སྐྱེས་པའོ། །གང་ལས་སྐྱེས་ཤེ་ན། རྟག་ཏུ་དྲི་མེད་ཐུགས་རྗེའི་ཤུགས་ལས་བྱུང་། །སྨོན་ལམ་གྲུབ་པ་མི་འགག་ཆོས་ཉིད་ཅན། །འགྲོ་བའི་དོན་བསྒྲུབ་བརྩོན་འགྲུས་
མཐའ་ཡས་པ། །ཐུགས་རྗེའི་བདག་ཉིད་རྟག་ཏུ་རྣམ་པར་སྣང་། །ཞེས་གསུངས་པའི་ཕྱིར་རོ། །འདི་དག་ལ་དམ་ཚིག་དང་མཁྱེན་པ་ནི། རྡོ་རྗེ་སེམས་དཔའ་དང་། རྡོ་རྗེ་ཡིད་ལས་བྱུང་བ་ལ་སོགས་པ་དེ་སྣ་ཚོགས་ཤིང་། རྣམ་པ་ཐ་དད་པའི་བྱེ་བྲག་གིས་ཕྱག་རྒྱ་ཆེན་པོ་ལ་སོགས་པར་

59-1-65a

རྣམ་པར་ཞེས་པའི་ངོ་བོ་སྟེ། དེ་དག་ཐམས་ཅད་དང་ལྡན་པ་ནི་བཅས་པའོ། །འདིས་ནི་བཅོམ་ལྡན་འདས་དེ་བཞིན་གཤེགས་པའི་རིགས་ཐུགས་སུ་ཆུད་པ་དང་། དམ་ཚིག་མཁྱེན་པ་ཉིད་དུ་སྟོན་ཏོ། །གསང་སྔགས་ཀྱི་སྒོར་སྤྱད་པ་སྤྱོད་པ་རྣམས་ཀྱིས་ཀྱང་། དམ་
ཚིག་ཤེས་པ་ཉིད་དུ་བྱའོ་ཞེས་སྟོན་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱིས་སྦྱིན་པའི་ཕ་རོལ་ཏུ་ཕྱིན་པའི་ངོ་བོ་ཉིད་དུ་མི་གཉིས་པའི་སེམས་དང་སེམས་ལས་བྱུང་བ་དེ་དག་ལས་བྱུང་བའི་རིན་པོ་ཆེའི་ཅོད་པན་དེས། འདོད་པ་དང་གཟུགས་དང་གཟུགས་མེད་པའི་ཁམས་ཀྱི་
མཚན་ཉིད་ཅན་གྱི་ཁམས་གསུམ་དུ་ཆོས་ཀྱི་རྒྱལ་པོའི་མཚན་མར་གྱུར་པའི་དབང་བསྐུར་བ་བརྙེས་ནས་ཁམས་གསུམ་ལ་སྤྱོད་པའི་སེམས་ཅན་རྣམས་ཆོས་ཉིད་ཀྱི་འཇིག་རྟེན་ལས་འདས་པའི་ལས་ལ་ངེས་པ་སྦྱོར་བས་ན་ཆོས་ཀྱི་རྒྱལ་པོའོ། །འདིས་ཀྱང་བཅོམ་ལྡན་འདས་ཀྱིས་རིན་པོ་ཆེའི་
རིགས་ཐུགས་སུ་ཆུད་ཅིང་དབང་བསྐུར་བ་བརྙེས་པར་སྟོན་ཏོ། །གསང་སྔགས་ཀྱི་སྒོ་ལ་སྤྱད་པ་སྤྱོད་པ་རྣམས་ཀྱིས་ཀྱང་དབང་བསྐུར་བ་དང་ལྡན་པས་ཤེས་པར་བྱའོ་ཞེས་སྟོན་པར་འགྱུར་བ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་དུ་གཉིས་སུ་
མེད་པའི་སེམས་དང་སེམས་ལས་བྱུང་བ་དེ་ཉིད་ནི་ཐམས་ཅད་མཁྱེན་པའི་ཡེ་ཤེས་ཏེ། རྣལ་འབྱོར་ཆེན་པོ་དེ་གང་ལ་ཡོད་པ་དེ་ནི་ཐམས་ཅད་མཁྱེན་པའི་ཡེ་ཤེས་དང་ལྡན་པའི་རྣལ་འབྱོར་ཆེན་པོའོ། །དེ་ཡང་དབང་ཕྱུག་ཅེས་བྱ་བ་སྟེ། དབང་ཕྱུག་དང་ལྡན་པས་ན་དེ་བཞིན་གཤེགས་པ་ཐམས་
ཅད་ཀྱི་ཐམས་ཅད་མཁྱེན་པའི་ཡེ་ཤེས་དང་ལྡན་པའི་རྣལ་འབྱོར་ཆེན་པོའི་དབང་ཕྱུག་གོ། །འདིས་ཀྱང་བཅོམ་ལྡན་འདས་པདྨའི་རིགས་ཐུགས་སུ་ཆུད་ཅིང་ཤེས་རབ་ཀྱི་ཕ་རོལ་ཏུ་ཕྱིན་པའི་གནས་པ་མཁྱེན་པས་ན་རྣལ་འབྱོར་གྱི་དབང་ཕྱུག་ཅེས་བཤད་པ་ཡིན་ལ། གསང་སྔགས་ཀྱི་སྒོ་ལ་
སྤྱད་པ་སྤྱོད་པ་རྣམས་ཀྱིས་ཀྱང་རྣལ་འབྱོར་ལ་དབང་ཕྱུག་ཏུ་གྱུར་པར་བྱའོ་ཞེས་སྟོན་པ་ཡིན་ནོ། །བཅོམ་ལྡན་འདས་དེ་ནི་ཐམས་ཅད་མཁྱེན་པའི་ཡེ་ཤེས་ཀྱི་རྣལ་འབྱོར་ཆེན་པོ་ཇི་ལྟ་བ་བཞིན་དུ་ཐུགས་སུ་ཆུད་པས་རང་གི་དོན་ཕུན་སུམ་ཚོགས་པ་བརྙེས་ནས་དེ་བཞིན་དུ་གཞན་གྱི་དོན་མཛད་པའི་ཕྱིར། 

59-1-65b

དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་ཏེ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནི། དེ་བཞིན་གཤེགས་པ་ཐམས་ཅད་དོ། །དེ་ཉིད་ནི་ཕྱག་རྒྱ་ཐམས་ཅད་དེ་སེམས་ཅན་གྱི་ཁམས་རྣམས་བྱང་ཆུབ་ལ་བརྩོན་འགྲུས་ཀྱི་གཟུགས་བརྙན་བསྐྱེད་པའི་ཕྱིར་རྒྱས་འདེབས་
པའི་ཕྱིར་ཏེ། དེ་ཉིད་ནི་མཉམ་པ་ཉིད་དོ། །དེ་ཐུགས་སུ་ཆུད་པ་ནི་བརྙེས་པའོ། །སྣ་ཚོགས་ཞེས་བྱ་བ་ནི་སེམས་ཅན་གྱི་ཁམས་ཐམས་ཅད་ཀྱིའོ། །བྱ་བ་མཛད་དོ་ཞེས་བྱ་བ་ནི་མངོན་པར་འདོད་པའི་དོན་རྫོགས་པར་མཛད་པ་སྟེ། བྱ་བ་མཛད་པ་ཉིད་ཀྱིས་བྱ་བ་མཛད་པ་སྟེ། དེས་སེམས་ཅན་གྱི་
ཁམས་མ་ལུས་ཤིང་ལུས་པ་མེད་པ་ཐམས་ཅད་ཀྱི་རེ་བ་ཐམས་ཅད་ཅེས་བྱ་བ་རྣམ་པ་ཐམས་ཅད་དུ་ཕྱག་རྒྱ་ཆེན་པོ་ལ་སོགས་པ་འཐོབ་པར་སྲེད་པའོ། །དེ་ཡོངས་སུ་སྐོང་བ་ནི་མངོན་པར་འདོད་པ་ཐོབ་པའོ། །དེ་ཉིད་ནི་ཕྲིན་ལས་ཏེ་དེ་མཛད་པས་ན་རེ་བ་ཐམས་ཅད་ཡོངས་སུ་སྐོང་བའི་ཕྲིན་ལས་
མཛད་པའོ། །མ་ལུས་པའི་སྒྲ་བཤད་པ་ནི་མཐའ་དག་གི་མིང་མ་ཡིན་པ་ཡང་སྲིད་པ་ཉིད་ཡིན་ནོ། །དེ་བས་ན་ལུས་པ་མེད་པའི་སྒྲ་ནི་མཐའ་དག་གི་དོན་གྱི་མིང་ཡིན་ནོ། །ཡང་ན་མ་ལུས་པ་ནི་འཇིག་རྟེན་གྱི་ཁམས་ཐམས་ཅད་དུའོ། །ལུས་པ་མེད་པ་ནི་སེམས་ཅན་གྱི་ཁམས་ཐམས་ཅད་དོ་
ཞེས་བྱ་བར་བཤད་པར་བྱའོ། །གང་དུ་སེམས་ཅན་གྱི་ཁམས་ཐམས་ཅད་ཅེས་སྨོས་པའི་ཚིག་ཡོད་པ་དེར་ནི་འཇིག་རྟེན་གྱི་ཁམས་མ་ལུས་ཤིང་ལུས་པ་མེད་པ་ནས་སེམས་ཅན་གྱི་ཁམས་ཐམས་ཅད་ཅེས་བཤད་པར་བྱའོ། །འདིས་ཀྱང་བཅོམ་ལྡན་འདས་ཀྱིས་ལས་ཀྱི་རིགས་ཀྱང་ཐུགས་
སུ་ཆུད་དོ་ཞེས་ཀྱང་སྟོན་པ་ཡིན་ལ། གསང་སྔགས་ཀྱི་སྒོ་ལ་སྤྱད་པ་སྤྱོད་པས་ཀྱང་སེམས་ཅན་རྣམས་རྗེས་སུ་འཛིན་པར་བྱེད་པའི་རིག་སྔགས་གྲུབ་པས་དཀྱིལ་འཁོར་འདྲི་བ་ལ་སོགས་པའི་ལས་རྣམས་ལ་འཇུག་པར་བྱའོ་ཞེས་སྟོན་ཏོ། །དེ་ལྟར་གྱུར་པ་སུ་ཞིག་ཡིན་ཞེ་ན། ཐུགས་རྗེ་ཆེ་བ་རྣམ་པར་
སྣང་མཛད་ཆེན་པོ་ཞེས་བྱ་བ་སྨོས་ཏེ། མི་དམིགས་ཤིང་རང་གི་ངང་གིས་འབྱུང་བའི་ཐུགས་རྗེ་མངའ་བས་ན་ཐུགས་རྗེ་ཆེན་པོའོ། །དེ་བཞིན་གཤེགས་པ་ལ་སོགས་པའི་རིགས་ཀྱི་ཚུལ་གྱིས་རྣམ་པར་མཛེས་ཤིང་སྣང་བར་མཛད་པས་ན་རྣམ་པར་སྣང་མཛད་དམ་རྣམ་པར་སྣང་མཛད་པ་ཉིད་ཡིན་པས་ན། 

59-1-66a

རྣམ་པར་སྣང་མཛད་དོ། །དེ་ཉིད་ནི་ཆོས་ཀྱི་སྐུ་དང་རྣམ་པར་སྨིན་པའི་སྐུ་དང་། ལོངས་སྤྱོད་རྫོགས་པའི་སྐུས་རྟག་པའོ། །འདས་པ་དང་། མ་འོངས་པ་དང་། ད་ལྟར་བྱུང་བའི་དུས་གསུམ་ནི་དུས་གསུམ་མོ། །དུས་དེ་དག་ཏུ་མཉམ་པ་ཉིད་ཅེས་བྱ་བའི་སྤྲུལ་པའི་སྐུ་བཞུགས་
པའོ། །ཡང་ན་དུས་གསུམ་པོ་དག་གི་དུས་སུ་ཀུན་རྫོབ་ཀྱི་གཟུགས་ལ་བཞུགས་ཀྱི། དོན་དམ་པར་ནི་ཡོད་པ་མ་ཡིན་པས་དུས་གསུམ་གྱི་མཉམ་པ་ཉིད་ལ་བཞུགས་པའོ། །སྐུ་ཐམས་ཅད་ནི་རྣམ་པ་བཞི་སྟེ། ངོ་བོ་ཉིད་ཀྱི་སྐུ་དང་། རྣམ་པར་སྨིན་པའི་སྐུ་དང་། ལོངས་སྤྱོད་རྫོགས་པའི་སྐུ་དང་། སྤྲུལ་
པའི་སྐུའོ། །དེ་སྐད་དུ། གང་འདི་རྒྱ་ཆེན་དུ་མ་ཡི། །ཁ་དོག་དབྱིབས་དང་གདན་རྣམས་དང་། །ཕྱག་མཚན་སྣ་ཚོགས་དབྱེ་བར་ནི། །སྐུ་ཡི་གསང་བ་འདི་ཞེས་བྱ། །ཞེས་གསུངས་པའི་ཕྱིར་རོ། །དེ་ལ་དེ་བཞིན་གཤེགས་པའི་རིགས་ཐམས་ཅད་དང་རྡོ་རྗེའི་རིགས་ནི་ངོ་བོ་ཉིད་ཀྱི་སྐུའི་ཚུལ་ལོ། །
རིན་པོ་ཆེའི་རིགས་ཐམས་ཅད་ནི་རྣམ་པར་སྨིན་པའི་སྐུའི་ངོ་བོ་ཉིད་དོ། །པདྨའི་རིགས་ཐམས་ཅད་ནི་ལོངས་སྤྱོད་རྫོགས་པའི་སྐུའི་ངོ་བོ་ཉིད་དོ། །ལས་ཀྱི་རིགས་ཐམས་ཅད་ནི་སྤྲུལ་པའི་སྐུའི་ངོ་བོ་ཉིད་དོ། །ཡང་ཕྱག་རྒྱ་ཆེན་པོ་གཙོ་བོར་གྱུར་པ་བྱང་ཆུབ་ཀྱི་སེམས་དང་། མེ་ལོང་ལྟ་བུའི་ཡེ་ཤེས་
ཀྱི་བདག་ཉིད་ཅན་ནི་དེ་བཞིན་གཤེགས་པའི་རིགས་སོ། །དམ་ཚིག་ཕྱག་རྒྱ་གཙོ་བོར་གྱུར་པ་སྦྱིན་པའི་ཕ་རོལ་ཏུ་ཕྱིན་པ་དང་མཉམ་པ་ཉིད་ཀྱི་ཡེ་ཤེས་ཀྱི་བདག་ཉིད་ཅན་ནི་རིན་པོ་ཆེའི་རིགས་སོ། །རང་བཞིན་གྱིས་རྣམ་པར་དག་པའི་རིགས་ཅན་ཆོས་ཀྱི་ཕྱག་རྒྱ་གཙོ་བོར་གྱུར་པ་ཤེས་རབ་ཀྱི་ཕ་རོལ་ཏུ་ཕྱིན་
པ་དང་སོ་སོར་རྟོག་པའི་ཡེ་ཤེས་ཀྱི་བདག་ཉིད་ཅན་ནི་པདྨའི་རིགས་སོ། །སངས་རྒྱས་ཀྱི་སྤྲུལ་པས་འགྲོ་བའི་དོན་བྱས་པ་ལས་ཀྱི་ཕྱག་རྒྱ་གཙོ་བོར་གྱུར་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བྱ་བ་གྲུབ་པའི་ཡེ་ཤེས་ཀྱི་བདག་ཉིད་ཅན་ནི་ལས་ཀྱི་རིགས་ཡིན་པར་ཤེས་པར་བྱའོ། །རྡོ་རྗེའི་རིགས་
ཀྱང་བྱང་ཆུབ་ཀྱི་སེམས་ཀྱི་བདག་ཉིད་ཅན་ཡིན་པས་མི་བསྐྱོད་པའི་ངོ་བོ་ཉིད་ཡིན་པས་ན། མེ་ལོང་ལྟ་བུའི་ཡེ་ཤེས་ཀྱི་རང་བཞིན་ཅན་ཡིན་པར་ཤེས་པར་བྱའོ། །ཕྱི་རོལ་གྱི་རྡོ་རྗེའི་རིགས་རྣམས་ཀྱང་སྤྲུལ་པའི་སྐུའི་ངོ་བོ་ཉིད་ཡིན་པས་བྱ་བ་གྲུབ་པའི་ཡེ་ཤེས་ཀྱི་རང་བཞིན་ནོ། །དེ་སྐད་དུ། རྡོ་རྗེ་སེམས་

59-1-66b

དཔའི་དབང་བསྐུར་བས། །ངོ་བོ་ཉིད་སྐུར་ཤེས་པར་བྱ། །རྡོ་རྗེ་རིན་ཆེན་དབང་བསྐུར་བས། །དེ་བཞིན་མཚན་དང་དཔེ་བྱད་ཡིན། །རྡོ་རྗེ་ཆོས་ཀྱི་དབང་བསྐུར་བས། །ལོངས་སྤྱོད་རྫོགས་པའི་སྐུ་རུ་འདོད། །རྡོ་རྗེ་ལས་ཀྱི་དབང་བསྐུར་བས། །སྤྲུལ་པ་ཡི་ནི་སྐུ་རུ་འདོད། །ཅེས་གསུངས་པའི་
ཕྱིར་རོ། །གསུང་ཐམས་ཅད་ནི་རབ་ཏུ་དགའ་བ་དང་། རྡོ་རྗེ་དང་། ཁྲོ་བོ་དང་། ཏིང་ངེ་འཛིན་དང་། བཀའི་ཚིག་གི་བྱེ་བྲག་གིས་རྣམ་པ་ལྔའོ། །ཐུགས་ཐམས་ཅད་ནི་ཐུགས་ཀའི་ཟླ་བའི་དཀྱིལ་འཁོར་ལ་རང་གི་རིགས་ཀྱི་མཚན་མའི་ཕྱག་རྒྱ་རྣམས་ཏེ། དེ་དག་ཀྱང་མི་ཕྱེད་པར་མངའ་བས་ན་སྐུ་
དང་གསུང་དང་ཐུགས་ཐམས་ཅད་རྡོ་རྗེའོ། །དེ་བཞིན་གཤེགས་པ་ཞེས་བྱ་བ་ནི་དངོས་པོ་ཐམས་ཅད་ཇི་ལྟར་གནས་པ་བཞིན་དུ་ཐུགས་སུ་ཆུད་ཅིང་སངས་རྒྱས་པས་ན་དེ་བཞིན་གཤེགས་པའོ། །ཡང་ན་དེ་བཞིན་དུ་གཞན་རྣམས་ལ་སྟོན་པར་མཛད་པས་ན་དེ་བཞིན་གཤེགས་པ་སྟེ། འདིས་
ཀྱང་གང་ལས་ཐོས་པའི་སྟོན་པ་པོ་དེ་ནི། སངས་རྒྱས་ཐམས་ཅད་བསྡུས་པར་གྱུར་པ་ནི་རྣམ་པར་སྣང་མཛད་ཡིན་ནོ་ཞེས་སྟོན་ཏོ། །དེ་ལྟར་བཅོམ་ལྡན་འདས་ཀྱི་ཡོན་ཏན་སྔོན་དུ་འགྲོ་བའི་བཤད་པ་བྱས་ནས། དེ་ལྟ་བུའི་ཡོན་ཏན་དང་ལྡན་པའི་བཅོམ་ལྡན་འདས་དེ་གང་ན་བཞུགས་ཞེས་རྣམ་པར་རྟོག་
པ་ལ་དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པས་གནས་སྨྲས་པ་ཡིན་ཏེ་དེ་བཞིན་གཤེགས་པ་ཐམས་ཅད་ཀྱི་བཞུགས་ཤིང་བསྟན་པ་ཡིན་ཏེ་དེ་བས་ན་བསྔགས་པའོ། །བསྔགས་པར་གྱུར་པ་ཉིད་ཀྱིས་ན་བསྟོད་པ་སྟེ། དེར་ནོར་བུ་དང་རིན་པོ་ཆེ་ཆེན་པོ་སྟེ། ཡིད་བཞིན་གྱི་ནོར་བུ་
རིན་པོ་ཆེ་དང་། རིན་པོ་ཆེ་ཞེས་བྱ་བ་རྡོ་རྗེ་ལ་སོགས་པ་རྣམས་ཏེ། དེ་རྣམས་ཀྱིས་སྤྲས་པ་ནི་གང་དུ་མཛེས་པར་བྱ་བའི་ཕྱིར་སྤྲས་ཤིང་སྤེལ་བ་དེར་ཁ་དོག་སྣ་ཚོགས་པའི་དྲིལ་བུ་བཏགས་པ་དང་། དར་དང་། འཕན་དང་། མེ་ཏོག་གི་ཕྲེང་བ་དང་། རྔ་མ་དང་། དྲ་བ་དང་། དྲ་བ་ཕྱེད་པ་དང་། ཟླ་བ་རླུང་གི་
བསྐྱོད་པ་རྣམས་ཀྱིས་ཉེ་བར་མཛེས་པར་གྱུར་པས་བརྒྱན་པ་ཕྱོགས་བཅུ་ཐམས་ཅད་ན་གནས་པའི་འདོད་པའི་ཁམས་ཐམས་ཅད་ན་ལྷའི་རྒྱལ་པོ་གཞན་འཕྲུལ་དབང་བྱེད་ཀྱི་གནས་ན་བཞུགས་པའོ། །དེ་ལ་གཞན་རྣམས་ཀྱིས་སྤྲུལ་པའི་འདོད་པའི་ཡོན་ཏན་ལྔ་རྣམས་ཏེ། དེ་རྣམས་ལ་དབང་བསྐུར་

59-1-67a

བའི་ངང་ཚུལ་ཅན་གང་ཡིན་པ་དེ་ནི་གཞན་འཕྲུལ་དབང་བྱེད་ཀྱི་ལྷ་རྣམས་སོ། །དེ་རྣམས་ཀྱི་བདག་པོའི་དང་པོའི་གནས་སུ་བཞུགས་པ་སྟེ། རྡོ་རྗེ་ལྷ་མོའི་ཚོགས་ཀྱི་དབུས་སུ་བཞུགས་པ། རབ་ཏུ་དགའ་བ་ཆེན་པོའི་སྐུ་འཛིན་པར་མཛད་པའི་རྡོ་རྗེ་འཆང་ཆེན་པོ་ནི་གཞན་
འཕྲུལ་དབང་བྱེད་ཀྱི་ལྷའི་རྒྱལ་པོའོ། །དེར་གྱུར་ནས་བཅོམ་ལྡན་འདས་བཞུགས་ཤིང་ནམ་མཁའ་ཐམས་ཅད་ལ་རབ་ཏུ་བཞུགས་པའི་བཅོམ་ལྡན་འདས་རྡོ་རྗེ་སེམས་དཔའི་བཞུགས་གནས་སུ་བཅོམ་ལྡན་འདས་བཞུགས་སོ་ཞེས་བྱ་བའི་དོན་ཏོ། །བཅོམ་ལྡན་འདས་རྡོ་རྗེ་སེམས་དཔའ་
ཇི་ལྟར་ན་གཞན་འཕྲུལ་དབང་བྱེད་ཀྱི་ལྷའི་རྒྱལ་པོར་གྱུར་པ་དེ་ནི་འདིའི་འོག་ནས་བཤད་པར་བྱའོ། །འདིས་ཀྱང་གང་དུ་ཐོས་པ་དེ་སྟོན་པར་གྱུར་པ་ཡིན་ནོ། །དེ་ལྟར་ན་བཅོམ་ལྡན་འདས་ཀྱི་གནས་ཀྱི་ཡོན་ཏན་ཕུན་སུམ་ཚོགས་པ་བསྟན་ནས། ད་ནི་འཁོར་ཕུན་སུམ་ཚོགས་པ་བསྟན་པར་བྱ་བའི་ཕྱིར། 
བྱང་ཆུབ་སེམས་དཔའ་བྱེ་བ་ཕྲག་བརྒྱ་དང་ཐབས་ཅིག་ཏུ་བཞུགས་པ་ལ་ཞེས་བྱ་བ་སྨོས་ཏེ། བྱང་ཆུབ་སེམས་དཔའ་བྱེ་བ་ཕྲག་དེ་དག་གི་ནང་ནས་སྒྲུབ་པའི་ཡན་ལག་ཏུ་གྱུར་པ་ནི་ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་སྟེ། རྭ་ནས་བཟུང་བའི་ཚུལ་གྱིས་སྟོན་པར་འདོད་ནས་འདི་ལྟ་
སྟེ་ཞེས་བྱ་བ་ལ་སོགས་པ་སྨོས་ཏེ། དེ་ལ་འདིའི་ཕྱག་ན་རྡོ་རྗེ་མངའ་བས་ན་ཕྱག་ན་རྡོ་རྗེའོ། །སྤྱན་གྱིས་རྣམ་པར་བལྟ་བ་ནི་སྤྱན་རས་གཟིགས་ཏེ། ཆོས་ཐམས་ཅད་ཀྱི་རང་བཞིན་རྣམ་པར་དག་པའོ་ཞེས་སོ་སོར་རྟོག་ཅིང་ཐམས་ཅད་ལ་སྐྱོབ་པའི་ཕྱིར་གཟིགས་པས་ན་སྤྱན་རས་གཟིགས་སོ། །
དབང་ཕྱུག་ནི་དེ་ལ་མངའ་བརྙེས་པའོ། །ནམ་མཁའ་ནི་མཉམ་པ་ཉིད་ཀྱི་ཡེ་ཤེས་སོ། །སྙིང་པོ་ནི་སྐྱེ་བའི་གནས་ཏེ། དེ་གང་ལ་ཡོད་པ་དེ་ནི་ནམ་མཁའི་སྙིང་པོའོ། །ཆོས་རྣམས་ནི་རང་བཞིན་གྱིས་འོད་གསལ་བའོ་ཞེས་བྱ་བ་བསྒོམ་པ་འདིས་ཆོས་ཐམས་ཅད་གཅིག་ཏུ་བྱེད་པའི་ཁུ་ཚུར་གང་ལ་ཡོད་
པ་དེ་ནི་རྡོ་རྗེ་ཁུ་ཚུར་ཏེ། དེ་བཞིན་ཉིད་བདེན་མི་སླུ་གང་། །རྡོ་རྗེ་ཁུ་ཚུར་དུ་བཤད་དོ་། །ཞེས་གསུངས་པའི་ཕྱིར་རོ། །འཇམ་ཞིང་མཉེན་པའི་དཔལ་གང་ལ་ཡོད་པ་དེ་ནི་འཇམ་དཔལ་ཏེ། གཉིས་སུ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པའི་རྒྱུ་ལས་ངེས་པར་འབྱུང་བ་ཉིད་ཀྱིས་ན་ཉོན་

59-1-67b

མོངས་པའི་རྩུབ་པ་དང་བྲལ་ཞིང་ན་ཚོད་ལོ་བརྒྱད་པའི་གཞོན་ནུའི་གཟུགས་མངའ་བའི་ཕྱིར་རོ། །སེམས་བསྐྱེད་མ་ཐག་པའི་རྗེས་ཐོགས་ཉིད་ལ་ཆོས་ཀྱི་འཁོར་ལོའི་དཀྱིལ་འཁོར་རབ་ཏུ་བསྐོར་ཞིང་སྤྲུལ་པའི་ངང་ཚུལ་གང་ལ་ཡོད་པ་དེ་ནི་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་
བའོ། །ནམ་མཁའ་ནི་གོ་འབྱེད་པ་སྟེ་མཉམ་པ་ཉིད་ཀྱི་ཡེ་ཤེས་སོ། །དེ་ཉིད་ཀྱི་མཛོད་འདི་ལ་མངའ་བས་ན་ནམ་མཁའི་མཛོད་དོ། །ཕུང་པོའི་བདུད་དང་། ཉོན་མོངས་པའི་བདུད་དང་། འཆི་བདག་གི་བདུད་དང་། ལྷའི་བུའི་བདུད་ནི་བདུད་ཐམས་ཅད་དོ། །དེ་རྣམས་འཇོམས་ཤིང་མི་
སྣང་བར་མཛད་པའི་ངང་ཚུལ་གང་ལ་ཡོད་པ་དེ་ནི་བདུད་ཀྱི་སྟོབས་ཐམས་ཅད་རྣམ་པར་འཇོམས་པའོ། །དེ་ལ་བྱང་ཆུབ་ཏུ་སེམས་བསྐྱེད་པས་ནི་གསང་སྔགས་འགྲུབ་པར་འགྱུར་རོ་ཞེས་བསྟན་པར་བྱ་བའི་ཕྱིར་ཕྱག་ན་རྡོ་རྗེ་བསྟན་པ་ཡིན་ནོ། །ཆོས་ཐམས་ཅད་ནི་རང་བཞིན་གྱིས་རྣམ་པར་དག་
པའོ་ཞེས་ཆོས་ལ་བདག་མེད་པ་བསྒོམ་པ་དང་ལྡན་པས་འགྲུབ་པར་འགྱུར་རོ་ཞེས་བསྟན་པར་བྱ་བའི་ཕྱིར་འཕགས་པ་སྤྱན་རས་གཟིགས་དབང་ཕྱུག་བསྟན་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་གཅིག་ཏུ་བྱ་བ་རང་བཞིན་གྱིས་འོད་གསལ་བ་ཤེས་
པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བསྒོམས་པས་འགྲུབ་པར་བསྟན་པར་བྱ་བའི་ཕྱིར་རྡོ་རྗེ་ཁུ་ཚུར་བསྟན་པ་ཡིན་ནོ། །ཤེས་རབ་ཀྱི་ཕ་རོལ་དུ་ཕྱིན་པ་བསྒོམས་པས་འགྲུབ་པའི་ཕྱིར། འཕགས་པ་འཇམ་དཔལ་བསྟན་པ་ཡིན་ནོ། །དཀྱིལ་འཁོར་དུ་འཇུག་པས་འགྲུབ་པར་འགྱུར་བའི་ཕྱིར་
སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་བསྟན་པ་ཡིན་ནོ། །མཆོད་པ་ཐམས་ཅད་ལ་འཇུག་པས་འགྲུབ་པར་བསྟན་པའི་ཕྱིར་ནམ་མཁའི་མཛོད་བསྟན་པ་ཡིན་ནོ། །བགེགས་ཐམས་ཅད་བཟློག་པར་ནུས་ན་འགྲུབ་པར་གསུངས་པའི་ཕྱིར་རྡོ་རྗེ་གནོད་སྦྱིན་བསྟན་པ་ཡིན་པར་བསྒྲུབ་
པའི་ཡན་ལག་སྟོན་པ་ཡིན་ནོ། །དེ་དག་ལ་སོགས་པ་ཞེས་བྱ་བ་ནི་གང་ལ་དེ་དག་གཙོ་བོར་གྱུར་པ་དེ་ནི་དེ་དག་ལ་སོགས་པ་སྟེ། དེ་དག་ལ་སོགས་པ་བྱང་ཆུབ་སེམས་དཔའ་བྱེ་བ་ཕྲག་བརྒྱད་ཀྱིས་བཅོམ་ལྡན་འདས་རྣམ་པར་སྣང་མཛད་ཡོངས་སུ་བསྐོར་ཞིང་ཀུན་ནས་འཁོར་བར་གནས་པའོ། །

59-1-68a

མདུན་གྱིས་བལྟས་ནས་ཞེས་བྱ་བ་ནི་གུས་པས་ཁྱད་པར་དུ་ཕུལ་དུ་བྱུང་བའི་སེམས་ཀྱིས་ཡང་དག་པར་གནས་པའོ། །དེར་ཅི་ཞིག་མཛད་ཅེ་ན་ཆོས་སྟོན་ཏེ་ཞེས་བྱ་བ་སྨོས་ཏེ་དམ་པའི་ཆོས་སྟོན་པར་མཛད་ཅིང་རབ་ཏུ་འཆད་པར་མཛད་ཅེས་བྱ་བའི་དོན་ཏོ། །མཚན་ནི་ཇི་སྐད་
དུ་བཏགས་ཁྱད་པར་ནི་ཇི་ལྟ་བུ་དང་ལྡན་པའི་ཆོས་སྟོན་པར་མཛད་ཅེ་ན། ཐོག་མར་དགེ་བ་ཞེས་བྱ་བ་ལ་སོགས་པ་སྨོས་ཏེ། དང་པོ་ཐོས་བཞིན་པའི་གནས་སྐབས་ན་ཡང་དད་པའི་རྒྱུར་འགྱུར་བས་ན་ཐོག་མར་དགེ་བའོ། །བར་དུ་བསམ་པའི་གནས་སྐབས་ན་ཡང་དགེ་བའི་རྒྱུར་གྱུར་པས་ན་བར་
དུ་དགེ་བའོ། །ཐ་མར་སྒོམ་པའི་ཤེས་རབ་ཀྱི་གནས་སྐབས་ན་ཡང་གྲོལ་བའི་རྒྱུར་གྱུར་པས་ན་ཐ་མར་དགེ་བའོ། །ཡང་ན་ལྷག་པའི་ཚུལ་ཁྲིམས་ཀྱི་བསླབ་པ་རྫོགས་པར་བྱེད་པས་ན་ཐོག་མར་དགེ་བའོ། །ལྷག་པའི་སེམས་ཀྱི་བསླབ་པ་རྫོགས་པར་བྱེད་པས་ན་བར་དུ་དགེ་བའོ། །ལྷག་
པའི་ཤེས་རབ་ཀྱི་བསླབ་པ་རྫོགས་པར་བྱེད་པས་ན་ཐ་མར་དགེ་བའོ་ཞེས་བྱ་བའི་དོན་ཏོ། །བྱང་ཆུབ་ཀྱི་སེམས་ལ་སོགས་པའི་ཚིག་གི་ངོ་བོར་གྱུར་པས་ན་དོན་བཟང་པོའོ། །ཚིག་ཙམ་མ་ཡིན་པའི་སྒྲ་ལ་སོགས་པའི་ཉེས་པ་དང་བྲལ་བས་ན་ཚིག་འབྲུ་བཟང་པོའོ། །ཆོས་དང་གང་ཟག་ཏུ་
འཛིན་པ་དང་བྲལ་བས་ན་མ་འདྲེས་པའོ། །ཐེག་པ་མ་ལུས་པ་ལྷག་པར་མོས་པའི་སེམས་ཅན་རྣམས་ཀྱི་མངོན་པར་འདོད་པའི་དོན་ཐོབ་པར་བྱེད་པས་ན་ཡོངས་སུ་རྫོགས་པའོ། །ཆོས་ཐམས་ཅད་དངོས་པོ་མེད་པའི་ངོ་བོ་ཉིད་དུ་སྟོན་པའི་རང་བཞིན་ཡིན་པས་ན་ཡོངས་སུ་དག་པ་སྟེ། རབ་ཏུ་
དགའ་བའི་སའི་ངོ་བོ་ཉིད་ཅེས་བྱ་བའི་དོན་ཏོ། །འདི་ཉིད་བསྒོམ་པའི་ལམ་ལ་ཡང་དང་ཡང་དུ་མངོན་དུ་བྱེད་པ་ཡིན་པས་ན་ཡོངས་སུ་བྱང་བ་སྟེ། དེ་ལྟ་བའི་རང་བཞིན་ཅན་གྱི་ཆོས་སྟོན་པར་མཛད་དོ་ཞེས་ཁྱད་པར་དུ་མཛད་ནས། ད་ནི་མིང་ཉིད་བསྟན་པར་བྱ་བའི་ཕྱིར་ཆོས་ཐམས་ཅད་ངོ་བོ་ཉིད་
ཀྱིས་རྣམ་པར་དག་པའི་སྒོ་ཞེས་བྱ་བ་སྨོས་ཏེ་ཆོས་ཐམས་ཅད་ནི་རབ་ཏུ་དགའ་བ་ལ་སོགས་པའོ། །དེ་རྣམས་ཀྱི་ངོ་བོ་ཉིད་རྣམ་པར་དག་པ་ནི་དེ་རྣམས་ཀྱི་དོན་དམ་པས་དངོས་པོ་མེད་པའི་ངོ་བོ་ཉིད་དོ། །དེའི་སྒོ་ནི་འཇུག་པའི་གནས་སོ། །དེ་ཡང་གང་གིས་མངོན་སུམ་དུ་བྱེད་པ་སྟེ། འདི་

59-1-68b

ལྟར་རབ་ཏུ་དགའ་བ་རྣམ་པར་དག་པའི་གནས་འདི་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ་ཞེས་བྱ་བ་ལ་སོགས་པ་སྟེ་གང་གི་ཕྱིར་དེ་ཐོས་པ་ལ་སོགས་པའི་ཤེས་རབ་ཀྱིས་ཐོས་པ་དེ་ལ་ནི་དེ་སྐད་ཅེས་བྱ་ལ། མིང་འདི་སྐད་ཅེས་བྱ་བའི་གསང་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་
ཚུལ་གང་ཡིན་པ་དེ་སྟོན་པར་མཛད་པའོ། །དེ་ལ་རབ་ཏུ་དགའ་བ་ལ་སོགས་པའི་དེ་ཁོ་ན་ཉིད་ཀྱི་རྣམ་པ་ནི་ཤེས་རབ་བོ། །དེའི་ཕ་རོལ་ཏུ་ཕྱིན་ཅིང་འགྲོ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། བྱང་ཆུབ་ཀྱི་སེམས་ལ་སོགས་པ་མངོན་སུམ་དུ་བྱེད་པའི་ངོ་བོ་ཉིད་རྣམ་པར་གྲོལ་བའི་ལམ་གྱི་
ཁྱད་པར་ཞེས་བྱ་བའི་དོན་ཏོ། །དེའི་ཚུལ་ནི་སྔར་བཤད་པ་ཉིད་དེ། དེས་དེ་ཐོབ་པ་གང་ཡིན་པ་དེ་ཡང་དག་པར་སྟོན་པ་ནི་རབ་ཏུ་འཆད་པར་མཛད་པའོ། །གང་འདི་སྟོན་པར་མཛད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་དེ་ཡང་གང་ཞིག་ཡིན་ཞེ་ན། འདི་ལྟར་ཞེས་བྱ་བ་ལ་སོགས་པ་གསུངས་ཏེ། 
འདི་ལྟར་ཞེས་བྱ་བ་ནི་དཔེ་ཉེ་བར་སྟོན་པའི་དོན་ཏོ། །ཤིན་ཏུ་དག་པས་ན་རབ་ཏུ་དགའ་བ་སྟེ། གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བའི་མི་དམིགས་པའི་ཐུགས་རྗེ་ཆེན་པོས་ཆགས་པའི་ངོ་བོ་ཉིད་དེ། དེ་བཞིན་ཉིད་ལས་གཟུགས་མ་ལུས་པར་སྟོན་པས་ཕྱི་མའི་མཐར་ཐུག་པའི་
བར་དུ་འགྲོ་བའི་དོན་ལ་སྤྱོད་པའོ། །དེ་སྐད་དུ་བཅོམ་ལྡན་འདས་རབ་ཏུ་དགའ་བ་ཇི་ལྟ་བུ་ལགས་ཞེས་པ་ལ། ཉེས་པ་མེད་པར་རྟག་ཏུ་འབྱུང་། །ཆགས་པ་ཀུན་ལ་རྗེས་སུ་དགྱེས། །དེ་ཉིད་ཀྱིས་གསང་བཅོམ་ལྡན་འདས། །འདོད་ཆགས་ཆེན་པོ་དགའ་བ་ཆེ། །ཞེས་བཀའ་སྩལ་བའི་ཕྱིར་
རོ། །དེའི་དེ་བཞིན་ཉིད་དུ་ཚུལ་གཅིག་པ་ནི་རྣམ་པར་དག་པའོ། །དེའི་གནས་ནི་བཞི་སྟེ། དེ་ཁོ་ན་ཉིད་བཅུའི་བདག་ཉིད་ཅན་ནོ། །འདིས་ནི་ཞེས་བྱ་བ་ནི་སྔ་མ་དང་སྦྱར་རོ། །འདི་ལྟ་སྟེ་ཞེས་བྱ་བ་ནི་ཚིག་གི་ཕྲད་དེ། བསྡུས་པའི་ཚིག་གིས་ཁ་སྐོང་བ་ལ་འཇུག་གོ། །དེ་ཡང་ཕ་རོལ་ཏུ་ཕྱིན་པ་དང་། ཡང་
དག་པར་སྦྱར་རོ། །བྱང་ཆུབ་པའི་ངོ་བོ་ཉིད་ལ་སེམས་དཔའ་ནི་བྱང་ཆུབ་སེམས་དཔའོ་ཞེས་ཉེ་བར་དགོངས་ཏེ། དེའི་འབྲས་བུའི་ངོ་བོ་ཉིད་ཡིན་པའི་ཕྱིར་རོ། །དེའི་གནས་ནི་སེམས་ཅན་གདུལ་བའི་རྟོན་ནོ། །དེའི་དོན་ནི་འདི་སྐད་སྟོན་པར་འགྱུར་ཏེ། གང་བཅོམ་ལྡན་འདས་རྡོ་རྗེ་སེམས་དཔའ་བྱང་ཆུབ་ཀྱི་

59-1-69a

ངོ་བོ་ཉིད་ཀྱི་གནས་འདི་ནི་སེམས་ཅན་རྣམས་འདུལ་བའི་རྟེན་ཡིན་ཏེ། རབ་ཏུ་དགའ་བ་རྣམ་པར་དག་པའི་གནས་ཀྱིས་འདུལ་བར་བྱ་བ་རྣམས་འདུལ་བའོ། །འདིས་ནི་རབ་ཏུ་དགའ་བ་རྣམ་པར་དག་པའི་གནས་ཀྱིས་རྡོ་རྗེ་སེམས་དཔའི་ངོ་བོ་ཉིད་བཤད་པ་ཡིན་ནོ། །འདོད་ཆགས་ནི་
རྡོ་རྗེ་སེམས་དཔའ་ལ་སོགས་པ་བསྒོམ་པ་ལ་ཤིན་ཏུ་ཞེན་པའི་ཆགས་པ་སྟེ། འདོད་ཆགས་དམ་ཚིག་ཡིན་པར་བཤད། །ཆོས་ཀྱི་འདོད་པ་ཡིད་འོང་བ། །ཞེས་གསུངས་པའི་ཕྱིར་རོ། །འདོད་ཆགས་ཉིད་མདའ་ཡིན་པས་ན། འདོད་ཆགས་ཀྱི་མདའ་སྟེ་ཕྲ་མོར་འབིགས་པས་མདའ་ཞེས་བྱ་
ཞེས་བཤད་པ་དང་། ཡང་རྒྱུད་འདི་ཉིད་ལས། མཆོག་ཀུན་འབིགས་པས་གཅིག་པུ་ཉིད། །ཅེས་གསུངས་པའི་ཕྱིར་རོ། །དེའི་རྣམ་པར་དག་པ་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །ཚིག་འདིས་ཀྱང་རྡོ་རྗེ་ཡིད་ལས་བྱུང་བའི་དོན་བསྟན་པ་ཡིན་ནོ། །རེག་པ་རྣམ་པར་དག་པ་ཞེས་བྱ་བ་
ལ་སོགས་པ་ལ་དེ་ལྟར་བསྒོམ་པ་དང་ལྡན་པ་ལ་རྡོ་རྗེ་སེམས་དཔའ་ལ་སོགས་པ་མངོན་སུམ་དུ་བྱེད་པ་ནི་རེག་པ་སྟེ། དེ་སྐད་དུ། བདེ་བ་ཐམས་ཅད་དངོས་གྲུབ་མཆོག །ཅེས་གསུངས་པའི་ཕྱིར་རོ། །ལྷག་མ་རྣམས་ནི་སྔ་མ་བཞིན་ནོ། །འདིས་ཀྱང་རྡོ་རྗེ་རྩེ་མོ་ཅན་གྱི་ངོ་བོ་ཉིད་བཤད་པ་ཡིན་ནོ། །
སྡུག་པའི་འཆིང་བ་རྣམ་པར་དག་པ་ལ་ཞེས་བྱ་བ་ལ་སོགས་པ་ལ། རྡོ་རྗེ་སེམས་དཔའ་ལ་སོགས་པའི་ངོ་བོ་ཉིད་མངོན་སུམ་དུ་བྱས་ནས་འཁོར་བ་ཇི་སྲིད་པར་ཡོངས་སུ་མི་གཏོང་བ་ནི་སྡུག་པའོ། །དེ་ཉིད་ནི་འཆིང་བ་སྟེ། རབ་ཆགས་འཆིང་བ་ཆུ་སྲིན་འདྲ། །དེས་འདི་ཆུ་སྲིན་རྒྱལ་མཚན་ནོ། །ཞེས་གསུངས་
པའི་ཕྱིར་རོ། །ལྷག་མ་རྣམས་ནི་སྔ་མ་བཞིན་ནོ། །འདིས་ཀྱང་རྡོ་རྗེ་དྲན་པའི་དོན་བསྟན་པ་ཡིན་ནོ། །ཐམས་ཅད་ལ་དབང་ཕྱུག་དང་ཞེས་བྱ་བ་ལ་སོགས་པ་ལ། དེ་ལྟར་རྡོ་རྗེ་སེམས་དཔའ་ལ་སོགས་པའི་ངོ་བོ་ཉིད་ཡོངས་སུ་མི་གཏོང་བའི་སྡུག་པའི་འཆིང་བས་བཅིངས་པའི་རྣལ་འབྱོར་པས་བྱ་བ་
སྒྲུབ་པའི་ཡེ་ཤེས་ཀྱིས་འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་འཁོར་བ་ཇི་སྲིད་དུ་འཛིན་པར་བྱེད་པས་ན། ཐམས་ཅད་ལ་དབང་ཕྱུག་དང་དབང་བྱེད་པ་ཞེས་བྱ་བ་གསུངས་པ་ཡིན་ཏེ། ལྷག་མ་ནི་སྔ་མ་བཞིན་ནོ། །འདིས་ཀྱང་རྡོ་རྗེ་སྙེམས་མའི་དོན་བསྟན་པ་ཡིན་ཏེ། 

59-1-69b

དེ་སྐད་དུ། གཡོན་དུ་སྙེམས་པས་དབང་དུ་བྱེད། །ཅེས་གསུངས་པའི་ཕྱིར་རོ། །དེས་དེ་སྙེམས་པས་མཐོ་བའི་ཐུན་མོང་དུ་བཤད་པ་ཡིན་ནོ། །འདིར་ཡང་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་དུ་ཤེས་པར་བྱ་སྟེ། དེའི་ངོ་བོ་ཉིད་ནི་བྱ་བ་སྒྲུབ་པའི་ཡེ་ཤེས་ཀྱི་ངོ་བོ་ཉིད་ཡིན་པའི་ཕྱིར་རོ། །
ལྟ་བ་རྣམ་པར་དག་པའི་གནས་ཞེས་བྱ་བ་ལ་སོགས་པ་ལ་ཇི་སྐད་དུ་གསུངས་པའི་འདོད་ཆགས་ཀྱི་མདས་ཆོས་ཀྱི་དབྱིངས་སོ་སོར་རྟོག་པར་བྱས་ནས། ཆོས་ཐམས་ཅད་བདག་མེད་པར་རབ་ཏུ་མཐོང་བའི་ལྟ་བ་ལ་བྱའོ། །གཞན་དག་ནི་གོ་སླའོ། །འདིས་ཀྱང་སྒེག་མོའི་དོན་གསུངས་པ་
ཡིན་ནོ། །དགའ་བ་རྣམ་པར་དག་པའི་གནས་ཞེས་བྱ་བ་ལ་སོགས་པ་ལ། སྔར་བཤད་པའི་ཚུལ་གྱིས་རྡོ་རྗེ་སེམས་དཔའ་ལ་སོགས་པའི་ངོ་བོ་ཉིད་མངོན་སུམ་དུ་བྱས་པའི་རེག་པ་རྣམ་པར་དག་པ་ལས་ཟག་པ་མེད་པའི་དགའ་བ་ཉེ་བར་འབྱུང་བར་འགྱུར་རོ། །གཞན་དག་ནི་གོ་སླའོ། །འདིས་
ཀྱང་བཞད་པའི་དོན་བཤད་པ་ཡིན་ནོ། །སྲེད་པ་རྣམ་པར་དག་པའི་གནས་ཞེས་བྱ་བ་ལ་སོགས་པ་ལ། རྡོ་རྗེ་དྲན་པའི་ངོ་བོ་ཉིད་ཀྱི་སྡུག་པའི་འཆིང་བའི་མ་འོངས་པའི་འདོད་པ་ཡོངས་སུ་མི་སྤོང་བའོ། །ལྷག་མ་རྣམས་ནི་གོ་སླའོ། །འདིས་ཀྱང་རྡོ་རྗེ་གླུ་མཁན་མའི་དོན་བཤད་པ་ཡིན་ནོ། །སྙེམས་
པ་ཞེས་བྱ་བ་ལ་སོགས་པ་ལ་དབང་ཕྱུག་གི་བདག་པོའི་སྙེམས་པས་ཁམས་གསུམ་མ་ལུས་པ་ན་སྤྱོད་པའི་སེམས་ཅན་གྱི་ཁམས་རྣམས་ཟིལ་གྱིས་མནན་ནས་རྣམ་པར་སྣང་བ་ནི་འདིར་བསྙེམས་པའོ། །ལྷག་མ་ནི་གོ་སླའོ། །འདིས་ཀྱང་རྡོ་རྗེ་གར་མཁན་མའི་དོན་བཤད་པ་ཡིན་ནོ། །རྒྱན་རྣམ་
པར་དག་པའི་གནས་ཞེས་བྱ་བ་ལ་སོགས་པ་ལ། བྱང་ཆུབ་ཀྱི་ཡན་ལག་དང་བསམ་གཏན་གྱི་མེ་ཏོག་གི་རྒྱན་གྱིས་ལྟ་བ་རྣམ་པར་དག་པར་འགྱུར་ཏེ། དེ་བས་ན་ལྟ་བ་རྣམ་པར་དག་པའི་གནས་ཞེས་གསུངས་སོ། །གཞན་དག་ནི་གོ་སླའོ། །འདིས་ཀྱང་རྡོ་རྗེ་མེ་ཏོག་མའི་དོན་བཤད་པ་ཡིན་ནོ། །ཡིད་
ཚིམ་པར་བྱེད་པ་རྣམ་པར་དག་པའི་གནས་ཞེས་བྱ་བ་ལ་སོགས་པ་ལ། ཤེས་རབ་ཀྱིས་ཆོས་ཐམས་ཅད་བདག་མེད་པར་མཐོང་བས་དགའ་བ་ཉེ་བར་སྐྱེ་བར་འགྱུར་ཏེ། དེ་བས་ན་ཤེས་རབ་ཀྱི་ཕ་རོལ་ཏུ་ཕྱིན་པ་ནི་གདུག་པ་མ་ཡིན་པར་གསུངས་སོ། །ལྷག་མ་རྣམས་གོ་སླའོ། །སྣང་བ་རྣམ་པར་

59-1-70a

དག་པའི་གནས་ཞེས་བྱ་བ་ལ་སོགས་པ་ལ་སྨོན་ལམ་གྱི་ཕ་རོལ་ཏུ་ཕྱིན་པ་ནི་སྣང་བས་ཆོས་ཐམས་ཅད་སྒྱུ་མ་ལ་སོགས་པའི་ངོ་བོར་རབ་ཏུ་མཐོང་བས་ན་ཆོས་ལ་སྲེད་པ་ཉེ་བར་འབྱུང་བར་འགྱུར་ཏེ། དེས་ན་སྣང་བ་རྣམ་པར་དག་པའི་གནས་ཞེས་གསུངས་སོ། །ལྷག་མ་ནི་
གོ་སླའོ། །འདིས་ཀྱང་རྡོ་རྗེ་མར་མེ་མའི་དོན་བསྟན་པ་ཡིན་ནོ། །ལུས་བདེ་བ་རྣམ་པར་དག་པའི་གནས་ཞེས་བྱ་བ་ལ་སོགས་པ་ལ་འཇིག་རྟེན་ལས་འདས་པའི་ཕུང་པོ་ལྔའི་ངོ་བོ་ཉིད་ནི་ལུས་སོ། །དེ་ཉིད་ནི་བདེ་བ་སྟེ། དེས་དགེ་བའི་སྙེམས་པ་ཉེ་བར་འབྱུང་བར་འགྱུར་ཏེ་དེ་བས་ན་དེ་ནི་འདིའི་
བཤད་པ་ཡིན་ཏེ། འདིས་ཀྱང་རྡོ་རྗེ་སྙེམས་མའི་དོན་བཤད་པ་ཡིན་ནོ། །ལྷག་མ་རྣམས་ནི་གོ་སླའོ། །གཟུགས་རྣམ་པར་དག་པའི་གནས་ཞེས་བྱ་བ་ལ་སོགས་པ་ལ་བསམ་གཏན་གྱི་ཕ་རོལ་ཏུ་ཕྱིན་པ་བསྐྱེད་པར་བྱ་བའི་ཕྱིར། གདུལ་བྱ་རྣམས་ལ་གང་རྡོ་རྗེ་སེམས་དཔའ་ལ་སོགས་པའི་སྐུ་
ཡང་དག་པར་སྟོན་པ། རྡོ་རྗེ་འཆང་ཆེན་པོས་མཛད་པ་དེ་ནི་གཟུགས་སོ། །ལྷག་མ་རྣམས་ནི་གོ་སླའོ། །སྒྲ་རྣམ་པར་དག་པའི་གནས་ཞེས་བྱ་བ་ལ་སོགས་པ་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བའི་ཕྱིར། ཆོས་སོ་སོ་ཡང་དག་པར་རིག་པའི་ངོ་བོ་ཉིད་ཀྱི་ཤེས་རབ་ཀྱི་
ཕ་རོལ་ཏུ་ཕྱིན་པ་བཅུ་སྟོན་པར་མཛད་པའི་ངོ་བོ་ཉིད་གང་ཡིན་པ་དེ་ནི་སྒྲའོ། །གཞན་དག་ནི་གོ་བར་ཟད་དོ། །དྲི་ཞེས་བྱ་བ་ལ་སོགས་པ་ལ་སྨོན་ལམ་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བའི་ཕྱིར་ཆོས་བདག་མེད་པ་བསྒོམས་པས། ཤེས་བྱ་མ་ལུས་པ་དངོས་པོ་མེད་པའི་ངོ་བོ་ཉིད་
དུ་ཤེས་པའི་གྲགས་པའི་དྲི་གང་ཡིན་པ་དེ་ནི་དྲིའོ། །ལྷག་མ་རྣམས་ནི་གོ་སླའོ། །རོ་ཞེས་བྱ་བ་ལ་སོགས་པ་ལ། ཚུལ་ཁྲིམས་དང་ཏིང་ངེ་འཛིན་དང་ཤེས་རབ་དང་རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བའི་ངོ་བོ་ཉིད་ཀྱིས་ལུས་ཀྱི་བདེ་བ་རྣམ་པར་དག་པའི་གནས་ཐོབ་པར་བྱ་
བའི་ཕྱིར། གང་སྒེག་པ་ལ་སོགས་པའི་ཉམས་རྡོ་རྗེ་འཛིན་པ་ཆེན་པོ་རང་ཉིད་ཀྱིས་སྟོན་པར་མཛད་པ་དེ་ནི་རོ་ཞེས་བྱའོ། །ལྷག་མ་རྣམས་ནི་ཤེས་པར་ཟད་དོ། །ཚིག་བཞི་པོ་དེ་དག་གིས་རིམ་པ་ཇི་ལྟ་བ་བཞིན་དུ་རྡོ་རྗེ་གཟུགས་དང་། རྡོ་རྗེ་སྒྲ་དང་། རྡོ་རྗེ་དྲི་དང་། རྡོ་རྗེ་རོའི་དོན་བསྟན་པ་ཡིན་ནོ། །དེ་

59-1-70b

ཡང་འདོད་པའི་ཁམས་ཀྱི་དབང་ཕྱུག་གདུལ་བར་བྱ་བའི་ཕྱིར། བཅོམ་ལྡན་འདས་རྡོ་རྗེ་འཛིན་པ་ཆེན་པོས་གང་འདི་བཙུན་མོའི་འཁོར་གྱི་ནང་དུ་བཞུགས་པའི་རབ་ཏུ་དགའ་བ་ཆེན་པོའི་སྐུར་སྤྲུལ་པ་མཛད་པ་དེ་མཐོང་བ་དང་། འདོད་པའི་ཁམས་ཀྱི་དབང་ཕྱུག་དེའི་རང་ཉིད་ཀྱི་ཆུང་མའི་འཁོར་ཉིད་ལ་སྡུག་
བསྔལ་བསྐྱེད་པའི་བློ་སྐྱེས་ནས། བཅོམ་ལྡན་འདས་ལ་མངོན་པར་འདོད་པས་ཕྱག་བྱས་སོ། །དེ་བས་ན་བཅོམ་ལྡན་འདས་ཀྱི་སྐུ་འདི་ནི་གཟུགས་རྣམ་པར་དག་པའི་གནས་སོ་སྙམ་ནས། བཅོམ་ལྡན་འདས་ལ་ཇི་ལྟར་ན་ཁྱེད་ཀྱི་གཟུགས་ཕུན་སུམ་ཚོགས་པ་འདི་དག་ཐོབ་པར་འགྱུར་ཞེས་ཞུས་པ་
དང་། དེའི་ཕྱིར་དེ་གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་ལ་བཀོད་ནས། དེ་ཉིད་ཀྱི་ཆེད་དུ་བཅོམ་ལྡན་འདས་གང་འདི་རབ་ཏུ་དགའ་བ་རྣམ་པར་དག་པ་ལ་སོགས་པ་སྟོན་པར་མཛད་པ་དེ་ནི་སྒྲའོ། །ཐོས་ནས་ཀྱང་དེའི་དོན་དེ་ལ་ལྷག་པར་མོས་པའི་ཡེ་ཤེས་ཀྱི་སྒྲ་རྟོགས་པ་ནི་
དྲིའོ། །དེ་ཉིད་ཤིན་ཏུ་ཡང་དེའི་རང་བཞིན་དུ་གྱུར་པ་ནི་རོའོ། །དེ་ནས་ཀྱང་བྱང་ཆུབ་ཀྱི་ཡན་ལག་བདུན་གྱི་མེ་ཏོག་གི་བསམ་གཏན་མངོན་སུམ་དུ་བྱས་པ་ནི་རྒྱན་ནོ། །དེ་ནས་ངེས་པར་འབྱེད་པའི་མཚན་ཉིད་ཅན་གྱི་ཤེས་རབ་ཀྱི་ཕ་རོལ་ཏུ་ཕྱིན་པ་ཁོང་དུ་ཆུད་པ་ནི་ཡིད་ཚིམ་པའོ། །དེ་ནས་སྣང་བ་ཐོབ་པ་
དང་། སྣང་བ་མཆེད་པ་དང་། དེ་ཁོ་ན་ཉིད་ཀྱི་དོན་ལ་ཕྱོགས་གཅིག་པ་ལས་བྱུང་བའི་བར་ཆད་མེད་པའི་ཏིང་ངེ་འཛིན་གྱི་ངོ་བོ་ཉིད་ཁོང་དུ་ཆུད་པ་ནི་སྣང་བའོ། །དེ་ཉིད་ཀྱིས་ནི་ཆོས་དང་གང་ཟག་ཏུ་རྟོག་པའི་དྲི་མ་དང་བྲལ་བས་ན་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། 
རྣམ་པར་གྲོལ་བའི་ཡེ་ཤེས་མཐོང་བ་ཐོབ་པ་ནི་ལུས་བདེ་བའོ། །དེ་ནས་ཆོས་ཐམས་ཅད་ལ་བདག་མེད་པ་མཐོང་བ་ནི་ལྟ་བའོ། །དེའི་རྒྱུར་གྱུར་པ་རབ་ཏུ་མགུ་བ་ནི་དགའ་བའོ། །དེ་ནས་ཇི་ལྟར་མཐོང་བའི་ཆོས་བདག་མེད་པའི་ཡེ་ཤེས་ཡང་དང་ཡང་དུ་བསྒོམ་པ་ནི་སྲེད་པའོ། །བསྒོམ་པ་དང་རབ་
ཏུ་ལྡན་པའི་སྤྲོས་པའི་མཚན་ཉིད་ཅན་གྱི་དྲེགས་པ་ནི་སྙེམས་པའོ། །སྤྲོ་བར་གྱུར་པ་དེ་ལ་ཡང་ནས་ཡང་དུ་རབ་ཏུ་དགའ་བ་རྣམ་པར་དག་པ་ལ་སོགས་པ་ནི་འདོད་ཆགས་ཀྱི་མདའོ། །དེས་རབ་ཀྱི་མཐར་ཐུག་པའི་རབ་ཏུ་དགའ་བ་རྣམ་པར་དག་པ་ནི་རེག་པ་རྣམ་པར་དག་པ་སྟེ། བྱང་ཆུབ་ཀྱི་སེམས་

59-1-71a

བདེ་བ་ཆེན་པོ་ལ་སོགས་པ་མངོན་སུམ་དུ་བྱས་ཞེས་བྱ་བའི་དོན་ཏོ། །བྱང་ཆུབ་ཀྱི་སེམས་ལ་སོགས་པ་མངོན་སུམ་དུ་བྱས་ནས་ཡོངས་སུ་མི་གཏོང་བར་ནུས་པ་ནི་སྡུག་པའི་འཆིང་བའོ། །དེས་ཀྱང་གཟུང་བ་དང་འཛིན་པ་ཀུན་དུ་སྦྱོར་བ་ལས་རང་བཞིན་གྱིས་འོད་གསལ་
བའི་རྣམ་པར་གྲོལ་བ་ཐོབ་ཅིང་ལྷུན་གྱིས་གྲུབ་པར་འཇུག་པའི་ལམ་ལ་གནས་པ་ཐོབ་པས་ཐམས་ཅད་ལ་དབང་ཕྱུག་དང་དབང་བ་ཉིད་ཐོབ་པ་སྟེ། རབ་ཏུ་དགའ་བའི་བདེ་བ་ཆེན་པོའི་གཙོ་བོས་བརྒྱན་པའི་དབང་ཕྱུག་ཏུ་གྱུར་པ་ནི། རབ་ཏུ་དགའ་བའི་བར་དུ་རྒྱུད་ལ་གསུངས་པ་ཡིན་ནོ། །འདི་
ལྟར་སྟོན་པར་མཛད་པ་ནི་ཡུལ་སྤངས་པས་ཐར་པ་ཐོབ་པར་འདོད་པས་སྐྲག་པ་རྣམས་ཀྱི་དབང་དུ་མཛད་ནས་གསུངས་པ་ཡིན་ཏེ། དེ་རྣམས་ཀྱི་འཁོར་བའི་མི་རྟག་པའི་གཟུགས་སྤངས་ནས་འདི་ན་ལྟ་བས་མི་ངོམས་པའི་གཟུགས་ཐོབ་སྟེ། བདེ་བ་ཆེན་པོ་རྗེས་སུ་མྱོང་བར་འགྱུར་རོ་ཞེས་བྱ་
བར་ངེས་པར་དགོད་པའི་ཕྱིར་རོ། །བཅོམ་ལྡན་འདས་ཀྱིས་ཇི་སྐད་དུ་བཤད་པའི་གཟུགས་ཡང་དག་པར་སྟོན་པར་མཛད་པ་ཡིན་ནོ། །གཟུགས་འདི་ནི་པི་ཝང་ལ་སོགས་པའི་སྒྲ་མེད་པར་བདེ་བ་ཆེན་པོ་འབྱུང་བར་མི་འགྱུར་རོ། །དེ་བས་ན་པི་ཝང་བརྡུངས་པ་ལ་སོགས་པས་སྒྲ་སྟོན་པར་
མཛད་པ་ཡིན་ནོ། །དྲི་མེད་པར་ཡང་མ་ཡིན་ནོ་ཞེས་བྱ་བར་བསྟན་པའི་ཕྱིར། ཕྱག་ན་དྲིའི་སྣོད་བསྣམས་པའོ། །དེ་ཡང་རོའི་སྣོད་མེད་པར་མ་ཡིན་པས་དེའི་ཕྱིར་ཕྱག་ན་རོའི་སྣོད་བསྣམས་པའོ། །མེ་ཏོག་གི་རྒྱན་མེད་པར་ཡང་དེ་བཞིན་ཏེ་དེ་བས་ན་ཕྱག་ཐལ་མོ་སྦྱར་བས་མེ་ཏོག་བསྣམས་
པའོ། །དེ་ཡང་བདུག་སྤོས་མེད་པར་ཡིད་ཚིམ་པར་མི་འགྱུར་བས་སྤོས་ཁང་འཛིན་པའི་ཕྱག་གིས་སྤོས་ཁང་བསྣམས་པའོ། །དེ་བཞིན་དུ་མུན་ནག་ཏུ་ནི་ཕན་ཚུན་མཐོང་བ་མེད་པས་དེའི་ཕྱིར་མར་མེ་བསྣམས་པར་མཛད་པ་ནི་མར་མེའོ། །དེ་ཡང་དྲིའི་བྱུག་པ་མེད་པར་ལུས་བདེ་བར་མི་འགྱུར་
བས་དུང་ཆོས་ཀྱི་ཕྱག་གིས་དྲི་བསྣམས་པའོ། །རྣམ་པར་སྒེག་མ་དང་བྲལ་བས་རབ་ཏུ་དགའ་བས་བདེ་བ་ཆེན་པོ་འབྱུང་བར་མི་འགྱུར་བས། དེའི་ཕྱིར་སྒེག་མ་དང་བཞད་པ་དང་། གླུ་ཆེན་པོ་དང་། གར་རྣམས་བྱེད་པས་རྣམ་པར་སྒེག་པར་གོ་རིམས་ཇི་ལྟ་བ་བཞིན་དུ་མིག་དགའ་བའི་སྡུག་པ་དང་། ལྟ་

59-1-71b

བ་དང་མིག་གི་ཆགས་པ་དང་། དགའ་བ་དང་། མིག་གི་ཆགས་པའི་སྲེད་པ་དང་། མིག་གི་ཆགས་པ་འབྱུང་བའི་སྤྲོ་བའི་སྙེམས་པའི་ངོ་བོ་ཉིད་དུ་སྟོན་ཏེ་འདི་དག་ཀྱང་གཞན་མ་ཡིན་པར་གྱུར་པ་ཉིད་ནི་འཁྱུད་པར་བྱེད་པ་ཡིན་ཞིང་ནམ་ཡང་ཡོངས་སུ་མི་སྤོང་སྟེ། དེ་བས་ན་རྣམ་པ་ཐམས་ཅད་པ་འདི་
རྣམས་ལ་དབང་བརྙེས་པ་ཉིད་བསྟེན་པ་ཉིད་ཀྱིས་རབ་ཏུ་དགའ་བའི་བདེ་བ་ཆེན་པོ་འབྱུང་བར་འགྱུར་བས། འདོད་ཆགས་ཀྱི་མདའ་དང་རེག་པ་དང་། སྡུག་པའི་འཆད་བ་དང་བདག་པོར་གྱུར་པའི་གནས་ཀྱི་བསྟན་པ་ཡིན་ནོ། །དེ་སྐད་དུ་ཡུལ་སྤངས་པས་ཐར་པ་ཐོབ་པར་འདོད་པས་སྐྲག་པ་ཞེས་བྱ་
བའོ། །མདོ་ལས། བྲིན་དཱའི་གནས་ནི་ཉམས་དགའ་བས། །ཝ་ཉིད་གྱུར་ཀྱང་མཆོག་ཡིན་གྱིས། །གཽ་ཏམ་ཡུམ་རྣམས་སྤངས་པ་ཡི། །ཐར་པ་ནམ་ཡང་མི་འཚལ་ལོ། །ཞེས་གསུངས་ཏེ། གཏན་ཚིགས་དེའི་ཕྱིར་རབ་ཏུ་དགའ་བ་རྣམ་པར་དག་པའི་གནས་འདི་ནི་བྱང་ཆུབ་སེམས་དཔའི་
གནས་སོ་ཞེས་བྱ་བ་ནས། རོ་རྣམ་པར་དག་པའི་གནས་འདི་ནི་བྱང་ཆུབ་སེམས་དཔའི་གནས་མོ་ཞེས་རྒྱུ་གསུངས་པ་ཡིན་ནོ། །དེ་བཞིན་དུ་ཆོས་ཐམས་ཅད་ནི་རང་བཞིན་གྱིས་རྣམ་པར་དག་པའོ་ཞེས་བྱ་བ་ནི་གང་གི་ཕྱིར་རབ་ཏུ་དགའ་བ་ནས། རོའི་མཐར་ཐུག་པའི་ཆོས་ཐམས་ཅད་ནི་དོན་དམ་
པར་གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བའོ། །དེ་བས་ན་རབ་ཏུ་དགའ་བ་རྣམ་པར་དག་པའི་གནས་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ་ཞེས་བྱ་བ་ནས། དེ་བཞིན་སུ་ཇི་སྲིད་དུ་རོ་རྣམ་པར་དག་པའི་གནས་འདི་ནི་བྱང་ཆུབ་སེམས་དཔའི་གནས་སོ་ཞེས་བྱ་བའི་བར་གྱིས་
ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པས་ཀྱང་རབ་ཏུ་དགའ་བ་ལ་སོགས་པ་རྣམ་པར་དག་པས་རྣལ་འབྱོར་པ་རྣམས་ཀྱིས་ཁོང་དུ་ཆུད་པར་བྱའི་གཞན་དུ་ནི་མ་ཡིན་ནོ་ཞེས་བསྟན་པར་བྱ་བའི་ཕྱིར་དེ་དག་གསུངས་པ་ཡིན་ནོ། །ཆོས་ཐམས་ཅད་ཅེས་བྱ་བ་ལ་སོགས་པ་ལ། ཆོས་ཀྱང་ཡིན་
ལ་ཐམས་ཅད་ཀྱང་ཡིན་པས་ཆོས་ཐམས་ཅད་དེ། ཇི་སྐད་བཤད་པའི་རབ་ཏུ་དགའ་བའི་རྣམ་པར་དག་པ་ལ་སོགས་པའོ། །དེ་རྣམས་ཀྱི་ངོ་བོ་ཉིད་ཀྱི་རྣམ་པར་དག་པ་ནི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཏེ་དེ་བཞིན་ཉིད་ཅེས་བྱ་བའི་དོན་ཏོ། །དེ་ལྟ་བུའི་ངོ་བོ་ཉིད་ཀྱི་ཆོས་ཐམས་ཅད་རྣམ་པར་

59-1-72a

དག་པའི་རྒྱུར་གྱུར་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པའོ་ཞེས་བྱ་བ་སྟེ། འདིར་ཤེས་རབ་ནི་རབ་ཏུ་དགའ་བ་ལ་སོགས་པ་རྣམ་པར་དག་པའི་ཆོས་ཐམས་ཅད་རབ་ཏུ་རྣམ་པར་འབྱེད་པའི་མཚན་ཉིད་ཅན་ནོ། །དེའི་ཕ་རོལ་ཏུ་ཕྱིན་པ་ནི་སོན་པ་སྟེ། རབ་ཏུ་
དགའ་བ་ལ་སོགས་པའི་རྣམ་པར་དག་པ་ཁོང་དུ་ཆུད་པ་མངོན་སུམ་དུ་བྱས་པའི་ངོ་བོ་ཉིད་དོ། །དེ་ཡང་ཆོས་ཐམས་ཅད་དྲི་མ་དང་བྲལ་བ་ཉིད་ཀྱི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་རང་བཞིན་གྱིས་རྣམ་པར་དག་པ་དང་དབྱེར་མི་ཕྱེད་པའོ་ཞེས་བྱ་བའི་དོན་ཏོ། །ཡོངས་སུ་དག་པའོ་ཞེས་
བྱ་བ་ནི་ཁམས་གསུམ་པ་ལྟ་བུའི་བག་ཆགས་དང་བཅས་པའི་རྣམ་པར་རྟོག་པ་ཐམས་ཅད་དང་བྲལ་བའོ་ཞེས་བྱ་བའི་དོན་ཏོ། །འདིས་ནི་དོན་འདི་སྟོན་པར་འགྱུར་བ་ཡིན་ཏེ། གང་རབ་ཏུ་དགའ་བ་ལ་སོགས་པ་རྣམ་པར་དག་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་ཡིན་
ལ། ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་གང་ཡིན་པ་དེ་ནི་རབ་ཏུ་དགའ་བ་ལ་སོགས་པ་རྣམ་པར་དག་པ་ཡིན་ཏེ། དེ་ལྟར་ཡིན་པའི་གཏན་ཚིགས་དེས་ན་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་སུམ་དུ་བྱས་པས་རབ་ཏུ་དགའ་བ་ལ་སོགས་པའི་རྣམ་པར་དག་པ་ཐོབ་པར་འགྱུར་ཏེ། ཐ་མི་
དད་པའི་ངོ་བོ་ཉིད་ཡིན་པའི་ཕྱིར་རོ། །དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་བཤད་ནས་དེ་ལ་ཉན་པ་དང་སེམས་པ་ལ་སོགས་པ་དང་ལྡན་པ་རྣམས་སྤྲོ་བ་བསྐྱེད་པར་བྱ་བའི་ཕྱིར་ལག་ན་རྡོ་རྗེ་སུ་ལ་ལས་ཞེས་བྱ་བ་ལ་སོགས་པས་དེའི་ཕན་ཡོན་གསུངས་པ་ཡིན་ཏེ། ལག་ན་རྡོ་རྗེ་ཞེས་བྱ་བ་ནི་བོད་པའོ། །སུ་
ལ་ལས་ཞེས་བྱ་བ་ནི་ཐ་མལ་པའི་སྐྱེས་པ་དང་བུད་མེད་ལ་སོགས་པའི་ཚུལ་གསུངས་པ་ཡིན་ནོ། །ཆོས་ཐམས་ཅད་ཇི་སྐད་དུ་བཤད་པའི་རབ་ཏུ་དགའ་བ་ལ་སོགས་པའོ། །དེ་རྣམས་ཀྱི་ངོ་བོ་ཉིད་རྣམ་པར་དག་པའི་སྒོ་ནི་དེའི་གནས་ཀྱི་དཀྱིལ་འཁོར་ལ་སོགས་པའོ། །དེའི་བསྒྲུབ་པ་ནི་གང་གིས་
མངོན་སུམ་དུ་བྱེད་པར་འགྱུར་བ་སྟེ། དེ་ལ་ནི་ཆོས་ཐམས་ཅད་ཀྱི་ངོ་བོ་ཉིད་རྣམ་པར་དག་པའི་སྒོ་བསྒྲུབ་པ་ཞེས་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ནི་རབ་ཏུ་དགའ་བ་རྣམ་པར་དག་པ་ལ་སོགས་པའི་ངོ་བོ་ཉིད་ཇི་སྐད་དུ་བཤད་པའོ། །འདི་ཞེས་བྱ་བ་ནི་བཤད་མ་ཐག་

59-1-72b

པའི་རབ་ཏུ་དགའ་བ་ལ་སོགས་པའི་རྣམ་པར་དག་པའི་ངོ་བོ་ཉིད་གཙོ་བོར་སྨོས་པ་གཟུང་བའི་ཚུལ་གྱིས་བློ་ལ་གཞག་ནས་སྨྲས་པའོ། །ལན་ཅིག་ཐོས་ན་ཡང་ཞེས་བྱ་བ་ནི་དེ་ལྟ་བུའི་ཚུལ་ལན་ཅིག་ཁོ་ནའོ། །ཐོས་པ་ནི་ཐོས་པའི་རང་བཞིན་གྱི་ཤེས་པས་བཟུང་བའོ། །ཡང་ཞེས་བྱ་བའི་སྒྲས་ནི་གང་གིས་ཡང་དང་ཡང་
དུ་ཐོས་པ་ལྟ་སྨོས་ཀྱང་ཅི་དགོས་ཞེས་སྟོན་ཏོ། །དེ་བྱང་ཆུབ་ཀྱི་སྙིང་པོའི་བར་དུ་ཞེས་བྱ་བ་ནི་ཉན་པ་པོ་དེ་ཐོས་པ་ནས་བརྩམས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་པར་མ་གྱུར་ཀྱང་། ཇི་སྐད་དུ་བཤད་པའི་སྒྲིབ་པ་ཐམས་ཅད་ལ་སོགས་པ་ཉེ་བར་
བསགས་པས། སེམས་ཅན་དམྱལ་བ་ལ་སོགས་པར་ནམ་ཡང་སྐྱེ་བར་མི་འགྱུར་རོ་ཞེས་བྱ་བར་སྦྱར་རོ། །སྒྲིབ་པ་ཐམས་ཅད་དེ་ཞེས་བྱ་བ་ནི་བསྟན་པའོ། །ལྷག་མ་རྣམས་ནི་བཤད་པའོ། །དེ་ལ་འདོད་པ་ལ་འདུན་པ་དང་། གནོད་སེམས་དང་། གཉིད་དང་། རྨུགས་པ་དང་། རྒོད་པ་དང་། 
འགྱོད་པ་དང་། ཐེ་ཚོམ་སྟེ། སྒྲིབ་པ་དེ་རྣམས་ཆེན་པོ་འདོད་ཆགས་ལ་སོགས་པས་ཕྱེ་བའི་འདོད་ཆགས་ལ་སོགས་པའི་ཉོན་མོངས་པ་ནི་ཉོན་མོངས་པའི་སྒྲིབ་པའོ། །འཕགས་པའི་ལམ་སྐྱེ་བའི་གེགས་སུ་གྱུར་པ། དམ་པའི་ཆོས་སྤོང་བ་ལ་སོགས་པའི་ལས་ནི་ཆོས་ཀྱི་སྒྲིབ་པའོ། །
མཚམས་མེད་པ་ལྔ་ལ་སོགས་པ་ནི་ལས་ཀྱི་སྒྲིབ་པ་སྟེ། ཇི་སྐད་དུ་བཤད་པའི་སྒྲིབ་པ་དེ་དག་ཉིད་ཀྱི་ཆེ་བ་ནི་ཆེན་པོའོ། །བསགས་པ་ཞེས་བྱ་བ་ནི་སྦྱོར་བ་དང་། དངོས་གཞི་དང་། ཇི་སྐད་དུ་བཤད་པའི་སྒྲིབ་པའི་མཚན་ཉིད་ཅན་གྱི་ལས་རྣམས་བྱས་ནས་མངོན་པར་དགའ་བའོ། །ཀྱང་ཞེས་
བྱ་བའི་སྒྲ་ནི་ཤིན་ཏུ་ཆེ་བ་དང་ཆུང་བ་དང་། འབྲིང་ཙམ་དུ་བསགས་པའི་སྒྲིབ་པས་ཤིན་ཏུ་ཡང་ངན་འགྲོར་འགྲོ་བར་མི་འགྱུར་རོ་ཞེས་སྟོན་ཏོ། །སེམས་ཅན་དམྱལ་བ་ལ་སོགས་པ་ཞེས་བྱ་བས་ནི་མནར་མེད་པ་ལ་སོགས་པ་དམྱལ་བ་ཆེན་པོ་བརྒྱད་དང་། ཉེ་འཁོར་བ་རྣམས་ནི་དམྱལ་བའོ། །
དེ་ལ་སོགས་པ་གང་དག་ཡིན་པ་དེ་དག་ནི་དམྱལ་བ་ལ་སོགས་པའི་ངན་སོང་རྣམས་ཏེ། ཡི་དྭགས་རྣམས་དང་དུད་འགྲོ་རྣམས་སོ། །དེ་ལྟར་ན་དམྱལ་བ་ལ་སོགས་པ་ངན་སོང་དེ་རྣམས་སུ་སྐྱེ་བར་མི་འགྱུར་རོ། །ནམ་ཡང་ཞེས་བྱ་བ་ནི་རྣམ་གྲངས་གང་གིས་ཀྱང་མ་ཡིན་པའོ། །སྡིག་པ་ཡང་

59-1-73a

བྱས་མ་ཐག་ཏུ་སྡུག་བསྔལ་མེད་པར་བྱང་བར་འགྱུར་རོ་ཞེས་བྱ་བ་ནི་གང་སྒྲིབ་པ་ཐམས་ཅད་སྦྱོང་བ་དང་། དངོས་གཞིའི་ལས་ཀྱི་ངོ་བོ་བྱས་མ་ཐག་ཏུ་ཞེས་པ་དེ་རྣམས་བྱས་པ་ཙམ་གྱིས་སྡུག་བསྔལ་མེད་པར་ཞེས་པ་སྡུག་བསྔལ་མེད་ཅིང་རིམས་ལ་སོགས་པའི་གནོད་པ་མ་བྱས་པར་
དེ་རྣམས་ཟད་པར་འགྱུར་ལ། བསགས་པ་རྣམས་ཀྱང་རིམས་ལ་སོགས་པའི་གནོད་པ་མི་བྱེད་དོ་ཞེས་སྟོན་པ་ཡིན་ནོ། །འདི་སྐད་སྟོན་པར་འགྱུར་བ་ཡིན་ཏེ་ཇི་སྐད་དུ་བཤད་པའི་སྒྲིབ་པ་རྣམས་ད་ལྟར་གྱི་ཚེ་འདི་ལ་ཆེན་པོ་ལ་སོགས་པ་བྱས་ཤིང་། མངོན་པར་དགའ་བ་ཡང་ཤེས་རབ་ཀྱི་ཕ་རོལ་ཏུ་ཕྱིན་
པ་ཐོས་ནས་། དེའི་རིམས་ལ་སོགས་པ་གནོད་པ་བསྐྱེད་པ་དེ་རྣམས་ཟད་པར་འགྱུར་ཞིང་། བྱས་མ་ཐག་ཏུ་ཡང་སྡུག་བསྔལ་མེད་པར་འགྱུར་རོ། །སུ་ཞིག་འཛིན་པ་དང་ཞེས་བྱ་བ་ནི་གཞུང་དང་དོན་གྱི་ཚུལ་མི་བརྗེད་པའི་སྦྱོར་བས་སེམས་ལ་ཡང་དག་པར་འཇོག་པའོ། །ཉིན་རེ་ཞིང་ཀློག་པ་དང་
ཞེས་བྱ་བ་ནི་ཡི་དམ་ཡང་དག་པར་བླངས་ནས་ཉིན་རེ་ཞིང་གླེགས་བམ་དུ་བྱས་ནས་ཀློག་པར་བྱེད་པའོ། །ཁ་ཏོན་དུ་བྱེད་པ་དང་ཞེས་བྱ་བ་ལ་སོགས་པ་ནི་ཚིག་ཏུ་བཟུང་ནས་ཡང་དང་ཡང་དུ་སྦྱོར་ཞིང་འདོན་པ་ནི་ཁ་ཏོན་དུ་བྱེད་པའོ། །ཚུལ་བཞིན་ཡིད་ལ་བྱེད་པ་ཞེས་བྱ་བ་ནི་ཐོས་ནས་སེམས་པ་དང་སྒོམ་
པར་བྱེད་པའོ། །འམ་ཞེས་བྱ་བའི་སྒྲ་ནི་ཚུལ་བཞིན་ནམ་ཡིད་ལ་བྱེད་པ་ཞེས་རྣམ་པར་བརྟག་པའོ། །དེ་ཚེ་འདི་ཉིད་ལ་ཞེས་བྱ་བ་ནི་མཐོང་བའི་ཆོས་ལའོ། །ཆོས་ཐམས་ཅད་ཅེས་བྱ་བ་ནི་རབ་ཏུ་དགའ་བ་ལ་སོགས་པའོ། །དེ་རྣམས་ཀྱི་མཉམ་པ་ཉིད་ནི་ཇི་སྐད་དུ་བཤད་པ་ཉིད་དོ། །དེ་ལ་དམིགས་པའི་
སེམས་རྩེ་གཅིག་པ་ནི་རྡོ་རྗེའི་ཏིང་ངེ་འཛིན་ཏོ། །དེ་འཐོབ་པ་ནི་རྙེད་པར་གྱུར་པ་སྟེ། དེ་ཐོབ་པས་ཆོས་ཐམས་ཅད་ལ་དབང་དུ་གྱུར་པ་སྟེ། དེ་ཉིད་ནི་རབ་ཏུ་དགའ་བ་ལ་སོགས་པའི་རྣམ་པར་དག་པ་མངོན་སུམ་དུ་བྱེད་པ་ལ་མངའ་བདག་ཏུ་འགྱུར་བའོ །དེ་ཡང་དངོས་སུ་ན་གཟུང་བ་དང་འཛིན་པར་རྣམ་པར་
རྟོག་པའི་གཞན་གྱི་དབང་དང་བྲལ་བར་འགྱུར་རོ་ཞེས་བྱ་བའི་དོན་ཏོ། །ཆོས་ཐམས་ཅད་ཅེས་བྱ་བ་ལ་སོགས་པ་ལས་ཐོབ་པར་གྱུར་པའི་སྐད་ཅིག་མ་དང་པོ་ལ་སྐྱེས་པ་ནི་དགའ་བའོ། །སྐད་ཅིག་མ་གཉིས་པ་ལ་སྐྱེས་པ་ནི་མགུ་བའོ། །སྐད་ཅིག་མ་གསུམ་པ་ལ་སོགས་པར་སྐྱེས་པ་ནི་མཆོག་ཏུ་

59-1-73b

དགའ་བ་སྟེ་ཐམས་ཅད་ལ་དགའ་བ་དང་མགུ་བ་དང་མཆོག་ཏུ་དགའ་བ་དག་ནི་དགའ་བ་དང་མགུ་བ་དང་མཆོག་ཏུ་དགའ་བ་དག་སྟེ། དེ་རྣམས་མྱོང་བར་འགྱུར་ཞིང་མངོན་སུམ་དུ་བྱེད་པར་འགྱུར་རོ། །རྡོ་རྗེ་གཟུགས་ནས་བརྩམས་ཏེ། རྡོ་རྗེ་སྙེམས་པའི་བར་གྱི་བྱང་ཆུབ་སེམས་དཔའ་བཅུ་དྲུག་
ནི་བྱང་ཆུབ་ཆེན་པོའི་སེམས་དཔའི་ངོ་བོ་ཉིད་ཡིན་པས་བྱང་ཆུབ་སེམས་དཔའ་ཆེན་པོའོ། །དེ་རྣམས་ཀྱི་ཚེ་ནི་རྣལ་འབྱོར་པས་དེའི་རང་བཞིན་མངོན་པར་རྟོགས་ནས། བྱང་ཆུབ་སེམས་དཔའ་ཆེན་པོ་དེ་དག་གི་ཚེ་བཅུ་དྲུག་གིས་ཆོས་ཐམས་ཅད་ཀྱི་མཉམ་པ་ཉིད་རྡོ་རྗེའི་ཏིང་ངེ་འཛིན་ཐོབ་པ་དང་
བཅས་པའི་རྒྱུར་གྱུར་པས་དེ་བཞིན་གཤེགས་པ་ཉིད་ཐོབ་པར་འགྱུར་ཏེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དུས་གསུམ་དུ་གཤེགས་པའི་བཅོམ་ལྡན་འདས་རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་།
དོན་ཡོད་གྲུབ་པ་ལ་སོགས་པ་ནི་དེ་བཞིན་གཤེགས་པ་ཡིན་ལ། དེ་རྣམས་སུ་འགྱུར་བ་ནི་དེ་བཞིན་གཤེགས་པ་ཉིད་དེ། དེ་ནི་ཇི་སྐད་དུ་བཤད་པའི་ཏིང་ངེ་འཛིན་ཐོབ་པའི་རྐྱེན་གྱིས་ཐོབ་པར་འགྱུར་རོ། །རྡོ་རྗེ་འཛིན་པ་ཉིད་ཅེས་བྱ་བ་ལ་རྡོ་རྗེ་ནི་དེ་བཞིན་ཉིད་དོ། །དེ་འཛིན་པར་མཛད་པས་ན་རྡོ་རྗེ་འཛིན་པ་
སྟེ། གཉིས་སུ་མེད་པའི་ངོ་བོ་ཉིད་རྡོ་རྗེ་སེམས་དཔའོ། །དེའི་རྒྱུ་མཐུན་པ་ལས་བྱུང་བ་ཕྱག་རྒྱ་ཆེན་པོའི་གཟུགས་ཀྱང་རྡོ་རྗེ་འཛིན་པ་ཞེས་བྱའོ། །དེར་གྱུར་པ་ནི་རྡོ་རྗེ་འཛིན་པ་ཉིད་དེ། དེ་ཐོབ་པར་འགྱུར་བའོ། །དེ་ལ་འདི་སྐད་བདག་གིས་ཐོས་པ་དུས་གཅིག་ན་ཞེས་བྱ་བ་ནས་རྡོ་རྗེ་འཛིན་པ་ཆེན་པོ་
ཉིད་ཅེས་བྱ་བའི་བར་གྱི་བཤད་པས་ནི་ཐབས་ཀྱི་ཕྱོགས་གཅིག་དང་། དང་པོའི་སྦྱོར་བའི་ཏིང་ངེ་འཛིན་ཡང་བཤད་པ་ཡིན་པར་ཤེས་པར་བྱའོ། །དེ་ནས་བཅོམ་ལྡན་འདས་ཀྱིས་རང་གི་དཀྱིལ་འཁོར་གྱི་དེ་ཁོ་ན་ཉིད་སྨྲས་སོ་ཞེས་བྱ་བར་སྦྱར་ཏེ། དེ་ནས་ཞེས་བྱ་བའི་སྒྲ་ནི་འདས་མ་ཐག་པའི་སྒྲའི་དོན་
སྟོན་པ་སྟེ། དང་པོ་སྦྱོར་བའི་རྗེས་ཐོགས་ཉིད་ལ་ཞེས་བྱ་བའི་དོན་ཏོ། །བཅོམ་ལྡན་འདས་ཞེས་བྱ་བ་ནི་བཤད་ཟིན་ཏོ། །དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་ནི་བྱང་ཆུབ་སེམས་དཔའི་ལམ་འབྲས་བུ་དང་བཅས་པའོ། །དེ་མངོན་པར་རྟོགས་པ་ནི་ཁོང་དུ་ཆུད་པའི་རྟོགས་པ་གང་ལ་

59-1-74a

ཡོད་པ་དེ་ལ་དེ་སྐད་ཅེས་བྱ་སྟེ་རྡོ་རྗེ་སེམས་དཔའོ། །དེ་ཉིད་ནི་དཀྱིལ་འཁོར་ཐམས་ཅད་པ་སྟེ། འཇིག་རྟེན་པ་དང་འཇིན་རྟེན་ལས་འདས་པའི་དཀྱིལ་འཁོར་ཐམས་ཅད་གང་ཡིན་པ་དེ་ནི་དཀྱིལ་འཁོར་རོ། །འདིས་ནི་བཅོམ་ལྡན་འདས་རྡོ་རྗེ་སེམས་དཔའ་དམ་ཚིག་
ཆེན་པོའི་དེ་ཁོ་ན་ཉིད་རྡོ་རྗེ་དང་པོའི་བྱིན་གྱིས་རློབ་པ་ཞེས་བྱ་བའི་བར་དུ་དགའ་བའི་རྡོ་རྗེའི་དཀྱིལ་འཁོར་གྱི་ངོ་བོ་ཉིད་དུ་བཤད་པ་ཡིན་ནོ། །རྡོ་རྗེ་ནི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའོ། །དབྱིངས་ནི་རྒྱུ་སྟེ་སྐྱེད་པར་བྱེད་པའི་རྒྱུ་གང་ཡིན་པའོ། །མཐའ་དག་ནི་
མ་ལུས་པ་སྟེ། དེ་གང་ཡིན་པ་དེ་ནི་རྡོ་རྗེ་དབྱིངས་མཐའ་དག་ཅེས་བྱ་སྟེ། རྣམ་པར་སྣང་མཛད་ཀྱི་དཀྱིལ་འཁོར་རོ། །དེ་དག་གི་སེམས་དཔའི་མཆོག་ནི་གཙོ་བོའི་དམ་པ་སྟེ་རྣམ་པར་སྣང་མཛད་དོ། །འདིས་ཀྱང་བཅོམ་ལྡན་འདས་རྡོ་རྗེ་སེམས་དཔའ་རྣམ་པར་སྣང་མཛད་ཀྱི་དཀྱིལ་འཁོར་གྱི་
ངོ་བོ་ཉིད་ཡིན་པར་བཤད་དོ། །ཁམས་གསུམ་མཐའ་དག་ན་ཞེས་བྱ་བ་ནི་ཕྱོགས་བཅུའི་འཇིག་རྟེན་གྱི་ཁམས་གསུམ་དུ་གང་གནས་པ་སྟེ། དེར་འཇིག་རྟེན་གསུམ་པོ་མ་ལུས་པ་ནི་ས་བླའི་འཇིག་རྟེན་དང་། བར་སྣང་གི་འཇིག་རྟེན་དང་། མཐོ་རིས་པའི་འཇིག་རྟེན་ནོ། །དེར་རྣམ་པར་རྒྱལ་བ་གང་
ཡོད་པ་དེ་ནི་ཁམས་གསུམ་པོ་མཐའ་དག་ན་འཇིག་རྟེན་གསུམ་པོ་མ་ལུས་པ་ལས་རྣམ་པར་རྒྱལ་བ་ཞེས་བྱ་བ་སྟེ་བཅོམ་ལྡན་འདས་རྡོ་རྗེ་ཧཱུྃ་མཛད་དོ། །འདིས་ཀྱང་བཅོམ་ལྡན་འདས་རྡོ་རྗེ་སེམས་དཔའ་རྡོ་རྗེ་རིགས་ཀྱི་ངོ་བོ་ཉིད་དུ་བཤད་དོ། །སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་
ཞེས་བྱ་བ་ནི་བཤད་ཟིན་ཏོ། །དེ་གང་གིས་འདུལ་ཞིང་ལུང་དང་རྟོགས་པ་རབ་ཏུ་བཞག་པ་གང་ཡིན་པ་དེ་ལ་ནི་འདི་སྐད་ཅེས་བྱ་སྟེ། འདིས་ཀྱང་བཅོམ་ལྡན་འདས་རྡོ་རྗེ་སེམས་དཔའ་འགྲོ་བ་འདུལ་བའི་དཀྱིལ་འཁོར་གྱི་ངོ་བོ་ཉིད་དུ་བཤད་པ་ཡིན་ནོ། །དོན་ཐམས་ཅད་ནི་འཇིག་རྟེན་དང་འཇིག་རྟེན་
ལས་འདས་པའི་དོན་སྟོན་ཏོ། །དེ་གྲུབ་པ་གང་ཡིན་པ་དེ་ནི་དོན་ཐམས་ཅད་གྲུབ་པ་སྟེ། འཕགས་པ་ནམ་མཁའི་སྙིང་པོའོ། །འདིས་ཀྱང་བཅོམ་ལྡན་འདས་རྡོ་རྗེ་སེམས་དཔའ་རིན་པོ་ཆེའི་རིགས་ཀྱི་ངོ་བོ་ཉིད་ཡིན་པར་བཤད་དོ། །ལག་ན་རྡོ་རྗེ་ཐམས་ཅད་པ། །ཞེས་བྱ་བ་ལ། ལག་ན་རྡོ་རྗེ་

59-1-74b

ཡང་ཡིན་ལ་ཐམས་ཅད་ཀྱང་ཡིན་པས་ལག་ན་རྡོ་རྗེ་ཐམས་ཅད་དེ་རིགས་ལྷག་མ་རྣམས་ཀྱི་དཀྱིལ་འཁོར་དུ་བཞུགས་པའོ། །འདིས་ཀྱང་བསྡུས་པའི་དཀྱིལ་འཁོར་ལ་སོགས་པའི་ལྷག་མ་རྣམས་ཀྱི་ངོ་བོ་ཉིད་ཡིན་པར་བཤད་པ་ཡིན་ནོ། །དུ་མ་ནི་གཅིག་མ་ཡིན་པ་སྟེ། རྡོ་རྗེ་གཙུག་ཏོར་དང་། རྡོ་རྗེ་
མཛོད་སྤུ་དང་། རིག་པ་མཆོག་ལ་སོགས་པའོ། །དེ་ཉིད་ནི་རྡོ་རྗེ་རིགས་ཀྱི་ངོ་བོ་ཉིད་ཀྱི་རྡོ་རྗེ་གསང་བའི་སེམས་ཅན་ཆེན་པོས་གཡོག་བྱས་པ་གང་ཡིན་པ་དེ་ལ་དེ་སྐད་ཅེས་བྱ་སྟེ། རྡོ་རྗེ་འཆང་ཆེན་པོའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་དོན་འདི་ནི་ཞེས་བྱ་བ་ནི་རབ་ཏུ་དགའ་བ་རྣམ་པར་
དག་པ་ལ་སོགས་པའི་གནས་བཅུ་བདུན་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལོ། །དེའི་དོན་ནི་རྟེན་དང་བརྟེན་པའི་ངོ་བོ་རྡོ་རྗེ་སེམས་དཔའི་དཀྱིལ་འཁོར་རོ། །སྟོན་ཏེ་ཞེས་བྱ་བ་ནི་སྤྲུལ་ནས་རབ་ཏུ་བསྟན་པའོ། །བཞིན་རབ་ཏུ་འཛུམ་ཞིང་ཞེས་བྱ་བ་ནི་གོ་བར་ཟད་དོ། །ལག་པ་གཡོན་པ་རྡོ་རྗེ་
བསྒྱིངས་ཏེ་ཞེས་བྱ་བ་ལ་དྲིལ་བུ་དང་བཅས་པའི་གཡོན་པའི་རྡོ་རྗེ་ཁུ་ཚུར་ནི་ལག་པ་གཡོན་པའི་རྡོ་རྗེའོ། །དེ་ཁ་ནང་དུ་བསྟན་ནས་གཡོན་པའི་རྐེད་པའི་ཕྱོགས་སུ་བཀན་ཏེ་འཇོག་པ་ནི་ལག་པ་གཡོན་པ་རྡོ་རྗེ་བསྒྱིངས་པའོ། །དེ་ཐོག་མའི་རྡོ་རྗེ་ཆེན་པོ་ཞེས་བྱ་བ་ནི་གང་དུམ་བུ་གཉིས་པའི་རྩ་བའི་རྒྱུད་ལས་བྱུང་
བའོ། །གསོར་བས་ནི་ཕྱག་གཡས་པས་ཇི་སྐད་དུ་བཤད་པའི་རྡོ་རྗེ་ཉེ་བར་འཕེན་པ་སྟེ། གསོར་བར་གྱུར་ཅིང་གཡོན་པའི་རྡོ་རྗེ་བསྒྱིངས་པས་གནས་པའོ། །རང་གི་སྙིང་གར་བསྟོད་པའི་ཚུལ་གྱིས་འཛིན་ཅིང་ཞེས་བྱ་བ་ནི་རང་གི་སྙིང་གའི་ཕྱོགས་སུ་བ་དན་གྱི་གུང་མོའི་སོར་མོ་ལ་རྡོ་རྗེ་རྩེ་མོ་གྱེན་དུ་བསྟོད་པར་
བཞག་པའི་ཚུལ་གྱིས་འཛིན་པའོ། །བདེ་བ་ཆེན་པོ་ཡང་ཡིན་ལ་རྡོ་རྗེ་ཡང་ཡིན་པས་ན་བདེ་བ་ཆེན་པོ་རྡོ་རྗེའོ། །དེ་ཉིད་དོན་ཡོད་པ་སྟེ། དངོས་གྲུབ་ཐམས་ཅད་མི་ཟད་པར་སྩོལ་བར་བྱེད་པ། སླུ་བ་མེད་པ་རྡོ་རྗེ་སེམས་དཔའི་དཀྱིལ་འཁོར་ཞེས་བྱ་བའི་དོན་ཏོ། །དེའི་དམ་ཚིག་ནི་རྫོགས་པར་བྱེད་པའི་
རྒྱུ་སྟེ། དེ་སྐད་ཅེས་བྱ་བ་དེ་ཉིད་ཀྱི་མིང་གང་ལ་ཡོད་པ་དེ་ནི་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་ཅེས་བྱ་སྟེ། བཅོམ་ལྡན་འདས་རྡོ་རྗེ་སེམས་དཔའི་དཀྱིལ་འཁོར་སྐྱེད་པར་བྱེད་པའི་རྒྱུའི་རང་གི་སྙིང་པོའོ། །འདི་ཞེས་བྱ་བ་ནི་བློ་ལ་བཞག་པའོ། །སྨྲས་སོ་ཞེས་བྱ་བ་ནི་གསུངས་པའོ། །དེ་ཡང་ཧཱུྃ་ཞེས་

59-1-75a

བྱ་བ་སྟེ། རང་གི་ཡང་ཡིན་ལ། དེ་ཁོ་ན་ཉིད་ཀྱང་ཡིན་པས་ན་རང་གི་དེ་ཁོ་ན་ཉིད་དེ། བཅོམ་ལྡན་འདས་རྡོ་རྗེ་སེམས་དཔའི་ཇི་སྐད་བཤད་པའི་དེ་ཁོ་ན་ཉིད་བཅུའོ། །དེ་རྣམས་ཀྱི་སྙིང་པོ་དེར་ནི་ངེས་པའི་ཡེ་ཤེས་སོ། །དེ་སྟོན་པར་བྱེད་པའི་སྒྲ་ལ་ཡང་ཉེ་བར་གདགས་པས་དེ་སྐད་ཅེས་
བྱའོ། །དེ་ནས་འདི་གསུངས་པ་ཙམ་གྱིས་ཞེས་བྱ་བ་ནི་གོ་བར་ཟད་དོ། །དེ་བཞིན་གཤེགས་པ་ཐམས་ཅད་དང་། རྡོ་རྗེ་འཛིན་པ་དང་བཅས་པ་ཞེས་བྱ་བ་ནི་གོ་བར་ཟད་དོ། །འཇིག་རྟེན་གྱི་ཁམས་ཐམས་ཅད་ནི་སྟོང་གསུམ་གྱི་སྟོང་ཆེན་པོ་ན་སངས་རྒྱས་དང་བཅས་པའི་སངས་རྒྱས་ཀྱི་ཞིང་ངོ་། །ཁམས་
གསུམ་ཐམས་ཅད་ནི་འདོད་པ་དང་གཟུགས་དང་གཟུགས་མེད་པའི་མཚན་ཉིད་ཅན་གྱི་ཁམས་གསུམ་ཐམས་ཅད་དོ། །དེ་ལྟར་ན་འཇིག་རྟེན་གྱི་ཁམས་དེ་དག་ཐམས་ཅད་ནས་དེ་བཞིན་གཤེགས་པ་ཐམས་ཅད་བཀུག་ནས། ཇི་སྲིད་དུ་འགྲུབ་ཀྱི་བར་དུ་ཞེས་བྱ་བར་སྦྱར་རོ། །རྗེས་སུ་མཉེས་པ་བརྟན་
པོས་མཉེས་པར་བྱས་ནས་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་འགུགས་པར་རྣམ་པར་སེམས་རྩེ་གཅིག་ཏུ་བྱས་པ་ན་རྗེས་སུ་མཉེས་པར་བྱ་བ་བརྟན་པོ་སྟེ། དེ་སྐད་དུ། འདོད་ཆགས་དམ་ཚིག་ཡིན་པར་བཤད། །ཆོས་ཀྱི་འདོད་པ་ཡིད་དུ་འོང་། །དེ་ཡི་རྗེས་ཆགས་སྒྲུབ་སྦྱོར་བས། །རྗེས་
སུ་ཆགས་པ་ཞེས་བཤད་དོ། །ཞེས་གསུངས་པའི་ཕྱིར་རོ། །དེས་མཉེས་པར་བྱས་པ་ནི་དགྱེས་པར་བྱས་པའོ། །བཀུག་པ་ནི་དྲངས་པའོ། །བཅོམ་ལྡན་འདས་རྣམ་པར་སྣང་མཛད་ཆེན་པོའི་དཀྱིལ་འཁོར་ཆེན་པོར་བཅུག་སྟེ་ཞེས་བྱ་བ་ནི་གང་བཅོམ་ལྡན་འདས་རྡོ་རྗེ་སེམས་དཔའ་རྣམ་པར་སྣང་མཛད་
བསྐུལ་བའི་ཕྱིར་རོ། །དཀྱིལ་འཁོར་སྤྲུལ་པར་མཛད་པ་དེ་ནི་འདིར་རྣམ་པར་སྣང་མཛད་ཀྱི་དཀྱིལ་འཁོར་ཏེ་དཀྱིལ་འཁོར་ཆེན་པོ་དེར་རྡོ་རྗེ་སེམས་དཔའ་ལ་སོགས་པའི་གཟུགས་ཀྱིས་རྡོ་རྗེ་སེམས་དཔའ་ལ་སོགས་པའི་གནས་སུ་བཞུགས་པའོ། །དམ་ཚིག་གིས་བཅིངས་ནས་ཞེས་བྱ་བ་ནི་རྡོ་རྗེ་
སེམས་དཔའ་ལ་སོགས་པའི་ཕྱག་རྒྱ་ཆེན་པོའི་གཟུགས་ཀྱི་རབ་ཏུ་དགའ་བ་རྣམ་པར་དག་པ་ལ་སོགས་པ་གྲུབ་པར་བྱ་བའི་ཕྱིར་རབ་ཏུ་བཞག་པའོ། །དེ་སྐད་དུ་ཕྱག་རྒྱ་ལ་སོགས་པ་དམ་ཚིག་བཤད་ཅེས་གསུངས་པའི་ཕྱིར་རོ། །དབང་དུ་བྱས་ཏེ་ཞེས་བྱ་བ་ནི་སེམས་ཅན་ཐམས་ཅད་རྣམ་པར་

59-1-75b

སྦྱང་བར་བྱ་བའི་ཕྱིར་བྱ་བ་གྲུབ་པའི་ཡེ་ཤེས་ཀྱིས་རང་དབང་དུ་བྱས་པའོ། །དངོས་གྲུབ་ཐམས་ཅད་གྲུབ་བོ་ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་རོའི་བར་གྱི་དངོས་གྲུབ་ཐམས་ཅད་ཀྱི་རྒྱུད་རྫོགས་པ་ནི་དངོས་གྲུབ་ཐམས་ཅད་ལ་གྲུབ་པའོ། །དེ་ནས་ཞེས་བྱ་བའི་སྒྲ་ནི་
སྔ་མ་བཞིན་ནོ། །བཅོམ་ལྡན་འདས་ཞེས་བྱ་བ་ནི་གོ་སླའོ། །བག་ཆགས་དང་བཅས་པའི་ཉོན་མོངས་པ་དང་བྲལ་བའི་གཉིས་སུ་མེད་པའི་སེམས་དང་སེམས་ལས་བྱུང་བ་བདེ་བ་ཆེན་པོ་སྟེ། མི་འགྱུར་བདེ་བའི་དངོས་གྲུབ་ཀུན། །བདེ་བ་ཆེན་པོ་ཞེས་བཤད་དོ། །ཞེས་གསུངས་པའི་ཐར་པ་ལ་
ནི། བདེ་བ་ཆེན་པོའི་སྒྲར་རྒྱུད་ཕྱི་མ་ལས་གསུངས་ཏེ། དེའི་ཕྱིར་རྡོ་རྗེ་སྙེམས་པའི་ཕྱག་རྒྱ་སྟེ། དེ་ནི་དེ་ལས་བྱུང་བས་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་སྟེ། དེ་བཅིངས་ནས་དེ་བཞིན་གཤེགས་པ་ཐམས་ཅད་ཀྱི་གསང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
པས་རྣམ་པར་སྣང་མཛད་བཞུགས་པ་སྟེ། དེ་བཞིན་གཤེགས་པ་ཐམས་ཅད་ཀྱི་གསང་བ་ནི་རྡོ་རྗེ་སེམས་དཔའི་དཀྱིལ་འཁོར་རོ། །དེ་ལ་དམིགས་པ་ནི་རྡོ་རྗེ་ལྟར་མི་ཕྱེད་པའི་ཐུགས་རྩེ་གཅིག་པ་ནི་དེ་བཞིན་གཤེགས་པ་ཐམས་ཅད་ཀྱི་གསང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏེ། དེ་ལ་སྙོམས་
པར་ཞུགས་པ་ནི་རྡོ་རྗེ་སེམས་དཔའི་དཀྱིལ་འཁོར་གྱི་རྣམ་པར་ཐུགས་རྩེ་གཅིག་ཏུ་མཛད་ནས་བཞུགས་སོ་ཞེས་སྟོན་པར་འགྱུར་བ་ཡིན་ནོ། །དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། ཏིང་ངེ་འཛིན་ལ་སྙོམས་པར་ཞུགས་ནས་བཞུགས་སོ་ཞེས་བྱ་བའི་བར་གྱི་བཤད་པས་དཀྱིལ་
འཁོར་གྱི་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་དང་། དེ་བཞིན་དུ་ཕྱག་རྒྱའི་ཡེ་ཤེས་ཀྱི་ཕྱོགས་གཅིག་ཀྱང་གསུངས་པ་ཡིན་ནོ། །དེ་ནས་འདུས་པ་མཛད་པ་ལ་སོགས་པ་ནི་ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །དེ་ལྟར་ཐབས་ཀྱི་ངོ་བོ་ཉིད་
ཏིང་ངེ་འཛིན་གསུམ་པ་བཤད་ནས། ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་ཐབས་དེ་ལ་འཇུག་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་རྣམས་ཀྱིས་སློབ་དཔོན་གྱི་ལས་རྣམས་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་

59-1-76a

ཡིན་ནོ། །དེ་ནས་ཞེས་བྱ་བའི་སྒྲ་ནི་འདས་མ་ཐག་པའི་ཚིག་སྟེ། དམ་ཚིག་གསུམ་གྱི་རྗེས་ཐོགས་ཉིད་ལ་ཞེས་བྱ་བའི་དོན་ཏོ། །རྡོ་རྗེ་གསང་བ་ཡང་ཡིན་ལ་ཆེན་པོ་ཡང་ཡིན་པས་ན་རྡོ་རྗེ་གསང་བ་ཆེན་པོ་སྟེ། རྡོ་རྗེ་སེམས་དཔའི་དཀྱིལ་འཁོར་རོ། །དེ་ཡང་གང་བཅོམ་ལྡན་འདས་རྡོ་རྗེ་
སེམས་དཔས་རྣམ་པར་སྣང་མཛད་བསྐུལ་བའི་རྗེས་ཐོགས་ཉིད་ལ་སྤྲུལ་པར་མཛད་པ་སྟེ། དེ་ཉིད་དམ་ཚིག་གོ། །དེའི་འབྱུང་བ་ནི་དཀྱིལ་འཁོར་བྱིན་གྱིས་རློབ་པའི་ཡེ་ཤེས་གང་དང་དཀྱིལ་འཁོར་སྟེན་པར་བྱེད་པའི་ཡེ་ཤེས་གང་གིས་འབྱུང་བར་འགྱུར་བ་དེ་ལ་དེ་སྐད་ཅེས་བྱའོ། །ཡེ་ཤེས་དེ་ཉིད་ཀྱི་
ཕྱག་རྒྱ་གང་ཡིན་པའམ། ཏིང་ངེ་འཛིན་གང་ཡིན་པ་དེ་ལ་དེ་སྐད་ཅེས་བྱ་སྟེ། དེ་ལ་སྙོམས་པར་ཞུགས་པ་ནི་མངོན་སུམ་དུ་མཛད་པ་སྟེ། རྡོ་རྗེ་སེམས་དཔའི་དཀྱིལ་འཁོར་བསྐྱེད་པའི་རྣམ་པ་ལ་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །དམ་ཚིག་ཆེན་པོའི་དེ་ཁོ་ན་ཉིད་ཅེས་བྱ་བ་ལ་སོགས་པ་ལ་
དམ་ཚིག་ཀྱང་ཡིན་ལ་ཆེན་པོ་ཡང་ཡིན་པས་ན་དམ་ཚིག་ཆེན་པོ་སྟེ། མི་བསྐྱོད་པའི་སེམས་དང་སེམས་ལས་བྱུང་བའི་ངོ་བོ་ཉིད་ཐོག་མ་དང་ཐ་མ་མེད་པ་ཆོས་ཀྱི་དབྱིངས་ཏེ་ཐམས་ཅད་དུ་འགྲོ་བ་ཡིན་པའི་ཕྱིར་རོ། །དེ་སྐད་དུ། དམ་ཚིག་ཆེན་པོ་ཉིད་གཅིག་པུ། །འདི་ནི་དམ་ཚིག་ཆེན་པོར་བཤད། །ཅེས་
གསུངས་པ་དང་། ཐོག་མཐའ་མེད་པའི་སེམས་དཔའ་ནི། །ཞེས་བྱ་བ་ལ་སོགས་པར་བཅོམ་ལྡན་འདས་ཀྱིས་བཀའ་སྩལ་པའོ། །དེའི་དེ་ཁོ་ན་ཉིད་ནི་རབ་ཏུ་དགའ་བའི་དེ་ཁོ་ན་ཉིད་དང་ཀུན་དུ་བཟང་པོ་ཉིད་དོ། །དེ་སྐད་དུ་དམ་ཚིག་ཆེན་པོའི་དེ་ཁོ་ན་ཉིད་ཅི་ཞིག་ཡིན་ཞེ་ན། འདི་ལྟ་སྟེ། རབ་ཏུ་དགའ་བ་དང་། ཀུན་
དུ་བཟང་པོའོ་ཞེས་གསུངས་པའི་ཕྱིར་རོ། །དེ་ཉིད་ནི་རྡོ་རྗེའོ། །དེ་ལྟར་ན་དམ་ཚིག་ཆེན་པོའི་དེ་ཁོ་ན་ཉིད་རྡོ་རྗེ་ཞེས་བྱ་བའི་སྒྲ་འདིས་ནི་བཅོམ་ལྡན་འདས་རྡོ་རྗེ་སེམས་དཔའ་བཤད་པར་གྱུར་པ་ཡིན་ནོ། །དེའི་བྱིན་གྱིས་རློབ་པ་ནི་གཞལ་ཡས་ཁང་སྟེ། དཀྱིལ་འཁོར་ཞེས་བྱ་བའི་དོན་ཏོ། །དེ་ལྟར་ན་དེ་སྐད་ཅེས་
བྱ་བའི་དཀྱིལ་འཁོར་ཆེན་པོ་གང་ཡིན་པ་དེ་ལ་དེ་སྐད་ཅེས་བྱའོ། །འདི་སྐད་ཅེས་བྱ་བ་ནི་བློ་ལ་བཞག་པ་འདས་མ་ཐག་ཉིད་དུ་བཤད་པར་བྱ་བ་བསྟན་པ་ཉིད་དོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། སྔར་བསྙེན་པ་བྱས་པའི་རྗེས་ཐོགས་ཉིད་ལ་ཞེས་བྱ་བའི་དོན་ཏོ། །དེའི་ཕྱིར་ཞེས་བྱ་བ་ནི་རྒྱུ་སྟེ་གང་གི་

59-1-76b

ཕྱིར་དཀྱིལ་འཁོར་དུ་འཇུག་པ་མེད་པར་སྐལ་བ་མེད་པ་རྣམས་ལ་སངས་རྒྱས་དང་བྱང་ཆུབ་སེམས་དཔའ་རྣམས་བསྟན་པར་མི་བྱའོ། །དེར་ཞུགས་ན་གྲུབ་པར་འགྱུར་ཏེ། དེ་བས་ན་དེ་རྣམས་ཀྱི་བག་ཆགས་བསྐྲུན་པར་བྱ་བའི་ཕྱིར། ཡང་དག་པར་རབ་ཏུ་རྣམ་པར་ཕྱེ་སྟེ་བཤད་པར་བྱའོ། །ཅི་ཞིག་ཅེ་ན།
དཀྱིལ་འཁོར་དམ་པ་སྟེ་ཞེས་གསུངས་སོ། །མིང་ཇི་སྐད་དུ་བཏགས་ཤེ་ན། དེ་ཉིད་དང་པོ་དམ་ཚིག་ཆེ་ཞེས་བྱ་བ་ལ་སོགས་པ་གསུངས་པ་སྟེ། དམ་ཚིག་ཆེན་པོ་དེ་ཁོ་ན་ཉིད་ནི་བཤད་ཟིན་ཏོ། །དང་པོའི་རྡོ་རྗེ་ནི་རྡོ་རྗེ་སེམས་དཔའོ། །དེའི་བྱིན་གྱི་རླབས་ནི་དཀྱིལ་འཁོར་ཏེ། གང་བཅོམ་ལྡན་འདས་
རྡོ་རྗེ་སེམས་དཔའ་སྤྲུལ་པར་མཛད་པ་དེ་ལ་མིང་དེ་སྐད་ཅེས་མཚུངས་པར་བརྗོད་ཅིང་མིང་འདོགས་པ་གང་ཡིན་པ་དེ་ནི། དམ་ཚིག་ཆེན་པོ་དེ་ཁོ་ན་ཉིད་བྱིན་གྱིས་རློབ་པ་ཞེས་བྱ་བའི་དཀྱིལ་འཁོར་ཆེན་པོའི་ཁ་དོག་དང་། དབྱིབས་ཀྱི་བདག་ཉིད་ཅན་དག་ཀྱང་གང་སྤྲུལ་པ་དང་འདྲ་བར་བྲིས་པ་ཡིན་པས་
དེ་ལ་ཡང་མིང་འདི་སྐད་ཅེས་བྱའོ། །གྲུ་བཞིར་བགྱི་ཞིང་ཞེས་བྱ་བ་ལ་སོགས་པ་ནི་ཁ་དོག་དབྱིབས་ཀྱི་བདག་ཉིད་ཅན་གྱི་གཟུགས་ཅན་དཀྱིལ་འཁོར་དུ་གསུངས་པ་ཡིན་ཏེ། ཕྱོགས་བཞིའི་རི་མོ་དང་ལྡན་པ་ནི་གྲུ་བཞིའོ། །དེ་ཡང་གང་གི་ཕྱིར་ངོས་ཀྱི་རི་མོ་ལ་བྱའོ། །དབུས་ཀྱི་རི་མོའི་ཕྱོགས་བཞིར་ཆ་
བརྒྱད་པའི་སྒོ་བཞི་དང་ལྡན་པ་ནི་སྒོ་བཞི་དང་ཞེས་བྱའོ། །སྒོ་དེའི་ཕྱེད་ཀྱི་ཚད་ཀྱི་ཁྱམས་ཀྱིས་སྐོར་ཕྱོགས་སུ་ཕྱི་རོལ་ཀུན་ནས་བསྐོར་ལ་རྟ་བབས་དང་བཅས་པར་བྱ་བ་ནི། ཁྱམས་རྣམས་ཀྱིས་ཡོངས་སུ་བསྐོར་བ་ཞེས་བྱའོ། །སྒོ་རྣམས་སུ་ནི་སྒོའི་སུམ་འགྱུར་གྱི་ཚད་ཀྱི་རྟ་བབས་བཞི་དང་ལྡན་པར་
བྱ་བ་ནི། རྟ་བབས་བཞི་དང་ཡང་དག་ལྡན། །ཞེས་བྱའོ། །འོད་ཟེར་དེ་ཉིད་འབར་བ་ཡིན་པས་ན་འོད་ཟེར་འབར་བ་སྟེ། དེ་ཉིད་ཀྱིས་འཁྲིགས་པའི་འོད་གང་ཡིན་པ་དེ་ནི་འོད་ཟེར་འབར་བས་འཁྲིགས་པའི་འོད་ཅེས་བྱའོ། །མཚམས་སུ་རི་མོ་གཉིས་འདུས་པ་ནི། དཀྱིལ་འཁོར་ཐམས་ཅད་ཀྱི་གྲྭ་ཞེས་བྱ་
སྟེ། དེ་རྣམས་དང་སྒོ་ཁྱུད་ཀྱི་མཚམས་རྣམས་སུ་ཞེས་བྱ་བ་ལ་སྒོ་རྣམས་ཀྱི་སྒོ་ཁྱུད་ནི་སྒོ་ཁྱུད་དེ་མཛེས་པ་དང་རྗེས་སུ་མཛེས་པ་ཞེས་བྱ་བ་ཐད་ཀར་བྱུང་བ་སྒོའི་ཕྱེད་ཀྱི་ཚད་དུ་རྩིག་པ་སྟོན་པའི་རི་མོའོ། །དེ་རྣམས་ཀྱི་མཚམས་སུ་ནི་རི་མོ་གཉིས་འདུས་པའོ། །དེ་དག་ཏུ་ཟླ་བ་ཕྱེད་པ་ལ་རབ་ཏུ་གནས་པ་

59-1-77a

ནི། ཟླ་བ་ཕྱེད་པ་ལ་རབ་ཏུ་གནས་ཤིང་འདུག་པ་སྟེ་དེ་ཡང་རྡོ་རྗེ་རྩེ་ལྔ་དང་། རྡོ་རྗེ་རིན་པོ་ཆེ་དང་། རྡོ་རྗེ་པདྨ་དང་། སྣ་ཚོགས་རྡོ་རྗེས་ཉེ་བར་མཛེས་པར་བྱས་ཤིང་བརྒྱན་པ་ནི་རིན་ཆེན་ཀུན་གྱིས་ཉེ་བར་མཛེས་པ་སྟེ། ཐ་མ་ཁ་དོག་ལྔ་པས་མཛེས་པར་བྱ་ཞེས་བྱ་བའི་དོན་ཏོ། །རྩེ་མོ་སྣ་
ཚོགས་པ་ཡང་དེ་ཉིད་ཡིན་ལ། བ་དན་ཡང་དེ་ཉིད་ཡིན་པས་རྩེ་མོ་སྣ་ཚོགས་བ་དན་ནོ། །དྲིལ་བུའི་མཆོག་ནི་དམ་པའོ། །དེ་བརྟགས་པ་ནི་རྟོགས་པ་སྟེ་རྩེ་མོ་སྣ་ཚོགས་ལ་བྱའོ། །དེ་ལ་ཤར་ཕྱོགས་ཀྱི་སྒོ་ཁྱུད་ཀྱི་མཚམས་དང་། ཤར་ལྷོའི་མཚམས་སུ་ནི་རྡོ་རྗེ་རྩེ་ལྔ་པས་ཉེ་བར་མཛེས་པར་བྱ་
བའོ། །གཞན་དག་ཏུ་ཡང་གོ་རིམས་ཇི་ལྟ་བ་བཞིན་དུ་རྡོ་རྗེ་རིན་པོ་ཆེ་ལ་སོགས་པས་ཉེ་བར་མཛེས་པར་བྱའོ། །རྩེ་མོར་སྣ་ཚོགས་བ་དན་ནི། །ཞེས་བྱ་བ་ལ་སོགས་པ་ལ་རྩེ་མོའི་ཆ་ཁ་དོག་ལྔ་པ་ནི། རྩེ་མོ་སྣ་ཚོགས་པའི་བ་དན་གང་ཡིན་པ་དེ་ལ་དེ་སྐད་ཅེས་བྱའོ། །དེ་ཡང་དཀྱིལ་འཁོར་དུ་རླུང་གིས་
བསྐྱོད་ཅིང་གཡེངས་པ་དེ་ལ་དེ་སྐད་ཅེས་བྱ་སྟེ། ཁྱད་པར་དུ་བྱ་བའི་རྣམ་པར་དབྱེ་བས་གཞན་པའི་ཚིག་གི་ཕྲད་དོ། །མེ་ཏོག་གི་ཆུན་འཕྱང་ནི་མེ་ཏོག་གི་ཕྲེང་བའོ། །མེ་ལོང་ནི་གོ་བར་ཟད་དེ། དེ་དག་གིས་སྤྲས་པ་ནི་བརྒྱན་པའོ། །ཕྱི་ཡི་དཀྱིལ་འཁོར་བྲི་བར་བྱ། །ཞེས་བྱ་བ་ནི་ཐམས་ཅད་ལ་
ཤེས་པར་བྱའོ། །དེའི་ནང་དུ་ཞེས་བྱ་བ་ལ་སོགས་པ་ལ་བཤད་པའི་དཀྱིལ་འཁོར་དེའི་དབུས་སུ་འཁོར་ལོ་ཞེས་བྱ་བ་ནི་དཀྱིལ་འཁོར་ཏེ། འཁོར་ལོ་དཀྱིལ་འཁོར་རབ་ཏུ་བཤད། །ཅེས་གསུངས་པས་སྒྲ་འདི་ནི་ཟླུམ་པོ་འབའ་ཞིག་སྟོན་པའི་ཚིག་ནི་མ་ཡིན་ནོ། །དཀྱིལ་འཁོར་བརྒྱད་དང་མཉམ་
པ་རུ། །ཞེས་བྱ་བ་ནི། རྣམ་པར་ཐར་པ་བརྒྱད་ནི་དཀྱིལ་འཁོར་བརྒྱད་དེ། དེའི་རྒྱུ་མཐུན་པ་ལས་བྱུང་བ་ཁ་དོག་དང་དབྱིབས་ཀྱི་བདག་ཉིད་ཅན་རྣམ་པར་ཐར་པ་བརྒྱད་སྟོན་པར་བྱེད་པའི་དཀྱིལ་འཁོར་གང་བཅོམ་ལྡན་འདས་ཀྱིས་སྤྲུལ་པར་མཛད་པ་དེ་ཡང་དཀྱིལ་འཁོར་བརྒྱད་ཅེས་བྱ་སྟེ། དེ་དང་
མཉམ་པར་གང་བྲིས་པ་དེ་ནི་དཀྱིལ་འཁོར་བརྒྱད་དང་མཉམ་པ་རུ་ཞེས་བྱའོ། །དེ་ལ་རྣམ་པར་ཐར་པ་བརྒྱད་ནི་གཟུགས་ཅན་གྱི་གཟུགས་རྣམས་ལ་ལྟ་བ་ན་དེ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་རྣམ་པར་ཟིལ་གྱིས་གནོན་པ་འདི་ནི་རྣམ་པར་ཐར་པ་དང་པོའོ། །ནང་གཟུགས་

59-1-77b

སུ་འདུ་ཤེས་པས་ཕྱི་རོལ་གྱི་གཟུགས་རྣམས་ལ་ལྟ་བ་འདི་ནི་རྣམ་པར་ཐར་པ་གཉིས་པའོ། །བསམ་གཏན་གསུམ་པ་སྔ་མ་བཞིན་དུ་མཐོང་བ་འདི་ནི་རྣམ་པར་ཐར་པ་གསུམ་པའོ། །ནམ་མཁའ་མཐའ་ཡས་སྐྱེ་མཆེད་ནི་བཞི་པའོ། །རྣམ་ཤེས་མཐའ་ཡས་སྐྱེ་མཆེད་ནི་ལྔ་པའོ། །ཅི་ཡང་མེད་
པའི་སྐྱེ་མཆེད་ནི་དྲུག་པའོ། །ཡོད་མིན་མེད་མིན་སྐྱེ་མཆེད་ནི་བདུན་པའོ། །འགོག་པའི་སྙོམས་པར་འཇུག་པ་ནི་བརྒྱད་པ་སྟེ། སྔ་མ་བཞིན་དུ་མཐོང་བ་ཞེས་བྱ་བ་ནི་ཐམས་ཅད་ལ་ཤེས་པར་བྱའོ། །རྡོ་རྗེ་ཐིག་གིས་ཐིག་བཏབ་པ། །ཞེས་བྱ་བ་ནི་གང་དཀྱིལ་འཁོར་བརྒྱད་དང་མཉམ་པའི་དཀྱིལ་
འཁོར་གང་ཞིག་བཤད་པའི་དེ་ཉིད་ནི་རྡོ་རྗེ་རྩེ་གསུམ་པའི་ཕྲེང་བས་ཕྱི་རོལ་ནས་ཀུན་དུ་བསྐོར་བའོ། །རྡོ་རྗེ་འཁོར་ལོ་ཞེས་བྱར་བཤད། །ཅེས་བྱ་བ་ནི་མིང་དེ་སྐད་ཅེས་བཤད་དེ་ཞེས་བྱ་བའི་དོན་ཏོ། །དེའི་ཞེས་བྱ་བ་ནི་དབུ་མའི་དཀྱིལ་འཁོར་གྱིའོ། །དབུས་སུ་ཞེས་བྱ་བ་ནི་དབུ་མའི་ཕྱོགས་ཏེ་ལྟེ་བ་ཞེས་
བྱ་བའི་དོན་ཏོ། །ཅི་རིགས་པར་ཞེས་བྱ་བ་ནི་སྔོན་དུ་བསྙེན་པ་ལ་སོགས་པ་སྔར་བྱས་ཏེ་ཇི་ལྟ་བ་བཞིན་དུ་དགོས་པར་བྱའོ་ཞེས་བྱ་བར་སྟོན་པ་ཡིན་ཏེ། དེ་དག་ནི་ཕྱིས་བཤད་པར་བྱའོ། །སངས་རྒྱས་སྐུ་ནི་ཞེས་བྱ་བ་ལ། རྡོ་རྗེ་སེམས་དཔའི་སྐུའི་གཟུགས་བརྙན་ཏེ། སངས་རྒྱས་རྡོ་རྗེ་འཛིན་དུ་
བཤད། །ཅེས་འདི་ཉིད་ཀྱི་འོག་ནས་གསུངས་པ་དང་། རྣམ་པར་སྣང་མཛད་ཀྱི་དཀྱིལ་འཁོར་ནི་དཀྱིལ་འཁོར་གཉིས་པ་ཡིན་པས་དེའི་ཕྱིར་ཡང་སོམ་ཉི་མི་བྱའོ། །འཛུམ་བཅས་ཞེས་བྱ་བ་ལ་ཅུང་ཟད་བཤད་པ་ནི་འཛུམ་པའོ། །དེ་དང་བཅས་པར་བཞུགས་པ་ལ་འཛུམ་བཅས་ཞེས་བྱའོ། །ཟླ་
བའི་མདོག་ཅན་ལ་ཞེས་བྱ་བ་ནི་གོ་བར་ཟད་དོ། །རྡོ་རྗེ་སྙེམས་པ་འཛིན་པའི་མཆོག །ཅེས་བྱ་བ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོ་ནི་རྡོ་རྗེ་སྙེམས་པ་སྟེ། དེ་ཡང་བཤད་ཟིན་ཏོ། །རྡོ་རྗེ་འཛིན་པར་མཛད་པས་ན་རྡོ་རྗེ་སྙེམས་པ་འཛིན་པའོ། །མཆོག་ནི་དམ་པའོ། །རྡོ་རྗེ་ཕྲེང་བ་སོགས་ཀྱིས་སྤྲས་ཤིང་
ཞེས་བྱ་བ་ནི་བརྒྱན་པ་སྟེ། དེ་ལ་དང་པོ་དབུ་རྒྱན་དེ་ནས་སྣ་ཚོགས་རྡོ་རྗེའི་ཕྲེང་བ་དེ་ནས་པདྨའི་ཕྲེང་བ་དེ་ནས་རྡོ་རྗེ་རིན་པོ་ཆེའི་ཕྲེང་བ། དེ་ནས་སྤྱི་བོའི་གནས་ནས་བརྩམས་ཏེ། དེ་བཞིན་གཤེགས་པ་ལྔས་བརྒྱན་པར་བྱ་སྟེ། དེ་ལྟར་ན་སྐུ་གཟུགས་དེ་ནི་རྡོ་རྗེ་ཕྲེང་བ་ལ་སོགས་པས་སྤྲས་པར་འགྱུར་རོ། །སྣ་

59-1-78a

ཚོགས་འབར་བ་འཁྲིགས་པའི་འོད། །ཅེས་བྱ་བ་ནི། དམར་པོ་དང་ལྗང་གུ་དང་། སྔོན་པོ་དང་། སེར་པོ་དང་། དཀར་པོའི་མདོག་ཅན་གྱི་རི་མོ་སྣ་ཚོགས་པས་འབར་བ་ནི་སྣ་ཚོགས་འབར་བའོ། །དེ་ཉིད་ནི་འཁྲིགས་པའི་འོད་དེ། དེ་ལྟ་བུའི་འོད་ཀྱི་དཀྱིལ་འཁོར་གང་ལ་ཡོད་པ་དེ་ལ་དེ་
སྐད་ཅེས་བྱའོ། །པདྨའི་གདན་ལ་བཞུགས་པར་ནི། །ཞེས་བྱ་བ་ནི། སྣ་ཚོགས་པདྨའི་སྡོང་བུ་དང་བཅས་པའི་སྟེང་དུ་སེམས་དཔའི་སྐྱིལ་མོ་ཀྲུང་གིས་བཞུགས་པའོ། །ལུགས་མ་ཞེས་བྱ་བ་ནི་གསེར་ལ་སོགས་པའི་རྫས་ལས་སྐུའི་གཟུགས་བརྙན་དུ་བྱས་པའོ། །མངོན་པར་འདུ་བྱས་པའོ་ཞེས་བྱ་
བ་ནི་ལག་གིས་ལས་སུ་བྱས་པའོ། །རང་གི་སྙིང་པོ་ཀུན་བཟླས་ཏེ། །དེ་ཚེ་དཀྱིལ་འཁོར་བལྟ་བར་བྱ། །ཞེས་བྱ་བ་ལ་སོགས་པ་བཅོམ་ལྡན་འདས་ཀྱི་རང་གི་སྙིང་པོ་ནི་ཡི་གེ་ཧཱུྃ་སྟེ། དེ་བཟླས་ལ་དཀྱིལ་འཁོར་ཐིག་གདབ་པ་ལ་སོགས་པ་ཐམས་ཅད་བྱའོ། །རྡོ་རྗེ་སེམས་དཔའ་ལ་སོགས་པ། །ཞེས་
བྱ་བ་ལ། རྡོ་རྗེ་སེམས་དཔའ་ལ་སོགས་པ་ནི་རྡོ་རྗེ་སེམས་དཔའ་དང་། རྡོ་རྗེ་ཡིད་ལས་བྱུང་བ་ལ་སོགས་པ་ཐམས་ཅད་ཧཱུྃ་ཉིད་ཀྱིས་ཡང་དག་པར་དགོད་པར་བྱ་ཞིང་གཞག་པར་བྱའོ། །དེ་ལ་ཇི་ལྟར་དགོད་པར་བྱ་ཞེ་ན། རྡོ་རྗེ་ཤུགས་ཀྱིས་ཞེས་བྱ་བ་ལ་སོགས་པ་གསུངས་ཏེ། དེ་ལ་རྡོ་རྗེ་ཤུགས་ནི་འདི་
ཡིན་ཏེ། བདག་ཉིད་རྡོ་རྗེ་ཤུགས་ཀྱིས་ནི། །རྡོ་རྗེ་རྡོ་རྗེ་ཞེས་སྨྲས་པ། །རྡོ་རྗེ་ཤུགས་ཞེས་བཤད་པ་སྟེ། །ཀུན་དུ་འགྲོ་བ་གྲུབ་པའོ། །ཞེས་བྱ་བ་འདིས་ནང་གི་དཀྱིལ་འཁོར་ལ་སོགས་པ་ལས་བྱུང་སྟེ། རྡོ་རྗེ་ཡིད་ལས་བྱུང་བ་ལ་སོགས་པ་ལ་དཀྱིལ་འཁོར་ཐམས་ཅད་དུ་ཡང་དག་པར་བསྡུས་པ་སྟེ། 
དཀྱིལ་འཁོར་པའི་ཚོགས་གཞག་པར་བྱའོ། །ཡང་ན་བྲི་བར་བྱ་ཞེས་བྱ་བ་ནི་ཚོན་རྩི་རྣམས་ཀྱིས་ལེགས་པར་བྲི་བར་བྱའོ། །གནས་གང་དག་ཏུ་བྲི་བར་བྱ་ཞེ་ན། ཕྱོགས་རྣམས་ཀུན་དུ་སྟོན་པའོ། །ཞེས་བྱ་བ་སྟེ་ཕྱོགས་བཞི་རྣམས་སུ་དཔལ་རྡོ་རྗེ་སེམས་དཔའི་སྟོན་པ་པོ་སྟེ། རྗེས་སུ་སྟོན་པ་ཞེས་བྱ་བའི་
དོན་ཏོ། །ཇི་ལྟར་གང་དུ་དགོད་ཅེས་རྟོག་པ་དག་གི་ཕྱིར། མདུན་དུ་ཞེས་བྱ་བ་ལ་སོགས་པ་གསུངས་ཏེ། བཅོམ་ལྡན་འདས་རྡོ་རྗེ་སེམས་དཔའི་མདུན་གྱི་ངོས་ལ་རྡོ་རྗེ་ཡིད་ལས་བྱུང་བ་ཞེས་བྱ་བའི་རྡོ་རྗེ་སེམས་དཔའ་སངས་རྒྱས་ལྔའི་དབུ་རྒྱན་ཅན་གཡོན་པ་རྡོ་རྗེ་ཁུ་ཚུར་གྱིས་གཞུ་བསྣམས་པ། ཕྱག་

59-1-78b

གཡས་པས་མདའ་གསོར་བར་བརྩོན་པ་སྐུ་མདོག་དམར་སྐྱ་དགོད་པར་བྱའོ། །སངས་རྒྱས་ཀྱི་ནི་ཞེས་བྱ་བ་ལ་སོགས་པ་ལ་དཔལ་རྡོ་རྗེ་སེམས་དཔའི་གཡས་ལོགས་སུ་རྡོ་རྗེ་ཀཱི་ལི་ཀཱི་ལ་སྐུ་ཐམས་ཅད་ལ་ཀུན་ནས་འཁྱུད་པ། ཕྱག་གཉིས་ཀྱིས་རྡོ་རྗེ་ཁུ་ཚུར་བཅིངས་པས་ཐུགས་ཀའི་ཕྱོགས་
སུ་འཁྱུད་པ། སྐུ་མདོག་དེ་ཉིད་དང་འདྲ་བར་དམར་སྐྱ་བྱའོ་ཞེས་བྱ་བའི་དོན་ཏོ། །རྡོ་རྗེ་གཟུགས་ཞེས་བྱ་བ་ནི་རྡོ་རྗེ་རྩེ་ལྔ་པ་སྟེ་དང་པོའི་རྡོ་རྗེའོ། །སྐུ་མདོག་ཇི་ལྟ་བུ་ཞེ་ན། ཉི་མའི་འོད་ཅན་ཞེས་བྱ་བ་གསུངས་ཏེ། ཉི་མ་ནི་ཉི་མའི་དཀྱིལ་འཁོར་ཏེ། དེའི་འོད་ནི་མདངས་ཏེ་འོད་དམར་པོའོ། །དེས་ན་ཉི་མའི་
འོད་ལྟ་བུའི་འོད་ཡོད་པས་ན་དེ་སྐད་ཅེས་བྱའོ། །རྒྱབ་ཏུ་ཞེས་བྱ་བ་ནི་དཔལ་རྡོ་རྗེ་སེམས་དཔའི་རྒྱབ་ཏུ་རྡོ་རྗེ་འདོད་པ་ཕྱག་གཡས་པ་ན་ཆུ་སྲིན་གྱི་རྒྱལ་མཚན་ཐོགས་པ། གཡོན་པ་གདན་ལ་བརྟེན་པ་དང་བཅས་པ་སྐུ་མདོག་སྔོ་སྐྱ་དགོད་པར་བྱའོ། །གཡོན་དུ་ཞེས་པ་ལ་སོགས་པ་ལ་དཔལ་
རྡོ་རྗེ་སེམས་དཔའི་གཡོན་དུ་རྡོ་རྗེ་སྙེམས་པ་རྡོ་རྗེ་ཁུ་ཚུར་གཉིས་ཀྱིས་རྡོ་རྗེ་རྩེ་ལྔ་པ་གཉིས་བསྣམས་ནས་རྐེད་པའི་ཕྱོགས་གཉིས་སུ་སྙེམས་པར་འཛིན་པ། གསེར་བཙོ་མའི་མདོག་འདྲ་བ་དགོད་པའམ་བྲི་བར་བྱའོ། །སངས་རྒྱས་ཀྱི་ནི་ཞེས་བྱ་བ་ལ་སོགས་པ་ལ། དཔལ་རྡོ་རྗེ་སེམས་དཔའི་
དཀྱིལ་འཁོར་སྔ་མ་བཞིན་དུ་ཤར་ལྷོའི་མཚམས་སུ་རྡོ་རྗེ་སྦྲང་རྩི་ཐལ་མོ་ཁོང་སྟོང་ཁ་ཕྱེ་བས་སྤྱི་བོའི་ཕྱོགས་སུ་རྡོ་རྗེ་མེ་ཏོག་གི་ཚོགས་ཐོགས་པ་དང་། ལྷོ་ནུབ་ཀྱི་ཕྱོགས་མཚམས་སུ་རྡོ་རྗེ་སྦྲེང་བའི་སྤྲིན་གྱི་བདུག་པའི་སྤོས་ཁང་ཐོགས་པའོ། །ནུབ་བྱང་མཚམས་སུ་རྡོ་རྗེ་སྟོན་པ་སྔ་མ་བཞིན་དུ་མེ་
མར་གྱི་སྡོང་བུ་འཛིན་པའོ། །བྱང་ཤར་གྱི་མཚམས་སུ་རྡོ་རྗེ་དགུན་དེ་བཞིན་དུ་དྲིའི་དུང་ཆོས་ཐོགས་པར་དགོད་པའམ་བྲི་བར་བྱའོ། །ཕྱིའི་དཀྱིལ་འཁོར་ཞེས་བྱ་བ་ལ་སོགས་པ་ལ་ཕྱིའི་དཀྱིལ་འཁོར་གྱི་ལྷའི་སྣམ་བུ་ལ་མེའི་ཕྱོགས་མཚམས་སུ་རྡོ་རྗེ་སྒེག་མོ་རྡོ་རྗེ་ཁུ་ཚུར་གཉིས་ཀྱིས་རྡོ་རྗེ་གཉིས་
ཐོགས་ནས་རྡོ་རྗེ་སྙེམས་པར་གནས་པའོ། །བདེན་བྲལ་གྱི་ཕྱོགས་སུ་རྡོ་རྗེ་བཞད་པ་དང་། རྡོ་རྗེ་ཁུ་ཚུར་གཉིས་ཀྱིས་སོའི་ཕྲེང་བ་གཉིས་དང་ལྡན་པའི་རྡོ་རྗེ་གཉིས་ཐོགས་ནས་དཔལ་རྡོ་རྗེ་སེམས་དཔའ་ལ་སོགས་པ་འཛུམ་ཞིང་ངོ་མཚར་དུ་གྱུར་པ་ལ་རབ་ཏུ་འཇོག་པའོ། །རླུང་གི་ཕྱོགས་སུ་རྡོ་རྗེ་གླུ་

59-1-79a

ཆེན་པོ་རྡོ་རྗེ་པི་ཝང་བརྡུང་བའོ། །དབང་ལྡན་གྱི་ཕྱོགས་སུ་རྡོ་རྗེ་གར་ལག་པ་གཉིས་ནི་རྡོ་རྗེ་རྩེ་གསུམ་པ་གཉིས་ཐོགས་ཏེ་གར་བྱེད་པའི་ཚུལ་གྱིས་གནས་པར་བྲི་བར་བྱའོ། །སྒོའི་དབུས་སུ་ནི་རྡོ་རྗེ་ཞེས་བྱ་བ་ལ་སོགས་པ་ལ་ཤར་གྱི་སྒོར་རྡོ་རྗེ་གཟུགས། ལྷོར་རྡོ་རྗེ་སྒྲ། ནུབ་
ཏུ་རྡོ་རྗེ་དྲི། བྱང་དུ་རྡོ་རྗེ་རོ་ཀུན་དུ་བྲི་བར་བྱ་སྟེ། འདི་དག་ཀྱང་གོ་རིམས་ཇི་ལྟ་བ་བཞིན་དུ་མེ་ལོང་དང་། པི་ཝང་དང་། དྲིའི་དུང་ཆོས་དང་། རོའི་སྣོད་དང་བཅས་པ་བྲི་བར་བྱའོ། །སངས་རྒྱས་དཀྱིལ་འཁོར་ཅན་བརྒྱད་ནི། །རྡོ་རྗེ་འཛིན་སོགས་བྲི་བར་བྱ། །ཞེས་བྱ་བ་ལ་སོགས་པ་ལ། རྡོ་རྗེ་ཐིག་
གི་ནང་གི་ཤར་ཕྱོགས་ཀྱི་ཆ་ནས་བརྩམས་ཏེ། རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་གནོད་སྦྱིན་གྱི་མཐར་ཐུག་པའི་བར་དུ་གོ་རིམས་བཞིན་དུ་བྲི་བར་བྱའོ་ཞེས་བྱ་བའི་དོན་ཏོ། །རྡོ་རྗེ་འཁོར་ལོ་ཐམས་ཅད་དུ། །སངས་རྒྱས་རྡོ་རྗེ་འཛིན་གྱིས་བསྐོར། །ཞེས་བྱ་བ་ནི་ཕྱོགས་བཞི་པོ་ཐམས་
ཅད་དུ་རྡོ་རྗེ་འཁོར་ལོའི་ནང་དུ་དཀྱིལ་འཁོར་ཐམས་ཅད་དུ་སངས་རྒྱས་ཏེ་མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་གྲུབ་པ་ཞེས་བྱ་བ་དང་། རྡོ་རྗེ་འཛིན་པ་སྟེ། རྡོ་རྗེ་སེམས་དཔའ་ལ་སོགས་པ་བརྒྱད་ཀྱིས་བསྐོར་ཞིང་ཡོངས་སུ་འཁོར་བར་བྱའོ། །འདི་སྐད་
སྟོན་པར་འགྱུར་ཏེ། རྡོ་རྗེ་ཐིག་གི་ནང་དུ་ཤར་ཕྱོགས་སུ་བཅོམ་ལྡན་འདས་མི་བསྐྱོད་པ། དེའི་གཡས་ལོགས་སུ་རྡོ་རྗེ་སེམས་དཔའོ། །གཡོན་དུ་ནི་འཕགས་པ་འཇམ་དཔལ་ལོ། །ལྷོ་ཕྱོགས་སུ་ནི་བཅོམ་ལྡན་འདས་རིན་ཆེན་འབྱུང་ལྡན་ཏེ། དེའི་གཡས་སུ་ནི་ནམ་མཁའི་སྙིང་པོའོ། །གཡོན་
དུ་ནི་ནམ་མཁའི་མཛོད་དོ། །ནུབ་ཕྱོགས་སུ་ནི་འོད་དཔག་ཏུ་མེད་པ་སྟེ། དེའི་གཡས་ལོགས་སུ་ནི་རྡོ་རྗེ་ཆོས་སོ། །གཡོན་དུ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའོ། །བྱང་ཕྱོགས་སུ་ནི་དོན་ཡོད་གྲུབ་པ་སྟེ། དེའི་གཡས་ལོགས་སུ་རྡོ་རྗེ་ཁུ་ཚུར། གཡོན་དུ་རྡོ་རྗེ་གནོད་སྦྱིན་བྲི་བར་
བྱའོ། །དེ་ལྟར་ན། སངས་རྒྱས་དཀྱིལ་འཁོར་ཅན་བརྒྱད་ནི། །རྡོ་རྗེ་འཛིན་སོགས་བྲི་བར་བྱ། །རྡོ་རྗེ་འཁོར་ལོ་ཐམས་ཅད་དུ། །སངས་རྒྱས་རྡོ་རྗེ་འཛིན་གྱིས་བསྐོར། །ཞེས་བྱ་བ་ལེགས་པར་བྲི་བར་གྱུར་པ་ཡིན་ནོ། །ཕྱི་ཡི་དཀྱིལ་འཁོར་གནས་རྣམས་སུ། །འདོད་པའི་དབང་ཕྱུག་བྲི་བྱ་སྟེ། །

59-1-79b

ཞེས་བྱ་བ་ནི་ཕྱིའི་དཀྱིལ་འཁོར་གྱི་ལྷའི་སྣམ་བུ་ལ་འདོད་པའི་དབང་ཕྱུག་ནས་བརྩམས་ཏེ། ཆུ་ལྷའི་མཐར་ཐུག་པའི་བར་དུ་ཆུང་མ་དང་བཅས་པ་ནི་བྲི་བར་བྱའོ་ཞེས་བྱ་བའི་དོན་ཏོ། །མདུན་དུ་འཇིག་རྟེན་གསུམ་རྒྱལ་པོ། །འདོད་པ་ཚངས་པ་ཞི་བྱེད་མཆོག །ཅེས་བྱ་བ་ནི་ཕྱིའི་ལྷའི་སྣམ་བུའི་ཤར་ཕྱོགས་
ནས་མདུན་དུའོ། །འཇིག་རྟེན་གསུམ་གྱི་ནི་རྒྱལ་པོ་སྟེ། འཇིག་རྟེན་བདག་པོར་འདོད་པའི་ལྷའོ། །ཚངས་པ་ཞེས་བྱ་བ་ནི་གྲགས་པར་ཟད་དོ། །ཞི་བྱེད་ཅེས་བྱ་བ་ནི་གྲགས་པར་ཟད་དོ། །མཆོག་ཅེས་བྱ་བའི་སྒྲས་ནི་ཁྱབ་འཇུག་དང་། སྐེམ་བྱེད་དང་། བརྒྱ་བྱིན་ལ་བྱ་སྟེ། དེ་དག་ཀྱང་བྲི་བར་བྱའོ། །
ཞེས་བྱ་བའི་དོན་ཏེ། འདིས་ནི་དོན་འདི་སྐད་སྟོན་པར་འགྱུར་ཏེ། ཕྱིའི་དཀྱིལ་འཁོར་གྱི་ལྷའི་སྣམ་བུ་ལ་ཤར་ཕྱོགས་སུ་འདོད་པའི་ཁམས་ཀྱི་དབང་ཕྱུག་དང་། ཚངས་པ་དང་། ལྷ་ཆེན་པོ་དང་། ཁྱབ་འཇུག་དང་། ཀརྟི་ཀ་དང་། བརྒྱ་བྱིན་ཆུང་མ་དང་བཅས་པར་བྲི་བར་བྱའོ། །ལྷོ་ཕྱོགས་སུ་ནི་ཟླ་བ་
དང་། ཉི་མ་དང་། སྤེན་པ་དང་། མིག་དམར་རོ། །ནུབ་ཕྱོགས་སུ་སྟོབས་ཀྱི་ལྷ་དང་། དཔྱིད་ཀྱི་ལྷ་དང་། རྒྱལ་བ་དང་། རྣམ་པར་རྒྱལ་བ་དང་། ནོར་སྦྱིན་དང་། རླུང་ལྷ་དང་། མེ་ལྷ་དང་། ལུས་ངན་པོའོ། །བྱང་དུ་ཕག་དང་། གཤིན་རྗེ་དང་། ཚོགས་ཀྱི་བདག་པོ་དང་། ཆུ་ལྷ་ཆུང་མ་དང་བཅས་པར་བྲི་བར་
བྱའོ། །དེ་དག་ཐམས་ཅད་ཀྱང་ཡི་གེ་ཧཱུྃ་ཉིད་ཀྱིས་དགོད་པར་བྱའོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །དཀྱིལ་འཁོར་ཆེན་པོ་འདིར་ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་དུའོ། །འཇུག་པ་ལ་སོགས་པའི་ཆོ་ག་རྒྱས་པའོ་ཞེས་བྱ་བ་ནི་དེར་འཇུག་པ་ལ་སོགས་པའི་ཆོ་ག་རྒྱས་པ་དེ་ལ་
དེ་སྐད་ཅེས་བྱ་སྟེ་འཇུག་པ་དྲན་པར་བྱ་སྟེ་ཞེས་བྱ་བ་ནས་བརྩམས་ཏེ། སློབ་མ་གཞུག་པར་བྱ་བའི་ཕྱིར་གསོལ་བ་གདབ་པར་བྱའོ་ཞེས་བྱ་བའི་བར་དུ་འོག་ནས་འབྱུང་བ་གང་ཡིན་པ་དེ་རྣམས་རྩོམ་པ་སྟོན་པའོ། །དེ་ལ་ཞེས་བྱ་བ་ནི་ཕྱི་རོལ་གྱི་ཉེ་བར་དགོད་པ་ཡིན་པར་ཤེས་པར་བྱའོ། །དང་པོ་ཉིད་དུ་
ཞེས་བྱ་བ་ནི་ཞུགས་ནས་ཡང་དག་པར་སྒེག་པར་འགྱུར་བ་དང་། ཕྱག་བྱའོ་ཞེས་བྱ་བ་ལ་སོགས་པ་ཇི་སྲིད་ཆོ་ག་རྒྱས་པར་མ་བྱས་པར་ཞུགས་པ་ཙམ་གྱིས་སློབ་དཔོན་ཇི་ལྟ་བུའི་འབྲས་བུ་ཐོབ་པ་དེ་ནི་དཀྱིལ་འཁོར་དུ་ཞུགས་པའི་འབྲས་བུ་ཡིན་ནོ་ཞེས་སྤྲོ་བ་བསྐྱེད་པའི་ཕྱིར། ཆོ་ག་ཇི་ལྟ་བུས་ཞེས་བྱ་བ་ལ་

59-1-80a

སོགས་པ་གསུངས་ཏེ། ཇི་སྐད་དུ་བཤད་པའི་ཆོ་ག་འདིས་ཞུགས་པའི་ཞེས་བྱ་བ་ནི་འོག་ནས་བཤད་པའི་འཇུག་པའི་ཆོ་གས་ཞུགས་པའི་རྡོ་རྗེ་སློབ་དཔོན་ནི། བཅོམ་ལྡན་འདས་རྡོ་རྗེ་སེམས་དཔས་བྱིན་གྱིས་རློབ་པར་འགྱུར་རོ་ཞེས་བྱ་བར་སྦྱར་རོ། །རྡོ་རྗེ་ཆེན་པོ་སློབ་དཔོན་ཏེ། །ཞེས་བྱ་བ་
ལ་རྡོ་རྗེ་ཡང་ཡིན་ལ་ཆེན་པོ་ཡང་ཡིན་པས་ན་རྡོ་རྗེ་ཆེན་པོ་སྟེ། དེ་བཞིན་ཉིད་དོ། །དེ་བཞིན་ཉིད་དུ་རོ་གཅིག་པའི་སེམས་ཀྱང་རྡོ་རྗེ་སེམས་དཔའི་ཚུལ་དུ་ཉེ་བར་གདགས་པས་རྡོ་རྗེ་ཆེན་པོ་ཞེས་བྱ་སྟེ་རྡོ་རྗེ་ཆེན་པོ་དེས་རྡོ་རྗེ་སེམས་དཔའི་ཆ་ལུགས་དང་ལྡན་པའི་སློབ་དཔོན་ནི་རྡོ་རྗེ་ཆེན་པོ་སློབ་དཔོན་ཏེ། རྡོ་རྗེ་
སེམས་དཔའི་དཀྱིལ་འཁོར་གྱི་སློབ་དཔོན་ཞེས་བྱ་བའི་དོན་ཏོ། །དཀྱིལ་འཁོར་ཐམས་ཅད་ཀྱི་སློབ་དཔོན་དང་ཞེས་བྱ་བ་ལ་དཀྱིལ་འཁོར་ཐམས་ཅད་ནི་རྣམ་པར་སྣང་མཛད་ཀྱི་དཀྱིལ་འཁོར་ཏེ། དེར་སློབ་དཔོན་དུ་གྱུར་པས་ན་དཀྱིལ་འཁོར་ཐམས་ཅད་ཀྱི་སློབ་དཔོན་ནོ། །དམ་ཚིག་ཐམས་
ཅད་ཤེས་པ་དང་། །ཞེས་བྱ་བ་ནི། དམ་ཚིག་ཀྱང་ཡིན་ལ་ཐམས་ཅད་ཀྱང་ཡིན་པས་དམ་ཚིག་ཐམས་ཅད་དེ་གདུག་པ་རྣམས་འདུལ་བའི་ཕྱིར། དེ་བཞིན་གཤེགས་པའི་བཀའ་བསྒོ་བའི་ཚུལ་ལོ། །དེ་ལ་རྗེས་སུ་འཇུག་ཅིང་དེ་དག་ཤེས་པས་ན་དམ་ཚིག་ཐམས་ཅད་ཤེས་པ་སྟེ། རྡོ་རྗེ་ཧཱུྃ་མཛད་ཀྱི་
དཀྱིལ་འཁོར་གྱི་སློབ་དཔོན་ཞེས་བྱ་བའི་དོན་ཏོ། །ཆོས་ཐམས་ཅད་རིག་པ་དང་ཞེས་བྱ་བ་ནི་སྟོབས་དང་མི་འཇིགས་པ་ལ་སོགས་པ་དང་། པདྨའི་རིགས་ཀྱི་ཆོས་ཐམས་ཅད་དེ། དེ་དག་ཐམས་ཅད་རིག་ཅིང་ཁོང་དུ་ཆུད་པས་ན་ཆོས་ཐམས་ཅད་རིག་པ་སྟེ། པདྨའི་རིགས་ཀྱི་དཀྱིལ་འཁོར་གྱི་སློབ་
དཔོན་དུ་འགྱུར་རོ་ཞེས་སྟོན་པར་གྱུར་པ་ཡིན་ནོ། །ལས་ཐམས་ཅད་སྒྲུབ་པ་དང་ཞེས་བྱ་བ་ནི་བཅོམ་ལྡན་འདས་ནམ་མཁའི་སྙིང་པོའི་ལས་གང་དག་གསུངས་པའི་ལས་དེ་དག་ཐམས་ཅད་རབ་ཏུ་སྒྲུབ་པར་བྱེད་པས་ན། དེའི་ཕྱིར་ལས་ཐམས་ཅད་བསྒྲུབ་པ་ཞེས་བྱ་བ་སྟེ། རིན་པོ་ཆེའི་རིགས་ཀྱི་སློབ་
དཔོན་ཞེས་བྱ་བའི་དོན་ཏོ། །དངོས་གྲུབ་ཐམས་ཅད་གྲུབ་པ་དང་། །ཞེས་བྱ་བ་ལ་དངོས་གྲུབ་ཀྱང་ཡིན་ལ་ཐམས་ཅད་ཀྱང་ཡིན་པས་དངོས་གྲུབ་ཐམས་ཅད་དེ། དཀྱིལ་འཁོར་ལྷག་མ་གྲུབ་པ་གང་ཡིན་པ་དེ་ནི་དངོས་གྲུབ་ཐམས་ཅད་གྲུབ་པ་སྟེ། དཀྱིལ་འཁོར་ལྷག་མ་རྣམས་གྲུབ་པས་གྲུབ་པ་ཞེས་བྱ་

59-1-80b

བའི་དོན་ཏོ། །དེ་བས་ན་དེ་ལྟ་བུའི་ངོ་བོ་ཉིད་དུ་བཅོམ་ལྡན་འདས་རྡོ་རྗེ་སེམས་དཔས་བྱིན་གྱིས་བརླབས་པ་ནི། རིགས་དང་དཀྱིལ་འཁོར་དང་ལྷ་ཐམས་ཅད་ཀྱིས་ནུས་པ་དང་ལྡན་པར་མཛད་ཅེས་བྱ་བའི་དོན་ཏོ། །གང་གི་ཕྱིར་དེ་ལྟར་གྱུར་པ་ཉིད་ཀྱིས་ན། དབང་བསྐུར་བ་ཐམས་ཅད་འཐོབ་པ་ཞེས་བྱ་བ་སྟེ། 
དེ་ལ་དབང་བསྐུར་བ་ཡང་ཡིན་ལ། ཐམས་ཅད་ཀྱང་ཡིན་པས་དབང་བསྐུར་བ་ཐམས་ཅད་དོ། །དེ་ཡང་ཕྱི་དང་གསང་བའི་དབང་བསྐུར་བ་གང་རིགས་ཐམས་ཅད་ཀྱི་དཀྱིལ་འཁོར་དུ་གསུངས་པ་དེ་དག་ཐམས་ཅད་ཐོབ་པའོ། །ཐམས་ཅད་ཤེས་པ་དང་ལྡན་པ་ཞེས་བྱ་བ་ནི། འདིས་དཀྱིལ་འཁོར་ལ་
སོགས་པ་ཐམས་ཅད་ཤེས་པ་དང་ལྡན་པའོ། །མཆོད་པ་ཐམས་ཅད་ནི་མཆོད་པ་ཐམས་ཅད་ཀྱིས་མཆོད་པ་སྟེ། ཐམས་ཅད་ཀྱི་མཆོད་པ་དེ་ཉིད་དང་། འཇིག་རྟེན་དང་འཇིག་རྟེན་ལས་འདས་པ་དཀྱིལ་འཁོར་ཐམས་ཅད་འདིས་དབང་དུ་འགྱུར་ཞིང་། རང་ལ་རག་ལས་པར་འགྱུར་རོ། །དེ་བས་ན་རྒྱུ་དེ་
ལྟ་བུས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་འགྲུབ་པར་འགྱུར་རོ། །འདིའི་ཕྱག་རྒྱ་ཐམས་ཅད་ཀྱང་རང་ཉིད་བཅིངས་པས་འགྲུབ་པར་འགྱུར་རོ་ཞེས་བྱ་བ་ནི། ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་རང་ཉིད་ཀྱིས་རང་ཉིད་ལ་བཅིངས་ན་འདིའི་དངོས་གྲུབ་རྣམས་འགྲུབ་
པར་འགྱུར་རོ། །དམ་ཚིག་ཐམས་ཅད་ཀྱིས་ཞེས་བྱ་བ་ལ་སོགས་པ་ལ། ལུས་ལ་དམིགས་པ་ལ་སོགས་པ་དམ་ཚིག་ལས་འདའ་བར་བྱེད་པ་ནི་ཉེས་པ་དང་བཅས་པ་སྟེ། དེ་ཉེས་པ་དང་བཅས་སུ་ཟིན་ཀྱང་། དཔལ་རྡོ་རྗེ་སེམས་དཔའི་ཕྱག་རྒྱའི་བྱིན་གྱི་རླབས་ཀྱིས་དམ་ཚིག་ཐམས་ཅད་བྱིན་གྱིས་
བརླབས་པར་རྟོགས་པར་འགྱུར་ཏེ། དེ་ཡང་དམ་ཚིག་ཐམས་ཅད་ནི། །དཔལ་རྡོ་རྗེ་སེམས་དཔའ་ལ་སོགས་པ་སྟེ། དེ་སྒྲུབ་པ་པོའི་རྒྱུད་ལ་སོ་སོར་སྣང་བའི་སྦྱོར་བས་གནས་པར་འགྱུར་རོ་ཞེས་བྱ་བའི་དོན་ཏོ། །མ་བསླབས་པར་ཡང་ཐམས་ཅད་ཤེས་པར་འགྱུར་རོ་ཞེས་བྱ་བ་ནི། དེ་ནས་བསྟན་བཅོས་
ལ་སོགས་པ་མ་བསླབས་པར་ཡང་དེ་རྣམས་ཀྱིས་བྱིན་གྱིས་བརླབ་པར་མཛད་པའི་མཐུས་ཐམས་ཅད་ཤེས་པར་འགྱུར་རོ། །མཆོད་པ་ཐམས་ཅད་ནི་རྣམ་པ་བཅུ་གཉིས་ཏེ། རྡོ་རྗེ་མཚོན་ཆ་ལ་སོགས་པའི་མཆོད་པ་རྣམས་སོ། །དེ་ལ་སོགས་པ་གང་ཡིན་པའོ། །བྱ་བ་ཐམས་ཅད་ནི་བྱ་བ་གང་
59-1-81a

རྡོ་རྗེ་སེམས་དཔའི་ཕྱག་རྒྱ་ལ་སོགས་པ་འགྲུབ་པའི་ངོ་བོ་ཉིད་དང་། དེ་ལྟ་བུའི་བྱ་བ་ཐམས་ཅད་ཀྱང་འདི་ལ་འགྲུབ་པར་འགྱུར་རོ། །མདོར་ན་ཞེས་བྱ་བ་ལ་སོགས་པ་ལ། རྒྱ་ཆེར་བཤད་པ་བོར་ནས་ཐ་མལ་པའི་རྡོ་རྗེ་རིག་པ་འཛིན་པ་ལ་སོགས་པ་དངོས་གྲུབ་ཀྱི་མཆོག་སྟོན་པར་
མཛད་པ་ནི་མདོར་བསྡུས་པ་སྟེ། མདོར་བསྡུས་པ་དེས་མདོར་བསྡུས་པའོ། །ཚེ་འདི་ཉིད་ལ་ཞེས་བྱ་བ་ནི་ད་ལྟར་བྱུང་བའི་དུས་ཏེ། བདག་ཉིད་ཀྱི་དངོས་པོ་གང་གིས་དཀྱིལ་འཁོར་ཆེན་པོ་འདིར་ཞུགས་པ་དེ་ཉིད་ཀྱིས་རྡོ་རྗེ་རིག་པ་འཛིན་པ་ལ་སོགས་པ་དངོས་གྲུབ་ཀྱི་མཆོག་ཐོབ་པར་འགྱུར་རོ། །ཇི་
ལྟ་བུ་ཞེ་ན། ཇི་ལྟར་མངོན་པར་འདོད་པ་ཞེས་བྱ་བ་གསུངས་ཏེ། དེའི་འདོད་པ་ཇི་ལྟ་བུས་ཇི་ལྟ་བ་འདོད་པ་དེ་ལྟ་བུ་ཉིད་ཀྱི་དངོས་གྲུབ་ཐོབ་པར་འགྱུར་རོ། །མངོན་པར་འདོད་པའི་དངོས་གྲུབ་དེ་ཉིད་བསྟན་པར་བྱ་བའི་ཕྱིར། སངས་རྒྱས་ཉིད་དམ་རྡོ་རྗེ་འཛིན་པ་ཉིད་ཐོབ་པར་འགྱུར་རོ་ཞེས་བྱ་བ་གསུངས་ཏེ། 
དེ་ལ་སངས་རྒྱས་ཉིད་ནི་དེ་བཞིན་གཤེགས་པ་ལྔ་པོ་ཉིད་དོ། །རྡོ་རྗེ་འཛིན་པ་ཉིད་ནི་རིགས་ཐམས་ཅད་ཀྱི་ངོ་བོ་ཉིད་དེ། དེ་ཅིའི་ཕྱིར་ཞེ་ན་ཞེས་བྱ་བ་ནི་རྒྱུ་གང་གི་ཕྱིར་ན། ཇི་སྐད་དུ་བཤད་པའི་འབྲས་བུ་དཀྱིལ་འཁོར་དུ་འཇུག་པ་ཙམ་གྱིས་སློབ་དཔོན་ལ་འབྱུང་བར་འགྱུར་ཞེ་ན། འདི་ལྟར་ཞེས་བྱ་བ་ལ་
སོགས་པ་གསུངས་ཏེ་གང་གི་ཕྱིར། བཅོམ་ལྡན་འདས་རྡོ་རྗེ་སེམས་དཔའ་ཧཱུྃ་གི་ངོ་བོ་ཉིད་དུ་འདིའི་སྙིང་ལ་ཞུགས་ཤིང་དོན་ཡོད་ལ་མི་སླུ་བའི་ཕྱིར། ལས་ཐམས་ཅད་ལ་འབྲས་བུ་དང་བཅས་པའི་རྒྱུས་ནི་བཀུག་ཅིང་སྤྱན་དྲངས་ཏེ། དེ་བས་ན་རྒྱུ་འདི་ཉིད་ཀྱིས་དཀྱིལ་འཁོར་དུ་ཞུགས་ཤིང་། རྡོ་རྗེ་
སེམས་དཔའ་ལ་སོགས་པའི་ཕྱག་རྒྱའི་ངོ་བོ་ཉིད་ཀྱིས་སེམས་ཅན་གྱི་དོན་ཏོ། །སྒྲུབ་པ་པོའི་རང་དགར་དབང་དུ་བྱས་ལ། དེའི་རང་བཞིན་དུ་བསྒོམ་པའི་སྦྱོར་བ་དང་། རྗེས་སུ་མཉེས་པར་བྱས་ཏེ། དེའི་ཕྱིར་བདག་ཉིད་སློབ་དཔོན་དུ་གྱུར་ནས་སློབ་དཔོན་དུ་འཇུག་ཅིང་སྒོ་སྲུང་ནས་བརྩམས་ཏེ། 
དཀྱིལ་འཁོར་ཐམས་ཅད་བསྟན་པར་བྱ་ཞིང་། དཀྱིལ་འཁོར་གྱི་རྣམ་པར་བསྒོམ་པའི་རྣམ་པར་སེམས་རྩེ་གཅིག་པར་སློབ་དཔོན་བྱེད་པ་ལ་མཉེས་པར་བྱེད་པའོ། །དཀྱིལ་འཁོར་གྱི་དངོས་གྲུབ་ཀྱང་དེ་ཉིད་ཀྱིས་བསྒྲུབས་ན་འགྲུབ་པར་འགྱུར་ཞིང་རྫོགས་པར་འགྱུར་བས་བཅོམ་ལྡན་འདས་དེ་ཡང་དེ་ལ་

59-1-81b

འགྲུབ་པར་འགྱུར་ཏེ། དེ་བས་ན་ཇི་སྐད་དུ་གསུངས་པའི་འབྲས་བུ་དཀྱིལ་འཁོར་དུ་འཇུག་པ་ཙམ་གྱིས་སློབ་དཔོན་གྱིས་འཐོབ་པར་འགྱུར་རོ། །དེ་ནས་ཞེས་བྱ་བ་ནི་དཀྱིལ་འཁོར་བྲིས་པའི་རྗེས་ཐོགས་ཉིད་ལ་བསྡུ་བ་ལ་སོགས་པ་ཇི་ལྟ་བ་བཞིན་དུ་སྔོན་དུ་འགྲོ་བས་བཅོམ་ལྡན་འདས་རྡོ་རྗེ་སེམས་
དཔའ་འཁོར་དང་བཅས་པའི་དཀྱིལ་འཁོར་དུ་བཅུག་ནས་བཅིངས་ལ་དབང་དུ་བྱས་ཏེ། དང་པོར་མཆོད་ཡོན་ཕུལ་ལ། རྡོ་རྗེ་ཕྱག་རྒྱ་དང་དང་པོའི་རྡོ་རྗེའི་མཚན་ཉིད་ཅན་བཅིངས་པ་དང་པོའི་སྟེ། ཐོག་མར་བྱས་ལ་ཕྱག་རྒྱ་གཞན་དག་བཅིང་བ་དང་། དཀྱིལ་འཁོར་དུ་འཇུག་པར་བྱས་ནས་ཧཱུྃ་ཟློས་ཤིང་། 
རྡོ་རྗེ་ལྟ་བས་ལྟ་བཞིན་དུ་དཀྱིལ་འཁོར་དུ་བསྒྲུབ་པར་བྱའོ། །རྡོ་རྗེ་ལྟ་བ་ཡང་། ཆགས་ཤིང་གདངས་པའི་མིག་དག་གིས། །བུད་མེད་དག་ལ་བལྟས་ན་ནི། །རྟག་ཏུ་དབང་དུ་གྱུར་པ་སྟེ། །རྡོ་རྗེ་ལྟ་བའི་མཚན་ཉིད་དོ། །རྡོ་རྗེ་བཅིང་བ་བསྟན་བྱས་ཏེ། །མཛུབ་མོ་མཐེ་བོའི་མངལ་དུ་ནི། །གཡས་པ་ཡི་ནི་མཐེ་
བོའི་མཚན། །བཅུག་ལ་བསྐྱོད་ཅིང་བསྡམ་པར་བྱ། །ཞེས་བྱ་བ་འདི་ནི་ལྔ་པོའི་བསྡུས་པ་ཞེས་བྱ་བའི་ཕྱག་རྒྱའོ། །ལྔ་པོ་བསྡུས་པ་བཅིངས་ནས་ནི། །གུང་བསྒྲེང་སྲིན་ལག་ནང་དུ་གཞུག །མཐེ་བོ་མཐེའུ་ཆུང་བསྙམས་རྡོ་རྗེ། །དེ་ནི་དང་པོའི་རྡོ་རྗེ་མཆོག །ཞེས་བྱ་བ་འདི་ནི་དང་པོའི་རྡོ་རྗེའི་མཚན་ཉིད་དོ། །
དེ་ནས་རྡོ་རྗེ་རྣམ་པར་སྒེག་པའི་ཕྱག་རྒྱ་དང་། བཟླས་བརྗོད་ལན་ཅིག་བྱས་ལ་ཕྱག་བྱ་ཞིང་ཞེས་བྱ་བ་ནི་དེ་ལྟ་བུའི་རྡོ་རྗེའི་ཕྱག་རྒྱ་དང་ཡི་གེ་ཧཱུྃ་ཟློས་ཤིང་དཀྱིལ་འཁོར་ཐམས་ཅད་རབ་ཏུ་ཇི་ལྟ་བ་བཞིན་བསྒྲུབས་ལ། རང་གི་ལྕེ་ལ་ཡི་གེ་ཧཱུྃ་ལས་གནོད་མཛེས་ཀྱི་རྡོ་རྗེ་བསམས་ལ། བཛྲ་ཛི་ཧྭ་ཞེས་བྱིན་
གྱིས་བརླབས་ལ། དཀྱིལ་འཁོར་པའི་ལྷ་ཐམས་ཅད་ཀྱི་ལྗགས་ལ་ཧཱུྃ་དང་བཅས་པར་བསམས་ལ་ལྷ་ཐམས་ཅད་ལས་ཀྱི་ཕྱག་རྒྱ་ཉེ་བར་བསྟན་ཏེ་བཅོམ་ལྡན་འདས་ཀྱི་ཕྱག་རྒྱ་ཆེན་པོ་ཇི་སྐད་བཤད་པ་བཅིངས་ཤིང་བསྟན་ལ། ལྷག་མ་རྣམས་ཀྱིས་ཀྱང་ཇི་ལྟར་བྲིས་པ་དང་རྗེས་སུ་མཐུན་པར་ཡི་གེ་ཧཱུྃ་
ཟློས་ཤིང་ཕྱག་རྒྱ་ཆེན་པོ་དེ་དག་ཉིད་ལ་ཉེ་བར་བསྟན་པར་བྱའོ། །དེ་ནས་དབང་བསྐུར་བའི་ཕྱག་རྒྱ་རྣམས་ཀྱིས་ཐམས་ཅད་ཇི་ལྟ་བ་བཞིན་དུ་དབང་བསྐུར་ནས་བུམ་པ་རྣམས་དང་། ཕྱག་རྒྱའི་མཆོད་པ་རྣམས་ཀྱིས་ཀྱང་ཡང་དག་པར་མཆོད་ལ། དེའི་རྗེས་ཐོགས་ཉིད་དུ་རྡོ་རྗེ་རྣམ་པར་སྒེག་པའི་ཕྱག་རྒྱས། 

59-1-82a

བཅོམ་ལྡན་འདས་ལ་ཕྱག་བྱས་ཏེ། དེ་དག་ཀྱང་འདིའི་འོག་ནས་ཤེས་པར་བྱའོ། །གོས་དམར་པོ་ཞེས་བྱ་བ་ལ་སོགས་པ་ལ་དེ་ལྟར་ཕྱག་བྱས་ནས། དཔལ་རྡོ་རྗེ་སེམས་དཔའི་སྦྱོར་བ་ཆེན་པོ་དང་ལྡན་པ་ལ་གོས་དམར་པོ་ལ་ཧཱུྃ་ངམ་རྡོ་རྗེ་གནོད་སྦྱིན་གྱི་སྔགས་ལན་བདུན་བཟླས་
ལ། རྡོ་རྗེ་ལྕགས་ཀྱུ་ལ་སོགས་པ་བཟླས་པས་ཀྱང་དེ་སྟོད་གཡོགས་དང་སྨད་གཡོགས་དང་ཟེའུ་ཁ་དང་གདོང་གཡོགས་བྱས་ལ། ཕྱག་བཞི་སྔོན་དུ་འགྲོ་བ་ལ་སོགས་པས་སྡོམ་པ་གཟུང་བ་དང་། མེ་ཏོག་གི་ཕྲེང་བ་ཐོགས་ཤིང་གདོང་དྲི་ཞིམ་པོས་བྱུག་པ་དང་། རྡོ་རྗེ་ཐལ་མོས་རྡོ་རྗེ་གར་བྱེད་ཅིང་
བསྐོར་བས་སྙིང་གར་མེ་ཏོག་ཐོགས་ཏེ་བདག་ཉིད་འཇུག་པར་བྱའོ་ཞེས་བྱ་བ་ནི་རྡོ་རྗེ་གར་ལས་ཧཱུྃ་བྱུང་བའི་རྡོ་རྗེ་ཐལ་མོས་མེ་ཏོག་བླངས་ལ། དེ་བསྐོར་ནས་སྙིང་གའི་ཕྱོགས་སུ་བཞག་སྟེ་བཛྲ་བཛྲ་ཧཱུྃ་ཞེས་འདོན་ཞིང་དཀྱིལ་འཁོར་དུ་འཇུག་པར་བྱའོ་ཞེས་བྱ་བའི་དོན་ཏེ་དེ་ལ་རྡོ་རྗེ་གར་ནི་འདི་ཡིན་ཏེ། ལག་
པ་གཡས་པ་བ་དན་གསུམ་པ་བྱས་ལ། གཡོན་པ་ཡང་བ་དན་གསུམ་པ་ཡིད་དུ་བྱས་ལ་དེ་ལྟར་བ་དན་རྩེ་གསུམ་པའི་མཆོག་གི་བསྒྱིངས་པ་དང་བཅས་པས། ཐ་མ་ལ་སོགས་པ་ནས་དགྲོལ་བས་གློག་ལྟར་འདེགས་ཤིང་བསྐོར་བས་གར་བྱེད་པ་འདི་ནི་རྡོ་རྗེའི་གར་རོ། །ཞུགས་ནས་ཀྱང་ཡང་
རྣམ་པར་སྒེག་པས་བསྐོར་བས་བདུད་བཅིང་ཞེས་བྱ་བ་ནི་ཇི་ལྟར་སྔར་རྡོ་རྗེ་སྒེག་པས་ཕྱག་བྱ་བར་གསུངས་པ་བཞིན་དུ་འདིར་ཡང་བྱའོ་ཞེས་སྟོན་པ་ཡིན་ནོ། །སྙིང་པོ་ཡང་བཟླས་བརྗོད་བྱའོ་ཞེས་བྱ་བ་ནི་ཧཱུྃ་བཟླས་ལ་ཕྱག་བྱའོ་ཞེས་སྟོན་པ་ཡིན་ནོ། །དེ་ནས་བཅོམ་ལྡན་འདས་ལ་རྡོ་རྗེ་ལྟ་བས་བལྟས་
ཏེ་དེ་བཞིན་དུ་འདུག་ནས་བསྒྲུབ་པར་བྱའོ་ཞེས་བྱ་བ་ནི་དེ་ལྟར་ཕྱག་བྱས་ནས་བསྐོར་བ་ལན་གསུམ་བྱས་ལ་དེ་ཁོ་ན་ཉིད་བརྗོད་དེ་མེ་ཏོག་དོར་ནས་སླར་བླངས་ལ། རང་གི་མགོ་ལ་བཅིངས་ཏེ་མཚན་བརྒྱ་རྩ་བརྒྱད་ཀྱིས་བསྟོད་ནས། བཅོམ་ལྡན་འདས་ཀྱིས་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་
ལ་རྡོ་རྗེའི་ལྟ་བས་བལྟས་ལ་ཡི་གེ་ཧཱུྃ་འདོན་ཅིང་བསྒྲུབ་པར་བྱའོ། །དེ་ནས་བཅོམ་ལྡན་འདས་དགྱེས་པས་བདག་ཉིད་སྟོན་པར་མཛད་པའམ། སྨིན་མ་བསྐྱོད་པའམ། ལུས་ཐམས་ཅད་དམ་ཡན་ལག་ཐམས་ཅད་ཅེས་བྱ་བ་ནི་གལ་ཏེ་ཞིག་ན་སྐུ་ཐམས་ཅད་བསྐྱོད་པར་འགྱུར་བའམ། སྐུའི་ཕྱོགས་གཅིག་

59-1-82b

བསྐྱོད་པར་འགྱུར་བའོ། །ཁ་དོག་དམར་པོར་འགྱུར་རོ་ཞེས་བྱ་བ་ནི་སྐུ་ཐམས་ཅད་དམ། ཞལ་ཚོམ་དམར་པོར་འགྱུར་བའོ། །འོད་ཟེར་གྱི་རང་བཞིན་གྱི་ཞལ་ལམ་སྐུ་ཐམས་ཅད་སྟོན་པར་འགྱུར་རོ། །ཆོ་འཕྲུལ་དཔག་ཏུ་མེད་པ་ཡང་སྟོན་པར་འགྱུར་རོ་ཞེས་བྱ་བ་འདི་ནི་མཚན་མོའོ། །འདི་ཉིད་ནི་ཉིན་
མོའོ་ཞེས་བྱེ་བྲག་ཤེས་པར་མི་འགྱུར་བར་འོད་ཟེར་གྱིས་བཀུག་ནས་འཁྲིགས་པ་དང་། གང་རྡོ་རྗེ་རྩེ་མོའི་རྒྱུད་ལས་ཆོ་འཕྲུལ་བརྒྱ་རྩ་བརྒྱད་ཀྱི་རྣམ་པ་གང་ཡིན་པ་དེ་དག་ཀྱང་སྟོན་པར་འགྱུར་རོ། །བདག་ཉིད་མཐོང་བ་སྩོལ་ཅིང་དངོས་གྲུབ་མཆོག་ཀྱང་སྩོལ་བར་འགྱུར་རོ་ཞེས་བྱ་བ་ནི། རང་རང་
གི་གཟུགས་ཉིད་མཐོང་བ་སྩོལ་བ་དང་། སངས་རྒྱས་ཉིད་དམ་རྡོ་རྗེ་འཛིན་པ་ཉིད་ཀྱི་དངོས་གྲུབ་མཆོག་སློབ་དཔོན་ལ་སྩོལ་བར་འགྱུར་རོ། །དེ་ནས་བརྩམས་ཏེ་ཞེས་བྱ་བ་ནི་དེ་ནས་བཟུང་ནས་སོ། །ཉིན་རེ་ཞིང་དངོས་གྲུབ་ཐམས་ཅད་ཐོབ་པར་འགྱུར་རོ་ཞེས་བྱ་བ་ནི་རིགས་ཐམས་ཅད་ཀྱི་དཀྱིལ་འཁོར་ཀྱི་
དངོས་གྲུབ་རྣམས་དང་། འཇིག་རྟེན་པ་རྣམས་ཀྱང་ཉིན་རེ་ཞིང་སློབ་དཔོན་ལ་འབྱུང་བར་འགྱུར་བའོ། །གང་དུ་ཞུགས་པ་ཙམ་གྱིས་མི་ཚུགས་པ་དང་། མི་སོད་པར་འགྱུར་རོ་ཞེས་བྱ་བ་ནི་དེར་རང་ཉིད་ཞུགས་པའོ་ཞེས་སྔ་མ་བཞིན་དུ་རྒྱུད་དང་སྦྱར་ཏེ། གང་ཞིག་དཀྱིལ་འཁོར་འདི་ལ་ཞུགས་པ་ཙམ་གྱིས་མི་
ཚུགས་པར་འགྱུར་བ་འདི་ནི། གང་བདུད་ལ་སོགས་པས་ཟིལ་གྱིས་མི་གནོན་ཅིང་ཚུགས་པར་མི་འགྱུར་བ་དང་། དེ་ཉིད་ཀྱིས་ཀྱང་མི་སོད་པ་སྟེ། བསད་པར་མི་ནུས་པའོ། །དངོས་གྲུབ་ཐམས་ཅད་དང་ཞེས་བྱ་བ་ནི་དཔལ་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་རྫོགས་པའོ། །ཕུན་སུམ་ཚོགས་པ་
ཐམས་ཅད་ཅེས་བྱ་བ་ནི། དེ་དག་ཉིད་ཀྱི་འབྱོར་པའོ། །ཡེ་ཤེས་ཐམས་ཅད་དང་ཞེས་བྱ་བ་ནི། དཔལ་རྡོ་རྗེ་སེམས་དཔའ་ལ་སོགས་པའི་ཡེ་ཤེས་དང་། བྱང་ཆུབ་ཀྱི་སེམས་རྫོགས་པར་འགྱུར་བ་ལ་སོགས་པའོ། །བྱ་བ་ཐམས་ཅད་ནི་སངས་རྒྱས་ཀྱི་སྤྲུལ་པས་སེམས་ཅན་གྱི་དོན་མཛད་པའི་ཚུལ་ཏེ། དེ་
དག་བཅོམ་ལྡན་འདས་རྡོ་རྗེ་སེམས་དཔའ་སློབ་དཔོན་ལ་བསྒྲུབ་པར་མཛད་ཅིང་རྫོགས་པར་མཛད་དོ། །དེར་དེ་ལྟ་བུའི་འབྲས་བུ་ཐོབ་པར་འདོད་པའི་སློབ་དཔོན་གྱིས་རང་ཉིད་འཇུག་པར་བྱའོ། །དེ་ནས་ཡང་དག་པར་མཆོད་ལ་ཞེས་བྱ་བ་ནི་དངོས་གྲུབ་ཐམས་ཅད་རབ་ཏུ་བསྒྲུབ་པར་མཛད་པ། བཅོམ་ལྡན་

59-1-83a

འདས་གསང་བའི་མཆོད་པ་བཞིས་ཡང་དག་པར་མཆོད་ཅིང་། གླུ་དང་རོལ་མོས་ཀྱང་མཆོད་དེ། བདག་ཉིད་རྡོ་རྗེ་སེམས་དཔར་བྱིན་གྱིས་བརླབས་ནས། ཆུའི་དབང་བསྐུར་བ། བཅོམ་ལྡན་འདས་ལས་རྡོ་རྗེ་ཐལ་མོ་བསྐོར་བས། བཅོམ་ལྡན་འདས་ལ་ཕྱག་བྱས་ལ་བླང་བར་
བྱའོ། །རྡོ་རྗེ་མིང་གིས་དབང་བསྐུར་བ་ཞེས་བྱ་བ་ལ་སོགས་པ་ལ་དེ་ལྟ་བུའི་དབང་བསྐུར་བ་བླངས་ནས། ཡང་ཕྱག་རྒྱ་དང་། ཅོད་པན་དང་། དར་དཔྱངས་དང་། རྡོ་རྗེ་དང་། དྲིལ་བུ་དང་བཅས་པའི་དང་པོའི་རྡོ་རྗེའི་དབང་བསྐུར་བ་བླངས་ལ། ཡི་གེ་ཧཱུཾ་ཉིད་ཟློས་ཤིང་མིང་གི་དབང་བསྐུར་བས་སློབ་
དཔོན་བདག་ཉིད་དབང་བསྐུར་བར་བྱའོ། །ལྷག་མ་རྣམས་ནི་གོ་བར་ཟད་དོ། །ཡང་ན་ཞེས་བྱ་བ་ལ་སོགས་པ་ལ་གང་གི་ཚེ་བཅོམ་ལྡན་འདས་རྡོ་རྗེ་སེམས་དཔའ་སྒྲུབ་པ་པོ་རང་ཉིད་ལ་དབང་བསྐུར་བ་སྩོལ་བར་མཛད་པ་དེའི་ཚེ། སྐད་ཅིག་དེ་ཉིད་ལ་སྒྲུབ་པ་པོས། དཔལ་རྡོ་རྗེ་སེམས་དཔའ་ལ་
སོགས་པའི་དངོས་གྲུབ་མཆོག་རྣམས་མ་བསམས་བཞིན་དུ་འཐོབ་པར་འགྱུར་རོ། །གང་གི་ཚེ་བཅོམ་ལྡན་འདས་དཔལ་རྡོ་རྗེ་སེམས་དཔའ་བདག་ཉིད་མཐོང་བ་མ་སྩལ་བ་དེའི་ཚེ་སྒྲུབ་པ་པོའི་ཇི་སྐད་བཤད་པའི་དབང་བསྐུར་བ་རང་ཉིད་ཀྱིས་བླང་བར་བྱ་སྟེ། དེའི་ཚེ་ལོ་ཕྱེད་ཀྱི་བར་དུ་རྒྱུན་མི་འཆད་
པར་བསྒྲུབ་པ་དང་ལྡན་པའི་སྒྲུབ་པ་པོས་ཡིད་ལ་འདོད་པའི་དངོས་གྲུབ་མཆོག་འགྲུབ་པར་འགྱུར་རོ། །དེ་ནས་རྡོ་རྗེ་མིང་གི་དབང་བསྐུར་བ་ཡང་དེ་བཞིན་ནོ་ཞེས་བྱ་བ་ནི་དེ་ནས་གཟེངས་བསྟོད་པའོ་། །དེ་ནས་ཐམས་ཅད་ཅེས་བྱ་བ་ལ་སོགས་པ་ལ་གང་འོག་ནས་བཤད་པའི་མིང་གི་དབང་བསྐུར་བ་དེས་
དབང་བསྐུར་བ་དེ་ནི། འདིར་རྡོ་རྗེ་མིང་གི་དབང་བསྐུར་བ་གཉིས་པ་སྟེ། རྡོ་རྗེ་མིང་གི་དབང་བསྐུར་བ་དེ་འོག་ནས་བཤད་པའི་ཚུལ་གྱིས་བླང་བར་བྱའོ་ཞེས་བྱ་བའི་དོན་ཏོ། །དེ་ནས་བྱིན་གྱིས་བརླབས་པ་ལ་སོགས་པ་བྱས་ལ་ཞེས་བྱ་བ་ལ་སོགས་པ་ནི། དེ་ལྟར་ལུང་བསྟན་པའི་མཐར་ཐུག་པའི་བར་གྱི་འཇུག་པ་
ལ་སོགས་པའི་ཆོ་ག་བྱས་ལ། བདག་ལ་བྱིན་གྱིས་བརླབས་པ་བྱ་སྟེ། འོག་ནས་བཤད་པའི་མཚན་ཉིད་ཅན་གྱི་ཇི་ལྟར་མངོན་པར་འདོད་པའི་ཆོ་གས་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་བསྒྲུབ་པ་བྱས་ལ། དཀྱིལ་འཁོར་ཆེན་པོ་ལས་བྱུང་བར་བྱའོ། །དཀྱིལ་འཁོར་ཆེན་པོ་གསང་བ་སྒྲུབ་པ་ལན་

59-1-83b

ཅིག་བྱའོ་ཞེས་བྱ་བ་ནི་གང་དཀྱིལ་འཁོར་ཆེན་པོ་འདི་བཤད་མ་ཐག་པའི་གསང་བ་སྒྲུབ་པའི་དེ་ཉིད་སློབ་དཔོན་གྱིས་ལན་ཅིག་སྟེ་ཐང་ཅིག་བྱའི་ཡང་ནས་ཡང་དུ་ངལ་བསོ་ཞིང་བྱ་བ་ཡང་མ་ཡིན་ལ། ཉིན་ཞག་བཞི་ལྔའམ། ཟླ་བ་ཙམ་གྱིས་བྱ་བ་ཡང་མ་ཡིན་གྱི། གཞན་དུ་སྟན་གཅིག་ལ་འདུག་པ་
ཉིད་ཀྱི་ཚེ། མཚན་མ་བྱུང་བའི་མཐར་ཐུག་པའི་བར་དུ་བྱའོ་ཞེས་སྟོན་ཏོ། །དེ་ནས་སློབ་མ་གཞུག་པར་བྱ་སྟེ་ཞེས་བྱ་བ་ལ་སོགས་པ་ལ། གལ་ཏེ་སློབ་མ་གཞུག་པར་འདོད་ན་སྔ་མ་བཞིན་དུ་སྡོམ་པ་བཟུང་བའི་བར་གྱི་ཆོ་ག་བྱས་ལ། རབ་ཏུ་དགའ་བའི་རྡོ་རྗེའི་ཕྱག་རྒྱ་ལྔ་པོ་བསྡུས་པ་བཅིངས་ལ་སྔ་
མ་བཞིན་དུ་སློབ་དཔོན་ཞུགས་ནས་དེ་བཞིན་དུ་རྡོ་རྗེ་རྣམ་པར་སྒེག་པའི་ཕྱག་རྒྱས་ཕྱག་བྱས་ཏེ། ཧཱུྃ་གི་ངོ་བོ་ཉིད་ཀྱི་སྙིང་པོས་སྙིང་པོ་དེ་ཉིད་ཅི་འདོད་པ་ཟློས་པའི་སློབ་དཔོན་གྱིས་བཅོམ་ལྡན་འདས་རྡོ་རྗེ་སེམས་དཔའ་རབ་ཏུ་བསྒྲུབ་པར་བྱའོ། །ཇི་ལྟར་བཅོམ་ལྡན་འདས་སློབ་དཔོན་གྱི་བསྒྲུབ་
པར་བྱ་ཞེ་ན། ཕྱག་རྒྱ་ཆེན་པོས་ཞེས་བྱ་བ་གསུངས་ཏེ། ཕྱག་རྒྱ་ཆེན་པོ་བཅིངས་ལ་སྙིང་པོ་འདོན་ཅིང་བསྒྲུབ་པར་བྱའི། །དམ་ཚིག་དང་ཆོས་དང་ལས་ཀྱི་ཕྱག་རྒྱ་རྣམས་ཀྱིས་ནི་མ་ཡིན་ནོ། །མཚན་མ་དེ་ཉིད་འབྱུང་སྟེ་ཞེས་བྱ་བ་ནི་གང་རྡོ་རྗེ་ཐལ་མོ་བསྐོར་བས་འཇུག་པ་ལ་བསྟན་པ་ནི་འདིར་ཡང་
འབྱུང་ངོ་ཞེས་བྱ་བའི་དོན་ཏོ། །དངོས་གྲུབ་ཐམས་ཅད་ཀྱང་འགྲུབ་པར་འགྱུར་ཏེ་ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་གྱི་དངོས་གྲུབ་རྣམས་ལ་བཅོམ་ལྡན་འདས་མཚན་མའི་དངོས་པོ་སྐྱེད་པར་མཛད་པ་སྟེ། དེ་བས་ན་རིགས་ཐམས་ཅད་ཀྱི་དཀྱིལ་འཁོར་གྱི་སློབ་དཔོན་དུ་འགྱུར་
བའོ། །བཞུགས་པ་འདིས་ཀྱང་ཞེས་བྱ་བ་ནི་ལྔ་པོ་བསྡུས་པའི་འཇུག་པས་སོ། །དེ་བཞིན་དུ་ཞེས་བྱ་བ་ནི། ཇི་ལྟར་དང་པོའི་འཇུག་པས་དབང་བསྐུར་བ་ཐམས་ཅད་ཐོབ་པའམ། རྡོ་རྗེ་འཛིན་པ་ཉིད་ཀྱི་བར་དུ་ཐོབ་པ་སྟེ། དེ་ལྟར་ན་འདིས་ཀྱང་དབང་བསྐུར་བ་ཐམས་ཅད་ཐོབ་པའི་དངོས་གྲུབ་རྣམས་ཐོབ་
པར་འགྱུར་རོ་ཞེས་སྟོན་ཏོ། །དེ་ནས་དེ་བཞིན་དུ་རྡོ་རྗེ་བླང་བ་ལ་སོགས་པ་བྱས་ནས་ཞེས་བྱ་བ་ནི། ཇི་ལྟར་དང་པོའི་འཇུག་པ་ན། །བདག་ལ་བྱིན་གྱིས་བརླབས་པ་ལ་སོགས་པ་སྔོན་དུ་འགྲོ་བས་ཆུའི་དབང་བསྐུར་བ་དང་། ཕྱག་རྒྱ་དང་། ཅོད་པན་དང་། དར་དཔྱངས་དང་། རྡོ་རྗེ་དང་བདག་པོ་དང་མིང་དང་

59-1-84a

ལུང་བསྟན་པ་རྣམས་བླངས་ལ། སློབ་མ་གཞུག་པའི་ཕྱིར་རྗེས་སུ་གནང་བ་མནོས་ལ་སློབ་མ་གཞུག་པར་བྱའོ། །རྡོ་རྗེ་སློབ་མ་ཞེས་བྱ་བ་ལ་སོགས་པ་ལ། རྡོ་རྗེ་སེམས་དཔའ་བྱས་པའི་སློབ་མ་དེ་རྣམས་ལ། འདི་ལྟར་རྡོ་རྗེ་སློབ་དཔོན་གྱིས་གཞུག་པ་ལ་སོགས་པའི་
ཆོ་ག་རྒྱས་པ་ཐམས་ཅད་སློབ་དཔོན་ཉིད་ཀྱིས་བྱའོ། །ཕྱག་རྒྱ་བཅིང་བ་ཡང་བསླབ་པར་བྱའོ་ཞེས་བྱ་བ་ནི་གང་གིས་ལྷ་གང་ཞིག་བཟུང་བ་དེ་ལ་ལྷའི་རྡོ་རྗེ་སེམས་དཔའ་ལ་སོགས་པའི་གཟུགས་ཀྱི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་བཅིང་བ་བསླབ་པར་བྱའོ། །སེམས་ཅན་
གང་ཡང་དེ་བཞིན་གཤེགས་པ་ལ་སོགས་པ་ལྷ་ཐམས་ཅད་ཀྱི་རིགས་ལ་མོས་པ་དེ་རྣམས་ལ་ཡང་དཀྱིལ་འཁོར་འདི་ཉིད་དུ་དེ་བཞིན་གཤེགས་པ་ལ་སོགས་པའི་དཀྱིལ་འཁོར་དུ་འཇུག་པ་ལ་སོགས་པའི་ཆོ་ག་རྒྱས་པ་ཐམས་ཅད་བྱའོ། །དེ་བཞིན་དུ་ཞེས་བྱ་བ་ནི། ཇི་ལྟར་དེ་བཞིན་
གཤེགས་པ་ལ་སོགས་པའི་དཀྱིལ་འཁོར་དུ་ཁྱད་པར་གྱི་ཆོ་ག་རྒྱས་པར་འབྱུང་བ་དེ་བཞིན་དུ་འདིར་ཡང་བྱ་བ་སྟེ། གཞན་དག་གིས་ནི་དེ་རྣམས་ཀྱི་ཡིད་ལ་ཅི་འདོད་པའི་དངོས་གྲུབ་འགྲུབ་པར་མི་འགྱུར་ཏེ། ཁྱད་པར་གྱི་ཆོ་གའི་ནུས་པ་ལ་རག་ལས་པའི་ཕྱིར་རོ། །དེ་ནས་ལྷ་གཞན་དག་ལ་
དད་པ་རྣམས་དང་ཞེས་བྱ་བ་ལ་སོགས་པ་ལ། ལྷ་ཆེན་པོ་ལ་སོགས་པ་ལ་དད་པ་ཡང་དཀྱིལ་འཁོར་འདི་ཉིད་དུ་ཞི་བའི་མདུང་གིས་མཚན་པ་ལ་སོགས་པའི་དཀྱིལ་འཁོར་ཆོ་ག་རྒྱས་པར་བྱའོ། །དེ་བཞིན་དུ་འགྲུབ་པར་འགྱུར་རོ་ཞེས་བྱ་བ་ནི། ཇི་ལྟར་ཞི་བའི་མདུང་གིས་མཚན་པའི་དཀྱིལ་འཁོར་
དུ་འཇུག་པའི་མདུང་གིས་མཚན་པ་ལས་གསུངས་པའི་དངོས་གྲུབ་རྣམས་འགྲུབ་པར་འགྱུར་བ་དེ་བཞིན་དུ། འདིར་ཡང་དེ་ལས་གསུངས་པའི་འཇུག་པའི་ཆོ་གའི་སྟོབས་ཀྱིས་འགྲུབ་པར་འགྱུར་རོ། །དེ་ནས་ཞེས་བྱ་བ་ལ་སོགས་པ་ལ། དེ་ལྟར་སློབ་མ་གཞུག་པ་ལ་སོགས་པ་བྱས་ནས། རྡོ་རྗེ་
སེམས་དཔའ་ལ་སོགས་པའི་ཆོ་ག་གང་དང་གང་གིས་ཞུགས་པ་དེ་རྣམས་ནི་ཇི་ལྟར་ཞུགས་པ་རྣམས་སོ། །ཟས་དང་རོའི་བཅུད་དང་གནས་པ་ལ་སོགས་པ་ཐམས་ཅད་ཀྱིས་ཡང་དག་པར་ཚིམ་པར་བྱས་ལ་ཞེས་བྱ་བ་ནི། ཟས་ཐམས་ཅད་ནི་བཟའ་བ་དང་བཏུང་བ་ལ་སོགས་པ་ཇི་ལྟར་གྲགས་པ་

59-1-84b

རྣམས་སོ། །རོ་ཐམས་ཅད་ཅེས་བྱ་བ་ནི། ཥཊ་ལ་སོགས་པ་དྲུག་གོ། །གནས་པ་ནི་གར་གྱི་བསྟན་བཅོས་ལས་བཤད་པ་དང་། གནས་པ་དང་། འདུག་པ་དང་། འཆག་པ་དང་། ཉལ་བ་དང་། རྒྱུད་ལས་བཤད་པའི་གནས་པ་རང་གི་ལྷའི་ངོ་བོ་ཉིད་དུ་གསལ་བའི་ཡིད་ཀྱིས་འདུག་པ་སྟེ། དེ་
ལྟར་ཟས་དང་རོ་དང་གནས་པ་ཐམས་ཅད་དེ། དེ་དག་ཐམས་ཅད་ཀྱིས་སློབ་མ་ཐམས་ཅད་ཅི་འདོད་པར་ཚིམ་པར་བྱས་ལ། རྡོ་རྗེ་གར་དང་། མཆོད་པ་ལ་སོགས་པ་སློབ་དཔོན་གྱིས་བྱ་སྟེ། སློབ་དཔོན་སློབ་མ་དང་བཅས་པས། དཀྱིལ་འཁོར་ཆེན་པོ་མཆོད་པར་བྱ་བའི་ཕྱིར། བྱ་བ་འདི་ནི་འདི་
ཉིད་ཀྱི་འོག་ནས་ཤེས་པར་བྱའོ། །ཇི་ལྟར་ཞེས་བྱ་བ་ལ་སོགས་པ་ལ། དེ་ལྟར་གར་དང་མཆོད་པ་བྱས་ནས། ཅི་ནུས་པའི་ཚུལ་གྱིས་ཟས་དང་སྐོམ་ལ་སོགས་པའི་ལོངས་སྤྱོད་དང་ལྡན་པར་བྱའོ། །དེ་བཞིན་དུ་བཟླས་བརྗོད་ཀྱང་བྱས་ལ། ཇི་སྐད་ཅེས་པའི་གར་དང་གླུ་དང་དགོད་པ་ལ་སོགས་
པས་མཆོད་པ་ཇི་ལྟ་བ་བཞིན་དུ་བྱའོ། །དེ་ལ་འདིར་ནི་ཞེས་བྱ་བ་ལ་སོགས་པ་ལ་དཀྱིལ་འཁོར་ཆེན་པོ་འདིར་འཇུག་པ་ལ་ནི། བྱ་བའི་རྒྱུད་ལ་སོགས་པ་གཞན་དག་ལ་བཤད་པ་ལྟར། སྣོད་དང་སྣོད་མ་ཡིན་པ་བརྟག་པར་མི་བྱའོ། །ཅིའི་ཕྱིར་ཞེ་ན། སེམས་ཅན་གྱི་ཁམས་མ་ལུས་ཤིང་ལུས་པ་མེད་
པ་རྣམས་ཞེས་བྱ་བ་ལ་སོགས་པ་སྨོས་ཏེ། སེམས་ཅན་གྱི་ཁམས་ཐམས་ཅད་ནི་གང་གི་ཕྱིར་ཕྱག་རྒྱ་རྣམས་ཀྱིས་རང་གི་གཟུགས་བརྙན་དུ་རྒྱས་བཏབ་པས། འདི་དག་ནི་བདེ་བ་ཆེན་པོའི་དམ་ཚིག་ཡིན་པའི་ཕྱིར་རོ། །འདིར་བདེ་བ་ཆེན་པོ་ནི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ལ་བྱ་སྟེ། 
དེ་ཉིད་ནི་རྡོ་རྗེའོ། །དེ་ལས་བྱུང་བའི་དཀྱིལ་འཁོར་གྱི་ཚུལ་ལ་སོགས་པ་ནི་དམ་ཚིག་གོ། །ཇི་ལྟར་ན་ཡང་འདི་བདེ་བ་ཆེན་པོའི་དམ་ཚིག་གི་རྡོ་རྗེ་ཡིན་ཞིང་། ཕྱག་རྒྱ་ཐམས་ཅད་ཀྱིས་རྒྱས་བཏབ་པ་ཡིན་ཞེ་ན། འདོད་པའི་བསམ་པ་ཞེས་བྱ་བ་ལ་སོགས་པ་གསུངས་ཏེ། སེམས་ཅན་ཐམས་ཅད་ཀྱི་
བསམ་པ་ནི་གནས་ཏེ། རྡོ་རྗེ་སེམས་དཔའ་ལ་སོགས་པའི་མངོན་སུམ་དུ་བྱ་བར་མངོན་པར་འདོད་པའི་བསམ་པ་ནི། དེ་ཡོངས་སུ་རྫོགས་པ་ན་རྡོ་རྗེ་སེམས་དཔའ་ལ་སོགས་པ་མངོན་སུམ་དུ་བྱས་པའོ། །དེ་ཉིད་གྲུབ་ཅིང་རྫོགས་པ་ནི་རྡོ་རྗེའི་སྦྱོར་བའོ། །རྡོ་རྗེའི་སྦྱོར་བ་དེས་ནི། རྡོ་རྗེ་ཆོས་མཉམ་པ་

59-1-85a

ཉིད་ཀྱི་ཞེས་བྱ་བ་སྟེ། བྱང་ཆུབ་ཀྱི་སེམས་ལ་སོགས་པ་ནི་རྡོ་རྗེ་ཆོས་སོ། །དེ་རྣམས་ཀྱི་མཉམ་པ་ཉིད་ནི་དེ་བཞིན་ཉིད་དེ་རྡོ་རྗེ་ཆོས་ཀྱི་མཉམ་པ་ཉིད་དེ་རྒྱུར་གྱུར་པའི་ཕྱག་རྒྱས་སེམས་ཅན་གྱི་ཁམས་ཐམས་ཅད་རྒྱས་བཏབ་པ་འདི་ནི་བདེ་བ་ཆེན་པོའི་རྡོ་རྗེའི་སྦྱོར་བ་ཡིན་ཏེ། དེ་བས་
ན་དཀྱིལ་འཁོར་ཆེན་པོ་འདིར་གཞུག་པ་ལ་སྣོད་དང་སྣོད་མ་ཡིན་པ་བརྟག་པར་མི་བྱའོ། །འདི་སྐད་སྟོན་པར་འགྱུར་ཏེ། གང་གི་ཕྱིར་དཀྱིལ་འཁོར་ཆེན་པོ་འདིར་ཞུགས་པས་ནི་རང་བཞིན་གྱིས་རྣམ་པར་དག་པའི་དེ་ཁོ་ན་ཉིད་བཅུ་ཁོང་དུ་ཆུད་པར་འགྱུར་ལ། དེ་ཁོང་དུ་ཆུད་པས་ཇི་ལྟར་ཞུགས་པའི་
སེམས་ཅན་གྱི་ཁམས་རྣམས་རྡོ་རྗེ་སེམས་དཔའ་ལ་སོགས་པའི་དངོས་གྲུབ་རྣམས་འགྲུབ་པར་འགྱུར་ཏེ། དེ་བས་ན་དཀྱིལ་འཁོར་ཆེན་པོ་འདིར་འཇུག་པ་ལ་སྣོད་དང་སྣོད་མ་ཡིན་པ་བརྟག་པར་མི་བྱའོ། །དེ་ལྟར་ན་དེ་ནས་བཅོམ་ལྡན་འདས་ཕྱག་ན་རྡོ་རྗེ་ཞེས་བྱ་བ་ནས་བརྩམས་ཏེ། དཀྱིལ་འཁོར་ཆེན་
པོའོ་ཞེས་བྱ་བའི་བར་གྱི་བཤད་པས་སློབ་དཔོན་གྱི་ལས་ཀྱི་ཆོ་ག་དང་། སློབ་མ་ཞུགས་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ།།  །།གཞན་ཡང་དེ་དག་ཉིད་གསལ་བར་བྱ་བའི་ཕྱིར། ཆོ་ག་ཐམས་ཅད་བཤད་པར་བྱ་སྟེ། དེ་ལ་དང་པོ་ཁོ་ནར་སློབ་དཔོན་དམ་ཚིག་ཆེན་པོའི་དེ་ཁོ་ན་ཉིད་རྡོ་རྗེ་
བྱིན་གྱིས་རློབ་པའི་དཀྱིལ་འཁོར་ཆེན་པོར་དབང་བསྐུར་བ་དང་། དམ་ཚིག་ཐོབ་པ་དེ་ལས་གསུངས་པའི་དམ་ཚིག་ཡོངས་སུ་སྐྱོང་བས། སེམས་ཅན་ཡོངས་སུ་དག་པ་གསང་བའི་ཆོ་ག་ཐམས་ཅད་ཀྱི་བྱ་བ་ཤེས་པ་དཔའ་བ། བརྟན་པ། སྤྲོ་བ་དང་ལྡན་པ། དུལ་བ་འདུལ་བའི་ཀུན་དུ་སྤྱོད་པ་དང་ལྡན་
པ་ལ་གནས་པ་དད་པ་དང་ལྡན་པ། ཆོས་ཟབ་མོ་ལ་ལྷག་པར་མོས་པ། སེམས་ཅན་ཐམས་ཅད་ཡོངས་སུ་སྐྱོང་བའི་བློ་དང་ལྡན་པ། ལུས་དང་སྲོག་ལ་ལྟོས་པ་མེད་པ་དང་། བཅོམ་ལྡན་འདས་ཡོངས་སུ་མཉེས་པར་བྱའོ། །དེ་ཡང་རང་བཞིན་གྱིས་རྣམ་པར་དག་པ་ལ་ལྷག་པར་མོས་པས་ནང་གི་
ཁྲུས་བྱས་ལ། ཆུའི་ཁྲུས་དོན་དུ་གཉེར་བ་དང་ལྡན་པ་རྣམས་ཀྱིས་ཀྱང་ཁྲུས་ཀྱི་ཆོ་གའམ། རང་ཉིད་ཇི་ལྟར་དགའ་བས་ཆུའི་ཁྲུས་བྱའོ། །དེ་ནས་ལྷའི་ཁང་པ་དང་ཉེ་བར་ཕྱིན་པ་དང་། དེ་རྐང་པ་གཉིས་བཀྲུས་ལ་ཉེ་རེག་བྱས་ནས། ཧཱུྃ་ཕཊ་ཅེས་བྱ་བའི་ཁྲོ་བོའི་སྙིང་པོ་ལན་བརྒྱ་སྟོང་བཟླས་ཏེ། གཡོན་པའི་

59-1-85b

ཁྲོ་བོའི་ཁུ་ཚུར་གཡོན་ཕྱོགས་སུ་བསྐོར་བས་བགེགས་ཐམས་ཅད་བསལ་ལ། ལྷའི་ཁང་པར་འཇུག་པར་བྱའོ། །དེ་ནས་རྡོ་རྗེ་རྩེ་མོའི་སྔགས་ཡོངས་སུ་བཟླས་པའི་སྤོས་ཆུས་རྟེན་དང་ལྷའི་ཁང་པ་བསང་གཏོར་བྱས་ལ། ས་མ་ཡ་སྟྭཾ་ཞེས་བརྗོད་ལ་འདུག་པར་བྱའོ། །དེ་ནས་ཡང་ལྐོག་མའི་
ཕྱོགས་སུ་ཡི་གེ་ཧྲཱིཿ་ལས་པདྨ་འདབ་མ་བརྒྱད་པ་ལྕེའི་པདྨའི་འདབ་མ་ལ་ཧཱུྃ་ལས་རྡོ་རྗེ་རྩེ་ལྔ་པ་དཀར་པོ་བསྐྱེད་ལ། བཛྲ་ཛི་ཧྭ་ཞེས་བྱ་བ་འདིས་བྱིན་གྱིས་བརླབ་པར་བྱའོ། །ལག་པ་གཉིས་སུ་ཡང་ཨ་ལས་ཟླ་བའི་དཀྱིལ་འཁོར་གཉིས་བསམས་ལ། དེའི་སྟེང་དུ་ཧཱུྃ་གཉིས་ལ་རྡོ་རྗེ་རྩེ་ལྔ་པ་གཉིས་
བསམ། ལག་པའི་རྩེ་མོ་ཡང་ཧཱུྃ་ཉིད་ལས་རྡོ་རྗེ་རྩེ་གཅིག་པའི་གཟུགས་སུ་རྣམ་པར་བསམས་ལ། ཧཱུྃ་ལས་རྡོ་རྗེ་མེ་ལྟར་འབར་བར་བདག་ཉིད་སྤྲུལ་ཏེ། ཨོཾ་གྲྀཧྞ་བཛྲ་ས་མ་ཡ་ཧཱུྃ་བཾ་ཞེས་བརྗོད་ལ། ཁྲོ་བོ་ཏི་རིནྟི་རིའི་ཕྱག་རྒྱ་བཅིང་བར་བྱ་སྟེ། རྡོ་རྗེ་བསྡམས་པ་ནང་བཅིངས་ནས། །ཡིད་ཀྱིས་ཁྲོས་
ནས་དགག་བྱ་ལ། །རྡོ་རྗེ་མཐེ་བོ་དམ་པོ་སྟེ། །ཁྲོ་བོ་ཏི་རིནྟི་རིར་བཤད། །ཨ་བཛྲ་ཛྭཱ་ལ་ཨ་ན་ལཱརྐ་ཧཱུཾ། ཨ་བྷི་ཥིཉྩ་མཾ་ཞེས་བྱ་བ་དང་། ཏི་རིནྟི་རིའི་ཕྱག་རྒྱས་རྡོ་རྗེ་ཕྲེང་བའི་དབང་བསྐུར་བ་བླང་བར་བྱའོ། །རྡོ་རྗེ་བསྡམས་པ་བཅིངས་ལ་མཐེ་བོ་གཉིས་སྙོམས་པའི་ཁུ་ཚུར་སྤྱི་བོར་བཞག་པ་འདི་ནི་རྡོ་རྗེ་ཏི་
རིནྟི་རི་སྟེ། འདིས་སྤྱི་བོ་ནས་བརྩམས་ཏེ། ཕྱོགས་བཞིར་རྡོ་རྗེ་ཕྲེང་བའི་དབང་བསྐུར་བའི་ཚུལ་བྱས་ལ། ཡང་ཕྱག་རྒྱ་འདི་ཉིད་དཔྲལ་བའི་ཕྱོགས་སུ་བཞག་ནས་གཉིས་སུ་བྱས་ཏེ། དར་དཔྱངས་བཅིངས་པའི་ཚུལ་ཇི་ལྟ་བ་བཞིན་དུ་བྱས་ཏེ། མཉམ་པའི་ཐལ་མོས་ལྷ་རྣམས་མཉེས་པར་བྱའོ། །
བཛྲ་ཏུ་ཥྟྱ་ཧོ། ཡང་ཨོཾ་བཛྲ་ཛྭཱ་ལ་ཨ་ན་ལཱརྐ་ཧཱུྃ་ཞེས་བརྗོད་དེ། རྡོ་རྗེ་སེམས་དཔའི་སྐྱིལ་མོ་ཀྲུང་བཅས་ལ། གཡོན་པ་རྡོ་རྗེ་ཁུ་ཚུར་སྙིང་གའི་ཕྱོགས་སུ་བཞག་ནས། གཡས་རྡོ་རྗེ་གསོར་ཞིང་བགེགས་ཐམས་ཅད་གཞོམ་པར་བྱའོ། །དེ་ནས་ཧཱུྃ་བཛྲ་ཨ་ན་ལ་ཧ་ན་ད་ཧ་པ་ཙ་མ་ཐ་བྷཉྫ་ར་ཎ་ཧཱུྃ་ཕཊ་ཅེས་བྱ་
བ་དང་། རྡོ་རྗེ་མེ་ལྟར་འབར་བའི་དམ་ཚིག་གི་ཕྱག་རྒྱ་བཅིངས་ལ་བགེགས་ཐམས་ཅད་བསྐྲད་པ་དང་། བསྲེག་པ་དང་། འཚེད་པ་དང་། བཅིང་བ་ལ་སོགས་པ་བྱའོ། །རྡོ་རྗེ་བསྡམས་པ་ནང་དུ་བཅིངས་ལ། སོར་མོ་རྣམས་ནང་དུ་འབར་བ་ལྟ་བུར་བྱས་ལ། མཐེ་བོ་རྡོ་རྗེ་བསྒྲེང་བ་འདི་ནི། ཁྲོ་བོ་

59-1-86a

ཏི་རིནྟི་རི་ཞེས་བྱ་བ་རྡོ་རྗེ་མེ་ལྟར་རབ་ཏུ་འབར་བའི་དམ་ཚིག་གི་ཕྱག་རྒྱའོ། །རྡོ་རྗེ་བསྡམས་པ་བཅིངས་ལ་མཐེ་བོ་གཉིས་བརྐྱང་སྟེ། བསྡམས་པ་ས་ལ་གཞག་སྟེ། བཛྲ་ནཻ་ཏྲི་བནྡྷ་སརྦ་བིགྷྣཱན་ཞེས་བྱ་བས་བགེགས་ཐམས་ཅད་བཅིང་བར་བྱའོ། །རྡོ་རྗེ་བསྡམས་པ་བརྐྱང་ལ་ས་ལ་
རེག་པར་བྱས་པ་དང་། ཨོཾ་བཛྲ་དྲྀ་དྷོ་མེ་བྷ་བ་རཀྵ་སརྦཾ་སྭཱ་ཧཱ་ཞེས་བྱ་བས་ས་འོག་བཅིང་བར་བྱའོ། །རྡོ་རྗེ་འཇིགས་བྱེད་ཀྱི་སྤྱན་གྱིས་ནམ་མཁའ་བཅིང་བར་བྱ་སྟེ། ཨོཾ་ཧུ་ལུ་ཧུ་ལུ་ཧཱུྃ་ཕཊ། དེ་ལ་འདིའི་ཕྱག་རྒྱ་ནི་རྡོ་རྗེ་ཁུ་ཚུར་གཉིས་བཅིངས་ལ་མགལ་མེའི་འཁོར་ལོ་བཞིན་དུ་བསྐོར་ནས། མགོ་
བོའི་སྟེང་དུ་མཛུབ་མོ་ལྕགས་ཀྱུ་ལྟར་བཞག་པ་འདི་ནི་རྡོ་རྗེ་འཇིགས་བྱེད་ཀྱི་སྤྱན་གྱི་ཕྱག་རྒྱའོ། །ཡང་རྡོ་རྗེ་གནོད་སྦྱིན་གྱི་རྡོ་རྗེ་འཇིགས་བྱེད་སྤྱན་གྱི་སྟེང་དུ་བཅིང་བར་བྱ་སྟེ། ཨོཾ་བཛྲ་ཡཀྵ་ཧཱུྃ། རྡོ་རྗེ་ཐལ་མོ་ལས་མཐེ་བོ་གཉིས་བརྐྱང་སྟེ། མཛུབ་མོ་གཉིས་མཆེ་བ་ལྟ་བུར་བྱས་ཏེ། ཁར་བཞག་པ་
འདི་ནི་རྡོ་རྗེ་གནོད་སྦྱིན་གྱི་ཕྱག་རྒྱའོ། །རྡོ་རྗེ་གཙུག་ཏོར་ཕྱག་རྒྱ་དང་ལྡན་པས་ཤར་ཕྱོགས་བཅིང་བར་བྱ་སྟེ། ཨོཾ་དྲུཾ་བནྡྷཾ་ཧཾ་ཞེས་བྱ་བའམ། ཏྲུཾ་ཞེས་བྱའོ། །རྡོ་རྗེ་ཁུ་ཚུར་གཉིས་ལས་མཐེ་ཆུང་ལུ་གུ་རྒྱུད་དུ་སྦྲེལ་ལ། མཛུབ་མོ་གཉིས་ཀྱི་རྩེ་མོ་སྦྱར་ཏེ། བཟློག་ནས་སྤྱི་བོར་བཞག་པ་ནི་རྡོ་རྗེ་གཙུག་
ཏོར་གྱི་ཕྱག་རྒྱའོ། །ཡང་རྡོ་རྗེ་ཞགས་པས་དེ་ཉིད་བཅིང་བར་བྱ་སྟེ། ཧཱུྃ་བཛྲ་པཱ་ཤ་ཧྲི། རྡོ་རྗེ་ཁུ་ཚུར་གཉིས་ཀྱིས་མཁྲིག་མར་མདུད་པ་བྱ་བ་ནི་རྡོ་རྗེ་ཞགས་པའི་ཕྱག་རྒྱའོ། །རྡོ་རྗེ་བ་དན་གྱིས་ནུབ་ཕྱོགས་བཅིང་བར་བྱ་སྟེ། ཨོཾ་བཛྲ་པཱ་ཏཾ་ཀེ་ནི་ར་ཊ། རྡོ་རྗེ་བསྡམས་པ་ལས་མཐེ་བོང་གཉིས་སེམས་དཔའི་
སྐྱིལ་མོ་ཀྲུང་དུ་བྱས་ཏེ། མཛུབ་མོ་གཉིས་མཉམ་པོར་ཕྱེ་ལ། མཐེ་ཆུང་གཉིས་བ་དན་ལྟར་བྱ་བ་འདི་ནི་རྡོ་རྗེ་བ་དན་གྱི་ཕྱག་རྒྱའོ། །རྡོ་རྗེ་ནག་མོས་བྱང་ཕྱོགས་བཅིང་བར་བྱ་སྟེ། ཧྲི་བཛྲ་ཀཱ་ལི་རུ་ཊ་མ་ཊ། རྡོ་རྗེ་གནོད་སྦྱིན་གྱི་ཕྱག་རྒྱ་ཉིད་ཁར་བརྟན་པར་བཞག་པ་ནི་རྡོ་རྗེ་ནག་མོའི་ཕྱག་རྒྱའོ། །རྡོ་རྗེ་རྩེ་
མོས་ལྷོ་ཕྱོགས་བཅིང་བར་བྱ་སྟེ། ཨོཾ་བཛྲ་ཤི་ཁ་ར་རུ་ཊ་མ་ཊ། རྡོ་རྗེ་ཁུ་ཚུར་གཉིས་ཀྱིས་རི་བོ་འདེགས་པའི་ཚུལ་དུ་བྱེད་པ་ནི་རྡོ་རྗེ་རྩེ་མོའི་ཕྱག་རྒྱའོ། །རྡོ་རྗེ་ལས་ཀྱིས་དཀྱིལ་འཁོར་བཅིང་བ་བྱས་ལ་ར་བ་བྱ་སྟེ། ཧཱུྃ་བཛྲ་ཀརྨ། ཡང་རྡོ་རྗེ་ཧཱུྃ་མཛད་ཀྱི་ནང་དུ་ར་བ་བྱས་ཏེ། ཧཱུྃ་རྡོ་རྗེ་ཁུ་ཚུར་གཉིས་བཅིངས་

