71-1-1a



71-1-1b

༄༅༅།  །རྒྱ་གར་སྐད་དུ། དྷྱཱ་ནོཏྟ་ར་པ་ཊ་ལ་ཊཱི་ཀཱ། བོད་སྐད་དུ། བསམ་གཏན་ཕྱི་མ་རིམ་པར་ཕྱེ་བ་རྒྱ་ཆེར་བཤད་པ། བམ་པོ་དང་པོ། དཔལ་རྡོ་རྗེ་སེམས་དཔའ་རྣལ་འབྱོར་ཆེན་པོའི་རྣལ་འབྱོར་
པ་ལ་ཕྱག་འཚལ་ལོ། །རྣམ་པར་སྣང་མཛད་རྒྱལ་མཆོག་དེ་ཉིད་གསུམ་རིག་པ། །རིག་སྔགས་ཚོགས་ཀུན་ཏིང་འཛིན་དམིགས་ལ་ཕྱག་འཚལ་ནས། །ལུང་དང་བླ་མས་ངེས་པར་བསྟན་པའི་ཚུལ་དག་གིས། །
བསམ་གཏན་ཕྱི་མ་རིམ་པར་ཕྱེ་བས་ཅུང་ཟད་དགྲོལ། །དེ་ལ་རིམ་པར་ཕྱེ་བ་འདི་ལ་དོན་རྣམ་པ་བཅུ་གཉིས་བསྟན་པ་ནི་འདི་ལྟ་སྟེ། རིག་སྔགས་དང་གསང་སྔགས་ཀྱི་བཟླས་བརྗོད་དང་། བསམ་གཏན་དང་། 
རྣལ་འབྱོར་གྱི་མཚན་ཉིད་རིག་སྔགས་དང་གསང་སྔགས་ཀྱི་ཐབས་ཆེན་པོའི་བདག་ཉིད་ཆེ་བ་བསྟན་པའི་དོན་ནི་དོན་དང་པོ་སྟེ། སློབ་མ་རྣམས་དེ་ལ་ནན་ཏན་དུ་བྱེད་འདོད་པར་བྱ་བའི་ཕྱིར། དེ་ནས་ཡེ་ཤེས་ཀུན་རྫོགས་
པ། །ཞེས་བྱ་བ་ལ་སོགས་པ་ཚིགས་སུ་བཅད་པ་གསུམ་གྱིས་བསྟན་པར་རིག་པར་བྱའོ། །རིག་སྔགས་དང་གསང་སྔགས་ཀྱི་ཐབས་ཆེན་པོ་དེ་ཉིད་ཀྱི་ཡུལ་རབ་ཏུ་ཕྱེ་སྟེ། རྣམ་པ་ཐམས་ཅད་བཤད་པར་ཁས་

71-1-2a

འཆེས་པའི་དོན་ནི་གཉིས་པ་སྟེ། ཡུལ་སོ་སོར་ངེས་པ་ལ་ཀུན་རྫོགས་པར་མ་བཤད་དུ་དོགས་པ་བསལ་བའི་ཕྱིར། ཆོ་ག་གང་དང་གང་དག་གིས། །བསམ་གཏན་ལས་ལ་གང་གནས་པ། །ཞེས་བྱ་བ་ལ་སོགས་པ་
ཚིགས་སུ་བཅད་པ་གཅིག་གིས་བསྟན་པར་རིག་པར་བྱའོ། །དེ་ལ་ནན་ཏན་དུ་བྱ་བའི་དགོས་པ་བསྟན་པའི་ཕྱིར་གསུམ་པ་སྟེ། དེའི་འབྲས་བུ་མེད་པར་དོགས་པ་བཟློག་པའི་ཕྱིར། གསང་སྔགས་བསམ་གཏན་ཞེས་བྱ་བ། །ཞེས་བྱ་བ་ལ་
སོགས་པ་ཚིགས་སུ་བཅད་པ་གསུམ་གྱིས་བསྟན་པར་རིག་པར་བྱའོ། །རིག་སྔགས་དང་གསང་སྔགས་ཀྱི་ཐབས་ཆེན་པོ་དེ་ཉིད་ཀྱི་རང་བཞིན་བསྟན་པའི་དོན་ནི་བཞི་པ་སྟེ། དེ་ལ་མཁས་པར་བྱ་བའི་ཕྱིར། །ལྷ་ཡི་སྐུ་ཡི་གནས་དེ་ལ། །ཞེས་བྱ་
བ་ལ་སོགས་པའི་ཚིགས་སུ་བཅད་པ་ནས། ཡན་ལག་བཅུ་ཡི་ཆོ་ག་ལས། །ཞེས་བྱ་བའི་མཐའི་བར་དུ་རིག་པར་བྱའོ། །དེ་བཞིན་དུ་སྔོན་གྱི་ལས་ཀྱི་བག་ཆགས་ལངས་པའི་དབང་ངམ། མི་མཐུན་པ་མ་སྤངས་པས་ཉེས་པ་གང་འབྱུང་བ་
ལས་གསང་སྔགས་གཞན་དུ་ཕྱོགས་པར་འགྱུར་ཏེ། དེ་བསྟན་པའི་དོན་ནི་ལྔ་པ་སྟེ། དེ་དག་ཤེས་ནས་ཡོངས་སུ་སྤང་བའི་ཕྱིར། མ་དད་པ་དང་སྙོམ་པ་དང་། །བཀྲེས་སྐོམ་ཟིལ་གནོན་དེ་བཞིན་ཏེ། །ཞེས་བྱ་བ་ལ་སོགས་པའི་ཚིགས་སུ་

71-1-2b

བཅད་པ་ནས། གསང་སྔགས་དེ་ལས་གཞན་དུ་ཕྱོགས། །ཞེས་བྱ་བའི་མཐའི་བར་དུ་རིག་པར་བྱའོ། །དེ་ནས་གཞན་ཡང་ཡོན་ཏན་གང་དག་འབྱུང་བ་ལ། གསང་སྔགས་སྤྱན་རས་གཟིགས་ཀྱིས་འཚོ་བའི་བདག་ཉིད་མངོན་དུ་གྱུར་པ་དེ་བསྟན་པའི་དོན་ནི་དྲུག་པ་སྟེ། གང་ཞིག་ཀུན་
དུ་ཞེན་པ་དང་། །ཞེས་བྱ་བ་ལ་སོགས་པ་ཚིགས་སུ་བཅད་པ་གཅིག་གིས་བསྟན་པར་རིག་པར་བྱའོ། །དེ་བཞིན་དུ་གསང་སྔགས་སྤྱན་རས་གཟིགས་ཀྱིས་འཚོ་བའི་མཚན་ཉིད་མངོན་དུ་གྱུར་ནས་སྒྲུབ་པ་པོ་ལ་ཡོན་ཏན་གང་འབྱུང་བ་དེ་བསྟན་པའི་དོན་ནི་བདུན་པ་སྟེ། ལྷ་དང་ལྷ་མིན་
སེམས་ཅན་ནི། །དབང་ཕྱུག་ཡེ་ཤེས་འཇུག་པ་རྣམས། །ཞེས་བྱ་བ་ལ་སོགས་པའི་ཚིགས་སུ་བཅད་པ་བཞིས་བསྟན་པར་ཤེས་པར་བྱའོ། །དེ་ནས་ཡང་མངོན་དུ་གྱུར་པའི་ཚེ་ཡོན་ཏན་བྱུང་ན་ལུས་དང་སེམས་དྲེགས་པ་སྐྱེ་སྟེ།  བཟླས་བརྗོད་དང་བསམ་གཏན་ལ་སོགས་པ་ལ་མི་འཛིན་སྲིད་
དེ། དེ་བས་ན་དེ་དགག་པའི་ཕྱིར་བརྒྱད་པ་སྟེ། གསང་སྔགས་ལྷ་ཡི་མངོན་ཕྱོགས་པའི། །ཞེས་བྱ་བ་ལ་སོགས་པའི་ཚིགས་སུ་བཅད་པ་གཅིག་གིས་བསྟན་ཏོ། །དེ་བཞིན་དུ་མངོན་དུ་ཕྱོགས་པའི་ཚེ་ན་བཟླས་བརྗོད་ལ་སོགས་པའི་དགེ་བ་ལ་འབད་པའི་མཚན་ཉིད་ལ་ཞེན་པའི་ཕན་
ཡོན་བསྟན་པའི་དོན་ནི་དགུ་པ་སྟེ། མངོན་དུ་ཕྱོགས་པའི་གནས་ཐོབ་ན། །ཞེས་བྱ་བ་ལ་སོགས་པའི་ཚིགས་སུ་བཅད་པ་གསུམ་གྱིས་བསྟན་ཏོ། །དེ་ནས་གཞན་ཡང་ཇི་སྐད་བཤད་པའི་མཚན་ཉིད་ལ་ཞེན་པའི་ཡུལ་བསྟན་པའི་ཕྱིར་བཅུ་པ་སྟེ། སྤྲོ་ཞིང་སྟོབས་དང་ལྡན་པ་ནི། །ཞེས་བྱ་
བ་ལ་སོགས་པའི་ཚིགས་སུ་བཅད་པ་གཅིག་གིས་བསྟན་ཏོ། །དེ་བཞིན་དུ་གསང་སྔགས་ཉེ་བར་གྱུར་པའི་གནས་སྐབས་ཀྱི་རྒྱུར་གྱུར་པ་བཟླས་བརྗོད་དང་བསམ་གཏན་ལ་སོགས་པ་གོམས་པ་ལས་བྱུང་བ་སྒྲུབ་པ་པོའི་ཡོན་ཏན་བསྟན་པའི་ཕྱིར་བཅུ་གཅིག་པ་སྟེ། གནས་དང་ཟས་དང་གྲང་བ་དང་། །
ཞེས་བྱ་བ་ལ་སོགས་པའི་ཚིགས་སུ་བཅད་པ་བཞིས་བསྟན་པར་ཤེས་པར་བྱའོ། །དེ་བཞིན་དུ་གསང་སྔགས་ཉེ་བར་གྱུར་པ་དང་། གསང་སྔགས་གྲུབ་པའི་ཕན་ཡོན་དང་འབྲས་བུ་རྣམ་པར་ཕྱེ་སྟེ་བསྟན་པའི་ཕྱིར་བཅུ་གཉིས་པ་སྟེ།  ནམ་ཞིག་ཉེ་བར་གྱུར་པ་ན། །ཞེས་བྱ་བ་ལ་

71-1-3a

སོགས་པ་ཚིགས་སུ་བཅད་པ་གསུམ་གྱིས་བསྟན་པར་ཤེས་པར་བྱ་སྟེ་དེ་དག་ཐམས་ཅད་ནི་བསྡུས་པའི་དོན་ཏོ།    །ད་ནི་དངོས་པོ་དེ་དག་གི་སོ་སོའི་དོན་གྱི་ཡན་ལག་རྣམ་པར་ཕྱེ་སྟེ་བརྟག་པའི་སྐབས་དབྱེའོ། །དེ་ལ་བཟླས་བརྗོད་དང་། བསམ་གཏན་དང་། རྣལ་
འབྱོར་གྱི་མཚན་ཉིད་དེ་རིག་སྔགས་དང་གསང་སྔགས་ཀྱི་ཐབས་ཀྱི་མན་ངག་མི་མཐུན་པའི་ཕྱོགས་དང་གཉེན་པོར་བཅས་ཤིང་ཕན་ཡོན་དང་བཅས་པ་རྡོ་རྗེ་འཛིན་ལས་ཚངས་པའི་མེ་ཏོག་ཅེས་བྱ་བས་ཐོས་ནས་ཚངས་པ་མི་འཆི་བ་ཞེས་བྱ་བ་ལ་བསྟན་པར་བསམས་པའི་ཚིག་གིས་འདི་ལྟ་སྟེ། 
དེ་ནས་ཡེ་ཤེས་ཀུན་རྫོགས་པ། །རིག་སྔགས་གསང་སྔགས་ཐབས་ཆེན་དེ། །ཞེས་བྱ་བ་ལ་སོགས་པའོ། །དེ་ལ་རིག་སྔགས་དང་གསང་སྔགས་ཀྱི་ཐབས་ཆེན་པོ་བཤད་པར་བྱའོ་ཞེས་ཚིགས་སུ་བཅད་པ་གསུམ་བསྟན་པ་དང་བཤད་པར་བྱའོ་ཞེས་བྱ་བ་འདི་དང་འབྲེལ་ཏོ། །དེ་ནས་ཞེས་བྱ་
བའི་ཚིག་ནི་སྐབས་ཀྱི་དེ་མ་ཐག་པ་སྟེ། གང་གི་ཕྱིར་འདི་ནི་བྱ་བའི་རྒྱུད་འཕགས་པ་རྡོ་རྗེ་གཙུག་ཏོར་གྱི་ཕྱོགས་གཅིག་པ་སྟེ། དེར་ཡང་འདིའི་སྔོན་རོལ་དུ་དོན་གཞན་ཡང་འདས་པའི་ཕྱིར་རོ། །དེ་ཞེས་བྱ་བ་འདི་ནི་རིག་སྔགས་དང་། གསང་སྔགས་ཀྱི་ཐབས་ཆེན་པོ་ཞེས་བྱ་བ་འདི་དང་འབྲེལ་ཏོ། །
སྔར་བཤད་པ་ལ་སྙེགས་པའི་ཚིག་དེ་ཞེས་བྱ་བ་འདིས་ནི་རིག་སྔགས་དང་གསང་སྔགས་ཀྱི་ཐབས་ཆེན་པོ་བསྟན་པར་ཐོག་མ་ཉིད་དུ་ཉན་པ་པོས་གསོལ་བ་བཏབ་པར་སྟོན་པ་སྟེ། དེས་འདི་སྐད་སྨྲས་པར་འགྱུར་རོ། །ཁྱོད་ཀྱིས་རིག་སྔགས་དང་གསང་སྔགས་ཀྱི་ཐབས་སྔར་གང་དྲིས་པ་དེ་བཤད་དོ་ཞེས་བྱ་
བའི་དོན་ཏོ། །ད་ནི་རིག་སྔགས་དང་གསང་སྔགས་ཀྱི་ཐབས་དེ། དེ་ཉིད་ཡེ་ཤེས་ཀུན་རྫོགས་པ། །ཞེས་བྱ་བ་ལ་སོགས་པའི་ཚིག་གིས་བྱེ་བྲག་ཏུ་བསྟན་ཏེ། དེ་ལ་ཡེ་ཤེས་ཀུན་རྫོགས་པ་ཞེས་བྱ་བ་ཡེ་ཤེས་ནི་ཡོངས་སུ་དག་པའི་སེམས་ཀྱི་ཁྱད་པར་གྱི་མཚན་ཉིད་དོ། །དེ་ཀུན་དུ་རྣམ་པ་ཐམས་
ཅད་དུ་གང་གོམས་པས་ཀུན་དུ་རྫོགས་པར་འགྱུར་བ་དེ་ནི། ཡེ་ཤེས་ཀུན་རྫོགས་ཞེས་བྱའོ། །དེ་བས་ན་འདི་ལྟར་དགོངས་ཏེ། སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་དང་རང་སངས་རྒྱས་རྣམས་ཀྱི་ཡེ་ཤེས་ཡོངས་སུ་དག་པ་གང་ཡིན་པ་དེ་ཡང་མངོན་དུའམ། བརྒྱུད་དེ་འོག་

71-1-3b

ནས་འཆད་པའི་མཚན་ཉིད་རིག་སྔགས་དང་གསང་སྔགས་ཀྱི་ཐབས་གོམས་པ་ལ་འགྲུབ་སྟེ། དེ་བས་ན་འདིས་ཀྱང་འཁོར་བ་ལས་རྣམ་པར་གྲོལ་བའི་མཚན་ཉིད་ཉོན་མོངས་པ་དང་ཤེས་བྱའི་སྒྲིབ་པ་ལས་རྣམ་པར་ཐར་པའི་རྒྱུ་ཡིན་པས་དེ་བསྟན་ཏོ། །འདི་ལྟར་ལྷའི་ཆོས་ཀྱི་སྐུ་གོམས་པར་བྱེད་
པའི་མཚན་ཉིད་རིག་སྔགས་ཀྱི་ཐབས་ཏེ། འཁོར་བ་ལས་རྣམ་པར་ཐར་པའི་རྒྱུ་ཡིན་པར་འོག་ནས། སྒྲ་མཐར་ཐར་པ་སྟེར་བ་ཉིད། །ཅེས་དངོས་སུ་འཆད་དོ། །ཡང་ན་ཡེ་ཤེས་ཀྱིས་ཀུན་རྫོགས་པས་ན་ཡེ་ཤེས་ཀུན་རྫོགས་པའོ། །དེ་ལ་ཡེ་ཤེས་ཡོངས་སུ་དག་པའི་སེམས་གཉིས་
སུ་མེད་པ་རྣམ་པ་མེད་པའི་དེ་ཉིད་ལས་ཡེ་ཤེས་ཞེས་བྱ་སྟེ། དེས་ཀུན་དུ་ཡོངས་སུ་རྫོགས་ཤིང་། ཡོངས་སུ་རྫོགས་པར་བྱ་བས། རྣམ་པ་ཐམས་ཅད་དུ་རྟོགས་ནས་བཤད་པ་ན་དེ་སྐད་ཅེས་བྱའོ། །འདི་རྣམ་པ་ཐམས་ཅད་དུ་ཡོངས་སུ་རྫོགས་པ་ཡང་བཟླས་བརྗོད་ཀྱི་ཡན་ལག་བཞི་དང་། 
མེ་ལ་གནས་པ་ལ་སོགས་པའི་སྒྲའི་སྦྱོར་བའི་མཚན་ཉིད་རིག་སྔགས་དང་གསང་སྔགས་ཀྱི་ཐབས་ཀྱི་རང་བཞིན་ཡན་ལག་ཅི་ཙམ་གྱིས་དངོས་གྲུབ་མཆོག་དང་འབྲིང་ལ་སོགས་པ་ཐོབ་པར་རིག་སྔགས་དང་གསང་སྔགས་དང་སྦྱར་དགོས་པ་དེ་ཙམ་གྱི་ཡན་ལག་རྣམས་བསྟན་པས་ཡོངས་སུ་
རྫོགས་པར་རིག་པར་བྱའོ། །འདི་ལྟར་སེམས་ཡོངས་སུ་དག་པའི་བྱེ་བྲག་ལ་གནས་པའི་རྣལ་འབྱོར་པ་རྣམས་སྨྲ་བ་ལ་སོགས་པ་མི་སྲིད་མོད་ཀྱི། འོན་ཀྱང་དེའི་དབང་དང་། སྔོན་གྱི་སྨོན་ལམ་གྱི་ཤུགས་ཀྱིས་འདུལ་བ་རྣམས་ཇི་ལྟར་འདོད་པར། རིག་སྔགས་དང་གསང་སྔགས་ཀྱི་
ཐབས་སྟོན་པའི་མདོ་སྡེ་དང་རྒྱུད་དང་ཆོ་ག་ཞིབ་མོ་ཉིད་ལ་སོགས་པའི་ངེས་པའི་ཚིག་རྣམས་སྣང་བ་སྲིད་པས་ན། ཡོངས་སུ་དག་པའི་ཡེ་ཤེས་ཀུན་དུ་རྫོགས་པ་ཞེས་བྱའོ། །ཡང་ན་འཇིག་རྟེན་ལས་འདས་པ་རྣམ་པ་མེད་པའི་ཡེ་ཤེས་ཀྱི་ཕྱི་ནས་ཐོབ་པ། དག་པ་འཇིག་རྟེན་པའི་ཡེ་ཤེས་
ཀྱིས་བཤད་པ་སྲིད་པས་ན། ཡེ་ཤེས་ཀུན་དུ་རྫོགས་པ་ཞེས་གསུངས་སོ། །འདིས་ཀྱང་སོ་སོར་རང་གིས་རིག་པའི་ཡེ་ཤེས་ཀྱི་མཐུས། དེ་དག་བཤད་པར་བྱ་བ་ཡིན་གྱི་རྟོག་གེ་པའི་དཔྱོད་པས་ཆུད་པའི་ཤེས་པས་བསྟན་པར་བྱ་བ་ནི་མ་ཡིན་ནོ་ཞེས་བསྟན་ཏོ། །དེ་བས་ན་འདིར་ཚིག་  

71-1-4a

བཤད་པའི་དོན། བཅོམ་ལྡན་འདས་རྣམས་ཀྱིས་འདི་ལྟར་བསྟན་པར་ཡང་མངོན་ཏེ། འདི་ལྟ་སྟེ་ཡེ་ཤེས་ཀྱིས་རྣམ་པ་ཐམས་ཅད་ཀུན་དུ་རྫོགས་ཤིང་ཡེ་ཤེས་ཀྱིས་ཐུགས་སུ་ཆུད་ནས་ཡོངས་སུ་རྫོགས་པའི་རིམ་པས་བསྟན་པའོ་ཞེས་བྱ་བས་མངོན་ནོ། །ཡེ་
ཤེས་ཀུན་རྫོགས་པ་དེ་ཡང་གང་ཞེ་ན། གསུངས་པ་རིག་སྔགས་དང་གསང་སྔགས་ཀྱི་ཐབས་ཆེན་པོ་ཞེས་བྱ་བའོ། །དེ་ལ་དེ་ནི་རིག་སྔགས་དང་གསང་སྔགས་དག་གི་ཐབས་ཀྱང་དེ་ཡིན་ལ། ཆེ་བ་ཡང་ཡིན་པས་ན། རིག་སྔགས་དང་སང་སྔགས་ཀྱི་ཐབས་ཆེན་པོའོ་
ཞེས་བྱའོ། །དེ་ལ་རི་སྔགས་ནི་བུད་མེད་ཀྱི་གཟུགས་དང་དབྱིབས་ཀྱི་ལྷ་དང་། དེ་སྟོན་པའི་སྒྲ་དང་། ཕྱག་རྒྱ་ལ་སོགས་པའོ། །དེ་ལས་བཟློ་པ་ནི་གསང་སྔགས་ཀྱི་མཚན་ཉིད་དོ། །རིག་སྔགས་ལ་སོགས་པ་དེ་དག་ཐམས་ཅད་ཀྱང་ཀུན་རྫོབ་དང་དོན་དམ་པའི་བདེན་པ་
ལ་གནས་པའི་བྱེ་བྲག་གིས་གཉིས་སུ་མེད་པའི་ཏིང་ངེ་འཛིན་དང་། གཟུགས་དང་ཕྱག་རྒྱ་དང་། ཚིག་དང་ཡི་གེ་དང་སྒྲ་དང་། རྣམ་པ་དང་བཅས་པ་དང་། རྣམ་པ་མེད་པའི་ཡེ་ཤེས་དང་། ཆོས་ཀྱི་དབྱིངས་ཀྱི་རང་བཞིན་ཏེ། དེ་ལ་དེ་དག་གི་ཆོས་ཀྱི་དབྱིངས་ཀྱི་ཡེ་ཤེས་
ཀྱི་རང་བཞིན་གང་ཡིན་པ་དེ་ནི་སོ་སོར་རང་གིས་རིག་པ་སྟེ། བྱིན་གྱི་རླབས་ཀྱིས་ཀྱང་འདུལ་བའི་སྤྱོད་ཡུལ་དུ་ཉེ་བར་བསྟན་དུ་མི་རུང་ངོ་། །གང་ཡང་དེ་དག་གི་གཟུགས་ཀྱི་སྐུ་ལ་སོགས་པར་སྣང་བའི་གཟུགས་ཀྱི་བདག་ཉིད་རང་བཞིན་དེ་དག་ནི་རྣམ་པར་མི་རྟོག་པའི་ཡེ་ཤེས་ལ་གནས་པ་རྣམས་
ཀྱི་སྔོན་གྱི་སྨོན་ལམ་གྱི་ཤུགས་ཀྱིས་འདུལ་བའི་འགྲོ་བ་མང་པོ་ཐམས་ཅད་ཀྱི་རྒྱུད་ལ་སྣང་བར་འགྱུར་བས། དོན་བྱེད་པར་ཤེས་པར་བྱའོ། །རྣམ་པར་མི་རྟོག་པའི་ཡེ་ཤེས་ཀྱི་རང་བཞིན་ལ་གནས་པ་རྣམས། སྔོན་གི་སྨོན་ལམ་གྱི་ཤུགས་ཀྱིས་སེམས་ཅན་གྱི་དོན་མཛད་དོ་ཞེས་བྱ་བའི་དོན་འདི་
ཡང་ངེས་པར་ཁས་བླང་བར་བྱའོ། །གཞན་དུ་ན་རྣམ་པར་རྟོག་པ་དང་བཅས་པའི་ཤེས་པ་མངོན་དུ་བཏང་ཞིང་བྱེད་པ་རྣམས་ནི། མི་ཕལ་པ་རྣམས་ལྟར་རྣམ་པ་ཐམས་ཅད་དུ་སེམས་ཅན་གྱི་དོན་བྱེད་པར་མི་སྲིད་པར་འགྱུར་རོ། །ཡང་ན་བསམ་གཏན་པ་རྣམས་ཀྱི་ཡུལ་ནི་བསམ་གྱིས་མི་ཁྱབ་སྟེ། 

71-1-4b

རྣམ་པར་རྟོག་པ་དང་བཅས་པའི་ཡེ་ཤེས་ལ་གནས་པ་རྣམས་ཀྱང་གདུལ་བྱ་རྣམས་ལ་དེ་བཞིན་དུ་སྣང་བ་མི་ཕལ་པ་བཞིན་དུ་ལྷུན་གྱིས་གྲུབ་པ་ཉིད་དུ་བསྐྱེད་དོ། །ཡང་འདི་བདག་ཅག་ལྟ་བུའི་ཡུལ་མ་ཡིན་ཏེ། བསམ་པ་འདིས་ཅི་ཞིག་བྱ་སྟེ་གཏང་བར་བྱའོ། །རིག་སྔགས་དང་གསང་སྔགས་དག་
གི་ངེས་པའི་ཚིག་ཀྱང་བཅོམ་ལྡན་འདས་ཉིད་ཀྱིས་མཛད་པ་ནི། འདིས་ཉོན་མོངས་པ་རྣམས་འཇོམས་པ་དང་། དོན་ཕུན་སུམ་ཚོགས་པ་ཐོབ་པའམ། འདིས་ཇི་ལྟར་གྱུར་པའི་དངོས་པོ་ཡང་དག་པ་ཇི་ལྟ་བ་བཞིན་རིག་པས་ན་རིག་པ་སྟེ། ཇི་ལྟར་སྲིད་པར་ལྷ་རྣམ་པ་དྲུག་རང་གི་རང་བཞིན་ལ་རིག་
སྔགས་ཞེས་བྱའོ། །ཤེས་པ་དང་སྐྱོབ་པ་དང་ལྡན་པའམ། གསང་སྟེ་བརྗོད་པའི་ཕྱིར་གསང་སྔགས་ཏེ། རང་བཞིན་སྔ་མ་ཡིན་ནོ། །ཐབས་ཤེས་ཞེས་བྱ་བ་ནི་ཀ་ལ་ཞེས་བྱ་སྟེ། ཀ་ལ་ཞེས་བྱ་བའི་སྒྲ་ཡང་ཁ་ཅིག་ཏུ་ནི་ཡན་ལག་ལ་བྱ་བ་ཡང་ཡོད་དེ། དཔེར་ན་ལྷའི་ཆ་ཤས་རྫོགས་པར་
བྱ་བ་ལྟ་བུ་སྟེ། ལྷ་ཡན་ལག་དང་བཅས་པར་བྱ་བར་ཤེས་པར་འགྱུར་རོ། །དེ་བཞིན་དུ་ཟླ་བའི་ཆ་ཤས་ཞེས་བྱ་བ་ལྟ་བུ་སྟེ། ཁ་ཅིག་ཏུ་ནི་ཡན་ལག་ཉི་ཚེ་ཙམ་ལ་ཡང་བྱའོ། །དེ་བཞིན་དུ་ལྷ་ཆ་ཤས་དང་བཅས་པ་ཞེས་བྱ་བ་འདིར་ཡང་། སྒྲའི་ཡན་ལག་དང་། གཟུགས་ཀྱི་ཡན་ལག་
རྣམས་དང་ལྡན་ནོ་ཞེས་བྱ་བར་ཤེས་པར་བྱའོ། །ཀ་ལ་ཞེས་བྱ་བའི་སྒྲ་ཁ་ཅིག་ཏུ་ནི་དངོས་པོ་འགའ་ཞིག་མངོན་པར་སྒྲུབ་པར་བྱེད་པ་དང་། རང་གི་བྱ་བ་ལ་སྦྱོར་བར་བྱེད་པ་ལ་ཡང་བྱ་སྟེ། དཔེར་ན་མདའ་གཞུའི་མཚོན་ཆ་ལ་སོགས་པའི་ཐབས་ཀྱི་སྒྲ་ལྟ་བུ་སྟེ། དེ་ཡང་གང་གི་མདའ་གཞུ་ལ་
སོགས་པ་སྒྲུབ་ཅིང་། རང་གི་བྱ་བ་ལ་སྦྱོར་བ་དེར་མངོན་པར་སྒྲུབ་པར་བྱེད་པ་དང་། བྱ་བ་ལ་སྦྱོར་བ་དག་ཡིན་ནོ། །འདི་ལྟར་མདའ་གཞུའི་ཐབས་ཤེས་སོ་ཞེས་སྨྲས་ན་མདའ་གཞུ་ལ་སོགས་པ་བྱེད་པའི་ཆོ་ག་དང་དེ་འཕེན་པའི་ཆོ་ག་ཤེས་སོ་ཞེས་བྱ་བར་མངོན་ན། ཀ་ལ་ཞེས་བྱ་བའི་སྒྲ་ཁ་
ཅིག་ཏུ་ནི་རང་གི་བྱ་བ་ལ་སྦྱོར་བར་བྱེད་པ་ཉིད་ལ་བྱ་སྟེ། དཔེར་ན་གླང་པོ་ཆེའི་ཐབས་ཤེས་ཞེས་བྱ་བ་ལྟ་བུའོ། །དེར་ཡང་ཆོ་ག་གང་གིས་གླང་པོ་རང་གི་བྱ་བ་ལ་སྦྱོར་བར་བྱེད་པ་དེ་ཉིད་ལ་ཐབས་ཞེས་བྱའི་གླང་པོ་ཆེ་སྐྱེད་པར་བྱ་བ་ལ་ནི་མི་བྱའོ། །དེ་ལྟར་ན་ཀ་ལ་ཞེས་བྱ་བའི་སྒྲ་ནི་དེ་ལ་སོགས་པའི་

71-1-5a

དོན་རྣམ་པ་དུ་མ་ལ་སྙེགས་པས་སྐབས་དང་སྦྱར་ཞིང་གཟུང་བར་བྱའོ། །དེ་ལ་འདིར་རིག་སྔགས་དང་གསང་སྔགས་དག་གི་ཐབས་ཆེན་པོ་ཞེས་བྱ་བ་དེ་ནི་རིག་སྔགས་དང་གསང་སྔགས་དག་རང་གི་ལས་ལ་སྦྱོར་བར་བྱེད་པ་ཉིད་ལ་ཐབས་ཀྱི་ཚིག་ཏུ་གདགས་ཀྱི་ཡན་ལག་
དང་སྐྱེད་པའི་བྱེད་པ་ལ་ནི་མི་བྱའོ། །འདི་ལྟར་རིག་སྔགས་དང་གསང་སྔགས་ཀྱི་ཐབས་ཆེན་པོ་རྣམ་པར་དབྱེ་བ་ཡང་། ཡན་ལག་བཞིའི་བཟླས་བརྗོད་ཀྱི་ཆོ་ག་དང་། མེ་ལ་གནས་པ་ལ་སོགས་པ་སྒྲའི་ཆོ་གས་མཛད་དོ། །བཟླས་བརྗོད་ལ་སོགས་པ་འདི་དག་ཀྱང་རིག་སྔགས་དང་གསང་
སྔགས་རྣམས་ཀྱི་རང་གི་ལས་ལ་སྦྱོར་བ་ཉིད་དུ་དམ་པ་རྣམས་ཀྱིས་བཤད་དེ། རིག་སྔགས་ལ་སོགས་པ་བསྐྱེད་པ་ནི་མ་ཡིན་ནོ། །ཕྲ་བ་ཞེས་བྱ་བ་ནི་དེ་ཡོད་ཀྱི་ལས་ཀྱིས་ཤེས་པར་བྱ་བས་ན་ཕྲ་བ་སྟེ། འདི་ལྟར་རང་གི་སེམས་ཡོངས་སུ་སྦྱང་བ་བཟླས་བརྗོད་ཀྱི་ཡན་ལག་བཞི་ལ་སོགས་
པ་བྱེད་པ་ན། གསང་སྔགས་དང་དེ་བཞིན་གཤེགས་པ་བཞི་དང་ཟླ་བའི་དཀྱིལ་འཁོར་རྣམས་བསམ་པ་ནི་ཡིད་ཀྱི་ལས་འདི་ཉིད་ཡིན་ནོ་ཞེས་བྱ་བའི་དོན་ཏོ། །ལྷ་ཆེན་པོ་ལ་སོགས་པས་ཀྱང་། རིག་སྔགས་དང་གསང་སྔགས་ཀྱི་ཐབས་བཤད་དེ། དེ་བས་ན་བྱེ་བྲག་ཕྱེ་བ་དེ་བཞིན་
གཤེགས་པས་གསུངས་ཞེས་བཤད་དོ། །དེ་ལ་གསུངས་པ་ནི་བཤད་ཅེས་བྱ་བའི་ཐ་ཚིག་གོ། །ཀློག་པ་དང་ཉན་པ་དང་འདོན་པའི་སྒོ་ནས་ཀྱང་རིག་སྔགས་ལ་སོགས་པའི་ཐབས་ནན་ཏན་དུ་བྱ་བ་སྲིད་པས་ན་བྱེ་བྲག་ཏུ་བྱ་བའི་ཕྱིར། བསམ་གཏན་གྱིས་ཀྱང་ཤིན་ཏུ་བརྒྱན། །ཞེས་
གསུངས་སོ། །དེ་ལ་བདག་གི་དེ་ཁོ་ན་ཉིད་ལ་སོགས་པ་ཇི་ལྟར་སྲིད་པ་བསམ་པ་ནི་བསམ་གཏན་དེ་བསམ་གཏན་དེས། བདག་གི་དེ་ཁོ་ན་ཉིད་དང་བཟླས་བརྗོད་ཀྱི་དེ་ཁོ་ན་ཉིད་ལ་སོགས་པའི་མཚན་ཉིད་ཀྱི་ཐབས་ཀྱིས་ཀུན་དུ་བརྒྱན་པ་ནི་དེ་བཞིན་གཤེགས་པའི་གཞི་ལ་སོགས་
པ་སེམས་ཅན་གསལ་བར་སྣང་བའི་སྒོ་ནས་ཡོངས་སུ་རྫོགས་པར་མཛེས་པར་བྱས་ཞེས་བྱ་བའི་དོན་ཏོ། །བཟླས་བརྗོད་ཀྱི་ཡན་ལག་བཞི་ལ་སོགས་པའི་མཚན་ཉིད་རིག་སྔགས་ལ་སོགས་པའི་ཐབས་དེ་ཡང་།  སྲོག་དང་རྩོལ་བ་ལ་སོགས་པ་མེད་ན་རྫོགས་པར་བྱེད་པ་མི་

71-1-5b

ནུས་པས་ན། རྣལ་འབྱོར་ཐབས་ནི་ཀུན་བསྟན་པ། །ཞེས་བྱ་བ་གསུངས་སོ། །ཀུན་ནི་མ་ལུས་པ་སྟེ་ལྷ་རྣམ་པ་དྲུག་ལས་ཇི་ལྟར་སྲིད་པ་དང་། སྦྱོར་བའི་རྣལ་འབྱོར་གྱི་ཐབས་ཀྱི་ཡན་ལག་སླར་སྡུད་པ་དང་། སྲོག་དང་རྩོལ་བ་ལ་སོགས་པའི་མཚན་ཉིད་བསྟན་པ་ནི་བཤད་པའོ། །
རིག་སྔགས་དང་གསང་སྔགས་ཀྱི་ཐབས་ཆེན་པོ་གང་ཡིན་པ་རྣལ་བྱོར་དེའི་ཐབས་ཐམས་ཅད་ཀྱང་བསྟན་པ་སྟེ། རྣལ་འབྱོར་གྱི་ཡན་ལག་ཐམས་ཅད་བཤད་ཅེས་བྱ་བའི་དོན་ཏོ། །དེས་ན་འདི་སྐད་དུ་རིག་སྔགས་ཀྱི་ཐབས་དེ་ཉིད་འབའ་ཞིག་བཤད་པ་མ་ཡིན་གྱི་སླར་སྡུད་པ་ལ་སོགས་པ་
བསམ་གཏན་གྱི་ཡན་ལག་དང་བཅས་པར་བཤད་དོ་ཞེས་སྨྲས་པར་འགྱུར་རོ། །ཡང་འདི་གནོད་པ་སེལ་ནུས་པའི་སྒོ་ནས་བྱེ་བྲག་ཏུ། སྡུག་བསྔལ་སྡིག་པ་སེལ་བ་སྟེ། །ཞེས་གསུངས་སོ། །དེ་ལ་སྡུག་བསྔལ་ནི་ལུས་དང་སེམས་ལ་གནོད་པའི་མཚན་ཉིད་བཀྲེས་པ་དང་སྐོམ་པ་དང་
གསད་པ་དང་བཅིངས་པ་དང་ཡིད་མི་བདེ་བ་ལ་སོགས་པའི་རང་བཞིན་ནོ། །སྡིག་པ་ནི་ལུས་ལ་སོགས་པ་ལས་བྱུང་བ་ལ་མི་འདོད་པའི་ལས་ཀྱི་བག་ཆགས་སེམས་ལ་ཡོད་པ་སྟེ། དེ་དག་བཟླས་བརྗོད་ལ་སོགས་པའི་མཚན་ཉིད་རིག་སྔགས་ལ་སོགས་པའི་ཐབས་ཀྱིས་སེལ་བའི་ངང་ཚུལ་
གང་ཡིན་པ་དེ་ལ་དེ་སྐད་ཅེས་བྱའོ། །ཕྱག་ན་རྡོ་རྗེའི་ཞལ་ནས་གསུངས། །ཞེས་བྱ་བ་ནི་རྡོ་རྗེ་འཛིན་ལས་ཚངས་པས་མངོན་དུ་ཐོས་པ་བསྟན་ཏོ། །སྐྱེ་དང་འཆི་བ་འཇིག་བྱེད་པ། །ཞེས་བྱ་བ་ནི་དེ་ངེས་པར་ལེགས་པའི་གནས་ཐོབ་པའི་རྒྱུ་ཡིན་པར་བསྟན་ཏེ། འདི་ལྟར། སྒྲ་གནས་རྣལ་འབྱོར་
སྟེར་བར་དྲན། ། སྒྲ་མཐར་ཐར་པ་སྟེར་བ་ཉིད། །ཅེས་བྱ་བ་འོག་ནས་འཆད་པའི་ཕྱིར་རོ། །ཀུན་དུ་མི་ཚུགས་ཞེས་བྱ་བའི་ཡུལ་དང་དུས་ཐམས་ཅད་དུ་སེམས་ཅན་ཐམས་ཅད་ཀྱི་གནོད་པ་སྦྱོར་བ་ནས་བཟླས་བརྗོད་ཀྱི་ཡན་ལག་བཞི་ལ་སོགས་པའི་མཚན་ཉིད་རིག་སྔགས་ཀྱི་ཐབས་ཀྱི་འབྲས་
བུའི་མཐུ་ལ་གནོད་པར་བྱེད་མི་ནུས་ཏེ། དེ་བས་ན་ཀུན་དུ་མི་ཚུགས་སོ་ཞེས་བྱའོ། །བསྟན་པ་སྟེ་ཞེས་བྱ་བ་ནི་སྲོག་དང་རྩོལ་བའི་སྦྱོར་བ་ལ་སོགས་པས་གོམས་པར་བྱེད་པའི་ཚེ་སེམས་མ་ཞི་བའི་མཚན་ཉིད་མི་བརྟན་པ་མེད་པས་ན་བརྟན་པ་སྟེ། ཞི་བ་ཞེས་བྱ་བའི་དོན་ཏོ། །འདི་

71-1-6a

དང་ཕ་རོལ་བྱེད་པར་གནས། ཞེས་བྱ་བ་ནི་དེ་ལ་ཕ་རོལ་དང་འདི་བས་ན་འདི་དང་ཕ་རོལ་དག་གོ། །དེ་དག་བྱེད་པ་ནི་སྐྱེད་པ་སྟེ། ཕ་རོལ་དང་འདི་བྱེད་པའོ། །ཕ་རོལ་དང་འདི་བྱེད་པ་དེའི་རྒྱུའི་ངོ་བོར་གནས་པའི་འཇུག་པ་སྟེ། ཕ་རོལ་དང་འདི་བྱེད་པར་གནས་
པའོ། །དེ་ལ་ཕ་རོལ་ནི་འཇིག་རྟེན་ཕ་རོལ་ལོ། །འདི་ནི་འཇིག་རྟེན་འདིའོ། །འདི་ཡང་སྤྱིར་འཇིག་རྟེན་ཕ་རོལ་དང་། འཇིག་རྟེན་འདི་དག་བསྐྱེད་པ་ཙམ་དུ་བསྟན་པ་འདི་སྟོན་མོད་ཀྱི། འོན་ཀྱང་བདག་ཉིད་ཆེ་བ་སྟོན་པའི་སྐབས་ཡིན་པས་ན་འདོད་པའི་འབྲས་བུ་ཁྱད་པར་ཅན་
སྒྲུབ་པའི་སྒོ་ནས་འཇིག་རྟེན་གཉིས་ཀའི་རྒྱུར་གནས་པར་རིག་པར་བྱ་སྟེ། འདིས་ཀྱང་རིག་སྔགས་ལ་སོགས་པའི་ཐབས་ཆེན་པོ་དེ་དག་མངོན་པར་མཐོ་བའི་རྒྱུར་བསྟན་ཏོ། །དཀྱིལ་འཁོར་ཆེན་པོ་ལ་སོགས་འབྱུང་། །ཞེས་བྱ་བ་དཀྱིལ་འཁོར་ཆེན་པོ་རྣམས་ནི་བྱ་བའི་རྒྱུད་ཀྱི་ཆོ་གར་
གཏོགས་པའི་རིགས་གསུམ་གྱི་དཀྱིལ་འཁོར་འཕགས་པ་གཞན་གྱིས་མི་ཐུབ་པ་ཞེས་བྱ་བ་དང་། རབ་ཏུ་གནས་པ་དང་། རྣམ་པར་གནོན་པ་ལ་སོགས་པ་རིགས་གསུམ་གྱི་དཀྱིལ་འཁོར་རྣམས་བྱ་བའི་རྒྱུད་ཀྱི་ཆོ་གར་གཏོགས་པའོ། །སོགས་པའི་ཚིག་གིས་ནི་རིགས་སོ་སོ་དང་།  
ལྷ་སོ་སོའི་བྱེ་བྲག་གི་དཀྱིལ་འཁོར་རྣམས་ཀྱང་བསྡུའོ། །དེ་བས་ན་ཚིག་གི་དོན་ནི་འདི་ལྟ་སྟེ། དེ་བཞིན་གཤེགས་པ་ལ་སོགས་པ་རྣམས་ཀྱི་སྐུ་དང་གསུང་དང་ཐུགས་གསང་བའི་ངོ་བོ་ཉིད་རང་བཞིན་གྱི་དཀྱིལ་འཁོར་ཆེན་པོ་ལ་སོགས་པ་རྣམས་གང་གོམས་པ་ལས་བྱེ་བྲག་ཏུ་འབྱུང་བ་དེ་ནི་དཀྱིལ་
འཁོར་ཆེན་པོ་ལ་སོགས་པ་འབྱུང་བ་སྟེ། བཟླས་བརྗོད་ཀྱི་ཡན་ལག་བཞི་དང་། མེ་ལ་གནས་པ་ལ་སོགས་པ་སྒྲའི་བསམ་གཏན་གྱི་བདག་ཉིད་རིག་སྔགས་དང་གསང་སྔགས་ཀྱི་ཐབས་ཆེན་པོ་ལ་བྱའོ། །འདིས་ཀྱང་རིག་སྔགས་ལ་སོགས་པའི་ཐབས་དེ་ལོངས་སྤྱོད་རྫོགས་པ་དང་སྤྲུལ་པའི་
སྐུ་མང་པོའི་རྒྱུ་ཡིན་པར་བསྟན་ཏོ། །རིག་སྔགས་ཀྱི་ཐབས་ལས་ཡོན་ཏན་རིན་པོ་ཆེ་མཐའ་ཡས་པ་འབྱུང་བ་དེའི་མཐུས་ཚིག་རེ་རེ་ནས་བསྒྲགས་པར་བྱ་མི་ནུས་པས་མདོར་བསྟན་པ། འདོད་པའི་དོན་ནི་རྗེས་སུ་སྒྲུབ། ཅེས་གསུངས་ཏེ། དེས་འདི་སྐད་གསུངས་པ་ཡིན་ནོ། །ངེས་པར་

71-1-6b

ལེགས་པ་དང་།  མངོན་པར་མཐོ་བའི་རྒྱུར་གྱུར་པའི་དོན་གང་འདོད་པ་དེ་དག་ཉིད་འདི་གོམས་པ་ལས་བྱུང་ངོ་ཞེས་པ་སྟེ། དེ་ལྟ་བུའི་རིག་སྔགས་དང་། གསང་སྔགས་ཀྱི་ཐབས་ཆེན་པོ་བཤད་པར་བྱའོ་ཞེས་བྱ་བ་ལ་འོག་ནས་འབྱུང་བ་དང་སྦྱར་རོ། །རིག་སྔགས་དང་གསང་སྔགས་
མཉེས་པར་བྱ་བའི་ཆོ་ག་ཐབས་ཞེས་བྱ་བ་དེ་ཡང་རྣམ་པ་གཉིས་ཏེ། གཅིག་གི་དམ་ཚིག་འཛིན་པ་དང་། དབང་བསྐུར་བ་དང་། སྦྱིན་སྲེག་དང་། མཆོད་པ་ལ་སོགས་པ་ངེས་པའི་མཚན་ཉིད་དོ།    །དེ་ལས་གཞན་པ་ནི་བཟླས་བརྗོད་ཀྱི་ཡན་ལག་བཞི་དང་། མེ་ལ་གནས་པ་ལ་
སོགས་པ་སྒྲའི་བསམ་གཏན་གྱི་རང་བཞིན་ནོ། །དེ་གཉིས་ལས་འདིར་ནི་བཟླས་བརྗོད་ཀྱི་ཡན་ལག་བཞིའི་སྦྱོར་བ་ལ་སྒྲ་དང་སེམས་དང་། བཞིའི་བསམ་གཏན་དང་མེ་ལ་གནས་པ་དང་། སྒྲའི་བསམ་གཏན་ལ་སོགས་པའི་མཚན་ཉིད་ཀྱི་ཐབས་ཞེས་བྱ་བ་ཉིད་རྟག་པར་བྱ་སྟེ།  དེ་
སྟན་པའི་ཕྱིར། ཆོ་ག་གང་དང་གང་དག་གིས། །བསམ་གཏན་ལས་ལ་གང་གནས་པ། །དེ་བཞིན་གཤེགས་ལ་ཕྱག་འཚལ་ནས། །དེ་དག་མ་ལུས་བཤད་པར་བྱ། །ཞེས་གསུངས་སོ། །དེ་ལ། ཆོ་ག་གང་དང་གང་དག་གིས། །ཞེས་བྱ་བ་ནི་བཟླས་བརྗོད་ཀྱི་ཡན་ལག་བཞི་དང་
མེ་ལ་གནས་པ་ལ་སོགས་པ་སྒྲའི་ཆོ་གས་སོ། །གང་གནས་པ་ཞེས་བྱ་བ་ནི་རིག་སྔགས་ལ་སོགས་པའི་ཐབས་ཏེ། རིག་སྔགས་ལ་སོགས་པ་རྣམས་སྒྲུབ་པའི་ཐབས་སོ། །ཡུལ་གང་ལ་དེ་གནས་ཤེ་ན། བསམ་གཏན་ལས་ལ་ཞེས་གསུངས་ཏེ། གསང་སྔགས་ལ་སོགས་པ་
སེམས་པའི་མཚན་ཉིད་བསམ་གཏན་གྱི་བྱ་བ་ལ་གནས་ཞེས་བྱ་བའི་དོན་ཏོ། །དེ་དག་བཤད་པར་བྱ་ཞེས་བྱ་བ་ནི་བཟླས་བརྗོད་ཀྱི་ཡན་ལག་བཞི་དང་མེ་ལ་གནས་པ་ལ་སོགས་པའི་རང་བཞིན་དུ་བསམ་གཏན་གྱི་ལས་ལ་གང་གནས་པ་གང་ཡིན་པ་དེ་ཉིད་བཤད་པའོ། །མ་ལུས་ཞེས་བྱ་
བ་ནི་ཆོ་ག་གང་དང་གང་དག་གིས་གནས་པའི་ཆོ་ག་དེ་མ་ལུས་པར་བཤད་དོ་ཞེས་བྱ་བའི་ཐ་ཚིག་གོ། །དེ་བཞིན་གཤེགས་ལ་ཕྱག་འཚལ་ནས། །ཞེས་བྱ་བ་ནི་ཕྱག་བྱས་ནས་དམ་པའི་སྤྱོད་པའི་རྗེས་སུ་འཇུག་པ་བསྟན་ཏོ། །དེས་ཀྱང་འདི་སྐད་བསྟན་ཏེ། བསམ་གཏན་གྱི་ལས་ཉིད་

71-1-7a

ལ་རིག་སྔགས་ལ་སོགས་པའི་ཐབས་བཤད་པ་བཟླས་བརྗོད་ཀྱི་ཡན་ལག་བཞི་ལ་སོགས་པ་བསམ་གཏན་གྱི་མཚན་ཉིད་ཡིན་པ་དེ་ཉིད་བསྟན་གྱི། དམ་ཚིག་དང་། དབང་བསྐུར་བ་དང་། སྦྱིན་སྲེག་ལ་སོགས་པའི་མཚན་ཉིད་བསྟན་པ་ནི་མ་ཡིན་ཏེ། དེ་དག་
གཞན་དུ་བཤད་ཟིན་པའི་ཕྱིར་རོ་ཞེས་བྱ་བའི་ཐ་ཚིག་གོ།    །བཟླས་བརྗོད་ཀྱི་ཡན་ལག་བཞི་ལ་སོགས་པའི་མཚན་ཉིད་རིག་སྔགས་ལ་སོགས་པའི་ཐབས་ཀྱིས་བསམ་གཏན་དེ་ཡང་ཅི་དགོས་ཤེ་ན། གསང་སྔགས་བསམ་གཏན་ཞེས་བྱ་བ། །མཆོག་ཏུ་གསང་བ་ཡང་དག་གསུངས། །
དྲང་སྲོང་དཀའ་ཐུབ་ཆེན་པོ་ཡང་། །དེ་དག་མེད་ན་མི་འགྲུབ་པོ། །ཞེས་བྱ་བ་གསུངས་སོ། །དེས་ནི་འདི་སྐད་བསྟན་ཏེ། གསང་སྔགས་ཀྱི་བསམ་གཏན་མེད་ན། གསང་སྔགས་ལ་མངོན་པར་བརྩོན་པའི་དྲང་སྲོང་རྣམས་ཀྱང་མི་འགྲུབ་སྟེ། དེ་བས་ན་གསང་སྔགས་ཀྱི་བསམ་གཏན་
བཤད་པར་བྱའོ་ཞེས་བསྟན་པའོ། །དེ་ལ་འདིར་གསང་སྔགས་རྣམས་ཀྱི་བསམ་གཏན་ནི་རྣམ་པ་གཉིས་ཏེ། བཟླས་བརྗོད་ཀྱི་ཡན་ལག་བཞི་དང་། མེ་ལ་གནས་པ་དང་། སྒྲ་ལ་སོགས་པའི་བསམ་གཏན་དང་། དེ་ལས་གཞན་པ་ནི་རང་གི་ལྷའི་རྣལ་འབྱོར་གྱི་བསམ་གཏན་ནོ། །དེ་ལ་
ཚིགས་སུ་བཅད་པ་འདིས་ནི་བཟླས་བརྗོད་ཀྱི་ཡན་ལག་བཞི་དང་། མེ་ལ་གནས་པ་དང་། སྒྲ་ལ་སོགས་པའི་གསང་སྔགས་ཀྱི་བསམ་གཏན་གྱི་ཕན་ཡོན་སུངས་པ་སྟེ། དེ་ལ་གསང་སྔགས་དེ་རྣམས་ཀྱི། །བསམ་གཏན་མཆོག་ཏུ་གསང་བ་གསུངས། །ཞེས་བྱ་བ་དང་སྦྱར་རོ། །
བསམ་གཏན་ཞེས་བྱ་བ་ནི་སེམས་པ་སྟེ། ཡན་ལག་བཞི་ལ་སོགས་པར་གནས་པའི་གསང་སྔགས་ཀྱི་བསམ་གཏན་ཡང་དང་ཡང་དུ་མངོན་དུ་བྱེད་པ་ཞེས་བྱ་བའི་ཐ་ཚིག་གོ། །བྱ་བ་ཞེས་བྱ་བའི་སྒྲ་ནི་སྲིད་པ་སྟེ། དེས་གསང་སྔགས་རྣམས་སེམས་པ་མཆོག་ཏུ་གསང་བ་སྲིད་དོ་ཞེས་
བྱ་བའི་ཐ་ཚིག་གོ། །མཆོག་ནི་དམ་པའོ། གསང་བ་ནི་མི་བསྟན་པ་སྟེ་དེས་ནི་འདི་ལྟར་དགོངས་སོ། །གསང་སྔགས་ཀྱི་བསམ་གཏན་དེ་གསང་སྔགས་ཐམས་ཅད་གྲུབ་པའི་ཡན་ལག་གི་སྙིང་པོར་གྱུར་པ་ཡིན་ཡང་རྒྱུད་སོ་སོ་དག་ཏུ་གསལ་བར་རྣམ་པར་ཕྱེ་སྟེ་མ་བསྟན་པ་ནི་སླར་སྡུད་པ་

71-1-7b

དང་། སྲོག་དང་རྩོལ་བ་ལ་སོགས་བསམ་གཏན་གྱི་ཡན་ལག་རྣམས་ནན་ཏན་དུ་བྱེད་མི་ནུས་པའི་གདུལ་བྱའི་འགྲོ་བ་རྣམས་གཟུད་པའི་ཕྱིར་རོ། །མི་མངོན་པའི་ཚིག་ཏུ་ནི་ཐམས་ཅད་དུ་ཡང་ཕལ་ཆེར་གསུངས་ཏེ། ཕྱིས་བཤད་པར་བྱའོ། །གསང་སྔགས་ཞེས་བྱ་བ་ནི་སྒྲ་དང་ཡི་གེའི་
རང་བཞིན་དེ་བཞིན་གཤེགས་པའི་ཐུགས་ཀར་ཟླ་བའི་དཀྱིལ་འཁོར་ལ་སོགས་པ་ལ་དགོད་པ་རྣམས་ཀྱི་ཞེས་བྱ་བའི་ཐ་ཚིག་གོ། །དེ་དག་མེད་ན་ཞེས་བྱ་བ་ནི་སྒྲ་དང་ཡི་གེ་སེམས་པའི་མཚན་ཉིད་བསམ་གཏན་དེ་དག་མེད་ན།  དངོས་གྲུབ་རབ་ལ་སོགས་པ་ཐོབ་པར་མི་འགྱུར་རོ་ཞེས་
བྱ་བའི་དོན་ཏོ། །དེ་ཡང་སུ་ཞེ་ན། དྲང་སྲོང་དཀའ་ཐུབ་ཆེན་པོ་ཡང་། །ཞེས་བྱ་བ་སྟེ། དེས་འདི་སྐད་བཤད་པར་འགྱུར་རོ། །དྲང་སྲོང་རྣམས་ཀྱང་གསང་སྔགས་བསམ་གཏན་མེད་པར་མི་འགྲུབ་ན། སྒྲུབ་པ་པོ་གཞན་ལྟ་ཅི་སྨོས་ཞེས་བྱ་བའི་དོན་ཏོ། །དྲང་སྲོང་ཞེས་བྱ་བས་
ཀྱང་ལུས་དང་ངག་དང་ཡིད་བསྡམས་པ་དང་ལྡན་པར་བསྟན་པ་སྟེ། འདི་ལྟར་ལུས་ལ་སོགས་པ་བསྡམས་པ་ནི་ཐུབ་པ་ཞེས་བྱའོ། །ཐུབ་པ་ཡང་དྲང་སྲོང་སྒྲའི་རྣམ་གྲངས་སུ་འཇིག་རྟེན་ན་སྣང་ངོ་། །དཀའ་ཐུབ་བོ་ཞེས་བྱ་བའི་བྱེ་བྲག་གིས་ནི་བཟླས་བརྗོད་དང་ཁྲུས་དང་སྦྱིན་སྲེག་ལ་སོགས་
པའི་ཕྱི་རོལ་གྱི་བྱ་བ་རྣམས་བསྟན་ཏོ། །དེས་ནི་ཚུལ་ཁྲིམས་དང་། བརྟུལ་ཞུགས་དང་། དཀའ་ཐུབ་དང་ལྡན་པའི་དྲང་སྲོང་དཀའ་ཐུབ་ཆེན་པོ་དང་ལྡན་པ་ཡང་། གསང་སྔགས་ཀྱི་བསམ་གཏན་མེད་ན་མི་འགྲུབ་བོ་ཞེས་བྱ་བར་བསྟན་ཏོ། །ད་ནི་བཟླས་བརྗོད་ཀྱི་བྱེ་བྲག་གིས་བདག་ཉིད་ཆེ་
བ་བསྟན་པའི་སྒོ་ནས། བདག་ལྷ་ཉིད་དུ་གྱུར་པའི་རྣལ་འབྱོར་གྱི་མཚན་ཉིད་བསམ་གཏན་གྱི་ཕན་ཡོན་བསྟན་པ། གསང་སྔགས་རྣལ་འབྱོར་ཅན་རྣམས་ནི། །གསང་སྔགས་བཟླས་བརྗོད་མེ་འབར་འདྲ། །སྐྱེ་དང་འཆི་བ་འཇིག་བྱེད་པ། །རྡོ་རྗེ་ཅན་གྱིས་སྔོན་གསུངས་སོ། །ཞེས་བྱ་སྟེ་
དེ་ལ་གསང་སྔགས་ཀྱི་རྣལ་འབྱོར་ཅན་སྒྲུབ་པ་པོ་རྣམས་ཀྱི་གསང་སྔགས་ཀྱི་བཟླས་བརྗོད་ནི་བརྗོད་པ་སྟེ། མེ་འབར་བ་ཞེས་བྱ་བ་དང་སྦྱར་རོ། །དེ་ལ་བཟླས་བརྗོད་ཅེས་བྱ་བ་ནི་ཡིད་ལ་སྨྲ་བ་དང་། གཤུབས་ཏེ་སྨྲ་བའི་གསང་སྔགས་ཀྱི་བཟླས་བརྗོད་དོ། །གསང་སྔགས་ཞེས་བྱ་བ་ནི་དེ་བཞིན་

71-1-8a

གཤེགས་པའི་ཐུགས་ཀར་ཟླ་བའི་དཀྱིལ་འཁོར་ལ་གནས་པའི་སྒྲ་དང་། ཡི་གེའི་རང་བཞིན་རྣམས་ཀྱིས་ཞེས་བྱ་བའི་ཐ་ཚིག་གོ། །གསང་སྔགས་རྣལ་འབྱོར་ཅན་རྣམས་ཀྱི། །ཞེས་བྱ་བ་ནི་གསང་སྔགས་ལྷའི་གཟུགས་ཀྱི་མཚན་ཉིད་ཀྱི་རྣལ་འབྱོར་དང་ལྡན་ཞིང་མི་
གཉིས་པ་དབྱེར་མེད་པའི་སྒྲུབ་པ་པོ་གང་ཡིན་པ་དེ་དག་གསང་སྔགས་ཀྱི་རྣལ་འབྱོར་ཅན་ཏེ། ལྷ་ཉིད་ཀྱི་རྣལ་འབྱོར་བྱས་པ་ཞེས་བྱ་བའི་ཐ་ཚིག་གོ། །དེ་དག་གི་བཟླས་བརྗོད་གང་ཡིན་པ་དེ་མེ་འབར་བ་ཞེས་བྱ་བ་དང་སྦྱར་རོ། །དེ་ལ་ལྷའི་རྣལ་འབྱོར་བྱས་པ་རྣམས་ཀྱི་བཟླས་བརྗོད་ནི་མེ་འབར་བ་
དང་འདྲ་སྟེ་ཞེས་བྱ་བ་འདིས་ལྷའི་རྣལ་འབྱོར་གྱི་མཚན་ཉིད་ནི་ལྷའི་རྣལ་འབྱོར་བྱས་ནས་བསམ་གཏན་གྱི་ཕན་ཡོན་བསྟན་ཏེ། བཟླས་བརྗོད་ཀྱི་དཔེ་མེ་འབར་བ་ལས་ལངས་པ་ཡང་འདི་ལྟར་དགོངས་ཏེ། གང་གི་ཕྱིར་བདག་གི་དེ་ཁོ་ན་ཉིད་བརྟག་པ་སྔོན་དུ་བྱས་པའི་ལྷའི་དེ་ཁོ་ན་ཉིད་ཀྱི་མཚན་ཉིད་
ནི་ལྷའི་རྣལ་འབྱོར་དུ་བསྟན་ཏོ། །བདག་གི་དེ་ཁོ་ན་ཉིད་བརྟག་པ་ཡང་ཉོན་མོངས་པ་དང་ཤེས་བྱའི་སྒྲིབ་པའི་གཉེན་པོ་གོམས་པར་བྱེད་པ་སྟེ་འོག་ནས་འཆད་དོ། །དེ་བས་ན་ལྷའི་རྣལ་འབྱོར་བྱས་པའི་བཟླས་བརྗོད་རྩོམ་པ་ཉིད་ན་ཡང་ཉོན་མོངས་པ་དང་ལས་ཀྱི་སྒྲིབ་པ་ཐམས་ཅད་ཀྱི་
བུད་ཤིང་བསྲེག་པའི་ཕྱིར་མེ་འབར་བ་དང་འདྲ་སྟེ། ཞེས་བརྟགས་སོ། །རང་བཞིན་ཡང་ཡན་ལག་བཞིའི་བསམ་གཏན་ལ་ཞེན་པའི་སྦྱོར་བས་ཚུལ་བཞིན་མ་ཡིན་པ་ཡིད་ལ་བྱེད་པ་ལ་སོགས་པའི་གཉེན་པོ་ཡིན་པའི་ཕྱིར་རོ། །དེ་བཞིན་དུ་འབྲས་བུ་ཡང་སངས་རྒྱས་པའི་མཐར་ཕྱིན་པའི་བར་
དུ་མི་ཤེས་པའི་བུད་ཤིང་ཐམས་ཅད་བསྲེག་པའི་རྒྱུ་ཡིན་པའི་ཕྱིར་རོ། །དེ་བས་ན། སྐྱེ་དང་འཆི་བ་འཇིག་བྱེད་པ། ཞེས་བྱ་བ་གསུངས་ཏེ། མངོན་དུ་དང་བརྒྱུད་པ་ལས་འགྱུར་རོ་ཞེས་བྱ་བའི་ཐ་ཚིག་གོ། །ད་ནི་ལྷའི་རྣལ་འབྱོར་གྱི་མཚན་ཉིད་ཀྱི་བསམ་གཏན་དང་བཟླས་བརྗོད་ཀྱི་ཡན་
ལག་བཞིའི་སྒྲའི་བསམ་གཏན་དེ་དག་མཇུག་བསྡུ་བའི་སྒོ་ནས་དུས་གཅིག་ཏུ་ནན་ཏན་བྱ་བར་བསྟན་པའི་ཕྱིར། དེ་བས་དེས་འདིར་གསང་སྔགས་ཀྱི། །བསམ་གཏན་ཚིམ་བྱ་མེ་དག་ལ། །དངོས་གྲུབ་འདོད་པ་དག་གིས་ནི། །རྟག་པར་རྒྱུན་དུ་སྦྱོར་བར་བྱ། །ཞེས་བྱ་བ་གསུངས་སོ། །དེ་

71-1-8b

ལ་གང་གི་ཕྱིར་བཟླས་བརྗོད་ཀྱི་ཚེ་གསང་སྔགས་རྣམས་ཀྱི་སྒྲ་དང་། ཡི་གེའི་རང་བཞིན་གྱི་བསམ་གཏན་གསང་བ་གསུངས་པ་དང་། ལྷའི་རྣལ་འབྱོར་བྱས་པའི་སྔགས་པའི་བཟླས་བརྗོད་ཀྱང་མེ་འབར་བ་ཞེས་བྱ་བ་གསུངས་པ་དེའི་བཟླས་བརྗོད་བྱེད་པ་དེའི་ཕྱིར་བཟླས་བརྗོད་ཀྱི་ཚེ་དེ་བཞིན་
གཤེགས་པ་ལ་སོགས་པ་བཞི་ལ་གསང་སྔགས་ཀྱི་སྒྲ་དང་ཡི་གེའི་རང་བཞིན་བཀོད་པ་སེམས་པ་ནི་བསམ་གཏན་ནོ། །ཚིམ་པར་བྱ་བ་ནི་གསལ་བར་སྣང་བར་བྱའོ། །གང་གི་དུས་སུ་ཞེ་ན་མེ་དག་ལ་ཞེས་བྱ་བ་གསུངས་ཏེ། མེ་འབར་བ་ལ་ཞེས་བྱ་བའི་དོན་ཏོ། །མེ་འབར་བ་ཞེས་
བྱ་བའི་བཟླས་བརྗོད་ཀྱིས་ཀྱང་ལྷའི་རྣལ་འབྱོར་བྱས་པའི་བཟླས་བརྗོད་བསྟན་ཏེ། གང་གི་ཕྱིར་གསང་སྔགས་ཀྱི་རྣལ་འབྱོར་པ་རྣམས་ཀྱི་བཟླས་བརྗོད་ཀྱི་མེ་འབར་བ་ཞེས་གསུངས་པ་དེའི་ཕྱིར་ལྷའི་རྣལ་འབྱོར་བྱས་ནས། དེ་བཞིན་གཤེགས་པ་ལ་སོགས་པ་རྣལ་འབྱོར་རྣམ་པར་བཀོད་པའི་
གསང་སྔགས་ལ་དམིགས་པ་མངོན་དུ་བྱས་ཏེ། བཟླས་བརྗོད་བྱའོ་ཞེས་གསུངས་པ་ཡིན་ནོ། །མེ་དག་ལ་ཞེས་བྱ་བ་འདིས་མེ་ལ་གནས་པའི་གསང་སྔགས་སྦྱོར་བའི་ཆོ་ག་འོག་ནས་འབྱུང་བ་བསྟན་ཏོ་ཞེས་སྨྲ་བ་གང་ཡིན་པ་དེ་ནི་སྐབས་མི་ཤེས་པས་ཟན་གྱི་དུས་ན་ཡང་ལན་ཚྭ་དང་ལྡན་
པའི་ཚོད་མ་ལ་སོགས་པའི་སྒྲ་ཐོས་ནས། རྟ་དང་ལྷན་ཅིག་ཏུ་ཚོད་མ་ཟ་བར་ཡིད་ཆེས་ཀྱང་སྲིད་དོ། །འདི་ལྟར་གསང་སྔགས་ཀྱི་སྦྱོར་བའི་སྐབས་རྣམ་པ་གཉིས་འཆད་པ་ནི། བཟླས་བརྗོད་ཀྱི་ཡན་ལག་བཞིའི་ཆོ་གའི་མཚན་ཉིད་དང་། མེ་ལ་གནས་པ་ལ་སོགས་པ་སྒྲའི་བསམ་
གཏན་གྱི་མཚན་ཉིད་དོ། །དེ་ལ་ཡན་ལག་བཞིའི་བསམ་གཏན་ལ་ནི་གསང་སྔགས་གཤུབས་ཏེ་བརྗོད་པ་དང་། ཡིད་ཀྱིས་བརྗོད་པ་གཉིས། སྔགས་བཟླས་ཡན་ལག་མ་ཉམས་པར། །ཞེས་འོག་ནས་འཆད་དོ། །མེ་ལ་གནས་པ་ལ་སོགས་པ་སྒྲའི་སྦྱོར་བ་ནི་སེམས་པ་
མཚན་ཉིད་བསམ་གཏན་ཉིད་དུ་འཆད་དེ། མེ་ཡི་ནང་གནས་ཞི་བ་སྟེ། །ཚིག་རྣམས་དག་པ་ཡན་ལག་ལྡན། །སྲོག་དང་རྩོལ་བ་འགགས་པའི་བདག །གཉིད་སྤངས་ནས་ནི་རྣམ་པར་བསམ། །ཞེས་བྱ་བ་ལ་སོགས་པའི་གཞུང་གིས་བསྟན་ཏོ། །བསམ་མོ་ཞེས་བྱ་བའི་ཚིག་

71-1-9a

བསྟན་པའི་ཕྱིར་རོ། །བསམ་པ་ཡང་བསམ་གཏན་གྱི་མཚན་ཉིད་དེ། རྟོག པ་དང་སེམས་པ་དང་། བསམ་གཏན་ཞེས་བྱ་བ་ནི་རྣམ་གྲངས་ཡིན་པའི་ཕྱིར་རོ། །སྐབས་འདིར་ནི། རྣལ་འབྱོར་པའི་བཟླས་བརྗོད་མེ་འབར་བ་ཞེས་བྱ་བ་གསུངས་སོ་ཞེས་
བྱ་བ་བཤད་ནས་མཇུག་བསྡུ་བའི་ཚིག་བྱེད་པ་ན། བཟླས་བརྗོད་མེ་འབར་བ་ཞེས་བྱ་བ་དེ་ཉིད་དང་། ལྷ་དང་གསང་སྔགས་དག་གི་བསམ་གཏན་ལ་སྦྱར་བར་རིགས་ཀྱི་སྐབས་སུ་མ་བབ་པའི་མེ་ལ་གནས་པའི་སྒྲའི་བསམ་གཏན་ལ་ནི་མི་བྱའོ། །མེ་ལ་གནས་པའི་སྒྲའི་བསམ་
གཏན་དེ་ལ་ནི་ལོགས་ཤིག་ཏུ་བསམ་གཏན་ལ་སོགས་པའི་སྐབས་འོག་ནས་འཆད་པའི་ཕྱིར་རོ། །རབ་ཏུ་འཕྲོས་པ་ནི་མི་དགོས་ཀྱི་བཏང་ངོ་། །དེ་ལ་བརྟག་པ་ཞེས་བྱ་བ་ནི་ཉི་མ་རེ་རེའོ། །རྒྱུན་དུ་སྦྱོར་བར་ཞེས་བྱ་བ་ནི། བཟླས་བརྗོད་མ་རྫོགས་ཀྱི་བར་དུ་སྟེ། འོག་ནས་
འཆད་པའི་རིམ་གྱིས་བརྗོད་ཅིང་གསང་སྔགས་ཀྱི་སྒྲ་ལ་དམིགས་པར་བྱའོ་ཞེས་བྱ་བའི་དོན་ཏོ། །འདི་ཡང་གསང་སྔགས་བཟླས་བརྗོད་བྱེད་པའི་བསམ་གཏན་གྱི་ཚེ་ན་བྱ་བར། བྱ་བའི་རྒྱུད་ཐམས་ཅད་ཀྱི་སྤྱིའི་ཆོ་ག་བསྡུས་པའི་རྒྱུད་འཕགས་པ་རབ་ཏུ་གྲུབ་པར་བྱེད་པ་དང་། དཔུང་
བཟངས་དང་། དཔལ་རྟོག་པ་བསྡུས་པ་ལ་སོགས་པ་དང་། བྱེ་བྲག་གི་རྒྱུད་འཕགས་པ་རྣམ་པར་སྣང་མཛད་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པའི་བྱིན་གྱིས་བརླབ་པ་དང་། འཕགས་པ་ཕྱག་ན་རྡོ་རྗེ་མངོན་པར་དབང་བསྐུར་བ་དང་། བྱང་ཆུབ་ཀྱི་སྙིང་པོ་དང་། རིག་
འཛིན་གྱི་སྡེ་སྣོད་ལ་སོགས་པ་ལས་གསུངས་ཏེ། ཁ་ཅིག་ཏུ་ནི་མི་མངོན་པའི་ཚིག་ཏུ་བཤད། ཁ་ཅིག་ཏུ་ནི་གསལ་བར་བསྟན་ཏེ། འདི་ལྟར་རབ་ཏུ་གྲུབ་པར་བྱེད་པ་ལས། །བཟླས་བརྗོད་བྱེད་པས་བཟླས་བརྗོད་ཚེ། །རིག་སྔགས་ལྷ་ཉིད་བཏང་ནས་ནི། །སྒོམ་པ་མཆོག་ཏུ་
གཅེས་པ་ཡང་། །རྟོག་པ་བཟུང་ནས་ཡོང་མི་བསམ། །ཞེས་བྱ་བ་ལ་སོགས་པ་གསུངས་པའོ། །དེ་བཞིན་དུ་དཔུང་བཟངས་ལས་ཀྱང་། སྙོམ་དང་བུད་མེད་མི་དགེ་ལྡན་པའི་སེམས། །གང་དང་གང་དུ་ཀུན་དུ་རྒྱུ་བ་དག །དེ་དང་དེ་ནས་བསྒྲིམས་ཏེ་རྣམ་བཟློག་ནས། །གསང་

71-1-9b

སྔགས་ཡི་གེ་མཆོག་ལ་སྦྱར་བར་བྱ། །ཞེས་བྱ་བ་དང་། དེ་བཞིན་དུ། བསམ་གཏན་དག་དང་ལྡན་པའི་སྒྲུབ་པ་པོ། །ཤེད་ལས་བྱུང་བ་དགའ་བ་རབ་ཏུ་བསྐྱེད། །དགའ་ལས་ལུས་ནི་ཤིན་ཏུ་སྦྱངས་པ་ཐོབ། །ཤིན་ཏུ་སྦྱངས་སེམས་བདེ་བའི་སྐལ་ལྡན་འགྱུར། །དགའ་བདེ་
ཡིད་གཅིག་ཏིང་ངེ་འཛིན་གྱུར་ན། །དེ་ཚེ་བཟླས་བརྗོད་དོགས་པ་མེད་པར་འགྱུར། །ཞེས་བྱ་བ་ལ་སོགས་པ་གསུངས་སོ། །བདག་གི་དེ་ཁོ་ན་ཉིད་བརྟག་པ་ཡང་དེ་ཉིད་ལས་གསུངས་ཏེ། འདོད་ཆགས་ལ་སོགས་ཉོན་མོངས་དྲི་མར་བཅས། །དེ་བས་སེམས་ནི་འཁོར་བ་ཡིན་པར་
གསུངས། །ཉོན་མོངས་རྣམ་གྲོལ་ཤེལ་དང་ཟླ་འདྲ་བ། །སྲིད་པའི་རྒྱ་མཚོ་མཐར་ནི་ཀུན་དུ་བསྒྲགས། །ཞེས་བྱ་བ་ལ་སོགས་པའི་གཞུང་གིས་བཤད་དོ། །དེ་བཞིན་དུ་རྣམ་པར་སྣང་མཛད་མངོན་པར་རྫོགས་པར་བྱང་ཆུབ་པ་ལས་ཀྱང་བཟླས་བརྗོད་བྱེད་པའི་ཚེ། བཟླས་བརྗོད་ཀྱི་
ཡན་ལག་བཞིའི་སྦྱོར་བས་གསང་སྔགས་ཀྱི་སྦྱོར་བ་གསལ་བ་ཉིད་དུ་བཤད་དོ། །ཕྱག་ན་རྡོ་རྗེ་མངོན་པར་དབང་བསྐུར་བ་ལས་ཀྱང་འཇམ་དཔལ་ནམ་སྔགས་ལ་ལྷུན་གྱིས་གྲུབ་པར་ལྷ་ཉིད་ཀྱི་ང་རྒྱལ་དུ་གྱུར་པ་དེའི་ཚེ། གསང་སྔགས་ཐམས་ཅད་མངོན་དུ་ཕྱོགས་པར་གནས་པར་
འགྱུར་རོ་ཞེས་གསུངས་སོ། །རིག་སྔགས་འཆང་གི་སྡེ་སྣོད་ལས་ཀྱང་། རི་མོ་ལ་སོགས་པ་ལ་གནས་པའི་ལྷའི་བསམ་གཏན་བྱ་བ། འདིས་ནི་སྙན་ཆ་ཀུན་དུ་བསྐྱོད། །ནེའུ་ལེ་རྐྱལ་བུ་བསྒུལ་བ་སྙམ། །དེ་ལྟར་བཟླས་བརྗོད་འབད་པའི་ཚེ། །ཞབས་ལ་སོགས་པའང་རིམ་གྱིས་
བརྟག །ཅེས་གསུངས་པ་དང་། བདག་གི་དེ་ཁོ་ན་ཉིད་བརྟག་པ་ཡང་གནས་པ་གསུམ་དང་། རྣམ་པར་ཐར་པའི་སྒོ་གསུམ་ལ་གཞོལ་བར་བྱའོ་ཞེས་དེ་ཉིད་ལས་གསུངས་ཏེ། གནས་པ་གསུམ་ནི་འཕགས་པའི་དང་། ལྷའི་དང་ཚངས་པའི་གནས་པའོ། །དེ་ལ་འཕགས་པ་
ནི་འཕགས་པའི་བདེན་པ་བཞིའོ། །ལྷའི་དེ་བསམ་གཏན་བཞིའོ། །ཚངས་པའི་ནི་ཚད་མེད་པ་བཞིའོ ། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་མཚན་ཉིད་ནི་རྣམ་པར་ཐར་པའི་སྒོ་གསུམ་ཡིན་ནོ་ཞེས་དེ་ལས་བཤད་དོ། །དཔལ་རྟོག་པ་བསྡུས་པ་ལས་ནི། 

71-1-10a

ཆོས་བདག་མེད་པ་ཉིད་གོམས་པར་བྱ་བ་དང་། ལྷའི་རྣལ་འབྱོར་གྱི་གཞུང་རབ་ཏུ་མང་པོས་བསྟན་པས་འདིར་མ་བྲིས་སོ། །དེ་བས་ན་དེ་ལ་སོགས་པའི་རྒྱུད་ལས། ཇི་ལྟར་སྲིད་པའི་ལྷའི་གཟུགས་དང་། གསང་སྔགས་ཀྱི་སྒྲའི་བསམ་གཏན་དུ་བྱས་པ་ཉིད་ཀྱི་
བཟླས་བརྗོད་གསུངས་སོ། །གང་དག་ཏུ་གདུལ་བྱའི་དབང་གིས་མ་བཤད་པ་དེ་དག་ནི་རྒྱུད་ཐམས་ཅད་ཀྱི་ཆོ་ག་བསྡུས་པའི་རྒྱུད་འཕགས་པ་དཔུང་བཟངས་དང་། དཔལ་རྟོག་པ་བསྡུས་པ་ལ་སོགས་པ་ལས་གསུངས་སོ། །དེ་དག་ཏུ་ཡང་གསང་སྔགས་ཀྱི་བསམ་གཏན་ནི་བསྟན་གྱི་དེའི་
སྦྱོར་བ་མ་བཤད་དོ། །འདིར་ནི་ཡན་ལག་བཞི་ལ་སོགས་པ་བཤད་པས་རབ་ཏུ་གསལ་བར་བསྟན་པར་རིག་པར་བྱའོ།ད་ནི་རིག་སྔགས་དང་གསང་སྔགས་ཀྱི་ཐབས་ཆེན་པོའི་ཡུལ་རབ་ཏུ་དབྱེ་བ་དང་། མཚན་ཉིད་བཤད་དོ། །དེ་ལ་རིག་སྔགས་དང་གསང་སྔགས་ནི་རྣམ་པ་དྲུག་གི་
བདག་ཉིད་དོ། །བྱང་ཆུབ་ཀྱི་སེམས་ཀྱི་མཚན་ཉིད་གཉིས་སུ་མེད་པའི་ཏིང་ངེ་འཛིན་དང་། སྒྲ་དང་། ཡི་གེ་དང་། ཕྱག་རྒྱ་དང་། གཟུགས་དང་། ཀུན་རྫོབ་ཀྱི་ཏིང་ངེ་འཛིན་རྣམ་པ་དང་བཅས་པའི་བྱེ་བྲག་གོ། །དེ་དག་གི་དངོས་གྲུབ་མཆོག་ལ་སོགས་པ་དང་། ཞི་བ་ལ་སོགས་
པའི་ལས་ཀྱི་མཚན་ཉིད་རང་གི་བྱ་བ་སྒྲུབ་པའི་ཐབས་ནི་ཐབས་སོ་ཞེས་མདའ་གཞུའི་མཚོན་ཆ་ལ་སོགས་པའི་དཔེས་སྔར་བསྟན་ཟིན་ཏོ། །ཐབས་དེ་ཡང་འདིར་རྣལ་འབྱོར་ལ་གནས་པར་འདོད་ཀྱི་བྱ་བ་ལ་གནས་པ་ནི་མ་ཡིན་ནོ། །དེ་ལ་ཡང་བྱེ་བྲག་རྣམ་པ་གཉིས་ཏེ། གཅིག་གི་བཟླས་
བརྗོད་ལ་ལྟོས་པ་དང་བཅས་པ། རིག་སྔགས་དང་གསང་སྔགས་ཀྱི་གཟུགས་ལ་སོགས་པ་མངོན་དུ་བྱ་བ་གོམས་པར་བྱེད་པའི་མཚན་ཉིད་དོ། །དེ་ལས་གཞན་པ་ནི་བཟླས་བརྗོད་ལ་མི་ལྟོས་པ་མེ་ལ་གནས་པ་ལ་སོགས་པ་སྒྲ་ལ་མངོན་པར་བརྩོན་པའི་མཚན་ཉིད་དོ། །དེ་ཡང་ཡན་ལག་
བཞི་ལ་སོགས་པ་རིག་སྔགས་དང་གསང་སྔགས་ཀྱི་ཐབས་ཆེན་པོ་སྒྲུབ་པ་དང་དེ་ལས་གཞན་ཡང་སྔར་ལྷ་མཆོད་པ་ནས་བདག་གི་དེ་ཁོ་ན་ཉིད་དང་། རིག་སྔགས་ཀྱི་དེ་ཁོ་ན་ཉིད་བསྒྲུབ་པ་སྔར་བྱ་བར་འདོད་དེ། དེ་བས་དེ་བསྟན་པ། ལྷ་ཡི་སྐུ་ཡི་གནས་དེ་ལ། །དང་པོ་ཁོ་ནར་མཆོད་

71-1-10b

ནས་ནི། །ཞེས་བྱ་བ་ལ་སོགས་པ་ནས། སྲོག་དང་རྩོལ་བ་རབ་ཏུ་བསྡམས། །ཞེས་བྱ་བའི་བར་དུའོ། །དེའི་འོག་ཏུ་ཡང་བཟླས་བརྗོད་ལ་ལྟོས་པའི་རིག་སྔགས་དང་། གསང་སྔགས་ཀྱི་གཟུགས་ལ་སོགས་པ་མངོན་དུ་བྱ་བ་གོམས་པར་བྱ་བའི་མཚན་ཉིད་རིག་སྔགས་དང་
གསང་སྔགས་ཀྱི་ཐབས་ཆེན་པོ་གསུངས་པ། སྒྲ་དང་སེམས་དང་གཞི་ལ་གཞོལ། །གསང་སྔགས་མི་འགྱུར་གཞི་ལ་གནས། །ཞེས་བྱ་བ་ལ་སོགས་པ་ནས། མིས་ནི་དངོས་གྲུབ་ཐོབ་པར་འགྱུར། །ཞེས་བྱ་བའི་བར་དུའོ། །དེའི་འོག་ཏུ་ཡང་བཟླས་བརྗོད་ལ་མི་ལྟོས་པར་རིག་
སྔགས་དང་གསང་སྔགས་ཀྱི་གཟུགས་ལ་སོགས་པ་མངོན་དུ་བྱ་བ་གོམས་པར་སྦྱོར་བ་ཕན་ཡོན་དང་བཅས་པར་བསྟན་པ། གསང་སྔགས་མེ་གནས་དངོས་གྲུབ་སྟེར། །ཞེས་བྱ་བ་ལ་སོགས་པ་ནས། ཡན་ལག་སྤངས་པ་རྒྱལ་བས་མཁྱེན། །ཞེས་བྱ་བའི་བར་དུའོ། དེའི་འོག་ཏུ་
གསང་སྔགས་དང་རིག་སྔགས་ལ་དམིགས་པ། གོམས་པར་བྱེད་པའི་མཚན་ཉིད་ཐབས། །ཞེས་བྱ་བ་རྣམ་པ་གཉིས་པོ་འདི་ཉིད་ཀྱི་ཡན་ལག་རྣམས་བསྟན་པ། སྲོག་རྩོལ་དཀའ་ཐུབ་བསམ་གཏན་དང་། །ཞེས་བྱ་བ་ལ་སོགས་པ་ནས། ཡན་ལག་བཅུ་ཡི་ཚུལ་ལས་ཀྱི། །ཚངས་པ་
རྟག་ཏུ་རིག་པར་བྱ། །ཞེས་བྱ་བའི་བར་དུའོ། །འདི་ནི་རེ་ཞིག་རིག་སྔགས་དང་གསང་སྔགས་ཀྱི་ཐབས་ཆེན་པོ་ཡན་ལག་དང་བཅས་པ་མདོར་བསྟན་པའི་ཚིག་རྣམས་བསྡུས་པའི་དོན་ཏོ། །ཡན་ལག་གི་དོན་བརྟག་པ་ནི་དེ་ལ། ལྷ་ཡི་སྐུ་ཡི་གནས་དེ་ལ། །དང་པོ་ཁོ་ནར་མཆོད་ནས་ནི། །
ཞེས་པ་མཆོད་པ་སྨོས་པ་ནི་ཉེ་བར་མཚོན་པ་བསྟན་པ་སྟེ། དེ་བས་ན་གཙང་སྦྲ་བྱ་བ་དང་། གནས་དང་། བདག་བསྲུང་བ་དང་། ལྷ་སྤྱན་དྲང་བ་ལ་སོགས་པ་ཡང་འདིར་བྱ་དགོས་པར་ཤེས་པར་བྱའོ། །གང་གི་ཕྱིར་ཞེ་ན་ལྷ་སྤྱན་མ་དྲངས་ཤིང་གནས་བསྲུང་བ་མ་བྱས་པར་སྒྲུབ་པ་པོས་ལྷ་མཆོད་པའི་
སྐབས་མེད་པའི་ཕྱིར་རོ། །གཙང་སྦྲ་ལ་སོགས་པ་མཆོད་པའི་ཆོ་གའི་བར་དེ་དག་ཀྱང་། རིག་སྔགས་ལ་སོགས་པའི་རྟོག་པ་ཐམས་ཅད་ལས་ཤེས་པར་བྱའོ། །འདིར་ཡང་མཆོད་ནས་ཞེས་བྱ་བའི་ཚིག་གིས་མཚམས་སྦྱོར་བ་ཙམ་འབའ་ཞིག་བསྟན་ཏོ། །འདིར་ཡང་མཆོད་ནས་

71-1-11a

ཞེས་སྔོན་གྱི་དུས་སུ་བྱ་བའི་ཚིག་འདི་འོག་ནས་འབྱུང་བ་ཕྱིས་བྱ་བ་བཟླས་བརྗོད་ལ་སོགས་པ་བསྟན་པའི་ཚིག་དང་འབྲེལ་ཏོ། །དེ་ལ་མཆོད་ནས་ཞེས་བྱ་བ་ནི། སྐབས་འདིར་མཆོད་པ་རྣམ་པ་བཞི་བསྟན་ཏེ། ཕྱག་རྒྱ་དང་།  གསང་སྔགས་དང་། ཡིད་ཀྱི་དང་། 
ཟང་ཟིང་དང་མཆོད་པ་བཞིའི་བྱེ་བྲག་གོ། །ལྔ་པ་ནི་ནན་ཏན་གྱི་མཆོད་པ་སྟེ། ལྷའི་སྐུའི་གནས་དེ་ལ་དེ་མི་སྲིད་པའི་ཕྱིར་རོ། །དེ་སྐབས་འདིར་མི་སྦྱར་རོ། །དེ་ལ་ཞེས་བྱ་བའི་ཚིག་དེ་ལྷའི་སྐུའི་གནས་ཞེས་བྱ་བ་དེ་དང་སྦྱར་རོ། །དེའི་དོན་ནི་འདི་ལྟ་སྟེ། ལྷ་གང་གི་བཟླས་བརྗོད་
ལ་སོགས་པའི་མཚན་ཉིད་རིག་སྔགས་དང་གསང་སྔགས་ཀྱི་ཐབས་ཆེན་པོ་གོམས་པར་འདོད་པས། དེ་མཆོད་ནས་བཟླས་བརྗོད་ལ་སོགས་པ་གོམས་པར་བྱའོ་ཞེས་བྱ་བའི་དོན་ཏོ། །མཆོད་པ་དེ་ཡང་ལྷ་དེའི་གང་དུ་བྱ་ཞེ་ན། སྐུའི་གནས་ཞེས་བྱ་བ་སྟེ། དེ་ལ་སྐུ་ཉིད་གནས་པས་
ན་སྐུའི་གནས་སོ། །སྐུ་དང་གཟུགས་དང་ལུས་ཞེས་བྱ་བ་ནི་རྣམ་གྲངས་སོ། །དེས་ནི་དོན་འདི་ལྟར་འགྱུར་ཏེ། རི་མོ་དང་སྐུ་གཟུགས་ལ་སོགས་པའི་ལྷའི་གཟུགས་ཀྱི་མཚན་ཉིད་སྐུའི་གནས་ལ་མཆོད་པ་བྱས་ནས། བཟླས་བརྗོད་ལ་སོགས་པ་བྱའོ་ཞེས་བསྟན་ཏོ། །རྣལ་འབྱོར་
གནས་བཅས་པ་ཞེས་བྱ་བ་ནི། རྣལ་འབྱོར་གྱི་ཕྱིར་འདུག་པས་ན་རྣལ་འབྱོར་གནས་སོ། །དེ་ལ་རྣལ་འབྱོར་ནི་སྦྱོར་བ་སྟེ། ཇི་ལྟར་སྲིད་པའི་ལྷ་རྣམ་པ་དྲུག་ལ་ཀུན་དུ་སྦྱར་བ་ཞེས་བྱ་བའི་ཐ་ཚིག་སྟེ། དེ་དང་རྗེས་སུ་མཐུན་པར་གནས་པ་ནི་རྡོ་རྗེ་དང་བཀྲ་ཤིས་དང་སེམས་དཔའི་སྐྱིལ་
མོ་ཀྲུང་ལ་སོགས་པའི་མཚན་ཉིད་དོ། །བདེ་གཤེགས་མདུན་དུ་བསམས་ནས་ནི། །ཞེས་བྱ་བ་འདིས་བཟླས་བརྗོད་ལ་སོགས་པའི་སྦྱོར་བ་ཐམས་ཅད། བཅོམ་ལྡན་འདས་ཀྱི་སྤྱན་སྔར་བྱ་བ་བསྟན་ཏོ། །དེ་ལྟར་ཅི་མངོན་ཞེ་ན། ལྷའི་རྣལ་འབྱོར་གྱི་མཚན་ཉིད་རིག་སྔགས་ཀྱི་བརྟུལ་
ཞུགས་ཀྱི་གནས་བསྟན་པའི་སྒོ་ནས་དོན་དམ་པའི་བཟླས་བརྗོད་ཀྱི་གནས་འོག་ནས། གསང་སྔགས་ལ་སོགས་ལྡན་པ་ཡི། །རིག་སྔགས་ཁྲོ་བོ་མང་པོ་ཀུན། །རྒྱལ་བའི་སྐུ་ལ་མངོན་ཕྱོགས་ནས། །བསམ་གཏན་ངོམས་ཕྱིར་རྟག་ཏུ་གནས། །ཞེས་བསྟན་ཏོ། །ད་ནི་བདག་གི་དེ་

71-1-11b

ཁོ་ན་ཉིད་བརྟག་པར་བྱ་སྟེ། དེ་ལ་གཞན་གྱིས་ཡོངས་སུ་བརྟགས་པའི་བདག་ནི་ཀུན་རྫོབ་ཀྱི་བདེན་པའི་ཐ་སྙད་དུ་ཡང་མི་བཟོད་པས་ན་རྣལ་འབྱོར་པའི་གཟུགས་ལ་སོགས་པའི་ཕུང་པོ་ལྔ་པོ་རྣམ་པར་མ་བཤིག་པའི་རང་བཞིན་འདི་ཉིད་ལ་བདག་ཅེས་བརྗོད་པར་ཤེས་པར་བྱའོ། །རྣལ་
འབྱོར་པའི་བདག་དེ་ལྟ་བུའི་ཕྱིན་ཅི་མ་ལོག་པའི་རང་བཞིན་ནི་བདག་གི་དེ་ཁོ་ན་ཉིད་དེ། དེ་ཡང་འདི་ལྟར་དགོངས་སོ། །རིགས་པ་དང་ལུང་དག་གིས་བརྟགས་ན། དེའི་ཕུང་པོ་ལྔའི་མཚན་ཉིད་ཀྱི་བདག་ཕྱིན་ཅི་མ་ལོག་པའི་ངོ་བོ་ཉིད་ཙམ་ཞིག་ལྷག་མ་ལུས་པ་མེད་པར་སྐུར་པ་གདབ་མི་
ནུས་པ་གང་ཡིན་པ་དེ་ནི་བདག་གི་དེ་ཁོ་ན་ཉིད་དོ། །དེ་ཡང་དོན་དམ་པའི་བདེན་པའི་ཡུལ་སྤྲོས་པ་ཐམས་ཅད་ཀྱི་བག་ཆགས་ཀྱི་གཞི་དང་བྲལ་བ་རྣམ་པ་མེད་པ་རང་གིས་རིག་པའི་ངོ་བོ་ཉིད་གཉིས་སུ་མེད་པའི་ཡེ་ཤེས་ཀྱི་མཚན་ཡིན་པར་འདིར་འདོད་དོ། །དེ་ལྟ་བུའི་བདག་གི་དེ་ཁོ་ན་
ཉིད་རྟོགས་པར་བྱ་བའི་ཐབས་གསུངས་པ། ཕྱི་ནས་ཡན་ལག་རྣམ་གྲོལ་བ། །མི་འབྱེད་འབྱེད་པ་རྣམ་པར་སྤངས། །ཕྲ་བ་མི་གཡོ་གསལ་བ་སྟེ། །བློ་ཡི་སྤྱོད་ཡུལ་མདུན་ན་གནས། །བདག་ཉིད་འདི་འདྲར་བཞག་ནས་ནི། །ཞེས་བྱ་བའོ། །དེ་ལ་ཡན་ལག་ལ་སོགས་པ་
ལས་རྣམ་པར་གྲོལ་བའི་ཚིག་རྣམས་དང་། བདག་ཉིད་འདི་འདྲར་བཞག་ནས་ཞེས་བྱ་བ་འདི་དང་སྦྱར་རོ། །དེ་ལ་མིག་ལ་སོགས་པའི་ཡན་ལག་ལས་རྣམ་པར་གྲོལ་ཞིང་བྲལ་བ་ནི། ཡན་ལག་ལས་རྣམ་པར་གྲོལ་བའོ། །ཡན་ལག་རྣམ་པར་གྲོལ་བདག་དེ། །བཞག་ནས་
ཞེས་བྱ་བའི་ཚིག་འོག་མ་རྣམས་དང་ཡང་དེ་བཞིན་དུ་སྦྱར་རོ། །ཡན་ལག་ལས་རྣམ་པར་གྲོལ་བའི་བདག་དེ་ཡང་ཅི་འདྲ་བ་ཞིག་ཅེ་ན། མི་འབྱེད་ཅེས་བྱ་བ་གསུངས་ཏེ། དེ་ལ་ཡན་ལག་ཡོངས་སུ་སྤངས་པའི་སྒོ་ནས་གཞན་གྱི་རྒྱུད་ལ་གནས་པའི་མིག་དང་རྣ་བ་ལ་སོགས་པའི་
རྣམ་པར་ཤེས་པས་ཀྱང་མི་འབྱེད་ཅིང་མི་འཛིན་པས་ན་མི་འབྱེད་པ་སྟེ། གཟུགས་མེད་ཅེས་བྱ་བའི་ཐ་ཚིག་གོ། །ད་ནི་གཟུགས་མེད་པ་ལ་སོགས་པའི་ངོ་བོ་ཉིད་ཀྱི་བདག་སྟེ་གཟུགས་ལ་སོགས་པ་ལ་དམིགས་པ་དགག་པའི་ཕྱིར།  འབྱེད་པ་རྣམ་པར་སྤངས་ཞེས་བྱ་བ་

71-1-12a

གསུངས་སོ། །དེའི་དོན་ནི་འདི་ལྟ་སྟེ། མིག་ལ་སོགས་པའི་ཡན་ལག་ཡོངས་སུ་སྤངས་པ་ཉིད་ཀྱིས། མིག་ལ་སོགས་པས་བསྐྱེད་པའི་རྣམ་པར་ཤེས་པ་དམིགས་པར་བྱེད་པ་རྣམས་མེད་དོ། །མེད་པས་ན་གཟུགས་ལ་སོགས་པ་དབྱེ་བ་རྣམས་ལ་
འདིས་དམིགས་པ་སྤངས་པའི་ཕྱིར། འབྱེད་པ་རྣམ་པར་སྤངས་པ་སྟེ། དེ་ལ་འབྱེད་པ་རྣམ་པར་སྤངས་ཞེས་བྱ་བ་སྔ་མ་བཞིན་དུ་སྦྱར་རོ། །དེ་ནི་ཡན་ལག་རྣམ་པར་གྲོལ་བས་ན། བདག་གཟུགས་ལ་སོགས་པའི་རང་བཞིན་ཡང་མ་ཡིན། གཟུགས་དང་སྒྲ་ལ་སོགས་པ་ལ་
དམིགས་པར་བྱེད་པའི་རང་བཞིན་ཡང་མ་ཡིན་ཞེས་བཤད་པར་འགྱུར་རོ། །དེ་ལྟ་བུའི་བདག་གི་རང་བཞིན་འདི་བཅོམ་ལྡན་འདས་ཀྱིས་ཁ་ཅིག་ཏུ་ནི་གཉིས་སུ་མེད་པའི་ཡེ་ཤེས་ཀྱི་རང་བཞིན་དུ་དེ་བཤད་པ་ལ། མོས་པའི་སེམས་ཅན་རྣམས་ལ་བསྟན་ཏོ། །འདིར་ནི་བདག་གི་དེ་
ཁོ་ན་ཉིད་ཀྱི་རང་བཞིན་དུ་བསྟན་ཏེ། དེ་ལྟ་བུའི་སྒྲ་ཐོས་པ་ཙམ་གྱིས་འདུལ་བའི་འགྲོ་བ་བསྡུ་བའི་སྒོ་ནས་བཤད་པར་མངོན་ནོ། །དེ་ལ་འདི་སྙམ་དུ་སེམས་པ་དག་ཀྱང་ཡོད་དེ། གལ་ཏེ་བདག་གི་དེ་ཁོ་ན་ཉིད་འདི་བདག་རང་གི་ཕྱི་རོལ་གྱི་གཟུགས་ཀྱི་རང་བཞིན་ཡང་མ་ཡིན་ཕྱི་
རོལ་གྱི་གཟུགས་ལ་དམིགས་པའི་རང་བཞིན་ཡང་མ་ཡིན་དུ་ཟིན་ཀྱང་། གང་རྨི་ལམ་གྱི་རྣམ་པར་ཤེས་པ་དང་འདྲ་བར་ནང་གི་འཁྲུལ་པ་ལས་ཕྱི་རོལ་གྱི་དོན་སྣང་བ་སྟེ། འདིར་སུས་བཀག་ཅེས་གང་རྒོལ་བ་དེའི་ལན་དུ་ཕྲ་བ་ཞེས་གསུངས་སོ། །དེ་འདི་ལྟར་དགོངས་ཏེ། ཇི་
ཙམ་དུ་ནང་གི་རྒྱུས་འཁྲུལ་པའམ། ཕྱི་རོལ་གྱི་དོན་གྱི་དབང་གིས་དོན་གྱིས་རྣམ་པར་སྣང་བ་དེ་ཙམ་དུ་བདག་ཅེས་བྱ་བ་ཤེས་པའི་རང་བཞིན་དེ་རིགས་སོ། །དེ་མེད་པ་ནི་རྣམ་པ་ཐམས་ཅད་དུ་རྣམ་པར་གྲོལ་བ་ཕྲ་བའི་དངོས་པོ་ཉིད་ཡིན་པར་མངོན་ནོ། །ད་ནི་བདག་གི་དེ་ཁོ་ཉིད་ཡེ་ཤེས་
ཀྱི་རང་བཞིན་ཏེ། ཞུམ་པ་དང་རྒོད་པ་མེད་པར་བསྟན་པ། མི་གཡོ་གསལ་བ་སྟེ་ཞེས་བྱ་བ་གསུངས་སོ། །དེ་ལ་མི་གཡོ་བ་ནི་མི་འགུལ་བ་མི་འགྱུར་བ་ཞེས་བྱ་བའི་ཐ་ཚིག་གོ། །འདིས་ཀྱང་ཤེས་རབ་རྒོད་པའི་རྣལ་འབྱོར་པ་ཆོས་རྣམ་པར་འབྱེད་པའི་རྣམ་པར་རྟོག་པ་གོམས་

71-1-12b

པར་བྱས་པའི་སེམས་གཡོ་བ་མ་ཞི་བའི་མཚན་ཉིད་རྒོད་པ་དང་དགག་པ་གསུངས་སོ། །དེ་བས་ན་སེམས་མི་གཡོ་བ་ནི་ལམ་ལ་ཉེ་བར་ཞི་བ་ཡིན་ནོ་ཞེས་བཤད་དོ། །དེ་བཞིན་དུ་གསལ་བ་ཞེས་བྱ་བ་ནི་དང་བ་སྟེ། རྨུགས་པ་ལ་སོགས་པའི་ཉེས་པ་དང་བྲལ་ཞེས་བྱ་བའི་ཐ་ཚིག་གོ། ། 
འདིས་ཀྱང་ཞི་གནས་གཅིག་པོར་སོང་བའི་རྣལ་འབྱོར་པ་ཆོས་རྣམ་པར་དབྱེ་བའི་དུས་ན་ཡང་གང་ཧ་ཅང་མཉམ་པར་གཞག་ཅེས་པ། སེམས་ཞུམ་པའི་མཚན་ཉིད་རྨུགས་པ་ཆོས་རྣམ་པར་འབྱེད་པའི་མི་མཐུན་པའི་ཕྱོགས་སུ་གྱུར་པ་དེ་བཀག་གོ། །དེ་ལྟར་བདག་གི་དེ་ཁོ་ན་ཉིད་
ཡན་ལག་མེད་པ། དམིགས་པ་མེད་པ། གཟུགས་མེད་པ། རྣམ་པ་མེད་པ། མི་གཡོ་བ། གསལ་བར་རྗེས་སུ་མྱོང་བ་མཚན་ཉིད་ཡིན་ཡང་རྣམ་པར་དཔྱོད་པའི་ལམ་མ་སྤངས་པ་ཉིད་དུ་འདོད་པས། བློ་ཡི་དཔྱོད་པ་མདུན་ན་གནས། །ཞེས་བྱ་བ་གསུངས་སོ། །བློ་ནི་
ཤེས་རབ་བོ། །དེའི་རང་གི་ཡུལ་ལ་འཇུག་པ་ནི་དཔྱོད་པ་སྟེ། བློའི་དཔྱོད་པའོ། །བློའི་དཔྱོད་པ་དེ་ཤེས་རབ་ཀྱི་སྣང་བའི་མཚན་ཉིད་དེ། བདག་གི་དེ་ཁོ་ན་ཉིད་གང་ཡིན་པའི་མདུན་ན་གནས་པ་དེ་ནི་བློའི་དཔྱོད་པ་མདུན་ན་གནས་པའོ། །དེས་འདི་སྐད་གསུངས་པར་འགྱུར་ཏེ་
རང་གིས་རིག་པའི་རང་བཞིན་དེ་རྣམ་པར་མི་རྟོག་པ་ཡིན་ཡང་ཤེས་རབ་ཀྱི་སྣང་བ་མདུན་ན་དཔྱོད་པ་ཉིད་དུ་འཇུག་གོ་ཞེས་བཤད་དོ། །ཤེས་རབ་དེ་བདག་གི་དེ་ཁོ་ན་ཉིད་དང་ཐ་མི་དད་དུ་ཟིན་ཀྱང་། བདག་གི་དེ་ཁོ་ན་ཉིད་ཀྱི་མདུན་ན་གནས་ཞེས་གསུངས་ཏེ། སྣང་བའི་དཔེ་བཞིན་
ནོ། །དེ་ལྟར་ཅི་མངོན་ཞེ་ན། སྣང་བ་མངོན་དུ་བྱས་ནས་མིག་ཅན་གྱིས་དངོས་པོ་སྣང་བ་རྣམས་མཐོང་ངོ་ཞེས་བྱ་བ་ལྟ་བུའོ། །དེ་ལྟར་གཟུང་བ་དང་འཛིན་པའི་ཡོངས་སུ་རྟོག་པའི་རང་བཞིན་ལས་རྣམ་པར་གྲོལ་བ་གཟུགས་མེད་པ། རྣམ་པ་མེད་པ། མི་གཡོ་བ། རབ་ཏུ་འོད་
གསལ་བ། རང་གི་རིག་པའི་རང་བཞིན་བདག་གི་དེ་ཁོ་ན་ཉིད་བསྟན་ནས་མཇུག་བསྡུ་བའི་ཕྱིར་རོ། །བདག་ཉིད་འདི་འདྲར་བཞག་ནས་ནི། །ཞེས་བྱ་བ་གསུངས་ཏེ། འདི་འདྲར་ཞེས་བྱ་བ་ནི་གོང་དུ་སྨོས་པའི་མཚན་ཉིད་ལྟར་རོ། །བཞག་ནས་ཞེས་བྱ་བ་ནི་བསམ་གནས་ཞེས་

71-1-13a

བྱ་བ་སྟེ། ཆོས་རྣམས་ཀྱི་རང་དང་སྤྱིའི་མཚན་ཉིད་གསལ་བའི་རིགས་པས་བསམ་གནས་ཞེས་བྱ་སྟེ། གསང་སྔགས་ཀྱི་བཟླས་བརྗོད་བྱའོ་ཞེས་འོག་ནས་འཆད་དོ། །ད་ནི་བདག་གི་དེ་ཁོ་ན་ཉིད་དེ་ལྟ་བུ་མངོན་དུ་བྱས་པའི་སྣང་བ་ལས་ལངས་ནས་ལྷའི་
དེ་ཁོ་ན་ཉིད་བསྟན་པའི་ཕྱིར། གསང་སྔགས་རྣམ་པར་ཤེས་པས་བསྒོམ། །བསྡམས་ནས་ཏིང་ངེ་འཛིན་ལ་གནས། །སྲོག་དང་རྩོལ་བ་རབ་ཏུ་བསྡམས། །ཞེས་བྱ་བ་གསུངས་སོ། །དེ་ལ་གསང་སྔགས་ཀྱི་རྣམ་པར་རྟོག་པ་དང་བཅས་པ་དང་། རྣམ་པར་མི་རྟོག་པའི་
ཡེ་ཤེས་དང་། སྒྲ་དང་། ཡི་གེ་དང་། ཕྱག་རྒྱ་དང་། གཟུགས་ཀྱི་བྱེ་བྲག་ལས་ལྷ་རྣམ་པ་དྲུག་གོ། །དེ་ལྟ་བུའི་གསང་སྔགས་ལ་དམིགས་པའི་རྣམ་པར་ཤེས་པ་དེ་ནི་གསང་སྔགས་ཀྱི་རྣམ་པར་ཤེས་པ་སྟེ། གསང་སྔགས་ཀྱི་རྣམ་པའི་རྣམ་པར་ཤེས་པ་དེས་བསྒོས་
ཤིང་བསྒོམས་པ་ནི་གསང་སྔགས་ཀྱི་རྣམ་པར་ཤེས་པས་བསྒོས་པ་སྟེ། བདག་ཉིད་ཅེས་བྱ་བའི་སྐབས་དང་འབྲེལ་ཏོ། །དེས་ན་འདི་ལྟར་དགོངས་ཏེ། ནམ་རྣམ་པར་མི་རྟོག་པའི་རང་བཞིན་བདག་གི་དེ་ཁོ་ན་ཉིད་དེ་ལས་ལྡང་བར་འདོད་པར་གྱུར་པ་དེ་ན། ལྷའི་རང་བཞིན་
རྣམ་པ་དྲུག་པོ་དེས་བདག་བསྒོས་ནས། ལྷའི་དེ་ཁོ་ན་ཉིད་ཀྱི་གཟུགས་སུ་བྱའོ་ཞེས་དགོངས་པའོ། །དེ་ལ་ལྷའི་ངོ་བོ་ཉིད་ཀྱིས་བསྒོ་བའི་ཚུལ་ཡང་འདི་ལྟ་སྟེ། ཇི་ལྟར་བདག་གི་དེ་ཁོ་ན་ཉིད་འདི་རྣམ་པར་མི་རྟོག་ཅིང་རྣམ་པ་མེད་པ། ཕྱོགས་ཐམས་ཅད་དུ་ཁྱབ་པ་དེ་བཞིན་
དུ། བདག་འདོད་པའི་གསང་སྔགས་ཀྱང་དེ་བཞིན་ཏེ། དེ་བས་ན་འདི་གཉིས་རྣམ་པ་ཐམས་ཅད་དུ་མཚུངས་པས། ལྷའི་རྣམ་པར་མི་རྟོག་པའི་ཡེ་ཤེས་སྣང་བ་དེ་བདག་གི་རྣམ་པར་མི་རྟོག་པའི་བདག་གི་དེ་ཁོ་ན་ཉིད་ཡེ་ཤེས་སྣང་བའི་ནང་དུ་འདུས། བདག་གི་ཡང་ཆུ་དང་འོ་མ་བཞིན་
དུ་དེའི་ནང་དུ་འདུས་པས་ན། བདག་ཅག་གཉིས་གཅིག་གོ་ཞེས་ཡོངས་སུ་བརྟགས་ཏེ། ཡང་རྣམ་པར་མི་རྟོག་པའི་སྣང་བའི་སྒོ་དེ་ཉིད་དུ་བདག་དང་། ལྷ་གཉིས་གཅིག་པར་ང་རྒྱལ་མངོན་དུ་བྱས་ཏེ། སྣང་བ་མེད་པར་རང་གི་རིག་པ་ཤིན་ཏུ་མངོན་སུམ་དུ་གྱུར་པར་བསམ་

71-1-13b

གཏན་བྱའོ། །དེ་ལས་ལངས་ནས་གསང་སྔགས་ཀྱི་སྒྲར་རྣམ་པར་བརྟག་གོ། །དེ་ལས་ཀྱང་གསང་སྔགས་ཀྱི་ཡི་གེའི་རྣམ་པ་ནམ་མཁའི་ནང་ན་གནས་པ་སྣང་བར་བསམ་པར་བྱའོ། །དེ་དག་ཀྱང་བདག་གི་དེ་ཁོ་ན་ཉིད་ཟླ་བའི་དཀྱིལ་འཁོར་གྱི་རྣམ་པར་མངོན་པར་གྱུར་པ་ལ། 
ཤིན་ཏུ་དག་པའི་དངུལ་ཆུ་གསེར་གྱི་བྱེ་མ་ལ་ཞེན་པ་ལྟར་ནང་དུ་འདུས་པར་བསམ་མོ། །དེ་ནས་ཡང་ལྷ་དང་བདག་གི་དེ་ཁོ་ན་ཉིད་གཅིག་ཏུ་གྱུར་པའི་རང་བཞིན་ཟླ་བའི་བདུད་རྩི་ལས་འོད་ཟེར་རབ་ཏུ་འཕྲོས་པའི་སྒོ་ནས།  ལྷག་པའི་ལྷའི་གཟུགས་དང་། བདག་དང་མི་གཉིས་པའི་རྣལ་
འབྱོར་གྱི་རབ་ཏུ་གསལ་བར་སྣང་ཞིང་། དེའི་ང་རྒྱལ་དུ་མངོན་པར་སྒོམ་མོ། །བསམ་གཏན་གྱི་རྣམ་པར་རྟོག་པ་དེ་ལས་ཀྱང་ལངས་ནས། མཚོག་མ་དང་སྤྱི་གཙུག་ལ་སོགས་པའི་ཕྱག་རྒྱ་རྣམས་ཀྱིས་ཡན་ལག་དང་བཅས་པར་བྱས་ལ། རྣམ་པར་རྟོག་པ་དང་བཅས་པའི་ལྷར་བསྒོམ་
མོ། །འདི་ནི་རེ་ཞིག་སྤྱིའི་གསང་སྔགས་ཀྱི་རྣམ་པར་ཤེས་པ་བསྒོམ་པའི་རིམ་པའོ། །གང་ཁ་ཅིག་ཏུ་རྣམ་པ་གཞན་དུ་གསུངས་པ་དེ་དག་ཏུ་ཡང་དེ་བཞིན་དུ་སྦྱར་བར་བྱའོ། །ད་ནི་གསང་སྔགས་རྣམ་པ་དྲུག་པོ་དེ་དག་ཉིད་ཀྱི་རྣམ་པར་ཤེས་པས་བསྒོ་བ་ནི་སེམས་པའི་མཚན་ཉིད། 
བསམ་གཏན་གྱི་ལྷའི་གཟུགས་དང་བདག་མི་གཉིས་པར་ཇི་ལྟར་བསམས་པའི་ཏིང་ངེ་འཛིན་མངོན་དུ་བྱས་པས། ཡུན་རིང་དུ་དམིགས་ཤིང་གསལ་བར་སྣང་བར་བྱ་བ་བསྟན་པ། བསྡམས་ནས་ཏིང་ངེ་འཛིན་ལ་གནས། །ཞེས་བྱ་བ་གསུངས་ཏེ། འདིར་ཡང་བདག་
ཅེས་བྱ་བ་དང་འབྲེལ་ཏེ། དེ་བས་ན་བདག་བསྡམས་ནས་ཏིང་ངེ་འཛིན་ལ་གནས་པར་བྱའོ་ཞེས་བྱ་བར་འགྱུར་རོ། །དེ་ལ་བདག་བསྡམས་པ་ནི་དྲན་པ་སྲོག་དང་རྩོལ་བར་ལྡན་པར་ཇི་ལྟར་ཏིང་ངེ་འཛིན་དུ་བྱ་བའི་ལྷའི་གཟུགས་ལས་གཞན་དུ་མི་འཕྲོ་བའོ། །ཏིང་ངེ་འཛིན་ལ་གནས་ཞེས་
བྱ་བ་ནི། ཏིང་ངེ་འཛིན་རྩེ་གཅིག་ཏུ་དམིགས་པའི་མཚན་ཉིད་ལ་མཉམ་པར་ལྡན་པའི་སྒོ་ནས་གནས་པས་ན་ཏིང་ངེ་འཛིན་ལ་གནས་ཏེ། བདག་གི་བྱེ་བྲག་ལ་བྱའོ། །དེ་ནས་འདི་ལྟར་དགོངས་ཏེ། རྣམ་པ་གཉིས་ཀྱི་ལྷའི་གཟུགས་བདག་དང་མི་གཉིས་པའི་རྣལ་འབྱོར་བསྐྱེད་པ་ནི་འདི་ལྟ་སྟེ་བསམ་གཏན་

71-1-14a

དང་ཏིང་ངེ་འཛིན་གྱིས་སོ། །དེ་ལ་བསམ་གཏན་ནི་སེམས་པའི་མཚན་ཉིད་དེ་དང་པོར་བསམ་པར་བྱ་བའི་དངོས་པོའི་རང་གི་གཟུགས་ལ་རྟོག་པའི་རང་བཞིན་ནོ། །ཏིང་ངེ་འཛིན་ནི་བསམ་གཏན་གྱིས་བརྟགས་པའི་དངོས་པོའི་རང་བཞིན་ཡུལ་དུ་གྱུར་པ་
ལས་རྣམ་པར་རྟོག་པའི་རབ་ཏུ་སྤྲོས་པ་དང་བྲལ་བ་རྩེ་གཅིག་ཏུ་དམིགས་པ་རྣམ་པར་མི་རྟོག་པའི་རང་བཞིན་བརྗོད་པ་མེད་པ་དོན་ཙམ་དུ་ཡུལ་དུ་གྱུར་པའི་རང་བཞིན་ནོ། །དེ་བས་ན་དང་པོ་ཁོ་ནར་གསང་སྔགས་རྣམ་པ་དྲུག་གི་ཡི་གེས་རྣམ་པར་ཤེས་པ་བསྒོམས་པ་སེམས་པའི་མཚན་ཉིད་
བསམ་གཏན་གྱིས་བདག་གི་དེ་ཁོ་ན་ཉིད་པོ་དེ་ལྷའི་གཟུགས་སུ་རྣམ་པར་བརྟགས་ནས། ཡང་ཇི་ལྟར་ལྷའི་གཟུགས་སུ་བསམས་པའི་བདག་ཉིད་དེ་དང་། རྣམ་པ་གཅིག་པར་ཏིང་ངེ་འཛིན་གྱིས་ཤིན་ཏུ་བསྒོམས་པས། གསལ་བར་བྱ་བའི་ཏིང་ངེ་འཛིན་ལ་གནས་ཞེས་བྱ་བའི་
ཐ་ཚིག་གིས་བསྟན་ཏོ། །ཏིང་ངེ་འཛིན་ལ་གནས་པའི་ཚེ། བདག་ཉིད་བསྡམ་པའི་ཚིགས་བཅད་དགོས་པར་མངོན་ཏེ། བསམ་གཏན་དུ་འཇུག་པ་ན་ཡང་བདག་བསྡམ་དགོས་མོད་ཀྱི་འོན་ཀྱང་ཇི་ལྟར་ཏིང་ངེ་འཛིན་མངོན་དུ་བྱེད་པའི་ཚེ། བདག་བསྡམ་པར་འདོད་པ་དེ་
ལྟར་བསམ་གཏན་མངོན་དུ་བྱེད་པའི་ཚེ་ན་མ་ཡིན་ནོ། །དེ་ཅིའི་ཕྱིར་ཞེ་ན། བསམ་གཏན་གྱི་མཚན་ཉིད་ནི་བསམ་གཏན་དངོས་པོ་ལ་ཐོག་མ་ཉིད་དུ་རྟོག་པའི་སེམས་པའི་རྣམ་པ་ཅན་དུ་འདོད་དེ། དེ་བས་ན་བསམ་གཏན་ནི་བདག་ཉིད་སྣ་ཚོགས་སུ་རྣམ་པར་རྟོག་པའི་རང་བཞིན་
ཡིན་པས་དེ་ལ་བདག་བསྡམ་པར་མ་བྱས་ཀྱང་། སྣ་ཚོགས་སུ་རྟོག་པ་སེམས་པའི་རང་བཞིན་གྱི་བསམ་གཏན་ནི་ཐམས་ཅད་དུ་མེད་པར་མི་འགྱུར་རོ། །ཏིང་ངེ་འཛིན་ནི་བསམ་གཏན་གྱིས་རྣམ་པར་བརྟགས་ནས་ངེས་པའི་དངོས་པོ་ལ་དམིགས་པ་སྟེ། ཏིང་ངེ་འཛིན་ནི་སེམས་རྩེ་
གཅིག་པ་ཞེས་བཤད་པའི་ཕྱིར། དེ་རྣམ་པ་གཅིག་པ་ཉིད་དོ། །དེ་བས་ན་བདག་གི་དེ་ཁོ་ན་ཉིད་ལ་བསྡམས་ན། ཇི་ལྟར་ཏིང་ངེ་འཛིན་དུ་བྱ་བའི་ལྷའི་དེ་ཁོ་ན་ཉིད་བདག་ཏུ་གྱུར་པ་ལས་གཞན་པ་གང་དུ་ཡིད་འགྲོ་བས་རྩེ་གཅིག་ཏུ་མི་འགྱུར་ཏེ། དེ་བས་ན་བསྡམས་ནས་ཏིང་ངེ་

71-1-14b

འཛིན་ལ་གནས་ཞེས་གསུངས་སོ། །བསྡམས་ཞེས་སྨྲས་པ་དེ་ཡང་ཇི་ལྟར་བསྡམ་པར་བྱ་བ་མི་ཤེས་ཏེ། དེ་བས་ན། སྲོག་དང་རྩོལ་བ་རབ་ཏུ་བསྡམས། །ཞེས་གསུངས་སོ། །དེ་ལ་སྲོག་དང་རྩོལ་བ་ནི་སྲོག་དང་རྩོལ་བ་སྟེ། ལྷའི་དེ་ཁོ་ན་ཉིད་ལ་བདག་ཉིད་ཏིང་ངེ་འཛིན་
དུ་གནས་པས་ན། དེ་གཉིས་བསྡམས་པ་དེ་ལ། སྲོག་དང་རྩོལ་བ་རབ་ཏུ་བསྡམས་པའི་བདག་ཅེས་བྱའོ། །དེ་ལ་སྲོག་ཅེས་བྱ་བ་ནི་མིག་དང་། རྣ་བ་དང་། སྣ་དང་། ཁ་དང་། ལྟེ་བ་དང་། སྐྱེས་པ་དང་། བུད་མེད་ཀྱི་དབང་པོ་དང་།  མི་གཙང་བའི་ཁུང་བུ་དང་། 
སྐྲ་དང་བ་སྤུའི་བུ་ག་ནས་འབྱུང་བ་དང་། འཇུག་པའི་མཚན་ཉིད་ཀྱི་རླུང་སྟེ། དེ་བསྡམས་པ་ཡང་སྐབས་འདིར་འབྱུང་བ་དང་འཇུག་པ་དགག་པའོ། །དེས་ནི་བདག་གི་ལུས་ལྷའི་སྐུའི་དེ་ཁོ་ན་ཉིད་གཉིས་སུ་མེད་པར་ཇི་ལྟར་བསམས་པའི་གནས་ཇི་ལྟ་བ་བཞིན་དུ། རླུང་འཇུག་པ་དང་འབྱུང་
བ་རྣམ་པར་དགག་པ་གྱེན་དུ་འདྲེན་པའི་རླུང་གིས། རུས་སྦལ་གྱི་ལུས་བསྐུམ་པ་དང་། ལྕེ་ཡིས་ཆུ་བཏུང་བའི་ཚུལ་དུ་བསྡུས་ཏེ། ཇི་ལྟར་བསམས་པའི་ལྷའི་སྐུ་དེ་ཁོ་ན་ཉིད་དང་། བདག་གི་ལུས་གཉིས་སུ་མེད་པར་གྱུར་པའི་ནང་དུ་ཏིང་ངེ་འཛིན་ནམ། བཟླས་བརྗོད་མ་རྫོགས་ཀྱི་བར་
དུའམ། ཅི་ནུས་པར་གཟུང་ངོ་ཞེས་དེ་སྐད་བཤད་པ་ཡིན་ནོ། །རྩོལ་བ་ནི་དྲན་པར་གསུངས་ཏེ། དེ་བསྡམས་པ་ཡང་བཟླས་བརྗོད་ཀྱི་དུས་མ་རྫོགས་ཀྱི་བར་དུའམ། ཅི་ནུས་པར་ཇི་ལྟར་བསམས་པའི་ལྷ་ཉིད་ཀྱི་གཟུགས་ལས་གཞན་པ་གུད་དུ་དམིགས་པ་དགག་པ་སྟེ། འདི་དེ་ལྟར་
ཅི་མངོན་ཞེ་ན། སྲོག་ཅེས་བྱ་བ་རླུང་དུ་བཤད། རྩོལ་བས་དྲན་པ་ཞེས་བྱའོ། །ཞེས་གཞན་དག་ལས་གསུངས་སོ། །ཡང་ན་ཇི་སྐད་སྨོས་པའི་མཚན་ཉིད་ཀྱི་སྲོག་སྔ་མའི་རིམ་པ་ཉིད་ཀྱིས་ཀུན་དུ་བསྡམས་པ་རྒྱུན་བཅད་ཅིང་།   འགོག་པ་ནི་སྲོག་རྩོལ་བ་ཞེས་བྱ་སྟེ། སྲོག་རྩོལ་
བ་དེས་བདག་ཤིན་ཏུ་བསྡམས་པ་ནི་སྲོག་རྩོལ་བ་རབ་ཏུ་བསྡམས་པའོ། །ཕྱོགས་འདིར་ཡང་བདག་ཅེས་བྱ་བའི་སེམས་བསྡམས་པ་ཉིད་ཀྱིས། དྲན་པ་བསྡམས་པར་རིག་པར་བྱའོ། །དེ་ལྟར་ཅི་མངོན་ཞེ་ན།  སེམས་རྒྱལ་པོ་དྲན་པ་དང་ཏིང་ངེ་འཛིན་དང་ཡིད་ལ་བྱེད་པ་ལ་སོགས་

71-1-15a

པའི་འཁོར་གྱིས་བསྐོར་བ་སྲོག་གི་ལྟ་ཞོན་པ་ཉིད་དུ་འདོད་དེ། སྲོག་གི་རྟ་དེ་བཟུང་ན། སེམས་རྒྱལ་པོ་འཁོར་དང་བཅས་པ་ངེས་པར་བཟུང་བར་འགྱུར་རོ། །འདི་ལྟར་གཞན་དག་ལས་ཀྱང་། སྲོག་རྩོལ་བ་ནི་སྲོག་འགོག་པ་སྟེ། དེ་བཀག་པས་དྲན་བ་དང་། 
བློ་དང་ཡིད་ལ་བྱེད་པ་ལ་སོགས་པ་དང་བཅས་པའི་བདག་གི་སེམས་ངེས་པར་གཟུང་བར་འགྱུར་རོ་ཞེས་གསུངས་སོ། །དེ་བས་ན་དེ་ལྟར་རྣམ་པར་ཤེས་པ་གསང་སྔགས་རྣམ་པ་དྲུག་གི་རྣམ་པ་བསྒོམས་པས་ལྷའི་དེ་ཁོ་ན་ཉིད་ཅེས་བྱ་བ། ལྷའི་གཟུགས་སུ་བདག་མངོན་པར་བསྒྱུར་ལ། 
སྲོག་དང་རྩོལ་བ་འགོག་པ་སྔར་བྱས་ཏེ། ཏིང་ངེ་འཛིན་དུ་གནས་པར་བྱས་ནས། བཟླས་བརྗོད་ཀྱི་ཡན་ལག་བཞི་ལ་སོགས་པ་འོག་ནས་འཆད་པ་ཐམས་ཅད་འདིར་བྱའོ་ཞེས་བསྟན་པའི་ཐ་ཚིག་གོ། །དེ་བཞིན་གཤེགས་པ་ལ་སོགས་པ་བཟླས་བརྗོད་ཀྱི་ཡན་ལག་བཞི་བརྟག་པ་
ཡང་རྡོ་རྗེ་གཙུག་ཏོར་གྱི་རྒྱུད་འདི་ཉིད་དུ་སྔར་བསྟན་ཏེ། དེ་བས་ན་གཞུང་འདི་ནི་བསམ་གཏན་ཕྱི་མ་རིམ་པར་ཕྱེ་བ་ཞེས་བསྒྲགས་སོ། །འདི་ལྟར་མིང་བཤད་པ་ནི་ཡན་ལག་བཞིའི་འོག་ཏུ་བསམ་ཏན་གྱི་ཕྱིར་བཤད་པས་ན་བསམ་གཏན་ཕྱི་མའི་རིམ་པར་ཕྱེ་བ་ཞེས་བྱའོ། །དེར་
གང་གསུངས་པའི་ལྷག་མ་བཟླས་བརྗོད་དང་མེ་ལ་གནས་པ་ལ་སོགས་པའི་སྒྲའི་བསམ་གཏན་རིག་སྔགས་དང་གསང་སྔགས་ཀྱི་ཐབས་ཞེས་བྱ་བ་ཡན་ལག་དང་བཅས་པ་དེ་འདིར་བཤད་དེ། དེ་བས་ན་སྒྲ་དང་སེམས་དང་གཞི་ལ་སོགས་པ་རྣམས་ཀྱིས་བཟླས་བརྗོད་ལ་སོགས་པའི་
ཡན་ལག་རྣམས་ཀྱི་མཚན་ཉིད་ཀྱི་ཚིག་འདིར་མ་བཤད་པ་ནི་འདི་ལྟར་སྒྲ་དང་སེམས་ལ་སོགས་པ་བཤད་པ་ཐོག་མ་ཉིད་དུ་རྒྱུད་འདིར་བཤད་ཟིན་པའི་ཕྱིར་རོ་ཞེས་བྱ་བའི་ཐ་ཚིག་གོ། །དེར་འདི་དག་གི་མཚན་ཉིད་བཤད་པ་ཡང་སྒྲ་ནི་སྔགས་ཀྱི་ཡི་གེའོ། །སེམས་ནི་སྔགས་ཀྱི་གཞི་ཟླ་
བའི་དཀྱིལ་འཁོར་གྱི་རྣམ་པར་གྱུར་པའོ། །གཞི་ནི་དེ་བཞིན་གཤེགས་པའི་སྐུའི་རང་བཞིན་ནོ། །གཞི་གཉིས་པ་ནི་རང་གི་ལྷའི་གཟུགས་སོ། །གཞན་ཡང་སྲོག་དང་རྩོལ་བ་དང་། སླར་སྡུད་པ་ལ་སོགས་པའི་མཚན་ཉིད་གང་ཡིན་པ་དེ་དག་རྡོ་རྗེ་གཙུག་ཏོར་གྱི་རྒྱུད་འདི་ཉིད་དུ་

71-1-15b

སྔར་བཤད་ཟིན་པས་དེ་དང་འབྲེལ་བ་བསམ་གཏན་ཕྱི་མ་ཞེས་བྱ་བ་རིམ་པར་ཕྱེ་བ་འདིར་དེ་དག་གི་མཚན་ཉིད་མ་གསུངས་པར་ཤེས་པར་བྱའོ། །ཇི་ལྟར་རྣམ་པར་སྣང་མཛད་མངོན་པར་རྫོགས་པར་བྱང་ཆུབ་པའི་རྒྱུད་ལས་བཤད་པ། ཡི་གེ་བྱང་ཆུབ་སེམས་ཡིན་ཏེ། །གཉིས་
པ་ལ་ནི་སྒྲ་ཞེས་བྱ། །བཞི་ནི་རང་གི་ལྷ་གཞག་པར། །རང་གི་ལུས་ལ་བྱ་བ་ཡིན། །གཉིས་པའི་གཞི་ནི་ཞེས་བྱ་བ། །རྫོགས་པའི་སངས་རྒྱས་རྐང་གཉིས་མཆོག །སྲོག་ཅེས་བྱ་བ་རླུང་དུ་བཤད། །རྩོལ་བ་དྲན་པ་ཞེས་བྱའོ། །ཞེས་བྱ་བ་ལ་སོགས་པ་ལྟ་བུ་སྟེ། དེ་བཞིན་
དུ་འདིར་ཡང་གཞི་ལ་སོགས་པ་དེ་དག་གི་མཚན་ཉིད་སྔར་བཤད་ཟིན་པར་བལྟའོ། །དེར་ཡང་ལྷ་ཉིད་ཀྱི་རྣལ་འབྱོར་བྱས་པའི་སྔགས་པས་མདུན་དུ་དེ་བཞིན་གཤེགས་པའི་སྐུའི་ནང་དུ་བཞུགས་པའི་ཟླ་བའི་དཀྱིལ་འཁོར་ལ་གསང་སྔགས་ཀྱི་ཡི་གེ་གཞག་པ། སྔར་བྱས་པའི་བཟླས་བརྗོད་
ཀྱི་ཚོགས་ནི་གསུངས་ན། གསང་སྔགས་ཡིད་ཀྱིས་བརྗོད་དམ་གཤུབས་ཏེ་བརྗོད་པ་ན་ཡན་ལག་བཞི་རྣམས་ལས། ཡན་ལག་གང་ལ་དམིགས་ཤིང་གསང་སྔགས་བརྗོད་པར་བྱ་བ་དག་བྱེ་བྲག་ཏུ་མ་ཕྱེའོ། །དེ་བཞིན་དུ་བཟླས་བརྗོད་མེད་པར་ཡང་བསམ་གཏན་ཉིད་ཀྱིས་གསང་
སྔགས་འགྲུབ་པ་དང་། རྣལ་འབྱོར་དང་ཐར་པ་ཐོབ་བོ་ཞེས་བྱ་བ་འདི་ཡང་དེར་གསུངས་ན། ཇི་ལྟར་ན་དེ་རྣམས་བསམ་གཏན་ཉིད་ཀྱིས་བཟླས་བརྗོད་ལ་མི་ལྟོས་པར་དངོས་གྲུབ་ལ་སོགས་པ་སྟེར་བར་མ་གསུངས་པས། དེ་ལ་ཇི་ལྟར་ཡན་ལག་བཞིའི་གསང་སྔགས་བརྗོད་པའི་ཚེ། 
སོ་སོར་ངེས་པའི་ཡན་ལག་ལ་དམིགས་པ་དང་། ཇི་ལྟར་བསམ་གཏན་ཉིད་ཀྱིས་གསང་སྔགས་རྣམས་དངོས་གྲུབ་དང་། རྣལ་འབྱོར་དང་ཐར་པ་སྟེར་བར་འགྱུར་བ་དེ་བཤད་པར་བྱའོ། །དེ་ལ་ཡང་རེ་ཞིག་བསམ་གཏན་གི་བཟླས་བརྗོད་ཀྱི་ཡན་ལག་བཞི་རྣམས་ཀྱི་གསང་སྔགས་བརྗོད་
པའི་ཚེ། བཟླས་བརྗོད་བྱེད་པས་རྣམ་པ་གསུམ་གྱིས་དམིགས་པ་ངེས་པར་བསྟན་པ་ནི། དེ་ལ་ལྷ་ཉིད་དུ་བདག་རྣལ་འབྱོར་བྱས་པའི་ཟློས་པ་པོས་མདུན་ན་བཞུགས་པའི་དེ་བཞིན་གཤེགས་པའི་ཐུགས་ཀ་ན་གནས་པའི་ཟླ་བ་ལ་བཀོད་པའི་གསང་སྔགས་ཀྱི་ཡི་གེ་ལ་ངེས་པར་དམིགས་

71-1-16a

ནས། གསང་སྔགས་བརྗོད་པ་དེ་བསྟན་པའི་ཕྱིར། སྒྲ་དང་སེམས་དང་གཞི་ལ་གཞོལ། །གསང་སྔགས་མི་འགྱུར་གཞི་ལ་གནས། །ཡན་ལག་མ་ཉམས་གསང་སྔགས་བཟླས། །ངལ་ན་བདག་ལ་ངལ་སོ་ཤིག །ཅེས་གསུངས་སོ། །དེ་བཞིན་དུ་གཞི་
སྔ་མ་བཞིན་ཡན་ལག་བཞི་བཀོད་པ་དེ་བཞིན་གཤེགས་པའི་གཞིའི་ཐུགས་ཀ་ན་གནས་པའི་གསང་སྔགས་ཀྱི་ཡི་གེ་དང་བཅས་པའི་ཟླ་བའི་དཀྱིལ་འཁོར་ལ་སེམས་པ་ལས། ཡིད་ཀྱིས་སླར་སྡུད་པའི་སྦྱོར་བས་བདག་རང་གི་ལྷའི་སྐུའི་ཐུགས་ཀ་ན་འདུག་པའི་ཟླ་བ་ལ་གནས་པའི་གསང་
སྔགས་ཀྱི་ཡི་གེ་ལ་དམིགས་ཤིང་སྔགས་བརྗོད་པའི་ངེས་པ། མི་འགྱུར་བ་དང་ཡི་གེར་ལྡན། །གཞི་ལས་གཞིར་གྱུར་དེ་བཞིན་ཏེ། །རང་སྔགས་ཕྱིར་ནི་གང་བརྟགས་པ། །ཡིད་ཀྱི་དག་པ་བསམ་པར་བྱ། །ཞེས་བྱ་བ་གསུངས་སོ། །དེ་བཞིན་དུ་ཡན་ལག་བཞིའི་དགོད་པ་བྱས་པ་ཉིད་
ཀྱིས་གསང་སྔགས་ཀྱི་སྒྲ་ལ་དམིགས་ཤིང་། གསང་སྔགས་བརྗོད་པའི་ཆོ་ག་ཡང་། །སླར་སྡུད་པ་ཡིས་བསྡམས་ནས་ནི། །སྲོག་དང་རྩོལ་བ་བསྡམས་པའི་ཡིད། །སྔགས་རིག་པས་ནི་སྔགས་ལ་སྦྱར། །ཡིད་ཀྱི་བཟླས་བརྗོད་བརྩམ་པར་བྱ། །ཞེས་བྱ་བ་ལ་སོགས་པ་གསུངས་
སོ། །འདི་ནི་རེ་ཞིག་ཡན་ལག་བཞི་རྣམས་ལ་དམིགས་པ་རབ་ཏུ་དབྱེ་བའི་ཚིགས་སུ་བཅད་པ་རྣམས་བསྡུས་པའི་དོན་ཏོ། །ཡན་ལག་གི་དོན་བསྟན་པ་ནི་སྒྲ་དང་སེམས་དང་གཞི་ཞེས་བྱ་བ་ལ་སོགས་པའོ། །དེ་ལ་གཞོལ་བར་གསང་སྔགས་བཟླས་བརྗོད་བྱའོ་ཞེས་བྱ་བ་དང་འབྲེལ་ཏེ། 
གང་དུ་གཞོལ་ཞེ་ན། སྒྲ་དང་སེམས་དང་གཞི་ལ་གཞོལ། །ཞེས་སྨྲས་པའོ། །དེ་ལ་སྒྲ་ཞེས་བྱ་བ་ནི་གསང་སྔགས་ཀྱི་ཡི་གེའི་ཕྲེང་བའོ། །སེམས་ཞེས་བྱ་བ་ནི་བྱང་ཆུབ་ཀྱི་སེམས་ཀྱི་མཚན་ཉིད་ཟླ་བའི་དཀྱིལ་འཁོར་གྱི་རྣམ་པའོ། །གཞི་ཞེས་བྱ་བ་ནི་དེ་བཞིན་གཤེགས་པའི་གཞིའོ། །
གཞོལ་ཞེས་བྱ་བ་ནི་ཟློས་པ་པོའི་བྱེ་བྲག་སྟེ། དེ་བས་ན་ཟློས་པ་པོ་སྒྲ་ལ་སོགས་པ་ལ་གཞོལ་བ་ནི་རྒྱུན་མ་ཆད་པར་དམིགས་པའི་སྒོ་ནས་ཞེན་པའོ། །འདིས་ནི་མདུན་དུ་བསམས་པའི་དེ་བཞིན་གཤེགས་པའི་གཞིའི་ཐུགས་ཀ་ན་གནས་པའི་གསང་སྔགས་ཀྱི་ཕྲེང་བ་དང་བཅས་པའི་ཟླ་བའི་

71-1-16b

གཟུགས་བརྙན་ལ་དམིགས་ཤིང་གསང་སྔགས་བཟླས་བརྗོད་བྱ་བར་བསྟན་ཏེ། སྒྲ་དང་སེམས་དང་གཞི་སྨོས་པ་ནི་ཚིག་གི་རིམ་པའི་གོ་རིམས་བཞིན་ནོ། །དེ་བས་ན་དུས་གཅིག་ཏུ་ཡང་དམིགས་པ་འདི་གསུམ་རིམ་པ་འདི་ཉིད་ཀྱིས་དམིགས་པར་བྱའོ་ཞེས་བྱ་བའི་ཐ་ཚིག་གོ། །གསང་
སྔགས་མི་འགྱུར་གཞི་ལ་གནས། །ཞེས་བྱ་བ་ནི་དེ་ལ་ཤིན་ཏུ་བསྒོམས་པའི་ཕྱིར་རང་གི་སྣང་བའི་རང་བཞིན་ལས་མི་ཉམས་ཤིང་མི་གཡོ་བས་ནི་མི་འགྱུར་བ་སྟེ། བདག་གིས་ཤིན་ཏུ་བསྒོམས་པའི་རང་གི་ལྷ་ཉིད་ཀྱི་གཞི་ལ་བྱའོ། །མི་འགྱུར་བ་དང་གཞི་ཡང་དེ་ཡིན་པས་ན་མི་འགྱུར་བའི་
གཞིའོ། །སྒྲ་དང་ཡི་གེ་ལ་སོགས་པ་རང་བཞིན་གྱི་གསང་སྔགས་མི་འགྱུར་བའི་གཞི་ཏིང་ངེ་འཛིན་གྱིས་རྟོགས་པའི་གཟུགས་ཀྱི་སྐུ་ལ་གསང་སྔགས་མི་འགྱུར་བའི་གཞི་ཞེས་བྱའོ། །གཞི་ཞེས་བྱ་བ་ནི་བདག་དང་གཞན་གྱི་སེམས་དང་སེམས་ལས་བྱུང་བ་རྣམས་ཀྱི་གཞི་དང་དམིགས་པ་དང་། 
རྟེན་གྱི་སྒོ་ནས་གཞིར་གྱུར་པའམ། སྐྱེས་པ་ལ་སོགས་པའི་གཟུགས་སུ་ཤེས་ཤིང་རྟོགས་པར་འགྱུར་བའི་སྣང་བའི་གཞི་ཡིན་པས་ན་གཞིའོ། །གསང་སྔགས་མི་འགྱུར་བའི་གཞི་དེ་ལ་གནས་པའི་རང་གི་ལྷའི་ང་རྒྱལ་དང་ལྡན་པ་ཞེས་བྱ་བའི་ཐ་ཚིག་གོ། །གསང་སྔགས་
བཟླས་བརྗོད་བྱ་ཞེས་བྱ་བ་ནི་གསང་སྔགས་བརྗོད་པ་སྟེ། ཡིད་ཀྱིས་སམ་ཤུབ་བུར་བྱའོ་ཞེས་བསྟན་ཏོ། །ཡན་ལག་མ་ཉམས་ཞེས་བྱ་བ་ནི་ཟློས་པ་གང་གི་སྒྲ་ལ་སོགས་པའི་ཡན་ལག་ཇི་ལྟར་སྲིད་པའི་ང་རྒྱལ་དང་། དམིགས་པ་གསུམ་མ་ཉམས་ཤིང་ཡོངས་སུ་མ་བཏང་བ་དེ་
ཡན་ལག་མ་ཉམས་པ་སྟེ། བཟླས་བརྗོད་ཀྱི་ཡན་ལག་བཞི་ཡོངས་སུ་མ་བཏང་བ་ཞེས་བྱ་བའི་ཐ་ཚིག་གོ། །དེ་ལ་གསང་སྔགས་ཀྱི་ཡི་གེ་དང་། ཟླ་བའི་དཀྱིལ་འཁོར་དང་། དེ་བཞིན་གཤེགས་པའི་སྐུའི་མཚན་ཉིད་ཀྱི་ཡན་ལག་གསུམ་ནི་དམིགས་པ་ཡོངས་སུ་མ་བཏང་
བའོ། །བཞི་པ་ནི་བདག་གི་ལྷ་ཉིད་ཀྱི་གཞིའི་ཡན་ལག་གང་ཡིན་པ་སྟེ། དེ་ནི་ང་རྒྱལ་དུ་བྱ་བ་ཡོངས་སུ་མ་བཏང་བ་ཞེས་བྱ་བའི་ཐ་ཚིག་གོ། །བཟླས་བརྗོད་ཀྱི་ཡན་ལག་བཞི་ལས་དེ་བཞིན་གཤེགས་པའི་གཞི་ལ་སོགས་པའི་ཡན་ལག་གསུམ་ལ་དམིགས་པའི་ཏིང་ངེ་འཛིན་