59-1-86b

ལ། མཁྲིག་མ་གཉིས་བསྣོལ་ཏེ། མཐེ་ཆུང་གཉིས་ལྕགས་ཀྱུར་སྦྲེལ་ལ། ཁམས་གསུམ་རྣམ་པར་རྒྱལ་བ་ཞེས་བྱ་བ་མཛུབ་མོ་གཉིས་སྡིགས་མཛུབ་ཏུ་བསྒྲེང་བ་འདི་ནི་རྡོ་རྗེ་ཧཱུྃ་མཛད་ཀྱི་ཕྱག་རྒྱའོ། །འདི་ཉིད་ལས་གུང་མོ་དང་མཛུབ་མོ་གཉིས་རྡོ་རྗེར་བྱ་བ་ནི། རྡོ་རྗེ་ལས་ཀྱི་ཕྱག་རྒྱའོ། །རྡོ་རྗེ་
བསྡམས་པ་དང་བཛྲ་བནྡྷ་བཾ་ཞེས་བྱ་བས་རྡོ་རྗེའི་དྲ་བ་བྱ་བའོ། །དེ་ནས་རྡོ་རྗེ་གནོད་སྦྱིན་ཡོངས་སུ་བཟླས་པའི་སྤོས་ཆུས་སྣོད་ལྷའི་ཁང་པའི་སྒོར་བསང་གཏོར་བྱ་བའི་ཕྱིར་གཞག་ལ། རྡོ་རྗེ་མེའི་སྔགས་བཟླས་པའི་སྤོས་ཆུས་མཆོད་པའི་ཡན་ལག་ཐམས་ཅད་བསང་གཏོར་བྱ་བ་དང་། རྡོ་རྗེ་མེ་ལྟར་
འབར་བ་ཕྱག་རྒྱ་དང་བཅས་པ་ཡང་བཟླས་པར་བྱའོ། །དེ་ནས་ཨོཾ་བཛྲ་པུཥྤེ་ཧཱུྃ་ཞེས་བྱ་བ་དང་། མེ་ཏོག་གི་ཕྱག་རྒྱས་མེ་ཏོག་བྱིན་གྱིས་རློབ། ཨོཾ་བཛྲ་གནྡྷ་ཞེས་བྱ་བ་དང་། དྲིའི་ཕྱག་རྒྱས་དྲི། ཨོཾ་བཛྲ་དྷཱུ་པེ་ཧཱུྃ་ཞེས་བྱ་བ་དང་། རྡོ་རྗེ་བདུག་པའི་ཕྱག་རྒྱས་བདུག་པ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་
ཨཱདྱ་ནུཏྤནྣ་ཏྭཱཏ་ཞེས་བྱ་བ་དང་། རལ་གྲིའི་ཕྱག་རྒྱས་ལྷ་བཤོས་ཏེ། །རྡོ་རྗེ་བསྡམས་པས་རལ་གྲི་འདེབས་པ་ལྟར་བྱེད་པ་ནི་རལ་གྲིའི་ཕྱག་རྒྱའོ། །ཨ་བཛྲ་ཨཱ་ལོ་ཀེ་ཧཱུྃ་ཞེས་བྱ་བ་དང་། མར་མེའི་ཕྱག་རྒྱས་ནི་མར་མེ་ལའོ། །ཧཱུྃ་ཞེས་བྱ་བ་དང་། ཏིལ་དང་། ནས་དང་། ཀུ་ཤ་དང་། མེ་ཏོག་དཀར་པོ་
དང་། འབྲས་ཡོས་དང་། ཙནྡན་དཀར་པོའི་དུང་ཆོས་ལ་སོགས་པའི་སྣོད་གཙང་མའི་ནང་དུ་བཞག་སྟེ། རྡོ་རྗེ་ཐལ་མོ་ཁ་ཕྱེ་བའི་མཆོད་ཡོན་གྱི་ཕྱག་རྒྱས་ལན་གསུམ་མམ་བདུན་ནམ་ཉི་ཤུ་རྩ་གཅིག་གི་བར་དུ་ཡོངས་སུ་བཟླས་ལ། དེ་དག་ཐམས་ཅད་གཞག་པར་བྱའོ། །མཆོད་རྟེན་ཐམས་
ཅད་དགུག་པ་དང་། །བདག་ལ་བྱིན་བརླབས་སོགས་བསྒྲུབས་པས། །རྟག་ཏུ་རྡོ་རྗེ་དྲིལ་འཆང་ཞིང་། །དངོས་གྲུབ་མཆོག་ནི་བསྒྲུབ་པར་བྱ། །ལུགས་མའམ་ཡང་ན་བརྐོས་པའམ། །བྱས་པའམ་ནི་བྲིས་པ་ཡི། །དང་པོའི་འཁོར་ལོའི་གཞག་ནས་ནི། །དེ་ནི་སླར་ཡང་རབ་ཏུ་བསྒྲུབ། །ཡི་གེ་
ཧཱུྃ་འདོན་ཅིང་དང་པོའི་རྡོ་རྗེའི་ཕྱག་རྒྱ་བཅིངས་ལ། ཨ་ནུ་རཱ་ག་ཡཱ་མི་ཧཱུྃ་ཞེས་བརྗོད་དེ། ས་ལ་གཞག་ནས་རྡོ་རྗེ་སེམས་དཔའི་དཀྱིལ་འཁོར་ཆེན་པོ་སྤྲུལ་ལ། དེ་ཉིད་ཁར་གཞག་ན་དཀྱིལ་འཁོར་དེར་རབ་ཏུ་གནས་པར་འགྱུར་རོ། །དེ་ནས་གལ་ཏེ་འབྱོར་ན་མེ་ཏོག་ལ་སོགས་པས་དཀྱིལ་འཁོར་མཆོད་

59-1-87a

ལ། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་པྲ་ཎ་མེ་ན་བཛྲ་བནྡྷ་ནཾ་ཀ་རོ་མི་ཞེས་བྱ་བ་དང་། ཕྱོགས་ཐམས་ཅད་དུ་དཀྱིལ་འཁོར་ལྔ་པས་བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པ་ལ་ཕྱག་བྱའོ། །ཡང་ཤར་ཕྱོགས་ནས་ནུབ་ཏུ་བལྟས་ཏེ། སྔགས་འདི་དང་རྡོ་རྗེ་
ཐལ་མོ་བརྐྱང་ནས་ལུས་ཐམས་ཅད་ཀྱིས་ཕྱག་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་ཨུ་པསྠ་ནཱ་ཡ། ཨཱཏྨ་ནཾ་ནི་རྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་སཏྭ་ཨ་དྷི་ཏིཥྠ་སྭ་མཾ། དེ་ནས་དེ་བཞིན་དུ་གནས་པ་ལས། རྡོ་རྗེ་ཐལ་མོ་སྙིང་གའི་ཕྱོགས་སུ་གཞག་ལ། ལྷོ་ཕྱོགས་ནས་བྱང་དུ་ཁ་བལྟས་ཏེ།
སྔགས་འདི་དང་དཔྲལ་བ་ས་ལ་རེག་པས་ཕྱག་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་ཨ་བྷི་ཥེ་ཀཱ་ཡ་ཨཱཏྨ་ནཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་རཏྣ་ཨ་བྷི་ཥིཉྩ་མཾ། དེ་ནས་དེ་བཞིན་དུ་གནས་པ་ལས། རྡོ་རྗེ་ཁུ་ཚུར་སྤྱི་བོར་གཞག་ལ། ནུབ་ཕྱོགས་སུ་ཁ་ཤར་དུ་བལྟས་ཏེ། སྔགས་འདི་དང་ཁ་ས་ལ་རེག་པས་
ཕྱག་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་པྲ་བརྟ་ནཱ་ཡ། ཨཱཏྨ་ནཾ་ནི་ཏ་ཡཱ་མི་སརྦ་ཏ་ཐཱ་ག་ཏ་བཛྲ་དྷརྨ་པྲ་བརྟ་ཡ་མཾ། དེ་ནས་དེ་བཞིན་དུ་གནས་པ་ལས། རྡོ་རྗེ་ཐལ་མོ་སྙིང་གར་གཞག་སྟེ། བྱང་ཕྱོགས་སུ་ལྷོར་ཁ་བལྟས་ཏེ། སྔགས་འདི་དང་སྤྱི་བོས་རེག་པས་ཕྱག་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་
ཀརྨ་ཎེ། ཨཱཏྨ་ནཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་ཀརྨ་ཀུ་རུ་མ། དེ་ནས་ཤར་ཕྱོགས་སུ་པུས་མོ་གཉིས་ས་ལ་བཙུགས་ཏེ་འདུག་ལ། རྡོ་རྗེ་ཐལ་མོ་སྙིང་གར་སྦྱར་ཏེ། སྡིག་པ་ཐམས་ཅད་སོ་སོར་བཤགས་པར་བྱའོ། །ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། 
དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་སུ་ཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷ་ཐམས་ཅད་དགོངས་སུ་གསོལ། བདག་རྡོ་རྗེ་མིང་འདི་ཞེས་བྱ་བ་ཕྱོགས་བཅུའི་སངས་རྒྱས་དང་བྱང་ཆུབ་
སེམས་དཔའ་ཐམས་ཅད་ཀྱི་སྤྱན་སྔར་དང་། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་སུ་ཞུགས་པ་ཐམས་ཅད་དང་། སྙིང་པོ་དང་ཕྱག་རྒྱ་དང་། གསང་སྔགས་དང་རིག་སྔགས་ཀྱི་ལྷ་ཐམས་ཅད་ཀྱི་སྤྱན་སྔར་སྡིག་པ་ཐམས་ཅད་སོ་སོར་བཤགས་པར་བགྱིའོ། །

59-1-87b

ཕྱོགས་བཅུའི་འཇིག་རྟེན་གྱི་ཁམས་ན། འདས་པ་དང་། མ་འོངས་པ་དང་། ད་ལྟར་བཞུགས་པའི་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་དང་། རང་སངས་རྒྱས་དང་། འཕགས་པ་ཉན་ཐོས་དང་། ཡང་དག་པར་སོང་བ་དང་། ཡང་དག་པར་ཞུགས་པ་རྣམས་དང་། སེམས་ཅན་གྱི་ཚོགས་
ཐམས་ཅད་ཀྱི་བསོད་རྣམས་ཐམས་ཅད་ལ་ཡང་རྒྱ་ཆེར་རྗེས་སུ་ཡི་རང་བར་བགྱིའོ། །ཕྱོགས་བཅུའི་སངས་རྒྱས་བཅོམ་ལྡན་འདས་ཆོས་ཀྱི་འཁོར་ལོ་བསྐོར་བར་མི་མཛད་པ་ཐམས་ཅད་ལ་ཆོས་ཀྱི་འཁོར་ལོ་དམ་པ་བསྐོར་བར་མཛད་པར་བསྐུལ་བར་བགྱིའོ། །ཕྱོགས་བཅུའི་འཇིག་རྟེན་ན་སངས་རྒྱས་
བཅོམ་ལྡན་འདས་ཡོངས་སུ་མྱ་ངན་ལས་འདའ་བར་བཞེད་པ་དེ་དག་ཐམས་ཅད་ལ་ཡོངས་སུ་མྱ་ངན་ལས་མི་འདའ་བར་གསོལ་བར་འཚལ་ལོ། །དེ་ནས་མེ་ཏོག་གི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་
ཐམས་ཅད་ན། ལྷ་དང་མི་རྣམས་ཀྱི་མེ་ཏོག་གི་བྱེ་བྲག་ཡིད་ལས་བྱུང་བའམ། ཆུ་ལས་སྐྱེས་པའམ། ཐང་ལས་སྐྱེས་པ་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར། ཕྱོགས་བཅུའི་སངས་རྒྱས་དང་བྱང་
ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། བདུག་པའི་ཕྱག་རྒྱ་བཅིངས་ལ། འདི་སྐད་ཅེས་
བརྗོད་པར་བྱ་སྟེ། གང་ཡང་ཕྱོགས་བཅུའི་འཇིན་རྟེན་གྱི་ཁམས་འདིའམ་གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། ལྷ་དང་མི་རྣམས་ཀྱི་བདུག་པའི་བྱེ་བྲག་ལྷན་ཅིག་སྐྱེས་པའམ། ཡང་དག་པར་སྦྱར་བའམ། ཡོངས་སུ་གྱུར་པ་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་
ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་ལ་

59-1-88a

དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་དྷཱུ་པེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། མར་མེའི་ཕྱག་རྒྱ་བཅིངས་ཏེ་འདི་སྐད་ཅེས་བརྗོད་པར་བྱ་སྟེ གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། ལྷ་དང་མི་རྣམས་ཀྱི་སྣང་
བའི་བྱེ་བྲག་ཡིད་ལས་བྱུང་བའམ། རིན་པོ་ཆེའི་འོད་དམ། མར་མེའི་སྣང་བ་ལ་སོགས་པ་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་
བཅས་པར་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་ཨཱ་ལོ་ཀེ་པཱུ་ཛ་མེ་གྷ་སུ་མུ་དྲ་སྥ་ར་ཎ་ས་མ་ཡེ་ཧཱུྃ། དྲིའི་ཕྱག་རྒྱ་བཅིངས་ལ། འདི་སྐད་ཅེས་བརྗོད་པར་བྱ་སྟེ། གང་འཇིག་
རྟེན་གྱི་ཁམས་འདི་འམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། ལྷ་དང་མི་རྣམས་ཀྱི་དྲིའི་བྱེ་བྲག་ལྷན་ཅིག་སྐྱེས་པའམ་ཡང་དག་པར་སྦྱར་བའམ། ཡོངས་སུ་གྱུར་པ་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་
མཆོད་པའི་ལས་བྱ་བའི་ཕྱིར། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་གནྡྷ་པཱུ་ཛ་མེ་གྷ་
ས་མུ་དྲ་སྥ་ར་ཎ་ས་མ་ཡེ་ཧཱུྃ། ཐལ་མོ་ཁོང་སྟོང་དུ་སྦྱར་བ་བཅིངས་ལ་འདི་སྐད་ཅེས་བརྗོད་པར་བྱ་སྟེ། གང་འཇིག་རྟེན་གྱི་ཁམས་འདིའམ་གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། རིན་པོ་ཆེའི་རི་བོའམ། རྒྱ་མཚོ་རིན་པོ་ཆེའི་ཚོགས་གང་དག་ཡོད་པ་དེ་དག་ཐམས་ཅད་ཀྱང་འདི་ལྟ་སྟེ། 
མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར། ཕྱོགས་བཅུའི་སངས་རྒྱས་དང་། བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་

59-1-88b

ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་བོ་དྷྱཾ་ག་རཏྣ་ཨཱ་ལཾ་ཀ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་ནས་བཞད་པའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། གང་འཇིག་རྟེན་གྱི་ཁམས་འདི་འམ། གང་ཡང་ཕྱོགས་བཅུའི་འཇིག་རྟེན་གི་ཁམས་ཐམས་ཅད་ན། དགོད་པ་དང་། 
སྒེག་པ་དང་། དགའ་བ་དང་། རྩེད་འཇོའི་བདེ་བའི་བྱེ་བྲག་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར། ཕྱོགས་བཅུའི་སངས་རྒྱས་དང་། བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་
ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་ཧ་སྱ་ལཱ་སྱ་ར་ཏི་ཀྲཱི་ཌ་སཽ་ཁྱ་ཨ་ནུཏྟ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། བཞད་པའི་ཕྱག་རྒྱ་དེ་ཉིད་རྡོ་རྗེ་ཐལ་མོ་བསྐོར་བ་འདི་སྤྱི་བོར་བཞག་ལ། 
ཡང་ཐལ་མོ་ཁོང་སྟོང་དུ་སྦྱར་བ་བཅིངས་ནས། འདི་སྐད་ཅེས་བརྗོད་པར་བྱ་སྟེ། གང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། དཔག་བསམ་གྱི་ཤིང་ངམ། གོས་ཀྱི་ཤིང་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་
གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་
ལ་དབུལ་བར་བགྱིའོ། །ཨ་སརྦ་ཏ་ཐཱ་ག་ཏ་ཨ་ནུཏྟ་ར་བོ་དྷི་ཨཱ་ལཾ་ཀཱ་ར་བསྟྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་ནས་སེམས་ཅན་ཐམས་ཅད་ཀྱི་འཁོར་བའི་སྡུག་བསྔལ་རྗེས་སུ་དྲན་པར་བྱས་ལ། བཅོམ་ལྡན་འདས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་བཅིངས་ཏེ། སྙིང་རྗེ་ཆེན་པོའི་དབང་གིས་སེམས་
ཅན་ཐམས་ཅད་བསྒྲལ་བའི་ཕྱིར། བྱང་ཆུབ་ཏུ་སེམས་བསྐྱེད་དེ། མ་བསྒྲལ་བ་རྣམས་བསྒྲལ་བར་བྱ་བའི་ཕྱིར་དང་། མ་གྲོལ་བ་རྣམས་དགྲོལ་བར་བྱ་བའི་ཕྱིར་དང་། དབུགས་མ་ཕྱིན་པ་རྣམས་དབུགས་དབྱུང་བར་བྱ་བའི་ཕྱིར་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླ་བར་

59-1-89a

བྱ་བའི་ཕྱིར་དང་། སེམས་ཅན་གྱི་ཁམས་མ་ལུས་པ་འཁོར་བའི་རྒྱ་མཚོ་ལས་ཡང་དག་པར་བསྒྲལ་བར་བྱ་བའི་ཕྱིར། བྱང་ཆུབ་ཏུ་སེམས་བསྐྱེད་པར་བགྱིའོ། །ཨོཾ་སརྦ་ཏ་ཐཱ་ག་ཏ་བཛྲ་བོ་དྷི་ཙིཏྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། སྒེག་མོའི་ཕྱག་རྒྱ་བཅིངས་ལ། འདི་སྐད་ཅེས་
བརྗོད་པར་བྱ་སྟེ། སེམས་ཅན་ཐམས་ཅད་ཡོ་བྱད་ཐམས་ཅད་ཀྱིས་ཡང་དག་པར་འབྱོར་ཅིང་ཕུན་སུམ་ཚོགས་པ་ཐམས་ཅད་འདོད་པ་ཙམ་ལ་རག་ལུས་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་མ་ཧཱ་བཛྲོདྡྷ་བ་དཱ་ན་པཱ་ར་མི་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། རྡོ་རྗེ་ཕྲེང་བ་མའི་ཕྱག་རྒྱ་བཅིངས་ལ། 
འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་མི་དགེ་བའི་ལུས་དང་ངག་དང་ཡིད་ཀྱི་ལས་ཀྱི་མཐའ་ཐམས་ཅད་དང་ཡང་དག་པར་བྲལ་བར་གྱུར་ཅིག །དགེ་བའི་ལུས་དང་ངག་དང་ཡིད་ཀྱི་ལས་ཀྱི་མཐའ་ཐམས་ཅད་དང་ལྡན་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་མ་ཧཱ་བོ་དྷི་ཧ་ར་ཤཱི་ལ་
པཱ་ར་མི་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། རྡོ་རྗེ་གླུ་མཁན་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་མཚན་དང་དཔེ་བྱད་ཐམས་ཅད་ཀྱིས་ལུས་ལ་ཡང་དག་པར་བརྒྱན་པར་བྱས་པ་དང་། རྟག་ཏུ་ཕན་ཚུན་འཇིགས་པ་མེད་པ་དང་། ཞེ་འགྲས་པ་མེད་པར་
ཞུགས་ཤིང་མིག་དང་ཡིད་མངོན་པར་དགའ་བ་དང་། ཆོས་ཟབ་མོ་ལ་བཟོད་པ་དང་ལྡན་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་ནུ་ཏྟ་ར་མ་ཧཱ་དྷརྨ་ཨ་བ་བོ་དྷི་ཀྵཱནྟི་པཱ་ར་མི་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། རྡོ་རྗེ་གར་མཁན་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་
བྱང་ཆུབ་སེམས་དཔའི་སྤྱོད་པ་ལ་མངོན་པར་དགའ་བ་དང་ལྡན་པ་དང་། སངས་རྒྱས་ཉིད་ལ་ཡོངས་སུ་གཞོལ་ཞིང་འཁོར་བ་ཡོངས་སུ་སྤོང་བའི་བརྩོན་འགྲུས་དང་ལྡན་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་སཾ་སཱ་ར་པ་རི་ཏྱི་ཀ་ཨ་ནུཏྟ་ར་མ་ཧཱ་བཱིརྱ་པཱ་ར་མི་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། མེ་
ཏོག་གི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་ཉོན་མོངས་པ་དང་། ཉེ་བའི་ཉོན་མོངས་པ་ཐམས་ཅད་དང་བྲལ་བར་གྱུར་ཅིག །བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། མངོན་པར་ཤེས་པ་རྣམས་དང་། རིག་པ་ཐམས་

59-1-89b

ཅད་དབང་དུ་གྱུར་པ་ཕུན་སུམ་ཚོགས་པར་གྱུར་ཅིག །ཨོཾ་སརྦྦ་ཏ་ཐཱ་ག་ཏ་ཨ་ནུཏྟ་ར་སཽ་ཁྱཱ་བི་ཧཱ་ར་དྷྱཱ་ན་པཱ་ར་མི་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བདུག་སྤོས་ཀྱི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་ཤེས་
རབ་དང་ཡེ་ཤེས་རྣམས་དང་ཡང་དག་པར་ལྡན་པར་གྱུར་ཅིག །སོ་སོ་ཡང་དག་པར་རིག་པ་བཞི་ཐོབ་སྟེ། བཟོ་དང་བསྟན་བཅོས་ཐམས་ཅད་ཤེས་ཤིང་། སྒྱུ་རྩལ་དང་ལྡན་ལ། གསང་བའི་ཆོ་ག་ཤེས་པ་དང་། དེ་ཁོ་ན་ཉིད་མཐོང་སྟེ་ཉོན་མོངས་པ་དང་། ཤེས་བྱའི་སྒྲིབ་པ་ཐམས་ཅད་ཡང་དག་པར་
གཅོད་པའི་ཡེ་ཤེས་ཐོབ་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་ཀླེ་ཤ་ཙྪེད་སརྦ་དྷརྨཿས་མནྟ། ཛྙཱ་ན་མ་ཧཱ་པྲཛྙཱ་པཱ་ར་མི་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཕྱོགས་བཅུའི་འཇིག་རྟེན་གྱི་ཁམས་མ་ལུས་པའི་དེ་བཞིན་གཤེགས་པ་རྣམས་ཀྱི་ཞབས་དྲུང་དུ་བདག་ཉིད་ཀྱིས་ལྷག་པར་མོས་པར་བྱས་
ལ། ལུས་ཀྱིས་བསྙེན་བཀུར་བྱ་བའི་ཕྱིར། ཨོཾ་སརྦ་ཏ་ཐཱ་ག་ཏ་ཀཱ་ཡ་ནིརྱཱ་ཏ་ན་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་ནས་ཐམས་ཅད་དུ་ཁ་དང་ལྕེ་བརྒྱ་སྟོང་ཕྲག་སྙེད་ཀྱི་སྒོ་ནས་མཉམ་མེད་མི་གཡོ་ཞེས་བྱ་བ་ལ་སོགས་པའི་བསྟོད་པས་མཆོད་པས་ལྷག་པར་མོས་པར་བྱས་ལ། ཨོཾ་སརྦ་ཏ་ཐཱ་ག་ཏ་
བཱ་ག་ནི་རྱ་ཏ་ན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་ནས་བྱང་ཆུབ་སེམས་དཔའ་ཐམས་ཅད་དང་། བསམ་པ་གཅིག་པའི་སྦྱོར་བས་ཆོས་ཐམས་ཅད་མཉམ་པ་ཉིད་ལ་ལྷག་པར་མོས་པར་བྱས་ལ། ཨོཾ་སརྦ་ཏ་ཐཱ་ག་ཏ་ཙིཏྟ་ནི་རྱཱ་ཏ་ན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཆོས་ཐམས་ཅད་ནི་
དངོས་པོ་མེད་པའི་ངོ་བོ་ཉིད་དང་། སྟོང་པ་ཉིད་དང་།མཚན་མ་མེད་པ་དང་། སྨོན་པ་མེད་པའི་རྣམ་པར་ལྷག་པར་མོས་པར་བྱས་ལ། ཨོཾ་སརྦ་ཏ་ཐཱ་ག་ཏ་གུ་ཧྱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་ལྟར་མཆོད་པ་རྣམ་པ་ཉི་ཤུས་དེ་བཞིན་གཤེགས་པ་ཐམས་ཅད་ཡང་དག་པར་མཆོད་ལ་བདག་ཉིད་
དབུལ་བར་བྱ་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བདག་ཉིད་དབུལ་གྱིས། དུས་ཐམས་ཅད་དང་། རྣམ་པ་ཐམས་ཅད་དུ་བདག་སོ་སོར་བཞེས་སུ་གསོལ། ཐུགས་རྗེ་ཆེན་པོ་དང་ལྡན་པའི་མགོན་པོ་ཁྱེད་རྣམས་ཀྱིས་དམ་ཚིག་ཆེན་པོའི་དངོས་གྲུབ་བདག་ལ་སྩལ་དུ་གསོལ་

59-1-90a

ཞེས་བརྗོད་ལ། དགེ་བའི་རྩ་བ་དེ་ཡང་སེམས་ཅན་ཐམས་ཅད་དང་ཐུན་མོང་དུ་བྱས་ཏེ། དགེ་བའི་རྩ་བ་འདི་དག་གིས་བདག་དང་སེམས་ཅན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་དངོས་པོའི་རྒུད་པ་ཐམས་ཅད་དང་བྲལ་བར་གྱུར་ཅིག །འཇིག་རྟེན་དང་འཇིག་རྟེན་ལས་
འདས་པའི་ཕུན་སུམ་ཚོགས་པ་ཐམས་ཅད་དང་ཡང་དག་པར་ལྡན་པའི་བདེ་བ་ཉིད་དང་། ཡིད་བདེ་བ་དང་བཅས་པ་ཉིད་ཀྱིས་མིའི་མཆོག་སངས་རྒྱས་སུ་ཚེ་འདི་ཉིད་ལ་གྱུར་ཅིག །བདེ་གཤེགས་གསང་སྔགས་རྣམས་ལ་མཁས་པ་དང་། །རྟག་ཏུ་ཆོས་རྒྱལ་ལྷུན་གྱིས་གྲུབ་ཐོབ་ལ། །འགྲོ་བ་མ་ལུས་
དགོད་པར་གནས་བགྱིད་ཅིང་། །གལ་ཏེ་མ་ཐོབ་ན་ཡང་དུས་འདིར་སྨོན། །དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དགེ་བའི་རྩ་བ་ཐམས་ཅད་ཡང་དག་པར་བསྔོས་ནས། སྡོམ་པ་གཟུང་བར་བྱ་སྟེ། ཇི་ལྟར་དུས་གསུམ་མགོན་པོ་རྣམས། །ཡང་དག་བྱང་ཆུབ་ངེས་མཛད་པ། །དེ་བཞིན་
བླ་མེད་བྱང་ཆུབ་སེམས། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །སྡོམ་པ་ཡི་ནི་ཚུལ་ཁྲིམས་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་ནི་བྱེད་པ་གསུམ། །བདག་གིས་བརྟན་པོར་ གཟུང་བགྱི་ཞིང་། །སངས་རྒྱས་ཆོས་དང་འཕགས་དགེ་འདུན། །བླ་
ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །རྡོ་རྗེ་རིགས་མཆོག་ཆེན་པོ་ཡི། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་ཞིང་ཡང་
ལན་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་མཆོག་དག་པ་ལ། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ཀྱང་མ་ལུས་གཟུང་། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །
མཆོད་པའི་ལས་ཀྱང་ཅི་ནུས་བགྱི། །བླ་ན་མེད་པའི་བྱང་ཆུབ་སེམས། །དམ་པ་བདག་གིས་བསྐྱེད་བགྱི་ཞིང་། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་གཟུང་། །མ་བསྒྲལ་བ་ནི་བསྒྲལ་བར་བགྱི། །མ་གྲོལ་བ་ནི་དགྲོལ་བར་བགྱི། །དབུགས་མ་ཕྱུང་བ་དབུགས་དབྱུང་ཞིང་། །

59-1-90b

སེམས་ཅན་མྱ་ངན་འདས་ལ་འགོད། །དེ་ནས་གཟུགས་བརྙན་ལ་སོགས་པའི་སྦྱོར་བས་ཕྱག་རྒྱ་བཅིང་བ་སྔོན་དུ་འགྲོ་བས། ཆོ་ག་རྣམས་རྗེས་སུ་སྤྱད་པར་བྱ་སྟེ། ཐལ་མོ་དམ་དུ་བསྡམས་པ་ལས། །སོར་མོ་ཐམས་ཅད་བསྣོལ་ནས་ནི། །རྡོ་རྗེ་ཐལ་མོར་བཀའ་སྩལ་ཏེ། །རབ་ཏུ་བསྡམས་ཕྱིར་རྡོ་
རྗེ་བསྡམས། །བཛྲ་ཨཉྫ་ལི་ཞེས་བྱ་བ་ནི་རྡོ་རྗེ་ཐལ་མོའི་སྔགས་སོ། །བཛྲ་བནྡྷ་ཞེས་བྱ་བ་ནི་རྡོ་རྗེ་བསྡམས་པའི་སྟེ། བཛྲ་བནྡྷ་ཏྲཊ་ཅེས་བྱ་བ་དང་། རྡོ་རྗེ་བསྡམས་པ་སྙིང་གར་དགྲོལ་ལོ། །བཛྲ་ཨཱ་བེ་ཤ་ཞེས་བྱ་བ་དང་། རྡོ་རྗེ་དབབ་པའི་དམ་ཚིག་གི་ཕྱག་རྒྱ་བཅིངས་ལ། ཨ་ཞེས་བྱ་བས་བདག་
ཉིད་ལ་དབབ་པར་བྱ་སྟེ། དང་པོའི་རྡོ་རྗེ་སྐུ་མདོག་དམར་པོ་འོད་དམར་པོ་འབར་བས། བདག་ཉིད་ཀུན་དུ་གང་བར་གྱུར་པར་བསམ་པར་བྱའོ། །དབབ་པ་དེ་ཡང་འདིས་བརྟན་པར་བྱ་སྟེ། ཏིཥྠ་བཛྲ་དྲྀ་ཌྷོ་མེ་བྷ་བ་ཤ་ཤྭ་ཏོ་མེ་བྷཱ་བ་ཧྲྀ་ད་ཡ་མེ་ཨ་དྷི་ཏིཥྛཱ་སརྦ་སིདྡྷི་སྨེ་པྲ་ཡཙྪ་ཧཱུཾ་ཧ་ཧ་ཧ་ཧ་ཧོ། དམ་ཚིག་གི་རྡོ་རྗེ་
ཁུ་ཚུར་གྱི་མཛུབ་མོ་སྦྱར་བ་ནི། རྡོ་རྗེ་དབབ་པའི་དམ་ཚིག་གི་ཕྱག་རྒྱའོ། །བཛྲ་མུཥྚི་ཞེས་བྱ་བ་དང་། དམ་ཚིག་གི་རྡོ་རྗེ་ཁུ་ཚུར་བཅིངས་ལ་འདི་སྐད་ཅེས་བརྗོད་དོ། །ཨོཾ་བཛྲ་སནྡྷི་རྦྃ། རྡོ་རྗེ་བསྡམས་པ་ལས་མཐེའུ་ཆུང་དང་སྲིན་ལག་གཉིས་ཀྱི་བར་དུ་མཐེ་བོང་བཞག་ནས་བསྡམས་ལ་མཛུབ་མོ་
གཉིས་བཀུག་པ་ནི། དམ་ཚིག་གི་རྡོ་རྗེ་ཁུ་ཚུར་གྱི་མཚན་ཉིད་དོ། །དེ་ནས་དཔལ་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་རོའི་མཐར་ཐུག་པའི་བར་གྱི་དམ་ཚིག་གི་ཕྱག་རྒྱས་མ་ཡ་སྟྭཾ་ཞེས་བརྗོད་དེ་བཅིངས་ལ། ཡི་གེ་ཧཱུཾ་ལན་གསུམ་དུ་བརྗོད་ནས། འདིས་རང་གི་སྙིང་གར་གཞུག་པར་བྱ་སྟེ། ཨོཾ་
བཛྲ་མུཿ ཨོཾ་སརྦ་པཱ་པཾ་ཨཱ་ཀཪྵ་ན་བི་ཤོ་དྷ་ན་བཛྲ་ས་མ་ཡེ་ཧཱུཾ་ཕཊ། ཅེས་བྱ་བ་ཕྱག་རྒྱ་དང་བཅས་པས་ངན་འགྲོ་ཐམས་ཅད་དགུག་པར་བྱའོ། །རྡོ་རྗེའི་ཕྱག་རྒྱ་གཉིས་ནང་དུ། །མཛུབ་མོ་གཉིས་ནི་བཅིངས་ནས་སུ། ལེགས་པར་གྱེན་དུ་འཕགས་པ་ནི། །ལྟུང་བ་སློང་བའི་དམ་པའོ། །ཨོཾ་
བཛྲ་པཱ་ཎི་བི་སྥོཊ་ཡ་སརྦ་ཨ་པཱ་ཡ་བནྡྷན་ནི་པྲ་མོ་ཀྵཱ་ཡ་སརྦ་ཨ་པཱ་ཡ་ག་ཏི་བྷྱཿསརྦ་ས་ཏྭཱན། སརྦ་ཏ་ཐཱ་ག་ཏ་བཛྲ་ས་མ་ས་ཏྲཊ་ཅེས་བྱ་བ་ཕྱག་རྒྱ་དང་བཅས་པས་སྡིག་པ་ཐམས་ཅད་དལ་བར་བྱའོ། །རྡོ་རྗེ་བཅིངས་པ་བསྡམས་བྱས་ཏེ། །གུང་མོ་གཉིས་ཀ་སྦྱར་ནས་ནི། །ཐ་མ་བཞི་ནི་རྩེ་མོ་སྦྱར། །སྡིག་

59-1-91a

པ་འཇོམས་པར་གྲགས་པ་ཡིན། །དེ་ནས་རང་གི་སྙིང་གར་རྡོ་རྗེ་ལ་ཧཱུྃ་ཡིད་ཀྱིས་མངོན་པར་བྲིས་ནས། དེ་ཉིད་ཡིད་ལ་གདོན་པར་བྱའོ། །དེ་ནས་ཡི་གེ་ཧཱུྃ་དེ་དང་དབྱངས་ཀྱི་ཡི་གེ་བཅུ་དྲུག་གིས། རང་གི་སེམས་ཟླ་བའི་དཀྱིལ་འཁོར་ལྟ་བུར་ཡོངས་སུ་གྱུར་པ་རྣམ་པར་བསམས་ལ། 
དེའི་སྟེང་དུ་ཡང་ཡི་གེ་ཧཱུྃ་དང་ཀ་ལ་སོགས་པ་རྣམས་ཀྱིས་སྐར་མ་ལྟ་བུའི་ཟླ་བའི་དཀྱིལ་འཁོར་གཉིས་པ་བསྐྱེད་པར་བྱའོ། །ཟླ་བའི་དཀྱིལ་འཁོར་གཉིས་པོ་དེ་ཉིད་ཧཱུྃ་དང་བཅས་པ་ཡོངས་སུ་གྱུར་པ་ལས། དང་པོའི་རྡོ་རྗེའི་གཟུགས་སུ་རྣམ་པར་བསྒོམས་ལ། རྡོ་རྗེའི་དབུས་སུ་ཡི་གེ་ཧཱུཾ་བསམས་ཏེ། 
རྡོ་རྗེ་ནི་བདག་གོ་ཞེས་བསྒོམས་ནས། རྡོ་རྗེ་དེ་ལས་དེ་བཞིན་གཤེགས་པའི་རིགས་རྣམས་སྤྲུལ་ལ། དེས་སེམས་ཅན་གྱི་ཁམས་ཐམས་ཅད་དེ་བཞིན་གཤེགས་པའི་རིགས་ཀྱི་ངོ་བོ་ཉིད་དུ་བསྐྱེད་ནས། དེ་རྣམས་རྡོ་རྗེ་དེར་བཅུག་ནས་རྡོ་རྗེ་ཆེན་པོ་དེ། བདག་ནི་སེམས་དཔའ་ཀུན་བདག་གྲགས། །བདག་
ཉིད་ཀྱང་ནི་བདག་ལ་གནས། །ཞེས་བྱ་བས་བྱིན་གྱིས་བརླབས་ལ། སེམས་དཔའ་ནི་བདག་གོ་ཞེས་བྱ་བའི་ང་རྒྱལ་དུ་བསྒོམ་པར་བྱའོ། །འདི་སྐད་སྟོན་པར་འགྱུར་ཏེ། བཛྲ་སཏྭ་ཧྃ་ཞེས་བརྗོད་ལ། བཟླས་མ་ཐག་ཏུ་བསྒོམས་པའི་རྡོ་རྗེ་ཆེན་པོ། རྡོ་རྗེ་སེམས་དཔའི་ཕྱག་རྒྱ་ཆེན་པོའི་གཟུགས་སུ་
བསམ་མོ། །དེ་ནས་སྙེམས་པ་དང་བཅས་པས་རྡོ་རྗེ་གསོར་ལ། ཡང་སྒྲུབ་པ་པོས་བཛྲ་སཏྭ་ཧྃ་ཞེས་བརྗོད་པར་བྱའོ། །དེ་ལྟར་སེམས་དཔར་བྱིན་གྱིས་རློབ་པའི་སྦྱོར་བས། རྡོ་རྗེ་སེམས་དཔའ་བདག་ཉིད་རྣམ་པར་བསམས་ལ། དེ་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་ངོ་བོ་ཉིད་སོ་སོར་སྣང་
ཞིང་། གཟུགས་བརྙན་དང་འདྲ་བར་བསམས་ལ། འདི་སྐད་ཅེས་བརྗོད་པར་བྱ་སྟེ། མ་ཧཱ་ས་མ་ཡ་སཏྭ་ཧཾ། དེ་ནས་དང་པོའི་རྡོ་རྗེ་བཅིངས་ལ་འདི་སྐད་ཅེས་བརྗོད་པར་བྱའོ། །ས་མ་ཡོ་ཧྃ། དེ་ཉིད་ཀྱིས་སྙིང་ག་དང་། དཔྲལ་བ་དང་། ལྐོག་མ་དང་། སྤྱི་བོར་བྱིན་གྱིས་བརླབ་པར་བྱའོ། །ས་མ་ཡ་སཏྭ་
ཨ་དྷི་ཏིཥྛ་སྭ་མཾ། དེ་ནས་སེམས་དཔའི་སྐྱིལ་མོ་ཀྲུང་བཅས་ལ། གཡོན་པའི་རྡོ་རྗེ་ཁུ་ཚུར་གྱིས་དྲིལ་བུ་བླངས་ལ་སྙེམས་པར་བྱ་སྟེ། ལག་པ་གཡས་པས་དང་པོའི་རྡོ་རྗེ་བླངས་ནས་གསོར་ནས། རང་གི་སྙིང་གར་བསྟོད་པའི་ཚུལ་གྱིས་གཞག་པར་བྱ་ཞིང་། ཧཱུཾ་འདོན་པས་འདི་ནི་བཅོམ་ལྡན་འདས་ཀྱི་ཕྱག་རྒྱ་

59-1-91b

ཆེན་པོ་སྟེ། དེ་ལྟ་བའི་ཕྱག་རྒྱ་བཅིངས་ནས་འདུག་ལ། ཧཱུྃ་ཨཱཿཞེས་བརྗོད་དེ། མདུན་དུ་སྣ་ཚོགས་པདྨའི་གདན་ལ་རྡོ་རྗེ་བསམས་ནས། ཧཱུྃ་བརྗོད་དེ་རྡོ་རྗེར་བདག་ཉིད་བསྒོམས་ལ། བཛྲོ་ཧྃ་ཞེས་བརྗོད་དོ། །ཡང་ཧཱུྃ་དེ་ཉིད་ཟློས་ཤིང་བཛྲ་སཏྭ་ཧཾ་ཞེས་བརྗོད་ལ། རྡོ་རྗེ་དེ་རྡོ་རྗེ་སེམས་དཔའི་བདག་ཉིད་དུ་
བསྒོམས་ལ། དེ་ཉིད་དུ་རྡོ་རྗེ་ལྕགས་ཀྱུ་ལ་སོགས་པས་སྙིང་པོ་དང་ཕྱག་རྒྱ་དང་བཅས་པ་འདི་དག་གིས། དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་བ་བྱས་ཏེ་བཛྲ་ཨཾ་ཀུ་ཤ་ཛཿབཛྲ་པཱ་ཤ་ཧཱུྃ། བཛྲ་སྥོཊ་བཾྃ། བཛྲ་ཨཱ་བེ་ཤ་ཨ། དེ་ནས་འདི་དག་གི་ཕྱག་རྒྱ་བཤད་པར་བྱ་སྟེ། རྡོ་རྗེ་ཁུ་ཚུར་གཉིས་
ལས་བྱུང་བའི་མཛུབ་མོ་ལྕགས་ཀྱུར་བཅིངས་ལ། མཐེའུ་ཆུང་ལྕགས་ཀྱུ་ཆེན་པོར་བྱ་བ་ནི། རྡོ་རྗེ་ལྕགས་ཀྱུའི་ཕྱག་རྒྱའོ། །མཁྲིག་མ་མདུད་པ་ནི་ཞགས་པའིའོ་། །མཐེའུ་ཆུང་དང་མཛུབ་མོ་མདུད་པ་ནི་ལྕགས་སྒྲོག་གིའོ། །རྒྱབ་གཉིས་བསྙམས་ཏེ་མནན་པ་ནི་རྡོ་རྗེ་འབེབས་པའི་ཕྱག་རྒྱའོ། །དེ་ནས་དང་
པོའི་རྡོ་རྗེ་བཅིངས་ལ་ཧཱུྃ་དྲྀ་ཤྱ་ཞེས་བྱ་བས། བཅོམ་ལྡན་འདས་ལ་བལྟ་བར་བྱ་སྟེ། ཡེ་ཤེས་སེམས་དཔའ་དེ་མཐོང་ནས། །རང་གི་ལུས་ལ་བསྐོམ་པར་བྱ། །བཀུག་ཅིང་བཅུག་ལ་བཅིང་བ་དང་། །དབང་དུ་བྱས་ཏེ་བསྒྲུབ་པར་བྱ། །ཧཱུྃ་དང་གསང་བའི་ལྕགས་ཀྱུ་དང་པོའི་རྡོ་རྗེས་གུང་མོ་རྡོ་རྗེ་ལྕགས་ཀྱུ་གཉིས་སུ་
བྱས་ལ། དེ་དང་དགུག་པའི་སྦྱོར་བས། རང་གི་སྙིང་གའི་ཕྱོགས་སུ་ལྕགས་ཀྱུ་ལ་སོགས་པས་དགུག་པ་ལ་སོགས་པ་བྱས་ལ། ཡང་དང་པོའི་རྡོ་རྗེ་བཅིངས་ནས། ས་མ་ཡ་སྟྭཾ་ཞེས་བརྗོད་དེ། རྒྱབ་ཏུ་འོད་ཀྱི་དཀྱིལ་འཁོར་བསྐྱེད་ནས། བཅོམ་ལྡན་འདས་བཞུགས་པར་གྱུར་པ་དང་། བདག་ཉིད་དང་ལྷན་
ཅིག་ཏུ་གྱུར་པར་བསམས་ལ། ས་མ་ཡ་སྟྭཾ་ཨ་ཧཾ། ཛཿཧཱུཾ་བཾཾ་ཧོཿ་ཞེས་ལན་གསུམ་བརྗོད་པས། མཛུབ་བཅས་ཟླ་བའི་མདོག་ཅན་ལ། །རྡོ་རྗེ་སྙེམས་པ་འཛིན་པའི་མཆོག །རྡོ་རྗེ་ཕྲེང་སོགས་ཀྱིས་སྤྲས་ཤིང་། །སྣ་ཚོགས་འབར་བ་འཁྲིགས་པའི་འོད། །ཅེས་བྱ་བ་སྣ་ཚོགས་པདྨ་ལ་སེམས་དཔའི་སྐྱིལ་
མོ་ཀྲུང་གིས་བཞུགས་པ་། དགའ་བ་ཆེན་པོས་གཟིགས་པ་ཞལ་འཛུམ་ཞིང་རྣམ་པར་གཡོ་བ་བསམས་ལ། མིག་གཉིས་སུ་ཧཱུྃ་གཉིས་བསམས་ནས། ལྕེ་ལ་ཡང་ཧཱུྃ་བཀོད་དེ། རྡོ་རྗེ་ཁུ་ཚུར་གཉིས་ཀྱིས་བཅོམ་ལྡན་འདས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་གར་ལས་བྱུང་བ་བཅིང་བར་བྱའོ། །དེ་ནས་རྡོ་རྗེ་

59-1-92a

བསྡུ་བའི་ཕྱག་རྒྱ་བཅིངས་ལ། ཡིད་ཀྱིས་ལེགས་སོ་ཞེས་བྱ་བའི་ཚལ་གྱིས་ཛཿཧཱུཾ་བཾ་ཧོཿཞེས་བརྗོད་ལ། རང་གི་ལུས་ལ་དེ་བཞིན་ག་གེགས་པ་ཐམས་ཅད་བཅུག་ལ་སྦྱོར་བ་འདི་དང་། ཕྱག་རྒྱ་འདིས་རྒྱས་གདབ་པར་བྱའོ། །བཅོམ་ལྡན་འདས་རྣམ་པར་སྣང་མཛད་ཀྱི་དམ་ཚིག་
གི་ཕྱག་རྒྱ་བཅིངས་ལ། འདི་སྐད་བརྗོད་པར་བྱའོ། །བཛྲ་དྷཱ་ཏུ་དྲྀ་ཤྱ་ཛཿཧཱུྃ་བྃ་ཧོཿ ས་མ་ཡ་སྟྭཾ། ས་མ་ཡ་ཧོ་། ཨ་ཧཾ་བཛྲ་དྷཱ་ཏུ། ཨོཾ་སརྦ་ཏ་ཐཱ་ག་ཏ་མ་ཧཱ་ཡོ་གཱི་ཤྭ་རི་ཧཱུཾ་ཞེས་ལན་གསུམ་བརྗོད་དོ། །དེ་བཞིན་དུ་བཅོམ་ལྡན་འདས་མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་གྲུབ་པའི་
དམ་ཚིག་གི་ཕྱག་རྒྱ་བཅིངས་ལ། འདི་སྐད་བརྗོད་དོ། །ཨོཾ་བཛྲ་དྷཱ་ཏུ་དྲྀ་ཤྱ། ཛཿཧཱུྃ་བཾྃ་ཧོཿས་མ་ཡ་སྟྭཾ། ས་མ་ཡ་སྟྭཾ། ཨ་ཧཾ་བཛྲ་དྷཱ་ཏུ་ཞེས་ལན་གསུམ་བརྗོད་དོ། །ཡང་དེ་རྣམས་ཀྱི་གསང་སྔགས་ནི། ཨོཾ་བཛྲ་སཏྭ་ཧཱུྃ། ཨོཾ་བཛྲ་རཏྣ་ཧཱུྃ། ཨོཾ་བཛྲ་དྷརྨ་ཧཱུྃ། ཨོཾ་བཛྲ་ཀརྨ་ཧཱུྃ་ཞེས་བྱ་བ་སྟེ། འདི་དག་ནི་རིམ་
པ་ཇི་ལྟ་བ་བཞིན་དུ་མི་བསྐྱོད་པ་ལ་སོགས་པའི་སྔགས་ཡིན་ནོ། །དེ་ནས་དེ་རྣམས་ཀྱི་ཕྱག་རྒྱ་བཤད་པར་བྱ་སྟེ། དེ་ལ། རྡོ་རྗེ་བསྡམས་པ་ལས་བྱུང་བའི། །རྡོ་རྗེ་སེམས་མ་བརྟན་བྱས་ལ། །གུང་མོ་མྱུ་གུ་ལྟར་མཉམ་བསྒྲེང་། །གུང་མོ་ནང་དུ་གཤིབས་པ་ནི། །སངས་རྒྱས་གཉིས་པ་ཡིན་པར་བཤད། །
གུང་མོ་རིན་ཆེན་འདྲ་བ་དང་། །གུང་མོ་པདྨ་འདྲ་བར་དགུག །སངས་རྒྱས་ལྔ་པའི་ཕྱག་རྒྱ་ནི། །དེ་བཞིན་མཛུབ་མོ་བཀུག་པའོ། །དེ་ནས་བཛྲ་ཛྙཱ་ན་ཞེས་བྱ་བའི་ཆོས་ཀྱི་ཕྱག་རྒྱ་དེ་བཞིན་གཤེགས་པ་ལྔའི་ལྗགས་ལ་བསམས་ནས། དེ་རྣམས་ཀྱི་ལས་ཀྱི་ཕྱག་རྒྱ་བཅིང་བར་བྱའོ། །དེ་ལ་འདི་དག་ནི་རྡོ་རྗེ་
ཁུ་ཚུར་ལས་བྱུང་བ་སྟེ། གཡོན་པའི་རྡོ་རྗེ་མཛུབ་མོ་ནི། །གཡས་པའི་ནང་དུ་བསྒྲེང་བར་བྱ། །བྱང་ཆུབ་མཆོག་གི་ཕྱག་རྒྱ་སྟེ། །སངས་རྒྱས་བྱང་ཆུབ་སྦྱིན་བྱེད་པའོ། །མི་གཡོ་བ་ཡིས་ལ་རེག །རིན་ཆེན་གྱི་ནི་མཆོག་སྦྱིན་པའོ། །ཚེ་དཔག་མེད་པའི་ཏིང་འཛིན་མཆོག །གདོན་མི་ཟ་བར་མི་འཇིགས་སྦྱིན། །
ཞེས་བྱ་བ་སྟེ། དེ་བས་ན་གོ་རིམས་ཇི་ལྟ་བ་བཞིན་དུ་རྣམ་པར་སྣང་མཛད་ལ་སོགས་པ་ནས་དོན་ཡོད་གྲུབ་པའི་མཐར་ཐུག་པའི་བར་དུ། བཛྲ་དྷཱ་ཏུ་ཞེས་བྱ་བ་ཐུན་མོང་གི་སྙིང་པོས་བྱང་ཆུབ་མཆོག་དང་། ས་གནོན་པ་ལ་སོགས་པའི་ཕྱག་རྒྱ་དང་རབ་ཏུ་སྦྱར་རོ། །དེ་ལྟར་དེ་བཞིན་གཤེགས་པ་རྣམས་ཀྱི་ཐུན་

59-1-92b

མོང་གི་སྙིང་པོས་སྔགས་པས་རང་གི་སྙིང་གར་རྡོ་རྗེ་རྩེ་ལྔ་པ་བསམས་ལ། མཚན་མ་རྣམས་དང་བཅས་པར་རབ་ཏུ་སྦྱར་ན། ཕྱག་རྒྱ་ཆེན་པོར་འགྱུར་རོ། །དེ་ནས་དང་པོའི་ཕྱག་རྒྱ་བཅིངས་ལ། བཛྲ་སཏྭ་ཏྭེ་ནོ་པ་ཏིཥྛ་ཞེས་བྱ་བ་དང་། རང་གི་སྙིང་གའི་ཟླ་བ་ལ་དང་པོའི་རྡོ་རྗེ་བསྐྱེད་དོ། །བཛྲ་རཏྣ་ཨ་དྷི་ཏིཥྠ་
ཞེས་བྱ་བ་དང་། དཔྲལ་བའི་ཕྱོགས་སུ་རྡོ་རྗེ་རིན་ཆེན། བཛྲ་དྷརྨ་ཨ་དྷི་ཏིཥྛ་ཞེས་བྱ་བ་དང་། ལྐོག་མའི་ཕྱོགས་སུ་པདྨ། བཛྲ་ཀརྨ་ཨ་དྷི་ཏིཥྛ་ཞེས་བྱ་བ་དང་། སྤྱི་བོར་སྣ་ཚོགས་རྡོ་རྗེ་བསྐྱེད་པར་བྱའོ། །དེ་ནས་ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏཱ་ཏྭེ་ནོ་པ། ཏིཥྠ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་
རཀྚོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷི་སྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾཿ་ཀ་རུ་ཧཱུ་ཧ་ཧ་ཧ་ཧ་ཧོ། བྷ་ག་བཱན་སརྦ་ཏ་ཐཱ་ག་ཏ། བཛྲ་མཱ་མེ་མུཉྩ། བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿཞེས་བྱ་བའི་ཡི་གེ་བརྒྱ་པས་བརྟན་པར་བྱའོ། །དེ་ནས་རྡོ་རྗེ་ཐལ་མོ་ལན་གསུམ་བསྐོར་ནས། བཅོམ་ལྡན་འདས་
རྡོ་རྗེ་སེམས་དཔའ་ལ་ཕྱག་བཙལ་དབང་བསྐུར་བ་བླང་བར་བྱ་སྟེ། ཨོཾ་སརྦ་བུདྡྷ་བྷ་བ་རཏྣ་སཉྩ་ཡ། པྲ་ཏྱུཏ་ད་བི་བྱ་མུ་ཀུ་ཊ་ནཱ་མ། ཨ་བྷི་ཥཱིཉྩ་མཾ། པྲ་བ་ར་བཛྲ་དྷ་ར་ཤྲཱི་བཛྲ་སཏྭ་ས་མ་ཡ་སྟྭཾ། ཨ་ཧཾ། ཞེས་རེ་རེ་བརྗོད་ཅིང་། དང་པོ་ཁོ་ནར་སངས་རྒྱས་ལྔའི་ཅོད་པན་གྱི་དབང་བསྐུར་བ་བླང་བར་བྱའོ། །
དེ་ཡང་སྤྱི་གཙུག་ཏུ་བཅོམ་ལྡན་འདས་རྣམ་པར་སྣང་མཛད་གསེར་གྱི་མདོག་ཅན། བྱང་ཆུབ་མཆོག་གི་ཕྱག་རྒྱས་བཞུགས་པར་བསམས་ལ། ཨོཾ་བྷཱུ་ཁཾ་ཨ་བྷི་ཥཱིཉྩ་མཾ་ཞེས་བརྗོད་དོ། །དཔྲལ་བའི་སྟེང་དུ་མི་བསྐྱོད་པ་སྐུ་མདོག་དཀར་པོས་གནོན་གྱི་ཕྱག་རྒྱས་བཞུགས་པར་བསམས་ལ། བཛྲ་
སཏྭ་ཨ་བྷི་ཥཱིཉྩ་མཾ་ཞེས་བརྗོད་དོ། །རྣ་བ་གཡས་པའི་སྟེང་དུ་རིན་ཆེན་འབྱུང་གནས་བེེ་ཌཱུརྱ་སྔོ་བསངས་ཀྱི་མདོག་ཅན། མཆོག་སྦྱིན་གྱི་ཕྱག་རྒྱས་བཞུགས་པར་བསམས་ལ། བཛྲ་རཏྣ་ཨ་བྷི་ཥཱིཉྩ་མཾ་ཞེས་བརྗོད་དོ། །ལྟག་པར་འོད་དཔག་ཏུ་མེད་པ་བཙག་ཡུག་སྣམ་གྱི་མདོག་ཅན། ཆོས་ཀྱི་འཁོར་
ལོའི་ཕྱག་རྒྱས་བཞུགས་པར་བསམས་ལ། བཛྲ་དྷརྨ་ཨ་བྷི་ཥཱིཉྩ་མཾ་ཞེས་བརྗོད་དོ། །རྣ་བ་གཡོན་པའི་སྟེང་དུ་དོན་ཡོད་གྲུབ་པ་སྣ་ཚོགས་པའི་མདོག་ཅན་མི་འཇིགས་པ་སྦྱིན་པའི་ཕྱག་རྒྱས་བཞུགས་པར་བསམས་ལ། ཕྱག་རྒྱ་འདི་དང་ལྡན་པས་བཛྲ་ཀརྨ་ཨ་བྷི་ཥཱིཉྩ་མཾ་ཞེས་བརྗོད་དེ། དེ་

59-1-93a

ཡང་ཞལ་དཀར་པོ་དཔུང་པའི་མཐའ་ནས་ཕྱག་གཉིས་པ་ལ་ཤའི་མདོག་ཅན། ལྷག་མ་ནི་ཁ་དོག་སྔོན་པོ། ཞལ་གྱི་འོག་ནས་ལྟེ་བའི་མཐར་ཐུག་པའི་བར་ནི་དམར་སྐྱ། བརླ་གཉིས་སེར་སྐྱ། པུས་མོ་མན་ཆད་ཁ་དོག་དཀར་པོའི་མདོག་དང་ལྡན་པའི་བཅོམ་ལྡན་འདས་དོན་ཡོད་
གྲུབ་པ་བསྐྱེད་པར་བྱའོ། །དེ་ནས་དེ་རྣམས་ཀྱི་ཕྱག་རྒྱ་བཤད་པར་བྱ་སྟེ། རྡོ་རྗེ་བསྡམས་པ་ལས་མཐེ་བོ་གཉིས་བསྣོལ་བར་བྱས་ལ། མཛུབ་མོ་གཉིས་རྩེ་མོ་ནང་དུ་བཀུག་ནས། གུང་མོ་བསྙམས་པའི་ཚིགས་དང་པོར་སྦྱར་བ་འདི་ནི། དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་ཅེས་བྱ་
བའི་དབང་བསྐུར་བའི་ཕྱག་རྒྱའོ། །དེ་ནས་ཕྱོགས་ཐམས་ཅད་དུ་ཅོད་པན་བཅིངས་ལ། མདུན་དུ་རྡོ་རྗེ་ཁུ་ཚུར་གཉིས་ཀྱིས་མདུད་པ་བྱེད་པ་ལྟ་བུས་ཕྲེང་བ་བཅིང་བ་བྱས་ལ། རྒྱབ་ཏུ་དེ་བཞིན་དུ་མདུད་པ་བྱས་ཏེ། སྒེག་པ་དང་བཅས་པས་མཐའ་མ་ལ་སོགས་པ་ལས་དགྲོལ་བས་ལོགས་
གཉིས་སུ་དར་དཔྱངས་འཕྱང་བར་བྱས་ལ། མཐར་མཉམ་པའི་ཐལ་མོས་མཉེས་པར་བྱས་ཏེ། བཛྲ་ཏུཥྱ་ཧོ་ཞེས་བརྗོད་དོ། །དེ་ནས་ཡང་བཛྲ་རཏྣ་ཨ་བྷི་ཥཱིཉྩ་མཾ་ཞེས་བྱ་བས། རྡོ་རྗེ་རིན་པོ་ཆེའི་ཕྲེང་བའི་དབང་བསྐུར་བ་བླང་བར་བྱའོ། །དེ་ནས་འདིའི་ཕྱག་རྒྱ་བཤད་པར་བྱའོ། །རྡོ་རྗེ་ཐལ་མོ་ཁ་ཐུར་དུ་
བསྟན་ལ། མཛུབ་མོ་གཉིས་བཀུག་སྟེ། མཐེ་བོང་ལ་རྩེ་སྦྱར་བར་བྱས་ནས། དེ་སྙིང་ག་ནས་བཏེག་སྟེ་དབང་བསྐུར་བའི་གནས་སུ་གཞག་པ་འདི་ནི། རྡོ་རྗེ་རིན་ཆེན་གྱི་དབང་བསྐུར་བའི་ཕྱག་རྒྱའོ། །དེ་ནས་ཨོཾ་པདྨ་མཱ་ལ་ཨ་བྷི་ཥཱིཉྩ་ལོ་ཀེ་ཤྭ་ར་ཏེ། ས་ར་ཧྲི། ཞེས་བྱ་བའི་རིག་སྔགས་འདི་དང་། པདྨའི་
ཕྲེང་བའི་དབང་བསྐུར་བ་བླང་བ་དང་། ཨོཾ་ཨ་བྷི་ཥཱིཉྩ་མཾ། ཞེས་བྱ་བ་དང་། ཕྱག་རྒྱ་འདིས་སྣ་ཚོགས་རྡོ་རྗེའི་ཕྲེང་བའི་དབང་བསྐུར་བ་བླང་བར་བྱའོ། །རྡོ་རྗེ་བསྡམས་པ་ལས་བྱུང་བའི། །རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་ལས། སྲིན་ལག་དང་མཐེའུ་ཆུང་བསྙམས་ཏེ་བརྐྱང་ལ་བ་དན་ལྟར་བྱས་ཏེ། 
དེ་ལྟར་ན་རྣལ་འབྱོར་པ་རྡོ་རྗེའི་ཕྲེང་བ་ལ་སོགས་པས་སྤྲས་པར་འགྱུར་རོ། །དེ་ནས་ཡི་གེ་གཉིས་ཀྱིས་སྔ་མ་བཞིན་དུ་གོ་ཆ་བྱས་ལ། ཧཱུཾ་ཟློས་བཞིན་དུ་དང་པོའི་རྡོ་རྗེའི་དབང་དང་བདག་པོའི་དབང་བླང་ལ། རྡོ་རྗེ་རང་གི་མགོ་ལ་གཞག་ལ་ཧཱུཾ་དེ་ཉིད་ཟློས་ཤིང་མིང་གི་དབང་བསྐུར་བ་བླང་བར་བྱའོ། །

59-1-93b

དེ་ནས་འདིས་དངོས་གྲུབ་ཀྱི་རྡོ་རྗེའི་བརྟུལ་ཞུགས་བླང་བར་བྱ་སྟེ། ཨོཾ་སརྦ་ཏ་ཐཱ་ག་ཏ་ས་མ་ཡ་ཨ་དྷི་པ་ཏི་སྟྭཾ། ཨ་བྷི་ཥཱིཉྩ་མི་མ་ཧཱ་བཛྲ་དྷ་ར། འདི་ནི་སངས་རྒྱས་ཐམས་ཅད་དེ། །རྡོ་རྗེ་སེམས་དཔའི་རྡོ་རྗེ་ཡིན། །ཁྱོད་ཀྱིས་ཀྱང་ནི་རྟག་ཏུ་བཅང་། །རྡོ་རྗེ་འཆང་ཆེན་བརྟུལ་ཞུགས་ཡིན། །རྡོ་རྗེ་འདི་ནི་
དེ་བཞིན་གཤེགས་པ་དེ་དག་ཐམས་ཅད་ཀྱི་བྱང་ཆུབ་ཀྱི་སེམས་ཆེན་པོའི་མཆོག་སྟེ། འདི་ཡོངས་སུ་མི་སྤོང་བས་འདི་རྟག་ཏུ་ཆོངས་ཤིག་ཅེས་བྱ་བའི་གསང་བའོ། །ཧྲཱི་བཛྲ་གརྦྷ་པ་ཏི་ཨ་ཏི་ཤྲཱི་ཧེ་བཛྲ་ནཱ་མ་སིདྡྷྱ་ས་མ་ཡ་སྟྭཾ་བྷུར་བྷུ་པཿསྭཿ། དེ་ནས་རྡོ་རྗེ་མཚོན་ཆ་ལ་སོགས་པ་གསང་བའི་མཆོད་
པ་བཞིས་བདག་ཉིད་ཡང་དག་པར་མཆོད་ལ། དེ་ཉིད་ཀྱིས་ནི་རྡོ་རྗེ་བཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །དེ་ལྟར་བདག་ཉིད་བསྐྱེད་ནས། དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ། ཧཱུྃ་འདོན་པ་ལ་བརྩོན་
ཞིང་། གཡས་པའི་མིག་ཏུ་ཊ་ལས་ཟླ་བ་བྱ། གཡོན་པར་མ་བཀོད་ལ་ཉི་མའི་དཀྱིལ་འཁོར་བསྐྱེད། ཧཱུྃ་གིས་མིག་འབྲས་དུས་མཐའི་མེ་ལྟ་བུར། །གནས་པ་འདི་ནི་རྡོ་རྗེའི་ལྟ་བ་བྱ། །དེ་ནས་ཡིད་ཀྱིས་ནམ་མཁའི་ཕྱོགས་ལ་འདུག་སྟེ། སྣོད་ཀྱི་འཇིག་རྟེན་གྱི་འོག་ཏུ་རླུང་གི་དཀྱིལ་འཁོར་ལ་ཧཱུྃ་
ལས་རྡོ་རྗེ་རྩེ་ལྔ་པ། དེའི་དབུས་སུ་ཡི་གེ་ར་བསམས་ལ། དེ་ལས་དུས་མཐའི་རླུང་གིས་སྦར་བའི་སྲེག་པའི་བསྐལ་པའི་མེ་ལྟ་བུའི་རྡོ་རྗེ་འབར་བའི་འོད་དང་ལྡན་པའི་རྡོ་རྗེ་དེས་སངས་རྒྱས་ཀྱི་ཞིང་ཐམས་ཅད་ཐལ་བར་བྱའོ། །དེ་ནས་ནམ་མཁའི་ཕྱོགས་སུ་སྟོང་གསུམ་པའི་སངས་རྒྱས་ཀྱི་ཞིང་གི་
ཚད་ཙམ་པའི་ཡི་གེ་ཁྃ་དཀར་པོའི་གཟུགས་ཅན་གྱི་བཅོམ་ལྡན་འདས་རྣམ་པར་སྣང་མཛད་བདུད་རྩིའི་ཆར་གྱི་རྒྱུན་རྣམ་པར་འབེབས་པས། སངས་རྒྱས་ཀྱི་ཞིང་ཀུན་དུ་ཚིག་པ་བཀྲུས་ལ། འོ་མ་ཅན་གྱི་རྒྱ་མཚོ་དབའ་རླབས་ཀྱི་ཕྲེང་བ་འཁྲུགས་པས་གང་བར་གནས་པར་བསམ་མོ། །དེ་ནས་རིའི་
མེས་འོ་མ་ཅན་གྱི་རྒྱ་མཚོ་བསྐོལ་ལ། དེའི་དབུས་སུ་པདྨ་ཆེན་པོའི་གཟུགས་ཅན་དེ་ལ། དེ་བས་ཆུང་བའི་པདྨ་དཔག་ཏུ་མེད་པས་ཡོངས་སུ་བསྐོར་བ་དེའི་ཡང་རྩ་བར་ཡི་གེ་པྲ་ལས་ཚད་མཐའ་ཡས་པའི་གསེར་གྱི་རུས་སྦལ་ཡང་པདྨའི་ལྟེ་བ་ལ་ཡི་གེ་པྲ་ཉིད་གསེར་གྱི་མདོག་ཅན་གྱི་ཡི་གེ་ཁཾ་གི་གཟུགས་

59-1-94a

ཅན་དུ་བསམས་ལ། ཇི་སྐད་དུ་བཤད་པའི་རྣམ་པར་སྣང་མཛད་ཀྱང་ནམ་མཁའི་ཕྱོགས་ནས་བྱོན་ཏེ་བཞུགས་པར་བསམ་མོ། །དེ་ནས་ཧཱུྃ་སུྃ་ཧཱུྃ་ཞེས་བྱ་བས་པདྨ་དེ་རིའི་རྒྱལ་པོ་རི་རབ་ཟུར་བཞི་པ། རིན་པོ་ཆེ་སྣ་བཞིའི་རང་བཞིན་གསེར་གྱི་རི་ལ་སོགས་པས་ཡོངས་སུ་
བསྐོར་བར་རྣམ་པར་བསམས་ལ། ཨ་བཛྲ་དྲྀ་ཌྷོ་མེ་བྷ་བ་རཀྵ་སརྦན་སྭཱཧཱ། ཞེས་བྱ་བ་དང་། རྡོ་རྗེ་བསྡམས་པ་བརྐྱང་ལ། དེ་བཞིན་དུ་ས་ལ་རེག་པར་བྱས་ཏེ་བྱིན་གྱིས་བརླབ་པར་བྱའོ། །དེ་ནས་དེ་བཞིན་དུ་དང་པོའི་རྡོ་རྗེ་ལས་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་ཁང་པ། ནམ་མཁའི་ཕྱོགས་
ཐམས་ཅད་ལ་གནས་པར་སྤྲུལ་ལ། ལྷ་ཐམས་ཅད་ཀྱི་གནས་སུ་སྣ་ཚོགས་པདྨའི་གདན་བསྐྱེད་ལ། ནམ་མཁའི་ཕྱོགས་ནས་བཅས་ལ། དབུས་ཀྱི་པདྨའི་གདན་ལ་སེམས་དཔའི་སྐྱིལ་མོ་ཀྲུང་གིས་འདུག་སྟེ། བསམ་གཏན་དང་། གཟུགས་མེད་པའི་སྙོམས་པར་འཇུག་པ་མངོན་དུ་བྱས་
ལ། ཡིད་ཀྱི་རང་བཞིན་གྱི་ལུས་ཀྱིས་འོག་མིན་གྱི་གནས་སུ་སོང་སྟེ། བསྐལ་པ་གྲངས་མེད་པ་གསུམ་ལས་ངེས་པར་འབྱུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཐམས་ཅད་གྲུབ་པའི་གཟུགས་སུ་བདག་ཉིད་བསམས་ལ། དེ་བཞིན་གཤེགས་པ་ཐམས་ཅད་ཀྱིས་ཀྱང་། 
སངས་རྒྱས་ཀྱི་ཞིང་འདི་ཏིལ་གྱི་གོང་བུ་བཞིན་དུ་ཡོངས་སུ་གང་བར་རྣམ་པར་བསམས་ལ། དེ་བཞིན་གཤེགས་པ་ཐམས་ཅད་ཀྱི་གཟུགས་ཀྱི་སྐུ་ཉིད་དང་། ཆོས་ཉིད་དག་ཀྱང་དྲན་པར་བྱའོ། །དེ་ནས་ཐེག་པ་ཆེན་པོའི་ངེས་པར་འབྱུང་བའི་ཆོས་སོ། །དེ་ནས་ཐེག་པ་ཆེན་པོའི་བྱང་ཆུབ་སེམས་
དཔའ་དགེ་འདུན་རྗེས་སུ་དྲན་པར་བྱས་ལ། སེམས་ཅན་ཐམས་ཅད་དང་། འགྲོ་བ་ཐམས་ཅད་དང་། འཇིག་རྟེན་གྱི་ཁམས་ཐམས་ཅད་ཀྱིས་བསྡུས་པ་རྣམས་སུ་ལྷག་པར་བྱམས་པ་བསྐྱེད་པ་དང་། ངན་འགྲོ་ཐམས་ཅད་ལ་སོགས་པའི་སྡུག་བསྔལ་གྱིས་ཀུན་དུ་གཟིར་བ་རྣམས་ལ་སྙིང་
རྗེ་བ་དང་། འཕགས་པ་ཐམས་ཅད་ལ་དགའ་བ་དང་། འཇིག་རྟེན་གྱི་ཆོས་ཐམས་ཅད་ལ་ཡང་བཏང་སྙོམས་པར་བྱ་བ་དང་། ཆོས་ཐམས་ཅད་ལ་ཡང་དངོས་པོ་མེད་པའི་ངོ་བོ་ཉིད་དང་། སྒྱུ་མ་ལྟ་བུ་དང་། མིག་ཡོར་ལྟ་བུར་ལྷག་པར་མོས་པར་བྱས་ལ། བྱང་ཆུབ་ཀྱི་སེམས་དང་ཤེས་རབ་ཀྱི་ཕ་

59-1-94b

རོལ་ཏུ་ཕྱིན་པ་དང་། ཐབས་མཁས་པའི་སྤྱད་པ་དང་། རིགས་ལྔ་རྣམས་དང་། རྡོ་རྗེ་དང་དྲིལ་བུ་དང་། ཕྱག་རྒྱ་དང་། སློབ་དཔོན་ཉིད་དང་། བྱམས་པ་དང་། མི་འཇིགས་པ་དང་། ཟང་ཟིང་དང་། ཆོས་ཀྱི་སྦྱིན་པ་དང་། ཐེག་པ་གསུམ་གྱིས་ངེས་པར་འབྱུང་བའི་ཚུལ་ཐམས་ཅད་སྟོན་པ་དང་། གསང་
སྔགས་ཀྱི་སྒོའི་སྤྱད་པ་སྤྱོད་པ་རྣམས་མངོན་སུམ་དུ་བྱས་ལ། སེམས་ཅན་ཐམས་ཅད་ལ་ཕན་པ་དང་། བདེ་བ་དམ་པ་གྲུབ་པར་བྱ་བའི་ཕྱིར། རྣམ་པར་སྣང་མཛད་དུ་གྱུར་ཅིག་ཅེས་སྨོན་ལམ་བཏབ་ལ། མི་གཡོ་བའི་ཏིང་ངེ་འཛིན་ལ་སྙོམས་པར་འཇུག་པར་བྱའོ། །དེ་ནས་རིམ་པ་འདིས་མངོན་
པར་བྱང་ཆུབ་པ་མངོན་དུ་བྱའོ། །རྡོ་རྗེའི་སྐྱིལ་མོ་ཀྲུང་བཅས་ལ་དེའི་སྟེང་དུ་རྡོ་རྗེ་བསྡམས་པ་བཀན་ཏེ་གཞག་ལ། རང་གི་སྙིང་གར་སེམས་དཔའི་རྡོ་རྗེ་རྣམ་པར་བསམས་ནས་འདི་ལྟར་བསྒོམ་པར་བྱའོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་སངས་རྒྱས་ཀྱི་ཞིང་འདི། དཔེར་ན་ཏིལ་གི་གོང་
བུ་བཞིན་དུ་ཡོངས་སུ་གང་བར་གྱུར་ཏོ། །དེ་ནས་དེ་བཞིན་གཤེགས་པ་ཐམས་ཅད་འདུས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཐམས་ཅད་གྲུབ་པ་ཞེས་བྱ་བ། བྱང་ཆུབ་ཀྱི་སྙིང་པོར་བཞུགས་པ་གང་ན་བ་དེར་གཤེགས་ཏེ། བྱང་ཆུབ་སེམས་དཔའ་དེ་ལ་ཆེད་དུ་ལོངས་སྤྱོད་རྫོགས་
པའི་སྐུ་བསྟན་ནས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཀྱིས་གང་གི་ཕྱིར་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་མངོན་པར་མ་རྟོགས་པར་དཀའ་བ་སྤྱོད་པ་ཐམས་ཅད་ལ་སྤྲོ་བ་བསྐྱེད་ཅིང་། ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་བྱ་སྙམ་
མམ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཐམས་ཅད་གྲུབ་པ་དེ་བཞིན་གཤེགས་པ་ཐམས་ཅད་ཀྱིས་བསྐུལ་བས་མི་གཡོ་བའི་ཏིང་ངེ་འཛིན་ལས་བཞེངས་ཏེ། དེ་བཞིན་གཤེགས་པ་ཐམས་ཅད་ལ་ཕྱག་བྱས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་
གཤེགས་པ་རྣམས། དེ་ཁོ་ན་ཉིད་ཇི་ལྟ་བུ་ལགས། ཇི་ལྟར་བསྒྲུབ་པར་བགྱི། བཀའ་སྩལ་དུ་གསོལ། དེ་སྐད་ཅེས་གསོལ་པ་དང་། དེ་བཞིན་གཤེགས་པ་དེ་དག་ཐམས་ཅད་ཀྱིས་གསུང་གཅིག་ཏུ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་རང་གི་སེམས་ལ་རྟོག་ཅིང་མཉམ་པར་ཞོག་ལ། 

59-1-95a

རང་བཞིན་གྱིས་གྲུབ་པའི་སྔགས་ཅི་དགར་ཟློས་ཤིང་བསྒྲུབ་པ་གྱིས་ཤིག །ཨོཾ་ཙིཏྟ་པྲ་ཏི་བེ་དྷཾ་ཀ་རོ་མི། དེ་ནས་བྱང་ཆུབ་སེམས་དཔས་དེ་བཞིན་གཤེགས་པ་ཐམས་ཅད་ལ་འདི་སྐད་ཅེས་གསོལ་ཏོ། །བཅོམ་ལྡ་འདས་དེ་བཞིན་གཤེགས་པ་རྣམས་བདག་གི་སྙིང་ག་
ན་ཟླ་བའི་དཀྱིལ་འཁོར་ལྟ་བུར་གདའ་བ་བདག་གིས་རྟོགས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ། རིགས་ཀྱི་བུ་སེམས་དེ་ནི་རང་བཞིན་གྱིས་འོད་གསལ་བས་ན། དེ་ནི་ཇི་ལྟ་བུར་སྦྱངས་པ་དེ་ལྟ་བུར་འགྱུར་ཏེ། དཔེར་ན་རས་དཀར་པོ་ཚོན་གྱིས་བསྒྱུར་
བ་བཞིན་ནོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་རང་བཞིན་གྱིས་འོད་གསལ་བའི་སེམས་ཤེས་པ་རྒྱས་པར་བྱ་བའི་ཕྱིར། ཨོཾ་བོདྷི་ཙིཏྟ་ཨུཏྤཱ་ད་ཡཱ་མི། ཞེས་རང་བཞིན་གྱིས་གྲུབ་པའི་སྔགས་འདིས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བྱང་ཆུབ་ཀྱི་སེམས་
བསྐྱེད་པར་གྱུར་ཏེ། དེ་ནས་བྱང་ཆུབ་སེམས་དཔས་ཡང་དེ་བཞིན་གཤེགས་པ་ཐམས་ཅད་ཀྱི་བཀས་བྱང་ཆུབ་ཀྱི་སེམས་བསྐྱེད་ནས། འདི་སྐད་ཅེས་གསོལ་ཏོ། །ཟླ་བའི་དཀྱིལ་འཁོར་ལྟ་བུར་མཐོང་བ་གང་ལགས་པ་དེ་ནི་ཟླ་བའི་དཀྱིལ་འཁོར་ཉིད་དུ་མཐོང་ངོ་ཞེས་སོ། །དེ་བཞིན་
གཤེགས་པ་ཐམས་ཅད་ཀྱིས་བཀའ་སྩལ་པ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་སེམས་བསྐྱེད་པ་ཀུན་དུ་བཟང་པོ་ཁྱོད་ཀྱིས་མངོན་སུམ་དུ་གྱུར་གྱིས་དེ་ལེགས་པར་བསྒྲུབས་ཤིག །དེ་བཞིན་གཤེགས་པ་ཐམས་ཅད་ཀྱིས་སེམས་བསྐྱེད་པ་ཀུན་དུ་བཟང་པོ་དེ་བརྟན་པར་བྱ་
བའི་ཕྱིར། སྔགས་འདིས་རང་གི་སེམས་ཟླ་བའི་དཀྱིལ་འཁོར་ལ་རྡོ་རྗེའི་དབྱིབས་སུ་སོམས་ཤིག །ཨོཾ་ཏིཥྛ་བཛྲ། བྱང་ཆུབ་སེམས་དཔས་གསོལ་པ། བཅོམ་ལྡན་འདས་དེ་བཞིན་གཤེགས་པ་རྣམས་ཟླ་བའི་དཀྱིལ་འཁོར་གྱི་སྟེང་ན་རྡོ་རྗེར་བདག་གིས་མཐོང་ངོ་། །དེ་བཞིན་གཤེགས་པ་
ཐམས་ཅད་ཀྱིས་བཀའ་སྩལ་པ། དེ་བཞིན་གཤེགས་པ་ཐམས་ཅད་ཀྱི་སེམས་བསྐྱེད་པ་ཀུན་དུ་བཟང་པོའི་སེམས་རྡོ་རྗེ་འདི་སྔགས་འདིས་བརྟན་པར་གྱིས་ཤིག །ཨོཾ་བཛྲ་ཨཱཏྨ་ཀོ྅ཧཾ། དེ་ནས་ནམ་མཁའི་དབྱིངས་ཐམས་ཅད་དུ་མཉམ་པར་འཇུག་པའི་དེ་བཞིན་གཤེགས་པ་ཐམས་ཅད་ཀྱི་སྐུ་

59-1-95b

དང་གསུང་དང་ཐུགས་རྡོ་རྗེའི་དབྱིངས་ཇི་སྙེད་པ་དེ་དག་ཐམས་ཅད། དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་སེམས་དཔའི་རྡོ་རྗེ་དེར་ཞུགས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས། བཅོམ་ལྡན་འདས་བྱང་ཆུབ་སེམས་དཔའ་ཆེན་པོ་དོན་ཐམས་ཅད་གྲུབ་པ་དེ་ལ། རྡོ་རྗེའི་
དབྱིངས་རྡོ་རྗེའི་དབྱིངས་ཞེས་བྱ་བ་རྡོ་རྗེའི་མིང་གིས་དབང་བསྐུར་རོ། །དེ་ནས་བྱང་ཆུབ་སེམས་དཔའ་རྡོ་རྗེའི་དབྱིངས་ཀྱིས་དེ་བཞིན་གཤེགས་པ་དེ་དག་ཐམས་ཅད་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་རྣམས་དེ་བཞིན་གཤེགས་པ་ཐམས་ཅད་ཀྱི་སྐུ་ནི་བདག་
ལགས་པར་མཐོང་ལགས་སོ། །དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ། སེམས་དཔའ་ཆེན་པོ་དེ་ལྟ་བས་ན། སེམས་དཔའི་རྡོ་རྗེ་དེ་རྣམ་པའི་མཆོག་ཐམས་ཅད་དང་ལྡན་པའི་སངས་རྒྱས་ཀྱི་སྐུར་བདག་ཉིད་རང་བཞིན་གྱིས་གྲུབ་པའི་སྔགས་འདིས་ཅི་དགར་ཟློས་ལ་བསྒོམས་
ཤིག །ཨོཾ་ཡ་ཐཱ་སརྦ་ཏ་ཐཱ་ག་ཏ་ཏ་ཐཱ་ཨ་ཧཾ། དེ་ནས་དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་ཆེན་པོ་རྡོ་རྗེ་དབྱིངས་ཀྱིས་བདག་དེ་བཞིན་གཤེགས་པ་མངོན་པར་རྫོགས་པར་སངས་རྒྱས་ནས། དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ། འདི་སྐད་ཅེས་གསོལ་ཏོ། །
བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བདག་བྱིན་གྱིས་རློབས་ལ། མངོན་པར་རྫོགས་པར་བྱང་ཆུབ་པ་འདི་བརྟན་པར་མཛོད་ཅིག །དེ་ནས་དེ་སྐད་ཅེས་གསོལ་པ་དང་། དེ་བཞིན་གཤེགས་པ་ཐམས་ཅད་དེ་བཞིན་གཤེགས་པ་རྡོ་རྗེ་དབྱིངས་ཀྱི་སེམས་དཔའི་རྡོ་རྗེ་དེར་ཞུགས་སོ། །
ཨོཾ་སརྦ་ཏ་ཐཱ་ག་ཏ་ཨ་བྷི་ས་བོ་དྷི་དྲྀ་ཌྷ་བཛྲ་ཏིཥྛ་ཞེས་བྱ་བ་དང་། དེའི་སྙིང་ག་དང་། སྨིན་མཚམས་དང་། ལྐོག་མ་དང་། སྤྱི་བོ་རྣམས་སུ་གོ་རིམས་ཇི་ལྟ་བ་བཞིན་དུ། རྡོ་རྗེ་སེམས་མ་དང་། རྡོ་རྗེ་རིན་ཆེན་མ་དང་། རྡོ་རྗེ་ཆོས་མ་དང་། རྡོ་རྗེ་ལས་མས་བརྟན་པར་བྱ་བའི་ཕྱིར་མངོན་པར་བྱང་ཆུབ་པ་རྫོགས་པར་
བྱས་པར་གྱུར་ཏོ། །དེ་ནས་སླར་བྱུང་སྟེ། ཡང་བཛྲ་རཏྣ་ཨ་བྷི་ཥིཉྩ་ཞེས་བྱ་བའི་སྙིང་པོ་ཟློས་པས། དེ་ལ་རིན་པོ་ཆེའི་ཅོད་པན་དང་། དར་དཔྱངས་ཀྱིས་དབང་བསྐུར་བ་བྱིན་ནོ། །དེ་ནས། མདོར་ན་འཇིག་རྟེན་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བའི། །

59-1-96a

ཆོས་ཀྱི་འཁོར་ལོ་རབ་ཏུ་བསྐོར། །ཞེས་བྱ་བ་དང་། དེ་བཞིན་དུ་རྡོ་རྗེ་དང་། རིན་པོ་ཆེ་དང་། པདྨ་དང་། ལས་དང་། ཁྲོ་བོའི་འཁོར་ལོ་རབ་ཏུ་བསྐོར། །ཞེས་བྱ་བའི་རྗེས་སུ་གནང་བའི་དབང་བསྐུར་བ་བྱིན་པས། འཕགས་པ་སྤྱན་རས་གཟིགས་དབང་ཕྱུག་གི་ཚོགས་ཀྱི་ཡེ་
ཤེས་བསྐྱེད་ནས། སངས་རྒྱས་ཀྱི་སྤྲུལ་པའི་ལས་དང་། སེམས་ཅན་གྱི་བྱ་བའི་ལས་ཀྱིས། སྣ་ཚོགས་པའི་ལས་ཉིད་ལ་རབ་ཏུ་གཞག་སྟེ། འདོད་པའི་ཁམས་ཐམས་ཅད་ན་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་གནས་སུ་བཞག་པར་འགྱུར་བ་དང་། བཅོམ་ལྡན་འདས་རྣམ་པར་སྣང་
མཛད། ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་བྱེ་བ་ཕྲག་བརྒྱད་ཀྱིས་ཡོངས་སུ་བསྐོར་ནས་བཞུགས་སོ། །དེ་ནས་ཨོཾ་བཛྲ་དྷ་ཏྭི་ཤྭ་རི་ཧཱུྃ་བཛྲི་ཎི། ཞེས་བྱ་བའི་རིག་སྔགས་འདི་ཕྱག་རྒྱ་དང་ལྡན་པས་སྙིང་ག་དང་། སྨིན་མཚམས་དང་། ལྐོག་མ་དང་། སྤྱི་བོ་རྣམས་སུ་བདག་ཉིད་བྱིན་
གྱིས་བརླབ་པར་བྱའོ། །རྡོ་རྗེ་ཐལ་མོ་ལས། མཐེ་བོང་གཉིས་ནི་བསྣོལ་བྱས་ལ། །མཛུབ་མོ་རྩེ་མོ་བཀུག་ནས་ནི། །གུང་མོ་བསྙམས་པའི་ཚིགས་སུ་སྦྱར། །རྡོ་རྗེ་དབྱིངས་ཀྱི་དབང་མོར་བཤད། །ཅེས་བྱ་བ་འདི་ནི་ཕྱག་རྒྱའོ། །དེ་ལྟར་བདག་ཉིད་བྱིན་གྱིས་བརླབས་ནས། རབ་ཏུ་དགའ་བ་
རྣམ་པར་དག་པའི་གནས་འདི་ནི། བྱང་ཆུབ་སེམས་དཔའི་གནས་སོ་ཞེས་བྱ་བ་ལ་སོགས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱིས་སྒོའི་ཆོས་སྟོན་པར་འགྱུར་བ་སྟེ། གཞུང་འདི་དག་གིས་ནི་དང་པོའི་སྦྱོར་བ་ཞེས་བྱ་བའི་ཏིང་ངེ་འཛིན་སྟོན་པར་གྱུར་པ་ཡིན་ནོ། །དེ་ལྟར་དང་པོའི་སྦྱོར་བ་མངོན་དུ་
བྱས་ནས། རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ཏེ། ཧཱུཾ་ཟློས་ཤིང་རྡོ་རྗེ་སེམས་དཔའ་ལ་སོགས་པ་རང་རང་གི་སྙིང་ག་ལས་ཕྱུང་སྟེ། ཇི་སྐད་བཤད་པའི་དཀྱིལ་འཁོར་གྱི་དབུས་སུ་དེ་བཞིན་གཤེགས་པ་དེ་དག་ཐམས་ཅད་བཀུག་སྟེ། བཅུག་ལ་བཅིངས་ཏེ་དབང་དུ་བྱས་ལ། རྡོ་རྗེ་སེམས་
དཔའ་ལ་སོགས་པ་དང་ལྷན་ཅིག་ཏུ་གྱུར་ནས། རྡོ་རྗེ་སེམས་དཔའ་ལ་སོགས་པ་ནས། ཆུ་ལྷའི་མཐར་ཐུག་གི་བར་དུ་རང་གི་གནས་སུ་ཧཱུཾ་ཉིད་ཀྱིས་གཞག་པར་བྱ་སྟེ། འདི་ནི་དཀྱིལ་འཁོར་གྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པའོ། །དེ་ནས་རྡོ་རྗེ་བསྡུ་བའི་ཕྱག་རྒྱ་གཉིས་པ་བཅིངས་ལ། ཨོཾ་

59-1-96b

བཛྲ་ས་མ་ཡ་ཛཿཛཿཛཿཧཱུཾ་བཾ་ཧོཿ། ཞེས་བརྗོད་དེ། སྒོ་དབྱེ་བ་སྔོན་དུ་འགྲོ་བ་བསྡུ་བར་བྱའོ། །དེ་ནས་རྡོ་རྗེ་བསྡུ་བ་དེས་རྡོ་རྗེ་འཛིན་པ་ཆེན་པོ་ལ་སོགས་པ་དང་། འཇིག་རྟེན་གྱི་ཁམས་ཐམས་ཅད་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་པ་བྱོན་
པར་བྱས་པ་དང་། ཨོཾ་སརྦ་ཏ་ཐཱ་ག་ཏ་པཱ་ད་བནྡྷ་ནཾ་ཀ་རོ་མི། ཞེས་བརྗོད་ཅིང་དེ་བཞིན་གཤེགས་པ་ཐམས་ཅད་ཀྱི་ཞབས་ལ་ཕྱག་བྱས་ནས་ཆེད་དུ་བརྗོད་པ་འདི་ཆེད་དུ་བརྗོད་དོ། །ཨེ་མའོ་བྱང་ཆུབ་སེམས་དཔའ་ཡི། །ཀུན་ཏུ་བཟང་པོ་སྤྱོད་པ་མཆོག །དེ་བཞིན་གཤེགས་པའི་འཁོར་ལོ་
ཡི། །དབུས་ན་དེ་བཞིན་གཤེགས་པ་མཛེས། །དེ་ནས་ཆེད་དུ་བརྗོད་པ་དེ་སྐད་དུ་སྨྲས་ནས། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ནས་འདུས་པའི་དེ་བཞིན་གཤེགས་པ་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་པ་དེ་དག་ཐམས་ཅད་དེ་བཞིན་གཤེགས་པ་ཐམས་
ཅད་ཀྱི་བྱིན་གྱི་རླབས་ཀྱིས་བཅོམ་ལྡན་འདས་རྡོ་རྗེ་འཆང་ཆེན་པོའི་ཐུགས་སུ་ཞུགས་སོ། །དེ་ནས་དེ་བཞིན་གཤེགས་པ་དེ་དག་ཐམས་ཅད་ཀྱི་ཐུགས་ཀ་ནས་རྡོ་རྗེ་ཡིད་ལས་བྱུང་བ་ལ་སོགས་པ་ནས། ཆུ་ལྷའི་མཐར་ཐུག་པའི་བར་དུ་ཕྱུང་ནས། རྡོ་རྗེ་ཡིད་ལས་བྱུང་བ་ལ་སོགས་པ་ནས། ཆུ་ལྷའི་
མཐར་ཐུག་པ་དང་བཅས་པ་དང་། གཅིག་ཏུ་གྱུར་ནས་གནས་ཏེ། ཆེད་དུ་བརྗོད་པ་འདི་ཆེད་དུ་བརྗོད་དོ། །ཨེ་མའོ་སངས་རྒྱས་ཐམས་ཅད་ཀྱིས། །རྒྱ་ཆེན་གདོད་ནས་སྐྱེ་བ་མེད། །རྡུར་ཕྲན་ཇི་སྙེད་ཐམས་ཅད་ཀྱི། །སངས་རྒྱས་རྣམས་ནི་གཅིག་ཏུ་གྱུར། །དེ་ནས་བདེ་བ་ཆེན་པོ་ཡིས། །རྡོ་རྗེའི་ཕྱག་རྒྱ་
ཐམས་ཅད་བཅིངས་ནས། ཧཱུྃ་ཟློས་པ་ལ་འབད་པའི་རྣལ་འབྱོར་པ་རྡོ་རྗེ་འཛིན་པ་ཆེན་པོ་ལ་སོགས་པ་དེ་རྣམས་ཀྱིས་བླངས་ནས། དབང་བསྐུར་བ་ཐམས་ཅད་ཀྱིས་དབང་བསྐུར་བར་གྱུར་པར་བདག་ཉིད་བསམས་ལ། དབང་བསྐུར་བ་ཐམས་ཅད་བླང་བར་བྱའོ། །དེ་ལྟར་དབང་བསྐུར་བ་བླངས་
ནས། རྡོ་རྗེ་འཛིན་པ་ཆེན་པོ་ལ་སོགས་པ་ནས་ཆུ་ལྷའི་མཐར་ཐུག་པའི་བར་དུ་རྡོ་རྗེ་གཟུགས་དང་། སྒྲ་དང་། དྲི་དང་། རོའི་ལས་ཀྱི་ཕྱག་རྒྱ་རྣམས་ཀྱིས་བཀུག་ལ་བཅུག་སྟེ། བཅིངས་ལ་དབང་དུ་བྱས་ཏེ། མཆོད་ཡོན་ཕུལ་ཏེ་ཕྱག་རྒྱ་བཞིས་རྒྱས་བཏབ་ལ། རང་གི་དབང་བསྐུར་བས་དབང་བསྐུར་བར་བྱ་སྟེ། 

59-1-97a

འདི་ནི་ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་པའོ། །དེ་ལ་རང་གི་ལས་ལ་ངེས་པར་སྦྱོར་བའི་རབ་ཏུ་སྦྱོར་བ་ནི་འདི་ཡིན་ཏེ། རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ། འདི་སྐད་ཅེས་བརྗོད་པར་བྱ་སྟེ། སེམས་ཅན་གྱི་ཁམས་ཐམས་ཅད་རབ་ཏུ་དགའ་བ་རྣམ་པར་
དག་པའི་གནས་ལ་དགོད་པར་མཛོད་ཅིག །ཧཱུྃ་དེ་བཞིན་དུ་རྡོ་རྗེ་རོའི་བར་དུ་ཕྱག་རྒྱ་ཆེན་པོ་བཅིངས་ལ། འདི་སྐད་ཅེས་བརྗོད་པར་བྱ་སྟེ། སེམས་ཅན་གྱི་ཁམས་ཐམས་ཅད་རོ་རྣམ་པར་དག་པའི་གནས་ལ་རབ་ཏུ་དགོད་པར་མཛད་ཅིག །ཧཱུྃ་དེ་ལྟར་ཏིང་ངེ་འཛིན་གསུམ་རྣམ་པར་བསྒོམས་ནས། 
ཡང་རྡོ་རྗེ་བསྡུ་བ་བྱའོ། །དེ་ནས་རྡོ་རྗེ་སེམས་དཔའ་ཡི། །ཕྱག་རྒྱ་ཆེན་པོ་སྒོམ་བྱེད་ཅིང་། །མིང་བརྒྱ་རྩ་བརྒྱད་དམ་པ་ནི། །ལན་ཅིག་བར་དུ་བརྗོད་པར་བགྱི། །དཔལ་མཆོག་དང་པོ་སེམས་དཔའ་ཆེ། །ཞེས་བྱ་བ་ནས་བརྩམས་ཏེ། མགོན་པོ་ཁྱོད་ལ་དད་བགྱིས་པས། །རྡོ་རྗེ་སེམས་དཔའ་
དེང་བདག་གྲུབ། །ཅེས་བྱ་བའི་མཐར་ཐུག་པའི་བར་གྱིས་བསྟོད་དོ། །དེ་ནས་སྔར་བཤད་པའི་གསང་བའི་ལྕགས་ཀྱུས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་བ་དག་བྱས་ལ། དཀྱིལ་འཁོར་གྱི་ལྷ་ཐམས་ཅད་རང་རང་གི་གནས་སུ་ངེས་པར་དགོད་པར་བྱའོ། །དེ་ནས་རྡོ་རྗེ་
གནོད་སྦྱིན་གྱིས་བགེགས་བསལ་བར་བྱས་ལ། ར་བ་དང་དྲ་བ་བྱས་ཏེ། རྡོ་རྗེ་ཁུ་ཚུར་གྱིས་སྒོ་བཅད་དེ། ཨོཾ་བཛྲ་རཀྵ་ཧྃ། ཞེས་བྱ་བ་དང་། རྡོ་རྗེ་བསྲུང་བའི་དམ་ཚིག་གི་ཕྱག་རྒྱས་བསྲུང་བ་ཐམས་ཅད་ཡང་དག་པར་བསྲུང་བར་བྱའོ། །རྡོ་རྗེ་བསྡམས་པ་བཅིངས་ལ། མཐེ་བོང་དང་མཐེ་ཆུང་གཉིས་ཐད་
ཀར་སྦྱར་ལ། མཛུབ་མོ་གཉིས་གཤིབས་པ་འདི་ནི་རྡོ་རྗེ་བསྲུང་བའི་དམ་ཚིག་གི་ཕྱག་རྒྱའོ། །དེ་ནས་བཅོམ་ལྡན་འདས་དཔལ་རྡོ་རྗེ་སེམས་དཔའ་འཁོར་དང་བཅས་པ་ལ་མཆོད་ཡོན་ཧཱུྃ་དང་བཅས་པར་ཕུལ་ལ། དང་པོའི་རྡོ་རྗེ་བཅིངས་ཏེ། རང་གི་སྙིང་གའི་ཟླ་བ་ལ་ཧཱུཾ་ལས་དང་པོའི་རྡོ་རྗེ་བསྐྱེད་ལ། ཧཱུཾ་དྲྀ་ཤྱ་
ཞེས་བྱ་བས་བཅོམ་ལྡན་འདས་འཁོར་དང་བཅས་པ་བལྟ་བར་བྱས་ནས། ཛཿཧཱུཾ་བཾཾ་ཧོཿས་མ་ཡ་སྟྭཾ་ས་མ་ཡ་སྟྭ། ཨ་ཧྃ་ཧཱུྃ། ཞེས་ལན་གསུམ་བརྗོད་དོ། །བཅོམ་ལྡན་འདས་འཁོར་དང་བཅས་ཏེ་བསྒྲུབ་པར་བྱའོ། །དེ་ནས་རང་གི་ལྕེ་ལ་རྡོ་རྗེ་དེ་བཞིན་དུ་བསྐྱེད་ལ། ལྷ་ཐམས་ཅད་ཀྱི་ལྗགས་ལ་ཡང་

59-1-97b

ཧཱུྃ་བསམ་པར་བྱ་སྟེ། འདི་ནི་དེ་རྣམས་ཀྱི་ཆོས་ཀྱི་ཕྱག་རྒྱའོ། །དེ་ནས་རང་གི་སྙིང་གར་ཨ་ལས་སྣ་ཚོགས་རྡོ་རྗེ་བསྐྱེད་ལ། རྡོ་རྗེ་སེམས་དཔའ་ལ་སོགས་པ་རང་གི་ལས་ཀྱི་ཕྱག་རྒྱ་ཧཱུཾ་ཟློས་ཤིང་གར་ལས་བྱུང་བ་སྟེ། བ་དན་གསུམ་པ་རྩེ་གསུམ་ཅན། །བསྒྱིངས་པས་མཐའ་སོགས་ལས་གྲོལ་
བས། །གློག་འགྱུ་ལྟར་འདེགས་མདུན་དུ་བསྐོར། །དེ་ནི་རྡོ་རྗེ་གར་ཞེས་བཤད། །ཅེས་བྱ་བ་དང་། རྡོ་རྗེ་ཁུ་ཚུར་གཉིས་བཅིངས་ནས་གཡོན་པ་དཀུར་བསྟེན་ནས། གཡས་པས་བསྟོད་པའི་ཚུལ་གྱིས་སྙིང་གར་འཛིན་པ་འདི་ནི་བཅོམ་ལྡན་འདས་ཀྱི་ལས་ཀྱི་ཕྱག་རྒྱའོ། །རྡོ་རྗེ་ཁུ་ཚུར་གཉིས་
ཀྱིས་མདའ་གསོར་བ་དང་བཅས་པ་གཡོན་དུ་འཕེན་པ་ནི་རྡོ་རྗེ་ཡིད་ལས་བྱུང་བའིའོ། །ཁུ་ཚུར་གཉིས་པ་དེ་དག་ཉིད་ཀྱིས་རང་ལ་འཁྱུད་པར་བྱེད་པ་དེ་ནི་ཀཱི་ལི་ཀཱི་ལའིའོ། །རྡོ་རྗེ་ཁུ་ཚུར་གཉིས་པོ་དེ་དག་ཉིད་ཀྱིས་རྒྱལ་མཚན་བསྒྲེང་བའི་ཚུལ་དུ་བྱེད་པ་ནི་རྡོ་རྗེ་བདུག་པའིའོ། །རྡོ་རྗེ་ཁུ་ཚུར་དེ་དག་ཉིད་
བཀན་ནས་ལག་པ་གཉིས་རྐེད་པ་གཉིས་སུ་འཇོག་པ་ནི་རྡོ་རྗེ་སྙེམས་པའིའོ། །མེ་ཏོག་ལ་སོགས་པ་ནས་གར་གྱི་བར་གྱི་ལས་ཀྱི་ཕྱག་རྒྱ་དམ་ཚིག་གི་ཕྱག་རྒྱའི་ཚུལ་དུ་བྱས་པ་ནི་ལས་ཀྱི་ཕྱག་རྒྱར་འགྱུར་རོ། །རྡོ་རྗེ་གཟུགས་ལ་སོགས་པ་ནས་ཆུ་ལྷ་ལ་སོགས་པའི་མཐར་ཐུག་པ་རྣམས་ཀྱི་ལས་ཀྱི་
ཕྱག་རྒྱ་ནི་བྲིས་པའི་རྗེས་སུ་མཐུན་པའི་ཕྱག་རྒྱ་ཆེན་པོ་གང་དག་ཡིན་པ་དེ་དག་ཉིད་ལས་ཀྱི་ཕྱག་རྒྱའི་ཚུལ་རབ་ཏུ་སྦྱར་བ་འདིར་ལས་ཀྱི་ཕྱག་རྒྱར་འགྱུར་རོ། །དེ་བཞིན་གཤེགས་པ་རྣམས་ཀྱི་ལས་ཀྱི་ཕྱག་རྒྱ་ནི་དེ་བཞིན་གཤེགས་པའི་ཁུ་ཚུར་ལས་བྱུང་བ་ཡིན་ཏེ། གཡོན་པ་དེ་བཞིན་གཤེགས་པའི་ཁུ་
ཚུར་སྙིང་གའི་ཕྱོགས་སུ་ཆོས་གོས་ཀྱི་རྩེ་མོ་འཛིན་པའི་ཚུལ་གྱིས་གཞག་ལ། གཡས་པའི་སོར་མོ་ཐམས་ཅད་བརྐྱང་པས། ས་ལ་རེག་པའི་ཚུལ་དུ་བྱ་བ་འདི་ནི་མི་བསྐྱོད་པའིའོ། །འདི་ཉིད་ལག་པ་གཡས་པ་རྐྱོང་པའི་ཚུལ་དུ་བཞག་པ་འདི་ནི་རིན་ཆེན་འབྱུང་ལྡན་གྱིའོ། །མི་བསྐྱོད་པའི་ཕྱག་རྒྱ་
ལས་གཡོན་པའི་ཆོས་གོས་ཀྱི་རྩེ་མོ་འཛིན་པའི་ལག་པས་པདྨའི་སྡོང་བུ་བཟུང་ལ། ལག་པ་གཡས་པའི་པདྨ་འདབ་མ་ཁ་འབྱེད་པ་ལྟ་བུ་ནི་འོད་དཔག་ཏུ་མེད་པའིའོ། །མི་བསྐྱོད་པའི་ཕྱག་རྒྱ་ལས་ལག་པ་གཡས་པ་བ་དན་གསུམ་པ་ལྟར་བྱས་ཏེ། མི་འཇིགས་པ་སྦྱིན་པའི་ཚུལ་དུ་བཞག་པ་ནི་དོན་

59-1-98a

ཡོད་གྲུབ་པའི་ལས་ཀྱི་ཕྱག་རྒྱའོ། །རྡོ་རྗེ་ཁུ་ཚུར་གཉིས་བཅིངས་ལ། ལག་པ་གཉིས་སྙེམས་པ་དང་བཅས་པ་དང་། འདེགས་པའི་ཚུལ་གྱིས་འཇོག་པ་འདི་ནི་ཕྱག་ན་རྡོ་རྗེའིའོ། །ལག་པ་གཡོན་པ་སྙིང་གར་བཞག་ལ། གཡས་པ་རལ་གྲི་འཛིན་པ་ལྟ་བུ་ནི་འཇམ་དཔལ་
གྱིའོ། །རྡོ་རྗེ་ཁུ་ཚུར་གཉིས་དབང་བསྐུར་བའི་གནས་སུ་འཇོག་པ་ལྟ་བུ་ནི་ནམ་མཁའི་སྙིང་པོའིའོ། །རྡོ་རྗེ་གར་བསྐོར་ལ་དཀྲོལ་ཏེ་ཐལ་མོ་ཁོང་སྟོང་དུ་བྱས་ནས་སྤྱི་གཙུག་ཏུ་འཇོག་པ་ནི་ནམ་མཁའི་མཛད་ཀྱིའོ། །གཡས་དང་གཡོན་གྱི་པདྨ་ཁ་འབྱེད་པ་ལྟ་བུར་བྱེད་པ་ནི། སྤྱན་རས་གཟིགས་དབང་
ཕྱུག་གིའོ། །མགལ་མེའི་འཁོར་ལོ་བསྐོར་བ་ལྟ་བུར་བྱ་བ་ནི་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའིའོ། །རྡོ་རྗེ་ཁུ་ཚུར་གཉིས་ངེས་པར་འཚིར་བ་ནི་རྡོ་རྗེ་ཁུ་ཚུར་གྱིའོ། །མཐེའུ་ཆུང་དང་མཛུབ་མོ་མཆེ་བ་ལྟར་བྱ་བ་འདི་ནི་རྡོ་རྗེ་གནོད་སྦྱིན་གྱི་ལས་ཀྱི་ཕྱག་རྒྱའོ། །དེ་ནས་ཕྱག་རྒྱ་ཆེན་པོས་
ཐམས་ཅད་རྒྱས་གདབ་པར་བྱ་སྟེ། དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་ནི་བཤད་ཟིན་ཏོ། །གཞན་དག་གིས་ཡང་བྲིས་པ་དང་། རྗེས་སུ་མཐུན་པར་བཅིང་བར་བྱའོ། །དེའི་འོག་ཏུ་བཅོམ་ལྡན་འདས་རྡོ་རྗེ་སེམས་དཔའ་སངས་རྒྱས་ཀྱི་ཕྲེང་བ་ལ་སོགས་པས་དབང་བསྐུར་ལ། དེ་བཞིན་
གཤེགས་པ་རྣམས་དང་། ཕྱི་རོལ་གྱི་རྡོ་རྗེའི་རིགས་ཆུ་ལྷའི་བར་དུ་ཡང་རྡོ་རྗེ་རིན་པོ་ཆེའི་དབང་བསྐུར་བས་དབང་བསྐུར་རོ། །རྡོ་རྗེ་ཡིད་ལས་བྱུང་བ་ལ་སོགས་པ་ནས། རྡོ་རྗེ་རོའི་མཐར་ཐུག་པ་དང་། ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་བརྒྱད་ནི། སངས་རྒྱས་ལྔའི་དབུ་རྒྱན་གྱི་ཕྱག་
རྒྱས་དབང་བསྐུར་བར་བྱའོ། །དེ་ནས་རྡོ་རྗེ་རྣམ་པར་སྒེག་པའི་ཕྱག་རྒྱས་ཕྱག་བྱས་ལ། འདོད་ཆགས་ཆེན་པོ་བདེ་བ་ཆེ། །རྡོ་རྗེ་ཆེན་པོ་ནོར་ཆེ་ཞིང་། །ཡེ་ཤེས་ཆེན་པོ་ལས་ཆེ་བ། །རྡོ་རྗེ་སེམས་དཔར་དེང་འགྲུབ་མཛོད། །ཅེས་བྱ་བའི་དེ་ཁོ་ན་ཉིད་ཀྱིས་ཡང་དག་པར་བསྐུལ་ལ། བསྟོད་པའི་ཕྱག་རྒྱ་
བཅིངས་ཏེ། ཡང་མཚན་བརྒྱ་རྩ་བརྒྱད་པས་ཡང་དག་པར་བསྟོད་དོ། །མཆོད་ཡོན་ཕུལ་ལ། བཅོམ་ལྡན་འདས་འཁོར་དང་བཅས་པ་ལ། མེ་ཏོག་ལ་སོགས་པ་མཆོད་པ་རྣམ་པ་ལྔས་བཛྲ་སྥ་ར་ཎ་ཁྃ་ཧཱུྃ་ཞེས་འདོན་ཞིང་ཡང་དག་པར་མཆོད་དེ། རྡོ་རྗེ་མཚོན་ཆ་ལ་སོགས་པའི་ལས་ཀྱི་ཕྱག་རྒྱ་རྣམ་པ་བཅུ་

59-1-98b

གཉིས་ཀྱིས་ཀྱང་ལེགས་པར་མཆོད་དོ། །དེ་ནས་ཕྱག་བཞི་བྱས་ལ། ཨོཾ་བཛྲ་ཨཱཏྨ་ཀོ྅ཧཾ། ཞེས་བྱ་བས་ལྷ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་ངོ་བོ་ཉིད་དུ་ཡེ་ཤེས་བདག་ཉིད་བསྒོམ་པ་དང་། ཨོཾ་སྭ་བྷཱ་ཝ་ཤུདྡྷོ྅ཧཾ། ཞེས་བྱ་བས་གཟུགས་བརྙན་དང་མཚུངས་ཤིང་དེ་ཁོ་ན་ཉིད་ཀྱི་ངོ་བོ་ཉིད་དུ་
བསམ་པ་དང་། ཨོཾ་སརྦ་ས་མོ་ཧཾ། ཞེས་བྱ་བས་ཆོས་ཐམས་ཅད་བདག་མེད་པའི་མཉམ་པ་ཉིད་ཀྱིས་ལྷ་ཐམས་ཅད་ཀྱི་ངོ་བོ་ཉིད་དུ་ཡེ་ཤེས་གཅིག་གི་རྒྱུ་མཐུན་པ་ཡིན་པར་རྣམ་པར་བསྒོམས་ལ། ལྷ་ཐམས་ཅད་ཀྱི་ཐུགས་ཀའི་ཟླ་བའི་རྡོ་རྗེ་ལ་ཧཱུྃ་ཞེས་བྱ་བ་རྣམ་པར་བཀོད་དེ། དེ་ཉིད་འདོན་ཅིང་བཅོམ་
ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ། དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོས་དབང་ཕྱུག་ཆེ། །འདོད་ཆགས་ཆེན་པོ་བདེ་བ་ཆེ། །རྡོ་རྗེ་སེམས་དཔར་བདག་གྱུར་ཅིག །ཅེས་བརྗོད་ལ་བསྒོམས་ཏེ། ལྷ་ཐམས་ཅད་ཀྱི་ཞལ་གྱི་སྒོ་ནས་ཧཱུྃ་གི་སྒྲ་མངོན་པར་སྒྲོགས་
པར་མཛད་པར་བསམས་ཏེ། དེ་ལྟར་ན་ཡང་ཐམས་ཅད་ཀྱི་ཡང་བཟླས་པ་བྱས་པར་འགྱུར་རོ། །བསྒོམས་པས་དུབ་པར་གྱུར་ན། མཚན་བརྒྱ་རྩ་བརྒྱད་ཀྱིས་ཡང་ཡང་དུ་བསྟོད་པ་དང་། མཆོད་པ་རྣམ་པ་བཅུ་གཉིས་དང་། ཕྱག་བྱས་ཏེ་འདི་དག་གིས་ནི་ཐམས་ཅད་སྤྱན་དྲངས་པ་དང་། མཆོད་པ་ཆེན་
པོ་དང་། བདག་ལ་བྱིན་གྱིས་བརླབ་པ་དང་། སྒྲུབ་པ་བཤད་པ་ཡིན་ནོ། །དེ་ནས་བྷ་ར་ཏ་དང་བི་ཤི་ཁ་ལ་མཁས་པའི་སྒྲུབ་པ་དང་རྗེས་སུ་སྒྲུབ་པ་དག་བཤད་པར་བྱ་སྟེ། དེ་ལ་ཧཱུྃ་གི་གླུ་ནི་རྗེས་སུ་སྒྲུབ་པ་སྟེ། རྡོ་རྗེ་དང་དྲིལ་བུ་དང་། གླིང་བུ་དང་། པི་ཝང་དང་། ཅང་ཏེའུ་དང་། རྫ་རྔ་དང་། རྔ་བོ་ཆེ་ལ་སོགས་པའི་
རོལ་མོ་རྣམས་དང་། བརྡུང་བའི་ཐལ་མོ་དང་བཅས་པ་དང་། ཧཱུྃ་གི་གླུ་ཉིད་ཀྱིས་དཔལ་རྡོ་རྗེ་སེམས་དཔའི་སྐུ་དང་གསུང་དང་ཐུགས་ཡང་དག་པར་སྟོན་པ་ནི་རྗེས་སུ་སྒྲུབ་པ་སྟེ། དེ་སྐད་དུ། རང་ལྷ་ཇི་བཞིན་སྦྱོར་བ་ཡི། །རྡོ་རྗེ་ཀུན་མཆོག་ལུས་དང་ནི། །གླུ་དང་རོལ་མོའི་ཆོ་ག་དང་། །རྡོ་རྗེ་ཉིད་ཀྱིས་མཉེས་
པར་བྱ། །རང་ལྷར་ཇི་བཞིན་སྦྱོར་བ་ཡི། །རྩ་བའི་དབྱངས་ཀྱིས་རབ་བསྐུལ་ཞིང་། །གླུ་དང་རོལ་མོའི་ཆོ་ག་དང་། །དྲིལ་བུ་ཉིད་དང་གླུར་བླང་ངོ་། །རང་ལྷར་ཇི་བཞིན་སྦྱོར་བ་ཡི། སྣ་ཚོགས་ཕྱག་རྒྱའི་བདག་པོའི་མཆོག །གླུ་དང་རོལ་མོའི་ཆོ་ག་དང་། །དམ་ཚིག་ཉིད་ཀྱང་རྗེས་སུ་སྒྲུབ། །རྡོ་རྗེ་དྲིལ་བུ་

59-1-99a

རོལ་མོ་མཉམ། །སྣ་ཚོགས་བརྩོན་པའི་རོལ་མོ་དང་། །རང་གསང་ཆོ་ག་ལེགས་བརྗོད་པས། །གཡས་པའི་ཐལ་མོ་རབ་ཏུ་འགྲུབ། །འདི་ཡིས་རྟོག་པ་ཐམས་ཅད་ལ། །རྡོ་རྗེའི་ཆ་ལུགས་བསྐུལ་བྱས་པ། །རང་གི་ལྷ་ཡི་གཞིར་གྱུར་གྱི། །དམ་ཚིག་ཐམས་ཅད་འགྲུབ་པར་
འགྱུར། །དེ་ནས་རྗེས་སུ་སྒྲུབ་པའི་ལན་བཤད་པར་བྱ་སྟེ། སློབ་མའི་ཚོགས་དང་བཅས་པ་དང་། །ཤིན་ཏུ་བྱང་བར་བསླབས་པའི་བུད་མེད་ཀྱི་ཚོགས་དང་། རྡོ་རྗེའི་གར་དང་། མཆོད་པའི་སྦྱོར་བ་དང་། སྣ་ཚོགས་པའི་ཕྱག་རྒྱ་མཆོད་པའི་སྦྱོར་བ་རྣམས་ཀྱིས་ཀྱང་བྱའོ། །དེ་ལ་རྡོ་རྗེའི་གར་ནི་འདི་ཡིན་
ཏེ། རྡོ་རྗེའི་གར་གྱིས་གར་བྱེད་ཅིང་། །བསྒྱུར་བཅས་འཛིན་པ་ཆེན་པོ་དང་། །དཀྱིལ་འཁོར་དུ་ནི་གར་བྱེད་ཅིང་། །ཡོངས་སུ་བཟློག་ནས་རབ་ཏུ་སྦྱར། །དེ་ནས་ཕྱག་རྒྱ་དང་ཕྱག་རྒྱའི་ལན་དང་། ཤིན་ཏུ་གསང་བའི་སྣ་ཚོགས་ཕྱག་རྒྱའི་མཆོད་པ་བཤད་པར་བྱ་སྟེ། རྡོ་རྗེ་སེམས་སོགས་ལྷ་རྣམས་ཀྱིས། །
རྟོགས་པ་ཀུན་གྱིས་རྣམ་བརྒྱན་པས། །གཏམ་དང་མཚན་མའི་རྒྱུ་དག་གིས། །གང་ཞིག་བྱེད་པ་དེ་གར་ཡིན། །གསེར་རམ་ཡང་ན་དངུལ་དག་དང་། །དེ་བཞིན་ཤིང་ལས་བྱས་པའི་གདོང་། །རང་གི་གདོང་ངམ་ལྷ་རྣམས་ཀྱི། །གྲུབ་པའི་ཕྱག་རྒྱ་རབ་ཏུ་གནས། །དེ་ལྟར་ལན་ཅིག་བསྒྲུབ་བྱས་ནས། །
དེ་ཡི་འོག་ཏུ་ཅི་བདེར་བྱ། །ཀུན་ཟ་དེ་བཞིན་ཐམས་ཅད་བྱེད། །སྤྱོད་པ་ཅི་དགར་འདོད་པར་བྱེད། །ལངས་པ་དང་ནི་འདུག་པ་དང་། །འཆག་གམ་དེ་བཞིན་གནས་པ་དང་། །དགོད་དམ་རབ་ཏུ་སྨྲ་ཡང་རུང་། །གང་ན་ཇི་ལྟར་སྤྱོད་ཀྱང་རུང་། །དབང་པོ་གང་དང་གང་ལས་གྱུར། །དེ་དང་དེ་ཡི་ངོ་བོར་བྱ། །
མཉམ་པར་མ་གཞག་སྦྱོར་བ་ཡི། །རང་གི་ལྷར་ནི་བསྒྲུབ་པར་བྱ། །དེ་ཉིད་སྦྱར་བ་འདི་ཡིས་ནི། །འདི་དག་ཐམས་ཅད་བསྒྲུབ་བྱས་ནས། །ཐམས་ཅད་རྡོ་རྗེ་སེམས་དཔའི་དངོས། །རྟག་ཏུ་བལྟས་པས་རབ་འགྲུབ་འགྱུར། །ཞེས་གསུངས་པས་གལ་ཏེ་ཤིན་ཏུ་མཉམ་པར་གཞག་པའི་སྦྱོར་བ་བསྒོམས་
པས་དུབ་པར་གྱུར་ཅིང་མཉམ་པར་མ་བཞག་པའི་སྦྱོར་བས་གནས་པར་འདོད་ན། དེའི་ཚེ་ཕྱག་རྒྱ་ཆེན་པོས་བཅོམ་ལྡན་འདས་རྡོ་རྗེ་སེམས་དཔའ་རང་གི་གནས་སུ་གཞག་སྟེ། དང་པོའི་རྡོ་རྗེས་བདག་ཉིད་ལན་ཅིག་བྱིན་གྱིས་བརླབས་ལ་གནས་པར་བྱ་ཞིང་། བྱ་བ་ཐམས་ཅད་བྱས་ལ། ཡང་སླར་ཞུགས་ཏེ། 

59-1-99b

དང་པོའི་སྦྱོར་བ་དེ་ཉིད་ཀྱིས། ཛཿཧཱུཾ་བཾ་ཧོཿཞེས་བརྗོད་དེ། བཅོམ་ལྡན་འདས་རང་གི་ལུས་ལ་བཅུག་ལ། ཕྱག་རྒྱ་ཆེན་པོ་བཅིངས་ཏེ། དབུས་སུ་འདུག་ལ་མཚན་བརྒྱ་རྩ་བརྒྱད་པས་བསྟོད་དེ། མེ་ཏོག་ལ་སོགས་པ་དང་། མཆོད་པའི་ཕྱག་རྒྱ་བཅུ་གཉིས་ཀྱིས་ཀྱང་ཡང་དག་པར་མཆོད་དེ། དེ་
ནས་ཕྱག་བྱས་ཏེ་དེ་བཞིན་དུ་བསྒོམ་པར་བྱའོ། །གལ་ཏེ་ཕྱག་རྒྱ་ལྷོད་པར་གྱུར་ཏམ། རང་ཉིད་གཏོང་བར་འདོད་ན་དེའི་ཚེ་ཡི་གེ་བརྒྱ་པས་བརྟན་པར་བྱའོ། །གང་གི་ཚེ་གནས་སྐབས་དང་པོ་ཉིད་དམ། གནས་སྐབས་གཉིས་པར་ལྷ་གཤེགས་སུ་གསོལ་བར་འདོད་པར་གྱུར་ན། དེའི་ཚེ་མཚན་བརྒྱ་
རྩ་བརྒྱད་པས་བསྟོད་ཅིང་མཆོད་དེ། མེ་ཏོག་ལ་སོགས་པའི་མཆོད་པ་དང་། ཕྱག་རྒྱ་རྣམ་པ་བཅུ་གཉིས་ཀྱིས་མཆོད་པ་བྱས་ལ། རྡོ་རྗེ་རྣམ་པར་སྒེག་པའི་ཕྱག་རྒྱས་རྗེས་སུ་ཕྱག་བྱ་བའི་སྦྱོར་བས་ཀྱང་ཕྱག་བྱས་ལ། འདོད་པའི་དངོས་གྲུབ་ཀྱི་ཕྱིར་དགེ་བའི་རྩ་བ་ཡང་ཡོངས་སུ་བསྔོས་ལ། དཔལ་རྡོ་རྗེ་
སེམས་དཔའ་ལ་སོགས་པའི་ཕྱག་རྒྱ་དེ་གང་དང་གང་ནས་བྱུང་བ་དེ་དང་དེ་ཉིད་དུ་དགྲོལ་བར་བྱའོ། །དེ་ནས་དམ་ཚིག་གི་ཕྱག་རྒྱ་དགྲོལ་བས་བཛྲ་མུཿཞེས་བརྗོད་དོ། །དེ་ནས་སྙིད་གནས་བྱུང་བའི་རྡོ་རྗེ་རིན་ཆེན་གྱི་ཕྱག་རྒྱས་རང་གི་དབང་བསྐུར་བའི་གནས་ན་གནས་པས་དབང་བསྐུར་ལ། མཛུབ་མོ་
གཉིས་ཀྱིས་ཕྲེང་བ་འཆིང་བའི་ཚུལ་དུ་བཅིང་ཞིང་། དེ་བཞིན་དུ་གོ་ཆ་བཅིང་བར་བྱ་སྟེ། དེ་ནས་ཨོཾ་བཛྲ་རཏྣ་ཨ་བྷི་ཥིཉྩ་ཞེས་བྱ་བ་ནི་ཕྱག་རྒྱ་ཐམས་ཅད་དབང་བསྐུར་བའི་སྙིང་པོའོ། །སརྦ་མུ་དྲ་མཻ་ཏྲི་ཀུ་རུ་བ་ར་ཀ་བ་ཙེ་ན་བཾ་ཞེས་བྱ་བ་ནི་གོ་ཆ་བཅིང་བའི་སྙིང་པོའོ། །དེ་ལ་འདིའི་ཕྱག་རྒྱ་ནི་འདི་ཡིན་ཏེ། རྡོ་རྗེ་
བསྡམས་པ་བཅིངས་ལ། མཛུབ་མོ་གཉིས་བཀུག་སྟེ། མཐེ་བོང་གཉིས་དང་རྩེ་སྦྱར་བའོ། །དེ་ནས་མཉམ་པའི་ཐལ་མོ་བརྡབས་པས་མཉེས་པར་བྱའོ། །དེ་ནས་བཅོམ་ལྡན་འདས་གཤེགས་པའི་ཕྱིར་བསྐུལ་བར་བྱ་སྟེ། ཐོག་མཐར་རབ་དགའི་ངོ་བོ་བརྟན། །འགྲོ་བ་འདི་དག་ཀུན་གྱི་དཔུང་། །
སེམས་དཔའ་ཆེན་པོ་བརྟན་མཛོད་ལ། །སླར་ཡང་གཤེགས་པར་མཛད་དུ་གསོལ། ཞེས་བརྗོད་དེ། མེ་ཏོག་གི་ཐལ་མོ་གྱེན་དུ་དགྲོལ་བར་བྱའོ། །ཧཱུྃ་མུཿ ཡང་ཞེས་བརྗོད་ནས་དེས་ནི་བཅོམ་ལྡན་འདས་འཁོར་དང་བཅས་པ་གཤེགས་པར་འགྱུར་རོ། །ཇི་ལྟར་མངོན་པར་སྤྲུལ་པའི་དཀྱིལ་འཁོར་

59-1-100a

གྱི་ཚོགས་དང་བཅས་པའི་འཁོར་ལོ་ཡང་ཡིད་ཀྱིས་ལེགས་སོ་ཞེས་བྱ་བའི་སྦྱོར་བས་རང་གི་ལུས་ལ་བཅུག་ལ་ཡི་གེ་བརྒྱ་པ་དང་། རྡོ་རྗེ་སེམས་དཔའ་ལན་གསུམ་བཟླས་ཏེ། དང་པོའི་རྡོ་རྗེ་དང་། རྡོ་རྗེ་གནོད་སྦྱིན་དང་། རྡོ་རྗེ་ཁུ་ཚུར་གྱི་ཕྱག་རྒྱས་བདག་ཉིད་བསྲུང་བར་བྱས་ལ། 
ལངས་ཏེ་མཆོད་རྟེན་གྱི་ལས་དང་། གླེགས་བམ་བཀླག་པ་ལ་སོགས་པའི་དགེ་བའི་བྱ་བ་ལ་སྦྱོར་བ་ཅི་བདེར་གནས་པར་བྱའོ། །དེ་ལྟར་ཉིན་རེ་ཞིང་བྱས་ནས། ཇི་སྲིད་ཟླ་བ་གཅིག་གམ། ཟླ་བ་དྲུག་གམ། ལོ་གཅིག་གི་བར་དུའམ། དུས་ཇི་སྲིད་དུ་ཉིན་རེའི་སྦྱོར་བས་དཀྱིལ་འཁོར་ཐམས་ཅད་མངོན་
སུམ་དུ་མཐོང་བར་གྱུར་པའམ། རྣལ་འབྱོར་ཆེན་པོས་ཇི་སྐད་དུ་བཤད་པའི་དཀྱིལ་འཁོར་བསྒོམ་པར་བྱ་བའམ། རང་གི་སྙིང་གར་དཀྱིལ་འཁོར་བསྐོམ་པར་བྱ་སྟེ། ཟླ་བ་གཅིག་གམ། ཟླ་བ་དྲུག་གམ། ལོ་གཅིག་གམ། དུས་ཇི་སྲིད་ཀྱིས་རང་གི་སྙིང་གར་དཀྱིལ་འཁོར་མངོན་སུམ་དུ་མཐོང་བར་
གྱུར་པ་དེའི་བར་དུ་བསྐོམ་པར་བྱའོ། །གང་ཞིག་སྒོམ་པར་བྱེད་པར་མི་ནུས་པ་དེས་ནི་རྣལ་འབྱོར་ཆེན་པོ་བྱས་ལ། སྔགས་ཐམས་ཅད་ཀྱི་བཟླས་བརྗོད་འབུམ་བྱའོ་ཞེས་བཅོམ་ལྡན་འདས་ཀྱིས་གསུངས་སོ། །དེ་ལ་རྣལ་འབྱོར་ཆེན་པོ་འདི་ཉིད་བཤད་པར་བྱ་སྟེ། བདག་བསྲུང་བ་ལ་སོགས་པ་སྔོན་དུ་
འགྲོ་བ་ནས། དམ་ཚིག་སེམས་དཔར་བྱིན་གྱིས་བརླབ་པའི་བར་གྱི་ཆོ་ག་རྣམས་རྗེས་སུ་སྤྱད་ལ། དེ་བཞིན་དུ་ཕྱག་རྒྱ་ཆེན་པོ་བཅིངས་ལ་ནམ་མཁའ་དང་མཉམ་པའི་སྦྱོར་བས་རང་གི་ལུས་ལ་ཡིད་ཀྱིས་ཞུགས་ལ། དང་པོའི་རྡོ་རྗེ་བཅིངས་ཏེ། སངས་རྒྱས་ཀྱི་ཞིང་དཔག་ཏུ་མེད་པ་དང་མཉམ་པའི་རང་གི་
སྙིང་གའི་ཟླ་བའི་དཀྱིལ་འཁོར་ལ་སྔ་མ་བཞིན་དུ་དཀྱིལ་འཁོར་མངོན་པར་སྤྲུལ་ལ། ཇི་ལྟ་བ་བཞིན་དུ་ཞུགས་ཏེ། རང་གི་མགོ་ལ་མེ་ཏོག་གི་ཕྲེང་བ་དོར་ལ། རང་གི་མགོ་ལ་བཅིང་བར་བྱའོ། །དེ་ནས་དངོས་གྲུབ་ཀྱི་བརྟུལ་ཞུགས་བླང་བའི་བར་གྱི་ཆོ་ག་རྣམས་རྗེས་སུ་སྤྱད་ལ། དཔལ་རྡོ་རྗེ་སེམས་དཔའི་
ངོ་བོ་ཉིད་ཀྱི་རང་གི་ལུས་ལ་ལྷ་ཐམས་ཅད་ཀྱི་གནས་སུ་ཧྲི་ལས་སྣ་ཚོགས་པའི་པདྨའི་གདན་བསྐྱེད་ལ། དཀྱིལ་འཁོར་དེ་རང་གི་ལུས་ལ་ཆུ་དང་འོ་མ་བཞིན་དུ་གཅིག་ཏུ་གྱུར་པའི་རྣམ་པར་བསམས་ལ། རང་གི་ལུས་རྡོ་རྗེ་སེམས་དཔའི་དབྱིབས་ལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ནས། ཧཱུྃ་ཟློས་

59-1-100b

ཤིང་འདུག་པའི་རྣལ་འབྱོར་པས་གཞིའི་ལུས་ལ། ཕྱི་རོལ་དུ་ནམ་མ་བའི་ཕྱོགས་སུ་ཧཱུཾ་ཨ་ཞེས་བྱ་བས་དཔལ་རྡོ་རྗེ་སེམས་དཔའི་རྡོ་རྗེ་ཆེན་པོ་སྣ་ཚོགས་པདྨའི་སྟེང་དུ་བསྐྱེད་ལ། ཧཱུྃ་བཛྲོ་ཧྃ་ཞེས་བསྒོམས་ལ། རྡོ་རྗེ་དེ་རྡོ་རྗེ་སེམས་དཔར་བསྒོམ་པར་བྱའོ། །དེ་བཞིན་དུ་རང་གི་ལས་ལ་ཇི་སྲིད་
རྡོ་རྗེའི་རོའི་གནས་སུ་རྡོ་རྗེ་རོའི་ཕྱག་རྒྱ་ཆེན་པོ་བཅིངས་ལ། ཧཱུྃ་ཟློས་ཤིང་འདུག་པའི་རྣལ་འབྱོར་པས་གཞིའི་ལུས་ལས་ཕྱི་རོལ་དུ་ནམ་མཁའི་ཕྱོགས་ལ་ཧཱུྃ་ཨ་ཞེས་བྱ་བས། རྡོ་རྗེ་རོའི་རྡོ་རྗེའི་སྣོད་སྣ་ཚོགས་པདྨའི་སྟེང་དུ་བསམས་ལ། ཧཱུྃ་བཛྲ་ས་ར་བྷཉྩ་ནཾ་ཨ་ཧཾ་ཞེས་བསྒོམ་པར་བྱ་ཞིང་། 
རོ་རྡོ་རྗེའི་སྣོད་དེ་རོ་རྡོ་རྗེ་ནི་བདག་པོ་ཞེས་བསྒོམ་པར་བྱའོ། །དེ་བཞིན་དུ་ལྷ་ཐམས་ཅད་ཀྱི་གཟུགས་མདུན་དུ་སྤྲུལ་ལ། སྔ་མ་བཞིན་དུ་རྡོ་རྗེ་ལྕགས་ཀྱུ་ལ་སོགས་པས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་སྟེ། དང་པོའི་རྡོ་རྗེ་བཅིངས་ལ་ཧཱུྃ་དྲྀ་ཤྱ་ཞེས་བྱ་བས་ཐམས་ཅད་
བལྟ་བར་བྱའོ། །དེ་ནས་སྔར་བཤད་པའི་གསང་བའི་ལྕགས་ཀྱུ་དང་། ཧཱུྃ་གི་རང་རང་གི་གནས་སུ་ཐམས་ཅད་བཅུག་ལ། ཡང་དང་པོའི་རྡོ་རྗེ་བཅིངས་ལ། ཛཿཧཱུྃ་བཾཾ་ཧོཿཞེས་ལན་གསུམ་བརྗོད་པ་དང་། ས་མ་ཡ་སྟྭཾ་ཞེས་བྱ་བས་ཐམས་ཅད་ཀྱི་འོད་ཀྱི་དཀྱིལ་འཁོར་བསྐྱེད་ལ། ས་མ་ཡ་སྟྭཾ། 
ཨ་ཧཾ་ཧཱུྃ་ཞེས་བརྗོད་དེ། ལྷ་ཐམས་ཅད་ཀྱི་ཕྱག་རྒྱ་ཆེན་པོའི་གཟུགས་དང་། ལྷན་ཅིག་གཅིག་ཏུ་གྱུར་པས། བདག་ཉིད་རྡོ་རྗེའི་ངོ་བོ་ཉིད་ཡིན་པར་བསམ་པར་བྱའོ། །དེ་ནས་ལྷ་ཐམས་ཅད་ཀྱི་ལྗགས་ལ་ཧཱུྃ་བསམས་ལ། སྔ་མ་བཞིན་དུ་ལྷ་ཐམས་ཅད་ཀྱི་ལས་ཀྱི་ཕྱག་རྒྱ་དང་། ཕྱག་རྒྱ་ཆེན་པོ་
བཅིང་བར་བྱའོ། །དེ་ནས་ལྷ་ཐམས་ཅད་ཀྱི་སྐུ་དང་གཞིའི་ལུས་ལ་ཡིད་ཀྱིས་ལེགས་སོ་ཞེས་བྱ་བའི་སྦྱོར་བས་སྔ་མ་བཞིན་དུ་སངས་རྒྱས་ཐམས་ཅད་བཅུག་ལ། ཕྱག་རྒྱ་བཞིས་རྒྱས་གདབ་པར་བྱའོ། །དེ་ནས་གནས་ཀྱི་ངེས་པ་བཤད་པར་བྱ་སྟེ། སྔགས་པའི་སྙིང་གའི་ཟླ་བའི་དཀྱིལ་འཁོར་གྱི་
མདུན་དུ་བདེ་བ་ཆེན་པོ་རྡོ་རྗེ་སེམས་དཔའ་དང་། ཕྱག་ན་རྡོ་རྗེ་དང་། རྡོ་རྗེ་ཡིད་ལས་བྱུང་བ་བསམ་པར་ཤེས་པར་བྱའོ། །དཔྲལ་བར་ཀཱི་ཀཱི་ལ་དང་། ནམ་མཁའི་སྙིང་པོའོ། །ལྐོག་མའི་ཕྱོགས་སུ་འཇིག་རྟེན་དབང་ཕྱུག་དང་། རྡོ་རྗེ་དྲན་པའོ། །སྤྱི་བོར་རྡོ་རྗེ་སྙེམས་པའོ། །མགོ་བོ་ལ་རྡོ་རྗེ་དཔྱིད་དོ། །

59-1-101a

མདོམས་ཀྱི་གསང་བར་རྡོ་རྗེ་སྤྲིན་ནོ། །མིག་གཉིས་སུ་རྡོ་རྗེ་སྟོན་གའོ། །ནུ་མ་དང་བྲང་དང་སྙིང་ག་རྣམས་སུ་རྡོ་རྗེ་དགུན་ནོ། །རྡོ་རྗེ་སེམས་དཔའི་གཡོན་ལོགས་སུ་ནི་རྡོ་རྗེ་སྒེག་མོའོ། །སྔགས་པའི་སོའི་ཕྲེང་བ་གཉིས་ལ་ནི་རྡོ་རྗེ་བཞད་པ་མོའོ། །རྡོ་རྗེ་ཆོས་ཀྱི་གཡོན་ལོགས་སུ་ནི་
རྡོ་རྗེ་གླུ་མཁན་མའོ། །རྡོ་རྗེ་སྙེམས་པའི་གཡོན་ལོགས་སུ་ནི། རྡོ་རྗེ་གར་མཁན་མའོ། །སྔགས་པའི་གཟུགས་ཀྱི་སྐྱེ་མཆེད་ལ་ནི་རྡོ་རྗེའི་གཟུགས་སོ། །སྒྲའི་སྐྱེ་མཆེད་ལ་ནི་རྡོ་རྗེ་སྒྲའོ། །དྲིའི་སྐྱེ་མཆེད་ལ་ནི་རྡོ་རྗེ་དྲིའོ། །རོའི་སྐྱེ་མཆེད་ལ་ནི་རྡོ་རྗེ་རོ་དགོད་པར་ཤེས་པར་བྱའོ། །ཡེ་ཤེས་ཀྱི་ནང་དུ་ནི་
འཕགས་པ་འཇམ་དཔལ་ལོ། །ཕྲག་པ་གཉིས་ནི་ནམ་མཁའི་མཛོད་དོ། །ལྟེ་བ་ལ་ནི་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའོ། །རྐེད་པ་ལ་ནི་རྡོ་རྗེ་ཁུ་ཚུར་རོ། །ཁར་ནི་རྡོ་རྗེ་གནོད་སྦྱིན་ནོ། །དེ་བཞིན་གཤེགས་པ་རྣམས་ནི་ཐམས་ཅད་དུ་ཁྱབ་པ་ཡིན་པས་དེ་རྣམས་ཀྱི་གནས་
ངེས་པ་ཡོད་པར་མི་འདོད་དོ། །ཕྱག་རྒྱ་དགྲོལ་བའི་དུས་སུ་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྤྱི་བོའི་གཙུག་གི་གནས་སུ་དགྲོལ་བའོ། །མི་བསྐྱོད་པ་ནི་རྡོ་རྗེ་ཡིད་ལས་བྱུང་བའི་གནས་སུའོ། །རིན་ཆེན་འབྱུང་ལྡན་ནི་ཀཱི་ལི་ཀཱི་ལའི་གནས་སུའོ། །འོད་དཔག་ཏུ་མེད་པ་ནི་རྡོ་རྗེ་སྡུག་པའི་
གནས་སུའོ། །དོན་ཡོད་གྲུབ་པ་ནི་རྡོ་རྗེ་སྙེམས་པའི་གནས་སུ་དགྲོལ་བར་བྱའོ། །དེ་ནས་དེ་བཞིན་དུ་དང་པོའི་རྡོ་རྗེ་སྙིང་ག་དང་། སྨིན་མཚམས་དང་། ལྐོག་མ་དང་། སྤྱི་བོ་རྣམས་སུ་བྱིན་གྱིས་བརླབས་ལ། ཡི་གེ་བརྒྱ་པས་བརྟན་པར་བྱ་སྟེ། དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་
ནས། གོ་ཆ་མཆོག་གི་ཕྱག་རྒྱས་བདག་ཉིད་གོ་བགོ་བར་བྱའོ། །དེ་ནས་དེ་བཞིན་དུ་དངོས་གྲུབ་དང་། བརྟུལ་ཞུགས་བླང་བའི་བར་གྱི་ཆོ་ག་ཐམས་ཅད་བྱས་ནས། རྡོ་རྗེ་མཚོན་ཆ་ལ་སོགས་པས་ལས་ཀྱི་ཕྱག་རྒྱ་རྣམ་པ་བཅུ་གཉིས་ཀྱིས་བདག་ཉིད་ཡང་དག་པར་མཆོད་ལ། མཆོད་པ་དེ་རྣམས་རང་གི་
གནས་སུ་བཞག་སྟེ། རྡོ་རྗེ་རྣམ་པར་སྒེག་པའི་ཕྱག་རྒྱ་དང་ལྡན་པའི་རབ་ཏུ་འདུད་པ་དང་ལྡན་པས་ཀྱང་། ཕྱག་བྱས་ལ་ཕྱག་རྒྱ་ཆེན་པོར་བསྒོམས་ཏེ། དེ་ཁོ་ན་ཉིད་ཀྱི་རྡོ་རྗེ་བླང་བར་བྱའོ། །ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་

59-1-101b

ཉིད། །རྡོ་རྗེ་སྙེམས་པ་བདག་པོའི་བདག །བཅོམ་ལྡན་འདས་དཔལ་མཆོག་དང་པོའི་སྐྱེས་བུ་ཉིད་དོ་ཞེས་བྱ་བ་ནི་དེ་ཁོ་ན་ཉིད་དོ། །ཡི་གེ་ཧཱུཾ་ནི་རྡོ་རྗེའི་ས་བོན་ནོ། །ཨ་ལས་དྲིལ་བུ་རྡོ་རྗེ་སྙེམས་མར་བསམས་ལ། ཆོས་ཀྱི་དྲིལ་བུ་དཀྲོལ་བར་བྱའོ། །བཅོམ་ལྡན་འདས་མཆོག་དེ་ཉིད་ནི། །སྲིད་
པའི་བདག་པོ་ཀུན་གྱི་མཆོག །དམ་པའི་དབང་ཕྱུག་དམ་ཆོས་མཆོག །བདེ་གཤེགས་བཀའ་བཞིན་བྱེད་པའོ། །སྲིད་པ་རང་བཞིན་དག་པ་སྟེ། །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་ཡིས། །སྲིད་པ་མཆོག་ཏུ་བྱེད་པར་འགྱུར། །དྲིལ་བུ་འདི་ནི་མཆོག་ཏུ་
གསང་བའི་ཆོས་ཉིད་དེ། དེ་བཞིན་གཤེགས་པ་ཐམས་ཅད་མཆོད་པ་བྱེད་པའམ། ལྷ་རྣམས་བསྒྲུབ་པ་ན་དཀྲོལ་བར་བྱ་སྟེ། དེས་ནི་ཆོས་ཐམས་ཅད་ཁོང་དུ་ཆུད་པ་ལ་འཇུག་པས་སྒྲིབ་པ་ཐམས་ཅད་རྣམ་པར་དག་པར་བྱེད་ཅིང་། རྡོ་རྗེ་ཐམས་ཅད་དབབ་པར་བྱ་བ་རབ་ཏུ་སྒྲུབ་པར་བྱེད་པ་དང་། 
དབང་དུ་བྱ་བ་དང་། བསྒྲུབ་པར་བྱ་བ་རབ་ཏུ་གྲུབ་པར་བྱེད་པའི་ཆོས་སོ། །དེ་ནས་དག་པའི་ཐབས་རྟོག་པ་ཐམས་ཅད་ཀྱི་གསང་བ་ཆེན་པོའི་དམ་ཚིག་རྟག་ཏུ་བསྟེན་པར་བྱའོ། །དེ་བརྗོད་པར་བྱ་སྟེ། སྲིད་པའི་བདེ་བ་ཤིན་ཏུ་ཆུང་། །སྡུག་བསྔལ་ཆེན་པོ་དག་བྱའི་ཕྱིར། །ཤིན་ཏུ་བདེ་བ་དམ་པའི་
ཐབས། །དམ་ཚིག་འདིས་ནི་རྟག་ཏུ་འཐོབ། །འདོད་པའི་ལོངས་སྤྱོད་ཐམས་ཅད་ཀྱིས། །ཅི་འདོད་པར་ནི་བསྟེན་ནས་སུ། །རང་གི་ལྷ་ཡི་སྦྱོར་བ་ཡི། །བདག་དང་གཞན་ལ་མཆོད་པ་བྱ། །ཞེས་བྱ་བ་སྟེ། དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་བླ་ན་མེད་པའི་ཐེག་པ་ཆེན་པོའི་
དམ་ཚིག་ཆེན་པོའི་རྣལ་འབྱོར་བཅོམ་ལྡན་འདས་ནི་དམ་ཚིག་གོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཀུན་གྱིས་ཀྱང་། །འདའ་བ་རུ་ནི་མི་མཛད་པ། །ཕྱག་རྒྱ་དམ་ཚིག་ཅེས་སུ་བསྒྲགས། །ཡིད་ཀྱི་གཟུགས་ནི་བརྟན་པའི་ཕྱིར། །ཞེས་གསུངས་པའི་ཕྱིར་རོ། །དེ་ལ་འདི་སྐད་ཅེས་ཀྱང་
བཤད་དེ། ཇི་སྲིད་འཁོར་བའི་གནས་སུ་ནི། །མཁས་མཆོག་འདུག་པར་གྱུར་པའི་ཚེ། །དེ་སྲིད་མཚུངས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །གསང་བ་དམ་པ་དམ་ཚིག་ཐབས། །བསོད་ནམས་བྱིན་རླབས་སྒྲུབ་བྱེད་ཅིང་། །རྟག་ཏུ་དངོས་གྲུབ་ཀུན་དབང་ཕྱུག །

59-1-102a

ཀུན་དུ་འགྲོ་བའི་དོན་བྱེད་དོ། །ཞེས་གསུངས་པ་སྟེ། དོན་འདི་ཉིད་གསལ་བར་བྱེད་པའི་ཧཱུྃ་ཡང་བཟླས་པར་བྱ་སྟེ། འདི་ནི་དམ་ཚིག་གོ། །དེ་ནས་དམ་ཚིག་གསུམ་གྱི་གླུ་དང་། མཆོད་པ་དང་དྲིལ་བུ་དཀྲོལ་བར་བྱ་སྟེ། ཨོཾ་ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་མ་མེད་
པའི་མཆོག །སེམས་དཔའ་རྡོ་རྗེ་ཆེ་རང་བཞིན། །རྡོ་རྗེ་སེམས་དཔའ་བདག་གྲུབ་མཛོད། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་དམ་པར་བདག་གྲུབ་མཛོད། །ཁྱོད་ནི་ཉེས་བྲལ་དམ་པ་སྟེ། །འདོད་ཆགས་ཀུན་
གྱི་རྗེས་སུ་མཉེས། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་ཀྱིས་གྲུབ་མཛད། །ཤིན་ཏུ་དག་པ་ཀུན་གྱི་མཆོག །གདོད་ནས་འགྲོ་བ་དེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །བྱང་ཆུབ་སེམས་དཔར་བདག་གྲུབ་མཛད། །དངོས་གྲུབ་ཆེན་པོ་ཀུན་གྱི་མཆོག །
དབང་ཕྱུག་ཆེ་སོགས་ཕྱག་རྒྱ་ཡིས། །གྲུབ་པའི་རྡོ་རྗེ་ཆེར་བསྟོད་པས། །རྡོ་རྗེ་སྙེམས་པའི་བདག་པོའི་བདག །དེ་ནས་སྔ་མ་བཞིན་དུ་བཛྲ་ཨཱཏྨ་ཀོ྅ཧཾ་ཞེས་བྱ་བ་ལ་སོགས་པའི་སྔགས་གསུམ་བརྗོད་ལ། དེ་བཞིན་དུ་ནམ་མཁའ་དང་མཉམ་པའི་སྦྱོར་བས་རང་གི་སྙིང་གར་ཞུགས་ཏེ། དང་པོའི་རྡོ་རྗེ་
ལས་སངས་རྒྱས་ཀྱི་ཞིང་དཔག་ཏུ་མེད་པའི་ཚད་ཙམ་གྱི་དཔལ་རྡོ་རྗེ་སེམས་དཔའི་དཀྱིལ་འཁོར་སྤྲུལ་ལ། ཡང་རྡོ་རྗེ་སེམས་དཔའི་ཕྱག་རྒྱ་ཆེན་པོ་རབ་སེམས་ཏེ། ཧཱུྃ་ཞེས་བྱ་བ་འདོན་ཞིང་། ཡིད་ཀྱིས་དེའི་དབུས་སུ་གནས་ལ། རྡོ་རྗེ་ཡིད་ལས་བྱུང་བ་ལ་སོགས་པ་ནས། ཆུ་ལྷའི་མཐར་ཐུག་པའི་བར་དུ་
དཀྱིལ་འཁོར་ཆེན་པོའི་སྦྱོར་བས་ཧཱུྃ་ཉིད་ཀྱིས་བཅུག་ལ། བཛྲ་ཨཱཏྨ་ཀོ྅ཧཾ་ལ་སོགས་པ་སྔགས་གསུམ་བརྗོད་དེ། སྔ་མ་བཞིན་དུ་དམ་ཚིག་ཆེན་པོའི་དེ་ཁོ་ན་ཉིད་དང་པོའི་རྡོ་རྗེར་བྱིན་གྱིས་རློབ་པའི་དཀྱིལ་འཁོར་གྱི་ངོ་བོ་ཉིད་ནི་བདག་ཡིན་ནོ་ཞེས་ང་རྒྱལ་བསྐྱེད་ལ། ལྷ་ཐམས་ཅད་ཀྱི་ཐུགས་ཀ་ན་ཡོད་པའི་
རྡོ་རྗེའི་དབུས་སུ་ཧཱུྃ་བཀོད་དེ། དེ་བཞིན་དུ་ཐམས་ཅད་དུ་བདག་ཡིན་ནོ་ཞེས་བསྒོམ་ཞིང་ཟླ་བ་གཅིག་གམ། ཟླ་བ་དྲུག་གམ། ལོ་གཅིག་གམ། དུས་ཇི་སྲིད་ཀྱིས་རང་གི་སྙིང་གའི་ཟླ་བའི་དཀྱིལ་འཁོར་ཆེན་པོ་དེ་མངོན་སུམ་དུ་མཐོང་བར་གྱུར་པ་སྲིད་དུ་བསྒོམས་ལ། དེ་ནས་དཀྱིལ་འཁོར་བྲི་བར་བྱའོ། །

59-1-102b

སྔོན་དུ་བསྙེན་པའི་ཆོ་གའོ། །དེ་ནས་སྔོན་དུ་བསྙེན་པ་བྱས་ནས། ཉིན་རེའམ། ཟླ་རེའམ། ལོ་རེ་ཞིང་རྣལ་འབྱོར་ཆེན་པོ་ཉིད་ཀྱིས་དཀྱིལ་འཁོར་བྲི་བར་བྱའོ། །དེ་ལ་དང་པོ་ཁོ་ནར་ཡོ་བྱད་ཐམས་ཅད་དང་ཡང་དག་པར་ལྡན་པས། མངོན་པར་འདོད་པའི་སའི་དབུས་སུ་མི་རུས་ཀྱི་ཕྱེ་མའི་སྦྱིན་སྲེག་དང་། 
མངོན་སྤྱོད་ཀྱི་སྦྱིན་སྲེག་གི་ཆོ་གས་དཀྱིལ་འཁོར་གྱི་བགེགས་བཟློག་ལ་བདག་དང་སློབ་མ་ཞི་བར་བྱེད་པའི་སྦྱིན་སྲེག་བྱའོ། །དེ་ནས་རྡོ་རྗེ་གནོད་སྦྱིན་གྱིས་སེམས་ཅན་གདུག་པ་རྣམས་བསྐྲད་ལ། གནས་བསྲུང་བར་བྱས་ཏེ། ཡང་དེ་ཉིད་ཀྱི་སྔགས་ལན་བདུན་བཟླས་པའི་ཡུངས་ཀར་དང་། ཆུ་དང་
ཐལ་བ་རྣམས་ཀྱིས་གཏོར་ལ། སའི་ཕྱོགས་དེར་ཁྲུ་གང་ཙམ་མམ། འདོམ་གང་ཙམ་བརྐོས་ཏེ། བཟློག་ལ་སྐྲ་དང་རུས་པ་དང་། ཞོགས་མ་དང་། སོལ་བ་དང་། ཐལ་བ་ལ་སོགས་པ་བསལ་ཏེ། དག་ཅིང་དྲི་ཞིམ་པའི་སས་བཀང་ལ། རྡོ་རྗེ་རྩེ་མོ་ཡོངས་སུ་བཟླས་པའི་སྤོས་ཆུས་སྤོང་ཞིང་འཐས་
པར་བཅག་པར་བྱའོ། །ཤིན་ཏུ་མཉམ་པའི་སྒོ་བཞི་པའི་ཁང་པ་བརྩེགས་མའི་ནང་དུ་ཆུད་པ། རྟ་བབས་བཞིས་མཛེས་པར་བྱས་པ། སྒོ་བཞིའི་སྒོ་གླེགས་བཟང་པོས་བསྐོར་བའི་གནས་སུ་སློབ་མ་ཤིན་ཏུ་མཁས་པས་ཤར་ཕྱོགས་ནས་བརྩམས་ཏེ། རྡོ་རྗེ་གནོད་སྦྱིན་གྱི་སྔགས་ཡོངས་སུ་བཟླས་པའི་
བའི་རྣམ་པ་ལྔས་ལེགས་པར་བྱུག་ཅིང་། དེ་ཉིད་ཡོངས་སུ་བཟླས་པའི་སྤོས་ཆུས་བསང་གཏོར་བྱ་བ་དང་། དེ་ཉིད་ལན་བདུན་བཟླས་པའི་རིན་པོ་ཆེ་དང་། འབྲུ་དང་། སྨན་ཐམས་ཅད་སའི་དབུས་སུ་གཞུག་པར་བྱ་སྟེ། ས་ཡོངས་སུ་སྦྱང་བའི་ཆོ་གའོ། །་དེ་ལས་ཡོངས་སུ་སྦྱངས་ཤིང་ཤིན་ཏུ་
འཐས་པར་བཅགས་ཟིན་པའི་གནས་སུ་རྡོ་རྗེ་གནོད་སྦྱིན་གྱིས་བགེགས་བསལ་ལ། ཡུངས་ཀར་དང་ཆུ་དང་ཐལ་བ་རྣམས་ལ་རྡོ་རྗེ་གནོད་སྦྱིན་གྱི་སྔགས་ལན་བདུན་བཟླས་པས་མངོན་པར་གཏོར་བར་བྱའོ། །དེ་ནས་ཡང་སློབ་མ་ཤིན་ཏུ་མཁས་པས་རྡོ་རྗེ་གནོད་སྦྱིན་གྱི་སྔགས་བཟླས་པའི་བའི་རྣམ་
ལྔས་ལེགས་པར་བྱུག་ཅིང་། སྤོས་ཆུས་ཀྱང་ས་ཕྱོགས་དེ་བསང་གཏོར་བྱའོ། །དེ་ནས་ཀྱང་རིན་པོ་ཆེ་དང་། འབྲུ་དང་སྨན་ཐམས་ཅད་ལ་བཟླས་བརྗོད་ལན་བདུན་བྱས་པའི་སའི་ཆ་དེའི་དབུས་སུ་གཞུག་པར་བྱ་སྟེ། འདི་ཡང་འདིར་ས་སྦྱང་བའི་ཆོ་གའོ། །དེ་ནས་ཡང་འདིར་སློབ་མ་ཤིན་ཏུ་མཁས་པས་

59-1-103a

སའི་ཤར་ཕྱོགས་ནས་བརྩམས་ཏེ། རྡོ་རྗེ་གནོད་སྦྱིན་གྱིས་ཡོངས་སུ་བཟླས་པའི་དྲིས་ཉེ་བར་བྱུག་པར་བྱའོ། །དེ་ནས་ལུགས་མའམ་འབུར་དུ་བརྐོས་པའམ། རིས་སུ་བྲིས་པའི་སངས་རྒྱས་དང་། བྱང་ཆུབ་སེམས་དཔའ་རྣམས་དང་། རིགས་པའི་ཚོགས་རྣམས་ཀྱིས་བརྒྱན་ཅིང་ཐ་
མར་ཚོན་གྱིར་བ་ཉེར་བར་མཛེས་པར་བྱ་བ་དང་། རྒྱན་མཚན་གྱི་དམ་པ་དང་། བླ་རེ་མཆོག་དྲིལ་བུ་བཏགས་པ་བྲེ་བ་དང་། མེ་ཏོག་དང་། མར་མེ་དང་། མེ་ཏོག་གི་ཆུན་འཕྱང་དང་། དྲ་བ་དང་། དྲ་བ་ཕྱེད་པ་དང་། ཟླ་བ་ཕྱེད་པ་དང་། ཟླ་བ་རྡོ་རྗེ་དང་། རིན་པོ་ཆེ་དང་། བ་དན་དང་། ཕྲེང་བ་རྣམས་དང་།
སྒོ་བཞི་དང་། མཚམས་བཞིར་སྤོས་ཁང་གཞག་པ་དང་། རོལ་མོ་དང་། གླུ་དང་གར་རྣམས་ཀྱིས་ཡང་དག་པར་མཆོད་ནས། ས་ལ་ལག་པ་བཞག་སྟེ། ཧཱུྃ་དང་ཡི་གེ་བརྒྱ་པ་ལན་བདུན་བཟླས་བརྗོད་བྱའོ། །ས་ཡོངས་སུ་གཟུང་བའི་ཆོ་གའོ། །དེ་ནས་དཀྱིལ་འཁོར་གྱི་སའི་དབུས་སུ་འདུག་ལ། 
བགེགས་གཞོམ་པ་ལ་སོགས་པ་ཇི་ལྟ་བ་བཞིན་དུ་བྱས་ཏེ། དང་པོའི་རྡོ་རྗེས་དཀྱིལ་འཁོར་སྤྲུལ་ལ་།ཕྱག་བྱ་བ་ལ་སོགས་པ་སྔོན་དུ་འགྲོ་བས་སྡོམ་པ་བཟུང་ནས་ལྷའི་རྣལ་འབྱོར་དང་གཞལ་ཡས་ཁང་དང་གདན་རྣམས་བསྐྱེད་དེ། དབུས་སུ་སེམས་དཔའི་སྐྱིལ་མོ་ཀྲུང་གིས་འདུག་ལ། འདི་
ལྟར་བདག་ཉིད་སྤྲོ་བ་བསྐྱེད་པར་བྱ་སྟེ། དེང་དུ་བདག་ཚེ་འབྲས་བུ་ཡོད། །བདག་གིས་གསོན་པའང་འབྲས་བུར་བཅས། །ལྷ་དང་དམ་ཚིག་གིས་མཉམ་པར། །གྱུར་པ་བདག་ནི་སོམ་ཉི་མེད། །བྱང་ཆུབ་སེམས་དང་སེམས་གཅིག་ལས། །མི་ལྡོག་པར་ནི་བདག་འགྱུར་ཏེ། །དེ་བཞིན་
གཤེགས་པའི་རིགས་སུ་ནི། །དེང་བདག་སྐྱེ་བར་ཐེ་ཚོམ་མེད། །དེང་བདག་ཉི་མ་དམ་པ་སྟེ། །བདག་གིས་མཆོད་སྦྱིན་བླ་ན་མེད། །སངས་རྒྱས་ཐམས་ཅད་སྤྱན་འདྲེན་པས། །དེང་བདག་འདུས་པ་མཆོག་ཡིན་ནོ། །དེ་ནས་ལུས་ཐམས་ཅད་ཀྱིས་ཕྱག་བྱས་ལ་བདུག་སྤོས་ཕུལ་ཏེ། སངས་རྒྱས་
ཐམས་ཅད་ལ་གསོལ་བ་གདབ་པར་བྱའོ། །མ་ལུས་ཕྱོགས་ན་བཞུགས་པ་ཡི། །སངས་རྒྱས་ཐམས་ཅད་དགོངས་སུ་གསོལ། བདག་མིང་འདི་ཞེས་བགྱི་བ་ཡི། རྡོ་རྗེ་ཅན་གྱི་དཀྱིལ་འཁོར་བྲི། །དེང་འདིར་སངས་རྒྱས་ཀུན་གཤེགས་ཏེ། །དངོས་གྲུབ་འདིར་ནི་སྩལ་དུ་གསོལ། །ཞེས་བརྗོད་དོ། །

59-1-103b

ཡན་ལག་ཐམས་ཅད་ཀྱིས་ཕྱག་བྱས་ལ། དང་པོའི་སྦྱོར་བ་དང་། དཀྱིལ་འཁོར་གྱི་མཆོག་དང་། ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་བསྒོམས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དོ། ཧཱུྃ་ཟློས་པ་ལ་བརྩོན་ཞིང་ཕྱག་རྒྱ་ཆེན་པོ་བསྒོམ་པར་བྱའོ། །དེ་ནས་དཀྱིལ་འཁོར་བྲི་བར་བྱ་
བའི་ཕྱིར། བདག་ཉིད་ལ་དེ་བཞིན་གཤེགས་པ་ཐམས་ཅད་ཀྱིས་གསོལ་བ་གདབ་པར་གྱུར་པར་བསམས་ཏེ། བཅོམ་ལྡན་ཁྱོད་ལ་གསོལ་བ་ནི། །འདོད་ཆགས་ཆེན་པོ་བདེ་བ་ཆེ། །སྙིང་པོ་འདི་ཡི་རྟག་པ་ཉིད། །བདེ་ཆེན་མྱུར་དུ་གྲུབ་པར་མཛོད། །ཅེས་བྱ་བས་གསོལ་བ་གདབ་པར་བསམ་མོ། །
དེ་ནས་དེ་ལས་ལངས་ཏེ། དེ་བཞིན་གཤེགས་པ་ཐམས་ཅད་ཀྱི་ཞབས་ལ་ཕྱག་བྱས་ཏེ། དེ་བཞིན་གཤེགས་པ་ཐམས་ཅད་ཀྱིས་ནམ་མཁའ་ཡོངས་སུ་གང་བར་བསམས་ལ། བདག་ཉིད་རང་ཉིད་རྡོ་རྗེ་ཅན། །རྡོ་རྗེ་སེམས་དཔའ་བདག་རང་ཉིད། །བདག་ནི་སངས་རྒྱས་རྒྱལ་པོ་ཆེ། །སྟོབས་ཆེན་རྡོ་རྗེ་
ཅན་བདག་ཉིད། །རྣལ་འབྱོར་དབང་ཕྱུག་རྒྱལ་པོ་བདག །ཕྱག་ན་རྡོ་རྗེ་བརྟན་བདག་སྟེ། །བདག་པོ་རྡོ་རྗེ་ཆེན་པོར་བདག །བྱིན་གྱིས་བརླབས་པ་མི་འདོར་རོ། །ཧཱུྃ་ཞེས་བརྗོད་པར་བྱ་བའོ། །མཆོག་ཏུ་དམ་ཚིག་གསུམ་ཐོབ་པའི། །སློབ་དཔོན་རང་གི་ཕྱག་རྒྱ་ཡིས། །རྡོ་རྗེ་དྲིལ་བུ་འཆང་བྱ་ཞིང་། །འཁོར་
ལོའི་ཆོ་ག་ཐམས་ཅད་བྱ། །རྟོག་པ་ཀུན་ལ་མཉམ་འཇུག་པས། །དཀྱིལ་འཁོར་ཐམས་ཅད་བསྒྲུབ་པར་བྱ། །དམ་ཚིག་གསུམ་ཞེས་བྱ་བ་ཡི། །རྒྱ་འདི་གསང་སྔགས་སྒྲུབ་བྱེད་པའོ། །དངོས་གྲུབ་ཀུན་གྱི་ཆོ་ག་ལ། །རྡོ་རྗེ་དྲིལ་བུས་རབ་བསྐུལ་བས། །ཆོ་ག་ལྷག་གམ་མ་ཚང་ནའང་། །འགྲུབ་པར་
འགྱུར་ཏེ་སྨད་མི་བྱ། །དེ་ནས་དཀྱིལ་འཁོར་ཐམས་ཅད་མངོན་དུ་བྱས་ལ། དང་པོའི་རྡོ་རྗེས་ཧཱུྃ་བཛྲ་ཨུཏྟིཥྛ་མ་ཧཱ་མཎྜལ་ཨུཏྤཱ་ད་ཡཱ་ཞེས་བརྗོད་དེ། བར་སྣང་གི་ཕྱོགས་སུ་དཀྱིལ་འཁོར་བཞག་ལ། བདག་ཉིད་དང་པོའི་རྡོ་རྗེ་དེ་ཉིད་དུ་ཧཱུྃ་གིས་བྱིན་གྱིས་བརླབས་ལ། ཡང་ཕྱག་རྒྱ་ཆེན་པོར་བསམས་ཏེ། 
བཛྲ་ཏིཥྛ་མ་ཊ་ཞེས་བྱ་བ་མིག་གཉིས་སུ་བཀོད་དེ། དེ་བཞིན་དུ་ལངས་ལ་ཕྱག་རྒྱལ་གནས་པས་ཐམས་ཅད་དུ་བལྟས་ཏེ། སྙེམས་པས་ཧཱུྃ་འདོན་ཅིང་སོང་ལ་རྐང་པ་གཉིས་ཀྱི་འོག་ཏུ་ཨ་ལས་སྣ་ཚོགས་རྡོ་རྗེ་བསམས་ཏེ། རྐང་པ་ནས་བརྩམས་ནས། ནམ་མཁའི་ཁམས་མ་ལུས་པ་དང་མཉམ་པར་

59-1-104a

གནས་པའི་སའི་ཆ་རྡོ་རྗེར་གྱུར་པར་ལྷག་པར་མོས་པར་བྱས་ལ། རྡོ་རྗེའི་ལྟ་བས་ཀྱང་གཡོན་པས་བགེགས་བསལ་ཏེ། སྐོར་ཕྱོགས་དང་སྟེང་འོག་དང་། ནམ་མཁའི་ཕྱོགས་ཐམས་ཅད་དུ་དཀྱིལ་འཁོར་གྱི་མཚམས་བཅད་པ་དང་། ར་བ་དང་དྲ་བ་དག་བྱའོ། །དེ་ནས་སྒོ་འབྱེད་
པའི་ཕྱག་རྒྱས་སྒོ་ཕྱེ་ལ། རྡོ་རྗེ་རྒྱུའི་ངོ་བོ་ཞལ་བཞི་པ། ཕྱག་བཞི་པའི་གསང་བའི་གཟུགས་ཅན་གྱི་དཀྱིལ་འཁོར་ཕྱག་རྒྱ་དང་། སྔགས་འདི་དང་ལྡན་པས་དགུག་པར་བྱའོ། །ཨོཾ་བཛྲ་མཎྜ་ལ་ཧཱུྃ་ཛ། རྡོ་རྗེ་ཁུ་ཚུར་གཉིས་ལས་མཐེ་བོ་དང་མཛུབ་མོ་རྡོ་རྗེར་བྱ་བ་ནི་དཀྱིལ་འཁོར་ཐམས་ཅད་
འགུགས་པར་བྱེད་པ་རྡོ་རྗེ་འཁོར་ལོ་ཞེས་བྱ་བའི་ཕྱག་རྒྱའོ། །ཨོཾ་མ་ཧཱ་བཛྲ་ཙཀྲ་ཨ་དྷི་ཏིཥྛ་སིདྡྷྱ་ཧཱུྃ་ཞེས་བྱ་བ་ཕྱག་རྒྱ་འདི་དང་ལྡན་པས་དཀྱིལ་འཁོར་ཡང་བྱིན་གྱིས་བརླབ་པར་བྱའོ། །རྡོ་རྗེ་ཁུ་ཚུར་གཉིས་ཀྱིས་འཁོར་ལོ་བསྐོར་བའི་ཚུལ་དུ་མགལ་མེ་བསྐོར་བ་ལྟར་བྱ་བ་ནི་འདིའི་ཕྱག་རྒྱའོ། །དེ་ནས་
སེང་ལྡེང་གི་ཕུར་བུ་ལ་མཐའ་ཡས་དང་། རྣམ་པར་རྒྱལ་བ་དང་། སྤྲིན་སྒྲ་དང་། གསུས་པོ་ཆེ་ཞེས་བྱ་བ་རིམ་པ་བཞིན་དུ་སྟེང་གི་འཁོར་ལོས་སྒྱུར་བ་དང་། རྡོ་རྗེ་ཧཱུྃ་མཛད་དང་། འཕགས་པ་འཇམ་དཔལ་གཤིན་རྗེ་གཤེད་དང་། རྡོ་རྗེ་ཆེན་པོ་དང་། རྟ་མགྲིན་ལྟ་བུ་ལ་འོག་ཏུ་རྡོ་རྗེ་རྩེ་གཅིག་པ་ལྟ་བུར་
བསྐྱེད་ནས། ཙནྡན་དམར་པོས་བྱུག་ཅིང་། སྲད་བུ་དམར་པོ་དང་། མེ་ཏོག་གི་ཕྲེང་བ་དམར་པོས་བཅིངས་ཏེ། ཧཱུྃ་ཀྲོ་ཏ་ཡ། ཏྲི་ཊ་ཏྲི་ཊ། ཏྲི་ཊ་མ་ཊ། ཞེས་བྱ་བ་བརྒྱ་རྩ་བརྒྱད་བཟླས་བརྗོད་བྱ་སྟེ། དེ་གཡོན་པའི་རྡོ་རྗེ་ཁུ་ཚུར་གྱིས་བཟུང་ལ། ཕྱིའི་དཀྱིལ་འཁོར་གྱི་གྲྭ་བཞིར་དབང་ལྡན་གྱི་ཕྱོགས་ནས་བརྩམས་
ཏེ། རྡོ་རྗེ་ཐོ་བས་བརྡུང་བར་བྱའོ། །དེ་ནས་རྡོ་རྗེ་གནོད་སྦྱིན་གྱིས་བགེགས་བསལ་ལ་བསྲུང་བ་བྱས་ཏེ། དེ་བཞིན་དུ་རྡོ་རྗེ་ཁུ་ཚུར་གྱིས་སྒོ་བཅད་ལ། རྡོ་རྗེ་གནོད་སྦྱིན་གྱིས་བསྲུང་བ་རྣམས་ཡང་དག་པར་བསྲུངས་ཏེ། རྡོ་རྗེ་གནོད་སྦྱིན་གྱིས་ཡོངས་སུ་བཟླས་པའི་བུམ་པ་དཀྱིལ་འཁོར་གྱི་སྒོར་བསང་
གཏོར་བྱ་བའི་ཕྱིར་གཞག་པར་བྱའོ། །དེ་ནས་སྤོས་ཆུ་ལས་རྡོ་རྗེ་གནོད་སྦྱིན་ཉིད་བཟླས་ལ། དེ་ཉིད་འདོན་ཅིང་སྤོས་ཆུ་དེས་དཀྱིལ་འཁོར་གྱི་ས་གཞི་བྱུག་པར་བྱའོ། །དེ་ནས་ལྷ་ཐམས་ཅད་ཀྱི་གནས་སུ་དྲིའི་དཀྱིལ་འཁོར་བྱས་ལ། ལག་པས་བྲིམ་ནས། ཧཱུྃ་ལན་བདུན་དེ་དག་ལ་བཟླས་ལ། དེ་རྣམས་སུ་

59-1-104b

དཔལ་རྡོ་རྗེ་སེམས་དཔའ་ལ་སོགས་པ་ནམ་མཁའི་ཕྱོགས་ལས་ཕབ་སྟེ། ཧཱུྃ་ཉིད་ཀྱིས་བཅུག་ལ་མཆོད་པ་རྣམ་པ་ལྔས་མཆོད་དོ། །དེ་ནས་ཕྱི་རོལ་དུ་གཏོར་མ་སྦྱིན་ལ། རྣམ་པར་རྒྱལ་བའི་བུམ་པ་ཇི་སྐད་དུ་བཤད་པའི་མཚན་ཉིད་རྣམས་དང་ལྡན་པ། སྨན་དང་འབྲུ་དང་། རིན་པོ་ཆེ་ལ་སོགས་
པ་དག་ཡང་དག་པར་ལྡན་པར་བྱས་ནས་ཆུ་ཅུང་ཟད་བཅུག་སྟེ། རྡོ་རྗེ་གནོད་སྦྱིན་དང་། རྡོ་རྗེ་མེ་ལྟར་རབ་ཏུ་འབར་བ་དང་། རྡོ་རྗེ་སེམས་དཔའ་རེ་རེ་ཞིང་ལན་བརྒྱ་རྩ་བརྒྱད་བཟླས་པའི་མཆོད་ཡོན་བུམ་པའི་སྟེང་དུ་བཞག་ལ། རང་གི་དམ་ཚིག་གི་ཕྱག་རྒྱས་བཟུང་བའི་རྡོ་རྗེ་དང་། མེ་ཏོག་གི་
ཡལ་ག་ལས་རེ་རེ་ཞིང་ཡང་ལན་བརྒྱ་རྩ་བརྒྱད་བཟླས་ནས། མེ་ཏོག་བཅུག་ལ་བདུག་པས་བདུགས་ཏེ། དེ་ནས་དབང་བསྐུར་བའི་དོན་དུ་རྡོ་རྗེ་སེམས་དཔའི་སྤྱན་སྔར་གཞག་ལ། ཉི་མ་གཉིས་པ་ལ། དེ་ལ་དུས་གསུམ་དུ་བཟླས་བརྗོད་བྱའོ། །དེ་ལྟར་བུམ་པའི་བསྙེན་པ་བྱས་ནས། རྡོ་རྗེ་
གནོད་སྦྱིན་དང་། རྡོ་རྗེ་སེམས་དཔའ་དང་། སངས་རྒྱས་སྤྱན་གྱིས་མར་ལ་སོགས་པའི་སྦྱིན་སྲེག་རེ་རེ་ཞིང་བརྒྱ་རྩ་བརྒྱད་བྱ་སྟེ། འདི་ནི་ལྷག་པར་གནས་པའི་སྦྱིན་སྲེག་གི་ཆོ་གའོ།།  །།དེ་ནས་བཅོམ་ལྡན་འདས་ལ་མཚན་བརྒྱ་རྩ་བརྒྱད་ཀྱིས་ཡང་དག་པར་བསྟོད་ལ། མཆོད་པ་བཅུ་གཉིས་
ཀྱིས་བཅོམ་ལྡན་འདས་འཁོར་དང་བཅས་པ་ལེགས་པར་མཆོད་ལ་སྔ་མ་བཞིན་དུ་ཕྱག་བྱས་ནས། མཆོད་ཡོན་ཕུལ་ཏེ། སློབ་མ་ལྷག་པར་གནས་པའི་ཆོ་ག་བྱའོ། །དེ་ལ་དང་པོར་རེ་ཞིག་ལག་ན་མེ་ཏོག་ཐོགས་པས། སློབ་དཔོན་ལ་ཕྱག་བྱས་ལ། འདི་སྐད་ཅེས་བརྗོད་པར་བྱ་སྟེ། དགའ་
ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་སེམས་དཔའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་
ནི་བདག་ལ་སྩོལ། །ཐར་པ་ཆེན་པོ་གྲོང་མཆོག་ཏུ། །མགོན་པོ་བདག་ནི་འཇུག་པར་བགྱིད་། །དེ་ནས་སློབ་དཔོན་གྱིས་སློབ་མའི་སྙིང་གར་ས་མ་ཡ་ཨ་ཞེས་བྱ་བས་ཟླ་བའི་དཀྱིལ་འཁོར་བསྐྱེད་ལ། དེའི་སྟེང་དུ་ཧཱུྃ་ལས་རྡོ་རྗེ་རྩེ་ལྔ་པ་བསམས་ལ། ལག་པ་གཡས་པས་རྡོ་རྗེ་ལངས་ཏེ། སུ་ར་ཏེ་ས་མ་

59-1-105a

ཡ་སྟྭཾ་ཧོ། བཛྲ་སིདྡྷྱི་ཡ་ཐཱ་སུ་ཁཾ་ཞེས་བྱ་བའི་སྙིང་པོས་རང་གི་སྙིང་གར་རྡོ་རྗེ་གཞག་པར་བྱའོ། །དེ་ནས་སྡིག་པ་བཤགས་པ་ལ་སོགས་པ་བྱེད་དུ་གཞུག་སྟེ། རྟོག་པ་མ་ལུས་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོར་ལྡན་པས་ཉོན། །བརྗེད་ངས་བློ་ལ་རྡོ་རྗེ་
སེམས་སོགས་པའི། །བདེ་བར་གཤེགས་པ་རྣམས་ཀྱིས་བྱིན་མི་རློབ། །དབང་མེད་བདག་གིས་མི་དགེ་བགྱིས་པ་དང་། །རྗེས་སུ་ཡི་རང་ཡང་ན་བགྱིད་སྩལ་གང་། །དེ་དག་ཐམས་ཅད་བྱང་ཆུབ་མཆོག་གི་ནི། །སྤྱན་སྔར་ད་ལྟར་མ་ལུས་སོ་སོར་བཤགས། །བདེ་གཤེགས་རྣམས་
ཀྱི་ཚོགས་གཉིས་མ་ལུས་དང་། །སྲས་རྣམས་ཀྱི་ནི་ཟབ་ཅིང་མཐའ་མེད་པའི། །འགྲོ་བ་མ་ལུས་དོན་རྣམས་བསྒྲུབ་མཛད་དང་། །དེ་ལས་གཞན་ལའང་བདག་ནི་ཡི་རང་ངོ་། །ཐུགས་རྗེས་གདུང་བས་ཐུགས་དང་ལྡན་འགྱུར་ཞིང་། །བློ་གྲོས་སྡིག་མེད་གཏི་མུག་ཚོགས་ཀུན་བཅོམ། །
མ་ལུས་རིགས་ཀྱི་པདྨའི་ནང་བཞུགས་པ། །བདེ་བར་གཤེགས་པ་རྣམས་ལ་སྐྱབས་སུ་མཆི། །རབ་མཆོག་བློ་ཡིས་ཀུན་དགའ་ར་བ་སྟེ། །དམན་པ་འཇིག་པར་བྱེད་པས་འཁོར་ལོའི་ཚུལ། །སྲིད་པའི་སྦྱོར་བ་ཟིལ་གྱིས་གནོན་པའི་ཚུལ། །གསུང་མཆོག་ཆོས་ཀྱི་མཆོག་ལ་སྐྱབས་
སུ་མཆི། །འདོད་ཆགས་ལ་སོགས་སྦྲུལ་གྱི་དུག་འཇོམས་ཤིང་། །བློ་གྲོས་རྣམ་རྒྱལ་ཐུགས་རྗེ་ཆེན་པོ་ཡིད། །བརྟུལ་ཞུགས་དབང་པོའི་ཚོགས་ལ་སྐྱབས་གསོལ་ཞིང་། །སྲིད་དང་བྲལ་བ་རྣམས་ལ་བདག་ཕྱག་འཚལ། །རྒྱུ་ཡི་རྗེས་ཐོགས་བདག་པོའི་ཡུལ་ཉིད་ལས། །འབྲས་བུའི་
ནུས་པས་དགྲ་ཡི་ཚོགས་ལས་རྒྱལ། །སོ་སོར་རིགས་དང་སྙིང་རྗེའི་རྩ་བ་ཅན། །བྱང་ཆུབ་ཡང་དག་རིག་པ་བདག་གིས་བཟུང་། །སེམས་ཅན་རྣམས་ནི་ཡོངས་སུ་སྨིན་ཕྱིར་དང་། །བསྐྱབ་པའི་ཕྱིར་རམ་ཡང་ན་བདག་གི་སེམས། །ཡང་དག་ཉིད་དུ་དག་པར་བྱ་བའི་ཕྱིར། །ཐམས་ཅད་རྩྭ་བཞིན་
ལྟོས་པ་མེད་པར་སྦྱིན། །དེ་བཞིན་ཚུལ་ཁྲིམས་བཟོད་དང་བརྩོན་འགྲུས་དང་། །བསམ་གཏན་དང་ནི་ཤེས་རབ་བླ་མེད་པ། །བདག་དང་གཞན་རྣམས་དག་པར་བྱ་ཕྱིར་འདི། །སྐད་ཅིག་རེ་རེ་ཞིང་ཡང་བསྒོམ་པར་བགྱི། །བདེ་གཤེགས་སྔགས་ལ་རྒྱ་ཆེར་མཁས་པ་དང་། །ཆོས་རྒྱལ་རྟག་ཏུ་ལྷུན་

59-1-105b

གྱིས་གྲུབ་པ་ནི། །འགྲོ་འདི་རྣམས་ཀྱིས་ཐོབ་པར་བྱ་བའི་ཕྱིར། འདི་ན་མཁའ་བཞིན་དུ་ནི་གནས་པར་བགྱིད། །ཅེས་ལན་གསུམ་བརྗོད་དོ། །བདག་གི་དགེ་བའི་རྩ་བ་ཡང་དག་པར་བསྡུས་པ་འདིས། བདག་གིས་ཐམས་ཅད་ཡོངས་སུ་གཏང་བར་བགྱིའོ། །བདག་གིས་སེམས་ཅན་ཐམས་
ཅད་ལ་མཉམ་པར་གཞག་པའི་སེམས་བསྐྱེད་པར་བགྱིའོ། །བདག་གིས་སེམས་ཅན་ཐམས་ཅད་ཐེག་པ་ཐམས་ཅད་དང་ཐབས་ཀྱི་བྱེ་བྲག་ཐམས་ཅད་ཀྱིས་བཏུལ་ནས་མི་གནས་པའི་མྱ་ངན་ལས་འདས་པའི་དབྱིངས་ལ་རབ་ཏུ་གཞག་པར་བགྱིའོ། །བདག་གིས་སེམས་ཅན་ཐམས་ཅད་ཡོངས་
སུ་མྱ་ངན་ལས་འདས་པར་གྱུར་ཀྱང་སེམས་ཅན་འགའ་ཡང་མྱ་ངན་ལས་བཟླས་པར་འགྱུར་བ་མེད་དོ་ཞེས་སེམས་བསྐྱེད་པར་བགྱིའོ། །བདག་གིས་ཆོས་ཐམས་ཅད་སྐྱེ་བ་མེད་པ་ཉིད་དུ་རྗེས་སུ་རྟོགས་པར་བགྱིའོ། །བདག་གིས་མ་ཡེངས་པའི་སེམས་དང་། ཐམས་ཅད་མཁྱེན་པའི་ཡེ་ཤེས་
ཀྱིས་ཕ་རོལ་ཏུ་ཕྱིན་པ་དྲུག་ལ་བསླབ་པར་བགྱིའོ། །བདག་གིས་ཐེག་པ་གཅིག་གི་ཚུལ་དུ་གནས་པར་ཡང་དག་པར་རྟོགས་པར་བགྱིའོ། །བདག་གིས་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ལ་གནས་པ་སོ་སོར་རྟོགས་པའི་ཕྱིར་བསླབ་པར་བགྱིའོ། །བདག་གིས་སྟོབས་བཅུ་དང་། མི་
འཇིགས་པ་བཞི་དང་། སོ་སོ་ཡང་དག་པར་རིག་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་རྣམས་སོ་སོར་རྟོགས་པར་བྱ་བའི་ཕྱིར་མངོན་པར་བརྩོན་པར་བགྱིའོ། །དེ་བཞིན་དུ་བདག་གིས་སངས་རྒྱས་ཀྱི་ཆོས་ཚད་མེད་པ་མ་ལུས་པ་ལ་མངོན་པར་གནས་ཤིང་། བསྒྲུབ་པར་བགྱིའོ། །འདི་ནི་
བྱང་ཆུབ་སེམས་དཔའ་རྣམས་ཀྱི་རྡོ་རྗེ་ལྟ་བུར་བྱང་ཆུབ་ཆེན་པོར་སེམས་བསྐྱེད་པ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱི་ཡབ་དང་། དེ་བཞིན་གཤེགས་པ་ཐམས་ཅད་ཀྱི་བཀའ་བཞིན་མཛད་པ་དང་། དེ་བཞིན་གཤེགས་པ་ཐམས་ཅད་ཀྱི་སྲས་ཀྱི་ཐུ་བོ་སྟེ། འདི་ཉིད་ནི་བཅོམ་ལྡན་
འདས་ཀུན་དུ་བཟང་པོའོ། །དེ་ཇི་ལྟ་བ་བཞིན་དུ་ཡང་དག་པར་རྫོགས་པར་བྱས་པའི་དགེ་བའི་རྩ་བའི་སྟོབས་ཀྱིས་བདག་སེམས་བསྐྱེད་པ་འདི་གནས་པས། བདེ་བ་མཐའ་ཡས་པ་ལ་གནས་པའི་ཀུན་དུ་བཟང་པོའི་སྤྱོད་པ་ཞེས་བྱ་བ་རྫོགས་པ་ལ་གདུལ་བྱའི་སྐྱེ་བོའི་ཚོགས་མ་ལུས་པ་ལ་

59-1-106a

བདེ་བའི་དབང་ཕྱུག་གི་བར་དུ་དབྱེ་བ་མང་པོ་ཡང་དག་པར་བསྟན་པས་སྨིན་པར་བྱ་ཞིང་། རབ་ཏུ་དགའ་བའི་གཟེངས་བསྟོད་པ་ལ་ངེས་པར་སྦྱར་བར་བྱའོ། །དེ་ནས་དཔལ་ཆེན་མོས་སློབ་མའི་ལག་ཏུ་དྲི་སྦྱིན་པ་དང་། རབ་ཏུ་དགའ་བས་མེ་ཏོག །རབ་ཏུ་དགའ་བས་བདུག་
སྤོས། སྤྱན་གྱིས་མར་མེ་སྦྱིན་ཞིང་། བཛྲ་ཧ་ས་ཧ་ཞེས་བྱ་བ་མངོན་པར་བཟླས་ཤིང་། ཕྱག་རྒྱ་མཆོག་གིས་བསྲུང་བ་བྱས་པའི་ཨ་ཤྭཏྠ་ལས་བྱས་ལ། དྲིས་བསྒོས་ཤིང་མེ་ཏོག་གིས་བཅིངས་པའི་སོ་ཤིང་དང་། བཛྲ་ཏིཥྛ་ཞེས་བྱ་བ་བཟླས་པའི་ཀུ་ཤ་གསར་པ་སློབ་མ་ལ་སྦྱིན་པར་བྱའོ། །དེ་
ནས་དཔུང་པ་གཡོན་པར་མདུད་པ་གསུམ་དང་ལྡན་པའི་སྲུང་སྐུད་ལ། ཨ་བཛྲ་རཀྵ་ཧཾ་ཞེས་བྱ་བ་འདི་བཟླས་ལ། བདག་ཉིད་ཀྱིས་ཡང་དག་པར་བཅིང་བར་བྱའོ། །དེ་ནས་ཨོཾ་བུདྡྷ་མཻ་ཏྲི་བཛྲ་རཀྵ་ཧཾ། ཞེས་བྱ་བའི་ཕྱག་རྒྱ་དང་ལྡན་པའི་བྱམས་པའི་གོ་ཆས་གོ་བསྐོན་པར་བྱའོ། །དེ་ལ་ཕྱག་རྒྱ་ནི་འདི་
ཡིན་ཏེ། རྡོ་རྗེ་ཁུ་ཚུར་གཉིས་བཅིངས་ལ། །མཛུབ་མོ་གཉིས་ཀྱིས་མདུད་པ་དང་། །བདག་གམ་གཞན་ལ་གོ་བསྐོན་ན། །རྟག་པ་ཡི་ནི་བསྲུང་བར་འགྱུར། །ཨོཾ་བཛྲ་སཏྭ་ཨུཥྞཱི་ཥ་ཧཱུཾ་ཕཊ། ཞེས་བྱ་བ་སློབ་མའི་སྤྱི་གཙུག་ཏུ་དགོད་དོ། །དེ་ནས་འདིའི་ཕྱག་རྒྱ་བཤད་དེ། རྡོ་རྗེ་བསྡམས་པ་དམ་བྱས་
ལ། །མཐེ་བོང་སྙིམ་པར་བཅུག་ནས་སུ། །མཛུབ་མོའི་རྩེ་མོ་བཀབ་པ་ནི། །སེམས་དཔའི་གཙུག་ཏོར་ཞེས་བྱར་གྲགས། །དེ་ནས་སློབ་མ་རྣམས་ལ་འདི་སྐད་ཅེས་བརྗོད་པར་བྱ་སྟེ། བཞིན་བཟངས་དག་ལོངས་ལ། དེ་བཞིན་གཤེགས་པ་རྣམས་ལ་ཕྱག་གྱིས་ཤིག །ནང་པར་ཐར་པ་ཆེན་པོའི་
གྲོང་ཁྱེར་མཐོང་བར་འགྱུར་རོ། །སློབ་མ་ལྷག་པར་གནས་པའི་ཆོ་གའོ། །དེ་ནས་མཆོད་པ་བྱས་ལ་བདུག་སྤོས་ཕུལ་ཏེ། བཅོམ་ལྡན་འདས་འཁོར་དང་བཅས་པ་ཉེ་བར་སྙན་གསན་དབབ་པ་སྤྱན་དྲང་བར་བྱའོ། །རྡོ་རྗེ་སེམས་དཔའ་བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་ལོ། །བདག་ནི་
བརྩེ་བར་གྱུར་ནས་སུ། །སློབ་མ་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །སང་ནི་དཀྱིལ་འཁོར་བྲི་བར་འཚལ། །བཅོམ་ལྡན་བདག་ནི་གུས་པ་ལ། །དེ་བས་གནང་བར་མཛད་པའི་རིགས། །སངས་རྒྱས་འཇིག་རྟེན་མགོན་བརྩེ་དང་། །བྱང་ཆུབ་སེམས་དཔའ་དགྲ་

59-1-106b

བཅོམ་དང་། །གསང་སྔགས་ལྷ་གཞན་གང་ལགས་དང་། །འཇིག་རྟེན་སྐྱོང་བའི་ལྷ་རྣམས་དང་། །གང་ཡང་འབྱུང་པོ་མཐུ་ཆེན་དང་། །གང་དུ་ལྷ་ཡི་སྤྱན་མངའ་བའི། །སེམས་ཅན་བསྟན་ལ་དགའ་བ་རྣམས། །བདག་ལ་དགོངས་པར་མཛད་དུ་གསོལ། །བདག་མིང་འདི་ཞེས་བགྱི་
བ་ཡི། །སང་ནི་དཀྱིལ་འཁོར་བཟང་པོའི་མིང་། །འདི་ཞེས་བགྱི་བ་ཅི་ནུས་ཀྱིས། །ཆོ་ག་བཞིན་དུ་བྲི་ལགས་ན། །བདག་དང་སློབ་མར་བཅས་པ་ལ། །ཐུགས་ནི་བརྩེ་བར་དགོངས་ནས་སུ། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབས་པར་མཛད་དུ་གསོལ། །
ཞེས་ལན་གསུམ་བརྗོད་དེ་ལྷ་ལྷག་པར་གནས་པའི་ཆོ་གའོ། །དེ་ནས་བཅོམ་ལྡན་འདས་ལ་ཕྱག་བྱས་ལ། མཚན་བརྒྱ་རྩ་བརྒྱད་པས་བསྟོད་ལ། མཆོད་ཡོན་ཕུལ་བ་སྔོན་དུ་འགྲོ་བས་ཡང་དག་པར་མཆོད་ལ་ཕྱག་བྱས་ཏེ། སློབ་མ་རྣམས་ལ་ཟབ་ཅིང་རྒྱ་ཆེ་བའི་ཆོས་བཤད་པ་བྱས་ནས། 
སློབ་མའི་ཚོགས་དང་བཅས་པའི་སློབ་དཔོན་དཀྱིལ་འཁོར་གྱི་སའི་མཐའ་ལོགས་སུ་ཉལ་བར་བྱའོ། །དེ་ནས་སྐྱ་རེངས་འཆར་བའི་དུས་སུ། ཁྲུས་བྱ་བ་སྔོན་དུ་འགྲོ་བས་ལྷའི་རྣལ་འབྱོར་བྱས་ལ། ཉི་མ་འཆར་བའི་དུས་སུ་དཀྱིལ་འཁོར་བྲི་བ་བརྩམ་པར་བྱ་སྟེ། དེ་བཞིན་དུ་དང་པོའི་རྡོ་རྗེ་བསྐྱེད་
ནས། དང་པོ་ཁོ་ནར་སྲད་བུ་ཚོན་དམར་པོ་དང་། ལྗང་གུ་དང་། སྔོན་པོ་དང་། སེར་པོ་དང་། དཀར་པོའི་དྲི་ཞིམ་པས་སོ་སོར་བཙོ་བར་བྱའོ། །དེ་ནས་རིམ་པ་འདི་ཉིད་ཀྱིས་བཞག་ལ། ཧྲཱིཿཨ་ཧཱུྃ་ཏྲཱྃ་ཨོཾ་ཞེས་བྱ་བའི་ས་བོན་གྱི་ཡི་གེ་རྣམས་ལས། དེ་བཞིན་གཤེགས་པ་འོད་དཔག་ཏུ་མེད་པ་དང་། དོན་
ཡོད་གྲུབ་པ་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། རྣམ་པར་སྣང་མཛད་རྣམས་སྲད་བུ་ལ་རྣམ་པར་བསམས་ལ། དེ་བཞིན་གཤེགས་པ་འོད་དཔག་ཏུ་མེད་པ་ལ་སོགས་པ་རང་རང་གི་ཕྱོགས་ན་བཞུགས་པས། རང་རང་གི་ས་བོན་གྱི་འོད་ཟེར་གྱི་སྲད་བུ་རང་རང་གི་ཐུགས་ཀ་ལས་
ཡང་དག་པར་གཏོར་བར་བསམ་པར་བྱའོ། །དེ་ནས་དེ་རྣམས་འབར་བའི་ལྟ་བ་དང་། ལྕགས་ཀྱུས་ཛ་ཧི་ཞེས་བྱ་བ་མིག་གཉིས་སུ་བཀོད་ལ། འབར་བའི་ལྟ་བ་དང་། ལྕགས་ཀྱུས་བཀུག་ནས། རང་གི་ལག་པ་གཉིས་སུ་བཞག་ལ། རང་གི་ལག་པར་བཞག་པ་དེ་རྣམས་ཀྱིས་ཕྱི་རོལ་གྱི་སྲད་བུ་

59-1-107a

ལ་ཀུན་དུ་བཀང་ལ་བསྒྲིལ་བར་བྱ་སྟེ། ཨ་ནྱོ་ནྱ་ཨ་ནུ་ག་ཏ་སརྦ་དྷརྨཱ་སྥ་ར་སྥ་ར་ཨ་ནུ་པྲ་བིཥྚ་སརྦ་དྷརྨཱ། ཨ་ཏྱན་ཏ་ཨ་ནུ་པྲ་བིཥྚ་སརྦ་དྷརྨཱ་ཧཱུྃ། ཞེས་བརྗོད་པར་བྱའོ། །དེ་ནས་དྲི་བཟང་པོས་བྱུག་པའི་གསེར་ལ་སོགས་པའི་སྣོད་དུ་བཞག་ལ་མེ་ཏོག་གིས་གཏོར་ཏེ། ཡང་དག་པར་
མཆོད་ལ། ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུྃ། ཞེས་བྱ་བ་རྡོ་རྗེ་ཁུ་ཚུར་གཉིས་ཀྱིས་བཟུང་ལ། བཟླས་བརྗོད་བརྒྱ་རྩ་བརྒྱད་བྱའོ། །དེ་ནས་དཀྱིལ་འཁོར་གྱིས་དྲི་ཞིམ་པོས་བྱུགས་ལ་མེ་ཏོག་གི་སིལ་མ་གཏོར་ཏེ། ནམ་མཁའ་ལ་བཞུགས་པའི་བཅོམ་ལྡན་འདས་མེ་ཏོག་ལ་སོགས་པ་དང་། 
གླུ་དང་རོལ་མོ་ལ་སོགས་པས་ཡང་དག་པར་མཆོད་ལ། མིག་གཡས་གཡོན་དུ་ཛ་གཉིས་ལས་ཉི་མ་དང་ཟླ་བ་ཁ་དོག་སེར་པོ་བསྐྱེད་དེ་ཡིད་ལ་ཧཱུྃ་ཟློས་ཤིང་། རྣམ་པར་སྣང་མཛད་དུ་བསྒྱུར་ནས། བཛྲ་ཀརྨ་ཞེས་བརྗོད་དེ། རང་གི་སྙིང་ག་ལས་སྒྲུབ་པའི་གྲོགས་མཆོག་རྡོ་རྗེ་ལས་ཀྱི་གཟུགས་
སུ་དྲངས་ལ་ཕྱུང་སྟེ། ཧཱུྃ་ཞེས་ཟློས་ཤིང་ཡང་རྡོ་རྗེ་འཛིན་པ་ཆེན་པོར་བདག་ཉིད་བསམས་ལ། དྲི་ཞིམ་པོ་དང་། ཡུངས་ཀར་དང་ལྡན་པའི་ཚོན་དཀར་པོ་དང་ལྷན་ཅིག་བསྒོས་ཏེ། སྲད་བུ་དེ་དང་པོའི་རྡོ་རྗེ་ཁུ་ཚུར་གྱིས་བཟུང་ལ། ཕྱི་ནས་ཅི་བདེར་བྱ་བ་དང་། །རིམ་པ་འདིས་ཐིག་གདབ་པར་བྱའོ། །
དེ་ལ་དང་པོ་ཁོ་ནར་དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ། ཡི་གེ་ཛས་སྒྲུབ་པའི་གྲོགས་མཆོག་རྡོ་རྗེ་ལས་ཀྱི་གཟུགས་ཅན་གྱི་ལག་ཏུ་གཏད་ལ་ཕྱོགས་ཐམས་ཅད་མཉམ་པ་ཉིད་དུ་བསམས་ནས། སློབ་དཔོན་ནུབ་ཏུ་གནས་ནས་ཤར་དུ་བལྟས་ཏེ་ཚངས་པའི་ཐིག་གདབ་པར་བྱའོ། །ཡང་ལྷོ་
ཕྱོགས་སུ་གནས་ནས་བྱང་ཕྱོགས་སུ་བལྟས་ཏེ་ཚངས་པའི་ཐིག་གཉིས་གདབ་པར་བྱའོ། །དེ་ནས་ཤར་ལྷོ་མཚམས་སུ་གནས་ནས་བྱང་ཕྱོགས་སུ་ཁ་བལྟས་ཏེ། ཕྱིའི་དཀྱིལ་འཁོར་གྱི་ཤར་ཕྱོགས་ཀྱི་ལོགས་ཐིག་གདབ་པར་བྱའོ། །དེ་ནས་ནུབ་བྱང་མཚམས་སུ་གནས་ནས་ལྷོ་ཕྱོགས་སུ་
ཁ་བལྟས་ཏེ་ནུབ་ཕྱོགས་ཀྱི་ལོགས་ཐིག་གདབ་པར་བྱའོ། །དེ་བཞིན་དུ་གནས་ནས་ཁ་ཤར་དུ་བལྟས་ཏེ་བྱང་ཕྱོགས་ཀྱི་ལོགས་ཐིག་གདབ་པར་བྱའོ། །ཡང་ཤར་ལྷོའི་མཚམས་ཀྱི་ཆ་ལ་འདུག་ནས་ནུབ་ཕྱོགས་སུ་བལྟས་ཏེ་ལྷོ་ཕྱོགས་ཀྱི་ལོགས་ཐིག་གདབ་པར་བྱའོ། །དེ་བཞིན་དུ་ཁྱམས་ཀྱི་ཐིག་དང་། 

59-1-107b

ལྷའི་སྣམ་བུའི་ཐིག་ཀྱང་གདབ་པར་ཤེས་པར་བྱ་སྟེ། ཐམས་ཅད་དུ་སློབ་དཔོན་དང་སྒྲུབ་པའི་གྲོགས་མཆོག་ནི་བསྐོར་བའི་ཚུལ་གྱིས་འགྲོ་བར་ཤེས་པར་བྱའོ། །དེ་ནས་ཤར་ལྷོ་མཚམས་སུ་གནས་ནས་ནུབ་བྱང་མཚམས་ཀྱི་བར་དུ་སྲད་བུ་བརྐྱང་སྟེ་ཐིག་གདབ་པ་དང་། ཡང་ལྷོ་ནུབ་ཀྱི་མཚམས་
སུ་འདུག་ལ་བྱང་ཤར་གྱི་མཚམས་སུ་སྲད་བུ་བརྐྱང་སྟེ་ཐིག་གདབ་པར་ཤེས་པར་བྱའོ། །དེ་ནས་སྒོ་དང་སྒོ་ཁྱུད་གདབ་སྟེ། དེ་ལ་ཐིག་གདབ་པའི་སྔགས་ནི་འདི་ཡིན་ཏེ། ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུྃ། ཞེས་བྱའོ། །ཛཿཛཿཛཿཞེས་བྱ་བ་ཛཿ གསུམ་དང་། སྒྲུབ་པའི་གྲོགས་མཆོག་གིས་
སྲད་བུ་དྲང་བར་བྱའོ། །དེ་ལ་སྒོ་ཐམས་ཅད་སྒོ་ཁྱུད་ནི་བརྒྱད་ཆར་བྱའོ། །སྒོ་འགྲམ་དང་ཁ་ཁྱེར་དང་ལྷའི་སྣམ་བུ་ནི་སྒོ་ཕྱེད་ཀྱི་ཚད་དོ། །ཚོན་སྣ་ལྔའི་ས་ནི་ཁ་ཁྱེར་གྱི་ཕྱེད་ཀྱི་ཚད་དོ། །རྟ་བབས་ཀྱི་ཚད་ནི་སྒོའི་སུམ་འགྱུར་དུ་བྱའོ། །ཕྱིའི་དཀྱིལ་འཁོར་གྱི་ཕྱེད་ཀྱི་ཚད་ནི་ནང་གི་དཀྱིལ་འཁོར་ཏེ་
ཟུར་བཞི་པ། སྒོ་བཞི་པ། ཀ་བ་བརྒྱད་པ། རྟ་བབས་མེད་པར་ལེགས་པར་ཐིག་བཏབ་ལ། དཀྱིལ་འཁོར་གྱི་དབུས་སུ་སེང་ལྡེང་གི་ཕུར་བུ་འོག་རྡོ་རྗེ་རྩེ་གཅིག་པ་ལྟ་བུ་ལ། སྟེང་རྡོ་རྗེ་རྩེ་ལྔ་པ་ལྟ་བར་བྱ་སྟེ་ཧཱུྃ་ལས་བསྐྱེད་ལ། ཨོཾ་བཛྲ་ཀཱི་ལི་ཀཱི་ལ་ཡ། སརྦ་བིགྷྣཱན་བནྡྷ་ཧཱུྃ་ཕཊ། ཅེས་བྱ་བ་ལན་
བརྒྱ་རྩ་བརྒྱད་བཟླས་ཏེ། རྡོ་རྗེས་བརྡུང་བར་བྱའོ། །དེ་ལ་བཏགས་པའི་སྲད་བུས་ནང་གི་དཀྱིལ་འཁོར་གྱི་ཕྱི་རོལ་གྱི་རྡོ་རྗེ་ཕྲེང་བའི་ཐིག་གདབ་པར་བྱའོ། །དེ་ལ་དཀྱིལ་འཁོར་བརྒྱད་ཆ་འདྲ་བའི་ཀ་བ་བརྒྱད་ཉིད་ཀྱི་ཐིག་ཆ་མཉམ་པར་ཐིག་གདབ་པར་བྱ་སྟེ། ཤར་ཕྱོགས་ཀྱི་ཆའི་ཀ་བའི་ཐིག་ནི་
ལྷོ་ཕྱོགས་ཀྱི་ཆར་འདུག་ལ་བྱང་དུ་བལྟས་ཏེ་ཐིག་གདབ་པར་བྱའོ། །ནུབ་ཕྱོགས་ཀྱི་ཆའི་ཀ་བའི་ཐིག་ནི་བྱང་ཕྱོགས་ཀྱི་ཆར་གནས་ལ་ལྷོའི་ཕྱོགས་སུ་བལྟས་ཏེ་གདབ་པོ། །བྱང་ཕྱོགས་ཀྱི་ཆའི་ཀ་བའི་ཐིག་ནི་ནུབ་ཕྱོགས་སུ་འདུག་ལ་ཤར་དུ་ཁ་བལྟས་ཏེ་གདབ་པོ། །ལྷོ་ཕྱོགས་ཀྱི་
ཆའི་ཀ་བའི་ཐིག་ནི་ཤར་ཕྱོགས་ཀྱི་ཆར་འདུག་ལ་ནུབ་ཏུ་བལྟས་དེ་གདབ་པར་བྱའོ། །ད་ནི་ལུང་ལས་གསུངས་པའི་ཐིག་གདབ་པའི་ཆོ་ག་བཤད་པར་བྱ་སྟེ། དེ་ནས་ཐིག་ནི་གདབ་བྱ་བ། །སྲད་བུ་ཉིས་འགྱུར་དག་གིས་ཏེ། །ནམ་མཁའ་ཐམས་ཅད་ཚད་གྱུར་པས། །ཚད་མེད་པ་ནི་ཚད་

59-1-108a

ཡིན་ཏེ། །བཟང་པོ་སངས་རྒྱས་ཀུན་གྱི་གནས། །ཕྱོགས་རྣམས་ཐམས་ཅད་མཉམ་པ་ཉིད། །ཤར་དང་ནུབ་དང་བྱང་དང་ལྷོ། །ཐིག་བཞི་བཏབ་པས་དཀྱིལ་འཁོར་བརྒྱད། །ཟུར་བཞི་པ་ལ་སྒོ་བཞི་པ། ཁྱམས་རྣམས་ཀྱིས་ནི་ལེགས་པར་བསྐོར། །རྟ་བབས་བཞི་དང་
ཡང་དག་ལྡན། །འོད་ཟེར་འབར་བ་འཁྲིགས་པའི་འོད། །དཀྱིལ་འཁོར་ཀུན་གྱི་གྲྭ་རྣམས་དང་། །སྒོ་དང་སྒོ་ཁྱུད་མཚམས་རྣམས་སུ། །ཟླ་བ་ཕྱེད་ལ་རབ་གནས་པའི། །རྡོ་རྗེ་རིན་ཆེན་རྣམས་ཀྱིས་སྤྲས། །མི་མཉམ་མེད་པས་ཟུར་བཞི་སྟེ། །དྲན་དང་དབང་པོའི་སྒོ་བཞིའོ། །བསམ་གཏན་
རྣམས་ཀྱི་རྟ་བབས་བཞི། །ཏིང་འཛིན་ཁ་ཁྱེར་ཤེས་པར་བྱ། །ཁ་ཁྱེར་ལ་བརྟན་རྡོ་རྗེའི་བདག །གཟུངས་རྣམས་ལྷ་མོས་མཆོད་པ་ཡིན། །རྒྱན་རྣམས་ཀུན་གྱིས་བཀྲ་བ་ཡང་། །བསམ་པ་ཐམས་ཅད་རྫོགས་བྱེད་པའོ། །གདུལ་བྱས་བསྐྱོད་པ་སྣ་ཚོགས་མཆོག །དར་འཕན་དྲིལ་བུ་
སྒྲོགས་པ་ཡིན། །མེ་ལོང་ཡེ་ཤེས་རྟག་མེད་རྟོག །བྱང་ཆུབ་ཡན་ལག་མེ་ཏོག་ཕྲེང་། །དྲ་བ་དྲ་ཕྱེད་རིན་ཆེན་མཆོག །ཉི་མ་ཟླ་བ་ཡང་དག་ལྡན། །ཀུན་གྲུབ་མི་ཟད་བདེ་བ་སྟེ། །བདེ་བ་ཆེན་པོ་ཞེས་གྲགས་པའོ། །ཕྱིའི་དཀྱིལ་འཁོར་རོ། །དེ་ཡི་ནང་གི་དཀྱིལ་འཁོར་ནི། །དཀྱིལ་འཁོར་བརྒྱད་
པ་དག་དང་མཚུངས། །རྡོ་རྗེའི་ཐིག་ནི་ཡོངས་བཏབ་པས། །རྡོ་རྗེ་འཁོར་ལོ་ཞེས་བྱར་གྲགས། །བྱང་ཆུབ་སེམས་ནི་ཐེག་པ་ཆེ། །རྡོ་རྗེ་ཐིག་ནི་རབ་བསྐོར་བས། །རྡོ་རྗེ་ཐིག་ནི་ཡོངས་བཏབ་ལ། །རྡོ་རྗེ་འཁོར་ལོ་ཡང་དག་བྲི། །ཡང་དག་བྲིས་ཏེ་ཀུན་གྱི་མཆོག །ཐར་པ་ཆེན་པོའི་རང་བཞིན་གྲོང་། །
ཐོག་མ་མེད་ཅིང་མཆོག་ཉིད་པས། །ཕྱོགས་རྣམས་ཐམས་ཅད་མཉམ་པ་ཡིན། །དེ་ནས། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུྃ། ཨཱ་ན་ཡ་ཧོ། བྷ་ག་བཱན་བཛྲ་ཧཱུཾ་ཕཊ། ཅེས་བརྗོད་ལ་དཀྱིལ་འཁོར་གྱི་ལྟེ་བ་ལ་གནས་པའི་ཕུར་བུ་ཕྱུང་ལ། འོག་ནས་བཤད་པའི་ཚོན་སྣ་
ལྔས་ཕུར་བུའི་བུ་ག་བཀང་སྟེ་མཉམ་པོར་བྱའོ། །དེ་ནས་མིག་གཉིས་སུ་ཧི་ལས་ཉི་མ་དང་ཟླ་བ་བསྐྱེད་ལ། ཁྲོ་བོའི་ལྟ་བས་ཀྱང་ཀུན་དུ་བལྟས་ཏེ་སྒོ་རྣམས་དབྱེའོ། །དེ་ནས་ཚོན་སྦྱང་བ་བཤད་པར་བྱ་སྟེ། ཨོཾ་བཛྲ་ཙི་ཏྲ་ས་མ་ཡ་ཧཱུཾ། ཞེས་བྱ་བས་ཕྱག་རྒྱ་འདི་དང་ལྡན་པས་ཚོན་ཐམས་ཅད་ལ་ལན་

59-1-108b

བདུན་བཟླས་ན། རྡོ་རྗེའི་རང་བཞིན་དུ་འགྱུར་རོ་ཞེས་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ། །དེ་ལ་ཕྱག་རྒྱ་ནི་འདི་ཡིན་ཏེ། རྡོ་རྗེ་ཕྱག་རྒྱ་གཉིས་ལས་ནི། །མཛུབ་མོ་རྩེ་མོ་མཉམ་སྦྱར་བ། །བྱས་ནས་ཚོན་རྩི་ཐམས་ཅད་ནི། །འབར་བའི་ལྟ་བས་དགུག་པར་བྱ། །ཧི་ཞེས་བྱ་བའི་
མཐར་ཁྲོ་བོ་ཏི་རིནྟི་རིའི་ཕྱག་རྒྱ་བཅིངས་ལ་སྦྱར་བར་བྱའོ། །དེ་ལ་ཚོན་རྩི་དཀར་པོ་ལ་ནི། དེ་བཞིན་གཤེགས་པ་དཀར་པོའི་ཕྲ་རབ་རྣམས་གཞུག་པར་བྱའོ། །སེར་པོ་ལ་ནི་སེར་པོའོ། །སྔོན་པོ་ལ་ནི་སྔོན་པོའོ། །ལྗང་གུ་ལ་ནི་ལྗང་གུའོ། །དམར་པོ་ལ་ནི་དམར་པོ་བཅུག་ནས། ཇི་སྐད་དུ་
བཤད་པའི་འབར་བའི་ལྟ་བས་མངོན་པར་སྦྱང་བའི་དུས་སུ་ཡང་དང་པོའི་རྡོ་རྗེ་ཐོག་མར་ཚོན་དགྱེ་བ་བརྩམ་པར་བྱས་ལ། ཚོན་ཐམས་ཅད་དབང་ལྡན་གྱི་ཕྱོགས་ནས་བརྩམས་ཏེ། བསྐོར་ཕྱོགས་སུ་ཧཱུྃ་ཟློས་ཤིང་དགྱེ་ལ་དེའི་འོག་ཏུ་ཇི་ལྟར་དགའ་བའི་ཚོན་དགྱེ་བར་བྱའོ། །དེ་ལ་ཚོན་དགྱེ་བའི་
རིམ་པ་ནི་འདི་ཡིན་ཏེ། དམར་པོ་དང་། ལྗང་གུ་དང་། སྔོན་པོ་དང་། སེར་པོ་སྟེ། དཀར་པོ་ནི་ཐམས་ཅད་ཀྱི་ནང་རོལ་དུའོ། །དེ་ལྟར་དཀྱིལ་འཁོར་བྲིས་ནས་དཀྱིལ་འཁོར་གྱི་ལྟེ་བར་སྣ་ཚོགས་པདྨའི་གདན་ལ། དཔལ་རྡོ་རྗེ་སེམས་དཔའ་མཚན་ཉིད་སྔར་བཤད་པ་ལྟ་བུའི་ལུགས་མ་ལ་སོགས་
པའི་སྐུ་གཟུགས་བཀོད་ལ། ཧཱུྃ་གིས་ཀྱང་བར་སྣང་གི་ཕྱོགས་སུ་སྤྱན་དྲངས་ཏེ། གཟུགས་དང་གཅིག་ཏུ་བསྲེ་བར་བྱའོ། །དེ་བཞིན་དུ་ཐམས་ཅད་ལ་ཡང་ཤེས་པར་བྱ་སྟེ། གང་གི་ཕྱིར་ལྷ་ཐམས་ཅད་ཀྱི་ཡང་དགོད་པའི་སྙིང་པོ་ནི་ཧཱུྃ་འདི་ཉིད་དོ། །དེ་ལ་དེའི་མདུན་དུ་རྡོ་རྗེ་ཡིད་ལས་བྱུང་བ་
སྐུ་མདོག་དམར་སྐྱ། དེ་བཞིན་གཤེགས་པ་ལྔའི་ཅོད་པན་ཅན་གཡོན་པའི་རྡོ་རྗེ་ཁུ་ཚུར་གྱིས། མེ་ཏོག་ཅན་གྱི་གཞུ་བསྣམས་པ། །ཕྱག་གཡས་ན་རྡོ་རྗེ་རྩེ་གཅིག་པའི་མདེའུ་ཅན་གྱི་མདའ་གསོར་བ་ལ་བརྩོན་པའོ། །དེའི་གཡས་ལོགས་སུ་རྡོ་རྗེ་ཀཱི་ལ་ཀཱི་ལ་སྐུ་མདོག་རྡོ་རྗེ་ཡིད་ལས་བྱུང་བ་
དང་མཐུན་པ་། རྡོ་རྗེ་ཁུ་ཚུར་བཅིངས་པའི་ཕྱག་གཉིས་ཀྱིས་རང་གི་ཐུགས་ཀའི་ཕྱོགས་སུ་དང་པོའི་རྡོ་རྗེ་རྩེ་ལྔ་པ་མདོག་དམར་པོ་བསྣམས་ནས་འཁྱུད་པའི་ཚུལ་གྱིས་བཞུགས་པའོ། །དེའི་རྒྱབ་ཏུ་རྡོ་རྗེ་དྲན་པ་སྐུ་མདོག་སྔོ་སྐྱ། ཕྱག་གཡས་ན་ཆུ་སྲིན་གྱི་རྒྱལ་མཚན་བསྣམས་པ། ཕྱག་

59-1-109a

གཡོན་གྱིས་གདན་ལ་སྙེམས་པ་དང་བཅས་པས་བཞུགས་པའོ། །དེའི་གཡོན་དུ་རྡོ་རྗེ་སྙེམས་པ་གསེར་བཙོ་མ་ལྟ་བུའི་མདོག་ཅན། རྡོ་རྗེ་ཁུ་ཚུར་གྱིས་རྡོ་རྗེ་རྩེ་ལྔ་པ་གཉིས་བསྣམས་ཏེ། དཀུ་གཉིས་སུ་སྙེམས་པ་དང་བཅས་པ། དབུ་གཡོན་དུ་ཅུང་ཟད་འདུད་པ་སྒེག་
པ་དང་བཅས་པའོ། །ནང་གི་དཀྱིལ་འཁོར་དེ་ཉིད་ཀྱི་ཤར་ལྷོའི་མཚམས་སུ་རབ་ཏུ་དགའ་བ་སྐུ་མདོག་རྡོ་རྗེ་ཡིད་ལས་བྱུང་བ་དང་མཐུན་པའོ། །ལྷོ་ནུབ་མཚམས་སུ་རབ་ཏུ་དགའ་མ་སྐུ་མདོག་ཀཱི་ལི་ཀཱི་ལ་དང་མཐུན་པའོ། །ནུབ་བྱང་མཚམས་སུ་རྡོ་རྗེ་སྤྱན་སྐུ་མདོག་རྡོ་རྗེ་དྲན་པ་དང་མཐུན་
པའོ། །བྱང་ཤར་མཚམས་སུ་དཔལ་ཆེན་མོ་སྐུ་མདོག་རྡོ་རྗེ་སྙེམས་པ་དང་མཐུན་པ་སྟེ། དེ་དག་ཀྱང་གོ་རིམས་ཇི་ལྟ་བ་བཞིན་དུ་མེ་ཏོག་གི་ཟ་མ་ཏོག་དང་། སྤོས་ཁང་དང་། མར་མེའི་སྡོང་བུ་དང་། དྲིའི་དུང་ཆོས་རང་གི་སྤྱི་བོའི་ཕྱོགས་སུ་ཐལ་མོ་ཁ་འབྱེད་པས་འཛིན་པའོ། །རྡོ་རྗེ་ཕྲེང་
བའི་ཕྱི་རོལ་གྱི་ནང་དུ་ཤར་ཕྱོགས་སུ་བཅོམ་ལྡན་འདས་མི་བསྐྱོད་པ་སྐུ་མདོག་དཀར་པོ་རྡོ་རྗེ་རྩེ་ལྔ་པ་བསྣམས་པ་ས་གནོན་གྱི་ཕྱག་རྒྱས་བཞུགས་པའོ། །དེའི་གཡས་ལོགས་སུ་ཕྱག་ན་རྡོ་རྗེ། རྡོ་རྗེ་དང་དྲིལ་བུ་བསྣམས་ཤིང་། གཡོན་སྙེམས་པ་དང་བཅས་པའོ། །གཡོན་དུ་འཇམ་
དཔལ་གཞོན་ནུར་གྱུར་པ་ནམ་མཁའི་མདོག་ཅན་གཞོན་ནུའི་སྐུའི་ཆ་ལུགས་འཆང་བ། འཛུམ་པ་དང་བཅས་པ་ཕྱག་བཞི་ན་རལ་གྲི་བཞི་དང་། དེ་བཞིན་གཤེགས་པ་རྣམས་ལ་འདེབས་པའོ། །རྡོ་རྗེ་ཕྲེང་བའི་ནང་ལྷོ་ཕྱོགས་སུ་རེན་ཆེན་འབྱུང་ལྡན་བཻ་ཌཱུརྱ་སྔོ་བསངས་ལྟ་བུའི་མདོག་ཅན།
རྡོ་རྗེ་རིན་པོ་ཆེ་མཆོག་སྦྱིན་པའི་ཕྱག་གིས་བསྣམས་པ། དེའི་གཡས་ལོགས་སུ་བྱང་ཆུབ་སེམས་དཔའ་ནམ་མཁའི་སྙིང་པོ་སྐུ་མདོག་མརྒད་ལྟ་བུ་རང་གི་མགོ་ལ་དབང་བསྐུར་བའི་ཕྲེང་བ་རང་ཉིད་འཆིང་བ་ཞལ་རྣམ་པར་བཞད་པའོ། །གཡོན་ལོགས་སུ་ནམ་མཁའི་མཛོད་སྐུ་མདོག་
སྣ་ཚོགས་པ་ཕྱག་ན་སྣ་ཚོགས་རྡོ་རྗེ་དང་། སྣ་ཚོགས་དྲིལ་བུ་བསྣམས་ནས། རྡོ་རྗེ་སྙེམས་པ་བསྒྱིངས་ནས་བཞུགས་པ་ཞལ་རྣམ་པར་བཞད་པའོ། །རྡོ་རྗེ་ཕྲེང་བའི་ནང་གི་ནུབ་ཕྱོགས་སུ་འོད་དཔག་ཏུ་མེད་པ་གསེར་བཙོ་མ་ལྟ་བུའི་མདོག་ཅན་པདྨ་བསྣམས་པ་ཆོས་ཀྱི་འཁོར་ལོའི་ཕྱག་རྒྱས་