71-1-17a

ལས་ལྡང་བར་བྱ་བའི་ཕྱིར། ངལ་ན་བདག་ལ་ངལ་སོ་ཤིག །ཅེས་བྱ་བ་གསུངས་སོ། །དེ་ལ་ངལ་བ་ནི་སྲོག་དང་རྩོལ་བ་བསྡམས་པ་དང་། ཡན་ལག་གསུམ་ལ་དམིགས་ཤིང་གསང་སྔགས་འདོན་པས། ངལ་ན་བདག་གི་རང་བཞིན་ལ་ངལ་སོ་ཤིག་ཅེས་
བསྟན་པའོ། །དེ་ལ་བདག་ནི་རྣམ་པར་སྨིན་པའི་རང་བཞིན་གྱིས་ལུས་སུ་འདོད་དོ། །དེ་ངལ་བསོ་བ་ནི་གཡེང་བ་སྤང་བའི་ཕྱིར་ཏེ། རང་གི་ལུས་ལྷའི་སྐུར་བསམ་པ་བཏང་ལ་རང་གི་ལུས་སུ་བསམས་ཏེ་ལྡང་ངོ་ཞེས་བྱ་བའི་ཐ་ཚིག་གོ། །གཏད་པའི་རིམ་པ་ཡང་འདི་ལྟ་སྟེ། གསང་
སྔགས་ཀྱི་ཡི་གེའི་སྒྲ་ནི་དེའི་ཡིག་འབྲུ་ལ་སེམས་པས་གཏང་ངོ་། །ཡི་གེ་ཡང་དེ་མེད་པའི་ཟླ་བ་ལ་སེམས་པས་སོ། །ཟླ་བའི་དཀྱིལ་འཁོར་ནི་དེ་བཞིན་གཤེགས་པའི་སྐུ་འབའ་ཞིག་ལ་སེམས་པས་སོ། །དེ་ཡང་རང་གི་ལྷའི་སྐུ་འབའ་ཞིག་ཏུ་སེམས་པས་སོ། །དེ་ཡང་དེའི་ཡི་གེའི་
འབྲུ་ལ་སེམས་པས་སོ། །དེ་ཡང་དེའི་སྒྲ་ལ་སེམས་པས་སོ། །དེའི་སྒྲ་ལ་ལྷའི་ཡེ་ཤེས་ཀྱི་སྐུ་ལ་སེམས་པས་སོ། །ཡེ་ཤེས་ཀྱི་སྐུ་ལ་སེམས་པ་དེ་ཡང་། ཆོས་ཀྱི་སྐུ་ལ་སེམས་པས་སོ། །དེ་ཡང་མི་དམིགས་པའི་བདག་གི་དེ་ཁོ་ན་ཉིད་ལ་བྱའོ། །དེ་ཡང་སྒྱུ་མ་དང་སྨིག་རྒྱུ་
ལ་སོགས་པར་སྣང་བ་རྣམ་པར་སྨིན་པའི་ལུས་སུ་སེམས་པ་སྟེ། འདི་ནི་བདག་ངལ་སོ་ཤིག་ཅེས་བྱ་བའི་ཚིག་གི་དོན་ཏོ། །དེ་ལ་བདག་གི་དེ་ཁོ་ན་ཉིད་ལ་སོགས་པ་དེ་དག་ཐམས་ཅད་ནན་ཏན་དུ་བྱ་བའི་རིམ་པ་ནི། འདི་ལྟ་སྟེ་བདག་གི་དེ་ཁོ་ན་ཉིད་བསྒོམ་པ་སྔར་བྱས་ཏེ། ལྷ་ཉིད་ཀྱི་
ང་རྒྱལ་མངོན་དུ་བྱས་པའི་ཟློས་པ་པོས་སྔ་མ་བཞིན་དུ་རུས་སྦལ་གྱི་ཡན་ལག་བསྐུམ་པ་དང་། ལྕེ་ཡིས་ཆུ་བཏུང་བ་ལྟར་ལུས་ཐམས་ཅད་ཀྱི་དབུགས་རྒྱུ་བ་དང་། དབང་པོའི་གྲོང་ནང་དུ་ཕྱོགས་པར་བྱས་ཀྱང་། ཕུག་གི་ནང་ན་གནས་པའི་མི་ཕྱི་རོལ་དུ་བལྟ་བའི་ཚུལ་དུ་མིག་ཟམ་ཟིམ་དུ་བྱས་
ཤིང་། གདོང་ཅུང་ཟད་བསྟོད་དེ། རང་གི་གསང་སྔགས་ཀྱི་ཡི་གེ་ཕྲེང་བ་དང་། ཟླ་བའི་དཀྱིལ་འཁོར་དང་། དེ་བཞིན་གཤེགས་པའི་གཞི་རྣམས་རིམ་པ་འདི་ཉིད་ཀྱིས་རི་མོ་བཏིང་བ་ལ་ཅིག་ཅར་དམིགས་པའི་ཚུལ་དུ་ཡིད་ཀྱིས་སམ་ཤུབ་བུར་གསང་སྔགས་བརྗོད་པར་བྱའོ། །བར་བར་དུ་ཡང་

71-1-17b

ལུས་ཐམས་ཅད་ཀྱི་རླུང་སྐད་ཅིག་ཙམ་བག་ཡངས་སུ་བྱས་ཏེ། དབུགས་དབྱུང་བ་ན། དེ་བཞིན་དུ་རང་གི་ལུས་རང་གི་ལྷ་ཉིད་ཀྱི་རང་བཞིན་དུ་གྱུར་པ་ལ་བལྟས་ནས་ཡང་སྔ་མ་བཞིན་དུ་ཕྱི་རོལ་དུ་བཞུགས་པའི་དེ་བཞིན་གཤེགས་པ་ལ་སོགས་པ་གསུམ་ལ་དམིགས་ཤིང་དབུགས་དབྱུང་བའི་
ལྷའི་མཐའི་བར་དུ་སྲོག་དང་རྩོལ་བ་སྡོམ་ཞིང་བཟླས་བརྗོད་དེ་བཞིན་དུ་བྱའོ། །རིམ་པ་འདིས་བཟླས་བརྗོད་གཏང་བའི་བར་བཟླས་བརྗོད་བྱས་ལ། སྔར་སྨོས་པའི་རིམ་པས་རྣམ་པར་སྨིན་པའི་བདག་གི་ལུས་ལ་ངལ་བསོའོ། །ད་ནི་ཡན་ལག་བཞི་དགོད་པའི་གོ་རིམས་བྱས་པའི་ཟློས་པ་པོ་
དེ་ཉིད་ཀྱི་གསང་སྔགས་འདོན་པའི་ཚེ། དམིགས་པའི་བྱེ་བྲག་གཞན་བསྟན་ཏེ། དེ་ཡང་གསང་སྔགས་ཀྱི་ཡི་གེ་བཀོད་པའི་ཟླ་བའི་དཀྱིལ་འཁོར་གྱི་རྣམ་པའི་རིམ་པས་དེ་བཞིན་གཤེགས་པའི་གཞི་ལས། རང་གི་ལྷ་དང་བདག་གཉིས་སུ་མེད་པའི་གཞི་ལ་སྤྲོའོ། །དེ་ལས་ཀྱང་དེ་བཞིན་
གཤེགས་པའི་གཞི་ལ་སྤྲོ་སྟེ། གསང་སྔགས་ཀྱི་མཐའ་འམ། དབུགས་དབྱུང་བའི་མཐར་ཕྱིར་འབྱུང་བ་དང་སླར་སྡུད་པའི་སྦྱོར་བས་བྱ་བ་དེ་བསྟན་པའི་ཕྱིར། མི་འགྱུར་བ་དང་ཡི་གེར་ལྡན། །གཞི་ལས་གཞིར་གྱུར་དེ་བཞིན་ཏེ། །རང་སྔགས་ཕྱིར་ནི་གང་བརྟགས་པ། །ཡིད་ཀྱི་
དག་པ་བསམ་པར་བྱ། །ཞེས་བྱ་བ་གསུངས་ཏེ། དེ་ལ་ཡིད་ཀྱི་ཞེས་བྱ་བ་ནི། ཡིད་ལས་བྱུང་བས་ན། ཡིད་ཀྱི་སྟེ་ཡིད་ཟླ་བའི་དཀྱིལ་འཁོར་གྱི་རྣམ་པར་གྱུར་པའི་གནས་སྐབས་སོ། །ཡིད་དེ་ཇི་ལྟ་བུ་ཞིག་ཡིན་ཞེས་ཁྱད་པར་དུ་བསྟན་པའི་ཕྱིར། མི་འགྱུར་བ་དང་ཡི་གེར་ལྡན། །ཞེས་
བྱ་སྟེ། དེ་ལ་ཤིན་ཏུ་བསྒོམས་པའི་ཕྱིར་གསལ་བར་སྣང་བ་ལས་མི་འགྱུར་བས་ན་མི་འགྱུར་བ་སྟེ། ཟླ་བའི་དཀྱིལ་འཁོར་ལ་བཀོད་པའི་གསང་སྔགས་ཀྱི་ཡི་གེ་རྣམས་ལ་བྱའོ། །ཡི་གེ་དེ་རྣམས་ཀྱང་མི་འགྱུར་བ་ནི་མི་འབྲལ་བ་དང་རྒྱུན་མི་འཆད་པར། རབ་ཏུ་སྣང་བར་ཡིད་ཟླ་བའི་དཀྱིལ་
འཁོར་གྱི་རྣམ་པར་གྱུར་པ་གང་ཡིན་པ་དེ་ལ། སྦྱར་བ་དེ་ནི་མི་འགྱུར་བ་དང་ཡི་གེར་ལྡན་པའི་ཡིད་དོ། །ཡང་དེ་ཉིད་བྱེ་བྲག་ཏུ་དབྱེ་བའི་ཕྱིར། གཞི་ལས་གཞིར་གྱུར་ཞེས་བྱ་བ་གསུངས་ཏེ། གཞི་ལས་ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་ཀྱི་གཞི་ལས་སོ། །གཞིར་གྱུར་

71-1-18a

ཞེས་བྱ་བ་ནི་རང་གི་ལྷའི་སྐུ་བདག་གི་གཞིར་གྱུར་པ་སྟེ། ཟླ་བའི་དཀྱིལ་འཁོར་གྱི་རྣམ་པར་གྱུར་པའི་ཡིད་དེ། གསང་སྔགས་ཀྱི་ཡི་གེ་དང་བཅས་པར་བདག་གི་གཟུགས་རང་གི་ལྷར་གྱུར་པ་དེའི་སྙིང་གར་བལྟ་ཞིང་དབུགས་དབྱུང་བའི་མཐའི་བར་དུ་བཟླས་བརྗོད་བྱའོ། །
དེ་ལས་ཀྱང་དེ་བཞིན་དུ་ཡང་དག་པར་རྫོགས་པའི་སངས་རྒྱས་ཀྱི་གཞི་ལ་བལྟའོ། །དེ་ལས་ཀྱང་ཡིད་ཀྱི་དེ་སླར་བསྡུས་ཏེ། སྔ་མ་བཞིན་རང་གི་ལྷའི་སྐུའི་གཞི་ལ་གནས་པར་བྱས་ལ་བཟླས་བརྗོད་བྱ་སྟེ། དེ་ལྟ་བུར་སེམས་ཤིང་གསང་སྔགས་གདོན་པར་བྱའོ་ཞེས་བྱ་བའི་ཐ་ཚིག་
གོ། །དེ་བཞིན་ཞེས་བྱ་བའི་སྒྲས་ནི་བཟླས་བརྗོད་ཀྱི་དམིགས་པའི་ཁྱད་པར་གཞན་ཉེ་བར་སྡུད་པ་བསྟན་ཏོ། །ཡང་ཡིད་ཀྱི་དག་པ་ཞེས་བྱ་བ་དེ་ཉིད་ཀྱི་ཁྱད་པར་བསྟན་ཏེ། དེ་ལ་ཡིད་ཀྱི་དག་པ་ནི་རྣམ་པ་གཉིས་ཏེ། འདོད་ཆགས་ལ་སོགས་པའི་ཉོན་མོངས་པའི་དྲི་མ་གཡེང་བ་དང་
བཅས་པ་རྣམས་ཀུན་ནས་མ་ལངས་པ་དང་། ཟླ་བའི་གཟུགས་བརྙན་གྱི་རྣམ་པར་གྱུར་པའི་གནས་སྐབས་ན་ཡང་། ཀུན་དུ་རྫོགས་ཤིང་དྲི་མ་མེད་པར་རབ་ཏུ་སྣང་ངོ་། །གང་བརྟགས་ཞེས་བྱ་བ་ནི། ཟླ་བའི་དཀྱིལ་འཁོར་གྱི་རྣམ་པར་བསྒྱུར་ཞེས་བྱ་བའི་ཐ་ཚིག་གོ། །རང་སྔགས་ཕྱིར་
ཞེས་བྱ་བ་ནི་ཡིད་ཟླ་བའི་གཟུགས་སུ་བརྟག་པའི་དགོས་པ་བསྟན་ཏེ། རང་གི་གསང་སྔགས་ཀྱི་ཡི་གེའི་གནས་ཀྱི་ཕྱིར་ཞེས་བྱ་བའི་ཐ་ཚིག་གོ། །འདི་བསྡུས་པའི་དོན་སྔ་མ་བཞིན་དུ་ལྷའི་དེ་ཁོ་ན་ཉིད་ཀྱི་སྐུ་བདག་གི་གཟུགས་སུ་གྱུར་པར་བདག་ཉིད་རབ་ཏུ་གོམས་པར་བྱས་ཤིང་དེ་བཞིན་དུ་
སྲོག་དང་རྩོལ་བ་བསྡམས་པ་སྔར་བྱས་ཏེ། ཅུང་ཟད་ཅིག་ཏིང་ངེ་འཛིན་གྱིས་གསལ་བར་རབ་ཏུ་སྣང་བར་བྱས་ནས་སྲོག་དང་རྩོལ་བ་བསྡམས་པ་ཉིད་ཀྱིས་མིག་ཅུང་ཟད་བཙུམས་ཀྱང་ཡིད་སྣང་བ་དང་བཅས་པར་མདུན་དུ་བཏང་ལ་ཧ་ཅང་མི་རིང་བར་བདག་གི་ཚད་ལས་ཅུང་ཟད་མཐོ་བར་དེ་
བཞིན་གཤེགས་པའི་སྐུ་གཟུགས་བརྟགས་ཏེ་དེའི་ཐུགས་ཀར་གསང་སྔགས་ཀྱི་ཕྲེང་བ་བཟླས་བརྗོད་དུ་བྱ་བ་ནང་ན་གནས་པས་བརྒྱན་པའི་ཟླ་བའི་དཀྱིལ་འཁོར་རབ་ཏུ་བརྟག་གོ། །དེ་ནས་ཟླ་བའི་དཀྱིལ་འཁོར་གྱི་གསང་སྔགས་དང་བཅས་པར་སྔ་མ་བཞིན་དུ་ལུས་ཐམས་ཅད་ཀྱི་རླུང་སླར་བསྡུ་

71-1-18b

བའི་ཚུལ་གྱིས་བདག་གི་སྙིང་གའི་ནང་ན་གནས་པར་དབུགས་དབྱུང་བའི་མཐའི་བར་དུ་གསང་སྔགས་རེ་རེ་ནས་བརྗོད་པས་བལྟ་ཞིང་བདག་གི་གསང་སྔགས་འདོན་པར་བྱས་ནས། ཡང་ལུས་ཐམས་ཅད་ནས་རླུང་འབྱུང་བའི་ཚུལ་དུ་རླུང་དང་བཅས་པས་ཡིད་ཀྱིས་དེ་བཞིན་གཤེགས་པའི་
ཐུགས་ཀའི་ཕྱོགས་སུ་བཏང་ངོ་། །ཟླ་བའི་དཀྱིལ་འཁོར་དེའི་ནང་ན་གནས་པའི་གསང་སྔགས་ཀྱི་ཕྲེང་བ་ལ་བལྟ་ཞིང་སྔ་མ་བཞིན་དུ་རང་གི་སྙིང་གའི་ནང་ན་གནས་པ་ལ་དམིགས་པའི་ཚུལ་གྱིས་དབུགས་དབྱུང་བའི་མཐའི་བར་དུ། གསང་སྔགས་འདོན་པ་སྔ་མ་བཞིན་དུ་བྱས་ལ། 
རིམ་པ་འདིས་བཟླས་བརྗོད་བཏང་གི་བར་དུ་བཟླས་བརྗོད་བྱའོ། །རླུང་འབྱུང་བའི་དུས་ན་ཡང་ཡན་ལག་བཞི་ཆར་ཡང་ཐང་ཅིག་ཏུ་དམིགས་པར་བྱའོ། །ད་ནི་དེ་བཞིན་དུ་བཟླས་བརྗོད་ཀྱི་ཡན་ལག་བཞི་པོ་ཤིན་ཏུ་བསྒོམས་པས་ལུས་ཐམས་ཅད་ཀྱི་རླུང་བསྡུས་ནས་དབང་པོའི་གྲོང་སླར་སྡུདཔའི་ཚུལ་
གྱིས་གསང་སྔགས་ཀྱི་སྒྲ་འདོན་པ་ལ་དམིགས་ཤིང་བཟླས་བརྗོད་བྱ་བ་བསྟན་པའི་ཕྱིར། སླར་སྡུད་པ་ཡིས་བསྡམས་ནས་སུ། །སྲོག་དང་རྩོལ་བ་བསྡམས་པ་ཡིས། །གསང་སྔགས་རིག་པས་སྔགས་དང་སྦྱར། །ཡིད་ཀྱིས་བཟླས་བརྗོད་བརྩམ་པར་བྱ། །འདི་ཉིད་ཀྱི་ནི་ཆོ་ག་ཡིས། །
ཡང་ན་ཤུབ་བུར་བྱ་ཡང་རུང་། །སྔགས་རིག་དངོས་གྲུབ་འདོད་པ་ཡིས། །བཟླས་བརྗོད་གཞན་དུ་མི་བྱའོ། ཞེས་གསུངས་སོ། །དེ་ལ་ཡིད་གསང་སྔགས་ལ་སྦྱར་ནས། ཡིད་ཀྱིས་བཟླས་བརྗོད་རྩོམ་མོ་ཞེས་བྱ་བ་དང་སྦྱར་རོ། །ཡིད་དེ་ཡང་ཇི་ལྟ་བུ་ཞིག་ཏུ་བྱ་སྟེ། གསང་
སྔགས་ལ་སྦྱར་ཞེ་ན། སླར་སྡུད་པ་ཡིས་བསྡམས་ནས་ནི། །ཞེས་བྱ་བ་གསུངས་ཏེ། མཉམ་པར་མ་བཞག་པའི་ཡིད་རང་དགར་འབྱུང་བ་མིག་ལ་སོགས་པའི་སྒོ་ནས་ཇི་ལྟར་སྲིད་པར་ཕན་ཚུན་དུ་རབ་ཏུ་རྒྱུ་བ་ལུས་ཐམས་ཅད་ཀྱི་རླུང་བསྡུ་བའི་ཚུལ་གྱིས་སླར་བཀུག་ལ་རང་
གི་ལུས་ཀྱི་ནང་དུ་འཇུག་པ་ནི་སླར་སྡུད་པ་སྟེ། སླར་སྡུད་པ་དེས་བསྡམས་ཤིང་བཙུམས་ལ་ནང་དུ་ཕྱོགས་པར་བྱས་ནས་ཞེས་བྱ་བའི་ཐ་ཚིག་སྟེ། དེ་ལྟ་བུའི་ཡིད་དེ་གསང་སྔགས་ལ་སྦྱར་རོ་ཞེས་བྱ་བ་དང་འབྲེལ་ཏོ། །ཡང་དེ་ཉིད་ཀྱི་ཁྱད་པར་བསྟན་པ་ནི། སྲོག་དང་རྩོལ་བ་

71-1-19a

བསྡམས་ཞེས་བྱ་བ་སྟེ། གོང་དུ་མོས་པའི་མཚན་ཉིད་ཀྱི་སྲོག་དང་རྩོལ་བ་དག་ཡིད་གང་གིས་བཅུམ་ཞིང་བསྡམས་པའམ། སྲོག་དང་རྩོལ་བ་དག་བསྡམས་པ་སྟེ། དེ་དག་ཉིད་ཀྱིས་བསྡམས་ཤིང་མི་གཡོ་བར་བྱས་པ་ལ། སྲོག་དང་རྩོལ་བ་བསྡམས་པ་
ཞེས་ཀྱང་བྱའོ། །དེ་ནི་སྲོག་དང་རྩོལ་བ་བསྡམས་པའི་ཡིད་ཡིན་ཏེ། རླུང་གི་ལམ་དང་དྲན་པ་བརྟུལ། །ཞེས་བྱ་བའི་དོན་ཏོ། །གསང་སྔགས་རིག་པ་སྔགས་ལ་སྦྱར། །ཞེས་བྱ་བ་ནི་གསང་སྔགས་ཀྱི་སྒྲ་ལ་དམིགས་པའི་ཡིད་དེ་གསང་སྔགས་ཀྱི་ཡུལ་ལ་སྦྱར་བ་
སྟེ། མངོན་པར་འདོད་ཅེས་བྱ་བའི་ཐ་ཚིག་གོ། །ཡིད་ཀྱིས་མངོན་དུ་སྨྲ་ཞིང་རྣམ་པར་རྟོག་པའི་ཕྱིར་ཡིད་ཀྱི་བཟླས་བརྗོད་དོ། །འདི་ཉིད་ཀྱི་ནི་ཆོ་ག་ཡིས། །ཞེས་བྱ་བ་ནི། གསང་སྔགས་ཀྱི་སྒྲ་ལ་དམིགས་པའི་ཚོགས་སོ་ཞེས་བྱ་བའི་ཐ་ཚིག་གོ། །ཤུབ་བུར་ཡང་
རུང་ཞེས་བྱ་བ་ནི། གསང་སྔགས་ཤུབ་བུར་སྨྲ་ཞིང་འདོན་པའི་བཟླས་བརྗོད་དོ། །ཤུབ་བུ་ནི་འབད་མི་དགོས་པར་གསང་སྔགས་འདོན་པའི་སྦྱོར་བའོ། །དེའི་དགོངས་པ་འདི་ལྟ་སྟེ། སླར་སྡུད་པ་དང་སྲོག་དང་རྩོལ་བ་ཤིན་ཏུ་བསྡམས་པས་དབང་པོའི་བྱེད་པ་མང་པོ་རང་དབང་མེད་པར་
ནང་དུ་ཕྱོགས་པར་བྱས་པའི་ཟློས་པ་པོ་སྒྲ་ཆེན་པོར་འདོན་པར་མི་སྲིད་པས་ན་གསང་སྔགས་སྒྲ་ཆུང་ངུར་འདོན་པ་ནི་ཤུབ་བུའི་མཚན་ཉིད་དུ་ཞར་ལ་ཤེས་པར་བྱའོ། །ཤུབ་བུར་ཡང་རུང་ཞེས་བྱ་བ་དེ་ཉིད་ཀྱིས་ཡིད་ཀྱི་བཟླས་བརྗོད་ལས་ཤུབ་བུའི་བཟླས་བརྗོད་ཀྱི་ཕྱོགས་གཞན་བསྟན་པར་མངོན་མོད་
ཀྱི་ཡང་ན་ཞེས་བྱ་བའི་སྒྲ་སྨོས་པས་ནི་གཙུག་ལག་མཛད་པས་ཡིད་ཀྱིས་བཟླས་བརྗོད་ཉིད་བསྔགས་པར་མངོན་ནོ། །དེའི་དོན་འདི་སྟེ། ཡིད་ཀྱིས་བཟླས་བརྗོད་ཉིད་ཏིང་ངེ་འཛིན་ཕྲ་བ་རྒྱུ་ཡིན་པས་རྟག་ཏུ་འདི་ཉིད་བྱའོ། །གལ་ཏེ་བརྒྱ་ལ་ཤུབ་བུར་བཟླས་བརྗོད་བྱེད་འདོད་ན་དེ་ཡང་དེའི་ཚེ་དེ་
ཉིད་ཀྱི་སྦྱོར་བས་བྱའོ་ཞེས་བསྟན་ཏོ། །ཡོང་ནི་སླར་སྡུད་པ་དང་སྲོག་དང་རྩོལ་བ་བསྡམས་པས་ཡིད་དང་རླུང་དང་། དབང་པོའི་བྱེད་པའི་ཚོགས་ནང་དུ་ཕྱོགས་པར་བྱས་པས་ཤུབ་བུར་བརྗོད་པར་དཀའ་སྟེ། དེ་བས་ན་ཡིད་ལ་བྱེད་པ་ཉིད་རིགས་སོ། །ཏིང་ངེ་འཛིན་དབང་དུ་མ་གྱུར་པ་རྣམས་ཚིག་

71-1-19b

བརྗོད་ན་ཏིང་ངེ་འཛིན་ཉམས་པར་འགྱུར་བ་ཡང་སྲིད་དེ། རིག་པས་དེ་དང་སྦྱར་ན་ཡང་ཡིད་ཀྱི་བཟླས་བརྗོད་ཉིད་མཆོག་ཡིན་ནོ། །དངོས་གྲུབ་འདོད་པས་ཞེས་བྱ་བ་ནི་དངོས་གྲུབ་འདོད་པའི་ཕྱིར་གསང་སྔགས་ཀྱི་བཟླས་བརྗོད་བྱེད་པ་གང་ཡིན་པ་དེ་དག་གིས་བཟླས་བརྗོད་ཀྱི་ཆོ་ག་
འདི་ངེས་པར་ནན་ཏན་བྱའོ་ཞེས་དགོངས་པའོ། །འཇིག་རྟེན་ཕ་རོལ་གྱི་བསོད་ནམས་ལ་སོགས་པའི་ཕྱིར་བྱེད་པ་ནི་འདི་སྐད་དུ་གསུངས་པའི་ཆོ་ག་ལས་ཉམས་ཤིང་ཅི་ནུས་པར་བཟླས་བརྗོད་བྱས་ན་ཡང་ཉེས་པར་མི་འགྱུར་རོ་ཞེས་བྱ་བའི་ཐ་ཚིག་གོ། །སྒྲ་ལ་དམིགས་པའི་བཟླས་བརྗོད་
ལ་ཡིད་ཀྱི་དང་ཤུབ་བུར་བཟླས་བརྗོད་བྱ་བ་སྨོས་པ་ནི་འདིར་ཉེ་བར་བསྟན་པའི་མཚན་ཉིད་དུ་བལྟ་སྟེ། དེ་བས་ན་སྔ་མའི་བཟླས་བརྗོད་དག་ལ་ཡང་སྦྱར་བར་བྱའོ། །འདིའི་བསྡུས་པའི་དོན་ཀྱང་སྔ་མ་བཞིན་དུ་ཡན་ལག་བཞིའི་ཆོ་ག་བྱས་ཤིང་དེ་བཞིན་གཤེགས་པའི་གཞི་ལ་བལྟས་ནས། 
ལུས་ཐམས་ཅད་ཀྱི་རླུང་གི་ལམ་གྱི་རྗེས་སུ་འབྲང་བའི་སེམས་ཀྱི་རྟ་མངོན་དུ་ཕྱོགས་པར་བྱས་ལ་རུས་སྦལ་གྱི་ལུས་བསྐུམ་པ་དང་ལྕེ་ཡིས་ཆུ་བཏུང་བའི་ཚུལ་དུ་རླུང་སླར་སྡུད་པའི་སྦྱོར་བས་ཡིད་ནང་དུ་ཕྱོགས་པར་བྱ་སྟེ། རང་གི་ལྷ་དང་།  གཉིས་སུ་མེད་པར་ཤིན་ཏུ་བསྒོམས་པའི་གཟུགས་
ཀྱིས་བདག་ཁྱབ་པར་བྱས་ལ་དྲན་པ་དང་རླུང་འབྱུང་བའི་ལམ་བཀག་སྟེ། བརྗོད་པར་བྱ་བའི་སྒྲ་ལ་དམིགས་ཤིང་སེམས་བཟུང་ནས་དབུགས་དབྱུང་བའི་མཐའ་འམ། གསང་སྔགས་ཀྱི་མཐའི་བར་དུ་གསང་སྔགས་འདོན་པ་བྱས་ལ། ཡང་དེ་བཞིན་དུ་རླུང་གི་ལམ་གྱི་རྗེས་སུ་འཕྲང་བའི་
སེམས་ཕྱིར་ཕྱོགས་པར་བྱས་ལ། དེ་བཞིན་གཤེགས་པ་ལ་སོགས་པ་གསུམ་ལ་བལྟས་ནས་སླར་བསྡུས་ཏེ། དེ་བཞིན་དུ་གསང་སྔགས་ཀྱི་སྒྲ་ལ་དམིགས་པའི་བཟླས་བརྗོད་བྱས་པ་ཡང་དེ་བཞིན་དུ་འབྱུང་བ་དང་སླར་བསྡུ་པའི་ཚུལ་གྱིས་ཇི་ཙམ་འདོད་པའི་བར་དུ་བཟླས་བརྗོད་བྱའོ། ། 
དེ་ལྟར་གསང་སྔགས་བརྗོད་པའི་ཆོ་ག་གང་དང་པོ་ལ་དམིགས་པ་གསུམ་གསུངས་པ་ནི་དེ་བཞིན་གཤེགས་པ་དང་དེའི་ནང་ན་གནས་པའི་གསང་སྔགས་དང་བཅས་པའི་ཟླ་བའི་དཀྱིལ་འཁོར་ལ་དམིགས་པའི་བྱེ་བྲག་གོ། །གསང་སྔགས་ཟློས་པའི་ཆོ་ག་གཉིས་པ་ལ་ནི་དམིགས་པ་

71-1-20a

གཉིས་ཏེ། བདག་གི་སྙིང་གའི་ཟླ་བའི་དཀྱིལ་འཁོར་དང་། དེའི་ནང་ན་གནས་པའི་གསང་སྔགས་ཀྱི་ཡི་གེའི་ཕྲེང་བའོ། །རིམ་པ་གསུམ་པ་ལ་ནི་བཟླས་བརྗོད་བྱ་བའི་གསང་སྔགས་ཀྱི་སྒྲ་ལ་དམིགས་པ་སྟེ། བཟླས་བརྗོད་གསུམ་གྱི་བྱེ་བྲག་གོ། །བཟླས་
བརྗོད་ཀྱི་དེ་ཁོ་ན་ཉིད་དང་། བདག་གི་དེ་ཁོ་ན་ཉིད་དང་། རིག་སྔགས་ཀྱི་དེ་ཁོ་ན་ཉིད་ཀྱི་མཚན་ཉིད་རིག་སྔགས་དང་གསང་སྔགས་ཀྱི་ཐབས་ཆེན་པོ་བཤད་ཟིན་ཏོ། །ད་ནི་རིག་སྔགས་དང་གསང་སྔགས་ཀྱི་དངོས་གྲུབ་ཀྱི་ལམ་འདི་ཉིད་ཡིན་གྱི་གཞན་ནི་མ་ཡིན་ཏེ། ཐུན་མོང་མ་ཡིན་པའི་རྒྱུ་ཡིན་
པར་བསྟན་པས་ཇི་སྐད་སྨོས་པའི་མཚན་ཉིད་རིག་སྔགས་དང་གསང་སྔགས་ཀྱི་ཐབས་འདི་ལ་ནན་ཏན་བསྟན་པར་བྱ་བའི་ཕྱིར་རོ། །རིག་སྔགས་དེ་ཉིད་མ་ལུས་དང་། །བདག་གི་དེ་ཉིད་ཆོ་ག་དང་། །བཟླས་བརྗོད་དེ་ཉིད་ཆོག་ཤེས་ན། །མིས་ནི་དངོས་གྲུབ་ཐོབ་པར་འགྱུར། །དེ་ལ་བཟླས་བརྗོད་ཀྱི་
དེ་ཁོ་ན་ཉིད་མཆོག་ཅེས་བྱ་བ་ནི་བཟླས་བརྗོད་ཀྱི་ཡན་ལག་ལ་དམིགས་པའི་མཚན་ཉིད་གོང་དུ་སྨོས་པ་གང་ཡིན་པ་དེ་ལ་བཟླས་བརྗོད་ཀྱི་དེ་ཁོ་ན་ཉིད་ཅེས་བྱ་བ་སྟེ། བཟླས་བརྗོད་ཀྱི་ཡན་ལག་བཞི་མ་ཡིན་པ་ལས་དམ་པར་གྱུར་པས་ན་མཆོག་གོ། །དེ་བས་ན་དེ་ཤེས་ན་དངོས་གྲུབ་ཐོབ་པོ་ཞེས་བྱ་
བ་དང་འབྲེལ་ཏོ། །འོ་ན་བཟླས་བརྗོད་ཀྱི་དེ་ཁོ་ན་ཉིད་རབ་ཏུ་ནན་ཏན་བྱས་ནས་ཞེས་སྨྲ་བར་རིགས་སོ། །གང་གི་ཕྱིར་ཞེ་ན་ནན་ཏན་མ་བྱས་པར་ཤེས་པ་ཙམ་གྱིས་འབྲས་བུ་ཡོད་པ་མི་སྣང་ངོ་། །དཔེར་ན་འཇིག་རྟེན་ན་རྨོས་དང་ཚོང་གི་ཆོ་ག་ཤེས་ཀྱང་ནན་ཏན་མ་བྱས་ན་དེའི་འབྲས་བུ་དང་ལྡན་པར་མི་
སྣང་སྟེ་དེ་ནི་མི་རིགས་པའོ། །དེ་ལ་ཉེས་པ་མེད་དེ་འབྲས་བུ་ལ་རྒྱུ་བཏགས་ཏེ། བསྟན་པར་དགོངས་པའམ། ནན་ཏན་ལ་སོགས་པའི་མཚན་ཉིད་དུ་བརྗོད་པར་དགོངས་པའོ། །རིག་སྔགས་དེ་ཉིད་མ་ལུས་དང་། །ཞེས་བྱ་བ་མ་ལུས་དང་ཞེས་སྨོས་པ་ནི་རིག་སྔགས་རྣམ་པ་དྲུག་གི་དེ་ཁོ་
ན་ཉིད་ཡོངས་སུ་ཤེས་པར་བསྟན་ཏོ། །བདག་གི་དེ་ཉིད་ཆོ་ག་ཡང་། །ཞེས་བྱ་བ་ནི་ཆོ་གའི་ཚིག་སྨོས་པས་འདི་སྐད་བསྟན་ཏེ། བདག་གི་དེ་ཁོ་ན་ཉིད་ཀྱི་ཆོ་ག་སྨོས་པས་རྣམ་པར་དཔྱད་ཀྱི་བདག་གི་དེ་ཁོ་ན་ཉིད་དེས་ཐོབ་པར་གྱུར་པ་ལ་ནི་མི་བྱའོ། །དེ་ཅིའི་ཕྱིར་ཞེ་ན། བདག་གི་དེ་ཁོ་ན་ཉིད་

71-1-20b

གཉིས་སུ་མེད་པའི་ཡེ་ཤེས་ཀྱི་མཚན་ཉིད་སྔར་སྨོས་པ་དེ་ཉིད་ཐོབ་ན་སངས་རྒྱས་སུ་གྱུར་པ་ཉིད་ཡིན་པས། དེ་ལ་བཟླས་བརྗོད་བཤད་ཅི་དགོས། །ཞེས་དགོངས་པའོ། །ད་ནི་བཟླས་བརྗོད་ལ་མི་ལྟོས་པར་བསམ་གཏན་འབའ་ཞིག་ལས་ཇི་ལྟར་འདོད་པའི་དངོས་གྲུབ་དང་། རྣལ་འབྱོར་
དང་ཐར་པ་ཐོབ་པའི་ཆོ་ག་བྱ་བ་བསྟན་པར་བྱ་སྟེ། དེའི་ཕྱིར་གསང་སྔགས་ཀྱི་བསམ་གཏན་གྱི་གནས་བསྟན་པའི་ཕྱིར། དབེན་པའི་སྐྱེད་མོས་ཚལ་དང་ངོགས། །ཕུག་དང་རི་བོ་ནགས་ཚལ་དུ། །བརྟུལ་ཞུགས་གནས་སམ་སྡོམ་པ་ཡིས། །སྔགས་པ་བསམ་གཏན་བྱེད་ཅིང་གནས། །ཞེས་
བྱ་བ་གསུངས་སོ། །དེ་ལ་བསམ་གཏན་གྱི་གནས་བསྟན་པའི་དགོངས་པ་ནི། འདི་ལྟར་གནས་རྣམ་པ་གཉིས་ཏེ། ལུས་དབེན་པ་དང་། སེམས་དབེན་པའི་རྒྱུའི་བྱེ་བྲག་གོ། །དེ་ལ་བཟླས་བརྗོད་ལ་ནི་པདྨའི་མཚོ་དང་། རི་དང་ཕུག་ལ་སོགས་པའི་མཚན་ཉིད་ཡོན་ཏན་གང་ཡང་རུང་བ་
དང་ལྡན་པའི་གནས་ཀྱི་བྱེ་བྲག་ཏུ་ཡང་ལས་དང་དངོས་གྲུབ་ཀྱི་རྗེས་སུ་མཐུན་པར་བྱ་བའི་ཕྱིར་གནས་འཆའ་འོ། །བསམ་གཏན་ལ་ནི་ལུས་དབེན་པ་དང་། སེམས་དབེན་པའི་རྒྱུ་གཉིས་ཀ་དང་ལྡན་པ་ཉིད་ཀྱིས་གནས་སུ་གནས་པར་རིགས་ཏེ། དེ་བས་ན་དེ་གཉིས་ཀའི་ཡོན་ཏན་གྱི་རྒྱུ་
དང་ལྡན་པ་ཉིད། དབེན་པའི་སྐྱེད་མོས་ཚལ་ལ་སོགས་པ་བསམ་གཏན་གྱི་སྐབས་སུ་བསྟན་ཏོ། །བཟླས་བརྗོད་ཀྱི་གནས་ནི་དེ་དག་ཉིད་དང་གཞན་དང་གཞན་དག་ཀྱང་རྒྱུད་འདིའི་སྔོན་རོལ་དུ་གསུངས་པར་བལྟའོ། །བསམ་གཏན་བྱེད་ཅིང་ཞེས་བྱ་བ་ནི་ཉེ་བའི་མཚན་ཉིད་དེ་ཏིང་ངེ་འཛིན་
བསྒོམས་པ་ལ་ཡང་བལྟ་བར་བྱའོ། །བརྟུལ་ཞུགས་ནི་རབ་ཏུ་བྱུང་བ་དང་། རིག་སྔགས་ཀྱི་བརྟུལ་ཞུགས་ལ་སོགས་པའོ། །སྡོམ་པ་ནི་གསོ་སྦྱོང་ལ་སོགས་པའི་མཚན་ཉིད་དོ། །བསམ་གཏན་བྱེད་ཅིང་ཞེས་གསུངས་པ་དེ་ཡང་།  བསམ་པར་བྱ་བ་ནི་འདིར་ལྷའི་རང་བཞིན་དེ་དེ་བས་ན་དེ་ཉིད་
བརྟག་པར་བྱའོ། །དེ་ལ་ལྷའི་རང་བཞིན་རྣམ་པ་གསུམ་སྟེ། འདི་ལྟར་གཟུགས་ཀྱི་སྐུའི་བདག་ཉིད་ཀྱི་ལྷའི་རང་བཞིན་དང་། སྒྲའི་བདག་ཉིད་ཀྱི་ལྷའི་རང་བཞིན་དང་། དོན་དམ་པའི་ལྷའི་རང་བཞིན་ནོ། །དེའི་གཟུགས་ཀྱི་བདག་ཉིད་ཀྱི་ལྷའི་རང་བཞིན་ཡང་རྣམ་པ་གཉིས་ཏེ། གཅིག་ནི་

71-1-21a

མིག་ལ་སོགས་པའི་ཡན་ལག་གི་དབྱིབས་ཀྱི་རང་བཞིན་ནོ། །གཉིས་པ་ནི་ཕྱག་རྒྱའི་རང་བཞིན་ནོ། །སྒྲའི་རང་བཞིན་གྱི་ལྷའི་བདག་ཉིད་ལ་ཡང་རྣམ་པ་གཉིས་ཏེ། གཅིག་ནི་ཡི་གེའི་མཚན་ཉིད་དོ། །གཉིས་པ་ནི་སྒྲར་བརྗོད་པའི་རང་བཞིན་ནོ། །སྒྲར་བརྗོད་པའི་
རང་བཞིན་དེ་ཡང་རྣམ་པ་གསུམ་སྟེ། གཅིག་ནི་རྐན་དང་མཆུ་ལ་སོགས་པའི་རྩོལ་བས་བསྐྱེད་པ་ཤུབ་བུ་ལ་སོགས་པར་བཟླས་བརྗོད་བྱེད་པའི་སྒྲའི་རང་བཞིན་ནོ། །གཉིས་པ་ནི་ཡིད་ཀྱིས་སྤྱིར་གསང་སྔགས་འདོན་པའི་རང་བཞིན་ནོ། །གསུམ་པ་ཡང་གསང་སྔགས་ཀྱི་ཡི་གེ་རེ་རེ་
ནས་སེམས་པའི་བདག་ཉིད་རྣམ་པར་རྟོག་པའི་རང་བཞིན་ནོ། །དོན་དམ་པའི་ལྷའི་རང་བཞིན་ཡང་རྣམ་པ་གཉིས་ཏེ། དེ་ལ་གཅིག་ནི་ཆོས་ཀྱི་དབྱིངས་ཀྱི་རང་བཞིན་ནོ། །དེ་ལས་གཞན་པ་ནི་དེ་ལ་དམིགས་པ་སྣང་བ་མེད་པར་རྣམ་པར་མི་རྟོག་པའི་ཡེ་ཤེས་ཀྱི་རང་བཞིན་ནོ། །དེ་ལྟར་
ལྷའི་རང་བཞིན་ཐམས་ཅད་ཀྱི་བྱེ་བྲག་འདི་དག་གི་བཟླས་བརྗོད་ཀྱི་ཡན་ལག་བཞིའི་ཆོ་ག་ལ་ལྷའི་དེ་ཁོ་ན་ཉིད་དང་། བཟླས་བརྗོད་ཀྱི་མཐའི་བར་དུ་ཇི་ལྟར་དཔྱད་པར་བྱ་བ་དེ་དག་ནི་བཤད་ཟིན་ཏོ། །བཟླས་བརྗོད་ལ་མི་ལྟོས་པར་བསམ་གཏན་ལས་གསང་སྔགས་ཀྱི་འབྲས་བུ་འདོད་པས་ནི། རང་
བཞིན་གསུམ་འོག་ནས་འཆད་པའི་རིམ་པས་ཇི་ལྟར་སྲིད་པར་བསམ་གཏན་དུ་བྱའོ། །དེ་ལ། གཅིག་ནི་ཇི་སྐད་སྨོས་པ་སྒྲ། །ཞེས་བྱ་བ་ལྷའི་བྱེ་བྲག་གི་བདག་ཉིད་གསང་སྔགས་ཀྱི་ཡན་ལག་གི་བྱེ་བྲག་གི་ཡི་གེ་རྣམས་སོ་སོར་ཡིད་ཀྱིས་རྣམ་པར་བརྟགས་པའི་བསམ་གཏན་གྱི་རང་བཞིན་ནོ། །གཉིས་
པ་ནི་རིག་སྔགས་དེ་ཉིད་ཀྱི་ཚིག་ཏུ་སྨྲ་བའི་ཡི་གེ་སྒྲའི་རང་བཞིན་ནོ། །གསུམ་པ་ནི་ཡོངས་སུ་དག་པ་གཉིས་སུ་མེད་པའི་ཡེ་ཤེས་ཀྱི་ཡུལ་ཆོས་ཀྱི་དབྱིངས་ཀྱི་རང་བཞིན་ནོ། །དེ་ལ་རང་བཞིན་གསུམ་པོ་ཇི་ལྟར་སྲིད་པ་དེའི་བསམ་གཏན་གྱི་སྦྱོར་བ་དང་བསམ་གཏན་གྱི་འབྲས་བུ་བསྟན་པའི་ཕྱིར། 
གསང་སྔགས་མེ་གནས་དངོས་གྲུབ་སྟེར། །སྒྲ་གནས་རྣལ་འབྱོར་སྟེར་བ་དྲན། །སྒྲ་མཐར་ཐར་པ་སྟེར་བ་ཉིད། །འདི་དག་དེ་ཉིད་གསུམ་པོ་ཡིན། །ཞེས་གསུངས་སོ། །དེ་ལ། གསང་སྔགས་མེ་གནས་དངོས་གྲུབ་སྟེར། །སྒྲ་གནས་རྣལ་འབྱོར་སྟེར་བ་དྲན། །ཞེས་བྱ་བའི་ཚིག་

71-1-21b

གཉིས་ཀྱིས་ཇི་ལྟར་སྲིད་པའི་ལྷའི་རང་བཞིན་གཉིས་ཀྱི་བསམ་གཏན་གྱི་སྦྱོར་བ་ལས་དངོས་གྲུབ་མཆོག་དང་། སེམས་མཉམ་པར་གནས་པའི་མཚན་ཉིད་རྣལ་འབྱོར་འགྲུབ་པར་བསྟན་ཏོ། །སྒྲ་མཐར་ཐར་པ་སྟེར་བ་ཉིད། །ཅེས་བྱ་བ་དེས་ཀྱང་ཆོས་ཀྱི་དབྱིངས་ཀྱི་རང་བཞིན་གྱི་ལྷའི་བསམ་
གཏན་གྱི་ཐར་པ་ཐོབ་པ་བསྟན་ཏོ། །སྦྱོར་བ་གསུམ་གྱི་བསམ་གཏན་དེ་དག་ནི་ཀུན་རྫོབ་ཡིན་ཡང་ཇི་སྐད་དུ་སྨོས་པའི་འབྲས་བུ་ཐོབ་པ་ལས་གཞན་དུ་མི་འགྱུར་བས་ན། འདི་གསུམ་ཆར་ཡང་དེ་ཁོ་ན་ཉིད་གསུམ་དུ་གསུངས་སོ། །བཟླས་བརྗོད་ལ་སོགས་པའི་དེ་ཁོ་ན་ཉིད་བསྟན་པ་ལ་ཡང་
དགོངས་པ་འདི་ཉིད་ཡིན་པར་ཤེས་པར་བྱའོ། །དེ་དག་གིས་དོན་འདི་དག་ཇི་ལྟར་བསྟན་པ་དེ་ཡང་གླེང་བ་ལ་འགྲེལ་པའི་ཚིགས་བཅད་བཤད་པས་དེ་མ་ཐག་ཏུ་འོག་ནས་བསྟན་པར་བྱའོ། །དེ་ལ་ཡང་བཟླས་བརྗོད་ཀྱི་ཆོ་ག་གོང་དུ་སྨོས་པ་བཞིན་དུ་གསང་སྔགས་ཀྱི་བསམ་གཏན་གྱི་ཆོ་ག་ལ་
ཡང་བདག་གི་དེ་ཁོ་ན་ཉིད་ཤིན་ཏུ་བསྒོམས་ཤིང་སྒྲ་ཞེས་བྱ་བ་ལྷའི་སྒྲ་སྣང་བ་དང་། གཉིས་སུ་མེད་པར་མོས་པར་བྱས་ལ་དེ་བསྒོམ་པར་འདོད་དེ། དེ་བས་ན་ཐོག་མ་ཉིད་དུ་བདག་གི་དེ་ཁོ་ན་ཉིད་སྔར་གསུངས་པའི་མཚན་ཉིད་ཚིགས་སུ་བཅད་པ་འདིས་བཤད་པ། མི་འབྱེད་ལས་བྱུང་དངོས་པོ་
རྣམས། །བློ་ཅན་གྱིས་ནི་བདག་ལ་བསྡམ། །སྔགས་པ་ཡན་ལག་འདས་པ་གནས། །ཞེན་པ་མེད་པར་བསམ་གཏན་བྱའོ། ཞེས་གསུངས་སོ། །དེ་ལ་སྔགས་པས་བསམ་གཏན་བྱའོ། །བསམ་མོ་ཞེས་བཤད་པ་ཅི་ཞིག་བསྡམ་པར་ཞེ་ན།  མི་འབྱེད་ལས་བྱུང་དངོས་པོ་རྣམས། །
བསྡམས་ནས་ཞེས་བྱ་བ་གསུངས་སོ། །དེ་ལ་མིག་ལ་སོགས་པའི་དབང་པོའི་རྣམ་པར་ཤེས་པས་མི་འབྱེད་པས་ན་མི་འབྱེད་པ་སྟེ་ཡིད་དོ། །དེ་ལ་མཚུངས་པར་ལྡན་པའམ། དེའི་རྒྱུས་གང་འབྱུང་ཞིང་སྐྱེ་བ་དེ་རྣམས་མི་འབྱེད་པ་ལས་བྱུང་སྟེ། སེམས་དང་སེམས་ལས་བྱུང་
བའི་མཚན་ཉིད་དེ་རྣམས་བསྡམས་ནས་ཞེས་བྱ་བ་དང་འབྲེལ་ཏོ། །དེ་དག་བསྡམས་པ་ཡང་ཀུན་ནས་དཀྲིས་པའི་ངོ་བོར་མི་སྐྱེ་བ་སྟེ། ཇི་སྐད་སྨོས་པའི་མཚན་ཉིད་བསྡམས་པ་དེ་ཡང་གང་དུ་བསྡམ་ཞེ་ན། བདག་ལ་ཞེས་བྱ་བ་གསུངས་ཏེ། ཡིད་ལ་ཞེས་བྱ་བའི་དོན་ཏོ། །དེས་འདི་སྐད་དུ་

71-1-22a

གསུངས་པར་འགྱུར་ཏེ། ཇི་སྐད་དུ་གསུངས་པའི་མཚན་ཉིད་སྣང་བ་མེད་པ་གཉིས་སུ་མེད་པའི་བདག་གི་དེ་ཁོ་ན་ཉིད་མངོན་དུ་བྱེད་པས་ཀུན་ནས་དཀྲིས་པ་དེ་དག་མི་འབྱུང་ཞིང་། བག་ཆགས་སུ་གནས་པའི་མཚན་ཉིད་ནི་བསྡམས་པའོ། །དེའི་གཞི་ཡང་ཡིད་ཀྱི་
རང་བཞིན་བདག་གི་དེ་ཁོ་ན་ཉིད་ཡིན་པའི་ཕྱིར། བདག་ལ་ཞེས་བྱ་བ་གསུངས་སོ། །བློ་དང་ལྡན་པ་ཞེས་བྱ་བ་ནི་ཤེས་རབ་དང་ལྡན་ན་དེ་ཁོ་ན་ཉིད་བརྟག་ནུས་པར་འགྱུར་རོ་ཞེས་བྱ་བའི་ཐ་ཚིག་གོ། །ཡན་ལག་འདས་ལ་གནས་ཞེས་བྱ་བ་ནི་འདི་སྙེད་ཅིག་གོ་ཞེས་ཡོངས་སུ་ཆད་པར་ཡན་
ལག་ཏུ་དབྱེ་ཞིང་བགྲང་དུ་ཡོད་པ་ནི་ཡན་ལག་སྟེ། མིག་དང་རྣ་བ་ལ་སོགས་པའི་ཡན་ལག་རྣམས་ལ་བྱའོ། །སྔགས་པ་གང་གིས་ཡིད་ལ་མི་བྱེད་པའི་སྒོ་ནས་སམ། ཆོས་བདག་མེད་པར་སྒྲུབ་པའི་རིགས་པས་སུན་ཕྱུང་སྟེ། ཡན་ལག་དེ་དག་ལས་འདས་ཤིང་རྒལ་བ་དང་། 
ཡོངས་སུ་བཏང་བ་དེ་ནི་ཡན་ལག་ལས་མ་འདས་པ་སྟེ། ཡན་ལག་ལས་འདས་པ་ཞེས་བྱ་བའི་དོན་འདི་ལ་ཡན་ལག་ལས་འདས་པར་གྱུར་ནས་གནས་པ་ནི། ཡན་ལག་འདས་ལ་གནས་པ་སྟེ། སྣང་བ་མེད་པའི་ཡེ་ཤེས་གསལ་བ་ལས་མ་ལངས་ཞེས་བྱ་བའི་དོན་ཏོ། །དེ་ལྟར་
བདག་གི་དེ་ཁོ་ན་ཉིད་ལ་གནས་པས་སྒྲ་ཞེས་བྱ་བའི་ལྷའི་རང་བཞིན་དང་། ཆོས་ཀྱི་དབྱིངས་ཀྱི་ལྷའི་རང་བཞིན་བསམ་པར་བྱའོ་ཞེས་བསྟན་པའི་ཕྱིར། བསམ་གཏན་བྱའོ་ཞེས་གསུངས་སོ། །ཇི་ལྟར་བསམ་གཏན་བྱ་ཞེ་ན། ཞེན་པ་མེད་པར་ཞེས་གསུངས་ཏེ། ཞེན་ཅིང་
ཆགས་པ་དང་བྲལ་བ་གང་ཡིན་པ་དེ་ནི་ཞེན་པ་མེད་པ་སྟེ། འདིས་ཀྱང་བསམ་གཏན་དུ་བྱ་བའི་དངོས་པོ་ལ་མངོན་པར་ཆགས་པ་དགག་པ་གསུངས་ཏེ། མངོན་པར་ཆགས་པ་དགག་པ་དེ་ཡང་ཤེས་རབ་ཀྱི་སྣང་བའི་སྒོ་ནས་བདག་གི་དེ་ཁོ་ན་ཉིད་རྣམ་པར་བཅད་པ་ཉིད་ལ་དགག་པར་
རིག་པར་བྱའོ། །ཅིའི་ཕྱིར་ཞེ་ན། བསམ་གཏན་དུ་བྱ་བ་ལ་ཆགས་ན་གོང་ནས་གོང་དུ་ཆོས་རྣམ་པར་འབྱེད་པར་མི་འགྱུར་བས། ཁྱད་པར་མི་ཐོབ་པར་འགྱུར་བའི་ཕྱིར་རོ། །ཀུན་རྫོབ་ཀྱི་ལྷའི་དེ་ཁོ་ན་ཉིད་ཀྱི་མཚན་ཉིད་ལ་བསམ་གཏན་དུ་བྱ་བ་ལ་ནི་དེ་ལ་མངོན་པར་ཆགས་པར་འདོད་པ་

71-1-22b

ཉིད་པས་ཞེན་པ་མེད་པར་བྱ་ཞེས་བྱ་བའི་དགག་པ་དེ་ལ་དགོངས་པར་ནི་དེ་ལ་མཁས་པ་རྣམས་ཀྱིས་མི་བལྟའོ། །དེ་ལ་དེ་ལྟ་བུའི་བདག་གི་དེ་ཁོ་ན་ཉིད་ལ་གནས་ནས་ལྷའི་དེ་ཁོ་ན་ཉིད་མངོན་དུ་བྱ་སྟེ། སྒྲ་ཞེས་བྱ་བའི་ལྷའི་དེ་ཁོ་ན་ཉིད་མངོན་དུ་བྱ་བའི་ཕྱིར། སྒྲ་ཞེས་བྱ་བ་ཕྲེང་བར་སྦྱར། །
ཡི་གེ་བརྒྱུས་པ་མི་འགྱུར་རྣམས། །དྲིལ་བུའི་སྒྲ་བཞིན་མ་ཆད་པར། །ཡིད་ལ་ཞེན་པར་སེམས་པ་ན། །ཞེས་བྱ་བ་ལ་སོགས་པ་གསུངས་ཏེ། འདིས་ཀྱང་སྣང་བ་མེད་པའི་ཡེ་ཤེས་ཀྱི་མཚན་ཉིད་བདག་གི་དེ་ཁོ་ན་ལས་ལྡང་བ་དང་།  གསང་སྔགས་ཀྱི་སྒྲའི་རྣམ་པའི་ལྷའི་རྣལ་
འབྱོར་བསྟན་ཏེ། འདིར་ཡང་བདག་གི་དེ་ཁོ་ན་ཉིད་རྣམ་པར་མི་རྟོག་པ་སྣང་བ་མེད་པའི་མཚན་ཉིད་ཀྱི་ཕྱི་ནས་ཐོབ་པའི་སྒྲའི་བདག་ཉིད་ཀྱི་ལྷའི་དེ་ཁོ་ན་སྒྲའི་རྣམ་པར་རྟོག་པ་ལྷན་ཅིག་ཏུ་སྐྱེས་པ་ཉན་པ་དང་ཆུ་དང་འོ་མ་བཞིན་དུ་སྒྲ་དང་གཅིག་ཏུ་གྱུར་པར་སེམས་པའི་རྣལ་འབྱོར་གྱིས་
གསལ་བར་རབ་ཏུ་སྣང་བར་ནམ་གྱུར་པ་དེ་ན། སྔགས་པ་དེ་སྒྲའི་བདག་ཉིད་ཀྱི་ལྷའི་སྦྱོར་བ་ལ་གནས་པར་གྱུར་པ་དེ་བསྟན་ཏོ། དེ་ལ་སྒྲ་ཞེས་བྱ་བ་ཡི་གེ་རྣམས་ཕྲེང་བར་སྦྱར་བ་སེམས་པ་ན་ཞེས་བྱ་བ་དང་སྦྱར་ཏེ། དེ་བས་ན་ཡི་གེ་རྣམས་ཕྲེང་བར་སྦྱར་ཞེས་བྱ་བ་ནི་གསང་སྔགས་ཀྱི་ཡི་གེའི་
སྒྲ་གཅིག་བརྒྱུད་པར་མཆད་པའི་མཚན་ཉིད་བསམ་གཏན་དུ་བྱ་བ་ལ་སྦྱར་ནས་ཞེས་བྱ་བ་སྟེ། བཀོད་ནས་ཞེས་བྱ་བའི་ཐ་ཚིག་གོ། །ཕྲེང་བར་སྦྱར་བར་ཞེས་སྤྱིར་གསུངས་ཏེ། དེ་བས་ན་སྒྲ་ཞེས་བྱ་བ་བྱེ་བྲག་ཏུ་བསྟན་ཏོ། །སྒྲར་སྣང་བ་གསང་སྔགས་ཀྱི་ཡི་གེའི་སྒྲ་གཅིག་ནས་གཅིག་ཏུ་
བརྒྱུད་པའི་མཚན་ཉིད་ཅེས་བྱ་བའི་ཐ་ཚིག་གོ། །ཁ་ཅིག་ཏུ་སྒྲའི་ཚིག་ནི་ཡི་གེ་ལ་ཡང་སྦྱར་མོད་ཀྱི་འོན་ཀྱང་འདིར་གསང་སྔགས་ཀྱི་སྒྲ་ཉིད་དུ་རིག་པར་བྱ་སྟེ། དྲིལ་བུའི་སྒྲ་བཞིན་རྒྱུན་མི་འཆད་པར་ཞེས་འོག་ནས་འཆད་པའི་ཕྱིར་ཏེ། དྲིལ་བུའི་སྒྲ་ལྟར་སྒྲ་འབྱུང་བ་ཡི་གེའི་མཚན་ཉིད་
ཀྱི་སྒྲ་ལ་མི་སྲིད་པའི་ཕྱིར་རོ་ཞེས་དགོངས་པའོ། །བསམ་གཏན་དུ་བྱ་བའི་གསང་སྔགས་ཀྱི་ཡི་གེའི་སྒྲ་གཅིག་ནས་གཅིག་ཏུ་འབྱུང་བའི་མཚན་ཉིད་སྒྲ་ཞེས་བྱ་བའི་ཕྲེང་བ་སྦྱར་བ་ནི་གསང་སྔགས་ཀྱི་ཡན་ལག་གི་ཡི་གེའི་སྒྲ་རྒྱུན་མི་ཆད་པར་རབ་ཏུ་སྣང་བར་འདོད་པས་ན། ཡི་གེ་བརྒྱུས་པ་ཞེས་

71-1-23a

གསུངས་སོ། །དེ་ལ་ཡི་གེ་རྣམས་བརྒྱུས་པས་ན་ཡི་གེ་བརྒྱུས་པ་སྟེ། ཕྲེང་བ་ཞེས་བྱ་བ་དང་སྦྱར་རོ། །དེས་ཀྱང་ཡི་གེ་བརྒྱུད་པའི་ཕྲེང་བ་བཀོད་པའི་མཚན་ཉིད་དེ་ཉིད་སྦྱར་ནས་ཞེས་བྱ་བ་འདིས་བསྟན་མོད་ཀྱིས་ངེས་པར་བྱ་བའི་ཕྱིར་ཡང་བརྗོད་པར་བྱ་སྟེ། དེ་བས་ན་མི་འགྱུར་
ཞེས་བྱ་བས་བྱེ་བྲག་ཏུ་བསྟན་ཏོ། །བརྒྱུས་པ་དེ་མི་འགྱུར་བ་ནི་རང་བཞིན་མི་འགྱུར་ཞིང་མི་གཡོ་བའི་ངང་ཚུལ་ཅན་གསང་སྔགས་ཀྱི་ཡི་གེའི་སྒྲ་རྒྱུན་མ་ཆད་པར་རབ་ཏུ་སྣང་བ་ཞེས་བྱ་བའི་ཐ་ཚིག་གོ། །ཡང་ཡི་གེའི་སྒྲ་དེ་དག་ཉིད་གཅིག་ནས་གཅིག་ཏུ་འབྱུང་བའི་མཚན་ཉིད་ཀྱི་ཕྲེང་བ་བྱེ་བྲག་ཏུ་
བསྟ་པའི་ཕྱིར། དྲིལ་བུའི་སྒྲ་བཞིན་མ་ཆད་པར། །ཞེས་བྱ་བ་གསུངས་སོ། །དེ་ལ་དྲིལ་བུའི་སྒྲ་ནི་གང་རྣ་ལམ་དུ་སྒྲ་བསྒྲགས་པའི་ཕྱི་རོལ་གྱི་དྲིལ་བུའི་སྒྲ་འདྲ་བར་ལྷན་ཅིག་སྐྱེས་པ་རྒྱུན་མི་འཆད་པར་ཡི་གེའི་སྒྲའི་རྒྱུན་མངོན་པར་མི་གསལ་བ་དེ་འདིར་འདོད་དོ། །དེ་བས་ན་དེ་ལྟ་བུའི་དྲིལ་བུའི་སྒྲ་
བཞིན་དུ་རྒྱུན་མི་འཆད་པ་དང་འབྲེལ་བའི་ཡི་གེའི་སྒྲ་གཅིག་ནས་གཅིག་ཏུ་འབྱུང་བའི་ཕྲེང་བ་ལ་ཞེན་པ་མེད་པར་བསམ་གཏན་དུ་བྱའོ་ཞེས་བྱ་བའི་སྐབས་དང་སྦྱར་རོ། །དེ་དག་གིས་ནི་སྒྲའི་བདག་ཉིད་ཀྱི་ལྷ་དང་མི་གཉིས་པའི་རྣལ་འབྱོར་དུ་དེའི་རྣ་བ་ལ་རྣམ་པར་རྟོག་པར་གནས་པར་
བསྟན་ཏོ། །དེ་ནི་དེ་ལྟ་བུའི་སྒྲའི་བདག་ཉིད་ཀྱི་ལྷར་སྣང་བ་ཏིང་ངེ་འཛིན་གྱི་སྦྱོར་བས་ཤིན་ཏུ་གསལ་བར་བྱས་ནས་བཟླས་བརྗོད་ལ་མི་ལྟོས་པའི་བསམ་གཏན་ཉིད་ཀྱིས་དངོས་གྲུབ་ཐོབ་པར་འདོད་པས་རང་གི་སྙིང་གར་མར་མེའི་མེ་ལྕེ་འདྲ་བའི་མེ་འབར་བའི་ནང་དུ། དེའི་ཚིག་གི་ཡིག་
འབྲུ་གཅིག་ནས་གཅིག་ཏུ་བརྒྱུད་པའི་རང་བཞིན་བསམས་ཏེ་བསྒོམ་མོ་ཞེས་བསྟན་པའི་ཕྱིར། ཡིད་ལ་ཞེན་པར་སེམས་པ་ན། །མེ་ཡི་ནང་གནས་ཞི་བ་སྟེ། །ཚིག་རྣམ་དག་པ་ཡན་ལག་ལྡན། །སྲོག་དང་རྩོལ་བ་བཀག་པའི་བདག །གཉིད་སྤངས་ནས་ནི་རྣམ་པར་བསམ། །ཞེས་
བྱ་བ་གསུངས་སོ། །དེ་ལ་སེམས་པ་ན་ཞེས་བྱ་བ་ནི་དེ་ལྟ་བུའི་ཕྲེང་བ་ལྟ་བུའི་དེ་ཁོ་ན་ཉིད་ཀྱི་མཚན་ཉིད་དེ། བསམ་གཏན་བྱེད་པའི་ཚེ་ཉིད་ན་མེ་ལ་སོགས་པའི་རྣམ་པར་རྟོག་པར་བྱའོ་ཞེས་བྱ་བའི་ཐ་ཚིག་གོ། །དེས་ནི་ཡི་གེར་བཀོད་པའི་སྒྲའི་བདག་ཉིད་ཀྱི་ལྷ་སྒྲར་རྣམ་པར་རྟོག་པ་གཅིག་ 

71-1-23b

ནས་གཅིག་ཏུ་འབྱུང་བ་སྟེ། སྙིང་ག་དང་ཉེ་བ་ཉིད་དུ་བསམ་མོ་ཞེས་དེ་སྐད་གསུངས་པ་ཡིན་ནོ། །མེ་ཡི་ནང་ན་གནས་ཞེས་བྱ་བ་ནི་སྙིང་གའི་ཕྱོགས་དེར་ཡང་མར་མེའི་མེ་ལྕེ་དང་འདྲ་བ་མེ་འབར་བའི་ནང་ན་འདུག་པ་རྣམ་པར་བརྟག་གོ་ཞེས་པའོ། །ཞི་བ་ཞེས་བྱ་བ་ནི་མི་གནོད་པའི་རང་བཞིན་
ཞེས་བྱ་བའི་དོན་ཏེ། དེས་འདི་སྐད་དུ་གསུངས་པར་འགྱུར་རོ། །དེའི་གནས་མེ་འབར་བའི་ཡི་གེའི་འབྲུ་གཅིག་ནས་གཅིག་ཏུ་བརྒྱུད་པ་དང་བཅས་པ་དེ་ཚ་བ་ལ་སོགས་པ་རེག་པའི་སྒོ་ནས་གནོད་པའི་རང་བཞིན་མ་ཡིན་པས་གསང་སྔགས་ཀྱི་སྒྲར་སྣང་བའི་རྣམ་པར་རྟོག་པ་གཅིག་ནས་གཅིག་ཏུ་འབྱུང་
བ་ལ་ཞི་བ་ཞེས་གསུངས་སོ། །ཚིག་རྣམ་པར་དག་པ་ཞེས་བྱ་བ་ནི། གང་ལ་རྐན་དང་མཆུ་ལ་སོགས་པ་སྦྱར་བས་བསྐྱེད་པའི་ཚིག་དང་ཡིད་ལ་གསང་སྔགས་ཟློས་པའི་མཚན་ཉིད་ཀྱི་ཚིག་རྣམ་པར་དག་ཅིང་མེད་པར་གྱུར་པ་དེ་ནི་ཚིག་རྣམ་པར་དག་པའོ། །དེས་འདི་སྐད་དུ་གསུངས་པར་
འགྱུར་ཏེ། དེ་ཤུབ་བུ་ལ་སོགས་པར་བཟླས་བརྗོད་བྱ་བའི་སྒྲའི་རང་བཞིན་ཡང་མ་ཡིན། ཡིད་ཀྱིས་བཟླས་བརྗོད་བྱ་བའི་རང་བཞིན་ཡང་མ་ཡིན་གྱི་གསང་སྔགས་ཀྱི་ཡི་གེའི་སྒྲ་རིང་པོར་སེམས་པའི་རྣམ་པར་ཏོག་པའི་རང་བཞིན་ནོ །མེད་པ་ལ་གང་རྣམ་པར་རྟོག་པའི་སྒྲར་འདོགས་པར་སྣང་
སྟེ། ཇི་ལྟར། ལྟོ་ཡི་དྲི་མ་རྣམ་པར་དག །ཅེས་བྱ་བ་ལྟ་བུའོ། །དེ་བས་ན་ཚིག་རྣམ་པར་དག་པ་ཞེས་བྱ་བ་ཚིག་གི་མཚན་ཉིད་རྣམ་པ་གཉིས་སུ་མེད་ཅེས་བྱ་བའི་ཐ་ཚིག་གོ། །ཡན་ལག་ལྡན་ཞེས་བྱ་བ་དེ་ལ་ཡན་ལག་གི་སྒྲ་དེའི་ཚིག་ཏུ་བརྗོད་པའི་ཡིག་འབྲུའི་ཕྲེང་བའི་རང་བཞིན་ཏེ། ཡན་
ལག་དེ་དང་ལྡན་པ་ནི་ཡན་ལག་དང་ལྡན་ཞིང་བཅས་པ་སྟེ། ཚིག་ཅེས་བྱ་བའི་སྒྲར་རྣམ་པར་རྟོག་པའི་ཕྲེང་བ་གང་ཡིན་པ་དེ་ཡན་ལག་དང་ལྡན་པའོ། །དེས་ནི་སྒྲ་དེའི་ཚིག་གི་ཡི་གེའི་འབྲུའི་ཕྲེང་བ་མེ་འབར་བའི་ནང་ན་གནས་པ་དེ་མངོན་པར་གྲགས་པར་རྣམ་པར་བརྟག་གོ་ཞེས་བྱ་བའི་ཐ་ཚིག་གོ། །
ད་ནི་དེ་ལྟ་བུའི་གསང་སྔགས་ཀྱི་སྒྲས་སེམས་པ་ལ་ཞུམ་པ་དང་རྒོད་པ་སྤང་བར་བསྟན་པ། སྲོག་དང་རྩོལ་བ་བཀག་པའི་བདག །གཉིད་སྤངས་ནས་ནི་རྣམ་པར་བསམ། །ཞེས་བྱ་བ་གསུངས་སོ། །དེ་ལ་གོང་དུ་གསུངས་པའི་སྲོག་དང་རྩོལ་བ་བདག་གི་མཚན་ཉིད་སྔར་གསུངས་པའི་

71-1-24a

རིམ་པ་ཉིད་ཀྱིས་རྣལ་འབྱོར་པའི་རང་བཞིན་གྱི་བདག་གང་ཡིན་པ་ལ། བསམ་གཏན་བྱེད་པའི་ཚེ་བཀག་པ་དེ་ནི། སྲོག་དང་རྩོལ་བ་བཀག་པའི་བདག །ཅེས་བྱའོ། །འདིས་ཀྱང་རྣལ་འབྱོར་པའི་རྒོད་པ་དགག་པ་གསུངས་ཏེ།  ཅིའི་ཕྱིར་ཞེ་ན། དྲན་པ་དང་
སྲོག་གི་སྐྱོན་མ་བཀག་པ་ནི་ཕྱུགས་དང་འདྲ་བར་སེམས་མཉམ་པར་གཞག་པ་མེད་པར་ཉེ་བར་ཞི་བའི་སེམས་སུ་མི་འགྱུར་རོ་ཞེས་བྱ་བའི་དོན་ཏོ། །གཉིད་སྤངས་ནས་ཞེས་བྱ་བ་འདིས་ཞུམ་པའི་ཕྱོགས་སུ་གཏོགས་པའི་གཉིད་ཡོངས་སུ་སྤང་བ་བཤད་པ་ཞུམ་པ་མེད་པ་བསྟན་ཏོ། །དེས་ན། གསང་
སྔགས་མེ་གནས་དངོས་གྲུབ་སྟེར། །ཞེས་གང་གསུངས་པ་དེ་བཤད་ཟིན་ཏེ། གང་གི་ཕྱིར་ཞེ་ན། ཡིད་ཀྱི་བསམ་པ་མེར་རྣམ་པར་རྟོག་པ་ནི་མེ་སྟེ། དེར་ཚིག་གི་ཡི་གེ་ཕྲེང་བ་དང་བཅས་པ་ཇི་སྐད་གསུངས་པའི་མཚན་ཉིད་ཀྱི་གསང་སྔགས་ཀྱི་སྒྲ་བསམ་པར་བྱ་བའི་བསམ་གཏན་
ཞེས་བྱ་བ་ཡི་གེ་དང་བཅས་པའི་གསང་སྔགས་ཀྱི་སྒྲའི་མཚན་ཉིད་ཀྱི་གསང་སྔགས་དེ་ལ་གནས་པས་ན། མེ་ལ་གནས་ཞེས་བསྟན་ཏོ། །བསམ་གཏན་འདི་ཡི་འབྲས་བུ་ཡང་། །སྒྲ་ལ་དམིགས་པའི་བསམ་གཏན་ནི། །འབའ་ཞིག་བྱས་པ་ཉིད་ཀྱིས་ཀྱང་། །དངོས་པོ་ཀུན་གནས་
དམ་པའི་དཔལ། །གྲུབ་པའི་སྐྱེས་བུ་ཐོབ་པར་འགྱུར། །ཞེས་འོག་ནས་འབྱུང་སྟེ། དེ་ཉིད་དུ་བཤད་པར་བྱའོ། །བསམ་གཏན་འདིའི་སྦྱོར་བའི་རིམ་པ་ཡང་འདིའོ། །དེ་ལ་ཐོག་མ་ཉིད་དུ་གཉིས་སུ་མེད་པའི་ཡེ་ཤེས་ཀྱི་མཚན་ཉིད་བདག་གི་དེ་ཁོ་ན་ཉིད་མངོན་དུ་བྱས་ནས། དེའི་རྗེས་ལ་
ཐོབ་པའི་སྒྲའི་བདག་ཉིད་ཀྱི་ལྷའི་དེ་ཁོ་ན་ཉིད་དུ་རྣམ་པར་རྟོག་པས་བདག་བསྒོས་ཏེ་སྒྲ་དེ་སྙིང་གའི་ཕྱོགས་ན་གནས་པའི་མེ་འབར་བའི་ནང་ན་འདུག་ཅིང་དེའི་ཡི་གེའི་ཕྲེང་བ་གནས་པར་སྲོག་དང་རྩོལ་བ་བཀག་སྟེ། ཉིན་རེ་བཞིན་བསམ་གཏན་དུ་བྱ་བ་ནི། ཇི་སྐད་དུ་བྲུ་བ་མི་ཚབ་ལ་སོགས་པ་ཕྱི་དང་ནང་གི་
མཚན་མ་བྱུང་ནས་བདག་ཉིད་ཇི་ལྟར་བསམས་པ་སྒྲུབ་ནུས་པར་གྱུར་གྱི་བར་དུའོ། །མེ་ལ་གནས་པའི་གསང་སྔགས་ཀྱི་ཡི་གེའི་སྒྲའི་བསམ་གཏན་འདི་ཡང་ཡན་ལག་བཞིའི་བཟླས་བརྗོད་བྱེད་པས་ཀྱང་བཟླས་བརྗོད་ཀྱི་མཇུག་གམ་གཞན་དུ་ཡང་རུང་སྟེ། གསང་སྔགས་ཀྱི་མཐུ་བསྐྱེད་

71-1-24b

པ་དང་། སེམས་མཉམ་པར་གཞག་པའི་ཕྱིར་སྦྱར་བར་བྱའོ། །ཞེས་དེ་ལ་མཁས་པ་དག་སྨྲའོ། །ད་ནི། སྒྲ་གནས་རྣལ་འབྱོར་སྟེར་བར་དྲན། །ཞེས་གང་གསུངས་པ་དེ་བརྟག་པར་བྱ་སྟེ། དེ་ལ་སྒྲ་ནི་ཇི་སྐད་དུ་གསུངས་པའི་སྒྲའི་བདག་ཉིད་ཀྱི་ལྷའི་རང་བཞིན་ནོ། །སྒྲ་ཙམ་པོ་དེ་ལ་
བརྗོད་པར་བྱ་བའི་ཚིག་གི་རང་བཞིན་དང་། ཡི་གེ་ཡོངས་སུ་སྤངས་པ་ནང་གི་བརྗོད་པ་ཙམ་རྣམ་པ་དང་བཅས་པའི་ཡིད་ཀྱི་རང་བཞིན་དུ་གང་གནས་པ་གསང་སྔགས་ཀྱི་དོན་གྱི་རང་བཞིན་དེ་དག་ནི་སྒྲ་ལ་གནས་པའོ། །དྲན་པ་ནི་བསམ་པ་སྟེ། རྣལ་འབྱོར་སྟེར་བར་འགྱུར་རོ་ཞེས་བྱ་བའི་དོན་
ཏོ། །དེ་ལ་རྣལ་འབྱོར་ནི་སྐབས་འདིར་ཡིད་ཡེངས་པ་བརྟུལ་ལ། མ་ཡེངས་ཀྱི་བར་དུ་བསམ་གཏན་བྱ་བའི་སྒྲའི་ཡུལ་ལ་གང་རྩེ་གཅིག་ཏུ་འཇུག་པ་སྟེ། བསམ་གཏན་བྱ་བའི་སྒྲའི་དབྱངས་དང་ཡིད་དུ་སྦྱོར་བ་ནི་རྣལ་འབྱོར་རོ་ཞེས་སྒྲའི་དོན་བཤད་པའི་ཕྱིར་ཏེ། དེ་བས་ན་ཁ་ཅིག་གིས་
རྣལ་འབྱོར་ནི་སེམས་འཇུག་པ་བཀག་པའོ་ཞེས་སྨྲས་པ་དང་དེ་བཞིན་དུ་སྲོག་ཅེས་བྱ་བའི་རླུང་ལེགས་པར་བཀག་པ་ནི་རྣལ་འབྱོར་རོ་ཞེས་གང་སྨྲས་པ་དེ་ཡང་བཤད་པར་གྱུར་ཏེ་ཇི་ལྟར་སྒྲ་གཅིག་པུ་ལ་དམིགས་པའི་ཡིད་ནི་གང་ལ་ཉོན་མོངས་པ་དང་ཉོན་མོངས་པ་མེད་པའི་རྣམ་པར་ཤེས་
པ་འཇུག་པ་དེ་དག་རེ་ཞིག་དོགས་པ་མེད་པར་བཀག་པར་འགྱུར་རོ། །དེ་བཞིན་དུ་ཡིད་རྩེ་གཅིག་ཏུ་གྱུར་པ་ཉིད་ལ་ནི་སྲོག་ཅེས་བྱ་བའི་ཡིད་ཀྱི་རྣམ་པར་ཤེས་པའི་གནས་རླུང་གཞན་དུ་མི་འཇུག་སྟེ། དེ་བས་ན་སེམས་རྩེ་གཅིག་ཏུ་གྱུར་ན་རླུང་བཀག་པར་དོན་གྱི་དབང་གིས་འགྱུར་རོ། །དེ་
ལྟར། སྒྲ་གནས་རྣལ་འབྱོར་སྟེར་བར་དྲན། །ཞེས་བྱ་བ་སྟེ་བསྟན་པའི་ཕྱིར། སྙིང་གར་གནས་པ་ཕྲ་བ་ནི། །དྲི་མེད་ཟླ་བའི་དཀྱིལ་འཁོར་ཏེ། །དེ་ནང་རབ་ཏུ་ཞི་བ་ཡི། །མེ་ལྕེ་རབ་ཏུ་འོད་བཟང་བ། །མི་འགྱུར་གཞི་ནི་དེར་བཞག་ནས། །དེར་འདུག་ནས་ནི་སྒྲ་བསམ་མམ། །མི་
འགྱུར་བ་ལ་ཡི་གེ་གཞག །སྒྲ་ཉིད་འབའ་ཞིག་བསམ་པར་བྱ། །ཞེས་བྱ་བ་གསུངས་སོ། །དེས་འདི་སྐད་གསུངས་ཏེ། དེ་ལྟར་སྣང་བ་མེད་པའི་བདག་གི་དེ་ཁོ་ན་ཉིད་ལ་གནས་པ་ཉིད་ཀྱི་སྙིང་ག་ན་ཟླ་བའི་གཟུགས་ཀྱི་ནང་ན་འདུག་པའི་མེ་ལྕེའི་ནང་ན་ལྷའི་གཞིའམ། ཟླ་བའི་དཀྱིལ་

71-1-25a

འཁོར་འབའ་ཞིག་ལ་ཡི་གེའི་འབྲུའི་ཕྲེང་བ་རབ་ཏུ་བརྟགས་ལ། ཅུང་ཟད་ཙམ་ཞིག་ཏིང་ངེ་འཛིན་གྱིས་རབ་ཏུ་གསལ་བར་བྱས་ཏེ། དེའི་རྣམ་པ་ཡང་སྤངས་ལ་ཇི་སྐད་སྨོས་པའི་སྒྲའི་དབྱངས་ཙམ་འབའ་ཞིག་བསམ་གཏན་དུ་བྱའོ་ཞེས་བྱ་བ་ནི་བསྡུས་པའི་དོན་ཏོ། །
ཡན་ལག་གི་དོན་བཤད་པར་བྱ་སྟེ། དེ་ལ་ཕྲ་བ་ཟླ་བའི་དཀྱིལ་འཁོར་ཞེས་པ་ནི་སྡུག་ཅིང་རྒྱ་ཆེ་བའི་སྐྱོན་སྤངས་པའི་ཟླ་བ་ནི་ཕྲ་བ་སྟེ། དེ་ལྟ་བུ་བསྒོམས་ན་རྣལ་འབྱོར་པའི་སྙིང་གར་གནས་ཤིང་སེམས་མཉམ་པར་གནས་པར་མི་འགྱུར་བའི་ཕྱིར་རོ། །དྲི་མ་མེད་པ་ཞེས་བྱ་བ་ནི་རབ་ཏུ་འོད་
གསལ་ཞིང་མདངས་ཅན་དུ་བསྒོམ་པར་བྱ་བ་བསྟན་པའོ། །མི་འགྱུར་གཞི་ནི་དེར་བཞག་ནས། །ཞེས་བྱ་བ་མི་འགྱུར་བ་ནི་གསང་སྔགས་ཀྱི་ཡི་གེའི་གཞི་སྟེ། གནས་ཀྱི་སྒོ་ནས་ལྷའི་གཟུགས་ཀྱི་སྐུ་ལ་གཞི་ཞེས་བྱའོ། །མི་འགྱུར་བའི་གཞི་རང་གི་ལྷའི་སྐུ་བཞག་ནས་ཞེས་བྱ་བ་ནི་
ཟླ་བའི་དཀྱིལ་འཁོར་ལ་གནས་པའི་མེ་ལྕེ་དེ་ལ་བསམས་ནས་ཞེས་བྱ་བའི་ཐ་ཚིག་གོ། །དེ་ལྟར་གང་གནས་པའི་ལྷ་མི་འགྱུར་བའི་གཞི་ཞེས་བྱ་བ་ལ་ཅི་ལྷ་དེ་ཉིད་ཀྱི་གཟུགས་བསམ་པའམ། འོན་ཏེ་གཞན་འབའ་ཞིག་བསམ་པ་བྱེ་བྲག་ཏུ་མ་ཕྱེ་བས་དེ་བསྟན་པའི་ཕྱིར། སྒྲ་བསམ་
མོ་ཞེས་བྱ་བ་གསུངས་ཏེ། སྔར་བཤད་པའི་སྒྲའི་མཚན་ཉིད་བསམ་ཞིང་བསྒོམ་མོ་ཞེས་བྱ་བའི་དོན་ཏོ། །དེས་འདི་སྐད་བསྟན་པར་འགྱུར་ཏེ། སྔར་ཟླ་བའི་དཀྱིལ་འཁོར་གྱི་ནང་ན་གནས་པའི་མེ་ལྕེ་དེ་ལ་ལྷའི་སྐུ་བསམ་གཏན་དུ་བྱས་ནས་ཕྱིས་བསྒོམ་པ་དེ་བཏང་སྟེ། སྒྲ་འབའ་
ཞིག་བསམ་གཏན་དུ་བྱའོ། །དབུགས་དབྱུང་བའི་ཚེ་ཡང་སེམས་ཀྱིས་ཀྱང་། ལྷའི་སྐུ་ལ་དམིགས་པར་བྱའོ་ཞེས་བསྟན་ཏོ། །འདིས་ཀྱང་བཟླས་བརྗོད་ཀྱི་ཡན་ལག་བཞི་ལ་དམིགས་པའི་སྦྱོར་བ་ལས་མེ་ལ་གནས་པའི་གསང་སྔགས་ལ་དམིགས་པ་བྱེ་བྲག་ཏུ་བསྟན་ཏོ། །དེ་
ལྟར་ཅི་མངོན་ཞེ་ན། བཟླས་བརྗོད་ཀྱི་ཡན་ལག་བཞི་ལ་དེ་བཞིན་གཤེགས་པ་དང་། ཟླ་བའི་དཀྱིལ་འཁོར་དང་། གསང་སྔགས་ཀྱི་ཡི་གེའི་ཕྲེང་བ་དང་གསུམ་ཅིག་ཅར་དམིགས་པ་དང་། ནང་དུ་ཡང་ཟླ་བའི་དཀྱིལ་འཁོར་དང་།  ཡི་གེའི་ཕྲེང་བ་གཉིས་དམིགས་པའམ། 

71-1-25b

གསང་སྔགས་ཀྱི་སྒྲ་བརྗོད་ཅིང་བསམ་གཏན་དུ་བྱ་བ་ཟློས་པ་པོས་གསང་སྔགས་བརྗོད་པའི་ཚེ་ཅིག་ཅར་བྱ་བ་སྔར་བསྟན་ཏོ། །དེ་བཞིན་དུ་མེ་ལ་གནས་པའི་གསང་སྔགས་ལ་དམིགས་པའི་སྦྱོར་བ་ལ་ཡང་མེ་ལྕེའི་ནང་ན་འདུག་པའི་ཡི་གེ་ཕྲེང་བ་དང་བཅས་པའི་གསང་སྔགས་ཀྱི་སྒྲ་དང་། 
མེ་ལ་སོགས་པ་གསུམ་ཆར་དུས་གཅིག་ཏུ་དམིགས་པ་བསྟན་པ། ཡིད་ལ་ཞེན་པར་སེམས་པ་ན། །མེ་ཡི་ནང་གནས་ཞི་བ་སྟེ། །ཚིག་རྣམས་དག་པ་ཡན་ལག་ལྡན། །ཞེས་བྱ་བ་གསུངས་ཏེ། མེའི་མཚན་ཉིད་དང་། གསང་སྔགས་ཀྱི་ཡི་གེ་དང་བཅས་པའི་གསང་སྔགས་
ཀྱི་ཡི་གེའི་ཕྲེང་བའི་སྒྲ་ལ་དུས་གཅིག་ཏུ་དམིགས་ངེས་པའི་ཕྱིར་རོ། །འདིར་ནི་མི་འགྱུར་བའི་གཞི་སྔར་བཞག་ནས་ཕྱིས་སྒྲ་བསྒོམ་མོ་ཞེས་བྱ་བའི་ཕྱི་མའི་དུས་བསྟན་པའི་ཚིག་གིས་ནི་སྒྲ་བསྒོམ་པའི་ཚེ་གསང་སྔགས་མི་འགྱུར་བའི་གཞི་ཡོངས་སུ་བཏང་བ་གསུངས་སོ། །དེ་བཞིན་དུ་
གཞུང་གཞན་དག་ལས་ཀྱང་སྒྲའི་བསམ་གཏན་བྱེད་པའམ། རླུང་གིས་རེག་པའི་བསམ་གཏན་བྱེད་པའི་ཚེ། གཟུགས་ལ་དམིགས་ན་སེམས་གཡེང་བར་འགྱུར་རོ་ཞེས་གསུངས་སོ། །སྒྲའི་བསམ་གཏན་ཉིད་རྣམ་པ་གཞན་དུ་བྱ་བ་ཡང་། མི་འགྱུར་བ་ལ་ཡི་གེ་གཞག །
སྒྲ་ཉིད་འབའ་ཞིག་བསམ་པར་བྱ། །ཞེས་གསུངས་ཏེ། སྣང་བ་མེད་པར་རྣམ་པ་གཅིག་པར་གནས་པ་ན་རྒྱུན་དུ་འཇུག་ཀྱང་རང་བཞིན་མི་འགྱུར་བས་ན་མི་འགྱུར་བ་ཞེས་བྱ་སྟེ། བྱང་ཆུབ་ཀྱི་སེམས་ལ་བྱའོ། །དེ་བས་ན་དེའི་མཚན་མར་གྱུར་པ་ཟླ་བའི་དཀྱིལ་འཁོར་ལ་ཡང་མི་འགྱུར་
བ་ཞེས་བྱ་སྟེ། ཟླ་བའི་དཀྱིལ་འཁོར་མི་འགྱུར་བ་དེ་ལ་གསང་སྔགས་ཀྱི་ཡི་གེའི་འབྲུའི་རང་བཞིན་རྣམས་བཞག་སྟེ་བསྒོམས་ནས་སྒྲ་འབའ་ཞིག་བསམ་མོ་ཞེས་བྱ་སྟེ་སྔ་མ་བཞིན་དུ་སྒྲའི་དབྱངས་ཙམ་འབའ་ཞིག་བསམ་མོ་ཞེས་བྱ་བའི་ཐ་ཚིག་གོ། །འདིས་ཀྱང་སྔ་མའི་
སྒྲའི་བསམ་གཏན་གྱི་སྦྱོར་བ་ལས་བྱེ་བྲག་ཏུ་བསྟན་ཏོ། །དེ་ལྟར་ཅི་མངོན་ཞེ་ན་སྔ་མ་ནི་རང་གི་ལྷའི་སྐུ་དེ་སེམས་ངལ་བསོ་བའི་ཕྱིར་བསམ་གཏན་དུ་བྱས་ནས་ཕྱིས་སྒྲའི་དབྱངས་འབའ་ཞིག་ལ་དམིགས་པ་གསུངས་སོ། །འདིར་ནི་ཡི་གེའི་འབྲུ་རྣམས་ཀྱི་རང་བཞིན་འབའ་ཞིག་སེམས་

71-1-26a

ངལ་བསོ་བའི་ཕྱིར་ཟླ་བའི་དཀྱིལ་འཁོར་ལ་བསམས་ནས་ཕྱིས་སྒྲའི་བསམ་གཏན་བྱའོ་ཞེས་དགོངས་སོ། །སྒྲའི་བསམ་གཏན་གྱི་སྦྱོར་བ་ཡང་ཕྲེང་བའི་གསང་སྔགས་ཀྱི་ཡི་གེ་རེ་རེའི་སྒྲ་ལུས་ཐམས་ཅད་ཀྱི་རླུང་སླར་སྡུད་པ་དང་།  ལྷན་ཅིག་ཏུ་ཡིད་ཀྱིས་རྣམ་
པར་བརྟག་ཅིང་བྱའོ། །ད་ནི་མེ་ལ་གནས་པ་ལ་སོགས་པ་སྒྲའི་བསམ་གཏན་གྱི་འབྲས་བུ་གང་ཡིན་པ་དེ་བསྟན་པ། སྒྲ་ལ་དམིགས་པའི་བསམ་གཏན་ནི། །འབའ་ཞིག་བྱས་པ་ཉིད་ཀྱིས་ཀྱང་། །དངོས་པོ་ཀུན་ནས་དམ་པའི་དཔལ། །སྒྲུབ་པའི་སྐྱེས་བུས་ཐོབ་པར་འགྱུར། །
ཞེས་བྱ་བ་གསུངས་སོ། །དེ་ལ་འབའ་ཞིག་ཅེས་བྱ་བ་ནི་བཟླས་བརྗོད་ལ་མི་ལྟོས་པའི་བསམ་གཏན་འབའ་ཞིག་གིས་སོ། །སྒྲ་ལ་དམིགས་པ་ཞེས་བྱ་བ་ནི་གོང་དུ་དམིགས་པའི་རིམ་པས་སྒྲ་རིག་ཅིང་སྒྲའི་རྗེས་སུ་སོང་བ་སྟེ། སྒྲ་ལ་དམིགས་པ་ཞེས་བྱ་བའི་ཐ་ཚིག་གོ། །སྒྲུབ་པའི་
སྐྱེས་བུ་ཞེས་བྱ་བ་ནི་ཉེ་བར་བསྟན་པ་སྟེ། བུད་མེད་ཀྱིས་ཀྱང་འཐོབ་པའོ། །དངོས་པོ་ཀུན་གནས་དམ་པའི་དཔལ། །ཞེས་བྱ་བ་ནི་ལྷའི་དང་ལྷའི་མ་ཡིན་པའི་སེམས་ཅན་ཐམས་ཅད་ཀྱི་དངོས་པོ་ལ་གནས་པའི་དཔལ་ལོངས་སྤྱོད་ཐོབ་པ་སྟེ། ཇི་ལྟར་འདོད་པའི་དངོས་གྲུབ་སྒྲུབ་ནུས་པར་
འགྱུར་བ་ལྷའི་དང་ལྷའི་མ་ཡིན་པའི་དཔལ་སྦྱོར་བ་ལས་འབྱུང་བ་དང་། སྦྱོར་བ་མ་ཡིན་པ་ལས་བྱུང་བ་གསང་སྔགས་ཀྱི་རྣལ་འབྱོར་གྱི་མཐུས་ཐོབ་པར་འགྱུར་རོ་ཞེས་དགོངས་པའོ། །དཔལ་དེ་ཡང་ཡིད་བཞིན་གྱི་ནོར་བུ་དང་།  བུམ་པ་བཟང་པོ་དང་། དཔག་བསམ་གྱི་ཤིང་དང་། རལ་གྲི་
ལ་སོགས་པས་སྦྱོར་བའི་དངོས་གྲུབ་ལོངས་སྤྱོད་ཀྱི་མཚན་ཉིད་དང་། དེ་བཞིན་དུ་ཕྲ་བ་དང་ཆེ་བ་ལ་སོགས་པ་དབང་ཕྱུག་གི་ཡོན་ཏན་བརྒྱད་པའི་མཚན་ཉིད་དོ། །དམ་པའི་དཔལ་ཞེས་བྱ་བ་དམ་པའི་སྒྲའི་ཁྱད་པར་ནི་རྣལ་འབྱོར་གྱི་མཐུས་ཐོབ་པའི་དཔལ་ཏེ། བརྟན་པ་དང་ཟིལ་གྱིས་མི་ནོན་
པ་ཉིད་དང་། ཉོན་མོངས་པའི་གདུང་བ་ལ་སོགས་པ་ཐུལ་བའི་ཡོན་ཏན་གྱི་ཚོགས་ལ་ལོངས་སྤྱོད་བྱེད་པར་བསྟན་པའི་ཕྱིར་རོ། །ད་ནི། སྒྲ་མཐར་ཐར་པ་སྟེར་བ་ཉིད། །ཅེས་གསུངས་པ་དེ་བརྟག་པར་བྱའོ། །དེ་ལ་གོང་དུ་སྨོས་པའི་སྒྲའི་མཐའ་ནི་སྒྲ་མེད་པ་སྟེ། གསང་སྔགས་

71-1-26b

ཀྱི་སྒྲ་ཙམ་ལ་གནས་པ་ཡོངས་སུ་བཏང་བ་ནི་སྒྲའི་མཐའོ། །སྒྲའི་མཐའ་དེར་གསང་སྔགས་ཀྱི་ཆོས་ཀྱི་སྐུའི་རང་བཞིན་དུ་གནས་པ་རྣམ་པར་ཐར་པ་སྟེར་བ་དྲན་པ་ནི་བསམས་པའོ། །འདི་སྐད་དུ་གསུངས་པར་འགྱུར་ཏེ། སྒྲའི་གནས་སྐབས་ཀྱི་ཡོངས་སུ་བཏང་བས་གཉིས་སུ་མེད་པའི་རྣམ་
པར་བསྒོམས་ན། རང་གི་རྣམ་པར་རྟོག་པ་ལས་བྱུང་བའི་ཉོན་མོངས་པ་དང་། ཤེས་བྱའི་སྒྲིབ་པ་ལ་སེམས་གྲོལ་བར་འཐོབ་བོ་ཞེས་བྱ་བའོ། །ཆོས་ཀྱི་སྐུ་སྟོང་པ་ཉིད་ཀྱི་མཚན་ཉིད་དེ་ཡོངས་སུ་དག་པ་དང་།  ཡོངས་སུ་མ་དག་པའི་སེམས་ཅན་སྤྱིའི་ཐུན་མོང་ཡིན་མོད་ཀྱི་འོན་ཀྱང་གསང་སྔགས་
ཀྱི་ངོ་བོའི་རང་བཞིན་དུ་གནས་པ་དེ་མངོན་དུ་གྱུར་པར་བྱའོ། །གང་གི་ཕྱིར་ཞེ་ན། གསང་སྔགས་ཀྱི་སྤྱོད་པ་ལ་ཞུགས་པའི་རྣལ་འབྱོར་པ་རྣམས་ཀྱི་གསང་སྔགས་ཡན་ལག་ཏུ་གྱུར་པར་སྣང་བ་དང་། སྒྲ་ཞེས་བྱ་བ་དང་། ཡིད་ཀྱི་དང་། ཚིག་རྣམ་པར་དག་པའི་གནས་སྐབས་ཡོངས་སུ་
བཏང་བའི་རིམ་པས་ཆོས་ཀྱི་སྐུ་དེ་མངོན་དུ་གྱུར་པར་བྱའོ། །དེ་བས་ན་སྒྲའི་མཐའ་ཆོས་ཀྱི་དབྱིངས་ཀྱི་རང་བཞིན་བསྒོམས་ན་ཐར་པ་སྟེར་རོ་ཞེས་གསུངས་སོ། །རྣམ་པ་འདི་ལྟ་བུའི་ཚིག་དཔྱད་པ་ལ་རྣམ་པ་དུ་མར་རྒོལ་བ་དང་། ལན་ལྡོན་པའི་ཡུལ་ལ་བདག་ཅག་ལྟ་བུའི་བློ་འཕྲོར
བཏུབ་མོད་ཀྱི་ཧ་ཅང་འཕྲོས་པ་ཅི་ཞིག་བྱ། བཏང་ལ་སྐབས་ཉིད་བརྟག་པར་བྱའོ། །གསང་སྔགས་ཀྱི་སྒྲའི་རྣམ་པ་ཡིད་ཀྱི་རྣམ་པར་རྟོག་པའི་རང་བཞིན་སྒྲའི་ངོ་བོ་ཉིད་ཀྱི་གནས་སྐབས་དེ་ཡང་རྣམ་པ་གསུམ་གྱིས་གཏང་བར་བྱ་བ་ནི་གནས་ཡོངས་སུ་གཏང་བ་དང་། དེ་མངོན་པར་
འབྱེད་པ་ཡོངས་སུ་གཏང་བ་དང་། རང་བཞིན་ཡོངས་སུ་གཏང་བའོ། །དེ་ལ་གནས་ནི་གཟུགས་ཀྱི་ཡན་ལག་གི་གནས་སྐབས་ཏེ། དེ་ལ་གནས་པ་གསང་སྔགས་ཀྱི་སྒྲ་ཙམ་ཉིད་ལ་རྣམ་པར་རྟོག་པའི་རང་བཞིན་ལ་འཇུག་པའི་ཕྱིར་རོ། །མངོན་པར་བྱེད་པ་ནི་ཡིད་ཀྱིས་དང་ཤུབ་བུར་
བཟླས་བརྗོད་བྱེད་པའི་སྒྲ་སྟེ། ཡིད་ཀྱི་རྣམ་པར་རྟོག་པའི་རང་བཞིན་ཚིག་ཏུ་གསལ་བར་མངོན་པར་སྟོན་པའི་ཕྱིར་རོ། །དེ་ལ་རང་བཞིན་ནི་གསང་སྔགས་ཀྱི་ཡི་གེའི་སྒྲར་རྣམ་པར་རྟོག་པའི་ངོ་བོ་ཉིད་དེ། ཡིད་ཀྱིས་དང་ཤུབ་བུར་བཟླས་བརྗོད་བྱེད་པའི་སྒྲ་ལས་གཞན་པའོ། །དེ་བས་ན་རྣམ་

71-1-27a

པ་གསུམ་པོ་དེས་ཇི་སྐད་གསུངས་པའི་གསང་སྔགས་ཀྱི་རང་བཞིན་གྱི་གནས་སྐབས་ཡོངས་སུ་གཏང་བ་བསྟན་པའི་ཕྱིར། ལྟོས་བཅས་ཡན་ལག་གྱུར་པར་སྣང་། །ཞེས་བྱ་བ་ལ་སོགས་པ་གསུངས་སོ། །དེ་ལ། ལྟོས་བཅས་ཡན་ལག་གྱུར་པར་སྣང་། །
ཞེས་བྱ་བ་འདིས་ནི་གནས་ཡོངས་སུ་གཏང་བ་བསྟན་ཏོ། །སྒྲ་ཞེས་བྱ་བ་ཡིད་ཀྱི་དང་། །ཞེས་བྱ་བ་ནི། གསལ་བར་མངོན་པར་བྱེད་པ་ཡོངས་སུ་གཏང་བ་བསྟན་པའོ། །ཚིག་རྣམ་པར་དག་པ་ཞེས་བྱ་བ་ནི་རང་བཞིན་ཡོངས་སུ་གཏང་བ་བསྟན་པ་སྟེ། དེ་ནི་བསྡུས་པའི་དོན་ཏོ། །ཡན་ལག་གི་
དོན་བཤད་པར་བྱ་སྟེ། དེ་ལ། རིག་སྔགས་དབང་པོའི་ཡན་ལག་སྤངས། །ཞེས་བྱ་བ་ནི་རིག་སྔགས་རྣམས་ཀྱི་དབང་པོ་བས་ན། རིག་སྔགས་ཀྱི་དབང་པོ་སྟེ། མཉེས་པར་བྱ་བའི་རང་བཞིན་ཡིན་པའི་ཕྱིར། བསྒྲུབ་པར་བྱ་བའི་རིག་སྔགས་ལ་བྱའོ། །རིག་སྔགས་ཞེས་བྱ་བ་ནི་ཉེ་བར་བསྟན་པ་སྟེ། 
གསང་སྔགས་ལ་ཡང་བྱའོ། །རིག་སྔགས་ཀྱི་དབང་པོ་དེ་དང་འབྲེལ་བའི་ཡན་ལག་སྤང་བར་བྱ་བ་ནི་རིག་སྔགས་ཀྱི་དབང་པོའི་ཡན་ལག་སྤང་བར་བྱ་བ་སྟེ། སྤང་བ་ཡང་དེ་ཡིན་ལ་ཡན་ལག་ཀྱང་དེ་ཡིན་པས་ན་དེ་སྐད་ཅེས་བྱའོ། །དེས་ནི་འདི་སྐད་གསུངས་ཏེ། རིག་སྔགས་
ཀྱི་དབང་པོ་དང་འབྲེལ་པའི་ཡན་ལག་སྤང་བ་ནི་གཏང་བར་བྱ་བ་སྟེ། ཡན་ལག་ཅེས་བྱ་བའི་སྒྲ་ནི་འདིར་ཆ་ཤས་ཙམ་གྱི་རྣམ་གྲངས་སོ། །ཡང་ན་ཡན་ལག་གི་ཚིག་གནས་སྐབས་ལ་ཡང་བྱ་སྟེ། ཇི་ལྟར་བདག་ཅག་གི་དུས་འདི་འདྲའོ་ཞེའམ་བདག་ཅག་གི་གནས་སྐབས་འདི་
འདྲའོ་ཞེས་བྱ་བ་ལྟ་བུའོ། །དེ་བས་ན་ཚིག་གི་དོན་འདི་ལྟར་འགྱུར་ཏེ། རིག་སྔགས་ཀྱི་དབང་པོའི་སྤང་བར་བྱ་བའི་གནས་སྐབས་སམ། ཆ་ཤས་ནི་རིག་སྔགས་ཀྱི་དབང་པོའི་ཡན་ལག་སྤང་བར་བྱ་བ་སྟེ། རིག་སྔགས་ཀྱི་དབང་པོའི་ཡན་ལག་སྤང་བར་བྱ་བ་དེ་རྒྱལ་བ་དེ་བཞིན་
གཤེགས་པས་མཁྱེན་པ་ནི་རིག་པར་འགྱུར་བའོ། །རིག་སྔགས་ཀྱི་དབང་པོའི་ཡན་ལག་སྤང་བར་བྱ་བའང་ཅི་འདྲ་བ་ཞིག་རྒྱལ་བས་མཁྱེན་ཞེ་ན། ལྟོས་བཅས་ཡན་ལག་གྱུར་པར་སྣང་། །སྒྲ་ཞེས་བྱ་བ་ཡིད་ཀྱི་དང་། །ཚིག་རྣམས་དག་པ་ཞེས་བྱ་བ་གསུངས་ཏེ། དེ་ལ་ལྟོས་པ་

71-1-27b

པ་དང་བཅས་པར་གྱུར་པས་ན་ལྟོས་པ་དང་བཅས་པ་སྟེ་སྔགས་པའོ། །བདག་གི་དངོས་པོ་གང་ལ་ཡན་ལག་ལྷའི་སྐུ་ཡན་ལག་གི་མཚན་ཉིད་ཀྱི་རང་བཞིན་དུ་གྱུར་ཅིང་སྐྱེས་པ་དེ་ནི་ཡན་ལག་ཏུ་གྱུར་པའོ། །རིག་སྔགས་ཀྱི་དབང་པོའི་ཡན་ལག་སྤང་བར་བྱ་བའམ། རིག་སྔགས་ཀྱི་དབང་
པོའི་ཆ་ཤས་སམ། གནས་སྐབས་སྤང་བར་བྱ་བ་གང་ལ་ཡན་ལག་ཏུ་གྱུར་པ་ཅུང་ཟད་མི་གསལ་བར་སྣང་བ་ཡོད་པ་དེ་ནི་ཡན་ལག་ཏུ་གྱུར་པར་སྣང་བ་སྟེ། དེ་ལ། ལྟོས་བཅས་ཡན་ལག་གྱུར་པར་སྣང་། །ཞེས་དེ་སྐད་གསུངས་སོ། །ལྟོས་བཅས་ཡན་ལག་གྱུར་པར་སྣང་བའི་རིག་
སྔགས་ཀྱི་དབང་པོ་དང་འབྲེལ་པ་སྤང་བར་བྱ་བའི་གནས་སྐབས་དེ། རྒྱལ་བ་དེ་བཞིན་གཤེགས་པས་མཁྱེན་ཏོ་ཞེས་བྱ་བའི་ཐ་ཚིག་གོ། །སྔགས་པ་སྲོག་དང་རྩོལ་བ་དང་དཀའ་ཐུབ་དང་། བསམ་གཏན་ལ་སོགས་པ་ལ་ལྟོས་པ་དང་བཅས་པའི་ཡན་ལག་ཏུ་གྱུར་པར་སྣང་བ་ཞེས་བྱ་བ་
རིག་སྔགས་ཀྱི་གཟུགས་ཀྱི་རྣམ་པ་དག་ཏུ་གྱུར་པ་རྣམ་པར་ཤེས་པ་སྣང་བ་གང་ཡིན་པ་དེ་ལྟོས་པ་དང་བཅས་པ་ཡན་ལག་ཏུ་གྱུར་པར་སྣང་བའོ། །དེ་ཡང་ཐར་པ་འདོད་པ་བསམ་གཏན་གྱི་ཚེ། རྣལ་འབྱོར་གྱི་མཐུས་ཆོས་ཀྱི་དབྱིངས་ཀྱི་རང་བཞིན་གྱིས་ལྷའི་ཆ་ཤས་ལ་དམིགས་པའི་
ཚུལ་གྱིས་སྤང་བར་བྱའོ། །ལྟོས་པ་དང་བཅས་པ་མ་ཡིན་པའི་གཟུགས་ཀྱི་ཡན་ལག་གསང་སྔགས་ཀྱི་རྣམ་པར་སྨིན་པ་དེ་ནི་སྔགས་པ་ལ་མི་སྲིད་པས། ཡོངས་སུ་སྤང་བར་བྱ་བ་མི་རིགས་པའི་ཕྱིར་མ་སྨོས་སོ། །སྒྲ་ཞེས་བྱ་བ་ལ་སྒྲ་ནི་གསང་སྔགས་ཤུབ་བུར་བཟླས་བརྗོད་བྱེད་པ་
ལས་བྱུང་བའི་སྒྲ་དེ་ལ་བྱ་སྟེ། རིག་སྔགས་ཀྱི་དབང་པོ་ཡན་ལག་སྤང་བར་བྱ་བ་རིག་སྔགས་ཀྱི་དབང་པོའི་སྤང་བར་བྱའི་གནས་སྐབས་གང་ཡིན་པ་དེ་ནི་སྒྲ་ཞེས་བྱ་བའི་ཡན་ལག་ཤུབ་བུར་བཟླས་བརྗོད་བྱེད་པའི་གནས་སྐབས་ལ་བྱའོ་ཞེས་བྱ་བར་དགོངས་པའོ། །དེས་ནི་གསང་
སྔགས་ཤུབ་བུར་བཟླས་བརྗོད་བྱེད་པའི་རང་བཞིན་ཡང་གྲོལ་བར་འདོད་པས་ཆོས་ཀྱི་སྐུ་ལ་དམིགས་པས་སྤང་བར་བྱའོ་ཞེས་བཤད་པ་ཡིན་ནོ། །དེ་ནས་ཡང་ཡིད་ལས་བྱུང་བའི་གསང་སྔགས་ཀྱི་སྒྲའི་རང་བཞིན་གྱི་གནས་སྐབས་ཀྱང་ཆོས་ཀྱི་དབྱིངས་ལ་དམིགས་པས་ཡོངས་སུ་སྤང་བར་

71-1-28a

བྱའོ་ཞེས་བསྟན་པ། ཡིད་ཀྱི་དང་ཞེས་གསུངས་སོ། །ཡིད་ལས་བྱུང་བས་ན་ཡིད་ཀྱི་སྟེ། རིག་སྔགས་ཀྱི་དབང་པོའི་ཡན་ལག་སྤང་བར་བྱ་ཞེས་བྱ་བར་སྦྱར་རོ། །དེ་ཡང་ཡིད་ཀྱི་བཟླས་བརྗོད་ལས་བྱུང་བའི་སྒྲའི་ངོ་བོ་ཉིད་མཉེས་པར་བྱ་བའི་ལྷའི་གསང་
སྔགས་འདོན་པའི་རང་བཞིན་གྱི་གནས་སྐབས་དེ་ཡང་གྲོལ་བར་འདོད་པས་སྤང་བར་བྱའོ་ཞེས་བྱ་བའི་ཐ་ཚིག་གོ། །ཚིག་རྣམ་པར་དག་པ་ཞེས་བྱ་བ་ནི་རིག་སྔགས་ཀྱི་དབང་པོའི་ཡན་ལག་གང་ལ་ཚིག་རྣམ་པ་གཉིས་མེད་པར་གྱུར་ཅིང་རྣམ་པར་དག་པ་དེ་ནི་ཚིག་རྣམ་པར་དག་པའོ། །ཚིག་
རྣམ་པར་དག་པ་རིག་སྔགས་ཀྱི་དབང་པོའི་ཡན་ལག་སྤང་བར་བྱ་བ་རྒྱལ་བས་མཁྱེན་ཞེས་བྱ་བ་ནི་ཡིད་ཀྱི་རྣམ་པར་རྟོག་པའི་རང་བཞིན་ཡིད་ཀྱི་དང་། ཤུབ་བུར་བཟླས་བརྗོད་བྱེད་པའི་ངོ་བོ་ཉིད་དང་བྲལ་བ་རིག་སྔགས་ཀྱི་དབང་པོའི་གནས་སྐབས་གང་ཡིན་པ་དེ་ཡང་གྲོལ་བར་འདོད་པས་
ཆོས་ཀྱི་སྐུ་ལ་དམིགས་པས་སྤང་བར་བྱ་ཞེས་དེ་སྐད་བསྟན་པར་འགྱུར་རོ། །ཡང་ན་ཚིགས་སུ་བཅད་པ་དེ་ཉིད་ཀྱི་དོན་འདི་ལྟར་བཤད་པར་བྱ་སྟེ། ལྟོས་པ་དང་བཅས་པ་དང་། ཡན་ལག་ཏུ་གྱུར་པར་སྣང་བ་དང་། སྒྲ་ཞེས་བྱ་བ་དང་། ཡིད་ཀྱི་དང་། ཚིག་རྣམ་པར་དག་པའི་
ཡན་ལག་དག ཀྱེ་རིག་སྔགས་ཀྱི་དབང་པོ་སྤང་བར་བྱས་ནས། རིག་པ་མཁས་པ་གསང་སྔགས་ཀྱི་དོན་རྣམ་པར་དབྱེ་བ་ལ་མཁས་པའི་དེ་བཞིན་གཤེགས་པར་འགྱུར་རོ་ཞེས་བྱ་བའི་ཐ་ཚིག་གོ། །དེ་ལ་གྲོལ་བར་འདོད་པས་རགས་རིམ་གྱིས་སྤང་བའི་རིམ་པ་ནི་འདི་ལྟ་སྟེ། སླར་
སྡུད་པ་དང་། དཀའ་ཐུབ་དང་། བསམ་གཏན་དང་། སྲོག་དང་རྩོལ་བ་ལ་སོགས་པ་བྱས་ནས། རང་གི་ལྷའི་གཟུགས་བརྙན་ལ་དམིགས་པས་རབ་ཏུ་སྒོམ་པའི་ཏིང་ངེ་འཛིན་བརྟན་པར་བྱས་ལ། ཤུབ་བུར་བཟླས་བརྗོད་བྱེད་པའི་གསང་སྔགས་ཀྱི་སྒྲ་ལ་དམིགས་པའི་ཏིང་ངེ་འཛིན་
རབ་ཏུ་རིགས་པ་ལ་དམིགས་པ་ཡོངས་སུ་སྤངས་ནས་རགས་པའི་ཏིང་ངེ་འཛིན་བརྟན་པར་བྱའོ། །རིགས་པ་ལ་དམིགས་པ་དེ་ཡང་ཕྲ་བ་ཡིད་ཀྱི་སྒྲའི་ཏིང་ངེ་འཛིན་གྱིས་ཡོངས་སུ་སྤང་ངོ་། །དེ་ཡང་རབ་ཏུ་སྤངས་ནས་རབ་ཏུ་ཕྲ་བ་གསང་སྔགས་ཀྱི་རྣམ་པར་རྟོག་པའི་ཏིང་ངེ་འཛིན་ལ་གནས་

71-1-28b

སོ། །དེ་ཡང་ཡོངས་སུ་སྤངས་ཏེ། གྲོལ་བར་འདོད་པས་ཆོས་ཀྱི་སྐུ་ལ་དམིགས་པའི་ཏིང་ངེ་འཛིན་ནན་ཏན་དུ་བྱའོ། །ལྟོས་པ་དང་བཅས་པའི་སྔགས་པ་ཡན་ལག་ཏུ་གྱུར་པར་སྣང་བའི་གནས་སྐབས་གང་ཡིན་པ་དེ་ཡོངས་སུ་སྤང་ངོ་ཞེས་ནི་གསུངས་ན། ཇི་ལྟར་དེ་ལྟོས་པ་དང་
བཅས་པ་མ་གསུངས་པས་དེ་བསྟན་པ། སླར་སྡུད་ཅེས་བྱ་བ་ལ་སོགས་པའོ། །དེ་ལ་སླར་སྡུད་པ་དང་། དཀའ་ཐུབ་དང་བསམ་གཏན་དང་། སྲོག་དང་། རྩོལ་བ་དང་། ཆོ་ག་སྟེ། དེ་དག་ནི་སླར་སྡུད་དང་དཀའ་ཐུབ་དང་བསམ་གཏན་དང་། སྲོག་དང་རྩོལ་བའི་ཆོ་ག་རྣམས་
ཏེ། དེ་དག་གི་བྱ་བ་ནི་བྱེད་པ་སྟེ། ནན་ཏན་ལ་ཡང་དེ་སྐད་ཅེས་བྱའོ། །དེ་བས་ན་ཇི་ཙམ་དུ་སྔགས་པ་ལ་སླར་སྡུད་པ་ལ་སོགས་པའི་རྣམ་པར་ཤེས་པ་སྣ་ཚོགས་སུ་འབྱུང་བ་དེ་ཙམ་དུ་ལྟོས་པ་དང་བཅས་པ་ཞེས་བྱ་སྟེ། དེ་ནི་བསྡུས་པའི་དོན་ཏོ། །སླར་སྡུད་པ་ལ་སོགས་པ་ལ་
ལྟོས་པས་ན་ལྟོས་པ་དང་བཅས་པ་ཞེས་བྱའོ། །དེ་ལ་སླར་སྡུད་པ་དང་སྲོག་དང་རྩོལ་བ་ནི། སླར་སྡུད་པས་ནི་བཀུག་ནས་ནི། །སྲོག་དང་རྩོལ་བ་བསྡམས་པའི་ཡིད། །ཅེས་བྱ་བའི་སྐབས་དེར་བཤད་ཟིན་ཏོ། །བསམ་གཏན་གྱི་སྒྲ་ཡང་། བསམ་གཏན་ཞེས་བྱ་མཆོག་ཏུ་
གསང་། །ཞེས་བྱ་བའི་ཚིགས་སུ་བཅད་པས་བཤད་ཟིན་ཏོ། །དེ་བས་ན་གང་མ་བཤད་པ་དེ་དག་བཤད་པར་བྱའོ། །དེ་ལ་དཀའ་ཐུབ་ཀྱི་བྱ་བ་བཤད་པར་བྱ་བ་སྟེ་འདིས་བསྲུངས་ཤིང་བསྡམས་པས་ན་དཀའ་ཐུབ་སྟེ། འདོད་ཆགས་དང་། ཞེ་སྡང་དང་། རྒྱགས་པ་དང་། སྒྱུ་ལ་
སོགས་པ་ཉོན་མོངས་པའི་གཉེན་པོར་གྱུར་པ་ལུས་དང་ངག་དང་ཡིད་ཀྱིས་ལེགས་པར་སྤྱོད་པ་ལ་ནན་ཏན་བྱེད་པའི་ངོ་བོ་དགེ་བ་བཅུའི་ལས་ཀྱི་ལམ་གྱི་རང་བཞིན་ཅན་གྱི་ཡིད་དོ། །གཞན་ཡང་གསང་སྔགས་ཀྱི་ཚུལ་ལ་སོགས་པ་ལས་བཅས་པ་དམ་ཚིག་དང་། འདུལ་བ་དང་། དཔྱོད་
པ་དང་། ནན་ཏན་གྱི་མཚན་ཉིད་དེ། དེ་བས་ན་འདོད་ཆགས་ལ་སོགས་པའི་གཉེན་པོ་དཀའ་ཐུབ་ཅེས་བྱ་བ་དེ་ནན་ཏན་དུ་བྱས་ན། ལུས་དང་ངག་ལ་སོགས་པ་བསྡམས་པས་གནོད་པར་འགྱུར་བའི་ཕྱིར། དེའི་གཉེན་པོ་ནན་ཏན་དུ་བྱེད་པ་གནོད་པའི་བདག་ཉིད་ཅན་ལ་དཀའ་ཐུབ་

71-1-29a

ཅེས་བྱ་བའི་ཚིག་ཏུ་བཤད་དོ་ཞེས་དགོངས་སོ། །ཆོ་ག་བྱ་བ་ཞེས་བྱ་བ་ནི་ཆོ་གར་བྱ་བ་སྣ་ཚོགས་རྣམས་ཏེ། དཀྱིལ་འཁོར་བསྟན་པ་དང་། དབང་བསྐུར་བ་དང་། མེ་ཏོག་ལ་སོགས་པའི་ཡོ་བྱད་ཀྱིས་མཆོད་པ་དང་། སྦྱིན་སྲེག་ལ་སོགས་པ་གསང་སྔགས་མཉེས་
པར་བྱེདཔའི་རྒྱུ་རྣམས་ཏེ། དེ་དག་གི་བྱ་བ་ནི་ནན་ཏན་དུ་བྱ་བ་སྟེ། ཆོ་གའི་བྱ་བའོ། རྣམ་པར་ཤེས་པ་སྣ་ཚོགས་ཞེས་བྱ་བ་ནི་བདག་གི་དེ་ཁོ་ན་ཉིད་རབ་ཏུ་ཤེས་པར་བྱེད་པའི་ཚེ། ཕུང་པོ་ལྔའི་རང་དང་སྤྱིའི་མཚན་ཉིད་ངེས་པར་རྟོགས་པའི་རྣམ་པ་སྣ་ཚོགས་ཀྱི་རྣམ་པར་སྣང་བ་ནི་རྣམ་
པར་ཤེས་པ་སྣ་ཚོགས་ཏེ། སྣ་ཚོགས་ནི་རྣམ་པ་ཐ་དད་པའི་རང་བཞིན་ཞེས་བྱ་བའི་དོན་ཏེ། དེས་ནི་དཀའ་ཐུབ་དང་ལྡན་པས་དཀྱིལ་འཁོར་གྱི་ལས་བྱ་སྟེ། ལྷ་མཆོད་པ་ལ་སོགས་པ་ལེགས་པར་བྱས་ནས་སླར་སྡུད་པ་བྱ་སྟེ། དེ་ཡང་བདག་གི་དེ་ཁོ་ན་ཉིད་བརྟག་པ། རྫོགས་པར་
བྱས་པས་རྣམ་པར་ཤེས་པ་སྣ་ཚོགས་པ་སྤངས་ལ་སྲོག་དང་རྩོལ་བ་མངོན་དུ་བྱས་ནས་ལྷའི་རྣམ་འབྱོར་གྱི་མཚན་ཉིད་ཡན་ལག་ཏུ་གྱུར་པར་སྣང་བའི་རྣམ་པར་ཤེས་པར་ནན་ཏན་བྱའོ་ཞེས་བསྟན་པ་སྟེ། དེ་ཡང་མཇུག་བསྡུ་བའི་སྒོ་ནས་བསྟན་པ། དཀའ་ཐུབ་ཆེན་པོ་དང་ལྡན་པར། །
ཞེས་བྱ་བ་ལ་སོགས་པའོ། །དེ་ལ་དཀའ་ཐུབ་ཆེན་པོ་དང་ལྡན་པར་བྱས་ལ་ཡན་ལག་སྣང་བ་ནན་ཏན་བྱའོ་ཞེས་པ་དང་སྦྱར་རོ། །དེ་ལ་དཀའ་ཐུབ་ཀྱི་མཚན་ཉིད་ནི་གོང་དུ་བཤད་པའོ། །དེའི་ཚེ་ཆེ་བ་ཡང་ལེགས་པར་བྱས་པ་དང་། རྟག་ཏུ་བྱས་པ་དང་། མ་ཉམས་པ་དང་། མ་
འདྲེས་པར་སྒྲུབ་པའི་སྒོ་ནས་མཐོང་བ་དེ་ཆོས་ལ་འབྲས་བུ་ཐོབ་པར་བྱེད་ནུས་པའོ། །ཆོས་བསྐྱེད་ཅེས་བྱ་བ་ནི་རང་གི་མཚན་ཉིད་ཕྱིན་ཅི་མ་ལོག་པར་འཛིན་པའི་ཕྱིར། བདག་གི་དེ་ཁོ་ན་ཉིད་ཀྱི་རང་བཞིན་ལ་འདིར་ཆོས་ཞེས་བྱ་བའི་ཚིག་ཏུ་འདོད་དོ། །དེ་བསྐྱེད་པ་ནི་རྣམ་པ་མེད་པར་
མོས་པ་སྐྱེད་པའོ། །བརྟུལ་ཞུགས་མཆོག་ཅེས་བྱ་བ་ནི་རིག་སྔགས་ཀྱི་བརྟུལ་ཞུགས་ལ་སོགས་པ་མ་འདྲེས་པའི་ཚུལ་དུ་གནས་ཞེས་བྱ་བའི་དོན་ཏོ། །ལྟོས་བཅས་ཞེས་བྱ་བ་ནི་སླར་སྡུད་པ་དང་། བསམ་གཏན་དང་། སྲོག་དང་རྩོལ་བ་ལ་ལྟོས་པ་དང་ལྡན་པའོ། །ཡུལ་

71-1-29b

ལས་གྲོལ་ཞེས་བྱ་བ་ནི་ཕྱི་རོལ་གྱི་གཟུགས་ལ་སོགས་པའི་རྣམ་པའི་མཚན་ཉིད་ཀྱི་ཡུལ་ལས་གྲོལ་བའོ། །ཡན་ལག་སྣང་བ་བསམ་གཏན་བྱ། །ཞེས་བྱ་བ། ཡན་ལག་ནི་ལྷའི་ཡན་ལག་གོ། །དེ་དག་ཅུང་ཟད་ཙམ་སྣང་བ་ནི། སྣང་བ་སྟེ། རྣམ་པར་སྨིན་པའི་གཟུགས་
མ་ཡིན་པའི་ཕྱིར། བསམ་གཏན་དང་ཏིང་ངེ་འཛིན་གྱི་བྱེ་བྲག་ལས་རེ་ཞིག་མི་གསལ་བར་སྣང་བ་ནི་ཡན་ལག་སྣང་ཞེས་བྱ་བའི་ཐ་ཚིག་གོ། །ཡན་ལག་སྣང་བ་དེ་ཡང་མངོན་དུ་བྱས་ནས་ཆོས་ཀྱི་དབྱིངས་ཀྱི་མཚན་ཉིད་ཀྱི་ལྷའི་རང་བཞིན་ཇི་ལྟར་མངོན་དུ་བྱ་བ་དེ་བསྟན་པ། དེར་ཡང་
བརྟུལ་ཞུགས་བྱས་ནས་ནི། །ཞེས་བྱ་བ་ལ་སོགས་པའོ། །དེར་ཡང་ཞེས་བྱ་བ་ནི་ཡན་ལག་གོམས་པར་བྱ་བའོ། །བརྟུལ་ཞུགས་བྱས་ནས་ཞེས་བྱ་བ་ནི་ཡི་དམ་བྱ་སྟེ། བདག་ཉིད་ལྷའི་རང་བཞིན་དུ་སེམས་ཀྱིས་བྱས་ནས་ཞེས་བྱ་བའི་ཐ་ཚིག་གོ། །ཡན་ལག་གོམས་པར་ཞེས་བྱ་
བའི་བརྟུལ་ཞུགས་དེ་ཇི་ལྟ་བུ་ཞིག་ཅེ་ན། དོགས་པ་ཞེས་བྱ་བ་གསུངས་ཏེ། གསལ་བར་མི་སྣང་ཞེས་བྱ་བའི་དོན་ཏོ། །དེས་འདི་ལྟར་དགོངས་སོ། །ཏིང་ངེ་འཛིན་མ་ཐོབ་པ་སླར་སྡུད་པ་ལ་སོགས་པ་ལ་ལྟོས་པ་དང་བཅས་པར་བསམ་གཏན་བྱེད་པ་ན་རེ་ཞིག་བདག་ལྷའི་
གཟུགས་བརྙན་གྱི་རྣམ་པ་གང་ཡིན་པར་བདག་གྱུར་པར་སྣང་བ་དེ་མི་གསལ་བའི་རང་བཞིན་ཉིད་དེ། རྣམ་པར་རྟོག་པ་དང་བཅས་པའི་བསམ་གཏན་གྱི་སྤྱོད་ཡུལ་ལས་བྱུང་བའི་ཕྱིར་རོ། །དེ་བས་ན། རྣམ་རྟོག་རྗེས་སུ་སོང་བ་ནི། །དོན་གསལ་བར་ནི་མི་སྣང་ངོ་། །ཞེས་
བཤད་དོ། །དེ་ལྟ་བུའི་བརྟུལ་ཞུགས་མངོན་དུ་བྱས་ནས་ཅི་ཞིག་བྱ་ཞེ་ན། འཇིག་རྟེན་སྨད་པའི་ཞེས་གསུངས་ཏེ། བསམ་གཏན་གཅིག་པོ་སྤྱད་ཅེས་བྱ་བ་དང་འབྲེལ་ཏོ། །བསམ་གཏན་དངོས་པོ་སེམས་པ་གང་ལ་འཇིག་རྟེན་སྨོད་པ་ཡོད་པ་དེ་ནི་འཇིག་རྟེན་སྨད་པའི་བསམ་
གཏན་ནོ། །དེས་ཇི་སྐད་བསྟན་པ་ཡིན་ཏེ། བདག་ལྷའི་རྣམ་པར་སྣང་བར་གྱུར་པ་སྒྲ་ཞེས་བྱ་བ་ལ་སོགས་པའི་བཟླས་བརྗོད་དང་བཅས་པ་ཡིད་ལ་མི་བྱེད་པས་ཡོངས་སུ་སྤངས་ནས་སེམས་ཅན་དང་སྣོད་ཀྱི་འཇིག་རྟེན་མ་སྐྱེས་པའི་རྣམ་པར་དཔྱོད་པ་སྨོད་པའི་རང་བཞིན་གྱི་བསམ་

71-1-30a

གཏན་སེམས་པ་ཉོན་མོངས་པ་དང་། ཤེས་བྱའི་སྒྲིབ་པ་ལས་རྣམ་པར་གྲོལ་བའི་ཕྱིར་བྱའོ་ཞེས་པའོ། །བསམ་གཏན་པ་ཇི་ལྟ་བུ་ཞིག་ཅེ་ན། བློ་གྲོས་ཞི་བ་བསྟན་པ་ཞེས་གསུངས་སོ། །དེ་ལ་ཡུལ་ལ་མ་ཆགས་པས་ན་བློ་གྲོས་ཞི་བའོ། །བཀྲེས་པ་དང་། 
སྐོམ་པ་ལ་སོགས་པའི་ཉོན་མོངས་པ་ལ་ཇི་མི་སྙམ་པ་ནི་བསྟན་པའོ། །འཇིག་རྟེན་སྨད་པའི་བསྟན་ནམ་གཅིག་པུ་ཞེས་བྱ་བ་གཅིག་ཏུ་སྨོས་པ་འབའ་ཞིག་བསྟན་པའི་དོན་ཏེ། འཇིག་རྟེན་སྨད་པ་ཉིད་ཀྱི་བསམ་གཏན་འབའ་ཞིག་སྤྱད་ཀྱི། བར་བར་དུ་སྒྲའི་བསམ་གཏན་ལ་སོགས་
པ་མི་སྤྱད་དོ་ཞེས་པའོ། །ད་ནི་འདི་དཔྱད་དེ་བདག་གི་དེ་ཁོ་ན་ཉིད་བརྟག་པ་སྔར་བྱས་ནས་བསམ་གཏན་པས་ཡན་ལག་བསྒོམ་པའི་ནན་ཏན་བྱའོ། །བདག་གི་དེ་ཁོ་ན་ཉིད་བརྟག་པ་ཡང་འདུས་བྱས་དང་འདུས་མ་བྱས་པའི་དངོས་པོ་ཐམས་ཅད་སུན་འབྱིན་པའི་རྣམ་པའོ། །དེ་བས་ན་ཆོས་
ཐམས་ཅད་གཟོད་མ་ནས་མ་སྐྱེས་པ་སྒྱུ་མ་དང་སྨིག་རྒྱུ་བ་དང་མཚུངས་པར་མོས་པར་བྱས་ན་གལ་ཏེ་གཙང་སྦྲ་ལ་སོགས་པ་ཡང་མི་བྱེད་པར་འགྱུར་སྲིད་དེ། དེ་དགག་པའི་ཕྱིར། ཁུ་བ་བཤང་གཅི་ཞེས་བྱ་བ་ལ་སོགས་པ་གསུངས་སོ། །དེས་ནི་འདི་བསྟན་ཏེ། བདག་གི་དེ་ཁོ་ན་ཉིད་སྔར་
བྱས་ནས། ལྷའི་རྣལ་འབྱོར་ལ་གནས་ཀྱང་འཇིག་རྟེན་གྱི་ཀུན་རྫོབ་ཀྱི་རྗེས་སུ་འཇུག་པའི་མཚན་ཉིད་གཙང་སྦྲ་བྱ་ཞིང་མི་དགེ་བའི་འབྲས་བུར་འགྱུར་བ་སེམས་ཅན་ལ་གནོད་པ་སྤང་བར་བྱའོ་ཞེས་པའོ། །དེ་ལ་ཁུ་བ་ཞེས་བྱ་བ་ནི་ཁུ་ཆུ་འབྱུང་བའོ། །བཤང་གཅི་འབྱུང་བ་ལ་
སོགས་པ་དང་། འབགས་པ་ནི་ཁར་ཟོས་པ་ལ་སོགས་པའོ། །རྒྱུ་བ་ནི་ཕྱེན་ནོ། །དོགས་པ་ཞེས་བྱ་བ་ནི་རང་གི་ལུས་ལྷར་སྣང་བར་གནས་པས་ཀྱང་ཞེས་བྱ་བའི་ཐ་ཚིག་གོ། །ཡང་ཞེས་བྱ་བའི་ཚིག་གིས་དོགས་པ་མེད་ཅིང་ལྷའི་བྱེ་བྲག་ཏུ་བསྒོམ་པ་མ་བྱས་པ་འབའ་ཞིག་
གིས་བྱ་བ་མ་ཡིན་གྱི་དོགས་པ་ཅན་ལྷའི་རྣམ་པར་གནས་པའི་ཟློས་པ་པོས་ཀྱང་བྱ་བར་བསྟན་པའོ། །བཤང་གཅི་ལ་སོགས་པ་འགྲོ་བ་མེད་པ་འཇིག་རྟེན་མི་འཕྱ་བའི་ཕྱོགས་སུ་དྲི་དང་ཆགས་པ་མེད་པའི་མཚན་ཉིད་གཙང་སྦྲ་བྱ་སྟེ། གཙང་སྦྲ་བྱེད་པ་མེད་པ་ནི་བྱ་བའི་རྒྱུད་ཀྱི་

71-1-30b

ཚུལ་དང་འགལ་བའི་ཕྱིར་རོ་ཞེས་བྱ་བའི་ཐ་ཚིག་གོ། །ཆོས་ཀྱིས་ཀྱང་དེ་ལྟ་ཡིན་ཏེ། གང་གཙང་སྦྲ་ལ་སོགས་པ་ལ་ལྟོས་པས་གསང་སྔགས་བཟླས་བརྗོད་བྱས་ན་འབྲས་བུ་འཕྲལ་དུ་ཐོབ་པར་འགྱུར་རོ། །རྣལ་འབྱོར་གྱི་རྒྱུད་ཀྱི་ཚུལ་ལ་ཡང་ཇི་ལྟར་བྱ་སྙམ་ན་ཡང་དེར་ཡང་
ཕྱི་རོལ་ཆེ་ཆུང་ལ་སོགས་པ་བྱས་ནས་མི་གཙང་བཞིན་དུ་གསང་སྔགས་བཟླས་བརྗོད་བྱའོ་ཞེས་ནི་མ་གསུངས་སོ། །འབགས་ཀྱང་རུང་མ་འབགས་ཀྱང་རུང་། གཙང་ཡང་རུང་མི་གཙང་ཡང་རུང་ཞེས་བྱ་བ་ལ་སོགས་པ་གང་གསུངས་པ་དེ་དག་ཀྱང་གཙང་སྦྲ་ལ་མངོན་པར་ཞེན་
པ་ཡོངས་སུ་སྤང་བའི་ཕྱིར་རམ། རྣལ་འབྱོར་ལ་གཅིག་ཁོ་ནར་འབད་པའི་གང་ཟག་ལ་དགོངས་པ་སྟེ། གང་གི་ཕྱིར་ཞེ་ན། འདི་ནི་ཕྱི་རོལ་གྱི་བྱ་བ་ཐམས་ཅད་ལ་མི་ལྟོས་པ་ཉིད་དུ་རྣལ་འབྱོར་གོམས་ཤིང་སེམས་བརྟན་པར་སྣང་བའི་མཚན་ཉིད་ཀྱི་དངོས་གྲུབ་ཐོབ་པར་བྱ་བའི་ཕྱིར་
ཞུགས་པ་ཡིན་པས་དེ་ལ་ཕྱི་རོལ་གྱི་གཙང་སྦྲ་བསྟན་པའི་ཆོ་ག་འདིས་ཅི་ཞིག་བྱ། གང་ཡང་རལ་གྲི་ལ་སོགས་པའི་དངོས་གྲུབ་ཕྱི་རོལ་གྱི་མཚན་མ་ལ་ལྟོས་པ་དང་བཅས་པ་དེ་བསྒྲུབ་པའི་ཕྱིར། འཕགས་པ་དེ་ཁོ་ན་ཉིད་བསྡུས་པ་ལ་སོགས་པ་དང་། རྣལ་འབྱོར་གྱི་རྒྱུད་ཀྱི་
དགོངས་པ་འགྲེལ་བ་རྡོ་རྗེ་རྩེ་མོ་ལ་སོགས་པ་ལས་དུས་གསུམ་དུ་ཁྲུས་བྱ་བ་ལ་སོགས་པ་ཡང་དེའི་ཕྱིར་གསུངས་ཏེ། རྒྱ་ཆེར་འཕྲོས་པ་འདིས་ནི་ཅི་ཞིག་བྱ་ཞེས་བཏང་ངོ་། །ཡོང་ཡེ་འདི་ནི་བྱ་བའི་རྒྱུད་ཡིན་པས་ན་རྣལ་འབྱོར་བསྒོམ་པ་བྱས་པས་ཀྱང་གཙང་སྦྲ་ཡོངས་སུ་མི་གཏོང་
བར་བྱའོ་ཞེས་བཀའ་སྩལ་ཏོ། །དབེན་པར་གཙང་སྦྲ་བརྩམ་པར་བྱ། །ཞེས་བྱ་བ་ལ་སྟོང་པ་ཉིད་བསྒོམ་མོ་ཞེས་བྱ་བ་གང་དག་འཆད་པ་དེའི་ལན་དུ་བྱ་བ་ནི། གལ་ཏེ་དོན་འདི་ལྟ་བུར་དགོངས་པ་ཞིག་ཡིན། སྟོང་པ་ཉིད་བསྒོམ་མོ་ཞེས་གསུངས་པར་གྱུར་མོད་ཀྱི། དབེན་པར་
གཙང་སྦྲ་བྱ་བའི་དགོངས་པ་ཅི་ཞིག་བྱ། རབ་ཏུ་སྟོང་པར་སྨྲ་བ་དག་བཤང་གཅི་བྱས་པའི་མི་གཙང་བས་ལུས་དང་གོས་ལ་རེག་པའི་དྲི་ང་བས་འཇིགས་ནས་སྒོར་འཇུག་ཏུ་ཡང་མི་སྟེར་རོ། །ཟས་བསླང་དུ་ཡང་མི་ཐོབ་པས་བཀྲེས་པའི་སྡུག་བསྔལ་བས་ལུས་དང་ཡིད་ཉོན་མོངས་

71-1-31a

ཏེ། དུས་མ་ཡིན་པ་ཉིད་དུ་ཐམས་ཅད་སྟོང་པར་འགྱུར་བའི་མཚན་ཉིད་འཆི་བར་འགྱུར་ཏ་རེ། མི་འདོད་པའི་ལས་སྤངས་པའི་མན་ངག་ཀྱང་། སྲང་དང་ཁྲོན་པ་ལུ་མ་དང་། །ཞེས་བྱ་བ་ལ་སོགས་པ་གསུངས་སོ། །དེ་ལ་སྲང་ལ་སོགས་པར་སེམས་ཅན་ལ་
གནོད་པ་ཀུན་དུ་མི་སྤྱད་ཅེས་བྱ་བ་དང་འབྲེལ་ཏོ། །དེ་ལ་སེམས་ཅན་ནི་སྲོག་ཆགས་སོ། །དེ་དག་ལ་འཚེ་བ་ནི་གནོད་པ་སྟེ། དེ་ཀུན་དུ་མི་སྤྱད་པ་ནི་མི་བྱ་བའོ། །དེ་དག་གང་གིས་མི་སྤྱད་ཅེ་ན། ལུས་ངག་ཡིད་ཀྱིས་ཞེས་བྱ་བ་གསུངས་སོ། །དེ་ལ་ལུས་ཀྱི་སྲོག་གཅོད་པ་དང་། 
མ་བྱིན་པར་ལེན་པ་དང་། འདོད་པས་ལོག་པར་སྤྱོད་པ་དང་། མི་ཚངས་པར་སྤྱད་པ་སྤོང་བའི་མཚན་ཉིད་སེམས་ཅན་ལ་གནོད་པ་ཡོངས་སུ་སྤང་བའོ། །དེ་བཞིན་དུ་ངག་གི་ལས་ཀྱང་བརྫུན་དུ་སྨྲ་བ་དང་། ཚིག་འཁྱལ་པ་ལ་སོགས་པ་ཡོངས་སུ་སྤང་བའི་མཚན་ཉིད་དོ། །
ཡིད་ཀྱིས་ནི་ཆགས་སེམས་ལ་སོགས་པ་སྤང་བའི་ངོ་བོ་ཉིད་དོ། །འོ་ན་ལུས་དང་ངག་དང་ཡིད་ཀྱི་ལས་ཀྱི་ལམ་རྗེས་སུ་ཞུགས་པ་ནི་སེམས་ཅན་རྣམས་ལ་གནོད་པར་སྲིད་ན་ཆགས་སེམས་དང་། གནོད་པར་སེམས་པ་དང་། ལོག་པར་ལྟ་བའི་མཚན་ཉིད་ནི་ཡིད་ཀྱི་ལས་ཀྱི་
ལམ་གྱི་རྗེས་སུ་འཇུག་པ་སྟེ། བདག་ལ་མི་འདོད་པ་ལ་སོགས་པའི་ལས་ལ་སོགས་པར་གྱུར་དུ་ཟིན་ཀྱང་ཡིད་ཀྱིས་སེམས་ལ་གནོད་པ་ཀུན་དུ་མི་སྤྱོད་དོ་ཞེས་དགག་པ་སེམས་ཅན་ལ་གནོད་པར་གོ་ཇི་ལྟར་འགྱུར། དེ་ལ་ཉེས་པ་མེད་དེ་གང་གི་ཕྱིར་ཞེ་ན། བདག་ཀྱང་སེམས་
ཅན་གྱི་ནང་དུ་གཏོགས་ཏེ། དེ་བས་ན་བདག་ལ་ཡང་གང་མི་འདོད་པའི་ལས་ཀྱི་འབྲས་བུ་ཚེ་ཕྱི་མ་ལ་སོགས་པར་འགྱུར་བ་དེ་ཡང་ཉེ་བར་འགྱུར་བ་ཉིད་པས་དགག་པར་དགོངས་པའི་ཕྱིར་རོ། །ཡང་ན་ལུས་དང་ངག་གི་ལས་བསྐྱེད་པའི་རྒྱུ་སེམས་པ་བཀག་པས་ཉེས་པ་མེད་དོ། །སྤང་
ངོ་ཞེས་བྱ་བ་ནི་བསླབ་པ་བླངས་པས་སེམས་ཅན་ལ་གནོད་པ་ཡོངས་སུ་སྤངས་ཏེ། མི་བྱའོ་ཞེས་པའོ། །དེས་འདི་སྟོན་ཏེ་སྡོམ་པ་གཟུང་བ་སྔར་བྱས་ནས། གང་ལས་ཀྱི་ལམ་གྱི་རྗེས་སུ་འཇུག་པར་བྱེད་པ་དེ་སེམས་རབ་ཏུ་བརྟས་པས་ལྷུན་གྱིས་གྲུབ་པར་ཡང་མངོན་དུ་འགྱུར་རོ། །

71-1-31b

ད་ནི་བསམ་གཏན་དང་བཟླས་བརྗོད་དང་སྒྲུབ་པ་ལ་སོགས་པའི་རྒྱུའི་ལྷའི་རྣལ་འབྱོར་གྱི་མཚན་ཉིད་བརྟུལ་ཞུགས་གང་གསུངས་པ། བརྟུལ་ཞུགས་དེ་མངོན་དུ་བྱ་བའི་གནས་དང་དུས་ངེས་པར་བྱ་བའི་ཕྱིར། བསམ་གཏན་དང་ནི་ཟླས་པ་དང་། །གསང་སྔགས་བསྒྲུབ་པར་བྱ་བ་དང་། །
སྦྱིན་སྲེག་ལས་དང་དབང་བསྐུར་དང་། །ཡུལ་གྱི་བྱ་བ་རྣམས་ལ་ཡང་། །བརྟུལ་ཞུགས་གསུངས་པ་གང་ཡིན་པ། །ཞེས་བྱ་བ་གསུངས་ཏེ། དེ་ལ་གསང་སྔགས་རྣམས་ཀྱི་བསམ་ཏན་བྱ་བའི་ཕྱིར། བརྟུལ་ཞུགས་གསུངས་པ་གང་ཡིན་པ། །ཞེས་བྱ་བ་དང་སྦྱར་རོ། །
དེ་བཞིན་དུ་བཟླས་བརྗོད་ལ་སོགས་པ་ལ་ཡང་སྦྱར་རོ། །དེ་ལ་གསང་སྔགས་རྣམས་ཀྱི་བསམ་གཏན་ནི། །མེ་གནས་དངོས་གྲུབ་སྟེར་ཞེས་བྱ་བ་ལ་སོགས་པ་སྔར་གསུངས་པའོ། །བསམ་གཏན་དེའི་ཕྱིར། གསང་སྔགས་ཀྱི་ཡི་གེ་རེ་རེ་ལ་རྟོག་པའི་རྣམ་པ་ཚིག་རྣམ་པར་དག་
པ་སྒྲའི་བདག་ཉིད་ཀྱིས་བསྒོས་པ་སྒྲའི་བདག་ཉིད་ཀྱི་ལྷའི་རྣལ་འབྱོར་གྱི་མཚན་ཉིད་ལ་རིག་སྔགས་ཀྱི་བརྟུལ་ཞུགས་སུ་བཤད་དོ། །དེ་བཞིན་དུ་གསང་སྔགས་རྣམས་བཟླས་བརྗོད་བྱ་བའི་ཕྱིར་བརྟུལ་ཞུགས་གསུངས་པ། མི་འགྱུར་གསང་སྔགས་གཞི་ལ་གནས། །ཞེས་བྱ་
བ་འདིས་བདག་ཉིད་བདག་གི་ལྷའི་སྐུར་གྱུར་པར་བསམ་པའི་སྒོ་ནས་བརྟུལ་ཞུགས་བྱ་བ་བསྟན་ཏོ། །དེ་བཞིན་དུ་བསྒྲུབ་པ་ལ་སོགས་པའི་བརྟུལ་ཞུགས་ཀྱང་རང་གི་ལྷའི་བདག་ཉིད་དུ་རིག་པར་བྱ་སྟེ་དེས་འདི་ལྟར་སྦྱར་རོ། །གསང་སྔགས་རྣམས་ཀྱི་སྦྱིན་སྲེག་གི་ཕྱིར་
བརྟུལ་ཞུགས་གང་གསུངས་པ་ཞེས་བྱ་བ་ནི་གསང་སྔགས་རྣམས་ལ་སྦྱིན་སྲེག་དབུལ་བའི་ཕྱིར། ལྷའི་རྣལ་འབྱོར་བཤད་པ་གང་ཡིན་པའོ། །གསང་སྔགས་རྣམས་དབང་བསྐུར་བའི་བརྟུལ་ཞུགས་ནི་གསང་སྔགས་ཀྱི་གཟུགས་བརྙན་གྱི་སྐུ་ལ་ཐིམ་པར་བྱ་བའི་ཕྱིར་འོག་མ་
ལ་སོགས་པས་དབང་བསྐུརབའོ། །ཡང་ན་སྒྲུབ་པ་པོས་གསང་སྔགས་བསྒྲུབ་པར་བྱ་བའི་ཕྱིར། གང་དབང་བསྐུར་བར་བྱ་བ་དེ་ནི་གསང་སྔགས་ཀྱི་དབང་བསྐུར་བ་སྟེ། གསང་སྔགས་ཀྱི་དབང་བསྐུར་བ་དེ་ལ་གང་གསུངས་པ་གང་ཡིན་པ་ཞེས་བྱ་བ་དང་སྦྱར་རོ། །ཡུལ་གྱི་བྱ་བ་

71-1-32a

རྣམས་ལ་ཡང་། །བརྟུལ་ཞུགས་གསུངས་པ་གང་ཡིན་པ། །ཞེས་བྱ་བ་ནི་དཀྱིལ་འཁོར་དང་། སྒྲུབ་པ་དང་། བཟླས་བརྗོད་ཀྱི་གནས་བྱི་དོར་བྱེད་པའི་ཚེ། གང་ལྷའི་རྣལ་འབྱོར་གྱི་མཚན་ཉིད་བརྟུལ་ཞུགས་མངོན་དུ་བྱའོ་ཞེས་གསུངས་པའོ། །བརྟུལ་ཞུགས་དེ་
གནས་གང་དུ་བྱ་བ་དང་། དུས་ཇི་སྲིད་དུ་བྱ་བ་དེ་དག་ཐམས་ཅད་བཅོམ་ལྡན་འདས་རྡོ་རྗེ་འཛིན་གྱི་ས་སྔོན་བདག་ལ་བཤད་དོ་ཞེས་ཆོ་ག་འཆད་པའི་ཚངས་པས་ཉན་པའི་ཚངས་པ་ལ་སྨྲས་པ། དེ་ཡི་གནས་དང་ཚད་རྣམས་ཀྱང་། །སྔོན་གྱི་བདག་ཉིད་འབའ་ཞིག་ལ། །མཐུ་ཆེན་རྡོ་རྗེ་འཛིན་
པའི་ལྷས། །རབ་ཏུ་གསང་བ་གསུངས་པ་ཡིན། །ཞེས་བྱའོ། །དེའི་ཞེས་བྱ་བ་ནི་ལྷའི་རྣལ་འབྱོར་གྱི་མཚན་ཉིད་བརྟུལ་ཞུགས་ཀྱི་སྟེ། གནས་དང་ཚད་གང་ཡིན་དེ་དག་ཀུན་བཤད་པར་བྱ་ཞེས་བྱ་བ་དང་སྦྱར་རོ། །འདིར་ཡང་བདག་གི་བློས་བརྟགས་ཏེ་སྨྲ་བ་མ་ཡིན་ནོ་ཞེས་
བསྟན་པའི་ཕྱིར། སྔོན་ནི་བདག་ཉིད་འབའ་ཞིག་ལ། །མཐུ་ཆེན་རྡོ་རྗེ་འཛིན་པའི་ལྷས། །རབ་ཏུ་གསང་བ་གསུངས་པ་ཡིན། །ཞེས་བཤད་དོ། །ལྷའི་རྣལ་འབྱོར་གྱི་མཚན་ཉིད་བརྟུལ་ཞུགས་མངོན་དུ་བྱེད་པའི་གནས་དང་དུས་གང་གསུངས་པ་དེ་ཐམས་ཅད་བཤད་པར་བྱ་བ་འབའ་
ཞིག་ཏུ་མ་ཟད་ཀྱི་ཉེ་བར་གྱུར་པ་ལ་སོགས་པའི་མཚན་ཉིད་གང་གསུངས་པ་དེ་ཡང་བཤད་པར་བྱའོ་ཞེས་བསྟན་པའི་ཕྱིར། ཉེར་གྱུར་མངོན་དུ་ཕྱོགས་པ་དང་། །གསང་སྔགས་སྟེར་བར་གྱུར་པ་དང་། །གཞན་དུ་ཕྱོགས་པ་གང་ཡིན་པ། །དེ་ཀུན་ཚངས་པ་ཁྱོད་ལ་བཤད། །ཅེས་
གསུངས་སོ། །དེ་ལ་ཉེ་བར་གྱུར་པ་ལ་སོགས་པའི་ཚིག་རྣམས་ནི། གསང་སྔགས་རྣམས་ཞེས་བྱ་བའི་སྐབས་འདི་དང་སྦྱར་རོ། །དེ་བས་ན་གསང་སྔགས་ཉེ་བར་གྱུར་པ་དང་། མངོན་དུ་ཕྱོགས་པ་དང་། གསང་སྔགས་སྟེར་བ་དང་།  གཞན་དུ་ཕྱོགས་པ་རྣམས་བསྟན་པར་བྱའོ། །
ཞེས་གསུངས་པ་ཡིན་ནོ། །དེ་ལ་བསམ་གཏན་དང་བཟླས་བརྗོད་ལ་སོགས་པ་རབ་ཏུ་གོམས་པས་སེམས་མཉམ་པར་གཞག་པར་གྱུར་པའི་སྒྲུབ་པ་པོ་བྱིན་གྱིས་བརླབ་ཏུ་རུང་བར་མཁྱེན་ནས་ལྷ་སྤྱན་དྲངས་ཀྱང་རུང་མ་དྲངས་ཀྱང་རུང་། ནམ་དེ་དང་ཉེ་བར་གཤེགས་པ་དེ་ནི་རིག་སྔགས་

71-1-32b

ཉེ་བར་གྱུར་པ་ཞེས་བྱ་སྟེ། དྲུང་དུ་གཤེགས་པར་གྱུར་ཞེས་བྱ་བའི་ཐ་ཚིག་གོ། །དེས་ནི་ཉེས་པར་གྱུར་པའི་མཚན་མ་གང་ཡིན་པ་དེ་བཤད་པར་བྱའོ་ཞེས་གསུངས་པ་ཡིན་ནོ། །མངོན་དུ་ཕྱོགས་ཞེས་བྱ་བ་ནི་ལྷ་ཉིད་ཀྱི་གནས་ན་བཞུགས་པ་བཞིན་དུ་གང་སྤྱན་རས་ཀྱིས་འཚོ་བ་དེ་ལ་མངོན་དུ་ཕྱོགས་པ་ཞེས་བྱའོ། །དེ་བས་ན་
མངོན་དུ་ཕྱོགས་པར་གྱུར་པའི་མཚན་མ་གང་ཡིན་པ་དེ་དག་ཀྱང་བཤད་པར་བྱའོ་ཞེས་གསུངས་པ་ཡིན་ནོ། །གསང་སྔགས་ཉིད་ཀྱི་གནས་ན་བཞུགས་བཞིན་དུ་སྤྱན་རས་ཀྱིས་འཚོ་བའི་མཚན་ཉིད་འདི་ཡང་ཉེ་བར་གྱུར་པའི་སྔོན་རོལ་དུ་བལྟ་བར་བྱ་སྟེ། དེ་བཞིན་དུ་འོག་ནས་ཀྱང་འཆད་
དོ། །གསང་སྔགས་སྟེར་བ་ཞེས་བྱ་བ་ནི་གསང་སྔགས་རྣམས་ཀྱིས་སྦྱིན་ཞིང་གསོལ་བ་ལ་གསང་སྔགས་སྟེར་བ་ཞེས་བྱ་སྟེ་དངོས་གྲུབ་ལ་བྱའོ། །དེས་ནི་དངོས་གྲུབ་ཀྱི་བྱེ་བྲག་ཀྱང་བཤད་པར་བྱའོ་ཞེས་གསུངས་པ་ཡིན་ནོ། །གཞན་དུ་ཕྱོགས་ཞེས་བྱ་བ་ནི་གསང་སྔགས་འཕངས་
པར་འགྱུར་བའི་གནས་སྐབས་ཀྱང་བཤད་པར་བྱའོ་ཞེས་བསྟན་པ་སྟེ། ཉེས་པ་གང་དག་བྱུང་ན་གསང་སྔགས་འཕང་བར་འགྱུར་བ་དེ་དག་ཀྱང་བཤད་པར་བྱའོ་ཞེས་པའོ། །ད་ནི་རིག་སྔགས་ཀྱི་བརྟུལ་ཞུགས་ཀྱི་གནས་སྐབས་མདོར་བསྟན་པ་དེ་ཞིབ་ཏུ་བཤད་པའི་ཕྱིར། གསང་
སྔགས་ལ་སོགས་དང་ལྡན་པའི། །ཞེས་བྱ་བ་ལ་སོགས་པ་གསུངས་སོ། །དེས་འདི་སྐད་བཤད་པར་འགྱུར་ཏེ། ནམ་ལྷའི་རྣལ་འབྱོར་གྱི་མཚན་ཉིད་རིག་སྔགས་ཀྱི་བརྟུལ་ཞུགས་མངོན་དུ་བྱེད་པར་འདོད་པ་དེའི་ཚེ་མདུན་དུ་དེ་བཞིན་གཤེགས་པའི་སྐུ་གཟུགས་བསམས་ལ། རིག་སྔགས་
དང་གསང་སྔགས་དང་། ཁྲོ་བོ་དང་མངག་གཞུག་པ་དང་། མངག་གཞུགས་མ་ལ་སོགས་པ་ནམ་མཁའི་དབྱིངས་ཁྱབ་ཅིང་ཁོ་ར་ཁོར་ཡུག་ཏུ་ཡོངས་སུ་བསྐོར་བར་ཐང་ཅིག་ཙམ་ཞིག་མངོན་པར་བསམས་ལ་ཏིང་ངེ་འཛིན་གྱིས་གསལ་བར་བྱ་སྟེ། བདག་ཉིད་ཀྱང་གསང་སྔགས་དང་རིག་
སྔགས་ཀྱི་གཟུགས་ཀྱི་རང་བཞིན་གྱི་མཚན་ཉིད་བརྟུལ་ཞུགས་བཤད་པར་བྱིན་གྱིས་བརླབས་ལ་དེའི་དབུས་ན་འདུག་པར་བྱའོ། །ཅིའི་ཕྱིར་ཞེ་ན། རིག་སྔགས་དང་གསང་སྔགས་ལ་སོགས་པ་ཐམས་ཅད་རྒྱལ་བའི་སྤྱན་སྔ་ན་རྟག་ཏུ་འཁོད་དེ། དེ་བས་ན་སྔགས་པ་ཡང་གསང་

71-1-33a

སྔགས་ལ་སོགས་པའི་ལྷའི་རྣལ་འབྱོར་བྱས་པས་ཏིང་ངེ་འཛིན་གྱི་ཚུལ་གྱིས་རྒྱལ་བ་ལ་མངོན་དུ་ཕྱོགས་པར་ཅི་ནུས་སུ་བྱའོ། །ད་ནི་དེ་བཞིན་གཤེགས་པའི་འཁོར་གྱི་དཀྱིལ་འཁོར་གྱི་ནང་ན་འདུག་པ་རང་གི་ལྷའི་རྣལ་འབྱོར་གྱི་མཚན་ཉིད་རིག་སྔགས་ཀྱི་བརྟུལ་ཞུགས་
དེ་མངོན་དུ་བྱ་བའི་དུས་ངེས་པར་བསྟན་པའི་ཕྱིར། དུས་གསུམ་དུ་ནི་ཕྲ་མོ་འདི། །ཞེས་བྱ་བ་ལ་སོགས་པ་གསུངས་སོ། །དེ་ལ་དུས་གསུམ་ཞེས་བྱ་བ་ནི་སྔ་དྲོ་དང་ཕྱི་དྲོ་དང་ཕྱེད་མཚམས་ཀྱི་བྱེ་བྲག་གོ། །འདི་ཞེས་བྱ་བ་ནི་དེའི་ནང་ན་འདུག་པ་རང་གི་རིག་སྔགས་ཀྱི་བརྟུལ་ཞུགས་ལ་
སྙེགས་སོ། །ཕྲ་མོ་ཞེས་བྱ་བ་ནི་བསམ་གཏན་གྱི་རིག་པར་བྱ་བའི་ཕྱིར་རོ། །གསང་སྔགས་རྣམས་བསྒྲུབ་པ་ལ་བརྩོན་པས་རིག་པར་བྱའོ་ཞེས་བྱ་བ་ནི། བརྟག་པར་བྱ་ཞིང་མངོན་དུ་བྱའོ་ཞེས་བྱ་བའི་ཐ་ཚིག་གོ། །ཅི་འདི་འབའ་ཞིག་དུས་གསུམ་དུ་མངོན་དུ་བྱའམ་ཞེས་པ་ལ་མ་ཡིན་
ནོ་ཞེས་བསྟན་པ། ཡན་ལག་བཅུ་ཡི་ཆོ་ག་ལས། །ཞེས་བྱ་བ་སྟེ། དེ་ཇི་ལྟ་ཇི་ལྟར་སྲིད་པའི་ཡན་ལག་བཅུའི་རྣམ་པ་དང་ལྡན་པར་རིག་སྔགས་ཀྱི་བརྟུལ་ཞུགས་དེ་དུས་གསུམ་དུ་མངོན་དུ་བྱའོ་ཞེས་པའོ། །ཡན་ལག་བཅུར་ངེས་པའི་ཆོ་ག་འདི་ནི་ཡན་ལག་བཅུའི་ཆོ་ག་སྟེ། 
བཟླས་བརྗོད་ཀྱི་ཡན་ལག་བཞི་ལ་སོགས་པའི་ཆོ་གའི་མཚན་ཉིད་དོ། །ཡན་ལག་བཅུའི་ཆོ་ག་དེ་གང་ལས་སུ་བྱ་ཞིང་ནན་ཏན་དུ་བྱ་བ་དེ་གང་ཡིན་པ་དང་ལྷན་ཅིག་ཏུ་རིག་སྔགས་ཀྱི་བརྟུལ་ཞུགས་དེ་དུས་གསུམ་དུ་མངོན་དུ་བྱའོ་ཞེས་བཤད་པ་ཡིན་ནོ། །དེ་ལ་ཡན་ལག་བཅུ་ནི་བདག་གི་
དེ་ཁོ་ན་ཉིད་དང་། རིག་སྔགས་ཀྱི་དེ་ཁོ་ན་ཉིད་དང་། བཟླས་བརྗོད་ཀྱི་དེ་ཁོ་ན་ཉིད་དང་། མེ་ལ་གནས་པ་ལ་སོགས་པའི་བསམ་གཏན་རྣམ་པ་གསུམ་དང་། གསང་སྔགས་བསྒྲུབ་པ་ལ་འཇུག་པའི་ཆོ་ག་དང་། སྦྱིན་སྲེག་གི་ཆོ་ག་དང་། དབང་བསྐུར་བའི་ཆོ་ག་དང་། གནས་ཀྱི་བྱ་བའི་
ནན་ཏན་ཏེ། དེ་དག་ནི་ཡན་ལག་བཅུ་པོ་རྣམས་སོ། །དེ་བས་ན་ཡན་ལག་བཅུ་པོ་དེ་རྣམས་ལས་ཇི་ལྟར་སྐབས་སུ་བབ་པ་ལས་གང་ཡང་རུང་བའི་ཡན་ལག་ནན་ཏན་དུ་བྱས་པ་ལས། ལྷན་ཅིག་ཏུ་ལྷའི་རྣལ་འབྱོར་གྱི་མཚན་ཉིད་རིག་སྔགས་ཀྱི་བརྟུལ་ཞུགས་དེ་མངོན་དུ་བྱའོ་ཞེས་

71-1-33b

བྱ་བར་དགོངས་པའོ། །གང་གི་ཕྱིར་ཞེ་ན། ལྷའི་རྣལ་འབྱོར་བྱས་པ་ལ་གསང་སྔགས་ལས་བྱུང་བའི་ལས་ཀྱི་བྱེ་བྲག་སྦྱོར་བའི་མཚན་ཉིད་ནི་དེ་དག་ཙམ་དུ་ཟད་པའི་ཕྱིར་རོ།    །ད་ནི་གསང་སྔགས་གཞན་དུ་ཕྱོགས་པར་འགྱུར་བའི་རྒྱུ་རྣམས་བཤད་པར་བྱ་སྟེ། དེ་ཤེས་ནས་ཡོངས་
སུ་སྤང་བའི་ཕྱིར་རོ། །དེ་དག་ཀྱང་མི་འདོད་པའི་ལས་ཀྱི་བག་ཆགས་ལངས་པའི་དབང་ངམ། ཡ་ང་བ་མ་སྤངས་པ་ལས་གསང་སྔགས་ཀྱི་བྱིན་གྱིས་བརླབ་པའི་སྐལ་བ་མེད་པར་འགྱུར་བའི་རྒྱུ་རྣམས་ནི་མ་དད་པ་དང་། སྙོམ་པ་ལ་སོགས་པ་སྔགས་པའི་རྒྱུད་ལས་བྱུང་བ་སྟེ། དེ་
བས་ན་དེ་དག་བསྟན་པའི་ཕྱིར་གསུངས་པ། མ་དད་པ་དང་སྙོམ་པ་དང་། །ཞེས་བྱ་བ་ལ་སོགས་པ་ནས། གསང་སྔགས་དེ་ལས་གཞན་དུ་ཕྱོགས། །ཞེས་བྱ་བའི་བར་དུའོ། །དེ་ལ་མ་དད་པ་ལ་སོགས་པ་དེ་དག་ཇི་ལྟར་སྲིད་པར་རང་གི་ལས་དང་། རང་གི་རྣམ་པར་རྟོག་པ་དང་སྐྱེ་བོ་སྡང་
བ་དང་བརྟེན་པའི་མཚན་ཉིད་དང་། རྒྱུ་རྣམ་པ་གསུམ་ལས་བྱུང་བ་ཡང་གཉེན་པོ་ལ་ནན་ཏན་བྱས་པས་བཟློག་པར་བྱའོ། །དེ་ལ་ལས་ལས་སྐྱེས་པ་རྣམས་ཟློག་པ་ནི་བདག་མེད་པའི་བསམ་གཏན་དང་། བཟླས་བརྗོད་དང་སྦྱིན་སྲེག་ལ་སོགས་པའོ། །རང་གི་རྣམ་པར་རྟོག་
པ་ལས་བྱུང་བ་རྣམས་ནི་དེའི་རང་བཞིན་རྣམ་པར་དཔྱད་པས་སོ། །སྐྱེ་བོ་སྡང་བ་དང་བརྟེན་པའི་སྐབས་སུ་གྱུར་པ་ནི་དེ་ཡོངས་སུ་སྤང་བས་བཟློག་གོ། །ལས་ལ་ཐེ་ཚོམ་ཟ་བ་དང་། །ཞེས་བྱ་བ་ནི་དགེ་བ་དང་མི་དགེ་བའི་ལས་ཀྱི་འབྲས་བུའམ། ཡང་ན་གསང་སྔགས་ཀྱི་ལས་དུས་དུས་
སུ་ཇི་ལྟར་བྱེདཔའི་ཐེ་ཚོམ་ཟ་ཞིང་བརྗེད་པའི་སྐབས་སུ་འབྱུང་བའོ། །ལོག་འདྲེན་གྱིས་ནི་བརླབས་པ་དང་། །ཞེས་བྱ་བ་ནི་ཇི་སྐད་གསུངས་པའི་ཉེས་པ་རྣམས་ལས་གཞན་པ་སེམས་གཡེངས་པ་ལ་སོགས་པ་ནི་ལོག་འདྲེན་གྱིས་བརླབས་པའི་ཉེས་པ་ཡིན་པར་ཤེས་པར་བྱའོ། །འདིར་ཡང་
འདི་ལྟར་ཤེས་པར་བྱ་སྟེ། ནམ་མ་དད་པ་ལ་སོགས་པ་དེ་དག་ལས་ཀྱི་བག་ཆགས་ལ་སོགས་པའི་མཐུ་ལས་བྱུང་བར་གྱུར་པ་དེའི་ཚེ་སྔགས་པ་དེ་ལས་གསང་སྔགས་གཞན་དུ་ཕྱོགས་པར་འགྱུར་ཏེ། བྱིན་གྱིས་བརླབ་པའི་སྐལ་བ་མེད་པར་འགྱུར་གྱི་སྒྲིབ་པ་ཐམས་ཅད་སྤངས་པས་རྟོག་

71-1-34a

པའི་བག་ཆགས་བསལ་བའི་གསང་སྔགས་ལ་སོགས་པ་ཉིད་ནི་འཕང་བར་མི་འགྱུར་རོ། །སྔགས་པའི་རྒྱུད་ལས་དེ་དག་སྐྱེས་པའི་ཚེ་གཙོ་བོའི་རྒྱུ་མ་ཚང་བས་རིག་སྔགས་དང་གསང་སྔགས་དག་གིས་ཀྱང་བཟློག་པར་མི་ནུས་སོ། །འདི་ལྟར་གསང་སྔགས་ལ་སོགས་པ་ནི་
མཆོད་པ་དང་བཟླས་བརྗོད་ལ་སོགས་པས་བསོད་ནམས་སྐྱེ་བའི་རྒྱུར་འགྱུར་ཞིང་དངོས་གྲུབ་ཐོབ་པའི་བག་ཆགས་བརྟས་པའི་གྲོགས་ཙམ་ཞིག་སྒྲུབ་པ་པོ་ལ་མཛད་པར་འདོད་དོ། །གལ་ཏེ་འགྲུབ་པའི་ལས་ཀྱི་བག་ཆགས་མེད་པ་ལ་ཡང་དངོས་གྲུབ་སྟེར་བར་འགྱུར་ན་ནི་དེའི་ཚེ་རབ་ཏུ་ཐུགས་རྗེ་
ཆེ་བས་ཆོ་ག་ཐམས་ཅད་ལ་ཐམས་ཅད་སྩོལ་བའི་མཐུ་མངའ་བར་འགྱུར་རོ། །དེ་ལྟ་ཡང་མ་ཡིན་པས་རབ་ཏུ་སྤྲོས་པ་བཏང་ངོ་།    །དེ་ནས་གཞན་ཡང་གསང་སྔགས་ཉེ་བར་གྱུར་ཅིང་མངོན་དུ་ཕྱོགས་པར་གྱུར་པའི་རྒྱུ་སྒྲུབ་པ་པོས་བསམ་གཏན་དང་། བཟླས་བརྗོད་ལ་གོམས་པར་བྱས་པ་ལས་
བྱུང་བའི་ཡོན་ཏན་བསྟན་པ། གང་ཞིག་ཞི་བར་འདུག་པ་དང་། །སྒྲ་ཡི་ངོ་བོར་གྱུར་པ་ན། །དེ་ཚེ་སྔགས་པ་གསང་སྔགས་ལ། །ཉེ་བར་གྱུར་ཅིང་མངོན་དུ་ཕྱོགས། །ཞེས་བྱ་བ་ཡིན་ནོ། །དེ་ལ་གང་ཞིག་ཅེས་བྱ་བ་ནི་འདིས་ནི་ཇི་ལྟར་སྲིད་པའི་བསམ་གཏན་དང་། བཟླས་བརྗོད་བྱེད་པ་
གང་ཡང་རུང་བ་དེ་ལ་སྙེགས་སོ། །ཞི་བ་ཞེས་བྱ་བ་ནི་འདོད་པ་དང་། ཁྲོ་བ་དང་། རྒྱགས་པ་དང་། སྒྱུ་ལ་སོགས་པ་ཀུན་ནས་མ་ལངས་ཞིང་ལུས་དང་ངག་དང་ཡིད་མ་གྱུར་པའི་གནས་སྐབས་ཐོབ་ནས་ཞེས་བསྟན་པའོ། །འདུག་པ་ཞེས་བྱ་བ་ནི་བསམ་གཏན་ནམ་བཟླས་བརྗོད་བྱེད་
པའི་ཕྱིར་འདུག་ཅེས་དགོངས་པའོ། །སྒྲ་ཡི་ངོ་བོར་གྱུར་པ་ཞེས་བྱ་བ་ལ། དེའི་ངོ་བོ་ནི་རང་བཞིན་དུ་གྱུར་པས་ན། སྒྲ་དེའི་ངོ་བོ་ཞེས་དེ་སྐད་གསུངས་ཏེ། སྒྲའི་རྣམ་པའི་རང་བཞིན་དུ་རྣམ་པར་ཤེས་པ་གཅིག་ནས་གཅིག་ཏུ་རྒྱུན་མི་འཆད་ཅེས་བྱ་བའི་དོན་ཏོ། །དེས་འདི་སྐད་བསྟན་པར་འགྱུར་
ཏེ། དེ་ལྟ་བུར་གྱུར་པ་དེ་བསམ་གཏན་ནམ་བཟླས་བརྗོད་བྱེད་པ་ལ་འདུག་ནས་གང་གི་ཚེ་བསམ་གཏན་དུ་བྱེད་པའམ་བཟླས་བརྗོད་དུ་བྱ་བའི་སྒྲ་གཅིག་པུ་ལ་དམིགས་པར་གྱུར་ན། དེའི་ཚེ་གསང་སྔགས་ཉེ་བར་གྱུར་ཅིང་མངོན་དུ་ཕྱོགས་པ་ཞེས་བྱའོ། །འདིར་ནི་ཉེ་བར་ཞེས་བྱ་བ་མངོན་དུ་ཕྱོགས་

71-1-34b

པའི་ཁྱད་པར་ཏེ། དེ་ན་ནི་བསམ་གཏན་པའམ། བཟླས་བརྗོད་བྱེད་པ་སྒྲའི་ངོ་བོར་གྱུར་པ་དེའི་ཚེ། གསང་སྔགས་ཉེ་བར་གྱུར་པ་སྤྱན་རས་ཀྱིས་འཚོ་བའི་མཚན་ཉིད་མངོན་དུ་ཕྱོགས་པར་འགྱུར་རོ་ཞེས་བསྟན་ཏོ།    །དེ་བས་ན་གཞན་ཡང་གསང་སྔགས་མངོན་དུ་གྱུར་པའི་ཚེ་ཐུན་མོང་མ་
ཡིན་པའི་ཡོན་ཏན་རྣམས་བསྟན་ཏེ། དེ་དག་ཀྱང་། ལྷ་དང་ལྷ་མིན་སེམས་ཅན་ནི། །ཞེས་བྱ་བ་ལ་སོགས་པ་ཚིགས་སུ་བཅད་པ་བཞིས་བསྟན་ཏོ། །དེ་ལ་ཚིགས་སུ་བཅད་པ་དང་པོ་དང་གཉིས་པ་དང་བཞི་པས་མངོན་དུ་གྱུར་པའི་ཚེ་ཕྱི་རོལ་གྱི་མཚན་མ་བསྟན་ཏོ། །ཚིགས་སུ་བཅད་པ་
གསུམ་པས་ནང་གི་མཚན་མ་བསྟན་པར་རིག་པར་བྱའོ། །ལྷ་ནི་ལྷ་ལ་སོགས་པའོ། །ལྷ་མ་ཡིན་ནི་སྲིན་པོ་ལ་སོགས་པའོ། །ཞི་བ་ཞེས་བྱ་བ་ནི་མི་གནོད་པའོ།    །ད་ནི་གསང་སྔགས་མངོན་དུ་གྱུར་པའི་ཡོན་ཏན་ཐོབ་པ་མི་ཉམས་པར་བྱ་བའི་ཐབས་བསྟན་ཏེ། དེ་བསྲུང་བ་སྔོན་དུ་འགྲོ་བའི་
བརྩོན་པ་བྱེད་ན། དངོས་གྲུབ་ཉེ་བར་གྱུར་པའི་ཕྱིར། །གསང་སྔགས་ལྷ་ནི་མངོན་ཕྱོགས་པའི། །ཞེས་བྱ་བ་ལ་སོགས་པའི་ཚིགས་སུ་བཅད་པ་གཉིས་ཀྱིས་བསྟན་ཏེ། ཀུན་དུ་ཞེན་ཞེས་བྱ་བ་ནི་བཟླས་བརྗོད་དང་། བསམ་གཏན་ལ་སོགས་པའོ། །དཀའ་ཐུབ་དང་ལྡན་ཞེས་བྱ་བ་ནི་ཇི་
སྐད་དུ་སྨོས་པའི་དཀའ་ཐུབ་བྱ་བ་ལ་བརྩོན་པ་ཞེས་བྱ་བའི་ཐ་ཚིག་གོ། །ནམ་མཁར་རྒྱུ་བའི་འགྲོ་བར་གནས། །ཞེས་བྱ་བ་ནི་ནམ་མཁའ་ལ་འགྲོ་བ་ན། ནམ་མཁར་རྒྱུ་བ་སྟེ་ལྷའོ། །དེ་དག་གི་འགྲོ་བ་ནི་ལྷའི་འགྲོ་བའོ། །དེར་གནས་པ་ནི་ལྷར་གྱུར་པའོ། །ནམ་མཁར་རྒྱུ་བར་གནས་ཞེས་
བྱ་བ་འདི་ཡང་གྲུབ་པའི་གནས་སྐབས་ཉེ་བར་བསྟན་པའི་ཚིག་ཏུ་གཏོགས་པར་བལྟའོ། །མྱོས་པའི་མཚན་ཉིད་གཏི་མུག་པ་ནི། མངོན་དུ་གྱུར་པའི་ཚེ་དང་། གྲུབ་པར་གྱུར་པའི་ཚེ་དབང་ཕྱུག་ཐོབ་པ་མ་ཉམས་པར་འགྱུར་བའི་རྒྱུར་མཚུངས་པར་བསྟན་པའི་ཕྱིར་རོ། །དབང་ཕྱུག་ཅེས་བྱ་བ་
ནི་ལུས་དང་ངག་དང་ཡིད་མཆོག་ཐོབ་པའི་མཚན་ཉིད་དོ། །དེ་ཡང་མངོན་དུ་གྱུར་པའི་ཚེའི་མཚན་ཉིད། དེ་ལ་ཤེས་པའང་དེ་ལས་སྐྱེ་བར་འགྱུར། ཞེས་བྱ་བ་ལ་སོགས་པ་སྔར་བསྟན་པའོ། །གྲུབ་པའི་གནས་སྐབས་ཉེ་བར་བསྟན་པ་ཡང་། རིག་དང་རྫས་ཀྱི་དངོས་གྲུབ་དང་། །སྨན་གྱི་

71-1-35a

ཡང་ནི་ལུས་ཅན་རྣམས། །ཞེས་བྱ་བ་ལ་སོགས་པ་འོག་ནས་འཆད་དོ། །གང་ཞིག་མ་མྱོས་ཞེས་བྱ་བ་ནི་རྨོངས་པར་མི་འགྱུར་བ་སྟེ། སེམས་བློང་བར་མི་འགྱུར་ཞེས་བྱ་བའི་དོན་ཏོ། །དེས་ཇི་སྐད་བསྟན་པར་འགྱུར་ཏེ། མངོན་དུ་གྱུར་པའི་ཚེ་དབང་ཕྱུག་ཐོབ་པ་
མི་ཉམས་པའི་རྒྱུ་ནི་བཟླས་བརྗོད་དང་བསམ་གཏན་ལ་སོགས་པ་ལ་ཞེན་ཅིང་དཀའ་ཐུབ་དང་ཁ་ཏོན་ལ་འགྲུས་པ་དང་སེམས་མ་རྨོངས་པའོ། །གྲུབ་པའི་ཚེ་དབང་ཕྱུག་ཐོབ་པ་ལ་ནི་མི་རྨོངས་པ་གཙོ་བོ་སྟེ། དེའི་ཚེ་ནི་ཁྱད་པར་དུ་དམ་ཚིག་བསྲུང་བ་ལ་བྱེ་བྲག་ཏུ་ནན་ཏན་བྱ་བར་འདོད་དོ། །
དེ་བས་ན་བཟླས་བརྗོད་བྱ་བ་ལ་སོགས་པ་ནི། དམ་ཚིག་ཙམ་དུ་དགོངས་སུ་ཟད་ཀྱི་མ་གྲུབ་པ་གྲུབ་པའི་རྒྱུ་ནི་མ་ཡིན་ནོ།    །ད་ནི་མངོན་དུ་གྱུར་པའི་ཚེ་དབང་ཕྱུག་ཐོབ་པའི་ཡོན་ཏན་ཉམས་པར་གྱུར་པའི་རྒྱུ་སྤོང་ཞིང་བཟླས་བརྗོད་དང་བསམ་གཏན་ལ་སོགས་པ་ལ་མངོན་པར་བརྩོན་པར་བྱས་ན། 
རིམ་གྱིས་འབྲས་བུ་གང་ཐོབ་པར་འགྱུར་བ་དེ་བསྟན་པའི་ཕྱིར། གསང་སྔགས་འབྲས་བུ་མ་ལུས་པ། །ཞེས་བྱ་བ་ལ་སོགས་པ་ཚིགས་སུ་བཅད་པ་གཉིས་ཀྱིས་བསྟན་ཏོ། །དེས་ཞེས་བྱ་བ་ནི་མངོན་དུ་གྱུར་པ་དང་།  གྲུབ་པའི་ཚེ་ཐོབ་པ་ཉམས་པར་གྱུར་པའི་རྒྱུ་སྤོང་བའོ། །གནས་མཆོག་
ཅེས་གསུངས་པ་དེ་ཡང་གང་ཞེ་ན། རྡོ་རྗེ་ཅན་གྱི་གསང་བའི་མཆོག །ཅེས་བྱ་བ་ལ་སོགས་པ་གསུངས་སོ། །དེ་ལ་རྡོ་རྗེ་ཅན་ནི་རྡོ་རྗེ་འཛིན་པ་སྟེ། གསང་སྔགས་ཀྱི་སྤྱོད་པ་ལས་བྱུང་བའི་བྱང་ཆུབ་སེམས་དཔའི་ཁྱད་པར་རོ། །དེའི་གསང་བའི་མཆོག་ནི་སྐུ་དང་གསུང་དང་ཐུགས་ཀྱི་འབྱོར་
པའི་མཚན་ཉིད་དོ། །དེས་འདི་སྐད་བསྟན་པར་འགྱུར་ཏེ། གསང་སྔགས་སྤྱད་པ་ལས་བྱུང་བའི་བྱང་ཆུབ་སེམས་དཔའི་གོ་འཕང་ནི་གནས་མཆོག་སྟེ། དམ་པ་དེ་ཐོབ་པར་འགྱུར་རོ་ཞེས་པའོ། །རྡོ་རྗེ་འཛིན་པ་དེའི་གསང་བའི་མཚན་ཉིད་ཀྱི་ཕན་ཡོན་ནི་བསྔགས་པའི་ཕྱིར། གང་ཞིག་
ཐོབ་ནས་བདེར་འགྱུར་བ། །ཡོངས་སུ་རྫོགས་པ་རྒྱལ་བ་བཞིན། །ཞེས་གསུངས་སོ། །དེས་འདི་ལྟར་དགོངས་ཏེ། གསང་སྔགས་ཀྱི་སྤྱོད་པ་ལས་བྱུང་བའི་བྱང་ཆུབ་སེམས་དཔའི་ཏིང་ངེ་འཛིན་གྱི་ཡུལ་མ་ཐོབ་ཀྱང་། གསང་སྔགས་ཀྱི་སྦྱོར་བའི་འབྲས་བུར་གྱུར་པ་མྱོང་བར་འགྱུར་ཏེ། དེ་དག་

71-1-35b

ནི་དེ་བཞིན་གཤེགས་པའི་སྐུ་ལ་སོགས་པའི་འཁོར་ལོའི་སྤྲུལ་པའི་སེམས་ཅན་སྨིན་པ་དང་། གྲོལ་བ་ལ་སོགས་པའི་རྒྱུར་གྱུར་པ་ཡང་གསང་སྔགས་ཀྱི་སྦྱོར་བས་བྱས་ནས་བདག་ཀྱང་བདེ་བ་འཕེལ་བར་བྱེད་དོ། །ཇི་ལྟར་ཞེ་ན། རྫུ་འཕྲུལ་ནི་རྣམ་པ་བཞི་སྟེ། སྐྱེས་ནས་ཐོབ་པ་དང་། སྦྱོར་
བ་ལས་བྱུང་བ་དང་། གསང་སྔགས་དང་། སྨན་ལས་བྱུང་བ་དང་། ལས་ལས་སྐྱེས་པའོ། །དེ་བས་ན་གསང་སྔགས་ཀྱི་སྦྱོར་བའི་མཐུས་དེ་བཞིན་གཤེགས་པའི་རྫུ་འཕྲུལ་ཁ་ཅིག་ཀྱང་ཐོབ་བོ་ཞེས་བསྟན་པ། གང་ཞིག་ཐོབ་ནས་བདེར་འགྱུར་བ། །ཡོངས་སུ་རྫོགས་པ་རྒྱལ་བ་བཞིན། །
ཞེས་སྔར་གསུངས་སོ།    །དེ་ལ་གསང་སྔགས་ཀྱི་ལྷ་མངོན་དུ་གྱུར་པ་ཐོབ་ནས་སྒྲུབ་པ་པོས་ཞེན་པར་བྱའོ་ཞེས་གོང་དུ་བཤད་པ་དངོས་པོས་གང་ལ་ཞེན་པར་བྱ་བ་འདི་བཤད་དེ། དེ་བས་ན་ཞེན་པར་བྱ་བའི་ཡུལ་གསུངས་པ། སྤྲོ་ཞིང་སྟོབས་དང་ལྡན་པ་ནི། །ཞེས་བྱ་བ་ལ་སོགས་པའོ། །དེས་ནི་
དཀའ་ཐུབ་དང་བསམ་གཏན་དང་། བཟླས་བརྗོད་ཇི་སྐད་བཤད་པ་ལ། ཞེན་ཅིང་མངོན་པར་བརྩོན་པར་བྱའོ། །ཞེས་བཤད་དེ། དེ་ལ་སྤྲོ་བ་ནི་བརྩོན་འགྲུས་དང་ལྡན་པའོ། །སྟོབས་དང་ལྡན་པ་ནི་བཀྲེས་པ་དང་། སྐོམ་པ་དང་།  ཕ་རོལ་གྱི་གནོད་པ་ལ་སོགས་ཏེ། ཉོན་མོངས་པ་བཟོད་
པའོ། །གསང་སྔགས་རང་བཞིན་མེ་ཡིས་ནི། །སྡིག་པ་ཐམས་ཅད་བསྲེག་པར་བྱ། །ཞེས་བྱ་བ་དང་འབྲེལ་ཏོ། །གསང་སྔགས་ཀྱི་ངོ་བོ་ཉིད་ཀྱི་མེ་ཞེས་བཤད་པ་ཡིན་ནོ། །མེའི་རང་བཞིན་ཡང་གང་གི་ཕྱིར་གསང་སྔགས་བཟླས་བརྗོད་བྱས་སམ། བསམ་གཏན་དུ་བྱས་ནས་མངོན་སུམ་
དུའམ། བརྒྱུད་པས་སྐྱེ་བ་དང་འཆི་བའི་ཞགས་པ་ལ་སོགས་པ་སྲེག་པར་བྱེད་དོ་ཞེས་སྔར་བཤད་དོ། །སྡིག་པ་རྣམས་ཇི་ལྟར་བསྲེག་ཅེ་ན་གསུངས་པ། བཟླས་བརྗོད་བསམ་གཏན་དཀའ་ཐུབ་མེས། །ཞེས་བྱ་བ་ལ་སོགས་པ་གསུངས་ཏེ། དེ་དག་ནི་བྱ་བའི་བྱེ་བྲག་གོ། །དེས་ནི་གསང་
སྔགས་རྣམས་ཀྱི་བཟླས་བརྗོད་དང་། བསམ་གཏན་དང་། དཀའ་ཐུབ་ཀྱི་བྱ་བས་དེ་དག་བསྲེག་ཅེས་བྱ་བའི་ཐ་ཚིག་གོ། །བསྲེག་པར་བྱ་ཞེས་བྱ་བ་ནི་སྲེག་པ་དང་འདྲ་ཞེས་བྱ་བའི་དོན་ཏོ། །དེ་བས་ན་འདི་སྐད་བཤད་པར་འགྱུར་ཏེ། གསང་སྔགས་ཀྱི་བསམ་གཏན་དང་། བཟླས་བརྗོད་ལས་བྱུང་བའི་

71-1-36a

དགེ་བའི་བག་ཆགས་དེ་ནི་འགྲུས་པ་དང་། རྟག་ཏུ་སྦྱོར་བ་ལས་གྱུར་པའི་ཕྱིར་སྟོབས་དང་ལྡན་པའོ། །དེ་བས་ན་དེའི་རྣམ་པར་སྨིན་པ་དེ་མ་ཐག་པ་ཉིད་དུ་མངོན་པར་སྐྱེའོ། །རྣམ་པར་སྨིན་པ་དེ་ཡང་བག་ཡོད་པས་རིག་འཛིན་ལ་སོགས་པའི་གྲུབ་པའི་རིམ་གྱིས་འཕགས་པ་རྡོ་རྗེ་འཛིན་
གྱི་སྐུ་དང་། གསུང་དང་། ཐུགས་ཀྱི་གསང་བ་ཐོབ་པའི་རིམ་པས་སངས་རྒྱས་པའི་བར་དུ་འགྱུར་རོ། །དེ་བས་ན་སྡིག་པའི་བག་ཆགས་འབྲས་བུ་རྣམ་པར་སྨིན་པའི་སྐབས་མི་རྙེད་པ་ནི་ས་བོན་བསྲེགས་པ་དང་འདྲ་བས་ན་སྡིག་པ་རྣམ་པར་བསྲེག་ཅེས་བཤད་དོ། །གཞན་ཡང་འདོད་ཆགས་མེད་
པ་ལ་སོགས་པས་བསྐྱེད་པ་བཟླས་བརྗོད་དང་བསམ་གཏན་གྱི་མཚན་ཉིད་དགེ་བའི་བག་ཆགས་ནི་འདོད་ཆགས་ལ་སོགས་པའི་མཐུ་ཆུང་བར་བྱེད་པས་སྡིག་པའི་བག་ཆགས་ཕྱིར་ལྡོག་གོ་ཞེས་དེ་སྐད་དུ་བཤད་དུའང་རུང་མོད་ཀྱི། གཞུང་རབ་ཏུ་མང་པོར་འབྲོས་སུ་དོགས་པ་དང་། ཚུལ་འདི་ལྟ་བུར་རབ་ཏུ་
གྲགས་པའི་ཕྱིར་འདིར་བདག་གིས་ཞིབ་ཏུ་མ་དཔྱད་དོ།    །ད་ནི་བཟླས་བརྗོད་དང་བསམ་གཏན་བསྒོམས་པ་ལས་སྒྲུབ་པ་པོའི་ཡོན་ཏན་འབྱུང་བ་གསང་སྔགས་ཉེ་བའི་རྒྱུར་གྱུར་པ་བསྟན་པ། གནས་དང་ཟས་དང་གྲང་བ་དང་། །ཞེས་བྱ་བ་ལ་སོགས་པའི་ཚིགས་སུ་བཅད་པ་བཞི་གསུངས་
སོ། །དེ་ཚེ་ལས་ཀྱི་འབྲས་བུ་དེས། །ཞེས་བྱ་བ་ནི་བཟླས་བརྗོད་དང་། བསམ་གཏན་གྱི་བག་ཆགས་ཀྱི་མཚན་ཉིད་ལས་ཀྱི་འབྲས་བུ་ཇི་ལྟར་འདོད་པའི་དངོས་གྲུབ་ཀྱི་མཚན་ཉིད་གདོན་མི་ཟ་བར་ངེས་པར་འགྱུར་བར་རིག་པར་བྱའོ། །འདིས་ཀྱང་ལུས་ཀྱི་ཡོན་ཏན་གསང་སྔགས་ཉེ་བར་གྱུར་
པའི་རྒྱུ་ལས་བྱུང་བ་རྣམས་བསྟན་ཏོ། །ཡིད་ཀྱི་ཡོན་ཏན་འབྱུང་བ་བསྟན་པའི་ཕྱིར། སྒྲ་འམ་ཡང་ན་གཟུགས་ལ་ཡང་། །གང་བརྩོན་པ་ནི་མི་རྨོངས་པ། །ཞེས་གསུངས་ཏེ། བསམ་གཏན་པའམ། ཟློས་པ་པོ་ཇི་ལྟར་རིགས་པར་ཡི་གེ་དང་དབྱངས་ཀྱི་རང་བཞིན་སྒྲ་དང་། ལྷའི་རང་
བཞིན་གྱི་གཟུགས་ལ་བྱ་སྟེ། མི་རྨོངས་ཞེས་བྱ་བ་ནི་དམིགས་པའི་ཚེ་སེམས་བླང་བར་མི་འགྱུར་བའོ། །དེས་འདི་སྐད་བཤད་པར་འགྱུར་ཏེ། བསམ་གཏན་དུ་བྱ་བ་དང་བཟླས་བརྗོད་དུ་བྱ་བའི་སྒྲ་ལ་སོགས་པ་ལ་ཇི་ཙམ་འདོད་པར་རྣམ་པར་ཤེས་པའི་རྒྱུན་འཇུག་པར་བར་མ་ཆད་པར་འཛིན་

71-1-36b

ཞེས་བྱ་བའི་དོན་ཏོ། །དོན་འདི་ནི། སྒྲ་ཡི་ངོ་བོར་གྱུར་པ་ན། །ཞེས་བྱ་བའི་ཚིག་དེས་གོང་དུ་ཡང་བཤད་ཟིན་མོད་ཀྱི། གསང་སྔགས་ཀྱི་སྐབས་བསམ་གཏན་ལ་ཕལ་ཆེར་སྒྲའི་ངོ་བོ་ལ་དམིགས་པ་གཙོ་བོར་བསྟན་པའི་ཕྱིར་གསང་སྔགས་ཉེ་བར་གྱུར་པ་ལ་སོགས་པའི་གནས་སྐབས་ཐམས་
ཅད་དུ་ཡང་། སྒྲའམ་ཡང་ན་གཟུགས་ལ་ཡང་མི་རྨོངས། ཞེས་གསུངས་སོ། །ཡང་ན་སྒྲའི་ངོ་བོར་གྱུར་པའི་གསང་སྔགས་ཉེ་བར་གྱུར་པ་མངོན་དུ་ཕྱོགས་པ་ཉིད་ཀྱི་རྒྱུ་ཡིན་གྱི་གསང་སྔགས་ཉེ་བར་གྱུར་པའི་གནས་སྐབས་ཀྱི་ནི་མ་ཡིན་ནོ་ཞེས་ཁ་ཅིག་དེ་ལྟར་སེམས་ན་ཡང་གཟུགས་ལ་
སྦྱོར་བ་ན་མི་རྨོངས་པའོ་ཞེས་དེ་ཙམ་ཞིག་བཤད་པ་ལ་སྒྲའམ། ཡང་ན་གཟུགས་ཞེས་བྱ་བའི་དོན་མཚུངས་པར་བསྟན་པས་ཉེས་པ་མེད་དོ། །ཉེ་བར་གྱུར་པར་དེས་བཤད་བྱ། །ཞེས་བྱ་བ་ནི་གསང་སྔགས་ཀྱི་སྐབས་སོ། །གང་ཞིག་མཐོང་བ་ཙམ་གྱིས་ནི། །སེམས་ཅན་ཐམས་ཅད་བྱམས་
འགྱུར་བ། །ཞེས་བྱ་བ་འདིས་ནི་ལུས་ཀྱི་ཡོན་ཏན་བཤད་དོ། །དེ་ལ་སྣང་བ་དང་། མི་སྣང་བ་དང་། མི་དང་སྲིན་བུ་དང་། སྦྲུལ་དང་། གཅན་གཟན་ཁྲོ་བོ་ལ་སོགས་པ་ནི་སེམས་ཅན་ཐམས་ཅད་ཅེས་བྱ་བའི་སྒྲར་བརྗོད་དོ། །དེ་ནི་དངོས་གྲུབ་ཉེ་བར་འགྱུར། །ཞེས་བྱ་བ་ནི་དངོས་གྲུབ་ཉེ་བར་གྱུར་
པས་གསང་སྔགས་ཉེ་བར་གྱུར་པ་བསྟན་ཏོ། །སེམས་ཅན་བགེགས་བྱེད་པ་དེ་རྣམས་སྒྲུབ་པ་པོ་ལ་བྱམས་པའི་སེམས་འཇོག་སྟེ། དེ་བས་ན་བགེགས་མེད་པར་བསྟན་པ། བགེགས་རྣམས་ཐམས་ཅད་རྣམ་པར་སྤངས། །ཞེས་གསུངས་སོ། །གལ་ཏེ་སེམས་ཅན་ཆེན་པོ་རྣམས་སྒྲུབ་པ་པོ་
ལ་བྱམས་པར་འགྱུར་ཏེ། བགེགས་མེད་པར་གྱུར་པ་དངོས་གྲུབ་ཀྱི་རྒྱུ་ཡིན་ན། འོ་ན་ནི་དེ་ལྟར་གྱུར་པའི་ཚེ་བགེགས་མེད་པས་བསྒྲུབ་པའི་ཚེ་སྲུང་བ་ལ་སོགས་པ་ཅུང་ཟད་ཀྱང་མི་དགོས་སོ་ཞེས་སྨྲས་པ་ལ། བདེ་བ་དང་ནི་སྡུག་བསྔལ་མཐའ། །འདོད་དང་ཁྲོ་དང་འཇིགས་པ་དང་། །ནད་དང་
འཆི་དང་གདོན་དག་གི། །རྒྱུ་ནི་སྔགས་པ་རྣམས་ལ་ཡོད། །ཅེས་གསུངས་སོ། །འདིར་བདེ་བ་ལ་སོགས་པའི་བག་ཆགས་སྒྲུབ་པ་པོའི་རྒྱུད་ལ་ཡོད་དོ་ཞེས་བསྟན་ཏོ། །དེས་འདི་སྐད་གསུངས་པར་འགྱུར་ཏེ། གནས་དང་ཟས་དང་གྲང་བ་ལ་སོགས་པ་ལ་ཇི་མི་སྙམ་པར་གྱུར་ནས་གྲང་བ་ལ་སོགས་པའི་

71-1-37a

གནོད་པ་སྡུག་བསྔལ་གྱིས་ཀུན་ནས་དཀྲིས་པའི་མཚན་ཉིད་ཀྱི་བགེགས་མེད་པར་གྱུར་པ་དང་། དེ་བཞིན་དུ་བསམ་གཏན་དང་། བཟླས་བརྗོད་བྱེད་པའི་ཚེ་དམིགས་པ་ལ་བརྟན་པར་གྱུར་པ་ན་སེམས་གཡེང་བ་ལ་སོགས་པའི་མཚན་ཉིད་ཀྱི་བགེགས་མེད་པར་གྱུར་པ་དང་། དེ་བཞིན་
དུ་སེམས་ཅན་ཐམས་ཅད་བྱམས་པར་གྱུར་པས། དེ་ལས་བྱུང་བའི་གནོད་པ་མེད་པའི་ཕྱིར་དེས་ཉེ་བར་བསྐྱེད་པ་གནོད་པའི་མཚན་ཉིད་ཀྱི་བགེགས་དེའི་ཡུལ་ལ། ཁྲོ་བ་ལ་སོགས་པས་ཀུན་ནས་དཀྲིས་པ་དང་བཅས་པ་མེད་པར་ཀུན་དུ་ཟིན་ཀྱང་གང་ཡང་དེ་དག་གི་རྒྱུ་བདག་གི་རྒྱུ་ལ་བག་ཆགས་
སུ་གནས་པའི་མཚན་ཉིད་དེ་དག་བཟླས་བརྗོད་བྱེད་པ་ལ་མེད་པ་ནི་མ་ཡིན་ནོ། །དེ་བས་ན་བག་ཆགས་ཀྱི་མཚན་ཉིད་ཀྱི་བགེགས་ཀྱི་རྒྱུ་ཡིན་པས་གྲོགས་བྱེད་པའི་རྐྱེན་དང་ཕྲད་ན་བགེགས་འབྱུང་བར་འགྱུར་རོ། །དེ་བས་ན་དེ་བསལ་བའི་ཕྱིར། སྒྲུབ་པ་ལ་སོགས་པ་ལ་བསྲུང་བ་བྱ་བར་རིགས་
པས་ཉེས་པ་མེད་དོ།    །ད་ནི་གསང་སྔགས་ཉེ་བར་གྱུར་པའི་སྔགས་པའི་ཕན་ཡོན་བསྟན་པའི་ཕྱིར། ནམ་ཞིག་ཉེ་བར་གྱུར་པ་ན། །དུས་དང་ཡུལ་དང་བྱ་དང་ལས། །ཆོས་དང་ཆོས་མིན་འབྲས་བུ་ལ། །དེ་ཚེ་སྔགས་པ་མི་ལྟོས་སོ། །ཞེས་བྱ་བ་གསུངས་སོ། །དེས་འདི་སྐད་གསུངས་
པར་འགྱུར་ཏེ། ནམ་སྔགས་པ་ལ་གསང་སྔགས་ཉེ་བར་གྱུར་པ་དེའི་ཚེ་དུས་ལ་སོགས་པ་ལ་མི་ལྟོས་པར་དངོས་གྲུབ་སྒྲུབ་པ་རྩོམ་མོ་ཞེས་བྱ་བའི་ཐ་ཚིག་སྟེ། ནམ་གསང་སྔགས་ཉེ་བར་མ་གྱུར་པ་ལ་སྔོན་དུ་བསྙེན་པ་མེད་པ་དེའི་ཚེ་བཟླས་བརྗོད་དང་། བསམ་གཏན་དང་དབང་བསྐུར་བ་ལ་སོགས་
པའི་ཆོ་ག་ལ་དུས་ལ་སོགས་པ་ལ་ལྟོས་པར་བྱའོ་ཞེས་དོན་གྱི་དབང་གིས་གསུངས་པར་འགྱུར་རོ། །འོ་ན་སྔགས་པ་དུས་ལ་སོགས་པ་ལ་མི་ལྟོས་ན་བསྒྲུབ་པར་བྱ་བ་ལ་གསང་སྔགས་འཕང་བར་འགྱུར་རོ་ཞེས། བསྡམ་པ་དང་ནི་བཤིག་པ་དང་། །ཞེས་བྱ་བ་ལ་སོགས་པའི་གཞུང་གིས་
བསྟན་ན། དེ་ཅིའི་ཕྱིར་དུས་ལ་སོགས་པ་ལ་མི་ལྟོས་པར་བཤད། དེ་ནི་གསང་སྔགས་ཉེ་བར་མ་གྱུར་པ་ལས་དགོངས་ཏེ་གསུངས་པས་ཉེས་པ་མེད་དོ། །གང་རིག་སྔགས་ཉེ་བར་གྱུར་པ་ལ་སོགས་པའི་སྒྲུབ་པ་པོས་ནི་ཉེས་པ་བྱས་པ་ཡང་བཟོད་དོ་ཞེས་བསྟན། རིག་སྔགས་ཉེ་བར་གྱུར་འདོད་

71-1-37b

དང་། །སྒྲུབ་པ་དང་ནི་དེ་བཞིན་མཆོག །ཉེས་པ་སྟོང་དག་བྱས་པ་ཡང་། །བཟོད་པར་འགྱུར་བ་དོགས་པ་མེད། །ཅེས་བྱ་བ་གསུངས་སོ། །རིག་སྔགས་ཉེ་བར་གྱུར་པ་བཟོད་པའི་སྐབས་འདིར། རིག་སྔགས་འདོད་པ་ལ་སོགས་པ་རྣམས་ཀྱང་བཟོད་པར་འགྱུར་བ་སྲིད་དོ་ཞེས་བསྟན་
ཏོ། །འདིར་བཟླས་བརྗོད་དང་བསམ་གཏན་ལ་སོགས་པས་སྒྲུབ་པ་པོའི་ཡོན་ཏན་ཇི་སྐད་དུ་སྨོས་པ་དང་ལྡན་པ་ལ་རིག་སྔགས་ཉེ་བར་གྱུར་པ་བསྟན་ཏོ། །འདོད་པ་ནི་ཉེ་བར་མ་གྱུར་ཀྱང་སྒྲུབ་པ་པོ་སྔོན་དུ་བསྙེན་པ་བྱེད་པའི་ཚེ་ཡང་ཉེས་པ་བྱས་པ་བཟོད་དོ། །འདོད་པར་གྱུར་པ་ཡང་དེ་དང་
ཆ་མཐུན་པའམ། ཚེ་རབས་སྔ་མ་ལ་མཉེས་པར་བྱས་པས་སོ། །གྲུབ་པ་ནི་རལ་གྲི་ལ་སོགས་པའི་དངོས་གྲུབ་སྟེར་པའི་སྒོ་ནས་གྲུབ་པའི་དམ་ཚིག་ལས་འདས་པའི་ཉེས་པ་བྱས་པ་ཡང་ཅུང་ཟད་བཟོད་དོ། དེ་བཞིན་དུ་རིག་སྔགས་མཆོག་ནི་ཉེ་བར་མ་གྱུར་པ་དང་། འདོད་པ་མ་ཡིན་
པ་དང་། མ་གྲུབ་པ་ཡང་མཐུ་ཆེ་བས་ཅུང་ཟད་ཀྱིས་མི་འཁྲུགས་པའི་ཕྱིར། སྒྲུབ་པ་པོའི་ཉེས་པ་མེད་དོ་ཞེས་གསུངས་སོ། །སྟོང་ཞེས་བྱ་བ་ནི་མང་པོའི་ཉེ་བའི་མཚན་མའམ། ངེས་པའི་ཚིག་སྟེ་སྟོང་ལས་ལྷག་པར་མི་བཟོད་ཅེས་བྱ་བའི་ཐ་ཚིག་གོ། །སྒྲུབ་པ་པོ་ཉེས་པ་བཟོད་པ་
འབའ་ཞིག་མ་ཡིན་གྱི། རིགས་ལས་བྱུང་བ་ལ་སོགས་པའི་དངོས་གྲུབ་ཀྱང་ཉེ་བར་གྱུར་པ་དང་། གྲུབ་པ་དག་སྟེར་རོ་ཞེས་བསྟན་པ། རིགས་དང་རྫས་ཀྱི་དངོས་གྲུབ་དང་། །སྨན་གྱི་ཡང་ནི་ལུས་ཅན་ལ། །ཉེ་བར་གྱུར་དང་སྔགས་གྲུབ་པ། །དབང་དུ་གྱུར་པ་རྟག་པར་རོ། །ཞེས་བྱ་བ་
གསུངས་སོ། །དེ་ལ་རིགས་ཀྱི་དངོས་གྲུབ་ནི་བསྒྲུབ་པར་བྱ་བའི་རྫས་མེད་པར་ཡང་བཟླས་བརྗོད་བྱས་པའམ། བསམ་གཏན་དུ་བྱ་བ་ལས་མངོན་པར་ཤེས་པ་ལ་སོགས་པའི་རིག་སྔགས་ཀྱིས་བྱིན་པའམ། རང་གི་རིགས་དང་རིགས་མཐུན་པའམ། གནོད་སྦྱིན་ལ་སོགས་པའི་རིགས་དང་
རིགས་མཐུན་པར་སྐྱེ་བ་དེ་ནི་བསྒྲུབ་པར་བྱ་བའི་རྫས་མེད་པར་ཡང་རིག་སྔགས་སུ་གཏོགས་པའི་གསང་སྔགས་ཀྱི་ལྷ་འབའ་ཞིག་ལས་ཐོབ་པས་ན་རིགས་ལས་བྱུང་བ་ཞེས་གསུངས་སོ། །དེ་བཞིན་དུ་རྫས་ལས་བྱུང་བ་ནི་རལ་གྲི་ལ་སོགས་པའི་དངོས་གྲུབ་ཀྱི་མཚན་ཉིད་དོ། །སྨན་གྱི་ཞེས་བྱ་བ་ནི་

71-1-38a

ཤུ་དག་ལ་སོགས་པ་བསྒྲུབས་པ་ལས་བྱུང་བའི་མཚན་ཉིད་དོ། །དངོས་གྲུབ་དེ་དག་ནི་གསང་སྔགས་ཉེ་བར་གྱུར་པའམ། གྲུབ་པ་ལ་དབང་དུ་གྱུར་པ་སྟེ། ཉེ་བར་སྤྱད་དུ་རུང་བར་འགྱུར་རོ་ཞེས་བྱ་བའི་ཐ་ཚིག་གོ། །འགྲེལ་པ་འདི་ནི་བྱས་ལས་དེ་རིང་བདག་གིས་དགེ་བ་གང་ཞིག་
ཐོབ་གྱུར་པ། །ཟླ་འོད་གསལ་དང་མུ་ཏིག་དོ་ཤལ་དྲི་མ་མེད་པ་དཀར་པོ་འདྲ་བ་དེས། །ཉོན་མོངས་མི་ཤེས་སྒྲིབ་པའི་བློ་རྒྱུད་སྤང་ཕྱིར་སེམས་ཅན་བྱང་ཆུབ་ཡིད་གྱུར་ཅིག །ཡང་དག་རྟོགས་པའི་གཏམ་འདི་སངས་རྒྱས་གསང་བས་སྨྲས་པ་སེམས་ཅན་རྣམས་ཀྱིས་ཉོན། །བསམ་གཏན་ཕྱི་མ་ཞེས་བྱ་
བ། རྒྱ་ཆེར་བཤད་པ་སློབ་དཔོན་སངས་རྒྱས་གསང་བས་མཛད་པ་རྫོགས་སོ།།      །།རྒྱ་གར་གྱི་མཁན་པོ་བིདྱཱ་ཀ་ར་པྲ་བྷཱ་དང་། ཞུ་ཆེན་གྱི་ལོ་ཙཱ་བ་བནྡེ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།།      །།༄༅༅།  །རྒྱ་གར་སྐད་དུ།  ཨཱརྱ་སུ་བཱ་ཧུ་པ་རི་པྲྀ་ཙྪ་ནཱ་མ་ཏནྟྲ་
པིཎྜཱརྠ། བོད་སྐད་དུ།  འཕགས་པ་དཔུང་བཟངས་ཀྱིས་ཞུས་པའི་རྒྱུད་ཀྱི་བསྡུས་པའི་དོན། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །མདོ་སྡེ་འདི་ལས་ནི་སངས་རྒྱས་དང་བྱང་ཆུབ་སེམས་དཔའ་དང་། འཇིག་རྟེན་པའི་ལྷའི་བྱེ་བྲག་རྣམས་ཀྱིས་རིག་སྔགས་
དང་། གསང་སྔགས་བཤད་པ་གང་ཡིན་པ་དེ་དག་རིགས་གསུམ་པོ་དེ་བཞིན་གཤེགས་པ་དང་། པདྨ་དང་རྡོ་རྗེ་དང་། དེ་བཞིན་དུ་གཞན་ཡང་ནོར་ཆེན་དང་། ལྔས་རྩེན་དང་འཇིག་རྟེན་པའི་རིགས་སུ་ཡང་དག་པར་བསྡུས་པར་སྟོན་ཏོ། །དེ་དག་གི་རིགས་དང་། རིག་སྔགས་དང་། 
གསང་སྔགས་དང་། ལས་ཀྱི་དབྱེ་བ་དང་མཉེས་པར་བྱ་བའི་ཐབས་ཁ་ཅིག་ཏུ་ནི་རྒྱས་པར་སྤྲོས་ལ། དེ་ལས་གཞན་དུ་ནི་ཅུང་ཟད་ཙམ་དུ་བསྟན་པ་དང་། གཞན་དག་ཏུ་ནི་མ་གསུངས་སོ་སྙམ་དུ་དགོངས་ནས།  བཅོམ་ལྡན་འདས་རྡོ་རྗེ་འཆང་གིས་རིག་སྔགས་ཐམས་ཅད་ཀྱིས་མཉེས་པར་བྱ་
བའི་ཐབས་སུ་གྱུར་པ། འཇུག་པ་དང་། སྦྱོར་བ་དང་། སྒྲུབ་པ་དང་། གྲུབ་པའི་སྤྱོད་པ་བསྟན་པ་རྣམས་དཔུང་བཟངས་ཀྱིས་ཞུས་པའི་གསང་སྔགས་ཀྱི་མདོ་སྡེའི་ལེའུ་བཅུ་གཅིག་པོ་འདིར་གཏན་ལ་དབབ་པ་བསྟན་ཏོ། །དེ་ལ་ལེའུ་དང་པོ་ནི་དོན་བདུན་གྱིས་བཤད་པར་བསྟན་ལ། ཚིག་

71-1-38b

དང་པོའི་དོན་ནི་འདི་ལྟ་སྟེ་མདོ་སྡེ་དང་། དེ་འཆང་བ་དང་། ཞུ་བ་དང་། འབྲེལ་པ་དང་། བརྗོད་པར་བྱ་བ་དང་། དགོས་པ་དང་། དགོས་པའི་ཡང་དགོས་པ་རྣམས་ཀྱིས་བསྟན་ཏོ། །གནོད་སྦྱིན་བདག་པོ་ཉི་མ་སྟོང་གི་གཟི། །སྙིང་རྗེས་རྩེ་གཅིག་ཡིད་གྱུར་ཞེས་བྱ་བ་ནས་བརྩམས་ཏེ། དེ་
ཕྱིར་མྱུར་དུ་རྩེ་གཅིག་ཡིད་བྱོས་དང་། །གསང་སྔགས་མདོ་སྡེའི་ཚུལ་བཞིན་ངས་བཤད་དོ། །ཞེས་བྱ་བའི་བར་གང་གསུངས་པའོ། །དེ་བཞིན་དུ་ཟློས་པ་དང་། སྒྲུབ་པ་དང་། མི་སྒྲུབ་པ་རྣམས་ཀྱིས་ཀྱང་ཐུན་མོང་གི་བསླབ་པ་ལ་འཇུག་པ་བསྟན་པ་ནི་དོན་གཉིས་པ་སྟེ། གསང་སྔགས་
བཟླས་བརྗོད་གང་དག་ངས་གསུངས་པ། །དེ་ཡི་བརྟུལ་ཞུགས་དང་པོར་ངས་བཤད་དོ། །ཞེས་བྱ་བ་ལ་སོགས་པ་ནས། དགེ་བ་བཅུ་དག་གི། ཆོས་ཀྱི་ལམ་ལ་གནས་པར་བྱས་ན་ལེགས། །ཞེས་བྱ་བའི་བར་གསུངས་པའོ། །དེ་བཞིན་དུ་དམ་ཚིག་གི་དཀྱིལ་འཁོར་རྣམས་དང་། 
གདོན་ལ་སོགས་པའི་དཀྱིལ་འཁོར་དུ་ཞུགས་པའི་ཕན་ཡོན་གསུངས་པ་ནི་དོན་གསུམ་པ་སྟེ། ལྷ་དང་ལྷ་མིན་ཤ་ཁྲག་ཟ་འཐུང་བ། །མཚན་མོར་རྒྱུ་བ་མི་བཟད་འཇིག་རྟེན་ན། །སེམས་ཅན་རྣམས་ལ་གནོད་པ་བྱེད་ཅིང་རྒྱུ། །ཞེས་བྱ་བ་ལ་སོགས་པ་ནས། དེ་ལས་གང་ཡང་རུང་བའི་
དཀྱིལ་འཁོར་ནི། །གཅིག་ཙམ་ཞིག་ཀྱང་དད་པས་བལྟ་བར་བྱ། །ཞེས་བྱ་བའི་བར་དུ་གང་གསུངས་པའོ། །སྒྲུབ་པ་པོས་ཁྱད་པར་དུ་དགེ་བའི་ཆོས་ཡང་དག་པར་སྡུད་པ་དང་། སེམས་ཅན་གྱི་དོན་བྱ་བ་དང་།  སོ་སོར་ཐར་པའི་སྡོམ་པའི་ཚུལ་ཁྲིམས་ལ་གནས་པར་བྱ་བ་བསྟན་པ་
དང་། དེའི་ཕན་ཡོན་བསྟན་པ་ནི་དོན་བཞི་པ་སྟེ། གནོད་སྦྱིན་ཚོགས་དང་མཚན་མོ་རྒྱུ་བ་དག །ས་བླའི་ཞེས་བྱ་བ་ལ་སོགས་པ་ནས། དེ་བཞིན་ཚུལ་ཁྲིམས་བརྟེན་ནས་ཆོས་དཀར་མཆོག །སྙིང་རྗེའི་ཆུས་བརླན་པས་ནི་རྣམ་པར་སྐྱེ། །ཞེས་བྱ་བའི་བར་གང་གསུངས་པའོ། །སོ་
སོར་ཐར་པ་དང་སེམས་ཅན་གྱི་དོན་བྱ་བའི་བསླབ་པའི་ཐབས་ནི་དོན་ལྔ་པ་སྟེ། རྒྱལ་བ་ངས་གསུངས་སོ་སོར་ཐར་པ་ཡི། །ཚུལ་ཁྲིམས་རྣམ་དག་འདུལ་བ་མ་ལུས་ལས། །ཞེས་བྱ་བ་ལ་སོགས་པའོ། །དེ་བཞིན་དུ་དགེ་བའི་ཆོས་ཡང་དག་པར་བསྡུ་བའི་ཐབས་ནི་དོན་དྲུག་པ་སྟེ། ཟློས་

71-1-39a

པས་སྐྱོ་ན་མདོ་སྡེ་བཀླག་པར་བྱ། །ཞེས་བྱ་བ་ལ་སོགས་པའོ། །དེ་བཞིན་དུ་གྲོགས་པོའི་མཚན་ཉིད་བསྟན་པ་ནི་དོན་བདུན་པ་སྟེ། ནམ་ཡང་འཁོར་ལོ་གཅིག་པའི་ཤིང་རྟ་ནི། །ཞེས་བྱ་བ་ལ་སོགས་པ་གང་གསུངས་པའོ།།      །།དེ་བཞིན་དུ་ལེའུ་གཉིས་པ་ལ་དོན་བཅུ་
སྟེ། དེ་ལ་གསང་སྔགས་མཉེས་པར་བྱ་བའི་དོན་ནི་དང་པོ་སྟེ། རང་སངས་རྒྱས་དང་བདེ་གཤེགས་ཉིད་སྐྱེས་དང་། །རྒྱལ་བ་སྔོན་ཆད་གང་ན་བཞུགས་བཞུགས་པའི། །ཞེས་བྱ་བ་ལ་སོགས་པ་ནས། དེར་ནི་ས་བརྐོས་སྦྱངས་ནས་གནས་བརྩིགས་པ། །ཞེས་བྱ་བ་ལ་སོགས་པའི་བདག་
གསུངས་པའོ། །དེ་བཞིན་དུ་ལྷ་བཞག་པའི་དོན་ནི་གཉིས་པ་སྟེ། དྲི་གཙང་ཁང་པ་དེ་ཡི་ཕྱོགས་གཅིག་ཏུ། །རྒྱལ་བ་ལམ་མཆོག་རྣམ་པར་སྟོན་པ་ཡི། །ཞེས་བྱ་བ་ལ་སོགས་པ་ནས། དེ་ཡི་སྤྱན་སྔར་དངོས་གྲུབ་བརྩམ་པར་བྱ། །ཞེས་བྱ་བའི་བར་གང་གསུངས་པའོ། །སྒྲུབ་
པ་དང་རྗེས་སུ་མཐུན་པའི་ཆ་ལུགས་བསྟན་པ་ནི་དོན་གསུམ་པ་སྟེ། དེའི་ཕྱིར། གཙུག་ཕུད་གཞག་སྟེ་སྐྲ་ནི་བྲེགས་ནས་སུ། །ཞེས་བྱ་བ་ལ་སོགས་པ་གསུངས་སོ། །དེ་བཞིན་དུ་སློང་མོ་བའི་ལྷུང་བཟེད་ཀྱི་མཚན་ཉིད་བསྟན་པ་ནི་དོན་བཞི་པ་སྟེ།  ཇི་སྐད་དུ།  ཀུ་བའམ་
ལྕགས་སམ་འཇིམ་པ་ལས་བྱས་པ། །ཞེས་བྱ་བ་ལ་སོགས་པ་གསུངས་སོ། །སྒྲུབ་པ་པོ་སློང་མོ་དང་རྗེས་སུ་མཐུན་པའི་ཡུལ་དུ་གནས་པའི་བྱ་བ་ནི་དོན་ལྔ་པ་སྟེ། དེ་བསྟན་པའི་ཕྱིར།  བཟའ་བཏུང་མོད་ཅིང་དམངས་རིགས་མང་བ་དང་། །མགྲོན་ལ་མཆོད་བྱེད་ལེགས་པར་
གནས་པའི་གྲོང་། །ཞེས་བྱ་བ་ལ་སོགས་པ་ནས། དེ་ནི་སྡིག་པ་རྣམ་པར་བསལ་བ་དང་། །བསོད་ནམས་མ་ལུས་ཡོངས་སུ་བཟུང་བས་འདག །ཅེས་བྱ་བའི་བར་དུའོ། །ཟས་ལ་མ་ཆགས་པར་བྱ་བ་དང་། ཟས་ཀྱི་ཚོད་ཟིན་པར་བྱ་བ་བསྟན་པ་ནི་དོན་དྲུག་པ་སྟེ། ཇི་ལྟར་རྨ་ནི་གསོ་
དང་བསལ་བའི་ཕྱིར། །ནད་པ་ལ་ནི་སྨན་པས་སྦྱིན་པ་ལྟར། །དེ་བཞིན་འདིར་ཡང་བཀྲེས་པའི་སྡུག་བསྔལ་དག །ཅེས་བྱ་བ་དང་། བཟའ་བར་གསུངས་ཞེས་བྱ་བ་ལ་སོགས་པ་ནས། ལུས་ནི་ཆུ་ཤིང་བཞིན་དུ་རིག་བྱ་སྟེ། །བཟའ་བཏུང་སོགས་ལ་སེམས་ནི་ཆགས་མི་བྱ། །ཞེས་

71-1-39b

བྱ་བའི་བར་དུའོ། །སློང་མོ་བྱེད་པའི་དུས་ན་སྤྱོད་ལམ་བཅོས་པར་བསྟན་པ་ནི་དོན་བདུན་པ་སྟེ་དེའི་ཕྱིར། དབང་པོ་དྲུག་པོ་ཡུལ་ལ་འཕྲོ་བ་དག །བདེ་གཤེགས་གསུངས་པའི་ཤེས་པས་བསྲུང་བར་བྱ། །ལྷུང་བཟེད་དེ་དག་ལས་གཅིག་ཐོགས་ནས་སུ། །གཉའ་ཤིང་གང་དུ་བལྟ་ཞིང་ཞེས་བྱ་
བ་ནས། དེ་བཞིན་གང་ན་རོལ་མོ་བྱེད་པ་རྣམས། །དེར་ནི་སྐྱེས་བུ་ནམ་ཡང་འགྲོ་མི་བྱ། །ཞེས་བྱ་བ་ལ་སོགས་པའི་བར་དུའོ། །ཟས་བཟའ་བའི་རིམ་པ་དང་།  དུས་ངེས་པར་བསྟན་པ་ནི་དོན་བརྒྱད་པ་སྟེ། གང་གི་ཕྱིར། བསོད་སྙོམས་ཅི་རྙེད་ཁྱེར་ཏེ་འོངས་ནས་ཀྱང་། །ཞེས་བྱ་བ་ལ་
སོགས་པ་གང་གསུངས་པའོ། །དུས་གསུམ་དུ་བཟླས་བརྗོད་བྱ་བ་དང་། དུས་གསུམ་དུ་ཁྲུས་བྱ་བ་དང་། མཆོད་པ་བསྟན་པ་ནི་དོན་དགུ་པ་སྟེ། དེའི་ཕྱིར།  དུས་སུ་ཟོས་ནས་དུས་གསུམ་ཁྲུས་བྱ་སྟེ། །ཞེས་བྱ་བ་ནས། སྤྲ་བ་ཨརྐ་བིལ་བ་བྲི་ཧ་ཏི། །ཀུ་ཤ་དྲི་ངན་ཡིད་དུ་མི་འོང་སྤང་། །
ཞེས་བྱ་བ་ལ་སོགས་པ་གསུངས་སོ། །སྒྲུབ་པ་པོས་སངས་རྒྱས་རྗེས་སུ་དྲན་པ་ལ་སོགས་པ་རྗེས་སུ་དྲན་པ་དྲུག་ལ་དམིགས་པའི་དུས་བསྟན་པ་ནི་དོན་བཅུ་པ་སྟེ། འགྲེང་དང་འདུག་དང་མ་ལོག་ཉལ་བ་དང་། །འགྲོ་འཕྲེས་ཟ་ཀློག་བཟླས་བརྗོད་བྱེད་པ་ན། །རྗེས་སུ་དྲན་དྲུག་སོ་སོའི་ཡོན་ཏན་
དག །རིག་པར་བཅས་ཏེ་རྗེས་སུ་དྲན་པར་བྱ། །ཞེས་གང་གསུངས་པའོ།།      །།ལེའུ་གསུམ་པ་ལ་སྒྲུབ་པ་པོའི་དེ་ཁོ་ན་ཉིད་ལ་དམིགས་པ་ནི་དོན་དང་པོ་སྟེ་དེའི་ཕྱིར། འདོད་ཆགས་ལ་སོགས་ཉོན་མོངས་ཚོགས་ལྡན་པའི། །སེམས་ནི་འཁོར་བ་ཡིན་པར་ཀུན་དུ་བརྗོད། །ཉོན་
མོངས་རྣམ་གྲོལ་ཤེལ་དང་ཟླ་འདྲ་བ། །སྲིད་པའི་རྒྱ་མཚོ་མཐར་ནི་ཡོངས་སུ་གྲགས། །ཞེས་བྱ་བ་ལ་སོགས་པ་གསུངས་པའོ། །བགྲང་ཕྲེང་གི་མཚན་ཉིད་བསྟན་པ་ནི་དོན་གཉིས་པ་སྟེ། དེའི་ཕྱིར། པུ་ཏྲ་ཛི་དང་དུང་ཤེལ་རུ་དྲཱཀྵ། །ཞེས་བྱ་བ་ལ་སོགས་པ་གསུངས་པའོ། །བཟླས་
བརྗོད་ཀྱི་དུས་སུ་ལུས་དང་། ངག་དང་། ཡིད་བསྡམས་པ་ནི་དོན་གསུམ་པ་སྟེ། དེ་བསྟན་པའི་ཕྱིར། འདུག་ནས་དབང་པོ་ཡང་དག་བསྡམས་པ་དང་། །ལུས་ནི་དྲང་ཞིང་བརྟན་པར་བཞག་ནས་སུ། །ཕྱིས་ནི་མ་མཆུ་ཤིན་ཏུ་མཛེས་པར་ཡང་། །བསྐུལ་ཞིང་གསང་སྔགས་ཅི་དགར་བཟླས་

71-1-40a

བརྗོད་བྱ། །ཞེས་གསུངས་པའོ། །བཟླས་བརྗོད་ཀྱི་ཉེས་པ་སེམས་མི་བརྟན་པ་དང་། གཉིད་ལ་སོགས་པ་དང་། དེ་བཞིན་བཟླས་བརྗོད་ལ་གནོད་པ་ཡུལ་རྒྱུ་བ་ལ་སོགས་པའི་རྣམ་པར་རྟོག་པ་རབ་ཏུ་དགག་པ་ནི་དོན་བཞི་པ་སྟེ་དེ་བསྟན་པའི་ཕྱིར། སེམས་ནི་གློག་
དང་སྤྲིན་དང་རླུང་དང་མཚུངས། །རྒྱ་མཚོ་ཆེན་པོ་ཡི་ནི་རླབས་དང་འདྲ། །སྒྱུ་ཅན་འདོད་དགུར་ཡུལ་ལ་མངོན་དགའ་བ། །གཡོ་ཞིང་འཕྱན་པ་ཞེས་བྱ་བ་ལ་སོགས་པ་ནས། གཉེན་ལ་དགའ་བའི་སེམས་ནི་རྣམ་རྟོག་གིས། །བཟློག་ནས་དགེ་ལ་བརྩོན་དང་ལྡན་པར་གཞག །ཅེས་བྱ་བ་ལ་
སོགས་པའི་བར་གང་གསུངས་པའོ། །ཐུབ་པར་བྱ་བ་བསྟན་པ་ནི་དོན་ལྔ་པ་སྟེ། དང་པོར་ཟློས་ནས་བཟླས་བརྗོད་ཟིན་བར་དུ། །བྲམ་ཟེ་རྒྱལ་རིགས་རྗེའུ་རིགས་ཞིང་པ་དང་། །བུད་མེད་མ་ནིང་ཁྱེའུ་བུ་མོ་དང་། །སྔགས་པ་ཞེས་བྱ་བ་ལ་སོགས་པ་གསུངས་པའོ། །བཟླས་བརྗོད་བྱས་པ་ལ་སོགས་
པ་ལས་བྱུང་བའི་བསོད་ནམས་ཡོངས་སུ་བསྔོ་བར་བསྟན་པ་ནི་དོན་དྲུག་པ་སྟེ། དེའི་ཕྱིར། མེ་ཏོག་དྲི་སྣོད་མར་མེ་ཕུལ་བ་དང་། །ཚུལ་ཁྲིམས་བརྩོན་འགྲུས་དཀའ་ཐུབ་བྱས་པ་ཡིས། །དགེ་བ་དེ་ཀུན་བླ་ན་མེད་པ་ཡི། །སངས་རྒྱས་བྱང་ཆུབ་བླ་མེད་མཆོག་ཏུ་བསྔོ། །ཞེས་བྱ་བ་ལ་སོགས་
པ་གསུངས་སོ། །ལུས་དང་ངག་དང་། ཡིད་ཀྱི་གནས་ངན་ལེན་དུ་གྱུར་པའི་འཇིག་རྟེན་གྱི་ཆོས་བརྒྱད་པོ་གང་ཡིན་པ་དང་། སྟངས་དང་། མཆོངས་པ་བྱེད་པ་ལ་སོགས་པ་རབ་ཏུ་དགག་པ་ནི་དོན་བདུན་པ་སྟེ། དེའི་ཕྱིར། གྲགས་དང་མ་གྲགས་རྙེད་དང་མ་རྙེད་དང་། །བདེ་དང་སྡུག་བསྔལ་
ཞེས་བྱ་བ་ལ་སོགས་པ་ནས།  ལེ་ལོ་དང་ནི་གཡོ་སྒྱུ་རྣམ་པར་སྤངས། །ཞེས་བྱ་བ་ལ་སོགས་པའི་བར་གསུངས་པའོ། །ཁ་ཟས་མ་གནང་མ་སྤང་བ་དང་། གསང་སྔགས་མཉེས་པར་འགྱུར་བ་དང་། རྗེས་སུ་མཐུན་པའི་ཁ་ཟས་དཀར་པོ་བསྟན་པ་ནི་དོན་བརྒྱད་པ་སྟེ། ཇི་སྐད་དུ། ཤ་ཆང་ཀེའུ་
དང་བཙོང་དང་སྒོག་རྡོག་དང་། །ཞེས་བྱ་བ་ལ་སོགས་པ་ནས། ལྷ་མིན་བུ་མོའི་འཁྲུལ་འཁོར་འཇོམས་པའི་ཚེ། །འབྲུ་མར་ཚིགས་མའི་ཁ་ཟས་མཆོག་ཏུ་བསྔགས། །ཞེས་བྱ་བའི་བར་གསུངས་པའོ། །ཇི་སྐད་བསྟན་པའི་དུས་སུ་ཉལ་བའི་རིམ་པ་བསྟན་པ་ནི་དོན་དགུ་པ་སྟེ། ཇི་

71-1-40b

སྐད་དུ། དེ་ལྟར་བཟླས་བརྗོད་བྱེད་པའི་སྒྲུབ་པ་པོས། །ཉིན་གཅིག་བཞིན་དུ་བྱས་ནས་ཞེས་བྱ་བ་ལ་སོགས་པ་གང་གསུངས་པའོ།།      །།དེ་ནས་ལེའུ་བཞི་པ་ལ་རྡོ་རྗེ་རྣམས་ཀྱི་མཚན་ཉིད་བསྟན་པ་ནི་དོན་དང་པོ་སྟེ། ཇི་སྐད་དུ།  སྒྲུབ་པ་པོས་ནི་ངེས་པར་བཅང་བ་ཡི། །རྡོ་རྗེ་གང་ཡིན་དེ་དག་
བཤད་པར་བྱ། །ཞེས་བྱ་བ་ལ་སོགས་པ་ནས། དེ་ལས་གཅིག་ཀྱང་རྙེད་པར་མ་གྱུར་ན། །ཁུ་ཚུར་བཅངས་ནས་རྩེ་གཅིག་སེམས་ཀྱིས་བཟླས། །ཞེས་བྱ་བའི་བར་དུ་གསུངས་པའོ། །སྒྲུབ་པའི་རྫས་རྣམས་ཀྱི་གྲངས་བསྟན་པ་ནི་དོན་གཉིས་པ་སྟེ། དེའི་ཕྱིར། ལྡོང་རོས་གི་ཝང་རལ་
གྱི་ཨཉྫ་ན། །ཞེས་བྱ་བ་ལ་སོགས་པའོ། །བགེགས་ཀྱི་རིགས་རྣམས་ཀྱི་གྲངས་བསྟན་པ་ནི་དོན་གསུམ་པ་སྟེ། དེའི་ཕྱིར། བགེགས་དང་ལོག་འདྲེན་གྲུབ་པར་མི་དགའ་བ། །རིག་པའི་ཚོགས་རྣམས་ཀྱི་ནི་མདུན་ནས་རྒྱུ། །ཞེས་བྱ་བ་ལ་སོགས་པ་ནས། སྒྲུབ་པ་པོ་ནི་འབྱོར་བར་མི་
དགའ་བ། །བརྩེ་མེད་རང་རང་རིགས་ལ་བགེགས་ཀྱང་བྱེད། །ཅེས་བྱ་བའི་བར་དུའོ། །བགེགས་རྣམས་བགེགས་བྱེད་པ་ན་ལྷ་ལ་ཕུལ་བའི་དྲི་ལ་སོགས་པ་མཆོད་པའི་ཡོ་བྱད་རྣམས་འཕྲོག་པ་དང་། གླགས་རྙེད་ནས་སྒྲུབ་པ་པོའི་ལུས་ལ་འཇུག་པར་བྱེད་དོ། །དེ་ལ་རྒྱུ་གང་གིས་
ཡོ་བྱད་རྣམས་འཕྲོག་པར་བྱེད་པ་དང་། ཡོ་བྱད་རྣམས་ཕྲོགས་པའི་ཉེས་པ་གང་ཡིན་པ་དེ་བསྟན་པ་ནི་དོན་བཞི་པ་སྟེ། དེའི་ཕྱིར། རང་གི་གསང་སྔགས་གཟུགས་སུ་རྣམ་སྤྲུལ་ནས། །ཕྲེང་བ་དང་ནི་གཏོར་མ་མངོན་དུ་ལེན། །ལྷ་ཡིས་ལོག་འདྲེན་གྱིས་བྱས་དེ་མཐོང་ནས། །
ཁྲོས་ཤིང་འཁྲུགས་ནས་ཕྱིར་ཡང་ཕྱོགས་པར་འགྱུར། །ཞེས་བྱ་བའོ། །བགེགས་རྣམས་དང་པོ་ནས་མི་འབྱུང་བར་བྱ་བ་དང་། ཞི་བར་བྱ་བའི་ཐབས་བསྟན་པ་ནི་དོན་ལྔ་པ་སྟེ། དེའི་ཕྱིར། སྔོན་ཆད་སེམས་ནི་རྨོངས་དང་འཇུངས་པ་ཡི། །ལྷ་ཡིས་ལོག་འདྲེན་བགེགས་ཀྱི་ལུགས་
འདི་གཏོང་། །ཞེས་བྱ་བ་ལ་སོགས་པ་ནས། བཟླས་བརྗོད་ཟིན་ནས་ལེགས་པར་བསྲུང་བྱས་ཏེ། །དཀྱིལ་འཁོར་མང་བྱས་སྒྲུབ་ལ་འཇུག་པར་བྱ། །ཞེས་བྱ་བའི་བར་དུའོ། །སྤྱིར་བགེགས་ཐམས་ཅད་སྒྲུབ་པ་པོའི་རྒྱུད་ལ་འབྱུང་བའི་རྒྱུ་བསྟན་པ་ནི་དོན་དྲུག་པ་སྟེ། དེའི་ཕྱིར། 

71-1-41a

གཞན་དུ་མཆོད་པའི་ཆོ་ག་མེད་པ་དང་། །བཟླས་བརྗོད་སྦྱིན་སྲེག་ཆོ་ག་བྲལ་བའམ། །གང་ཞིག་རྟག་ཏུ་སེམས་ནི་འདི་ལྟར་སེམས། །རིག་པ་གང་ཞིག་བདག་གིས་བཟླས་པར་བྱ། །ཡུལ་དང་རྒྱལ་སོགས་གཏམ་ལ་ཆགས་པ་དེའི། །ལུས་ལ་ཐོགས་པ་མེད་པར་
རབ་ཏུ་འཇུག །ཅེས་བྱ་བ་ལ་སོགས་པ་ནས། སྦྱིན་སྲེག་བྱེད་པ་ན་ཡང་བགེགས་གཞན་འཇུག །ཅེས་བྱ་བའི་བར་དུའོ། །དེ་བཞིན་དུ་སྤྱིར་བགེགས་ཐམས་ཅད་སྒྲུབ་པ་པོའི་རྒྱུད་ལ་འདོད་ཆགས་སྐྱེད་པར་འགྱུར་བ་བསྟན་པ་ནི་དོན་བདུན་པ་སྟེ། དེའི་ཕྱིར། ཇི་ལྟར་ཉི་ཟེར་མེ་ཤེལ་ལ་
བབ་པའི། །རྐྱེན་གྱིས་མ་བསྒྲིབས་མེ་ནི་འབྱུང་བ་ལྟར། །དེ་བཞིན་བགེགས་ཀྱང་ལུས་ལ་ཞུགས་གྱུར་ན། །འདོད་ཆགས་མེ་ཆེན་ཀུན་དུ་སྐྱེད་པར་བྱེད། །ཅེས་གསུངས་པའོ། །བགེགས་རྣམས་ཁྱད་པར་འབྱུང་བའི་རྒྱུ་དང་། དེ་དག་ཀྱང་སྒྲུབ་པ་པོའི་རྒྱུད་ལས་ཁྱད་པར་དུ་བྱེད་
པ་གང་ཡིན་པ་བསྟན་པ་ནི་དོན་བརྒྱད་པ་སྟེ། ཇི་སྐད་དུ། གཡོ་ཞིང་འགུལ་བ་ཞེས་ནི་བྱ་བ་ཡི། །བགེགས་ནི་ཆུ་དང་སྐྱེས་བུ་འཁྲུ་ཚེ་འཛིན། །བཀྲེས་ཤིང་ལུས་ལ་སྙོམ་ཞིང་གཉིད་ཀྱང་ཆེ། །དེ་བཞིན་ལུས་ལྕི་མཆོག་ཏུ་འཁྲུ་བར་འགྱུར། །ཞེས་བྱ་བ་ལ་སོགས་པ་ནས། མེ་
ཏོག་འབུལ་ཚེ་མེ་ཏོག་ཆེར་དགོད་པ། །རང་གི་གླགས་རྙེད་མོད་ལ་ལུས་ལ་འཇུག །རིམས་དང་ཆམ་པ་རུ་ཤིང་ན་བ་དང་། །གྲོགས་པོ་དག་དང་རྣམ་པར་བྲལ་བར་བྱེད། །ཅེས་བྱ་བའི་བར་དུ་གསུངས་པའོ། །དེ་བཞིན་དུ་གཞན་ཡང་སྤྱིར་ན་འདི་ནི་བགེགས་ཐམས་ཅད་སྐྱོན་མེད་
པར་བྱེད་པ་དེ་བསྟན་པ་ནི་དོན་དགུ་པ་སྟེ། ཇི་སྐད་དུ། བགེགས་ཀྱིས་བརླམས་པ་ཕྱོགས་ན་ལམ་མིན་ལམ་དུ་མཐོང་། །སྤྱོད་པ་སྣ་ཚོགས་བྱེད་ཅིང་འདོད་ཆགས་རྣམས་ཀྱིས་གདུངས། །གློ་བུར་སྨྲ་ཞིང་ཀློག་ལ་དོན་མེད་ཀུན་དུ་འཕྱེན། །ཞེས་པ་ལ་སོགས་པ་ནས། ཁྲོན་སྐམ་
ཐོད་པ་རུས་གང་ཕུང་པོ་དང་། །ལྕགས་དང་རྡོ་པུང་མི་གཙང་ཁོང་རུལ་དང་། །ཁ་བཞིན་བསྒྱུར་ཞིང་རལ་གྲི་མདུང་ཐོགས་པ། །རྨི་ལམ་འདི་རྣམས་རྨིས་པའི་མིང་ཡང་བརླམས། །ཞེས་བྱ་བའི་བར་དུ་གསུངས་སོ། །བགེགས་ཐམས་ཅད་ཐོག་མ་ཉིད་ནས་མི་འབྱུང་བར་བྱ་བའི་རྒྱུ་བསྟན་

71-1-41b

པ་ནི་དོན་བཅུ་པ་སྟེ། དེའི་ཕྱིར། བགེགས་དང་ལོག་འདྲེན་རྣམ་པར་གཞིགཔའི་ཕྱིར། །བདུད་རྩི་ཐབ་སྦྱོར་དྲག་ཤུལ་ཐབས་ལས་སྦྱར། །སྔགས་པ་དེ་ཡི་གསང་སྔགས་ལ་ཞུགས་པ། །བགེགས་དང་ལོག་འདྲེན་རྣམས་ཀྱིས་ཡོང་མི་ཚུགས། །ཞེས་གསུངས་པའོ། །སྒྲུབ་པ་པོའི་
རྒྱུད་ལ་བགེགས་འབྱུང་བ་དང་། གཞན་ཡང་སྐྱེས་པ་དང་བུད་མེད་ལ་སོགས་པ་བགེགས་ཀྱིས་ཟིན་པ་དང་། མ་ཟིན་པ་རྣམས་ཀྱི་སྡིག་པ་ཉེ་བར་ཞི་བར་བྱ་བ་དང་། དབང་ཐང་ལ་སོགས་པ་བསྐྱེད་པའི་ཕྱིར།  དེ་དག་དབང་བསྐུར་བའི་དཀྱིལ་འཁོར་དུ་དབང་བསྐུར་བར་བསྟན་པ་དང་། 
དེའི་ཆོ་ག་བསྟན་པ་ནི་དོན་བཅུ་གཅིག་པ་སྟེ། ཇི་སྐད་དུ། ཕྱུགས་ལྔས་ཤིང་གཅིག་ལྷ་ཡི་ཁང་པའམ། །ལམ་གྱི་གཞི་མདོའམ་ཁང་སྟོང་ནགས་ཚལ་དུ། །དཀྱིལ་འཁོར་གྲུ་བཞི་ལྷམ་པ་ཁྲུ་བཞིའི་ཚད། །ཚོན་རྩི་རྣམ་པ་སྣ་ཚོགས་རྣམས་ཀྱིས་བྲི། །ཞེས་བྱ་བ་ལ་སོགས་
པ་ནས། སྒྲུབ་པ་པོ་ཡི་མི་ནི་འབའ་ཞིག་ལ། །བགེགས་རྣམས་གཞིག་ཕྱིར་ཕན་པར་མ་ཟད་ཀྱི། །རྒྱལ་པོའི་འཁོར་དང་བུད་མེད་བུ་ཕོ་དང་། །བུ་མོ་དག་དང་རོལ་མོ་མཁན་རྣམས་དང་། །ཞེས་བྱ་བ་ལ་སོགས་པ་ལེའུ་ལྔ་པ་གསུངས་པའི་བར་དུའོ།།      །།དེ་ལ་ལེའུ་ལྔ་པ་ལ་
བགེགས་ཀྱིས་ཟིན་པ་ལས་ཐར་པའི་སྔགས་བསྟན་པ་ནི་དོན་དང་པོ་སྟེ། དེའི་ཕྱིར། བགེགས་ཀྱིས་བསོད་ནམས་མ་ལུས་ཟད་བྱེད་པས། །དེའི་ཕྱིར་མི་ཡིས་གསང་སྔགས་གྲུབ་མི་འགྱུར། །ཇི་ལྟར་ཟླ་བ་སྤྲིན་ལས་རྣམ་གྲོལ་ལྟར། །དེ་བཞིན་བགེགས་ལས་གྲོལ་བ་རྣམ་པར་གསལ། །
ཞེས་གསུངས་པའོ། །བཟླས་བརྗོད་དང་མཆོད་པ་དང་། སྡིག་པ་ཟད་པ་ལ་སོགས་པའི་ཚོགས་དང་ལྡན་པ་ལ་ལྟོས་ནས་གསང་སྔགས་ཀྱི་འབྲས་བུ་ཐོབ་པར་འགྱུར་གྱི་གཅིག་པུས་ནི་མ་ཡིན་ཏེ། འདི་ལྟར་དངོས་པོ་ཐམས་ཅད་ཚོགས་པ་ལ་སྐྱེའི། རྒྱུ་ཅིག་པུས་འགྲུབ་པ་ནི་ཅུང་
ཟད་ཀྱང་ཡོད་པ་མ་ཡིན་ནོ་ཞེས་བསྟན་པ་ནི་དོན་གཉིས་པ་སྟེ། དེའི་ཕྱིར། ས་དང་ཆུ་དང་དུས་དང་རྣམ་བྲལ་བའི། །སྣོད་གནས་འབྲས་བུ་ལ་ནི་མྱུ་གུ་མེད། །ཅེས་བྱ་བ་ལ་སོགས་པ་གསུངས་སོ། །གསང་སྔགས་ཀྱི་འབྲས་བུའི་ཚོགས་བསྟན་པ་ནི་དོན་གསུམ་པ་སྟེ། དེའི་ཕྱིར། ཆོ་

71-1-42a

ག་ཉམས་ཤིང་ཡི་གེ་གུག་སྐྱེད་མེད། །མཆོད་པ་མེད་ཅིང་མི་གཙང་བཟླས་བརྗོད་བྱས། །གུག་སྐྱེད་ཡི་གེ་ལྷག་པར་གྱུར་པ་ཡིས། །གསང་སྔགས་དངོས་གྲུབ་རྒྱ་ཆེར་མི་སྟེར་རོ། །ཞེས་བྱ་བ་ལ་སོགས་པ་ནས། ཇི་ཙམ་སྡིག་པ་མང་པོའི་རབ་གང་ཞིང་། །ཇི་ཙམ་
ལས་དཀར་བསོད་ནམས་མ་བསགས་དང་། །ཇི་སྲིད་ཆོ་ག་མེད་པར་བཟླས་བྱས་པ། །དེ་སྲིད་སྔགས་པས་དངོས་གྲུབ་མི་ཐོབ་བོ། །ཞེས་པའི་བར་དུ་གསུངས་པའོ། །བག་མེད་པས་ཆོ་ག་ཉམས་བཞིན་དུ་བཟླས་པ་དང་། ཟློས་པའི་བར་བཅད་ནས་རིག་པ་གཞན་བཟླས་པ་དང་། བསྙེན་
པ་ཡོངས་སུ་རྫོགས་ནས་བཟླས་པ་བཏང་ན། གསང་སྔགས་འབུམ་ལྷག་པར་བཟླས་པ་དང་། སྦྱིན་སྲེག་བྱ་བ་དེ་བསྟན་པ་ནི་དོན་བཞི་པ་སྟེ། དེའི་ཕྱིར། ཆོ་ག་ཉམས་སམ་བར་བཅད་སྔགས་གཞན་བཟླས། །བཟླས་པ་བཏང་ངམ་གཞན་ལ་བྱིན་གྱུར་ན། །དུས་གསུམ་མཆོད་པ་ལ་
ནི་བརྩོན་བྱས་ནས། །སླར་ཡང་འབུམ་བཟླས་བསྒྲུབ་ལ་འཇུག་པར་བྱ། །ཞེས་བྱ་བ་ལ་སོགས་པ་ནས། དེ་ལྟར་བྱས་ན་དངོས་གྲུབ་མྱུར་དུ་ཐོབ། །ཅེས་བྱ་བའི་བར་དུ་གསུངས་པའོ། །གཞན་གྱི་གསང་སྔགས་ཀྱིས་རང་གི་གསང་སྔགས་བཅད་དམ། བཅིངས་སམ། མནན་
པར་གྱུར་པ་ན་ཡང་། དངོས་གྲུབ་འདོད་པས་ཚིམ་པར་བྱ་བའི་སྦྱོར་བ་བསྟན་པ་ནི་དོན་ལྔ་པ་སྟེ། ཇི་སྐད་དུ། གཞན་གྱི་གསང་སྔགས་ཀྱིས་ནི་གསང་སྔགས་གང་། །ཞེས་བྱ་བ་ལ་སོགས་པ་ནས། ཞག་བཅུར་བཀྲུ། །དེས་ན་ཞག་བདུན་བྱས་པས་གསང་སྔགས་དག །བཅིངས་པ་དང་
ནི་མནན་ལས་གྲོལ་བར་འགྱུར། །ཞེས་བྱ་བའི་བར་དུ་གསུངས་པའོ། །ཇི་སྐད་གསུངས་པའི་ཆོ་གས་གསང་སྔགས་བསྙེན་ཅིང་སྒྲུབ་པའི་སྦྱོར་བའི་རྣམ་པ་ཐམས་ཅད་ཀྱིས་བསྒྲུབས་ཏེ་མ་གྲུབ་ན། རིག་པ་དེ་ཉིད་ལ་དྲག་པོའི་སྦྱོར་བའི་རྣམ་པར་བྱང་བར་བསྟན་པ་ནི། དོན་དྲུག་པ་
སྟེ། དེ་བསྟན་པའི་ཕྱིར། མཆོད་པ་ལ་སོགས་ཆོ་གར་ལྡན་ཡང་ནི། །ཅི་སྟེ་གསང་སྔགས་འབྲས་བུ་མི་སྟེར་ན། །དེའི་གཟུགས་དུག་དང་སྐེ་ཚེས་བྱུགས་ནས་སུ། །ཀཱི་ལི་ཀཱི་ལ་འགྲོ་ལྡིང་ལ་སོགས་པའི། །སྔགས་ཀྱིས་དེ་ལ་ཡུངས་མར་ཚྭ་སྦྱར་བས། །ཞེས་བྱ་བ་ལ་སོགས་

71-1-42b

པའི་བར་དུ་གསུངས་པའོ། །བདེ་བར་གཤེགས་པའི་གསང་སྔགས་རྣམས་ནི་འདོད་ཆགས་ཞེ་སྡང་སྤངས་པ་ཡིན་ན། དེ་ཇི་ལྟར་གཞན་གྱི་གསང་སྔགས་ལ་གནོད་པར་བྱེད། དེ་དག་ཀྱང་གནོད་པ་ཐམས་ཅད་དང་བྲལ་བ་ཡིན་ན།  གཞན་གྱི་གསང་སྔགས་ཀྱང་ཇི་ལྟར་གནས་པར་
བྱ་ཞེས་བྱ་བའི་ཀླན་ཀ་ཡོངས་སུ་སྤང་བ་ནི་དོན་བདུན་པ་སྟེ། དེའི་ཕྱིར། སྔོན་གྱི་སྔགས་ལུགས་འཆད་པས་བསྟན་མོད་ཀྱི། །ཇི་ལྟར་རྒྱ་མཚོ་དུས་ལས་མི་འདའ་ལྟར། །སྔགས་ཀྱིས་གཞན་གྱི་གསང་སྔགས་མི་མནན་ཅིང་། །བཅིང་དང་གཅད་པ་ནམ་ཡང་མི་བྱའོ། །ཞེས་བྱ་
བ་ལ་སོགས་པ་ནས། དེ་བཞིན་སྔགས་པས་གང་ཡང་རུང་བའི་སྔགས། །བཟླས་ནས་གཞན་གྱི་གསང་སྔགས་མནན་མི་བྱ། །ཞེས་བྱ་བའི་བར་དུ་གསུངས་པའོ། །སྒྲུབ་པ་པོས་གསང་སྔགས་གཅད་པ་དང་། གནོན་གྱི་ལས་དང་དབྱེ་བ་ལ་སོགས་པའི་ལས་ཕྲན་ཚིགས་
རྣམས་མི་བྱ་བར་དགག་པ་ནི་དོན་བརྒྱད་པ་སྟེ། ཇི་སྐད་དུ། གསང་སྔགས་བཅད་དང་གནན་པར་མི་བྱ་ཞིང་། །ཞེས་བྱ་བ་ལ་སོགས་པ་ནས། རྒྱ་མོ་ས་མདའ་རྙི་དང་མཛོལ་བུ་ཡིས། །སེམས་ཅན་གནོད་པར་ནམ་ཡང་མི་བྱའོ། །ཞེས་བྱ་བའི་བར་དུ་གསུངས་པའོ། །འཇིག་རྟེན་དང་
འཇིག་རྟེན་ལས་འདས་པའི་གསང་སྔགས་རྣམས་སྒྲུབ་པའི་ཡན་ལག་ལ་སོགས་པའི་གྲངས་ངེས་པར་བསྟན་པ་ནི་དོན་དགུ་པ་སྟེ། དེའི་ཕྱིར། དངོས་གྲུབ་ཕྱིར་ནི་རྣམ་པ་བཅུར་གསུངས་ཏེ། །སྔགས་པ་དང་ནི་རང་སྔགས་གཡོག་དང་རྫས། །བརྩོན་འགྲུས་ཕྱོགས་དང་ས་གཞི་
དུས་དང་ནི། །ཡན་ལག་རྫོགས་པའི་ལྷ་དང་སེམས་སྟོབས་སོ། །ཞེས་བྱ་བ་ལ་སོགས་པ་ནས། གུག་སྐྱེད་ཀླད་ཀོར་ཚེག་ཚང་ཟུར་ཕྱིན་ལ། །གསང་སྔགས་དག་ཅིང་ཤིན་ཏུ་ཆོ་གར་བཅས། །སངས་རྒྱས་བྱང་ཆུབ་སེམས་དཔའ་བསྟེན་པ་ཡིས། །གནས་སུ་བཟླས་ན་ཡིད་འོང་
དངོས་གྲུབ་ཐོབ། །ཅེས་བྱ་བའི་བར་དུ་གསུངས་པའོ། །སྒྲུབ་པ་ཐ་མ་ལ་འཇུག་པའི་སྒྲུབ་པ་པོས་ཀྱང་ལུས་དང་། ངག་དང་། ཡིད་ཀྱི་བརྩོན་འགྲུས་ཆུང་བར་མི་བྱ་བ་དེ་བསྟན་པ་ནི་དོན་བཅུ་པ་སྟེ། ཇི་སྐད་དུ། ཇི་ལྟར་རི་དྭགས་རྒྱལ་པོ་བཀྲེས་པ་དག །མཐུ་སྟོབས་ཆེན་པོས་

71-1-43a

གླང་ཆེན་གསོད་པ་དང་། །དེ་བཞིན་སྤྱང་ཀུ་ཕག་དང་རི་དྭགས་དང་། །ཞེས་བྱ་བ་ལ་སོགས་པ་ནས། དེ་བཞིན་སྔགས་པ་སེང་གེའི་ཚུལ་གྱིས་སུ། །རབ་དང་འབྲིང་དང་ཐ་མའི་ལས་རྣམས་ལ། །བརྩོན་འགྲུས་ཆེན་པོ་དང་ནི་ལྡན་པ་དང་། །འབད་པ་
མཆོག་རྣམས་ཀྱིས་ཀྱང་བསྟེན་པར་བྱ། །ཞེས་བྱ་བའི་བར་དུ་གསུངས་པའོ། །སེམས་གཡེང་བའི་རྒྱུ་རྣམས་དང་། བཟླས་བརྗོད་ཀྱི་སྐྱོན་རྣམས་སྤངས་པ་ནི་དོན་བཅུ་གཅིག་པ་སྟེ། དེའི་ཕྱིར། རྫ་རྔའི་སྒྲ་དང་དུང་དང་རྔ་སྒྲ་དང་། །ཤིན་ཏུ་འཇིགས་བྱེད་སྐྱེ་བོའི་སྒྲ་དང་ནི། །སེམས་
ནི་གཡེང་ཞིང་ཞེས་བྱ་བ་ལ་སོགས་པ་ནས། བཟླས་བརྗོད་བྱེད་ཚེ་མི་མྱུར་མི་དལ་ཞིང་། །སྒྲ་ཆེར་མི་འབྱུང་ཧ་ཅང་ཆུང་བའང་མིན། །སྨྲ་བཞིན་མ་ཡིན་གཞན་དུ་གཡེང་བཞིན་མིན། །གུག་སྐྱེད་ཀླད་ཀོར་ཚེག་རྣམས་ཉམས་པར་མིན། །ཞེས་བྱ་བའི་བར་དུ་གསུངས་པའོ། །གསང་
སྔགས་ཀྱི་བཟླས་བརྗོད་ཕྱག་དང་བཅས་པར་བྱ་བའི་ཕན་ཡོན་དང་། བཟླས་བརྗོད་བྱེད་པའི་ཚེ།  གསང་སྔགས་ཀྱི་ཡི་གེའམ། ལྷ་ཉིད་ཀྱི་གཟུགས་ལ་གསལ་བར་བསྟན་པ་ནི་དོན་བཅུ་གཉིས་པ་སྟེ། དེའི་ཕྱིར།  ཇི་ལྟར་ཆུ་ཀླུང་ཉིན་མཚན་རྟག་ཏུ་ནི། །རྒྱུན་མི་འཆད་པར་
འབབ་པར་འགྱུར་བ་ལྟར། །དེ་བཞིན་ཕྱག་བཅས་བཟླས་དང་བརྟུལ་ཞུགས་ཀྱི། །བསོད་ནམས་ལུས་ཅན་ལ་ནི་འཕེལ་བར་འགྱུར། །ལེ་ལོ་འདོད་ཆགས་མི་དགེ་བཅས་པའི་སེམས། །གང་དང་གང་དུ་གཡེང་ཞིང་རྒྱུ་བ་དག །དེ་དང་དེ་ནས་མྱུར་དུ་བཟློག་ནས་ནི། །གསང་
སྔགས་ཡི་གེ་མཆོག་ལ་ལེགས་པར་སྦྱར། །ཞེས་བྱ་བ་གསུངས་སོ། །སེམས་ཀྱི་བརྟེན་པ་ཇི་ལྟ་བུར་བྱས་ནས་བཟླས་བརྗོད་བྱ་བ་དེ་བསྟན་པ་ནི་དོན་བཅུ་གསུམ་པ་སྟེ། དེའི་ཕྱིར། སྣ་རྩེར་བལྟ་ཞིང་རྣམ་པར་རྟོག་པ་སྤོང་། །ནམ་ཞིག་བསྐྱོད་ཀྱང་རྣམ་པར་མི་གཡོ་བ། །དེ་
ཚེ་དམིགས་ལ་གནས་པ་ཐོབ་པ་སྟེ། །སེམས་ནི་ལས་སུ་རུང་བར་གྱུར་པར་ངེས། །རྩེ་གཅིག་སེམས་དང་ལྡན་པའི་མི་ལ་ནི། །ཡིད་ལས་བྱུང་བའི་དགའ་བ་རབ་ཏུ་སྐྱེ། །དགའ་བས་ལུས་ནི་ཤིན་ཏུ་སྦྱངས་པ་ཐོབ། །ལུས་སྦྱོངས་པས་ནི་བདེ་བའི་སྐལ་ལྡན་འགྱུར། །ལུས་

71-1-43b

བདེ་རྩེ་གཅིག་སེམས་དང་ཏིང་འཛིན་གྱིས། །དེ་ཚེ་བཟླས་བརྗོད་དོགས་པ་མེད་པར་འགྲུབ། །ཅེས་གསུངས་པའོ། །སྒྲུབ་པ་པོས་སེམས་མཉམ་པར་གཞག་སྟེ། བཟླས་བརྗོད་བྱས་པའི་ཕན་ཡོན་དང་། སེམས་མཉམ་པར་གཞག་པའི་ཕན་ཡོན་མངོན་པར་མཐོ་བ་དང་། ངེས་
པར་ལེགས་པར་འབྲས་བུ་དང་བཅས་པ་གཞན་འབྱུང་བར་བསྟན་པ་ནི་དོན་བཅུ་བཞི་པ་བསྟན་པ་སྟེ། དེའི་ཕྱིར། ཚེ་རབས་གཞན་དུ་གང་དང་གང་བྱས་པའི། །སྡིག་པ་མ་ལུས་བཟླས་བརྗོད་བྱས་པས་འབྱང་། བཟླས་པས་སྡིག་པ་མ་ལུས་བྱང་གྱུར་ན། །དང་བའི་ཡིད་ཀྱིས་
དངོས་གྲུབ་ཐོབ་པར་འགྱུར། །ཞེས་བྱ་བ་ལ་སོགས་པ་གསུངས་པའོ། །སེམས་མཉམ་པར་གཞག་པའི་འབྲས་བུ་རྣམ་པར་བྱང་བ་རྒྱས་པར་བསྟན་ནས། མངོན་པར་ཐོབ་པའི་འབྲས་བུའི་ཕན་ཡོན་ཡང་དག་པར་སྟོན་ཏེ། གསང་སྔགས་དངོས་གྲུབ་ཀུན་དང་ཐུན་མོང་བ། །བདེ་
བ་ཆུང་ཞིང་སྡུག་བསྔལ་བརྒྱ་དང་འབྲེལ། །ཉོན་མོངས་དུག་བཅས་རྣམ་པར་འཇིག་འགྱུར་བ། །དང་བའི་སེམས་ཀྱིས་ཐོབ་པར་གྱུར་པ་ཡིན། །ཞེས་བྱ་བ་གསུངས་པའོ། །སྒྲུབ་པ་པོ་དབང་ཕྱུག་དང་བྱེད་པ་པོ་ལ་སོགས་པ་འཇིག་རྟེན་པའི་ལྟ་བ་དགག་པ་ནི་དོན་བཅོ་ལྔ་
པ་སྟེ། དེའི་ཕྱིར། འདོད་རྒྱལ་ལས་ཀྱང་མ་བྱུང་དུས་ལས་མིན། །རང་བཞིན་དབང་ཕྱུག་ལས་ཀྱང་བྱུང་མ་ཡིན། ཞེས་བྱ་བ་ལ་སོགས་པ་ནས། དེ་ལྟར་མཐོང་བ་ལྟ་བ་བཟང་པོ་ཡིན། །གང་ཞིག་གཞན་གྱུར་དེ་ནི་ལྟ་ངན་གསུངས། །ཞེས་བྱ་བའི་བར་དུ་གསུངས་པའོ། །སྒྲུབ་
པ་པོས་ཀྱང་བཟླས་བརྗོད་ཁྱད་པར་ཅན་ལ་སོགས་པ་གོམས་པར་བྱས་པས་དང་པོར་གསང་སྔགས་ཉེ་བར་འགྱུར་རོ། །དེའི་འོག་ཏུ་བཟླས་བརྗོད་ལ་སོགས་པ་ཉིད་ཀྱིས་བསྙེན་པ་བྱས་ན་དངོས་གྲུབ་ཉེ་བར་འགྱུར་ཏེ། ཉེ་བར་གྱུར་པ་དེ་དག་གི་མཚན་ཉིད་བསྟན་པ་ནི་དོན་བཅུ་དྲུག་པའོ། །
དེ་ལ་གསང་སྔགས་ཉེ་བའི་དོན་གྱི་དབང་དུ་བྱས་ནས། དེ་ལྟར་ཟློས་པའི་གསང་སྔགས་ཉེ་གྱུར་ན། །མཚན་མོ་ཉལ་ན་རྨི་ལམ་འདི་དག་མཐོང་། །ཁང་བཟངས་ལྗོན་ཤིང་རྒྱལ་མཚན་སེང་གེ་རྟ། །རི་བོ་ཤིང་རྟ་སྒྲ་ལྡན་སྤྲིན་དང་ཀླུ། །ཞེས་བྱ་བ་ལ་སོགས་པ་ནས། ཟླ་བ་གཅིག་

71-1-44a

དང་ཟླ་ཕྱེད་ཉིན་ཞག་དང་། །སྐད་ཅིག་གིས་ཀྱང་ཕྱི་ཕྱིར་ཉེ་བར་འགྱུར། །ཞེས་བྱ་བའི་བར་དུ་གསུངས་པའོ།།      །།ལེའུ་དྲུག་པ་ལ་དངོས་གྲུབ་འགྲུབ་པར་འགྱུར་བའི་མཚན་ཉིད་བསྟན་པ་ནི་དོན་དང་པོ་སྟེ། དངོས་གྲུབ་ཉེ་ན་ཟློས་ལ་དགའ་བ་དང་། །སེམས་ནི་སྡིག་ལ་
ནམ་ཡང་འཇུག་མི་འགྱུར། །བཀྲེས་སྐོམ་ཚ་གྲང་རླུང་དང་ངལ་བ་ཡི། །སྡུག་བསྔལ་དྲག་པོས་ཉེན་ཀྱང་གཡོ་མི་འགྱུར། །ཞེས་བྱ་བ་ལ་སོགས་པ་ནས། གང་ཚེ་མཁའ་ལ་ལྷ་དང་གནོད་སྦྱིན་དང་། །དྲི་ཟ་ལྷ་ཡི་བུ་མོའི་ལུས་དང་སྒྲ། །མིས་ནི་དགའ་བའི་ཡིད་ཀྱིས་མཐོང་ཐོས་
ན། །དེ་ཚེ་ཤིན་ཏུ་ཉེ་བར་གྱུར་པ་ཡིན། །ཞེས་བྱ་བའི་བར་དུའོ། །དེ་ལྟར་བདག་ཉིད་ལ་དངོས་གྲུབ་ཉེ་བར་གྱུར་པར་རིག་པ་དང་། ཉིན་ཞག་གཅིག་གམ་གཉིས་སམ། གསུམ་དུ་སྨྱུང་བ་བྱས་ནས། སྒྲུབ་པ་ལ་འཇུག་པར་བྱ་བ་དེ་བསྟན་པ་ནི་དོན་གཉིས་པ་སྟེ། དེ་ནི། ལུས་ནི་དྲི་
མེད་དག་པར་རིག་པ་དང་། །ཞེས་བྱ་བ་ལ་སོགས་པས་བསྟན་ཏོ། །སྨྱུང་བར་བྱ་བའི་རྒྱུ་བསྟན་པ་ནི་དོན་གསུམ་པ་སྟེ། གསུང་དེ་དཔུང་བཟངས་ཀྱིས་ཐོས་སླར་གསོལ་བ། །ཟས་ཀྱིས་མི་འདག་ཅེས་ནི་སྔར་གསུངས་ན། །མཆོད་འོས་ཁྱོད་ཀྱིས་ལུས་ངག་བགྱི་ཕྱིར་ཡང་། །ཅི་སླད་
སྨྱུང་བ་མི་བཟད་བགྱི་བར་གསུངས། །ཞེས་བྱ་བ་ནས། དྲི་མ་ཟད་ནས་མི་ཡི་ལུས་དག་ནི། །རང་གི་འབྱོར་ཕྱིར་སྒྲུབ་ལ་བདེ་བར་འཇུག །ཅེས་བྱ་བའི་བར་དག་གོ། །སྒྲུབ་པ་པོའི་འདོད་ཆགས་ལ་སོགས་པ་རབ་ཏུ་ཞི་བར་བྱ་བའི་ཕྱིར་མི་གཙང་བ་བསྒོམ་པ་བསྟན་པ་དང་། སྒྲུབ་པ་རབ་
དང་། འབྲིང་དང་། ཐ་མ་རྣམས་སྒྲུབ་པའི་ཚེས་གྲངས་ངེས་པར་བསྟན་པ་ནི་དོན་བཞི་པ་སྟེ། དེའི་ཕྱིར། འདོད་ཆགས་ཀྱིས་ནི་གདུངས་པར་གྱུར་ན་ཡང་། །ལུས་ཀྱི་ཡན་ལག་འདི་དག་ཐམས་ཅད་ལ། །དྲན་པ་རྩེ་གཅིག་མངོན་དུ་བྱས་ནས་ནི། །ཡེ་ཤེས་མིག་གིས་སོ་སོར་རྣམ་
པར་བརྟག །ཅེས་བྱ་བ་ལ་སོགས་པ་ནས། ཡར་གྱི་ཚེས་བརྒྱད་དམ་ནི་བཅུ་བཞིའམ། །ཡང་ན་བཅོ་ལྔ་ལ་ནི་བཟླས་བརྗོད་བྱ། །ཞེས་བྱ་བའི་བར་དུ་གསུངས་པའོ། །སྒྲུབ་པ་ལ་འཇུག་པའི་ཡོ་བྱད་བསྟན་པ་ནི་དོན་ལྔ་པ་སྟེ། ལྷ་ཡི་གནས་ཀྱི་ས་དག་བསྟར་བའི་ཕྱིར། ས་དང་

71-1-44b

ལྕི་བར་བསྲེས་ལ་སོགས་པས་བྱུག །ཅེས་བྱ་བ་ལ་སོགས་པ་ནས། སྦྱིན་བླུགས་བརྒྱ་ཕྲག་བཅུར་ཡང་བསྲེག་པར་བྱ། །ཞེས་བྱ་བའི་བར་དུའོ། །དེ་བཞིན་དུ་རྫས་ལས་བྱུང་བའི་དངོས་གྲུབ་དང་། རྫས་མ་ཡིན་པ་ལས་བྱུང་བའི་དངོས་གྲུབ་ཀྱི་མཚན་མ་ཅི་རིགས་སུ་བསྟན་པ་དང་། དེ་
ཉིད་ཀྱི་འབྲས་བུ་འབྱུང་བར་བསྟན་པ་ནི་དོན་དྲུག་པ་སྟེ། དེའི་ཕྱིར། དྲོ་དང་དུད་འཐུལ་མེ་བཞིན་འབར་བ་དང་། །རིམ་བཞིན་བཟློག་ནས་བྱུང་ནའང་འགྲུབ་པར་གསུངས། །དྲོ་བས་འགྲོ་བ་ཐམས་ཅད་དབང་འགྱུར་ཏེ། །དུད་པ་འཐུལ་བས་ལུས་ནི་སྣང་བར་འགྱུར། །འབར་བས་མཁའ་
ལ་ཤིན་ཏུ་འགྲོ་འགྱུར་ཏེ། །ཞེས་བྱ་བ་ལ་སོགས་པ་ནས། གསང་སྔགས་གཟུགས་ནི་མངོན་དུ་མཐོང་ན་འགྲུབ། །ཅེས་བྱ་བའི་བར་དུ་གསུངས་པའོ། །སྒྲུབ་པའི་དུས་ན་མཆོད་ཡོན་དབུལ་བའི་ཆོ་ག་དང་། མཆོག་བསླང་བར་བསྟན་པ་དང་། དེ་བཞིན་དུ་མཆོག་ཐོབ་ནས་ཀྱང་
ལྷ་ཉིད་སླར་གཤེགས་སུ་གསོལ་བར་བསྟན་པ་ནི་དོན་བདུན་པ་སྟེ། དེའི་ཕྱིར། མེ་ཏོག་མ་ཉམས་དབྱིག་དང་ཆུར་བསྲེས་ཤིང་། །བསྟོད་དང་བཅས་པ་མཆོད་པ་རྒྱུན་བསྲིངས་ནས། །རྩེ་གཅིག་ཡིད་ཀྱིས་མགོ་བཏུད་ཕྱག་བྱས་ཏེ། །དད་དང་འབད་པའི་རྗེས་མཐུན་མཆོག་སློང་ངོ་། །
མཆོག་ཐོབ་ནས་ནི་དགའ་བས་ཕྱག་བྱས་ཏེ། །དད་པས་བསྟོད་ཅིང་མཆོད་ཡོན་ཕུལ་ནས་སུ། །གསང་སྔགས་བརྗོད་ནས་སླར་ཡང་གཤེགས་སུ་གསོལ། །གསང་སྔགས་ཀུན་ལ་ཚུལ་ནི་འདི་ཡིན་ནོ། །ཞེས་གསུངས་སོ། །རོ་ལངས་སྒྲུབ་པ་པོའི་མཚན་ཉིད་དང་། རོ་ལངས་
བསླང་བའི་མཚན་ཉིད་དང་། རོ་ལངས་འགྲུབ་པའི་གནས་བསྟན་པ་དང་། རོ་ལངས་པའི་དངོས་གྲུབ་པའི་དཀྱིལ་འཁོར་རྣམས་ཁ་བསྟན་པ་དང་། རོའི་ལུས་བྱི་དོར་བྱ་བ་དང་། མཆོད་པ་རྣམ་པ་ལྔའི་ཡོ་བྱད་ཀྱི་ཆོ་ག་དང་།  གསང་སྔགས་བཟླས་བརྗོད་བྱ་བའི་ཆོ་ག་དང་། རོ་ལངས་པ་
ལ་བགེགས་བྱུང་བ་རབ་ཏུ་ཞི་བར་བྱ་བ་དང་། དངོས་གྲུབ་བསླང་བ་ནི་དོན་བརྒྱད་པ་སྟེ། དེའི་ཕྱིར། སེམས་སྟོབས་མཆོག་དང་ཡང་དག་ལྡན་པ་དེས། །འདིར་ནི་ཤིན་ཏུ་འཇིགས་པའི་ཡིད་ཀྱང་བྱ། །སེམས་སྟོབས་ཆུང་བའི་མི་ལ་ཤ་ཟ་ཡིས། །གླགས་མཐོང་ནས་ནི་འཕུང་བར་བྱེད་

71-1-45a

པར་འགྱུར། །ཞེས་བྱ་བ་ལ་སོགས་པ་ནས། གང་ཞིག་གསང་སྔགས་ཆོ་ག་ཞིབ་མོ་ལས། །མཐོང་བའི་དངོས་གྲུབ་དེ་ནི་ཐོགས་མེད་ངེས། །ཞེས་བྱ་བ་འདིར་རྒྱས་པར་སྦྱར་རོ། །རོ་ལངས་བསླང་བའི་གསང་སྔགས་ཀྱི་དངོས་གྲུབ་ཀྱི་གྲངས་བསྟན་པ་དང་། སེམས་
སྟོབས་མེད་པའི་སྒྲུབ་པ་པོ་རོ་ལངས་སློང་བའི་ཉེས་པ་བསྟན་པ་ནི་དོན་དགུ་པ་སྟེ། དེའི་ཕྱིར། གཏེར་གྱི་ཕྱོགས་དང་ཕུག་ཏུ་འགྲོ་བ་དང་། །རལ་གྱི་ཨཉྫ་ན་བཞོན་མངག་གཞུག་དང་། །འབྱུང་ཀུན་གསེར་བསྒྱུར་རྩི་དང་བཅུད་ཀྱིས་ལེན། །མཁའ་ལ་འགྲོ་བའི་དངོས་གྲུབ་རབ་ཏུ་སྟེར། །
བསྲུང་བའི་སྟོབས་མེད་སྔགས་ཀྱི་སྟོབས་མེད་དང་། །དཀའ་ཐུབ་སྟོབས་མེད་སེམས་སྟོབས་མེད་པ་ཡི། །བློ་ཞན་གང་ཞིག་རོ་ལངས་དངོས་གྲུབ་ཚོལ། །དེ་ནི་མཚན་མོ་རྒྱུ་བ་རྣམས་ཀྱིས་བསད། །ཅེས་གསུངས་པའོ།།      །།ལེའུ་བདུན་པ་ལ་ཤ་ཆེན་པོ་བཙོང་བའི་ཆོ་ག་བསྟན་
པ་ནི་དོན་དང་པོ་སྟེ། ཇི་སྐད་དུ། མི་གང་མི་ཡི་ཤ་ནི་འཚོང་འདོད་དེས། །མར་གྱི་ངོ་ལ་དུར་ཁྲོད་སོང་ནས་སུ། །ཞེས་བྱ་བ་ལ་སོགས་པ་ནས། ཤ་ཡི་ཆོ་ག་ངས་གསུངས་དེ་དག་ནི། །གསང་སྔགས་མ་བཟླས་པ་ཡིས་བསྟེན་མི་བྱ། །རིགས་མཆོག་གཙུག་ཏོར་སྟོབས་ཆེན་ལ་སོགས་པས། །
དུར་ཁྲོད་དུ་ནི་བསྲུང་བར་ངས་གསུངས་སོ། །ཞེས་བྱ་བའི་བར་དུ་གསུངས་པའོ། །དེ་བཞིན་དུ་དབབ་པ་དང་། བསྐྲད་པར་བྱ་བ་དང་། མ་དག་གཞོམ་པ་དང་། གྲོང་དང་གྲོང་ཁྱེར་དུ་གནོད་པ་བྱེད་པ་འབྱུང་བར་བྱ་བ་དང་། ཤ་ཟ་དང་། སྲིན་པོ་དང་། ས་བླ་དང་། གནོད་སྦྱིན་དང་། མ་མོ་
དང་། དྲག་པོ་ལ་སོགས་པའི་ལྷ་རྣམས་ལ་མིའི་ཤ་དང་། དེ་བཞིན་དུ་བ་ལང་དང་། མ་ཧེའི་ཤ་ལ་སོགས་པ་ཤའི་སྦྱིན་སྲེག་གི་ཆོ་ག་བྱ་བར་བསྟན་པ་ནི་དོན་གཉིས་པ་སྟེ། དེའི་ཕྱིར། གསང་སྔགས་དྲག་པོ་གང་ཞིག་ཤ་ཟ་བ། །དེ་ལ་དུར་ཁྲོད་མི་ཤ་སྦྱིན་སྲེག་བྱ། །ཞེས་བྱ་བ་ལ་སོགས་
པ་ནས། །མི་ཡི་ཤ་ནི་རྙེད་པར་མ་གྱུར་ན། །བ་ལང་ཤ་ནི་སྦྱིན་སྲེག་དེ་བཞིན་ཤིས། །མ་ཧེའི་ཤའམ་ཁྱི་ཤ་མར་བསྲེས་པ། །ཚེས་གྲངས་དག་ལ་སྨྱུང་བྱས་སྦྱིན་སྲེག་བྱ། །ཞེས་བྱ་བའི་བར་དུ་གསུངས་པའོ། །དེ་བཞིན་དུ་འཇིག་རྟེན་དང་འཇིག་རྟེན་ལས་འདས་པའི་རྒྱུད་དུ་གསུངས་

71-1-45b

པའི་གནོད་སྦྱིན་མོའི་གསང་སྔགས་རྣམས་ཀྱི་མཆོག་ལ་སོགས་པའི་དབྱེ་བ་བསྟན་པ་དང་། སྤྱིའི་མཆོད་པའི་ཡོ་བྱད་ཀྱི་མཚན་ཉིད་བསྟན་པ་ནི་དོན་གསུམ་པ་སྟེ། ཇི་སྐད་དུ། གནོད་སྦྱིན་མོ་ཡི་ཆོ་ག་ཞིབ་མོར་ནི། །གསང་སྔགས་མཉེས་བྱས་གྲུབ་པའི་དེ་རྣམས་སྟེར། །མ་དང་
སྒྱུག་མོ་སྲུ་མོ་གྲོགས་མོ་དང་། །བུ་མོ་ཆུང་མ་མནའ་མར་གྲུབ་པར་འགྱུར། །མ་དང་སྒྱུག་མོ་སྲུ་མོ་གང་ཡིན་དེ། །ཡིད་བཞིན་རིན་ཆེན་བཞིན་དུ་གྲུབ་པ་མཆོག །ཡིད་འོང་གྲོགས་མོ་བུ་མོ་གྲུབ་པ་འབྲིང་། །ཆུང་མ་མནའ་མ་གྲུབ་པ་ཐ་མར་བསྒྲགས། །དུས་གསུམ་དུ་ནི་མེ་ཏོག་
ཕྲེང་བ་དྲི། །མར་རམ་འབྲུ་མར་མར་མེ་ཙནྡན་དང་། །ཨ་ཀར་དྲི་ཞིམ་བདུག་པས་མཆོད་པ་དང་། །གཏོར་མ་སྣ་ཚོགས་རྟག་ཏུ་མཚན་མོ་སྦྱིན། །ཞེས་གསུངས་པའོ། །གནོད་སྦྱིན་མོ་མངོན་དུ་ཕྱོགས་པར་གྱུར་པའི་མཚན་མ་བསྟན་པ་ནི་དོན་བཞི་པ་སྟེ། དེའི་ཕྱིར། གནོད་
སྦྱིན་མོ་ནི་དགའ་ནས་མངོན་ཕྱོགས་ནས། །རྙེད་པ་རྙེད་ཅིང་ས་བོན་འབྱུང་བར་བྱེད། །འདོད་ཆགས་ཟིལ་གྱིས་ནོན་པའི་བུད་མེད་དག །གནོད་པ་བྱེད་ཚེ་འགྲོ་བར་མི་བྱ་ཞིང་། །རྙེད་པ་མང་ཉུང་ལ་ཡང་འདོད་མི་བསྐྱེད། །སྔགས་ལས་མཚན་མོ་ཁྲུས་ནི་དག་བྱས་ནས། །བརྩོན་འགྲུས་
རབ་ཏུ་བསྐྱེད་དེ་བསྒྲུབ་པར་བྱ། །སྔགས་པ་སེམས་རྨོངས་པ་དག་གཞན་དུ་ནི། །བརྩམས་ན་ཕུང་བར་ཡང་ནི་འགྱུར་བ་ཉིད། །ཅེས་བྱ་བ་གསུངས་སོ། །དེ་བཞིན་དུ་ཤ་ཟ་མོའི་གནོད་སྦྱིན་དང་། ཀླུ་སྒྲུབ་པའི་ཆོ་ག་སྒྲུབ་པ་ནི་དོན་ལྔ་པ་སྟེ། དེའི་ཕྱིར། ཤ་ཟའི་གནོད་སྦྱིན་མ་
ལའང་དེ་བཞིན་ཏེ། །དེ་ལས་ཆོ་ག་ལྷག་པ་འདི་རྣམས་བྱ། །ཤ་ཆང་ལ་ཕུག་ཚོད་མ་ཅུང་པེང་དང་། །ནས་ཆན་མ་ཤའི་ཆན་དང་འབྲས་ཆན་ཉ། །ཞེས་བྱ་བ་ལ་སོགས་པ་ནས། ཕྲེང་བ་མེ་ཏོག་བྱུག་པ་སྔོན་པོ་དག །ཇི་རྙེད་བྲང་གིས་འགྲོ་བ་རྣམས་ལ་དབུལ། །ཞེས་བྱ་བའི་བར་དུ་
གསུངས་པའོ། །གསལ་བར་སྟོན་པ་དབབ་པའི་ཕྱིར། མཐེ་བོང་དང་མེ་ལོང་ལ་སོགས་པ་བཞི་རྣམས་བསྟན་པ་ནི་དོན་དྲུག་པ་སྟེ། དེའི་ཕྱིར། མཐེ་བོང་མེ་ལོང་རལ་གྲི་ཆུ་དང་ཤེལ། །མར་མེ་ས་གཞི་ལྕགས་དང་ནམ་མཁའ་དང་། །ལྷ་གཟུགས་ལྷུང་བཟེད་ནོར་བུ་མེ་འབར་

71-1-46a

བ། །འདི་ལ་གསལ་བར་སྟོན་པ་རྟག་ཏུ་འབྱུང་། །ཞེས་བྱ་བ་གསུངས་སོ། །གསལ་བར་སྟོན་པ་རྣམས་ཕེབས་པའི་གྲུབ་པ་བསྟན་པ་ནི་དོན་བདུན་པ་སྟེ། ཇི་སྐད་དུ། འདས་པ་དང་ནི་མ་འོངས་ད་ལྟར་བྱུང་། །མཐོ་རིས་ས་སྟེང་དུས་དང་མི་ལྡན་ཡང་། །ལྷ་
དང་ལྷ་མི་དགེ་དང་མི་དགེ་བའི། །ལས་རྣམས་ཐམས་ཅད་གསལ་བར་སྟོན་པར་རྟོགས། །ཞེས་བྱ་བ་གསུངས་སོ། །གསལ་བར་སྟོན་པ་རྣམས་མི་འབབ་པའི་ཉེས་པ་གང་ཡིན་པ་དང་། མཐེ་བོང་ལ་སོགས་པ་ལ་བབས་ན་ཡང་བདེན་པར་མི་སྟན་པ་དང་། ལོག་པར་སྟོན་པ་དང་། 
ཅུང་ཟད་ཙམ་སྟོན་པར་བྱེད་པ་དེ་བསྟན་པ་ནི་དོན་བརྒྱད་པ་སྟེ། ཇི་སྐད་དུ། ཆོ་ག་ཉམས་པའམ་ཡང་ན་ཕྱེད་བཟླས་སམ། །ཡི་གེ་ཆད་དམ་ཡི་གེ་ལྷག་པའམ། །བཟླས་བརྗོད་མ་བྱས་དད་པ་མེད་པ་དང་། །མཆོད་པ་མེད་ཅིང་ས་གཞི་མི་གཙང་དང་། །སྤྲིན་གྱི་ཚོགས་ཀྱིས་ཉི་ཟེར་
བསྒྲིབས་པ་དང་། །བྱིས་པ་ཡན་ལག་ཉམས་ཤིང་ལྷག་པ་དང་། །དེ་ལྟ་བུ་ལ་མི་ཡི་གསལ་སྟོན་པ། །འབབ་པར་མི་འགྱུར་དགོས་པ་ཡོང་མི་སྟོན། །ཞེས་བྱ་བ་གསུངས་སོ། །གསལ་བར་སྟོན་པ་ཐམས་ཅད་དབབ་པའི་ཆོ་ག་གང་ཡིན་པ་དེ་བསྟན་པ་ནི་དོན་དགུ་པ་སྟེ། ཇི་
སྐད་དུ། གསལ་སྟོན་དབབ་ཕྱིར་སྔོན་དུ་ཆོ་ག་བཞིན། །བཟླས་ཤིང་ཚེས་གྲངས་བཟང་ལ་སྔགས་པ་ཡང་། །སྨྱུང་བྱས་དགོངས་ཀར་ས་དང་ལྕི་བ་ཡིས། །བ་ཀོ་ཙམ་གྱིས་ས་གཞི་ལེགས་པར་བྱུག །བྱུག་སྤོས་དང་ནི་བདུག་སྤོས་མེ་ཏོག་དང་། །ལྷ་བཤོས་མར་མེ་དག་ཀྱང་
ཕུལ་ནས་སུ། །བྱིས་པ་གཞོན་ནུ་སྟ་གོན་གནས་པར་བྱ། །དེ་ནས་ནང་པར་ཆོ་ག་འདི་ཀུན་བྱ། །ཁྲུས་བྱས་ལུས་ལ་གོས་དཀར་གཙང་བགོས་ཏེ། །ཤར་ཕྱོགས་ཁ་བལྟས་ཀུ་ཤའི་སྟན་སྟེང་དུ། །འདུག་ནས་གསང་སྔགས་རྗེས་སུ་དྲན་པར་བྱ། །མེ་ལོང་ཐལ་བ་གཙང་མས་ལན་བདུན་
ནམ། །བརྒྱད་དམ་ཡང་ན་བཅུར་ནི་ཕྱིས་ནས་སུ། །རྩེ་གཅིག་སེམས་ཀྱིས་གསང་སྔགས་ཟློས་བཞིན་དུ། །བྱིས་པ་གཞོན་ནུ་ནུབ་ཏུ་ཁ་ལྟས་པས། །ལྷ་ཡི་མིག་གིས་བལྟས་ན་འདས་པ་དང་། །ད་ལྟར་དང་ནི་མ་འོངས་མཐོང་བར་འགྱུར། །མེ་ལོང་ཞེས་བྱའི་ཆོ་ག་མཐའ་དག་ནི། །

71-1-46b

རལ་གྲི་གསལ་བར་སྟོན་ལ་སྦྱར་བར་བྱ། །མཐེ་བོང་རྒྱ་སྐྱེགས་ཁུ་བས་བསྐུས་ནས་སུ། །འབྲུ་མར་དྲི་ཞིམ་དག་གིས་གདབ་པར་བྱ། །བུམ་པ་གཙང་མ་ཆུས་བཀང་མི་ཡོར་བཞག །ས་ལྟར་ལྷུང་བཟེད་ནོར་བུ་ཆུ་ཡིས་དགང་། །སྐུ་གཟུགས་ལ་ནི་མེ་ཏོག་བྱུག་སྤོས་དབུལ། །དེ་ནས་
བྱིས་པ་གཞོན་ནུས་བལྟ་བར་བྱ། །ཞེས་གསུངས་སོ། །གསལ་བར་སྟོན་པ་དབབ་པའི་དགོས་པ་བསྟན་པ་ནི་དོན་བཅུ་པ་སྟེ། ཇི་སྐད་དུ། གསལ་བར་སྟོན་དང་རྨི་ལམ་ལ་སོགས་ལས། །དངོས་གྲུབ་བརྟགས་ཏེ་དེ་ནས་བཟླས་བརྗོད་བྱ། །ཞེས་བྱ་བ་གསུངས་སོ། །དེ་བཞིན་དུ་
གལ་ཏེ་རྒྱུ་ཞིག་ལ་གསལ་བར་སྟོན་པ་ཕེབས་ཀྱང་། མཆོད་པ་ཉམས་པ་ལ་སོགས་པའི་ཉེས་པས་སྒྲུབ་པ་ལ་སོགས་པ་གཏན་ལ་ཕེབས་པར་མ་གྱུར་ན། དེའི་ཚེ་སྔར་རིག་སྔགས་མི་གདུག་པ་ཆོ་ག་བཞིན་དུ་བཟླས་བརྗོད་བྱས་ནས།  ཁྱེའུ་དང་བུ་མོ་ལ་ཕབ་སྟེ། དངོས་གྲུབ་ལ་
སོགས་པ་གཏན་ལ་དབབ་པར་དྲི་བ་དེ་ནི་དོན་བཅུ་གཅིག་པ་སྟེ། ཇི་སྐད་དུ། གལ་ཏེ་ཡིད་ནི་ཆེས་པར་མ་གྱུར་ན། །དེས་ན་རིག་སྔགས་མི་གདུག་བཟླས་བརྗོད་བྱ། །ཞེས་བྱ་བ་ལ་སོགས་པ་ནས། སྔ་མ་བཞིན་དུ་གསང་སྔགས་ཆོ་ག་དག །དམ་ཚིག་ཇི་བཞིན་མ་ལུས་སྦྱར་ན་
ནི། །བདག་གི་ཡིད་དང་མཐུན་པའི་དངོས་གྲུབ་ཐོབ། །སྔགས་པ་ཡུན་རིང་ཉོན་མོངས་མི་འགྱུར་རོ། །ཞེས་བྱ་བའི་བར་དུ་གསུངས་སོ།།      །།དེ་བཞིན་དུ་ལེའུ་བརྒྱད་པ་འདིར་ནི། ཐར་པ་འདོད་པ་རྣམས་ཁོ་ནས། འཕགས་པའི་ལམ་ཡན་ལག་བརྒྱད་པ་ལ་སོགས་པའི་བསླབ་
པའི་མཚན་ཉིད་འཇུག་པ་དང་ལྡོག་པའི་བསླབ་པ་ལ་བདག་ཉིད་མངོན་པར་བརྩོན་པར་བྱ་བར་མ་ཟད་ཀྱི་གསང་སྔགས་སྒྲུབ་པས་ཀྱང་འཇུག་ཅིང་གོམས་པར་བྱ་དགོས་སོ་ཞེས་གསུངས་པར་བསྟན་པ་ནི་དོན་དང་པོ་སྟེ། དེའི་ཕྱིར། སངས་རྒྱས་ཀྱིས་གསུངས་ཡན་ལག་བརྒྱད་
ལམ་ནི། །ཡང་དག་འཚོ་དང་ལས་མཐའ་ཞེས་བྱ་བ་ལ་སོགས་པ་ནས། ཡུལ་སའི་གཏམ་དང་མི་དབང་བརྟེན་པ་དང་། །དམག་དང་གྱད་དང་ན་ཆུང་གཏམ་དག་དང་། །སྒྲུང་ལྡེབས་དང་ནི་སྔོན་གྱི་ལོ་རྒྱུས་གཏམ། །འདོད་ཆགས་དང་ནི་སྨད་འཚོང་གཏམ་མི་བྱ། །ཞེས་བྱ་བའི་