59-1-109b

ཆོས་སྟོན་པར་མཛད་པའོ། །དེའི་གཡས་ལོགས་སུ་འཇིག་རྟེན་དབང་ཕྱུག་སྐུ་མདོག་དམར་སྐྱ། གཡོན་པ་སྙེམས་པ་དང་བཅས་པས་པདྨའི་སྡོང་བུ་བཟུང་ནས། ཕྱག་གཡས་པས་རང་གི་ཐུགས་ཀར་འབྱེད་པར་མཛད་པའོ། །གཡོན་ལོགས་སུ་སེམས་བསྐྱེད་མ་ཐག་ཏུ་ཆོས་ཀྱི་འཁོར་
ལོ་བསྐོར་བ། གསེར་གྱི་མདོག་ཅན་ཕྱག་གཡོན་པས་གདན་ལ་བརྟེན་པ། ཕྱག་གཡས་པའི་གུང་མོའི་རྩེ་མོར་རྡོ་རྗེ་འཁོར་ལོ་རྩིབས་བརྒྱད་པ་རང་གི་ཐུགས་ཀའི་ཕྱོགས་སུ་བསྐོར་བའི་ཚུལ་གྱིས་བསྣམས་པ། ཞལ་རྣམ་པར་བཞད་པས་བཞུགས་པའོ། །རྡོ་རྗེ་ཕྲེང་བའི་ནང་གི་
བྱང་ཕྱོགས་སུ་དོན་ཡོད་པར་གྲུབ་པ་སྐུ་མདོག་སྣ་ཚོགས་པ་མི་འཇིགས་པ་སྦྱིན་པའི་ཕྱག་རྒྱས་སྣ་ཚོགས་རྡོ་རྗེ་བསྣམས་པའོ། །དེའི་གཡས་ལོགས་སུ་རྡོ་རྗེ་ཁུ་ཚུར་གསེར་གྱི་མདོག་ཅན་དམ་ཚིག་གི་ཁུ་ཚུར་གྱིས། རྡོ་རྗེ་རྩེ་ལྔ་པ་བསྣམས་པ་ཞལ་རྣམ་པར་བཞད་པའོ། །གཡོན་
ལོགས་སུ་རྡོ་རྗེ་གནོད་སྦྱིན་སྐུ་མདོག་སྔོན་པོ་རྡོ་རྗེ་མཆེ་བ་རྣམ་པར་གཙིགས་པ་འབར་བའི་ཕྲེང་བ་ཀུན་དུ་འཁྲིགས་པའི་འོད་མངའ་བ། འཇིགས་པར་མཛད་པ། ཧ་ཧ་ཞེས་གསལ་བར་བཞད་པའི་ཞལ་གྱིས་ཀུན་དུ་བཞུགས་ཤིང་། རྡོ་རྗེ་ཁུ་ཚུར་གཉིས་ཀྱིས་རྡོ་རྗེ་མཆེ་བའི་མཚོན་ཆ་བསྣམས་
ནས། ཞལ་གྱི་གྲ་གཉིས་སུ་འཇོག་པས་བཞུགས་པའོ། །ཕྱིའི་དཀྱིལ་འཁོར་གྱི་ལྷའི་སྣམ་བུ་ལ། ཤར་ལྷོའི་མཚམས་ཀྱི་ཕྱོགས་སུ་རྡོ་རྗེ་སྒེག་མོ། །རྡོ་རྗེ་ཡིད་ལས་བྱུང་བའི་མདོག་ཅན། རྡོ་རྗེ་ཁུ་ཚུར་གཉིས་རྡོ་རྗེ་རྩེ་ལྔ་པ་གཉིས་བསྣམས་ནས། གཉི་ག་སྙེམས་པར་བྱ་སྟེ། དབུ་གཡོན་དུ་
འདུད་པས་ཕྱག་འཚལ་བའོ། །ལྷོ་ནུབ་མཚམས་སུ་རྡོ་རྗེ་བཞད་པ་རྡོ་རྗེ་ཀཱི་ལི་ཀཱི་ལ་དང་མདོག་འདྲ་བ་ཕྱག་གཡས་ན་སོའི་ཕྲེང་བ་གཉིས་དང་ལྡན་པའི་རྡོ་རྗེ་གཉིས་བསྣམས་ནས་བཞད་པའི་ཚུལ་དུ་མཛད་ཅིང་། གཡོན་གྱིས་གདན་ལ་བརྟེན་ཏེ་བཞུགས་པའོ། །ནུབ་བྱང་དུ་རྡོ་རྗེ་གླུ་ཆེན་མོ་སྐུ་མདོག་རྡོ་རྗེ་
དྲན་པ་དང་མཐུན་པ་རྡོ་རྗེ་པི་ཝང་བརྡུང་བར་མཛད་པའོ། །བྱང་ཤར་གྱ་མཚམས་སུ་རྡོ་རྗེ་གར་སྐུ་མདོག་རྡོ་རྗེ་སྙེམས་མ་དང་མཐུན་པ། ཕྱག་གཉིས་ཀྱིས་རྡོ་རྗེ་རྩེ་གསུམ་པ་བསྣམས་ཏེ་གར་མཛད་པའོ། །ནང་དང་ཕྱི་རོལ་དུ་བཅས་པའི་ཤར་ཕྱོགས་ཀྱི་སྒོ་གཉིས་སུ་རྡོ་རྗེ་གཟུགས་སྐུ་

59-1-110a

མདོག་རྡོ་རྗེ་ཡིད་ལས་བྱུང་བ་དང་མཐུན་པ་ཕྱག་ན་མེ་ལོང་བསྣམས་པའོ། །ལྷོ་ཕྱོགས་ཀྱི་སྒོ་གཉིས་སུ་རྡོ་རྗེ་སྒྲ་སྐུ་མདོག་རྡོ་རྗེ་ཀཱི་ལི་ཀཱི་ལ་དང་མཐུན་པའི་པི་ཝང་བརྡུང་བ་ལ་བརྩོན་པར་མཛད་པའོ། །ནུབ་ཕྱོགས་ཀྱི་སྒོ་གཉིས་སུ་རྡོ་རྗེ་དྲི་སྐུ་མདོག་རྡོ་རྗེ་དྲན་པ་དང་མཐུན་པ་
ཕྱག་ན་དྲིའི་དུང་ཆོས་བསྣམས་པའོ། །བྱང་ཕྱོགས་ཀྱི་སྒོ་གཉིས་སུ་རྡོ་རྗེ་རོ་སྐུ་མདོག་རྡོ་རྗེ་སྙེམས་པ་དང་མཐུན་པ་ཕྱག་ན་རོའི་སྣོད་བསྣམས་པའོ། །དེའི་ཕྱིར་འདི་དག་ནི་རྡོ་རྗེ་ལྕགས་ཀྱུ་ལ་སོགས་པ་ཉིད་ཡིན་པར་འདོད་དེ། མེ་ལོང་དང་། པི་ཝང་དང་། དྲིའི་སྣོད་དང་། རོའི་སྣོད་རྣམས་ནི་
གཟུགས་ལ་སོགས་པའི་ཕྱག་མཚན་ཡིན་ནོ། །རྡོ་རྗེ་ལྕགས་ཀྱུ་ལ་སོགས་པ་ནི་རྡོ་རྗེ་ལྕགས་ཀྱུ་ལ་སོགས་པའི་ཕྱག་མཚན་ནོ་ཞེས་རྩ་བའི་རྒྱུད་ལས་གསུངས་པའོ། །ཕྱིའི་དཀྱིལ་འཁོར་གྱི་ཁྱམས་ཀྱི་ནང་དུ་འདོད་པའི་ཁམས་ཀྱི་དབང་ཕྱུག་རྣམས་སྔར་བཤད་པའི་རིམ་གྱིས་ཆུ་ལྷའི་
མཐར་ཐུག་པའི་བར་དུ་ཆུང་མ་དང་བཅས་པར་འཕགས་པ་དེ་ཁོ་ན་ཉིད་བསྡུས་པ་ལས་གསུངས་པའི་ཕྱག་རྒྱ་ཆེན་པོས་བྲི་བར་བྱའོ། །དེ་ལ་དཔལ་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་གཟུགས་ཀྱི་བར་དུ་ནི་སེམས་དཔའི་སྐྱིལ་མོ་ཀྲུང་གིས་བཞུགས་པའོ། །དེ་བཞིན་གཤེགས་པ་
རྣམས་ནི་རྡོ་རྗེའི་སྐྱིལ་མོ་ཀྲུང་གིས་བཞུགས་པའོ། །རྡོ་རྗེ་སེམས་དཔའ་ནི་ཤར་ཕྱོགས་སུ་གཟིགས་ནས་བཞུགས་པའོ། །ལྷག་མ་རྣམས་ནི་རང་གི་བདག་པོ་ལ་གཟིགས་པར་བྲི་བར་བྱའོ། །དེ་ལྟར་དཀྱིལ་འཁོར་ཆེན་པོ་བྲིས་ནས། ཕྱི་དྲོའི་དུས་སུ་མཚམས་ལ་བབ་པ་ན་དཔལ་
རྡོ་རྗེ་ཧཱུྃ་མཛད་ཀྱིས་སྦྱོར་བ་བྱས་ལ། ཁྲོ་བོ་ཏི་རིནྟི་རི་བཅིངས་ཏེ། བཛྲ་དང་ཧཱུྃ་བཞི་ཟློས་ཤིང་དཀྱིལ་འཁོར་ཆེན་པོར་འཇུག་པར་བྱའོ། །དེ་ནས་བསྐོར་བ་ལན་བདུན་བྱས་ལ་ལྷག་པ་དང་མ་ཚང་བའི་ཉེས་པ་རྣམས་ཞི་བར་བྱ་བའི་ཕྱིར་རྡོ་རྗེ་དྲིལ་བུ་དཀྲོལ་ལ་དཀྱིལ་འཁོར་ལ་བལྟ་བར་བྱའོ། །
དེ་ནས་མེ་ཏོག་གི་ཕྲེང་བ་བཅོམ་ལྡན་འདས་ལ་ཕུལ་ལ་གར་བྱ་བའི་ཚུལ་གྱིས་བླངས་ཏེ། ཕྲེང་བས་དབང་བསྐུར་བའི་སྔགས་ཀྱིས་རང་གི་མགོ་ལ་བཅིངས་ནས་སྒོ་དབྱེ་བ་ཇི་ལྟ་བ་བཞིན་བྱའོ། །དེ་ནས་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ། སུ་ར་ཏ་བཛྲོ་ཧཱུྃ་ཞེས་བྱ་བ་ལ་

59-1-110b

སོགས་པ་དང་། གཞན་ཡང་རང་གི་མིང་བརྗོད་ཅིང་། བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ། ཧཱུྃ་ཨཱ་ཞེས་བྱ་བ་དང་། དཔལ་རྡོ་རྗེ་སེམས་དཔའི་དཀྱིལ་འཁོར་གྱི་ལྟེ་བར་རང་གི་རྡོ་རྗེའི་གཟུགས་སུ་བསམ་པར་བྱའོ། །དེ་ནས་ཧཱུྃ་བཛྲོ་ཧཾ་ཞེས་རྡོ་རྗེའི་ང་རྒྱལ་དུ་
རྣམ་པར་བསམས་ལ། ཧཱུྃ་བཛྲ་སཏྭ་ཧཾ་ཞེས་བྱ་བས། རྡོ་རྗེ་དེ་རྡོ་རྗེ་སེམས་དཔའི་ཕྱག་རྒྱ་ཆེན་པོའི་ངོ་བོ་ཉིད་དུ་བདག་ཉིད་བསམ་པར་བྱའོ། །དེ་བཞིན་དུ་རྡོ་རྗེ་རོའི་བར་གྱི་ཕྱག་རྒྱ་ཆེན་པོ་བཅིངས་ལ། ཧཱུྃ་ཨཱ་ཞེས་བྱ་བས་རྡོ་རྗེ་རོའི་གནས་སུ། རྡོ་རྗེ་རོའི་སྣོད་བསམ་མོ། །དེ་ནས་ཧཱུྃ་བཛྲ་
ར་ས་བྷཉྫ་ནོ་ཧཾ། ཞེས་བྱ་བས་ཕྱག་རྒྱའི་ང་རྒྱལ་དུ་བསམས་ལ། ཧཱུཾ་བཛྲ་ར་སོ་ཧཾ་ཞེས་བྱ་བས་ཕྱག་རྒྱའི་གཟུགས་ཏེ། རྡོ་རྗེ་རོའི་ཕྱག་རྒྱ་ཆེན་པོའི་ངོ་བོ་ཉིད་དུ་བདག་ཉིད་བསམ་པར་བྱའོ། །དེ་ནས་རྡོ་རྗེ་བསྡུ་བ་དང་། མཚན་བརྒྱ་རྩ་བརྒྱད་པས་བསྟོད་པ་དེ་བཞིན་དུ་བྱས་ལ། རྡོ་རྗེ་ཅན་གྱི་སྤྱན་
སྔར་རྡོ་རྗེ་སེམས་དཔའི་སྐྱིལ་མོ་ཀྲུང་གིས་འདུག་ལ། ཡོངས་སུ་བརྟགས་པའི་དཀྱིལ་འཁོར་དེར་གསང་བའི་ལྕགས་ཀྱུས་བཅོམ་ལྡན་འདས་འཁོར་དང་བཅས་པ་སྤྱན་དྲངས་ལ། དེ་བཞིན་དུ་རྡོ་རྗེ་གནོད་སྦྱིན་གྱིས་བགེགས་བསྐྲད་པ་ལ་སོགས་པ་བྱས་ཏེ། རྡོ་རྗེ་ཁུ་ཚུར་གྱིས་སྒོ་
བཅད་ལ། རྡོ་རྗེ་གནོད་སྦྱིན་གྱིས་བསྲུང་བ་ཐམས་ཅད་ཡང་དག་པར་བསྲུངས་ཏེ། དེ་བཞིན་དུ་མཆོད་ཡོན་ཕུལ་ནས་དང་པོའི་རྡོ་རྗེས་བསྒྲུབ་པར་བྱའོ། །དེ་ནས་དེ་བཞིན་དུ་ལྷ་ཐམས་ཅད་ཀྱི་ལྗགས་ལ་ཧཱུཾ་བསམས་ཏེ། དཔལ་རྡོ་རྗེ་སེམས་དཔའ་ལ་སོགས་པ་ནས་ཆུ་ལྷའི་མཐར་ཐུག་པའི་
བར་གྱིས་ལས་ཀྱི་ཕྱག་རྒྱ་དང་། ཕྱག་རྒྱ་ཆེན་པོས་ཉེ་བར་བསྟན་ནས། དབང་བསྐུར་བའི་ཕྱག་རྒྱ་རྣམས་ཀྱིས་དེ་རྣམས་དབང་བསྐུར་ལ། མཆོད་ཡོན་ཕུལ་ཏེ། བུམ་པ་གང་བ་ལ་སོགས་པས་བཅོམ་ལྡན་འདས་འཁོར་དང་བཅས་པ་མཆོད་པར་བྱའོ། །དྲིལ་བུའི་མཆོག་བཏགས་རྒྱལ་
མཚན་དག །གྲྭ་རྣམས་སུ་ནི་གཞག་པར་བྱ། །ཕྱི་ཡི་མཚམས་ཀྱི་གནས་སུ་ནི། །བུམ་པ་ཡལ་གར་བཅས་པས་མཛེས། །ཕྱག་ན་རྡོ་རྗེའི་སྤྱན་སྔར་ཡང་། །བུམ་པ་སྤོས་ཆུས་གང་བ་གཞག །གང་ཞིག་རྡོ་རྗེར་བཅས་པ་ལ། །ནགས་ཀྱི་ལྕུག་མས་བཟླས་བརྗོད་བྱ། །འདི་སྐད་

59-1-111a

སྟོན་པར་འགྱུར་ཏེ། རྩ་བ་ནག་པོ་ར་རི་མེད་པ་ལྟོ་བ་ཆེ་བ། མགྲིན་པ་མཐོ་བ། མཆུ་འཕྱང་བ། བྱི་རུ་དང་། སེར་དང་། དུང་དང་། མུ་ཏིག་དང་། པདྨ་རཱ་ག་སྟེ་རིན་པོ་ཆེ་ཐམས་ཅད་དང་། བྲི་ཧ་ཏི་དང་། ཀཎྜ་ཀ་རི་དང་། ཧ་ས་ཧ་དང་། ནན་ཧ་ཨུཏྤ་ལ་དང་། ཨ་པ་ར་ཛི་ཏ་དཀར་
པོ་སྟེ། སྨན་ཐམས་ཅད་དང་། འབྲས་སཱ་ལུ་དང་། ནས་དང་། གྲོ་དང་། ཏིལ་དང་། མ་ཤ་སྟེ། འབྲུ་ཐམས་ཅད་དང་། ཙནྡན་དཀར་པོ་དང་ལྡན་པའི་ཆུ་དང་། མེ་ཏོག་དཀར་པོ་དང་། དྲི་ཤིན་ཏུ་ཞིམ་པ་རྣམས་ཀྱིས་ཡོངས་སུ་བཀང་ལ། ཕྱི་རོལ་ཀུན་དུ་དྲི་ཞིམ་པོས་བྱུགས་ཏེ། མེ་ཏོག་གི་ཕྲེང་བ་
བཏགས་ལ། རང་གི་ལྷའི་ཕྱག་རྒྱས་མཚན་པ། མགུལ་པར་རས་གཙང་མ་བཟང་པོས་དཀྲིས་པ། འབྲས་བུ་དང་ལོ་མ་བཟང་པོ་དང་ལྡན་པའི་ཡལ་གས་ཁ་བརྒྱན་པ་དང་པོའི་རྡོ་རྗེས་ཡོངས་སུ་བཟུང་བའི་མེ་ཏོག་གི་ལྕུག་མ་ལ་མཚན་བརྒྱ་རྩ་བརྒྱད་ཀྱི་བར་དུ་བཟླས་ཤིང་། ཧཱུྃ་ཡང་བཟླས་
ལ་ཕྱི་རོལ་ཀུན་དུ་ལྷ་རེ་རེ་ཞིང་དབུལ་བར་བྱ་སྟེ། དེ་ལ་དང་པོའི་དཔལ་རྡོ་རྗེ་སེམས་དཔའི་མདུན་དུ་གཅིག་དབུལ་བར་བྱའོ། །ཡང་བུམ་པ་གཅིག་འཇུག་པའི་སྒོར་མངོན་དུ་ཕྱོགས་པར་གཞག་པར་བྱའོ། །དེ་ལྟར་བུམ་པ་ཕུལ་ནས་བུམ་པ་གང་བ་ཡང་སོ་སོར་དབུལ་བར་བྱའོ། །དེ་ལྟར་
འབྱོར་པར་མ་གྱུར་ན། །བཅོམ་ལྡན་འདས་ལ་བུམ་པ་གཅིག །ལྷག་མ་རྣམས་ལ་བུམ་པ་ལྔ་དང་། བུམ་པ་གང་བ་ཡང་དབུལ་བར་བྱ་སྟེ། བཅུ་ལས་ཉུང་བར་མི་བྱའོ་ཞེས་གསུངས་པའི་ཕྱིར་རོ། །དེ་ལྟར་བུམ་པ་རྣམས་དང་། བུམ་པ་གང་བ་ཡང་ཕུལ་ནས། རས་ཟུང་འབུམ་མམ། ཁྲི་འམ། 
སྟོང་ཕྲག་གཅིག་གམ། ལྷ་རེ་རེ་ཞིང་རྡོ་རྗེ་རིན་པོ་ཆེ་དང་། ཧཱུྃ་གཉིས་བཟླས་ལ། དབུལ་བ་དང་། བླ་རེ་དང་། རྒྱལ་མཚན་དང་། བ་དན་སྣ་ཚོགས་པ་རྣམས་ཀྱང་བཅོམ་ལྡན་འདས་འཁོར་དང་བཅས་པ་ལ་དབུལ་བར་བྱའོ། །མེ་ཏོག་གི་ཤིང་བརྒྱའམ། བཞིའམ་མེ་ཏོག་ཐམས་ཅད་ཀྱང་སྔར་
བཤད་པའི་མེ་ཏོག་གི་རིག་སྔགས་ཀྱིས་དབུལ་བ་དང་། དྲི་ཐམས་ཅད་ཀྱང་དྲིའི་རིག་སྔགས་ཀྱིས་དབུལ་བ་དང་། ག་པུར་དང་། ཨ་ག་རུ་དང་། དུ་རུ་སྐ་དང་། ཙནྡན་ལ་སོགས་པའི་བདུག་པ་རྣམས་ནི་བདུག་པའི་རིམ་པས་སོ། །ཁ་ཟས་རོ་བརྒྱ་པ་ལ་སོགས་པ་ནི་ཨ་ཀཱ་རོ་ལ་སོགས་པས་སོ། །

59-1-111b

མར་གྱི་མར་མེ་ལ་སོགས་པ་ནི་མར་མེའི་རིག་སྔགས་མངོན་པར་བཟླས་ལ། བཛྲ་སྥ་ར་ཎ་ཁཾ་ཞེས་བརྗོད་ལ། བཅོམ་ལྡན་འདས་འཁོར་དང་བཅས་པ་ལ་དབུལ་བར་བྱའོ། །མ་འབྱོར་ན་ཡང་བཅུ་ལས་ཉུང་བར་མི་བྱའོ། །མར་མེ་སྡོང་བུ་དང་བཅས་པའི་སྣོད་ཆེན་པོ་སྟོང་གཞག་པར་བྱ་སྟེ། ཐ་ན་
སྣོད་ཆེན་པོ་བཞི་མར་མེའི་རིག་སྔགས་ཉིད་བཟླས་ལ་དབུལ་བར་བྱའོ། །རོལ་མོ་བརྒྱ་སྟོང་ངམ། རོལ་མོའི་སིལ་སྙན་བཅུ་ཧཱུྃ་གིས་རོལ་མོའི་ཕྱག་རྒྱ་དང་ལྡན་པས་བཟླས་ལ་དབུལ་ཏེ། རྡོ་རྗེ་ཁུ་ཚུར་གཉིས་ཀྱིས་ལག་པའི་སོར་མོ་རྣམས་ཀྱིས་རོལ་མོ་བརྡུང་བ་ལྟ་བུ་རྣམ་པ་བཅུ་པོ་འདི་ལྟ་སྟེ། 
པི་ཝང་དང་། གླིང་བུ་དང་། རྔ་དང་། མུ་ཀུན་ད་དང་། ཆ་ལང་དང་། རྔ་བོ་ཆེ་དང་། རྫ་རྔ་དང་། རྔ་རིངས་དང་། ཀུན་ཛ་དང་། ཏ་མི་ལ་བརྡུང་བའི་རྒེད་ཉག་ཚུལ་དུ་བྱེད་པའོ། །ཕྱི་རོལ་དུ་གར་ལ་སོགས་པ་ཡང་ཧཱུྃ་ཉིད་ཀྱིས་དབུལ་བར་བྱའོ། །དར་དཔྱངས་འཕྱང་བར་བྱ་བ་དང་། མེ་ཏོག་གི་ཆུན་པོ་
དང་། རྔ་ཡབ་ཀྱིས་རྣམ་པར་བརྒྱན་པ་དང་། དྲ་བ་དང་དྲ་བ་ཕྱེད་པས་སྤྲས་པ་དང་། ཟླ་བ་ཕྱེད་པ་དང་བཅས་པས་ཉེ་བར་མཛེས་པར་བྱས་པ་དང་། རྟ་དང་གླང་པོ་ཆེ་དང་། བ་ལང་གི་ཁྱུ་ཤིན་ཏུ་བརྟགས་པ་རྣམས་ཀྱང་དབུལ་བར་བྱའོ། །རྟ་བབས་ཡིད་དུ་འོང་བ་དྲིལ་བུ་དང་བཅས་པ་ཡང་དབུལ་བར་
བྱའོ། །དེ་ནས་རྡོ་རྗེ་མཚོན་ཆ་ལ་སོགས་པ་ལས་ཀྱི་ཕྱག་རྒྱ་རྣམ་པ་བཅུ་གཉིས་འོག་ནས་བཤད་པའི་མཚན་ཉིད་དང་ལྡན་པས། བཅོམ་ལྡན་འདས་འཁོར་དང་བཅས་པ་ཡང་དག་པར་མཆོད་ལ། ཨོཾ་གྱིས་རིན་པོ་ཆེ་སྣ་བདུན་དང་། དཔག་བསམ་གི་ཤིང་དང་། ཁ་ཟས་རོ་བརྒྱ་པ་དང་། གླུ་དང་། 
གར་ལ་སོགས་པའི་སྤྲིན་རྣམས་སྤྲུལ་ལ། དཔྲལ་བའི་ཕྱོགས་སུ་ཐལ་མོ་ཁོང་སྟོང་དུ་སྦྱར་ལ། ཨོཾ་སརྦ་བིད་པཱུ་ར་པཱུ་ར། ཨཱ་བརྟ་ཡ་ཨཱ་བརྟ་ཡ་ཧོ། ཞེས་བྱ་བས་དེ་རྣམས་དབུལ་བར་བྱའོ། །དེ་ནས་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུ་ཏྤ་ནན་ཏྭཱཏ། ཞེས་བྱ་བ་མངོན་པར་བཟླས་ལ། འདི་ཉིད་
བརྗོད་ཅིང་ཕྱི་རོལ་དུ་གཏོར་མ་སྦྱིན་པར་བྱའོ། །དེ་ནས་རྡོ་རྗེ་མེ་ལྟར་རབ་ཏུ་འབར་བ་དང་། རྡོ་རྗེ་གནོད་སྦྱིན་དང་། རྡོ་རྗེ་སྤྱན་མ་ལ་སོགས་པས་སྦྱིན་སྲེག་བྱས་ལ། དཔལ་རྡོ་རྗེ་སེམས་དཔའི་དཀྱིལ་འཁོར་གྱི་ཚུལ་གྱིས་ཐབ་ཀྱི་དབུས་སུ་མེ་ཏོག་གིས་བཞུགས་སུ་གསོལ་ལ། ཧཱུྃ་ཟློས་ཤིང་མར་

59-1-112a

ལ་སོགས་པའི་རྫས་ལས་སྦྱིན་སྲེག་བརྒྱ་རྩ་བརྒྱད་དབུལ་བར་བྱའོ། །དེ་ནས་རྡོ་རྗེ་ཡིད་ལས་བྱུང་བ་ལ་སོགས་པ་ནས། རྡོ་རྗེ་རོའི་བར་ལ་ཡང་ཧཱུྃ་ཟློས་ཤིང་རེ་རེ་ལ་སྦྱིན་སྲེག་བདུན་བདུན་དབུལ་བར་བྱའོ། །དེ་ནས་ཕྱག་བཙལ་བ་ལ་སོགས་པ་སྔོན་དུ་འགྲོ་བས་སྡོམ་པ་
བཟུང་ལ། ཨོཾ་སརྦ་ཡོ་ག་ཙིཏྟ་ཨུཏྤཱ་ད་ཡཱ་མི། ཞེས་བྱ་བས། བྱང་ཆུབ་ཆེན་པོའི་སེམས་བསྐྱེད་ལ། གཡས་པའི་རྡོ་རྗེ་ཁུ་ཚུར་གྱིས་དང་པོའི་རྡོ་རྗེ་བླངས་ནས་རང་གི་སྙིང་གར་ལེགས་པར་བཞག་སྟེ། ཧཱུྃ་ཞེས་བྱ་བས་རྡོ་རྗེ་བསྐྱེད་ལ། འདི་སྐད་ཅེས་བརྗོད་པར་བྱ་སྟེ། སུ་ར་ཏ་ས་མ་ཡ་
སྟྭཾ་ཧོ། བཛྲ་སིདྡྷྱ་ཡ་ཐཱ་སུ་ཁཾ། དེ་ནས་སྒོར་བཞག་པའི་བུམ་པའི་ཆུས་བདག་ཉིད་དབང་བསྐུར་ལ། རས་དམར་པོ་ཟུང་གྱོན་ཞིང་། མེ་ཏོག་གི་ཕྲེང་བ་བཏགས་པ་དང་། གདོང་དྲི་ཞིམ་པོས་བྱུགས་ལ་ཇི་སྐད་དུ་བཤད་པའི་གར་ལས་བྱུང་བའི་རྡོ་རྗེ་ཐལ་མོ་བཅིངས་ནས། དེ་དང་མེ་ཏོག་
བླངས་ཏེ། དེའི་སྙིང་གའི་ཕྱོགས་སུ་བསྐོར་ནས་བཞག་ལ། བཛྲ་བཛྲ་ཧཱུྃ་ཞེས་བྱ་བ་ཟློས་ཤིང་། སློབ་དཔོན་འཇུག་པར་བྱའོ། །ཤར་ཕྱོགས་ཀྱི་སྒོར་བཛྲ་ཨཾ་ཀུ་ཤ་ཛཿ ཞེས་བརྗོད་ལ་རྡོ་རྗེ་ལྕགས་ཀྱུས་བདག་ཉིད་དགུག་པར་བྱའོ། །ཡང་ལྷོ་ཕྱོགས་ཀྱི་སྒོར་དཀྱིལ་འཁོར་ཆེན་པོར་དེ་
བཞིན་དུ་འཇུག་པར་བྱ་སྟེ། བཛྲ་པཱ་ཤ་ཧཱུྃ་ཞེས་བརྗོད་ལ། རྡོ་རྗེ་བསྡམས་པ་ལས་ཞགས་པར་བྱས་པས་བདག་ཉིད་གཞུག་པར་བྱའོ། །དེ་ནས་ནུབ་ཕྱོགས་ཀྱི་སྒོར་དེ་བཞིན་དུ་བདག་ཉིད་ཞུགས་ལ། བཛྲ་སྥོ་ཊ་རྦྃ་ཞེས་བྱ་བས། རྡོ་རྗེ་ལྕགས་སྒྲོག་བཅིངས་ཏེ་བདག་ཉིད་བཅིང་བར་བྱའོ། །ཡང་
བྱང་ཕྱོགས་ཀྱི་སྐོར་ཞུགས་ལ། བཛྲ་ཨཱ་བེ་ཤ་ཨ། ཞེས་བྱ་བས་བདག་ཉིད་དབང་དུ་བྱའོ། །ཡང་ཤར་ཕྱོགས་ཀྱི་སྒོར་ཞུགས་ལ། མ་ཧཱ་ར་ཏ་སུ་དྲི་ཌྷ་སུ་ཏོ་ཥོ་སུ་སུ་ཥོ་བཛྲ་སཏྭ་ཨཱདྱ་སིདྡྷཱ་མཱཾ། ཞེས་བརྗོད་དེ། རྡོ་རྗེ་གར་ལས་བྱུང་བའི་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ་ཕྱག་བྱའོ། །
དེ་སྐད་དུ། ཞུགས་ནས་མགོན་ལ་ཕྱག་བྱས་ཏེ། །གཡོན་པའི་རྡོ་རྗེ་མིག་དང་ནི། །གཡོན་སྙེམས་འཛུམ་པའི་ཚུལ་གྱིས་ནི། །རོལ་པའི་མིག་ནི་བཙུམ་པར་བྱ། །ཞེས་གསུངས་པའི་ཕྱིར་རོ། །ཨོཾ་པ་ར་མ་སུ་ཁ་ཨ་ཤ་ཡ། སུ་ལ་ལི་ཏ་བི་ལ་ས་ན་མི་ཏེ། ན་མ་མཱི་བྷ་ག་བཱན་ཏམ། ཛཿཧཱུྃ་བཾཾ་ཧོཿ

59-1-112b

ཧི་ཧི་ཧི་ཧི་ཧཱི་། པྲ་ཏཱིཙྪ་ཀུ་སུ་མ་ཨཉྫ་ལི་ནཱ་ཐ་ཧོ། ཞེས་བྱ་བ་ནི་ཕྱག་འཚལ་བའི་རིག་སྔགས་སོ། །ཡང་ཞུགས་པའི་ཕྱག་རྒྱ་བཅིངས་ལ། དཀྱིལ་འཁོར་ལན་གསུམ་བསྐོར་བར་བྱའོ། །དེ་ནས་ཡང་མདུན་དུ་འདུག་ལ། དེ་ཁོ་ན་ཉིད་འདི་ལན་ཅིག་བརྗོད་པར་བྱ་སྟེ། འདོད་ཆགས་ཆེན་པོ་བདེ་
བ་ཆེ། །རྡོ་རྗེ་ཆེན་པོ་ནོར་ཆེ་ཞིང་། །ཡེ་ཤེས་ཆེན་པོ་ལས་ཆེ་བ། །རྡོ་རྗེ་སེམས་དཔའ་དེང་བདག་འགྲུབ་། །ཛཿཧཱུྃ་བཾཾ་ཧོཿ པྲ་སིདྡྷྱེ་མཱཾ། དེ་ནས་རྡོ་རྗེའི་ཆུ་འཐུངས་ལ། ཨས་བདག་ཉིད་ལ་དབབ་པར་བྱ་སྟེ། ཨ་ཡང་གཡོན་པའི་རྡོ་རྗེ་ཁུ་ཚུར་གྱིས་རྡོ་རྗེ་སེམས་མ་ཕྱེ་ལ། བདག་ཉིད་དབབ་པར་
བྱ་སྟེ། ཨོཾ་ཨཱ་ཞེས་བྱ་བ་བརྒྱ་བཟླས་ལ་བཅོམ་ལྡན་འདས་རྡོ་རྗེ་སེམས་དཔས་བདག་ཉིད་ཀུན་དུ་གང་བར་བསམ་མོ། །དེ་ནས་ཧཱུྃ་གིས་མེ་ཏོག་གི་ཕྲེང་བ་དོར་ལ། དེ་ནས་སླར་བླངས་ཏེ། རང་གི་མགོ་ལ་དེ་ཉིད་ཀྱང་བཅིང་བར་བྱའོ། །དེ་ནས་དེ་ཉིད་ཀྱིས་གདོང་གཡོགས་དགྲོལ་ལ། དེ་ཉིད་
ཟློས་ཤིང་རྡོ་རྗེ་སེམས་དཔའ་ནས་བརྩམས་ཏེ། རྡོ་རྗེ་གཟུགས་ཀྱི་བར་གྱི་དཀྱིལ་འཁོར་བལྟ་བར་བྱའོ། །དེ་ནས་ཏིཥ་བཛྲ་ཞེས་བྱ་བ་ལ་སོགས་པས་ཞུགས་པའི་ཕྱག་རྒྱ་སྙིང་གར་དགྲོལ་བར་བྱའོ། །དེ་ནས་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་ལ་རྡོ་རྗེ་
ལྟ་བས་བལྟ་ཞིང་། ཇི་སྲིད་བཅོམ་ལྡན་འདས་ཀྱི་མཐོང་བ་གནང་ནས། དངོས་གྲུབ་ཐམས་ཅད་སྩལ་པ་དེ་སྲིད་ཀྱི་བར་དུ་བཟླས་བརྗོད་བྱའོ། །དེ་ནས་རྡོ་རྗེ་ཐལ་མོ་བསྐོར་ལ་འདུག་སྟེ། ཤིས་པ་བརྗོད་པའི་ཚུལ་གྱིས་བདག་གི་སྙིང་གར་བཞག་ལ། མཚན་བརྒྱ་རྩ་བརྒྱད་པ་ལ་སོགས་པས་
བསྟོད་པ་བྱས་ཏེ། འདོད་ཆགས་རྡོ་རྗེ་ལ་སོགས་པ་གསང་བའི་མཆོད་པ་བཞིས་བཅོམ་ལྡན་འདས་ཡང་དག་པར་མཆོད་དོ། །གླུ་དང་རོལ་མོ་ལ་སོགས་པས་ཀྱང་མཆོད་ལ། ཡང་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ཏེ། བཅོམ་ལྡན་འདས་ལ་རྡོ་རྗེའི་ལྟ་བས་བལྟས་ནས། རྡོ་རྗེ་
ཐལ་མོ་བསྐོར་བས་བཅོམ་ལྡན་འདས་ལ་་ཕྱག་བྱའོ། །ཕྱག་བྱས་ནས་ཀྱང་། མེ་ཏོག་ལ་སོགས་པའི་དབང་བསྐུར་བ་བླང་བར་བྱ་སྟེ། དེ་ལ་དང་པོ་ཁོ་ནར་དང་པོའི་རྡོ་རྗེས་བཟུང་བའི་མེ་ཏོག་གི་ཡལ་ག་ལ་རྣམ་པར་རྒྱལ་བའི་བུམ་པ་ལས་སྔགས་འདི་བཟླས་བརྗོད་ཉི་ཤུ་རྩ་གཅིག་བྱ་སྟེ། ཨོཾ་

59-1-113a

མ་ཧཱ་སུ་ཁ་བཛྲ་ཨ་མོ་གྷ་ས་མ་ཡོ་ད་ཀ་སིདྡྷྱ། ཨ་བྷི་ཥིཉྩ་སརྦ་སུ་ཁ་སོ་མ་ན་སྱ་ནི་ཨ་དད་ཀུ་རུ་ཀུ་རུ་ཛཿཧཱུྃ་བཾ་ཧོཿཨ། དེ་ནས་རྡོ་རྗེ་སེམས་དཔར་བདག་ཉིད་བྱིན་གྱིས་བརླབས་ལ། དམ་ཚིག་གི་ཕྱག་རྒྱས་རང་གི་ལུས་ལ་རྣལ་འབྱོར་ཆེན་པོས་བཤད་པའི་གནས་རྣམས་སུ་ལྷ་
ཐམས་ཅད་དགོད་པར་བྱའོ། །ཕྱི་རོལ་གྱི་དཀྱིལ་འཁོར་གྱི་ནང་དུ་སྣ་ཚོགས་པདྨའི་སྟེང་དུ་ཕྱག་རྒྱ་ཆེན་པོས་འདུག་ལ། མེ་ཏོག་ལ་སོགས་པས་བདག་ཉིད་ཡང་དག་པར་མཆོད་དེ། མཆོད་ཡོན་བླངས་ནས་དཔལ་རྡོ་རྗེ་སེམས་དཔའི་སྐུ་གཟུགས་རང་གི་མགོ་ལ་བཞག་སྟེ། མཚན་
བརྒྱ་རྩ་བརྒྱད་པས་བསྟོད་ལ། རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་བླངས་ནས། ཨོཾ་བཛྲ་ཨ་བྷི་ཥིཉྩ་ཧཱུྃ། ཞེས་བརྗོད་དེ། དེས་བདག་ཉིད་དབང་བསྐུར་བར་བྱ་ཞིང་ཆུ་དེ་བཏུང་བར་བྱའོ། །ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུྃ་བཾ་ཧོཿ སུ་ར་ཏ་སྟྭཾ་ཞེས་བྱ་བས་ཐོག་མའི་རྡོ་རྗེ་རང་གི་
མགོ་ལ་བཅིངས་ཏེ། བཟླས་བརྗོད་བརྒྱ་རྩ་བརྒྱད་བྱའོ། །དེ་ནས་སྔར་བཤད་པའི་ཕྱག་རྒྱས་དབང་བསྐུར་བ་ཐམས་ཅད་ཡང་དག་པར་བླངས་ཏེ། ལུགས་མའམ། བརྐོས་པའམ། བྲི་བའམ་། བྱས་པའི་སངས་རྒྱས་ཀྱི་ཕྲེང་བ་ལ་སོགས་པ་དང་ལྡན་པའི་ཅོད་པན་རྡོ་རྗེ་རིན་ཆེན་གྱི་སྔགས་
དང་ཕྲེང་བའི་དབང་བསྐུར་བའི་སྔགས་བཟླས་པས་བདག་ཉིད་དབང་བསྐུར་བར་བྱའོ། །དེ་ནས་རྡོ་རྗེ་དང་བདག་པོ་དང་མིང་གི་དབང་བསྐུར་བ་བླངས་ལ། དངོས་གྲུབ་ཀྱི་རྡོ་རྗེའི་བརྟུལ་ཞུགས་ཀྱིས་རྡོ་རྗེའི་དབང་བླང་བར་བྱའོ། །དེ་ནས་མེ་ཏོག་ལ་སོགས་པ་དང་། ཕྱག་རྒྱའི་མཆོད་པ་རྣམ་པ་
བཅུ་གཉིས་ཀྱིས་བདག་ཉིད་མཆོད་པར་བྱའོ། །དེ་ནས་དེ་ཁོ་ན་ཉིད་ཀྱིས་རྡོ་རྗེ་བཟུང་ལ། ཆོས་ཀྱི་དྲིལ་བུ་དཀྲོལ་བར་བྱ་ཞིང་། དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབས་ལ། ཧཱུྃ་ཞེས་བྱ་བ་བརྗོད་པར་བྱའོ། །དེ་ནས་བཅོམ་ལྡན་འདས་ལ་ཕྱག་བྱས་ལ་གསང་སྔགས་བཟུང་སྟེ། ཚིགས་སུ་
བཅད་པ་ལྔ་པས་རྗེས་སུ་གནང་བ་དང་། གཟེངས་བསྟོད་པ་དང་། ལུང་བསྟན་པ་ཡང་བླངས་ལ། བདག་ལ་བྱིན་གྱིས་བརླབ་པར་བྱ་སྟེ། ཇི་ལྟར་མངོན་པར་འདོད་པའི་ཆོ་གས་བཅོམ་ལྡན་འདས་རབ་ཏུ་བསྒྲུབས་ལ་ཕྱིར་འབྱུང་བར་བྱའོ། །སློབ་དཔོན་གྱི་ལས་ཀྱི་ཆོ་ག་རྒྱས་པ་རྫོགས་སོ།།      །།

59-1-113b

དེ་ནས་སྔར་བཤད་པའི་ཆོ་ག་ཉིད་ཀྱིས་སློབ་མ་གཞུག་པར་བྱ་སྟེ། སློབ་དཔོན་གྱིས་ལྔ་པོ་བསྡུས་པ་འདི་ཉིད་བཅིངས་ལ་སླར་ཡང་ཞུགས་ཏེ། ཆོ་ག་ཐམས་ཅད་རྗེས་སུ་སྤྱོད་ནས། བཅོམ་ལྡན་འདས་ལ་ཕྱག་བྱས་ལ། འདི་སྐད་ཅེས་བརྗོད་པར་བྱ་སྟེ། ཁྱོད་སྔོན་ཁྱིམ་ལ་དགའ་བ་ཡི། །སྲེད་
པའི་བདེ་བ་དག་བྱའི་ཕྱིར། །འདོད་པ་ཀུན་གྱི་དངོས་གྲུབ་ཅེས། །འགྲོ་བ་ཀུན་ཀྱང་འགྲུབ་པར་གྱིས། །དེ་ནས་བཅོམ་ལྡན་འདས་ལ་མཆོད་པ་ཐམས་ཅད་ཀྱིས་ཡང་དག་པར་མཆོད་དེ། སློབ་མ་གཞུག་པར་བྱའོ། །དེ་ལ་བསླབ་པའི་གཞི་ལྔ་བླངས་པའམ། དགེ་སྦྱོང་ངམ། དགེ་སློང་གི་
བསླབ་པ་ཡོངས་སུ་བཟུང་བས། སྡོམ་པ་བཟུང་ལ་དེ་སློབ་དཔོན་ལ་ཕྱག་བྱས་ནས་འདི་སྐད་ཅེས་བརྗོད་པར་བྱ་སྟེ། དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་སེམས་དཔའི་ཚུལ་བསྟན་པས། །མགོན་པོ་ཆེན་པོ་བདག་འཚལ་ལོ། །དམ་
ཚིག་དེ་ཉིད་བདག་ལ་སྩོལ། །སྡོམ་པ་རྣམས་ཀྱང་སྩལ་དུ་གསོལ། །དེ་ནས་རྡོ་རྗེ་གནོད་སྦྱིན་གྱིས་ཡོངས་སུ་བཟླས་པའི་རས་དམར་པོ་བཟང་པོ་གཅིག་གིས་སྨད་གཡོགས་བྱ། གཅིག་གིས་སྟོད་གཡོགས་བྱས་ལ། ཡང་རྡོ་རྗེ་ལྕགས་ཀྱུ་དང་ཞགས་པ་དང་ལྕགས་སྒྲོག་དང་། རྡོ་རྗེ་
འབེབས་པས། གདོང་གཡོགས་ལ་ཡོངས་སུ་བཟླས་ལ། དེས་སློབ་མའི་གདོང་གཡོགས་པ་དང་། མེ་ཏོག་གི་ཕྲེང་བ་གདགས་ཤིང་། གདོང་དྲི་ཞིམ་པོས་བྱུགས་ལ་ཕྱག་བཞི་བྱེད་དུ་གཞུག་གོ། །ཡང་ལག་ན་མེ་ཏོག་ཐོགས་པས་སློབ་དཔོན་ལ་ཕྱག་བྱས་ལ་ལག་ན་མེ་ཏོག་ཐོགས་
པ་ཉིད་ཀྱིས་སྡིག་པ་བཤགས་པ་དང་། རྗེས་སུ་ཡི་རང་བ་དང་། བསྐུལ་བ་དང་། གསོལ་བ་གདབ་པ་བྱས་ནས། སློབ་མས་འདི་སྐད་ཅེས་བརྗོད་པར་བྱ་སྟེ། ཐུབ་པའི་ཉི་མ་མ་ལུས་པ། །སངས་རྒྱས་རྣམས་ནི་བདག་ལ་དགོངས། །བདག་མིང་འདི་ཞེས་བྱ་བ་ནི། །སློབ་དཔོན་དཔང་དུ་གནས་པ་
ལ། །སངས་རྒྱས་རོལ་མོ་ལས་བྱུང་བ། །མི་ལྡོག་པ་ཡི་འཁོར་ལོས་སྦྱོར། །ཐར་པའི་རང་བཞིན་གྲོང་ཁྱེར་ཆེ། །གསང་བ་ཆེན་པོ་འཇུག་པར་བགྱི། །གསང་བ་ཐམས་ཅད་བསྡུས་པར་ནི། །སློབ་དཔོན་ཆེན་པོ་བདག་འཇུག་མཛོད། །མི་ལྡོག་པ་ཡི་དབང་བསྐུར་བ། །སྐལ་བ་ཆེན་པོ་བདག་

59-1-114a

ལ་སྩོལ། །མཚན་རྣམས་ཀུན་གྱིས་རྒྱས་བཏབ་ཅིང་། །དཔེ་བྱད་རྣམས་དང་ཡང་དག་ལྡན། །སངས་རྒྱས་སྐུ་ནི་ཡིད་འོང་བ། །སློབ་དཔོན་ཆེན་པོ་བདག་ལ་སྩོལ། །དབང་བསྐུར་ཆེན་པོ་རྨད་བྱུང་བ། །སེམས་ཅན་ཀུན་གྱི་དོན་གྱི་ཕྱིར། །བདག་ནི་རྟག་ཏུ་སློབ་དཔོན་འགྱུར། །
སློབ་དཔོན་ཆེན་པོ་བདག་ལ་སྩོལ། །དེ་ནས་སློབ་དཔོན་གྱིས་དཀྱིལ་འཁོར་གྱི་ལྷ་ཐམས་ཅད་ལ་གསོལ་བ་གདབ་པར་བྱ་སྟེ། ཆེ་གེ་ཞེས་བྱ་འདི་ཉིད་ནི། །བྱང་ཆུབ་སེམས་ནི་ཡོངས་འཛིན་པ །དམ་ཚིག་མཆོག་དང་གསང་བ་ཡི། །འཁོར་ལོ་འདིར་ཡང་འཇུག་པར་འཚལ། །དེ་ནས་ཡང་
སློབ་དཔོན་གྱིས་ཡང་འདི་སྐད་ཅེས་བརྗོད་པར་བྱ་སྟེ། བདག་ཉིད་ཆེན་པོ་ཁྱོད་གསང་བ་ཆེན་པོའི་རིགས་དག་པ་ཤིན་ཏུ་སྦས་པ་ཡོངས་སུ་འཛིན་པར་འདོད་དམ་ཞེས་དྲི་བར་བྱའོ། །དེས་ཀྱང་བདག་འཚལ་ལོ་ཞེས་བརྗོད་པར་བྱའོ། །དེ་ནས་ཡང་སློབ་དཔོན་གྱིས་འདི་སྐད་ཅེས་བརྗོད་པར་བྱ་སྟེ། 
སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང་། །འདི་ནི་སངས་རྒྱས་རིགས་དག་པའི། །དམ་ཚིག་བརྟན་པར་གྱུར་པའོ། །རྡོ་རྗེ་དྲིལ་བུ་ཕྱག་རྒྱ་ཡང་། །བློ་ཆེན་ཁྱོད་ཀྱིས་གཟུང་བར་གྱིས། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བསྒྲགས་
སོ། །སློབ་དཔོན་དག་ཀྱང་གཟུང་བར་བགྱི། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེ་རིགས་དག་པའི། །སྡོམ་པ་དམ་ཚིག་ཡིན་པར་གསུངས། །སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང་། དགེ་བའི་ཆོས་རྣམས་སྡུད་པ་དང་། །སེམས་ཅན་དོན་
བྱེད་ཚུལ་ཁྲིམས་གསུམ། །ཁྱོད་ཀྱིས་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །ནམ་དུ་ཡང་ནི་མི་སྤོང་ངོ་། །འདི་ནི་སངས་རྒྱས་རིགས་དག་པའི། །སྡོམ་པ་བརྟན་པར་གྱུར་པའོ། །རིན་
ཆེན་རིགས་མཆོག་ཆེན་པོ་ལ། །ཉིན་དང་མཚན་དུ་ལན་གསུམ་དུ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །ཕྱི་ནང་གསང་བ་ཐེག་པ་གསུམ། །དམ་ཆོས་ཁྱོད་ཀྱིས་གཟུང་བར་བྱ། །འདི་ནི་པདྨའི་རིགས་དག་པའི། །དམ་ཚིག་སྡོམ་པ་ཡིན་པར་གསུངས། །

59-1-114b

ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་གྱིས། །མཆོད་པའི་ལས་ཀྱང་ཅི་ནུས་བྱ། །ཞན་ཡང་བཅུ་བཞི་འདི་དག་ནི། །ཕས་ཕམ་པར་ནི་རབ་ཏུ་བཤད། །སྤང་ཞིང་དོར་བར་མི་བྱའོ། །རྩ་བའི་ལྟུང་བར་ཤེས་པར་བྱ། །ཉིན་དང་
མཚན་མོ་ལན་གསུམ་དུ། །ཉིན་རེ་ཞིང་ནི་བཟླ་བར་བྱ། །གང་ཚེ་ཉམས་ན་རྣལ་འབྱོར་པ། །ཁ་ན་མ་ཐོ་སྦོམ་པོར་འགྱུར། །ཁྱོད་ཀྱིས་སྲོག་ཆགས་གསད་མི་བྱ། །མ་བྱིན་པར་ཡང་མི་བླང་ངོ་། །འདོད་ལ་ལོག་པར་མི་སྤྱད་ཅིང་། །བརྫུན་དུ་སྨྲ་བར་མི་བྱའོ། །ཕུང་ཁྲོལ་ཀུན་གྱི་རྩ་བ་
ཡི། །ཆང་ནི་རྣམ་པར་སྤང་བར་བྱ། །སེམས་ཅན་གདུལ་ཕྱིར་མ་གཏོགས་པར། །བྱ་བ་མ་ཡིན་ཐམས་ཅད་སྤང་། །དམ་པ་ཉེ་བར་བསྟེན་བྱ་ཞིང་། །རྣལ་འབྱོར་པ་རྣམས་བསྙེན་བཀུར་བྱ། །ལུས་ཀྱི་ལས་ནི་རྣམ་གསུམ་དང་། །ངག་གི་རྣམ་པ་བཞི་རྣམས་དང་། །ཡིད་ཀྱི་རྣམ་པ་
གསུམ་དག་ནི། །ཅི་ནུས་པར་ནི་རྗེས་སུ་སྐྱོང་། །ཐེག་པ་དམན་པ་འདོད་མི་བྱ། །སེམས་ཅན་དོན་ལ་རྒྱབ་ཕྱོགས་མིན། །འཁོར་བ་དག་ཀྱང་ཡོངས་མི་སྤང་། །རྟག་ཏུ་མྱ་ངན་འདས་མི་ཆགས། །ལྷ་དང་ལྷ་མིན་གསང་བ་པ། །ཁྱོད་ཀྱིས་བརྙས་པར་མི་བྱ་ཞིང་། །ཕྱག་རྒྱ་བཞོན་པ་
མཚོན་ཆ་དང་། །མཚན་མ་འགོམ་པར་མི་བྱའོ། །འདི་དག་དམ་ཚིག་ཡིན་པར་བཤད། །ཁྱོད་ཀྱིས་རྟག་ཏུ་བསྲུང་བར་བྱ། །དེས་ཀྱང་འདི་སྐད་བརྗོད་བྱ་སྟེ། །སློབ་དཔོན་འདིར་ནི་བདག་ལ་གསོན། །གཙོ་བོས་ཇི་ལྟར་བཀའ་སྩལ་པ། །དེ་ལྟར་བདག་ནི་བགྱིད་པར་འཚལ། །ཇི་ལྟར་དུས་
གསུམ་མགོན་པོ་རྣམས། །ཞེས་བྱ་བ་ནས་བརྩམས་ཏེ། སེམས་ཅན་མྱ་ངན་འདས་ལ་དགོད། །ཅེས་བྱ་བའི་བར་དུ་བརྗོད་པར་བྱའོ། །དེ་ནས་དེ་ལ་ཨོཾ་སརྦ་ཡོ་ག་ཙིཏྟཱ་ཨུཏྤཱ་ད་ཡཱ་མི་ཞེས་བྱ་བས་བྱང་ཆུབ་ཏུ་སེམས་བསྐྱེད་དུ་བཅུག་སྟེ། དེའི་སྙིང་གར་དེ་བཞིན་དུ་རྡོ་རྗེ་བསྐྱེད་ནས། རྡོ་རྗེ་
སེམས་དཔར་བྱིན་གྱིས་བརླབས་ལ་འདི་སྐད་ཅེས་བརྗོད་པར་བྱའོ། །དེང་ཁྱོད་ལ་བཅོམ་ལྡན་འདས་ཀྱིས་བྱིན་གྱིས་བརླབས་པར་འགྱུར་གྱིས། ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་གསང་བ་འདི་དཀྱིལ་འཁོར་མ་མཐོང་བ་རྣམས་ལ་སྨྲ་བར་མི་བྱ་ཞིང་། དད་པ་མེད་པ་རྣམས་ལ་ཡང་མ་

59-1-115a

ཡིན་ནོ། །དེ་ནས་ལྔ་པོ་བསྡུས་པའི་ཕྱག་རྒྱ་བཅིངས་ལ། འདི་སྐད་ཅེས་བརྗོད་པར་བྱའོ། །འདི་ནི་དམ་ཚིག་གསང་བ་སྟེ། །སངས་རྒྱས་ཐམས་ཅད་རབ་གྲུབ་པ། །གལ་ཏེ་དཀྱིལ་འཁོར་མ་མཐོང་སྨྲས། །རིགས་རྣམས་ཐམས་ཅད་དེར་བརླག་འགྱུར། །ཨོཾ་མ་ཧཱ་སུ་ཁ་ཧ་ན་ས་
མ་ཡ་མཱ་ཏི་པྲ་ཏི་ཎཾ་སུ་ར་སྟྭཾ། དེ་ནས་ཡོན་གྱི་མཆོག་བླངས་ལ། སྒོར་བཞག་པའི་བུམ་པའི་ཆུས་དབང་བསྐུར་ནས། དང་པོར་རང་ཉིད་འཇུག་པའི་ཆོ་གས་གཞུག་པར་བྱའོ། །ཞུགས་ནས་འདི་སྐད་ཅེས་བརྗོད་པར་བྱ་སྟེ། མ་ཧཱ་ར་ཏ་སུ་དྲི་ཌྷ། སུ་ཏོ་ཥོ་སུ་སུ་ཁོ། བཛྲ་སཏྭ་ཨཱདྱ་སིདྡྷྱ་མཾ། ཞེས་སྨྲོས་ཤིག་
ཅེས་བསྒོའོ། །དེ་ནས་ཡང་འདི་སྐད་ཅེས་བརྗོད་པར་བྱ་སྟེ། དེང་ཁྱོད་དེ་བཞིན་གཤེགས་པའི་རིགས་སུ་ཞུགས་ཀྱིས་ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་དུ་འགྲུབ་པར་ཡང་འཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། དེ་ལྟ་བུའི་ཡེ་ཤེས་བསྐྱེད་པར་
བྱས་ཀྱིས། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ལ་མ་སྨྲ་ཤིག །ཁྱོད་དམ་ཚིག་ཉམས་པར་གྱུར་ཏ་རེ། དེ་ནས་རྡོ་རྗེ་སློབ་དཔོན་རང་ཉིད་ཀྱིས། སེམས་མ་རྡོ་རྗེའི་ཕྱག་རྒྱ་ཁ་ཐུར་དུ་བསྟན་པ་དང་། གྱེན་དུ་བསྟན་པ་བཅིངས་ལ། རྡོ་རྗེ་སློབ་མའི་སྤྱི་བོར་གཞག་ལ། འདི་སྐད་ཅེས་བརྗོད་
པར་བྱའོ། །འདི་ནི་ཁྱོད་ཀྱི་རྡོ་རྗེའི་དམ་ཚིག་ཡིན་གྱིས། གལ་ཏེ་འགའ་ཞིག་ལ་སྨྲས་ན། ཀླད་པ་འགས་པར་འགྱུར་རོ། །དེ་ནས་དམ་ཚིག་གི་ཕྱག་རྒྱ་དེ་ཉིད་དང་། མནའི་སྙིང་པོའི་ཆུ་ལ་ཡོངས་སུ་བཟླས་ན། སློབ་མ་དེ་འཐུང་དུ་གཞུག་གོ། དེ་ལ་མནའི་སྙིང་པོ་ནི་འདི་ཡིན་ཏེ། རྡོ་རྗེ་སེམས་དཔའ་
ཁྱོད་ཉིད་ཀྱིས། །དེང་ནས་སྙིང་ལ་ཡང་དག་ཞུགས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །བཛྲོད་ཀ་ཐ། དེ་ནས་སློབ་མ་ལ་འདི་སྐད་བསྐོས་ཤིག །དེང་ཕྱིན་ཆད་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱི། ངས་འདི་བྱོས་ཤིག་ཅེས་བསྒོ་བ་གང་ཡིན་པ་དེ་བྱ་དགོས་སོ། །ཁྱོད་ཀྱིས་ང་
ལ་བརྙས་པར་མ་བྱེད་ཅིག་མི་བདེ་བ་མ་སྤངས་པས་ཁྱོད་དུས་བྱས་ནས་དམྱལ་བར་ལྟུང་བར་གྱུར་ཏ་རེ་ཞེས་སྨྲས་ལ། དེ་ནས་འདི་སྐད་ཅེས་བརྗོད་པར་བྱ་སྟེ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ། རྡོ་རྗེ་སེམས་དཔའ་བདག་ལ་འབབ་པར་གྱུར་ཅིག་ཅེས་བརྗོད་དུ་གཞུག་གོ། །དེ་

59-1-115b

ནས་རྡོ་རྗེ་སློབ་དཔོན་གྱིས་མྱུར་དུ་སེམས་མའི་རྡོ་རྗེའི་ཕྱག་རྒྱ་བཅིངས་ལ་དེའི་སྙིང་གར་བཞག་སྟེ། འདི་སྐད་ཅེས་བརྗོད་དུ་གཞུག་གོ །འདི་ནི་རྡོ་རྗེ་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་ཡེ་ཤེས་བླ་མེད་ནི། །དེ་རིང་ཉིད་དུ་འབབ་པར་ཤོག །དེ་ནས་བཛྲ་ཨཱ་བེ་ཤ་ཨ་
ཞེས་བྱ་བ་འདི་ལན་བརྒྱ་ཟློས་སུ་གཞུག་གོ། །ཡང་གཡོན་པའི་ཁུ་ཚུར་བཅིངས་ལ། སེམས་མ་རྡོ་རྗེའི་ཕྱག་རྒྱ་ཕྱེ་སྟེ། ཧཱུྃ་ཨ་ཨ་ཨ་ཨ་ཞེས་བྱ་བ་ལན་བརྒྱ་ཟློས་སུ་གཞུག་གོ། །སྦྱོར་བ་གཉིས་ཀ་ལ་ཡང་འོད་ཟེར་དམར་པོ་འབར་བའི་འོད་ཀྱིས་ཀུན་ནས་འཁྲིགས་པའི་རྡོ་རྗེ་སེམས་དཔས་ཀུན་
ནས་གང་བར་བསམས་ན་ངེས་པར་འབབ་པར་འགྱུར་རོ། །ལྷའི་ཡེ་ཤེས་ཀྱང་འདི་ལས་སྐྱེ་བར་འགྱུར་རོ། །དེ་ནས་མེ་ཏོག་གི་ཕྲེང་བ་དོར་ཞིང་ཕྲེང་བས་དབང་བསྐུར་བ་དང་། གདོང་གཡོགས་དཀྲོལ་ཞིང་དཀྱིལ་འཁོར་བསྟན་པ་དང་། འཇུག་པའི་ཕྱག་རྒྱ་དགྲོལ་བ་དག་སློབ་དཔོན་གྱི་ལས་ཀྱི་ཆོ་
གར་བསྟན་པའི་སྦྱོར་བས་བྱེད་དུ་གཞུག་གོ །དེ་ནས་དེ་བཞིན་དུ་པདྨ་བྲིས་ལ། སློབ་མ་རྡོ་རྗེ་སེམས་དཔར་བྱིན་གྱིས་བརླབ་པར་བྱ་སྟེ། པདྨ་དེ་ལ་རྡོ་རྗེ་སེམས་དཔའི་ཕྱག་རྒྱ་ཆེན་པོས་ཉེ་བར་གཞག་ལ། ཡོན་གྱི་མཆོག་བླངས་ཏེ་མཆོད་ཡོན་བྱིན་ལ། མེ་ཏོག་ལ་སོགས་པས་ཡང་དག་པར་མཆོད་
དེ། རྣམ་པར་རྒྱལ་བའི་བུམ་པ་ལས་རྡོ་རྗེ་ཁུ་ཚུར་གིས་ཆུ་བླངས་ལ། སློབ་དཔོན་གྱི་ཆོ་གས་དབང་བསྐུར་ཞིང་ཆུ་དེ་འཐུང་དུ་བཅུག་ལ། འདི་སྐད་ཅེས་བརྗོད་དོ། །འདི་ནི་སེམས་ཅན་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེའི་བདུད་རྩི་
ཆུ་འདིས་འགྲུབ། །རྡོ་རྗེ་དྲིལ་བུ་ཕྱག་རྒྱ་རྣམས། །གལ་ཏེ་དཀྱིལ་འཁོར་མ་མཐོང་སྨྲས། །སྐྱེས་བུ་འདུས་པའི་ནང་གནས་ཤིང་། །དད་པ་མེད་པས་བགད་པར་འགྱུར། །དེ་ནས་ཕྱག་རྒྱའི་དབང་བསྐུར་བ་དང་། ཅོད་པན་གྱི་དབང་བསྐུར་བ་དང་། རྡོ་རྗེ་དང་བདག་པོ་དང་མིང་གི་དབང་བསྐུར་བ་
དང་། རང་གི་དངོས་གྲུབ་ཀྱི་རྡོ་རྗེའི་བརྟུལ་ཞུགས་དང་། ཆོས་ཀྱི་དེ་ཁོ་ན་ཉིད་རྣམས་ཀྱི་དམ་ཚིག་རྣམས་སྦྱིན་པར་བྱའོ །དེ་ནས་མེ་ཏོག་ལ་སོགས་པ་དང་། རྡོ་རྗེ་མཚོན་ཆ་ལ་སོགས་པས་དེ་ཡང་དག་པར་མཆོད་ལ། དེ་ལ་སྙིང་པོ་བྱིན་ཏེ། དང་པོར་མནའ་འདོར་དུ་བཅུག་ལ། ལྷའི་ཕྱག་རྒྱ་བཞི་

59-1-116a

བསླབ་པར་བྱའོ། །དེ་ནས་གསང་བའི་དབང་བསྐུར་བཤད་དེ། དབང་བསྐུར་བར་འོས་པ་བཅུག་ལ། སློབ་དཔོན་གྱིས་ལས་ཀྱི་ཆོ་ག་ཐམས་ཅད་དང་། དཀྱིལ་འཁོར་དང་། ལྷའི་དེ་ཁོ་ན་ཉིད་ཐམས་ཅད་བསྟན་པར་བྱ་སྟེ། འདི་དག་གིས་ནི་དབང་བསྐུར་བ་ཐམས་ཅད་ཀྱིས་དབང་
བསྐུར་བར་གྱུར་པ་ཡིན་ནོ། །དེ་ནས་དབང་བསྐུར་བའི་ཆོ་ག་རྒྱས་པར་བཤད་པར་བྱ་སྟེ། རྩ་བའི་དཀྱིལ་འཁོར་ལས་བར་དུ་ཁྲུ་དོ་ཡོངས་སུ་དོར་བར་དབང་བསྐུར་བའི་དཀྱིལ་འཁོར་ཤར་ཕྱོགས་ཀྱི་སྒོར་བལྟས་པ་ནང་གི་དཀྱིལ་འཁོར་གྱི་ཕྱེད་ཀྱི་ཚད་ཙམ་ལ། ཟུར་བཞི་པོ་སྒོ་ནུབ་ཏུ་བལྟས་པ། 
ཚོན་གྱི་ཕྱེ་མ་སྣ་ལྔས་བྲི་བར་བྱ་སྟེ། དཀྱིལ་འཁོར་དེའི་དབུས་སུ་པདྨ་འདབ་མ་བརྒྱད་པ། དེའི་སྟེང་དུ་དང་པོའི་རྡོ་རྗེ་ཁ་དོག་དམར་པོར་བྲི་བར་བྱའོ། །དེ་ནས་དཀྱིལ་འཁོར་དེ་མེ་ཏོག་ལ་སོགས་པས་ཡང་དག་པར་མཆོད་ལ། སྣ་ཚོགས་པདྨ་དང་། རས་ཀྱིས་གཡོགས་པའི་སེང་གེའི་གདན་ནམ། 
སྟན་ནང་ཚངས་ཅན་རྡོ་རྗེ་རྩེ་མོས་མངོན་པར་བཟླས་པ་དེར་གཞག་སྟེ། དེ་ཡང་དབང་བསྐུར་བར་བྱ་སྟེ། དཔལ་རྡོ་རྗེ་སེམས་དཔར་བྱིན་གྱིས་བརླབས་ལ། དེའི་ལུས་ལ་ལྷ་ཐམས་ཅད་ཀྱི་གནས་སུ་སྔ་མ་བཞིན་དུ་པདྨའི་གདན་བསམས་ནས། གདན་དེ་རྣམས་ལ་དང་པོའི་རྡོ་རྗེའི་སྙིང་པོ་དང་
བཅས་པས། དཔལ་རྡོ་རྗེ་སེམས་དཔའ་ལ་སོགས་པ་བསྐྱེད་དེ། གདན་དེ་ལ་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོས་འདུག་ནས་དང་པོའི་རྡོ་རྗེ་དེ་ཉིད་དང་། རྡོ་རྗེ་སེམས་དཔའ་ལ་སོགས་པས་སྙིང་ག་དང་། སྨིན་མཚམས་དང་། ལྐོག་མ་དང་། སྤྱི་བོ་རྣམས་སུ་བྱིན་གྱིས་བརླབས་པ་
དང་། སེང་གེའི་གདན་གྱི་སྟེང་དུ་བླ་རེ་བྲེ་ཞིང་། གཡས་ལོགས་སུ་དར་དང་། མེ་ཏོག་གི་ཆུན་པོས་བརྒྱན་པའི་གདུགས་དཀར་པོ་རིན་པོ་ཆེའི་མེ་ཏོག་ཅན་ཧཱུྃ་གིས་བཟླས་པ་བཞག་པ་དང་། གཡོན་ཕྱོགས་ཀྱི་ཆར་དར་སྣ་ཚོགས་པའི་རྒྱལ་མཚན་དང་། བ་དན་ལ་ནམ་མཁའ་མཛོད་ཀྱི་སྔགས་
བཟླས་པ་གཞག་ལ། མཆོད་ཡོན་ཕུལ་ཏེ། མེ་ཏོག་ལ་སོགས་པས་ཡང་དག་པར་མཆོད་ནས། དུང་དང་། རྔ་རིངས་དང་། རྔ་བོ་ཆེ་དང་། རྭ་དུང་ལ་སོགས་པའི་རོལ་མོའི་ཕྱག་རྒྱས་བྱིན་གྱིས་བརླབས་པའི་སྒྲ་དང་། ཕྱི་རོལ་དུ་གླུ་དང་། གར་རྣམས་བྱ་བ་དང་། རྡོ་རྗེ་མཚོན་ཆ་བཟླས་པས་མཆོད་དོ། །

59-1-116b

དེ་ནས་ཡོན་གྱི་མཆོག་བླངས་ལ། །དཔལ་རྡོ་རྗེ་སེམས་དཔའི་སྐུ་གཟུགས་དེའི་སྤྱི་བོར་བཞག་སྟེ། བཀྲ་ཤིས་ཀྱི་ཚིགས་སུ་བཅད་པ་གདོན་པར་བྱའོ། །དེ་ལ་བཀྲ་ཤིས་ཀྱི་ཚིགས་སུ་བཅད་པ་འདི་ཡིན་ཏེ། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་
མགོན་པོ་དྲི་མ་གསུམ་སྤངས་པ། །སངས་རྒྱས་པདྨ་རྒྱས་པའི་འདབ་འདྲའི་སྤྱན་མངའ་བ། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་དང་པོའོ། །དེ་ཡིས་ཉེ་བར་བསྟན་པ་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་
དགུ་རྣམས་ལ་ཞི་བྱེད་པ། །དེ་ནི་འཇིག་རྟེན་དགེ་བའི་བཀྲ་ཤིས་གཉིས་པའོ། །དགེ་འདུན་དམ་པ་ཆོས་ལྡན་ཐོས་པའི་བཀྲ་ཤིས་ཕྱུག །མི་དང་ལྷ་དང་ལྷ་མ་ཡིན་གྱིས་མཆོད་པའི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་གཞི། །དེ་ནི་འཇིག་རྟེན་དགེ་བའི་བཀྲ་ཤིས་གསུམ་
པའོ། །སེམས་ཅན་ཀུན་ལ་ཕན་ཕྱིར་བྱང་ཆུབ་མངའ་བ་པོ། །དོན་རྣམས་ཐམས་ཅད་གྲུབ་པར་བརྟུལ་ཞུགས་ཡོངས་ལྡན་པ། །ཚོགས་ཀྱི་ལས་དགྱེས་ཐུབ་པའི་བཀྲ་ཤིས་གང་བྱུང་བ། །བཀྲ་ཤིས་དེས་ཀྱང་སྐྱེ་དགུ་རྣམས་ལ་ཞི་བྱེད་ཤོག །འགྲོ་ལ་ཕན་ཕྱིར་དེ་བཞིན་གཤེགས་པ་དགའ་
ལྡན་ལྷའི། །གཞལ་མེད་ཁང་གི་སྙིང་པོ་ནས་ནི་འདིར་གཤེགས་ཏེ། །དབང་བཅས་ལྷས་བསྐོར་བ་ཡི་བཀྲ་ཤིས་གང་བྱུང་བ། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །ལོ་མ་མེ་ཏོག་འོད་འབར་ཉམས་དགའ་ལུམྦིའི་ཚལ། །ལྷ་མང་དག་གིས་བསྟན་པར་མགོན་པོ་བལྟམས་པ་
ན། །སྲིད་པའི་མཐར་ཕྱིན་པ་ཡི་བཀྲ་ཤིས་གང་བྱུང་བ། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །གྲོང་ཁྱེར་སེར་སྐྱའི་གནས་ནས་རྒྱལ་པོའི་ཕོ་བྲང་དུ། །ལྷུམས་ནས་བལྟམས་པ་སྟོན་པ་བདེ་གཤེགས་ཟས་གཙང་སྲས། །མྱུར་བསྐྲུན་བདུད་རྩི་ཆུས་གཏོར་བ་ཡི་བཀྲ་ཤིས་
གང་། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །གྲོང་ཁྱེར་དམ་པ་སེར་སྐྱའི་གནས་ཞེས་བྱ་བར་ནི། །རྨད་དུ་གྲགས་པ་ཆེ་བའི་ལྷ་ཡིས་མངོན་བསྟོད་པས། །བསམ་ཡས་དགེ་བསྒྲུབས་བསོད་ནམས་ཕུང་པོའི་བཀྲ་ཤིས་གང་། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །དགྱེས་

59-1-117a

ཤིང་ནམ་ཕྱེད་གྲོང་ཁྱེར་མཆོག་ནས་མངོན་བྱུང་སྟེ། །དཀའ་ཐུབ་ཚལ་དུ་མངོན་པར་གཤེགས་ཤིང་ཚངས་ལ་སོགས། །ལྷ་ཡི་ཚོགས་ཀྱིས་ཡོངས་སུ་བསྐོར་བའི་བཀྲ་ཤིས་གང་། །བཀྲ་ཤིས་དེས་ཀྱང་སྐྱེ་དགུ་རྣམས་ལ་ཞི་བྱེད་ཤོག །རབ་ཏུ་འོད་འབར་གསེར་དང་
འདྲ་བའི་སྐུ་མངའ་ཞིང་། །བེེ་ཌཱུརྱ་ལྟར་སྡོ་བའི་རྩྭ་བཏིང་སྟེང་བཞུགས་ཏེ། །སྐྱིལ་མོ་ཀྲུང་བཅས་མི་གཡོ་མཆོག་གི་བཀྲ་ཤིས་གང་། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །ཆུ་བོའི་འགྲམ་ན་ཙྭ་ཤའི་ཕྲེང་གིས་ཡོངས་བསྐོར་བ། །ཤིན་ཏུ་རྨད་དུ་བྱུང་བའི་སྲིད་པ་སེལ་མཛད་
པ། །ཀླུ་ཡི་རྒྱལ་པོས་ཕྱག་བྱས་པ་ཡི་བཀྲ་ཤིས་གང་། །བཀྲ་ཤིས་དེས་ཀྱང་སྐྱེ་དགུ་རྣམས་ལ་ཞི་བྱེད་ཤོག །ཤིང་རྒྱལ་དྲུང་གཤེགས་བྱམས་པའི་སྟོབས་ཀྱིས་བདུད་ཀྱི་ཕྱོགས། །མང་པོ་བཏུལ་ཚེ་ས་སྟེང་དང་ནི་ནམ་མཁའ་ལ། །བཅོམ་ལྡན་བཀྲ་ཤིས་རྣམ་པ་སྣ་ཚོགས་གང་
བྱུང་བ། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །སྡུག་བསྔལ་མཐའ་དག་གཞིག་ཕྱིར་རྡོ་རྗེ་གདན་བཞུགས་ཏེ། །ནམ་གྱི་ཐོ་རངས་བདུད་བཞི་པོ་དག་རྣམ་པར་བཏུལ། །སྟོན་པ་བདེ་བར་གཤེགས་པའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །
གྲོང་ཁྱེར་བཱ་རཱ་ཎ་སཱིར་དྲང་སྲོང་མཆོག་བཞུགས་ནས། །ཆོས་ཀྱི་འཁོར་ལོ་མཆོག་བསྟན་པ་ཡི་བཀྲ་ཤིས་གང་། །ལྷ་ཡུལ་དང་འདིར་ཤིན་ཏུ་རྨད་དུ་བྱུང་གྱུར་པ། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །བཀྲ་ཤིས་གང་ཞིག་ཕན་བྱེད་དམ་པ་དག་བྱེད་པ། །བསོད་ནམས་བྱ་བྱེད་
འཕགས་པའི་སྐྱེ་བོས་མངོན་བསྟོད་པ། །བཅོམ་ལྡན་ཤཱཀྱ་ཐུབ་པ་སེང་གེས་མངོན་གསུངས་པ། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །མུ་སྟེགས་བྱེད་པ་ཀུན་གྱི་ང་རྒྱལ་གཞོམ་པ་དང་། །འགྲོ་ལ་བདེ་བ་བསྐྱེད་ཕྱིར་ཆོ་འཕྲུལ་དམ་པ་དག །ཉེ་བར་སྟོན་པའི་རྒྱལ་བའི་བཀྲ་ཤིས་
གང་ཡིན་པ། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །འགྲོ་ལ་ཕན་ཕྱིར་མཐོ་རིས་ནས་ནི་འདིར་གཤེགས་ཏེ། །ཚངས་པ་ལ་སོགས་ལྷ་ཚོགས་ལག་ན་རྔ་ཡབ་གདུགས། །སྣ་ཚོགས་ཐོགས་པས་ཡོངས་སུ་བསྐོར་བའི་བཀྲ་ཤིས་གང་། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་

59-1-117b

ཤོག །དེ་བཞིན་གཤེགས་པ་ཞི་བའི་མཆོག་ཏུ་ཉེར་གཤེགས་པ། །མན་དཱ་ར་བའི་མེ་ཏོག་མང་པོས་མངོན་མཆོད་པ། །ལྷ་མཆོག་རྣམས་ཀྱིས་མངོན་པར་བསྟོད་པའི་བཀྲ་ཤིས་གང་། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །ལྷ་དབང་ཀླུ་དང་མི་ཡི་དབང་པོས་ཕྱག་བྱས་
པ། །མཁའ་ལྡིང་གནོད་སྦྱིན་དྲི་ཟའི་དབང་པོས་མཆོག་གྱུར་པ། །དེ་བཞིན་གཤེགས་པའི་སྟོབས་བཅུ་ལྡན་གྱི་བཀྲ་ཤིས་གང་། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །དེ་ནས་མཚན་བརྒྱ་རྩ་བརྒྱད་པས་ཡང་དག་པར་བསྟོད་ལ། དང་པོར་བུམ་པ་གང་བ་དང་། རྡོ་རྗེ་གཟུགས་
ལ་སོགས་པ་དེ་དག་དབུལ་ལོ། །དེ་ནས་བུམ་པ་དེ་རྣམས་ཀྱིས་སོ། །དེའི་འོག་ཏུ་རྣམ་པར་རྒྱལ་བའི་བུམ་པ་ལས་ཆུ་བླངས་ཏེ། དེ་བཞིན་དུ་དབང་བསྐུར་བར་བྱ་ཞིང་འཐུང་དུ་ཡང་གཞུག་གོ །དེ་ནས་ཕྱག་རྒྱའི་དབང་བསྐུར་བ་དང་། ཅོད་པན་དང་དར་དཔྱངས་ཀྱི་དབང་བསྐུར་བ་དང་། རྡོ་རྗེ་དང་
བདག་པོ་དང་། མིང་གི་དབང་བསྐུར་བ་ཡང་བྱིན་ལ། དངོས་གྲུབ་ཀྱི་རྡོ་རྗེའི་བརྟུལ་ཞུགས་ཀྱང་སྦྱིན་པར་བྱའོ། །དེ་ནས་མེ་ཏོག་ལ་སོགས་པ་དང་། རྡོ་རྗེ་མཚོན་ཆ་ལ་སོགས་པ་མཆོད་པའི་ཕྱག་རྒྱ་རྣམ་པ་བཅུ་གཉིས་དུམ་བུ་གཉིས་པའི་རྩ་བའི་དཀྱིལ་འཁོར་དུ་བཤད་པ་རྣམས་ཀྱིས་ཡང་དག་
པར་མཆོད་ལ། ཆོས་ཀྱི་དེ་ཁོ་ན་ཉིད་ཀྱིས་དམ་ཚིག་རྣམས་སྦྱིན་པར་བྱའོ། །དེ་བཞིན་གཤེགས་པའི་དཀྱིལ་འཁོར་དུ་ཡང་མཆོད་པ་བཅུ་གཉིས་པོ་དེ་དག་ཉིད། དེ་བཞིན་གཤེགས་པའི་ཁུ་ཚུར་ལས་བྱུང་བའོ། །རྡོ་རྗེའི་རིགས་ལ་ནི་ཁྲོ་བོའི་ཁུ་ཚུར་གཉིས་ལས་བྱུང་བའོ། །པདྨའི་རིགས་ལ་
ནི་པདྨའི་ཁུ་ཚུར་གཉིས་ལས་བྱུང་བའོ། །རིན་པོ་ཆེའི་རིགས་ལ་ནི་རིན་པོ་ཆེའི་ཁུ་ཚུར་གཉིས་ལས་བྱུང་བར་གཟུང་བར་བྱའོ། །རྡོ་རྗེ་སེམས་དཔའི་དཀྱིལ་འཁོར་ལ་ནི་ཁ་དོག་སྣ་ཚོགས་པའོ། །དེ་བཞིན་གཤེགས་པའི་དཀྱིལ་འཁོར་ལ་ནི་དཀར་པོའོ། །རྡོ་རྗེའི་དཀྱིལ་འཁོར་ལ་ནི་སྔོན་པོའོ། །པདྨའི་
དཀྱིལ་འཁོར་ལ་ནི་དམར་པོའོ། །རིན་པོ་ཆེའི་དཀྱིལ་འཁོར་ལ་ནི་སེར་པོར་ཤེས་པར་བྱའོ། །དེ་ནས་སྔ་མ་བཞིན་དུ་ཆོ་ག་རྣམས་རྗེས་སུ་སྤྱད་པ་བྱས་ལ། ཡི་གེ་པྲས་བྱིན་གྱིས་བརླབས་པའི་རིན་པོ་ཆེའི་ཐུར་མའམ། གསེར་གྱི་ཐུར་མ་བླངས་ལ། སློབ་མའི་མིག་གཉིས་སུ་ཕྲ་བཀོད་དེ། ཐུར་

59-1-118a

མ་དེས་དེའི་མིག་ཏུ་བྱུགས་ལ། འདི་སྐད་ཅེས་བརྗོད་པར་བྱ་སྟེ། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །རབ་རིབ་རྒྱལ་བས་བསལ་བར་མཛད། །ཨོཾ་བཛྲ་ནཻ་ཏྲ་ཨ་པ་ཧཱ་ར་ཕཊ་ལཾ་ཧྲི། དེ་ནས་མེ་ལོང་
བླངས་ལ། ཆོས་ཀྱི་མཚན་ཉིད་བསྟན་པར་བྱ་སྟེ། ཆོས་རྣམས་གཟུགས་བརྙན་ལྟ་བུ་སྟེ། །དང་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་བྱུང་བ་སྟེ། །ངོ་བོ་ཉིད་མེད་གནས་མེད་པར། །དེ་ལྟར་ཆོས་འདི་ཤེས་ནས་སུ། །སེམས་ཅན་དོན་ནི་མཉམ་མེད་
བྱོས། །འོན་ཀྱང་སངས་རྒྱས་སྲས་སུ་སྐྱེས། །དེ་ནས་ཡི་གེ་ཧོས་མདའ་དང་བཅས་པའི་གཞུ་བྱིན་ལ། དེ་བཞིན་གཤེགས་པ་ཐམས་ཅད་རྗེས་སུ་མཉེས་པར་གྱིས་ཤིག་ཅེས་བརྗོད་ལ། ཕྱོགས་བཞིར་མདའ་བཞི་འཕེན་པའི་ཚུལ་བྱེད་དུ་གཞུག་ཅིང་། སྟེང་འོག་ཏུའང་འཕེན་དུ་བཅུག་ལ། ཨོཾ་
བཛྲ་རཱ་ག་ཧོ་ཞེས་ཀྱང་སྨྲར་གཞུག་པར་བྱའོ། །དེ་ནས་ཨོཾ་བཛྲ་ས་ཏྭ་ཞེས་བྱ་བས་མེ་ལོང་བསྟན་ལ། འདི་སྐད་ཅེས་བརྗོད་པར་བྱ་སྟེ། རྡོ་རྗེ་སེམས་དཔའ་མེ་ལོང་ལྟར། །དག་ཅིང་གསལ་ལ་རྙོག་པ་མེད། །སངས་རྒྱས་ཀུན་བདག་རང་ཉིད་ནི། །བུ་ཁྱོད་ཀྱི་ནི་སྙིང་ལ་ཞུགས། དེ་བཞིན་
གཤེགས་པ་ཀུན་བདག་གང་། །བྱང་ཆུབ་སེམས་འདིར་ཤེས་པར་གྱིས། །དེ་ནས་བཛྲ་ཧེ་ཏུ་མཾ། ཞེས་བྱ་བས་ཆོས་ཀྱི་འཁོར་ལོ་རྐང་པ་གཉིས་སུ་དགོད་པ་དང་། བཛྲ་བྷཱ་ཥ་རཾ་ཞེས་བྱ་བས་དུང་ལག་པ་གཡས་པར་བྱིན་ལ། འདི་སྐད་ཅེས་བརྗོད་པར་བྱ་སྟེ། དེ་རིང་ཕན་ཆད་འཇིག་རྟེན་ལ། །སྐྱོབ་པ་
རྣམས་ཀྱིས་འཁོར་ལོ་བསྐོར། །ཆོས་ཀྱི་དུང་ནི་བླ་མེད་པས། །ཀུན་དུ་མ་ལུས་གང་བར་གྱིས། །སོམ་ཉི་ཡིད་གཉིས་མི་བྱ་ཞིང་། །དོགས་པ་མེད་པའི་སེམས་ཀྱིས་སུ། །གསང་སྔགས་སྤྱད་པའི་ཚུལ་གྱི་མཆོག །འཇིག་རྟེན་འདི་ལ་རབ་ཏུ་སྒྲོགས་། །དེ་ལྟར་བྱས་ན་སངས་རྒྱས་ལ། །ཕན་
འདོགས་ཤིན་ཏུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཡང་། །ཀུན་དུ་ཁྱོད་ལ་སྲུང་བར་བྱེད། །མདོར་ན་འཇིག་རྟེན་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་འདུལ་བ་སྣ་ཚོགས་པའི། །ཆོས་ཀྱི་འཁོར་ལོ་རབ་ཏུ་བསྐོར། །མདོར་ན་འཇིག་རྟེན་ཐམས་ཅད་དུ། །སེམས་ཅན་

59-1-118b

ཀུན་ལ་ཕན་པའི་ཕྱིར། །ཇི་ལྟར་འདུལ་བ་སྣ་ཚོགས་པའི། །རྡོ་རྗེའི་འཁོར་ལོ་རབ་ཏུ་བསྐོར། །མདོར་ན་འཇིག་རྟེན་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་འདུལ་བ་སྣ་ཚོགས་པའི། །ཁྲོ་བོའི་འཁོར་ལོ་རབ་ཏུ་བསྐོར། །མདོར་ན་འཇིག་རྟེན་ཐམས་ཅད་དུ། །སེམས་
ཅན་ཀུན་ལ་ཕན་པའི་ཕྱིར། །ཇི་ལྟར་འདུལ་བ་སྣ་ཚོགས་པའི། །པདྨའི་འཁོར་ལོ་རབ་ཏུ་བསྐོར། །མདོར་ན་འཇིག་རྟེན་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་འདུལ་བ་སྣ་ཚོགས་པའི། །ནོར་བུའི་འཁོར་ལོ་རབ་ཏུ་བསྐོར། །ཞེས་བྱ་བསདེ་བཞིན་གཤེགས་པ་དང་། 
རྡོ་རྗེ་སེམས་དཔའ་དང་། རྡོ་རྗེ་ཧཱུྃ་མཛད་དང་། འཇིག་རྟེན་དབང་ཕྱུག་དང་། ནམ་མཁའི་སྙིང་པོའི་ང་རྒྱལ་དང་། ཚིགས་སུ་བཅད་པ་འདི་རྣམས་ཀྱིས། རྗེས་སུ་གནང་བ་བྱིན་ལ་རང་གི་ལྷའི་སྙིང་པོ་སྦྱིན་པར་བྱའོ། །དེ་ནས་ཕྱག་རྒྱ་བཞིའི་ཡེ་ཤེས་བསླབས་ལ། གཟེངས་བསྟོད་པའི་ཕྱག་རྒྱ་
བཅིངས་ཏེ། སློབ་མ་ཐམས་ཅད་ལ་དབང་བསྐུར་བ་སྦྱིན་པར་བྱའོ། །ཨོཾ་འདི་ནི་ངས་ཁྱོད་ལུང་བསྟན་པ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་མཆོག་ཏུ་གྲུབ་པའི་ཕྱིར། །སྲིད་པའི་ངན་འགྲོ་དག་ལས་བཏོན། །ཀྱེ་རྡོ་རྗེ་ཆེ་གེ་མོ་ཞེས་བྱ་བའི་དེ་བཞིན་གཤེགས་པ་སིདྡྷྱ་ས་མ་ཡ་
སྟྭཾ། བྷུར་བྷུ་བཿ སྭཿ དེ་ལ་གཟེངས་བསྟོད་པ་འདི་ཡིན་ཏེ་དེ་བཞིན་གཤེགས་པའི་ཁུ་ཚུར་གཉིས་བཅིངས་ལ། གཡོན་པ་ཆོས་གོས་ཀྱི་མཐའ་མ་འཛིན་པའི་ཚུལ་དུ་བྱས་ལ། གཡས་པ་མི་འཇིགས་པའི་ཚུལ་དུ་བྱའོ། །ཆོ་ག་ལྷག་མ་རྣམས་ནི་དུམ་བུ་གཉིས་པ་ལས་ཤེས་པར་བྱའོ། །རྗེས་སུ་བསྒྲུབ་
པ་དང་། རྗེས་སུ་བསྒྲུབ་པའི་ལན་ཡང་དེ་ལྟར་ཤེས་པར་བྱའོ། །དེ་ནས་སྦྱིན་སྲེག་བྱ་སྟེ། སློབ་མ་བསང་གཏོར་བྱས་ལ་གཡོན་ལོགས་སུ་བཞག་སྟེ། དེའི་གཡས་པའི་མཐེ་བོང་ལག་པ་གཡོན་པས་བཟུང་ནས། ཧཱུྃ་གིས་མར་གྱི་སྦྱིན་སྲེག་ལན་བདུན་བྱས་ལ། བླུགས་གཟར་གྱིས་སློབ་མ་
ལ་བསྐོར་བ་བྱས་ཏེ། དེ་ཉིད་ཀྱིས་དགང་བླུགས་གསུམ་དབུལ་བར་བྱའོ། །དེ་ནས་སངས་རྒྱས་སྤྱན་གྱིས་དེ་བཞིན་དུ་སྦྱིན་སྲེག་བྱའོ། །དེ་ནས་སློབ་མའི་ལག་པར་རྡོ་རྗེ་གནོད་སྦྱིན་བཟླས་པའི་གདུ་བུ་བཏགས་ལ། དེ་ཉིད་བཟླས་པའི་ཆུས་བསང་གཏོར་བྱའོ། །ཨོཾ་རུ་རུ་སྤུ་རུ་ཛྲཱ་ལ་ཏིཥྛ་སིདྡྷ་ལོ་

59-1-119a

ཙ་ནེ་སརྦ་ཨརྠ་སཱ་དྷ་ནེ་སྭཱ་ཧཱ། ཞེས་བྱ་བའི་སངས་རྒྱས་སྤྱན་གྱི་སྔགས་དང་། སྙིང་གར་བྱུགས་ཏེ། སློབ་མ་གཏང་བར་བྱ་བ་ནི་སློབ་མའི་ཐུན་མོང་གི་ཆོ་གའོ། །གང་ཞིག་སློབ་དཔོན་གྱི་དབང་གིས་དབང་བསྐུར་བ་དེ་ལ་ནི། དེ་ལ་དམིགས་ཏེ་མར་གྱི་སྲེག་བླུགས་བརྒྱ་ཧཱུྃ་ཞེས་
བྱ་བ་དང་། སྦྱིན་སྲེག་བྱའོ། །དེ་ནས་སངས་རྒྱས་སྤྱན་གྱི་ཡང་སྦྲང་རྩི་དང་། མར་དང་། ཞོ་དང་བསྲེས་པའི་ཏིལ་གྱིས་སྦྱིན་སྲེག་བརྒྱ་སངས་རྒྱས་སྤྱན་གྱི་སྔགས་ཉིད་ཀྱིས་དབུལ་ལོ། །དེ་ནས་དེ་བཞིན་དུ་གདུ་བུ་བཏགས་ལ་བསང་གཏོར་བྱས་ཏེ། སྙིང་ག་ནས་བྱུགས་ནས། དེ་ནས་ཡང་སྔ་མ་
བཞིན་དུ་ཐབ་ཀྱི་ནང་དུ་དཀྱིལ་འཁོར་བསམས་ལ། དཀྱིལ་འཁོར་པའི་ལྷ་རྣམས་ལ་སྦྱིན་སྲེག་ཕུལ་ནས། ཡང་དཀྱིལ་འཁོར་ལ་ཞུགས་པའི་བཅོམ་ལྡན་འདས་ལ་མཚན་བརྒྱ་རྩ་བརྒྱད་པས་བསྟོད་ནས། མཆོད་པ་ཐམས་ཅད་ཀྱིས་ཡང་དག་པར་མཆོད་དེ། དེའི་ཕྱི་རོལ་དུ་གཏོར་མ་བྱིན་ལ་ཉེ་
རེག་བྱ་སྟེ། ཕྱག་རྒྱ་དགྲོལ་བ་ལ་སོགས་པ་སྔར་བཤད་པའི་ཆོ་ག་རྣམས་རྗེས་སུ་སྤྱད་ནས། བཅོམ་ལྡན་འདས་འཁོར་དང་བཅས་པ་རྣམས་གཤེགས་སུ་གསོལ་བར་བྱའོ། །དེ་ནས་དེ་བཞིན་དུ་རང་གི་ལུས་ལ་སྤྲུལ་པའི་དཀྱིལ་འཁོར་བཅུག་ལ། ཤེས་རབ་ཀྱི་ཕ་རོལ་ཏུ་ཕྱིན་པ་མཐའ་
ཡས་པ་ཉིད་པས། དེ་བཞིན་གཤེགས་པ་ཐམས་ཅད་མཐའ་ཡས་པ་ཉིད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པ་ཉིད་པས། རྡོ་རྗེ་ཐམས་ཅད་མུ་མེད་པ་ཉིད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་དུ་མ་ཉིད་པས་ཆོས་ཐམས་ཅད་དུ་མ་ཉིད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་མཐར་ཐུག་པ་
མེད་པ་ཉིད་པས་ལས་ཐམས་ཅད་མཐར་ཐུག་པ་མེད་པ་ཉིད་དོ། །སེམས་ཅན་ཆེན་པོ་ལེགས་སོ་ལེགས། །བདེ་བ་ཆེན་པོ་ལེགས་སོ་ལེགས། །བློ་གྲོས་ཆེན་པོ་ལེགས་སོ་ལེགས། །ཆོ་ག་འདི་ནི་ལེགས་པར་སྨྲས། །སངས་རྒྱས་རྡོ་རྗེ་འཛིན་ཀུན་གྱིས། །འབྲས་བུ་ཡོད་པ་འདུལ་བའི་མཆོག །
རྡོ་རྗེ་མདོ་སྡེ་བྱིན་གྱིས་བརླབས། །དེ་ནས་སྔ་མ་བཞིན་དུ་བདག་ཉིད་ལ་བསྲུང་བ་ལེགས་པར་བྱས་ལ། ཧཱུྃ་ཞེས་བྱ་བཟློས་ཤིང་དཀྱིལ་འཁོར་ཕྱོགས་པར་བྱའོ། །དེ་ནས་གླེགས་བམ་བཀླག་པ་དང་མཆོད་རྟེན་གདབ་པ་ལ་སོགས་པ་ཅི་ནུས་པའི་དགེ་བའི་ལས་རྣམས་རྗེས་སུ་སྤྱོད་པར་བྱེད་ཅིང་

59-1-119b

གནས་པར་བྱའོ། །དེ་ནས་བརྩམས་པ་འདི་ནི་རིགས་ཐམས་ཅད་ཀྱི་དཀྱིལ་འཁོར་རྣམས་ལ་ཐུན་མོང་དུ་གྱུར་པ་ཡིན་པར་ཤེས་པར་བྱའོ། །སྔོན་དུ་བསྙེན་པ་བྱ་བ་ལ་སོགས་པའི་ཆོ་ག་རྣམས་གང་དུ་ཁྱད་པར་དུ་ཕྱེ་སྟེ། བཤད་པ་མེད་པ་དག་ལ་ནི་དཀྱིལ་འཁོར་གྱི་བདག་པོའི་དབང་དུ་བྱས་
ནས་བྱ་བ་ཡིན་པར་ཤེས་པར་བྱའོ། །སློབ་མ་གཞུག་པ་ལ་སོགས་པའི་ཆོ་ག་རྒྱས་པ་རྫོགས་སོ།།      །།དབང་བསྐུར་བ་དང་། དམ་ཚིག་ཐོབ་པ་རྣམས་ལ་སློབ་དཔོན་གྱིས་དངོས་གྲུབ་གྱི་ཡེ་ཤེས་བླང་བར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་
པ་གསུངས་ཏེ། དེ་ནས་ཞེས་བྱ་བའི་སྒྲས་ནི་འདས་མ་ཐག་པའི་དོན་སྟོན་པར་བྱེད་པ་སྟེ། སློབ་མ་གཞུག་པ་ལ་སོགས་པའི་ཆོ་ག་རྒྱས་པའི་རྗེས་ཐོགས་ཉིད་ལ་ཞེས་བྱ་བའི་དོན་ཏོ། །ཆོ་ག་ཞེས་བྱ་བ་ནི་མངོན་པར་འདོད་པ་འགྲུབ་པར་བྱ་བའི་དངོས་གྲུབ་ཀྱི་ཕྱིར་རྒྱུ་དང་བྱེད་པར་ཞེས་བྱ་བའི་
དོན་ཏོ། །འབྱུང་སྟེ་ཞེས་བྱ་བ་རྩོམ་པར་བྱེད་པའོ། །ཟླ་བ་ཉ་ནས་བརྩམས་ཞེས་བྱ་བ་ནི་ཟླ་བ་ཡར་གྱི་ངོ་ཚེས་བཅོ་ལྔ་ལ་དཀྱིལ་འཁོར་དུ་འཇུག་པའི་མཚན་མོ་ནས་ཉེ་བར་བཟུང་བའོ། །ཕྱག་ན་རྡོ་རྗེའི་སྤྱན་སྔར་ཞེས་བྱ་བ་ནི་རྡོ་རྗེ་སེམས་དཔའི་སྐུ་གཟུགས་ལུགས་མའམ། བརྐོས་པ་ལ་
སོགས་པའི་གཟུགས་ཀྱི་སྤྱན་སྔར་ཏེ་མདུན་དུའོ། །རབ་ཏུ་དགའ་བའི་རྡོ་རྗེའི་ཕྱག་རྒྱ་བཅིངས་ལ་ཞེས་བྱ་བ་ནི་ལྔ་པོ་བསྡུས་པ་བཅིངས་པའོ། །ཇི་ལྟར་སྐྱོ་བར་མ་གྱུར་བ་ཞེས་བྱ་བ་ནི། ཇི་སྲིད་སྐྱོ་བ་སྐྱེ་བར་མ་གྱུར་པའོ། །དང་པོར་བྱིན་གྱིས་བརླབས་པ་ལ་སོགས་པ་བྱས་ལ་ཞེས་བྱ་བ་ནི་བཟླས་
བརྗོད་ཀྱི་གང་དུ་བྱ་བ་ཐམས་ཅད་དྲངས་ནས་གསུངས་པ་ཡིན་ཏེ། མཆོད་པ་དང་། བདག་ལ་བྱིན་གྱིས་བརླབས་པ་དང་། དབང་བསྐུར་བའི་ཆོ་ག་དང་། དངོས་གྲུབ་ཀྱི་རྡོ་རྗེའི་བརྟུལ་ཞུགས་བླང་བར་བྱས་ནས། ཆོས་རྣམས་ཀྱི་དེ་ཁོ་ན་ཉིད་ཀྱི་དམ་ཚིག་རྣམས་བླང་བའོ། །རྡོ་རྗེའི་དམ་ཚིག་གིས་
བརྗོད་ཅིང་ཞེས་བྱ་བ་ནི་རབ་ཏུ་དགའ་བའི་རྡོ་རྗེའི་གསུང་གིས་བཟླས་བརྗོད་བྱའོ་ཞེས་བྱ་བའི་དོན་ཏོ། །འདི་སྐད་སྟོན་པར་འགྱུར་ཏེ། དཀྱིལ་འཁོར་ཆེན་པོར་ཞུགས་ནས། ཇི་ལྟར་སློབ་དཔོན་ལས་རང་གི་འདོད་པའི་ལྷ་བསྒྲུབ་པར་བྱ་བའི་ཕྱིར་ཧཱུྃ་ཞེས་བྱ་བ་བཟླས་ཤིང་ཕྱག་རྒྱ་བཞིའི་ཡེ་ཤེས་བརླབས་

59-1-120a

ལ། དེ་ནས་བརྩམས་ཏེ་རྡོ་རྗེ་སེམས་དཔའི་རས་རིས་ལ་སོགས་པ་བྲིས་པའི་སྐུ་མདུན་དུ་བཞག་སྟེ། འདི་སྤྱན་སྔར་ཇི་སྐད་བཤད་པའི་བདག་ལ་བྱིན་གྱིས་བརླབས་པ་ལ་སོགས་པའི་ཆོ་ག་རྗེས་སུ་སྤྱད་མ་ཐག་ཏུ། ལྔ་པོ་བསྡུས་པའི་ཕྱག་རྒྱ་བཅིངས་ཏེ། ཧཱུྃ་ཞེས་བྱ་བའི་འོག་ནས་
བཤད་པའི་མཚན་ཉིད་དང་ལྡན་པའི་རབ་ཏུ་དགའ་བའི་རྡོ་རྗེའི་ཚིག་གིས་ཇི་སྲིད་སྐྱོ་བར་མ་གྱུར་པ་དེ་སྲིད་ཀྱི་བར་དུ་བཟླས་བརྗོད་བྱའོ། །སྐྱོ་བར་གྱུར་ན་མཉམ་པར་མ་བཞག་པའི་སྦྱོར་བས་རྡོ་རྗེའི་ཚིག་ཀྱང་བཟླས་པར་བྱའོ། །བྱ་བ་ཐམས་ཅད་བྱས་ནས། ལྔ་པོ་བསྡུས་པའི་ཕྱག་རྒྱ་དེ་བཞིན་དུ་
བཅིངས་ལ། ཇི་སྲིད་ཐུན་དང་པོའི་མཐར་ཐུག་པའི་བར་དུའམ། ཐུན་གཉིས་པའི་མཐར་ཐུག་པའི་བར་དུ་བཟླས་བརྗོད་བྱའོ། །དེ་ནས་ཇི་ལྟ་བ་བཞིན་དུ་གཤེགས་སུ་གསོལ་བ་བྱས་ལ། ལངས་ཏེ་ཇི་སྐད་དུ་བཤད་པའི་སྤྱོད་ལམ་གྱིས་གནས་པར་བྱའོ། །དེ་ལྟར་ཉིན་རེ་ཞིང་བདག་ལ་བྱིན་གྱིས་
བརླབས་པར་བྱས་ལ། ཇི་སྲིད་ཟླ་བ་གཅིག་གི་བར་དེ་སྲིད་དུ་བཟླས་བརྗོད་བྱས་ན་སྔོན་དུ་བསྙེན་པ་བྱས་པར་འགྱུར་རོ། །དེ་ནས་བརྩམས་ཏེ། ཕྱག་ན་རྡོ་རྗེའི་བཀའ་ཇི་ལྟ་བ་བཞིན་དུ་སྒྲུབ་པ་ཐམས་ཅད་འགྲུབ་པར་འགྱུར་རོ་ཞེས་བྱ་བ་ནི། འདི་ཉིད་ཀྱི་འོག་ནས་བཤད་པའི་རས་རིས་ལ་སོགས་པ་སྒྲུབ་པ་
ཐམས་ཅད་སྔོན་དུ་བསྙེན་པ་རྫོགས་ནས། བཀའ་ཉེ་བར་བརྩམས་ནས་འགྲུབ་པར་འགྱུར་ཞིང་རྫོགས་པར་འགྱུར་རོ། །ཕྱག་ན་རྡོ་རྗེའི་བཀའ་ཇི་ལྟ་བ་བཞིན་དུ་ཞེས་བྱ་བ་འདི་ནི་སྡུད་པར་བྱེད་པའི་ཚིག་ཡིན་ཏེ། རྡོ་རྗེ་སེམས་དཔས་ཇི་སྐད་གསུངས་པ་དེ་ནི་དེ་བཞིན་ཏེ་གཞན་དུ་མི་འགྱུར་རོ་ཞེས་བྱ་བའི་དོན་
ཏོ། །དེ་ནས་རས་རིས་བྲིའམ། འདྲིར་འཇུག་པར་འདོད་ན་ཞེས་བྱ་བ་ལ་སོགས་པ་ལ་གང་གི་ཕྱིར་སྔོན་དུ་བསྙེན་པ་བྱས་པས། རས་རིས་སྒྲུབ་པ་ལ་སོགས་པ་ཐམས་ཅད་འགྲུབ་པར་འགྱུར་གྱི་གཞན་དག་ལ་ནི་མ་ཡིན་ཏེ། གཏན་ཚིགས་དེ་བས་ན་སྔོན་དུ་བསྙེན་པ་བྱས་ལ། དེ་ནས་རས་རིས་བདག་ཉིད་
ཀྱིས་བྲི་བའམ། རི་མོ་མཁན་དཀྱིལ་འཁོར་མཐོང་བ་འདྲིར་གཞུག་པར་བྱའོ། །དང་པོའི་རྡོ་རྗེ་བྲི་བའི་ཕྱག་རྒྱ་བྲིས་ལ་ཞེས་བྱ་བ་ནི་དང་པོའི་རྡོ་རྗེ་ནི་རྡོ་རྗེ་བྲི་བའི་ཕྱག་རྒྱ་སྟེ། དེས་དང་པོ་ཧཱུྃ་ཞེས་བྱ་བཟློས་ཤིང་། པིར་བླངས་ལ། དེ་རི་མོ་བྲི་བར་བྱ་བའམ་བྱེད་དུ་གཞུག་གོ །དེའི་འོག་ཏུ་ནི་ཅི་བདེར་བྱའོ་ཞེས་

59-1-120b

བྱ་བ་ནི་དེ་ཕན་ཆད་ཀྱི་དུས་སུ་ནི་ཕྱག་རྒྱ་མེད་པར་ཡང་འདྲི་བའམ། འདྲིར་གཞུག་པར་བྱའོ། །དཀྱིལ་འཁོར་ཐམས་ཅད་དུ་ཡང་དེ་ཉིད་ཀྱིས་དང་པོར་བརྩམ་པར་བྱའོ་ཞེས་བྱ་བ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་ལ་སོགས་ཏེ། བཅོམ་ལྡན་འདས་ཀྱིས་རྒྱུད་འདིར་དཀྱིལ་འཁོར་ཇི་སྲིད་
གསུངས་པ་དེ་རྣམས་སུ་ཡང་རྡོ་རྗེ་བྲི་བའི་ཕྱག་རྒྱ་དང་པོ་བརྩམ་པར་བྱས་ལ། ཕྱི་ནས་ཚོན་རྩི་ཐམས་ཅད་དགྱེ་བ་ལ་ཧཱུྃ་ཞེས་བྱ་བ་ཉིད་ཟློས་བཞིན་དུ་ཅི་བདེ་བར་བྱའོ་ཞེས་པའོ། །དབུས་སུ་བཅོམ་ལྡན་འདས་ཆོ་ག་ཇི་ལྟ་བ་བཞིན་དུ་བྲི་ཞིང་ཞེས་བྱ་བ་ལ་སོགས་པ་ལ། ཇི་སྐད་སྟོན་པར་འགྱུར་ཏེ། 
དཔལ་རྡོ་རྗེ་སེམས་དཔའི་སྦྱོར་བ་བྱས་ལ། ཆོ་ག་ཐམས་ཅད་རྗེས་སུ་སྤྱད་ལ། བླ་རེ་དང་། །གདུགས་དང་། རྒྱལ་མཚན་དང་། འཕན་ལ་སོགས་པས་གནས་མཛེས་པར་བྱས་ལ། བུམ་པ་དང་། བུམ་པ་གང་བ་རྣམས་ཀྱང་དགོད་དེ། སའི་ཕྱོགས་བའི་རྣམ་ལྔ་དང་། སྤོས་ཆུའི་དྲི་ཞིམ་པོས་ཉེ་
བར་བྱུགས་པའི་གནས་སུ་བྲི་བར་བྱ་བའི་རས་གཞག་ལ། དེ་སྔ་མ་བཞིན་དུ་དཀྱིལ་འཁོར་ཐམས་ཅད་བསམས་ནས། མཆོད་ཡོན་ཕུལ་ཏེ། རྡོ་རྗེ་སེམས་དཔའ་ལ་སོགས་པའི་བྱང་ཆུབ་སེམས་དཔའ་རྣམས་ཇི་ལྟར་ཡོངས་སུ་བརྟགས་པའི་གནས་རྣམས་སུ་ཧཱུྃ་ཞེས་བྱ་བ་བཀོད་ནས། 
མཆོད་པ་རྣམ་པ་ལྔས་ཇི་ལྟ་བ་བཞིན་དུ་ཡང་དག་པར་མཆོད་དེ། བཅོམ་ལྡན་འདས་རྡོ་རྗེ་སེམས་དཔའ་རས་ཀྱི་དབུས་སུ་བྲི་བའམ། འདྲིར་གཞུག་པར་བྱའོ། །དེའི་འོག་ལོགས་སུ་ཕྱག་ན་རྡོ་རྗེ། ཤར་ལྷོ་མཚམས་སུ་འཇམ་པའི་དབྱངས། ལྷོར་ནམ་མཁའི་སྙིང་པོ། ལྷོ་ནུབ་མཚམས་སུ་ནམ་མཁའི་
མཛོད། བཅོམ་ལྡན་འདས་ཀྱི་སྟེང་གི་ཆ་ལ་འཇིག་རྟེན་དབང་ཕྱུག །ནུབ་བྱང་མཚམས་སུ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ། བཅོམ་ལྡན་འདས་ཀྱི་གཡོན་ལོགས་སུ་རྡོ་རྗེ་ཁུ་ཚུར། བྱང་ཤར་མཚམས་སུ་རྡོ་རྗེ་གནོད་སྦྱིན་བྲི་བའམ། འདྲིར་འཇུག་པར་བྱའོ། །དེ་ནས་ཟླ་བ་ཉ་
ནས་བརྩམས་ཏེ་ཞེས་བྱ་བ་ནི། དེ་ལྟར་རས་རིས་བྲིས་ནས། དེའི་རྗེས་ཐོགས་ཉིད་ལ། ཚེས་བཅོ་ལྔ་ནས་ཉེ་བར་བཟུང་སྟེ། བདག་ལ་བྱིན་གྱིས་བརླབས་པ་ལ་སོགས་པ་བྱས་ཏེ། རས་རིས་ལ་བཅོམ་ལྡན་འདས་སྤྱན་དྲངས་ནས་ཡང་དག་པར་བཅུག་ལ། མཆོད་པ་ཐམས་ཅད་ཀྱིས་ཇི་ལྟ་བ་བཞིན་དུ་

59-1-121a

བཅོམ་ལྡན་འདས་འཁོར་དང་བཅས་པ་ཡང་དག་པར་མཆོད་ལ། ཕྱག་བྱས་ནས་བཅོམ་ལྡན་འདས་ཀྱི་ཐུགས་ཀའི་ཟླ་བའི་དཀྱིལ་འཁོར་ལ་གནས་པའི་དང་པོའི་རྡོ་རྗེའི་ནང་དུ་ཧཱུྃ་ཞེས་བྱ་བ་རྣམ་པར་བསམས་ལ། ཕྱག་རྒྱ་ཆེན་པོ་བཅིངས་ནས་ཉིན་རེའི་སྦྱོར་བས་ཇི་སྲིད་ཟླ་བ་ཉ་
བ་གཉིས་པ་ལ་ཐུག་པ་དེ་སྲིད་ཀྱི་བར་དུ་བཟླས་བརྗོད་བྱའོ། །དེ་ནས་དེའི་ཚེ་མཚན་ཐོག་ཐག་ཏུ་བཟླས་བརྗོད་བྱས་ནས་ཐོ་རངས་ཀ་བཅོམ་ལྡན་འདས་རྡོ་རྗེ་སེམས་དཔས་མཐོང་བསྩལ་ནས། དེ་ལ་སངས་རྒྱས་ཉིད་ལ་སོགས་པའི་དངོས་གྲུབ་ཇི་ལྟར་འདོད་པ་སྩོལ་བར་འགྱུར་རོ། །ཆོ་ག་གཞན་
ཡང་ཞེས་བྱ་བ་ལ་སོགས་པ་ལ། དེ་བཞིན་དུ་སྔོན་དུ་བསྙེན་པ་བྱས་ཏེ། དཔལ་རྡོ་རྗེ་སེམས་དཔའི་རས་རིས་ཀྱི་དབུས་སུ་བཅོམ་ལྡན་འདས་རྣམ་པར་སྣང་མཛད་ཕྱག་གཉིས་བྱང་ཆུབ་མཆོག་གི་ཕྱག་རྒྱ་བཅིངས་ལ། ཧཱུྃ་ཞེས་བྱ་བ་ཉིད་ཀྱིས་བྲི་བར་བྱའོ། །དེའི་མདུན་གྱི་ཆ་ནས་བརྩམས་ཏེ། མི་
བསྐྱོད་པ་ལ་སོགས་པ་དེ་བཞིན་གཤེགས་པ་བཞི། ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་བརྒྱད་ཀྱིས་ཡོངས་སུ་བསྐོར་བར་བྲི་བར་བྱའོ། །དེ་ནས་དེའི་མདུན་དུ་ཆོ་ག་ཐམས་ཅད་རྗེས་སུ་སྤྱད་ལ་དཔལ་རྡོ་རྗེ་སེམས་དཔའི་ཕྱག་གྱ་ཆེན་པོ་བཅིངས་ཏེ། དེ་བཞིན་དུ་བཟླས་བརྗོད་བྱས་ནས་ཟླ་
བའི་མཐར་ཐུག་པ་དང་མཚན་ཐོག་ཐག་བཟླས་བརྗོད་བྱས་ལ། དེ་ནས་ནང་པར་བཅོམ་ལྡན་འདས་རྣམ་པར་སྣང་མཛད་ཀྱིས་མཐོང་བ་སྩལ་ནས། སྒྲུབ་པ་པོས་སངས་རྒྱས་ཉིད་ལ་སོགས་པའི་དངོས་གྲུབ་སྩོལ་བར་འགྱུར་རོ། །རས་ལ་བཅོམ་ལྡན་འདས་ཞེས་བྱ་བ་ལ་སོགས་པ་ལ་སྔ་མ་
བཞིན་དུ་ཟླ་བ་གཅིག་ཙམ་སྔོན་དུ་བསྙེན་པ་བྱས་ལ། བཅོམ་ལྡན་འདས་རྡོ་རྗེ་སེམས་དཔའ་དཔའ་བོ་གཅིག་པུ་རས་ལ་བྲི་བར་བྱའོ། །དེ་ནས་ཟླ་བ་ཉ་ནས་བརྩམས་ཏེ། རས་རིས་ཀྱི་སྤྱན་སྔར་དེ་བཞིན་དུ་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ། བཟླས་བརྗོད་འབུམ་བྱའོ། །དེ་ནས་
ཟླ་བ་ཉ་བ་ལ་ཕྱག་རྒྱ་ཆེན་པོ་བཅིངས་པ་ཉིད་ཀྱིས། མཚན་ཐོག་ཐག་བཟླས་བརྗོད་བྱས་ན། ཐོ་རངས་ཀ་བཅོམ་ལྡན་འདས་ཕྱག་ན་རྡོ་རྗེས་མཐོང་བ་སྩལ་ནས། རྡོ་རྗེ་སེམས་དཔའ་ཉིད་སྩོལ་བར་འགྱུར་རོ། །དེ་བཞིན་དུ་དེ་བཞིན་གཤེགས་པ་དཔའ་བོ་གཅིག་པུའི་རས་རིས་སྒྲུབ་པ་ཡང་ཤེས་པར་

59-1-121b

བྱའོ། །དེ་ནས་བཀླགས་པ་ཙམ་གྱིས་འགྲུབ་པ་ཞེས་བྱ་བ་ནི། ཧཱུྃ་ཞེས་བྱ་བས་བྱིན་གྱིས་བརླབས་པ་དང་བཅས་པའོ། །ལས་རྣམས་བཤད་པ་ནི་རྗེས་སུ་མཉེས་པར་བྱེད་པ་ལ་སོགས་པའོ། །དཀྱིལ་འཁོར་དུ་ཞུགས་པ་ཙམ་ཉིད་ཀྱིས་ཞེས་བྱ་བ་ནི། རས་རིས་ཀྱི་བསྒྲུབ་པ་བྱས་ལ། 
ཟླ་བ་གཅིག་ཇི་སྐད་དུ་བཤད་པའི་བསྙེན་པ་བྱས་ནས་དཀྱིལ་འཁོར་དུ་ཞུགས་པ་ཙམ་གྱིས་ཡེ་ཤེས་མ་བབས་ཀྱང་ལས་རྣམས་འགྲུབ་པར་འགྱུར་རོ་ཞེས་སྟོན་ཏོ། །གང་ཞིག་ཡེ་ཤེས་བབས་པ་ལ་ནི་ལས་རྣམས་ཤིན་ཏུ་ཡང་འགྲུབ་པར་འགྱུར་རོ་ཞེས་བྱ་བའི་དོན་ཏོ། །འདི་ལྟ་སྟེ་ཞེས་བྱ་བ་
ནི་ཉེ་བར་སྟོན་པའི་དོན་ཏོ། །དེ་བཞིན་གཤེགས་པ་ཐམས་ཅད་ཅེས་བྱ་བ་ནི། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་བཅོམ་ལྡན་འདས་རྣམ་པར་སྣང་མཛད་ལ་སོགས་པའོ། །དེ་རྣམས་རྗེས་སུ་མཉེས་པར་བྱེད་པ་ནི་རྒྱབ་ཀྱིས་ཕྱོགས་པ་རྣམས་རང་དབང་དུ་བྱ་
བའི་ཕྱིར་མངོན་དུ་ཕྱོགས་པར་བྱའོ། །དེ་ཇི་ལྟར་འགྱུར་ཞེ་ན། འདོད་ཆགས་ལ་སོགས་པའི་བདེ་བ་ཐམས་ཅད་ཕུལ་བས་ཞེས་བྱ་བ་སྟེ། འདོད་ཆགས་ནི་རྡོ་རྗེ་སེམས་དཔའོ། །དེ་ལ་སོགས་པ་གང་ཡིན་པ་ནི། འདོད་ཆགས་ལ་སོགས་པའོ། །བདེ་བ་ཐམས་ཅད་ཅེས་བྱ་བ་ནི། རྡོ་རྗེ་ཡིད་
ལས་བྱུང་བ་ནས་བརྩམས་ཏེ། རྡོ་རྗེ་རོའི་མཐར་ཐུག་པའི་བར་གྱི་ལྷ་ཐམས་ཅད་ཀྱི་རྣམ་པར་ཐར་པའི་སྒོ་སྟེ། འདོད་ཆགས་དམ་ཚིག་ཅེས་སུ་བཤད། །ཅེས་བྱ་བ་ལ་སོགས་པས་བཤད་པའི་ཕྱིར་རོ། །དེ་རྣམས་ཕུལ་བ་ནི་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་ཐུགས་
རྡོ་རྗེ་ལས་བསྟབས་པའོ། །འདིས་ནི་དོན་འདི་སྐད་སྟོན་པར་འགྱུར་ཏེ། དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་རྣལ་འབྱོར་དུ་ཞུགས་ལ། དེ་མངོན་སུམ་བཞིན་དུ་བལྟས་ཏེ། འཇིག་རྟེན་གྱི་ཁམས་ཐམས་ཅད་རྡུལ་ཕྲ་རབ་དང་མཉམ་པ། དེ་བཞིན་གཤེགས་པ་རྡོ་རྗེ་སེམས་དཔའི་
ཆ་ལུགས་ཀྱིས་བཅུག་ལ། རྡོ་རྗེ་སེམས་དཔའི་དཀྱིལ་འཁོར་ཆེན་པོའི་ངོ་བོ་ཉིད་དུ་བྱས་ནས་ལས་དེ་ཡོངས་སུ་རྫོགས་པར་མཛད་པ་ལ་བརྩོན་པར་བྱའོ། །དེ་ལྟར་དེ་རྣམས་རྗེས་སུ་མཉེས་པར་བྱས་ནས། རྡོ་རྗེ་སེམས་དཔའི་བདེ་བ་དང་། ཡིད་བདེ་བ་ཐོབ་པར་འགྱུར་རོ། །རྡོ་རྗེ་འཛིན་པ་ཆེན་པོ་

59-1-122a

ཞེས་བྱ་བ་ལ། རྡོ་རྗེ་འཛིན་པ་ཆེན་པོ་ནི་རྡོ་རྗེ་སེམས་དཔའ་སྟེ། དེའི་རྣལ་འབྱོར་དེ་བཞིན་དུ་བྱས་ལ། དེ་རས་རིས་ལ་སོགས་པ་ལ་མདུན་དུ་བཞུགས་སུ་གསོལ་ཏེ། མཆོད་པ་ཐམས་ཅད་ཀྱིས་ཇི་ལྟ་བ་བཞིན་དུ་མཆོད་ལ། འཁྱུད་པ་དང་འོ་བྱེད་པ་ལ་སོགས་པའི་ཕྱག་རྒྱ་
གཉིས་པོ་རྒྱུད་ཕྱི་མ་ལས་གསུངས་པ་དག་གིས་ཡིད་ཀྱི་རྗེས་སུ་མཉེས་པར་བྱ་བའམ། དཔལ་ཁམས་གསུམ་རྣམ་པར་རྒྱལ་བའི་ཆོ་ག་ལས་གསུངས་པའི་སྦྱོར་བས་རྗེས་སུ་མཉེས་པར་བྱའོ། །དེ་སྐད་དུ། གཟུགས་དེ་ལ་ནི་ཞུགས་བཞིན་ནམ། །ཡིད་ཀྱིས་བཏུད་པ་ལྟ་བུ་དང་། །འཛུམ་
ཞིང་མིག་གཞན་མི་ལྟ་བས། །བཟླས་ན་རིང་པོར་མི་ཐོགས་འགྲུབ། །ཅེས་གསུངས་པའོ། །བྱང་ཆུབ་སེམས་དཔའ་ཐམས་ཅད་ནི་ཕྱག་ན་རྡོ་རྗེ་ལ་སོགས་པ་སྟེ། གང་གླེང་གཞིར་བཤད་པའོ། །དེ་རྣམས་མཉེས་པར་བྱ་བ་ནི་རྡོ་རྗེ་སེམས་དཔའི་སྦྱོར་བས་ཧཱུྃ་ཞེས་བྱ་བ་དཔག་ཏུ་མེད་པར་བཟླས་
པ་སྟེ། སྔ་མ་བཞིན་ནོ། །རྡོ་རྗེ་ཐམས་ཅད་ནི་རྡོ་རྗེ་ཡིད་ལས་བྱུང་བ་ལ་སོགས་པ་སྟེ། དེ་རྣམས་རྗེས་སུ་མཉེས་པར་བྱའོ། །ཇི་ལྟར་འགྱུར་ཞེ་ན། རང་གི་སྙིང་པོ་ལ་བཟླས་པས་སོ་ཞེས་བྱ་བ་སྟེ། དུམ་བུ་གཉིས་པའི་རྩ་བའི་རྒྱུད་ལས། གང་དེ་རྣམས་ཀྱི་སྙིང་པོ་གསུངས་པ་དང་། རྡོ་རྗེ་སེམས་
དཔའ་ལ་སོགས་པའི་རྒྱུད་གཞན་དག་ལས། ཛཿཧཱུྃ་བཾ་ཧོཿ། ཞེས་རང་གི་སྙིང་པོ་གསུངས་པ་གང་ཡིན་པ་དེ་བཟླས་པས་དེ་རྣམས་རྗེས་སུ་མཉེས་པར་འགྱུར་རོ། །ལྷ་ལ་སོགས་པའི་སེམས་ཅན་ཐམས་ཅད་རྗེས་སུ་ཆགས་པར་བྱ་བ་ལ་ནི། ཐམས་ཅད་དུ་བཟླས་བརྗོད་འབུམ་བྱས་པས་སོ་ཞེས་
བྱ་བ་ནི་འདོད་པའི་དབང་ཕྱུག་ལ་སོགས་པའི་ལྷ་རྣམས་བཀུག་ལ། བདག་ལ་བྱིན་གྱིས་བརླབ་པ་ལ་སོགས་པ་བྱས་ཏེ། ཧཱུྃ་ཞེས་བྱ་བ་དེ་རྗེས་སུ་དགའ་བར་བྱ་བའི་བསམས་པས། བཟླས་བརྗོད་འབུམ་བྱས་ན། དེ་ནས་དེ་དག་རྗེས་སུ་ཆགས་པར་སྒྲུབ་པ་པོ་ཅི་འདོད་པར་བྱེད་པར་འགྱུར་རོ། །གནོད་
སྦྱིན་མོ་ལ་སོགས་པ་རྣམས་ཀྱང་ཆུང་མ་ལ་སོགས་པའི་གཟུགས་ཀྱིས་ཉེ་བར་གནས་པར་འགྱུར་རོ། །བདག་བསྲུང་བ་ལ་སོགས་པ་ལ་ནི་ཡུངས་ཀར་ལ་ལན་ཅིག་གིས་སོ་ཞེས་བྱ་བ་ནི་ཡུངས་ཀར་ཧཱུྃ་ཞེས་བྱ་བས་རྡོ་རྗེ་རྩེ་ལྔ་པ་འབར་བ་རྣམ་པར་བསམས་ལ། རང་གི་མགོ་ལ་གཞག་སྟེ། རྡོ་རྗེ་

59-1-122b

འབར་བའི་ནང་དུ་བདག་ཉིད་ཆུད་པར་བྱས་པར་བསམས་ན་བདག་བསྲུང་བར་བྱས་པར་འགྱུར་རོ། །གཞན་བསྲུང་བ་ལ་ནི་རྡོ་རྗེ་བསྐོར་བས་སོ་ཞེས་བྱ་བ་ནི། དེ་བཞིན་དུ་བདག་ལ་བྱིན་གྱིས་བརླབ་པ་ལ་སོགས་པ་བྱས་ཏེ། གཡས་པའི་རྡོ་རྗེ་ཁུ་ཚུར་གྱིས་ཐོག་མའི་རྡོ་རྗེ་བླངས་ལ། གཞན་
གྱི་ཡན་ལག་དང་ཉིང་ལག་རྣམས་སུ་རྡོ་རྗེར་བྱ་བའི་བསམ་པས། ཧཱུྃ་ཞེས་བྱ་བཟློས་ཤིང་བསྐོར་བར་བྱ་སྟེ། དེས་ནི་གཞན་བསྲུང་བ་བྱས་པར་འགྱུར་རོ། །ཐམས་ཅད་དུ་ཡང་ཧཱུྃ་ཞེས་བྱ་བ་བཟླས་ལ། བདག་ལ་བྱིན་གྱིས་བརླབ་པ་ལ་སོགས་པ་བྱས་ཏེ། ལས་བྱ་བ་ཡིན་པར་ཤེས་པར་བྱའོ། །
ཐམས་ཅད་བསྲུང་བ་ལ་ནི་ཡིད་ཀྱིས་ལན་ཅིག་གོ་ཞེས་བྱ་བ་ལ་ནི། གྲོང་ལ་སོགས་པ་བསྲུང་བ་ལ་ནི་ཡིད་ཀྱིས་ཧཱུྃ་ཞེས་བྱ་བཟློས་ཤིང་ཕྱོགས་བཅིང་བ་ལ་སོགས་པ་བྱའོ། །མཚམས་དང་ཕྱོགས་དང་དཀྱིལ་འཁོར་ཐམས་ཅད་བཅིང་བ་ལ་ནི་བལྟ་བའམ་ཞེས་བྱ་བ་ནི་ཧཱུྃ་ཞེས་བྱ་བས་མིག་
གཉིས་སུ་རྡོ་རྗེ་བསམས་ལ། བལྟས་པས་མཚམས་བཅིང་བ་ལ་སོགས་པ་བྱའོ། །ཡུངས་ཀར་ལ་སོགས་པས་སོ་ཞེས་བྱ་བ་ནི། ཧཱུྃ་ཞེས་བྱ་བས་ཡུངས་ཀར་རྡོ་རྗེའི་རྣམ་པར་བསམས་ལ་དེས་ཕྱོགས་བཅིང་བ་ལ་སོགས་པ་བྱ་སྟེ། དེ་བཞིན་དུ་ཆུ་དང་ཐལ་བ་ལ་སོགས་པས་ཀྱང་བྱའོ། །
སེམས་ཅན་ཐམས་ཅད་རེངས་པར་བྱ་བ་ལ་ནི་དབུགས་མི་འབྱིན་པས་བཟློས་པས་སོ་ཞེས་བྱ་བ་ནི། སེང་གེ་ལ་སོགས་པའི་སྟེང་དུ་རྡོ་རྗེ་སེམས་དཔའ་རང་གི་ལུས་ཕྱུང་ལ། དབུགས་མི་འབྱུང་བའི་སྦྱོར་བས་གཞན་མི་གཡོ་བར་བྱས་པར་འགྱུར་རོ། །སེམས་ཅན་ཐམས་ཅད་རྨུགས་
པར་བྱ་བ་ལ་ནི་རྡོ་རྗེ་འཚིར་བས་སོ་ཞེས་བྱ་བས་ནི་རྡོ་རྗེ་བསྡམས་པས། རྡོ་རྗེ་བླངས་ལ་བསྒྲུབ་པར་བྱ་བའི་ལྕེ་འཚིར་བའི་བསམ་པས་བཙིར་བར་བྱ་སྟེ། དེས་ནི་ལྐུགས་པར་འགྱུར་ཏེ། ཚིག་འཕྲོག་པར་འགྱུར་ཞེས་བྱ་བའི་དོན་ཏོ། །སེམས་ཅན་ཐམས་ཅད་རྨོངས་པར་བྱ་བ་ལ་ནི་མིག་
བཙུམས་ནས་བཟླས་པས་སོ་ཞེས་བྱ་བ་ནི་བསྒྲུབ་པར་བྱ་བ་དང་། ལྷན་ཅིག་ཏུ་བྱས་ལ་ཡིད་ཀྱིས་མིག་བཙུམས་ནས་བཟླས་ན་དེས་མི་རྨོངས་པར་བྱས་པར་འགྱུར་རོ། །ཐམས་ཅད་བསད་པ་ལ་ནི་རྡོ་རྗེ་དྲིལ་བུས་སོ་ཞེས་བྱ་བས་ནི་ལག་པ་གཡས་པས་དང་། གཡོན་དུ་ཧཱུྃ་ཞེས་བྱ་བས་

59-1-123a

རྡོ་རྗེ་གཉིས་བསམས་ལ། ལག་པ་གཡོན་པའི་རྡོ་རྗེ་ལ་བསྒྲུབ་པར་བྱ་བའི་མིང་བློས་བསམས་ལ། ལག་པ་གཡས་པའི་རྡོ་རྗེ་བསྒྲུབ་པར་བྱ་བ་གསད་པའི་བསམ་པས་བསྣུན་ན། དེས་ནི་ཐམས་ཅད་གསོད་པར་འགྱུར་རོ། །སེམས་ཅན་ཐམས་ཅད་རྒྱས་བཏབ་པ་
ལ་ནི་རྡོ་རྗེ་མཁའ་འགྲོ་མའི་ཕྱག་རྒྱས་སོ་ཞེས་བྱ་བ་ནི་ཁྲོ་བོའི་ཁུ་ཚུར་གཉིས་ཀྱིས་གར་བྱས་ལ། བསྟོད་པ་དང་བཅས་པས་མདའ་འཕེན་པ་ནི་རྡོ་རྗེ་མཁའ་འགྲོ་མའི་ཕྱག་རྒྱ་ཡིན་ལ། འདིས་བསྒྲུབ་པར་བྱ་བའི་སྙིང་ཀར་བསྣུན་པར་བྱ་སྟེ། འདིས་ནི་རྒྱས་བཏབ་པར་བྱའོ། །རྒྱས་བཏབ་
པར་གྱུར་པ་ལ་ནི་མཚན་མ་འདི་དག་འབྱུང་བར་འགྱུར་ཏེ། མིག་འཛུམ་པར་འགྱུར་བ་དང་། སྟེང་དུ་ལྟ་བ་དང་། ལྐུགས་པ་བཞིན་དུ་འདུག་པ་དང་། རླུང་ལྟར་དབུགས་འབྱིན་པ་དང་། སྦྲུལ་ལྟར་འཁྲིལ་བ་དང་། རོ་ལྟར་ཅི་ཡང་མི་སྨྲ་བ་དང་། ལྷ་ལ་སོགས་པའི་ཕྱག་རྒྱ་སྟོན་པ་དང་། སོར་
མོ་རྣམས་བགྲང་བ་དང་། མིག་མི་འཛུམ་པར་ལྟ་བ་དང་། འཆི་མ་གློགས་པ་དང་། རིམས་དང་བཅས་པར་འགྱུར་བ་དང་། འདར་ཞིང་གཡོ་བ་དང་། རྣམ་པར་འགྱུར་བ་དང་། འཚིག་པར་འགྱུར་བ་དང་། སྲེག་པར་འགྱུར་བ་དང་། རྨོངས་པར་འགྱུར་བ་དང་། འཁྲུག་པར་འགྱུར་བ་དང་། 
འཁྲིལ་བར་འགྱུར་བ་དང་། རྡུལ་བར་འགྱུར་བ་དང་། མངོན་པར་བལྟ་བར་འགྱུར་རོ། །སྙིང་ཐམས་ཅད་འདྲེན་ཅིང་འབྱིན་པ་ལ་ནི་ཡིད་ཀྱིས་བཟླས་པས་སོ་ཞེས་བྱ་བ་ནི་ལྷའི་སྦྱོར་བས་ཡིད་ཀྱིས་བསྒྲུབ་པར་བྱ་བའི་ལུས་ལ་ཞུགས་ལ། དེའི་སྙིང་གའི་པདྨ་བྱུང་སྟེ་བླངས་ལ། རང་གི་སྙིང་ལ་
གཞག་ལ་གཅིག་ཏུ་གྱུར་པར་བསམས་ཏེ། དེས་ནི་ཐམས་ཅད་ཀྱི་སྙིང་འདྲེན་ཅིང་འབྱིན་པར་འགྱུར་རོ། །སེམས་ཅན་ཐམས་ཅད་ཟབ་ལ་ནི་བལྡད་ཅིང་མྱུར་བར་ཟློས་པས་སོ་ཞེས་བྱ་བས་ནི་བདག་ཉིད་རྡོ་རྗེ་ཁྲོ་བོའི་ཁ་ནམ་མཁའ་དང་མཉམ་པ། མཆེ་བ་གཙིགས་པ་རྣམ་པར་བསམས་ལ། བསྒྲུབ་པར་བྱ་བ་
ཁས་བླངས་ལ་བལྡད་ཅིང་བཟླས་ན་མྱུར་བར་དེ་ཟོས་པར་འགྱུར་རོ། །ཐམས་ཅད་སྐྲག་པར་བྱ་བ་ལ་ནི་རྡོ་རྗེ་འཇིགས་བྱེད་ཀྱི་ཕྱག་རྒྱས་སོ་ཞེས་བྱ་བ་ནི་སེམས་ཅན་ཐམས་ཅད་འཇིགས་པར་བྱ་བ་ནི་སྐྲག་པར་བྱ་བས་སོ། །དེ་ཡང་གར་ལས་བྱུང་བའི་རྡོ་རྗེ་ཁུ་ཚུར་གཉིས་བཅིངས་ལ་ཁ་ཕྱེ་སྟེ། གདོང་

59-1-123b

ཤིན་ཏུ་འཇིགས་པ་དང་། སྐྲ་གྱེན་དུ་བརྫེས་པ་དང་། འོག་ནས་མགོ་འདེགས་པས་སོ་ཞེས་བྱ་བ་སྨྲ་བར་བྱེད་པ་འདི་ནི། རྡོ་རྗེ་འཇིགས་བྱེད་ཀྱི་ཕྱག་རྒྱ་སྟེ། འདིས་སེམས་ཅན་ཐམས་ཅད་སྐྲག་པར་བྱའོ། །ནོར་ཐམས་ཅད་འགུགས་པ་ལ་ནི་གསེར་གྱི་བཟླས་པས་སོ་ཞེས་བྱ་བས་ནི་དོང་རྩེ་
འགུགས་པའི་ཚུལ་གྱིས་བཟླས་བརྗོད་བྱས་ན། དེས་ནི་ནོར་ཐམས་ཅད་འགུགས་པར་འགྱུར་རོ། །ནོར་དང་འབྲུ་ཐམས་ཅད་འགུགས་པ་ལ་ནི་རྡོ་རྗེ་རྣལ་འབྱོར་མའི་ཕྱག་རྒྱས་སོ་ཞེས་བྱ་བ་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱ་ལས་ལག་པ་གཡས་པའི་ཡང་མཛུབ་མོ་བསྒྲེང་
ལ་གཡོན་པའི་ཡི་གེ་ཧཱུྃ་དང་སྡིགས་མཛུབ་བྱ་བའི་ཚུལ་གྱིས་འདྲེན་པ་ནི། རྡོ་རྗེ་རྣལ་འབྱོར་མའི་ཕྱག་རྒྱ་སྟེ། འདིས་ནི་ནོར་དང་འབྲུ་ཐམས་ཅད་འགུགས་པར་འགྱུར་རོ། །ཐམས་ཅད་རྗེས་སུ་ཆགས་པར་བྱ་བ་ལ་ནི་པི་ཝང་བརྡུང་བ་དང་བཅས་པའི་ཀ་ཀ་ལེའི་གླུ་ལེན་པས་བཟླས་བརྗོད་
བྱའོ་ཞེས་བྱ་བ་ལ། དེ་བཞིན་གཤེགས་པ་ལ་སོགས་པ་དང་། སེམས་ཅན་ཐམས་ཅད་རྗེས་སུ་ཆགས་པར་བྱ་བ་ནི་ཐམས་ཅད་རྗེས་སུ་ཆགས་པར་བྱ་བ་སྟེ། རྡོ་རྗེ་སྒྲ་དང་ཕྱག་རྒྱ་ཆེན་པོས་བྱའོ། །ཐམས་ཅད་འབིགས་ཤིང་རྗེས་སུ་ཆགས་པར་བྱ་བ་ལ་ནི་རྡོ་རྗེ་མདའི་ཕྱག་རྒྱས་སོ་ཞེས་བྱ་བ་
ལ། རྣམ་པར་འཇོམས་པ་ཞེས་བྱ་བ་ནི་འབིགས་པའོ། །ཡིད་བདེ་བ་བསྐྱེད་པ་ནི་རྗེས་སུ་ཆགས་པར་བྱ་སྟེ། རྡོ་རྗེ་ཡིད་ལས་བྱུང་བའི་ལས་ཀྱི་ཕྱག་རྒྱ་ནི་རྡོ་རྗེ་མདའི་ཕྱག་རྒྱ་སྟེ། དེས་ཐམས་ཅད་འབིགས་པ་དང་། རྗེས་སུ་ཆགས་པར་འགྱུར་རོ། །ཐམས་ཅད་དགའ་བར་བྱ་བ་ལ་ནི་ཕྱོགས་
ཐམས་ཅད་ཀྱི་དེ་བཞིན་གཤེགས་པ་མཉེས་པའོ་ཞེས་བྱ་བ་ནི་དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་ནི་ཐམས་ཅད་དེ། དེ་དགའ་བར་བྱ་བ་ནི་བསྒྲུབ་པར་བྱ་ཞིང་རང་དབང་དུ་བྱ་བ་སྟེ། ཀཱི་ལི་ཀཱི་ལའི་རྡོ་རྗེ་ཕྱག་རྒྱ་བཅིངས་ལ་དེས་ཕྱོགས་བཅུར་དེ་
བཞིན་གཤེགས་པ་ཐམས་ཅད་བྲིས་ལ། ཡིད་ཀྱིས་བཟླས་བརྗོད་བྱ་སྟེ་དེས་ནི་ཐམས་ཅད་མཉེས་པར་འགྱུར་རོ། །སྡུག་པའི་བཅིང་བ་བརྟན་པར་བྱ་བ་ལ་ནི་སྙིང་བརྟན་པར་ངེས་པར་བཙིར་བས་སོ་ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པས་སེམས་ཅན་ཐམས་ཅད་འཁོར་བ་ཇི་སྲིད་

59-1-124a

པར་ཡོངས་སུ་མི་གཏོང་བའི་ཆགས་པ་ནི་སྡུག་པ་བརྟན་པའོ། །དེས་འཆིང་བ་ནི་དམ་པོར་བཟུང་བ་སྟེ། སྡུག་པ་ནི་རྡོ་རྗེའི་ཕྱག་རྒྱ་བཅིངས་ལ་བརྟན་པའི་འཁྲུལ་འཁོར་བཙིར་བ་དེས་ནི་སྙིང་བཙིར་བས་དེ་རྫོགས་པར་འགྱུར་རོ། །མ་རུངས་པ་རབ་ཏུ་བསྒྲུབ་པ་ལ་ནི་རྡོ་རྗེ་
སྙེམས་མས་སོ་ཞེས་བྱ་བ་ནི་རྡོ་རྗེ་སྙེམས་མའི་ཕྱག་རྒྱ་ནི་རྡོ་རྗེ་སྙེམས་མ་སྟེ། དེས་མ་རུངས་པ་རྣམས་རབ་ཏུ་སྒྲུབ་པར་བྱེད་པར་འགྱུར་རོ། །འདི་སྐད་སྟོན་པར་འགྱུར་ཏེ། མ་རུངས་པ་རྣམས་ལ་བལྟས་ལ་རྡོ་རྗེ་སྙེམས་མའི་ལས་ཀྱི་ཕྱག་རྒྱ་བཅིངས་ནས། ཡིད་ཀྱིས་བསྒྲུབ་པར་བྱ་བའི་
ལུས་ལ་ཞུགས་ཏེ། བདག་ཉིད་དེ་དང་ལྷན་ཅིག་ཏུ་གྱུར་པར་བསམས་ལ། མགོ་གཡོན་དུ་བཏུད་དེ། བསྒྲུབ་པར་བྱ་བ་འདུད་པར་བྱེད་པའི་བསམ་པས་གདུད་དེ། དེས་ནི་དེ་ལྟུང་བར་བྱས་པར་འགྱུར་ཞིང་། དྲེགས་པ་འཕྲོག་པར་འགྱུར་རོ། །རྒྱན་ཐམས་ཅད་ཅེས་བྱ་བ་ནི་གོ་བར་ཟད་དོ། །
དེ་རྣམས་དབྲོག་པ་ནི་འབར་བའི་ལྟ་བས་དབྲོག་པས་སོ་ཞེས་བྱ་བ་ནི། རབ་ཏུ་མྱུར་བར་གཡོ་བའི་མིག །མིག་གི་རྫི་མ་འདྲེན་པ་ནི། །འབར་བའི་ལྟ་བ་ཞེས་གྲགས་ཏེ། །འགྲོ་བ་ཐམས་ཅད་འགུགས་པའོ། །ཞེས་བྱ་བ་ནི་འབར་བའི་ལྟ་བའི་མཚན་ཉིད་དེ། དེ་དབྲོག་པ་ནི་འགུགས་པ་སྟེ། འབར་
བའི་ལྟ་བས་དབྲོག་པའོ། །ཐམས་ཅད་ཡིད་ཚིམ་པ་ཞེས་བྱ་བ་ནི་བདེ་བ་བསྐྱེད་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་ཁུ་ཚུར་གཉིས་སྙིང་གར་བཞག་པས་གོ་ཞེས་བྱ་བ་གསུངས་ཏེ། དམ་ཚིག་རྡོ་རྗེའི་ཁུ་ཚུར་བཅིངས་ལ་སྙིང་གའི་ཕྱོགས་སུ་བཞག་སྟེ། དེས་ནི་ཐམས་ཅད་ཡིད་ཚིམ་པར་
འགྱུར་རོ། །མུན་པ་སྣང་བར་བྱ་བ་ལ་ནི། རྡོ་རྗེ་ཁ་ཤར་དུ་བལྟས་ཏེ་བསྐོར་བས་སོ་ཞེས་བྱ་བ་ནི། དང་པོའི་རྡོ་རྗེ་བླངས་ལ་འོད་ཟེར་འབར་བ་གཏོང་བའི་ཚུལ་གྱིས་ཤར་ཕྱོགས་སུ་བལྟས་ལ། བསྐོར་ན་མུན་པ་མུན་ནག་སྣང་བར་བྱེད་དོ། །ལུས་བདེ་བར་བྱ་བ་ལ་ནི་རང་གི་མཚན་གྱིས་བཟླས་པས་སོ། །
ཞེས་བྱ་བ་ནི་རྡོ་རྗེ་བསྡམས་པས་རང་གི་མཚན་བཟུང་ལ། ལུས་ཀྱི་སྡུག་བསྔལ་གཞིག་པར་བྱ་བའི་ཕྱིར་བཟླས་བརྗོད་བྱ་སྟེ། དེས་ལུས་བདེ་བའི་རྒྱུར་འགྱུར་ཏེ། གཡོགས་ནས་བྱའོ་ཞེས་བཅོམ་ལྡན་འདས་ཀྱིས་གསུངས་སོ། །གཟུགས་ཐམས་ཅད་སྣང་བར་བྱ་བ་ལ་ནི། རྡོ་རྗེ་གཟུགས་ཀྱི་མཆོག་

59-1-124b

གིས་ཕྱག་རྒྱས་སོ་ཞེས་བྱ་བ་ནི། དེ་བཞིན་གཤེགས་པ་ལ་སོགས་པ་གཟུགས་ཐམས་ཅད་ཡང་དག་པར་སྟོན་པའི་བསམ་པ་གར་ལས་བྱུང་བའི་རྡོ་རྗེ་བསྡམས་པ་བཅིངས་ལ། གཡོན་པའི་མཛུབ་མོ་ལྕགས་ཀྱུས་གཡས་པའི་གུང་མོའི་རྩེ་མོ་འཁྱུད། གཡས་པའི་མཛུབ་མོའི་
ལྕགས་ཀྱུས་གཡོན་པའི་གུང་མོའི་རྩེ་མོ་འཁྱུད། མཐེ་བོང་གཉིས་རང་རང་གི་མཛུབ་མོ་དང་རྩེ་སྦྱར་ལ་མཐེའུ་ཆུང་གཉིས་སྦྱར་ཏེ་བརྐྱང་བ་འདི་ནི་རྡོ་རྗེ་གཟུགས་ཀྱི་མཆོག་སྟེ། འདིས་གཟུགས་ཐམས་ཅད་ཡང་དག་པར་སྟོན་པར་འགྱུར་རོ། །སྒྲ་ཐམས་ཅད་ནི་དེ་བཞིན་གཤེགས་པ་ལ་
སོགས་པའི་སྒྲའོ། །དེ་ཐོས་པར་བྱ་བ་ལ་ནི་ཞེས་བྱ་བ་ནི་གཞན་རྣམས་ཀྱིས་ཐོས་པར་བྱ་བའོ། །དེ་ཇི་ལྟར་འགྱུར་ཞེ་ན། རྡོ་རྗེ་པི་ཝང་གིས་སོ་ཞེས་བྱ་བ་སྟེ། གར་ལས་བྱུང་བའི་རྡོ་རྗེ་བསྡམས་པ་ལས་གཡོན་པའི་མཛུབ་མོ་བཀུག་པ་ནི་ཡུ་བ་སྟེ། གཡས་པའི་མཛུབ་མོས་བརྡུངས་ལ། 
འདི་དང་སྒྲ་རྣམས་བྲག་ཅ་ལྟ་བུར་བསྒོམས་པས་སྒྲ་ཐམས་ཅད་འབྱུང་བར་འགྱུར་ཏེ། འདི་ནི་རྡོ་རྗེ་པི་ཝང་ངོ་། །དྲི་ཞིམ་པོ་སྣ་ཚོགས་པའི་ཕྱིར་ན། སྣའི་དབུགས་འབྱིན་པའི་གླུ་ཡིས་སོ་ཞེས་བྱ་བ་ནི། དེ་བཞིན་གཤེགས་པ་ལ་སོགས་པའི་དྲི་ཞིམ་པོ་རྣམས་སྣ་ཚོགས་པ་བསྐྱེད་པའི་དབུགས་
འབྱིན་པ་དང་། ཧཱུྃ་ཞེས་པའི་གླུའི་བཟླས་པས། དེ་བསྐྱེད་པའི་བསམ་པའི་དབང་གིས་འབྱུང་བར་འགྱུར་རོ། །ཟས་དང་སྐོམ་ཐམས་ཅད་ཅེས་བྱ་བ་ལ་སོགས་པ་ལ། རྫས་ཐམས་ཅད་རྡོ་རྗེ་བསྡམས་པས་བཅིང་ཞིང་ཡིད་ཀྱིས་བླངས་ལ། མངོན་པར་འདོད་པའི་གནས་སུ་གཞག་པར་བྱ་སྟེ། 
དེ་ལྟར་ན་རྡོ་རྗེ་སྤྲོ་བ་བྱས་པར་འགྱུར་རོ། །དབབ་པ་ཐམས་ཅད་ནི་ཞེས་པ་ལ་སོགས་པ་ལ། ལག་པ་གཉིས་ཀྱིས་སེ་གོལ་རྡེབས་ཤིང་བཅོམ་ལྡན་འདས་རྡོ་རྗེ་སེམས་དཔའ་འོད་ཟེར་འབར་བས་ཀུན་ནས་འཁྲིགས་པས་བསྒྲུབ་པར་བྱ་བ་ཀུན་དུ་གང་བར་བསམ་ཞིང་། ཧཱུྃ་ཞེས་བྱ་བའི་གླུ་བླང་བར་
བྱ་སྟེ། དེས་ནི་པྲ་སེ་ན་ལ་སོགས་པ་དབབ་པ་ཐམས་ཅད་བྱེད་པར་འགྱུར་རོ། །ཐམས་ཅད་གར་བྱེད་དུ་གཞུག་པ་ལ་ནི་ཞེས་བྱ་བ་ལ་སོགས་པ་ལ་བསྒྲུབ་པར་བྱ་བའི་ལུས་ལ་ཡིད་ཀྱིས་ཞུགས་པའི་བསྒྲུབ་པར་བྱ་བ་གར་བྱེད་པའི་བསམ་པས་བདག་ཉིད་གར་བྱེད་ཅིང་། ཧཱུྃ་ཞེས་བྱ་བ་བཟླས་

59-1-125a

ན། དེས་ན་ཐམས་ཅད་གར་བྱེད་དུ་འཛུད་པར་འགྱུར་རོ། །ཐམས་ཅད་གླུ་ལེན་དུ་གཞུག་པ་ལ་ནི་ཞེས་བྱ་བ་ལ་སོགས་པ་ལ། རྒྱུ་བ་དང་མི་རྒྱུ་བའི་དངོས་པོ་ཐམས་ཅད་ལ་ཧཱུྃ་ཞེས་བྱ་བའི་གླུ་ལ་སོགས་པའི་གྲེ་འགྱུར་ཐམས་ཅད་འབྱུང་བར་བསམས་ལ། དེ་རྫོགས་པར་བྱ་བའི་
བསམ་པས་ལྕེ་བསྐྱོད་ཅིང་བཟླས་བརྗོད་བྱ་སྟེ། དེས་ནི་ཐམས་ཅད་གླུ་ལེན་དུ་འཛུད་པར་འགྱུར་རོ། །ཐམས་ཅད་སྨྲར་འཇུག་པ་ནི་རྡོ་རྗེ་ཆུ་ཡིས་སོ་ཞེས་བྱ་བ་ནི། ཐམས་ཅད་བབས་པས་ཡི་གེ་ཧཱུྃ་ཞེས་བྱ་བ་དང་། སྤོས་ཆུའི་རྡུལ་ཕྲ་རབ་རྡོ་རྗེ་སྨྲ་བ་ལྟ་བུར་རྣམ་པར་བསམས་ལ། མངོན་པར་
བཟླས་ཏེ། ཁར་བླུད་ན་དེས་ནི་ཐམས་ཅད་སྨྲར་འཛུད་པར་འགྱུར་རོ། །ཐམས་ཅད་བབས་ནས་ཞེས་བྱ་བ་ལ་སོགས་པ་ལ། གདོན་ལ་སོགས་པ་ཐམས་ཅད་ཞུགས་ནས་དེ་རྣམས་ཀྱིས་མངོན་པར་འདོད་པའི་དངོས་པོ་རྣམས་སྟོན་ཅིང་དྲིས་པའི་ལན་སྟོན་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་
འབེབས་པས་སོ་ཞེས་བྱ་བ་གསུངས་ཏེ་། དམ་ཚིག་རྡོ་རྗེ་འབེབས་པས་སོ་ཞེས་བྱ་བའི་དོན་ཏོ། །འདི་སྐད་སྟོན་པར་འགྱུར་ཏེ། བབས་པར་གྱུར་པ་དང་། ལྕེ་ལ་ཧཱུྃ་ཞེས་བྱ་བ་ལས་རྡོ་རྗེ་བསམས་ཏེ། དེའི་སྟེང་དུ་ཧཱུྃ་ཨ་ཞེས་བྱ་བ་འོད་ཟེར་འབར་བ་འཁྲིགས་པ་བཀོད་ལ། རྡོ་རྗེ་འབེབས་པའི་དམ་ཚིག་གི་
ཕྱག་རྒྱ་སྟོན་པར་རྣམ་པར་བསམས་ནས། ཧཱུྃ་ཨ་ཞེས་བྱ་བ་བཟླས་བརྗོད་བྱའོ། །གདོན་ཐམས་ཅད་ལས་ཐར་བར་བྱ་བ་ལ་ནི་རྡོ་རྗེ་མའི་ཕྱག་རྒྱས་སོ་ཞེས་བྱ་བ་ལ། སྲིན་པོ་ལ་སོགས་པའི་གདོན་ཐམས་ཅད་ལས་ཐར་བར་བྱ་བ་ལ་ནི། གར་ལས་བྱུང་བའི་བདན་གསུམ་པའི་ཕྱག་རྒྱ་གཉིས་བྱས་
ལ། མཐེའུ་ཆུང་གཉིས་གཤིབས་ལ་མཛུབ་མོ་གཉིས་གཤིབས་པ་མཛུབ་མོ་རྡོ་རྗེར་བྱ། གུང་མོ་གཉིས་མདུད་དེ་བཟློག་ནས་དབང་བསྐུར་བའི་གནས་སུ་མཛུབ་མོ་རྩེ་སྦྱར་བར་བཞག་ནས། ཧཱུྃ་མུ་ཞེས་བརྗོད་ལ། ཁྲོས་ཤིང་གདོང་མཆེ་བ་གཙིགས་པ་འོད་ཟེར་འབར་བས་ཀུན་དུ་འཁྲིགས་
པའི་བཅོམ་ལྡན་འདས་རྡོ་རྗེ་སེམས་དཔའ་བསྒྲུབ་པར་བྱ་བའི་སྟེང་དུ་བསམས་ལ། དེས་ཀྱང་དེའི་མགོ་བོ་ནས་བརྩམས་ཏེ། རྐང་པའི་མཐར་ཐུག་གི་བར་དུ་བསྒྲུབ་པར་བྱ་བའི་ལུས་ལ་ཁྱབ་པར་བསམ་པར་བྱ་སྟེ། དེས་ནི་གདོན་ཐམས་ཅད་ལས་ཐར་བར་འགྱུར་ཏེ། འདི་ནི་རྡོ་རྗེ་མུའི་ཕྱག་རྒྱའོ། །

59-1-125b

གདོན་ཐམས་ཅད་ཅེས་བྱ་བ་ལ་སོགས་པ་ལ། སྲིན་པོ་ལ་སོགས་པའི་གདོན་ཐམས་ཅད་ཀྱིས་སེམས་ཅན་འགའ་ཞིག་འཛིན་པར་བྱ་བར་འདོད་ན། དེའི་ཚེ་ཚོགས་ཀྱི་བདག་པོའི་གཟུགས་བརྙན་མདུན་དུ་བཞག་ལ། དེར་ཚོགས་ཀྱི་བདག་པོ་བཀུག་ཅིང་བཅུག་ལ་དབང་དུ་བྱ་སྟེ། སྔ་མ་བཞིན་དུ་
རབ་ཏུ་བསྒྲུབས་ལ་དབང་བསྐུར་ཏེ་ལེགས་པར་མཆོད་ལ། ཁྲོས་པས་རྡོ་རྗེ་གསོར་ཞིང་བཟླས་ནས། ཆེ་གེ་མོ་གདོན་གྱིས་ཟིན་དུ་ཆུག་ཤིག །ཧཱུྃ་ཞེས་བསྐུལ་ན། དེའི་ཚེ་དེ་གདོན་གྱིས་ཟིན་པར་འགྱུར་རོ། །རིམས་ཐམས་ཅད་འཛིན་དུ་འཇུག་པ་ལ་ནི་རྡོ་རྗེ་རིམས་ཀྱི་གདོན་གྱིས་སོ་ཞེས་བྱ་བ་
ལ། ཉིན་གཅིག་པ་ལ་སོགས་པའི་རིམས་བརྒྱད་ནི་རིམས་ཐམས་ཅད་དེ། གང་གི་ཚེ་དེས་སེམས་ཅན་འགའ་ཞིག་ཟིན་པར་འདོད་ན། དེའི་ཚེ་ཧཱུྃ་ཞེས་བྱ་བཟློས་ཤིང་རྡོ་རྗེ་བཅིངས་ནས། ནམ་མཁའ་ལས་རིམས་བླངས་ལ། བསྒྲུབ་པར་བྱ་བའི་སྙིང་གར་སྦྱོར་བ་འདིས་རིམས་གཞུག་པར་བྱ་
སྟེ། རྡོ་རྗེ་བསྡམས་པ་བརྐྱང་ལ་སྙིང་འདར་བར་བྱ་སྟེ། དེ་ནས་རིམས་ཀྱིས་འཛིན་པར་འགྱུར་རོ། །རིམས་ཐམས་ཅད་བསལ་བ་ལ་ནི་རྡོ་རྗེའི་ལྟ་བས་བསལ་བའོ་ཞེས་བྱ་བ་ལ། རྡོ་རྗེའི་ལྟ་བ་ནི་ཆགས་ཤིང་རབ་ཏུ་གདངས་པའི་མིག་ཅེས་བྱ་བ་ནི་རྡོ་རྗེ་ལྟ་བའི་མཚན་ཉིད་དོ། །དེས་བྱབས་
པས་རིམས་ཐམས་ཅད་སེལ་ནུས་པར་འགྱུར་རོ། །འདི་སྐད་སྟོན་པར་འགྱུར་ཏེ། ཇི་སྐད་དུ་གསུངས་པའི་རྡོ་རྗེ་སེམས་དཔའི་སྦྱོར་བ་བྱས་ལ་མིག་གཡས་པར་མ་ལས་ཉི་མའི་དཀྱིལ་འཁོར། གཡོན་པར་ཨ་མེད་པའི་ཡི་གེ་ཊ་ལས་ཟླ་བའི་དཀྱིལ་འཁོར། ཡང་ཡི་གེ་ཧཱུྃ་ལས་མིག་གཉིས་སུ་རྡོ་རྗེ་
གཉིས་བསམས་ལ། དེ་དང་ཧཱུྃ་ཞེས་བྱ་བཟློས་ཤིང་བསྒྲུབ་པར་བྱ་བའི་སྤྱི་བོ་ནས་བརྩམས་ཏེ། བྱབས་ལ་མིག་གཉིས་ལས་བྱུང་བའི་རྡོ་རྗེའི་འོད་ཟེར་རྣམས་ཀྱིས་རིམས་ལ་བསྣུན་པར་བྱས་ན། དེས་ནི་རིམས་ཐམས་ཅད་བསལ་ནུས་པར་འགྱུར་རོ། །དུག་ཐམས་ཅད་སྦར་བ་ལ་ནི་ཞེས་བྱ་བ་ལ། རྒྱུ་
བ་དང་མི་རྒྱུ་བའི་དུག་ཐམས་ཅད་བེམས་པོར་གྱུར་པ་རྣམས་ལ། བེམས་པོ་མ་ཡིན་པར་བྱ་ཞིང་། རང་གི་ནུས་པ་བསྐྱེད་པར་བྱ་བ་ནི་སྦར་བའོ། །དེ་ཇི་ལྟར་བྱ་ཞེ་ན། རྡོ་རྗེ་ལྟ་བུའི་དུག་གི་ཕྱག་རྒྱས་སོ་ཞེས་བྱ་བ་ནི་ཁྲོས་ཤིང་མིག་མི་འཛུམས་པའི་ལྟ་བས་ལྟ་བ་འདི་ནི་རྡོ་རྗེའི་ལྟ་བ་སྟེ། འདིས་དུག་

59-1-126a

ཐམས་ཅད་འབར་བར་བྱེད་པར་འགྱུར་རོ། །འདིས་ནི་དོན་འདི་སྐད་དུ་སྟོན་པར་འགྱུར་ཏེ། ཁྲོས་པའི་དཔལ་རྡོ་རྗེ་སེམས་དཔའ་རང་ཉིད་ཇི་ལྟ་བ་བཞིན་དུ་བསམས་ལ། ཧཱུྃ་ཞེས་བྱ་བ་ལས་མིག་གཉིས་སུ་ལྟ་བའི་དུག་ཅན་གྱི་ཁྲོ་བོ་གཉིས་འབར་བའི་འོད་རྣམ་པར་འཁྲུགས་པ་
བསྐྱེད་ལ། ལྟ་བ་དེས་འབར་བ་ནི་དུག་མེ་དང་རླུང་གི་དཀྱིལ་འཁོར་ལ་བསམས་ནས། ཧཱུྃ་ཞེས་བྱ་བཟློས་ཤིང་སྦར་བར་བྱའོ། །དུག་ཐམས་ཅད་གཞིག་པ་ལ་ནི་རྨ་བྱའི་སྒྲོའི་ཆུན་པོས་སོ་ཞེས་བྱ་བ་ནི་རང་གི་ལྷའི་རྣལ་འབྱོར་ཇི་ལྟ་བ་བཞིན་བྱས་ལ། རྨ་བྱའི་ཆུན་པོ་ལ་ཟླ་བའི་དཀྱིལ་འཁོར་གྱི་སྟེང་དུ་
དཔལ་རྡོ་རྗེ་སེམས་དཔའ་ཟླ་བའི་མདོག་ཅན་ཉིད་ཀྱི་དབུ་ལས་བྱུང་བའི་བདུད་རྩིའི་ཆུ་རྒྱུན་དགུས་ཕྱོགས་བཅུ་ཐམས་ཅད་ཀུན་དུ་གང་བར་བསམས་ལ། ཆུན་པོ་དེས་བསྒྲུབ་པར་བྱ་བའི་ལུས་ལ་བྱབ་པར་བྱ་ཞིང་། དེས་ཀྱང་བཅོམ་ལྡན་འདས་དུག་ཐམས་ཅད་རྣམ་པར་གཡེང་བར་བྱེད་པས་བསྒྲུབ་
པར་བྱ་བའི་ལུས་བཀྲུས་པར་གྱུར་པར་བསམས་ལ། དེས་ནི་དུག་ཐམས་ཅད་འཇིག་པར་འགྱུར་རོ། །དུག་ཐམས་ཅད་བཟའ་བར་བྱ་བ་ལ་ནི་རྡོ་རྗེ་བདུད་རྩིའི་ཕྱག་རྒྱས་སོ་ཞེས་བྱ་བ་ནི། དང་པོའི་རྡོ་རྗེ་ལས་མཛུབ་མོ་གཉིས་སྦྱར་ཏེ། རྐང་པའི་སོར་མོ་བསྒྱུར་ཞིང་། ཧཱུྃ་ཞེས་བྱ་བཟློས་ཤིང་
དུག་གི་སྟེང་དུ་བཞག་ནས། བཅོམ་ལྡན་འདས་དཔལ་རྡོ་རྗེ་སེམས་དཔའ་ཟླ་བའི་དཀྱིལ་འཁོར་གྱི་སྟེང་ན་བཞུགས་ཤིང་། སྔར་བཤད་པའི་མཚན་ཉིད་ཀྱིས་དུག་ལ་ཁྱབ་པས་བདུད་རྩིར་གྱུར་པར་བསམ་པར་བྱ་སྟེ། འདི་ནི་རྡོ་རྗེ་བདུད་རྩིའོ། །བདུད་ལ་སོགས་པ་མ་རུངས་པ་ཐམས་ཅད་བརླག་
པ་ལ་ནི་འཁྲུགས་པས་དཔག་ཏུ་མེད་པར་བཟླས་པས་སོ་ཞེས་བྱ་བ་ནི་སྔ་མ་བཞིན་དུ་བདག་ཉིད་རྡོ་རྗེ་སེམས་དཔའ་ཞལ་མཆེ་བ་རྣམ་པར་གཙིགས་པ། མདོག་ནག་པོ་རྡོ་རྗེ་འབར་བའི་འོད་ཀུན་དུ་འཁྲུགས་པ། རྡོ་རྗེ་གསོར་བ་ལ་སོགས་པ་ལ་བརྩོན་པར་རྣམ་པར་བསམས་ལ། ཧཱུྃ་ཞེས་བྱ་བ་ཟློས་
ཤིང་། རྡོ་རྗེ་ལས་རྡོ་རྗེ་ཁྲོ་བོ་སྤྲུལ་ལ། དེས་བགེགས་ཐམས་ཅད་སྐྲག་པར་བྱ་ཞིང་བསྐྲད་པར་བྱའོ། །དཔག་ཏུ་མེད་པ་བཟླས་པས་སོ་ཞེས་བྱ་བ་ནི་ཧཱུྃ་ཞེས་བྱ་བ་ཉིད་བཟླས་པས་སོ། །མཁའ་འགྲོ་མའི་གདོན་ཐམས་ཅད་ལས་གྲོལ་བ་ལ་ནི་རྡོ་རྗེ་ཆེན་པོ་གསོར་བའི་ཕྱག་རྒྱས་སོ་ཞེས་བྱ་བ་ནི་བཅོམ་

59-1-126b

ལྡན་འདས་རྡོ་རྗེ་མེ་ལྟར་རབ་ཏུ་འབར་བའི་ཕྱག་རྒྱ་ཆེན་པོ་ནི་རྡོ་རྗེ་ཆེན་པོ་གསོར་བ་སྟེ། དེས་མཁའ་འགྲོ་མའི་གདོན་ཐམས་ཅད་ལས་གྲོལ་བར་བྱའོ། །དེ་ཡང་རྡོ་རྗེ་མེ་ལྟར་རབ་ཏུ་འབར་བར་བདག་ཉིད་རྣམ་པར་བསམས་ལ། ཧཱུྃ་ཞེས་བྱ་བཟློས་ཤིང་རྡོ་རྗེ་ཆེན་པོ་གསོར་བར་བྱའོ། །དེ་ནས་
རྡོ་རྗེ་ལས་བྱུང་བའི་བཅོམ་ལྡན་འདས་རྡོ་རྗེ་ཧཱུྃ་མཛད་ཀྱིས་མཁའ་འགྲོ་མའི་གདོན་རྣམས་གསོད་ཅིང་འཇོམས་པར་བྱེད་པར་བསམ་པར་བྱའོ་ཞེས་བྱ་བའི་དོན་ཏོ། །ཕྱག་རྒྱ་ཐམས་ཅད་གཞིག་པ་ལ་ནི་རྡོ་རྗེ་འཕེན་པས་སོ་ཞེས་བྱ་བ་ནི་སྲིན་པོ་ལ་སོགས་པའི་ཕྱག་རྒྱ་བཅིངས་ལ། གང་གི་ཚེ་
འགའ་ཞིག་འོངས་པར་གྱུར་ན། དེའི་ཚེ་རྡོ་རྗེ་སེམས་དཔའ་ཁྲོས་པར་བདག་ཉིད་རྣམ་པར་བསམས་ལ། རྡོ་རྗེ་ཁུ་ཚུར་གཉིས་བཅིངས་ནས། དེའི་ཐད་ཀར་འཕངས་ལ། རྡོ་རྗེ་འབར་བའི་སྟེང་དུ་ངེས་པར་བབ་པར་བསམ་པར་བྱ་སྟེ། དེ་ལྟར་ན་ཕྱག་རྒྱ་དེས་འཇིག་པར་འགྱུར་རོ། །མཁའ་འགྲོ་མ་
ཐམས་ཅད་དགུག་པ་དང་གཞུག་པ་དང་གདུལ་བ་ལ་ནི་ཞེས་བྱ་བ་ལ་སོགས་པ་ལ། དུར་ཁྲོད་དམ་ལམ་གྱི་བཞི་མདོར་དཀྱིལ་འཁོར་བྲིས་ལ། དཀྱིལ་འཁོར་དེར་མཁའ་འགྲོ་མའི་ཚོགས་ཐམས་ཅད་བཀུག་ནས་དེའི་འོག་ཏུ་བཅུག་ལ། དེ་ནས་རང་གི་བཀའ་བསྒོ་བ་ལ་སྦྱར་བར་བྱ་སྟེ། དེ་ཡང་
རྡོ་རྗེ་ཁ་ཊྭཱཾ་གའི་ཕྱག་རྒྱ་བཅིངས་ལ། ཁྲོས་པས་རྡོ་རྗེ་ཧཱུྃ་མཛད་ཀྱི་ཕྱག་རྒྱ་དང་། ཧཱུྃ་ཞེས་བྱ་བ་བཟླས་བརྗོད་བྱའོ། །གཡོན་པའི་མཛུབ་མོ་ཐད་ཀར་བཞག་སྟེ། གཡས་པའི་མཐེའུ་ཆུང་བརྐྱང་ལ། ཕྱག་རྒྱ་སྟེང་དུ་བཏེག་ནས་བཞག་པ་འདི་ནི་རྡོ་རྗེ་ཁ་ཊྭཱཾ་གའི་ཕྱག་རྒྱ་སྟེ། རྡོ་རྗེ་ཧཱུྃ་མཛད་ཀྱི་གཟུགས་ཀྱིས་
སྦྱར་བར་བྱའོ། །མ་མོ་ཐམས་ཅད་ཀྱི་དཀྱིལ་འཁོར་དང་ཞེས་བྱ་བ་ལ་སོགས་པ་ལ་མ་མོ་ཐམས་ཅད་ཀྱི་དཀྱིལ་འཁོར་ནི་གཟུགས་དང་བཅས་པ་དང་། གཟུགས་མེད་པ་སྟེ། དེ་ཉིད་ནི་དམ་ཚིག་ཅེས་བཤད་དོ། །དེ་རྣམས་ཀྱི་སྙིང་པོ་ནི་ཕྱག་རྒྱ་ཆེན་པོའི་དཀྱིལ་འཁོར་རོ། །ཕྱག་རྒྱ་ནི་གཟུགས་ཀྱི་དཀྱིལ་
འཁོར་རོ། །སྔགས་ནི་ཆོས་ཀྱི་དཀྱིལ་འཁོར་རོ། །རིག་པ་ནི་ལས་ཀྱི་དཀྱིལ་འཁོར་ཏེ། དེ་རྣམས་ནི་གསང་བ་ཞེས་བྱའོ། །དེ་དག་འཇིག་པར་ཇི་ལྟར་འགྱུར་ཞེ་ན། རྡོ་རྗེ་ཁྲོ་བོའི་ཡི་གེ་ཕཊ་ཀྱིས་སོ་ཞེས་བྱ་བ་གསུངས་ཏེ། རྡོ་རྗེ་ཧཱུྃ་མཛད་དུ་གྱུར་པས་ཁྲོ་བོའི་ཁུ་ཚུར་གཉིས་ཀྱིས་ཧཱུྃ་ཕཊ་ཅེས་བྱ་བའི་ཁྲོ་བོ་

59-1-127a

སྟོང་གིས་ཇི་སྐད་དུ་བཤད་པའི་དངོས་པོ་གཞིག་པར་བྱ་བའི་ཕྱིར་སྦྱར་བར་བྱ་སྟེ། ཁྲོ་བོ་སྟོང་པོ་མཚོན་ཆ་སྣ་ཚོགས་པ་ཐོགས་པ། ཕྱག་ན་རྡོ་རྗེའི་སྐུ་ལས་བྱུང་བ་རྣམས་ཀྱིས་མ་མོ་ཐམས་ཅད་ཀྱི་དཀྱིལ་འཁོར་དང་། དམ་ཚིག་དང་། སྙིང་པོ་དང་། ཕྱག་རྒྱ་དང་། སྔགས་དང་། 
རིག་སྔགས་དང་། གསང་བ་རྣམས་འཇིག་པར་བྱས་པར་བསམ་པར་བྱའོ། །མ་མོ་དང་མཁའ་འགྲོ་མ་ཐམས་ཅད་མངག་གཞུག་མར་བྱ་བ་ལ་ནི། མ་མོའི་གནས་སུ་ཁྲོས་པས་བཟླས་བརྗོད་འབུམ་བྱའོ་ཞེས་བྱ་བ་ནི་དྲག་མོ་ལ་སོགས་པ་ནི་མ་མོ་ཐམས་ཅད་དང་མཁའ་འགྲོ་མ་གང་ཡིན་པ་སྟེ། 
དེ་རྣམས་ཀྱི་རིག་པ་གང་ཡིན་པས་གྲུབ་པ་རྣམས། དེ་རྣམས་རང་གི་དབང་དུ་བྱེད་པར་འདོད་པས། ཁྲོས་པ་དང་། རྡོ་རྗེ་གསོར་ཞིང་མ་མོའི་གནས་རྣམས་སུ་ཧཱུྃ་ཞེས་བྱ་བའི་བཟླས་བརྗོད་ཇི་སྲིད་སྟོང་ཕྲག་བརྒྱ་རྫོགས་པར་གྱུར་པ་དེ་སྲིད་ཀྱི་བར་དུ་བཟླས་བརྗོད་བྱས་ནས། དེ་ནས་དེ་རྣམས་མངག་
གཞུག་མར་འགྱུར་རོ། །བདུད་ཐམས་ཅད་ཀྱི་སྟོབས་གཞོམ་པ་ལ་ནི་རྡོ་རྗེ་དྲག་པོའི་ཧ་ཧ་ཞེས་བྱ་བའི་གད་རྒྱངས་སོ་ཞེས་བྱ་བ་ནི་ལྷའི་བུ་དང་། ཉོན་མོངས་པ་དང་། ཕུང་པོ་དང་། འཆི་བདག་གི་རང་བཞིན་ནི་བདུད་ཐམས་ཅད་དོ། །དེ་རྣམས་ཀྱི་སྟོབས་ནི་ནུས་པ་སྟེ། དེ་བཟློག་པ་ནི་གཞོམ་པའོ། །དེ་
ནི་རྡོ་རྗེ་དྲག་པོའི་ཧ་ཧ་ཞེས་བྱ་བའི་གད་རྒྱངས་ཀྱིས་འགྱུར་ཏེ། བདག་ཉིད་རྡོ་རྗེ་སེམས་དཔའ་ཁྲོས་པར་རྣམ་པར་བསམས་ལ། རྡོ་རྗེ་ཁུ་ཚུར་གཉིས་བཅིངས་ཏེ། བཟློག་ནས་ཁའི་གྲ་གཉིས་སུ་བཞག་ལ། ཧ་ཧ་ཧ་ཧ་ཧཱུྃ་ཞེས་བཟླས་པ་འདི་ནི་རྡོ་རྗེ་དྲག་པོའི་ཧ་ཧ་ཞེས་བྱ་བའི་གད་རྒྱངས་ཏེ། འདི་ཉིད་བཅིངས་ལ་
བཟླས་པའི་དུས་སུ་འཇིག་རྟེན་གྱི་ཁམས་ཐམས་ཅད་རྡུལ་ཕྲ་རབ་དང་མཉམ་པའི་རྡོ་རྗེ་གནོད་སྦྱིན་གྱི་གཟུགས་བདུད་ཐམས་ཅད་ཟ་བར་བྱེད་པར་བསམ་པར་བྱ་སྟེ། དེ་ལྟ་བུ་ནི་བདུད་ཐམས་ཅད་ཡང་དག་པར་འཇོམས་པར་འགྱུར་རོ། །གཞན་གྱི་དཔུང་ཐམས་ཅད་གཞོམ་པ་ལ་ནི། རྡོ་རྗེ་ལ་ཡོངས་སུ་
བཟླས་ལ་འཕང་ངོ་ཞེས་བྱ་བ་ལ་ནི། ལག་པ་གཡས་སམ། གཡོན་དུ་ཧཱུྃ་ཞེས་བྱ་བ་ལས་ཁྲོ་བོ་རྡོ་རྗེ་རྣམ་པར་བསམས་ལ། རྡོ་རྗེ་ཁུ་ཚུར་གཉིས་བཅིངས་ཏེ། མངོན་པར་བཟླས་ལ་བསྐལ་པ་སྲེག་པ་ལྟ་བུའི་ཁུ་ཚུར་དེ་ཉིད་ཀྱིས་ཡང་དང་ཡང་དུ་གཞན་གྱི་དཔུང་གི་སྟེང་དུ་འཕང་བར་བྱ་སྟེ། དེ་ལྟ་བུས་ནི་

59-1-127b

གཞན་གྱི་དཔུང་ཐམས་ཅད་འཇོམས་པར་འགྱུར་རོ། །འཐབ་པ་ཐམས་ཅད་ལས་ཐར་བར་བྱ་བ་ལ་ནི། རྡོ་རྗེ་རྒྱལ་མཚན་གྱི་ཕྱག་རྒྱས་སོ་ཞེས་བྱ་བ་ནི། ལྔ་པོ་བསྡུས་པ་ལས་མཛུབ་མོ་གཉིས་ལྕགས་ཀྱུར་བཅིངས་ཏེ། སྲིན་ལག་དང་མཐེའུ་ཆུང་སྙོམས་ལ་ཕྱེ་སྟེ། བརྐྱང་ནས་བ་དན་གྱི་རྩེ་མོ་ལྟ་
བུར་བྱ་བ་སྟེ། གྱེན་དུ་འདེགས་པ་འདི་ནི་རྡོ་རྗེ་རྒྱལ་མཚན་གྱི་ཕྱག་རྒྱ་སྟེ། འདི་བཅིངས་ལ་ཧཱུྃ་ཞེས་བྱ་བ་ཟློས་ཤིང་། རྡོ་རྗེ་དྲན་པར་བདག་ཉིད་རྣམ་པར་བསམས་ལ། ཆུ་སྲིན་གྱི་རྒྱལ་མཚན་ལས་དཔུང་གི་ཚོགས་ཡན་ལག་བཞི་པ་ཕྱུང་སྟེ། དེས་གཞན་གྱི་དཔུང་བཅོམ་ཞིང་གཞིག་པར་བྱ་སྟེ། དེ་
ལྟ་བུས་ནི་གཡུལ་ཐམས་ཅད་ལས་ཐར་བར་འགྱུར་རོ། །ཐམས་ཅད་བཅིང་བ་ལ་ནི་གོས་ལ་མདུད་པ་བྱའོ་ཞེས་བྱ་བ་ནི། ཧཱུྃ་ཞེས་བྱ་བས་གོས་ཀྱི་མཐའི་རྡོ་རྗེའི་ཐག་པར་བསམས་ལ། དེས་རྐུན་པོ་ལ་སོགས་པ་ཡིད་ཀྱིས་བཀུག་ནས་ཧཱུྃ་ཞེས་བྱ་བཟློས་ཤིང་མདུད་པའི་ཚུལ་གྱིས་བཅིང་བར་
བྱའོ། །ཐམས་ཅད་དགྲོལ་བ་ལ་ནི། ཡི་གེ་མུ་ཡིས་སོ་ཞེས་བྱ་བ་ནི་བཅིངས་པ་དང་། རྒྱབ་བཏབ་པ་དང་། སྲེག་པ་དང་། བཙོས་པ་དང་། བསྐྲད་པ་ལ་སོགས་པ་སྔགས་ཀྱི་སྦྱོར་བ་བྱས་ལ་དེ་ཐམས་ཅད་ནི་ཧཱུྃ་མུ་ཞེས་བྱ་བ་བཟླས་ན་བཅིང་བ་ཐམས་ཅད་ལས་གྲོལ་ཞིང་ཐར་བར་འགྱུར་རོ། །རོ་
ལངས་དང་འཁྲུལ་འཁོར་ཐམས་ཅད་གཞིག་པ་ལ་ནི་རྡོ་རྗེ་འཇིགས་བྱེད་ཀྱིས་སོ་ཞེས་བྱ་བ་ནི། རོ་ལངས་ཐམས་ཅད་དང་འཁྲུལ་འཁོར་རྣམས་ནི། རོ་ལངས་དང་། འཁྲུལ་འཁོར་ཐམས་ཅད་དེ། དེ་ལ་མི་ཤི་བའི་རོ་ལ་སྲིན་པོ་ལ་སོགས་པ་ཞུགས་པ་ནི་རོ་ལངས་སོ། །འཁྲུལ་འཁོར་ནི་ལྷ་མ་ཡིན་
གྱིས་བྱས་པའམ། གཞན་དག་གིས་བྱས་པ་སྟེ། དཔེར་ན་ས་འོག་ཏུ་འགྲོ་བའི་ལམ་དུ་བཤད་པའོ། །དེ་རྣམས་ནི་རྡོ་རྗེ་འཇིགས་བྱེད་ཀྱི་ཕྱག་རྒྱས་འཇིག་པར་འགྱུར་ཏེ། རྡོ་རྗེ་བསྡམས་པ་བཅིངས་ནས། སྟང་སྟབས་ཀྱིས་འཕངས་ལ་ཕྱག་རྒྱ་བཅིངས་པ་ལས་རྡོ་རྗེ་འབར་བ་བྱུང་བས་རོ་ལངས་དང་།
འཁྲུལ་འཁོར་རྣམས་ལ་འབབ་པར་བསམ་པར་བྱ་སྟེ། དེ་ནི་རྡོ་རྗེ་འཇིགས་བྱེད་དོ། །ལྕགས་སྒྲོག་ཐམས་ཅད་དགྲོལ་བ་ལ་ནི། རྡོ་རྗེ་ཁབ་ལོང་གིས་སོ་ཞེས་བྱ་བ་ནི་རྡོ་རྗེ་ཧཱུྃ་མཛད་ཀྱི་ཕྱག་རྒྱ་གར་ལས་བྱུང་བ་བཅིངས་ལ། ལྕགས་སྒྲོག་རྣམས་ལ་འཕངས་པས་ཕྱག་རྒྱ་དང་། སྟང་སྟབས་ལས་

59-1-128a

བྱུང་བའི་རྡོ་རྗེ་འབར་བ་རྣམས་ལྕགས་སྒྲོག་ལ་བབས་པས་ལྕགས་སྒྲོག་ཐལ་བར་བྱས་པར་བསམ་པར་བྱ་སྟེ། འདི་ནི་རྡོ་རྗེ་ལྕགས་སྒྲོག་གོ། །མེ་ཡང་དག་པར་སྐྱེད་པ་ལ་ནི་རྡོ་རྗེ་མེ་ཤེལ་གྱིས་སོ་ཞེས་བྱ་བ་ནི། དང་པོའི་རྡོ་རྗེ་བཅིངས་ལ་མཐེ་བོང་དང་། མཐེའུ་ཆུང་རྡོ་རྗེ་
རྩེ་མོ་བཞི་པ་འབར་བ་རྣམ་པར་འཕྲོ་བ་རབ་ཏུ་སྟོན་པའི་ཚུལ་དུ་བྱས་པ་འདི་ནི། རྡོ་རྗེ་མེ་ཤེལ་ཏེ། འདི་བཅིངས་ལ་རླུང་དང་མེའི་དཀྱིལ་འཁོར་ལ་ཧཱུྃ་ཞེས་བྱ་བ་བསམས་ཏེ། ཧཱུྃ་ཞེས་བྱ་བ་ཉིད་ཟློས་ཤིང་མེ་བསྐྱེད་པར་བྱའོ། །ཆུ་མེད་པར་ཆུ་ཡང་དག་པར་བསྐྱེད་པ་ལ་ནི་རྡོ་རྗེ་ཆུ་ཤེལ་གྱིས་སོ་ཞེས་བྱ་
བ་ནི་དེ་བཞིན་གཤེགས་པའི་སྐུའི་མཆོག་བཅིངས་ལ་རང་གི་སྙིང་གའི་ཕྱོགས་སུ་བཞག་སྟེ། ཁྲོ་བོའི་ལྟ་བས་ཇི་ལྟར་མངོན་པར་དགའ་བའི་གླུ་ལ་ལྟ་བཞིན་དུ་འདིར་ཆུ་བསྐྱེད་ཅིང་ཞེས་བྱ་བ་དང་། ཧཱུྃ་ཞེས་བྱ་བས་བཟླས་ན། ཆུ་བསྐྱེད་པར་འགྱུར་ཏེ། འདི་ནི་རྡོ་རྗེ་ཆུ་ཤེལ་ལོ། །ནམ་མཁའ་
ལས་ཞེས་བྱ་བ་ལ་སོགས་པ་ལ། ནམ་མཁའ་ལ་ཧཱུྃ་ཞེས་བྱ་བ་ལས་ནམ་མཁའི་མཛོད་ཟས་དང་སྐོམ་ཐམས་ཅད་འབེབས་པ་ལ་བརྩོན་པར་བསམས་ལ། དེ་ཉིད་ལ་ལྟ་ཞིང་ཧཱུྃ་ཞེས་བྱ་བས་བཟླས་བརྗོད་སྟོང་ཕྲག་བརྒྱ་བྱའོ། །འབུམ་རྫོགས་པ་དང་། ཐམས་ཅད་ནམ་མཁའ་ལས་འབྱུང་བར་འགྱུར་
རོ། །ནམ་མཁའ་ལས་ཞེས་བྱ་བ་ལ་སོགས་པ་ལ། ནམ་མཁའ་ལ་ཧཱུྃ་ཞེས་བྱ་བ་ལས་བཅོམ་ལྡན་འདས་རྣམ་པར་སྣང་མཛད་ལ་སོགས་པའི་སྐུ་རྣམ་པར་བསམས་ལ། དེ་ཉིད་ཡིད་ལ་བྱ་ཞིང་ཧཱུྃ་ཞེས་བྱ་བས་བཟླས་བརྗོད་འབུམ་བྱའོ། །འབུམ་རྫོགས་པར་གྱུར་པ་དང་། ནམ་མཁའ་ལས་
སངས་རྒྱས་ཀྱི་སྐུ་ལ་སོགས་པའི་གཟུགས་སྟོན་པར་འགྱུར་རོ། །ནམ་མཁའ་ལ་ཡི་གེ་ཞེས་བྱ་བ་ལ་སོགས་པ་ལ། ནམ་མཁའ་ལ་ཡི་གེ་ཨ་བསམས་ལ། དེ་ཉིད་ལ་སེམས་ཞིང་ཇི་སྲིད་འབུམ་ཕྲག་གཅིག་མ་རྫོགས་པར་གྱུར་པ་དེ་སྲིད་ཀྱི་བར་དུ་ཧཱུྃ་ཞེས་བྱ་བ་བཟླས་ནས་དེ་ནས་ཡི་གེ་ཨ་དེ་ལས། 
འདས་པ་དང་། ད་ལྟར་བྱུང་བ་དང་། མ་འོངས་པ་རྣམས་ལུང་སྟོན་པ་བདེན་པར་སྟོན་པར་འགྱུར་རོ། །པྲ་སེ་ན་ཐམས་ཅད་ཅེས་བྱ་བ་ལ་སོགས་པ་ལ། མེ་ལོང་དང་། མཐེ་བོ་དང་། རྩིག་པ་དང་། ཆུ་དང་། མར་མེའི་རྩེ་མོ་དང་། རལ་གྲིའི་པྲ་སེ་ན་ཐམས་ཅད་དེ། དེ་རྣམས་ལ་ཡི་གེ་གཟུགས་སུ་འདས་

59-1-128b

པ་དང་། མ་འོངས་པ་དང་། ད་ལྟར་བྱུང་བའི་བྱ་བ་གང་ཤེས་པར་འགྱུར་བ་དེ་ནི། པྲ་སེ་ན་ཐམས་ཅད་ལས་འདས་པ་དང་། མ་འོངས་པ་དང་། ད་ལྟར་བྱུང་བའི་ལུང་བདེན་པར་སྟོན་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་པྲ་སེ་ན་ཐམས་ཅད་དབབ་པས་སོ་ཞེས་བྱ་བ་གསུངས་ཏེ། རྡོ་རྗེ་བསྡམས་པ་
བཅིངས་པ་ལས། གཡས་པའི་མཐེ་བོ་བསྒྲེང་ལ། གཡོན་པའི་མཛུབ་མོ་ལྕགས་ཀྱུར་བྱ་བ་ནི་པྲ་སེ་ན་ཐམས་ཅད་དབབ་པ་སྟེ་འདི་བཅིངས་ལ་ཧཱུྃ་ཞེས་བྱ་བཟློས་ཤིང་། དངོས་པོ་ཐམས་ཅད་ལ། རྡོ་རྗེ་སེམས་དཔའ་ལ་སོགས་པའི་ངོ་བོ་ཉིད་ཐམས་ཅད་གཟུགས་བརྙན་གྱི་ཚུལ་གྱིས་གསལ་
བར་སྣང་ཞིང་སེམས་ཅན་ཐམས་ཅད་དང་། བདག་ཉིད་ལ་སྒྲ་བརྙན་གྱི་ཚུལ་དུ་གསལ་ཞིང་བདེན་པ་སྒྲོགས་པར་འགྱུར་ཏེ། པྲ་སེ་ན་དབབ་པའི་བཟླས་བརྗོད་འབུམ་བྱས་ལ་བྱའོ། །དེ་བཞིན་དུ་ཞེས་བྱ་བ་ལ་སོགས་པས་ཇི་ལྟར་བཟླས་བརྗོད་འབུམ་བྱས་པས། པྲ་སེ་ན་ཐམས་ཅད་སྒྲུབ་པར་བྱེད་
པ་དེ་བཞིན་དུ་རང་གི་མིག་གཉིས་ལ་ཧཱུྃ་ཞེས་བྱ་བ་ལས་རྡོ་རྗེ་གཉིས་བསམས་ལ། ཧཱུྃ་ཞེས་བྱ་བ་བཟླས་བརྗོད་འབུམ་བྱས་ན་གཟུགས་བརྙན་གྱི་ཚུལ་གྱིས་རྡོ་རྗེ་སེམས་དཔའ་ལ་སོགས་པ་དངོས་པོ་ཐམས་ཅད་མཐོང་བར་འགྱུར་རོ། །དེ་བཞིན་དུ་རང་གི་རྣ་བ་གཉིས་ལ་ཧཱུྃ་ཞེས་བྱ་བ་ལས་རྡོ་རྗེ་
བསམས་ལ། རྣ་བར་བཟླས་བརྗོད་འབུམ་ཕྱས་ན་བྲག་ཅའི་ཚུལ་གྱིས་རྡོ་རྗེ་སེམས་དཔའ་ལས་སྒྲ་རྣམས་ཐོས་པར་འགྱུར་རོ། །སྣའི་རྩེ་མོ་ཧཱུྃ་ཞེས་བྱ་བ་ལས་རྡོ་རྗེ་བསམས་ལ། དེ་ལ་དམིགས་པའི་སེམས་ཀྱིས་བཟླས་བརྗོད་འབུམ་བྱས་ན། རྡོ་རྗེ་སེམས་དཔའ་ལ་སོགས་པའི་དྲི་ཐམས་ཅད་
བསྣམས་པར་འགྱུར་རོ། །ལྕེ་ལ་ཧཱུྃ་ཞེས་བྱ་བ་ལས་རྡོ་རྗེ་བསམས་ལ། དེའི་སྟེང་དུ་ཧཱུྃ་ཞེས་བྱ་བ་བསམས་ནས། བཟླས་བརྗོད་འབུམ་བྱས་ན་དེ་ཐམས་ཅད་སྨྲ་བར་འགྱུར་རོ། །ལུས་ལ་ཧཱུྃ་ཞེས་བྱ་བ་རྣམ་པར་བཀོད་ལ། ལུས་ལ་བཟླས་བརྗོད་འབུམ་བྱས་ན། དེས་ཐམས་ཅད་ཚོར་བར་འགྱུར་རོ། །
རང་གི་སྙིང་གར་ཧཱུྃ་ཞེས་བྱ་བ་ལས་རྡོ་རྗེ་རྩེ་ལྔ་པ་བསམས་ལ་བཟླས་བརྗོད་འབུམ་བྱས་ན་ཡིད་ཀྱིས་ཐམས་ཅད་ཤེས་པར་འགྱུར་རོ། །རྨད་དུ་བྱུང་བ་ཐམས་ཅད་བསྟན་པ་ལ་ནི། སངས་རྒྱས་ཀྱི་སྐུ་བསྒྲུབས་པས་སོ་ཞེས་བྱ་བ་ནི། རྣམ་པར་སྣང་མཛད་ལ་སོགས་པའི་སྐུ་གཟུགས་མདུན་དུ་བཞག་ལ། 

59-1-129a

དེར་གསང་བའི་ལྕགས་ཀྱུ་ལ་སོགས་པས་བཀུག་ནས་བཅུག་ལ། བཅིངས་ནས་དབང་དུ་བྱས་ཏེ། མཆོད་པ་ཐམས་ཅད་ཀྱིས་ཇི་ལྟ་བ་བཞིན་དུ་ཡང་དག་པར་མཆོད་ནས། དེའི་ཐུགས་ཀར་ཧཱུྃ་ཞེས་བྱ་བ་བསམས་ལ། དེ་བཞིན་གཤེགས་པ་བསྒོམ་ཞིང་བཟླས་བརྗོད་འབུམ་བྱས་
ན། རྨད་དུ་བྱུང་བ་ཐམས་ཅད་སྟོན་པར་འགྱུར་རོ། །སྒྱུ་མ་ཐམས་ཅད་བསྟན་པ་ལ་ནི་རྨ་བྱའི་སྒྲོའི་ཆུན་པོ་ལ་ནི་བཟླས་བརྗོད་འབུམ་བྱས་པས་སོ་ཞེས་བྱ་བ་ནི། རྨ་བྱའི་ཆུན་པོ་ལ་རྡོ་རྗེ་བཅུག་སྟེ་བཅིང་ངོ་། །དེ་ནས་རྨ་བྱའི་ཆུན་པོ་དེ་ཧཱུྃ་ཞེས་བྱ་བ་ལས་དངོས་པོ་ཐམས་ཅད་ཀྱི་བདག་ཉིད་ཅན་གྱི་རྡོ་རྗེ་སེམས་དཔའི་
རྣམ་པར་བསམ་མོ། །དེ་ནས་དེ་ཉིད་བསྒོམ་ཞིང་བཟླས་བརྗོད་འབུམ་བྱས་ན་ཆུན་པོ་འགྲུབ་པར་འགྱུར་ཏེ། དེ་ནས་ཆུན་པོ་དེ་ལ་བཟླས་བརྗོད་བྱ་ཞིང་གཟུགས་བརྙན་གྱི་ཚུལ་གྱིས་བསྐོར་ནས། དཔལ་རྡོ་རྗེ་སེམས་དཔའ་ལ་སོགས་པ་ཐམས་ཅད་གཟུགས་བརྙན་གྱི་ཚུལ་དུ་སྣང་ཞིང་། བྲག་ཅའི་
ཚུལ་གྱིས་ཐམས་ཅད་སྟོན་པར་འགྱུར་རོ། །ཐམས་ཅད་གཡོགས་པར་བྱ་བ་ལ་ནི། ཞི་བའི་གནས་སུ་བཟླས་བརྗོད་འབུམ་བྱས་པས་སོ་ཞེས་བྱ་བ་ནི། ཐམས་ཅད་གཡོགས་པ་ནི་ཚོང་དུས་གཡོགས་པ་སྟེ། གྲགས་པར་ཟད་དོ། །དེ་ཞེས་བྱ་བ་ནི་བསྐྱེད་པ་སྟེ། ལྷ་ཆེན་པོའི་གནས་སུ་ལྷ་ཆེན་པོ་
བཀུག་ལ། ཧཱུྃ་ཞེས་བྱ་བ་བཟླས་བར་བརྗོད་འབུམ་བྱའོ། །དེའི་འོག་ཏུ་དེ་ཤེས་པ་ལས་དེའི་སྦྱོར་བ་ཤེས་པར་བྱས་ལ། ཧཱུྃ་ཞེས་བྱ་བ་བཟླས་པས་དེ་དང་དེ་གཡོགས་པར་བྱའོ། །ཐམས་ཅད་ལ་ལན་ལྡོན་པར་སྟོན་པ་ལ་ནི། རྡོ་རྗེ་ཧཱུྃ་མཛད་ཀྱི་ཕྱག་རྒྱས་སོ་ཞེས་བྱ་བ་ནི། འདས་པ་དང་། མ་འོངས་པ་དང་། ད་
ལྟར་བྱུང་བའི་དངོས་པོའི་གཏམ་གྱི་སྒྲ་ཐོས་པ་ནི་ཐམས་ཅད་ལ་ལན་ལྡོན་པ་སྟོན་པ་སྟེ། དེ་ནི་རྡོ་རྗེ་ཧཱུྃ་མཛད་ཀྱིས་ཞེས་བྱ་བ་ཁམས་གསུམ་རྣམ་པར་རྒྱལ་བའི་ཕྱག་རྒྱ་ནི་རྡོ་རྗེ་ཧཱུྃ་མཛད་དོ། །འདི་སྐད་སྟོན་པར་འགྱུར་ཏེ། རྡོ་རྗེ་སེམས་དཔའི་རྣལ་འབྱོར་ཇི་ལྟ་བ་བཞིན་དུ་བྱས་ལ། ཁམས་གསུམ་རྣམ་
པར་རྒྱལ་བའི་ཕྱག་རྒྱ་བཅིངས་ལ། རྡོ་རྗེ་ཧཱུྃ་མཛད་དུ་བདག་ཉིད་རྣམ་པར་བསམས་ལ་བདེན་པ་གང་གི་སྒྲ་རྣམས་ནི་བྲག་ཅ་དང་མཚུངས་པ་ཡིན་པས་བདེན་པ་དེས་འདས་པ་དང་། མ་འོངས་པ་དང་། ད་ལྟར་བྱུང་བའི་བྱ་བ་རྣམས་བཅོམ་ལྡན་འདས་རྡོ་རྗེ་སེམས་དཔས་བཤད་དུ་གསོལ་ཞེས་བདེན་པའི་

59-1-129b

བྱིན་གྱི་རླབས་བྱས་ལ། རྡོ་རྗེ་ཧཱུྃ་མཛད་སྙིང་གར་ཞུགས་པར་བསམས་ལ། དེ་ཉིད་ཟློས་ཤིང་རྡོ་རྗེ་ཧཱུྃ་མཛད་དུ་བདག་ཉིད་བསམས་ལ། ཇི་སྲིད་བཅོམ་ལྡན་འདས་ཐམས་ཅད་སྟོན་པར་མཛད་པ་དེ་སྲིད་དུ་བསྒོམ་པར་བྱའོ། །རྫུ་འཕྲུལ་ཐམས་ཅད་བསྟན་པ་ལ་ནི། རྡོ་རྗེ་རྫུ་འཕྲུལ་གྱི་ཕྱག་རྒྱས་སོ་ཞེས་
བྱ་བ་ལ། རྫུ་འཕྲུལ་ཐམས་ཅད་ནི་སེམས་ཀྱི་ས་ཡང་དག་པར་འཕྲུལ་པ་སྟེ། ནམ་མཁར་འགྲོ་བ་ལ་སོགས་པའི་ཚུལ་ལོ། །དེ་ཡང་ཡིད་ལྟར་མགྱོགས་པ་ལ་སོགས་པ་ལ་རྣམ་པ་ལྔ་སྟེ། རྣམ་པ་ལྔ་པོ་དེ་དག་རྫོགས་པར་བྱ་ཞིང་མངོན་སུམ་དུ་བྱ་བ་གང་ཡིན་པ་དེ་ནི་རྫུ་འཕྲུལ་ཐམས་ཅད་
བསྟན་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་རྫུ་འཕྲུལ་གྱི་ཕྱག་རྒྱས་སོ་ཞེས་བྱ་བ་སྟེ། དང་པོའི་རྡོ་རྗེའི་བཅིངས་པ་ལས་ནམ་མཁའ་ལ་རྡོ་རྗེ་སེམས་དཔའ་ལ་སོགས་པ་བྱང་ཆུབ་སེམས་དཔའ་ཆེན་པོ་བསྐྱེད་པའི་ཚུལ་དུ་བྱ་བ་ནི། རྡོ་རྗེ་རྫུ་འཕྲུལ་གྱི་ཕྱག་རྒྱ་སྟེ། དེས་དེ་རྣམས་འབྱུང་བར་འགྱུར་
རོ། །ཆོ་འཕྲུལ་ཐམས་ཅད་ཅེས་བྱ་བ་ནི་རྫུ་འཕྲུལ་དང་། རྗེས་སུ་བསྟན་པ་དང་། ཀུན་བརྗོད་པའི་ཆོ་འཕྲུལ་ཏེ། གདུལ་བྱའི་སྐྱེ་བོ་རྣམས་ཀྱིས་སོ་སོར་དགའ་བར་བྱེད་པས་ན་ཆོ་འཕྲུལ་ཏེ། དེ་རྣམས་སྟོན་པ་ནི་སྔ་མ་བཞིན་ནོ། །རྡོ་རྗེ་ཏིང་ངེ་འཛིན་ནི་མཆོག་གིས་སོ་ཞེས་བྱ་བ་ནི། བཅོམ་ལྡན་འདས་
འོད་དཔག་ཏུ་མེད་པའི་ཏིང་ངེ་འཛིན་གྱི་ཕྱག་རྒྱས་སོ། །འདི་སྐད་སྟོན་པར་འགྱུར་ཏེ། དཔལ་རྡོ་རྗེ་སེམས་དཔའི་སྦྱོར་བ་བྱས་ལ། ཧཱུྃ་ཞེས་བྱ་བཟློས་ཤིང་། བཅོམ་ལྡན་འདས་འོད་དཔག་ཏུ་མེད་པའི་ཏིང་ངེ་འཛིན་གྱི་ཕྱག་རྒྱ་བཅིངས་ལ། དེའི་ངོ་བོ་ཉིད་དུ་བདག་ཉིད་བསམས་ཏེ། རང་གི་ལུས་ལ་དངོས་པོ་
ཐམས་ཅད་ཕུང་བ་ལ་ཡང་དག་པར་བསྟན་པར་བྱའོ། །རང་གི་ལུས་ལ་སོགས་པ་དངོས་པོ་ཐམས་ཅད་ལས་ཞེས་བྱ་བ་ལ་སོགས་པ་ལ། རྡོ་རྗེ་སེམས་དཔའི་རྣལ་འབྱོར་བྱས་ལ། རང་གི་ལུས་ལས་སམ། རྩིག་པ་ལ་སོགས་པ་རྣམས་ལས་དེ་བཞིན་གཤེགས་པ་ཐམས་ཅད་ལ་སོགས་པའི་དངོས་
པོ་ཐམས་ཅད་ཕྱུང་ལ། རྡོ་རྗེ་རྫུ་འཕྲུལ་རྣམ་པར་འཕྲུལ་པའི་ཕྱག་རྒྱ་བཅིངས་ལ། ཧཱུྃ་ཞེས་བྱ་བས་བརྟན་པར་བྱའོ། །རྡོ་རྗེ་ཁུ་ཚུར་གཉིས་ལོག་འགྱུ་བའི་ཚུལ་གྱིས་ནམ་མཁའི་ཕྱོགས་སུ་དངོས་པོ་ཐམས་ཅད་སྤྲུལ་པའི་བསམ་པས་བསྐོར་བར་བྱ་སྟེ། འདི་ནི་རྡོ་རྗེ་རྫུ་འཕྲུལ་རྣམ་པར་འཕྲུལ་པའོ། །ལྷ་

59-1-130a

ཐམས་ཅད་ནི་ལྷ་ཆེན་པོ་ལ་སོགས་པ་སྟེ། དེ་རྣམས་དབབ་པ་ལ་ནི་ལྷ་དབབ་པའི་སྦྱོར་བས་བསྒོམས་པས། རྡོ་རྗེ་བསྐོར་བའི་ཕྱག་རྒྱ་བཅིངས་ལ། རྡོ་རྗེ་ཁུ་ཚུར་གྱི་མཛུབ་མོ་གཉིས་ཀྱིས་ལྕགས་ཀྱུ་སྦྲེལ་བ་ལྟར་བྱས་ལ། གཡས་ལོགས་ནས་གཡོན་ལོགས་སུ་དྲངས་ཏེ་ཡང་
གཡས་སུ་དྲངས་ནས། བཞག་པ་འདི་ནི་རྡོ་རྗེ་བསྐོར་བའི་ཕྱག་རྒྱའོ། །ཀླུ་ཐམས་ཅད་ནི་མཐའ་ཡས་ལ་སོགས་པ་སྟེ། དེ་རྣམས་རྗེས་སུ་འབྲང་བར་བྱེད་པར་འདོད་པས་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ། ཀླུའི་མཚོར་བཟླས་བརྗོད་བྱས་ན། རྗེས་སུ་སྤྱོད་པར་འགྱུར་རོ། །གནོད་
སྦྱིན་ཐམས་ཅད་ཅེས་བྱ་བ་ལ་སོགས་པ་ལ་གང་འདོད་པའི་གནོད་སྦྱིན་གྱི་གཟུགས་ལ། གནོད་སྦྱིན་དགུག་པ་ལ་སོགས་པ་བྱས་ཏེ། རྡོ་རྗེ་ཁུ་ཚུར་གཉིས་ཀྱིས་བཀའ་བསྒོས་པའི་ཚུལ་དུ་བྱས་ལ། ཧཱུྃ་ཞེས་བྱ་བ་བཟླས་བརྗོད་བྱས་ལ། གནོད་སྦྱིན་ཐམས་ཅད་ཅི་བགྱི་ཞེས་བྱ་བ་བྱེད་པར་འགྱུར་རོ། །
འབྱུང་པོ་ཐམས་ཅད་ཅེས་བྱ་བ་ལ་སོགས་པ་ལ། སྟན་མཐོན་པོ་ལ་འདུག་སྟེ། གར་ལས་བྱུང་བའི་རྡོ་རྗེ་གསོར་བའི་ཕྱག་རྒྱས་ཁྲོ་བ་དང་བཅས་པས་དགོད་པའི་བཞིན་དང་། དབང་ཕྱུག་ཆེན་པོའི་གཟུགས་ལ་དབང་ཕྱུག་ཆེན་པོ་བཀུག་སྟེ། ཧཱུྃ་ཞེས་བྱ་བཟློས་ཤིང་། རྐང་པ་གཡོན་པས་མནན་ལ། ཧཱུྃ་ཧཱུྃ་
ཞེས་བཟླས་བརྗོད་བྱས་ན། འབྱུང་པོ་ཐམས་ཅད་དབང་དུ་འགྱུར་རོ། །སེར་བ་ཐམས་ཅད་བཟློག་པ་ལ་ནི་རྡོ་རྗེ་སྲིད་སྲུང་གི་ཕྱག་རྒྱས་སོ་ཞེས་བྱ་བ་ནི་དང་པོའི་རྡོ་རྗེ་ལས་གཡས་པའི་མཛུབ་མོ་སྡིགས་མཛུབ་བསྒྲེང་ལ། ཐོག་གམ་སྤྲིན་གྱི་ཕྱག་རྒྱ་དེ་ལས་རྡོ་རྗེ་འབར་བའི་འོད་ཟེར་ཀུན་དུ་འཁྲིགས་
པའི་འོད་དང་ལྡན་པ། ནམ་མཁའ་དང་མཉམ་པ་ཕྱུང་ལ། དེས་སེར་བ་རྣམས་ཐལ་བར་གྱུར་པར་བསམ་པར་བྱ་སྟེ། འདི་ནི་རྡོ་རྗེ་སྲིད་སྲུང་གི་ཕྱག་རྒྱའོ། །གློག་འབབ་པ་ཐམས་ཅད་བཟློག་པ་ལ་ནི། རྡོ་རྗེ་ཁྲོ་གཉེར་ཅན་གྱི་ཕྱག་རྒྱས་སོ་ཞེས་བྱ་བ་ནི། རྡོ་རྗེ་ཐལ་མོ་ལས་མཛུབ་མོ་གཉིས་སྦྱར་བའི་
ཕྱག་རྒྱ་དཔྲལ་བའི་ཕྱོགས་སུ་བཞག་ལ། དེ་ནས་སོར་མོ་ལྷག་མ་རྣམས་འབར་བ་གཏོང་བའི་ཚུལ་དུ་བྱ་བ་འདི་ནི། རྡོ་རྗེ་ཁྲོ་གཉེར་ཅན་གྱི་ཕྱག་རྒྱ་སྟེ། འདི་བཅིངས་ལ་རྡོ་རྗེ་མེ་ལྟར་འབར་བ་རབ་དག་ཉིད་རྣམ་པར་བསམས་ལ། ཧཱུྃ་ཞེས་བྱ་བ་ལས་རྡོ་རྗེ་མེ་འབར་བས་གློག་ལ་འབར་བར་བྱ་སྟེ། དེས་ནི་གློག་

59-1-130b

བཟློག་པར་འགྱུར་རོ། །ཆར་པ་དབབ་པ་ལ་ནི་ཀླུའི་མཚོར་བཟླས་བརྗོད་བྱའོ་ཞེས་བྱ་བ་ནི། ཆར་དཀོན་པའི་དུས་སུ་ཀླུའི་མཚོར་ཀླུ་བཀུག་ལ། ཧཱུྃ་ནཱ་ག་ཧཱུཾ་ཞེས་བྱ་བའི་སྙིང་པོ་སྤེལ་ལ། རྡོ་རྗེ་ཁྲོ་གཉེར་ཅན་གྱི་ཕྱག་རྒྱ་བཅིངས་ནས་བཟླས་ལ། རྡོ་རྗེ་འབར་བས་ཀླུ་ཚིག་པར་གྱུར་པར་རྣམ་པར་བསམ་
ཞིང་། སྙིང་བཙིར་བས། ཁྲག་སྐྱུགས་པར་འགྱུར་བར་རྣམ་པར་བསམས་ལ། དེས་ཆར་གྱི་རྒྱུན་འབེབས་པར་འགྱུར་རོ། །ཆར་པ་བཅད་པ་ལ་ནི། དྲི་མ་མེད་པའི་ཆུའི་སྦྱིན་སྲེག་བྱའོ་ཞེས་བྱ་བ་ནི། དཔལ་རྡོ་རྗེ་སེམས་དཔའ་ཧཱུྃ་ཞེས་བྱ་བས་མཆོད་ནས། ཆུ་དྲི་མ་མེད་པ་བླངས་ལ། དེར་དཔལ་རྡོ་རྗེ་
སེམས་དཔའ་ཟླ་བའི་དཀྱིལ་འཁོར་གྱི་སྟེང་དུ་ཟླ་བའི་མདོག་ཅན་སྔ་མ་བཞིན་དུ་རྣམ་པར་བསམས་ལ། ཀླུའི་ཚོགས་ཀྱི་སྟེང་དུ་དྲི་མ་མེད་པའི་ཆུའི་མཚེའུ་དབུལ་ཞིང་། དེས་དེ་ཚིམ་པར་འགྱུར་ཞིང་མཚེའུ་ཐམས་ཅད་དང་བྲལ་བར་བསམས་ལ། དེ་ནས་དེ་ཆར་ཉེ་བར་སྡུད་པར་འགྱུར་རོ། །སྤྲིན་བསྐྱེད་
པ་ལ་ནི་ཀླུ་བྲིས་ནས། བདུག་པས་བདུག་པར་བྱའོ་ཞེས་བྱ་བ་ནི། ཇི་ལྟར་གྲགས་པའི་ཀླུ་བྲིས་ལ་བདུག་པར་བྱའོ། །དེ་ནས་ཧཱུྃ་ཞེས་བྱ་བས། གུ་གུལ་ལ་བཟླས་ལ། ཀླུའི་གཟུགས་བརྙན་ལ་བདུག་པར་བྱས་ན། སྤྲིན་བསྐྱེད་པར་འགྱུར་རོ། །སྤྲིན་གཞིག་པ་ལ་ནི་རྡོ་རྗེ་ནམ་མཁའི་སྤྱན་གྱིས་སོ་
ཞེས་བྱ་བ་ནི་དང་པོའི་རྡོ་རྗེ་བཅིངས་ལ། རྡོ་རྗེའི་ལྟ་བས་ལྟ་ཞིང་ནམ་མཁའ་ལ་སྤྲིན་གཏོར་བར་བྱ་སྟེ། འདི་ནི་རྡོ་རྗེ་ནམ་མཁའི་སྤྱན་ནོ། །ཆུ་མེད་པའི་ཕྱོགས་སུ་ཞེས་བྱ་བ་ལ་སོགས་པ་ལ། རི་ལ་སོགས་པ་ཆུ་མེད་པའི་སའི་ཕྱོགས་སུ་ཧཱུྃ་ཞེས་བྱ་བ་ཟློས་ཤིང་། དང་པོའི་རྡོ་རྗེ་བཅིངས་པ་ལས། ཀླུ་གཉིས་
བྱས་ལ་ཡིད་ཀྱིས་ཀླུ་གནས་ན་གནས་པའི་ཀླུ་དང་། གཅིག་ཏུ་གྱུར་ནས། རི་ལ་སོགས་པ་ཕྱེ་སྟེ། ལངས་ནས་ཆུའི་ཕུང་པོ་བསྐྱེད་པར་བསམས་ཏེ། དེ་ལྟར་ན་ཤིན་ཏུ་བསིལ་བའི་ཆུའི་ཕུང་པོ་མི་ཟད་པར་སྐྱེད་པར་འགྱུར་ཏེ། འདི་ནི་རྡོ་རྗེ་ཀླུའི་ཕྱག་རྒྱའོ། །གཏེར་ཐམས་ཅད་ཤེས་པར་བྱ་བ་ལ་ནི་
སྣོད་དུ་ཆུ་བླུགས་པར་བྱའོ་ཞེས་བྱ་བ་ནི་གང་དུ་གཏེར་ཡོད་པར་རེ་བའི་སའི་ཕྱོགས་དེར་བཅོམ་ལྡན་འདས་རྡོ་རྗེ་སེམས་དཔའ་སྤྱན་དྲངས་ལ། ཡང་དག་པར་མཆོད་དེ་སྤོས་ཆུས་གང་བའི་ཟངས་མའི་བུམ་པ་རྡོ་རྗེ་ཁུ་ཚུར་གྱིས་བཟུང་ལ་ཇི་སྲིད་དུ་ཆུ་སྟོན་པ་དེ་སྲིད་དུ་བཟླས་བརྗོད་བྱ་སྟེ། དེ་ནས་གཏེར་

59-1-131a

འདི་ན་ཡོད་དོ་ཞེས་བྱ་བ་ཤེས་པར་བྱའོ། །སྣོད་གང་གི་ཆུས་བླུགས་པ་དེའི་དོན་ལ་སྣོད་ཆུ་བླུགས་པར་བྱའོ་ཞེས་གསུངས་པ་ཡིན་ནོ། །དེ་ལྟར་གཏེར་ཤེས་པར་བྱ་བས་གཏེར་གང་ན་ཡོད་པ་ངེས་པར་བྱས་ལ། གཏེར་དང་སྲུང་མ་དག་བཅིངས་ནས། རྡོ་རྗེ་དྲ་བའི་ཕྱག་རྒྱ་དང་རྡོ་རྗེ་
བསྲུང་བའི་ཕྱག་རྒྱ་རྣམས་ཀྱིས་གྲོགས་པོ་དང་། གནས་བསྲུང་བ་བྱས་ནས། རྡོ་རྗེ་བརྐོ་བའི་ཕྱག་རྒྱས་འཇོར་ལ་སོགས་པ་ལ་ཡི་གེ་ཧཱུྃ་བཟླས་ཏེ། དབུགས་འབྱིན་ཅིང་བརྐོ་བར་བྱའོ། །དང་པོའི་རྡོ་རྗེ་དེ་ཉིད་བཅིངས་ལ། དཔྲལ་བའི་ཕྱོགས་སུ་བཞག་ནས། གཏེར་འབྱིན་པའི་ཚུལ་དུ་བྱ་བ་
འདི་ནི་རྡོ་རྗེ་བརྐོ་བའི་ཕྱག་རྒྱའོ། །དེ་ནས་གཏེར་མཐོང་ནས་རྡོ་རྗེ་ནོར་གྱི་ཕྱག་རྒྱ་བཅིངས་ལ་བླང་བར་བྱ་སྟེ། དང་པོའི་རྡོ་རྗེ་ཉིད་དཔྲལ་བར་བཞག་ལ། ནོར་ལེན་པའི་ཚུལ་དུ་བྱ་བ་འདི་ནི་རྡོ་རྗེ་ནོར་གྱི་ཕྱག་རྒྱའོ། །རྒྱལ་སྲིད་ཐམས་ཅད་ཐོབ་པར་བྱ་བ་ལ་ནི་དབང་བསྐུར་བའི་ཕྱག་རྒྱས་སོ་ཞེས་བྱ་བ་ལ། 
དང་པོའི་རྡོ་རྗེ་བཅིངས་ལ། དབང་བསྐུར་བའི་གནས་སུ་བཞག་སྟེ། གང་མངོན་པར་འདོད་པའི་རྒྱལ་སྲིད་ཐོབ་པའི་བསམ་པས། ཡི་གེ་ཧཱུྃ་བཟླས་བརྗོད་བྱ་སྟེ། འདི་ནི་རྡོ་རྗེ་དབང་བསྐུར་བའི་ཕྱག་རྒྱའོ། །སའི་བདག་པོར་བྱ་བ་ལ་ནི། རྡོ་རྗེ་སེམས་དཔའི་དབང་བསྐུར་བའི་ཕྱག་རྒྱས་སོ་ཞེས་བྱ་བ་ནི། 
དང་པོའི་རྡོ་རྗེ་བཅིངས་ལས་ཐམས་ཅད་ཐོབ་པའི་ཚུལ་གྱིས། དཔྲལ་བའི་ཕྱོགས་སུ་གཞག་པར་བྱ་སྟེ། འདི་ནི་རྡོ་རྗེ་སེམས་དཔའི་དབང་བསྐུར་བའི་ཕྱག་རྒྱའོ། །དཀྱིལ་འཁོར་ཐམས་ཅད་ཅེས་བྱ་བ་ནི། འཇིག་རྟེན་དང་འཇིག་རྟེན་ལས་འདས་པ་རྣམས་སོ། །དེ་རྣམས་སྒྲུབ་པ་ནི་རྫོགས་པར་བྱ་བའོ། །
དེ་ཇི་ལྟར་འགྱུར་ཞེ་ན། རྡོ་རྗེ་འཁོར་ལོའི་ཕྱག་རྒྱས་སོ་ཞེས་བྱ་བ་གསུངས་ཏེ། རྡོ་རྗེ་ཁུ་ཚུར་གཉིས་བཅིངས་ལ། །མཐེའུ་ཆུང་མཛུབ་མོ་རྡོ་རྗེར་བསྡམས། །རྡོ་རྗེ་འཁོར་ལོ་ཞེས་བྱར་གྲགས། །དཀྱིལ་འཁོར་ཐམས་ཅད་སྒྲུབ་བྱེད་པའོ། །ཞེས་བཤད་པའོ། །ཕྱག་རྒྱ་ཐམས་ཅད་བསྒྲུབ་པ་ལ་ནི། བདེ་བ་ཆེན་
པོའི་དམ་ཚིག་གི་ཕྱག་རྒྱས་སོ་ཞེས་བྱ་བ་ལ། ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་རྣམས་ནི། ཕྱག་རྒྱ་ཐམས་ཅད་དོ། །དེ་བསྒྲུབ་པ་ནི་རྫོགས་པར་བྱ་བ་སྟེ། རང་དབང་དུ་བྱས་པའོ། །དང་པོའི་རྡོ་རྗེ་ནི་བདེ་བ་ཆེན་པོའི་དམ་ཚིག་གི་ཕྱག་རྒྱའོ། །འདི་སྐད་སྟོན་པར་འགྱུར་ཏེ། ཐལ་མོ་ཁོང་སྟོང་དུ་སྦྱར་ལ། 