71-1-47a

བར་དུ་གསུངས་པའོ། །དེ་བཞིན་དུ་སྒྲུབ་པ་པོ་ནི་རྣམ་པ་གཉིས་ཏེ། ལ་ལ་ནི་གནས་གཅིག་ཁོ་ནར་སྔར་བསྙེན་པ་ཡོངས་སུ་རྫོགས་པར་བྱ་བའི་བསམ་པས་མཆོད་ཡོན་ཕུལ་ཏེ། སྔོན་དུ་བསྙེན་པའི་བཟླས་བརྗོད་རྩོམ་པར་བྱེད་དོ། །གཞན་དག་ནི་དགུན་དང་
དཔྱིད་ཟླ་བརྒྱད་ལ་གནས་མ་ངེས་པ་ཉིད་དུ་སྔར་བསྙེན་པའི་བཟླས་བརྗོད་བྱེད་ཅིང་། དབྱར་ཟླ་བ་གསུམ་ནི་གནས་གཅིག་ཏུ་སྔར་བསྙེན་པའི་བཟླས་བརྗོད་རྫོགས་པར་བྱ་སྟེ་སྒྲུབ་པར་བྱེད་དོ། །དེ་དག་ཀྱང་བསོད་སྙོམས་ལ་འགྲོ་བ་ལ་མ་གཏོགས་པར་ཟློས་པའི་གནས་ལས། 
གཞན་གྲོང་དང་གྲོང་ཁྱེར་ལ་སོགས་པར་འཕྱེན་དུ་འགྲོ་བ་དགག་པར་བསྟན་པ་དེ་ནི་དོན་གཉིས་པ་སྟེ། དེའི་ཕྱིར། སྔགས་པ་གསང་སྔགས་བཟླས་པ་མནོས་པ་ནི། །གྲོང་དང་གྲོང་ཁྱེར་ཁྱིམ་དང་གཙུག་ལག་ཁང་། །མཆོད་རྟེན་དང་ནི་བསྟི་གནས་དཀའ་ཐུབ་གནས། །ཀུན་དགའ་
ལུ་མ་རྫིང་བུར་འགྲོ་མི་བྱ། །སྔར་བཤད་པ་ཡི་གནས་རྣམས་མ་རྙེད་ན། །ལྷ་ཁང་སྟོང་པ་དག་གམ་ཤིང་དྲུང་ངམ། །རི་དང་ཆུ་བོ་ཆུ་ཀླུང་འབབ་ཆུ་དང་། །ནགས་ཚལ་སྟོང་པ་དང་ནི་ཡུལ་སྟོང་དང་། །གནས་གང་རུང་བར་སྔགས་པས་གནས་ཤིང་བཟླས། །ཞེས་བྱ་བ་རྒྱས་
པར་གསུངས་པ་དང་། ཡང་ན་གནས་ནི་ངེས་པར་མ་བྱས་ན། །ཟླ་བ་བརྒྱད་པོ་འདི་ཡི་དུས་དག་ཏུ། །གནས་འདི་གང་ཡང་རུང་བ་ཅིག་ཏུ་བསྟན། །ཞེས་བྱ་བ་རྒྱ་ཆེར་གསུངས་སོ། །སྒྲུབ་པ་པོས་བསྙེན་པ་ཡོངས་སུ་རྫོགས་ཀྱང་དབྱར་གྱི་དུས་སུ་སྒྲུབ་པ་དགག་པ་དང་། མ་གྲུབ་
ཀྱི་བར་དུ་བཟླས་བརྗོད་ཡོངས་སུ་མི་བཏང་བ་དང་། བསྒྲུབ་པའི་དུས་སུ་དབང་བསྐུར་བའི་དཀྱིལ་འཁོར་དུ་དབང་བསྐུར་བ་དང་། བདག་ཉིད་བསྲུང་བར་བྱ་བ་དེ་བསྟན་པ་ནི་དོན་གསུམ་པ་སྟེ། དེའི་ཕྱིར།  སྔགས་པ་དབྱར་ནི་སྒྲུབ་ལ་མི་འཇུག་པར། །བཟླས་བརྗོད་ཀྱིས་ནི་དུས་
ཀྱང་འདས་པར་བྱ། །དབྱར་འདས་ནས་ནི་གསང་སྔགས་གཟི་བསྐྱེད་པས། །བདག་ཉིད་བསྲུང་བྱས་སྒྲུབ་ལ་འཇུག་པར་བྱ། །ཞེས་བྱ་བ་གསུངས་སོ། །དེ་བཞིན་དུ་ཞི་བ་ལ་སོགས་པའི་ཆོ་གའི་ལས་ཀྱི་ཁྱད་པར་གྱིས་སྦྱིན་སྲེག་གི་ཐབ་ལ་སོགས་པའི་མཚན་ཉིད་བསྟན་པ་ནི་

71-1-47b

དོན་བཞི་པ་སྟེ། དེའི་ཕྱིར། མེ་ཐབ་ཟླུམ་པོ་གྲུ་གསུམ་གྲུ་བཞི་དང་། །པདྨ་ལྟ་བུར་བྱས་ཏེ་དབྱིབས་ལེགས་ཤིང་། །ཞེས་བྱ་བ་ལ་སོགས་པ་ནས། ཟླུམ་པོར་དབང་ཐང་བསྐྱེད་དང་ནོར་དགུག་དང་། །སྤྱན་དྲང་ཞི་བའི་ཆོ་ག་བྱ་བར་ཤིས། །གྲུ་གསུམ་དུ་ནི་དགར་བསྐྲད་བསད་པ་
དང་། །གཤེད་བྱེད་ལ་སོགས་དྲག་པོ་རྣམས་ཀྱང་བྱ། །གྲུ་བཞི་པོར་ནི་ཀླུ་དང་གསང་བ་པོའི། །ལུས་གཞིག་པ་དང་བསྲེག་པར་བྱ་བ་ཡིན། །པདྨའི་དབྱིངས་སུ་བུད་མེད་བུ་མོ་གྲོང་། །ཡུལ་འཐོབ་པའམ་དོན་ཀུན་སྒྲུབ་པར་ཤིས། །ཞེས་བྱ་བའི་བར་དུ་གསུངས་པའོ། །དེ་
ལྟར་སྔར་བསྙེན་པའི་སྦྱིན་སྲེག་གི་ཆོ་ག་གསུངས་པ་དེའི་ཕྱིར། མེ་ཐབ་བསྟར་བར་བསྟན་པ་ནི་དོན་ལྔ་པ་སྟེ། ཇི་སྐད་དུ། མེ་ཐབ་ལྕི་བ་གཙང་མས་བྱུགས་ནས་ཀྱང་། །ཞེས་བྱ་བ་ལ་སོགས་པ་ནས། རླུང་ཡབ་ཀྱིས་ནི་མེ་ཡང་སྦར་བྱས་ནས། །ཞེས་བྱ་བའི་བར་དུ་གསུངས་
པའོ། །དེ་ལ་སྔར་བསྙེན་པའི་དུས་ཀྱི་སྦྱིན་སྲེག་ཀྱང་རྣམ་པ་གཉིས་སུ་འདོད་དེ། དེ་ལ་གཅིག་ནི་བགེགས་རྣམས་ཞི་བར་བྱ་བའི་ཕྱིར་བདུད་རྩི་ཐབ་སྦྱོར་གྱིས་བྱ་བ་དང་། དེ་ལས་གཞན་པའི་ནི་རང་གི་ལྷ་གཟི་བརྗིད་བསྐྱེད་པའི་ཆེད་ཡིན་པར་བསྟན་པ་ནི་དོན་དྲུག་པ་སྟེ། ཇི་སྐད་དུ། 
སངས་རྒྱས་རྣམས་ལ་ཕྱག་བྱས་ཁྲོ་བོ་ནི། །བདུད་རྩི་འཁྱིལ་པས་མ་ཉམས་པདྨའམ། །མ་གྲུགས་ཏིལ་ནག་ལས་ནི་བདུན་ནམ་བརྒྱད། །བཅུའམ་ཉི་ཤུར་མེ་ལ་སྦྱིན་སྲེག་བྱ། །ཞེས་བྱ་བ་ལ་སོགས་པ་ནས། མར་དང་སྦྲང་རྩི་འོ་མ་ལ་བཏགས་ནས། །རང་གི་གསང་སྔགས་
འགྲུབ་ཕྱིར་སྦྱིན་སྲེག་བྱ། །ཞེས་བྱ་བའི་བར་དུ་གསུངས་པའོ། །དེ་བཞིན་དུ་སྦྱིན་སྲེག་ཐམས་ཅད་ཀྱི་མེ་འབར་བའི་ཁ་དོག་དང་། དབྱིབས་དང་། སྒྲ་ལ་སོགས་པས་ལྟས་བཟང་ངན་བསྟན་པ་ནི་དོན་བདུན་པ་སྟེ། དེའི་ཕྱིར། མེ་ཡི་མཚན་ཉིད་ཉེ་བར་བརྟག་པ་ནི། །མེ་སྟག་དུ་
བ་མེ་ལྕེ་སྒྲ་རྣམས་ཀྱིས། །འགྲུབ་པ་དང་ནི་མི་འགྲུབ་ཐམས་ཅད་ཀྱང་། །སྔགས་ཀྱིས་བྱིན་རླབས་མེ་ནི་སྟོན་པར་བྱེད། །དུ་བ་མེད་ཅིང་གསེར་གྱི་མདོག་ལྟར་དངས། །མེ་ལྕེ་རབ་ཏུ་ཆེ་ལ་གཡས་སུ་འཁྱིལ། །ཞེས་བྱ་བ་ལ་སོགས་པ་ནས། མེ་ལྕེ་འཕྲོ་བས་སྦྱིན་སྲེག་བྱེད་

71-1-48a

པ་ཚིག །མི་རོའི་དྲི་ང་དངོས་གྲུབ་མེད་པར་སྟོན། །ཞེས་བྱ་བའི་བར་དུ་གསུངས་སོ། །སྒྲུབ་པ་པོ་གསང་སྔགས་མཉེས་པར་བྱ་བའི་སྤྱོད་པ་མ་བསླབས་པས། སྔར་གསང་སྔགས་བསྙེནཔའི་བཟླས་བརྗོད་ལ་སོགས་པ་རྫོགས་པར་བྱས་ཀྱང་། རང་གི་ལྷ་ཉིད་
ཀྱིས་སྐབས་དེར་ལུས་ལ་གནོད་པ་ལ་སོགས་པར་འབྱུང་བར་མཛད་པ་བསྟན་པ་ནི་དོན་བརྒྱད་པ་སྟེ། ཇི་སྐད་དུ། ཇི་ལྟར་རལ་གྲིའི་སོ་ལ་འཛིན་པའི་མི། །ལེགས་པར་མ་བཟུང་ལག་པ་གཅོད་པ་ལྟར། །དེ་བཞིན་སྔགས་ཀྱང་ལེགས་པར་མ་བཟླས་ན། །འབྲས་བུ་མེད་པའམ་
ཡང་ན་ཕུང་བར་འགྱུར། །མི་ནི་ཚུལ་ཁྲིམས་གཙང་སྦྲ་མི་ལྡན་ཡང་། །གསང་སྔགས་ལྷ་ནི་ནམ་ཡང་གནོད་མི་མཛད། །ལྷ་ཡི་འཁོར་དུ་གྱུར་པ་གང་ཡིན་རྣམས། །མི་ལ་གླགས་སྐབས་མཐོང་ནས་ཕུང་བར་བྱེད། །ཅེས་བྱ་བས་བསྟན་ཏོ། །གཏོར་མའི་ལས་ནི་དང་པོ་སྔོན་དུ་བསྙེན་
པ་རྩོམ་པའི་ཚེ། ས་དང་རི་ལ་སོགས་པ་ལ་གནས་པའི་གདོན་སྲིན་པོ་དང་། ཤ་བ་དང་། ཀླུ་ལ་སོགས་པ་རྣམས་དང་། དབང་པོ་ལ་སོགས་པ་ཕྱོགས་སྐྱོང་བཅུ་རྣམས་ལ་གཏོར་མ་མང་ཞིང་རྒྱ་ཆེ་བ་བསྒྲིམས་ཏེ་དབུལ་བར་བྱ་བ་དང་། སྔོན་དུ་བསྙེན་པ་བྱེད་པའི་ཉི་མ་ཉིད་ལ། གཞན་
རྣམས་ལ་ཡང་ཅི་འབྱོར་པ་དབུལ་བ་དང་། དེ་བཞིན་དུ་སྒྲུབ་པ་ལ་བརྩོན་པའི་ཚེ། རྒྱ་ཆེ་ཞིང་མང་བའི་གཏོར་མའི་བྱ་བ་དང་། གྲུབ་ནས་ཀྱང་ཅི་འབྱོར་པའི་གཏོར་མ་ཉིན་གཅིག་བཞིན་དུ་དབུལ་བའི་ལས་བྱ་བ་དེ་བསྟན་པ་ནི་དོན་དགུ་པ་སྟེ། དེའི་ཕྱིར། ལྷ་དང་ལྷ་མིན་གནོད་
སྦྱིན་ལྟོ་འཕྱེ་གྲུལ། །ནམ་མཁའ་ལྡིང་དང་འདབ་བཟངས་ལུས་སྲུལ་པོ། །དྲི་ཟ་སྲིན་པོ་གདོན་གྱི་རིགས་རྣམས་དང་། །གང་དག་ས་ལ་གནས་པའི་རྫུ་འཕྲུལ་ཅན། །བུ་སྨད་གཡོག་འཁོར་ཚོགས་དང་བཅས་རྣམས་ལ། །བདག་གི་པུས་མོ་ས་ལ་བཙུགས་ནས་སུ། །ཐལ་མོ་སྦྱར་
ནས་ཁྱེད་ལ་གསོལ་འདེབས་ཀྱིས། །གནས་ནས་ཕན་གདགས་ཕྱིར་ནི་འདིར་སྤྱོན་ཅིག །ཅེས་བྱ་བ་ལ་སོགས་ནས། དེ་ལྟར་གང་ཞིག་མཚན་མོ་རྒྱུ་བ་ལ། །གཏོར་མ་གཏོང་བའི་ལས་རྣམས་བྱེད་པ་དེའི། །དངོས་གྲུབ་མྱུར་ཞིང་ཤིན་ཏུ་བགེགས་ཀྱང་མེད། །ཡིད་དུ་འོང་བའི་འདོད་པ་

71-1-48b

འང་ཐོབ་པར་འགྱུར། །ཞེས་བྱ་བའི་བར་དུ་གསུངས་པའོ།།      །།དེ་བཞིན་དུ་ལེའུ་དགུ་པ་ལ་མཚམས་མེད་པ་དང་། མཚམས་མེད་པ་ལ་ཉེ་བ་དང་། དམ་པའི་ཆོས་ཀྱི་གླེགས་བམ་ཆུད་གསོན་ཅིང་སྤོང་བ་དང་། སོ་སོའི་སྐྱེ་བོ་རྣམས་ཀྱི་དགེ་བའི་གཞིར་གྱུར་པ་དགེ་སློང་ལ་
སོགས་པ་གསད་ན། དེས་ནི་ཕུང་པོ་འདི་ལ་དངོས་གྲུབ་མི་ཐོབ་པར་བསྟན་པ་ནི་དོན་དང་པོ་སྟེ། དེའི་ཕྱིར། གང་གིས་དགྲ་བཅོམ་ཕ་མ་གསོད་པ་དང་། །མཐུན་པའི་དགེ་འདུན་དབྱེན་ནི་བྱེད་པ་དང་། །དེ་བཞིན་གཤེགས་ལ་གནོད་པའི་སེམས་ཀྱིས་སུ། །ནམ་ཞིག་མི་དག་སྐུ་
མཚལ་འབྱིན་བྱེད་པ། །ཤིན་ཏུ་མི་བཟད་པ་ཡི་ལས་འདི་རྣམས། །ཞེས་བྱ་བ་ནས། འདི་དག་ངས་ནི་ཁྱོད་ལ་མདོར་བཤད་དོ། །ཞེས་བྱ་བའི་བར་དུ་གསུངས་སོ། །བྱང་ཆུབ་ཏུ་སེམས་བསྐྱེད་པས་འཇིག་རྟེན་པའི་ལྷ་རྣམས་ལ་ཕྱག་བྱས་པའི་ཉེས་པ་བསྟན་པ་དང་། དེ་བཞིན་དུ་
བྱང་ཆུབ་ཏུ་སེམས་བསྐྱེད་པ་ཉིད་སེམས་ཅན་མཐའ་དག་གི་རྒྱུ་ཉིད་དུ་གྱུར་པ་དང་། དཀོན་མཆོག་གསུམ་ལ་སྐྱབས་སུ་འགྲོ་བའི་རྒྱུ་ཉིད་དུ་གྱུར་པ་དེ་བསྟན་པ་ནི་དོན་གཉིས་པ་སྟེ། དེའི་ཕྱིར། གང་ཞིག་བྱང་ཆུབ་སེམས་ནི་བླངས་པ་ལས། །ཞེས་པ་ནས། དཀོན་མཆོག་གསུམ་གྱི་རྒྱུད་
དུ་སྙིང་ནས་སྐྱེས། །ཞེས་བྱ་བའི་བར་དུ་གསུངས་སོ། །སྒྲུབ་པ་པོ་རང་གི་ལུས་དང་ངག་དང་ཡིད་ཀྱིས་ཉེས་པར་སྤྱོད་པ་ཡོངས་སུ་མ་སྤངས་ན་དམ་ཚིག་ལས་འདས་པའི་ཕྱིར། དངོས་གྲུབ་འབྱུང་བར་མི་འགྱུར་བ་དེ་བསྟན་པ་ནི་དོན་གསུམ་པ་སྟེ། དེའི་ཕྱིར། གང་ཞིག་མི་བཟད་
ལས་བྱེད་ཐུབ་པ་གསོད། །ཅེས་བྱ་བ་ནས། དེ་ཡི་སྔགས་ཀྱང་མི་ཟློས་མདོ་མི་བཀླག །ཅེས་བྱ་བའི་བར་དུ་གསུངས་སོ། །སྒྲུབ་པ་པོ་རྣམས་ཀྱིས་སྐྱབས་ཅི་ཡོད་པར་ཕྱག་བྱ་བའི་གནས་རྣམས་ལ་ལྷར་ཕྱག་བྱ་བ་དང་། བྱང་ཆུབ་སེམས་དཔའ་དང་། ཉན་ཐོས་དང་། རང་སངས་
རྒྱས་རྣམས་ལ་ཕྱག་བྱ་བར་བསྟན་པ་དང་། དེ་བཞིན་དུ་བྱང་ཆུབ་སེམས་དཔའ་རབ་ཏུ་བྱུང་བའི་གཟུགས་ཅན་རྣམས་ལ་ཡང་ཕྱག་བྱ་བའི་རིགས་པར་བསྒྲུབ་པ་ནི་དོན་བཞི་པ་སྟེ། དེའི་ཕྱིར། བདེ་བར་གཤེགས་པ་ཀུན་གྱིས་བསྟན་པ་ཡི། །ཞེས་བྱ་བ་ནས། གང་གི་རང་བཞིན་

71-1-49a

ཆགས་དང་རྣམ་བྲལ་ཡང་། །གདུལ་བྱའི་དོན་ཕྱིར་ཁྲོ་ལ་ཁྲོ་བ་དང་། །འདོད་ཆགས་ཅན་ལ་ཆགས་ཅན་ལྟར་སྟོན་པ། །བྱང་ཆུབ་མཆོག་གནས་དེ་ལ་ཕྱག་འཚལ་ལོ། །གང་ཞིག་ལས་དང་རྣམ་སྨིན་མཁྱེན་པ་ཡིས། །འགྲོ་བ་ཀུན་དང་ཇི་ལྟར་མཐུན་པ་ཡི། །
གསང་སྔགས་གཟུགས་ཀྱི་རྗེས་སུ་འཛིན་མཛད་པ། །སྔགས་ཀྱི་རྣམ་འདྲེན་དེ་ལ་ཕྱག་འཚལ་ལོ། །ཞེས་བྱ་བའི་བར་དུ་གསུངས་པའོ།།      །།ལེའུ་བཅུ་པ་ལ་སྒྲུབ་པའི་གསང་སྔགས་དང་ཕྱག་རྒྱ་གང་ཡིན་པ་དེ་དག་འཕགས་པ་དཔུང་བཟངས་ཀྱི་གསང་སྔགས་ཀྱི་
མདོའི་ཚུལ་འདིར། རིག་སྔགས་དང་གསང་སྔགས་ཀྱི་དབྱེ་བས་བསྡུ་བར་བསྟན་པའི་དོན་ནི་དང་པོ་སྟེ། དེ་ལ་རེ་ཞིག་དེ་བཞིན་གཤེགས་པའི་རིགས་བསྡུ་བའི་དབང་དུ་བྱས་ནས། ལྷ་དང་ལྷ་མིན་མི་ལ་ཕན་གདགས་ཕྱིར། །གསང་སྔགས་རིག་སྔགས་རྣམ་པ་སྣ་ཚོགས་ནི། །
འབུམ་ཕྲག་ལྔ་དང་བྱེ་བ་ཕྲག་གསུམ་དང་། །རིག་འཛིན་སྡེ་སྣོད་བཤད་པར་རྒྱལ་བས་གསུངས། །ཞེས་བྱ་བ་གསུངས་སོ། །དེ་བཞིན་དུ་རྡོ་རྗེ་རིགས་ཀྱི་གསང་སྔགས་བསྡུ་བའི་དབང་དུ་བྱས་ནས། ངས་ནི་གསང་བ་པ་རྣམས་གཞོམ་པ་དང་། །དབུལ་བའི་སྡུག་བསྔལ་
བསལ་བར་བྱ་བའི་ཕྱིར། །དཀྱིལ་འཁོར་བཅས་ཤིང་ཕྱག་རྒྱར་ལྡན་པ་ཡིས། །གསང་སྔགས་བྱེ་བ་ཕྲག་བདུན་རབ་ཏུ་བཤད། །ཅེས་བྱ་བ་ལ་སོགས་པ་གསུངས་པའོ། །པདྨའི་རིགས་ཀྱི་དབང་དུ་བྱས་ནས། སྤྱན་རས་གཟིགས་ཀྱིས་གསང་སྔགས་བྱེ་བ་ཕྲག །གསུམ་
དང་དེ་བཞིན་འབུམ་ཕྲག་ལྔ་རྣམས་བཤད། །ཅེས་རྒྱས་པར་གསུངས་སོ། །ལྔས་རྩེན་གྱི་རིགས་ཀྱི་དབང་དུ་བྱས་ནས། ལྔས་རྩེན་གྱིས་ནི་སྟོང་ཕྲག་ཉི་ཤུ་སྟེ། །དེ་ཡི་ཆུང་མས་དེ་ཡི་ཕྱེད་བཤད་དོ། །ཞེས་གསུངས་སོ། །ནོར་གྱི་རིགས་ཀྱི་དབང་དུ་བྱས་ནས། ནོར་གྱི་བདག་པོས་
སྟོང་ཕྲག་སུམ་ཅུ་སྟེ། །གང་པོ་ཕ་ཡིས་ཀྱང་ནི་འབུམ་བཤད་དོ། །ལྷ་དང་ལྷ་མིན་ལ་སོགས་རྒྱལ་བ་ལ། །དད་པ་རྣམས་ཀྱིས་གསང་སྔགས་མཐའ་ཡས་བཤད། །ཁ་ཅིག་ང་ཡི་རིགས་སུ་གཏོགས་པ་སྟེ། །ཁ་ཅིག་ཀྱང་ནི་པདྨོའི་རིགས་སུ་གཏོགས། །ཁ་ཅིག་ནོར་གྱི་རིགས་སུ་

71-1-49b

གཏོགས་པ་ཡིན། །གཞན་ཡང་ཁ་ཅིག་གནས་མེད་རྣམ་པར་འཁྱམ། །ནོར་སྤྱོད་ཅེས་བྱ་ནོར་གྱི་རིགས་སུ་གསུངས། །ང་ནི་རྡོ་རྗེ་རིགས་ཞེས་རབ་ཏུ་བསྟན། །སྤྱན་རས་གཟིགས་དབང་པདྨའི་རིགས་ཡིན་ཏེ། །རིགས་བཞི་པ་ནི་འདིར་ཡང་ལྔས་རྩེན་ནོ། །གསང་སྔགས་མདོ་སྡེ་
ངས་བཤད་གང་ཡིན་པ། །བཞི་པོ་འདིར་ནི་རྣམ་པར་སྦྱར་བར་བྱ། །གང་གཞན་ལ་ལ་འདི་ན་གནས་མེད་པར། །བདེ་བར་གཤེགས་ལ་བརྟེན་ཞིང་ཡོངས་འཁྱམ་པ། །མདོ་སྡེ་འདིར་ནི་དེ་དག་ཐམས་ཅད་ཀྱང་། །འབྱོར་པ་འདོད་པའི་མིས་ནི་རྣམ་པར་སྦྱར། །ལམ་འདི་ཉིད་དུ་ཞུགས་
པའི་སྔགས་པ་ནི། །ཡིད་དང་མཐུན་པའི་དངོས་གྲུབ་ཐོབ་པར་འགྱུར། །ཞེས་བྱ་བ་གསུངས་སོ། །དེ་བཞིན་དུ་དེ་བཞིན་གཤེགས་པའི་རིགས་ཀྱི་གསང་སྔགས་ལ་དང་པོར། གསང་སྔགས་ཀྱི་མགོ་ལ་དོན་མཆོག་གསུམ་སྔར་བརྗོད་ནས། གསང་སྔགས་འདོན་
པ་དང་། པདྨ་དང་། རྡོ་རྗེ་དང་། ནོར་བུ་བཟང་པོའི་རིགས་ལ། སོ་སོའི་རིགས་ཀྱི་བདག་པོ་ལ་ཕྱག་འཚལ་བ་ཐོག་མར་བརྗོད་དེ། བཟླས་བརྗོད་བྱ་བ་དེ་བསྟན་པ་ནི་དོན་གཉིས་པ་སྟེ། དེའི་ཕྱིར། སྲིད་པ་གསུམ་ན་རྒྱལ་བ་དཀོན་མཆོག་སྟེ། །ཞེས་བྱ་བ་ལ་སོགས་པ་ནས།  
ནོར་གྱི་རིགས་དང་པདྨའི་རིགས་ལ་ཡང་། །རང་གི་གསང་སྔགས་བདག་པོར་ལྡན་པར་བྱ། །ཞེས་བྱ་བའི་བར་དུ་གསུངས་པའོ། །དེ་བཞིན་དུ་བཟླས་བརྗོད་དང་། སྦྱིན་སྲེག་དང་། མཆོད་པའི་ཚེ། གསང་སྔགས་ཟློས་པ་ཁ་ཅིག་རྡོ་རྗེ་ཐོགས་སུ་མི་གནང་བ་ཡིན་པས། དེ་ལྟ་བུའི་
རྡོ་རྗེ་ཐོགས་པའི་ཉེས་པ་གང་ཡིན་པ་དེ་བསྟན་པ་ནི། དོན་གསུམ་པ་སྟེ། དེའི་ཕྱིར། བདེ་བར་གཤེགས་མིན་ཉན་ཐོས་ལམ་ཞུགས་དང་། །རང་རྒྱལ་རྣམས་ཀྱི་ལམ་ལ་ཞུགས་པ་དང་། །དད་པ་མེད་ཅིང་ཚུལ་འཆོས་འཇུངས་པ་ཡིས། །ང་ཡི་རྡོ་རྗེ་ཡང་ནི་བཅང་མི་བྱ། །གང་
ཞིག་ཐེག་པ་མཆོག་ལ་སྡང་བ་དང་། །བདུད་ཀྱིས་བཤད་པ་ཡིན་ཞེས་ཟེར་བ་དང་། །རྨོངས་པ་ང་ལ་གནོད་སྦྱིན་ཞེས་སྨྲ་དང་། །བྱང་ཆུབ་སེམས་དཔའ་ལ་ནི་མི་འདུད་པའི། །དགེ་སློང་དགེ་སློང་མ་དང་དགེ་བསྙེན་དང་། །དགེ་བསྙེན་མ་དང་འཇིག་རྟེན་པ་རྣམས་ཀྱིས། །ང་ཡི་རིགས་

71-1-50a

ཀྱི་གསང་སྔགས་བཟླས་བརྗོད་ན། །མྱུར་དུ་དེ་ཡི་ལུས་ནི་ཞིག་པར་འགྱུར། །གང་ཞིག་ང་རིགས་རྗེས་སུ་འབྲང་བའི་གདོན། །འབྱུང་པོ་གནོད་སྦྱིན་ཀླུ་དང་ཤ་ཟ་ཡིས། །ང་ཡི་སྔགས་བཟླས་རྡོ་རྗེ་ཐོགས་པ་དག །མཐོང་ན་ཁྲོས་ནས་ཕུང་བར་བྱེད་པར་འགྱུར། །ཞེས་
བྱ་བ་གསུངས་སོ། །དེ་བཞིན་དུ་གསང་སྔགས་གྲུབ་པ་པོ་རྣམས་ཀྱི་དམ་ཚིག་དང་། འདུལ་བ་དང་སྤྱོད་པ་གསུངས་པ་བཤད་པ་སྟེ། དེ་ལ་ཡན་ལག་ཁ་ཅིག་ཉམས་སུ་ལེན་མ་ནུས་ཀྱང་། ཁ་ཅིག་ཉམས་སུ་མི་བླང་དུ་མི་རུང་བ་གང་ཡིན་པ་དེ་བསྟན་པ་ནི་དོན་བཞི་པ་སྟེ། དེའི་ཕྱིར། 
གང་ཞིག་ཐེག་མཆོག་རྒྱ་ཆེན་ཀློག་པ་དང་། །དེ་ལ་དད་ཅིང་དེ་ཉིད་འཆད་པར་སྤྲོ། །བརྩོན་འགྲུས་ཆེ་ཞིང་བྱང་ཆུབ་སེམས་བརྟན་པ། །དེ་ལ་ང་ཡི་གསང་སྔགས་མཆོག་སྦྱིན་མཛད། །ཅེས་བྱ་བ་གསུངས་སོ། །དེ་ལྟར་འདིས་ནི་དེ་བཞིན་གཤེགས་པ་ལ་སོགས་པ་རིགས་ཀྱི་བདག་
པོ་རྣམས་ཀྱིས་གསང་སྔགས་དང་། རིག་སྔགས་རྣམས་གསུངས་པའི་བར་རྣམས་འབུམ་དང་། བྱེ་བ་ལ་སོགས་པར་དེ་དག་བསྡུས་ཏེ། རྒྱས་པར་བསྟན་པ་དང་། དེ་ལྟར་མཉེས་པར་བྱ་བའི་ཆོ་ག་ཡང་། སྤྲོས་པ་དང་བཅས་པར་བསྟན་པར་ཁོང་དུ་ཆུད་པར་བྱའོ། །དེ་ནི་
འཇིག་རྟེན་ལས་འདས་པའི་གསང་སྔགས་ཀྱི་ཆོ་གའི་ཞར་ལ། དྲག་པོ་ལ་སོགས་པའི་འཇིག་རྟེན་གྱི་ལྷ་ཁྱད་པར་ཅན་རྣམས་ཀྱིས། རིག་སྔགས་དང་གསང་སྔགས་དང་། རང་རང་གི་གསང་སྔགས་ཀྱི་རྒྱུད་དང་། ཆོ་ག་ཞིབ་མོ་བཤད་པ་དང་དེ་དག་གི་གྲངས་ཞར་ལ་བསྟན་
པར་བྱ་བ་དང་། སངས་རྒྱས་ཀྱི་དཀྱིལ་འཁོར་གྱི་སློབ་དཔོན་རྣམས་མང་དུ་ཐོས་པར་བསྟན་པའི་དོན་ནི་ལྔ་པ་སྟེ། དེའི་ཕྱིར། དྲག་པོ་ཡིས་ནི་བྱེ་བ་ཕྲག་བཅུ་བཤད། །ནོར་ལྷའི་བུས་ནི་སྟོང་ཕྲག་སུམ་ཅུ་སྟེ། །ཚངས་པ་ཡིས་ནི་སྟོང་ཕྲག་དྲུག་ཅུ་ཉིད། །ཉི་མས་ཀྱང་ནི་འབུམ་
ཕྲག་གསུམ་བཤད་དོ། །ནམ་མཁའ་ལྡིང་གིས་སྟོང་ཕྲག་བཅོ་བརྒྱད་དེ། །ཞེས་བྱ་བ་ལ་སོགས་པ་ནས། རང་སྔགས་མདོ་སྡེའི་རྗེས་འབྲངས་དད་བསྐྱེད་ནས། །མ་བསྒྲིམས་བཞིན་དུ་ཐེ་ཚོམ་མེད་པར་འགྲུབ། །དེ་ལས་བཟློག་ན་དངོས་གྲུབ་མི་ཐོབ་ལ། །སྡུག་བསྔལ་མང་

71-1-50b

པོ་ཡང་ནི་ཐོབ་པར་འགྱུར། །ཞེས་བྱ་བའི་བར་དུ་གསུངས་པའོ།།      །།ལེའུ་བཅུ་གཅིག་པར་འདིར་ནི་གསང་སྔགས་སྨྲ་བ་དང་། བཅུད་ཀྱིས་ལེན་ལ་སོགས་པ་བརྟག་པ་བརྒྱད་ཀྱི་མིང་བཤད་པ་དང་། བསྟན་པ་དེ་རྣམས་ཀྱི་དངོས་གྲུབ་རབ་དང་། འབྲིང་དང་། ཐ་མའི་བྱེ་
བྲག་བསྟན་པའི་དོན་དང་། གསང་སྔགས་སྨྲ་བའི་ཡོན་ཏན་གོང་མའི་ཡང་གོང་མར་བརྗོད་པར་བསྟན་པ་ནི་དོན་དང་པོ་སྟེ། དེ་ལ་བཅུད་ཀྱིས་ལེན་དང་གཏེར་དང་ཕུག་འགྲོ་དང་། །ནོར་སྒྱུར་འབྱུང་ཁུངས་སྔགས་དང་གསེར་སྒྱུར་རྩི། །རིན་ཐང་མེད་པའི་རིན་ཆེན་ནོར་སྦྱིན་ཏེ། །བརྒྱད་
པོ་བསྟན་པ་ཡོངས་སུ་བསྒྲགས་པ་ཡིན། །ཞེས་བྱ་བ་གསུངས་སོ། །བསྟན་པ་དེ་དག་རབ་ལ་སོགས་པར་དབྱེ་བའི་དབང་དུ་བྱས་ནས། སྔགས་དང་ཕུག་ཏུ་འགྲོ་དང་བཅུད་ཀྱིས་ལེན། །སྡིག་པ་སྤོང་བར་བྱེད་པས་མཆོག་ཏུ་བསྟན། །རིན་ཆེན་དང་ནི་གཏེར་དང་འབྱུང་ཁུངས་
འབྲིང་། །གསེར་སྒྱུར་རྩི་དང་ནོར་སྒྱུར་ཐ་མའོ། །ཞེས་བྱ་བ་གསུངས་སོ། །དེ་དག་སྒྲུབ་པ་ལ་འཇུག་པ་རྣམས་མཆོག་ལ་སོགས་པར་དབྱེ་བ་ནི་འདི་ཡིན་ཏེ། མི་ནི་སེམས་སྟོབས་ལྡན་ཞིང་ཆོས་ལ་བརྩོན། །དཀའ་ཐུབ་ཀྱིས་ཕྱུག་དང་པོར་བསྟན་པའི་སྣོད། །རྡུལ་ཤས་ཆེ་བ་ལ་
ནི་འབྲིང་པོར་གསུངས། །ཐ་མ་ལ་ནི་མུན་པ་ཅན་གྱིས་བསྟན། །གང་ཞིག་མཆོག་ཏུ་བསྟན་པ་དེ་སྟོན་པ། །དེས་ནི་ཐ་མར་བསྟན་པ་རྣམ་པར་སྤངས། །གལ་ཏེ་ནོར་ལ་སྲེད་ཅིང་སྡུག་བསྔལ་གྱིས། །གདུངས་ན་འབྲིང་པོ་ལ་ནི་བསྟན་པར་བྱ། །ཞེས་བྱ་བ་གསུངས་སོ། །ད་ནི་བསྟན་
པ་འདི་རྣམས་ཀྱི་དངོས་གྲུབ་དང་མཐུནཔའི་དཀའ་ཐུབ་དང་། གསང་སྔགས་ཀྱི་བཟླས་བརྗོད་ལ་སོགས་པའི་ཐབས་བསྟན་པ་ནི། ལྷ་ཡི་བདེ་བ་དང་ནི་འབྱོར་པ་དང་། །ཚེ་དང་སྟོབས་གཟུགས་ཕུན་སུམ་ཚོགས་པ་དང་། །ཐོས་མང་མདངས་བཟངས་གཅིག་པུ་ཡིད་གཞུངས་དང་། །
དབང་ཐང་ཚེ་ཀུན་དཀའ་ཐུབ་སྟོབས་ཀྱིས་ཐོབ། །ཆགས་དང་རྣམ་བྲལ་དགེ་ལ་དགའ་བ་དང་། །རྟག་ཏུ་དཀོན་མཆོག་གསུམ་ལ་གཞོལ་བ་དང་། །སྡིག་པ་སྤངས་ཞིང་བཟླས་བརྗོད་ལྡན་པ་ཡིས། །མི་ལ་ལྷ་རྫས་དངོས་གྲུབ་རིང་བ་མེད། །ཅེས་བྱ་བ་གསུངས་སོ། །ད་ནི་བསྟན་པ་དེ་

71-1-51a

རྣམས་ཀྱི་ནང་ན། གསང་སྔགས་བསྟན་པ་མཆོག་ཡིན་པ་དང་། སྡུག་བསྔལ་སེལ་བར་བསྟན་པ་ནི། རྡོ་རྗེ་མཚོན་མེ་གནམ་ལྕགས་མཐུ་འདྲ་ཡི། །གསང་སྔགས་མི་ཡི་འཇིག་རྟེན་མཆོག་སྦྱིན་མཛད། །འཇིག་རྟེན་འདི་དང་ཕ་རོལ་ཉིད་ན་ཡང་། །སྡུག་
བསྔལ་སེལ་ཞིང་སྡིག་འཇོམས་གཞན་མེད་དོ། །གང་ཞིག་དཔག་བསམ་ལྗོན་པའི་ཤིང་ལྟ་བུར། །ལ་ལར་དངོས་གྲུབ་ལ་ལར་བསོད་ནམས་དང་། །གཞན་ལ་གཟུགས་སྟོབས་ཚེ་དང་བདེ་བ་གང་། །ཡིད་མཐུན་འབྲས་བུ་འདོད་པའི་མི་ལ་སྩོལ། །གསང་སྔགས་སྣ་ཚོགས་
གཟུགས་སུ་རྣམ་སྤྲུལ་ནས། །གང་ཞིག་སྡུག་བསྔལ་གང་ཞིག་འཇིགས་སྐྲག་པའམ། །རྒྱལ་པོ་ཆོམ་རྐུན་ཐོག་གིས་འཇིགས་སྐྲག་པའི། །འགྲོ་བའི་ཚོགས་ཆེན་མཐའ་དག་སྐྱོབ་མཛད་པ། །ཞེས་བྱ་བ་གསུངས་སོ། །གཞན་ཡང་གསང་སྔགས་སྒྲུབ་པ་རྣམ་པ་གཉིས་ཏེ། 
ཇི་སྐད་དུ་གསུངས་པའི་གསང་སྔགས་སྒྲུབ་པ་པོའི་འཇུག་པའི་སྤྱོད་པ་དང་། སྦྱོར་བའི་སྤྱོད་པ་དང་། དངོས་གྲུབ་སྒྲུབ་པ་པོའི་སྤྱོད་པ་དང་། སྒྲུབ་པའི་སྤྱོད་པ་བསླབས་ནས་ཁྱིམ་ནས་བྱུང་སྟེ། ཇི་སྐད་དུ་གསུངས་པའི་གནས་རྣམས་སུ་འཇུག་ནས། གསང་སྔགས་མཉེས་པར་
བྱེད་པ་གང་ཡིན་པ་དེའི་དོན་དུ་མཉེས་པར་བྱ་བའི་རིམ་པ་བསྟན་པ་ནི་འདི་དག་ཐམས་ཅད་ཡིན་ནོ། །གང་ཡང་ཇི་སྐད་གསུངས་པའི་འཇུག་པ་ལ་སོགས་པའི་སྤྱོད་པ་བསླབས་ནས་ཁྱིམ་ན་གནས་ཤིང་ཡུལ་ལ་སོགས་པ་འདོད་པ་ལ་ལོངས་སྤྱོད་ཅིང་ཇི་སྐད་གསུངས་པའི་གསང་སྔགས་
མཉེས་པར་བྱ་བའི་རྗེས་སུ་འཇུག་ཅིང་ཉིན་གཅིག་བཞིན་དུ་བཟླས་བརྗོད་ལ་སོགས་པ་ཅི་ནུས་སུ་བྱེད་པ་གང་ཡིན་པ་དེ་རྣམས་ཀྱང་ཡུན་རིང་ཞིག་ལོན་ནས། ཚེ་འདིའམ་ཚེ་རབས་གཞན་དུ་དེ་མཉེས་པར་བྱས་པ་ལས་བྱུང་བའི་བསོད་ནམས་ཀྱི་བག་ཆགས་བརྟས་ན། ཚེ་རབས་གཞན་ལ་
གྲུབ་པར་འགྱུར་བ་དེ་བསྟན་པ་ནི་དོན་གཉིས་པ་སྟེ། དེའི་ཕྱིར། གང་ཞིག་ཡུལ་དང་ཁྱིམ་ལ་བརྟེན་ཀྱང་རུང་། །དཀའ་ཐུབ་མ་ཉམས་རྩེ་གཅིག་སེམས་ཀྱིས་ནི། །ཉིན་གཅིག་བཞིན་དུ་ཅུང་ཟད་སྔགས་ཟློས་པ། །དེ་ཡི་གསང་སྔགས་དུས་ཤིག་ན་ནི་འགྲུབ། །ཅེས་བྱ་བ་གསུངས་སོ། །

71-1-51b

ད་ནི་སྒྲུབ་པ་པོ་རྣམ་གཉིས་ཀྱིས་བཟླས་བརྗོད་གོམས་པར་བྱ་བའི་ཕྱིར། སྔར་བསྙེན་པའི་བཟླས་བརྗོད་ཇི་སྐད་བསྟན་པའི་གྲངས་ལས་ལྷག་པར་འབུམ་ཕྲག་གཅིག་བསྒྲིམས་ནས། བཟླས་བརྗོད་བྱས་ནས་སྔར་བསྙེན་པ་ཇི་སྐད་གསུངས་པ་བཞིན་དུ་ལྷུར་བླང་བར་བསྟན་པ་ནི་དོན་གསུམ་
པ་སྟེ། དེའི་ཕྱིར། ཆོ་ག་བཞིན་དུ་དང་པོར་འབུམ་བཟླས་ནས། །དེ་ནས་གསང་སྔགས་སྒྲུབ་ལ་འཇུག་པར་བྱ། །དེས་ན་དངོས་གྲུབ་མྱུར་དུ་འཐོབ་འགྱུར་ལ། །གསང་སྔགས་ཆོ་གས་ཡུན་རིང་ཉོན་མི་མོངས། །ཞེས་གསུངས་སོ། །དེ་བཞིན་དུ་སྒྲུབ་པ་པོའི་ཁྲུས་ཀྱི་ཆོ་ག་གཏན་
ལ་དབབ་པ་དང་། ཉེ་རེག་གི་ཆོ་ག་བསྟན་པ་ནི་དོན་བཞི་པ་སྟེ། དེའི་ཕྱིར། ལུས་ལ་ས་ཡིས་དྲིལ་ཕྱིས་བྱས་ནས་སུ། །ཆུ་ཆེན་རྙོག་མ་མེད་པར་ཞུགས་ནས་ཀྱང་། །ཇི་ཙམ་འདོད་པའི་བར་དུ་ཁྲུས་བྱས་ཏེ། །བྱུང་ནས་ཤར་རམ་བྱང་དུ་ཁ་བལྟས་ལ། །ཆུ་ཡིས་ལག་པ་རྐང་
པ་བཀྲུས་ནས་ནི། །པུས་མོའི་ཕྱི་རོལ་དུ་ནི་བསྟན་བྱས་ཏེ། །བར་དུ་ལག་གཞག་ཙོག་ཙོག་པོར་འདུག་ནས། །སྒྲ་མེད་དབུ་བ་མེད་པས་ཉེ་རེག་བྱ། །ལན་གསུམ་བར་དུ་ཆུ་ནི་འཐུངས་ནས་ཀྱང་། །མཆུ་ལ་ལན་གཉིས་ཡོངས་སུ་ཕྱི་བར་བྱ། །ཞེས་བྱ་བ་གསུངས་སོ། །དེ་
བཞིན་དུ་སོ་ལ་ཆགས་པའི་ལྷག་མ་ཡོད་པར་ཚོར་བ་དང་། རང་སྦྲིད་པ་བྱུང་ན་ཁ་འཁྲུ་བའི་ཆོ་ག་བྱ་བ་དང་། དེ་བཞིན་དུ་སྐྱེས་པ་དང་བུད་མེད་ཀྱི་ལུས་ལ་རེག་པ་དགག་པ་བསྟན་པ་དང་། བག་མེད་པས་དེ་དག་རྣམས་ཀྱིས་རེག་པར་གྱུར་ན་ཁྲུས་བྱ་དགོས་པ་བསྟན་པ་
ནི་དོན་ལྔ་པ་སྟེ། དེའི་ཕྱིར། སོ་ལ་ཆགས་པ་ལྕེ་ཡིས་རེག་པ་དང་། །སྦྲིད་པ་བྱུང་ན་ཁ་ཡང་བཀྲུ་བར་བྱ། །རབ་བྱུང་སྐྱེས་པ་བུད་མེད་གཞོན་ནུ་དང་། །གཞོན་ནུ་མ་དང་རྒན་པོ་བྲམ་ཟེ་རྣམས། །དེ་ལ་སྔགས་པས་ནམ་ཡང་རེག་མི་བྱ། །སྔགས་པས་དེ་དག་རྣམས་ལ་མི་བསམ་
མོ། །བརྒྱ་ལ་དེ་དག་རྣམས་ལ་རེག་གྱུར་ཏམ། །སྒྲུབ་པས་དེ་དག་རྣམས་ལ་རེག་གྱུར་ན། །སླར་ཡང་ཁྲུས་དང་འཐོར་འཐུང་བྱས་ནས་སུ། །དེ་ནས་ཕྱིར་ཡང་ཟློས་ལ་འཇུག་པར་བྱ། །ཞེས་བྱ་བ་གསུངས་སོ། །གཙང་སྦྲ་དང་བཟླས་བརྗོད་དང་། མཆོད་པ་ལ་སོགས་པ་ཇི་སྐད་

71-1-52a

གསུངས་པ་བཞིན་བྱས་ན། མྱུར་དུ་གསང་སྔགས་ཀྱི་བྱིན་གྱིས་རློབ་པར་མཛད་དོ་ཞེས་བསྟན་པ་ནི་དོན་དྲུག་པ་སྟེ། དེའི་ཕྱིར། གཙང་སྦྲ་ལ་དང་ཟློས་དགའ་སྙིང་རྗེ་ཅན། །རྟག་ཏུ་ལེན་པ་ལས་ནི་ལོག་པ་དང་། །སློང་མོའི་ཟས་ཟ་ལྷ་ཡི་ལས་བརྩོན་
པ། །དེ་ཡི་ལུས་ལ་གསང་སྔགས་འཇུག་པར་འགྱུར། །ཞེས་བྱ་བ་གསུངས་སོ། །དེ་བཞིན་དུ་སྒྲུབ་པ་པོའི་རྣམ་པ་ཐམས་ཅད་དུ་མི་བསླང་བར་བསྟན་པ་ནི་དོན་བདུན་པ་སྟེ། དེའི་ཕྱིར། འགའ་ཡིས་བུད་མེད་གོས་དང་ནོར་རྣམས་དང་། །བཞོན་པ་རྒྱན་དང་བྱུག་པ་
བཟའ་བཏུང་དང་། །མལ་སྟན་རྣམས་ནི་མང་ཉུང་བྱིན་གྱུར་ན། །དེ་ལས་སྒྲུབ་ལ་གནས་པས་མི་བསླང་ངོ་། །ཞེས་བྱ་བ་གསུངས་སོ། །དེ་བཞིན་དུ་སྒྲུབ་པ་པོའི་ཕྱི་རོལ་ཆེ་ཆུང་གི་གཙང་སྦྲ་བསྟན་པ་ནི་དོན་བརྒྱད་པ་སྟེ། དེའི་ཕྱིར།  ས་ཕུང་བཤང་སྒོར་ལྔ་སྟེ་མཚན་
ལ་གསུམ། །གཡོན་ལ་གསུམ་སྟེ་ལག་པ་གཉིས་ལ་བདུན། །ཡང་ན་ས་དང་ཆུ་ཡིས་ཇི་སྲིད་དུ། །དྲི་མ་དྲི་བྲལ་དེ་སྲིད་བར་དུ་བྱ། །ཞེས་གསུངས་སོ། །དེ་བཞིན་དུ་ཚུལ་ཁྲིམས་དང་ལྡན་པའི་སྒྲུབ་པ་པོས་བཟླས་བརྗོད་བྱས་པས་སྡིག་པ་འབྱང་བའི་རྒྱུར་འགྱུར་བ་དང་། 
ཐོག་མ་མེད་པའི་དུས་ནས་བསགས་པའི་སྡིག་པ་རྣམས་ཀྱང་བཟླས་བརྗོད་བྱས་པས་འབྱང་བར་འགྱུར་རོ་ཞེས་བསྟན་པ་ནི་དོན་དགུ་པ་སྟེ། དེའི་ཕྱིར། སོས་ཀ་ནགས་མེ་མཆེད་པའི་མེ་ལྕེ་ཡིས། །མ་བསྒྲིམས་བཞིན་དུ་ཚང་ཚིང་ཀུན་བསྲེགས་ལྟར། །བཟླས་བརྗོད་
མེ་ལ་ཚུལ་ཁྲིམས་རླུང་གིས་སྦར། །བརྩོན་འགྲུས་ཆེན་པོའི་མེ་ལྕེས་སྡིག་པ་བསྲེག །ཇི་ལྟར་གངས་ལ་ཉི་མའི་འོད་ཟེར་གྱིས། །གདུངས་ན་གཟི་བརྗིད་མི་བཟོད་འཇུ་བ་བཞིན། །ཚུལ་ཁྲིམས་ཉི་མའི་འོད་ཟེར་བཟླས་བརྗོད་ཀྱིས། །གདུངས་ན་སྡིག་པའི་གངས་ཀྱང་ཟད་
པར་འགྱུར། །མུན་ནག་སྨག་ལ་མར་མེ་ཕྱུང་བ་ཡིས། །མུན་ནག་མ་ལུས་སེལ་བར་བྱེད་པ་ལྟར། །ཚེ་རབས་སྟོང་ནས་གནས་པའི་སྡིག་པའི་མུན། །བཟླས་བརྗོད་མར་མེས་མྱུར་དུ་སེལ་བར་བྱེད། །ཅེས་བྱ་བ་གསུངས་སོ། །དེ་བཞིན་དུ་ཇི་ལྟར་གསུངས་པའི་ཆོ་ག་

71-1-52b

བཞིན་དུ། སྔར་བསྙེན་པ་བྱས་ནས་བསྒྲུབས་ཀྱང་གསང་སྔགས་ཀྱི་འབྲས་བུ་མ་ཐོབ་ན། དེའི་ཚེ་སྡིག་པ་མ་ལུས་པ་ཟད་པར་བྱ་བའི་ཕྱིར། མཆོད་རྟེན་འབུམ་གདབ་པར་བསྟན་པ་ནི་དོན་བཅུ་པ་སྟེ། དེའི་ཕྱིར། ཅི་སྟེ་སྦྱིན་སྲེག་དང་ནི་བཟླས་བརྗོད་ཀྱིས། །གསང་སྔགས་
བསྒྲུབས་ཀྱང་དངོས་གྲུབ་མ་ཐོབ་ན། །འཇིམ་པ་ལས་ནི་མཆོད་རྟེན་འབུམ་གདབ་པའམ། །ཡང་ན་ཆུ་འགྲམ་བྱེ་མ་དག་ལ་གདབ། །དེས་ནི་དེ་ཡི་སྡིག་པ་སྲིད་གཞན་ལ། །བྱས་པ་དེ་ནི་གང་ཡིན་ཟད་གྱུར་ན། །དེས་ན་གསང་སྔགས་མཐུ་ཡིས་འདི་ཉིད་དུ། །མཐོང་བའི་
ཆོས་ལ་བསོད་ནམས་འབྲས་བུ་ཐོབ། །ཅེས་བྱ་བའི་བར་དུ་གསུངས་སོ། །དེ་བཞིན་དུ་སྔར་སྦྱང་གི་ནང་དུ་འདུག་པའི་ས་བོན་གྱི་དཔེ་བསྟན་པས། གསང་སྔགས་བཟླས་བརྗོད་ལ་སོགས་པའི་ཚོགས་པ་ལ་བརྟེན་ནས་གསང་སྔགས་ཀྱི་འབྲས་བུ་འབྱུང་གི། གསང་སྔགས་
ཀྱི་ལྷ་ལ་སོགས་པ་འབའ་ཞིག་ལས་ནི་མ་ཡིན་པས་དེའི་ཕྱིར་དེའི་ཚོགས་བསྟན་པ་ནི་དོན་བཅུ་གཅིག་པ་སྟེ། དེའི་ཕྱིར། གསང་སྔགས་རྩ་བ་དང་པོར་ཚུལ་ཁྲིམས་ཏེ། །དེ་ནས་བརྩོན་འགྲུས་དང་ནི་བཟོད་པ་དང་། །རྒྱལ་བ་ལ་ནི་དད་དང་བྱང་ཆུབ་སེམས། །གསང་སྔགས་དང་ནི་
ལེ་ལོ་མེད་པའོ། །ཞེས་བྱ་བར་རྒྱ་ཆེར་སྦྱར་རོ། །སྔར་བསྙེན་པ་རྫོགས་ནས། སྔགས་པས་རང་གི་ལྷ་མཉེས་པར་བྱ་བའི་དོན་དུ་སྦྱིན་སྲེག་བྱ་བ་དེ་བསྟན་པ་ནི་དོན་བཅུ་གཉིས་པ་སྟེ། དེའི་ཕྱིར། དང་པོར་བཟླས་བརྗོད་ཕལ་ཆེར་བྱས་ནས་སུ། །དེ་ཡི་འོག་ཏུ་འདིར་ནི་སྦྱིན་སྲེག་
བྱ། །སྦྱིན་སྲེག་གིས་ནི་གསང་སྔགས་མཆོག་མྱུར་སྩོལ། །ཡིད་དུ་འོང་བའི་འདོད་པའང་སྦྱིན་པར་མཛད། །ཅེས་བྱ་བ་གསུངས་སོ། །དེ་བཞིན་དུ་གང་གིས་མིའི་ཆུང་མ་བཀུག་པ་དང་། གནོད་སྦྱིན་གྱི་བུ་མོ་གསང་སྔགས་ཀྱི་དབང་གིས་བཀུག་སྟེ། འདོད་པར་ལོངས་སྤྱོད་
པ་དེ་ལ། ཕ་རོལ་གྱི་བུད་མེད་ལོངས་སྤྱད་པའི་ཕྱིར་འདོད་པས་ལོག་པར་གཡེམ་པ་ལ་སོགས་པ་བྱས་པའི་ཉེས་པ་གང་ཡིན་པ་དེ་ཡོངས་སུ་སྤང་བ་ནི་དོན་བཅུ་གསུམ་པ་སྟེ། དེའི་ཕྱིར། གང་གིས་དཔག་ཚད་བརྒྱ་ཡི་ཕ་རོལ་ནས། །གསང་སྔགས་མཐུ་ཡིས་བུད་མེད་བཀུག་

71-1-53a

ཀྱང་དེ། །བུད་མེད་མ་ཡིན་གནོད་སྦྱིན་བུ་མོ་སྟེ། །དེ་གཟུགས་ཆ་བྱད་ཀྱིས་ནི་སྔགས་པ་བསྟེན། །འདོད་པའི་དོན་ཕྱིར་བསྒྲུབ་པ་གང་ཡིན་དེ། །གྲུབ་ནའང་གནོད་སྦྱིན་བུ་མོ་སྦྱིན་པར་བྱེད། །ཅེས་བྱ་བ་ལ་སོགས་པ་ནས། གཞན་གྱི་ཆུང་མར་ཡིད་ལ་
བསམས་ནས་སུ། །འདོད་པ་སྟེན་པར་བྱེད་པ་གང་ཡིན་དེ། །མི་ཤེས་ཡིད་ཀྱིས་གཞན་གྱི་ཆུང་མ་ལ། །འདོད་པ་སྤྱད་པས་སྡིག་པ་མང་དུ་ཐོབ། །ཅེས་བྱ་བའི་བར་དུ་གསུངས་སོ། །དེ་བཞིན་དུ་འཇིག་རྟེན་པའི་གསང་སྔགས་ལྷ་དང་ཀླུ་དང་གནོད་སྦྱིན་ལ་སོགས་པས་ཇི་
ལྟར་ཁོང་དུ་ཆུད་པ་བཞིན་དུ་སྨྲས་པ་དེ་ཡང་། སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་རྣམས་ཀྱིས་བྱིན་གྱིས་བརླབཔའི་ཕྱིར། དེ་རྣམས་ཀྱི་དངོས་གྲུབ་རབ་དང་འབྲིང་དང་། ཐ་མའི་མཚན་ཉིད་ཇི་ལྟ་བ་བཞིན་བསྟན་པ་དེ་ནི་དོན་བཅུ་
བཞི་པ་སྟེ། དེའི་ཕྱིར། རྒྱལ་བ་ལ་དད་གཞན་ལ་ཕན་བརྩོན་པའི། །ལྷ་དང་ལྷ་མིན་གནོད་སྦྱིན་དྲི་ཟ་དང་། །གྲུབ་པར་བཅས་པས་སྔགས་བཤད་གང་ཡིན་པ། །ཞེས་བྱ་བ་ལ་སོགས་པ་ནས། དེ་དག་འབྲས་བུའང་རབ་དང་འབྲིང་དང་ནི། །ཐ་མར་དབྱེ་བས་རྣམ་པ་
གསུམ་དུ་བསྟན། །ཞེས་བྱ་བ་ལ་སོགས་པ་རྒྱ་ཆེར་སྦྱར་རོ། །དེ་བཞིན་དུ་འཇིག་རྟེན་དང་འཇིག་རྟེན་ལས་འདས་པའི་རིག་སྔགས་དང་། གསང་སྔགས་ཀྱི་རྒྱུད་དང་ཆོ་ག་ཞིབ་མོར་དུག་གི་ལས་ཀྱི་དབྱེ་བ་བཤད་པའི་མིང་བསྡུས་ནས་བསྟན་པ་ནི་དོན་བཅོ་ལྔ་པ་སྟེ། དེའི་
ཕྱིར། བྱ་བ་དང་ཁུ་ཚུར་ཐལ་ལྕག་སྐྲ་དྲང་དང་། །རྣ་བར་བཟླས་དང་དབབ་དང་བསྐྲད་པ་དང་། །ཞེས་བྱ་བ་ལ་སོགས་པ་ནས། དུང་གི་སྒྲས་ནི་བསླང་བར་བྱ་བ་སྟེ། །རྣམ་པ་འདི་དག་དུག་གི་ལས་སུ་བཤད། །ཅེས་བྱ་བའི་བར་དུ་རྒྱས་པར་གསུངས་སོ། །དེ་བཞིན་དུ་སྦྲུལ་གྱི་
རིགས་ཀྱི་བྱེ་བྲག་བསྟན་པ་ནི་དོན་བཅུ་དྲུག་པ་སྟེ། དེའི་ཕྱིར། ས་ཡི་སྟེང་ན་སྦྲུལ་ནི་བརྒྱད་ཅུ་དག །གཞན་ལ་གནོད་པར་བྱེད་ཅིང་རྣམ་པར་འཁྱམ། །དེ་དག་རྣམས་ལས་ཉི་ཤུ་གདེངས་ཀ་ཅན། །འཁྱིལ་པ་དྲུག་དང་དུག་མེད་བཅུ་གཉིས་དང་། །དེ་བཞིན་སྦྲུལ་ནི་ཁྲོ་བོ་བཅུ་གསུམ་

71-1-53b

སྟེ། །སུམ་ཅུ་གང་ཡིན་དེ་ནི་རིགས་སུ་གཏོགས། །སྦལ་པ་གོ་དྷ་སྡིག་པ་ཁ་བརྒྱད་དང་། །རྣམ་པར་དབྱེ་ན་རབ་ཏུ་མང་པོ་ཡོད། །ཅེས་བྱ་བ་གསུངས་སོ། །དེ་བཞིན་དུ་མི་ལ་སོགས་པའི་ལུས་ལ་སྦྲུལ་དེ་དག་དུག་གཏོང་བའི་སྦྱོར་བ་བསྟན་པ་ནི་དོན་བཅུ་བདུན་པ་སྟེ། དེའི་ཕྱིར། 
གཅིན་རྟུག་ཁ་ཆུ་རེག་དང་མཐོང་བ་དང་། །མཆེ་བ་བཙུགས་པ་ལས་ནི་དུག་ཀྱང་གཏོང་། །དེ་ལས་དུག་གི་རྒྱུ་ལ་མཁས་པ་ཡིས། །རབ་འབྲིང་ཐ་མ་གསུམ་དུ་རྣམ་པར་དབྱེ། །ཞེས་བྱ་བ་གསུངས་སོ། །དེ་དག་ལས་མི་ལ་སོགས་པ་ལ་ཟ་བར་བྱེད་པའི་རྒྱུ་བསྟན་པ་ནི་དོན་བཅོ་
བརྒྱད་པ་སྟེ། དེའི་ཕྱིར། དུག་མོད་ཁྲོ་བོའི་དབང་གྱུར་སྐྲག་པ་དང་། །དེ་བཞིན་དངངས་པའམ་བཀྲེས་པའི་ཁ་ཟས་ཕྱིར། །ཤ་ཁོན་ཡོད་པའམ་གཤིན་རྗེས་བསྒོ་བའམ། །ལུས་ལ་བརྫིས་ནས་དེ་དག་ཟ་བར་བྱེད། །ཅེས་བྱ་བ་ལ་སོགས་པ་གསུངས་སོ། །དེ་ལ་མི་ལ་སོགས་
པ་ལ་སྦྲུལ་དེ་དག་གིས་ཇི་ལྟར་མཆེ་བས་བཏབ་ནས་དུག་གཏོང་བར་བྱེད་པ་དང་དེ་དག་གིས་མཆེ་བས་བཏབ་པའི་མཚན་ཉིད་བསྟན་པ་ནི་དོན་བཅུ་དགུ་པ་སྟེ། དེའི་ཕྱིར། ཟོས་པ་དེ་ཡང་རྣམ་པ་བཞིར་འགྱུར་ཏེ། །མཆེ་བས་ཟིན་དང་སོས་བཅད་བཏབ་པའོ། །གང་དུ་མཆེ་བ་
གཅིག་གིས་ཁྲག་ཕྱུང་རྗེས། །དེ་ནི་དུག་ཆུང་བས་ནི་ཟིན་པར་བཤད། །གང་དུ་མཆེ་བ་གཉིས་ཀྱིས་བཏབ་ནས་སུ། །ཁྲག་དག་ཕྱུང་བར་གྱུར་པ་ཟོས་པའོ། །གལ་ཏེ་མཆེ་བ་གསུམ་གྱིས་ཤ་བཅད་པ། །དེ་ནི་བཅད་པར་གྱུར་པ་ཡིན་ཞེས་བསྟན། །གང་དུ་མཆེ་བ་བཞི་ཡིས་
བཏབ་ནས་སུ། །སྦྲུལ་གྱི་ལུས་ནི་བཟློག་པར་གྱུར་པ་དེ། །བཏབ་ནས་ཟོས་པ་ཡིན་ཞེས་བཤད་པ་སྟེ། །དེ་ནི་སྨན་རྣམས་ཀྱིས་ཀྱང་བཟློག་པར་དཀའ། །ཞེས་བྱ་བ་གསུངས་སོ། །དེ་ལ་གསང་སྔགས་ཀྱི་རྒྱུད་ཐམས་ཅད་ལས་རྣམ་པ་གཉིས་ཀྱིས་དུག་གསོ་བར་བསྟན་པ་ལས།  
དེ་གཉིས་ལས་ཀྱང་སྔགས་ཀྱིས་གསོ་བ་གཙོར་བསྟན་པ་ནི་དོན་ཉི་ཤུ་པ་སྟེ། དེའི་ཕྱིར། མེ་ཡི་རང་བཞིན་གནད་དུ་འཕནཔའི་དུག །མཚོན་དང་མེ་དང་འདྲ་ཞིང་མཚུངས་པ་དག །ཇི་ལྟར་སྔགས་ཀྱིས་རབ་ཏུ་ཞི་འགྱུར་བ། །དེ་བཞིན་སྨན་གྱིས་ཞི་བར་མི་ནུས་སོ། །ཞེས་

71-1-54a

བྱ་བ་ལ་སོགས་པ་ནས། དུག་གི་མཐུ་སྟོབས་ཤེས་ནས་རབ་བསྒྲིམས་ཏེ། །གསང་སྔགས་ཆོ་ག་བཞིན་དུ་བཟླས་སྒྲུབ་ན། །སྦྱོར་བ་འདིས་ནི་དུག་ཀྱང་འཕྲོག་པར་བྱེད། །བ་ལང་ཁྱུ་ན་སེང་གེ་ཇི་ལྟ་བར། །དུག་ཅན་སྦྲུལ་དང་དོན་མེད་ལྷན་ཅིག་རྩེ། །ཞེས་
བྱ་བའི་བར་དུ་གསུངས་སོ། །དེ་བཞིན་དུ་གདོན་གྱིས་ཟིན་པས་གསོ་བའི་དབང་དུ་བྱས་ནས། གདོན་རྣམས་ཀྱི་དབྱེ་བ་བསྟན་པ་ནི་དོན་ཉི་ཤུ་གཅིག་པ་སྟེ་དེའི་ཕྱིར། ལྷ་དང་ལྷ་མིན་གནོད་སྦྱིན་གྲུབ་པ་དང་། །དྲི་ཟ་འབྱུང་པོ་མཚན་དང་གསང་བ་དང་། །ཡི་དྭགས་ཤ་ཟ་དག་དང་
ལུས་སྲུལ་པོ། །སྨྱོ་བྱེད་མདངས་འཕྲོག་པ་དང་གྲིབ་གནོན་དག །ས་ཡི་སྟེང་ན་གདོན་ནི་སྣ་ཚོགས་པ། །མི་ཤ་ཚིལ་ཡང་ཟ་ཞིང་ཁྲག་ཀྱང་འཐུང་། །ཞེས་བྱ་བ་གསུངས་སོ། །མི་ལ་སོགས་པ་དེ་དག་གི་གླགས་སྐབས་བསྟན་པ་ནི་དོན་ཉི་ཤུ་གཉིས་པ་སྟེ། དེའི་ཕྱིར། མྱ་ངན་
འདོད་གདུངས་ཁྲོ་བས་ཉམ་ཐག་པའི། །གླགས་སྐབས་རྙེད་ནས་ལུས་ལ་འཇུག་པར་བྱེད། །ཅེས་བྱ་བ་གསུངས་སོ། །གདོན་གྱིས་ཟིན་པ་རྣམས་ཀྱི་སྤྱོད་པ་བསྟན་པ་ནི་དོན་ཉི་ཤུ་གསུམ་པ་སྟེ། དེའི་ཕྱིར། དེ་དག་རྣམས་ཀྱིས་ཟིན་པའི་མི་འཕྱན་ཅིང་། །གླུ་ལེན་གར་བྱེད་
དགོད་དང་ཁྲོ་བ་དང་། །དགའ་ཞིང་རྔམ་པ་ཆེ་ལ་སྨྲ་འདོད་དང་། །སྤྱོད་པ་སྣ་ཚོགས་བྱེད་པའི་ལྷ་རྣམས་དང་། །ལྷ་མིན་ལྟར་འཆོས་སྐྱེ་བོ་བཞད་གད་བྱེད། །ཅེས་བྱ་བ་གསུངས་སོ། །མི་ལ་སོགས་པ་རྣམ་པ་གསུམ་གྱི་ཕྱིར་འཛིན་པར་བསྟན་པ་ནི་དོན་ཉི་ཤུ་བཞི་པ་སྟེ། 
དེའི་ཕྱིར། གཏོར་མ་འདོད་པའམ་རྩེད་མོ་བྱེད་འདོད་པས། །གསད་པའི་དོན་དུ་ལུས་ལ་འབེབས་ཤིང་འཇུག །ཅེས་བྱ་བ་གསུངས་སོ། །གདོན་གྱིས་ཟིན་པ་རྣམས་ཐར་བར་བྱ་བའི་ཐབས་སུ་གྱུར་པ་གསང་སྔགས་རྣམས་དང་།  དེའི་ལས་བྱེད་པ་རྣམས་ཀྱི་མིང་བསྟན་པ་ནི་དོན་ཉི་
ཤུ་ལྔ་པ་སྟེ། དེའི་ཕྱིར། གསང་བ་པ་རྣམས་གཞིག་ཕྱིར་རིགས་ཀྱི་མཆོག །མཐུ་ཆེན་མཆོག་སྦྱིན་རྡོ་རྗེ་ལྕགས་ཀྱུའམ། །གཞན་ཡང་ང་ཡི་རིགས་ལས་བྱུང་རིག་པའམ། །ཁྲོ་བོ་བདུད་རྩི་ཐབ་སྦྱོར་ལ་སོགས་པས་སོ། །ཞེས་བྱ་བ་ལ་སོགས་པ་ནས། འབྱུང་པོའི་རིག་

71-1-54b

སྔགས་འདིར་ནི་ཀུན་མཐོང་དང་། །གདོན་གྱི་སྤྱོད་པ་མ་ལུས་ཤེས་ནས་སུ། །ཕྱི་ནས་གདོན་རྣམས་དོགས་མེད་འདུལ་ན་ནི། །གདོན་གྱིས་མི་འཇིགས་སླར་ཡང་ཚུགས་པ་མེད། །ཅེས་བྱ་བ་གསུངས་སོ། །དེ་བཞིན་དུ་སངས་རྒྱས་དང་བྱང་ཆུབ་སེམས་དཔའ་དང་། རང་སངས་
རྒྱས་དང་། ཉན་ཐོས་ལ་མངོན་པར་དད་པ་རྣམས་ཀྱིས་གསང་སྔགས་བཤད་པ་གང་ཡིན་པ་དེ་དག་ལ། འཇིག་རྟེན་པའི་ལྷས་སྨྲས་པའི་གསང་སྔགས་རྣམས་ཀྱི་མཐུས་མི་ཐུབ་པར་བསྟན་པ་ནི་དོན་ཉི་ཤུ་དྲུག་པ་སྟེ། དེའི་ཕྱིར།  རིག་གསུམ་འཕེལ་དང་སྲིད་གསུམ་མཐར་
ཕྱིན་པའི། །ཞེས་བྱ་བ་ལ་སོགས་པ་ནས། འཇིག་རྟེ་ལྷ་ཚོགས་རྣམས་ཀྱིས་བསྔགས་པ་ཡི། །གསང་སྔགས་མཐུ་ཡིས་དེ་ལ་བསྐྱོད་དུ་མེད། །ཅེས་བྱ་བའི་བར་དུ་གསུངས་སོ། །གསང་སྔགས་ཀྱི་མདོ་སྡེ་འདི་བཤད་པ་རྫོགས་པར་བསྟན་པ་ནི་དོན་ཉི་ཤུ་བདུན་པ་སྟེ། དེའི་
ཕྱིར། རྡོ་རྗེ་འཆང་གི་གསུང་ཐོས་ལྷ་རྣམས་དང་། །ཚངས་པ་ལྷ་མིན་གནོད་སྦྱིན་གྲུབ་པ་དང་། །རིག་འཛིན་ཀླུ་དང་གནོད་སྦྱིན་དྲི་ཟ་དང་། །གསང་བ་པ་དང་མཚུན་དང་འབྱུང་པོ་རྣམས། །དད་པས་ཞབས་ལ་སྤྱི་བོས་ཕྱག་འཚལ་ཏེ། །གུས་པས་ཐལ་མོ་སྦྱར་ནས་ཚིག་
གསོལ་པ། །ཞེས་བྱ་བ་ལ་སོགས་པ་ནས། གཞལ་མེད་ཁང་དུ་མངོན་དུ་ཞུགས་ནས་ཀྱང་། །ཇི་ལྟར་འོངས་པ་ནམ་མཁའི་ལམ་ནས་དོང་། །ཞེས་བྱ་བའི་བར་དུ་རྒྱས་པར་སྦྱར་རོ། །དེ་བཞིན་དུ་ལྷ་རྣམས་དང་ནས། ཕྱག་ན་རྡོ་རྗེས་ཡང་། དཔུང་བཟངས་ལ་བསྟན་པ་ནི་དོན་ཉི་ཤུ་
བརྒྱད་པ་སྟེ། དེའི་ཕྱིར། ལྷ་རྣམས་ཀུན་གྱིས་མདོ་འདི་ཤེས་ཟིན་གྱིས། །ཁྱོད་ཀྱིས་འཇིག་རྟེན་འདིར་ནི་གྲགས་པར་གྱིས། །ཞེས་བྱ་བ་ལ་སོགས་པ་གསུངས་སོ། །འཕགས་པ་དཔུང་བཟངས་ཀྱིས་ཞུས་པའི་རྒྱུད་ཀྱི་བསྡུསཔའི་དོན་སློབ་དཔོན་སངས་རྒྱས་གསང་བས་མཛད་པ་རྫོགས་སོ།།      །། 
༄༅།  །འཕགས་པ་དཔུང་བཟངས་ཀྱིས་ཞུས་པའི་རྒྱུད་ཀྱི་ཚིག་གི་དོན་བཤད་པའི་བརྗེད་བྱང་བཞུགས། ༄༅༅།  །ཆོས་དབྱིངས་མཉམ་པ་ཉིད་ལ་རབ་ཞུགས་ཀྱང་། །ཐུགས་རྗེས་གཏན་དུ་མྱ་ངན་མི་འདའ་ཞིང་། །འགྲོ་བའི་དོན་མཛད་མཐའ་ཡས་གཟུགས་མངའ་བ། །དཔལ་

71-1-55a

བརྟན་རྡོ་རྗེ་བསྣམས་ལ་ཕྱག་འཚལ་ལོ། །དེ་ལྟར་བསྡུས་པའི་དོན་དང་དགོས་པ་དག །སློབ་དཔོན་ཁྱད་པར་ཅན་གྱིས་གསལ་མཛད་ཀྱང་། །ཚིག་གི་དོན་དང་མཚམས་སྦྱར་བརྒལ་བའི་ལན། །རང་ལ་གཅེས་པའི་དོན་དུ་ཅུང་ཟད་དབྱེ། །དེ་ལ་གནོད་སྦྱིན་
བདག་པོ་ཞེས་བྱ་བ་ནི་ཕྱག་ན་རྡོ་རྗེ་སྟེ། གནོད་སྦྱིན་ཐམས་ཅད་འདུལ་བར་མངའ་གསོལ་བའི་ཕྱིར་རོ། །ཉི་མ་སྟོང་གི་གཟི་ཞེས་བྱ་བ་ནི་སྐུ་དང་ཐུགས་ཀྱི་ཡོན་ཏན་ལ་སྦྱར་རོ། །ཐུགས་རྗེ་ཞེས་བྱ་བ་ནི་སེམས་ཅན་ཐམས་ཅད་ལ་བརྩེ་བར་དགོངས་པའི་དོན་ཏོ། །རྩེ་གཅིག་ཡིད་གྱུར་
ཞེས་བྱ་བ་ནི་དེ་བཞིན་ཉིད་ལ་དགོངས་པའི་དོན་ཏོ། །བཞུགས་པ་ལ་ཞེས་བྱ་བ་ནི་ཚངས་པའི་གནས་པ་ལ་སོགས་པ་སྟེ་ཐུགས་རྗེས་ཞེས་སྨོས་པའི་ཕྱིར་རོ། །དཔུང་བཟངས་ཚུལ་བཞིན་གུས་པར་ཕྱག་འཚལ་ནས། །ཞེས་བྱ་བ་ནི་ཤིན་ཏུ་དང་བས་མགོ་བོས་ཡབ་ཀྱི་ཞབས་ལ་
གཏུགས་ཏེ་ཕྱག་བྱས་པའི་དོན་ཏོ། །ཚོགས་ཀུན་གྲུབ་ལ་ཞུས་ཞེས་བྱ་བ་ནི་སངས་རྒྱས་དང་བྱང་ཆུབ་སེམས་དཔའ་ལ་སོགས་པས། རིག་སྔགས་དང་གསང་སྔགས་མང་པོ་སོ་སོའི་ཆོ་ག་ཞིབ་མོ་གསུངས་པ་རྣམས་ངེས་པར་དངོས་གྲུབ་ཏུ་གྱུར་པར་བྱ་བའི་དོན་རྣམས་ཞུས་ཞེས་བྱ་
བའི་ཐ་ཚིག་གོ། །ས་སྟེང་མི་རྣམས་ཞེས་བྱ་བ་ནི་སྐབས་འདི་ལ་སོགས་རིག་སྔགས་འཆང་ལ་སྦྱར་བའི་ཤས་ཆུང་བའི་དོན་ཏོ། །བཟླས་བརྗོད་ཅེས་བྱ་བ་ནི་ཡན་ལག་བཞི་པའི་དོན་ཏོ། །སྨྱུང་བ་ཞེས་བྱ་བ་ནི་ཁ་ཟས་མི་ཟ་བའོ། །དཀའ་ཐུབ་ཅེས་བྱ་བ་ནི་འགལ་བའི་ཟས་དང་གོས་
སྤང་བའོ། །ངེས་པར་སྤྱད་པ་ཞེས་བྱ་བ་ནི་སྨྱུང་བ་དང་མི་སྨྲ་བའི་དཀའ་ཐུབ་ཀྱི་དུས་འདི་སྲིད་གཅིག་ཏུ་བྱའོ་ཞེས་ལུས་དང་ངག་གི་སྒོ་ཤིན་ཏུ་སྡོམ་པའོ། །རབ་ཏུ་བསྒྲིམས་ཀྱང་གྲུབ་པ་མ་མཐོང་ན། །ཞེས་བྱ་བ་ནི་འབད་པར་ནི་གཟིགས་ལ་གྲུབ་པར་ནི་མ་གཟིགས་ཞེས་བྱ་བའི་ཐ་
ཚིག་གོ། །གཙོ་བོ་ཁྱོད་ཀྱིས་ཞེས་བྱ་བ་ནི་སྐབས་འདིར་ཕྱག་ན་རྡོ་རྗེ་ཁོ་ན་སྨོས་པ་ནི་ས་འཛིན་ནམ་རྡོ་རྗེའི་རིགས་ཀྱི་ཤས་ཆེར་གསུངས་པར་རིག་པར་བྱའོ། །སྡིག་འཇོམས་ཞེས་བྱ་བ་ནི་གསང་སྔགས་དེ་དག་གི་ལས་རྣམ་པར་དག་པ་བསྟན་ཏོ། །དག་བྱེད་རྣམས་ཀྱི་མཆོག་ཅེས་

71-1-55b

བྱ་བ་ནི་རང་བཞིན་རྣམ་པར་དག་པ་བསྟན་ཏོ། །བདེན་པའི་གསུང་གིས་རབ་ཏུ་བཀའ་སྩལ་ན། ཞེས་བྱ་བ་ནི་རྒྱུད་རྣམ་པར་དག་པར་བསྟན་པའོ། །ཇི་ལྟར་སྔགས་རྣམས་འབྲས་བུ་མ་མཆིས་གྱུར། །ཞེས་བྱ་བ་ནི་རྣམ་པར་དག་པའི་ཁུངས་ནས་བྱུང་བ་ལ། སླུ་བ་མི་སྲིད་པར་
བརྗོད་པའོ། །རབ་དང་འབྲིང་དང་དེ་བཞིན་ཐ་མ་ཞེས་བྱ་བ་ལ་སོགས་པས་ནི་ནམ་མཁའ་ལ་འགྲོ་བ་ལ་སོགས་པའི་དངོས་གྲུབ་སྒྲུབ་པ་པོ་ལ་ཡོན་ཏན་ཡང་ཡོད། གསང་སྔགས་ཀྱང་མཐུ་ཆེ་མོད་ཀྱི། མ་བསྒྲུབས་པའི་ཕྱིར་དངོས་གྲུབ་མ་ཐོབ་བོ་ཞེས་བྱ་བའི་གླན་
ཀ་བསལ་བའི་དོན་ཏོ། །འབྲས་བུ་ཞེས་བྱ་བ་དང་གྲུབ་པ་ཞེས་བྱ་བ་ནི་རྣམ་གྲངས་ཏེ། ནམ་མཁའ་ལ་འགྲོ་བ་ལ་སོགས་པའོ། །སྒྲུབ་པ་ཉོན་མོངས་ཁོ་ན་ཅི་རུང་ལགས། །ཞེས་བྱ་བ་ནི་ངལ་བའི་འབྲས་བུ་མེད་པ་ནི་སྨད་པའོ་ཞེས་བྱ་བའི་ཐ་ཚིག་གོ། །རྒྱལ་བ་ཞེས་བྱ་བ་ནི་སྡིག་
པ་མི་དགེ་བའི་ཆོས་ལས་རྒྱལ་བའི་ཕྱིར་སངས་རྒྱས་ཏེ། ཇི་སྐད་དུ། སྡིག་པ་མི་དགེའི་ཆོས་ལས་ང་རྒྱལ་ཏེ། །དེ་ཕྱིར་ང་ནི་ཉེ་འགྲོ་རྒྱལ་བ་ཡིན། །ཞེས་གསུངས་པ་ལྟ་བུའོ། །ཡེ་ཤེས་ཞི་བ་ཞེས་བྱ་བ་ནི་སངས་རྒྱས་ཀྱི་མཁྱེན་པ་ལ་འདོད་ཆགས་ལ་སོགས་པ་མ་ཞི་བ་མི་
སྲིད་པའི་ཕྱིར་རོ། །དེ་ཡིས་འདི་དག་གསོ་བར་སྔོན་གསུངས་ན། །ཞེས་བྱ་བ་ནི་ཡེ་ཤེས་དེ་སེམས་ཅན་རྣམས་ཀྱིས་རྟོགས་པར་བྱ་བའི་དོན་དུ་འདོད་ཆགས་ནས་ལེ་ལོའི་བར་གྱི་གཉེན་པོར་མ་ཆགས་པ་ནས་བརྩོན་འགྲུས་ཀྱི་བར་ལ་གདུལ་བྱ་རྣམས་དགོད་པར་ལུང་ལས་གསུངས་
པའོ། །གང་ལ་སྔགས་དང་རིག་པའང་འགྲུབ་མེད་པ། །ཞེས་བྱ་བ་ནི་གསང་སྔགས་ཀྱི་སྒོ་ནས་འཇུག་པ་རྣམས་བག་མེད་པའི་གནས་ནས་བསླངས་ཏེ། དངོས་གྲུབ་ཐོབ་པར་འགྱུར་བའི་ཐབས་བཤད་པར་གསོལ་བ་འདེབས་པའི་དོན་ཏོ། །དེ་དག་རྣམས་ཀྱང་ཇི་ལྟར་གསོལ་བར་
བགྱི། །ཞེས་བྱ་བ་ནི་ཞར་ལ་ཕ་རོལ་ཏུ་ཕྱིན་པའི་སྒོ་ནས་འཇུག་པ་རྣམས་ཀྱང་བག་མེད་པའི་གནས་ནས་བསླངས་ཏེ། མ་ཆགས་པ་ནས་བརྩོན་འགྲུས་ཀྱི་བར་ལ་དགོད་པར་གསོལ་བ་འདེབས་པའི་ཐ་ཚིག་གོ། །ཐུགས་རྗེ་དང་ལྡན་པས་ཞེས་བྱ་བ་ལ་སོགས་པས་ནི། ཡང་གསང་

71-1-56a

སྔགས་ཀྱི་ལས་དང་རང་བཞིན་དང་རྒྱུ་རྣམ་པར་དག་པ་དེ་ཅིའི་ཕྱིར་མ་གྲུབ་ཅེས་བཟླས་ཏེ་ཞུས་པའོ། །ཆོ་ག་ཞེས་བྱ་བ་ནི་འཇུག་པ་ལ་སོགས་པ་དང་གསང་སྔགས་དང་ཕྱག་རྒྱའོ། །ཉམས་ཞེས་བྱ་བ་ནི་དེ་དག་ཉིད་ལས་མ་ཚང་བའམ་འཁྲུལ་པའོ། །མཐུ་མ་
མཆིས་ཞེས་བྱ་བ་ནི་ཀྱེ་གསང་སྔགས་དེ་དག་ལ་འགྲུབ་པར་ནུས་པའི་མཐུ་ཡོད་དམ་ཞེས་བྱ་བའི་དོན་ཏོ། །དུས་ཀྱི་རང་བཞིན་ཞེས་བྱ་བ་ནི་དབྱར་དགུན་དང་སྔ་དྲོ་ལ་སོགས་པའི་དུས་དང་མ་སྦྱར་བའི་ཉེས་པའམ་ཞེས་བྱ་བའི་ཐ་ཚིག་གོ། །སྡིག་པས་བསྒྲིབས་ཞེས་བྱ་བ་ནི་
མཚམས་མེད་པ་ལ་སོགས་པ་མི་དགེ་བའི་ལས་བསགས་པས་མངོན་པར་མཐོ་བའི་དཔལ་དང་དངོས་གྲུབ་ཐོབ་པའི་སྐལ་བ་དང་མི་ལྡན་པར་གྱུར་ཏམ་ཞེས་བྱ་བའི་དོན་ཏོ། །གསང་སྔགས་གཞན་དུ་གྱུར་ཏམ་ཞེས་བྱ་བ་ནི་ཡི་གེ་ལྷག་པ་དང་ཆད་པས་དབྱིངས་དང་རྣམ་པར་ཐར་
པའི་སྒོ་སྟོན་པའི་སྒྲ་གཞན་དུ་གྱུར་ཏམ། ཞེས་བྱ་བའི་ཐ་ཚིག་གོ། །མཆོད་ལས་གྱུར་ཞེས་བྱ་བ་ནི་རིགས་ཀྱི་བྱེ་བྲག་གིས་གཞན་གྱི་མཆོད་པ་གཞན་ལ་ཕུལ་བས་འོས་པ་མ་ཡིན་པའམ། ཡང་ན་མ་ལྕོགས་པའི་ཉེས་པའམ་ཞེས་བྱ་བའི་དོན་ཏོ། །ཐམས་ཅད་མ་ལུས་
བཅོམ་ལྡན་འདས་ཀྱིས་གསུངས། ཞེས་བྱ་བ་ནི་དཔུང་བཟངས་ཀྱིས་ཡོངས་སུ་ཞུས་པ་རྣམས་མ་ལུས་པར་བཀའ་སྩོལ་ཅིག་ཅེས་མཇུག་བསྡུས་པའོ། །ཡུད་ཙམ་ཞེས་བྱ་བ་ནི་སེ་གོལ་ཐང་ཅིག་སྐད་ཅིག་མ་དྲུག་ཅུ་རྩ་བཞི་ལ་སོགས་ཏེ། དུས་ཀྱི་བྱེ་བྲག་རབ་ཏུ་ཕྲ་བར་འདྲེན་
པ་ལ་ནི་མི་བྱའི། འཕྲལ་གྱི་སྤྱོད་པའི་སྐད་ཅིག་ཡུད་ཙམ་ཞེས་བྱ་བ་ལ་གདགས་སོ། །དགོངས་ནས་ཞེས་བྱ་བ་ནི་མ་འོངས་པའི་སོ་སོའི་སྐྱེ་བོའི་སློབ་དཔོན་རྣམས་ལ་གདམས་པའི་དབང་དུ་མཛད་དེ་ཞུས་པའི་དོན་མ་འཁྲུལ་པ་དང་ལྡན་པ་དང་འཁྲུལ་པ་གླན་པར་བསྟན་ཏོ། །རྡོ་རྗེ་ཞེས་
བྱ་བ་ནི་བཅོམ་ལྡན་འདས་ཀྱི་ཡེ་ཤེས་ཀྱི་མཚན་མའོ། །མེ་སྟག་ཅེས་བྱ་བ་ནི་འོད་ཟེར་རོ། །འཕྲོ་ཞེས་བྱ་བ་ནི་སེམས་ཅན་གྱི་དོན་རྒྱས་པར་མཛད་པའི་མཚན་ཉིད་དོ། །ཨེ་མའོ་ཞེས་བྱ་བ་ནི་ཡབ་ཐུགས་དགྱེས་ཤིང་དམ་པའི་ཚིག་གོ། །ཟླ་བའི་འོད་ལྟར་ལམ་མེ་བའི། །ཞེས་བྱ་བ་ནི་

71-1-56b

ཐུགས་རྗེ་ཆེན་པོས་སེམས་ཅན་ཐམས་ཅད་ལ་དབྲི་བཀོལ་མེད་པར་ཕན་འདོགས་པའི་དཔེ་སྟེ། ཇི་སྐད་དུ། འོད་ཟེར་རབ་ཏུ་གསལ་བ་ཡིས། །གནམ་ནི་རྒོད་པ་ལྟར་བྱེད་པའི། །སྟོན་ཀའི་ཟླ་བ་དེ་དང་ནི། །འཇིག་རྟེན་རྣམས་དང་ཅི་ཡིས་འབྲེལ། །ཞེས་འབྱུང་བ་དང་འདྲ་བར། 
སྙིང་རྗེས་སེམས་ཅན་ཕན་ཕྱིར་ཞེས་བྱ་བའི་དོན་དང་ཡང་། དམ་པ་རིང་ན་གནས་གྱུར་ཀྱང་། །མ་འདྲིས་གཉེན་དུ་མ་འབྲེལ་བའི། །སྐྱེ་བོ་དགའ་བས་རྗེས་འབྲངས་པ། །དེ་ཡི་རྒྱུ་ནི་ཡོན་ཏན་དཔལ། །ཞེས་བཤད་དོ། །ཤིན་ཏུ་དྲི་མ་མེད་པའི་སེམས། །ཞེས་བྱ་བ་ནི་ལྷག་
པར་སེམས་ཅན་རྣམས་ལ་བཅོས་པ་མེད་པར་བརྩེ་ཞེས་བྱ་བའི་ཐ་ཚིག་གོ། །དེ་ཡིས་ཞེས་བྱ་བ་ནི་ཐུགས་རྗེ་ལྷག་པར་ཆེ་བ་དེའི་ཕན་ཡོན་གྱིས་ཞེས་བྱ་བའི་དོན་ཏོ། །བདེ་གཤེགས་སྲས་ནང་ཞེས་བྱ་བ་ནི་ཐུགས་ལས་སྐྱེས་པའི་བྱང་ཆུབ་སེམས་དཔའ་སར་ཆུད་པ་རྣམས་ཀྱི་ནང་ངོ་། །
ཕ་རོལ་ཕྱིན་པར་གྱུར་ཞེས་བྱ་བ་ནི་སངས་རྒྱས་ཀྱི་ཚོགས་མྱུར་དུ་རྫོགས་པར་འགྱུར་རོ་ཞེས་བྱ་བའི་ཐ་ཚིག་གོ། །ཐུགས་རྗེ་དེ་ལྟར་སྐྱེས་པ་ཙམ་གྱིས་མཐར་ཐུག་པ་མ་ཡིན་གྱིས་ཀྱང་། འཇིག་རྟེན་ན་ས་བོན་ཤིན་ཏུ་བཟང་ཞིང་སྐྱོན་མེད་པ་ལ་དེའི་འབྲས་བུ་བཟང་པོ་ཞེས་འདོགས་པ་
བཞིན་ཏེ་ཉེས་པ་མེད་དོ། །རང་གི་བདེ་མ་ཆགས་ཞེས་བྱ་བ་ནི་བྱང་ཆུབ་སེམས་དཔའ་རྣམས་བདག་གི་འདུ་ཤེས་དང་བྲལ་བས་བདག་ལ་ཕངས་པར་སེམས་པ་ཡང་མེད་ན་ཡོ་བྱད་ཐམས་ཅད་ལ་ཕངས་པར་སེམས་པ་ལྟ་ག་ལ་ཡོད་དེ་འཁོར་ལོས་སྒྱུར་བའི་རྒྱལ་སྲིད་ལ་སོགས་པ་
ཡང་རྩྭ་དང་འདྲ་བར་འདོར་བའི་ཕྱིར་རོ། །རང་གི་སྡུག་བསྔལ་རྣམས་ཀྱིས་མི་བརྗེད་ཀྱང་། །ཞེས་བྱ་བ་ཡང་བདག་ཏུ་འཛིན་པ་དང་བྲལ་བའི་དབང་གིས་འཆི་བ་ལ་སོགས་པའི་སྡུག་བསྔལ་གྱིས་མི་འཇིགས་ཞེས་བྱ་བའི་དོན་ཏོ། །གཞན་གྱི་སྡུག་བསྔལ་རྣམས་ཀྱིས་སྡུག་བསྔལ་ཏེ། 
ཞེས་བྱ་བ་ནི་སྙིང་རྗེ་ཆེན་པོ་སྔོན་དུ་འགྲོ་བའི་ལྷག་པའི་བསམ་པ་མ་ཉམས་པ་དང་མི་དམའ་བས་སེམས་ཅན་ཐམས་ཅད་ཀྱི་དགེ་བའི་རྩ་བ་བསྐྱེད་པའི་ཕྱིར་ཤིན་ཏུ་བརྩོན་པར་བྱེད་པའི་ཐ་ཚིག་གོ། །དེ་དག་བདེ་བས་དགའ་དང་ལྡན་པར་གྱུར། །ཞེས་བྱ་བ་ནི་བྱམས་པ་ཆེན་པོ་དང་ལྡན་པ་རྣམས་

71-1-57a

ཀྱི་ཆོས་ཉིད་དོ། །སྐྱེ་བོ་དམ་པས་གཞན་གྱི་བདེ་བསྒྲུབས་སམ། །སྡུག་བསྔལ་བཟློག་ན་དེ་དང་མཚུངས་པར་ནི། །བདེ་དང་སྡུག་བསྔལ་རབ་ཏུ་མྱོང་བར་འགྱུར། །རང་གི་བདེ་བ་གྲུབ་ཀྱང་དེ་ལྟ་མིན། །ཞེས་བཤད་དོ། །རྩེ་གཅིག་ཡིད་བྱོས་ཞེས་བྱ་བ་ནི་བྱང་ཆུབ་
སེམས་དཔའི་རྒྱུད་ལ་མ་ཞི་བར་མི་འབྱུང་གིས་ཀྱང་མ་འོངས་པའི་སྐྱེ་བོ་ཆོས་ཉན་པའི་མི་རྣམས་ལ་གདམས་པའི་དབང་དུ་མཛད་དེ་གསུངས་སོ། །དེ་ཡི་བརྟུལ་ཞུགས་ཞེས་བྱ་བ་ནི་འཇུག་པ་ལ་སོགས་པ་རྣམ་པ་བཞིའོ། །དེ་ཡིས་ཞེས་བྱ་བ་ནི་སྒྲུབ་པ་པོའི་སྐྱེས་བུས་སོ། །བདེ་
བར་གཤེགས་པ་ཞེས་བྱ་བ་ནི་སངས་རྒྱས་ཏེ། དེ་ནི་བདེ་བར་གྱུར་ཅིང་མཐོ་རིས་ཀྱི་བདེ་བ་དང་ལྡན་པ་ལ་གནོད་པ་མི་མངའ་བའི་དོན་ཏོ། །དད་པ་སྐྱེས་ནས་ཞེས་བྱ་བ་ནི་དེ་ལ་དང་བ་དང་འདུན་པ་བསྐྱེད་པར་བྱ་བའི་ཐ་ཚིག་གོ། །དེ་བཞིན་དུ་ཞེས་བྱ་བ་ནི་དང་བ་དང་འདུན་པ་ལྟར་
རོ། །བྱང་ཆུབ་སེམས་ཀྱང་བསྐྱེད་ཅེས་བྱ་བ་ནི་འདིར་སྨོས་པ་དང་སྦྱར་རོ། །སེར་སྣ་ཞེས་བྱ་བ་ནི་འདོད་ཆགས་ཀྱི་ཆར་གཏོགས་པའི་སེམས་ཀྱིས་ཡོ་བྱད་རྣམས་ཀུན་དུ་འཛིན་པའོ། །དྲེགས་དང་རྒྱགས་པ་ཞེས་བྱ་བ་ནི་རྣམ་པ་གསུམ་སྟེ། རིགས་དང་སྟོབས་དང་གཟུགས་
དང་ཡིད་གཞུངས་པ་དང་བློ་དང་ལོངས་སྤྱོད་དང་། དབང་ཕྱུག་ལ་སོགས་པས་སོ། །རྣམ་སྤངས་ཏེ་ཞེས་བྱ་བ་ནི་ཐམས་ཅད་དུ་བསལ་ཏེའོ། །དཀོན་མཆོག་གསུམ་ལ་དད་པ་བརྟན་པར་བྱ། །ཞེས་བྱ་བ་ནི་སངས་རྒྱས་ལ་བལྟ་བ་དང་ཆོས་ཉན་པ་དང་། དགེ་འདུན་ལ་རིམ་
གྲོ་བྱ་བའི་དོན་ཏོ། །རྡོ་རྗེའི་རིགས་ཞེས་བརྗོད་པ་རྒྱ་ཆེན་དང་། །ཞེས་བྱ་བ་ནི་འདིར་རྡོ་རྗེའི་རིགས་ཀྱི་ཤས་ཆེར་གསུངས་པའི་ལྷའི་བྱེ་བྲག་མང་པོ་རྣམས་སོ། །ང་ལ་ཡང་ནི་དད་ཅིང་དགའ་བར་བྱ། །ཞེས་བྱ་བ་ནི་ཕྱག་ན་རྡོ་རྗེ་ལ་མོས་པར་བྱ་བའི་དོན་ཏོ། །ཚིག་རྩུབ་ཅེས་
བྱ་བ་ནི་ཞེར་འདེབས་ཤིང་བརླང་བའོ། །ཕྲ་མ་ཞེས་བྱ་བ་ནི་དབྱེན་གྱི་ཚིག་གོ། །འཁྱལ་པ་སྨྲ་ཞེས་བྱ་བ་ནི་ཚིག་གི་རྣམ་པར་གཡེངས་པའོ། །གཞན་གྱི་བུད་མེད་བགྲོད་ཅེས་བྱ་བ་ནི་རུས་དང་བདག་པོ་དང་ཆོས་ཀྱིས་བསྲུངས་པ་རྣམས་ལ་གཉིས་ཀྱི་དབང་པོ་སྤྲོད་པའམ། 

71-1-57b

ཡན་ལག་མ་ཡིན་པར་སྤྱོད་པ་དོན་གཉེར་བའོ། །བརྫུན་ཞེས་བྱ་བ་ནི་སླུ་བའི་ཚིག་གོ། །རྐུན་པོ་ཞེས་བྱ་བ་ནི་རྐུ་སེམས་ཉེ་བར་བཞག་སྟེ་མ་བྱིན་པར་ལེན་པའོ། །གཞན་གྱི་སྲོག་གཅོད་གནོད་བྱེད་ཅེས་བྱ་བ་ནི། ཆེད་དུ་བསམས་ཏེ་ལུས་ཀྱིས་མཐོ་བཙམས་པ་ཆེན་
པོ་བྱེད་པའོ། །ཆང་དང་བྱེད་པ་ནི་རང་བཞིན་གྱིས་ཁ་ན་མ་ཐོབ་མ་ཡིན་གྱིས་ཀྱང་ཉེས་པ་ཐམས་ཅད་འབྱུང་བའི་རྩ་བར་འགྱུར་བའི་ཕྱིར་རོ། །རྟག་ཏུ་སྤང་བར་ཞེས་བྱ་བ་ནི་ཐམས་ཅད་ལ་སྦྱར་བའི་དོན་ཏོ། །རྨོངས་པ་གང་གིས་ཞེས་བྱ་བ་ནི་མི་བླུན་པོ་འགའོ། །བསོད་ནམས་
བསགས་བྱས་ཀྱང་ཞེས་བྱ་བ་ནི། ཡོངས་སུ་མ་དག་པ་ལ་སོགས་པའི་སྦྱིན་པ་བྱས་པའོ། །ཐམས་ཅད་ལོག་པར་ལྟ་བས་བཅོམ་པས་ན། །ཞེས་བྱ་བ་ནི་རྒྱུ་དང་འབྲས་བུ་དང་བྱེད་པ་ལ་སྐུར་པ་འདེབས་པ་དང་། ཚུལ་ཁྲིམས་ངན་པའི་ལྟ་བ་དང་མ་བྲལ་བའི་ཕྱིར་དགེ་བའི་
ཕྱོགས་ཐམས་ཅད་ལ་རྒྱབ་ཀྱིས་ཕྱོགས་པར་གྱུར་ཏོ། །དེ་ཡི་རྣམ་སྨིན་མི་འདོད་འབྲས་བུར་འགྱུར། །ཞེས་བྱ་བ་ནི་ཡིད་དུ་མི་འོང་བ་སྟེ་ངན་སོང་དུ་ལྷུང་བའི་དོན་ཏོ། །འོ་ན། བསྐལ་པ་དག་ནི་བརྒྱ་རུ་ཡང་། །ལས་རྣམས་ཆུད་ཟར་མི་འགྱུར་ཏེ། །ཞེས་བཤད་པ་དང་སྦྱར་
ན། ལོག་པར་ལྟ་བའི་སྡིག་པས་མི་འདོད་པ་མྱོང་ཡང་བསོད་ནམས་བྱས་པས་འདོད་པའི་འབྲས་བུ་ཅིའི་ཕྱིར་མི་འགྱུར་ཞེ་ན། ལོག་པར་ལྟ་བའི་མེས་བསྲེགས་པས་དགེ་བ་མི་སྐྱེ་ཞེས་བྱ་བའི་ཐ་ཚིག་གོ། །དཔེར་བརྗོད་པ་ནི་ས་བོན་ཚིག་པའོ། །འདིར་ངག་རྩུབ་པོ་དང་སྲོག་
གཅོད་པའི་རྒྱུ་ནི་གནོད་སེམས་ཡིན་ལ། མ་བྱིན་པར་ལེན་པའི་རྒྱུ་ནི་བརྣབ་སེམས་ཡིན་པ་དེ་གཉིས་གུད་དུ་མ་ཕྱེ་སྟེ་འབྲས་བུ་ལ་བསྡུས་སོ། །གོ་རིམས་འཁྲུགས་པ་ནི་ཚིགས་སུ་བཅད་པ་སྦྱར་བ་ལ་བདེ་བའི་ཕྱིར་རོ། །ལོག་པར་ལྟ་བ་རྣམ་སྤངས་ལ། །ཞེས་བྱ་བ་ལ་
སོགས་པས་ནི་རྗེས་སུ་བསྟན་པ་བརྗོད་པའོ། །ལྷ་ནི་ས་དང་རི་ལ་གནས་པ་དང་ལྷ་ཡུལ་པའོ། །ལྷ་མ་ཡིན་ཞེས་བྱ་བ་ནི་སྐབས་འདིར་ལྷ་མ་གཏོགས་པའི་གདོན་ཐམས་ཅད་ལ་རིག་པར་བྱའོ། །ཤ་ཁྲག་ཟ་འཐུང་ཞེས་བྱ་བ་ནི་དེ་དག་གི་ཟས་ཐ་དད་པར་སྨོས་པའོ། །མཚན་

71-1-58a

མོ་རྒྱུ་བ་ཞེས་བསྟན་པ་ནི་མི་མ་ཡིན་པའི་གདོན་རྣམས་དེའི་དུས་སུ་སྤྱོད་པའི་ཕྱིར་རོ། །གནོད་པ་བྱེད་ཅིང་རྒྱུ་ཞེས་བྱ་བ་ནི་མི་རྣམས་ལ་གཙེ་བའི་བསམ་པ་ཁོ་ནས་བགེགས་བྱེད་པར་ངེས་པ་ཞེས་བྱ་བའི་ཐ་ཚིག་གོ། །བཟླས་བརྗོད་བརྩོན་པའི་སེམས་ནི་གཡེང་
བར་བྱེད། །ཅེས་བྱ་བ་ནི་ཁྱད་པར་དུ་བགེགས་བྱེད་པར་བསྟན་ཏོ། །དེ་དག་རྣམས་ཀྱི་གཉེན་པོར་གྱུར་པའི་ཕྱིར། །ཞེས་བྱ་བ་ལ་སོགས་པས་ནི་བགེགས་བྱེད་པའི་རྒྱུར་བསྟན་ཏོ། །གནོད་བྱེད་དེ་དག་ཅེས་བྱ་བ་ནི་བགེགས་རྣམས་སོ། །བདག་ཉིད་ཅེས་བྱ་བ་ནི་སྒྲུབ་པ་པོའི་
སྐྱེས་བུའོ། །འབྱོར་བར་བྱ་ཕྱིར་ཞེས་བྱ་བ་ནི་དངོས་གྲུབ་ཀྱི་དཔལ་མངོན་དུ་ཕྱོགས་པར་བྱ་བའི་ཐ་ཚིག་གོ། །ངས་གསུངས་པའི་ཞེས་བྱ་བ་ནི་རྡོ་རྗེའི་རིགས་ཤས་ཆེར་གསུངས་པའི་དོན་ཏོ། །དཀྱིལ་འཁོར་ལྷ་དང་ལྷ་མིན་གནས་གྱུར་པ། །དམ་ཚིག་ཇི་བཞིན་ཞེས་བྱ་བ་ནི་དམ་
ཚིག་གི་དཀྱིལ་འཁོར་ཚུལ་བཞིན་དུ་བྲིས་པ་སྟེ། དེར་མི་མ་ཡིན་པ་ཐམས་ཅད་ཀྱིས་དམ་ཚིག་ཕུལ་བས་རྒྱ་ཆེ་བར་ཁོང་དུ་ཆུད་པར་བྱའོ། །བསོད་ནམས་དོན་དུ་བལྟ་ཞེས་བྱ་བ་ནི་དེར་ཞུགས་ན་བསོད་ནམས་འཕེལ་ཞེས་བྱ་བའི་ཐ་ཚིག་གོ། །སྣ་ཚོགས་པའི་གདོན་ཞེས་
བྱ་བ་ནི་གདོན་གྱི་རིགས་སྟོང་ཕྲག་བརྒྱད་ཅུ་རྩ་བཞི་དག་ཏུ་འཕེལ་བའོ། །རྣམ་པ་སྣ་ཚོགས་ལས་བྱེད་པའི། །དཀྱིལ་འཁོར་ཞེས་བྱ་བ་ནི་གདོན་དེ་དག་གཞོམ་པའི་གཉེན་པོར། དཀྱིལ་འཁོར་ཐ་དད་པར་བཤད་པ་དག་སྟེ། དེ་དག་ནི་གདོན་གྱི་རིགས་རེ་རེའི་ལས་ཉི་ཚེ་བྱེད་
པས་རྒྱ་ཆུང་བར་བསྟན་ཏོ། །གནོད་བྱེད་གཞོམ་པའི་ཕྱིར་ཞེས་བྱ་བ་ནི་ས་འཛིན་ཏེ་དངོས་སུ་གདོན་ཐམས་ཅད་འཇོམས་པར་གོ་བར་བྱའོ། །གང་ཡང་རིག་པ་མཆོག་ཏུ་གསུངས་པ་དང་། །ཞེས་བྱ་བ་ནི་རྒྱུད་དེར་གདོན་སྣ་ཚོགས་ཀྱི་གཉེན་པོར་དཀྱིལ་འཁོར་གང་དག་གང་
བཤད་པའོ། །ཁྲོ་བོའི་དཀྱིལ་འཁོར་དུ་ཡང་འཇུག་པར་བྱ། །ཞེས་བྱ་བ་ནི་དེ་ཉིད་ལ་སོགས་པ་བརྒྱད་ཀྱི་དཀྱིལ་འཁོར་འབྱུང་བའོ། །དེར་ནི་ཞེས་བྱ་བ་ནི་རིག་པ་མཆོག་གི་རྒྱུད་ཆེན་པོར་ཞེས་བྱ་བའི་དོན་ཏོ། །དམ་ཚིག་སྣ་ཚོགས་ངས་བཤད་པ། །ཞེས་བྱ་བ་ནི་ཕྱག་ན་རྡོ་རྗེ་དང་

71-1-58b

དབང་ཕྱུག་ཆེན་པོའི་དམ་ཚིག་བཤད་པའི་དཀྱིལ་འཁོར་གྱི་རྒྱལ་པོ་དེར་ཐམས་ཅད་ཀྱི་དམ་ཚིག་འདུས་ཞེས་བྱ་བའི་ཐ་ཚིག་གོ། །སྡིག་པ་བསལ་ཕྱིར་རྒྱུན་དུ་བལྟ་བར་བྱ། །ཞེས་བྱ་བ་ནི་དཀྱིལ་འཁོར་གྱི་རྒྱལ་པོ་དེར་ཞུགས་ན་སྡིག་པ་ཐམས་ཅད་འབྱང་ཞེས་བྱ་བའི་དོན་ཏོ། །རྡོ་རྗེའི་
རིགས་གཙོ་ཞེས་བྱ་བ་ནི་ཡུམ་མཱ་མ་ཀཱིའོ། །ཕོ་ཉ་མོའི་ཚོགས་དང་རིག་པ་མང་པོས་བསྟན་པའི་ལྷ་མོ་ཞེས་བྱ་བ་ཡང་དེ་ཉིད་དོ། །ཐམས་ཅད་ཀྱིས་མཆོད་ཅིང་བསྙེན་བཀུར་བྱ་བའི་གནས་ཡིན་པར་བསྟན་ཏོ། །ཟློས་པ་ཞེས་བྱ་བ་ནི་ཡུམ་གྱི་གསང་སྔགས་ཟླས་པའི་རིག་སྔགས་འཆང་
པའོ། །མཐོང་ནས་ཞེས་བྱ་བ་ནི་བགེགས་ཀྱིས་མཐོང་ཞེས་བྱ་བའི་དོན་ཏོ། །བགེགས་རྣམས་ཕུང་བ་དང་། རྔམ་པ་འདོན་ཅིང་ཤིན་ཏུ་སྐྲག་པར་འགྱུར། །ཞེས་བྱ་བ་ནི་ཡུམ་གྱི་གསང་སྔགས་མཐུ་རླབས་ཆེ་བར་བསྟན་པའི་ཐ་ཚིག་གོ། །ཇི་ལྟ་ཇི་ལྟར་དཀྱིལ་འཁོར་མཐོང་བ་དང་། །
ཞེས་བྱ་བ་ནི་དམ་ཚིག་གི་དཀྱིལ་འཁོར་དུ་ཞུགས་པའོ། །དེ་ལྟ་དེ་ལྟར་རྡོ་རྗེའི་རིགས་བསྟན་དང་། །ཞེས་བྱ་བ་ནི་དཀྱིལ་འཁོར་དུ་ཞུགས་ནས་ལྷར་མནོས་ཏེ་གསང་སྔགས་རྗེས་སུ་དྲན་པའོ། །རིག་པའི་ཚོགས་ལ་བརྟེན་པའི་བསོད་ནམས་ཀྱིས། །ཞེས་བྱ་བ་ནི་རིགས་གཞན་གྱི་
རིག་སྔགས་ཀྱི་ཚོགས་ལ་བརྟེན་པའི་མཐུ་ཡང་དེ་བཞིན་དུ་ཆེ་བར་དགོངས་པའོ། །དེ་ཡི་ལུས་ལ་བྱིན་རླབས་མ་ལུས་འཇུག །ཅེས་བྱ་བ་ནི་དཀྱིལ་འཁོར་དུ་ཞུགས་པའི་དུས་ན་མིའི་སྤྱོད་ཡུལ་དུ་མ་གྱུར་གྱིས་ཀྱང་། ཡེ་ཤེས་ཀྱི་རང་བཞིན་རྡོ་རྗེ་ལ་སོགས་པའི་ཕྱག་རྒྱ་རྣམས་
ལས་གསང་སྔགས་ཀྱི་བྱིན་གྱི་རླབས་ཀྱིས་འོད་ཟེར་བྱུང་སྟེ། དེ་དག་སྒྲུབ་པ་པོའི་ལུས་ལ་འཇུག །ཅེས་བྱ་བའི་ཐ་ཚིག་གོ། །མི་ཚུགས་རྡོ་རྗེའི་བདག་ཉིད་ཅེས་བྱ་བ་ལ་སོགས་པས་ནི་དེའི་ཕན་ཡོན་བསྟན་ཏོ། །ང་ཡི་དམ་ཚིག་མཐོང་བའི་བུ་དག་གིས། །ཞེས་བྱ་བ་ལ་སོགས་
པས་ནི་དཀྱིལ་འཁོར་དུ་ཞུགས་པའི་ཕན་ཡོན་གྱི་རྣམ་གྲངས་གཞན་བསྟན་པའོ། །རིག་སྔགས་མ་མཐོང་བ་ནི་ལྷའི་རང་བཞིན་མི་ཤེས་པའོ། །དམ་ཚིག་མ་མཐོང་ཞེས་བྱ་བ་ནི་དམ་ཚིག་གི་དཀྱིལ་འཁོར་དུ་མ་ཞུགས་ཤིང་དམ་ཚིག་མི་སྲུང་བའོ། །སྙིང་རྗེ་མེད་ཅེས་བྱ་བ་ནི་རང་བཞིན་

71-1-59a

རྩུབ་པའོ། །བྱང་ཆུབ་ཀྱི་སེམས་མ་བསྐྱེད་ཅེས་བྱ་བ་ནི་སྨོན་པ་ཙམ་ཡང་མེད་པའོ། །སངས་རྒྱས་ལ་མ་དད་ཅེས་བྱ་བ་ནི་ཡིད་མ་ཆེས་པས་བརྙས་ཤིང་མ་དད་པའི་དོན་ཏོ། །ལྷ་གཞན་ལ་བརྟེན་ཞེས་བྱ་བ་ནི་འཇིག་རྟེན་པའི་ལྷ་ལ་བརྟེན་ཅིང་མུ་སྟེགས་པའི་ཕྱོགས་
འཛིན་པའོ། །ང་ཡི་གསང་སྔགས་བཟླས་ན་ཕུང་བར་འགྱུར། །ཞེས་བྱ་བ་ནི་འཆི་བ་དང་འཇིག་རྟེན་ཕ་རོལ་དུ་ཡང་ངན་སོང་དུ་སྐྱེ་བར་འགྱུར་རོ། །བསམ་པ་ཞན་ཅིང་ཞེས་བྱ་བ་ནི་སེམས་ཞུམ་པའོ། །ཉམས་ཀྱིས་མི་ལྕོགས་པས་ཞེས་བྱ་བ་ནི་ཡོ་བྱད་དང་མི་ལྡན་ཞེས་བྱ་བའི་དོན་ཏོ། །
དཀྱིལ་འཁོར་ཀུན་ཞེས་བྱ་བ་ནི་གོང་དུ་སྨོས་པ་ཐམས་ཅད་དོ། །བལྟ་བར་མི་ནུས་ནའང་ཞེས་བྱ་བ་ནི་ཡོ་བྱད་མ་འབྱོར་ཏེ་སེམས་ཞུམ་ནས། དཀྱིལ་འཁོར་འབྲི་ཞིང་འཇུག་མ་ནུས་ན་ཡང་། །ཞེས་བྱ་བའི་དོན་ཏོ། །གཅིག་ཙམ་ཞིག་ཀྱང་དད་པས་མཐོང་གྱུར་ན། །ཞེས་བྱ་བ་ནི་ཡོ་
བྱད་མེད་པའི་སྒྲུབ་པ་པོ་དབུལ་པོས་ཀྱང་དཀྱིལ་འཁོར་དེ་དག་རྣམས་ལས་ཉམས་ཀྱིས་གང་ལྕོགས་པ་གཅིག་ནི་ངེས་པར་འདྲི་དགོས་པར་གསུངས་ཏེ། དོན་དེ་ཉིད་རབ་ཏུ་གྲུབ་པར་བྱེདཔའི་རྒྱུད་ཆེན་པོ་ལས་ཀྱང་ཇི་སྐད་དུ།  ཡོ་བྱད་ཆུང་ངུ་དག་གིས་ཀྱང་། །བཟླས་བརྗོད་བྱེད་པས་
དཀྱིལ་འཁོར་བྲི། །ཞེས་གསུངས་པའི་ཕྱིར་རོ། །གནོད་སྦྱིན་གྱི་ཚོགས་ཞེས་བྱ་བ་ནི་ས་དང་རི་དང་རི་རབ་ཀྱི་ངོས་ལ་གནས་པའོ། །མཚན་མོ་རྒྱུ་བ་ཞེས་བྱ་བ་ནི་མི་མ་ཡིན་པ་ཐམས་ཅད་དོ། །ས་བླའི་གདོན་ཞེས་བྱ་བ་ནི་བར་སྣང་བ་ལས་ཁྲུ་གང་གིས་སྤགས་པ་ཡན་ཆད་ན་གནོད་སྦྱིན་
གྱི་གྲོང་གནས་པ་རྣམས་སོ། །ཀླུའི་བདག་པོ་ཞེས་བྱ་བ་ནི་ཀླུའི་རྒྱལ་པོའོ། །ལྷ་ཞེས་བྱ་བ་ནི་ས་དང་རི་ལ་གནས་པ་དང་ལྷ་ཡུལ་པའོ། །སོགས་པ་ཞེས་བྱ་བས་ནི་འདིར་མ་སྨོས་པའི་གདོན་ཐམས་ཅད་བསྡུས་པར་རིག་པར་བྱའོ། །བགེགས་ཞེས་བྱ་བ་ནི་རྣམ་པར་འཇིགས་པ་ལ་
སོགས་པའོ། །ལོག་འདྲེན་ཞེས་བྱ་བ་ནི། དེ་དག་ཉིད་གནོད་པར་བྱེད་པའི་ཁྱད་པར་གྱིས་མིང་གཞན་ནོ། །བརྟུལ་ཞུགས་གནས་པ་ཞེས་བྱ་བ་ནི་རིག་སྔགས་འཆང་འཇུག་པ་ལ་སོགས་པའི་དུས་སུ་ཚུལ་ཁྲིམས་རྣམ་པ་གསུམ་པོ་དག་ལ་གནས་པའོ། །གླགས་མི་ལྟ་ཞེས་བྱ་

71-1-59b

བ་ནི་ཚུལ་ཁྲིམས་དེ་དག་ལ་གནས་པའི་ཕན་ཡོན་གྱིས་གོང་དུ་སྨོས་པའི་གདོན་ཐམས་ཅད་འཛེམ་ནས་རྒོལ་མི་ཕོད་པར་བསྟན་ཏོ། །ཚུལ་ཁྲིམས་ལ་བརྟེན་ནས་ཞེས་བྱ་བ་ནི་ཚུལ་ཁྲིམས་ནི་དགེ་བའི་ཕྱོགས་ཐམས་ཅད་ཀྱི་རྟེན་ཡིན་པར་བརྗོད་པའོ། །ཆོས་དཀར་པོ་ཞེས་བྱ་བ་
ནི་མོས་པ་སྤྱོད་པའི་ས་ལ་སྣང་བ་ཐོབ་པའི་དུས་སུ་དངོས་པོར་རྣམ་པར་བྱང་བའི་ཕྱོགས་སྐྱེས་པ་གང་ཡིན་པའོ། །སྙིང་རྗེའི་ཆུས་བརླན་པས་ནི་རྣམ་པར་སྐྱེ། །ཞེས་བྱ་བ་ནི་འདིར་སྙིང་རྗེའི་རྩ་བའི་རླན་གྱིས་ཚུལ་ཁྲིམས་ཀྱི་ས་གཞི་ལ་བརྟེན་པའི་བྱང་ཆུབ་ཀྱི་སེམས་ཀྱི་མྱུ་གུ་བསྐྱེད་ཅེས་བྱ་
བར་སྦྱར་རོ། །རྒྱལ་བ་ངས་གསུངས་ཞེས་བྱ་བ་ནི་སངས་རྒྱས་ཀྱི་ས་ཤིན་ཏུ་ལེགས་པར་ཕྱེ་སྟེ་བསྟན་ཞེས་བྱ་བའི་དོན་ཏོ། །སོ་སོར་ཐར་པའི་བསླབ་པ་ཞེས་བྱ་བས་ནི་མྱ་ངན་ལས་འདས་པའི་གྲོང་ཁྱེར་དུ་ཕྱིན་པར་བྱེད་ཅེས་བྱ་བའི་ཐ་ཚིག་གོ། །ཚུལ་ཁྲིམས་རྣམ་པར་དག་པ་ཞེས་
བྱ་བ་ནི་ཟག་པ་མེད་པའི་རྒྱུ་ཡིན་པའི་ཕྱིར་རོ། །འདུལ་བ་ཞེས་བྱ་བ་ནི་གདུལ་བྱ་རྣམས་སྲབ་ཀྱིས་ཁ་ལོ་སྒྱུར་བ་དང་འདྲ་བའི་དོན་ཏོ། །མ་ལུས་ཞེས་བྱ་བ་ནི་རབ་ཏུ་བྱུང་བ་ལ་བསླབ་པའི་གཞི་ཐམས་ཅད་དོ། །སྔགས་པ་ཁྱིམ་པ་རྣམས་ལ་ནི་གཞན་ཏེ། རྟགས་ཞེས་བྱ་བསྐྲ་དང་ཁ་
སྤུ་བྲེག་པ་དང་། ངུར་སྨྲིག་གི་སྣམ་སྦྱར་བཅང་བ་ལ་སོགས་པ་དང་། ཆོ་ག་སྤང་ཞེས་བྱ་བ་ཡང་ལྷུང་བཟེད་བདུག་པ་ལ་སོགས་པ་བྱ་མི་དགོས་པ་བསྟན་ཏོ། །ལྷག་མ་རྣམས་ནི་ཉམས་སུ་བླང་བར་བྱ། །ཞེས་བྱ་བ་ནི་བསླབཔའི་གཞི་བསྙེན་གནས་དང་རིག་སྔགས་ཀྱི་བརྟུལ་ཞུགས་
ལ་གནས་པས་སྨད་འཚོང་དང་གདོལ་པ་དང་ཤན་པ་དང་རྒྱལ་པོའི་ཕོ་བྲང་དུ་མི་འགྲོ་བའི་སྤྱོད་ཡུལ་ཕུན་སུམ་ཚོགས་པ་ལ་ནི་རབ་ཏུ་བྱུང་བ་བཞིན་དུ་བསླབ་པར་བྱ་བའི་དོན་ཏོ། །དེ་ལྟར་སྡིག་པའི་ཆོས་ལས་རྣམ་གྲོལ་ནས། །ཞེས་བྱ་བ་ནི་སྡོམ་པ་ལ་གནས་པའི་ཕྱིར་རོ། །ལེགས་
པར་གསུངས་པའི་ཕྱིར་ཆོས་ཞེས་བྱ་བ་ནི་གཞན་ཕྱི་རོལ་པ་དང་མི་འདྲ་བར་བཅོམ་ལྡན་འདས་ཀྱིས་ལེགས་པར་བསྟན་ཞིང་གོ་བར་བྱས་ཏེ་རིག་པ་དང་ལྡན་ཞེས་བྱ་བའི་ཐ་ཚིག་གོ། །དག་ཅིང་ཞེས་བྱ་བ་ནི་ཉོན་མོངས་པ་དང་མ་འདྲེས་པའི་དོན་ཏོ། །གྲོལ་བ་ཞེས་བྱ་བ་ནི་ཁམས་གསུམ་

71-1-60a

གྱི་འཆིང་བ་གཅོད་པའི་ཐ་ཚིག་གོ། །ཟློས་པས་སྐྱོ་ན་མདོ་སྡེ་བཀླག་པར་བྱ། །ཞེས་བྱ་བ་ནི་བཟླས་བརྗོད་བཏང་བའི་དུས་ན་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་གདོན་པར་བསྟན་པའི་དོན་ཏོ། །གཙང་ཞིང་ཞེས་བྱ་བ་ནི་ས་གཞི་ལ་སོགས་པ་སྐྱོན་མེད་
པའོ། །དབེན་པའི་ས་ཕྱོགས་ཞེས་བྱ་བ་ནི་རྟོག་ལམ་དུ་མ་བབ་པའོ། །འཇིམ་པའམ་ནི་བྱེ་མ་ཞེས་བྱ་བ་ནི་ཡུལ་རྣམས་ཀྱིས་གང་མོད་པ་ལས་བྱ་བའི་དོན་ཏོ། །ལས་བྱས་པའི་བདེ་གཤེགས་མཆོད་རྟེན་ཞེས་བྱ་བ་ནི་མཆོད་རྟེན་གྱི་ཆ་དབྱེ་བ་ལས་བདེ་བར་གཤེགས་པའི་ཆེ་
བའི་ཡོན་ཏན་དེ་ལ། རྫོགས་པར་གཞག་པས་མཆོད་པའི་འོས་ཡིན་པར་བསྟན་ཏོ། །རྟེན་འབྲེལ་སྙིང་པོ་ཅན་ཞེས་བྱ་བ་ནི་རྣམ་པར་སྣང་མཛད་མངོན་པར་རྫོགས་པར་བྱང་ཆུབ་པའི་རྒྱུད་ཆེན་པོ་ལས། ཇི་སྐད་དུ། ཆོས་གང་རྒྱུས་བྱུང་དེ་དག་གི། །རྒྱུ་དང་དེ་འགོག་གང་
ཡིན་པ། །དེ་བཞིན་གཤེགས་པས་བཀའ་སྩལ་ཏེ། །དེ་སྐད་གསུངས་པ་དགེ་སྦྱོང་ཆེ། །ཞེས་གསུངས་པ་འདི་དང་ལྡན་པར་བསྟན་ཏོ། །སྡིག་པ་སྦྱང་བའི་ཕྱིར་ནི་རྟག་ཏུ་གདབ། །ཅེས་བྱ་བ་ནི་ཀུན་ནས་སྒོར་འཇུག་པའི་འོད་ཟེར་གཙུག་ཏོར་དྲི་མ་མེད་པར་སྣང་བའི་གཟུངས་
ལས། ཇི་སྐད་དུ། གངྒཱའི་ཀླུང་གི་བྱེ་མ་སྙེད་དེ་བཞིན་གཤེགས་པ་རྣམས་ལ་དགེ་བའི་རྩ་བ་བསྐྱེད་པར་འགྱུར་རོ་ཞེས་བྱ་བ་ལ་སོགས་པའི་ཡོན་ཏན་མང་པོར་འགྱུར་བའི་ཕྱིར་རོ། །རིང་བསྲེལ་ཅན་གྱིས་ཞེས་བྱ་བ་ནི་བྱང་ཆུབ་ཀྱི་སྙིང་པོའི་རྒྱན་གྱི་གཟུངས་ཀྱི་ཆོ་ག་ཞིབ་མོ་ལས། 
ཆོས་ཀྱི་སྐུའི་རིང་བསྲེལ་དང་། དེ་བཞིན་གཤེགས་པའི་སྐུ་གདུང་གི་རིང་བསྲེལ་དང་། སྐུ་བལ་གྱི་རིང་བསྲེལ་དང་། ཆོས་ཀྱི་རིང་བསྲེལ་དང་། ཡུངས་འབྲུ་ཙམ་གྱི་རིང་བསྲེལ་ཞེས་གསུངས་ཏེ། འདི་རྣམས་གང་དང་ལྡན་ན་ཡང་རིང་བསྲེལ་ཅན་དུ་གོ་བར་བྱའོ། །སྐུ་གཟུགས་
ཞེས་བྱ་བའི་མཚན་ཉིད་ནི་འོག་མས་འཆད་དོ། །མཆོད་རྟེན་ཞེས་བྱ་བ་ནི་རིག་པ་མཆོག་གི་རྒྱུད་ཆེན་པོ་ལས་བྱ་གག་གི་སྒོ་ང་འདྲ་བར་འདུག་ན་དངོས་གྲུབ་སྦྱིན་པར་འགྱུར་རོ་ཞེས་གསུངས་ཏེ། དེ་དང་སྦྱར་རོ། །བསྟོད་ཅིང་ཞེས་བྱ་བ་ལ་སོགས་པས་ནི་ལུས་དང་ངག་དང་ཡིད་ཀྱི་

71-1-60b

མཆོད་པ་དང་མཐུན་མཐུན་དུ་སྦྱར་བའི་དོན་ཏོ། །རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། ཡིད་ཀྱི་མཆོད་པ་ལྷག་པར་ནན་ཏན་དུ་བྱ་དགོས་པར་གསུངས་ཏེ། ཇི་སྐད་དུ། ཡིད་ཀྱི་མཆོད་པ་ཁྱད་པར་ཅན། །ཡང་དག་ཉིད་དུ་བརྩམ་པར་བྱ། །ཆོས་ཀྱི་ཐོག་མར་ཡིད་
འགྲོ་ཞེས། །ཐུབ་པ་ཆེན་པོས་བཀའ་སྩལ་ཏོ། །ཞེས་གསུངས་པའི་ཕྱིར་རོ། །ནམ་ཡང་འཁོར་ལོ་གཅིག་པའི་ཤིང་རྟ་ནི། །རྟ་དང་ལྡན་ཡང་ཞེས་བྱ་བ་ལ་སོགས་པས་ནི་སྒྲུབ་པ་པོས་གང་དུ་སྨོས་པའི་ཚུལ་ལས་མི་འགལ་བར་འབད་ཀྱིས་ཀྱང་། སྒྲུབ་པའི་གྲོགས་
མཆོག་མེད་ན་དངོས་གྲུབ་མི་ཐོབ་པར་བསྟན་ཏེ། ཚིག་གི་དོན་གཞན་ནི་གོ་བར་ཟད་དོ། །རྩོད་པའི་དུས་ཞེས་སྨོས་པས་ནི་འདི་ལྟར་ཏིང་ངེ་འཛིན་བརྟན་པའི་དུས་དང་། ཏིང་ངེ་འཛིན་དགེ་བའི་རྩ་བ་ལ་བརྟེན་པའི་དུས་དང་།  ཐོས་པ་འཛིན་པའི་དུས་ན་ཡང་ཁམས་གསུམ་ལས་
སྒྲོལ་བའི་རྒྱུ་ངེས་པར་གནས་ཀྱི། དུས་ལྔ་བརྒྱའི་ཐ་མ་ལ་དགེ་བའི་རྩ་བ་མཐུ་ཆུང་བའི་ཚེ་དངོས་གྲུབ་ཀྱི་མཐུ་ལ་བརྟེན་ནས་ཐར་པའི་ལམ་ལ་འཇུག་པར་བསྟན་པའི་དོན་དུ་རྩོད་པའི་དུས་སུ་དངོས་གྲུབ་སྒྲུབ་པ་གཙོར་གསུངས་ཞེས་བྱ་བའི་ཐ་ཚིག་གོ། །ལེའུ་དང་པོའི་དོན་བཤད་ཟིན་
ཏོ།།      །།རང་སངས་རྒྱས་ཞེས་བྱ་བ་ནི་རང་བྱང་ཆུབ་སྟེ་དེ་དག་བཞུགས་པའི་གནས་ནི་བཱ་རཱ་ཎ་སཱིའི་དྲང་སྲོང་ལྷུང་བའི་རི་ལ་སོགས་པའོ། །བདེ་གཤེགས་ཉིད་སྐྱེས་ཞེས་བྱ་བ་ནི་བྱང་ཆུབ་སེམས་དཔའ་རྣམས་ཏེ་དེ་དག་གི་གནས་ངེས་པ་ནི་རི་བོ་རྩེ་ལྔ་ལ་སོགས་པའོ། །རྒྱལ་བ་སྔོན་ཆད་
གང་ན་བཞུགས་པ་ཡི། །གནས་གང་ཞེས་བྱ་བ་ནི་བྱ་རྒོད་ཕུང་པོའི་རི་ལ་སོགས་པའོ། །བསོད་ནམས་ལྡན་ཞིང་ཞེས་བྱ་བ་ནི་འཕགས་པ་བསོད་ནམས་དང་ལྡན་པས་ཞབས་ཀྱིས་བཅགས་པའོ། །ཡིད་དགའ་བ་ཞེས་བྱ་བ་ནི་སྒྲུབ་པ་པོ་གནས་དེར་མོས་པའོ། །ལྷ་དང་ལྷ་མིན་སོགས་པས་
ཕྱག་འཚལ་མཆོད། །ཅེས་བྱ་བ་ནི་སྔོན་འཕགས་པ་རྣམས་བཞུགས་པའི་ཚེ། དེ་དག་གིས་ཕྱག་བྱས་ཤིང་མཆོད་པའམ། ཡང་ན་སྔོན་ཞབས་ཀྱིས་བཅགས་པས་དེ་ཡང་ས་ཕྱོགས་མཆོད་པའི་འོས་ཡིན་པའི་ཕྱིར་རོ། །གསོ་སྦྱོང་སྡོམ་པ་དང་ནི་ལྡན་པ་ཡིས། །ཞེས་བྱ་བ་ནི་སྒྲུབ་པ་

71-1-61a

པོའི་སྐྱེས་བུའོ། །བདག་ཉིད་དག་པར་བྱ་ཕྱིར་བརྟེན་བྱ་བ། །ཞེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། གནས་དེ་རྣམས་སུ་དངོས་གྲུབ་ནི། །རྣམ་པ་གསུམ་དག་རབ་ཏུ་བསྟན། །ངེས་ཤིང་མྱུར་ལ་རྒྱ་ཆེ་ཞིང་། །བགེགས་མེད་པར་ཡང་དེར་འགྱུར་རོ། །
ཞེས་པའི་ཕྱིར་རོ། །དེ་ལྟ་བུ་དག་མ་རྙེད་ཅེས་བྱ་བ་ནི་བྱིན་གྱིས་བརླབས་པའི་གནས་སོ། །གཞན་ཡང་ཞེས་བྱ་བ་ནི་རང་བཞིན་གྱིས་ཡོན་ཏན་ཅན་བཙལ་བར་བསྟན་པའོ། །ཆུ་བོ་ཆུ་ཀླུང་ཞེས་བྱ་བ་ལ་སོགས་པས་ནི་གནས་ཀྱི་རང་བཞིན་གྱི་ཡོན་ཏན་རྣམས་བརྗོད་པའོ། །མི་བཟད་གདོན
རྣམས་ཀྱང་ནི་མི་གནས་པ། །ཞེས་པ་ནི་ཀླུ་ནག་པོ་གདུག་པ་ལ་སོགས་པའོ། །གྲོག་པོ་གྲོག་མཁར་ཐལ་བ་སྐྲ་ཤད་དང་། །ཉལ་ཉིལ་སོལ་བ་ཚ་སྒོའམ་བཅོག་ཅན་སྤང་། །ཞེས་བྱ་བ་ལ་སོགས་པས་ནི་གནས་ཀྱི་མཚན་ཉིད་མངོན་པར་འདུས་བྱས་པའི་ཡོན་ཏན་དང་ལྡན་པར་བྱ་
བར་བསྟན་ཏོ། །ལྷོ་ཕྱོགས་སུ་ནི་ནམ་ཡང་སྒོ་མི་གདོད། །ཅེས་བྱ་བ་ནི་གཤིན་རྗེའི་ཕྱོགས་ཡིན་པས་བཀྲ་མི་ཤིས་པའི་ཕྱིར་རོ། །དྲི་གཙང་ཁང་པ་དེ་ཡི་ཕྱོགས་ཅིག་ཏུ། །ཞེས་བྱ་བ་ནི་ཤར་ཕྱོགས་ལ་དགོངས་པའི་དོན་ཏོ། །རྒྱལ་བའི་ལམ་མཆོག་རྣམ་པར་སྟོན་པ་ཡི། །ཞེས་
བྱ་བ་ནི་དངོས་གྲུབ་དང་ཐར་པ་ཞེས་བྱ་བའི་ཐ་ཚིག་གོ། །རས་ཀྱི་སྐུ་གཟུགས་ལས་ཕྱིར་བསྟན་པར་གདགས། །ཞེས་བྱ་བ་ནི་སྒྲུབ་པ་པོའི་ཁྱད་པར་གྱི་ལྷའི་གཟུགས་ནི་སོ་སོའི་ཆོ་ག་ཞིབ་མོ་དག་ལས་འབྱུང་སྟེ་ཡོད་ཀྱང་རུང་མི་འབྱུང་སྟེ་མེད་ཀྱང་རུང་གི་སངས་རྒྱས་ཀྱི་སྐུ་གཟུགས་ནི་
རྒྱས་པ་ལ་སོགས་པའི་ལས་འགྲུབ་པའི་དོན་དུ་ངེས་པར་གཞག་པར་བསྟན་པའོ། །ཡང་ན་ཤིང་གཟུགས་ལེགས་པ་མཆོད་ཕྱིར་གཞག །ཅེས་བྱ་བ་ཡང་ཕན་ཡོན་གོང་མ་དང་འདྲ་བའི་ཕྱིར་རོ། །ཤིང་གི་སྐུ་གཟུགས་དེའི་ཚད་ཇི་ཙམ་ཞེས་བྱ་ཞེ་ན། གསང་རྒྱུད་ལྟར་རམ། འཕགས་
པ་ཕྱག་ན་རྡོ་རྗེ་དབང་བསྐུར་བའི་རྒྱུད་ཆེན་པོ་ལས་བདེ་བར་གཤེགས་པའི་མཐོ་གང་ཚད་ཀྱི་སྐུ་གཟུགས་གཞག་ལ་ཞེས་འབྱུང་སྟེ་དེ་དང་སྦྱར་རོ། །ཐག་པས་བཏགས་ཞེས་བྱ་བ་ལ་སོགས་པ་རི་མོར་བྲི་བའི་ཆོ་ག་ཡང་རྒྱུད་དེ་ཉིད་ཀྱི་ཚིག་གིས་དགྲོལ་བར་བྱ་བ་སྟེ། དེ་ལས་ཇི་སྐད་དུ། བྲམ་

71-1-61b

ཟེའམ་རྒྱལ་རིགས་ཀྱི་བུ་མོ་གཟུགས་བཟང་བ། ཡན་ལག་ཐམས་ཅད་ཡོངས་སུ་རྫོགས་པ། གསོ་སྦྱང་བཟུང་བ་ཞག་གི་རིན་ལ་མ་བརྩེགས་པར་ཉོས་པའི་ཤིང་བལ་འཁལ་དུ་བཅུག་ལ། ཚེས་གྲངས་དང་བྱེད་པ་དང་ཡུད་ཙམ་བཟང་པོ་ལ་ཡན་ལག་ཐམས་ཅད་ཡོངས་སུ་རྫོགས་
པའི་ཐ་ག་པ་འཐག་ཏུ་གཞུག་སྟེ། བ་ལང་གི་ལྕི་བ་ས་ལ་མ་ལྷུང་བས་དཀྱིལ་འཁོར་བསྐུས་ལ། སྤོས་དང་མེ་ཏོག་དང་བདུག་པ་ལ་སོགས་པས་ཡང་མཆོད་དོ། །ཐ་ག་པའི་ཐགས་ཆ་རྣམས་ཀྱང་བའི་རྣམ་ལྔ་དང་སྤོས་ཆུས་བཀྲུའོ་ཞེས་གསུངས་སོ། །འཇམ་ལ་སྙོམས་
པ་དང་། ཐགས་བཟངས་དེ་བཞིན་སྐྲ་ཤད་མེད་པ་དང་། །ཞེས་བྱ་བ་ཡང་དེ་ཉིད་ལས་སྐྲ་མེད་པ་དང་མཉམ་པ་དང་འཇམ་པར་བྱའོ་ཞེས་གསུངས་སོ། །ཁོ་ལག་ཆེ་ཞིང་ཞེས་བྱ་བ་ནི་ཆུ་ཞིང་འཚམ་པར་མི་ཆུང་བའོ། །མ་ཉམས་ཞེས་བྱ་བ་ནི་མ་དྲས་པའོ། །ཁ་ཚར་བཅས་ཞེས་
བྱ་བ་ནི་མ་གོད་པའོ། །གཙང་མ་ཞེས་བྱ་བ་ཡང་རྒྱུད་དེ་ཉིད་ལས། སྒྲུབ་པ་པོ་ཁྲུས་བྱས་ཤིང་བྱུག་པས་བྱུགས་ལ། ཐོད་ཟེའུ་ཀས་བཅིངས་ཤིང་དྲི་ཞིམ་པོའི་དྲི་དང་ལྡན་པར་བྱས་པས་མཆོད་པ་རྒྱ་ཆེར་བྱས་ལ། ཨ་ཀ་རུའི་བདུག་པ་བསྲེག་ཅིང་ཐ་ག་པ་ལ་ཡོན་བཟང་དུ་བྱིན་ལ་
དགྲོལ་བར་བྱའོ། །བཀྲོལ་ནས་ཀྱང་བྱིན་གྱིས་བརླབས་ཏེ། ས་ཕྱོགས་གཙང་མར་མེ་ཏོག་གི་སིལ་མ་བཀྲམ་པ་སྤོས་དང་བདུག་པས་བདུགས་ལ་སྤོས་ཆུའི་ནང་དུ་བཅུག་སྟེ་ཞག་བདུན་དུ་གཞག་གོ་ཞེས་གསུངས་སོ། །སྤོས་ཀྱིས་བཏབ་པ་ཞེས་བྱ་བ་ཡང་དེ་ཉིད་ལས་ཕྱེ་མ་འཇམ་
པོས་རས་ལ་ལན་མང་དུ་བསྒོ་བར་བྱའོ། །ཀླུ་ཤིང་དང་ཙམ་པ་ཀ་དང་སྐྱ་སྣར་ལ་སོགས་པའི་མེ་ཏོག་གིས་ཀྱང་བསྐོར་བར་བྱའོ། །དེའི་འོག་ཏུ་སྲུང་བ་བྱས་པས་ཚེས་གྲངས་ངན་པ་དང་མི་མཐུན་པར་འཇུག་པའི་ཉེས་པ་དང་བྲལ་ཞིང་། ཚེས་གྲངས་དང་བྱེད་པ་དང་། ཡུད་ཙམ་
བཟང་པོ་ལ་རོལ་མོའི་སྒྲ་སྣ་ཚོགས་མང་པོ་འབྱིན་པ། ཤིས་པར་བརྗོད་པ་ཡོད་པ། མེ་ཏོག་བཀྲམ་པའི་དཀྱིལ་འཁོར་དུ་མཆོད་པ་རྒྱ་ཆེར་བྱས་ལ། དེ་བཞིན་གཤེགས་པ་ཐམས་ཅད་ལ་ཕྱག་བྱས་ནས་གསོལ་བ་བཏབ་སྟེ་བྲིའོ་ཞེས་གསུངས་སོ། །དེ་ལ་ནི་ཞེས་བྱ་བ་ནི་དག་ཅིང་བསྒོས་