59-1-131b

བཛྲ་ཨཉྫ་ལི་ཞེས་བྱ་བས། རྡོ་རྗེ་ཐལ་མོ་བཅིངས་ཏེ། དེ་ནས་བཛྲ་བནྡྷ་ཞེས་བྱ་བས། དམ་ཚིག་གི་ཕྱག་རྒྱ་བཅིངས་ལ། བཛྲ་བནྡྷ་ཏྲ་ཐ། ཞེས་བྱ་བས་རྡོ་རྗེ་བསྡམས་པ་སྙིང་གར་དབྱེ་བར་བྱའོ། །དེ་ནས་བཛྲ་ཨཱ་བེ་ཤ་ཨ་ཞེས་བྱ་བས། རྡོ་རྗེ་དབབ་པའི་དམ་ཚིག་གི་ཕྱག་རྒྱ་བཅིངས་ལ། ཨ་ཞེས་བྱ་བས་
བདག་ཉིད་ལ་དབབ་པར་བྱའོ། །དེ་ནས་དབབ་པ་བསྡུ་བ་བྱས་ལ། བཛྲ་མུཥྚི་ཞེས་བྱ་བས། རྡོ་རྗེ་དམ་ཚིག་གི་ཕྱག་རྒྱ་བཅིངས་ལ། བཛྲ་མུཥྚི་བཾ་ཞེས་བརྗོད་དོ། །དེ་ནས་ཧཱུཾ་ཞེས་བྱ་བཟློས་ཤིང་། དང་པོའི་རྡོ་རྗེ་བཅིང་བར་བྱ་སྟེ། དེ་ལྟ་བུས་ནི་ཕྱག་རྒྱ་ཐམས་ཅད་འགྲུབ་པར་འགྱུར་རོ། །དམ་ཚིག་ཐམས་
ཅད་སྒྲུབ་པ་ལ་ནི། རབ་ཏུ་དགའ་བའི་རྡོ་རྗེའི་ཕྱག་རྒྱས་སོ་ཞེས་བྱ་བ་ལ། ལྔ་པོ་བསྡུས་པའི་ཕྱག་རྒྱ་ནི་རབ་ཏུ་དགའ་བའི་རྡོ་རྗེའི་ཕྱག་རྒྱ་སྟེ། དེས་དཀྱིལ་འཁོར་ཐམས་ཅད་གྲུབ་པར་འགྱུར་རོ། །གང་གི་ཕྱིར་སློབ་མ་གཞུག་པར་བྱ་བའི་ཕྱིར། དེ་བཅིངས་ལ་ཡང་སློབ་དཔོན་གྱིས་དཀྱིལ་འཁོར་དུ་གཞུག་
པར་བྱ་སྟེ། དེ་བས་ན་དེ་ནི་དཀྱིལ་འཁོར་ཐམས་ཅད་སྒྲུབ་པར་འགྱུར་རོ། །འདི་སྐད་སྟོན་པར་འགྱུར་ཏེ། ཇི་ལྟར་རྡོ་རྗེ་སེམས་དཔའི་དཀྱིལ་འཁོར་དུ། དེས་དཀྱིལ་འཁོར་བསྒྲུབ་པར་བྱ་བ་དེ་བཞིན་དུ་དེ་བཞིན་གཤེགས་པ་ལ་སོགས་པའི་དཀྱིལ་འཁོར་དུ་ཞུགས་ལ། དེས་དཀྱིལ་འཁོར་བསྒྲུབ་པར་བྱ་
བ་ཡིན་ནོ། །དངོས་གྲུབ་ཐམས་ཅད་སྒྲུབ་པ་ལ་ནི་རྡོ་རྗེ་སྙེམས་མའི་ལྕགས་ཀྱུའི་ཕྱག་རྒྱས་སོ་ཞེས་བྱ་བ་ནི། རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་གྲུབ་པ་ནི་དངོས་གྲུབ་ཐམས་ཅད་དེ། དེ་མངོན་སུམ་དུ་བྱ་བ་ནི་སྒྲུབ་པའོ། །བཅོམ་ལྡན་འདས་རྡོ་རྗེ་སེམས་དཔའ་ལས་ཀྱི་ཕྱག་རྒྱ་ནི་རྡོ་རྗེ་སྙེམས་
པ་སྟེ། དེའི་གཡས་པའི་ལྕགས་ཀྱུ་ནི་རྡོ་རྗེ་སྙེམས་པའི་ལྕགས་ཀྱུ་སྟེ། འདི་བཅིངས་ལ་འཇིག་རྟེན་དང་། འཇིག་རྟེན་ལས་འདས་པའི་ལྷའི་གཟུགས་མདུན་དུ་བཞག་ནས། ཧཱུྃ་ཞེས་བྱ་བ་བཟླས་བརྗོད་བྱ་སྟེ། དེ་ནས་ཐམས་ཅད་དངོས་གྲུབ་སྟེར་བར་འགྱུར་རོ། །མ་གྲུབ་པ་ཐམས་ཅད་གྲུབ་པར་སྒྲུབ་པ་ལ་
ནི་རྡོ་རྗེ་གྲུབ་པའི་ཕྱག་རྒྱས་སོ་ཞེས་བྱ་བ་ལ། རྡོ་རྗེ་སེམས་དཔའ་ལ་སོགས་པ་ཇི་སྐད་དུ་བཤད་པའི་ཕྱག་རྒྱ་ཐམས་ཅད་མ་གྲུབ་པ་ལ་ནི། མ་གྲུབ་པ་ཐམས་ཅད་ཅེས་བྱའོ། །དེ་ཐམས་ཅད་གྲུབ་པར་བྱ་བ་ལ་ནི། ཡང་སྦྱོར་བའི་རྗེས་སུ་འབྲངས་ནས། རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཐམས་ཅད་

59-1-132a

བསྒྲུབ་ཅིང་རྫོགས་པར་བྱ་བ་ལ་ནི། མ་གྲུབ་པ་ཐམས་ཅད་གྲུབ་པར་སྒྲུབ་པའོ། །དང་པོའི་རྡོ་རྗེ་ནི་རྡོ་རྗེ་གྲུབ་པའི་ཕྱག་རྒྱ་སྟེ། དེ་བཅིངས་ནས་མ་གྲུབ་པ་ཐམས་ཅད་གྲུབ་པར་འགྱུར་རོ། །འདི་སྐད་སྟོན་པར་འགྱུར་ཏེ། གང་གི་ཚེ་རྡོ་རྗེ་སྙེམས་པའི་ལྕགས་ཀྱུའི་ཕྱག་རྒྱ་དངོས་གྲུབ་ཐམས་
ཅད་བསྒྲུབས་ན། དངོས་གྲུབ་ཐམས་ཅད་གྲུབ་པར་མ་གྱུར་ན། དེའི་ཚེ་དང་པོའི་རྡོ་རྗེ་བཅིངས་ལ། ཧཱུྃ་ཞེས་བྱ་བའི་གླུའི་བཟླས་པས། དངོས་གྲུབ་ཐམས་ཅད་བསྒྲུབ་པར་བྱའོ། །རིག་པ་འཛིན་པ་ཐམས་ཅད་སྒྲུབ་པ་ནི། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིག་པ་འཛིན་པ་གྲུབ་པ་སྟེ། དེ་སྒྲུབ་པ་
ནི་རིག་པ་འཛིན་པ་ཐམས་ཅད་སྒྲུབ་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་རིག་པ་འཛིན་པའི་ཕྱག་རྒྱས་སོ་ཞེས་བྱ་བ་གསུངས་ཏེ། ཧཱུྃ་ཟློས་ཤིང་། ཟླ་བའི་གཟུགས་ལ་གནས་ནས་ནི། །ནམ་མཁའི་སྟེང་དུ་འདུག་ནས་སུ། །ལག་ན་རྡོ་རྗེ་བསྒོམས་ནས་ནི། །རྡོ་རྗེ་རིག་པ་འཛིན་པར་འགྱུར། །ཟླ་བའི་
གཟུགས་ལ་གནས་ནས་ནི། །ནམ་མཁའི་སྟེང་དུ་འདུག་ནས་སུ། །ལག་ཏུ་རིན་ཆེན་བསྒོམས་ནས་ནི། །རིན་ཆེན་རིག་པ་འཛིན་པར་འགྱུར། །ཟླ་བའི་གཟུགས་ལ་གནས་ནས་ནི། །ནམ་མཁའི་སྟེང་དུ་འདུག་ནས་སུ། །ལག་ཏུ་པདྨ་བསྒོམས་ནས་ནི། །པདྨའི་རིག་པ་འཛིན་པར་འགྱུར། །ཟླ་བའི་གཟུགས་
ལ་གནས་ནས་ནི། །ནམ་མཁའི་སྟེང་དུ་འདུག་ནས་སུ། །ལག་ཏུ་སྣ་ཚོགས་བསྒོམས་ནས་ནི། །རིག་པ་འཛིན་པ་ཀུན་དུ་འགྱུར། །ཞེས་བྱ་བ་འདི་དག་ནི་རྡོ་རྗེ་རིག་པ་འཛིན་པའི་ཕྱག་རྒྱའོ། །རྡོ་རྗེ་ཐམས་ཅད་ཅེས་བྱ་བ་ལ་སོགས་པ་ལ། རྡོ་རྗེ་ཐམས་ཅད་ནི། དང་པོའི་རྡོ་རྗེ་དང་། དེ་བཞིན་གཤེགས་པའི་རྡོ་རྗེ་
དང་། ཁྲོ་བོའི་རྡོ་རྗེ་དང་། རིན་པོ་ཆེའི་རྡོ་རྗེ་དང་། པདྨའི་རྡོ་རྗེ་དང་། སྣ་ཚོགས་རྡོ་རྗེ་སྟེ། དེ་དག་སྒྲུབ་པ་ནི་རྡོ་རྗེ་ཐམས་ཅད་སྒྲུབ་པའོ། །དེ་བསྒྲུབ་པར་ཇི་ལྟར་འགྱུར་ཞེ་ན། རྡོ་རྗེ་ཐམས་ཅད་ཀྱི་མཆོག་གི་ཕྱག་རྒྱས་སོ་ཞེས་གསུངས་ཏེ། རྡོ་རྗེ་བསྡམས་པ་ལས་བྱུང་བ་དང་པོའི་རྡོ་རྗེ་ནི། རྡོ་རྗེ་ཐམས་ཅད་ཀྱི་མཆོག་གི་ཕྱག་
རྒྱའོ། །བྱང་ཆུབ་སེམས་དཔའ་ཐམས་ཅད་ནི་ཆོས་ཀྱི་དཀྱིལ་འཁོར་ལས་གསུངས་པའི་རྣམ་པར་སྣང་མཛད་ལ་སོགས་པ་ནས། བསྐལ་པ་བཟང་པོའི་མཐར་ཐུག་པ་རྣམས་སོ། །དེ་ནས་བསྒྲུབ་པར་ཇི་ལྟར་འགྱུར་ཞེ་ན། ཐུགས་ཀྱི་རྡོ་རྗེས་སོ་ཞེས་བྱ་བ་གསུངས་ཏེ། ལྷའི་རྣལ་འབྱོར་ཇི་ལྟ་བ་བཞིན་དུ་བྱས་

59-1-132b

ལ་ཧཱུྃ་ཞེས་བྱ་བཟློས་ཤིང་། ཕྲ་མོའི་རྣལ་འབྱོར་སྦྱོར་བ་ཡིས། །ཤིན་ཏུ་མཉམ་པར་གཞག་ནས་བསྒོམ། །བྱང་ཆུབ་སེམས་དཔའ་ཐུགས་རྡོ་རྗེ། །རྡོ་རྗེ་སེམས་དཔའི་བསྒོམ་པའོ། །ཞེས་བྱ་བ་སྟེ། དེ་ལྟ་བུའི་རང་གི་མཚན་མའི་སྙིང་གའི་ཕྱོགས་སུ་གཞག་ལ། གང་དང་གང་བསྒོམས་པ་དེ་དང་དེ་
འགྲུབ་པར་འགྱུར་ཏེ། འདི་ནི་ཐུགས་རྡོ་རྗེའི་ཕྱག་རྒྱའོ། །རྡོ་རྗེ་འཛིན་པ་ཉིད་སྒྲུབ་པ་ལ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོས་སོ་ཞེས་བྱ་བ་ནི་ཤེས་པར་ཟད་དོ། །དེ་བཞིན་དུ་སངས་རྒྱས་ཉིད་སྒྲུབ་པ་ལ་ཡང་ཧཱུྃ་ཞེས་བྱ་བ་གླུ་དང་ཟློས་ཤིང་། བྱང་ཆུབ་མཆོག་གི་ཕྱག་རྒྱ་བཅིངས་ནས་བསྒྲུབ་པར་བྱའོ། །བདེ་
བ་ཆེན་པོ་ཞེས་བྱ་བ་ལ་ནི། བདེ་བ་ཡང་ཡིན་ལ་ཆེན་པོ་ཡང་དེ་ཉིད་ཡིན་པས། བདེ་བ་ཆེན་པོ་སྟེ། གཉིས་སུ་མེད་པའི་དེ་བཞིན་གཤེགས་པའི་ཡེ་ཤེས་སོ། །དེ་ཡང་། མི་ཟད་པ་ཡི་དངོས་གྲུབ་ཀུན། །བདེ་བ་ཆེན་པོ་ཞེས་བཤད་དོ། །ཞེས་གསུངས་པའི་ཕྱིར་རོ། །དེ་ཉིད་ནི་རྡོ་རྗེ་དོན་ཡོད་པ་སྟེ། ལོངས་
སྤྱོད་རྫོགས་པ་དང་། སྤྲུལ་པའི་སྐུ་རྫོགས་པར་བྱེད་པས་འབྲས་བུ་དང་བཅས་པའོ། །དེའི་དམ་ཚིག་ཐམས་ཅད་ནི་འཇིག་རྟེན་དང་། འཇིག་རྟེན་ལས་འདས་པའི་ལྷའི་ཚུལ་རྣམས་ཏེ། རྡོ་རྗེ་སེམས་དཔའ་ནས་བརྩམས་ནས། ཆུ་ལྷའི་མཐར་ཐུག་པའི་བར་དུ་འདི་སྐད་དུ་བཤད་པ་སྟེ། གང་གི་ཕྱིར་དེ་རྣམས་ནི་འདིར་
བྱང་ཆུབ་ཀྱི་སེམས་ཆེན་པོ་ལས་བྱུང་བར་འདོད་པའི་ཕྱིར། དམ་ཚིག་ཐམས་ཅད་ཅེས་བྱའོ། །རྟོག་པ་ནི་རྣམ་པར་རྟོག་པ་སྟེ། དེ་ཉིད་ཀྱིས་རྟོག་པ་གཞན་ཐམས་ཅད་ཟིལ་གྱིས་མནན་ནས། འབར་ཞིང་མཛེས་པས་ན་རྒྱལ་པོ་སྟེ། དེ་སྟོན་པའི་སྒྲའི་ཚོགས་ལ་ཡང་ཉེ་བར་གདགས་པས་དེ་སྐད་ཅེས་བྱའོ། །དེ་བས་
ན་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་ཐམས་ཅད་ཀྱི་རྟོག་པའི་རྒྱལ་པོ་ཆེན་པོ་ལས་ཞེས་བྱའོ། །དམ་ཚིག་གི་དེ་ཁོ་ན་ཉིད་ཆེན་པོ་ནི་བཤད་ཟིན་ཏོ། །དེ་ཉིད་ནི་མི་ཕྱེད་པས་ན་རྡོ་རྗེ་ཞེས་བྱ་སྟེ། མིང་དེ་སྐད་ཅེས་བྱ་བ་ནི་རྟོག་པའི་རྒྱལ་པོ་ཆེན་པོ་རྫོགས་སོ་ཞེས་བྱ་བ་ནི། བྱང་ཆུབ་ཀྱི་སེམས་ཆེན་པོ་དང་། ཕྱག་རྒྱ་ཆེན་
པོ་དང་། མེ་ལོང་ལྟ་བུའི་ཡེ་ཤེས་དང་། རྣམ་པར་ཐར་པའི་སྒོ་སྟོང་པ་ཉིད་དང་། ངོ་བོ་ཉིད་ཀྱི་སྐུ་ལ་སོགས་པ་སྟོན་པའི་རང་བཞིན་གྱི་མཐར་ཐུག་པའོ་ཞེས་པའོ། །རྡོ་རྗེ་སེམས་དཔའི་དབུགས་དབྱུང་བའི་བཤད་པ་རྫོགས་སོ།།    །།དེ་ལྟར་འདོད་ཆགས་ཀྱིས་འདོད་ཆགས་སྤང་བར་བྱ་བའི་ཕྱིར། དཔལ་

59-1-133a

རྡོ་རྗེ་སེམས་དཔའི་དཀྱིལ་འཁོར་དང་། དེ་བསྒྲུབས་པའི་འབྲས་བུ་ཡང་གསུངས་ནས། ད་ནི་རང་བཞིན་བཟང་ཞིང་ཆ་མཉམ་པ་ལ་སྤྱོད་པའི་སེམས་ཅན་རྣམས་རྗེས་སུ་བཟུང་བའི་ཕྱིར་དེ་ནས་ཞེས་བྱ་བ་ལ་སོགས་པས་བཅོམ་ལྡན་འདས་རྣམ་པར་སྣང་མཛད་ཀྱི་དཀྱིལ་འཁོར་གསུངས་
ཏེ། དེ་ནས་ཞེས་བྱ་བ་ནི་དེ་མ་ཐག་པ་སྟེ། འོག་མིན་གྱི་གནས་སུ་མངོན་པར་རྫོགས་པར་སངས་རྒྱས་ནས། འདོད་པའི་ཁམས་ཐམས་ཅད་ཀྱི་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་གནས་ན། ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་བྱེ་བ་ཕྲག་བརྒྱ་དང་ཐབས་ཅིག་ཏུ་བཞུགས་ནས། 
དེའི་རྗེས་ཐོགས་ཉིད་ལའོ། །བདུད་བཞི་བཅོམ་པས་ན་བཅོམ་ལྡན་འདས་སོ། །ཕྱོགས་བཅུ་བོ་དག་ཏུ་རྣམ་པར་སྣང་ཞིང་གཟུགས་ཐམས་ཅད་ཡང་དག་པར་སྟོན་པར་མཛད་པས་ན་རྣམ་པར་སྣང་མཛད་དོ། །ཡང་ཞེས་བྱ་བའི་སྒྲ་ནི་སླར་ཡང་ཞེས་བྱ་བའི་དོན་ཏོ། །རབ་ཏུ་དགའ་བ་ལ་སོགས་པ་སྟོན་
པར་མཛད་ནས་འདི་ཡང་དག་པར་སྟོན་པར་མཛད་དོ། །དེ་བཞིན་གཤེགས་པ་ཐམས་ཅད་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་ལ་སོགས་པའོ། །དེ་རྣམས་ཀྱི་ཞི་བའི་ཆོས་ཉིད་ནི་ཞི་བའི་ཉམས་སྟོན་པའི་སེམས་དང་སེམས་ལས་བྱུང་བའི་གཟུང་
བ་དང་། འཛིན་པའི་རྣམ་པར་རྟོག་པ་དང་བྲལ་བ་ཉིད་དོ། །དེའི་མངོན་པར་རྫོགས་པར་བྱང་ཆུབ་པ་ནི་ཐུགས་སུ་ཆུད་པའོ། །དེའི་སྒྲུབ་པ་ནི་གང་གིས་མངོན་སུམ་དུ་བྱེད་པར་འགྱུར་བའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ཞེས་བྱ་བ་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ནི་བྱང་ཆུབ་ཀྱི་སེམས་ཆེན་
པོ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་རབ་ཏུ་འབྱེད་པའི་རྣམ་པ་སྟེ། དེ་ནི་བདག་གི་ཕུན་སུམ་ཚོགས་པའི་ཕ་རོལ་ཏུ་ཕྱིན་ཅིང་འགྲོ་བ་ཡིན་པས་ན་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེའི་ཚུལ་ནི་རྡོ་རྗེ་སྲ་བ་ཉིད་ཀྱི་ཕྱིར་ཞེས་བྱ་
བ་ལ་སོགས་པ་སྟེ། དེ་ཐོས་པ་ལ་སོགས་པས་རྟོག་པ་དང་བཅས་པ་གང་ཡིན་པའི་ཚུལ་ཏེ། གསུངས་ཏེ་ཞེས་བྱ་བར་སྦྱར་རོ། །འདི་ཞེས་བྱ་བ་ནི་བློ་ལ་བཞག་ནས་གསུངས་པའོ། །གསུངས་ཏེ་ཞེས་བྱ་བ་ནི་གང་ལ་མིང་ཇི་སྐད་ཅེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་སྟོན་པར་མཛད་ཅིང་འཆད་

59-1-133b

པར་མཛད་པའོ། །རྡོ་རྗེ་སྲ་བ་ཉིད་ཀྱི་ཕྱིར་རྡོ་རྗེ་མཉམ་པ་ཉིད་ཅེས་བྱ་བ་ལ་སོགས་པ་ལ། རྡོ་རྗེ་ནི་སྟོང་པ་ཉིད་ཀྱི་ཡེ་ཤེས་ཏེ། བྱང་ཆུབ་ཀྱི་སེམས་ཆེན་པོ་དེ་ཉིད་ནི་དེ་བཞིན་གཤེགས་པའི་རིགས་ལས་རྡོ་རྗེའོ། །དེའི་མཉམ་པ་ཉིད་ནི་གཟུང་བ་དང་། འཛིན་པའི་རྣམ་པར་རྟོག་པ་དང་བྲལ་བ་ཉིད་དོ། །
དེའི་མངོན་པར་རྫོགས་པར་བྱང་ཆུབ་པ་ནི་དེ་བཞིན་ཉིད་མངོན་སུམ་དུ་མཛད་པའོ། །དེ་ཉིད་ནི་བྱང་ཆུབ་ཆེན་པོ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །རྒྱུ་ཅིའི་ཕྱིར་ཞེ་ན། རྡོ་རྗེ་སྲ་བ་ཉིད་ཀྱི་ཕྱིར་ཞེས་བྱ་བ་གསུངས་ཏེ། གང་གི་ཕྱིར་དེ་བཞིན་ཉིད་དང་། སྟོང་པ་ཉིད་དང་། འདུས་མ་
བྱས་དང་། རང་བཞིན་མེད་པའི་ངོ་བོ་ཉིད་ཡིན་པས་ན་རྡོ་རྗེ་སྟེ། དེ་བཞིན་ཉིད་དུ་རོ་གཅིག་པའི་བྱང་ཆུབ་ཆེན་པོའི་མཚན་ཉིད་ཅན་གྱི་སེམས་ལ་ནི། རྒྱུ་བ་དང་མི་རྒྱུ་བ་རྣམས་ཀྱིས་མི་ཤིགས་པ་ཡིན་པའི་ཕྱིར་ན་རྡོ་རྗེ་ལྟར་བརྟན་ཞིང་སྲ་བའོ། །རྡོ་རྗེ་བརྟན་པར་གྱུར་པ་ཉིད་ཀྱིས་ན། རྡོ་རྗེ་བརྟན་པ་ཉིད་དེ། 
དེས་རྡོ་རྗེ་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །དེ་ལྟར་བྱང་ཆུབ་ཀྱི་སེམས་ཆེན་པོའི་ངོ་བོ་ཉིད་མི་བསྐྱོད་པའི་རང་བཞིན་དང་། དེའི་རིགས་ཀྱི་ངོ་བོར་བཤད་ནས། ད་ནི་སྦྱིན་པའི་ཕ་རོལ་ཏུ་ཕྱིན་པ་དང་། རིན་ཆེན་འབྱུང་ལྡན་གྱི་ངོ་བོ་ཉིད་དང་དེའི་རིགས་ཀྱི་ངོ་བོ་ཉིད་དུ་
བསྟན་པའི་ཕྱིར། དོན་གཅིག་པ་ཞེས་བྱ་བ་ལ་སོགས་པ་གསུངས་ཏེ། དེ་ལ་སྦྱིན་པའི་ཕ་རོལ་ཏུ་ཕྱིན་པའམ། རིན་ཆེན་འབྱུང་ལྡན་གྱི་ངོ་བོ་ཉིད་དང་། རིན་པོ་ཆེའི་རིགས་ནི་དོན་ཏོ། །དེའི་མཉམ་པ་ཉིད་ནི་གཉིས་དང་བྲལ་བ་ཉིད་དོ། །དེ་མངོན་པར་རྫོགས་པར་བྱང་ཆུབ་པ་ནི་མངོན་སུམ་དུ་མཛད་པ་
ཉིད་དོ། །དེ་ཉིད་ནི་བྱང་ཆུབ་ཆེན་པོ་སྟེ་སྔ་མ་བཞིན་ནོ། །དེ་ཅིའི་ཕྱིར་ཞེ་ན། དོན་གཅིག་པའི་ཕྱིར་ཞེས་བྱ་བ་གསུངས་ཏེ། དོན་གཅིག་པ་ཉིད་དུ་འགྱུར་བས་དོན་གཅིག་པ་ཉིད་ཀྱི་ཕྱིར་དོན་གྱི་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །དེའི་རིགས་ཀྱི་ངོ་བོ་ཉིད་དུ་བསྟན་
པར་བྱ་བའི་ཕྱིར། དོན་གཅིག་པ་ཞེས་བྱ་བ་ལ་སོགས་པ་གསུངས་ཏེ། དེ་ལ་སྦྱིན་པའི་ཕ་རོལ་ཏུ་ཕྱིན་པ་དང་། རིན་ཆེན་འབྱུང་ལྡན་གྱིས་འདི་སྐད་སྟོན་པར་འགྱུར་ཏེ། གང་སྦྱིན་པའི་ཕ་རོལ་ཏུ་ཕྱིན་པ་ཉིད་དང་། རིན་པོ་ཆེའི་རིགས་དེ་དག་གི་མཉམ་པ་ཉིད་རྟོག་པ་གང་ཡིན་པ་དེ་ནི་ཆོས་ཉིད་དང་གཞན་

59-1-134a

དུ་མི་འགྱུར་བའོ། །དེ་བས་ན་དེས་དོན་གྱི་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །དེ་ལྟར་སྦྱིན་པའི་ཕ་རོལ་ཏུ་ཕྱིན་པ་དང་། བཅོམ་ལྡན་འདས་རིན་ཆེན་འབྱུང་ལྡན་གྱི་ངོ་བོ་ཉིད་དང་། དེའི་རིགས་ཀྱི་ངོ་བོ་ཉིད་དུ་ཡང་བསྟན་ནས། དེ་ནི་ཤེས་རབ་ཀྱི་
ཕ་རོལ་ཏུ་ཕྱིན་པ་དང་། འོད་དཔག་ཏུ་མེད་པའི་ངོ་བོ་ཉིད་དང་། དེའི་རིགས་ཀྱི་ངོ་བོ་ཉིད་ཀྱང་བསྟན་པར་བྱ་བའི་ཕྱིར། ངོ་བོ་ཉིད་རྣམ་པར་དག་པ་ཞེས་བྱ་བ་ལ་སོགས་པ་གསུངས་ཏེ། དེ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་དང་། འོད་དཔག་ཏུ་མེད་པའི་ངོ་བོ་ཉིད་དང་། དེའི་རིགས་ཀྱི་ངོ་བོ་ཉིད་ནི་ཆོས་སོ། །
དེའི་མཉམ་པ་ཉིད་ནི་རང་བཞིན་གྱིས་རྣམ་པར་དག་པའོ། །དེའི་མངོན་པར་བྱང་ཆུབ་པ་ནི་ཞེས་པ་ནི་སྔ་མ་བཞིན་ནོ། །དེ་ནི་འདིར་བྱང་ཆུབ་ཆེན་པོའོ། །དེ་ཅིའི་ཕྱིར་ཞེ་ན། ངོ་བོ་ཉིད་རྣམ་པར་དག་པའི་ཕྱིར་ཞེས་བྱ་བ་གསུངས་ཏེ། སོ་སོར་རྟོག་པའི་ཡེ་ཤེས་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་ནི།
གཟུང་བ་དང་། འཛིན་པའི་རྣམ་པར་རྟོག་པའི་དྲི་མ་མེད་པའི་ངོ་བོ་ཉིད་ཀྱིས་རྣམ་པར་དག་པའོ། །ངོ་བོ་ཉིད་དག་པར་གྱུར་པ་ཉིད་ཀྱིས་ན་ངོ་བོ་ཉིད་ཀྱིས་རྣམ་པར་དག་པའི་ཕྱིར་ཏེ། དེས་ཆོས་ཐམས་ཅད་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་པའོ། །དེ་ཅིའི་ཕྱིར་ཞེ་ན། གང་གི་ཕྱིར་
ཆོས་རྣམས་ལས་ཆོས་ཅན་གཞན་དུ་མི་འགྱུར་བའི་ཕྱིར་ཏེ། དེ་བས་ན་གང་ཆོས་ཀྱི་མཉམ་པ་ཉིད་མངོན་པར་རྫོགས་པར་བྱང་ཆུབ་པ་དང་། གང་ཡང་ཆོས་རྣམས་ཀྱི་རྣམ་པར་དག་པ་དེ་ནི་གཅིག་པ་ཉིད་དོ། །དེ་བས་ན་དེས་ཆོས་ཐམས་ཅད་ཀྱི་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་
ཆེན་པོའོ། །དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་དང་། འོད་དཔག་ཏུ་མེད་པའི་ངོ་བོ་ཉིད་དང་། དེའི་རིགས་ཀྱི་ངོ་བོ་ཉིད་དུ་ཡང་བསྟན་ནས། ད་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། དོན་ཡོད་པར་གྲུབ་པའི་ངོ་བོ་ཉིད་དང་། དེའི་རིགས་ཀྱི་ངོ་བོ་ཉིད་བསྟན་པར་བྱ་བའི་ཕྱིར། ཐམས་ཅད་ལ་ཞེས་བྱ་བ་
ལ་སོགས་པ་གསུངས་ཏེ། ཐམས་ཅད་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། དོན་ཡོད་པར་གྲུབ་པའི་ངོ་བོ་ཉིད་དང་། དེའི་རིགས་ཀྱི་ངོ་བོ་ཉིད་དོ། །དེའི་མཉམ་པ་ཉིད་ནི་ཆོས་ཐམས་ཅད་ཀྱི་ངོ་བོ་ཉིད་དང་། རང་བཞིན་གྱིས་འོད་གསལ་བའོ། །དེའི་མངོན་པར་རྫོགས་པར་བྱང་ཆུབ་པ་ནི་ཞེས་པ་ནི་སྔ་མ་

59-1-134b

བཞིན་ཏེ། དེ་ཉིད་བྱང་ཆུབ་ཆེན་པོའོ། །ཅིའི་ཕྱིར་ཞེ་ན། ཐམས་ཅད་ལ་རྣམ་པར་མི་རྟོག་པ་ཉིད་ཀྱི་ཕྱིར་ཞེས་བྱ་བ་གསུངས་ཏེ། ཐམས་ཅད་ནི་ཇི་སྐད་དུ་བཤད་པ་རྣམས་སོ། །དེའི་མི་རྟོག་པ་ནི་གཟུང་བ་དང་འཛིན་པར་བྱེད་པའི་རྣམ་པར་རྟོག་པ་མེད་པའོ། །དེའི་ངོ་བོ་ཉིད་ཡིན་པས་ན། ཐམས་ཅད་ལ་
རྣམ་པར་མི་རྟོག་པའི་ཕྱིར་ཏེ། དེས་ཐམས་ཅད་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །འདི་སྐད་སྟོན་པར་འགྱུར་ཏེ། དེ་ཐམས་ཅད་མཉམ་པ་ཉིད་རྟོག་པ་དང་། གང་ཡང་ཐམས་ཅད་ལ་མི་རྟོག་པ་ཉིད་དེ། །ཆོས་འདི་ཉིད་ནི་ཐ་མི་དད་པ་སྟེ། དེའི་ཕྱིར་འདིས་ཐམས་
ཅད་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །ད་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ཉན་པ་དང་། སེམས་པ་དང་། སྒོམ་པར་བྱེད་པ་རྣམས་ལ་སྤྲོ་བ་བསྐྱེད་པར་བྱ་བའི་ཕྱིར་ལག་ན་རྡོ་རྗེ་གང་ལ་ལ་ཞེས་བྱ་བ་ལ་སོགས་པས་འབྲས་བུ་གསུངས་པ་ཡིན་ཏེ། གང་ལ་ལ་
ཞེས་བྱ་བ་ནི་སྐྱེས་པ་དང་། བུད་མེད་དང་། ཁྱེའུ་དང་བུ་མོ་ལ་སོགས་པའི་གཟུགས་ཅན་གྱི་ཐ་མལ་པའི་གང་ཟག་གསུངས་པ་ཡིན་ནོ། །ཆོས་མངོན་པར་བསྒྲུབ་པ་བཞི་པོ་ཞེས་བྱ་བ་ནི། བྱང་ཆུབ་ཀྱི་སེམས་དང་། སྦྱིན་པའི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་
ཕ་རོལ་ཏུ་ཕྱིན་པའི་ངོ་བོ་ཉིད་ནི་བཞིར་གསུངས་པ་སྟེ། དེ་ཉིད་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་ཀྱི་མངོན་པར་བསྒྲུབ་པ་སྟེ། ཐོས་པ་དང་། བསམ་པ་དང་། བསྒོམ་པའི་ཤེས་རབ་ཀྱིས་མངོན་དུ་བྱ་བར་འོས་པ་ཡིན་ནོ། །འདི་དག་ཅེས་བྱ་བ་ནི་བཤད་མ་ཐག་པའི་གྲངས་བཞིར་ཡོངས་སུ་ཆུད་པའི་
བྱང་ཆུབ་ཀྱི་སེམས་ལ་སོགས་པའི་ངོ་བོ་ཉིད་ཀྱི་ཆོས་རྣམས་སོ། །དེ་ཉན་པ་ནི་རྣ་བའི་རྣམ་པར་ཤེས་པས་ངེས་པར་གཟུང་བའོ། །འཛིན་པ་ནི་ཚིག་དང་དོན་གྱི་ཚུལ་གྱིས་མི་བརྗེད་པར་སེམས་ལ་ཡང་དག་པར་འཇོག་པའོ། །ཀློག་པ་ནི་གླེགས་བམ་དུ་བཀླག་པ་ཡང་དག་པར་བླངས་ནས། ཉིན་རེ་བཞིན་
ཀློག་པར་བྱེད་པའོ། །བསྒོམ་པ་ནི་ཐོས་པ་དང་བསམ་པའི་ཤེས་རབ་དག་གིས་བཟུང་བ་ཡང་དང་ཡང་དུ་མངོན་པར་འདུ་བྱེད་པའོ། །དེ་ཞེས་བྱ་བ་ནི་གང་ཟག་དེའོ། །སྡིག་པ་ཐམས་ཅད་སྤྱོད་ཀྱང་ཞེས་བྱ་བ་ལ་སོགས་པ་ལ། མཚམས་མེད་པ་ལ་སོགས་པའི་ལས་བྱེད་པ་ཡིན་ཡང་། མནར་མེད་

59-1-135a

པ་ལ་སོགས་པ་ངན་སོང་ཐམས་ཅད་ལས་ཡང་དག་པར་འདས་པར་འགྱུར་ཞིང་། མནར་མེད་པ་ལ་སོགས་པའི་འགྲོ་བའི་ལས་དང་བྲལ་ནས། ལྷ་དང་མིར་བཅས་པའི་འགྲོ་བ་ལ་ཡང་དག་པར་བསྟེན་ཏེ། སངས་རྒྱས་དང་བྱང་ཆུབ་སེམས་དཔའ་རྣམས་ཡང་དག་པར་མཉེས་
པར་བྱས་ནས། བྱང་ཆུབ་ཀྱི་སྙིང་པོ་ལ་ཐུག་གི་བར་དུ་ངན་སོང་ཐམས་ཅད་ལས་ཡང་དག་པར་ཐར་པར་འགྱུར་རོ། །ངན་སོང་ཐམས་ཅད་དུ་འགྲོ་བའི་ལས་རྣམས་མི་བྱེད་པ་དང་། སངས་རྒྱས་དང་བྱང་ཆུབ་སེམས་དཔའ་རྣམས་ཡང་དག་པར་མཉེས་པར་བྱས་པས་བསོད་ནམས་དང་། ཡེ་
ཤེས་ཀྱི་ཚོགས་ཡང་དག་པར་རྫོགས་ཏེ། མྱུར་བ་ཉིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ལྟར་ན་བཤད་མ་ཐག་པའི་ཕན་ཡོན་གྱི་མཐར་ཐུག་པའི་བར་གྱི་གཞུང་གིས་ནི། འདིར་དང་པོ་སྦྱོར་བའི་ཏིང་ངེ་འཛིན་གསུངས་པ་ཡིན་
ནོ། །ད་ནི་དེ་ནས་ཞེས་བྱ་བ་ལ་སོགས་པས་དཀྱིལ་འཁོར་གྱི་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པར་སྟོན་པའི་ཚིག་སྟེ། དང་པོ་སྦྱོར་བའི་རྗེས་ཐོགས་ལའོ། །དེ་སྐད་ཅེས་བཀའ་སྩལ་ནས་ཞེས་བྱ་བ་ནི། ཤེས་རབ་ཀྱི་ཕ་རོལ་ཏུ་
ཕྱིན་པའི་ཚིག་བཞི་ཕན་ཡོན་དང་བཅས་པར་གསུངས་པའོ། །བཅོམ་ལྡན་འདས་ཞེས་བྱ་བ་ནི་རྣམ་པར་སྣང་མཛད་དོ། །ཡེ་ཤེས་ཀྱི་ཁུ་ཚུར་ཡོངས་སུ་འཛིན་པ་ཞེས་བྱ་བ་ནི། ཕྱག་གཉིས་ཀྱིས་བྱང་ཆུབ་མཆོག་གི་ཕྱག་རྒྱ་བཅིང་བར་མཛད་པའོ། །དོན་གྱི་གནས་འདི་ཉིད་ཅེས་བྱ་བ་ནི། ཤེས་རབ་ཀྱི་ཕ་
རོལ་ཏུ་ཕྱིན་པའི་དོན་བཞི་པའོ། །རྒྱ་ཆེར་སྟོན་ཅིང་ཞེས་བྱ་བ་ནི། སྔར་བཤད་པའི་ཚིག་དང་ཡི་གེ་ལས་ཐ་དད་པ་ཨ་ཞེས་བྱ་བའི་ཡི་གེ་སྤྲུལ་པར་མཛད་པས་སྟོན་པར་མཛད་པ་ནི། རྒྱ་ཆེར་སྟོན་ཅིང་ཞེས་བྱའོ། །བཞིན་འཛུམ་པ་དང་བཅས་ཏེ་ཞེས་བྱ་བ་ནི་ཅུང་ཟད་ཙམ་བཞད་པའི་ཞལ་འདི་ལ་མངའ་
བས་ན་བཞིན་འཛུམ་པ་དང་བཅས་པའོ། །ཆོས་ཐམས་ཅད་ཀྱི་མཉམ་པ་ཉིད་ཀྱི་སྙིང་པོ་འདི་གསུངས་སོ་ཞེས་བྱ་བ་ལ། ཆོས་ཐམས་ཅད་ནི་བྱང་ཆུབ་ཀྱི་སེམས་ལ་སོགས་པ་ཇི་སྐད་བཤད་པ་རྣམས་སོ། །དེ་རྣམས་ཀྱི་མཉམ་པ་ཉིད་ནི་གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བའོ། །དེ་

59-1-135b

ལྟ་བུའི་ཡེ་ཤེས་ནི་སྙིང་པོ་སྟེ། དེ་སྟོན་པར་བྱེད་པའི་ཨ་ཞེས་བྱ་བའི་སྒྲ་ལ་ཡང་ཉེ་བར་གདགས་པས་སྙིང་པོ་ཞེས་བྱའོ། །གསུངས་སོ་ཞེས་བྱ་བ་ནི་འདི་སྐད་དུ་བཀའ་སྩལ་པའོ། །དེ་ནས་འདི་གསུངས་པ་ཙམ་གྱིས་ཞེས་བྱ་བ་ནི། ཨ་ཞེས་བྱ་བའི་ཡི་གེ་ཆོས་ཐམས་ཅད་སྟོན་པར་བྱེད་པ། བཅོམ་ལྡན་འདས་
རྣམ་པར་སྣང་མཛད་ཀྱིས་གསུངས་པ་ཙམ་གྱི་རྗེས་ཐོགས་ཉིད་ལའོ། །དེ་བཞིན་གཤེགས་པ་ཐམས་ཅད་ནི་རྣམ་པར་སྣང་མཛད་ལ་སོགས་པའོ། །ཡང་དག་པར་འདུས་ནས་ཞེས་བྱ་བ་ནི་ཚོགས་པར་མཛད་པའོ། །བཅོམ་ལྡན་འདས་རྣམ་པར་སྣང་མཛད་ཀྱི་ཕྱོགས་ཐམས་ཅད་དུ་ཞེས་བྱ་བ་ནི་ཕྱོགས་
བཞིར་རོ། །རྡོ་རྗེ་སེམས་དཔའི་དཀྱིལ་འཁོར་ཆེན་པོའི་ཚུལ་གྱིས་བཞུགས་པ་དང་ཞེས་བྱ་བ་ནི། རྡོ་རྗེ་སེམས་དཔའི་དཀྱིལ་འཁོར་ཆེན་པོའི་དབྱིངས་ཀྱིས་བཞུགས་པའོ། །དེ་ཡང་སེམས་དཔའ་ཆེན་པོ་བརྒྱད་ཅེས་བྱ་བ་ནི། ཕྱག་ན་རྡོ་རྗེ་ལ་སོགས་པ་ནས། རྡོ་རྗེ་གནོད་སྦྱིན་གྱི་བར་གྱི་བྱང་ཆུབ་
སེམས་དཔའ་ཆེན་པོ་རྣམས་སོ། །ཕྱིའི་དཀྱིལ་འཁོར་གྱི་ཕྱོགས་བརྒྱད་དུ་ཞེས་བྱ་བ་ནི། ཕྱོགས་དང་མཚམས་སུ་བཞུགས་པའོ། །བཞད་པ་ཆེན་པོ་བཞད་ཅིང་བཞུགས་སོ་ཞེས་བྱ་བ་ནི་དེ་བཞིན་གཤེགས་པས་འདུལ་བའི་སེམས་ཅན་གྱི་ཁམས་བཏུལ་ནས། དེ་བཞིན་གཤེགས་པར་གྱུར་པར་
གཟིགས་ཏེ། ཡིད་བདེ་བ་སྐྱེས་པར་གྱུར་པས་བཞད་པ་ཆེན་པོས་བཞད་པར་གྱུར་པ་སྟེ། ཐམས་ཅད་དུ་འགྲོ་བའི་འཛུམ་པ་མཛད་ཅེས་བྱ་བའི་དོན་ཏོ། །དེ་ལ་དེ་ནས་དེ་སྐད་ཅེས་བཀའ་སྩལ་ནས་ཞེས་བྱ་བ་ནས་བརྩམས་ཏེ་བཞད་པ་ཆེན་པོ་བཞད་ཅིང་བཞུགས་སོ་ཞེས་བྱ་བའི་བར་གྱི་བཤད་པས་ནི། 
དཀྱིལ་འཁོར་གྱི་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་པ་སྔོན་དུ་འགྲོ་བ་ལ་སོགས་པ་ནི། གསུམ་པ་ཡིན་པར་ཤེས་པར་བྱའོ། །དབང་བསྐུར་བ་དང་། དམ་ཚིག་ཐོབ་པ་རྣམས་ཀྱིས་ནི་བཟླས་བརྗོད་དང་བསྒོམ་པར་བྱའོ་ཞེས་བྱ་བ་འདིའི་དོན་བསྟན་པར་བྱ་
བའི་ཕྱིར། དེ་ནས་ཞེས་བྱ་བ་ལ་སོགས་པ་སློབ་དཔོན་གྱི་ལས་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་བྱ་བ་ནི་སྔ་མ་བཞིན་ཏེ། དམ་ཚིག་གསུམ་བསྒོམ་པ་ནས་བརྩམས་ཏེ། དཀྱིལ་འཁོར་གྱི་བརྟུལ་ཞུགས་སྔར་བཤད་པས། མཚན་མ་ཐོབ་

59-1-136a

པའི་རྗེས་ཐོགས་ཉིད་ལ། སློབ་དཔོན་གྱིས་དཀྱིལ་འཁོར་འདི་བྲི་བར་བྱའོ་ཞེས་བྱ་བའི་དོན་གཞན་གྱི་དགོངས་པ་དང་སྦྱར་བ་སྟོན་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་དཀྱིལ་འཁོར་ཞེས་བྱ་བ་ནི། བཅོམ་ལྡན་འདས་རྣམ་པར་སྣང་མཛད་ཀྱི་དམ་ཚིག་
ཆེན་པོའི་དཀྱིལ་འཁོར་རོ། །བྱིན་གྱིས་རློབ་པ་ནི་ཏིང་ངེ་འཛིན་གང་གིས་དེ་བྱིན་གྱིས་བརླབས་ཤིང་བརྟན་པར་བྱ་བའི་ཏིང་ངེ་འཛིན་གང་ཡིན་པ་དེ་ལ་འདི་སྐད་ཅེས་བྱ་སྟེ། དེ་ལ་སྙོམས་པར་འཇུག་པ་ནི་མངོན་སུམ་དུ་མཛད་ནས། བཅོམ་ལྡན་འདས་རྣམ་པར་སྣང་མཛད་ཀྱིས་དཀྱིལ་འཁོར་ཆེན་
པོ་འདི་གསུངས་སོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་ཡིན་པས་ན། དེ་བཞིན་གཤེགས་པ་ཐམས་ཅད་དེ་སྔར་བཤད་པ་རྣམས་སོ། །དེ་རྣམས་ཀྱི་དེ་ཁོ་ན་ཉིད་ནི་དེ་ཁོ་ན་ཉིད་བཅུ་པོ་སྔར་ཇི་སྐད་དུ་བཤད་པ་རྣམས་སོ། །དེ་ཉིད་རྡོ་རྗེ་སྟེ། དེ་སྟོན་པར་བྱེད་པས་
གང་ལ་དེ་སྐད་ཅེས་བྱ་བ་ནི་དམ་ཚིག་ཆེན་པོའི་དཀྱིལ་འཁོར་ཞེས་བྱ་བ་དེ་གསུངས་ཏེ། དེ་ལ་དམ་ཚིག་ཆེན་པོ་ནི། བྱང་ཆུབ་ཀྱི་སེམས་ཆེན་པོ་ཞེས་བྱ་བ་ནས། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་མཐར་ཐུག་པ་རྣམས་དང་། དེ་ལས་བྱུང་བའི་རྣམ་པར་སྣང་མཛད་ལ་སོགས་པ་སྔར་བཤད་པ་རྣམས་
སོ། །འཇམ་ཞིང་ཤིན་ཏུ་བདེ་བའི་སྟན་དང་། སངས་རྒྱས་ཀྱི་སྐུ་གཟུགས་དགོད་པར་བྱ་བའི་བར་གྱི་མཐར་ཐུག་པ་སྟེ། ཉེ་བར་མཚོན་པ་འདིས་ན། དེ་རྣམས་ཀྱི་དཀྱིལ་འཁོར་ལ་ནི་དམ་ཚིག་ཆེན་པོའི་དཀྱིལ་འཁོར་ཞེས་བྱའོ། །འདི་སྐད་སྟོན་པར་འགྱུར་ཏེ། བཅོམ་ལྡན་འདས་རྣམ་པར་སྣང་
མཛད་ཀྱི་སྦྱོར་བས། སྔ་མ་བཞིན་དུ་རྣལ་འབྱོར་ཆེན་པོ་བསྒྲུབ་ལ། དེ་ནས་ཆོ་ག་ཐམས་ཅད་རྗེས་སུ་སྤྱད་ནས། དཀྱིལ་འཁོར་གྱི་རྣམ་པར་སེམས་རྩེ་གཅིག་ཏུ་བྱ་སྟེ། དམ་ཚིག་ཆེན་པོའི་དཀྱིལ་འཁོར་བྲི་བར་བྱ་སྟེ། འདི་ནི་མཚན་མ་ཐོབ་པས་དཀྱིལ་འཁོར་བྲི་བར་བྱའོ་ཞེས་སྟོན་པར་འགྱུར་བ་
ཡིན་ནོ། །རྡོ་རྗེ་སེམས་དཔའི་དཀྱིལ་འཁོར་ཆེན་པོ་ནི་སྔར་བཤད་པའོ། །དེའི་ཚུལ་དུ་ཞེས་བྱ་བ་ནི་དབྱིབས་ཏེ་ཟུར་བཞི་པ་ལ་ཞེས་བྱ་བ་ལ་སོགས་པ་ཅི་སྐད་དུ་བཤད་པ་སྟེ། རྡོ་རྗེ་སེམས་དཔའི་དཀྱིལ་འཁོར་ཆེན་པོའི་ཚུལ་དེས་དེ་བཞིན་གཤེགས་པའི་དཀྱིལ་འཁོར་ཆེན་པོའི་དབྱིབས་སུ་

59-1-136b

བཅོམ་ལྡན་འདས་རྡོ་རྗེ་སེམས་དཔའི་ཕྱིའི་དཀྱིལ་འཁོར་འདི་བྲིས་ལ། དེའི་དབུས་སུ་ཐིག་གསུམ་གྱི་འཁོར་ལོ་བྲིས་ནས་ཞེས་བྱ་བ་ནི་དབང་ལྡན་གྱི་ཕྱོགས་ནས་བརྩམས་ཏེ། ཐིག་གསུམ་གྱིས་ཟླུམ་པོར་ཐིག་བཏབ་ལ་བྲི་བར་བྱའོ་ཞེས་བྱ་བའི་དོན་ཏོ། །འདི་ཡང་ཇི་ལྟ་བུ་ཞེ་ན། བཅོམ་
ལྡན་འདས་ཀྱི་ཐད་ཀར་སྣ་ཚོགས་པདྨ་རབ་ཏུ་གནས་པ་ཞེས་བྱ་བ་སྟེ། གང་དཀྱིལ་འཁོར་འདི་དག་པར་སྣང་ལ་གནས་པའི་བཅོམ་ལྡན་འདས་རྣམ་པར་སྣང་མཛད་ཀྱི་འོག་ཏུ་ཡང་བྲི་བར་བྱ་ཞིང་། ལྷ་ཐམས་ཅད་ཀྱི་གནས་སུ་སྣ་ཚོགས་པདྨ་ཉེ་བར་མཛེས་པ་ནི། སྣ་ཚོགས་པདྨ་རབ་ཏུ་
གནས་པའི་ཕྱིར་རོ། །དེའི་འཁོར་ལོའི་ལྟེ་བ་ལ་བཅོམ་ལྡན་འདས་ཞེས་བྱ་བ་ལ་སོགས་པ་དཀྱིལ་འཁོར་གྱི་ལྟེ་བ་ནི་དཀྱིལ་འཁོར་གྱི་དབུས་སོ། །བཅོམ་ལྡན་འདས་དེ་བཞིན་གཤེགས་པ་རྟག་པ་ཆེན་པོ་ཞེས་བྱ་བ་ནི་རྟག་པ་ཆེན་པོ་སྟེ། ལོངས་སྤྱོད་རྫོགས་པའི་སྐུའི་ངོ་བོ་ཉིད་ཀྱིས་འཁོར་བ་ཇི་
སྲིད་བར་དུ་བཞུགས་པའི་དེ་བཞིན་གཤེགས་པ་རྣམ་པར་སྣང་མཛད་བར་སྣང་ལ་ཕབ་སྟེ། ཨ་ཞེས་བྱ་བའི་སྐུའི་གཟུགས་བརྙན་གཅིག་ཏུ་བྱའོ། །དེའི་ཞེས་བྱ་བ་ལ་སོགས་པ་ལ། དེའི་ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཀྱིའོ། །ཕྱོགས་ཐམས་ཅད་དུ་ཞེས་བྱ་བ་ནི། ཕྱོགས་
དང་ཕྱོགས་མཚམས་རྣམས་སུའོ། །དེ་བཞིན་གཤེགས་པ་བརྒྱད་བཞག་གམ་བྲི་བར་བྱ་ཞེས་བྱ་བ་ནི། སྤྲུལ་པའི་སྐུ་གཟུགས་ཅན་ཏིང་ངེ་འཛིན་ལ་སྙོམས་པར་ཞུགས་པའི་དེ་བཞིན་གཤེགས་པ་བརྒྱད་ཡང་དག་པར་གཞག་པར་བྱའོ། །དེ་ནས་ཚོན་གྱི་ཐིག་ལེ་རྣམས་ཀྱིས་ཞེས་བྱ་བ་ནི། ཕྱག་
རྒྱའི་གཟུགས་ཀྱིས་སམ། གདན་གྱི་ཚུལ་གྱིས་སམ། ཡིག་འབྲུའི་ཚུལ་གྱིས་སམ། ཐིག་ལེའི་ཚུལ་གྱིས་བྲི་བའོ། །དཀྱིལ་འཁོར་གྱི་འཁོར་ལོ་ལ་བཞུགས་པའི་དེ་བཞིན་གཤེགས་པ་རྣམས་རྡོ་རྗེ་འཛིན་པ་དང་བཅས་པར་བྲི་བར་བྱའོ་ཞེས་བྱ་བ་ནི། དེ་ལྟར་བཅོམ་ལྡན་འདས་རྣམ་པར་སྣང་མཛད་
སྤྲུལ་པའི་སྐུ་ཅན་ཏིང་ངེ་འཛིན་ལ་སྙོམས་པར་ཞུགས་པའི་སངས་རྒྱས་ཀྱི་སྐུའི་གཟུགས་བརྙན་བརྒྱད་ཀྱིས་བསྐོར་བར་དབུས་སུ་བྲི་ལ། རྣལ་འབྱོར་པ་དེས་རྣམ་པར་སྣང་མཛད་ཀྱི་དཀྱིལ་འཁོར་ལ་ཟླུམ་པོར་བསྐོར་ནས། དཀྱིལ་འཁོར་གསུམ་པ་བྲིས་པ་གང་ཡིན་པ་དེ་མི་བསྐྱོད་པ་ལ་སོགས་

59-1-137a

པ་དེ་བཞིན་གཤེགས་པ་རྣམས་ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་བརྒྱད་ཀྱིས་བསྐོར་བར། རྡོ་རྗེ་སེམས་དཔའི་དཀྱིལ་འཁོར་ཆེན་པོའི་ཚུལ་ཉིད་བཞིན་དུ་བྲི་བར་བྱའོ། །ཕྱི་ཞེས་བྱ་བ་ལ་སོགས་པ་ལ་འདི་སྐད་དུ་བཤད་པའི་ཕྱིའི་དཀྱིལ་འཁོར་ལྷའི་སྣམ་བུ་ལ་
ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་བརྒྱད་ཕྱོགས་དང་མཚམས་རྣམས་སུ་བྲི་བར་བྱའོ། །བུམ་པ་གང་བ་བཞི་སྒོ་རྣམས་སུ་དགོད་པར་བྱའོ་ཞེས་བྱ་བ་ལ་སོགས་པ་ལ། དཀྱིལ་འཁོར་གྱི་སྒོ་བཞིར་བུམ་པ་གང་བ་བཞི་ལེགས་པར་གཞག་པར་བྱའོ། །ཡང་ཤར་ཕྱོགས་ཀྱི་སྒོར།
ནས་དང་། གྲོ་དང་། འབྲས་སཱ་ལུ་ལས་སྐྱེས་པའི་ལྗང་བུ་དང་བཅས་པའི་སའི་དུམ་བུ་དགོད་པར་བྱ་སྟེ། རྡོ་རྗེ་སེམས་དཔའ་ལ་སོགས་པའི་བྱང་ཆུབ་སེམས་དཔའ་ཆེན་པོ་ནི་ནེའུ་གསིང་སྟེ། ས་ཆེན་པོ་སྟོན་པ་ཅན་གྱི་མཚན་མའོ། །ལྷོ་ཕྱོགས་ཀྱི་སྒོར་རོ་དྲུག་གིས་གང་བའི་སྣོད་ལ། དབྱིག་དང་
གསེར་དང་རིན་པོ་ཆེ་དང་། གོས་ལ་སོགས་པས་བརྒྱན་པ་དགོད་པ་ནི་སྦྱིན་པའི་ཕ་རོལ་ཏུ་ཕྱིན་པ་དང་། རིན་པོ་ཆེའི་རིགས་ཀྱི་ངོ་བོ་ཉིད་དེ། སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱེད་པའི་བྱང་ཆུབ་ཆེན་པོའི་མཚན་མའོ། །ནུབ་ཕྱོགས་ཀྱི་སྒོར་འཇམ་ཞིང་ཤིན་ཏུ་
བདེ་བའི་སྟན་ལ་བཞག་པ་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་དེ། བག་ཆགས་དང་བཅས་པའི་ཉོན་མོངས་པ་དང་ཤེས་བྱའི་སྒྲིབ་པ་དང་སྤྲོས་པ་དང་བྲལ་བའི་བྱང་ཆུབ་ཆེན་པོའི་ངོ་བོ་ཉིད་ཀྱི་གདན་སྟོན་པའི་མཚན་མའོ། །བྱང་ཕྱོགས་ཀྱི་སྒོར་སྤྲུལ་པའི་སྐུའི་གཟུགས་ཅན་ཏིང་ངེ་འཛིན་
ལ་སྙོམས་པར་ཞུགས་པའི་སངས་རྒྱས་བཅོམ་ལྡན་འདས་ཀྱི་སྐུ་བཞག་པ་ནི། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་དེ། བྱ་བ་གྲུབ་པའི་ཡེ་ཤེས་ཀྱི་རང་བཞིན་གྱི་བྱང་ཆུབ་ཆེན་པོ་སྟོན་པར་བྱེད་པའི་མཚན་མར་གཞག་པར་བྱའོ། །འདིར་ལྷ་ཐམས་ཅད་ཀྱི་ས་བོན་ནི་ཨ་ཞེས་བྱ་བའོ། །འདི་སྐད་
སྟོན་པར་འགྱུར་ཏེ། རྡོ་རྗེ་སེམས་དཔའི་དཀྱིལ་འཁོར་བཞིན་དུ་ཕྱིའི་དཀྱིལ་འཁོར་བྲིས་ལ། དེའི་ནང་དུ་ཆ་བཞིའི་ཚད་ཀྱི་ཟླུམ་པོར་རྡོ་རྗེ་ཕུར་བུ་ལ་བཏགས་པའི་ཚོན་སྣ་ལྔའི་སྲད་བུས་དཀྱིལ་འཁོར་ཐིག་བཏབ་སྟེ། གཉིས་པ་ནི་དེའི་ཉིས་འགྱུར་རོ། །གསུམ་པ་ནི་སུམ་འགྱུར་དུ་ཟླུམ་པོར་དེ་ཡོངས་

59-1-137b

སུ་བསྐོར་བར་དཀྱིལ་འཁོར་ཀུན་དུ་ཐིག་བཏབ་ལ་གེགས་པར་བྲིས་ཏེ། ལྷ་ཐམས་ཅད་ཀྱི་གནས་སུ་སྣ་ཚོགས་པདྨའི་གདན་བྲིས་ནས། དཀྱིལ་འཁོར་གྱི་ལྟེ་བ་ལ་བཅོམ་ལྡན་འདས་རྣམ་པར་སྣང་མཛད་གསེར་གྱི་མདོག་ཅན། རྒྱན་ཐམས་ཅད་ཀྱིས་བརྒྱན་པ་ལོངས་སྤྱོད་རྫོགས་པའི་སྐུའི་
གཟུགས་ཅན་ཕྱག་གཉིས་བྱང་ཆུབ་མཆོག་གི་ཕྱག་རྒྱ་དང་ལྡན་པ་སྐྱིལ་མོ་ཀྲུང་གིས་བཞུགས་པ་ཞལ་གཅིག་པ་ཤར་དུ་གཟིགས་པར་བྲི་བར་བྱའོ། །དེ་ནས་དཀྱིལ་འཁོར་ཟླུམ་པོ་གཉིས་པ་ལ་སྤྲུལ་པའི་སྐུའི་གཟུགས་ཅན་ཏིང་ངེ་འཛིན་ལ་སྙོམས་པར་ཞུགས་པའི་སངས་རྒྱས་བརྒྱད་བྲི་བར་
བྱའོ། །དེ་ནས་དཀྱིལ་འཁོར་ཟླུམ་པོ་གསུམ་པ་ལ། ཤར་ཕྱོགས་སུ་བཅོམ་ལྡན་འདས་མི་བསྐྱོད་པ་དང་། ཕྱག་ན་རྡོ་རྗེ་དང་། འཇམ་པའི་དབྱངས་དང་བཅས་པར་རྡོ་རྗེ་སེམས་དཔའི་དཀྱིལ་འཁོར་གྱི་ཚུལ་དུ་བྲི་བར་བྱའོ། །ལྷོ་ཕྱོགས་སུ་བཅོམ་ལྡན་འདས་རིན་ཆེན་འབྱུང་ལྡན་བྱང་ཆུབ་སེམས་
དཔའ་ནམ་མཁའི་སྙིང་པོ་དང་། ནམ་མཁའི་མཛོད་དང་བཅས་པའོ། །ནུབ་ཕྱོགས་སུ་བཅོམ་ལྡན་འདས་སྣང་བ་མཐའ་ཡས། །བྱང་ཆུབ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང་། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་གཉིས་དང་བཅས་པའོ། །བྱང་ཕྱོགས་སུ་
བཅོམ་ལྡན་འདས་དོན་ཡོད་གྲུབ་པ་བྱང་ཆུབ་སེམས་དཔའ་རྡོ་རྗེ་ཁུ་ཚུར་དང་། རྡོ་རྗེ་གནོད་སྦྱིན་གཉིས་དང་བཅས་པ་སྔ་མ་བཞིན་དུ་བྲི་བར་བྱའོ། །དེ་ནས་ཕྱིའི་དཀྱིལ་འཁོར་གྱི་ལྷའི་སྣམ་བུ་ལ། ཤར་ཕྱོགས་སུ་ཡང་ཕྱག་ན་རྡོ་རྗེ། ལྷོ་ཕྱོགས་སུ་ནམ་མཁའི་སྙིང་པོ། །ནུབ་ཕྱོགས་སུ་འཇིག་རྟེན་
དབང་ཕྱུག །བྱང་ཕྱོགས་སུ་རྡོ་རྗེ་ཁུ་ཚུར། ཤར་ལྷོ་མཚམས་སུ་འཇམ་དཔལ་གཞོན་ནུ། ལྷོ་ནུབ་མཚམས་སུ་ནམ་མཁའི་མཛོད། ནུབ་བྱང་མཚམས་སུ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ། བྱང་ཤར་མཚམས་ཀྱི་ཕྱོགས་ཆ་ལ། རྡོ་རྗེ་གནོད་སྦྱིན་བྲི་བར་བྱ་སྟེ། ལྷག་མ་རྣམས་ནི་
སྔར་སྨྲས་པར་ཟད་དོ། །བུམ་པ་དང་། བུམ་པ་གང་བ་རྣམས་ནི། ཨ་ཞེས་བྱ་བ་ཉིད་ཀྱིས་རེ་རེ་ཞིང་ལན་བརྒྱ་རྩ་བརྒྱད་བཟླས་བརྗོད་བྱས་ལ་སྔ་མ་བཞིན་དུ་ལྷ་ཐམས་ཅད་ལ་དབུལ་བར་བྱ་སྟེ། དེ་བཞིན་དུ་གཞན་དག་ཀྱང་སྔ་མ་བཞིན་དུ་ཤེས་པར་བྱའོ། །དེ་ལྟར་དཀྱིལ་འཁོར་བྲིས་ནས་སྔ་མ་བཞིན་དུ་རྡོ་རྗེ་

59-1-138a

བསྡུ་བར་བྱའོ། །དེ་ནས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བསྒོམ་ཞིང་། མཚན་བརྒྱ་རྩ་བརྒྱད་ཀྱིས་བསྟོད་པར་བྱའོ། །དེ་ནས་ཨ་ཞེས་བྱ་བ་ཟློས་ཤིང་སྔར་བཤད་པའི་གསང་བའི་ལྕགས་ཀྱུ་བཅིངས་ནས། བཅོམ་ལྡན་འདས་འཁོར་དང་བཅས་པ་སྤྱན་དྲངས་ལ། དགུག་པ་
དང་གཞུག་པ་དང་། བཅིང་བ་དང་། དབང་དུ་བྱ་བ་བྱས་ཏེ། རྡོ་རྗེ་གནོད་སྦྱིན་གྱིས་བགེགས་བསལ་ལ། མཚམས་བཅད་པ་དང་། དཀྱིལ་འཁོར་བཅིང་བ་དང་། ར་བ་དང་དྲ་བ་དག་ཀྱང་བྱས་ཏེ། རྡོ་རྗེ་ཁུ་ཚུར་གྱིས་སྒོ་བཅད་པ་དང་། རྡོ་རྗེ་བསྲུང་བས་བསྲུང་བ་ཐམས་ཅད་ཡང་དག་པར་བསྲུངས་ལ། 
ཨ་ཞེས་བྱ་བས་མཆོད་ཡོན་ཕུལ་ཏེ། རྡོ་རྗེ་བསྡམས་པ་ལས་བྱུང་བའི་དང་པོའི་རྡོ་རྗེ་བཅིངས་ལ། ཨ་དྲྀ་ཤྱ་ཞེས་བྱ་བ་ནས་རྣམ་པར་སྣང་མཛད་ལ་སོགས་པ་ཐམས་ཅད་བལྟ་བར་བྱས་ནས། ཛཿཧཱུྃ་བཾཾ་ཧོཿ། ས་མ་ཡ་སྟྭཾ། ས་མ་ཡ་སྟྭཾ། ཨ་ཧཾ་ཨ་ཞེས་བྱ་བ་ལན་གསུམ་བརྗོད་དེ། དེ་ཐམས་ཅད་བསྒྲུབ་
པར་བྱའོ། །དེ་ནས་རང་གི་ལྕེ་ལ་ཡི་གེ་ཧཱུྃ་ལས་རྡོ་རྗེ་བཟང་པོ་རྣམ་པར་བསམས་ལ། རྣམ་པར་སྣང་མཛད་ལ་སོགས་པའི་ལྗགས་ལ་ཡང་ཨ་ཞེས་བྱ་བ་བསམ་པར་བྱའོ། །དེ་ནས་ཡང་རང་གི་སྙིང་གར་ཨ་ལས་སྣ་ཚོགས་རྡོ་རྗེ་བསྐྱེད་ལ། རྣམ་པར་སྣང་མཛད་ལ་སོགས་པའི་ལས་ཀྱི་ཕྱག་རྒྱ་
ཨ་ཞེས་བྱ་བ་ཟློས་བཞིན་དུ་བཅིང་བར་བྱས་ཏེ། ཆོས་གོས་འཛིན་པའི་ཚུལ་གྱིས་དེ་བཞིན་གཤེགས་པའི་ཁུ་ཚུར་གཉིས་བཅིངས་ལ། གཡོན་པའི་རྡོ་རྗེ་མཛུབ་མོ་ནི། །གཡས་པའི་ནང་དུ་བསྒྲེང་བར་བྱ། །བྱང་ཆུབ་མཆོག་གི་ཕྱག་རྒྱ་སྟེ། །སངས་རྒྱས་བྱང་ཆུབ་སྦྱིན་པའོ། །ཞེས་བྱ་བ་ནི། བཅོམ་
ལྡན་འདས་རྣམ་པར་སྣང་མཛད་ཀྱི་ཕྱག་རྒྱའོ། །དེ་བཞིན་དུ་གཡོན་པ་རང་གི་སྙིང་གར་བསྟོད་པའི་ཚུལ་གྱིས་བཞག་ལ། གཡས་པ་བརྐྱང་བས་ས་ལ་རེག་པའི་ཚུལ་དུ་བྱ་བ་འདི་ནི་མི་བསྐྱོད་པའིའོ། །གཡོན་པ་དེ་བཞིན་དུ་བཞག་ལ། གཡས་པ་ས་ལ་རེག་པ་ལས་ཟློག་སྟེ། སྨྲང་འདོན་པའི་ཚུལ་
གྱིས་བསླང་ཞིང་མཆོག་སྦྱིན་པ་ལྟ་བུ་ནི་རིན་ཆེན་འབྱུང་ལྡན་གྱིའོ། །མི་བསྐྱོད་པའི་ཕྱག་རྒྱ་ལས་གཡོན་པ་ཆོས་གོས་འཛིན་པའི་ཁུ་ཚུར་གཡས་པས་པདྨ་དབྱེ་བའི་ཚུལ་དུ་མཐེའུ་ཆུང་ནས་བརྩམས་ཏེ། འབྱེད་པ་ནི་འོད་དཔག་ཏུ་མེད་པའིའོ། །མི་བསྐྱོད་པའི་ཕྱག་རྒྱ་ལས་ལག་པ་གཡས་པ་བ་དན་

59-1-138b

གསུམ་པ་ལྟར་བྱས་ལ། མི་འཇིགས་པ་སྟེར་བའི་ཚུལ་གྱིས་བཞག་པ་ནི་དོན་ཡོད་པར་གྲུབ་པའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་བཅིངས་ལ། གཉིས་ཀས་སྙིམས་པ་དང་བཅས་པར་བསྟོད་པའི་ཚུལ་དུ་བཞག་པ་འདི་ནི་ཕྱག་ན་རྡོ་རྗེའིའོ། །གཡོན་པའི་སྙིང་གར་བཞག་པ་ལ། གཡས་ཀྱིས་རལ་
གྲི་འཛིན་པ་ལྟ་བུ་ནི་མགོན་པོ་འཇམ་དབྱངས་ཀྱིའོ། །རྡོ་རྗེ་གཉིས་ཀྱིས་དབང་བསྐུར་བའི་ཚུལ་དུ་འཇོག་པ་ནི་ནམ་མཁའ་སྙིང་པོའིའོ། །རྡོ་རྗེ་གར་བསྐོར་ཞིང་བཀྲོལ་ཏེ། མཁུར་བ་དང་། སྤྱི་གཙུག་ཏུ་བཞག་པ་ནི་ནམ་མཁའི་མཛད་ཀྱིའོ། །གཡས་ཀྱི་གཡོན་པ་དབྱེ་བ་ནི་འཇིག་རྟེན་དབང་ཕྱུག་
གིའོ། །མགལ་མེའི་འཁོར་ལོ་ལྟར་བསྐོར་བ་ནི་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའིའོ། །རྡོ་རྗེ་ཁུ་ཚུར་གཉིས་མནན་པ་འཚིར་བ་ནི་རྡོ་རྗེ་ཁུ་ཚུར་གྱིའོ། །མཐེའུ་ཆུང་དང་མཛུབ་མོ་མཆེ་བ་ལྟར་བྱ་བ་ནི། རྡོ་རྗེ་གནོད་སྦྱིན་གྱི་ལས་ཀྱི་ཕྱག་རྒྱའོ། །བྱང་ཕྱོགས་ན་གནས་པའི་སངས་
རྒྱས་ཀྱི་སྐུ་གཟུགས་ཀྱི་ཕྱག་རྒྱ་ནི་དོན་ཡོད་པར་གྲུབ་པ་དང་འདྲ་བར་ཤེས་པར་བྱའོ། །རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོ་ནི་བྲིས་པའི་རྗེས་སུ་འབྲངས་ནས་བསམ་པར་བྱའོ། །དེ་ལྟར་བཅོམ་ལྡན་འདས་རྣམ་པར་སྣང་མཛད་ལ་སོགས་པ་ཕྱག་རྒྱ་བཞིས་རྒྱས་བཏབ་པ་བྱས་ནས། སྔར་
བཤད་པའི་ཚུལ་ཉིད་ཀྱིས་དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ལ། ཡང་མཆོད་ཡོན་ཕུལ་ཏེ། བུམ་པ་དང་། བུམ་པ་གང་བ་དང་། མེ་ཏོག་ལ་སོགས་པས་ཡང་དག་པར་མཆོད་ལ། རྡོ་རྗེ་མཚོན་ཆ་ལ་སོགས་པ་ལས་ཀྱི་ཕྱག་རྒྱ་རྣམ་པ་བཅུ་གཉིས་ཀྱིས་མཆོད་པར་བྱའོ། །དེ་ནས་
ཡིད་ཀྱིས་དཔག་བསམ་གྱི་ཤིང་ལ་སོགས་པའི་སྤྲིན་རྣམས་ཀྱིས་སྔ་མ་བཞིན་དུ་ཡང་དག་པར་མཆོད་ལ། ཕྱི་རོལ་དུ་གཏོར་མ་སྦྱིན་པར་བྱའོ། །དེ་ནས་རྡོ་རྗེ་གནོད་སྦྱིན་དང་། རྡོ་རྗེ་མེ་ལྟར་རབ་ཏུ་འབར་བ་དང་། སངས་རྒྱས་སྤྱན་གྱི་སྦྱིན་སྲེག་བྱ་བ་ནས། བཅོམ་ལྡན་འདས་རྣམ་པར་སྣང་མཛད་སྔ་མ་
བཞིན་དུ་ཐབ་ཀྱི་དབུས་སུ་དཀྱིལ་འཁོར་གྱི་ཚུལ་གྱིས་བཀོད་ནས། ཡང་སྦྱིན་སྲེག་བྱའོ། །དེ་ནས་རྡོ་རྗེ་གནོད་སྦྱིན་གྱིས་བགོ་བའི་གོས་ལ་བཟླས་པའི་སྟོད་གཡོགས་དང་། སྨད་གཡོགས་བགོ་ཞིང་ཟེའུ་ཁ་བཅིངས་ཏེ། ཡང་རྡོ་རྗེ་ལྕགས་ཀྱུ་ལ་སོགས་པ་བཞིའི་སྙིང་པོས་གདོང་གཡོགས་ཀྱིས་

59-1-139a

རས་ལ་ཡོངས་སུ་བཟླས་ཏེ། དེས་གདོང་གཡོགས་བྱས་ལ། སློབ་དཔོན་གྱིས་སྔར་བཤད་པའི་ཕྱག་རྒྱ་ལ་སོགས་པའི་ཆོ་ག་རྣམས་རྗེས་སུ་སྤྱད་ནས། ཨ་ཞེས་བྱ་བ་བཟླས་པའི་བུམ་པ་སྒོ་ན་གནས་པའི་ཆུས་བདག་ཉིད་དབང་བསྐུར་ལ། རྡོ་རྗེ་བསྡམས་པ་ལས་བྱུང་བའི་དང་པོའི་
རྡོ་རྗེ་བཅིངས་ནས་བཛྲ་བཛྲ་ཨ་ཞེས་བརྗོད་ཅིང་ཞུགས་ལ། ཇི་སྲིད་དེང་བདག་རྡོ་རྗེ་སེམས་གྲུབ་མཛོད། །ཅེས་བྱ་བའི་བར་དུ་སྔར་བཤད་པའི་ཆོ་ག་རྣམས་རྗེས་སུ་སྤྱད་ནས། ཕྱག་བཙལ་བའི་སྔགས་དང་། རྣམ་པར་སྒེག་པའི་རྡོ་རྗེས་ཕྱག་བྱའོ། །དེ་ལ་རྣམ་པར་སྒེག་པའི་རྡོ་རྗེ་ནི་འདི་ཡིན་ཏེ། རྡོ་རྗེ་
གར་གྱི་མཆོད་པས་རྣམ་པར་འགྱུར་བ་དང་བཅས་ཤིང་། འཛུམ་པ་དང་བཅས་པའི་མིག་གིས་ཕྱག་བྱ་བས་རྡོ་རྗེ་སེམས་དཔའ་དང་དེ་བཞིན་གཤེགས་པ་ཐམས་ཅད་ཀྱང་རྗེས་སུ་མཉེས་པར་བྱ་ཞིང་། ཕྱག་འཚལ་ལོ་ཞེས་བྱ་བ་སྟེ། འདི་ནི་དེའི་མཚན་ཉིད་དོ། །དེ་ནས་བསྐོར་བ་ལན་གསུམ་བྱས་ལ། དེ་ཁོ་ན་
ཉིད་བརྗོད་དེ། ཛཿཧཱུྃ་བཾ་ཧོཿ། པྲ་སིདྡྷྱ་མཾ། ཞེས་བྱ་བས་བཅོམ་ལྡན་འདས་ལ་ཡང་དག་པར་བསྐུལ་བར་བྱའོ། །དེ་ནས་དེ་བཞིན་དུ་གོས་གྱོན་ལ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཕྱག་རྒྱ་བཅིངས་ནས། ཞུགས་ན་ཞེས་བྱ་བ་འདིའི་དོན་བཤད་པ་ཡིན་ནོ། །བདག་ཉིད་སློབ་དཔོན་མེད་པར་ཡང་། །
ཞེས་བྱ་བ་འདི་དཀྱིལ་འཁོར་འདིར་དབང་མ་བསྐུར་བ་སྟེ། ཡང་ཞེས་བྱ་བའི་སྒྲས་ནི་དབང་བསྐུར་བ་རྣམས་ནི། བཅོམ་ལྡན་འདས་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སློབ་དཔོན་ཉིད་དང་། དེ་བཞིན་གཤེགས་པའི་དཀྱིལ་འཁོར་གྱི་སློབ་དཔོན་ཉིད་དུ་ལེགས་པར་
བྱིན་གྱིས་བརླབ་པར་མཛད་དེ་ཞེས་སྟོན་པ་ཡིན་ནོ། །འདིས་ནི་དོན་འདི་སྐད་སྟོན་པ་ཡིན་ཏེ། གང་ཞིག་རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་དུ་ནི་དབང་བསྐུར་ལ། འདིར་ནི་དབང་མ་བསྐུར་བ་དེས་ཀྱང་། དཀྱིལ་འཁོར་འདི་ཉིད་བྲིས་ཏེ་ཞུགས་ན། དེ་ལྟ་ན་ཡང་ཇི་སྐད་དུ་གསུངས་པའི་འབྲས་བུ་ཐོབ་
པར་འགྱུར་རོ། །དེང་ནས་བརྩམས་ཏེ་ཞེས་བྱ་བ་ནི། དཀྱིལ་འཁོར་དུ་ཞུགས་པ་ནས་བརྩམས་ཏེ། དེ་བཞིན་གཤེགས་པ་ཐམས་ཅད་ཀྱི་རྟོགས་པ་དང་ཞེས་བྱ་བ་རྒྱུད་གཞན་དུ་གནས་གསུངས་པ་དག་ཏུ་ཡང་། དངོས་གྲུབ་ཐམས་ཅད་ལ་ཞེས་བྱ་བ་སངས་རྒྱས་ཉིད་ལ་སོགས་པ་རྣམས་ལ་བདུད་ལ་

59-1-139b

སོགས་པས་ཟིལ་གྱིས་མི་ནོན་པས་ན་མི་ཚུགས་པར་འགྱུར་བ་དང་། དེ་དག་ཉིད་ཀྱིས་གསོད་པར་མི་ནུས་པས་ན། མི་གསོད་པ་དང་། ཉོན་མོངས་པའི་སྒྲིབ་པ་ལ་སོགས་པ་སྒྲིབ་པ་ཐམས་ཅད་དང་བྲལ་བ་ཐོབ་པར་འགྱུར་རོ། །དེ་ནས་སློབ་མ་ཡང་དེ་བཞིན་དུ་གཞུག་གོ་ཞེས་བྱ་བ་ནི་སློབ་མ་གཞུག་
པར་བྱ་བའི་ཕྱིར། རྗེས་སུ་གནང་བ་ཇི་ལྟ་བ་བཞིན་དུ་གསོལ་ཏེ། དེའི་རྗེས་ཐོགས་ཉིད་ལ་བདག་ཉིད་འཇུག་པའི་ཆོ་གས་སློབ་མ་གཞུག་པར་བྱའོ། །ཞུགས་ནས་རྡོ་རྗེ་རྩེ་ལྔ་པ་བྱིན་ལ་ཞེས་བྱ་བ་ནི། སློབ་མ་རྣམས་ལ་ཇི་ལྟ་བ་བཞིན་དུ་ཆུའི་དབང་བསྐུར་བ་དང་། ཕྱག་རྒྱ་དང་། དབུ་རྒྱན་དང་། ཅོད་པན་དང་། 
དར་དཔྱང་གི་དབང་བསྐུར་བ་བྱིན་ལ་ཨ་ཞེས་བྱ་བ་ཉིད་ཟློས་ཤིང་། དེ་བཞིན་གཤེགས་པའི་རྡོ་རྗེ་སྦྱིན་པར་བྱའོ། །དེ་ནས་རྡོ་རྗེ་མིང་གི་དབང་བསྐུར་བ་དང་། དངོས་གྲུབ་ཀྱི་རྡོ་རྗེའི་བརྟུལ་ཞུགས་བྱིན་ལ། སེམས་ཅན་ཀུན་ལ་ཞེས་བྱ་བ་ལ་སོགས་པས་དམ་ཚིག་རྣམས་ཀྱང་བསྒོ་བར་བྱའོ། །སེམས་
ཅན་ཞེས་བྱ་བ་ལ་སོགས་པ་ལ་སེམས་ཅན་ཐམས་ཅད་ལ་ཕན་པ་ནི། བདེ་བའི་རྣམ་པར་སྨིན་པ་རྒྱ་ཆེན་པོར་འགྱུར་བའི་ལས་རྣམས་ཏེ། དེའི་ཕྱིར་ནི་དེ་རྫོགས་པར་བྱ་བའི་ཕྱིར་རོ། །བསྟན་པ་ཐམས་ཅད་ནི་དེ་བཞིན་གཤེགས་པའི་བཀའ་ཐམས་ཅད་དོ། །དེ་ཡོངས་སུ་སྐྱོང་ཞིང་ཉམས་སུ་ལེན་པ་ནི་
གྲུབ་པ་སྟེ་དེའི་ཕྱིར་རོ། །རྣམ་པར་མི་རྟོག་སྦྱོར་བ་ཡིས། ཅི་བདེ་བར་ནི་ཐམས་ཅད་ཀྱིས། །ཞེས་བྱ་བ་ནི། རྡོ་རྗེ་དང་། དོན་དང་། ཆོས་དང་། ཐམས་ཅད་མཉམ་པ་ཉིད་དུ་བསྒོམ་པ་རྣམས་ནི་རྣམ་པར་མི་རྟོག་པའི་སྦྱོར་བ་སྟེ། རྣམ་པར་མི་རྟོག་པའི་སྦྱོར་བ་དེས་བཟླས་བརྗོད་དམ། བསྒོམ་པའམ། 
དགེ་བའི་ལས་གཞན་གང་ཡང་རུང་བ་དེ། །ཅི་བདེ་བར་ནི་ཐམས་ཅད་ཀྱིས། །ཞེས་པ་སྟེ། དངོས་པོ་ལ་མངོན་པར་ཞེན་པ་སྤངས་པས། དགེ་བའི་ཕྱོགས་ཐམས་ཅད་ལ་བྱ་བའི་རྒྱུད་ལས་བཤད་པའི་སྟན་ལ་སོགས་པའི་ངེས་པའི་གནོད་པ་སྤངས་ཏེ། ཅི་བདེ་བར་ཐམས་ཅད་ཀྱིས་ཤིག་ཅེས་བྱའོ། །
དེ་ལྟར་དམ་ཚིག་བྱིན་ནས་དེ་ནས་དེ་བཞིན་དུ་རྡོ་རྗེ་སེམས་དཔའི་དཀྱིལ་འཁོར་ཆེན་པོར་གསུངས་པའི་ཚུལ་གྱིས་བཟའ་བ་དང་། རོ་དང་། གནས་པ་རྣམས་ཀྱིས་སློབ་མ་རྣམས་ལོངས་སྤྱོད་དུ་གཞུག་ཅིང་། འབྱོར་པ་ཅི་ཡོད་པས་ཡང་དག་པར་ཚིམ་པར་བྱའོ། །དེ་ནས་མཚན་མ་བཞི་པོ་ཞེས་བྱ་བ་ནི། བྱང་

59-1-140a

ཆུབ་ཀྱི་སེམས་རྫོགས་པར་བྱ་བའི་ཕྱིར་ནེའུ་གསིང་ས་དང་བཅས་པའི་དུམ་བུ་དང་། སྦྱིན་པའི་ཕ་རོལ་ཏུ་ཕྱིན་པ་རྫོགས་པར་བྱ་བའི་ཕྱིར། དབྱིག་དང་གསེར་དང་། རིན་པོ་ཆེ་དང་། གོས་ལ་སོགས་པས་གང་བའི་སྣོད་དང་། ཤེས་རབ་ཀྱི་ཕ་རོལ་ཏུ་ཕྱིན་པ་རྫོགས་པར་བྱ་བའི་ཕྱིར་
འཇམ་ཞིང་ཤིན་ཏུ་བདེ་བའི་སྟན་དང་། བྱ་བ་གྲུབ་པའི་ཡེ་ཤེས་ཀྱི་ངོ་བོ་ཉིད་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྫོགས་པར་བྱ་བའི་ཕྱིར། སངས་རྒྱས་ཀྱི་སྐུ་གཟུགས་འབྱོར་པ་ཇི་ལྟ་བས་སྐལ་བ་ཇི་ལྟ་བ་བཞིན་དུ་སློབ་དཔོན་གྱིས་སློབ་མ་རྣམས་ལ་སྦྱིན་པར་བྱ་སྟེ། མི་བསྐྱོད་པའི་རིགས་ལ་ནི་
ནེའུ་གསིངས་དང་བཅས་པའི་དུམ་བུའོ། །རིན་པོ་ཆེའི་རིགས་ལ་མངོན་པར་བརྩོན་པ་རྣམས་ལ་ནི་ཇི་སྐད་དུ་བཤད་པའི་སྣོད་དོ། །འོད་དཔག་ཏུ་མེད་པའི་རིགས་ལ་མངོན་པར་བརྩོན་པ་རྣམས་ལ་ནི་སྟན་ནོ། །དོན་ཡོད་པར་གྲུབ་པའི་རིགས་ལ་མངོན་པར་བརྩོན་པ་རྣམས་ལ་ནི་སངས་རྒྱས་ཀྱི་
སྐུ་གཟུགས་སྦྱིན་པར་བྱ་སྟེ། འདི་ནི་འདིར་སྐལ་བ་ཇི་ལྟ་བ་བཞིན་དུ་ཞེས་བྱ་བའི་སྒྲའི་དོན་ཡིན་ནོ། །དམ་ཚིག་ཆེན་པོའི་དཀྱིལ་འཁོར་རོ། །ཞེས་བྱ་བ་ནི་བྱང་ཆུབ་ཀྱི་སེམས་ཆེན་པོ་དང་། སྦྱིན་པའི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཇི་
སྐད་དུ་བཤད་པ་རྣམས་ནི། ཐམས་ཅད་དུ་སོང་བ་ཡིན་པའི་ཕྱིར། དམ་ཚིག་ཆེན་པོ་ཡིན་ལ། དེ་ལས་བྱུང་བའི་རྣམ་པར་སྣང་མཛད་ལ་སོགས་པ་ལ་ཡང་ཉེ་བར་གདགས་པས་དམ་ཚིག་ཆེན་པོ་ཞེས་བཤད་དེ། དེ་རྣམས་ཀྱི་དཀྱིལ་འཁོར་ནི་དམ་ཚིག་ཆེན་པོའི་དཀྱིལ་འཁོར་རོ། །དེ་ནས་དེ་བཞིན་དུ་
ཞེས་བྱ་བ་ནས་བརྩམས་ཏེ་སྦྱིན་པར་བྱའོ་ཞེས་བྱ་བའི་དོན་སླར་ཡང་གསལ་བར་བྱ་བའི་ཕྱིར་བཤད་པར་བྱ་བ་སྟེ། དེ་ལྟར་བཤད་མ་ཐག་པའི་ཆོ་གས་དཀྱིལ་འཁོར་བྲིས་ལ། བཅོམ་ལྡན་འདས་རྣམ་པར་སྣང་མཛད་ཀྱི་སྦྱོར་བས་འདི་ལས་གསུངས་པའི་རྣལ་འབྱོར་ཆེན་པོ་བྱས་ལ། བུམ་པ་གང་བ་དང་། བུམ་
པ་རྣམས་ཀྱང་རྡོ་རྗེ་བསྡམས་པ་ལས་བྱུང་བའི་དང་པོའི་རྡོ་རྗེས་ཨ་ཞེས་བྱ་བ་བརྒྱ་རྩ་བརྒྱད་བཟླས་བརྗོད་བྱའོ། །དེ་ནས་རྡོ་རྗེ་ཧཱུྃ་མཛད་ཀྱི་སྦྱོར་བས། དཀྱིལ་འཁོར་གྱི་སྒོ་བཞི་ཕྱེ་ལ། ཡང་རྣམ་པར་སྣང་མཛད་ཀྱི་ང་རྒྱལ་གྱིས་རྡོ་རྗེ་བསྡུ་བ་བྱས་ཏེ། རྣམ་པར་སྣང་མཛད་ཀྱི་ཕྱག་རྒྱ་ཆེན་པོར་བསྒོམ་ཞིང་།

59-1-140b

མཚན་བརྒྱ་རྩ་བརྒྱད་པས་བསྟོད་ལ། ཨ་ཞེས་བྱ་བ་ཟློས་ཤིང་གསང་བའི་ལྕགས་ཀྱུས་རྣམ་པར་སྣང་མཛད་ལ་སོགས་པ་ཐམས་ཅད་བཀུག་ལ། རང་གི་གནས་སུ་བཅུག་སྟེ་རྡོ་རྗེ་གནོད་སྦྱིན་གྱིས་བགེགས་བསྐྲད་ཅིང་། མཚམས་བཅད་པ་དང་། དཀྱིལ་འཁོར་བཅིང་བ་དང་། དྲཱ་བ་དང་། 
ར་བ་རྣམས་བྱས་ནས། རྡོ་རྗེ་ཁུ་ཚུར་གྱིས་སྒོ་བཅད་དེ་རྡོ་རྗེ་བསྲུང་བས་བསྲུང་བ་ཐམས་ཅད་ཡང་དག་པར་བསྲུངས་ལ། ཨ་ཞེས་བྱ་བས་མཆོད་ཡོན་ཕུལ་ཏེ། དམ་ཚིག་གི་ཕྱག་རྒྱས་བཅོམ་ལྡན་འདས་འཁོར་དང་བཅས་པ་བསྒྲུབ་པར་བྱའོ། །དེ་ནས་རྣམ་པར་སྣང་མཛད་ལ་སོགས་པའི་
རྡོ་རྗེའི་ལྗགས་ལ་དེ་བཞིན་དུ་ཨ་ཞེས་བྱ་བ་རྣམ་པར་བསམས་ལ། རྣམ་པར་སྣང་མཛད་ལ་སོགས་པའི་ལས་ཀྱི་ཕྱག་རྒྱ་དང་། ཕྱག་རྒྱ་ཆེན་པོ་དག་བཅིང་བར་བྱའོ། །དེ་ནས་དེ་བཞིན་གཤེགས་པ་རྣམས་ནི་རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་ཞིང་། བྱང་ཆུབ་སེམས་དཔའ་རྣམས་
ནི་སངས་རྒྱས་ལྔའི་དབུ་རྒྱན་གྱིས་དབང་བསྐུར་བར་བྱའོ། །དེ་ནས་བཅོམ་ལྡན་འདས་འཁོར་དང་བཅས་པ་ལ་ཨ་ཞེས་བྱ་བས་མཆོད་ཡོན་ཕུལ་ཏེ། བུམ་པ་དང་། བུམ་པ་གང་བ་རྣམས་དང་། ན་བཟའ་རྣམས་ཕུལ་ཏེ། མཆོད་པ་རྣམ་པ་ལྔ་དང་། དཔག་བསམ་གྱི་ཤིང་ལ་སོགས་པས་མཆོད་
པར་བྱའོ། །དེ་ནས་གར་དང་། གླུ་དང་། རོལ་མོ་དང་། རྟ་དང་། གླང་པོ་ཆེ་དང་། བ་ལང་གི་ཁྱུ་ལ་སོགས་པ་ཕྱི་རོལ་གྱི་མཆོད་པ་རྣམས་ཀྱང་འབྱོར་པར་གྱུར་ན་མཆོད་ལ། མེ་ཏོག་ལ་སོགས་པའི་ཕྱག་རྒྱའི་མཆོད་པ་རྣམས་ཀྱིས་ཀྱང་ཡང་དག་པར་མཆོད་པར་བྱའོ། །དེ་ནས་ཡིད་ཀྱི་མཆོད་པ་
བྱས་ལ་ཕྱི་རོལ་དུ་གཏོར་མ་སྦྱིན་པར་བྱའོ། །དེ་ནས་ཇི་སྐད་དུ་བཤད་པའི་སྦྱིན་སྲེག་བྱས་ལ། ཇི་སྐད་དུ་བཤད་པའི་གོས་དང་། རྒྱན་དང་ལྡན་པའི་རྣལ་འབྱོར་པས། ཕྱག་བཙལ་བ་ལ་སོགས་པ་སྔོན་དུ་འགྲོ་བ་དང་སྡོམ་པ་གཟུང་བར་བྱའོ། །དེ་ནས་ཨོཾ་སརྦ་ཡོ་ག་ཙིཏྟཱ་ཨུཏྤཱ་ད་ཡཱ་མི། ཞེས་བྱ་
བས་བྱང་ཆུབ་ཀྱི་སེམས་ཆེན་པོ་བསྐྱེད་ལ། གཡས་པའི་རྡོ་རྗེ་ཁུ་ཚུར་གྱིས་དེ་བཞིན་གཤེགས་པའི་རྡོ་རྗེ་བླངས་ལ་རང་གི་སྙིང་གར་གཞག་སྟེ། ཨ་ཞེས་བྱ་བས་རང་གི་སྙིང་གའི་ཟླ་བའི་དཀྱིལ་འཁོར་ལ་དེས་བསྐྱེད་ནས། འདི་སྐད་ཅེས་བརྗོད་པར་བྱ་སྟེ། སུ་ར་ཏེ་ས་མ་ཡ་སྟྭཾ་ཧོ། བཛྲ་སིདྡྷ་ཡ་ཐཱ་སུ་ཁཾ། དེ་

59-1-141a

ནས་སྒོ་ན་གནས་པའི་བུམ་པའི་ཆུས་བདག་ཉིད་དབང་བསྐུར་ལ། དམ་ཚིག་གི་ཕྱག་རྒྱ་བཅིངས་ཏེ། དེ་ཉིད་ཀྱིས་མེ་ཏོག་གི་ཕྲེང་བ་བཟུང་ནས། བཛྲ་བཛྲ་ཨ་ཞེས་བྱ་བ་ཟློས་ཤིང་། སློབ་དཔོན་ཤར་ཕྱོགས་ཀྱི་སྒོ་ནས་དམ་ཚིག་གི་དཀྱིལ་འཁོར་ཆེན་པོར་འཇུག་ཅིང་། བཛྲ་ཨཾ་
ཀུ་ཤ་ཛཿཞེས་ཀྱང་བརྗོད་པར་བྱའོ། །དེ་ནས་ལྷོ་ཕྱོགས་ཀྱི་སྒོ་ནས་ཞུགས་ལ། བཛྲ་པཱ་ཤ་ཧཱུྃ་ཞེས་བརྗོད་ནས། ཡང་ཡིད་ཀྱིས་ཞུགས་པས་འཇུག་པར་བྱའོ། །ཡང་ནུབ་ཕྱོགས་ཀྱི་སྒོ་ནས་ཞུགས་ལ་བཛྲ་སྤོ་ཊ་བཾ་ཞེས་བྱ་བ་དང་ཡིད་ཀྱིས་བཅིང་བར་བྱའོ། །དེ་ནས་བྱང་ཕྱོགས་ཀྱི་སྒོ་ནས་
ཞུགས་ལ། བཛྲ་ཨ་བེ་ཤ་ཧོཿ། ཞེས་བྱ་བ་དང་། རྡོ་རྗེ་འབེབས་པས་བདག་ཉིད་དབང་དུ་བྱའོ། །དེ་ནས་ཡང་ཤར་ཕྱོགས་ཀྱི་སྒོ་ནས་ཞུགས་ནས། མ་ཧཱ་ར་ཏ་སུ་དྲྀ་ཌྷ་སུ་ཏོ་ཥེ་། སུ་སུ་ཁཾ་བཛྲ་སཏྭ་ཨནྡྷ་སིདྡྷྱ་མཾ་ཞེས་བརྗོད་པར་བྱའོ། །དེ་ནས་རྣམ་པར་སྒེག་པའི་རྡོ་རྗེས་ཕྱག་བྱས་ལ་དཀྱིལ་
འཁོར་བསྐོར་བ་ལན་གསུམ་བྱའོ། །དེ་ནས་བཅོམ་ལྡན་འདས་ཀྱི་སྤྱན་སྔར་འདུག་སྟེ། འདི་སྐད་ཅེས་བརྗོད་པར་བྱའོ། །འདོད་ཆགས་ཆེན་པོ་བདེ་བ་ཆེ། །རྡོ་རྗེ་ཆེན་པོ་ནོར་ཆེ་ཞིང་། །ཡེ་ཤེས་ཆེན་པོ་ལས་ཆེ་བ །རྡོ་རྗེ་སེམས་དཔའ་དེང་བདག་འགྲུབ། །ཛཿཧཱུྃ་བཾ་ཧོཿཔྲ་སིདྡྷྱ་མཾ། །དེ་ནས་
རྡོ་རྗེའི་ཆུ་འཐུངས་ལ། བདག་ཉིད་ལ་དབབ་པར་བྱ་སྟེ། ཨ་ཞེས་བྱ་བ་ལན་བརྒྱ་བཟླས་ལ། ཡང་གཡོན་པའི་རྡོ་རྗེ་ཁུ་ཚུར་གྱིས་སེམས་མ་རྡོ་རྗེ་མའི་ཕྱག་རྒྱ་ཕྱེ་ནས། བདག་ཉིད་ལ་དབབ་པར་བྱ་ཞིང་། ཨ་ཨ་ཞེས་བྱ་བ་ལན་བརྒྱ་བཟླས་སོ། །དེ་ནས་ཨ་ཞེས་བྱ་བས་མེ་ཏོག་དོར་བར་བྱའོ། །དེ་
ནས་དེ་བླངས་ལ་རང་གི་མགོ་ལ་དེ་ཉིད་ཀྱིས་བཅིང་བར་བྱའོ། །དེ་ནས་དེ་ཉིད་ཀྱིས་གདོང་གཡོགས་དགྲོལ་བར་བྱའོ། །དེ་ནས་དེ་ཉིད་ཟློས་ཤིང་ཤར་ཕྱོགས་ཀྱི་ཆ་ནས་བརྩམས་ཏེ། དཀྱིལ་འཁོར་བལྟ་བར་བྱའོ། །དེ་ནས་ཏིཥྛ་བཛྲ་ཞེས་བྱ་བ་ལ་སོགས་པས་དབབ་པའི་ཕྱག་རྒྱ་རང་གི་སྙིང་གར་
དགྲོལ་བར་བྱའོ། །དེ་ནས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོར་རང་བསམས་ལ། བཅོམ་ལྡན་འདས་ལ་རྡོ་རྗེའི་ལྟ་བས་བལྟ་ཞིང་། ཇི་སྲིད་བཅོམ་ལྡན་འདས་ཀྱི་ཞལ་བསྟན་ནས་དངོས་གྲུབ་ཐམས་ཅད་སྩོལ་བར་མཛད་པ་དེ་སྲིད་ཀྱི་བར་དུ་བཟླས་བརྗོད་བྱའོ། །དེ་ནས་རྡོ་རྗེ་ཐལ་མོ་བསྐོར་ལ། 

59-1-141b

བདག་ཉིད་དབུལ་བའི་ཚུལ་གྱིས་སྙིང་གར་བཞག་ནས་མཚན་བརྒྱ་རྩ་བརྒྱད་ཀྱིས་བསྟོད་དེ་སྒེག་མོ་ལ་སོགས་པ་གསང་བའི་མཆོད་པ་བཞིས་བཅོམ་ལྡན་འདས་ཡང་དག་པར་མཆོད་ལ། གླུ་དང་རོལ་མོའི་མཆོད་པ་རྣམས་ཀྱིས་ཀྱང་མཆོད་པར་བྱའོ། །དེ་ནས་ཡང་ཕྱག་རྒྱ་ཆེན་པོ་
བཅིངས་ཏེ། བཅོམ་ལྡན་འདས་ལ་རྡོ་རྗེའི་ལྟ་བས་བལྟ་ཞིང་རྡོ་རྗེ་ཐལ་མོས་བསྐོར་བས་ཕྱག་བྱ་ཞིང་མེ་ཏོག་གི་ཕྲེང་བ་ལ་སོགས་པ་དང་། དབང་བསྐུར་བ་རྣམས་བླང་བར་བྱ་སྟེ། དེ་ལ་དང་པོ་ཁོ་ནར་དམ་ཚིག་གི་ཕྱག་རྒྱས་ཡོངས་སུ་བཟུང་བའི་རྡོ་རྗེའི་མེ་ཏོག་གི་ཡལ་ག་ལས་རྣམ་པར་རྒྱལ་
བའི་བུམ་པ་ལ་བཟླས་བརྗོད་ཉི་ཤུ་རྩ་གཅིག་བྱས་ལ། ཨོཾ་མ་ཧཱ་སུ་ཁ་བཛྲ་ཨ་མོ་གྷ་ས་མ་ཡོ་ད་ཀ་སིདྡྷྱ་ཨ་བྷི་ཥིཉྩ་སརྦ་སུ་ཁ་སོ་མ་ན་སྱ་ནི་ཨདྡྱ་ཀུ་རུ་ཀུ་རུ་ཛཿཧཱུྃ་བཾ་ཧོཿཨ་ཞེས་བྱ་བ་བརྗོད་དོ། །དེ་ནས་བདག་ཉིད་རྣམ་པར་སྣང་མཛད་དུ་བྱིན་གྱིས་བརླབས་ལ། དམ་ཚིག་གི་ཕྱག་རྒྱས་རྣལ་འབྱོར་
ཆེན་པོར་གསུངས་པའི་གནས་རྣམས་སུ་རང་གི་ལུས་ལ་ལྷ་ཐམས་ཅད་དགོད་པར་བྱས་ནས། ཕྱི་རོལ་དུ་དཀྱིལ་འཁོར་གྱི་ནང་དུ་སྣ་ཚོགས་པདྨའི་སྟེང་དུ་ཕྱག་རྒྱ་ཆེན་པོའི་ཚུལ་གྱིས་འདུག་ནས། མེ་ཏོག་ལ་སོགས་པས་བདག་ཉིད་ཡང་དག་པར་མཆོད་དེ། མཆོད་ཡོན་བླངས་ནས། མཚན་བརྒྱ་རྩ་
བརྒྱད་པས་བསྟོད་ལ། རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ལ། ཨོཾ་བཛྲ་ཨ་བྷི་ཥིཉྩ་ཨ་ཞེས་བརྗོད་དེ། དེས་བདག་ཉིད་དབང་བསྐུར་བར་བྱ་ཞིང་ཆུ་དེ་བཏུང་བར་ཡང་བྱའོ། །དེ་ནས་རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་བ་བླངས་ལ། ལུགས་མའམ། བྱས་པའམ། བརྐོས་
པའམ། བྲིས་པའི་རྡོ་རྗེ་རིན་པོ་ཆེའི་ཅོད་པན་རྡོ་རྗེ་རིན་ཆེན་ཡོངས་སུ་བཟླས་པས་དབང་བསྐུར་བར་བྱའོ། །དེ་ནས་རྡོ་རྗེ་དང་། བདག་པོ་དང་། མིང་གི་དབང་བསྐུར་བ་བླངས་ལ། དངོས་གྲུབ་ཀྱི་རྡོ་རྗེའི་བརྟུལ་ཞུགས་བླང་བར་བྱའོ། །དེ་ནས་མེ་ཏོག་ལ་སོགས་པ་ཕྱིའི་མཆོད་པ་རྣམས་ཀྱིས་ཀྱང་
བདག་ཉིད་ཡང་དག་པར་མཆོད་དེ། དེ་ནས། དེ་ཉིད་ཀྱིས་ནི་རྡོ་རྗེ་བཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གི་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །ཞེས་བྱ་བ་དག་གོ། །དེ་ནས་བཅོམ་ལྡན་འདས་ལ་ཕྱག་བྱས་ལ། གསང་སྔགས་བཟུང་སྟེ། ཚིགས་སུ་བཅད་པ་ལྔ་

59-1-142a

པས་རྗེས་སུ་གནང་བ་དང་། གཟེངས་བསྟོད་པ་དང་། ལུང་བསྟན་པ་དག་ཀྱང་བླང་བར་བྱའོ། །དེ་ནས་ཡང་བདག་ལ་བྱིན་གྱིས་བརླབས་པ་ལ་སོགས་པ་བྱས་ལ། ཅི་འདོད་པར་བཟླས་པ་བྱས་ནས། བཅོམ་ལྡན་འདས་ལ་ཕྱག་བྱས་ཏེ་འདི་སྐད་ཅེས་བརྗོད་པར་བྱའོ། །བདག་
མིང་འདི་ཞེས་བགྱི་བ་ཡི། །རྡོ་རྗེ་སློབ་དཔོན་དཀའ་ཐུབ་ཆེས། །སེམས་ཅན་རྣམས་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བགྱི། །དེ་ནས་ཕྱིར་ཕྱུང་ལ། སློབ་མ་རྣམས་གཞུག་པར་བྱ་སྟེ། འདི་ནི་སློབ་དཔོན་གྱི་ལས་ཀྱི་ཆོ་གའོ། །དེ་ནས་སྡོམ་པ་སྦྱིན་པར་འོས་པའི་སློབ་མ་ལ་སྔར་
བཤད་པའི་ཚུལ་གྱིས་སྡོམ་པ་འཛིན་དུ་གཞུག་པར་བྱའོ། །དེ་ནས་དེ་བཞིན་དུ་བྱང་ཆུབ་ཀྱི་སེམས་བསྐྱེད་པ་ལ་སོགས་པ་ཡང་བྱེད་དུ་བཅུག་ནས། དེའི་སྙིང་གར་དེ་བཞིན་དུ་རྡོ་རྗེ་བསྐྱེད་ལ། དེ་རྣམ་པར་སྣང་མཛད་དུ་བྱིན་གྱིས་བརླབས་ཏེ། དྲི་དང་མེ་ཏོག་ལ་སོགས་པས་མཆོད་ལ། འདི་སྐད་ཅེས་
བརྗོད་པར་བྱ་སྟེ། དེང་ཁྱོད་བཅོམ་ལྡན་འདས་ཀྱིས་བྱིན་གྱིས་བརླབས་པར་འགྱུར་གྱིས། ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱིས་གསང་བའི་དཀྱིལ་འཁོར་མ་མཐོང་བ་རྣམས་ལ་བརྗོད་པར་མི་བྱ་ཞིང་། དད་པ་མེད་པར་ཡང་མ་བྱེད་ཅིག །དེ་ནས་ལྔ་པོ་བསྡུས་པ་བཅིངས་ལ། འདི་སྐད་ཅེས་
བརྗོད་པར་བྱ་སྟེ། འདི་ནི་ཁྱོད་ཀྱི་དམ་ཚིག་གསང་། །སངས་རྒྱས་ཀུན་གྱིས་རབ་བསྒྲུབ་པ། །གལ་ཏེ་དཀྱིལ་འཁོར་མ་མཐོང་སྨྲས། །རིགས་རྣམས་ཀུན་གྱིས་ཁྱོད་བརླག་འགྱུར། །ཨོཾ་མ་ཧཱ་སུ་ཁ་ཧ་ན་ས་མ་ཡ་ཨ་དྷི་ཀྲ་མ་མི་སུ་ར་ཏ་སྟྭཾ། དེ་ནས་ཡོན་གྱི་མཆོག་བླངས་ལ། ཕྱི་རོལ་གྱི་སྒོ་ལ་
མངོན་པར་ཕྱོགས་ནས་གནས་པའི་བུམ་པའི་ཆུས་དབང་བསྐུར་ལ། བདག་ཉིད་འཇུག་པའི་ཚུལ་དུ་བཅུག་ནས། ཆོ་ག་ཐམས་ཅད་སྔ་མ་བཞིན་དུ་རྗེས་སུ་སྤྱོད་ལ། དམ་ཚིག་འདི་སློབ་མ་རྣམས་ཀྱི་རྣ་བར་བསྒྲག་པར་བྱ་སྟེ། སེམས་ཅན་ཀུན་ལ་ཕན་ཕྱིར་དང་། །བསྟན་པ་ཐམས་ཅད་བསྒྲུབ་པའི་ཕྱིར། །
རྣམ་པར་མི་རྟོག་སྦྱོར་བ་ཡིས། །ཅི་བདེ་བར་ནི་ཐམས་ཅད་ཀྱིས། །ལྷག་མ་རྣམས་ནི་སྔར་བཤད་པ་བཞིན་དུ་ཤེས་པར་བྱའོ། །སློབ་མ་ཞུགས་པ་ལ་སོགས་པའི་ཆོ་ག་རྒྱས་པ་རྫོགས་སོ།།      །།དེ་ལྟར་དབང་བསྐུར་བ་དང་། དམ་ཚིག་ཐོབ་པ་རྣམས་ལ། སློབ་དཔོན་གྱི་དངོས་གྲུབ་ཀྱི་ཡེ་ཤེས་

59-1-142b

བསླབ་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །འདིས་བསྒྲུབ་པར་བྱ་བ་ཡིན་པས་ན་བསྒྲུབ་པ་སྟེ། རས་རིས་ལ་སོགས་པའོ། །དེ་ཉིད་བསྟན་པའི་ཕྱིར། རས་ལ་བཅོམ་ལྡན་འདས་
རྣམ་པར་སྣང་མཛད་ཅེས་བྱ་བ་ལ་སོགས་པ་གསུངས་ཏེ། འདི་དག་ནི་གོ་བར་ཟད་དོ། །དེ་ནས་དེས་དེ་བཞིན་དུ་སེམས་དཔའ་མཆོག་བསྒྲུབ་པ་དང་ཞེས་བྱ་བ་ནི། ཇི་ལྟར་དཔལ་རྡོ་རྗེ་སེམས་དཔའི་བསྒྲུབ་པ་བཤད་པ་དེ་བཞིན་དུ། འདིར་བཅོམ་ལྡན་འདས་རྣམ་པར་སྣང་མཛད་བསྒྲུབ་པ་ལ་ཡང་
ཤེས་པར་བྱའོ། །དངོས་གྲུབ་མཆོག་རྣམས་ཀྱང་དེ་བཞིན་ནོ་ཞེས་བྱ་བ་ནི། ཇི་ལྟར་དེར་རྡོ་རྗེ་སེམས་དཔའི་རས་རིས་ལ་སངས་རྒྱས་ཉིད་དང་། རྡོ་རྗེ་སེམས་དཔའ་ཉིད་ཀྱི་དངོས་གྲུབ་ཀྱི་མཆོག་ཏུ་གྱུར་པ་དེ་བཞིན་དུ་འདིར་ཡང་གྲུབ་པར་བཤད་པ་ཡིན་ནོ། །འདི་སྐད་སྟོན་པ་ཡིན་ཏེ། ཟླ་བ་ཉ་ནས་བརྩམས་
ནས་བཅོམ་ལྡན་འདས་རྣམ་པར་སྣང་མཛད་ཀྱི་སྤྱན་སྔར་རྡོ་རྗེའི་ཕྱག་རྒྱ་བཅིངས་ཏེ། ཇི་ལྟར་སྐྱོ་བར་མ་གྱུར་པས། དང་པོ་བདག་ལ་བྱིན་གྱིས་བརླབ་པ་ལ་སོགས་པ་བྱས་ལ། རྡོ་རྗེ་ཚིག་གིས་ཨ་ཞེས་བྱ་བ་ཇི་སྲིད་ཟླ་བ་གཅིག་གིས་སྔོན་དུ་བསྙེན་པ་བྱས་པར་འགྱུར་བ་དེ་ཇི་སྲིད་ཀྱི་བར་དུ་བཟླས་བརྗོད་
བྱའོ། །དེ་ནས་རས་ལ་རྡོ་རྗེ་བྲི་བའི་ཕྱག་རྒྱ་དང་པོར་བརྩམ་ཞིང་། ཕྱིས་ཅི་བདེར་བྱ་བ་དང་། བྲི་བའམ། འདྲིར་གཞུག་པར་བྱ་སྟེ། དབུས་སུ་བཅོམ་ལྡན་འདས་རྣམ་པར་སྣང་མཛད་ཕྱག་གཉིས་བྱང་ཆུབ་མཆོག་གི་ཕྱག་རྒྱ་དང་ལྡན་པར་བྲི་བར་བྱའོ། །དེ་བཞིན་དུ་གཞན་ཐམས་ཅད་ནི་དམ་ཚིག་གི་
དཀྱིལ་འཁོར་ཆེན་པོའི་ཚུལ་དུ་བྱའོ་ཞེས་བྱ་བ་ནི། དེ་ནས་ཟླ་བ་ཉ་ནས་བརྩམས་ཏེ། བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ། དེ་བཞིན་དུ་སྔོན་དུ་བསྙེན་པའི་སྦྱོར་བས་ཟླ་བ་ཕྱི་མ་ཉའི་བར་དུ་བཟླས་བརྗོད་བྱ་ཞིང་། དེའི་ཚེ་མཚན་ཐོག་ཐག་བཟླས་བརྗོད་བྱའོ། །དེ་ནས་ནང་པར་བཅོམ་ལྡན་འདས་ཀྱིས་
མཐོང་བ་སྩལ་ནས། སངས་རྒྱས་ཉིད་དང་བྱང་ཆུབ་སེམས་དཔའ་ཉིད་སྩོལ་བར་འགྱུར་རོ་ཞེས་བྱའོ། །གཞན་ཡང་རས་ལ་བཅོམ་ལྡན་འདས་དཔའ་བོ་གཅིག་པུ་བྲིས་ཏེ་ཞེས་བྱ་བ་ནི། སྔ་མ་བཞིན་དུ་བསྙེན་པ་བྱས་པའོ། །བཅོམ་ལྡན་འདས་དཔའ་བོ་གཅིག་པོ་རས་ལ་བྲི་བར་བྱའོ་ཞེས་བྱ་བ་ནི། དེ་ནས་ཟླ་

59-1-143a

བ་ཉ་ནས་བརྩམས་ཏེ། ཕྱག་རྒྱ་ཆེན་པོ་བཅིངས་ལ། བཟླས་བརྗོད་འབུམ་བྱའོ། །དེ་ནས་ཟླ་བ་ཕྱི་མའི་ཉ་ལ་བབ་པ་དང་། མཚན་ཐོག་ཐག་བཟླས་བརྗོད་བྱས་ནས། ཤེས་རབ་ཀྱི་ཕ་རོལ་ཏུ་ཕྱིན་པ་ཐོབ་ཅིང་། ཇི་སྐད་དུ་བཤད་པའི་དངོས་གྲུབ་རྣམས་འགྲུབ་པར་འགྱུར་རོ། །དེ་
ནས་ཞེས་བྱ་བའི་སྒྲ་ནི་འདས་མ་ཐག་པ་སྟེ། སྔོན་དུ་བསྙེན་པའི་རྗེས་ཐོགས་ཉིད་ལའོ། །མ་བསྒྲུབས་པས་ཀྱང་ཞེས་བྱ་བ་ནི། དེ་ནས་རས་རིས་གྲུབ་པ་མ་བསྒྲུབས་པས་སོ། །དཀྱིལ་འཁོར་དུ་ཞུགས་པ་ཙམ་ཉིད་ཀྱི་ལས་རྣམས་འགྲུབ་པར་འགྱུར་ཏེ་ཞེས་བྱ་བ་ནི། ཡེ་ཤེས་བབས་པ་མེད་ཀྱང་
ཞེས་སྟོན་པ་ཡིན་ཏེ། གང་ཞིག་ཡེ་ཤེས་བབས་པར་གྱུར་པ་དེ་ལ་ནི། ལས་རྣམས་བཀླགས་པ་ཙམ་ཉིད་ཀྱིས་ཤིན་ཏུ་འགྲུབ་པར་འགྱུར་རོ་ཞེས་ཤེས་པར་བྱའོ། །འདི་ལྟ་སྟེ་ཞེས་བྱ་བའི་སྒྲ་ནི་ཉེ་བར་སྟོན་པའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱིས་ཇི་སྐད་དུ་བཤད་པའི་བསྒྲུབ་པའི་མཆོད་
པ་ནི། དེ་བཞིན་གཤེགས་པ་ཐམས་ཅད་ཀྱི་མཆོད་པའོ། །དེ་ཇི་ལྟར་འགྱུར་ཞེ་ན། ཇི་སྙེད་པའི་དེ་བཞིན་གཤེགས་པའི་བདེ་བ་ཐམས་ཅད་ཕུལ་བས་སོ་ཞེས་བྱ་བ་གསུངས་ཏེ། བཅོམ་ལྡན་འདས་རྣམ་པར་སྣང་མཛད་ཀྱི་དཀྱིལ་འཁོར་སྒོམ་པས་སོ། །བསྒོམ་པའི་རང་བཞིན་གྱིས་བདེ་བ་གང་ཞིག་
བྱུང་བར་གྱུར་པ་དེ་རྣམས་ནི་ཆུང་ངུ་དང་། འབྲིང་དང་ཆེན་པོ་རྣམས་ཇི་སྙེད་པ་སྟེ། ཇི་ལྟར་ཐོབ་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་བདེ་བ་རྣམས་སོ། །དེ་རྣམས་དབུལ་བ་ནི་བཅོམ་ལྡན་འདས་རྣམ་པར་སྣང་མཛད་ཀྱི་དཀྱིལ་འཁོར་གྱི་ངོ་བོ་ཉིད་དུ་སེམས་ཅན་ཐམས་ཅད་བསྐྱེད་པར་ཡང་དང་
ཡང་དུ་བསྒོམས་པས་ཕུལ་བ་སྟེ། དེས་ནི་དེ་བཞིན་གཤེགས་པ་ཐམས་ཅད་མཆོད་པར་འགྱུར་རོ། །སངས་རྒྱས་ནི་ཇི་སྐད་དུ་བཤད་པ་རྣམས་སོ། །བྱང་ཆུབ་སེམས་དཔའ་ཐམས་ཅད་ནི་རྡོ་རྗེ་སེམས་དཔའ་ལ་སོགས་པ་ནས། བསྐལ་པ་བཟང་པོའི་མཐར་ཐུག་པའི་བར་རོ། །དེ་རྣམས་ལ་
མཆོད་པར་ཇི་ལྟར་འགྱུར་ཞེ་ན། བདག་ཕུལ་བས་སོ་ཞེས་བྱ་བ་གསུངས་ཏེ། ཕྱག་འཚལ་བ་བཞིའི་སྦྱོར་བས་བདག་ཉིད་ཕུལ་ནས་ཞེས་བྱ་བའི་དོན་ཏོ། །དཀོན་མཆོག་གསུམ་ནི་སངས་རྒྱས་དང་། ཆོས་དང་། དགེ་འདུན་ཏེ། འོག་ནས་བཤད་པའི་མཚན་ཉིད་ཅན་ཏེ། སངས་རྒྱས་ཆོས་དང་

59-1-143b

དགེ་འདུན་ནི། །དམ་ཚིག་ཆེན་པོ་གསུམ་འདི་ཡིན། །རས་ལ་དཀོན་མཆོག་གསུམ་དང་ནི། །བྱང་ཆུབ་སེམས་དཔའ་གཟུགས་མཆོག་བྲི། །ཞེས་བྱ་ལ་སོགས་པ་བཤད་པས་སོ། །དེ་རྣམས་ལ་མཆོད་པར་ཇི་ལྟར་འགྱུར་ཞེ་ན། མེ་ཏོག་ལ་སོགས་པའི་བཟླས་པས་སོ་ཞེས་བྱ་བ་གསུངས་
ཏེ། རབ་ཏུ་དགའ་བ་དང་། ཤིན་ཏུ་དགའ་བ་དང་། སྤྱན་དང་། ལྷ་མོ་དཔལ་ཆེན་བཞིའི་སྙིང་པོ་བཟླ་ཞིང་ཕྱག་རྒྱ་དང་ལྡན་པས་སོ་ཞེས་བྱ་བའི་དོན་ཏོ། །སེམས་ཅན་ཐམས་ཅད་ནི། ཁམས་གསུམ་ན་སྤྱོད་པ་རྣམས་སོ། །དེ་རྣམས་ལ་མཆོད་པ་ནི་སངས་རྒྱས་དང་བྱང་ཆུབ་སེམས་དཔའ་རྣམས་
སུ་བསྐྱེད་པ་སྟེ། ཁམས་གསུམ་པ་རྡོ་རྗེ་སེམས་དཔའི་སྐུར་བསྒོམས་པས། དེས་ཁམས་གསུམ་ན་གནས་པའི་སེམས་ཅན་ཐམས་ཅད་རྣམ་པར་བྱང་ངོ་ཞེས་བྱ་བ་འདི་ཉིད་ཀྱི་འོག་ནས་གསུངས་པ་སྟེ། ཐམས་ཅད་ལ་བྱམས་པའི་བཟླས་པས་སོ་ཞེས་བྱ་བ་ནི། ཁམས་གསུམ་གྱི་རྡོ་རྗེ་
རྒྱས་པར་འཁོར་ལོ་ཆེན་པོ་ཐོག་མ་མེད་པ་ལས་བྱུང་བ་བསྒོམས་པས་སོ། །ཁམས་གསུམ་མ་ལུས་པ་ན་སྤྱོད་པའི་སེམས་ཅན་གྱི་ཁམས་ཐམས་ཅད་རྡོ་རྗེ་སེམས་དཔའ་ཉིད་དུ་བྱ་བའི་ཕྱིར། བཟླས་པ་ནི་ཐམས་ཅད་ལ་བྱམས་པའི་བཟླས་པ་སྟེ། བཟླས་པ་དེས་སེམས་ཅན་ཐམས་ཅད་
ལ་མཆོད་པར་འགྱུར་རོ། །ཆོས་ཐམས་ཅད་བསྡུས་པ་ནི། བྱང་ཆུབ་ཀྱི་སེམས་ཆེན་པོ་དང་། སྦྱིན་པའི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྣམས་ཀྱི་ཉེ་བར་ལེན་པའོ། །དེ་ཇི་ལྟར་འགྱུར་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པའི་ཚིག་
བཞི་པོ་འདོན་པས་སོ་ཞེས་བྱ་བ་གསུངས་ཏེ་། རྡོ་རྗེ་སྲ་བ་ཉིད་ཀྱི་ཕྱིར་རྡོ་རྗེ་མཉམ་པ་ཉིད་ཀྱི་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ་ཞེས་བྱ་བ་ནས། ཐམས་ཅད་རྣམ་པར་མི་རྟོག་པ་ཉིད་ཀྱི་ཕྱིར་ཐམས་ཅད་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ་ཞེས་
གསུངས་པའི་བར་གྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚིག་བཞི་འདོན་པ་སྟེ། དེས་བྱང་ཆུབ་ཀྱི་སེམས་ཆེན་པོ་ལ་སོགས་པའི་ཆོས་རྣམས་བསྡུས་པར་གྱུར་པ་ཡིན་ཞིང་། དེ་ལྟ་བུའི་ཡེ་ཤེས་སྐྱེ་བར་འགྱུར་རོ། །བདུད་ཐམས་ཅད་འདུལ་བ་ལ་ནི་བརྟན་ཞིང་ངེས་པའི་བཟླས་པས་སོ་ཞེས་བྱ་

59-1-144a

བས་ནི། གང་གི་ཚེ་སྒྲུབ་པ་དང་རབ་ཏུ་ལྡན་པའི་རྣལ་འབྱོར་པ་ལ་བདུད་དག་དེ་བཞིན་གཤེགས་པ་ཐམས་ཅད་ཀྱི་གཟུགས་ཀྱི་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་རྣམས་ཀྱི་ཡུལ་ལས་རྣལ་འབྱོར་པའི་སེམས་ཕྱིར་ཕྱོགས་པར་བྱ་བའི་ཕྱིར་འཇུག་པ་མཐོང་
ན། དེའི་ཚེ་བཅོམ་ལྡན་འདས་མི་བསྐྱོད་པའི་ས་གནོན་གྱི་ཕྱག་རྒྱ་བཅིངས་ལ། ཆོས་ཐམས་ཅད་བདག་མེད་པར་བསྒོམ་ཞིང་། ཨ་ཞེས་བྱ་བའི་བཟླས་བརྗོད་བྱ་སྟེ། དེ་ལྟ་བུ་བརྟན་ཞིང་ངེས་པའི་བཟླས་པས་ནི་བདུད་ཐམས་ཅད་འདུལ་བར་འགྱུར་རོ། །དེ་བཞིན་གཤེགས་པ་ཐམས་ཅད་
དབང་བསྐུར་བ་ཐོབ་པ་ལ་ནི་ཞེས་བྱ་བ་ལ་སོགས་པ་ལ་འཕགས་པ་ནམ་མཁའི་སྙིང་པོར་བདག་ཉིད་བསམས་ལ། རྡོ་རྗེ་རིན་ཆེན་གྱི་ཕྱག་རྒྱ་བཅིངས་ཏེ། ཨ་ཞེས་བྱ་བ་ཟློས་ཤིང་། དེ་བཞིན་གཤེགས་པ་ཐམས་ཅད་ལ་དབང་བསྐུར་བ་དང་། རྒྱན་ཐམས་ཅད་ཀྱིས་ཡང་དག་པར་མཆོད་དེ། ཡང་
བདག་ཉིད་དེས་དབང་བསྐུར་ཞིང་། བདག་ཉིད་ཀྱིས་བདག་ཉིད་ལ་རྒྱན་ཐམས་ཅད་གདགས་པར་བྱ་སྟེ། དེ་ལྟ་བུས་ནི་དབང་ཐམས་ཅད་ཐོབ་པར་འགྱུར་རོ། །ཆོས་ཐམས་ཅད་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེའི་ཐོབ་པ་ཉིད་ནི་རྙེད་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་པདྨ་ལ་ལྟ་བས་སོ་
ཞེས་བྱ་བ་གསུངས་ཏེ། འཕགས་པ་སྤྱན་རས་གཟིགས་དབང་ཕྱུག་གི་ཕྱག་རྒྱ་ཆེན་པོ་ནི་རྡོ་རྗེ་པདྨ་ལ་ལྟ་བ་སྟེ། དེ་ཆོས་ཉིད་ཐམས་ཅད་འཐོབ་པར་འགྱུར་རོ། །དེ་ཡང་འཕགས་པ་སྤྱན་རས་གཟིགས་དབང་ཕྱུག་གི་ཕྱག་རྒྱ་ཆེན་པོ་བཅིངས་པས། ཆོས་ཐམས་ཅད་རང་བཞིན་གྱིས་རྣམ་
པར་དག་པར་བསྒོམ་ཞིང་། ཨ་ཞེས་བྱ་བའི་བཟླས་བརྗོད་བྱ་སྟེ། དེ་ལྟ་བུས་ནི་ཆོས་ཐམས་ཅད་ཀྱི་མཉམ་པ་ཉིད་ཀྱི་ཏིང་ངེ་འཛིན་འཐོབ་པར་འགྱུར་རོ། །དེ་བཞིན་གཤེགས་པ་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ནི་འགྲོ་བའི་དོན་བྱ་བ་དང་། མཆོད་པའི་
ལས་རྣམས་སོ། །དེའི་དངོས་གྲུབ་ནི་རྫོགས་པར་འགྱུར་བའོ། །དེ་ཐོབ་པ་ནི་མངོན་སུམ་དུ་གྱུར་པའོ། །དེ་ཇི་ལྟར་འགྱུར་ཞེ་ན། ཐམས་ཅད་རྡོ་རྗེའི་ལས་ཀྱི་མཆོག་གིས་སོ་ཞེས་བྱ་བ་གསུངས་ཏེ། དང་པོའི་རྡོ་རྗེའི་ཕྱག་རྒྱ་བཅིངས་ལ། བྱང་ཆུབ་སེམས་དཔའ་ཆེན་པོ་རྡོ་རྗེ་ལས་ཀྱི་གཟུགས་

59-1-144b

སུ་བདག་ཉིད་བསམས་ཏེ། ཨ་ཞེས་བྱ་བ་བཟླས་ནས། དེའི་འོག་ཏུ་དེ་བཞིན་གཤེགས་པ་ཐམས་ཅད་ཀྱི་ལས་ཀྱི་དངོས་གྲུབ་ཐོབ་པར་འགྱུར་རོ། །སངས་རྒྱས་ཉིད་ཅེས་བྱ་བ་ལ་སོགས་པ་ལ། སངས་རྒྱས་ཉིད་རབ་ཏུ་འཐོབ་པ་ནི་འཚང་རྒྱ་བར་འགྱུར་བ་ཉིད་ཐོབ་པའོ། །དེ་ཇི་ལྟར་
འགྱུར་ཞེ་ན། རྡོ་རྗེ་ཡེ་ཤེས་ཀྱི་ཁུ་ཚུར་གྱི་དེ་ཁོ་ན་ཉིད་ཀྱི་ཕྱག་རྒྱ་ཆེན་པོས་སོ་ཞེས་བྱ་བ་གསུངས་ཏེ། རྡོ་རྗེ་ཡེ་ཤེས་ནི་ཆོས་ཀྱི་དབྱིངས་ཀྱི་ཡེ་ཤེས་སོ། །དེ་སྟོན་པར་བྱེད་པའི་ཁུ་ཚུར་ནི་བྱང་ཆུབ་མཆོག་གི་ཕྱག་རྒྱའོ། །དེ་ཉིད་ནི་དེ་ཁོ་ན་ཉིད་ཀྱི་ཕྱག་རྒྱ་ཆེན་པོ་སྟེ། ཀུན་རྫོབ་ཀྱི་བདེན་པའི་
ངོ་བོ་ཉིད་དེ། ཕྱག་རྒྱ་ཆེན་པོ་བཅོམ་ལྡན་འདས་རྣམ་པར་སྣང་མཛད་ཀྱི་སྐུའི་གསང་བའི་ངོ་བོ་ཉིད་ཀྱི་ཕྱག་རྒྱའོ་ཞེས་བྱ་བའི་དོན་ཏོ། །འདི་སྐད་སྟོན་པར་འགྱུར་རོ། །བཅོམ་ལྡན་འདས་རྣམ་པར་སྣང་མཛད་ཀྱི་སྦྱོར་བ་ཇི་ལྟ་བ་བཞིན་བྱས་ལ་དེའི་ཕྱག་རྒྱ་ཆེན་པོ་བཅིངས་ཏེ། རྣམ་པར་སྣང་
མཛད་དུ་བདག་ཉིད་བསྒོམས་ནས། ཨ་ཞེས་བྱ་བ་བཟླས་ནས་དེ་ལྟ་བུས་ནི་སངས་རྒྱས་ཉིད་འགྲུབ་བར་འགྱུར་རོ་ཞེས་པའོ། །བདེ་བ་ཆེན་པོ་རྡོ་རྗེ་དོན་ཡོད་པ་ནི་གཉིས་སུ་མེད་པ་སྟེ། བྱང་ཆུབ་སེམས་དཔའ་ལ་སོགས་པ་དེ་བཞིན་གཤེགས་པའི་ཡེ་ཤེས་བཞིའི་ངོ་བོ་ཉིད་དོ། །དེའི་དམ་ཚིག་ནི་
དེ་ལས་བྱུང་བ་མི་བསྐྱོད་པ་ལ་སོགས་པའི་དེ་བཞིན་གཤེགས་པའི་ཚུལ་དང་། དེའི་རིགས་ཀྱི་ངོ་བོ་ཉིད་དེ་སྟོན་པའི་སྒྲའི་ཚོགས་ལ་ཡང་ཉེ་བར་གདགས་པས་དེ་སྐད་ཅེས་བྱའོ། །དེ་དག་ཉིད་ནི་ཆོས་དང་དོན་དང་ངེས་པའི་ཚིག་དང་། སྤོབས་པ་སོ་སོ་ཡང་དག་པར་རིག་པའི་རྣམ་པར་རྟོག་པའི་
ངོ་བོ་ཉིད་དུ་གྱུར་པས་ན་རྟོག་པ་སྟེ། དེ་སྟོན་པའི་སྒྲའི་ཚོགས་ལ་ཡང་དེ་སྐད་ཅེས་བྱ་བ་ནི་སྔ་མ་བཞིན་ནོ། །དེ་ནི་རྟོག་པ་གཞན་རྣམས་ལས་མཆོག་ཏུ་གྱུར་ཅིང་ཚུལ་དེ་ཉིད་ཀྱིས་གཞན་རྣམས་ཟིལ་གྱིས་ནོན་པས་མཛེས་ཤིང་འབར་བའི་ཕྱིར། རྟོག་པའི་རྒྱལ་པོ་ཆེན་པོ་སྟེ། རྟོག་པའི་རྒྱལ་
པོ་ཆེན་པོ་དེ་ལས་དེ་བཞིན་གཤེགས་པ་དེ་དག་ཐམས་ཅད་ཀྱི་དེ་ཁོ་ན་ཉིད་ནི། བྱང་ཆུབ་ཀྱི་སེམས་ཆེན་པོ་ལ་སོགས་པའི་ངོ་བོ་ཉིད་དོ། །དེ་ཉིད་ནི་རྣམ་པར་རྟོག་པ་ཐམས་ཅད་ཀྱིས་མི་ཤིགས་པས་ན་རྡོ་རྗེའོ། །དེ་རྣམས་ཀྱི་དམ་ཚིག་ནི་དེ་ཁོ་ན་ཉིད་བཅུ་སྟེ། མིང་དེ་སྐད་ཅེས་བཏགས་པའི་

59-1-145a

རྟོག་པའི་རྒྱལ་པོ་རྫོགས་སོ་ཞེས་བྱ་བ་ནི། བྱང་ཆུབ་ཀྱི་སེམས་དང་། ཕྱག་རྒྱ་ཆེན་པོ་དང་། མེ་ལོང་ལྟ་བུའི་ཡེ་ཤེས་དང་། རྣམ་པར་ཐར་པའི་སྒོ་སྟོང་པ་ཉིད་དང་། ངོ་བོ་ཉིད་ཀྱི་སྐུ་སྟོན་པའི་ངོ་བོ་ཉིད་ཀྱིས་མཐར་ཐུག་གོ་ཞེས་བྱ་བའོ། །དེ་བཞིན་གཤེགས་པའི་
དབུགས་དབྱུང་བའི་བཤད་པ་རྫོགས་སོ།།    །།དེ་ལྟར་རང་བཞིན་ཤས་བཟང་ཞིང་ཆ་མཉམ་པ་ལ་སྤྱོད་པའི་སེམས་ཅན་རྣམས་རྗེས་སུ་གཟུང་བར་བྱ་བའི་ཕྱིར། དེ་བཞིན་གཤེགས་པའི་དབུགས་དབྱུང་བ་བཤད་ནས། ད་ནི་ཁྲོ་བས་ཁྲོ་བ་སྤང་བར་བྱ་བའི་ཕྱིར། དཔལ་ཁམས་གསུམ་
རྣམ་པར་རྒྱལ་བའི་དབུགས་དབྱུང་བ་གསུངས་པ་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། སྔར་བཤད་པའི་ཚུལ་གྱིས་འདོད་པའི་ཁམས་ཐམས་ཅད་ཀྱི་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་གནས་ན། བྱང་ཆུབ་སེམས་དཔའ་ལག་
ན་རྡོ་རྗེ་ལ་སོགས་པས་ཡོང་སུ་བསྐོར་ནས། བཅོས་ལྡན་འདས་རྣམ་པར་སྣང་མཛད་བཞུགས་པ་དང་། དེའི་རྗེས་ཐོགས་ཉིད་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲུབ་པ་འདི་གསུངས་པའོ། །དེ་ལ་མ་རུངས་པ་ནི་སེམས་ཅན་ཉེ་བར་ལེན་པའི་གསོད་པ་ལ་ཞུགས་པའོ། །དེ་རྣམས་འདུལ་བ་
ནི་བཅོམ་ལྡན་འདས་རྣམ་པར་སྣང་མཛད་རྡོ་རྗེ་ཧཱུྃ་མཛད་དུ་གྱུར་ནས་འདིས་འདུལ་ཞིང་སེམས་ཅན་གསོད་པའི་གདུག་པ་ཡོངས་སུ་སྤངས་ནས། བྱང་ཆུབ་ཆེན་པོའི་སེམས་བསྐྱེད་པར་མཛད་པས་ན་འདུལ་བའོ། །དེ་བཞིན་དུ་ཐུགས་སུ་ཆུད་ཅིང་སངས་རྒྱས་ལ་དེ་བཞིན་དུ་གསུངས་པས་ན། དེ་
བཞིན་གཤེགས་པའོ། །དེ་ཉིད་ནི་ཤཱཀྱའི་རིགས་སུ་སྤྲུལ་པའི་སྐུས་སྐྱེ་བ་སྟོན་པར་མཛད་པས་ན། ཤཱཀྱ་ཐུབ་པའོ། །དེ་ཉིད་ནི་རྡོ་རྗེ་སྲ་བ་ཉིད་ཀྱི་ཕྱིར་མཉམ་པ་ཉིད་ཀྱིས་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ་ཞེས་བྱ་བ་ལ་སོགས་པ་སྔར་གསུངས་པ་ལ་ལྟོས་ནས། ཡང་གཞན་
དག་ཀྱང་སྟོན་པར་མཛད་པ་ནི་ཡང་ཞེས་བྱ་བའི་སྒྲས་བཤད་པ་ཡིན་ནོ། །ཆོས་ཐམས་ཅད་ཅེས་བྱ་བ་ལ་སོགས་པ་ཆོས་ཀྱང་ཡིན་ལ་ཐམས་ཅད་ཀྱང་ཡིན་པས་ན་ཆོས་ཐམས་ཅད་དེ། འདོད་ཆགས་དང་། ཞེ་སྡང་དང་། གཏི་མུག་གི་ཆོས་ཐམས་ཅད་ཀྱི་ངོ་བོ་ཉིད་དོ། །དེ་རྣམས་ཀྱི་མཉམ་པ་

59-1-145b

ཉིད་ནི་དེ་བཞིན་ཉིད་དོ། །དེ་རྣམ་པར་རྒྱལ་བ་ནི་མཉམ་པ་ཉིད་ཀྱི་སྟོབས་ཀྱིས་འདོད་ཆགས་ལ་སོགས་པ་སྤོང་བའོ། །དེའི་བསྡུ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་གང་གིས་འདོད་ཆགས་ལ་སོགས་པ་དངོས་པོ་མེད་པའི་ངོ་བོ་ཉིད་དུ་བསྒོམས་པའི་མཚན་ཉིད་ཀྱིས་སྤོང་
བར་གྱུར་པ་སྟེ། གང་ལ་མིང་དེ་སྐད་ཅེས་བྱ་བ་ནི། ཆོས་ཐམས་ཅད་ཀྱི་མཉམ་པ་ཉིད་ཀྱིས་རྣམ་པར་རྒྱལ་བ་བསྡུ་བ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པ་སྒྲུབ་པ་འདི་གསུངས་པ་དེ་འཆད་པར་མཛད་པའོ། །འདོད་ཆགས་སྤྲོ་བ་མེད་པ་ཉིད་ཀྱིས་ཞེས་བྱ་བ་ལ་སོགས་པ་ལ། དེ་ལ་འདོད་
ཆགས་ནི་བྱང་ཆུབ་ཀྱི་སེམས་ཆེན་པོ་དང་། ཉོན་མོངས་པ་རྣམས་ཀྱི་ངོ་བོ་ཉིད་དོ། །དེའི་སྤྲོས་པ་ནི་དེ་བཞིན་གཤེགས་པའི་རིགས་དང་། རྣམ་པར་ཐར་པའི་སྒོ་སྟོང་པ་ཉིད་དང་། ངོ་བོ་ཉིད་ཀྱི་སྐུའི་རང་བཞིན་གྱིས་རྣམ་པ་སྣ་ཚོགས་པའི་ཚུལ་དུ་རྣམ་པར་རྟོག་ཅིང་བྱང་ཆུབ་སེམས་དཔའི་ངོ་བོ་
ཉིད་དང་། ཉོན་མོངས་པའི་ངོ་བོ་ཉིད་ལ་ཆགས་པའི་མཚན་ཉིད་ཀྱི་རྗེས་སུ་ཆགས་པ་དང་། འདོད་པའི་འདོད་ཆགས་དང་། སྲིད་པའི་འདོད་ཆགས་ཁ་དོག་དང་དབྱིབས་དང་། རེག་པ་དང་། ཉེ་བར་སྤྱོད་པའི་དབྱེ་བས་སྣ་ཚོགས་པའི་ཚུལ་དུ་རྣམ་པར་རྟོག་པ་ནི་སྤྲོས་པའོ། །མ་སྤྲོས་པས་ན་
སྤྲོས་པ་མེད་པ་སྟེ། དོན་དམ་པར་འདོད་ཆགས་རྗེས་སུ་མི་དམིགས་པའོ། །འདོད་ཆགས་ཀྱི་སྤྲོས་པ་མེད་པར་གྱུར་པ་ནི། འདོད་ཆགས་སྤྲོས་པ་མེད་པ་སྟེ། དེ་རྒྱུར་གྱུར་པས་ནི། ཞེ་སྡང་སྤྲོས་པ་མེད་པ་ཉིད་དོ། །དེ་ལ་ཞེ་སྡང་ནི་རྡོ་རྗེའི་རིགས་དང་ཉོན་མོངས་པ་རྣམས་ཀྱི་ངོ་བོ་ཉིད་ཀྱིས་སེམས་
ཅན་རྣམས་ལ་གནོད་ཅིང་ཕན་པ་མ་ཡིན་པའི་ཚུལ་ཏེ། རྡོ་རྗེ་རིགས་ཀྱི་ངོ་བོ་ཉིད་དེ་ལ་རྡོ་རྗེ་ཧཱུྃ་མཛད་ལ་སོགས་པའི་གཟུགས་ཀྱིས་སྣ་ཚོགས་པའི་ཚུལ་དུ་རྣམ་པར་རྟོག་པའི་སྤྲོས་པ་དང་། ཉོན་མོངས་པའི་ངོ་བོ་ཉིད་མནར་སེམས་དགུ་པོའི་དངོས་པོའི་དབྱེ་བ་དང་གནས་མེད་པ་ལ་འཁྲུལ་པ་ནི་
བཅུ་པ་སྟེ། དེ་དག་གི་ངོ་བོ་ཉིད་སྣ་ཚོགས་པའི་ཚུལ་དུ་རྣམ་པར་རྟོག་པ་ནི་སྤྲོས་པའོ། །མ་སྤྲོས་པས་ན་སྤྲོས་པ་མེད་པ་སྟེ། དོན་དམ་པར་ཞེ་སྡང་ནི་དངོས་པོ་མེད་པའི་ངོ་བོ་ཉིད་དོ། །ཞེ་སྡང་གི་སྤྲོས་པ་མེད་པར་གྱུར་པ་ཉིད་ནི། ཞེ་སྡང་གི་སྤྲོས་པ་མེད་པ་དེས། གཏི་མུག་སྤྲོས་པ་མེད་པ་ཉིད་

59-1-146a

དོ། །གཏི་མུག་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་དེ། གཟུང་བ་དང་། འཛིན་པའི་རྣམ་པར་རྟོག་པ་མེད་པས་འཇིག་རྟེན་གྱི་དབང་ཕྱུག་ཡོངས་སུ་མི་ཤེས་པ་དང་། མ་རིག་པ་ནི་གཏི་མུག་གོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་ལ་འགྲོ་བ་འདུལ་བ་ལ་སོགས་པའི་
གཟུགས་ཀྱིས་སྣ་ཚོགས་པའི་ཚུལ་དུ་རྣམ་པར་རྟོག་པ་ནི་སྤྲོས་པའོ། །མ་རིག་པའི་ངོ་བོ་ཉིད་ཀྱིས་ཀྱང་རྨོངས་པའི་བདག་ལ་ཆགས་པ་ལ་སོགས་པ་ལྟ་བ་དྲུག་ཅུ་རྩ་གཉིས་ཀྱི་ཚུལ་དུ་རྣམ་པར་རྟོག་པ་ནི་སྤྲོས་པའོ། །མ་སྤྲོས་པས་ན་སྤྲོས་པ་མེད་པ་སྟེ། དོན་དམ་པར་ནི་གཏི་མུག་ལ་གཏི་མུག་
གི་དངོས་པོ་མི་དམིགས་པའི་ཕྱིར་རོ། །ཚིག་གི་དགོད་པ་གཞན་ནི་སྔ་མ་བཞིན་ནོ། །གཏི་མུག་གི་སྤྲོས་པ་མེད་པ་ཉིད་ཀྱིས་ཆོས་ཐམས་ཅད་ཀྱི་སྤྲོས་པ་མེད་པ་ཉིད་དོ་ཞེས་བྱ་བ་ནི་ཇི་སྐད་དུ་བཤད་པའི་གཏི་མུག་གི་སྤྲོས་པ་མེད་པ་ཉིད་ཀྱིས་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་མཚན་ཉིད་ཅན་སེམས་
དང་སེམས་ལས་བྱུང་བའི་འཁོར་བ་པའི་མིག་དང་། རྣ་བ་དང་། སྣ་དང་། ལྕེ་དང་། ལུས་ཀྱི་རྣམ་པར་ཤེས་པའི་ངོ་བོ་ཉིད་ཀྱིས་ཆོས་ཐམས་ཅད་ནི་སྤྲོས་པ་མེད་པ་ཉིད་དོ། །དེ་ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཉིད་དང་། དོན་ཡོད་པར་གྲུབ་པ་ལ་སོགས་པའི་དབྱེ་བས་རྣམ་པ་དུ་མའི་ཚུལ་དུ་
རྣམ་པར་རྟོག་པ་ནི་སྤྲོས་པའོ། །འཁོར་བའི་ཆོས་ཐམས་ཅད་ཀྱང་ཇི་སྐད་དུ་བཤད་པའི་མིག་གི་རྣམ་པར་ཤེས་པ་ལ་སོགས་པའི་དབྱེ་བས་སྣ་ཚོགས་པའི་ཚུལ་དུ་རྣམ་པར་རྟོག་པ་ནི་སྤྲོས་པའོ། །མ་སྤྲོས་པས་ན་སྤྲོས་པ་མེད་པ་སྟེ་དེ་ལྟར་གྱུར་པའོ། །ཆོས་ཐམས་ཅད་སྤྲོས་པ་མེད་པ་ཉིད་
ཀྱིས་ཞེས་བྱ་བ་ལ་སོགས་པ་ལ། འདིར་ཡང་ཆོས་ཐམས་ཅད་ནི་འདོད་ཆགས་དང་ཞེ་སྡང་དང་། གཏི་མུག་གི་ཆོས་ཐམས་ཅད་ཀྱི་ངོ་བོ་ཉིད་དུ་ཇི་སྐད་དུ་གསུངས་པའོ། །དེ་རྣམས་ཀྱི་སྤྲོས་པ་མེད་པ་ནི་ཇི་སྐད་དུ་གསུངས་པའི་མཚན་ཉིད་ཅན་གྱི་ཆོས་ཐམས་ཅད་སྤྲོས་པ་མེད་པར་གྱུར་པའོ། །ཆོས་
ཐམས་ཅད་སྤྲོས་པ་མེད་པར་གྱུར་པ་དེས་ཤེས་རབ་ཀྱི་ཕ་རོལ་ཏུ་ཕྱིན་པ་སྤྲོས་པ་མེད་པ་ཉིད་དུ་རིག་པར་བྱའོ་ཞེས་བྱ་བ་སྟེ། འདོད་ཆགས་དང་ཞེ་སྡང་དང་། གཏི་མུག་གི་ཆོས་ཐམས་ཅད་ནི་དངོས་པོ་མེད་པའི་ངོ་བོ་ཉིད་མངོན་སུམ་དུ་བྱས་པ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། དེ་ཉིད་ཀྱང་ཆོས་

59-1-146b

ཐམས་ཅད་ཀྱི་སྤྲོས་པ་མེད་པ་ཉིད་དོ། །གང་གི་ཕྱིར་དེ་ལྟར་ཡིན་པ་དེས་ན་ཆོས་ཐམས་ཅད་ནི་སྤྲོས་པ་མེད་པ་ཉིད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་སྤྲོས་པ་མེད་པ་ཉིད་དུ་རིག་པར་བྱ་ཞིང་ཤེས་པར་བྱ་སྟེ། ཆོས་ཐམས་ཅད་ཀྱི་དངོས་པོ་མེད་པའི་ངོ་བོ་ཉིད་གང་ཡིན་པ་དེ་ཉིད་ནི་ཤེས་རབ་ཀྱི་ཕ་རོལ་ཏུ་
ཕྱིན་པ་དང་དབྱེར་མེད་ཅིང་ཆད་པ་མེད་དོ་ཞེས་བྱ་བའི་དོན་ཏོ། །འདི་སྐད་སྟོན་པར་འགྱུར་ཏེ། འདོད་ཆགས་ཀྱི་མཉམ་པ་ཉིད་རྟོག་པས་ནི་ཞེ་སྡང་མི་དམིགས་པར་འགྱུར་ལ། ཞེ་སྡང་མི་དམིགས་པས་ནི་གཏི་མུག་མི་དམིགས་ཏེ། དེས་ཀྱང་ཆོས་ཐམས་ཅད་མི་དམིགས་ལ། ཆོས་ཐམས་ཅད་
མི་དམིགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་སུམ་དུ་བྱས་པར་འགྱུར་ཏེ། དེ་ནས་རྡོ་རྗེ་ཧཱུྃ་མཛད་ལ་སོགས་པའི་གཟུགས་ཡང་དག་པར་བསྟན་ནས། སྔོན་གྱི་འཕེན་པའི་ཤུགས་ལས་བྱུང་བའི་མ་ཆགས་པ་དང་། མི་སྡང་བ་དང་། མ་རྨོངས་པའི་ཚུལ་གྱིས་ཕྱི་མའི་མཐར་ཐུག་པའི་བར་
དུ་སེམས་ཅན་རྣམས་ཀྱི་དོན་རྫོགས་པར་བྱེད་པར་འགྱུར་རོ། །ལག་ན་རྡོ་རྗེ་གང་ལ་ལ་ཞེས་བྱ་བ་ལ་སོགས་པས་ནི། སྤྲོ་བ་བསྐྱེད་པར་བྱ་བའི་ཕྱིར་སྔ་མ་བཞིན་དུ་ཕན་ཡོན་སྟོན་པར་མཛད་པ་ཡིན་ནོ། །དེས་ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཉན་པ་དང་། འཛིན་པ་དང་། ཀློག་པ་
དང་། སྒོམ་པ་དང་། རབ་ཏུ་བསྟན་པས་སོ། །འདོད་པ་དང་། གཟུགས་དང་། གཟུགས་མེད་པའི་ཁམས་གཅིག་ཏུ་བསྡུས་པ་ནི་ཁམས་གསུམ་སྟེ། དེར་སྐྱེས་པའི་སེམས་ཅན་ནི་ཁམས་གསུམ་དུ་སྐྱེས་པའི་སེམས་ཅན་ནོ། །དེ་ལྟ་བུའི་སེམས་ཅན་དེ་དག་ཐམས་ཅད་བསད་ཀྱང་ངན་སོང་
གསུམ་དུ་སྐྱེ་བར་མི་འགྱུར་བ་སྟེ། ཀྱང་ཞེས་བྱ་བའི་སྒྲས་ནི་ཉུང་ཟད་ཅིག་བསད་པས་ནི་ཤིན་ཏུ་ཡང་ངན་སོང་དུ་སྐྱེ་བར་མི་འགྱུར་རོ་ཞེས་སྟོན་པ་ཡིན་ནོ། །ཅིའི་ཕྱིར་མི་འགྱུར་ཞེ་ན། འདུལ་བའི་དབང་གི་ཕྱིར་ཞེས་བྱ་བ་གསུངས་ཏེ། འདིར་སེམས་ཅན་རྣམས་འདུལ་བར་འགྱུར་བས་ན་འདུལ་བ་སྟེ། གང་
གི་བསམ་པ་རྣམ་པར་དག་ཅིང་སྙིང་རྗེའི་རང་བཞིན་དུ་གྱུར་པ་དེས་ནི་སེམས་ཅན་རྣམས་ངན་འགྲོ་ལ་སོགས་པའི་སྡུག་བསྔལ་ལས་བསྒྲལ་བར་བྱ་བའི་ཕྱིར་བྱེད་པའི་སེམས་ཀྱི་རིན་པོ་ཆེ་གང་ཡིན་པ་དེའི་དབང་ཞེས་བྱ་བ་ནུས་པ་རྒྱུར་གྱུར་པར་བྱ་བའི་ཕྱིར་ངན་འགྲོར་སྐྱེ་བར་མི་འགྱུར་ཞིང་མྱུར་དུ་བླ་ན་

59-1-147a

མེད་པ་ཡང་དག་པར་རྫོགས་པའི་བྱང་ཆུབ་ཅེས་བྱ་བ། དེ་བཞིན་གཤེགས་པ་རྣམས་ཀྱི་ཡེ་ཤེས་རྟོགས་ཤིང་མངོན་པར་རྫོགས་པར་སངས་རྒྱས་པར་འགྱུར་བ་སྟེ། མངོན་སུམ་དུ་བྱེད་པར་འགྱུར་རོ་ཞེས་བྱ་བའོ། །དེ་ལྟར་དེ་ནས་མ་རུངས་པ་འདུལ་བ་ཞེས་བྱ་བ་ནས་བརྩམས་ཏེ། 
མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་བྱ་བ་འདིའི་བར་གྱི་བཤད་པ་དོན་གཞན་ལ་དགོངས་པའི་ཚུལ་གྱིས་ནི་དང་པོའི་སྦྱོར་བ་ཞེས་བྱ་བའི་ཏིང་ངེ་འཛིན་གསུངས་པ་ཡིན་ནོ། །ད་ནི་དེ་ནས་ཞེས་བྱ་བ་ལ་སོགས་པ་ཁྲོ་བོའི་དཀྱིལ་འཁོར་གྱི་མཆོག་ཅེས་བྱ་བའི་ཏིང་ངེ་འཛིན་གསུངས་པ་ཡིན་ཏེ། 
དེ་ནས་ཞེས་བྱ་བའི་སྒྲས་ནི་དེ་མ་ཐག་པའི་དོན་སྟོན་པར་བྱེད་པའི་ཚིག་སྟེ། དང་པོའི་སྦྱོར་བའི་རྗེས་ཐོགས་ཉིད་ལ་ཞེས་པའོ། །ལག་ན་རྡོ་རྗེ་ནི་རྡོ་རྗེ་སེམས་དཔའོ། །ཆོས་ཉིད་འདིའི་དོན་ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་བཤད་མ་ཐག་པའོ། །རྒྱ་ཆེར་སྟོན་ཅིང་ཞེས་བྱ་བ་ནི་ཧཱུྃ་ཞེས་བྱ་བའི་
ཡི་གེ་དང་། སྤྲུལ་པ་སྟོན་པར་མཛད་ཅིང་གསལ་བར་མཛད་པའོ། །འཇིག་རྟེན་གསུམ་ལས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཕྱག་རྒྱ་བཅིངས་ནས་ཞེས་བྱ་བ་ནི། ལག་ངར་རྡོ་རྗེར་བྱས་ནས་ནི། །མཐེའུ་ཆུང་ལྕགས་ཀྱུར་བཅིང་བར་བྱ། །མཛུབ་མོ་གཉིས་ཀྱིས་བསྡིགས་ནས་ནི། །འཇིག་རྟེན་
གསུམ་ལས་རྒྱལ་ཞེས་བྱ། །ཞེས་བྱ་བ་ནི། འཇིག་རྟེན་གསུམ་ལས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཕྱག་རྒྱ་སྟེ། དེ་བཅིངས་ནས་ཐུགས་ཀའི་ཕྱོགས་སུ་རྡོ་རྗེ་དྲིལ་བུ་འབར་བ་རྡོ་རྗེ་དང་བཅས་པས་བསྡམས་ནས་སྙིང་པོ་འདི་གསུངས་སོ་ཞེས་བྱ་བར་སྦྱར་རོ། །ཇི་ལྟ་བུའི་རྡོ་རྗེའི་སྙིང་པོ་གསུངས་
ཞེ་ན། ཁྲོ་གཉེར་དང་ཞེས་བྱ་བ་ལ་སོགས་པ་གསུངས་ཏེ། ཁྲོ་གཉེར་ལས་བྱུང་བའི་དཔྲལ་བའི་ཕྱོགས་སུ་བསྙེར་བ་དང་བཅས་པ་ནི་གཉེར་མའོ། །སྨིན་མ་གཉིས་འདེགས་པ་ནི་སྨིན་མ་བཏེག་པ་སྟེ། དེ་ཡང་ཤེས་པར་ཟད་དོ། །ཁྲོ་གཉེར་དང་བཅས་པ་དང་། སྨིན་མ་བཏེག་པ་ནི་ཁྲོ་གཉེར་དང་
བཅས་ཤིང་སྨིན་མ་བཏེག་པ་སྟེ། དེ་གཉིས་དང་ལྷན་ཅིག་གནས་པ་ནི། ཁྲོ་གཉེར་དང་བཅས་ཤིང་སྨིན་མ་བཏེག་སྟེ་འབར་བར་ལྟ་བ་ཞེས་བྱའོ། །སེམས་ཅན་ཚར་གཅོད་པའི་ཕྱིར་ཞེ་སྡང་ནི་ཁྲོ་ཞིང་ཞེས་བྱའོ། །གཞན་དག་སྐྲག་པར་བྱ་བའི་ཕྱིར་ཅུང་ཟད་དགོད་པར་ནི་དགོད་པའོ། །ཞལ་ལས་མཆེ་

59-1-147b

བ་ཅུང་ཟད་བཏོན་ནས་གནས་པ་ནི་མཆེ་བ་ཅུང་ཟད་གཙིགས་པ་སྟེ། དེ་ལྟར་ན་ཚུལ་དེ་ལྟ་བུས་འབར་བར་ལྟ་བ་ལ། པདྨའི་གདོང་ཁྲོ་བ་དང་བཅས་པས་དགོད་ཅིང་མཆེ་བ་ཅུང་ཟད་གཙིགས་པས་འཇིགས་སུ་རུང་བའི་ཞལ་གྱི་པདྨ་གང་ལ་མངའ་བ་འདི་ལ་དེ་སྐད་ཅེས་བྱ་སྟེ། ཕྱག་ན་རྡོ་རྗེའོ། །དེ་ནི་
དེ་ལྟ་བུར་གྱུར་པ་འབའ་ཞིག་ཏུ་ཡང་མ་ཟད་ཀྱི། གཡོན་བརྐྱང་བའི་ཚུལ་དུ་གནས་པས་གནས་ནས་ཞེས་བྱ་བ་སྟེ། གཡོན་པའི་བྱིན་པ་བརྐྱང་ནས། པུས་མོ་གཡས་པ་དགུག་པའི་ཚུལ་གྱིས་གནས་པ་ལས་བར་དུ་མཐོ་ལྔས་ཆོད་པར་འཇོག་པ་འདི་ནི། གཡོན་བརྐྱང་བའི་གནས་པས་གནས་
པའི་མཚན་ཉིད་དོ། །དེས་བཞུགས་པས་ན་གཡོན་བརྐྱང་བའི་ཚུལ་དུ་གནས་པས་གནས་ནས་ཞེས་བྱ་བའོ། །དེ་ལྟར་བཞུགས་ནས། མིང་ཇི་སྐད་ཅེས་བྱ་བའི་སྙིང་པོར་གསུངས་ཤེ་ན། རྡོ་རྗེ་ཧཱུྃ་ཞེས་བྱ་བ་གསུངས་ཏེ། རྡོ་རྗེ་ནི་བྱང་ཆུབ་ཆེན་པོའི་མཚན་ཉིད་ཀྱི་སེམས་ཏེ། སྟོང་པ་ཉིད་ནི་
རྡོ་རྗེར་བཤད། །ཅེས་གསུངས་པའི་ཕྱིར་རོ། །དེ་ལས་བྱུང་བའི་ཁྲོ་བོ་ནི་རྡོ་རྗེ་ཧཱུྃ་མཛད་དེ། དེ་སྟོན་པར་བྱེད་པའི་སྒྲ་ཧཱུྃ་གི་གཟུགས་ཅན་ཡང་རྡོ་རྗེ་ཧཱུཾ་མཛད་ཡིན་ནོ། །མིང་དེ་སྐད་ཅེས་བཏགས་པའི་ངེས་པའི་ཡེ་ཤེས་དང་། དེ་སྟོན་པའི་སྒྲའི་གཟུགས་ཅན་ནི་སྙིང་པོའོ། །འདི་ཞེས་བྱ་བ་ནི་བློ་ལ་བཞག་
ནས་སྨྲས་པའོ། །གསུངས་སོ་ཞེས་བྱ་བ་ནི་བཀའ་སྩལ་པར་གྱུར་པའོ། །ཧཱུཾ་ཞེས་བྱ་བ་ནི་ཧ་དབྱངས་ཀྱི་ཡི་གེ་ལྔ་པ་དང་བཅས་པ་ལ་ཐིག་ལེ་དང་ལྡན་པ་ནི་རྡོ་རྗེ་ཧཱུཾ་མཛད་ཡིན་པར་ཤེས་པར་བྱའོ། །དེ་ནས་འདི་གསུངས་པ་ཙམ་གྱིས་ཞེས་བྱ་བ་ནི་ཧཱུྃ་ཞེས་བྱ་བ་གསུངས་པ་ཙམ་གྱིས་ཏེ། བཅོམ་
ལྡན་འདས་ཕྱག་ན་རྡོ་རྗེས་བཀའ་སྩལ་པ་ཙམ་གྱིས་སོ། །འཇིག་རྟེན་གསུམ་པོ་ཐམས་ཅད་ཀྱི། །ཞེས་བྱ་བ་ནི། ཕྱོགས་བཅུ་ན་གནས་པའི་འདོད་པའི་ཁམས་ལ་སོགས་པ་སྟེ། ཁམས་གསུམ་པོ་མ་ལུས་པ་དེ་དག་ཐམས་ཅད་ལས། དབང་ཕྱུག་ཆེན་པོ་ལ་སོགས་པ་ནས། ཆུ་ལྷའི་མཐར་ཐུག་
པའི་བར་དུའོ། །འཇིག་རྟེན་གསུམ་པོ་ནི་ས་འོག་དང་། ས་སྟེང་དང་། མཐོ་རིས་པ་སྟེ། ས་ལ་གནས་པའི་འཇིག་རྟེན་པ་དང་། ལྷ་ཡུལ་ན་གནས་པའི་འཇིག་རྟེན་དང་། བར་སྣང་ལ་གནས་པའི་འཇིག་རྟེན་ནོ། །དེ་ལ་གང་བདག་པོར་གྱུར་པའི་རྒྱལ་པོ་རྣམས་ནི་འཇིག་རྟེན་གསུམ་གྱི་བདག་པོ་རྣམས་

59-1-148a

སོ། །ཡང་དག་པར་བཀུག་སྟེ་ཞེས་བྱ་བ་ནི་ཕྱོགས་བཅུ་དག་ནས་བཀུག་པའོ། །ལྟུང་བར་མཛད་ནས་ཞེས་བྱ་བ་ནི། དེ་ནས་ལྟུང་བར་མཛད་ནས་དཀྱིལ་འཁོར་དུ་བཅུག་པའོ། །མཚན་མ་མེད་པར་བྱས་པ་ནི་རྣམ་པར་རྒྱལ་བར་མཛད་པ་སྟེ། རྡོ་རྗེ་ལྕགས་སྒྲོག་གིས་
བཅིངས་ནས། རྡོ་རྗེ་འབེབས་པས་ཕབ་སྟེ་དབང་དུ་བྱས་ནས་བཏགས་ཏེ། རང་དབང་དུ་མཛད་ནས་བཏུལ་ཞིང་རྗེས་སུ་བཏུལ་ཏེ། ལྟུང་བར་བྱས་པ་ལས་བླངས་ནས་རྡོ་རྗེ་ལྕགས་སྒྲོག་གིས་བཅིངས་ཏེ། སླར་ཡང་དམ་ཚིག་གིས་བཅིངས་ནས། གསུམ་ལ་སྐྱབས་སུ་འགྲོ་བ་དང་། 
བྱང་ཆུབ་ཏུ་སེམས་བསྐྱེད་པ་དང་། སེམས་ཅན་གྱི་དོན་ཡོངས་སུ་མི་གཏོང་བ་ལ་བཞག་པར་གྱུར་ཏོ་ཞེས་བྱ་བའི་དོན་ཏོ། །དབང་ཕྱུག་ཆེན་པོ་ཨུ་མ་དང་བཅས་པ་རྣམ་པར་སྦྱང་བར་བྱ་བའི་ཕྱིར། བཅོམ་ལྡན་འདས་ཀྱི་ཞབས་གཉིས་ཀྱིས་མནན་པར་མཛད་པ་སྟེ། ལྷག་མ་རྣམས་ནི་གོ་
སླའོ། །དེ་ནས་རྡོ་རྗེ་ཁྲོ་བོའི་རྡོ་རྗེ་ལས་ཞེས་བྱ་བ་ལ་སོགས་པ་ལ་ཧཱུྃ་ཞེས་བྱ་བ་གསུངས་པའི་རྗེས་ཐོགས་ཉིད་ལ། བཅོམ་ལྡན་འདས་ཀྱི་ཕྱག་ན་གནས་པའི་རྡོ་རྗེ་རྩེ་བཞི་པ་འབར་བ་ལས་ཇི་སྐད་དུ་བཤད་པའི་རང་བཞིན་ཅན་གྱི་ཁྲོ་བོ་ཆེན་པོ་རྣམས་བྱུང་ནས། དང་པོའི་དཀྱིལ་འཁོར་གྱི་ཚུལ་
གྱིས་བཞུགས་སོ་ཞེས་བྱ་བར་སྦྱར་རོ། །དེ་རྣམས་ཀྱི་ཁྱད་པར་དུ་བྱ་བ་ནི་ཕྱག་ན་རྡོ་རྗེ་དང་འདྲ་བ་ལ་ཞེས་བྱ་བ་ལ་སོགས་པ་ཡིན་ཏེ། ཕྱག་ན་རྡོ་རྗེ་ཞེས་བྱ་བ་རྡོ་རྗེ་ཧཱུྃ་མཛད་དང་འདྲ་བའི་བདག་ཉིད་ཀྱི་སྐུ་གང་ལ་མངའ་བ་དེ་ལ་དེ་སྐད་ཅེས་བྱའོ། །བདག་ཉིད་ཀྱི་དངོས་པོ་འབའ་ཞིག་ཕྱག་ན་རྡོ་རྗེ་དང་འདྲ་
བར་མ་ཟད་ཀྱི། ཁ་དོག་དང་རྒྱན་དང་མཚོན་ཆ་སྣ་ཚོགས་པ་བསྣམས་པ་ཞེས་བྱ་སྟེ། སྐུ་མདོག་སྔོན་པོ་དང་། སེར་པོ་དང་། དམར་པོ་དང་། ལྗང་གུ་དང་། དཀར་པོ་སྟེ། ཁ་དོག་སྣ་ཚོགས་པ་དང་། གདུ་བུ་དང་། རྣ་རྒྱན་དང་། དཔུང་རྒྱན་དང་། ཅོད་པན་ལ་སོགས་པ་རྒྱན་རྣམ་པ་སྣ་ཚོགས་དང་། རྡོ་རྗེ་
ལ་སོགས་པའི་མཚོན་ཆ་རྣམས་ཏེ། དེ་ལྟ་བུའི་སྣ་ཚོགས་ཤིང་ཐ་དད་པ་བསྣམས་པ་དང་། དེ་དག་དེ་ལྟ་བུའི་ཚུལ་ཅན་འབའ་ཞིག་ཏུ་ཡང་མ་ཟད་ཀྱི། རྣམ་པར་འགྱུར་ཞིང་རྡོ་རྗེ་མཆེ་བ་གཙིགས་པ། ཚེམས་ཀྱི་སྒྲོས་གནོན་པ་སྨིན་མ་མི་བཟད་ཅིང་ཁྲོ་གཉེར་བསྙེར་བ། སྤྱན་དང་དབུ་སྐྲ་དང་ཨག་ཚོམ་

59-1-148b

འབར་བ་དང་། ཞལ་འཇིགས་པ་ཞེས་བྱ་བ་སྟེ། རྣམ་པར་འགྱུར་བའི་མཆེ་བ་གཡོ་ལ། རྡོ་རྗེ་ལྟར་མི་ཕྱེད་པའི་མཆེ་བ་ནི་རྣམ་པར་འགྱུར་བའི་རྡོ་རྗེ་མཆེ་བ་ཞེས་བྱའོ། །དེ་དག་གིས་གཙིགས་ཤིང་ཤིན་ཏུ་ཁྲོ་བས་ཚེམས་ཀྱི་སྒྲོས་གནོན་པ་སྟེ། མ་མཆུ་མནན་པ་གང་ཡིན་པ་དེ་ལ་དེ་སྐད་ཅེས་བྱའོ། །
སྨིན་མ་མི་བཟད་ཅིང་ཁྲོ་གཉེར་བསྙེར་བས་འཇིགས་སུ་རུང་བ་གང་ཡིན་པ་དེ་ལ་དེ་སྐད་ཅེས་བྱའོ། །དེ་བཞིན་དུ་སྤྱན་དང་། དབུ་སྐྲ་དང་། ཨག་ཚོམ་འབར་བས་ཞལ་འཇིགས་པ་དང་བཅས་ཤིང་འཇིགས་སུ་རུང་བ་གང་ཡིན་པ་དེ་ལ་དེ་སྐད་ཅེས་བྱ་སྟེ། སྨིན་མ་མི་བཟད་པ་དང་། ཁྲོ་གཉེར་
བསྙེར་བ་ཡང་ཡིན་ལ། སྤྱན་དང་དབུ་སྐྲ་དང་། ཨག་ཚོམ་འབར་བ་དང་། ཞལ་འཇིགས་པ་ཡང་ཡིན་པས་ན། སྨིན་མ་མི་བཟད་པའི་ཁྲོ་གཉེར་བསྙེར་བ། སྤྱན་དང་། དབུ་སྐྲ་དང་། ཨག་ཚོམ་འབར་བ། ཞལ་འཇིགས་པ་ཞེས་བྱ་བ་ལ། རྣམ་པར་འགྱུར་བའི་རྡོ་རྗེ་མཆེ་བ་གཙིགས་པ། ཚེམས་ཀྱི་སྒྲོས་
གནོན་པ་ནི་ཡང་ཁྱད་པར་གྱི་མཚམས་སྦྱོར་བའོ། །རྡོ་རྗེ་དང་ཞེས་བྱ་བ་ལ་སོགས་པ་ལ། རྡོ་རྗེ་ནི་རྩེ་མོ་བཞི་པའི་རྡོ་རྗེ་འབར་བའོ། །ལྕགས་ཀྱུ་ནི་རྡོ་རྗེས་མཚན་པའོ། །ཞགས་པ་ནི་ཤེས་པར་ཟད་དོ། །མཚོན་ཆ་ཞེས་བྱ་བ་ནི། ཚིག་སྔ་མ་རྣམས་དང་། ཚིག་འོག་མ་རྣམས་ལ་རེ་རེ་ཞིང་ཡང་སྦྱར་བར་
བྱའོ། །དབྱིག་པ་དང་། རལ་གྲི་དང་། ཁ་ཊྭཱཾ་ག་དང་། གྲི་རིངས་དང་། ཆུ་གྲི་ནི་གོ་བར་ཟད་དོ། །དེ་དག་ནི་ཕྱག་ན་བསྣམས་པ་གང་ཡིན་པ་དེ་ལ་དེ་སྐད་ཅེས་བྱའོ། །ཁྲོ་བོ་ཆེན་པོ་ཧཱུྃ་མཛད་ཅེས་བྱ་བ་ནི། བཅོམ་ལྡན་འདས་རྡོ་རྗེ་ཧཱུྃ་མཛད་ཀྱི་ཕྱག་ན་བསྣམས་པའི་རྡོ་རྗེ་ལས་འབྱུང་སྟེ། བཅོམ་ལྡན་འདས་
ཕྱག་ན་རྡོ་རྗེ་ཞེས་བྱ་བ་རྡོ་རྗེ་སེམས་དཔའི་དང་པོའི་དཀྱིལ་འཁོར་གྱི་ཚུལ་གྱིས་བཞུགས་ཤིང་གནས་པར་གྱུར་ཏོ། །ལྷ་ལ་སོགས་པ་དེ་རྣམས་ཀྱང་ཞེས་བྱ་བ་ནི། ཁྱབ་འཇུག་ནས་བརྩམས་ཏེ། ཆུ་ལྷའི་བར་དུ་ཕྱིའི་དཀྱིལ་འཁོར་གྱི་ཁྱམས་ཀྱི་ནང་དུ་རིམ་གྱིས་གནས་པར་བྱའོ། །ཅི་ཞིག་བྱས་
ནས་གཞག་པར་བྱ་ཞེ་ན། རང་གི་དཀྱིལ་འཁོར་གྱིས་བྱིན་གྱིས་བརླབས་ནས་ཞེས་བྱ་བ་གསུངས་ཏེ། ལྷ་ལ་སོགས་པ་དེ་དག་རང་གི་དཀྱིལ་འཁོར་ལ་གནས་པའི་ཁྲོ་བོའི་ཆ་ལུགས་ལ་ཞུགས་ནས། རང་གི་དཀྱིལ་འཁོར་ལས་བཀུག་སྟེ། ཕྱིའི་དཀྱིལ་འཁོར་གྱི་ཁྱམས་ཀྱི་ནང་དུ་གཞག་

59-1-149a

པར་བྱའོ། །གདོན་ལ་སོགས་པ་དེ་དག་ཀྱང་ཞེས་བྱ་བ་ནི། སྲིན་པོ་ལ་སོགས་པའི་གདོན་རྣམས་ནས་བརྩམས་ཏེ། ནད་དང་ཡམས་དང་རིམས་དང་། དུག་དང་། ངན་སོང་ལ་སོགས་པ་ཐམས་ཅད་དོ། །དཀྱིལ་འཁོར་གྱི་ཕྱི་རོལ་ན་གནས་སོ་ཞེས་བྱ་བ་ནི། ཕྱིའི་དཀྱིལ་འཁོར་
བསྐོར་ནས་ཀུན་དུ་གནས་སོ་ཞེས་བྱ་བའི་དོན་ཏོ། །དེ་ནས་ཕྱག་ན་རྡོ་རྗེ་ཞེས་བྱ་བ་ནས་བརྩམས་ཏེ། ཕྱི་རོལ་ན་གནས་སོ་ཞེས་བྱ་བའི་བར་གྱི་དོན་གཞན་པའི་དགོངས་པས་ནི་ཁྲོ་བོའི་དཀྱིལ་འཁོར་གྱི་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་པ་སྔོན་དུ་འགྲོ་བ་
ནི་གསུམ་པ་ཡིན་པར་ཤེས་པར་བྱའོ། །དབང་བསྐུར་བ་དང་དམ་ཚིག་ཐོབ་པ་རྣམས་ཀྱི་བཟླས་བརྗོད་དང་བསྒོམ་པར་བྱའོ་ཞེས་བྱ་བའི་ཚིག་འདིའི་དོན་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང་སློབ་མ་ཞུགས་པ་ལ་སོགས་པའི་ཆོ་ག་རྒྱས་པར་
གསུངས་པ་ཡིན་ནོ། །དེ་ནས་ཞེས་བྱ་བ་ནི་དེ་མ་ཐག་པར་སྟོན་པའི་ཚིག་སྟེ། སྔར་བསྙེན་པ་བྱས་པའི་རྗེས་ཐོགས་ཉིད་ལའོ། །བཅོམ་ལྡན་འདས་ཞེས་བྱ་བ་ནི་རྡོ་རྗེ་ཧཱུྃ་མཛད་དོ། །དེ་བཞིན་གཤེགས་པ་ཐམས་ཅད་ཀྱི་ཐུགས་རྗེ་ཆེན་པོ་ནི་མི་དམིགས་པས་སེམས་ཅན་ཐམས་ཅད་ལ་ཁྱབ་པར་
མཛད་པའོ། །དེ་ལས་བྱུང་བའི་ཐབས་ཀྱི་ཁྲོ་བོའི་གཟུགས་ཅན་ནི་ཁམས་གསུམ་རྣམ་པར་རྒྱལ་བ་ལ་སོགས་པའི་ཁྲོ་བོའི་ཚུལ་ཏེ་ཐུན་མོང་ངོ་། །དེ་ལ་དམིགས་པ་ནི་རྡོ་རྗེ་དང་འདྲ་བར་མི་ཕྱེད་པ་གང་ཡིན་པ་དེ་ལ་མིང་དེ་སྐད་ཅེས་བྱ་སྟེ། ཏིང་ངེ་འཛིན་དེ་ལ་སྙོམས་པར་ཞུགས་པ་ནི་མངོན་སུམ་
དུ་མཛད་པའོ། །ཁམས་གསུམ་པོ་མཐའ་དག་ནི་ཁམས་གསུམ་མ་ལུས་པའོ། །དེ་ལས་གང་གི་རྣམ་པར་རྒྱལ་བར་བྱས་པ་ནི་དེ་ན་གནས་པའི་དབང་ཕྱུག་ཆེན་པོ་ལ་སོགས་པ་རང་དབང་དུ་བྱས་པ་དེ་ནི་ཁམས་གསུམ་པོ་མཐའ་དག་ལས་རྣམ་པར་རྒྱལ་བ་རྡོ་རྗེ་སྟེ་རྡོ་རྗེའི་རིགས་སོ། །
དེའི་བྱིན་གྱིས་བརླབས་པ་ནི་དཀྱིལ་འཁོར་ཆེན་པོ་སྟེ། དེ་སྐད་ཅེས་བྱ་བའི་མིང་གང་ལ་ཡོད་པ་དེ་གསུངས་པའོ། །འདི་ཞེས་བྱ་བ་ནི་བློ་ལ་གཞག་པའི་དཀྱིལ་འཁོར་རོ། །གསུངས་སོ་ཞེས་བྱ་བ་ནི་སྨྲས་པ་སྟེ། དཀྱིལ་འཁོར་གྱི་རྣམ་པ་ལ་ཐུགས་རྩེ་གཅིག་ཏུ་མཛད་ནས། དཀྱིལ་འཁོར་གསུངས་

59-1-149b

སོ་ཞེས་བྱ་བའི་དོན་ཏོ། །འདིས་ནི་དཀྱིལ་འཁོར་བསྒོམས་པས་མཚན་མ་ཐོབ་ནས་དཀྱིལ་འཁོར་བྲི་བར་བྱའོ་ཞེས་སྟོན་པ་ཡིན་ནོ། །དེ་ནས་ཞེས་བྱ་བ་ནི་བཤད་མ་ཐག་པའི་དོན་སྟོན་པ་སྟེ། སྔོན་དུ་བསྙེན་པའི་མཚན་མ་ཐོབ་པའི་རྣལ་འབྱོར་པས་ཇི་སྐད་བཤད་པའི་དཀྱིལ་འཁོར་གྱི་དབུས་སུ་
འདུག་སྟེ། ཏིང་ངེ་འཛིན་གསུམ་རྣམ་པར་བསྒོམ་པའི་རྗེས་ཐོགས་ཉིད་ལའོ། །དེ་བས་ན་ཞེས་བྱ་བ་ནི་རྒྱུ་སྟེ། གང་གི་ཕྱིར་དཀྱིལ་འཁོར་དུ་མ་ཞུགས་པར་སྐལ་བ་མེད་པའི་སེམས་ཅན་ལ་སངས་རྒྱས་དང་བྱང་ཆུབ་སེམས་དཔའ་རྣམས་བསྟན་པའི་སྐལ་བ་ཡོད་པ་མ་ཡིན་ནོ། །དེ་བས་ན་
སྐལ་བ་མེད་པ་དེ་རྣམས་ཀྱི་བག་ཆགས་བསྐྱེད་པར་བྱ་བའི་ཕྱིར། ཡང་དག་ཅིང་ཕྱིན་ཅི་མ་ལོག་པར་ཕུལ་དུ་བྱུང་བས་ལེགས་པར་བཤད་པར་བྱའོ་ཞེས་པའོ། །དེ་གང་ཞེ་ན་རྡོ་རྗེ་དཀྱིལ་འཁོར་ཞེས་བྱ་བ་གསུངས་ཏེ། རྡོ་རྗེ་ཆེན་པོའི་རིགས་དང་དབྱེར་མི་ཕྱེད་པས་ན་རྡོ་རྗེ་སྟེ་དེའི་དཀྱིལ་འཁོར་རོ། །
ཁྱད་པར་ཇི་ལྟ་བུ་ཞེ་ན། དམ་པ་སྟེ་ཞེས་བྱ་བ་སྟེ། སེམས་ཅན་མ་རུངས་ཤིང་གདུག་པ་རྣམས་གདུལ་བར་བྱ་བའི་ཕྱིར། གཉིས་སུ་མེད་པས་ན་དམ་པ་སྟེ་མཆོག་གོ། །མིང་ཇི་སྐད་དུ་བྱ་ཞེ་ན། ཁམས་གསུམ་རྣམ་པར་རྒྱལ་བ་ཞེས་བྱའོ། །ལས་ཅི་ཞིག་བྱེད་ཅེ་ན། གདུག་པ་ཆེན་པོ་འདུལ་བར་བྱེད་
པའོ་ཞེས་བྱ་སྟེ། འདིས་གདུག་པ་རྣམས་འདུལ་བས་ན་འདུལ་བའོ། །ཕྱོགས་བཅུ་ཐམས་ཅད་དུ་ཁྱབ་པས་ན་ཆེན་པོ་སྟེ། འདུལ་བ་ཡང་ཡིན་ལ་ཆེན་པོ་ཡང་ཡིན་པས་ན་འདུལ་བ་ཆེན་པོ་སྟེ། བཅོམ་ལྡན་འདས་རྡོ་རྗེ་ཧཱུྃ་མཛད་དོ། །དེ་དཀྱིལ་འཁོར་ཆེན་པོ་གང་དུ་འདུལ་བ་མཛད་པ་དེ་ནི་གདུག་པ་ཆེན་པོ་
འདུལ་བྱེད་པ་ཞེས་བྱ་བ་སྟེ། གདུག་པ་ཐམས་ཅད་རང་གི་བཀའ་ལ་ངེས་པར་སྦྱར་བ་ཞེས་བྱ་བའི་དོན་ཏོ། །དཀྱིལ་འཁོར་དང་པོའི་སྦྱོར་བ་ཡིས། །ཕྱི་ཡི་དཀྱིལ་འཁོར་བྲི་བར་བྱ། །ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་དབྱིབས་ཀྱི་ཕྱི་མའི་དཀྱིལ་འཁོར་འདི་དག་ཐམས་ཅད་བྲི་བར་བྱའོ། །
དེ་ཡི་ནང་གི་དཀྱིལ་འཁོར་ནི། །དཀྱིལ་འཁོར་བརྒྱད་པ་དག་དང་མཚུངས། །ཞེས་བྱ་བ་ནི་བཤད་མ་ཐག་པའི་ཕྱིའི་དཀྱིལ་འཁོར་དེའི་ནང་དུ་སྟེ། དབུས་སུ་འཁོར་ལོའི་དཀྱིལ་འཁོར་ཇི་སྐད་དུ་བཤད་པ་དཀྱིལ་འཁོར་བརྒྱད་པ་དང་མཚུངས་ཤིང་འདྲ་བར་བྲི་བར་བྱ་སྟེ། ཕྱིའི་དཀྱིལ་འཁོར་གྱི་ཕྱེད་ཀྱི་ཚད་

59-1-150a

ལ་ཇི་སྐད་དུ་བཤད་པའི་ཀ་བ་བརྒྱད་དང་ལྡན་པ། རྡོ་རྗེའི་ཕྲེང་བ་ཟླུམ་པོས་བསྐོར་བའི་དཀྱིལ་འཁོར་བྲི་བར་བྱའོ་ཞེས་བྱ་བའི་དོན་ཏོ། །དེ་ཡི་དབུས་སུ་ཁྲོ་བོ་ཆེ། །ཕྱག་ན་རྡོ་རྗེ་གཞག་པར་བྱ། །ཞེས་བྱ་བ་ནི། དཀྱིལ་འཁོར་བརྒྱད་པ་དང་མཚུངས་པའི་དབུས་མའི་དཀྱིལ་འཁོར་
དེའི་དབུས་སུ་བཅོམ་ལྡན་འདས་རྡོ་རྗེ་ཧཱུྃ་མཛད་ཧཱུྃ་ཞེས་བྱ་བ་ཟློས་ཤིང་ནམ་མཁའི་ཕྱོགས་ལས་ཕབ་སྟེ། ལུགས་མ་དང་། བརྐོས་མ་ལ་སོགས་པའི་གཟུགས་བརྙན་དང་ལྷན་ཅིག་གཅིག་ཏུ་གཞག་པར་བྱའོ། །དེ་ཇི་ལྟ་བུར་དགོད་པར་བྱ་ཞེ་ན། སངས་རྒྱས་ཕྲེང་བ་ལ་སོགས་པས་སྤྲས་ཞེས་བྱ་
བ་ལ་སོགས་པས་ཁྱད་པར་དུ་བྱས་པ་ཡིན་ཏེ། སངས་རྒྱས་དང་། རིན་པོ་ཆེ་དང་། པདྨ་དང་རྡོ་རྗེ་འབར་བ་རྩེ་བཞི་པའི་ཕྲེང་བ་ལ་སོགས་པ་དང་ལྡན་པའི་དབུ་རྒྱན་དང་། གཞན་དག་གདུ་བུ་དང་། སྙན་ཆ་ལ་སོགས་པས་བརྒྱན་པ་ནི། སངས་རྒྱས་ཕྲེང་བ་ལ་སོགས་པས་སྤྲས་ཞེས་བྱའོ། །
ཨུཏྤལ་སྔོན་པོའི་མདོག་འདྲ་བ། །ཞེས་བྱ་བ་ནི་སྐུ་མདོག་ཨུཏྤལ་སྔོན་པོ་དང་འདྲ་བའོ། །ཞལ་ནི་ཅུང་ཟད་མཆེ་བ་གཙིགས། །ཞེས་བྱ་བ་ནི། མཆེ་བ་ཅུང་ཟད་བྱུང་བ་ནི་མཆེ་བ་ཅུང་ཟད་དེ། དེ་གཉིས་གཙིགས་པའི་ཞལ་དང་བཅས་པ་གང་ཡིན་པ་དེ་ལ་དེ་སྐད་ཅེས་བྱའོ། །ཁྲོ་བ་དང་བཅས་པར་གནས་
པས་ན་ཁྲོ་བཅས་ཏེ། ཞེ་སྡང་དང་བཅས་པ་ཞེས་བྱ་བའི་དོན་ཏོ། །ཁྲོ་བ་དང་བཅས་པ་ཡང་ཡིན་ལ། བཞད་པའི་ཞལ་མངའ་བ་ཡང་ཡིན་པས་ན་ཁྲོ་བཅས་བཞད་པའི་ཞལ་མངའ་བའོ། །གཡོན་བརྐྱང་བ་ནི་བཤད་ཟིན་ཏོ། །དེས་མཛེས་པར་གྱུར་པའི་གནས་པ་གང་ཡིན་པ་དེ་ནི་གཡོན་བརྐྱང་བས་
ལེགས་པར་བཞུགས་པ་ཞེས་བྱའོ། །རྡོ་རྗེ་ཁུ་ཚུར་གཉིས་ལས་བྱུང་བའི་རྡོ་རྗེ་དྲིལ་བུ་དང་བཅས་པ་ནི། ཁམས་གསུམ་རྣམ་པར་རྒྱལ་བ་ཇི་སྐད་དུ་བཤད་པའི་མཚན་ཉིད་ཅན་ནི་རྡོ་རྗེ་ཧཱུྃ་མཛད་དོ། །དེ་གང་གིས་བསྡུས་ཤིང་བཅིངས་པ་དེ་ནི་རྡོ་རྗེ་ཧཱུྃ་མཛད་བསྡུས་པའོ། །གཡོན་གྱི་ཞེས་བྱ་བ་ལ་
སོགས་པ་ནི་གོ་སླའོ། །འབར་ཕྲེང་འཁྲིགས་པའི་འོད་ལྡན་པ། །ཞེས་བྱ་བ་ནི། མཆོད་ཅིང་འཕྲོ་བ་ནི་འབར་བའོ། །དེའི་ཕྲེང་བ་ནི་འབར་བའི་ཕྲེང་བ་སྟེ། དེ་ཉིད་ཕན་ཚུན་དུ་འགྲོ་བས་ན་འཁྲིགས་པའི་འོད་གང་ཡིན་པ་དེ་ལ་དེ་སྐད་ཅེས་བྱའོ། །འབར་བའི་ཕྲེང་བས་ཀུན་དུ་འཁྲིགས་པར་གྱུར་པ་ཉིད་ཀྱིས་

59-1-150b

འོད་དང་ལྡན་ཞིང་འབར་བར་གྱུར་ལ་རབ་ཏུ་འབར་བས་ན་འོད་དང་ལྡན་པའོ། །དེ་ལྟ་བུར་གྱུར་པའི། ས་སོགས་བཅས་པའི་ཁམས་རྣམས་ཀྱིས། །ཁྲོ་བོ་ཀུན་དུ་གཞག་པར་བྱ། །ཞེས་བྱ་བ་སྟེ། དེའི་ཕྱོགས་དང་མཚམས་རྣམས་སུ་རྡོ་རྗེ་འཛིན་པ་ལ་སོགས་པའི་ཁྲོ་བོ་བརྒྱད་ས་ལ་སོགས་པ་དང་
བཅས་པའི་ཁྱམས་ལས་བྱས་པ་ཧཱུྃ་ཉིད་ཀྱིས་གཞག་པར་བྱའོ། །གང་གི་ཕྱིར་ལྷ་ཐམས་ཅད་ཀྱི་སྔགས་ནི་འདིར་ཡི་གེ་ཧཱུྃ་ཞེས་བྱ་བ་ཡིན་པའི་ཕྱིར། །འབར་ཕྲེང་འཁྲིགས་པའི་འོད་ལྡན་པ། །ཞེས་བྱ་བ་ནི་གོ་བར་ཟད་དོ། །འཁོར་ལོ་དེ་ཡང་ཞེས་བྱ་བ་ལ་སོགས་པ་ནི་གོ་སླའོ། །སླར་ཡང་
གསལ་བར་བྱ་བའི་ཕྱིར། བྲི་བའི་ཆོ་ག་བཤད་པར་བྱ་སྟེ། བཅོམ་ལྡན་འདས་རྡོ་རྗེ་ཧཱུྃ་མཛད་ཀྱི་སྦྱོར་བས་རྣལ་འབྱོར་ཆེན་པོ་བྱས་ལ། དམ་ཚིག་གསུམ་བསྒོམ་པ་ནས་བརྩམས་ཏེ། དཀྱིལ་འཁོར་འདི་ཇི་སྲིད་དུ་མངོན་སུམ་དུ་མཐོང་བར་གྱུར་པའི་བར་དུ་བསྒོམ་པར་བྱའོ། །དེ་ནས་ཇི་སྐད་དུ་བཤད་པའི་
དཀྱིལ་འཁོར་གྱི་དབུས་སུ་དམ་ཚིག་གསུམ་བསྒོམས་ལ། བར་སྣང་གི་ཕྱོགས་སུ་སྔ་མ་བཞིན་དུ་ཡང་དག་པར་གཞག་པར་བྱ་སྟེ། ཉི་མ་འཆར་བའི་དུས་སུ་ལེགས་པར་ཐིག་གདབ་པར་བྱའོ། །འདིའི་ཕྱིའི་དཀྱིལ་འཁོར་ནི་རྡོ་རྗེ་སེམས་དཔའི་དཀྱིལ་འཁོར་དང་འདྲའོ། །དེའི་ནང་དུ་དེའི་ཕྱེད་ཀྱི་ཚད་ཀྱི་
ཐིག་རྡོ་རྗེ་ཟླུམ་པོར་དཀྱིལ་འཁོར་བརྒྱད་པ་དང་འདྲ་བ་རྡོ་རྗེ་འབར་བ་འོད་ཀུན་དུ་འཁྲིགས་པར་ཕྱི་དང་ནང་དུ་བཅས་པའི་དཀྱིལ་འཁོར་བྲི་བར་བྱའོ། །དེ་ནས་ལྷ་ཐམས་ཅད་ཀྱི་གནས་སུ་སྣ་ཚོགས་པདྨའི་གདན་བྱས་པའི་དབུས་སུ་རྡོ་རྗེ་ཧཱུྃ་མཛད་ཇི་སྐད་དུ་བཤད་པ་བཞག་ལ། དེའི་ཤར་ཕྱོགས་ཀྱི་ཆ་ལ་རྡོ་རྗེ་ཡིད་
ལས་བྱུང་བའི་གནས་སུ་ཁྲོ་བོ་རྡོ་རྗེ་འཛིན་པ་སྐུ་མདོག་དམར་པོ། ལྷོར་ཀཱི་ལི་ཀཱི་ལའི་གནས་སུ་ལྕགས་ཀྱུ་འཛིན་པ་སྐུ་མདོག་ལྗང་གུ། །ནུབ་ཏུ་རྡོ་རྗེ་དྲན་པའི་གནས་སུ་རལ་གྲི་འཛིན་པ་སྐུ་མདོག་སྔོན་པོ།  །བྱང་དུ་རྡོ་རྗེ་བསྙེམས་པའི་གནས་སུ་ཞགས་པ་འཛིན་པ་སྐུ་མདོག་སེར་པོ་དགོད་པར་བྱའོ། །ཤར་
ལྷོ་ལ་སོགས་པའི་མཚམས་རྣམས་སུ་དབྱིག་པ་དང་། ཁ་ཊྭཱཾ་ག་དང་། གྲི་རིངས་དང་། ཆུ་གྲི་འཛིན་པའི་ཁྲོ་བོ་རྣམས་རིམ་བཞིན་དུ་རྡོ་རྗེ་འཛིན་པ་ལ་སོགས་པ་དང་སྐུ་མདོག་མཐུན་པར་བྲི་བར་བྱ་སྟེ། དེ་དག་ཐམས་ཅད་ཀྱང་གཡོན་བརྐྱང་བའི་གནས་པས་བཞུགས་པ་ལ། གཡོན་པ་ཁྲོ་བོའི་ཁུ་ཚུར་

59-1-151a

ཐུགས་ཀའི་ཕྱོགས་སུ་བཞག་ནས་སྡིགས་མཛུབ་བསྒྲེང་བ་ལ་བརྩོན་པ། གཡས་པ་རྡོ་རྗེ་ཁུ་ཚུར་གྱིས་རང་གི་མཚན་མ་བསྡམས་ཤིང་སྟང་སྟབས་དང་བཅས་པ་བཞུགས་པའོ། །ཕྱིའི་མཚམས་བཞིའི་ལྷའི་སྣམ་བུ་ལ་སྒེག་མོ་ལ་སོགས་པའི་ཁྲོ་མོ་བཞི་དེ་བཞིན་དུ་བྲི་བར་
བྱའོ། །ཤར་ཕྱོགས་ཀྱི་སྒོར་མདའ་དང་གཞུ། ལྷོའི་སྒོར་རལ་གྲི། ནུབ་ཏུ་རྡོ་རྗེ། བྱང་གི་སྒོར་མདུང་རྩེ་གསུམ་པ་དགོད་པའོ། །ཕྱིའི་དཀྱིལ་འཁོར་གྱི་ཁྱམས་སུ་དབང་ཕྱུག་ཆེན་པོ་ཆུང་མ་དང་བཅས་པ་མ་གཏོགས་པར་རྡོ་རྗེ་སེམས་དཔའི་དཀྱིལ་འཁོར་གྱི་ཚུལ་གྱིས་འདོད་པའི་ཁམས་ཀྱི་
དབང་ཕྱུག་ལ་སོགས་པ་ནས་ཆུ་ལྷའི་མཐར་ཐུག་པའི་བར་དུ་བྲི་བར་བྱ་སྟེ། འདིར་ཐམས་ཅད་ཀྱང་ཧཱུྃ་ཞེས་བྱ་བས་ཡང་དག་པར་དགོད་པར་བྱའོ། །ཁྱམས་ཀྱི་ཕྱི་རོལ་དུ་དཀྱིལ་འཁོར་གྱི་ཉེ་འཁོར་ཀུན་དུ་ཕྲེང་བ་སྣ་ཚོགས་དང་བ་དན་སྔོན་པོ་དྲིལ་བུ་བཏགས་པ་རྩེ་མོ་སྣ་ཚོགས་པས་བསྐོར་
བར་གཞག་པར་བྱའོ། །དེ་ནས་འཇུག་པ་ཞེས་བྱ་བ་ནི། ཡང་དག་པར་དེ་ལྟར་བྲིས་ནས་དཀྱིལ་འཁོར་རྫོགས་པ་དང་། ཆོ་ག་ཐམས་ཅད་ཀྱི་དཀྱིལ་འཁོར་གང་དག་ཏུ་འདས་མ་ཐག་པའི་ཆོ་ག་ཐམས་ཅད་ཀྱིས་འཇུག་ན། འདིར་སློབ་དཔོན་ཇི་ལྟར་འཇུག་པར་བྱ་ཞེ་ན། སྔོན་པོ་ཞེས་བྱ་བ་ལ་སོགས་པ་
གསུངས་ཏེ། ཁ་དོག་སྔོན་པོ་དང་ལྡན་པའི་རས་ཟུང་བླངས་ལ། གཅིག་གིས་སྨད་གཡོགས་བྱ། གཉིས་པས་སྟོད་གཡོགས་བྱས་ལ། གསུམ་པས་ཟེའུ་ཁ་བཅིངས་པ་སྟེ། དེ་ལྟར་གོས་སྔོན་པོ་བགོས་པར་གྱུར་ནས་ཞུགས་ན། བཅོམ་ལྡན་འདས་ཀྱིས་རྡོ་རྗེ་སློབ་དཔོན་བྱིན་གྱིས་རློབ་པར་
འགྱུར་རོ་ཞེས་བྱ་བར་སྦྱར་རོ། །དེ་ལྟ་བུར་བྱས་པ་འབའ་ཞིག་ཏུ་ཡང་མ་ཟད་ཀྱི་ཁྲོས་པས་ཞེས་བྱ་བ་སྟེ། དཔལ་རྡོ་རྗེ་ཁྲོ་བོ་ཧཱུྃ་མཛད་ཀྱི་ཉམས་དང་ལྡན་པ་ནི་ཁྲོས་པའོ། །དེ་ཡང་རྡོ་རྗེ་བསྡམས་པ་ནང་དུ་བཅིངས་ལ་སོར་མོ་རྣམས་ནང་དུ་འབར་བ་ལྟ་བུར་བཞག་སྟེ། མཐེ་བོང་རྡོ་རྗེ་བསྒྲེང་བ་འདི་ནི་རྡོ་རྗེ་
དམ་ཚིག་གི་ཕྱག་རྒྱ་སྟེ། དེ་འཛིན་ཅིང་བདག་གིར་བྱེད་པ་གང་ཡིན་པ་དེ་ནི་རྡོ་རྗེ་དམ་ཚིག་གི་ཕྱག་རྒྱ་ཡོངས་སུ་འཛིན་པ་སྟེ། དམ་ཚིག་ཕྱག་རྒྱ་བཅིངས་པ་དང་བཅས་པས་དཔལ་རྡོ་རྗེ་ཧཱུྃ་མཛད་དུ་བདག་ཉིད་ལྷག་པར་མོས་པར་བྱའོ་ཞེས་བྱ་བའི་དོན་ཏོ། །དེ་ལྟར་དམ་ཚིག་གི་ཕྱག་རྒྱ་བཅིངས་པ་དང་བཅས་

59-1-151b

པའི་རྡོ་རྗེ་ཧཱུྃ་མཛད་ཀྱི་ང་རྒྱལ་དང་ལྡན་པར་གྱུར་པས། དཀྱིལ་འཁོར་འདིར་གཞུག་པའི་རྣལ་འབྱོར་པ་ལ་ནི། བཅོམ་ལྡན་འདས་རྡོ་རྗེ་ཧཱུྃ་མཛད་ཀྱིས་རྡོ་རྗེ་རིགས་ཀྱི་སློབ་དཔོན་དུ་བྱིན་གྱིས་རློབ་པར་མཛད་དོ། །དེང་ནས་བརྩམས་ཏེ་ཞེས་བྱ་བ་ནི། དཀྱིལ་འཁོར་དུ་འཇུག་པ་དེ་ནས་ཉེ་བར་བཟུང་སྟེ། 
སྡིག་པ་ཐམས་ཅད་ལས་རྣམ་པར་གྲོལ་ཞིང་ཞེས་བྱ་བ་མཚམས་མེད་པ་ལ་སོགས་པ་སྡིག་པ་ཐམས་ཅད་དང་བྲལ་ཞིང་མི་གསོད་པར་འགྱུར་རོ། །དེ་ཉིད་ཀྱིས་ནི་མི་ཚུགས་པ་སྟེ། ཟིལ་གྱིས་མི་ནོན་པ་དང་།ཁམས་གསུམ་ཐམས་ཅད་ན་སྤྱོད་པའི་དབང་ཕྱུག་ཆེན་པོ་ལ་སོགས་པ་ཡང་ཧཱུྃ་ཞེས་བྱ་བ་
ཙམ་གྱིས་ཚར་གཅོད་པར་ནུས་པ་དང་། ཕན་འདོགས་པར་ནུས་པ་སྟེ། དེ་དག་ཉིད་ལ་བདེ་བ་དང་ཡིད་བདེ་བ་སྟེར་བས་ན་ཕན་འདོགས་པ་དང་། དཔལ་རྡོ་རྗེ་ཧཱུྃ་མཛད་དང་འདྲ་བར་ཐམས་ཅད་ལས་རྒྱལ་བ་དང་། འཇིག་རྟེན་གསུམ་པོ་ཐམས་ཅད་ལས་རྣམ་པར་རྒྱལ་བར་འགྱུར་ཞིང་། ཧཱུཾ་ཞེས་བྱ་བ་ཙམ་
གྱིས་དབང་ཕྱུག་ཆེན་པོ་ལ་སོགས་པ་རང་དབང་དུ་བྱེད་པའི་ཕྱིར་རོ། །དངོས་གྲུབ་ཐམས་ཅད་འགྲུབ་པར་འགྱུར་རོ་ཞེས་བྱ་བ་ནི་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་བའོ། །སློབ་དཔོན་གྱི་ལས་ཀྱི་ཆོ་གའོ། །དེ་ནས་སློབ་མ་དེ་བཞིན་དུ་བཅུག་སྟེ་ཞེས་བྱ་བ་ནི་སློབ་དཔོན་གྱི་ལས་ཀྱི་ཆོ་གའི་
འོག་ཏུ་རང་གི་འཇུག་པའི་ཚུལ་གྱིས་སློབ་མ་གཞུག་པར་བྱ་སྟེ། བཅུག་ནས་དེའི་འོག་ཏུ་དེ་རྣམས་ལ་ཧཱུྃ་ཞེས་བྱ་བ་སྦྱིན་ནོ། །ཇི་ལྟར་འདིར་སྙིང་པོ་སྦྱིན་པར་བཤད་པ་དེ་བཞིན་དུ་རྡོ་རྗེ་སེམས་དཔའ་ལ་སོགས་པའི་རིགས་ཀྱི་དཀྱིལ་འཁོར་ཐམས་ཅད་དུ་ཡང་ཤེས་པར་བྱའོ། །དེ་ནས་རྡོ་རྗེ་རྣོན་པོ་རྩེ་བཞི་
པ་འབར་བ་སྦྱིན་ལ་ཞེས་བྱ་བ་ནི་དབུ་རྒྱན་གྱི་དབང་བསྐུར་བའི་འོག་ཏུ་རྡོ་རྗེ་རྣོན་པོ་རྩེ་བཞི་པ་འབར་བ་ཧཱུྃ་ཞེས་བྱ་བས་སྦྱིན་པར་བྱ་སྟེ། ཧཱུྃ་ཞེས་བྱ་བཟློས་ཤིང་། རྡོ་རྗེ་མིང་གི་དབང་བསྐུར་བས་དབང་བསྐུར་བར་བྱའོ། །དེ་ལྟར་དབང་བསྐུར་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་སྦྱིན་པར་བྱ་སྟེ་ཞེས་བྱ་བ་ནི། འདི་
ནི་ཞེས་བྱ་བ་ལ་སོགས་པས་སྦྱིན་པར་བྱའོ། །དེ་ནས་དེ་བཞིན་དུ་དབྱུང་བར་བྱའོ་ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་བཤད་པ་བཞིན་དུ་ཆོ་ག་རྣམས་རྗེས་སུ་སྤྱད་ལ། དཀྱིལ་འཁོར་ཉེ་བར་བསྡུ་བ་ཇི་ལྟ་བ་བཞིན་དུ་བྱ་སྟེ་དབྱུང་བར་བྱའོ་ཞེས་བྱ་བའི་དོན་ཏོ། །འདི་དག་གི་དོན་སླར་

59-1-152a

ཡང་བཤད་པར་བྱ་སྟེ། དེ་ལྟར་དཀྱིལ་འཁོར་བྲིས་ནས་ཇི་སྐད་དུ་བཤད་པའི་བཅོམ་ལྡན་འདས་རྡོ་རྗེ་ཧཱུྃ་མཛད་ཀྱི་སྦྱོར་བ་དང་། ཡང་རང་གི་སྦྱོར་བས་རྣལ་འབྱོར་ཆེན་པོ་བྱས་ལ་འཇུག་པའི་དམ་ཚིག་གི་ཕྱག་རྒྱས་ཡོངས་སུ་བཟུང་བའི་རྡོ་རྗེ་དང་། མེ་ཏོག་གི་ཡལ་ག་ལས་རྣམ་པར་རྒྱལ་
བའི་བུམ་པ་དང་། ལྷ་ཐམས་ཅད་ཀྱི་བུམ་པ་དང་། བུམ་པ་གང་བ་རྣམས་ལ་ཧཱུྃ་ཞེས་བྱ་བ་རེ་རེ་ཞིང་ལན་བརྒྱ་རྩ་བརྒྱད་ཡོངས་སུ་བཟླས་ལ་དཀྱིལ་འཁོར་གྱི་སྒོ་བཞི་ཕྱེ་སྟེ། རྡོ་རྗེ་བསྡུ་བ་བྱས་ནས།  བཅོམ་ལྡན་འདས་ཀྱི་ཕྱག་རྒྱ་ཆེན་པོ་བསྐོམ་ཞིང་། མཚན་བརྒྱ་རྩ་བརྒྱད་པས་ཡང་དག་པར་བསྟོད་
དེ། གསང་བའི་ལྕགས་ཀྱུ་དང་། ཧཱུྃ་ཞེས་བྱ་བས་བཅོམ་ལྡན་འདས་འཁོར་དང་བཅས་པ་དཀྱིལ་འཁོར་དུ་བཅུག་ལ། རྡོ་རྗེ་གནོད་སྦྱིན་གྱིས་བགེགས་བསྐྲད་པ་དང་། མཚམས་དང་དཀྱིལ་འཁོར་བཅིང་བ་དང་། ར་བ་དང་དྲ་བ་དག་བྱས་ནས་རྡོ་རྗེ་ཁུ་ཚུར་གྱིས་དཀྱིལ་འཁོར་གི་སྒོ་བཞི་བཅིངས་ལ། རྡོ་
རྗེ་བསྲུང་བས་བསྲུང་བ་ཐམས་ཅད་གོ་ཆ་བསྐོན་ཏེ། ཧཱུྃ་ཞེས་བྱ་བས་མཆོད་ཡོན་ཕུལ་ལ། དམ་ཚིག་གི་ཕྱག་རྒྱས་ཧཱུྃ་དྲྀ་ཤྱ་ཛཿཧཱུྃ་བཾྃ་ཧོཿ ས་མ་ཡ་སྟྭཾ། ས་མ་ཡ་སྟྭཾ་ཨ་ཧྃ་ཧཱུྃ། ཞེས་བྱ་བས་བསྒྲུབ་པར་བྱ་སྟེ། འཇུག་པའི་ཕྱག་རྒྱ་ཉིད་ནི་དམ་ཚིག་གི་ཕྱག་རྒྱའོ། །དེ་ནས་རང་གི་ལྕེ་ལ་རྡོ་རྗེ་བསམ་ཞིང་བཅོམ་
ལྡན་འདས་རྡོ་རྗེ་ཧཱུྃ་མཛད་ལ་སོགས་པའི་ལྗགས་ལ་ཧཱུྃ་བསམ་པར་བྱ་སྟེ་འདི་ནི་ཆོས་ཀྱི་ཕྱག་རྒྱའོ། །ཨ་ཞེས་བྱ་བ་རང་གི་སྙིང་གར་སྣ་ཚོགས་རྡོ་རྗེ་བསམས་ལ། བཅོམ་ལྡན་འདས་རྡོ་རྗེ་ཧཱུྃ་མཛད་ལ་སོགས་པའི་ལས་ཀྱི་ཕྱག་རྒྱ་ཧཱུྃ་ཞེས་བྱ་བ་ཉིད་ཟློས་ཤིང་བསྟན་པར་བྱའོ། །རྡོ་རྗེ་ཁུ་ཚུར་གཉིས་
བཅིངས་ཏེ། གཡོན་པའི་ཁུ་ཚུར་གྱིས་སྙིམས་པ་བྱས་ལ་གཡས་པས་རྡོ་རྗེ་གསོར་བ་འདི་ནི་བཅོམ་ལྡན་འདས་རྡོ་རྗེ་ཧཱུྃ་མཛད་ཀྱི་ལས་ཀྱི་ཕྱག་རྒྱའོ། །གཞན་རྣམས་ནི་ཕྱག་རྒྱ་ཆེན་པོ་ཉིད་དང་འདྲའོ། །དེ་ནས་རྡོ་རྗེ་དྲིལ་བུ་དང་། རྡོ་རྗེ་རྩེ་བཞི་པ་བླངས་ལ་བྲིས་པ་དང་། རྗེས་སུ་མཐུན་པར་རྡོ་རྗེ་ཧཱུྃ་མཛད་ཀྱི་ཕྱག་
རྒྱ་ཆེན་པོར་བསམ་པ་དང་། གཞན་རྣམས་ཀྱི་ཡང་བསམ་པར་བྱའོ། །དེ་ནས་རྡོ་རྗེ་སེམས་དཔའི་དབང་བསྐུར་བས། རྡོ་རྗེ་ཕྲེང་བ་གསུམ་གྱིས་དབང་བསྐུར་བ་དང་། བཅོམ་ལྡན་འདས་རྡོ་རྗེ་ཧཱུྃ་མཛད་དབང་བསྐུར་བར་བྱ་ཞིང་རྡོ་རྗེ་འཛིན་པ་ལ་སོགས་པ་ནི་སངས་རྒྱས་ལྔའི་ཅོད་པན་གྱི་རྡོ་རྗེ་ཕྲེང་བའི་དབང་

59-1-152b

བསྐུར་བའི་ཕྱག་རྒྱ་དག་གིས་དབང་བསྐུར་རོ། །དེ་ནས་དེ་བཞིན་དུ་མཆོད་ཡོན་ཕུལ་ལ་བུམ་པ་དང་བུམ་པ་གང་བ་དང་། ན་བཟའ་དང་བླ་རེ་ལ་སོགས་པ་ཕུལ་ལ། མེ་ཏོག་གི་ཤིང་ལ་སོགས་པ་མཆོད་པ་རྣམ་པ་ལྔའི་མཆོད་པ་བྱས་ལ། ཕྱི་རོལ་དུ་གླུ་དང་གར་དང་རོལ་མོ་དང་། རྟ་དང་གླང་པོ་ཆེ་
དང་། བ་ལང་གི་ཆུ་རྣམས་ཀྱིས་ཀྱང་མཆོད་པར་བྱའོ། །དེ་ནས་ཁྲོ་བོའི་མཚོན་ཆ་ལ་སོགས་པ་མཆོད་པ་རྣམ་པ་བཅུ་གཉིས་ཀྱིས་ཡང་དག་པར་མཆོད་པ། ཡིད་ཀྱི་མཆོད་པ་བྱས་ཏེ། ཕྱི་རོལ་དུ་གཏོར་མ་བྱིན་ལ་སྦྱིན་སྲེག་བྱའོ། །དེ་ནས་རས་སྔོན་པོ་ལ་རྡོ་རྗེ་གནོད་སྦྱིན་ཡོངས་སུ་བཟླས་ཏེ། དེ་ནས་
སྨད་གཡོགས་དང་སྟོད་གཡོགས་ཟེའུ་ཁ་དག་བྱས་ལ། ཡང་གཅིག་ལ་རྡོ་རྗེ་ལྕགས་ཀྱུ་དང་། ཞགས་པ་དང་། ལྕགས་སྒྲོག་དང་འབེབས་པ་ཡོངས་སུ་བཟླས་པས་རང་གི་གདོང་གཡོགས་ཏེ། ཕྱག་འཚལ་བ་ལ་སོགས་པ་སྔོན་དུ་འགྲོ་བས་སྡོམ་པ་གཟུང་བར་བྱའོ། །དེ་ནས་དེ་བཞིན་དུ་བྱང་
ཆུབ་ཏུ་སེམས་བསྐྱེད་དེ། རྡོ་རྗེ་རྩེ་བཞི་པ་འབར་བ་སྙིང་གར་དེ་བཞིན་དུ་གཞག་ལ། སྔ་མ་བཞིན་དུ་ཤར་སྒོ་ལ་མངོན་པར་ཕྱོགས་པའི་ཕྱིར་རོལ་ན་གནས་པའི་བུམ་པའི་ཆུས་བདག་ཉིད་དབང་བསྐུར་ནས་འཇུག་པའི་དམ་ཚིག་གི་ཕྱག་རྒྱ་བཅིང་ལ་དེ་ཉིད་ཀྱིས་མེ་ཏོག་གི་ཕྲེང་བ་བླངས་ཏེ། བཛྲ་བཛྲ་ཧཱུྃ་ཞེས་
ཟློས་ཤིང་དཀྱིལ་འཁོར་དུ་འཇུག་པར་བྱའོ། །ཤར་ཕྱོགས་ཀྱི་སྒོར་ཨོཾ་བཛྲ་ཨཾ་ཀུ་ཤ་མ་ཧཱ་ཀྲོ་དྷ་ཨཱ་ཀཪྵ་ཡ་སརྦ་ས་མ་ཡཱ་ཧཱུཾ་ཛཿཞེས་བྱ་བ་དང་། རྡོ་རྗེ་ལྕགས་ཀྱུས་བདག་ཉིད་དགུག་པར་བྱའོ། །ལྷོར་ཨོཾ་བཛྲ་པཱ་ཤ་མ་ཧཱ་ཀྲོ་དྷ་པ་བེ་ཤ་ཡ་སརྦ་ས་མ་ཡཱ་ཧཱུཾ་ཧཱུྃ་ཞེས་བྱ་བ་དང་གཞུག་པར་བྱའོ། །ནུབ་ཏུ་ཨོཾ་བཛྲ་སྥོ་ཊ་
མ་ཧཱ་ཀྲོ་དྷ་བནྡྷ་བནྡྷ་སརྦ་ས་མ་ཡཱ་ཧཱུྃ་བཾ་ཞེས་བྱ་བས་བཅིང་བར་བྱའོ། །བྱང་ཕྱོགས་ཀྱི་སྒོར་ཞུགས་ཏེ། ཨོཾ་བཛྲ་ཨཱ་བེ་ཤ་ཡ་མ་ཧཱ་ཀྲོ་དྷ་ཨཱ་བེ་ཤ་ཡ་སརྦ་ས་མ་ཡཱ་ཧཱུྃ་ཨ་ཞེས་བྱ་བས་བདག་ཉིད་དབང་དུ་བྱའོ། །དེ་ནས་ཤར་ཕྱོགས་ཀྱི་སྒོ་ནས་དཀྱིལ་འཁོར་དུ་ཞུགས་ལ། མ་ཧཱ་ར་ཏ། སུ་དྲྀ་ཌྷ། སུ་ཏོ་ཥོ། སུ་སུ་ཁོ། 
བཛྲ་སཏྭ། ཨཱདྱ་སིདྡྷ་མཾ། ཞེས་བརྗོད་པར་བྱའོ། །དེ་ནས་རྡོ་རྗེ་གསོར་ཞིང་ཁྲོས་པས་ཁྲོ་གཉེར་དང་འཛུམ་པ་དང་བཅས་པས་ཕྱག་བྱའོ། །དེ་ནས་སློབ་དཔོན་ཆེར་ཁྲོས་ཤིང་། །རྡོ་རྗེ་ཅན་གྱི་སློབ་མ་མཆོག །རྡོ་རྗེ་ཧཱུྃ་མཛད་སྡིགས་མཛུབ་དང་། །ཧཱུྃ་ཞེས་བྱ་བས་རབ་ཏུ་སྦྱར། །རྡོ་རྗེ་སྙེམས་པ་འཛིན་གྱུར་

59-1-153a

ཅིང་། །ཁྲོ་བོས་འདུལ་བ་དེ་ལྟ་བུས། །རྡོ་རྗེ་འཛིན་ཆེན་མཉེས་འགྱུར་ཞིང་། །དགྱེས་པ་ཡང་ནི་རབ་ཏུ་འགྱུར། །ཡང་འཇུག་པའི་ཕྱག་རྒྱ་བཅིངས་ཏེ། བསྐོར་བ་ལན་གསུམ་བྱས་ལ། བཅོམ་ལྡན་འདས་ཀྱི་སྤྱན་སྔར་འདུག་སྟེ། འདི་སྐད་དུ་ཞེས་བརྗོད་པར་བྱའོ། །འདོད་ཆགས་
ཆེན་པོ་བདེ་བ་ཆེ། །རྡོ་རྗེ་ཆེན་པོ་ནོར་ཆེ་ཞིང་། །ཡེ་ཤེས་ཆེན་པོ་ལས་ཆེ་བ། །རྡོ་རྗེ་སེམས་དཔར་དེང་བདག་འགྲུབ། །ཛཿཧཱུྃ་བཾ་ཧོཿཔྲ་སིདྡྷཱ་མཾ། དེ་ནས་རྡོ་རྗེའི་ཆུ་འཐུངས་ལ་བདག་ཉིད་ལ་དབབ་པར་བྱ་སྟེ། ཨ་ཞེས་བྱ་བ་ལན་བརྒྱ་བཟླས་ལ། ཡང་རྡོ་རྗེ་དབབ་པའི་དམ་ཚིག་གི་ཕྱག་རྒྱ་
བཅིངས་ནས། བཛྲ་ཨཱ་བེ་ཤ་ཨ། ཞེས་ལན་བརྒྱ་རྩ་བརྒྱད་བརྗོད་པར་བྱའོ། །དེ་ནས་ཡང་གཡོན་པའི་ཁྲོ་བོའི་ཁུ་ཚུར་གྱིས་སེམས་མ་རྡོ་རྗེའི་ཕྱག་རྒྱ་ཕྱེ་ལ། ཧཱུྃ་ཨ་ཞེས་བྱ་བ་ལན་བརྒྱ་བརྗོད་ན་འབབ་པར་འགྱུར་རོ། །དེ་ནས་ཧཱུྃ་ཞེས་བྱ་བས་མེ་ཏོག་དོར་རོ། །དེ་ནས་བླངས་ལ་ཧཱུྃ་ཉིད་ཀྱིས་རང་གི་
མགོ་ལ་བཅིང་བར་བྱའོ། །དེ་ནས་དེ་ལྟར་བབས་པར་གྱུར་པ་དང་། འདི་ལྟར་གདོང་གཡོགས་ཧཱུྃ་ཞེས་བྱ་བ་ཉིད་ཀྱིས་དགྲོལ་བར་བྱའོ། །དེ་ནས་ཧཱུྃ་མཛད་ཀྱི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་ལ་ཁྲོ་བོའི་ལྟ་བས་བལྟ་ཞིང་། ཇི་སྲིད་བཅོམ་ལྡན་འདས་ཀྱིས་ཞལ་བསྟན་ནས་དངོས་གྲུབ་
ཐམས་ཅད་སྩལ་བ་དེ་སྲིད་ཀྱི་བར་དུ་བཟླས་བརྗོད་བྱའོ། །དེ་ནས་རྡོ་རྗེ་ཐལ་མོས་བསྐོར་བས་ཤིས་པ་རྗོད་པར་བྱེད་པའི་ཚུལ་དུ་རང་གི་སྙིང་གར་བཞག་ལ། མཚན་བརྒྱ་རྩ་བརྒྱད་པས་བསྟོད་པ་བྱས་ནས། ཁྲོ་བོའི་མཚོན་ཆ་ལ་སོགས་པ་གསང་བའི་མཆོད་པ་རྣམ་པ་བཞིས་བཅོམ་ལྡན་འདས་འཁོར་
དང་བཅས་པ་ཡང་དག་པར་མཆོད་ལ་གླུ་དང་གར་དང་རོལ་མོའི་མཆོད་པས་ཡང་དག་པར་མཆོད་པར་བྱའོ། །དེ་ནས་ཡང་ཕྱག་རྒྱ་ཆེན་པོར་བསམས་ལ། བཅོམ་ལྡན་འདས་ལ་ཁྲོ་བོའི་ལྟ་བས་བལྟ་ཞིང་། རྡོ་རྗེ་ཐལ་མོས་བསྐོར་བར་ཕྱག་བྱས་ལ། མེ་ཏོག་ལ་སོགས་པའི་དབང་བསྐུར་བ་རྣམས་ཀྱང་
བླང་བར་བྱའོ། །དེ་ལ་དང་པོའི་ཁོ་ནར་དམ་ཚིག་གི་ཕྱག་རྒྱས་ཡོངས་སུ་བཟུང་བའི་རྡོ་རྗེ་དང་། མེ་ཏོག་གི་ཡལ་ག་ལས་རྣམ་པར་རྒྱལ་བའི་བུམ་པ་ལ་སྔགས་འདི་བཟླས་བརྗོད་ཉི་ཤུ་རྩ་གཅིག་བྱ་སྟེ། ཨོཾ་མ་ཧཱ་སུ་ཁ་ཞེས་བྱ་བ་ལ་སོགས་པ་སྔར་བཤད་པའི་བུམ་པའི་སྔགས་བཟླས་བརྗོད་བྱའོ། །