71-1-62a

པའི་རས་ལའོ། །ཚོན་རྩི་སྤྱིན་མེད་ཅེས་བྱ་བ་ནི་ཀ་པི་ཏ་དང་སྦྱར་བའོ། །ཁྲུས་བྱས་གཙང་ལ་གསོ་སྦྱོང་གཟུང་བའི་མི། །མཁས་པས་ཞེས་བྱ་བ་ཡང་དེ་ཉིད་ལས། རི་མོ་མཁན་གསོ་སྦྱོང་གཟུང་བ། མཁས་པ་དད་པ་སྙིང་རྗེ་དང་ལྡན་པ་སེར་སྣ་མེད་པ་
ཡན་ལག་ཐམས་ཅད་ཡོངས་སུ་རྫོགས་པས་བྲི་བར་གསུངས་སོ། །བ་ལང་སྤུ་ཞེས་བྱ་བ་ནི་རྣ་སྤུ་སྟེ་པིར་གྱི་རྒྱུའོ། །བྲི་བར་བྱ་ཞེས་བྱ་བ་ཡང་། དེ་ཉིད་ལས་སྒྲུབ་པ་པོ་བྱམས་པའི་སེམས་དང་ལྡན་པ། ཐོད་ཟེའུ་ཀ་བཅིངས་པ། སྔགས་བགྲང་ནོར་བུ་འཆང་བ་དང་བཅས་པར་
རི་མོ་མཁན་གྱི་རྒྱབ་ན་འདུག་ཅིང་། བཅོམ་ལྡན་འདས་ཀྱི་སྐུ་གཟུགས་དང་ཁ་དོག་དང་བཅས་པར་བྱའོ། །ཕྱག་རྒྱ་དང་ཡི་གེ་རྣམས་ཀྱང་བསམ་མོ། །ཡང་ན་སྒྲུབ་པ་པོ་བདག་ཉིད་ཀྱིས་བྲི་བར་བྱའོ་ཞེས་གསུངས་སོ། །དེའི་ཁ་དོག་དང་ཚུལ་ནི་རིག་པ་མཆོག་གི་རྒྱུད་ཆེན་པོ་
ལས། དེ་བཞིན་གཤེགས་པའི་སྐུ་གཟུགས་བརྙན་གསེར་གྱི་ཁ་དོག་ལྟ་བུ་མཚན་ཐམས་ཅད་ཡོངས་སུ་རྫོགས་ཤིང་དཔལ་གྱི་བེའུས་བརྒྱན་པ། ཕྱག་གཡས་པ་མཆོག་སྦྱིན་པའི་ཚུལ་ལམ་སྐྱབས་མཛད་པའི་ཚུལ་ལ་བལྟས་ཏེ། རིག་སྔགས་བསྒྲུབ་པར་བྱའོ་ཞེས་གསུངས་
སོ། །ཤིང་གཟུགས་ཀྱི་ཚུལ་དེ་དང་མཐུན་པར་ཁོང་དུ་ཆུད་པར་བྱའོ། །ཕྲེང་བ་ཞེས་བྱ་བ་ལ་སོགས་པའི་མཆོད་པ་ནི་རབ་ཏུ་གྲུབ་པའི་རྒྱུད་ཆེན་པོ་ལས་བལྟ་བར་བྱ་སྟེ། འདིར་ཡི་གེ་མང་དུ་དོགས་པས་མ་སྤྲོས་སོ། །སྐུ་གཟུགས་ཆེར་མཆོད་དེ་ཞེས་བྱ་བ་ནི་བྲི་བ་ཟིན་ནས་ཏེ། དེ་ཡང་
ཕྱག་ན་རྡོ་རྗེ་དབང་བསྐུར་བའི་རྒྱུད་དེ་ཉིད་ལས། གདུགས་དང་རྒྱལ་མཚན་དང་བ་དན་བསྒྲེང་ཞིང་། སིལ་སྙན་དང་དགའ་བར་འགྱུར་བའི་སྒྲ་མང་པོ་དང་། ཤིས་པ་རྒྱ་ཆེན་པོ་དང་། བཀྲ་ཤིས་བརྗོད་པ་རྣམས་ཀྱིས་མཆོད་པར་བྱའོ་ཞེས་གསུངས་སོ། །ནུབ་ཕྱོགས་ཞལ་བསྟན་
ཞེས་བྱ་བ་ནི་བསྙེན་པ་ལ་འཇུག་པའི་དུས་སུ་རྒྱས་པའི་ལས་དང་སྦྱར་དགོས་པས་སྐུ་གཟུགས་ཞལ་ནུབ་ཕྱོགས་སུ་བསྟན་ལ། སྒྲུབ་པ་པོ་ཁ་ཤར་ཕྱོགས་སུ་བསྟན་པའི་དོན་ཏོ། །དེ་ཡི་སྤྱན་སྔར་དངོས་གྲུབ་བརྩམ་པར་བྱ། །ཞེས་བྱ་བ་ནི་རིག་པ་མཆོག་གི་རྒྱུད་ཆེན་པོ་ལས། སྐུ་གཟུགས་

71-1-62b

ལ་ཐད་ཀར་བལྟ་ཞིང་བསྒྲུབ་པར་བྱ་བ་སྟེ། གཞན་དུ་བལྟ་ཞིང་བསྒྲུབ་པར་མི་བྱའོ་ཞེས་གསུངས་སོ། །ཡང་དེ་ཉིད་ལས་དེ་བཞིན་གཤེགས་པའི་སྤྱན་སྔར་དྲག་ཤུལ་བསྒྲུབ་པར་མི་བྱ་སྟེ། དེ་ནི་ལག་ན་རྡོ་རྗེའི་དྲུང་དུ་བསྒྲུབ་པར་བྱའོ་ཞེས་ཀྱང་གསུངས་སོ། །གཙུག་ཕུད་གཞག་སྟེ་སྐྲ་
ནི་བྲེགས་ནས་སུ། །ཞེས་བྱ་བ་ནི་སྒྲུབ་པ་པོ་ཁྱིམ་པ་རྣམས་ཚུལ་བསྒྱུར་བར་བསྟན་ཏོ། །འབྱུང་ཁུངས་ཚོན་གྱིས་གོས་ཀྱི་ཁ་དོག་བསྒྱུར། །ཞེས་བྱ་བ་ནི་རབ་ཏུ་བྱུང་བ་རྣམས་ཏེ་ངུར་སྨྲིག་ལས་དགོངས་སོ། །གོས་དཀར་པོ་ཞེས་བྱ་བ་ནི་ཁྱིམ་པ་རྣམས་ལའོ། །ཤིང་ལོ་ཞེས་བྱ་བ་
ལ་སོགས་པ་ནི་གཉིས་ཀའི་ཐུན་མོང་གི་བརྟུལ་ཞུགས་ཁྱད་པར་ཅན་ལས་དགོངས་པར་རིག་པར་བྱའོ། །གཞན་ནི་གོ་བར་ཟད་དོ། །བཟའ་བཏུང་མོད་ཅེས་བྱ་བ་ནི། གྲོང་བཀྲེན་པ་མ་ཡིན་པའི་དོན་ཏོ། །དམངས་རིགས་མང་བ་ཞེས་བྱ་བ་ནི་དེ་དག་ལུགས་ཀྱིས་དགེ་སྦྱོང་དང་བྲམ་ཟེ་
ལ་རིམ་གྲོ་ཆེ་བའི་ཕྱིར་རོ། །མགྲོན་པོ་ལ་མཆོད་བྱེད་ཅེས་བྱ་བ་ནི་བསོད་སྙོམས་པ་ལ་སོགས་ཏེ་གློ་བུར་བ་ལ་བྱམས་པའི་དོན་ཏོ། །ལེགས་པར་གནས་པའི་གྲོང་ཞེས་བྱ་བ་ནི་བཟའ་བཏུང་མོད་པའམ་ཡང་ན་ཆོམ་པོ་ལ་སོགས་པའི་གཡོན་ཅན་རྣམས་ཀྱིས་ཕུང་བར་མི་འགྱུར་
བའོ། །ཧ་ཅང་མི་ཉེ་ཞེས་བྱ་བ་ནི་སྒྲུབ་པའི་གནས་གྲོང་དེ་དང་ཉེ་ཆེས་ན་རྣལ་འབྱོར་ལ་སྦྱོར་བའི་དུས་སུ་སྒྲ་ལ་སོགས་པའི་ཚེར་མས་གནོད་པར་འགྱུར་བའི་ཕྱིར་རོ། །ཧ་ཅང་མི་རིང་ཞེས་བྱ་བ་ནི་བསོད་སྙོམས་བསྙག་ཏུ་མི་སླེབས་པའམ། ཡང་ན་སྐྱེ་བོ་གཡོན་ཅན་རྣམས་འཚོ་
བའི་ཕྱིར་རོ། །བྲམ་ཟེ་ཕྱི་རོལ་སྐྱེ་བོ་ཞེས་བྱ་བ་ནི་བསྟན་པ་ལས་ཕྱི་རོལ་པའོ། །མེད་ཅེས་བྱ་བ་ནི་གནས་པའོ། །ང་རྒྱལ་གྱིས་ནི་ནོན་པ་ཞེས་བྱ་བ་ནི་རང་བཞིན་གྱིས་མངོན་པའི་ང་རྒྱལ་དང་། ཆེ་བའི་ང་རྒྱལ་དང་ལྡན་པའི་ཕྱིར་རོ། །བྲམ་ཟེ་རྣམས་རིགས་ཀྱིས་རློམ་ཞིང་ཞེས་བྱ་
བ་ནི་ཚངས་པའི་བུ་ཡིན་པར་སེམས་པའི་ཕྱིར་རོ། །སྙིང་རྗེ་མི་ལྡན་པ་ཞེས་བྱ་བ་ནི་སངས་རྒྱས་ཀྱི་བསྟན་པ་ལ་ཕྱོགས་པ་རྣམས་ལ་རྣམ་པ་སྣ་ཚོགས་ཀྱིས་མཐོ་བཙམས་པའི་དུས་ན་བརྩེ་བ་མེད་པའི་ཐ་ཚིག་གོ། །དེ་དག་ཅེས་བྱ་བ་ནི་བྲམ་ཟེ་རྣམས་སོ། །བདེ་བར་གཤེགས་

71-1-63a

པའི་མཆོད་རྟེན་ཞེས་བྱ་བ་ནི་སྐུ་གཟུགས་ལ་སོགས་པའོ། །མཆོད་པ་ཞེས་བྱ་བ་ནི་ཕྱོགས་འདིའི་ནང་པའི་རིག་སྔགས་འཆང་བའོ། །མཐོང་ནས་བགེགས་ཀྱང་བྱེད་པར་འགྱུར། །ཞེས་བྱ་བ་ནི་བྲམ་ཟེ་རྣམས་ཐབས་སྣ་ཚོགས་ཀྱིས་འགོག་པའི་དོན་ཏོ། །བྲམ་ཟེ་སངས་
རྒྱས་པ་ལས་ཇི་ལྟར་དམན། །ཞེས་བྱ་བ་ལ་སོགས་པས་ནི། སྒྲུབ་པ་པོ་དམངས་རིགས་ཞིག་ཡིན་ན་བྲམ་ཟེ་རྣམས་འདི་སྐད་དུ། ཁྱེད་ངེད་ལ་བཀུར་སྟི་དང་མཆོད་པ་བྱེད་པ་དང་། རང་གི་ལས་སྦྱིན་པ་བྱེད་པ་དང་། ཕྱུགས་འཚོ་བས་གྲོལ་བ་ཡིན་ན། ཅིའི་ཕྱིར་སངས་རྒྱས་པའི་
ལྟ་བ་ལ་ཕྱོགས་ཤིང་དེའི་གསང་སྔགས་ཟློས་ཞེས་འཚེ་བའི་དོན་ཏོ། །ལྷ་དང་མགྲོན་མཆོད་པ་ཞེས་བྱ་བ་ནི་དེའི་དོན་དང་བྲམ་ཟེའི་གཞུང་གིས་སྲོག་གཅོད་པར་གནང་བའོ། །ལས་དྲུག་ཅེས་བྱ་བ་ནི་བྲམ་ཟེ་རྣམས་མཆོད་སྦྱིན་བྱེད། བྱེད་དུ་འཇུག སྨྲང་འདོན། འདོན་དུ་འཇུག 
སྦྱིན་པར་བྱེད། སྦྱིན་པ་ལན་པ་དང་ལྡན་པའོ་ཞེས་བརྟགས་པའོ། །རྒྱལ་པོ་དང་ནི་མེ་ལྷ་བསྟེན་པ་ཞེས་བྱ་བ་ནི་སྲིད་བཙལ་བ་དང་། ལྷ་མཉེས་པར་བྱ་བའི་དོན་གྱི་ཕྱིར་རོ། །བུ་ཡི་དོན་དུ་འགྲོ་བར་བྱ་བ་དག །ཅེས་བྱ་བ་ནི་རིགས་རྒྱུན་མི་གཅད་པར་བྱ་བའི་ཕྱིར་རང་དབང་བའི་བུད་
མེད་དང་འཚོ་བའོ། །བྲམ་ཟེ་རྣམས་ཀྱིས་ངེས་པར་གྲུབ་པ་ཡིན། །ཞེས་བྱ་བ་ནི་སྒྲུབ་པ་པོ་བྲམ་ཟེའི་རིགས་ཤིག་ཡིན་ན་ནི། དེའི་ཕྱི་རོལ་པའི་བྲམ་ཟེ་རྣམས་བདག་ཅག་གིས་ལས་ངེས་པ་འདི་ལྟ་བུ་བོར་ནས་ཅིའི་ཕྱིར་སངས་རྒྱས་པའི་གསང་སྔགས་ཟློས་ཞེས་འཚོ་བའི་དོན་སྟོན་ཏོ། །
རྒྱལ་རིགས་རྗེའུ་རིགས་རྣམས་ཀྱང་རང་གི་ལས་གྲུབ་པ་འདི་ལ་ཐེ་ཚོམ་བྱེད་ཅེས་བྱ་བ་ནི་སྒྲུབ་པ་པོ་རྒྱལ་རིགས་ན་རང་གི་ལས་བཞི་དང་འགྲོ་བ་སྐྱོང་བ་ཡིན། སྒྲུབ་པ་པོ་རྗེའུ་རིགས་ན་རང་གི་ལས་གཉིས་དང་ཞིང་མེད་པ་ཡིན་ན། ཅིའི་ཕྱིར་འདི་ལ་ཐེ་ཚོམ་དུ་གྱུར་ཅིང་ལྟ་བ་གཞན་དུ་
ཕྱོགས་ཞེས་འཚེ་བར་བྱེད་པའི་དོན་ཏོ། །བརྫུན་དུ་སྨྲ་བ་སྣ་ཚོགས་སྐྱོན་དག་གིས། །ཞེས་བྱ་བ་ནི་གོང་དུ་བཤད་པ་ལྟ་བུའི་གཞུང་དེ་དག་འཇུགས་པའི་ཚེ་ཁ་སྟོབས་ཀྱིས་སྒྲོ་འདོགས་པ་དང་སྐུར་པ་འདེབས་པའོ། །བདག་དང་གཞན་གྱི་སེམས་ནི་སྲེག་པར་བྱེད། །ཅེས་བྱ་བ་ནི་ཁྲོས་པའི་དབང་

71-1-63b

གིས་ཞེ་སྡང་ལངས་པའི་ཕྱིར་དགེ་བའི་རྩ་བ་བསྲེགས་ཏེ་ཇི་སྐད་དུ། ཡིད་ལ་ཞེ་སྡང་ཡོད་ན་བདག་དང་གཞན་དག་ལ། །ཕན་པར་འགྱུར་བ་མེད་བཞིན་རབ་ཏུ་སྲེག་པར་བྱེད། །ཅེས་བཤད་པ་དེ་ལྟ་བུའོ། །ཡན་ལག་བརྒྱད་ལམ་གནས་པར་རབ་ཏུ་བྱུང་བ་ལ་མ་སྨོས་ཀྱིས་ཀྱང་། 
ཀ་ལ་གདམས་པའི་དོན་དུ་གོ་བར་བྱའོ། །ཉི་མ་ཕྱེད་མཚམས་ཚུན་ཆད་བླང་བར་བྱ། །ཞེས་བྱ་བ་ནི་འདི་ནི་སངས་རྒྱས་པའི་དུས་ཡིན་པའི་ཕྱིར་རོ། །བྲམ་ཟེའི་དུས་ནི་ཕྱི་དྲོ་ཡིན་པས་ན། །ཞེས་བྱ་བ་ནི་དེ་དག་གི་ཟས་ཟ་བའི་དུས་ངེས་པའོ། །དེ་ཕྱིར་བྲམ་ཟེའི་ཁྱིམ་དུ་འགྲོ་མི་
བྱ། །ཞེས་བྱ་བ་ནི་དུས་མི་མཐུན་ཏེ། ཁ་ཟས་མེད་པ་དང་གླན་ཀ་ཚོལ་བའི་ཕྱིར་རོ། །དགེ་དང་མི་དགེའི་ཤེས་པ་བཟུང་བ་ནི། །ཞེས་བྱ་བ་ནི་ལས་ལེགས་ཉེས་ཀྱི་འབྲས་བུ་འདོད་པ་དང་མི་འདོད་པར་སྨིན་པར་རིག་ན་ཞེས་བྱ་བའི་དོན་ཏོ། །བྲམ་ཟེ་དམངས་རིགས་དག་ལ་ཁྱད་
པར་མེད། །ཅེས་བྱ་བ་ནི་བྲམ་ཟེ་རྣམས་ཚངས་པའི་བུ་ཡིན་པས་རང་བཞིན་གྱིས་དག་སྟེ། རིགས་མཐོ་བའི་ཕྱིར་མཐོ་རིས་སུ་སྐྱེ་ལ། གཞན་རྣམས་ནི་རིགས་ཀྱིས་དམའ་བས་འགྲོ་བ་གཞན་དུ་སྐྱེའོ་ཞེས་བྲམ་ཟེའི་གཞུང་ལས་འབྱུང་བ་དགག་པའི་དོན་དུ། ལས་ལེགས་
ཉེས་ཀྱི་དབང་གིས་གནས་མཐོ་དམན་དུ་སྐྱེ་བར་མཚུངས་པར་བསྟན་པའོ། །བརྟགས་པ་ཞེས་བྱ་བ་ནི་གང་ལ་གང་མེད་པ་དེ་ལ་དེ་འདོགས་པ་སྟེ། ནམ་མཁའི་མེ་ཏོག་གི་གཙུག་ཕུད་ཅེས་བྱ་བ་དང་འདྲའོ། །གཞན་ནི་གོ་སླ་བས་མ་ཕྱེའོ། །འདོད་པའི་ཁམས་ནི་ཁ་ཟས་ཀྱིས་གནས་
ཞེས། རྒྱལ་བས་ཆོས་གཅིག་ཏུ་ནི་བཀའ་སྩལ་པས། །ཞེས་བྱ་བ་ནི་ཁམས་གོང་མ་དག་ན་སེམས་པའི་ཟས་ཀྱིས་ལུས་བརྟེན་ཏེ། འཇུ་བའི་ཟས་ལ་མི་ལྟོས་པ་ལྟར་འདིར་དེ་ལྟ་མ་ཡིན་པར་བསྟོན་ཏོ། །ལུས་ནི་ཆུ་ཤིང་བཞིན་དུ་རིག་བྱ་སྟེ། །ཞེས་བྱ་བ་ནི་སྙིང་པོ་མེད་
པ་དེ་འཇུ་བའི་ཟས་ཁོ་ནས་བརྟེན་པར་བསྟན་ཏོ། །སོགས་ལ་ཞེས་བྱ་བ་ནི་བཅའ་བ་དང་བལྡག་པ་དང་གཞིབས་པ་དང་བཏུང་བ་དག་གོ། །ཆགས་མི་བྱ་ཞེས་བྱ་བ་ནི་ཚེ་དང་ལོངས་སྤྱོད་ལ་དགའ་བའི་དོན་དུ་མ་ཡིན་གྱི།  གཞན་དུ་ན་ལུས་གནས་པ་ཙམ་དུ་བྱ་བའི་ཕྱིར་བཟའ་ཞེས་བྱ་བའི་

71-1-64a

ཐ་ཚིག་གོ། །དབང་པོ་དྲུག་པོ་ཞེས་བྱ་བ་ནི་མིག་གི་དབང་པོ་ནས་ཡིད་ཀྱི་དབང་པོའི་བར་དག་གོ། །ཡུལ་ལ་ཞེས་བྱ་བ་ནི་གཟུགས་ནས་ཆོས་ཀྱི་བར་དག་གོ། །འཕྲོས་པ་ཞེས་བྱ་བ་ནི་སོ་སོར་འཇུག་པའོ། །བདེ་གཤེགས་གསུངས་པའི་ཤེས་པས་བསྲུང་
བར་བྱ། །ཞེས་བྱ་བ་ནི་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པས་སུན་ཕྱུང་སྟེ་འཕྲོ་བ་དགག་པར་བསྟན་ཏོ། །ལྷུང་བཟེད་དེ་དག་ལས་གཅིག་ཐོགས་ནས་སུ། །ཞེས་བྱ་བ་ནི་གོང་དུ་སྨོས་པའི་ཀུ་བ་ལ་སོགས་པ་ལས་གང་འབྱོར་པའོ། །གཉའ་ཤིང་
གང་དུ་བལྟ་ཞིང་ཞེས་བྱ་བ་ནི་སྤྱོད་ལམ་ཞི་བར་བྱེད་པར་བསྟན་ཏོ། །འཛུམ་ཞིང་འགྲོ་ལ་སྨྲ་ཞིང་མིག་ཟུར་ཅན། །ཞེས་བྱ་བ་ནི་བུད་མེད་ཀྱི་ངག་འདོད་ཆགས་ལ་ཞེན་པས་སྐྱེས་པ་ལ་ཡང་འདོད་ཆགས་སྐྱེད་པར་བྱེད་པའི་དོན་ཏོ། །ཡན་ལག་ཐམས་ཅད་ཡིད་འཕྲོག་བྱེད་པའི་
གཟུགས། །ཞེས་བྱ་བ་ནི་སྐྱེས་པའི་སེམས་སླུ་བའི་དོན་ཏོ། །མཚོན་ཆ་འཇེབས་འདྲ་བས་ཞེས་བྱ་བ་ནི་དགེ་བ་སྲོག་དང་འདྲ་བའི་རྒྱུན་གཅོད་ཅེས་བྱ་བའི་ཐ་ཚིག་གོ། །སྐྱེས་པའི་སེམས་དག་མངོན་དུ་འཕྲོག་པར་བྱེད། །ཅེས་བྱ་བ་ནི་རང་དབང་མེད་པར་ཉོན་མོངས་པའི་དབང་དུ་
འགྱུར་བའི་དོན་ཏོ། །ལྕགས་ཀྱི་ཐོང་ལྕགས་རབ་ཏུ་འབར་བ་ཡིས། །མིག་ནི་རྣམ་པར་བཀབ་པ་ཆེས་བླ་ཡི། །ཞེས་བྱ་བ་ནི་འདྲ་བའི་དོན་མཐོང་བའི་ཕྱིར་རོ། །ཉིས་ན་དྲན་པ་ཉམས་བྱེད་བུད་མེད་ཀྱི། །དཀྱུས་རིང་མིག་ཅན་བཞིན་ནི་མ་མཐོང་སླ། །ཞེས་བྱ་བ་ནི་འདོད་ཆགས་ལ་
སོགས་པའི་རྒྱུ་མཐོང་བའི་ཕྱིར་རོ། །ཡང་ན་གནོད་པ་དེ་ཙམ་དང་བསྡོས་ཏེ་མི་བལྟའོ་ཞེས་དགག་པར་བསྟན་ཏོ། །གང་དུ་དགའ་བར་འགྲོ་ཞེས་བྱ་བ་ནི་བསོད་སྙོམས་ལ་གང་མོས་པའི་གྲོང་དུ་འགྲོ་ཞེས་བྱ་བའི་ཐ་ཚིག་གོ། །འཛིན་མེད་ཅེས་བྱ་བ་ནི་གྲོང་དེ་དག་ཏུ་འགྲོ་བ་ན་
བུད་མེད་ལ་སོགས་པ་ལ་མཚན་མ་དང་མངོན་རྟགས་སུ་མི་གཟུང་བའོ། །སེམས་ཀྱིས་ཞེས་བྱ་བ་ནི་བློ་སྔོན་དུ་བཏང་བའོ། །སེམས་ནི་རྣམ་པར་བཏུལ་བཞིན་དུ། །ཞེས་བྱ་བ་ནི། འདོད་པའི་ཡོན་ཏན་ལྔ་ལ་སེམས་འཕྲོ་བ་མི་རྟག་པ་ལ་སོགས་པའི་གཉེན་པོ་ལ་བརྟེན་ཅིང་གླན་པའོ། །

71-1-64b

རབ་དང་འབྲིང་ལ་སོགས་པར་ཞེས་བྱ་བ་ནི་རྒྱལ་རིགས་ལ་སོགས་པའི་རིགས་བཞིའི་ཁྱིམ་དུ་བསོད་སྙོམས་བསླང་བར་གསུངས་ཏེ། གདོལ་པ་དག་གི་དེར་ནི་མ་ཡིན་ནོ། །སྤངས་ནས་སུ་ཞེས་བྱ་བ་ནི་དེ་དག་ཏུ་སྤྱོད་ལམ་མ་ཞི་བ་སྤངས་པའི་དོན་ཏོ། །མི་སྨྲ་བར་ན་ཞེས་
བྱ་བ་ནི་ངག་གི་བརྟུལ་ཞུགས་ལ་གནས་པའི་ཕྱིར་རོ། །གང་ན་བ་བཞོན་བེའུ་ཕྲུག་ཆུང་བ་དང་། །ཞེས་བྱ་བ་ལ་སོགས་པས་ནི་གནོད་པ་དང་ཆགས་པའི་སྒོ་ནས་གཉེན་དུ་འགྱུར་བས་སྤང་བར་བསྟན་ཏོ། །བསོད་སྙོམས་ཅི་རྙེད་ཅེས་བྱ་བ་ནི་ཇི་ཙམ་རྙེད་པ་ལས་ཞེས་བྱ་བའི་དོན་
ཏོ། །དང་པོར་ཇི་ལྟར་བདེ་བར་བགོ་བར་བྱ། །ཞེས་བྱ་བ་ནི་ཆ་གསུམ་དུ་བགོས་ཏེ་ཆ་དང་པོ་ཆུང་ངུ་གཅིག་ནི་ལྷ་ལ་དབུལ་བར་བསྟན་ཏོ། །རྐང་པ་བཀྲུས་ཏེ་ཞེས་བྱ་བ་ནི། དང་པོར་བསོད་སྙོམས་བླངས་ནས་སླར་འཁོར་བའི་དུས་སུ་སྟེ། ཚིགས་སུ་བཅད་པ་སྦྱར་བ་ལ་བདེ་
བའི་ཕྱིར་འདིར་སྨོས་པར་གོ་བར་བྱའོ། །གློ་བུར་བ་ལ་བྱིན་ནས་སུ་ཞེས་བྱ་བ་ནི་ཆ་གཉིས་པའོ། །ལུས་བསྲུང་ཕྱིར་ནི་ཁ་ཟས་བཟའ་བར་བྱ། །ཞེས་བྱ་བ་ནི་ཆ་གསུམ་པ་བདག་ཉིད་ཀྱིས་བཟའ་བར་བསྟན་ཏོ། །དུས་སུ་ཟོས་ནས་ཞེས་བྱ་བ་ནི་ཕྱེད་མཚམས་སུ་བཟའ་བའི་དོན་ཏོ། །
དུས་གསུམ་ཁྲུས་བྱས་ཏེ་ཞེས་བྱ་བའི་དོན་ནི་ཕྱི་རོལ་ཆེ་ཆུང་དང་ཁ་ཟས་བཟའ་བ་དང་། བཟླས་བརྗོད་ཀྱི་དུས་འདི་གསུམ་དུ་ཁྲུས་བྱ་བར་བསྟན་མོད་ཀྱི། བཟླས་བརྗོད་ཉིད་དུས་གསུམ་དུ་བྱ་དགོས་པས་ཁྲུས་ནི་མང་དུ་བྱ་དགོས་པར་རིག་པར་བྱའོ། །གཞན་ནི་གོ་བར་ཟད་དོ། །
རྗེས་སུ་དྲན་དྲུག་ཅེས་བྱ་བ་ནི་སངས་རྒྱས་དང་ཆོས་དང་དགེ་འདུན་དང་ལྷ་དང་གཏོང་བ་དང་ཚུལ་ཁྲིམས་རྗེས་སུ་དྲན་པའོ། །སོ་སོའི་ཡོན་ཏན་དང་ཞེས་བྱ་བ་ནི་དང་པོ་གསུམ་ནི་རང་བཞིན་གྱི་ཡོན་ཏན་ལས་རྗེས་སུ་དྲན་པར་བྱའོ། །བཞི་པ་ནི་རྒྱུ་ཡི་ཡོན་ཏན་ལས་རྗེས་སུ་དྲན་པར་བྱའོ། །
ལྔ་པ་དང་དྲུག་པ་ནི་འབྲས་བུའི་ཡོན་ཏན་ལས་རྗེས་སུ་དྲན་པར་བྱས་ཏེ། འདིར་ནི་མདོར་བརྗོད་པ་ཡིན་ནོ། །རྒྱས་པར་ནི་མདོ་སྡེ་ལས་བལྟ་བར་བྱ་སྟེ། འདིར་ཡི་གེ་མངས་སུ་དོགས་ནས་མ་སྤྲོས་སོ། །རིག་པར་བཅས་ཏེ་རྗེས་སུ་དྲན་པར་བྱ། །ཞེས་བྱ་བ་ནི། འགྲེང་དང་འདུག་

71-1-65a

དང་མ་ལོག་ཉལ་བ་དང་། །འགྲོ་འཕྲེས་ཟ་ཀློག་ཅེས་བྱ་བའི་དུས་ནི། གོང་དུ་སྨོས་པ་དྲུག་པོ་དེ་དག་རྗེས་སུ་དྲན་པར་བྱས་ལ། བཟླས་བརྗོད་བྱེད་པའི་དུས་སུ་ནི་རང་གི་རིག་སྔགས་རྗེས་སུ་དྲན་པའི་དོན་ཏོ། །ལེའུ་གཉིས་པའི་དོན་བཤད་ཟིན་ཏོ།།      །།འདོད་
ཆགས་ཞེས་བྱ་བ་ནི་ཉེ་བར་ལེན་པའི་ཕུང་པོ་ལྔ་ལ་ཞེན་པ་དང་། ལྷག་པར་ཆགས་པའོ། །སོགས་པ་ཞེས་བྱ་བ་ནི་ཁོང་ཁྲོ་བ་དང་། ང་རྒྱལ་དང་། མ་རིག་པ་དང་། ལྟ་བ་དང་། ཐེ་ཚོམ་ལ་སོགས་པའི་ཉོན་མོངས་པ་རྣམས་སོ། །ཚོགས་ལྡན་པ་ཞེས་བྱ་བ་ནི་ཁྲོ་བ་དང་ཁོན་དུ་
འཛིན་པ་ལ་སོགས་པ་ཉེ་བའི་ཉོན་མོངས་པ་རྣམས་སོ། །སེམས་ནི་འཁོར་བ་ཡིན་པར་ཀུན་དུ་བརྗོད། །ཅེས་བྱ་བ་ནི་ཇི་ཙམ་དུ་སེམས་ཀྱི་རྒྱུད་ལ་འདོད་ཆགས་ལ་སོགས་པའི་ཉོན་མོངས་པ་རྣམས་དང་ལྡན་ན་དེ་སྲིད་དུ་འཁོར་བ་ཞེས་བྱ་བའི་དོན་ཏོ། །ཉོན་མོངས་རྣམ་གྲོལ་
ཞེས་བྱ་བ་ནི་འདོད་ཆགས་ལ་སོགས་པའི་ཉོན་མོངས་པ་རྣམས་སྤངས་པ་ཉིད་འཁོར་བ་ལས་ལོག་པར་བསྟན་ཏོ། །ཤེལ་ཞེས་བྱ་བ་ནི་རང་གི་སེམས་ཀྱི་རྒྱུད་ལ་ཉོན་མོངས་པའི་སྒྲིབ་པ་སྤངས་པའི་དག་པའི་དཔེའོ། །ཟླ་བ་འདྲ་བ་ཞེས་བྱ་བ་ནི་ཤེས་བྱའི་སྒྲིབ་པ་ཡང་སྤངས་
པས། བདག་དང་གཞན་གྱི་རྒྱུད་གཉི་གའི་གཏི་མུག་གི་མུན་པ་སེལ་བའི་དཔེ་བརྗོད་པའོ། །སྲིད་པའི་རྒྱ་མཚོའི་མཐར་ནི་ཡོངས་སུ་བསྒྲགས་ཞེས་བྱ་བ་ནི་འདོད་ཆགས་ལ་སོགས་པའི་ཉོན་མོངས་པ་དང་བྲལ་བའི་དབང་གིས་ཡང་སྲིད་པར་སེམས་མངོན་དུ་ཕྱོགས་པར་བྱེད་པའི་   
སྐྱེ་བོའི་རྐྱེན་རྣམས་ཀྱི་ཚོགས་ལྡོག་པའི་ཕྱིར་རོ། །དཔེར་ན་དྲི་མེད་ཆུ་ནི་རྡུལ་སོགས་ཀྱིས། །སྐད་ཅིག་ཏུ་ཡང་རྙོག་པར་བྱེད་པ་ལྟར། །ཞེས་བྱ་བ་ནི་ཆུ་དངས་པའི་ནང་དུ་བཙག་ལ་སོགས་པ་མཉེས་ན། གཞན་དུ་སྣང་སྟེ་ཆུའི་རང་བཞིན་དུ་མི་སྣང་བ་ལྟ་བུའོ། །དེ་བཞིན་རྣམ་དག་དྲི་མ་
མེད་པའི་སེམས། །འདོད་ཆགས་ལ་སོགས་སྐྱོན་གྱིས་རྙོགས་པར་འགྱུར། །ཞེས་བྱ་བ་ཡང་གློ་བུར་གྱི་དྲི་མས་ཉོན་མོངས་པར་བྱས་ཀྱི་གཅིག་པ་མ་ཡིན་ཏེ། ཆུ་ཁམས་གསེར་དང་ནམ་མཁའ་རྣམས། །དག་པ་བཞིན་དུ་དག་པར་འདོད། །ཅེས་ཇི་སྐད་བཤད་པ་ལྟ་བུའོ། །འོ་ན་

71-1-65b

སེམས་ཀྱི་ངོ་བོ་ཉིད་དེ་ཇི་ལྟ་བུ་ཞིག་ཅེ་ན། རྣམ་པར་སྣང་མཛད་མངོན་པར་རྫོགས་པར་བྱང་ཆུབ་པའི་རྒྱུད་ཆེན་པོ་ལས་འདི་སྐད་དུ། དངོས་པོ་ཐམས་ཅད་དང་བྲལ་བ་ཕུང་པོ་དང་ཁམས་དང་སྐྱེ་མཆེད་དང་། གཟུང་བ་དང་འཛིན་པ་རྣམ་པར་སྤངས་པ། ཆོས་བདག་མེད་པ་མཉམ་པ་ཉིད་
ཀྱིས་རང་གི་སེམས་གཟོད་མ་ནས་མ་སྐྱེས་པ་སྟོང་པ་ཉིད་ཀྱི་ངོ་བོ་ཉིད་ཅེས་གསུངས་སོ། །བདག་གི་དེ་ཁོ་ན་ཉིད་ཀྱི་ཆོས་ཉིད་དེ་ལྟ་བུ་དང་། ལྷའི་ཆོས་ཀྱི་སྐུ་དེ་བཞིན་ཉིད་དང་ཡང་དབྱེར་མེད་དོ། །དོན་དེ་ཉིད་འཕགས་པ་ཕྱག་ན་རྡོ་རྗེ་དབང་བསྐུར་བའི་རྒྱུད་ཆེན་པོ་ལས་འདི་སྐད་དུ། 
བདག་གི་ངག་མ་གཏོགས་པར་ཡིད་མེད། ཡིད་མ་གཏོགས་པར་ངག་མེད། བདག་གི་ཡིད་མ་གཏོགས་པར་ལྷའི་སྐུ་མེད་དེ་ཡིད་ཉིད་ངག་ཡིན། ངག་ཉིད་ཡིད་ཡིན་ལ། ལྷའི་གཟུགས་ཉིད་ཀྱང་ཡིད་ཡིན་ལ། ངག་ཉིད་ཀྱང་ལྷའི་གཟུགས་ཡིན་ནོ་ཞེས་རྒྱ་ཆེར་གསུངས་སོ། །
དེ་ལྟར་དེ་ཁོ་ན་ཉིད་ཀྱི་དོན་ལ་དམིགས་པའི་ཏིང་ངེ་འཛིན་འདི་ངེས་པར་བསྒོམས་པའི་དོན་ནི་འཕགས་པ་རྡོ་རྗེའི་གཙུག་ཏོར་རྒྱུད་ཕྱི་མ་བསམ་གཏན་གྱི་ལེའུ་ལས་འདི་སྐད་དུ། མི་འབྱེད་འབྱེད་པ་རྣམ་པར་སྤངས། །ཕྲ་བ་མི་གཡོ་གསལ་བ་སྟེ། །བློ་ཡི་སྤྱོད་པ་མདུན་ན་གནས། །
ཞེས་གསུངས་པ་སྟེ། དེ་ལྟར་ཅི་ནུས་སུ་བསྒོམ་ཞིང་གོམས་པར་བྱེད་པ་ནི་སྒྲུབ་པ་པོ་དེ་ཁོ་ན་ཉིད་ཀྱི་དོན་ལ་དམིགས་པ་ཞེས་བྱའོ། །གཞན་ནི་གོ་བར་ཟད་དོ། །འདུག་ནས་ཞེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། ཇི་སྐད་དུ། སྐྱིལ་མོ་བཀྲ་ཤིས་བཟང་མོ་སྟེ། །དེ་དག་
འདུག་པ་གསུམ་ཡིན་ནོ། །ཞེས་གསུངས་པ་ཉིད་བལྟ་བར་བྱའོ། །དབང་པོ་ཡང་དག་བསྡམ་པ་ཞེས་བྱ་བ་ནི་ངོ་བོ་ཉིད་ཀྱིས་གཡེངས་པ་ལ་སོགས་ཏེ། རྣམ་པར་གཡེང་བ་དྲུག་ལས་སླར་གླན་པར་དགོངས་པའོ། །ལུས་ཀྱང་དྲང་ཞིང་ཞེས་བྱ་བ་ནི་སྒལ་ཚིགས་བསྲང་བའི་དོན་ཏོ། །བརྟན་
པ་ཞེས་བྱ་བ་ནི་དང་པོ་ལས་ཕྱིས་མི་བསྐྱོད་པའི་ཐ་ཚིག་གོ། །ཕྱིས་ནི་ཞེས་བྱ་བ་ནི་ལུས་བརྟན་པོར་བཞག་ནས་དེའི་འོག་ཏུ་བཟླས་བརྗོད་བརྩམ་པར་བསྟན་ཏོ། །མ་མཆུ་ཤིན་ཏུ་མཛེས་པར་ཡང་བསྒུལ་ཞིང་། །ཞེས་བྱ་བ་ནི་ཤུབ་བུར་བཟླས་བརྗོད་བྱ་བའི་དོན་ཏོ། །གསང་སྔགས་ཅི་

71-1-66a

དགར་བཟླས་བརྗོད་བྱ། །ཞེས་བྱ་བ་ནི་བཟླས་བརྗོད་ཀྱི་ཡན་ལག་བཞི་ལ་སོགས་པ་གང་ལས་གོམས་པའི་ཚུལ་དུ་བཟླས་པའི་ཐ་ཚིག་གོ། །སེམས་ནི་གློག་དང་འདྲ་ཞེས་བྱ་བ་ནི་བྱུང་མ་ཐག་ཏུ་འགག་པའི་མཚན་ཉིད་དུ་བསྟན་ཏོ། །སྤྲེའུ་དང་འདྲ་ཞེས་བྱ་བ་ནི་ཡུལ་
ཀུན་དུ་འཇུག་པའི་དོན་ཏོ། །རླུང་དང་མཚུངས་ཞེས་བྱ་བ་ནི་རིང་དུ་འགྲོ་ཞིང་གཟུང་རྒྱུ་མེད་པར་རྒྱུ་བའོ། །རྒྱ་མཚོ་ཆེན་པོ་ཡི་ནི་རླབས་དང་འདྲ། །ཞེས་བྱ་བ་ནི། ཇི་ལྟར་རྒྱ་མཚོའི་རླབས་དེ་ཆེ་ཆུང་དང་གཉེར་མ་སྣ་ཚོགས་སུ་འགྱུར་བ་བཞིན་དུ། སེམས་འདི་ཡང་དངོས་པོ་སྣ་
ཚོགས་ཀྱི་ངང་དུ་འབྱུང་བའི་དོན་ཏོ། །སྒྱུ་ཅན་ཞེས་བྱ་བ་ནི་ཕྱིན་ཅི་ལོག་ཏུ་སླུ་བའི་ཐ་ཚིག་གོ། །འདོད་དགུར་ཡུལ་ལ་མངོན་དགའ་བ། །ཞེས་པ་ནི་འདོད་ཆགས་ལ་སོགས་པའི་ཡུལ་ལ་སོ་སོར་ཞེན་པར་རྒྱུ་བའི་དོན་ཏོ། །གཡོ་ཞིང་འཕྱེན་པ་ཞེས་བྱ་བ་ནི་མི་བརྟན་པའོ། །ངེས་པར་
གདུལ་བར་བྱ་ཞེས་བྱ་བ་ནི་རང་གི་ལྷའི་བཟླས་བརྗོད་ལ་འབད་པའི་དུས་སུ་རང་ཡན་དུ་མི་གཏོང་བར་དགུག་པའི་དོན་ཏོ། །གང་ཚེ་ཟློས་དགའི་སེམས་ནི་ཞི་བ་ལ། །བརྟེན་པས་ཉིད་ཀྱི་དྲན་པ་རྨོངས་གྱུར་ན། །ཞེས་བྱ་བ་ནི་རྒོད་པ་ལས་དགུག་དྲགས་པས་བྱིང་བར་གྱུར་པའོ། །
ལངས་ནས་བཅག་ཅིང་ཞེས་བྱ་བ་ལ་སོགས་པས་ནི་གཉིད་བསལ་བའི་ཐབས་བསྟན་པའོ། །ལས་ཀྱི་དབང་གྱུར་ཞེས་བྱ་བ་ནི་དེས་སྐྱིད་སྡུག་ཏུ་གྱུར་པའོ། །བདག་པོ་མེད་ཅེས་བྱ་བ་ནི་སྡུག་བསྔལ་ལས་སྐྱོབ་པར་བྱེད་པའི་རྗེ་དཔོན་འགའ་ཡང་མེད་པའི་དོན་ཏོ། །མགོན་མེད་
ཅེས་བྱ་བ་ནི་ཉོན་མོངས་པས་ལོག་པར་ཁྲིད་ཀྱང་དེ་ལས་བཟློག་པའི་ཉེ་དུ་གང་ཡང་མེད་པར་བསྟན་ཏོ། །རྟེན་མེད་ཅེས་བྱ་བ་ནི་མི་རྟག་པ་དང་སྐད་ཅིག་མས་བཅོམ་པའི་ཚེ་སྡོདཔའི་མཐུ་མེད་པའི་དོན་ཏོ། །ཚེ་རབས་གཅིག་ནས་གཅིག་ཅེས་བྱ་བ་ནི་ཁམས་གསུམ་གྱི་ནང་དུ་འཁོར་བའོ། །
ལུས་ཀྱི་ཁ་བརྒྱུད་ཅེས་བྱ་བ་ནི། སྐྱེ་གནས་བཞི་ཡི་མིང་ལ་བརྟགས། །ཞེས་བྱ་བའི་ཐ་ཚིག་གོ། །རྗེས་སུ་རབ་འགྲོ་བ་ཞེས་བྱ་བ་ནི། འགྲོ་བ་དྲུག་པོ་དག་གི་ནང་དུའོ། །དེ་ཡི་རྗེས་སུ་དགེ་དང་མི་དགེ་འབྲང་། །ཞེས་བྱ་བ་ནི་ལྷ་ལ་སོགས་པའི་སྐྱེ་གནས་སུ་ལུས་བླངས་ཀྱང་། 

71-1-66b

སེམས་དང་འབྲེལ་པ་མ་ཡིན་གྱི། ལས་དགེ་བ་ལ་སོགས་པའི་བག་ཆགས་ཁོ་ན་དང་འབྲེལ་བར་བསྟན་ཏོ། །གཞན་ནི་གོ་བར་ཟད་དོ། །འདོད་ཆགས་ཤས་ཆེ་བ་ཞེས་བྱ་བ་ནི་སྒྲུབ་པ་པོ་ཁ་ཅིག་གོ། །མི་གཙང་ཤ་ཚིལ་དང་། པགས་པ་ཀེང་རུས་བལྟ་བས་རྣམ་པར་བཟློག ། ཅེས་
བྱ་བ་ནི་གཉེན་པོ་རྣམ་པར་ཐར་པའི་ལམ་མི་སྡུག་པའི་ཏིང་ངེ་འཛིན་བསྒོམ་པར་བསྟན་ཏེ། དེ་ཡང་། ཐོག་མར་པགས་པའི་རིམ་པ་འདི། །རང་གི་བློ་ཡིས་ཐ་དད་ཕྱེ། །ཤ་ཡང་རུས་པའི་དྲ་བ་ལས། །ཤེས་རབ་མཚོན་གྱིས་གུད་དུ་ཕྱེ། །རུས་པ་རྣམས་ཀྱང་དབྱེ་བྱས་ནས། །རྐང་
གི་བར་དུ་བལྟ་བྱ་ཞིང་། །འདི་ལ་སྙིང་པོ་ཅི་ཡོད་ཅེས། །བདག་ཉིད་ཀྱིས་ནི་བརྟག་པར་གྱིས། །ཞེས་ཇི་སྐད་བཤད་པ་ལྟ་བུའོ། །བྱམས་དང་ཞེས་བྱ་བ་ནི་སྒྲུབ་པ་པོ་ལ་ལ་ཞེ་སྡང་གི་ཤས་ཆེ་བ་ལ་གཉེན་པོ་བྱམས་པའི་ཏིང་ངེ་འཛིན་བསྒོམ་པར་བསྟན་ཏེ། དེ་ལ་དང་པོར་གང་
ཟག་ཡོན་ཏན་དང་ལྡན་པ་བཀུར་སྟི་བྱ་བར་འོས་པ་བླ་མ་ལྟ་བུའི་གནས་ཤིག་ལ་དད་པ་བསྐྱེད་ནས་སྐྱེས་བུ་དམ་པ་འདི་བདེ་བར་གྱུར་ཅིག་སྙམ་པའི་ཡིད་ལ་བྱེད་པ་འཇུག་པར་བྱེད་དེ། ཇི་སྲིད་དུ་འདི་སེམས་ཆུང་ངུ་འབྱུང་བ་དེ་སྲིད་དུ་འཇུག་པར་བྱེད་དོ། །དེ་ནས་གང་ཟག་སྡུག་པ་ལ་
སེམས་གཏོད་པར་བྱེད་དེ། དེ་ལ་ཡང་ཇི་སྲིད་དུ་གང་ཟག་སྔ་མ་དང་མཉམ་པའི་སེམས་བསྐྱེད་པ་དེ་སྲིད་དུ། སེམས་གཏོད་པར་བྱེད་དོ། །དེ་ནས་གང་ཟག་ཐ་མལ་པ་ལ་གཏོད་པར་བྱེད་ད་སྔ་མ་བཞིན་ནོ། །དེ་ནས་གང་ཟག་མི་སྡུག་པ་ལ་གཏོད་པར་བྱེད་དེ་སྔ་མ་བཞིན་ནོ། །གལ་ཏེ་འདི་
ལ་གང་ཟག་ཤ་ཁོན་ཅན་ཞིག་ཡོད་ན། དེ་ལ་འདི་བདེ་བར་གྱུར་ཅིག་སྙམ་པའི་སེམས་བསྐྱེད་པར་བྱ་སྟེ། དེ་ལ་ཡང་ཇི་སྲིད་དུ་སྔ་མ་དག་དང་ལྷན་ཅིག་མཉམ་པའི་སེམས་བསྐྱེད་པ་དེ་སྲིད་དུ་སྐྱེད་པར་བྱེད་དེ། འདི་ཙམ་གྱིས་ན་བྱམས་པའི་སེམས་ཀྱིས་རྣམ་པར་གྲོལ་བ་མཚམས་
ཐ་དད་པ་བསྒོམས་པ་ཡིན་ནོ། །དེ་ཕྱིན་ཆད་ནི་ཕྱོགས་ཁྱད་པར་བྱེད་པའི་དབང་གིས་ཡིད་ལ་བྱེད་པར་རིག་པར་བྱའོ། །སྙིང་རྗེ་ཞེས་བྱ་བ་ནི་གང་ཟག་སྡུག་བསྔལ་བ་མགོན་མེད་པ་སྐྱབས་མེད་པ་ལ་དམིགས་ནས། རིམ་པ་འདི་ཉིད་ཀྱིས་འཇུག་པར་བྱའོ། །འདིའི་ཕན་ཡོན་

71-1-67a

ཡང་རྣམ་པར་སྣང་མཛད་ཀྱི་རྒྱུད་ཕྱི་མ་ལས། གང་གིས་རྟ་དང་འདྲ་བའི་སེམས། །མཉམ་པར་གཞག་པས་བཏུལ་ནས་སུ། །བྱམས་དང་སྙིང་རྗེ་བརྟན་བྱས་ན། །དངོས་གྲུབ་བརྟན་པ་མོད་ལ་ཐོབ། །ཅེས་ཇི་སྐད་གསུངས་
པ་ལྟ་བུའོ། །ཆུས་གདབ་ཞེ་སྡང་ལ་ཞེས་བྱ་བ་ནི་བྱམས་པ་དང་སྙིང་རྗེས་ཞེ་སྡང་གི་མེ་བསད་པ་འམ། ཡང་ན་དགེ་བའི་རྩ་བ་བསྐྱེད་པའི་དོན་ཏོ། །གཏི་མུག་ཅེས་བྱ་བ་ནི་མི་ཤེས་པ་སྟེ། སྒྲུབ་པ་པོ་ལ་ལའི་རྒྱུད་ལ་གཏི་མུག་གི་ཤས་ཆེ་ཞེས་བྱ་བའི་ཐ་ཚིག་གོ། །རྟེན་
བྲེལ་ལམ་གྱིས་སོ་ཞེས་བྱ་བ་ནི་གཏི་མུག་གི་གཉེན་པོ་སྟེ། འདི་ལྟར་མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱ་བ་ནས། སྐྱེ་བའི་རྐྱེན་གྱིས་རྒ་ཤི་ཞེས་བྱ་བའི་བར་དུའོ། །དེ་བཞིན་དུ་མ་རིག་པ་མ་བྱུང་ན་འདུ་བྱེད་རྣམས་ཀྱང་མི་མངོན། སྐྱེ་བ་མ་བྱུང་ན་རྒ་ཤིའི་བར་དུ་ཡང་མི་མངོན་
པ་ཞིག་ན་ཞེས་བྱ་བ་ལ་སོགས་པ་རྒྱས་པར་མདོ་སྡེ་ལས་ཇི་སྐད་འབྱུང་བ་བཞིན་བལྟ་བར་བྱ་སྟེ། འདིར་ནི་ཡི་གེ་མངས་སུ་དོགས་པས་མ་སྤྲོས་སོ། །རེ་ཞིག་ཅིག་ན་དགྲ་ཡང་མཛའ་བོར་འགྱུར། །ཞེས་བྱ་བ་ལ་སོགས་པས་ནི་ངེས་པ་མེད་པར་བསྟན་ཏོ། །བློ་གྲོས་ལྡན་པས་ནམ་ཡང་
ཆགས་མི་བྱ། །ཞེས་བྱ་བ་ནི་སྒྲུབ་པ་པོའི་ཕྱིན་ཅི་ལོག་གི་བློ་བཟློག་པར་རྩོལ་བ་རྣམས་ཀྱིས་ཞེས་བྱ་བའི་ཐ་ཚིག་གོ། །གཉེན་ལ་དགའ་བའི་སེམས་ཀྱི་རྣམ་རྟོག་དག །བཟློག་ནས་ཞེས་བྱ་བའི་ཤུགས་ཀྱིས་ནི་དགྲ་ལ་ཞེ་སྡང་བཟློག་དགོས་པར་ཡང་གོ་བར་བྱའོ། །དེ་ལྟར་ན་དགེ་བ་
ལ་སེམས་ཅི་བདེར་འཇོག་ནུས་ཀྱི་དེ་ལྟ་མ་ཡིན་ཏེ་མཛའ་བ་བཟུང་ན་ནི། ཧ་ཅང་ཡང་བྱེད་འདོད་པར་འགྱུར། མི་མཛའ་བས་བཟུང་ན་ནི། ཐམས་ཅད་ཀྱི་ཐམས་ཅད་དུ་བྱེད་མི་འདོད་པར་གྱུར་པས། རྗེས་སུ་ཆགས་པ་དང་ཁོང་ཁྲོ་བའི་སེམས་གཉིས་དང་ལྡན་པས་ནི་ཆོས་མཉམ་པ་
ཉིད་དེ་ཁོང་དུ་ཆུད་པར་བྱེད་མི་ནུས་སོ། །སྔགས་འཆང་ནམ་ཡང་སྨྲ་བར་མི་བྱའོ། །ཞེས་བྱ་བ་ནི་བཟླས་བརྗོད་ལ་སྦྱོར་བའི་དུས་སུ་ཐམས་ཅད་བཀག་གོ། །ཇི་སྟེ་དགོས་པ་ཡོད་ན་སྔགས་གཡོག་དང་། །བཟླས་བརྗོད་ཟིན་ནས་ཅུང་ཟད་སྨྲ་བར་བྱ། །ཞེས་བྱ་བ་ནི་བསྙེན་པ་ལ་ཞུགས་

71-1-67b

པའི་ཚེ་བཟླས་བརྗོད་དང་མདོ་སྡེ་བཀླག་པ་མ་གཏོགས་པའི་ཚིག་མི་སྨྲ་བའི་བརྟུལ་ཞུགས་ལ་གནས་པའི་དུས་སུ་ཡང་ཆེད་ཆེ་བ་ཞིག་ཡོད་ན། སྔགས་གཡོག་ཁོ་ན་ཅུང་ཟད་སྨྲ་བར་སྐབས་ཕྱེ་བའོ། །མེ་ཏོག་དྲི་སྣོད་ཅེས་བྱ་བ་ལ་སོགས་པས་ནི་ལྷ་མཉེས་པར་བྱ་བའི་དོན་དུ་དགེ་
བ་གང་དང་གང་སྤྱད་པའོ། །སངས་རྒྱས་བྱང་ཆུབ་མཆོག་ཏུ་བསྔོ་བར་བྱ། །ཞེས་བྱ་བ་ནི་ཐབས་མཁས་པར་འབྲས་བུ་ཡོངས་སུ་མི་ཟད་པར་བྱ་བའི་ཕྱིར་རྒྱ་ཆེན་པོར་བསྔོ་བར་བསྟན་ཏོ། །ཆུ་ཀླུང་ཞེས་བྱ་བ་ནི་ཕྱོགས་ཐ་དད་པ་ནས་འབབ་པའི་རོ་སྣ་ཚོགས་དང་ལྡན་པའོ། །རྒྱ་
མཚོར་ཕྱིན་པ་ན། །ལན་ཚྭའི་རོར་ནི་གཅིག་ཏུ་གྱུར། །ཅེས་བྱ་བ་ནི་དེར་སོན་པའི་དབང་གིས་རོ་གཅིག་པར་གྱུར་པར་བསྟན་ཏོ། །དེ་བཞིན་ཞེས་བྱ་བ་ནི་དཔེ་བརྗོད་པ་དེ་བཞིན་དུ་ཞེས་བྱ་བའི་ཐ་ཚིག་གོ། །རྒྱལ་བའི་རོར་ནི་གཅིག་ཏུ་འགྱུར། །ཞེས་བྱ་བ་ནི་ཚུལ་ཁྲིམས་དང་
བརྩོན་འགྲུས་ལ་སོགས་པ་སྒོ་ཐ་དད་པ་ནས་བསྒྲུབས་པ་ཡང་། འབྲས་བུ་སངས་རྒྱས་ཁོ་ནར་འགྲུབ་པར་བསྟན་པའི་དོན་ཏོ། །འབྲས་བུའི་ཕྱིར་སཱ་ལུ་བསྐྱེད་ཀྱིས་ཞེས་བྱ་བ་ལ་སོགས་པས་ནི་དེ་ལྟར་དགེ་བ་སྤྱད་དོ་ཅོག་སངས་རྒྱས་ཉིད་དུ་བསྔོས་ན་ནམ་མཁའ་ལ་འགྲོ་བ་
ལ་སོགས་པའི་རིག་སྔགས་འཆང་དུ་མི་འགྲུབ་པར་དོགས་པའི་རྟོག་པ་བསལ་ཏེ། ཚིག་གི་དོན་གཞན་ནི་གོ་བར་ཟད་དོ། །སོག་མ་དཔེར་བརྗོད་པ་ནི་ལྷ་དང་མིའི་ལོངས་སྤྱོད་ལ་སྙིང་པོ་མེད་པར་ཞར་ལ་བསྟན་པའི་ཐ་ཚིག་གོ། །ཚེ་རིང་བ་ལེགས་པར་ཐོབ་པ་ཞེས་བྱ་བ་ནི་སྲོག་
གཅོད་པ་སྤངས་པའི་འབྲས་བུའོ། །དང་ཞེས་བྱ་བ་ནི་མི་དགེ་བ་ལྷག་མ་དགུ་སྤང་བའི་ཚུལ་ཁྲིམས་ལ་ཡང་དེ་བཞིན་དུ་སྤྲོ་བ་བསྐྱེད་པར་བྱ་བའི་ཐ་ཚིག་གོ། །ཆོས་བཞིན་བསྒྲུབས་ཞེས་བྱ་བ་ནི། དགེ་བ་བཅུའི་ཚུལ་བཞིན་སྤྱོད་པའོ། །ཡུལ་དག་རྙེད་པ་ཞེས་བྱ་བ་ནི་དེའི་དབང་
གིས་མངོན་པར་མཐོ་བའི་དཔལ་མངོན་དུ་ཕྱོགས་པར་འགྱུར་ཞེས་བྱ་བའི་ཐ་ཚིག་གོ  །སྐྱོ་བ་མེད་པར་འགྱུར་ཞིང་ཞེས་བྱ་བ་ནི་དགེ་བ་བཅུའི་འབྲས་བུའི་ཕན་ཡོན་དཔག་ཏུ་མེད་པར་རྫོགས་པའི་ཕྱིར་རྒྱུ་ཉིད་ཟད་མི་ཤེས་པར་བསྔོ་བའི་དོན་ཏོ། །འགྲོ་བའི་བསམ་པ་རྣམས་ནི་རྟག་

71-1-68a

ཏུ་རྫོགས་པར་བྱ། །ཞེས་བྱ་བ་ནི་དཔག་བསམ་གྱི་ཤིང་ལྗོན་པའམ་ཡིད་བཞིན་གྱི་ནོར་བུ་ལྟ་བུར་སེམས་ཅན་རྣམས་ཀྱི་རེ་བ་སྣ་ཚོགས་སྐོང་བའི་མཐུ་དང་ལྡན་པར་གྱུར་ཅིག་ཅེས་བསྔོ་བར་བསྟན་ཏོ། །གྲགས་དང་མ་གྲགས་ཞེས་བྱ་བ་ལ་སོགས་པ་ནི་འཇིག་རྟེན་
གྱི་ཆོས་བརྒྱད་བརྗོད་པ་སྟེ། རབ་བཅོམ་སྟེ་ཞེས་བྱ་བ་ནི་མི་རྟག་པ་ལ་སོགས་པ་ལ། དམིགས་པས་སོ་སོར་བརྟག་ཅེས་བྱ་བའི་ཐ་ཚིག་གོ། །སྡིག་པའི་གནས་སུ་གྱུར་པ་ཞེས་བྱ་བ་ནི་འཇིག་རྟེན་པའི་ཕན་ཡོན་གྲགས་པ་ལ་སོགས་པ་ཞིག་བྱུང་ནས་ཆགས་ཤིང་རྒྱགས་པ་ནི་
སྡིག་པའི་གནས་ཡིན་ནོ། །དེ་བཞིན་དུ་འཇིག་རྟེན་པའི་སྐྱོན་མ་གྲགས་པ་ལ་སོགས་པ་རྣམས་བྱུང་བའི་ཚེ། ཞུམ་ཞིང་འཁྲུག་པ་ཡང་སྡིག་པའི་གནས་ཡིན་ནོ། །སྤང་བར་བྱ་ཞེས་བྱ་བ་ནི་ཐམས་ཅད་དུའོ། །ལྷན་ཅིག་མི་གནས་ལྟར་ཞེས་བྱ་བ་ནི་རྒྱ་མཚོ་ཆེན་པོའི་ནང་
དུ་མི་རོ་བོར་ན། ཀླུ་མཐུ་བོ་ཆེ་རྣམས་ཀྱིས་གཅིག་གི་གནས་ནས་གཅིག་ཏུ་ཕུལ་ཏེ། མཐར་ཕྱིན་པ་ནི་དཔེར་བརྗོད་པའོ། །དེ་བཞིན་རྣམ་ཏོག་སེམས་ཀྱིས་སྡིག་བྱས་པ། །ཞེས་བྱ་བ་ནི་ཆགས་པ་ནས་ལེ་ལོའི་བར་གྱིས་དབང་དུ་གྱུར་པའོ། །སྔགས་པ་སྐད་ཅིག་ཙམ་ཡང་གནས་མི་
བྱ། །ཞེས་བྱ་བ་ནི་མ་ཆགས་པ་ནས་བརྩོན་འགྲུས་ཀྱི་བར་གྱིས་གསལ་བར་བྱ་བའི་དོན་ཏོ། །རྩེ་གཅིག་སེམས་ཀྱིས་ཞེས་བྱ་བ་ནི་རྣམ་པར་རྟོག་པས་གླགས་མི་ཐོད་པའི་ཞི་གནས་དང་ལྷག་མཐོང་གིས་འཁྱུད་པའི་ཏིང་ངེ་འཛིན་ཏོ། །ཟློས་ལ་མངོན་པར་དགའ་བ་ཡི། །ཞེས་
བྱ་བ་ནི་བཟླས་བརྗོད་ཤེས་རབ་དང་ལྡན་པས་སྒྲིབ་པ་བསལ་བའི་དབང་གིས་བཟླས་བརྗོད་ལ་ཞེན་ཏེ་ཏིང་ངེ་འཛིན་གྱི་བདེ་བ་དང་ལྡན་ཞེས་བྱ་བའི་ཐ་ཚིག་གོ། །ལུས་ལ་ཆོས་ཀྱང་དེ་བཞིན་འབར་བར་འགྱུར། །ཞེས་བྱ་བ་ནི་ཏིང་ངེ་འཛིན་ཐོབ་པས་སེམས་བྱང་སྟེ། དགའ་བ་ཐོབ་
པའི་དབང་གིས་ལུས་ཀྱང་བྱང་ནས་རིག་སྔགས་འཆང་ལྷའི་གཟུགས་སུ་གྱུར་ཏེ། གཟི་བརྗིད་ཐོབ་བོ་ཞེས་བྱ་བའི་དོན་ཏོ། །གཞན་ནི་གོ་བར་ཟད་དོ། །དེ་ལྟར་བཟླས་བརྗོད་བྱེད་པའི་སྒྲུབ་པ་པོས། །ཉིན་གཅིག་བཞིན་དུ་བྱས་ནས་ཞེས་བྱ་བ་ནི་བསོད་སྙོམས་བླང་བ་དང་། 

71-1-68b

བཟླས་བརྗོད་བྱ་བ་དང་། མདོ་སྡེ་བཀླག་པ་དང་། མཆོད་རྟེན་གདབ་པ་ལ་སོགས་པའི་དགེ་བ་སྤྱད་པ་འབའ་ཞིག་གིས་ཉིན་པར་གྱི་དུས་འདས་པར་བྱ་བའི་ཐ་ཚིག་གོ། །བཟླས་པ་ཕུལ་ནས་ཞེས་བྱ་བ་ནི་འཕགས་པ་རྨུགས་འཛིན་ལ་སོགས་ཏེ་ནོར་ཅན་གྱི་རིགས་སྒྲུབ་པ་ལ་ནི་བསོད་
ནམས་ཀྱི་ཚོགས་བསྟན་པར་བྱ་བའི་དོན་ཏོ། །བཟླས་བརྗོད་བྱས་པ་རྣམས་གསེར་གྱི་བུམ་པ་རིན་པོ་ཆེ་སྣ་ཚོགས་ཀྱིས་སྤྲས་པའི་ནང་དུ་བཅུག་སྟེ། ཁ་པདྨ་དཀར་པོས་བཅད་ནས་ལྷའི་ཕྱག་ཏུ་དབུལ་བར་བསམ་པར་བྱེད་ཅེས་གྲག་གོ། །གསང་སྔགས་གཞན་ལ་ནི་འདིས་མི་
བསྒྲེ་སྟེ། བཟླས་བརྗོད་བྱས་པའི་བསོད་ནམས་ཀྱི་ཚོགས་འཕེལ་བར་བྱ་བའི་དོན་དུ། རང་གི་ལྷ་ལ་དབུལ་བར་བསྟན་ཏེ། ཇི་སྐད་དུ། སངས་རྒྱས་བཅོམ་ལྡན་འདས་ཐམས་ཅད་ལ་དགེ་བའི་རྩ་བ་ཐམས་ཅད་ཕུལ་ནས།  བསོད་ནམས་ཀྱི་ཕུང་པོ་ཡོངས་སུ་བསྡུས་པའི་
བསོད་ནམས་ཀྱི་ཕུང་པོ་དཔག་ཏུ་མ་མཆིས་ཤིང་བསམ་གྱིས་མི་ཁྱབ་པ་དེ་བཞིན་གཤེགས་པའི་ཡེ་ཤེས་ཀྱིས་མཁྱེན་པ་གང་ལགས་པ་དེས་བདག་བརྟན་པར་གྱུར་ནས་ཞེས་བྱ་བ་དང་འདྲའོ། །ནུབ་མོ་ཞེས་བྱ་བ་ནི་ཉིན་པར་མི་ཉལ་བར་བསྟན་ཏོ། །ཀུ་ཤ་བཏིང་ནས་ཉལ་བར་
བྱ། །ཞེས་བྱ་བ་ནི་ཁྲི་ལ་མི་ཉལ་བར་བསྟན་ཏོ། །བྱམས་པ་ཞེས་བྱ་བ་ནི་སེམས་ཅན་རྣམས་བདེ་བ་དང་ཕྲད་པར་ཤོག་ཅིག་པའི་བསམ་པའོ། །སྙིང་རྗེ་ཞེས་བྱ་བ་ནི་སྡུག་བསྔལ་བ་རྣམས་དེ་དང་བྲལ་བར་ཤོག་ཤིག་པའི་བསམ་པའོ། །དགའ་བ་ཞེས་བྱ་བ་ནི་བདེ་བ་རྣམས་
དང་མི་འབྲལ་བར་ཤོག་ཤིག་པའི་བསམ་པའོ། །བཏང་སྙོམས་ཞེས་བྱ་བ་ནི་ཕན་པ་དང་བདེ་བས་གཞན་དག་གི་ཉོན་མོངས་པ་མི་སྐྱེ་བར་བྱ་བའི་ཕྱིར་ཀུན་ནས་ཉོན་མོངས་པ་མེད་པའི་བསམ་པའོ། །ལྡན་ཞེས་བྱ་བ་ནི་རང་གི་ལྷའི་ལྷག་པའི་ཏིང་ངེ་འཛིན་ལ་གནས་པའི་ཞར་
ལ་དེ་རྣམས་རྗེས་སུ་དྲན་པར་བྱ་བ་ཙམ་དུ་ཟད་ཀྱི། རྒྱུན་གྱི་ཏིང་ངེ་འཛིན་རྣམས་རྣམ་པར་ཕྱེ་སྟེ་བསྒོམ་པ་ལྟ་བུ་ནི་མ་ཡིན་ནོ། །བཅས་པར་དྲན་བྱས་ཏེ་ཞེས་བྱ་བ་ནི་ལྷ་དང་གཏོང་བ་དང་ཚུལ་ཁྲིམས་སོ། །ཤཱ་རིའི་བུ་ལ་ཕྱག་འཚལ་ནས་ཉལ་བ་ནི་བསོད་ནམས་འཕེལ་བའི་དོན་དུ་

71-1-69a

ཉལ་བ་སྟེ། རིག་པ་མཆོག་གི་རྒྱུད་ཆེན་པོ་ལས། ཐུབ་པ་སངས་རྒྱས་གཉིས་པ་ནི། །འཕགས་པ་ཤ་ར་དྭ་ཏིའི་བུ། །ལྷ་དང་ལྷ་མིན་དྲི་ཟར་བཅས། །ཀླུ་དང་གནོད་སྦྱིན་ཚོགས་ཀྱིས་མཆོད། །ཅེས་གསུངས་པའི་ཕྱིར་རོ། །ང་ལ་ཐལ་སྦྱར་བཏུད་ནས་
ཉལ། །ཞེས་བྱ་བ་ནི་ལོག་འདྲེན་རྨོངས་པར་བྱ་བའི་དོན་དུ་སྟེ། ཡང་རྒྱུད་དེ་ཉིད་ལས། དེ་བཞིན་དམ་པ་གྲུབ་པ་དེ། །རིག་སྔགས་འཆང་ཀུན་དབང་ཕྱུག་རྗེ། །དཔའ་བོ་གཅིག་པོ་དགྲ་ཐུལ་བ། །རྡོ་རྗེ་འཛིན་ལ་ཕྱག་འཚལ་ལོ། །ཞེས་གསུངས་པའི་ཕྱིར་རོ། །སྡིག་པ་
མཐའ་དག་ཟད་པར་བྱ། །ཞེས་བྱ་བ་ནི་རིམ་པ་དེ་རྣམས་སྤྱད་པས་སོ། །ལེའུ་གསུམ་པའི་དོན་བཤད་ཟིན་ཏོ།།      །།སོར་བཅུ་ཞེས་བྱ་བ་ལ་སོགས་པས་ནི་རྡོ་རྗེ་རྣམས་ཀྱི་ཚད་བསྟན་ཏོ། །རིག་སྔགས་འཆང་ཉིད་ཅེས་བྱ་བ་ནི་ནམ་མཁར་འགྲོ་བ་ཁོ་ནའོ། །ས་རྣམས་ཐོབ་
པ་ཞེས་བྱ་བ་ནི་ཡུལ་ཐམས་ཅད་ལ་དབང་བའི་རྒྱལ་པོའོ། །རྒྱལ་པོའི་དོན་དུ་ཞེས་བྱ་བ་ནི་རྒྱལ་ཕྲན་དོན་དུ་གཉེར་བའོ། །རིན་ཆེན་འབྱུང་བ་ནི་དེའི་གཏེར་རྒྱ་མཚོ་ཡིན་ནོ། །དོན་ཀུན་སྒྲུབ་པ་ཞེས་བྱ་བ་ནི་ཡུལ་ཐམས་ཅད་ལ།  ལྕགས་གསུམ་གྱི་ཞེས་བྱ་བ་ནི་གསེར་དང་
དངུལ་དང་ཟངས་རྣམས་བསྲེས་པའི་རྡོ་རྗེ་ཞེས་བྱ་བའི་ཐ་ཚིག་གོ། །གདོན་གཞན་ཞེས་བྱ་བ་ནི་གནོད་སྦྱིན་མ་གཏོགས་པ་ཐམས་ཅད་དོ། །སེང་ལྡེང་ཞེས་བྱ་བ་ནི་དེའི་རྡོ་རྗེས་གཞོམ་པའི་དོན་ཏོ། །དཔལ་ཞེས་བྱ་བ་ནི་དབང་ཕྱུག་གི་དོན་འབྱོར་པའོ། །ཚེ་ཞེས་བྱ་བ་ནི་
བརྟན་པ་དང་སྲིད་པའོ། །ནོར་རྫས་ཞེས་བྱ་བ་ནི་གཏེར་ལ་སོགས་པ་དང་རྟ་ལ་སོགས་པ་འཕེལ་བར་གྲུབ་པའོ། །ཤ་ཟ་སྒྲུབ་པ་ལ་ཡང་རྟག་ཏུ་ཤིས། །ཞེས་བྱ་བ་ཡང་བ་རུ་རའི་ཤིང་ལས་བྱས་པའི་རྡོ་རྗེ་ཉིད་དོ། །གཟུགས་བསྒྱུར་བ་ཞེས་བྱ་བ་ནི་མི་ལས་བྱོལ་སོང་ལ་
སོགས་པར་བསྒྱུར་ཞིང་བརྫུའོ། །ས་ལས་བྱས་པའི་རྡོ་རྗེ་ཞེས་བྱ་བ་ནི་རིག་པ་མཆོག་གི་རྒྱུད་ཆེན་པོ་ལས། ཆུ་ངོགས་གཉིས་ཀ་ནས་བླངས་པའི་ས་ཞེས་གསུངས་སོ། །ཡིད་དུ་འོང་བའི་འདོད་པ་ཞེས་བྱ་བ་ནི་འདོད་པའི་ཡོན་ཏན་རྣམ་ལྔ་ཡིད་བཞིན་དུ་འབྱོར་པར་སྒྲུབ་

71-1-69b

པའོ། །དབྱིབས་ལེགས་ཞེས་བྱ་བ་ནི་ཆུ་ཞེང་འཚམ་པའོ། །འཇམ་ཞིང་ཞེས་བྱ་བ་ནི་བྱི་དོར་ལེགས་པའོ། །མ་ཉམས་ཞེས་བྱ་བ་ནི་མཚན་ཉིད་རྫོགས་པའོ། །ཡང་ན་ཡ་ཡོ་མེད་པའི་དོན་ཏོ། །རྨ་མེད་ཅེས་བྱ་བ་ནི་སེལ་ལམ་འཕན་མེད་པའོ། །རྡོ་རྗེ་རྩེ་ལྔ་ཞེས་བྱ་
བ་ནི་དེ་ཐམས་ཅད་ཀྱི་དབྱིབས་ཏེ་རིགས་ལྔའི་ངོ་བོ་ཉིད་དུ་བསྟན་པའི་དོན་ཏོ། །གཞན་ནི་གོ་བར་ཟད་དོ། །རྡོ་རྗེ་མེད་ན་གྲུབ་པར་མི་འགྱུར་རོ། །ཞེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། ཇི་སྐད་དུ། རྡོ་རྗེ་དེ་ནི་བཅངས་པ་ཡིས། །བགེགས་དང་ལོག་འདྲེན་
ཐམས་ཅད་དང་། །གང་དག་གནོད་པར་བྱེད་པ་རྣམས། །ཤིན་ཏུ་སྐྲག་ནས་འབྱེར་བར་བྱེད། །ཅེས་བྱ་བ་དང་། དེ་བཞིན་དུ་ལས་ཀྱི་རྡོ་རྗེ་ཞེས་བྱ་སྟེ། དེ་ཉིད་སྨད་ཀྱི་ལས་ཀྱང་བྱེད། །འདི་ནི་སྒྲུབ་པ་པོ་རྣམས་ཀྱི། །གསང་ཞིང་ཕྲ་བ་གཅིག་པུར་བསྒྲགས། །ཞེས་
གསུངས་པའི་ཕྱིར་རོ། །ཁུ་ཚུར་བཅངས་ནས་ཞེས་བྱ་བ་ནི་རིག་སྔགས་འཆང་དངོས་གྲུབ་ལ་མི་རྩོལ་བ་རྣམས་ཀྱི་ངོར་གསུངས་སོ། །ལྡོང་རོས་ཞེས་བྱ་བ་ལ་སོགས་པས་ནི་སྒྲུབ་པ་པོའི་རྫས་ཀྱི་མཚན་ཉིད་བསྟན་ཏེ། དེ་ཡང་ཆོ་ག་ཞིབ་མོ་ཁ་ཅིག་ཏུ་གསང་སྔགས་
གསུངས་ལ། རྫས་གང་ལས་སྒྲུབ་པ་མ་གསུངས་པ་དང་། གཞན་དག་ཏུ་རྫས་ཐམས་ཅད་ལ་སྒྲུབ་ཅེས་ཁུངས་ཕྱུང་ལ། རྫས་དངོས་སུ་མ་བསྟན་པ་རྣམས་སྤྱིའི་རྒྱུད་འདི་དང་སྦྱར་རོ། །རྫས་ནི་བཅུ་བདུན་སྒྲུབ་པ་པོ་དེ་རྣམས་ཀྱིས།  ཞེས་བྱ་བ་ནི་གྲངས་ངེས་པ་སྟེ་དེ་དག་
བལྟ་བ་དང་། གཟུང་བ་དང་། སྦྱང་བ་དང་། རབ་ཏུ་གྲུབ་པར་བྱེད་པ་དང་། རིག་པ་མཆོག་གི་རྒྱུད་ཆེན་པོ་དེ་དག་ལས་འབྱུང་སྟེ། འདིར་ཡི་གེ་མངས་སུ་དོགས་ནས་མ་སྤྲོས་སོ། །གྲུབ་པ་རྣམ་པ་གསུམ་རྣམས་གྲུབ་པར་བྱེད། །ཅེས་བྱ་བ་ནི། དེ་དག་སྦྱངས་ནས་བསྒྲུབས་
ན་འབར་བ་དང་། དུད་པ་འབྱུང་བ་དང་། ཚེའི་བྱེ་བྲག་གིས་རབ་དང་འབྲིང་དང་ཐ་མའི་དངོས་གྲུབ་ཐོབ་པའི་དོན་ཏོ། །རང་སྔགས་ཆོ་གར་ལྷག་པར་བཤད་པ་གང་། །ཞེས་བྱ་བ་ནི་སོ་སོའི་ཆོ་ག་ཞིབ་མོ་དག་ཏུ་འདིར་མ་སྨོས་པའི་རྫས་ཞིག་བྱུང་ན་ཡང་སྒྲུབ་ཏུ་རུང་ཞེས་བྱ་བའི་ཐ་ཚིག་

71-1-70a

གོ། །དེར་ཡང་གྲུབ་པ་རྣམ་པ་གསུམ་དུ་མཐོང་། །ཞེས་བྱ་བ་ནི་རྫས་བཅུ་བདུན་ལས་ལྷག་པའི་འགལ་བ་མེད་དེ། དངོས་གྲུབ་ཏུ་གྱུར་པར་བསྟན་ཏོ། །བགེགས་དང་ལོག་འདྲེན་གྲུབ་པར་མི་དགའ་བ། །ཞེས་བྱ་བ་ནི་དེ་དག་གི་རང་བཞིན་བསྟན་ཏོ། །རིག་
པའི་ཚོགས་རྣམས་ཀྱི་ནི་མདུན་ནས་རྒྱུ། །ཞེས་བྱ་བ་ལ་སོགས་པས་ནི་དེ་དག་གི་སྤྱོད་པ་བསྟན་ཏོ། །རྣམ་པ་བཞི་ཡོད་དེ་ཞེས་བྱ་བ་ནི་དེ་དག་གི་རིགས་ཀྱི་སྡོམ་སྟེ། འོག་ནས་རིགས་གཉིས་འབྱུང་བས་བསྣན་ན་རིགས་དྲུག་ཏུ་བགེགས་ཐམས་ཅད་འདུས་སོ། །འཇིག་རྟེན་སྐྱོང་
བ་བཞི་ཞེས་བྱ་བ་ནི་རྒྱལ་པོ་ཆེན་པོ་བཞིའོ། །དེ་དག་གཡོག་འཁོར་ཞེས་བྱ་བ་ནི་རྒྱལ་པོ་ཆེན་པོ་བཞིའི་གཡོག་འཁོར་དུ་གཏོགས་པའོ། །མྱ་ངན་མེད་པ་ཞེས་བྱ་བ་ཡང་དེ་ཉིད་དེ་བགེགས་ཀྱི་རིགས་རྣམས་འཇིག་ཅེས་བྱ་བའི་སྡེ་དཔོན་མིང་ངོ་། །དེ་ཡི་གཡོག་འཁོར་བྱེ་བ་
ཕྲག་བདུན་རྣམས། །ཞེས་བྱ་བ་ནི་རྣམ་པར་འཇིག་གི་རིགས་ལ་གཏོགས་པ་མྱ་ངན་མེད་པའི་གཡོག་གི་གྲངས་སོ། །དེ་དག་གསང་སྔགས་སྒྲུབ་ལ་བགེགས་བྱེད་དོ། །ཞེས་བྱ་བ་ནི་རྒྱལ་པོ་ཆེན་པོ་བཞི་ཡིས་གསང་སྔགས་སྒྲུབ་པ་རྣམས་ལ་བགེགས་བྱེད་པའི་དོན་ཏོ། །
ས་སྟེངས་མཐའ་དག་ཀུན་དུ་བགེགས་ཀྱང་བྱེད། །ཅེས་བྱ་བ་ནི་རང་གི་རིགས་དང་གཞན་ལ་ཡང་བྱེད་དེ། འཇིག་རྟེན་ལས་འདས་པ་དང་འཇིག་རྟེན་པ་ཐམས་ཅད་ལ་ཡང་གོ་བར་བྱའོ། །གཞན་ནི་གོ་སླ་བས་མི་ཕྱེའོ། །ཁྲོས་ཤིང་འཁྲུགས་ནས་ཕྱིར་ཡང་ཕྱོགས་པར་
འགྱུར། །ཞེས་བྱ་བ་ནི་བགེགས་ཀྱི་དབང་དུ་གྱུར་པའི་ཉེས་དམིགས་བསྟན་པ་སྟེ། བདག་དང་གནས་དང་རྫས་རྣམས་བསྲུང་བར་གསུངས་པ་རྣམས་ཁྱད་དུ་བསད་དེ་མ་བྱས་པས་དངོས་གྲུབ་ཀྱི་སྣོད་དུ་མི་རུང་བའི་དོན་ཏོ། །སེམས་ནི་འཇུངས་ཤིང་ཞེས་བྱ་བ་ནི་སེར་སྣའི་
དབང་གིས་གཞན་གྱི་འབྱོར་པ་མི་བཟོད་པའོ། །རྨོངས་པ་ཞེས་བྱ་བ་ནི་བླུན་པས་མ་དཔྱད་པར་བྱས་པའོ། །ལྷ་ཞེས་བྱ་བ་ནི་བགེགས་སྤྲུལ་པར་བྱིན་གྱིས་རློབ་པ་རྣམས་སོ། །ལོག་འདྲེན་བགེགས་ཀྱི་ལུགས་འདི་གཏོད། །ཅེས་བྱ་བ་ནི་ཕྲག་དོག་གི་བར་གཏོད་པའི་དོན་ཏོ། །

71-1-70b

རིག་པ་མཆོག་གི་རྒྱུད་ཆེན་པོ་ལས། ཇི་སྐད་དུ། ལྷ་རྣམས་ལ་ཡང་ལྷ་མིན་རྣམས། །འཐབ་པའི་ཕྱིར་ནི་དང་བ་ལྟར། །སེམས་ཅན་རྣམས་ལ་བགེགས་བྱེད་ཕྱིར། །དེ་བཞིན་བགེགས་རྣམས་འབྱུང་བར་འགྱུར། །ཞེས་གསུངས་སོ། །རྣམ་པར་སྣང་མཛད་མངོན་པར་
རྫོགས་པར་བྱང་ཆུབ་པའི་རྒྱུད་ཆེན་པོ་ལས་ནི་གཞན་དུ་བཀའ་སྩལ་ཏེ། སྔོན་ཆད་སེར་སྣ་བསྟེན་པའི་ཕྱིར། །བགེགས་ནི་རང་གི་སེམས་ལས་བྱུང་། །ཞེས་གསུངས་སོ། །གཉེན་པོ་ཡང་དེ་ཉིད་ལས་ཇི་སྐད་དུ། དེ་ཡི་རྒྱུ་ནི་གཞིག་པའི་ཕྱིར། །གང་དུ་སེམས་དང་སེམས་
འབྱུང་བའི། །རྟོག་པ་ཐམས་ཅད་སྤོང་བ་དང་། །རྣམ་པར་རྟོག་པ་ལས་བྱུང་བའི། །སྤྲོས་པ་ཐམས་ཅད་འགག་འགྱུར་བ། །བྱང་ཆུབ་སེམས་ཞེས་བཤད་པ་ཡིན། །ཞེས་གསུངས་ཏེ། དེ་དང་ཡང་སྦྱར་བར་བྱའོ། །བཟློག་མི་ནུས་ཞེས་བྱ་བ་ནི་བགེགས་མི་བྱེད་པའི་ལུགས་
སྡོད་པར་མི་ནུས་པའི་དོན་ཏོ། །བགེགས་ཀྱིས་འཇིགས་སུ་རུང་བ་བྱས་པ་དག །ཅེས་བྱ་བ་ནི་རིག་པ་མཆོག་གི་རྒྱུད་ཆེན་པོ་ལས་ཇི་སྐད་དུ། ལོག་འདྲེན་དེ་དག་ནི་བསོད་ནམས་ཀྱང་ཟད་པར་བྱེད་དེ། ལོག་འདྲེན་རྣམས་ཀྱིས་རེག་པ་ཙམ་གྱིས་ལྷའི་ལོ་སྟོང་གི་བར་དུ་ཕ་
རོལ་ཏུ་ཕྱིན་པ་དྲུག་བསགས་པའི་བསོད་ནམས་ཀྱི་ཕུང་པོ་ཡང་ཐལ་བར་རློག་པར་བྱེད་ཅིང་། རིག་སྔགས་སྒྲུབ་པའི་བསོད་ནམས་ཀྱང་ཟད་པར་བྱེད་དེ། དེས་ན་རིག་སྔགས་འགྲུབ་པར་མི་འགྱུར་རོ་ཞེས་གསུངས་སོ། །སྔར་བཤད་པ་ནི་དེ་དག་ཟློག་པར་བྱེད། །ཅེས་བྱ་བ་
ལ་སོགས་པས་ནི་གོང་དུ་བཟླས་བརྗོད་དང་དཀྱིལ་འཁོར་དུ་འཇུག་པར་གསུངས་པ་དག་གོ། །གཞན་ནི་གོ་བར་ཟད་དོ། །འདི་ལྟར་ཕན་ཚུན་དུ་ནི་འགྲོ་བ་ན། །རིག་པ་འདོན་པའི་སེམས་ནི་གཡེང་བར་བྱེད། །ཅེས་བྱ་བ་ནི་བགེགས་འཇུག་ཅེས་བྱ་བར་གོ་བར་བྱ་སྟེ། རྒྱུད་དེ་ཉིད་
ལས། ངེས་པར་གནས་པ་ལ་ཡང་གནས་ནས། གནས་སུ་འགྲོ་བ་ལ་ཡང་གོམ་པ་རེ་རེ་ལ་ལོག་འདྲེན་རྣམས་ལ་གླགས་ཚོལ་བའི་ཕྱིར་འཁོད་པ་ཡང་ཡོད་དོ་ཞེས་གསུངས་སོ། དཔེར་ན་ཆུ་ནང་གྲིབ་མ་སྣང་བ་ལྟར། །ཞེས་བྱ་བ་ནི་གྲིབ་མ་ཆུའི་ནང་དུ་འབྱུང་བ་ན། 

71-1-71a

ཐོགས་པའམ་སོང་བའི་རྗེས་ཤུལ་མི་སྣང་བར་གཏིང་དུ་ཕྱིན་ཏོ། །དེ་བཞིན་མི་ཡི་ལུས་ལ་འཇུག་པར་འགྱུར། །ཞེས་བྱ་བ་ཡང་ཐོགས་པ་མེད་ཅིང་རྨ་མེད་པར་འཇུག་པའི་དོན་ཏོ། །འཁྲུ་ཚེ་གཞན་ལ་ཞེས་བྱ་བ་ལ་སོགས་པ་ནི་བགེགས་ཀྱི་རིགས་དྲུག་
སོ་སོ་ལ་ཡང་ཁྱད་པར་དུ་བགེགས་བྱེད་པ་རྣམས་ཀྱིས་རང་བཞིན་བསྟན་པ་སྟེ་ཚུལ་ནི་འོག་ནས་འཆད་དོ། །མ་བརྩལ་མེ་ནི་འབྱུང་བ་ལྟར། །ཞེས་བྱ་བ་ནི་རང་དབང་མེད་པར་འབྱུང་བའི་དཔེའོ། །འདོད་ཆགས་མེ་ཆེན་ཞེས་བྱ་བ་དེས་དགེ་བའི་རྩ་བ་ཐམས་ཅད་བསྲེག་པའི་དོན་
ཏོ། །གཡོ་ཞིང་འགུལ་བ་ཞེས་ནི་བྱ་བའི་བགེགས། །ཞེས་བྱ་བ་ལ་སོགས་པས་ནི་ཁྱད་པར་དུ་བགེགས་བྱེད་པ་དེ་དག་སྒྲུབ་པ་པོ་ལ་འཛིན་པའི་དུས་དང་། ཟིན་པའི་མཚན་མ་བསྟན་པ་སྟེ་ཚིག་གི་དོན་ནི་གོ་སླ་བས་མ་ཕྱེའོ། །བགེགས་ཀྱིས་བརླམས་པ་ཞེས་བྱ་བ་ནི་དེས་ཟིན་
ནས་མིའི་རང་བཞིན་གྱུར་པའོ། །ཕྱོགས་ན་ལམ་མིན་ལམ་དུ་མཐོང་། །ཞེས་བྱ་བ་ནི་ལོག་པའི་སྤྱོད་པ་ལ་འཇུག་པའོ། །གཞན་ནི་གོ་བར་ཟད་དོ། །བགེགས་དང་ལོག་འདྲེན་རྣམ་པར་གཞིག་པའི་ཕྱིར། །ཞེས་བྱ་བ་ནི་དེ་དག་གཞོམ་པའི་དོན་དུ་ཞེས་བྱ་བའི་ཐ་ཚིག་གོ། །བདུད་རྩི་
ཐབ་སྦྱོར་དྲག་ཤུལ་ལས་ཅན་སྦྱོར། །སྔགས་པ་དེ་ཡིས་གསང་སྔགས་ལམ་ཞུགས་པ། །ཞེས་བྱ་བ་ཡང་རྒྱུད་དེ་ཉིད་ལས། དེ་བས་ན་རིག་སྔགས་འཆང་གིས་ཉི་མ་ཤར་ཕྱོགས་སུ་ཁ་བལྟས་ལ། རྟག་ཏུ་ཆུ་ཁྱོར་བ་གང་གཏོར་ནས་ཁྲོ་བོའི་གསང་སྔགས་ཀྱང་ལན་བདུན་བརྗོད་
པར་བྱ་སྟེ། ཇི་སྐད་དུ། བདག་མིང་འདི་ཞེས་བྱ་བ་རིག་སྔགས་ཆེ་གེ་མོ་ཞིག་སྒྲུབ་ཀྱིས་ཁྱེད་ཡིད་དགའ་བར་གྱིས་ཤིག་ཅེས་སྨྲ་བར་བྱའོ། །བགེགས་དང་ལོག་འདྲེན་རྣམས་ཀྱིས་ཡང་མི་ཚུགས། །ཞེས་བྱ་བ་ནི་བདུད་རྩི་ཐབ་སྦྱོར་གྱི་ལམ་དུ་ཞུགས་པའི་ཕན་ཡོན་བསྟན་པ་སྟེ། 
ཡང་རྒྱུད་དེ་ཉིད་ལས་དེས་ལོག་འདྲེན་རྣམས་དགའ་ཞིང་མགུ་ལ་ཡིད་དགའ་བར་འགྱུར་ཏེ། དངོས་གྲུབ་སྦྱིན་པར་བྱེད་ཅིང་སེམས་ཀྱང་དང་བར་འགྱུར་རོ་ཞེས་གསུངས་སོ། །བགེགས་ཀྱི་རྣམ་གྲངས་མང་པོ་དེ་དག་གི་ངོ་ལོན་དང་གཉེན་པོ་ཐ་དད་པ་ཡང་རྒྱུད་དེ་ལས་རྒྱས་པར་སོ་

71-1-71b

སོར་ཕྱེ་སྟེ་བསྟན་པ་རྣམས་འདིར་ཡི་གེ་མངས་སུ་དོགས་ཏེ་མ་སྤྲོས་པས་རྒྱུད་ཉིད་ལས་བལྟ་བར་བྱའོ། །ཕྱུགས་ལྷས་ཞེས་བྱ་བ་ལ་སོགས་པས་ནི་དབང་བསྐུར་བའི་གནས་བསྟན་ཏོ། །ཤིང་གཅིག་ཅེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། ཀུན་དུ་ཟླུམ་པོའི་ཤིང་
དྲུང་ངམ། །ཞེས་གསུངས་སོ། །གཞན་ནི་གོ་བར་ཟད་དོ། །དཀྱིལ་འཁོར་གྲུ་བཞི་ལྷམ་པ་ཁྲུ་བཞིའི་ཚད། །ཅེས་བྱ་བ་ནི་དཀྱིལ་འཁོར་གྱི་ཕྱིའི་རྒྱའི་ར་བའི་ཚད་དོ། །ཚོན་རྩི་རྣམ་པ་སྣ་ཚོགས་ཞེས་བྱ་བ་ནི་དཀར་པོ་དང་དམར་པོ་དང་སེར་པོ་དང་ལྗང་གུ་དང་ནག་པོ་རྣམས་ཏེ། 
དེ་ཡང་དབུས་སུ་ནི་ཁྲུ་ཕྱེད་པའི་ས་ཁྲུ་དོ་དོར་རོ། །ཕྱོགས་ཀྱི་ལྷ་རྣམས་གནས་ནི་ཡོངས་སུ་གཟུང་། །ཞེས་བྱ་བ་ནི་དེའི་ཕྱི་རིམ་ཁྱོན་ཁྲུ་གང་ཞིག་ཡོད་པའི་སུམ་ཆ་འཁོར་སར་གཞག་སྟེ། སུམ་གཉིས་ལ་ལྷ་རྣམས་དགོད་པ་ནི་གསང་བའི་དཀྱིལ་འཁོར་ལས། ཇི་སྐད་དུ། 
བརྒྱ་བྱིན་གྱི་ནི་རྡོ་རྗེར་གསུངས། །མེ་ལྷའི་ཕྱག་རྒྱ་ཞུགས་ཐབ་ཡིན། །གཤིན་རྗེའི་ཕྱག་རྒྱ་བེ་ཅོན་ཡིན། །བདེན་བྲལ་གྱི་ནི་རལ་གྲི་ཡིན། །ཆུ་བདག་གི་ནི་ཞགས་པར་བཤད། །རླུང་གི་ཕྱག་རྒྱ་རྒྱལ་མཚན་ཡིན། །ཀུ་བེ་ར་ཡི་དབྱུག་ཏོ་ཡིན། །དབང་ཕྱུག་གི་ནི་རྩེ་གསུམ་
གསུངས། །ས་ཡི་ཕྱག་རྒྱ་བུམ་པ་ཡིན། །ཉི་ཟླའི་ཕྱག་རྒྱ་ཟླུམ་པོར་བྱ། །ཞེས་གསུངས་ཏེ། ཤར་ཕྱོགས་ནས་བརྩམ་པར་བྱའོ། །ཟླ་བ་ནི་མདུང་རྩེ་གསུམ་པ་དང་རྡོ་རྗེའི་བར་དུ་གཞག་སྟེ་དཀར་པོར་བྱའོ། །ཉི་མ་ནི་རལ་གྲི་དང་ཞགས་པའི་བར་དུ་གཞག་སྟེ་ཤིན་ཏུ་དམར་
པོར་བྱའོ། །སའི་ལྷ་མོའི་བུམ་པ་ནི་ཞགས་པ་དང་རྒྱལ་མཚན་གྱི་བར་དུ་གཞག་གོ། །སྒོ་བཞི་པ་ལ་ཞེས་བྱ་བ་ཡང་རྒྱུད་དེ་ཉིད་ལས། དབུས་སུ་སྒོ་ནི་གདོད་པར་བྱ། །ངོས་གཉིས་སུ་ནི་ཚད་དག་ཀྱང་། །བཞི་བཞི་དག་ནི་དོར་བར་བྱ། །ཞེས་གསུངས་སོ། །ཀུ་ཤའི་རྩྭ་ཡང་
དགྲམ་ཞེས་བྱ་བ་ནི་དཀྱིལ་འཁོར་གྱི་རི་མོ་ལ་མ་བབ་པའི་ཐ་མ་ཐོག་ཐག་རྩེ་མོས་རྩ་བ་མནན་ནས་བསྐོར་རོ། །བཟའ་བ་ཞེས་བྱ་བ་ནི་ཁུར་བ་སྣ་ཚོགས་སོ། །ཤ་ཆང་ལ་ཕུག་ཅེས་བྱ་བ་ནི་སྤྱིར་སྨོས་ཀྱང་། ལྷ་གཞན་ལ་སྦྱིན་པར་བྱ་བ་མ་ཡིན་ཏེ། གཤིན་རྗེ་དང་བདེན་བྲལ་ལ་

71-1-72a

སྦྱིན་ནོ། །འབྲས་བུ་མང་པོ་ཞེས་བྱ་བ་ནི་ཤིང་ཐོག་སྣ་ཚོགས་སོ། །གཏོར་མ་སྦྱིན་ཞེས་བྱ་བ་ནི་གཏོར་མ་དེ་དག་སྦྱར་ནས་འཁོར་བའི་སྣམ་བུ་ལ་སོ་སོའི་མདུན་དུ་དབབ་བོ། །བུམ་པ་ཞེས་བྱ་བ་ནི་ཚད་དང་དབྱིབས་ནི་འདིར་ཡི་གེ་མངས་སུ་དོགས་ནས་མ་སྤྲོས་ཏེ། 
འགྲོ་ལྡིང་གི་བུམ་པའི་ཆོ་ག་ལས་བལྟ་བར་བྱའོ། །པདྨ་དམར་པོའི་མདོག་འདྲ་བ། །ཞེས་བྱ་བ་ནི་སོ་བཏང་ལེགས་པས་ཁ་དོག་དམར་པོར་གྱུར་པའོ། །ནག་པོ་ར་རི་མེད་ཅེས་བྱ་བ་ནི་སོ་བཏང་ཉེས་པའི་སྐྱོན་མེད་པའོ། །རིན་ཆེན་བཅས་ཞེས་བྱ་བ་ནི་གསང་བའི་དཀྱིལ་
འཁོར་ལས་ཇི་སྐད་དུ། བྱི་རུ་དང་ནི་ས་ལེ་སྦྲམ། །དུང་དང་མུ་ཏིག་ནོར་བུ་སྟེ། །རིན་ཆེན་ཀུན་ཞེས་བྱ་བ་ལ། །ལྔ་པོ་འདི་དག་ཤེས་པར་བྱ། །ཞེས་གསུངས་སོ། །སྨན་དང་ཞེས་བྱ་བ་ཡང་དེ་ཉིད་ལས། སིང་ཧ་བྱ་ཀྲྀ་ཀ་ར་ཎི། །ཧ་ས་ཧ་ས་དེ་བ་སྟེ། །སྨན་རྣམས་ཀུན་ཞེས་
བྱ་བ་ལ། །ལྔ་པོ་འདི་དག་ཤེས་པར་བྱ། །ཞེས་གསུངས་སོ། །འབྲུ་དང་ཞེས་བྱ་བ་ཡང་དེ་ཉིད་ལས། འབྲས་ཀྱི་སོ་བ་མོ་སྲན་གྲེའུ། །ནས་དང་ཏིལ་དང་གྲོ་དང་ལྔ། །འབྲུ་རྣམས་ཀུན་ཞེས་བྱ་བ་ནི། །ལས་རྣམས་ཀུན་ལ་འདི་དག་གཟུང་། །ཞེས་གསུངས་སོ། །སྤོས་ཆུས་
བཀང་ཞེས་བྱ་བ་ནི་འཕགས་པ་འཇམ་དཔལ་གྱི་རྒྱུད་ཆེན་པོ་ལས། ཙནྡན་དང་ག་པུར་དང་གུར་གུམ་གྱིས་བསྲེ་བ་གསུངས་སོ། །བཞི་ཞེས་བྱ་བ་ནི་བུམ་པ་རེ་རེའི་ནང་དུ་ལྷ་རེ་རེ་སྤྱན་འདྲེན་པའི་ཕྱིར་རོ། །ལྡུམ་བུས་ཁ་བཀང་ཞེས་བྱ་བ་ནི་རིག་པ་མཆོག་གི་རྒྱུད་ཆེན་པོ་ལས། འོ་མ་
ཡོད་པའི་ཤིང་གི་ཡལ་གས་ཁ་བརྒྱན་པར་གསུངས་སོ། །རས་ཀྱིས་མགུལ་བ་དཀྲིས་ཞེས་བྱ་བ་ནི་རས་ཕྲན་དཀར་པོ་ཁ་ཚར་མ་གོད་པ་ཁྱེའུ་གཙང་གིས་མགྲིན་པ་བཅིང་བའི་དོན་ཏོ། །ལུས་དམར་པོ་དང་ཀི་ལི་ཀི་ལི་དང་། འགྲོ་ལྡིང་བའི་ཞེས་བྱ་བའི་ལྷ་འདི་དག་ནི་ཕྱག་ན་
རྡོ་རྗེའི་ཐུགས་ཀྱི་རང་བཞིན་སྙིང་པོ་ཞེས་བྱ་སྟེ། གཏན་ཚིགས་ནི་འོག་ནས་འཆད་དོ། །སོགས་པ་ཞེས་བྱ་བ་ནི་འཕགས་པ་སྟོབས་པོ་ཆེ་ལས་རིག་པར་བྱ་སྟེ། འོག་ནས་སྦྱིན་སྲེག་གི་སྐབས་སུ་ཡང་ལས་ཐམས་ཅད་ལ་སྦྱར་བར་འབྱུང་སྟེ། ཇི་སྐད་དུ། མེ་ཡི་མཚན་མ་འདི་

71-1-72b

རྣམས་མཐོང་ནས་ནི། །སྟོབས་པོ་ཆེ་ཡིས་མར་གྱི་སྦྱིན་སྲེག་བྱ། །ཞེས་འབྱུང་བས་ལྷ་གཞན་མ་ཡིན་པར་མངོན་ནོ། །ཁྲོ་བོ་སྔ་མ་གསུམ་པོ་ནས་བཟླས་པ་ཡང་མ་ཡིན་ཏེ། བུམ་པ་བཞི་ཡོད་ལ། བཟླས་བརྗོད་བྱེད་ཅིང་བུམ་པ་རེ་རེས་བཀྲུ། །ཞེས་འབྱུང་བ་དང་
འགལ་བའི་ཕྱིར་རོ། །བརྒྱར་བཟླས་ཏེ་ཞེས་བྱ་བ་ནི་བུམ་པ་རེ་རེ་ལ་ལྷ་རེ་རེས་བརྒྱ་རྩ་བརྒྱད་བཟླས་པའི་དོན་ཏོ། །ཁོར་ཡུག་ཏུ་ནི་གཞག་པར་བྱ། །ཞེས་བྱ་བ་ནི་ཁྲུས་བྱེད་པའི་ས་བོར་བའི་ཕྱི་རིམ་གྱི་གྲ་བཞིར་ཡང་ཀུ་ཤ་བཏིང་ནས་དེའི་སྟེང་དུ་བུམ་པ་གཞག་སྟེ་དེའི་ནང་དུ་ཁྲོ་བོ་རྣམས་སྤྱན་དྲང་
ངོ་། །དེའི་ནང་དུ་སྤྱན་དྲང་བར་ཅི་མངོན་ཞེ་ན། ལས་ཀྱི་ཕྲེང་བ་ལས། འཇིག་རྟེན་དབང་ཕྱུག་ཆུ་དབུས་སྤྱན་དྲངས་ཏེ། །ཞེས་གསུངས་པ་དེ་དང་མཐུན་པའི་ཕྱིར་རོ། །དེ་ལྟ་བས་ན་བུམ་པ་དེ་དག་ཀྱང་ཡིད་བཞིན་གྱི་མཚོ་བདུད་རྩིའི་ཆུས་གང་བར་བསམས་ལ། དེ་ལ་
གནས་རྣམས་བཀོད་དེ་འཕགས་པ་རྣམས་མཆོད་ཡོན་ནམ་གསང་སྔགས་ཀྱིས་སྤྱན་དྲང་ངོ་། །དེ་ནས་བྱུག་སྤོས་བདུག་སྤོས་ལ་སོགས་དབུལ། །ཞེས་བྱ་བ་ནི་དེ་དག་གཤེགས་པར་རིག་པ་དང་མཆོད་པ་རྣམ་ལྔ་རིམ་པ་བཞིན་དུ་དབུལ་བའི་དོན་ཏོ། །དེ་ནས་ཕྱོགས་སྐྱོང་
དག་ལ་ཡང་གཏོར་མ་བསྔོས་ནས་བཟླས་བརྗོད་བརྩམ་པར་བྱའོ། །བཟླས་བརྗོད་ཟིན་ནས་ཕྱོགས་ཀྱི་ལྷ་རྣམས་དགའ་བར་བྱ་བའི་ཕྱིར་རིག་པ་མཆོག་གི་རྒྱུད་ཆེན་པོ་ལས། དེ་དག་ལས་བསྟོད་པའི་ཚིག་འབྱུང་བ་བརྗོད་པར་བྱ་སྟེ། འདིར་ཡི་གེ་མངས་སུ་དོགས་པས་མ་སྤྲོས་སོ། །
བདེ་བའི་སྟན་ལ་གཞག་ཅེས་བྱ་བ་ནི་དཀྱིལ་འཁོར་གྱི་དབུས་སུ་ཀུ་ཤའི་ཁྲེས་ཅིག་གཞག་ལ། དེའི་སྟེང་དུ་ནད་པ་གཞག་གོ། །བཟླས་བརྗོད་བྱེད་ཅིང་བུམ་པ་རེ་རེས་བཀྲུ། །ཞེས་བྱ་བ་ནི་ལྷ་གང་གི་བཟླས་པའི་བུམ་པ་དེ་ཆུ་བླུགས་པ་ནི་དེ་ཉིད་ཀྱི་གསང་སྔགས་བརྗོད་པའི་དོན་
ཏོ། །འོན་ཀྱང་ལོག་འདྲེན་རྣམས་ལས་ཐར་བར་འགྱུར། །ཞེས་བྱ་བ་ནི་བགེགས་ཀྱིས་ཟིན་པའམ། མ་ཟིན་པ་རྣམས་ཀྱིས་ལས་འདི་བྱས་ན་ཡང་ཕྱིས་མི་ཚུགས་པར་ཐར་པའོ། །སྒྲུབ་པ་པོ་ཡི་མིང་ནི་འབའ་ཞིག་ལ། །བགེགས་རྣམས་གཞིག་ཕྱིར་ཕན་པར་མ་ཟད་ཀྱི། །ཞེས་

71-1-73a

བྱ་བ་ལ་སོགས་པས་ནི་ཞར་གྱི་ཕན་ཡོན་བསྟན་ཏེ། ཚིག་གི་དོན་གཞན་ནི་གོ་བར་ཟད་དོ། །བུ་མོ་དག་ཅེས་བྱ་བ་ནི་མི་ལ་མ་སོང་བའོ། །བུད་མེད་ཕལ་ཞེས་བྱ་བ་ནི་སྨད་འཚོང་མའོ། །ལེའུ་བཞི་པའི་དོན་བཤད་ཟིན་ཏོ།།      །།རྣམ་པར་བསལ་ཏེ་ཞེས་བྱ་བ་ནི་
བགེགས་དང་བྲལ་བའི་དབང་གིས་སྡིག་པའི་དྲི་མ་མེད་དེ་སེམས་ཀྱི་རྒྱུད་དང་ཞེས་བྱ་བའི་ཐ་ཚིག་གོ། །ཆོ་ག་ཉམས་དང་ཞེས་བྱ་བ་ནི་སྐད་ཅིག་གསུངས་པའི་ཆོ་ག་རྣམས་མ་ལྕོགས་པར་ཟློས་པའོ། །ཡི་གེ་གུག་སྐྱེད་མེད་ཅེས་བྱ་བ་ནི་ལྷག་པ་དང་ཆད་པས་དབྱིངས་དང་རྣམ་པར་ཐར་པའི་
སྒོ་སྟོན་པའི་དོན་གྱིས་སྒྲ་གཞན་དུ་གྱུར་པའི་ཕྱིར་རོ། །མཆོད་པ་མེད་ཅེས་པ་ནི་མ་འབྱོར་པའོ། །མི་གཙང་ཞེས་བྱ་བ་ནི་ཕྱི་ནང་གི་དྲི་མ་མ་བསལ་བའོ། །དངོས་གྲུབ་རྒྱ་ཆེན་མི་སྟེར་རོ། །ཞེས་བྱ་བ་ནི་སྐྱོན་གོང་མ་རྣམས་དང་མ་བྲལ་བའི་ཉེས་པས་ཞེས་བྱ་བའི་ཐ་ཚིག་གོ། །ཆར་པ་
ལེགས་པར་འབེབས་ཞེས་བྱ་བ་ནི་ལོ་ལེགས་པའི་སྐལ་བ་དང་ལྡན་པ་རྣམས་ཀྱི་ཡུལ་དུའོ། །མི་ཡི་སྐལ་བ་དང་ལྡན་པ་ཞེས་བྱ་བ་ནི་ཚེ་འདི་དང་གཞན་དུ་སྤྱད་པའི་བསོད་ནམས་ཀྱི་འཕྲོ་ཡོད་པའོ། །འདོད་པ་བཞིན་དུ་ཞེས་བྱ་བ་ནི་ནམ་མཁའ་ལ་འགྲོ་བ་ལ་སོགས་པ་སྒྲུབ་པ་
པོ་གང་ལ་རེ་བའི་འབྲས་བུ་ཐོབ་པའི་དོན་ཏོ། །ཡུལ་ཞེས་བྱ་བ་ནི་རབ་ཏུ་གྲུབ་པའི་རྒྱུད་ཆེན་པོ་ལས་ཇི་སྐད་དུ། གང་དུ་བདུད་བཞི་བཏུལ་ནས་ནི། །བཅོམ་ལྡན་མངོན་པར་སངས་རྒྱས་པར། །དངོས་གྲུབ་མང་པོ་ཀུན་གྱི་མཆོག །རྨད་བྱུང་གོ་འཕང་ཐོབ་གྱུར་པ། །ཞེས་བྱ་བ་
ལ་སོགས་པའོ། །དུས་ཞེས་བྱ་བ་ཡང་རྒྱུད་དེ་ཉིད་ལས། ཇི་སྐད་དུ། དགུན་ཟླ་ཐ་ཆུངས་སྟོན་ཟླ་འབྲིང་། །དཔྱིད་ཟླ་ར་བ་འབྲིང་པོ་དང་། །དབྱར་ཟླ་ར་བའི་ཉ་ལ་ཡང་། །སྒྲུབ་པ་ཆེན་པོ་བརྩམ་པར་བྱ། །ཞེས་གསུངས་པའོ། །ཆོ་ག་ཞེས་བྱ་བ་ནི་ལྷ་གཟི་བྱིན་བསྐྱེད་པ་ལ་སོགས་
པའོ། །ལས་ཞེས་བྱ་བ་ནི་རྣམ་པ་བཞིའོ། །སྡིག་པ་བྱང་ཞེས་བྱ་བ་ནི་བཟླས་བརྗོད་དང་བསམ་གཏན་དང་དཀའ་ཐུབ་ལ་སོགས་པས་འབྱང་བའི་དོན་ཏོ། །བསོད་ནམས་བསགས་པ་ཞེས་བྱ་བ་ནི་ཚུལ་ཁྲིམས་རྣམ་པ་གསུམ་པོ་ལ་གནས་ཤིང་ཕ་རོལ་ཏུ་ཕྱིན་པ་རྣམས་དང་ལྡན་པའོ། །

71-1-73b

གུས་པ་ཞེས་བྱ་བ་ནི་ལྷ་དང་བླ་མ་ལ་ཡིད་ཆེས་པས། ནན་ཏན་ངེས་པར་བྱེད་པར་འགྱུར་བའི་དོན་ཏོ། །བཟླས་བརྗོད་ཅེས་བྱ་བ་ནི་ཡན་ལག་དང་ལྡན་པར་བྱེད་ཅེས་བྱ་བའི་ཐ་ཚིག་གོ། །ཇི་ཙམ་སྡིག་པ་མང་པོ་ཞེས་བྱ་བ་ལ་སོགས་པས་ནི་སྔ་མའི་ཡོན་ཏན་ལས་བཟློག་པའི་སྐྱོན་
རྣམས་བརྗོད་པའོ། །བར་ཆད་སྔགས་གཞན་བཟླས་ཞེས་བྱ་བ་ནི་སྒྲུབ་པ་པོ་བློ་ཙམ་ལ་མ་ཕེབས་པ་ཁ་ཅིག་ལྷ་ལ་ལྷའི་ཡོན་ཏན་མྱུར་མྱུར་སྐད་འབྱུང་བ་དག་ཐོས་ནས། རང་གི་ཁྱད་པར་གྱི་ལྷ་བཏང་སྟེ། དེའི་གསང་སྔགས་ཟློས་པའོ། །བཟླས་པ་བཏང་ཞེས་བྱ་བ་ནི་བསྙེན་པའི་
གྲངས་ཚང་ནས་སྒྲུབ་པའི་དུས་ལ་སྡོད་པའི་སྐབས་སུ་སྟེ། རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། ཇི་སྐད་དུ། སྔོན་དུ་བསྙེན་པ་རྫོགས་པ་ལ། །མི་ནུས་ན་ནི་དུས་གཅིག་གམ། །དུས་གཉིས་སུ་ནི་ཆོ་ག་བསྒོམ། །ཞེས་བྱ་བ་དེ་མ་ཟློས་པའོ། །གཞན་ལ་བྱིན་ཞེས་བྱ་བ་
ནི་བདག་གིས་བསྙེན་པ་བྱས་པ་རྣམས་གཞན་དངོས་གྲུབ་ཐོབ་པར་བསྔོས་ནས་སྦྱིན་པའོ། །དེས་ཇི་ལྟར་ཕན་ཐོགས་པར་འགྱུར་ཞེ་ན། འཕགས་པ་ཕྱག་ན་རྡོ་རྗེ་དབང་བསྐུར་བའི་རྒྱུད་ཆེན་པོ་ལས། ཇི་སྐད་དུ། ལས་གཞན་གྱིས་བྱས་ལ་འབྲས་བུ་གཞན་སྤྱོད་པའི་དཔེ་
འཁོར་ལོས་སྒྱུར་བའི་རྒྱལ་པོ་དང་ཞིང་པ་བརྗོད་པ་ལྟ་བུར་གོ་བར་བྱའོ། །དུས་གསུམ་མཆོད་པ་ལ་ནི་བརྩོན་བྱས་ནས། །སླར་ཡང་འབུམ་བཟླས་ཞེས་བྱ་བ་ནི་གོང་དུ་སྨོས་པའི་སྐྱོན་དེ་དག་བྱུང་ནས། སླར་བསབ་པར་འདོད་པས་སྔོན་དུ་བསྙེན་པ་བྱས་པ་རྣམས་ཀྱང་བརྡེག་
བསྣུན་ཏེ། སྔོན་པས་ཀྱང་མཆོད་པའི་བུངས་བསྐྱེད། ཡོ་བྱད་བཟང་དུ་བསྟར་ནས་བསབ་པའི་དོན་དུ་འབུམ་བཟླས་བརྗོད་བྱ་བར་བསྟན་ཏོ། །སྒྲུབ་ལ་འཇུག་པར་བྱ་ཞེས་བྱ་བ་ནི་དེ་ལྟར་ཉེས་པ་བསབ་ནས། དེའི་འོག་ཏུ་བསྙེན་པའི་མགོ་གཟུགས་ཞེས་བྱ་བའི་ཐ་ཚིག་གོ། །སྟོང་
ཕྲག་ཅེས་བྱ་བ་ནི་ཐམས་ཅད་ལ་སྦྱར་རོ། །བཅུ་ཞེས་བྱ་བ་ནི་དངོས་གྲུབ་རབ་ཀྱི་དོན་དུའོ། །བརྒྱད་དམ་བདུན་ཞེས་བྱ་བ་ནི་འབྲིང་ལས་དགོངས་པའོ། །བཞི་ཞེས་བྱ་བ་ནི་དངོས་གྲུབ་ཐ་མ་སྒྲུབ་པ་རྣམས་ཀྱི་གྲངས་སོ། །བཟླས་མཐར་ཞེས་བྱ་བ་ནི་བསབ་པའི་དོན་དུ་བཟླས་བརྗོད་

71-1-74a

འབུམ་བྱེད་པའི་ཚེ། འབུམ་གྱི་གྲངས་མ་ཚང་གི་བར་དུ་བཟླས་བརྗོད་དུས་གསུམ་དུ་བྱེད་པར་མཇུག་ཐོགས་སུ་སྦྱིན་སྲེག་བྱ་དགོས་པར་བསྟན་པའོ། །མར་གྱི་སྦྱིན་སྲེག་བྱ་ཞེས་བྱ་བ་ནི་དེའི་ཚེ་མར་འབའ་ཞིག་གི་སྦྱིན་སྲེག་བྱ་བར་གསུངས་སོ། །ཡང་ན་ཞེས་བྱ་
བ་ལ་སོགས་པས་ནི་མར་འབའ་ཞིག་གི་སྦྱིན་སྲེག་ལས་རྣམ་པ་གཞན་དུ་ཡང་བསྟན་ཏོ། །འཛམ་བུ་མ་ནུ་ཞེས་བྱ་བ་ལ་སོགས་པས་ནི་ཡམ་ཤིང་གི་རིགས་བསྟན་ཏོ། །ཡམ་ཤིང་གཞོན་ནུ་ཞེས་བྱ་བས་ནི་མཚན་ཉིད་བསྟན་ཏོ། །སོར་བཅུ་གཉིས་པའི་ཞེས་བྱ་བས་ནི་ཚད་བསྟན་ཏོ། །
ཞོ་མར་སྦྲང་རྩི་ལ་བཏགས་ནས། །ཞེས་བྱ་བ་ནི་བསབ་པའི་དོན་དུ་སྦྱིན་སྲེག་བྱེད་པ་རྒྱས་པའི་ལས་དང་སྦྱར་དགོས་པའི་ཕྱིར་རོ། །ང་ཡི་མདུན་དུ་ཞེས་བྱ་བ་ནི་ཕྱག་ན་རྡོ་རྗེའི་སྐུ་གཟུགས་ཀྱི་དྲུང་གཡོན་ལེགས་སུ་བཞག་པའི་དོན་ཏོ། །མངོན་དུ་ཕྱོགས་པར་བཞག་ཅེས་བྱ་བ་ནི་འཇིམ་
གཟུགས་དེའི་ཞལ་ཡང་ཕྱག་ན་རྡོ་རྗེ་ལ་བསྟན་པའི་ཐ་ཚིག་གོ། །ཀི་ལི་ཀི་སོགས་ཞེས་བྱ་བ་ནི་གོང་དུ་བུམ་པའི་ཆོ་ག་ལས་འབྱུང་བའི་ལྷ་བཞི་པོ་རྣམས་སོ། །སྙིང་པོས་མར་དང་འོ་མ་ཞེས་བྱ་བ་ནི་མར་དང་འོ་མ་གཙང་མས་བུམ་པ་བཀང་ལ། ལྷ་དེ་རྣམས་ཀྱི་སྙིང་པོ་བརྒྱ་རྩ་
བརྒྱད་བཟླས་པའི་དོན་ཏོ། །དེའི་གཟུགས་བརྙན་བཀྲུ་ཞེས་བྱ་བ་ནི་འཇིམ་གཟུགས་དེ་དུས་གསུམ་དུ་བཟླས་པའི་མར་དང་འོ་མས་བཀྲུ་བའི་དོན་ཏོ། །དེ་ལྟར་ཞག་བདུན་བྱས་ནས་ཞེས་བྱ་བ་ནི་ཞག་བདུན་དུ་དུས་གསུམ་དུ་བཀྲུས་པས་གཟུགས་བརྙན་དེ་ཡང་འཇིག་པར་འགྱུར་
ཏེ་ཞེས་པའི་རྫས་དང་། བཀྲུ་བའི་རྫས་བཅས་ཏེ། ཆུ་ཀླུང་ཆེན་པོར་དོར་རོ། །དེའི་གཟུགས་ཞེས་བྱ་བ་ནི་རང་གི་ལྷའི་གཟུགས་སྤྲ་ཚིལ་ལས་བྱས་པའོ། །མདའ་དུག་དང་སྐེ་ཚེས་བྱུགས་ནས་ཞེས་བྱ་བ་ནི་དེའི་ལྡེ་གུས་གཟུགས་བརྙན་བསྐུ་བའི་དོན་ཏོ། །ཀི་ལི་ཀི་ལ་འགྲོ་
ལྡིང་ལ་སོགས་པའི། །སྔགས་ཀྱིས་ཞེས་བྱ་བ་ཡང་། གོང་མའི་ལྷ་བཞི་པོ་དེ་རྣམས་ཉིད་དེ། ལྷ་དེ་རྣམས་དྲག་པོའི་ཚུལ་གྱིས་དྲག་པོའི་ཐབ་ཏུ་སྤྱན་དྲངས་ལ། རང་གི་ལྷ་ལ་དྲག་ཤུལ་མཛད་ཅིག་ཅེས་གསོལ་བ་གདབ་པའི་དོན་ཏོ། །དེ་ལ་ཞེས་བྱ་བ་ནི་རང་གི་ལྷའི་གཟུགས་

71-1-74b

བརྙན་ནོ། །ཡུངས་མར་ཚ་བ་དང་སྦྱར་ཞེས་བྱ་བ་ནི་དེའི་དུམ་བུར་བཅད་ནས་ཡུངས་མར་ཚྭ་དང་བསྲེ་བའི་ཐ་ཚིག་གོ། །ཞག་བདུན་དུས་གསུམ་སྦྱིན་སྲེག་ལས་བྱས་ན། །ཞེས་བྱ་བ་ནི་གཟུགས་ཀྱི་དུམ་བུ་དེ་དང་དྲག་པོའི་རྫས་རྣམས་བསོགས་ལ་དྲག་པོའི་བསྐུལ་ཚིག་བཅུག་སྟེ། 
སྦྱིན་སྲེག་བྱ་བའི་དོན་ཏོ། །གསང་སྔགས་འོངས་ནས་རྨི་ལམ་དག་ཏུ་ནི། །ཞེས་བྱ་བ་ནི་དྲག་ཤུལ་སྤྱད་པའི་རྗེས་ལ་ངེས་པར་ལྷ་བྱོན་ཏེ་སྟོན་པའི་ཐ་ཚིག་གོ། །ཆོ་ག་ཉམས་པའམ་ཡི་གེ་ལྷག་ཆད་སྟོན། །ཞེས་བྱ་བ་ནི་གསང་སྔགས་ཀྱི་ལྷ་རྣམས་ཀྱང་ཐུགས་རྗེ་ཆེན་པོ་དང་
ལྡན་པས་ཆོ་ག་མ་ཉམས་ན། དངོས་གྲུབ་མི་སྟེར་མི་སྲིད་པས་སྒྲུབ་པ་པོས་ཆོ་ག་ཉམས་པ་འགའ་ཞིག་ངོས་མ་ཟིན་པར་དྲག་ཤུལ་གྱི་ལས་བྱས་ཏེ་བསྐུལ་བས་གང་ཉེས་པ་དེ་སྟོན་པར་འགྱུར་ཞེས་བྱ་བའི་དོན་ཏོ། །ཇི་ལྟར་རྒྱ་མཚོ་དུས་ལས་མི་འདའ་ལྟར། །ཞེས་བྱ་བ་ནི་
ཆོས་ཉིད་དེ་གཞན་དུ་འགྱུར་མི་སྲིད་པར་བསྟན་པའོ། །སྔགས་ཀྱིས་གཞན་གྱི་གསང་སྔགས་མི་གནོན་ཅིང་། །ཞེས་བྱ་བ་ལ་སོགས་པས་ནི་གསང་སྔགས་མཐུ་ཆེ་བར་བསྟན་པའི་སྐབས་སུ། དེ་ལྟར་ལས་སྣ་ཚོགས་འགྲུབ་ནུས་པར་བརྡ་སྤྲད་ཀྱིས་ཀྱང་། དེ་དག་གཅིག་
ལ་གཅིག་གནོད་པ་མི་མཛད་ཅེས་བྱ་བའི་ཐ་ཚིག་གོ། །དཔེ་ནི་གོ་སླ་བས་མ་ཕྱེའོ། །དེ་བཞིན་ཞེས་བྱ་བ་ནི་དེའི་ཕྱིར་ཞེས་བྱ་བའི་དོན་ཏོ། །སྔགས་པས་གང་ཡང་རུང་བའི་སྔགས་བཟླས་ནས། །ཞེས་བྱ་བ་ནི་གསང་སྔགས་དུག་པ་གང་ཡང་རུང་བའོ། །གཞན་གྱི་གསང་
སྔགས་མནན་མི་བྱ། །ཞེས་བྱ་བ་ནི་ཕྲག་དོག་གི་དབང་གིས་སྒྲུབ་པ་པོ་གཞན་དངོས་གྲུབ་ཐོབ་ཏུ་དོགས་ནས། དེའི་ལྷ་ལ་ཕུར་བུས་འདེབས་པ་དག་དགག་པར་བསྟན་ཏོ། །གསང་སྔགས་བཅད་དང་བཅིང་བར་མི་བྱ་ཞིང་། །ཞེས་བྱ་བ་ཡང་དེའི་དངོས་གྲུབ་བཀག་པའི་དོན་དུ། གཞན་གྱི་
ལྷའི་གཟུགས་བརྙན་ནམ་རྩྭ་ཀུ་ཤ་ལས་མཚོན་རྣོན་པོས་གཅོད་པ་དང་། དེའི་གཟུགས་བརྙན་ཚོན་སྣ་ལྔའི་སྐུད་པས་འཆིང་བ་ལྟ་བུའི་ལས་དྲག་པོ་བྱེད་དུ་མ་གནང་བའི་དོན་ཏོ། །ཡི་གེ་ལྷག་ཆད་གསང་སྔགས་མི་སྦྱིན་ནོ། །ཞེས་བྱ་བ་ནི་སེར་སྣའི་ཐ་བ་དང་མ་བྲལ་

71-1-75a

བས་གཞན་མི་འགྲུབ་པར་བྱ་བའི་དོན་དུ། གསང་སྔགས་ཀྱི་ཡི་གེ་འབྲུ་བསྣན་པའམ། ཕྲི་སྟེ་སྦྱིན་པ་དགག་པར་བསྟན་པའོ། །ལས་རྣམས་སྤྱད་པས་གཞན་དུ་བསྒྱུར་མི་བྱ། །ཞེས་བྱ་བ་ནི་ཞི་བའི་ལས་བྱེད་འདོད་པ་རྣམས་ལ་མི་འགྲུབ་པར་བྱ་
བའི་དོན་དུ། དྲག་པོ་ལ་སོགས་པའི་ཚུལ་དུ་མན་ངག་ལོག་པར་མི་བསྟན་ཏོ་ཞེས་བྱ་བའི་ཐ་ཚིག་གོ། །གནས་རྣམས་གཟིར་བར་ནམ་ཡང་མི་བྱའོ། །ཞེས་བྱ་བ་ནི་ཀླུ་ལ་སོགས་པ་གནས་པའི་ས་གཞི་ལ། དེ་དག་གཙེ་བའི་དོན་དུ་གསང་སྔགས་དྲག་པོའི་ཕུར་བུས་
གདབ་པ་ལ་སོགས་མི་བྱ་བར་བསྟན་ཏོ། །གཞན་ནི་གོ་སླ་བར་ཟད་དོ། །དངོས་གྲུབ་ཕྱིར་ནི་རྣམ་པ་བཅུར་གསུངས་ཏེ། །ཞེས་བྱ་བ་ནི་སྒྲུབ་པ་པོ་ལ་ལའི་ལུགས་ལས་གཙོ་བོ་བཅུར་འདོད་ཅེས་བྱ་བའི་ཐ་ཚིག་གོ། །དེ་ཡང་སྔགས་པ་དང་ཞེས་བྱ་བ་ནི་སྒྲུབ་པ་པོའི་སྐྱེས་བུའོ། །རང་
སྔགས་ཞེས་བྱ་བ་ནི་བསྒྲུབ་པར་བྱ་བའི་ཁྱད་པར་གྱི་ལྷའོ། །གཡོག་ཅེས་བྱ་བ་ནི་སྒྲུབ་པ་པོའི་གྲོགས་མཆོག་གོ། །རྫས་ཞེས་བྱ་བ་ནི་ལྡོང་རོས་ལ་སོགས་པའོ། །བརྩོན་འགྲུས་ཞེས་བྱ་བ་ནི་སྦྱོར་བ་ལ་སོགས་པའོ། །ཕྱོགས་ཞེས་བྱ་བ་ནི་དབུས་ལ་སོགས་པའི་ཡུལ་ལོ། །ས་གཞི་
ཞེས་བྱ་བ་ནི་རིའི་རྩེ་མོ་ལ་སོགས་པའི་གནས་སོ། །དུས་ཞེས་བྱ་བ་ནི་དཔྱིད་ཟླ་ལ་སོགས་པ་དང་། སྔ་དྲོ་ལ་སོགས་པའོ། །ཡན་ལག་རྫོགས་པའི་ལྷ་ཞེས་པ་ནི་རི་མོ་དང་ཤིང་གཟུགས་ལ་སོགས་པའོ། །སེམས་སྟོབས་ཞེས་བྱ་བ་ནི་འཇིགས་པ་མེད་ཅིང་སྲན་ཆེ་བའོ། །ཚིག་གི་
དོན་ལྷག་མ་ནི་གོ་བར་ཟད་དོ། །བཅུ་ཞེས་བྱ་བ་ནི་བཤད་པ་ཐ་མའོ། །བརྒྱད་ཅེས་བྱ་བ་ནི་བཅུ་པོ་དེ་དག་ལས་ཐ་མ་གཉིས་ཕྲི་བའོ། །ལྔ་ཞེས་བྱ་བ་ནི། གཞན་དག་ཁ་ཅིག་རིག་འཛིན་གྲོགས་ཞེས་ཟེར། །གཞན་དག་ཕྱོགས་དང་བརྩོན་འགྲུས་དུས་རྣམས་ཉིད། །ཅེས་བྱ་བ་འདི་ཉིད་ཀྱིས་
བསྟན་པར་རིག་པར་བྱའོ། །བཞི་ཞེས་བྱ་བ་ནི། གཞན་ནི་རྫས་དང་ས་གཞིའི་ལྷ་དང་སྔགས། །ཞེས་བྱ་བ་དེ་ཉིད་ཀྱིས་བསྟན་ཏོ། །གསུམ་ཞེས་བྱ་བ་ནི་ལྔ་པོའི་གྲངས་སུ་སྨོས་པའི་རྐང་པ་འོག་མ། གཞན་དག་ཕྱོགས་དང་བརྩོན་འགྲུས་དུས་རྣམས་ཉིད། །ཅེས་བྱ་བས་བསྟན་ཏོ། །

71-1-75b

གཅིག་ཅེས་བྱ་བ་ནི། ཁ་ཅིག་སེམས་སྟོབས་ཡིན་ཞེས་རྣམ་པར་སྨྲ། །ཞེས་བྱ་བས་བསྟན་ཏོ། །སྔགས་རིག་རང་རང་བློ་ཡིས་རྣམ་པར་འཆད། །ཅེས་བྱ་བ་ནི་དེ་བཞིན་གཤེགས་པ་འཇིག་རྟེན་དུ་མ་བྱུང་བའི་ཚེ་འཇིག་རྟེན་པའི་ལྷ་དེ་དག་གིས་སོ་སོར་བརྟགས་ཞེས་བྱ་བའི་ཐ་ཚིག་གོ། །
སངས་རྒྱས་རྒྱུད་ལ་ཆོ་ག་གཉིས་ཀྱིས་འགྲུབ། །ཅེས་བྱ་བ་ནི་ཤིན་ཏུ་རིགས་པར་གསུངས་ཞེས་བྱ་བའི་དོན་ཏོ། །དེ་ཡང་སྒྲུབ་པ་གང་ཞིག་རང་གི་ཡོན་ཏན་རྫོགས། ཞེས་བྱ་བ་ལ་སོགས་པ་དང་། གུག་སྐྱེད་ཀླད་ཀོར་ཚེག་ཚང་ཟུར་ཕྱིན་ལ། །གསང་སྔགས་དག་ཅིང་ཤིན་ཏུ་ཆོ
གར་བཅས། །ཞེས་བྱ་བ་འདི་གཉིས་གཙོ་བོར་གཞག་གོ། །ཕྱི་རོལ་པ་རྣམས་ཀྱིས་ནི་ཐམས་ཅད་གཙོ་བོར་བཞག་པས གཙོ་བོ་དང་ཡན་ལག་ཅེས་བྱེ་བྲག་དབྱེར་མེད་པ་ཉིད་ཀྱིས་ཉེས་པར་བཤད་པ་ཡིན་ནོ། །གནས་ཞེས་བྱེ་བྲག་ཏུ་སྨོས་པ་ནི་ཡན་ལག་གི་ནང་ནས་གཅེས་
པར་དགོངས་པའི་ཕྱིར་རོ། །གཞན་ནི་གོ་བར་ཟད་དོ། །གླིང་བུའི་སྒྲ་དང་ཞེས་བྱ་བ་ལ་སོགས་པས་ནི་ཆགས་པ་དང་གནོད་པའི་སྒོ་ནས་གཡེང་བའི་རྒྱུར་འགྱུར་བའི་ཕྱིར་སྤང་བར་དགོངས་པའོ། །མི་མྱུར་ཞེས་བྱ་བ་ནི་བཟླས་བརྗོད་ཟུར་མི་ཕྱིན་པ་དགག་པར་བསྟན་ཏོ། །མི་ངལ་
ཞེས་བྱ་བ་ནི་སེམས་གཞན་དུ་གཡེང་བའི་སྐྱོན་དུ་འགྱུར་བའི་ཕྱིར་རོ། །སྒྲ་ཆེར་མི་འབྱུང་ཞེས་བྱ་བས་ནི་རྒོད་པའི་སྐྱོན་བཟློག་པར་བསྟན་ཏོ། །ཧ་ཅང་ཆུང་བར་མིན་ཞེས་བྱ་བས་ནི་བྱིང་བའི་སྐྱོན་དགག་པར་བསྟན་ཏོ། །སྨྲ་བཞིན་མིན་ཞེས་བྱ་བ་ནི་གསང་སྔགས་ཀྱི་ཚིག་བདེན་པར་བྱིན་
གྱིས་བརླབས་པ་འདོན་པ་ན་ཚིག་གཞན་དང་འདྲེས་ན་དངོས་གྲུབ་ཏུ་མི་འགྱུར་བས་དེ་དགག་པར་བསྟན་ཏོ། །གཞན་དུ་ཡེངས་བཞིན་མིན་ཞེས་བྱ་བ་ནི་ལྷའི་སྐུ་དང་ཟླ་བའི་དཀྱིལ་འཁོར་ལ་ཡི་གེའི་ཕྲེང་བ་བཀོད་པ་དང་། ཡི་གེའི་སྒྲ་ལ་མ་གཏོགས་པར་གཞན་དུ་ཡེངས་པར་
མི་བྱ་བའི་དོན་ཏོ། །གུག་སྐྱེད་ཀླད་ཀོར་ཚེག་རྣམས་ཉམས་པར་མིན། །ཞེས་བྱ་བ་ནི་དམིགས་པ་དང་འདོན་པ་གཉི་ག་ལའོ། །ཇི་ལྟར་ཆུ་ཀླུང་ཉིན་མཚན་རྟག་ཏུ་ནི། །ཞེས་བྱ་བ་ལ་སོགས་པ་ནི་བྱེ་བྲག་ཏུ་སྨྲ་བའི་སྡོམ་པ་དང་།  སྡོམ་པ་མ་ཡིན་པ་ཡང་དག་པར་བླངས་པ་ལས་

71-1-76a

སྐྱེས་པའི་རྣམ་པར་རིག་བྱེད་མ་ཡིན་པའི་གཟུགས་གནས་པ་དང་འདྲ་བར་འདིར་ཡང་དགེ་བའི་བག་ཆགས་ཀྱི་རྒྱུན་གནས་པ་ཉིད་དུ་བཞེད་དོ། །ལེ་ལོ་ཞེས་བྱ་བ་ནི་དགེ་བ་ལ་སེམས་མངོན་པར་སྤྲོ་བ་མེད་པ་སྟེ། གཉིད་དང་གློས་ཕབ་སྟེ་ཉལ་བ་དང་། བསོད་
སྙོམས་ལ་བརྟེན་ནས་སྙོམ་པའི་དབང་དུ་གྱུར་པའོ། །འདོད་ཆགས་ཞེས་བྱ་བ་ནི་བུད་མེད་ལ་སོགས་པ་ལ་སེམས་མངོན་པར་ཕྱོགས་པའོ། །མི་དགེར་ལྡན་པའི་སེམས་ཞེས་བྱ་བ་ནི་དེ་དག་དང་ཆ་མཐུན་པ་གཞན་རྣམས་དང་ཉེ་བའི་ཉོན་མོངས་པ་ཐམས་ཅད་དོ། །བཟློག་
ནས་ཞེས་བྱ་བ་ནི་སྐབས་འདིར་གཉེན་པོ་ལ་བརྟེན་པར་བྱ་བ་མ་ཡིན་གྱི་དགག་པར་བསྟན་ཏོ། །གསང་སྔགས་ཡི་གེ་མཆོད་ལ་སྦྱར་བར་བྱ། །ཞེས་བྱ་བ་ནི་ཕྱག་རྒྱ་དང་གསང་སྔགས་དང་ཡིད་དང་ཟང་ཟིང་གི་མཆོད་པ་རྣམས་ནི་སྐབས་འདིར་མི་སྲིད་པས་ནན་ཏན་
གྱིས་གུས་པར་བཟླས་བརྗོད་བྱེད་པ་ཉིད་འཕགས་པ་དགྱེས་པའི་མཆོད་པ་ཞེས་གདགས་སོ། །སྣ་རྩེར་བལྟ་ཞིང་ཞེས་བྱ་བ་ནི་མིག་ཟམ་ཟིམ་དུ་བལྟས་ཏེ། སྣའི་རྩེ་མོ་ལ་བལྟ་བར་དམིགས་པ་ཉེ་བར་གཞག་ན། སེམས་གཞན་དུ་མི་གཡེང་ཞེས་བྱ་བའི་ཐ་ཚིག་གོ། 
རྣམ་པར་རྟོག་པ་སྤོང་ཞེས་བྱ་བ་ནི་གང་ལ་དམིགས་པའི་ཏིང་ངེ་འཛིན་གྱི་ཡུལ་ལས་སེམས་གཞན་དུ་མ་འཕྲོས་པར་གཞག་པའི་དོན་ཏོ། །ནམ་ཞིག་བསྐྱོད་ཀྱང་རྣམ་པར་མི་གཡོ་བ། །ཞེས་བྱ་བ་ནི་རྣལ་འབྱོར་པ་སེམས་མཉམ་པར་གཞག་པ་དེ་གོམས་པའི་ཤུགས་
ཀྱིས་སྒྲ་ལ་སོགས་པའི་རྐྱེན་ཅི་བྱུང་ཡང་གང་ལ་དམིགས་པའི་ཏིང་ངེ་འཛིན་ལས་མི་གཡོ་བའོ། །དེ་ཚེ་དམིགས་ལ་གནས་པ་ཐོབ་པ་སྟེ།  ཞེས་བྱ་བ་ནི་ཏིང་ངེ་འཛིན་གྱི་མིང་དེ་སྐད་ཅེས་གདགས་པ་ཐོབ་ཅེས་བྱ་བའི་ཐ་ཚིག་གོ། །སེམས་ནི་ལས་སུ་རུང་བར་གྱུར་པ་
དེས། །ཞེས་བྱ་བ་ནི་དེ་ནས་བསྙེན་པ་ལ་འཇུག་པའི་ལས་བྱར་རུང་བའི་དོན་ཏོ། །རྩེ་གཅིག་སེམས་དང་ལྡན་པ་ཞེས་བྱ་བ་ལ་སོགས་པས་ནི་བསམ་གཏན་ཐོབ་པའི་ཕན་ཡོན་བསྟན་ཏོ། །དེ་ཚེ་བཟླས་བརྗོད་ཐོགས་པ་མེད་པར་འགྱུར། །ཞེས་བྱ་བ་ནི་སེམས་ལས་སུ་རུང་བའི་

71-1-76b

བཟླས་བརྗོད་རྣམས་བསྙེན་པའི་གྲངས་སུ་ཆུད་དེ། དངོས་གྲུབ་ཀྱི་དོན་ལ་ཆུད་མི་ཟ་ཞེས་པའི་ཐ་ཚིག་གོ། །གཞན་ནི་གོ་བར་ཟད་དོ། །བཅོམ་ལྡན་རྒྱལ་བའི་དབང་པོ་ཡིས། །ཞེས་བྱ་བ་ནི་ལུང་ཤིན་ཏུ་དག་པ་ལས་ཁུངས་ཕྱུང་བའོ། །ཆོས་འདི་ཀུན་ཞེས་བྱ་བ་ནི་ཀུན་ནས་ཉོན་མོངས་
པ་དང་རྣམ་པར་བྱང་བ་ཐམས་ཅད་དོ། །རྩ་བ་སེམས་ཞེས་གསུངས་ཞེས་བྱ་བ་ནི་ཁམས་གསུམ་པའི་སེམས་དང་སེམས་ལས་བྱུང་བ་སྟེ། དེའི་རང་བཞིན་ངོ་བོ་ཉིད་གསུམ་པོ་ཀུན་བརྟགས་པ་དང་། གཞན་གྱི་དབང་དང་། ཡོངས་སུ་གྲུབ་པ་སྟེ། དེར་ཆོས་ཐམས་ཅད་ཀྱི་དེ་ཁོ་ན་འདུས་
པའི་ཕྱིར་རོ། །དེར་ཆོས་ལྷ་མིའི་བདེ་བ་ཞེས་བྱ་བ་ནི་དེ་དག་གིས་ལོངས་སྤྱད་པའོ། །མཐོ་རིས་ཞེས་བྱ་བ་ནི་འགྲོ་བའི་རིས་ཀྱིས་མཐོ་བའོ། །བྱང་གྲོལ་ཞེས་བྱ་བ་ནི་ཕྱོགས་གཅིག་པའི་མྱ་ངན་ལས་འདས་པའོ། །སེམས་རབ་ཏུ་དང་བ་ཞེས་བྱ་བ་ནི་སྒྲིབ་པ་རྣམ་པ་གཉིས་སྤངས་པས་
གནས་གྱུར་ཞེས་བྱ་བའི་ཐ་ཚིག་གོ། །ས་ཆུ་མེ་རླུང་དང་བྲལ་ཞེས་བྱ་བ་ནི་ཆོས་སྐུའི་ངོ་བོ་ཉིད་ཐོབ་པའི་ཕྱིར་རོ། །སྐྱེ་བ་དང་རྒས་པ་དང་འཆི་བ་དང་བྲལ་ཞེས་བྱ་བ་ནི་དེ་ལ་དབང་ཐོབ་པའི་དོན་ཏོ། །སོགས་པ་ཞེས་བྱ་བ་ནི་ན་བ་དང་ཡང་བྲལ་བར་བསྟན་ཏོ། །ཐོག་མ་དང་བར་དང་ཐ་
མར་གནོད་པ་ཀུན་དང་བྲལ་བ་ཞེས་བྱ་བ་ནི་ཆོས་ཀྱི་དབྱིངས་ལ་གནས་པ་དེ་དུས་གསུམ་ལས་འདས་པའི་ཕྱིར་རོ། །རྣམ་པར་གྲོལ་བ་ཞེས་བྱ་བ་ནི་ཁམས་གསུམ་པའི་འཆིང་བའི་རྒྱུ་བཅད་པའི་དོན་ཏོ། །བདེ་ཞིང་ཞི་བར་ཐོབ་པར་འགྱུར།  ཞེས་བྱ་བ་ནི་མི་གནས་པའི་མྱ་ངན་ལས་
འདས་པ་ཐོབ་པ་སྟེ། ཇི་སྐད་དུ། ཐབས་ཆེན་རྣམས་དང་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །འཁོར་བའང་ཞི་བའི་བདག་ཉིད་དེ། །དེ་ཕྱིར་དེ་བཞིན་གཤེགས་བསམ་ཡས། །ཞེས་བཤད་པའི་ཕྱིར་རོ། །གསང་སྔགས་དངོས་གྲུབ་ཀུན་དང་ཐུན་མོང་བ། །ཞེས་
བྱ་བ་ནི། འཇིག་རྟེན་པ་དང་འཇིག་རྟེན་ལས་འདས་པ་གཉིས་ཀས་སྒྲུབ་ཏུ་རུང་བའི་དོན་ཏོ། །བདེ་བ་ཆུང་ཞིང་ཞེས་བྱ་བ་ནི་མྱ་ངན་ལས་འདས་པ་ལ་ལྟོས་ན་མི་བདེ་བར་འགྱུར་ཏེ། རིག་པ་མཆོག་གི་རྒྱུད་ཆེན་པོ་ལས། ཇི་སྐད་དུ། མྱ་ངན་འདས་པ་བདེ་བའི་མཆོག །ཅེས་

71-1-77a

གསུངས་པའི་ཕྱིར་རོ། །སྡུག་བསྔལ་ཞེས་བྱ་བ་ནི་འགྱུར་བ་དང་། འདུ་བྱེད་ཀྱི་སྡུག་བསྔལ་དང་མ་བྲལ་བའི་དོན་ཏོ། །བརྒྱ་ཞེས་བྱ་བ་ནི་མང་པོར་མཚོན་པའི་ཐ་ཚིག་གོ། །འབྲེལ་པ་ཞེས་བྱ་བ་ནི་ལྟ་འོག་ནས་འབྱུང་བའི་སྐྱོན་དེ་དག་དངོས་གྲུབ་ཐོབ་པའི་
རིག་སྔགས་འཆང་དང་མ་བྲལ་བའི་དོན་ཏོ། །ཉོན་མོངས་དུག་བཅས་ཞེས་བྱ་བ་ནི་དེ་ཉིད་ན་འདོད་ཆགས་དང་ཞེ་སྡང་དང་གཏི་མུག་གི་ཐ་བ་མ་སྤངས་པའི་ཕྱིར་རོ། །རྣམ་པར་འཇིག་འགྱུར་བ་ཞེས་བྱ་བ་ནི་ཐེར་ཟུག་མ་ཡིན་པར་བསྟན་ཏེ། དོན་དེ་ཉིད་རྡོ་རྗེ་གཙུག་ཏོར་གྱི་རྒྱུད་
ལས་ཀྱང་། བདེ་བ་དང་ནི་སྡུག་བསྔལ་མཐའ། །འདོད་དང་ཁྲོ་དང་འཇིགས་པ་དང་། །ནད་དང་འཆི་དང་གདོན་དག་གི། །རྒྱུ་ནི་སྔགས་པ་རྣམས་ལ་ཡོད། །ཅེས་ཇི་སྐད་གསུངས་པ་ལྟ་བུའོ། །འདིར་དངོས་གྲུབ་ཀྱི་འབྲས་བུ་སྨད་པ་ཡང་། དེ་ཉིད་ལ་ཞེན་པའི་བློ་
སྤངས་པས་ཐར་པ་ལ་སེམས་གཞོལ་བར་འགྱུར་བའི་ཕྱིར་རོ། །དང་བའི་སེམས་ཀྱིས་ཐོབ་པར་འགྱུར་བ་ཡིན། །ཞེས་བྱ་བ་ནི་ཐར་པ་འདོད་པ་འབའ་ཞིག་གིས་བསམ་གཏན་ལ་བརྟེན་པར་བྱ་བར་མ་ཟད་ཀྱི།  དངོས་གྲུབ་འདོད་པས་ཀྱང་དེ་མི་བསྒོམ་དུ་མི་རུང་བར་བསྟན་ཏོ། །
ཡང་རྒྱུད་དེ་ཉིད་ལས་ཇི་སྐད་དུ། གསང་སྔགས་བསམ་གཏན་ཞེས་བྱ་བ། །མཆོག་ཏུ་གསང་བ་ཡང་དག་གསུངས། །དྲང་སྲོང་དཀའ་ཐུབ་ཆེན་པོ་ཡང་། །དེ་དག་མེད་ན་མི་འགྲུབ་པོ། །ཞེས་ཇི་སྐད་གསུངས་པ་ལྟ་བུའོ། །འདོད་རྒྱལ་ཞེས་བྱ་བ་ནི་གནམ་བབས་སུ་སྨྲ་བའོ། །
དེ་ལས་ཀྱང་མ་བྱུང་ཞེས་བྱ་བ་ནི་སྐྱེས་བུའི་བྱེད་པ་འབྲས་བུ་དང་བཅས་པར་མཐོང་བའི་ཕྱིར་རོ། །དུས་ཞེས་བྱ་བ་ནི་ཇི་སྐད་དུ། དུས་ནི་འབྱུང་བ་རྣམ་སྨིན་བྱེད། །དུས་ནི་སྐྱེ་དགུ་རྣམས་འཇིག་བྱེད། །དུས་ནི་གཉིད་ལོག་རྣམ་སད་བྱེད། །དུས་ནི་འདའ་བར་དཀའ་བ་ཡིན། །ཞེས་
སྨྲ་བའོ། །དེ་ལས་མིན་ཞེས་བྱ་བ་ནི་ཆོས་ཐམས་ཅད་ཀྱི་སྐྱེ་བའི་རྒྱུ་མ་ཡིན་ཏེ། རྗེས་སུ་འགྲོ་བ་དང་ལྡོག་པར་མི་དམིགས་པའི་ཕྱིར། ནམ་མཁའི་མེ་ཏོག་བཞིན་ནོ། །རང་བཞིན་ཞེས་བྱ་བ་ནི་གྲངས་ཅན་རྣམས་ཀྱིས་བརྟགས་ཏེ།  ཆོས་ཐམས་ཅད་ཀྱི་རྒྱུར་གྱུར་པའི་སྙིང་

71-1-77b

སྟོབས་དང་རྡུལ་དང་། མུན་པའི་ངོ་བོ་ཉིད་གཅིག་པུ་རྟག་པ་ཁྱབ་པ་ཞིག་དམིགས་པའོ། །དེ་ཡང་མ་ཡིན་ཞེས་བྱ་བར་སྦྱར་ཏེ། དེ་ནམ་མཁའ་ལྟར་རྟག་པ་ཁྱབ་པ་ཞིག་ན་ནི་འགྱུར་དུ་མི་བཏུབ་པས་ཆོས་གང་ལ་ཡང་རྒྱུའི་བྱ་བ་བྱེད་མི་སྲིད་དོ། །འགྱུར་བ་ཞིག་ན་ནི་བདག་ཉིད་
ཐམས་ཅད་ཀྱིས་སམ་ཕྱོགས་གཅིག་གིས་རྒྱུ་བྱེད་ཅེ་ན་གལ་ཏེ་བདག་ཉིད་ཐམས་ཅད་ཀྱིས་ན་ནི་རང་བཞིན་ཆད་པར་འགྱུར་རོ། །འོན་ཏེ་ཕྱོགས་གཅིག་གིས་ནི་མི་རྟག་པ་ཉིད་དུ་ཐལ་བར་འགྱུར་རོ། །དབང་ཕྱུག་ཅེས་བྱ་བ་ནི།  ཕྲ་ཞིང་བསམ་གྱིས་མི་ཁྱབ་རབ་ཏུ་
སྲབ་བྱེད་ཀུན་རིག་ཐམས་ཅད་བྱེད། །རྣལ་འབྱོར་གོམས་པས་ཐོབ་པའི་བློ་ཅན་བསམ་གཏན་པ་ཡི་བསམ་གཏན་ཡུམ། །ཉི་མ་ཟླ་བ་ས་ཆུ་མེ་རླུང་ཕྱོགས་དང་ནམ་མཁའི་ལུས་ཅན་ཏེ། །ཞི་བའི་བདེ་དགའ་འགྲུབ་པར་འདོད་པ་རྣམས་ཀྱིས་དབང་ཕྱུག་རྟག་ཏུ་བསྒོམ། །ཞེས་
སྨྲ་བའོ། །མ་ཡིན་ཞེས་བྱ་བ་ནི་དབང་ཕྱུག་ཀྱང་ཕྲ་བ་མ་ཡིན་ཏེ། ས་ལ་སོགས་པའི་ལུས་ཅན་ཡིན་པའི་ཕྱིར། ས་ལ་སོགས་པ་ལྟ་བུ་ཁོ་ནའོ། །གཅིག་ལ་ཕན་ཚུན་འགལ་བའི་ངོ་བོ་ཉིད་ཀྱང་རུང་བ་མ་ཡིན་ལ། དུ་མའི་བདག་ཉིད་ཀྱང་མ་ཡིན་པས་འདི་ས་ལ་
སོགས་པའི་ལུས་ཅན་ཉིད་དུ་ཡང་མི་སྲིད་དོ། །རབ་ཏུ་སྲབ་མོར་བྱེད་པ་ཡང་མ་ཡིན་ཏེ། སྐྱེ་བའི་ལུས་ཅན་ཡིན་པའི་ཕྱིར་སྐྱེས་བུ་ལྟ་བུ་ཁོ་ནའོ། །ཀུན་རིག་པ་ཡང་མ་ཡིན་ཏེ་རབ་ཏུ་སྲབ་མོར་བྱེད་པའི་ཕྱིར། གྲོལ་བའི་བདག་བཞིན་ནོ། །ཐམས་ཅད་བྱེད་པ་ཡང་མ་
ཡིན་ཏེ། ཕྲ་བའི་ཕྱིར་རྡུལ་ཕྲ་རབ་བཞིན་ནོ། །རྟག་པ་ཡང་མ་ཡིན་ཏེ། ས་ལ་སོགས་པའི་ལུས་ཅན་ཡིན་པའི་ཕྱིར་རོ། །ཆོས་ཐམས་ཅད་ཀྱི་རྒྱུ་ཡང་མ་ཡིན་ཏེ། ཅིག་ཅར་མི་བསྐྱེད་པའི་ཕྱིར་རྫ་མཁན་བཞིན་ནོ། །གཟུགས་ལ་སོགས་པ་བསྐྱེད་པ་ཡང་མ་ཡིན་ཏེ། དངོས་
པོ་ཡིན་པའི་ཕྱིར་དབང་ཕྱུག་བཞིན་ནོ། །ཐམས་ཅད་བྱེད་པ་ཡང་མ་ཡིན་ཏེ། བདག་མེད་པའི་ཕྱིར་བུམ་པ་བཞིན་ནོ། །བདག་ཡོད་ན་ནི་སྐྱེས་བུ་བཅིངས་པ་བཞིན་དུ་དབང་ཕྱུག་མ་ཡིན་པ་ཉིད་དུ་ཐལ་བར་འགྱུར་རོ། །རྒྱུ་མེད་པ་ཅན་ཞེས་བྱ་བ་ནི། ཇི་སྐད་པདྨའི་སྡོང་བུ་

71-1-78a

ལོ་མ་སྙིང་པོ་དང་། །ཁ་དོག་དབྱིབས་དང་འཇམ་ལ་སོགས་པའི་རྒྱུ་ནི་གང་། །བྱ་ཡི་འདབ་གཤོག་སྣ་ཚོགས་རི་མོར་འབྲི་བ་སུ། །འགྲོ་བ་འདི་དག་ངོ་བོ་ཉིད་ཀྱིས་དེ་བཞིན་ངེས། །ཞེས་སྨྲ་བ་སྟེ། དེའི་ཕྱོགས་གཅིག་པ་ནི་འཇིག་རྟེན་ཉིད་ཀྱིས་གསལ་བར་
ཟད་པས་ཅུང་ཟད་ཀྱང་མི་བརྗོད་དོ། །སྐྱེས་བུ་ཞེས་བྱ་བ་དང་། བདག་ཅེས་བྱ་བ་དང་། ཤེད་བུ་ཞེས་བྱ་བ་ལ་སོགས་པས་ནི་བདག་ཏུ་ལྟ་བ་རྣམས་ཀྱིས་མིང་ཐ་དད་པར་བརྟགས་པ་སྟེ། མ་བྱས་ཞེས་བྱ་བའི་གཏན་ཚིགས་ནི་བཤད་མ་ཐག་པ་རྣམས་སོ། །ལས་ཞེས་བྱ་བ་
ནི། དགེ་བ་དང་མི་དགེ་བ་དང་མི་གཡོ་བའོ། །ཉོན་མོངས་པ་ཞེས་བྱ་བ་ནི་མ་རིག་པ་ལ་སོགས་པའོ། །སེམས་ཅན་བྱུང་ཞེས་བྱ་བ་ནི་འཁོར་བ་ལུགས་བཞིན་དུ་བྱུང་བའི་རྒྱུ་ངེས་པ་དེ་གཉིས་ཡིན་པར་བསྟན་ཏོ། །གཟུགས་ཞེས་བྱ་བ་ནི་ལས་དང་ཉོན་མོངས་པས་བསྐྱེད་
པའི་རིག་པ་དང་ཡུལ་བརྟགས་པས་གཟུགས་སུ་རུང་བའོ། །འབྱུང་བ་ཆེན་པོ་བཞི་དང་ལྡན་ཞེས་བྱ་བ་ནི་གཟུགས་དེ་ཡང་ས་དང་ཆུ་དང་མེ་དང་རླུང་གི་རང་བཞིན་ལས་གཞན་མ་ཡིན་པའི་དོན་ཏོ། །དེ་ནི་བདག་མིན་ཞེས་བྱ་བ་ནི་གཟུགས་དེ་ལ་མུ་སྟེགས་ཅན་གྱིས་བརྟགས་
པའི་བདག་མེད་དོ་ཞེས་བྱ་བའི་ཐ་ཚིག་གོ། །བདག་ཀྱང་གཟུགས་མ་ཡིན་ཞེས་བྱ་བ་ནི་བདག་ཅེས་བྱ་བ་ཀུན་བརྟགས་པ་དེ་གཟུགས་ཀྱི་ངོ་བོ་ཉིད་དམ། གཟུགས་དང་ལྡན་པར་ཡང་ཡོད་པ་མ་ཡིན་པའི་དོན་ཏོ། །གཟུགས་ལ་བདག་མེད་ཅེས་བྱ་བ་ནི་འབྱུང་བའི་ངོ་བོས་
སོ་སོར་བཤིག་གམ། འདུས་པ་ལ་ཡང་བདག་མེད་ཅེས་བྱ་བའི་ཐ་ཚིག་གོ། །བདག་ལ་གཟུགས་མེད་ཅེས་བྱ་བ་ནི་བརྟགས་པའི་ངོ་བོ་དེ་ལ་གཟུགས་ཀྱི་རྫས་མེད་པའི་དོན་ཏོ། །གཟུགས་ནི་སྟོང་པའོ་ཞེས་བྱ་བ་ནི་དེ་ལྟར་གཟུགས་ཀྱི་གྲུབ་པའི་མཐའ་ནི་རྡུལ་ཕྲ་རབ་དག་
ཡིན་ལ། དེ་ཉིད་ཀྱང་ཕྱོགས་ཆས་སོ་སོར་བཤིག་ན། ཐ་མ་མེད་པར་གྲུབ་པས་དོན་དམ་པར་གཟུགས་ཀྱང་གཟུགས་ཀྱི་རང་བཞིན་གྱིས་སྟོང་ཞེས་བྱ་བའི་ཐ་ཚིག་གོ། །ཕུང་པོ་བཞི་ཡང་རིག་པར་གྱིས། །ཞེས་བྱ་བ་ནི་གཟུགས་ལ་ཇི་ལྟར་རྣམ་པ་བཞིར་ཕྱེ་སྟེ་བརྟགས་ན། བདག་

71-1-78b

ཡོད་པར་མ་གྱུར་ཅིང་སྟོང་པ་ལྟར་ཕུང་པོ་ལྷག་མ་རྣམས་ལ་ཡང་གོ་བར་བྱ་བའི་དོན་ཏོ། །གཟུགས་ནི་དབུ་བ་དག་དང་འདྲ་བ་སྟེ། ཞེས་བྱ་བ་ལ་སོགས་པས་ནི་དཔེ་བརྗོད་པ་སྟེ་ཇི་སྐད་དུ། གཟུགས་ནི་དབུ་བ་རྡོས་པ་འདྲ། །ཚོར་བ་ཆུ་ཡི་ཆུ་བུར་བཞིན། །འདུ་ཤེས་སྨིག་རྒྱུ་ལྟ་བུ་སྟེ། །
འདུ་བྱེད་རྣམས་ནི་ཆུ་ཤིང་འདྲ། །རྣམ་ཤེས་སྒྱུ་མ་ལྟ་བུའོ་ཞེས། །ཉི་མའི་གཉེན་གྱིས་བཀའ་སྩལ་ཏོ། །ཞེས་བཤད་པ་ལྟ་བུའོ། །དེ་ལྟར་མཐོང་ལ་ལྟ་བ་བཟང་པོ་ཡིན། །ཞེས་བྱ་བ་ནི་འདི་ལས་ཆོས་ཐམས་ཅད་དོན་དམ་པར་སྟོང་པ་ཉིད་དུ་བཤད་ལ་ཀུན་རྫོབ་ཏུ་ནི་སྒྱུ་མ་ལྟ་
བུར་རང་སྣང་བར་རྟོགས་པས་དབུ་མའི་ལམ་མ་ནོར་བར་བསྟན་པའི་ཕྱིར་རོ། །གང་ཞིག་གཞན་གྱུར་དེ་ནི་ལྟ་ངན་གསུངས། །ཞེས་བྱ་བ་ནི་ཕྱི་རོལ་པ་ལ་སོགས་པས་བདེན་པ་གཉིས་ཀྱི་དོན་མ་རྟོགས་པ་དང་། ལོག་པར་རྟོགས་པའི་ཕྱིར་རོ། །སེམས་དང་བ་དང་མ་དང་པའི་
སླབས་ནས་འཕྲོས་ཏེ་ཞར་ལས་འོངས་པ་བཤད་ནས་དཀྱུས་ཆ་ལ་འཇུག་པ་ནི། དང་བའི་ཡིད་ཀྱིས་དངོས་གྲུབ་ཐོབ་པར་འགྱུར། །ཞེས་བྱ་བ་དང་འདིར་འབྲེལ་ཏེ། དེ་ལྟར་ཟློས་པའི་གསང་སྔགས་ཉེ་གྱུར་ན། །མཚན་མོ་ཉལ་བའི་རྨི་ལམ་འདི་རྣམས་མཐོང་། །ཞེས་བྱ་བ་
ལ་སོགས་པ་གསུངས་པས་སྒྲུབ་པའི་དུས་ལ་བབ་པར་ཤེས་པར་བྱ་སྟེ། ཚིག་གི་དོན་གཞན་ནི་གོ་སླ་བས་མ་ཕྱེའོ། །ཐོ་རངས་ཁར་ཞེས་བྱ་བ་ནི་ལྟ་འོག་ཐམས་ཅད་ལ་སྦྱར་རོ། །དེ་ཡང་སྲོད་ལ་ནི་བད་ཀན་གྱི་དུས་ལ་བབ་པས་ལྕི།  འཇིང་དང་ནམ་གུང་ལ་ནི་མཁྲིས་པའི་དུས་ལ་
བབ་པས་རྨུགས་ཏེ་མི་གསལ་བས་ལྟས་རྣམས་རྟོགས་པར་མི་འགྱུར་གྱི། ཐོ་རངས་ནི་རླུང་གི་དུས་ལ་བབ་པས་གསལ་ཏེ་རྟོགས་པའི་དོན་ཏོ། །དོན་དེ་ཉིད་ཕྱག་ན་རྡོ་རྗེ་དབང་བསྐུར་བའི་རྒྱུད་ཆེན་པོ་ལས་ཀྱང་ཇི་སྐད་དུ། ནམ་གྱི་བཞི་ཆ་ལུས་པའི་ཚེ། །གལ་ཏེ་རྨི་ལམ་
བཟང་རྨིས་ན། །ཞེས་གསུངས་པའི་ཕྱིར་རོ། །ལེའུ་ལྔ་པའི་དོན་བཤད་ཟིན་ཏོ།།      །།དངོས་གྲུབ་དང་ཉེ་བ་ཞེས་བྱ་བ་ནི་གསང་སྔགས་མངོན་དུ་ཕྱོགས་པ་ལ་བསྙེན་པ་ཁྱད་པར་ཅན་གྱིས་ལྷ་མཉེས་ནས་སྔ་མ་བས་ཀྱང་དངོས་གྲུབ་ཐོབ་པ་དང་ཉེ་བའི་དོན་ཏོ། །ཟློས་ལ་

71-1-79a

དགའ་ཞེས་བྱ་བ་ལ་སོགས་པས་ནི་ལྷ་ཉེ་བར་གྱུར་ནས་ལུས་དང་ངག་དང་ཡིད་ཀྱི་ཡོན་ཏན་རྣམས་འབྱུང་བར་བསྟན་ཏེ། ཚིག་གི་དོན་གཞན་ནི་གོ་བར་ཟད་དོ། །བུད་མེད་ཅེས་བྱ་བ་ནི་ལྷ་དང་ལྷ་མ་ཡིན་གྱི་བུ་མོ་བྱད་གཟུགས་ཁྱད་པར་ཅན་རྣམས་སོ། །
འདོད་ལྷ་ཞེས་བྱ་བ་ནི་ལྷ་དང་ལྷ་མ་ཡིན་བྱད་གཟུགས་ཁྱད་པར་ཅན་རྣམས་སོ། །མདངས་འཕྲོག་ཅེས་བྱ་བ་ནི་དེ་དག་གཅིག་ལ་གཅིག་མཐོང་བ་ཙམ་གྱིས་རང་དབང་མེད་པར་འདོད་ཆགས་སྐྱེ་བ་སྟེ། ལྷའི་བུ་མོ་དེ་དག་གཞན་གྱིས་མི་མཐོང་བར་བྱ་བའི་ཕྱིར་གསང་སྔགས་
དང་སྨན་གྱིས་བསྒྲུབས་ཏེ། ལུས་སྦས་པ་རྣམས་སོ། །འདོད་ལ་ལོངས་སྤྱད་ཕྱིར་ནི་འབོད་པར་འགྱུར། །ཞེས་བྱ་བ་ནི་སྒྲུབ་པ་པོ་སྒོ་གསུམ་དག་པས། ལྷའི་བུ་མོ་ལུས་སྦས་པ་དེ་དག་ཀྱང་མངོན་སུམ་དུ་མཐོང་ཞིང་དེ་དག་གིས་ཀྱང་ཉེ་བར་སྤྱོད་པ་རྣམས་ཀྱིས་མཆོད་ཅེས་
བྱ་བའི་ཐ་ཚིག་གོ། །ལུས་ནི་དྲི་མེད་དག་པར་རིག་པ་དང་། །ཞེས་བྱ་བ་ནི་མཚན་མ་དེ་དག་བྱུང་ན། དངོས་གྲུབ་དང་འགལ་བའི་སྐྱོན་མེད་པར་ཁོང་དུ་ཆུད་པར་བྱ་བའི་དོན་ཏོ། །གསོ་སྦྱོང་སྡོམ་པ་དང་ནི་ལྡན་པ་ཡིས། །ཞེས་བྱ་བ་ནི་དེ་ནས་ཉེས་པ་ཐམས་ཅད་བཤགས་ལ་
རང་གི་ལྷའི་གཟུགས་ཀྱི་སྤྱན་སྔར་བྱང་ཆུབ་ཀྱི་སྡོམ་པ་ནོད་ཅེས་བྱ་བའི་ཐ་ཚིག་གོ། །ཉིན་ཞག་གཅིག་གམ་གཉིས་སམ་གསུམ་དུ་ནི། །ཁ་ཟས་སྤངས་ཤིང་སྨྱུང་བར་གནས་པ་ཡིས། །ཞེས་བྱ་བ་ནི་དངོས་གྲུབ་རབ་ལ་སོགས་པ་གསུམ་གྱི་དོན་དུ་ཞག་གྲངས་མང་ཉུང་དུ་
སྨྱུང་བ་བྱ་བར་བསྟན་ཏོ། །གཞན་དག་ན་རེ་སྒྲུབ་པ་པོ་ཉིད་ཀྱི་ཉམས་ཆེ་ཆུང་ལས་བྱུང་བ་ན་རྣམ་པ་གསུམ་དུ་གསུངས་སོ་ཞེའོ། །རང་གི་འབྱོར་པ་ཞེས་བྱ་བ་ནི་ནམ་མཁའ་ལ་འགྲོ་བ་ལ་སོགས་ཏེ་མངོན་པར་མཐོ་བའི་དཔལ་ཐོབ་པར་འགྱུར་རོ། །གཞན་ནི་གོ་བར་ཟད་དོ། །
དེ་ལྟར་ཡན་ལག་ཐམས་ཅད་འདུས་པ་དང་། །ཞེས་བྱ་བ་ནི་བཤད་མ་ཐག་པའི་མི་གཙང་བ་རྣམས་སོ། །ས་ཆུ་མེ་རླུང་ནམ་མཁའ་རྣམས་དང་ལྡན། །ཞེས་བྱ་བ་ནི་དེ་ཉིད་ཀྱང་ཁམས་ལྔའི་རང་བཞིན་ཡིན་པར་བསྟན་ཏོ། །ཇི་བཞིན་ལས་ཀྱི་རྗེས་འབྲངས་མི་ཡི་ལུས། །

71-1-79b

ཞེས་བྱ་བ་ནི་སྔོན་གྱི་ལས་བཟང་ངན་གྱི་དབང་གིས་གྲུབ་པའོ། །ཐམས་ཅད་ལྡན་ཞེས་བྱ་བ་ནི་ནང་གྲོལ་ལ་སོགས་པ་དང་བྲེལ་པར་བསྟན་ཏོ། །མི་ཡི་གཟུགས་ལ་གནས་པ་ཡིས། །བཤང་གཅི་སྣབས་དང་མཆིལ་མ་བད་ཀན་དང་། །ཞེས་བྱ་བ་ནི་བུ་ག་དགུ་ནས་འཛག་
པ་རྣམས་སོ། །འདི་དག་ཟད་པར་བྱ་ཕྱིར་སྨྱུང་བར་གསུངས། །ཞེས་བྱ་བ་ནི་ནང་གྲོལ་དང་། མི་གཙང་བ་དང་ལྡན་པའི་ལུས་དེ་ཐམས་ཅད་སྤང་དུ་མི་རུང་གིས་ཀྱང་བཙོག་པ་དེ་དག་ཆུང་ཞིང་ཉུང་བར་བྱ་བའི་དོན་ཏོ། །དྲི་མ་ཟད་ནས་ཞེས་བྱ་བ་ནི་ཆུང་ཞིང་ཉུང་བའོ། །མི་ཡི་
ལུས་དག་བསྒྲུབས་ན་བདེ་བར་འཇུག །ཅེས་བྱ་བ་ནི་ལུས་དག་སྟེ་དྲི་མ་མེད་ན་དངོས་གྲུབ་ཀྱི་སྣོད་དུ་རུང་ཞེས་བྱ་བའི་དོན་ཏོ། །འདོད་ཆགས་ཀྱིས་ནི་གདུངས་པར་གྱུར་ན་ཡང་། །ཞེས་བྱ་བ་ལ་སོགས་པས་ནི་གོང་དུ་གཉེན་པོ་བཤད་པའི་སྐབས་ནས། འདོད་ཆགས་
ཤས་ཆེ་མི་གཙང་ཤ་ཚིལ་དང་། །པགས་པ་ཀེང་རུས་བལྟ་བས་རྣམ་པར་བཟློག །ཅེས་གསུངས་པ་དེར་མི་གཙང་བ་གང་དང་གང་ཡིན་པ་ཕྱེ་སྟེ། མ་བཤད་པ་ཡང་འདིས་ཞར་ལ་བསྟན་ཏོ། །ཡེ་ཤེས་ཀྱི་མིག་ཅེས་བྱ་བ་ནི་བློ་མ་འཁྲུལ་བའི་ཤེས་རབ་ཀྱིས་བརྟགས་
པའོ། །འདོད་ཆགས་རྩད་ནས་ཡོང་ཡེ་ཞི་གྱུར་ཏེ། །ཞེས་བྱ་བ་ནི་མི་སྡུག་པའི་ཏིང་ངེ་འཛིན་གྱིས་སུན་ཕྱུང་བའི་ཕྱིར་རོ། །དཔེར་ན་ཉི་མས་མུན་ནག་གཏན་ནས་བསལ་བ་བཞིན། །ཞེས་བྱ་བ་ནི་རྣམ་པར་ཐར་པའི་ཏིང་ངེ་འཛིན་གྱི་མཐུས་ཉོན་མོངས་པ་ཟིལ་གྱིས་མནན་ནས་
སྤངས་པའི་དོན་ཏོ། །ཕན་ཡོན་དེ་ཡིས་ཞེས་བྱ་བ་ནི་རྣམ་པར་ཐར་པའི་ཏིང་ངེ་འཛིན་ལ་བརྟེན་པས་ཞེས་བྱ་བའི་ཐ་ཚིག་གོ། །གསང་སྔགས་དེས་བསྙེན་ནས་ཞེས་བྱ་བ་ནི་སྔར་ཉོན་མོངས་པ་གང་དང་གང་བྱུང་བའི་གཉེན་པོ་བསྒོམས་ནས། དེའི་འོག་ཏུ་བསྙེན་པ་ལ་འཇུག་
པར་བསྟན་ཏོ། །རང་གི་ལུས་ལ་ཉེ་བར་རིག་པ་དང་། །ཞེས་བྱ་བ་ནི་ཇི་སྐད་དུ་གསུངས་པའི་ལུས་དང་ངག་དང་ཡིད་ཀྱི་ཡོན་ཏན་གྱིས་བདག་ཉིད་ལ་ཡིད་ཆེས་པ་དང་། དེ་བཞིན་དུ་ཕྱི་རོལ་གྱི་ཡོན་ཏན་ཡང་། གང་ཚེ་མཁའ་ལས་ལྷ་དང་གནོད་སྦྱིན་དང་། །དྲི་ཟ་ལྷ་ཡི་བུ་

71-1-80a

མོའི་ལུས་དང་སྒྲ། །མིས་ནི་དག་པའི་ཡིད་ཀྱིས་མཐོང་ཐོས་ན། །དེ་ཚེ་ཤིན་ཏུ་ཉེ་བར་འགྱུར་བ་ཡིན། །ཞེས་བྱ་བ་དག་བྱུང་ཞེས་བྱ་བའི་ཐ་ཚིག་གོ། །ཡར་གྱི་ཚེས་བརྒྱད་དམ་ནི་བཅུ་བཞིའམ། །ཡང་ན་བཅོ་ལྔ་ལ་ནི་ཞེས་བྱ་བ་ནི་ཚེས་གྲངས་དེ་དག་ལ་
སྒྲུབ་པར་བསྟན་ཏོ། །བཟླས་བརྗོད་བྱ་ཞེས་བྱ་བ་ནི་སྒྲུབ་པའི་ནུབ་མོ་མཚན་རངས་པར་བཟླས་པ་ལ་དགོངས་པའི་དོན་ཏོ། །ས་བསྟར་བ་ཞེས་བྱ་བ་ནི་སྒྲུབ་པའི་དཀྱིལ་འཁོར་གྱི་སའོ། །སོགས་པ་ཞེས་བྱ་བ་ནི་དེར་སྤོས་གཙང་མ་སྣ་ཚོགས་ཀྱིས་བསྲེས་པའི་དོན་ཏོ། །བྱུག་ཅེས་
བྱ་བ་ནི་ནུབ་མོ་བསྒྲུབ་ན་དེའི་ནང་པར་ནས་བསྐུ་བར་བསྟན་ཏོ། །རྡོ་རྗེ་འཛིན་པ་ང་ལ་མཆོད། །ཅེས་བྱ་བས་ནི་དེའི་ཤུགས་ཀྱིས་པདྨ་འཛིན་པ་ལ་ཡང་གོ་བར་བྱའོ། །གཞན་ནི་བརྡ་ཕྲད་པར་ཟད་དོ། །ཚོན་རྩི་རྣམས་ཀྱིས་བྲི་བར་བྱ། །ཞེས་བྱ་བ་ནི་སོ་སོའི་ཆོ་ག་ཞིབ་མོ་དག་ལས་སྣ་
ལྔའམ་སྣ་གསུམ་མམ་སྣ་གཅིག་གིས་བྲི་བར་གསུངས་པའོ། །རྡོ་རྗེ་ཞེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས་ཇི་སྐད་དུ། རྡོ་རྗེའི་ར་བས་བསྔགས་པ་ཡི། །ལྕགས་ཀྱི་ཕྱེ་མས་ར་བ་བྱ། །ཞེས་གསུངས་སོ། །མེ་དང་ཆུ་དང་རླུང་ཞེས་བྱ་བ་ནི་ཕྱག་ན་རྡོ་རྗེ་དབང་
བསྐུར་བའི་རྒྱུད་ཆེན་པོ་ལས། རྩྭ་དང་མེ་དང་ཆུ་དང་ཐལ་བ་ལ་ལན་བདུན་བསྔགས་པ་སར་བར་འགྱུར་རོ་ཞེས་གསུངས་པའོ། །མདུང་ཐུང་ཞེས་བྱ་བ་ནི་མདུང་ཐུང་གི་རྩེ་མོ་ཕྱི་རོལ་དུ་བསྟན་པ་ཤ་སྟག་བྲི་བའི་དོན་ཏོ། །རིམ་བཞིན་དཀྱིལ་འཁོར་འདིར་ནི་བྲི་བར་བྱ། ཞེས་བྱ་བ་ནི་
དང་པོར་ལྕགས་ཕྱེ་ལས་རྡོ་རྗེའི་ར་བ་བྲི་བ་ནི་ཕྱི་རིམ་དུ་བྲི་ལ། མདུང་ཐུང་ནི་ནང་དུ་བྲི་བའི་དོན་ཏོ། །སྡང་བའི་བདག་ཉིད་སེམས་ནི་མྱོས་པར་འགྱུར། །ཞེས་བྱ་བ་ནི་དཀྱིལ་འཁོར་དེ་བྲིས་པའི་བྱིན་གྱི་རླབས་ཀྱིས་རྡོ་རྗེ་དང་མེ་ལ་སོགས་པ་དངོས་ཀྱི་ར་བར་མཐོང་བས་རྒོལ་མི་ནུས་
པའི་དོན་ཏོ། །བསྟན་ཞེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། ཇི་སྐད་དུ། དཱུར་བ་སྔོན་པོའི་རྩ་སྟན་ནི། །འཕང་དུ་སོར་བཞི་བྱ་བ་སྟེ། །མཉམ་ཞིང་ཞིང་དུ་མཐོ་གང་བ། །སྲིད་དུ་སོར་ནི་བཅུ་དྲུག་གོ། །ཞེས་གསུངས་པ་ཉིད་བལྟ་བར་བྱའོ། །བདག་ཉིད་བསྲུང་

71-1-80b

བར་བྱ་སྟེ་ཞེས་བྱ་བ་ནི་ས་འཛིན་ཙམ་ཞིག་སྨོས་ཀྱི། དངོས་སུ་ནི་རྒྱུད་དེ་ཉིད་ལས་ཇི་སྐད་དུ། བསྐྲད་པ་དང་ནི་འོག་འཆིང་དང་། །སྟེང་ཡང་བཅིང་ཞིང་འཁོར་ཡུག་ཏུ། །མཚམས་གཅད་ཕྱོགས་ཀྱང་བཅིང་བར་བྱ། །རྡོ་རྗེའི་ར་བ་དྲ་བར་བྱ། །རྫས་དང་བདག་དང་ལྷ་རྣམས་བསྲུང་། །
ཞེས་གསུངས་པ་དང་སྦྱར་རོ། །རྫས་བླངས་མྱུར་དུ་བཟླས་བརྗོད་བྱས་ནས་ནི། །ཞེས་བྱ་བ་ནི་དེ་ནས་སྒྲུབ་པའི་རྫས་ལས་ལག་ཏུ་བླངས་ནས་བརྒྱ་རྩ་བརྒྱད་ཙམ་ཞིག་བཟླས་བརྗོད་བྱ་བའི་དོན་ཏོ། །བདུག་པའི་སྦྱིན་སྲེག་སྟོང་བྱ་ཞེས་བྱ་བ་དེའི་འོག་ཏུ་རྫས་ལ་མར་གྱིས་བདུག་པའི་
སྦྱིན་སྲེག་སྟོང་བྱ་བར་བསྟན་ཏོ། །དེ་ནས་དེ་ནི་དྲི་ཆུས་བཀྲུས་ནས་སུ། །ཞེས་བྱ་བ་ནི་སྒྲུབ་པའི་རྫས་དེ་སྦྱིན་སྲེག་གི་དུས་སུ་དྲི་མ་དང་སྣུམ་གྱིས་འབགས་པའི་ཕྱིར་རོ། །བགེགས་མང་རྣམས་ཀྱང་རབ་ཏུ་བསལ་བྱས་ནས། །ཞེས་བྱ་བ་ཡང་རྒྱུད་དེ་ལས། གསང་སྔགས་
དག་གི་ཕྱི་ནང་དུ། །བགེགས་རྣམས་ཐམས་ཅད་བཟློག་པར་བྱ། །ཞེས་གསུངས་སོ། །གཞན་ནི་གོ་བར་ཟད་དོ། །དབྱིབ་ཅེས་བྱ་བ་ནི་རིན་པོ་ཆེ་སྣ་ལྔའོ། །བསྟོད་དང་བཅས་པར་ཞེས་བྱ་བ་ནི་ཚིག་ཏུ་ལྷ་དེའི་ཡོན་ཏན་བརྗོད་པའོ། །རྩེ་གཅིག་སེམས་ཀྱིས་ཞེས་བྱ་བ་ནི་རང་
གི་ལྷ་ཁོ་ན་ལ་དམིགས་པ་ལས་སེམས་གཞན་དུ་མ་ཡེངས་པའོ། །དད་པ་ཞེས་བྱ་བ་ནི་དང་པོ་ནས་ལྷ་དེ་ལ་དད་པའོ། །འབད་པ་ཞེས་བྱ་བ་ནི་སྒྲུབ་པ་པོ་དངོས་གྲུབ་འདོད་པས་སྔར་དཀའ་བ་སྣ་ཚོགས་སྤྱད་པའོ། །རྗེས་སུ་མཐུན་པའི་མཆོག་བསླང་ངོ་། །ཞེས་བྱ་བ་ནི་དང་པོ་ནས་
དངོས་གྲུབ་གང་ལ་དམིགས་པ་དེ་ཉིད་གསོལ་བའི་དོན་ཏོ། །གཞན་ནི་གོ་བར་ཟད་དོ། །སེམས་སྟོབས་མཆོག་དང་ལྡན་པ་ཞེས་བྱ་བ་ནི་གཅིག་ཏུ་དཔའ་བའོ། །འཇིགས་དང་བཅས་པའི་ལས་ཞེས་བྱ་བ་ནི་ཉེན་ཆེན་པོ་ཡོད་པའི་དོན་ཏོ། །ཤ་ཟ་ཞེས་བྱ་བ་ནི་དུར་ཁྲོད་ལ་དབང་
བསྒྱུར་བའི་གདོན་རྣམས་སོ། །ཕུང་བར་བྱེད་ཅེས་བྱ་བ་ནི་གསོད་པའི་དོན་ཏོ། །གཞན་ནི་གོ་སླ་བས་མ་ཕྱེའོ། །རལ་གྲི་བེ་ཅོན་ལག་ན་ཐོགས་པ་ཡིས། །ཉིན་པར་ཐོག་ཐག་ཏུ་ནི་བསྲུང་བར་བྱ། །ཞེས་བྱ་བ་ནི་སྒྲུབ་པ་པོའི་གྲོགས་པོ་མཆོག་གིས་བྱས་པའི་དོན་ཏོ། །གཞན་ནི་གོ་བར་ཟད་དོ། །

71-1-81a

འཇིགས་པའི་གཟུགས་ཅན་བགེགས་ནི་སྣ་ཚོགས་འབྱུང་། །ཞེས་བྱ་བ་ནི་ཆོས་ཉིད་ཀྱིས་འབྱུང་སྟེ། དེ་ལ་སྒྲུབ་པ་པོ་ནི་བཟླས་བརྗོད་བྱེད་པ་ལས་མི་བསྐྱོད་པར་འདུག་ལ་གྲོགས་པོ་མཆོག་གིས་ནི་བགེགས་གཞོམ་མོ། །གཙུག་ཏོར་རྒྱལ་པོ་ཞེས་བྱ་བ་ནི་དེའི་
གསང་སྔགས་ཁྱད་པར་དུ་མཐུ་རླབས་ཆེ་བའི་ཕྱིར་རོ། །འབྱེར་བར་འགྱུར་ཞེས་བྱ་བ་ནི་གསང་སྔགས་ཀྱི་གཟི་བརྗིད་ལ་ཉེ་མི་ཕོད་ཅེས་བྱ་བའི་དོན་ཏོ། །ཁྲོ་བོ་བདུད་རྩི་ཐབ་སྦྱོར་དྲག་ཤུལ་ལས་ཅན་སྦྱར། །ཞེས་བྱ་བའི་མཐུ་རླབས་ཀྱང་སྔ་མ་དང་འདྲ་སྟེ། གང་ལ་གོམས་པར་བྱ་
བ་བསྟན་ཏོ། །གང་ཞིག་གསང་སྔགས་ཆོ་ག་ཞིབ་མོ་ལས། །མཐོང་བ་དེ་ནི་དོགས་པ་མེད་པར་འགྲུབ། །ཅེས་བྱ་བ་ནི་དེ་དག་ལས་དངོས་གྲུབ་གང་གསུངས་པ་ཐམས་ཅད་འགྲུབ་ཅེས་བྱ་བའི་ཐ་ཚིག་གོ། །དེ་ཡིས་གསང་སྔགས་ཆོ་ག་མི་ཤེས་ན། །ཞེས་བྱ་བ་ནི་རང་གི་ཆོ་ག་
ཞིབ་མོ་ལས་ལས་འདི་མི་འབྱུང་ན་ཞེས་བྱ་བའི་དོན་ཏོ། །གསང་སྔགས་གཞན་དུ་བསྟན་པའི་ཆོ་ག་ཡིས། །དེ་ལ་རང་གིས་དངོས་གྲུབ་བསླང་ཞེས་བྱ་བ་ནི་གཞན་གྱི་ཆོ་ག་ཞིབ་མོ་དེའི་དངོས་གྲུབ་འབྱུང་བ་རྣམས་བསླངས་ན་སྟེར་རོ་ཞེས་བྱ་བའི་ཐ་ཚིག་གོ། །གཏེར་གྱི་ཕྱོགས་ཞེས་
བྱ་བ་ལ་སོགས་པས་ནི་དེའི་འབྲས་བུ་དངོས་གྲུབ་རྣམས་བསྟན་པ་སྟེ། གཏེར་ལ་སོགས་པ་དེ་དག་གི་མཚན་ཉིད་ནི་འོག་ནས་འཆད་པས་འདིར་མ་ཕྱེའོ། །བསྲུང་བའི་སྟོབས་མེད་ཅེས་བྱ་བ་ནི་དུས་གསུམ་བྱས་ཤིང་མ་ལྕོགས་པའོ། །གསང་སྔགས་ཀྱི་སྟོབས་མེད་ཅེས་བྱ་བ་ནི་
ལྷ་ཉིད་མཐུ་ཞན་པའོ། །དཀའ་ཐུབ་ཀྱི་སྟོབས་མེད་ཅེས་བྱ་བ་ནི་དཀའ་ཐུབ་ཞིག་པའོ། །སེམས་སྟོབས་མེད་ཅེས་བྱ་བ་ནི་སྡར་མའོ། །བློ་ཞན་ཞེས་བྱ་བ་ནི་དང་བླུན་པའོ། །དེ་ནི་མཚན་མོ་རྒྱུ་བ་རྣམས་ཀྱིས་བསད། །ཅེས་བྱ་བ་ནི་ཉེན་ཆེན་པོ་ཡོད་པར་བསྟན་པའི་དོན་ཏོ། །ལེའུ་
དྲུག་པའི་དོན་བཤད་ཟིན་ཏོ།།      །།འཚོང་འདོད་ཅེས་བྱ་བ་ནི་སྒྲུབ་པ་པོ་ཁ་ཅིག་ལས་དེ་ལྟ་བུ་ལ་དགའ་བའོ། །མར་གྱི་ངོ་ལ་ཞེས་བྱ་བ་ནི་མར་གྱི་ངོའི་དུས་ཚིགས་གང་ཡང་རུང་བ་ཞེས་བྱ་བའི་ཐ་ཚིག་གོ། །གཞན་ནི་གོ་བར་ཟད་དོ། །མི་ཉུང་ཞེས་བྱ་བ་ནི་སྲང་བརྒྱ་ཡན་ཆད་

71-1-81b

དོ། །དེ་ཡང་སྐྱེས་པའི་ཤ་ཞེས་གྲག་གོ། །ཚིག་གི་དོན་གཞན་ནི་གོ་བར་ཟད་དོ། །རབ་ཏུ་བསྒྲིམས་ནས་ཞེས་བྱ་བ་ནི་རང་གི་ལྷ་རྗེས་སུ་དྲན་པ་དང་། མི་སྐྲག་པར་འབད་པའི་དོན་ཏོ། །སྒྲ་ཆེར་འབོད་ཅིང་ཞེས་བྱ་བ་ནི་སྤ་མི་འགོང་བའི་ཚིག་གིས་སྐད་ཆེར་འབོད་པའི་ཐ་ཚིག་
གོ། །ཤར་དང་བྱང་དང་ལྷོ་དང་ནུབ་ཕྱོགས་སུ། །ཞེས་བྱ་བ་ནི་ཤར་ལྷོའི་མཚམས་ནས་བྱང་ཤར་ལོགས་སུ་འགྲོ་བར་བྱའོ། །དེ་ནས་སླར་ལོག་སྟེ་ཤར་ལྷོའི་མཚམས་ནས་ལྷོ་ནུབ་ཀྱི་མཚམས་ལོགས་སུ་འགྲོ་བར་བྱའོ། །མྱུར་དུ་ཞེས་བྱ་བ་ནི་དེར་ལེ་ལོ་མི་བྱེད་ཅིང་དྲག་ཏུ་འགྲོ་
བར་བྱ་བའི་དོན་ཏོ། །བསྐོར་ཞིང་ཞེས་བྱ་བ་ནི་དེ་ནས་མཐའ་བསྐོར་ཏེ་དབུས་སུ་མི་འགྲོ་ཞེས་བྱ་བའི་ཐ་ཚིག་གོ། །ཤིན་ཏུ་བརྗོད་པར་བྱ་ཞེས་བྱ་བ་ནི་གོང་དུ་སྨོས་པའི་ཚིག་གི་དོན་བརྗོད་ཅིང་སྐབས་སྐབས་སུ་མི་སྨྲ་བར་ཉན་ཅིང་འགྲོ་བའི་དོན་ཏོ། །སྔར་ནི་གང་ཞིག་སེམས་
ཀྱིས་བསམས་པའི་དོན། །དེ་ཉིད་སྨྲ་བ་ཞེས་བྱ་བ་ནི་དང་པོ་ནས་གང་ལ་རྣམ་པ་དེ་དང་ཚོང་བྱས་པའི་ཐ་ཚིག་གོ། །གཞན་དུ་སྨྲ་མི་བྱ་ཞེས་བྱ་བ་ནི་སྔར་དངོས་པོ་ཆུང་ངུར་བསམས་ལ། འཕྲལ་ལ་ཁེ་མཐོང་སྟེ་ཆེན་པོར་མི་བཙོང་། སྔར་དངོས་པོ་ཆེན་པོ་ཞིག་བསམས་ལ་དེར་
སྤ་བཀོང་ནས་ཆུང་ངུར་ཡང་མི་བཙོང་ཞེས་བྱ་བའི་དོན་ཏོ། །དེ་ཉོས་པས་ཅིར་བྱ་ཞེ་ན། ཉོ་བའི་གསང་སྔགས་ཀྱིས་ལྷ་ལ་ཡང་རྣམ་པ་གཉིས་ཏེ། འཇིག་རྟེན་ལས་འདས་པའི་ཁྲོ་བོ་ལ་སོགས་པ་དང་། འཇིག་རྟེན་གྱི་མ་མོ་དག་ནི་བྱིན་གྱིས་བརླབས་དག་ལས་བྱུང་བ་ཞེས་བྱ་བ་
སྟེ། དེའི་རང་བཞིན་གྱིས་ཕན་འདོགས་པའི་དོན་དུ་འབྱུང་ངོ་། །ཤ་ཟའི་རིགས་སུ་སྐྱེས་པའི་སྲིན་པོ་ལ་སོགས་པའི་རྣམ་པར་སྨིན་པའི་གསང་སྔགས་ཞེས་བྱ་སྟེ་དེ་ཉིད་ཟ་བའོ། །གཞན་ནི་གོ་བར་ཟད་དོ། །གསང་སྔགས་མ་བཟླས་པ་ཡིས་བསྟེན་མི་བྱ། །ཞེས་བྱ་བ་
ནི་སྔར་བསྙེན་པ་མ་རྫོགས་པའམ་རྫོགས་ཀྱིས་ཀྱང་ལས་འདི་ལྟ་བུ་བྱོས་ཤིག་ཅེས་ལྷ་ཉིད་ཀྱི་བཀའ་ལུང་མེད་པར་མི་བྱ་བའི་དོན་ཏོ། །སོགས་པ་ཞེས་བྱ་བ་ནི་བདུད་རྩི་ཐབ་སྦྱོར་རོ། །བསྲུང་བ་ངས་གསུངས་སོ་ཞེས་བྱ་བ་ནི་གསང་སྔགས་དེ་དག་ཁྱད་པར་དུ་མཐུ་རླབས་ཆེ་

71-1-82a

བའི་ཕྱིར་རོ། །གསང་སྔགས་དྲག་པོ་གང་ཞིག་ཤ་ཟ་བ། །ཞེས་བྱ་བ་ནི་སྲིན་པོ་ལ་སོགས་པའོ། །མེ་ཏོག་མ་ཉམས་པ་ཞེས་བྱ་བ་ནི་མ་རྙིངས་པའོ། །གཞན་ནི་གོ་བར་ཟད་དོ། །ཚེས་གྲངས་དག་ལ་ཞེས་བྱ་བ་ནི་མར་གྱི་ངོའི་དུས་ཚིགས་སོ། །གྲུབ་པ་འདི་
རྣམས་སྟེར་ཞེས་བྱ་བ་ནི་དངོས་གྲུབ་ཀྱི་རྣམ་གྲངས་སོ། །ཡིད་བཞིན་རིན་ཆེན་བཞིན་དུ་གྲུབ་པ་མཆོག །ཅེས་བྱ་བ་ནི་གང་བསམས་པའི་དོན་ཐམས་ཅད་སྒྲུབ་པར་བྱེད་ཅེས་བྱ་བའི་ཐ་ཚིག་གོ། །གྲུབ་འབྲིང་ཞེས་བྱ་བ་ནི་སྡིག་པ་ལྟ་དགོས་པའི་ཉེན་དག་ཡོད་པའི་ཕྱིར་རོ། །གྲུབ་
པ་ཐ་མ་ཞེས་བྱ་བ་ནི་ཉོན་མོངས་པའི་འདམ་དུ་བྱིང་ཞིང་ཕྲག་དོག་ལ་སོགས་པའི་ཉེན་ཆེན་པོ་ཡོད་པའི་དོན་ཏོ། །དུས་གསུམ་དུ་ཞེས་བྱ་བ་ནི་སྔ་དྲོ་དང་དགུང་དང་དགོངས་ཀའོ། །གཏོར་མ་སྣ་ཚོགས་པ་ཞེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས་བལྟ་བར་བྱ་སྟེ། འདིར་
ཡི་གེ་མངས་སུ་དོགས་པས་མ་སྤྲོས་སོ། །རྟག་ཏུ་མཚན་མོ་སྦྱིན་པར་བྱ། །ཞེས་བྱ་བ་ནི་དངོས་གྲུབ་ཐོབ་ཀྱི་བར་དུ་ནུབ་མོའི་དུས་ཤིག་ཏུ་ལན་རེ་གཏོར་མ་སྦྱིན་པའི་དོན་ཏོ། །དགའ་ནས་ཞེས་བྱ་བ་ནི་བསྙེན་པས་མགུ་ཞེས་བྱ་བའི་ཐ་ཚིག་གོ། །མངོན་དུ་ཕྱོགས་པ་ཞེས་བྱ་བ་ནི་
བསྙེན་པ་བྱས་པའི་དབང་གིས་དངོས་གྲུབ་ཐོབ་པར་ངེས་པའོ། །རྙེད་པ་རྙེད་ཅིང་ཞེས་བྱ་བ་ནི་ནོར་རྫས་འདུ་བའི་དོན་ཏོ། །ས་བོན་འབྱུང་བར་བྱེད་ཅེས་བྱ་བ་ནི་ཁུ་བ་རླུགས་པའོ། །འདོད་ཆགས་ཟིལ་གྱིས་ནོན་པའི་བུད་མེད་དག །ཅེས་བྱ་བ་ནི་གནོད་སྦྱིན་མོ་མི་གཟུགས་ལས་ཁྱད་
པར་དུ་འཕགས་པ་ལྷའི་བུ་མོའི་གཟུགས་དང་འདྲ་བ་དེ་མཐོང་བས་རང་དབང་མེད་པར་འདོད་ཆགས་ཀྱིས་མྱོས་ནས་སྒྲུབ་པ་གཞན་མི་དྲན་པར་འགྱུར་བའི་ཕྱིར་རོ། །གནོད་པར་བྱེད་པ་ངེས་པར་གནས་པར་འགྱུར། །ཞེས་བྱ་བ་ནི་སྒྲུབ་པ་པོས་དངོས་གྲུབ་མི་ཐོབ་པར་བྱ་བའི་དོན་དུ། 
རྩེད་འཇོ་ལ་སོགས་པས་བསྟེན་ཅིང་སེམས་གཡེང་བར་བྱེད་ཅེས་བྱ་བའི་ཐ་ཚིག་གོ། །གནོད་པ་བྱེད་ཚེ་འགྲོ་བར་མི་བྱ་ཞིང་། །ཞེས་བྱ་བ་ནི་དེ་དག་གིས་བྲོས་པའི་དུས་སུ་བསླུར་མི་བཏུབ་པའོ། །རྙེད་པ་མང་ཉུང་ལ་ཡང་འདོད་མི་སྐྱེད། །ཅེས་བྱ་བ་ནི་དེའི་དུས་སུ་ཅི་རྙེད་ན་ཡང་མ་

71-1-82b

བསླང་བ་དང་གཞན་ལ་གཏང་བའི་དོན་ཏོ། །མཚན་མོ་ཁུ་བ་དགག་བྱས་ནས། །ཞེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། ཇི་སྐད་དུ། བུ་མོས་བཀལ་པའི་སྐུད་པ་ནི། །ལེ་བརྒན་རྩི་འམ་གུར་གུམ་བཙོས། །དེ་ནི་བཟླས་བརྗོད་སྟོང་བྱས་ཤིང་། །མདུད་པ་
དག་ནི་བདུན་བོར་ལ། །སྲོད་ལ་རིག་སྔགས་འདི་ཡིས་ནི། །བདག་གི་རྐེད་པར་བཅིང་བར་བྱ། །ཞེས་གསུངས་པ་ཉིད་འདིར་སྦྱར་རོ། །བརྩོན་འགྲུས་རབ་ཏུ་བསྐྱེད་དེ་བསྒྲུབ་པར་བྱ། །ཞེས་བྱ་བ་ནི་བགེགས་ཀྱིས་བསླུས་པའི་དབང་དུ་ཡང་མི་གཏང་། འདི་དག་ནི་དངོས་གྲུབ་དང་
ཉེ་བའི་མཚན་མའོ་ཞེས་ཡ་ཡ་པོའི་དགའ་བ་བསྐྱེད་པར་ཡང་མི་བྱ་བར་སྔོན་བས་ཀྱང་ཤིན་དུ་བརྩོན་འགྲུས་བསྐྱེད་དེ་སྒྲུབ་པའི་དོན་ཏོ། །སེམས་རྨོངས་པ་ཞེས་བྱ་བ་ནི་སྒྲུབ་པ་པོ་བླུན་པོ་ཁ་ཅིག་གོ། །གཞན་དུ་བརྩམས་ནས་ཞེས་བྱ་བ་ནི་འདོད་ཆགས་ལ་ཞེན་པའི་དབང་གིས་བགེགས་ཀྱིས་
འབྲོངས་པའི་ཚེ་བསླུར་བཏུབ་པ་དང་། ནོར་རྫས་དག་བླངས་པ་དང་། བརྩོན་འགྲུས་ལྷོད་པས་སྒྲུབ་པ་རྣམས་སོ། །ཕུང་བར་འགྱུར་ཞེས་བྱ་བ་ནི་སྲོག་དང་བྲལ་བར་བྱེད་པའི་ཕྱིར་རོ། །ཤ་ཟའི་གནོད་སྦྱིན་མོ་ལའང་དེ་ཉིད་དོ། །ཞེས་བྱ་བ་ནི་ཆོ་གའི་སྦུབས་གོང་མ་དང་འདྲ་བར་
བསྟན་ཏོ། །ཆོ་ག་ལྷག་མ་འདི་རྣམས་བྱ། །ཞེས་བྱ་བ་ནི་སྔ་མ་ལས་མ་བཤད་པའོ། །གཞན་ནི་གོ་བར་ཟད་དོ། །གོས་ཀྱང་སྔོན་པོ་ཞེས་བྱ་བ་ནི་སྒྲུབ་པ་པོ་རང་བགོ་བའོ། །བྲང་གིས་འགྲོ་བ་ཞེས་བྱ་བ་ནི་ཀླུ་རྣམས་ཀྱི་རང་བཞིན་གྱི་གཟུགས་སྦྲུལ་ཡིན་པའི་ཕྱིར་རོ། །རྟག་ཏུ་འབྱུང་
ཞེས་བྱ་བ་ནི་རྫས་དེ་རྣམས་པྲ་སེ་ན་སྟོན་པའི་གཞི་ཡིན་ཏེ། སྣང་དུ་བཏུབ་ཅེས་བྱ་བའི་ཐ་ཚིག་གོ། །མཐོ་རིས་ཞེས་བྱ་བ་ནི་ལྷ་ཡུལ་པ་རྣམས་སོ། །ས་སྟེངས་ཞེས་བྱ་བ་ནི་མི་རྣམས་སོ། །དེའི་ཤུགས་ཀྱིས་ངན་སོང་དག་ཀྱང་རྟོགས་པར་ཁོང་དུ་ཆུད་པར་བྱའོ། །དུས་དང་མི་
ལྡན་པ་ཞེས་བྱ་བ་ནི་དུས་གསུམ་ལས་འདས་པ་འཕགས་པ་དགྲ་བཅོམ་པ་ལ་སོགས་པ་ཡང་རྟོགས་པར་འགྱུར་བའི་དོན་ཏོ། །གཞན་ནི་གོ་བར་ཟད་དོ། །སྔོན་དུ་ཆོ་ག་བཞིན་བཟླས་ཤིང་། །ཞེས་བྱ་བ་ནི་སོ་སོའི་ཆོ་ག་ཞིབ་མོ་དག་ལས་བསྙེན་པའི་གྲངས་ངེས་པར་གཟུང་བའོ། །

71-1-83a

ཚེས་གྲངས་བཟང་ལ་ཞེས་བྱ་བ་ནི་ཡར་གྱི་ངོའི་དུས་ཚིགས་རྣམས་སོ། །སྨྱུང་བ་ཞེས་བྱ་བ་ནི་ཞག་གཅིག་གི་མདུན་ནས་ཁ་ཟས་སྤང་བར་བསྟན་ཏོ། །དགོངས་ཀར་ཞེས་བྱ་བ་ནི་སྨྱུང་བ་བྱས་པའི་ཕྱི་འཕྲེང་ངོ་། །བྱིས་པ་གཞོན་ནུ་ཞེས་བྱ་བ་ནི་ལོ་བཅུ་དྲུག་ལོན་པ་
མན་ཆད་དོ། །སྟ་གོན་གནས་པར་བྱ་ཞེས་བྱ་བ་ནི་བྱིས་པ་དེ་དག་ཀྱང་སྨྱུང་བ་བྱེད་དུ་བཅུག་ལ་འདི་དག་གིས་མཐོང་བར་གྱུར་ཅིག་ཅེས་ལྷ་ལ་གསོལ་བ་བཏབ་སྟེ་དེ་རྣམས་བསྲུང་བར་བྱས་ནས་མེ་ཏོག་དང་སྤོས་དག་ཀྱང་བདག་གིས་ལག་དར་ཏེ་བྱིན་ནས་ས་གཙང་མར་གོས་སར་
པ་བསྐོན་ཏེ། བསྙལ་བའི་དོན་ཏོ། །ཁྲུས་བྱས་ཞེས་བྱ་བ་ནི་སྒྲུབ་པ་པོ་དང་བྱིས་པ་གཉིས་ཀའོ། །ཤར་ཕྱོགས་ཁ་བལྟས་ཀུ་ཤའི་སྟན་སྟེང་དུ། །འདུག་ནས་ཞེས་བྱ་བ་ནི་སྒྲུབ་པ་པོ་ཉིད་དོ། །གསང་སྔགས་རྗེས་སུ་དྲན་པར་བྱ། །ཞེས་བྱ་བ་ནི་ལྷའི་ཏིང་ངེ་འཛིན་ལ་
གནས་ལས་བརྩམ་པར་བསྟན་ཏོ། །ཐལ་བ་གཙང་མ་ཞེས་བྱ་བ་ནི་སྦྱིན་སྲེག་བྱ་བའི་ཐལ་བའོ། །རྩེ་གཅིག་སེམས་ཀྱིས་གསང་སྔགས་ཟློས་བཞིན་དུ། །ཞེས་བྱ་བ་ནི་བདག་ཉིད་ལྷའི་ཏིང་ངེ་འཛིན་དུ་ཇི་ལྟ་བ་བཞིན་དུ་བསྒོམས་པ་ལས་མ་ཉམས་པས་གཞི་གང་ཡིན་པ་ལ་
ལྷ་སྤྱན་དྲངས་ཏེ་མཆོད་ནས། དངོས་པོ་གང་བལྟ་བར་བྱ་བ་ཡང་སྟོན་ཅིག་ཅེས་བསྐུལ་ཞིང་བཟླས་བརྗོད་བྱ་བར་བསྟན་ཏོ། །ནུབ་ཏུ་ཁ་བསྟན་ཞེས་བྱ་བ་ནི་སྒྲུབ་པ་པོ་ཁ་བལྟ་དགོས་པའི་ཕྱིར་ཏེ་བར་གཉའ་ཤིང་གང་ལྷག་ཙམ་གྱིས་བཅད་ནས་བལྟར་གཞུག་གོ། །ལྷ་
ཡི་མིག་གིས་ཞེས་བྱ་བ་ནི་སྦྱིན་སྲེག་བྱས་པའི་ཐལ་བས་སོར་མོ་ལ་བསྐུས་ཏེ། གསང་སྔགས་དག་ཀྱང་བཟླས་ནས། ལྷའི་མིག་ཏུ་བྱིན་གྱིས་བརླབ་ཏུ་སོལ། ཞེས་བསྐུལ་ཚིག་བཅུག་ནས། བྱིས་པའི་མིག་ལ་བསྐུ་བའི་དོན་ཏོ། །བལྟས་ན་ཞེས་བྱ་བ་ནི་ཉི་མ་ཤར་
བགབ་ནས་དྲོས་ཆེན་གྱི་བར་དུ་བལྟར་གཞུག་པའི་ཐ་ཚིག་གོ། །མཐོང་བར་གྱུར་ཞེས་བྱ་བ་ནི་དངོས་པོ་རྣམས་གཟུགས་སུ་མཐོང་བའམ། ཡི་གེའི་འབྲས་བུས་ཀྱང་བརྡ་སྤྲོད་པར་བྱེད་དོ། །ཁ་ཅིག་ན་རེ་གཞི་བསྙེན་ན་སྒྲར་ཡང་གྲག་ཅེའོ། །གཞན་ནི་གོ་བར་ཟད་དོ། །གལ་ཏེ་

71-1-83b

ཡིད་ཆེས་པར་ནི་མ་གྱུར་ན། །ཞེས་བྱ་བ་ནི་པྲ་སེ་ནས་གཏན་ལ་མ་ཕེབས་སུ་དོགས་ན་ཞེས་བྱ་བའི་ཐ་ཚིག་གོ། །རིག་སྔགས་མི་གདུག་ཅེས་བྱ་བ་ནི་རིག་སྔགས་ཀྱི་ལྷ་ལ་ཡང་རྣམ་པ་གཉིས་ཏེ། སངས་རྒྱས་དང་བྱང་ཆུབ་སེམས་དཔའ་དག་ནི་ཡེ་ཤེས་ལས་བྱུང་བའོ། །དབང་
ཕྱུག་ལ་སོགས་པ་ནི་རྣམ་པར་སྨིན་པས་བསྐྱེད་པའོ། །དེ་བཞིན་དུ་དེ་དག་གི་བྱིན་གྱི་རླབས་ལས་འཁོར་བའི་མཐའ་ཇི་ཙམ་པར་སེམས་ཅན་གྱི་དོན་མཛད་པ་ཁྲོ་བོ་འཇིགས་པའི་མེ་ལ་སོགས་པ་དང་། འཇིག་རྟེན་པའི་ཡང་བསྐལ་པའི་མཐར་ཐུག་པར་མ་མོ་ལ་སོགས་པ་དྲག་ཅིང་
གདུག་པར་བྱིན་གྱིས་བརླབས་པ་དག་ཡོད་དེ། དེ་དག་ཕབ་ན་བྱིས་པ་འཆི་བའི་ཉེན་ཡོད་པས་དེ་ལྟ་བུ་མ་ཡིན་པའི་གསང་སྔགས་མི་གདུག་པ་བཟླས་པར་བསྟན་ཏོ། །ང་ཡི་གསང་སྔགས་ཞེས་བྱ་བ་ནི་སྐབས་འདིར་རྡོ་རྗེའི་རིགས་ཀྱི་ཤས་ཆེར་གསུངས་པའི་ཐ་ཚིག་གོ། །དག་པ་ཞེས་
བྱ་བ་ནི་ཡི་གེ་ལྷག་ཆད་མེད་པའོ། །གང་ཡང་རུང་ཞེས་བྱ་བ་ནི་སྒྲུབ་པ་པོ་ཉིད་གང་ལ་དད་པའོ། །གསོ་སྦྱོང་བྱས་པས་ནན་ཏན་བཟུང་ནས་སུ། །ཞེས་བྱ་བ་ནི་རང་གི་ལྷ་མཉེས་པར་བྱ་བའི་དོན་ཡིན་པས། ལྷ་གཟུང་བ་ཡང་རང་གི་ལྷ་ལ་བཟོད་པར་གསོལ་ཡང་མི་དགོས། བླ་མ་ལས་
ནོད་ཀྱང་མི་དགོས་པར་རང་གིས་གསོ་སྦྱོང་བྱས་ནས་གཟུང་བར་བསྟན་ཏོ། །རྒྱལ་བའི་རིང་བསྲེལ་ཞེས་བྱ་བ་ལ་སོགས་པས་ནི་དེའི་བསྙེན་པའི་གནས་བསྟན་ཏོ། །གཡོ་བ་ཞེས་བྱ་བ་ནི་ཡུལ་སོ་སོར་འཇུག་པའོ། །རབ་ཏུ་བསྡམས་ནས་ཞེས་བྱ་བ་ནི་སོ་སོར་དག་པར་བསྟན་ཏོ། །དེ་ལ་
ཡིད་གཞོལ་བ་ཞེས་བྱ་བ་ནི་ལྷའི་དེ་ཁོ་ན་ལ་སེམས་གཏོད་ཅིང་། བཟླས་བརྗོད་ཡན་ལག་དང་ལྡན་པར་བྱེད་པའོ། །བྱམས་ལ་གནས་ཤིང་ཞེས་བྱ་བ་ནི་དང་པོར་བྱམས་པའི་ཏིང་ངེ་འཛིན་བསྒོམས་ལ་དེའི་རྗེས་ལ་ལྷའི་སྦྱོར་བ་བྱ་བར་བསྟན་ཏེ། དེ་ནི་བསོད་ནམས་འཕེལ་བས་
བགེགས་ཀྱིས་མི་ཚུགས་པར་འགྱུར་རོ། །ཀུ་ཤའི་ཁྲེས་ལ་འདུག་ཅེས་བྱ་བ་ནི་དེའི་དཀའ་ཐུབ་ཀྱི་སྟན་བསྟན་པ་སྟེ། དབྱིབས་དང་ཚད་དང་སོགས་པས་ནི་སྔར་བཤད་པ་དང་མཐུན་པར་རིག་པར་བྱའོ། །ཇི་སྲིད་དུ་ནི་རྩེ་གཅིག་གནས་གྱུར་པ། །ཞེས་བྱ་བ་ནི་སེམས་བཟླས་བརྗོད་

71-1-84a

ལ་ཞེན་ཏེ། གཞན་དུ་མི་གཡོ་བར་གྱུར་པའི་དོན་ཏོ། །དེ་སྲིད་དུ་ནི་འབུམ་མམ་ཉིས་འབུམ་བཟླས། །ཞེས་བྱ་བ་ནི་སེམས་ཀྱི་གདེང་ལས་དཔག་པར་བྱ་བའི་ཐ་ཚིག་གོ། །ཧཱུཾ་ཞེས་བྱ་བ་ནི་གསང་སྔགས་གང་ཡང་རུང་བའི་ཀླད་ལ་སྤེལ་བའི་དོན་ཏོ། །ཤིང་ལའང་
འབབ་ན་མི་ལ་སྨོས་ཅི་དགོས། །ཞེས་བྱ་བ་ནི་སྤྱིར་གསང་སྔགས་མཐུ་ཆེ་བར་རྗེས་སུ་བསྔགས་པའོ། །སྣོད་ཅེས་བྱ་བ་ནི་བྱིས་པ་ཡོན་ཏན་དང་ལྡན་པ་ལ་ལྷ་དབབ་པའི་སྐལ་བ་ཡོད་པས་སྣོད་དུ་རུང་ཞེས་བྱ་བའི་དོན་ཏོ། །ཚིག་གི་དོན་གཞན་ནི་གོ་སླ་བས་མ་ཕྱེའོ། །ཚེས་གྲངས་
བཟང་ལ་ཞེས་བྱ་བ་ནི་ངོ་གཉིས་ཀྱི་དུས་ཚིགས་རྣམས་སོ། །སྨྱུང་བ་བྱས་པ་ཞེས་བྱ་བ་ནི་རིག་སྔགས་འཆང་ཉིད་དང་བྱིས་པ་རྣམས་སོ། །ཁྲུས་བྱས་གོས་དཀར་བསྐོན་ཞེས་བྱ་བ་ནི་འབེབས་པ་ཉིད་ཀྱིས་སྔ་དྲོའོ། །ཤར་ཕྱོགས་ཁ་བསྟན་རྒྱན་ནི་རྣམ་པར་སྤངས། །ཞེས་བྱ་
བ་ཡང་བུས་པ་རྣམས་ཏེ། དེ་དག་འདབ་མ་ཕྲག་པར་བཀོད་ལ། གཉའ་བ་ལ་དབབ་པར་བྱ་བའི་གསང་སྔགས་སྤྱན་དྲངས་ཏེ་མཆོད་ནས་ཁོང་དུ་ཞུགས་པར་བསམ་མོ། །བདུག་པས་བདུགས་ཤིང་ཞེས་བྱ་བ་ནི་གུ་གུལ་གྱིས་བདུགས་པས་སོ། །རྫོགས་པར་གྱུར་པར་
ཤེས་པར་བྱ། །ཞེས་བྱ་བ་ནི་ལྷ་ཞུགས་པའི་མཚན་མ་མ་ལུས་ཞེས་བྱ་བའི་དོན་ཏོ། །འཇིགས་པ་མེད་པ་ཞེས་བྱ་བ་ནི་མ་བབས་སུ་དོགས་པ་མེད་ཅེས་བྱ་བའི་ཐ་ཚིག་གོ། །རིག་པ་མཆོག་གི་གསང་སྔགས་དྲན་བྱས་ནས། །ཞེས་བྱ་བ་ནི་དེར་བགེགས་གཞན་མི་འཇུག་པར་
བྱ་བའི་དོན་དུ་བསྲུང་བར་གསུངས་སོ། །གཞན་ནི་གོ་བར་ཟད་དོ། །གང་ཞིག་བླུན་པས་གཞན་དུ་བརྩམས་ནས་ནི། །དེ་ནི་མི་རྣམས་ཀུན་གྱིས་དཔྱས་པར་འགྱུར། །ཞེས་བྱ་བ་ནི་ལྷ་གདུག་པ་ཕབ་པས་བྱིས་པ་ཐལ་བྱུང་ཁྱེར་བ་དང་། བསྙེན་པ་གུས་པར་མ་བྱས་ཤིང་། ཆོ་ག་
མ་སྨིན་པས་མ་ཕེབས་ན་དཔྱས་སུ་འགྱུར་བའི་ཕྱིར་རོ། །གཞན་ནི་གོ་བར་ཟད་དོ། །དྲག་པོའི་སྦྱིན་སྲེག་ཉི་ཤུ་རྩ་གཅིག་བྱ། །ཞེས་བྱ་བ་ནི་དྲག་པོའི་ཐབ་ཏུ་མེ་ཁྲོ་གཉེར་ལ་བསྐྲད་པའི་བསྐུལ་ཚིག་བཅུག་ནས་དྲག་པོའི་ལས་བྱ་བར་བསྟན་ཏོ། །སྔ་མ་བཞིན་ཞེས་བྱ་བ་ལ་

71-1-84b

སོགས་པས་ནི་གོང་དུ་སྨོས་པའི་ཆོ་ག་རྣམས་ལས་མི་འགལ་བར་བྱས་པའི་ཕན་ཡོན་བརྗོད་པའོ། །སྔགས་པ་ཡུན་རིངས་ཉོན་མོངས་མི་འགྱུར་རོ། །ཞེས་བྱ་བ་ནི་ཡོན་ཏན་དང་སྐྱོན་ལྷ་ཉིད་ལས་ལུང་ཐོབ་པའི་ཕྱིར་རོ། །ལེའུ་བདུན་པའི་དོན་བཤད་ཟིན་ཏོ།།      །།སངས་
རྒྱས་ཀྱིས་གསུངས་ཞེས་བྱ་བ་ནི་མི་སླུ་བའི་ཁུངས་ཏེ་ལུང་ཤིན་ཏུ་དག་པ་ཡིན་པར་བསྟན་ཏོ། །ཡན་ལག་བརྒྱད་ཅེས་བྱ་བ་ནི་ལམ་དེའི་རང་བཞིན་གྱི་རྣམ་གྲངས་སོ། །ལམ་ཞེས་བྱ་བ་ནི་རྣལ་འབྱོར་པ་རྣམས་ཀྱིས་བགྲོད་པར་བྱ་བསྒྲུབ་པའི་གཞི་ཡིན་པའི་ཕྱིར་རོ། །ཡང་དག་
པའི་འཚོ་བ་ཞེས་བྱ་བ་ནི་ཚུལ་འཆོས་པ་དང་གཞོགས་སློང་ལ་སོགས་པ་ལོག་པས་འཚོ་བའི་ཉེས་པ་སྤངས་ཤིང་ཡོངས་སུ་དག་པའི་ལུས་དང་ངག་གི་ལས་ཀུན་དུ་སྤྱོད་པའོ། །ཡང་དག་པའི་ལས་ཀྱི་མཐའ་ཞེས་བྱ་བ་ནི་སྲོག་གཅོད་པ་ལ་སོགས་པའི་ཉེས་པ་སྤངས་ཤིང་
ལུས་ཀྱི་ལས་ཡོངས་སུ་དག་པའོ། །ཡང་དག་པའི་ཏིང་ངེ་འཛིན་ཞེས་བྱ་བ་ནི་གོང་ནས་གོང་དུ་ཡོན་ཏན་གྱི་ཁྱད་པར་རྣམས་མངོན་པར་བསྒྲུབ་པའི་ཕྱིར་རྟག་ཏུ་མཉམ་པར་གཞག་པའོ། །ཡང་དག་པའི་ངག་ཅེས་བྱ་བ་ནི་གཞན་དག་ལ་གདམས་ངག་མ་ནོར་བར་འཆད་ཅིང་
བརྫུན་པ་ལ་སོགས་པའི་ཉེས་པ་སྤོང་བའོ། །ཡང་དག་པའི་རྩོལ་བ་ཞེས་བྱ་བ་ནི་ཉེས་པ་ཐམས་ཅད་སྤོང་བ་ལ་མངོན་པར་སྤྲོ་བའོ། །ཡང་དག་པའི་རྟོག་པ་ཞེས་བྱ་བ་ནི། དེས་ཇི་ལྟར་རྟོགས་པའི་དོན་རྣམ་པར་བཞག་ནས་གདོན་པའོ། །ཡང་དག་པའི་དྲན་པ་ཞེས་བྱ་བ་ནི་
དེ་ཉིད་མི་བརྗེད་པའོ། །ཡང་དག་པའི་ལྟ་བ་ཞེས་བྱ་བ་ནི་དེ་ཁོ་ན་ཉིད་ཀྱི་དོན་ལ་མ་ནོར་བའི་རང་བཞིན་དུ་འཛིན་པའོ། །འདིར་གོ་རིམས་འཁྲུགས་པ་ནི་ཚིགས་སུ་བཅད་པ་སྦྱར་བ་ལ་བདེ་བའི་ཕྱིར་རོ། །སོ་སོ་སོ་སོར་ཡང་དག་བསྟེན་པར་བྱ། །ཞེས་བྱ་བ་ནི་ལམ་གྱི་ཡན་ལག་རེ་རེ་
ལ་ཡང་གུས་པས་བརྟེན་པར་བསྟན་ཏོ། །ཡང་ན་སོ་སོའི་སྐྱེ་བོ་དང་འཕགས་པ་ཉན་ཐོས་དང་། རང་བྱང་ཆུབ་དང་། བྱང་ཆུབ་སེམས་དཔའ་རྣམས་ཀྱིས་སོ་སོའི་རྒྱུའི་སྟོབས་ཀྱིས་འཇུག་ཅེས་བྱ་བའི་ཐ་ཚིག་གོ། །ལམ་འདི་རྣམས་ཀྱིས་ཞེས་བྱ་བ་ནི་བཤད་མ་ཐག་པའི་

71-1-85a

ཡན་ལག་བརྒྱད་པའོ། །གསང་སྔགས་དངོས་གྲུབ་སྒྲུབ་ཅིང་། དེ་བཞིན་འདིས་ནི་མཐོ་རིས་ཞེས་བྱ་བས་ནི་སོ་སོའི་སྐྱེ་བོ་མངོན་པར་མཐོ་བར་འདོད་པ་རྣམས་ཀྱིས་བགྲོད་དགོས་པར་བསྟན་ཏོ། །ཐར་པ་ཐོབ་ཅེས་བྱ་བ་ནི་ཉན་ཐོས་དང་རང་སངས་རྒྱས་ཀྱི་འབྲས་བུ་འདོད་
པས་འཕགས་པའི་ལམ་བགྲོད་དགོས་པར་བསྟན་ཏོ། །རྒྱལ་སྲས་ཞེས་བྱ་བ་ནི་བྱང་ཆུབ་སེམས་དཔའ་རྣམས་སོ། །སྔོན་གྱི་རྒྱལ་བ་ཞེས་བྱ་བ་ནི་འདས་པའི་སངས་རྒྱས་རྣམས་སོ། །དེ་བཞིན་གཤེགས་པར་འགྱུར་ཞེས་བྱ་བ་ནི་མ་བྱོན་པའི་སངས་རྒྱས་རྣམས་སོ། །འབྱུང་
བའི་ལམ་སྲོལ་ཡང་འདི་ཉིད་ཡིན་པར་གསུངས་པའི་དོན་ཏོ། །ངོམས་མེད་སེམས་ཀྱིས་ཞེས་བྱ་བ་ནི་གོ་འཕང་ཁྱད་པར་ཅན་འདོད་པ་རྣམས་ཀྱིས་བགྲོད་པ་དེ་ངེས་པར་བསྒྲུབ་དགོས་པའི་ཕྱིར་རོ། །བདེན་པའི་ལམ་དམིགས་ན་ཞེས་བྱ་བ་ནི་མི་སླུ་བའི་གཞི་དེ་ལ་ངེས་པར་གཟུད་
དེ་ཡིད་བརྟན་ན་ཞེས་བྱ་བའི་དོན་ཏོ། །དགེ་བའི་ལས་དེ་ཡང་དག་བསྐྱེད་པ་ཡིན། །ཞེས་བྱ་བ་ནི་དེའི་ཕན་ཡོན་གྱིས་སོ་སོའི་འབྲས་བུ་ཐོབ་པར་འགྱུར་རོ་ཞེས་བྱ་བའི་ཐ་ཚིག་གོ། །ཡོངས་སུ་འཛིན་པ་རྣམ་པར་སྤངས་ནས་སུ། ། ཞེས་བྱ་བ་ལ་སོགས་པས་ནི་ཡང་དག་པའི་འཚོ་
བ་རྣམ་པར་ཕྱེ་སྟེ་བསྟན་པའོ། །སྟག་ཅེས་བྱ་བ་ནི་སྲོག་ཕངས་པ་དང་བྲལ་བར་བྱེད་པས་བསྙེན་དུ་མི་རུང་བའི་དོན་ཏོ། །སྦྲུལ་ཞེས་བྱ་བ་ནི་གདུག་ཅིང་མ་རུངས་པ་ཉིད་ཡིན་པས་ཡིད་འབྱུང་བར་བྱ་བ་ཡིན་ནོ། །མེ་ཞེས་བྱ་བ་ནི་གདུང་བར་བྱེད་པ་ཉིད་ཀྱིས་སྡུག་བསྔལ་བསྐྱེད་པའི་
ཐ་ཚིག་གོ། །འཇིག་རྟེན་ལ་བསམས་ནས་ཞེས་བྱ་བ་ནི་དཔེ་གོང་མ་རྣམས་དང་འཇིག་རྟེན་པའི་འདོད་པའི་ཡོན་ཏན་དང་མཚུངས་པར་དམིགས་པར་བསྟན་པ་སྟེ། ཇི་སྐད་དུ། འདོད་པ་རྣམས་ནི་ཕུང་བ་བསྐྱེད་པ་སྟེ། །རྒྱལ་བའི་དབང་པོས་ཀིམ་པའི་འབྲས་འདྲར་གསུངས། །
དེ་དག་སྤང་བྱ་དེ་ཡི་ལྕགས་སྒྲོག་གིས། །འཁོར་བའི་བཙོན་རར་འཇིག་རྟེན་འདི་དག་བཅིངས། །ཞེས་བཤད་པ་ལྟ་བུའོ། །སྤངས་ཏེ་ཞེས་བྱ་བ་ནི་གཉེན་པོ་བསྒོམ་པའི་དུས་སུའོ། །བུད་མེད་མཚན་ཉིད་ཅེས་བྱ་བ་ལ་སོགས་པས་ནི་ཡང་དག་པའི་དྲན་པའི་མི་མཐུན་པའི་

71-1-85b

ཕྱོགས་སྤང་བར་བསྟན་ཏོ། །གླང་ཆེན་རྟ་དང་ཞེས་བྱ་བ་ལ་སོགས་པས་ནི་ཡང་དག་པའི་རྩོལ་བའི་མི་མཐུན་པའི་ཕྱོགས་སྤང་བར་བསྟན་ཏོ། །ཡུལ་སའི་གཏམ་དང་ཞེས་བྱ་བ་ལ་སོགས་པས་ནི་ཡང་དག་པའི་ངག་གི་མི་མཐུན་པའི་ཕྱོགས་སྤང་བར་བསྟན་ཏོ། །བསྟི་
གནས་ཞེས་བྱ་བ་ལ་སོགས་པས་ནི་ཡང་དག་པའི་ལས་ཀྱི་མཐའ་བསྟན་ཏེ། དེ་ལ་བསྟི་གནས་ནི་བསོད་ནམས་འདོད་པ་དག་གིས་ལམ་གྱིས་དུབ་པ་རྣམས་བསྟན་པའི་གནས་བཤམས་པའོ། །སྔར་བཤད་པའི་གནས་རྣམས་མ་རྙད་ན་ཞེས་བྱ་བ་ནི་གང་དུ། དྲོ་ལ་བརྟན་
ཞིང་འཇིམ་པས་ཞལ་ཞལ་བྱས། །ཞེས་བྱ་བ་ལ་སོགས་པའི་གནས་སྒྲུབ་པ་པོ་དབུལ་པོས་མི་ནུས་ན་ཞེས་བྱ་བའི་དོན་ཏོ། །ལྷ་ཁང་སྟོང་པ་ཞེས་བྱ་བ་ལ་སོགས་པས་ནི་རིག་སྔགས་འཆང་དབུལ་པོ་རྣམས་གནས་དེ་དག་ཏུ་བསྒྲུབ་པར་བསྟན་ཏོ། །ཡང་ན་གནས་ནི་ངེས་པར་
མ་བྱས་ན། །ཞེས་བྱ་བ་ནི་དང་པོ་ནས་གནས་གར་བདེ་བ་དེར་བསྟན་པར་དམ་བཅས་པའོ། །ཟླ་བ་བརྒྱད་པོ་ཞེས་བྱ་བ་ནི་སྟོན་ཟླ་ཐ་ཆུངས་ཉ་ནས་དབྱར་ཟླ་འབྲིང་པོའི་ཉའི་བར་རོ། །གནས་འདི་གང་ཡང་རུང་བ་ཅིག་ཏུ་བསྟེན། །ཞེས་བྱ་བ་ནི་སྒྲུབ་པ་པོ་དབུལ་པོ་མ་ཡིན་པས་ཀྱང་
གནས་གར་བདེ་བ་དེར་འཕོ་ཞིང་བསྙེན་པ་བྱ་བར་དམ་བཅས་ན་ནི་འཕོས་པའི་ཉེས་པ་མེད་ཅེས་བྱ་བའི་ཐ་ཚིག་གོ། །མཚོ་དང་ཞེས་བྱ་བ་ལ་སོགས་པས་ནི། གང་དང་གང་དུ་གནས་སུ་རུང་བའི་རྣམ་གྲངས་བསྟན་པའོ། །དགུན་དཔྱིད་ཅེས་བྱ་བ་ནི་གོང་དུ་སྨོས་པའི་ཟླ་བ་བརྒྱད་པོ་
ལས་བཞི་བཞིའོ། །དབྱར་ནི་གཅིག་ཏུ་གནས་པར་བྱའོ་ཞེས་བྱ་བ་ནི་དབྱར་ཟླ་འབྲིང་པོ་ཉ་ནས་སྟོན་ཟླ་འབྲིང་པོ་ཉའི་བར་དུ་ཟླ་བ་གསུམ་ནི་མི་འཕོ་བར་གནས་གཅིག་ཏུ་གནས་ཏེ་བཟླས་བརྗོད་བྱ་བར་གསུངས་སོ། །དཔེ་ནི་གོ་བར་ཟད་དོ། །སྔགས་པས་དབྱར་ནི་སྒྲུབ་ལ་མི་
འཇུག་པར། །ཞེས་བྱ་བ་ནི་བསྙེན་པ་རྫོགས་ཏེ་སྒྲུབ་པ་ལ་འཇུག་པ་དག་གིས་ཀྱང་ཆར་པ་ལ་སོགས་པའི་བགེགས་མང་བས་ཟླ་བ་དེ་གསུམ་ལ་བསྒྲུབ་པར་མི་བྱ་བའི་དོན་ཏོ། །བཟླས་བརྗོད་ཀྱིས་ནི་དུས་ཀྱང་འདའ་བར་བྱ། །ཞེས་བྱ་བ་ནི་བསྙེན་པའི་གྲངས་ཚང་གིས་ཀྱང་དབྱར་

71-1-86a

འདས་འདས་སུ་ཉིན་རེ་ཞིག་དུས་གཉིས་སམ་དུས་གཅིག་ལ་བཟླས་བརྗོད་བར་ཆད་མེད་པར་བསྟན་ཏོ། །སྟོན་ཟླ་འབྲིང་པོ་ཉ་ནས་ཐ་ཆུངས་ཉའི་བར་དུ་ཟླ་བ་གཅིག་མ་སྨོས་པ་ནི་བསྒྲུབ་པའི་དུས་སུ་ནི་མི་རུང་སྟེ། རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། ཇི་
སྐད་དུ། སྟོན་ཟླ་འབྲིང་པོ་གློག་འགྱུ་ཞིང་། །སྒྲ་ཆེན་རྣམས་ཀྱང་འབྱུང་བར་འགྱུར། །ཞེས་གསུངས་སོ། །དབྱར་གྱི་ནང་དུ་མ་བསྡུས་པ་ནི་ཟླ་བ་འདི་ལ་ཚུལ་ནས་བྱུང་བའི་ཕྱིར་རོ། །གསང་སྔགས་གཟི་བརྗིད་བསྐྱེད་པས་ཞེས་བྱ་བ་ནི་བཟླས་བརྗོད་དང་སྦྱིན་སྲེག་གིས་
བྱིན་བསྐྱེད་ནས་དངོས་གྲུབ་ཏུ་འགྱུར་བའི་མཐུ་དང་ལྡན་པའི་དོན་ཏོ། །བདག་ཉིད་ཅེས་བྱ་བ་ནི་སྒྲུབ་པ་པོའི་སྐྱེས་བུའོ། །ཟླུམ་པོ་ཞེས་བྱ་བ་ནི་ཀུན་དུ་དཀྱིལ་འཁོར་རོ། །གྲུ་གསུམ་ཞེས་བྱ་བ་ནི་ཟུར་གསུམ་མོ། །གྲུ་བཞི་ཞེས་བྱ་བ་ནི་ལྷམ་པའོ། །པདྨ་ལྟ་བུ་ཞེས་བྱ་བ་ནི་པདྨའི་
འདབ་མ་ཡག་ཅིག་གི་དབྱིབས་སོ། །དབྱིབས་ལེགས་ཤིང་། འཇམ་ཞིང་ཤིན་ཏུ་མཉམ་པར་བྱས་ནས་སུ། །ས་དང་ལྕི་བས་ལེགས་པར་བྱུག །ཅེས་བྱ་བ་ནི་ཐབ་ཀྱི་དབྱིབས་རྣམ་པ་བཞི་ཆར་ལ་ཡང་སྦྱར་བའི་དོན་ཏོ། །དབང་ཐང་བསྐྱེད་ཅེས་བྱ་བ་ནི་དབང་ཕྱུག་གི་དཔལ་
མངོན་དུ་ཕྱོགས་པར་སྒྲུབ་པའི་དོན་ཏོ། །ནོར་འགུགས་པ་ཞེས་བྱ་བ་ནི་གཏེར་ལ་སོགས་པ་བསྡུ་བའོ། །སྤྱན་དྲང་བ་ཞེས་བྱ་བ་ནི་ལྷ་མཉེས་པར་བྱ་བའི་དོན་དུ་ཚིམ་པ་དང་གཟི་བྱིན་བསྐྱེད་པའི་སྦྱིན་སྲེག་བྱེད་པ་སྟེ། དེ་དག་ནི་རྒྱས་པའི་ལས་སོ། །ཞི་བའི་ཆོ་ག་ཞེས་བྱ་བ་ནི་རབ་
གྲུབ་པར་བྱེད་པའི་རྒྱུད་ཆེན་པོ་ལས། ཇི་སྐད་དུ། དུས་མིན་འཆི་དང་ནད་རྣམས་དང་། །ཡམས་ཀྱི་ནད་དང་གནོད་པ་དང་། །དེ་བཞིན་བགེགས་དང་ནད་འགོ་དང་། །ཞི་བར་བྱེད་པས་ཞི་ཞེས་བྱ། །ཞེས་གསུངས་སོ། །བྱ་བར་ཤིས་ཞེས་བྱ་བ་ནི་རྒྱས་པ་དང་ཞི་བའི་ལས་ཐབ་
ཁུང་ཟླུམ་པོར་བྱས་ན་འགྲུབ་པར་བསྟན་ཏོ། །དགར་ཞེས་བྱ་བ་ནི་གནས་སྔ་མ་ནས་འཕོ་ཞིང་འགྲོ་འདོད་པར་བྱེད་པའི་སྦྱོར་བའོ། །བསྐྲད་པ་ཞེས་བྱ་བ་ནི་མི་མ་ཡིན་པའི་གདོན་རྣམས་ཁོ་ན་ལ་སྟེ། གནས་དེ་ནས་མི་འགྲོ་མི་སྣང་བར་ཚར་བཅད་པའོ། །བསད་པ་

71-1-86b

ཞེས་བྱ་བ་ནི་སྲོག་དང་བྲལ་བར་བྱེད་པའོ། །གཤེད་བྱེད་ཅེས་བྱ་བ་ནི་རོ་ལངས་རྦད་པ་ལ་སོགས་པའོ། །སོགས་པ་དྲག་པོ་རྣམས་ཞེས་བྱ་བ་ནི་དགྲའི་ཡུལ་དུ་ནད་འབྱུང་བ་དང་། དམག་མནན་པ་དང་། དབྱེ་བ་ལ་སོགས་པ་གཏོང་བ་དང་། དེ་ལྟ་བུ་དག་དང་ཆ་མཐུན་པར་སྒྲུབ་
པ་ཐམས་ཅད་དོ། །སྲོག་སྐམ་པའམ་ཡན་ལག་གཞིག་པ་ཞེས་བྱ་བ་འདིར་ཡང་དྲག་པོའི་ལས་དང་མཐུན་པར་གསུངས་པ་རྒྱུད་གཞན་ལས་ཐབ་ཁུང་གྲུ་བཞི་པོར་རྒྱས་པའི་ལས་དང་སྦྱར་བ་མི་འགལ་ལོ་ཞེ་ན། ཀླུ་དང་གནོད་སྦྱིན་ལ་སོགས་པ་གཟིར་བ་དང་། ལྷ་མ་ཡིན་
གྱི་ཕུག་གི་འཁྲུལ་འཁོར་ལ་སོགས་པ་ཆོམས་ནས། ཁྱད་པར་གྱི་དཔལ་མངོན་དུ་ཕྱོགས་པའི་ཕྱིར་ཉེས་པ་མེད་དོ། །བུད་མེད་ཅེས་བྱ་བ་ནི་ཡུགས་ས་མོ་ལ་སོགས་པའོ། །བུ་མོ་ཞེས་བྱ་བ་ནི་བདག་འདོད་པ་སྟེ། དེ་བཞིན་དུ་བཟློག་ནས་སྦྱོར་བ་བྱས་པས་ནི་སྐྱེས་པ་ཡང་
དབང་དུ་འགྱུར་བར་གོ་བར་བྱའོ། །གྲོང་དང་ཡུལ་འཁོར་འཐོབ་པ་ཞེས་བྱ་བ་ཡང་དབང་གི་ལས་ཀྱིས་འགྲུབ་པའི་ཕྱིར་རོ། །དོན་ཀུན་ཞེས་བྱ་བ་ནི་འདོད་པའི་ཡོན་ཏན་ལྔའོ། །ལྕི་བ་གཙང་མ་ཞེས་བྱ་བ་ནི་བའི་ལྕི་བ་ས་ལ་མ་ལྷུང་པའོ། །ཐ་མ་ཐོག་ཐག་ཏུ་ཀུ་ཤ་དགྲམ་པར་
བྱ་ཞེས་བྱ་བ་ནི་བཅོམ་ལྡན་འདས་མ་ཙུནྡའི་ཆོ་ག་ཞིབ་མོ་ལས་ཇི་སྐད་དུ། ཀུ་ཤའི་རྩྭ་ནི་རློན་པ་དག །ཐབ་ཁུང་བསྐོར་བའི་ཚུལ་དུ་བཏིང་། །ཐ་མས་རྩེ་མོ་མནན་ནས་སུ། །རྩ་བ་དག་ཀྱང་རྩེ་མོས་མནན། །ཞེས་གསུངས་པའི་ཕྱིར་རོ། །ཕྱག་ན་རྡོ་རྗེ་དང་ཞེས་བྱ་བ་ནི་འདིར་
རྡོ་རྗེའི་རིགས་ཀྱི་ཤས་ཆེར་གསུངས་པའི་ཕྱིར། དེ་སྐད་མོས་ཏེ། རིགས་གཞན་ནི་སྐབས་སུ་ཡང་སོ་སོའི་གཙོ་བོ་ལ་རིག་པར་བྱའོ། །ཡམ་ཤིང་མང་པོ་ཞེས་བྱ་བ་ནི་རྣམ་གྲངས་བཅུ་གཉིས་སུ་ཕྱེ་བའམ། ལས་ཀྱི་བྱེ་བྲག་གིས་ཐ་དད་པ་རྣམས་ལས་སྣ་གཅིག་ཡིན་གྱི་
འདིར་སྣ་ཚོགས་བ་སོགས་པ་ནི་མ་ཡིན་ནོ། །ཐབ་ཀྱི་དྲུང་དུ་བཞག་སྟེ་ཞེས་བྱ་བ་ནི་སྒྲུབ་པ་པོའི་གཡས་ཕྱོགས་སུ་བཞག་པའི་དོན་ཏོ། །བདུན་ནམ་བརྒྱད་ཅེས་བྱ་བ་ནི་བགེགས་ཀྱི་མཚན་མ་ཆུང་ངུ་བྱུང་བའི་ངོ་ལོན་དུ་བསྟན་ཏོ། །བཅུ་ཞེ་བྱ་བ་ནི་འབྲིང་གི་ངོ་ལོན་དུ་བསྟན་ཏོ། །

71-1-87a

ཉི་ཤུ་ཞེས་བྱ་བ་ནི་བགེགས་ཆེན་པོའི་མཚན་མ་ཞིག་བྱུང་ན་དེས་བཟློག་པར་དགོངས་པའི་དོན་ཏོ། །ཀུ་ཤ་བཏིང་བའམ་ཁྲེས་སམ་རྩྭ་སྟན་ལ། །ཞེས་བྱ་བ་ནི་གསང་བའི་དཀྱིལ་འཁོར་ལས། ཞི་བ་ལ་ནི་པདྨའི་སྟན། །རྒྱས་པ་ལ་ནི་ཀུ་ཤའི་ཁྲེས། །
དྲག་ཤུལ་སྤྱོད་ལ་སྟན་མེད་པར། །ཞེས་གསུངས་སོ། །འདུག་ནས་ཞེས་བྱ་བ་ནི་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། སྐྱིལ་ཀྲུང་བཀྲ་ཤིས་བཟང་པོ་སྟེ། །དེ་དག་འདུག་པ་གསུམ་ཡིན་ནོ། །ཞེས་གསུངས་ཏེ། ལས་རྣམ་གསུམ་དང་སྦྱར་རོ། །དྲག་པོ་ལ་ནི་གསང་བའི་
དཀྱིལ་འཁོར་ལས། ཇི་སྐད་དུ། རྐང་པས་རྐང་པ་མནན་ཏེ་བྱ། །ཞེས་གསུངས་སོ། །ཤར་ཕྱོགས་ཁ་བལྟས་ཞེས་བྱ་བ་ནི་ལྷ་མཉེས་པར་བྱ་བའི་སྐབས་དང་འབྲེལ་པས། རྒྱས་པའི་ལས་ཀྱི་དབང་དུ་གསུངས་པར་གོ་བར་བྱ་སྟེ། འདིས་ཐམས་ཅད་ལ་མི་བསྒྲེ་བར་གསང་
བའི་དཀྱིལ་འཁོར་ལས་ཇི་སྐད་དུ། བྱང་དུ་ཁ་བལྟས་ཞི་བའི་ཕྱིར། །ཤར་དུ་ཁ་བལྟས་རྒྱས་པ་ལ། །ལྷོ་ཕྱོགས་ཁ་བལྟས་དྲག་པོ་ཡི། །སྦྱིན་སྲེག་ལས་ནི་བརྩམ་པར་བྱ། །ཞེས་གསུངས་པའི་ཕྱིར་རོ། །རྫས་རྣམས་ཞེས་བྱ་བ་ནི་སོ་སོའི་ཆོ་ག་ཞིབ་མོ་དག་ལས་ཇི་སྐད་
བཤད་པ་རྣམས་སོ། །མར་དང་སྦྲང་རྩི་འོ་མ་ལ་བཏགས་ནས། །ཞེས་བྱ་བ་ལ། རང་གི་ལྷ་མཉེས་པར་བྱེད་པའི་སྐབས་དང་འབྲེལ་བས་རྒྱས་པའི་དོན་ཉེ་བར་གཟུང་བའི་ཐ་ཚིག་གོ། །མེ་ནི་སྟོན་པར་བྱེད་ཅེས་བྱ་བ་ནི་བཟླས་བརྗོད་ལ་ཡང་ཞེན་ལས་ལ་གོམས་ནས་
སྦྱིན་སྲེག་བྱས་ན། མེ་ཡང་མཚན་མ་སྟོན་ཏོ། །དེ་ཉིད་ཀྱི་དབང་དུ་མཛད་ནས་བྱང་ཆུབ་ཀྱི་སྙིང་པོའི་རྒྱུད་ཆེན་པོ་ལས་ཀྱང་། ལས་དང་པོ་པས་སྦྱིན་སྲེག་བྱས་པས་ནི་བགེགས་ཀྱི་ཟས་སུ་འགྱུར་རོ་ཞེས་གསུངས་སོ། །ཚིག་གི་དོན་གཞན་ནི་གོ་སླ་བས་མ་བྱེའོ། །
མེ་ཡི་མཚན་མ་འདི་རྣམས་མཐོང་ནས་ནི། །ཞེས་བྱ་བ་ནི་ངན་པ་རྣམས་བྱུང་ན་ཞེས་བྱ་བའི་དོན་ཏོ། །སྟོབས་པོ་ཆེ་ཡིས་མར་གྱི་སྦྱིན་སྲེག་བྱ། །ཞེས་བྱ་བ་ནི་སྦྱིན་སྲེག་སྔ་མ་བྱེད་པའི་འཕྲོ་གཞག་སྟེ། ཐབ་དེར་བླ་ཐབས་སུ་ཁྲོ་བོའི་རྒྱལ་པོ་དེ་སྤྱན་དྲངས་ལ། མར་གྱི་དགང་

71-1-87b

བླུགས་ཉི་ཤུ་རྩ་གཅིག་དབུལ་བས་ནི་ལྟ་ངན་དེའི་ངོ་ལོན་པས་དེ་ནས་སྔ་མའི་འཕྲོ་ནས་བཟུང་སྟེ། རང་གི་ལྷ་ལ་སྦྱིན་སྲེག་དབུལ་བའི་དོན་ཏོ། །སྦྱིན་པ་དག་དང་ཞེས་བྱ་བ་ལ་སོགས་པས་ནི་གོང་དུ། གཙུག་ཕུད་གཞག་སྟེ་སྐྲ་ནི་བྲེག་པར་བྱ། །ཞེས་གསུངས་པས་སྐྲ་ལས་
ཐལ་ཏེ། སྤུ་འདི་དག་བཏོགས་པ་ལ་སོགས་པ་ལ་འཇུག་པ་དགག་པར་བསྟན་ཏོ། །རལ་གྲི་སོ་ལ་འཛིན་ཞེས་པའི་དཔེ་ནི་གོ་བར་ཟད་དོ། །ལེགས་པར་མ་བཟླས་ཞེས་བྱ་བ་ནི་མ་གུས་པའོ། །འབྲས་བུ་མེད་ཅེས་བྱ་བ་ནི་མཐོང་བ་དང་མ་མཐོང་བའི་ཕན་ཡོན་ནོ། །ཕུང་
བར་འགྱུར་ཞེས་བྱ་བ་ནི་འཆི་བ་ལ་སོགས་པའི་ཉེན་ཡོད་པའི་དོན་ཏོ། །མི་ནི་ཚུལ་ཁྲིམས་གཙང་སྦྲར་མི་ལྡན་ཡང་། །ཞེས་བྱ་བ་ལ་སོགས་པས་ནི་འཕགས་པ་དོན་ཡོད་ཞགས་པའི་ཆོ་ག་ཞིབ་མོ་ལས། དཔེར་ན་མི་ལ་ལས་ཙནྡན་ནམ། ག་པུར་རམ་གུར་
གུམ་མམ་གླ་རྩི་ཡང་རུང་སྟེ། སྤྱོས་ཤིང་མཚང་བྲུས་ནས། ལུས་ལ་བྱུགས་ཀྱང་ཙནྡན་ལ་སོགས་པ་འདི་སྙམ་དུ་འདིས་བདག་སྤྱོས་ཀྱིས་འདི་ལ་དྲི་ང་བར་བྱའོ་སྙམ་དུ་མི་སེམས་ཏེ། ཆོས་ཀྱིས་དྲི་ཞིམ་པོ་ཁོ་ནར་བྱེད་པ་བཞིན་དུ། བདག་གིས་དོན་ཡོད་ཞགས་པའི་
སྙིང་པོ་འདི་ཡང་ཁྲོས་ཏེ་དྲན་ནམ་བཏོན་ཀྱང་དེ་ལ་བསྲུང་བ་དང་བསྐྱབ་པ་དང་སྦེད་པར་བགྱིད་ལགས་སོ་ཞེས་འབྱུང་བ་དང་འགལ་བར་འགྱུར་བའི་ཐེ་ཚོམ་བསལ་བར་བསྟན་ཏོ། །གཞན་ནི་གོ་བར་ཟད་དོ། །ལྷ་དང་ཞེས་བྱ་བ་ལ་སོགས་པས་ནི་ཚིག་དོན་རྣམས་ཀྱི་རིགས་
བསྟན་པའོ། །རི་རབ་སྟེང་གནས་དང་ཞེས་བྱ་བ་ལ་སོགས་པས་ནི་དེ་དག་གི་གནས་བསྟན་ཏོ། །དེ་ལྟར་རིགས་དང་གནས་ཙམ་སྨོས་པས་སྤྱིར་གཉེར་བ་ཡང་གདོན་དེ་དག་རྣམ་གྲངས་མ་ངེས་པས་རེ་རེ་ནས་བརྗོད་ཀྱིས་མི་ལང་བའི་ཕྱིར་རོ། །དེ་དག་བཞེད་ནས་ཞེས་བྱ་བ་
ལ་སོགས་པས་ནི་མདངས་ལེན་པ་རྣམས་ལ་བསྔོ་བའི་དོན་ཏོ། །བཏུང་ཞིང་བསྣམས་སུ་གསོལ་ཞེས་བྱ་བ་ནི་ཁམ་གྱིས་ཟ་བ་རྣམས་ལ་སྦྱིན་པར་བསྟན་ཏོ། །དེ་ལྟར་གདོན་ལ་མཆོད་པར་བྱས་ནས་སུ། །ཞེས་བྱ་བ་ནི་དེ་ལ་མཁས་པ་དག་ན་རེ། བདེན་བྲལ་གྱི་ཕྱོགས་

71-1-88a

ནས་རྒྱང་བསྲིངས་ཏེ་བྱའོ་ཞེས་ཟེར་རོ། །ལས་འདི་རྣམས་ནི་འབྲས་བུ་མཆིས་པར་མཛོད། །ཅེས་བྱ་བ་ནི་དེ་དག་ལ་ལས་བཅོལ་བར་བསྟན་ཏོ། །དེ་ནས་ཕྱོགས་སྐྱོང་རྣམས་ལ་མཆོད་པར་བྱ། །ཞེས་བྱ་བ་ནི་དེའི་འོག་ཏུ་དབང་ལྡན་གྱི་ཕྱོགས་ནས་བརྩམས་ཏེ་
རེ་རེ་ནས་མཆོད་པར་བྱ་བའི་དོན་ཏོ། །ཅིའི་ཕྱིར་གདོན་རྣམས་ལ་སྔར་མཆོད་ཅེ་ན་དེ་དག་གཏུམ་ཞིང་མྱུར་དུ་འཚེ་བའི་ཕྱིར་རོ། །ལྷ་རྣམས་ཀུན་དང་ཞེས་བྱ་བ་ལ་སོགས་པས་ནི་འཇིག་རྟེན་སྐྱོང་བ་དེ་དག་ཀྱང་འཁོར་དང་བཅས་པར་མཆོད་པའི་ཐ་ཚིག་སྟེ། འདིར་འཁོར་མ་
སྨོས་པ་རྣམས་ཀྱང་། རིག་པ་མཆོག་གི་རྒྱུད་དག་ལས་གསུངས་པ་བཞིན་བརྗོད་པར་བྱ་སྟེ། འདིར་ནི་ཡི་གེ་མངས་སུ་དོགས་པས་མ་སྤྲོས་སོ། །དེ་ལྟར་གང་ཞིག་ཅེས་བྱ་བ་ལ་སོགས་པས་ནི་གཏོར་མ་གཏོང་བའི་ཕན་ཡོན་བསྟན་པའོ། །ལེའུ་བརྒྱད་པའི་དོན་བཤད་ཟིན་
ཏོ།།      །།དེ་བཞིན་གཤེགས་པ་ལ་སྐུ་མཚལ་འབྱིན་ཞེས་བྱ་བ་ནི་ཞེ་སྡང་དྲག་པོས་དེའི་སྐུའི་ཡན་ལག་ལ་བཅད་པའི་ངན་སེམས་བསྐྱེད་པའོ། །མཚམས་མེད་པ་ཞེས་བྱ་བ་ནི་འཇིག་རྟེན་འདི་ནས་ཕ་རོལ་ཏུ་ཉིང་མཚམས་སྦྱོར་བ་ན། སྐྱེ་གནས་གང་གིས་ཀྱང་བར་དུ་མི་ཆོད་
པར་མནར་མེད་པའི་དམྱལ་བར་ངེས་པར་སྦྱོར་བའི་དོན་ཏོ། །ཕུང་པོ་འདི་ལ་ཞེས་བྱ་བ་ནི་ད་ལྟར་གྱི་ལུས་ཉེ་བར་ལེན་པས་ཟིན་པའོ། །མཆོད་རྟེན་ཞེས་བྱ་བ་ནི་སྐུ་གཟུགས་དང་སྐུ་གདུང་བཞུགས་པའི་མཆོད་རྟེན་དང་ལུང་གི་ཆོས་སོ། །འཇིག་ཅེས་བྱ་བ་ནི་དེ་དག་གཏན་དུ་
མི་སྣང་བར་བྱེད་པའོ། །བྱང་ཆུབ་སེམས་དཔའ་ཞེས་བྱ་བ་ནི་ས་ཆེན་པོ་ལ་གནས་པའོ། །སློབ་པ་ཞེས་བྱ་བ་ནི་མོས་པའི་ས་ལ་གནས་པའོ། །མཚམས་མེད་པ་དང་ཉེ་བ་ཞེས་བྱ་བ་ནི་མཚམས་མེད་པ་ལྔ་དང་མི་བཟད་པར་འདྲ་བ་ལས། དགེ་བའི་ལས་དྲག་པོ་དག་གིས་དེ་
ལས་བཟློག་པ་དག་སྲིད་པ་ནི་བྱེ་བྲག་གོ། །ཚུལ་ཉམས་པ་ཞེས་བྱ་བ་ནི་མཐོ་རིས་དང་བྱང་གྲོལ་ཐོབ་པའི་རྒྱུ་མེད་པར་གྱུར་པའོ། །བསྐལ་པའི་བར་དུ་ཞེས་བྱ་བ་ནི་བསྐལ་པ་ཆེན་པོ་གཅིག་ཏུ་ཞེས་བྱ་བའི་དོན་ཏོ། །མནར་མེད་པ་ཡི་སྡུག་བསྔལ་མྱོང་བར་འགྱུར། །ཞེས་བྱ་བ་

71-1-88b

ནི་ཕྱོགས་དྲུག་ནས་མེ་འབར་བ་འཁྲིགས་པས་སེམས་ཅན་རྣམས་ཀྱི་པགས་པ་དང་ཤ་དང་རྒྱུས་པ་དང་རུས་པ་དང་རྐང་མར་མེའི་སྙིང་པོ་ལ་ཞེན་པ་བཞིན་དུ་ལུས་པོ་ལ་ཁྱབ་ནས། དེ་ནས་ཉམ་ཐག་པའི་ང་རོ་མ་གཏོགས་པར་འདི་དག་ནི་སེམས་ཅན་ནོ། །འདི་དག་ནི་མེ་ཡིན་
ནོ་ཞེས་དབྱེ་བར་མི་ནུས་པའི་ཕྱིར་སྡུག་བསྔལ་བརྒྱུད་པའི་བར་མཚམས་མེད་པའི་དམྱལ་བ་མནར་མེད་པ་ཞེས་བྱ་བའི་ཐ་ཚིག་གོ། །ཆོས་ཀྱི་སྐུ་སྤོང་བ་ཞེས་བྱ་བ་ནི་འཐོབ་པའི་ཆོས་ལ་རྒྱབ་ཀྱིས་ཕྱོགས་པའོ། །བསླབ་པའི་ཚིག་མ་ལུས་པས་བརྒྱན་པ་ཞེས་བྱ་བ་ནི་
སོ་སོར་ཐར་པའི་སྡོམ་པས་བསྡུས་པ་ལ་གནས་པའོ། །ངན་པའི་སེམས་ཞེས་བྱ་བ་ནི་ཞེ་སྡང་གིས་དཀྲུགས་པའོ། །དཀའ་བར་སྤྱོད་པར་ལྡན་ཞེས་བྱ་བ་ནི་དཀའ་ཐུབ་ཁྱད་པར་ཅན་རླུང་ཟ་བ་ལ་སོགས་པ་བྱེད་པའོ། །ངོས་གྲུབ་མི་ཐོབ་ཅེས་བྱ་བ་ནི་ཤིང་ཏཱ་ལའི་མགོ་བཅད་
པ་བཞིན་དུ། དངོས་གྲུབ་ཐོབ་པའི་སྐལ་བ་ཅན་དུ་སླར་གསོར་མེད་དོ་ཞེས་བྱ་བའི་ཐ་ཚིག་གོ། །བདག་ཉིད་མནར་མེད་ཡུན་རིང་དམྱལ་བར་བཙོས། །ཞེས་བྱ་བ་ནི་གོང་མ་གཉིས་དང་མཐུན་པར་བསྟན་ཏེ། སྐྱེ་གནས་གཞན་གྱིས་བར་དུ་མ་ཆོད་པ་སྲིད་པ་དང་། བསྐལ་
པར་མི་གནས་པ་ནི་བྱེ་བྲག་གོ། །མདོར་བཤད་པའོ་ཞེས་བྱ་བ་དང་མཚམས་མེད་པ་དང་མཐུན་པའི་ཆོས་འདིར་མ་སྨོས་པ་རྣམས་ཀྱང་། དེ་དག་དང་འདྲ་བར་སྡིག་ལྕི་བར་བསྟན་ཏོ། །བྱང་ཆུབ་སེམས་ནི་བླངས་པ་ལས། །ཞེས་བྱ་བ་ནི་བྱང་ཆུབ་ཀྱི་སྡོམ་པ་མནོས་པ་སྟེ། 
སྨོན་པ་བྱང་ཆུབ་ཀྱི་སེམས་དང་ལྡན་པའི་དོན་ཏོ། །རྨོངས་པས་ཞེས་བྱ་བ་ནི་སྒྲུབ་པ་པོས་བྱང་ཆུབ་ཏུ་སེམས་བསྐྱེད་པ་མི་མཁས་པ་ཁ་ཅིག་གོ། །དེ་ལ་མི་དགར་གྱུར་ནས་སུ། །ཞེས་བྱ་བ་ནི་བྱང་ཆུབ་ཏུ་སེམས་བསྐྱེད་པ་དེས་གཞན་ལ་ཕྱག་བྱས་ན་དེ་དག་གི་དཔལ་
འབྲི་བར་འགྱུར་བའི་ཕྱིར་རོ། །གང་གི་ཚེ་ན་སེམས་ནི་དང་བ་ཡིས། །ཞེས་བྱ་བ་ལ་སོགས་པས་ནི་བྱང་ཆུབ་ཀྱི་སྡོམ་པ་མནོས་པའི་སྐྱེས་བུ་དེ་མཆོད་པའི་གནས་ཡིན་པར་བསྟན་ཏོ། །བསླབ་པ་མཐའ་དག་བླངས་པ་ཞེས་བྱ་བ་ནི་ཚུལ་ཁྲིམས་རྣམ་པ་གསུམ་པོ་དག་མནོས་

71-1-89a

ཞེས་བྱ་བའི་ཐ་ཚིག་གོ། །སེམས་ཅན་ཀུན་ལ་མི་འཇིགས་སྦྱིན་པ་ཞེས་བྱ་བ་ནི་སྙིང་རྗེ་ལ་གནས་པས་ལྷག་པར་སྲོག་གཅོད་པ་ལ་སོགས་པའི་ཐོ་འཚམ་པ་སྤོང་བའི་སྡོམ་པ་ལེན་ཏེ། ཇི་སྐད་དུ། བྱང་ཆུབ་སེམས་དཔའི་ལྟུང་བ་ནི་ཕལ་ཆེར་ཞེ་སྡང་ལས་
བྱུང་གི་ཞེས་བཤད་པ་ལྟ་བུའོ། །དཀོན་མཆོག་གསུམ་གྱི་གདུང་ཡང་བསབས་པ་ཡིན། །ཞེས་བྱ་བ་ནི་བྱང་ཆུབ་ཏུ་སེམས་བསྐྱེད་པ་ལ་བརྟེན་ནས། བླ་ན་མེད་པའི་སངས་རྒྱས་སུ་གྲུབ་ན། དམ་པའི་ཆོས་འཆད་ཅིང་འཕགས་པའི་དགེ་འདུན་གྱི་ཚོགས་ཀྱང་སྡུད་པའི་དོན་
ཏོ། །མི་བཟད་པའི་ལས་བྱེད་ཅེས་བྱ་བ་ནི་སེམས་ཅན་ལ་རྡེག་པ་དང་འཆིང་བ་དང་། གོ་རར་འཇུག་པ་ལ་སོགས་པའི་གནོད་པའི་སྦྱོར་བས་ཐོ་འཚམ་པའོ། །ཐུབ་པ་གསོད་ཅེས་བྱ་བ་ནི་ལུས་དང་ངག་མི་དགེ་བ་ལས་སྡོམ་པའི་དྲང་སྲོང་རྣམས་སྲོག་དང་བྲལ་བར་བྱེད་པ་སྟེ། 
འདིར་ནི་འཇིག་རྟེན་པ་རྣམས་ལ་གོ་བར་བྱ་བའོ། །གཞན་ནི་བརྡ་ཕྲད་པར་ཟད་དོ། །ཕན་གནོད་བྱས་པའི་དགེ་སྡིག་མཐའ་མི་རྟོགས། །ཞེས་བྱ་བ་ནི། གང་ཞིག་དེ་འདྲའི་རྒྱལ་སྲས་སྦྱིན་བདག་ལ། །གལ་ཏེ་ངན་སེམས་སྐྱེད་པར་བྱེད་པ་སྟེ། །ངན་སེམས་བསྐྱེད་པའི་གྲངས་
བཞིན་བསྐལ་པར་ནི། །དམྱལ་བར་གནས་པར་འགྱུར་ཞེས་ཐུབ་པས་གསུངས། །འོན་ཏེ་གང་ཞིག་ཡིད་རབ་དང་བྱེད་ན། །དེ་ཡི་འབྲས་བུ་དེ་ལས་ལྷག་པར་འཕེལ། །ཞེས་བཤད་པའི་ཕྱིར་རོ། །ཕ་རོལ་དུ་ཡང་གྲུབ་མི་ཐོབ། །ཅེས་བྱ་བ་ནི་སེམས་ཅན་ལ་ཐོ་འཚམ་པའི་རྣམ་
པ་དེ་དག་གོང་མ་དག་པས་ལྕི་བར་བསྟན་པའི་དོན་ཏོ། །བདུད་ཀྱི་དགྲ་ཞེས་བྱ་བ་ནི་སངས་རྒྱས་དེ་བདུད་ནག་པོའི་ཕྱོགས་མེ་ཏོག་མདའ་ལ་སོགས་པས་དགྲར་བཟུང་བའི་ཕྱིར་རོ། །དེ་ཡང་ཉེ་བར་བསྟན་པར་ཟད་ཀྱི་དངོས་སུ་འཇིག་རྟེན་ལས་འདས་པའི་གསང་སྔགས་ཐམས་
ཅད་དང་། དཀོན་མཆོག་གསུམ་ལ་ཕུལ་བའི་མེ་ཏོག་ཀུན་ལ་གོ་བར་བྱའོ། །བཀྲེས་པས་གདུངས་ཀྱང་ཞེས་བྱ་བ་ནི་གོང་དུ། འབྱུང་པོའི་ཟས་དང་ལྷ་བཤོས་གཏོར་མ་དང་། །གུ་ལང་མཆོད་བྱས་གཏོར་མ་མི་བཟའོ། །ཞེས་བྱ་བ་ཉིད་ཀྱི་རྣམ་གྲངས་བསྟན་པའོ། །

71-1-89b

འཇིགས་ཀྱང་ཕྱག་མི་བྱ་ཞེས་བྱ་བ་ནི། །རྨོངས་པས་འཇིག་རྟེན་ལྷ་ཚོགས་ཕྱག་བྱས་ན། །དེ་དག་དེ་ལ་མི་དགར་གྱུར་ནས་སུ། །ཞེས་བྱ་བ་ཉིད་ཀྱི་རྣམ་གྲངས་རྒྱས་པར་འདིར་བསྟན་ཏོ། །དེ་རྣམས་ཆོས་ལ་ངན་སེམས་མི་བྱ་ཞིང་། ། ཞེས་བྱ་བ་ནི་རྣམ་པར་སྣང་མཛད་མངོན་
པར་རྫོགས་པར་བྱང་ཆུབ་པའི་རྒྱུད་ཆེན་པོ་ལས། ཇི་སྐད་དུ། གསང་བའི་བདག་པོ་འདི་ནི་བྱིས་པ་སོ་སོའི་སྐྱེ་བོ་འཁོར་བ་ན་ཀུན་དུ་འཁྱམས་པ་རྣམས་ཀྱི་དབུགས་འབྱིན་པའི་མཆོག་ཡིན་ཏེ་ཞེས་རྒྱ་ཆེར་གསུངས་པའི་ཕྱིར་རོ། །གཞན་ནི་གོ་བར་ཟད་དོ། །བདེ་བར་གཤེགས་
པ་ཀུན་གྱིས་བསྟེན་པའི་གནས། །ཞེས་བྱ་བ་ནི་རྡོ་རྗེའི་གདན་ལ་སོགས་པའི་མཆོད་རྟེན་བརྒྱད་དོ། །རྒྱལ་སྲས་རྣམས་ཞེས་བྱ་བ་ལ་སོགས་པས་ནི་བཀུར་སྟིའི་གནས་རྣམས་བརྗོད་པའོ། །དད་པས་རྒྱལ་བའི་ཐུགས་སྲས་ལ་ཕྱག་བྱའོ། །ཞེས་བྱ་བ་ནི་བྱང་ཆུབ་སེམས་དཔའ་
རྣམས་ཡོན་ཏན་ཕྱིར་ཞིང་སྐྱེས་ཏེ། དེ་ལས་སངས་རྒྱས་ཉིད་ཀྱི་གོ་འཕང་དུ་འབྱུང་བའི་ཕྱིར་རོ། །བདེ་བར་གཤེགས་པ་མིན་ཞེས་བྱ་བ་ནི་དགོངས་པའི་དོན་མི་ཤེས་པ་དག་ལྷག་མ་མེད་པའི་མྱ་ངན་ལས་འདའ་བར་འགྱུར་རོ་ཞེས། དེ་ལས་སྔ་མ་ལྷག་པར་ནན་ཏན་གྱིས་གུས་
པར་ཕྱག་མི་འཚལ་བ་དག་སྲིད་ཅེས་བྱ་བའི་ཐ་ཚིག་གོ། །དགོངས་པ་ནི་འདི་ཡིན་ཏེ། ལ་ལར་རྫོགས་པར་བྱང་ཆུབ་སྟོན། །ལ་ལར་མེད་བཞིན་མྱ་ངན་འདས། །ནམ་ཡང་མེད་པ་མ་ཡིན་ཏེ། །དེ་བཞིན་གཤེགས་པ་རྟག་པའི་སྐུ། ། ཞེས་ཇི་སྐད་བཤད་པའོ། །འཇིག་
རྟེན་ཀུན་གྱི་མངོན་མཐོའི་བསླབ་པ་ཅན། །ཞེས་བྱ་བ་ནི་སྡོམ་པ་ནོད་པ་ཉིད་ཀྱི་ཚེ་ན་ཇི་སྐད་དུ། དུས་འདི་ནས་བཟུང་ནས་ནམ་བྱང་ཆུབ་ཀྱི་སྙིང་པོ་ལ་གནས་ཀྱི་བར་དུ། སེམས་ཅན་ཐམས་ཅད་བསྒྲལ་བ་དང་། སེམས་ཅན་ཐམས་ཅད་སྒྲོལ་བ་དང་། སེམས་ཅན་ཐམས་ཅད་དབུགས་
དབྱུང་བ་དང་། སེམས་ཅན་ཐམས་ཅད་ཡོངས་སུ་མྱ་ངན་ལས་འདའ་བ་དང་། སེམས་ཅན་ཐམས་ཅད་ཐམས་ཅད་མཁྱེན་པའི་ཡེ་ཤེས་ལ་དགོད་པའི་སླད་དུ་ཞེས་སྡོམ་པ་བླངས་པའི་ཕྱིར་རོ། །སྙིང་རྗེའི་བདག་ཉིད་འགྲོ་བའི་དོན་དུ་ནི། །སྐྱེ་བ་ལེན་པ་ཞེས་བྱ་བ་ནི་སྐྱེ་བ་ལ་དབང་

71-1-90a

ཐོབ་ཀྱིས་ཀྱང་གང་དང་གང་དུ་སེམས་ཅན་གདུལ་བ་ཡོད་པ་དེ་དང་དེར་སྐྱེ་བ་ལེན་གྱི་ཞིང་དག་པ་དག་ཁོ་ནར་ངེས་པར་སྐྱེ་བ་མི་འཛིན་པའི་དོན་ཏོ། །སྐྱེས་བུ་བསམ་ཡས་ཞེས་བྱ་བ་ནི་རིག་པའི་གནས་ལྔ་ལ་འབྱམས་པས། བདག་གཞན་གྱི་དོན་ཕུན་སུམ་ཚོགས་
པར་སྒྲུབ་པའི་ཐ་ཚིག་གོ། །རྨད་བྱུང་རྫུ་འཕྲུལ་ཅན་ཞེས་བྱ་བ་ནི་ཉན་ཐོས་ལ་སོགས་པ་ལ་མེད་པའི་ཆོ་འཕྲུལ་སྣ་ཚོགས་སྟོན་པའི་ཚིག་གོ། །དེ་ལ་རྒྱལ་བ་ཐམས་ཅད་ཐུགས་བྱུང་ནས། །ཞེས་བྱ་བ་ནི་བྱང་ཆུབ་སེམས་དཔའ་ལ་མ་གུས་པའི་སྡིག་གི་མཐུ་ལས་བྱུང་བའི་
སྒྲིབ་པས་ཐུགས་རྗེས་བསྐྱང་བར་དགོངས་པ་ལས། སྤྱན་རས་ཀྱིས་འཚོ་བའི་སྐལ་བ་མེད་པར་གྱུར་པ་སྟེ། ཇི་སྐད་དུ། ཇི་ལྟར་ཉི་མའི་འོད་ཟེར་རྣམས། །སྤྲིན་ལ་སོགས་པས་བསྒྲིབ་པར་འདོད། །དེ་བཞིན་སངས་རྒྱས་ཡེ་ཤེས་རྣམས། །སེམས་ཅན་གྱི་ནི་ཉེས་པས་
བསྒྲིབས། །ཞེས་བཤད་པའི་ཕྱིར་རོ། །གཞན་ནི་གོ་བར་ཟད་དོ། །ཁྲོ་ལ་ཁྲོ་བ་དང་ཞེས་བྱ་བ་ནི་ཁྲོ་བོས་འདུལ་བ་རྣམས་ལ་འཕགས་པ་བདུད་རྩི་ཐབ་སྦྱོར་ལ་སོགས་པས་ཁྲོ་བོའི་ཚུལ་གྱིས་སེམས་ཅན་རྣམས་ཀྱི་དོན་མཛད་པའོ། །འདོད་ཆགས་ཅན་ལ་ཆགས་
ཅན་ལྟར་སྟོན་པ། །ཞེས་བྱ་བ་ནི་ཟང་ཟིང་ལ་ཆགས་ཏེ་ཁྱིམ་གྱི་གནས་ནས་འཕགས་མི་ནུས་པ་རྣམས་གདུལ་བའི་དོན་དུ་ནི་འཕགས་པ་དྲི་མ་མེད་པར་གྲགས་པ་ལ་སོགས་པ་བཙུན་མོའི་འཁོར་དང་བཅས་པ་ལྟ་བུར་སྟོན་པའོ། །བྱང་ཆུབ་མཆོག་གནས་ཞེས་བྱ་བ་ནི་དོན་
དམ་པའི་རྟོག་པས་ཆོས་ཀྱི་དབྱིངས་ལ་གནས་པའི་ཕྱིར་རོ། །ལས་དང་རྣམ་སྨིན་མཁྱེན་པ་ཡིས། །ཞེས་བྱ་བ་ནི་ཁམས་དང་བག་ལ་ཉལ་རྫོགས་པས་ཀུན་བརྗོད་པའི་ཆོ་འཕྲུལ་སྟོན་པའི་དོན་ཏོ། །འགྲོ་བ་ཀུན་དང་ཇི་ལྟར་མཐུན་པ་ཡི། །གསང་སྔགས་གཟུགས་ཀྱི་རྗེས་སུ་
ཆགས་མཛད་པ། །ཞེས་བྱ་བ་ནི་ཁྲོ་བོ་དང་ཞི་བ་ལ་སོགས་པའི་གཟུགས་ཐ་དད་པ་རྣམས་ཀྱིས་གདུལ་བྱའི་འགྲོ་བ་རྣམས་ཡིད་མགུ་བར་བྱེད་པའི་སྒོ་ནས། རྫུ་འཕྲུལ་གྱི་ཆོ་འཕྲུལ་སྟོན་ཞེས་བྱ་བའི་ཐ་ཚིག་གོ། །སྔགས་ཀྱིས་རྣམ་འདྲེན་ཞེས་བྱ་བ་ནི་གསང་སྔགས་ཀྱི་

71-1-90b

རང་བཞིན་རྣམ་པ་དྲུག་ཏུ་ཕྱེ་སྟེ། རྗེས་སུ་བསྟན་པས། མངོན་པར་མཐོ་བ་དང་ངེས་པར་ལེགས་པ་ལ་སེམས་ཅན་རྣམས་བཀོད་པའི་ཕྱིར་རྗེས་སུ་བསྟན་པའི་ཆོ་འཕྲུལ་སྟོན་པའི་དོན་ཏོ། །ལེའུ་དགུ་པའི་དོན་བཤད་ཟིན་ཏོ།།      །།གསང་སྔགས་རིག་སྔགས་རྣམ་པ་
སྣ་ཚོགས་དག །ཅེས་བྱ་བ་ནི་གཙུག་ཏོར་རྣམས་དང་ཡུམ་རྣམས་དང་། ཁྲོ་བོ་རྣམས་དང་དེ་བཞིན་ཁྲོ་མོ་དང་། ཕྱག་བརྙན་ལ་སོགས་པ་དང་། གཞན་ཡང་དེ་བཞིན་གཤེགས་པའི་རིགས་སུ་བསྡུ་བའི་བྱང་ཆུབ་སེམས་དཔའ་རྣམས་དང་། གནས་གཙང་མའི་ལྷ་
རྣམས་སུ་རྣམ་གྲངས་དུ་མར་ཕྱེ་བ་དག་གོ། །བྱེ་བ་ཕྲག་གསུམ་དང་ནི་འབུམ་ཕྲག་ལྔ། །ཞེས་བྱ་བ་ནི་ཤློ་ཀའི་གྲངས་སོ། །རིག་འཛིན་གྱི་སྡེ་སྣོད་ཅེས་བྱ་བ་ནི་རིག་སྔགས་འཆང་རྣམས་ཀྱི་བསླབ་པའི་གཞི་དང་། ལྟ་བའི་ཀླུང་གིས་གྲུབ་པའི་མཐའ་འདི་ཉིད་ཀྱིས་སྟོན་པའི་དོན་
ཏོ། །རྒྱལ་བས་གསུངས་ཞེས་བྱ་བ་ནི་དེ་བཞིན་གཤེགས་པའི་རིགས་ཀྱི་དབང་དུ་མཛད་ནས་བཀའ་སྩལ་པའོ། །ངས་ནི་ཞེས་བྱ་བ་ནི་ཕྱག་ན་རྡོ་རྗེས་གསུངས་པ་རྣམས་སོ། །གསང་བ་པ་རྣམས་གཞོམ་པ་ཞེས་བྱ་བ་ནི་དེས་ཁྱད་པར་དུ་གནོད་སྦྱིན་ལ་སོགས་པ་གདུལ་བར་བསྟན་
ཏོ། །དབུལ་བའི་སྡུག་བསྔལ་སེལ་ཞེས་བྱ་བ་ནི་ལྷ་མ་ཡིན་གྱི་དཔལ་གྱི་སྒོ་འབྱེད་པ་དང་། གཏེར་དབྱུང་བའི་ཆོ་ག་ལ་སོགས་པས་སེམས་ཅན་རྣམས་ལ་ཕན་འདོགས་པའི་དོན་ཏོ། །ཕོ་ཉ་མོ་བཅུ་ཞེས་བྱ་བ་ནི་རིག་པ་མཆོག་གི་རྒྱུད་ཆེན་པོ་ལས། རྡོ་རྗེའི་བློ་གྲོས་མ་དང་། དྲིལ་བུ་
མ་དང་། ནག་མོ་དང་། གཞན་གྱིས་མི་ཐུབ་མ་དང་། མཛེས་མ་དང་། ཤུགས་དང་། ཐོག་ཐག་དང་། བདེན་མ་དང་། ཉི་མ་དང་། རྡོ་རྗེའི་དབྱུག་པ་མ་ཞེས་འབྱུང་བ་དག་གོ། །རིག་པའི་རྒྱལ་པོ་བདུན་ཞེས་བྱ་བ་ནི་ཕྱག་ན་རྡོ་རྗེ་དབང་བསྐུར་བའི་རྒྱུད་ཆེན་པོ་ལས། རབ་ཏུ་གྲུབ་
པ་དང་། དབུ་རྒྱན་རྩེ་གསུམ་དང་། བཛྲ་ཀི་ལི་ཀི་ལ་དང་། རིན་ཆེན་ཀི་ལི་ཀི་ལ་དང་། གཟུགས་ལེགས་དང་། རྡོ་རྗེའི་ཐིགས་པ་དང་། རྡོ་རྗེའི་རོལ་པའོ། །དེ་བཞིན་ཕྱག་བརྙན་དྲུག་ཅུ་རྩ་བཞི་དང་། ཞེས་བྱ་བ་ནི་རིག་པ་མཆོག་གི་རྒྱུད་ཆེན་པོ་ལས། རྡོ་རྗེའི་ལྟ་བ་ལ་

71-1-91a

སོགས་པ་འབྱུང་བ་རྣམས་ཏེ། དངོས་སུ་ཕོ་ཉ་མོ་བཅུའི་ཕྱག་བརྙན་ཡིན་ནོ། །ང་ཡི་སྙིང་པོ་དམ་པ་བརྒྱད་རྣམས་དང་། ཞེས་བྱ་བ་ནི་འཕགས་པ་སྟོབས་པོ་ཆེའི་ཆོ་ག་ཞིབ་མོ་དང་། རྣམ་པར་རྒྱལ་བའི་རྒྱུད་ཆེན་པོ་ལས། ཇི་སྐད་དུ། སྙིང་པོ་ནི་ཀི་ལི་ཀི་ལ་
དང་། འགྲོ་ལྡིང་དང་། ལུས་དམར་དང་། རྡོ་རྗེ་རྣམ་པར་འཇོམས་པ་དང་། རྡོ་རྗེ་རྒྱ་ཆེན་དང་། སྙིང་པོའི་མཆོག་དང་། སོག་མེད་གཏུམ་པོ་དང་། དཔལ་ལྡན་ཞི་བར་གྲགས་པ་ཞེས་བྱ་བ་དག་སྟེ། ལྷ་དེ་རྣམས་ནི་ཕྱག་ན་རྡོ་རྗེའི་ཐུགས་ཀྱི་ཡོན་ཏན་གྱི་ཁྱད་པར་ལས་བརྒྱད་དུ་ཕྱེ་བར་
རིག་པར་བྱའོ། །ཁྲོ་བོ་དྲག་པོ་ཞེས་བྱ་བ་ནི་རིག་པ་མཆོག་གི་རྒྱུད་ཆེན་པོ་ལས། ཚོགས་བརྒྱད་བཤད་པ་དག་སྟེ། བདུད་རྩི་ཐབ་སྦྱོར་དང་། རྨུགས་བྱེད་དང་། རྫོང་ལྡན་དང་། མཚན་སྦྱིན་དང་། ལྕགས་ཅན་དང་། སོ་ཅན་དང་། གསར་ཅན་དང་། གཏུམ་བྱེད་དག་གོ། །
རིག་པ་མཆོག་ལ་སོགས་པ་མཐུ་བོ་ཆེ་རིག་པའི་བདག་པོ་ཞེས་བྱ་བ་ནི་ཕྱག་ན་རྡོ་རྗེ་དབང་བསྐུར་བའི་རྒྱུད་ཆེན་པོ་ལས། རིག་པའི་རྒྱལ་པོ་གཞན་བསྟན་ཏེ། རིག་པ་མཆོག་དང་། གླང་པོའི་རྣ་བ་དང་། གནོད་མཛེས་དང་། བསྡིགས་སུ་རུང་བ་དང་། འཕྲོག་བྱེད་དང་། རྡོ་རྗེའི་ཞགས་
པ་དག་གོ། །གསང་སྔགས་རྗེས་སུ་འབྲང་བཅས་ཞེས་བྱ་བ་ནི་རིག་པའི་རྒྱལ་པོ་རྣམས་ཀྱི་རྗེས་སུ་འབྲང་བའི་ལྷའི་བྱེ་བྲག་མང་པོར་བསྟན་པ་རྣམས་སོ། །དེ་ཡི་རིག་སྔགས་བདག་པོ་རྟ་མགྲིན་དང་། །ཞེས་བྱ་བ་ནི་པདྨའི་རིགས་ཀྱི་གསང་སྔགས་ཐམས་ཅད་ཀྱི་རྒྱལ་པོ་ཡིན་པའི་དོན་ཏོ། །
དེ་ཡི་མིང་ཅན་དཀྱིལ་འཁོར་ཞེས་བྱ་བ་ནི་དཔལ་རྟ་མགྲིན་པདྨའི་རིགས་ཀྱི་རིག་པའི་རྒྱལ་པོ་ཡིན་པས། དཔལ་སྡོམ་གྱི་རྒྱུད་ལ་སོགས་པ་ལས། རབ་ཏུ་གནས་པའི་དཀྱིལ་འཁོར་འབྱུང་ངོ་ཅོག་ལ་དེའི་མིང་ཅན་ཞེས་གདགས་ཏེ། འཕགས་པ་རྟ་མགྲིན་ཉིད་ཀྱི་ཁྱད་པར་གྱི་
དཀྱིལ་འཁོར་འབའ་ཞིག་ལ་གདམས་པ་ནི་མ་ཡིན་ནོ། །དོན་ཡོད་ཞགས་པ་བདུན་བསྟན་པ། །ཞེས་བྱ་བ་ནི་བཤད་མ་ཐག་པའི་དོན་ཡོད་པའི་ཞགས་པ་དྲུག་དང་དཔལ་རྟ་མགྲིན་དང་བདུན་ནོ། །ཉི་མ་བདུན་ལྟར་འབར་ཞེས་བྱ་བའི་དཔེས་ནི་སྒྲུབ་པ་པོའི་ལས་དང་ཉོན་མོངས་པ་ཐམས་ཅད་

71-1-91b

བསྲེག་ཅིང་མངོན་པར་མཐོ་བའི་དཔལ་ཡང་འབར་བར་བྱེད་པའི་དོན་ཏོ། །དེ་རྣམས་རྟ་མགྲིན་དཀྱིལ་འཁོར་གསང་སྔགས་ཏེ། །ཞེས་བྱ་བ་ནི་རིག་པའི་རྒྱལ་པོ་ཡིན་པས། དེ་དག་གི་དཀྱིལ་འཁོར་ལ་ཡང་དབང་བསྒྱུར་བར་བསྟན་ཏོ། །མི་ལ་མཆོག་སྦྱིན་ཞེས་བྱ་བ་ནི་དམ་པ་བརྒྱད་ལ་
སོགས་པ་སྟེར་བའི་དོན་ཏོ། །འཇིག་རྟེན་གསུམ་གྱིས་འདུད་ཅེས་བྱ་བ་ནི་ལྷའི་རིགས་དང་མིའི་རིགས་དང་། ཀླུའི་རིགས་རྣམས་ཀྱིས་མཆོད་གནས་སུ་གྱུར་ཅེས་བྱ་བའི་ཐ་ཚིག་གོ། །སྒྲོལ་མ་ཞེས་བྱ་བ་ལ་སོགས་པ་ནི་པདྨའི་རིགས་ཀྱི་ཡུམ་བརྒྱད་ཡོད་པར་བསྟན་པའོ། །དེ་དག་
དཀྱིལ་འཁོར་ཞེས་བྱ་བ་ནི་ཡུམ་དེ་རྣམས་ཀྱི་དཀྱིལ་འཁོར་ཞེས་བྱ་བའི་ཐ་ཚིག་གོ། །སྣ་ཚོགས་གཟུགས་ཅན་ཞེས་བྱ་བ་ནི་དཀྱིལ་འཁོར་གྱི་ཚུལ་ཐ་དད་པ་དང་། འཁོར་སྣ་མང་བར་བསྟན་ཏོ། །ཕྱག་རྒྱ་རྣམ་པ་སྣ་ཚོགས་རྣམས་དང་ལྡན། །ཞེས་བྱ་བ་ནི་ལས་ཀྱི་བྱེ་བྲག་གིས་
ལྷ་རེ་རེ་ལ་ཡང་ཕྱག་རྒྱ་དུ་མ་དང་བཅས་པའི་ཕྱིར་རོ། །རྒྱས་པའི་གསང་སྔགས་རྒྱུད་དུ་ཞེས་བྱ་བ་ནི་རིགས་བཞི་པར་བསྟན་པའོ། །འོག་པག་ཅན། རིག་པའི་དབང་ཕྱུག་གསང་སྔགས་བདག་མོར་གསུངས། །ཞེས་བྱ་བ་ནི་རིགས་བཞི་པ་འདིས་གསང་སྔགས་ཐམས་ཅད་ལ་
དབང་བསྒྱུར་བར་སྟན་ཏོ། །དངོས་སུ་ལྔས་རྩེན་གྱི་བཙུན་མོ་འཕྲོག་མ་ཡིན་ནོ། །དེ་ལ་ལྔས་རྩེན་ཡང་ནི་མངོན་པར་དགའ། །ཞེས་བྱ་བ་ནི་རིགས་ཀྱི་བདག་པོས་དེ་རྒྱལ་མོར་བསྒོ་བར་དགའ་བའི་དོན་ཏོ། །གནོད་སྦྱིན་དབང་ཕྱུག་ཅེས་བྱ་བ་ནི་རྒྱས་པའི་རིགས་ལ་གཏོགས་པའི་
གནོད་སྦྱིན་གྱི་སྡེ་དཔོན་རྣམས་སོ། །དེ་དང་རྟག་ཏུ་མཐུན་པ་ཞེས་བྱ་བ་ནི་ལྔས་རྩེན་དང་གནོད་སྦྱིན་གྱི་གཙོ་བོ་རྣམས་བློ་མཐུན་པས། འོག་པག་ཅན་འདིས་རྒྱས་པའི་རིགས་ཀྱི་གསང་སྔགས་ཀྱི་བདག་མོར་དབང་བསྐུར་བའི་དོན་ཏོ། །དེ་ཡི་བཀའ་ཡིས་གསང་སྔགས་ཚོགས་
རྣམས་བཤད། །ཅེས་བྱ་བ་ནི་འོག་པག་ཅན་རྒྱས་པའི་རིགས་ཀྱི་རྒྱུད་རྣམས་བཤད་ཅེས་བྱ་བའི་ཐ་ཚིག་གོ། །ལྔས་རྩེན་གྱིས་ནི་སྟོང་ཕྲག་ཉི་ཤུ་སྟེ། །ཞེས་བྱ་བ་ནི་རྒྱས་པའི་རིགས་ལ་ལྔས་རྩེན་གྱི་རྒྱུད་དུ་གྲགས་པ་ནི་ཤློ་ཀ་ཉི་ཁྲིའོ། །དེ་ཡི་ཆུང་མ་ཞེས་བྱ་བ་ནི་འཕྲོག་མ་ཉིད་དེ། དེའི་ཕྱེད་