59-1-153b

དེ་ནས་བདག་ཉིད་རྡོ་རྗེ་ཧཱུྃ་མཛད་དུ་བྱིན་གྱིས་བརླབས་ལ། དམ་ཚིག་གི་ཕྱག་རྒྱས་རྣལ་འབྱོར་ཆེན་པོ་ལས་བཤད་པའི་གནས་རྣམས་སུ་རང་གི་ལུས་ལ་རྡོ་རྗེ་ཧཱུྃ་མཛད་ལ་སོགས་པ་ཡང་དག་པར་བཞག་ལ། ཕྱིའི་དཀྱིལ་འཁོར་གྱི་ནང་དུ་སྣ་ཚོགས་པདྨའི་སྟེང་དུ་དབང་ཕྱུག་ཆེན་པོ་ཆུང་མ་དང་བཅས་པ་
བྲིས་ཏེ། དེ་གཉིས་ཀྱི་སྟེང་དུ་རྡོ་རྗེ་ཧཱུྃ་མཛད་ཀྱི་ཕྱག་རྒྱ་ཆེན་པོ་གཡོན་བརྐྱང་བའི་གནས་པས་གནས་པར་བསམས་ལ་འདུག་སྟེ། མེ་ཏོག་ལ་སོགས་པས་བདག་ཉིད་ཡང་དག་པར་མཆོད་ལ་མཆོད་ཡོན་བླངས་ཏེ། མཚན་བརྒྱ་རྩ་བརྒྱད་ཀྱིས་བསྟོད་ནས། རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་
བུམ་པ་ལས་ཆུ་བླངས་ལ། ཨོཾ་བཛྲ་ཨ་བྷི་ཥིཉྩ་ཧཱུྃ་ཞེས་བྱ་བ་དང་། དེས་བདག་ཉིད་དབང་བསྐུར་བར་བྱ་ཞིང་ཆུ་དེ་བཏུང་བར་ཡང་བྱའོ། །དེ་ནས་ཡང་སངས་རྒྱས་ཀྱི་ཕྲེང་བའི་དབང་བསྐུར་བའི་ཕྱག་རྒྱས་དབང་བསྐུར་བ་བླངས་པ་ལ། རིན་པོ་ཆེ་དང་། པདྨ་དང་། རྡོ་རྗེའི་དབང་བསྐུར་བ་སྔ་མ་བཞིན་
དུ་བླང་བར་བྱའོ། །དེ་ནས་ལུགས་མའམ། བརྐོས་པའམ། བྱས་པའམ། བྲིས་པའི་དབུ་རྒྱན་སངས་རྒྱས་དང་། རིན་པོ་ཆེ་དང་། པདྨ་དང་། རྡོ་རྗེའི་ཕྲེང་བ་དང་བཅས་པས་ཕྲེང་བ་དེ་བཅིངས་ལ་རེ་རེ་ཞིང་བཟླས་བརྗོད་བརྒྱ་རྩ་བརྒྱད་བྱ་ཞིང་རྡོ་རྗེ་རིན་ཆེན་ཡང་བཟླས་ལ་དེས་བདག་ཉིད་དབང་བསྐུར་
བ་དར་དཔྱངས་དང་བཅས་པ་བྱས་ཏེ། རྡོ་རྗེ་འབར་བ་དང་བདག་པོ་དང་། མིང་གི་དབང་བསྐུར་བ་བླང་བར་བྱའོ། །དེ་ནས་དངོས་གྲུབ་ཀྱི་རྡོ་རྗེའི་བརྟུལ་ཞུགས་བླང་བར་བྱ་སྟེ། འདི་ནི་གདུག་པ་འདུལ་བྱེད་པའི། །ཕྱག་ན་རྡོ་རྗེའི་རྡོ་རྗེ་སྟེ། །མ་རུངས་ཐམས་ཅད་འདུལ་བ་ལ། །ཁྱོད་ཀྱིས་ཀྱང་ནི་རྟག་ཏུ་བཅང་། །
དེ་ནས་ཕྱིའི་མཆོད་པ་རྣམས་ཀྱིས་བདག་ཉིད་ཡང་དག་པར་མཆོད་ལ། ཁྲོ་བོའི་མཚོན་ཆའི་ཕྱག་རྒྱ་རྣམས་ཀྱིས་ཀྱང་མཆོད་པར་བྱའོ། །དེ་ལྟར་བདག་ཉིད་མཆོད་ནས། དེ་ཁོ་ན་ཉིད་ཀྱིས་རྡོ་རྗེ་གཟུང་བར་བྱ་ཞིང་། རྟག་ཏུ་འདོད་ཆགས་ལས་བྱུང་ཁྲོ། །རྡོ་རྗེ་སེམས་དཔས་འདུལ་བའི་ཕྱིར། །རྡོ་རྗེ་མེ་ལྟར་
འབར་བ་ཡང་། རབ་ཏུ་འཇིགས་པའི་སྙིང་པོ་ཡིན། །ཞེས་བྱ་བ་ནི་དེ་ཁོ་ན་ཉིད་དོ། །ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་མཉམ་རྣལ་འབྱོར་པས། །འདི་དག་ཐམས་ཅད་མྱུར་དུ་བསྒྲུབ། །ཅེས་བྱ་བ་ནི་ཆོས་ཏེ་འདིས་དྲིལ་བུ་དཀྲོལ་བར་བྱའོ། །

59-1-154a

དེ་ནས་འདིས་དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབས་ལ། ཧཱུྃ་ཞེས་བྱ་བཟློས་ཤིང་། ཐམས་ཅད་ནམ་མཁའ་མཆོག་སྦྱོར་བས། །ཐམས་ཅད་ནམ་མཁའ་ཞེས་སྨྲ་ཞིང་། །རྡོ་རྗེ་ཕྱག་རྒྱས་རྒྱས་བཏབ་ལ། །ཁམས་གསུམ་ཡང་ནི་བཟའ་བར་བྱ། །ཞེས་བྱ་བ་ནི་དམ་ཚིག་གོ། །
དེ་ནས་བཅོམ་ལྡན་འདས་ལ་ཕྱག་བྱས་ལ་སྔགས་བཟླས་ནས། ཚིགས་སུ་བཅད་པ་ལྔ་པོས་རྗེས་སུ་གནང་བ་དང་། གཟེངས་བསྟོད་པ་དང་། ལུང་བསྟན་པ་ཡང་བཅོམ་ལྡན་འདས་ལས་མནོས་ལ་ཡང་བདག་ལ་བྱིན་གྱིས་བརླབ་པ་ལ་སོགས་པ་དང་། བཟླས་བརྗོད་བྱས་ནས་ཕྱག་བྱས་ལ། 
འདི་སྐད་ཅེས་བརྗོད་པར་བྱ་སྟེ། བདག་མིང་འདི་ཞེས་བྱ་བ་ཡི། །རྡོ་རྗེ་སློབ་དཔོན་དཀའ་ཐུབ་ཆེས། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བགྱི། །དེ་ནས་སློབ་མ་རྣམས་གཞུག་པར་བྱ་སྟེ། སློབ་དཔོན་གྱི་ལས་ཀྱི་ཆོ་གའོ། །དེ་ནས་རང་གི་སྡོམ་པ་སྦྱིན་པར་འོས་པ་
ལ་སྔར་བཤད་པའི་ཚུལ་གྱིས་དམ་ཚིག་འཛིན་དུ་གཞུག་པ་དང་། བྱང་ཆུབ་ཏུ་སེམས་བསྐྱེད་དུ་བཅུག་ལ། དེའི་སྙིང་གར་དེ་བཞིན་དུ་རྡོ་རྗེ་བསྐྱེད་ནས། དེ་རྡོ་རྗེ་ཧཱུྃ་མཛད་དུ་བྱིན་གྱིས་བརླབས་ལ། སྤོས་དང་མེ་ཏོག་ལ་སོགས་པས་མཆོད་དེ། ཡོན་གྱི་མཆོག་བླངས་ཏེ། ཤར་སྒོ་ལ་བལྟས་ནས་གནས་པའི་
བུམ་པས་དབང་བསྐུར་ལ། བདག་ཉིད་འཇུག་པའི་ཆོ་གས་བཅུག་ལ། ཆོ་ག་ཐམས་ཅད་ལ་རྗེས་སུ་སྤྱད་པར་བྱའོ། །སློབ་མ་གཞུག་པ་ལ་སོགས་པ་ཆོ་ག་རྒྱས་པ་རྫོགས་སོ།།      །།རྡོ་རྗེ་ནི་རྡོ་རྗེའི་རིགས་ཏེ། དེའི་དཀྱིལ་འཁོར་ནི་རྡོ་རྗེའི་དཀྱིལ་འཁོར་རོ། །དེ་ལྟར་སློབ་དཔོན་གྱི་ལས་ཀྱི་ཆོ་ག་
དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་བཤད་ནས། ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ལ་སློབ་དཔོན་གྱིས་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་སྒྲུབ་པ་ནི་ཞེས་བྱ་བ་ལ་སོགས་པ་གསུངས་ཏེ། དེ་ལ་རས་ལ་
སྔོན་དུ་བསྙེན་པ་ལ་སོགས་པའི་སྒྲུབ་པ་ནི་རས་ལ་བཅོམ་ལྡན་འདས་ཞེས་བྱ་བ་ལ་སོགས་པ་འདི་ཉིད་ཀྱིས་གསུངས་པ་ཡིན་ཏེ། སྔ་མ་བཞིན་དུ་ཐམས་ཅད་བྱས་ལ། རྡོ་རྗེ་བྲི་བའི་ཕྱག་རྒྱས་ཧཱུྃ་ཞེས་བྱ་བ་ཟློས་ཤིང་བརྩམ་པར་བྱས་ལ་དཀྱིལ་འཁོར་གྱི་ཚུལ་ཉིད་གྱིས་འཇིག་རྟེན་དང་འཇིག་རྟེན་ལས་འདས་

59-1-154b

པའི་ལྷ་ཐམས་ཅད་བྲི་བའམ། འདིར་གཞུག་པར་བྱའོ། །དེ་ནས་སྒྲུབ་པ་ཆེན་པོ་ལ་ཡང་དེ་བཞིན་ཏེ། དེ་བཞིན་དུ་དངོས་གྲུབ་མཆོག་རྣམས་ནི་ཞེས་བྱ་བ་ནི། རྡོ་རྗེ་སེམས་དཔའི་སྐབས་སུ་གསུངས་པའི་ཆོ་ག་ཉིད་ཀྱིས་སངས་རྒྱས་ཉིད་དམ། རྡོ་རྗེ་འཛིན་པ་ཉིད་འདིར་བསྒྲུབ་པར་བྱ་བའོ་ཞེས་བྱ་བའི་དོན་
ཏོ། །དེ་བས་ན་དེ་བཞིན་དུ་དངོས་གྲུབ་མཆོག་རྣམས་ལ་ནི་ཞེས་བྱ་བ་གསུངས་སོ། །རས་ལ་བཅོམ་ལྡན་འདས་ཇི་ལྟ་བ་བཞིན་དུ་བྱས་ནས་ཞེས་བྱ་བ་ནི། སྔར་བཤད་པའི་ཆོ་གས་བཅོམ་ལྡན་འདས་རྡོ་རྗེ་ཧཱུྃ་མཛད་དཔའ་བོ་གཅིག་པུ་བྲི་བའོ། །དེའི་མདུན་དུ་ལག་པ་གཉིས་ཀྱིས་ཕྱག་རྒྱ་བཅིངས་
ཏེ། བཟླས་བརྗོད་འབུམ་བྱའོ་ཞེས་བྱ་བ་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱ་ལག་པ་གཉིས་ཀྱིས་བཅིངས་པའོ། །དེ་ནས་ཞེས་བྱ་བ་ལ་སོགས་པ་ནི་གོ་སླའོ། །འདི་སྐད་སྟོན་པ་ཡིན་ཏེ། དཔལ་རྡོ་རྗེ་ཧཱུྃ་མཛད་ཀྱི་སྦྱོར་བ་བྱས་ལ། བདག་ལ་བྱིན་གྱིས་རློབ་པ་ལ་སོགས་པ་ཇི་ལྟ་བ་བཞིན་དུ་
བྱས་ནས། དམ་ཚིག་གི་ཕྱག་རྒྱ་བཅིངས་ལ། དཀྱིལ་འཁོར་དུ་ཞུགས་པའི་རྗེས་ཐོགས་ཉིད་ལ་ཟླ་བ་ཉ་ནས་བརྩམས་ཏེ། ཉིན་རེ་སྦྱོར་བས་ཇི་སྲིད་ཟླ་བ་གཅིག་ཙམ་གྱི་བར་དུ་བཟླས་བརྗོད་བྱས་ནས། སྔོན་དུ་བསྙེན་པ་བྱས་པར་འགྱུར་རོ། །དེ་ནས་ཟླ་བ་ཉ་ལ་ཇི་སྐད་དུ་གསུངས་པའི་ཚུལ་གྱིས་རས་ལས་
བཅོམ་ལྡན་འདས་རྡོ་རྗེ་ཧཱུྃ་མཛད་ཀྱི་དཀྱིལ་འཁོར་སྤྲུལ་ལ། མཆོད་ཡོན་ཕུལ་བ་སྔོན་དུ་འགྲོ་བ་དང་། ཧཱུྃ་གིས་རང་གི་གནས་སུ་དགོད་པར་བྱས་ལ། རྡོ་རྗེ་བྲི་བའི་ཕྱག་རྒྱ་དང་པོ་ནས་བརྩམས་ཏེ། ཕྱིས་ཅི་བདེར་དཀྱིལ་འཁོར་གྱི་ཚུལ་དུའམ། བཅོམ་ལྡན་འདས་དཔའ་བོ་གཅིག་པུ་བྲིས་པའམ། འདིར་
གཞུག་པར་བྱའོ། །དེ་ནས་ཟླ་བ་ཉ་ནས་བརྩམས་ཏེ་བདག་ལ་བྱིན་གྱིས་བརླབ་པ་ལ་སོགས་པའི་སྦྱོར་བས་བཅོམ་ལྡན་འདས་དཀྱིལ་འཁོར་གྱི་ཚུལ་དུ་རས་ལ་བཞུགས་སུ་གསོལ་ལ། ཕྱག་རྒྱ་ཆེན་པོར་བསམས་ཏེ། ཉིན་རེའི་སྦྱོར་བས་ཇི་སྲིད་ཟླ་བ་གཉིས་པའི་ཉ་ལ་བབ་པ་དེ་སྲིད་ཀྱི་བར་དུ་དཔག་ཏུ་
མེད་པའི་བཟླས་བརྗོད་ཀྱིས་བསྒྲུབ་པར་བྱའོ། །དེ་ནས་དེའི་ཚེ་མཚན་ཐོག་ཐག་བཟླས་བརྗོད་བྱས་ནས། དེ་ནས་ནང་པར་བཅོམ་ལྡན་འདས་ཀྱིས་ཞལ་བསྟན་ནས། སངས་རྒྱས་ཉིད་དམ་རྡོ་རྗེ་འཛིན་པ་ཉིད་ལ་སོགས་པ་དངོས་གྲུབ་ཐམས་ཅད་སྩོལ་བར་འགྱུར་། དཔའ་བོ་གཅིག་པུའི་རས་རིས་ལ་

59-1-155a

ཡང་སྔར་བཤད་པའི་ཆོ་ག་རྗེས་སུ་སྤྱད་ལ། ཕྱག་རྒྱ་ཆེན་པོ་བཅིངས་ཏེ། བཟླས་བརྗོད་འབུམ་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བཟླས་བརྗོད་བྱས་ནས་ཐོ་རངས་ཁ་བཅོམ་ལྡན་འདས་ཀྱིས་ཞལ་བསྟན་ནས་སངས་རྒྱས་ཉིད་དམ་རྡོ་རྗེ་ཧཱུྃ་མཛད་ཉིད་སྩོལ་བར་འགྱུར་རོ། །མ་
བསྒྲུབས་པར་ཡང་ཞེས་བྱ་བ་ནི་དཀྱིལ་འཁོར་དུ་འཇུག་པ་བྱས་ནས་སྔགས་བཟླས་ཏེ། དམ་ཚིག་གི་ཕྱག་རྒྱ་བཅིངས་ལ་ཟླ་བ་གཅིག་གི་བར་དུ་བཟླས་བརྗོད་དཔག་ཏུ་མེད་པ་བྱས་ནས། དེའི་རྗེས་ཐོགས་ཉིད་ལ་སྙིང་པོ་མ་བསྒྲུབས་ཀྱང་ལས་འདི་དག་བྱེད་པར་འགྱུར་བའོ། །དེ་བཞིན་དུ་ཞེས་བྱ་བ་
ནི་བདག་ལ་བྱིན་གྱིས་བརླབ་པ་ལ་སོགས་པ་བྱས་ཏེ། ཇི་སྐད་བཤད་པ་ཐམས་ཅད་གསད་པ་ལ་ནི་རྡོ་རྗེ་ཁྲོ་བོ་མཐར་བྱེད་ཀྱིས་སོ་ཞེས་བྱ་བ་ལ་སོགས་པ་དེ་ཉིད་ལས་གཞན་དུ་མི་འགྱུར་བའོ། །ཐམས་ཅད་རྗེས་སུ་ཆགས་པར་བྱ་བ་དང་ཞེས་བྱ་བ་ལ་སོགས་པ་ནི་བསྟན་པའོ། །ཐམས་ཅད་གསད་པ་
ལ་ནི་ཞེས་བྱ་བ་ལ་སོགས་པ་ནི་འདི་ཉིད་ཀྱི་བཤད་པའོ། །དེ་བཞིན་དུ་སྔོན་དུ་བསྙེན་པ་བྱ་ཞིང་བདག་ལ་བྱིན་གྱིས་བརླབ་པ་ལ་སོགས་པ་བྱས་ནས། གདུག་པ་ཐམས་ཅད་གསད་པ་ལ་ནི་ཁྲོ་བོ་རྡོ་རྗེ་མཐར་བྱེད་ཀྱིས་བྱ་སྟེ། ལྔ་པོ་བསྡུས་པ་བཅིངས་ནས་བཟློག་ནས། ཁའི་གྲྭ་གཉིས་སུ་མཆེ་བ་
སྟོན་པའི་ཚུལ་དུ་གཞག་པར་བྱ་ཞིང་གདུག་པ་ཐམས་ཅད་ཀྱང་མཆེ་བ་གཙིགས་པའི་ཞལ་ནས་ནམ་མཁའ་དང་མཉམ་པའི་རྡོ་རྗེ་ཧཱུྃ་མཛད་ཀྱིས་ཟོས་པར་གྱུར་པར་བསྒོམ་པར་བྱ་སྟེ། འདི་ནི་རྡོ་རྗེ་ཁྲོ་བོ་མཐར་བྱེད་དོ། །ཐམས་ཅད་རྒྱས་གདབ་པ་ལ་ནི། །ཁྲོ་བོའི་བལྟ་བའི་བཟླས་པས་སོ་ཞེས་བྱ་བ་ནི་
བསྒྲུབ་པར་བྱ་བའི་ལུས་ལ་རྡོ་རྗེ་འབར་བའི་གཟུགས་བརྙན་བསྐྱེད་པ་ནི་རྒྱས་གདབ་པའོ། །ཁྲོ་གཉེར་བསྙེར་ཞིང་མིག་གདངས་ནས། ཁྲོ་བས་ལྟ་བ་ནི་ཁྲོ་བོའི་ལྟ་བ་སྟེ། འདིས་རྡོ་རྗེ་ཧཱུྃ་མཛད་ཀྱི་ཕྱག་རྒྱ་བཅིངས་ལ། ཧཱུྃ་ཞེས་བྱ་བ་ཟློས་ཤིང་བསྒྲུབ་པར་བྱ་བ་ལ་རྒྱས་གདབ་པར་བྱ་སྟེ། མིག་གཉིས་
ལས་རྡོ་རྗེ་འབར་བ་ཕྱུང་ལ་བསྒྲུབ་པར་བྱ་བའི་ལུས་ལ་དབབ་པར་བྱ་སྟེ། དེ་ལྟ་བུས་ནི་ཐམས་ཅད་རྒྱས་གདབ་པར་འགྱུར་རོ། །ཐམས་ཅད་གཞིག་པ་ལ་ནི་རྡོ་རྗེ་ཁྲོས་པས་གཞིག་པར་བྱའོ་ཞེས་བྱ་བ་ནི་སྲིན་པོ་ལ་སོགས་པའི་གདུག་པ་ཐམས་ཅད་གཞིག་ཅིང་མི་སྣང་ལ་མི་མངོན་པ་དང་། ཟས་ལ་

59-1-155b

སོགས་པའི་དངོས་པོ་ཐམས་ཅད་སྣང་བར་འགྱུར་བ་ལས་མི་སྣང་བར་བྱ་བ་ནི་གཞིག་པ་སྟེ། གསང་བའི་རྡོ་རྗེ་སོར་བཞི་པའི་ཚད་བླངས་ལ་བསྒྲུབ་པར་བྱ་བ་གཞིག་པའི་བསམ་པས་ཁྲོས་པར་གྱུར་པ་དང་། རྡོ་རྗེ་ཁུ་ཚུར་གྱིས་གཡོགས་པར་བྱ་བ་སྟེ། དེ་ལྟ་བུས་ནི་ཐམས་ཅད་འཇིག་པར་འགྱུར་
རོ། །ཐམས་ཅད་ངེས་པར་གནོན་པ་ལ་ནི་ཞེས་བྱ་བ་ནི་དབང་ཕྱུག་ཆེན་པོ་ལ་སོགས་པའི་འཇིག་རྟེན་གསུམ་པོ་མཐའ་དག་བརྒྱལ་ནས་ཁས་བུབ་ཏུ་ལྷུང་བར་གྱུར་པ་ནི་ངེས་པར་གནོན་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་ཁྲོས་པས་ཕྱོགས་དེར་བརྡེག་པར་བྱའོ་ཞེས་བྱ་བ་སྟེ། རང་གི་ལག་ཏུ་ཧཱུྃ་
ལས་རྡོ་རྗེ་འབར་བ་བསམས་ལ་ཕྱོགས་གང་ན་བསྒྲུབ་པར་བྱ་བ་གནས་པ་དེ་ལ་རང་གི་ལག་ཏུ་བསམས་པའི་རྡོ་རྗེ་བསྒྲུབ་པར་བྱ་བ་ངེས་པར་གནོན་པའི་བསམ་པས་བསྣུན་པར་བྱ་སྟེ། དེ་ལྟ་བུས་ནི་རྡོ་རྗེས་བཅོམ་པར་འགྱུར་རོ། །ཡུངས་ཀར་ལ་སོགས་པ་ཡང་ཧཱུྃ་ཞེས་བྱ་བས་རྡོ་རྗེ་འབར་བར་
བསམས་ཏེ་དེ་ས་ཕྱོགས་དེར་བསྣུན་པར་བྱའོ། །གནད་ཐམས་ཅད་ནི་གོ་བར་ཟད་དོ། །དེ་རྣམས་དབུག་པ་ནི་རྣམ་པར་གཞོམ་པའོ། །དེ་ཇི་ལྟར་བྱ་ཞེ་ན། རྡོ་རྗེ་ཕྲ་མོ་འབིགས་བྱེད་ཀྱིས་སོ་ཞེས་བྱ་བ་གསུངས་ཏེ། རྡོ་རྗེ་ཧཱུྃ་མཛད་ཀྱི་ཕྱག་རྒྱའི་གཡས་པའི་མཛུབ་མོ་ལྕགས་ཀྱུས་གཡོན་ལོགས་ནས་
གཡོན་པའི་མཛུབ་མོ་བཟུང་ལ། བསྒྲུབ་པར་བྱ་བའི་གནད་ནས་དྲངས་ལ། རྡོ་རྗེ་མདས་ངེས་པར་འབིགས་པར་གྱུར་པར་བསམ་པར་བྱ་སྟེ། འདི་ནི་རྡོ་རྗེ་ཕྲ་མོ་འབིགས་བྱེད་དོ། །འདིས་ནད་ཐམས་ཅད་འབིགས་པར་འགྱུར་རོ། །ཐམས་ཅད་ཀྱི་སྙིང་ནི་སེམས་ཅན་ཐམས་ཅད་ཀྱི་སྙིང་གི་པདྨའོ། །
དེ་རྣམས་འབྱིན་པ་ནི་རྡོ་རྗེ་ཧཱུྃ་མཛད་ཀྱི་སྦྱོར་བས་བསྒྲུབ་པར་བྱ་བའི་ལུས་ལ་ཞུགས་ལ། དེའི་སྙིང་གི་པདྨ་ཁྲོས་པར་གྱུར་པ་དང་དབྱུང་བར་བྱ་སྟེ། དེ་ལྟ་བུས་ནི་ཐམས་ཅད་ཀྱི་སྙིང་འབྱིན་པར་འགྱུར་རོ། །གདུག་པ་ཐམས་ཅད་ཚར་གཅད་པ་ནི་སྲིན་པོ་ལ་སོགས་པ་ཚར་གཅོད་པའོ། །དེ་གང་གིས་འགྱུར་
ཞེ་ན། ཁྲོས་པས་རྡོ་རྗེ་བསྐོར་བར་བྱའོ་ཞེས་བྱ་བ་གསུངས་ཏེ།དེ་བཞིན་དུ་བདག་ལ་བྱིན་གྱིས་བརླབ་པ་ལ་སོགས་པ་བྱས་ནས། རྡོ་རྗེ་འབར་བ་དེ་ཁོ་ན་ཉིད་ཀྱིས་བླངས་ལ་ཧཱུྃ་ཞེས་བྱ་བཟློས་ཤིང་ཁྲོས་པས་བསྐོར་ལ། རྡོ་རྗེ་འབར་བ་དེ་ལས་རྡོ་རྗེ་འཛིན་པ་ལ་སོགས་པའི་ཁྲོ་བོ་རྣམས་ཕྱུང་སྟེ། དེ་རྣམས་
59-1-156a

ཀྱིས་གདུག་པ་ཐམས་ཅད་གཟིར་བར་འགྱུར་བ་དང་། བསྲེག་པ་དང་། རྡོ་རྗེ་ལུ་གུ་རྒྱུད་ལ་སོགས་པས་བཅིངས་པར་གྱུར་པར་བསམ་པར་བྱ་སྟེ། དེ་ལྟ་བུས་ནི་གདུག་པ་ཐམས་ཅད་ཚར་གཅོད་པར་འགྱུར་རོ། །གདུག་ཅིང་ཁྲོས་པ་ནི་སྲོག་འཕྲོག་པའི་མ་རུངས་པ་སྟེ། དེ་རྣམས་
དགས་པ་ནི་གཞོམ་པའོ། །དེ་ཇི་ལྟར་འགྱུར་ཞེ་ན། ཁྲོས་པས་ལྕགས་ཕྱེའི་སྦྱིན་སྲེག་བྱས་པས་སོ་ཞེས་བྱ་བ་གསུངས་ཏེ། མངོན་སྤྱོད་ཀྱི་ཐབ་ཁུང་དུ་བཅོམ་ལྡན་འདས་རྡོ་རྗེ་ཧཱུཾ་མཛད་ཇི་ལྟ་བ་བཞིན་དུ་རྣམ་པར་བསམས་ལ། ཧཱུྃ་ཆེ་གེ་མོ་གྷཱ་ཏ་ཡ་ཧཱུྃ། ཞེས་བསྐུལ་ཏེ་རལ་གྲི་ལ་སོགས་པ་མཚོན་ཆའི་
ཕྱེ་མའི་སྦྱིན་སྲེག་གི་ཐབ་ཁུང་དེ་ལས་རྡོ་རྗེ་འཛིན་པ་ལ་སོགས་པའི་ཁྲོ་བོ་རྣམས་བྱུང་བ་རྣམས་ཀྱིས་གདུག་པ་རྣམས་ཐལ་བར་བྱེད་པར་འགྱུར་ཞིང་ཟ་བར་གྱུར་པར་བསྒོམ་པར་བྱའོ། །བདུད་ཐམས་ཅད་རླག་པར་བྱེད་པ་ལ་ནི་ཞེས་བྱ་བ་ལ་བདུད་ཀྱང་ཡིན་ལ་ཐམས་ཅད་ཀྱང་ཡིན་པས་ན་
བདུད་ཐམས་ཅད་དོ། །དེ་རྣམས་བརླག་པ་ནི་ཟིལ་གྱིས་མནན་ཅིང་ཚར་བཅད་པས་ཞེས་བྱ་བའི་དོན་ཏོ། །དེ་ཇི་ལྟར་འགྱུར་ཞེ་ན། རང་གི་ས་བོན་གྱི་སྦྱིན་སྲེག་གིས་སོ་ཞེས་བྱ་བ་གསུངས་ཏེ། སྔགས་པ་འདོད་ཆགས་ལ་སོགས་པའི་ཉོན་མོངས་པས་ཟིལ་གྱིས་གནོན་པ་དང་། ཕུང་པོ་དང་། 
འཆི་བདག་དང་། ལྷའི་བུའི་བདུད་རྣམས་ཀྱིས་མནན་པར་གྱུར་ན། དེའི་ཚེ་བཅོམ་ལྡན་འདས་རྡོ་རྗེ་ཧཱུྃ་མཛད་ཀྱི་སྦྱོར་བས་རྣལ་འབྱོར་ཆེན་པོ་བྱས་ལ་ཏིང་ངེ་འཛིན་གསུམ་བསྒོམ་པར་བྱའོ། །དེ་ནས་ཁམས་གསུམ་རྣམ་པར་རྒྱལ་བའི་དཀྱིལ་འཁོར་ནི་བདག་པོ་ཞེས་རྡོ་རྗེ་དཀྱིལ་འཁོར་གྱི་ངོ་བོ་ཉིད་དུ་
བདག་ཉིད་ཇི་ལྟ་བ་བཞིན་དུ་རྣམ་པར་བསམས་ལ། མདུན་དུ་ཧཱུཾ་ལས་རྡོ་རྗེ་འབར་བའི་ཕྱག་རྒྱས་བསམས་ཏེ། དེ་ཡང་རྡོ་རྗེ་ཧཱུྃ་མཛད་ཀྱི་ལྷ་མོར་བསམ་པར་བྱའོ། །དེ་ནས་དེ་དང་ལྷན་ཅིག་ཡང་དག་པར་སྦྱོར་བ་བྱས་པར་བསྒོམས་ལ། ཡིད་ཀྱིས་ཡང་དག་པར་སྦྱོར་བ་བསྒོམས་པ་ལས། རང་
གི་ས་བོན་རྡོ་རྗེ་རིགས་ཀྱི་གཟུགས་ཅན་གྱིས་ནམ་མཁའ་ཀུན་དུ་བཀང་ལ། རང་གི་ལུས་ལ་བྱེ་མའི་བུམ་པ་ལ་ཆུའི་བུམ་པ་བླུགས་པ་བཞིན་དུ་ཞུགས་ནས་བདག་ཉིད་རྡོ་རྗེའི་རིགས་ཀྱི་རྡུལ་ཕྲ་རབ་ལས་གྲུབ་པ། སྒྱུ་མ་ལྟ་བུ། གཟུགས་བརྙན་དང་མཚུངས་པ་འོད་ཟེར་འབར་བ་ཀུན་དུ་འཁྲིགས་པའི་

59-1-156b

འོད་དང་ལྡན་པ། ཉོན་མོངས་པའི་བུད་ཤིང་ཐམས་ཅད་སྲེག་པར་བྱེད་པའི་བདག་ཉིད་ཅན་གྱི་རྡོ་རྗེ་ཧཱུྃ་མཛད་བསྒོམ་པར་བྱའོ། །འདི་ནི་ཡིད་ཀྱི་རང་བཞིན་གྱི་ས་བོན་གྱི་སྦྱིན་སྲེག་ཡིན་ཏེ། འདིས་བདུད་ཐམས་ཅད་བརླག་པར་འགྱུར་རོ། །དེ་སྐད་དུ་ཡིད་ཀྱི་སྦྱིན་སྲེག་གི་དབང་དུ་མཛད་
ནས། འདོད་ཆགས་ལ་སོགས་པའི་ཉོན་མོངས་པ་གཞིག་པའི་ཕྱིར། ཁྲོ་བོའི་སྤྲིན་ནི་རྣམ་པར་བསྒོམ་པར་བྱ་ཞེས་བྱ་བ་ལ་སོགས་པ་གསུངས་པའི་ཕྱིར་རོ། །ཕྱིའི་རང་གི་ས་བོན་དང་སྦྱིན་སྲེག་བྱ་བར་བཤད་ན་ནི། འདོད་ཆགས་ལ་སོགས་པའི་བདུད་རྣམས་ཟིལ་གྱིས་མནན་པ་ལ། དེ་
རྣམས་ལ་ངེས་པར་དམིགས་པ་དང་བཅས་པ་བསྐྱེད་པར་འགྱུར་རོ། །གནོད་སྦྱིན་ཐམས་ཅད་བསྐྲད་པ་ལ་ནི་ཞེས་བྱ་བ་ནི་གནོད་སྦྱིན་མ་རུངས་པ་རྣམས་གནས་ནས་བསྐྱོད་ཅིང་མི་གཞག་པ་ནི་བསྐྲད་པའོ། །དེ་ཇི་ལྟར་འགྱུར་ཞེ་ན། ཧ་ཧ་ཞེས་དགོད་ཅིང་བཟླས་པས་སོ་ཞེས་བྱ་བ་གསུངས་
ཏེ། རྡོ་རྗེ་ཧཱུྃ་མཛད་ཀྱི་སྦྱོར་བ་ཇི་ལྟ་བ་བཞིན་དུ་བྱས་ལ། དེའི་ཕྱག་རྒྱ་ཆེན་པོ་བཅིངས་ནས། ལུས་ཀྱི་སྟོབས་དང་། ཁྱིམ་ལ་སོགས་པ་ལ་གནོད་པ་བྱེད་པའི་གནོད་སྦྱིན་མ་རུངས་པ་རྣམས་ཧ་ཧ་ཧ་ཧ་ཧཱུྃ་དུཥྚ་ཡཀྵ་ཨུཙྪ་ཊ་ཡ་ཧཱུྃ་ཞེས་བྱ་བ་ཧ་ཧ་ཞེས་དགོད་པས་ཁྲོ་བོ་ཆེན་པོས་ཁྱབ་པ་དང་བཟླས་
བརྗོད་བྱས་ལ་ཁ་ལས་རྡོ་རྗེ་འཛིན་པ་ལ་སོགས་པའི་ཁྲོ་བོའི་ཚོགས་སྤྲུལ་ནས་ཕྱུང་བ་འཇིགས་བྱེད་ཆེན་པོའི་གཟུགས་ཅན་དེ་རྣམས་ཀྱིས་གནོད་སྦྱིན་གདུག་པ་དེ་རྡོ་རྗེ་འབར་བ་ལ་སོགས་པས་བསྲེགས་པར་གྱུར་པ་དང་། དབྱིག་པ་ལ་སོགས་པ་རྣམས་ཀྱིས་བརྡེགས་པར་གྱུར་པ་དང་། སྐྲོད་
པར་གྱུར་པར་རྣམ་པར་བསམས་ལ། རིའི་རྒྱལ་པོ་རི་རབ་ལ་སོགས་པའི་རི་བོ་ཆེན་པོ་རྣམས་སུ་ལྕགས་སྒྲོག་གིས་བཅིང་བར་གྱུར་པར་བསམ་པར་བྱ་སྟེ། དེ་ལྟ་བུས་ནི་གནོད་སྦྱིན་ཐམས་ཅད་སྐྲོད་པར་འགྱུར་རོ། །ཀླུ་ཐམས་ཅད་གདོན་པ་ལ་ནི་རྡོ་རྗེས་ལ་བརྡབས་ནས་བཟླས་པས་སོ་ཞེས་བྱ་བ་ནི། 
ཀླུའི་མཚོའི་འགྲམ་དུ་ཀླུ་གདུག་པ་གདོན་པར་བྱ་བའི་ཕྱིར་མངོན་སྤྱོད་ལས་བཤད་པའི་རྫས་རྣམས་ཀྱིས་ཀླུའི་གཟུགས་བརྙན་བྱས་ཏེ། དེའི་སྙིང་གར་དེའི་མིང་བཅུག་ནས་ཧཱུྃ་ཞེས་བྱ་བ་དང་། གསང་བའི་ལྕགས་ཀྱུས་བཀུག་ལ་གཟུགས་བརྙན་དེར་བཅུག་སྟེ། རྡོ་རྗེ་ལྕགས་སྒྲོག་གིས་བཅིངས་ལ། 

59-1-157a

དེ་བཟླས་པའི་སྲད་བུ་དམར་པོས་ཀྱང་བཅིང་བར་བྱའོ། །དེ་ནས་ཧཱུྃ་ཞེས་བྱ་བ་ལས་རྡོ་རྗེ་རྩེ་བཞི་པ་འབར་བ་བསྐྱེད་ལ་ཀླུའི་སྙིང་གར་རྡོ་རྗེ་ཕུར་བུ་ཇི་ལྟ་བ་བཞིན་དུ་བརྡུངས་ཤིང་། ཧཱུྃ་ནཱ་ག་ཆེ་གེ་མོ་ཧཱུཾ་ཞེས་ཤིན་ཏུ་ཁྲོས་པས་བཟླས་བརྗོད་བྱས་ལ། རྡོ་རྗེ་ཧཱུྃ་མཛད་ཀྱི་ཕྱག་རྒྱས་རྡོ་རྗེ་བཟུང་ཞིང་།
དེས་ཀྱང་རྡོ་རྗེ་ལྕགས་ཀྱུ་ལྟ་བུ་འབར་བའི་ཚོགས་ཀྱིས་ཁྱེར་ཏེ་འོངས་བར་བསམ་པར་བྱ་སྟེ། དེ་ལྟ་བུས་ནི་ཀླུ་ཐམས་ཅད་འབྱིན་པར་འགྱུར་རོ། །ལྷ་རྣམས་ལྟུང་བར་བྱ་བ་ནི། །ཞེས་བྱ་བ་ལ་སོགས་པ་ལ། ལྷ་རྣམས་ཞེས་བྱ་བ་ནི་མ་ཧཱ་དེ་བ་ལ་སོགས་པ་སྟེ། དེ་དག་ཐམས་ཅད་བར་སྣང་ལས་ས་ལ་བབ་
པ་ནི་ལྟུང་བར་འགྱུར་བའོ། །དེ་ཅི་ལྟར་འགྱུར་ཞེ་ན། ལྷ་མོ་རྡོ་རྗེ་ལྟུང་བྱེད་ཀྱིས་སོ་ཞེས་བྱ་བ་གསུངས་ཏེ། རྡོ་རྗེ་ཧཱུྃ་མཛད་ཀྱི་ཕྱག་རྒྱ་ལས་མཛུབ་མོ་གཉིས་ལུ་གུ་རྒྱུད་དུ་བཅིངས་ལ། ལྷ་ཐམས་ཅད་བཟུང་བའི་བསམ་པས་ཕྱག་རྒྱ་བཅིངས་ལ་གྱེན་དུ་བཏེག་ལ། ལྷ་རྣམས་ལྟུང་བར་བྱ་བའི་བསམ་པས་
ཐུར་དུ་དབབ་པར་བྱ་སྟེ། འདི་ནི་ལྷ་མོ་རྡོ་རྗེ་ལྟུང་བྱེད་ཀྱི་ཕྱག་རྒྱ་སྟེ། འདིས་ལྷ་རྣམས་ལྟུང་བར་བྱེད་པར་འགྱུར་རོ། །ལྷའི་བདག་པོ་ཐམས་ཅད་ནི་དབང་ཕྱུག་ཆེན་པོ་ལ་སོགས་པའོ། །དེ་རྣམས་དབང་དུ་བྱ་བ་ནི་རང་ཡི་དམ་དུ་བྱ་བའོ། །དེ་རྣམས་ཉིད་དྲེགས་པ་དང་ཕྲལ་ནས་དུལ་བ་ལ་འཇོག་པ་ནི་དུལ་
བའོ། །ཤིང་རྡོ་རྗེ་ཅན་གྱི་ལྕུག་མ་ལ་སོགས་པས་བརྡེགས་པ་ནི་བསྣུན་པའོ། །དེ་རྣམས་ཉིད་རྣམ་པར་སྦྱར་བར་བྱ་བའི་ཕྱིར་དང་སྲོག་དང་བྲལ་བར་བྱ་བ་ནི་དབང་ཕྱུག་ཆེན་པོ་ལ་སོགས་པ་ཉིད་ཀྱིས་གསད་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་སྲིད་པ་གསུམ་པོ་འདུལ་བར་བྱེད་པས་སོ་ཞེས་བྱ་བ་གསུངས་
ཏེ། རྡོ་རྗེ་ཧཱུྃ་མཛད་ཉིད་ཀྱིས་ཧཱུྃ་ཧི་ཞེས་བྱ་བས་འཇིག་རྟེན་གསུམ་དབང་དུ་བྱ་བའི་བསམ་པས་སྦྱོར་བ་ནི་སྲིད་པ་གསུམ་པོ་འདུལ་བར་བྱེད་པ་སྟེ། རང་གི་ཁྲོ་གཉེར་གྱི་ཕྱོགས་ལས་བྱུང་བའི་རྡོ་རྗེ་ཧཱུྃ་མཛད་ཀྱི་གཟུགས་ཀྱིས་ལྷའི་བདག་པོ་ཐམས་ཅད་འདུལ་བར་བྱེད་པར་བསམ་པར་བྱ་སྟེ། དེ་ལྟ་བུས་ནི་དེ་
རྣམས་དབང་དུ་བྱ་བ་ལ་སོགས་པ་བྱས་པར་འགྱུར་རོ། །རྣམ་ཐོས་སྲས་རྗེས་སུ་འབྲང་བར་བྱ་བ་ནི་ཞེས་བྱ་བ་ལ་ནི་རྣམ་ཐོས་སྲས་ཀྱི་གཟུགས་བརྙན་ལ་སྔ་མ་བཞིན་དུ་གསང་བའི་ལྕགས་ཀྱུས་རྣམ་ཐོས་སྲས་བཀུག་ལ་བཅུག་ནས་བཅིངས་ཏེ། རྡོ་རྗེ་ཧཱུྃ་མཛད་ཀྱི་ཕྱག་རྒྱ་ཇི་ལྟ་བ་བཞིན་དུ་བཅིངས་

59-1-157b

ནས། གཡོན་བརྐྱང་བའི་གནས་པས་འདུག་ལ། རྐང་པ་གཡོན་པས་རྣམ་ཐོས་སྲས་ཀྱི་གཟུགས་མནན་ནས། ཧཱུྃ་བེེ་ཤྲ་བ་ཎ་ཨ་ནུ་རཱ་ཛ་ཀུ་རུ་ཧཱུྃ། ཞེས་བཟླས་ན་རྗེས་སུ་འབྲང་བར་འགྱུར་རོ། །ལུས་ངན་པོ་མནན་ནས་དཔལ་དབྲོག་པ་ལ་ནི་རྡོ་རྗེ་སྐྱེས་བུས་སོ་ཞེས་བྱ་བ་ནི། རྡོ་རྗེ་ཧཱུྃ་མཛད་ཀྱི་
ཕྱག་རྒྱ་ལས་གཡོན་པའི་ཁུ་ཚུར་གཡས་པའི་ཁུ་ཚུར་གྱིས་མནན་ལ། ཡང་གཡོན་པའི་མཛུབ་མོས་སོ་བཟུང་སྟེ། དཔལ་དབྲོག་པའི་བསམ་པ་དྲངས་པ་འདི་ནི་རྡོ་རྗེ་སྐྱེས་བུ་སྟེ། འདིས་སྔ་མ་བཞིན་དུ་ལུས་ངན་པོ་དང་རྣམ་ཐོས་སྲས་སྒྲུབ་པའི་སྦྱོར་བས་མནན་ལ་དཔལ་དབྲོག་པར་བྱའོ། །འདོད་
པའི་ལྷ་དབང་དུ་བྱ་བ་ལ་ནི་ཞེས་བྱ་བ་ལ་སོགས་པ་ལ། རྡོ་རྗེ་ཧཱུྃ་མཛད་ཀྱི་སྦྱོར་བས་འདོད་པའི་ལྷའི་གཟུགས་བརྙན་མདུན་དུ་བཞག་ལ། དེ་ལ་སྔ་མ་བཞིན་དུ་འདོད་པའི་ལྷ་བཅུག་སྟེ། རྡོ་རྗེ་ཧཱུྃ་མཛད་བཅིངས་ལ། ཧཱུཾ་ཀཱ་མ་དེ་བ་བ་ཤ་མ་ན་ཡ་ཧཱུྃ་ཞེས་བཟླས་བརྗོད་བྱས་ལ་རང་གི་ལུས་ལས་བྱུང་བའི་
རྡོ་རྗེ་ཧཱུཾ་མཛད་ཀྱི་རིམ་གྱིས་བཀུག་ནས། རང་གི་རྐང་པ་གཉིས་ལ་ལྟུང་བར་བྱས་པར་བསམ་པར་བྱ་སྟེ། དེ་ལྟ་བུས་ནི་འདོད་པའི་ལྷ་དབང་དུ་བྱས་པར་འགྱུར་རོ། །ཚངས་པ་ལྟུང་བར་བྱ་བ་ལ་ནི་རྡོ་རྗེ་རབ་ཏུ་དགའ་བའི་ཕྱག་རྒྱས་སོ་ཞེས་བྱ་བ་ནི། ལྔ་པོ་བསྡུས་པ་ནི་རྡོ་རྗེ་རབ་ཏུ་དགའ་བའི་ཕྱག་རྒྱ་
སྟེ། དེ་བཅིངས་ལ་ཚངས་པའི་འདོད་ཆགས་དང་བྲལ་བ་ལས་ལྟུང་བར་བྱ་བའི་བསམ་པས་འཇིག་རྟེན་ཐམས་ཅད་ལས་ཕུལ་དུ་བྱུང་བའི་གཟུགས་དང་། སྒྲ་དང་། དྲི་དང་། རོ་དང་། རེག་བྱ་རྣམས་སྤྲུལ་ལ་ཉེ་བར་དབབ་པར་བྱའོ། །དེ་ནས་དེས་དེ་རྣམས་མཐོང་བས་བསམ་གཏན་ལས་ཉམས་
པར་གྱུར་ཏེ། དེས་ན་དེ་ཕྱག་རྒྱ་འདིས་ལྟུང་བར་འགྱུར་རོ། །ཁྱབ་འཇུག་གཞིག་པ་ལ་ནི་རྡོ་རྗེ་འཁོར་ལོས་དྲལ་བས་སོ་ཞེས་བྱ་བ་ནི། རྡོ་རྗེ་ཧཱུྃ་མཛད་ཀྱི་ཕྱག་རྒྱ་ལས་མཛུབ་མོ་གཡོན་པ་འཁོར་ལོའི་ཚུལ་དུ་འཕྲེད་དུ་བཞག་ལ། དེ་ནས་དེ་ལ་མཛུབ་མོ་གཡས་པས་ཡང་དང་ཡང་དུ་དྲལ་བར་བྱ་བ་འདི་ནི་རྡོ་རྗེ་
འཁོར་ལོ་དྲལ་བ་སྟེ། འདིས་ནི་ཁྱབ་འཇུག་འཇིག་པར་འགྱུར་རོ། །དབང་ཕྱུག་ཆེན་པོ་འདུལ་བ་ལ་ནི་རྡོ་རྗེ་ཏྲི་ཤཱུ་ལའི་ཕྱག་རྒྱས་སོ་ཞེས་བྱ་བ་ནི། རྡོ་རྗེ་ཧཱུྃ་མཛད་ཀྱི་ཕྱག་རྒྱ་ལས། གཡོན་པའི་མཛུབ་མོ་དང་། གུང་མོ་དང་སྲིན་ལག་རྩེ་གསུམ་དུ་བྱས་ལ། དེ་གཡས་པའི་མཛུབ་མོས་དྲལ་བར་བྱའོ། །

59-1-158a

འདི་ནི་རྡོ་རྗེ་ཏྲི་ཤཱུལ་དྲལ་བ་སྟེ། འདིས་དབང་ཕྱུག་ཆེན་པོ་འདུལ་བར་བྱའོ། །མ་མོ་ཐམས་ཅད་བསད་པ་ལ་ནི་རྡོ་རྗེ་ཁྲོ་བོའི་ཚོགས་ཀྱི་སྲིན་མོས་སོ་ཞེས་བྱ་བ་ནི། ཨུ་མ་ལ་སོགས་པ་མ་མོའི་ཚོགས་རྣམས་དང་། དེའི་དངོས་གྲུབ་སྒྲུབ་པ་ཐམས་ཅད་ནི་མ་མོ་ཐམས་ཅད་དེ། རྡོ་
རྗེ་ཧཱུྃ་མཛད་ཀྱི་ཕྱག་རྒྱ་ལས་མཛུབ་མོ་གཉིས་ལྕགས་ཀྱུ་གཉིས་སུ་བྱས་ཏེ། ཧཱུྃ་མཱ་ཏྲི་ག་ཎ་མཱ་ར་ཡ་ཧཱུཾ། ཞེས་བཟླས་ལ་གསད་པར་བྱ་སྟེ། འདི་ནི་རྡོ་རྗེ་ཁྲོ་བོའི་ཚོགས་ཀྱི་སྲིན་མོའི་ཕྱག་རྒྱའོ། །ཕྱིའི་དཀྱིལ་འཁོར་ཐམས་ཅད་ནི་འབྱུང་པོའི་གདོན་དང་། སྲིན་པོའི་གདོན་ལ་སོགས་པའི་དཀྱིལ་འཁོར་
རོ། །དེ་རྣམས་ཀྱི་ཕྱག་རྒྱ་ནི་ལག་པའི་ཐབས་ཀྱི་ཚུལ་ལོ། །དམ་ཚིག་ནི་མི་འདའ་བའི་དོན་ཏོ། །དེ་རྣམས་ཀྱི་ཆོས་ནི་གཞན་གསོད་པ་ལ་སོགས་པའི་ཚུལ་ལོ། །གསང་བའི་དངོས་གྲུབ་ནི་དེ་རྣམས་ཀྱི་སྔགས་ཀྱི་དངོས་གྲུབ་པོ། །དེ་ལྟ་བུའི་ཕྱིའི་དཀྱིལ་འཁོར་ཐམས་ཅད་ཀྱི་ཕྱག་རྒྱ་དང་། དམ་ཚིག་
དང་ཆོས་དང་། ལས་དང་། གསང་བའི་དངོས་གྲུབ་རྣམ་པར་གཏོར་བ་ཞེས་བྱ་བ་ནི་ཕན་ཚུན་དུ་རྣམ་པར་གཏོར་བ་སྟེ། དེ་ཉིད་ནི་རྣམ་པར་འཇིག་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་ཁྲོ་བོའི་གདུག་པའི་དམ་ཚིག་འཇིག་པར་བྱེད་པས་སོ་ཞེས་བྱ་བ་གསུངས་ཏེ། རྡོ་རྗེ་ཧཱུྃ་མཛད་ཉིད་དེའི་ཚུལ་གྱིས་སྦྱར་བ་ནི་རྡོ་རྗེ་
ཁྲོ་བོ་གདུག་པའི་དམ་ཚིག་འཇིག་པར་བྱེད་པར་འགྱུར་རོ། །རི་དང་ཞེས་བྱ་བ་ལ་སོགས་པ་ལ་རྡོ་རྗེ་ཧཱུྃ་མཛད་ཀྱི་ཕྱག་རྒྱ་བཅིངས་ལ། ཁྲོ་བོའི་ལྟ་བས་ནི་མི་བསྐྱོད་པས་རྡོ་རྗེ་འབར་བ་སྤྲུལ་ལ་བསྒྲུབ་པར་བྱ་བའི་རི་ལ་སོགས་པའི་སྟེང་དུ་ལྟུང་བར་བྱས་ན་རི་ལ་སོགས་པ་ལྟུང་བར་འགྱུར་རོ། །ལྟུང་བ་ཐམས་ཅད་
བསླང་བ་ལ་ནི་ཞེས་བྱ་བ་ལ་སོགས་པ་ལ། རྡོ་རྗེ་ཧཱུྃ་མཛད་ཀྱི་ཕྱག་རྒྱས་བསླང་བའི་ཚུལ་དུ་སྦྱར་བ་འདི་ནི་རྡོ་རྗེ་ཁྲོ་བོའི་བསླང་བའོ། །ཐམས་ཅད་སྤྲོ་བ་ལ་ནི་ཞེས་བྱ་བ་ལ་སོགས་པ་ལ། གཏེར་ལ་སོགས་པའི་དངོས་པོ་ཐམས་ཅད་གར་ལས་བྱུང་བའི་ཁྲོ་བོའི་ཁུ་ཚུར་གཉིས་ཀྱིས་བླངས་ནས། ཡིད་ཀྱིས་
དྲངས་ནས་གཞན་དུ་བཞག་པ་འདི་ནི་རྡོ་རྗེ་ཁྲོ་བོའི་རྣལ་འབྱོར་མ་སྟེ། འདིས་ཐམས་ཅད་སྤོ་བར་བྱའོ། །ཐམས་ཅད་དབྲོག་པ་ལ་ནི་ཞེས་བྱ་བ་ལ་སོགས་པ་ལ། གསེར་ལ་སོགས་པའི་དངོས་པོ་རྣམས་ཁྲོ་བོའི་ཁུ་ཚུར་གཉིས་ཀྱིས་བླངས་ལ་དབྲོག་པར་བྱ་སྟེ། འདི་ནི་རྡོ་རྗེ་ཁྲོ་བོའི་འཕྲོག་པའི་ཁུ་ཚུར་ཏེ། 

59-1-158b

འདིས་ཐམས་ཅད་འཕྲོག་པར་འགྱུར་རོ། །འཇིགས་པ་ཐམས་ཅད་བསྐྱེད་པ་ལ་ནི་ཞེས་བྱ་བ་ལ་སོགས་པ་ལ། འཇིགས་པ་ཐམས་ཅད་ནི་སེང་གེ་ལ་སོགས་པའོ། །དེ་དབྱུང་བ་ནི་བསྐྱེད་པའོ། །དེ་ཡང་རྡོ་རྗེ་ཧཱུྃ་མཛད་ཀྱི་ཕྱག་རྒྱ་བཅིངས་ལ། ཁྲོ་བོའི་ལྟ་བས་བལྟ་བཞིན་དུ་སེང་གེ་ལ་སོགས་པ་སྤྲུལ་
པའམ། མནར་མེད་པ་ལ་སོགས་པ་སྤྲུལ་ལ། གཞན་རྣམས་ལ་འཇིགས་པ་བསྐྱེད་པར་བྱ་སྟེ། འདི་ནི་རྡོ་རྗེ་ཁྲོ་བོའི་ལྟ་བའོ། །དཔུང་ཐམས་ཅད་གསད་པ་ལ་ནི་ཞེས་བྱ་བ་ལ་སོགས་པ་ལ། ལྷའི་བུ་ལ་སོགས་པའི་དཔུང་ཐམས་ཅད་ནི་དཔུང་ཐམས་ཅད་དེ། དེ་བས་དཔལ་རྡོ་རྗེ་ཁུ་ཚུར་གཉིས་བཅིངས་
ལ་ཁ་ཕྱེ་སྟེ། འཇིགས་བྱེད་ཀྱི་གདོང་སྐྲ་གྱེན་དུ་བརྫེས་པ། མགོ་ཐུར་དུ་བཏུད་དེ་འགྲོ་ཞིང་བྷྱོ་ཞེས་བྱ་བ་སྨྲ་བ་འདི་ནི་རྡོ་རྗེ་ཁྲོ་བོའི་གནོད་སྦྱིན་མོ་སྟེ། འདིས་དཔུང་ཐམས་ཅད་གསོད་པར་འགྱུར་རོ། །གཞན་གྱི་དཔུང་ཐམས་ཅད་གཞོམ་པ་དང་ཞེས་བྱ་བ་ལ་སོགས་པ་ལ་རྡོ་རྗེ་ཁུ་ཚུར་གཉིས་བཅིངས་ལ། 
མཐེའུ་ཆུང་གཉིས་ཀའི་གྲ་གཉིས་སུ་བཞག་སྟེ། མཛུབ་མོ་གཉིས་ཀྱི་ལྕགས་ཀྱུ་གཉིས་ཀྱིས་བསྒྲུབ་པར་བྱ་བ་འདི་ནི། རྡོ་རྗེ་ཁྲོ་བོའི་མ་རུངས་པའི་སྲིན་མོ་སྟེ། འདིས་གཞན་གྱི་དཔུང་ཐམས་ཅད་གཞོམ་པ་ལ་སོགས་པ་བྱེད་པར་འགྱུར་རོ། །རྒྱལ་པོ་ལ་སོགས་པ་མི་ཆེན་པོ་ཞེས་བྱ་བ་ལ་སོགས་པ་
གསུམ་ནི་གོ་སླའོ། །རང་གི་ཁྲག་གི་རྒྱུན་ཞེས་བྱ་བ་ལ་སོགས་པ་ལ། རྡོ་རྗེ་ཧཱུྃ་མཛད་ཀྱི་ཕྱག་རྒྱ་བཅིངས་ལ་བཟློག་སྟེ། ས་མ་ལུས་པ་ནུབ་པའི་བསམ་པས་རབ་ཏུ་སྦྱར་བ་འདི་ནི་རྡོ་རྗེ་ཁྲོ་བོའི་ས་འོག་གི་ཕྱག་རྒྱ་སྟེ། འདིས་ས་ཐམས་ཅད་ནུབ་པར་འགྱུར་རོ། །ཁམས་གསུམ་ཐམས་ཅད་བསལ་བ་ལ་ནི་ཞེས་
བྱ་བ་ལ་སོགས་པ་ལ། ས་འོག་དང་། ས་སྟེང་དང་། མཐོ་རིས་ནི་འཇིག་རྟེན་གསུམ་ཐམས་ཅད་དེ། དེ་བསལ་བ་ལ་ནི་རྣམ་པར་གཞིག་པའོ། །དེ་ཡང་རྡོ་རྗེ་མེ་ལྟར་རབ་ཏུ་འབར་བའི་ཕྱག་རྒྱ་ཆེན་པོ་སྟེ། དེ་ནི་སེམས་དཔའི་སྐྱིལ་མོ་ཀྲུང་བཅས་ལ། ཤིན་ཏུ་ཁྲོས་པའི་གཡོན་པའི་རྡོ་རྗེ་ཁུ་ཚུར་གྱིས་དྲིལ་བུ་
བླངས་ཏེ། ཐམས་ཅད་བྱས་ལ་གཡས་པས་རྡོ་རྗེ་འབར་བ་གསོར་ཞིང་ཧཱུྃ་ཞེས་བྱ་བ་དང་། ཧཱུྃ་མཛད་ཀྱིས་རྡོ་རྗེ་འབར་བ་ལས། རྡོ་རྗེ་འཁྲིགས་པ་དུས་མཐའི་རླུང་གིས་བསྐྱོད་པའི་བསྐལ་པའི་མེའི་ཕུང་པོ་ལྟ་བུར་སྤྲུལ་ལ། དེས་འཇིག་རྟེན་གསུམ་པོ་ཐམས་ཅད་ཐལ་བར་བྱེད་པར་འགྱུར་བར་བསམ་པར་བྱ་སྟེ། 

59-1-159a

དེ་ལྟ་བུས་ནི་ཁམས་གསུམ་ཐམས་ཅད་གསལ་བར་འགྱུར་རོ། །འཇིག་རྟེན་གསུམ་པོ་ཐམས་ཅད་ལས་རྣམ་པར་རྒྱལ་བ་ལ་ནི། འཇིག་རྟེན་གསུམ་ལས་རྣམ་པར་རྒྱལ་བའི་མཆོག་གི་རྡོ་རྗེ་ཁྲོ་བོས་སོ་ཞེས་བྱ་བ་ནི་འདིའི་གོང་དུ་བཤད་མ་ཐག་པའི་རྡོ་རྗེ་མེ་ལྟར་འབར་བའི་ཕྱག་
རྒྱ་དང་ཧི་ཞེས་བྱ་བ་ནི་འཇིག་རྟེན་གསུམ་པོ་ཐམས་ཅད་ལས་རྣམ་པར་རྒྱལ་བ་སྟེ། ཧཱུྃ་ཧྲི་ཞེས་བྱ་བའོ། །ཁམས་གསུམ་ཐམས་ཅད་དབབ་པ་དང་། །ཞེས་བྱ་བ་ལ་སོགས་པ་ལ་ཁམས་གསུམ་རྣམ་པར་རྒྱལ་བའི་ཕྱག་རྒྱ་ལས་མཛུབ་མོ་གཉིས་སྦྱར་ཏེ། རྡོ་རྗེ་རྩེ་མོར་སྦྱར་བ་ནི་རྡོ་རྗེ་སེམས་
དཔའི་ཁྲོ་བོའི་ཕྱག་རྒྱ་སྟེ། འདིས་ཁམས་གསུམ་ཐམས་ཅད་དབབ་པ་དང་། དགུག་པ་དང་། གཞུག་པ་དང་། དབང་དུ་བྱ་བ་དང་། ངེས་པར་གནོན་པར་འགྱུར་རོ། །ཁམས་གསུམ་ཐམས་ཅད་ཅེས་བྱ་བ་ལ་སོགས་པ་ལ་འཇུག་པའི་དམ་ཚིག་གི་ཕྱག་རྒྱ་ནི། བདེ་བ་ཆེན་པོའི་རྡོ་རྗེ་དམ་ཚིག་
གི་ཁྲོ་བོ་སྟེ། འདིས་ཁམས་གསུམ་ཐམས་ཅད་རྗེས་སུ་ཆགས་པར་བྱ་བ་དང་། དགུག་པ་དང་། གཞུག་པ་དང་། བཅིང་བ་དང་། དབབ་པ་དང་། རྒྱས་གདབ་པ་དང་། དབང་དུ་བྱ་བ་དང་། གནོན་པར་གྱུར་པ་རྣམས་སྒྲུབ་པར་འགྱུར་རོ། །དེ་ལ་རྗེས་སུ་ཆགས་པར་བྱ་བ་ནི་རང་དབང་དུ་བྱ་བའི་
ཕྱིར་མངོན་སུམ་དུ་ཕྱོགས་ཤིང་དགའ་བར་བྱའོ། །དགུག་པ་ནི་མངོན་པར་འདོད་པའི་གནས་སུ་ཉེ་བར་ཕྱིན་པར་བྱའོ། །གཞུག་པ་ནི་བཀུག་ནས་མངོན་པར་འདོད་པའི་ཕྱོགས་སུ་གཞག་པའོ། །དབབ་པ་ནི་བབ་པར་བྱས་པའོ། །བཅིང་བ་ནི་མི་འགུལ་བར་བྱས་པ་དང་། རྡོ་རྗེ་ལྕགས་སྒྲོག་
གིས་བསྡམས་པའོ། །རྒྱས་གདབ་པ་ནི་བསྒྲུབ་པར་བྱ་བའི་སྙིང་གར་རྡོ་རྗེ་འབར་བ་བསྐྱེད་པའོ། །དབང་དུ་བྱ་བ་ནི་བདག་དང་ནོར་དབང་དུ་བྱ་བའོ། །ངེས་པར་གནོན་པ་ནི་ཧཱུྃ་གིས་བརྒྱལ་བར་བྱས་ནས་ཁས་སྦུབ་ཏུ་འགྱེལ་བར་བྱས་པའོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་
རྒྱལ་པོ་ཞེས་བྱ་བ་ནི་བཤད་ཟིན་ཏོ། །འདོད་པ་དང་། གཟུགས་དང་། གཟུགས་མེད་པའི་མཚན་ཉིད་ཅན་གྱི་སྲིད་པ་གསུམ་ནི་ཁམས་གསུམ་སྟེ། དབང་ཕྱུག་ཆེན་པོ་ལ་སོགས་པའོ། །དེ་རྣམས་ལས་རྣམ་པར་རྒྱལ་བའི་ཕྱིར། རྡོ་རྗེ་ལྟར་མི་ཕྱེད་པའི་དམ་ཚིག་འདའ་བར་མི་བྱེད་པ་གང་ཡིན་པ་དེ་ལ་

59-1-159b

མིང་དེ་སྐད་ཅེས་བྱ་བའི་རྟོག་པའི་རྒྱལ་པོ་རྫོགས་སོ།།    །།དེ་ལྟར་བྱང་ཆུབ་ཀྱི་སེམས་ཆེན་པོ་དང་། ཕྱག་རྒྱ་ཆེན་པོའི་ཡུལ་ལ་རྡོ་རྗེ་ཧཱུྃ་མཛད་ཀྱིས་དབུགས་དབྱུང་བས་ཁྲོ་བས་ཁྲོ་བ་སྤང་བ་གསུངས་ནས། ད་ནི་བྱང་ཆུབ་ཀྱི་སེམས་ཆེན་པོ་དང་། ཕྱག་རྒྱ་ཆེན་པོ་དེ་ཉིད་ཀྱིས་དབང་ཕྱུག་ལ་
སོགས་པའི་རྟོག་པ་གཏི་མུག་སྤང་བར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་བཅོམ་ལྡན་འདས་འགྲོ་བ་འདུལ་བའི་དབུགས་དབྱུང་བ་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་འདས་མ་ཐག་པའི་དོན་སྟོན་པར་བྱེད་པ་སྟེ། སྔ་མ་བཞིན་དུ་ཐམས་ཅད་བྱས་ནས། བཅོམ་ལྡན་འདས་
རྣམ་པར་སྣང་མཛད་འདོད་པའི་ཁམས་ཐམས་ཅད་ཀྱི་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་གནས་ན་ལག་ན་རྡོ་རྗེ་ལ་སོགས་པས་ཡོངས་སུ་བསྐོར་ཅིང་མདུན་གྱིས་བལྟས་ནས་བཞུགས་པ་དང་། དེའི་རྗེས་ཐོགས་ཉིད་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་གསུངས་པའོ། །བཅོམ་
ལྡན་འདས་ཞེས་བྱ་བ་བཤད་ཟིན་ཏོ། །ངོ་བོ་ཉིད་དག་པའི་ཆོས་ཉིད་ཐོབ་པས་ཞེས་བྱ་བ་ནི་གཟུང་བ་དང་འཛིན་པ་དང་བྲལ་བའི་ཤེས་རབ་ཀྱི་ཕ་རོལ་ཏུ་ཕྱིན་པ་ནི་ངོ་བོ་ཉིད་ཀྱིས་དག་པའི་ཆོས་ཉིད་དེ། དེ་ཐོབ་པ་ནི་ཐུགས་སུ་ཆུད་པའོ། །དེ་ཉིད་ཕྱིན་ཅི་མ་ལོག་པར་ཐུགས་སུ་ཆུད་ཅིང་བརྙེས་པས་ན་དེ་
བཞིན་གཤེགས་པའོ། །འདོད་ཆགས་སྤྲོས་པ་མེད་པར་བསྟན་པ་ལ་ལྟོས་ནས་ཡང་ཞེས་བྱ་བ་སྨོས་སོ། །ཆོས་ཀྱང་ཡིན་ལ་ཐམས་ཅད་ཀྱང་ཡིན་པས་ན་ཆོས་ཐམས་ཅད་དེ། ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་ཀྱི་སེམས་དང་། སེམས་ལས་བྱུང་བ་རྣམས་དང་། པདྨའི་རིགས་སོ། །
དེ་རྣམས་ཀྱི་མཉམ་པ་ཉིད་ནི་དེ་བཞིན་ཉིད་དོ། །དེ་ལ་གཟིགས་པས་ན་སྤྱན་རས་གཟིགས་ཏེ། དེ་ཤིན་ཏུ་མཉམ་པར་གཞག་པའི་སྦྱོར་བས་མངོན་སུམ་དུ་མཛད་པའོ། །དེས་ན་གཙོ་བོར་གྱུར་པས་ན་དབང་ཕྱུག་སྟེ། གཟུང་བ་དང་འཛིན་པའི་རྣམ་པར་རྟོག་པའི་འཆིང་བས་མ་བཅིངས་པའོ། །དེའི་
ཡེ་ཤེས་ནི་ཆོས་ཐམས་ཅད་ངོ་བོ་ཉིད་ཀྱིས་དག་པའོ་ཞེས་ངེས་པར་བྱས་པའོ། །དེ་ཉིད་ཕྱག་རྒྱ་སྟེ་གང་ལ་མིང་དེ་སྐད་ཅེས་བྱ་བ་དེ་ལ་ནི་དེ་སྐད་ཅེས་བྱའོ། །འདི་ཞེས་བྱ་བ་ནི་འདས་མ་ཐག་པའི་འོག་ཏུ་སྟོན་པར་འགྱུར་བའི་ཤེས་རབ་ཀྱི་ཕ་རོལ་ཏུ་ཕྱིན་པ་བློ་ལ་བཞག་ནས་འདི་སྐད་དུ་སྨྲས་པའོ། །གསུངས་

59-1-160a

ཏེ་ཞེས་པ་ནི་བཀའ་སྩོལ་བར་མཛད་པའོ། །འདོད་ཆགས་ཐམས་ཅད་ཅེས་བྱ་བ་ལ་སོགས་པ་ལ། བྱང་ཆུབ་ཀྱི་སེམས་ཆེན་པོས་འདོད་པའི་ཁམས་ལ་སྣ་ཚོགས་པའི་ཚལ་དུ་རྣམ་པར་རྟོག་པའི་ཁམས་གསུམ་པོ་ཐམས་ཅད་ཀྱི་ཆགས་པ་ནི་འདོད་པའི་འདོད་ཆགས་སོ། །དེའི་
རྣམ་པར་དག་པ་ནི་དེ་བཞིན་ཉིད་དེ་དེས་ན་ཞེ་སྡང་ཐམས་ཅད་དག་པར་འགྱུར་རོ། །འཇིག་རྟེན་ནི་འཇིག་པས་ན་འཇིག་རྟེན་ནོ། །དེ་ནི་ཁམས་གསུམ་པོ་སྟེ་འཇིག་པའོ་ཞེས་བྱ་བའི་དོན་ཏོ། །དེ་ལ་འདོད་ཆགས་ཀྱི་རྣམ་པ་ནི་བྱང་ཆུབ་ཆེན་པོའི་སེམས་ལ་རྣམ་པར་རྟོག་པའོ། །གནོད་སེམས་ཀྱི་
རྣམ་པ་ཐམས་ཅད་ནི་ཞེ་སྡང་ཐམས་ཅད་དེ། དེའི་རྣམ་པར་དག་པ་ཡང་དེ་བཞིན་ནོ། །ཞེ་སྡང་ཐམས་ཅད་ཀྱི་རྣམ་པར་དག་པར་གྱུར་པ་ནི་ཞེ་སྡང་ཐམས་ཅད་རྣམ་པར་དག་པ་སྟེ། དེའི་དོན་དུ་འཇུག་པར་འགྱུར་ཞིང་རྒྱུར་གྱུར་པས་རབ་ཏུ་སྒྲུབ་པའོ། །འདི་སྐད་སྟོན་པར་འགྱུར་ཏེ། འདོད་ཆགས་
ཐམས་ཅད་ནི་རྨི་ལམ་ལྟ་བུར་རྟོགས་པར་ཐོབ་པས། ཞེ་སྡང་ཐམས་ཅད་རྨི་ལམ་ལྟ་བུར་རྟོགས་པར་འགྱུར་ཏེ། རྗེས་སུ་ཆགས་པ་མེད་པས་ཞེ་སྡང་མེད་པར་འགྱུར་བའི་ཕྱིར་རོ། །དྲི་མ་ཐམས་ཅད་ནི་བྱང་ཆུབ་ཀྱི་སེམས་ཆེན་པོ་ལ་རྣམ་པ་སྣ་ཚོགས་པའི་ཚུལ་དུ་ཤེས་པའི་རྣམ་པར་རྟོག་པའི་གཏི་མུག་
ཐམས་ཅད་དེ། དེའི་རྣམ་པར་དག་པ་ཡང་དེ་བཞིན་ནོ། །དྲི་མ་ཐམས་ཅད་རྣམ་པར་དག་པར་གྱུར་པ་ནི། དྲི་མ་ཐམས་ཅད་རྣམ་པར་དག་པ་ཉིད་དེ། དེས་ནི་སྡིག་པ་ཐམས་ཅད་རྣམ་པར་དག་པས་འཇུག་པར་འགྱུར་རོ། །དེ་ཡང་ལུས་དང་ངག་དང་ཡིད་ཀྱི་ཉེས་པར་སྤྱོད་པ་རྣམས་ནི་སྡིག་པ་ཐམས་
ཅད་དོ། །དེའི་རྣམ་པར་ཤེས་པ་ཐམས་ཅད་ཀྱི་རྣམ་པར་རྟོག་པ་དང་། གཏི་མུག་དང་བྲལ་བས་ལུས་དང་ངག་དང་ཡིད་ཀྱི་ཉེས་པར་སྤྱོད་པར་འབྱུང་བར་མི་འགྱུར་ཏེ། གཏི་མུག་མེད་པས་ན་ཉེ་བར་སྤྱོད་པ་ལ་ཀུན་དུ་སྤྱོད་པར་མི་འགྱུར་བའི་ཕྱིར་རོ། །ཆོས་ཐམས་ཅད་ནི་བྱང་ཆུབ་ཀྱི་སེམས་ཆེན་པོ་དེ་
ཉིད་ལ་རྣམ་པ་སྣ་ཚོགས་པའི་ཚུལ་དུ་ཕྱིའི་རྣམ་པར་རྟོག་པ་གཟུགས་དང་། སྒྲ་དང་དྲི་དང་རོ་དང་རེག་བྱ་ལ་རྣམ་པར་རྟོག་པ་སྟེ། དེའི་རྣམ་པར་དག་པ་ཡང་དེ་བཞིན་ནོ། །དེའི་རྣམ་པར་དག་པར་གྱུར་པ་ནི་ཆོས་ཐམས་ཅད་རྣམ་པར་དག་པ་ཉིད་ཀྱི་སྟེ། དེས་སེམས་ཅན་ཐམས་ཅད་རྣམ་པར་དག་པ་ལ་

59-1-160b

འཇུག་པར་འགྱུར་ཏེ། ཚངས་པའི་གཟུགས་ཀྱིས་འདུལ་བར་འགྱུར་བ་དང་། འདོད་པའི་ཡོན་ཏན་ལྔ་ལ་མངོན་པར་ཞེན་པ་ནི་སེམས་ཅན་ཐམས་ཅད་དོ། །དེ་རྣམས་རྣམ་པར་དག་པ་ནི་ཚངས་པ་ལ་སོགས་པ་རྨི་ལམ་ལྟ་བུར་རྟོགས་པའོ། །འདི་སྐད་སྟོན་པར་འགྱུར་ཏེ། ཆོས་ཐམས་ཅད་རྣམ་པར་དག་
པར་འགྱུར་བས་སེམས་ཅན་ཐམས་ཅད་རྣམ་པར་དག་པར་འགྱུར་ཏེ། དེ་ལ་དམིགས་པའི་དངོས་པོ་ལ་མངོན་པར་ཞེན་པ་མེད་པའི་ཕྱིར་རོ། །ཤེས་པ་ཐམས་ཅད་ཅེས་བྱ་བ་ལ་སོགས་པ་ལ་འདོད་ཆགས་དང་ཞེ་སྡང་དང་གཏི་མུག་ཐམས་ཅད་ནི་ཤེས་པ་ཐམས་ཅད་དེ་ཇི་སྐད་དུ་བཤད་པའི་ཤེས་པ་ཐམས་
ཅད་དོ། །དེ་རྣམས་ཀྱི་རྣམ་པར་དག་པ་ཡང་དེ་བཞིན་ནོ། །ཤེས་པ་ཐམས་ཅད་རྣམ་པར་དག་པར་འགྱུར་བ་ནི་ཤེས་པ་ཐམས་ཅད་རྣམ་པར་དག་པ་ཉིད་ཀྱིས་སོ། །དེ་ནི་འཇིག་རྟེན་དུ་ཇི་སྐད་བཤད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པས་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པའི་རྒྱུར་
གྱུར་པར་སྒྲུབ་པར་བྱེད་དོ། །འདི་སྐད་སྟོན་པར་འགྱུར་ཏེ། རྣལ་འབྱོར་པས་འདོད་ཆགས་དང་ཞེ་སྡང་དང་། གཏི་མུག་ཐམས་ཅད་དང་ཆོས་ཐམས་ཅད་སྒྱུ་མ་དང་མཚུངས་པར་རྟོགས་པས་མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོག་པ་དང་། བྱ་བ་གྲུབ་པའི་ཡེ་ཤེས་རྣམ་པར་དག་པར་
འགྱུར་རོ། །དེ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་འཕགས་པ་སྤྱན་རས་གཟིགས་དབང་ཕྱུག་རྟོགས་པར་འགྱུར་ཏེ། ཤེས་པ་ཐམས་ཅད་རྣམ་པར་དག་པའི་རྒྱུ་ཅན་ཡིན་པའི་ཕྱིར་རོ། །ལག་ན་རྡོ་རྗེ་གང་ལ་ལ་ཞེས་བྱ་བ་ལ་སོགས་པ་ནི་བཤད་ཟིན་ཏོ། །འདོད་ཆགས་དང་དྲི་མ་ཐམས་
ཅད་ཀྱི་ནང་ན་འདུག་ཀྱང་ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ཐོབ་པ་ལ་སོགས་པ་དང་ལྡན་པ་དེ་ནི་ཇི་སྐད་དུ་བཤད་པའི་འདོད་ཆགས་ཐམས་ཅད་དེ་འདོད་པའི་ཁམས་ཐམས་ཅད་དང་། གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་གནས་དང་། གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་
གཟུགས་ཀྱིས་གནས་ནས་མཆོག་ཏུ་གྱུར་པའི་འདོད་པ་རྣམས་ལ་ཡོངས་སུ་ལོངས་སྤྱོད་པར་བྱེད་དུ་ཟིན་ཀྱང་སྔ་མ་བཞིན་དུ་འདོད་ཆགས་ཀྱི་ཉེས་པས་གོས་པར་མི་འགྱུར་ཏེ། མ་རིག་པའི་ངོ་བོ་ཉིད་ཀྱི་གློ་བུར་བའི་དྲི་མ་རྣམས་ཀྱིས་གོས་པར་མི་འགྱུར་རོ། །མྱུར་དུ་ཞེས་བྱ་བ་ལ་སོགས་པ་ནི་གོ་

59-1-161a

སླའོ། །དེ་ལྟར་དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ་འཚང་རྒྱ་བར་ཡང་འགྱུར་རོ་ཞེས་བྱ་བའི་བར་གྱི་བཤད་པས་ནི་དང་པོའི་སྦྱོར་བའི་ཏིང་ངེ་འཛིན་གསུངས་པ་ཡིན་ནོ། །ད་ནི་དེ་ནས་ཞེས་བྱ་བ་ལ་སོགས་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ཏེ། དེ་
ནས་ཞེས་བྱ་བའི་སྒྲ་ནི་འདས་མ་ཐག་པ་སྟོན་པར་བྱེད་པའི་ཐ་ཚིག་གོ། །བྱང་ཆུབ་ཆེན་པོའི་ངོ་བོ་ཉིད་ཀྱི་སེམས་དཔའ་ནི་བྱང་ཆུབ་སེམས་དཔའ་ཆེན་པོའོ། །དོན་གྱི་གནས་འདི་ཉིད་ཅེས་བྱ་བ་འདོད་ཆགས་རྣམ་པར་དག་པ་ལ་སོགས་པའི་གནས་ལྔ་པོ་བཤད་མ་ཐག་པའོ། །ཡང་རྒྱ་ཆེར་
སྟོན་ཅིང་ཞེས་བྱ་བ་ནི་སྔར་གསུངས་པའི་ཚིག་དང་ཡི་གེ་དང་དོན་ལས་གཞན་དུ་གྱུར་པ་དག་གིས་ཧྲཱིཿཞེས་བྱ་བའི་ཡི་གེ་སྤྲུལ་ནས་ཡང་སྟོན་པར་མཛད་པས་ན་ཡང་རྒྱ་ཆེར་སྟོན་ཅིང་ཞེས་བྱའོ། །དེ་བཞིན་རབ་ཏུ་འཛུམ་དམུལ་ཏེ་ཞེས་བྱ་བ་ནི་ཞལ་འཛུམ་པ་དང་བཅས་པའོ། །པདྨའི་འདབ་མ་ཁ་
འབྱེད་པས་ཞེས་བྱ་བ་ལ་སོགས་པ་ནི་གཡོན་པའི་པདྨའི་ཁུ་ཚུར་གྱིས་པདྨ་དམར་པོ་བླངས་ནས་བསྙེམས་པའི་ཚུལ་གྱིས་འཛིན་ཅིང་ཕྱག་གཡས་པས་དེ་འབྱེད་ལ། ཇི་སྐད་གསུངས་པའི་འདོད་ཆགས་ལ་སོགས་པའི་དྲི་མས་མི་གོས་པ་ལ་བལྟ་ཞིང་རྣམ་པར་རྟོག་པའོ། །འགྲོ་བ་ཐམས་ཅད་ནི་པདྨའི་
རིགས་ཏེ་དེ་ཡོངས་སུ་རྫོགས་པར་བྱ་བའི་ཕྱིར་པདྨའི་གཟུགས་སྣ་ཚོགས་པ་ཞེས་མིང་དུ་བཏགས་པའི་ཧྲཱི་ཞེས་བྱ་བའི་ཡི་གེ་ནི་སྙིང་པོའོ། །འདི་ཞེས་བྱ་བ་ནི་འདས་མ་ཐག་པའི་འཆད་པར་འགྱུར་བ་བློ་ལ་བཞག་ནས་སྨྲས་པའོ། །གསུངས་སོ་ཞེས་བྱ་བ་ནི་བཀའ་སྩལ་པ་སྟེ། པདྨའི་རིགས་བསྐྱེད་
པར་བྱ་བའི་ཕྱིར་ངེས་པར་བསྐྱེད་པར་མཛད་ནས་ཧྲཱི་ཞེས་བྱ་བ་གསུངས་སོ་ཞེས་བྱ་བའི་དོན་ཏོ། །དེ་ནས་འདི་གསུངས་པ་ཙམ་གྱིས་ཞེས་བྱ་བ་ནི་ཧྲཱིཿཞེས་བྱ་བ་གསུངས་པ་ཙམ་གྱི་རྗེས་ཐོགས་ཉིད་ལའོ། །པདྨ་ཆེན་པོ་དེ་ལས་ཞེས་བྱ་བ་ནི་སྤྱན་རས་གཟིགས་དབང་ཕྱུག་པདྨའི་འདབ་མ་ཁ་
འབྱེད་པའི་ཚུལ་གྱིས་འཛིན་པར་མཛད་པ་དེ་ལས་སོ། །དེ་བཞིན་གཤེགས་པ་ལ་སོགས་པའི་གཟུགས་ཐམས་ཅད་ཅེས་བྱ་བ་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་རྣམས་ཏེ། དེ་དག་ཉིད་ལ་སོགས་པ་གང་ཡིན་

59-1-161b

པའི་དེ་བཞིན་གཤེགས་པ་ལ་སོགས་པའི་གཟུགས་ཐམས་ཅད་དེ། དེ་རྣམས་བྱུང་ནས་དཀྱིལ་འཁོར་གྱི་ཚུལ་དུ་བཞུགས་པར་གྱུར་ཏོ་ཞེས་བྱ་བར་སྦྱར་རོ། །དེ་རྣམས་ཀྱང་ཁྱད་པར་ཇི་ལྟ་བུ་དང་ལྡན་ཞེ་ན། བཅོམ་ལྡན་འདས་དང་འདྲ་བ་ཞེས་བྱ་བ་གསུངས་ཏེ། བཅོམ་ལྡན་འདས་འཕགས་པ་
སྤྱན་རས་གཟིགས་དབང་ཕྱུག་གི་པདྨ་ཆེན་པོ་ལས་མངོན་པར་བྱུང་བས་ན། བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་དང་འདྲ་ཞིང་པདྨའི་མཚན་མ་དང་པདྨས་མཚན་པའི་མཚན་མའོ། །མཚན་མ་གང་ཞེ་ན། པདྨས་མཚན་པར་ངེས་པར་བྱུང་ནས་ཞེས་གསུངས་ཏེ། ངེས་པར་
བྱུང་ནས་ཞེས་བྱ་བ་ལ་སོགས་པ་ནི་གོ་སླའོ། །དེ་ནས་བྱང་ཆུབ་སེམས་དཔའ་ཞེས་བྱ་བ་ནས་བརྩམས་ཏེ་བཞུགས་པར་གྱུར་ཏོ་ཞེས་བྱ་བའི་བར་གྱི་བཤད་པས་ནི་དེ་བཞིན་དུ་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་པ་མཛད་པ་སྔོན་དུ་འགྲོ་བ་ནི་ཏིང་ངེ་འཛིན་གསུམ་པ་ཡིན་པར་
ཤེས་པར་བྱའོ། །དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པར་བྱའོ་ཞེས་བྱ་བ་འདིའི་ཆོ་ག་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང་སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ཏེ། དེ་
ནས་ཞེས་བྱ་བའི་སྒྲ་ནི་སྔ་མ་བཞིན་ཏེ། སྔོན་དུ་བསྙེན་པའི་ལས་བྱས་པའི་རྗེས་ཐོགས་ཉིད་ལའོ། །བཅོམ་ལྡན་འདས་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །ཆོས་ཐམས་ཅད་ཅེས་བྱ་བ་ལ་ཆོས་ཀྱང་ཡིན་ལ་ཐམས་ཅད་ཀྱང་ཡིན་པས་ན་ཆོས་ཐམས་ཅད་དེ། འདོད་ཆགས་ལ་སོགས་པ་ཇི་
སྐད་དུ་བཤད་པ་རྣམས་དང་པདྨའི་རིགས་སོ། །དེ་དག་ཉིད་ལ་གཟིགས་པ་ནི་ཡེ་ཤེས་གང་གིས་སོ་སོར་རྟོག་པར་མཛད་པ་དེ་ཉིད་ནི་ཆོས་ཐམས་ཅད་ལ་གཟིགས་པའི་ཡེ་ཤེས་ཏེ་ཆོས་ཐམས་ཅད་ངོ་བོ་ཉིད་ཀྱིས་དག་པའོ་ཞེས་ངེས་པའི་ཡེ་ཤེས་ཞེས་བྱ་བའི་དོན་ཏོ། །དེས་དབང་ཕྱུག་ཏུ་གྱུར་པ་ནི་སྔ་མ་
བཞིན་ནོ། །དེའི་ཡེ་ཤེས་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ཐམས་ཅད་ངེས་པར་བྱས་པའོ། །ཡེ་ཤེས་དེ་ཉིད་ཕྱག་རྒྱ་སྟེ། གང་ལ་མིང་དེ་སྐད་ཅེས་བྱ་བ་དེ་ལ་དམིགས་པའི་ཏིང་ངེ་འཛིན་ནི་ཆོས་ཐམས་ཅད་ལ་གཟིགས་པའི་ཡེ་ཤེས་ཀྱི་དབང་ཕྱུག་སྟེ། ཡེ་ཤེས་ཀྱི་ཕྱག་རྒྱ་ཞེས་བྱའོ། །དེ་ལ་

59-1-162a

སྙོམས་པར་ཞུགས་པ་ནི་མངོན་སུམ་དུ་མཛད་པའོ། །འགྲོ་བ་ཐམས་ཅད་ནི་སེམས་ཅན་གྱི་ཁམས་ཏེ་དེ་གང་གིས་འདུལ་བར་གྱུར་པ་དེ་ནི། འགྲོ་བ་ཐམས་ཅད་འདུལ་བ་ཞེས་བྱ་བའི་དཀྱིལ་འཁོར་ཆེན་པོའོ། །འདི་ཞེས་བྱ་བ་དེ་ནི་སྔ་མ་བཞིན་ནོ། །གསུངས་སོ་ཞེས་བྱ་བ་ནི་བཀའ་
སྩལ་པ་སྟེ། འགྲོ་བ་འདུལ་བའི་དཀྱིལ་འཁོར་ཆེན་པོའི་རྣམ་པར་ཐུགས་རྩེ་གཅིག་ཏུ་མཛད་ནས་འགྲོ་བ་ཐམས་ཅད་འདུལ་བར་ཞེས་བྱ་བའི་དཀྱིལ་འཁོར་ཆེན་པོ་གསུངས་སོ་ཞེས་བྱ་བའི་དོན་ཏོ། །འདིས་ནི་དཀྱིལ་འཁོར་བསྒོམས་ནས་མཚན་མ་ཐོབ་པས་དཀྱིལ་འཁོར་བྲི་བར་བྱའོ་ཞེས་སྟོན་པར་
འགྱུར་བ་ཡིན་ནོ། །ཕྱིའི་དཀྱིལ་འཁོར་ཇི་ལྟ་བ་ཞེས་བྱ་བ་ནི་ཕྱིའི་དཀྱིལ་འཁོར་རྡོ་རྗེ་སེམས་དཔའི་དཀྱིལ་འཁོར་ཆེན་པོ་བཞིན་དུ་བྲི་བར་བྱའོ་ཞེས་བྱ་བའི་དོན་ཏོ། །ནང་དུ་གཉིས་པ་ནི་ཟུར་བཞི་པ་ལ་ཞེས་བྱ་བ་ནི་ཕྱིའི་དཀྱིལ་འཁོར་གྱི་ཕྱེད་ཀྱི་ཚད་ཀྱི་དབུས་སུ་དཀྱིལ་འཁོར་གཉིས་པ་བྲི་བར་བྱའོ། །
དེ་བཞིན་དུ་སྒོ་དང་མཚམས་རྣམས་སུ་བཅས་པ་བྲི་བར་བྱའོ་ཞེས་བྱ་བ་ནི་ཇི་ལྟར་དེ་ཁོ་ན་ཉིད་བསྡུས་པར་འགྲོ་བ་འདུལ་བའི་དཀྱིལ་འཁོར་ཆེན་པོར་དཀྱིལ་འཁོར་དབུས་མ་སྒོ་བཞི་ལ་བལྟས་པ་དང་མཚམས་བཞི་ཇི་ལྟར་ཡོད་པ་དེ་བཞིན་དུ་སྤྲུལ་པའི་དཀྱིལ་འཁོར་འདི་ཉིད་ཀྱང་སྒོ་དང་བཅས་པར་དེ་བཞིན་དུ་
བྲི་བར་བྱའོ། །དེ་ནས་དཀྱིལ་འཁོར་བརྒྱད་པའི་ཚུལ་དུ་ཐིག་བཞིས་ཐིག་བཏབ་པ་ལ་ནི་ཞེས་བྱ་བ་ནི་དེ་ལྟར་ནང་གི་དཀྱིལ་འཁོར་ཟུར་བཞི་པ་བྲིས་ལ། ཤར་དང་ནུབ་དང་བྱང་དང་། ལྷོར་ཐིག་བཞི་བཏབ་པ་སྟེ། དཀྱིལ་འཁོར་བརྒྱད་ཅེས་བྱ་བའི་ཆོ་ག་འདིས་ཐིག་བཞི་དང་ཐིག་གདབ་པ་བྱས་ལ། ཚོན་
དམར་པོས་ཀ་བ་བརྒྱད་ཀྱི་ཚུལ་དུ་པདྨ་འདབ་མ་བརྒྱད་པ་བྲི་བར་བྱའོ། །དེའི་དབུས་སུ་བཅོམ་ལྡན་འདས་དགོད་པར་བྱའོ་ཞེས་བྱ་བ་ཀ་བ་བརྒྱད་ཀྱི་ཚུལ་གྱིས་བྲིས་པའི་ནང་གི་དཀྱིལ་འཁོར་གྱི་དབུས་སུ་སྟེ། པདྨའི་ལྟེ་བ་ལ་པདྨའི་གདན་ལ་འཇིག་རྟེན་དབང་ཕྱུག་བྲི་བར་བྱའོ། །དེའི་མདུན་དུ་ཞེས་བྱ་བ་
ལ་སོགས་པ་ནི་གོ་ལའོ། །ཕྱིའི་དཀྱིལ་འཁོར་གི་མཚམས་རྣམས་སུ་ཞེས་བྱ་བ་ལ་སོགས་པ་ལ་ཕྱིའི་དཀྱིལ་འཁོར་གྱི་ལྷའི་སྣམ་བུ་ལ་ཤར་ལྷོ་མཚམས་སུ་པདྨ་ཆེན་པོ་ལ་ས་འཛིན་ལྷ་མོ་མིང་ཤྲཱི་ཞེས་བྱ་བ་ཕྱག་གཡོན་པ་པདྨ་བསྣམས་པ། གཡས་ན་གཏེར་གྱི་བུམ་པ་བསྣམས་པའོ། །ལྷོ་

59-1-162b

ནུབ་མཚམས་སུ་པདྨ་ཆེན་པོ་རྒྱ་མཚོ་མིང་ཧྲཱིཿཞེས་བྱ་བ་ཕྱག་གཡོན་པ་ན་པདྨ་བསྣམས་པ། གཡས་ན་སྦྲུལ་གྱི་ཞགས་པ་བསྣམས་པ། ནུབ་བྱང་མཚམས་སུ་པདྨ་ཆེན་པོ་ཉི་མའི་མིང་གི་ཞེས་བྱ་བ་ཕྱག་གཡོན་པ་ན་པདྨ་བསྣམས་པ། གཡས་ན་པདྨའི་སྟེང་ན་ཉི་མའི་དཀྱིལ་འཁོར་བསྣམས་
པའོ། །བྱང་ཤར་མཚམས་སུ་པདྨ་ཆེན་པོ་རླུང་གི་ལྷ་མོ་མིང་དྷཱིཿ་ཞེས་བྱ་བ་ཕྱག་གཡོན་ན་པདྨ་བསྣམས་པ། གཡས་ན་བ་དན་བསྣམས་པ་ལེགས་པར་བྲི་བར་བྱའོ། །ཤར་ཕྱོགས་ཀྱི་སྒོར་པདྨ་ཆེན་པོ་ཆགས་པའི་མཚོན་ཆའི་མཚན་མ་བུད་མེད་ཀྱི་གཟུགས་དང་། ལྷོར་པདྨ་ཆེན་པོ་གཏུམ་པའི་
དབང་ཕྱུག་གི་མཚན་མ་སྦྲུལ་གྱི་གཟུགས་དང་། ནུབ་ཏུ་པདྨ་ཆེན་པོ་ནག་པོའི་མཚན་མ་ཕག་གི་གཟུགས་དང་། བྱང་དུ་མི་མཇེད་ཀྱི་བདག་པོ་ཚངས་པའི་མཚན་མ་པདྨའི་གཟུགས་བྲི་བར་བྱའོ། །འདི་སྐད་སྟོན་པར་འགྱུར་ཏེ། བཅོམ་ལྡན་འདས་འགྲོ་བ་འདུལ་བའི་སྦྱོར་བས་འཕགས་པ་དེ་ཁོ་ན་
ཉིད་བསྡུས་པ་ལས་གསུངས་པའི་རྣལ་འབྱོར་ཆེན་པོ་བྱས་ལ། ཏིང་ངེ་འཛིན་གསུམ་བསྒོམ་པ་ནས་བརྩམས་ཏེ། ཇི་སྲིད་དཀྱིལ་འཁོར་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་དཀྱིལ་འཁོར་བསྐོམ་པར་བྱའོ། །དེ་ནས་ཇི་སྐད་དུ་བཤད་པའི་དཀྱིལ་འཁོར་གྱི་སའི་དབུས་སུ་ཏིང་ངེ་འཛིན་
གསུམ་པོ་བསྒོམས་ལ། བར་སྣང་གི་ཕྱོགས་སུ་སྔ་མ་བཞིན་དུ་ཡང་དག་པར་བཞག་སྟེ། ཉི་མ་འཆར་བའི་དུས་སུ་ཐིག་ལེགས་པར་གདབ་པར་བྱ་སྟེ། འདིའི་ཕྱིའི་དཀྱིལ་འཁོར་ནི་རྡོ་རྗེ་སེམས་དཔའི་དཀྱིལ་འཁོར་དང་འདྲའོ། །དེའི་ནང་དུ་དེའི་ཕྱེད་ཀྱི་ཚད་ཀྱི་རི་མོ་གཉིས་ཕྱིའི་དཀྱིལ་འཁོར་གྱི་
སྒོ་བཞི་ལ་མངོན་སུམ་དུ་བལྟས་པ། མཚམས་བཞི་པོ་རི་མོ་གཉིས་ཀྱི་དབུས་ན་གནས་པ། པདྨའི་ཕྲེང་བས་ཀུན་དུ་མཉེས་པར་མཛེས་པར་བྱས་ལ། ནང་གི་དཀྱིལ་འཁོར་སྒོ་མེད་པར་བྲིས་ཏེ། འདིར་ཀ་བ་བརྒྱད་ཀྱི་ཚུལ་དུ་པདྨ་འདབ་མ་བརྒྱད་བྲི་བར་བྱའོ། །དེ་ནས་ཕྱི་དང་ནང་དུ་བཅས་པའི་
དཀྱིལ་འཁོར་གྱི་ལྷ་ཐམས་ཅད་ཀྱི་གནས་སུ་སྣ་ཚོགས་པདྨ་རྣམས་ལ་དབུས་སུ་བཅོམ་ལྡན་འདས་སྤྱན་རས་གཟིགས་དབང་ཕྱུག་གཡོན་སྙེམས་པས་རྡོ་རྗེ་པདྨ་འཛིན་ཅིང་ཐུགས་ཀའི་ཕྱོགས་སུ་འབྱེད་པར་མཛད་པ་སྐུ་མདོག་དམར་སྐྱ་ཞལ་འཛུམ་དམུལ་བ་སེམས་དཔའི་སྐྱིལ་མོ་ཀྲུང་དུ་བཞུགས་

59-1-163a

པ། འོད་དཔག་ཏུ་མེད་པའི་ཅོད་པན་གྱིས་དབང་བསྐུར་བ། ཟླ་བའི་འོད་ཅན་བྲི་བར་བྱའོ། །དེའི་ཤར་གྱི་པདྨའི་འདབ་མ་ལ་པདྨ་ཆེན་པོ་སྐུ་མདོག་དམར་བ། འདོད་པའི་ལྷའི་གཟུགས་འཛིན་པ། མེ་ཏོག་པདྨ་དང་མདའ་གཞུ་བསྣམས་པ་བྲི་བར་བྱའོ། །དེའི་ལྷོ་ཕྱོགས་སུ་པདྨ་ཆེན་
པོ་གཏུམ་པོའི་དབང་ཕྱུག་སྐུ་མདོག་ནག་པོ་དབང་ཕྱུག་ཆེན་པོའི་གཟུགས་འཛིན་པ། ཁྲོས་པ་སྤྱན་གསུམ་པ་ཕྱག་བཞི་པ་སྟེ། དེ་ལ་ཕྱག་གཡས་གཉིས་ན་ཏྲི་ཤཱུ་ལ་དང་པདྨ་བསྣམས་པ། གཡོན་གཉིས་ན་ཁ་ཊྭཱཾ་གདང་ཐོད་པ་བསྣམས་པའོ། །དེའི་རྒྱབ་ཏུ་པདྨ་ཆེན་པོ་ཁྱབ་འཇུག་གི་གཟུགས་
འཛིན་པ། སྐུ་མདོག་ནག་པོ་ཕྱག་བཞི་པ་སྟེ། དེ་ལ་ཕྱག་གཡས་གཉིས་ན་པདྨ་དང་འཁོར་ལོ་བསྣམས་པ། གཡོན་གཉིས་ན་དབྱིག་པ་དང་དུང་བསྣམས་པའོ། །དེའི་བྱང་དུ་གནས་པའི་པདྨ་ལ་པདྨ་ཆེན་པོ་མི་མཇེད་ཀྱི་བདག་པོ་ཚངས་པའི་གཟུགས་འཛིན་པ། སྐུ་མདོག་དཀར་པོ་ཞལ་བཞི་པ། 
ཕྱག་བཞི་པ། གཡས་ན་དབྱིག་པ་དང་བགྲང་ཕྲེང་འཛིན་པ། གཡོན་གཉིས་ན་པདྨ་དང་རིལ་པ་སྤྱི་བླུགས་བསྣམས་པའོ། །ཤར་ལྷོའི་མཚམས་ཀྱི་པདྨའི་འདབ་མར་སྣ་ཚོགས་པདྨ་ལ། པདྨ་ཆེན་པོས་འཛིན་ས་ཆེན་པོ་འཛིན་པ་གཡོན་བརྐྱང་བས་གནས་པ་སྟེ། དེ་ལ་ཕྱག་གཉིས་ཀྱིས་གཅིག་
ལ་གཅིག་བཟུང་བའི་ཚུལ་གྱིས་བཞུགས་ཤིང་། ཕྱག་གཡོན་པ་འདེགས་པས་ས་འཛིན་པར་མཛད་པ། ཡང་ཕྱག་གཡོན་པ་གཉིས་ན་དུང་དང་པདྨ་བསྣམས་པ། གཡས་གཉིས་ན་འཁོར་ལོ་དང་དབྱིག་པ་བསྣམས་པའོ། །ལྷོ་ནུབ་མཚམས་སུ་པདྨ་ཆེན་པོ་རྒྱ་མཚོ་ཆུ་ལྷའི་གཟུགས་འཛིན་པ་སྐུ་
མདོག་དཀར་པོ་གདེངས་ཀ་བརྒྱད་པ། གཡས་ན་པདྨ་བསྣམས་པ། གཡོན་ན་སྦྲུལ་གྱི་ཞགས་པ་བསྣམས་པའོ། །ནུབ་བྱང་གི་མཚམས་སུ་པདྨ་ཆེན་པོ་ཉི་མ་སྐུ་མདོག་དམར་པོ་ཕྱག་གཡས་ན་པདྨ་བསྣམས་པ། གཡོན་ན་པདྨའི་སྟེང་ན་ཉི་མའི་དཀྱིལ་འཁོར་བསྣམས་པ་གཞག་པར་བྱའོ། །བྱང་
ཤར་མཚམས་སུ་པདྨ་ཆེན་པོ་རླུང་གི་གཟུགས་འཛིན་པར་མཛད་པ། སྐུ་མདོག་ནག་པོ་ཕྱག་གཡས་ན་བ་དན་བསྣམས་པ། གཡོན་ན་པདྨ་བསྣམས་པ་བྲི་བར་བྱའོ། །ལྷག་མ་རྣམས་ནི་སྔར་སྨྲས་པ་བཞིན་ནོ། །འདིར་ལྷ་ཐམས་ཅད་ཀྱི་སྙིང་པོ་ནི་ཧྲཱིཿཞེས་བྱ་བ་ཡིན་ནོ། །དེ་ལ་པདྨ་ཆེན་པོ་ཆགས་པའི་

59-1-163b

འདོད་ཆགས་ནི་བྱང་ཆུབ་ཆེན་པོའི་མཚན་ཉིད་ཅན་གྱི་སེམས་ཀྱི་ངོ་བོ་ཉིད་ཀྱི་དེ་བཞིན་ཉིད་དང་། དོན་ཐམས་ཅད་ལ་ཆགས་པ་ཉིད་དང་། དེ་སྟོན་པའི་མཚན་མ་ནི་འདོད་ཆགས་ཀྱི་མཚན་མ་བུད་མེད་ཀྱི་གཟུགས་ཞེས་བྱ་བ་བུད་མེད་ཀྱི་ལུས་ཏེ། དེས་ནི་དེའི་ངོ་བོ་ཉིད་དུ་སྟོན་ཏེ། བུད་མེད་
ཆགས་པས་འགྲོ་བ་བདེ་བྱེད་ཕྱིར། །ཞེས་བཤད་པའི་ཕྱིར་རོ། །པདྨ་ཆེན་པོ་གཏུམ་པའི་དབང་ཕྱུག་ནི་ཞེ་སྡང་སྟེ། བྱང་ཆུབ་ཀྱི་སེམས་ཆེན་པོ་དེས་གདུག་པ་རྣམས་ལ་སྡང་བ་ནི་བྱང་ཆུབ་ཀྱི་སེམས་ཆེན་པོ་ཞེས་བྱ་བའི་ཆོས་ཉིད་དེ་སྟོན་པའི་བྱང་ཆུབ་ཀྱིས་ཞེ་སྡང་བཟློག་པར་འགྱུར་ཏེ། དེའི་
མཚན་མ་ནི་སྦྲུལ་གྱི་གཟུགས་ཞེ་སྡང་ངོ་བོ་ཉིད་མེད་པར་སྟོན་པ་སྟེ། ཞེ་སྡང་ནི་དྲག་པོའོ་ཞེས་གསུངས་པའི་ཕྱིར་རོ། །པདྨ་ཆེན་པོ་ནག་པོ་ནི་གཏི་མུག་སྟེ། བྱང་ཆུབ་ཀྱི་སེམས་ཆེན་པོའི་མཚན་ཉིད་ཅན་དེ་ལ་ལྟ་བ་དྲུག་ཅུ་རྩ་གཉིས་རྣམ་པར་རྟོག་པས་དབང་ཕྱུག་ལ་སོགས་པ་ཡོངས་སུ་བརྟགས་པས་
གདུལ་བྱ་རྣམས་ཡོངས་སུ་འཁྲུལ་པར་གྱུར་པ་ལ་དེ་རྣམས་ཀྱི་དངོས་པོ་ལ་མངོན་པར་ཞེན་པ་སྤང་བར་བྱ་བའི་ཕྱིར་གཏི་མུག་མཉམ་པ་ཉིད་སྟོན་པར་མཛད་པས་དེའི་ཚུལ་གྱིས་ན་གཏི་མུག་ལ་ཁྱབ་འཇུག་ཅེས་བཤད་དོ། །དེའི་མཚན་མ་ནི་ཕག་གི་གཟུགས་ཏེ། ཆོས་ཉིད་དེ་སྟོན་པར་མཛད་པའོ། །མི་
མཇེད་ཀྱི་བདག་པོ་ཚངས་པ་ནི་ཐར་པ་སྟེ། ཀུན་དུ་དགའ་བ་ཚངས་པའི་བཞི། །ཞེས་ཟེར་བའི་ཕྱིར་རོ་ཞེས་བཤད་དོ། །དེའི་ཕྱིར་དེའི་མཚན་མ་ནི་པདྨ་སྟེ། དེས་དྲི་མ་ཐམས་ཅད་དང་བྲལ་བ་སྟོན་པའི་ཕྱིར་རོ། །དེ་ལྟར་མཚན་མ་དེ་རྣམས་ཀྱིས་མཚོན་པའི་དོན་བཤད་པས་གདུལ་བྱ་རྣམས་ཀྱིས་འདོད་ཆགས་ལ་
སོགས་པའི་མཉམ་པ་ཉིད་རྣམ་པར་བསྒོམས་ནས་ཐར་པ་ཆེན་པོའི་གྲོང་ཁྱེར་གྱི་སྒོ་འཇིག་རྟེན་ལས་འདས་པའི་དབང་པོ་ལྔའི་ངོ་བོ་ཉིད་རྟོགས་ནས། ཐར་པ་ཆེན་པོའི་གྲོང་ཁྱེར་བྱང་ཆུབ་ཆེན་པོའི་སེམས་ལ་སོགས་པའི་ངོ་བོ་ཉིད་མངོན་སུམ་དུ་བྱེད་པར་འགྱུར་ཏེ། དེ་བས་ན་འདི་དག་ནི་སྒོ་རྣམས་སུ་བྲི་བར་
བྱའོ། །དེ་ནས་གོས་དཀར་པོ་ཞེས་བྱ་བ་ལ་སོགས་པས་དེ་ལྟར་དཀྱིལ་འཁོར་བྲིས་ནས་དེའི་རྗེས་ཐོགས་ཉིད་ལ་སློབ་དཔོན་རས་དཀར་པོ་ལ་པདྨའི་རྡོ་རྗེ་གནོད་སྦྱིན་ཡོངས་སུ་བཟླས་པ་དེས་སྨད་གཡོགས་དང་། སྟོད་གཡོགས་དང་། གདོང་གཡོགས་བྱས་ལ་ཇི་ལྟ་བ་བཞིན་དུ་ཞུགས་པའི་པདྨའི་རིགས་

59-1-164a

ཀྱི་སློབ་དཔོན་ནི་འདི་ལྟར་རང་ཉིད་འཇུག་པར་འགྱུར་རོ། །དེ་ནས་ཞེས་བྱ་བ་ལ་སོགས་པ་ནི་གོ་སླའོ། །ཇི་ལྟར་པདྨ་དམར་པོ་འདི། །ཞེས་བྱ་བ་ལ་སོགས་པ་ལ་ཇི་ལྟར་འདམ་གྱི་ནང་ན་གནས་ཀྱང་འདམ་གྱིས་མི་གོས། རང་བཞིན་གྱིས་ཁ་དོག་དམར་པོའི་པདྨ་དམར་པོ་ནི་རང་བཞིན་
གྱིས་ཁ་དོག་དམར་པོ་ལ་རང་གི་ཉེས་པ་ཆུ་ལས་བྱུང་བའི་འདམ་ལ་སོགས་པས་གོས་པར་མི་འགྱུར་རོ། །གང་ན་ཞེ་ན་འདམ་གྱི་ནང་ནའོ། །དེ་བཞིན་དུ་རྣམ་པར་དག་པའི་བྱང་ཆུབ་སེམས་དཔའ་རྣམས་ནི་བག་ཆགས་དང་བཅས་པ་ཁམས་གསུམ་ན་སྤྱོད་པའི་ཉོན་མོངས་པ་རྣམས་མེད་པར་ཐུགས་
རྗེ་ཆེན་པོའི་འདོད་ཆགས་ཀྱི་ཆགས་པ་ནི་འདོད་ཆགས་དང་། ཞེ་སྡང་དང་། གཏི་མུག་ལ་སོགས་པ་འཁོར་བའི་མཚོའི་དབུས་ན་འཁོར་བ་ནས་བྱུང་བ་ཉེས་པ་རྣམས་ཀྱིས་མི་གོས་པས་ན་དེ་ལྟར་ཞེས་བྱའོ། །དེ་བཞིན་ཞེས་བྱ་བའི་སྒྲ་གཉིས་པ་ནི་ངེས་པར་གཟུང་བ་སྟེ། ཇི་ལྟར་པདྨ་འདམ་གྱི་ནང་ན་
དམར་དུ་ཟིན་ཀྱང་ཆུའི་ཉེས་པས་མི་གོས་སོ། །དེ་བཞིན་དུ་བྱང་ཆུབ་སེམས་དཔའ་བག་ཆགས་དང་བཅས་པའི་ཉོན་མོངས་པ་དང་བྲལ་བ་རྣམས་ནི་འཁོར་བའི་འདམ་གྱི་ནང་དུ་སྐྱེས་ཤིང་ཐུགས་རྗེ་ཆེན་པོའི་ཆགས་པས་ཆགས་སུ་ཟིན་ཀྱང་འཁོར་བའི་ཉེས་པས་གོས་པར་མི་འགྱུར་རོ། །དེ་ལྟར་ཆོས་
རྣམས་བསྒོམས་ན་ནི། །ཞེས་བྱ་བ་ནི་ཇི་ལྟར་ཡོངས་སུ་དག་པའི་བྱང་ཆུབ་སེམས་དཔའ་རྣམས་ནི་ཐུགས་རྗེ་ཆེན་པོའི་ཆགས་པས་ཆགས་ཀྱང་འདོད་ཆགས་ལ་སོགས་པའི་འཁོར་བའི་ཆུའི་ཉེས་པ་ལས་ངེས་པར་གྲོལ་བ་ཡིན་ནོ། །དེ་བཞིན་དུ་ལས་དང་པོ་པའི་བྱང་ཆུབ་སེམས་དཔའ་རྣམས་ཀྱིས་ཆོས་
ཐམས་ཅད་ངོ་བོ་ཉིད་ཀྱིས་དག་པའོ་ཞེས་བསྒོམ་ཞིང་། ཡང་དང་ཡང་དུ་མངོན་སུམ་དུ་བྱེད་ལ། སྙིང་རྗེ་ཆེན་པོའི་ཆགས་པས་ཆགས་ན་བློ་ལྡན་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པ་ཤེས་པ་དང་ལྡན་པའོ། །ཉོན་མོངས་པ་ཅན་དུ་གྱུར་ཀྱང་ཞེས་བྱ་བ་ནི་འཁོར་བའི་ཉོན་མོངས་ཅན་དང་། ཉེ་བའི་ཉོན་
མོངས་པ་ལ་སོགས་པ་དང་ལྡན་དུ་ཟིན་ཀྱང་ངོ་། །ཉོན་མོངས་ཀུན་ལས་རྣམ་གྲོལ་ནས། །མྱུར་དུ་བྱང་ཆུབ་མཆོག་ཐོབ་འགྱུར། །ཞེས་བྱ་བ་ནི་ཉོན་མོངས་པ་ཐམས་ཅད་ལས་རྣམ་པར་གྲོལ་བའི་སྒོམ་པའི་རང་བཞིན་གྱི་ཤེས་རབ་ཀྱི་ཕ་རོལ་ཏུ་ཕྱིན་པ་རྟོགས་པས་མྱུར་བ་ཉིད་དུ་མངོན་པར་རྫོགས་

59-1-164b

པར་སངས་རྒྱས་ཤིང་། སངས་རྒྱས་ཉིད་མཐོང་བར་འགྱུར་བའོ། །ཏིང་ངེ་འཛིན་འདི་ལ་གཟིགས་པས་ཞེས་བྱ་བ་ནི་མངོན་སུམ་དུ་བྱེད་པས་སོ། །དེ་བཞིན་གཤེགས་པ་ཐམས་ཅད་ནི་རྣམ་པར་སྣང་མཛད་ལ་སོགས་པ་སྟེ། དེ་བསྒོམ་པ་དང་ལྡན་པའི་སེམས་དང་སེམས་ལས་བྱུང་བ་ནི་དབང་ཕྱུག་
ཉིད་དུ་འཐོབ་པར་འགྱུར་ཞིང་རྟོག་པར་འགྱུར་བ་སྟེ། གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བས་རང་དབང་དུ་སྤྱོད་པར་མཛད་པའི་ཕྱིར། དེ་ནས་བཅོམ་ལྡན་འདས་སྤྱན་རས་གཟིགས་དབང་ཕྱུག་ཅེས་མཚན་བཏགས་སོ་ཞེས་བྱ་བ་ནི་རང་དབང་དུ་གྱུར་པ་ཐུགས་སུ་ཆུད་པ་དེས་དེའི་རྗེས་
སུ་འགྲོ་བའི་དོན་ལས། བཅོམ་ལྡན་འདས་སྤྱན་རས་གཟིགས་དབང་ཕྱུག་ཅེས་མཚན་བཏགས་པའོ། །དེ་ནས་བརྩམས་ཏེ་ཞེས་བྱ་བ་ནི་བསྒོམས་པའི་དུས་ནས་ཉེ་བར་བཟུང་ནས་སོ། །བདག་ཉིད་ཀྱི་དངོས་པོ་ཐམས་ཅད་ཤིན་ཏུ་ཡོངས་སུ་དག་པ་ཞེས་བྱ་བ་ནི་སྐུ་དང་གསུང་དང་ཐུགས་རྡོ་རྗེ་རྣམ་
པར་དག་པ་དེ་ཐུགས་སུ་ཆུད་པ་དང་། རྗེས་སུ་མཐུན་པའི་ལུས་དང་ངག་དང་ཡིད་ཡོངས་སུ་ཐོབ་པས་སོ། །དུས་ཇི་སྲིད་ཅིག་གིས་བདག་ཉིད་ཀྱི་དངོས་པོ་ཐམས་ཅད་ཡོངས་སུ་དག་པར་འགྱུར་ཞེ་ན། བྱང་ཆུབ་ཀྱི་སྙིང་པོའི་བར་དུ་ཞེས་བྱ་བ་གསུངས་ཏེ། ཇི་སྲིད་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་སུམ་དུ་མ་བྱས་པ་དེའི་བར་དུ། དེ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཐོབ་པ་ལ་གེགས་སུ་གྱུར་པའི་སྒྲིབ་པ་དང་ལྡན་པར་མི་འགྱུར་བའོ། །མྱུར་དུ་འཚང་རྒྱ་བ་ཉིད་འཐོབ་པར་འགྱུར་ཏེ་ཞེས་བྱ་བ་ནི་གོ་བར་ཟད་དོ། །སློབ་མ་གཞུག་པའི་ཆོ་ག་རྒྱས་པ་
ཡང་དེ་བཞིན་ནོ་ཞེས་བྱ་བ་ནི། ཇི་ལྟར་སློབ་དཔོན་གྱི་འཇུག་པ་ལ་སོགས་པའི་ཆོ་ག་རྒྱས་པར་བཟླས་མ་ཐག་ཏུ་བཤད་པ་དེ་བཞིན་དུ་པདྨའི་སློབ་མ་རྣམས་ཀྱི་ཡང་ཤེས་པར་བྱ་བའོ་ཞེས་བྱ་བའི་དོན་ཏོ། །ཡེ་ཤེས་ཀྱི་དཀྱིལ་འཁོར་ཞེས་བྱ་བ་ནི་གཏི་མུག་གི་གཉེན་པོའི་ཕྱོགས་སུ་གྱུར་པ་འདོད་ཆགས་
ཐམས་ཅད་རྣམ་པར་དག་པ་ལ་སོགས་པ་ཇི་སྐད་བཤད་པའི་ཡེ་ཤེས་རྣམ་པ་ལྔ་ནི་ཡེ་ཤེས་ཏེ། དེ་ལས་བྱུང་བའི་པདྨའི་རིགས་ཀྱི་དཀྱིལ་འཁོར་ཡང་ཡེ་ཤེས་ཀྱི་དཀྱིལ་འཁོར་རོ། །དེ་ནས་གོས་དཀར་པོ་ཞེས་བྱ་བ་ནས་བརྩམས་ཏེ། འདིའི་བར་གྱི་དོན་ཡང་འདི་ལྟར་ཡང་ཤེས་པར་བྱ་སྟེ། དེ་ལྟར་

59-1-165a

དཀྱིལ་འཁོར་བྲིས་ནས་བཅོམ་ལྡན་འདས་འགྲོ་བ་འདུལ་བའི་སྦྱོར་བས་སྔ་མ་བཞིན་དུ་རྣལ་འབྱོར་ཆེན་པོ་བྱས་ལ། འཇུག་པའི་དམ་ཚིག་གི་ཕྱག་རྒྱས་ཡོངས་སུ་བཟུང་བའི་པདྨའི་མེ་ཏོག་གི་ཡལ་ག་ལས་རྣམ་པར་རྒྱལ་བའི་བུམ་པ་དང་། ལྷ་ཐམས་ཅད་ཀྱི་བུམ་པ་དང་། བུམ་
པ་གང་བ་རྣམས་ཧྲཱིཿཞེས་བྱ་བས་རེ་རེ་ཞིང་ལན་བརྒྱ་རྩ་བརྒྱད་བཟླས་པས་དཀྱིལ་འཁོར་གྱི་སྒོ་བཞི་ཕྱེ་སྟེ། རྡོ་རྗེ་བསྡུས་པ་བྱས་ལ། བཅོམ་ལྡན་འདས་ཀྱི་ཕྱག་རྒྱ་ཆེན་པོ་བསྒོམ་ཞིང་། བཅོམ་ལྡན་འདས་ལ་མཚན་བརྒྱ་རྩ་བརྒྱད་པས་བསྟོད་ལ། གསང་བའི་ལྕགས་ཀྱུ་དང་། ཧྲཱིཿཞེས་བྱ་བས་
བཅོམ་ལྡན་འདས་འཁོར་དང་བཅས་པ་དཀྱིལ་འཁོར་དུ་བཅུག་པ་ལ་རྡོ་རྗེ་གནོད་སྦྱིན་གྱིས་བགེགས་བསྐྲད་དོ། །མཚམས་དང་དཀྱིལ་འཁོར་བཅིང་བ་དང་། ར་བ་དང་དྲ་བ་དག་བྱས་ཏེ་། རྡོ་རྗེ་ཁུ་ཚུར་གྱིས་དཀྱིལ་འཁོར་གྱི་སྒོ་བཞི་བཅིངས་ལ། རྡོ་རྗེ་བསྲུང་བས་བསྲུངས་པ་ཐམས་ཅད་གོ་
ཆ་བསྐོན་ཏེ། ཧྲཱིཿ་ཞེས་བྱ་བས་མཆོད་ཡོན་ཕུལ་ཏེ། དམ་ཚིག་གི་ཕྱག་རྒྱ་དང་། དྲི་དང་དྲྀ་ཤྱ་ཞེས་བྱ་བས་འཁོར་དང་བཅས་པ་བལྟ་བར་བྱས་ཏེ་། ཛཿཧཱུྃ་བཾཾ་ཧོཿ ས་མ་ཡ་སྟྭཾ། ས་མ་ཡ་སྟྭཾ་ཨ་ཧཾ། ཧྲཱིཿཞེས་བྱ་བ་དང་བསྒྲུབ་པར་བྱའོ། །རྡོ་རྗེ་ཐལ་མོ་ཁོང་སྟོང་དུ་སྦྱར་བ་ལས་གུང་མོ་གཉིས་
བསྙམས་ལ། མཐེ་བོང་དང་མཐེའུ་ཆུང་ཕྱེ་སྟེ། པདྨའི་འདབ་མ་དང་འདྲ་བར་བྱ་བ་འདི་ནི་དམ་ཚིག་གི་ཕྱག་རྒྱ་སྟེ། པདྨ་ཆེན་པོའི་ཕྱག་རྒྱ་ཡང་འདི་ཉིད་ཡིན་ནོ། །འཇུག་པའི་དམ་ཚིག་གི་ཕྱག་རྒྱ་པདྨའི་མེ་ཏོག་དང་ལྡན་པ་བཟུང་ལ། དེ་ནས་ལྕེ་ལ་ཧྲཱིཿཞེས་བྱ་བ་ཇི་ལྟ་བ་བཞིན་བསམ་ཞིང་། ལྷ་ཐམས་
ཅད་ཀྱི་ལྗགས་ལ་ཡང་བསམ་པ་འདི་ནི་ཆོས་ཀྱི་ཕྱག་རྒྱའོ། །ཨ་ལས་སྙིང་གར་སྣ་ཚོགས་པདྨ་བསམས་ལ། འགྲོ་བ་འདུལ་བ་ལ་སོགས་པའི་ལས་ཀྱི་ཕྱག་རྒྱ་ཧྲཱིཿཞེས་བྱ་བ་ཟློས་ཤིང་། ལས་ཀྱི་ཕྱག་རྒྱ་བཅིང་བར་བྱ་སྟེ། པདྨའི་ཁུ་ཚུར་བཅིངས་ལ་གཡས་པས་གཡོན་པ་དབྱེ་བ་འདི་ནི་བཅོམ་ལྡན་
འདས་ཀྱི་ལས་ཀྱི་ཕྱག་རྒྱའོ། །གཞན་རྣམས་ཀྱི་ནི་ཕྱག་རྒྱ་ཆེན་པོ་ཉིད་དོ། །དེ་ནས་ཧྲཱིཿཞེས་བྱ་བས་རང་གི་སྙིང་གར་པདྨ་བསམས་ལ། ཕྱག་རྒྱ་ཆེན་པོ་བྲིས་པའི་རྗེས་སུ་མཐུན་པར་ཧྲཱིཿཞེས་བྱ་བ་ཉིད་ཟློས་ཤིང་བཅིང་བར་བྱའོ། །དེ་ནས་བཅོམ་ལྡན་འདས་འོད་དཔག་ཏུ་མེད་པའི་དབང་བསྐུར་བ་དང་པངྨའི་

59-1-165b

ཕྲེང་བའི་དབང་བསྐུར་བ་བཅོམ་ལྡན་འདས་འཁོར་དང་བཅས་པ་ལ་ཕུལ་ལ། སྔ་མ་བཞིན་དུ་མཆོད་ཡོན་དང་། བུམ་པ་དང་། བུམ་པ་གང་བ་དང་། ན་བཟའ་བླ་རེ་ལ་སོགས་པ་ཡང་ཕུལ་ཏེ། མེ་ཏོག་གི་ཤིང་ལ་སོགས་པ་མཆོད་པ་རྣམ་པ་ལྔས་མཆོད་པ་བྱས་ལ། ཕྱི་རོལ་དུ་གླུ་དང་གར་དང་རོལ་
མོ་དང་རྟ་དང་གླང་པོ་ཆེ་དང་། བ་ལང་གི་ཁྱུ་རྣམས་ཀྱིས་ཀྱང་མཆོད་པ་བྱེད་དུ་གཞུག་གོ། །དེ་ནས་མཆོད་པ་རྣམ་པ་བཅུ་གཉིས་ཀྱིས་ཡང་དག་པར་མཆོད་ལ། ཨོཾ་ལས་རིན་པོ་ཆེ་སྣ་བདུན་དང་། དཔག་བསམ་གྱི་ཤིང་དང་ཁ་ཟས་རོ་བརྒྱ་པ་ལ་སོགས་པའི་བཀོད་པ་སྤྲུལ་ལ། དེ་འདིས་
དབུལ་བར་བྱ་སྟེ། ཕྱག་འཚལ་བའི་ཐལ་མོ་དཔྲལ་བའི་ཕྱོགས་སུ་སྦྱར་ལ། ཨོཾ་སརྦ་བིཏྤཱུ་ར་པཱུ་ར། སུ་ར་སུ་ར་ཨཱ་བརྟ་ཡ་ཨཱ་བརྟ་ཡ་ཧོཿ། དེ་ནས་ཕྱི་རོལ་དུ་གཏོར་མ་སྦྱིན་ལ། རས་དཀར་པོ་ལ་རྡོ་རྗེ་གནོད་སྦྱིན་གྱིས་ཡོངས་སུ་བཟླས་ཏེ་གཅིག་གིས་སྨད་གཡོགས་བྱ། གཉིས་པས་སྟོད་གཡོགས་
བྱས་ལ། ཡང་གཅིག་ལ་རྟ་མགྲིན་ལ་སོགས་པ་སྒོ་སྲུང་བཞིའི་སྙིང་པོ་བཟླས་པས་རང་གི་གདོང་གཡོགས་ནས། ཕྱག་འཚལ་བ་ལ་སོགས་པ་སྔོན་དུ་འགྲོ་བས་དེ་བཞིན་དུ་སྡོམ་པ་བླངས་ལ། བྱང་ཆུབ་ཏུ་སེམས་བསྐྱེད་དེ། རྡོ་རྗེ་པདྨ་རྡོ་རྗེ་ལྟེ་བ་ལྟ་བུའི་སྙིང་གར་པདྨའི་ཁུ་ཚུར་བཞག་ལ། སྔ་མ་
བཞིན་དུ་སྒོ་ལ་མངོན་པར་ཕྱོགས་ནས་གནས་པའི་དབུས་སུ་བུམ་པའི་ཆུས་བདག་ཉིད་དབང་བསྐུར་ཏེ། འཇུག་པའི་དམ་ཚིག་གི་ཕྱག་རྒྱས་ཇི་སྐད་དུ་བཤད་པའི་མཚན་ཉིད་ཅན་པདྨའི་མེ་ཏོག་དང་བཅས་པ་བཅིངས་ལ། དེ་ཉིད་ཀྱིས་མེ་ཏོག་གི་ཕྲེང་བ་བླངས་ནས། བཛྲ་བཛྲ་ཧྲཱིཿཞེས་ཟློས་ཤིང་དཀྱིལ་
འཁོར་དུ་འཇུག་པར་བྱའོ། །དེ་ནས་ཤར་ཕྱོགས་ཀྱི་སྒོར་ཞུགས་ལ། ཨོཾ་ཧྱ་གྲྀ་བ་མ་ཧཱ་པདྨ་ཨཾ་ཀུ་ཤ་ཨཱ་ཀཪྵ་ཡ་ཤཱི་གྷྲཾ་སརྦ་པདྨ་ས་མ་ཡ་པདྨ་ཨཾ་ཀུ་ཤ་དྷ་ར་ཧཱུྃ་ཛཿཞེས་བྱ་བ་དང་། རྟ་མགྲིན་གྱིས་བདག་ཉིད་དགུག་པར་བྱའོ། །དེ་ནས་ལྷོ་ཕྱོགས་ཀྱི་སྒོ་ནས་དེ་བཞིན་དུ་ཞུགས་ཏེ། ཨོཾ་ཨ་མོ་གྷ་པདྨ་པཱ་ཤ་ཀྲོ་དྷ་
ཨཱ་ཀཪྵ་ཡ་པྲ་བེ་ཤ་ཡ་མ་ཧཱ་པ་ཤུ་པ་ཏི་ཡ་མ་བ་རུ་ཎ་ཀུ་བེ་ར་བྲཏྨ་བེ་ཤ་དྷ་ར་སརྦ་པདྨ་ཀུ་ལ་ས་མ་ཡཱཾ་ཧཱུྃ་ཧཱུྃ་ཞེས་བྱ་བ་དང་། ཡང་བཅོམ་ལྡན་འདས་དོན་ཡོད་པའི་ཞགས་པས་གཞུག་པར་བྱའོ། །ཡང་ནུབ་ཕྱོགས་ཀྱི་སྒོ་ནས་ཞུགས་ལ། ཨོཾ་པདྨ་སྥོ་ཊ་བནྡྷ་སརྦ་པདྨ་ཀུ་ལ་ས་མ་ཡཱ་ཤཱི་གྷྲཾ་ཧཱུྃ་བཾ་ཞེས་བྱ་བ་དང་། 

59-1-166a

པདྨའི་ལྕགས་སྒྲོག་གིས་བཅིང་བར་བྱའོ། །དེ་ནས་བྱང་ཕྱོགས་ཀྱི་སྒོ་ནས་ཞུགས་ཏེ། ཨོཾ་ཥ་ཎ་མུ་ཁ་ན་ཀྐུ་མཱ་ར་བེ་ཤ་དྷ་ར་པདྨ་ཥ་ན་ཏ་ཡ། ཨཱ་བེ་ཤ་ཡ་སརྦ་པདྨ་ཀུ་ལ་ས་མ་ཡཱཾ་སརྦ་མུ་དྲ་བནྡྷ་ཡ། སརྦ་སིདྡྷ་ཡོ་མེ་པྲ་ཡཙྪ་པདྨ་ཨཱ་བེ་ཤ་ཡ་ཨ་ཨ་ཨ་ཨ་ཞེས་བྱ་བ་དང་། པདྨའི་
འབེབས་པས་བདག་ཉིད་དབང་དུ་བྱའོ། །ཡང་ཤར་ཕྱོགས་ཀྱི་སྒོ་ནས་ཞུགས་ལ། མ་ཧཱ་ར་ཏ་སུ་དྲྀ་ཌྷ། སུ་ཏོ་ཥྱོ་སུ་སུ་ཁོ་བཛྲ་སཏྭ་སིདྡྷྱ་མཱཾ་ཞེས་བརྗོད་དོ། །དེ་ནས་རྣམ་པར་སྒེག་པའི་རྡོ་རྗེས་ཕྱག་བྱས་ལ། དཀྱིལ་འཁོར་ལ་བསྐོར་བ་ལན་གསུམ་བྱས་ཏེ། བཅོམ་ལྡན་འདས་ཀྱི་སྤྱན་སྔར་
འདུག་ལ་འདི་སྐད་ཅེས་བརྗོད་པར་བྱའོ། །མ་ཧཱ་རཱ་ག་མ་ཧཱ་སཽ་ཁྱ། མ་ཧཱ་བཛྲ་མ་ཧཱ་དྷ་ན། མ་ཧཱ་ཛྙ་ན་མ་ཧཱ་ཀརྨ་བཛྲ་སཏྭཱ་ཨཱདྱ་སིདྡྷྱ་མཱཾ། ཡང་འདི་སྐད་བརྗོད་པར་བྱའོ། །ཛཿཧཱུྃ་བཾ་ཧོཿ པྲ་སིདྡྷྱ་མཱཾ། དེ་ནས་རྡོ་རྗེ་ཆུ་འཐུངས་ལ་བདག་ཉིད་འཇུག་པར་བྱ་སྟེ། དང་པོ་ཁོ་ནར་ས་མ་ཡ་སྟྭཾ་ཞེས་བརྗོད་ལ་
སེམས་མ་རྡོ་རྗེ་བཅིང་བར་བྱའོ། །དེ་ནས་ཨོཾ་པདྨ་སྥོ་ཊ་ཨ་བྷི་ཏིཥྛ་ཨ་ཞེས་བརྗོད་དེ། སེམས་མ་རྡོ་རྗེའི་ཕྱག་རྒྱ་སྦྱར་ལ་ཨ་ཞེས་བྱ་བ་ལན་བརྒྱ་བཟླས་པར་བྱའོ། །ཡང་ཧྲཱིཿཨ་ཞེས་ལན་བརྒྱ་བརྗོད་པར་བྱ་སྟེ། དེས་ནི་བབ་པར་འགྱུར་རོ། །དེ་ནས་ཧྲཱིཿ་ཞེས་བྱ་བས་མེ་ཏོག་དོར་བར་བྱའོ། །དེ་ནས་དེས་བླང་
ལ་དེ་ཉིད་དང་རང་གི་མགོ་ལ་བཅིང་བར་བྱའོ། །དེ་ནས་དེ་ཉིད་ཀྱིས་གདོང་གཡོགས་དགྲོལ་བར་བྱའོ། །དེ་ནས་དེ་ཉིད་ཟློས་ཤིང་། ཤར་ཕྱོགས་ཀྱི་ཆ་ནས་བརྩམས་ཏེ་བལྟ་བར་བྱའོ། །དེ་ནས་འཇུག་པའི་ཕྱག་རྒྱ་བཅིངས་ནས། ཏིཥྛ་བཛྲ་ཞེས་བྱ་བ་ལ་སོགས་པས་རང་གི་སྙིང་གར་དགྲོལ་བར་བྱའོ། །
དེ་ནས་འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་ལ་རྡོ་རྗེའི་ལྟ་བས་བལྟ་ཞིང་། ཇི་སྲིད་བཅོམ་ལྡན་འདས་ཀྱིས་ཞལ་བསྟན་ནས་རང་གི་དངོས་གྲུབ་སྩོལ་བར་མཛད་པ་དེ་སྲིད་ཀྱི་བར་དུ་བཟླས་བརྗོད་བྱའོ། །དེ་ནས་རྡོ་རྗེ་ཐལ་མོ་བསྐོར་བ་ཤིས་པ་བརྗོད་པ་འདོན་པའི་ཚུལ་དུ་
རང་གི་སྙིང་གར་བཞག་ལ། མཚན་བརྒྱ་རྩ་བརྒྱད་པས་བསྟོད་དོ། །རྡོ་རྗེ་པདྨ་ལ་སོགས་པས་གསང་བའི་མཆོད་པ་བཞིས་བཅོམ་ལྡན་འདས་ཡང་དག་པར་མཆོད་ལ། གླུ་དང་རོལ་མོའི་མཆོད་པ་རྣམས་ཀྱིས་ཡང་དག་པར་མཆོད་པར་བྱའོ། །དེ་ནས་ཡང་ཕྱག་རྒྱ་ཆེན་པོ་བཅིངས་ལ། བཅོམ་ལྡན་

59-1-166b

འདས་ལ་རྡོ་རྗེའི་ལྟ་བས་བལྟ་ཞིང་རྡོ་རྗེ་ཐལ་མོ་བསྐོར་བས་ཕྱག་བྱས་ལ། མེ་ཏོག་ལ་སོགས་པའི་དབང་བསྐུར་བ་རྣམས་ཀྱང་བླང་བར་བྱ་སྟེ། དེ་ལ་དང་པོ་ཁོ་ནར་དམ་ཚིག་གི་ཕྱག་རྒྱས་ཡོངས་སུ་བཟུང་བའི་མེ་ཏོག་གི་ཡལ་ག་ལས་རྣམ་པར་རྒྱལ་བའི་བུམ་པ་ལས་ཨོཾ་མ་ཧཱ་སུ་ཁ་ཞེས་བྱ་བ་ལ་
སོགས་པ་སྔར་བཤད་པའི་སྔགས་ལན་ཉི་ཤུ་རྩ་གཅིག་བཟླས་བརྗོད་བྱའོ། །དེ་ནས་བདག་ཉིད་འགྲོ་བ་འདུལ་བར་བྱིན་གྱིས་བརླབས་ལ། དམ་ཚིག་གི་ཕྱག་རྒྱས་རྣལ་འབྱོར་ཆེན་པོ་ལས་གསུངས་པའི་གནས་སུ་རང་གི་ལུས་ལ་འགྲོ་བ་འདུལ་བ་ལ་སོགས་པ་ལེགས་པར་བཀོད་ནས། ཕྱིའི་དཀྱིལ་
འཁོར་གྱི་ནང་དུ་སྣ་ཚོགས་པདྨའི་སྟེང་དུ་འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ལ་འདུག་སྟེ། མེ་ཏོག་ལ་སོགས་པས་བདག་ཉིད་ཡང་དག་པར་མཆོད་ནས། མཆོད་ཡོན་བླངས་ལ། མཚན་བརྒྱ་རྩ་བརྒྱད་ཀྱིས་ཡང་དག་པར་བསྟོད་དེ། པདྨའི་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་
ཆུ་བླངས་ལ། ཨོཾ་བཛྲ་ཨ་བྷི་ཥིཉྩ་ཧྲཱིཿཞེས་བྱ་བ་འདིས་བདག་ཉིད་དབང་བསྐུར་བར་བྱ་ཞིང་། ཆུ་དེ་བཏུང་བར་ཡང་བྱའོ། །དེ་ནས་འོད་དཔག་ཏུ་མེད་པའི་དབང་བསྐུར་བའི་ཕྱག་རྒྱས་དབང་བསྐུར་ལ། ལུགས་མའམ། བརྡུངས་པའམ། བྱས་པའམ། བྲིས་པའི་དབུ་རྒྱན་འོད་དཔག་ཏུ་མེད་པའི་ཕྲེང་
བ་དང་ལྡན་པས། རྡོ་རྗེ་རིན་པོ་ཆེ་དང་། འོད་དཔག་ཏུ་མེད་པའི་པདྨའི་ཕྲེང་བའི་སྔགས་ཡོངས་སུ་བཟླས་པས་ཡང་བདག་ཉིད་དབང་བསྐུར་བར་བྱ་ཞིང་། དར་དཔྱངས་བཅིང་བ་ཡང་བྱས་ལ། རྡོ་རྗེ་པདྨ་དང་། པདྨའི་དྲིལ་བུ་བླངས་ལ། བདག་པོ་དང་། མིང་གི་དབང་བསྐུར་བས་བདག་ཉིད་
དབང་བསྐུར་ཏེ། དངོས་གྲུབ་ཀྱི་རྡོ་རྗེའི་བརྟུལ་ཞུགས་ཀྱི་ཆོ་ག་འདི་གཟུང་བར་བྱའོ། །གཡོན་པའི་པདྨའི་ཁུ་ཚུར་གྱིས་རྡོ་རྗེ་པདྨ་བླངས་ལ་བསྙེམས་པས་བཟུང་སྟེ། ལག་པ་གཡས་པས་རང་གི་སྙིང་གའི་ཕྱོགས་སུ་ཁ་འབྱེད་ཅིང་། བཅོམ་ལྡན་འདས་རྡོ་རྗེ་བརྟུལ་ཞུགས་རྩོལ་བར་མཛད་བཞིན་
པར་ཡང་བསམས་ལ། ཨོཾ་པདྨ་ཧ་སྟ་བཛྲ་དྷརྨ་ཏཱཾ་ཕ་ལ་ཡ་ཞེས་བརྗོད་པར་བྱའོ། །ཡང་འདི་སྐད་ཅེས་ཀྱང་བརྗོད་པར་བྱ་སྟེ། རྡོ་རྗེ་ཆོས་ཉིད་དེ་ཇི་ལྟ་བུ་ལགས། དེ་ནས་བཅོམ་ལྡན་འདས་ཆོས་ཉིད་སྟོན་པར་མཛད་པར་བསམ་པར་བྱ་སྟེ། ཇི་ལྟར་པདྨ་དམར་པོ་འདི། །མཚོན་གྱི་ཉེས་པས་མི་

59-1-167a

གོས་ཏེ། །འདམ་གྱི་ནང་ན་དག་པ་སྟེ། །འདོད་ཆགས་ཞེ་སྡང་སོགས་དེ་བཞིན། །ཞེས་བྱ་བ་སྟེ། འདི་ནི་འདིར་ཆོས་ཉིད་དོ། །དེ་ལྟར་བརྟུལ་ཞུགས་བླངས་ནས། མེ་ཏོག་ལ་སོགས་པ་ཕྱིའི་མཆོད་པ་རྣམས་ཀྱིས་བདག་ཉིད་ཡང་དག་པར་མཆོད་ལ། པདྨའི་
མཚོན་ཆ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཀྱིས་ཡང་དག་པར་མཆོད་ནས། དེ་ཉིད་ཀྱིས་ནི་པདྨ་བཟུང་། །ཞེས་བྱ་བ་ལ། དེ་ཁོ་ན་ཉིད་འདི་ཡིན་ཏེ་བཅོམ་ལྡན་སངས་རྒྱས་འཕགས་པ་ནི། །སྤྱན་རས་གཟིགས་ཀྱི་དབང་ཕྱུག་སྟེ། །དག་པའི་རོལ་མོས་གར་མཛད་ཅིང་། །གདུལ་
བ་ཡི་ནི་ཐབས་རྣམས་མཛད། །ཆོས་ཀྱི་དྲིལ་བུ་དཀྲོལ་བར་བྱ། །ཞེས་བྱ་བ་ནི་འདི་ཡིན་ཏེ། དེ་ལྟར་པདྨ་དམར་པོ་ནི། །མཚོན་གྱིས་ཉེས་དང་གནས་པ་ཡི། །ཉེས་པ་དུ་མས་མི་གོས་ཏེ། །དེ་བཞིན་ཁམས་གསུམ་དག་པའོ། །དམ་ཚིག་གི་མི་ཕྱག་རྒྱ་ཆེར། །བྱིན་གྱིས་བརླབས་ནས་
སྙིང་པོ་བཟླ། །ཞེས་བྱ་བ་ནི་འདི་ཡིན་ཏེ། བྱ་བ་གང་དང་གང་གིས་ནི། །འགྲོ་བ་རྣམས་ནི་འདུལ་བར་འགྱུར། །པདྨ་དག་པར་སྦྱོར་བའི་བདག །དེ་དང་དེས་ནི་སྦྱར་བར་བྱ། །ཞེས་བྱ་བ་འདི་དམ་ཚིག་གོ། །དེ་ནས་བཅོམ་ལྡན་འདས་ལ་ཕྱག་བཞི་བྱས་ཏེ། སྙིང་པོ་བླངས་ལ་ཚིགས་སུ་བཅད་པ་ལྔ་
པས་རྗེས་སུ་གནང་བ་དང་། གཟེངས་བསྟོད་པ་དང་། ལུང་བསྟན་པ་བཅོམ་ལྡན་འདས་ལས་མནོས་ཏེ། ཡང་བདག་ལ་བྱིན་གྱིས་བརླབས་པ་ལ་སོགས་པ་བྱས་ནས། ཇི་ལྟར་འདོད་པའི་བཟླས་བརྗོད་བྱས་ལ། བཅོམ་ལྡན་འདས་ལ་ཕྱག་བྱས་ཏེ། འདི་སྐད་ཅེས་བརྗོད་དོ། །བདག་མིང་འདི་
ཞེས་བྱ་བ་ཡི། །པདྨའི་སློབ་དཔོན་དཀའ་ཐུབ་ཆེ། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བགྱི། །དེ་ནས་སློབ་མ་གཞུག་པར་བྱ་སྟེ། སློབ་དཔོན་གྱི་ལས་ཀྱི་ཆོ་ག་རྒྱས་པའོ། །དེ་ནས་སྡོམ་པ་དབོག་པར་འོས་པའི་སློབ་མ་སྔར་བཤད་པའི་ཚུལ་གྱིས་སྡོམ་པ་
འཛིན་དུ་བཅུག་ལ། བྱང་ཆུབ་ཏུ་སེམས་བསྐྱེད་དུ་བཅུག་སྟེ། དེའི་སྙིང་གར་དེ་བཞིན་དུ་པདྨ་བསྐྱེད་ལ། ད་འགྲོ་བ་འདུལ་བར་བྱིན་གྱིས་བརླབས་ནས། སྤོས་དང་མེ་ཏོག་ལ་སོགས་པས་མཆོད་དེ། ཡོན་གྱི་མཆོག་བླངས་ལ་སྒོའི་ཕྱོགས་སུ་བལྟས་ནས་གནས་པའི་བུམ་པས་དབང་བསྐུར་ནས། 

59-1-167b

བདག་ཉིད་འཇུག་པའི་ཆོ་གས་བཅུག་ལ། ཆོ་ག་ཐམས་ཅད་རྗེས་སུ་སྤྱད་པར་བྱའོ། །སློབ་མ་གཞུག་པ་ལ་སོགས་པའི་ཆོ་ག་རྒྱས་པ་རྫོགས་སོ།།      །།འགྲོ་བ་འདུལ་བའི་དཀྱིལ་འཁོར་འདི་ཉིད་དུ་དམ་ཚིག་དང་དབང་བསྐུར་བ་ཐོབ་པ་རྣམས་ལ། སློབ་དཔོན་གྱིས་འདི་ལས་གསུངས་པའི་
དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། སྒྲུབ་པ་པོ་ཞེས་བྱ་བ་ལ་སོགས་པ་གསུངས་ཏེ། སྒྲུབ་པ་ལ་ནི་དེ་བཞིན་དུ་རས་ཀྱི་རི་མོ་གཉིས་ཀྱིས་དངོས་གྲུབ་ཐམས་ཅད་ཐོབ་པར་འགྱུར་རོ་ཞེས་བྱ་བ་ནི་དཀྱིལ་འཁོར་དུ་ཞུགས་ལ་སྙིང་པོ་བླངས་ནས་ཟླ་བ་ཉ་
ནས་བརྩམས་ཏེ། བཅོམ་ལྡན་འདས་འགྲོ་བ་འདུལ་བ་རས་ལ་སོགས་པ་ལ་བྲིས་པའི་སྐུ་མདུན་དུ་བཞག་སྟེ། དེའི་སྦྱོར་བས་མདུན་དུ་སྤྱན་དྲངས་ནས། ཆོ་ག་ཐམས་ཅད་རྗེས་སུ་སྤྱད་དེ། དེའི་དམ་ཚིག་གི་ཕྱག་རྒྱ་བཅིངས་ནས། བཅོམ་ལྡན་འདས་ཀྱི་ཐུགས་ཀ་ན་ཡོད་པའི་རྡོ་རྗེ་པདྨ་ལ་ཧྲཱིཿ
ཞེས་བྱ་བ་རྣམ་པར་བཀོད་ལ་དེ་ཉིད་དཔག་ཏུ་མེད་པར་ཉིན་རེ་ཞིང་བདག་ལ་བྱིན་གྱིས་བརླབས་པ་ལ་སོགས་པ་བྱས་ནས། ཇི་སྲིད་ཟླ་བ་གཅིག་གི་བར་དུ་བཟླས་བརྗོད་བྱས་ན་སྔོན་དུ་བསྙེན་པ་བྱས་པར་འགྱུར་རོ། །དེ་ནས་དང་པོ་རྡོ་རྗེ་བྲི་བའི་ཕྱག་རྒྱ་དང་བྲི་བའམ། འདྲིར་གཞུག་པར་བྱའོ། །
དཀྱིལ་འཁོར་དུ་ཡང་དེས་དང་པོར་བརྩམ་པར་བྱ་སྟེ། ཕྱིས་ནི་ཅི་བདེར་བྱའོ། །དེ་ཡང་དབུས་སུ་ནི་བཅོམ་ལྡན་འདས་འགྲོ་བ་འདུལ་བ་བྲི་བར་བྱའོ། །གཞན་དག་ནི་དཀྱིལ་འཁོར་གྱི་ཚུལ་གྱིས་བྲི་བར་བྱའོ། །འདི་ནི་དཀྱིལ་འཁོར་གྱི་རས་ཀྱི་རི་མོའོ། །དེ་ནས་ཟླ་བ་ཉ་ནས་བརྩམས་ཏེ། ཕྱག་
རྒྱ་ཆེན་པོ་བཅིངས་ལ། སྔོན་དུ་བསྙེན་པའི་སྦྱོར་བ་ཇི་སྲིད་དུ་ཟླ་བ་གཉིས་པའི་ཉ་ལ་ཐུག་གི་བར་དུ་བཟླས་བརྗོད་དེ་བཞིན་དུ་བྱའོ། །དེ་ནས་དེའི་མཚན་ཐོག་ཐག་ཕྱག་རྒྱ་མ་བཀྲོལ་བར་ཅི་ནས་ཀྱང་སྐྱོ་བར་མི་འགྱུར་བ་དེ་ལྟར་བཟླས་བརྗོད་བྱའོ། །དེ་ནས་ཐོ་རངས་ཀ་བཅོམ་ལྡན་འདས་ཀྱིས་ཞལ་
བསྟན་ནས ཇི་ལྟར་མངོན་པར་འདོད་པའི་དངོས་གྲུབ་སྩོལ་བར་འགྱུར་ཏེ། རས་ཀྱི་རི་མོ་དང་པོའི་ཆོ་གའོ། །དེ་ནས་རས་ཀྱི་རི་མོ་གཉིས་པའི་ཆོ་ག་ནི་སྔོན་དུ་བསྙེན་པ་དེ་བཞིན་དུ་བྱས་ལ། རས་ལ་བཅོམ་ལྡན་འདས་འགྲོ་བ་འདུལ་བ་དཔའ་བོ་གཅིག་པུ་བྲི་བར་བྱའོ། །དེ་ནས་དེའི་སྤྱན་སྔར་ཕྱག་

59-1-168a

རྒྱ་ཆེན་པོ་ལ་གནས་པས་བཟླས་བརྗོད་འབུམ་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བཟླས་བརྗོད་བྱས་ནས་ཐོ་རངས་བཅོམ་ལྡན་འདས་ཀྱིས་ཞལ་བསྟན་ནས། དེ་བཞིན་དུ་དངོས་གྲུབ་རྣམས་སྩོལ་བར་འགྱུར་ཏེ། རས་ཀྱི་རི་མོ་གཉིས་པའི་བསྒྲུབ་པ་བྱའོ། །དེ་ནས་
མ་བསྒྲུབས་ཀྱང་ཞེས་བྱ་བ་ནི་བཤད་ཟིན་ཏོ། །ཐམས་ཅད་རྗེས་སུ་ཆགས་པར་བྱ་བ་ལ་ནི་ཞེས་བྱ་བ་ནི་འདོད་པའི་ལྷ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་རང་དབང་དུ་བྱའོ། །དེ་ཇི་ལྟར་འགྱུར་ཞེ་ན། པདྨ་ལ་ལན་སྟོང་བཟླས་ཏེ་སྦྱིན་པར་བྱའོ་ཞེས་བྱ་བ་གསུངས་ཏེ། ཕྱིའི་
པདྨ་བླངས་ལ། འཕགས་པ་སྤྱན་རས་གཟིགས་དབང་ཕྱུག་གི་སྦྱོར་བས་ཧྲཱིཿཞེས་བྱ་བ་ལན་སྟོང་ཡོངས་སུ་བཟླས་ཏེ། མཉེས་པར་བྱས་པའི་ལྷའམ། མི་ལ་སོགས་པ་གཞན་དག་ལ་དབུལ་ཞིང་སྦྱིན་པར་བྱའོ། །པདྨ་དེ་ཁ་དོག་དམར་ཞིང་འོད་ཟེར་དམར་པོའི་ཚོགས་ཀྱིས་བསྒྲུབ་པར་བྱ་
བ་དམར་པོ་བསམ་པར་བྱ་བ་སྟེ། དེ་ལྟ་བུས་ནི་རྗེས་སུ་ཆགས་པར་འགྱུར་རོ། །ཐམས་ཅད་གསད་པ་ལ་ནི་ཞེས་བྱ་བ་ནི། སེམས་ཅན་མང་པོ་ལ་འཁུ་ཞིང་གསོད་པ་ལ་སོགས་པ་རྣམས་ལ་འདུལ་བའི་དབང་གིས་ཉེ་བར་བཟུང་སྟེ་གསད་པའོ། །དེ་ཇི་ལྟར་འགྱུར་ཞེ་ན། པདྨ་ཆེན་པོའི་ཁྲོ་བོའི་
ཕྱག་རྒྱས་སོ་ཞེས་བྱ་བ་གསུངས་ཏེ། པདྨ་ཆེན་པོ་གཏུམ་པའི་དབང་ཕྱུག་ནི་པདྨ་ཆེན་པོའི་ཁྲོ་བོའོ། །དེའི་དམ་ཚིག་གི་ཕྱག་རྒྱ་གང་ཡིན་པ་དེ་ནི་པདྨ་ཆེན་པོའི་ཁྲོ་བོའི་ཕྱག་རྒྱའོ། །དེ་ནི་འདི་ཡིན་ཏེ། རྡོ་རྗེ་བསྡམས་པ་བཅིངས་ལ། མཛུབ་མོ་གཉིས་བརྐྱང་ནས་མིག་གདངས་ཤིང་ཁྲོ་གཉེར་བསྡུས་
ཏེ་འདིས་པདྨ་ཆེན་པོ་གཏུམ་པའི་དབང་ཕྱུག་ཏུ་བདག་ཉིད་བསྒོམས་ལ། ཁྲོ་བས་ཁྲོ་བ་སྤང་བར་བྱ་བའི་ཕྱིར་གདུལ་བའི་ཕྱིར་སྐྱེ་བོ་རྣམས་ལ་ཡིད་ཀྱིས་དེ་གསད་པར་བྱའོ། །དེ་ནས་གདུལ་བྱ་དེ་རྣམས་པདྨ་ཆེན་པོ་གཏུམ་པའི་དབང་ཕྱུག་ཉིད་འཐོབ་པར་འགྱུར་བའམ། འཆི་བར་འགྱུར་ལ། ཤི་
འཕོས་ནས་ཀྱང་སངས་རྒྱས་ཀྱི་ཞིང་ཡོངས་སུ་དག་པ་རྣམས་སུ་སྐྱེ་བར་འགྱུར་རོ། །ཐམས་ཅད་རྨོངས་པར་འགྱུར་བ་ལ་ནི་ཞེས་བྱ་བ་ནི་རང་གི་སེམས་དང་སེམས་ལས་བྱུང་བའི་རྒྱུན་ཐམས་ཅད་དེ་དེ་རྣམས་རྨོངས་པར་བྱ་བ་ནི་སྟོང་པ་ཉིད་ཀྱི་ཡེ་ཤེས་ཀྱིས་གཟུང་བ་དང་འཛིན་པའི་རྣམ་པར་རྟོག་པ་

59-1-168b

བསལ་ནས། རྣམ་པར་མི་རྟོག་པའི་ཏིང་ངེ་འཛིན་ལ་རབ་ཏུ་གཞག་པའམ། དཀོན་མཆོག་གསུམ་ལ་སོགས་པ་ལ་འཁུ་བ་ལ་སོགས་པའི་སེམས་ཅན་ཐམས་ཅད་ཀྱི་དྲན་པ་ཉམས་པར་བྱ་ཞིང་། རང་ངམ་གཞན་དུ་ཤེས་པར་མི་འགྱུར་བའོ། །དེ་ཇི་ལྟར་འགྱུར་ཞེ་ན། པདྨ་ཆེན་པོ་ཕག་གིས་
སོ་ཞེས་བྱ་བ་གསུངས་ཏེ། པདྨ་ཆེན་པོས་འཛིན་གྱི་ཕྱག་རྒྱ་ཆེན་པོ་ནི་པདྨ་ཆེན་པོ་ཕག་སྟེ། དེས་དེ་ལྟར་འགྱུར་བའོ། །འདི་སྐད་སྟོན་པར་འགྱུར་ཏེ། བཅོམ་ལྡན་འདས་པདྨ་ཆེན་པོ་ས་འཛིན་གྱི་ཕྱག་རྒྱ་ཆེན་པོ་བཅིངས་ལ་དེའི་ངོ་བོ་ཉིད་དུ་བདག་ཉིད་བསམས་ནས། བསྒྲུབ་པར་བྱ་བའི་སེམས་ཅན་
ཐམས་ཅད་དེའི་ངོ་བོ་ཉིད་དུ་བྱའོ། །དེ་ལྟར་ན་རྣམ་པར་མི་རྟོག་པའི་ཡེ་ཤེས་འདིས་རྨོངས་པར་འགྱུར་ཏེ། དེ་རྟོག་པར་འགྱུར་བའི་སྟོབས་ཀྱིས་རྨོངས་པར་འགྱུར་རོ། །སེམས་ཅན་གྱི་ཁམས་གདུག་པ་རྣམས་ཀྱང་དྲན་པ་གཞིག་པའི་བསམ་པས་བསྐོམས་ན་དེ་ཀུན་དུ་རྨོངས་པར་འགྱུར་རོ། །
ཉོན་མོངས་པ་ཐམས་ཅད་ནི་ཇི་སྐད་བཤད་པའི་འདོད་ཆགས་ལ་སོགས་པའོ། །དེ་རྣམས་ཀྱི་རྣམ་པར་རྟོག་པ་ནི་དེ་བཞིན་ཉིད་རྟོགས་པའོ། །ཇི་ལྟར་འགྱུར་ཞེ་ན། པདྨ་ཆེན་པོ་རྣམ་པར་གཟིགས་པའི་ཏིང་ངེ་འཛིན་གྱི་ཕྱག་རྒྱས་སོ་ཞེས་བྱ་བ་གསུངས་ཏེ། བཅོམ་ལྡན་འདས་འགྲོ་བ་འདུལ་བའི་ཕྱག་རྒྱ་
ཆེན་པོ་ཞེས་བྱ་བའི་དོན་ཏོ། །ས་ཐམས་ཅད་ཀྱི་བདག་པོ་ཉིད་དུ་བྱ་བ་ནི་རྒྱལ་པོ་ཐམས་ཅད་ཐོབ་པའོ། །ས་ལ་སྐྱིལ་མོ་ཀྲུང་བཅས་ནས་ཞེས་བྱ་བ་ལ་སོགས་པ་ནི་གོ་སླའོ། །འདི་སྐད་སྟོན་པར་འགྱུར་ཏེ། གང་རྒྱལ་པོ་འདོད་པ་དེས་ནི་བཅོམ་ལྡན་འདས་པདྨ་ཆེན་པོའི་ནག་པོའི་སྦྱོར་བ་བྱས་ལ། བསྙེན་
པ་བྱས་ནས་རྣམ་པར་དབེན་པའི་ཕྱོགས་སུ་ས་ལ་སྐྱིལ་མོ་ཀྲུང་བཅས་ལ། བཟླས་པས་སྟོང་ཕྲག་བརྒྱ་བྱས་ཏེ། ཟླ་བ་ཉ་ལ་མཚན་ཡལ་ནངས་སུ་བཟླས་བརྗོད་བྱས་ན། དེ་ནས་ནང་པར་རྒྱལ་སྲིད་ཐོབ་པར་འགྱུར་རོ། །ཆུ་ཐམས་ཅད་དགུག་པ་ལ་ནི་ཞེས་བྱ་བ་ལ་སོགས་པ་ལ་སྔ་མ་བཞིན་དུ་བཅོམ་ལྡན་
འདས་པདྨ་ཆེན་པོའི་རྒྱ་མཚོའི་སྦྱོར་བས་ཟླ་བ་གཅིག་གི་བར་དུ་སྔོན་དུ་བསྙེན་པ་བྱས་ལ། ཆུ་དྭང་བའི་བསམ་པས་ཀླུའི་རྒྱལ་པོ་རྒྱ་མཚོའི་གཟུགས་བྲིས་ཏེ། གསང་བའི་ལྕགས་ཀྱུས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་བ་བྱས་ལ། དེའི་སྟེང་དུ་སྐྱིལ་མོ་ཀྲུང་བཅས་ནས་འདུག་སྟེ། 

59-1-169a

བཟླས་བརྗོད་སྟོང་ཕྲག་བརྒྱ་བྱའོ། །ཐམས་ཅད་སྣང་བར་བྱ་བ་ལ་ནི་ཞེས་བྱ་བ་ལ་སོགས་པ་ལ། ཉི་མའི་སྣང་བ་ལ་སོགས་པ་བྱ་བར་འདོད་པས་བཅོམ་ལྡན་འདས་པདྨ་ཆེན་པོ་ནག་པོའི་སྦྱོར་བས་སྔ་མ་བཞིན་དུ་སྔོན་དུ་བསྙེན་པ་བྱས་ལ། དེའི་ཕྱག་རྒྱ་ཆེན་པོ་བཅིངས་ཏེ་བཟུང་ནས་མུན་པའི་
ཕྱོགས་སུ་ཉི་མ་འབར་བ་རབ་ཏུ་གཏོང་བ་རང་གི་ལུས་ལས་གཏོང་བར་བྱས་ཏེ། དེ་ལྟ་བུས་ནི་སྣང་བར་བྱས་པར་འགྱུར་རོ། །རླུང་ཐམས་ཅད་ཅེས་བྱ་བ་ལ་སོགས་པ་རླུང་གི་དཀྱིལ་འཁོར་བྷེ་རཾ་པ་ལྡང་བར་འདོད་པས། བཅོམ་ལྡན་འདས་པདྨ་ཆེན་པོ་རླུང་གི་སྦྱོར་བས་དེ་བཞིན་དུ་སྔོན་དུ་བསྙེན་པ་བྱས་ནས། དེའི་
རྗེས་ཐོགས་ཉིད་ལ་རླུང་ཐམས་ཅད་བཟུང་སྟེ། ཇི་སྐད་དུ་བཤད་པའི་རླུང་ཐམས་ཅད་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་བ་རྣམས་བྱའོ། །ཉོན་མོངས་པ་ཐམས་ཅད་ནི་འདོད་ཆགས་ལ་སོགས་པའོ། །དེ་རྣམས་ཀྱི་རྣམ་པར་དག་པ་ནི་ཇི་སྐད་དུ་བཤད་པ་རྣམས་སོ། །དེའི་དམ་ཚིག་
ནི་པདྨའི་རིགས་ཏེ། མིང་འདི་སྐད་ཅེས་བྱ་བའི་རྟོག་པའི་རྒྱལ་པོ་ཆེན་པོ་རྫོགས་པ་སྟེ། པདྨའི་རིགས་ཀྱི་དབུགས་དབྱུང་བའི་བཤད་པ་རྫོགས་སོ།།    །།དེ་ལྟར་གཏི་མུག་གི་གཉེན་པོའི་ཕྱོགས་སུ་གྱུར་པ་པདྨའི་རིགས་བསྟན་ནས། ད་ནི་སེར་སྣའི་གཉེན་པོའི་ཕྱོགས་སུ་གྱུར་པའི་རིན་པོ་ཆེའི་རིགས་
བཤད་པའི་ཕྱིར། དེ་ནས་ཞེས་བྱ་བ་གསུངས་ཏེ། དེ་ནས་ཞེས་བྱ་བའི་སྒྲས་ནི་དེ་མ་ཐག་པ་སྟོན་པར་བྱེད་པའི་ཚིག་སྟེ། བཅོམ་ལྡན་འདས་འདོད་པའི་ཁམས་ཐམས་ཅད་ཀྱི་ལྷའི་རྒྱལ་པོའི་གནས་ན་བཞུགས་པའི་རྗེས་ཐོགས་ཉིད་ལ། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་གསུངས་པའོ། །དེ་
བཞིན་གཤེགས་པ་ཁམས་གསུམ་ཐམས་ཅད་ཀྱི་དབང་པོ་ཞེས་བྱ་བ་ནི་ཕྱོགས་བཅུ་ནམ་མཁའི་ཁམས་ཐམས་ཅད་ན་གནས་པའི་འདོད་པའི་ཁམས་ལ་སོགས་པའི་ཁམས་གསུམ་མཐའ་ཡས་ཤིང་དཔག་ཏུ་མེད་པ་ཐམས་ཅད་དེ། དེར་ཉོན་མོངས་པ་དང་ཉོན་མོངས་པ་ཅན་མ་ཡིན་པའི་རྨོངས་པ་དང་
བྲལ་བས་རང་དབང་བརྙེས་པའི་ཕྱིར་དང་། ཆོས་ཀྱིས་སེམས་ཅན་ཐམས་ཅད་ལ་རྗེས་སུ་སྟོན་པར་མཛད་པས་ན་དེ་བཞིན་གཤེགས་པ་ཁམས་གསུམ་ཐམས་ཅད་ཀྱི་དབང་པོ་སྟེ། བཅོམ་ལྡན་འདས་རྣམ་པར་སྣང་མཛད་དོ། །ཡང་ཞེས་བྱ་བ་ནི་འདོད་ཆགས་ཐམས་ཅད་རྣམ་པར་དག་པར་སྟོན་པར་

59-1-169b

མཛད་པ་ལ་ལྟོས་ནས། དབང་བསྐུར་བ་སྦྱིན་པ་ལ་སོགས་པ་ཡང་སྟོན་པར་མཛད་པ་ནི་ཡང་ཞེས་བྱ་བའི་སྒྲས་སྟོན་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་ཞེས་བྱ་བ་ནི། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་ལ་
སོགས་པ་ནི། དེ་བཞིན་གཤེགས་པ་ཐམས་ཅད་དེ་དེ་རྣམས་ཀྱིས་དབང་བསྐུར་བ་ནི་མཉམ་པ་ཉིད་ཀྱི་ཡེ་ཤེས་བདུད་རྩིའི་ཆུ་རྒྱུན་གྱིས་སེམས་དང་སེམས་ལས་བྱུང་བའི་གཟུང་བ་དང་འཛིན་པའི་རྣམ་པར་རྟོག་པ་ཤིན་ཏུ་འཁྲུད་པར་བྱེད་པ་དང་། ཡེ་ཤེས་དེ་ལས་བྱུང་བའི་རིན་པོ་ཆེའི་རིགས་ནི་དེ་
བཞིན་གཤེགས་པ་ཐམས་ཅད་ཀྱིས་དབང་བསྐུར་བའོ། །དེའི་ཡེ་ཤེས་གང་གིས་འབྱུང་བ་དེ་ནི་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བ་ལས་བྱུང་བའི་ཡེ་ཤེས་སོ། །དེ་ཉིད་སྙིང་པོ་སྟེ་བསྐྱེད་པའི་གནས་སུ་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་ལ། མིང་དེ་སྐད་ཅེས་བཏགས་པའི་
ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་གསུངས་པའོ། །དབང་བསྐུར་བ་སྦྱིན་པ་ནི་ཞེས་བྱ་བ་ནི་སེམས་ཅན་ཐམས་ཅད་བྱང་ཆུབ་ཀྱི་སེམས་ཆེན་པོ་རྟོགས་པ་བསྐྱེད་པ་དང་། སྤྱན་དྲངས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ། རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་བ་དང་། དཀྱིལ་
འཁོར་དུ་སློབ་མ་རྣམས་ལ་རྡོ་རྗེ་རིན་པོ་ཆེའི་ཅོད་པན་གང་ལ་བྱིན་པ་དང་དབང་བསྐུར་བ་དང་། ལྷ་དང་ཕྱག་རྒྱ་ཆེན་པོ་ལ་སོགས་པ་བྱིན་པ་གང་ཡིན་པ་དེ་ནི་དབང་བསྐུར་བ་བྱིན་པའོ། །ཁམས་གསུམ་ཐམས་ཅད་ཀྱི་རྒྱལ་སྲིད་འཐོབ་པར་འགྱུར་རོ་ཞེས་བྱ་བ་ནི་བཤད་མ་ཐག་པའི་དབང་བསྐུར་བ་དེ་བྱིན་པས་
མ་ལུས་པའི་འདོད་པ་དང་། གཟུགས་དང་གཟུགས་མེད་པའི་ངོ་བོ་ཉིད་ཀྱི་ཁམས་གསུམ་པོ་ཐམས་ཅད་དུ་སྦྱིན་པ་པོ་སློབ་མ་རྣམས་ཀྱི་བག་ཆགས་དང་བཅས་པའི་ཉོན་མོངས་པ་རྣམས་དང་བྲལ་བས་ཆོས་ཀྱི་རྒྱལ་པོ་འཐོབ་པར་འགྱུར་བ་ནི། ཁམས་གསུམ་ཐམས་ཅད་ཀྱི་རྒྱལ་སྲིད་འཐོབ་པ་སྟེ། 
དེའི་དོན་དུ་གནས་པར་གྱུར་པའོ། །ནོར་སྦྱིན་པ་ནི་ཞེས་བྱ་བ་ནི་དབྱིག་དང་གསེར་དང་རྒྱལ་པོ་ལ་སོགས་པ་ཕྱིའི་དངོས་པོ་རྣམས་དང་ཆོས་ཀྱི་མཚན་ཉིད་ལ་མངོན་པར་ཞེན་པ་ཡོངས་སུ་སྤོང་བ་དང་། གཏེར་དང་ལྷའི་ཕྱག་རྒྱ་ཆེན་པོ་ལ་སོགས་པ་བྱིན་པ་ནི་ནོར་བྱིན་པའོ། །རེ་བ་ཐམས་ཅད་ཡོངས་སུ་

59-1-170a

རྫོགས་པར་འགྱུར་རོ་ཞེས་བྱ་བ་ནི་ནོར་སྦྱིན་པ་དེ་ནི་འཇིག་རྟེན་དང་འཇིག་རྟེན་ལས་འདས་པའི་ནོར་ཐོབ་པའི་རྒྱུར་གྱུར་པ་ཉིད་དུ་གནས་པར་འགྱུར་བའོ། །ཆོས་སྦྱིན་པ་ནི་བཅོམ་ལྡན་འདས་གླེགས་བམ་བསྣམས་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། ཆོས་ཀྱི་དོན་གྱི་རིན་པོ་ཆེའི་
ཕྱག་རྒྱ་ཆེན་པོ་ལ་སོགས་པ་བྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་བྱིན་པ་ནི་ཆོས་སྦྱིན་པའོ། །ཆོས་ཀྱི་སྦྱིན་པ་དེས་ཆོས་ཐམས་ཅད་ཀྱི་མཉམ་པ་ཉིད་འཐོབ་པར་འགྱུར་ཏེ། རྨི་ལམ་ལྟ་བུའི་ཆོས་རིན་པོ་ཆེ་ཁོང་དུ་ཆུད་པར་འགྱུར་བ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། རྟོགས་པར་འགྱུར་བ་ནི་
ཆོས་ཐམས་ཅད་ཀྱི་མཉམ་པ་ཉིད་འཐོབ་པའོ། །ཟང་ཟིང་གི་སྦྱིན་པ་ནི་ཞེས་བྱ་བ་ནི་རིན་པོ་ཆེ་ཆེན་པོ་མྱང་བ་དང་། བྱང་ཆུབ་སེམས་དཔའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། ཕྱིའི་ཡང་ཟས་དང་སྐོམ་དང་གོས་ནི་ཟང་ཟིང་ངོ་། །དེ་ཡོངས་སུ་གཏོང་བ་ནི་ཟང་ཟིང་སྦྱིན་པ་སྟེ། དེས་སེམས་ཅན་
ཐམས་ཅད་ཚིམ་པར་བྱ་ཞེས་བྱ་བའི་དོན་ཏོ། །ལུས་དང་ངག་དང་སེམས་ཀྱི་བདེ་བ་ཐམས་ཅད་འཐོབ་པར་འགྱུར་རོ་ཞེས་བྱ་བ་ནི། ཟང་ཟིང་གི་སྦྱིན་པ་དེའི་ངོ་བོ་ཉིད་དང་། རྣམ་པར་སྨིན་པ་དང་། ལོངས་སྤྱོད་རྫོགས་པ་དང་། སྤྲུལ་པའི་སྐུ་དང་། རྡོ་རྗེ་དང་། རབ་ཏུ་དགའ་བ་དང་། ཁྲོ་བོ་དང་། ཆོས་
དང་། བཀའ་བསྒོ་བའི་ཚིག་རྣམས་ཏེ། ངག་ཐམས་ཅད་དང་། དབང་པོ་དང་། དེ་བཞིན་གཤེགས་པ་དང་། ཁྲོ་བོ་དང་། པདྨ་དང་། རིན་པོ་ཆེ་དང་། སྣ་ཚོགས་རྡོ་རྗེ་ནི་སེམས་ཅན་ཐམས་ཅད་དེ། དེ་རྣམས་ལས་བྱུང་བའི་བདེ་བ་གང་ཡིན་པ་དེ་ནི་ལུས་དང་ངག་དང་ཡིད་ཀྱི་བདེ་བའོ། །དེ་རྣམས་
ཐོབ་པ་ནི་རྙེད་པ་སྟེ། དེའི་དོན་དུ་གནས་པར་འགྱུར་བའོ། །དེ་ལྟར་དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། བདེ་བ་ཐམས་ཅད་འཐོབ་པར་འགྱུར་རོ་ཞེས་བྱ་བའི་བར་གྱི་བཤད་པས་ནི་དང་པོའི་སྦྱོར་བའི་ཏིང་ངེ་འཛིན་གསུངས་པ་ཡིན་ནོ། །ད་ནི་དེ་ནས་ཞེས་བྱ་བ་ལ་སོགས་པས་ཏིང་ངེ་
འཛིན་གཉིས་པ་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །བྱང་ཆུབ་ཀྱི་ངོ་བོ་ཉིད་ལ་སེམས་དཔའ་ནི། བྱང་ཆུབ་སེམས་དཔའོ། །ནམ་མཁའི་སྙིང་པོ་ནི་བཤད་ཟིན་ཏོ། །བཞིན་རབ་ཏུ་འཛུམ་པ་དང་བཅས་ཏེ་ཞེས་བྱ་བ་ནི་གོ་སླའོ། །དེ་ལྟར་བཅོམ་ལྡན་འདས་རྣམ་པར་སྣང་མཛད་

59-1-170b

ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་ཅིང་། རིན་པོ་ཆེའི་རིགས་ཀྱི་དཀྱིལ་འཁོར་སྤྲུལ་པར་བྱ་བའི་ཕྱིར་བཅོམ་ལྡན་འདས་ཀྱིས་ནམ་མཁའི་སྙིང་པོ་ལ་བསྐུལ་བ་དང་། དེ་ནས་དེ་བཞིན་དུ་རབ་ཏུ་འཛུམ་པ་དང་བཅས་པས་རྡོ་རྗེ་རྩེ་ལྔ་པའི་གཙུག་གི་ནོར་བུའི་རིན་པོ་ཆེ་ལས་བྱས་པའི་ཕྲེང་བའི་
དབང་བསྐུར་བའི་གནས་སུ་བཞག་སྟེ། དཀྱིལ་འཁོར་བསྐྱེད་པར་བྱ་བའི་ཕྱིར། ཏྲཱྃ་ཞེས་བྱ་བ་གསུངས་པའོ། །དེ་ནས་འདི་གསུངས་པ་ཙམ་གྱིས་ཞེས་བྱ་བ་ནི་ཏྲཱྃ་ཞེས་བྱ་བ་གསུངས་པའི་རྗེས་ཐོགས་ཉིད་ལའོ། །བཅོམ་ལྡན་འདས་ཀྱི་རིན་པོ་ཆེ་དེ་ལས་ཞེས་བྱ་བ་ནི། འཕགས་པ་ནམ་མཁའི་སྙིང་
པོའི་ཐུགས་ཀར་གནས་པའི་རིན་པོ་ཆེ་ལས་སོ། །དབང་བསྐུར་བ་ལ་སོགས་པ་ཞེས་བྱ་བ་ནི་དབང་བསྐུར་བ་ཐམས་ཅད་དེ། བྱང་ཆུབ་སེམས་དཔའ་ཆེན་པོ་དབང་བསྐུར་བའོ། །དེ་ལ་སོགས་པ་གང་ཡིན་པ་དེ་ནི་རིན་པོ་ཆེ་ཆེན་པོ་འཛིན་པ་དང་། ནོར་སྦྱིན་པ་ལ་སོགས་པ་སྟེ། དེ་དག་ནི་དབང་
བསྐུར་བ་ཐམས་ཅད་ལ་སོགས་པའོ། །ཡོ་བྱད་ཐམས་ཅད་ཕྱུང་སྟེ་ཞེས་བྱ་བ་ནི་ཕྱུང་བར་གྱུར་ནས། བཅོམ་ལྡན་འདས་ནམ་མཁའི་སྙིང་པོའི་དང་པོའི་དཀྱིལ་འཁོར་གྱི་ཚུལ་གྱིས་ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔའ་དཀྱིལ་འཁོར་གྱི་དབྱིབས་ཀྱི་དབང་བསྐུར་བ་ལ་སོགས་པའི་བྱང་ཆུབ་
སེམས་དཔའི་གཟུགས་ཉིད་ཀྱིས་བཞུགས་པ་སྟེ། གཞུང་འདི་དག་གི་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་པ་མཛད་ནས་བརྩམས་ཏེ། ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་
པ་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །དབང་བསྐུར་བ་ཐམས་ཅད་ཀྱི་རིན་པོ་ཆེ་ཞེས་བྱ་བ་ནི་དབང་
བསྐུར་བ་ཡང་ཡིན་ལ་ཐམས་ཅད་ཀྱང་ཡིན་པས་ན། དབང་བསྐུར་བ་ཐམས་ཅད་དེ་རིན་པོ་ཆེའི་རིགས་སོ། །དེ་ལ་དམིགས་པ་ནི་རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་གང་ཡིན་པ་དེ་ལ་མིང་དེ་སྐད་ཅེས་བྱ་སྟེ། དེ་ལ་སྙོམས་པར་ཞུགས་པ་ནི་མངོན་སུམ་དུ་མཛད་པའོ། །སྲེད་པའི་རྣམ་པ་ཐམས་ཅད་

59-1-171a

ནི་བསམ་པ་ཐམས་ཅད་དེ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་པོ། །དེ་ཡང་དེ་ཡོངས་སུ་རྫོགས་པར་བྱེད་པ་ནི་དངོས་གྲུབ་ཐམས་ཅད་ཐོབ་པའོ། །དེའི་དོན་གྱི་ནོར་བུ་རིན་པོ་ཆེ་ནི་ནམ་མཁའ་དང་མཉམ་པའི་ཡེ་ཤེས་སོ། །དེའི་དམ་ཚིག་ནི་དེ་ལས་བྱུང་བ་
སྟེ། མིང་དེ་སྐད་ཅེས་བྱ་བའི་རིན་པོ་ཆེའི་རིགས་ཀྱི་དཀྱིལ་འཁོར་རོ། །འདི་ཞེས་བྱ་བ་ནི་བློ་ལ་བཞག་པའོ། །གསུངས་སོ་ཞེས་བྱ་བ་ནི་རིན་པོ་ཆེའི་རིགས་ཀྱི་དཀྱིལ་འཁོར་གྱི་རྣམ་པར་ཐུགས་རྩེ་གཅིག་ཏུ་མཛད་ནས་དཀྱིལ་འཁོར་གསུངས་སོ་ཞེས་བྱ་བའི་དོན་ཏོ། །འདིས་ནི་མཚན་མ་ཐོབ་ནས་
དཀྱིལ་འཁོར་བྲི་བར་བྱའོ་ཞེས་སྟོན་པ་ཡིན་ནོ། །ཕྱིའི་དཀྱིལ་འཁོར་ནི་དང་པོའི་དཀྱིལ་འཁོར་གྱི་ཚུལ་དུ་བྱས་པའོ་ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་དབྱིབས་བཞིན་དུ་འདིའི་ཕྱིའི་དཀྱིལ་འཁོར་ལ་ཡང་བྲི་བར་བྱའོ། །ནང་དུ་ཞེས་བྱ་བ་ལ་སོགས་པ་ལ་ཕྱིའི་དཀྱིལ་འཁོར་དེའི་ནང་
དུ་དབུས་སུ་རིན་པོ་ཆེ་ཟུར་བརྒྱད་པ་ལྟ་བུའི་ཆ་བརྒྱད་པ་ལ་རྡོ་རྗེ་རིན་པོ་ཆེ་བརྒྱད་ཀྱིས་མཚན་པའི་ཀ་བ་གང་དུ་གནས་པ་དེ་ལ་དེ་སྐད་ཅེས་བྱའོ། །དེ་ཡང་ཇི་ལྟ་ཞེ་ན། དཀྱིལ་འཁོར་བརྒྱད་པའི་ཚུལ་ལས་རིན་པོ་ཆེའི་ལྕུག་མས་ཡོངས་སུ་བསྐོར་བ་ཞེས་བྱ་བ་སྟེ། རིན་པོ་ཆེའི་ལྕུག་མས་ཀུན་ནས་འཁོར་
བར་བྱས་པའོ། །རྡོ་རྗེ་རིན་པོ་ཆེའི་ར་བ་སྨོས་པ་ནི་རིན་པོ་ཆེའི་ལྕུག་མ་འདིའི་ཕྱི་རོལ་ཀུན་ནས་རི་མོ་གཅིག་གི་ར་བ་ལ། རྡོ་རྗེ་རྩེ་ལྔ་པའི་རྩེ་མོ་ཡིད་བཞིན་གྱི་ནོར་བུ་རྩེ་མོའི་གནས་སུ་བཏགས་པ་དང་ལྡན་པའི་རྡོ་རྗེ་རིན་པོ་ཆེའི་ར་བའི་ལྕོག་ཡོད་པས་ན། རྡོ་རྗེ་རིན་པོ་ཆེའི་ལྕོག་གོ། །དཀྱིལ་འཁོར་དེ་
འདི་ལྟ་བུ་འབའ་ཞིག་དང་ལྡན་པར་མ་ཟད་ཀྱི། མེ་ཏོག་གི་ཕྲེང་བ་དང་།བ་དན་དང་། གདུགས་དང་། རྔ་ཡབ་ཀྱིས་ཉེ་བར་མཛེས་པར་བྲི་བར་བྱའོ་ཞེས་བྱ་བ་ནི། མེ་ཏོག་གི་ཕྲེང་བ་དང་། དར་འཕན་དང་། གདུགས་དང་། རྔ་ཡབ་རྣམས་ཀྱིས་ཉེ་བར་མཛེས་ཤིང་བརྒྱན་པ་དེར་ཡང་དག་པར་བྲི་བར་
བྱའོ། །དེའི་དབུས་སུ་བཅོམ་ལྡན་འདས་ཞེས་བྱ་བ་ལ་སོགས་པ་ལ། དཀྱིལ་འཁོར་དེའི་དབུས་སུ་བཅོམ་ལྡན་འདས་འཕགས་པ་ནམ་མཁའི་སྙིང་པོ་རྟ་བདུན་གྱིས་དྲངས་པའི་ཤིང་རྟ་ལ་བཅིབས་པ། ཇི་སྐད་དུ་བཤད་པའི་རྡོ་རྗེ་རིན་པོ་ཆེ་དབང་བསྐུར་བའི་ཕྲེང་བ་རང་གི་དབུ་ལ་རང་ཉིད་འཆིང་བར་

59-1-171b

མཛད་ཅིང་ནམ་མཁའ་དང་མཉམ་པའི་ཡེ་ཤེས་ཐུགས་སུ་ཆུད་པའི་ཐུགས་ཀྱི་བདེ་བའི་རབ་ཏུ་དགྱེས་པས། ཞལ་རྣམ་པར་བཞད་པ། ནམ་མཁའ་དང་མཉམ་པའི་ཡེ་ཤེས་ཀྱེ་རིན་པོ་ཆེ་སྟོན་པར་བྱེད་པ། མརྒད་ཀྱི་རིན་པོ་ཆེའི་མདོག་ཅན་དུ་གཞག་པར་བྱའོ། །དེའི་མདུན་དུ་ཞེས་བྱ་བ་ལ་སོགས་
པ་ལ། འཕགས་པ་ནམ་མཁའི་སྙིང་པོ་ཞལ་ཤར་དུ་གཟིགས་པ་དེའི་མདུན་དུ་ཞེས་བྱ་བ་རྡོ་རྗེ་ཡིད་ལས་བྱུང་བའི་གནས་སུ་དེ་ལ་མངོན་དུ་ཕྱོགས་པས་དབང་བསྐུར་བའི་རིན་པོ་ཆེའི་ཅོད་པན་འཛིན་པ་གཞག་པར་བྱའོ། །བཅོམ་ལྡན་འདས་ཀྱི་གཡས་ལོགས་སུ་ཀཱི་ལི་ཀཱི་ལའི་གནས་སུ་རིན་
པོ་ཆེ་ཆེན་པོའི་ནོར་སྩོལ་བའི་དབྱིག་གི་གཏེར་འཛིན་པའོ། །བཅོམ་ལྡན་འདས་ཀྱི་རྒྱབ་ཏུ་རྡོ་རྗེ་དྲན་པའི་གནས་སུ་ཆོས་ཆེན་པོ་རིན་པོ་ཆེའི་གླེགས་བམ་འཛིན་པའོ། །བཅོམ་ལྡན་འདས་ཀྱི་གཡོན་ལོགས་སུ་རིན་པོ་ཆེ་ཆེན་པོ་རོ་མྱང་བ་ཟས་དང་སྐོམ་ཐམས་ཅད་ཀྱིས་ཡོངས་སུ་གང་བའི་རོའི་སྣོད་
འཛིན་པ་གཞག་པར་བྱ་སྟེ། དེ་དག་ཐམས་ཅད་ཀྱང་སྣ་ཚོགས་པདྨ་ལ་སེམས་དཔའི་སྐྱིལ་མོ་ཀྲུང་གིས་བཞུགས་པ། ཕྱག་གཡས་ན་རང་གི་མཚན་མ་བསྣམས་པ། གཡོན་གྱིས་གདན་ལ་བརྟེན་པས་བཞུགས་པའོ། །མཚམས་རྣམས་སུ་ཞེས་བྱ་བ་ལ་སོགས་པ་ལ། ནང་གི་དཀྱིལ་
འཁོར་དེ་ཉིད་ཀྱི་ཤར་ལྷོའི་མཚམས་སུ་ལྷ་མོ་རིན་ཆེན་གདུགས་མ་རིན་པོ་ཆེའི་གདུགས་འཛིན་པའོ། །ལྷོ་ནུབ་ཏུ་ལྷ་མོ་རིན་ཆེན་རྒྱལ་མཚན་མ་རིན་པོ་ཆེའི་རྒྱལ་མཚན་འཛིན་པའོ། །ནུབ་བྱང་མཚམས་སུ་ལྷ་མོ་རྔ་ཅན་མ་རྫ་རྔ་རྡུང་བར་བྱེད་པའོ། །བྱང་ཤར་མཚམས་སུ་ལྷ་མོ་རིན་ཆེན་སྲོག་
ཤིང་མ་རིན་པོ་ཆེའི་སྲོག་ཤིང་བསྒྲེང་བ་གཞག་པར་བྱའོ། །ཕྱིའི་དཀྱིལ་འཁོར་གྱི་མཚམས་བཞིར་བུམ་པ་གང་བ་བཞི་བཞག་གོ། །ཤར་ཕྱོགས་ཀྱི་སྒོར་ནི་རིན་པོ་ཆེའི་ཅོད་པན་ནོ། །ལྷོ་ཕྱོགས་ཀྱི་སྒོར་ནི་རིན་པོ་ཆེའི་བུམ་པའོ། །ནུབ་ཕྱོགས་ཀྱི་སྒོར་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་
ལེགས་བམ་མོ། །བྱང་ཕྱོགས་ཀྱི་སྒོར་ནི་ཟས་དང་སྐོམ་ཐམས་ཅད་ཀྱིས་ཡོངས་སུ་གང་བའི་རིན་པོ་ཆེའི་སྣོད་གཞག་པར་བྱའོ། །དེ་བས་ན་དེ་བཞིན་དུ་རྡོ་རྗེ་རིན་ཆེན་གྱི་ཕྱག་རྒྱ་ཞེས་བྱ་བ་ལ་སོགས་པ་ལ། དེ་ལྟར་དཀྱིལ་འཁོར་བྲིས་ནས། རྡོ་རྗེ་བསྡུ་བ་ལ་སོགས་པའི་ཆོ་ག་རྗེས་སུ་སྤྱད་དེ། དེའི་

59-1-172a

རྗེས་ཐོགས་ཉིད་ལ་རང་གི་ཆོ་གས་འཇུག་པ་གསུངས་པ་དེ་བཞིན་དུ་འདིར་ཡང་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱས་འཇུག་པར་བྱ་སྟེ། རྡོ་རྗེ་ཐལ་མོ་བརྐྱང་ལ་མཐེ་བོང་གཉིས་བསྙམས་ལ། མཛུབ་མོ་གཉིས་དང་རྩེ་སྦྱར་ནས་དཔྲལ་བ་དང་། སྨིན་མཚམས་སུ་བཞག་
པ་འདི་ནི་རིན་ཆེན་གྱི་ཕྱག་རྒྱ་སྟེ། འདིས་འདིར་གཞུག་པར་བྱའོ། །དེ་ནས་བརྩམས་ཏེ་ནོར་ཐམས་ཅད་འགྲུབ་པ་ལ་སོགས་པའི་དངོས་གྲུབ་ཐམས་ཅད་འཐོབ་པར་འགྱུར་རོ་ཞེས་བྱ་བ་ནི། དཀྱིལ་འཁོར་དུ་འཇུག་པ་ནས་ཉེ་བར་བཟུང་སྟེ། རིན་པོ་ཆེའི་རིགས་ཀྱི་ངོ་བོ་ཉིད་ཀྱི་ནོར་ཐམས་ཅད་འགྲུབ་
པ་ལ་སོགས་པ་དངོས་གྲུབ་ཐམས་ཅད་འཐོབ་པར་འགྱུར་རོ། །དེ་ནས་ཞེས་བྱ་བ་ལ་སོགས་པ་ལ། དེ་ནས་ཇི་སྐད་དུ་གསུངས་པའི་འཇུག་པས་ཞུགས་ནས་རྡོ་རྗེ་རིན་ཆེན་གྱི་དབང་བསྐུར་བའི་ཕྲེང་བ་ཇི་ལྟ་བ་བཞིན་དུ་རང་གི་མགོ་ལ་བཅིངས་ཏེ་ཇི་སྐད་དུ་བཤད་པའི་རྡོ་རྗེ་རིན་ཆེན་བླངས་པ། བདག་
ཉིད་རིན་པོ་ཆེའི་མིང་གི་དབང་བསྐུར་བས་དབང་བསྐུར་ཏེ། རིན་པོ་ཆེའི་ཅོད་པན་དང་། གཏེར་གྱི་བུམ་པ་དང་། གླེགས་བམ་དང་། རོའི་སྣོད་དང་ངོ་བོ་ཉིད་ཀྱི་དབང་བསྐུར་བ་རྣམས་ཀྱིས་དཀྱིལ་འཁོར་པའི་ལྷ་རྣམས་ལ་ཕུལ་ལ་སློབ་དཔོན་སླར་འཇུག་པར་བྱའོ། །སློབ་མ་ཞུགས་པའི་ཆོ་ག་རྒྱས་པ་ཡང་
དེ་བཞིན་ནོ་ཞེས་བྱ་བ་ནི། ཇི་ལྟར་སློབ་དཔོན་གྱི་འཇུག་པའི་ཆོ་ག་རྒྱས་པར་གསུངས་པ་དེ་བཞིན་དུ་སློབ་མ་རྣམས་ལ་ཡང་ཤེས་པར་བྱའོ། །རྡོ་རྗེ་རིན་པོ་ཆེའི་དཀྱིལ་འཁོར་ཞེས་བྱ་བ་ནི་མི་ཕྱེད་པའི་དབང་བསྐུར་བ་སྦྱིན་པ་ལ་སོགས་པའི་ཡེ་ཤེས་ནི་བསམ་པ་ཐམས་ཅད་ཡོངས་སུ་རྫོགས་པར་བྱེད་པའི་རྒྱུར་
གྱུར་པས་རིན་པོ་ཆེ་དང་འདྲ་བས་ན་རིན་པོ་ཆེ་སྟེ། དེ་ལས་བྱུང་བའི་རིན་པོ་ཆེའི་རིགས་ཀྱི་དཀྱིལ་འཁོར་ནི་རྡོ་རྗེ་རིན་པོ་ཆེའི་དཀྱིལ་འཁོར་རོ། །འདི་སྐད་སྟོན་པར་འགྱུར་ཏེ། །བཅོམ་ལྡན་འདས་རྡོ་རྗེ་རིན་ཆེན་གྱི་སྦྱོར་བས་དེ་ཁོ་ན་ཉིད་བསྡུས་པ་ལས་གསུངས་པའི་རྣལ་འབྱོར་ཆེན་པོ་བྱས་ལ་ཏིང་ངེ་
འཛིན་གསུམ་བསྒོམ་པ་ནས་བརྩམས་ཏེ། དེ་ཇི་སྲིད་ཉིན་རེ་ཞིང་དེ་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་ཇི་སྐད་དུ་བཤད་པའི་དཀྱིལ་འཁོར་གྱི་སའི་དབུས་སུ་ཏིང་ངེ་འཛིན་གསུམ་རྣམ་པར་བསྒོམས་ལ། སྔ་མ་བཞིན་དུ་བར་སྣང་གི་ཕྱོགས་སུ་བཞག་

59-1-172b

སྟེ། ཉི་མ་འཆར་བའི་དུས་སུ་ལེགས་པར་ཐིག་གདབ་པར་བྱའོ། །འདིའི་ཕྱིའི་དཀྱིལ་འཁོར་ནི་རྡོ་རྗེ་སེམས་དཔའི་དཀྱིལ་འཁོར་གྱི་ཚུལ་དུ་བྱས་ལ། དེའི་ནང་དུ་དེའི་ཕྱེད་ཀྱི་ཚད་ལ་རིན་པོ་ཆེ་ཟུར་བརྒྱད་པའི་དབྱིབས་ཅན། ནོར་བུའི་ཀ་བ་བརྒྱད་དང་ཡང་དག་པར་ལྡན་པ། ཕྱི་རོལ་ཀུན་
དུ་རི་མོ་གཉིས་ཀྱི་ནང་ན་གནས་པའི་རིན་པོ་ཆེའི་ཡལ་གའི་པ་ཏྲའི་ཕྲེང་བས་ཡོངས་སུ་བསྐོར་བ། ཡང་ཕྱི་རོལ་ཀུན་ནས་རིན་པོ་ཆེའི་མྱུ་གུའི་འདབ་མའི་ཕྲེང་བས་རི་མོ་གཅིག་པའི་ར་བ་ཟླུམ་པོར་བྱས་པས་རྡོ་རྗེ་རིན་པོ་ཆེའི་ཕྲེང་བའི་ཚུལ་འཛིན་པས་ཡོངས་སུ་བསྐོར་བ། །མེ་ཏོག་གི་ཆུན་འཕྱང་དང་། 
བ་དན་དང་། གདུགས་དང་རྔ་ཡབ་ཀྱིས་ཉེ་བར་མཛེས་པར་བྱས་པས་ཐིག་གདབ་པར་བྱའོ། །དེ་ནས་ལེགས་པར་བྲིས་ཏེ། ལྷ་ཐམས་ཅད་ཀྱི་གནས་སུ་སྣ་ཚོགས་པདྨའི་གདན་བྲི་བར་བྱའོ། །དེ་ནས་ནང་གི་དཀྱིལ་འཁོར་གྱི་ལྟེ་བ་ལ་ཇི་སྐད་དུ་བཤད་པའི་རྟས་དྲངས་པའི་ཤིང་རྟའི་སྟེང་དུ་སྣ་
ཚོགས་པདྨ་ལ། བཅོམ་ལྡན་འདས་འཕགས་པ་ནམ་མཁའི་སྙིང་པོ་སེམས་དཔའི་སྐྱིལ་མོ་ཀྲུང་གིས་བཞུགས་པ་བྲི་བར་བྱའོ། །ལྷག་མ་རྣམས་ནི་སྔར་བཤད་པ་བཞིན་དུ་ཤེས་པར་བྱའོ། །དབང་བསྐུར་བ་ལ་སོགས་པ་རྣམས་ཀྱང་དག་ཅིང་རྙོག་པ་མེད་པའི་ནོར་བུ་གསེར་གྱི་མདོག་ཅན་དུ་ཤེས་
པར་བྱའོ། །འདིར་ལྷ་ཐམས་ཅད་ཀྱི་གནས་སུ་ཏྲཱཾ་ཞེས་བྱ་བས་དགོད་པར་བྱའོ། །དེ་ལྟར་དཀྱིལ་འཁོར་བྲིས་ནས། དེ་བཞིན་དུ་ཡང་རྣལ་འབྱོར་ཆེན་པོ་བྱས་ནས་འཇུག་པའི་དམ་ཚིག་གི་ཕྱག་རྒྱ་ཡོངས་སུ་བཟུང་བའི་རིན་པོ་ཆེའི་མེ་ཏོག་གི་ལྕུག་མ་ལས་རྣམ་པར་རྒྱལ་བའི་བུམ་པ་དང་། ལྷ་ཐམས་ཅད་
ཀྱི་བུམ་པ་དང་། བུམ་པ་གང་བ་རྣམས་ལ་རེ་རེ་ཞིང་ཡང་ཏྲཱཾ་ཞེས་བྱ་བ་བརྒྱ་རྩ་བརྒྱད་བཟླས་བརྗོད་བྱའོ། །དེ་ནས་དཀྱིལ་འཁོར་གྱི་སྒོ་བཞི་ཕྱེ་སྟེ་བསྡུ་བ་བྱས་ལ། བཅོམ་ལྡན་འདས་ཀྱི་ཕྱག་རྒྱ་ཆེན་པོ་བསྒོམ་ཞིང་། བཅོམ་ལྡན་འདས་ལ་མཚན་བརྒྱ་རྩ་བརྒྱད་ཀྱིས་བསྟོད་དེ། གསང་བའི་ལྕགས་ཀྱུ་
དང་། ཏྲཱཾ་ཞེས་བྱ་བས་བཅོམ་ལྡན་འདས་འཁོར་དང་བཅས་པ་དཀྱིལ་འཁོར་དུ་བཅུག་ལ། །རྡོ་རྗེ་གནོད་སྦྱིན་གྱིས་བགེགས་བསལ་བ། མཚམས་དང་དཀྱིལ་འཁོར་བཅིང་བ་དང་། ར་བ་དང་དྲྭ་བ་དག་ཀྱང་བྱས་ཏེ། རྡོ་རྗེ་ཁུ་ཚུར་གྱིས་དཀྱིལ་འཁོར་གྱི་སྒོ་བཞི་བཅིངས་ནས་རྡོ་རྗེ་སྲུང་བས་བསྲུང་བ་

59-1-173a

ཐམས་ཅད་གོ་བསྐོན་ཏེ། ཏྲཱཾ་ཞེས་བྱ་བས་མཆོད་ཡོན་ཕུལ་ཏེ། རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་ཇི་སྐད་དུ་བཤད་པའི་མཚན་ཉིད་དང་ལྡན་པ་དང་། ཏྲཱཾ་ཏྲི་ཤུ་ཞེས་བྱ་བས་བཅོམ་ལྡན་འདས་འཁོར་དང་བཅས་པ་བལྟ་བ་བྱས་ནས། ཛཿ་ཧཱུྃ་བཾྃ་ཧོཿ ས་མ་ཡ་སྟྭྃ། ས་མ་ཡ་སྟྭྃ། ཨ་
ཧྃ་ཏྲྃ་ཞེས་ལན་གསུམ་བརྗོད་དེ་བསྒྲུབ་པར་བྱའོ། །དེ་ནས་ལྕེ་ལ་རྡོ་རྗེ་ཇི་ལྟ་བ་བཞིན་དུ་བསམས་ལ། ལྷ་ཐམས་ཅད་ཀྱི་ལྗགས་ལ་ཏྲཱཾ་ཞེས་བྱ་བ་བསམ་པར་བྱ་སྟེ། འདི་ནི་ཆོས་ཀྱི་ཕྱག་རྒྱའོ། །དེ་ནས་ཨ་ཞེས་བྱ་བ་རང་གི་སྙིང་གར་སྣ་ཚོགས་རྡོ་རྗེ་བསམས་ལ། ནམ་མཁའི་སྙིང་པོ་ལ་སོགས་
པའི་ལས་ཀྱི་ཕྱག་རྒྱ་ཏྲཱཾ་ཞེས་བྱ་བ་ལ་སོགས་པ་ཟློས་ཤིང་བཅིང་བར་བྱ་སྟེ། རིན་པོ་ཆེའི་ཕྱག་རྒྱ་གཉིས་བཅིངས་ལ། གཅིག་སྙིང་གར་བཞག་ལ་གཡས་པའི་རིན་པོ་ཆེའི་ཁུ་ཚུར་གྱིས་ནོར་སྦྱིན་པ་ལྟ་བུ་འདི་ནི་བཅོམ་ལྡན་འདས་ནམ་མཁའི་སྙིང་པོའི་ལས་ཀྱི་ཕྱག་རྒྱའོ། །རིན་པོ་ཆེའི་ཁུ་ཚུར་གཉིས་
པོ་དེ་ཉིད་དབང་བསྐུར་བའི་གནས་སུ་འཇོག་པ་ནི་རིན་པོ་ཆེ་དབང་བསྐུར་བའོ། །རིན་པོ་ཆེའི་ཁུ་ཚུར་བཀན་ལ་སྙིང་གའི་ཕྱོགས་སུ་བཞག་པ་ནི་རིན་པོ་ཆེ་ཆེན་པོའི་ནོར་སྦྱིན་གྱིའོ། །རིན་པོ་ཆེའི་ཁུ་ཚུར་གཉིས་བཀན་ལ་པང་པར་བཞག་པ་ནི་ཆོས་རིན་པོ་ཆེའིའོ། །རིན་པོ་ཆེའི་ཁུ་ཚུར་གཉིས་མགོར་
བཞག་པ་ནི་རིན་པོ་ཆེ་ཆེན་པོ་རོ་མྱང་བའིའོ། །ལྷ་མོ་རྣམས་ཀྱི་ཕྱག་རྒྱ་ཆེན་པོ་ཉིད་ལས་ལས་ཀྱི་ཕྱག་རྒྱའི་ཚུལ་དུ་བཅིངས་ནས་ལས་ཀྱི་ཕྱག་རྒྱར་འགྱུར་རོ། །དེ་ནས་རས་ལ་བྲི་བའི་རྗེས་སུ་འབྲངས་ནས། ཕྱག་རྒྱ་ཆེན་པོ་བསམ་པར་བྱའོ། །དེ་ནས་རྡོ་རྗེ་རིན་ཆེན་གྱི་ཕྱག་རྒྱས་བཅོམ་ལྡན་འདས་འཁོར་
དང་བཅས་པ་དབང་བསྐུར་བ་ལས་སྔ་མ་བཞིན་དུ་མཆོད་ཡོན་དང་། བུམ་པ་དང་། བུམ་པ་གང་བ་དང་། ན་བཟའ་དང་། བླ་རེ་ལ་སོགས་པས་བཅོམ་ལྡན་འདས་འཁོར་དང་བཅས་པ་ལ་ཕུལ་ཏེ། མེ་ཏོག་གི་ཤིང་ལ་སོགས་པ་མཆོད་པ་རྣམ་པ་ལྔས་མཆོད་པ་བྱས་ལ། ཕྱི་རོལ་ཏུ་གླུ་དང་གར་
དང་རོལ་མོ་དང་རྟ་དང་གླང་པོ་ཆེ་དང་། བ་ལང་གི་ཁྱུ་རྣམས་ཀྱིས་ཀྱང་མཆོད་པ་བྱེད་དུ་གཞུག་གོ། །དེ་ནས་ཕྱག་རྒྱའི་མཆོད་པ་རྣམ་པ་བཅུ་གཉིས་ཀྱིས་ཡང་དག་པར་མཆོད་ལ། ཨ་ལས་རིན་པོ་ཆེ་སྣ་བདུན་དང་། དཔག་བསམ་གྱི་ཤིང་དང་ཁ་ཟས་རོ་བརྒྱ་དང་ལྡན་པའི་བཀོད་པ་སྤྲུལ་

59-1-173b

ནས། དེ་རྣམས་འདིས་དབུལ་བར་བྱ་སྟེ། ཕྱག་འཚལ་བའི་ཐལ་མོ་སྤྱི་བོར་བཞག་ལ། ཨོཾ་སརྦ་བི་དྤཱུ་ར་པཱུ་ར། སུ་ར་སུ་ར། ཨཱ་བརྟ་ཡ་ཨཱ་བརྟ་ཡ་ཧོ། དེ་ནས་ཕྱི་རོལ་དུ་གཏོར་མ་བྱིན་ལ། སྦྱིན་སྲེག་བྱས་ནས། རྡོ་རྗེ་གནོད་སྦྱིན་གྱིས་ཡོངས་སུ་བཟླས་པའི་རས་སེར་པོ་གཅིག་གིས་
སྨད་གཡོགས་བྱ། གཉིས་པས་སྟོད་གཡོགས་བྱས་ལ། ཡང་རས་གཅིག་ལ་སྒོ་སྲུང་བཞིའི་སྙིང་པོ་བཟླས་པས་རང་གི་གདོང་གཡོགས་པར་བྱའོ། །དེ་ལ་སྒོ་སྲུང་བཞིའི་སྙིང་པོ་ནི་འདི་ཡིན་ཏེ། ཨོཾ་སརྦ་རཏྣ་ཨཱརྱ་ཨཱ་རུ་ཎ། མ་ཧཱ་སཏྭ་བྷ་ག་བཱན་ཏཾ། ཨཱརྱ་ཨཱ་ཀཱ་གརྦྷ་ཙོ་ཏ་ཡ་ཨཱ་
ཀཪྵ་ཡ། ཨོ་སརྦ་རཏྣ་པྲ་བེ་ཤ་ས་མ་ཡཱན། མ་ཧཱ་མ་ཎི་རཱ་ཛ་ཀུ་ལ་རཏྣ་པཱ་ཤ་ཧཱུྃ། ཨོཾ་མ་ཎི་བནྡྷ་ཧཱུྃ་བཾྃ། ཨོཾ་མ་ཎི་རཏྣ་ཨཱ་བེ་ཤ་ཡ་ཨཱ་ཞེས་བྱ་བའོ། །དེ་ནས་ཕྱག་འཚལ་བ་ལ་སོགས་པ་སྔོན་དུ་འགྲོ་བས་དེ་བཞིན་དུ་སྡོམ་པ་བཟུང་ལ། བྱང་ཆུབ་ཏུ་སེམས་བསྐྱེད་དེ། དེ་བཞིན་དུ་རྡོ་རྗེ་རིན་
པོ་ཆེ་སྙིང་གར་བསྐྱེད་ལ། ཤར་ཕྱོགས་ཀྱི་སྒོ་ལ་བལྟས་ནས་ཕྱི་རོལ་ན་གནས་པའི་བུམ་པའི་ཆུས་བདག་ཉིད་དབང་བསྐུར་ཏེ། འཇུག་པའི་དམ་ཚིག་གི་ཕྱག་རྒྱ་བཅིངས་ནས། དེ་ཉིད་ཀྱི་མེ་ཏོག་ཕྲེང་བ་བླངས་ལ། བཛྲ་བཛྲ་ཏྲཾ་ཞེས་བརྗོད་ཅིང་དཀྱིལ་འཁོར་དུ་འཇུག་པར་བྱའོ། །དེ་ནས་
འཕགས་པ་སྐྱ་རེངས་ལན་ཅིག་བརྗོད་པར་བྱའོ། །དེ་ནས་ལྷོ་ཕྱོགས་ཀྱི་སྒོ་ནས་དེ་བཞིན་དུ་ཞུགས་ལ་རིན་པོ་ཆེའི་ཞགས་པའི་སྙིང་པོ་ལན་ཅིག་བརྗོད་པར་བྱའོ། །དེ་ནས་ནུབ་ཕྱོགས་ཀྱི་སྒོ་ནས་དེ་བཞིན་དུ་ཞུགས་ལ། རིན་པོ་ཆེའི་ལྕགས་སྒྲོག་གི་སྙིང་པོ་ལན་ཅིག་བརྗོད་པར་བྱའོ། །དེ་ནས་
བྱང་ཕྱོགས་ཀྱི་སྒོ་ནས་དེ་བཞིན་དུ་ཞུགས་ལ། ནོར་བུ་རིན་པོ་ཆེ་འབེབས་པའི་སྙིང་པོས་བདག་ཉིད་དབང་དུ་བྱའོ། །དེ་ནས་ཡང་དེ་བཞིན་དུ་ཤར་ཕྱོགས་ཀྱི་སྒོ་ནས་ཞུགས་ལ། མ་ཧཱ་ར་ཏ། སུ་དྲྀ་ཌྷ་སུ་ཏོ་ཥོ་སུ་སུ་ཁོ། བཛྲ་སཏྭ། ཨཱ་དྱ་སིདྡྷྱ་མཱྃ། ཞེས་བརྗོད་པར་བྱའོ། །དེ་ནས་རྣམ་པར་སྒེག་
པའི་རྡོ་རྗེས་ཕྱག་བྱས་ལ་དཀྱིལ་འཁོར་བསྐོར་བ་ལན་གསུམ་བྱས་ཏེ། བཅོམ་ལྡན་འདས་ནམ་མཁའི་སྙིང་པོའི་སྤྱན་སྔར་འདུག་ལ། འདི་སྐད་ཅེས་བརྗོད་པར་བྱའོ། །མ་ཧཱ་རཱ་ག་མ་ཧཱ་སཽ་ཁྱ་མ་ཧཱ་བཛྲ་མ་ཧཱ་དྷཱ་ན། མ་ཧཱ་ཛྙཱ་ན་མ་ཧཱ་ཀརྨ། བཛྲ་ས་ཏཱ་ཨཱདྱ་སིདྡྷྱ་མཱྃ། ཡང་འདི་སྐད་ཅེས་བརྗོད་པར་བྱའོ། །

59-1-174a

ཛཿཧཱུྃ་བཾཾ་ཧོཿཔྲ་སིདྡྷྱ་མཱ། དེ་ནས་རྡོ་རྗེའི་ཆུ་འཐུངས་ལ། བདག་ཉིད་ལ་དབབ་པར་བྱ་སྟེ། ཨ་ཞེས་བྱ་བ་ལན་བརྒྱ་བཟླའོ། །དེ་ནས་གཡོན་པའི་རྡོ་རྗེ་ཁུ་ཚུར་གྱིས་སྡིགས་མཛུབ་ལགས་གཡས་པ་རྡོ་རྗེ་རིན་ཆེན་གྱི་ཕྱག་རྒྱས་དེ་དབྱེ་ཞིང་ཨ་ཞེས་བྱ་བ་ཉིད་ལན་བརྒྱ་རྩ་བརྒྱད་བཟླས་
པར་བྱའོ། །དེ་ནས་ཏྲཾ་ཞེས་བྱ་བས་མེ་ཏོག་དོར་བར་བྱའོ། །དེ་ནས་དེ་བླངས་ལ་ཏྲྃ་ཞེས་བྱ་བ་ཉིད་ཀྱིས་རང་གི་མགོ་ལ་བཅིང་བར་བྱའོ། །དེ་ནས་ཏྲྃ་ཞེས་བྱ་བ་ཟློས་ཤིང་གདོང་གཡོགས་དགྲོལ་བར་བྱའོ། །དེ་ནས་དེ་ཉིད་ཟློས་ཤིང་ཤར་ཕྱོགས་ཀྱི་ཆ་ནས་བརྩམས་ཏེ། དཀྱིལ་འཁོར་
བལྟའོ། །དེ་ནས་འཇུག་པའི་ཕྱག་རྒྱ་བཅིངས་ལ། ཏིཥྛ་བཛྲ་ཞེས་བྱ་བ་ལ་སོགས་པས་རང་གི་སྙིང་གར་དགྲོལ་བར་བྱའོ། །དེ་ནས་འཕགས་པ་ནམ་མཁའི་སྙིང་པོའི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་ལ་རྡོ་རྗེ་ལྟ་བས་བལྟ་ཞིང་། ཇི་སྲིད་བཅོམ་ལྡན་འདས་ཀྱི་ཞལ་བསྟན་
ནས། དངོས་གྲུབ་ཐམས་ཅད་སྩོལ་བར་འགྱུར་བ་དེ་སྲིད་ཀྱི་བར་དུ་བཟླས་བརྗོད་བྱའོ། །དེ་ནས་རྡོ་རྗེ་ཐལ་མོ་བསྐོར་ལ་ཤིས་པ་བརྗོད་པ་འདོན་པའི་ཚུལ་དུ་སྙིང་གར་གཞག་ལ། མཚན་བརྒྱ་རྩ་བརྒྱད་པས་བསྟོད་དེ། རིན་པོ་ཆེའི་མཚོན་ཆ་ལ་སོགས་པ་གསང་བའི་མཆོད་པ་བཞིས། བཅོམ་
ལྡན་འདས་འཁོར་དང་བཅས་པ་ཡང་དག་པར་མཆོད་ལ། གླུ་དང་རོལ་མོ་ལ་སོགས་པའི་མཆོད་པ་རྣམས་ཀྱིས་ཀྱང་ལེགས་པར་མཆོད་པར་བྱའོ། །དེ་ནས་ཡང་བཅོམ་ལྡན་འདས་ནམ་མཁའི་སྙིང་པོའི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་ལ་རྡོ་རྗེའི་ལྟ་བས་བལྟ་ཞིང་རྡོ་རྗེ་ཐལ་
མོ་བསྐོར་བས་ཕྱག་བྱས་ལ། མེ་ཏོག་ལ་སོགས་པའི་དབང་བསྐུར་བ་རྣམས་བླང་བར་བྱ་སྟེ། དེ་ལ་དང་པོ་ཁོ་ནར་རྡོ་རྗེ་རིན་ཆེན་གྱི་ཕྱག་རྒྱས་ཡོངས་སུ་བཟུང་བའི་རྡོ་རྗེའི་རིན་པོ་ཆེའི་མེ་ཏོག་གི་ཡལ་ག་ལས། ཡང་རྣམ་པར་རྒྱལ་བའི་བུམ་པ་སྔར་བཤད་པའི་བུམ་པའི་སྔགས་དེ་བཞིན་དུ་
བཟླས་ལ། བདག་ཉིད་འཕགས་པ་ནམ་མཁའི་སྙིང་པོར་བྱིན་གྱིས་བརླབས་ཏེ། རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱས་རྣལ་འབྱོར་ཆེན་པོ་བཤད་པའི་གནས་རྣམས་སུ་རང་གི་ལུས་ལ་འཕགས་པ་ནམ་མཁའི་སྙིང་པོ་ལ་སོགས་པ་ཡང་དག་པར་བཞག་ནས། ཕྱིའི་དཀྱིལ་འཁོར་གྱི་

59-1-174b

ནང་དུ་རྟ་བདུན་དང་ལྡན་པའི་ཤིང་རྟའི་སྟེང་དུ་སྣ་ཚོགས་པདྨ་བྲིས་ལ། དེའི་སྟེང་དུ་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ཏེ་འདུག་ནས། མེ་ཏོག་ལ་སོགས་པས་བདག་ཉིད་ཡང་དག་པར་མཆོད་དེ། མཆོད་ཡོན་བླངས་ལ། མཚན་བརྒྱ་རྩ་བརྒྱད་པས་བསྟོད་ལ། རྣམ་པར་རྒྱལ་བའི་
བུམ་པ་ལས་རྡོ་རྗེ་ཁུ་ཚུར་གྱིས་ཆུ་བླངས་ལ། ཨོཾ་བཛྲ་ཨ་བྷི་ཥིཉྩ་ཏྲཱྃ་ཞེས་བྱ་བ་དང་། དེས་བདག་ཉིད་དབང་བསྐུར་བར་བྱ་ཞིང་། ཆུ་དེ་བཏུང་བར་ཡང་བྱའོ། །དེ་ནས་རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་ལ། ལུགས་མའམ་བརྡུངས་པ་ལ་སོགས་པའི་རིན་པོ་ཆེའི་ཅོད་པན་དང་། དར་
དཔྱངས་དང་ལྡན་པ་ལ། ཏྲྃ་ཞེས་བྱ་བ་ལ་སོགས་པ་བཟླས་པས་ཡང་བདག་ཉིད་དབང་བསྐུར་ཏེ། རྡོ་རྗེ་རིན་པོ་ཆེ། རིན་པོ་ཆེའི་དྲིལ་བུ་དང་བཅས་པར་བླངས་ལ། བདག་པོ་དང་མིང་གིས་དབང་བསྐུར་བ་དག་གིས་དབང་བསྐུར་བར་བྱའོ། །དེ་ནས་དངོས་གྲུབ་ཀྱི་རིན་པོ་ཆེའི་རྡོ་རྗེའི་བརྟུལ་
ཞུགས་བླངས་ལ། མེ་ཏོག་ལ་སོགས་པ་ཕྱིའི་མཆོད་པ་རྣམས་ཀྱིས་བདག་ཉིད་ཡང་དག་པར་མཆོད་ཅིང་རིན་པོ་ཆེའི་མཚོན་ཆ་ལ་སོགས་པ་ཕྱག་རྒྱའི་མཆོད་པ་རྣམ་པ་བཅུ་གཉིས་ཀྱིས་མཆོད་ལ། རྡོ་རྗེ་རིན་པོ་ཆེ་དེ་ཁོ་ན་ཉིད་ཀྱིས་གཟུང་བར་བྱ་སྟེ། ཉི་མ་འདི་ནི་དམ་པ་སྟེ། །ཐམས་ཅད་མཐོང་
བ་དེ་བཞིན་གཤེགས། །ནམ་མཁའི་སྙིང་པོ་བཅོམ་ལྡན་འདས། །བསམ་པ་ཐམས་ཅད་རྫོགས་མཛད་པའོ། །ཞེས་བྱ་བ་ནི་དེ་ཁོ་ན་ཉིད་དོ། །རིན་པོ་ཆེའི་དྲིལ་བུ་ཆོས་ཀྱིས་དཀྲོལ་བར་བྱ་སྟེ། བསམ་པ་ཐམས་ཅད་འགྲུབ་པ་ནི། །དོན་བསམ་འགྲུབ་པ་དམ་པ་སྟེ། །འདོད་པ་དེ་ནི་
རབ་གྲུབ་ཕྱིར། །འདོད་ལས་ཐར་པའི་བདེ་བ་ཆེ། །ཞེས་བྱ་བ་ནི་ཆོས་སོ། །དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབ་པར་བྱ་སྟེ། འདོད་དང་བདེ་བ་ཀུན་གྱི་ཕྱིར། །མི་མཐུན་པ་ཡང་སྦྱིན་བྱ་སྟེ། །བདག་ཉིད་དང་ནི་གཞན་རྣམས་ཀྱི། །བསམ་པ་ཐམས་ཅད་རྫོགས་པར་གྱིས། །ཞེས་
བྱ་བ་ནི་དམ་ཚིག་གོ། །དེ་ནས་བཅོམ་ལྡན་འདས་ལ་ཕྱག་བྱས་ཏེ་སྙིང་པོ་བཟུང་ལ། ཚིགས་སུ་བཅད་པ་ལྔ་པས་རྗེས་སུ་གནང་བ་དང་། གཟེངས་བསྟོད་པ་དང་། ལུང་བསྟན་པ་དག་མནོས་ནས། ཡང་བདག་ལ་བྱིན་གྱིས་བརླབ་པ་ལ་སོགས་པ་དག་བྱས་ཏེ། ཅི་འདོད་པར་བཟླས་བརྗོད་

59-1-175a

ཀྱང་བྱས་ནས། བཅོམ་ལྡན་འདས་ལ་ཕྱག་བྱས་ལ། འདི་སྐད་ཅེས་བརྗོད་པར་བྱ་སྟེ། བདག་མིང་འདི་ཞེས་བྱ་བ་ཡི། །རིན་ཆེན་སློབ་དཔོན་དཀའ་ཐུབ་ཆེས། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བགྱི། །སློབ་དཔོན་གྱི་ལས་ཀྱི་ཆོ་ག་རྫོགས་
སོ།།      །།དེ་ནས་སྡོམ་པ་དབོག་པར་འོས་པའི་སློབ་མ་ལ་སྔར་བཤད་པའི་ཚུལ་གྱིས་སྡོམ་པ་འཛིན་དུ་གཞུག་པ་དང་། བྱང་ཆུབ་ཏུ་སེམས་བསྐྱེད་པ་དག་བྱའོ། །དེ་ནས་དེའི་སྙིང་གར་དེ་བཞིན་དུ་རྡོ་རྗེ་རིན་ཆེན་བསྐྱེད་ལ། དེ་འཕགས་པ་ནམ་མཁའི་སྙིང་པོར་བྱིན་གྱིས་བརླབས་ཏེ། དྲི་དང་མེ་ཏོག་ལ་
སོགས་པས་མཆོད་ནས། ཡོན་གྱི་མཆོག་བླངས་ཏེ། སྒོར་མངོན་པར་ཕྱོགས་ནས་གནས་པའི་བུམ་པའི་ཆུས་དབང་བསྐུར་ལ། རང་ཉིད་འཇུག་པའི་ཆོ་གས་བཅུག་སྟེ། ཡང་གཡོན་པའི་ཁྲོ་བོའི་ཁུ་ཚུར་བཅིངས་ནས། རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱས་ཕྱེ་ལ། སྙིང་པོ་འདིས་དབབ་པར་བྱའོ། །
ཏྲྃ་ཨ་ཨ་ཨ་ཨ་ཞེས་ལན་བརྒྱ་བཟླས་སོ། །དེ་ནས་ཆོ་ག་ཐམས་ཅད་རྗེས་སུ་སྤྱད་པར་བྱའོ། །སློབ་མ་གཞུག་པ་ལ་སོགས་པའི་ཆོ་ག་རྒྱས་པ་རྫོགས་སོ།།      །།དེ་ལྟར་དམ་ཚིག་དང་དབང་བསྐུར་བ་ཐོབ་པ་རྣམས་ལ། སློབ་དཔོན་གྱིས་དངོས་གྲུབ་ཀྱི་ཤེས་བསླབ་པར་བྱའོ་ཞེས་བསྟན་པར་
བྱ་བའི་ཕྱིར། སྒྲུབ་པ་ལ་ཞེས་བྱ་བ་ལ་གོགས་པ་གསུངས་ཏེ། སྒྲུབ་པ་དང་དངོས་གྲུབ་རྣམས་ཀྱང་དེ་བཞིན་ནོ་ཞེས་བྱ་བ་ནི་ཇི་ལྟར་རྡོ་རྗེ་སེམས་དཔའི་སྒྲུབ་པ་ལ་རས་ཀྱི་རི་མོ་གཉིས་གསུངས་པ་དང་། དེའི་དངོས་གྲུབ་རྣམས་ཇི་སྐད་དུ་གསུངས་པ་དེ་བཞིན་དུ་འཕགས་པ་ནམ་མཁའི་སྙིང་པོའི་སྒྲུབ་པ་
དང་། དེ་སྒྲུབ་པ་རྣམས་ཀྱང་དེ་ལྟར་ཤེས་པར་བྱའོ། །འདི་སྐད་སྟོན་པ་ཡིན་ཏེ། ཇི་སྐད་དུ་གསུངས་པའི་ཚུལ་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་འཕགས་པ་ནམ་མཁའི་སྙིང་པོའི་སྐུ་རས་ལ་བྲིས་པ་ལ་སོགས་པ་མདུན་དུ་བཞག་སྟེ། བདག་ལ་བྱིན་གྱིས་བརླབ་པ་ལ་སོགས་པ་བྱས་
ནས། བཅོམ་ལྡན་འདས་མདུན་དུ་ཇི་ལྟ་བ་བཞིན་དུ་སྤྱན་དྲངས་ཏེ། ཕྱིའི་མཆོད་པ་རྣམས་ཀྱིས་ཡང་དག་པར་མཆོད་ལ་ཕྱག་བྱས་ནས། རྡོ་རྗེ་རིན་པོ་ཆེའི་ཕྱག་རྒྱ་བཅིངས་ཏེ། བཟླས་བརྗོད་དཔག་ཏུ་མེད་པས་ཟླ་བ་གཅིག་གི་བར་དུ་སྔོན་དུ་བསྙེན་པ་སྔ་མ་བཞིན་དུ་བྱས་ལ། དེ་བཞིན་དུ་དཀྱིལ་འཁོར་གྱི་