71-1-92a

བཤད་དོ་ཞེས་བྱ་བ་ནི་ཤློ་ཀ་ཁྲི་བཤད་པའི་དོན་ཏོ། །ནོར་གྱི་བདག་པོ་ཞེས་བྱ་བ་ནི་རིགས་ལྔ་པ་ནོར་བུའི་རིགས་བསྟན་པ་སྟེ། དངོས་སུ་དཔལ་ནོར་བུ་བཟང་པོའོ། །སྟོང་ཕྲག་སུམ་ཅུ་ཞེས་བྱ་བ་ནི་ནོར་བུའི་རིགས་ལ་དཔལ་ནོར་བུ་བཟང་པོའི་རྒྱུད་དུ་གྲགས་པ་ནི་ཤློ་ཀ་སུམ་ཁྲི་བཤད་པར་བསྟན་ཏོ། །གང་པོའི་
ཕ་ཞེས་བྱ་བ་ནི་ལྷའི་དྲང་སྲོང་རྣམ་ཐོས་ཞེས་བྱ་བ་ཡིན་ནོ། །ལྷ་དང་ལྷ་མི་ལ་སོགས་རྒྱལ་བ་ལ། །དད་པ་རྣམས་ཀྱིས་གསང་སྔགས་མཐའ་ཡས་བཤད། །ཅེས་བྱ་བ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་སྤྱན་སྔར་གནང་ཞིང་རྗེས་སུ་ཐུགས་རངས་ནས་སོ་སོ་
ནས་བཤད་པའོ། །གཞན་ཡང་ཁ་ཅིག་གནས་མེད་རྣམ་པར་འཁྱམ། །ཞེས་བྱ་བ་ནི་ཕ་རོལ་ཏུ་ཕྱིན་པས་བསྐྱེད་པའི་རིགས་བཞི་པོ་དེ་དག་གི་བགབ་ཏུ་མ་བསྡུས་པའོ། །གཞན་ནི་གོ་བར་ཟད་དོ། །ངས་བཤད་གང་ཡིན་དེ་ཞེས་བྱ་བ་ནི་འཇིག་རྟེན་པའི་རིགས་རྒྱལ་བ་ལ་
དད་པ་རྣམས་སོ། །བཞི་པོ་འདི་དག་རྣམ་པར་སྦྱང་བར་བྱ། །ཞེས་བྱ་བ་ནི་དེ་དག་གི་རིགས་བཞི་པོའི་བགབ་ཏུ་ཕལ་ཆེར་འདུས་པར་བསྟན་ཏོ། །གང་གཞན་ལ་ལ་འདི་ན་གནས་མེད་པར། །ཞེས་བྱ་བ་ནི་རིགས་བཞིར་མ་བསྡུས་པ་རྣམས་སོ། །བདེ་བར་གཤེགས་ལ་བརྟེན་
ཞེས་བྱ་བ་ནི་དད་པས་སངས་རྒྱས་ཀྱི་སྤྱན་སྔར་སོ་སོའི་ཆོ་ག་ཞིབ་མོ་བཤད་པའོ། །ཡོངས་འཁྱམ་པ་ཞེས་བྱ་བ་ནི་དེ་དག་རིགས་ལྔ་ཆར་གྱིས་མ་བསྡུས་པའི་དོན་ཏོ། །དེ་བཞིན་གཤེགས་པའི་རིགས་སུ་མ་བསྡུས་སམ་ཞེ་ན། དེའི་རིགས་སུ་གཏོགས་པ་ནི་གཙུག་ཏོར་ལ་སོགས་
པ་ཡེ་ཤེས་ལས་བྱུང་བ་ཡིན་ལ། འདི་དག་ནི་རྣམ་པར་སྨིན་པས་བསྐྱེད་པའི་ཕྱིར་རོ། །མདོ་སྡེ་འདིར་ནི་ཞེས་བྱ་བ་ནི་དཔུང་བཟངས་ཀྱིས་ཞུས་པའི་རྒྱུད་འདིར་ཞེས་བྱ་བའི་དོན་ཏོ། །དེ་དག་ཐམས་ཅད་ཀྱང་ཞེས་བྱ་བ་ནི་འཕགས་པའི་རིགས་ལྔ་དང་། འཇིག་རྟེན་པའི་རིགས་
དང་དྲུག་ཅར་རོ། །རྣམ་པར་སྦྱང་ཞེས་བྱ་བ་ནི་རྒྱུད་འདི་ཆོ་ག་ཐམས་ཅད་ལ་སྦྱར་བར་བསྟན་ཏོ། །སྲིད་པ་གསུམ་ཞེས་བྱ་བ་ནི་འདོད་པ་དང་གཟུགས་དང་གཟུགས་མེད་པའོ། །རྒྱལ་བཞེས་བྱ་བ་ནི་སངས་རྒྱས་སོ། །དཀོན་པ་ཞེས་བྱ་བ་ནི་ཨུ་དུམྺཱ་རའི་མེ་ཏོག་དང་འདྲ་བའི་དོན་

71-1-92b

ཏོ། །མཆོག་ཅེས་བྱ་བ་ནི་ཡིད་བཞིན་གྱི་ནོར་བུ་ལྟར་དེ་དང་ཡོན་ཏན་མཉམ་པ་མེད་པའི་ཕྱིར་རོ། །དེ་ཡི་འོག་ཏུ་དེ་ལས་བྱུང་བའི་ཆོས། །ཞེས་བྱ་བ་ནི་རང་གི་དོན་དུ་རྟོགས་པའི་ཆོས་ཐུགས་སུ་ཆུད་པ་དང་། གཞན་གྱི་དོན་དུ་ལུང་གི་ཆོས་ངེས་པར་བསྟན་པ་རྣམས་སོ། །དེའི་དགེ་
འདུན་ཞེས་བྱ་བ་ནི་སངས་རྒྱས་ཀྱི་བསྟན་པ་ལ་རབ་ཏུ་བྱུང་བའི་འཕགས་པ་ཉན་ཐོས་རྣམས་སོ། །སྐྱེས་ཆེན་བརྒྱད་པོ་ཞེས་བྱ་བ་ནི་རྒྱུན་དུ་ཞུགས་པ་ལ་སོགས་པ་ཟུང་བཞི་ཡ་བརྒྱད་དོ། །སྲིད་པ་གསུམ་ན་དཀོན་མཆོག་གསུམ་པོ་གཙོ། །ཞེས་བྱ་བ་ནི་ཁམས་གསུམ་
པ་ཐམས་ཅད་ཀྱིས་མཆོད་ཅིང་བཀུར་སྟི་བྱ་བའི་འོས་བླ་ན་མེད་པར་བསྟན་ཏོ། །གཞན་ནི་གོ་བར་ཟད་དོ། །བདེ་བར་གཤེགས་པ་མིན་ཞེས་བྱ་བ་ནི་ཐེག་པ་ཆེན་པོ་ལ་མི་ཕྱོགས་པ་རྣམས་སོ། །ཉན་ཐོས་དང་རང་སངས་རྒྱས་རྣམས་ཀྱི་ལམ་ལ་གནས་པ་དང་ཞེས་བྱ་བ་ནི་ཐེག་
པ་དམན་པ་ལ་ཕྱོགས་པའོ། །དད་པ་མེད་ཅིང་ཞེས་བྱ་བ་ནི་གསང་སྔགས་ཀྱི་ཕྱོགས་ལ་མ་དད་པའོ། །ཚུལ་འཆོས་ཞེས་བྱ་བ་ནི་གཞན་ལ་སླུ་བའི་བསམ་པས་གསང་སྔགས་སྒོ་ནས་ཐེག་པ་ཆེན་པོ་ལ་དད་པ་ལྟར་སྤྱོད་ལམ་བསྒྱུར་བའོ། །འཇུངས་པ་ཞེས་
བྱ་བ་ནི་སེར་སྣས་ཀུན་ནས་དཀྲིས་པའོ། །གཞན་ནི་གོ་སླ་བས་མ་ཕྱེའོ། །གང་གི་ང་ཡི་རྗེས་སུ་འབྲང་བའི་གདོན། །འབྱུང་པོ་ཀླུ་དང་གནོད་སྦྱིན་ཤ་ཟ་ཡི། །ཞེས་བྱ་བ་ནི་རྣམ་པར་སྨིན་པས་བསྐྱེད་པའི་འཇིག་རྟེན་ལས་མ་འདས་པ་དེ་དག་ཕྱག་ན་རྡོ་རྗེའི་བྱིན་གྱི་རླབས་ཀྱིས་
བཏུལ་ནས། སོ་སོ་ནས་དམ་ཚིག་ཕུལ་ཏེ་རྡོ་རྗེའི་རིགས་སུ་བསྡུས་པ་རྣམས་སོ། །ང་ཡི་སྔགས་ཟློས་རྡོ་རྗེ་ཐོགས་པ་དང་། །ཞེས་བྱ་བ་ནི་བཤད་མ་ཐག་པའི་སྣོད་དུ་མ་གྱུར་པ་རྣམས་སོ། །ཕུང་བར་བྱེད་ཅེས་བྱ་བ་ནི་གསོད་པའམ་རིགས་ཀྱང་རླག་པར་བྱེད་ཅེས་བྱ་བའི་ཐ་ཚིག་གོ། །
ཐེག་པ་མཆོག་ཅེས་བྱ་བ་ནི་ཐེག་པ་ཆེན་པོ་སྟེ། དེའི་བླ་མར་གྱུར་པ་གཞན་མེད་པའི་ཕྱིར་རོ། །རྒྱ་ཆེན་ཞེས་བྱ་བ་ནི་ཐེག་པ་གཞན་ལས་ཁྱད་པར་དུ་དམིགས་པ་ལ་སོགས་པ་ཁྱད་ཞུགས་པར་ཆེ་བའི་ཕྱིར་རོ། །བརྩོན་འགྲུས་ཆེ་ཞིང་ཞེས་བྱ་བ་ནི་བདག་དང་གཞན་གྱི་དོན་དུ་བརྩོན་པའི

71-1-93a

དོན་ཏོ། །བྱང་ཆུབ་ཀྱི་སེམས་བརྟན་པ་ཞེས་བྱ་བ་ནི་བརྩོན་འགྲུས་དང་ཏིང་ངེ་འཛིན་དང་། ཤེས་རབ་མཚུངས་པར་ལྡན་པས་བྱང་ཆུབ་ཀྱི་སེམས་གཟུང་བའི་ཐ་ཚིག་གོ། །སངས་རྒྱས་པའི་གསང་སྔགས་ཞེས་བྱ་བ་ནི་རིགས་ལྔས་བསྡུས་པའོ། །ཡངས་ཤིང་
ཞེས་བྱ་བ་ནི་སྒོ་མང་པོ་ནས་དྲངས་པའི་དོན་ཏོ། །རྒྱ་ཆེན་བཤད་པ་ཞེས་བྱ་བ་ནི་འབྲས་བུ་ཆེན་པོ་དང་ལྡན་པ་ཞེས་བྱ་བའི་ཐ་ཚིག་གོ། །དེ་ནས་ཞེས་བྱ་བ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་འདུལ་བའི་སྐྱེ་བོ་རྣམས་ཀྱི་ངོར། འཇིག་རྟེན་ལས་འདས་པའི་གསང་སྔགས་
རྣམས་ཀྱི་རྒྱུད་གཙོར་བཤད་པའི་སྐབས་ནས་གླེངས་པའི་དེ་མ་ཐག་པའོ། །གཞན་ཡང་འཇིག་རྟེན་པ་བསྡུས་ནས་ཞར་ལ་བཤད་པ་འདི་དག་ཅེས་བྱ་བ་ནི་འཇིག་རྟེན་ལས་འདས་པའི་རྒྱུད་ཀྱི་སྡོམ་བཤད་པའི་ཟླ་བ་གླེངས་ཞེས་བྱ་བའི་ཐ་ཚིག་གོ། །དྲག་པོ་ཞེས་བྱ་བ་ནི་ལྷ་ཆེན་པོའི་
མིང་གི་རྣམ་གྲངས་སོ། །ནོར་ལྷའི་བུ་ཞེས་བྱ་བ་ནི་ཁྱབ་འཇུག་གི་རྣམ་གྲངས་སོ། །གཏུམ་བྱེད་མ་ཞེས་བྱ་བ་ནི་འཇིག་རྟེན་པའི་རིག་སྔགས་ཀྱི་ལྷ་མོ་སྐལ་ལྡན་མ་ཞེས་བརྗོད་པ་སྟེ། མཁའ་འགྲོ་རྣམས་ཀྱི་ལྷ་ཞེས་ཀྱང་གྲག་གོ། །ཕུར་བུ་གསུམ་པ་ཞེས་བྱ་བ་ནི་གདོལ་པའི་རྒྱལ་པོའོ། །
མཚན་མོ་རྒྱུ་བའི་དབང་པོ་ཞེས་བྱ་བ་ནི་གནོད་སྦྱིན་གྱི་སྡེ་དཔོན་རྣམས་སོ། །འཇིག་རྟེན་བདག་པོ་བཞི་ཞེས་བྱ་བ་ནི་རྒྱལ་པོ་ཆེན་པོ་རྣམས་སོ། །ལྷའི་དབང་པོ་ཞེས་བྱ་བ་ནི་བརྒྱ་བྱིན་ནོ། །རང་སྔགས་མདོ་སྡེའི་རྗེས་འབྲངས་ཞེས་བྱ་བ་ནི་སོ་སོའི་ཚུལ་མ་ཉམས་པ་སྟེ། གཞན་གྱི་ཆོ་
ག་དང་མ་བསྲེས་ཞེས་བྱ་བའི་ཐ་ཚིག་གོ། །དད་པ་སྐྱེད་ཅེས་བྱ་བ་ནི་སོ་སོའི་ལྷ་དེ་དག་ལ་དང་བས་ཐེ་ཚོམ་མེད་པར་སྒྲུབ་པའོ། །དེ་ལས་བཟློག་ན་དངོས་གྲུབ་མི་ཐོབ་ལ། །ཞེས་བྱ་བ་ནི་སོ་སོའི་ཆོ་ག་དང་འགལ་བར་བསྒྲུབ་པ་དང་། ལྷ་དེ་དག་ཉིད་ལ་མ་དད་པ་རྣམས་སོ། །སྡུག་བསྔལ་
མང་པོ་ཡང་ནི་ཐོབ་པར་འགྱུར། །ཞེས་བྱ་བ་ནི་བཟླས་བརྗོད་ལ་སོགས་པའི་ལས་ཆེན་པོ་ནི་བྱས་ལ། འབྲས་བུ་མི་ཐོབ་པའམ། ཡང་ན་དེ་དག་འཁྲུགས་ནས་ཉེན་དུ་གྱུར་པའི་དོན་ཏོ། །ལེའུ་བཅུ་པའི་དོན་བཤད་ཟིན་ཏོ།།      །།བཅུད་ལེན་ཞེས་བྱ་བ་ནི་སྨན་བཅུད་ལེན་ཏེ། དེ་ཡང་

71-1-93b

ཁམས་ལས་བྱུང་བ་དང་། རྩ་ལས་བྱུང་བ་དང་། སྲོག་ཆགས་ཀྱི་ལུས་ལས་བྱུང་བ་དང་། ལྡེ་གུ་དང་རྣམ་པ་བཞིའོ། །དེ་དག་གི་ཕན་ཡོན་ནི་ཚེ་རིང་བ་དང་། ནད་མེད་པ་དང་། དབང་པོ་རྣོ་བ་དང་། སླར་གཞོན་ནུར་གྱུར་པ་སྟེ། དེ་ཡང་གསང་སྔགས་མཉེས་པའི་སྒོ་ནས། བཅུད
ལེན་གྱི་མཐུ་འགྲུབ་ཀྱིས་སྐལ་བ་མེད་པ་རྣམས་ལ་ནི་མ་ཡིན་ཏེ། རྡོ་རྗེ་གཙུག་ཏོར་གྱི་རྒྱུད་ལས་ཀྱང་། ཇི་སྐད་དུ། སྨན་གྱི་ཡང་ནི་ལུས་ཅན་ལ། །ཉེ་བར་གྱུར་དང་སྔགས་གྲུབ་པས། །དབང་དུ་གྱུར་པར་རྟག་པར་རོ། །ཞེས་གསུངས་པའི་ཕྱིར་རོ། །ལྷ་དང་མིའི་གཏེར་
ཞེས་བྱ་བ་ནི་ས་ལ་ཡོད་དོ། །དེ་ལ་ལྷའི་གཏེར་ཁ་གབ་ཡོད་དེ། དེ་ཕྱེ་ན་རི་ལུ་དང་ལིག་བུ་མིག་དང་མཆིལ་ལྷམ་དང་གླེགས་བམ་དག་འབྱུང་སྟེ། དེ་དག་གི་ཕན་ཡོན་ནི་ནམ་མཁའ་ལ་འགྲོ་བ་དང་། ལུས་མི་སྣང་བར་འགྱུར་བ་དང་། རྐང་པས་མགྱོགས་པ་དང་། བསྟན་བཅོས་
ཐམས་ཅད་ལ་ཐོགས་པ་མེད་པའི་བློ་དང་ལྡན་པར་འགྱུར་རོ། །མིའི་གཏེར་ནི་གསེར་དང་དངུལ་དང་རིན་པོ་ཆེ་སྣ་ཚོགས་དག་འབྱུང་བའོ། །ལྷ་མ་ཡིན་གྱི་ཕུག་ཏུ་འགྲོ་བ་ཞེས་བྱ་བ་ནི་དཔལ་གྱི་སྒོ་དང་སླས་ཀྱི་སྒོ་ནས་འགྲོ་སྟེ། དེ་ལ་དཔལ་གྱི་ཕུག་གི་སྒོ་དབྱེ་བ་ནི་ལྷའི་གཏེར་གྱི་དངོས་
གྲུབ་རྣམས་ལས་གང་ཡང་རུང་བ་ཅིག་ཐོབ་པར་འགྱུར་རོ། །སླས་ཀྱི་ཕུག་གི་སྒོ་དབྱེ་ན་ནི་ལྷ་མ་ཡིན་གྱི་བུ་མོ་དང་ཕྲད་དེ། ལྷ་མ་ཡིན་གྱི་གནས་སུ་ཁྲིད་ནས་དེ་དག་དང་འཚོ་ཞིང་བསྐལ་པར་གནས་པར་འགྱུར་རོ། །ནོར་རྒྱུན་མ་ཞེས་བྱ་བ་ནི་སྨན་སྣ་ཚོགས་བསྡུས་ནས་རོ་ཉེ་ལ་སོགས་པ་
ལས་སེར་དངུལ་དུ་བྱེད་པའོ། །འབྱུང་ཁུངས་ཞེས་བྱ་བ་ནི་གསེར་དངུལ་ལ་སོགས་པའི་ཁྲོན་ཕྱིན་པའོ། །གསང་སྔགས་ཀྱི་དངོས་གྲུབ་ཅེས་བྱ་བ་ནི་འཇིག་རྟེན་ལས་འདས་པ་དང་། འཇིག་རྟེན་པའི་ལྷ་མཉེས་པ་ཐོབ་པའོ། །གསེར་སྒྱུར་རྩི་ཞེས་བྱ་ནི་དངུལ་ཆུའི་རིགས་གསེར་
དུ་སྣང་བ་ཞེས་བྱ་བ་ཅིག་ཡོད་དེ་དེ་ནི་སྲང་གཅིག་གིས་ལྕགས་སྲང་སྟོང་གསེར་དུ་སྒྱུར་ནུས་ལ་དངུལ་ཆུ་སྲང་གཅིག་པོ་དེས་ནི་ལྕགས་སྲང་སྟོང་པོ་དེས་ཟད་པར་བྱ་བའམ། ལྕགས་བསྒྱུར་བར་མི་ནུས་སོ་ཟེར། ལ་ལ་ན་རེ་རས་ཞེས་བྱ་བ་དངུལ་ཆུ་འདྲ་བ་ཞིག་ཡོད་དེ། དེ་ལྟ་བུའི་

71-1-94a

ཐིགས་པ་གཅིག་གིས་ཟངས་སྲང་སྟོང་གསེར་དུ་སྒྱུར་ནུས་ཞེས་གྲག་གོ། །རིན་ཐང་མེད་པའི་རིན་ཆེན་ནོར་སྦྱིན་ཏེ། །ཞེས་བྱ་བ་ནི་ནོར་གྱི་རྒྱུན་གྲུབ་པའོ། །སྡིག་པ་སྤོང་བར་བྱེད་པས་ཞེས་བྱ་བ་ནི་རྣམ་པ་དེ་དག་འདོད་པས་བསོད་ནམས་ཁྱད་པར་ཅན་ལ་བརྟེན་དགོས་
པའི་ཕྱིར་རོ། །མཆོག་ཏུ་སྟོན་ཞེས་བྱ་བ་ནི་དམ་པ་བརྒྱད་པོ་དེ་རྣམས་ཀྱི་ནང་ན་འབྲས་བུ་ཆེ་བའི་ཕྱིར་རོ། །དང་པོར་བསྟན་པའི་སྣོད་ཅེས་བྱ་བ་ནི་གསང་སྔགས་གྲུབ་པ་དང་། ཕུག་ཏུ་འགྲོ་བ་དང་བཅུད་ཀྱིས་ལེན་གྲུབ་པའོ། །རྡུལ་ཞེས་བྱ་བ་ནི་འདིར་འདོད་ཆགས་ཀྱི་དྲི་མ་ལས་
དགོངས་སོ། །ཤེས་ཆེ་བ་ཞེས་བྱ་བ་ནི་སྒྲུབ་པ་པོ་ལ་ལའི་རྒྱུད་ལ་འདོད་ཆགས་ཀྱི་བག་ལ་ཉལ་ཆེ་བ་རྣམས་སོ། །འབྲིང་པོ་རྣམས་གྲུབ་པར་འགྱུར་ཞེས་བྱ་བ་ནི་རིན་པོ་ཆེ་ལ་སོགས་པ་ནོར་གྱི་རྒྱུན་དང་། འབྱུང་ཁུངས་ཀྱི་ཁྲོན་ཕྱིན་པ་སྟེ། དེ་དག་ནི་འདོད་ཆགས་ཀྱི་ཤས་ཆེ་བས་ཀྱང་འགྲུབ་
པར་བསྟན་ཏོ། །ཐ་མ་ཞེས་བྱ་བ་ནི་གསེར་དང་ནོར་བསྒྱུར་བའི་རྩི་སྟེ། སྦྱོར་བ་དཀའ་ཞིང་ཆུད་ཟ་ལ་འབྲས་བུ་ཆུད་ཟ་བའི་ཕྱིར་རོ། །མུན་པ་ཞེས་བྱ་བ་ནི་ཡང་དག་པའི་དོན་ལ་སྒྲིབ་པས་གཏི་མུག་ལ་བྱའོ། །རྟེན་ཞེས་བྱ་བ་ནི་གཏི་མུག་གི་ཤས་ཆེ་བའི་སྒྲུབ་པ་པོས། ལས་གོང་མ་དག་
ནི་མི་ལྕོགས་པའི་ཕྱིར། ཐ་མ་ཙམ་ལ་བརྟེན་དགོས་པར་བསྟན་ཏོ། །གང་ཞིག་མཆོག་ཏུ་བསྟན་པ་བསྟེན་འདོད་པས། །ཞེས་བྱ་བ་ནི་བཅུད་ཀྱིས་ལེན་ལ་སོགས་པ་དང་པོར་བསྟན་པ་རྣམས་སྒྲུབ་པར་འདོད་པའོ། །དེས་ནི་ཐ་མར་བསྟན་པ་རྣམ་པར་སྤང་། །ཞེས་བྱ་བ་ནི་གསེར་
སྒྱུར་ལ་སོགས་པའི་ལས་ཕྲན་ཚེགས་མི་བྱ་བར་བསྟན་ཏོ། །ཇི་ལྟར་ཚབས་ཀྱི་མདའ་བདར་བ་བཞིན་དུ་སྔར་མི་སྤྱད་པ་དང་འདྲའོ། །གལ་ཏེ་ནོར་ལ་སྲེད་ཅིང་སྡུག་བསྔལ་གྱིས། །གདུངས་ན་འབྲིང་པོ་ལ་ནི་བསྟེན་པར་བྱ། །ཞེས་བྱ་བ་ནི་སྒྲུབ་པ་པོ་དང་དངོས་གྲུབ་མཆོག་སྒྲུབ་པའི་
ཡོན་ཏན་གཞན་རྣམས་ཡོད་ལ་སྲིད་པའི་ཤས་ཆེ་ན་ཞེས་བྱ་བའི་དོན་ཏོ། །ལྷའི་བདེ་བ་ཞེས་བྱ་བ་ལ་སོགས་པས་ནི་གོང་དུ་སྨོས་པའི་འབྲས་བུ་རྣམས་བརྗོད་པའོ། །དཀའ་ཐུབ་སྟོབས་ཀྱིས་ཐོབ། ཆགས་དང་རྣམ་བྲལ་ཞེས་བྱ་བ་ལ་སོགས་པས་ནི། འབྲས་བུ་དེ་རྣམས་ཐོབ་པའི་

71-1-94b

རྒྱུ་བསྟན་ཏོ། །རྡོ་རྗེ་མཚོན་ཞེས་བྱ་བའི་དཔེས་ནི། ལས་དང་ཉོན་མོངས་པའི་དྲ་བའི་ཐིགས་པོ་མཐའ་དག་གཅོད་ཅིང་འབིགས་པར་བསྟན་ཏོ། །མེ་ཞེས་བྱ་བའི་དཔེས་ནི། དུག་གསུམ་གྱི་ནགས་སྦྱོར་གྱི་ཚང་ཚིང་མཐའ་དག་སྲེག་པར་སྟོན། གནམ་ལྕགས་ཞེས་བྱ་བའི་དཔེས་
ནི། བག་ལ་ཉལ་ཕྲ་མོ་ལུས་པ་རྣམས་ཀྱང་དམིགས་ཀྱིས་སེལ་ཞེས་བྱ་བའི་ཐ་ཚིག་གོ། །མིའི་འཇིག་རྟེན་ཞེས་བྱ་བ་ནི་བྱ་བའི་རྒྱུད་འདིས་མི་རྣམས་ཀྱི་དོན་དུ་གསུངས་པའི་ཤས་ཆེ་བའི་དོན་ཏོ། །འཇིག་རྟེན་འདི་དང་ཕ་རོལ་ཉིད་ན་ཡང་། །སྡུག་བསྔལ་སེལ་ཅིང་ཞེས་བྱ་བ་
ནི་ཕྱག་ན་རྡོ་རྗེ་དབང་བསྐུར་བའི་རྒྱུད་ཆེན་པོ་ལས། ཇི་སྐད་དུ། ཚེ་འདི་ལ་དངོས་གྲུབ་ལ་ངེས་པར་གཞོལ་བར་འགྱུར་བ་དང་། ཤི་འཕོས་ནས་ཀྱང་རྡོ་རྗེའི་རིགས་སུ་གཞོན་ནུའི་ལུས་ཐོབ་པར་འགྱུར་རོ་ཞེས་གསུངས་པའི་ཕྱིར་རོ། །སྡིག་འཇོམས་ཞེས་བྱ་བ་ནི་འོག་ནས། ཇི་སྐད་
དུ། ཚེ་རབས་སྟོང་ནས་གནས་པའི་སྡིག་པའི་མུན། །བཟླས་བརྗོད་བྱས་པས་མྱུར་དུ་སེལ་བར་བྱེད། །ཅེས་གསུངས་པ་ལྟ་བུའོ། །གཞན་མེད་དོ་ཞེས་བྱ་བ་ནི་གསང་སྔགས་འདྲ་བའི་འདྲེན་པ་མེད་ཅེས་བཤད་པའི་ཕྱིར་རོ། །གང་ཞིག་ཅེས་བྱ་བ་ནི་རིག་སྔགས་ཀྱི་བྱིན་གྱི་རླབས་གང་
གིས་ཞེས་བྱ་བའི་དོན་ཏོ། །དཔག་བསམ་ལྗོན་པའི་ཤིང་ལྟ་བུར། ཞེས་བྱ་བ་ནི་སེམས་ཅན་རྣམས་ཀྱི་རེ་བ་སྣ་ཚོགས་སྐོང་བའི་དཔེར་བརྗོད་པའོ། །ལ་ལར་དངོས་གྲུབ་ཅེས་བྱ་བ་ལ་སོགས་པས་ནི་དེའི་ཕན་ཡོན་གྱི་འབྲས་བུ་སྣ་ཚོགས་སུ་ཕྱེ་སྟེ་བསྟན་པ་རྣམས་ཀྱི་རྣམ་གྲངས་
བཀོད་པའོ། །གསང་སྔགས་ཞེས་བྱ་བ་ནི་གསང་སྔགས་རྣམས་ཀྱི་ལྷ་དེ་ནི་ཞེས་བྱ་བར་སྦྱར་རོ། །སྣ་ཚོགས་གཟུགས་སུ་རྣམ་སྤྲུལ་ནས། །ཞེས་བྱ་བ་ནི་སངས་རྒྱས་ལ་སོགས་པ་དག་པའི་གཟུགས་དང་། གནོད་སྦྱིན་ལ་སོགས་པ་མ་དག་པའི་གཟུགས་སུ་བསྟན་པའི་དོན་
ཏོ། །གང་ཞིག་སྡུག་བསྔལ་གང་གིས་འཇིགས་སྐྲག་པ། །ཞེས་བྱ་བ་ལ་སོགས་པས་ཀྱང་། གསང་སྔགས་ལ་བརྟེན་པའི་ཕན་ཡོན་གྱི་འབྲས་བུ་གཞན་བརྗོད་པའོ། །གང་ཞིག་ཅེས་བྱ་བ་ནི་རིག་སྔགས་འཆང་དངོས་གྲུབ་ཆེན་པོ་སྒྲུབ་པར་མི་རྩོལ་བ་རྣམས་སོ། །ཡུལ་ཞེས་

71-1-95a

བྱ་བ་ནི་དགོན་པར་མ་སྤངས་པའམ། འདོད་པའི་ཡོན་ཏན་ལྔ་ལ་སྤྱོད་པའོ། །ཁྱིམ་ཞེས་བྱ་བ་ནི་རབ་ཏུ་མ་བྱུང་ཞིང་འཆོ་ཚིས་ལྷུར་ལེན་པའོ། །དཀའ་ཐུབ་མ་ཉམས་ཞེས་བྱ་བ་ནི་དམ་ཚིག་རྣམས་བསྲུངས་པའོ། །རྩེ་གཅིག་སེམས་ཀྱིས་ཞེས་བྱ་བ་ནི་བཟླས་
བརྗོད་ཡན་ལག་དང་ལྡན་པར་བྱེད་པའོ། །ཉིན་གཅིག་བཞིན་དུ་ཅུང་ཟད་སྔགས་ཟློས་ན། །ཞེས་བྱ་བ་ནི་ཡི་དམ་རྒྱུན་མི་འཆད་པར་བྱེད་པའོ། །དེ་ཡི་གསང་སྔགས་དུས་གཅིག་ན་ནི་འགྲུབ། །ཅེས་བྱ་བ་ནི་གསང་སྔགས་ཀྱི་ལྷའི་སྔོན་གྱི་སྨོན་ལམ་དང་། སྒྲུབ་པ་པོའི་མོས་
པའི་ཤུགས་ཀྱིས་ཚེ་རབས་གཞན་དང་གཞན་དུ་ཡང་ལྷ་དེའི་ཆོ་ག་ཞིབ་མོ་དང་མི་འབྲལ་ཏེ། རྒྱུའི་སྟོབས་ཇི་ཙམ་པས་ལས་སྲིད་པ་ཕྱི་མ་དང་ཡང་ཕྱི་མ་ལ་སོགས་པར་དངོས་གྲུབ་ཐོབ་པར་གསུངས་སོ། །ཆོ་ག་བཞིན་དུ་ཞེས་བྱ་བ་ནི་བརྟུལ་ཞུགས་ལ་སོགས་པའི་ཆོ་ག་མཐའ་
དག་བསྙེན་པ་ལ་སྦྱོར་བ་དང་འདྲ་བར་བཤད་དོ། །དང་པོར་འབུམ་བཟླས་ནས་ཞེས་བྱ་བ་ནི་ཆོ་ག་ཞིབ་མོ་དག་ལ་བསྙེན་པའི་གྲངས་ངེས་པར་གསུངས་པ་ལ་མ་གཏོགས་པར་འཇུག་པའི་སྤྱོད་པ་སྔར་སྤྱད་པ་འབུམ་བཟླས་བརྗོད་བྱ་དགོས་པའི་དོན་ཏོ། །དེ་ནས་སྔགས་པ་སྒྲུབ་ལ་འཇུག་
པར་བྱ། །ཞེས་བྱ་བ་ནི་སྔར་སྤྱོད་པ་བྱས་ནས་སོ་སོའི་ཆོ་ག་ཞིབ་མོ་བསྙེན་པའི་གྲངས་ངེས་པའི་མགོ་གཟུགས་པར་བསྟན་ཏོ། །ཡུན་རིང་ཉོན་མི་མོངས་ཞེས་བྱ་བ་ནི་ལུས་དང་སེམས་སྦྱངས་པས་ལས་སུ་བྱ་བ་ཐམས་ཅད་ཆུད་མི་གསོན་པའི་ཕྱིར་རོ། །ལུས་ལས་ཡི་དྲིལ་ཕྱིས་བྱས་
ནས་སུ། ཞེས་བྱ་བ་ལ་སོགས་པ་ནི་གོང་དུ་དུས་གསུམ་ཁྲུས་བྱས་ཏེ་ཞེས་འབྱུང་ལ། ཁྲུས་ཀྱི་ཆོ་ག་དེར་མ་གསུངས་པ་འདིར་བསྟན་ཏོ། །སྦྲིད་པ་བྱུང་ན་ཁ་ཡང་བཀྲུ་བར་བྱ། །ཞེས་བྱ་བ་ནི་གཙང་སྦྲའི་རྣམ་གྲངས་གཞན་བསྟན་པའོ། །གཙང་སྦྲ་ལ་དད་ཅེས་བྱ་བ་ནི་ཕྱི་རོལ་གྱི་དྲི་
མ་སྤོང་བའོ། །ཟློས་ལ་དགའ་ཞེས་བྱ་བ་ནི་བཟླས་བརྗོད་བྱས་པའི་སྟོབས་ཆེ་བའོ། །སྙིང་རྗེ་ཅན་ཞེས་བྱ་བ་ནི་རང་བཞིན་གྱིས་སེམས་ཅན་རྣམས་ལ་བརྩེ་བའོ། །ལེན་པ་ལས་ནི་ལྡོག་ཅེས་བྱ་བ་ནི་སྲེད་པའི་ཤས་ཆུང་བས་ཡོ་བྱད་མི་མཁོ་བ་མི་སོགས་ཞེས་བྱ་བའི་ཐ་ཚིག་གོ། །

71-1-95b

སློང་མོ་ཟས་ཟ་ཞེས་བྱ་བ་ནི་བསོད་སྙོམས་ལ་བརྟེན་པའོ། །ལྷའི་ལས་ལ་བརྩོན་ཞེས་བྱ་བ་ནི་བཟླས་བརྗོད་དང་། མདོ་སྡེ་བཀླག་པ་དང་། མཆོད་རྟེན་གདབ་པ་དང་། མཆོད་པ་བྱེད་པ་ལ་སོགས་པ་དགེ་བའི་ཕྱོགས་ལ་སྐྱོ་བ་མེད་པའོ། །དེ་ཡི་ལུས་ལ་གསང་སྔགས་འཇུག་པར་
འགྱུར། །ཞེས་བྱ་བ་ནི་གསང་སྔགས་ཀྱི་བྱིན་གྱི་རླབས་འཇུག་པའི་སྣོད་ཡིན་པར་བསྟན་ཏོ། །འགའ་ཡིས་བུད་མེད་གོས་དང་ནོར་རྣམས་དང་། །ཞེས་བྱ་བ་ལ་སོགས་པ་ནི་བསྙེན་པ་ལ་སྦྱོར་བའི་དུས་སུ་ཅི་ཡང་མི་བླང་བར་བསྟན་པའི་དོན་ཏོ། །ས་ཕུང་བཤང་སྒོར་ལྔ་སྟེ་ཞེས་བྱ་བ་ལ་
སོགས་པས་ནི་ཁྲུས་ཀྱི་ཆོ་ག་འདི་འདག་པའི་ཚལ་དང་ཚད་བསྟན་པའོ། །སོས་ཀའི་ནགས་ཞེས་བྱ་བ་ནི་དཔྱིད་ཀྱི་དུས་སུ་ཉི་མས་གདུངས་པས་སྐོམ་པའི་དོན་ཏོ། །མ་བསྒྲིམས་བཞིན་དུ་ཚང་ཚིང་ཀུན་བསྲེག་ལྟར། །ཞེས་བྱ་བ་ནི་ཤིང་རློན་པ་ལ་མེ་བཏང་བ་ལྟར། མིས་འབད་པའི་
ནན་ཏན་མི་དགོས་ཞེས་བྱ་བའི་ཐ་ཚིག་གོ། །བཟླས་བརྗོད་མེ་ཞེས་བྱ་བ་ནི་སྡིག་པ་ཐམས་ཅད་བསྲེག་པའི་རྒྱུའི་གཙོ་བོར་བསྟན་ཏོ། །ཚུལ་ཁྲིམས་རླུང་གིས་སྤར། བརྩོན་འགྲུས་ཆེན་པོའི་མེ་ལྕེས་ཞེས་བྱ་བ་ནི་ལྷན་ཅིག་བྱེད་པའི་རྒྱུར་བསྟན་པའོ། །སྡིག་པའི་གངས་ཞེས་བྱ་བ་ནི་འདོད་
ཆགས་དང་ཞེ་སྡང་དང་གཏི་མུག་གི་རྒྱུན་ཡང་དང་ཡང་དུ་བྱུང་བའི་བག་ཆགས་ཐ་མར་འགྱུར་ཞེས་བྱ་བའི་དོན་ཏོ། །གཞན་ནི་གོ་བར་ཟད་དོ། །ཅི་སྟེ་སྦྱིན་སྲེག་དང་བཟླས་བརྗོད་ཀྱི་གསང་སྔགས་བསྒྲུབས་ཀྱང་དངོས་གྲུབ་མ་ཐོབ་ན་ཞེས་བྱ་བ་ནི་ཇི་སྐད་གསུངས་པའི་ཆོ་ག་བཞིན་དུ། གུས་
པར་ལེན་བདུན་གྱི་བར་དུ་སྤོགས་ཤིང་བསྒྲུབས་ན་ཡང་དངོས་གྲུབ་མ་ཐོབ་ན་ཞེས་བྱ་བའི་ཐ་ཚིག་གོ། །འཇིམ་པ་ལ་ནི་མཆོད་རྟེན་འབུམ་གདབ་པའམ། །ཡང་ན་ཆུ་འགྲམ་བྱེ་མ་དག་ལ་གདབ། །ཅེས་བྱ་བ་ནི་བསོད་ནམས་ཀྱི་ཚོགས་ཆེར་བསྐྱེད་དགོས་པར་སྟོན་ཏོ། །དོན་དེ་ཉིད་རབ་ཏུ་
གྲུབ་པར་བྱེདཔའི་རྒྱུད་ཆེན་པོ་ལས་ཀྱང་། ཇི་སྐད་དུ། རྒྱ་མཚོར་འབབ་པའི་བྱེ་མ་ལ། །མཆོད་རྟེན་དག་ནི་ཁྲུ་གང་པ། །ཞེས་བྱ་བ་དང་། དེ་བཞིན་དུ། རེ་རེའི་མདུན་དུ་འདུག་ནས་ནི། །བཟླས་བརྗོད་དག་ཀྱང་སྟོང་དུ་བྱ། །མཆོད་རྟེན་ཐ་མ་འབར་བར་ནི། །མཐོང་ན་ངེས་པར་

71-1-96a

འགྲུབ་པར་འགྱུར། །ཞེས་བྱ་བ་ལ་སོགས་པ་གསུངས་པའི་ཕྱིར་རོ། །དེས་ནི་ཞེས་བྱ་བ་ལ་སོགས་མཆོད་རྟེན་གདབ་པའི་ཕན་ཡོན་དེས་ཞེས་བྱ་བའི་ཐ་ཚིག་གོ། །དེས་ནི་དེ་ཡི་སྡིག་པ་སྲིད་གཞན་ལ། །བྱས་པ་གང་ཡིན་དེ་ནི་ཟད་འགྱུར་ན། །ཞེས་བྱ་བ་ནི་ཚེ་
རབས་གཞན་ལ་སྒྲིབ་པ་ཆེན་པོ་བྱས་པ་ཐམས་ཅད་འབྱང་བར་བསྟན་ཏེ། རྒྱུད་དེ་ཉིད་ལས་ཇི་སྐད་དུ། མཚམས་མེད་ལྔ་དག་བྱེད་པ་ཡང་། །མཆོད་རྟེན་འབར་བར་གྱུར་ན་ནི། །ངེས་པ་ཉིད་དུ་འགྲུབ་པར་འགྱུར། །ཞེས་གསུངས་པའི་ཕྱིར་རོ། །དེས་ནི་ཞེས་བྱ་བ་ནི་སྡིག་པ་ཟད་
ནས་ཞེས་བྱ་བའི་དོན་ཏོ། །མཐོང་བའི་ཆོས་ཞེས་བྱ་བ་ནི་ཚེ་འདི་ཉིད་ཅེས་བྱ་བའི་ཐ་ཚིག་གོ། །བསོད་ནམས་འབྲས་བུ་ཐོབ་ཅེས་བྱ་བ་ནི་དངོས་གྲུབ་ཀྱི་དཔལ་ཐོབ་པའི་དོན་ཏོ། །སྔགས་ཀྱི་རྩ་བ་དང་པོ་ཚུལ་ཁྲིམས་ཏེ། །ཞེས་བྱ་བ་ནི་སྡོམ་པ་དང་དགེ་བའི་ཆོས་སྡུད་པ་དང་། སེམས་
ཅན་གྱི་དོན་བྱེད་པའི་ཚུལ་ཁྲིམས་རྣམས་ཀྱིས་དཀར་པོའི་ཕྱོགས་ཀྱི་གཞི་ཐམས་ཅད་བསྡུས་པའི་ཕྱིར་རོ། །ཡང་ན་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་ངོར་ནི་འཕགས་པ་ཕྱག་ན་རྡོ་རྗེ་དབང་བསྐུར་བའི་རྒྱུད་ཆེན་པོ་ལས། ཇི་སྐད་དུ། བདག་ཉིད་
རང་གི་ལྷའི་གཟུགས་སུ་བྱས་ལ། ཐེ་ཚོམ་མེད་པའི་ཡིད་ཀྱིས་ང་རྒྱལ་བསྐྱེད་ཅིང་། རྟག་པར་དུས་ཐམས་ཅད་དུ་བསྐྱོད་ཀྱང་མི་གཡོ་བ་དེའི་ཚེ་ཚུལ་ཁྲིམས་དང་ལྡན་པ་ཡིན་ནོ་ཞེས་འབྱུང་བའི་ཕྱིར་རོ། །ཇི་ལྟར་མི་དབང་ཞེས་བྱ་བ་ནི་དཔེ་བསྟན་པ་སྟེ། དེ་ལ་ཡན་ལག་བདུན་དང་ལྡན། །
ཞེས་བྱ་བ་ནི་མཁར་དང་བློན་པོ་སྙིང་ཉེ་ཞིང་ལྕོགས་པ་དང་། གྲུ་དང་། ནོར་དང་། གླང་པོ་ཆེ་དང་། རྟ་དང་། དམག་མི་རྣམས་དང་ལྡན་པའོ། །སྐྱེ་བ་མེད་པར་སྐྱེ་དགུ་འདུལ་བར་བྱེད། །ཅེས་བྱ་བ་ནི་དངོས་པོ་བདུན་དང་ལྡན་པའི་རྒྱལ་པོ་དེ་ནི་བདེ་བླག་ཏུ་རྒྱལ་སྲིད་ལ་དབང་བསྒྱུར་
བས། བདེ་བ་ལ་རེག་ཅིང་དགྲ་དྲེགས་པ་ཐམས་ཅད་ཀྱང་ཐུལ་བའི་དོན་ཏོ། །དེ་བཞིན་སྔགས་པའང་ཡན་ལག་འདི་བཞིན་དུ། །ལྡན་པར་གྱུར་ན་སྡིག་པ་འདུལ་བར་བྱེད། །ཅེས་བྱ་བ་ནི་ཚུལ་ཁྲིམས་ཀྱི་མཁར་དང་། བརྩོན་འགྲུས་ཀྱི་བློན་པོ་དང་། བཟོད་པའི་གྲུ་དང་། དད་པའི་ནོར་དང་། 

71-1-96b

བླ་ན་མེད་པའི་བྱང་ཆུབ་ཆེན་པོར་སྨོན་པའི་བློ་གྲོས་ཀྱི་གླང་པོ་དང་། གཞན་གྱི་གསང་སྔགས་གཅོད་པ་ལ་སོགས་པའི་དོན་ཆུང་ངུ་ལ་རང་གི་གསང་སྔགས་མ་སྤྱད་པའི་རྟ་ཅང་ཤེས་དང་། ལེ་ལོ་སྤངས་པའི་དམག་མིའི་ཚོགས་དེ་བདུན་དང་ལྡན་ན། དངོས་གྲུབ་ཀྱི་སྐྱིད་པའི་དཔལ་ཡང་
ཉམས་སུ་མྱོང་ལ། ལས་དང་ཉོན་མོངས་པའི་དགྲའི་ཚོགས་ཀྱང་ཆོམས་པའི་དོན་ཏོ། །དང་པོར་བཟླས་བརྗོད་ཕལ་ཆེར་བྱས་ནས་སུ། །ཞེས་བྱ་བ་ནི། ལས་དང་པོ་པ་རྣམས་ཀྱིས་ཞེས་བྱ་བའི་ཐ་ཚིག་གོ། །དེ་ཡི་འོག་ཏུ་འདིར་ནི་སྦྱིན་སྲེག་བྱ། །ཞེས་བྱ་བ་ནི་ལས་རྣམས་ལ་གོམས་
པས་ཆོ་གའི་གནས་ཐམས་ཅད་ལ་ཐགས་ཐོགས་མེད་པར་ལྕོགས་པ་རྣམས་ཀྱིས་བྱ་བར་བསྟན་ཏོ། །གཞན་ནི་གོ་སླ་བས་མ་ཕྱེའོ། །རྒྱལ་བ་ལ་དད་ཅེས་བྱ་བ་ནི་སངས་རྒྱས་ལ་དད་པའི་འཇིག་རྟེན་པའི་ལྷ་རྣམས་སོ། །གཞན་ལ་ཕན་བརྩོན་ཞེས་བྱ་བ་ནི་མ་འོངས་པའི་སེམས་ཅན་
རྣམས་ལ་བརྩེ་བར་སེམས་པ་སྟེ། དེ་ཡང་ལྷ་ཞེས་བྱ་བ་ལ་སོགས་པ་འཇིག་རྟེན་པའི་གསང་སྔགས་ཀྱི་ལྷ་སངས་རྒྱས་ལ་དད་པ་རྣམས་སོ། །རྒྱལ་བའི་ཉན་ཐོས་རང་སངས་རྒྱས། །དེ་བཞིན་གཤེགས་དང་བྱང་ཆུབ་སེམས་དཔའ་ཡིས། །ཞེས་བྱ་བ་ནི་འཇིག་རྟེན་པའི་ཞུ་གནས་
རྣམས་སྨོས་པའོ། །མ་འོངས་སེམས་ཅན་ཞེས་བྱ་བ་ལ་སོགས་པས་ནི་སོ་སོའི་གསང་སྔགས་ཕུལ་བ་རྣམས་བཞེས་པར་གནང་ཞིང་བྱིན་གྱིས་བརླབ་པའི་རྒྱུ་བསྟན་ཏོ། །དེ་དག་འབྲས་བུ་ཞེས་བྱ་བ་ལ་སོགས་པས་ནི་འབྲས་བུ་རྣམ་པར་དབྱེ་བ་བསྟན་ཏེ། དཔལ་ཞེས་བྱ་བ་ནི་
ལྷ་མ་ཡིན་གྱི་ཕུག་གི་སྒོའི་རྣམ་གྲངས་ཀྱི་མིང་ངོ་། །ཕུག་ཏུ་འགྲོ་ཞེས་བྱ་བ་ཡང་རྣམ་གྲངས་གཞན་ཏེ་སླས་ཀྱི་སྒོ་ལ་བྱའོ། །མིག་འཕྲུལ་སྒྱུ་མ་ཞེས་བྱ་བ་ནི་སངས་རྒྱས་ཀྱི་གཟུགས་མང་པོར་སྟོན་པ་ལ་སོགས་པའོ། །མཚན་མོ་རྒྱུ་བ་ཞེས་བྱ་བ་ནི་རོ་ལངས་ལ་སོགས་པ་དུར་ཁྲོད་ཀྱི་
ལས་རྣམས་གྲུབ་པའོ། །དེ་དག་མཆོག་ཡིན་ཞེས་བྱ་བ་ནི་རྣམ་པ་དེ་བརྒྱད་དངོས་གྲུབ་རབ་ཡིན་པར་བསྟན་ཏོ། །འབྲིང་ནི་ས་བདག་གོ་ཞེས་བྱ་བ་ནི་རྒྱལ་པོར་གྱུར་པའོ། །གཞན་ནི་གོ་བར་ཟད་དོ། །ངོ་མཚར་སྣ་ཚོགས་དག་ནི་སྟོན་པར་བྱེད། །ཅེས་བྱ་བ་ནི་གླུ་ལེན་པ་དང་རྔ་རྡུང་བ་དང་

71-1-97a

ཚམ་ངམ་ལུས་ཀྱི་སྒྱུར་བ་ལ་སོགས་པས་གདོན་དག་སྐྲོད་པའོ། །ཕྲ་མོའི་ཕྲན་ཚེགས་ཡིན་ཞེས་བྱ་བ་ནི་དངོས་གྲུབ་ཆུང་ངུ་བསྟན་པ་བས་ཀྱང་ཆུང་བ་ཞེས་བྱ་བའི་དོན་ཏོ། །བྱ་བ་ཅེས་བྱ་བ་ནི་སྦྲུལ་གྱིས་ཟིན་ཏམ་དུག་འཐུངས་པའི་ལུས་ལ་ལག་པས་བྱབ་ཅིང་སྔགས་
གདབ་པའོ། །ཁུ་ཚུར་ཐལ་ལྕག་སྐྲ་དྲང་དང་། རྣ་བར་བཟླས་ཞེས་བྱ་བ་ནི་དུག་གིས་ཕོག་སྟེ་མྱོས་པ་བསླང་བའི་ཐབས་བསྟན་ཏོ། །དབབ་པ་ཞེས་བྱ་བ་ནི་དུག་དེ་ཤིང་ལ་སོགས་པ་ལ་ཕབ་ནས་དོར་བའོ། །བསྐྲད་པ་ཞེས་བྱ་བ་ནི་སྔགས་བཏབ་པས་འབྲོས་སུ་གཞུག་པའོ། །
གསད་པ་ཞེས་བྱ་བ་ནི་སྔགས་ཀྱིས་དེ་ཉིད་དུ་གསད་དེ་ཤི་བར་བྱ་བའོ། །བཅིང་བ་ཞེས་བྱ་བ་ནི་དུག་གི་མཐུ་གཡོར་མི་གནང་བར་སྔགས་དང་ཕྱག་རྒྱས་བཅིང་བའོ། །བོད་པ་ཞེས་བྱ་བ་ནི་མྱོས་པ་བསླང་བའི་དོན་དུ་ཁུས་གདབ་ཅིང་མིང་ནས་བོད་པའོ། །རིག་པའི་གོས་དང་སྔགས་
གོས་དང་། །ཞེས་བྱ་བ་ནི་དུག་གིས་ཕོག་པའི་གོས་ལ་ཆུའི་དཀྱིལ་འཁོར་དཀར་པོའི་སྟེང་དུ། ཆུའི་ས་བོན་དཀར་པོ་གཅིག་མགོ་ཐུར་དུ་བསྟན་ཏེ་གཞག་པ་ལས། ཆུ་རྒྱུན་དཀར་པོ་བབ་པས་ཉིས་རིམ་དུ་བསྐོར་ཞིང་འཁྱིལ་པ་ལས་བདུད་རྩིའི་རྒྱུན་འབབ་པར་བསམས་ལ། 
འཁོར་གྱི་མི་རྣམས་ཀྱི་ཁར་ཡང་གསོ་བའི་ས་བོན་བཀོད་དེ། རིག་སྔགས་ཟློས་ཤིང་གོས་དེ་བཤུས་ལ་འཁོར་གྱི་མི་རྣམས་ཀྱིས་ཀྱང་དུག་ཕྲོགས་སོ་ཞེས་བརྗོད་པར་བྱའོ། །རྡོག་པས་བསྣུན་དང་རྣམ་པར་བསྐྱོད་པ་དང་། །ཞེས་བྱ་བ་ནི་མྱོས་པ་ལས་བསླང་བའི་དོན་དུ། རྟིང་སྒྲས་
བསྡིགས་པ་དང་ལུས་བསྐུལབའོ། །མིག་ཏུ་དུག་སོང་ལྟར་ནི་གཞུག་པ་དང་། །ཞེས་བྱ་བ་ནི་མིག་ལ་ཞེན་པ་དང་འདྲ་ན། དེར་སྔགས་ཀྱི་འབྲུ་བཀོད་དེ་མིག་ཕྱེ་ནས་བལྟར་གཞུག་པའི་ཐ་ཚིག་གོ། །ཁབ་ཀྱིས་གཟུགས་པ་དང་ཞེས་བྱ་བ་ནི་མྱོས་པ་བསླང་བའི་དོན་དུ། སེན་མོ་ལ་
སོགས་པའི་ཡན་ལག་ལ་ཁབ་ཀྱིས་གཟུགས་པའི་དོན་ཏོ། །སྐྱུག་ཏུ་གཞུག་ཅེས་བྱ་བ་ནི་ཟོས་ཤིང་འཐུངས་པས་འཕྲང་དུ་ཚོར་ན་སྐྱུག་ཏུ་གཞུག་པའི་ཐ་ཚིག་གོ། །ཕུ་ཞེས་བུད་དང་ཞེས་བྱ་བ་ནི་རིག་སྔགས་བཟླས་པའི་དབུགས་ཀྱིས་བུད་པའོ། །ཡན་ལག་གཞིག་པ་ཞེས་བྱ་བ་ནི་

71-1-97b

སྔགས་དང་སྨན་གྱིས་མ་ཕྱིན་པའི་མི་ལ། མིའི་ས་བོན་ཁོང་དུ་གཞུག་པ་དང་བཅས་ཏེ་བསྲེགས་ནས་ཐལ་བར་སྦྱོར་བ་བྱས་ཏེ། དེ་ནས་གསོ་བའི་ས་བོན་གྱིས་ལུས་བསྐྱེདཔའི་དོན་ཏོ། །བྲང་གི་འགྲོ་བ་དག་ཀྱང་དགུག་པ་དང་། །ཞེས་བྱ་བ་ནི་སྦྲུལ་དེ་ཉིད་སྔགས་ཀྱི་མཐུས་བཀུག་
སྟེ། ངོ་མཚར་དག་བསྟན་པའོ། །བཅིངས་ཞེས་བྱ་བ་ནི་ཕྱག་རྒྱས་ཡན་ལག་ཏུ་འབྲོས་སུ་མི་གནང་བར་མཚམས་བཅད་པའོ། །མནན་པར་བྱ་བ་ཞེས་བྱ་བ་ནི་དུག་གི་མཐུ་ཉིད་བཀུག་ལ་ཕུར་བུས་བཏབ་སྟེ། སའི་སྙིང་པོས་བསྐྱེད་པའི་དབང་ཆེན་གྱི་དཀྱིལ་འཁོར་མནན་པའི་
དོན་ཏོ། །རྨོངས་པར་བྱ་ཞེས་བྱ་བ་ནི་སྦྱོར་བ་དེ་རྣམས་ཀྱིས་སྦྱར་ན། དུག་གི་མཐུ་དྲུག་གོ་ཞེས་བྱ་བའི་ཐ་ཚིག་གོ། །དུག་ཟར་གཞུག་པ་ཞེས་བྱ་བ་ནི་འགྲོ་བའི་དུག་བསད་པའི་དོན་དུ་གནས་པའི་དུག་འབྱིན་ལ། དེ་ཉིད་སྨན་དང་སྔགས་ཀྱི་ཕྱག་རྒྱས་གསད་པར་བསྟན་པའོ། །དུག་
ནི་གཞན་ལ་སྤོ་བར་བྱ་བ་དང་། །ཞེས་བྱ་བ་ནི་རླུང་གི་ས་བོན་གྱིས་བསྐྱེད་པའི་རླུང་གི་དཀྱིལ་འཁོར་གྱི་སྟེང་དུ་དུག་བཞག་ལ་གཞན་གྱི་ལུས་ལ་སྤོའོ། །དེ་ནས་ཀྱང་ཤིང་ལ་སོགས་པ་ལ་སྤོས་ནས་སའི་དཀྱིལ་འཁོར་གྱིས་མནན་ཏེ་གཞག་པའི་དོན་ཏོ། །ལྕགས་ཀྱུར་ལྡན་པས་དྲང་
བར་བྱ་བའམ། །ཞེས་བྱ་བ་ནི་ཚིགས་ལ་ཞེན་པ་རྣམས་ལྕགས་ཀྱུའི་ཕྱག་རྒྱས་དྲང་བར་བསྟན་ཏོ། །ལུས་ལ་ཞེན་པའི་དུག་ནི་བསླང་བ་དང་། །ཞེས་བྱ་བ་ནི་རྐང་པ་ལ་ཞེན་ཏེ་དབྱུང་དཀའ་བར་གྱུར་ན། རླུང་དང་མེའི་དཀྱིལ་འཁོར་གྱི་སྟེང་དུ། དུག་བཞག་ན་སློང་བར་བྱེད་དེ། 
ལངས་ཏེ་དེ་ནས་སྤོ་བ་དང་གསད་པ་དག་བྱ་བའི་དོན་ཏོ། །ཟོས་པར་བཟའ་བ་དང་ཞེས་བྱ་བ་ནི་སྔ་མའི་རྨ་ཁར་སྦྲུལ་ལ་སོགས་པའི་སྲོག་ཆགས་ཟར་གཞུག་ཅེས་བྱ་བའི་ཐ་ཚིག་གོ། །ཟོས་པས་བཅད་པ་དང་ཞེས་བྱ་བ་ནི་གདུག་པས་ཟིན་པའི་ཁ་འཕྲོ་བཅད་དེ་དོར་བའོ། །ས་བཅིང་
བ་དང་ཞེས་བྱ་བ་ནི་དུག་མཆེད་དེ་ཡན་ལག་གཞན་དུ་འཕྲོས་སུ་མི་གནང་བར་མཚམས་བཅད་པའོ། །ཕོ་ཉ་བཏང་བ་དང་ཞེས་བྱ་བ་ནི་སྦྲུལ་གྱིས་ཟིན་ཏམ། དུག་འཐུངས་སོ་ཞེས་སྦྲོན་པའི་མི་སྟེ། དེའི་ཚུལ་ལ་སོགས་པའི་བརྟག་པ་ནི། ནམ་མཁའ་ལྡིང་གི་རྒྱུད་ཞི་བའི་གཙུག་

71-1-98a

ཏོར་རྣལ་འབྱོར་དག་ལས་བལྟ་བར་བྱ་སྟེ། འདིར་ཡི་གེ་མངས་སུ་དོགས་པས་མ་སྤྲོས་སོ། །བསྐྲད་པ་ཞེས་བྱ་བ་ནི་དུག་གིས་བཏབ་པ་ཉིད་ལ་བྱ་བའི་དོན་ཏོ། །ཀླུ་རྣམས་གཞིག་པ་ཞེས་བྱ་བ་ནི་སྦྲུལ་མགོའི་ཕྱག་རྒྱ་ལ་སོགས་པ་བསྟན་པས་ཀླུའི་གདོན་
རྣམས་གཞིལ་བའི་ཐ་ཚིག་གོ། །རྔ་དང་དུང་གི་སྒྲས་ནི་བསླང་བར་བྱ། །ཞེས་བྱ་བ་ནི་སྨན་དང་སྤོས་ལ་བསྔགས་པས། རོལ་མོའི་ཆ་བྱད་ལ་བསྐུས་ཏེ། བསྒྲགས་པས་དུག་གིས་མྱོས་པ་བསླང་བའི་དོན་ཏོ། །ས་ཡི་སྟེང་ན་སྦྲུལ་ནི་བརྒྱད་ཅུ་དག །གཞན་ལ་གནོད་པ་བྱེད་ཅིང་
རྣམ་པར་འཁྱམ། །ཞེས་བྱ་བ་ནི་སྦྲུལ་གྱི་རིགས་ཀྱི་སྡོམ་བཤད་པའོ། །དེ་དག་རྣམས་ལས་ཉི་ཤུ་གདེངས་ཀ་ཅན། །འཁྱིལ་པ་དྲུག་དང་ཞེས་བྱ་བ་ནི་རིགས་སོ་སོར་དབྱེ་ན་དུག་ཅན་དུ་རིག་པར་བྱའོ། །ཁྲ་བོ་བཅུ་གསུམ་ཞེས་བྱ་བ་ནི་དུག་ཅན་ཡང་ཡོད་དུག་མེད་ཀྱང་ཡོད་པར་རིག་
པར་བྱའོ། །སུམ་ཅུ་གང་ཡིན་རིགས་དེའི་ནང་དུ་གཏོགས། །ཞེས་བྱ་བ་ནི་བར་མ་དོའི་རིགས་སུ་བསྡུ་ཞེས་བྱ་བའི་ཐ་ཚིག་གོ། །གཅིག་ལྷག་པ་ཡང་བར་མདོའི་རིགས་གར་ཡང་བརྩིར་རུང་བས་ཉེས་པ་མེད་དོ། །གོ་དྷ་ཞེས་བྱ་བ་ནི་རྩངས་པ་དང་འདྲ་བར་འདུག་པ་ཞིག་ཡོད་དོ་ཞེས་
གྲག་གོ། །ཁ་བརྒྱད་ཅེས་བྱ་བ་ནི་སྡོམ་གདུག་པའོ། །རྣམ་པར་དབྱེ་བ་རབ་ཏུ་མང་པོ་ཡོད་ཅེས་བྱ་བ་ནི་འདིར་མ་སྨོས་པའི་སྲོག་ཆགས་གདུག་པ་རྣམས་སོ། །གཅིན་རྟུག་ཁ་ཆུ་རེག་དང་ཞེས་བྱ་བ་ནི་རྔད་དང་ཤིང་ཐོག་དག་ལས་དུག་དབྱུང་བའོ། །མཐོང་བ་དང་ཞེས་བྱ་བ་ནི་ཀླུ་གདུག་
པས་བལྟས་པས་མི་ལ་དུག་གཏོང་བའི་དོན་ཏོ། །མཆེ་བ་བཙུགས་པ་ལས་ནི་དུག་ཀྱང་གཏོང་། ཞེས་བྱ་བ་ནི་སྦྲུལ་ལ་སོགས་པས་ཟིན་ནས་དུག་ལྡང་བའོ། །དེ་ལ་དུག་གི་རྒྱུད་ལ་མཁས་པ་ཡིས། །རབ་འབྲིང་ཐ་མ་རྣམ་པ་གསུམ་དུ་དབྱེ། །ཞེས་བྱ་བ་ནི་གཅིན་རྟུག་ལ་སོགས་
པའི་ཚད་མང་ཉུང་དང་། མཆེ་བས་ཟིན་པའི་རྨ་ཆེ་ཆུང་ལས་དྲག་དལ་དང་། དུག་གི་རིགས་དབྱེ་བ་ཤེས་པར་བྱ་སྟེ། དེ་ཡང་ནམ་མཁའ་ལྡིང་གི་རྒྱུད་ཀང་ཀས་བསྡུས་པ་ལས། ཇི་སྐད་དུ། ས་ཡི་དུག་གིས་བླུན་བཅས་ཁྱི་ལ་སོགས། །འདུས་པ་དག་གི་ནད་ཀྱང་བྱེད་པར་

71-1-98b

བཤད། །དེ་བཞིན་དུ་ནི་ཆུ་སྤུ་རྣམ་ལྡང་བ། །ཁུ་ཆུ་འཛག་ཅིང་ལྐོག་མ་འགག་པར་བྱེད། །མཆི་མ་འཛག་ཅིང་སྐོམ་པར་བྱེད་པ་དང་། །ཁྲག་འཕྲོག་པས་ནི་མེར་ཡང་མངོན་པར་འགྱུར། །རླུང་གིས་མདོག་མེད་སྐམ་ཞིང་ལྕེ་བསྐྱོད་དང་། །ཟིན་པའི་ས་ཡང་ནག་པོར་བྱེད་པ་ཡིན། །
ཞེས་བཤད་པ་བཞིན་རྟོགས་པར་བྱ་བའི་དོན་ཏོ། །དུག་བདོ་བ་ཞེས་བྱ་བ་ནི་དུག་ལངས་ནས་རང་དབང་མེད་པར་མི་ལ་དུག་འཛིན་པའོ། །ཁྲོ་བོའི་དབང་གྱུར་ཞེས་བྱ་བ་ནི་རང་བཞིན་གཏུམ་པས་འཛིན་པར་བསྟན་པའོ། །སྐྲག་པ་ཞེས་བྱ་བ་ནི་མི་མཐོང་ནས་སྔངས་ཏེ་སླར་ཟ་ཞེས་བྱ་
བའི་ཐ་ཚིག་གོ། །སྔངས་པ་ཞེས་བྱ་བ་ནི་རྔ་ལ་སོགས་པའི་སྒྲས་འདྲོགས་ནས་མི་ལ་ཟ་བའི་དོན་ཏོ། །བཀྲེསཔའི་ཟས་ཕྱིར་ཞེས་བྱ་བ་ནི་ཟས་འདོད་པ་ཁོ་ནའི་ཕྱིར་འཛིན་པའི་ཐ་ཚིག་གོ། །ཤ་ཁོན་ཡོད་པ་ཞེས་བྱ་བ་ནི་གཙེས་ཤིང་ཚང་བཤིག་པའོ། །ཤིན་རྗེས་བསྟན་པ་
ཞེས་བྱ་བ་ནི་གློ་བུར་དུ་གང་ལས་འོངས་གཏོལ་མེད་པས་ཟིན་ནས་འཆི་བར་བྱེད་དོ། །ལུས་ལ་བརྫིས་ན་ཞེས་བྱ་བ་ནི་སྣོད་དེ་ཁྲོས་ནས་སླར་རོ་མཁྲིས་ལྡོན་ཞིང་འཛིན་པའོ། །མ་བསྒྲིམས་ཏེ། གསང་སྔགས་ཆོ་ག་བཞིན་བཟླས་བསྒྲུབས་ན་ནི། །ཞེས་བྱ་བ་ཡང་དེ་ཉིད་ལས་ཇི་སྐད་དུ
ཁྱབ་བདག་བྱུང་བ་རྣམས་ཀྱི་རང་བཞིན་དུ། །གྱུར་པས་ས་དང་ཆུ་དང་མེ་རླུང་གི། །ངོ་བོ་ཉིད་དེ་གཉེན་པོའི་ས་བོན་གྱི། །སྦྱོར་བ་ཡིས་ནི་དུག་ཀྱང་དབྲོག་པར་བྱ། །ཞེས་བྱ་བ་ནི་འདིར་སྦྱོར་བར་བསྟན་ཏོ། །ལྷ་ཀླུ་ལྷ་མིན་ཞེས་བྱ་བ་ལ་སོགས་པ་ནི་གོང་དུ་གདོན་རྣམས་ཀྱིས་ཟིན་པ་ལས་གསོ་
བའོ་ཞེས་ནི་གསུངས་ན། གདོན་གྱི་རིགས་ངེས་པར་མ་གསུངས་པ་རྣམས་ཀྱི་འདིར་བསྟན་པའོ། །ས་ཡི་སྟེང་ན་གདོན་ནི་སྣ་ཚོགས་པ། །ཞེས་བྱ་བ་ནི་དེ་དག་གི་གནས་བསྟན་པའོ། །མི་ཡི་ཤ་ཚིལ་ཟ་ཞིང་ཁྲག་ཀྱང་འཐུངས། །ཞེས་བྱ་བ་ནི་དེ་དག་གི་ཟས་བསྟན་ཏོ། །མྱ་ངན་
ཞེས་བྱ་བ་ལ་སོགས་པ་ནི་གདོན་འཇུག་པའི་སྐབས་བསྟན་ཏོ། །དེ་དག་རྣམས་ཀྱིས་ཟིན་པའི་མི་འཕྱན་ཞིང་། །ཞེས་བྱ་བ་ལ་སོགས་པ་ནི་གདོན་གྱིས་ཟིན་པའི་རྟགས་བསྟན་ཏོ། །གཏོར་མ་འདོད་པའམ་ཞེས་བྱ་བ་ལ་སོགས་པས་ནི་གདོན་འཇུག་པའི་རྒྱུ་བསྟན་ཏོ། །དེ་ལ་རྩེད་མོ་བྱེད་

71-1-99a

འདོད་པའམ། ཞེས་བྱ་བ་ནི་གདོན་ཕོ་མོས་འདོད་ཆགས་ལ་བརྟེན་འདོད་པས་འཛིན་འདོད་པའོ། །བསད་པའི་དོན་དུ་ཞེས་བྱ་བ་ནི་དེ་དག་གིས་བཟའ་བའི་ཕྱིར་བཟུང་ནས་མི་གཏོང་བའི་དོན་ཏོ། །ལུས་ལ་འབེབས་ཤིང་འཇུག་ཅེས་བྱ་བ་ནི་དེ་དག་ཁོང་དུ་ཞུགས་
ནས་བརླམས་པར་གྱུར་པའོ། །གསང་བ་པ་རྣམས་གཞིག་ཕྱིར་ཞེས་བྱ་བ་ནི་གདོན་རྣམས་ལ་ངོ་ལོན་བྱ་དགོས་པར་བསྟན་པའི་དོན་ཏོ། །རིགས་ཀྱི་མཆོག་མཐུ་ཆེན་སྦྱིན་ཞེས་བྱ་བ་ཉིད་རྡོ་རྗེ་ལྕགས་ཀྱུ་མ་ཞེས་བྱ་བ་ཡིན་ནོ། །གཞན་ཡང་། ང་ཡི་རིགས་ལས་བྱུང་བའི་རིག་པ་
ཡི། །ཞེས་བྱ་བ་ནི་རྡོ་རྗེ་རིགས་ཀྱི་ཕོ་ཉ་མོ་བཅུ་ལ་སོགས་པའོ། །ཁྲོ་བོ་བདུད་རྩི་ཐབ་སྦྱོར་ལ་སོགས་པས། །ཞེས་བྱ་བ་ནི་རྡོ་རྗེ་རིགས་ཀྱི་ཁྲོ་བོ་ཐམས་ཅད་དོ། །གསོ་ཞེས་བྱ་བ་ནི་གསང་སྔགས་དེ་རྣམས་ཀྱིས་གདོན་དང་བྲལ་ནུས་པའི་ཕྱིར་སྦྱར་བར་བསྟན་ཏོ། །གདོན་རྣམས་
འཇིགས་པར་ཞེས་བྱ་བ་ནི་གསང་སྔགས་དེ་རྣམས་ཀྱི་གཟི་བརྗིད་ཟླ་དཔེ་མེད་པར་ཆེ་བའི་ཕྱིར་རོ། །དེ་ལྟར་ནི་མི་མིན་ཞེས་བྱ་བ་ལ་སོགས་པས་ནི་འཇིག་རྟེན་པའི་གསང་སྔགས་ལ་གོམས་པའི་མཐུ་ལྟ་བུ་མེད་པས་ནི་གདོན་རྣམས་མི་སྐྲག་པར་གསུངས་སོ། །གྲོང་ཁྱེར་སུམ་
བརྩེགས་ཞེས་བྱ་བ་ནི། ལྷ་མ་ཡིན་གནས་པའི་གྲོང་རྡལ་ལོ། །སུམ་བརྩེགས་ཞེས་བྱ་བ་ལ། ལྷ་མ་ཡིན་གྱི་གནས་དང་པོ་ནི། གྲོང་ཁྱེར་འོད་ཅན་ཞེས་བྱ་བ་སྟེ། ལྷ་མ་ཡིན་མཉེས་ཤིང་བརྩེ་བའི་གནས་སོ། །དེའི་བདག་པོ་ནི་སྒྲ་གཅན་ཞེས་བྱའོ། །ལྷ་མ་ཡིན་གྱི་གནས་
གཉིས་པ་ནི། གྲོང་ཁྱེར་སྐར་ཕྲེང་ཞེས་བྱ་སྟེ། ལྷ་མ་ཡིན་མགུལ་ཕྲེང་རྣམས་གནས་སོ། །དེའི་དབང་པོ་བསྟན་པ་ཞེས་བྱའོ། །ལྷ་མ་ཡིན་གྱི་གནས་གསུམ་པ་ནི། གྲོང་ཁྱེར་ཟབ་པ་ཞེས་བྱ་སྟེ། ལྷ་མ་ཡིན་ཀུན་དུ་འགྲོ་རྣམས་གནས་པའོ། །དེའི་དབང་པོ་ནི། མེ་ཏོག་ཕྲེང་
ཞེས་བྱ་བའོ། །ཡང་ལྷ་མ་ཡིན་གྱི་རྒྱལ་པོ་ཐགས་བཟངས་རིས་དང་། སྒྲ་གཅན་གྱི་ཕོ་བྲང་རིམ་པར་བརྩེགས་པའི་ཟེར་ཏེ་སྔ་མ་བདེའོ། །དེ་དག་འཇོམས་བྱེད་ཅེས་བྱ་བ་ནི། ལྷ་ཆེན་པོས་ལྷ་མ་ཡིན་གྱི་གནས་དེ་རྣམས་སུ་ལྕགས་ཀྱི་མདའ་འབར་བ་གཅིག་འཕངས་པས་

71-1-99b

བསྲེགས་ཏེ་ཐལ་བར་བྱ་བའི་ཕྱིར་རོ། །ལྷ་མ་ཡིན་གྱི་གནས་བཞི་པ་ནི་ལྷ་མ་ཡིན་དཔུང་བཟངས་རྣམས་དང་། དེའི་དབང་པོ་ཐགས་བཟངས་རིས་གནས་པའི་གྲོང་ཁྱེར་མཛེས་པ་ཞེས་བྱ་བ་དེ་ཅིའི་ཕྱིར་མི་གཞོམ་ཞེ་ན། གྲོང་ཁྱེར་དེ་ནི་ས་འོག་གི་སྟེང་ན་གནས་པ་ཡིན་ལ། 
དེ་ལ་འོག་ཏུ་གྱུར་པའི་གནས་གཞན་མེད་པས། ཕན་ཚུན་འཁྲུག་པ་དང་བྲལ་བས། དགྲ་ཟླའི་འཇིགས་པ་དང་བྲལ་བ། ནམ་མཁའ་གཉིས་པ་ལྟ་བ་ཡིན་ཏེ། ཇི་ལྟར་ནམ་མཁའ་གཟའ་དང་། རྒྱུ་སྐར་དང་། སྐར་མའི་ཚོགས་དག་གིས་མཛེས་པར་བྱས་པར་དེ་ལྟར་གྲོང་
ཁྱེར་དེ་ཡང་། རིན་པོ་ཆེ་སྣ་ཚོགས་ཀྱིས་བརྒྱན་ཅིང་། མཛེས་པ་ཡིན་པས། དེ་ནི་ལྷ་རྣམས་ཀྱི་མཐུས་ཀྱང་ཆོམས་པར་མི་འགྱུར་བའི་ཕྱིར་སྨོས་སོ། །གཟི་ཅན་ཉི་མ་ཞེས་བྱ་བ་ནི་ལྷའི་བུ་ཉི་མའོ། །མེས་པོ་ཞེས་བྱ་བ་ནི་ཚངས་པ་སྟེ། དེ་ལས་སེམས་ཅན་ཐམས་ཅད་
འབྱུང་བར་འདོད་པའི་ཕྱིར་རོ། །ཆུ་བདག་ཅེས་བྱ་བ་ནི་ཀླུའི་རྒྱལ་པོ་རྣམས་སོ། །ནོར་བདག་ཅེས་བྱ་བ་ནི་ཀུ་བེ་རའོ། །གནོད་སྦྱིན་རྒྱལ་པོ་ཞེས་བྱ་བ་ནི་རྣམ་ཐོས་ཀྱི་བུའོ། །ལྷག་མ་ཞེས་བྱ་བ་ནི་གོང་མ་དག་ལ་ལྟོས་ནས་དེའི་ཕྱིར་རམ་གཞན་ཡང་ཞེས་བྱ་བའི་དོན་ཏོ། །ས་
སྲུངས་ཀྱི་བུ་ཞེས་བྱ་བ་ནི་གླང་པོ་ཆེ་སྟེ། དེ་ལ་ཞོན་པ་ཞེས་བྱ་བ་ནི་བརྒྱ་བྱིན་ནོ། །ལྷ་མ་ཡིན་གྱི་གྲོང་ཁྱེར་འཇིག་བྱེད་ཅེས་བྱ་བ་ཡང་དེ་ཉིད་དོ། །འབྱུང་པོའི་རིག་སྔགས་འདིར་ནི་ཀུན་མཐོང་དང་། ཞེས་བྱ་བ་ལ་སོགས་པས་ནི་འཇིག་རྟེན་པའི་གསང་སྔགས་དེ་རྣམས་དེ་
ལྟར་སྨད་པ་ཡིན་གྱིས་ཀྱང་གདོན་གྱི་ལས་ཀྱི་རྒྱུས་ལ་མཁས་པར་བྱ་བའི་ཕྱིར་བསླབ་དགོས་པར་བསྟན་ཏོ། །རིག་གསུམ་འཕེལ་དང་ཞེས་བྱ་བ་ནི་སངས་རྒྱས་ཏེ་དེ་ལ་ལྷག་པའི་ཚུལ་ཁྲིམས་དང་ལྷག་པའི་སེམས་དང་ལྷག་པའི་ཤེས་རབ་ཀྱི་རིག་པ་དཔག་ཏུ་མེད་པའི་དོན་ཏོ། །
སྲིད་གསུམ་མཐར་ཕྱིན་དང་ཞེས་བྱ་བ་ནི་ཁམས་གསུམ་ལས་རྣམ་པར་གྲོལ་བའི་ཕྱིར་རོ། །ཉེས་པ་གསུམ་སྤངས་ཞེས་བྱ་བ་ནི་འདོད་ཆགས་དང་ཞེ་སྡང་དང་གཏི་མུག་གི་ཉེས་པ་གཏན་དུ་བསལ་བའི་ཐ་ཚིག་གོ། །ལམ་གསུམ་ཐུགས་སུ་ཆུད་དང་ཞེས་བྱ་བ་ནི་ཐེག་པ་གསུམ་གྱི་

71-1-100a

ཚུལ་མཁྱེན་པའི་ཕྱིར་རོ། །དེས་པ་དེའི་སྲས་ཞེས་བྱ་བ་ནི་ཉན་ཐོས་དང་བྱང་ཆུབ་སེམས་དཔའ་རྣམས་སོ། །དེའི་ལམ་རྗེས་སུ་འགྲོ་བའི་ལྷ་དང་ལྷ་མིན་ཞེས་བྱ་བ་ནི་འཇིག་རྟེན་པའི་ལྷ་སངས་རྒྱས་ལ་ཕྱོགས་པས་སོ་སོ་ནས་རིག་སྔགས་ཕུལ་བ་རྣམས་ཏེ། 
བདག་ཉིད་ཆེན་པོ་ཞེས་བྱ་བ་ནི་མཐོང་བའི་ཆོས་ལ་མངོན་པར་མཐོ་བའི་དཔལ་ཐོབ་པའི་དོན་ཏོ། །མུན་པ་སེལ་བ་ཞེས་བྱ་བ་ནི་ཡང་དག་པའི་ཤེས་རབ་ཀྱིས་མ་རིག་པའི་མུན་པ་བསལ་བས་ངེས་པར་ལེགས་པར་འགྱུར་རོ། །བྱིན་གྱིས་བརླབས་པ་ཞེས་བྱ་བ་ནི་བཤད་མ་ཐག་པའི་
འཇིག་རྟེན་པས་སོ་སོ་ནས་བྱིན་གྱིས་བརླབས་པས་སོ། །འཇིག་རྟེན་ལྷ་ཚོགས་རྣམས་ཀྱིས་བསྔགས་པ་ཡི། །གསང་སྔགས་མཐུ་ཡིས་ཞེས་བྱ་བ་ནི་དེ་བཞིན་གཤེགས་པ་འཇིག་རྟེན་དུ་མ་བྱུང་བའི་ཚེ་སོ་སོ་ནས་བཤད་པ་རྣམས་ཏེ། དེ་ལ་བསྐྱོད་དུ་མེད་ཅེས་བྱ་བ་ནི་སྔ་མའི་མཐུ་
ལ་དེས་འགྲན་དུ་མི་བཟོད་ཅེས་བྱ་བའི་དོན་ཏོ། །གཞན་ནི་གོ་བར་སླ་བས་མ་ཕྱེའོ། །ཁྱོད་ཀྱི་སྤྱོད་པ་སྣ་ཚོགས་ཞེས་བྱ་བ་ནི་གང་ལ་གང་གིས་འདུལ་བ་དེ་ལ་དེའི་གཟུགས་དང་ཚུལ་དུ་བསྟན་པས་གདུལ་བྱའི་འགྲོ་བ་རྣམས་འཛུད་པའི་དོན་ཏོ། །ཁ་ཅིག་གིས་ནི་རྡོ་རྗེ་འབར་བ་
མཐོང་། །ཞེས་བྱ་བ་ནི་དབང་པོ་འདུལ་བ་རྣམས་ལ་ནི་བརྒྱ་བྱིན་གྱི་གཟུགས་དང་རྡོ་རྗེ་ཐོགས་པ་དང་། ལྷ་རྣམས་དང་མཐུན་པའི་ཚུལ་དུ་བསྟན་ཏོ་ཞེས་བྱ་བའི་ཐ་ཚིག་གོ། །གཞན་གྱི་དབྱུག་ཏོ་གཞན་གྱི་འཁོར་ལོ་ཅན། །ཞེས་བྱ་བ་དེ་བཞིན་དུ་ཀུ་བེ་རའི་གཟུགས་སུ་ཡང་སྟོན་
པའི་དོན་ཏོ། །འཁོར་ལོ་ཅན་ཞེས་བྱ་བ་ནི་ཁྱབ་འཇུག་གོ། །མདུང་རྩེ་གསུམ་ཐོགས་པ་ཞེས་བྱ་བ་ནི་དབང་ལྡན་ནོ། །ཞགས་པ་ཅན་ཞེས་བྱ་བ་ནི་ཆུ་ལྷའོ། །རལ་གྲི་ཐོགས་པ་ཞེས་བྱ་བ་ནི་བདེན་བྲལ་ལོ། །གཞུ་ཐོགས་པ་ནི་ཉི་མའོ། །བེ་ཅོན་ཅན་ཞེས་བྱ་བ་ནི་གཤིན་རྗེའོ། །དེ་
བཞིན་དུ་རླུང་ལྷ་དང་མེ་ལྷ་ལ་སོགས་ཏེ་འདིར་མ་སྨོས་པའི་ལྷ་ལ་སོགས་པ་ཐམས་ཅད་ཀྱི་གཟུགས་སུ་ཡང་སྟོན་ཏོ། །འཇིགས་པའི་གཟུགས་ཅན་ཞེས་བྱ་བ་ནི་འཕགས་པ་རྡོ་རྗེ་རི་རབ་ཀྱི་རྩེ་མོ་ཁང་པ་བརྩེགས་པའི་གཟུངས་ལས་ཇི་སྐད་དུ། འཇིགས་པ་བས་ཀྱང་འཇིགས་པར་

71-1-100b

བྱེད་པ་འཆི་བདག་ཀྱང་སྐྲག་པར་བྱེད་པ་ཁམས་གསུམ་པ་ཐམས་ཅད་ཀྱིས་བསྡུས་པ་ལྟ་བུའི་ལུས་དང་ལྡན་པའི་ཁྲོ་བོར་གྱུར་ནས་ཞེས་གསུངས་པ་ལྟ་བུར་ཡང་སྟོནཔའི་དོན་ཏོ། །མཚོན་ཆ་ཀུན་ཐོགས་ཞེས་བྱ་བ་ཡང་དེ་ཉིད་ལས། ལག་པ་སྟོང་ཕྲག་དུ་མ་ལ། །རྡོ་རྗེ་དང་
ཞགས་པ་དང་གཏུན་ཤིང་དང་ཞེས་རྒྱ་ཆེར་གསུངས་པ་ལྟ་བུར་སྟོན་པའི་ཕྱིར་རོ། །ཞི་བ་ཉིད་དུ་མཐོང་ཞེས་བྱ་བ་ནི་དེས་འདུལ་བ་རྣམས་ལ་དེ་ལྟར་སྣང་བའི་ཐ་ཚིག་གོ། །དམིགས་མེད་སྐུ་མངའ་ཞེས་བྱ་བ་ནི་ཆོས་ཀྱི་སྐུ་དང་ལྡན་པའི་དོན་ཏོ། །གཞན་ནི་གོ་བར་ཟད་དོ། །དབུལ་
བའི་མུན་པ་ཞེས་བྱ་བ་ནི་ཤེས་རབ་དང་དཔལ་དང་གཟུགས་དང་ནོར་རྣམས་གང་ལ་ཡང་མི་སྣང་བའོ། །གསལ་ནས་ཉི་མ་བཞིན་དུ་འབར་བར་འགྱུར། །ཞེས་བྱ་བ་ནི་ཤེས་རབ་དང་དཔལ་དང་གཟུགས་དང་ནོར་རྣམས་ལེགས་པར་རྫོགས་པར་གྱུར་ནས་འཇིག་རྟེན་ན་མངོན་པར་མཐོ་
བར་སྣང་བའི་དོན་ཏོ། །ཡན་ལག་མི་ཉམས་ཞེས་བྱ་བ་ནི་དངོས་གྲུབ་ཐོབ་ནས་ཀྱང་བཟླས་བརྗོད་ཀྱི་ཡན་ལག་མི་ཉམས་པས་ཟློས་པའི་དོན་ཏོ། །སེམས་ཀྱང་མི་ཉམས་ཤིང་ཞེས་བྱ་བ་ནི་དེའི་དུས་སུ་འདོད་པའི་ཡོན་ཏན་ལ་སྤྱོད་ཀྱང་ཕྱིན་ཅི་ལོག་གི་དབང་དུ་མི་འགྱུར་བའི་ཐ་ཚིག་གོ། །
ནད་དང་སྡུག་བསྔལ་ལུས་ཉམས་མི་འགྱུར་བ། །ཁྱོད་ལ་དད་པའི་མིས་ནི་ཐོབ་པར་འགྱུར། །ཞེས་བྱ་བ་ནི་གནོད་པ་སྣ་ཚོགས་སེལ་བའི་སྨན་པའི་རྒྱལ་པོ་ཡིན་པར་བརྗོད་པའོ། །གཞན་ནི་གོ་སླ་བས་མ་ཕྱེའོ། །ལེའུ་བཅུ་གཅིག་པའི་དོན་བཤད་ཟིན་ཏོ།།      །།འཕགས་པ་
དཔུང་བཟངས་ཀྱིས་ཞུས་པའི་རྒྱུད་ཀྱི་ཚིག་གི་དོན་བཤད་པའི་བརྗེད་བྱང་རྫོགས་སོ།།      །། ༄༅༅།  །རྒྱ་གར་སྐད་དུ། ཨཱརྱ་སུ་བཱ་ཧུ་པ་རི་པྲྀ་ཙྪ་ནཱ་མ་ཏནྟྲ་པིཎྜཱརྠ་པི་ཏི། བོད་སྐད་དུ། འཕགས་པ་དཔུང་བཟངས་ཀྱིས་ཞུས་པའི་རྒྱུད་ཀྱི་བསྡུས་པའི་དོན་དགྲོལ་བའི་བརྗེད་
བྱང་། བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ལོ། །བཅོམ་ལྡན་གསང་སྔགས་རིག་སྔགས་དབང་ཕྱུག་གི། །ཡེ་ཤེས་ཉི་མའི་འོད་ཟེར་འབར་བ་དེས། །རིག་སྔགས་རྒྱ་མཚོའི་གསང་སྔགས་ཚོགས་རྣམས་ཀྱི། །དངོས་གྲུབ་པདྨ་ངེས་པར་ཕྱེ་བ་དང་། །དཔུང་བཟངས་ཐུགས་

71-1-101a

རྗེའི་ཟླ་བ་ཤར་བ་དེས། །དངོས་གྲུབ་ཚོལ་ལ་རྨོངས་པའི་གཏི་མུག་གི། །མུན་གྱིས་བསྒྲིབས་པའི་སྐྱེ་བོ་རྣམས་གཟིགས་ནས། །ཡབ་ལ་ཞུས་པ་དེ་ལ་ཕྱག་འཚལ་ལོ། །མདོ་སྡེ་འཆད་པར་འདོད་པ་རྣམས། །དགའ་བར་བྱེད་པའི་བསྡུས་པའི་དོན། །འདི་ནི་
སློབ་དཔོན་བདག་ཉིད་ཆེ། །སངས་རྒྱས་གསང་བས་ཡང་དག་མཛད། །དེ་ཡི་སྡོམ་ཡང་རྣམ་གསུམ་སྟེ། །རྒྱུད་ཀྱི་ལུས་སུ་གཞག་པ་དང་། །ཀུན་ལ་མེད་དུ་མི་རུང་དང་། །དོན་རྣམས་ཕྱེ་བས་མདོ་འདི་བསྡུས། །དེ་ལ་དང་པོ་རྒྱུད་ཀྱི་ལུས་རྣམ་པར་གཞག་པའི་དབང་དུ་མཛད་ནས་
མདོ་སྡེ་འདི་ལས་ནི་སངས་རྒྱས་དང་། བྱང་ཆུབ་སེམས་དཔའ་དང་། འཇིག་རྟེན་པའི་ལྷའི་བྱེ་བྲག་རྣམས་ཀྱི་རིག་སྔགས་དང་། གསང་སྔགས་བཤད་པ་གང་ཡིན་པ་དེ་དག རིགས་གསུམ་པོ་དེ་བཞིན་གཤེགས་པ་དང་། པདྨ་དང་རྡོ་རྗེ་དང་། དེ་བཞིན་དུ་གཞན་ཡང་ནོར་
ཅན་དང་། རྒྱས་པ་དང་། འཇིག་རྟེན་པའི་རིགས་ཀྱང་གསུམ་དུ་ཡང་དག་པར་བསྡུས་པ་སྟོན་ཏོ་ཞེས་གསུངས་སོ། །དེ་ལ་མདོ་སྡེ་འདི་ཞེས་བྱ་བ་ནི་ཞལ་ནས་གསུངས་པ་རྨད་དུ་བྱུང་བའི་སྡེ་ལས། བྱ་བའི་རྒྱུད་འཕགས་པ་དཔུང་བཟངས་ཀྱིས་ཞུས་པ་ཞེས་གྲགས་སོ། །
སངས་རྒྱས་ཞེས་བྱ་བ་ནི་མ་རིག་པའི་གཉིད་སངས་ཤིང་པདྨ་རྒྱས་པ་བཞིན་དུ་བྱེ་ཞིང་རྒྱས་པའི་དོན་ཏོ། །བྱང་ཆུབ་སེམས་དཔའ་ཞེས་བྱ་བ་ནི། བྱང་ཆུབ་དང་སེམས་ཅན་ལ་དམིགས་པའམ། བྱང་ཆུབ་ཀྱི་ཕྱིར་གསན་ཐུབ་པའི་དོན་ཏོ། །འཇིག་རྟེན་པ་ཞེས་བྱ་བ་ནི། ཁམས་
གསུམ་པའི་འདོད་ཆགས་དང་མ་བྲལ་བའི་གསང་སྔགས་ཀྱི་ལྷ་རྣམས་སོ། །ལྷའི་བྱེ་བྲག་རྣམས་ཞེས་བྱ་བ་ནི། སངས་རྒྱས་དང་བྱང་ཆུབ་སེམས་དཔའ་དང་། འཇིག་རྟེན་པ་སྤྱི་དང་། སོ་སོའི་རྣམ་གྲངས་གཞག་པའོ། །རིག་སྔགས་ཞེས་བྱ་བ་ནི་ཉོན་མོངས་པ་རྣམས་འཇོམས་པ་
དང་། དོན་ཕུན་སུམ་ཚོགས་པ་ཐོབ་པ་འམ། འདིས་ཇི་ལྟར་གྱུར་པའི་དངོས་པོ་རིག་པས་ན་རིག་སྔགས་ཏེ། དེ་ཡང་བུད་མེད་ཀྱི་གཟུགས་དང་། དབྱིབས་ཀྱི་ལྷ་དང་། དེ་སྟོན་པའི་སྒྲ་དང་། ཕྱག་རྒྱ་ལ་སོགས་པའོ། །གསང་སྔགས་ཞེས་བྱ་བ་ནི། ཤེས་པ་དང་དཔུང་གཉེན་

71-1-101b

དུ་ལྡན་པ་འམ། གསངས་ཏེ་བརྗོད་པའི་ཕྱིར་གསང་སྔགས་ཏེ། གཟུགས་ལ་སོགས་པ་ནི་སྔ་མ་ལས་ཟློག་པའི་སྐྱེས་པའི་ཞེས་བྱ་བར་སྦྱར་རོ། །བཤད་པ་གང་ཡིན་པ་དེ་དག་ཅེས་བྱ་བ་ནི། སོ་སོའི་རྒྱུད་དང་། ཆོ་ག་ཞིབ་མོ་ཐ་དད་པའོ། །རིགས་གསུམ་པོ་ཞེས་བྱ་བ་ནི་བྱ་བའི་
རྒྱུད་ལ་གཞན་དག་ལས་གྲགས་པ་སྟེ། དེ་བཞིན་གཤེགས་པའི་རིགས་ཞེས་བྱ་བ་ནི། ཆོས་ཐམས་ཅད་ཀྱི་རང་བཞིན་ཇི་ལྟ་བ་བཞིན་དུ་མཁྱེན་ཅིང་། སྔོན་གྱི་སངས་རྒྱས་རྣམས་ཇི་ལྟར་གཤེགས་པ་བཞིན་དུ་བྱོན་པའི་དོན་ཏོ། །དེས་བྱིན་གྱིས་བརླབས་པའི་གསང་སྔགས་
ཀྱི་ལྷ་གཙུག་ཏོར་ལ་སོགས་པ་དང་བཅས་པའོ། །པདྨའི་རིགས་ཞེས་བྱ་བ་ནི། ཉོན་མོངས་པས་མ་གོས་པའི་ཐུགས་རྗེའི་སྤྱན་གྱིས་ཉིན་མཚན་དུས་དྲུག་ཏུ་སེམས་ཅན་རྣམས་ལ་གཟིགས་པ་འཕགས་པ་སྤྱན་རས་གཟིགས་དབང་ཕྱུག་སྟེ། དེས་འགྲོ་བ་བསྒྲལ་བར་བྱིན་གྱིས་
བརླབས་པའི་རིག་སྔགས་སྒྲོལ་མ་ལ་སོགས་པའི་འཁོར་དང་བཅས་པའོ། །རྡོ་རྗེའི་རིགས་ཞེས་བྱ་བ་ནི། བསྟན་པ་བསྲུང་བ་དང་། སྡང་བ་རྣམས་གཞོམ་པའི་དོན་དུ་བྱང་ཆུབ་སེམས་དཔའ་ཀུན་དུ་བཟང་པོ་ལ་ཕ་རོལ་ཏུ་ཕྱིན་པ་དྲུག་གིས་བསྐྱེད་པའི་ཡེ་ཤེས་དེ་རྡོ་རྗེར་བྱིན་གྱིས་
བརླབས་ནས། དེ་བཞིན་གཤེགས་པ་རྣམས་ཀྱིས་ཕྱག་ན་རྡོ་རྗེར་དབང་བསྐུར་ཏེ། དེའི་བྱིན་གྱི་རླབས་བསྟན་པའི་གསང་སྔགས་ཀྱི་ལྷ་ཁྲོ་བོ་ལ་སོགས་པའི་ཚོགས་དང་བཅས་པའོ། །ཁ་ཅིག་ན་རེ་རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས། རོ་སྟོད་ལས་ནི་བྱུང་བའི་མཆོག ། 
ལྟེ་བ་མན་ཆད་ཐ་མ་ཡིན། །བར་གྱི་ལུས་ལས་བྱུང་བ་འབྲིང་། །གསང་སྔགས་རྣམས་ཀྱི་དངོས་གྲུབ་བསྟན། །ཞེས་གསུངས་པ་དང་། རྣམ་པར་སྣང་མཛད་མངོན་པར་རྫོགས་པ་བྱང་ཆུབ་པའི་རྒྱུད་ཆེན་པོ་ལས་ཀྱང་། རྡོ་རྗེ་འཛིན་པའི་ལུས་འདྲ་བ་དང་། བྱང་ཆུབ་སེམས་དཔའ་
ཀུན་དུ་བཟང་པོ་དང་། ཕྱག་ན་པདྨའི་ལུས་འདྲ་བ་དག ཕྱོགས་བཅུ་ན་གསང་སྔགས་ཀྱི་ཚུལ་གྱི་ཚིག་རྣམ་པར་དག་པའི་ཚིག་གིས་ཆོས་སྟོན་པ་དག་ཀྱང་མཐོང་ངོ་ཞེས་ཀྱང་གསུངས་པས། བཤད་པ་དེ་འགལ་ལོ་ཞེ་ན། གཞན་དག་ན་རེ་གཙུག་ཏོར་གྱི་རྒྱུད་ལས་གཙུག་ཏོར་འཁོར་

71-1-102a

ལོ་སྒྱུར་བའི་རང་བཞིན་བཤད་པ་ལས། བཅོམ་ལྡན་འདས་འདི་ནི། སངས་རྒྱས་ཐམས་ཅད་དང་། གསང་སྔགས་ཀྱི་ཚུལ་དུ་གནས་ནས། ཐུགས་རྗེ་ཆེན་པོའི་ལུས་ཅན་ཐམས་ཅད་ལ་སྟོན་པར་བཞུགས་ཤིང་། གསང་སྔགས་རྣམས་ཀྱི་བདག་པོ་མཛད་
དོ་ཞེས་གསུངས་སོ། །གཞན་ཡང་། ཇི་ལྟར་ཉི་མའི་དཀྱིལ་འཁོར་གྱི། །འོད་ཟེར་དཔག་ཏུ་མེད་འདྲེས་ཤིང་། །རྟག་ཏུ་བྱ་བ་གཅིག་ལ་འཇུག །འཇིག་རྟེན་ལ་ཡང་སྣང་བར་བྱེད། །དེ་བཞིན་ཟག་མེད་དབྱིངས་ན་ཡང་། །སངས་རྒྱས་དཔག་ཏུ་མེད་འདྲེས་ཤིང་། །མཛད་པ་
གཅིག་ནི་མཛད་པ་ལ། །ཡེ་ཤེས་སྣང་བ་མཛད་པར་འདོད། །ཅེས་གསུངས་ཏེ། གང་ལྟར་ཡང་མི་འགལ་ལོ། །ཇི་སྐད་དུ། ཟག་མེད་དབྱིངས་ན་སངས་རྒྱས་རྣམས། །མཁའ་ལྟར་ལུས་ནི་མེད་ཕྱིར་དང་། །སྔོན་གྱི་རྗེས་ལུགས་འབྲང་བའི་ཕྱིར། །གཅིག་མིན་མང་པོ་ཉིད་
མ་ཡིན། །ཞེས་བཤད་པའི་ཕྱིར་རོ། །དེ་བཞིན་དུ་ཞེས་བྱ་བ་ནི། སྔ་མ་གསུམ་དང་འདྲ་བར་རིག་སྔགས་ཀྱི་ལྷའི་རྣམ་གྲངས་སུ་གཞག་པའི་དོན་ཏོ། །གཞན་ཡང་ཞེས་བྱ་བ་ནི་རྒྱུད་གཞན་ལ་མ་གྲགས་པ་འདིར་གླེངས་པའི་ཐ་ཚིག་གོ། །ནོར་ཅན་གྱི་རིགས་ཞེས་བྱ་བ་ནི། དཔལ་ 
ནོར་བུ་བཟང་པོ་ལ་སོགས་པས་ནོར་གྱི་རྒྱུན་ཟད་མི་ཤེས་པར་བྱིན་གྱིས་བརླབས་ནས། སེམས་ཅན་གྱི་དབུལ་བའི་གནོད་པ་སེལ་ཞེས་བྱ་བའི་དོན་ཏོ། །རྒྱས་པའི་རིགས་ཞེས་བྱ་བ་ནི། ནོར་བུ་ལྔ་བརྒྱ་དང་འགྲོགས་ཤིང་། ཆོ་ལོ་ལྔས་རྩེ་བར་སྟོན་པས་ལྔས་རྩེན་ཏེ། དེས་བུ་ཚ་  
འཕན་པ་དང་། ལོངས་སྤྱོད་འཕེལ་བ་རྒྱས་པའི་ལས་གྲུབ་པར་བྱེད་ཅེས་བྱ་བའི་ཐ་ཚིག་གོ། །འཇིག་རྟེན་པའི་རིགས་ཞེས་བྱ་བ་ནི། ལྔ་པོ་དེ་རྣམས་ལ་མ་གཏོགས་པའི་ལྷ་དང་། ལྷ་མ་ཡིན་ལ་སོགས་པས་སོ་སོའི་གསང་སྔགས་ཆོ་ག་དང་བཅས་ཏེ་ཕུལ་བའོ། །གསུམ་དུ་ཡང་
དག་པར་བསྡུས་པ་སྟོན་ཏོ་ཞེས་བྱ་བ་ནི། ནོར་ཅན་ནི་པདྨའི་རིགས་ཀྱིས་བསྡུས་སོ། །རྒྱས་པ་ནི་རྡོ་རྗེའི་རིགས་ཀྱིས་བསྡུས་སོ། །འཇིག་རྟེན་པའི་རིགས་ཀྱང་དེ་དག་གི་བགབ་ཏུ་ཕལ་ཆེར་འདུས་པར་རིག་པར་བྱའོ། །དེ་དག་གིས་མ་བསྡུས་པ་རྣམས་ནི་དེ་བཞིན་གཤེགས་པའི་བྱིན་

71-1-102b

གྱི་རླབས་ལས་བྱུང་བ་ཡང་མ་ཡིན་ལ། བྱང་ཆུབ་སེམས་དཔའ་ས་ལ་གནས་པ་ལྟར་བདེ་བར་གཤེགས་པ་ཉིད་ཀྱི་རིགས་སུ་སྐྱེས་པ་ཡང་མ་ཡིན་པས། དེ་བཞིན་གཤེགས་པའི་རིགས་ལ་བརྟེན་པ་ཞེས་གདགས་ཏེ། དོན་དེ་རྒྱུད་འདི་ཉིད་ལས་ཀྱང་། གཞན་ཡང་འདི་ན་ཁ་
ཅིག་གནས་མེད་པར། །བདེ་བར་གཤེགས་ལ་བརྟེན་ཅིང་ཡོངས་འཁྱམ་པ། །ཞེས་གསུངས་སོ། །དེ་ལྟར་དེ་རྣམས་སངས་རྒྱས་ཀྱིས་བཏུལ་ཏེ་དམ་ཚིག་ལ་གནས་ཤིང་རིགས་གསུམ་པོའི་ནང་དུ་འདུས་པར་སྣང་གིས་ཀྱང་། དེ་བཞིན་གཤེགས་པ་འཇིག་རྟེན་དུ་མ་བྱུང་བའི་ཚེ་
སོ་སོ་ནས་བཤད་པའི་རྒྱུད་རྣམས་ནི་འདིར་མི་བསྡུ་བར་རིག་པར་བྱ་སྟེ། རྒྱུད་འདི་ཉིད་ལས་ཇི་སྐད་དུ། དེ་ནས་གཞན་ཡང་འཇིག་རྟེན་པར་བསྡུས་ནས། །ཞར་ལ་བཤད་པ་འདི་དག་ཁྱོད་ཀྱིས་ཉོན། །ཞེས་བྱ་བ་ལ་སོགས་པ་གསུངས་སོ།    །རྒྱུད་འདི་ཐམས་ཅད་ལ་མེད་དུ་མི་རུང་བ་
ཉིད་དུ་བསྟན་པའི་དབང་དུ་མཛད་ནས། དེ་དག་གི་རིགས་དང་། རིག་སྔགས་དང་། གསང་སྔགས་དང་། ལས་ཀྱི་དབྱེ་བ་དང་། མཉེས་པར་བྱ་བའི་ཐབས་ཁ་ཅིག་ཏུ་ནི་རྒྱས་པར་སྤྲོས་ལ། དེ་ལས་གཞན་དུ་ནི་ཅུང་ཟད་ཙམ་དུ་བསྟན་པ་དང་། གཞན་དག་ཏུ་ནི་མ་གསུངས་སོ་
སྙམ་དུ་དགོངས་ནས། བཅོམ་ལྡན་འདས་རྡོ་རྗེ་འཆང་གིས། རིག་སྔགས་ཐམས་ཅད་ཀྱིས་མཉེས་པར་བྱས་པའི་ཐབས་སུ་གྱུར་པ། འཇུག་པ་དང་། སྦྱོར་བ་དང་། སྒྲུབ་པ་དང་། གྲུབ་པའི་སྤྱོད་པ་བསྟན་པ་རྣམས་དཔུང་བཟངས་ཀྱིས་ཞུས་པའི་གསང་སྔགས་ཀྱི་མདོ་སྡེའི་
ལེའུ་བཅུ་གཅིག་པོ་འདིར་གཏན་ལ་དབབ་པར་བསྟན་ཏོ་ཞེས་གསུངས་སོ། །དེ་དག་གི་རིགས་དང་། རིག་སྔགས་ཞེས་བྱ་བ་ལ་སོགས་པ་ནི་བཤད་མ་ཐག་པའོ། །ལས་ཀྱི་དབྱེ་བ་ཞེས་བྱ་བ་ནི་བཟླས་བརྗོད་དང་སྦྱིན་སྲེག་གི་ཁྱད་པར་གྱིས། ཞི་བ་དང་། རྒྱས་པ་དང་། དབང་
དང་། དྲག་ཤུལ་སྤྱོད་པར་གསུངས་སོ། །མཉེས་པར་བྱ་བའི་ཐབས་ཞེས་བྱ་བ་ནི། དམ་ཚིག་འཛིན་པ་དང་། དབང་བསྐུར་བ་དང་། མཆོད་པ་ལ་སོགས་པའི་ངེས་པའི་མཚན་ཉིད་དང་། བཟླས་བརྗོད་དང་། སྦྱིན་སྲེག་བྱེད་པའོ། །ཁ་ཅིག་ཏུ་ནི་རྒྱས་པར་སྤྲོས་ལ་ཞེས་བྱ་བ་

71-1-103a

ནི་རྒྱུད་ལ་ལ་དག་ལས་འཕྲོས་ཆེ་བར་གསུངས་པ། དབང་པོ་རྟུལ་པོ་རྣམས་ཀྱིས་མི་འདུས་ཞེས་བྱ་བའི་ཐ་ཚིག་གོ། །དེ་ལས་གཞན་དག་ནི་ཅུང་ཟད་ཙམ་དུ་བསྟན་པ་དང་ཞེས་བྱ་བ་ནི། ཁ་ཅིག་ཏུ་ཟུར་ཙམ་གྱིས་བསྟན་པ་ཐོས་པ་ཉུང་དུས་མི་གོ་བའོ། །གཞན་
དག་ཏུ་ནི་མ་གསུངས་སོ་ཞེས་བྱ་བ་ནི་རྒྱུད་ཁ་ཅིག་ཏུ་གསང་སྔགས་དང་། དེའི་ཕན་ཡོན་ཙམ་ནི་གསུངས་ལ། དེ་དག་གི་རིགས་ལ་སོགས་པའི་དབྱེ་བ་དང་མཉེས་པར་བྱ་བའི་ཐབས་ནི་མ་གསུངས་སོ་ཞེས་བྱ་བའི་ཐ་ཚིག་གོ། །དགོངས་ནས་ཞེས་བྱ་བ་ནི། དོན་མ་འདུས་པ་དང་། 
མ་གོ་བ་དང་། ཆོ་ག་མེད་པའི་རྣམས་བསྒྲུབ་ཏུ་མི་རུང་བ་ལས་དགོངས་པའི་དོན་ཏོ། །བཅོམ་ལྡན་འདས་ཞེས་བྱ་བ་ནི་བདུད་བཅོམ་ཞིང་གཟུགས་ལ་སོགས་པའི་ལེགས་པ་དྲུག་དང་ལྡན་པའི་དོན་ཏོ། །རིགས་ཐམས་ཅད་ཀྱིས་མཉེས་པར་བྱ་བའི་ཐབས་སུ་གྱུར་པ་ཞེས་བྱ་བ་ནི། 
འཇིག་རྟེན་ལས་འདས་པ་དང་། འཇིག་རྟེན་པ་ཐམས་ཅད་ལ་ཡང་འདི་སྦྱར་དགོས་པར་བསྟན་ཏོ། །འཇུག་པ་ཞེས་བྱ་བ་ནི། རིག་སྔགས་འཆང་སྒྲུབ་པ་དང་། མི་སྒྲུབ་པ་གཉི་གའི་ཐུན་མོང་དང་། ཐུན་མོང་མ་ཡིན་པར་འཇུག་པའོ། །སྦྱོར་བ་ཞེས་བྱ་བ་ནི། ལྷ་རྣམ་པ་དྲུག་
པོ་གཟུགས་དང་། ཕྱག་རྒྱ་དང་། ཡི་གེ་དང་། སྒྲ་དང་། ཀུན་རྫོབ་ཀྱི་ཏིང་ངེ་འཛིན་རྣམ་པ་དང་བཅས་པ་དང་། དོན་དམ་པའི་ཏིང་ངེ་འཛིན་གཉིས་སུ་མེད་པ་ལ་སྦྱོར་བའོ། །སྒྲུབ་པ་ཞེས་བྱ་བ་ནི་ལུས་སམ། རྫས་སམ། ལོངས་སྤྱོད་དག་སྒྲུབ་པའོ། །གྲུབ་པ་ཞེས་བྱ་བ་ནི་
འབར་བ་ལ་སོགས་པའི་བྱེ་བྲག་གིས་དངོས་གྲུབ་གང་ཡང་རུང་བ་ཞིག་ཏུ་གྱུར་ནས། ཇི་ལྟར་སྤྱད་པ་བསྟན་པའོ། །དཔུང་བཟངས་ཞེས་བྱ་བ་ནི་ཕྱག་ན་རྡོ་རྗེའི་སྲས་ཏེ་ཡབ་ཀྱི་དཔུང་པ་བཟང་པོ་ལས་འཁྲུངས་པ། འདིར་ཞུས་པའི་གང་ཟག་གི་དབང་དུ་མཛད་དེ། རྒྱུད་ཀྱི་མིང་
ཡང་དེ་དང་མཐུན་པར་བཏགས་པར་རིག་པར་བྱའོ། །ལེའུ་བཅུ་གཅིག་པོ་ཞེས་བྱ་བ་ནི་ལེའུ་རིམ་པར་བཀོད་པའི་གྲངས་སོ། །གཏན་ལ་ཕབ་པར་བསྟན་ཏོ་ཞེས་བྱ་བ་ནི་མདོར་བསྡུས་པ་དང་། གོ་སླ་བར་བྱས་ཏེ་ངེས་པར་བསྟན་པའི་དོན་ཏོ།    །དོན་རྣམ་པར་དབྱེ་བའི་དབང་དུ་མཛད་

71-1-103b

ནས། དེ་ལ་ལེའུ་རིམ་པར་དང་པོ་ནི་དོན་བདུན་གྱིས་བཤད་པར་བསྟན་ལ། ཚིག་དང་པོའི་དོན་ནི་འདི་ལྟ་སྟེ། མདོ་སྡེ་དང་། དེ་འཆད་པ་དང་། ཞུ་བ་དང་། འབྲེལ་པ་དང་། བརྗོད་པར་བྱ་བ་དང་། དགོས་པ་དང་། དགོས་པའི་ཡང་དགོས་པ་རྣམས་ཀྱིས་བསྟན་ཏེ་ཞེས་གསུངས་
སོ། །དེ་ལ་ལེའུ་དང་པོ་ཞེས་བྱ་བ་ནི་ཐོག་མར་གསུངས་པའི་ལེའུའོ། །དོན་བདུན་གྱིས་བཤད་པར་བསྟན་ལ་ཞེས་བྱ་བ་ནི་དོན་གྱི་རྣམ་གྲངས་བདུན་ནོ། །ཚིག་དང་པོའི་དོན་ཞེས་བྱ་བ་ནི་བདུན་པའི་དང་པོའོ།    །དེ་ལ་མདོ་སྡེ་ཞེས་བྱ་བ་ནི་དཔུང་བཟངས་ཀྱིས་ཞུས་པ་ཞེས་གྲགས་པའོ།    །
དེ་འཆད་པ་ནི་བཅོམ་ལྡན་འདས་རྡོ་རྗེ་འཛིན་ཏོ།    །ཞུ་བ་ནི་འཕགས་པ་དཔུང་བཟངས་ཏེ། དེ་གཉིས་ཀྱང་སྐྱེ་བ་གཅིག་གིས་ཐོགས་པའི་ཕྱིར། བྱང་ཆུབ་སེམས་དཔའི་མངོན་པར་ཤེས་པ་དང་། གཟུངས་དང་། སོ་སོ་ཡང་དག་པར་རིག་པ་དང་། ཏིང་ངེ་འཛིན་དང་། དབང་དང་། 
བཟོད་པ་དང་། རྣམ་པར་ཐར་པ་ཐམས་ཅད་ཀྱི་དམ་པའི་ཕ་རོལ་ཏུ་སོན་པ། བྱང་ཆུབ་སེམས་དཔའི་ས་ཐམས་ཅད་ལ་སྒྲིབ་པ་མ་ལུས་པར་སྤངས་པས་བཤད་ཅིང་གཟུང་བའི་སྒོ་ནས་གང་དག་གང་ཟག་གི་རྗེས་སུ་འབྲང་བ་རྣམས་རྒྱུད་ལ་གུས་པ་སྐྱེའོ།    །འབྲེལ་པ་ཞེས་བྱ་
བ་ནི་འཕགས་པ་རྡོ་རྗེ་འཛིན་པ་ལ་སོགས་པ་རིག་སྔགས་ཐམས་ཅད་དུ་གྲུབ་པས། རྒྱུད་འདི་ལས་བཤད་པ་འམ། ཡང་ན་རྒྱུད་འདི་ལས་གོམས་ཤིང་། འདི་མན་ངག་བཞིན་དུ་སྤྱད་པས། རིག་སྔགས་འཆང་རྣམས་དངོས་གྲུབ་ཐོབ་པའི་ཕྱིར་རོ།    །བརྗོད་པར་བྱ་བ་ཞེས་
བྱ་བ་ནི། རིག་སྔགས་ཐམས་ཅད་མཉེས་པའི་ཐབས་སུ་གྱུར་པ། འཇུག་པ་ལ་སོགས་པའི་སྤྱོད་པ་རྒྱུད་འདིས་སྟོན་པའི་དོན་ཏོ།    །དགོས་པ་ཞེས་བྱ་བ་ནི་ཆོ་གའི་གནས་རྣམས་གཏན་ལ་ཕབ་པར་ཤེས་པ་དང་། ཡིད་ལ་བྱེད་པའི་ཕན་ཡོན་ཐོབ་པར་འགྱུར་བའོ། །དེ་ལ་ཆོ་གའི་
གནས་རྣམས་གཏན་ལ་ཕབ་པར་ཤེས་པས་ནི། འཇུག་པ་ལ་སོགས་པའི་དུས་ན་ལས་སུ་བྱ་བ་ཐམས་ཅད་རྟོགས་པར་ཁོང་དུ་ཆུད་པས་བདེ་བླག་ཏུ་སྒྲུབ་པ་ལ་འཇུག་ནུས་ལ། ཡིད་ལ་བྱེད་པའི་ཕན་ཡོན་ཐོབ་པས་ནི་ཞི་གནས་ཀྱི་རྗེས་སུ་མཐུན་པ་དང་ལྷག་མཐོང་འཕེལ་བའི་རྗེས་

71-1-104a

སུ་མཐུན་པར་འགྱུར་བའི་ཕྱིར་རོ། །དེ་ཡང་རིག་སྔགས་འཆང་གི་སྡེ་སྣོད་ལས། གནས་པ་གསུམ་དང་། རྣམ་པར་ཐར་པའི་སྒོ་གསུམ་ལ་གཞོལ་བར་བྱའོ། །དེ་ལ་གནས་པ་གསུམ་ནི་འཕགས་པ་དང་། ལྷའི་དང་། ཚངས་པའི་གནས་པའོ། །དེ་ལ་འཕགས་
པའི་གནས་པ་ནི་འཕགས་པའི་བདེན་པ་བཞིའོ། །ལྷའི་བསམ་གཏན་བཞིའོ། །ཚངས་པ་ནི་ཚད་མེད་པ་བཞིའོ། །སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་མཚན་ཉིད་ནི་རྣམ་པར་ཐར་པའི་སྒོ་གསུམ་ཡིན་ནོ་ཞེས་འབྱུང་བ་དང་མཐུན་པར་འདི་ཡང་གསུངས་
སོ། །དེ་དག་འོག་ནས་ཐོད་རྒལ་དུ་འབྱུང་བ་རྣམས་འདིར་སྦྱར་བར་བྱ་སྟེ། དེ་ལ་འཕགས་པའི་གནས་པ་བདེན་པ་བཞི་པོ་འདི་ཅིའི་ཕྱིར་བཤད་ཅེ་ན། མྱ་ངན་ལས་འདས་པ་དང་། འཁོར་བ་གཉིས་ཀྱི་ཡོན་ཏན་དང་ཉེས་པ་མ་རྟོགས་པའི་ཕྱིར། བྱིས་པ་རྣམས་སྲེད་པ་དང་། ལོངས་
སྤྱོད་ལ་མངོན་པར་དགའ་ཞིང་མྱ་ངན་ལས་འདས་པ་ལ་སྐྲག་གོ། །དེའི་ཕྱིར་འཁོར་བ་ལ་སྐྱོ་བར་བྱ་བའི་དོན་དང་། མྱ་ངན་ལས་འདས་པ་མངོན་སུམ་དུ་བྱ་བའི་དོན་དུ་བདེན་པ་བཞི་ལ་འཇུག་པར་བྱ་བའི་ཕྱིར་དྲན་པ་ཉེ་བར་གཞག་པ་བསྒོམ་པར་བསྟན་ཏོ། །དེ་ལ་ལུས་དྲན་པ་ཉེ་བར་
གཞག་པའི་དབང་དུ་མཛད་ནས། འདོད་ཆགས་ཤས་ཆེ་མི་གཙང་ཤ་ཚིལ་དང་། །པགས་པ་ཀེང་རུས་བལྟ་བས་རྣམ་པར་བཟློག །ཅེས་བྱ་བ་དང་། ལུས་འདི་མི་གཙང་པགས་པ་ཤ་ཁྲག་རྐང་། །གླད་རྒྱས་རྒྱུ་མ་མཚར་མཆིན་མཁལ་མ་ཞག །མཁྲིས་པ་བད་ཀན་ཁུ་
ཆུ་ཕྱི་ས་དང་། །གཅིན་སྣབས་བ་སྤུ་སྐྲ་དང་རུས་པ་དང་། །མིག་དང་རྣ་བ་སྣ་དང་ཁ་དང་ནི། །བཤང་གོའི་མཚན་དང་བུ་ག་དགུ་པོ་ཡི། །རྨ་ནས་དྲི་མ་སྣ་ཚོགས་མི་ཙང་བ། །འཛག་པའི་རྒྱུ་ནི་རྟག་ཏུ་འབྱུང་བ་ཡིན། །དེ་ལྟར་ཡན་ལག་ཐམས་ཅད་འདུས་པ་དང་། །ས་ཆུ་མེ་རླུང་
ནམ་མཁའ་རྣམས་དང་ལྡན། །ཇི་བཞིན་ལས་ཀྱི་རྗེས་འབྲང་མི་ཡི་ལུས། །ཐམས་ཅད་ལྡན་པའི་ལུས་ལ་གནས་པ་ཡིན། །འདོད་ཆགས་ཀྱིས་ནི་གདུངས་པར་གྱུར་ན་ཡང་། །ལུས་ཀྱི་ཡན་ལག་འདི་དག་ཐམས་ཅད་ལ། །དྲན་པ་རྩེ་གཅིག་མངོན་དུ་བྱས་ནས་ནི། །ཡེ་ཤེས་མིག་

71-1-104b

གིས་སོ་སོ་རྣམ་པར་བརྟག །དེ་ལྟར་གང་གིས་ངེས་པར་བརྟགས་པ་ན། །ལུས་དང་སྲོག་ལ་རྗེས་སུ་ཆགས་པ་ཡི། །འདོད་ཆགས་རྩ་ནས་ཡོང་ཡེ་ཞི་འགྱུར་ཏེ། །ཉི་མས་མུན་ནག་གཏན་ནས་བསལ་བ་བཞིན། །ཞེས་གསུངས་ཏེ། འདིས་ནི་གནས་ངན་ལེན་རབ་ཏུ་སྟོན་ཏེ། 
དེ་ལ་ཡོངས་སུ་བརྟགས་པས། སྡུག་བསྔལ་གྱི་བདེན་པ་ལ་འཇུག་གོ་ཞེས་བསྟན་ཏོ། །ཚོར་བ་དྲན་པ་ཉེ་བར་གཞག་པའི་དབང་དུ་མཛད་ནས། ཚོལ་དང་མཛའ་བཤེས་དང་ནི་རྣམ་པར་བྲལ། །མི་སྡུག་པ་དང་ཕྲད་ཅིང་འདོད་པས་གདུངས། །ངན་པ་སྐྱེ་རྒ་འཆི་བའི་སྡུག་
བསྔལ་ཅན། །ཡུལ་རྣམས་ཀུན་དུ་སོང་ནའང་མེད་པ་མིན། །ཤ་སྦྲང་ཚ་གྲང་བཀྲེས་དང་ངལ་ལ་སོགས། །གང་དུ་སོང་ནའང་སྡུག་བསྔལ་ཉིད་ཡིན་པས། །ཡུལ་ལ་མངོན་དགའི་སེམས་ནི་བྱུང་བ་ན། །རྣམ་རྟོག་དེ་དག་རྣམས་ཀྱིས་བཟློག་པར་བྱ། །ཞེས་གསུངས་ཏེ། 
འདིས་ནི་སྲེད་པའི་རྒྱུ་ནི་ཚོར་བ་སྟེ། དེ་ལ་ཡོངས་སུ་བརྟགས་པས་ཀུན་འབྱུང་བའི་བདེན་པ་ལ་འཇུག་གོ་ཞེས་བསྟན་ཏོ། །སེམས་དྲན་པ་ཉེ་བར་གཞག་པའི་དབང་དུ་མཛད་ནས། སེམས་ནི་གློག་དང་སྤྲེའུ་དང་རླུང་དང་མཚུངས། །རྒྱ་མཚོ་ཆེན་པོ་ཡི་ནི་རླབས་དང་འདྲ། །སྒྱུ་ཅན་འདོད་
དགུར་འདོད་ཡོན་མངོན་དགའ་བ། །གཡོ་ཞིང་འཕྱན་པ་ངེས་པར་གདུལ་བར་བྱ། །ཞེས་བྱ་བ་དང་། དེའི་ཕྱིར་བཅོམ་ལྡན་རྒྱལ་བའི་དབང་པོ་ཡིས། །ཆོས་འདི་ཀུན་གྱི་རྩ་བ་སེམས་ཞེས་གསུངས། །སེམས་ནི་དང་བར་ལྷ་མི་བདེ་བ་དང་། །མཐོ་རིས་དང་ནི་བྱང་གྲོལ་ཐོབ་པར་
འགྱུར། །སེམས་ཀྱི་སྐྱོན་གྱིས་དུད་འགྲོར་སྐྱེ་བ་དང་། །སེམས་དམྱལ་གནས་ཤིང་མི་སྡུག་དབུལ་པོར་འགྱུར། །སེམས་ནི་རབ་ཏུ་དང་བར་གྱུར་པའི་མིས། །ས་ཆུ་མེ་རླུང་སྐྱེ་རྒ་འཆི་སོགས་དང་། །བར་དང་ཐ་མར་གནོད་པ་ཀུན་བྲལ་བ། །རྣམ་གྲོལ་བདེ་ཞིང་ཞི་བ་ཐོབ་པར་འགྱུར། །
གསང་སྔགས་དངོས་གྲུབ་ཀུན་དང་ཐུན་མོང་བ། །བདེ་བ་ཆུང་ཞིང་སྡུག་བསྔལ་བརྒྱ་དང་འབྲེལ། །ཉོན་མོངས་དུག་བཅས་རྣམ་པར་འཇིག་འགྱུར་བ། །དང་པོའི་སེམས་ཀྱིས་ཐོབ་པར་གྱུར་པ་ཡིན། །ཞེས་གསུངས་ཏེ། འདིས་ནི་རྟག་ཏུ་མངོན་པར་ཞེན་པའི་གཞི་ནི་སེམས་ཏེ། 

71-1-105a

དེ་ལ་ཡོངས་སུ་བརྟགས་པས་འགོག་པའི་བདེན་པ་ལ་འཇུག་སྟེ། བདག་ཆད་པར་དོགས་པའི་འཇིགས་པ་མེད་པའི་ཕྱིར་རོ་ཞེས་བསྟན་ཏོ། །ཆོས་དྲན་པ་ཉེ་བར་གཞག་པའི་དབང་དུ་མཛད་ནས། འདོད་རྒྱལ་ལས་ཀྱང་མ་བྱུང་དུས་ལས་མིན། །རང་བཞིན་
དབང་ཕྱུག་ལས་ཀྱང་མ་ཡིན་ཏེ། །རྒྱུ་མེད་ཅན་མིན་སྐྱེས་བུས་མ་བྱས་ཀྱང་། །ལས་དང་ཉོན་མོངས་པ་ལས་སེམས་ཅན་བྱུང་། །གཟུགས་ནི་འབྱུང་བ་ཆེན་པོ་བཞི་དང་ལྡན། །དེ་ནི་བདག་མིན་གཟུགས་ཀྱང་བདག་མ་ཡིན། །གཟུགས་ལ་བདག་མེད་བདག་ལ་གཟུགས་མེད་དེ། །
གཟུགས་ནི་སྟོང་པའོ་ཕུང་བཞིའང་རིག་པར་གྱིས། །གཟུགས་ནི་དབུ་བ་རྡོས་པ་དག་དང་འདྲ་བ་སྟེ། །ཚོར་བ་ཆུའི་ཆུ་བུར་བཞིན་དུ་རྟག་པ་མེད། །དེ་ལྟར་མཐོང་བ་ལྟ་བ་བཟང་པོ་ཡིན། །གང་ཞིག་གཞན་གྱུར་དེ་ནི་ལྟ་ངན་གསུངས། །ཞེས་གསུངས་ཏེ། འདིས་ནི་ཆོས་ལ་ཡོངས་སུ་
བརྟགས་པས་ཀུན་ནས་ཉོན་མོངས་པ་དང་། རྣམ་པར་བྱང་བའི་ཆོས་ལ་རྨོངས་པ་མེད་པའི་ཕྱིར། ལམ་གྱི་བདེན་པ་ལ་འཇུག་གོ་ཞེས་བསྟན་ཏོ། །འདིར་ཚིགས་སུ་བཅད་པ། གནས་ངན་ལེན་ཕྱིར་སྲིད་རྒྱུའི་ཕྱིར། །གཞི་ཡི་ཕྱིར་དང་མ་རྨོངས་ཕྱིར། །བདེན་པ་བཞི་ལ་འཇུག་བྱ་བས། །
དྲན་པ་ཉེ་བར་གཞག་པ་བསྒོམ།    །དྲན་པ་ཉེ་བར་གཞག་པ་བསྒོམས་པ་དེ་ཉིད་ལ་མི་མཐུན་པའི་ཕྱོགས་དང་། གཉེན་པོ་གཉིས་སྐྱེད་པ་དང་། མ་སྐྱེས་པ་ཐ་དད་པས་བརྩོན་འགྲུས་རྣམ་པ་བཞི་འབྱུང་བ་ནི། ཡང་དག་པར་སྤང་བ་སྟེ། མི་མཐུན་པའི་ཕྱོགས་བསལ་བ་ལ་སྐྱེས་པ་
རྣམས་ཀྱི་རྒྱུད་བཅད་པའི་དབང་དུ་མཛད་ནས། ཚིག་རྩུབ་ཕྲ་མ་ཀྱལ་པ་སྨྲ་བ་དང་། །གཞན་གྱི་བུད་མེད་བགྲོད་དང་བརྫུན་སྨྲ་དང་། །རྐུ་དང་གཞན་གྱི་སྲོག་གཅོད་གནོད་བྱེད་དང་། །ཆང་དད་བྱེད་པ་རྟག་ཏུ་སྤང་བར་བྱ། །རྨོངས་པ་གང་གིས་ལུས་དང་ངག་དང་ནི། །དེ་བཞིན་ཡིད་ཀྱི་བསོད་
ནམས་བསགས་བྱས་ཀྱང་། །ཐམས་ཅད་ལོག་པར་ལྟ་བས་བཅོམ་པས་ན། །དེ་ཡི་རྣམ་སྨིན་མི་འདོད་འབྲས་བུར་འགྱུར། །དཔེར་ན་ས་དང་ཆུ་དང་དུས་ལྡན་ཡང་། །ས་བོན་ཚིག་པ་མྱུ་གུ་མི་སྐྱེ་ལྟར། །དེ་བཞིན་མི་ཤེས་ལོག་ལྟས་བཅོམ་པ་ཡི། །སེམས་ལས་དགེ་བའི་ཆོས་

71-1-105b

རྣམས་མི་སྐྱེའོ། །རྟག་ཏུ་སེམས་ནི་དགེ་བ་བཅུ་དག་གི། །ཆོས་ཀྱི་ལམ་ལ་གནས་པར་བྱས་ན་ལེགས། །ཞེས་བྱ་བ་དང་། སེར་སྣ་དྲེགས་དང་རྒྱགས་པ་རྣམ་སྤངས་ཏེ། །ཞེས་གསུངས་ཏེ། འདི་ནི་སྡིག་པ་མི་དགེ་བའི་ཆོས་སྐྱེས་པ་རྣམས་སྤང་བའི་ཕྱིར་འདུན་པ་སྐྱེད་དོ། །འབད་
དོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། །ཡང་དག་པར་རབ་ཏུ་འཇོག་གོ་ཞེས་བསྟན་ཏོ། །མི་མཐུན་པའི་ཕྱོགས་བསལ་བ་ལ་མ་སྐྱེས་པ་རྣམས་མི་བསྐྱེད་པའི་དབང་དུ་མཛད་ནས། གང་ཞིག་དགྲ་བཅོམ་ཕ་མ་གསོད་པ་དང་། །ཐུབ་པའི་དགེ་འདུན་དབྱེན་ནི་བྱད་
པ་དང་། །དེ་བཞིན་གཤེགས་ལ་སྡང་བའི་སེམས་ཀྱིས་སུ། །ནམ་ཞིག་མི་དག་སྐུ་མཚལ་འབྱིན་བྱེད་པ། །ཤིན་ཏུ་མི་བཟད་པ་ཡི་ལས་འདི་རྣམས། །རྒྱལ་བས་མཚམས་མེད་ལྔ་པོ་ཡིན་པར་བཤད། །གཏི་མུག་གིས་ནི་སྡིག་པ་ཅི་བྱས་ནའང་། །ཕུང་པོ་འདི་ལ་གྲུབ་པ་ཐོབ་
མི་འགྱུར། །མཆོད་རྟེན་འཇིག་ཅིང་བྱང་ཆུབ་སེམས་དཔའ་གསོད། །ཉོན་མོངས་ཟད་པའི་མ་ནི་སུན་འབྱིན་དང་། །སློབ་པ་གསོད་ཀྱི་དགེ་འདུན་མངའ་བ་ལ། །གང་ཞིག་འདོད་པས་མང་ཉུང་རྐུ་འཕྲོག་དང་། །མཚམས་མེད་ཉེ་ལྔར་དེ་བཞིན་གཤེགས་པས་གསུངས། །ཚུལ་ཉམས་
མི་ནི་འགའ་ཞིག་འདི་བྱེད་པ། །བསྐལ་པའི་བར་དུ་མནར་མེད་སྡུག་བསྔལ་མྱོང་། །གསང་སྔགས་དངོས་གྲུབ་བསྒྲིམས་ཀྱང་ཡོང་མི་འཐོབ། །གང་ཞིག་བདེ་གཤེགས་གསུང་གི་གླེགས་བམ་དག །ཆུད་གཟོན་པའམ་མེས་ནི་སྲེག་པ་དང་། །བསམ་པ་ངན་པས་ཆུར་ནི་འདོར་བ་དང་། །
ཡང་ན་ཆོས་ཀྱི་སྐུ་ནི་སྤོང་བ་འམ། །བསླབ་ཚིག་མ་ལུས་པས་ནི་བརྒྱན་པ་ཡི། །དགེ་སློང་དག་དང་དགེ་སློང་མ་གསོད་དང་། །དགེ་བསྙེན་དང་ནི་དགེ་བསྙེན་མ་གསོད་དང་། །ངན་པའི་སེམས་ཀྱིས་ལྷ་ཁང་སྲེག་ཀྱང་རུང་། །མི་ཡི་ཡུལ་ནི་སྡིག་པ་འདི་བྱས་པ། །དཀའ་བ་སྤྱོད་པར་ལྡན་
ཡང་གྲུབ་མི་ཐོབ། །གང་ཞིག་དཀོན་མཆོག་གསུམ་ལ་གནོད་པ་ཡི། །བསམ་པས་གནོད་པ་ཅུང་ཟད་བྱས་ཀྱང་རུང་། །བདག་ཉིད་མནར་མེད་ཡུན་རིང་དམྱལ་བར་བཙོ། །དེ་ལས་ཐར་ནའང་ལས་ཀྱི་དབང་གིས་ནི། །རིགས་ངན་མི་དང་དུད་འགྲོར་སྐྱེ་བ་འཐོབ། །འདི་དག་ངས་ནི་

71-1-106a

ཁྱོད་ལ་མདོར་བཤད་དོ། །ཞེས་བྱ་བ་དང་། གང་ཞིག་མི་བཟད་ལས་བྱེད་ཐུབ་པ་གསོད། །རིག་སྔགས་གཅོད་དང་གནོན་པར་བྱེད་པའམ། །བསམ་པ་ངན་པས་གསང་སྔགས་ཚོགས་མི་མཆོད། །དོན་མེད་བཞིན་དུ་སེན་མོས་རྩ་གཅོད་དང་། །རྐང་པས་
རྐང་མཉེད་པ་ལ་སོགས་པའོ། །སྣ་འབིགས་དགེ་འདུན་ལ་ནི་མི་གུས་དང་། །འབྱུང་པོ་བྱིན་པའམ་ལྷ་བཤོས་གཏོར་མ་འམ། །ས་ལ་ལྷུང་བ་སྔགས་པས་བཟའ་མི་བྱ། །འདོད་ཆགས་ཟིལ་གྱིས་ནོན་པས་དུད་འགྲོ་དང་། །བུད་མེད་བགྲོད་བྱ་མིན་པར་བགྲོད་མི་བྱ། །གླང་
ཆེན་མི་གདུལ་སྦྲུལ་ཡང་མི་གཟུང་ཞིང་། །རྟ་རྒྱུག་པ་དང་ལྕག་གིས་གཞུ་མི་བྱ། །གང་ཞིག་སེམས་ཅན་ན་དང་སྡུག་བསྔལ་ལ། །བྱམས་པའི་བསམ་པ་བརྟན་པོ་མེད་པ་དང་། །ལས་དེ་རྣམས་དང་ལྡན་པར་གྱུར་པ་དེའི། །དངོས་གྲུབ་ནམ་ཡང་འབྱུང་བར་མི་འགྱུར་རོ། །དཔེར་ན་ནམ་
མཁའ་མཐའ་ཐུག་མེད་པ་ལ། །འདོམ་གྱིས་བཅལ་བས་མཐའ་རྟོགས་མི་ནུས་ལྟར། །དེ་བཞིན་དཀོན་མཆོག་གསུམ་ལ་བརྟེན་ནས་ནི། །ཕན་གནོད་བྱས་པའི་དགེ་སྡིག་མཐའ་མི་རྟོགས། །རྒྱ་དང་རྙི་གཏོར་རྩ་བའི་དུག་དག་གིས། །ཁྱི་ལ་སོགས་པའི་སེམས་ཅན་གསོད་
པ་དང་། །བྱ་རོག་ལ་སོགས་གཟེབ་ཀྱིས་བཅིང་བྱས་ན། །འདི་དང་ཕ་རོལ་དུ་ཡང་གྲུབ་མི་ཐོབ། །བདུད་དགྲའི་མེ་ཏོག་རྙིང་པ་བོར་བ་རྣམས། །རྐང་པས་མི་བརྫི་མགོ་ལ་གདགས་མི་བྱ། །བཀྲེས་པས་གདུངས་ཀྱང་དེ་དག་རྣམས་ལ་ནི། །ཕུལ་བའི་ལྷ་བཤོས་ནམ་ཡང་བཟའ་
མི་བྱ། །ཞེས་གསུངས་ཏེ། འདིས་ནི་སྡིག་པ་མི་དགེ་བའི་ཆོས་མ་སྐྱེས་པ་རྣམས་མི་བསྐྱེད་པའི་ཕྱིར། འདུན་པ་བསྐྱེད་དོ། །འབད་དོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། །ཡང་དག་པར་རབ་ཏུ་འཇོག་གོ་ཞེས་བསྟན་ཏོ། །གཉེན་པོ་སྐྱེས་པ་ལ། མ་སྐྱེས་
པ་རྣམས་སྐྱེད་པའི་དབང་དུ་མཛད་ནས། དགེ་དང་མི་དགེའི་ཤེས་པ་གཟུང་ན་ནི། །བྲམ་ཟེ་དམངས་རིགས་དག་ལ་ཁྱད་པར་མེད། །འོན་ཀྱང་འགྲོ་བའི་བློས་ནི་བྲམ་ཟེ་དང་། །འདི་ནི་དམངས་རིགས་ཡིན་ཞེས་བརྟགས་པར་ཟད། །བདེན་པའི་ལམ་དམིགས་དགེ་བའི་རྗེས་

71-1-106b

འབྲངས་ནས། །དམངས་རིགས་དག་ཀྱང་རྒ་ཤི་མེད་པར་འགྲོ། །ལོག་པའི་ལམ་ཞུགས་ཉེས་པར་སྤྱོད་ལྡན་ན། །བྲམ་ཟེ་གང་ཡིན་མི་བཟད་དམྱལ་བར་ལྟུང་། །ལུས་ཅན་ཤིན་ཏུ་དྲི་མ་ལྡན་པ་དག །འདི་ན་གཞན་གྱིས་འདག་པར་མི་འགྱུར་ཏེ། །དེ་ནི་སྡིག་པ་རྣམ་པར་བསལ་བ་
དང་། །བསོད་ནམས་མ་ལུས་ཡོངས་སུ་བཟུང་བས་འདག །ཅེས་གསུངས་ཏེ། འདིས་ནི་དགེ་བའི་ཆོས་རྣམས་མ་སྐྱེས་པ་རྣམས་བསྐྱེད་པའི་ཕྱིར། འདུན་པ་བསྐྱེད་དོ། །འབད་དོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། །ཡང་དག་པར་རབ་ཏུ་གཞོག་
གོ་ཞེས་བསྟན་ཏོ། །གཉེན་པོ་བསྐྱེད་པ་ལ་སྐྱེས་པ་རྣམས་ཀྱི་རྒྱུད་ཀྱི་རྗེས་སུ་འཇུག་པའི་དབང་དུ་མཛད་ནས། དེ་ལྟར་སྡིག་པའི་ཆོས་ལ་རྣམ་གྲོལ་ནས། །བདེ་བར་གཤེགས་པས་ལེགས་པར་གསུངས་པའི་ཆོས། །དག་ཅིང་གྲོལ་བ་དང་ནི་ལྡན་གྱུར་པ། །ཟློས་པས་སྐྱོན་མདོ་སྡེ་
བཀླག་པར་བྱ། །གཙང་ཞིང་དབེན་པའི་ས་ཡི་ཕྱོགས་སུ་ནི། །འཇིམ་པའམ་ནི་བྱེ་མ་ལས་བྱས་པའི། །བདེ་གཤེགས་མཆོད་རྟེན་རྟེན་འབྲེལ་སྙིང་པོ་ཅན། །སྡིག་པ་སྦྱང་བའི་ཕྱིར་ནི་རྟག་ཏུ་གདབ། །རིང་བསྲེལ་ཅན་གྱི་གཟུགས་སམ་མཆོད་རྟེན་ལ། །བསྟོད་ཅིང་འཕྲེང་བ་དྲི་དང་
མར་མེ་དབུལ། །གདུགས་དང་རྒྱལ་མཚན་དྲི་དང་རོལ་མོ་དང་། །མཆོག་ཏུ་དང་བ་ཡིས་ནི་མཆོད་པར་བྱ། །ཞེས་བྱ་བ་དང་། ཇི་ལྟར་ཆུ་ཀླུང་ཉིན་མཚན་རྟག་ཏུ་ནི། །རྒྱུན་མི་འཆད་པར་འབབ་པར་འགྱུར་བ་ལྟར། །དེ་བཞིན་ཕྱག་བཅས་བཟླས་དང་བརྟུལ་ཞུགས་ཀྱི། །བསོད་
ནམས་ལུས་ཅན་ལ་ནི་འཕེལ་བ་འགྱུར། །ཞེས་བྱ་བ་དང་། ཇི་ལྟར་སྦྱིན་སྲེག་དང་ནི་བཟླས་བརྗོད་ཀྱིས། །གསང་སྔགས་བསྒྲུབས་ཀྱང་དངོས་གྲུབ་མ་ཐོབ་ན། །འཇིམ་པ་ལ་ནི་མཆོད་རྟེན་འབུམ་གདབ་པའམ། །ཡང་ན་ཆུ་འགྲམ་བྱེ་མ་དག་ལ་གདབ། །དེས་ནི་དེ་ཡི་སྡིག་པ་
སྲེག་གཞན་ལ། །བྱས་པ་གང་ཡིན་དེ་ནི་ཟད་གྱུར་ནས། །དེས་ན་གསང་སྔགས་མཐུ་ཡིས་འདི་ཉིད་ལ། །མཐོང་བའི་ཆོས་ལ་བསོད་ནམས་འབྲས་བུ་ཐོབ། །ཅེས་གསུངས་ཏེ། འདིས་ནི་དགེ་བའི་ཆོས་སྐྱེས་པ་རྣམས་གནས་པ་དང་། ཕྱིར་ཞིང་འབྱུང་བ་དང་། ཡོངས་སུ་རྫོགས་

71-1-107a

པར་བྱ་བའི་ཕྱིར། འདུན་པ་བསྐྱེད་དོ། །འབད་དོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། །ཡང་དག་པར་རབ་ཏུ་འཇོག་གོ་ཞེས་བསྟན་ཏོ། །འདིར་ཚིགས་སུ་བཅད་པ། མི་མཐུན་ཕྱོགས་དང་གཉེན་པོ་རྣམས། །རྣམ་པ་ཐམས་ཅད་ཡོངས་ཤེས་
ནས། །དེ་དག་ཡང་ཕྱིར་བརྩོན་འགྲུས་ནི། །རྣམ་པ་བཞི་དག་རབ་ཏུ་འབྱུང་།    །མི་མཐུན་པའི་ཕྱོགས་བསལ་བའི་བརྩོན་འགྲུས་བརྩམ་པའི་སེམས་གནས་པའི་ལུས་ལས་སུ་རུང་བ་ཉིད་རྫུ་འཕྲུལ་གྱི་རྐང་པ་བཞིར་འགྱུར་བའི་ཕྱིར། ཡང་དག་པར་སྤོང་བའི་འོག་ཏུ། རྫུ་འཕྲུལ་གྱི་
རྐང་པ་རྣམས་བསྟན་ཏོ། །དེ་ལ་འདུན་པའི་ཏིང་ངེ་འཛིན་གྱི་དབང་དུ་མཛད་ནས། དེ་ཡི་བདེ་བར་གཤེགས་ལ་དད་བསྐྱེད་ནས། །དེ་བཞིན་དུ་ནི་བྱང་ཆུབ་སེམས་ཀྱང་བསྐྱེད། །རྡོ་རྗེའི་རིགས་ཞེས་བརྗོད་པ་རྒྱ་ཆེན་དང་། །ང་ལ་ཡང་ནི་དད་ཅིང་དགའ་བར་བྱ། །ཞེས་གསུངས་ཏེ། འདི་
ནི་གང་གི་ཚེ། འདུན་པའི་དབང་གིས་བརྩོན་འགྲུས་རྩོམ་པ་ལ་གུས་པར་འཇུག་ན་སེམས་རྩེ་གཅིག་པ་ཉིད་ལ་རེག་གོ་ཞེས་བསྟན་ཏོ། །བརྩོན་འགྲུས་ཀྱི་ཏིང་ངེ་འཛིན་གྱི་དབང་དུ་མཛད་ནས། གྲགས་དང་མ་གྲགས་རྙེད་དང་མ་རྙེད་དང་། །བདེ་དང་སྡུག་བསྔལ་དེ་བཞིན་བསྟོད་དང་
སྨད། །སེམས་ཀྱིས་འཇིག་རྟེན་ཆོས་རྣམས་རབ་བཅོམ་སྟེ། །སྡིག་པའི་གནས་སུ་གྱུར་པ་སྤང་བར་བྱ། །དཔེར་ནི་རྒྱ་མཚོ་སྐད་ཅིག་ཙམ་ཡང་ནི། །མི་ཡི་རོ་དང་ལྷན་ཅིག་མི་གནས་ལྟར། །དེ་བཞིན་རྣམ་རྟོག་སེམས་ཀྱིས་སྡིག་བྱས་པ། །སྔགས་པ་སྐད་ཅིག་ཙམ་ཡང་གནས་
མི་བྱ། །ཞེས་གསུངས་ཏེ། འདིས་ནི་གང་གི་ཚེ་བརྩོན་འགྲུས་རྩོམ་པ་ན་རྟག་པར་སྦྱར་བས་སེམས་རྩེ་གཅིག་པ་ཉིད་ལ་རེག་གོ། །ཞེས་བསྟན་ཏོ། །སེམས་ཀྱི་ཏིང་ངེ་འཛིན་གྱི་དབང་དུ་བྱས་ནས། འཕགས་པ་གཙུག་ན་རིན་པོ་ཆེས་ཞུ་བའི་མདོ་ལས། སྙིང་རྗེ་ཆེན་པོ་རབ་ཏུ་ཐོབ་
པས་སེམས་ཡེངས་པར་འགྱུར་ཞེས་འབྱུང་བ་དང་མཐུན་པར་གསུངས་ཏེ། བྱམས་དང་སྙིང་རྗེའི་ཆུས་གདབ་ཞེ་སྡང་ལ། །ཞེས་གསུངས་སོ། །འདིས་ནི་སྔོན་གྱི་ཏིང་ངེ་འཛིན་གྱི་ས་བོན་ལ་བརྟེན་ནས། རང་བཞིན་གྱི་སྙིང་རྗེ་ཆེན་པོས་སེམས་འཛིན་ཅིང་། སེམས་རྩེ་གཅིག་