59-1-175b

མལ་གྱི་སར་རས་རིས་བྲིས་ནས། དེ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ་ཟླ་བ་གཅིག་གི་བར་དུ་དཔག་ཏུ་མེད་པའི་བཟླས་བརྗོད་དེ་བཞིན་དུ་བྱའོ། །དེ་ནས་ཟླ་བ་ཉ་ལ་བབ་པ་དང་མཚན་ཐོག་ཐག་བཟླས་བརྗོད་བྱས་ན། ནང་པར་བཅོམ་
ལྡན་འདས་འཕགས་པ་ནམ་མཁའི་སྙིང་པོས་ཞལ་བསྟན་ནས། མངོན་པར་འདོད་པའི་དངོས་གྲུབ་ཐམས་ཅད་སྩོལ་བར་འགྱུར་ཏེ། དེ་རས་ཀྱི་རི་མོ་དང་པོའི་ཆོ་གའོ། །དེ་ནས་རས་རིས་གཉིས་པ་ལ་སྒྲུབ་པ་བཤད་པར་བྱ་སྟེ། སྔོན་དུ་བསྙེན་པ་དེ་བཞིན་དུ་བྱས་ལ། བཅོམ་ལྡན་འདས་
ནམ་མཁའི་སྙིང་པོ་དཔའ་བོ་གཅིག་པུ་རས་ལ་བྲིས་ཏེ། དེའི་སྤྱན་སྔར་བཅོམ་ལྡན་འདས་ནམ་མཁའི་སྙིང་པོའི་ཕྱག་རྒྱ་ཆེན་པོ་བཅིངས་ལ། བཟླས་བརྗོད་འབུམ་བྱའོ། །དེ་ནས་ཟླ་བ་ཉ་ལ་བབ་པ་དང་། མཚན་ཐོག་ཐག་བཟླས་བརྗོད་བྱས་ཏེ། དེ་ནས་ནང་པར་བཅོམ་ལྡན་འདས་ནམ་མཁའི་སྙིང་
པོས་ཞལ་བསྟན་ནས། སྒྲུབ་པ་པོ་ལ་ནམ་མཁའི་སྙིང་པོ་ཉིད་སྩོལ་བར་འགྱུར་བའོ། །དེ་ནས་མ་བསྒྲུབས་པར་ཞེས་བྱ་བ་ནི་སྔ་མ་དང་འདྲའོ། །དབང་བསྐུར་བ་ཐམས་ཅད་ཐོབ་ཅིང་ཞེས་བྱ་བ་ནི་དབང་བསྐུར་བ་ཡང་ཡིན་ལ་ཐམས་ཅད་ཀྱང་ཡིན་པས་ན། དབང་བསྐུར་བ་ཐམས་ཅད་དེ། རྡོ་རྗེ་དང་། 
རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེའི་དབང་བསྐུར་བ་རྣམས་ཏེ། བྱང་ཆུབ་ཀྱི་སེམས་ཆེན་པོ་དང་། སྦྱིན་པའི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་སྟོན་པར་བྱེད་པའོ། །དེ་ཐོབ་པ་ནི་མངོན་སུམ་དུ་བྱས་པའོ། །ཇི་ལྟར་འགྱུར་ཞེ་ན། 
རྡོ་རྗེ་རིན་པོ་ཆེའི་དབང་བསྐུར་བའི་ཕྲེང་བས་སོ་ཞེས་བྱ་བ་གསུངས་ཏེ། རིན་པོ་ཆེའི་ཁུ་ཚུར་གཉིས་ཀྱིས་ཕྲེང་བ་བཅིངས་པའི་ཚུལ་དུ་བྱ་བ་ནི། རྡོ་རྗེ་རིན་པོ་ཆེའི་དབང་བསྐུར་བའི་ཕྲེང་བ་སྟེ། དེས་དབང་བསྐུར་བ་ཐམས་ཅད་ཐོབ་པར་འགྱུར་རོ། །བསམ་པ་ཐམས་ཅད་ཡོངས་སུ་རྫོགས་པ་ལ་ནི་ཞེས་
བྱ་བ་ནི། བསམ་པ་ཡང་ཡིན་ལ་ཐམས་ཅད་ཀྱང་ཡིན་པས་ན་བསམ་པ་ཐམས་ཅད་དེ། དེ་དབང་བསྐུར་བ་ལ་སོགས་པ་ཐོབ་པར་འདོད་པའོ། །དེ་ཡོངས་སུ་རྫོགས་པ་ནི་དབང་བསྐུར་བ་ལ་སོགས་པ་ཐོབ་པའོ། །དེ་ཇི་ལྟར་འགྱུར་ཞེ་ན། ཉིན་རེ་ཞིང་ཉི་མ་འཆར་ཀར་བཟླས་བརྗོད་དཔག་ཏུ་

59-1-176a

མེད་པ་བྱས་པས་སོ་ཞེས་བྱ་བ་གསུངས་ཏེ། དེ་བཞིན་དུ་སྔོན་དུ་བསྙེན་པ་བྱས་ལ། བཅོམ་ལྡན་འདས་ཀྱི་སྤྱན་སྔར་བཟླས་བརྗོད་དཔག་ཏུ་མེད་པ་བྱ་ཞིང་ཉིན་རེ་ཞིང་ཡང་བདག་ལ་བྱིན་གྱིས་བརླབ་པ་ལ་སོགས་པ་བྱས་ཏེ། འདི་ནི་རིན་པོ་ཆེ་ཆེན་པོ་འཛིན་པ་ནོར་སྦྱིན་གྱི་
དངོས་གྲུབ་སྟོན་པ་ཡིན་ནོ། །ཆོས་ཐམས་ཅད་ཀྱི་དོན་ཤེས་པ་ལ་ནི་ཞེས་བྱ་བ་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་ཀྱི་སེམས་དང་སེམས་ལས་བྱུང་བ་དང་། པདྨའི་རིགས་ནི་ཆོས་ཐམས་ཅད་དོ། །དེ་རྣམས་ཀྱི་དོན་ནི་ངོ་བོ་ཉིད་རྣམ་པར་དག་པ་སྟེ། དེ་ཤེས་པ་ནི་ངེས་པར་བྱས་པའོ། །
དེ་ཇི་ལྟར་འགྱུར་ཞེ་ན། དྲི་མ་མེད་པའི་ནམ་མཁའ་ལ་ལྟ་ཞིང་བཟླས་བརྗོད་བྱའོ་ཞེས་བྱ་བ་གསུངས་ཏེ། རྡུལ་ཐམས་ཅད་དང་བྲལ་བའི་ནམ་མཁའ་དེ་ལ་མིག་གི་རྣམ་པར་ཤེས་པ་དང་བློས་བལྟ་བཞིན་དུ་བཟླས་བརྗོད་ཏྲཾ་ཞེས་བྱ་བ་བཟླས་པར་བྱའོ། །འདི་སྟོན་པར་འགྱུར་ཏེ། ཆོས་ཐམས་ཅད་ནི་
ངོ་བོ་ཉིད་ཀྱིས་དག་པའོ་ཞེས་བསྒོམ་ཞིང་བཟླས་བརྗོད་བྱ་སྟེ། འདིས་ནི་ཆོས་རིན་པོ་ཆེའི་དངོས་གྲུབ་གསུངས་པ་ཡིན་ནོ། །ཟས་དང་སྐོམ་ཐམས་ཅད་ལ་སོགས་པ་རོ་ཐམས་ཅད་ཐོབ་པར་བྱ་བ་ལ་ནི་ཞེས་བྱ་བ་ལ། བཟའ་བ་ལ་སོགས་པ་ནི་ཟས་ཐམས་ཅད་དེ། ཟན་དྲོན་དང་འབྲས་ཆན་ལ་
སོགས་པའོ། །ཁུ་བའི་རྫས་ཐམས་ཅད་ནི་སྐོམ་ཐམས་ཅད་དེ། དེ་ལ་སོགས་པ་གང་ཡིན་པ་དེ་ནི་ཟས་དང་སྐོམ་ཐམས་ཅད་ལ་སོགས་པའོ། །རོ་ཐམས་ཅད་ནི་འཇིག་རྟེན་དང་འཇིག་རྟེན་ལས་འདས་པ་སྟེ། ཞི་བ་ལ་སོགས་པ་ནི་འཇིག་རྟེན་ལས་འདས་པའོ། །མངར་བ་དང་སྐྱུར་བ་ལ་
སོགས་པའི་དབྱེ་བས་ཕྱེ་བའི་རོ་བརྒྱ་ནི་འཇིག་རྟེན་པའོ། །དེ་རྣམས་ཐོབ་པ་ནི་རྙེད་པར་གྱུར་པའོ། །དེ་ཇི་ལྟར་འགྱུར་ཞེ་ན། ནམ་མཁའ་ལས་ཡིད་ལ་འདོད་པས་ཉིན་རེ་ཞིང་བཅོམ་ལྡན་འདས་ཀྱི་བཟླས་པ་སྟོང་བྱས་པས་སོ་ཞེས་བྱ་བ་གསུངས་ཏེ། ཉིན་རེ་ནི་ཉི་མ་རེ་རེ་ཞིང་ངོ་། །བཅོམ་ལྡན་འདས་
ནི་རིན་པོ་ཆེ་ཆེན་པོ་རོ་མྱང་བའི་གཟུགས་ཅན་གྱི་ནམ་མཁའི་སྙིང་པོའོ། །བཟླས་པ་སྟོང་བྱས་པས་ནི་ཏྲྃ་ཞེས་བྱ་བ་ལན་སྟོང་གི་བར་དུ་བཟླས་པས་སྒྲུབ་པ་པོ་ལ་དངོས་གྲུབ་སྩོལ་བ་སྟེ། རིན་པོ་ཆེ་ཆེན་པོའི་རོ་མྱང་བའི་རྣལ་འབྱོར་གྱི་སྦྱོར་བས་འདི་བསྒྲུབ་པར་བྱའོ། །གདུགས་ཆེན་པོ་ཐོབ་པར་བྱ་བ་

59-1-176b

ལ་ནི་ཞེས་བྱ་བ་ནི། རིག་པ་འཛིན་པ་དང་འཁོར་ལོས་སྒྱུར་བ་ཉིད་ལ་སོགས་པ་འཇིག་རྟེན་པའི་རྒྱལ་སྲིད་ཐོབ་པའོ། །དེ་ཇི་ལྟར་འགྱུར་ཞེ་ན། གདུགས་བཟུང་ནས་བཟླས་བརྗོད་འབུམ་བྱའོ་ཞེས་བྱ་བ་གསུངས་ཏེ། ལྷ་མོ་རིན་ཆེན་གྱི་སྦྱོར་བས་རིན་པོ་ཆེའི་གདུགས་བཟུང་ལ་བཟླས་བརྗོད་
འབུམ་བྱའོ། །རྣམ་པར་རྒྱལ་བ་ཆེན་པོ་ཐོབ་པ་ལ་ནི་རིན་ཆེན་རྒྱལ་མཚན་མཆོག་གིས་སོ་ཞེས་བྱ་བ་ལ། ལྷའི་བུ་ལ་སོགས་པ་གཞན་དག་ལས་རྒྱལ་བ་ནི། རྣམ་པར་རྒྱལ་བ་ཆེན་པོ་སྟེ། དེ་ཐོབ་པ་ནི་སྔ་མ་བཞིན་ནོ། །དེ་ཡང་རྡོ་རྗེ་བསྡམས་པ་ལས་བྱུང་བའི་རྡོ་རྗེ་རིན་ཆེན་གྱི་དམ་ཚིག་གི་
ཕྱག་རྒྱ་ལས་གུང་མོ་དང་། སྲིན་ལག་དང་། མཐེའུ་ཆུང་གི་སོར་མོ་བརྐྱང་ལ། སྲིན་ལག་དང་མཐེའུ་ཆུང་ཕན་ཚུན་སྦྲེལ་བ་ནི་རྒྱལ་མཚན་མཆོག་སྟེ། འདི་བཅིངས་ལ། ལྷ་མོ་རིན་ཆེན་རྒྱལ་མཚན་མཆོག་གི་སྦྱོར་བས་ཏྲཾ་ཧཾ་ཞེས་བཟླས་བརྗོད་བྱས་ཏེ། ཕྱག་རྒྱ་བཅིངས་པ་དེ་ལས་རྡོ་རྗེ་
འཛིན་པ་ཆེན་པོ་ལ་སོགས་པའི་ཁྲོ་བོའི་གོ་ཆ་དང་། ཡ་ལད་བགོས་པར་གྱུར་པ་སྤྲུལ་པ་ལ། དེ་རྣམས་ཀྱིས་བདུད་ལ་སོགས་པའི་སྡེ་སྐྲག་པར་གྱུར་པར་བསམ་པར་བྱ་སྟེ། དེ་ལྟ་བུས་ནི་ཐམས་ཅད་ལས་རྣམ་པར་རྒྱལ་བ་ཐོབ་པར་འགྱུར་རོ། །གྲགས་པ་ཆེན་པོ་ནི་ཞེས་བྱ་བ་ལ་སོགས་
པ་ལ་འཇིག་རྟེན་གསུམ་དུ་ཁྱད་པར་ཅན་དུ་གྱུར་ཅིང་། དགའ་བར་བྱ་བ་ལ་སོགས་པས་གཞན་གྱི་ཡོན་ཏན་བསྒྲགས་པ་ནི་གྲགས་པ་ཆེན་པོའོ། །འཇིག་རྟེན་ཐམས་ཅད་ཡང་དག་པར་བསྲུང་ཞིང་། དམྱལ་བ་ལ་སོགས་པའི་སྡུག་བསྔལ་ལས་ཟློག་པར་བྱེད་ལ། འཇིག་རྟེན་དང་འཇིག་རྟེན་ལས་
འདས་པའི་དངོས་གྲུབ་སྟེར་བར་བྱེད་པའོ་ཞེས་སྙན་པའི་སྒྲ་ཐོབ་པའོ། །མིང་ནི་རིན་ཆེན་མཆོག་གི་རིན་པོ་ཆེའི་སློབ་དཔོན་ཞེས་བྱ་བ་ལ་སོགས་པའི་ཁམས་གསུམ་མཐའ་དག་ཏུ་རབ་ཏུ་གྲགས་པ་ནི་མིང་སྟེ། གྲགས་པ་དང་སྙན་པ་ཆེན་པོ་དང་། མིང་དེ་ལྟ་བུ་ཐོབ་པའོ། །དེ་ཇི་ལྟར་འགྱུར་ཞེ་ན།
ཉིན་རེ་ཞིང་སྒོ་ཐམས་ཅད་ནས་བཟླས་པར་བྱའོ་ཞེས་བྱ་བ་གསུངས་ཏེ། ལྷ་མོ་རིན་ཆེན་ལྔའི་སྦྱོར་བས། སྔ་དྲོ་ཤར་ཕྱོགས་སུ་ཁ་བལྟས་ལ་ཟླ་བ་དང་ཉི་མ་ཕྱེད་ལ་ལྷོར་བལྟ་བ་དང་། ཕྱི་དྲོ་ནུབ་ཏུ་བལྟ་བ་དང་། ནམ་ཕྱེད་ན་བྱང་དུ་བལྟས་ལ་བཟླས་བརྗོད་བྱའོ། །བདག་པོ་ཡང་ཡིན་ལ་ཆེན་པོ་ཡང་ཡིན་

59-1-177a

པས་ན། བདག་པོ་ཆེན་པོ་སྟེ། འཇིག་རྟེན་དང་འཇིག་རྟེན་ལས་འདས་པའི་རྒྱལ་པོ་སྟེ། དེ་ཐོབ་པའོ། །དེ་ཇི་ལྟར་འགྱུར་ཞེ་ན། རིན་པོ་ཆེའི་སྲོག་ཤིང་གི་ཕྱག་རྒྱས་སོ་ཞེས་བྱ་བ་གསུངས་ཏེ། རིན་པོ་ཆེའི་ཁུ་ཚུར་གཉིས་ཀྱིས་རིན་པོ་ཆེའི་སྲོག་ཤིང་འཛིན་པའི་ཚུལ་དུ་བྱ་བ་ནི། རིན་པོ་
ཆེའི་སྲོག་ཤིང་གི་ཕྱག་རྒྱ་སྟེ། འདི་བཅིངས་ལ། ལྷ་མོ་རིན་ཆེན་སྲོག་ཤིང་གི་སྦྱོར་བས། ཏྲྃ་ཧྲི་ཞེས་བཟླས་བརྗོད་བྱས་ཏེ། དེ་ལྟ་བུས་ནི་བདག་པོ་ཆེན་པོར་འགྱུར་རོ། །ཐམས་ཅད་དབང་བསྐུར་བ་ནི་བྱང་ཆུབ་ཀྱི་སེམས་ཆེན་པོ་ལ་སོགས་པ་ཐོབ་པའོ། །དེ་ཉིད་རིན་པོ་ཆེ་དང་ཆོས་ཐམས་ཅད་མཐུན་
པས་ན་རིན་པོ་ཆེ་སྟེ། དེའི་དམ་ཚིག་ནི་རིན་པོ་ཆེའི་རིགས་ཏེ། མིང་དེ་སྐད་ཅེས་བྱ་བའི་རྟོག་པའི་རྒྱལ་པོ་ཆེན་པོ་རྫོགས་སོ། །དཔལ་མཆོག་དང་པོ་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུའི་རིན་པོ་ཆེའི་རིགས་ཀྱི་དུམ་བུ་རྫོགས་སོ།།    །།དེ་ལྟར་སེར་སྣའི་གཉེན་པོའི་ཕྱོགས་སུ་རིན་པོ་
ཆེའི་རིགས་བཤད་ནས། ད་ནི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་གཅིག་ཏུ་བྱས་པ་རང་བཞིན་གྱིས་འོད་གསལ་བར་སྒྲུབ་པོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པའི་མཚན་ཉིད་ཅན་ནི་རྡོ་རྗེ་ཁུ་ཚུར་བསྒོམས་པས་གྲུབ་པར་འགྱུར་རོ་ཞེས་བྱ་བ་ནི་དོན་བསྟན་པའི་ཕྱིར། 
དེ་ནས་ཞེས་བྱ་བ་ལ་སོགས་པའི་གཞུང་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་སྔ་མ་བཞིན་ཏེ། འདོད་པའི་ཁམས་ཐམས་ཅད་དུ་ཇི་སྐད་དུ་བཤད་པའི་རིམ་པས་བཅོམ་ལྡན་འདས་རྣམ་པར་སྣང་མཛད་བཞུགས་ནས། དེའི་རྗེས་ཐོགས་ཉིད་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་གསུངས་
པའོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱ་ཐོབ་པས་ཞེས་བྱ་བ་ལ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ནི་རང་བཞིན་གྱིས་འོད་གསལ་བ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པར་ངེས་པ་དང་། རྡོ་རྗེ་ཁུ་ཚུར་གྱི་ཕྱག་རྒྱར་ངེས་པའོ། །དེ་ཉིད་ནི་སེམས་ཅན་གྱི་ཁམས་
ཐམས་ཅད་རྒྱས་འདེབས་པས་ན་ཕྱག་རྒྱའོ། །དེ་ཐོབ་པ་ནི་མངོན་སུམ་དུ་མཛད་པ་སྟེ། དེ་ནི་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱ་ཐོབ་པའོ། །དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་འཛིན་པ་ཞེས་བྱ་བ་ནི། དེ་བཞིན་ཉིད་ཀྱི་རྡོ་རྗེ་ཁུ་ཚུར་འཛིན་པའི་ཕྱིར་དང་། ཕྱག་གཉིས་

59-1-177b

བྱང་ཆུབ་མཆོག་གི་ཕྱག་རྒྱ་འཆིང་བར་མཛད་པས་སོ། །རྟག་པ་ཞེས་བྱ་བ་ནི་འཁོར་བ་ཇི་སྲིད་པར་བཞུགས་པའི་ཕྱིར་དང་། རྒྱུན་གྱི་རྟག་པ་ཉིད་ཀྱིས་ན་རྟག་པའོ། །ཡང་ཞེས་བྱ་བ་ནི་དབང་བསྐུར་བ་སྦྱིན་པ་ལ་སོགས་པ་གསུངས་པ་ལ་ལྟོས་ནས། ཡང་ཞེས་བྱ་བའི་སྒྲ་སྨས་སོ། །དེ་
བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱ་ནི་འདི་སྐད་དུ་བཤད་པའོ། །དེའི་བྱིན་གྱི་རླབས་ནི་འཁོར་བ་ཇི་སྲིད་པར་བརྟན་པར་མཛད་པའི་ཐོས་པ་དང་། བསམ་པ་དང་། བསྒོམ་པའི་རང་བཞིན་གྱི་ཡེ་ཤེས་གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་རྡོ་རྗེ་ལྟར་མི་ཕྱེད་པར་འགྱུར་བ་
སྟེ། མིང་དེ་སྐད་ཅེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་གསུངས་པའོ། །དེ་བཞིན་གཤེགས་པ་ཐམས་ཅད་ཀྱི་སྐུའི་ཕྱག་རྒྱ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོ་སྟེ། དེ་ཡོངས་སུ་འཛིན་པ་ནི་ཕྱག་རྒྱ་ཆེན་པོ་བསྒོམ་པ་སྟེ། དེའི་ང་རྒྱལ་བསྒོམ་པའི་སྦྱོར་བས་སོ། །དེས་
དོན་ཅི་ཞིག་ཏུ་འགྱུར་ཞེ་ན། དེ་བཞིན་གཤེགས་པ་ཐམས་ཅད་ཉིད་དུ་འགྱུར་རོ་ཞེས་བྱ་བ་གསུངས་ཏེ། གང་གི་ཕྱིར་ཕྱག་རྒྱ་ཆེན་པོ་ཐམས་ཅད་ནི་གཟུགས་བརྙན་དང་མཚུངས་སོ་ཞེས་བསྒོམ་པའི་རྣལ་འབྱོར་པ་ནི་བྱང་ཆུབ་ཆེན་པོའི་ཚུལ་དུ་སྐྱེ་བར་འགྱུར་ཏེ། དེ་བས་ན་དེ་བཞིན་གཤེགས་པ་
ཉིད་དུ་འགྱུར་རོ། །གསུང་གི་ཕྱག་རྒྱ་ནི་བྱང་ཆུབ་སེམས་དཔའ་རྡོ་རྗེ་ལྗགས་སོ། །དེ་ཡོངས་སུ་འཛིན་པ་ནི་དེའི་ངོ་བོ་ཉིད་བསྒོམ་པས་དེའི་ཕྱག་རྒྱ་བཅིང་བའོ། །དེས་དོན་ཅི་ཞིག་ཏུ་འགྱུར་ཞེ་ན། ཆོས་ཐམས་ཅད་འཐོབ་པར་འགྱུར་རོ་ཞེས་བྱ་བ་གསུངས་ཏེ། ཆོས་ཀྱང་ཡིན་ལ་ཐམས་ཅད་ཀྱང་
ཡིན་པས་ན་ཆོས་ཐམས་ཅད་དེ། ཆོས་དང་དོན་དང་ངེས་པའི་ཚིག་དང་། སྤོབས་པ་སོ་སོ་ཡང་དག་པར་རིག་པའི་ངོ་བོ་ཉིད་དོ། །དེ་རྣམས་འཐོབ་པར་འགྱུར་བ་ནི་རྙེད་པ་སྟེ། དེའི་དོན་དུ་འཇུག་པར་འགྱུར་ཞིང་། རྒྱུ་ཉིད་དུ་སྒྲུབ་པར་བྱེད་དོ། །འདིས་ནི་དོན་འདི་སྐད་སྟོན་པར་འགྱུར་ཏེ། ལྕེ་ལ་
རྡོ་རྗེ་དཀར་པོ་རྣམ་པར་བསམས་ནས། སྔགས་ཐམས་ཅད་ཟློས་ཤིང་། རང་བཞིན་གྱིས་དག་པར་ལྷག་པར་མོས་པར་བྱའོ། །ཐུགས་ཀྱི་ཕྱག་རྒྱ་ནི་བྱང་ཆུབ་སེམས་དཔའ་ཏིང་ངེ་འཛིན་རྡོ་རྗེའོ། །དེ་ཡོངས་སུ་འཛིན་པ་ནི་སྔ་མ་བཞིན་ནོ། །ཏིང་ངེ་འཛིན་ཀྱང་ཡིན་ལ་ཐམས་ཅད་ཀྱང་ཡིན་

59-1-178a

པས་ན། ཏིང་ངེ་འཛིན་ཐམས་ཅད་ནི། ལྷ་ཐམས་ཅད་ཀྱི་སྦྱོར་བས་རང་གི་སྙིང་གར་སེམས་དཔའ་རྡོ་རྗེ་ལྟ་བུར་སེམས་རྩེ་གཅིག་ཏུ་གྱུར་པ་སྟེ། དེ་རྣམས་ཐོབ་པ་ལ་འཇུག་པར་འགྱུར་བའོ། །འདིས་ཀྱང་དོན་འདི་སྐད་སྟོན་པར་འགྱུར་ཏེ། རང་གི་སྙིང་གའི་ཟླ་བའི་དཀྱིལ་
འཁོར་ལ། རྡོ་རྗེ་རྣམ་པར་བསམས་ནས་དེའི་དབུས་སུ་བཟླས་པ་བྱས་པའི་སྙིང་པོ་བཀོད་ལ། སྒྲུབ་པ་པོས་བཟླས་བརྗོད་དམ་བསྒོམ་པ་བྱའོ། །རྡོ་རྗེའི་ཕྱག་རྒྱ་ནི་བྱང་ཆུབ་སེམས་དཔའ་རྡོ་རྗེ་སྟེ། དེ་ཡོངས་སུ་འཛིན་པ་ནི་སྔ་མ་བཞིན་ནོ། །ལུས་དང་ངག་དང་སེམས་ཐམས་ཅད་རྡོ་རྗེ་
ནི་ཇི་སྐད་དུ་བཤད་པ་རྣམས་སོ། །དེ་དག་ཐམས་ཅད་ཀྱི་དངོས་གྲུབ་དམ་པ་ནི་ཕྱག་རྒྱ་ཆེན་པོ་ལ་སོགས་པ་ཐོབ་པ་སྟེ། དེའི་དོན་དུ་འཇུག་པར་འགྱུར་བའོ། །འདི་སྐད་སྟོན་པར་འགྱུར་ཏེ། རང་གི་སྙིང་གར་སྣ་ཚོགས་རྡོ་རྗེ་བསམས་ལ། ལས་ཀྱི་ཕྱག་རྒྱ་བཅིངས་ནས་བཟླས་བརྗོད་དམ་བསྒོམ་
པ་བྱས་ན། དངོས་གྲུབ་ཐོབ་པར་འགྱུར་རོ། །སྐུའི་ཕྱག་རྒྱ་ཡོངས་སུ་འཛིན་པ་ལ་སོགས་པའི་ཚིག་རྣམས་ཀྱིས་རིམ་པ་ཇི་ལྟ་བ་བཞིན་དུ་ཕྱག་རྒྱ་ཆེན་པོ་དང་། ཆོས་ཀྱི་ཕྱག་རྒྱ་དང་། དམ་ཚིག་གི་ཕྱག་རྒྱ་དང་། ལས་ཀྱི་ཕྱག་རྒྱ་སྒྲུབ་པ་ཐུན་མོང་དུ་གསུངས་པ་ཡིན་ནོ། །འདི་སྐད་སྟོན་པར་འགྱུར་ཏེ། 
རང་གི་སྙིང་གར་སེམས་དཔའ་རྡོ་རྗེ་རྣམ་པར་བསམས་ལ། བྱང་ཆུབ་ཀྱི་སེམས་ཆེན་པོ་བསྒོམ་པས་ཕྱག་རྒྱ་ཆེན་པོ་ཐམས་ཅད་བསྒྲུབ་པར་བྱའོ། །ལྕེ་ལ་རྡོ་རྗེ་དཀར་པོ་རྣམ་པར་བསམས་ལ། ཆོས་ཐམས་ཅད་རང་བཞིན་གྱིས་དག་པའོ་ཞེས་བསྒོམས་པས་སྔགས་ཐམས་ཅད་གདོན་པར་བྱའོ། །
ཡང་རང་གི་སྙིང་གར་རྡོ་རྗེ་རྩེ་ལྔ་པ་རྣམ་པར་བསམས་ལ། དེའི་དབུས་སུ་རིག་པའི་སྔགས་ཐམས་ཅད་དང་། དམ་ཚིག་གི་ཕྱག་རྒྱ་མིག་ཡོར་དང་མཚུངས་པར་བསྒོམ་པ་དང་། ཆོས་ཐམས་ཅད་ནི་ནམ་མཁའ་དང་མཉམ་པའོ་ཞེས་བསྐོམ་པར་བྱའོ། །རང་གི་སྙིང་གར་སྣ་ཚོགས་རྡོ་རྗེ་རྣམ་པར་
བསམས་ལ། དེའི་དབུས་སུ་བཟླས་པར་བྱ་བའི་རིག་སྔགས་བཀོད་ལ། ལས་ཀྱི་ཕྱག་རྒྱ་བཅིངས་ཏེ། ཆོས་ཐམས་ཅད་ནི་རང་བཞིན་གྱིས་འོད་གསལ་བའོ་ཞེས་བསྒོམ་པར་བྱའོ། །དེ་ལྟར་རིགས་ཐམས་ཅད་ཀྱི་ཐུན་མོང་གི་ཕྱག་རྒྱ་བསྒྲུབ་པ་བཤད་ནས་གང་ལ་ལ་ཞེས་བྱ་བ་ལ་སོགས་པས་སློབ་

59-1-178b

དཔོན་ལས་རྣ་བའི་རྣམ་པར་ཤེས་པས་གཟུང་བར་འགྱུར་བ་ནི་ཐོབ་པའོ། །སྟོན་པ་ནི་གཞན་རྣམས་ལ་འཆད་པའོ། དངོས་གྲུབ་ཐམས་ཅད་ནི་ཕྱག་རྒྱ་ཆེན་པོ་ཐམས་ཅད་གྲུབ་པའོ། །ཕུན་སུམ་ཚོགས་པ་ཐམས་ཅད་ནི་གསུང་གི་ཕྱག་རྒྱ་ཐམས་ཅད་གྲུབ་པའོ། །ཤེས་པ་ཐམས་ཅད།
ནི་དམ་ཚིག་གི་ཕྱག་རྒྱ་ཐམས་ཅད་གྲུབ་པའོ། །དགོས་པ་ཐམས་ཅད་ནི་ལས་ཀྱི་ཕྱག་རྒྱ་ཐམས་ཅད་གྲུབ་པ་སྟེ། འདི་ཉིད་ཀྱིས་དོན་བཞི་པོ་ཉིད་སྟོན་པར་གྱུར་པ་ཡིན་ནོ། །ལུས་དང་ངག་དང་སེམས་ཐམས་ཅད་རྡོ་རྗེའི་དངོས་གྲུབ་དམ་པ་ཐོབ་ནས་ཞེས་བྱ་བ་ནི་ལུས་དང་ངག་དང་སེམས་
ཐམས་ཅད་རྡོ་རྗེ་ཉིད་ཐོབ་པས་བྱང་ཆུབ་ཀྱི་སེམས་ཆེན་པོ་དང་། སྦྱིན་པའི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཐོབ་པ་ནས། དངོས་གྲུབ་ཐམས་ཅད་ཐོབ་པར་འགྱུར་རོ། །མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་བྱ་བ་ནི་བྱང་ཆུབ་ཀྱི་སེམས་ཆེན་པོ་ལ་སོགས་པ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྟོགས་པར་འགྱུར་རོ། །དེ་ལྟར་ན་དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། མངོན་པར་རྫོགས་པར་འཚང་རྒྱ་བར་འགྱུར་རོ་
ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་དང་པོ་གསུངས་པའོ། །ད་ནི་དེ་ནས་དེ་བཞིན་གཤེགས་པ་ཞེས་བྱ་བ་ལ་སོགས་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ཏེ། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པར་མཛད་པའི་ཕྱིར། བཅོམ་ལྡན་འདས་རྣམ་པར་སྣང་མཛད་ཀྱི་
དཀྱིལ་འཁོར་སྤྲུལ་པར་བྱ་བའི་ཕྱིར། བཅོམ་ལྡན་འདས་རྡོ་རྗེ་ཁུ་ཚུར་ལ་བསྐུལ་བ་དང་། དེའི་རྗེས་ཐོགས་ཉིད་ལ་དཀྱིལ་འཁོར་བསྐྱེད་པར་བྱ་བའི་ཕྱིར་སྙིང་པོ་འདི་གསུངས་པའོ། །དམ་ཚིག་ཆེན་པོ་ཕྱག་རྒྱ་ཡོངས་སུ་འཛིན་པས་ཞེས་བྱ་བ་ནི། ཕྱག་གཉིས་དམ་ཚིག་གི་ཁུ་ཚུར་གྱི་ཕྱག་རྒྱ་འཆིང་
བར་མཛད་པ་སྟེ། རྡོ་རྗེ་སྲ་བའི་ཕྱག་རྒྱ་ཐམས་ཅད་ནི་རྡོ་རྗེ་ཁུ་ཚུར་གྱི་དཀྱིལ་འཁོར་གྱི་ལྷ་རྣམས་ཀྱི་ཕྱག་རྒྱ་ཆེན་པོའོ། །དེ་རྣམས་ཀྱི་དངོས་གྲུབ་ནི་སྤྲུལ་པ་རྫོགས་པར་འགྱུར་བའོ། །དེའི་དམ་ཚིག་ནི་རྫོགས་པར་བྱེད་པའི་རྒྱུ་སྟེ། མིང་དེ་སྐད་ཅེས་བྱ་བའི་སྙིང་པོ་འདིས་གསུངས་པ་ནི། ཨ་ཞེས་

59-1-179a

བྱ་བའོ། །དེ་ནས་འདི་གསུངས་པ་ཙམ་གྱིས། བཅོམ་ལྡན་འདས་ཀྱིས་སེམས་ཅན་ཐམས་ཅད་རྒྱས་བཏབ་པའོ་ཞེས་བྱ་བར་སྦྱར་ཏེ། ཨ་ཞེས་བྱ་བ་གསུངས་པ་ཙམ་གྱིས་དེ་བཞིན་གཤེགས་པ་ལ་སོགས་པ་དང་སེམས་ཅན་ཐམས་ཅད་བཅོམ་ལྡན་འདས་རྡོ་རྗེ་སེམས་
དཔའ་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ཁུ་ཚུར་གྱི་ངོ་བོ་ཉིད་དུ་གྱུར་པས་ཕྱག་རྒྱ་ཆེན་པོ་དང་། ཆོས་དང་དམ་ཚིག་དང་ལས་ཀྱི་ཕྱག་རྒྱ་སྟེ། ཕྱག་རྒྱ་ཐམས་ཅད་ཀྱི་རྡོ་རྗེ་སེམས་དཔའ་ཉིད་དུ་ཕྱག་རྒྱ་ཆེན་པོ་དང་། ཆོས་དང་དམ་ཚིག་དང་། ལས་ཀྱི་ཕྱག་རྒྱ་བདག་ཉིད་སྐྱེད་པར་བྱེད་
པས་མི་ཕྱེད་པར་བྱས་པ་ནི་རྡོ་རྗེ་སེམས་དཔའ་སྟེ། དེར་གྱུར་པ་ནི་རྡོ་རྗེ་སེམས་དཔའ་ཉིད་དོ། །རྡོ་རྗེ་སེམས་དཔའ་དེའི་རྒྱུ་ནི་དེ་བཞིན་གཤེགས་པ་ཐམས་ཅད་ལ་སོགས་པའི་དངོས་གྲུབ་མཆོག་གི་རྒྱུ་སྟེ། རྡོ་རྗེ་སེམས་དཔའ་སྐྱེད་པར་བྱེད་པ་དེས་སངས་རྒྱས་ཉིད་དམ། བྱང་ཆུབ་སེམས་དཔའ་
ཐོབ་པ་ཉིད་ནི། དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་མཆོག་གི་རྒྱུས་རྒྱས་བཏབ་པས། དེ་བཞིན་གཤེགས་པ་ཐམས་ཅད་ལ་སོགས་པས་སེམས་ཅན་ཐམས་ཅད་རྒྱས་བཏབ་པའོ། །བཅོམ་ལྡན་འདས་ཞེས་བྱ་བ་ལ་སོགས་པ་ལ། ཡང་ཞེས་བྱ་བའི་སྒྲ་ནི་ཉེ་བར་བསྡུ་བ་སྟེ། བཅོམ་
ལྡན་འདས་ཀྱིས་ཇི་སྐད་དུ་བཤད་པའི་དངོས་གྲུབ་ཀྱི་རྒྱུས་རྒྱས་བཏབ་པ་འབའ་ཞིག་ཏུ་མ་ཟད་ཀྱི། བཅོམ་ལྡན་འདས་ཀྱི་སྐུའི་གསང་བ་ལས། ཕྱག་རྒྱ་ཆེན་པོའི་ཚུལ་དུ་དམ་ཚིག་གི་སེམས་དཔའ་བྱུང་བ་དང་། གསུང་གི་གསང་བ་ལས་ལྗགས་ཀྱི་རིག་སྔགས་རྣམས་དང་། ཐུགས་ཀྱི་གསང་བ་
ལས་རྡོ་རྗེའི་གཟུགས་རྣམས་དང་། སྣ་ཚོགས་རྡོ་རྗེ་ལས་སྣ་ཚོགས་རྡོ་རྗེ་འཆང་བ་རྣམས་ཕྱུང་བའོ། །ཕྱུང་ནས་ཀྱང་དང་པོའི་དཀྱིལ་འཁོར་གྱི་ཚུལ་གྱིས་བཞུགས་པར་གྱུར་ཏོ་ཞེས་བྱ་བ་ནི་དེ་རྣམས་ཀྱིས་བཅོམ་ལྡན་འདས་རྡོ་རྗེ་ཁུ་ཚུར་ཡོངས་སུ་བསྐོར་ནས། བཅོམ་ལྡན་འདས་རྡོ་རྗེ་སེམས་དཔའི་
དཀྱིལ་འཁོར་གྱི་ཚུལ་དུ་བཞུགས་པའོ། །དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། བཞུགས་པར་གྱུར་ཏོ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་པ་ནས་བརྩམས་ཏེ། གསུམ་པ་ཡིན་པར་ཤེས་པར་བྱའོ། །དམ་ཚིག་དང་དབང་བསྐུར་

59-1-179b

བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པ་བྱའོ་ཞེས་བྱ་བ་འདིའི་ཆོ་ག་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང་། སློབ་མ་ཞུགས་པ་ལ་སོགས་པའི་ལས་ཀྱི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་
ནོ། །ཏིང་ངེ་འཛིན་གསུམ་གྱི་མཐར་སྙོམས་པར་ཞུགས་པར་མཛད་པའི་རྗེས་ཐོགས་ཉིད་ལ་ཞེས་བྱ་བའི་དོན་ཏོ། །བཅོམ་ལྡན་འདས་ཞེས་བྱ་བ་ལ་སོགས་པ་ནི་གོ་སླའོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ནི་སྔར་བཤད་པའོ། །དེ་ལས་བྱུང་བའི་རྡོ་རྗེ་ཁུ་ཚུར་གྱི་དཀྱིལ་
འཁོར་ནི་སེམས་ཅན་གྱི་ཁམས་རྣམས་རྒྱས་འདེབས་པས་ན་ཕྱག་རྒྱ་ཆེན་པོ་སྟེ། །དེ་ལ་དམིགས་པ་རྡོ་རྗེ་ལྟར་མི་ཕྱེད་པ་གང་ཡིན་པའི་ཏིང་ངེ་འཛིན་དེ་མངོན་སུམ་དུ་མཛད་པའོ། །ཕྱག་རྒྱ་ཐམས་ཅད་ཀྱི་རྡོ་རྗེ་དམ་ཚིག་ཅེས་བྱ་བའི་དཀྱིལ་འཁོར་ཆེན་པོ་འདི་གསུངས་སོ་ཞེས་བྱ་བ་ནི་ཕྱག་
རྒྱ་ཡང་ཡིན་ལ་ཐམས་ཅད་ཀྱང་ཡིན་པས་ན་ཕྱག་རྒྱ་ཐམས་ཅད་དེ། ཕྱག་རྒྱ་ཆེན་པོ་དང་། ཆོས་དང་དམ་ཚིག་དང་། ལས་ཀྱི་ཕྱག་རྒྱ་རྣམས་སོ། །དེ་ཉིད་མི་ཕྱེད་པས་ན་རྡོ་རྗེའོ། །དེའི་དམ་ཚིག་ནི་རྡོ་རྗེ་ཁུ་ཚུར་གྱི་དཀྱིལ་འཁོར་ཏེ། མིང་དེ་སྐད་ཅེས་བྱ་བ་ནི་འདི་གསུངས་པའོ། །འདིས་ནི་
དོན་འདི་སྐད་སྟོན་པར་འགྱུར་ཏེ། །ཏིང་ངེ་འཛིན་གསུམ་པོ་ཇི་ལྟ་བ་བཞིན་དུ་བསྒོམས་པ་ནས་ཉེ་བར་བཟུང་སྟེ། ཇི་སྲིད་དཀྱིལ་འཁོར་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་དེའི་རྗེས་ཐོགས་ཉིད་ལ་དཀྱིལ་འཁོར་འདི་བྲི་བར་བྱའོ། །ཕྱིའི་དཀྱིལ་འཁོར་ནི་
དང་པོའི་སྦྱོར་བས་བྲིས་ལ་ཞེས་བྱ་བ་ལ། འདི་དག་ནི་ཕྱིའི་དཀྱིལ་འཁོར་ཐམས་ཅད་ནི་རྡོ་རྗེ་སེམས་དཔའི་དཀྱིལ་འཁོར་བཞིན་དུ་བྲི་བར་བྱའོ། །ནང་དུ་རྡོ་རྗེ་ཐིག་གི་འཁོར་ལོ་བྲིའོ་ཞེས་བྱ་བ་ནི་ཕྱིའི་དཀྱིལ་འཁོར་དེའི་དབུས་སུ་རྡོ་རྗེ་ཕྲེང་བ་ཟླུམ་པོར་བྲིའོ། །དེ་བཞིན་དུ་དེའི་དབུས་སུ་དཀྱིལ་
འཁོར་བརྒྱད་པར་ཐིག་བཏབ་པ་ལ་ཞེས་བྱ་བ་ནི་རྡོ་རྗེའི་ཐིག་གི་འཁོར་ལོའི་དབུས་སུ་ཤར་དང་། ནུབ་དང་། བྱང་དང་། ལྷོར་ཐིག་བཞི་བཏབ་པས་དཀྱིལ་འཁོར་བརྒྱད་པར་ཐིག་གདབ་པར་བྱའོ། །དེ་ནས་དེའི་དབུས་སུ་བཅོམ་ལྡན་འདས་རྡོ་རྗེ་ཁུ་ཚུར་གསེར་གྱི་མདོག་ཅན་རྡོ་རྗེ་རྩེ་ལྔ་པ་དང་

59-1-180a

བཅས་པའི་དམ་ཚིག་གི་ཁུ་ཚུར་གྱི་ཕྱག་རྒྱ་གཉིས་ཀྱིས་འཆིང་བར་མཛད་པ། ཞལ་རྣམ་པར་བཞད་པ་སྟེ། ཅུང་ཟད་འཛུམ་པ་དང་བཅས་པས། ཨ་ཞེས་བྱ་བས་ཡང་དག་པར་གཞག་པར་བྱའོ། །དེ་བཞིན་དུ་རྡོ་རྗེའི་སྐུ་མཆོག་ཅེས་བྱ་བ་ནས་བརྩམས་ཏེ། ཇི་སྲིད་ལྷ་མོ་རྡོ་རྗེ་
ཞེས་བྱ་བའི་བར་དུ་ལྷ་ཐམས་ཅད་གནས་ཇི་ལྟ་བ་བཞིན་དུ་གཞག་པར་བྱའོ། །དེ་ནས་དམ་ཚིག་གི་ཁུ་ཚུར་ཡོངས་སུ་འཛིན་པས་ཞེས་བྱ་བ་ནི། དེ་ལྟར་དཀྱིལ་འཁོར་བྲིས་ནས་ཆོ་ག་ཐམས་ཅད་རྗེས་སུ་སྤྱོད་དེ། རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིངས་ལ། རང་ཉིད་འཇུག་པར་བྱའོ། །ཞུགས་
ནས་སློབ་དཔོན་མེད་པར་ཡང་ཕྱག་རྒྱ་ཐམས་ཅད་ཀྱི་སློབ་དཔོན་དུ་འགྱུར་རོ་ཞེས་བྱ་བ་ནི། གང་ཞིག་སློབ་དཔོན་ཡོད་པ་ལྟ་སྨོས་ཀྱང་ཅི་དགོས་པའོ། །དེ་ནས་བརྩམས་ཏེ་དངོས་གྲུབ་ཐམས་ཅད་དོན་ཡོད་པར་ཐོབ་པར་འགྱུར་རོ་ཞེས་བྱ་བ་ནི་དཀྱིལ་འཁོར་དུ་འཇུག་པ་ནས་ཉེ་བར་བཟུང་སྟེ། རྡོ་རྗེ་ཁུ་
ཚུར་གྱི་དཀྱིལ་འཁོར་ལས་གསུངས་པའི་དངོས་གྲུབ་རྣམས་དང་རིགས་གཞན་གྱི་དཀྱིལ་འཁོར་ལས་གསུངས་པ་རྣམས་ཀྱང་དོན་ཡོད་ཅིང་འབྲས་བུ་དང་བཅས་པས་ཐོབ་པར་འགྱུར་རོ། །ཕྱག་རྒྱ་ཐམས་ཅད་ཀྱི་ཡེ་ཤེས་ཀྱི་དབང་ཕྱུག་ཅེས་བྱ་བ་ལ། ཕྱག་རྒྱ་ཆེན་པོ་ལ་སོགས་པ་ནི་ཕྱག་རྒྱ་ཐམས་
ཅད་དེ། དེ་རྣམས་ཀྱི་ཡེ་ཤེས་ནི་ཆོས་ཐམས་ཅད་རང་བཞིན་གྱི་འོད་གསལ་བའོ་ཞེས་ངེས་པར་གྱུར་པའོ། །དེས་དབང་ཕྱུག་ཏུ་གྱུར་པ་ནི་རང་དབང་དུ་གྱུར་པའི་གཙོ་བོའོ། །མྱུར་བ་ནི་ཤིན་ཏུ་སྐྱེན་པ་ཉིད་དུའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་
བར་འགྱུར་རོ་ཞེས་བྱ་བའོ། །དེ་ནས་ཐམས་ཅད་བྱས་ལ། བདག་ཉིད་ལ་གོ་བར་བྱ་བའི་ཕྱིར་སྐུ་གསུང་ཐུགས་ཀྱི་ཞེས་བྱ་བ་ལ་སོགས་པ་དམ་ཚིག་བརྗོད་པར་བྱའོ། །དེ་ཡང་སྐུ་དང་གསུང་དང་ཐུགས་རྣམས་ཀྱིས་གཟུགས་བརྙན་གྱི་སྦྱོར་བས་དེའི་ངོ་བོ་ཉིད་ཡིན་པས་ན་ཕྱག་རྒྱ་ཐམས་ཅད་ཅེས་
བྱ་བ་སྟེ། སྐུ་དང་གསུང་དང་ཐུགས་རྡོ་རྗེ་རྣམས་བསྒོམ་པའི་ངོ་བོ་ཉིད་ཀྱི་སྦྱོར་བ་དེས་སྒྲུབ་པ་པོའི་རྒྱུད་ལ་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་ཅེས་བྱ་བར་གྲགས་ཤིང་ངེས་པའོ། །གང་ཞིག་ཅེ་ན་དམ་ཚིག་སྟེ། ཕྱག་རྒྱ་ཆེན་པོ་ལ་སོགས་པའི་ངོ་བོ་ཉིད་དོ། །འདིའི་ལས་ནི་ཅི་

59-1-180b

ཞིག་ཡིན་ཞེ་ན་དངོས་གྲུབ་ཀུན་སྟེར་བའོ་ཞེས་བྱ་བ་སྟེ། བྱང་ཆུབ་ཀྱི་སེམས་ཆེན་པོ་དང་། སྦྱིན་པའི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་མཚན་ཉིད་ཅན་གྱིས་དངོས་གྲུབ་ཐམས་ཅད་སྟེར་བར་བྱེད་པས་ན། དངོས་གྲུབ་ཀུན་སྟེར་བའོ། །འདི་སྐད་
སྟོན་པར་འགྱུར་ཏེ། ཕྱག་རྒྱ་ཆེན་པོ་དང་། ཆོས་དང་དམ་ཚིག་དང་། ལས་དང་ཕྱག་རྒྱ་རྣམས་གཟུགས་བརྙན་གྱི་ཚུལ་གྱིས་བཅིང་བར་བྱའོ། །དེ་ནས་དེའི་ངོ་བོ་ཉིད་དུ་བསྒོམ་པའི་སྟོབས་ཀྱིས་རྣལ་འབྱོར་པ་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་ཀྱི་ངོ་བོ་ཉིད་དུ་འགྱུར་ཞིང་། བྱང་ཆུབ་ཀྱི་
སེམས་ལ་སོགས་པ་རྫོགས་པའི་རྒྱུར་འགྱུར་རོ། །སློབ་མ་གཞུག་པ་ཡང་དེ་བཞིན་ནོ་ཞེས་བྱ་བ་ནི་ཇི་ལྟར་སློབ་དཔོན་གྱི་འཇུག་པའི་ཆོ་ག་རྒྱས་པར་གསུངས་པ་དེ་བཞིན་དུ་སློབ་མ་རྣམས་ཀྱི་ཡང་དེ་བཞིན་དུ་ཤེས་པར་བྱའོ། །ཕྱག་རྒྱ་ཐམས་ཅད་ཀྱི་དཀྱིལ་འཁོར་ཞེས་བྱ་བ་ལ་ཕྱག་རྒྱ་ཐམས་ཅད་
ནི་རང་བཞིན་གྱི་འོད་གསལ་བ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་སྟེ། དེ་ལས་བྱུང་བའི་རྡོ་རྗེ་ཁུ་ཚུར་གྱི་དཀྱིལ་འཁོར་ནི་ཕྱག་རྒྱ་ཐམས་ཅད་ཀྱི་དཀྱིལ་འཁོར་ཞེས་བྱའོ། །ཐམས་ཅད་རྣམ་པར་གསལ་བར་བྱ་བའི་ཕྱིར་སླར་ཡང་བཤད་པར་བྱ་སྟེ། བཅོམ་ལྡན་འདས་རྡོ་རྗེ་ཁུ་ཚུར་གྱི་སྦྱོར་
བས་རྡོ་རྗེ་དབྱིངས་ལས་གསུངས་པའི་རྣལ་འབྱོར་ཆེན་པོ་བྱས་ལ། ཏིང་ངེ་འཛིན་གསུམ་བསྒོམ་པ་ནས་བརྩམས་ཏེ། ཇི་སྲིད་དཀྱིལ་འཁོར་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་ཇི་སྐད་དུ་གསུངས་པའི་དཀྱིལ་འཁོར་གྱི་སའི་དབུས་སུ་ཏིང་ངེ་འཛིན་བསྒོམས་
ལ། བར་སྣང་གི་ཕྱོགས་སུ་སྔ་མ་བཞིན་དུ་བཞག་ནས་ཉི་མ་འཆར་བའི་དུས་སུ་ཐིག་གདབ་པར་བྱའོ། །འདིའི་ཕྱིའི་དཀྱིལ་འཁོར་ནི་རྡོ་རྗེ་སེམས་དཔའི་དཀྱིལ་འཁོར་དང་འདྲ་སྟེ། དེའི་ནང་དུ་དེའི་ཕྱེད་ཀྱི་ཚད་ཀྱི་ཟླུམ་པོའི་རྡོ་རྗེའི་ཐིག་ཀ་བ་བརྒྱད་དང་ལྡན་པར་ཐིག་ལེགས་པར་གདབ་པར་བྱའོ། །
དེ་ནས་ལེགས་པར་བྲི་བར་བྱ་སྟེ། ལྷ་ཐམས་ཅད་ཀྱི་གནས་སུ་སྣ་ཚོགས་པདྨ་བྲི་བར་བྱའོ། །དེ་ནས་དཀྱིལ་འཁོར་དབུས་མའི་ལྟེ་བའི་ཕྱོགས་སུ་གནས་པའི་པདྨ་ལ་བཅོམ་ལྡན་འདས་རྡོ་རྗེ་ཁུ་ཚུར་སྐུ་མདོག་སེར་པོ་ཞལ་འཛུམ་པ་དང་བཅས་པ། དམ་ཚིག་གི་ཁུ་ཚུར་གྱི་རྡོ་རྗེ་རྩེ་ལྔ་པ་འཛིན་ཅིང་

59-1-181a

ཐུགས་ཀའི་ཕྱོགས་སུ་འཚིར་བ་རྒྱན་ཐམས་ཅད་ཀྱིས་བརྒྱན་པ། དེ་བཞིན་གཤེགས་པ་ལ་སོགས་པའི་ཅོད་པན་གྱིས་དབང་བསྐུར་བ། ཞལ་ཤར་དུ་གཟིགས་པ་སེམས་དཔའི་སྐྱིལ་མོ་ཀྲུང་གིས་བཞུགས་པ་གཞག་པར་བྱའོ། །དེའི་མདུན་དུ་རྡོ་རྗེ་ཡིད་ལས་བྱུང་བའི་
གནས་སུ་རྡོ་རྗེ་སྐུ་མཆོག་རྡོ་རྗེ་སེམས་དཔའི་སྐུའི་ཆ་ལུགས་འཛིན་པའོ། །གཡས་ཕྱོགས་སུ་ཀཱི་ལི་ཀཱི་ལའི་གནས་སུ་རྡོ་རྗེ་ལྗགས་རྡོ་རྗེ་སྨྲ་བའི་ཆ་ལུགས་འཛིན་པ་ཕྱག་ན་ལྕེ་བསྣམས་པའོ། །རྒྱབ་ཏུ་རྡོ་རྗེ་དྲན་པའི་གནས་སུ་བྱང་ཆུབ་སེམས་དཔའ་ཏིང་ངེ་འཛིན་རྡོ་རྗེ་ཞེས་བྱ་བ་དམ་ཚིག་གི་ཕྱག་
རྒྱས་རྡོ་རྗེ་རྩེ་ལྔ་པ་བསྣམས་པ། རྡོ་རྗེ་སྐྱིལ་མོ་ཀྲུང་གིས་བཞུགས་པའོ། །གཡོན་ལོགས་སུ་རྡོ་རྗེ་སྙེམས་པའི་གནས་སུ་བྱང་ཆུབ་སེམས་དཔའ་རྡོ་རྗེ་རྡོ་རྗེ་ཞེས་བྱ་བ་རྡོ་རྗེ་སྙེམས་པའི་སྐུའི་ཆ་ལུགས་འཆང་བ། དེའི་ཕྱག་རྒྱའི་ཚུལ་ཅན་ནོ། །ནང་གི་དཀྱིལ་འཁོར་དེ་ཉིད་ཀྱི་ཤར་ལྷོའི་མཚམས་སུ་ལྷ་མོ་
ཕྱག་རྒྱའི་ཁུ་ཚུར་ཞེས་བྱ་བ་རྡོ་རྗེ་ཁུ་ཚུར་གྱི་ཆ་ལུགས་འཆང་བ། དམ་ཚིག་གི་ཁུ་ཚུར་གྱིས་རྡོ་རྗེ་རྩེ་ལྔ་པ་ཐོགས་པ་བྲི་བར་བྱའོ། །ལྷོ་ནུབ་ཀྱི་མཚམས་སུ་ལྷ་མོ་རིན་ཆེན་གྱི་ཁུ་ཚུར་ཞེས་བྱ་བ་འཕགས་པ་ནམ་མཁའི་སྙིང་པོའི་ཆ་ལུགས་འཆང་བ་དང་། དམ་ཚིག་གི་རིན་པོ་ཆེའི་ཁུ་ཚུར་གྱིས་རྡོ་རྗེ་རིན་ཆེན་
འཛིན་ཅིང་བཞུགས་པའོ། །ནུབ་བྱང་མཚམས་སུ་བཅོམ་ལྡན་འདས་མ་ཡེ་ཤེས་ཀྱི་ཁུ་ཚུར་ཞེས་བྱ་བ་འཇིག་རྟེན་དབང་ཕྱུག་གི་ཆ་ལུགས་འཆང་བ། དམ་ཚིག་པདྨའི་ཁུ་ཚུར་གྱིས་པདྨ་བསྣམས་པའོ། །བྱང་ཤར་མཚམས་སུ་བཅོམ་ལྡན་འདས་མ་ལས་ཀྱི་ཁུ་ཚུར་ཞེས་བྱ་བ་དངོས་པོ་ཐམས་ཅད་རྡོ་རྗེ་
ལས་དང་འདྲ་བ་རྡོ་རྗེ་ཁུ་ཚུར་གྱིས་ལས་ཀྱི་ཕྱག་རྒྱ་སྣ་ཚོགས་རྡོ་རྗེ་བསྣམས་པ་བྲི་བར་བྱའོ། །ཤར་ཕྱོགས་ཀྱི་སྒོར་བཅོམ་ལྡན་འདས་མ་རྡོ་རྗེ་སྙེམས་མ་བདག་ཉིད་ཀྱི་དངོས་པོ་ཐམས་ཅད་རྡོ་རྗེ་སེམས་དཔའ་དང་འདྲ་བ་རྡོ་རྗེ་དང་དྲིལ་བུ་བསྣམས་པའོ། །ལྷོ་ཕྱོགས་ཀྱི་སྒོར་རྡོ་རྗེ་ལྗགས་མ་རྡོ་རྗེ་སྨྲ་
བ་དང་འདྲ་བ། རྡོ་རྗེ་ལྕེ་བསྣམས་པའོ། །ནུབ་ཕྱོགས་ཀྱི་སྒོར་ཏིང་ངེ་འཛིན་རྡོ་རྗེ་མ་ཏིང་ངེ་འཛིན་རྡོ་རྗེའི་ཆ་ལུགས་འཆང་བའོ། །བྱང་ཕྱོགས་ཀྱི་སྒོར་རྡོ་རྗེ་རྡོ་རྗེ་མ་རྡོ་རྗེ་ལས་དང་འདྲ་བའོ། །ཕྱིའི་དཀྱིལ་འཁོར་གྱི་མཚམས་བཞིར་ནི་སྒེག་མོ་ལ་སོགས་པ་བྲི་བར་བྱའོ། །འདིར་ལྷ་ཐམས་ཅད་ཀྱི་སྙིང་

59-1-181b

པོ་ནི་ཨ་ཞེས་བྱ་བའོ། །དེ་ལྟར་དཀྱིལ་འཁོར་བྲིས་ལ། དེ་བཞིན་དུ་རྣལ་འབྱོར་ཆེན་པོ་བྱས་ལ། འཇུག་པའི་དམ་ཚིག་གི་ཕྱག་རྒྱས་ཡོངས་སུ་བཟུང་བའི་རྡོ་རྗེ་མེ་ཏོག་གི་ཡལ་ག་ལས་རྣམ་པར་རྒྱལ་བའི་བུམ་པ་དང་། ལྷ་ཐམས་ཅད་ཀྱི་བུམ་པ་དང་། གང་བའི་བུམ་པ་རྣམས་ལ་ཨ་ཞེས་བྱ་
བ་རེ་རེ་ཞིང་ལན་བརྒྱ་རྩ་བརྒྱད་ཡོངས་སུ་བཟླའོ། །དེ་ནས་དཀྱིལ་འཁོར་གྱི་སྒོ་བཞི་ཡོངས་སུ་ཕྱེ་སྟེ། རྡོ་རྗེ་བསྡུ་བ་བྱས་ལ་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བསྒོམ་ཞིང་བཅོམ་ལྡན་འདས་ལ་མཚན་བརྒྱ་རྩ་བརྒྱད་པས་ཀྱང་བསྟོད་ལ། གསང་བའི་ལྕགས་ཀྱུ་དང་། ཨ་ཞེས་བྱ་བས་བཅོམ་
ལྡན་འདས་འཁོར་དང་བཅས་པའི་དཀྱིལ་འཁོར་དུ་བཅུག་ནས། རྡོ་རྗེ་གནོད་སྦྱིན་གྱིས་བགེགས་བསལ་བ་བྱས་ཏེ་མཚམས་བཅིང་བ་དང་། དྲ་བ་དང་ར་བ་དག་བྱས་ལ། རྡོ་རྗེ་ཁུ་ཚུར་གྱིས་སྒོ་བཅིངས་ཏེ། རྡོ་རྗེ་སྲུང་བས་སྲུང་བ་ཐམས་ཅད་གོ་བསྐོན་ནས། ཨ་ཞེས་བྱ་བས་མཆོད་ཡོན་
ཕུལ་ཏེ། རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་དང་། ཨཱཿ་དྲྀ་ཤྱ་ཞེས་བྱ་བས་འཁོར་དང་བཅས་པ་ལ་བལྟ་བར་བྱས་ལ། ཛཿཧཱུཾ་བཾ་ཧོཿ ས་མ་ཡ་སྟྭཾ་ས་མ་ཡ་སྟྭཾ་ཨ་ཧཾ་ཨ་ཞེས་ལན་གསུམ་བརྗོད་དེ་བསྒྲུབ་པར་བྱའོ། །རྡོ་རྗེ་བསྡམས་པ་ལས་མཐེའུ་ཆུང་གཉིས་ཀྱི་བར་དུ་མཐེ་བོང་བཅིངས་ལ་མཛུབ་
མོ་བཀུག་པ་འདི་ནི་དམ་ཚིག་རྡོ་རྗེ་ཁུ་ཚུར་གྱི་མཚན་ཉིད་དོ། །དེ་ནས་ལྕེ་ལ་རྡོ་རྗེ་ཇི་ལྟ་བ་བཞིན་དུ་བསམས་ལ། ཨ་ཞེས་བྱ་བ་ལྷ་ཐམས་ཅད་ཀྱི་ལྗགས་ལ་བསམ་པར་བྱ་སྟེ། འདི་ནི་འདི་ལྟར་ལྷ་ཐམས་ཅད་ཀྱི་ཆོས་ཀྱི་ཕྱག་རྒྱའོ། །རང་གི་སྙིང་གར་ཨ་ལས་སྣ་ཚོགས་རྡོ་རྗེ་བསམས་ལ། ལྷ་
ཐམས་ཅད་ཀྱི་ལས་ཀྱི་ཕྱག་རྒྱ་བཅིང་བར་བྱ་སྟེ། རྡོ་རྗེ་ཁུ་ཚུར་གཉིས་བཅིངས་ལ། གཅིག་ལ་གཅིག་བཙིར་བ་འདི་ནི་བཅོམ་ལྡན་འདས་རྡོ་རྗེ་ཁུ་ཚུར་གྱི་ལས་ཀྱི་ཕྱག་རྒྱའོ། །གཉི་ག་སྙེམས་པ་དང་བཅས་པས་བསྟོད་དེ་འཇོག་པ་འདི་ནི་རྡོ་རྗེའི་སྐུའི་མཆོག་གིའོ། །རྡོ་རྗེ་གཉིས་ཀར་བསྒྲེང་བ་
འདི་ནི་རྡོ་རྗེ་ལྗགས་ཀྱིའོ། །ཏིང་ངེ་འཛིན་མཆོག་ནི་ཏིང་ངེ་འཛིན་རྡོ་རྗེའོ། །རྡོ་རྗེ་གར་བསྐོར་ཏེ་བཀྲོལ་ལ་མཁུར་བ་དང་སྤྱི་བོར་འཇོག་པ་ནི་རྡོ་རྗེ་རྡོ་རྗེའོ། །རྡོ་རྗེ་ཁུ་ཚུར་གཉིས་ངེས་པར་བཙིར་བ་ནི་ལྷ་མོ་ཕྱག་རྒྱའི་ཁུ་ཚུར་གྱིའོ། །ནམ་མཁའི་སྙིང་པོའི་ལས་ཀྱི་ཕྱག་རྒྱ་ནི་ལྷ་མོ་བཅོམ་ལྡན་འདས་མ་ནོར་

59-1-182a

བུའི་ཁུ་ཚུར་གྱིའོ། །གཡས་ཀྱིས་གཡོན་དབྱེ་བ་ནི་ལྷ་མོ་ཡེ་ཤེས་ཀྱི་ཁུ་ཚུར་གྱིའོ། །རྡོ་རྗེ་རྡོ་རྗེའི་ཕྱག་རྒྱ་ཉིད་ནི་ལྷ་མོ་ལས་ཀྱི་ཁུ་ཚུར་གྱིའོ། །སྒེག་མོ་ལ་སོགས་པའི་ནི་སྔར་བཤད་པའི་ལས་ཀྱི་ཕྱག་རྒྱ་ཉིད་དོ། །རྡོ་རྗེ་སྙེམས་མ་ལ་སོགས་པའི་ཡང་རྡོ་རྗེ་སྐུ་མཆོག་ལ་
སོགས་པའི་བྱང་ཆུབ་སེམས་དཔའ་ཆེན་པོ་རྣམས་ཀྱི་ལས་ཀྱི་ཕྱག་རྒྱ་རྣམས་གཟུང་བར་བྱའོ། །རང་གི་སྙིང་གར་རྡོ་རྗེ་རྩེ་ལྔ་པ་རྣམ་པར་བསམས་ལ། ཇི་ལྟར་བྲིས་པའི་རྗེས་སུ་འབྲངས་ནས། ཐམས་ཅད་ཀྱི་ཕྱག་རྒྱ་ཆེན་པོ་བཅིང་བར་བྱའོ། །ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་
བཅོམ་ལྡན་འདས་ཀྱི་ཐུན་མོང་གི་སྙིང་པོ་ནི་འདིར་ཨ་ཞེས་བྱ་བ་ཡིན་ནོ། །དེ་ནས་སངས་རྒྱས་ལྔའི་དབུ་རྒྱན་གྱི་དབང་བསྐུར་བ་ཐམས་ཅད་དབང་བསྐུར་ལ་སྔ་མ་བཞིན་དུ་མཆོད་ཡོན་ཕུལ་ཏེ། བུམ་པ་རྣམས་དང་། བུམ་པ་གང་བ་དང་། ན་བཟའ་དང་། བླ་རེ་ལ་སོགས་པ་རྣམས་ཀྱང་
བཅོམ་ལྡན་འདས་འཁོར་དང་བཅས་པ་ལ་ཕུལ་ལ། མཆོད་པ་རྣམ་པ་ལྔ་བྱས་ནས། ཕྱི་རོལ་དུ་གླུ་དང་གར་དང་རོལ་མོ་དང་། རྟ་དང་། གླང་པོ་ཆེ་དང་། བ་ལང་གི་ཁྱུ་རྣམས་ཀྱིས་ཀྱང་མཆོད་པ་བྱེད་དུ་གཞུག་གོ། །དེ་ནས་ཕྱག་རྒྱའི་མཆོད་པ་རྣམ་པ་བཅུ་གཉིས་ཀྱིས་ཡང་དག་པར་མཆོད་དེ། ཨོཾ་
ཞེས་བྱ་བ་ལས་རིན་པོ་ཆེ་སྣ་བདུན་དང་། དཔག་བསམ་གྱི་ཤིང་ཁ་ཟས་རོ་བརྒྱ་ལ་སོགས་པའི་བཀོད་པ་སྤྲུལ་ལ། དེ་འདིས་དབུལ་བར་བྱ་སྟེ། ཕྱག་འཚལ་བའི་ཐལ་མོ་སྤྱི་བོར་བཞག་ལ། ཨོཾ་སརྦ་བིཏྤཱུ་ར་པཱུ་ར། སུ་ར་སུ་ར། ཨཱ་བརྟ་ཡ་ཨཱ་བརྟ་ཡ་ཧོཿ་ཞེས་བརྗོད་པར་བྱའོ། །དེ་ནས་ཕྱི་རོལ་
དུ་གཏོར་མ་བྱིན་ལ། སྦྱིན་སྲེག་བྱས་ནས་རས་ཤིན་ཏུ་དམར་བ་ལ་རྡོ་རྗེ་གནོད་སྦྱིན་ཡོངས་སུ་བཟླས་ལ། དེ་ལས་རས་གཅིག་གིས་སྨད་གཡོགས་བྱ། གཅིག་གིས་སྟོད་གཡོགས་བྱས་ནས་ཡང་གཅིག་ལ་རྡོ་རྗེ་ལྕགས་ཀྱུ་ལ་སོགས་པ་བཞི་ཡོངས་སུ་བཟླས་པས་རང་གི་གདོང་
གཡོགས་པར་བྱའོ། །དེ་ནས་ཕྱག་བཙལ་བ་ལ་སོགས་པ་སྔོན་དུ་འགྲོ་བས་དེ་བཞིན་དུ་སྡོམ་པ་ཡང་དག་པར་བླངས་ལ་བྱང་ཆུབ་ཏུ་སེམས་བསྐྱེད་དེ། དེ་བཞིན་དུ་སྙིང་གར་རྡོ་རྗེ་བསྐྱེད་ལ། ཤར་ཕྱོགས་ཀྱི་སྒོ་ལ་བལྟས་ནས། ཕྱི་རོལ་ན་གནས་པའི་བུམ་པའི་ཆུས་བདག་ཉིད་དབང་བསྐུར་ཏེ། 

59-1-182b

རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིངས་ནས་དེ་བཞིན་དུ་མེ་ཏོག་གི་ཕྲེང་བ་བླངས་ལ། བཛྲ་བཛྲ་ཨ་ཞེས་ཟློས་ཤིང་དཀྱིལ་འཁོར་དུ་གཞུག་པར་བྱ་སྟེ། བཛྲ་ཨཾ་ཀུ་ཤ་ཛཿཞེས་ཀྱང་བརྗོད་པར་བྱའོ། །དེ་ནས་ལྷོ་ཕྱོགས་ཀྱི་སྒོ་ནས་དེ་བཞིན་དུ་ཞུགས་ཏེ། བཛྲ་པཱ་ཤ་ཧཱུཾ་ཞེས་བརྗོད་པར་བྱའོ། །དེ་
ནས་ནུབ་ཕྱོགས་ཀྱི་སྒོ་ནས་ཞུགས་ཏེ། བཛྲ་སྥོ་ཊ་བཾ་ཞེས་བརྗོད་པར་བྱའོ། །དེ་ནས་བྱང་ཕྱོགས་ཀྱི་སྒོ་ནས་སྔ་མ་བཞིན་དུ་ཞུགས་ལ། བཛྲ་ཨཱ་བེ་ཤ་ཨཱཿ་ཞེས་བྱ་བས་བདག་ཉིད་དབང་དུ་བྱའོ། །དེ་ནས་ཡང་ཤར་ཕྱོགས་ཀྱི་སྐོ་ནས་ཞུགས་ལ། མ་ཧཱ་ར་ཏ། སུ་དྲི་ཌྷ། སུ་ཏོ་ཥོ། སུ་སུ་ཁོ་བཛྲ་སཏྭ། 
ཨཱདྱ་སིདྡྷྱ་མཱཾ་ཞེས་བརྗོད་པར་བྱའོ། །དེ་ནས་རྣམ་པར་སྒེག་པའི་རྡོ་རྗེས་ཕྱག་བྱས་ལ། དཀྱིལ་འཁོར་ལ་ལན་གསུམ་བསྐོར་བ་བྱས་ལ། བཅོམ་ལྡན་འདས་རྡོ་རྗེ་ཁུ་ཚུར་གྱི་སྤྱན་སྔར་འདུག་ལ། འདི་སྐད་ཅེས་བརྗོད་པར་བྱའོ། །མ་ཧཱ་རཱ་ག །མ་ཧཱ་སཽ་ཁྱ། མ་ཧཱ་བཛྲ། མ་ཧཱ་དྷཱ་ན། མ་ཧཱ་ཛྙཱ་ན། མ་ཧཱ་
ཀརྨ། བཛྲ་སཏྭ་ཨཱདྱ་སིདྡྷྱ་མཱཾ། ཡང་འདི་སྐད་བརྗོད་པར་བྱ་སྟེ། ཛཿཧཱུཾ་བཾ་ཧོཿ པྲ་སིདྡྷྱ་མཱཾ། དེ་ནས་རྡོ་རྗེའི་ཆུ་འཐུངས་ལ་ཨ་ཞེས་བྱ་བ་ལན་བརྒྱ་བརྗོད་དོ། །དེ་བདག་ཉིད་ལ་དབབ་པར་བྱའོ། །ཡང་གཡོན་པའི་ཁྲོ་བོའི་ཁུ་ཚུར་གྱིས་སེམས་མ་རྡོ་རྗེ་ཕྱེ་ལ། བདག་ཉིད་ལ་དབབ་པར་བྱ་སྟེ། ཨ་ཞེས་
བྱ་བ་ལན་བརྒྱ་བརྗོད་པར་བྱའོ། །དེ་ནས་ཨ་ཞེས་བྱ་བས་མེ་ཏོག་དོར་བར་བྱའོ། །དེ་ནས་དེ་བླངས་ལ་ཨ་ཞེས་བྱ་བ་ཉིད་ཀྱིས་རང་གི་མགོ་ལ་བཅིང་བར་བྱའོ། །དེ་ནས་དེ་ཉིད་ཀྱིས་གདོང་གཡོགས་དགྲོལ་བར་བྱའོ། །དེ་ནས་དེ་ཟློས་ཤིང་ཤར་ཕྱོགས་ཀྱི་ཆ་ནས་བརྩམས་ཏེ། དཀྱིལ་འཁོར་བསྐོར་
བར་བྱའོ། །དེ་ནས་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིངས་ལ། ཏིཥྛ་བཛྲ་ཞེས་བྱ་བས་རང་གི་སྙིང་གར་དགྲོལ་བར་བྱའོ། །དེ་ནས་རྡོ་རྗེ་ཁུ་ཚུར་གྱི་ཕྱག་རྒྱ་ཆེན་པོ་བཅིངས་ལ། དེ་ལ་རྡོ་རྗེའི་ལྟ་བས་བལྟ་ཞིང་། ཇི་སྲིད་བཅོམ་ལྡན་འདས་ཀྱི་ཞལ་བསྟན་ནས་དངོས་གྲུབ་ཐམས་ཅད་སྩོལ་བར་འགྱུར་
བ་དེ་སྲིད་ཀྱི་བར་དུ་བཟླས་བརྗོད་བྱའོ། །དེ་ནས་རྡོ་རྗེ་ཐལ་མོ་བསྐོར་བས་ཤིས་པ་བརྗོད་པ་འདོན་པའི་ཚུལ་དུ་རང་གི་སྙིང་གར་བཞག་ལ་མཚན་བརྒྱ་རྩ་བརྒྱད་ཀྱིས་བསྟོད་དེ། རྡོ་རྗེ་མཚོན་ཆ་ལ་སོགས་པའི་གསང་བའི་མཆོད་པ་བཞིས་བཅོམ་ལྡན་འདས་འཁོར་དང་བཅས་པ་ཡང་དག་པར་མཆོད་ལ། གླུ་

59-1-183a

དང་རོལ་མོའི་མཆོད་པ་རྣམས་ཀྱིས་ཀྱང་ལེགས་པར་མཆོད་པར་བྱའོ། །དེ་ནས་ཡང་བཅོམ་ལྡན་འདས་རྡོ་རྗེ་ཁུ་ཚུར་གྱི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་ལ་རྡོ་རྗེའི་ལྟ་བས་བལྟ་ཞིང་རྡོ་རྗེ་ཐལ་མོ་བསྐོར་བས་ཕྱག་བྱས་ལ། མེ་ཏོག་ལ་སོགས་པ་དང་དབང་བསྐུར་
བ་རྣམས་བླང་བར་བྱའོ། །དེ་ལ་དང་པོ་ཁོ་ནར་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱས་ཡོངས་སུ་བཟུང་བའི་རྡོ་རྗེའི་མེ་ཏོག་གི་ཡལ་ག་ལས་རྣམ་པར་རྒྱལ་བའི་བུམ་པ་ལ་སྔར་བཤད་པའི་མཚན་ཉིད་ཅན་གྱི་གསང་སྔགས་དེ་བཞིན་དུ་ཡང་བཟླས་ལ། བདག་ཉིད་བྱང་ཆུབ་སེམས་དཔའ་རྡོ་རྗེ་ཁུ་
ཚུར་དུ་བྱིན་གྱིས་བརླབས་ཏེ། རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱས་རྣལ་འབྱོར་ཆེན་པོ་ལས་བཤད་པའི་གནས་རྣམས་སུ་ལྷ་ཐམས་ཅད་དགོད་པར་བྱས་ལ། ཕྱིའི་དཀྱིལ་འཁོར་གྱི་ནང་དུ་སྣ་ཚོགས་པདྨ་བྲིས་ལ། དེའི་སྟེང་དུ་རྡོ་རྗེ་ཁུ་ཚུར་གྱི་ཕྱག་རྒྱ་ཆེན་པོས་འདུག་ལ་མེ་ཏོག་ལ་སོགས་
པས་བདག་ཉིད་ཀྱང་ཡང་དག་པར་མཆོད་དེ་མཆོད་ཡོན་བླངས་ལ། མཚན་བརྒྱ་རྩ་བརྒྱད་ཀྱིས་ཡང་དག་པར་བསྟོད་ནས། རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ལ། ཨོཾ་བཛྲ་ཨ་བྷི་ཥིཉྩ་ཨཱཿཞེས་བྱ་བས་བདག་ཉིད་དབང་བསྐུར་བར་བྱ་ཞིང་། ཆུ་དེ་བཏུང་བར་ཡང་བྱའོ། །དེ་ནས་སངས་
རྒྱས་ལྔའི་དབང་བསྐུར་བའི་ཕྱག་རྒྱས་དབང་བསྐུར་ལ། ལུགས་མའམ། བརྡུངས་པའམ། བྱས་པའམ། བྲིས་པའི་སངས་རྒྱས་ལྔའི་དབུ་རྒྱན་གྱིས་སྔ་མ་བཞིན་དུ་བདག་ཉིད་ལ་དབང་བསྐུར་བར་བྱའོ། །དེ་ནས་དང་པོའི་རྡོ་རྗེ་དྲིལ་བུ་དང་བཅས་པ་བླངས་ལ། བདག་པོ་དང་མིང་གི་དབང་བསྐུར་
བ་དག་གིས་བདག་ཉིད་དབང་བསྐུར་བར་བྱའོ། །དེ་ནས། སྐུ་གསུང་ཐུགས་ཀྱི་རྡོ་རྗེ་ཡི། །གཟུགས་བརྙན་ལྟ་བུའི་སྦྱོར་བ་ཡིས། །ཕྱག་རྒྱ་ཀུན་ཞེས་སྦྱོར་བས་བསྒྲགས། །དམ་ཚིག་དངོས་གྲུབ་ཀུན་སྟེར་བའོ། །ཞེས་བྱ་བ་བརྗོད་པར་བྱའོ། །དེ་ནས་དངོས་གྲུབ་ཀྱི་རྡོ་རྗེའི་བརྟུལ་ཞུགས་བླངས་
ལ་མེ་ཏོག་ལ་སོགས་པ་ཕྱིའི་མཆོད་པ་རྣམས་ཀྱིས་བདག་ཉིད་ཡང་དག་པར་མཆོད་ལ། རྡོ་རྗེ་མཚོན་ཆ་ལ་སོགས་པའི་ཕྱག་རྒྱའི་མཆོད་པ་རྣམ་པ་བཅུ་གཉིས་ཀྱིས་ཡང་དག་པར་མཆོད་པར་བྱ་ཞིང་། དེ་ཉིད་ཀྱིས་ནི་རྡོ་རྗེ་བཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་

59-1-183b

ཆེར། །བྱིན་གྱིས་བརླབས་ནས་སྙིང་པོ་བཟླ། །དེ་ནས་བཅོམ་ལྡན་འདས་ལ་ཕྱག་བྱས་ལ། སྙིང་པོ་བཟླས་ནས་ཚིགས་སུ་བཅད་པ་ལྔ་པ་རྗེས་སུ་གནང་བ་དང་། གཟེངས་བསྟོད་པ་དང་། ལུང་བསྟན་པ་མནོས་ལ་ཡང་བདག་ཉིད་བྱིན་གྱིས་བརླབ་པ་ལ་སོགས་པ་བྱས་ཏེ། ཅི་འདོད་པར་
བཟླས་བརྗོད་བྱས་ལ། བཅོམ་ལྡན་འདས་ལ་ཕྱག་བྱས་ནས། འདི་སྐད་ཅེས་བརྗོད་པར་བྱ་སྟེ། བདག་མིང་འདི་ཞེས་བྱ་བ་ཡི། །རྡོ་རྗེ་སློབ་དཔོན་དཀའ་ཐུབ་ཆེས། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བགྱི། །དེ་ནས་སློབ་མ་གཞུག་པར་བྱའོ། །སློབ་
དཔོན་གྱི་ལས་ཀྱི་ཆོ་ག་རྫོགས་སོ།།      །།དེ་ནས་སྡོམ་པ་དབོག་པར་འོས་པའི་སློབ་མ་སྔར་བཤད་པའི་ཆོ་གས་སྡོམ་པ་འཛིན་དུ་གཞུག་པར་བྱ་ཞིང་། བྱང་ཆུབ་ཏུ་སེམས་བསྐྱེད་དུ་གཞུག་པར་བྱའོ། །དེ་ནས་དེའི་སྙིང་གར་དེ་བཞིན་དུ་རྡོ་རྗེ་བསྐྱེད་ལ། དེ་བྱང་ཆུབ་སེམས་དཔའ་ཆེན་པོ་རྡོ་རྗེ་
ཁུ་ཚུར་དུ་བྱིན་གྱིས་བརླབས་ཏེ། སྤོས་དང་མེ་ཏོག་ལ་སོགས་པས་མཆོད་ནས། ཡོན་གྱི་མཆོག་བླངས་ལ། སྒོར་བལྟས་ནས་གནས་པའི་བུམ་པའི་ཆུས་དབང་བསྐུར་ནས་རང་གི་འཇུག་པའི་ཆོ་གས་བཅུག་ཅིང་དབབ་པར་བྱས་ལ། ཡང་རྡོ་རྗེ་དབབ་པའི་ཕྱག་རྒྱ་དྲིལ་བུ་དང་བཅས་པས་རྐང་
པ་གཡོན་པས་དེའི་རྐང་པ་གཡས་པ་མནན་ཏེ། ཨ་ཨ་ཨ་ཨ་ཨ་ཞེས་བྱ་བ་ཨ་ལྔ་ལན་བརྒྱའི་བར་དུ་བརྗོད་པས་དབབ་པར་བྱའོ། །དེ་ནས་ཆོ་ག་ཐམས་ཅད་རྗེས་སུ་སྤྱད་པར་བྱའོ། །སློབ་མ་གཞུག་པ་ལ་སོགས་པའི་ཆོ་ག་རྒྱས་པ་རྫོགས་སོ།།      །།ད་ནི་དམ་ཚིག་དང་དབང་བསྐུར་
བ་ཐོབ་པ་རྣམས་ལ། སློབ་དཔོན་གྱི་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར། སྒྲུབ་པ་དང་ཞེས་བྱ་བ་ལ་སོགས་པ་གསུངས་ཏེ། སྒྲུབ་པ་དང་དངོས་གྲུབ་ཐམས་ཅད་ཀྱང་དེ་བཞིན་ནོ་ཞེས་བྱ་བ་ནི་ཟླ་བ་ཉ་ནས་བརྩམས་ཏེ། བཅོམ་ལྡན་འདས་རྡོ་རྗེ་ཁུ་
ཚུར་གྱི་སྤྱན་སྔར་དམ་ཚིག་གི་རྡོ་རྗེ་ཁུ་ཚུར་གྱི་ཕྱག་རྒྱ་བཅིངས་ལ། ཇི་ལྟར་སྐྱོ་བར་མ་གྱུར་པས། དང་པོ་བདག་ལ་བྱིན་གྱིས་བརླབ་པ་ལ་སོགས་པ་བྱས་ཏེ། ཇི་སྲིད་ཟླ་བ་གཅིག་གིས་སྔོན་དུ་བསྙེན་པ་བྱས་པར་གྱུར་པ་དེ་སྲིད་ཀྱི་བར་དུ་རྡོ་རྗེ་ཚིག་གིས་བཟླས་བརྗོད་བྱའོ། །དེ་ནས་དང་པོ་རྡོ་རྗེ་བྲི་

59-1-184a

བའི་ཕྱག་རྒྱས་རས་ལ་བྲི་བའམ་འདྲིར་གཞུག་པར་བྱ་སྟེ། ཕྱིས་ནི་ཅི་བདེར་བྱའོ། །དེ་ཡང་དབུས་སུ་བཅོམ་ལྡན་འདས་རྡོ་རྗེ་ཁུ་ཚུར་ཇི་ལྟ་བ་བཞིན་དུ་བྲིས་ལ། བྱང་ཆུབ་སེམས་དཔའ་རྡོ་རྗེའི་སྐུ་མཆོག་ནས་བརྩམས་ཏེ། ལྷ་མོ་རྡོ་རྗེ་རྡོ་རྗེའི་བར་དུ་ཐམས་ཅད་དཀྱིལ་འཁོར་གྱི་
ཚུལ་དུ་ཡང་དག་པར་བྲི་བར་བྱའོ། །དེ་ནས་ཟླ་བ་ཉ་ནས་བརྩམས་ཏེ། བཅོམ་ལྡན་འདས་རྡོ་རྗེ་ཁུ་ཚུར་གྱི་ཕྱག་རྒྱ་ཆེན་པོ་བཅིངས་ལ། དེ་བཞིན་དུ་སྔོན་དུ་བསྙེན་པའི་སྦྱོར་བས་ཟླ་བ་གཅིག་ཙམ་གྱི་བར་དུ་བཟླས་བརྗོད་བྱའོ། །དེ་ནས་ནང་པར་བཅོམ་ལྡན་འདས་རྡོ་རྗེ་ཁུ་ཚུར་གྱིས་ཞལ་བསྟན་
ནས། སངས་རྒྱས་ཉིད་ལ་སོགས་པའི་དངོས་གྲུབ་རྣམས་སྩོལ་བར་འགྱུར་རོ། །རས་ཀྱི་རི་མོ་དང་པོའི་སྒྲུབ་པའོ། །དེ་ནས་རས་ཀྱིས་རི་མོ་གཉིས་པ་བསྒྲུབ་པར་བྱའོ། །སྔོན་དུ་བསྙེན་པ་དེ་བཞིན་དུ་བྱས་ནས། བཅོམ་ལྡན་འདས་རྡོ་རྗེ་ཁུ་ཚུར་དཔའ་བོ་གཅིག་པུ་བྲིས་ལ། དེའི་སྤྱན་སྔར་
བཅོམ་ལྡན་འདས་རྡོ་རྗེ་ཁུ་ཚུར་གྱི་ཕྱག་རྒྱ་ཆེན་པོ་བཅིངས་ལ་བཟླས་བརྗོད་འབུམ་བྱའོ། །དེ་ནས་ཟླ་བ་ཉ་ནས་མཚན་ཐོག་ཐག་བཟླས་བརྗོད་བྱས་ནས། ནང་པར་རྡོ་རྗེ་ཁུ་ཚུར་ཉིད་ཐོབ་པར་འགྱུར་རོ། །དེ་ནས་མ་བསྒྲུབས་པའི་ལས་རྣམས་ཀྱང་དེ་བཞིན་ཏེ་ཞེས་བྱ་བ་ནི་སྔ་མ་བཞིན་ནོ། །ཕྱག་
རྒྱ་ཐམས་ཅད་བཅིང་བ་བསྒྲུབ་པ་ལ་ཞེས་བྱ་བ་ནི། ཕྱག་རྒྱ་ཆེན་པོ་དང་། ཆོས་དང་དམ་ཚིག་དང་ལས་ཀྱི་ཕྱག་རྒྱ་རྣམས་ནི་ཕྱག་རྒྱ་ཐམས་ཅད་དེ། དེ་རྣམས་བཅིང་བ་ནི་ཇི་སྐད་དུ་བཤད་པའོ། །དེའི་སྒྲུབ་པ་ནི་རྫོགས་པར་བྱ་བའོ། །དེ་ཇི་ལྟར་འགྱུར་ཞེ་ན། སྙིང་གར་རྡོ་རྗེ་ཁུ་ཚུར་གྱིས་སོ་
ཞེས་བྱ་བ་གསུངས་ཏེ། ཕྱག་རྒྱ་དེ་ཐམས་ཅད་བཅིང་བ་སྒྲུབ་པ་ནི་སྙིང་གར་རྡོ་རྗེ་ཁུ་ཚུར་གྱི་ཕྱག་རྒྱས་གྲུབ་པར་གྱུར་ཏེ། རྡོ་རྗེ་ཁུ་ཚུར་གཉིས་གཅིག་ལ་གཅིག་ལྟ་བར་སྙིང་གའི་ཕྱོགས་སུ་བཞག་ལ་བཙིར་བ་འདི་ནི་སྙིང་གར་རྡོ་རྗེ་ཁུ་ཚུར་གྱི་ཕྱག་རྒྱ་བྱ་སྟེ། འདི་བཅིངས་ལ་ཨ་ཞེས་བྱ་བ་
ཟློས་ཤིང་། དེ་ལྟ་བུས་ནི་ཕྱག་རྒྱ་ཐམས་ཅད་བཅིང་བ་གྲུབ་པར་འགྱུར་ཏེ། ཕྱག་རྒྱ་ཆེན་པོ་ལ་སོགས་པ་རིགས་ཐམས་ཅད་ཀྱི་ཕྱག་རྒྱ་སྒྲུབ་པ་པོས་བཅིངས་ལ་རང་གི་ལས་ལ་ངེས་པར་སྦྱར་ནས། རང་གི་ལས་རྣམས་བྱེད་དོ་ཞེས་བྱ་བའི་དོན་ཏོ། །ཕྱག་རྒྱ་ཐམས་ཅད་བསྒྲུབ་པ་ལ་ནི་

59-1-184b

ཞེས་བྱ་བ་ལ། ཕྱག་རྒྱ་ཐམས་ཅད་ནི་ཇི་སྐད་དུ་བཤད་པ་རྣམས་སོ། །དེ་རྣམས་བསྒྲུབ་པ་ནི་རང་དབང་དུ་བྱ་བའོ། །དེ་ཇི་ལྟར་འགྱུར་ཞེ་ན། རྡོ་རྗེ་ཆེན་པོའི་ཁུ་ཚུར་གྱིས་སོ་ཞེས་བྱ་བ་གསུངས་ཏེ། ཇི་སྐད་དུ་བཤད་པའི་མཚན་ཉིད་ཅན་གྱི་བཅོམ་ལྡན་འདས་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་
ནི། རྡོ་རྗེ་ཆེན་པོའི་ཁུ་ཚུར་རོ། །འདི་སྐད་སྟོན་པར་འགྱུར་ཏེ། ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་སྒྲུབ་པར་འདོད་པས། དང་པོ་ཉིད་རྡོ་རྗེའི་ཐལ་མོ་དང་། རྡོ་རྗེ་བསྡམས་པ་དང་། རྡོ་རྗེ་བསྡམས་པ་དགྲོལ་བའི་ཕྱག་རྒྱ་དང་། རྡོ་རྗེ་དབབ་པའི་དམ་ཚིག་གི་ཕྱག་རྒྱ་བཅིངས་ལ། བཛྲ་
མུཥྚི་ཞེས་བྱ་བ་དང་། རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིངས་ཏེ། ཨ་ཞེས་བྱ་བ་གདོན་པར་བྱའོ། །དེ་ནས་སྒྲུབ་པ་པོ་དེའི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་རང་དབང་དུ་བྱས་པར་འགྱུར་རོ། །དམ་ཚིག་ཐམས་ཅད་བསྒྲུབ་པ་ལ་ནི་ཞེས་བྱ་བ་ལ་དམ་ཚིག་ཀྱང་ཡིན་ལ་
ཐམས་ཅད་ཀྱང་ཡིན་པས་ན་དམ་ཚིག་ཐམས་ཅད་དེ། རྡོ་རྗེ་སེམས་དཔའ་ལ་སོགས་པ་རྣམས་སོ། །དེ་རྣམས་བསྒྲུབ་པ་ནི་སྤྱན་དྲངས་པ་རྣམས་རང་དབང་དུ་བྱ་བའོ། །དེ་ཇི་ལྟར་འགྱུར་ཞེ་ན། རྡོ་རྗེ་འདོད་པའི་ཁུ་ཚུར་གྱིས་སོ་ཞེས་བྱ་བ་གསུངས་ཏེ། རྡོ་རྗེ་ཧཱུཾ་མཛད་ཀྱི་ཕྱག་རྒྱ་ལས་མཛུབ་
མོ་གཉིས་ལུ་གུ་རྒྱུད་དུ་མདུད་པ་བྱས་ལ། མཐེ་བོང་གཉིས་གཤིབས་ནས་སྙིང་གར་བཞག་པ་འདི་ནི་རྡོ་རྗེ་འདོད་པའི་རྒྱལ་པོའི་ཕྱག་རྒྱ་སྟེ། འདི་བཅིངས་ལ་རང་གི་ལྷའི་སྤྱན་སྔའམ། རང་གི་ལུས་ལ་བཞག་ལ། ཨ་ཞེས་བྱ་བ་བཟླས་བརྗོད་བྱས་ན་དེ་ལྟ་བུས་ནི་དམ་ཚིག་ཐམས་ཅད་
འགྲུབ་པར་འགྱུར་རོ། །སེམས་ཅན་ཐམས་ཅད་རྗེས་སུ་ཆགས་པར་བྱ་བ་ལ་ནི་ཞེས་བྱ་བ་ལ། རྡོ་རྗེ་སེམས་དཔའ་ལ་སོགས་པ་དང་། སེམས་ཅན་གྱི་ཁམས་རྣམས་ནི་སེམས་ཅན་ཐམས་ཅད་དེ། དེ་རྣམས་རྗེས་སུ་ཆགས་པར་བྱ་བ་ནི་སྔ་མ་བཞིན་ནོ། །རྡོ་རྗེ་ཆགས་པ་ཆེན་པོའི་ཁུ་ཚུར་
གྱིས་སོ་ཞེས་བྱ་བ་ནི། རྡོ་རྗེ་ཁུ་ཚུར་གཉིས་བཅིངས་ལ། དེས་མདའ་འཛིན་པའི་ཚུལ་དུ་བྱ་བ་འདི་ནི་རྡོ་རྗེ་ཆགས་པ་ཆེན་པོའི་ཚུལ་དུ་བྱ་བའི་རྡོ་རྗེ་ཁུ་ཚུར་ཏེ་འདི་བཅིངས་ལ། རྡོ་རྗེ་ཆགས་པར་བདག་ཉིད་རྣམ་པར་བསམས་ནས། རྡོ་རྗེ་སེམས་དཔའ་ལ་སོགས་པ་བསྒྲུབ་པར་བྱ་བའི་སེམས་དཔའ་

59-1-185a

རྣམས་ཡིད་ཀྱིས་མདུན་དུ་གནས་པ་ལ། མེ་ཏོག་གི་མདའ་ཁ་དོག་དམར་པོས་ཡང་དང་ཡང་དུ་སྙིང་གར་བསྣུན་པར་བྱ་ཞིང་། ཨ་ཆེ་གེ་མོ་ཨ་ནུ་རཱ་ག་ཡ་ཧོ་ཞེས་བཟླས་བརྗོད་བྱས་ནས་དེ་ལྟ་བུས་ནི་རྗེས་སུ་ཆགས་པར་བྱས་པར་འགྱུར་རོ། །སེམས་ཅན་ཐམས་ཅད་
དབང་དུ་བྱ་བ་ལ་ནི་ཞེས་བྱ་བ་ལ། རྡོ་རྗེ་སེམས་དཔའ་ལ་སོགས་པ་དབང་དུ་བྱ་བ་ནི་ཐམས་ཅད་དབང་དུ་བྱ་བ་སྟེ། བདག་དང་ནོར་རང་དབང་དུ་བྱས་ཞེས་བྱ་བའི་དོན་ཏོ། །དེ་ཇི་ལྟར་འགྱུར་ཞེ་ན། རྡོ་རྗེ་བཞད་པའི་ཁུ་ཚུར་གྱིས་སོ་ཞེས་བྱ་བ་གསུངས་ཏེ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་
པོ་ལས་གསུངས་པའི་རྡོ་རྗེ་བཞད་པའི་དམ་ཚིག་གི་ཕྱག་རྒྱ་ནི་རྡོ་རྗེ་བཞད་པའི་དམ་ཚིག་གི་ཁུ་ཚུར་ཡིན་ལ། འདི་བཅིངས་ནས་ཨ་ཞེས་བྱ་བ་ཟློས་ཤིང་རྡོ་རྗེ་བཞད་པ་མདོག་དམར་པོར་བདག་ཉིད་རྣམ་པར་བསམས་ལ། བསྒྲུབ་པར་བྱ་བ་མདུན་དུ་བཞག་སྟེ། དེ་བཞིན་དུ་འོད་ཟེར་
དམར་པོ་རྣམས་ཀྱིས་བསྒྲུབ་པར་བྱ་བ་འཁྱུད་ཅིང་བཟླས་བརྗོད་བྱ་སྟེ། ཨ་ཆེ་གེ་མོ་མེ་བ་ཤཾ་ཨཱ་ན་ཡ་ཧོ། དེ་ལྟ་བུས་ནི་འདི་དབང་དུ་འགྱུར་རོ། །ཐམས་ཅད་བཅིང་བ་ལ་ནི་ཞེས་བྱ་བ་ལ། རྡོ་རྗེ་འཛིན་པས་རྡོ་རྗེ་ལྕགས་སྒྲོག་ཕྱག་ན་བསྣམས་པས་བདུད་ལ་སོགས་པ་བཅིང་བ་ནི་
ཐམས་ཅད་བཅིང་བའོ། །དེ་ཇི་ལྟར་འགྱུར་ཞེ་ན། རྡོ་རྗེ་བསྡམས་པའི་ཁུ་ཚུར་ཆེན་པོས་སོ་ཞེས་བྱ་བ་གསུངས་ཏེ། རྡོ་རྗེ་བསྡམས་པ་ནི་གོ་བར་ཟད་དོ། །དེ་ཉིད་ནི་ཁུ་ཚུར་ཆེན་པོ་སྟེ། དེས་ཐམས་ཅད་བཅིང་བའོ། །ཡང་རྣམ་པ་འདི་ཉིད་ཀྱིས་ཐམས་ཅད་བཅིང་བ་བསྟན་པའི་ཕྱིར། ཐམས་
ཅད་བསྡམས་པ་ལ་ནི་རྡོ་རྗེ་ལུ་གུ་རྒྱུད་ཀྱི་ཁུ་ཚུར་གྱིས་སོ་ཞེས་བྱ་བ་གསུངས་ཏེ། རྡོ་རྗེ་བསྡམས་པ་ནང་དུ་བཅིངས་ལ། མཐེ་བོ་དང་མཛུབ་མོ་རྩེ་སྤྲད་དེ། བཅིང་བ་ནི་རྡོ་རྗེ་ལུ་གུ་རྒྱུད་ཀྱི་ཁུ་ཚུར་ཏེ་འདི་བཅིངས་ལ་ཨ་ཞེས་བྱ་བ་ཟློས་ཤིང་། རྡོ་རྗེ་ལྕགས་སྒྲོག་གི་ལག་པ་དང་རྡོ་རྗེ་ལྕགས་སྒྲོག་ཏུ་
བདག་ཉིད་རྣམ་པར་བསམས་ལ། ཨ་ཆེ་གེ་མོ་བནྡྷ་ཡ་བཾ་ཞེས་བྱ་བ་ཟློས་ཤིང་། བསྒྲུབ་པར་བྱ་བའི་རྡོ་རྗེ་ལྕགས་སྒྲོག་དང་བཅིང་བར་བྱའོ། །ཐམས་ཅད་ལྐུགས་པར་བྱ་བ་ལ་ནི་ཞེས་བྱ་བ་ལ། ངག་གི་འཇུག་པ་དང་བྲལ་བ་ནི་ལྐུགས་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་ཞལ་གྱི་ཁུ་

59-1-185b

ཚུར་གྱིས་སོ་ཞེས་བྱ་བ་གསུངས་ཏེ། རྡོ་རྗེ་དགུན་གྱི་ཕྱག་རྒྱ་ནི། རྡོ་རྗེ་ཞལ་གྱི་ཁུ་ཚུར་ཏེ། འདི་བཅིངས་ལ་ཨཱ་ཞེས་བྱ་བས། བདག་ཉིད་རྡོ་རྗེ་དགུན་གྱི་གཟུགས་སུ་རྣམ་པར་བསམས་ཏེ། བསྒྲུབ་པར་བྱ་བ་རྡོ་རྗེ་ཁབ་བབས་པས་འཁྱག་པར་འགྱུར་ཞིང་ཚིག་སྨྲ་མི་ནུས་པས་རྨུགས་
པར་བསམ་པར་བྱ་སྟེ། དེ་ལྟ་བུས་ནི་ལྐུགས་པར་འགྱུར་རོ། །ཐམས་ཅད་བཙིར་བ་ལ་ནི་ཞེས་བྱ་བ་ལ། སྔར་བཤད་པའི་སྤྱོར་བས་གདོན་པ་ལ་སོགས་པ་བཅིངས་ཏེ། ཕྱིས་རྡོ་རྗེ་བསྡམས་པ་བཅིངས་ལ། དེ་དང་ཡིད་ཀྱིས་བླངས་ཏེ། རྡོ་རྗེ་བསྡམས་པའི་ནང་དུ་ཆུད་པ་དང་བསྒྲུབ་
པར་བྱ་བ་བཙིར་བར་བྱ་བ་འདི་ནི་རྡོ་རྗེ་བསྡམས་པའི་ཁུ་ཚུར་ཏེ། འདིས་ཐམས་ཅད་བཙིར་བར་འགྱུར་རོ། །ཐམས་ཅད་གསད་པ་ལ་ནི་རྡོ་རྗེ་ཁྲོ་བོའི་ཁུ་ཚུར་གྱིས་སོ་ཞེས་བྱ་བ་ནི་བཅོམ་ལྡན་འདས་རྡོ་རྗེ་ཁུ་ཚུར་གྱི་སྦྱོར་བ་ཇི་ལྟ་བ་བཞིན་དུ་བྱས་ལ། ཨཱཿཧཱུཾ་ཞེས་བྱ་བས་རྡོ་རྗེ་ཁྲོ་བོར་བདག་ཉིད་
རྣམ་པར་བསམས་ལ། གཡས་ཀྱི་ཁྲོ་བོའི་ཁུ་ཚུར་རམ། གཡོན་གྱི་ཁུ་ཚུར་གྱིས་གཞན་ལ་སྡིགས་མཛུབ་བྱ་ཞིང་། ཨ་ཆེ་གེ་མོ་མཱ་ར་ཡ་ཧཱུཾ་ཞེས་བཟླས་ལ། མཛུབ་མོའི་རྡོ་རྗེ་ལས་རྡོ་རྗེ་འབར་བ་སྤྲུལ་ལ། བསྒྲུབ་པར་བྱ་བའི་སྟེང་དུ་ལྟུང་བར་བྱ་སྟེ། དེ་ལྟ་བུས་ནི་རྡོ་རྗེ་ཁྲོ་བོའི་ཁུ་ཚུར་གྱིས་
ཐམས་ཅད་གསོད་པར་འགྱུར་རོ། །ཐམས་ཅད་བཟའ་བ་ལ་ནི་རྡོ་རྗེ་གནོད་སྦྱིན་གྱི་ཁུ་ཚུར་གྱིས་སོ་ཞེས་བྱ་བ་ནི། རྡོ་རྗེ་གནོད་སྦྱིན་གྱི་སྦྱོར་བས་ཇི་ལྟ་བ་བཞིན་དུ་བྱས་ལ། ཨཱ་ཞེས་བྱ་བ་ཉིད་ཀྱིས་རྡོ་རྗེ་གནོད་སྦྱིན་གྱི་སྐྲ་གྱེན་དུ་བརྫེས་པ། གསུས་པ་ཆེ་བ་ཞལ་ནམ་མཁའ་ལྟར་ཚད་མེད་ཅིང་
མཆེ་བ་གཙིགས་པ་ཁྲོ་བ་ཆེན་པོ་འཁྲུགས་པ། མདོག་ནག་པོར་བདག་ཉིད་བསམས་ནས། དེའི་ལས་ཀྱི་ཕྱག་རྒྱ་བཅིངས་ཏེ། བསྒྲུབ་པར་བྱ་བའི་སྤྲིན་ལ་སོགས་པ་དེས་རང་གི་ཁར་བཅུག་ལ། ཨ་མེ་གྷ་ཨ་ཏི་ཨཾ་བྷཀྵ་ཡ་ཧཱུཾ་ཞེས་བཟླས་བརྗོད་བྱའོ། །འདི་ནི་རྡོ་རྗེ་གནོད་སྦྱིན་གྱི་ཁུ་
ཚུར་ཏེ་འདིས་ཐམས་ཅད་ཟ་བར་འགྱུར་རོ། །ཐམས་ཅད་གཞིག་པ་ལ་ནི་རྡོ་རྗེ་ངེས་པར་བཙིར་བའི་ཁུ་ཚུར་གྱིས་སོ་ཞེས་བྱ་བ་ནི། སྔ་མ་བཞིན་དུ་སྦྱོར་བ་བྱས་ལ། དམ་ཚིག་གི་རྡོ་རྗེ་ཁུ་ཚུར་གྱི་ཕྱག་རྒྱས་བསྒྲུབ་པར་བྱ་བ་བཟུང་བའི་བསམ་པས་རྡོ་རྗེ་རྩེ་ལྔ་པ་བླངས་ཏེ། བསྒྲུབ་པར་བྱ་བ་བཙིར་

59-1-186a
བའི་བསམ་པས་བཙིར་བར་བྱའོ། །འདིས་ནི་རྡོ་རྗེ་ངེས་པར་བཙིར་བའི་ཁུ་ཚུར་འདིས་ཐམས་ཅད་གཞིག་པར་བྱའོ། །ཐམས་ཅད་དྲལ་བ་ལ་ནི་རྡོ་རྗེ་དྲལ་བའི་ཁུ་ཚུར་གྱིས་སོ་ཞེས་བྱ་བ་ནི། ལྷའི་བུའི་བདུད་ལ་སོགས་པའི་དངོས་པོ་ཐམས་ཅད་དྲལ་བ་ལ་ནི་རྡོ་རྗེ་ཁུ་ཚུར་
གཉིས་བཅིངས་ལ། བསྒྲུབ་པར་བྱ་བ་དྲལ་བའི་བསམ་པས་དྲལ་བར་བྱའོ། །འདི་ནི་རྡོ་རྗེ་དྲལ་བའི་ཁུ་ཚུར་ཏེ་འདིས་ཐམས་ཅད་དྲལ་བར་འགྱུར་རོ། །ཐམས་ཅད་དབབ་པ་ལ་ནི་རྡོ་རྗེ་འབེབས་པའི་རྡོ་རྗེ་ཁུ་ཚུར་གྱིས་སོ་ཞེས་བྱ་བ་ནི། རྒྱུ་བ་དང་མི་རྒྱུ་བའི་དངོས་པོ་ཐམས་ཅད་དབབ་པ་ནི་ཐམས་
ཅད་དབབ་པའོ། །དེ་ཡང་རྡོ་རྗེ་བསྡམས་པ་ནང་དུ་བཅིངས་ལ་སྲིན་ལག་དང་། མཐེའུ་ཆུང་གི་བར་དུ་མཐེ་བོ་གཞག་པ་འདི་ནི་རྡོ་རྗེ་འབེབས་པའི་ཁུ་ཚུར་ཏེ། འདི་དང་ཨ་ཞེས་བྱ་བས་ཐམས་ཅད་འབེབས་པར་འགྱུར་རོ། །ཐམས་ཅད་གར་བྱེད་དུ་གཞུག་པ་ལ་ནི་རྡོ་རྗེ་གར་གྱི་ཁུ་ཚུར་གྱིས་སོ་
ཞེས་བྱ་བ་ནི། འདི་ནི་རྡོ་རྗེ་གར་མཁན་མའི་ཕྱག་རྒྱ་ནི། རྡོ་རྗེ་གར་གྱི་ཁུ་ཚུར་ཏེ། འདིས་ཐམས་ཅད་གར་བྱེད་དུ་གཞུག་པར་བྱའོ། །འདི་སྐད་སྟོན་པར་འགྱུར་ཏེ། བཅོམ་ལྡན་འདས་རྡོ་རྗེ་ཁུ་ཚུར་གྱི་སྦྱོར་བ་ཇི་ལྟ་བ་བཞིན་དུ་བྱས་ལ། ཨ་ཞེས་བྱ་བ་ཟློས་ཤིང་ཐམས་ཅད་གར་བྱེད་པའི་ཚུལ་
གྱིས་བསྒྲུབ་པར་བྱ་བའི་ལུས་ལ་ཡིད་ཀྱིས་གཞུག་པས་བསྒྲུབ་པར་བྱ་བ་བཀང་ལ། བདག་ཉིད་ཀྱིས་གར་བྱས་ཏེ་དེས་ནི་ཐམས་ཅད་གར་བྱེད་དུ་གཞུག་པར་བྱའོ། །ཐམས་ཅད་སྨྲར་གཞུག་པ་ནི་རྡོ་རྗེ་གསུང་གི་ཁུ་ཚུར་གྱིས་སོ་ཞེས་བྱ་བ་ནི། རྡོ་རྗེ་ཁུ་ཚུར་གཉིས་ཀྱིས་པི་ཝང་བརྡུང་བའི་ཚུལ་
དུ་བྱས་པ་འདི་ནི་རྡོ་རྗེ་གསུང་གི་ཁུ་ཚུར་ཏེ། འདི་བཅིངས་ལ་ཨ་ཞེས་བྱ་བ་ཟློས་ཤིང་རྡོ་རྗེ་ཁུ་ཚུར་གྱི་སྤྱོར་བས་བསྒྲུབ་པར་བྱ་བའི་ལུས་ལ་ཇི་ལྟ་བ་བཞིན་དུ་ཞུགས་ནས། རྡོ་རྗེ་ཁུ་ཚུར་གཉིས་ཀྱིས་ཡང་དང་ཡང་དུ་པི་ཝང་བརྡུང་བ་ལྟར་བྱས་ན་ཐམས་ཅད་སྨྲ་བར་འགྱུར་རོ། །ཐམས་ཅད་རེངས་པར་
བྱ་བ་ལ་ནི་རྡོ་རྗེ་དམིགས་པའི་ཁུ་ཚུར་གྱིས་སོ་ཞེས་བྱ་བ་ནི། རྡོ་རྗེ་ཁུ་ཚུར་གྱི་སྦྱོར་བ་ཇི་ལྟ་བ་བཞིན་དུ་བྱས་ལ། སྙིང་གའི་ཟླ་བ་ལ་རྡོ་རྗེ་རྩེ་ལྔ་པ་འབར་བའི་ཕྲེང་བ་ཀུན་དུ་འཁྲུགས་པའི་འོད་ཅན་རྣམ་པར་བསམས་ཏེ། འབར་བ་དེས་ཕྱོགས་བཅུའི་སྤྲིན་ལ་སོགས་པ་བསྒྲུབ་པར་བྱ་བ་གནོན་པར་བྱ་སྟེ། 

59-1-186b

འདི་ནི་རྡོ་རྗེ་དམིགས་པའི་ཁུ་ཚུར་གྱིས་ཐམས་ཅད་རེངས་པར་བྱའོ། །གཞན་གྱི་དཔུང་ཐམས་ཅད་ལྐུགས་པ་དང་འཕྱེ་བོར་བྱ་བ་ལ་ནི་རྡོ་རྗེ་ཆེན་པོ་འཕྱེ་བོའི་ཁུ་ཚུར་གྱིས་སོ་ཞེས་བྱ་བ་ནི། དེ་བཞིན་དུ་བཅོམ་ལྡན་འདས་ཀྱི་སྦྱོར་བ་བྱས་ལ། ཨ་ཧཱུཾ་ཞེས་ཟློས་ཤིང་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་
ལ། རྡོ་རྗེ་ཧཱུཾ་མཛད་དུ་བདག་ཉིད་བསྒོམས་ལ། ཨ་བ་ར་སཻ་ནྱམ་མུ་ཁ་ཕག་ཀམ་ཀུ་རུ་ཧཱུཾ། ཞེས་ཁྲོས་པས་བཟླས་བརྗོད་བྱས་ལ། ཕྱག་རྒྱ་བཅིངས་ལ་དེ་ལས་རྡོ་རྗེ་ཁྲོ་བོ་རྣམས་སྤྲུལ་ཏེ། གཞན་གྱི་དཔུང་ཐམས་ཅད་ཚིག་དང་བྲལ་བས་ན་ལྐུགས་པ་དང་། རྐང་པ་འདགས་པའི་ནུས་
པ་དང་བྲལ་བས་ན་གྲུམ་པོར་བྱ་བ་འདི་ནི་འཕྱེ་བོའི་ཁུ་ཚུར་རོ། །གཞན་གྱི་ཕྱག་རྒྱ་ཐམས་ཅད་ལས་སྒྲོལ་བ་ལ་ནི་རྡོ་རྗེ་ཐལ་མོའི་ཁུ་ཚུར་གྱིས་སོ་ཞེས་བྱ་བ་ནི་སྔ་མ་བཞིན་དུ་རྡོ་རྗེ་ཁུ་ཚུར་གྱི་སྦྱོར་བ་བྱས་ལ། ཨཱཿཞེས་བྱ་བ་ཟློས་ཤིང་། དམ་ཚིག་གི་རྡོ་རྗེའི་ཁུ་ཚུར་གྱི་མཐིལ་གཉིས་སུ་འཇིག་
རྟེན་དང་འཇིག་རྟེན་ལས་འདས་པའི་ཕྱག་རྒྱ་ཐམས་ཅད་ཡིད་ཀྱིས་བླངས་ལ། དགྲོལ་བ་དེ་ནི་རྡོ་རྗེ་ཐལ་མོའི་ཁུ་ཚུར་རོ། །རྡོ་རྗེ་མཁའ་འགྲོ་མ་ཐམས་ཅད་ཀྱི་ཕྱག་རྒྱ་གཞིག་པ་ལ་ནི་རྡོ་རྗེ་ཧཱུཾ་མཛད་ཀྱི་རྡོ་རྗེའི་ཁུ་ཚུར་གྱིས་སོ་ཞེས་བྱ་བ་ནི། དེ་བཞིན་དུ་རྡོ་རྗེ་ཁུ་ཚུར་སྦྱོར་བ་བྱས་ལ། ཨཱཿ་ཧཱུཾ་ཞེས་བྱ་
བས་དཔལ་ཧེ་རུ་ཀར་བདག་ཉིད་རྣམ་པར་བསམས་ལ། དཔལ་ཁྲག་འཐུང་གི་རྡོ་རྗེའི་ཕྱག་རྒྱ་མཁའ་འགྲོ་མའི་ཕྱག་རྒྱའི་སྟེང་དུ་བབས་པར་འགྱུར་བར་བསམས་ཏེ། འདི་ནི་ཧཱུཾ་མཛད་ཀྱི་རྡོ་རྗེའི་ཁུ་ཚུར་རོ། །གདུག་པ་ཐམས་ཅད་ཀྱི་ཕྱག་རྒྱ་དབྱེ་བ་ལ་ནི་ཧཱུཾ་མཛད་ཀྱི་རྡོ་རྗེའི་ཁུ་ཚུར་གྱིས་སོ་
ཞེས་བྱ་བ་ནི། དེ་བཞིན་དུ་རྡོ་རྗེ་ཁུ་ཚུར་གྱི་སྦྱོར་བ་བྱས་ལ། ཨཱཿ་ཧཱུཾ་ཞེས་བྱ་བ་དང་། རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་ནས་རྡོ་རྗེ་ཧཱུཾ་མཛད་དུ་བདག་ཉིད་རྣམ་པར་བསམས་ཏེ། སྲིན་པོ་ལ་སོགས་པའི་གདུག་པ་ཐམས་ཅད་ཀྱི་ཕྱག་རྒྱ་དྲལ་བའི་བསམ་པས་རྡོ་རྗེ་ཧཱུཾ་མཛད་ཀྱི་ཕྱག་རྒྱས་མཁྲིག་མ་
བཅིང་བ་དྲལ་བར་བྱ་སྟེ། འདིས་ནི་རྡོ་རྗེ་ཧཱུཾ་མཛད་ཀྱི་ཁུ་ཚུར་ཏེ། ཇི་སྐད་དུ་བཤད་པའི་ལས་རྫོགས་པར་བྱེད་པའོ། །ཕྱག་རྒྱ་ཐམས་ཅད་བཅིང་བ་ལ་ནི་རྡོ་རྗེ་ཁུ་ཚུར་གྱི་ཁུ་ཚུར་གྱིས་སོ་ཞེས་བྱ་བ་ནི་སྔ་མ་བཞིན་དུ་རྡོ་རྗེ་ཁུ་ཚུར་གྱི་སྦྱོར་བ་བྱས་ལ། རྡོ་རྗེ་ཁུ་ཚུར་གྱིས་ལས་ཀྱི་ཕྱག་རྒྱ་བཅིངས་ནས། 

59-1-187a

ཕྱག་རྒྱ་ཆེན་པོ་ལ་སོགས་པའི་རིགས་ཐམས་ཅད་ཀྱི་ཕྱག་རྒྱ་རྣམས་དམ་ཚིག་གི་བཅིང་བས་བཅིངས་ནས་ཨ་ཞེས་བྱ་བ་ཟློས་པ་འདི་ནི་རྡོ་རྗེ་ཁུ་ཚུར་གྱི་ཁུ་ཚུར་ཏེ། ཕྱག་རྒྱ་ཐམས་ཅད་འཆིང་བའོ། །ཕྱག་རྒྱ་ཐམས་ཅད་རྡོ་རྗེར་བྱ་བ་ལ་ནི་རྡོ་རྗེ་ཁུ་ཚུར་གྱིས་སོ་ཞེས་བྱ་བ་ནི་སྔ་
མ་བཞིན་དུ་རྡོ་རྗེ་ཁུ་ཚུར་གྱི་སྦྱོར་བ་བྱས་ལ། རྡོ་རྗེ་ཁུ་ཚུར་གཉིས་ཀྱིས་ཡན་ལག་དང་ཉིང་ལག་ཐམས་ཅད་བྱུག་ཅིང་ཨ་ཞེས་བྱ་བ་ཟློས་པ་འདི་ནི་རྡོ་རྗེ་ཁུ་ཚུར་ཏེ། ཕྱག་རྒྱ་ཆེན་པོ་རྡོ་རྗེར་བྱེད་པའོ། །ཐམས་ཅད་རྒྱས་གདབ་པ་ལ་ནི་རྡོ་རྗེ་མ་མོའི་ཁུ་ཚུར་གྱིས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་
ཁུ་ཚུར་གྱི་སྦྱོར་བ་བྱས་ལ། ཨ་ཞེས་བྱ་བ་དང་བསྒྲུབ་པར་བྱ་བ་རྒྱས་གདབ་པའི་བསམ་པས་རྡོ་རྗེ་ཁུ་ཚུར་གཉིས་ཁར་གཞག་པ་འདི་ནི་རྡོ་རྗེ་མ་མོའི་ཁུ་ཚུར་ཏེ། དེས་སེམས་ཅན་ཐམས་ཅད་རྒྱས་འདེབས་པའོ། །ཐམས་ཅད་ཕྱེ་མར་བྱ་བ་ལ་ནི་རྡོ་རྗེ་བཟང་པོའི་ཁུ་ཚུར་གྱིས་སོ་ཞེས་བྱ་
བ་ནི་སྔ་མ་བཞིན་དུ་རྡོ་རྗེ་ཁུ་ཚུར་གྱི་སྦྱོར་བ་བྱས་ལ། བདུད་ལ་སོགས་པ་ཕྱེ་མར་བྱ་བའི་བསམ་པས་དམ་ཚིག་རྡོ་རྗེའི་ཁུ་ཚུར་བཅིངས་ལ། ཡིད་ཀྱིས་བསྒྲུབ་པར་བྱ་བའི་སྟེང་དུ་བཞག་ནས། ས་ལ་བཙིར་ཏེ་རྡོ་རྗེ་འབར་བས་བསྒྲུབ་པར་བྱ་བ་ཐལ་བར་བྱས་པར་གྱུར་པར་བསམ་ཞིང་། ཨ་ཧཱུཾ་
ཞེས་བྱ་བའི་བཟླས་བརྗོད་བྱ་བ་འདི་ནི་རྡོ་རྗེ་བཟང་པོའི་ཁུ་ཚུར་ཏེ་ཐམས་ཅད་ཕྱེ་མར་བྱེད་པའོ། །ཐམས་ཅད་རྣམ་པར་གཞིག་པ་ལ་ནི་རྡོ་རྗེ་གདུག་པའི་ཁུ་ཚུར་གྱིས་སོ་ཞེས་བྱ་བ་ནི་སྔ་མ་བཞིན་དུ་རྡོ་རྗེ་ཁུ་ཚུར་གྱི་སྦྱོར་བ་བྱས་ལ། གདུག་པ་རྣམས་ཀྱི་དཀྱིལ་འཁོར་གཞིག་པའི་བསམ་པས་
གཡོན་པའི་རྡོ་རྗེ་ཁུ་ཚུར་གྱི་རྒྱབ་ཏུ་གཡས་པའི་རྡོ་རྗེ་ཁུ་ཚུར་ཁ་བཀན་ཏེ་བཞག་ནས། དབུས་སུ་གདུག་པའི་དཀྱིལ་འཁོར་བསམས་ལ། གཡོན་དུ་བལྟ་བ་དང་བཅས་པ་ཉིད་ཀྱིས་གཡོན་པའི་ཁུ་ཚུར་མངོན་དུ་ཕྱོགས་པར་བྱས་ཏེ། གཅིག་ལ་གཅིག་བཙིར་བར་བྱ་བ་འདི་ནི་རྡོ་རྗེ་གདུག་
པའི་ཁུ་ཚུར་ཏེ་ཐམས་ཅད་རྣམ་པར་འཇིག་པར་བྱེད་པའོ། །ཐམས་ཅད་དབྱེ་བ་དང་རྣམ་པར་གཞོལ་བ་ལ་ནི་དབང་པོའི་རྡོ་རྗེའི་ཁུ་ཚུར་གྱིས་སོ་ཞེས་བྱ་བ་ནི་འཕགས་པ་དེ་ཁོ་ན་ཉིད་བསྡུས་པ་ལས་གསུངས་པའི་ཕྱིར་རྡོ་རྗེ་ཁུ་ཚུར་གཉིས་བཅིངས་ལ་གཡས་པའི་ཁུ་ཚུར་གྱི་སྟེང་དུ་གཡོན་

59-1-187b

པའི་ཁུ་ཚུར་བཞག་པ་འདི་ནི་དབང་པོའི་རྡོ་རྗེའི་ཁུ་ཚུར་ཏེ། འདི་བཅིངས་ལ་སྟང་སྟབས་དང་བཅས་པས་བསྒྲུབ་པར་བྱ་བའི་སྟེང་དུ་འཕང་ཞིང་ཨ་ཧཱུཾ་ཞེས་ཟློས་ཤིང་རྡོ་རྗེ་འབར་བས་བསྒྲུབ་པར་བྱ་བ་རྣམ་པར་གཞོམ་པར་བསམ་པར་བྱའོ། །དེ་ལྟ་བུའི་དབང་པོའི་རྡོ་རྗེའི་ཁུ་ཚུར་གྱིས་ནི་
ཐམས་ཅད་དབྱེ་བ་དང་རྣམ་པར་འཇོམས་པར་བྱེད་པའོ། །ཆུའི་ནང་དུ་གནས་ཤིང་འཆག་པ་ལ་ནི། རྡོ་རྗེ་རྣོན་པོའི་ཁུ་ཚུར་གྱིས་སོ་ཞེས་བྱ་བ་ནི། བཅོམ་ལྡན་འདས་རྡོ་རྗེ་ཁུ་ཚུར་གྱི་སྦྱོར་བ་བྱས་ལ། དང་པོའི་རྡོ་རྗེ་ལ་མཛུབ་མོ་གཉིས་བཀུག་སྟེ། གུང་མོ་གཉིས་ཀྱི་སྟེང་དུ་མཐེ་བོས་
སེན་མོ་མནན་ལ། མིག་གི་འབྲས་བུ་ལྟར་བྱས་ནས་སྲིན་ལག་དང་མཐེའུ་ཆུང་གཉིས་མཉམ་པོར་བརྐྱང་བ་འདི་བཅིངས་ལ་འཆག་ཅིང་འགྲོ་བས་རང་གི་ཕྱག་རྒྱ་ལས་བྱུང་བའི་རྡོ་རྗེ་འབར་བས་ཆུ་སྟེང་དུ་བཏེག་སྟེ། ཆུའི་ནང་དུ་གནས་ཤིང་འཆག་པར་བྱ་བ་འདི་ནི་རྡོ་རྗེ་རྣོན་པོའི་ཁུ་ཚུར་ཏེ། 
བཟླས་བརྗོད་ནི་ཨ་ལམ་ཞེས་བརྗོད་པར་བྱའོ། །གཟུགས་མང་པོར་སྟོན་པ་ལ་ནི་སྣ་ཚོགས་རྡོ་རྗེའི་ཁུ་ཚུར་གྱིས་སོ་ཞེས་བྱ་བ་ནི་རྡོ་རྗེ་ཁུ་ཚུར་གཉིས་བཅིངས་ལ། གཡོན་པའི་མཐེ་བོའི་སྦུབས་སུ་གཡས་པའི་མཛུབ་མོ་བཅུག་པ་ནི་སྣ་ཚོགས་རྡོ་རྗེའི་ཁུ་ཚུར་ཏེ་འདི་བཅིངས་ལ་ཧྲཱིཿ ཏ་
ཞེས་བཟླས་བརྗོད་བྱས་ནས་གཟུགས་ཐམས་ཅད་ཡང་དག་པར་སྟོན་པའི་ཏིང་ངེ་འཛིན་བསྒོམ་པར་བྱ་སྟེ། དེ་ལྟ་བུས་ནི་གཟུགས་མང་པོ་སྟོན་པར་འགྱུར་རོ། །མི་སྣང་བའི་དངོས་གྲུབ་ལ་ནི་མི་སྣང་བའི་རྡོ་རྗེའི་ཁུ་ཚུར་གྱིས་སོ་ཞེས་བྱ་བ་ནི། དེ་བཞིན་དུ་རྡོ་རྗེ་ཁུ་ཚུར་གྱི་སྦྱོར་བས་ཨ་ཁཾ་
ཞེས་ཟློས་ཤིང་རྡོ་རྗེ་རྣོན་པོའི་ཁུ་ཚུར་བཅིངས་ལ་བདག་ཉིད་ནམ་མཁའ་དང་འདྲ་བར་བསྒོམས་ན་མི་སྣང་བར་གྱུར་ཏེ། འདི་ནི་མི་སྣང་བའི་རྡོ་རྗེ་ཁུ་ཚུར་རོ། །རྒྱུ་བ་དང་མི་རྒྱུ་བའི་དངོས་པོ་རྣམས་འབྱུང་བ་ལ་ནི་རྡོ་རྗེ་ནམ་མཁའི་ཁུ་ཚུར་གྱིས་སོ་ཞེས་བྱ་བ་ནི། བཅོམ་ལྡན་འདས་རྡོ་རྗེ་ཁུ་ཚུར་
གྱི་སྦྱོར་བ་བྱས་ལ། ཨཱཿཏྲཾ་ཞེས་ཟློས་ཤིང་བདག་ཉིད་ནམ་མཁའི་སྙིང་པོའི་རྣམ་པར་བསམས་ནས། འཕགས་པ་ནམ་མཁའི་སྙིང་པོའི་དམ་ཚིག་གི་ཕྱག་རྒྱ་བཅིངས་ལ། ནམ་མཁའ་ལས་དངོས་པོ་ཐམས་ཅད་བསྐྱེད་པར་བྱ་བ་ནི་རྡོ་རྗེ་ནམ་མཁའི་ཁུ་ཚུར་ཏེ་དངོས་པོ་ཐམས་ཅད་སྐྱེད་

59-1-188a

པར་བྱེད་པའོ། །ནམ་མཁའ་ལ་འགྲོ་བའི་དངོས་གྲུབ་ལ་ནི་རྡོ་རྗེ་བསྡམས་པའི་ཁུ་ཚུར་གྱིས་སོ་ཞེས་བྱ་བ་ནི། བཅོམ་ལྡན་འདས་རྡོ་རྗེ་ཁུ་ཚུར་གྱི་སྦྱོར་བས་རྡོ་རྗེ་བསྡམས་པ་བཅིངས་ལ་རང་གི་གནས་ནས་རི་རབ་ཀྱི་བར་དུ་ཇི་སྲིད་མངོན་པར་འདོད་པའི་གནས་སུ་འགྲོ་
བར་བྱ་བའི་ཕྱིར། རྡོ་རྗེ་སྐས་ཀྱི་གདང་བུ་རྣམ་པར་བསམས་ལ། དེ་ལ་འཛེགས་ནས་འགྲོ་ན། དེ་ལྟ་བུས་ནི་ནམ་མཁའ་ལ་འགྲོ་བར་འགྱུར་ཏེ། འདི་ནི་རྡོ་རྗེ་བསྡམས་པའི་ཁུ་ཚུར་ནམ་མཁའ་ལ་འགྲོ་བ་སྟེར་བར་བྱེད་པའོ། །རིག་པ་འཛིན་པའི་དངོས་གྲུབ་ལ་ནི་རྡོ་རྗེ་རལ་གྲིའི་ཁུ་ཚུར་གྱིས་
སོ་ཞེས་བྱ་བ་ནི། རྡོ་རྗེ་རལ་གྲིའི་ཁུ་ཚུར་ནི་འཕགས་པ་འཇམ་དཔལ་གྱི་ཕྱག་རྒྱ་ཆེན་པོ་སྟེ། དེ་བཅིངས་ལ་ཨ་ཞེས་བྱ་བ་ཟློས་ཤིང་། རལ་གྲི་འཛིན་པའི་རིག་པ་འཛིན་པར་བདག་ཉིད་བསྒོམས་ན། བསྒྲུབ་པ་གྲུབ་ནས་རལ་གྲི་འཛིན་པའི་རིག་པ་འཛིན་པར་འགྱུར་རོ། །དེ་བཞིན་གཤེགས་
པ་ཐམས་ཅད་ལ་མཆོད་པའི་དངོས་གྲུབ་ལ་ནི། རྡོ་རྗེ་དེ་ལས་ཀྱི་ཁུ་ཚུར་གྱིས་སོ་ཞེས་བྱ་བ་ནི། བཅོམ་ལྡན་འདས་རྡོ་རྗེ་ཁུ་ཚུར་གྱི་སྦྱོར་བ་བྱས་ལ། ཨ་ཞེས་བྱ་བ་ཟློས་ཤིང་རྡོ་རྗེ་ཁུ་ཚུར་གཉིས་ཀྱིས་སྣ་ཚོགས་རྡོ་རྗེ་བླངས་ལ། མཆོད་པ་མ་ལུས་ཤིང་ལུས་པ་མེད་པས་དེ་བཞིན་གཤེགས་པ་
ཐམས་ཅད་ལ་མཆོད་པ་ཡིད་ཀྱིས་བྱ་སྟེ། འདི་ནི་རྡོ་རྗེ་ལས་ཀྱི་ཁུ་ཚུར་གྱིས་མཆོད་པ་ཐམས་ཅད་རབ་ཏུ་སྒྲུབ་པར་བྱེད་པའོ། །ཐམས་ཅད་མཁྱེན་པའི་དངོས་གྲུབ་ལ་ནི་རྡོ་རྗེ་ཡེ་ཤེས་ཀྱི་ཁུ་ཚུར་གྱིས་སོ་ཞེས་བྱ་བ་ནི། པདྨའི་དམ་ཚིག་གི་ཕྱག་རྒྱས་རྡོ་རྗེ་པདྨ་འཛིན་པ་ནི་རྡོ་རྗེ་ཡེ་ཤེས་ཀྱི་ཁུ་ཚུར་ཏེ་
འདི་བཅིངས་ལ་ཨ་ཞེས་བྱ་བ་ཟློས་ཤིང་ཆོས་ཐམས་ཅད་རང་བཞིན་གྱིས་དག་པའོ་ཞེས་བསྒོམས་ན། ཤེས་རབ་ཀྱི་ཕ་རོལ་ཏུ་ཕྱིན་པ་ཐོབ་པར་འགྱུར་ཏེ། དེས་ན་འདི་ལ་ཐམས་ཅད་མཁྱེན་པའི་ཡེ་ཤེས་འགྲུབ་པར་འགྱུར་རོ། །ནོར་ཐམས་ཅད་ཀྱི་དངོས་གྲུབ་ལ་ནི་རྡོ་རྗེ་ནོར་གྱི་ཁུ་ཚུར་གྱིས་སོ་ཞེས་བྱ་བ་
ནི། རིན་པོ་ཆེའི་དམ་ཚིག་གི་ཁུ་ཚུར་གྱིས་རྡོ་རྗེ་རིན་པོ་ཆེ་འཛིན་པ་ནི་རྡོ་རྗེ་ནོར་གྱི་ཁུ་ཚུར་ཏེ། འདི་བཅིངས་ལ་བྱང་ཆུབ་སེམས་དཔའ་ཆེན་པོ་རྡོ་རྗེ་རིན་ཆེན་དུ་བདག་ཉིད་བསྒོམས་ན་ནོར་ཐམས་ཅད་ཀྱི་དངོས་གྲུབ་འགྲུབ་པར་འགྱུར་རོ། །ཕྱག་རྒྱ་ཐམས་ཅད་ཀྱི་བདག་པོ་ཉིད་ལ་ནི་རྡོ་རྗེ་ཁུ་ཚུར་གྱིས་

59-1-188b

སོ་ཞེས་བྱ་བ་ནི། རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱས་རྡོ་རྗེ་རྩེ་ལྔ་པ་འཛིན་པ་ནི་རྡོ་རྗེའི་ཕྱག་རྒྱའི་ཁུ་ཚུར་ཏེ། འདིས་ཕྱག་རྒྱ་ཐམས་ཅད་ཀྱི་བདག་པོ་ཉིད་དུ་འགྱུར་རོ། །ལས་ཐམས་ཅད་ཀྱི་དངོས་གྲུབ་ལ་ནི་རྡོ་རྗེ་ཐམས་ཅད་ཀྱི་ཁུ་ཚུར་གྱིས་སོ་ཞེས་བྱ་བ་ནི། ལས་ཐམས་ཅད་པའི་ཕྱག་རྒྱ་
ནི་རྡོ་རྗེ་ཐམས་ཅད་ཀྱི་ཁུ་ཚུར་ཏེ། འདིས་སངས་རྒྱས་ཀྱི་སྤྲུལ་པ་རྣམས་དང་། སེམས་ཅན་གྱི་དོན་བྱ་བའི་མཚན་ཉིད་ཅན་གྱི་ལས་ཐམས་ཅད་འགྲུབ་པར་འགྱུར་རོ། །དཀྱིལ་འཁོར་ཐམས་ཅད་ཀྱི་དངོས་གྲུབ་ལ་ནི་རྡོ་རྗེ་འཛིན་པའི་ཁུ་ཚུར་གྱིས་སོ་ཞེས་བྱ་བ་ནི་ཏིང་ངེ་འཛིན་རྡོ་རྗེའི་ཕྱག་རྒྱ་
ཆེན་པོ་ནི་རྡོ་རྗེ་འཛིན་པའི་ཁུ་ཚུར་ཏེ། དེས་དཀྱིལ་འཁོར་ཐམས་ཅད་འགྲུབ་པར་འགྱུར་རོ། །བདག་ཉིད་འདས་པ་དང་། མ་འོངས་པ་དང་། ད་ལྟར་བྱུང་བ་སྟོན་པ་ལ་ནི་རྡོ་རྗེ་ལྗགས་ཀྱི་མཆོག་གི་ཁུ་ཚུར་གྱིས་སོ་ཞེས་བྱ་བ་ནི། རྡོ་རྗེ་སྨྲ་བའི་ཕྱག་རྒྱ་ཆེན་པོ་ནི་རྡོ་རྗེ་ལྗགས་ཀྱི་མཆོག་
གི་ཁུ་ཚུར་ཏེ། དེ་བཅིངས་ལ་ཨ་ཞེས་བྱ་བས་ལྕེ་ལ་དབབ་པར་བྱས་ན། འདས་པ་དང་། མ་འོངས་པ་དང་། ད་ལྟར་བྱུང་བ་ཐམས་ཅད་སྟོན་པར་འགྱུར་རོ། །རྡོ་རྗེ་འཛིན་པ་ཉིད་ལ་ནི་རྡོ་རྗེ་བསྙེམས་པའི་ཁུ་ཚུར་གྱིས་སོ་ཞེས་བྱ་བ་ནི། རྡོ་རྗེ་སེམས་དཔའི་ཕྱག་རྒྱ་ཆེན་པོ་ནི་རྡོ་རྗེ་བསྙེམས་པའི་
ཁུ་ཚུར་ཏེ། འདི་བཅིངས་ལ་ཨ་ཞེས་བྱ་བ་ཟློས་ཤིང་རྡོ་རྗེ་སེམས་དཔར་བདག་ཉིད་བསྒོམས་ན་རྡོ་རྗེ་འཛིན་པ་ཉིད་དུ་འགྱུར་རོ། །སངས་རྒྱས་པ་ཉིད་ལ་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཁུ་ཚུར་གྱིས་སོ་ཞེས་བྱ་བ་ལ། བྱང་ཆུབ་མཆོག་གི་ཕྱག་རྒྱ་ནི། དེ་བཞིན་གཤེགས་པ་
ཐམས་ཅད་ཀྱི་རྡོ་རྗེ་ཁུ་ཚུར་ཏེ། འདི་བཅིངས་ལ་ཨ་ཞེས་བྱ་བ་ཟློས་ཤིང་རྣམ་པར་སྣང་མཛད་དུ་བདག་ཉིད་བསྒོམ་པ་ཇི་སྲིད་དེའི་སྐུར་བདག་ཉིད་མཐོང་གི་བར་དུ་བསྒོམ་པར་བྱའོ། །དེ་ནས་གྲུབ་པས་རྣམ་པར་སྣང་མཛད་དང་འདྲ་བར་འགྱུར་རོ། །ཕྱག་རྒྱ་ཐམས་ཅད་ཀྱི་ཁུ་ཚུར་གྱི་དམ་ཚིག་
ཅེས་བྱ་བ་ལ། དེ་བཞིན་ཉིད་ནི་ཕྱག་རྒྱ་ཐམས་ཅད་ཀྱི་ཁུ་ཚུར་རོ། །དེའི་དམ་ཚིག་ནི་དེ་ལས་བྱུང་བའི་རྡོ་རྗེ་ཁུ་ཚུར་གྱི་དཀྱིལ་འཁོར་ཏེ། མིང་དེ་སྐད་ཅེས་བྱ་བའི་རྟོག་པའི་རྒྱལ་པོ་རྫོགས་པ་སྟེ། དེ་ལྟར་བཅོམ་ལྡན་འདས་རྡོ་རྗེ་ཁུ་ཚུར་གྱི་རྟོག་པའི་རྒྱལ་པོའི་བཤད་པ་རྫོགས་སོ།།    །།ད་ནི་

59-1-189a

ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམས་པས་གསང་སྔགས་རྣམ་པར་འགྲུབ་པར་འགྱུར་རོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། ཤེས་རབ་ཀྱི་ཕ་རོལ་ཏུ་ཕྱིན་པ་གཙོ་བོར་གྱུར་པ་འཁོར་ལོ་ལྟར་ཡི་གེ་བསྐོར་བའི་རྟོག་པའི་རྒྱལ་པོའི་བཤད་པ་ནི། དེ་ནས་ཞེས་
བྱ་བ་ལ་སོགས་པ་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། སྔར་བཤད་པའི་འདོད་པའི་ཁམས་ཐམས་ཅད་ཀྱི་གཞན་འཕྲུལ་དབང་བྱེད་ཀྱི་ལྷའི་གནས་སུ་བཅོམ་ལྡན་འདས་རྣམ་པར་སྣང་མཛད་བཞུགས་པ་དང་། དེའི་རྗེས་ཐོགས་ཉིད་ལ་འཁོར་ལོ་ལྟར་ཡི་གེ་
བསྐོར་བ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་གསུངས་སོ། །ཆོས་ཐམས་ཅད་སྤྲོས་པ་མེད་པའི་དེ་བཞིན་གཤེགས་པས་ཞེས་བྱ་བ་ལ། ཆོས་ཐམས་ཅད་ནི་བྱང་ཆུབ་ཀྱི་སེམས་ཆེན་པོ་དང་། སྦྱིན་པའི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། བརྩོན་
འགྲུས་ཀྱི་ཕ་རོལ་ཏུ་ཕྱིན་པ་དང་། ཀུན་གཞིའི་རྣམ་པར་ཤེས་པ་དང་། ཉོན་མོངས་པ་ཅན་གྱི་ཡིད་དང་། སོ་སོར་རྟོག་པར་བྱེད་པའི་ཡིད་ཀྱི་རྣམ་པར་ཤེས་པ་དང་། གང་རྣམ་པར་མི་རྟོག་པའི་ཡིད་ཀྱི་རྣམ་པར་ཤེས་པ་དང་། མིག་དང་། རྣ་བ་དང་། སྣ་དང་། ལྕེ་དང་ལུས་ཀྱི་རྣམ་པར་ཤེས་པ་
འདི་དག་གི་ཡུལ་རྣམས་དང་། མེ་ལོང་ལྟ་བུའི་ཡེ་ཤེས་དང་། མཉམ་པ་ཉིད་དང་། སོ་སོར་ཏོག་པ་དང་། བྱ་བ་གྲུབ་པའི་ཡེ་ཤེས་དང་། ངོ་བོ་ཉིད་ཀྱི་སྐུ་དང་། རྣམ་པར་མི་རྟོག་པའི་སྐུ་དང་། ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུ་དང་། དེ་བཞིན་གཤེགས་པའི་རིགས་དང་། རྡོ་རྗེ་དང་། 
པདྨ་དང་། རིན་པོ་ཆེ་དང་། ལས་ཀྱི་རིགས་རྣམས་དང་། དེ་རྣམས་ལ་སྤྲོས་པ་ནི་རྣམ་པར་རྟོག་པ་རྣམས་སོ། །མ་སྤྲོས་པ་ནི་སྤྲོས་པ་མེད་པ་སྟེ། བྱང་ཆུབ་ཀྱི་སེམས་ལ་སོགས་པར་རྣམ་པར་རྟོག་པ་མེད་པའོ། །དེ་གང་ལ་ཡོད་པ་དེ་ནི་ཆོས་ཐམས་ཅད་སྤྲོས་པ་མེད་པ་སྟེ། གཟུང་བ་དང་འཛིན་
པའི་རྣམ་པར་རྟོག་པ་དང་བྲལ་ཞིང་གཉིས་སུ་མེད་པའི་ཆོས་ཀྱི་དབྱིངས་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་དོ། །དེ་བཞིན་གཤེགས་པ་ཞེས་བྱ་བ་ནི་བཤད་ཟིན་ཏོ། །འཁོར་ལོ་ལྟར་ཡི་གེ་བསྐོར་བ་ཞེས་བྱ་བ་ནི་ཨ་ར་པ་ཙ་ལ་སོགས་པའི་ཡི་གེ་རྣམས་འཁོར་ལོ་ལྟར་ཡོངས་སུ་བསྐོར་

59-1-189b

ཞིང་། མངོན་སུམ་དུ་གྱུར་པ་གང་ལ་ཐོས་པ་དང་། བསམ་པ་དང་། བསྒོམ་པའི་རང་བཞིན་གྱིས་ཤེས་པས་མངོན་སུམ་དུ་བྱས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གང་ཡིན་པ་དེ་ནི་འཁོར་ལོ་ལྟར་ཡི་གེ་བསྐོར་བ་ཞེས་བྱ་སྟེ། མིང་དེ་སྐད་ཅེས་བྱ་བ་གསུངས་པའོ། །ངོ་བོ་ཉིད་
མེད་པའི་ཚུལ་གྱིས་ཆོས་ཐམས་ཅད་སྟོང་པའོ་ཞེས་བྱ་བ་ལ། ཆོས་ཀྱང་ཡིན་ལ་ཐམས་ཅད་ཀྱང་ཡིན་པས་ན། ཆོས་ཐམས་ཅད་དེ། བྱང་ཆུབ་ཀྱི་སེམས་དང་། མེ་ལོང་ལྟ་བུའི་ཡེ་ཤེས་དང་། ཀུན་གཞིའི་རྣམ་པར་ཤེས་པ་དང་། ངོ་བོ་ཉིད་ཀྱི་སྐུ་དང་། དེ་བཞིན་གཤེགས་པའི་རིགས་ཀྱི་ངོ་བོ་
ཉིད་རྣམས་ཏེ། དེ་ནི་དོན་དམ་པར་དངོས་པོ་མེད་པའི་ངོ་བོ་ཉིད་ཡིན་པའི་ཕྱིར་སྟོན་པའོ། །དོན་འདི་ཉིད་བསྟན་པར་བྱ་བའི་ཕྱིར་ངོ་བོ་ཉིད་མེད་པའི་ཚུལ་གྱིས་ཞེས་བྱ་བ་གསུངས་ཏེ། རྟག་ཏུ་ངོ་བོ་ཉིད་དང་བྲལ་བའི་རང་བཞིན་ནི་ངོ་བོ་ཉིད་མེད་པའོ། །དེའི་ཚུལ་གྱིས་ཞེས་བྱ་བ་ནི་དེ་བཞིན་དུ་རོ་
གཅིག་པ་ཉིད་དེ། ངོ་བོ་ཉིད་མེད་པའི་ཚུལ་དེས་ཇི་སྐད་དུ་བཤད་པའི་ཆོས་ཐམས་ཅད་སྟོང་པ་ཉིད་ཡིན་གྱི་ཀུན་རྫོབ་ཏུ་ནི་ཡོད་བཞིན་པའོ་ཞེས་སྟོན་པ་ཡིན་ནོ། །མཚན་མ་མེད་པའི་ཚུལ་གྱིས་ཆོས་ཐམས་ཅད་མཚན་མ་མེད་པའོ་ཞེས་བྱ་བ་ལ། སྦྱིན་པའི་ཕ་རོལ་ཏུ་ཕྱིན་པ་དང་། མཉམ་པ་ཉིད་ཀྱི་ཡེ་
ཤེས་དང་། ཉོན་མོངས་པ་ཅན་གྱི་ཡིད་དང་། རྣམ་པར་སྨིན་པའི་སྐུ་དང་། རིན་པོ་ཆེའི་རིགས་ནི་ཆོས་ཐམས་ཅད་དོ། །དེ་རྣམས་ཀྱི་མཚན་མ་ནི་བདག་ལ་སོགས་པར་རྣམ་པར་རྟོག་པའི་བག་ཆགས་ཏེ། རྣམ་པར་ཤེས་པ་སྐྱེད་པར་བྱེད་པའི་རྒྱུའོ། །མཚན་མར་མི་འཛིན་པས་ན་མཚན་མ་
མེད་པ་སྟེ། དོན་དམ་པར་རྣམ་པར་ཤེས་པ་སྐྱེད་པར་བྱེད་པའི་རྒྱུ་མེད་དོ་ཞེས་བྱ་བའི་དོན་ཏོ། །དོན་འདི་ཉིད་བསྟན་པར་བྱ་བའི་ཕྱིར་མཚན་མ་མེད་པའི་ཚུལ་གྱིས་ཞེས་བྱ་བ་གསུངས་ཏེ། མཚན་མ་དང་བྲལ་བས་ན་མཚན་མ་མེད་པ་སྟེ། རྣམ་པར་ཤེས་པ་སྐྱེད་པར་བྱེད་པའི་རྒྱུ་དང་བྲལ་བས་
མཚན་མ་མེད་པའོ། །དེ་ཉེ་བར་བཟུང་བ་ནི་རྒྱུར་བྱས་པ་སྟེ། ཇི་སྐད་དུ་བཤད་པའི་ཆོས་ཐམས་ཅད་མཚན་མ་མེད་པ་རྣམས་སོ། །སྨོན་པ་མེད་པའི་ཚུལ་གྱིས་ཆོས་ཐམས་ཅད་དེ། སྨོན་པ་མེད་པའོ་ཞེས་བྱ་བ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་དང་། སོ་སོར་རྟོག་པའི་ཡེ་ཤེས་དང་། 

59-1-190a

རྟོག་པ་དང་བཅས་པ་དང་། རྟོག་པ་མེད་པའི་ཡིད་ཀྱི་རྣམ་པར་ཤེས་པ་དང་། ལོངས་སྤྱོད་རྫོགས་པའི་སྐུ་དང་། པདྨའི་རིགས་ནི་ཆོས་ཐམས་ཅད་དོ། །སྨོན་པ་ནི་གསོལ་བ་འདེབས་པ་སྟེ། འདོད་པའི་དབང་ཕྱུག་ཏུ་འགྱུར་བར་བགྱིའོ་ཞེས་བྱ་བ་ལ་སོགས་པ་དངོས་པོ་
ལ་མངོན་པར་ཞེན་པས་སྨོན་པའོ། །སྨོན་པ་མེད་པ་ནི་མཚན་མ་མེད་པའི་ཕྱིར་ཏེ། དེ་ལྟར་དངོས་པོ་ལ་མངོན་པར་མི་ཞེན་པའོ། །དེ་ཉིད་བསྟན་པར་བྱ་བའི་ཕྱིར། སྨོན་པ་མེད་པའི་ཚུལ་གྱིས་ཞེས་བྱ་བ་གསུངས་ཏེ། སྨོན་པ་ནི་སྨོན་ལམ་རྣམས་ཏེ། དངོས་པོར་འཛིན་པ་ལ་མངོན་པར་
ཞེན་པས་འདོད་པའི་ཁམས་ཀྱི་དབང་ཕྱུག་ལ་སོགས་པར་གསོལ་བ་འདེབས་པའོ། །སྨོན་པར་མི་བྱེད་པས་ན་སྨོན་པ་མེད་པ་སྟེ། དངོས་པོར་འཛིན་པ་མེད་པས་གསོལ་བ་མི་འདེབས་པའོ། །དེའི་ཚུལ་གྱིས་ཞེས་པ་ནི་སྨོན་པ་མེད་པ་ཉིད་དེ། དེས་ན་ཆོས་དེ་རྣམས་སྨོན་པ་མེད་པའོ། །
ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པས་ཆོས་ཐམས་ཅད་རང་བཞིན་གྱིས་འོད་གསལ་བའོ་ཞེས་བྱ་བ་ལ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བྱ་བ་གྲུབ་པའི་ཡེ་ཤེས་དང་། མིག་དང་། རྣ་བ་དང་། སྣ་དང་། ལྕེ་དང་། ལུས་ཀྱི་རྣམ་པར་ཤེས་པ་དང་། སྤྲུལ་པའི་སྐུ་དང་། ལས་
ཀྱི་རིགས་ནི་ཆོས་ཐམས་ཅད་དོ། །དེ་རྣམས་ནི་རང་བཞིན་ཞེས་བྱ་བ་ངོ་བོ་ཉིད་ཀྱིས་མུན་པ་དང་བྲལ་བ་ནི་རང་བཞིན་གྱིས་འོད་གསལ་བ་སྟེ། དོན་དམ་པར་རྣམ་པར་རྟོག་པ་ཐམས་ཅད་དང་བྲལ་བའོ། །དེ་ཅིའི་ཕྱིར་ཞེ་ན། མི་བདེན་པ་ཡོངས་སུ་བརྟགས་པ་རྣམས་ནི་དོན་དམ་པར་གདོད་མ་ནས་
མ་སྐྱེས་པ་ཡིན་པའི་ཕྱིར་རོ། །འདི་ཉིད་བསྟན་པར་བྱ་བའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཞེས་བྱ་བ་གསུངས་ཏེ། གཟུང་བ་དང་འཛིན་པའི་རྣམ་པར་རྟོག་པ་བག་ཆགས་དང་བཅས་པ་དང་བྲལ་བའི་ཡེ་ཤེས་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེའི་རྣམ་པར་
དག་པ་ནི་དེ་བཞིན་ཉིད་དེ། དེ་བས་ན་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་གང་ཡིན་པ་དེ་ཉིད་ནི་ཆོས་ཐམས་ཅད་རྣམ་པར་དག་པ་ཡིན་ཏེ། གང་གི་ཕྱིར་ཆོས་ཐམས་ཅད་གང་ཡིན་པ་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ལ། ཤེས་རབ་ཀྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི་ཆོས་

59-1-190b

ཐམས་ཅད་ཡིན་ཏེ། དེ་བས་ན་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པས་ཆོས་ཐམས་ཅད་རང་བཞིན་གྱིས་འོད་གསལ་བའོ། །ཚིག་དེ་དག་གིས་ནི་རིམ་པ་བཞིན་དུ་རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། རང་བཞིན་གྱིས་འོད་
གསལ་བ་རྣམས་གསུངས་པ་ཡིན་ནོ། །དེ་ལྟར་ན་དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། རང་བཞིན་གྱིས་འོད་གསལ་བའོ་ཞེས་བྱ་བའི་བར་གྱིས་བཤད་པས་ནི་ཏིང་ངེ་འཛིན་དང་པོ་གསུངས་པ་ཡིན་ནོ། །ད་ནི་དེ་ནས་ཞེས་བྱ་བ་ལ་སོགས་པས་ཏིང་ངེ་འཛིན་གཉིས་པ་
གསུངས་པ་ཡིན་ཏེ། རལ་གྲི་དེས་ཞེས་བྱ་བ་ནི་རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། རང་བཞིན་གྱིས་འོད་གསལ་བར་སྟོན་པར་བྱེད་པའི་རལ་གྲི་བཞི་ཕྱག་བཞིས་ཡོངས་སུ་བཟུང་བས་སོ། །དེ་བཞིན་གཤེགས་པ་ཐམས་ཅད་ལ་འདེབས་
ཤིང་ཞེས་བྱ་བ་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་རྣམས་དངོས་པོ་མེད་པའི་ངོ་བོ་ཉིད་དུ་བསྒོམས་པས་མི་སྣང་བར་བྱས་པ་སྟེ། གང་གི་ཕྱིར་འདིར་ཡང་དེ་བཞིན་གཤེགས་པ་ནི་ཆོས་ཀྱི་སྐུ་ཡིན་
པར་བལྟའོ། །ཤེས་རབ་ཀྱི་ཞེས་བྱ་བ་ལ་སོགས་པ་སྨོས་པ་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ནི་གཙོ་བོར་གྱུར་པས་ན། མཆོག་སྟེ་བླ་ན་མེད་པའི་ཡེ་ཤེས་ཀྱི་ཚུལ་གྱིས་དེ་ལས་བྱུང་བས་ན། ཨ་ཞེས་བྱ་བའི་ཡི་གེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ་ཞེས་བྱའོ། །འདི་ཞེས་བྱ་བ་
ནི་བློ་ལ་བཞག་ནས་སྨྲས་པའོ། །གསུངས་སོ་ཞེས་བྱ་བ་ནི་དེ་བཀའ་སྩལ་པ་སྟེ། ཨ་ཞེས་བྱ་བའོ། །དེ་ནས་ཞེས་བྱ་བ་ལ་སོགས་པ་ནི་གོ་བར་ཟད་དོ། །དང་པོའི་དཀྱིལ་འཁོར་གྱི་ཚུལ་གྱིས་བཞུགས་སོ་ཞེས་བྱ་བ་ནི། རྡོ་རྗེ་སེམས་དཔའི་དཀྱིལ་འཁོར་དང་འདྲ་བར་བཅོམ་ལྡན་འདས་
འཇམ་དཔལ་གཞོན་ནུར་གྱུར་པ་ལ་ཕྱོགས་དང་མཚམས་རྣམས་ནས་ཡོངས་སུ་བསྐོར་ཏེ་བཞུགས་པའོ། །དེ་ལྟར་ན་བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ནས་བརྩམས་ཏེ་བཞུགས་སོ་ཞེས་བྱ་བའི་བར་གྱིས་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །

59-1-191a

དེ་ནས་འདུས་པ་མཛད་པ་སྔོན་དུ་འགྲོ་བ་ནས་བརྩམས་ཏེ་གསུམ་པ་ཡིན་པར་ཤེས་པར་བྱའོ། །དེ་ནས་ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པར་བྱའོ་ཞེས་བྱ་བ་འདིའི་ཆོ་ག་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་
སོགས་པས་སློབ་དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ཏེ། དཀྱིལ་འཁོར་གྱི་རྣམ་པ་ལ་ཐུགས་རྩེ་གཅིག་ཏུ་མཛད་པའི་རྗེས་ཐོགས་ཉིད་ལའོ། །ཆོས་ཐམས་ཅད་ཅེས་བྱ་བ་ལ་
སོགས་པ་ལ། ཆོས་ཀྱང་ཡིན་ལ་ཐམས་ཅད་ཡིན་པས་ན་ཆོས་ཐམས་ཅད་དེ། བྱང་ཆུབ་ཀྱི་སེམས་ཆེན་པོ་ལ་སོགས་པ་ཆོས་རྣམ་པ་བཞིའོ། །དེ་རྣམས་ཀྱི་རང་གི་རང་བཞིན་ནི་ངོ་བོ་ཉིད་དེ། དེ་བཞིན་ཉིད་ལ་སོགས་པའོ། །དེས་སྤྲོས་པ་མེད་པ་ནི་རྣམ་པར་མི་རྟོག་པ་སྟེ། བྱང་ཆུབ་ཀྱི་
སེམས་དང་། སྦྱིན་པའི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྣམས་དེ་བཞིན་ཉིད་དུ་རོ་གཅིག་པས་རྣམ་པར་མི་རྟོག་པ་ཞེས་བྱ་བའི་དོན་ཏོ། །དེ་ལས་བྱུང་བའི་འཕགས་པ་འཇམ་དཔལ་གྱི་དཀྱིལ་འཁོར་ནི་རྣམ་པར་རྟོག་པ་
ཐམས་ཅད་རྣམ་པར་འཇིག་པའི་རྒྱུར་གྱུར་པས་རལ་གྲི་དང་འདྲ་བས་ན། རལ་གྲི་ཞེས་བྱ་བ་དང་། རལ་གྲིའི་ཕྱག་རྒྱ་ཉེ་བར་མཚོན་པས་རལ་གྲི་སྟེ། དེ་ལ་དམིགས་པས་ན་མིང་དེ་སྐད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཤིང་མངོན་སུམ་དུ་མཛད་ནས་འཁོར་ལོ་ལྟར་ཡི་གེ་བསྐོར་
བ་ཞེས་བྱ་བའི་དཀྱིལ་འཁོར་འདི་གསུངས་པའོ། །དེའི་དཀྱིལ་འཁོར་ཇི་ལྟ་བའི་ཞེས་བྱ་བ་ནི་། འདིའི་ཕྱིར་དཀྱིལ་འཁོར་ཐམས་ཅད་རྡོ་རྗེ་སེམས་དཔའི་དཀྱིལ་འཁོར་ཆེན་པོ་དང་འདྲ་བར་བྲིས་ལ། འདིའི་ནང་དུ་འཁོར་ལོ་རྩིབས་བརྒྱད་པ་བྲི་བར་བྱའོ། །དེ་ལྟར་བྲིས་ནས། ཨ་ལ་སོགས་
པའི་ཡི་གེའི་ཕྲེང་བ་ལུང་ལས་ཇི་སྐད་གསུངས་པའི་གོ་རིམས་བཞིན་དུ་བྲི་བར་བྱའོ། །དེ་ནས་རྩ་བའི་དཀྱིལ་འཁོར་གྱི་ཚུལ་དུ་ཐིག་བཏབ་ལ་ཞེས་བྱ་བ་ནི། ཏིང་ངེ་འཛིན་གསུམ་བསྒོམ་པ་ནས་བརྩམས་ཏེ། ཇི་སྲིད་ཉིན་རེ་ཞིང་མངོན་སུམ་མཐོང་བར་གྱུར་པ་དེ་སྲིད་ཀྱི་བར་དུ་དཀྱིལ་འཁོར་

59-1-191b

འདི་བསྒོམ་པར་བྱའོ། །དེ་ནས་དེའི་རྗེས་ཐོགས་ཉིད་ལ་རྡོ་རྗེ་སེམས་དཔའི་དཀྱིལ་འཁོར་ཆེན་པོ་བཞིན་དུ་ཕྱིའི་དཀྱིལ་འཁོར་དང་། ནང་གི་འཁོར་ལོའི་དཀྱིལ་འཁོར་ལེགས་པར་ཐིག་བཏབ་ལ། དེ་ནས་དེའི་འོག་ཏུ་བྲི་བར་བྱའོ། །ཡང་དག་པར་བྲིས་པའི་འཁོར་ལོའི་ལྟེ་བ་ལ། 
བཅོམ་ལྡན་འདས་འཇམ་དཔལ་གཞོན་ནུ། གཞོན་ནུའི་ཆ་ལུགས་འཆང་བ་ཞེས་བྱ་བ་ནི། གཞོན་ནུ་ལོ་བརྒྱད་པ་ལྟ་བུའོ། །ཕྱག་བཞི་དང་རལ་གྲི་དེ་བཞིན་གཤེགས་པ་ཐམས་ཅད་ལ་འདེབས་པར་བཞག་པར་བྱའོ་ཞེས་བྱ་བ་ནི་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་
དང་། རང་བཞིན་གྱིས་འོད་གསལ་བ་སྟེ། རྣམ་པར་ཐར་པའི་སྒོ་བཞིའི་ངོ་བོ་ཉིད་ཀྱི་རལ་གྲི་བཞིས་ཇི་སྐད་དུ་བཤད་པའི་དེ་བཞིན་གཤེགས་པ་རྣམས་ལ། གཡས་དང་གཡོན་གྱི་ཕྱག་བཞིས་འདེབས་པར་མཛད་ཅིང་མི་སྣང་བར་མཛད་པར་བཞག་པར་བྱའོ། །དེའི་མདུན་ལ་སོགས་པར་
དེ་བཞིན་གཤེགས་པའི་སྐུ་རྣམས་གཞག་པར་བྱའོ་ཞེས་བྱ་བ་ནི་ཕྱོགས་དང་མཚམས་རྣམས་སུ་དེ་བཞིན་གཤེགས་པའི་སྐུ་གཟུགས་བྲིས་པའམ་ལུགས་མ་ལ་སོགས་པ་བརྒྱད་ལེགས་པར་གཞག་པར་བྱའོ། །ཕྱིའི་མཚམས་རྣམས་སུ་ཤེས་རབ་ཀྱི་ཕ་རོལ་ཏུ་ཕྱིན་པ་བཞི་ལུང་ཇི་ལྟར་ཐོབ་
པ་བཞིན་དུ་གཞག་པར་བྱའོ་ཞེས་བྱ་བ་ནི་ཕྱིའི་དཀྱིལ་འཁོར་གྱི་ལྷའི་སྣམ་བུའི་ཤར་ལྷོའི་མཚམས་སུ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་དང་པོ་ཡང་དག་པར་གཞག་པར་བྱའོ། །ལྷོ་ནུབ་མཚམས་སུ་དེའི་གཉིས་པ་སྟོང་པ་ཉིད་ཀྱི་
དུམ་བུའི་གླེགས་བམ་མོ། །ནུབ་བྱང་མཚམས་སུ་དེ་ཉིད་ཀྱི་གསུམ་པ་རྣམ་པར་དག་པའི་དུམ་བུའི་གླེགས་བམ་མོ། །བྱང་ཤར་མཚམས་སུ་དེ་ཉིད་ཀྱི་བཞི་པ་དེ་བཞིན་ཉིད་ཀྱི་དུམ་བུའི་ལེགས་བམ་གཞག་པར་བྱའོ། །སྒོ་རྣམས་སུ་ཞེས་བྱ་བ་ལ་སོགས་པ་ལ་ཤར་ཕྱོགས་ཀྱི་སྒོའི་དབུས་སུ་
རལ་གྲིའོ། །ལྷོའི་སྒོའི་དབུས་སུ་མདུང་ཐུང་ངོ་། །ནུབ་ཀྱི་སྒོའི་དབུས་སུ་ལྷུང་བཟེད་དོ། །བྱང་གི་སྒོའི་དབུས་སུ་ཤེས་རབ་ཀྱི་ཕ་རོལ་ཏུ་ཕྱིན་པའི་ལེགས་བམ་རྣམས་གཞག་པར་བྱའོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་དཀྱིལ་འཁོར་བྲིས་ནས། རལ་གྲི་དང་ལེགས་བམ་གྱི་

59-1-192a

ཕྱག་རྒྱས་བཅིངས་ནས། དེས་དཀྱིལ་འཁོར་དུ་ཇི་ལྟ་བ་བཞིན་དུ་ཞུགས་ནས། རྡོ་རྗེ་སེམས་དཔའི་དཀྱིལ་འཁོར་གྱི་སློབ་དཔོན་བཞིན་དུ། བཅོམ་ལྡན་འདས་འཇམ་པའི་དབྱངས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་ཀྱི་དཀྱིལ་འཁོར་གྱི་སློབ་དཔོན་དུ་བྱིན་གྱིས་རློབ་
པར་འགྱུར་རོ། །དེ་ནས་རལ་གྲི་བླངས་ནས་ཞེས་བྱ་བ་ལ་སོགས་པ་ལ། ཆོ་ག་ཐམས་ཅད་རྗེས་སུ་སྤྱད་ནས་ཇི་ལྟ་བ་བཞིན་དུ་རལ་གྲི་བླང་ངོ་། །དེ་ནས་རལ་གྲིའི་མིང་གིས་དབང་བསྐུར་བས་བདག་ཉིད་དབང་བསྐུར་ལ། བདག་ཉིད་ལ་ཁོང་དུ་ཆུད་པར་བྱ་བའི་ཕྱིར། རང་ཉིད་ཀྱིས་ཆོས་
འདི་བཤད་པར་བྱ་ཞིང་། བཅོམ་ལྡན་འདས་ཀྱང་ཉེ་བར་སྟོན་པར་མཛད་པར་བསམ་པར་བྱའོ། །ཤེས་རབ་ཀྱི་ཚུལ་ནི་ཞེས་བྱ་བ་ལ་སོགས་པ་ལ་རལ་གྲི་འདི་ནི་ཞེས་བྱ་བ་རང་གི་ལག་ན་གནས་པ་བཤད་པ་སྟེ། རལ་གྲི་འདི་ཉིན་རེ་ཞིང་ཐུང་ཞིག་པའོ། །ཤེས་རབ་ཚུལ་ནི་དཀར་སྨྲ་ཞིང་། །
ཞེས་བྱ་བ་ནི། ཨ་ར་པ་ཙ་ནཱ་ཡ་སྟེ་ཞེས་བྱ་བའམ། ཨ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་སྨྲ་བ་ནི་དཀར་པོ་སྟེ། ཟག་པ་མེད་པའི་ཆོས་བདག་མེད་པའི་ཚུལ་ལོ། །ནམ་མཁའ་སངས་རྒྱས་སྦྱོར་བ་ཡིས། །འདེབས་ན་ཞེས་བྱ་བ་ལ་སོགས་པ་ལ། ནམ་མཁའ་ནི་གྲགས་པར་ཟད་དོ། །
དེ་ནི་སངས་རྒྱས་སྦྱོར་བ་ཡིས། །ཞེས་བྱ་བ་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་སངས་རྒྱས་ཀྱི་སྐུའི་ངོ་བོ་ཉིད་དུ་བསམས་ལ། དངོས་པོ་མེད་པའི་ངོ་བོ་ཉིད་དུ་བསམ་ཞིང་། དེ་ལྟ་བུའི་ནམ་མཁའ་སངས་རྒྱས་སྦྱོར་བས་འདེབས་པར་བྱ་ཞིང་བསྣུན་པར་བྱའོ། །དེ་
ལྟ་བུའི་ཚུལ་གྱིས་འདེབས་པའི་རྣལ་འབྱོར་པ་ནི་མྱུར་དུ་འགྲུབ་པར་འགྱུར་ཞེས་བྱ་བ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་མྱུར་བ་ཉིད་དུ་ཐོབ་པར་འགྱུར་ཞེས་བྱ་བའི་དོན་ཏོ། །སངས་རྒྱས་བསྟན་པ་བསྲུང་ཕྱིར་དང་། །ཞེས་བྱ་བ་ལ་དངོས་པོ་ལ་མངོན་པར་ཞེན་པ་སྤངས་པ་
ནི་སངས་རྒྱས་ཀྱི་བསྟན་པ་སྟེ། སངས་རྒྱས་རྣམས་ཀྱི་བཀའོ། །དེ་བསྲུང་བ་ནི་དངོས་པོ་མེད་པ་ལ་མངོན་པར་ཞེན་པའི་ཀུན་དུ་སྤྱོད་པ་སྟེ། དེའི་ཕྱིར་དང་སེམས་ཅན་མང་པོ་བསྲུང་བའི་ཕྱིར་ཞེས་བྱ་བ་ནི། སེམས་ཅན་གྱི་ཁམས་ཐམས་ཅད་ལ་མངོན་པར་ཕྱོགས་པས་བླ་ན་མེད་པ་

59-1-192b

ཡང་དག་པར་རྫོགས་པའི་བྱང་ཆུབ་ཏུ་སྨོན་པར་བྱེད་པ་དང་། དངོས་པོ་ལ་མངོན་པར་ཞེན་པ་བཟློག་པ་ནི་སེམས་ཅན་མང་པོ་བསྲུང་བ་སྟེ། རྒྱུ་དེའི་ཕྱིར་དང་། ཇི་སྐད་དུ་བཤད་པའི་རལ་གྲི་དང་། ནམ་མཁར་སངས་རྒྱས་སྦྱོར་བ་འདི་ཡིས་བསད་ན་རྣལ་འབྱོར་པས་བསོད་ནམས་ཐོབ་
པར་འགྱུར་རོ། །ཅིའི་ཕྱིར་ཞེ་ན། འདིས་བསད་སྡིག་པར་མི་འགྱུར་ཞིང་། །ཞེས་བྱ་བ་གསུངས་ཏེ། དེ་ལྟར་དེ་བཞིན་གཤེགས་པ་ཐམས་ཅད་བསད་ན་རྣལ་འབྱོར་པ་དེ་ལ་འདོད་ཆགས་དང་ཞེ་སྡང་དང་གཏི་མུག་གི་མཚན་ཉིད་ཅན་གྱི་སྡིག་པར་མི་འགྱུར་རོ། །དེ་བས་ན་རྣལ་འབྱོར་པ་
དེ་ནི་བསོད་ནམས་དག་ཀྱང་ཐོབ་པར་འགྱུར་ཞིང་། ཆོས་ཐམས་ཅད་རང་བཞིན་གྱིས་རྣམ་པར་དག་པ། གཟུང་བ་དང་འཛིན་པ་དང་བྲལ་བ་རྟོགས་པར་འགྱུར་རོ་ཞེས་བྱ་བའི་དོན་ཏོ། །སློབ་མ་རྣམས་ལ་ཡང་དེ་བཞིན་ཏེ་ཞེས་བྱ་བ་ནི། ཇི་ལྟར་ཆོས་ཀྱིས་སློབ་དཔོན་གྱི་རང་ཉིད་འཇུག་པ་ལ་
སོགས་པའི་ཆོ་ག་གསུངས་པ་དེ་བཞིན་དུ་སློབ་མ་རྣམས་ལ་ཡང་བྱའོ། །དེ་ལྟར་སློབ་དཔོན་འཇུག་པ་ལ་སོགས་པའི་ཆོ་ག་བཞིན་དུ་སློབ་མ་ཞུགས་པ་ལ་སོགས་པའི་ཆོ་ག་བྱས་པའི་སློབ་མ་རྣམས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་རྣམ་པ་བཞིས་སྟོང་པ་ཉིད་དང་། མཚན་
མ་མེད་པ་དང་། སྨོན་པ་མེད་པ་དང་། རང་བཞིན་གྱིས་འོད་གསལ་བའི་རྣམ་པར་ཐར་པའི་སྒོ་རྣམ་པ་བཞིའི་ངོ་བོ་ཉིད་ཀྱིས། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་བྱ་བ་སྟེ། སློབ་མའི་ཕན་ཡོན་གསུངས་པ་ཡིན་ནོ། །ཆོས་
ཀྱི་དཀྱིལ་འཁོར་རོ་ཞེས་བྱ་བ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཆོས་ཏེ། དེ་ལས་བྱུང་བའི་དཀྱིལ་འཁོར་ནི་ཆོས་ཀྱི་དཀྱིལ་འཁོར་རོ། །འདི་ནི་སླར་ཡང་བཤད་པར་བྱ་སྟེ། བཅོམ་ལྡན་འདས་འཇམ་དཔལ་གཞོན་ནུར་གྱུར་པའི་སྤྱོར་བས་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་བཤད་
པའི་རྣལ་འབྱོར་ཆེན་པོའི་ལས་ལ། ཏིང་ངེ་འཛིན་གསུམ་བསྒོམ་པ་ནས་བརྩམས་ཏེ། ཇི་སྲིད་དུ་ཉིན་རེ་ཞིང་མངོན་དུ་མཐོང་བར་གྱུར་པ་དེ་སྲིད་ཀྱི་བར་དུ་དཀྱིལ་འཁོར་འདི་བསྒོམ་པར་བྱའོ། །དེ་ནས་ཇི་སྐད་བཤད་པའི་དཀྱིལ་འཁོར་གྱི་སའི་དབུས་སུ་དམ་ཚིག་གསུམ་རྣམ་པར་བསྒོམས་ལ་

59-1-193a

བར་སྣང་གི་ཕྱོགས་སུ་དཀྱིལ་འཁོར་སྔ་མ་བཞིན་དུ་ཡང་དག་པར་བཞག་ནས། ཉི་མ་འཆར་བའི་དུས་སུ་ལེགས་པར་ཐིག་གདབ་པར་བྱ་སྟེ། འདིའི་ཕྱིའི་དཀྱིལ་འཁོར་ནི་རྡོ་རྗེ་སེམས་དཔའི་ཕྱིའི་དཀྱིལ་འཁོར་དང་འདྲ་བར་བྱས་ལ། དེའི་ཕྱེད་ཀྱིས་རྡོ་རྗེ་རྩེ་གཅིག་པར་
འཁོར་ལོ་རྩིབས་བརྒྱད་པར་བྲིའོ། །དེ་ནས་ལྷ་ཐམས་ཅད་ཀྱི་གནས་སུ་སྣ་ཚོགས་པདྨའི་གདན་བྲི་བར་བྱའོ། །དེ་ནས་འཁོར་ལོའི་སྟེང་དུ་ཤར་ཕྱོགས་ནས་བརྩམས་ཏེ། བསྐོར་ཕྱོགས་སུ་ཨ་ལ་སོགས་པའི་ཡི་གེའི་ཕྲེང་བ་སྒོ་ནས་རྩིབས་ཀྱི་ལྟེ་བའི་མཐར་ཐུག་པར་བྲི་བར་བྱེད་པ་དེ་ཉིད་ནི། ཨ་
ར་པ་ཙ་ན་སྟེ། ཨ་ར་པ་ཙ་ན་ཞེས་བྱ་བ་འདོད་པ་ཐམས་ཅད་ཐོབ་པར་བྱེད་པའོ། །དེ་ཅིའི་ཕྱིར་ཞེ་ན། ཨ་ཞེས་བྱ་བ་ནི་འདོད་པའོ། །ར་ཞེས་བྱ་བ་ནི་ཆགས་པའོ། །པ་ཞེས་བྱ་བ་ནི་དོན་དམ་པའོ། །ཙ་ཞེས་བྱ་བ་ནི་སྤྱོད་པའོ། །ན་ཞེས་བྱ་བ་ནི་རང་བཞིན་མེད་པའོ། །དེ་ལྟར་ན་འདོད་པ་དང་། ཆགས་པ་
དང་། དོན་དམ་པ་དང་། སྤྱོད་པ་དང་། རང་བཞིན་མེད་པ་ཉིད་ཀྱི་སྙིང་པོ་འདི་བསྒོམས་ཏེ་བསྒྲུབས་ན་འདོད་པ་ཐམས་ཅད་ཐོབ་པར་འགྱུར་རོ། །དེ་བཞིན་གཤེགས་པ་ནི་འདོད་པ་ཐམས་ཅད་ཀྱི་སྣོད་ཡིན་ཏེ། དེ་བས་ན་སྙིང་པོ་འདིས་ནི་དེ་བཞིན་གཤེགས་པ་ཉིད་དང་། རྡོ་རྗེ་འཛིན་པ་ཉིད་ཀྱང་མྱུར་དུ་
ཐོབ་པར་འགྱུར་རོ། །དེ་ནས་འཁོར་ལོའི་ལྟེ་བར་སྣ་ཚོགས་པདྨ་ལ་ཇི་སྐད་དུ་བཤད་པའི་སྐུ་མདོག་དང་ལྡན་ཞིང་། ཕྱག་བཞིས་རལ་གྲི་བཞི་བསྣམས་ནས། དེས་དེ་བཞིན་གཤེགས་པ་ཐམས་ཅད་ལ་འདེབས་པ། སེམས་དཔའི་སྐྱིལ་མོ་ཀྲུང་གིས་བཞུགས་པ། སངས་རྒྱས་ལྔའི་དབུ་རྒྱན་དང་། 
དར་དཔྱངས་ཀྱི་དབང་བསྐུར་བས་དབང་བསྐུར་བར་བྲི་བར་བྱའོ། །དེའི་ལོགས་བརྒྱད་དུ་དེ་བཞིན་གཤེགས་པ་བརྒྱད་སྤྲུལ་པའི་སྐུའི་གཟུགས་ཅན་ཏིང་ངེ་འཛིན་ལ་སྙོམས་པར་ཞུགས་པར་བྲི་བར་བྱའོ། །ཕྱིའི་དཀྱིལ་འཁོར་གྱི་ལྷའི་སྣམ་བུའི་མཚམས་བཞིར་ཇི་སྐད་དུ་བཤད་པའི་ཤེས་རབ་ཀྱི་ཕ་
རོལ་ཏུ་ཕྱིན་པའི་གླེགས་བམ་བཞི་བཞག་པ་དང་། སྒོ་རྣམས་སུ་ཇི་སྐད་དུ་བཤད་པའི་མཚན་མ་བཞི་གཞག་པར་བྱའོ། །འདིར་ལྷ་ཐམས་ཅད་ཀྱི་སྙིང་པོ་ནི་ཨ་ཞེས་བྱ་བའོ། །དེ་ལྟར་དཀྱིལ་འཁོར་བྲིས་ནས་རྣལ་འབྱོར་ཆེན་པོ་དེ་བཞིན་དུ་བྱས་ཏེ། དམ་ཚིག་གི་ཕྱག་རྒྱས་ཡོངས་སུ་བཟུང་བའི་

59-1-193b

རལ་གྲི་དང་། མེ་ཏོག་གི་ཡལ་ག་ལས་བུམ་པ་ཐམས་ཅད་དང་། བུམ་པ་གང་བ་ལ་ཨ་ཞེས་བྱ་བས་རེ་རེ་ཞིང་ལན་བརྒྱ་རྩ་བརྒྱད་ཡོངས་སུ་བཟླས་ལ། དཀྱིལ་འཁོར་གྱི་བསྒོ་བཞི་ཡོངས་སུ་ཕྱེ་ནས་རྡོ་རྗེ་བསྡུ་བ་བྱས་ཏེ། བཅོམ་ལྡན་འདས་ཀྱི་ཕྱག་རྒྱ་ཆེན་པོ་བསྒོམ་ཞིང་། བཅོམ་ལྡན་འདས་
ལ་མཚན་བརྒྱ་རྩ་བརྒྱད་ཀྱིས་ཡང་དག་པར་བསྟོད་དེ་། གསང་བའི་ལྕགས་ཀྱུ་དང་། ཨ་ཞེས་བྱ་བས་བཅོམ་ལྡན་འདས་འཁོར་དང་བཅས་པ་དཀྱིལ་འཁོར་དུ་བཅུག་ནས། རྡོ་རྗེ་གནོད་སྦྱིན་གྱིས་བགེགས་བསལ་བ་བྱས་ནས་མཚམས་བཅིང་བ་དང་། དཀྱིལ་འཁོར་བཅིང་བ་དང་དྲ་བ་
དང་། ར་བ་དག་བྱས་ཏེ། རྡོ་རྗེ་ཁུ་ཚུར་གྱིས་སྒོ་བཅིངས་ནས། རྡོ་རྗེ་སྲུང་བས་བསྲུང་བ་ཐམས་ཅད་ཡང་དག་པར་གོ་ཆ་བསྐོན་ལ། དམ་ཚིག་གི་ཕྱག་རྒྱས་ཨ་དྲྀ་ཤྱ་ཞེས་བྱ་བ་དང་། དེ་བཞིན་གཤེགས་པ་ཐམས་ཅད་དང་བཅས་པ་ལ་བལྟ་བ་བྱས་ལ། ཛཿ་ཧཱུྃ་བཾ་ཧོཿ ས་མ་ཡ་སྟྭཾ། ས་མ་ཡ་
སྟྭཾ། ཨོཾ་ཧཾ་ཨཱ་ཞེས་ལན་གསུམ་བརྗོད་ལ་བསྒྲུབ་པར་བྱའོ། །གཡོན་པའི་རྡོ་རྗེ་ཁུ་ཚུར་གྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་རང་གི་སྙིང་གར་བཟུང་ཞིང་གཡས་པའི་རྡོ་རྗེ་ཁུ་ཚུར་གྱིས་གཡོན་པའི་སོར་མོ་བསྒྲེང་བ་བཟུང་བ་འདི་ནི་བཅོམ་ལྡན་འདས་ཀྱི་དམ་ཚིག་གི་ཕྱག་རྒྱའོ། །དེ་
བཞིན་དུ་ལྕེ་ལ་རྡོ་རྗེ་རྣམ་པར་བསམས་པ་ནི། བཅོམ་ལྡན་འདས་འཇམ་དཔལ་གཞོན་ནུར་གྱུར་པ་དང་། དེ་བཞིན་གཤེགས་པ་ཐམས་ཅད་ཀྱི་ལྗགས་ལ་ཆོས་ཀྱི་ཕྱག་རྒྱ་དགོད་པར་བྱ་སྟེ། དེ་ལ་ཨ་ཞེས་བྱ་བ་ནི་ལྷ་ཐམས་ཅད་ཀྱི་ཆོས་ཀྱི་ཕྱག་རྒྱའོ། །དེ་ནས་རང་གི་སྙིང་གར་ཨ་ཞེས་བྱ་བ་
ལས་སྣ་ཚོགས་རྡོ་རྗེ་བསམས་ལ། བཅོམ་ལྡན་དས་འཇམ་དཔལ་གཞོན་ནུའི་ལས་ཀྱི་ཕྱག་རྒྱ་སྔ་མ་བཞིན་དུ་བཅིང་བར་བྱའོ། །དེ་བཞིན་གཤེགས་པ་རྣམས་ཀྱི་ནི་ཕྱག་རྒྱ་ཆེན་པོ་ཉིད་ལས་ཀྱི་ཕྱག་རྒྱའོ། །དེ་ནས་རང་གི་སྙིང་གར་ཧཱུྃ་ལས་རྡོ་རྗེ་རྩེ་ལྔ་པ་རྣམ་པར་བསམས་ལ། བཅོམ་ལྡན་འདས་
ཀྱི་ཕྱག་རྒྱ་ཆེན་པོ་དང་། དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཆེན་པོ་ཇི་ལྟར་བྲིས་པའི་རྗེས་སུ་འབྲངས་ནས་བཅིང་བར་བྱ་སྟེ། དམ་ཚིག་གི་ཕྱག་རྒྱའི་སྦྱོར་བས་ཀྱང་བྱ་ཞིང་། ཐམས་ཅད་དུ་རྡོ་རྗེ་རྩེ་ལྔ་པ་རང་གི་སྙིང་གར་བསྒོམ་པར་བྱའོ། །འདིར་ཕྱག་རྒྱ་ཐམས་ཅད་ཀྱི་སྙིང་པོ་ནི་

59-1-194a

ཞེས་བྱ་བ་ཡིན་ནོ། །དེ་ནས་སངས་རྒྱས་ལྔའི་དབུ་རྒྱན་དང་དར་དཔྱངས་ཀྱི་དབང་བསྐུར་བས་དབང་བསྐུར་ལ། བཅོམ་ལྡན་འདས་འཇམ་དཔལ་གཞོན་ནུར་གྱུར་པ་དང་། དེ་བཞིན་གཤེགས་པ་ཐམས་ཅད་དང་བཅས་པ་ལ་སྔ་མ་བཞིན་དུ་མཆོད་ཡོན་ཕུལ་ཏེ། བུམ་པ་
རྣམས་དང་། བུམ་པ་གང་བ་དང་། ན་བཟའ་དང་། བླ་རེ་ལ་སོགས་པ་ཡང་བཅོམ་ལྡན་འདས་འཁོར་བཅས་ལ་ཕུལ་ལ་མཆོད་པ་རྣམ་པ་ལྔས་ཀྱང་ཡང་དག་པར་མཆོད་དེ། ཕྱི་རོལ་དུ་གླུ་དང་། གར་དང་། རོལ་མོ་དང་། རྟ་དང་། གླང་པོ་ཆེ་དང་། བ་ལང་གི་ཁྱུ་རྣམས་ཀྱིས་ཀྱང་མཆོད་པ་བྱེད་དུ་གཞུག་
གོ། །དེ་ནས་ཕྱག་རྒྱ་རྣམ་པ་བཅུ་གཉིས་ཀྱིས་ཡང་དག་པར་མཆོད་ལ། ཨོཾ་ལས་རིན་པོ་ཆེ་སྣ་བདུན་དང་། དཔག་བསམ་གྱི་ཤིང་དང་། ཁ་ཟས་རོ་བརྒྱ་བཀོད་པ་ལ་སོགས་པ་སྤྲུལ་ཏེ། དེ་རྣམས་འདིས་དབུལ་བར་བྱའོ། །ཕྱག་འཚལ་བའི་ཐལ་མོ་སྦྱར་བ་སྤྱི་བོར་བཞག་ལ། ཨོཾ་སརྦ་བིཏྦཱུ་ར་པཱུ་
ར། སུ་ར་སུ་ར། ཨཱ་བརྟ་ཡ་ཨཱ་བརྟ་ཡ་ཧོ་ཞེས་བརྗོད་དོ། །དེ་ནས་ཕྱི་རོལ་དུ་གཏོར་མ་བྱིན་ལ། སྦྱིན་སྲེག་བྱས་ནས་ཤིན་ཏུ་དམར་བའི་རས་ལ། རྡོ་རྗེ་གནོད་སྦྱིན་ཡོངས་སུ་བཟླས་ལ། རས་གཅིག་གིས་སྨད་གཡོགས་བྱ་བ་དང་། གཉིས་པས་སྟོད་གཡོགས་བྱ་ཞིང་། ཡང་གཅིག་ལ་རྡོ་རྗེ་ལྕགས་
ཀྱུ་ལ་སོགས་པ་ཡོངས་སུ་བཟླས་པས་རང་གི་གདོང་གཡོགས་པར་བྱའོ། །དེ་ནས་ཕྱག་འཚལ་བ་ལ་སོགས་པ་སྔོན་དུ་འགྲོ་བས། དེ་བཞིན་དུ་སྡོམ་པ་བཟུང་ལ། བྱང་ཆུབ་ཏུ་སེམས་བསྐྱེད་དེ། སྔ་མ་བཞིན་དུ་ཐུགས་ཀར་རྡོ་རྗེ་བསྐྱེད་ལ་ཤར་ཕྱོགས་ཀྱི་སྒོར་བལྟས་ནས། ཕ་རོལ་ནས་
གནས་པའི་བུམ་པའི་ཆུས་བདག་ཉིད་དབང་བསྐུར་ཏེ། རལ་གྲི་དང་། གླེགས་བམ་གྱི་ཕྱག་རྒྱ་བཅིངས་ནས། དེ་ཉིད་དང་། མེ་ཏོག་གི་ཕྲེང་བ་བཟུང་ལ། བཛྲ་བཛྲ་ཨ་ཞེས་ཟློས་ཤིང་དཀྱིལ་འཁོར་དུ་ཞུགས་ལ། ཤར་ཕྱོགས་ཀྱི་སྒོར་བཛྲ་ཨཾ་ཀུ་ཤ་ཛཿ། ཞེས་བརྗོད་པར་བྱའོ། །དེ་ནས་ལྷོ་ཕྱོགས་ནས་
ཞུགས་ལ་བཛྲ་པཱ་ཤ་ཧཱུྃ་ཞེས་བརྗོད་པར་བྱའོ། །ཡང་ནུབ་ཕྱོགས་ཀྱི་སྒོ་ནས་ཞུགས་ལ། བཛྲ་སྥོ་ཊ་བཾཾ་ཞེས་བརྗོད་པར་བྱའོ། །དེ་ནས་བྱང་ཕྱོགས་ཀྱི་སྒོ་ནས་དེ་བཞིན་དུ་ཞུགས་ལ། བཛྲ་ཨཱ་བེ་ཤ་ཨཿཞེས་བྱ་བ་དང་། བདག་ཉིད་དབང་དུ་བྱའོ། །དེ་ལ་རལ་གྲི་དང་གླེགས་བམ་གྱི་ཕྱག་རྒྱ་ནི་འདི་

59-1-194b

ཡིན་ཏེ། གཡོན་པའི་རྡོ་རྗེ་ཁུ་ཚུར་གྱིས་རང་གི་སྙིང་གའི་ཕྱོགས་སུ་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་འཛིན་ཅིང་གཡས་པའི་རྡོ་རྗེ་ཁུ་ཚུར་ལས་མཛུབ་མོ་བརྐྱང་ལ་རྩེ་མོ་བཀུག་སྟེ། རལ་གྲི་ལྟ་བུར་གཞག་པར་བྱའོ། །དེ་ནས་ཡང་ཤར་ཕྱོགས་ཀྱི་སྒོ་ནས་དཀྱིལ་འཁོར་དུ་ཞུགས་
ལ། མ་ཧཱ་ར་ཏ། སུ་དྲྀ་ཌྷ། སུ་ཏོ་ཥོ། སུ་སུ་ཁོ། བཛྲ་སཏཱ། ཨཱདྱ་སིདྡྷྱཱ་མཱཾ་ཞེས་བརྗོད་པར་བྱའོ། །དེ་ནས་རྣམ་པར་སྒེག་པའི་རྡོ་རྗེས་ཕྱག་བྱས་ལ། དཀྱིལ་འཁོར་ལ་བསྐོར་བ་ལན་གསུམ་བྱས་ཏེ། བཅོམ་ལྡན་འདས་འཇམ་དཔལ་གཞོན་ནུར་གྱུར་པའི་སྤྱན་སྔར་འདུག་ལ་འདི་སྐད་
ཅེས་བརྗོད་པར་བྱ་སྟེ། མ་ཧཱ་རཱ་ག །མ་ཧཱ་སཽ་ཁྱ། མ་ཧཱ་བཛྲ། མ་ཧཱ་དྷཱ་ན། མ་ཧཱ་ཛྙཱ་ན། མ་ཧཱ་ཀརྨ། བཛྲ་སཏྭ། ཨཱདྱ་སིདྡྷྱཱ་མཱཾ། ཡང་འདི་སྐད་ཅེས་བརྗོད་པར་བྱ་སྟེ། ཛཿ ཧཱུྃ་བཾ་ཧོཿ། པྲ་སིདྡྷྱཱམཱཾ། དེ་ནས་རྡོ་རྗེའི་ཆུ་འཐུངས་ལ། ཨ་ཞེས་བྱ་བ་ལན་བརྒྱ་རྩ་བརྒྱད་བཟླས་ནས་བདག་ཉིད་ལ་དབབ་
པར་བྱའོ། །ཡང་གཡོན་པའི་ཁྲོ་བོའི་ཁུ་ཚུར་གྱིས་སེམས་མ་རྡོ་རྗེ་ཕྱེ་ལ། ཨ་ཞེས་བྱ་བ་དེ་བཞིན་དུ་བརྗོད་ཅིང་བདག་ཉིད་ལ་དབབ་པར་བྱའོ། །དེ་ནས་ཨ་ཞེས་བྱ་བ་ཟློས་ཤིང་མེ་ཏོག་དོར་བར་བྱའོ། །དེ་ནས་དེ་བླངས་ལ། ཨ་ཉིད་ཀྱིས་རང་གི་མགོ་བོ་ལ་བཅིང་བར་བྱའོ། །དེ་ནས་དེ་
ཉིད་ཀྱིས་གདོང་གཡོགས་དགྲོལ་ལོ། །དེ་ནས་དེ་ཟློས་ཤིང་ཤར་ཕྱོགས་ནས་བརྩམས་ཏེ་དཀྱིལ་འཁོར་ལ་བལྟ་བར་བྱའོ། །དེ་ནས་རལ་གྲི་དང་གླེགས་བམ་གྱི་ཕྱག་རྒྱ་བཅིངས་ལ། ཏིཥྛ་བཛྲ་ཞེས་བྱ་བ་ལ་སོགས་པས་རང་གི་སྙིང་གར་དགྲོལ་ལོ། །དེ་ནས་བཅོམ་ལྡན་འདས་ཀྱི་ཕྱག་རྒྱ་
ཆེན་པོ་བཅིངས་ལ། བཅོམ་ལྡན་འདས་ལ་རྡོ་རྗེའི་ལྟ་བས་བལྟ་ཞིང་ཇི་སྲིད་དུ་བཅོམ་ལྡན་འདས་ཀྱི་ཞལ་བསྟན་ནས་དངོས་གྲུབ་སྩོལ་བར་གྱུར་པ་དེ་སྲིད་ཀྱི་བར་དུ་ཨ་ཞེས་བྱ་བའམ། ཨ་ར་པ་ཙ་ན་ཞེས་བཟླས་བརྗོད་བྱའོ། །དེ་ནས་རྡོ་རྗེ་ཐལ་མོ་བསྐོར་བ་ཤིས་པ་བརྗོད་པ་འདོན་པའི་ཚུལ་དུ་རང་གི་
སྙིང་གར་བཞག་ལ། མཚན་བརྒྱ་རྩ་བརྒྱད་པས་བསྟོད་དེ། རྡོ་རྗེ་མཚོན་ཆ་ལ་སོགས་པ་གསང་བའི་མཆོད་པ་བཞིས་ཡང་དག་པར་མཆོད་ལ། གླུ་དང་རོལ་མོ་ལ་སོགས་པ་རྣམས་ཀྱིས་ཀྱང་ཡང་དག་པར་མཆོད་པར་བྱའོ། །དེ་ནས་ཡང་བཅོམ་ལྡན་འདས་འཇམ་དཔལ་གཞོན་ནུར་གྱུར་པའི་

59-1-195a

ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་ལ་རྡོ་རྗེའི་ལྟ་བས་བལྟས་ཏེ། རྡོ་རྗེ་ཐལ་མོ་བསྐོར་བས་ཕྱག་བྱས་ཏེ། མེ་ཏོག་ལ་སོགས་པ་དང་དབང་བསྐུར་བ་རྣམས་བླང་བར་བྱའོ། །དེ་ལ་དང་པོ་ཁོ་ནར་བཅོམ་ལྡན་འདས་ཀྱི་དམ་ཚིག་གི་ཕྱག་རྒྱས་ཡོངས་སུ་
བཟུང་བའི་རལ་གྲི་དང་། མེ་ཏོག་གི་ཡལ་ག་ལས་རྣམ་པར་རྒྱལ་བའི་བུམ་པ་ལ་སྔར་བཤད་པའི་བུམ་པའི་སྔགས་དེ་བཞིན་དུ་ཡོངས་སུ་བཟླས་ལ། བདག་ཉིད་འཇམ་པའི་དབྱངས་སུ་བྱིན་གྱིས་བརླབས་ཏེ། བཅོམ་ལྡན་འདས་ཀྱི་དམ་ཚིག་གི་ཕྱག་རྒྱས་རྣལ་འབྱོར་ཆེན་པོ་ལས་
གསུངས་པའི་གནས་རྣམས་སུ་བཅོམ་ལྡན་འདས་རང་གི་གནས་སུ་བཀོད་ལ། རྡོ་རྗེ་ཁུ་ཚུར་དང་། ཧཱུྃ་གིས་རྡོ་རྗེ་སེམས་དཔའི་དཀྱིལ་འཁོར་ཆེན་པོར་གསུངས་པའི་རྡོ་རྗེ་སེམས་དཔའ་ལ་སོགས་པ་ཡང་རང་གི་ལུས་ལ་རང་གི་གནས་སུ་བཀོད་དེ་ཕྱི་རོལ་གྱི་དཀྱེལ་འཁོར་གྱི་ནང་དུ་སྣ་ཚོགས་
པདྨའི་སྟེང་དུ་འཇམ་པའི་དབྱངས་ཀྱི་ཕྱག་རྒྱ་ཆེན་པོས་བདག་ཉིད་འདུག་ལ། མེ་ཏོག་ལ་སོགས་པས་བདག་ཉིད་ཡང་དག་པར་མཆོད་དེ། མཆོད་ཡོན་བླངས་ལ། མཚན་བརྒྱ་རྩ་བརྒྱད་པས་ཡང་དག་པར་བསྟོད་ནས། རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ལ། 
ཨོཾ་བཛྲ་ཨ་བྷི་ཥིཉྩ་ཨ་ཞེས་བྱ་བས་བདག་ཉིད་དབང་བསྐུར་ཞིང་། ཆུ་དེ་བཏུང་བར་ཡང་བྱའོ། །དེ་ནས་སངས་རྒྱས་ལྔའི་དབུ་རྒྱན་གྱི་དབང་བསྐུར་བའི་ཕྱག་རྒྱས་བདག་ཉིད་དབང་བསྐུར་ཞིང་། ལུགས་མའམ། བརྡུངས་པའམ། བྱས་པའམ། བྲིས་པའི་སངས་རྒྱས་ལྔའི་དབུ་རྒྱན་དང་
ཅོད་པན་གྱི་དབང་བསྐུར་བས་དབང་བསྐུར་ལ། རྡོ་རྗེ་རལ་གྲི་རྡོ་རྗེ་དྲིལ་བུ་དང་བཅས་པར་བླངས་ཏེ། བདག་པོ་དང་མིང་གི་དབང་བསྐུར་བ་དག་གིས་ཀྱང་ཨ་ཞེས་བྱ་བ་ཟློས་ཤིང་དབང་བསྐུར་བར་བྱའོ། །དེ་ནས་འདི་སྐད་ཅེས་བརྗོད་པར་བྱ་སྟེ། རལ་གྲི་འདི་ནི་རྟག་བཟུང་ལ། །ཤེས་རབ་
ཚུལ་འདི་དཀར་སྨྲ་ཞིང་། །ནམ་མཁར་སངས་རྒྱས་སྦྱོར་བ་ཡིས། །འདེབས་ན་མྱུར་དུ་འགྲུབ་པར་འགྱུར། །སངས་རྒྱས་བསྟན་པ་བསྲུང་ཕྱིར་དང་། །སེམས་ཅན་མང་པོ་བསྲུང་བའི་ཕྱིར། །འདི་བསད་སྡིག་པར་མི་འགྱུར་ཞིང་། །བསོད་ནམས་དག་ཀྱང་ཐོབ་པར་འགྱུར། །

59-1-195b

དེ་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་བླངས་ལ། མེ་ཏོག་ལ་སོགས་པ་མཆོད་པ་རྣམ་པ་ལྔས་བདག་ཉིད་ཡང་དག་པར་མཆོད་དེ། རྡོ་རྗེ་མཚོན་ཆ་ལ་སོགས་པ་ཕྱག་རྒྱའི་མཆོད་པ་རྣམ་པ་བཅུ་གཉིས་ཀྱིས་ཀྱང་ཡང་དག་པར་མཆོད་པར་བྱའོ། །དེ་ནས་རྡོ་རྗེ་རལ་གྲི་དེ་ཁོ་ན་ཉིད་
ཀྱིས་བཟུང་ལ། རྡོ་རྗེ་དྲིལ་བུ་ཆོས་ཀྱིས་དཀྲོལ་ཞིང་། དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབ་པར་བྱ་སྟེ། དེ་ཁོ་ན་ཉིད་ལ་སོགས་པ་ནི། །ཐོག་མཐའ་མེད་པའི་སེམས་དཔའ་ནི། །ཞེས་བྱ་བ་ལ་སོགས་པ་ནི་དེ་དག་ཉིད་ཡིན་ཏེ། འདི་ཉིད་ལས་ཤེས་པར་བྱའོ། །དེ་ནས་བཅོམ་
ལྡན་འདས་ལ་ཕྱག་བྱས་ལ། སྙིང་པོ་བླངས་ཏེ། ཚིགས་སུ་བཅད་པ་ལྔ་པས་རྗེས་སུ་གནང་བ་དང་། གཟེངས་བསྟོད་པ་དང་། ལུང་བསྟན་པ་མནོས་ནས། ཡང་བདག་ལ་བྱིན་གྱིས་བརླབ་པ་ལ་སོགས་པ་དང་། ཇི་ལྟར་མངོན་པར་འདོད་པའི་བཟླས་བརྗོད་བྱས་ནས། བཅོམ་ལྡན་
འདས་ལ་ཕྱག་བྱས་ཏེ། འདི་སྐད་ཅེས་བརྗོད་པར་བྱའོ། །བདག་མིང་འདི་ཞེས་བྱ་བ་ཡི། །རྡོ་རྗེ་སློབ་དཔོན་དཀའ་ཐུབ་ཆེས། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བགྱི། །དེ་ནས་སློབ་མ་རྣམས་གཞུག་པར་བྱའོ། །སློབ་དཔོན་གྱི་ལས་ཀྱི་ཆོ་ག་
རྒྱས་པ་རྫོགས་སོ།།      །།དེ་ནས་སྡོམ་པ་དབོག་པར་འོས་པའི་སློབ་མ་ལ། སྔར་བཤད་པའི་ཚུལ་གྱིས་དམ་ཚིག་འཛིན་དུ་གཞུག་ཅིང་བྱང་ཆུབ་ཏུ་སེམས་བསྐྱེད་པ་བྱེད་དུ་གཞུག་གོ། །དེ་ནས་དེའི་སྙིང་གར་དེ་བཞིན་དུ་རྡོ་རྗེ་བསྐྱེད་ལ། མེ་ཏོག་ལ་སོགས་པས་མཆོད་དེ། ཡོན་
གྱི་མཆོག་བླངས་ནས། སྒོ་ལ་བལྟས་ནས་གནས་པའི་བུམ་པའི་ཆུས་དབང་བསྐུར་ལ། བདག་ཉིད་འཇུག་པའི་ཆོ་གས་བཅུག་སྟེ། ཡང་རྡོ་རྗེ་དབབ་པའི་ཕྱག་རྒྱ་དྲིལ་བུ་དང་བཅས་པས་རྐང་པ་གཡོན་པས་དེའི་རྐང་པ་གཡས་པ་མནན་ལ། ཨ་ཨཿཨཿཨཿཨཿ་ཞེས་བྱ་བ་སྟེ། ཚེག་དྲག་མེད་
པའི་ཨ་དང་པོ་དང་། ཚེག་དྲག་དང་བཅས་པའི་ཨཿ་བཞི་ལན་བརྒྱ་བཟླས་ལ་དབབ་པར་བྱའོ། །དེ་ནས་ཆོ་ག་ཐམས་ཅད་རྗེས་སུ་སྤྱད་པར་བྱའོ། །སློབ་མ་གཞུག་པ་ལ་སོགས་པའི་ཆོ་ག་རྒྱས་པ་རྫོགས་སོ།།      །།དེ་ལྟར་སློབ་དཔོན་གྱི་ལས་ཀྱི་ཆོ་ག་རྒྱས་པ་དང་། སློབ་མ་གཞུག་པ་ལ་

59-1-196a

སོགས་པའི་ཆོ་ག་རྒྱས་པ་གསུངས་ནས། ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ལ། སློབ་དཔོན་གྱིས་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། སྒྲུབ་པ་ཞེས་བྱ་བ་ལ་སོགས་པ་གསུངས་ཏེ། སྒྲུབ་པ་དག་ནི་དེ་བཞིན་ནོ། །
ཞེས་བྱ་བ་ནི་ཇི་ལྟར་རྡོ་རྗེ་སེམས་དཔའི་སྒྲུབ་པ་ལ་སྔོན་དུ་བསྙེན་པ་རས་རིས་ཀྱི་སྤྱན་སྔར་བྱ་བར་གསུངས་པ་དེ་བཞིན་དུ། འཕགས་པ་འཇམ་དཔལ་གཞོན་ནུར་གྱུར་པའི་ཡང་དེ་བཞིན་དུ་ཤེས་པར་བྱའོ། །དེ་ནི་འདི་ཡིན་ཏེ། ཟླ་བ་ཉ་ནས་བརྩམས་ནས། འཇམ་དཔལ་གཞོན་ནུར་གྱུར་པའི་
སྤྱན་སྔར་དམ་ཚིག་གི་ཕྱག་རྒྱས་བཅིངས་ལ། ཇི་ལྟར་སྐྱོ་བར་མི་འགྱུར་བར། དང་པོ་བདག་ལ་བྱིན་གྱིས་བརླབ་པ་ལ་སོགས་པ་བྱས་ཏེ། ཨ་ཞེས་བྱ་བའམ། ཨ་ར་པ་ཙ་ན་ཞེས་བྱ་བའི་བཟླས་བརྗོད་ཇི་སྲིད་ཟླ་བ་གཅིག་གིས་སྔོན་དུ་བསྙེན་པ་བྱས་པར་གྱུར་གྱི་བར་དུ་བྱའོ། །དེ་ནས་དཀྱིལ་
འཁོར་གྱི་སྦྱོར་བས་སྔ་མ་བཞིན་དུ་བྲི་བའམ། འདྲིར་གཞུག་པར་བྱའོ། །དེ་ནས་ཡང་བདག་ལ་བྱིན་གྱིས་བརླབ་པ་ལ་སོགས་པ་བྱས་ཏེ། བཅོམ་ལྡན་འདས་རས་ཀྱི་རི་མོ་ལ་ཇི་ལྟ་བ་བཞིན་དུ་སྤྱན་དྲངས་ནས་ཆོ་ག་ཐམས་ཅད་རྗེས་སུ་སྤྱད་ལ། བཅོམ་ལྡན་འདས་ཀྱི་ཐུགས་ཀ་ན་གནས་པའི་
རྡོ་རྗེ་ལ་བཟླས་པར་བྱ་བའི་སྔགས་བཀོད་དེ། བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ནས། ཟླ་བ་ཉ་ནས་བརྩམས་ཏེ། དེ་བཞིན་དུ་སྔོན་དུ་བསྙེན་པའི་སྤྱོར་བས་ཇི་སྲིད་དུ་ཕྱི་མའི་ཉ་ལ་བབ་ཀྱི་བར་དུ་བཟླས་བརྗོད་བྱའོ། །དེ་ནས་དེའི་མཚན་ཐོག་ཐག་བཟླས་བརྗོད་བྱས་ནས། ནང་
པར་བཅོམ་ལྡན་འདས་ཀྱིས་ཞལ་བསྟན་ནས། སངས་རྒྱས་ཉིད་ལ་སོགས་པའི་དངོས་གྲུབ་རྣམས་སྩོལ་བར་འགྱུར་རོ། །དེ་བཞིན་དུ་བཅོམ་ལྡན་འདས་དཔའ་བོ་གཅིག་པ་རས་ལ་བྲིས་ལ་དེའི་སྤྱན་སྔར་ཕྱག་རྒྱ་ཆེན་པོ་ཇི་ལྟ་བ་བཞིན་དུ་བཅིངས་ཏེ་བཟླས་བརྗོད་འབུམ་བྱའོ། །དེ་ནས་ཟླ་བ་ཉ་
ལ་མཚན་ཐོག་ཐག་བཟླས་བརྗོད་བྱས་ནས། ནང་པར་བཅོམ་ལྡན་འདས་ཀྱིས་ཞལ་བསྟན་ནས་རང་གི་དངོས་གྲུབ་སྩོལ་བར་འགྱུར་རོ། །དེ་ནས་མ་བསྒྲུབས་པར་ཡང་དེ་བཞིན་དུ་ལས་རྣམས་གྲུབ་པར་འགྱུར་བ་ནི་ཞེས་བྱ་བ་ཟླ་བ་གཅིག་གི་བར་དུ་བསྙེན་པ་ཇི་ལྟ་བ་བཞིན་དུ་བྱ་ཞིང་། བཅོམ་

59-1-196b

ལྡན་འདས་ཀྱི་སྦྱོར་བ་ཇི་ལྟ་བ་བཞིན་དུ་བྱས་ནས། སྟོང་པ་ཉིད་ཀྱི་ཏིང་ངེ་འཛིན་མངོན་སུམ་དུ་བྱ་བར་འདོད་པས་ཆོས་ཐམས་ཅད་ནི་ནམ་མཁའ་དང་མཉམ་པའོ་ཞེས་བསྒོམ་ཞིང་། ཨ་ཞེས་བྱ་བ་བཟླས་བརྗོད་བྱས་ནས་དེ་ནས་འདིས་སྟོང་པ་ཉིད་ཀྱི་ཏིང་ངེ་འཛིན་ཐོབ་པར་འགྱུར་རོ། །མཚན་མ་མེད་པའི་
ཏིང་ངེ་འཛིན་ཐོབ་པ་ལ་ནི་ཞེས་བྱ་བ་ལ་སོགས་པ་ལ། མཚན་མ་མེད་པའི་ཏིང་ངེ་འཛིན་རྟོགས་པར་འདོད་པས་ཇི་སྐད་དུ་གསུངས་པའི་ཆོས་ཐམས་ཅད་ནི་མཚན་མ་དང་བྲལ་བའོ་ཞེས་བསྒོམ་པར་བྱའོ། །དེ་ནས་རྩེ་གཅིག་པ་ཐོབ་པ་དང་མཚན་མ་མེད་པའི་ཏིང་ངེ་འཛིན་ཐོབ་པར་འགྱུར་རོ། །
སྨོན་པ་མེད་པ་ཞེས་བྱ་བ་ལ་སོགས་པ་ལ། དེ་བཞིན་དུ་ཐམས་ཅད་བྱས་ལ། ཆོས་ཐམས་ཅད་རང་བཞིན་གྱིས་དག་པའོ་ཞེས་མཐར་སེམས་རྩེ་གཅིག་པ་ཐོབ་པས་སྨོན་པ་མེད་པའི་ཏིང་ངེ་འཛིན་ཐོབ་པར་འགྱུར་རོ། །རང་བཞིན་གྱིས་འོད་གསལ་བ་ཞེས་བྱ་བ་ལ་སོགས་པ་སྔ་མ་བཞིན་དུ་
ཐམས་ཅད་བྱས་ཏེ། ཆོས་ཐམས་ཅད་ནི་རང་བཞིན་གྱིས་འོད་གསལ་བའོ་ཞེས་བསྒོམ་ཞིང་། ཨ་ཞེས་བྱ་བ་བཟླས་ཏེ། ཇི་སྲིད་དེ་ལྟ་བུའི་རྣམ་པར་སེམས་རྩེ་གཅིག་པ་ཐོབ་པར་འགྱུར་བ་དེ་སྲིད་ཀྱི་བར་དུ་བསྒོམས་ན། རང་བཞིན་གྱིས་འོད་གསལ་བའི་ཡེ་ཤེས་འཐོབ་པར་འགྱུར་རོ། །ཉོན་མོངས་པ་
ཐམས་ཅད་གཅོད་པ་ལ་ནི་ཆོས་བསྒོམས་པས་སོ་ཞེས་བྱ་བ་ལ། ཉོན་མོངས་པ་ཐམས་ཅད་ནི་འདོད་ཆགས་ལ་སོགས་པའོ། །དེ་རྣམས་གཅོད་པ་ནི་སྤངས་པར་གྱུར་པའོ། །ཆོས་སོ་སོ་ཡང་དག་པར་རིག་པ་བསྒོམ་པ་ནི་ཆོས་བསྒོམ་པ་སྟེ། དེས་འདོད་ཆགས་ལ་སོགས་པ་སྤོང་བར་འགྱུར་
རོ། །ཡི་གེ་ཐམས་ཅད་ཀྱི་ངེས་པའི་ཚིག་གི་ཡེ་ཤེས་ནི་ངེས་པའི་ཚིག་སོ་སོ་ཡང་དག་པར་རིག་པའོ། །དེ་ཇི་ལྟར་འགྱུར་ཞེ་ན། སྤྲོས་པ་མེདཔའི་ཡེ་ཤེས་བསྒོམས་པས་སོ་ཞེས་བྱ་བ་གསུངས་ཏེ། ཆོས་ཐམས་ཅད་ནི་ངག་གི་ལམ་དང་བྲལ་བའོ་ཞེས་བསྒོམ་པ་ནི་སྤྲོས་པ་མེད་པའི་ཡེ་ཤེས་
བསྒོམ་པ་སྟེ། དེས་དེ་ཐོབ་པར་འགྱུར་བའོ། །གནས་ཐམས་ཅད་དུ་ཞེས་བྱ་བ་ལ་སོགས་པ་ལ། རྩིག་པ་དང་སྣམ་བུ་དང་ནམ་མཁའ་ལ་སོགས་པའི་གནས་ཐམས་ཅད་ལ། གཟུགས་ལ་སོགས་པའི་དངོས་པོ་དེ་བཞིན་ཉིད་དུ་སྟོན་པར་བྱེད་པའི་ཡི་གེ་ཆོས་ཐམས་ཅད་གདོད་མ་ནས་མ་སྐྱེས་

59-1-197a

པའི་ཕྱིར་ཨ་ནི་ཆོས་ཐམས་ཅད་ཀྱི་སྒོའོ་ཞེས་བྱ་བ་ལ་སོགས་པས་དེ་བཞིན་ཉིད་དུ་ཉེ་བར་དམིགས་ཤིང་ཆོས་ཀྱི་སྐུ་མཐོང་བའི་ཕྱིར་རོ། །དེ་ཇི་ལྟར་འགྱུར་ཞེ་ན། ཨ་ལ་སོགས་པའི་ཡི་གེའི་ངོ་བོ་ཉིད་བསྒོམས་པས་སོ་ཞེས་བྱ་བ་གསུངས་ཏེ། གདོད་མ་ནས་མ་སྐྱེས་
པའི་ཕྱིར་ཨ་ནི་ཆོས་ཐམས་ཅད་ཀྱི་སྒོའོ་ཞེས་བྱ་བ་ལ་སོགས་པ་བསྒོམ་པ་ནི། ཨ་ལ་སོགས་པའི་ཡི་གེ་ངོ་བོ་ཉིད་སྒོམ་པ་སྟེ། དེས་དེ་ཐོབ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་འཐོབ་པ་ལ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཏིང་ངེ་འཛིན་ཐོབ་པའོ། །དེ་ཇི་ལྟར་
འགྱུར་ཞེ་ན། རྡོ་རྗེ་རལ་གྲིའི་ཕྱག་རྒྱའོ་ཞེས་བྱ་བ་གསུངས་ཏེ། རྡོ་རྗེ་བསྡམས་པ་ལས་མཐེ་བོང་གཉིས་བཤིབས་ལ། མཛུབ་མོ་གཉིས་པདྨའི་འདབ་མ་ལྟར་བྱ་ཞིང་གུང་མོ་གཉིས་ཀྱི་ཚིགས་གསུམ་པ་བཀུག་ལ། རལ་གྲིར་བྱ་བ་འདི་ནི་རྡོ་རྗེ་རལ་གྲིའི་ཕྱག་རྒྱ་སྟེ། འདི་བཅིངས་ལ་ཆོས་
ཐམས་ཅད་ནི་ནམ་མཁའ་དང་མཉམ་པའོ་ཞེས་ཇི་སྲིད་ཤེས་རབ་ཀྱི་ཕ་རོལ་ཏུ་ཕྱིན་པའི་ཏིང་ངེ་འཛིན་ཐོབ་པར་འགྱུར་གྱི་བར་དུ་བསྒོམས་ན་དེས་དེ་འཐོབ་པར་འགྱུར་རོ། །འཁོར་ལོ་ཆེན་པོ་ལྟར་ཡི་གེ་བསྐོར་བའི་དམ་ཚིག་ཅེས་བྱ་བ་ལ། འཁོར་ལོ་ཡང་ཡིན་ལ་ཆེན་པོ་ཡང་ཡིན་པས་ན་འཁོར་ལོ་
ཆེན་པོ་སྟེ། གདུལ་བྱའི་སྐྱེ་བོའི་རྒྱུད་ལ་འཕོ་བའི་ཕྱིར། སྟོང་པ་ཉིད་དང་མཚན་མ་མེད་པ་དང་། སྨོན་པ་མེད་པ་དང་། རང་བཞིན་གྱིས་འོད་གསལ་བ་སྟེ། རྣམ་པར་ཐར་པའི་སྒོ་བཞི་ནི་འཁོར་ལོ་ཆེན་པོ་ཞེས་བྱ་བ་ལ། དེ་ལས་བྱུང་བའི་ཡི་གེ་ཨ་ར་པ་ཙ་ན་ལ་སོགས་པ་ལ་ཡང་། འཁོར་ལོ་ཆེན་
པོ་ལྟར་ཡི་གེ་བསྐོར་བ་ཞེས་བྱ་སྟེ། དེས་ཉེ་བར་མཚོན་པའི་དཀྱིལ་འཁོར་ནི་འཁོར་ལོ་ཆེན་པོ་ལྟར་ཡི་གེ་བསྐོར་བའི་དམ་ཚིག་ཅེས་བྱ་བ་ལ། མིང་དེ་སྐད་ཅེས་བྱ་བའི་རྟོག་པའི་རྒྱལ་པོ་ཆེན་པོ་རྫོགས་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུ་ལས་གསུངས་པའི་འཕགས་པ་འཇམ་
དཔལ་གཞོན་ནུར་གྱུར་པའི་རྟོག་པ་བཤད་པ་རྫོགས་སོ།།    །།དེ་ལྟར་འཕགས་པ་འཇམ་དཔལ་གྱི་རྟོག་པ་གསུངས་ནས་ད་ནི་རིགས་ཐམས་ཅད་ཀྱི་དཀྱིལ་འཁོར་དུ་འཇུག་པའི་རྒྱུར་གྱུར་པ་འཕགས་པ་རྡོ་རྗེ་འཁོར་ལོའི་རྟོག་པ་བཤད་པའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་

59-1-197b

ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟོན་པའི་ཚིག་སྟེ། སྔ་མ་བཞིན་དུ་བཅོམ་ལྡན་འདས་རྣམ་པར་སྣང་མཛད་འདོད་པའི་ཁམས་ཐམས་ཅད་ཀྱི་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་གནས་ན། ཇི་སྐད་དུ་བཤད་པའི་བྱང་ཆུབ་སེམས་དཔའ་འདི་དག་གིས་བསྐོར་ཅིང་
བཞུགས་པ་དང་། དེའི་རྗེས་ཐོགས་ཉིད་ལ་འཁོར་ལོ་ཆེན་པོ་ལ་འཇུག་པའི་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་
ལ་སོགས་པའི་དེ་བཞིན་གཤེགས་པ་རྣམས་དང་། སེམས་དཔའ་ཐམས་ཅད་དེ་དེ་བཞིན་གཤེགས་པ་ཐམས་ཅད་ལ་སོགས་པ་ནི། ཁམས་གསུམ་གྱི་ནང་དུ་གཏོགས་པ་རྣམས་སོ། །སེམས་དཔའ་ཐམས་ཅད་ནི་བཤད་མ་ཐག་པ་རྣམས་ཏེ། དེ་རྣམས་ཀྱི་འཁོར་ལོ་ནི་རྡོ་རྗེ་འཁོར་ལོའི་
དཀྱིལ་འཁོར་ཏེ། དེའི་ནང་དུ་འདུག་པ་ནི་དབུས་སུ་བཞུགས་པའོ། །དེ་བཞིན་གཤེགས་པ་ནི་རྣམ་པར་སྣང་མཛད་ལ་སོགས་པའོ། །འཕགས་པ་འཇམ་དཔལ་གྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ལྟོས་ནས། ཡང་ཞེས་བྱ་བའི་སྒྲ་སྨོས་སོ། །འཁོར་ལོ་ཆེན་པོ་ལ་འཇུག་པ་ཞེས་བྱ་བ་ནི་
བྱང་ཆུབ་ཀྱི་སེམས་དང་། སྦྱིན་པའི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནི་ཐམས་ཅད་དུ་བསྔོ་བ་ཡིན་པས་ན་འཁོར་ལོ་ཆེན་པོའོ། །དེ་ལ་འཇུག་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྟོགས་པ་སྟེ། མིང་དེ་སྐད་ཅེས་བྱ་བའི་ཤེས་
རབ་ཀྱི་ཕ་རོལ་ཏུ་ཕྱིན་པའི་ཚུལ་གང་ཡིན་པ་དེ་བཤད་པ་ནི་སྟོན་པར་མཛད་པའོ། །རྡོ་རྗེ་མཉམ་པ་ཉིད་ལ་འཇུག་པ་དང་། །ཞེས་བྱ་བ་ལ། རྡོ་རྗེ་ནི་དེ་བཞིན་གཤེགས་པ་དང་། དེ་བཞིན་གཤེགས་པའི་རིགས་རྣམས་དང་། བྱང་ཆུབ་ཀྱི་སེམས་དང་། མེ་ལོང་ལྟ་བུའི་ཡེ་ཤེས་དང་། རྣམ་པར་ཐར་པའི་
སྒོ་སྟོང་པ་ཉིད་དང་། སངས་རྒྱས་རྣམས་ཀྱི་ངོ་བོ་ཉིད་ཀྱི་སྐུའོ། །དེའི་མཉམ་པ་ཉིད་དུ་ནི་གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བ་ཉིད་དེ། ཀུན་རྫོབ་དང་དོན་དམ་པར་དབྱེར་མི་ཕྱེད་པའི་ངོ་བོ་ཉིད་དོ། །དེ་གཉིས་ཀའི་ངོ་བོ་ཉིད་ཀྱིས་གང་མཉམ་ཤིང་ཐབས་དང་ཤེས་རབ་ཀྱི་རང་བཞིན་

59-1-198a

གྱིས་གང་ཐོས་པ་དང་བསམ་པ་དང་། བསྒོམ་པ་རྣམས་ཀྱིས་རྟོགས་པར་གྱུར་པ་ནི་འཇུག་པའོ། །དེ་བཞིན་གཤེགས་པ་ཐམས་ཅད་ཀྱི་འཁོར་ལོ་འཇུག་པར་འགྱུར་རོ་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ནི་དེ་བཞིན་གཤེགས་པའི་རིགས་
ཀྱི་དཀྱིལ་འཁོར་རོ། །དེ་ལ་འཇུག་པ་ནི་ཕྱི་དང་གསང་བའི་ཚུལ་གྱིས་འཇུག་པ་སྟེ། དེ་ལ་ཕྱིའི་འཇུག་པ་ནི་ཇི་ལྟར་སྤྲུལ་པའི་དེ་བཞིན་གཤེགས་པའི་རིགས་ཀྱི་དཀྱིལ་འཁོར་དུ་འཇུག་པའི་ཕྱག་རྒྱ་བཅིངས་ལ། གདུལ་བྱ་རྣམས་རྡོ་རྗེ་སེམས་དཔར་གང་ཞིག་མཛད་པའོ། །གསང་
བའི་འཇུག་པ་ནི་བཅོམ་ལྡན་འདས་རྡོ་རྗེ་སེམས་དཔས་མཛད་པ་ཕྱིའི་འཇུག་པ་དེ་ཉིད་དུ་གང་ཡེ་ཤེས་དབབ་པ་དང་དེ་ཁོ་ན་ཉིད་བཅུ་རྟོགས་པའི་བདག་ཉིད་ཅན་དེ་ནི་གསང་བའི་འཇུག་པ་སྟེ། དེའི་དོན་དུ་རྡོ་རྗེ་མཉམ་པ་ཉིད་ལ་འཇུག་པའི་རྒྱུའི་དངོས་པོར་གནས་ཤིང་བསྒྲུབ་པར་འགྱུར་
རོ། །དོན་གྱི་མཉམ་པ་ཉིད་ལ་འཇུག་པ་ཞེས་བྱ་བ་ལ། དོན་ནི་རིན་པོ་ཆེའི་རིགས་དང་། སྦྱིན་པའི་ཕ་རོལ་ཏུ་ཕྱིན་པ་དང་། མཉམ་པ་ཉིད་ཀྱི་ཡེ་ཤེས་དང་། རྣམ་པར་ཐར་པའི་སྒོ་མཚན་མ་མེད་པ་དང་། དེ་བཞིན་གཤེགས་པ་རྣམས་ཀྱི་རྣམ་པར་སྨིན་པའི་སྐུའོ། །དེའི་མཉམ་པ་ཉིད་ལ་
འཇུག་པ་ནི། ཇི་སྐད་དུ་བཤད་པའི། བྱང་ཆུབ་སེམས་དཔའ་ཆེན་པོའི་འཁོར་ལོ་དང་། རིན་པོ་ཆེའི་རིགས་དེ་ལ་ཕྱི་དང་གསང་བའི་འཇུག་པ་ཇི་སྐད་དུ་བཤད་པ་སྟེ། དེའི་དོན་དུ་འཇུག་པར་འགྱུར་བ་ནི། ཇི་ལྟར་སྤྲུལ་པའི་རིན་པོ་ཆེའི་རིགས་ཀྱི་དཀྱིལ་འཁོར་དུ་བཅོམ་ལྡན་འདས་ནམ་
མཁའི་སྙིང་པོའི་སློབ་དཔོན་གྱིས་གདུལ་བྱ་རྣམས་གང་འཇུག་པར་བྱ་བའི་དོན་ཏེ་དེ་ནི་དོན་གྱི་མཉམ་པ་ཉིད་རྟོགས་པའི་རྒྱུར་འགྱུར་རོ་ཞེས་བྱ་བའི་དོན་ཏོ། །ཆོས་ཐམས་ཅད་མཉམ་པ་ཉིད་ལ་འཇུག་པ་ནི་ཞེས་བྱ་བ་ལ། ཆོས་ནི་པདྨའི་རིགས་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། 
སོ་སོར་རྟོག་པའི་ཡེ་ཤེས་དང་། རྣམ་པར་ཐར་པའི་སྒོ་སྨོན་པ་མེད་པ་དང་། དེ་བཞིན་གཤེགས་པ་རྣམས་ཀྱི་ལོངས་སྤྱོད་རྫོགས་པའི་སྐུའོ། །དེའི་མཉམ་པ་ཉིད་ནི་རང་བཞིན་གྱིས་རྣམ་པར་དག་པ་དང་། མི་ཕྱེད་པ་ཉིད་དེ་འཇུག་པ་ནི་དེ་རྟོགས་པའོ། །དམ་པའི་ཆོས་ཀྱི་འཁོར་ལོ་

59-1-198b

ནི་པདྨའི་རིགས་ཀྱི་དཀྱིལ་འཁོར་རོ། །དེ་ལ་འཇུག་པ་ནི་ཇི་སྐད་དུ་བཤད་པའི་བཅོམ་ལྡན་འདས་འགྲོ་བ་འདུལ་བས་གདུལ་བྱ་རྣམས་ལ་གང་ཞིག་མཛད་པ་སྟེ། དེའི་དོན་དུ་ཆོས་ཐམས་ཅད་ཀྱི་མཉམ་པ་ཉིད་ལ་འཇུག་པའི་རྒྱུར་འགྱུར་རོ། །ཐམས་ཅད་ཀྱི་མཉམ་པ་ཉིད་ལ་འཇུག་པ་ནི་ཞེས་བྱ་
བ་ལ་སོགས་པ་ལ། ཐམས་ཅད་ནི་ལས་ཀྱི་རིགས་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བྱ་བ་གྲུབ་པའི་ཡེ་ཤེས་དང་། རྣམ་པར་ཐར་པའི་སྒོ་རང་བཞིན་གྱིས་འོད་གསལ་བ་དང་། དེ་བཞིན་གཤེགས་པ་རྣམས་ཀྱི་སྤྲུལ་པའི་སྐུའོ། །དེའི་མཉམ་པ་ཉིད་ནི་རང་བཞིན་གྱིས་
འོད་གསལ་བའི་ངོ་བོ་ཉིད་དང་། མི་ཕྱེད་པ་སྟེ། དེ་རྟོགས་པ་ནི་འཇུག་པའོ། །འཁོར་ལོ་ཐམས་ཅད་ནི་ལས་ཀྱི་དཀྱིལ་འཁོར་དུ་གང་དེ་བཞིན་གཤེགས་པ་རྣམས་ཀྱི་སྤྲུལ་པའོ། །དེར་འཇུག་པ་ནི་ཇི་སྐད་དུ་གསུངས་པའི་བཅོམ་ལྡན་འདས་རྡོ་རྗེ་ལས་ཀྱིས་གདུལ་བྱ་རྣམས་ལ་གང་ཞིག་
མཛད་པའོ། །དེའི་དོན་དུ་ནི་ཐམས་ཅད་ཀྱི་མཉམ་པ་ཉིད་ལ་འཇུག་པའི་རྒྱུར་འགྱུར་བའོ་ཞེས་བྱ་བའི་དོན་ཏོ། །དེ་ལྟར་ན་བཅོམ་ལྡན་འདས་ཞེས་བྱ་བ་ནས་བརྩམས་ཏེ་འཁོར་ལོ་ཐམས་ཅད་ལ་འཇུག་པར་འགྱུར་རོ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་དང་པོ་གསུངས་པ་ཡིན་ནོ། །
ད་ནི་དེ་ནས་ཞེས་བྱ་བ་ལ་སོགས་པས་ཏིང་ངེ་འཛིན་གཉིས་པ་གསུངས་པ་ཡིན་ཏེ། དེ་ལྟར་བཅོམ་ལྡན་འདས་རྣམ་པར་སྣང་མཛད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་འཁོར་ལོ་ལ་རང་གི་དཀྱིལ་འཁོར་སྤྲུལ་པར་བྱ་བའི་ཕྱིར་དང་། ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པའི་
ཕྱིར་བསྐུལ་བ་དང་། དེའི་རྗེས་ཐོགས་ཉིད་ལ་དཀྱིལ་འཁོར་སྤྲུལ་པར་བྱ་བའི་ཕྱིར་སྙིང་པོ་ནི་སྨྲས་པའོ། །རྡོ་རྗེ་འཁོར་ལོ་ཞེས་བྱ་བ་ནི། རྡོ་རྗེ་རྩེ་གཅིག་པའི་དབྱིབས་ཀྱི་རྩིབས་བརྒྱད་དང་ལྡན་པའི་རྡོ་རྗེ་ནི་རྡོ་རྗེ་འཁོར་ལོའོ། །བསྐོར་བ་ནི་ལག་པ་གཡས་པའི་གུང་མོའི་སྟེང་དུ་བསྐོར་བའོ། །
འཁོར་ལོ་ཐམས་ཅད་ནི་རིགས་ཐམས་ཅད་ཀྱི་དཀྱིལ་འཁོར་རྣམས་སོ། །དེ་རྣམས་ལ་འཇུག་པ་ནི། ཇི་སྐད་དུ་བཤད་པའི་ཕྱི་དང་གསང་བའི་ངོ་བོ་ཉིད་དེ། དེའི་དོན་གྱི་དམ་ཚིག་ནི་རྒྱུའོ། །འདི་ཞེས་བྱ་བ་ནི་བློ་ལ་བཞག་ནས་སྨྲས་པའོ། །སྨྲས་སོ་ཞེས་བྱ་བ་ནི་མིང་དེ་སྐད་ཅེས་བྱ་

59-1-199a

བའི་སྙིང་པོ་གསུངས་པ་ནི། ཧཱུྃ་ཞེས་བྱ་བའོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་རྡོ་རྗེ་འཁོར་ལོས་ཧཱུྃ་ཞེས་བྱ་བ་འདི་གསུངས་པ་ཙམ་གྱིས་བཅོམ་ལྡན་འདས་རྣམ་པར་སྣང་མཛད་ལ་སོགས་པ་གང་ཕྱོགས་བཅུའི་དེ་བཞིན་གཤེགས་པ་དེ་དག་ལ་
སོགས་པ་འདོད་པ་དང་། གཟུགས་དང་གཟུགས་མེད་པའི་མཚན་ཉིད་ཅན་གྱི་ཁམས་གསུམ་གྱི་ནང་དུ་གཏོགས་པའི་སྐལ་བ་ཇི་ལྟ་བ་དང་ལྡན་པའི་སེམས་ཅན་ཐམས་ཅད་དཀྱིལ་འཁོར་ཐམས་ཅད་དུ་ཞེས་པ་འཁོར་ལོའི་དཀྱིལ་འཁོར་གྱི་ནང་དུ་ཞུགས་ནས། བཅོམ་ལྡན་འདས་
སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་ཐུགས་ལས་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ལ་སོགས་པ་དཀྱིལ་འཁོར་ཐམས་ཅད་ཀྱི་དམ་ཚིག་སེམས་དཔའ་རྣམས་ཞེས་པ་འཁོར་ལོའི་དཀྱིལ་འཁོར་པའི་བྱང་ཆུབ་སེམས་དཔའ་རྣམས་བྱུང་ནས། དཀྱིལ་
འཁོར་གྱི་ཚུལ་གྱིས་ཇི་ལྟ་བ་བཞིན་དུ་བཞུགས་སོ། །དེ་ལྟར་ན། དེ་ནས་ཞེས་བྱ་བ་ནས་བརྩམས་ཏེ་བཞུགས་སོ་ཞེས་བྱ་བའི་བར་གྱི་བཤད་པས་ནི། དཀྱིལ་འཁོར་གྱི་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་པ་ནས་བརྩམས་ཏེ་གསུམ་པ་ཡིན་པར་ཤེས་
པར་བྱའོ། །ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པར་བྱའོ་ཞེས་བྱ་བ་འདིའི་ཆོ་ག་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །
དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་ནི་གོ་སླའོ། །དཀྱིལ་འཁོར་ཐམས་ཅད་ལ་རབ་ཏུ་འཇུག་པ་ཞེས་བྱ་བ་ལ། རིགས་ཐམས་ཅད་ཀྱི་དཀྱིལ་འཁོར་གྱི་འཁོར་ལོ་ཐམས་ཅད་དེ། དེ་རྣམས་ལ་ཞུགས་པ་ནི་ཇི་སྐད་དུ་བཤད་པའོ། །དེའི་དོན་གྱི་ཕྱག་རྒྱ་ནི་འཁོར་ལོའི་དཀྱིལ་འཁོར་ཏེ། དེ་ལ་
དམིགས་པའི་མིང་དེ་སྐད་ཅེས་བྱ་སྟེ། འཁོར་ལོ་ཐམས་ཅད་ལ་རབ་ཏུ་འཇུག་པའི་ཕྱག་རྒྱ་ཞེས་བྱ་བའི་ཏིང་ངེ་འཛིན་དེ་ལ་སྙོམས་པར་ཞུགས་པའོ། །དཀྱིལ་འཁོར་ཆེན་པོ་ཐམས་ཅད་ཅེས་བྱ་བ་ལ། དཀྱིལ་འཁོར་ཆེན་པོ་ཐམས་ཅད་ནི་དེ་བཞིན་གཤེགས་པ་ལ་སོགས་པ་རིགས་ཐམས་ཅད་ཀྱི་

59-1-199b

དཀྱིལ་འཁོར་ཏེ། དེར་འཇུག་པར་བྱ་བའི་ཕྱིར་དེའི་དམ་ཚིག་ནི་རྒྱུའོ། །མིང་དེ་སྐད་ཅེས་བྱ་བའི་འཁོར་ལོའི་དཀྱིལ་འཁོར་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་རྡོ་རྗེ་འཁོར་ལོའི་འཁོར་ལོས་མཚོན་པའི་དཀྱིལ་འཁོར་འོག་ནས་བཤད་པ་འདི་གསུངས་པས་སོ། །ཕྱིའི་དཀྱིལ་འཁོར་
ཇི་ལྟ་བ་བཞིན་དུ་བྱས་ཏེ་ཞེས་བྱ་བ་ནི་རྡོ་རྗེ་སེམས་དཔའི་ཕྱིའི་དཀྱིལ་འཁོར་དང་འདྲ་བར་བྲི་བར་བྱའོ། །ནང་གི་དཀྱིལ་འཁོར་དུ་རྡོ་རྗེའི་དཀྱིལ་འཁོར་བྲིས་ལ་ཞེས་བྱ་བ་ནི། དཀྱིལ་འཁོར་འདིའི་ནང་དུ་དཀྱིལ་འཁོར་བརྒྱད་པ་དང་འདྲ་བར་དཀྱིལ་འཁོར་བྲི་བའོ། །དབུས་སུ་རྡོ་རྗེ་འཁོར་ལོ་ལ་
རྡོ་རྗེ་འཁོར་ལོ་བསྐོར་བ་གཞག་པར་བྱའོ་ཞེས་བྱ་བ་ནི། དཀྱིལ་འཁོར་གྱི་ལྟེ་བ་ལས། བཅོམ་ལྡན་འདས་བྱང་ཆུབ་སེམས་དཔའ་རྡོ་རྗེ་འཁོར་ལོ་ཇི་སྐད་དུ་བཤད་པའི་རྡོ་རྗེའི་འཁོར་ལོ་རྩིབས་བརྒྱད་པ། ཕྱག་གཡས་པའི་གུང་མོའི་རྩེ་མོ་ལ་ཡོངས་སུ་བསྐོར་བ་བཞག་པར་བྱའོ། །ཕྱག་ན་
རྡོ་རྗེ་ཞེས་བྱ་བ་ལ་སོགས་པ་ལ་བཅོམ་ལྡན་འདས་བྱང་ཆུབ་སེམས་དཔའ་རྡོ་རྗེ་འཁོར་ལོ་དེའི་ཕྱོགས་དང་མཚམས་རྣམས་སུ་སྔ་མ་བཞིན་དུ་ཕྱག་ན་རྡོ་རྗེ་ནས་བརྩམས་ཏེ། རྡོ་རྗེ་གནོད་སྦྱིན་གྱི་བར་གྱི་བྱང་ཆུབ་སེམས་དཔའ་རྣམས་དཀྱིལ་འཁོར་དང་པོའི་ཚུལ་དུ་ཞེས་པ་རྡོ་རྗེ་སེམས་དཔའི་
དཀྱིལ་འཁོར་གྱི་ཚུལ་དུ་གཞག་པར་བྱ་ཞིང་བཞུགས་སུ་གསོལ་བར་བྲི་བར་བྱའོ། །ཕྱིའི་མཚམས་རྣམས་སུ་རྡོ་རྗེའི་རིགས་ཀྱི་དཀྱིལ་འཁོར་བཞི་བྲི་བར་བྱའོ་ཞེས་བྱ་བ་ནི་ཕྱིའི་རྡོ་རྗེའི་རིགས་ཀྱི་དཀྱིལ་འཁོར་རྣམས་ཏེ། ཞི་བ་མདུང་གིས་མཚན་པ་དང་། མིང་པོ་གསུམ་དང་། སྲིང་མོ་བཞི་
དང་། མ་མོ་རྣམས་ཀྱི་དཀྱིལ་འཁོར་རིམ་པ་ཇི་ལྟ་བ་བཞིན་དུ་ཤར་ལྷོའི་མཚམས་ནས་བརྩམས་ཏེ། བསྐོར་ཕྱོགས་ཀྱི་རིམ་པས་བྱང་ཤར་མཚམས་ཀྱི་བར་དུ་བྲི་བར་བྱའོ། །སྒོ་རྣམས་སུ་མཚན་མ་བཞི་གཞག་པར་བྱའོ་ཞེས་བྱ་བ་ནི་གོ་བར་ཟད་དོ། །དེ་ནས་རྡོ་རྗེ་འཁོར་ལོའི་ཕྱག་རྒྱས་ཇི་ལྟ་བ་
བཞིན་དུ་དཀྱིལ་འཁོར་ཐམས་ཅད་དུ་སངས་རྒྱས་ཉིད་དང་རྡོ་རྗེ་འཛིན་པ་ཉིད་འགྲུབ་པར་འགྱུར་རོ་ཞེས་བྱ་བ་ནི། རྡོ་རྗེ་ཁུ་ཚུར་གཉིས་བཅིངས་ལ། མཛུབ་མོ་དང་མཐེའུ་ཆུང་གཉིས་རྡོ་རྗེ་བཅིང་བ་ནི་རྡོ་རྗེ་འཁོར་ལོའི་ཕྱག་རྒྱ་སྟེ། དེ་དང་སྔར་བཤད་པའི་ཚུལ་གྱིས་དཀྱིལ་འཁོར་དུ་ཞུགས་ན། དཀྱིལ་

59-1-200a

འཁོར་ཐམས་ཅད་འགྲུབ་པར་འགྱུར་ལ། དཀྱིལ་འཁོར་ཐམས་ཅད་འགྲུབ་པ་དེས་སྒྲུབ་པ་པོས་སངས་རྒྱས་ཉིད་དམ། རྡོ་རྗེ་འཛིན་པ་ཉིད་འགྲུབ་པར་འགྱུར་རོ། །དེ་ནས་འཁོར་ལོ་བླངས་ལ་ཞེས་བྱ་བ་ནི་ཧཱུྃ་ཞེས་བྱ་བ་ཟློས་ཤིང་། བཅོམ་ལྡན་འདས་ལ་འཁོར་ལོ་ནོད་པའོ། །
འཁོར་ལོའི་མིང་གི་དབང་བསྐུར་བ་བླང་བར་བྱ་ཞིང་ཞེས་བྱ་བ་ནི། འཁོར་ལོ་མགོ་ལ་བཞག་ལ་ཧཱུྃ་ཀྱེ་རྡོ་རྗེ་འཁོར་ལོ་ཞེས་བྱ་བ་ལ་སོགས་པ་འཁོར་ལོའི་མིང་གི་དབང་བསྐུར་བ་བླང་བར་བྱའོ། །དེ་ནས་ཆོ་ག་ཐམས་ཅད་རྗེས་སུ་སྤྱད་ལ། དཀྱིལ་འཁོར་ཐིག་བཞི་བཏབ་པའི་རིགས་རྣམས་
སུ་འཇུག་པར་བྱའོ་ཞེས་བྱ་བ་ནི་ཞི་བ་མདུང་ཐུང་གིས་མཚན་པ་ལ་སོགས་པ་བཞི་རྣམས་ཀྱང་ཇི་ལྟ་བ་བཞིན་དུ་བྲིས་ལ། ཞི་བ་མདུང་གིས་མཚན་པ་ལ་སོགས་པའི་དཀྱིལ་འཁོར་དུ་འཇུག་པའི་ཆོ་ག་ཉིད་ཀྱིས་འཇུག་པར་བྱའོ། །སློབ་མ་རྣམས་གཞུག་པ་ཡང་དེ་བཞིན་ནོ་ཞེས་བྱ་བ་ནི་ཇི་ལྟར་
འདིར་སློབ་དཔོན་འཇུག་པ་ལ་སོགས་པའི་ཆོ་ག་གསུངས་པ་སློབ་མ་རྣམས་ལ་ཡང་དེ་བཞིན་དུ་ཤེས་པར་བྱའོ། །འཁོར་ལོའི་དཀྱིལ་འཁོར་རོ་ཞེས་བྱ་བ་ནི། རྡོ་རྗེ་མཉམ་པ་ཉིད་ལ་འཇུག་པ་ལ་སོགས་པ་གདུལ་བྱའི་སྐྱེ་བོ་རྣམས་ཀྱི་རྒྱུད་ལ་འཕོ་བར་བྱེད་པའི་དོན་གྱིས་ན་འཁོར་ལོ་སྟེ། དེ་
ལས་བྱུང་བའི་བཅོམ་ལྡན་འདས་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་དཀྱིལ་འཁོར་ལ་ཡང་འཁོར་ལོའི་དཀྱིལ་འཁོར་ཞེས་བྱའོ། །འདི་སྐད་སྟོན་པར་འགྱུར་ཏེ། བཅོམ་ལྡན་འདས་རྡོ་རྗེ་འཁོར་ལོའི་སྦྱོར་བས་རྣལ་འབྱོར་ཆེན་པོ་བྱས་ལ། ཏིང་ངེ་འཛིན་གསུམ་བསྒོམ་པ་
ནས་བརྩམས་ཏེ། ཇི་སྲིད་དུ་མངོན་སུམ་དུ་མཐོང་བར་གྱུར་གྱི་བར་དུ་དཀྱིལ་འཁོར་འདི་བསྒོམ་པར་བྱའོ། །དེ་ནས་ཇི་སྐད་དུ་བཤད་པའི་དཀྱིལ་འཁོར་གྱི་དབུས་སུ་ཏིང་ངེ་འཛིན་གསུམ་བསྒོམས་ལ། བར་སྣང་གི་ཕྱོགས་སུ་སྔ་མ་བཞིན་དུ་བཞག་སྟེ། ཉི་མ་འཆར་བའི་དུས་སུ་ཐིག་གདབ་
པར་བྱའོ། །འདིའི་ཕྱིའི་དཀྱིལ་འཁོར་ནི་རྡོ་རྗེ་སེམས་པའི་དཀྱིལ་འཁོར་དང་འདྲ་བར་བྱའོ། །འདིའི་ནང་དུ་ནི་དེའི་ཕྱེད་ཀྱི་ཚད་ཀྱི་ཟླུམ་པོ་རྡོ་རྗེ་ཕྲེང་བའི་རང་བཞིན་གྱི་དཀྱིལ་འཁོར་རྡོ་རྗེ་ཀ་བ་བརྒྱད་དང་ལྡན་པར་ཐིག་གདབ་པར་བྱའོ། །དེ་ནས་ཐམས་ཅད་ཇི་ལྟ་བ་བཞིན་དུ་བྲིས་ལ་ལྷ་ཐམས་

59-1-200b

ཅད་ཀྱི་གནས་སུ་སྣ་ཚོགས་པདྨའི་གདན་བྲི་བར་བྱའོ། །དེ་ནས་དཀྱིལ་འཁོར་དབུས་མའི་ལྟེ་བའི་ཕྱོགས་སུ་བཅོམ་ལྡན་འདས་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་གསེར་གྱི་མདོག་ཅན། ཇི་སྐད་དུ་བཤད་པའི་སྣ་ཚོགས་པདྨའི་གདན་ལ། སེམས་དཔའི་སྐྱིལ་མོ་ཀྲུང་གིས་
བཞུགས་པ། སངས་རྒྱས་ལྔའི་དབུ་རྒྱན་དང་། དར་དཔྱངས་ཀྱི་དབང་བསྐུར་བ། ཕྱག་གཡས་ན་སྔ་མ་བཞིན་དུ་རང་གི་སྙིང་གའི་ཕྱོགས་སུ་རྡོ་རྗེ་འཁོར་ལོ་རྩིབས་བརྒྱད་པས་ཡོངས་སུ་བསྐོར་བ་ཕྱག་གཡོན་པས་གདན་ལ་བསྙེམས་ཏེ་བཞུགས་པ། སྤྱན་རབ་ཏུ་གདངས་ཤིང་
རྣམ་པར་བྱེ་བ་བྲི་བར་བྱའོ། །དེའི་ཤར་ཕྱོགས་ཀྱི་ཆ་ལ་རྡོ་རྗེ་ཡིད་ལས་བྱུང་བའི་གནས་སུ་ཕྱག་ན་རྡོ་རྗེ་སྔར་བཤད་པའི་མཚན་ཉིད་དང་ལྡན་པ། ཤར་ལྷོའི་མཚམས་སུ་འཇམ་དཔལ་གཞོན་ནུ། ལྷོར་ཀཱི་ལི་ཀཱི་ལའི་གནས་སུ་ནམ་མཁའི་སྙིང་པོ། ལྷོ་ནུབ་མཚམས་སུ་ནམ་མཁའི་མཛོད། ནུབ་
ཏུ་རྡོ་རྗེ་དྲན་པའི་གནས་སུ་འཇིག་རྟེན་དབང་ཕྱུག །ནུབ་བྱང་མཚམས་སུ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ། བྱང་དུ་རྡོ་རྗེ་བསྙེམས་པའི་གནས་སུ་རྡོ་རྗེ་ཁུ་ཚུར། བྱང་ཤར་མཚམས་སུ་རྡོ་རྗེ་གནོད་སྦྱིན་བྲི་བར་བྱའོ། །ཡང་ཤར་ཕྱོགས་ཀྱི་སྒོའི་དབུས་སུ་རྡོ་རྗེ་སེམས་དཔའ། 
ལྷོར་རྡོ་རྗེ་ཧཱུྃ་མཛད། ནུབ་ཏུ་འཇིག་རྟེན་དབང་ཕྱུག །བྱང་དུ་ནམ་མཁའི་སྙིང་པོ་བྲི་བར་བྱའོ། །ཡང་ཕྱིའི་དཀྱིལ་འཁོར་གྱི་ལྷའི་སྣམ་བུའི་ཤར་ལྷོའི་མཚམས་སུ་ཞི་བ་མདུང་གིས་མཚན་པའི་དཀྱིལ་འཁོར། ལྷོ་ནུབ་མཚམས་སུ་མིང་པོ་གསུམ་གྱི་དཀྱིལ་འཁོར། ནུབ་བྱང་མཚམས་སུ་སྲིང་
མོ་བཞིའི་དཀྱིལ་འཁོར། བྱང་ཤར་མཚམས་སུ་མ་མོའི་དཀྱིལ་འཁོར་མཚན་ཉིད་ཇི་སྐད་དུ་བཤད་པ་བཞིན་དུ་བྲི་བར་བྱའོ། །འདིར་ལྷ་ཐམས་ཅད་ཀྱི་སྙིང་པོ་ནི་ཧཱུྃ་ཞེས་བྱ་བ་ཡིན་ནོ། །དེ་ལྟར་དཀྱིལ་འཁོར་བྲིས་ནས་དེ་བཞིན་དུ་རྣལ་འབྱོར་ཆེན་པོ་བྱས་ལ། རྡོ་རྗེ་འཁོར་ལོའི་དམ་ཚིག་གི་
ཕྱག་རྒྱ་ཡོངས་སུ་བཟུང་བའི་རྡོ་རྗེ་འཁོར་ལོ་དང་བཅས་པའི་མེ་ཏོག་གི་ཡལ་ག་ལས་བུམ་པ་ཐམས་ཅད་དང་། བུམ་པ་གང་བ་རྣམས་ལ་ཧཱུྃ་ཞེས་བྱ་བ་རེ་རེ་ཞིང་ལན་བརྒྱ་རྩ་བརྒྱད་བཟླས་ལ། དཀྱིལ་འཁོར་གྱི་སྒོ་བཞི་ཕྱེ་ནས། རྡོ་རྗེ་བསྡུ་བ་བྱས་ལ། བཅོམ་ལྡན་འདས་ཀྱི་ཕྱག་རྒྱ་ཆེན་པོ་བསྒོམ་

59-1-201a

ཞིང་། བཅོམ་ལྡན་འདས་ལ་མཚན་བརྒྱ་རྩ་བརྒྱད་པས་ཡང་དག་པར་བསྟོད་དེ། གསང་བའི་ལྕགས་ཀྱུ་དང་། ཧཱུྃ་ཞེས་བྱ་བས་བཅོམ་ལྡན་འདས་འཁོར་དང་བཅས་པ་དཀྱིལ་འཁོར་དུ་བཅུག་ལ། རྡོ་རྗེ་གནོད་སྦྱིན་གྱིས་བགེགས་བསལ་ཏེ། མཚམས་བཅིང་
བ་དང་། དཀྱིལ་འཁོར་བཅིང་བ་དང་། དྲ་བ་དང་། ར་བ་དག་བྱས་ཏེ། རྡོ་རྗེ་ཁུ་ཚུར་གྱིས་སྒོ་བཅིངས་ལ། རྡོ་རྗེ་སྲུང་བས་བསྲུང་བ་ཐམས་ཅད་གོ་བསྐོན་ཏེ། ཧཱུྃ་ཞེས་བྱ་བས་མཆོད་ཡོན་ཕུལ་ལ། དམ་ཚིག་གི་ཕྱག་རྒྱ་དང་། ཧཱུྃ་དྲྀ་ཤྱ་ཞེས་བྱ་བས་འཁོར་དང་བཅས་པ་བལྟ་བར་བྱ་སྟེ། ཛཿ
ཧཱུྃ་བཾ་ཧོཿ ས་མ་ཡ་སྟྭཾ། ས་མ་ཡ་སྟྭཾ། ཨ་ཧཾ་ཧཱུྃ་ཞེས་ལན་གསུམ་བརྗོད་ལ་བསྒྲུབ་པར་བྱའོ། །དེ་ནས་རྡོ་རྗེ་འཁོར་ལོའི་ཇི་སྐད་དུ་གསུངས་པའི་དམ་ཚིག་གི་ཕྱག་རྒྱ་ནི་ཐམས་ཅད་ཀྱི་དམ་ཚིག་གི་སྦྱོར་བ་སྟེ། ཧཱུྃ་ཞེས་བྱ་བ་དང་། རང་གི་སྙིང་གར་རྡོ་རྗེ་རྩེ་ལྔ་པ་བསམ་པར་བྱའོ། །དེ་ནས་ལྷ་
ཐམས་ཅད་ཀྱི་ལྗགས་ལ་ཧཱུྃ་ཞེས་བྱ་བ་ཇི་ལྟ་བ་བཞིན་དུ་བསམས་པ་འདི་ནི་ལྷ་ཐམས་ཅད་ཀྱི་ཆོས་ཀྱི་ཕྱག་རྒྱའོ། །རང་གི་སྙིང་གར་ཨ་ལས་སྣ་ཚོགས་རྡོ་རྗེ་རྣམ་པར་བསམས་ལ། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ལ་སོགས་པའི་ལས་ཀྱི་ཕྱག་རྒྱ་ཡང་དེ་བཞིན་དུ་
བཅིང་བར་བྱ། ཕྱི་རོལ་གྱི་རྡོ་རྗེའི་རིགས་རྣམས་ཀྱང་གར་ལས་འབྱུང་བའི་འོག་ནས་བཤད་པའི་ཕྱག་རྒྱ་ཆེན་པོ་ནི་ལས་ཀྱི་ཕྱག་རྒྱ་ཡིན་པར་ཤེས་པར་བྱའོ། །ཡང་ཧཱུྃ་ལས་རང་གི་སྙིང་གར་རྡོ་རྗེ་རྩེ་ལྔ་པ་བསམས་ལ། ཧཱུྃ་ཞེས་བྱ་བས་ཇི་ལྟར་བྲིས་པའི་རྗེས་སུ་འབྲངས་ཏེ་བཅོམ་ལྡན་འདས་
འཁོར་དང་བཅས་པའི་ཕྱག་རྒྱ་ཆེན་པོ་བཅིང་བར་བྱ་སྟེ། དེ་ནས་སངས་རྒྱས་ལྔའི་དབུ་རྒྱན་གྱི་ཕྱག་རྒྱས་བཅོམ་ལྡན་འདས་འཁོར་དང་བཅས་པས་དབང་བསྐུར་ཞིང་ཕྱི་རོལ་གྱི་རྡོ་རྗེའི་རིགས་རྣམས་ནི་རང་གི་དབང་བསྐུར་བས་དབང་བསྐུར་བར་བྱའོ། །དེ་ནས་བཅོམ་ལྡན་འདས་འཁོར་
དང་བཅས་པ་ལ་ཧཱུྃ་ཞེས་བྱ་བས་མཆོད་ཡོན་ཕུལ་ཏེ། བུམ་པ་རྣམས་དང་། བུམ་པ་གང་བ་རྣམས་དང་ན་བཟའ་དང་། བླ་རེ་ལ་སོགས་པ་ཡང་བཅོམ་ལྡན་འདས་འཁོར་དང་བཅས་པ་ལ་ཕུལ་ཏེ། མཆོད་པ་རྣམ་པ་ལྔས་མཆོད་ལ། ཕྱི་རོལ་དུ་གླུ་དང་གར་དང་རོལ་མོ་དང་། རྟ་དང་གླང་པོ་ཆེ་

59-1-201b

དང་བ་ལང་གི་ཁྱུ་རྣམས་ཀྱིས་ཀྱང་མཆོད་པ་བྱེད་དུ་གཞུག་གོ། །དེ་ནས་ཕྱག་རྒྱའི་མཆོད་པ་རྣམ་པ་བཅུ་གཉིས་ཀྱིས་ཡང་དག་པར་མཆོད་ཅིང་། ཨོཾ་ལས་རིན་པོ་ཆེ་སྣ་བདུན་དང་། དཔག་བསམ་གྱི་ཤིང་དང་། ཁ་ཟས་རོ་བརྒྱ་པ་ལ་སོགས་པའི་བཀོད་པ་སྤྲུལ་ལ་འདིས་དབུལ་བར་བྱའོ། །
ཕྱག་འཚལ་བའི་ཐལ་མོ་སྦྱར་བ་སྤྱི་བོར་བཞག་ལ། ཨོཾ་སརྦ་བིཏྤཱུ་པཱུ་ར། སུ་ར་སུ་ར། ཨཱ་བརྟ་ཡ། ཨཱ་བརྟ་ཡ་ཧོཿ་ཞེས་བརྗོད་དོ། །དེ་ནས་ཕྱི་རོལ་དུ་གཏོར་མ་བྱིན་ལ། སྦྱིན་སྲེག་བྱས་ནས། ཤིན་ཏུ་དམར་བའི་རས་ལ་རྡོ་རྗེ་གནོད་སྦྱིན་གྱིས་ཡོངས་སུ་བཟླས་ལ། གཅིག་གིས་སྨད་གཡོགས་
བྱས། གཉིས་པས་སྟོད་གཡོགས་བྱའོ། །ཡང་གཅིག་ལ་རྡོ་རྗེ་ལྕགས་ཀྱུ་ལ་སོགས་པའི་སྙིང་པོ་བཟླས་ལ། དེས་རང་གི་གདོང་གཡོགས་ནས། ཕྱག་འཚལ་བ་ལ་སོགས་པ་སྔོན་དུ་འགྲོ་བས་དེ་བཞིན་དུ་སྡོམ་པ་བླངས་ལ། བྱང་ཆུབ་ཏུ་སེམས་བསྐྱེད་ཅིང་སྔ་མ་བཞིན་དུ་རང་གི་
སྙིང་གར་རྡོ་རྗེ་བསྐྱེད་ལ། ཤར་ཕྱོགས་ཀྱི་སྐོར་བལྟས་ནས་ཕྱི་རོལ་ན་གནས་པའི་བུམ་པའི་ཆུས་བདག་ཉིད་དབང་བསྐུར་ཏེ། རྡོ་རྗེ་འཁོར་ལོའི་ཕྱག་རྒྱ་ཇི་སྐད་དུ་གསུངས་པ་བཅིངས་ནས། དེ་ཉིད་ཀྱིས་མེ་ཏོག་བླངས་ལ། བཛྲ་བཛྲ་ཧཱུྃ་ཞེས་ཟློས་ཤིང་དཀྱིལ་འཁོར་དུ་འཇུག་པར་བྱའོ། །
ཤར་ཕྱོགས་ཀྱི་སྒོ་ནས་ཞུགས་ལ། བཛྲ་ཨཾ་ཀུ་ཤ་ཛཿ་ཞེས་བརྗོད་པར་བྱའོ། །དེ་ནས་ལྷོ་ཕྱོགས་ཀྱི་སྒོ་ནས་ཞུགས་ལ། བཛྲ་པཱ་ཤ་ཧཱུྃ་ཞེས་བརྗོད་པར་བྱའོ། །དེ་ནས་ནུབ་ཕྱོགས་ཀྱི་སྒོ་ནས་ཞུགས་ལ། བཛྲ་སྥོ་ཊ་བཾ་ཞེས་བརྗོད་པར་བྱའོ། །དེ་ནས་བྱང་ཕྱོགས་ཀྱི་སྒོ་ནས་དེ་བཞིན་དུ་
ཞུགས་ལ། བཛྲ་ཨཱ་བེ་ཤ་ཨཱཿ་ཞེས་བརྗོད་ལ་བདག་ཉིད་ལ་དབབ་པར་བྱའོ། །དེ་ནས་ཡང་ཤར་ཕྱོགས་ཀྱི་སྒོ་ནས་ཞུགས་ལ། མ་ཧཱ་ར་ཏ། སུ་དྲྀ་ཌྷ་སུ་ཏོ་ཥོ། །སུ་སུ་ཥོ་བཛྲ་སཏྭ་ཨཱདྱ་སིདྡྷྱ་མཱཾ། དེ་ནས་རྣམ་པར་སྒེག་པའི་རྡོ་རྗེས་ཕྱག་བྱས་ལ། དཀྱིལ་འཁོར་ལ་བསྐོར་བ་ལན་གསུམ་
བྱས་ནས། བཅོམ་ལྡན་འདས་ཀྱི་སྤྱན་སྔར་འདུག་སྟེ། འདི་སྐད་ཅེས་བརྗོད་པར་བྱའོ། །འདོད་ཆགས་ཆེན་པོ་བདེ་བ་ཆེ། །རྡོ་རྗེ་ཆེན་པོ་ནོར་ཆེ་ཞིང་། །ཡེ་ཤེས་ཆེན་པོ་ལས་ཆེ་བ། །རྡོ་རྗེ་སེམས་དཔའ་དེང་བདག་འགྲུབ། །ཡང་འདི་སྐད་ཅེས་བརྗོད་པར་བྱ་སྟེ། ཛཿཧཱུྃ་བཾ་ཧོཿ། པྱ་སིདྡྷྱི་

59-1-202a

མཱཾཿ། དེ་ནས་རྡོ་རྗེ་ཆུ་འཐུངས་ལ། ཨཱ་ཞེས་བྱ་བ་ལན་བརྒྱ་ཟློས་ཤིང་བདག་ཉིད་ལ་དབབ་པར་བྱའོ། །ཡང་གཡོན་པའི་ཁྲོ་བོའི་ཁུ་ཚུར་གྱིས་སེམས་མ་རྡོ་རྗེ་ཕྱེ་ལ། དེ་བཞིན་དུ་ཨཱ་ཞེས་བྱ་བ་ཟློས་ཤིང་བདག་ཉིད་ལ་དབབ་པར་བྱའོ། །དེ་ནས་ཧཱུྃ་ཞེས་བྱ་བ་ཟློས་ཤིང་
མེ་ཏོག་དོར་བར་བྱའོ། །དེ་ནས་དེ་བླངས་ལ་ཧཱུྃ་ཞེས་བྱ་བ་ཉིད་ཀྱིས་རང་གི་མགོ་ལ་བཅིང་བར་བྱའོ། །དེ་ནས་དེ་ཉིད་ཀྱིས་གདོང་གཡོགས་དགྲོལ་བར་བྱའོ། །དེ་ནས་དེ་ཉིད་ཟློས་ཤིང་ཤར་ཕྱོགས་ཀྱི་ཆ་ནས་བརྩམས་ཏེ། དཀྱིལ་འཁོར་བལྟ་བར་བྱའོ། །དེ་ནས་རྡོ་རྗེ་འཁོར་ལོའི་
ཕྱག་རྒྱ་བཅིངས་ལ། སྔ་མ་བཞིན་དུ་རང་གི་སྙིང་གར་དགྲོལ་བར་བྱའོ། །དེ་ནས་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་ལ་རྡོ་རྗེའི་ལྟ་བས་བལྟ་བར་བྱ་ཞིང་། ཇི་སྲིད་དུ་བཅོམ་ལྡན་འདས་ཀྱིས་ཞལ་བསྟན་ནས་དངོས་གྲུབ་ཐམས་ཅད་སྩོལ་བར་འགྱུར་བ་
དེ་སྲིད་ཀྱི་བར་དུ་ཧཱུྃ་ཞེས་བྱ་བ་བཟླས་བརྗོད་བྱའོ། །དེ་ནས་རྡོ་རྗེ་ཐལ་མོ་བསྐོར་བ། ཤིས་པ་བརྗོད་པ་འདོན་པའི་ཚུལ་དུ་རང་གི་སྙིང་གར་བཞག་ནས། མཚན་བརྒྱ་རྩ་བརྒྱད་པས་བསྟོད་ལ། རྡོ་རྗེ་མཚོན་ཆ་ལ་སོགས་པ་གསང་བའི་མཆོད་པ་རྣམ་པ་བཞིས་བཅོམ་ལྡན་འདས་དེ་བཞིན་
གཤེགས་པ་ཐམས་ཅད་དང་བཅས་པ་ཡང་དག་པར་མཆོད་ནས། གླུ་དང་རོལ་མོའི་མཆོད་པ་རྣམས་ཀྱིས་ཡང་དག་པར་མཆོད་པར་བྱའོ། །དེ་ནས་བཅོམ་ལྡན་འདས་ཀྱི་ཡང་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་ལ་རྡོ་རྗེའི་ལྟ་བས་བལྟ་ཞིང་། རྡོ་རྗེ་ཐལ་མོ་བསྐོར་བས་ཕྱག་བྱས་
ལ། མེ་ཏོག་ལ་སོགས་པའི་དབང་བསྐུར་བ་རྣམས་བླང་བར་བྱ་སྟེ། དེ་ལ་དང་པོ་ཁོ་ནར་རྡོ་རྗེ་འཁོར་ལོའི་ཕྱག་རྒྱ་ཡོངས་སུ་བཟུང་བའི་རྡོ་རྗེ་འཁོར་ལོ་དང་མེ་ཏོག་གི་ཡལ་ག་ལས་རྣམ་པར་རྒྱལ་བའི་བུམ་པ་ལས་སྔར་བཤད་པའི་མཚན་ཉིད་ཅན་གྱིས་གསང་སྔགས་ཡང་དེ་བཞིན་དུ་ཡོངས་
སུ་བཟླས་ལ། བདག་ཉིད་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བར་བྱིན་གྱིས་བརླབས་ནས། རྡོ་རྗེ་འཁོར་ལོའི་ཕྱག་རྒྱས་རང་གི་ལུས་ལ་བཅོམ་ལྡན་འདས་འཁོར་དང་བཅས་པ་རྣམ་པར་བཀོད་དེ། ཕྱིའི་དཀྱིལ་འཁོར་གི་ནང་དུ་

59-1-202b

སྣ་ཚོགས་པདྨ་བྲིས་ལ། དེའི་སྟེང་དུ་སེམས་བསྐྱེད་མ་ཐ་ཏུ་ཆོས་ཀྱི་འཁོར་ལོ་བསྐོར་བའི་ཕྱག་རྒྱ་ཆེན་པོས་འདུག་ནས། མེ་ཏོག་ལ་སོགས་པས་བདག་ཉིད་ཡང་དག་པར་མཆོད་དེ། མཆོད་ཡོན་བླངས་ལ། མཚན་བརྒྱ་རྩ་བརྒྱད་པས་ཡང་དག་པར་བསྟོད་ནས། རྡོ་རྗེ་ཁུ་ཚུར་གྱིས་
རྣམ་པར་རྒྱལ་བའི་བུམ་པ་ལས་ཆུ་བླངས་ལ། ཨོཾ་བཛྲ་ཨ་བྷི་ཥིཉྩ་ཧཱུྃ་ཞེས་བྱ་བ་དང་། བདག་ཉིད་དབང་བསྐུར་བར་བྱ་ཞིང་། ཆུ་དེ་བཏུང་བར་ཡང་བྱའོ། །དེ་ནས་སངས་རྒྱས་ལྔའི་དབུ་རྒྱན་གྱི་ཕྱག་རྒྱའི་དབང་བསྐུར་བས་དབང་བསྐུར་ཞིང་། ལུགས་མའམ། བརྡུངས་པའམ། བྱས་པ་འམ། 
བྲིས་པའི་སངས་རྒྱས་ལྔའི་དབུ་རྒྱན་དང་། དར་དཔྱངས་ཀྱི་དབང་བསྐུར་བས། རྡོ་རྗེ་དྲིལ་བུ་དང་བཅས་པ་ཧཱུྃ་ཞེས་བྱ་བས་བླངས་ལ། ཧཱུྃ་ཞེས་བྱ་བཟློས་ཤིང་བདག་པོ་དང་མིང་གི་དབང་བསྐུར་བ་དག་གིས་དབང་བསྐུར་བར་བྱའོ། །དེ་ནས་དངོས་གྲུབ་ཀྱི་འཁོར་ལོའི་བརྟུལ་ཞུགས་བླངས་ལ། 
མེ་ཏོག་ལ་སོགས་པའི་མཆོད་པ་རྣམ་པ་ལྔས་བདག་ཉིད་མཆོད་ཅིང་། རྡོ་རྗེ་མཚོན་ཆ་ལ་སོགས་པ་ཕྱག་རྒྱའི་མཆོད་པ་རྣམས་ཀྱིས་ཡང་དག་པར་མཆོད་པར་བྱའོ། །དེ་ནས་འཁོར་ལོ་དེ་ཁོ་ན་ཉིད་ཀྱིས་བཟུང་ལ། ཆོས་ཀྱི་དྲིལ་བུ་དཀྲོལ་བར་བྱ་ཞིང་དམ་ཚིག་གི་ཕྱག་རྒྱ་ཆེན་པོར་བྱིན་གྱིས་
བརླབས་ཏེ། དེ་དག་ནི། ཐོག་མཐའ་མེད་པའི་སེམས་དཔའ་ནི། །ཞེས་བྱ་བ་ལ་སོགས་པ་སྔར་བཤད་པ་ཡིན་ནོ། །དེ་ནས་བཅོམ་ལྡན་འདས་ལ་ཕྱག་བྱས་ལ་སྙིང་པོ་བླངས་ཏེ། ཚིགས་སུ་བཅད་པ་ལྔ་པ་རྗེས་སུ་གནང་བ་དང་གཟེངས་བསྟོད་པ་དང་། ལུང་བསྟན་པ་རྣམས་ཉེ་བར་
མནོས་ལ། ཡང་བདག་ལ་བྱིན་གྱིས་བརླབ་པ་ལ་སོགས་པ་བྱས་ནས། ཅི་འདོད་པར་བཟླས་པ་ཡང་བྱ་སྟེ། བཅོམ་ལྡན་འདས་ལ་ཕྱག་བྱས་ལ་འདི་སྐད་ཅེས་བརྗོད་པར་བྱའོ། །བདག་མིང་འདི་ཞེས་བགྱི་བ་ཡི། །རྡོ་རྗེ་སློབ་དཔོན་དཀའ་ཐུབ་ཆེས། །སེམས་ཅན་ཀུན་ལ་ཕན་པའི་
ཕྱིར། །སློབ་མ་རྣམས་ནི་གཞུག་པར་བགྱི། །དེ་ནས་སློབ་མ་གཞུག་པར་བྱ་སྟེ། སློབ་དཔོན་གྱི་ལས་ཀྱི་ཆོ་ག་རྒྱས་པའོ། །དེ་ནས་སྡོམ་པ་དབོག་པར་འོས་པའི་སློབ་མ་ལ་སྔར་བཤད་པའི་ཚུལ་གྱིས་སྡོམ་པ་འཛིན་དུ་གཞུག་པ་དང་། བྱང་ཆུབ་ཏུ་སེམས་བསྐྱེད་དུ་གཞུག་པ་དག་

59-1-203a

བྱས་ལ། དེའི་སྙིང་གར་རྡོ་རྗེ་དེ་བཞིན་དུ་བསྐྱེད་ནས། རྡོ་རྗེ་འཁོར་ལོར་བྱིན་གྱིས་བརླབས་ཏེ་སྤོས་དང་མེ་ཏོག་ལ་སོགས་པས་མཆོད་ལ། ཡོན་གྱི་མཆོག་བླངས་ནས་ཤར་ཕྱོགས་ཀྱི་སྒོ་ལ་བལྟས་ནས་ཕྱི་རོལ་ན་གནས་པའི་ཆུས་དབང་བསྐུར་ལ། བདག་ཉིད་འཇུག་
པའི་ཆོ་གས་བཅུག་ལ། ཡང་རྡོ་རྗེ་དབབ་པའི་ཕྱག་རྒྱ་དྲིལ་བུ་དང་བཅས་པས་རྐང་པ་གཡོན་པ་དང་། དེའི་རྐང་པ་གཡས་པ་མནན་ལ། ཧཱུྃ་ཨཿཨཿཨཿཨཿཨཱཿཞེས་ལན་བརྒྱ་རྩ་བརྒྱད་བཟླས་ན་བབས་པར་འགྱུར་རོ། །དེ་ནས་ཆོ་ག་ཐམས་ཅད་རྗེས་སུ་སྤྱད་པར་བྱའོ། །སློབ་མ་
གཞུག་པ་ལ་སོགས་པའི་ཆོ་ག་རྒྱས་པ་རྫོགས་སོ།།      །།དེ་ནས་སློབ་དཔོན་གྱི་ལས་ཀྱི་ཆོ་ག་རྒྱས་པ་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པ་གསུངས་ནས། ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ལ། སློབ་དཔོན་གྱིས་དངོས་གྲུབ་ཀྱི་ཡེ་ཤེས་བསླབ་
པར་བྱའོ་ཞེས་བྱ་བ་འདིའི་ཆོ་ག་བསྟན་པར་བྱ་བའི་ཕྱིར། སྒྲུབ་པ་རྣམས་ནི་ཞེས་བྱ་བ་ལ་སོགས་པ་གསུངས་ཏེ། སྒྲུབ་པ་རྣམས་ནི་དེ་བཞིན་ནོ་ཞེས་བྱ་བ་ནི་ཇི་ལྟར་རྡོ་རྗེ་སེམས་དཔའི་སྒྲུབ་པ་གསུངས་པ་དེ་བཞིན་དུ་བྱང་ཆུབ་སེམས་དཔའ་ཆེན་པོ་རྡོ་རྗེ་འཁོར་ལོའི་ཁྲོ་བོའི་རས་ཀྱི་རི་མོ་གཉིས་པ་
སྔོན་དུ་བསྙེན་པ་བྱས་ནས། བསྒྲུབ་པར་ཤེས་པར་བྱའོ་ཞེས་བྱ་བའི་དོན་ཏོ། །དེ་ནས་མ་བསྒྲུབས་པར་ཡང་ཞེས་བྱ་བ་ལ་སོགས་པ་ནི་བཤད་ཟིན་ཏོ། །དཀྱིལ་འཁོར་ཐམས་ཅད་དུ་ཞུགས་པ་ལ་ནི། རྡོ་རྗེ་འཁོར་ལོའི་ཕྱག་རྒྱས་སོ་ཞེས་བྱ་བ་ནི། བཅོམ་ལྡན་འདས་རྡོ་རྗེ་འཁོར་ལོའི་
སྦྱོར་བ་བྱས་ལ། ཇི་སྐད་དུ་བཤད་པའི་མཚན་ཉིད་ཅན་གྱིས་བཅོམ་ལྡན་འདས་རྡོ་རྗེ་འཁོར་ལོའི་ཕྱག་རྒྱ་བཅིངས་ལ། ཧཱུྃ་ཞེས་བྱ་བཟློས་ཤིང་། གཡས་ནས་བསྐོར་བའི་ཚུལ་གྱིས་བསྐོར་ནས། དཀྱིལ་འཁོར་ཐམས་ཅད་སྤྲུལ་པར་བྱས་པར་འགྱུར་རོ། །དེ་ནས་དེ་ལ་ལྟ་བཞིན་དུ་ཧཱུྃ་ཞེས་བྱ་བ་
ལན་བརྒྱ་རྩ་བརྒྱད་བཟླས་བརྗོད་བྱས་ལ། ཕྱག་རྒྱ་རང་གི་ཁར་བཅུག་སྟེ་བཞག་ན། དེ་ལྟ་བུས་ནི་རྡོ་རྗེ་འཁོར་ལོས་དཀྱིལ་འཁོར་ཐམས་ཅད་དུ་འཇུག་པར་འགྱུར་རོ། །དཀྱིལ་འཁོར་ཆེན་པོར་འཇུག་པ་ལ་ནི་རྡོ་རྗེ་འཁོར་ལོ་ཆེན་པོས་སོ་ཞེས་བྱ་བ་ནི་དེ་བཞིན་དུ་བཅོམ་ལྡན་འདས་རྡོ་རྗེ་འཁོར་

59-1-203b

ལོའི་སྦྱོར་བ་བྱས་ལ། རྡོ་རྗེ་ཁུ་ཚུར་གཉིས་བཅིངས་ཏེ། ཧཱུྃ་ཞེས་བྱ་བཟློས་ཤིང་མགལ་མེའི་འཁོར་ལོའི་ཚུལ་དུ་བསྐོར་བར་བྱ་བ་འདི་ནི་རྡོ་རྗེ་འཁོར་ལོ་ཆེན་པོ་སྟེ། འདིས་གཙོ་བོ་ཆེན་པོ་ཐམས་ཅད་ཀྱི་དཀྱིལ་འཁོར་ཆེན་པོ་རྣམས་སུ་འཇུག་པར་བྱའོ། །དེ་བཞིན་དུ་ཕྱག་རྒྱའི་དཀྱིལ་འཁོར་དུ་
འཇུག་པ་ལ་ནི། དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཕྱག་རྒྱས་སོ་ཞེས་བྱ་བ་ནི། ཇི་ལྟར་རྡོ་རྗེ་འཁོར་ལོ་ཆེན་པོས་དཀྱིལ་འཁོར་ཆེན་པོ་ཐམས་ཅད་དུ་འཇུག་པར་འགྱུར་བ་དེ་བཞིན་དུ་མཚན་མའི་ཕྱག་རྒྱའི་དཀྱིལ་འཁོར་ཐམས་ཅད་དུ་འཇུག་པ་ནི། རྡོ་རྗེ་བསྡམས་པ་ལས་བྱུང་བའི་
དང་པོའི་རྡོ་རྗེས་འགྱུར་རོ་ཞེས་བྱ་བའི་དོན་ཏོ། །དེ་བཞིན་དུ་དམ་ཚིག་གི་དཀྱིལ་འཁོར་དུ་འཇུག་པ་ལ་ནི་དམ་ཚིག་ཆེན་པོའི་འཁོར་ལོས་སོ་ཞེས་བྱ་བ་ལ། དམ་ཚིག་གི་གཙོ་བོར་གྱུར་པའི་དཀྱིལ་འཁོར་ནི་དམ་ཚིག་གི་དཀྱིལ་འཁོར་ཏེ། དམ་ཚིག་ཆེན་པོའི་དེ་ཁོ་ན་ཉིད་ལ་སོགས་པ་རྒྱུད་ལས་
ཇི་སྐད་གསུངས་པའོ། །དེར་འཇུག་པ་ནི་དམ་ཚིག་གི་དཀྱིལ་འཁོར་དུ་འཇུག་པ་སྟེ། རྡོ་རྗེ་བསྡམས་པ་བཅིངས་ལ་གུང་མོ་གཉིས་རྩེ་མོའི་ཚུལ་དུ་བརྐྱང་ནས། མཛུབ་མོ་གཉིས་སོ་སོར་བརྐྱང་ལ། གུང་མོ་དེ་ཉིད་ཀྱི་རྡོ་རྗེ་རྩེ་མོའི་རྒྱབ་ཏུ་བཞག་པ་འདི་ནི་དམ་ཚིག་ཆེན་པོའི་འཁོར་ལོ་སྟེ། འདིས་
དམ་ཚིག་གི་དཀྱིལ་འཁོར་ཐམས་ཅད་དུ་འཇུག་པར་འགྱུར་རོ། །ལས་ཀྱི་དཀྱིལ་འཁོར་དུ་འཇུག་པ་ལ་ནི་ཐམས་ཅད་ཀྱི་འཁོར་ལོས་སོ་ཞེས་བྱ་བ་ནི་ལས་ཀྱི་ཕྱག་རྒྱ་གཙོ་བོར་གྱུར་པའི་དཀྱིལ་འཁོར་ནི་ལས་ཀྱི་དཀྱིལ་འཁོར་རོ། །དེར་འཇུག་པ་ནི་ཐམས་ཅད་ཀྱི་འཁོར་ལོར་འགྱུར་ཏེ་དེ་བཞིན་
དུ་བཅོམ་ལྡན་འདས་རྡོ་རྗེ་འཁོར་ལོའི་སྦྱོར་བ་བྱས་ཏེ། ནམ་མཁའ་མཛོད་ཀྱི་དམ་ཚིག་གི་ཕྱག་རྒྱ་བཅིངས་ལ། ཧཱུྃ་ཞེས་བྱ་བ་ཟློས་ཤིང་ནམ་མཁའ་མཛོད་དུ་བདག་ཉིད་བསམས་ནས་ཧཱུྃ་ཞེས་བྱ་བ་བཟླས་བརྗོད་བྱས་ཏེ་འདི་ནི་ཐམས་ཅད་ཀྱི་འཁོར་ལོ་ནམ་མཁའ་མཛོད་ཀྱི་དམ་ཚིག་གི་ཕྱག་རྒྱ་
སྟེ། འདིས་དཀྱིལ་འཁོར་ཐམས་ཅད་དུ་འཇུག་པར་འགྱུར་རོ། །དེ་བཞིན་དུ་ཞེས་བྱ་བ་ལ་སོགས་པ་ལ། ཇི་ལྟར་རྡོ་རྗེ་འཁོར་ལོ་ལ་སོགས་པའི་ཕྱག་རྒྱ་རྣམས་ཀྱི་དཀྱིལ་འཁོར་ཆེན་པོ་ལ་སོགས་པར་འཇུག་པར་འགྱུར་བ་དེ་བཞིན་དུ་ཕྱག་ན་རྡོ་རྗེ་ལ་སོགས་པའི་ཕྱག་རྒྱ་དང་། ལག་པ་

59-1-204a

གཡོན་ན་འཁོར་ལོ་འཛིན་པ་ལ་སོགས་པས་རྗེས་སུ་ཆགས་པར་བྱ་བ་ལ་སོགས་པའི་ལས་རྣམས་བྱེད་པར་འགྱུར་ཏེ། དེ་ལ་རྡོ་རྗེ་སེམས་དཔའི་དམ་ཚིག་གི་ཕྱག་རྒྱས་ནི་དེ་བཞིན་གཤེགས་པ་ཐམས་ཅད་ལ་སོགས་པ་དང་སེམས་ཅན་ཐམས་ཅད་རྗེས་སུ་ཆགས་པར་
བྱེད། འཕགས་པ་སྤྱན་རས་གཟིགས་དབང་ཕྱུག་གི་དམ་ཚིག་གི་ཕྱག་རྒྱས་ནི་དབང་དུ་བྱེད་དོ། །འཕགས་པ་ནམ་མཁའི་སྙིང་པོའི་དམ་ཚིག་གི་ཕྱག་རྒྱས་ནི་དོན་ཐོབ་པར་འགྱུར་རོ། །རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱས་ནི་རྒྱས་འདེབས་སོ། །འཕགས་པ་འཇམ་དཔལ་གཞོན་ནུའི་
དམ་ཚིག་གི་ཕྱག་རྒྱས་ནི་གཅོད་པར་བྱེད་དོ། །རྡོ་རྗེ་འཁོར་ལོའི་དམ་ཚིག་གི་ཕྱག་རྒྱས་ནི་དཀྱིལ་འཁོར་ཐམས་ཅད་དུ་འཇུག་པར་འགྱུར་རོ། །ནམ་མཁའ་མཛོད་ཀྱི་དམ་ཚིག་གི་ཕྱག་རྒྱས་ནི་མཆོད་པའི་ལས་རྣམས་འགྲུབ་བོ། །རྡོ་རྗེ་གནོད་སྦྱིན་གྱི་དམ་ཚིག་གི་ཕྱག་རྒྱས་ནི་གདུག་
པ་ཐམས་ཅད་འདུལ་བའི་དངོས་གྲུབ་འགྲུབ་པོ། །དཀྱིལ་འཁོར་ཐམས་ཅད་ཀྱི་རྡོ་རྗེའི་དམ་ཚིག་ཅེས་བྱ་བ་ལ། དཀྱིལ་འཁོར་ཐམས་ཅད་ནི་རྡོ་རྗེ་འཁོར་ལོའི་དཀྱིལ་འཁོར་རོ། །དེ་དག་ཉིད་ནི་རྡོ་རྗེ་ལྟར་མི་ཕྱེད་པ་ཡིན་པས་ན་རྡོ་རྗེའོ། །དེའི་དམ་ཚིག་ནི་བསྐྱེད་པའི་རྒྱུ་སྟེ། རྡོ་རྗེ་འཁོར་ལོའི་
དཀྱིལ་འཁོར་གྱི་ཚུལ་དུ་རྣམ་པར་རྟོག་པའོ། །མིང་དེ་སྐད་ཅེས་བྱ་བའི་རྟོག་པའི་རྒྱལ་པོ་རྫོགས་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ལས་གསུངས་པའི་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་རྟོག་པའི་བཤད་པ་རྫོགས་སོ།།    །།དེ་ལྟར་རིགས་ཐམས་ཅད་ཀྱི་དཀྱིལ་
འཁོར་དུ་འཇུག་པའི་རྒྱུར་གྱུར་པའི་དཀྱིལ་འཁོར་ཐམས་ཅད་ཀྱི་རྡོ་རྗེའི་དམ་ཚིག་ཅེས་བྱ་བའི་རྒྱལ་པོ་གསུངས་ནས། ད་ནི་ཚོགས་ཡོངས་སུ་རྫོགས་པའི་རྒྱུར་གྱུར་པའི་ནམ་མཁའི་མཛོད་ཀྱི་རྟོག་པའི་རྒྱལ་པོ་བཤད་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་
སྒྲས་ནི་འདས་མ་ཐག་པ་སྟེ། འདོད་པའི་ཁམས་ཐམས་ཅད་ཀྱི་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་གནས་ན། བཅོམ་ལྡན་འདས་རྣམ་པར་སྣང་མཛད་ཇི་སྐད་དུ་བཤད་པའི་ཚུལ་གྱིས་བཞུགས་ནས། དེའི་རྗེས་ཐོགས་ཉིད་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ་ཞེས་

59-1-204b

བྱ་བར་སྦྱར་རོ། །མཆོད་པ་ཐམས་ཅད་ཀྱི་ཆོ་ག་རྒྱས་པའི་སྣོད་ཀྱིས་ཞེས་བྱ་བ་ལ། མཆོད་པ་ཐམས་ཅད་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པའི་མཚན་ཉིད་ཅན་གྱི་མཆོད་པ་རྣམ་པ་བཞིའོ། །དེའི་ཆོ་ག་རྒྱས་པ་ནི་དཀྱིལ་འཁོར་ལ་སོགས་པའི་དབྱེ་བས་དེ་ཁོ་ན་ཉིད་བཅུའི་བདག་ཉིད་ཅན་
གྱི་རྣམ་པར་རྒྱས་པའོ། །དེའི་སྣོད་ནི་འབྱུང་གནས་ཏེ། དེ་ལས་བྱུང་བས་སོ། །མཆོད་པ་ཐམས་ཅད་ཀྱི་ནི་མཆོག །ཅེས་བྱ་བ་ལ། མཆོད་པ་ཐམས་ཅད་ནི་ཇི་སྐད་དུ་བཤད་པ་རྣམས་ཏེ། དེ་ཉིད་ནི་དམ་པ་ཡིན་པས་ན་མཆོག་གོ། །དེ་ཡང་བསྒྲུབ་པའི་མཆོད་པའི་ངོ་བོ་ཉིད་ཡིན་པས་མེ་ཏོག་
ལ་སོགས་པའི་སྤྱིར་མཆོད་པའི་ཚུལ་ཐམས་ཅད་ལས་མཆོག་ཏུ་གྱུར་པ་ཡིན་པའི་ཕྱིར་རོ། །མིང་དེ་སྐད་ཅེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ཏེ། བཤད་དོ་ཞེས་བྱ་བ་ནི་གསུངས་པའོ། །བྱང་ཆུབ་ཀྱི་སེམས་བསྐྱེད་པ་ནི་དེ་བཞིན་གཤེགས་
པ་ཐམས་ཅད་ལ་མཆོད་པའི་ཆོ་ག་རྒྱས་པའོ་ཞེས་བྱ་བ་ལ་བྱང་ཆུབ་ཀྱི་མཚན་ཉིད་ཅན་དང་། བྱང་ཆུབ་ཏུ་འཇུག་པ་དང་། བྱང་ཆུབ་ཏུ་སྨོན་པའི་སེམས་ནི་བྱང་ཆུབ་ཀྱི་སེམས་ཏེ། གསུམ་པ་འདི་དག་བསྐྱེད་པ་ནི། བྱང་ཆུབ་ཏུ་སེམས་བསྐྱེད་པའོ། །དེ་ཉིད་བསྐྱེད་པ་ནི་དེ་བཞིན་གཤེགས་པ་ཐམས་ཅད་
ལ་མཆོད་པ་ཡིན་པས་ན། དེ་བཞིན་གཤེགས་པ་ཐམས་ཅད་ལ་མཆོད་པ་སྟེ། བྱང་ཆུབ་ཏུ་སེམས་བསྐྱེད་པའི་ཚུལ་གྱིས་བསྒྲུབ་པའི་མཆོད་པ་ཡིན་ལ། དེའི་ཆོ་ག་རྒྱས་པ་ནི་དཀྱིལ་འཁོར་ལ་སོགས་པའི་ཚུལ་ཏེ། དེ་ཁོ་ན་ཉིད་བཅུའི་བདག་ཉིད་ཅན་ནོ། །སེམས་ཅན་གྱི་ཁམས་ཐམས་ཅད་
ཡོངས་སུ་སྐྱོབ་པ་ནི་ཞེས་བྱ་བ་ལ། ཁམས་གསུམ་ན་སྤྱོད་པའི་སེམས་ཅན་གྱི་ཁམས་མ་ལུས་པ་ཐམས་ཅད་ཡོངས་སུ་ཀུན་ནས་སྐྱོབ་ཅིང་ཉོན་མོངས་པའི་བག་ཆགས་དང་བཅས་པ་སྤངས་པས་ཆོས་ཀྱི་མཚན་ཉིད་ལ་མངོན་པར་ཞེན་པའི་འཇིགས་པ་ལས་སྒྲོལ་བ་སྟེ། ཡོངས་སུ་སྐྱོབ་པ་
ཉིད་ཡིན་པས་ན་ཡོངས་སུ་སྐྱོབ་པ་ཉིད་དོ། །དེ་ནི་དེ་བཞིན་གཤེགས་པ་ཐམས་ཅད་ཀྱི་སེམས་དང་སེམས་ལས་བྱུང་བའི་ངོ་བོ་ཉིད་ཀྱི་མཆོད་པ་སྟེ་སྒྲུབ་པའི་མཆོད་པའོ། །དེའི་ཆོ་ག་རྒྱས་པ་ནི་སྔ་མ་བཞིན་ནོ། །དམ་པའི་ཆོས་སོ་ཞེས་བྱ་བ་ལ་སོགས་པ་ལ། དམ་པ་ཡང་ཡིན་ལ། ཆོས་ཀྱང་ཡིན་

59-1-205a

པས་ན་དམ་པའི་ཆོས་ཏེ། སེམས་དང་སེམས་ལས་བྱུང་བ་རང་བཞིན་གྱིས་རྣམ་པར་དག་པ་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་དོ། །ཡང་ན་དམ་པ་རྣམས་ཏེ། སངས་རྒྱས་དང་བྱང་ཆུབ་སེམས་དཔའ་དང་། རང་སངས་རྒྱས་དང་། འཕགས་པ་ཉན་ཐོས་རྣམས་ཀྱི་
ཆོས་ལུང་དང་རྟོགས་པའི་བདག་ཉིད་ཅན་དང་པདྨའི་རིགས་སོ། །དེ་ཡོངས་སུ་བཟུང་བ་ནི། ཐོས་པ་དང་། བསམ་པ་དང་། བསྒོམ་པའི་རང་བཞིན་གྱི་ཤེས་པས་ཉེ་བར་བླངས་པའོ། །དེ་བཞིན་གཤེགས་པ་ཐམས་ཅད་ལ་མཆོད་པའི་ཆོ་ག་རྒྱས་པའོ་ཞེས་བྱ་བ་ནི་སྔ་མ་བཞིན་ནོ། །ཤེས་
རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བ་ལ་སོགས་པ་ལ། ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་ལ་སོགས་པ་གང་རང་ཉིད་འདྲི་བ་ནི་འདྲི་བའི་ལས་ཏེ། ལས་ཞེས་བྱ་བའི་སྒྲ་ནི་རེ་རེ་ཞིང་ཡང་སྦྱར་བར་བྱའོ། །དེ་ཉིད་གཞན་འདྲིར་གཞུག་པ་དང་། དེ་ཉིད་གཞུང་དང་དོན་གྱིས་མི་བརྗེད་པར་
ཡིད་ལ་ཡང་དག་པར་འཇོག་པ་ནི་འཛིན་པའོ། །དེ་ཉིད་ཀྱི་གླེགས་བམ་ཀློག་པ་ནི་བཀླགས་པའོ། །འདོན་པ་ནི་བརྗོད་པའོ། །སྒོམ་པ་ནི་གོ་བར་ཟད་དོ། །སྤོས་དང་མེ་ཏོག་ལ་སོགས་པས་མཆོད་པ་བྱེད་པ་ནི་མཆོད་པའི་ལས་སོ། །དེ་བཞིན་གཤེགས་པ་ཐམས་ཅད་ལ་མཆོད་པའི་ཆོ་ག་རྒྱས་པའོ་
ཞེས་བྱ་བ་ལ། རང་བཞིན་གྱིས་འོད་གསལ་བ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་ཀྱི་སེམས་དང་སེམས་ལས་བྱུང་བ་དང་། ལས་ཀྱི་རིགས་རྣམས་དེ་བཞིན་གཤེགས་པ་ཐམས་ཅད་དོ། །དེ་རྣམས་ལ་མཆོད་པ་ནི་ཇི་སྐད་དུ་གསུངས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་འདྲི་
བ་ལ་སོགས་པའི་ཚུལ་ཏེ། དེ་བཞིན་གཤེགས་པ་ཐམས་ཅད་མངོན་སུམ་དུ་བྱེད་པའི་རྒྱུ་ཡིན་པའི་ཕྱིར་རོ། །དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། མཆོད་པའི་ཆོ་ག་རྒྱས་པའོ་ཞེས་བྱ་བའི་བར་གྱི་བཤད་པས་ནི། དང་པོ་སྦྱོར་བ་ཞེས་བྱ་བའི་ཏིང་ངེ་འཛིན་གསུངས་པ་ཡིན་ནོ། །
ད་ནི་དེ་ནས་ཞེས་བྱ་བ་ལ་སོགས་པས་ཏིང་ངེ་འཛིན་གཉིས་པ་གསུངས་པ་ཡིན་ཏེ། དེ་ལྟར་བཅོམ་ལྡན་འདས་རྣམ་པར་སྣང་མཛད་ཀྱིས་བཅོམ་ལྡན་འདས་ནམ་མཁའི་མཛོད་ལ་ཤེས་རབ་ཀྱི་ཕ་རོལ་ཏུ་ཕྱིན་པ་བཤད་པས་རང་གི་དཀྱིལ་འཁོར་སྤྲུལ་པར་བྱ་བའི་ཕྱིར་བསྐུལ་བ་དང་། དེའི་རྗེས་ཐོགས་

59-1-205b

ཉིད་ལ་རང་གི་དཀྱིལ་འཁོར་བསྐྱེད་པའི་སྙིང་པོ་ཨོཾ་ཞེས་བྱ་བའི་བདག་ཉིད་ཅན་གསུངས་པའོ། །ནམ་མཁའ་ནི་གོ་འབྱེད་པའོ།  །དེ་ཉིད་ནི་མཛོད་དེ། ནོར་གྱི་ཞིའོ། །ཁང་པར་མངའ་བས་ན། ནམ་མཁའ་མཛོད་ཅེས་བྱ་བ་སྟེ། བསམས་པ་ཙམ་ཉིད་ཀྱིས་ནམ་མཁའ་ལས་དེ་
བཞིན་གཤེགས་པ་ལ་སོགས་པའི་དངོས་པོ་ཐམས་ཅད་འབྱུང་བའི་ཕྱིར་རོ། །ལས་ཐམས་ཅད་དོན་ཡོད་པའི་ཕྱིར་དམ་ཚིག་ཅེས་བྱ་བ་ལ། ལས་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པའི་ལས་རྣམ་པ་བཞིའོ། །དེའི་དོན་ཡོད་པ་ནི་འབྲས་བུ་དང་བཅས་པའོ། །དེའི་དམ་
ཚིག་ནི་དེ་སྐྱེད་པར་བྱེད་པའི་རྒྱུ་སྟེ། མིང་དེ་སྐད་ཅེས་བྱ་བར་ངེས་པའི་ཡེ་ཤེས་ནི་སྙིང་པོའི་དེ་སྟོན་པར་བྱེད་པའི་སྒྲ་ལ་ཡང་ཉེ་བར་གདགས་པས་སྙིང་པོ་ཞེས་བྱ་སྟེ། དེ་སྨྲས་པ་ནི་གསུངས་པའོ། །ནམ་མཁའ་ཐམས་ཅད་ལས་ཞེས་བྱ་བ་ནི་ཕྱོགས་བཅུ་ན་གནས་པའི་ནམ་མཁའ་
ལས་སོ། །མཆོད་པ་ཐམས་ཅད་ཀྱི་ཆོ་ག་རྒྱས་པར་གྱུར་ནས། བྱང་ཆུབ་སེམས་དཔའི་ཚུལ་གྱིས་བཞུགས་སོ་ཞེས་བྱ་བར་སྦྱར་ཏེ། མཆོད་པ་ཐམས་ཅད་ཇི་སྐད་དུ་བཤད་པའི་རྣམ་པ་བཞིའོ། །དེའི་ཆོ་ག་རྒྱས་པ་ནི་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོའི་དཀྱིལ་འཁོར་
ལ་སོགས་པའི་དབྱེ་བས་ཕྱེ་བའི་རྣམ་པ་ནི་རྒྱས་པའོ། །དེ་དག་ཀྱང་ཁྱད་པར་ཇི་ལྟ་བུ་ཞེ་ན། ནམ་མཁའི་ཁམས་མ་ལུས་པར་སྤྲོས་པ་ཞེས་བྱ་བ་གསུངས་ཏེ། ནམ་མཁའི་ཁམས་ཀྱང་ཡིན་ལ་མ་ལུས་པ་ཡང་ཡིན་པས་ནམ་མཁའི་ཁམས་མ་ལུས་པ་ཞེས་བྱ་སྟེ། ཇི་ལྟར་
གྲགས་པའི་ཕྱོགས་བཅུ་དག་ན་རྫས་ཐམས་ཅད་དང་བྲལ་བའོ། །དེའི་སྤྲོས་པ་ནི་ཁྱབ་པ་སྟེ། འདི་ལྟར་ནམ་མཁའི་ཁམས་མ་ལུས་པའི་མཐར་ཐུག་པར་སྤྲོས་པའོ། །དེ་ལྟ་བུའི་གཟུགས་ཅན་དུ་གྱུར་པ་ནི་གྱུར་ནས་ཞེས་བྱའོ། །བྱང་ཆུབ་སེམས་དཔའི་ཚུལ་གྱིས་ཞེས་བྱ་བ་ནི། རྡོ་
རྗེ་སེམས་དཔའ་ལ་སོགས་པའི་གཟུགས་ཀྱིས་ནམ་མཁའ་མཛོད་ཀྱི་དཀྱིལ་འཁོར་དུ་རྡོ་རྗེ་སེམས་དཔའི་དཀྱིལ་འཁོར་གྱི་དབྱིབས་ཀྱི་སྣ་ཚོགས་པདྨའི་གདན་ལ་བཞུགས་པ་སྟེ་གནས་པར་གྱུར་པའོ། །དེ་ལྟར་ན་དེ་ནས་ཞེས་བྱ་བ་ནས་བརྩམས་ཏེ། བཞུགས་སོ་ཞེས་བྱ་བའི་བར་

59-1-206a

གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་པ་མཛད་པ་ནས་བརྩམས་ཏེ། གསུམ་པ་ཡིན་པར་ཤེས་པར་བྱའོ། །དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པར་བྱའོ་ཞེས་བྱ་བ་འདིའི་ཆོ་ག་བསྟན་པར་
བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ཏེ། ལས་ཀྱི་མཆོག་གི་ཏིང་ངེ་འཛིན་གྱི་རྗེས་ཐོགས་ཉིད་ལའོ། །མཆོད་པ་ཐམས་ཅད་
ཀྱི་ཆོ་ག་རྒྱས་པ་ནི་བཤད་ཟིན་ཏོ། །དེའི་བྱིན་གྱིས་བརླབ་པ་ནི་དཀྱིལ་འཁོར་ལ་དམིགས་པ་སྟེ། གང་ལ་དེ་སྐད་ཅེས་བྱ་བའི་ཏིང་ངེ་འཛིན་དེ་ལ་སྙོམས་པར་ཞུགས་ནས་འདི་གསུངས་སོ་ཞེས་བྱ་བར་སྦྱར་རོ། །རྡོ་རྗེ་མཆོད་པའི་མཆོག་དོན་ཡོད་པའི་དམ་ཚིག་ཅེས་བྱ་བ་ལ། རྡོ་རྗེ་མཆོད་
པ་ལ་ནི། ཇི་སྐད་དུ་བཤད་པའི་མཆོད་པ་རྣམ་པ་བཞིའོ། །དེ་བྱུང་བར་གྱུར་པ་ནི་མཆོག་གོ། །དོན་ཡོད་པའི་རྣམ་པ་སྟེ་དམ་ཚིག་ཅེས་བྱ་བ་ནི། ནམ་མཁའ་མཛོད་ཀྱི་དཀྱིལ་འཁོར་ཏེ་དེ་གསུངས་པའོ། །འདིས་ནི་དོན་འདི་སྐད་སྟོན་པར་འགྱུར་ཏེ། ཏིང་ངེ་འཛིན་གསུམ་བསྒོམ་པ་སྔོན་དུ་
འགྲོ་བས་ཇི་སྲིད་དུ་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་དཀྱིལ་འཁོར་འདི་བསྒོམ་པར་བྱའོ། །དེ་ནས་དཀྱིལ་འཁོར་འདི་བྲི་བར་བྱའོ། །ཕྱིའི་དཀྱིལ་འཁོར་ཇི་ལྟ་བའི། །ཞེས་བྱ་བ་ནི། འདིའི་ཕྱིའི་དཀྱིལ་འཁོར་ཐམས་ཅད་རྡོ་རྗེ་སེམས་དཔའི་དཀྱིལ་འཁོར་དང་འདྲ་བར་བྱའོ། །
དེ་བཞིན་དུ་ནང་དུ་རིན་པོ་ཆེའི་ཀ་བ་བརྒྱད་བྱས་ལ་ཞེས་བྱ་བ་ནི། ཇི་ལྟར་འཕགས་པ་ནམ་མཁའི་སྙིང་པོའི་དཀྱིལ་འཁོར་བྲི་བ་བཞིན་དུ་འདིའི་ནང་གི་དཀྱིལ་འཁོར་ཐམས་ཅད་བྲི་བར་བྱའོ། །དབུས་སུ་བཅོམ་ལྡན་འདས་ཞེས་བྱ་བ་ལ་སོགས་པ་ལ་དཀྱིལ་འཁོར་དབུས་མའི་དབུས་སུ་སྣ་ཚོགས་
པདྨའི་གདན་ལ། བཅོམ་ལྡན་འདས་སེམས་དཔའི་སྐྱིལ་མོ་ཀྲུང་གིས་བཞུགས་པ། ཕྱག་གཡས་ན་སྣ་ཚོགས་རྡོ་རྗེ་རང་གི་སྙིང་གར་བསྟོད་པའི་ཚུལ་གྱིས་བསྣམས་པ། གཡོན་པའི་རྡོ་རྗེ་ཁུ་ཚུར་གྱིས་སྣ་ཚོགས་རྡོ་རྗེས་མཚན་པའི་དྲིལ་བུ་བསྣམས་ནས་བསྙེམས་པས་བཞུགས་པ། སངས་

59-1-206b

རྒྱས་ལྔའི་དབུ་རྒྱན་ལ་སྣ་ཚོགས་རྡོ་རྗེའི་ཕྲེང་བ་ཅན་གྱིས་དབང་བསྐུར་བ། ཞལ་དཀར་པོ་པུས་མོའི་འོག་གི་ཆ་ནས་རྐང་པ་དང་། ཕྱག་གཉིས་པ་ལ་ཤའི་མདོག་ཅན། ལྷག་མ་རྣམས་ནི་སྔོན་པོ་ཞལ་གྱི་འོག་གི་ཆ་ནས་རྐེད་པའི་བར་དུ་དམར་སྐྱ། བརླ་གཉིས་སེར་སྐྱའི་མདོག་ཅན་དུ་དགོད་
པར་བྱའོ། །ཐམས་ཅད་དུ་མཆོད་པའི་དམ་ཚིག་གི་སེམས་དཔའ་རྣམས་གཞག་པར་བྱའོ་ཞེས་བྱ་བ་ནི། དེའི་ཕྱོགས་དང་མཚམས་རྣམས་སུ་མཆོད་པའི་ངོ་བོ་ཉིད་ཀྱི་ཀུན་རྫོབ་ཀྱི་གཟུགས་ནི་མཆོད་པའོ། །སེམས་དཔའ་ནི་ཕྱག་རྒྱ་ཆེན་པོའི་ངོ་བོ་སྟེ། དེ་ནི་མཆོད་པའི་དམ་ཚིག་
སེམས་དཔའོ། །དེ་ཡང་ལུགས་མའམ། བརྡུངས་པ་ལ་སོགས་པའི་གཟུགས་སུ་གཞག་པར་བྱའོ། །དེ་དག་ཀྱང་གང་ཞེ་ན། འདི་ལྟ་སྟེ་ཞེས་བྱ་བ་ལ་སོགས་པ་གསུངས་ཏེ། གང་ཞེ་ན། ཕྱག་ན་རྡོ་རྗེ་དང་། འཇིག་རྟེན་དབང་ཕྱུག་ལ་སོགས་པ་བྱང་ཆུབ་སེམས་དཔའ་བརྒྱད་
པོ་ཞེས་བྱ་བ་སྟེ། དེ་དག་ཀྱང་བྱང་ཆུབ་ཀྱི་སེམས་ལ་སོགས་པ་ཕྱག་ན་བསྣམས་པར་ཇི་ལྟ་བ་བཞིན་དུ་བྲི་བར་བྱའོ། །དེ་ལ་བྱང་ཆུབ་ཀྱི་སེམས་ནི་རྡོ་རྗེ་རྩེ་ལྔ་པ་སྟེ། རྡོ་རྗེ་དེ་ཕྱག་གིས་ཡོངས་སུ་འཛིན་ཅིང་། དེས་ན་འདི་ནི་བྱང་ཆུབ་ཀྱི་སེམས་ཀྱི་བླ་ན་མེད་པའི་མཆོད་པའི་ཆོ་ག་རྒྱས་པར་བསྣམས་
པའི་ཕྱག་གོ། །ཏིང་ངེ་འཛིན་སྟོན་པའི་ཕྱག་རྒྱ་ནི་ཏིང་ངེ་འཛིན་ཏེ་པདྨའི་ཕྱག་རྒྱའོ། །དེ་ཡང་འཕགས་པ་སྤྱན་རས་གཟིགས་དབང་ཕྱུག་ཡོངས་སུ་འཛིན་ཏེ། དེས་ན་འདི་ནི་ཏིང་ངེ་འཛིན་གྱི་བླ་ན་མེད་པའི་མཆོད་པའི་ཆོ་ག་རྒྱས་པར་ཕྱག་ན་བསྣམས་པའོ། །དབང་བསྐུར་བ་ནི་རྡོ་རྗེའི་རིན་པོ་ཆེ་སྟེ། 
འཕགས་པ་ནམ་མཁའི་སྙིང་པོའི་མཚན་མའོ། །ཕྱག་རྒྱ་ནི་རྡོ་རྗེ་ཁུ་ཚུར་ཏེ། དམ་ཚིག་གི་ཁུ་ཚུར་གྱིས་ཡོངས་སུ་བཟུང་བའི་རྡོ་རྗེ་རྩེ་ལྔ་པའི་ཕྱག་རྒྱའོ། །སྟོང་པ་ཉིད་དུ་སྨྲ་བ་ནི། འཕགས་པ་འཇམ་དཔལ་གྱི་རལ་གྲི་སྟེ། དེས་ཆོས་ཐམས་ཅད་ནི་མ་སྐྱེས་པའོ་ཞེས་སྟོན་པའི་ཕྱིར། དེ་
ནས་སྟོང་པ་ཉིད་དུ་སྨྲ་བ་ཞེས་འདི་ལ་བཤད་དོ། །དཀྱིལ་འཁོར་འདྲི་བ་ནི་འཕགས་པ་རྡོ་རྗེའི་རྒྱུའི་མཚན་མ་འཁོར་ལོ་རྩིབས་བརྒྱད་པ་སྟེ། དེ་ཕྱག་ན་བསྣམས་པས་གང་ཞིག་དཀྱིལ་འཁོར་རྫོགས་པར་བྱེད་པར་འདོད་པའི་རྣལ་འབྱོར་པ་ལ་དེ་ངེས་པ་ཉིད་དུ་རྫོགས་པར་མཛེས་པས་ན། དེའི་

59-1-207a

ཕྱིར་དེ་ནི་དཀྱིལ་འཁོར་འདྲི་བ་ཞེས་བཤད་དོ། །མཆོད་པ་ཐམས་ཅད་ནི་ནམ་མཁའི་མཛོད་ཀྱི་མཚན་མ་སྣ་ཚོགས་རྡོ་རྗེའོ། །དེ་ཕྱག་ན་བསྣམས་པས་རྣལ་འབྱོར་པ་རྣམས་ཀྱིས་སངས་རྒྱས་ལ་མཆོད་པ་དང་། སེམས་ཅན་གྱི་དོན་བྱ་བ་ཡོངས་སུ་རྫོགས་པར་མཛད་དོ། 
དེས་ན་མཆོད་པ་ཐམས་ཅད་ཅེས་བཤད་དོ། །སེམས་ཅན་རྣམས་ཡོངས་སུ་བསྐྱབ་པ་ནི་རྡོ་རྗེ་གནོད་སྦྱིན་གྱི་མཆོད་པའི་ཕྱག་རྒྱ་སྟེ། མཚན་མ་དེ་ཕྱག་ན་བསྣམས་པས་བདུད་ཐམས་ཅད་ལ་སོགས་པ་གདུག་པ་རྣམས་རྣམ་པར་འཇིག་པར་མཛད་ལ། དེ་ནས་སེམས་ཅན་རྣམས་སྐྱོབ་པར་
གྱུར་པའོ། །དེ་ལྟར་ན་བྱང་ཆུབ་སེམས་དང་ཏིང་ངེ་འཛིན་དང་དབང་བསྐུར་བ་དང་། ཕྱག་རྒྱ་ཡོངས་སུ་འཛིན་པ་དང་། སྟོང་པ་ཉིད་དུ་སྨྲ་བ་དང་། དཀྱིལ་འཁོར་འདྲི་བ་དང་། མཆོད་པ་ཐམས་ཅད་དང་། སེམས་ཅན་རྣམས་ཡོངས་སུ་སྐྱོབ་པ་རྣམས་སོ། །དེ་དག་ཉིད་ནི་བླ་ན་མེད་
པའི་མཆོད་པ་སྟེ། བྱང་ཆུབ་ཀྱི་སེམས་ལ་སོགས་པ་སྒྲུབ་པའི་མཆོད་པ་རྣམས་ནི་ཕྱིའི་མཆོད་པའི་ཁྱད་པར་ཐམས་ཅད་ལས་མཆོག་ཏུ་གྱུར་པ་ཡིན་པའི་ཕྱིར་རོ། །དེའི་ཆོ་ག་རྒྱས་པ་ནི་རྡོ་རྗེ་སེམས་དཔའ་ལ་སོགས་པའི་ངོ་བོ་ཉིད་གསལ་བའི་དབྱེ་བ་སྟེ། དེས་ནད་ཕྱག་ན་བསྣམས་
པ་ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་བརྒྱད་དོ། །དེ་བས་ན་དེ་རྣམས་ནི་བྱང་ཆུབ་ཀྱི་སེམས་ལ་སོགས་པ་བླ་ན་མེད་པའི་མཆོད་པའི་ཆོ་ག་རྒྱས་པ་ཕྱག་ན་བསྣམས་པ་བྲི་བར་བྱའོ། །ཇི་ལྟ་བ་བཞིན་དུ་ཞེས་བྱ་བ་ལ་སོགས་པ་ནི་ཤར་ཕྱོགས་ཀྱི་ཆ་ནས་བརྩམས་ཏེ། ཇི་
སྲིད་དབང་ལྡན་གྱི་ཕྱོགས་ཀྱི་བར་དུ་སྣ་ཚོགས་པདྨའི་གདན་ལ་སེམས་དཔའི་སྐྱིལ་མོ་ཀྲུང་གིས་བཞུགས་པར་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་ཆེན་པོས་ཨོཾ་ཞེས་བྱ་བ་བྲི་བར་བྱའོ་ཞེས་བྱ་བའི་དོན་ཏོ། །ཕྱིའི་མཚམས་རྣམས་སུ་ནི་མེ་ཏོག་ལ་སོགས་པ་རྣམས་
དང་ཞེས་བྱ་བ་ནི་རྡོ་རྗེ་སྦྲང་རྩི་དང་རྡོ་རྗེ་སྤྲིན་དང་། རྡོ་རྗེ་སྟོན་དང་། རྡོ་རྗེ་དགུན་རྣམས་རྡོ་རྗེ་སེམས་དཔའི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོས་མེའི་ཕྱོགས་ནས་བརྩམས་ཏེ། དབང་ལྡན་གྱི་ཕྱོགས་ཀྱི་བར་དུ་བྲི་བར་བྱའོ། །སྒོ་རྣམས་སུ་ནི་ཞེས་བྱ་བ་ལ་ཤར་ཕྱོགས་ཀྱི་སྒོར་ནི་དོང་

59-1-207b

ཙེ་དང་། ལྷོར་གསེར་དང་། ནུབ་ཏུ་མུ་ཏིག་གི་འབྲས་བུ་དང་། བྱང་དུ་རིན་པོ་ཆེ་ཞེས་བྱ་བ་པདྨ་རཱ་ག་གཞག་པར་བྱའོ། །དེ་ནས་དེ་བཞིན་དུ་རྡོ་རྗེ་ཐམས་ཅད་ཀྱི་མཆོད་པ་ཐམས་ཅད་ཐོབ་པར་འགྱུར་རོ་ཞེས་བྱ་བ་ལ། ནམ་མཁའ་མཛོད་ཀྱི་དམ་ཚིག་གི་ཕྱག་རྒྱ་ནི་རྡོ་རྗེ་ཐམས་ཅད་དེ། དེ་བཅིངས་
ལ་རྡོ་རྗེ་སེམས་དཔའི་དཀྱིལ་འཁོར་ཆེན་པོར་འཇུག་པའི་ཚུལ་གྱིས་སློབ་དཔོན་ཞུགས་ནས། དེ་ནས་ཆོ་ག་དེ་ཉིད་ཀྱིས་ནམ་མཁའ་མཛོད་ཀྱི་དངོས་གྲུབ་ཐོབ་པར་འགྱུར་བ་ནི་མཆོད་པ་ཐམས་ཅད་འཐོབ་པར་འགྱུར་རོ་ཞེས་བྱའོ། །ཞུགས་ནས་སྣ་ཚོགས་རྡོ་རྗེ་བླངས་ལ་ཞེས་བྱ་བ་ནི་དེ་ལྟར་
རྡོ་རྗེ་སེམས་དཔའི་དཀྱིལ་འཁོར་ཆེན་པོའི་ཚུལ་གྱིས་རྡོ་རྗེ་ཐམས་ཅད་ཀྱིས་ཞུགས་ལ། བཅོམ་ལྡན་འདས་ལས་ཨོཾ་ཞེས་བྱ་བ་དང་། སྣ་ཚོགས་རྡོ་རྗེ་མནོས་ཏེ། ཨོཾ་ཞེས་བྱ་བ་ཟློས་ཤིང་། ཀྱེ་སྣ་ཚོགས་ཆེ་གེ་མོ་ཞེས་བྱ་བའི་མིང་གི་དབང་བསྐུར་བས་དབང་བསྐུར་བར་བྱའོ། །དེ་ལྟར་བདག་
ཉིད་དབང་བསྐུར་ནས་སློབ་དཔོན་གྱིས་མཆོད་པ་རྣམ་པ་བཞི་བྱ་སྟེ། འདི་ལྟ་སྟེ་ལུས་ཀྱི་ལས་ཐམས་ཅད་དང་ཕྱག་བྱ་བ་དང་། ངག་དང་ཡིད་དང་ཞེས་བྱ་བ་ནི། དེ་ལ་ཨོཾ་སརྦ་ཏ་ཐཱ་ག་ཏ་ཀཱ་ཡ་བཱ་ཀ་ཙིཏྟ་པྲ་ཎ་མེ་ན་བཛྲ་བནྡ་ནཾ་ཀ་རོ་མི་ཞེས་བྱ་བ་འདི་ནི་མཆོད་པ་གཅིག་གོ། །སེམས་ཀྱིས་ཆོས་ཀྱི་
དབྱིངས་སུ་སྤྲོས་པས་མཆོད་པའི་ཆོ་ག་རྒྱས་པ་དང་ཞེས་བྱ་བ་ནི། ཐོས་པ་དང་། མཐོང་བའི་མཆོད་པའི་ཁྱད་པར་རྣམས་ཀྱི་སེམས་ཀྱིས་ནམ་མཁའ་ཀུན་དུ་བཀང་ལ། དེ་བཞིན་གཤེགས་པ་ཐམས་ཅད་ལ་མཆོད་པར་བྱའོ་ཞེས་བྱ་བ་འདི་ནི་གཉིས་པའོ། །རྡོ་རྗེས་ཞེས་བྱ་བ་རང་གི་སྙིང་གར་
རྡོ་རྗེ་རྩེ་ལྔ་པ་བསྒོམས་པ་འདི་ནི་མཆོད་པ་གསུམ་པའོ། །ཕྱག་རྒྱས་མཆོད་པ་གཅིག་ཏུ་བྱས་པའོ། །ཞེས་བྱ་བ་ནི་གསང་བའི་མཆོད་པའི་ཕྱག་རྒྱ་རྣམས་སམ། རྡོ་རྗེ་སྦྲང་རྩི་ལ་སོགས་པའི་ཕྱག་རྒྱས་མཆོད་པར་བྱ་སྟེ། དེ་དག་གཅིག་ཏུ་བྱས་པའི་ཕྱག་རྒྱ་ནི་མཆོད་པ་བཞི་པར་འགྱུར་རོ། །སློབ་
མ་རྣམས་ནི་གཞུག་པའི་ལས་ཀྱང་དེ་བཞིན་ནོ་ཞེས་བྱ་བ་སློབ་དཔོན་འཇུག་པའི་ཆོ་ག་བཞིན་དུ་སློབ་མ་རྣམས་གཞུག་པ་ལ་སོགས་པའི་ཆོ་ག་རྣམས་ཀྱང་བྱ་བའོ། །ལས་ཀྱི་དཀྱིལ་འཁོར་རོ་ཞེས་བྱ་བ་ནི་བྱང་ཆུབ་ཀྱི་སེམས་ལ་སོགས་པ་ཇི་སྐད་དུ་བཤད་པའི་མཆོད་པ་རྣམ་པ་བཞི་ནི་ལས་ཏེ། དེ་ལས་

59-1-208a

བྱུང་བའི་དཀྱིལ་འཁོར་ནི་ལས་ཀྱི་དཀྱིལ་འཁོར་ཡིན་པ་འམ། དེ་བསྐྱེད་པའི་རྒྱུའི་དཀྱིལ་འཁོར་ཞེས་བྱའོ། །ཡང་འདིའི་དོན་བཤད་པར་བྱ་སྟེ། བཅོམ་ལྡན་འདས་ནམ་མཁའ་མཛོད་ཀྱི་སྦྱོར་བ་བྱས་ལ། དེ་ཉིད་ཀྱིས་རྣལ་འབྱོར་ཆེན་པོ་བྱའོ། །དེ་ནས་ཏིང་ངེ་འཛིན་
གསུམ་བསྒོམ་པར་བྱས་ལ། དཀྱིལ་འཁོར་ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་དཀྱིལ་འཁོར་འདི་བསྒོམ་པར་བྱའོ། །དེ་ནས་ཇི་སྐད་དུ་བཤད་པའི་དཀྱིལ་འཁོར་གྱི་སའི་དབུས་སུ་ཏིང་ངེ་འཛིན་གསུམ་རྣམ་པར་བསྒོམས་ལ། བར་སྣང་གི་ཕྱོགས་སུ་ཇི་ལྟ་བ་
བཞིན་དུ་བཞག་ནས་ཉི་མ་འཆར་བའི་དུས་སུ་ཇི་ལྟ་བ་བཞིན་དུ་གདབ་པར་བྱའོ། །འདིའི་ཕྱིའི་དཀྱིལ་འཁོར་ཐམས་ཅད་ནི་རྡོ་རྗེ་སེམས་དཔའི་ཕྱིའི་དཀྱིལ་འཁོར་དང་འདྲ་བའོ། །འདིའི་ནང་དུ་འདིའི་ཕྱེད་ཀྱི་ཚད་དུ་འཕགས་པ་ནམ་མཁའི་སྙིང་པོའི་དཀྱིལ་འཁོར་དང་འདྲ་བར་ཐིག་བཏབ་ལ། 
དཀྱིལ་འཁོར་ཐམས་ཅད་བྲི་བར་བྱའོ། །དེ་ནས་ལྷ་ཐམས་ཅད་ཀྱི་གནས་སུ་སྣ་ཚོགས་པདྨའི་གདན་བྱས་ལ། དཀྱིལ་འཁོར་དབུས་མའི་དབུས་སུ་སྣ་ཚོགས་པདྨའི་སྟེང་དུ་བཅོམ་ལྡན་འདས་ནམ་མཁའི་མཛོད་ཞལ་ཤར་ཕྱོགས་སུ་གཟིགས་པ་བྲི་བར་བྱའོ། །དེའི་ཤར་ཕྱོགས་ཀྱི་ཆ་
ལ་རྡོ་རྗེ་ཡིད་ལས་བྱུང་བའི་གནས་སུ་རྡོ་རྗེ་སེམས་དཔའ། མེའི་ཕྱོགས་སུ་འཇམ་དཔལ་གཞོན་ནུར་གྱུར་པ། ཀཱི་ལི་ཀཱི་ལའི་གནས་སུ་ནམ་མཁའི་སྙིང་པོ། བདེན་བྲལ་གྱི་ཕྱོགས་སུ་ནམ་མཁའ་མཛོད། རྡོ་རྗེ་དྲན་པའི་གནས་སུ་འཇིག་རྟེན་དབང་ཕྱུག །རླུང་གི་ཕྱོགས་སུ་སེམས་
བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ། རྡོ་རྗེ་བསྙེམས་པའི་གནས་སུ་རྡོ་རྗེ་ཁུ་ཚུར། དབང་ལྡན་གྱི་ཕྱོགས་སུ་རྡོ་རྗེ་གནོད་སྦྱིན་ལེགས་པར་བྲི་བར་བྱའོ། །ཕྱིའི་དཀྱིལ་འཁོར་གྱི་ལྷའི་སྣམ་བུ་ལ་མེའི་མཚམས་སུ་རྡོ་རྗེ་སྦྲང་རྩི། བདེན་བྲལ་གྱི་མཚམས་སུ་རྡོ་རྗེ་སྤྲིན། རླུང་གི་མཚམས་
སུ་རྡོ་རྗེ་སྟོན་ཀ །དབང་ལྡན་གྱི་མཚམས་སུ་རྡོ་རྗེ་དགུན་བྲི་བར་བྱའོ། །ཤར་ཕྱོགས་ཀྱི་སྒོར་ནི་དོང་ཙེ། ལྷོ་ཕྱོགས་ཀྱི་སྒོར་ནི་གསེར། ནུབ་ཕྱོགས་སུ་ནི་མུ་ཏིག་གི་འབྲུམ་བུ། བྱང་ཕྱོགས་ཀྱི་སྒོར་ནི་རིན་པོ་ཆེ་པདྨ་རཱ་ག་ཡང་དག་པར་གཞག་པར་བྱའོ། །འདིར་ལྷ་ཐམས་ཅད་ཀྱི་སྙིང་པོ་ནི་ཨོཾ་

59-1-208b

ཞེས་བྱ་བ་ཡིན་པར་ཤེས་པར་བྱའོ། །དེ་ལྟར་དཀྱིལ་འཁོར་བྲིས་ནས། དེ་བཞིན་དུ་སྦྱོར་བ་ཆེན་པོ་བྱས་ལ། ནམ་མཁའ་མཛོད་ཀྱི་དམ་ཚིག་གི་ཕྱག་རྒྱས་ཡོངས་སུ་བཟུང་བའི་སྣ་ཚོགས་རྡོ་རྗེ་དང་། མེ་ཏོག་གི་ལྕུག་མས་བུམ་པ་ཐམས་ཅད་དང་། བུམ་པ་གང་བ་ལ། ཨོཾ་ཞེས་བྱ་བ་རེ་རེ་
ཞིང་བཟླས་བརྗོད་བརྒྱ་རྩ་བརྒྱད་བྱས་ཏེ། དཀྱིལ་འཁོར་གྱི་སྒོ་བཞི་ཕྱེ་ནས་རྡོ་རྗེ་བསྡུ་བ་བྱས་ལ། བཅོམ་ལྡན་འདས་ནམ་མཁའ་མཛོད་ཀྱི་ཕྱག་རྒྱ་ཆེན་པོ་བསྒོམ་ཞིང་། བཅོམ་ལྡན་འདས་ལ་མཚན་བརྒྱ་རྩ་བརྒྱད་པས་བསྟན་ལ། གསང་བའི་ལྕགས་ཀྱུ་དང་། ཨོཾ་ཞེས་བྱ་བས་བཅོམ་ལྡན་
འདས་འཁོར་དང་བཅས་པ་དཀྱིལ་འཁོར་དུ་བཅུག་ལ་རྡོ་རྗེ་གནོད་སྦྱིན་གྱིས་གདོན་བསལ་ལ། དཀྱིལ་འཁོར་བཅིང་བ་དང་། མཚམས་བཅིང་བ་དང་། དྲ་བ་དང་། ར་བ་དག་བྱས་ཏེ། རྡོ་རྗེ་ཁུ་ཚུར་གྱིས་སྒོ་བཅིངས་ལ། རྡོ་རྗེ་སྲུང་བས་བསྲུང་བ་ཐམས་ཅད་གོ་བསྐོན་ཏེ། ཨོཾ་ཞེས་བྱ་བས་
མཆོད་ཡོན་ཕུལ་ལ་དམ་ཚིག་གི་ཕྱག་རྒྱས་ཨོཾ་དྲྀ་ཤྱ་ཞེས་བྱ་བ་དང་། འཁོར་དང་བཅས་པ་བལྟ་བར་བྱས་ཏེ། ཛཿཧཱུྃ་བཾ་ཧོཿ ས་མ་ཡ་སྟྭཾ། ས་མ་ཡ་སྟྭཾ། ཨ་ཧཾ་ཞེས་ལན་གསུམ་བརྗོད་ལ་བསྒྲུབ་པར་བྱ་ཞིང་། རྡོ་རྗེ་བསྡམས་པ་ལས་བྱུང་བའི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་ལས། སྲིན་
ལག་དང་། མཐེའུ་ཆུང་བརྐྱང་ལ། རྒྱལ་མཚན་དང་། དར་འཕན་གྱི་རྩེ་མོ་ལྟར་བྱ་བ་འདི་ནི་ནམ་མཁའ་མཛོད་ཀྱི་དམ་ཚིག་གི་ཕྱག་རྒྱའོ། །དེ་ནས་ལྷ་ཐམས་ཅད་ཀྱི་ལྗགས་ལ་ཨོཾ་ཞེས་བྱ་བ་ཇི་ལྟ་བ་བཞིན་དུ་བསམས་པ་འདི་ནི་འདིར་ལྷ་ཐམས་ཅད་ཀྱི་ཆོས་ཀྱི་ཕྱག་རྒྱའོ། །ཨ་ཞེས་བྱ་བས་
སྙིང་གར་སྣ་ཚོགས་རྡོ་རྗེ་བསམས་ལ་ལྷ་ཐམས་ཅད་ཀྱི་ཕྱག་རྒྱ་སྔར་བཤད་པའི་མཚན་ཉིད་ཅན་ཨོཾ་ཞེས་པ་ཉིད་ཟློས་ཤིང་བཅིང་བར་བྱའོ། །དེ་ནས་ཧཱུྃ་ལས་རང་གི་སྙིང་གར་རྡོ་རྗེ་རྩེ་ལྔ་པ་བསམས་ལ། ཇི་ལྟར་བྲིས་པའི་རྗེས་སུ་མཐུན་པར་ནམ་མཁའ་མཛོད་ལ་སོགས་པའི་ཕྱག་རྒྱ་ཆེན་
པོ་ཨོཾ་ཞེས་བྱ་བ་ཟློས་ཤིང་བཅིང་བར་བྱའོ། །དེ་ནས་སངས་རྒྱས་ལྔའི་ཅོད་ཕན་དང་སྣ་ཚོགས་རྡོ་རྗེའི་ཕྲེང་བའི་ཕྱག་རྒྱའི་དབང་བསྐུར་བདག་གིས་བཅོམ་ལྡན་འདས་འཁོར་དང་བཅས་པ་དབང་བསྐུར་བར་བྱའོ། །འདིར་སྣ་ཚོགས་རྡོ་རྗེའི་ཕྲེང་བའི་དབང་བསྐུར་བ་ནམ་མཁའ་མཛོད་ཀྱི་དམ་ཚིག་གི་

59-1-209a

ཕྱག་རྒྱ་དང་། ཨོཾ་ཞེས་བྱ་བས་དབུལ་བར་བྱའོ། །དེ་ནས་བཅོམ་ལྡན་འདས་འཁོར་དང་བཅས་པ་ལ་ཨོཾ་ཞེས་བྱ་བས་མཆོད་ཡོན་ཕུལ་ལ། བུམ་པ་རྣམས་དང་། བུམ་པ་གང་བ་རྣམས་དང་། ན་བཟའ་དང་། བླ་རེ་ལ་སོགས་པ་ཕུལ་ཏེ། མཆོད་པ་རྣམ་པ་ལྔས་མཆོད་ལ།
ཕྱི་རོལ་དུ་གླུ་དང་གར་དང་། རོལ་མོ་དང་རྟ་དང་། གླང་པོ་ཆེ་དང་། བ་ལང་གི་ཁྱུ་རྣམས་ཀྱིས་ཀྱང་མཆོད་པ་བྱེད་དུ་གཞུག་གོ། །དེ་ནས་ཕྱག་རྒྱའི་མཆོད་པ་རྣམ་པ་བཅུ་གཉིས་ཀྱིས་ཡང་དག་པར་མཆོད་ལ། ཨོཾ་ཞེས་བྱ་བ་ཉིད་ལས་རིན་པོ་ཆེ་སྣ་བདུན་དང་། དཔག་བསམ་གྱི་ཤིང་། 
ཁ་ཟས་རོ་བརྒྱ་པ་ལ་སོགས་པའི་བཀོད་པ་རྣམས་སྤྲུལ་ལ། འདིས་དབུལ་བར་བྱ་སྟེ། ཐལ་མོ་ཁོང་སྟོང་དུ་སྦྱར་ལ་སྤྱི་བོར་བཞག་ནས། ཨོཾ་སརྦ་བིཏྤཱུ་ར་པཱུ་ར་སུ་ར་སུ་ར་ཨཱ་བརྟ་ཡ་ཨཱ་བརྟ་ཡ་ཧོ། །ཞེས་བརྗོད་དོ། །དེ་ནས་ཕྱི་རོལ་དུ་གཏོར་མ་བྱིན་ལ་སྦྱིན་སྲེག་བྱའོ། །དེ་ནས་ཤིན་ཏུ་དམར་
བའི་རས་ལ། རྡོ་རྗེ་གནོད་སྦྱིན་གྱིས་ཡོངས་སུ་བཟླས་པ་གཅིག་གིས་སྨད་གཡོགས་བྱ། གཉིས་པས་སྟོད་གཡོགས་བྱའོ། །ཡང་གཅིག་ལ་རྡོ་རྗེ་ལྕགས་ཀྱུ་ལ་སོགས་པའི་སྙིང་པོ་བཞི་ཡོངས་སུ་བཟླས་པས་རང་གི་གདོང་གཡོགས་པར་བྱའོ། །དེ་ནས་ཕྱག་འཚལ་བ་ལ་སོགས་
པ་སྔོན་དུ་འགྲོ་བས་དེ་བཞིན་དུ་སྡོམ་པ་བཟུང་ལ། བྱང་ཆུབ་ཏུ་སེམས་བསྐྱེད་དེ། སྔ་མ་བཞིན་དུ་སྙིང་གར་རྡོ་རྗེ་བསྐྱེད་ལ། ཤར་ཕྱོགས་ཀྱི་སྒོར་བལྟས་ནས་ཕྱི་རོལ་ན་གནས་པའི་བུམ་པའི་ཆུས་བདག་ཉིད་དབང་བསྐུར་ཏེ། ནམ་མཁའ་མཛོད་ཀྱི་དམ་ཚིག་གི་ཕྱག་རྒྱ་བཅིངས་ལ། 
དེ་ཉིད་ཀྱིས་མེ་ཏོག་གི་ཕྲེང་བ་བླངས་ནས། བཛྲ་བཛྲ་ཨོཾ་ཞེས་ཟློས་ཤིང་དཀྱིལ་འཁོར་དུ་འཇུག་པར་བྱ་སྟེ། ཤར་ཕྱོགས་ཀྱི་སྒོར་བཛྲ་ཨཾ་ཀུ་ཤ་ཛཿཞེས་བརྗོད་པར་བྱའོ། །དེ་ནས་ལྷོ་ཕྱོགས་ནས་ཞུགས་ལ་བཛྲ་པཱ་ཤ་ཧཱུྃ་ཞེས་བརྗོད་པར་བྱའོ། །ཡང་ནུབ་ཕྱོགས་ཀྱི་སྒོ་ནས་ཞུགས་ནས་བཛྲ་
སྥོ་ཊ་བཾ་ཞེས་བརྗོད་པར་བྱའོ། །དེ་ནས་བྱང་ཕྱོགས་ཀྱི་སྒོ་ནས་དེ་བཞིན་དུ་ཞུགས་ལ་བཛྲ་ཨཱ་བེ་ཤ་ཨཱཿཞེས་པ་དང་བདག་ཉིད་དབང་དུ་བྱའོ། །དེ་ནས་དེ་བཞིན་དུ་ཤར་ཕྱོགས་ཀྱི་སྒོར་ཞུགས་ལ། མ་ཧཱ་ར་ཏ་། སུ་དྲྀ་ཌྷ། སུ་ཏོ་ཥྱོ། སུ་སུ་ཥྱོ། བཛྲ་སཏྭ། ཨཱདྱ་སིདྡྷྱཱ་མཱཾ་ཞེས་བརྗོད་པར་བྱའོ། །

59-1-209b

དེ་ནས་རྣམ་པར་སྒེག་པའི་རྡོ་རྗེས་ཕྱག་བྱས་ལ། དཀྱིལ་འཁོར་ལ་བསྐོར་བ་ལན་གསུམ་བྱས་ཏེ། བཅོམ་ལྡན་འདས་ཀྱི་སྤྱན་སྔར་འདུག་ལ། འདི་སྐད་ཅེས་བརྗོད་པར་བྱ་སྟེ། མ་ཧཱ་རཱ་ག་མ་ཧཱ་སོ་ཁྱ། མ་ཧཱ་བཛྲ་མ་ཧཱ་དྷཱ་ན། མ་ཧཱ་ཛྙཱ་ན་མ་ཧཱ་ཀརྨ་བཛྲ་སཏྭ་ཨཱདྱ་སིདྡྷྱ་མཱཾ། ཡང་འདི་སྐད་
ཅེས་བརྗོད་པར་བྱ་སྟེ། ཛཿཧཱུཾ་བཾ་ཧོཿ། པྲ་སིདྡྷྱ་མཱཾ། དེ་ནས་རྡོ་རྗེ་ཆུ་འཐུངས་ལ་ཨ་ཞེས་བྱ་བ་བརྒྱ་བཟླས་ནས། བདག་ཉིད་ལ་དབབ་པར་བྱའོ། །ཡང་གཡོན་པའི་ཁྲོ་བོའི་ཁུ་ཚུར་གྱིས་སེམས་མ་རྡོ་རྗེ་ཕྱེ་ལ། ཨ་ཞེས་བྱ་བ་ལན་བརྒྱ་བརྗོད་ཅིང་བདག་ཉིད་ལ་དབབ་པར་བྱའོ། །དེ་ནས་ཨོཾ་ཞེས་
བྱ་བ་ཟློས་ཤིང་མེ་ཏོག་དོར་བར་བྱའོ། །དེ་ནས་དེ་བླངས་ལ། ཨོཾ་ཉིད་ཀྱིས་རང་གི་མགོ་ལ་བཅིང་བར་བྱའོ། །དེ་ནས་དེ་ཉིད་ཀྱིས་གདོང་གཡོགས་དགྲོལ་ལོ། །དེ་ནས་དེ་ཉིད་ཟློས་ཤིང་ཤར་ཕྱོགས་ནས་བརྩམས་ཏེ། དཀྱིལ་འཁོར་ལ་བལྟ་བར་བྱའོ། །དེ་ནས་བཅོམ་ལྡན་འདས་
ནམ་མཁའ་མཛོད་ཀྱི་དམ་ཚིག་གི་ཕྱག་རྒྱ་བཅིངས་ལ། སྔ་མ་བཞིན་དུ་རང་གི་སྙིང་གར་དགྲོལ་བར་བྱའོ། །དེ་ནས་ཡང་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་ལ་རྡོ་རྗེའི་ལྟ་བས་བལྟ་ཞིང་། ཇི་སྲིད་དུ་བཅོམ་ལྡན་འདས་ཀྱིས་ཞལ་བསྟན་ནས་རང་གི་དངོས་གྲུབ་སྩོལ་
བར་གྱུར་པ་དེ་སྲིད་ཀྱི་བར་དུ་ཨོཾ་ཞེས་བྱ་བ་བཟླས་བརྗོད་བྱའོ། །དེ་ནས་རྡོ་རྗེ་ཐལ་མོ་བསྐོར་བ་ཤིས་པ་བརྗོད་པ་འདོན་པའི་ཚུལ་དུ་རང་གི་སྙིང་གར་བཞག་ལ། མཚན་བརྒྱ་རྩ་བརྒྱད་པས་བསྟོད་དེ། རྡོ་རྗེ་མཚོན་ཆ་ལ་སོགས་པས་གསང་བའི་མཆོད་པ་བཞིས་ཡང་དག་པར་མཆོད་ལ། གླུ་དང་
རོལ་མོ་ལ་སོགས་པ་རྣམས་ཀྱིས་ཡང་དག་པར་མཆོད་པར་བྱའོ། །དེ་ནས་ཡང་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་ལ་རྡོ་རྗེའི་ལྟ་བས་བལྟས་ཏེ། རྡོ་རྗེ་ཐལ་མོ་བསྐོར་བས་ཕྱག་བྱས་ནས། མེ་ཏོག་ལ་སོགས་པ་དང་དབང་བསྐུར་བ་རྣམས་བླང་བར་བྱའོ། །
དེ་ལ་དང་པོ་ཁོ་ནར་བཅོམ་ལྡན་འདས་ཀྱི་དམ་ཚིག་གི་ཕྱག་རྒྱས་ཡོངས་སུ་བཟུང་བའི་སྣ་ཚོགས་རྡོ་རྗེ་དང་། མེ་ཏོག་གི་ཡལ་ག་ལས་རྣམ་པར་རྒྱལ་བའི་བུམ་པ་ལ་སྔར་བཤད་པའི་བུམ་པའི་སྔགས་དེ་བཞིན་དུ་ཡོངས་སུ་བཟླས་ལ། བདག་ཉིད་བཅོམ་ལྡན་འདས་ནམ་མཁའི་མཛོད་དུ་བྱིན་གྱིས་

59-1-210a

བརླབས་ཏེ། བཅོམ་ལྡན་འདས་ཀྱི་དམ་ཚིག་གི་ཕྱག་རྒྱས་རྣལ་འབྱོར་ཆེན་པོ་ལས་གསུངས་པའི་གནས་སུ་བཅོམ་ལྡན་འདས་འཁོར་དང་བཅས་པ་ཨོཾ་གྱིས་རང་གི་གནས་སུ་བཀོད་ལ། ཕྱི་རོལ་གྱི་དཀྱིལ་འཁོར་གྱི་ནང་དུ་སྣ་ཚོགས་པདྨའི་སྟེང་དུ་ནམ་མཁའ་མཛོད་ཀྱི་
ཕྱག་རྒྱ་ཆེན་པོས་བདག་ཉིད་འདུག་ནས། མེ་ཏོག་ལ་སོགས་པས་བདག་ཉིད་ཡང་དག་པར་མཆོད་དེ། མཆོད་ཡོན་བླངས་ལ་མཚན་བརྒྱ་རྩ་བརྒྱད་པས་ཡང་དག་པར་བསྟོད་ནས། རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ལ། ཨོཾ་བཛྲ་ཨ་བྷི་ཥིཉྩ་ཨོཾ་ཞེས་བྱ་བས་
བདག་ཉིད་དབང་བསྐུར་ཞིང་ཆུ་དེ་བཏུང་བར་བྱའོ། །དེ་ནས་སངས་རྒྱས་ལྔའི་དབུ་རྒྱན་དང་། སྣ་ཚོགས་རྡོ་རྗེའི་ཕྲེང་བའི་ཕྱག་རྒྱ་དག་གིས་བདག་ཉིད་དབང་བསྐུར་ཞིང་། ལུགས་མའམ། བརྡུངས་པའམ་། བྱས་པའམ། བྲིས་པའི་སངས་རྒྱས་ལྔའི་དབུ་རྒྱན་དང་། སྣ་ཚོགས་རྡོ་རྗེའི་
ཕྲེང་བའི་དབང་བསྐུར་བས་དབང་བསྐུར་ལ། སྣ་ཚོགས་རྡོ་རྗེ་སྣ་ཚོགས་དྲིལ་བུ་དང་བཅས་པར་བླངས་ཏེ། བདག་པོ་དང་མིང་གི་དབང་བསྐུར་བདག་གིས་ཀྱང་ཨོཾ་ཞེས་བྱ་བཟློས་ཤིང་དབང་བསྐུར་བར་བྱའོ། །དེ་ནས་དངོས་གྲུབ་ཀྱི་རྡོ་རྗེའི་བརྟུལ་ཞུགས་བླངས་ལ། མེ་ཏོག་ལ་སོགས་པ་མཆོད་
པ་རྣམ་པ་ལྔས་བདག་ཉིད་ལ་ཡང་དག་པར་མཆོད་དེ། རྡོ་རྗེ་མཚོན་ཆ་ལ་སོགས་པ་ཕྱག་རྒྱའི་མཆོད་པ་རྣམ་པ་བཅུ་གཉིས་ཀྱིས་ཀྱང་ཡང་དག་པར་མཆོད་པར་བྱའོ། །དེ་ནས་རྡོ་རྗེ་དེ་ཁོ་ན་ཉིད་ཀྱིས་བཟུང་ལ། ཆོས་ཀྱི་དྲིལ་བུ་དཀྲོལ་ཞིང་དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབ་པར་བྱ་སྟེ། 
དེ་ཁོ་ན་ཉིད་ལ་སོགས་པ་ནི། ཐོག་མཐའ་མེད་པའི་སེམས་དཔའ་ནི། །ཞེས་བྱ་བ་ལ་སོགས་པ་སྔར་སྨྲས་པ་ཉིད་ཡིན་པར་ཤེས་པར་བྱའོ། །དེ་ནས་བཅོམ་ལྡན་འདས་ལ་ཕྱག་བྱས་ལ་སྙིང་པོས་བླངས་ཏེ། ཚིགས་སུ་བཅད་པ་ལྔ་པས་རྗེས་སུ་གནང་བ་དང་། དབུགས་དབྱུང་བ་དང་། གཟེངས་
བསྟོད་པ་དང་། ལུང་བསྟན་པ་མནོས་ལ་ཡང་བདག་ཉིད་ལ་བྱིན་གྱིས་བརླབ་པ་ལ་སོགས་པ་དང་། ཇི་ལྟར་མངོན་པར་འདོད་པའི་བཟླས་བརྗོད་བྱས་ནས། བཅོམ་ལྡན་འདས་ལ་ཕྱག་བྱས་ཏེ། འདི་སྐད་ཅེས་བརྗོད་པར་བྱའོ། །བདག་མིང་འདི་ཞེས་བྱ་བ་ཡི། །རྡོ་རྗེ་སློབ་དཔོན་དཀའ་ཐུབ་ཆེས། །

59-1-210b

སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བགྱི། །དེ་ནས་སློབ་མ་གཞུག་པར་བྱའོ། །སློབ་དཔོན་གྱི་ལས་ཀྱི་ཆོ་ག་རྒྱས་པ་རྫོགས་སོ།།      །།དེ་ནས་སྡོམ་པ་དབོག་པར་འོས་པའི་སློབ་མ་སྔར་བཤད་པའི་ཚུལ་གྱིས་སྡོམ་པ་འཛིན་དུ་གཞུག་པར་བྱའོ། །དེ་
ནས་བྱང་ཆུབ་ཏུ་སེམས་བསྐྱེད་དུ་བཅུག་ལ། དེའི་སྙིང་གར་དེ་བཞིན་དུ་རྡོ་རྗེ་བསྐྱེད་དེ། དེ་ནམ་མཁའ་མཛོད་དུ་བྱིན་གྱིས་བརླབས་ནས། དྲི་དང་མེ་ཏོག་ལ་སོགས་པས་ཡང་དག་པར་མཆོད་ལ། ཡོན་གྱི་མཆོག་ཡང་དག་པར་བླངས་ཏེ། རང་གི་འཇུག་པའི་ཆོ་གས་གཞུག་པ་དང་དབབ་
པར་བྱའོ། །དེ་ནས་ཡང་དབབ་པའི་ཕྱག་རྒྱ་དྲིལ་བུ་དང་བཅས་པ་དང་། རྐང་པ་གཡོན་པས་དེའི་རྐང་པ་གཡས་པ་མནན་ལ། ཨོཾ་ཨཿཨཿཨཿཨཱཿ་ཞེས་བྱ་བ་ལན་བརྒྱ་རྩ་བཟླས་ལ་དབབ་པར་བྱའོ། །དེ་ནས་ཆོ་ག་ཐམས་ཅད་རྗེས་སུ་སྤྱད་པར་བྱའོ། །སློབ་མ་གཞུག་པ་ལ་སོགས་
པའི་ཆོ་ག་རྒྱས་པ་རྫོགས་སོ།།      །།དེ་ལྟར་དམ་ཚིག་དང་དབང་བསྐུར་བ་ཐོབ་པ་རྣམས་ལ། སློབ་དཔོན་གྱིས་དངོས་གྲུབ་ཀྱི་ཡེ་ཤེས་ལ་བསླབ་པར་བྱའོ་ཞེས་བྱ་བ་འདིའི་ཆོ་ག་བསྟན་པར་བྱ་བའི་ཕྱིར་དེ་ནས་སྒྲུབ་པ་ཞེས་བྱ་བ་ལ་སོགས་པ་གསུངས་ཏེ། སྒྲུབ་པ་དང་དངོས་གྲུབ་རྣམས་ཀྱང་
དེ་བཞིན་ནོ་ཞེས་བྱ་བ་ནི། ཇི་ལྟར་རྡོ་རྗེ་སེམས་དཔའི་སྒྲུབ་པ་གསུངས་པ་དེ་བཞིན་དུ་བྱང་ཆུབ་སེམས་དཔའ་ནམ་མཁའ་མཛོད་ཀྱི་སྒྲུབ་པ་ལ་སོགས་པ་ལ་སྔོན་དུ་བསྙེན་པ་བྱས་ཏེ། རས་ཀྱི་རི་མོ་གཉིས་ལ་བསྒྲུབ་པར་བྱ་བ་ཤེས་པར་བྱའོ་ཞེས་བྱ་བའི་དོན་ཏོ། །དེ་ནས་མ་བསྒྲུབས་པར་
ཡང་ངོ་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །བྱང་ཆུབ་ཀྱི་སེམས་ཀྱི་མཆོད་པ་ལ་ནི་རང་གི་སྙིང་གར་རྡོ་རྗེ་བསྒོམས་པས་སོ་ཞེས་བྱ་བ་ནི་བཅོམ་ལྡན་འདས་ཕྱག་རྒྱའི་སྦྱོར་བ་བྱས་ལ། ཨོཾ་ཞེས་བྱ་བ་ཟློས་ཤིང་རང་གི་སྙིང་གའི་ཟླ་བ་ལ་རྡོ་རྗེ་རྩེ་ལྔ་པ་བསྒོམ་པར་བྱ་སྟེ། དེ་ལྟ་བུས་ནི་བྱང་
ཆུབ་ཀྱི་སེམས་ཀྱི་མཆོད་པ་བྱས་པར་འགྱུར་རོ། །ཏིང་ངེ་འཛིན་གྱི་མཆོད་པ་ལ་ནི་ཐམས་ཅད་དག་པར་བསྒོམས་པས་སོ་ཞེས་བྱ་བ་ནི། བཅོམ་ལྡན་འདས་འཇིག་རྟེན་དབང་ཕྱུག་གི་སྦྱོར་བ་བྱས་ལ། ཨོཾ་ཞེས་བྱ་བ་ཟློས་ཤིང་ཆོས་
ཐམས་ཅད་ནི་རང་བཞིན་གྱིས་རྣམ་པར་དག་པའོ་ཞེས་བསྒོམ་པར་བྱ་

59-1-211a

སྟེ། དེ་ལྟ་བུས་ནི་ཏིང་ངེ་འཛིན་གྱི་མཆོད་པ་བྱས་པར་འགྱུར་རོ། །དབང་བསྐུར་བ་ལ་ནི་རྡོ་རྗེ་དབང་བསྐུར་བ་སྣ་ཚོགས་ཀྱིས་སོ་ཞེས་བྱ་བ་ནི། བཅོམ་ལྡན་འདས་ནམ་མཁའི་སྙིང་པོའི་སྦྱོར་བ་བྱས་ལ། དེ་ཉིད་ཀྱི་དམ་ཚིག་གི་ཕྱག་རྒྱ་བཅིངས་ཏེ། ཨོཾ་ཞེས་བྱ་བའི་བཟླས་
བརྗོད་བྱས་ན་དེ་ལྟ་བུས་ནི་དབང་བསྐུར་བའི་མཆོད་པ་བྱས་པར་འགྱུར་རོ། །ཕྱག་རྒྱའི་མཆོད་པ་ལ་ནི་སྣ་ཚོགས་རྡོ་རྗེ་ཐམས་ཅད་ཀྱིས་སོ་ཞེས་བྱ་བ་ནི། བཅོམ་ལྡན་འདས་རྡོ་རྗེ་ཁུ་ཚུར་གྱི་སྦྱོར་བ་བྱས་ལ། དེའི་དམ་ཚིག་གི་ཕྱག་རྒྱ་བཅིངས་ནས། ཨོཾ་ཞེས་བྱ་བ་བཟླས་བརྗོད་བྱ་བ་འདི་ནི་
སྣ་ཚོགས་རྡོ་རྗེ་ཐམས་ཅད་དེ། དེ་ལྟ་བུས་ནི་ཕྱག་རྒྱའི་མཆོད་པ་བྱས་པར་འགྱུར་རོ། །སྟོང་པ་ཉིད་ཀྱི་མཆོད་པ་ལ་ནི་ཨ་ལ་སོགས་པའི་ཡི་གེའི་ལུང་བསྟན་པས་སོ་ཞེས་བྱ་བ་ནི། བཅོམ་ལྡན་འདས་འཇམ་དཔལ་གཞོན་ནུའི་སྦྱོར་བ་བྱས་ལ། ཨ་ར་པ་ཙ་ན་ཞེས་བརྗོད་ཅིང་། འདོད་པ་
ཐམས་ཅད་འཐོབ་པོ། །དེ་ཅིའི་ཕྱིར་ཞེ་ན། ཨ་ཞེས་བྱ་བ་ནི་འདོད་པའོ། །ར་ཞེས་བྱ་བ་ནི་ཆགས་པའོ། །པ་ཞེས་བྱ་བ་ནི་དོན་དམ་པའོ། །ཙ་ཞེས་བྱ་བ་ནི་སྤྱོད་པའོ། །ན་ཞེས་བྱ་བ་ནི་རང་བཞིན་མེད་པའོ། །དེ་ལྟར་ན་འདོད་པ་དང་། ཆགས་པ་དང་། དོན་དམ་པ་དང་། སྤྱོད་པ་དང་། རང་བཞིན་
མེད་པ་ཉིད་དེ། སྙིང་པོ་འདི་བསྒོམས་ལ་བསྒྲུབས་ན། འདོད་པ་ཐམས་ཅད་འཐོབ་པའོ། །དེ་བཞིན་གཤེགས་པ་ནི་འདོད་པ་ཐམས་ཅད་ཀྱི་སྣོད་ཡིན་ཏེ་དེ་བས་ན་སྙིང་པོ་འདིས་དེ་བཞིན་གཤེགས་པ་ཉིད་དང་རྡོ་རྗེ་འཛིན་པ་ཉིད་ཀྱང་མྱུར་དུ་ཐོབ་པར་འགྱུར་རོ། །སྔགས་འདི་ནི་ཨ་ལ་སོགས་
པའི་ཡི་གེས་ལུང་བསྟན་པ་སྟེ། འདིས་ནི་སྟོང་པ་ཉིད་མཆོད་པར་འགྱུར་རོ། །དཀྱིལ་འཁོར་གྱི་མཆོད་པ་ལ་ནི་རྡོ་རྗེ་འཁོར་ལོ་སྣ་ཚོགས་ཀྱིས་སོ་ཞེས་བྱ་བ་ནི། བཅོམ་ལྡན་འདས་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་དམ་ཚིག་གི་ཕྱག་རྒྱ་གང་ཡིན་པ་དེ་ནི་རྡོ་རྗེ་འཁོར་ལོ་སྣ་
ཚོགས་ཏེ། འདི་བཅིངས་ལ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་སྦྱོར་བ་བྱས་ལ། ཨོཾ་ཞེས་བྱ་བ་བཟླས་བརྗོད་བྱས་ཏེ། དེ་ལྟ་བུས་ནི་དཀྱིལ་འཁོར་གྱི་མཆོད་པ་བྱས་པར་འགྱུར་རོ། །མཆོད་པ་ཐམས་ཅད་ལ་ནི་སྣ་ཚོགས་རྡོ་རྗེས་སོ་ཞེས་བྱ་བ་ནི། བཅོམ་ལྡན་འདས་ནམ་

59-1-211b

མཁའ་མཛོད་ཀྱི་དམ་ཚིག་གི་ཕྱག་རྒྱ་ནི་སྣ་ཚོགས་རྡོ་རྗེ་སྟེ། དེ་བཅིངས་ལ། བཅོམ་ལྡན་འདས་ནམ་མཁའི་མཛོད་ཀྱི་སྦྱོར་བ་བྱས་ནས་། ཨོཾ་ཞེས་བྱ་བ་བཟླས་བརྗོད་བྱས་ཏེ། དེ་ལྟ་བུས་ནི་མཆོད་པ་ཐམས་ཅད་བྱས་པར་འགྱུར་རོ། །གདུག་པ་འདུལ་བའི་མཆོད་པ་ལ་ནི་ཁྲོ་བོས་སོ་ཞེས་བྱ་
བ་ནི་བཅོམ་ལྡན་འདས་རྡོ་རྗེ་གནོད་སྦྱིན་གྱི་སྦྱོར་བ་བྱས་ལ། འདིའི་དམ་ཚིག་གི་ཕྱག་རྒྱ་བཅིངས་ནས། ཨོཾ་ཧ་ཞེས་བྱ་བ་བཟླས་བརྗོད་བྱས་ན་གདུག་པ་ཐམས་ཅད་ཟོས་པར་འགྱུར་ཏེ། དེ་ལྟ་བུས་ནི་གདུག་པ་ཐམས་ཅད་འདུལ་བའི་མཆོད་པ་བྱས་པར་འགྱུར་རོ། །མེ་ཏོག་ལ་སོགས་པ་
དོར་བ་ལ་ནི་བཟླས་པས་སོ་ཞེས་བྱ་བ་ནི་རྡོ་རྗེ་སྦྲང་རྩི་ལ་སོགས་པ་དུས་ཀྱི་མཆོད་པ་བཞིའི་སྙིང་པོ་ཟློས་ཤིང་འདི་རྣམས་ཀྱི་ལས་ཀྱི་ཕྱག་རྒྱ་རྣམས་ཀྱིས་དེ་དག་བྱས་ཏེ། དེ་ལྟ་བུས་ནི་མེ་ཏོག་དོར་བ་ལ་སོགས་པའི་ལས་རྣམས་འགྲུབ་པར་འགྱུར་རོ། །སྣ་ཚོགས་རྡོ་རྗེ་དོན་ཡོད་པའི་དམ་
ཚིག་ཅེས་བྱ་བ་ལ་སྣ་ཚོགས་རྡོ་རྗེ་ནི་བྱང་ཆུབ་ཀྱི་སེམས་ལ་སོགས་པ་མཆོད་པ་རྣམ་པ་བཞིའོ། །དེའི་དམ་ཚིག་ནི་དེ་ལས་བྱུང་བའི་ནམ་མཁའི་མཛོད་ཀྱི་དཀྱིལ་འཁོར་ཏེ། མིང་དེ་སྐད་བྱ་བའི་རྟོག་པའི་རྒྱལ་པོ་རྫོགས་པ་སྟེ། བཅོམ་ལྡན་འདས་ནམ་མཁའ་མཛོད་ཀྱི་རྟོག་པའི་བཤད་པ་
རྫོགས་སོ།།    །།དེ་ལྟར་ཚོགས་རྣམས་ཡོངས་སུ་རྫོགས་པའི་རྒྱུར་གྱུར་པ་ནམ་མཁའ་མཛོད་ཀྱི་རྟོག་པ་བཤད་ནས། ད་ནི་བསྲུང་བའི་ལས་ཀྱི་ཆོ་གའི་རང་བཞིན་རྡོ་རྗེ་གནོད་སྦྱིན་གྱི་རྟོག་པ་བཤད་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་
སྔ་མ་བཞིན་ཏེ། དེ་བཞིན་དུ་ཐམས་ཅད་མཛད་ནས་བཅོམ་ལྡན་འདས་རྣམ་པར་སྣང་མཛད་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་གནས་ན་ཇི་ལྟ་བ་བཞིན་དུ་བཞུགས་པ་དང་། དེའི་རྗེས་ཐོགས་ཉིད་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་གསུངས་པའོ། །གདུག་པ་ཐམས་
ཅད་འདུལ་ནུས་པ། །ཞེས་བྱ་བ་ནི་མི་དགེ་བའི་ལས་ཀྱི་ལམ་བཅུ་ལ་མངོན་པར་དགའ་བ་དང་། གཟུང་བ་དང་འཛིན་པའི་རྣམ་པར་རྟོག་པས་བཅོམ་པའི་གདུག་པ་ཐམས་ཅད་དོ། །དེ་རྣམས་འདུལ་བ་ནི་མི་དགེ་བ་བཅུའི་ལས་ཀྱི་ལམ་ལས་བཟློག་པ་དང་། གཟུང་བ་དང་འཛིན་པའི་རྣམ་

59-1-212a

པར་རྟོག་པ་ལ་མངོན་པར་ཞེན་པ་ལས་བཟློག་པའི་ཆོས་བདག་མེད་པ་བསྒོམ་པ་སྟོན་པར་མཛད་པས་གདུག་པ་ཐམས་ཅད་འདུལ་བར་སྤྱོད་ཅིང་ནུས་པ་སྟེ། ཆོ་འཕྲུལ་རྣམ་པ་བཞིས་རང་དབང་དུ་མཛད་པར་སྤྱོད་ཅེས་བྱ་བའི་དོན་ཏོ། །ཡེ་ཤེས་ཀྱི་ཁུ་ཚུར་ཡོངས་
སུ་འཛིན་པའི་ཞེས་བྱ་བ་ནི་གོ་བར་ཟད་དོ། །སེམས་ཅན་ཐམས་ཅད་འདུལ་བའི་ཡེ་ཤེས་ཀྱི་སྙིང་པོ་ཞེས་བྱ་བ་ལ། སེམས་ཅན་ཐམས་ཅད་ནི་ཇི་སྐད་དུ་བཤད་པ་རྣམས་སོ། །དེའི་སྙིང་པོ་མི་དགེ་བ་བཅུའི་ལས་ཀྱི་ལམ་སྤོང་བ་དང་། ཇི་སྐད་དུ་བཤད་པའི་མངོན་པར་ཞེན་པ་དག་སྤོང་བའོ། །
དེར་ངེས་པ་ནི་ཡེ་ཤེས་ཏེ། དེ་འབྱུང་བར་བྱེད་པའི་རྒྱུར་གྱུར་པ་གང་ཡིན་པ་སྟེ། དེ་སྐད་ཅེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་དེ་བཤད་པའོ། །སེམས་ཅན་ཐམས་ཅད་མཉམ་པ་ཉིད་པས་ཁྲོ་བོ་མཉམ་པ་ཉིད་དོ་ཞེས་བྱ་བ་ནི། མཛའ་བོ་དང་། ཐ་མལ་པ་དང་། དགྲ་བོ་དང་། དེ་
བཞིན་གཤེགས་པའི་རིགས་དང་། བྱང་ཆུབ་ཀྱི་སེམས་ཀྱི་ངོ་བོ་ཉིད་ཀྱི་སེམས་དང་སེམས་ལས་བྱུང་བ་རྣམས་ནི་སེམས་ཅན་ཐམས་ཅད་དེ། དེ་རྣམས་ཀྱི་མཉམ་པ་ཉིད་ནི་དོན་དམ་པར་དེ་བཞིན་ཉིད་ཡིན་པ་དང་། ཀུན་རྫོབ་ཏུ་མཛའ་བོ་དང་། ཐ་མལ་པ་དང་། དགྲ་བོ་རྣམས་ལ་ཐུགས་རྗེ་ཆེན་
པོའི་གཞན་གྱི་དབང་གིས་སེམས་མཉམ་པ་ཉིད་དེ། ཁྲོ་བོས་ཕན་པ་མ་ཡིན་པ་ལས་བཟློག་པ་དང་། ཕན་པ་ལ་སྦྱོར་བའི་སེམས་ཀྱིས་སོ་ཞེས་བྱ་བའི་དོན་ཏོ། །ཁྲོ་བོ་མཉམ་པ་ཉིད་དོ་ཞེས་བྱ་བ་ནི་སེམས་ཅན་ཐམས་ཅད་ལ་མཉམ་པ་ཉིད་དེས། མཛའ་བོ་དང་། ཐ་མལ་པ་དང་། དགྲ་བོ་
རྣམས་ལ་རྡོ་རྗེ་གནོད་སྦྱིན་གྱི་ཁྲོ་བོའི་གཟུགས་ཡང་དག་པར་སྟོན་ཅིང་སྡིག་པ་ལས་ལྡོག་པར་བྱེད་པ་ནི་ཁྲོ་བོའི་མཉམ་པ་ཉིད་དེ། དམིགས་པ་མེད་པའི་ཐུགས་རྗེ་ཆེན་པོའི་ཤུགས་ཀྱི་ཁྲོ་བོས་འདུལ་བའི་སེམས་ཅན་རྣམས་གདུལ་བར་བྱ་བའི་ཕྱིར། ཁྲོ་བོའི་བྱ་བ་བསྒྲུབ་པ་ནི་ཁྲོ་བོའི་མཉམ་པ་ཉིད་
དོ། །གང་གི་ཚེ་ཁྲོ་བོའི་བྱ་བ་བསྒྲུབ་པ་ལས་ལྡོག་པར་འགྱུར་ཞེ་ན། སེམས་ཅན་ཐམས་ཅད་འདུལ་བ་ཉིད་ལས་ཁྲོ་བོའི་དུལ་བ་ཉིད་དོ་ཞེས་བྱ་བ་གསུངས་ཏེ། གང་གི་ཚེ་སེམས་ཅན་ཐམས་ཅད་འདུལ་བར་གྱུར་པ་དེའི་ཚེ་ཁྲོ་བོས་འདུལ་བའི་སེམས་ཅན་རྣམས་མེད་པས་ཐུགས་རྗེ་ཆེན་པོའི་ཁྲོ་

59-1-212b

བོས་འདུལ་བར་འགྱུར་ཞིང་བྲལ་བར་འགྱུར་རོ་ཞེས་བྱ་བའི་དོན་ཏོ། །ཁྲོ་བོ་དེའི་ཆོས་ཉིད་གང་ཞེ་ན། སེམས་ཅན་ཐམས་ཅད་ཆོས་ཉིད་ལས་ཁྲོ་བོའི་ཆོས་ཉིད་དོ་ཞེས་བྱ་བ་གསུངས་ཏེ། སེམས་ཅན་ཐམས་ཅད་དོན་དམ་པར་གཟུང་བ་དང་འཛིན་པ་དང་བྲལ་བ་ཉིད་དེ། དེ་དང་ལྷན་ཅིག་ཏུ་གྱུར་པ་ནི་
ཁྲོ་བོའི་ཆོས་ཉིད་ཡིན་ལ། གང་སེམས་ཅན་ཐམས་ཅད་ཀྱི་དངོས་པོ་མེད་པའི་ངོ་བོ་ཉིད་དེ་ནི་ཁྲོ་བོ་དངོས་པོ་མེད་པའི་ངོ་བོ་ཉིད་དེ། དེ་ནི་སེམས་ཅན་ཐམས་ཅད་མེད་པ་ཉིད་དོ་ཞེས་བྱ་བའི་དོན་ཏོ། །ཁྲོ་བོ་འདིའི་མིང་མི་ཕྱེད་པའི་མིང་ཇི་སྐད་དུ་བྱ་ཞེ་ན། སེམས་ཅན་ཐམས་ཅད་རྡོ་རྗེ་ཉིད་པས་
ཁྲོ་བོ་རྡོ་རྗེ་ཉིད་དོ་ཞེས་བྱ་བ་གསུངས་ཏེ། སེམས་དང་སེམས་ལས་བྱུང་བ་རྣམས་ནི་དོན་དམ་པར་གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བ་ཉིད་དོ། །དེ་ནི་སེམས་ཅན་ཐམས་ཅད་རྡོ་རྗེ་ཉིད་ཡིན་ལ། དེས་ཁྲོ་བོ་རྡོ་རྗེ་ཉིད་ཡིན་ཏེ། སེམས་ཅན་ཐམས་ཅད་ཀྱི་རྡོ་རྗེ་ཉིད་
གང་ཡིན་པ་དེ་ཉིད་ནི་ཐུགས་རྗེ་ཆེན་པོ་ཁྲོ་བོའི་ངོ་བོ་ཉིད་ཡིན་ལ། ཆོས་ཐམས་ཅད་ནི་ཆོས་ཀྱི་དབྱིངས་ཀྱི་ངོ་བོ་ཉིད་ཡིན་པའི་ཕྱིར་རོ། །ཡང་ན་ཁྲོ་བོས་འདུལ་བའི་སེམས་ཅན་རྣམས་ལ་འཁོར་བ་ཇི་སྲིད་པར་གནས་པ་ནི་སེམས་ཅན་ཐམས་ཅད་ཀྱི་རྡོ་རྗེ་ཉིད་དོ། །སེམས་ཅན་ཐམས་ཅད་ཀྱི་རྡོ་རྗེ་ཉིད་
དེ་རྒྱུར་གྱུར་པས་ཁྲོ་བོ་རྡོ་རྗེ་ཉིད་དེ། ཁྲོ་བོས་གདུལ་བའི་སེམས་ཅན་ཐམས་ཅད་རྣམ་པར་གདུལ་བར་བྱ་བའི་བྱ་བའོ། །འཁོར་བ་ཇི་སྲིད་པར་ཁྲོ་བོའི་བྱ་བ་བསྒྲུབ་པ་རྒྱུན་མི་གཅོད་པ་ཉིད་ནི་ཁྲོ་བོ་རྡོ་རྗེ་ཉིད་དོ། །དེ་ཅིའི་ཕྱིར་ཞེ་ན་ཞེས་བྱ་བ་ནི་རྒྱུ་གང་གིས་ན་སེམས་ཅན་ཐམས་ཅད་མཉམ་
པ་ཉིད་པས་ཁྲོ་བོ་མཉམ་པ་ཉིད་དོ་ཞེས་བྱ་བས། སེམས་ཅན་ཐམས་ཅད་རྡོ་རྗེ་ཉིད་པས་ཁྲོ་བོ་རྡོ་རྗེ་ཉིད་ཡིན་ཞེ་ན། གང་གི་ཕྱིར་འདི་ལྟར་སེམས་ཅན་ཐམས་ཅད་འདུལ་བའི་བྱང་ཆུབ་བོ་ཞེས་གསུངས་ཏེ། འདི་ཉིད་ནི་བྱང་ཆུབ་ཀྱི་མཚན་ཉིད་ཅན་ཏེ། གང་ཞེ་ན། སེམས་ཅན་ཐམས་ཅད་
མཉམ་པ་ཉིད་ནས་སེམས་ཅན་ཐམས་ཅད་རྡོ་རྗེ་ཉིད་ཀྱི་བར་ཏེ། དེས་ཁྲོ་བོ་རྡོ་རྗེ་ཉིད་དོ་ཞེས་བྱ་བ་སྟེ་ཁྲོ་བོ་མཉམ་པ་ཉིད་ལ་སོགས་པས་ཀྱང་སེམས་ཅན་གདུག་པ་ཅན་ཐམས་ཅད་འདུལ་བར་མཛད་ཅིང་། སངས་རྒྱས་ཀྱི་བྱང་ཆུབ་ལ་རབ་ཏུ་འཇོག་པར་མཛད་པས་ན། དེའི་ཕྱིར་སེམས་ཅན་ཐམས་

59-1-213a

ཅད་འདུལ་བ་ནི་བྱང་ཆུབ་བོ་ཞེས་བྱ་བའོ། །དེ་ལྟར་ན་དེ་ནས་ཞེས་བྱ་བ་ནས་བརྩམས་ཏེ། བྱང་ཆུབ་བོ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་དང་པོ་གསུངས་པ་ཡིན་ནོ། །དེ་ནི་དེ་ནས་ཞེས་བྱ་བ་ལ་སོགས་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ལ་དེ་ནས་ཞེས་
བྱ་བའི་སྒྲ་ནི་སྔ་མ་བཞིན་ཏེ་དེ་ལྟར་བཅོམ་ལྡན་འདས་རྣམ་པར་སྣང་མཛད་ཀྱིས་བཅོམ་ལྡན་འདས་རྡོ་རྗེ་གནོད་སྦྱིན་ལ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པའི་ཕྱིར་དང་། རང་གི་དཀྱིལ་འཁོར་སྤྲུལ་པར་བྱ་བའི་ཕྱིར་བསྐུལ་བ་མཛད་པ་དང་། དེའི་རྗེས་ཐོགས་ཉིད་ལ་སྙིང་པོ་འདི་རང་གི་དཀྱིལ་
འཁོར་སྤྲུལ་པར་བྱ་བའི་ཕྱིར་སྨྲས་པའོ། །བཞིན་རབ་ཏུ་འཛུམ་པ་ནི་ཁྲོ་བོའི་ཧ་ཧ་ཞེས་བྱ་བའི་གད་རྒྱངས་དང་བཅས་པའི་ཞལ་ལོ། །རྡོ་རྗེ་མཆེ་བའི་ཕྱག་རྒྱ་དང་། །ཞེས་བྱ་བ་ནི། རྡོ་རྗེ་ཁུ་ཚུར་གཉིས་ཀྱིས་རྡོ་རྗེ་མཆེ་བའི་མཚོན་བྱ་བཟུང་ནས་རང་གི་ཞལ་གྱི་གྲ་གཉིས་སུ་འཛིན་པར་མཛད་པ་ནི། 
རྡོ་རྗེ་མཆེ་བའི་ཕྱག་རྒྱ་སྟེ། དེ་དང་བཅས་པའི་རྡོ་རྗེ་གནོད་སྦྱིན་གྱི་གཟུགས་ཀྱིས་ཞེས་བྱ་བ་ནི་ཇི་སྐད་དུ་རབ་ཏུ་གྲགས་པས་རྡོ་རྗེ་ཁྲོ་བོའི་གད་མོ་ཞེས་བྱ་བའི་སྙིང་པོ་འདི་དཀྱིལ་འཁོར་སྤྲུལ་པར་མཛད་པའི་ཕྱིར་སྨྲས་པ་ནི་ཧ་ཞེས་བྱའོ། །གདུག་པ་ཐམས་ཅད་འདུལ་བའི་སེམས་དཔའ་རྣམས་ཞེས་བྱ་
བ་ལ། སེམས་ཅན་རྣམས་གདུལ་བའི་དོན་གྱི་སེམས་དཔའ་རྣམས་ནི་གདུག་པ་ཐམས་ཅད་འདུལ་བའི་སེམས་དཔའ་རྣམས་ཏེ། རྡོ་རྗེ་སེམས་དཔའི་ཁྲོ་བོ་ལ་སོགས་པའོ། །དང་པོའི་དཀྱིལ་འཁོར་གྱི་ཚུལ་དུ་བཞུགས་སོ་ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ནི་དང་པོའི་དཀྱིལ་
འཁོར་ཏེ། དེའི་སྦྱོར་བས་དེའི་དབྱིབས་ཀྱི་རྡོ་རྗེ་སེམས་དཔའ་ལ་སོགས་པའི་གནོད་སྦྱིན་གྱི་གཟུགས་ཀྱིས་བཞུགས་པའོ། །དེ་ལྟར་ན་དེ་ནས་ཞེས་བྱ་བ་ནས་བརྩམས་ཏེ་བཞུགས་གོ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་པ་ནས་བརྩམས་
ཏེ། ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང་། སློབ་མ་ལ་གཞུག་པ་ལ་

59-1-213b

སོགས་པའི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ཏེ། དེ་ལྟར་ཏིང་ངེ་འཛིན་གསུམ་བསྒོམས་པ་ནས་བརྩམས་ཏེ། ཇི་སྲིད་མཚན་མ་ཐོབ་ཀྱི་བར་དུ་བསྒོམས་ལ། དེའི་རྗེས་ཐོགས་ཉིད་ལ་དཀྱིལ་འཁོར་འདི་བྲི་བར་བྱའོ། །ཐབས་ཐམས་ཅད་ཀྱིས་འདུལ་བའི་
ཁྲོ་བོ་ཞེས་བྱ་བ་ལ། འདིས་སེམས་ཅན་རྣམས་འདུལ་བ་སྟེ། གདུག་ཅིང་མ་རུངས་པ་ཉིད་འདོར་དུ་འཇུག་པས་ཞེས་བྱ་བའི་དོན་ཏོ། །ཐབས་ཐམས་ཅད་ཀྱང་ཡིན་ལ་འདུལ་བ་ཡིན་པས་ན། ཐབས་ཐམས་ཅད་ཀྱིས་འདུལ་བའོ། །དེ་ཉིད་ནི་ཁྲོ་བོའི་རྡོ་རྗེ་སྟེ་རྡོ་རྗེ་གནོད་སྦྱིན་གྱིས་ཞེས་བྱ་བའི་དོན་ཏོ། །
དེ་ལ་དམིགས་པས་ན་མིང་དེ་སྐད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཤིང་མངོན་སུམ་དུ་མཛད་པའོ། །གདུག་པ་ཐམས་ཅད་འདུལ་ཞིང་བྱིན་གྱིས་རློབ་པའི་རྡོ་རྗེ་ཞེས་བྱ་བ་ནི། མི་ཕྱེད་པ་གང་ཡིན་པ་སྟེ། མིང་དེ་སྐད་ཅེས་བྱ་བའི་གནོད་སྦྱིན་གྱི་དཀྱིལ་འཁོར་འདི་གསུངས་ཤིང་བཀའ་
སྩལ་པའོ། །ཕྱི་ཡི་དཀྱིལ་འཁོར་ཚུལ་དུ་ནི། །ཕྱི་ཡི་དཀྱིལ་འཁོར་བྲི་བར་བྱ། །ཞེས་བྱ་བ་ནི། རྡོ་རྗེ་སེམས་དཔའི་ཕྱིའི་དཀྱིལ་འཁོར་གྱི་དབྱིབས་སུ་འདིའི་ཕྱིའི་དཀྱིལ་འཁོར་ཐམས་ཅད་བྲི་བར་བྱའོ། །དེ་ནི་ནང་རིམ་ཉིད་དུ་ནི། །དཀྱིལ་འཁོར་བཟང་པོ་གྲུ་བཞི་པ། །ཞེས་བྱ་བ་ནི། ཕྱིའི་
དཀྱིལ་འཁོར་གྱི་ནང་དུ་ཟུར་བཞི་པ་ཤིན་ཏུ་མཛེས་པའི་དཀྱིལ་འཁོར་གཉིས་པ་བྲི་བར་བྱའོ། །ཐིག་བཞིར་ལྡན་ཞེས་བྱ་བ་ནི་ཚངས་པའི་སྲད་བུ་གཉིས་དང་མཚམས་ཀྱི་སྲད་བུ་གཉིས་གདབ་པར་བྱ་སྟེ། དེ་ལྟར་ཐིག་བཞི་པར་འགྱུར་རོ། །ཚོན་སྣ་ལྔས་ནི་རྣམ་པར་བྲིས། །ཞེས་བྱ་བ་ནི། དམར་པོ་དང་། 
ལྗང་གུ་དང་། སྔོན་པོ་དང་། སེར་པོ་དང་། དཀར་པོའི་མདོག་ཅན་གྱི་ཚོན་རྣམས་ཀྱིས་ལེགས་པར་ཐིག་གདབ་ནས་རི་མོར་བྲིས་པ་ནི། ཚོན་སྣ་ལྔས་ནི་རྣམ་པར་བྲིས། །ཞེས་བྱའོ། །ཀ་བ་བརྒྱད་ཀྱི་མདུན་གནས་པར། །ཞེས་བྱ་བ་ལ་འདི་ཉིད་དུ་གནས་པས་ན་གནས་པ་ཞེས་བྱ་ལ། མདུན་
ཡང་ཡིན་ལ་གནས་པ་ཡང་ཡིན་པས་ན་མདུན་ན་གནས་པ་སྟེ། ཀ་བ་བརྒྱད་ཀྱི་མདུན་ན་གནས་པའི་དཀྱིལ་འཁོར་བྲི་བའོ། །འབར་བའི་དཀྱིལ་འཁོར་ཡང་དག་ལྡན། །ཞེས་བྱ་བ་ནི། ལྷ་ཐམས་ཅད་ཀྱི་གནས་སུ་སྣ་ཚོགས་པདྨའི་གདན་གྱི་སྟེང་དུ་འབར་བའི་དཀྱིལ་འཁོར་དང་ཡང་དག་པར་

59-1-214a

ལྡན་པར་འགྱུར་རོ། །དེའི་ཞེས་བྱ་བ་ཇི་ལྟར་བྲིས་པའི་དཀྱིལ་འཁོར་དབུས་མའི་དབུས་སུ་ཅི་རིགས་པར་ཞེས་བྱ་བ་རྡོ་རྗེ་གནོད་སྦྱིན་ལུགས་མའམ། བརྡུངས་པའམ། བྱས་པའམ། བྲིས་པ་ཧ་ཞེས་བྱ་བ་དགོད་པར་བྱའོ། །རྡོ་རྗེ་མཆེ་བ་གཙིགས་པ་དང་ཞེས་
བྱ་བ་ནི་རྡོ་རྗེ་མཆེ་བ་གཉིས་གཙིགས་པའི་བུ་ག་དང་བཅས་པའི་ཞལ་གྱི་ཕྱོགས་སོ། །འབར་བའི་ཕྲེང་བ་འཁྲིགས་པའི་འོད། །ཅེས་བྱ་བ་ནི། འབར་བ་རྣམས་ཀྱི་ཕྲེང་བར་གྱུར་པ་གང་ཡིན་པ་དེ་ནི་འབར་བའི་ཕྲེང་བའོ། །དེ་ཉིད་འཁྲིགས་པ་སྟེ། ཕན་ཚུན་དུ་འགྲོ་བའི་འོད་
གང་ཡིན་པ་དེ་ནི་འབར་བའི་ཕྲེང་བ་འཁྲིགས་པའི་འོད་ཅེས་བྱའོ། །དེའི་ཞེས་བྱ་བ་ནི་རྡོ་རྗེ་གནོད་སྦྱིན་གྱིའོ། །ཀུན་དུ་ཞེས་བྱ་བ་ནི་ཕྱོགས་དང་ཕྱོགས་མཚམས་རྣམས་སུ་ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་བརྒྱད་གནོད་སྦྱིན་གྱི་གཟུགས་འཆང་བ་ཤིན་ཏུ་ཞེས་བྱ་བ་སྟེ། ཁྱད་
པར་དུ་ཡང་འཇིགས་པར་བྱེད་པ་རྡོ་རྗེ་ལ་སོགས་པ་རང་གི་མཚན་མ་བསྣམས་པ་བྲི་བར་བྱའོ། །ཕྱིའི་དཀྱིལ་འཁོར་གྱི་མཚམས་བཞིར་ནི་མཆེ་བའི་ཕྱག་རྒྱ་བྲི་བར་བྱའོ། །ཕྱི་དང་ནང་གི་སྒོ་རྣམས་སུ་ནི་ཁྲོ་བོའི་རྡོ་རྗེ་ཡང་དག་པར་བྲི་བར་བྱའོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་
དཀྱིལ་འཁོར་བྲིས་ནས། རས་སྔོན་པོ་ལ་སྔ་མ་བཞིན་དུ་སྔགས་བཟླས་ལ། དེ་དག་གི་སྨད་གཡོགས་ལ་སོགས་པ་ཇི་ལྟ་བ་བཞིན་དུ་བྱས་ནས། བཅོམ་ལྡན་འདས་རྡོ་རྗེ་གནོད་སྦྱིན་གྱི་མཆེ་བའི་ཕྱག་རྒྱ་བཅིངས་ལ། འདིས་མེ་ཏོག་གི་ཕྲེང་བ་བཟུང་སྟེ། ཇི་ལྟ་བ་བཞིན་ཞུགས་ན་ཇི་སྐད་དུ་
གསུངས་པའི་གནས་ཐོབ་པར་འགྱུར་རོ། །རྡོ་རྗེ་མཆེ་བ་ཞེས་བྱ་བ་ལ་སོགས་པ་ལ་རྡོ་རྗེ་རྩེ་ལྔ་པའི་རྩ་བ་ཡོད་པའི་མཆེ་བ་ནི། རྡོ་རྗེ་མཆེ་བ་སྟེ། དེ་བླངས་ལ་རྡོ་རྗེ་མིང་གི་དབང་བསྐུར་བས་བདག་ཉིད་དབང་བསྐུར་ནས། དེའི་རྗེས་ཐོགས་ཉིད་ལ་རྡོ་རྗེས་རྡོ་རྗེ་གནོད་སྦྱིན་ལ་བསྣུན་པར་བྱ་སྟེ། དེ་ནས་
རྡོ་རྗེ་གནོད་སྦྱིན་མཉེས་པས། ཞལ་ནས་ཧ་ཧ་ཞེས་བྱ་བའི་བཞད་པ་མཛད་པར་འགྱུར་རོ། །དེ་ནས་སྒྲུབ་པ་པོས་བདག་ཉིད་བཅོམ་ལྡན་འདས་གྲུབ་པ་ཡིན་ནོ་ཞེས་ཤེས་པར་བྱའོ། །དེ་ནས་ཕྱག་རྒྱ་ཐམས་ཅད་བཅིང་བར་བྱ་ཞིང་བསྒྲུབ་པར་བྱའོ་ཞེས་བྱ་བ་ནི། དེ་ལྟར་བདག་ཉིད་འཇུག་པ་ལ་སོགས་

59-1-214b

པ་བྱས་ནས། བཅོམ་ལྡན་འདས་ལས་སྙིང་པོ་མནོས་ལ། ཕྱག་རྒྱ་ཆེན་པོ་དང་། དམ་ཚིག་གི་དང་། ཆོས་ཀྱི་ཕྱག་རྒྱ་རྣམས་བཅིང་བར་བྱའོ། །དེ་ནས་བདག་ལ་བྱིན་གྱིས་བརླབ་པ་ལ་སོགས་པ་བྱས་ལ། ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་ཇི་ལྟར་མངོན་པར་འདོད་པ་བཞིན་
དུ་བསྒྲུབ་པར་བྱའོ། །དེ་ནས་མཆོད་ལ་ཞེས་བྱ་བ་ནི་དེ་ལྟར་ཇི་ལྟར་མངོན་པར་འདོད་པའི་ཕྱག་རྒྱ་བསྒྲུབ་པ་བྱས་ནས་སློབ་མ་བཅུག་ལ། མཆོད་པ་རྣམ་པ་ལྔ་དང་། ཕྱག་རྒྱའི་མཆོད་པ་རྣམ་པ་བཅུ་གཉིས་ཀྱིས་བཅོམ་ལྡན་འདས་འཁོར་དང་བཅས་པ་ཡང་དག་པར་མཆོད་ནས། རོ་དང་ཁ་
ཟས་དང་གནས་པ་ཐམས་ཅད་ཀྱིས་སློབ་མ་རྣམས་ཚིམ་པར་བྱས་ལ། སེམས་ཅན་ཐམས་ཅད་མཉམ་པ་ཉིད་པས་ཁྲོ་བོ་མཉམ་པ་ཉིད་དོ་ཞེས་བྱ་བ་ལ་སོགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚིག་བཞི་བརྗོད་ལ། བཅོམ་ལྡན་འདས་འཁོར་དང་བཅས་པ་ཇི་ལྟ་བ་བཞིན་དུ་གཤེགས་སུ་
གསོལ་ཏོ། །དཀྱིལ་འཁོར་ཉེ་བར་བསྡུས་ནས་སླར་དབྱུང་བར་བྱའོ། །དེ་བཞིན་དུ་ཞེས་བྱ་བ་ལ་སོགས་པ་ལ། ཇི་ལྟར་རྡོ་རྗེ་གནོད་སྦྱིན་གྱི་དཀྱིལ་འཁོར་དུ་ཕྱག་རྒྱ་བཅིང་བ་ལ་སོགས་པའི་ཆོ་ག་གསུངས་པ་དེ་བཞིན་དུ་རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་ཐམས་ཅད་དུ་ཡང་
བྱ་བར་ཤེས་པར་བྱའོ། །ཕྱག་ན་རྡོ་རྗེའི་དཀྱིལ་འཁོར་རོ། །ཞེས་བྱ་བ་ནི་གོ་བར་ཟད་དོ། །འདིའི་དོན་སླར་ཡང་བཤད་པར་བྱ་སྟེ། བཅོམ་ལྡན་འདས་རྡོ་རྗེ་གནོད་སྦྱིན་གྱི་སྦྱོར་བས་རྣལ་འབྱོར་ཆེན་པོ་བྱས་ལ། ཏིང་ངེ་འཛིན་གསུམ་བསྒོམ་པ་ནས་བརྩམས་ཏེ། ཇི་སྲིད་དུ་མངོན་སུམ་དུ་
མཐོང་བར་གྱུར་གྱི་བར་དུ་བསྒོམ་པར་བྱའོ། །དེ་ནས་ཇི་སྐད་དུ་གསུངས་པའི་དཀྱིལ་འཁོར་གྱི་སའི་དབུས་སུ་ཏིང་ངེ་འཛིན་གསུམ་བསྒོམས་ལ་བར་སྣང་གི་ཕྱོགས་སུ་ཇི་ལྟ་བ་བཞིན་དུ་ཡང་དག་པར་བཞག་སྟེ། ཉི་མ་འཆར་བའི་དུས་སུ་ལེགས་པར་ཐིག་གདབ་པར་བྱའོ། །རྡོ་རྗེ་སེམས་
དཔའི་ཕྱིའི་དཀྱིལ་འཁོར་ཐིག་བཏབ་ལ། ནང་དུ་འདིའི་ཕྱིའི་ཕྱེད་ཀྱི་ཚད་དང་། ཕྱིའི་དཀྱིལ་འཁོར་གཉིས་པ་གྲུ་བཞི་ལ། ཀ་བ་བརྒྱད་ཀྱིས་མཛེས་པར་བྱས་པ་། ལྷ་ཐམས་ཅད་ཀྱི་གནས་སུ་སྣ་ཚོགས་པདྨའི་གདན་འབར་བའི་དཀྱིལ་འཁོར་གྱིས་བརྒྱན་པ་བྲི་བར་བྱའོ། །དཀྱིལ་འཁོར་

59-1-215a

དབུས་མའི་དབུས་སུ་བཅོམ་ལྡན་འདས་རྡོ་རྗེ་གནོད་སྦྱིན། རྡོ་རྗེ་ཡིད་ལས་བྱུང་བའི་གནས་སུ་ཕྱག་ན་རྡོ་རྗེ། ཤར་ལྷོ་མཚམས་ཀྱི་ལེའུ་ཚེ་ལ་འཇམ་པའི་དབྱངས། ཀཱི་ལི་ཀཱི་ལའི་གནས་སུ་ནམ་མཁའི་སྙིང་པོ། ལྷོ་ནུབ་མཚམས་སུ་ནམ་མཁའ་མཛོད། རྡོ་རྗེ་དྲན་པའི་
གནས་སུ་འཇིག་རྟེན་དབང་ཕྱུག །ནུབ་བྱང་མཚམས་སུ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ། རྡོ་རྗེ་སྙེམས་པའི་གནས་སུ་རྡོ་རྗེ་ཁུ་ཚུར། བྱང་ཤར་མཚམས་ཀྱི་ལེའུ་ཚེ་ལ་རྡོ་རྗེ་གནོད་སྦྱིན་གཉིས་པ་བྲི་བར་བྱ་སྟེ། དེ་དག་ཐམས་ཅད་ཀྱང་སེམས་དཔའི་སྐྱིལ་མོ་
ཀྲུང་གིས་བཞུགས་པ། སྐུ་མདོག་ནག་པོ་ཤས་ཆེར་གཏུམ་པ་འཇིགས་པ་རྣམས་ཀྱང་འཇིགས་པར་མཛད་པ། འབར་བའི་ཕྲེང་བ་འཁྲིགས་པའི་འོད་མངའ་བ་རྡོ་རྗེའི་མཆེ་བ་གཙིགས་པ། ཧ་ཧ་ཞེས་གསལ་བར་བཞད་པའི་ཞལ་མངའ་བའོ། །ཕྱིའི་དཀྱིལ་འཁོར་གྱི་མཚམས་
རྣམས་སུ་མཆེ་བའི་ཕྱག་རྒྱ་དང་། ཕྱི་དང་ནང་དུ་བཅས་པའི་སྒོ་རྣམས་སུ་ཁྲོ་བོའི་རྡོ་རྗེ་རྣམས་བྲི་བར་བྱའོ། །འདིར་ལྷ་ཐམས་ཅད་ཀྱི་སྙིང་པོ་ནི་ཧ་ཞེས་བྱ་བ་ཡིན་ནོ། །དེ་ལྟར་དཀྱིལ་འཁོར་བྲིས་ནས་དེ་བཞིན་དུ་རྣལ་འབྱོར་ཆེན་པོ་བྱས་ལ། རྡོ་རྗེ་གནོད་སྦྱིན་གྱི་དམ་ཚིག་གི་ཕྱག་རྒྱས་
ཡོངས་སུ་བཟུང་བའི་རྡོ་རྗེ་མཆེ་བ་དང་། མེ་ཏོག་གི་ཡལ་ག་ལས་བུམ་པ་ཐམས་ཅད་དང་། བུམ་པ་གང་བ་རྣམས་ལ་ཧ་ཞེས་བྱ་བ་ལན་བརྒྱ་རྩ་བརྒྱད་བཟླས་བརྗོད་བྱའོ། །དེ་ནས་དཀྱིལ་འཁོར་གྱི་སྒོ་བཞི་ཕྱེ་ལ་བསྡུ་བ་བྱས་ཏེ། བཅོམ་ལྡན་འདས་རྡོ་རྗེ་གནོད་སྦྱིན་གྱི་ཕྱག་རྒྱ་ཆེན་པོ་
བསྒོམ་ཞིང་། མཚན་བརྒྱ་རྩ་བརྒྱད་ཀྱིས་ཡང་དག་པར་བསྟོད་ལ། གསང་བའི་ལྕགས་ཀྱུ་དང་། ཧ་ཞེས་བྱ་བས་བཅོམ་ལྡན་འདས་འཁོར་དང་བཅས་པ་དཀྱིལ་འཁོར་དུ་བཅུག་ལ། རྡོ་རྗེ་གནོད་སྦྱིན་གྱིས་བགེགས་བསལ་བ་བྱས་ནས། མཚམས་བཅིང་བ་དང་། དཀྱིལ་འཁོར་བཅིང་
བ་དང་། ར་བ་དང་། དྲ་བ་དག་བྱས་ལ། རྡོ་རྗེ་ཁུ་ཚུར་གྱིས་སྒོ་བཅིངས་ནས། རྡོ་རྗེ་བསྲུང་བས་བསྲུང་བ་ཐམས་ཅད་གོ་ཆ་བསྐོན་ཏེ། ཧ་ཞེས་བྱ་བས་མཆོད་ཡོན་ཕུལ་ལ། དམ་ཚིག་གི་ཕྱག་རྒྱ་དང་། ཧ་དྲྀ་ཤྱ་ཞེས་བྱ་བས་བཅོམ་ལྡན་འདས་འཁོར་དང་བཅས་པ་བལྟ་བར་བྱ་སྟེ། ཛཿཧཱུྃ་བཾ་ཧོཿ

59-1-215b

ས་མ་ཡ་སྟཾ། ས་མ་ཡ་སྟྭཾ་ཨ་ཧཾ་ཧ། ཞེས་ལན་གསུམ་བརྗོད་ལ་བསྒྲུབ་པར་བྱའོ། །དེ་ལ་བཅོམ་ལྡན་འདས་ཀྱི་དམ་ཚིག་གི་ཕྱག་རྒྱ་ནི་འདི་ཡིན་ཏེ། རྡོ་རྗེ་བསྡམས་པ་ལས་མཛུབ་མོའི་རྩེ་གཉིས་བཀུག་ལ། མཐེ་བོ་གཉིས་ཤིན་ཏུ་བརྐྱང་བ་ནི་རྡོ་རྗེ་མཆེ་བ་ཞེས་བྱའོ། །དེ་ནས་ལྷ་འདི་དག་ཐམས་
ཅད་ཀྱི་ལྗགས་ལ་ཧ་ཞེས་བྱ་བ་བསམ་པར་བྱ་སྟེ། འདི་ནི་འདིར་ཆོས་ཀྱི་ཕྱག་རྒྱའོ། །སྔ་མ་བཞིན་དུ་རང་གི་སྙིང་གར་ཨ་ལས་སྣ་ཚོགས་རྡོ་རྗེ་བསམས་ལ། ཧ་ཞེས་བྱ་བ་ཟློས་ཤིང་རྡོ་རྗེ་སེམས་དཔའི་དཀྱིལ་འཁོར་དུ་བཤད་པའི་ལྷ་ཐམས་ཅད་ཀྱི་ཕྱག་རྒྱ་བཅིང་བར་བྱའོ། །རང་
གི་སྙིང་གར་ཧཱུཾ་ལས་རྡོ་རྗེ་རྩེ་ལྔ་པ་བསམས་ལ་ཧ་ཞེས་བྱ་བཟློས་ཤིང་ཇི་ལྟར་བྲིས་པ་དང་རྗེས་སུ་མཐུན་པར་ལྷ་ཐམས་ཅད་ཀྱི་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་སངས་རྒྱས་ལྔའི་དབུ་རྒྱན་དང་། རྡོ་རྗེ་ཕྲེང་བའི་དབང་བསྐུར་བའི་ཕྱག་རྒྱ་དག་གིས་བཅོམ་ལྡན་འདས་འཁོར་དང་
བཅས་པ་དབང་བསྐུར་ལ། ཧ་ཞེས་བྱ་བས་བཅོམ་ལྡན་འདས་འཁོར་དང་བཅས་པ་ལ་མཆོད་ཡོན་ཕུལ་ཏེ། བུམ་པ་དང་། བུམ་པ་གང་བ་རྣམས་དང་། ན་བཟའ་དང་། བླ་རེ་ལ་སོགས་པ་ཕུལ་ལ། མཆོད་པ་རྣམ་པ་ལྔས་མཆོད་དེ། ཕྱི་རོལ་དུ་གླུ་དང་གར་དང་། རོལ་མོ་དང་། 
རྟ་དང་། གླང་པོ་ཆེ་དང་། བ་ལང་གི་ཁྱུ་རྣམས་ཀྱིས་ཀྱང་མཆོད་པ་བྱེད་དུ་གཞུག་གོ། །དེ་ནས་ཕྱག་རྒྱའི་མཆོད་པ་རྣམ་པ་བཅུ་གཉིས་ཀྱིས་ཡང་དག་པར་མཆོད་ལ། ཧ་ཞེས་བྱ་བ་ཉིད་ལས་རིན་པོ་ཆེ་སྣ་བདུན་དང་། དཔག་བསམ་གྱི་ཤིང་། ཁ་ཟས་རོ་བརྒྱ་པ་ལ་སོགས་པའི་
མཆོད་པ་རྣམས་སྤྲུལ་ལ། འདིས་དབུལ་བར་བྱ་སྟེ། ཐལ་མོ་ཁོང་སྟོང་དུ་སྦྱར་ལ་སྤྱི་བོར་བཞག་ལ་ཨོཾ་སརྦ་བིཏྤཱུ་ར་པཱུ་ར། སུ་ར་སུ་ར། ཨཱ་བརྟ་ཡ་ཨཱ་བརྟ་ཡ་ཧོ་ཞེས་བརྗོད་དོ། །དེ་ནས་ཕྱི་རོལ་དུ་གཏོར་མ་བྱིན་ལ་སྦྱིན་སྲེག་བྱའོ། །དེ་ནས་རས་སྔོན་པོ་ལ་རྡོ་རྗེ་གནོད་སྦྱིན་གྱིས་
ཡོངས་སུ་བཟླས་པ་གཅིག་གིས་སྨད་གཡོགས་བྱ། གཉིས་པས་སྟོད་གཡོགས་བྱའོ། །ཡང་གཅིག་ལ་རྡོ་རྗེ་ལྕགས་ཀྱུ་ལ་སོགས་པའི་སྙིང་པོ་བཞི་ཡོངས་སུ་བཟླས་པས་རང་གི་གདོང་གཡོགས་པར་བྱའོ། །དེ་ནས་ཕྱག་འཚལ་བ་ལ་སོགས་པ་སྔོན་དུ་འགྲོ་བས་དེ་བཞིན་

59-1-216a

དུ་སྡོམ་པ་བཟུང་ལ། བྱང་ཆུབ་ཏུ་སེམས་བསྐྱེད་དེ། སྔ་མ་བཞིན་དུ་སྙིང་གར་རྡོ་རྗེ་བསྐྱེད་ལ། ཤར་ཕྱོགས་ཀྱི་སྒོར་བལྟས་ནས། ཕྱི་རོལ་ན་གནས་པའི་བུམ་པའི་ཆུས་བདག་ཉིད་དབང་བསྐུར་ཏེ། རྡོ་རྗེ་མཆེ་བའི་ཕྱག་རྒྱ་བཅིངས་ལ། དེ་ཉིད་ཀྱིས་མེ་ཏོག་གི་
ཕྲེང་བ་བཟུང་ནས་བཛྲ་བཛྲ་ཧ་ཞེས་ཟློས་ཤིང་དཀྱིལ་འཁོར་དུ་འཇུག་པར་བྱ་སྟེ། ཤར་ཕྱོགས་ཀྱི་སྒོར་བཛྲ་ཨཾ་ཀུ་ཤ་ཛཿཞེས་བརྗོད་པར་བྱའོ། །དེ་ནས་ལྷོ་ཕྱོགས་ནས་ཞུགས་ལ་བཛྲ་པཱ་ཤ་ཧཱུཾ་ཞེས་བརྗོད་པར་བྱའོ། །ཡང་ནུབ་ཕྱོགས་ཀྱི་སྒོ་ནས་ཞུགས་ལ་བཛྲ་སྥོ་ཊ་བཾ་ཞེས་
བརྗོད་པར་བྱའོ། །དེ་ནས་བྱང་ཕྱོགས་ཀྱི་སྒོ་ནས་དེ་བཞིན་དུ་ཞུགས་ལ། བཛྲ་ཨཱ་བེ་ཤ་ཨཱཿཞེས་བྱ་བ་དང་། བདག་ཉིད་དབང་དུ་བྱའོ། །དེ་ནས་དེ་བཞིན་དུ་ཤར་ཕྱོགས་ཀྱི་སྒོར་ཞུགས་ལ། མ་ཧཱ་ར་ཏ། སུ་དྲྀ་ཌྷ། སུ་ཏོ་ཥྱ་མ་ཧཱ་དྷཱ་ན་སུ་སུ་ཁོ། བཛྲ་སཏྭ། ཨཱདྱ་སིདྡྷྱ་མཱཾ་ཞེས་བརྗོད་པར་བྱའོ། །
དེ་ནས་རྣམ་པར་སྒེག་པའི་རྡོ་རྗེས་ཕྱག་བྱས་ལ། དཀྱིལ་འཁོར་ལ་བསྐོར་བ་ལན་གསུམ་བྱས་ཏེ། བཅོམ་ལྡན་འདས་ཀྱི་སྤྱན་སྔར་འདུག་ལ། འདི་སྐད་ཅེས་བརྗོད་པར་བྱ་སྟེ། མ་ཧཱ་ར་ག་མ་ཧཱ་སོོ་ཁྱ། མ་ཧཱ་བཛྲ་མ་ཧཱ་ཛྙཱ་ན། མ་ཧཱ་ཀརྨ། བཛྲ་སཏཱ་ཨཱདྱ་སིདྡྷྱཱ་མཱཾ། ཡང་འདི་སྐད་ཅེས་བརྗོད་
པར་བྱ་སྟེ། ཛཿཧཱུྃ་བཾ་ཧོཿ པྲ་སིདྡྷྱཱ་མཱཾ། དེ་ནས་རྡོ་རྗེ་ཆུ་འཐུངས་ལ་ཨ་ཞེས་བྱ་བ་ལན་བརྒྱ་བཟླས་ནས། བདག་ཉིད་ལ་དབབ་པར་བྱའོ། །ཡང་གཡོན་པའི་ཁྲོ་བོའི་ཁུ་ཚུར་གྱིས་སེམས་མ་རྡོ་རྗེ་མ་ཕྱེ་ལ། ཨ་ཞེས་བྱ་བ་ལན་བརྒྱ་བརྗོད་ཅིང་བདག་ཉིད་ལ་དབབ་པར་བྱའོ། །དེ་ནས་ཧ་ཞེས་
བྱ་བ་ཟློས་ཤིང་མེ་ཏོག་དོར་བར་བྱའོ། །དེ་ནས་དེ་བླངས་ལ། ཧ་ཉིད་ཀྱིས་རང་གི་མགོ་ལ་བཅིང་བར་བྱའོ། །དེ་ནས་དེ་ཉིད་ཀྱིས་གདོང་གཡོགས་དགྲོལ་ལོ། །དེ་ནས་དེ་ཉིད་ཟློས་ཤིང་། ཤར་ཕྱོགས་ནས་བརྩམས་ཏེ། དཀྱིལ་འཁོར་ལ་བལྟ་བར་བྱའོ། །དེ་ནས་བཅོམ་ལྡན་འདས་རྡོ་རྗེ་
མཆེ་བའི་ཕྱག་རྒྱ་བཅིངས་ལ། སྔ་མ་བཞིན་དུ་རང་གི་སྙིང་གར་དགྲོལ་བར་བྱའོ། །ཡང་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་ལ་ཁྲོ་བོའི་ལྟ་བས་བལྟ་ཞིང་། ཇི་སྲིད་དུ་བཅོམ་ལྡན་འདས་ཀྱིས་ཞལ་བསྟན་ནས་རང་ལ་དངོས་གྲུབ་སྩོལ་བར་གྱུར་པ་དེ་སྲིད་

59-1-216b

ཀྱི་བར་དུ་ཧཱ་ཞེས་བྱ་བཟླས་བརྗོད་བྱའོ། །དེ་ནས་རྡོ་རྗེ་ཐལ་མོ་བསྐོར་བ་ཤིས་པ་བརྗོད་པ་འདོན་པའི་ཚུལ་དུ་རང་གི་སྙིང་གར་བཞག་ལ། མཚན་བརྒྱ་རྩ་བརྒྱད་པས་བསྟོད་དེ། རྡོ་རྗེ་མཚོན་ཆ་ལ་སོགས་པ་གསང་བའི་མཆོད་པ་བཞིས་ཡང་དག་པར་མཆོད་ལ། གླུ་དང་རོལ་མོ་ལ་
སོགས་པ་རྣམས་ཀྱིས་ཀྱང་ཡང་དག་པར་མཆོད་པར་བྱའོ། །དེ་ནས་ཡང་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་ལ་ཁྲོ་བོའི་ལྟ་བས་བལྟས་ཏེ། རྡོ་རྗེ་ཐལ་མོ་བསྐོར་བས་ཕྱག་བྱས་ནས། མེ་ཏོག་ལ་སོགས་པ་དང་དབང་བསྐུར་བ་རྣམས་བླང་བར་
བྱའོ། །དེ་ལ་དང་པོ་ཁོ་ནར་བཅོམ་ལྡན་འདས་ཀྱི་དམ་ཚིག་གི་ཕྱག་རྒྱས་ཡོངས་སུ་བཟུང་བའི་རྡོ་རྗེ་དང་། མེ་ཏོག་གི་ཡལ་ག་ལས་རྣམ་པར་རྒྱལ་བའི་བུམ་པ་ལ་སྔར་བཤད་པའི་བུམ་པའི་སྔགས་དེ་བཞིན་དུ་ཡོངས་སུ་བཟླས་ལ། བདག་ཉིད་བཅོམ་ལྡན་འདས་རྡོ་རྗེ་གནོད་སྦྱིན་དུ་བྱིན་
གྱིས་བརླབས་ཏེ། བཅོམ་ལྡན་འདས་ཀྱི་དམ་ཚིག་གི་ཕྱག་རྒྱས་རྣལ་འབྱོར་ཆེན་པོ་ལས་གསུངས་པའི་གནས་སུ་བཅོམ་ལྡན་འདས་འཁོར་དང་བཅས་པ་ཧས་རང་རང་གི་གནས་སུ་བཀོད་ལ། ཕྱི་རོལ་གྱི་དཀྱིལ་འཁོར་གྱི་ནང་དུ་སྣ་ཚོགས་པདྨའི་སྟེང་དུ། འབར་བའི་དཀྱིལ་
འཁོར་བྲིས་ལ། དེའི་སྟེང་དུ་བདག་ཉིད་རྡོ་རྗེ་གནོད་སྦྱིན་གྱི་ཕྱག་རྒྱ་ཆེན་པོས་འདུག་ནས་མཆོད་ཡོན་བླངས་ལ་མེ་ཏོག་ལ་སོགས་པས་བདག་ཉིད་ཡང་དག་པར་མཆོད་དེ་མཚན་བརྒྱ་རྩ་བརྒྱད་པས་ཡང་དག་པར་བསྟོད་ནས། རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་
ལ། ཨོཾ་བཛྲ་ཨ་བྷི་ཥིཉྩ་ཧ་ཞེས་བྱ་བས་བདག་ཉིད་དབང་བསྐུར་ཞིང་ཆུ་དེ་བཏུང་བར་ཡང་བྱའོ། །དེ་ནས་སངས་རྒྱས་ལྔའི་དབུ་རྒྱན་དང་། རྡོ་རྗེ་ཕྲེང་བའི་ཕྱག་རྒྱ་དག་གིས་བདག་ཉིད་དབང་བསྐུར་ཞིང་། ལུགས་མའམ། བརྡུངས་པའམ། བྱས་པའམ། བྲིས་པའི་སངས་
རྒྱས་ལྔའི་དབུ་རྒྱན་དང་། རྡོ་རྗེ་ཕྲེང་བ་དང་། དར་དཔྱངས་ཀྱིས་དབང་སྔ་མ་བཞིན་དུ་བསྐུར་ལ། ཧ་ཞེས་བྱ་བས་རྡོ་རྗེ་མཆེ་བའི་ཕྱག་རྒྱ་རྡོ་རྗེ་དྲིལ་བུ་དང་བཅས་པ་བླངས་ཏེ། ཧ་ཞེས་བྱ་བ་ཟློས་བཞིན་དུ་བདག་པོ་དང་མིང་གི་དབང་བསྐུར་བ་དག་གིས་ཀྱང་དབང་བསྐུར་བར་བྱའོ། །

59-1-217a

དེ་ནས་དངོས་གྲུབ་ཀྱི་རྡོ་རྗེའི་བརྟུལ་ཞུགས་བླངས་ལ། མེ་ཏོག་ལ་སོགས་པའི་མཆོད་པ་རྣམ་པ་ལྔས་བདག་ཉིད་ཡང་དག་པར་མཆོད་དེ། རྡོ་རྗེ་མཚོན་ཆ་ལ་སོགས་པ་ཕྱག་རྒྱའི་མཆོད་པ་རྣམ་པ་བཅུ་གཉིས་ཀྱིས་ཀྱང་ཡང་དག་པར་མཆོད་པར་བྱའོ། །དེ་ནས་རྡོ་རྗེ་
དེ་ཁོ་ན་ཉིད་ཀྱིས་བཟུང་ལ། ཆོས་ཀྱི་དྲིལ་བུ་དཀྲོལ་ཞིང་དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབ་པར་བྱས་ཏེ་། དེ་ཁོ་ན་ཉིད་ལ་སོགས་པས་ནི། ཐོག་མཐའ་མེད་པའི་སེམས་དཔའ་ནི། །ཞེས་བྱ་བ་ལ་སོགས་པ་རྡོ་རྗེའི་རིགས་ཀྱི་དཀྱིལ་འཁོར་གྱི་སྐབས་སུ་སྨྲས་པ་ཉིད་ཡིན་
པར་ཤེས་པར་བྱའོ། །དེ་ནས་བཅོམ་ལྡན་འདས་ལ་ཕྱག་བྱས་ལ་སྙིང་པོ་བླངས་ཏེ། ཚིགས་སུ་བཅད་པ་ལྔ་པས་རྗེས་སུ་གནང་བ་དང་། གཟེངས་བསྟོད་པ་དང་། ལུང་བསྟན་པ་མནོས་ལ་ཡང་བདག་ཉིད་ལ་བྱིན་གྱིས་བརླབ་པ་ལ་སོགས་པ་དང་ཇི་ལྟར་མངོན་པར་འདོད་པའི་བཟླས་
བརྗོད་བྱས་ནས། བཅོམ་ལྡན་འདས་ལ་ཕྱག་བྱས་ཏེ་འདི་སྐད་ཅེས་བརྗོད་པར་བྱའོ། །བདག་མིང་འདི་ཞེས་བགྱི་བ་ཡི། །རྡོ་རྗེ་སློབ་དཔོན་དཀའ་ཐུབ་ཆེས། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བགྱི། །དེ་ནས་སློབ་མ་རྣམས་གཞུག་པར་བྱའོ། །
སློབ་དཔོན་གྱི་ལས་ཀྱི་ཆོ་ག་རྒྱས་པ་རྫོགས་སོ།།      །།དེ་ནས་སྡོམ་པ་དབོག་པར་འོས་པའི་སློབ་མ་ལ་སྔར་བཤད་པའི་ཚུལ་གྱིས་སྡོམ་པ་འཛིན་དུ་གཞུག་པར་བྱའོ། །དེ་ནས་བྱང་ཆུབ་ཏུ་སེམས་བསྐྱེད་དུ་བཅུག་ལ། དེའི་སྙིང་གར་དེ་བཞིན་དུ་རྡོ་རྗེ་བསྐྱེད་དེ། རྡོ་རྗེ་གནོད་སྦྱིན་དུ་བྱིན་གྱིས་
བརླབས་ནས། དྲི་དང་མེ་ཏོག་ལ་སོགས་པས་ཡང་དག་པར་མཆོད་ལ། ཡོན་གྱི་མཆོག་ཡང་དག་པར་བླངས་ཏེ། རང་གི་འཇུག་པའི་ཆོ་གས་གཞུག་པ་དང་དབབ་པ་བྱའོ། །དེ་ནས་ཡང་རྡོ་རྗེ་དབབ་པའི་ཕྱག་རྒྱ་དྲིལ་བུ་དང་བཅས་པ་དང་། རྐང་པ་གཡོན་པས་དེའི་རྐང་པ་གཡས་པ་
མནན་ལ། ཧ་ཨཿཿཨཿཿཨཿཞེས་བྱ་བ་ལན་བརྒྱ་བཟླས་ལ་དབབ་པར་བྱའོ། །དེ་ནས་ཆོ་ག་ཐམས་ཅད་རྗེས་སུ་སྤྱད་པར་བྱའོ། །སློབ་མ་གཞུག་པ་ལ་སོགས་པའི་ཆོ་ག་རྒྱས་པ་རྫོགས་སོ།།      །།དེ་ལྟར་དམ་ཚིག་དང་དབང་བསྐུར་བ་ཐོབ་པ་རྣམས་ལ་སློབ་དཔོན་གྱིས་དངོས་གྲུབ་

59-1-217b

ཀྱི་ཡེ་ཤེས་བསླབ་པར་བྱའོ་ཞེས་བྱ་བ་འདིའི་ཆོ་ག་བསྟན་པར་བྱ་བའི་ཕྱིར། སྒྲུབ་པ་དང་ཞེས་བྱ་བ་ལ་སོགས་པ་གསུངས་ཏེ། སྒྲུབ་པ་དང་དངོས་གྲུབ་དག་ཀྱང་དེ་བཞིན་ནོ་ཞེས་བྱ་བ་ནི། ཇི་ལྟར་རྡོ་རྗེ་སེམས་དཔའི་སྒྲུབ་པ་ལས་རས་ཀྱི་རི་མོ་གཉིས་པ་བསྙེན་པ་བྱ་བར་གསུངས་པ་དེ་
བཞིན་དུ་རྡོ་རྗེ་གནོད་སྦྱིན་གྱི་སྒྲུབ་པ་ལ་ཡང་ཤེས་པར་བྱ་སྟེ། དངོས་གྲུབ་རྣམས་ཀྱང་དེ་བཞིན་ནོ། །མ་བསྒྲུབས་པར་ཡང་དང་པོ་ཇི་ལྟ་བ་བཞིན་ནོ་ཞེས་བྱ་བ་ནི་གོ་སླའོ། །གདུག་པ་ཐམས་ཅད་འདུལ་བ་ལ་ནི་རྡོ་རྗེ་མཆེ་བའི་ཕྱག་རྒྱས་སོ་ཞེས་བྱ་བ་ནི། རྡོ་རྗེ་གནོད་སྦྱིན་གྱི་སྦྱོར་བ་བྱས་
ལ། ཇི་སྐད་དུ་བཤད་པའི་རྡོ་རྗེ་གནོད་སྦྱིན་གྱི་རྡོ་རྗེ་མཆེ་བའི་ཕྱག་རྒྱ་བཅིངས་ལ། ཧ་ཞེས་བྱ་བས་བདུད་ལ་སོགས་པའི་གདུག་པ་ཐམས་ཅད་རང་དབང་དུ་བྱའོ། །སེམས་ཅན་ཐམས་ཅད་འདུལ་བ་ལ་ནི་ཞེས་བྱ་བ་ནི་བྱ་བ་མ་ཡིན་པ་ཐམས་ཅད་ལས་བཟློག་ནས། དགེ་བ་བཅུའི་ལས་
ཀྱི་ལམ་ལ་སྦྱར་བའམ། ཐེག་པ་ཆེན་པོ་ལ་དགོད་པའོ། །དེ་ཇི་ལྟར་འགྱུར་ཞེ་ན། ཁྲོ་བས་ཧ་ཧ་ཞེས་དགོད་ཅིང་བཟླས་པས་སོ་ཞེས་བྱ་བ་གསུངས་ཏེ། རྡོ་རྗེ་གནོད་སྦྱིན་གྱི་སྦྱོར་བ་བྱས་ལ། ཁྲོས་པར་འགྱུར་བས་ཧ་ཞེས་བྱ་བ་ཟློས་ཤིང་བསྒྲུབ་པར་བྱ་བ་རང་གི་ཁ་ནམ་མཁའ་དང་མཉམ་
པའི་ནང་དུ་ཞུགས་པར་ཡིད་ཀྱིས་བསམ་པར་བྱ་སྟེ། དེ་ལྟ་བུས་ནི་སེམས་ཅན་གདུག་པ་ཐམས་ཅད་འདུལ་བར་འགྱུར་རོ། །ཉན་ཐོས་དང་རང་སངས་རྒྱས་ཐམས་ཅད་ཀྱི་ཐར་པ་ནི་འདུ་ཤེས་དང་བྲལ་བའོ། །འདོད་ཆགས་དང་བྲལ་བ་ལས་ལྟུང་བར་བྱ་བ་ནི་འདོད་པའི་ཁམས་ལ་
སོགས་པས་སོ་སོར་སྣང་བ་ཡང་དག་པར་བསྟན་པའོ། །དེ་ཇི་ལྟར་འགྱུར་ཞེ་ན། ཆོས་གོས་དང་སྣམ་སྦྱར་གྱི་སྦྱིན་སྲེག་གིས་སོ་ཞེས་བྱ་བ་གསུངས་ཏེ། འདོད་ཆགས་དང་བྲལ་བ་ལས་ལྟུང་བར་བྱ་བའི་བསམ་པས་ཆོས་གོས་དུམ་བུར་བྱས་ཏེ། རྡོ་རྗེ་གནོད་སྦྱིན་ཐབ་ཀྱི་
དབུས་སུ་རྣམ་པར་བསམས་ལ་སྦྱིན་སྲེག་བྱ་སྟེ། དེ་ལྟ་བུས་ནི་འདོད་ཆགས་དང་བྲལ་བ་ལས་ལྟུང་བར་འགྱུར་རོ། །དབང་བསྐུར་བ་ཐམས་ཅད་ནི་འཇིག་རྟེན་དང་འཇིག་རྟེན་ལས་འདས་པ་རྣམས་སོ། །དེ་དབྲོག་པ་ནི་མེད་པར་བྱའོ། །དེ་ཇི་ལྟར་འགྱུར་ཞེ་ན། ཁམས་ཐམས་ཅད་

59-1-218a

ཀྱི་ཕྱེ་མའི་སྦྱིན་སྲེག་གིས་སོ་ཞེས་བྱ་བ་གསུངས་ཏེ། གསེར་ལ་སོགས་པའི་ཕྱེ་མའི་སྦྱིན་སྲེག་གིས་བྱ་བའི་དོན་ཏོ། །ཐམས་ཅད་རྒྱས་གདབ་པ་ལ་ནི་རྡོ་རྗེ་ཁུ་ཚུར་གྱི་ཕྱག་རྒྱས་སོ་ཞེས་བྱ་བ་ནི། རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱས་བསྒྲུབ་པར་བྱ་བའི་སྙིང་གར་ཧ་ཞེས་བྱ་བས་རྡོ་རྗེ་
འབར་བ་བསྐྱེད་པ་ནི་ཐམས་ཅད་རྒྱས་གདབ་པའོ། །ཐམས་ཅད་བཅད་པ་ལ་ནི་གཟུགས་བརྙན་བྱས་ནས་གཏུབས་པས་སོ་ཞེས་བྱ་བ་ནི་བསྒྲུབ་པར་བྱ་བའི་གཟུགས་བརྙན་མངོན་སྤྱོད་ཀྱི་རྫས་རྣམས་ལས་བྱས་ལ། བསྒྲུབ་པར་བྱ་བ་གསང་བའི་ལྕགས་ཀྱུས་བཀུག་སྟེ་བཅུག་པ་བྱས་ལ། རྡོ་རྗེ་རྣོན་
པོའི་སྦྱོར་བས་ཧ་ལས་རལ་གྲི་བསྐྱེད་དེ། རལ་གྲི་དེས་ལྷ་སྦྱིན་མཱ་ར་ཡ་ཧ་ཞེས་བྱ་བ་ལ་སོགས་པ་མིང་ནས་སྨོས་ཤིང་བཟླས་ལ། གཟུགས་བརྙན་གཏུབ་པར་བྱ་སྟེ། དེ་ལྟ་བུས་ནི་ཐམས་ཅད་གཅོད་པར་འགྱུར་རོ། །མ་རུངས་པ་ཐམས་ཅད་ཀྱི་དཀྱིལ་འཁོར་རྣམ་པར་འཇིག་པ་ལ་ནི་རྡོ་རྗེ་བཟུང་ནས་
འཇུག་པར་བྱའོ་ཞེས་བྱ་བ་ནི། རྡོ་རྗེ་འཛིན་པའི་སྦྱོར་བ་བྱས་ལ། འོག་ནས་བཤད་པའི་གདུག་པ་རྣམས་ཀྱི་དཀྱིལ་འཁོར་བྲིས་ནས་ཁྲོ་བོའི་རྡོ་རྗེ་བླངས་ལ། ཧ་དུཥྚ་མཎྜ་ལཾ་བྷསྨི་ཀུ་རུ་ཧཾ་ཞེས་ཟློས་ཤིང་། གནོད་སྦྱིན་ལ་སོགས་པའི་གདོན་གྱི་དཀྱིལ་འཁོར་དུ་ཞུགས་ལ་རྐང་པ་གཉིས་ཀྱིས་མཉེས་ན་དེ་ལྟ་
བུས་ནི་དེ་རྣམ་པར་འཇིག་པར་འགྱུར་རོ། །མཆོད་པ་ཐམས་ཅད་རྣམ་པར་གཞིག་པ་ལ་ནི་ཁྲོས་ནས་བཟླས་བརྗོད་བྱའོ་ཞེས་བྱ་བ་ལ་ནི། ནམ་མཁའ་མཛོད་ཀྱི་སྦྱོར་བས་ཧ་ཞེས་བྱ་བ་ཟློས་ཤིང་རང་གི་ཁ་ལས་རྡོ་རྗེ་གནོད་སྦྱིན་ཕྱུང་བས་མཆོད་པ་ཐམས་ཅད་ཐལ་བར་བྱས་པར་བསམ་པར་བྱ་སྟེ། དེ་ལྟ་
བུས་ནི་མཆོད་པ་ཐམས་ཅད་རྣམ་པར་འཇིག་པར་འགྱུར་རོ། །ཐམས་ཅད་སྐྲག་པར་བྱ་བ་ལ་ནི་འཇིགས་བྱེད་ཀྱི་ལྟ་བས་བལྟ་བར་བྱའོ་ཞེས་བྱ་བ་ནི། རྡོ་རྗེ་གནོད་སྦྱིན་གྱི་སྦྱོར་བ་བྱས་ལ། སེམས་ཅན་གདུག་པ་ཅན་རྣམས་ལ་ཧ་ཞེས་བྱ་བཟློས་ཤིང་འཇིགས་བྱེད་ཀྱི་ལྟ་བས་བལྟས་ལ་རྡོ་རྗེ་འབར་བ་སྤྲུལ་
ཏེ། དེའི་མིག་གི་མཐའ་སྲེག་པར་བྱེད་པར་བསམ་པར་བྱ་སྟེ། དེ་ལྟ་བུས་ནི་ཐམས་ཅད་སྐྲག་པར་བྱེད་པར་འགྱུར་རོ། །རྡོ་རྗེ་དམ་ཚིག་ནི་རྡོ་རྗེ་དཀྱིལ་འཁོར་སྐྱེད་པའི་རྒྱུར་གྱུར་པ་སྟེ། །དེ་སྐད་ཅེས་བྱ་བའི་རྟོག་པའི་རྒྱལ་པོ་རྫོགས་པ་སྟེ། རྡོ་རྗེ་གནོད་སྦྱིན་གྱི་རྟོག་པའི་བཤད་པ་རྫོགས་སོ།།    །།

59-1-218b

དེ་ལྟར་རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་བསྟན་ནས། ད་ནི་རིགས་ཐམས་ཅད་ཀྱི་དཀྱིལ་འཁོར་གྱི་ངོ་བོ་ཉིད་དང་། རིགས་ཐམས་ཅད་ཀྱི་དཀྱིལ་འཁོར་གྱི་དམ་ཚིག་ཏུ་གྱུར་པ་བསྡུས་པའི་དཀྱིལ་འཁོར་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ལ། དེ་ནས་ཞེས་
བྱ་བ་ལ་སོགས་པའི་སྒྲ་ནི་དེ་མ་ཐག་པ་སྟེ་ཇི་སྐད་དུ་གསུངས་པའི་ཚུལ་གྱིས་བཅོམ་ལྡན་འདས་འདོད་པའི་ཁམས་ཐམས་ཅད་ཀྱི་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་གནས་ན་བཞུགས་པ་དང་། དེའི་རྗེས་ཐོགས་ཉིད་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་གསུངས་པའོ། །ཆོས་
ཐམས་ཅད་ཀྱི་མཉམ་པ་ཉིད་ལ་བཞུགས་པས་ཞེས་བྱ་བ་ནི། འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་ཐམས་ཅད་དོན་དམ་པར་དངོས་པོ་མེད་པའི་ངོ་བོ་ཉིད་ཀྱི་རང་བཞིན་གཅིག་པ་ཉིད་ནི་ཆོས་ཐམས་ཅད་མཉམ་པ་ཉིད་དོ། །དེ་ལ་རབ་ཏུ་ཞུགས་པ་ནི་གཉིས་སུ་མེད་པའི་ཡེ་ཤེས་
ཐུགས་སུ་ཆུད་པས་གནས་པར་མཛད་པའོ། །དེ་སུ་ཞིག་ཡིན་ཞེ་ན། དེ་བཞིན་གཤེགས་པ་ཆོས་ཐམས་ཅད་མཉམ་པ་ཉིད་ཅེས་བྱ་བ་གསུངས་ཏེ། འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་ཐམས་ཅད་ཀྱི་དེ་བཞིན་ཉིད་ནི་ཐམས་ཅད་ཀྱི་ཆོས་ཉིད་དོ། །དེ་ལ་དམིགས་པའི་ཡེ་
ཤེས་ནི་མཆོག་སྟེ། དེ་ལས་བྱུང་བའི་ཐོས་པ་དང་བསམ་པ་དང་། བསྒོམ་པའི་ཡེ་ཤེས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་སུམ་དུ་མཛད་པའི་རྒྱུའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གང་ཡིན་པའི་མཆོག་སྟེ། མིང་དེ་སྐད་ཅེས་བྱ་བ་བཤད་པ་ནི་གསུངས་པའོ། །ཆོས་ཐམས་ཅད་
མཉམ་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མཉམ་པ་ཉིད་དོ་ཞེས་བྱ་བ་ལ་ཆོས་ཐམས་ཅད་ནི་བྱང་ཆུབ་ཀྱི་སེམས་དང་། མེ་ལོང་ལྟ་བུའི་ཡེ་ཤེས་དང་། དེ་བཞིན་གཤེགས་པའི་རིགས་དང་། ཀུན་གཞིའི་རྣམ་པར་ཤེས་པ་དང་། ངོ་བོ་ཉིད་ཀྱི་སྐུའོ། །དེ་རྣམས་ཀྱི་མཉམ་པ་ཉིད་ནི་རྣམ་པར་ཐར་
པའི་སྒོ་སྟོང་པ་ཉིད་དང་དེ་བཞིན་ཉིད་དོ། །ཆོས་ཐམས་ཅད་མཉམ་པ་ཉིད་དང་ཤེས་རབ་ཀྱི་ཕ་རོལ་ཏུ་ཕྱིན་པ་ཉོན་མོངས་པ་བག་ཆགས་དང་བཅས་པར་བྲལ་བ་དེ་ཐོབ་པར་བྱེད་པའི་ཐབས་ནི་ཆོས་བདག་མེད་པའི་ཡེ་ཤེས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པའོ། །དེའི་མཉམ་པ་ཉིད་ནི་ཤེས་རབ་ཀྱི་ཕ་རོལ་ཏུ་

59-1-219a

ཕྱིན་པ་དང་། རྣམ་པར་ཐར་པའི་སྒོ་སྟོང་པ་ཉིད་དང་དེ་བཞིན་ཉིད་དོ། །འདི་སྐད་སྟོན་པ་ཡིན་ཏེ། ཆོས་ཐམས་ཅད་ཀྱི་གཉིས་སུ་མེད་པ་ཉིད་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་གཉིས་སུ་མེད་པ་ཉིད་དེ། དོན་དམ་པར་ཆོས་ཐམས་ཅད་ནི་ཆོས་ཀྱི་དབྱིངས་ཀྱི་ངོ་བོ་ཉིད་ཡིན་པའི་ཕྱིར་
རོ། །ཐམས་ཅད་དོན་ཉིད་ཡིན་པས་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ཉིད་དོ་ཞེས་བྱ་བ་ལ་ཐམས་ཅད་ནི་སྦྱིན་པའི་ཕ་རོལ་ཏུ་ཕྱིན་པ་དང་། མཉམ་པ་ཉིད་ཀྱི་ཡེ་ཤེས་དང་། རིན་པོ་ཆེའི་རིགས་དང་། ཉོན་མོངས་པ་ཅན་གྱི་ཡིད་ཀྱི་ངོ་བོ་ཉིད་དང་། རྣམ་པར་སྨིན་པའི་སྐུའོ། །དེའི་དོན་ནི་ཐམས་ཅད་དོན་ཉིད་དོ། །
རྣམ་པར་ཐར་པའི་སྒོ་མཚན་མ་མེད་པ་དང་། ནམ་མཁའི་མཉམ་པ་ཉིད་དེ། སྦྱིན་པའི་ཕ་རོལ་ཏུ་ཕྱིན་པ་ལ་སོགས་པ་ནི་དེའི་ངོ་བོ་ཉིད་ཡིན་པའི་ཕྱིར་རོ། །དོན་ཐམས་ཅད་དུ་གྱུར་པ་ཉིད་ཀྱིས་ནི་དོན་ཐམས་ཅད་ཉིད་དེ། དེས་ན་ཤེས་རབ་ཀྱི་ཕ་རོལ་ཏུ་ཕྱིན་པ་ནི་དོན་ཉིད་དོ་ཞེས་བྱ་བ་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ནི་
ཇི་སྐད་དུ་བཤད་པའོ། །དེའི་དོན་ནི་རྣམ་པར་ཐར་པའི་སྒོ་མཚན་མ་མེད་པ་དང་ནམ་མཁའི་མཉམ་པ་ཉིད་དོ། །འདི་སྐད་སྟོན་པར་འགྱུར་ཏེ། རྣམ་པར་ཐར་པའི་སྒོ་མཚན་མ་མེད་པ་གང་ཡིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་གང་ཡིན་པ་སྟེ། གཉིས་པོ་འདི་དག་ནི་གཉིས་སུ་མེད་ཅིང་ཐ་མི་དད་པའོ། །
ཐམས་ཅད་ཆོས་ཉིད་པས་ཞེས་བྱ་བ་ལ། ཐམས་ཅད་ནི་འདིར་ཤེས་རབ་ཀྱི་ཕ་རོལ་ཏུ་ཕྱིན་པ་དང་། སོ་སོར་རྟོག་པའི་ཡེ་ཤེས་དང་། པདྨའི་རིགས་དང་། ཡིད་ཀྱི་རྣམ་པར་ཤེས་པ་དང་། ལོངས་སྤྱོད་རྫོགས་པའི་སྐུའོ། །དེའི་ཐམས་ཅད་ཆོས་ཉིད་ནི་རྩམ་པར་ཐར་པའི་སྒོ་སྨོན་པ་མེད་པ་དང་། རང་
བཞིན་གྱིས་རྣམ་པར་དག་པ་སྟེ། ཐམས་ཅད་ཆོས་ཉིད་ཡིན་པ་དེས་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་ཉིད་དོ་ཞེས་བྱ་བ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་སྔ་མ་བཞིན་ནོ། །དེའི་ཆོས་ཉིད་ནི་རྣམ་པར་ཐར་པའི་སྒོ་སྨོན་པ་མེད་པ་དང་། རང་བཞིན་གྱིས་རྣམ་པར་དག་པའོ། །འདི་སྐད་སྟོན་པར་འགྱུར་ཏེ།
ཆོས་ཐམས་ཅད་རང་བཞིན་གྱིས་རྣམ་པར་དག་པ་གང་ཡིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་གང་ཡིན་པ་སྟེ་གཉིས་པོ་འདི་དག་ནི་དབྱེར་མེད་པའོ། །ཐམས་ཅད་ལས་ཉིད་པས་ཞེས་བྱ་བ་ལ། ཐམས་ཅད་ནི་འདིར་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བྱ་བ་གྲུབ་པའི་ཡེ་ཤེས་དང་། ལས་ཀྱི་རིགས་

59-1-219b

དང་། མིག་དང་། རྣ་བ་དང་། སྣ་དང་། ལྕེ་དང་། ལུས་ཀྱི་རྣམ་པར་ཤེས་པ་དང་། སྤྲུལ་པའི་སྐུའོ། །དེ་ལས་ཉིད་ནི་རྣམ་པར་ཐར་པའི་སྒོ་རང་བཞིན་གྱིས་འོད་གསལ་བ་དང་། རང་བཞིན་གྱིས་འོད་གསལ་བའི་ཆོས་ཉིད་དོ། །ཐམས་ཅད་ལས་ཉིད་པ་དེས་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ཉིད་དུ་རིག་པར་བྱའོ་
ཞེས་བྱ་བ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཇི་སྐད་དུ་བཤད་པའོ། །དེའི་ལས་ཉིད་ནི་རྣམ་པར་ཐར་པའི་སྒོ་རང་བཞིན་གྱིས་འོད་གསལ་བ་དང་། རང་བཞིན་གྱིས་འོད་གསལ་བའི་ཆོས་ཉིད་དོ་ཞེས་རིག་པར་བྱ་ཞིང་། ཁོང་དུ་ཆུད་པར་བྱ་ལ་ཤེས་པར་བྱའོ་ཞེས་བྱ་བ་ནི་རེ་རེ་ལ་ཡང་སྦྱར་བར་བྱའོ། །དེ་ལྟར་ན་དེ་
ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། ལས་ཉིད་དུ་རིག་པར་བྱའོ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་དང་པོ་གསུངས་པ་ཡིན་ནོ། །ད་ནི་དེ་ནས་ཞེས་བྱ་བ་ལ་སོགས་པ་ཏིང་ངེ་འཛིན་གཉིས་པ་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །དེ་ལྟར་བཅོམ་ལྡན་འདས་རྣམ་
པར་སྣང་མཛད་ཀྱིས་བསྡུས་པའི་དཀྱིལ་འཁོར་སྤྲུལ་པར་བྱ་བའི་ཕྱིར་དང་། ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པར་བྱ་བའི་ཕྱིར་བཅོམ་ལྡན་འདས་རྡོ་རྗེ་འཆང་ཆེན་པོ་ལ་བསྐུལ་བའི་རྗེས་ཐོགས་ཉིད་ལ་སྙིང་པོ་འདི་བསྡུས་པའི་དཀྱིལ་འཁོར་སྤྲུལ་པར་མཛད་པའི་སྦྱོར་བ་གསུངས་པའོ། །དེ་བཞིན་
གཤེགས་པ་དང་བྱང་ཆུབ་སེམས་དཔའ་ཐམས་ཅད་ཅེས་བྱ་བ་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དེ། དེ་རྣམས་ཀྱི་དོན་ཡོད་པའི་དམ་ཚིག་ནི་དཀྱིལ་འཁོར་ངེས་པར་སྤྲུལ་པ་ཉིད་ཀྱིས་མངོན་པར་འདོད་པའི་དངོས་གྲུབ་རྫོགས་པར་བྱེད་པ་ལས་མི་འདའ་བའི་དཀྱིལ་འཁོར་ཏེ། བསྡུས་
པའི་དཀྱིལ་འཁོར་ཞེས་བྱ་བའི་དོན་ཏོ། །དེ་གང་གིས་བྱིན་གྱིས་རློབ་པ་དེ་ལ་ནི་མིང་དེ་སྐད་ཅེས་བྱ་སྟེ། ཏིང་ངེ་འཛིན་དེ་ལ་སྙོམས་པར་ཞུགས་ཤིང་མངོན་སུམ་དུ་མཛད་ནས། དོན་ཡོད་པ་ཐམས་ཅད་ཀྱི་དམ་ཚིག་ཅེས་བྱ་བའི་སྙིང་པོ་འདི་གསུངས་པའོ། །ཐམས་ཅད་ནི་འཇིག་རྟེན་དང་འཇིག་རྟེན་
ལས་འདས་པའི་ལྷ་རྣམས་སོ། །དེ་རྣམས་ཀྱི་དོན་ཡོད་པའི་དམ་ཚིག་ནི་བསྡུས་པའི་དཀྱིལ་འཁོར་ཏེ། དེར་ངེས་པའི་ཡེ་ཤེས་ལ་མིང་སྙིང་པོ་ཞེས་བྱ་ལ་དེ་སྟོན་པར་བྱེད་པའི་ཧཱུཾ་ལ་ཡང་ཉེ་བར་གདགས་པས་དེ་སྐད་ཅེས་བྱ་སྟེ། དེ་གསུངས་པ་ནི་སྟོན་པར་མཛད་པའོ། །དེ་ཡང་བསྡུས་པའི་དཀྱིལ་འཁོར་སྐྱེད་པར་

59-1-220a

བྱེད་པའི་རྣམ་པ་ལ་ཐུགས་རྩེ་གཅིག་ཏུ་མཛད་ནས། ཧཱུཾ་ཞེས་བྱ་བ་གསུངས་སོ་ཞེས་བྱ་བའི་དོན་ཏོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་ཧཱུཾ་ཞེས་བྱ་བ་གསུངས་པ་ཙམ་གྱིས་རྣམ་པར་སྣང་མཛད་ཀྱི་དཀྱིལ་འཁོར་ལ་སོགས་པ་དང་། བྱང་ཆུབ་སེམས་
དཔའ་ཐམས་ཅད་ཀྱི་དཀྱིལ་འཁོར་དང་། འཇིག་རྟེན་པ་དག་གི་དཀྱིལ་འཁོར་གྱི་བར་དང་། བཅོམ་ལྡན་འདས་རྡོ་རྗེ་སེམས་དཔའི་ཐུགས་ཀའི་རྡོ་རྗེ་ལས་བྱུང་སྟེ། བཅོམ་ལྡན་འདས་རྡོ་རྗེ་སེམས་དཔའི་སྔར་བཤད་པའི་དཀྱིལ་འཁོར་ཆེན་པོའི་མཚན་ཉིད་དུ་ཞུགས་པར་གྱུར་ཏོ། །དེ་ལྟར་ན་དེ་ནས་ཞེས་བྱ་བ་ནས་བརྩམས་
ཏེ་ཞུགས་པར་གྱུར་ཏོ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་འདུས་པ་མཛད་པ་ནས་བརྩམས་ཏེ་གསུམ་པ་ཡིན་པར་ཤེས་པར་བྱའོ།།  །།དེ་ལྟར་ཏིང་ངེ་འཛིན་གསུམ་གསུངས་ནས། ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་
བསྒོམ་པ་བྱའོ་ཞེས་བྱ་བ་འདིའི་ཆོ་ག་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ལ། དེ་ནས་ཞེས་བྱ་བ་ནི་སྔ་མ་བཞིན་ཏེ། དེ་ལྟར་ཏིང་ངེ་འཛིན་གསུམ་བསྒོམ་པ་ནས་བརྩམས་ཏེ། དཀྱིལ་
འཁོར་བསྒོམས་པའི་རྗེས་ཐོགས་ཉིད་ལའོ། །བཅོམ་ལྡན་འདས་ཀྱི་ཞབས་གཉིས་ལ་ཉེ་བར་བཏུད་དེ་ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཀྱི་ཞབས་གཉིས་ལ་ཕྱག་བྱས་པའོ། །དམ་ཚིག་ཆེན་པོའི་དཀྱིལ་འཁོར་ཞེས་བྱ་བ་ལ་དམ་ཚིག་ཀྱང་ཡིན་ལ་ཆེན་པོ་ཡང་ཡིན་པས་ན་དམ་ཚིག་
ཆེན་པོ་སྟེ། བྱང་ཆུབ་ཀྱི་སེམས་ཆེན་པོ་ཆོས་ཀྱི་དབྱིངས་ཐོག་མ་དང་ཐ་མ་མེད་པའོ་ཞེས་བྱ་བའི་དོན་ཏོ། །དེའི་དཀྱིལ་འཁོར་ནི་དེ་ལས་བྱུང་བའི་བསྡུས་པའི་དཀྱིལ་འཁོར་རོ། །དེ་གསུངས་པ་ནི་བཀའ་སྩལ་པའོ། །དཀྱིལ་འཁོར་ཆེན་པོ་ཞེས་བྱ་བ་ལ་སོགས་པ་ལ་བཅོམ་ལྡན་འདས་རྡོ་རྗེ་སེམས་དཔའི་དཀྱིལ་
འཁོར་ཕྱི་དང་ནང་དུ་བཅས་པ་སྔ་མ་བཞིན་དུ་ལེགས་པར་བྲིས་ནས། དཀྱིལ་འཁོར་ཆེན་པོའི་གནས་བརྒྱད་དུ། །ཞེས་བྱ་བ་ནི། ཤར་ཕྱོགས་ཀྱི་རེའུ་ཆ་ལ་སོགས་པ་ནས། ནང་གི་དཀྱིལ་འཁོར་གྱི་བྱང་ཤར་མཚམས་ཀྱི་རེའུ་ཆའི་བར་དུ། ཁམས་གསུམ་ལས་རྣམ་པར་རྒྱལ་བ་དང་། འཕགས་

59-1-220b

པ་འཇམ་དཔལ་གཞོན་ནུར་གྱུར་པ་དང་། ནམ་མཁའི་སྙིང་པོ་དང་། ནམ་མཁའ་མཛོད་དང་། འཇིག་རྟེན་དབང་ཕྱུག་དང་། སེམས་བསྐྱེད་མ་ཐག་པ་ཆོས་ཀྱི་འཁོར་ལོ་བསྐོར་བ་དང་། རྡོ་རྗེ་ཁུ་ཚུར་དང་། རྡོ་རྗེ་གནོད་སྦྱིན་གྱི་དཀྱིལ་འཁོར་རིམ་པ་ཇི་ལྟ་བ་བཞིན་དུ་སོ་སོར་གནས་པར་ཡིད་ཀྱིས་རྣམ་པར་
བསམ་ལ། དབུས་སུ་རྡོ་རྗེ་སེམས་དཔའི་དཀྱིལ་འཁོར་ཡང་བསམ་པར་བྱ་སྟེ། འདིས་ནི་ཡིད་ཀྱི་དཀྱིལ་འཁོར་བཤད་པ་ཡིན་ནོ། །དེ་ལྟར་ཡིད་ཀྱི་དཀྱིལ་འཁོར་གསུངས་ནས། ད་ནི་བྲིས་པའི་དཀྱིལ་འཁོར་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ལ། དེ་ནས་ཞེས་
བྱ་བའི་སྒྲ་ནི་དེ་མ་ཐག་པ་སྟེ། དེ་ལྟར་ཏིང་ངེ་འཛིན་གསུམ་བསྒོམ་པ་སྔོན་དུ་འགྲོ་བས་བསྡུས་པའི་དཀྱིལ་འཁོར་ཐུགས་ལ་བརྟན་པོར་མཛད་ནས་བསྡུས་པའི་དཀྱིལ་འཁོར་དེ་བཅོམ་ལྡན་འདས་ཕྱག་ན་རྡོ་རྗེས་གསུངས་པའོ། །དེ་ལ་དམ་ཚིག་ཐམས་ཅད་ནི་བསྡུས་པའི་དཀྱིལ་འཁོར་རོ། །དེ་ཉིད་
ནི་མི་ཕྱེད་པས་ན་རྡོ་རྗེའོ། །དེ་གང་གིས་བྱིན་གྱིས་རློབ་ཅིང་བརྟན་པར་མཛད་པ་དེ་ལ་དམིགས་པའི་ཏིང་ངེ་འཛིན་ནི་དམ་ཚིག་ཐམས་ཅད་ཀྱི་རྡོ་རྗེར་བྱིན་གྱིས་རློབ་པ་སྟེ། མིང་དེ་སྐད་ཅེས་བྱ་བའི་ཏིང་ངེ་འཛིན་དེ་ལ་སྙོམས་པར་ཞུགས་ནས། དམ་ཚིག་ཐམས་ཅད་ཀྱི་རྡོ་རྗེ་ཞེས་བྱ་བ་བསྡུས་པའི་དཀྱིལ་འཁོར་
ཏེ། མིང་དེ་སྐད་ཅེས་བྱ་བའི་དཀྱིལ་འཁོར་ཆེན་པོ་འདི་གསུངས་པ་ནི་བཀའ་སྩལ་པའོ། །དཀྱིལ་འཁོར་ཆེན་པོའི་ཚུལ་དུ་ཞེས་བྱ་བ་ལ་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་དབྱིབས་སུའོ། །ཕྱིའི་དཀྱིལ་འཁོར་བྲིས་ལ་ཞེས་བྱ་བ་ནི་ཀུན་དུ་བྲི་བའོ། །དེའི་དབུས་སུ་དཀྱིལ་འཁོར་ཆེན་པོ་རྡོ་རྗེ་འཁོར་
ལོ་བྲིས་ནས་ཞེས་བྱ་བ་ནི་ཕྱིའི་དཀྱིལ་འཁོར་དེའི་དབུས་སུ་སྟེ། དེའི་ནང་དུ་རྡོ་རྗེ་འཁོར་ལོ་ཆེན་པོ་ཞེས་བྱ་བ་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཤད་པའི་ནང་གི་དཀྱིལ་འཁོར་ལེགས་པར་བྲི་བར་བྱ་ཞིང་། དེའི་དབྱིབས་སུ་བྱའོ། །ནང་གི་དཀྱིལ་འཁོར་དེའི་དབུས་ཀྱི་ཆ་ནས་བརྩམས་ཏེ། 
བྱང་ཤར་མཚམས་ཀྱི་རེའུ་ཆ་རྣམས་སུ་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ནས་བརྩམས་ཏེ། །ཇི་སྲིད་རྡོ་རྗེ་གནོད་སྦྱིན་གྱི་དཀྱིལ་འཁོར་གྱི་མཐར་ཐུག་པའི་བར་གྱི་དཀྱིལ་འཁོར་ཐམས་ཅད་བྲི་བར་བྱ་ཞིང་སེམས་དཔའ་ཆེན་པོ་རྣམས་གཞག་པར་བྱའོ། །དེ་ཇི་ལྟར་བྲི་ཞེ་ན། ཐམས་ཅད་ཀྱང་

59-1-221a

དཀྱིལ་འཁོར་བརྒྱད་པའི་ཐིག་གིས་ཐིག་བཏབ་ཅིང་། ཞེས་བྱ་བ་གསུངས་ཏེ། སྔར་བཤད་པའི་ཆོ་གས་དཀྱིལ་འཁོར་དེ་ལེགས་པར་ཐིག་གདབ་པར་བྱའོ་ཞེས་བྱ་བའི་དོན་ཏོ། །སེམས་དཔའ་ཆེན་པོ་རྣམས་གཞག་པར་བྱའོ་ཞེས་བྱ་བ་ནི་རྡོ་རྗེ་སེམས་དཔའ་དང་། རྡོ་རྗེ་ཧཱུཾ་མཛད་ལ་སོགས་
པ་སྔར་བཤད་པའི་འཁོར་དང་ལྷན་ཅིག་ཏུ་ལུགས་མ་ལ་སོགས་པའི་སྐུ་གཟུགས་རྣམས་ཧཱུཾ་ཞེས་བྱ་བ་ཉིད་ཀྱིས་གཞག་པར་བྱའོ། །ཕྱིའི་དཀྱིལ་འཁོར་དུ་ནི་ཕྱིའི་རྡོ་རྗེའི་རིགས་རྣམས་རིམ་པ་ཇི་ལྟ་བ་བཞིན་དུ་བྲི་བར་བྱའོ་ཞེས་བྱ་བ་ལ་ཕྱིའི་དཀྱིལ་འཁོར་གྱི་ལྷའི་སྣམ་བུ་ལ་ཤར་ལྷོ་མཚམས་སུ་
ཞི་བ་མདུང་ཐུང་གིས་མཚན་པའི་དཀྱིལ་འཁོར། ལྷོ་ནུབ་ཏུ་མ་མོའི་དཀྱིལ་འཁོར། ནུབ་བྱང་དུ་མིང་པོ་གསུམ་གྱི་དཀྱིལ་འཁོར། བྱང་ཤར་མཚམས་སུ་སྲིང་མོ་བཞིའི་དཀྱིལ་འཁོར་བྲི་བར་བྱའོ། །སྒོ་རྣམས་སུ་ནི་རིགས་རྣམ་པ་བཞིའི་མཚན་མ་རྣམས་གཞག་པར་བྱའོ་ཞེས་བྱ་བ་ལ་ཤར་ཕྱོགས་ཀྱི་
སྒོར་རྡོ་རྗེ་སེམས་དཔའ། ལྷོར་རྡོ་རྗེ་ཧཱུཾ་མཛད། ནུབ་ཏུ་འཇིག་རྟེན་དབང་ཕྱུག །བྱང་དུ་ནམ་མཁའི་སྙིང་པོ་གཞག་པར་བྱའོ། །དེ་ནས་དམ་ཚིག་ཆེན་པོའི་དེ་ཁོ་ན་ཉིད་ཀྱི་རྡོ་རྗེ་དཀྱིལ་འཁོར་ཆེན་པོའི་ཚུལ་གྱི་ཆོ་ག་ཐམས་ཅད་རྒྱས་པར་བྱའོ་ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོར་སློབ་དཔོན་གྱི་ལས་ཀྱི་ཆོ་
ག་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་གང་ཡིན་པ་དེ་ཐམས་ཅད་འདིར་བྱ་ཞིང་བསྒྲུབ་པའི་ཡེ་ཤེས་ཐམས་ཅད་ཀྱང་དང་པོ་ཉིད་ཀྱི་སྔ་མ་བཞིན་དུ་བྱ་སྟེ། རས་ཀྱི་རི་མོ་གཉིས་ནས་བརྩམས་ཏེ། གང་གསུངས་པ་དེ་ཐམས་ཅད་འདིར་ཡང་བྱ་བར་ཤེས་པར་བྱའོ། །བདེ་བ་ཐམས་ཅད་
ཀྱི་དམ་ཚིག་ཅེས་བྱ་བ་ལ་རྡོ་རྗེ་སེམས་དཔའ་ལ་སོགས་པའི་དངོས་གྲུབ་འབྱུང་བའི་བདེ་བ་ནི་བདེ་བ་ཐམས་ཅད་དོ། །དེའི་དམ་ཚིག་ནི་རྒྱུ་སྟེ། མིང་དེ་སྐད་ཅེས་བྱ་བའི་རྟོགས་པའི་རྒྱལ་པོ་ཆེན་པོ་རྫོགས་སོ།།      །།འདིའི་དོན་སླར་ཡང་བཤད་པར་བྱ་སྟེ། བཅོམ་ལྡན་འདས་རྡོ་རྗེ་སེམས་དཔའི་སྦྱོར་བ་བྱས་
ལ། དེས་ཀྱང་རྣལ་འབྱོར་ཆེན་པོ་དེ་ལས་གསུངས་པ་ཇི་ལྟ་བ་བཞིན་དུ་བྱས་ཏེ། བསྡུས་པའི་དཀྱིལ་འཁོར་ལས་གསུངས་པའི་ཏིང་ངེ་འཛིན་གསུམ་ཇི་ལྟ་བ་བཞིན་དུ་བསྒོམ་པར་བྱའོ། །དེ་ནས་དཀྱིལ་འཁོར་དེ་ཇི་སྲིད་དུ་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་ཉིན་རེ་བཞིན་བསྒོམ་པར་བྱའོ། །དེ་

59-1-221b

ནས་ཇི་སྐད་དུ་གསུངས་པའི་དཀྱིལ་འཁོར་གྱི་སའི་དབུས་སུ་ཏིང་ངེ་འཛིན་གསུམ་རྣམ་པར་བསྒོམས་ལ། བར་སྣང་གི་ཕྱོགས་སུ་ཇི་ལྟ་བ་བཞིན་དུ་བཞག་སྟེ། ཉི་མ་འཆར་བའི་དུས་སུ་ལེགས་པར་ཐིག་གདབ་པར་བྱའོ། །རྡོ་རྗེ་སེམས་དཔའི་དཀྱིལ་འཁོར་གྱི་སའི་དབུས་མའི་རེའུ་ཆ་ལ་ཡང་དཔལ་རྡོ་རྗེ་སེམས་
དཔའི་དཀྱིལ་འཁོར་རོ། །རྡོ་རྗེ་ཡིད་ལས་བྱུང་བའི་གནས་སུ་རྡོ་རྗེ་ཧཱུཾ་མཛད་ཀྱི་དཀྱིལ་འཁོར། ཀཱི་ལི་ཀཱི་ལའི་གནས་སུ་ནམ་མཁའི་སྙིང་པོའི་དཀྱིལ་འཁོར། རྡོ་རྗེ་དྲན་པའི་གནས་སུ་འཇིག་རྟེན་དབང་ཕྱུག་གི་དཀྱིལ་འཁོར། རྡོ་རྗེ་བསྙེམས་པའི་གནས་སུ་རྡོ་རྗེ་ཁུ་ཚུར་གྱི་དཀྱིལ་འཁོར་རོ། །ཤར་ལྷོ་མཚམས་ཀྱི་
རེའུ་ཆ་ལ་འཕགས་པ་འཇམ་དཔལ་གྱི་དཀྱིལ་འཁོར། ལྷོ་ནུབ་མཚམས་སུ་ནམ་མཁའ་མཛོད་ཀྱིའོ། །ནུབ་བྱང་མཚམས་སུ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའིའོ། །བྱང་ཤར་མཚམས་སུ་རྡོ་རྗེ་གནོད་སྦྱིན་གྱི་དཀྱིལ་འཁོར་ལེགས་པར་བྲི་བར་བྱའོ། །དེ་ནས་ཧཱུཾ་ཞེས་བྱ་བ་ཉིད་ཀྱིས་ལྷ་ཐམས་ཅད་
སྔར་བཤད་པའི་རང་གི་དཀྱིལ་འཁོར་དུ་བྲིས་ལ། ཕྱིའི་དཀྱིལ་འཁོར་གྱི་ལྷའི་སྣམ་བུ་ལ་ཤར་ལྷོ་མཚམས་ལ་སོགས་པར་རིམ་པ་ཇི་ལྟ་བ་བཞིན་དུ་ཞི་བ་མདུང་གིས་མཚན་པ་དང་། མ་མོ་རྣམས་དང་། མིང་པོ་གསུམ་དང་སྲིང་མོ་བཞིའི་དཀྱིལ་འཁོར་རྣམས་བྲི་བར་བྱའོ། །ཤར་ཕྱོགས་ཀྱི་སྒོར་ནི་རྡོ་རྗེ་
སེམས་དཔའ། ལྷོར་ནི་རྡོ་རྗེ་ཧཱུཾ་མཛད། ནུབ་ཏུ་འཇིག་རྟེན་དབང་ཕྱུག །བྱང་དུ་ནམ་མཁའི་སྙིང་པོ་ལེགས་པར་བྲི་བར་བྱའོ། །དེ་ལྟར་དཀྱིལ་འཁོར་བྲིས་ནས། དེ་བཞིན་དུ་རྣལ་འབྱོར་ཆེན་པོ་བྱས་ལ། དང་པོ་རྡོ་རྗེས་ཡོངས་སུ་བཟུང་བའི་མེ་ཏོག་གི་ལྕུག་མ་ལས་བུམ་པ་ཐམས་ཅད་དང་། བུམ་པ་
གང་བ་རྣམས་ལ་ཧཱུཾ་ཞེས་བྱ་བ་རེ་རེ་ཞིང་བརྒྱ་རྩ་བརྒྱད་བཟླས་ལ། དཀྱིལ་འཁོར་གྱི་སྒོ་ཐམས་ཅད་ཕྱེ་སྟེ། རྡོ་རྗེ་བསྡུ་བ་བྱས་ལ། བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བསྒོམ་ཞིང་། མཚན་བརྒྱ་རྩ་བརྒྱད་ཀྱིས་བསྟོད་པ་བྱས་ལ། གསང་བའི་ལྕགས་ཀྱུ་དང་། ཧཱུཾ་ཞེས་བྱ་བས་ལྷ་ཐམས་ཅད་
རང་གི་སྐུ་གཟུགས་ཀྱི་གནས་སུ་བཅུག་སྟེ། རྡོ་རྗེ་གནོད་སྦྱིན་གྱིས་བགེགས་བསལ་ལ། མཚམས་བཅིང་བ་དང་། དཀྱིལ་འཁོར་བཅིང་བ་དང་། དྲ་བ་དང་། ར་བ་དག་བྱས་ལ། རྡོ་རྗེ་ཁུ་ཚུར་གྱི་སྒོ་བཅིངས་ཏེ། རྡོ་རྗེ་བསྲུང་བས་བསྲུང་བ་ཐམས་ཅད་གོ་བསྐོན་ལ། ཧཱུཾ་ཞེས་བྱ་བས་མཆོད་ཡོན་དབུལ་བར་

59-1-222a

བྱའོ། །དེ་ནས་དང་པོའི་རྡོ་རྗེ་ཧཱུཾ་དྲྀ་ཤྱ་ཞེས་བྱ་བས་བལྟ་བ་བྱས་ནས། ཛཿཧཱུཾ་བཾཾ་ཧོཿ། ས་མ་ཡ་སྟྭཾ་ས་མ་ཡ་སྟྭཾ་ཨ་ཧི་ཧཱུཾ་ཞེས་ལན་གསུམ་བརྗོད་ལ་བསྒྲུབ་པར་བྱའོ། །དེ་ནས་སྔ་མ་བཞིན་དུ་ལྷ་ཐམས་ཅད་ཀྱི་ལྗགས་ལ། ཧཱུཾ་ཞེས་བྱ་བ་རྣམ་པར་བསམ་པར་བྱ་སྟེ། འདི་ནི་འདིར་ཆོས་ཀྱི་ཕྱག་
རྒྱའོ། །རང་གི་སྙིང་གར་ཨ་ལས་སྣ་ཚོགས་རྡོ་རྗེ་བསམས་ཏེ། རྡོ་རྗེ་སེམས་དཔའ་ལ་སོགས་པའི་ལས་ཀྱི་ཕྱག་རྒྱ་སྔར་བཤད་པ་རྣམས་ཧཱུཾ་ཞེས་བྱ་བ་ཉིད་ཀྱིས་བཅིང་བར་བྱའོ། །དེ་ནས་ཡང་རང་གི་སྙིང་གར་ཧཱུཾ་ཉིད་ལས་རྡོ་རྗེ་རྩེ་ལྔ་པ་བསམས་ལ། རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་
ཆེན་པོ་ཧཱུཾ་ཞེས་བྱ་བ་ཉིད་ཀྱིས་བཅིང་བར་བྱའོ། །དེ་ནས་སྔ་མ་བཞིན་དུ་རང་གིས་དབང་བསྐུར་བའི་ཕྱག་རྒྱ་རྣམས་ཀྱིས་རྡོ་རྗེ་སེམས་དཔའ་ལ་སོགས་པ་ཐམས་ཅད་དབང་བསྐུར་ལ། ཧཱུཾ་ཞེས་བྱ་བས་དཀྱིལ་འཁོར་བའི་ལྷ་ཐམས་ཅད་ལ་མཆོད་ཡོན་ཕུལ་ལ། བུམ་པ་དང་། བུམ་པ་གང་བ་རྣམས་དང་། ན་བཟའ་
དང་། བླ་རེ་ལ་སོགས་པ་ཕུལ་ཏེ། མཆོད་པ་ལྔས་མཆོད་ལ། ཕྱི་རོལ་དུ་གླུ་དང་། གར་དང་། རོལ་མོ་དང་། རྟ་དང་། གླང་པོ་ཆེ་དང་། བ་ལང་གི་ཁྱུ་རྣམས་ཀྱིས་ཀྱང་མཆོད་པ་བྱེད་དུ་གཞུག་གོ། །དེ་ནས་རིགས་རེ་རེ་ཞིང་ཕྱག་རྒྱའི་མཆོད་པ་རྣམ་པ་བཅུ་གཉིས་བྱས་ལ། ཨོཾ་ལས་རིན་པོ་ཆེ་སྣ་བདུན་དང་། དཔག་
བསམ་གྱི་ཤིང་དང་། ཁ་ཟས་རོ་བརྒྱ་པ་ལ་སོགས་པའི་བཀོད་པ་སྤྲུལ་ལ། འདིས་དབུལ་བར་བྱ་སྟེ། ཐལ་མོ་ཁོང་སྟོང་དུ་སྦྱར་བ་སྤྱི་བོར་བཞག་ལ། ཨོཾ་སརྦ་བིད་པཱུ་ར་པཱུ་ར་སུ་ར་སུ་ར་ཨཱ་ཝརྟ་ཡ་ཨཱ་ཝརྟ་ཡ་ཧོ་ཞེས་བརྗོད་པར་བྱའོ། །དེ་ནས་ཕྱི་རོལ་དུ་གཏོར་མ་བྱིན་ལ་སྦྱིན་སྲེག་བྱའོ། །དེ་ནས་ཤིན་ཏུ་དམར་བའི་གོས་
ལ། རྡོ་རྗེ་གནོད་སྦྱིན་ཡོངས་སུ་བཟླས་པ་དེ་དག་ལས་གཅིག་གིས་སྨད་གཡོགས་བྱ། གཉིས་པས་སྟོད་གཡོགས་བྱས་ནས། ཡང་གཅིག་ལ་རྡོ་རྗེ་ལྕགས་ཀྱུ་ལ་སོགས་པའི་སྙིང་པོ་བཞི་བཟླས་པས་རང་གི་གདོང་གཡོགས་ལ། ཕྱག་འཚལ་བ་ལ་སོགས་པ་སྔོན་དུ་འགྲོ་བས་དེ་བཞིན་དུ་སྡོམ་པ་བཟུང་ཞིང་། བྱང་
ཆུབ་ཏུ་སེམས་བསྐྱེད་ལ། རང་གི་སྙིང་གར་རྡོ་རྗེ་དེ་བཞིན་དུ་བསྐྱེད་དེ། ཤར་ཕྱོགས་ཀྱི་སྒོར་བལྟས་ནས་ཕྱི་རོལ་ན་གནས་པའི་བུམ་པའི་ཆུས་བདག་ཉིད་དབང་བསྐུར་ལ། རྡོ་རྗེ་སེམས་དཔའི་དཀྱིལ་འཁོར་ཆེན་པོར་འཇུག་པའི་ཚུལ་གྱིས་ཞུགས་ཏེ། དེ་བཞིན་དུ་ཆོ་ག་ཐམས་ཅད་རྗེས་སུ་སྤྱད་པར་བྱའོ། །སློབ་

59-1-222b

དཔོན་གྱི་ལས་ཀྱི་ཆོ་ག་རྒྱས་པ་རྫོགས་སོ།།      །།དེ་ནས་སློབ་མ་རྣམས་ལ་ཡང་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཤད་པའི་ཆོ་ག་ཐམས་ཅད་འདིར་བྱའོ། །སློབ་མ་གཞུག་པ་ལ་སོགས་པའི་ཆོ་ག་རྒྱས་པ་རྫོགས་སོ།།    །།དེ་ལྟར་དམ་ཚིག་དང་དབང་བསྐུར་བ་རྣམས་ལ་
སློབ་དཔོན་གྱིས་དངོས་གྲུབ་ཀྱི་ཡེ་ཤེས་བསླབ་པར་བྱས་ནས། དེ་བཞིན་དུ་རྡོ་རྗེ་སེམས་དཔའ་ལ་སོགས་པ་རང་གི་དཀྱིལ་འཁོར་དུ་གསུངས་པ་རྣམས་འགྲུབ་པར་འགྱུར་རོ། །གང་ཡང་རྡོ་རྗེ་ཧཱུཾ་མཛད་ལ་སོགས་པ་སྒྲུབ་པ་པོ་རྡོ་རྗེ་ཧཱུཾ་མཛད་ལ་སོགས་པའི་ཆོ་ག་འདོད་པ་དེ་རྣམས་ཀྱི་ནི་རྡོ་རྗེ་ཧཱུཾ་མཛད་ལ་
སོགས་པའི་དཀྱིལ་འཁོར་དུ་བཤད་པའི་དབང་བསྐུར་བ་ལ་སོགས་པའི་ཆོ་ག་འདིར་བྱའོ། །བསྡུས་པའི་དཀྱིལ་འཁོར་གྱི་བཤད་པ་རྫོགས་སོ།།    །།འདིར་འཇིག་རྟེན་པའི་ལྷ་རྣམས་ལ་ལྷག་པར་མོས་པའི་སེམས་ཅན་རྣམས་རྗེས་སུ་གཟུང་བའི་ཕྱིར། ཞི་བ་མདུང་གིས་མཚན་པ་ལ་སོགས་
པའི་དཀྱིལ་འཁོར་གྱི་དེ་ཁོ་ན་ཉིད་སྟོན་པར་བྱེད་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གསུངས་པ་ནི། དེ་ནས་ཞེས་བྱ་བ་ལ་སོགས་པ་ཡིན་ལ། དེ་ནས་ཞེས་བྱ་བའི་སྒྲ་ནི་སྔ་མ་བཞིན་ཏེ། བཅོམ་ལྡན་འདས་རྣམ་པར་སྣང་མཛད་འདོད་པའི་ཁམས་ཐམས་ཅད་ཀྱི་ལྷའི་རྒྱལ་པོའི་གནས་ན་ཕྱག་ན་རྡོ་རྗེ་
ལ་སོགས་པ་རྣམས་ཀྱིས་ཡོངས་སུ་བསྐོར་ནས། ཇི་ལྟ་བ་བཞིན་དུ་བཞུགས་པ་དང་། དེ་ནས་དེའི་རྗེས་ཐོགས་ཉིད་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ་ཞེས་བྱ་བར་སྦྱར་རོ། །སེམས་ཅན་ཐམས་ཅད་བྱིན་གྱིས་རློབ་པ་ཞེས་བྱ་བ་ལ། སེམས་ཅན་ཐམས་ཅད་ནི་འཇིག་རྟེན་པའི་ལྷ་རྣམས་ལ་
ལྷག་པར་མོས་པའོ། །དེ་རྣམས་བྱིན་གྱིས་རློབ་པ་ནི་དེ་བཞིན་གཤེགས་པའི་བདག་ཉིད་དུ་མོས་པ་བསྐྱེད་པས་བདག་ཏུ་འཛིན་པ་ལ་སོགས་པ་དང་བྲལ་ཏེ། དེ་བཞིན་གཤེགས་པ་ལ་སོགས་པ་ལ་ལྷག་པར་མོས་པ་བསྐྱེད་པ་སྟེ། མིང་དེ་སྐད་ཅེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་
བཅོམ་ལྡན་འདས་རྣམ་པར་སྣང་མཛད་ཀྱིས་བཤད་པ་ནི་བཀའ་སྩལ་པའོ། །སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་ནོ་ཞེས་བྱ་བ་ལ་སེམས་ཅན་ཐམས་ཅད་ནི་འདོད་པ་དང་། གཟུགས་དང་གཟུགས་མེད་པའི་སྲིད་པའི་ངོ་བོ་ཉིད་དེ། དེ་ནི་དེ་བཞིན་གཤེགས་པའི་སྙིང་པོ་ཅན་ནོ། 

59-1-223a

དེ་ལ་བྱང་ཆུབ་ཀྱི་སེམས་ཆེན་པོ་དང་། མི་བསྐྱོད་པའི་ངོ་བོ་ཉིད་ཡིན་པས། དེ་བཞིན་གཤེགས་པའི་རིགས་ནི་དེ་བཞིན་གཤེགས་པ་སྟེ། དེ་ཉིད་གང་གི་སྙིང་པོ་ཡིན་པ་དེ་ལ་ནི་དེ་སྐད་ཅེས་བྱའོ། །འདིར་རྒྱུ་བསྟན་པར་བྱ་བའི་ཕྱིར། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་
པོ་ཐམས་ཅད་ཀྱི་རང་བཞིན་ཉིད་ཡིན་པས་ཞེས་བྱ་བ་གསུངས་ཏེ། དེ་ལ་བྱང་ཆུབ་ཀྱི་སེམས་ཆེན་པོ་དང་། དེ་བཞིན་གཤེགས་པའི་རིགས་དེ་དག་ཉིད་ནི་བྱང་ཆུབ་ཆེན་པོའི་ངོ་བོ་ཉིད་ཡིན་པས་ན་བྱང་ཆུབ་སེམས་དཔའ་ཆེན་པོའོ། །ཀུན་དུ་བཟང་པོའི་བྱང་ཆུབ་ཀྱི་སེམས་ཆེན་པོ་རྟོགས་པར་བྱེད་པའི་ངོ་བོ་དང་། དེ་
བཞིན་གཤེགས་པའི་རིགས་ཀྱི་རིགས་རྟོགས་པའི་ངོ་བོ་སྟེ། དེ་རྣལ་འབྱོར་པ་འདི་ཡིད་ལས་འབྱུང་བར་འགྱུར་བས་ཀུན་དུ་བཟང་པོའོ། །བྱང་ཆུབ་སེམས་དཔའ་ཆེན་པོ་ཡང་ཡིན་ལ་ཀུན་དུ་བཟང་པོ་ཡང་ཡིན་པས་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་སྟེ། དེ་ནི་ཐམས་
ཅད་དུ་སེམས་ཅན་ཐམས་ཅད་ཀྱི་རང་བཞིན་ཡིན་པས་ན། དེ་ནི་བྱང་ཆུབ་སེམས་དཔའ་ཆེན་པོ་ཀུན་དུ་བཟང་པོ་ཐམས་ཅད་ཀྱི་རང་བཞིན་ནོ། །དེ་རྣམས་སུ་གྱུར་པས་ན་རང་བཞིན་ཉིད་དེ། དེས་ན་སེམས་ཅན་ཐམས་ཅད་ནི་དེ་བཞིན་གཤེགས་པའི་སྙིང་པོ་ཅན་ནོ། །དེ་སྐད་དུ་ལང་ཀར་གཤེགས་
པའི་མདོ་ལས། དེ་བཞིན་གཤེགས་པའི་སྙིང་པོ་གསལ་ཞིང་དག་ལ་རྙོག་པ་མེད་པ། སེམས་ཅན་གྱི་རྒྱུད་ལ་གནས་ཏེ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཡང་དག་པར་ལྡན་པ་དང་། དཔེ་བྱད་བཟང་པོ་བརྒྱད་ཅུས་ལེགས་པར་བརྒྱན་པའོ་ཞེས་གསུངས་པའི་ཕྱིར་རོ། །འདི་སྐད་སྟོན་པར་
འགྱུར་ཏེ། དོན་དམ་པར་བྱང་ཆུབ་ཆེན་པོའི་མཚན་ཉིད་ཅན་གྱི་སེམས་ཀྱི་ངོ་བོ་ཉིད་དང་། དེ་བཞིན་གཤེགས་པའི་རིགས་ཀྱི་ངོ་བོ་ཉིད་ནི་སེམས་ཅན་ཐམས་ཅད་ཀྱི་ངོ་བོ་ཉིད་ཡིན་ཏེ། ཡང་དག་པ་མ་ཡིན་པར་ཡོངས་སུ་བརྟགས་པ་ཉིད་ཤིན་ཏུ་མ་སྐྱེས་པ་ཡིན་པའི་ཕྱིར་རོ། །སེམས་ཅན་ཐམས་ཅད་ནི་རྡོ་རྗེའི་
སྙིང་པོ་ཅན་ནོ་ཞེས་བྱ་བ་ལ་རྡོ་རྗེ་ནི་རྡོ་རྗེ་ནོར་བུའི་སྦྱིན་པའི་ཕ་རོལ་ཏུ་ཕྱིན་པ་དང་། རིན་པོ་ཆེའི་རིགས་སོ། །དེ་ཉིད་ཅེས་བྱ་བ་ལ་སོགས་པ་ནི་སྔ་མ་བཞིན་ནོ། །འདིར་ཡང་རྒྱུ་བསྟན་པར་བྱ་བའི་ཕྱིར་རྡོ་རྗེ་སྙིང་པོས་དབང་བསྐུར་བ་ཉིད་པས་ཞེས་བྱ་བ་གསུངས་ཏེ། རྡོ་རྗེ་ནོར་བུའི་སྦྱིན་པའི་ཕ་རོལ་ཏུ་ཕྱིན་པ་དང་། 

59-1-223b

རིན་པོ་ཆེའི་རིགས་ཀྱི་ངོ་བོ་ཉིད་ཀྱི་རྡོ་རྗེ་སྙིང་པོས་དབང་བསྐུར་བ་གང་ཡིན་པ་དེ་ནི་རྡོ་རྗེ་སྙིང་པོས་དབང་བསྐུར་བ་སྟེ། དེ་རྣམས་ཀྱི་ངོ་བོ་ཉིད་ནི་དབང་བསྐུར་བ་ཉིད་དོ། །འདི་སྐད་སྟོན་པར་འགྱུར་ཏེ། གང་ཉོན་མོངས་པ་ཅན་གྱི་ཡིད་དེ་ཉིད་ནི་ཤིན་ཏུ་ཡང་སྐྱེ་བ་མེད་པ་ཡིན་ཏེ། དེ་བས་ན་དོན་དམ་པར་རྡོ་རྗེ་ནོར་བུ་སྦྱིན་
པའི་ཕ་རོལ་ཏུ་ཕྱིན་པ་དང་། རིན་པོ་ཆེའི་རིགས་ཀྱི་སྙིང་པོ་ཅན་ནི་སེམས་ཅན་ཐམས་ཅད་ཡིན་ནོ། །སེམས་ཅན་ཐམས་ཅད་ནི་ཆོས་ཀྱི་སྙིང་པོ་ཅན་ནོ་ཞེས་བྱ་བ་ལ། ཆོས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་དང་པདྨའི་རིགས་སོ། །དེ་ཉིད་ཅེས་བྱ་བ་ལ་སོགས་པ་ཡང་དེ་བཞིན་ནོ། །འདིར་རྒྱུ་
བསྟན་པར་བྱ་བའི་ཕྱིར། ངག་ཐམས་ཅད་རབ་ཏུ་བྱུང་བ་ཉིད་པས་ཞེས་བྱ་བ་གསུངས་ཏེ། ཆོས་དང་། དོན་དང་། ངེས་པའི་ཚིག་དང་། སྤོབས་པ་སོ་སོ་ཡང་དག་པར་རིག་པའི་ངོ་བོ་ཉིད་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། པདྨའི་རིགས་ཐམས་ཅད་ནི་ངག་ཐམས་ཅད་དོ། །དེའི་རབ་
ཏུ་བྱུང་བ་ནི་གང་སེམས་ཅན་ཐམས་ཅད་ཀྱི་རྒྱུད་ལ་རབ་ཏུ་འཇུག་པ་དེ་ལ་ནི། ངག་ཐམས་ཅད་རབ་ཏུ་འབྱུང་བའོ། །དེ་རྣམས་ཀྱི་དངོས་པོ་ནི་ངག་ཐམས་ཅད་རབ་ཏུ་བྱུང་བ་ཉིད་དེ། དེས་ན་སེམས་ཅན་ཐམས་ཅད་ལ་ཆོས་ཀྱི་སྙིང་པོ་ཅན་ནོ། །འདིས་ནི་འདི་སྐད་སྟོན་པར་འགྱུར་ཏེ། གང་སོ་སོར་
རྟོག་པ་ཅན་གྱི་ཤེས་རབ་དང་། ཡེ་ཤེས་ཀྱི་རྣམ་པར་ཤེས་པ་ནི་དོན་དམ་པར་མ་སྐྱེས་པ་ཡིན་ཏེ། དེ་བས་ན་སེམས་ཅན་ཐམས་ཅད་ཆོས་དང་། དོན་དང་། ངེས་པའི་ཚིག་དང་། སྤོབས་པ་སོ་སོ་ཡང་དག་པར་རིག་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། པདྨའི་རིགས་ཀྱི་ངོ་བོ་ཉིད་ཀྱི་
ཆོས་ཀྱི་སྙིང་པོ་ཅན་ནོ། །སེམས་ཅན་ཐམས་ཅད་ནི་ལས་ཀྱི་སྙིང་པོ་ཅན་ནོ་ཞེས་བྱ་བ་ལ་ལས་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། ལས་ཀྱི་རིགས་སོ། །དེ་ཉིད་དེ་རྣམས་ཀྱི་སྙིང་པོ་ཡིན་པའམ། དེའི་སྙིང་པོ་ཅན་གང་ཡིན་པ་དེ་དག་ནི་ལས་ཀྱི་སྙིང་པོ་ཅན་ནོ། །འདིར་ཡང་རྒྱུ་བསྟན་པའི་ཕྱིར། སེམས་ཅན་ཐམས་
ཅད་ཀྱི་བྱ་བ་བྱེད་པ་ལ་སྦྱོར་བས་ཞེས་བྱ་བ་གསུངས་ཏེ། སེམས་ཅན་ཐམས་ཅད་ཀྱི་བྱ་བ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། ལས་ཀྱི་རིགས་སོ། །དེའི་བྱེད་པ་ནི་དེ་ལ་འཇུག་པ་གང་ཡིན་པ་དེ་ནི་སེམས་ཅན་ཐམས་ཅད་ཀྱི་བྱ་བ་བྱེད་པའོ། །དེ་རྣམས་ཀྱི་དངོས་པོ་ནི་སེམས་ཅན་ཐམས་ཅད་ཀྱི་བྱ་བ་བྱེད་པ་

59-1-224a

ཉིད་དོ། །དེ་དང་མཐར་ཐུག་པར་རབ་ཏུ་སྦྱོར་ཞིང་འབྲེལ་པས་སེམས་ཅན་ཐམས་ཅད་ཀྱི་བྱ་བ་བྱེད་པ་ཉིད་ལ་སྦྱོར་བ་སྟེ། དེས་ན་སེམས་ཅན་ཐམས་ཅད་ཀྱི་བྱ་བ་བྱེད་པ་ཉིད་ལ་སྦྱོར་བས་སོ་ཞེས་བྱ་བའི་སྒྲས་ནི་ངེས་པར་བཟུང་བ་སྟེ། སྦྱོར་བ་ཉིད་ཀྱིས་ཞེས་བྱ་བའི་དོན་ཏོ། །འདིས་ནི་འདི་སྐད་སྟོན་པ་
ཡིན་ཏེ། གང་མིག་དང་། རྣ་བ་དང་། སྣ་དང་། ལྕེ་དང་། ལུས་ཀྱི་རྣམ་པར་ཤེས་པ་ནི་དོན་དམ་པར་རང་བཞིན་གྱིས་འོད་གསལ་བ་ཡིན་པས་མ་སྐྱེས་པའོ། །དེ་བས་ན་སེམས་ཅན་ཐམས་ཅད་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལས་བྱས་པ་དང་། ལས་ཀྱི་རིགས་ཀྱི་ངོ་བོ་ཉིད་ནི་ལས་ཀྱི་སྙིང་པོའོ། །དེ་ལྟར་ཤེས་རབ་ཀྱི་
ཕ་རོལ་ཏུ་ཕྱིན་པ་བསྟན་པ་འདིས། སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ལ་སོགས་པ་སྟོན་པར་བྱེད་པས། དོན་དམ་པར་སེམས་ཅན་ཐམས་ཅད་ནི་བྱང་ཆུབ་ཀྱི་སེམས་དང་། དེ་བཞིན་གཤེགས་པའི་རིགས་དང་། སྦྱིན་པའི་ཕ་རོལ་ཏུ་ཕྱིན་པ་དང་། རིན་པོ་ཆེའི་རིགས་དང་། ཤེས་རབ་ཀྱི་
ཕ་རོལ་ཏུ་ཕྱིན་པ་དང་། པདྨའི་རིགས་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། ལས་ཀྱི་རིགས་ཀྱི་ངོ་བོ་ཉིད་དུ་སྟོན་པ་ཡིན་ནོ། །གཞུང་འདི་དག་གིས་ནི་ཕྱི་རོལ་གྱི་རྡོ་རྗེའི་རིགས་བཞིའི་ཐུན་མོང་གི་དང་པོའི་སྦྱོར་བའི་ཏིང་ངེ་འཛིན་གསུངས་པ་ཡིན་ནོ། །དེ་ནི་དེ་ནས་ཞེས་བྱ་བ་ལ་སོགས་པས། ཏིང་ངེ་
འཛིན་གསུངས་པ་ཡིན་ལ། དེ་ནས་ཞེས་བྱ་བའི་སྒྲ་ནི་སྔ་མ་བཞིན་ཏེ། དེ་ལྟར་བཅོམ་ལྡན་འདས་རྣམ་པར་སྣང་མཛད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པར་མཛད་པས་ཕྱི་རོལ་གྱི་རྡོ་རྗེའི་རིགས་ལ་ལྷག་པར་མོས་པའི་སེམས་ཅན་རྣམས་གདུལ་བར་བྱ་བའི་ཕྱིར། བཅོམ་ལྡན་འདས་ཕྱག་
ན་རྡོ་རྗེ་ལ་བསྐུལ་བ་དང་། དེའི་རྗེས་ཐོགས་ཉིད་ལ་རྡོ་རྗེའི་དབང་ཕྱུག་མ་ལ་སོགས་པ་ཕྱི་རོལ་གྱི་རྡོ་རྗེའི་རིགས་ཀྱི་གཟུགས་ཀྱི་ཞི་བ་མདུང་གིས་མཚན་པ་ལ་སོགས་པའི་དཀྱིལ་འཁོར་སྐྱེད་པར་བྱེད་པའི་སྙིང་པོ་སྨྲས་པར་གྱུར་པ་ནི་དྲི་ཞེས་བྱ་བ་བཅོམ་ལྡན་འདས་རྡོ་རྗེ་འཛིན་པས་རྡོ་རྗེའི་དབང་ཕྱུག་གི་གཟུགས་
ཀྱིས་གསུངས་པའོ། །དེ་ནས་དེའི་རྗེས་ཐོགས་ཉིད་ལ་ཞིབ་མདུང་གིས་མཚན་པའི་དཀྱིལ་འཁོར་འདི་བཅོམ་ལྡན་འདས་ཕྱག་ན་རྡོ་རྗེས་རྡོ་རྗེ་དབང་ཕྱུག་གི་གཟུགས་ཀྱི་གནས་པ་ཐུགས་ཀ་ནས་བྱུང་ནས་རང་གི་གནས་སུ་གནས་པར་ཤེས་པར་བྱའོ། །དེ་ལྟར་ན་གཞུང་འདི་དག་གིས་ཏིང་ངེ་འཛིན་

59-1-224b

གཉིས་པ་གསུངས་པ་ཡིན་ནོ། །བསྡུས་པ་ནས་བརྩམས་ཏེ་གསུམ་པ་ཡིན་པར་ཤེས་པར་བྱའོ། །དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པ་བྱའོ་ཞེས་བྱ་བ་འདིའི་ཆོ་ག་བསྟན་པར་བྱ་བའི་ཕྱིར། དེ་ནས་དཀྱིལ་འཁོར་བཤད་པར་བྱ་སྟེ་ཞེས་བྱ་བ་
ལ་སོགས་པ་གསུངས་ཏེ། འདིས་ནི་སློབ་དཔོན་གྱི་ལས་ཀྱི་ཆོ་ག་དང་། སློབ་མ་ཞུགས་པ་ལ་སོགས་པའི་ཆོ་ག་ཡང་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་འདས་མ་ཐག་པ་སྟོན་པར་བྱེད་པ་སྟེ། ཏིང་ངེ་འཛིན་གསུམ་པ་བསྒོམ་པ་ནས་བརྩམས་ཏེ། ཇི་སྲིད་མངོན་སུམ་དུ་
མཐོང་བར་གྱུར་པ་དེ་སྲིད་ཀྱི་བར་དུ་དཀྱིལ་འཁོར་དུ་བསྒོམ་པར་བྱའོ། །དེ་ནས་དེའི་རྗེས་ཐོགས་ཉིད་ལ་ཏིང་ངེ་འཛིན་གསུམ་བསྒོམས་ལ་དཀྱིལ་འཁོར་འདི་བྲི་བར་བྱའོ། །དཀྱིལ་འཁོར་བཤད་པར་བྱ་སྟེ། ཞེས་བྱ་བ་ནི་བརྩོན་པ་ལ་འཇུག་པའོ། །ཀུན་ནས་ཟླུམ་པ་ཞེས་བྱ་བ་ནི་དབྱིབས་ཟླུམ་
པའོ། །ཐིག་གསུམ་པ་ཞེས་བྱ་བ་ནི་རིམ་པ་གསུམ་པའོ། །དཀྱིལ་འཁོར་ཆེན་པོ་ཞེས་བྱ་བ་ནི་ཕྱག་རྒྱ་ཆེན་པོ་གཙོ་བོར་བྱས་པའོ། །སྒོ་བཞི་པ་ཞེས་བྱ་བ་ལ་སོགས་པ་ལ་རིམ་པ་རེ་རེ་ཞིང་སོ་སོར་སྒོ་བཞི་བྲི་ཞིང་། མཚམས་སུ་ནི་མདུང་རྩེ་གསུམ་པ་བྲིས་ལ། དེའི་དབུས་སུ་དབང་ཕྱུག་ཆེན་པོ་ཇི་
ལྟ་བ་བཞིན་དུ་བྲིས་ལ། དབང་ཕྱུག་ཆེན་པོའི་དེའི་ཕྱོགས་དང་མཚམས་རྣམས་ཏེ། ལོགས་ཐམས་ཅད་དུ་ཚོགས་བརྒྱད་པོ་སྟེ། བ་ལང་གི་རྣ་བའི་དབང་ཕྱུག་གི་བར་དུ་བྲི་བར་བྱའོ། །དེའི་མཚམས་རྣམས་སུ་ནི་མ་མོའི་ཚོགས་ཐམས་ཅད་ཅེས་བྱ་བ་ནི་རིམ་པ་དབུས་མར་རོ། །གནས་ཇི་ལྟ་བ་བཞིན་དུ་ཞེས་
བྱ་བ་ནི་ཇི་ལྟར་འོག་ནས་བཤད་པ་བཞིན་དུའོ། །སྒོ་རྣམས་སུ་དབྱིག་པའི་དབང་ཕྱུག་ལ་སོགས་པ་བྲི་བར་བྱའོ། །ཕྱི་རོལ་དུ་ནི་འབྱུང་པོ་རྣམས་དང་ཡི་གེ་རྣམས་བྲི་བར་བྱའོ་ཞེས་བྱ་བ་ནི་རིམ་པ་གསུམ་པའི་ཕྱིའི་དཀྱིལ་འཁོར་གྱི་རང་བཞིན་གྱི་རིམ་པ་ལ་ནི་འབྱུང་པོ་བརྒྱད་ཀྱི་ཡི་གེ་བརྒྱད་བྲི་བར་བྱའོ། །
དེ་ནས་ཞེས་བྱ་བ་ལ་སོགས་པ་ལ་དེ་ལྟར་དཀྱིལ་འཁོར་བྲིས་ནས། སློབ་དཔོན་ཐལ་བ་གཙང་མས་ལུས་བསྐུས་ཤིང་གོས་གཙང་མ་བགོས་ཏེ། མདུང་རྩེ་གསུམ་གྱི་མཚན་མས་གཞུག་པར་བྱའོ། །ཞུགས་ནས་ཀྱང་སེམས་ཅན་ཀུན་ལ་ཞེས་བྱ་བ་ལ་སོགས་པའི་ཆོ་ག་བརྗོད་པར་བྱའོ། །

59-1-225a

སེམས་ཅན་ཞེས་བྱ་བ་ལ་སོགས་པ་ལ་ཕན་པ་རྒྱ་ཆེན་པོའི་བདེ་བར་རྣམ་པར་སྨིན་པ་ལས་ཏེ། དེའི་དོན་དུ་དྲག་པོའི་ལས་དངོས་པོ་མེད་པའི་ངོ་བོ་ཉིད་དོ་ཞེས་བྱ་བར་སྦྱར་རོ། །བསྟན་པ། གདུག་པ་ཐམས་ཅད་གྲུབ་པའི་ཕྱིར། །ཞེས་བྱ་བ་ནི་གདུག་པ་རྣམས་འདུལ་བའི་
ཕྱིར་མ་རུངས་པའི་ལས་བྱ་བ་སྟེ། དེ་བཞིན་གཤེགས་པའི་བཀའ་ནི་གདུག་པ་རྣམས་འདུལ་བའོ། །དེ་གྲུབ་པ་ནི་རྫོགས་པ་སྟེ་དེའི་དོན་དུའོ། །འདོད་པ་ཀུན་གྱི་བདག་པོ་དང་། །ཞེས་བྱ་བ་ནི་འདོད་པའི་ཡོན་ཏན་ལྔ་པོ་དག་གི་བདག་པོ་ཉིད་དང་། རྡོ་རྗེ་དབང་ཕྱུག་ལ་སོགས་པའི་
བདག་པོ་ཉིད་ནི་འདོད་པ་ཐམས་ཅད་ཀྱི་བདག་པོ་སྟེ་འདོད་པ་ཐམས་ཅད་ཀྱི་བདག་པོ་ཉིད་དོ། །དྲག་པོའི་ལས་ཀྱི་ངོ་བོ་ཉིད། །ཅེས་བྱ་བ་ནི་རྡོ་རྗེ་དབང་ཕྱུག་གི་ལས་ནི་དྲག་པོའི་ལས་ཏེ། ལས་དེའི་དངོས་པོ་དེ་གྱིས་ཤིག་ཅེས་བོད་པའོ། །འདི་སྐད་སྟོན་པ་ཡིན་ཏེ། གང་རྡོ་རྗེ་
དབང་ཕྱུག་གི་ལས་སྣ་ཚོགས་པ་དེ་གྱིས་ཤིག་པའོ། །དེ་ལྟ་བུ་དེས་ནི་དེའི་ཕྱག་རྒྱ་ཆེན་པོ་འགྲུབ་པར་འགྱུར་རོ་ཞེས་བྱ་བའོ། །དེ་ནས་ཕྱག་རྒྱའི་ཡེ་ཤེས་བསླབ་སྟེ་ཞེས་བྱ་བ་ནི་སློབ་མ་བཅུག་ནས་དེ་རྣམས་ཀྱི་ཕྱག་རྒྱ་ཆེན་པོ་ལ་སོགས་པ་བསླབ་པར་བྱའོ། །དེ་ནས་ཉེ་བར་སྡུད་པའི་དུས་སུ་ཡང་ཕྱི་
རོལ་དུ་གཏོར་མ་ཇི་ལྟ་བ་བཞིན་དུ་བྱིན་ལ། དཀྱིལ་འཁོར་ཉེ་བར་བསྡུ་བར་བྱའོ། །དེ་ནས་བརྩམས་ཏེ་ཞེས་བྱ་བ་ནི་དཀྱིལ་འཁོར་དུ་འཇུག་པ་ནས་ཉེ་བར་གཟུང་བར་བྱའོ། །འཇིགས་པ་མེད་པར་ཞེས་བྱ་བ་ནི་ཕྱི་རོལ་གྱི་ལྷ་རྣམས་ཀྱི་འཚེ་བ་དང་བྲལ་བའོ། །དངོས་གྲུབ་ཐམས་ཅད་ཅེས་བྱ་བ་ནི་རྡོ་རྗེ་
དབང་ཕྱུག་དང་། ཕྱག་རྒྱ་ཆེན་པོ་ལ་སོགས་པའི་དངོས་གྲུབ་རྣམས་ཀྱི་རྒྱུར་གྱུར་པས་སོ། །ཕུན་སུམ་ཚོགས་པ་ཐམས་ཅད་ཀྱིས། །ཞེས་བྱ་བ་ནི་རྡོ་རྗེ་དབང་ཕྱུག་ལ་སོགས་པའི་ཕུན་སུམ་ཚོགས་པ་རྣམས་ཀྱིས་སོ། །བདེ་བ་དང་ཡིད་བདེ་བ་ཐམས་ཅད་རྗེས་སུ་མྱོང་ནས་ཞེས་བྱ་བ་ནི་རྡོ་རྗེ་དབང་ཕྱུག་ལ་སོགས་པ་དེ་
རྣམས་ཉིད་ཀྱིའོ། །དྲག་པོའི་འཇིག་རྟེན་དུ་ཞེས་བྱ་བ་ནི་འཇིག་རྟེན་དུ་གྲགས་པའོ། །མཆོད་པར་འགྱུར་རོ་ཞེས་བྱ་བ་ནི་རྡོ་རྗེ་དབང་ཕྱུག་དང་འདྲ་བར་ཡང་དག་པར་མཆོད་པར་འགྱུར་བས་སོ། །དེའི་དོན་འདི་ཡིན་པར་བཤད་པར་བྱ་སྟེ། རྡོ་རྗེ་དབང་ཕྱུག་གི་སྦྱོར་བ་བྱས་ལ། ཏིང་ངེ་འཛིན་བསྒོམ་པ་ནས་

59-1-225b

བརྩམས་ཏེ། ཇི་སྲིད་མཚན་མ་ཐོབ་ཅིང་རྗེས་སུ་གནང་བ་ཐོབ་ཀྱི་བར་དུ་དཀྱིལ་འཁོར་འདི་བསྒོམ་པར་བྱའོ། །དེ་ནས་དཀྱིལ་འཁོར་གྱི་སའི་དབུས་སུ་ཏིང་ངེ་འཛིན་གསུམ་རྣམ་པར་བསྒོམས་ལ། བར་སྣང་གི་གནས་སུ་དཀྱིལ་འཁོར་སྔ་མ་བཞིན་དུ་གཞག་ལ། ཉི་མ་འཆར་བའི་དུས་སུ་ལེགས་པར་
ཐིག་གདབ་པར་བྱ་སྟེ། ཀུན་ནས་ཟླུམ་པོ་ལ། རིམ་པ་གསུམ་པ། དབུས་མ་ཉིས་འགྱུར། རིམ་པ་གསུམ་པ་ནི་ཕྱིའི་དཀྱིལ་འཁོར་གྱི་རང་བཞིན་ཏེ། རིམ་པ་གསུམ་པ་སུམ་འགྱུར་རོ། །ཐམས་ཅད་ཀྱི་སྒོ་བཞི་པ་ལ་མཚམས་བཞིར་མདུང་རྩེ་གསུམ་པས་མཚན་པ་བྲི་བར་བྱའོ། །དེ་ནས་དཀྱིལ་
འཁོར་དབུས་མའི་དབུས་སུ་དབང་ཕྱུག་ཆེན་པོ་གདོང་བཞི་པ་དགོད་པར་བྱ་སྟེ། གདོང་དང་པོ་ཞིག  གདོང་ལྷག་མ་རྣམས་ནི་དྲག་ཅིང་འཇིགས་པར་བྱེད་པ་བྲི་བར་བྱའོ། །ཁྲོ་བོ་ཆེན་པོ་འཇིགས་བྱེད་ལག་པ་བཞི་པ་ཁ་དོག་ནག་པོ་ལག་པ་གཉིས་ན་རྩེ་གསུམ་དང་ཐོད་པ། ཡང་གཉིས་ཀྱིས་གླང་པོ་ཆེའི་
པགས་པ་རླན་དང་བཅས་པ་བ་དན་གྱི་ཚུལ་གྱིས་འཛིན་པས་གནས་པ། དེའི་སྤྱི་བོར་བྲི་བར་བྱའོ། །རྡོ་རྗེ་དབང་ཕྱུག་དེའི་མདུན་གྱི་ལག་པ་བཞིན། མདུང་རྩེ་གསུམ་པ་དང་། ཁ་ཊྭཱཾ་ག་དང་། ཕྲེང་བ་དང་། གཡུང་དྲུང་གིས་མཚན་པ་འཛིན་པར་བྱའོ། །དེ་བཞིན་དུ་དེའི་རྒྱབ་ཀྱི་ལག་པ་བཞི་ལ་ཡང་
དེ་བཞིན་དུ་བྱའོ། །དཀྱིལ་འཁོར་དབུས་མ་དེ་ཉིད་ཤར་ཕྱོགས་ཀྱི་ལོགས་སུ་ནག་པོ་ཆེན་པོ་ལག་ན་ཏྲི་ཤཱུ་ལ་ཐོགས་པའོ། །ལྷོ་ཕྱོགས་སུ་དགའ་བྱེད་དབང་ཕྱུག་རྫ་རྔ་བརྡུང་བ་ལ་བརྩོན་པའོ། །ནུབ་ཕྱོགས་སུ་དྲིལ་ཆེན་ལག་ན་དྲིལ་བུ་ཐོགས་པའོ། །བྱང་ཕྱོགས་སུ་གར་གྱི་དབང་ཕྱུག་ལག་ན་མདུང་
རྩེ་ལ་སོགས་པ་ཐོགས་པའོ། །ཤར་ལྷོ་མཚམས་སུ་ཐོད་པ་བཟང་པོ་ལག་ན་ཐོད་པ་ཐོགས་པའོ། །ལྷོ་ནུབ་མཚམས་སུ་གཏུམ་པའི་དབང་ཕྱུག་ཕྱག་ན་ཏྲི་ཤཱུ་ལ་དང་། རལ་གྲི་དང་། ཁཊྭཱཾ་ག་དང་། ཐོད་པ་ཐོགས་པའོ། །ནུབ་བྱང་མཚམས་སུ་ཁཊྭཱཾ་ག་ལག་ན་ཁཊྭཱཾ་ག་དང་། ཐོད་པ་ཐོགས་པའོ། །
བྱང་ཤར་མཚམས་སུ་བ་ལང་རྣ་བའི་དབང་ཕྱུག་ལག་ན་ཏྲི་ཤཱུ་ལ་ཐོགས་པའོ། །རིམ་པ་གཉིས་པའི་ཤར་ཕྱོགས་སུ་དྲག་མོ་ལག་ན་མདུང་རྩེ་གསུམ་པ་ཐོགས་པའོ། །ལྷོར་ཚངས་པ་མོ་ལག་ན་བགྲང་ཕྲེང་ཐོགས་པའོ། །ནུབ་ཏུ་ཁྱབ་འཇུག་མོ་ལག་ན་འཁོར་ལོ་ཐོགས་པའོ། །བྱང་ཕྱོགས་སུ་

59-1-226a

གཞོན་ནུ་མ་ལག་ན་དྲིལ་བུ་ཐོགས་པའོ། །ཤར་ལྷོ་མཚམས་སུ་ནག་མོ་ལག་ན་ཐོད་པ་ཁྲག་དང་བཅས་པ་དང་འཁར་གསིལ་ཐོགས་པའོ། །ལྷོ་ནུབ་མཚམས་སུ་ནག་མོ་ཆེན་མོ་ལག་ན་ཆུ་གྲི་ཐོགས་པའོ། །ནུབ་བྱང་མཚམས་སུ་ཟབ་མོ་ལག་ན་མཆེ་བ་ཐོགས་པའོ། །
བྱང་ཤར་མཚམས་སུ་སྲིན་མོ་ལག་ན་ཁཊྭཱཾ་ག་ཐོགས་པ་བྲི་བར་བྱའོ། །དཀྱིལ་འཁོར་གྱི་དེ་ཉིད་ཀྱི་ཤར་ཕྱོགས་ཀྱི་སྒོར་ཞི་བ་ལག་ན་ཐོད་པ་ཐོགས་པའོ། །ལྷོར་བྷཱེ་རུཎྜ་ལག་ན་རུས་པའི་ལུ་གུ་རྒྱུད་ཐོགས་པའོ། །ནུབ་ཏུ་གཏུམ་མོ་ལག་ན་བྱ་རྒོད་ཐོགས་པའོ། །བྱང་དུ་འཇིགས་བྱེད་
མ་ལག་ན་བྱི་ལ་ཐོགས་པའོ། །རིམ་པ་གསུམ་པོ་ལ་འབྱུང་པོའི་ཡི་གེ་ཏྲི་བརྒྱད་ཕྲེང་བརྒྱད་དུ་གནས་པ་བྲི་བར་བྱའོ། །ཕྱི་དང་ནང་དུ་བཅས་པའི་ཤར་ཕྱོགས་ཀྱི་སྒོར་དབྱིག་པའི་དབང་ཕྱུག་ལག་ན་ཐོད་པ་དང་འཁར་བ་ཐོགས་པའོ། །ལྷོར་མགོ་བོའི་དབང་ཕྱུག་ལག་ན་ཏི་ཤཱུ་ལ་དང་ཐོད་པ་ཐོགས་
པའོ། །ནུབ་ཏུ་དྲིལ་བུའི་རྣ་བ་ལག་ན་དྲིལ་བུ་ཐོགས་པའོ། །བྱང་ཕྱོགས་སུ་དྲག་པོ་ཆེན་པོ་ལག་ན་ཐོད་པ་དང་ཏྲི་ཤཱུ་ལ་ཐོགས་པ་བྲི་བར་བྱའོ། །འདིར་ལྷ་ཐམས་ཅད་ཀྱི་སྙིང་པོ་ནི་ཏྲི་ཞེས་བྱ་བ་ཡིན་པར་ཤེས་པར་བྱའོ། །དེ་ལྟར་ན་རྡོ་རྗེ་དབང་ཕྱུག་གི་སྦྱོར་བས་དཀྱིལ་འཁོར་བྲིས་ལ། མདུང་རྩེ་གསུམ་གྱིས་མཚན་
པའི་ཕྱག་རྒྱས་བཟུང་བའི་རྩེ་གསུམ་པ་དང་། མེ་ཏོག་གི་ཡལ་ག་ལས་བུམ་པ་ཐམས་ཅད་དང་བུམ་པ་གང་བ་རྣམས་ཏྲི་ཞེས་བྱ་བ་རེ་རེ་ཞིང་ལན་བརྒྱ་རྩ་བརྒྱད་ཡོངས་སུ་བཟླས་ལ། དཀྱིལ་འཁོར་གྱི་སྒོ་ཐམས་ཅད་ཕྱེ་སྟེ། ཏྲི་ཞེས་བྱ་བས་རྡོ་རྗེ་དབང་ཕྱུག་འཁོར་དང་བཅས་པ་ལ་མཆོད་ཡོན་ཕུལ་ལ། 
བུམ་པ་གང་བ་རྣམས་དང་། གོས་དང་བླ་རེ་ལ་སོགས་པ་བསྟབས་ཏེ། མཆོད་པ་རྣམ་པ་ལྔས་མཆོད་ལ། ཇི་སྐད་དུ་བཤད་པའི་རང་གི་ལས་ཀྱི་ཕྱག་རྒྱ་རྣམས་ཀྱིས་ཀྱང་མཆོད་དེ། ཕྱི་རོལ་དུ་གཏོར་མ་བྱིན་ནས་སྦྱིན་སྲེག་བྱའོ། །དེ་ནས་རས་དཀར་པོ་ལ་རྡོ་རྗེ་གནོད་སྦྱིན་དང་། དྲི་ཡོངས་སུ་བཟླས་
ལ། དེ་དག་ལས་གཅིག་གིས་སྨད་གཡོགས་བྱ། གཉིས་པས་ནི་སྟོད་གཡོགས་བྱ། གསུམ་པས་རང་གི་གདོང་གཡོགས་ལ། ཏྲི་ཞེས་བྱ་བ་ཡོངས་སུ་བཟླས་པའི་ཐལ་བ་གཙང་མས་ལུས་ལ་བྱུགས་ཏེ། ཕྱག་བྱས་ལ། བྱང་ཆུབ་ཏུ་སེམས་བསྐྱེད་ནས། དེ་བཞིན་དུ་རང་གི་སྙིང་གར་རྡོ་རྗེ་བསམས་

59-1-226b

ལ། ཤར་ཕྱོགས་ཀྱི་སྒོར་བལྟས་ནས། ཕྱི་རོལ་ན་གནས་པའི་བུམ་པའི་ཆུས་དབང་བསྐུར་ནས། རྩེ་གསུམ་པས་མཚན་མ་བཅིངས་ཏེ། དེ་ཉིད་ཀྱིས་མེ་ཏོག་གི་ཕྲེང་བ་བཟུང་ལ། བཛྲ་བཛྲ་ཏྲི་ཞེས་བརྗོད་ཅིང་དཀྱིལ་འཁོར་དུ་འཇུག་པར་འགྱུར་བའོ། །དེ་ནས་འདི་སྐད་ཅེས་བརྗོད་པར་བྱ་སྟེ། ཀྱེ་
དྲག་པོ་འབྱུང་བའི་བདག་པོ་དབང་དུ་མཛོད་ཅིག་ཅེས་བརྗོད་དོ། །དེ་ནས་ཕྱག་བྱས་ལ་དཀྱིལ་འཁོར་ལ་བསྐོར་བ་ལན་གསུམ་བྱས་ནས། རྡོ་རྗེ་དབང་ཕྱུག་གི་མདུན་དུ་འདུག་སྟེ། འདི་སྐད་ཅེས་བརྗོད་པར་བྱའོ། །ཛཿཧཱུཾ་བཾ་ཧོཿ། པྲ་སིདྡྷྱེ་མ་ན། དེ་ནས་རྡོ་རྗེ་ཆུ་འཐུངས་ལ། །ཨ་ཞེས་བྱ་བ་
ལན་བརྒྱ་ཟློས་ཤིང་། བདག་ཉིད་ལ་དབབ་པ་བྱའོ། །ཡང་གཡོན་པའི་ཁུ་ཚུར་གྱིས་རྡོ་རྗེ་སེམས་མ་ཕྱེ་ལ། ཨ་ཞེས་བྱ་བ་དེ་བཞིན་དུ་ཟློས་ཤིང་བདག་ཉིད་ལ་དབབ་པ་བྱའོ། །དེ་ནས་ཏྲི་ཞེས་བྱ་བས་མེ་ཏོག་དོར་རོ། །དེ་ནས་དེ་བླངས་ལ་དེ་ཉིད་ཀྱིས་རང་གི་མགོ་ལ་བཅིང་བར་བྱའོ། །དེ་
ནས་དེ་ཉིད་ཀྱིས་གདོང་གཡོགས་དགྲོལ་བར་བྱའོ། །དེ་ནས་དེ་ཉིད་ཟློས་ཤིང་ཤར་ཕྱོགས་ཀྱི་ཆ་ནས་བརྩམས་ཏེ། དཀྱིལ་འཁོར་བལྟ་བར་བྱའོ། །དེ་ནས་རྩེ་མོ་གསུམ་གྱིས་མཚན་པ་བཅིངས་ལ། ཏིཥྛ་བཛྲ་ཞེས་བྱ་བ་ལ་སོགས་པས་རང་གི་སྙིང་གར་དགྲོལ་བར་བྱའོ། །དེ་ནས་རྡོ་རྗེ་
དབང་ཕྱུག་གི་ཕྱག་རྒྱ་ཆེན་པོ་བཅིངས་ལ། རྡོ་རྗེ་ལྟ་བས་དེ་ལ་བལྟ་ཞིང་ཇི་སྲིད་དུ་རྡོ་རྗེ་དབང་ཕྱུག་གི་མཐོང་བར་བྱིན་ནས། རང་གི་དངོས་གྲུབ་རྣམས་སྟེར་བར་གྱུར་པ་དེ་སྲིད་ཀྱི་བར་དུ་ཏྲི་ཞེས་བྱ་བ་བཟླས་བརྗོད་བྱའོ། །དེ་ནས་རྡོ་རྗེ་དབང་ཕྱུག་རྡོ་རྗེའི་ལྟ་བས་བལྟས་ལ། རྡོ་རྗེ་ཐལ་མོ་བསྐོར་བས་
ཕྱག་བྱས་ཏེ། མེ་ཏོག་ལ་སོགས་པའི་དབང་བསྐུར་བ་བླང་བར་བྱའོ། །དེ་ལ་དང་པོ་ཁོ་ནར་ཞི་བ་མདུང་གིས་མཚན་པས་ཡོངས་སུ་བཟུང་བའི་མདུང་རྩེ་གསུམ་པ་དང་། མེ་ཏོག་གི་ཡལ་ག་ལས་ཀྱང་རྣམ་པར་རྒྱལ་བའི་བུམ་པ་ལས་སྔར་བཤད་པའི་བུམ་པའི་སྔགས་དེ་བཞིན་དུ་ཡོངས་སུ་
ཟློས་ཏེ། བདག་ཉིད་རྡོ་རྗེ་དབང་ཕྱུག་ཏུ་བྱིན་གྱིས་བརླབས་ལ། ཕྱིའི་དཀྱིལ་འཁོར་གྱི་ནང་དུ་སྣ་ཚོགས་པདྨ་བྲིས་ནས། དེའི་སྟེང་དུ་རྡོ་རྗེ་དབང་ཕྱུག་གི་ཕྱག་རྒྱ་ཆེན་པོས་འདུག་སྟེ་མེ་ཏོག་ལ་སོགས་པས་བདག་ཉིད་ཡང་དག་པར་མཆོད་ལ། མཆོད་ཡོན་བླངས་ཏེ། རྡོ་རྗེ་ཁུ་ཚུར་

59-1-227a

གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ལ། ཨོཾ་བཛྲ་ཨ་དྷི་ཥིཉྩ་ཏྲི་ཞེས་ཟློས་ཤིང་དེས་བདག་ཉིད་དབང་བསྐུར་བར་བྱ་ལ། ཆུ་དེ་བཏུང་བར་ཡང་བྱའོ། །དེ་ནས་རིན་པོ་ཆེའི་ཅོད་པན་དང་། དར་དཔྱངས་དང་། དབང་བསྐུར་བའི་ཕྱག་རྒྱས་རིན་པོ་ཆེའི་
ཅོད་པན་དང་། དར་དཔྱངས་ཀྱིས་བདག་ཉིད་དབང་བསྐུར་བར་བྱ་ཞིང་། ཏྲི་ཞེས་བྱ་བས་མདུང་རྩེ་གསུམ་དྲིལ་བུ་དང་བཅས་པ་བླངས་ལ་ཏྲི་ཞེས་བྱ་བ་ཉིད་ཟློས་ཤིང་རྡོ་རྗེ་དབང་ཕྱུག་གི་མིང་གིས་དབང་བསྐུར་བས་བདག་ཉིད་དབང་བསྐུར་བ་དང་། ཏྲི་ཞེས་བྱ་བ་ཉིད་ཀྱིས་བདག་པོའི་དབང་བསྐུར་བ་
བླངས་ཏེ། མདུང་རྩེ་གསུམ་དེ་ཁོ་ན་ཉིད་ཀྱིས་གཟུང་བར་བྱའོ། །དེ་ལ་འཇིག་རྟེན་པ་འདི་དག་ཐམས་ཅད་ནི་བཅོམ་ལྡན་འདས་ཕྱག་ན་རྡོ་རྗེས་དཀྱིལ་འཁོར་དུ་བཅུག་ནས། རྡོ་རྗེར་མཛད་པ་དེ་རྣམས་ཀྱི་ཕྱག་རྒྱ་གང་ཡིན་པ་དེ་ནི་རྡོ་རྗེའི་ཕྱག་རྒྱ་ཞེས་བྱ་སྟེ། དེ་ཁོ་ན་ཉིད་དོ། །དེ་ནས་དྲིལ་བུ་ཆོས་ཀྱི་དཀྲོལ་
བར་བྱ་སྟེ། དེ་ལ་ཆོས་ནི་འདི་ཡིན་ཏེ། སེམས་ཅན་ཀུན་ལ་ཕན་པའི་ཕྱིར། །གདུག་པ་འདུལ་བ་གྲུབ་ཕྱིར་དང་། །འདོད་ཀུན་བདག་པོ་ཉིད་ཀྱི་ཕྱིར། །གདུག་པའི་ལག་ལ་གནས་པར་གྱིས། །དེ་ནས་དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབ་བོ། །དེ་ནི་འདི་ཡིན་ཏེ། འདི་ནི་ཁྱོད་ཀྱི་དམ་
ཚིག་ཆོས། །ཡང་དག་བདེན་པར་སྨྲ་བྱ་བ། །དེ་ནི་ཁྱོད་ཀྱིས་བརྙས་མི་བྱ། །བདེན་པ་ཡང་དག་ཡིན་ཞེས་བཤད། །ཅེས་བྱ་བ་ནི་དམ་ཚིག་གོ། །དེ་ནས་བརྟུལ་ཞུགས་བླང་བར་བྱ་སྟེ། འཆི་བའི་དབང་དུ་གྱུར་ཀྱང་ནི། །མི་བདེན་ནམ་ཡང་སྨྲ་མི་བྱ། །འབྱུང་པོའི་གདོན་ཡང་གཞན་མིན་ཏེ། །འདི་ནི་
བདེན་པ་མིན་ལས་བྱུང་། །དེ་ནས་བརྩམས་ཏེ་འབྱུང་པོ་ཐམས་ཅད་དབང་དུ་འགྱུར་བ་དང་། དབང་ཕྱུག་ཆེན་པོ་ཡང་དངོས་གྲུབ་ཐམས་ཅད་སྟེར་བར་འགྱུར་རོ། །དེ་ནས་མེ་ཏོག་ལ་སོགས་པས་བདག་ཉིད་ཡང་དག་པར་མཆོད་དེ། རང་གི་ལས་ཀྱི་ཕྱག་རྒྱ་རྣམས་ཀྱིས་ཀྱང་མཆོད་ལ། དབང་
བསྐུར་བ་བླངས་ཏེ། རྡོ་རྗེ་དབང་ཕྱུག་ལ་ཕྱག་བྱས་ལ། ཏྲི་ཞེས་བྱ་བས་བཟང་ནས་ཡང་བདག་ལ་བྱིན་གྱིས་བརླབ་པ་ལ་སོགས་པ་བྱས་ཏེ། རང་གི་མིང་བརྗོད་ཅིང་། དཀྱིལ་འཁོར་རྡོ་རྗེས་བསྒྲུབ་པར་བྱའོ། །དེ་ནས་བསྡུ་བ་བྱས་ལ། ཨོཾ་ཏྲི་ཧ་ཧ་ཧ་ཞེས་བྱ་བ་ཕྱག་རྒྱ་དང་བཅས་པས་

59-1-227b

བཅོམ་ལྡན་འདས་རྡོ་རྗེ་དབང་ཕྱུག་འཁོར་དང་བཅས་པ་དཀྱིལ་འཁོར་དུ་བཅུག་ལ། གནས་ཇི་ལྟ་བ་བཞིན་དུ་གཞག་པར་བྱའོ། །ལག་པ་གཡོན་པ་སོར་མོ་དབུས་མ་གསུམ་བསྒྲེང་ལ། བདེན་བྲལ་གྱི་ཕྱོགས་སུ་དཔུང་པ་གྱེན་དུ་བརྐྱང་ནས། གཡས་པས་ལག་མཐིལ་དུ་སོར་མོ་
གསུམ་བསྡུས་ལ་མཐེ་བོ་དང་མཐེ་ཆུང་བརྐྱང་ནས། ཁཊྭཱཾ་ག་འཛིན་པར་བྱ་བའི་ཕྱག་རྒྱ་བཅིངས་ལ། ལག་པ་གཡོན་པའི་གུང་མོ་ལྕགས་ཀྱུར་བྱ་བ་འདི་ནི་རྡོ་རྗེ་དབང་ཕྱུག་འཁོར་དང་བཅས་པ་སྤྱན་དྲང་བའི་ཕྱག་རྒྱ་སྟེ། འདིས་དབང་ཕྱུག་ཆེན་པོ་འཁོར་དང་བཅས་པ་བཀུག་ལ། ཏྲི་ཞེས་བྱ་བའི་
སྒྲ་བརྗོད་པར་བྱའོ། །དེ་ནས་རྡོ་རྗེ་གནོད་སྦྱིན་གྱིས་བགེགས་བསལ་ལ། མཚམས་བཅིང་བ་དང་། དཀྱིལ་འཁོར་བཅིང་བ་དང་། ར་བ་དང་། དྲ་བ་དག་བྱས་ལ། རྡོ་རྗེ་ཁུ་ཚུར་གྱིས་དཀྱིལ་འཁོར་གྱི་སྒོ་བཅིངས་ཏེ། རྡོ་རྗེ་སྲུང་པས་བསྲུང་བ་ཐམས་ཅད་གོ་ཆ་བསྐོན་ལ། ཏྲི་ཞེས་བྱ་བས་མཆོད་
ཡོན་ཕུལ་ཏེ། མདུང་རྩེ་གསུམ་པའི་མིག་གིས་ཏྲི་དྲྀ་ཤྱ་ཞེས་བྱ་བས་འཁོར་དང་བཅས་པ་བལྟ་བར་བྱས་ལ། ཛཿཧཱུཾ་བཾ་ཧོཿ། ས་མ་ཡ་སྟཾ་ས་མ་ཡ་སྟཾ་ཨ་ཧཾ་ཏྲི་ཞེས་ལན་གསུམ་བརྗོད་ལ། བསྒྲུབ་པར་བྱའོ། །དེ་ནས་ལག་པ་གཉིས་ཀྱི་མཐེ་བོ་དང་། མཐེ་ཆུང་ལྕགས་སྒྲོག་ལྟར་མདུང་རྩེ་གསུམ་
པས་མཚན་པ་ནི་དམ་ཚིག་གི་ཕྱག་རྒྱའོ། །སྔ་མ་བཞིན་དུ་ལྕེ་ལ་རྡོ་རྗེ་བསམས་ལ། དབང་ཕྱུག་ཆེན་པོ་ལ་སོགས་པའི་ལྕེ་ལ་ཏྲི་ཞེས་བྱ་བ་བསམ་པར་བྱ་སྟེ། འདི་ནི་འདིར་ཆོས་ཀྱི་ཕྱག་རྒྱའོ། །སྙིང་གར་ཨ་ལས་སྣ་ཚོགས་རྡོ་རྗེ་བསམས་ལ། རྡོ་རྗེ་དབང་ཕྱུག་ལ་སོགས་པའི་ཕྱག་རྒྱ་ཆེན་
པོ་ཇི་ལྟར་བྲིས་པ་དང་། རྗེས་སུ་མཐུན་པར་ཏྲི་ཞེས་བྱ་བ་ཟློས་ཤིང་། གར་བྱེད་པའི་ཚུལ་གྱིས་བཅིང་བ་འདི་ནི་དེ་རྣམས་ཀྱི་ལས་ཀྱི་ཕྱག་རྒྱའོ། །རང་གི་སྙིང་གར་ཧཱུཾ་ལས་རྡོ་རྗེ་རྣམ་པར་བསམས་ལ། ཏྲི་ཞེས་བྱ་བ་ཟློས་ཤིང་། ཇི་ལྟར་བྲིས་པ་དང་རྗེས་སུ་མཐུན་པར་རྡོ་རྗེ་དབང་ཕྱུག་ལ་
སོགས་པའི་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་རྡོ་རྗེ་རིན་ཆེན་གྱི་བསྡུ་བའི་ཕྱག་རྒྱས་རྡོ་རྗེ་དབང་ཕྱུག་འཁོར་དང་བཅས་པ་དབང་བསྐུར་བ་ལ། ཏྲི་ཞེས་བྱ་བས་རྡོ་རྗེ་དབང་ཕྱུག་འཁོར་དང་བཅས་པ་ལ་མཆོད་ཡོན་ཕུལ་ནས་མཆོད་པ་རྣམ་པ་ལྔ་དང་། ཕྱག་རྒྱ་རྣམས་ཀྱིས་ཡང་དག་པར་མཆོད་

59-1-228a

ལ། སློབ་མ་གཞུག་པར་བྱ་བའི་ཕྱིར། །རྗེས་སུ་གནང་བ་མནོས་ནས་སློབ་མ་གཞུག་པར་བྱའོ། །དེ་ནས་སློབ་མ་རྣམས་ལ་ཆོ་ག་ཐམས་ཅད་བྱའོ། །ཞི་བ་མདུང་གིས་མཚན་པའི་དཀྱིལ་འཁོར་རོ་ཞེས་བྱ་བ་ལ་ཞི་བ་ནི་དབང་ཕྱུག་ཆེན་པོའོ། །དེའི་མདུང་ནི་མདུང་རྩེ་གསུམ་པའོ། །
དེའི་མཚན་པ་ནི་དེས་དཀྱིལ་འཁོར་གང་ལ་མཚན་པར་བྱས་པ་དེ་ནི་ཞི་བའི་མདུང་གིས་མཚན་པའི་དཀྱིལ་འཁོར་རོ་ཞེས་བྱའོ། །ཕྱི་རོལ་གྱི་རྡོ་རྗེའི་རིགས་ལ་ཕྱག་བྱ་བ་ནི་དེ་ལ་དད་པ་ཉིད་ཀྱིས་བྱའི་འཇིག་རྟེན་ལས་འདས་པའི་ལྷ་རྣམས་ལ་ལྷག་པར་མོས་པ་རྣམས་ཀྱིས་ནི་མ་ཡིན་ཏེ། དེ་
རྣམས་ཀྱིས་ནི་འཇུག་པ་དང་། དབང་བསྐུར་བ་དང་། སྔགས་བཟུང་བ་རྣམས་ཕྱག་མི་བྱ་བར་བྱའོ། །དཔལ་མཆོག་དང་པོའི་ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུ་ལས་གསུངས་པའི་ཞི་བ་མདུང་གིས་མཚན་པའི་དཀྱིལ་འཁོར་གྱི་བཤད་པ་རྫོགས་སོ།།    །།དེ་
ལྟར་ཞི་བ་མདུང་གིས་མཚན་པའི་དཀྱིལ་འཁོར་བཤད་ནས། ད་ནི་མ་མོ་རྣམས་ཀྱིས་འདུལ་བ་ཉིད་ལས་བརྩམས་ཏེ། མ་མོའི་དཀྱིལ་འཁོར་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །འདིར་དང་པོ་སྦྱོར་བའི་ཏིང་ངེ་འཛིན་ནི་ཞི་བ་མདུང་གིས་མཚན་པའི་
དཀྱིལ་འཁོར་ཆེན་པོར་གསུངས་པ་ཉིད་དོ། །ཐམས་ཅད་དགུག་པ་དང་ཞེས་བྱ་བ་ལ་སྙིང་པོ་ལ་སོགས་པས་ཐམས་ཅད་དགུག་པ་ནི་དགུག་པའོ། །གཞུག་པ་དང་ཞེས་བྱ་བ་ནི་དཀྱིལ་འཁོར་ལ་སོགས་པར་སེམས་ཅན་ཐམས་ཅད་ལ་སོགས་པ་གཞུག་པའོ། །སེམས་ཅན་ཐམས་
ཅད་བསད་པ་སེམས་མེད་པར་བྱ་བ་དང་ཤིན་ཏུ་བསད་པའོ། །སྒྲུབ་པ་ནི་ཕྱག་རྒྱ་ཆེན་པོ་ལ་སོགས་པ་བསྒྲུབ་པའོ། །དམ་ཚིག་ནི་ཐམས་ཅད་དགུག་པ་དང་། གཞུག་པ་དང་། བསད་པ་དང་། སྒྲུབ་པ་དེ་རྣམས་ཀྱི་རྒྱུ་སྟེ། གང་ལ་མིང་དེ་སྐད་ཅེས་བྱ་བའི་སྙིང་པོ་ནི་ངེས་པའི་ཡེ་ཤེས་
ཏེ། དེ་བསྒོམ་པ་དང་དེ་སྟོན་པར་བྱེད་པའི་སྒྲ་ཡང་ཉེ་བར་གདགས་པས་དེ་སྐད་ཅེས་བྱ་བའོ། །དེ་སྨྲས་པ་ནི་བཤད་པར་གྱུར་པ་སྟེ། བྷྱོ་ཞེས་བྱའོ། །བཤད་པ་འདི་དག་གི་ཏིང་ངེ་འཛིན་གཉིས་པ་སྨྲས་པ་ཡིན་ནོ། །དེ་ནས་འདུས་པ་ནས་བརྩམས་ཏེ། གསུམ་པ་ཡིན་པར་ཤེས་

59-1-228b

པར་བྱའོ། །ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པ་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་དཀྱིལ་འཁོར་བཤད་པར་བྱ་སྟེ་ཞེས་བྱ་བ་ལ་སོགས་པ་སྨོས་པ་ནི་སློབ་དཔོན་གྱི་ལས་ཀྱི་ཆོ་ག་གསུངས་པ་ཡིན་ནོ། །དེ་ནས་ཞེས་བྱ་
བའི་སྒྲ་ནི་དེ་མ་ཐག་པ་སྟེ། སྔོན་དུ་བརྟེན་པའི་རྗེས་ཐོགས་ལ་ཞེས་བྱ་བའི་དོན་ཏོ། །འདིའི་ཞེས་བྱ་བ་ནི་སྙིང་པོ་འདིའིའོ། །དཀྱིལ་འཁོར་བཤད་པར་བྱ་སྟེ་ཞེས་བྱ་བ་ནི་གོ་བར་ཟད་དོ། །ཟུར་བཞི་པ་ནི་ཞེས་བྱ་བ་ལ་སོགས་པ་ནི་གོ་སླའོ། །དེ་ལྟར་དཀྱིལ་འཁོར་བྲིས་ནས་དེའི་རྗེས་ཐོགས་ཉིད་ལམ་མོའི་
ཚོགས་ཀྱི་ཕྱག་རྒྱའི་སློབ་དཔོན་ཆོས་སྤྱོད་པ་གཙང་བ་ཞེས་བྱ་བ་ནི་དགེ་བ་བཅུའི་ལས་ཀྱི་ལམ་གྱི་ཆུས་མི་དགེ་བ་བཅུའི་ལས་ཀྱི་ལམ་བཀྲུས་པའི་རྒྱུད་དང་ལྡན་པ་དང་། ཕྱིའི་ཆུའི་ཁྲུས་ཀྱིས་ཕྱིའི་དྲི་མ་དང་བྲལ་བ་ནི་ཆོས་སྤྱོད་པ་དང་གཙང་བའོ། །གོས་གཙང་མ་བགོས་པ་ཞེས་བྱ་བ་ནི་གོ་བར་ཟད་དོ། །ཐམས་
ཅད་ཟ་བའམ་ཞེས་བྱ་བ་ནི་ངེས་པ་མ་བཟུང་ཞིང་ཕྱིའི་གཙང་སྦྲའི་སྤྱོད་པ་དང་བྲལ་བ། ཚོལ་བའི་རྒྱུད་ལ་མངོན་པར་དགའ་བས། གཟུགས་དང་། སྒྲ་དང་། དྲི་དང་། རོ་དང་། རེག་བྱ་རྣམས་ལ་ཉེ་བར་སྤྱོད་པའོ། །ཐམས་ཅད་སྤྱད་པ་ལ་ཡང་སྨད་པ་མེད་དེ་ཞེས་བྱ་བ་ནི་མ་མོ་རྣམས་བསྒྲུབ་པའོ། །ཞི་བའི་
ཕོ་ཉའི་ཕྱག་རྒྱས་ཞུགས་ལ་ཞེས་བྱ་བ་ནི་མཁྲིག་མ་གཉིས་བསྣོལ་ལ། ལག་པ་གཉིས་བརྐྱང་སྟེ་ས་ལ་བཞག་ནས། འཕགས་པའི་ཚུལ་གྱིས་ཙོག་པུར་འདུག་ལ། ཅེ་སྤྱང་གི་སྒྲ་འདོན་པར་བྱའོ། །ཞུགས་ལ་ཞེས་བྱ་བ་ནི་ཞི་བའི་ཕོ་ཉའི་ཕྱག་རྒྱ་འདིས་མ་མོ་ཐམས་ཅད་དང་། མཁའ་འགྲོའི་ཚོགས་ཐམས་ཅད་
དེར་འདུས་པར་གྱུར་པའོ། །སྙིང་པོ་བཟླས་པར་བྱའོ་ཞེས་བྱ་བ་ནི་བྷྱོ་ཞེས་བྱ་བར་བཟླས་པའོ། །དེ་ནས་བྷྱོ་ཞེས་པ་བཟླས་པ་ཙམ་གྱིས་དཀྱིལ་འཁོར་གྱི་དབུས་ནས་བྷྱོ་ཆེན་པོ་ཐོས་པར་འགྱུར་རོ། །དེ་ནས་ཞེས་བྱ་བ་ལ་སོགས་པ་ནི་གོ་སླའོ། །གདུག་པའི་དམ་ཚིག་ནི་མ་གཏོགས་སོ་ཞེས་བྱ་བ་ནི་གང་གདོན་
གྱིས་ཟིན་པ་དེ་ནི་གདུག་པའི་དམ་ཚིག་གི་ཕྱག་རྒྱ་གཞུག་སྟེ། གདུག་པའི་དམ་ཚིག་དེ་མ་གཏོགས་པའོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་སློབ་དཔོན་གྱི་རང་གི་ཆོ་ག་རྣམས་རྗེས་སུ་སྤྱད་ལ། དེའི་རྗེས་ཐོགས་ཉིད་ལ་སློབ་མ་རྣམས་ནག་པོ་ཆེན་པོའི་དམ་ཚིག་གི་ཕྱག་རྒྱས་གཞུག་པར་བྱ་སྟེ། ལག་པ་གཡོན་

59-1-229a

པ་མདུན་དུ་དཔུང་པ་བཀུག་ལ། ཁ་ཊྭཱཾ་ག་འཛིན་པའི་ཁུ་ཚུར་དང་། གཡས་པའི་དཔུང་པ་བརྐྱང་ནས། བ་དན་གསུམ་པར་བྱས་ལ། མཐེ་བོ་དང་། སྲིན་ལག་གི་ཐོད་པ་འཛིན་པ་ལྟ་བུ་ཆུ་འཐུང་བའི་ཕྱག་རྒྱ་སྟེ། ནག་པོ་ཆེན་པོའི་དམ་ཚིག་གི་ཕྱག་རྒྱ་ཡིན་ལ། འདིས་
སློབ་མ་རྣམས་གཞུག་པར་བྱའོ། །ཞུགས་ནས་དེ་རྣམས་ལ་སློབ་དཔོན་གྱིས་རྣ་བར་བྷྱོ་ཞེས་བྱ་བ་སྒྲ་ཆེན་པོས་སྦྱར་བར་བྱ་ཞིང་བརྗོད་པར་བྱའོ། །དེ་ནས་ཞེས་བྱ་བ་ལ་སོགས་པ་ནི་གོ་སླའོ། །བདུག་པ་ལ་སོགས་པའི་ཕྱག་རྒྱས་མཆོད་ནས་ཞེས་བྱ་བ་ནི་རྡོ་རྗེ་བདུག་པ་ལ་སོགས་པའི་ཕྱག་རྒྱ་རྣམས་ཀྱིས་ཕྱིའི་
བདུག་པ་ལ་སོགས་པ་བླངས་ནས། བྷྱོ་ཞེས་བྱ་བ་ཉིད་ཀྱིས་དཀྱིལ་འཁོར་བ་ཐམས་ཅད་མཆོད་པར་བྱའོ། །དེ་ནས་བྷྱོ་ཞེས་བྱ་བས་ཨ་ར་ལི་ཞེས་བྱ་བའི་ཕྱི་རོལ་པའི་སྙིང་པོ་སློབ་མ་རྣམས་ལ་སྦྱིན་པར་བྱ་ཞིང་། ནག་པོ་ཆེན་པོ་ལ་སོགས་པའི་མཚན་མ་ཁ་ཊྭཱཾ་གཟུགས་ལ་སོགས་པ་དེ་རྣམས་སྦྱིན་པར་བྱའོ། །དེ་
ནས་ཞེས་བྱ་བ་ལ་སོགས་པ་ལ། དེ་ལྟར་རང་གི་མཚན་མ་རྣམས་བྱིན་ནས་སེམས་ཅན་ཐམས་ཅད་དེ། སེམས་ཅན་དུ་མ་ལ་གནོད་པ་བྱེད་པའི་གདུག་པ་དང་། དཀོན་མཆོག་གསུམ་ལ་གནོད་པར་བྱེད་པ་དེ་རྣམས་ཁྱོད་ཀྱིས་རྒྱས་གདབ་པར་བྱ་བ་དང་། དམ་ཚིག་ལ་སྨོད་དེ། གང་དཀྱིལ་འཁོར་ལ་སྨོད་
པར་བྱེད་པ་དེ་ཡང་ཁྱོད་ཀྱིས་བཟའ་བར་བྱ་བ་དང་། ཁྱོད་ཀྱིས་རང་གི་སྔགས་རྣམས་བསྟན་པར་མི་བྱ་བ་སྟེ། དམ་ཚིག་གསུམ་པོ་དེ་དག་ནི་ཁྱོད་ལ་རྣལ་འབྱོར་གྱི་དངོས་གྲུབ་སྟེར་བར་བྱེད་པ་ཡིན་ནོ་ཞེས་སློབ་མ་ལ་སློབ་དཔོན་གྱི་དམ་ཚིག་བསྟན་པར་བྱའོ། །དྲག་པོའི་དམ་ཚིག་མདུང་རྩེ་སྟེ། །ཞེས་བྱ་བ་ནི་
མདུང་རྩེ་གསུམ་པའོ། །མ་མོ་རྣམས་ཀྱིས་རྒྱས་འདེབས་པ། །ཞེས་བྱ་བ་ནི་གང་མ་མོའི་ཚོགས་རྣམས་ཀྱིས་རྒྱས་འདེབས་པའི་ལས་དང་། དེའི་སྙིང་པོ་ཁྱེད་ཀྱིས་ནམ་ཡང་མི་སྨྲ་བའོ། །གལ་ཏེ་འདས་ན་ཁྱེད་ཀྱི་སྙིང་། །རྟག་ཏུ་འཇིག་པར་བྱེད་པར་འགྱུར། །ཞེས་བྱ་བ་ནི་དྲག་པོའི་རྩེ་གསུམ་
གྱིས་ཁྱེད་ཀྱི་སྙིང་གཞིག་པར་འགྱུར་བ་དང་། མ་མོ་རྣམས་ཀྱིས་གང་རྒྱས་འདེབས་པའི་ལས་དེས་ཁྱོད་ཀྱི་སྙིང་རྟག་ཏུ་རྒྱས་འདེབས་པར་འགྱུར་རོ། །གལ་ཏེ་ཞེས་བྱ་བ་ནི་གལ་ཏེ་ཁྱོད་འདས་ན་ཞེས་བྱ་བའི་དོན་ཏོ། །དེ་ནས་ཞེས་བྱ་བ་ལ་སོགས་པ་ལ་དེ་ནས་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་

59-1-229b

ཐམས་ཅད་ཀྱི་ཡེ་ཤེས་བསླབ་པར་བྱའོ། །བསླབས་ནས་སློབ་དཔོན་གྱི་ལས་ཀྱི་ཕྱག་རྒྱ་རྣམས་ཀྱིས་གར་གྱི་མཆོད་པ་བྱ་ཞིང་། མེ་ཏོག་ལ་སོགས་པས་དཀྱིལ་འཁོར་མཆོད་ལ། དཀྱིལ་འཁོར་དུ་གཏོར་མ་སྦྱིན་པར་བྱའོ། །དེ་ནས་དཀྱིལ་འཁོར་དུ་བསྟབས་པའི་བཟའ་བ་དང་། བཅའ་བ་དང་།
བཏུང་བ་ཐམས་ཅད་ཀྱིས་སློབ་མ་རྣམས་ཚིམ་པར་བྱས་ལ། དཀྱིལ་འཁོར་ཇི་ལྟ་བ་བཞིན་དུ་ཉེ་བར་བསྡུས་ཏེ་ཕྱིར་འབྱུང་བར་བྱའོ། །ཕྱག་རྒྱའི་དཀྱིལ་འཁོར་རོ་ཞེས་བྱ་བ་ལ་ཕྱག་རྒྱ་ནི་རྡོ་རྗེ་དབང་ཕྱུག་ལ་སོགས་པའི་གཟུགས་ཀྱི་དཀྱིལ་འཁོར་ནི་དཀྱིལ་འཁོར་རོ། །དངོས་གྲུབ་ཐམས་ཅད་ཀྱི་དམ་
ཚིག་ནི་དངོས་གྲུབ་རྣམས་རྫོགས་པར་བྱེད་པའི་རྒྱུ་ལ་དམ་ཚིག་ཅེས་བྱ་སྟེ། མིང་དེ་སྐད་ཅེས་བྱའོ། །འདི་སྐད་སྟོན་པར་འགྱུར་ཏེ། མ་མོའི་དཀྱིལ་འཁོར་ལས་བཤད་པའི་ནག་པོ་ཆེན་པོའི་སྦྱོར་བ་བྱས་ལ། ཏིང་ངེ་འཛིན་གསུམ་བསྒོམ་པ་ནས་བརྩམས་ཏེ། ཇི་སྲིད་དུ་མཚན་མ་དང་རྗེས་སུ་གནང་བ་ཐོབ་པར་
གྱུར་པ་དེ་སྲིད་ཀྱི་བར་དུ་མ་མོའི་དཀྱིལ་འཁོར་འདི་བསྒོམ་པར་བྱའོ། །དེ་ནས་དཀྱིལ་འཁོར་གྱི་སའི་དབུས་སུ་མ་མོའི་ཚོགས་ཀྱི་དཀྱིལ་འཁོར་གྱི་ཏིང་ངེ་འཛིན་གསུམ་བསྒོམས་ལ། བར་སྣང་གི་ཕྱོགས་སུ་དཀྱིལ་འཁོར་སྔ་མ་བཞིན་དུ་བཞག་ནས། ཉི་མ་འཆར་ཀར་ཟུར་བཞི་པ་སྒོ་བྱང་དུ་བལྟས་
པར་ཐིག་བཏབ་ལ། དེ་བྲི་བར་བྱ་བ་ནི་དམར་པོ་ལ་སོགས་པ་ཚོན་སྣ་ལྔའམ། དམར་པོའམ། ཁྲག་གིས་བྲི་བར་བྱའོ། །དེའི་དབུས་སུ་ནག་པོ་ཆེན་པོ་གར་བྱེད་བཞིན་དུ་གནས་པ་བྲི་བར་བྱ་སྟེ། ལག་པ་བཅུ་ལ་ཁ་ཊྭཱཾ་ག་དང་། པདྨ་ཐོགས་པ་ཅི་དགའ་བ་བྲི་བར་བྱའོ། །དེའི་བྱང་ཕྱོགས་ཀྱི་
ལོགས་སུ་དྲག་པོ་ལག་ན་རྩེ་གསུམ་ཐོགས་པའོ། །ཤར་དུ་ཚངས་པ་མོ་ལག་ན་བགྲང་ཕྲེང་ཐོགས་པའོ། །ལྷོར་ཁྱབ་འཇུག་མ་ལག་ན་འཁོར་ལོ་ཐོགས་པའོ། །ནུབ་ཏུ་གཞོན་ནུ་མ་ལག་ན་དྲིལ་བུ་ཐོགས་པའོ། །བྱང་ཤར་མཚམས་སུ་ནག་མོ་ལག་ན་གྲི་ཐོགས་པའོ། །ཤར་ལྷོར་ནག་མོ་ཆེན་པོ་
ལག་ན་ཆུ་གྲི་ཐོགས་པའོ། །ལྷོ་ནུབ་ཏུ་ཟ་བ་མོ་ལག་ན་མཆེ་བ་ཐོགས་པའོ། །ནུབ་བྱང་མཚམས་སུ་སྲིན་མོ་ལག་ན་ཁཊྭཱཾ་ག་ཐོགས་པར་དྲི་བར་བྱའོ། །སྒོའི་དབུས་སུ་གཡས་ཀྱི་ཆ་ལ་ཞིབ་མོ་དང་། བྷེ་རུཎྜའོ། །གཡོན་གྱི་ཆ་ལ་གཏུམ་མོ་དང་། འཇིགས་བྱེད་མ་རྣམས་བྲི་བར་བྱའོ། །

59-1-230a

འདི་རྣམས་ནི་རིམ་པ་ཇི་ལྟ་བ་བཞིན་དུ་ཐོད་པ་དང་། རུས་པ་དང་། སྒྲོགས་དང་། བྱ་རྒོད་དང་། བྱི་ལའི་མཚན་མ་ཐོགས་པར་བྲི་བར་བྱའོ། །དེ་ལྟར་ནག་པོ་ཆེན་པོའི་སྦྱོར་བས་དཀྱིལ་འཁོར་བྲིས་ལ་ནག་པོ་ཆེན་པོའི་དམ་ཚིག་གི་ཕྱག་རྒྱས་ཡོངས་སུ་བཟུང་
བའི་ཁ་ཊྭཱཾ་ག་དང་། མེ་ཏོག་གི་ཡལ་ག་ལས་བུམ་པ་ཐམས་ཅད་དང་། བུམ་པ་གང་བ་རྣམས་དང་། པདྨའི་སྣོད་རྣམས་ལ་བྷྱོ་ཞེས་བྱ་བ་རེ་རེ་ཞིང་བརྒྱ་རྩ་བརྒྱད་བཟླས་བརྗོད་བྱས་ནས་དཀྱིལ་འཁོར་གྱི་སྒོ་རྣམས་ཇི་ལྟ་བ་བཞིན་དུ་ཕྱེ་ལ། ནག་པོ་ཆེན་པོ་འཁོར་དང་བཅས་པ་ལ་བྷྱོ་ཞེས་བྱ་བས་
དམ་ཚིག་གི་ཕྱག་རྒྱས་མཆོད་ཡོན་བྱིན་ཞིང་། བུམ་པ་དང་། བུམ་པ་གང་བ་རྣམས་ཀྱང་བསྟབས་ལ། ཡང་ནག་པོ་ཆེན་པོའི་མདུན་དུ་ཐོད་པ་དམར་པོ་གཞག་སྟེ། གོས་དང་བླ་རེ་ལ་སོགས་པ་ཡང་བྱིན་ལ། མཆོད་པ་རྣམ་པ་ལྔས་མཆོད་དེ། རང་གི་ལས་ཀྱི་ཕྱག་རྒྱ་རྣམས་
ཀྱིས་ཀྱང་མཆོད་ལ། ཕྱི་རོལ་དུ་གཏོར་མ་བྱིན་ཏེ་སྦྱིན་སྲེག་བྱའོ། །དེ་ནས་རས་སྔོན་པོ་ལ་བྷྱོ་ཞེས་བྱ་བ་བཟླས་ཏེ། དེ་དག་ལས་གཅིག་གིས་ནི་སྨད་གཡོགས་བྱ། གཉིས་པས་ནི་སྟོད་གཡོགས་བྱ། ཡང་གཅིག་ལ་བྷྱོ་ཞེས་བྱ་བ་བཟླས་པས་རང་གི་གདོང་གཡོགས་ཏེ། ཕྱག་བཞི་བྱའོ། །དེ་ནས་
བྱང་ཆུབ་ཏུ་སེམས་བསྐྱེད་ལ། དེ་བཞིན་དུ་རང་གི་སྙིང་གར་རྡོ་རྗེ་རྣམ་པར་བསམས་ལ། སྒོ་ལ་བལྟས་ནས་ཕྱི་རོལ་ན་གནས་པའི་བུམ་པའི་ཆུས་བདག་ཉིད་དབང་བསྐུར་ལ། ལག་ན་མེ་ཏོག་ཐོགས་ཤིང་ཞི་བ་མོའི་ཕོ་ཉའི་ཕྱག་རྒྱས་མེ་ཏོག་གི་ཕྲེང་བ་བླངས་ལ། བཛྲ་བཛྲ་བྷྱོ་
ཞེས་བྱ་བ་ཟློས་ཤིང་དཀྱིལ་འཁོར་དུ་འཇུག་པར་བྱའོ། །དེ་ནས་དཀྱིལ་འཁོར་བསྐོར་བ་ལན་གསུམ་བྱས་ཏེ། གཡས་དང་གཡོན་གྱི་ནག་པོ་ཆེན་པོ་ལ་ཕྱག་བྱས་ནས། དེ་ཉིད་ཀྱི་མདུན་དུ་འདུག་ལ། འདི་སྐད་ཅེས་བརྗོད་པར་བྱའོ། །ཛཿཧཱུཾ་བཾ་ཧོཿ པྲ་སིདྡྷྱ་མཱཾ། དེ་ནས་
རྡོ་རྗེ་ཆུ་འཐུངས་ལ། ཨ་ཞེས་བྱ་བ་ལན་བརྒྱ་ཟློས་ཤིང་བདག་ཉིད་ལ་དབབ་པར་བྱའོ། །ཡང་གཡོན་པའི་ཁྲོ་བོའི་ཁུ་ཚུར་གྱིས་སེམས་མ་རྡོ་རྗེ་དབྱེ་ཞིང་། ཨ་ཞེས་བྱ་བ་དེ་བཞིན་དུ་བཟླས་ལ་བདག་ཉིད་ལ་དབབ་པར་བྱའོ། །དེ་ནས་བྷྱོ་ཞེས་བྱ་བས་མེ་ཏོག་དོར་བར་བྱའོ། །དེ་ནས་དེ་བླངས་

59-1-230b

ལ་དེ་ཉིད་ཀྱིས་རང་གི་མགོ་ལ་བཅིང་བར་བྱའོ། །དེ་ནས་དེ་ཉིད་ཀྱི་གདོང་གཡོགས་དགྲོལ་ལོ། །དེ་ནས་དེ་ཉིད་ཟློས་ཤིང་ཤར་ཕྱོགས་ཀྱི་ཆ་ནས་བརྩམས་ཏེ། དཀྱིལ་འཁོར་བལྟ་བར་བྱའོ། །དེ་ནས་ཏིཥྛ་བཛྲ་ཞེས་བྱ་བ་ལ་སོགས་པས་ཞི་བ་ཕོ་ཉའི་ཕྱག་རྒྱ་བཅིངས་ལ། རང་གི་སྙིང་གར་དགྲོལ་བར་བྱའོ། །
དེ་ནས་ནག་པོ་ཆེན་པོའི་ཕྱག་རྒྱ་བཅིངས་ལ། དེ་ལ་ཁྲོ་བོའི་ལྟ་བས་བལྟ་ཞིང་། ཇི་སྲིད་ནག་པོ་ཆེན་པོས་མཐོང་བ་བྱིན་ནས་རང་གི་དངོས་གྲུབ་སྟེར་བར་གྱུར་པ་དེ་སྲིད་ཀྱི་བར་དུ་བཟླས་བརྗོད་བྱའོ། །དེ་ནས་ཡང་ནག་པོ་ཆེན་པོ་ལ་ཁྲོ་བོའི་ལྟ་བས་བལྟ་ཞིང་། རྡོ་རྗེ་ཐལ་མོ་བསྐོར་བས་ཕྱག་བྱས་ལ་མེ་ཏོག་ལ་སོགས་པ་དང་།
དབང་བསྐུར་བ་རྣམས་བླང་བར་བྱའོ། །ཡང་ནག་པོ་ཆེན་པོའི་དམ་ཚིག་གི་ཕྱག་རྒྱས་ཡོངས་སུ་བཟུང་བའི་ཁཊྭཱཾ་ག་དང་། མེ་ཏོག་གི་ཡལ་ག་ལས་རྣམ་པར་རྒྱལ་བའི་བུམ་པ་ལ་སྔར་བཤད་པའི་བུམ་པའི་སྔགས་དེ་བཞིན་དུ་ཡོངས་སུ་བཟླས་ལ། བདག་ཉིད་དེ་ཉིད་ནག་པོ་ཆེན་པོར་བྱིན་གྱིས་བརླབས་ལ། ཕྱིའི་
དཀྱིལ་འཁོར་གྱི་ནང་དུ་སྣ་ཚོགས་པདྨ་བྲིས་ཏེ། དེའི་སྟེང་དུ་ནག་པོ་ཆེན་པོའི་ཕྱག་རྒྱ་ཆེན་པོས་འདུག་ནས། མེ་ཏོག་ལ་སོགས་པས་བདག་ཉིད་མཆོད་ལ། མཆོད་ཡོན་བླངས་ཏེ། རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ལ། ཨོཾ་བཛྲ་ཨ་བྷི་ཥིཉྩ་བྷྱོ་ཞེས་ཟློས་ཤིང་དེས་བདག་ཉིད་
དབང་བསྐུར་བར་བྱས་ལ། ཆུ་དེ་བཏུང་བར་ཡང་བྱའོ། །དེ་ནས་རིན་པོ་ཆེའི་ཅོད་པན་དང་། ཐོད་པའི་དབང་བསྐུར་བའི་ཕྱག་རྒྱ་དག་གིས་བདག་ཉིད་དབང་བསྐུར་ལ། བྷྱོ་ཞེས་བྱ་བས་ཁ་ཊྭཱཾ་ག་དང་། དྲིལ་བུ་དང་བཅས་པ་བླངས་ནས། བྷྱོ་ཞེས་བྱ་བ་ཟློས་བཞིན་དུ་མིང་གི་དབང་བསྐུར་བ་བླང་ཞིང་། བདག་
པོའི་དབང་བསྐུར་བ་ཡང་ཁ་ཊྭཱཾ་ག་དེ་ཉིད་གཟུང་བར་བྱའོ། །འཇིག་རྟེན་ཐམས་ཅད་ཅེས་བྱ་བ་ལ་སོགས་པ་སྔར་བཤད་པ་ནི་དེ་ཁོ་ན་ཉིད་དོ། །ཆོས་ཀྱི་དྲིལ་བུ་དཀྲོལ་བར་བྱའོ། །སེམས་ཅན་ཀུན་ལ་ཕན་ཕྱིར་དང་། །ཞེས་བྱ་བ་ལ་སོགས་པ་ནི་ཆོས་སོ། །དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབ་
པར་བྱའོ། །དེ་ལ་དམ་ཚིག་ནི་འདི་ཡིན་ཏེ། སེམས་ཅན་ཐམས་ཅད་རྒྱས་བཏབ་ཅིང་། །དམ་ཚིག་སྡང་རྣམས་བཟའ་བར་བྱ། །སྔགས་རྣམས་བསྟན་པར་མི་བྱ་སྟེ། །དམ་ཚིག་རྣལ་འབྱོར་ཁྱོད་གྲུབ་སྟེར། །དྲག་པོའི་དམ་ཚིག་མདུང་རྩེ་སྟེ། །མ་མོའི་བདག་ཉིད་རྒྱས་འདེབས་པའོ། །གལ་ཏེ་དམ་

59-1-231a

ཚིག་འདས་གྱུར་ན། །ཁྱོད་ཀྱི་སྙིང་ནི་རྟག་འཇིག་འགྱུར། །དེ་ནས་མེ་ཏོག་ལ་སོགས་པས་བདག་ཉིད་མཆོད་དེ་རང་གི་ཕྱག་རྒྱ་རྣམས་ཀྱིས་ཀྱང་རྗེས་སུ་གནང་བ་དང་། དབང་བསྐུར་བ་བླངས་ལ། ནག་པོ་ཆེན་པོ་ལ་ཕྱག་བྱས་ཏེ། བྷྱོ་ཞེས་བྱ་བ་དང་རང་གི་ལྷའི་ཕྱག་རྒྱ་བཞི་
བླང་ངོ་། །དེ་ནས་བྷྱོ་ཁ་ཞེས་ཟློས་ཤིང་། མ་མོའི་ཚོགས་དང་བཅས་པའི་ནག་པོ་ཆེན་པོ་ལ་གཏོར་མ་བྱིན་ལ། ཁྲག་གི་ཐིག་པ་ལན་བརྒྱད་མྱང་བར་བྱའོ། །དེ་ནས་ནག་པོ་ཆེན་པོའི་མདུན་དུ་འདུག་སྟེ། ཐོད་པ་ནག་པོ་བླངས་ལ། མཐེ་བོ་དང་སྲིན་ལག་གཉིས་དང་། ཧ་ཧ་ཧ་ཧ་ཧ་ཞེས་ཟློས་ན་སྐད་
ཅིག་མ་དེ་ཉིད་ལ་ནམ་མཁའ་ལ་འགྲོ་བར་འགྱུར་རོ། །ཡང་བདག་ལ་བྱིན་གྱིས་བརླབ་པ་ལ་སོགས་པ་བྱས་ལ། བདག་གི་མིང་ནས་བརྗོད་དོ། །དེ་ནས་དཀྱིལ་འཁོར་རྡོ་རྗེར་བསྒྲུབ་པར་བྱའོ། །དེ་ནས་བྷྱོ་བྷྱོ་ཞེས་ཟློས་ཤིང་། དཀྱིལ་འཁོར་མེ་ཏོག་ལ་སོགས་པས་མཆོད་པ་གར་བྱས་ཏེ། 
ཁ་ཊྭཱཾ་གའི་ལྕགས་ཀྱུས་མ་མོའི་ཚོགས་དང་བཅས་པའི་ནག་པོ་ཆེན་པོའི་ཨ་ར་ལླི་བྷྱོ་བྷྱོ་ཞེས་བྱ་བའི་སྙིང་པོ་འདིས་དགུག་པར་བྱའོ། །དེ་ནས་མ་མོ་ཐམས་ཅད་འདུས་ནས། ཅེ་སྤྱང་གི་སྒྲ་སྒྲོགས་པར་འགྱུར་རོ། །མཁའ་འགྲོའི་ཚོགས་རྣམས་ཀྱང་འདུས་པར་འགྱུར་རོ། །ནག་པོ་ཆེན་པོའི་
དམ་ཚིག་ནི་ཕྱག་རྒྱ་ལས་མཛུབ་མོ་ལྕགས་ཀྱུར་བྱ་བ་ནི། ཁ་ཊྭཱཾ་གའི་ལྕགས་ཀྱུའོ། །དེ་ནས་རྡོ་རྗེ་གནོད་སྦྱིན་གྱིས་བགེགས་བསལ་བར་བྱས་ལ། མཚམས་བཅིང་བ་དང་། དཀྱིལ་འཁོར་བཅིང་བ་དང་། ར་བ་དང་། དྲ་བ་དག་བྱས་ཏེ། རྡོ་རྗེ་ཁུ་ཚུར་གྱིས་དཀྱིལ་འཁོར་གྱི་སྒོ་བཅིངས་ལ། 
རྡོ་རྗེ་སྲུང་བས་བསྲུང་བ་ཐམས་ཅད་གོ་བསྐོན་ཏེ། བྷྱོ་ཞེས་བྱ་བས་མ་མོའི་ཚོགས་དང་བཅས་པའི་ནག་པོ་ཆེན་པོ་ལ་མཆོད་ཡོན་བྱིན་ཏེ། ནག་པོ་ཆེན་པོའི་དམ་ཚིག་གི་ཕྱག་རྒྱ་དང་། བྷྱོ་དྲྀ་ཤྱ་ཞེས་བྱ་བས་འཁོར་དང་བཅས་པ་བལྟ་བ་བྱས་ལ། ཛཿཧཱུཾ་བཾཾ་ཧོཿ་། ས་མ་ཡ་སྟྭཾ་ས་མ་ཡ་སྟྭཾ་ཨ་
ཧཾ་བྷྱོ་ཞེས་བྱ་བ་ལན་གསུམ་བརྗོད་དེ་བསྒྲུབ་པར་བྱའོ། །དེ་ནས་སྔ་མ་བཞིན་དུ་རང་གི་ལྕེ་ལ་རྡོ་རྗེ་བསམས་ནས་ནག་པོ་ཆེན་པོ་ལ་སོགས་པའི་ལྕེ་ལ་བྷྱོ་ཞེས་བྱ་བ་བསམས་ལ། འདི་ནི་འདིར་ལྷ་ཐམས་ཅད་ཀྱི་ཕྱག་རྒྱའོ། །དེ་ནས་ཨ་ལས་རང་གི་སྙིང་གར་སྣ་ཚོགས་རྡོ་རྗེ་བསམས་ལ། 

59-1-231b

ནག་པོ་ཆེན་པོ་ལ་སོགས་པའི་ཕྱག་རྒྱ་ཆེན་པོ་གར་གྱི་ཚུལ་གྱིས་བྷྱོ་ཞེས་བྱ་བ་དང་། བཅིང་བར་བྱ་སྟེ། འདི་ནི་དེ་རྣམས་ཀྱི་ལས་ཀྱི་ཕྱག་རྒྱའོ། །དེ་ནས་རང་གི་སྙིང་གར་ཧཱུཾ་ཞེས་བྱ་བས་ཁྲོ་བོའི་རྡོ་རྗེ་རྣམ་པར་བསམས་ལ། ཇི་ལྟར་བྲིས་པ་དང་རྗེས་སུ་མཐུན་པར་ནག་པོ་ཆེན་པོ་ལ་སོགས་
པའི་ཕྱག་རྒྱ་ཆེན་པོ་བྷྱོ་ཞེས་བྱ་བས་བཅིང་བར་བྱའོ། །དེ་ནས་རྡོ་རྗེ་རིན་ཆེན་དང་། ཐོད་པའི་ཕྱག་རྒྱ་དག་གིས་ནག་པོ་ཆེན་པོ་འཁོར་དང་བཅས་པ་དབང་བསྐུར་ལ། བྷྱོ་ཞེས་བྱ་བས་ནག་པོ་ཆེན་པོ་འཁོར་དང་བཅས་པ་ལ་མཆོད་ཡོན་བྱིན་ཏེ། མཆོད་པ་རྣམ་པ་ལྔས་མཆོད་ནས། ལས་ཀྱི་ཕྱག་རྒྱ་དང་།
གར་གྱི་མཆོད་པ་བྱས་ལ། ཞི་བ་མོའི་ཕོ་ཉའི་ཕྱག་རྒྱ་བཅིངས་ཏེ། བྷྱོ་ཞེས་བྱ་བ་ཇི་སྲིད་དཀྱིལ་འཁོར་ལས་བྷྱོའི་སྒྲ་ཐོས་པར་གྱུར་གྱི་བར་དུ་བཟླས་བརྗོད་བྱའོ། །དེ་ནས་སློབ་དཔོན་མ་གཏོགས་པ་གཞན་ཐམས་ཅད་ཇི་ལྟར་འོངས་པ། འཇུག་པར་འགྱུར་ཞིང་ཐོབ་པར་འགྱུར་ཏེ། གདུག་པའི་དམ་ཚིག་ནི་
མ་གཏོགས་སོ། །དེ་ནས་སློབ་མ་ལག་ན་མེ་ཏོག་ཐོགས་པ་རས་ཀྱིས་མིག་བཀབ་ལ། ནག་པོ་ཆེན་པོའི་དམ་ཚིག་གི་ཕྱག་རྒྱས་སློབ་དཔོན་འཇུག་པའི་ཆོ་ག་བཞིན་དུ་གཞུག་པར་བྱའོ། །དེ་ནས་ཞུགས་པ་དང་། སློབ་མས་ལག་ན་མེ་ཏོག་ཐོགས་ལ། འདི་སྐད་ཅེས་བསྒོ་བར་བྱའོ། །
ཁྱོད་ལ་འཇིགས་པ་མེད་དམ་ཞེས་བསྒོའོ། །དེ་ནས་འདིས་ཀྱང་མེད་དོ་ཞེས་བརྗོད་པར་བྱའོ། །དེ་ནས་སློབ་དཔོན་གྱིས་དེའི་རྣ་བར་བྷྱོ་ཞེས་བྱ་བའི་སྒྲ་ཆེན་པོ་བསྒྲག་པར་བྱའོ། །དེ་ནས་བསྒྲགས་ནས། མེ་ཏོག་དོར་བར་བྱའོ་ཞེས་བྱ་བ་ནི་བྷྱོ་ཞེས་བྱ་བ་ཉིད་ཀྱིས་སོ། །དེ་ནས་གང་དུ་ལྷུང་བའི་ལྷ་དེ་འདི་ལ་འགྲུབ་
པར་འགྱུར་རོ། །གལ་ཏེ་ལྷུང་བར་མ་གྱུར་ན་ཡང་དང་ཡང་དུ་འདོར་དུ་གཞུག་གོ། །དེ་ནས་ལྷུང་བས་ཁྲོ་བ་དང་བཅས་པར་འགྱུར་ཞིང་རང་གི་ལྷའི་ལས་བྱེད་པའི་རྣལ་འབྱོར་ཡང་སོ་སོར་འཐོབ་པར་འགྱུར་རོ། །དེ་ནས་བྷྱོ་ཞེས་བྱ་བ་ཉིད་ཀྱིས་མེ་ཏོག་བླངས་ལ། དེའི་མགོ་བཅིང་ངོ་། །དེ་ནས་དེ་ཉིད་ཀྱིས་
གདོང་གཡོགས་དགྲོལ་བར་བྱའོ། །དེ་ནས་དེ་ཉིད་ཟློས་ཤིང་སྒོ་སྲུངས་ནས་བརྩམས་ཏེ། དཀྱིལ་འཁོར་བསྟན་ལ། ནག་པོ་ཆེན་པོའི་དམ་ཚིག་གི་ཕྱག་རྒྱ་ཡང་བཅིངས་ཏེ། སློབ་མའི་སྙིང་གར་དེ་བཞིན་དུ་དགྲོལ་བར་བྱའོ། །དེ་ནས་དེ་ནག་པོ་ཆེན་པོའི་གཟུགས་ལ་སོགས་པ་བྱིན་གྱིས་བརླབས་

59-1-232a

ཏེ། ཡོན་བླངས་ལ། བདུག་སྤོས་ལ་སོགས་པའི་ཕྱག་རྒྱ་རྣམས་ཀྱིས་མཆོད་དེ། ཇི་ལྟ་བ་བཞིན་དུ་དབང་བསྐུར་བར་བྱའོ། །འདིར་ཕྱུགས་ཆེན་པོ་ཡོན་དུ་བླང་བར་བྱའོ། །དེ་ནས་འདི་ལ་དེ་ལྟར་གྱུར་ཅིག་པར་བསྒོ་སྟེ། རང་གི་མི་ལ་སྦྱིན་པར་བྱའོ། །དེ་ནས་རང་གི་མི་དེ་སློབ་དཔོན་
གྱིས་བླངས་ཏེ། དེ་བསྲུང་བའི་ཕྱིར་བག་ཟན་གྱི་གཟུགས་བརྙན་ཚོས་པ་དང་མ་ཚོས་པའི་ཁྲག་གིས་ཁེངས་པར་བྱའོ། །དེ་ནས་དེ་བླངས་ལ་སློབ་མ་དམ་པ་དང་། ནག་པོ་ཆེན་པོ་མ་མོའི་ཚོགས་དང་བཅས་པ་དེ་ལ་བྱིན་ལ། དེ་ལ་འདི་སྐད་ཅེས་བརྗོད་དེ། བྷྱོ་བྷྱོ་ཞེས་བྱ་བ་གཉིས་བཟླས་ལ་དེ་ཉིད་
ཟློས་ཤིང་བྱིན་ལ། སློབ་དཔོན་ལ་སོགས་པ་སློབ་མའི་ཚོགས་ཐམས་ཅད་ཀྱིས་གཟུགས་བརྙན་དེ་བཟའ་བར་བྱའོ། །དེ་ཅིའི་ཕྱིར་ཞེ་ན། སངས་རྒྱས་པའི་གྲུབ་པའི་མཐའ་ལ་ནི་སྲོག་གཅོད་པ་རྗེས་སུ་མ་གནང་སྟེ། ངུ་འབོད་ལ་སོགས་པ་དམྱལ་བ་ཆེན་པོའི་རྒྱུ་ཡིན་པའི་ཕྱིར་རོ། །དེ་བས་ན་བག་
ཟན་གྱིས་གཟུགས་བརྙན་བྱའོ་ཞེས་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ། །དེ་ནས་བརྩམས་ཏེ་སློབ་མ་རྣམས་མཁའ་འགྲོ་མའི་ཚོགས་ཀྱི་མི་གསོད་པར་འགྱུར་རོ། །དེ་ན་མིའི་ཁྲག་གི་ཐིགས་པ་གཉིས་ལངས་ལ། ཧ་ཧ་ཞེས་བརྗོད་པར་བྱ་སྟེ། དེ་ལྟ་བུས་ནི་སློབ་མ་གྲུབ་པར་
འགྱུར་རོ། །དེ་ནས་སྔ་མ་བཞིན་དུ་དམ་ཚིག་དང་ཆོས་ཀྱི་དེ་ཁོ་ན་ཉིད་བསླབ་སྟེ། དེ་ནས་བརྩམས་ཏེ། ཤ་ཆེན་ཁ་ན་མ་ཐོ་བ་མེད་པ་ལ་བྷྱོ་ཞེས་བཟླས་ནས་གང་ཞིག་ཟ་བ་དེ་རིང་པོར་མི་ཐོགས་པར་རྣལ་འབྱོར་གྲུབ་པར་འགྱུར་རོ། །ཡོངས་སུ་དག་པའི་སེམས་ཅན་གང་མི་ཟ་བ་དེ་དག་
ཀྱང་བཟླས་བརྗོད་དང་བསྒོམ་པ་དག་གིས་འགྲུབ་པར་འགྱུར་ཏེ། མཁའ་འགྲོ་མའི་ཚོགས་རྣམས་ལས་འཇིགས་པ་ཡོད་པ་མ་ཡིན་ནོ། །དེ་ནས་འདིའི་དམ་ཚིག་བྱིན་ལ། ཕྱག་རྒྱའི་ཡེ་ཤེས་བསླབ་པར་བྱ་སྟེ། དེ་ལ་དམ་ཚིག་ནི་འདི་ཡིན་ཏེ། ཁྱོད་ཀྱིས་ཆོས་ནི་ཡོང་མི་སྤང་། །དམ་
ཚིག་རྣམས་ནི་བྲལ་མི་བྱ། །མཁའ་འགྲོ་མས་ནི་ཟིན་པ་རྣམས། །ཐར་པ་རུ་ནི་མི་བྱའོ། །མཁའ་འགྲོ་རྣམས་ནི་བརྙས་མི་བྱ། །གང་ཕྱིར་མ་དང་བུ་མོ་དང་། །དེ་ལ་ཆོས་ནི་གང་ཞེ་ན། །འདི་ལྟ་སྟེ། ཐམས་ཅད་རྒྱས་བཏབ་པའོ། །དེ་ལ་དམ་ཚིག་གང་ཞེ་ན། །ཕྱག་རྒྱ་ཐམས་ཅད་ཤེས་

59-1-232b

པའོ། །དེ་ལ་མཁའ་འགྲོ་མ་རྣམས་ཀྱིས་བཟུང་བ་གང་ཞེ་ན། འདི་ལྟ་སྟེ་སྙིང་པོའོ། །དེ་ལ་འདུལ་བ་གང་ཞེ་ན། འདི་ལྟ་སྟེ་ཚངས་པར་སྤྱོད་པའོ། །དེ་ནས་བརྩམས་ཏེ། མཁའ་འགྲོ་མ་རྣམས་ཀྱི་ཡེ་ཤེས་འགྲུབ་པར་འགྱུར་རོ། །ནག་པོ་ཆེན་པོའི་དམ་ཚིག་གི་ཕྱག་རྒྱ་བཅིངས་ལ། བྷྱོ་ཞེས་བྱ་བས་
མཁའ་འགྲོ་མ་ཐམས་ཅད་གཞིག་པ་དང་། གནོད་པ་དང་། དབྱེ་བ་དང་། གཉིད་ལོག་ཏུ་གཞུག་པ་དང་། རྨོངས་པ་དང་། གསོད་པ་ལ་སོགས་པ་བྱེད་པར་འགྱུར་རོ། །ལག་པ་གཡོན་པའི་སོར་མོ་བར་མ་གསུམ་བཏེག་ལ། བདེན་བྲལ་གྱི་ལོགས་སུ་ལག་པ་གྱེན་དུ་བརྐྱང་ནས། གཡས་
པ་དེའི་སྟེང་དུ་བཀུག་ལ། ལག་པས་བ་དན་གསུམ་པ་དང་། མཐེ་བོ་དང་། སྲིན་ལག་གིས་ཐོད་པ་འཛིན་པ་ནི་དྲག་པོ་སྟེ། འདིས་མིག་མི་འཛུམ་པར་ཁྲོ་བོའི་ལྟ་བས་ཐམས་ཅད་རྒྱས་བཏབ་ཅིང་། ཨེ་ཨ་རལླི་བྷྱོ་ཞེས་བྱ་བ་དང་བསྟུན་ལ། ལྷག་མ་རྣམས་ལས་ཀྱི་ཕྱག་རྒྱ་དང་། བྷྱོ་ཞེས་བྱ་བ་ཟློས་ཤིང་
ལས་ཐམས་ཅད་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུ་ལས་གསུངས་པའི་དཔལ་མཆོག་དང་པོའི་མ་མོའི་དཀྱིལ་འཁོར་གྱི་བཤད་པ་རྫོགས་སོ།།    །།མིང་པོ་གསུམ་གྱིས་འདུལ་བའི་སྐྱེ་བོ་ལས་བརྩམས་ཏེ། དེ་ནས་སྦྲང་རྩིར་བྱེད་པ་ལ་སོགས་པ་ཞེས་བྱ་བ་ལ་སོགས་པས་
མིང་པོ་གསུམ་གྱི་དཀྱིལ་འཁོར་གསུངས་པ་ཡིན་ལ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོའི་སྦྱོར་བའི་རྗེས་ཐོགས་ཉིད་ལ་ཞེས་བྱ་བའི་དོན་ཏོ། །འདིར་དང་པོའི་སྦྱོར་བའི་ཏིང་ངེ་འཛིན་ནི་མ་མོའི་དཀྱིལ་འཁོར་དུ་གསུངས་པ་ཉིད་དོ། །སྦྲང་རྩིར་བྱེད་ལ་སོགས་པ་ལ། འདོད་པའི་ཁམས་
ཀྱི་དབང་ཕྱུག་གི་གཟུགས་འཛིན་པའི་ཚངས་པ་ནི་སྦྲང་རྩིར་བྱེད་པ་སྟེ། དེ་ཉིད་དང་པོར་གྱུར་པ་གང་ཡིན་པ་དེ་དག་ནི། སྦྲང་རྩིར་བྱེད་ལ་སོགས་པ་ཞེས་བྱ་སྟེ། སྦྲང་རྩིར་བྱེད་དང་། རྒྱལ་བར་བྱེད་པ་དང་། དོན་ཐམས་ཅད་གྲུབ་པ་སྟེ། མིང་པོ་གསུམ་མོ། །དབང་ཕྱུག་ཆེན་མོ་གང་སྟོན་བཟངས་ཀྱི་གཟུགས་
འཛིན་པ་གང་ཡིན་པ་དེ་ནི་རྒྱལ་བར་བྱེད་པའོ། །ཁྱབ་འཇུག་ནི་དཔྱིད་ཀྱི་གཟུགས་འཛིན་པ་གང་ཡིན་པ་དེ་ནི་དོན་ཐམས་ཅད་གྲུབ་པ་སྟེ། དེ་སྐད་དུ། ཚངས་པ་འདོད་ཆགས་གཞན་སྤྲུལ་པ། །ཞེ་སྡང་དྲག་པོའི་ཏིང་ངེ་འཛིན། །གཏི་མུག་ཁྱབ་འཇུག་བསྟན་བྱས་པས། །འཇིག་རྟེན་གསུམ་ནི་བྱིན་

59-1-233a

གྱིས་བརླབས། །འདོད་ཆགས་སྦྲང་རྩི་བྱེད་པར་བཤད། །ཞེ་སྡང་རྒྱལ་བར་བྱེད་པར་གྲགས། །གཏི་མུག་དེར་ནི་བསྒྲུབ་པ་སྟེ། །གསང་བའི་མིང་ནི་ཐམས་ཅད་དུའོ། །ཞེས་བཤད་པའི་ཕྱིར་རོ། །བཅོམ་ལྡན་འདས་ལ་ཕྱག་འཚལ་ཏེ། །ཞེས་བྱ་བ་ནི་རྡོ་རྗེ་འཆང་ཆེན་པོ་ལ་རབ་ཏུ་འདུད་
པའོ། །མགྲིན་གཅིག་ཏུ་ཞེས་བྱ་བ་ནི་གོ་སླའོ། །དེ་ལྟར་ན་དེ་ནས་ཞེས་བྱ་བ་ནས་བརྩམས་ཏེ། སྭ་ཞེས་བྱ་བའི་བར་གྱི་བཤད་པས་ནི། ཏིང་ངེ་འཛིན་གསུམ་གསུངས་པ་ཡིན་ནོ། །དེ་ནས་འདུས་པ་ནས་བརྩམས་ཏེ་གསུངས་པ་ཡིན་པར་ཤེས་པར་བྱའོ། །ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་
ཀྱིས་བཟླས་བརྗོད་དང་བསྒོམ་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ཏེ། ཏིང་ངེ་འཛིན་གསུམ་གྱི་རྗེས་
ཐོགས་ཉིད་ལ་ཞེས་བྱ་བའི་དོན་ཏོ། །འདིའི་ཞེས་བྱ་བ་ལ་སོགས་པ་ནི་གོ་སླའོ། །སྒོ་ཡི་མཚམས་ནི་ཐམས་ཅད་དུ། །ཞེས་བྱ་བ་ལ་སོགས་པ་ནི་ཤར་ཕྱོགས་ཀྱི་སྒོ་ནས་བརྩམས་ཏེ། ཚོགས་དང་། མཚོན་ཆ་དང་། ཕོ་ཉ་དང་། བྲན་རྣམས་གཞག་པར་བྱའོ། །ཕྱིའི་དཀྱིལ་འཁོར་གྱི་ལྷའི་སྣམ་བུ་ལ་
གྲུབ་པ་ནས་བརྩམས་ཏེ། ཚོགས་རྣམ་པ་བཞི་གཞག་པར་བྱའོ། །ཕྱི་རོལ་ན་ཞེས་བྱ་བ་ལ་སོགས་པ་ལ། དར་དང་། བ་དན་མཆོག་སྟེ། དམ་པར་གྱུར་པ་དང་། དྲིལ་བུའི་ཕྲེང་བ་བ་དན་གྱི་མཆོག་དང་བཅས་པ་དང་། བུམ་པ་གང་བ་རྣམས་དང་། རོལ་མོའི་མཆོག་སྟེ། དམ་པ་དང་
བཅས་པ་གཞག་པར་བྱའོ། །ཕྱག་རྒྱ་ཀུན་གྱིས་གཞུག་པར་བྱ། །ཞེས་བྱ་བ་ནི། རྩེ་གསུམ་པའི་དམ་ཚིག་གི་ཕྱག་རྒྱ་ཐམས་ཅད་དེ། དེ་བཅིངས་ལ་འཇུག་པར་བྱའོ། །འཇིག་རྟེན་གསུམ་ཞེས་བྱ་བ་ནི་མཐོ་རིས་ཀྱི་འཇིག་རྟེན་དང་། བར་སྣང་གི་འཇིག་རྟེན་དང་། སའི་འཇིག་རྟེན་ནོ། །
སྲིད་གསུམ་ཞེས་བྱ་བ་ནི་འདོད་པའི་སྲིད་པ་དང་། གཟུགས་ཀྱི་སྲིད་པ་དང་། གཟུགས་མེད་པའི་སྲིད་པའོ། །ངན་སོང་གསུམ་ནི། དམྱལ་བ་དང་། དུད་འགྲོ་དང་། ཡི་དྭགས་སོ། །མཆོད་གསུམ་ནི་སྤུན་གསུམ་གྱིས་མཆོད་པའོ། །རྣམ་གསུམ་ནི་འདོད་ཆགས་དང་། ཞེ་སྡང་དང་། 

59-1-233b

གཏི་མུག་གི་མཆོད་པའི་དབྱེ་བས་རྣམ་པ་གསུམ་མོ། །སྦས་པ་ནི་སྐྱེས་བུ་གསུམ་གྱི་གཟུགས་སུ་བྱིན་གྱིས་བརླབས་པས་སོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་བདག་གིས་ལས་རྣམས་བྱས་ནས་སོ་ཞེས་བྱ་བ་དང་། རྩེ་གསུམ་པས་མཚན་པའི་ཕྱག་རྒྱས་གཡས་པའི་མཛུབ་མོའི་
ལྕགས་ཀྱུས་དགུག་པར་བྱའོ། །དེ་ནས་དྲིལ་བུ་དང་བཅས་པའི་ཕྲེང་བས་འདི་སྐད་དུ་བཤད་པའི་མིང་པོ་གསུམ་འོངས་པས་ཐམས་ཅད་གཡོ་བར་འགྱུར་རོ། །ཐམས་ཅད་ཕབ་ནས་དེ་བཞིན་དུ་གཞུག་པར་བྱའོ་ཞེས་བྱ་བ་ནི་སློབ་མ་ཐམས་ཅད་ལ་ཕབ་ལ། སློབ་དཔོན་གྱི་འཇུག་པས་
གཞུག་པར་བྱའོ། །དེ་ནས་ཞེས་བྱ་བ་ལ་སོགས་པ་ནི་གོ་སླའོ། །གཞན་ལ་དེ་ཉིད་བསྟན་མི་བྱ། །ཞེས་བྱ་བ་ནི་དཀྱིལ་འཁོར་དུ་མ་ཞུགས་པ་རྣམས་ནི་གཞན་དག་སྟེ། དེ་རྣམས་ལ་ནི། འཇིག་རྟེན་གསུམ་པོ་སྲིད་གསུམ་མཆོག །ཅེས་བྱ་བ་ལ་སོགས་པ་དེ་ཁོ་ན་ཉིད་བཤད་པར་མི་
བྱའོ། །དེ་ནས་ཞེས་བྱ་བ་ལ་སོགས་པ་ལ། གླུ་དང་། གར་དང་། རོལ་མོ་དང་། དགོད་པ་དང་། ཞེས་བྱ་བ་ལ་སོགས་པ་ནི་གོ་བར་ཟད་དོ། །དགའ་བ་ནི་རྩེ་བ་སྟེ། དེ་ལྟར་ན་གླུ་དང་། གར་དང་། རོལ་མོ་དང་། དགོད་པ་དང་། དགའ་བ་དང་། ཟ་བ་སྟེ། དེ་དག་ལས་བྱུང་
བའི་མགུ་ཞེས་བྱ་བ་ཡིད་བདེ་བའི་ཤུགས་གྱིས་མེ་ལ་ཚེ་ཞེས་བྱའོ། ཕྱག་རྒྱ་དང་། གར་གྱི་རོལ་མིའི་མཆོད་པ་ཡང་བྱས་ལ་ཞེས་བྱ་བ་ནི། མིང་པོ་གསུམ་གྱི་ལས་ཀྱི་ཕྱག་རྒྱ་ལ་སོགས་པ་ནི་ཕྱག་རྒྱ་དང་། གར་གྱི་རོལ་མོའི་མཆོད་པ་སྟེ། དེས་མཆོད་པ་བྱའོ། །དེ་ལྟར་ཕྱག་རྒྱ་གར་གྱི་རོལ་མོའི་
མཆོད་པ་བྱས་ལ། ཕྱག་རྒྱ་དེ་དང་བཅས་པས་ཞེས་བྱ་བ་ནི་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིངས་ལ། བཛྲ་མུཥྚི་བཾ་ཞེས་བརྗོད་པར་བྱའོ། །དེ་ནས་ཞེས་བྱ་བ་ལ་སོགས་པ་ནི་གོ་སླའོ། །དམ་ཚིག་གི་ཕྱག་རྒྱ་དཀྱིལ་འཁོར་རོ། །ཞེས་བྱ་བ་ལ་ཆོས་ཐམས་ཅད་རང་བཞིན་གྱིས་རྣམ་པར་དག་པ་
ནི་འདའ་བར་བྱ་བ་མ་ཡིན་པས། དམ་ཚིག་ཅེས་བྱ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་ལས་བྱུང་ཞིང་དེ་སྟོན་པའི་དཀྱིལ་འཁོར་ལ་ཡང་དམ་ཚིག་གི་དཀྱིལ་འཁོར་ཞེས་བྱ་སྟེ། ཕྱི་རོལ་གྱི་རྡོ་རྗེའི་རིགས་ཀྱི་ཆོས་ཀྱི་ཕྱག་རྒྱ་གཙོ་བོར་བྱས་པའི་དཀྱིལ་འཁོར་ཞེས་བྱ་བའི་དོན་ཏོ། །འདིའི་དོན་ནི་

59-1-234a

འདི་ལྟར་ཤེས་པར་བྱ་སྟེ། བཛྲ་ཨཉྫ་ལི་ཞེས་བྱ་བས་རྡོ་རྗེ་ཐལ་མོ་བཅིངས་ལ། དེ་ནས་བཛྲ་བནྡྷ་ཞེས་བྱ་བས་རྡོ་རྗེ་བསྡམས་པ་བཅིངས་ནས། བཛྲ་བནྡྷ་ཏྲ་ཊ་ཞེས་བྱ་བས་རྡོ་རྗེ་བསྡམས་པ་སྙིང་གར་དགྲོལ་བར་བྱའོ། །དེ་ནས་བཛྲ་ཨཱ་བེ་ཤ་ཞེས་བྱ་བ་དང་། རྡོ་རྗེ་དབབ་པའི་དམ་ཚིག་
གི་ཕྱག་རྒྱ་བཅིངས་ལ། ཨ་ཞེས་བྱ་བས་བདག་ཉིད་ལ་དབབ་པར་བྱའོ། །དེ་ནས་ཏིཥྛ་བཛྲ་ཞེས་བྱ་བ་ལ་སོགས་པས་རང་གི་སྙིང་གར་དབབ་པའི་ཕྱག་རྒྱ་དཀྲོལ་ལ། རང་གི་སྙིང་གར་གནས་པའི་རྡོ་རྗེ་རྩེ་ལྔ་པ་ལ་སྭ་རྣམ་པར་བསམས་ལ། ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་
སྭ་དང་བཅས་པའི་དབྱངས་ཀྱི་ཡི་གེ་བཅུ་དྲུག་ལས་ཟླ་བའི་དཀྱིལ་འཁོར་དུ་གྱུར་པར་རང་གི་སེམས་བསམས་ལ། དེའི་སྟེང་དུ་ཡང་སྭ་བསམས་ཏེ། ཀ་ནས་ཀྵའི་བར་གྱི་ཡི་གེ་རྣམས་སྐར་མ་ལྟ་བུར་རྣམ་པར་བསམས་ལ། དེ་དང་དེ་འདུས་པར་གྱུར་པ་ལས་ཟླ་བའི་དཀྱིལ་འཁོར་གཉིས་པ་བསམ་
མོ། །ཟླ་བའི་དཀྱིལ་འཁོར་གཉིས་པའི་སྟེང་དུ་ཡང་སྭ་ཞེས་བྱ་བ་བསམས་ལ། ཟླ་བའི་དཀྱིལ་འཁོར་གཉིས་པོ་ལས་དང་པོའི་རྡོ་རྗེ་རྩེ་ལྔ་པ་བསམ་པར་བྱ་ཞིང་། སྭ་ཞེས་བྱ་བ་ཉིད་ལ་ཡང་བཟླའོ། །དེ་ནས་རྡོ་རྗེ་མེ་ཏོག་དང་། མདའ་གཞུ་དང་། ཐོད་པ་དང་བཅས་པ་སྭ་ཞེས་བྱ་བ་ལས་རྣམ་
པར་བསམས་ལ། མདའི་དབུས་སུ་སྭ་རྣམ་པར་བསམས་ཏེ། མདའ་དང་། གཞུ་དང་། ཐོད་པའི་ཕྱག་རྒྱ་དང་བཅས་པ་ལ་སྃ་བཾྃ་ཧྃ་ཞེས་བྱ་བ་རྣམ་པར་བསམས་ལ། ཕྱག་རྒྱ་དེ་སེམས་དཔར་བྱིན་གྱིས་རློབ་པའི་སྦྱོར་བའི་རྡོ་རྗེ་སེམས་དཔའ་བདག་ཉིད་བསམ་པར་བྱའོ། །དེ་ནས་སྭ་ལས་རྡོ་རྗེ་
སེམས་དཔའ་མིང་པོ་གསུམ་གྱི་གཟུགས་སུ་བདག་ཉིད་བསམས་ལ། མ་ཧཱ་ས་མ་ཡ་སྃ་བྃ་ཧྃ་ཞེས་བརྗོད་དོ། །དམ་ཚིག་སེམས་དཔའ་ཆེན་པོ་བདག་ཉིད་བསྒོམ་པར་བྱའོ། །དེ་ནས་མིང་པོ་གསུམ་གྱི་དམ་ཚིག་གི་ཕྱག་རྒྱ་བཅིངས་ལ། ས་མ་ཡ་སྟྭཾ་ཞེས་བརྗོད་ལ་དམ་ཚིག་སེམས་དཔའ་ཉིད་
དུ་བདག་ཉིད་བསྒོམ་པར་བྱའོ། །དེ་ནས་ས་མ་ཡ་སཏྭ་ཨ་དྷི་ཏིཥྛ་སྭ་མཾ་ཞེས་བརྗོད་ལ། མིང་པོ་གསུམ་གྱི་དམ་ཚིག་གི་ཕྱག་རྒྱ་དེ་ཉིད་ཀྱིས་སྙིང་ག་དང་། སྨིན་མཚམས་དང་། ལྐོག་མ་དང་། སྤྱི་བོ་རྣམས་སུ་བྱིན་གྱིས་བརླབ་པར་བྱའོ། །དེ་ནས་མིང་པོ་གསུམ་གྱི་དམ་ཚིག་གི་ཕྱག་རྒྱ་བཅིང་བར་

59-1-234b

བྱའོ། །དེ་ནས་དེ་བཅིངས་ལ་སྭ་ཨ་ཞེས་བརྗོད་ལ། མདའ་དང་། གཞུ་དང་། ཐོད་པའི་ཕྱག་རྒྱ་མདུན་དུ་བསྐྱེད་པར་བྱའོ། །དེ་ནས་མདའི་དབུས་སུ་སྭ་རྣམ་པར་བསམས་ལ། མདའ་དང་། གཞུ་དང་། ཐོད་པའི་ཕྱག་རྒྱ་ནི་བདག་གོ་ཞེས་ཕྱག་རྒྱའི་ང་རྒྱལ་བསྒོམ་པར་བྱ་ཞིང་། ཕྱག་རྒྱ་དེ་སྭ་ཞེས་
བྱ་བ་བཟླས་ལ། བྷྲ་ཏྲི་ཏ་ཡཾ་ཨ་ཧཾ་ཞེས་བྱ་བ་དང་། མིང་པོ་གསུམ་གྱི་ངོ་བོ་ཉིད་དུ་ཡོངས་སུ་གྱུར་པར་བསམ་མོ། །དེ་ནས་རྡོ་རྗེ་ལྕགས་ཀྱུ་ལ་སོགས་པས་དེར་མིང་པོ་གསུམ་བཀུག་ལ། བཅུག་སྟེ་བཅིངས་ནས་དབང་དུ་བྱས་ནས་མིང་པོ་གསུམ་གྱི་དམ་ཚིག་གི་ཕྱག་རྒྱས་སྭ་དྲྀ་
ཤྱ་ཞེས་བྱ་བས་དེ་དག་བལྟ་བ་བྱས་ལ། དེ་གཉིས་ཀྱི་གཡས་པའི་མཛུབ་མོ་ལྕགས་ཀྱུ་དང་། སྭ་ཞེས་བྱ་བ་ཟློས་ཤིང་། རང་གི་ལུས་ལ་བཅུག་ལ། མིང་པོ་གསུམ་གྱི་དམ་ཚིག་གི་ཕྱག་རྒྱ་ཉིད་བཅིངས་ནས། ས་མ་ཡ་སྟྭཾ་ཞེས་བརྗོད་དོ། །འོད་ཀྱི་དཀྱིལ་འཁོར་དུ་བསམས་ལ། 
ཛཿཧཱུཾ་བཾ་ཧོཿས་མ་ཡ་སྟྭཾ་ས་མ་ཡ་སྟྭཾ་ཨ་ཧཾ་སྭཿ་ཞེས་བཟླས་ནས་མིང་པོ་གསུམ་དང་། བདག་ཉིད་ལྷན་ཅིག་ཏུ་གྱུར་པར་བསམ་པར་བྱའོ། །དེ་ནས་ལྕེ་ལ་རྡོ་རྗེ་དེ་བཞིན་དུ་རྣམ་པར་བསམས་ལ། སྭ་ཞེས་བྱ་བ་རྣམ་པར་བསམ་པར་བྱའོ། །སྙིང་གར་ཨ་ལས་སྣ་ཚོགས་རྡོ་རྗེ་བསམས་ལ། མིང་པོ་
གསུམ་གྱི་ལས་ཀྱི་ཕྱག་རྒྱ་བཅིང་བར་བྱའོ། །ཧཱུཾ་ལས་རྡོ་རྗེ་རྩེ་ལྔ་པ་བསམས་ལ། མིང་པོ་གསུམ་གྱི་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་ལ། མདའ་དང་། གཞུ་དང་། ཐོད་པའི་ཕྱག་རྒྱའི་དབང་བསྐུར་བ་དང་། མིང་གི་དབང་བསྐུར་བ་ཡང་བླངས་
ལ། སྭ་ཞེས་བྱ་བ་ཉིད་ཟློས་ཤིང་བདག་པོའི་དབང་བསྐུར་བ་དང་། དེ་ཁོ་ན་ཉིད་དང་ཆོས་དང་དམ་ཚིག་བཟུང་ལ། མེ་ཏོག་ལ་སོགས་པ་དང་། རང་གི་ལས་ཀྱི་ཕྱག་རྒྱ་རྣམས་ཀྱིས་བདག་ཉིད་མཆོད་དེ། མིང་པོ་གསུམ་ནི་བདག་གོ་ཞེས་ང་རྒྱལ་བསྐྱེད་ལ། ཏིང་ངེ་འཛིན་ཇི་ལྟ་བ་བཞིན་དུ་བསྒོམ་
པར་བྱའོ། །དེ་ནས་དཀྱིལ་འཁོར་འདི་ཇི་སྲིད་མཚན་མ་དང་། རྗེས་སུ་གནང་བ་ཐོབ་ཀྱི་བར་དུ་ཉིན་རེ་སྦྱོར་བས་བསྒོམ་པར་བྱའོ། །དེ་ནས་དཀྱིལ་འཁོར་གྱི་སའི་དབུས་སུ་ཏིང་ངེ་འཛིན་གསུམ་རྣམ་པར་བསྒོམས་ལ། བར་སྣང་གི་ཕྱོགས་སུ་དཀྱིལ་འཁོར་གྱི་དམ་ཚིག་གི་ཕྱག་རྒྱས་

59-1-235a

བཏེག་སྟེ་གཞག་པར་བྱའོ། །དེ་ནས་ཉི་མ་འཆར་བའི་དུས་སུ་ཇི་ལྟ་བ་བཞིན་དུ་ཐིག་གདབ་པར་བྱ་སྟེ། ཟུར་བཞི་པ། སྒོ་བཞི་པ། དེའི་དབུས་སུ་དཀྱིལ་འཁོར་གཉིས་པ་གཞུའི་དབྱིབས་ལྟ་བུ་དེའི་ཕྱེད་ཀྱི་ཚད་དེའི་དབུས་སུ་སེང་གེའི་གདན་བྱས་ལ། དེའི་དབུས་སུ་མིང་པོ་གསུམ་
རིམ་པ་བཞིན་བྲི་བར་བྱས་ཏེ། དབུས་སུ་རྒྱལ་བར་བྱེད་པ། དེའི་གཡས་ཕྱོགས་སུ་སྦྲང་རྩིར་བྱེད་པ། གཡོན་ལོགས་སུ་དོན་ཐམས་ཅད་གྲུབ་པར་བྱེད་པ་སྟེ། དེ་དག་ཐམས་ཅད་གོ་ཆ་བགོས་པས། གཡས་ན་ཐོད་པ་ཐོགས་པ། གཡོན་ན་མདའ་གཞུ་ཐོགས་པ། ཅུང་ཟད་དགོད་ཅིང་ཁྲོ་
བར་བྲི་བར་བྱའོ། །དེ་ལ་རྒྱལ་བར་བྱེད་པ་ནི་དཀར་པོ། སྦྲང་རྩིར་བྱེད་པ་ནི་སེར་པོ། དོན་ཐམས་ཅད་གྲུབ་པ་ནི་ལྗང་གུའི་མདོག་ཅན་ནོ། །ཤར་ཕྱོགས་ཀྱི་སྒོར་གྲུབ་པ་མདོག་དཀར་པོ། མིག་གསུམ་པ། ལག་ན་རྩེ་གསུམ་ཐོགས་པའོ། །ལྷོར་འཕེལ་བ་མདོག་སེར་པོ། ལག་ན་གཏེར་གྱི་
བུམ་པ་ཐོགས་པའོ། །ནུབ་ཏུ་ཆེན་པོ་མདོག་དམར་སྐྱ། ལག་ན་མེ་ཏོག་གི་ཟ་མ་ཏོག་ཐོགས་པའོ། །བྱང་དུ་གནོད་སྦྱིན་ནག་པོ། ལག་ན་མཆེ་བ་ཐོགས་པ། གནོད་སྦྱིན་གྱི་གཟུགས་ཅན་ནོ། །ཕྱིའི་དཀྱིལ་འཁོར་གྱི་ལྷའི་སྣམ་བུའི་ཤར་ལྷོ་མཚམས་སུ་གཏུམ་མོ་མདོག་ནག་པོ། ལག་ན་
དབྱིག་པ་ཐོགས་པའོ། །ལྷོ་ནུབ་ཏུ་ཁྲོ་བ་མདོག་ནག་པོ། ལག་ན་སྦྲུལ་ཐོགས་པའོ། །ནུབ་བྱང་དུ་མཆོག་མདོག་ནག་པོ། ལག་ན་འཁོར་ལོ་ཐོགས་པའོ། །བྱང་ཤར་དུ་གསོད་པ་མདོག་ནག་པོ། ལག་ན་རལ་གྲི་འཕྱར་བ་བྲི་བར་བྱའོ། །འདིར་ལྷ་ཐམས་ཅད་ཀྱི་སྙིང་པོ་ནི་སྭ་
ཞེས་བྱ་བའོ། །དེ་ལྟར་དཀྱིལ་འཁོར་བྲིས་ནས་མདུང་གི་མཚན་མའི་ཕྱག་རྒྱས་ཡོངས་སུ་བཟུང་བའི་རྩེ་གསུམ་པ་དང་། མེ་ཏོག་གི་ཡལ་ག་ལས་བུམ་པ་ཐམས་ཅད་དང་། བུམ་པ་གང་བ་རྣམས་ལ་སྭ་ཞེས་བྱ་བ་རེ་རེ་ཞིང་བརྒྱ་རྩ་བརྒྱད་བཟླས་ལ། དཀྱིལ་འཁོར་གྱི་སྒོ་ཐམས་ཅད་ཕྱེ་སྟེ། སྭ་
ཞེས་བྱ་བས་མིང་པོ་གསུམ་འཁོར་དང་བཅས་པ་ལ་མཆོད་ཡོན་བྱིན་ལ། བུམ་པ་དང་བུམ་པ་གང་བ་རྣམས་དང་། བླ་རེ་ལ་སོགས་པ་བྱིན་ལ། མཆོད་པ་རྣམ་པ་ལྔས་མཆོད་དེ། རང་གི་ལས་ཀྱི་ཕྱག་རྒྱ་རྣམས་ཀྱིས་ཀྱང་མཆོད་པ་དང་། ཕྱི་རོལ་དུ་གླུ་དང་གར་ལ་སོགས་པས་ཀྱང་མཆོད་

59-1-235b

ལ། ཕྱི་རོལ་དུ་གཏོར་མ་བྱིན་ནས་སྦྱིན་སྲེག་བྱའོ། །དེ་ནས་གོས་བཟང་པོ་ལ་སྭ་ཞེས་བྱ་བ་བཟླས་ལ། གཅིག་གིས་ནི་སྨད་གཡོགས་བྱ། གཉིས་པས་ནི་སྟོད་གཡོགས་བྱ། གསུམ་པས་ནི་རང་གི་གདོང་གཡོགས་ལ། ཕྱག་བཞི་བྱས་ཏེ། བྱང་ཆུབ་ཏུ་སེམས་བསྐྱེད་ལ། སྔ་མ་བཞིན་
དུ་རང་གི་སྙིང་གར་རྡོ་རྗེ་བསྐྱེད་དེ། ཤར་ཕྱོགས་ཀྱི་སྒོར་བལྟས་ནས་ཕྱི་རོལ་ན་གནས་པའི་བུམ་པའི་ཆུས་བདག་ཉིད་དབང་བསྐུར་ལ། རྩེ་གསུམ་པས་མཚན་པའི་ཕྱག་རྒྱ་བཅིངས་ཏེ། དེ་ཉིད་ཀྱིས་མེ་ཏོག་གི་ཕྲེང་བ་བཟུང་ལ། བཛྲ་བཛྲ་སྭ་ཞེས་བརྗོད་ཅིང་། གླུ་རྣམས་གླུ་རུ་ལེན་པ་དང་། །
རོལ་མོ་རྣམས་བརྡུང་བར་བྱེད་པ་དང་། གར་བྱེད་པ་བཞིན་དུ་སློབ་དཔོན་གྱི་དཀྱིལ་འཁོར་གྱི་མཆོག་ཏུ་འཇུག་པར་བྱའོ། །དེ་ནས་ཡང་མིང་པོ་གསུམ་གྱི་མདུན་དུ་འདུག་ལ། འདི་སྐད་ཅེས་བརྗོད་པར་བྱའོ། །ཛཿཧཱུཾ་བཾ་ཧོཿཔྲ་སིདྡྷྱེ་མཱཾ། དེ་ནས་རྡོ་རྗེའི་ཆུ་འཐུངས་ལ། །ཨ་ཞེས་བྱ་བ་ལན་
བརྒྱ་ཟློས་ཤིང་། བདག་ཉིད་ལ་དབབ་པར་བྱའོ། །ཡང་གཡོན་པའི་ཁྲོ་བོའི་ཁུ་ཚུར་གྱིས་སེམས་མ་རྡོ་རྗེ་ཕྱེ་ལ། ཨ་ཞེས་བྱ་བ་དེ་བཞིན་དུ་ཟློས་ཤིང་། བདག་ཉིད་ལ་དབབ་པར་བྱའོ། །དེ་ནས་སྭ་ཞེས་བྱ་བ་ཟློས་ཤིང་། མེ་ཏོག་དོར་བར་བྱའོ། །དེ་ནས་དེ་ཉིད་བླངས་ལ་དེ་ཉིད་ཀྱི་མགོ་ལ་བཅིང་བར་
བྱའོ། །དེ་ནས་དེ་ཉིད་ཀྱིས་གདོང་གཡོགས་དགྲོལ་ལོ། །དེ་ནས་དེ་ཉིད་ཟློས་ཤིང་། ཤར་ཕྱོགས་ཀྱི་ཆ་ནས་བརྩམས་ཏེ། དཀྱིལ་འཁོར་བལྟ་བར་བྱའོ། །དེ་ནས་རྩེ་གསུམ་པས་མཚན་པའི་ཕྱག་རྒྱ་བཅིངས་ལ། ཏིཥྛ་བཛྲ་ཞེས་བྱ་བས་རང་གི་སྙིང་གར་དགྲོལ་བར་བྱའོ། །
དེ་ནས་མིང་པོ་གསུམ་གྱི་ཕྱག་རྒྱ་ཆེན་པོ་བཅིངས་ལ། དེ་ལ་རྡོ་རྗེའི་ལྟ་བས་ཁྲོ་བ་དང་བཅས་པས་བལྟས་ཏེ། ཇི་སྲིད་རང་གི་མཐོང་བ་བྱིན་ནས་རང་གི་དངོས་གྲུབ་རྣམས་སྟེར་བར་གྱུར་པ་དེ་སྲིད་ཀྱི་བོར་དུ་སྭ་ཞེས་བྱ་བ་བཟླས་བརྗོད་བྱའོ། །ཡང་དེ་ལ་དེ་བཞིན་དུ་བལྟས་ཏེ། རྡོ་རྗེ་
ཐལ་མོ་དང་། ཕྱག་བྱས་ལ། མེ་ཏོག་ལ་སོགས་པ་དང་། དབང་བསྐུར་བ་རྣམས་བླངས་པར་བྱའོ། །དེ་ལ་དང་པོ་ཁོ་ནར་རྩེ་གསུམ་པས་མཚན་པ་ཡོངས་སུ་བཟུང་བའི་རྩེ་གསུམ་པ་དང་། མེ་ཏོག་གི་ཡལ་ག་ལས་རྣམ་པར་རྒྱལ་བའི་བུམ་པ་ལ་སྔར་བཤད་པའི་སྔགས་དེ་བཞིན་དུ་

59-1-236a

བཟླའོ། །དེ་ནས་བདག་ཉིད་མིང་པོ་གསུམ་དུ་བྱིན་གྱིས་བརླབས་ལ། ཕྱིའི་དཀྱིལ་འཁོར་གྱི་ནང་དུ་སྣ་ཚོགས་པདྨ་བྲིས་ཏེ། དེའི་སྟེང་དུ་སྭ་ཞེས་བྱ་བ་ཉིད་ཀྱིས་སེང་གེའི་གདན་བཞག་ལ། དེར་མིང་པོ་གསུམ་གྱི་ཕྱག་རྒྱ་ཆེན་པོས་འདུག་སྟེ། མེ་ཏོག་ལ་སོགས་པས་བདག་
ཉིད་མཆོད་ལ། མཆོད་ཡོན་བླངས་ནས། རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ལ། ཨོཾ་བཛྲ་ཨ་བྷི་ཥིཉྩ་སྭ་ཞེས་ཟློས་ཤིང་། དེས་བདག་ཉིད་དབང་བསྐུར་ནས་ཆུ་དེ་བཏུང་བར་ཡང་བྱའོ། །དེ་ནས་རིན་པོ་ཆེའི་ཅོད་པན་གྱི་ཕྱག་རྒྱས་རིན་པོ་ཆེའི་ཅོད་པན་དང་། 
དར་དཔྱངས་ཀྱི་དབང་བསྐུར་བས་དབང་བསྐུར་ལ། སྭ་ཞེས་བྱ་བས་མདའ་དང་གཞུ་དང་དྲིལ་བུ་དང་བཅས་པ་བླངས་ཏེ། སྭ་ཞེས་བྱ་བ་ཉིད་ཀྱིས་མིང་པོ་གསུམ་གྱི་མིང་གི་དབང་བསྐུར་བ་དང་། བདག་པོའི་དབང་བསྐུར་བ་བླངས་ནས། མེ་ཏོག་གི་མཆོད་པས་དཀྱིལ་འཁོར་མཆོད་དེ། 
བདག་ཉིད་མཆོད་པ་རྣམ་པ་ལྔ་དང་། ཕྱག་རྒྱའི་མཆོད་པ་རྣམས་ཀྱིས་ཀྱང་མཆོད་ལ། རྗེས་སུ་གནང་བའི་དབང་བསྐུར་བ་བླངས་ནས། མིང་པོ་གསུམ་ལ་ཕྱག་བྱས་ནས། སྭ་ཞེས་བྱ་བ་དང་། ཕྱག་རྒྱ་བཞིའི་ཡེ་ཤེས་བསླབ་པར་བཟུང་ལ། བདག་ལ་བྱིན་གྱིས་བརླབ་པ་ལ་སོགས་
པ་བྱས་ཏེ། རང་གི་མིང་ནས་བརྗོད་པར་ཡང་བྱས་ལ། འདི་སྐད་ཅེས་བརྗོད་དོ། །འཇིག་རྟེན་གསུམ་མཆོག་སྲིད་གསུམ་མཆོག །ངན་སོང་གསུམ་མཆོད་གསུམ་རྣམ་གསུམ། །ལེགས་ལྡན་སྦས་པ་གྲུབ་པ་ནི། །དངོས་གྲུབ་ཀུན་ལ་རྟག་ཏུའོ། །དེ་ནས་དཀྱིལ་འཁོར་རྡོ་རྗེས་
བསྒྲུབས་ལ། བསྡུ་བ་བྱས་ཏེ། རྩེ་གསུམ་པས་མཚན་པའི་ཕྱག་རྒྱ་ལས་གཡས་པའི་མཛུབ་མོ་ལྕགས་ཀྱུར་བྱས་པ་དང་། སྭ་ཞེས་བྱ་བ་ཟློས་ཤིང་མིང་པོ་གསུམ་འཁོར་དང་བཅས་པ་དཀྱིལ་འཁོར་དུ་བཅུག་ལ། རྡོ་རྗེ་གནོད་སྦྱིན་གྱིས་བགེགས་བསལ་བར་བྱས་ལ། དཀྱིལ་
འཁོར་བཅིང་བ་དང་། མཚམས་བཅིང་བར་བྱའོ། །དེ་ནས་རྡོ་རྗེ་ཁུ་ཚུར་གྱིས་དཀྱིལ་འཁོར་གྱི་སྒོ་བཅིངས་ཏེ། རྡོ་རྗེ་སྲུང་བས་སྲུང་བ་ཐམས་ཅད་གོ་ཆ་བསྐོན་ཏེ། སོ་ཞེས་བྱ་བས་མིང་པོ་གསུམ་གྱི་འཁོར་དང་བཅས་ལ་མཆོད་ཡོན་ཕུལ་ལ། རྩེ་གསུམ་གྱིས་མཚན་པ་

59-1-236b

བཅིངས་ཏེ། སྭ་དྲྀ་ཤྱ་ཞེས་བྱ་བས་བལྟ་བ་བྱས་ལ། ཛཿཧཱུཾ་བཾ་ཧོཿས་མ་ཡ་སྟྭཾ་ས་མ་ཡ་སྟྭཾ་ཨ་ཧཾ་སྭ་ཞེས་ལན་གསུམ་བརྗོད་ལ་བསྒྲུབ་པར་བྱའོ། །དེ་ནས་དེ་བཞིན་དུ་ལྕེ་ལ་རྡོ་རྗེ་བསམས་ཏེ། མིང་པོ་གསུམ་ལ་སོགས་པའི་ལྕེ་ལ་ཡང་སྭ་ཞེས་བྱ་བ་རྣམ་པར་བསམ་པ་འདི་ནི་དེ་
རྣམས་ཀྱི་ཆོས་ཀྱི་ཕྱག་རྒྱའོ། །ཨ་ཞེས་བྱ་བས་རང་གི་སྙིང་གར་སྣ་ཚོགས་པདྨ་དང་། སྣ་ཚོགས་རྡོ་རྗེ་རྣམ་པར་བསམས་ལ། གར་གྱི་ཚུལ་གྱིས་མིང་པོ་གསུམ་གྱི་ཕྱག་རྒྱ་ཆེན་པོ་བཅིང་བར་བྱ་སྟེ། འདི་ནི་འདིར་ལས་ཀྱི་ཕྱག་རྒྱའོ། །ཧཱུཾ་ཞེས་བྱ་བས་རང་གི་སྙིང་གར་རྡོ་རྗེ་རྩེ་ལྔ་པ་
བསམས་ལ། ཇི་ལྟར་བྲིས་པ་དང་། རྗེས་སུ་མཐུན་པ་མིང་པོ་གསུམ་ལ་སོགས་པའི་ཕྱག་རྒྱ་ཆེན་པོ་སྭ་ཞེས་བྱ་བས་བཅིང་བར་བྱའོ། །དེ་ནས་རྡོ་རྗེ་རིན་པོ་ཆེའི་ཕྱག་རྒྱས་མིང་པོ་གསུམ་ལ་སོགས་པ་ལ་དབང་བསྐུར་ལ། སྭ་ཞེས་བྱ་བས་མིང་པོ་གསུམ་འཁོར་དང་བཅས་པ་ལ་མཆོད་
ཡོན་བྱིན་ཏེ། མཆོད་པ་རྣམ་པ་ལྔས་མཆོད་ཅིང་། །ལས་ཀྱི་ཕྱག་རྒྱ་རྣམས་ཀྱིས་ལེགས་པར་མཆོད་ལ། སློབ་མ་རྣམས་གཞུག་པའི་རྗེས་སུ་གནང་བ་མནོས་ཏེ། དེ་རྣམས་བདག་ཉིད་འཇུག་པའི་ཚུལ་དུ་གཞུག་པར་བྱའོ། །དེ་ནས་ཐམས་ཅད་བྱས་ལ་དམ་ཚིག་སྦྱིན་པར་བྱ་སྟེ། གལ་
ཏེ་དམ་ཚིག་འདས་གྱུར་ན། །ཕ་གསོད་འགྲོ་བ་གང་ཡིན་དང་། །མ་གསོད་པ་ཡི་འགྲོ་བ་གང་། །འགྲོ་བ་དེར་ནི་འགྲོ་བར་འགྱུར། །རྟག་ཏུ་དམ་པ་བརྟེན་པར་བྱ། །དམ་པ་མིན་པ་ཡོངས་སུ་སྤང་། །གཞན་ལ་དེ་ཉིད་བསྟན་མི་བྱ། །རྟག་ཏུ་མིང་པོ་གསུམ་པོ་བསྒྲུབ། །ཅེས་བྱ་བ་ནི་དམ་
ཚིག་གོ། །ལྷག་མ་རྣམས་ནི་སྔར་བཤད་པའི་ཚུལ་དུ་ཤེས་པར་བྱའོ། །དཔལ་མཆོག་དང་པོ་ལས་མིང་པོ་གསུམ་གྱི་རྟོག་པའི་རྒྱལ་པོའི་བཤད་པ་རྫོགས་སོ།།    །།དེ་ལྟར་མིང་པོ་གསུམ་གྱི་རྟོག་པ་དེས་འདུལ་བའི་སེམས་ཅན་རྣམས་ལས་བརྩམས་ཏེ་གསུངས་ནས། ད་ནི་སྲིང་མོ་
བཞིས་འདུལ་བའི་སེམས་ཅན་ཉིད་ལས་བརྩམས་ཏེ། སྲིང་མོ་བཞིའི་རྟོག་པ་བཤད་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་སོ། །འདིར་དང་པོ་སྦྱོར་བའི་ཏིང་ངེ་འཛིན་ནི་མིང་པོ་གསུམ་གྱི་དཀྱིལ་འཁོར་དུ་གསུངས་པ་ཉིད་གཟུང་བར་བྱའོ། །ད་ནི་དེ་ནས་ཞེས་བྱ་བ་ལ་སོགས་པ་

59-1-237a

གཉིས་པ་གསུངས་པ་ཡིན་ལ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོའི་སྦྱོར་བའི་རྗེས་ཐོགས་ཉིད་ལ་ཞེས་བྱ་བའི་དོན་ཏོ། །སྲིང་མོ་བཞིས་ཞེས་བྱ་བ་ནས་ཧཾ་ཞེས་བྱ་བའི་བར་གྱི་བཤད་པ་ནི་གོ་བར་ཟད་དོ། །འདི་དག་གིས་ནི་ཏིང་ངེ་འཛིན་གཉིས་པ་བཤད་པ་
ཡིན་ནོ། །དེ་ནས་འདུས་པ་ནས་བརྩམས་ཏེ། གསུམ་པ་ཡིན་པར་ཤེས་པར་བྱའོ། །དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པ་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་འདི་ཞེས་བྱ་བ་ལ་སོགས་པ་སློབ་དཔོན་གྱི་ལས་ཀྱི་ཆོ་ག་དང་། སློབ་མ་ཞུགས་
པ་ལ་སོགས་པའི་ཆོ་ག་རྒྱས་པ་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ཏེ། ལས་ཀྱི་མཆོག་གི་ཏིང་ངེ་འཛིན་གྱི་རྗེས་ཐོགས་ཉིད་ལའོ། །འདི་ཞེས་བྱ་བ་ནི་ཧཾ་གིའོ། །ཟླུམ་པོ་ཞེས་བྱ་བ་ལ་སོགས་པ་ལ། ཀུན་ནས་ཟླུམ་པོའི་དཀྱིལ་འཁོར་ཕུར་བུ་ལ་བཏགས་པའི་སྲད་བུ་དབང་
ལྡན་གྱི་ཕྱོགས་ནས་བརྩམས་ཏེ། ཐིག་གདབ་པར་བྱའོ། །དེ་ནས་ཧཱུཾ་ཞེས་ཕུར་བུ་ཕྱུང་ལ། ཕུར་བུའི་ཁུང་བུ་ཚོན་སྣ་ལྔས་ཡོངས་སུ་བཀང་ལ་མཉམ་པོར་བྱའོ། །དེ་ནས་མཚམས་ཀྱི་སྲད་བུ་གཉིས་ཀྱིས་དཀྱིལ་འཁོར་དེ་དུམ་བུ་བཞི་པར་བྱའོ། །དེ་ནས་སྒོ་བཞི་པོ་དེར་ཤར་ཕྱོགས་ཀྱི་
དཀྱིལ་འཁོར་ལ། དགའ་བ་མོ་ཤར་དུ་བལྟ་བ་བྲི་བར་བྱ་ཞིང་། མདའ་དང་། གཞུ་ཐོགས་པ་ལ་བརྩོན་པ། ཁ་དོག་དམར་པོར་བྱའོ། །ལྷོ་ཕྱོགས་ཀྱི་དཀྱིལ་འཁོར་ལ། གསོད་མ་ལྷོར་བལྟ་བ། ལག་ན་རལ་གྲི་དང་། ཕུབ་ཐོགས་པ། མདོག་ནག་པོའོ། །
ནུབ་ཕྱོགས་ཀྱི་དཀྱིལ་འཁོར་ལ། ཕག་མོ་ནུབ་ཏུ་བལྟ་བ། ལག་ན་གསེར་གྱི་གཏེར་ཐོགས་པ། གསེར་གྱི་མདོག་ཅན་ནོ། །བྱང་ཕྱོགས་ཀྱི་དཀྱིལ་འཁོར་ལ། གྲུབ་པ་མོ་བྱང་དུ་བལྟ་བ། ལག་ན་ཤ་ཀ་ར་དང་། གྲི་རིངས་ཐོགས་པ། མདོག་དཀར་མོ་བྲི་བར་བྱའོ། །ཕྱི་
རོལ་གྱི་ཞེས་བྱ་བ་ལ། སྒོ་བཞིའི་དབུས་སུ་དགའ་བ་མོ་ལ་སོགས་པས་མཚན་པའི་ཡན་ལག་ཇི་ལྟ་བ་བཞིན་དུ་ཤར་ཕྱོགས་ཀྱི་སྒོ་ནས་བརྩམས་ཏེ་བྲི་བར་བྱའོ། །དེ་ནས་སློབ་དཔོན་ཞེས་བྱ་བ་ལ་སོགས་པ་ལ་ཆོས་ཀྱི་དཀྱིལ་འཁོར་བྲིས་ལ། ལག་པ་གཡས་པས་དྲིལ་བུ་བཟུང་སྟེ། 

59-1-237b

གཡོན་པས་ཁ་ཊྭཱཾ་ག་བཟུང་ནས་ཧཱུཾ་ཟློས་ཤིང་འཇུག་པར་བྱའོ། །དེ་ནས་ཕྱག་རྒྱ་དང་། གར་གྱི་མཆོད་པ་བསྟབ་པར་བྱའོ་ཞེས་བྱ་བ་ནི་ལས་ཀྱི་ཕྱག་རྒྱ་བཞིས་གར་བྱའོ། །དེ་ནས་ཡིད་ལ་འདོད་པའི་དངོས་གྲུབ་ཐམས་ཅད་ཅེས་བྱ་བ་ནི་གོ་བར་ཟད་དོ། །ལས་ཀྱི་དཀྱིལ་འཁོར་རོ་ཞེས་བྱ་བ་
ལ་རིམ་པ་གཙོ་བོར་བྱ་བ་དང་། བརྩོན་འགྲུས་ཀྱི་ལས་ཀྱི་གཙོ་བོར་གྱུར་པའི་དཀྱིལ་འཁོར་ནི་ལས་ཀྱི་དཀྱིལ་འཁོར་རོ། །འདི་སྐད་སྟོན་པ་ཡིན་ཏེ། མིང་པོ་གསུམ་གྱི་སྐབས་སུ་བཤད་པའི་ཆོ་གས་དགའ་བ་མོའི་སྦྱོར་བ་བྱས་ལ། ཏིང་ངེ་འཛིན་སྒོམ་པ་སྔོན་དུ་འགྲོ་བས་སྲིང་མོ་བཞིའི་
དཀྱིལ་འཁོར་འདི་ཇི་སྲིད་དུ་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་དཀྱིལ་འཁོར་གྱི་དབུས་སུ་ཏིང་ངེ་འཛིན་གསུམ་བསྒོམས་ལ། བར་སྣང་གི་ཕྱོགས་སུ་དཀྱིལ་འཁོར་སྲིང་མོ་བཞིའི་དམ་ཚིག་གི་ཕྱག་རྒྱས་བཏབ་ནས། ཇི་ལྟ་བ་བཞིན་དུ་བཞག་
ལ། ལྷག་པར་གནས་པའི་ཆོ་ག་རྣམས་རྗེས་སུ་སྤྱད་དེ། ཡང་ཉི་མ་འཆར་བའི་དུས་སུ་དཀྱིལ་འཁོར་དེ་བཞིན་དུ་བར་སྣང་ལ་བཞག་ནས་ཐིག་གདབ་པར་བྱའོ། །དེ་ནས་ཇི་སྐད་དུ་བཤད་པའི་ལྷ་མོ་བཞིའི་ང་རྒྱལ་གྱིས་བྲི་བར་བྱའོ། །ཡང་ཤར་ཕྱོགས་ཀྱི་སྒོར་མདའ་དང་གཞུ་གཉིས་བྲི་བར་
བྱའོ། །ལྷོ་ཕྱོགས་སུ་ཕུབ་དང་བཅས་པའི་རལ་གྲིའོ། །ནུབ་ཏུ་གཏེར་གྱི་བུམ་པའོ། །བྱང་གི་སྒོར་གྲི་རིངས་དང་བཅས་པའི་ཐོད་པ་ཧཾ་ཞེས་བྱ་བ་ཉིད་ཀྱིས་བྲི་བར་བྱའོ། །དེ་ནས་སྲིང་མོ་བཞིའི་དམ་ཚིག་གི་ཕྱག་རྒྱས་ཡོངས་སུ་བཟུང་བའི་རྡོ་རྗེ་དང་། མེ་ཏོག་གི་ཡལ་ག་ལས་བུམ་པ་ཐམས་ཅད་དང་། 
བུམ་པ་གང་བ་རྣམས་ལ་རེ་རེ་ཞིང་ཧོ་ཞེས་བརྒྱ་རྩ་བརྒྱད་བཟླས་བརྗོད་བྱའོ། །རྡོ་རྗེ་བསྡམས་པ་བྱས་ལ་གཡས་པའི་མཛུབ་མོ་དང་། གུང་མོ་རྩེ་སྦྱར་ལ། གཡས་པའི་སྲིན་ལག་གི་རྩེ་མོ་དང་། གཡོན་པའི་མཐེའུ་ཆུང་གི་རྩེ་མོ་སྦྱར་ནས་བཞག་པ་འདི་ནི་སྲིང་མོ་བཞིའི་དམ་ཚིག་གི་ཕྱག་རྒྱའོ། །དེ་ནས་
དཀྱིལ་འཁོར་གྱི་སྒོ་རྣམས་ཇི་ལྟ་བ་བཞིན་དུ་ཕྱེ་ལ། ཧཾ་ཞེས་བྱ་བས་སྲིང་མོ་བཞི་ལ་མཆོད་ཡོན་བྱིན་ཏེ། བུམ་པ་དང་། བུམ་པ་གང་བ་རྣམས་དང་། བླ་རེ་ལ་སོགས་པ་ཡང་བྱིན་ལ། མཆོད་པ་རྣམ་པ་ལྔས་མཆོད་དེ་རང་གི་ལས་ཀྱི་ཕྱག་རྒྱ་རྣམས་ཀྱིས་དེ་ཡང་དག་པར་མཆོད་ལ། ཕྱི་

59-1-238a

རོལ་དུ་གླུ་དང་གར་ལ་སོགས་པས་ཀྱང་མཆོད་པ་བྱེད་དུ་བཅུག་སྟེ། ཕྱི་རོལ་དུ་གཏོར་མ་སྦྱིན་པར་བྱའོ། །དེ་ནས་སྦྱིན་སྲེག་བྱས་ལ་གོས་བཟང་པོ་ལ་ཧཾ་ཞེས་བྱ་བ་བཟླས་ཏེ། དེ་ལས་གཅིག་གིས་ནི་སྨད་གཡོགས་བྱ། གཉིས་པས་ནི་སྟོད་གཡོགས་བྱ། གསུམ་པས་
རང་གི་གདོང་གཡོགས་བྱས་ལ། ཕྱག་བཞི་བྱས་ཏེ། བྱང་ཆུབ་ཏུ་སེམས་བསྐྱེད་ནས། སྔ་མ་བཞིན་དུ་རང་གི་སྙིང་གར་རྡོ་རྗེ་བསམས་ལ། ཤར་ཕྱོགས་ཀྱི་སྒོར་བལྟས་ནས་ཕྱི་རོལ་ན་གནས་པའི་བུམ་པའི་ཆུས་བདག་ཉིད་ལ་དབང་བསྐུར་ཏེ། ལག་པ་གཡས་པས་དྲིལ་བུ་དཀྲོལ་ལ། 
ལག་པ་གཡོན་པས་ཁཊྭཱཾ་ག་བཟུང་སྟེ། བཛྲ་བཛྲ་ཞེས་བཟླས་ཤིང་དཀྱིལ་འཁོར་དུ་གཞུག་པར་བྱའོ། །དེ་ནས་ཕྱག་བྱས་ལ། དཀྱིལ་འཁོར་བསྐོར་བ་ལན་གསུམ་བྱས་ཏེ། མདུན་དུ་འདུག་ལ་འདི་སྐད་ཅེས་བརྗོད་པར་བྱའོ། །ཛཿཧཱུཾ་བཾ་ཧོཿཔྲ་སིདྡྷྱ་མཱཾ། དེ་ནས་རྡོ་རྗེ་ཆུ་འཐུངས་
ལ། ཨ་ཞེས་བྱ་བ་ལན་བརྒྱ་ཟློས་ཤིང་བདག་ཉིད་ལ་དབབ་པར་བྱའོ། །ཡང་གཡོན་པའི་ཁྲོ་བོའི་ཁུ་ཚུར་གྱིས་སེམས་མ་རྡོ་རྗེ་ཕྱེ་ལ། ཨ་ཞེས་བྱ་བ་དེ་བཞིན་དུ་ཟློས་ཤིང་བདག་ཉིད་ལ་དབབ་པར་བྱའོ། །དེ་ནས་མེ་ཏོག་ཧཾ་ཞེས་བྱ་བས་དོར་བར་བྱའོ། །དེ་ནས་དེ་བླངས་ལ། དེ་ཉིད་
ཀྱིས་རང་གི་མགོ་བོ་ལ་བཅིང་བར་བྱའོ། །དེ་ནས་དེ་ཉིད་ཀྱིས་གདོང་གཡོགས་དགྲོལ་ལོ། །དེ་ནས་དེ་ཉིད་ཟློས་ཤིང་ཤར་ཕྱོགས་ཀྱི་ཆ་ནས་བརྩམས་ཏེ། དཀྱིལ་འཁོར་ལ་བལྟ་བར་བྱའོ། །དེ་ནས་འཇུག་པའི་ཕྱག་རྒྱ་བཅིངས་ནས། ཏིཥྛ་བཛྲ་ཞེས་བྱ་བ་ལ་སོགས་པས་རང་གི་སྙིང་གར་
དགྲོལ་ལོ། །དེ་ནས་དགའ་བ་མོའི་ཕྱག་རྒྱ་ཆེན་པོ་བཅིངས་ལ། རྡོ་རྗེའི་ལྟ་བས་དེ་ལ་བལྟ་ཞིང་ཇི་སྲིད་དུ་རང་གི་གཟུགས་བསྟན་ནས། རང་གི་དངོས་གྲུབ་སྟེར་བར་གྱུར་པ་དེ་སྲིད་ཀྱི་བར་དུ་ཧཾ་ཞེས་བྱ་བ་བཟླས་བརྗོད་བྱའོ། །ཡང་དེ་ལ་རྡོ་རྗེའི་ལྟ་བས་བལྟས་ཏེ། རྡོ་རྗེ་ཐལ་མོ་བསྐོར་བས་
ཕྱག་བྱས་ལ། མེ་ཏོག་ལ་སོགས་པས་དབང་བསྐུར་བ་བླང་བར་བྱའོ། །དེ་ལ་དང་པོ་ཁོ་ནར་སྲིང་མོ་བཞིའི་དམ་ཚིག་གི་ཕྱག་རྒྱས་ཡོངས་སུ་བཟུང་བའི་རྡོ་རྗེ་དང་མེ་ཏོག་གི་ཡལ་ག་ལས་རྣམ་པར་རྒྱལ་བའི་བུམ་པ་ལ། ཨོཾ་མ་ཧཱ་སུ་ཁ་བཛྲ་ཨ་མོ་གྷ་ཞེས་བྱ་བ་ལ་སོགས་པ་སྔ་མ་

59-1-238b

བཞིན་དུ་བཟླས་ལ། བདག་ཉིད་མིང་པོ་གསུམ་གྱི་གཟུགས་སུ་བྱིན་གྱིས་བརླབས་ནས། དཀྱིལ་འཁོར་གྱི་དབུས་སུ་སྣ་ཚོགས་པདྨ་བྲིས་ལ། དེའི་དབུས་སུ་མིང་པོ་གསུམ་གྱི་ཕྱག་རྒྱ་ཆེན་པོས་འདུག་སྟེ། མེ་ཏོག་ལ་སོགས་པས་བདག་ཉིད་ཡང་དག་པར་མཆོད་ནས། མཆོད་ཡོན་བླངས་
ལ་རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ཏེ། ཨོཾ་བཛྲ་ཨ་བྷི་ཥིཉྩ་ཧཾ་ཞེས་བྱ་བ་དང་། དེས་བདག་ཉིད་དབང་བསྐུར་བར་བྱ་ཞིང་། ཆུ་དེ་བཏུང་བར་ཡང་བྱའོ། །དེ་ནས་རིན་པོ་ཆེའི་ཅོད་པན་དང་། དར་དཔྱངས་ཀྱི་དབང་བསྐུར་བའི་ཕྱག་རྒྱས་རིན་པོ་ཆེའི་ཅོད་པན་དང་། 
དར་དཔྱངས་ཀྱི་དབང་བསྐུར་བས་དབང་བསྐུར་ལ། ཧཾ་ཞེས་བྱ་བས་དྲིལ་བུ་དང་བཅས་པའི་ཁཊྭཱཾ་ག་བླངས་ནས། ཧཾ་ཞེས་བྱ་བ་ཉིད་ཟློས་ཤིང་། མིང་གི་དབང་བསྐུར་བ་དང་། བདག་པོའི་དབང་བསྐུར་བ་བླངས་ལ། བདག་ཉིད་ལ་མེ་ཏོག་ལ་སོགས་པས་མཆོད་དེ། ལྷ་མོ་བཞིའི་ལས་ཀྱི་ཕྱག་
རྒྱས་ཀྱང་མཆོད་ནས། རྗེས་སུ་གནང་བ་དང་དབང་བསྐུར་བ་བླང་བར་བྱའོ། །དེ་ནས་ལྷ་མོ་བཞི་ལ་ཕྱག་བྱས་ཏེ། ཧཾ་ཞེས་བྱ་བ་དང་། ཕྱག་རྒྱ་བཞི་ཡང་བཟུང་ནས། བདག་ལ་བྱིན་གྱིས་བརླབ་པ་དང་། རང་གི་མིང་ནས་བརྗོད་པ་དག་ཀྱང་བྱའོ། །དེ་ནས་དཀྱིལ་འཁོར་རྡོ་རྗེས་བསྒྲུབ་པར་བྱའོ། །དེ་
ནས་བསྡུ་བ་བྱས་ལ། ཧཾ་ཞེས་བྱ་བ་ཟློས་ཤིང་། གསང་བའི་ལྕགས་ཀྱུས་སྲིང་མོ་བཞིའི་དཀྱིལ་འཁོར་དུ་གཞུག་པར་བྱའོ། །དེ་ནས་རྡོ་རྗེ་གནོད་སྦྱིན་གྱིས་བགེགས་བསལ་བར་བྱས་ལ། མཚམས་བཅིང་བ་དང་། དཀྱིལ་འཁོར་བཅིང་བ་དང་། ར་བ་དང་། དྲ་བ་དག་བྱས་ཏེ། རྡོ་རྗེ་ཁུ་ཚུར་
གྱིས་སྒོ་བཅིངས་ནས། རྡོ་རྗེ་སྲུང་བས་བསྲུངས་པ་ཐམས་ཅད་གོ་ཆ་བསྐོན་ཏེ། སྲིང་མོ་བཞི་ལ་ཧཾ་ཞེས་བྱ་བས་མཆོད་ཡོན་བྱིན་ནས། སྲིང་མོ་བཞིའི་དམ་ཚིག་གི་ཕྱག་རྒྱ་ཧཾ་དྲྀ་ཤྱ་ཞེས་བྱ་བ་དང་། སྲིང་མོ་བཞི་ལ་བལྟབ་བྱས་ལ། ཛཿཧཱུཾ་བཾ་ཧོཿ། ས་མ་ཡ་སྟྭཾ། ས་མ་ཡ་སྟྭཾ། ཨ་ཧཾ་ཞེས་ལན་
གསུམ་བརྗོད་དེ་བསྒྲུབ་པར་བྱའོ། །སྔ་མ་བཞིན་དུ་རང་གི་ལྕེ་ལ་རྡོ་རྗེ་བསམས་ལ། དེ་རྣམས་ཀྱི་ལྕེ་ལ་ཡང་ཧཾ་ཞེས་བྱ་བ་བསམ་པ་འདི་ནི་འདིར་ཆོས་ཀྱི་ཕྱག་རྒྱའོ། །འདིར་སྙིང་གར་ཨ་ལས་སྣ་ཚོགས་རྡོ་རྗེ་བསམས་ལ་གར་གྱི་སྦྱོར་བས་ཧཾ་ཞེས་ཟློས་ཤིང་སྲིང་མོ་བཞིའི་ཕྱག་རྒྱ་

59-1-239a

ཆེན་པོ་བཅིང་བར་བྱའོ། །འདི་ནི་དེ་རྣམས་ཀྱི་ལས་ཀྱི་ཕྱག་རྒྱའོ། །ཧཱུཾ་ལས་རང་གི་སྙིང་གར་རྡོ་རྗེ་རྣམ་པར་བསམས་ལ། ཧཾ་ཞེས་བྱ་བ་ཟློས་ཤིང་དེ་རྣམས་ཇི་ལྟར་བྲིས་པ་དང་རྗེས་སུ་མཐུན་པར་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་དེ་རྣམས་ལ་རྡོ་རྗེ་རིན་ཆེན་གྱི་ཕྱག་རྒྱས་དབང་
བསྐུར་ལ། ཧཾ་གིས་མཆོད་ཡོན་བྱིན་ཏེ། མཆོད་པ་རྣམ་པ་ལྔ་དང་། ལས་ཀྱི་ཕྱག་རྒྱ་རྣམ་པ་བཞིས་ཡང་དག་པར་མཆོད་ལ། ཕྱག་བྱས་ནས་སློབ་མ་གཞུག་པའི་ཕྱིར་གནང་བ་མནོས་ལ། བདག་ཉིད་འཇུག་པའི་སྦྱོར་བས་གཞུག་པར་བྱའོ། །དེ་ནས་རང་གི་ཆོ་ག་ཐམས་ཅད་དེ་རྣམས་ལ་རྗེས་སུ་སྤྱད་པར་
བྱའོ། །དཔལ་མཆོག་དང་པོའི་དུམ་བུ་དང་པོ་ལས་སྲིང་མོ་བཞིའི་དཀྱིལ་འཁོར་གྱི་བཤད་པ་རྫོགས་སོ།།    །།རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཤད་པའི་སྔོན་དུ་བསྙེན་པའི་ཆོ་ག་དང་རས་ཀྱི་རི་མོ་གཉིས་ལ་བསྒྲུབ་པའི་ཆོ་ག་ནི་དཀྱིལ་འཁོར་ཐམས་ཅད་ལ་ཡང་སོ་སོར་
ཤེས་པར་བྱའོ། །ཕྱི་རོལ་གྱི་རྡོ་རྗེའི་རིགས་ཀྱི་རྟོག་པའོ་ཞེས་བྱ་བ་ནི་བྱང་ཆུབ་ཀྱི་སེམས་ཆེན་པོ་དང་། མི་བསྐྱོད་པའི་ངོ་བོ་ཉིད་ནི་རྡོ་རྗེའོ། །དེ་ལས་བྱུང་བའི་སངས་རྒྱས་ཀྱི་དཀྱིལ་འཁོར་གྱི་རང་བཞིན་ནི་བླ་ན་མེད་པའི་རྡོ་རྗེའི་རིགས་སོ། །མོས་པ་སྤྱོད་པའི་ངོ་བོ་ཉིད་བྱང་ཆུབ་ཀྱི་སེམས་ཟག་པ་དང་
བཅས་པ་ལ་སོགས་པ་ལས་སྐྱེས་པ་གང་ཡིན་པ་རྡོ་རྗེ་དབང་ཕྱུག་ལ་སོགས་པ་ནས་སྲིང་མོ་བཞིའི་བར་གྱི་དཀྱིལ་འཁོར་གྱི་རང་བཞིན་ནི་ཕྱི་རོལ་གྱི་རྡོ་རྗེའི་རིགས་ཏེ། དེའི་རྟོག་པ་ནི་ཇི་སྐད་བཤད་པའོ། །དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུ་ལས། དཀྱིལ་འཁོར་བཅོ་ལྔའི་རྟོག་པ་
གསུངས་ནས། ད་ནི་འཇིག་རྟེན་ལས་འདས་པའི་དཀྱིལ་འཁོར་རྣམས་བྲིས་ནས་སློབ་དཔོན་གྱིས་ཇི་ལྟ་བ་བཞིན་དུ་གཤེགས་སུ་གསོལ་ལ། སྤྲུལ་པ་རྣམས་རང་གི་ལུས་ལ་བཅུག་སྟེ། རང་གི་རྟོག་པ་ལས་གསུངས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་བཞི་བརྗོད་ནས། ཤེས་རབ་
ཀྱི་ཕ་རོལ་ཏུ་ཕྱིན་པའི་ཚིག་བཞི་འདོན་ཅིང་། དེའི་དོན་ལ་ལྷག་པར་མོས་པས་བྱིན་གྱིས་བརླབས་ལ། དེ་བཞིན་གཤེགས་པ་ཐམས་ཅད་འདུས་པར་ལྷག་པར་མོས་པས་བདག་ཉིད་ཕྱག་ན་རྡོ་རྗེའི་གཟུགས་སུ་གནས་པ་ལ་ལེགས་སོ་ཞེས་བྱ་བས་དགའ་བར་བྱས་ནས། བདག་ཉིད་

59-1-239b

བསྲུང་བ་བྱས་ཏེ་ལྡང་བར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ལ། དེ་ནས་ཞེས་བྱ་བའི་སྒྲ་ནི་དེ་མ་ཐག་སྟོན་པར་བྱེད་པའི་ཚིག་སྟེ། ཇི་སྐད་དུ་གསུངས་པའི་དཀྱིལ་འཁོར་བྲིས་ནས། ཇི་ལྟ་བ་བཞིན་དུ་གཤེགས་སུ་གསོལ་
བར་བྱ་བ་དང་། རང་གི་ལུས་ལ་བཅུག་པ་བྱས་ནས་དེའི་རྗེས་ཐོགས་ཉིད་ལ་ཞེས་བྱ་བའི་དོན་ཏོ། །བཅོམ་ལྡན་འདས་ཞེས་བྱ་བ་ནི་རྣམ་པར་སྣང་མཛད་དོ། །དེ་བཞིན་གཤེགས་པ་ནི་དེ་བཞིན་གཤེགས་པ་ཐམས་ཅད་ཅེས་བྱ་བའི་དོན་ཏོ། །མཐའ་ཡས་མུ་མེད་པས་མཐར་ཐུག་ཅིང་ཞེས་བྱ་བ་
ལ་དེ་ལ་མཐའ་ཡས་པ་ནི་ཆོས་ཀྱི་དབྱིངས་དང་། ནམ་མཁའི་དབྱིངས་སོ། །དེ་ཉིད་ནི་མུ་མེད་པ་སྟེ། མཐའ་ཡས་པ་ཡང་ཡིན་པས་ན་མཐའ་ཡས་མུ་མེད་པའོ། །མཐའ་ཡས་པ་དང་མུ་མེད་པ་དེ་ཉིད་ནི་མཐར་ཐུག་པ་སྟེ། རྫོགས་པ་གང་ཡིན་པ་དེ་ནི་མཐའ་ཡས་མུ་མེད་པས་མཐར་ཐུག་
པའོ། །དེའི་ཆོས་གང་ཡིན་ཞེ་ན་མུ་མེད་པའི་མཐར་ཐུག་པའི་ཆོས་ཉིད་དང་ལྡན་པས་ཞེས་བྱ་བ་གསུངས་ཏེ། མུ་མེད་པ་ནི་ཇི་སྐད་དུ་བཤད་པའི་ཆོས་ཀྱི་དབྱིངས་དང་། ནམ་མཁའི་དབྱིངས་ཏེ། དེའི་མཐར་ཐུག་པ་ནི་ཆོས་ཀྱི་དབྱིངས་དང་། ནམ་མཁའི་དབྱིངས་ཁྱབ་པའི་ཆོས་ཉིད་འདི་
མངའ་བས་ན་མུ་མེད་ཅིང་མཐར་ཐུག་པའི་ཆོས་དང་ལྡན་པ་ཞེས་བྱ་བ་སྟེ། ལོངས་སྤྱོད་རྫོགས་སྐུ་དང་། སྤྲུལ་པའི་སྐུ་དག་གིས་འགྲོ་བ་སེམས་ཅན་རྣམས་ཀྱི་དོན་མཛད་པའི་ཕྱིར། ཐམས་ཅད་དུ་སོང་བ་ཞེས་བྱ་བའི་དོན་ཏོ། །ཡང་ཆོ་ག་འདི་མཐར་ཐུག་པར་བྱིན་གྱིས་བརླབ་པའི་ཕྱིར། 
ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ་ཞེས་བྱ་བར་སྦྱར་ཏེ། ཡང་ཞེས་བྱ་བ་ནི་བཤད་ཟིན་ཏེ། ཅིའི་ཕྱིར་བཤད་ཅེ་ན། འདི་ཞེས་བྱ་བ་ལ་སོགས་པ་གསུངས་ཏེ། ཆོ་ག་འདི་ཞེས་བྱ་བ་ནི་བཤད་མ་ཐག་པའི་རྟོག་པ་བཅོ་ལྔ་སྟེ། མཐར་ཐུག་པ་ནི་ཡོངས་སུ་རྫོགས་པར་འདི་དག་
གིས་བཤད་པའོ། །དེའི་བྱིན་གྱིས་བརླབ་པ་ནི་སློབ་དཔོན་གཅིག་གིས་ཕྱི་མའི་མཐར་ཐུག་པ་མེད་པའི་བར་དུ་གདུལ་བྱ་རྣམས་ཀྱི་མངོན་པར་འདོད་པའི་དོན་རྫོགས་པར་བྱ་བའི་ཕྱིར་བཞག་པའོ། །ཆོས་ཀྱང་ཡིན་ལ་ཐམས་ཅད་ཀྱང་ཡིན་པས་ན། ཆོས་ཐམས་ཅད་དེ། རྟོག་པ་བཅོ་ལྔའི་

59-1-240a

མཐར་ཐུག་པའོ། །དེ་རྣམས་ཀྱི་མཉམ་པ་ཉིད་ནི་དེ་བཞིན་ཉིད་དེ། དཀྱིལ་འཁོར་ལ་སོགས་པའི་ཚུལ་གྱིས་ཀྱང་ཕྱི་མའི་མཐར་ཐུག་པའི་བར་དུ་མི་ཕྱེད་པའི་འགྲོ་བའི་དོན་གྱི་བྱ་བའོ། །དེའི་མཐར་ཐུག་པ་ནི་ཡོངས་སུ་རྫོགས་པ་སྟེ། དཔག་ཏུ་ཡོད་ཅིང་ཡོངས་སུ་ཆད་
པའི་གཞུང་གིས་ཡང་དག་པར་བསྡུས་ནས། ཡང་དག་པར་བསྲེས་ཏེ་བཤད་པའོ། །དེའི་བྱིན་གྱིས་བརླབ་པ་ནི་རྡོ་རྗེ་ལྟ་བུའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གང་གིས་བསྟན་པར་བྱས་པར་གྱུར་པ་དེ་ནི་ཆོས་ཐམས་ཅད་ཀྱི་མཉམ་པ་ཉིད་ཀྱི་མཐར་ཐུག་པས་བྱིན་གྱིས་བརླབ་པ་རྡོ་རྗེ་སྟེ། མིང་
དེ་སྐད་ཅེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་སྟོན་པར་མཛད་པའོ། །འདི་ཞེས་བྱ་བ་ནི་བློ་ལ་བཞག་ནས་སྨྲས་པའོ། །བཤད་དོ་ཞེས་བྱ་བ་ནི་གསུངས་པའོ། །དེ་ཉིད་གང་ཞེ་ན་ཤེས་རབ་ཀྱི་ཕ་རོལ་ཏུ་ཕྱིན་པ་མཐའ་ཡས་པ་ཉིད་པས་ཞེས་བྱ་བ་ལ་འདིར་ཤེས་རབ་ཀྱི་ཕ་རོལ་ཏུ་ཕྱིན་
པ་ཞེས་བྱ་བ་ནི་ཆོས་ཐམས་ཅད་བདག་མེད་པའི་ཡེ་ཤེས་དང་། བྱང་ཆུབ་ཀྱི་སེམས་ཆེན་པོའི་མཚན་ཉིད་ཅན་ནོ། །དེ་ཡང་ཐམས་ཅད་དུ་སོང་བ་ཡིན་ཏེ། དེ་བས་ན་ཤེས་རབ་ཀྱི་ཕ་རོལ་ཏུ་ཕྱིན་པ་མཐའ་ཡས་པ་ཡིན་ལ། དེའི་དངོས་པོ་ཉིད་ནི་མཐའ་ཡས་པ་ཉིད་དེ། དེས་དེ་བཞིན་
གཤེགས་པ་ཐམས་ཅད་མཐའ་ཡས་པ་ཉིད་དུ་གྱུར་པ་ཡིན་ཏེ། འདིར་དེ་བཞིན་གཤེགས་པ་ནི་དེ་བཞིན་གཤེགས་པའི་རིགས་ཐམས་ཅད་དང་དེ་བཞིན་གཤེགས་པ་ཐམས་ཅད་ཡིན་ལ། དེ་རྣམས་ཀྱི་མཐའ་ཡས་པ་ཉིད་ནི་ནམ་མཁའི་ཁམས་ཐམས་ཅད་དུ་རྟག་ཏུ་ཞུགས་པའི་སྐུ་
དང་གསུང་དང་ཐུགས་རྡོ་རྗེ་ཉིད་དོ། །ཆོས་བདག་མེད་པའི་ཡེ་ཤེས་དང་། ཡེ་ཤེས་ལས་བྱུང་བའི་དེ་བཞིན་གཤེགས་པ་ཐམས་ཅད་དང་དེ་བཞིན་གཤེགས་པའི་རིགས་རྣམས་ཀྱི་གདུལ་བྱའི་དབང་གི་ཕྱིར་ཕྱི་མའི་མཐར་ཐུག་པ་མེད་པའི་ནམ་མཁའ་ཁྱབ་པར་མཛད་ཅེས་བྱ་བའི་དོན་ཏོ། །
ཤེས་རབ་ཀྱི་ཕ་རོལ་ཏུ་ཕྱིན་པ་ནི་འདིར་ནམ་མཁའ་དང་མཉམ་པའི་ཡེ་ཤེས་དང་། སྦྱིན་པའི་ཕ་རོལ་ཏུ་ཕྱིན་པའོ། །དེའི་མུ་མེད་པ་ཉིད་ནི་རྣམ་པར་ཐར་པའི་སྒོ་མཚན་མ་མེད་པའི་རང་བཞིན་ཏེ། དེས་དེ་བཞིན་གཤེགས་པ་ཐམས་ཅད་རྡོ་རྗེ་ཐམས་ཅད་མུ་མེད་པ་ཉིད་དུ་འགྱུར་ཏེ། རྡོ་རྗེ་ཡང་ཡིན་ལ། 

59-1-240b

ཐམས་ཅད་ཀྱང་ཡིན་པས་ན་རྡོ་རྗེ་ཐམས་ཅད་དེ། རིན་པོ་ཆེའི་རིགས་ཀྱི་ངོ་བོ་ཉིད་ཀྱི་སངས་རྒྱས་དང་། བྱང་ཆུབ་སེམས་དཔའ་རྣམས་སོ། །འདི་སྐད་ཅེས་སྟོན་པ་ཡིན་ཏེ། སྦྱིན་པའི་ཕ་རོལ་ཏུ་ཕྱིན་པ་ནི་ཐམས་ཅད་དུ་སོང་བ་ཡིན་ལ། སྦྱིན་པའི་ཕ་རོལ་ཏུ་ཕྱིན་པ་ཐམས་ཅད་དུ་སོང་བ་དེའི་ཕྱིར་དེའི་
ཚུལ་ལས་སྐྱེས་པའི་རྡོ་རྗེ་རིན་ཆེན་གྱི་རིགས་ནི་མུ་མེད་པར་གྱུར་པ་ཡིན་ཏེ། མཐའ་ཡས་པའི་རྒྱུ་ལས་བྱུང་བའི་ཕྱིར་རོ། །ཤེས་རབ་ཀྱི་ཕ་རོལ་ཏུ་ཕྱིན་པ་དུ་མ་ཉིད་ཅེས་བྱ་བ་ལ་འདིར་ཤེས་རབ་ཀྱི་ཕ་རོལ་ཏུ་ཕྱིན་པ་ནི་རང་བཞིན་གྱིས་དག་པའི་ཆོས་ཉིད་ཀྱི་ཡེ་ཤེས་སོ། །དེ་ཡང་དཀྱིལ་འཁོར་ལ་
སོགས་པ་རྣམ་པར་དག་པའི་ཡེ་ཤེས་ཀྱི་དབྱེ་བས་མཐའ་ཡས་པའི་རང་བཞིན་ཅན་ནོ། །དེ་བས་ན་དེ་ནི་དུ་མ་ཉིད་ཡིན་པའི་ཕྱིར་རོ། །ཤེས་རབ་ཀྱི་ཕ་རོལ་ཏུ་ཕྱིན་པ་དུ་མ་ཉིད་དེས་ཆོས་ཐམས་ཅད་དུ་མ་ཉིད་དུ་གྱུར་པ་ཡིན་ཏེ། ཆོས་ཀྱང་ཡིན་ལ་ཐམས་ཅད་ཀྱང་ཡིན་པས་ན་ཆོས་ཐམས་ཅད་དེ། པདྨའི་
རིགས་ཀྱི་ངོ་བོ་ཉིད་དོ། །དེ་རྣམས་ཀྱི་དཀྱིལ་འཁོར་གི་དེ་ཁོ་ན་ཉིད་ལ་སོགས་པའི་དབྱེ་བས་དུ་མ་ཉིད་དམ་སྣ་ཚོགས་པར་གྱུར་པ་ཡིན་ཏེ། རྣམ་པར་དག་པའི་ཡེ་ཤེས་སྣ་ཚོགས་པའི་རྒྱུ་ཉིད་ཀྱིས་ན་སྣ་ཚོགས་པའི་རྣམ་པར་དག་པའོ་ཞེས་བྱ་བའི་དོན་ཏོ། །ཤེས་རབ་ཀྱི་ཕ་རོལ་ཏུ་ཕྱིན་པ་མཐར་ཐུག་
པ་མེད་པ་ཉིད་པས་ཞེས་བྱ་བ་ལ་འདིར་ཤེས་རབ་ཀྱི་ཕ་རོལ་ཏུ་ཕྱིན་པ་ནི་རྣམ་པར་ཐར་པའི་སྒོ་རང་བཞིན་གྱིས་འོད་གསལ་བ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཉིད་དེ་དེ་ལས་ཐམས་ཅད་མཐར་ཐུག་པ་མེད་པ་ཉིད་དུ་གྱུར་པའོ། །དེ་ཡང་ལས་ཀྱང་ཡིན་ལ་ཐམས་ཅད་ཀྱང་ཡིན་པས་ན་
ལས་ཐམས་ཅད་དེ། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ལས་རྣམས་དང་ལས་ཀྱི་རིགས་ཀྱི་དཀྱིལ་འཁོར་ལ་སོགས་པའི་དེ་ཁོ་ན་ཉིད་དོ། །དེ་རྣམས་ཀྱི་མཐར་ཐུག་པ་མེད་པ་ནི། ཕྱི་མའི་མཐའི་མུར་ཐུག་པ་མེད་པར་སྤྲུལ་པ་རྣམས་ཀྱིས་འགྲོ་བ་རྣམས་ཀྱི་དོན་མཛད་
པར་གྱུར་པའོ། །གང་ལ་ལ་ཞེས་བྱ་བ་ནི་གོ་སླའོ། །དེ་སངས་རྒྱས་དང་། བྱང་ཆུབ་སེམས་དཔའ་སྤྱོད་པ་མཐར་ཐུག་པ་མེད་པའི་ཕྱིར་ཏེ་ཞེས་བྱ་བ་ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུ་དག་གིས་འགྲོ་བའི་དོན་གྱི་མཐར་ཕྱིན་ཏེ། ཤེས་རབ་ཀྱི་མཐར་ཐུག་པའི་

59-1-241a

རྟོགས་པ་ཐོབ་པའོ། །ཇི་ལྟ་ཞེ་ན། སྒྲིབ་པ་ཐམས་ཅད་ཟད་པའི་མཐར་ཕྱིན་པ་ཉིད་ཀྱིས་ཞེས་བྱ་བ་གསུངས་ཏེ། སྒྲིབ་པ་ཐམས་ཅད་ནི་བཤད་ཟིན་ཏོ། །དེ་རྣམས་ཀྱི་ཟད་པའི་མཐར་ཐུག་པ་ནི་ལྷག་མ་མེད་པར་སྤངས་པའོ། །དེའི་དངོས་པོ་ནི་སྒྲིབ་
པ་ཐམས་ཅད་ཟད་པའི་མཐར་ཐུག་པ་ཉིད་དེ་དེས་དེ་བཞིན་གཤེགས་པ་ཉིད་དམ་རྡོ་རྗེ་འཛིན་པ་ཉིད་མྱུར་དུ་འགྲུབ་པར་འགྱུར་རོ། །དེ་ནས་ཞེས་བྱ་བ་ནི་འདས་མ་ཐག་པ་སྟོན་པའི་ཐ་ཚིག་གོ། །དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་ནི་གོ་བར་ཟད་དོ། །
སེམས་ཅན་ཞེས་བྱ་བ་ལ་སོགས་པ་ལ། སེམས་ཅན་ཡང་ཡིན་ལ་ཆེན་པོ་ཡང་ཡིན་པས་ན། སེམས་ཅན་ཆེན་པོ་སྟེ་ཐོག་མ་དང་ཐ་མ་མེད་པའོ། །རིགས་ཐམས་ཅད་ཀྱི་མདོ་སྡེ་ཡིན་པས་ན་རྡོ་རྗེའི་མདོ་སྡེའོ། །དེ་བྱིན་གྱིས་བརླབས་པ་ནི་བརྟན་པར་བྱས་པ་སྟེ་སྔར་བཤད་
པའི་ཚུལ་གྱིས་སློབ་དཔོན་གཅིག་ནས་གཅིག་ཏུ་བརྒྱུད་པ་སྟེ། རྒྱུན་མི་འཆད་པར་བཞག་པའོ། །གང་གིས་བྱིན་གྱིས་བརླབས་ཤེ་ན། སངས་རྒྱས་རྡོ་རྗེ་འཛིན་ཀུན་གྱིས། །ཞེས་བྱ་བ་གསུངས་ཏེ། རྡོ་རྗེ་འཛིན་པ་ནི་རྡོ་རྗེ་སེམས་དཔའ་ལ་སོགས་པའི་བྱང་ཆུབ་སེམས་
དཔའ་རྣམས་ཏེ། དེ་དག་དང་ལྷན་ཅིག་ཏུ་བཞུགས་པ་ནས། སངས་རྒྱས་རྡོ་རྗེ་འཛིན་ཀུན་གྱིས། །ཞེས་བྱ་བ་སྟེ། དེས་བྱིན་གྱིས་བརླབས་པའོ། །སངས་རྒྱས་རྡོ་རྗེ་འཛིན་པ་དང་བཅས་པ་དེ་རྣམས་ཀྱིས་བྱིན་གྱིས་བརླབས་པས་ཅིར་འགྱུར་ཞེ་ན། འབྲས་བུ་ཡོད་པས་ཞེས་བྱ་བ་
གསུངས་ཏེ། གདུལ་བྱ་རྣམས་ཀྱི་བྱང་ཆུབ་སེམས་ལ་སོགས་པ་རྫོགས་པར་བྱེད་པ་ངེས་པ་ཉིད་ཡིན་པས་ན་འབྲས་བུ་ཡོད་པའོ། །འདིས་སེམས་ཅན་རྣམས་འདུལ་བས་འདུལ་བ་སྟེ། སངས་རྒྱས་ཉིད་དམ་རྡོ་རྗེ་འཛིན་པ་ཉིད་ལ་རབ་ཏུ་འཇོག་པ་ཞེས་བྱ་བའི་དོན་ཏོ། 
འདུལ་བ་ཡང་ཡིན་ལ་མཆོག་ཀྱང་ཡིན་པས་ན་འདུལ་བའི་མཆོག་གོ། །ཆོ་གའི་རྒྱལ་པོ་ཞེས་བྱ་བ་ལ་སོགས་པ་ནི་གོ་བར་ཟད་དོ། །སངས་རྒྱས་ཀུན་གྱིས་གསུངས་པ་བཞིན། །ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱིས་ཇི་སྐད་དུ་གསུངས་པའི་གཞུང་དང་

59-1-241b

དོན་སྒྲུབ་པར་བྱེད་ཅིང་། གང་ཞིག་འཛིན་པར་བྱེད་པ་དེ་དག་ནི་ཇི་སྐད་དུ་གསུངས་པའི་དངོས་གྲུབ་རྣམས་ཐོབ་པར་འགྱུར་ཏེ་གཞན་དུ་ནི་མ་ཡིན་ནོ། །དེ་སྐད་ཅེས་བྱ་བ་ནི་འདས་མ་ཐག་ཏུ་གསུངས་པའོ། །རྡོ་རྗེ་ཅན་ནི་རྡོ་རྗེ་སེམས་དཔའ་སྟེ། དེས་གསུངས་པའོ། །
ཀུན་གྱི་མཆོག་ནི་དམ་པར་འགྱུར་བའོ། །སངས་རྒྱས་ཐམས་ཅད་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའོ། །སྲས་བཅས་ཀུན་ནི་བྱང་ཆུབ་སེམས་དཔའི་འཁོར་ཀྱི་དཀྱིལ་འཁོར་དང་བཅས་པ་སྟེ། དེ་དག་ཐམས་ཅད་ཀྱིས་མངོན་པར་
བསྟོད་དོ་ཞེས་བྱ་བར་སྦྱར་རོ། །ཅིའི་ཕྱིར་རྡོ་རྗེ་སེམས་དཔས་བཤད་པ་ལ་མངོན་པར་བསྟོད་ཅེ་ན། གསང་བ་གྲུབ་ཕྱིར་ཞེས་བྱ་བ་གསུངས་ཏེ། ཕྱག་རྒྱ་ཆེན་པོ་དང་། གསང་སྔགས་ཀྱི་དངོས་གྲུབ་ནི། གསང་བའི་དངོས་གྲུབ་སྟེ། དེའི་དོན་ལ་མངོན་པར་བསྟོད་
པར་གྱུར་པའོ། །འདི་སྐད་དུ་སྟོན་པར་གྱུར་ཏེ། བཅོམ་ལྡན་འདས་རྡོ་རྗེ་སེམས་དཔས་དཀྱིལ་འཁོར་བཅོ་ལྔའི་སྒྲུབ་པའི་ཚིག་གང་ཞིག་གསུངས་པ་སྟེ། དེ་རྣམས་ནི་ཕྱག་རྒྱ་ཆེན་པོ་ལ་སོགས་པའི་གསང་བ་སྒྲུབ་པའི་ཕྱིར་དེ་བཞིན་གཤེགས་པ་བྱང་ཆུབ་
སེམས་དཔའི་འཁོར་ཀྱི་དཀྱིལ་འཁོར་དང་བཅས་པ་དེ་རྣམས་ཀྱིས་རྗེས་སུ་ཡི་རང་བར་མཛད་པ་སྟེ། སངས་རྒྱས་ཀྱི་གསུང་ཉིད་དུ་བསྟན་པའི་ཕྱིར་རོ། །དེ་ཡང་ཇི་ལྟ་བུ་ཞེ་ན། གདུལ་བྱ་རྣམས་ཀྱིས་རྡོ་རྗེ་སེམས་དཔས་གསུངས་པ་འདི་ནི་དེ་བཞིན་གཤེགས་པ་སྲས་དང་
བཅས་པ་རྣམས་ཀྱིས་སངས་རྒྱས་ཉིད་ཀྱི་གསུང་ཉིད་དུ་ཞལ་གྱིས་བཞེས་པར་མཛད་པ་ཡིན་ནོ་ཞེས་ངེས་པ་བསྐྱེད་ནས། འཇུག་པར་གྱུར་ན་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་རྣམས་འགྲུབ་པར་འགྱུར་བ་ཡིན་ནོ། །ཕྱི་དང་ནང་གི་ཡུལ་གཉིས་སུ་སྤངས་པའི་
དོན་ཡང་ཞེས་བྱ་བ་ནི་སྟོང་ཕྲག་བརྒྱ་ལ་སོགས་པ་དང་། ཚུལ་སྒོ་བརྒྱ་ལྔ་བཅུ་པར་གསུངས་ཏེ། སྨོས་པ་ཙམ་ལས་གསལ་བར་མ་བཤད་པ་རྣམས་སོ། །གསལ་བར་བཤད་པ་ཞེས་བྱ་བ་ནི་གསང་བའི་དོན་རྣམས་ཀྱང་འདིར་མ་གསང་བར་བསྟན་པའི་དོན་ཏོ། །ཤེས་

59-1-242a

རབ་ཀྱི་ཕ་རོལ་ཏུ་ཕྱིན་པའི་ཚུལ་ཞེས་བྱ་བ་ནི་ཇི་སྐད་དུ་གསུངས་པ་རྣམས་སོ། །དེ་རྫོགས་སོ་ཞེས་བྱ་བ་ནི་མཐར་ཕྱིན་པ་སྟེ། ཀུན་གཞིའི་རྣམ་པར་ཤེས་པ་ཡོངས་སུ་གྱུར་པའི་མཚན་ཉིད་ཅན་མེ་ལོང་ལྟ་བུའི་ཡེ་ཤེས་ཀྱི་ངོ་བོ་ཉིད་སྟོན་པའི་ཚུལ་དང་། ངོ་བོ་ཉིད་ཀྱི་
སྐུ་དང་། རྣམ་པར་ཐར་པའི་སྒོ་སྟོང་པ་ཉིད་དང་། བྱང་ཆུབ་ཀྱི་སེམས་ཆེན་པོ་དང་། ཕྱག་རྒྱ་ཆེན་པོ་སྟོན་པའི་ཚུལ་གྱིས་སོ། །རྒྱལ་བ་ཞེས་བྱ་བ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་གྱི་སྙིང་པོ་ཞེས་པ་འདི་ཁོ་ནར་ཟད་པས་འདི་མི་ཤེས་བཞིན་དོན་ཤེས་པར་སྨྲ་བར་བཀག་
པའོ། །བྱང་ཆུབ་སེམས་དང་རྒྱ་ཆེན་ཤེས་རབ་ཕ་རོལ་ཕྱིན་འབྱུང་བའི། །རྒྱུད་འདི་བཤད་བྱས་བདག་གིས་དགེ་བ་ཚད་མེད་གང་བསགས་ཤིང་། །ཤེས་རབ་ཕ་རོལ་ཕྱིན་ལ་ཀུན་དགའི་སྙིང་པོས་དགེ་བསྐྱེད་པས། །འཇིག་རྟེན་མ་ལུས་ཁྱབ་བདག་ཆེན་པོ་རྡོ་རྗེ་འཛིན་གྱུར་ཅིག །
དཔལ་མཆོག་དང་པོ་ལས་གསང་བའི་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ། དུམ་བུ་དང་པོའི་ཕྱག་རྒྱ་བཤད་པ་རྫོགས་སོ།།      །།སྔགས་དགོངས་སྒྲ་ཡི་ཚིག་དོན་རྟོགས་དཀའ་ལས། །བློ་གྲོས་བརྩོན་སོགས་རྒྱུ་དང་མི་ལྡན་ཞིང་། །དོན་བཞིན་སྒྲུབ་པ་ཕལ་ཆེར་
འདས་པ་ན། །ནུས་གཞན་བདག་ལ་སྤྲོ་བའི་སེམས་མེད་ཀྱང་། །མྱ་ངན་གནས་ཀྱི་དཔག་བསམ་ཤིང་འདྲ་ཡི། །སྙིགས་དུས་མཐའ་འཁོབ་གནས་སུ་རྗེ་རྒྱལ་འཁྲུངས། །ཆོས་དོན་ལྷུར་མཛད་ཀུན་ལ་ཐུགས་བརྩེ་བས། །དོན་འདི་བསྒྲུབ་ཕྱིར་བླ་མའི་བཀའ་ཡིས་བསྐུལ། །རྗེ་ཡི་བཀའ་
ལས་མི་འདའ་གཙོར་བགྱིས་ཏེ། །བཀའ་དྲིན་བླན་ཞིང་ཅི་ནས་མཉེས་བྱ་དང་། །ཡོངས་ལ་ཕན་དགོངས་རྒྱ་ཆེན་བསྒྲུབ་པའི་ཕྱིར། །སྔོན་མཁས་རྗེས་འབྲངས་རྩོལ་བ་གཏུགས་ཏེ་བསྒྱུར། །དེ་བས་ཆོས་རྗེས་འབྲང་བའི་དམ་པ་རྣམས། །ཡང་དག་དོན་བཙལ་རྗེས་སུ་མོས་བློ་ཡིས། །ཆོས་མཆོག་
བཀའ་དྲིན་དམ་པ་ཤེས་བྱས་ལ། །དོན་བཞིན་དཔྱད་པས་བཀའ་དྲིན་བསམ་པའི་རིགས། །རྒྱ་གར་གྱི་མཁན་པོ་ཨཱ་ཙཱརྱ་ཤྲདྡྷྲ་ཀ་ར་བརྨྨ་དང་། ཀ་མ་ལ་གུཔྟ་དང་། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །།

59-1-242b

empty page