71-1-107b

པ་ཉིད་ལ་རེག་གོ་ཞེས་བསྟན་ཏོ། །དཔྱོད་པའི་ཏིང་ངེ་འཛིན་གྱི་དབང་དུ་བྱས་ནས། རེ་ཞིག་ཅིག་ན་དགྲ་ཡང་མཛའ་བོར་འགྱུར། །མཛའ་བོ་དག་ཀྱང་དགྲར་ནི་འགྱུར་བ་ཉིད། །དེ་ཞིན་ཁ་ཅིག་ཀྱང་ནི་བར་མར་འགྱུར། །བར་མ་དེ་ཉིད་ཀྱང་ནི་དགྲ་བོར་འགྱུར། །དེ་ལྟར་
མཛའ་བཤེས་འགྱུར་བར་རིག་བྱ་སྟེ། །བློ་གྲོས་ལྡན་པས་ནམ་ཡང་ཆགས་མི་བྱ། །གཉེན་ལ་དགའ་བའི་སེམས་ཀྱི་རྣམ་རྟོག་དག །བཟློག་ནས་དགེ་ལ་ཅི་བདེ་གཞག་པར་བྱ། །ཞེས་བྱ་བ་དང་། ལེ་ལོ་འདོད་ཆགས་མི་དགེར་ལྡན་པའི་སེམས། །གང་དང་གང་དུ་གཡེང་
ཞིང་རྒྱུ་བ་དག །དེ་དང་དེ་ནས་མྱུར་དུ་བཟློག་ནས་ནི། །གསང་སྔགས་ཡི་གེ་མཆོད་ལ་ལེགས་པར་སྦྱར། །ཞེས་གསུངས་ཏེ། འདིས་ནི་གང་གི་ཚེ་དམིགས་པ་རབ་ཏུ་རྣམ་པར་འབྱེད་པ་ན་སེམས་རྩེ་གཅིག་པ་ཉིད་ལ་རེག་གོ་ཞེས་བསྟན་ཏོ། །སེམས་ལས་སུ་རུང་བ་དེའི་དགོས་
པ་གང་ཞེ་ན། ལེ་ལོ་དང་ནི་གདམས་ངག་རྣམས། །བརྗེད་དང་བྱིང་དང་རྒོད་པ་དང་། །འདུ་མི་བྱེད་དང་འདུ་བྱེད་དེ། །འདི་དག་ཉེས་པ་ལྔར་འདོད་དོ། །ཞེས་བྱ་བ་འདི་སྤང་བར་དགོངས་པའོ། །དེའི་རྒྱུ་གང་ཞེ་ན། སྤོང་བའི་འདུ་བྱེད་བརྒྱད་དེ། གནས་དང་དེ་ལ་གནས་པ་དང་། །
རྒྱུ་དང་འབྲས་བུ་ཉིད་དུའོ། །དམིགས་པ་བརྗེད་པར་གྱུར་པ་དང་། །བྱིང་དང་རྒོད་པ་རྟོགས་པ་དང་། །དེ་ཡང་མངོན་པར་འདུ་བྱེད་དང་། །ཞི་ཚེ་རྣལ་དུ་འཇུག་པའོ། །ཞེས་བཤད་དོ། །འདིར་ཚིགས་སུ་བཅད་པ། དེར་གནས་ལས་སུ་རུང་བ་ཉིད། །དོན་རྣམས་ཐམས་ཅད་འབྱོར་བར་
འགྱུར། །ཉེས་པ་ལྔ་སྤོང་འདུ་བྱེད་བརྒྱད། །བརྟེན་པའི་རྒྱུ་ལས་བྱུང་བའོ།    །རྫུ་འཕྲུལ་གྱི་རྐང་པ་རྣམས་ཀྱིས་སེམས་ལས་སུ་རུང་ནས། དེའི་འོག་ཏུ་ཐར་པའི་ཆ་དང་མཐུན་པའི་དགེ་བའི་རྩ་བ་བསྐྱེད་པ་ལ་དབང་བྱེད་པས། རྫུ་འཕྲུལ་གྱི་རྐང་པའི་འོག་ཏུ། དབང་པོ་ལྔ་རྣམ་པར་
གཞག་གོ། །དད་པའི་དབང་པོའི་དབང་དུ་མཛད་ནས། དཀོན་མཆོག་གསུམ་ལ་དད་པས་བརྟེན་པར་བྱ། །ཞེས་གསུངས་ཏེ། འདིས་ནི་གང་ཡོད་པ་ཉིད་དང་། ཡོན་ཏན་ཅན་དང་བུས་པ་རྣམས་ལ་གོ་རིམས་བཞིན་དུ། མངོན་པར་ཡིད་ཆེས་པ་དང་། དད་པ་དང་། འདོད་པ་

71-1-108a

རྣམས་ནི། དད་པའི་མཚན་ཉིད་དུ་བསྟན་ཏོ། །བརྩོན་འགྲུས་ཀྱི་དབང་དུ་མཛད་ནས། སོས་ཀའི་ནགས་མེ་མཆེད་པའི་མེ་ལྕེ་ཡིས། །མ་བསྒྲིམས་བཞིན་དུ་ཚང་ཚིང་ཀུན་བསྲེག་ལྟར། །བཟླས་བརྗོད་མེ་ལ་ཚུལ་ཁྲིམས་རླུང་གི་སྦར། །བརྩོན་འགྲུས་ཆེན་པོའི་
མེ་ལྕེས་སྡིག་པ་བསྲེག །ཅེས་གསུངས་ཏེ། འདིས་ནི་དེ་ལྟར་དད་པར་འགྱུར་བ་ནི་འཁོར་བའི་བཙོན་ར་ནས་འབྱུང་བར་སྦྱོར་བས་དེའི་ཕྱིར། བརྩོན་འགྲུས་རྩོམ་མོ་ཞེས་བསྟན་ཏོ། །དྲན་པའི་དབང་པོའི་དབང་དུ་མཛད་ནས། འཕགས་པ་གཙུག་ན་རིན་པོ་ཆེའི་མདོ་ལས། ཡོངས་
སུ་བསྔོ་བ་ལ་མཁས་པ་ནི། དྲན་པའི་དབང་པོ་ཞེས་འབྱུང་བ་དང་མཐུན་པར་གསུངས་ཏེ། མེ་ཏོག་དྲི་སྣོད་མར་མེ་ཕུལ་བ་དང་། །ཚུལ་ཁྲིམས་བརྩོན་འགྲུས་དཀའ་ཐུབ་བྱས་པ་ཡིས། །དགེ་བ་དེ་ཀུན་བླ་ན་མེད་པ་ཡི། །སངས་རྒྱས་བྱང་ཆུབ་བླ་མེད་མཆོག་ཏུ་བསྔོ། །དཔེར་ན་ཆུ་ཀླུང་
རྒྱ་མཚོར་ཕྱིན་པ་ན། །ལན་ཚྭའི་རོ་ནི་གཅིག་ཏུ་འགྱུར་བ་བཞིན། །དེ་ལྟར་བླ་མེད་བྱང་ཆུབ་བསྔོས་པ་ཡི། །བསོད་ནམས་རྒྱལ་བའི་རོར་ནི་གཅིག་ཏུ་འགྱུར། །དཔེར་ན་སྐྱེས་བུ་ལ་ལས་འབྲས་བུའི་ཕྱིར། །སཱ་ལུ་བསྐྱེད་ཀྱི་སོག་མའི་ཕྱིར་མིན་ཡང་། །སཱ་ལུ་རྙེད་ནས་བསྒྲིམས་པ་
མེད་པར་ནི། །སོག་མའི་ཕུང་པོ་ཞར་ལ་འབྱུང་བ་བཞིན། །དེ་བཞིན་བྱང་ཆུབ་འབྲས་བུ་འདོད་པའི་ཕྱིར། །བསོད་ནམས་སྒྲུབ་ཀྱི་ལོངས་སྤྱོད་ཕྱིར་མིན་ཡང་། །སོག་མའི་ཕུང་པོ་དག་དང་མཚུངས་པར་ནི། །མ་བསྒྲུབས་བཞིན་དུ་མི་ཡི་ལོངས་སྤྱོད་གྲུབ། །ཚེ་རིང་བ་འདི་ལེགས་པར་ཐོབ་པ་
དང་། །ཆོས་བཞིན་བསྒྲུབ་པའི་ཡུལ་དག་རྙེད་པའམ། །སྐྱེ་བ་མེད་པར་འགྱུར་ཞིང་འགྲོ་བ་ཡི། །བསམ་པ་རྣམས་ནི་རྟག་ཏུ་རྫོགས་པར་བྱ། །ཞེས་གསུངས་ཏེ། འདི་ནི་དེའི་འབྲས་བུ་ལ་རེ་བ་བསྒྲུབས་པས་ཚུལ་ཁྲིམས་རྣམ་པར་དག་པའི་རྒྱུར་འགྱུར་རོ་ཞེས་བསྟན་ཏོ། །གཞན་ཡང་། 
འགྲེང་དང་འདུག་དང་གཉིད་ལོག་ཉལ་བ་དང་། །འགྲོ་འཕྲེས་ཟ་ཀློག་བཟླས་བརྗོད་བྱེད་པ་ན། །རྗེས་སུ་དྲན་པ་སོ་སོའི་ཡོན་ཏན་དང་། །རིགས་པར་བཅས་ཏེ་རྗེས་སུ་དྲན་པར་བྱ། །ཞེས་བྱ་བ་དང་། བདེ་གཤེགས་ཆོས་དང་དགེ་འདུན་བཅས་པར་དྲན་བྱས་ཏེ། །ཤཱ་རིའི་བུ་དང་ང་ལ་

71-1-108b

ཐལ་སྦྱར་བཏུད་ནས་ཉལ། །དེ་ལྟར་སྦགས་པའི་སྡིག་པ་མཐའ་དག་ཟད་པར་བྱ། །ཞེས་བྱ་བ་དང་། ལྷ་ལ་སོགས་དང་བགེགས་དང་ལོག་འདྲེན་རྣམས། །བརྟུལ་ཞུགས་གནས་པ་དེ་ལ་གླགས་མི་ལྟ། །དཔེར་ན་ལོ་ཏོག་ཐམས་ཅད་ས་དག་ལ། །བརྟེན་ནས་སྐྱོན་མེད་པར་
ནི་སྐྱེ་བ་ལྟར། །དེ་བཞིན་ཚུལ་ཁྲིམས་བསྟེན་ནས་ཆོས་དཀར་མཆོག །སྙིང་རྗེའི་ཆུས་བརླན་པས་ནི་རྣམ་པར་སྐྱེ། །རྒྱལ་བ་ངས་གསུངས་སོ་སོ་ཐར་པ་ཡི། །ཚུལ་ཁྲིམས་རྣམ་དག་འདུལ་བ་མ་ལུས་ལས། །སྔགས་པ་ཁྱིམ་པས་རྟགས་དང་ཆོ་ག་སྤང་། །ལྷག་མ་རྣམས་
ནི་ཉམས་སུ་བླང་བར་བྱ། །ཞེས་བྱ་བ་དང་། ལྷ་ཡི་བདེ་བ་དང་ནི་འབྱོར་པ་དང་། །ཚེ་དང་སྟོབས་གཟུགས་ཕུན་སུམ་ཚོགས་པ་དང་། །ཐོས་མོང་མདངས་བཟང་གཅིག་ཏུ་ཡིད་གཞུངས་དང་། །དབང་ཐང་ཆེ་ཀུན་དཀའ་ཐུབ་སྟོབས་ཀྱིས་འཐོབ། །ཅེས་བྱ་བ་དང་། གང་
གི་ཚེ་ན་སེམས་ནི་དང་བ་ཡིས། །མི་ཡི་ཡུལ་ནས་བྱང་ཆུབ་སེམས་བླངས་པ། །དེ་ནི་ཕྱིན་ཆད་ལྷ་དང་ལྷ་མིན་དང་། །འཇིག་རྟེན་མ་ལུས་རྣམས་ཀྱི་ཕྱག་བྱར་འོས། །མིས་ནི་མངོན་པར་མཐོ་བ་མ་ལུས་པའི། །བསླབ་པ་མཐའ་དག་བླངས་པར་གྱུར་པ་དང་། །སེམས་ཅན་ཀུན་ལ་
མི་འཇིགས་སྦྱིན་པ་དང་། །དཀོན་མཆོག་གསུམ་གྱི་གདུང་ཡང་བསབ་པ་ཡིན། །ཞེས་གསུངས་པ་འདི་དག་གིས་ནི། དམིགས་པ་བསལ་བའི་མཚན་ཉིད་ནི། དྲན་པའི་དབང་པོར་བསྟན་ཏེ། དེས་ཀྱང་ཚུལ་ཁྲིམས་ཀྱི་བསླབ་པ་བསྒྲུབ་པར་སྟན་ཏོ། །ཏིང་ངེ་འཛིན་གྱི་དབང་པོའི་
དབང་དུ་མཛད་ནས། ཇི་ལྟར་གངས་ལ་ཉི་མའི་འོད་ཟེར་གྱིས། །གདུངས་ན་གཟི་བརྗིད་མི་བཟོད་འཇུ་བ་བཞིན། །ཚུལ་ཁྲིམས་ཉི་མའི་འོད་ཟེར་བཟླས་བརྗོད་ཀྱིས། །གདུངས་ན་སྡིག་པའི་གངས་ཀྱང་ཟད་པར་འགྱུར། །མུན་ནག་སྨག་ལ་མར་མེ་ཕྱུང་བ་ཡིས། །མུན་ནག་མ་ལུས་སེལ་
བར་བྱེད་པ་ལྟར། །ཚེ་རབས་སྟོང་ནས་གནས་པའི་སྡིག་པའི་མུན། །བཟླས་བརྗོད་མར་མེས་མྱུར་དུ་སེལ་བར་བྱེད། །ཅེས་བྱ་བ་དང་། ཚེ་རབས་གཞན་དུ་གང་དང་གང་བྱས་པའི། །སྡིག་པ་མ་ལུས་བཟླས་བརྗོད་བྱས་པས་འབྱང་། །བཟླས་པས་སྡིག་པ་མ་ལུས་བྱང་གྱུར་ན། །དང་

71-1-109a

པོའི་ཡིད་ཀྱིས་དངོས་གྲུབ་ཐོབ་པར་འགྱུར། །ཞེས་གསུངས་ཏེ། འདིས་ནི་ཏིང་ངེ་འཛིན་ནི་རྩེ་གཅིག་པའི་མཚན་ཉིད་རྒྱུ་དང་བཅས་པ་ཡིན་པས། སེམས་ཀྱི་བསླབ་པ་བསྒྲུབ་པར་བསྟན་ཏོ། །ཤེས་རབ་ཀྱི་དབང་པོའི་དབང་དུ་མཛད་ནས། ལས་ཀྱི་དབང་གྱུར་
བདག་པོ་མེད་པ་དང་། །མགོན་མེད་རྟེན་མེད་ཚེ་རབས་གཅིག་ནས་གཅིག །ལུས་ཀྱི་ཁ་བརྒྱུད་རྗེས་སུ་རབ་འགྲོ་བ། །དེ་ཡི་རྗེས་སུ་དགེ་དང་མི་དགེ་འབྲང་། །ཞེས་གསུངས་ཏེ། འདིས་ནི་ཤེས་རབ་ཀྱི་དབང་པོས་ཆོས་རྣམ་པར་འབྱེད་པ་བསྟན་ཏོ། །འདིར་ཚིགས་སུ་བཅད་པ། ཐར་
པའི་ཆ་དང་མཐུན་བསྐྱེད་ནས། །འདུན་དང་སྦྱོར་དང་དབང་བྱེད་དེ། །དམིགས་པ་བརྗེད་པར་མ་གྱུར་དང་། །མི་འཕྲོ་རྣམ་པར་འབྱེད་ཀྱང་ངོ་།    །དད་པ་ལ་སོགས་དེ་དག་ཉིད། །སྟོབས་དང་ལྡན་པར་གྱུར་པ་ལ། །སྟོབས་རྣམས་ཞེས་བྱ་བ་སྟེ། འདིར་ཚིགས་སུ་བཅད་པ། མི་
མཐུན་ཕྱོགས་ནི་བསྲབས་པའི་ཕྱིར། །སྟོབས་ལྡན་འབྲས་བུ་ཕྱི་མ་ཡིན། །དབང་པོ་རྣམས་ཀྱང་སྟོབས་རྣམས་ལ། །ངེས་འབྱེད་ཆ་མཐུན་གཉིས་གཉིས་སོ།    །ངེས་པར་འབྱེད་པའི་ཆ་དང་མཐུན་པ་ནི་ཟག་པ་མེད་པའི་ཆོས་འབྱུང་བའི་ཚུལ་དུ་རིག་པར་བྱ་སྟེ། ཆོས་ཀྱི་མཆོག་
གི་འོག་ཏུ། མཐོང་བའི་ལམ་འབྱུང་བས། སྟོབས་ཀྱི་འོག་ཏུ་བྱང་ཆུབ་ཀྱི་ཡན་ལག་རྣམས་བཤད་དོ། །དེ་ལ་དྲན་པ་ཡང་དག་བྱང་ཆུབ་ཀྱི་ཡན་ལག་གི་དབང་དུ་མཛད་ནས། སྔགས་ཀྱི་རྩ་བ་དང་པོར་ཚུལ་ཁྲིམས་ཏེ། །དེས་ན་བརྩོན་འགྲུས་དང་ནི་བཟོད་པ་དང་། །རྒྱལ་
བ་ལ་ནི་དད་དང་བྱང་ཆུབ་སེམས། །གསང་སྔགས་དང་ནི་ལེ་ལོ་མེད་པའོ། །ཞེས་བྱ་བ་དང་། ཆགས་དང་རྣམ་བྲལ་དགེ་ལ་དགའ་བ་དང་། །རྟག་ཏུ་དཀོན་མཆོག་གསུམ་ལ་སེམས་གཞོལ་ཞིང་། །སྡིག་པ་སྤངས་ཤིང་བཟླས་བརྗོད་ལྡན་པ་ཡི། །མི་ལ་ལྷ་རྫས་དངོས་གྲུབ་རིང་
བ་མེད། །ཅེས་བྱ་བ་དང་། ཁྱོད་ཀྱིས་ཇི་སྐད་གསུངས་པ་དེ་བཞིན་དུ། །མི་ཡིས་ལེགས་པར་སྤྱད་པ་བགྱིས་ནས་ནི། །དེ་དག་མྱུར་དུ་དབུལ་བའི་མུན་བསལ་ནས། །ཉི་མ་བཞིན་དུ་ཤིན་ཏུ་འབར་བར་འགྱུར། །ཡན་ལག་མི་ཉམས་སེམས་ཀྱང་མི་ཉམས་ཤིང་། །ནད་དང་

71-1-109b

སྡུག་བསྔལ་ལུས་ཉམས་མི་འགྱུར་བ། །ཁྱོད་ལ་དད་པའི་མིས་ནི་ཐོབ་པར་འགྱུར། །ཞེས་གསུངས་པ་འདིས་ནི། བྱང་ཆུབ་ཀྱི་གནས་ཀྱི་ཡན་ལག་སྟེ། དྲན་པའི་སྟོབས་ཀྱིས་དམིགས་པ་དེ་ལས་མི་གཡེང་བའི་ཕྱིར་རོ་ཞེས་བསྟན་ཏོ། །ཆོས་རྣམ་པར་འབྱེད་པ་ཡང་
དག་བྱང་ཆུབ་ཀྱི་ཡན་ལག་གི་དབང་དུ་མཛད་ནས། ལུས་དང་ངག་ཡིད་ལག་པ་མིག་དག་ནི། །སྨིན་མཚམས་ཡན་ལག་རྣམ་པར་གཡོ་བ་དག །རབ་ཏུ་བསྡམས་ནས་དེ་ལ་ཡིད་གཞོལ་ཞིང་། །བྱམས་ལ་གནས་ཞིང་ཀུ་ཤའི་ཁྲེས་ལ་འདུག །ཇི་སྲིད་དུ་ནི་རྩེ་གཅིག་
གནས་གྱུར་པ། །དེ་སྲིད་དུ་ནི་འབུམ་མམ་ཉིས་འབུམ་བཟླས། །ཞེས་གསུངས་ཏེ། འདིས་ནི་རང་བཞིན་གྱི་ཡན་ལག་བསྟན་ཏེ། བྱང་ཆུབ་ནི་ཡེ་ཤེས་ཀྱི་ངོ་བོ་ཉིད་ཡིན་པའི་ཕྱིར་རོ། །ཞེས་བསྟན་ཏོ། །བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་གི་དབང་དུ་མཛད་ནས། 
ཇི་ལྟར་རི་དྭགས་དབང་པོ་བཀྲེས་པ་དག །མཐུ་སྟོབས་ཆེན་པོས་གླང་ཆེན་གསོད་པ་དང་། །དེ་བཞིན་སྤྱང་ཀུ་ཕག་དང་རི་དྭགས་དང་། །ཝ་རྣམས་ཀྱང་ནི་མྱུར་དུ་གསོད་པ་ལྟར། །དེ་བཞིན་སྔགས་པ་སེང་གེའི་ཚུལ་གྱིས་སུ། །རབ་དང་འབྲིང་དང་ཐ་མའི་ལས་རྣམས་ལ། །
བརྩོན་འགྲུས་ཆེན་པོ་དང་ནི་ལྡན་པ་དང་། །འབད་པ་མཆོག་རྣམས་ཀྱིས་ཀྱང་བརྟན་པར་བྱ། །ཞེས་གསུངས་ཏེ། འདིས་ནི་ངེས་པར་འབྱུང་བའི་ཡན་ལག་སྟེ། དེས་སོ་སོ་སྐྱེ་བོའི་ས་ལས་ཤིན་ཏུ་འདའ་བའི་ཕྱིར་རོ་ཞེས་བསྟན་ཏོ། །དགའ་བ་ཡང་དག་བྱང་ཆུབ་ཀྱི་ཡན་ལག་
གི་དབང་དུ་མཛད་ནས། རྩེ་གཅིག་སེམས་དང་ལྡན་པའི་མི་ལ་ནི། །ཡིད་ལས་བྱུང་བའི་དགའ་བ་རབ་ཏུ་སྐྱེ། །དགའ་བས་ལུས་ནི་ཤིན་ཏུ་སྦྱངས་པ་འཐོབ། །ལུས་སྦྱངས་པ་ནི་བདེ་བའི་སྐལ་ལྡན་འགྱུར། །ལུས་བདེ་རྩེ་གཅིག་སེམས་དང་ཏིང་འཛིན་གྱིས། །དེ་ཚེ་བཟླས་
བརྗོད་དོགས་པ་མེད་པར་འགྱུར། །ཞེས་གསུངས་ཏེ། འདིས་ནི་ཕན་ཡོན་གྱི་ཡན་ལག་བསྟན་ཏེ། དེས་ལུས་དང་སེམས་ལ་ཕན་འདོགས་པའི་ཕྱིར་རོ་ཞེས་བསྟན་ཏོ། །ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་གི་དབང་དུ་མཛད་ནས། དངོས་གྲུབ་ཉེ་ན་ཟློས་

71-1-110a

ལ་དགའ་བ་དང་། །སེམས་ནི་སྡིག་ལ་ནམ་ཡང་དགའ་མི་འགྱུར། །བཀྲེས་སྐོམ་ཚ་གྲང་རླུང་དང་ངལ་བ་ཡི། །སྡུག་བསྔལ་དྲག་པོས་ཉེན་ཀྱང་གཡོ་མི་འགྱུར། །སྦྲང་བུ་ཤ་སྦྲང་སྲིན་བུ་གྲོག་སྦུར་དང་། །སྡིག་སྦྲུལ་རྐང་བརྒྱ་བ་དང་སྦུར་དང་འདྲེ། །ཤ་
ཟ་སྲུལ་པོ་རྣམས་ཀྱང་དེ་ཡི་ནི། །ལུས་དང་དྲི་མ་ལ་ཡང་མི་འགོང་ངོ་། །ཚིག་ནི་གཟུང་བར་འོས་ཤིང་ཡིད་གཞུངས་ལ། །སྙན་དངགས་དང་ནི་བྲི་བ་རྣམས་ལ་མཁས། །ཆོས་ལ་མངོན་དགའ་གཏེར་རྣམས་མཐོང་བ་དང་། །ལུས་ཀྱི་ནད་དང་དྲི་མ་མེད་པར་འགྱུར། །སྐྱེ་བོས་
མཐོང་ངམ་ཐོས་པར་གྱུར་ཀྱང་རུང་། །མྱུར་དུ་མངོན་དགའ་ཡིད་དུ་འོང་བར་འགྱུར། །བུད་མེད་འདོད་ལྷའི་མདས་ཕོག་པ་རྣམས་ཀྱིས། །འདོད་པ་ལོངས་སྤྱད་སྤྱིར་ནི་འབོད་པར་འགྱུར། །གང་ཚེ་མཁའ་ལས་ལྷ་དང་གནོད་སྦྱིན་དང་། །དྲི་ཟ་ལྷ་ཡི་བུ་མོའི་ལུས་དང་སྒྲ། །
མིས་ནི་དག་པའི་ཡིད་ཀྱིས་མཐོང་ཐོས་ནས། །དེ་ཚེ་ཤིན་ཏུ་ཉེ་བར་གྱུར་པ་ཡིན། །ཞེས་གསུངས་ཏེ། འདིས་ནི་ཀུན་ནས་ཉོན་མོངས་པ་མེད་པའི་གཞི་ཡིན་པས། ཀུན་ནས་ཉོན་མོངས་པ་མེད་པ་ནི་རྣམ་པར་དག་པའོ་ཞེས་བསྟན་ཏོ། །ཏིང་ངེ་འཛིན་ཡང་དག་བྱང་ཆུབ་ཀྱི་
ཡན་ལག་གི་དབང་དུ་མཛད་ནས། དཔེར་ན་རླུང་མེད་ཁང་པའི་ནང་དུ་ནི། །མར་མེ་བཙུགས་པ་མི་གཡོ་འབར་བ་ལྟར། །རྩེ་གཅིག་སེམས་ཀྱིས་ཟློས་ལ་མངོན་དགའ་བའི། །ལུས་ལ་ཆོས་ཀྱིས་དེ་བཞིན་འབར་བར་འགྱུར། །ཞེས་གསུངས་ཏེ། འདིས་ནི་ལུས་དང་སེམས་གཉིས་
ཤིན་ཏུ་སྤྱངས་པས་རྗེས་སུ་གཟུང་བའི་ཕྱིར། སེམས་མཉམ་པར་འཇོག་གོ། །སེམས་མཉམ་པར་གཞག་ན་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཡང་དག་པ་ཇི་ལྟ་བ་བཞིན་དུ་མཐོང་བས། ཉོན་མོངས་པ་རྣམས་སོ་སོར་སྤོང་ངོ་ཞེས་བསྟན་ཏེ། བཏང་སྙོམས་ཡང་
དག་བྱང་ཆུབ་ཀྱི་ཡན་ལག་གི་དབང་དུ་མཛད་ནས། སྣ་རྩེར་བལྟ་ཞིང་རྣམ་པར་རྟོག་པ་སྤོང་། །ནམ་ཞིག་བསྐྱོད་ཀྱང་རྣམ་པར་མི་གཡོ་བ། །དེ་ཚེ་དམིགས་ལ་གནས་པ་ཐོབ་པ་སྟེ། །སེམས་ནི་ལས་སུ་རུང་བར་གྱུར་པར་ངེས། །ཞེས་བྱ་བ་དང་། བཏང་སྙོམས་ལྡན་ཞེས་ཀྱང་

71-1-110b

གསུངས་ཏེ། འདིས་ནི་ཀུན་ནས་ཉོན་མོངས་པར་གྱུར་པ་དང་མཐུན་པའི་སེམས་མི་ཉམས་པ་དང་། སེམས་རྣལ་དུ་མི་འཇུག་པ་དང་། སེམས་རྩོལ་བ་དང་བཅས་པའི་གཉེན་པོ་ཡིན་པའི་ཕྱིར་ཀུན་ནས་ཉོན་མོངས་པ་མེད་པའི་ངོ་བོ་ཉིད་དོ། །འདིར་ཚིགས་སུ་བཅད་པ། རང་
བཞིན་ཡན་ལག་གནས་ཡན་ལག །གསུམ་པ་ངེས་འབྱུང་ཡན་ལག་སྟེ། །བཞི་པ་ཕན་ཡོན་ཡན་ལག་ཡིན། །རྣམ་གསུམ་ཉོན་མོངས་མེད་ཡན་ལག །འདི་ལ་གཞི་དང་གནས་དང་ནི། །ངོ་བོ་ཉིད་དུ་བསྟན་པ་ཡིན།    །བྱང་ཆུབ་ཀྱི་ཡན་ལག་གིས་མཐོང་བ་གང་ཡིན་པའི་
ལམ་དེ་ཐོབ་པར་བསྒོམས་པས་མཐོང་བའི་ལམ་གྱི་འོག་ཏུ་བསྒོམ་པའི་ལམ་དུ་བསྟན་པ་ནི་ལམ་གྱི་ཡན་ལག་བརྒྱད་དེ། སངས་རྒྱས་ཀྱིས་གསུངས་ཡན་ལག་བརྒྱད་ལམ་འདི། །ཡང་དག་འཚོ་དང་ལས་མཐའ་ཏིང་འཛིན་དག །རྩོལ་དང་རྟོག་དང་དྲན་དང་ལྟ་བ་རྣམས། །
སོ་སོ་སོ་སོར་ཡང་དག་བསྟེན་པར་བྱ། །ཞེས་གསུངས་སོ། །མིང་ཙམ་བརྗོད་པས་རང་གི་ངོ་བོ་མི་ཤེས་པའི་ཕྱིར་རེ་རེ་ནས་སྟོན་ཏེ། དེ་ལ་ཡང་དག་པའི་ལྟ་བའི་དབང་དུ་མཛད་ནས། འཇིགས་ཀྱང་ཚངས་པ་བརྒྱ་བྱིན་ཁྱབ་འཇུག་དང་། །དྲག་པོ་རླུང་སོགས་ལྷ་ལ་ཕྱག་མི་བྱ། །
དེ་ཡིས་བཤད་པའི་ཆོས་ལ་མི་བརྟེན་ཞིང་། །དེ་དག་དཀའ་ཐུབ་མི་སྤྱད་རྟགས་མི་མཆོད། །དེ་རྣམས་ཆོས་ལའང་ངན་སེམས་མི་བྱ་ཞིང་། །དེ་ཡི་སྤྱོད་ལ་ནམ་ཡང་དགའ་མི་བྱ། །དེ་དག་བསྟོད་པ་མི་གདོན་སྔགས་མི་བཟླས། །སྦྱིན་པ་སྦྱིན་ཚེ་སྙིང་རྗེ་བསྐྱེད་ནས་སྦྱིན། །བདེ་བར་
གཤེགས་པ་ཀུན་གྱིས་བསྟེན་པ་ཡི། །གནས་དང་རྒྱལ་སྲས་རྣམས་ལ་ཕྱག་བྱའོ། །རང་སངས་རྒྱས་དང་རྒྱལ་བའི་ཉན་ཐོས་རྣམས། །དེ་དག་རྟག་ཏུ་ཕྱག་བྱའི་གནས་ཡིན་ནོ། །དེ་ལྟར་ཟླ་བ་ཚེས་ལ་མི་རྣམས་ནི། །ཕྱག་འཚལ་ཉ་ལ་ཕྱག་ནི་མི་འཚལ་མེད། །དེ་བཞིན་དད་
པས་རྒྱལ་བའི་ཐུགས་སྲས་ལ། །ཕྱག་བྱའི་དེ་ལྟར་བདེ་བར་གཤེགས་ལ་མིན། །འཇིག་རྟེན་ཀུན་གྱི་མངོན་མཐོའི་བསླབ་པ་ཅན། །སྙིང་རྗེའི་བདག་ཉིད་འགྲོ་བའི་དོན་དུ་ནི། །སྐྱེ་བ་ལེན་པ་དེ་ལ་ཅི་ཡི་ཕྱིར། །བུ་གཅིག་བདག་ཉིད་ཀུན་གྱིས་ཕྱག་མི་བྱ། །སྐྱེས་བུ་བསམ་ཡས་

71-1-111a

རྨད་བྱུང་རྫུ་འཕྲུལ་ཅན། །དེ་ལ་མི་ངན་གང་ཞིག་མི་འདུད་པ། །དེ་ལ་རྒྱལ་བ་ཐམས་ཅད་ཐུགས་ནུར་ནས། །དེ་ཡི་གསང་སྔགས་དངོས་གྲུབ་མི་རྩོལ་ཏོ། །དཔེར་ན་ཤིང་གི་མེ་ཏོག་དང་པོར་ནི། །ཡིད་འོང་ཕྱི་ནས་འབྲས་བུར་གྱུར་པ་ལྟར། །སེམས་ཅན་མཆོག་
རྣམས་མེ་ཏོག་འདྲ་བར་ལྟོས། །འབྲས་བུ་བཞིན་དུ་རྒྱལ་བ་རིག་པར་གྱིས། །གང་གི་རང་བཞིན་ཆགས་དང་རྣམ་བྲལ་ཡང་། །གདུལ་བྱའི་དོན་ཕྱིར་ཁྲོ་ལ་ཁྲོ་བ་དང་། །འདོད་ཆགས་ཅན་ལ་ཆགས་ཅན་ལྟར་སྟོན་པ། །བྱང་ཆུབ་མཆོག་གནས་དེ་ལ་ཕྱག་འཚལ་ལོ། །གང་
ཞིག་ལས་དང་རྣམ་སྨིན་མཁྱེན་པ་ཡིས། །འགྲོ་བ་ཀུན་དང་ཇི་ལྟར་མཐུན་པ་ཡི། །གསང་སྔགས་གཟུགས་ལ་རྗེས་སུ་ཆགས་མཛད་པ། །སྔགས་ཀྱི་རྣམ་འདྲེན་དེ་ལ་ཕྱག་འཚལ་ལོ། །ཞེས་བྱ་བ་འདི་ནི་ཡང་དག་པའི་ལྟ་བའི་རྒྱུ་སྟེ། འདིར་རྒྱུ་ལ་འབྲས་བུ་བཏགས་ནས་
ཡང་དག་པའི་ལྟ་བར་གཞག་གོ། །གཞན་ཡང་། དེ་ཕྱིར་ལོག་པར་ལྟ་བ་རྣམས་སྤངས་ལ། །ཡང་དག་ལྟ་བ་ལ་ནི་བརྟེན་པར་གྱིས། །ཞེས་གསུངས་ཏེ། འདིས་ནི་མཐོང་བའི་ལམ་གྱིས་རྟོགས་པ་ལ། བདག་གིས་འདི་ལྟ་བུ་རྟོགས་སོ་ཞེས་ཡོངས་སུ་གཅོད་པར་བསྟན་
ཏོ། །ཡང་དག་པའི་རྟོག་པའི་དབང་དུ་མཛད་ནས། བུད་མེད་མཚན་ཉིད་སྐྱེས་པའི་མཚན་ཉིད་དང་། །སྨན་དང་གླང་ཆེན་བརྟག་པའམ་སྐར་མའི་དཔྱད། །མཚོན་ཆ་བརྟག་པའམ་རྟ་དཔྱད་རང་བཟོ་འམ། །བསྟན་བཅོས་ངན་པ་སློབ་ཅིང་ཀློག་པ་ཡང་། །ཞེས་གསུངས་ཏེ། 
འདིར་ནི་མི་མཐུན་པའི་ཕྱོགས་ཙམ་ཞིག་སྨོས་ཏེ། དངོས་སུ་ནི་ཡང་དག་པའི་རྟོག་པས་ངག་ཀུན་ནས་སློང་སྟེ། མ་བརྟགས་མ་དཔྱད་པར་ཚིག་མི་སྨྲ་བའི་ཕྱིར། ཡང་དག་པའི་རྟོག་པས་བསླང་བའི་ངག་ནི་གཞན་ལ་གོ་བར་བྱེད་པའི་ཡན་ལག་གོ། །ཡང་དག་པའི་ངག་གི་དབང་
དུ་བྱས་ནས། ཡུལ་སའི་གཏམ་དང་མི་དབང་བསྟེན་པ་དང་། །དམག་དང་གྱད་དང་ན་ཆུང་གཏམ་དག་དང་། །སྒྲུང་ལྡེབས་དང་ནི་སྔོན་གྱི་ལོ་རྒྱུས་གཏམ། །འདོད་ཆགས་དང་ནི་སྨད་འཚོང་གཏམ་མི་བྱ། ། ཞེས་གསུངས་ཏེ། འདིར་ནི་མི་མཐུན་པའི་ཕྱོགས་ཙམ་ཞིག་གསུངས་

71-1-111b

ཏེ། དངོས་སུ་གཞན་དག་ལ་རྒོལ་ཞིང་ལེན་འདེབས་པ་ན། བསྙད་པ་དང་འབྲེལ་པའི་གཏམ་རྣམ་པར་ངེས་པ་འདིས་ནི། དེ་ཁོ་ན་ཉིད་ངེས་པར་རྟོག་སོ་ཞེས་ཤེས་རབ་ལ་གཞན་དག་ཡིད་ཆེས་པར་འགྱུར་རོ། །ཡང་དག་པའི་ལས་ཀྱི་མཐའི་དབང་དུ་མཛད་ནས། བདག་
ལ་བསྟོད་པར་ནམ་ཡང་མི་བྱ་ཞིང་། །སེམས་ཅན་གཞན་ལ་སྨད་པར་མི་བྱའོ། །སྟག་དང་སྦྲུལ་དང་མེ་འདྲར་འཇིག་རྟེན་དག །བསམས་ནས་སྤངས་ཏེ་དབེན་ལ་དགའ་བར་བྱ། །ཞེས་བྱ་བ་དང་། སྔགས་པ་གསང་སྔགས་བསླབ་པ་མནོས་པ་ནི། །གྲོང་དང་གྲོང་ཁྱེར་ཁྱིམ་དང་
གཙུག་ལག་ཁང་། །མཆོད་རྟེན་བསྟི་གནས་རི་དང་དཀའ་ཐུབ་གནས། །ཀུན་དགའ་ལུ་མ་རྫིང་བུར་འགྲོ་མི་བྱ། །སྔར་བཤད་པ་ཡི་གནས་རྣམས་མ་རྙེད་ན། །ལྷ་ཁང་སྟོང་པ་དག་གམ་ཤིང་དྲུང་ངམ། །རི་དང་ཆུ་བོ་ཆུ་ཀླུང་འབབ་ཆུ་དང་། །ནགས་ཚལ་སྟོང་པ་དག་དང་ཡུལ་སྟོང་དང་། །
གནས་གང་རུང་བར་སྔགས་པས་གནས་ཤིང་བཟླས། །ཡང་ན་གནས་ནི་ངེས་པར་མ་བྱས་ན། །ཟླ་བ་བརྒྱད་པོ་འདི་ཡི་དུས་དག་ཏུ། །གནས་ནི་གང་ཡང་རུང་བ་ཅིག་ཏུ་བསྟན། །མཚོ་དང་ཤིང་དང་རི་བོའམ་དགོན་པའི་གནས། །མཚེའུ་དང་ཁང་པ་ནགས་སམ་ཆུ་ངོགས་སུ། །
དགུན་དཔྱིད་ཟླ་བ་རྣམས་ལ་གནས་བྱས་ནས། །སྔགས་པས་དབྱར་ནི་གཅིག་ཏུ་གནས་བྱས་ཏེ། །ཇི་ལྟར་རྒྱལ་བས་དགེ་སློང་དབྱར་ཟླ་གསུམ། །ཚུལ་ཞུགས་གནས་གཞན་མི་འགྲོ་གསུངས་པ་བཞིན། །དེ་བཞིན་བཅོམ་ལྡན་འདས་ཀྱིས་སྔགས་པ་ཡང་། །ཟླ་བ་སུམ་དུ་
གཅིག་ཏུ་གནས་པ་གསུངས། །སྦགས་པས་དབྱར་ནི་བསྒྲུབ་ལ་མི་འཇུག་པར། །བཟླས་བརྗོད་ཀྱིས་ནི་དུས་ཀྱང་འདའ་བར་བྱ། །དབྱར་འདས་ནས་ནི་གསང་སྔགས་གཟི་བསྐྱེད་པས། །བདག་ཉིད་བསྲུང་བྱས་སྒྲུབ་ལ་འཇུག་པར་བྱ། །ཞེས་གསུངས་ཏེ། འདིས་ནི་ཉེས་པར་སྤྱོད་
པ་དང་། མི་མཐུན་པར་བསྟན་ཏེ། དེ་དང་ལྡན་ན་སྲོག་གི་ཕྱིར་ཡང་བྱ་བ་མ་ཡིན་པ་མི་བྱེད་དོ། །དེའི་ཕྱིར་འདི་ནི་འཕགས་པ་དགྱེས་པའི་ཚུལ་ཁྲིམས་དང་ལྡན་ནོ་ཞེས་ཡིད་ཆེས་པ་འབྱུང་ངོ་ཞེས་བསྟན་ཏོ། །ཡང་དག་པའི་འཚོ་བའི་དབང་དུ་མཛད་ནས། ཡོངས་སུ་འཛིན་པ་

71-1-112a

རྣམ་པར་སྤངས་ནས་སུ། །ཆོས་གོས་དང་ནི་བསོད་སྙོམས་ངན་ངོན་དང་། །སྟན་དང་མལ་སྟན་ངན་ངོན་ཙམ་གྱིས་ཀྱང་། །ཆོག་པའི་སེམས་དང་ལྡན་པས་བསོད་ནམས་ཐོབ། །ཅེས་བྱ་བ་དང་། གཙུག་ཕུད་གཞག་སྟེ་སྐྲ་ནི་བྲེགས་ནས་སུ། །འབྱུང་ཁུངས་ཚོན་
གྱིས་གོས་ཀྱི་ཁ་དོག་བསྒྱུར། །གོས་དཀར་དག་གམ་ཤིང་ལོའམ་གསོ་མའམ། །ཟར་མའམ་ཤིང་ཤུན་རྣམས་ཀྱི་གོས་བགོའོ། །ཀུ་བའམ་ལྕགས་སམ་འཇིམ་པ་ལས་བྱས་པ། །དབྱིབས་ནི་ལེགས་ཤིང་མི་རྩུབ་འཇམ་པ་དང་། །མཆོག་ཏུ་ཟླུམ་ཞིང་མ་གས་རྨ་མེད་པར། །
ཡིད་དུ་འོང་བའི་ལྷུང་བཟེད་བཅང་བར་བྱ། །བཟའ་བཏུང་མེད་ཅིང་དམངས་རིགས་མང་བ་དང་། །མགྲོན་ལ་མཆོད་བྱེད་ལེགས་པར་གནས་པའི་གྲོང་། །ཧ་ཅང་མི་ཉེ་ཧ་ཅང་མི་རིང་ལ། །བྲམ་ཟེ་ཕྱི་རོལ་སྐྱེ་བོ་མེད་པར་བསྟེན། །ང་རྒྱལ་གྱིས་ནི་ནོན་པའི་བྲམ་ཟེ་རྣམས། །རིགས་
ཀྱིས་རློམ་ཞིང་སྙིང་རྗེ་མི་ལྡན་པ། །དེ་དག་བདེ་བར་གཤེགས་ཀྱི་མཆོད་རྟེན་ལ། །མཆོད་པ་མཐོང་ནས་བགེགས་ཀྱང་བྱེད་པར་འགྱུར། །བྲམ་ཟེ་སངས་རྒྱས་པ་ལ་ཇི་ལྟར་དམན། །སྨྲ་ལས་བྲམ་ཟེ་དག་ལ་དམངས་རིགས་རྣམས། །བསྙེན་བཀུར་དང་ནི་མཆོད་པར་འབྱུང་བས་ན། །
དམངས་རིགས་ཀྱིས་ཀྱང་གསང་སྔགས་ཇི་ལྟར་བཟླས། །ལྷ་དང་མགྲོན་མཆོད་པ་དང་ལས་དྲུག་དང་། །རྒྱལ་པོ་དང་ནི་མེ་ལ་བརྟེན་པ་དང་། །བུ་ཡི་དོན་དུ་འགྲོ་བར་བྱ་བ་དག །བྲམ་ཟེ་རྣམས་ཀྱིས་ངེས་པར་བསྒྲུབས་པ་ཡིན། །རྒྱལ་རིགས་རྗེའུ་རིགས་རྣམས་ཀྱང་རང་གི་ལས། །
གྲུབ་པ་འདི་ལ་ཐེ་ཚོམ་མ་བྱེད་ཅེས། །བརྫུན་དུ་སྨྲ་བ་སྣ་ཚོགས་སྐྱོན་དག་གིས། །བདག་དང་གཞན་གྱི་སེམས་ནི་སྲེག་པར་བྱེད། །ཡན་ལག་བརྒྱད་ལམ་གནས་པས་རྟག་ཏུ་ནི། །ཉི་མ་ཕྱེད་མཚམས་ཚུན་ཆད་བསླང་བར་བྱ། །བྲམ་ཟེའི་དུས་ནི་ཕྱི་དྲོ་ཡིན་པས་ན། །དེ་ཕྱིར་བྲམ་
ཟེའི་ཁྱིམ་དུ་འགྲོ་མི་བྱ། །དཔེར་ན་རྨ་ནི་གསོ་དང་བསལ་བའི་ཕྱིར། །ནད་པ་དག་ལ་སྨན་པ་སྦྱིན་པ་ལྟར། །དེ་བཞིན་འདིར་ཡང་བཀྲེས་པའི་སྡུག་བསྔལ་དག །བསལ་ཕྱིར་རྒྱལ་བས་ཁ་ཟས་བཟའ་བར་གསུངས། །ལ་ལ་ལམ་གྱིས་དུབ་ཅིང་འགྲོ་བའི་ཚེ། །བཀྲེས་སྐོམ་

71-1-112b

གདུངས་པས་རང་གི་བུ་ཡི་ཤ། །ཟ་བ་བཞིན་དུ་རྣལ་འབྱོར་སེམས་དམན་བཞིན། །ཚེ་དང་རྒྱགས་ཕྱིར་བཟའ་བར་མི་བྱའོ། །མང་དུ་བླུགས་ན་རྩོལ་མེད་མཐོ་བ་དང་། །དེ་བཞིན་ཉུང་ངུས་སྲང་ནི་དམར་འགྱུར་ལ། །རན་པས་སྐད་ཅིག་མཉམ་པར་འགྲོ་བ་ལྟར། །ལུས་ཅན་ཁ་ཟས་
དེ་ལྟར་བཟའ་བར་བྱ། །དཔེར་ན་ཁང་རྙིང་མི་ཞིག་བྱ་བའི་ཕྱིར། །མི་ཡིས་ཀ་བ་བརྟན་པོ་འཛུགས་པ་ལྟར། །དེ་བཞིན་ལུས་ཀྱི་འཁྲུལ་འཁོར་གནས་པ་དང་། །ཤིང་རྟའི་དམིག་བསྐུ་བཞིན་དུ་ཁ་ཟས་བཟའ། །འདོད་པའི་ཁམས་ནི་ཁ་ཟས་ཀྱིས་གནས་ཞེས། །རྒྱལ་བས་
ཆོས་གཅིག་ཏུ་ནི་བཀའ་སྩལ་པས། །ལུས་ནི་ཆུ་ཤིང་བཞིན་དུ་རིག་བྱ་སྟེ། །སེམས་ནི་བཟའ་བཏུང་སོགས་ལ་ཆགས་མི་བྱ། །དབང་པོ་དྲུག་པོ་ཡུལ་ལ་འཕྲོ་བ་དག །བདེ་གཤེགས་གསུངས་པའི་ཤེས་པས་བསྲུང་བར་བྱ། །ལྷུང་བཟེད་དེ་དག་ལས་གཅིག་ཐོགས་ནས་
སུ། །གཉའ་ཤིང་གང་དུ་བལྟ་ཞིང་བསོད་སྙོམས་སྤྱད། །འཛུམ་ཞིང་འགྲོ་ལ་སྨྲ་ཞིང་མིག་ཟུར་ཅན། །ཡན་ལག་ཐམས་ཅད་ཡིད་འཕྲོག་བྱེད་པའི་གཟུགས། །བུད་མེད་གཟུགས་ནི་མཚོན་ཆ་འཇེབས་འདྲ་བས། །སྐྱེས་པའི་སེམས་ནི་མངོན་དུ་འཕྲོག་པར་བྱེད། །ལྕགས་
ཀྱི་ཐོང་ལྕགས་རབ་ཏུ་འབར་བ་ཡིས། །མིག་ནི་རྣམ་པར་བཀབ་པ་ཆེས་བླ་ཡི། །ཉིས་ན་དྲན་པ་ཉམས་བྱེད་བུད་མེད་ཀྱི། །དཀྱུས་རིང་མིག་ཅན་བཞིན་ནི་མ་མཐོང་བླ། །གང་དུ་དག་པར་འགྲོ་ཞིང་འཛིན་མེད་ལ། །སེམས་ཀྱིས་སེམས་ནི་རྣམ་པར་བཏུལ་བཞིན་དུ། །རབ་
དང་འབྲིང་ལ་སོགས་པར་སྤངས་ནས་སུ། །མི་སྨྲ་བར་ནི་གཞན་གྱི་གྲོང་དུ་འགྲོ། །གང་ན་བ་གཞོན་བེའུ་ཕྲུག་ཆུང་བ་དང་། །གང་ན་སྐྱེས་བུ་ཆང་ནི་འཐུང་བ་དང་། །གང་ན་བུ་མོ་གཞོན་བསྟེན་རྩེ་བ་དང་། །གང་ན་ཁྱི་ཟ་དགའ་སྟོན་བྱེད་པ་དང་། །གང་ན་སྐྱེ་བོ་མང་པོ་འདུས་པ་
དང་། །དེ་བཞིན་གང་ན་རོལ་མོ་བྱེད་པ་རྣམས། །དེར་ནི་སྐྱེས་བུ་ནམ་ཡང་འགྲོ་མི་བྱ། །བསོད་སྙོམས་ཅི་རྙེད་ཁྱེར་ནས་འོངས་པས་ཀྱང་། །དང་པོ་ཇི་ལྟར་བདེ་བར་བགོ་བར་བྱ། །རྐང་བཀྲུས་གློ་བུར་བ་ལ་བྱིན་ནས་སུ། །ལུས་བསྲུང་ཕྱིར་ནི་ཁ་ཟས་བཟའ་བར་བྱ། །དུས་སུ་ཟོས་

71-1-113a

ནས་དུས་གསུམ་ཁྲུས་བྱ་སྟེ། ཞེས་གསུངས་ཏེ། འདིས་ནི་ལུས་གནས་པ་ཙམ་དུ་བྱ་བའི་ཕྱིར། རིགས་པ་དང་ཚོད་ཟིན་པར་ཆོས་གོས་ལ་སོགས་པ་ཚོལ་བས་ན། གདོན་མི་ཟ་བར་འདིས་ནི་ཡོ་བྱད་རྣམས་ལ་སྲེད་པ་སྤངས་སོ་ཞེས་ཡོ་བྱད་བསྙུངས་
པར་ཡིད་ཆེས་སོ་ཞེས་བསྟན་ཏོ། །ཡང་དག་པའི་རྩོལ་བའི་དབང་དུ་མཛད་ནས། གང་ཚེ་ཟློས་དཀའི་སེམས་ནི་ཞི་བ་ལ། །བརྟེན་པས་གཉིད་ཀྱིས་དྲན་པ་རྨོངས་གྱུར་ན། །ལངས་ནས་བཅག་ཅིང་ཕྱོགས་སུ་བལྟ་བ་དང་། །ཆུ་ཡིས་གདོང་ཡང་ཡོངས་སུ་བཀྲུ་བར་བྱ། །ཞེས་
བྱ་བ་དང་། གླིང་བུའི་སྒྲ་དང་རྔ་ཡི་སྒྲ་རྣམས་དང་། །ཤིན་ཏུ་འཇིགས་བྱེད་སྐྱེ་བོའི་སྒྲ་དག་དང་། །གད་རྒྱངས་ཀུ་ཅོ་དག་དང་གླུ་གར་དང་། །ཅང་དང་པི་ཝང་དག་དང་རྫ་རྔའི་སྒྲ། །བྱ་བྲན་སྣ་ཚོགས་སྒྲ་དང་ཆུ་སྒྲ་དང་། །བུད་མེད་རྒྱན་གྱིས་སིལ་ཁྲོལ་སྒྲ་རྣམས་དང་། །ཤ་སྦྲང་
ཚ་གྲང་རླུང་གི་གནོད་པ་ཡིས། །མི་ཡི་སེམས་ནི་གཡེང་ཞིང་གཡོ་བར་བྱེད། །ཅེས་གསུངས་ཏེ། འདིར་ནི་བྱིང་བ་དང་རྒོད་པའི་སྐྱོན་སྤང་བའི་ཐབས་ཉི་ཚེ་ཙམ་སྨོས་པར་ཟད་ཀྱི། དངོས་སུ་ནི་བྱིང་བ་དང་རྒོད་པ་དང་བྲལ་བའི་ཏིང་ངེ་འཛིན་གྱི་དུས་ཀྱི་བརྩོན་འགྲུས་ཡང་དག་
པའི་ལྟ་བས་བསྡུས་པ་ནི་ཡང་དག་པའི་རྩོལ་བ་སྟེ། དེས་བསྒོམ་པར་བྱ་བའི་ཉོན་མོངས་པ་རྣམས་སྤང་བའི་ཕྱིར་དེའི་གཉེན་པོ་ལམ་བསྒོམ་པའོ། །ཡང་དག་པའི་དྲན་པའི་དབང་དུ་མཛད་ནས། སྟངས་དང་མཆོངས་པ་དང་ནི་གར་བྱེད་དང་། །གླུ་ལེན་རྔ་རྡུང་སྐྱེ་བོས་
དཔྱས་གྱུར་དང་། །ལྷག་པའི་ང་རྒྱལ་འདྲིད་དང་འདོད་ཆེན་དང་། །རྒྱལ་པོ་དང་ནི་འདུས་ལ་བལྟ་འདོད་དང་། །དུས་མིན་གཉིད་དང་མི་འགྲུབ་སྨྲ་བ་དང་། །བསྟན་བཅོས་ངན་དང་སྙན་དངགས་ཀློག་འདོན་དང་། །ཆགས་དང་ཚིག་དང་དྲེགས་དང་རྒྱགས་པ་དང་། །ཞེ་ལ་འཛིན་
དང་ལེ་ལོ་གཡོ་སྒྱུ་སྤང་། །ཞེས་བྱ་བ་དང་། གླང་ཆེན་རྟ་དང་བ་ལང་བྱ་གག་ཁྱི། །གོང་མོ་སྲེག་པ་ངུར་པ་སྐྱེས་པ་དང་། །བུད་མེད་བུ་མོ་དེ་བཞིན་ར་ལུག་སོགས། །ཐལ་མོ་འགྱེད་པ་མི་བལྟ་མི་བྱའོ། ཞེས་གསུངས་ཏེ། འདིར་ནི་མི་མཐུན་པའི་ཕྱོགས་ཉི་ཚེ་ཙམ་ཞིག་

71-1-113b

སྨོས་ཀྱི། དངོས་སུ་ནི་ལམ་བསྒོམ་པ་དེ་ཉིད་ལ་བྱིང་བ་དང་རྒོད་པའི་ཉོན་མོངས་པའི་གཉེན་པོ་ཞི་གནས་དང་ལྷག་མཐོང་གི་རྒྱུ་རྣམས་ལ་དྲན་བཞིན་དུ་ཉེ་བར་གནས་པ་ནི་ཡང་དག་པའི་དྲན་པའོ། །ཡང་དག་པའི་ཏིང་ངེ་འཛིན་གྱི་དབང་དུ་མཛད་ནས། འདོད་ཆགས་ལ་སོགས་ཉོན་
མོངས་ཚོགས་ལྡན་པའི། །སེམས་ནི་འཁོར་བ་ཡིན་པར་ཀུན་དུ་བརྗོད། །ཉོན་མོངས་རྣམ་གྲོལ་ཤེལ་དང་ཟླ་འདྲ་བ། །སྲིད་པའི་རྒྱ་མཚོའི་མཐར་ནི་རབ་ཏུ་གྲགས། །དཔེར་ན་དྲི་མེད་ཆུ་ནི་རྡུལ་སོགས་ཀྱིས། །སྐད་ཅིག་ཏུ་ཡང་རྙོག་པར་བྱེད་པ་ལྟར། །དེ་བཞིན་རྣམ་དག་དྲི་
མ་མེད་པའི་སེམས། །འདོད་ཆགས་ལ་སོགས་སྐྱོན་གྱིས་རྙོག་པར་འགྱུར། །ཞེས་གསུངས་ཏེ། འདིས་ནི་སྙོམས་པར་འཇུག་པའི་སྒྲིབ་པ་དང་བྲལ་བར་བསྟན་ཏོ། །འདིར་ཚིགས་སུ་བཅད་པ། ཡོངས་སུ་གཅོད་དང་གོ་བྱེད་དང་། །རྣམ་གསུམ་གཞན་ཡིད་ཆེས་པར་
བྱེད། །མི་མཐུན་ཕྱོགས་ཀྱི་གཉེན་པོར་ནི། །ལམ་གྱི་ཡན་ལག་དེ་བརྒྱད་དོ།    །རིག་སྔགས་འཆང་སོ་སོའི་སྐྱེ་བོའི་ཚོགས་ཀྱི་ལམ་ལ་གནས་པ་རྣམས་ཀྱིས་ཀྱང་། དེ་ལྟར་ཚུལ་ཁྲིམས་རྣམ་པར་དག་པ་བྱ་བ་དང་། དབང་པོའི་སྒོ་བསྡམ་པ་དང་། ཟས་ཀྱི་ཚོད་ཤེས་པ་དང་། 
ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་བརྩོན་པ་དང་། དེ་བཞིན་དུ་གནས་པ་ལ་མངོན་པར་བརྩོན་པར་བྱས་ནས། དངོས་གྲུབ་ལ་གཞོལ་ཞིང་བྱང་ཆུབ་ཀྱི་ཕྱོགས་སུམ་ཅུ་རྩ་བདུན་ལ་ཡང་བསྒོམ་དགོས་པར་བསྟན་པའི་དབང་དུ་མཛད་ནས། ལས་འདི་རྣམས་ཀྱི་
གསང་སྔགས་དངོས་གྲུབ་ཅི་ཞེས་གསུངས་ཏེ། དེ་བཞིན་དུ་རྒྱུར་གྱུར་པ་དང་། ཐོས་པ་དང་། བསམ་པ་དང་། བསྒོམ་པས་མངོན་པར་རྟོགས་པ་དང་། རྣམ་པར་ཐར་པར་འགྱུར་བའི་གནས་ཀྱི་སྣོད་ཉིད་དུ་གྱུར་པའི་ཕྱིར། ཚོགས་ཀྱི་ལམ་ལ་གནས་པས་ཀྱང་། དེའི་གོང་མའི་
ལམ་དུ་གྱུར་པའི་བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ལ་རྗེས་སུ་མཐུན་པར་བསྒོམ་དགོས་པར་བསྟན་པའི་དབང་དུ་མཛད་ནས། དེ་བཞིན་འདིས་ནི་མཐོ་རིས་ཐར་པ་ཐོབ། །རྒྱལ་སྲས་སྔོན་གྱི་རྒྱལ་བ་འདས་པ་དག །འདི་ནས་གཤེགས་ཤིང་དེ་བཞིན་གཤེགས་པར་འགྱུར། །ངོམས་

71-1-114a

མེད་སེམས་ཀྱི་ལུས་དང་ངག་ཡིད་ཀྱིས། །གུས་པས་བསོད་ནམས་གང་དག་བསམས་པ་ཡང་། །བདེ་གཤེགས་གསུངས་པའི་བདེན་པའི་ལམ་དམིགས་ནས། །དགེ་བའི་ལས་དེ་ཡང་དག་བསྐྱེད་པ་ཡིན། །ཞེས་གསུངས་སོ། །འོན་ཀྱང་བྱང་ཆུབ་ཀྱི་ཕྱོགས་
ཀྱི་ཆོས་འདི་རྣམས་མདོ་ལས་ཅི་ཡི་ཕྱིར་གོ་རིམས་བཞིན་མ་བཀོད་ཅེ་ན། གསང་སྔགས་ཀྱི་རྒྱུད་ཀྱི་ལུགས་ལས་སློབ་དཔོན་གྱི་མན་ངག་གཅེས་པར་བསྟན་པའི་ཕྱིར། དོན་སྦས་པ་དང་། ལས་ཀྱི་སྐབས་སོ་སོས་ཏིང་ངེ་འཛིན་གྱི་སྒོ་ལ་སོགས་པ་ཐ་དད་པར་བསྟན་ཏེ། སློབ་དཔོན་
རྒྱལ་བའི་འོད་ཀྱིས་ཀྱང་འདི་སྐད་དུ། རྒྱས་པ་ལ་ནི་དགའ་སེམས་ཀྱིས། །དབང་ལ་རབ་ཏུ་མཛའ་བ་ཡིས། །ཁྲོས་པ་ཡིས་ནི་དྲག་ཤུལ་ལ། །ཞེས་གསུངས་པའི་ཕྱིར་རོ། །འཕགས་པའི་གནས་པ་བཞི་དང་སྦྱར་བ་བཤད་ཟིན་ཏོ།    །དེ་ལྟར་སྒྲུབ་པའི་རྣལ་འབྱོར་པ་འཁོར་
བས་སྐྱོ་ཞིང་མྱ་ངན་ལས་འདས་པ་ལ་གཞོལ་བ་དེ། སྙོམས་པར་འཇུག་པའི་སྒྲིབ་པ་དང་བྲལ་བར་བྱ་བའི་དོན་དུ་ཏིང་ངེ་འཛིན་ལ་སྦྱོར་བའི་ཕྱིར། ལྷའི་གནས་པ་བསམ་གཏན་བསྒོམ་དགོས་པར་སྟོན་ཏེ། དེ་ལ་བསམ་གཏན་དང་པོ་ལ་ཡན་ལག་ལྔ་སྟེ། རྟོག་པ་དང་། དཔྱོད་
པ་དང་། དགའ་བ་དང་། བདེ་བ་དང་། སེམས་རྩེ་གཅིག་པ་ཉིད་དོ། །དེ་ལ་རྟོག་པ་དང་། དཔྱོད་པའི་དབང་དུ་མཛད་ནས། གླིང་བུའི་སྒྲ་དང་རྔ་ཡི་སྒྲ་རྣམས་དང་། །ཤིན་ཏུ་འཇིགས་བྱེད་སྐྱེ་བོའི་སྒྲ་རྣམས་དང་། །གད་རྒྱངས་ཀུ་ཅོ་དག་དང་གླུ་གར་དང་། །ཅང་དང་པི་ཝང་
དག་དང་རྫ་རྔའི་སྒྲ། །བྱ་བྲན་སྣ་ཚོགས་སྒྲ་དང་ཆུ་སྒྲ་དང་། །བུད་མེད་རྒྱན་གྱི་སིལ་ཁྲོལ་སྒྲ་རྣམས་དང་། །ཤ་སྦྲང་ཚ་གྲང་རླུང་གི་གནོད་པ་ཡིས། །མི་ཡི་སེམས་ནི་གཡེང་ཞིང་གཡོ་བར་བྱེད། །ཅེས་བྱ་བ་དང་། འཛུམ་ཞིང་འགྲོ་ལ་སྨྲ་ཞིང་མིག་ཟུར་ཅན། །ཡན་ལག་ཐམས་
ཅད་ཡིད་འཕྲོག་བྱེད་པའི་གཟུགས། །བུད་མེད་གཟུགས་ནི་མཚོན་ཆ་འཇེབས་འདྲ་བས། །སྐྱེས་པའི་སེམས་ནི་མངོན་དུ་འཕྲོག་པར་བྱེད། །ལྕགས་ཀྱི་ཐོང་ལྕགས་རབ་ཏུ་འབར་བ་ཡིས། །མིག་ནི་རྣམ་པར་བཀབ་པ་ཆེས་བླ་ཡི། །ཉིས་ན་དྲན་པ་ཉམས་བྱེད་བུད་མེད་ཀྱི། །

71-1-114b

དཀྱུས་རིང་མིག་ཅན་བཞིན་ནི་མ་མཐོང་བླ། །ཞེས་བྱ་བ་དང་། སྟག་དང་སྦྲུལ་དང་མེ་འདྲར་འཇིག་རྟེན་དག །བསམས་ནས་སྤངས་ཏེ་དབེན་ལ་དགའ་བར་བྱ། །ཞེས་བྱ་བ་ལ་སོགས་པ་གསུངས་པ་འདི་ནི། གཉེན་པོའི་ཡན་ལག་བསྟན་ཏེ། དེ་གཉིས་ཀྱི་འདོད་པ་དང་། 
གནོད་སེམས་དང་། འཚེ་བའི་རྣམ་པར་རྟོག་པ་ལ་སོགས་པ་སྤོང་བའི་ཕྱིར་རོ། །དགའ་བ་དང་བདེ་བའི་དབང་དུ་མཛད་ནས། དགའ་བ་ལུས་ནི་ཤིན་ཏུ་སྦྱངས་པ་ཐོབ། །ལུས་སྦྱངས་པས་ནི་བདེ་བའི་སྐལ་ལྡན་འགྱུར། །ཞེས་གསུངས་ཏེ། འདིས་ནི་ཕན་ཡོན་གྱི་ཡན་ལག་
བསྟན་ཏེ། རྟོག་པ་དང་དཔྱོད་པ་གཉིས་ཀྱིས་གཉེན་པོ་བྱས་པའི་མི་མཐུན་པའི་ཕྱོགས་ལ། དེ་ལས་དབེན་པ་ལས་སྐྱེས་པའི་དགའ་བ་དང་། བདེ་བ་འཐོབཔའི་ཕྱིར་རོ། །སེམས་རྩེ་གཅིག་པའི་དབང་དུ་མཛད་ནས། རྩེ་གཅིག་སེམས་དང་ལྡན་པའི་མི་ལ་ནི། །ཡིད་ལས་
བྱུང་བའི་དགའ་བ་རབ་ཏུ་སྐྱེ། །ཞེས་གསུངས་པ་འདིས་ནི་གཉེན་པོ་དང་། ཕན་ཡོན་གཉི་གའི་གནས་ཀྱི་ཡན་ལག་བསྟན་ཏེ། ཏིང་ངེ་འཛིན་ལ་བརྟེན་པའི་སྟོབས་ཀྱིས་རྟོག་པ་ལ་སོགས་པ་འཇུག་པའི་ཕྱིར་རོ།    །བསམ་གཏན་གཉིས་པ་ལ་ཡན་ལག་བཞི་སྟེ། ནང་རབ་ཏུ་
དང་བ་དང་དགའ་བ་དང་བདེ་བ་དང་། སེམས་རྩེ་གཅིག་པ་ཉིད་དོ། །ནང་རབ་ཏུ་དང་བའི་དབང་དུ་མཛད་ནས། སེམས་ནི་དང་བས་ལྷ་མིའི་བདེ་བ་དང་། །མཐོ་རིས་དང་ནི་བྱང་གྲོལ་ཐོབ་པར་འགྱུར། །ཞེས་བྱ་བ་ལ་སོགས་པ་གསུངས་པ་འདིས་ནི་རྟོག་པ་དང་དཔྱོད་པ་
ཉིད་སྐྱོན་དུ་མཐོང་སྟེ། དེའི་གཉེན་པོར་བསྟན་ཏོ། །དགའ་བ་དང་བདེ་བ་དང་སེམས་རྩེ་གཅིག་པ་ཡན་ལག་ལ་ལྷག་མ་གཉིས་པ་སྔ་མ་བཞིན་ནོ།    །བསམ་གཏན་གསུམ་པ་ལ་ཡན་ལག་ལྔ་སྟེ། བཏང་སྙོམས་དང་། དྲན་པ་དང་། ཤེས་བཞིན་དང་། བདེ་བ་དང་། 
སེམས་རྩེ་གཅིག་པ་ཉིད་དོ། །དེ་ལ་བཏང་སྙོམས་ཀྱི་དབང་དུ་མཛད་ནས། བཏང་སྙོམས་ལྡན་ཞེས་གསུངས་ཏེ། སེམས་མཉམ་པ་ཉིད་དང་། སེམས་རྣལ་དུ་འཇུག་པ་དང་། སེམས་ལྷུན་གྱིས་གྲུབ་པའོ། །དྲན་པ་དང་། ཤེས་བཞིན་གྱི་དབང་དུ་མཛད་ནས། 

71-1-115a

དཔེར་ན་རླུང་མེད་ཁང་པའི་ནང་དུ་ནི། །མར་མེ་བཙུགས་པ་མི་གཡོ་འབར་བ་ལྟར། །རྩ་གཅིག་སེམས་ཀྱིས་ཟློས་ལ་མངོན་དགའ་བའི། །ལུས་ལ་ཆོས་ཀྱང་དེ་བཞིན་འབར་བར་འགྱུར། །ཞེས་གསུངས་ཏེ། དྲན་པ་ནི་འདྲིས་པའི་དངོས་པོ་མ་བརྗེད་
པའོ། །ཤེས་བཞིན་ནི་གཞན་དུ་མི་གཡེང་བ་སྟེ། འདི་གསུམ་གྱིས་ནི་དགའ་བའི་རྣམ་པར་རྟོག་པ་སྤོང་བས། གཉེན་པོའི་ཡན་ལག་ཏུ་བསྟན་ཏོ། །བདེ་བ་དང་སེམས་རྩེ་གཅིག་པ་ཉིད་ནི། ཡན་ལག་ལྷག་མ་རྣམས་དང་གོ་རིམས་བཞིན་ནོ།    །བསམ་གཏན་བཞི་
པ་ལ་ཡན་ལག་བཞི་སྟེ། བཏང་སྙོམས་ཡོངས་སུ་དག་པ་དང་། དྲན་པ་ཡོངས་སུ་དག་པ་དང་། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པ་ནས། སེམས་རྩེ་གཅིག་པ་ཉིད་དོ། །དེ་ལ་བཏང་སྙོམས་ཡོངས་སུ་དག་པ་དང་། དྲན་པ་ཡོངས་སུ་དག་པ་ནི། བདེ་
བའི་གཉེན་པོའི་ཡན་ལག་གོ། །སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་དབང་དུ་མཛད་ནས། གྲགས་དང་མ་གྲགས་རྙེད་དང་མ་རྙེད་དང་། །བདེ་དང་སྡུག་བསྔལ་དེ་བཞིན་བསྟོད་དང་སྨད། །སེམས་ཀྱིས་འཇིག་རྟེན་ཆོས་རྣམས་རབ་བཅོམ་སྟེ། །སྡིག་པའི་
གནས་སུ་གྱུར་པ་སྤང་བར་བྱ། །ཞེས་གསུངས་པ་འདིས་ནི། ཕན་ཡོན་གྱི་ཡན་ལག་བསྟན་ཏོ། །སེམས་རྩེ་གཅིག་པ་ཉིད་ནི། དེ་གཉི་གའི་གནས་ཀྱི་ཡན་ལག་གོ། །འདི་ཡི་དགོས་པ་ནི། རྣམ་པར་གཡེང་བ་ལས་གླན་པའོ། །ཕན་ཡོན་ནི་ཏིང་ངེ་འཛིན་ཡོངས་སུ་
སྦྱོང་བར་བྱེད་པ་སྟེ། འདིར་ཚིགས་སུ་བཅད་པ། དམིགས་པ་ལ་ནི་སེམས་གཏད་ནས། །དེ་རྒྱུན་རྣམ་པར་གཡེང་མི་བྱ། །རྣམ་གཡེང་མྱུར་དུ་རྟོགས་གྱུར་ནས། །དེ་ལས་སླར་ནི་གླན་པར་བྱ། །བློ་ལྡན་གོང་ནས་གོང་དུ་ཡང་། །སེམས་ནི་ནང་དུ་བསྡུ་བར་བྱ། །དེ་ནས་ཡོན་ཏན་
མཐོང་བའི་ཕྱིར། །ཏི་ངེ་འཛིན་ལ་སེམས་གདུལ་ལོ། །རྣམ་གཡེང་ཉེས་པ་མཐོང་བའི་ཕྱིར། །དེ་ལ་མི་དགའ་ཞི་བར་བྱ། །བརྣབ་སེམས་ཡིད་མི་བདེ་ལ་སོགས། །ལངས་པ་དེ་བཞིན་ཞི་བར་བྱ། །དེ་ནས་སྡོམ་བརྩོན་ཅན་གྱིས་ནི། །སེམས་ལ་མངོན་པར་འདུ་བྱེད་བཅས། །

71-1-115b

རང་གི་ངང་གིས་འབྱུང་བ་ཐོབ། །དེ་གོམས་པ་ལས་འདུ་མི་བྱེད། །ལྷའི་གནས་པ་དང་སྦྱར་བ་བཤད་ཟིན་ཏོ།    །བྱང་ཆུབ་སེམས་དཔའི་ལྷག་པའི་བསམ་པ་ནི། གནས་སྐབས་གང་དུ་ཡང་སེམས་ཅན་རྣམས་ཀྱི་དོན་ལྷུར་ལེན་པ་ལ་གཞོལ་བའི་ཕྱིར། དེའི་འོག་ཏུ་ཚངས་པའི་
གནས་པ་ཚད་མེད་པ་བཞི་བསྒོམ་དགོས་པར་སྟོན་ཏེ། དེ་ལ་བྱམས་པའི་དབང་དུ་མཛད་ནས། བྱམས་དང་ཞེས་གསུངས་ཏེ། བསམ་གཏན་ལ་བརྟེན་ནས། སེམས་ཅན་རྣམས་ལ་ཕན་པ་དང་། ཕྲད་པར་ཤོག་ཤིག་པར་བསམས་པའི་གནས་པ་ཡང་དག་པར་འབྱོར་པའི་
ཏིང་ངེ་འཛིན་ཏོ།    །སྙིང་རྗེའི་དབང་དུ་མཛད་ནས་སྙིང་རྗེ་ཞེས་གསུངས་ཏེ། བསམ་གཏན་ལ་བརྟེན་ནས། སེམས་ཅན་རྣམས་ལ་སྡུག་བསྔལ་དང་བྲལ་བར་ཤོག་ཤིག་པར་བསམས་པའི་གནས་པའི་ཡང་དག་པར་འབྱོར་པའི་ཏིང་ངེ་འཛིན་ཏོ།    །དགའ་བའི་དབང་དུ་མཛད་ནས།  
དགའ་བ་ཞེས་གསུངས་ཏེ། བསམ་གཏན་ལ་བརྟེན་ནས་སེམས་ཅན་རྣམས་ལ་བདེ་བ་དང་མི་འབྲལ་བར་ཤོག་ཤིག་པར་བསམས་པའི་གནས་པ་ཡང་དག་པར་སྦྱོར་བའི་ཏིང་ངེ་འཛིན་ཏོ།    །བཏང་སྙོམས་ཀྱི་དབང་དུ་མཛད་ནས། བཏང་སྙོམས་ལྡན་ཞེས་གསུངས་ཏེ། བསམ་
གཏན་ལ་བརྟེན་ནས་སེམས་ཅན་རྣམས་ལ་ཕན་པར་བསམས་པའི་གནས་པ་ཡང་དག་པར་འབྱོར་པའི་ཏིང་ངེ་འཛིན་སེམས་མཉམ་པ་ཉིད་ལ་དང་། སེམས་རྣལ་དུ་འདུག་པ་དང་། སེམས་ལྷུན་གྱིས་གྲུབ་པའོ། །འདིར་ཚིགས་སུ་བཅད་པ། བྱང་ཆུབ་སེམས་དཔའ་གནོད་
སེམས་དང་། །རྣམ་འཚེ་མི་དགའ་གནོད་སེམས་དང་། །འདོད་པའི་འདོད་ཆགས་དང་ལྡན་པ། །ཉེས་དམིགས་རྣམ་པ་མང་ལ་རེག །ཅེས་བྱ་བ་དང་། ཉེས་པ་འདི་ཀུན་བྱམས་སོགས་ལ། །ལེགས་པར་གནས་ལ་མི་འབྱུང་སྟེ། །ཉོན་མོངས་ཅན་མིན་སེམས་ཅན་གྱི། །
དོན་དུ་འཁོར་བའང་ཡོངས་མི་གཏོང་། །ཚངས་པའི་གནས་པ་དང་སྦྱར་བ་བཤད་ཟིན་ཏོ།    །དེ་ནས་ཆོས་ཀྱི་དབྱིངས་རྟོགས་པ་ལ་འཇུག་པར་གཞོལ་བའི་ཡུལ་རྣམ་པར་ཐར་པའི་སྒོ་གསུམ་བསྒོམ་དགོས་པར་སྟོན་ཏེ། དེ་ལ་སྟོང་པ་ཉིད་བསྟན་པའི་དབང་དུ་མཛད་ནས། 

71-1-116a

གཟུགས་ནི་འབྱུང་བ་ཆེན་པོ་བཞི་དང་ལྡན། །དེ་ནི་བདག་མིན་བདག་ཀྱང་གཟུགས་མ་ཡིན། །གཟུགས་ལ་བདག་མེད་བདག་ལ་གཟུགས་མེད་དེ། །གཟུགས་ནི་སྟོང་པའི་ཕུང་བཞིའང་རིག་པར་གྱིས། །ཞེས་བྱ་བ་ལ་སོགས་པ་གསུངས་ཏེ། འདིས་ནི་གང་ཟག་
དང་ཆོས་ལ་བདག་མེད་པ་དག་ཡོངས་སུ་ཤེས་པར་བྱ་བའི་ཕྱིར་བསྟན་ཏོ།    །མཚན་མ་མེད་པའི་དབང་དུ་མཛད་ནས། བུད་མེད་མཚན་ཉིད་སྐྱེས་པའི་མཚན་ཉིད་དང་། །སྨན་དང་གླང་ཆེན་བརྟག་པའམ་སྐར་མའི་དཔྱད། །མཚོན་ཆ་བརྟག་པའམ་རྟ་དཔྱད་རང་བཟོ་འམ། །
བསྟན་བཅོས་ངན་པ་སློབ་ཅིང་ཀློག་པ་ཡང་། །ཞེས་བྱ་བ་ལ་སོགས་པ་གསུངས་ཏེ། འདིས་ནི་གང་ཟག་དང་ཆོས་ལ་བདག་ཏུ་འཛིན་པ་ཉེ་བར་ཞི་བར་བྱ་བའི་ཕྱིར་བསྟན་ཏོ།    །སྨོན་པ་མེད་པའི་དབང་དུ་མཛད་ནས། ཡུལ་སའི་གཏམ་དང་མི་དབང་བསྟན་པ་དང་། །
དམག་དང་གྱད་དང་ན་ཆུང་གཏམ་དག་དང་། །སྒྲུང་ལྡེབས་དང་ནི་སྔོན་གྱི་ལོ་རྒྱུས་གཏམ། །འདོད་ཆགས་གཏམ་དང་སྨད་འཚོང་གཏམ་མི་བྱ། །ཞེས་བྱ་བ་ལ་སོགས་པ་གསུངས་ཏེ། འདིས་ནི་གང་ཟག་དང་ཆོས་ལ་བདག་ཏུ་འཛིན་པའི་རྟེན་སྤང་བའི་ཕྱིར་བསྟན་ཏོ། །འདིར་
ཚིགས་སུ་བཅད་པ། ཡོངས་སུ་ཤེས་དང་སྤོང་བ་དང་། །མངོན་གསུམ་དུ་ནི་བྱ་བའི་ཕྱིར། །སྟོང་ཉིད་ལ་སོགས་ཏིང་འཛིན་རྣམས། །དོན་རྣམས་གསུམ་དུ་ཡོངས་སུ་བསྒྲགས། །རྣམ་པར་ཐར་པའི་སྒོ་གསུམ་དང་སྦྱར་བ་བཤད་ཟིན་ཏོ།    །དེ་བཞིན་དུ་བཟླས་བརྗོད་ཡན་
ལག་དང་བཅས་པ་དང་། སྒྲའི་ཏིང་ངེ་ཛིན་ལ་སོགས་ཏེ། འདིར་མོས་པ་ཡིད་ལ་བྱེད་པ་དང་། དེ་ཁོ་ན་ཉིད་ལ་བྱེད་པ་བསྟན་པ་འདི་དག་གིས་ཀྱང་ཞི་གནས་ཀྱི་རྗེས་སུ་མཐུན་པ་དང་། ལྷག་མཐོང་འཕེལ་བའི་རྗེས་སུ་མཐུན་པའི་ཕྱིར་ཡིད་ལ་བྱེད་པའི་ཕན་ཡོན་བསྟན་པ་
ཡིན་ནོ།    །དགོས་པའི་ཡང་དགོས་པ་ཞེས་བྱ་བ་ནི་ཆོ་གའི་གནས་ལ་མཁས་པ་དང་། ཡིད་ལ་བྱེད་པའི་ཕན་ཡོན་ཐོབ་པས་མཐོང་བའི་ཆོས་ལ་མངོན་པར་མཐོ་བ་དང་། སྲིད་པ་གཞན་དུ་ངེས་པར་ལེགས་པའི་འབྲས་བུ་ཐོབ་པ་ཡིན་ནོ། །དེ་ལྟར་འབྲེལ་པ་ལ་སོགས་པའི་རྒྱུད་ཀྱི་

71-1-116b

དོན་བཟང་པོ་འདི་རྣམས་ཁོང་དུ་ཆུད་པའི་སྒོ་ནས་ནི། གང་དག་ཆོས་ཀྱི་རྗེས་སུ་འབྲང་བ་རྣམས་འཆད་པ་ལ་སོགས་པ་ལ་གུས་པ་སྐྱེའོ། །བསྡུས་པའི་དོན་གཞན་ནི་དངོས་སུ་གོ་བར་ཟད་དོ། །འཕགས་པ་དཔུང་བཟངས་ཀྱིས་ཞུས་པའི་རྒྱུད་ཀྱི་བསྡུས་པའི་དོན་བཀྲོལ་བའི་
བརྗེད་བྱང་རྫོགས་སོ།།      །།༄༅༅།  །རྒྱ་གར་སྐད་དུ། སིདྡྷཻ་ཀ་བཱི་ར་ཏནྟྲ་ཊཱི་ཀཱ། བོད་སྐད་དུ། དཔའ་བོ་གཅིག་ཏུ་སྒྲུབ་པའི་རྒྱུད་ཀྱི་འགྲེལ་པ། དཔལ་རྡོ་རྗེ་འཆང་ལ་ཕྱག་འཚལ་ལོ། །གང་ཞིག་སྒྲོལ་མའི་ཞབས་པད་སྤྱི་བོས་ལེན་མཛད་ཅིང་། །བདེ་
གཤེགས་ཚུལ་ཁྲིམས་གསུམ་ལྡན་དྲི་མེད་དགེ་འབྱུང་གནས། །བསྟན་པའི་ཁུར་འཛིན་བཟོད་པ་གསུམ་གྱིས་བརྒྱན་པ་པོ། །སྲིད་གསུམ་མཆོད་འོས་བྱམས་པའི་རྩ་ལག་ལ་བཏུད་དེ། །བླ་མའི་མན་ངག་ཇི་བཞིན་རྒྱུད་གཞུང་འདི་དག་གི། །སྙིང་རྗེའི་ག་བུར་ཡལ་ག་རྒྱས་པ་རྒྱ་ཆེ་བ། །
གསལ་ཞིང་གཞལ་མེད་དགའ་བའི་རོལ་པ་པདྨའི་རྩེ། །དཔའ་བོ་གཅིག་སྒྲུབ་རྒྱུད་ཚིག་གསལ་བར་དབྱེ་བར་བྱ། །རྒྱུད་འདིའི་བརྗོད་པར་བྱ་བ་ནི་ཅི་ཞིག དེ་བཞིན་དུ་དགོས་པ་དང་། དགོས་པའི་དགོས་པ་དང་། འབྲེལ་པ་ནི་གང་ཞིག་སྙམ་ན། ཞི་བ་ལ་སོགས་པའི་རང་བཞིན་
ཅན་གྱི་ལས་ཀྱི་ཚོགས་རྣམས་ནི་རྒྱུད་འདིའི་བརྗོད་པར་བྱ་བ་ཡིན་ལ། དེའི་དོན་རྒྱུད་ཀྱི་གཞུང་གི་ཚོགས་ལེའུ་བཞི་པའི་བདག་ཉིད་ཅན་འདི་ལ་བརྟེན་ནས་རྟོགས་པར་གྱུར་པ་ནི་དགོས་པའོ། །སྒྲུབ་པ་པོའི་མངོན་པར་འདོད་པའི་དོན་རང་དང་གཞན་གྱི་བདེ་ལེགས་ཕུན་སུམ་ཚོགས་
པ་ལ་དབང་འབྱོར་པ་ནི་དགོས་པའི་ཡང་དགོས་པའོ། །འབྲེལ་པ་ནི་ཤུགས་ལས་ཤེས་པར་འགྱུར་རོ། །ཁ་ཅིག་འདི་སྙམ་དུ་འདི་སྐད་བདག་གིས་ཞེས་པ་ལ་སོགས་པ་གླེང་གཞི་ཕུན་སུམ་ཚོགས་པ་སྟོན་པའི་ཚིག་མེད་པས་སྟོན་པའི་གསུང་རབ་ཉིད་དུ་མ་གྲུབ་པོ་སྙམ་དུ་རྟོག་ན་
མ་ཡིན་ཏེ། འདི་སྐད་ཐོས་པ་ཞེས་བྱ་བ་ལ་སོགས་པ་ནི་འཕགས་པ་ཀུན་དགའ་བོ་ལ་སོགས་པ་སྡུད་པ་པོའི་ཚིག་ཡིན་ལ། འདིར་ནི་སྟོན་པ་དང་སྡུད་པ་པོ་ཐ་དད་མེད་པར་དགོངས་ནས་སྡུད་པ་པོའི་ཚིག་མ་གསུངས་པ་ཡིན་ནོ། །ཡང་ན་ཨེ་ཝཾ་ནི་ཐབས་དང་ཤེས་རབ་གཉིས་སུ་མེད་

71-1-117a

པར་མཚོན་པ་ཡིན་ལ། རྒྱུད་ཀྱི་བརྗོད་པར་བྱ་བ་ཐམས་ཅད་ཀྱང་ཡེ་ནས་ཐབས་དང་ཤེས་རབ་གཉིས་སུ་མེད་པའི་བདག་ཉིད་དུ་གནས་པས་ཨེ་ཝཾ་གྱི་སྒྲ་མ་གསུངས་པར་ཟད་དོ། །ཡང་ན་རྒྱུད་འདིར་ནི་ཡོངས་སུ་རྫོགས་པ་མ་ཡིན་པའི་ཕྱིར་གླེང་གཞི་མ་གསུངས་ཏེ། 
སྒྱུ་འཕྲུལ་ཆེན་པོ་ལ་སོགས་པ་བཞིན་ནོ། །དེ་ལྟར་གདུལ་བྱ་རྣམས་ཀྱི་ཐེ་ཚོམ་གྱི་རྣམ་པར་རྟོག་པ་བསལ་ནས་རྒྱུད་ཀྱི་གཞུང་ལ་འཇུག་པར་བྱེད་དོ། །གང་ཟག་མོས་པ་དང་སྐལ་བ་ཐ་དད་པའི་དབང་གིས་འཇིག་རྟེན་པའི་འབྲས་བུ་དང་། འཇིག་རྟེན་ལས་འདས་པའི་འབྲས་བུ་ལ་
མོས་པ་གཉིས་ལས། དང་པོའི་དབང་དུ་བྱས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་ཟབ་པ་དང་རྒྱ་ཆེ་བའི་བསྟན་བཅོས་ལ་འཇུག་མི་ནུས་པའི་སེམས་ཅན་ལ། ཞི་བ་དང་རྒྱས་པ་ལ་སོགས་པའི་ཕྲིན་ལས་ལ་ངེས་པ་དང་བཅས་པ་དེ་དག་ལ། སྙིང་རྗེ་ཆེན་པོའི་
གཞན་དབང་དུ་གྱུར་པ་ཉིད་ཀྱིས་རང་རང་གི་རྒྱུད་དུ་རྟོག་པ་ལ་གནས་པའི་དཔའ་བོ་གཅིག་ཏུ་སྒྲུབ་པ་རྣམས་གཅིག་ཏུ་ཡང་དག་པར་བསྡུས་ཏེ་བསྟན་ཏོ། །གང་ཞིག་དོན་འདི་ལ་ངེས་པར་ཕྱོགས་པ་དེ་དག་འདི་རྣམས་ཀྱི་ཏིང་ངེ་འཛིན་གྱི་རིམ་པས་ས་བཅུ་དང་ཕ་རོལ་ཕྱིན་པ་ལ་
སོགས་པས་རྒྱུད་སྡེ་ཡང་དག་པའི་བྱང་ཆུབ་ཐོབ་པར་འགྱུར་རོ། །འཇམ་པའི་རྡོ་རྗེ་ཞེས་པ་ལ་སོགས་པ་ལ། དཔའ་བོ་གཅིག་པའི་རྒྱུད་ཆེན་པོ་འཛིན་པར་ནུས་པའི་གདུལ་བྱ་ཡང་མི་སྣང་ཡང་། ཅུང་ཟད་ཙམ་འདོད་པའི་གདུལ་བྱ་ལ་ཐུགས་རྗེས་རྗེས་སུ་ཆགས་པ་ནི་འཇམ་
པའི་རྡོ་རྗེ་སྟེ། འཇམ་དཔལ་ལོ། །འཇམ་དཔལ་ནི་སྐུ་གསུང་ཐུགས་མཛེས་པའོ། །རྡོ་རྗེ་ནི་མི་ཤིགས་པ་དང་ཐོགས་པ་མེད་པའི་ཡེ་ཤེས་དང་ལྡན་པ་སྟེ། དེས་རྒྱུད་རབ་ཏུ་གསུངས་ཞེས་འབྲེལ་ཏོ། །གང་གི་དོན་དུ་ཞེ་ན། སེམས་ཅན་ཐམས་ཅད་ཀྱི་དོན་དུ་སྟེ། སེམས་
ཀྱི་ཞེན་པ་ནི་བདག་གིའོ། །དོན་གྱིས་ཞེས་པ་ནི་དགོས་པའོ། །སྦྱིན་པ་ལ་སོགས་པས་རང་གི་རྒྱུད་ལ་བསོད་ནམས་ཀྱི་ཚོགས་སོགས་པས་སེམས་ཅན་གྱི་དོན་ཏོ། །ཡང་ན་སེམས་ནི་གདུལ་བྱ་ལ། །དོན་ནི་ཡོངས་སུ་རྫོགས་པའོ། །དེའི་དོན་དུ་རྒྱུད་དང་སྔགས་དང་རྫས་དང་ཏིང་

71-1-117b

ངེ་འཛིན་ལ་རྨོགས་པས་ཡང་དག་པར་བསྡུས་པའོ། །རྒྱུན་མི་འཆད་པས་ན་རྒྱུད་དེ་བཤད་པར་བྱ་བ་ཞི་བ་ལ་སོགས་པའི་དངོས་གྲུབ་གདུལ་བྱའི་རྒྱུད་ལ་རྗེས་སུ་འབྲེལ་པའོ། །དེ་གང་ཡིན་ན་དཔའ་བོའི་གཙོ་ཞེས་པ་སྟེ། དཔའ་བོ་ནི་ཉོན་མོངས་པ་དང་ལས་དང་སྐྱེ་བ་གཡུལ་
དུ་རྣམ་པར་འཇོམས་པ་ལ་བརྩོན་འགྲུས་བརྩམ་པར་བྱ་སྟེ། བྱང་ཆུབ་སེམས་དཔའ་རྣམས་སོ། །དེ་རྣམས་ཀྱི་གཙོ་བོ་ནི་མངའ་བདག་ཅེས་བྱ་བའི་དོན་ཏོ། །ཆོས་སྟོན་པ་ལ་དོན་དང་ཚིག་ལ་མི་འཇིགས་པས་གདུལ་བྱའི་རྒྱུད་བླ་ན་མེད་པའི་ཡོན་ཏན་ཕྱིར་སྨྲ་བ་རྣམས་ཀྱི་མཆོག་
གོ། །ཡང་ན་སྨྲ་བ་རྣམས་ནི་སྟོན་པ་སྟེ། དབང་ཕྱུག་ཆེན་པོ་ལ་སོགས་པའོ། །མཆོག་ནི་འཕགས་པ་སྟེ། རྟོགས་པ་ལས་བྱུང་བའི་རྫུ་འཕྲུལ་གྱིས་རྡོ་རྗེ་འཇིགས་བྱེད་ལ་སོགས་པར་སྤྲུལ་པའི་དུས་སུ་ལྷ་ཆེན་པོ་རྣམས་སྤོབས་པ་མེད་པར་བྱ་བའི་ཕྱིར་རོ། །དེ་བས་ན་དེ་དག་ནི་སྐྱེས་
བུ་ཆེན་པོའི་མིང་གི་ཡོན་ཏན་དག་གིས་ཁྱད་པར་དུ་འཕགས་པའོ། །འགྲོ་བའི་བླ་མ་ཞེས་པ་ལ། འགྲོ་བ་ནི་ཤིན་ཏུ་འོད་གསལ་བར་འགྲོ་བ་དང་། དེ་ལས་འོངས་པ་སྟེ། འགྲོ་བ་སྣ་ཚོགས་སོ། །དེ་དག་གི་བླ་མ་ནི་མངའ་བདག་གོ། །ཡང་ན་འགྲོ་བ་ནི་སྐུ་གསུང་ཐུགས་ཀྱི་དོན་
མ་རྟོགས་པ་རྣམས་ཡིན་ལ་དེ་དུལ་བས་ན་བླ་མའོ། །ཡང་ན་འགྲོ་བ་དྲུག་གི་གཟུགས་སུ་གྱུར་པས་འགྲོ་བ་སྟེ། ཁམས་གསུམ་མོ། །དེ་དག་ལ་དབང་མཛད་པས་བླ་མའོ། །ཇི་ལྟར་ན་རྒྱུད་ཡིན་ཞེ་ན། དཔའ་བོ་གཅིག་གྲུབ་པ་ཞེས་པ་སྟེ། གྲུབ་པ་ནི་ཡོངས་སུ་རྫོགས་པ་ལ་
རབ་ཏུ་གྲགས་པ་སྟེ། ལས་གང་དང་གང་གི་དབང་དུ་བྱས་པའི་རྫས་དང་སྔགས་ལ་སོགས་པའོ། །ཞི་བ་ལ་སོགས་པའི་དངོས་གྲུབ་ཀྱིས་བདུད་འཇོམས་དཔའ་བོ་རྣམས་སོ། །རབ་མཆོག་ཅེས་བྱ་བ་ནི་ཁྱད་པར་དུ་འཕགས་པ་སྟེ་རྒྱུན་མི་འཆད་པར་གནས་པའི་རྒྱུའོ། །གཟུགས་
ཅན་གྱི་ལྷ་བསྒོམ་པར་སྔགས་པས་སྔགས་དེ་དག་ཅིའི་ཕྱིར་སྒྲུབ་ཅེ་ན། གསུངས་པ། ལྷ་ཉིད་ཅེས་པ་ལ་སོགས་པ་སྟེ། སྔགས་གང་གྲུབ་པའི་ཡོངས་སུ་གསལ་བར་གྱུར་ན་དེའི་ལྷ་དེ་དེ་ལ་འགྲུབ་པར་འགྱུར་ཏེ། འདོད་པའི་དོན་ཡོངས་སུ་རྫོགས་པའི་དོན་ཏོ། །དེ་ཅིའི་ཕྱིར་

71-1-118a

ཞེ་ན། རྫོགས་པའི་རིམ་པ་ལ་ལྷ་དང་སྔགས་ཐ་དད་མེད་པ་དང་། བསྐྱེད་རིམ་ལ་རྒྱུ་ལྷ་ལ་འབྲས་བུ་སྔགས་སུ་བསྟན་པས་སོ། །དེ་བས་ན། ལྷ་ཉིད་གསང་སྔགས་ཚུལ་གྱིས་ནི། ཞེས་པ་ཉིད་ནི་མ་ནོར་བའི་དོན་ཏོ། །སྔགས་པ་ནི་སྒྲུབ་པ་པོའོ། །དེ་
ཉིད་ནི་སྔགས་སོ། །བསྒོམས་ན་ནི་ཞེས་པ་ནི་རྣམ་པ་དེ་ལ་ཡང་དང་ཡང་དུ་རྩེ་གཅིག་ཏུ་བྱ་བའི་དང་པོ་ཡིད་ཆེས་པའི་དོན་དུ་འདོད་པའི་དོན་ལ་ཡང་དག་པར་བཟླས་པའི་སྔགས་ཀྱིས་དངོས་གྲུབ་ཆེན་པོ་ལ་མི་སྦྱོར་རོ་ཞེས་གསུངས་པ་ནི་ཕྲ་མོ་ཞེས་པ་ལ་སོགས་པ་སྟེ་གོ་སླའོ། །
ལེགས་པར་བཟླས་པའི་སྔགས་ནི་དོན་དེ་བསྒོམས་པས་འདི་དང་ཕྱི་མར་ལྷག་པར་རྟོགས་པའི་བསྒོམ་པ་འོད་གསལ་བ་ལ་རབ་ཏུ་ཞུགས་པའི་རྗེས་སུ་རིམ་པས་ཆོས་ཐམས་ཅད་རྙེད་པས་ཞེས་གསུངས་པས་སོ། །ས་ལ་སོགས་པ་གོ་སླའོ། །དང་པོ་རབ་ཏུ་འཇུག་པའི་སྒོ་ནས་འདི་
བཤད་པའོ། །དེ་ལྟར་མཁྱེན་ནས་ཞེས་པ་ལ་སོགས་པ་ནི་གོ་སླའོ། །ཨོཾ་ཀཱ་ལུ་ཞེས་པ་ལ་སོགས་པ་ནི་འཆད་པར་འགྱུར་བའི་རེངས་པར་བྱེད་པའི་སྔགས་བཞི་སྟེ། འདི་ལ་ཡང་བསྙེན་པ་དང་ལས་ལ་སྦྱར་བའི་དུས་ཐམས་ཅད་དུ་སྐད་ཅིག་གིས་རྡོ་རྗེ་གདན་གྱི་རྣལ་འབྱོར་བྱའོ། །
དང་པོ་དང་གཉིས་པའི་སྔགས་ཀྱི་མངོན་སྤྱོད་ལ་སོགས་པ་ལ་རྡོ་རྗེ་སེམས་དཔའི་རྣལ་འབྱོར་ཉིད་ཀྱིས་བྱའོ། །ལེགས་པར་བཟླས་ན་ཞེས་པ་ནི་འབུམ་བཟླས་པའོ། །དྲན་པ་ཉིད་ཅེས་པ་ཐམས་ཅད་དུ་བརྒྱ་རྩ་བརྒྱད་དམ་ཉི་ཤུ་རྩ་གཅིག་བཟླས་པས་སོ། །ཐལ་བ་ལ་ཞེས་པ་ནི་རྫ་མཁན་
གྱི་ཐལ་བས་སོ། །མངོན་པར་བཟླས་ན་ཞེས་པ་ནི་ལག་པ་གཡས་པའི་མཐིལ་དུ་ཐལ་བ་བཞག་ནས་ལག་པ་གཡོན་པའི་སྲིན་ལག་གིས་བརྒྱ་རྩ་བརྒྱད་བཟླས་པས་སོ། །གང་དུ་འདོད་པ་དེར་འགྲོའོ། །ཞེས་པ་ནི་གོ་སླའོ། །ཨོཾ་ག་རུ་ཞེས་པ་ལ་སོགས་པ་ནི་ཐོད་ལོ་ཀོར་དང་རྔ་ལྕག་
ལ་ལན་ཉི་ཤུ་རྩ་གཅིག་མངོན་པར་བཟླས་ནས་རྔ་བརྡུང་བར་བྱའོ། །ཨོཾ་ཧེ་ཧེ་ཞེས་པ་ལ་སོགས་པ་ལ། སྔོན་དུ་བསྙེན་པའི་ཆོ་ག་ནི་སངས་རྒྱས་བཅོམ་ལྡན་འདས་ཡང་དག་པར་མཆོད་དེ། བླ་མ་ལ་གསོལ་བ་བཏབ་ནས་ཉི་མ་རེ་རེ་བཞིན་ལུས་ཐམས་ཅད་བཀྲུ་བ་དང་ཟས་དཀར་

71-1-118b

གསུམ་ཟ་བ་རྒྱུན་མ་ཆད་པས་འབུམ་ཕྲག་གཅིག་ཏུ་བཟླས་པར་བྱའོ། །ཐལ་བ་དང་ཞེས་པ་ནི་གཟའ་ཉི་མའི་ཚེས་གྲངས་ལ་བྲམ་ཟེ་ཤི་བའི་ཐབ་ཀྱི་ཐལ་བའམ་ཡང་ན་དགེ་སློང་གི་ཐབ་ཀྱི་ཐལ་བ་དང་། བ་དམར་སྐྱའི་ལྕི་བ་ཐང་ལ་མ་ལྷུང་བའི་ཐལ་བའོ། །ཡུངས་ཀར་ལ་ཞེས་
པ་ནི་བྲམ་ཟེའི་ཐོད་ཕོར་དུ་ཀུན་རྫོབ་ཀྱི་བདུད་རྩི་བྱུགས་ཏེ། སྐར་མ་རྒྱལ་གྱི་ཉིན་པར་ཡུངས་ཀར་བསྐྲུན་པའི་འབྲས་བུའོ། །ཡང་ན་ཡུངས་ཀར་ཉིད་ལ་བརྒྱ་རྩ་བརྒྱད་བཟླས་པས་སོ། །ཞིང་ལས་ཞེས་པ་ནི་ཞིང་གི་ཕྱོགས་གཅིག་ཏུ་སྒོ་གཅིག་གཞག་སྟེ། གཞན་དུ་ན་བྱི་བ་ལ་སོགས་
པ་འཆིང་བར་འགྱུར་རོ། །དུར་ཁྲོད་ཀྱི་རས་ནི་རོ་རས་སོ། །དུར་ཁྲོད་ཀྱི་བུམ་པ་ནི་འོ་མས་རབ་ཏུ་བཀང་བའི་བུམ་པ་དུར་ཁྲོད་དུ་བསྐྱལ་བའོ། །སྦས་པ་ནི་རླུང་བཟུང་ནས་ཞེས་བྱ་བས་ཏེ་མན་ངག་གོ། །ཡུང་བ་ཞེས་པ་ནི་འདིར་རེངས་པའི་རས་ལ་བྲི་བ་སྟེ། ཡུང་བ་དང་བ་ཟླ་དང་ཨ་རུ་
རའི་ཆུ་བསྲེས་པས་སོ། །རྒོལ་བ་ནི་བཀུར་སྟི་ལ་སོགས་པ་ལ་ཕྲག་དོག་པའོ། །རྩོད་སྦྱོང་བ་ནི་ནོར་གྱི་དོན་དུ་ཕན་ཚུན་རྩོད་པའོ། །ཁམ་ཕོར་ནི་ཞབས་ནག་པོར་རི་མེད་པ་ལ་སྔགས་ལན་བདུན་བཟླས་པའི་ཐོད་ལོ་ཀོར་གྱིས་སྔགས་གཡས་སྐོར་དུ་བྲི་བར་བྱའོ། །ཁ་སྦྱོར་དུ་བྱས་ཏེ་
ཞེས་པ་ནི་སྟེང་དུ་གནས་པའི་ཁམ་ཕོར་ལ་སྣ་ཚོགས་རྡོ་རྗེ་སེར་པོ་བྲིའོ། །དེའི་ཕྱི་རོལ་དུ་སྐུད་པ་སེར་པོས་དཀྲི་བར་བྱའོ་ཞེས་པ་ནི་མན་ངག་གོ། །རྐང་པའི་མཐིལ་དུ་སྔགས་ཀྱི་རྒྱལ་པོ་འདི་བཅུག་སྟེ་ཞེས་པ་ནི་རྐང་པ་གཉིས་ཀྱི་བར་དུའོ། །བླ་གོས་ནི་གོས་ཀྱི་ཕྱོགས་
གཅིག་ལ་མི་མཐུན་པ་ཐམས་ཅད་རབ་ཏུ་ཞུགས་པར་བསྒོམས་ཏེ་རང་གི་གནས་ཀྱི་མཚམས་འདབ་རླུང་བཟུང་སྟེ་ནུས་ཚད་ཀྱི་སྔགས་བཟླས་ནས་མདུད་པ་བྱ་སྟེ། འདྲུལ་གྱི་རྒྱབ་ན་གནས་པའི་སྒྲུབ་པའི་གྲོགས་ཕྱི་མས་ཀྱང་སྔགས་དང་འདུན་པའི་གྲོགས་བྱས་ནས་ཆོ་ག་འདིས་
མདུན་དུ་འགྲོ་བར་བྱའོ། །འཇིགས་པ་ལས་ཐར་ནས་མདུད་པ་དགྲོལ་བར་བྱའོ། །ཆུའི་ཕ་རོལ་དུ་ཕྱིན་ནས་བོང་བ་བཅུག་པ་དེ་གདོན་པར་བྱའོ། །གཉིས་དང་ལྡན་པར་བྲི་སྟེ་ཞེས་པ་ནི་སྣ་ཚོགས་རྡོ་རྗེའི་ཕྱི་རོལ་དུ་སའི་དཀྱིལ་འཁོར་གཉིས་ཕྱོགས་དང་མཚམས་སུ་རྡོ་རྗེ་རྒྱ་

71-1-119a

གྲམ་གྱི་རྣམ་པར་བརྒྱན་པ། ཕ་རོལ་གྱི་མཚམས་སམ་རི་ཁྲོད་ལ་སྦ་བར་བྱའོ། །སྔགས་ཨོཾ་གཉིས་ཀྱི་ཁ་སྦྱོར་ཞེས་པ་ནི་ལྷོར་སྔགས་མགོ་གཉིས་ཕན་ཚུན་ཕྲད་པར་བྱས་པ་ཨོཾ་གཉིས་ཀྱི་དབུས་སུ་བྲི་བར་བྱའོ། །ཐ་གཉིས་ཀྱིས་ཡོངས་སུ་བསྐོར་ཞེས་པ་
ལ་ཐ་གཉིས་ནི་ཚེག་དྲག་སྟེ་དེ་དག་གི་ཕྱི་རོལ་དུ་བྲིའོ། །སྣ་ཚོགས་རྡོ་རྗེས་ཉེ་བར་མཛེས་པ་ནི་དབང་ཆེན་གྱི་དཀྱིལ་འཁོར་གྱི་ཁྱད་པར་རོ། །ཆུ་གཉིས་པ་བདུན་ཞེས་པ་ནི་བུམ་པ་སར་པའི་ཆུས་སོ། །ཐལ་བས་ཞེས་པ་ནི་རྨ་བྱ་ཆེན་མོའི་རྣལ་འབྱོར་གྱིས་སོ། །ནས་ཆན་ནི་བལ་སྲན་དང་
འབྲས་འདྲེས་པ་བཙོས་པའི་ཟན་ནོ། །གཏོར་མ་ཆེན་པོ་གཏང་བར་བྱ། །ཞེས་པ་ནི་གཏོར་མ་གཏོང་བའི་དུས་སུ་ཁྱུང་གི་དང་། རྡོ་རྗེའི་དང་། དཔལ་བེའུའི་ཕྱག་རྒྱ་གསུམ་བཅིང་བར་བྱའོ། །དེ་ལ་ཁྱུང་གི་ཕྱག་རྒྱ་ནི་ལག་པ་གཉིས་ཐལ་མོ་བརྐྱང་བ་རྒྱབ་སྤྲད་དེ་མཐེའུ་ཆུང་
གཉིས་ལུ་གུ་རྒྱུད་དུ་མདུད་ནས་མིང་མེད་ཀྱི་སེན་མོ་གཉིས་མཐེ་བོང་གིས་མནན་པའོ། །དེ་གཉིས་ལ་སྡིགས་མཛུབ་གཉིས་ལུ་གུ་རྒྱུད་དུ་བཅིངས་པ་དང་། གུང་མོ་དང་མིང་མེད་ཀྱི་སེན་མོའི་སྟེང་དུ་མཐེ་བོང་གཞག་པ་ནི་རྡོ་རྗེའི་ཕྱག་རྒྱའོ། །ལག་པ་གཉིས་ཐལ་མོ་སྦྱར་ནས་མིང་
མེད་ནང་དུ་བསྐུམས་པའི་སེན་མོ་ལ་ཉེ་བའི་ཚིགས་ཀྱི་རྒྱབ་མཐེ་བོང་གཉིས་ཀྱིས་མནན་ཏེ། མཐེའུ་གཉིས་རྩེ་སྤྲད་ཅིང་གུང་མོ་གཉིས་ཀྱང་བརྐྱང་རྩེ་སྤྲད་དེ་མཛུབ་མོ་གཉིས་གུང་མོ་གཉིས་ཀྱི་རྒྱབ་ཏུ་ལྕགས་ཀྱུའི་ཚུལ་དུ་ཞག་པ་ནི་དཔལ་གྱི་བེའུའི་ཕྱག་རྒྱའོ། །ཡང་ལག་པ་གཉིས་གན་རྐྱལ་
དུ་བྱས་ནས་གཡོན་དང་གཡས་པ་ཉི་མ་དང་། ཟླ་བ་དང་ཉི་མ་ལ་ཨཱ་ལི་དང་ཀཱ་ལིས་མཚན་པ་བསྒོམས་ལ། ཡང་ལག་པ་གཉིས་ཁ་སྦུབ་པར་བྱ་སྟེ། ཨོཾ་བརྗོད་པས་གཡོན་པ་བསྟན། ཨཱཿབརྗོད་པས་གཡས་པ་བསྟན། ཧཱུཾ་བརྗོད་པས་གཉིས་ཀ་མཉམ་པར་སྦུབ་ལ་གཏོར་མ་ལ་
བསྟན། དེའི་རྗེས་སུ་ལག་པ་གཉིས་མཉམ་པོར་ཁ་སྦྱར་ནས་རྡོ་རྗེ་རྩེ་གཅིག་གི་ཕྱག་རྒྱ་གཏོར་སྣོད་ལ་རེག་པའོ། །ཡམ་ཤིང་ལྔ་ཞེས་པ་ནི། ཨ་འབྲས་དང་། བྱང་ཆུབ་ཀྱི་ཤིང་དང་། བྲ་ཀ་ཌི་དང་། བ་ཌ་དང་། བ་ལ་ཤིང་རྣམས་སོ། །འབྲུ་ལྔ་ཞེས་པ་ནི། འབྲས་སོ་བ་དང་། 

71-1-119b

ནས་དང་། ཏིལ་དང་། བལ་སྲན་དང་། གྲོ་རྣམས་སོ། །གསེག་མ་ཞེས་པ་ནི་རྡོ་དང་དངུལ་ལ་སོགས་པའི་ཉེ་བར་མཚོན་པའོ། །རྡོ་ལེབ་ལ་ཞེས་པ་ནི་རྡོ་ལེབ་བཞི་ལ་སྔགས་བྲིས་ནས་ཁང་པའི་ཟུར་བཞི་ལ་གཞག་པར་བྱའོ། །དུར་ཁྲོད་ཀྱི་རོ་བསྲེགས་པའི་ཤིང་གི་བྱུར་བུ་ཞེས་པ་ནི་
གཟའ་ཉི་མའི་ཚེས་གྲངས་ལ་བྲམ་ཟེའི་དགེ་སློང་གི་རོ་བསྲེགས་པའི་ཤིང་ངོ་། །དེ་སྒོའི་སྟེང་ཁོ་ན་ལ་གཞག་པར་བྱའོ། །སྐྱེད་ཀྱིས་འཚོ་བ་ཞེས་པ་ནི་རི་དགས་ལ་སོགས་པའོ། །ཨོཾ་ཧི་ནི་ཞེས་པ་ནི་བསྙེན་པ་འབུམ་བཟླས་པའི་རྗེས་ལ། མ་བསྒྲུབས་སུ་ཟིན་ཀྱང་ཞེས་པ་ནི་ལས་སྦྱོར་གྱི་
དུས་སུ་ཁྱད་པར་གྱི་ཆོ་ག་མ་བྱས་ཀྱང་གྲུབ་པར་འགྱུར་རོ། །ལན་ཚྭ་ཞེས་པ་ནི་ལན་ཚྭ་དང་སྐེ་ཚེ་རིན་ལ་མི་རྩེག་པར་ཉོ་བའོ། །དཔུང་གི་ཚོགས་རྣམས་ཀྱང་བྱེར་བར་ནི་བསྐྲད་པའོ། །སྦུན་པའི་སྦྱིན་སྲེག་ཅེས་པ་ནི་ཤ་མི་དང་སེང་ལྡེང་གི་ཡམ་ཤིང་དཀྱུས་སོར་བཅུ་གཉིས་ལ་སོགས་
སྦོམས་སུ་མཛུབ་མོ་དང་མཉམ་པའི་ཤིང་བུ་ཤུན་པ་དང་བཅས་སྤར་བ་གང་སྦྱིན་སྲེག་བྱའོ། །རེངས་པའི་སྔགས་བཞི་པོ་འདི་དག་ལ་སྔགས་གཅིག་གིས་ཀྱང་སྔགས་གཞན་གསུམ་གྱི་རབ་སྦྱོར་བྱེད་པར་ངེས་སོ། །ཞི་བ་དང་རྒྱས་པ་དང་དབང་དུ་བྱ་བ་དང་དྲག་པོའི་ལས་རྣམས་ལ་རིམ་
པ་བཞིན་དུ་འཇག་མ་ཤ་ར་དང་། མེ་ཏོག་ཨ་མྲ་ན་དང་། མྱ་ངན་མེད་པའི་ཤིང་དང་བྱ་རོག་གི་སྒྲོ་རྣམས་ཀྱི་སྨྱུ་གུས་བྱའོ། །ཨམྦ་སིམྤ་ཞེས་པ་ལ་སོགས་པ་ལ། དུ་པ་བུ་ཞེས་པའི་གོང་དུ་བདག་གི་དོན་གྲུབ་པར་གྱིས་ཤིག་ཅེས་གདགས་པར་བྱའོ། །རྟག་ཏུ་བཟླས་པ་ཞེས་པ་ནི་ཉི་མ་རེ་
རེ་ཞིང་རྒྱུན་མ་ཆད་པར་བཟླས་པའོ། །རྡོ་རྗེའི་ཆུ་ཞེས་པ་ནི་རྡོ་རྗེའི་ལག་པ་གཡས་པར་བླུགས་ནས་གཡོན་པའི་སྲིན་ལག་གིས་རེག་སྟེ། ལན་བདུན་བཟླས་ནས་རླུང་བཟུང་སྟེ། དཔྲལ་བར་ཐིག་ལེ་བྱའོ། །སིམྦ་ཞེས་པ་ནི་སིམྦའི་ཆུང་ཤོས་སོར་གསུམ་གྱི་ཚད་ཀྱོག་པོ་མ་ཡིན་
པའོ། །མངོན་སྤྱོད་ལ་སོགས་པ་ཐམས་ཅད་ལ་ཐུན་གསུམ་སྟེ། མཚན་མོའི་ཐུན་གསུམ་མོ། །གཡོན་ངོས་སུ་རྫ་སོ་བཏང་བའི་ཐལ་བ་དང་། གཡས་ངོས་སུ་ཤིང་ཨ་འབྲས་དང་། སྲིན་ཤིང་སི་བ་དང་། རས་བལ་གྱི་ལོ་མ་དང་། དེ་དག་གི་ལོ་མ་ཐ་དད་དུ་བཞག་ནས་མདུན་དུ་སྨྱུ་

71-1-120a

མ་ལ་བྱས་པའི་སྣོད་དུ་ལག་པ་གཡོན་པས་བོར་ནས་རྐང་པ་གཡོན་པས་བསྒྲུབ་བྱ་དེའི་ལིངྒ་བྲིས་ནས་རྐང་པ་གཡོན་པས་མཉེ་ཞིང་སྔགས་བཟླས་པར་བྱེདཔའི་རྣལ་འབྱོར་པས་ཞིབ་མ་ལ་བྲིས་པའི་ལིངྒའི་སྙིང་གར་རྐང་པ་གཡོན་པའི་མཐེ་བོང་གིས་མནན་ཅིང་། 
ལིངྒའི་མགོ་ལ་ཨ་འབྲས་ཀྱི་ལོ་མ་དང་། སྙིང་གར་སིམྦའི་ལོ་མ་རྐང་པ་ལ་རས་བལ་གྱི་ལོ་མ་བཞག་ནས་སྔགས་བཟླས་པའི་རྗེས་ལ་རྐང་པས་ཤིན་ཏུ་མཉེ་བར་བྱའོ། །དེ་བཞིན་དུ་ལན་ཉི་ཤུ་རྩ་གཅིག་གི་བར་དུ་བྲི་བ་དང་ཕྱི་བར་བྱ་བའི་རྗེས་ལ་ཡི་གེ་ལ་སོགས་པ་ངལ་སོ་ནས་ཐལ་
བ་དེ་དག་ཐམས་ཅད་ངོས་ནས་རྐང་པས་ཤིན་ཏུ་དྲག་པོར་མཉེ་བར་བྱའོ། །ནམ་ཕྱེད་ཀྱི་ཐུན་ལ་ཡང་ལན་ཉི་ཤུ་རྩ་གཅིག་བཟླས་པ་བྱས་པའི་ཐལ་བ་དང་ཐུན་མོང་པོ་ལ་བསྲེས་ནས་མཉེ་བར་བྱའོ། །དེ་བཞིན་དུ་ཐོ་རངས་ཀྱི་ཐུན་ལའང་དེ་ལྟར་བྱའོ། །གཞན་ཡང་ཐུན་གཉིས་ཀྱིས་
ཞིབ་མོའི་ཕྱོགས་གཅིག་ལ་བཞག་སྟེ་ལངས་ཏེ་མི་གཙང་བའི་གནས་སུ་དོར་བར་བྱའོ་ཞེས་པ་ནི་མན་ངག་གོ། །ཡང་དེ་ཁོ་ནའི་ལས་སྦྱོར་གཞན་ནི་སྐད་ཅིག་མས་རྨ་བྱ་ཆེན་མོའི་ལས་སྦྱོར་གྱིས་ཞིབ་མ་ལ་སོགས་པ་ལ་དོན་དང་སྦྱར་བསྔགས་བཟླས་ཤིང་ལག་པ་གཡོན་པ་གན་
རྐྱལ་དུ་བྱས་ནས་ཨ་འབྲས་ཀྱི་ལོ་མ་དང་། སིམྦའི་ལོ་མ་དང་། རས་བལ་གྱི་ལོ་མ་གསུམ་གཅིག་ཏུ་དྲིལ་ནས་སྐུད་པ་སེར་པོས་དཀྲིས་ཏེ་གོང་བུར་བཞག་སྟེ། དེ་ལྟ་བུ་ལན་བརྒྱ་རྩ་བརྒྱད་ཀྱི་བར་དུ་བྱའོ། །དབང་དུ་བྱ་བ་ལ་སོགས་པ་ལ་སྐུད་པ་དམར་པོ་ལ་སོགས་པས་བྱའོ། །
འདི་ནི་ཞག་བདུན་གྱི་བར་དུ་ཉིན་མོ་ཐུན་གསུམ་དང་མཚན་མོ་ཐུན་གསུམ་བྱའོ། །དེ་ནས་སྔར་གྱི་དྲིལ་བ་དེ་སྐྱེ་བོས་དབེན་པའི་གནས་སུ་ཤིང་ལ་སོགས་པའི་འོག་ཏུ་ཉི་མ་རེ་རེ་གཞག་པར་བྱའོ། །དེ་ནས་གཞན་རྫས་འབགས་པ་ཅན་གྱི་ནང་དུ་ཆུ་དང་བཅས་པའི་སྐྱུར་པོ་བླུགས་
ནས། རིམ་པ་ཇི་ལྟ་བར་བཤད་པའི་ལོ་མ་རྣམས་སྣོད་དེ་གང་བར་མ་གྱུར་གྱི་བར་དུ་སྦྱིན་སྲེག་བྱས་ནས་སྣོད་དེ་ཉི་མ་རེ་རེ་ཞིང་མིས་དབེན་པའི་སར་གཞག་སྟེ། ཕྱག་གི་ཤིང་བུ་དོན་མ་གྲུབ་ཀྱི་བར་དུ་ཐུན་གསུམ་གསུམ་དུ་བསྐུལ་བར་བྱའོ། །དེ་ནས་གཞན་ཡང་རྫས་འབགས་པ་

71-1-120b

ལ་ཇི་ལྟར་བཤད་པའི་རིམ་པས་སྔར་བཤད་པའི་ལོ་མ་རྣམས། ཚྭ་དང་བསྲེས་པའི་སྔགས་བསྐུལ་ཚིག་དང་བཅས་པ་བཟླས་ཤིང་དོན་མ་གྲུབ་ཀྱི་བར་དུ་སྦྱིན་སྲེག་བྱའོ། །སྣོད་དེ་ཉི་མ་རེ་རེ་ཞིང་ཅུང་ཟད་ཅུང་ཟད་ཡོན་སོ་སོར་གཞག་པར་བྱ་སྟེ། དེས་ནི་བསྒྲུབ་བྱ་ནད་ཀྱིས་
ཟིན་པར་འགྱུར་རོ། །སྣོད་དེ་ཁ་སྦུབ་པར་གྱུར་ན་བསྒྲུབ་བྱ་དེ་ངེས་པར་འཆི་བར་འགྱུར་རོ། །སྣོད་དེ་བཀྲུས་ན་ནི་བསྒྲུབ་བྱ་དེ་ངེས་པར་སོས་པར་འགྱུར་རོ། །སེམས་ཅན་རྣམས་ནི་སངས་རྒྱས་ཀྱི་རང་བཞིན་ཡིན་པས་སངས་རྒྱས་གསད་པར་འགྱུར་བའི་ཉེས་པས་ལས་སྦྱོར་དེ་གཉིས་ཀྱིས་
གནོད་པ་ཙམ་བྱའི་གསད་པ་ནི་མི་བྱའོ། །དེ་ནས་གཞན་ཡང་ཆུ་ཤིང་གི་འབྲས་བུ་དང་བཅས་པའི་ལོ་མ་ལ་ཚེར་མས་བསྒྲུབ་བྱ་བྲིས། དེའི་སྙིང་གར་དོན་དང་བཅས་པའི་སྔགས་བྲིས་ནས་བཟླས་ཤིང་ལོ་མ་དྲིལ་ཏེ་བཅིངས་ནས་སྦྲུམ་མ་ཡིན་པ་ལ་ཞག་བདུན་གྱི་བར་དུ་ཟར་
གཞུག་གོ། །གལ་ཏེ་མི་ཟ་ན་དེའི་ཚེ་ཚྭ་དང་བཅས་པ་ཟར་གཞུག་གོ། །དེས་ཀྱང་ཟ་བར་མ་གྱུར་ན་དེའི་ཚེ་དངོས་གྲུབ་མི་འབྱུང་བར་རིག་པར་བྱའོ། །དེ་ནས་གཞན་ཡང་དབྱེ་བར་འདོད་ན། ལག་པ་གཡོན་པའི་མཐིལ་དུ་སྔར་བཤད་པའི་ལོ་མ་གསུམ་པོ་གཞག་ནས་དཔུང་པ་
གཡོན་པའི་འོག་ཏུ་ཉེ་བའི་ལག་པ་གཡས་པས་ལན་བརྒྱ་རྩ་བརྒྱད་དྲིལ་ཏེ་ས་ལ་བསྐྱུར་ཏེ་སྒྲུབ་པ་པོ་མ་མཐོང་བར་ལངས་ཏེ་འགྲོ་བར་བྱའོ། །དེ་བཞིན་དུ་ཉིན་ཞག་གསུམ་གསུམ་གྱི་བར་དུ་བྱའོ། །དེ་ནས་གཞན་ཡང་ཞིབ་མའི་སྣོད་སར་པའི་ནང་དུ་རྫ་བསྲེགས་པའི་ཐལ་
བས་མཎྜལ་བྱས་ནས་ལག་པ་གཡས་པའི་ལོ་མ་གསུམ་པོ་རི་མོ་ཇི་ལྟ་བར་གཡོན་པའི་སེན་མོས་བཅད་ནས་བྱབ་པའི་སྔགས་བརྗོད་ཅིང་ཐལ་བའི་མཎྜལ་གྱི་སྟེང་དུ་དོར་བར་བྱའོ། །དེ་ནས་མཎྜལ་དེ་བཤིག་ནས་དྲི་ཞིམ་པོ་ལ་རལ་གཅིག་མ་དང་། མྱ་ངན་མེད་པའི་ལྷ་མོ་དང་། 
དུག་སེལ་མ་དང་། རྨ་བྱ་ཆེན་མོས་ཡོངས་སུ་བསྐོར་བའི་འཇིགས་པ་མེད་པའི་སྒྲོལ་མའི་མཎྜལ་བྱས་ནས་སྔགས་ཇི་ཙམ་དུ་ནུས་པར་བཟླས་པ་བྱས་ནས་ཞག་བདུན་དུ་ཉིན་རེ་ཞིང་ཐུན་གསུམ་གསུམ་དུ་བྱ་སྟེ། ཐུན་རེ་ལ་བརྒྱ་རྩ་བརྒྱད་བཟླས་ནས་ཐལ་བ་དེས་རྩོད་སྦྱོང་ལ་སོགས་པ་ཐམས་

71-1-121a

ཅད་ཞི་བར་འགྱུར་རོ། །ཨ་འབྲས་ཀྱི་ལོ་མ་སྲང་གཅིག ཤིང་སིམྦའི་ལོ་མ་སྲང་གཅིག རས་བལ་གྱི་ལོ་མ་སྲང་གཅིག ཚྭ་ཞོ་གཉིས། སྐེ་ཚེ་ཞོ་གཉིས། དུད་པ་ཞོ་གཉིས་དེ་དག་ཞིབ་མར་བླུགས་ཏེ། མཚན་ཕྱེད་ན་སྒྲུབ་པ་པོ་གཅེར་བུར་བྱས་ཏེ། སྐྲ་
གྲོལ་བར་བྱས་ནས་བྱང་དུ་མངོན་པར་ཕྱོགས་ཏེ། ཞི་བའི་སེམས་དང་ལྡན་པས་སྔགས་བཟླས་ཤིང་མཉེ་བར་བྱའོ། །ཡང་ལོ་མ་དེ་དག་སྲང་ལ་བཅལ་ཏེ་ཆ་བསྙམས་ཏེ། འདག་པ་བྱས་ནས་ཁང་དྲིའི་རུས་པའི་ཚད་ཙམ་གྱི་རི་ལུ་བྱ་སྟེ། ཀུ་ཤའི་སྐུད་པ་ལ་རྒྱུས་ནས་ཐོགས་ཏེ། གོས་
གཙང་མ་གྱོན། ཁ་ནུབ་ཏུ་བལྟས་ནས་བཙོན་དགྲོལ་བ་ལ་སོགས་པའི་བཟླས་པ་བྱའོ། །ཕྲིན་ལས་ཐམས་ཅད་ལ་ཕྲེང་བ་འདི་དང་ལྡན་པས་ཕྲིན་ལས་བྱའོ། །དེ་ནས་ཡང་ཤིང་སིམྤའི་ལོ་མ་དང་དབང་དུ་བྱ་བའི་རྫས་ལ་སྔགས་བཟླས་ཤིང་སྦྱིན་སྲེག་བྱའོ། །དེའི་རྗེས་ལ་དཀྱིལ་
འཁོར་ལ་ཐབ་ཁུང་བྱ་སྟེ་མཚན་མོའི་དུས་སུ་སེང་ལྡེང་ངམ་ཁང་དྲིའི་མེ་ལ་མདོག་གཅིག་པའི་ཀ་ར་བདུན་གྱིས་ཐུན་གསུམ་དུ་སྦྱིན་སྲེག་བྱའོ། །གཞན་ཡང་ཞིབ་མ་མཁྲེགས་པོ་མདུན་དུ་བཞག་ནས་སྐྲོད་པའི་ལས་བྱ་བ་འདོད་པའི་བསམ་པས་སྔགས་སྤེལ་ཚིག་དང་བཅས་པར་བཟླས་
ཤིང་། ཞིབ་མ་ལ་རིམ་པ་ཇི་ལྟ་བར་ལོ་མ་གསུམ་གཞག་སྟེ་བསྐམས་པ་ལ་ལག་པ་གཉིས་ཀྱིས་མཉེས་ཏེ། རང་གི་གཡོན་ངོས་སུ་ལོ་མའི་ཕྱེ་མ་དེ་དག་ལ་བཀབ་སྟེ། ཟད་པ་དང་མ་མཐོང་བར་སྤངས་ཏེ་འགྲོ་བར་བྱའོ། །གཞན་ཡང་སྔར་བཤད་པའི་ལོ་མ་རྣམས་ལ་རེ་རེ་ཞིང་བརྒྱ་
རྩ་བརྒྱད་དུ་བཟླས་ནས་ཚེར་མས་རེངས་པར་བྱེད་པའི་སྔགས་སྤེལ་ཚིག་དང་བཅས་པ་བྲིས་ཏེ། ཁམ་ཕོར་གཙང་མའི་ནང་དུ་གཞུག་ལ་ཁ་སྦྱར་བ་ལ་རྡོ་རྗེ་རྒྱ་གྲམ་བྲིས་ལ་སྐུད་པ་སེར་པོས་དཀྲིས་ནས་སྐུད་པ་སར་པ་བཏགས་ཏེ་ཁྲོན་པར་དཔྱངས་པ་དང་། ཇི་ལྟར་ཆུར་ནུབ་པ་དེ་ལྟར་
སྐུད་པ་གཏང་བར་བྱའོ། །དེ་ནས་གཞན་ཡང་གནས་པར་འདོད་པས་སྔར་བཤད་པའི་ལོ་མ་གསུམ་པོ་ལ་བརྒྱ་རྩ་བརྒྱད་བཟླས་ཤིང་། ལོ་མ་རེ་རེ་ལ་ཡང་ཁ་ལ་ཕུར་བུའི་འདེབས་པའི་སྔགས་སྤེལ་ཚིག་དང་བཅས་པ་ལན་བདུན་བཟླས་པའི་ཚེར་མས་ཕུག་སྟེ་དབེན་པའི་གནས་སུ་གཞག་

71-1-121b

གོ། །དེ་ནས་གཞན་ཡང་རང་ཉིད་མགྲིན་པ་ནུབ་ཙམ་གྱི་ཆུར་ཞུགས་ཏེ། རྐང་པ་གཡས་པ་ཨ་འབྲས་ཀྱི་ཡལ་ག་དང་། གཡས་པས་སིམྦའི་ཡལ་ག་མནན་ཏེ། རས་བལ་གྱི་མེ་ཏོག་གིས་ཞག་བདུན་གྱི་བར་དུ་ཐུན་རེ་རེ་བཞིན་དུ་ཆུའི་ནང་དུ་དོར་བར་བྱའོ། །དེས་དགྲ་ལ་
སོགས་པ་རེངས་པར་འགྱུར་རོ། །དེ་ནས་གཞན་ཡང་བཤད་མ་ཐག་པའི་མེ་ཏོག་གསུམ་པོ་དེའི་ཁ་སྨྲས་ཀྱི་ས་ལ་མངོན་པར་ཆས་པའི་ཐག་མི་རིང་ཙམ་དུ་གནས་ཏེ་སྔགས་བརྒྱ་རྩ་བརྒྱད་དུ་བཟླས་ཤིང་མཉེ་བར་བྱའོ། །དེས་ནི་ཁ་སྨྲས་ལས་རྒྱལ་བར་འགྱུར་རོ། །དེ་ནས་གཞན་ཡང་བའི་
ལྕི་བ་ལས་ཀོང་བུ་གསུམ་བྱས་ནས་དེ་ལ་ཨ་འབྲས་དང་ཤིམྦི་དང་རས་བལ་གྱི་ལོ་མ་ཆག་པ་རྙིངས་པ་མ་ཡིན་པ་རིམ་པ་ཇི་ལྟ་བར་བཅུག་སྟེ། ལག་པ་གཡོན་པས་ཕྲེང་བ་བཟུང་ནས་སྔགས་བཟླས་ཤིང་སྐུད་པ་ཕྲེང་བ་ལ་ཉེ་བར་མཆོད་པ་བྱས་ནས་གཙང་བའི་ཕྱོགས་སུ་འདུག་སྟེ། ཁ་ལྷོར་
བལྟས་ནས་མཚན་མོ་ཐུན་དང་པོའི་རྗེས་ལ་དོན་དང་སྦྱར་བའི་སྔགས་ཇི་ཙམ་ནུས་པ་ཞག་བདུན་དུ་བཟླས་པ་བྱའོ། །དེ་ནས་གཞན་ཡང་སྒྱེད་པོ་གསུམ་གྱི་སྟེང་དུ་ཁོག་མ་སར་པར་འབྲས་སཱ་ལུའི་ལིངྒ་གསུམ་བྱས་ནས་དབང་དུ་བྱ་བའི་བསམ་པས་སྔགས་སྤེལ་ཚིག་དང་བཅས་པ་ཟློས་ཤིང་འོག་
ཏུ་མེ་བཏང་ལོ་མ་དེ་དག་ཐམས་ཅད་བསྲེག་པར་བྱའོ། །གཞན་ཡང་རྒྱས་པའི་ཐབ་ཁུང་ངམ་གྱོ་མོ་སར་པར་སྲིན་ཉི་ཆུང་ཤོས་ལ་སྔགས་བཟླས་ཤིང་བྱང་བུ་མངོན་དུ་ཕྱོགས་པས་སྔགས་འབུམ་ཕྲག་གཅིག་བཟླས་ཤིང་སྦྱིན་སྲེག་བྱས་ན་དཔལ་ཆེན་པོར་འགྱུར་རོ། །ཨེ་ཤོད་ཐི་རྡོ་རྗེ་ཞེས་པ་ལ་
སོགས་པ་ལ། ཨེ་ཤ་ཞེས་ཌོ་སྟེ་ཤོ་ཏ་པུརྞ་རྣ་བའོ། །ཨུདྠི་ཏ་ཞེས་པ་དན་པ་ལའོ། །ཛྭ་ལ་ཞེས་པ་ནི་ཨརྒ་དཀར་པོའོ། །ཛི་ཧོ་ཞེས་པ་ནི་སྣུ་ཧིའོ། །འདི་དག་ཆ་མཉམ་པོར་བསྲེས་ཏེ་འདག་པར་བྱས་ནས་སྲང་ལ་གཞལ་བའི་རི་ལུ་བྱ་སྟེ། གཞོན་ནུ་མས་བཀལ་པའི་སྐུད་
པའི་ཕྲེང་བས་སྭཱ་ཧཱའི་གོང་དུ་ཞི་བ་ལ་སོགས་པ་གང་འདོད་སྦྱར་བའི་སྔགས་བཟླས་པར་བྱའོ། །སྦུན་པའི་ཞེས་པ་བར་ཤུན་སྤར་བ་གང་དང་ཨུ་དུམྺཱ་རའི་ཤིང་སོར་བཅུ་གཉིས་ཀྱི་ཚད་ཤིང་བུ་དང་བཅས་པའི་ཡམ་ཤིང་དང་། ཁ་ནུབ་ཏུ་བལྟས་ཏེ། རེངས་པའི་ཐབ་སེར་པོའི་ནང་དུ་

71-1-122a

སྦྱིན་སྲེག་བྱའོ། །ཆུ་ཞེས་པ་ནི་འབབ་ཆུའོ། །ཁྱིམ་ཞེས་པ་ནི་གང་གི་ཁྱིམ་སྲུང་བར་བྱེད་པར་མིང་སྔོན་དུ་འགྲོ་བས་སྙིམ་པ་བདུན་གཏོར་ཏེ་ཕྱོགས་ཆེ་གེ་མོ་སྲུང་བར་བསམ་པར་བྱའོ། །མེས་ཚིག་པའི་མེ་ཁ་ལས་ཐར་བར་བྱེད་དོ་ཞེས་པ་ནི་ཚིག་པའི་ས་ལ་ལན་ཉི་ཤུ་
རྩ་གཅིག་བཟླས་ནས་རང་གི་ལག་གམ་རྩ་དཱུར་བས་བྱབ་པ་བྱས་ཤིང་ཕུ་གསུམ་བྱས་ནས་མེ་གདོན་པར་བྱའོ། །དེ་ནས་གཞན་ཡང་རབ་ཏུ་སྦྱོར་བ་ནི་གསེར་དང་དངུལ་དང་རྫ་གསར་པའི་ཁོག་མ་ལ་སོགས་པའི་སྣོད་གཙང་མའི་ཆུས་ཡོངས་སུ་གང་བའི་དབུས་སུ་ཞི་བ་ལ་སོགས་པའི་དོན་དུ་ཐོད་
པའི་སྣོད་དུ་མེ་ཏོག་དཀར་པོ་ལ་སོགས་པ་ལ་ཐུན་གསུམ་དུ་སྔགས་བརྒྱ་རྩ་བརྒྱད་བཟླས་ཤིང་། རྨ་བྱ་ཆེན་མོའི་རྣལ་འབྱོར་དང་ལྡན་པས་དོན་མ་གྲུབ་ཀྱི་བར་དུ་པདྨའི་ཕྱག་རྒྱས་སྦྱིན་སྲེག་བྱའོ། །ཨོཾ་པདྨེ་ཞེས་པ་ལ་སོགས་པ་ནི། ཨོཾ་པཉྩ་ནི་ལ་སྭཱཧཱ་ཞེས་པའི་མཐའ་ཅན་འདི་
ནས་སྔགས་བརྒྱད་མི་འཇིགས་པའི་སྒྲོལ་མའི་རྣལ་འབྱོར་གྱི་བཟླས་པ་དང་ལས་ལ་སྦྱར་བར་བྱའོ། །སྔགས་དང་པོ་ལ་ཕུ་གསུམ་གྱི་ཡི་གེ་སྦྱར་བར་བྱའོ། །མིག་ཅེས་པ་ནི་ཚེས་གྲངས་གང་ལ་མིག་ནད་ལངས་པ་ལ་དེ་ཁོ་ན་ལ་རེངས་པར་བྱ་སྟེ། སྔགས་འདི་བཟླས་ཤིང་མཐེ་བོང་
དང་སྲིན་ལག་གི་ཐལ་བ་ཁྱེར་ནས་ཁ་སྟེང་དུ་བལྟ་སྟེ་མིག་ཀུན་དུ་ཡོངས་སུ་བསྐོར་བར་བྱའོ། །བྱབ་པ་ཞེས་པ་ལག་པས་བྱབ་པའོ། །རྩིག་པ་ལ་ཞེས་པ་ནི་ཐོད་ལོ་ཀོར་ལ་ལན་བརྒྱ་རྩ་བརྒྱད་རྩིག་པ་ལ་བྲིས་པའི་སྔགས་དེ་མིག་ནད་ཅན་གྱིས་རྟག་ཏུ་བལྟ་བར་བྱའོ། །ཨོཾ་མོ་ཙ་ནི་
ཞེས་པ་ལ་སོགས་པ་ལ། མི་འཇིགས་པའི་སྒྲོལ་མ་འདིས་མངོན་པར་བསྔགས་ཞེས་པ་ནི་ལན་བརྒྱ་རྩ་བརྒྱད་དོ། །བཅིངས་པ་ལ་མངོན་དུ་ཕྱོགས་པ་ཞེས་པ་ནི་གང་ན་བཙོན་བུ་བཅིངས་པ་ཡོད་པའི་ཕྱོགས་དེ་ལ་བལྟ་ཞིང་དེ་ལ་དམིགས་པས་བཟླས་པ་བྱས་ན་གྲོལ་བར་འགྱུར་བར་བལྟ་བ་དང་། 
གྲོང་དེ་ལ་གནས་ནས་ཆུ་གཏོར་བའོ། །རྟག་ཏུ་ཞེས་པ་ནི་གོང་བཞིན་དུའོ། །ཨོཾ་ཧ་རི་ཞེས་པ་ལ་སོགས་པ་ལ། སའི་སྟེང་དུ་ཞེས་པ་ནི་དྲི་ཞིམ་པོ་ལ་སོགས་པས་བྱུག་པ་བྱུག་པ་བྱའོ། །ཡང་དང་ཡང་དུ་ཞེས་པ་ནི་སྔགས་ཀྱི་ཕྲེང་བ་གཉིས་རིམ་པ་དང་རིམ་པ་ལས་བཟློག་པ་བྲིས་ཏེ་རིམ་པ་དང་རིམ་པ་མ་

71-1-122b

ཡིན་པ་ཕྱི་བའི་ཐལ་བ་གཏོར་ཏེ་བསྲུབ་པར་བྱའོ། །ཡང་ན་པདྨ་ཕྱེད་པ་བྲི་ཞེས་པ་གོང་བཞིན་དུ་འབྲེལ་ལོ། །ཨོཾ་ཏ་ར་ཎི་ཞེས་པ་ལ་སོགས་པ་ནི་ཆེ་གེ་མོའི་ཛི་བཾ་ཞེས་པ་ནི་ལྷ་སྦྱིན་ལ་སོགས་པ་ཉེ་བར་མཚོན་པའོ། །ཨོཾ་ཏ་ར་ཞེས་པ་ཡང་གོང་བཞིན་ནོ། །ཨོཾ་རཎྜ་ཞེས་པ་ལ་སོགས་པ་
ལ། ཕོ་ཉར་འོང་བས་ཞེས་པ་ནི་ཕོ་ཉར་འབྱུང་བ་ལ་ཆུ་ཁྱོར་བ་རེ་རེ་ལ་ལན་བདུན་བདུན་བཟླས་ནས་འཐུང་དུ་བཅུག་པའོ་ཞེས་འབྲེལ་ཏོ། །ཡང་ན་བུམ་པའི་ཆུ་ལ་ལན་ཉི་ཤུ་རྩ་གཅིག་བཟླས་ཏེ་ཕོ་ཉར་འབྱུང་བ་ལ་ཇི་ཙམ་འདོད་པ་འཐུང་དུ་གཞུག་ཅེས་པ་ནི་མན་ངག་གོ། །ཨོཾ་ཨ་མ་ར་
ཎི་ཞེས་པ་ལ་སོགས་པ་ལ། ལེགས་པར་བཟླས་པ་ནི་སྔོན་དུ་བསྙེན་པ་འབུམ་མོ། །མངོན་པར་བསྔགས་ཞེས་པ་ལས་སྦྱོར་བ་ལན་བརྒྱ་རྩ་བརྒྱད་མངོན་པར་བསྔགས་ནའོ། །སྔགས་མདུད་ཅེས་པ་ནི་གཞོན་ནུ་མས་བཀལ་པའི་སྐུད་པ་དེ་ཐལ་མོའི་བར་དུ་བཅུག་ནས་སྟོང་པ་ཉིད་ལས་བྱུང་
བ་དམིགས་ཏེ་སྔགས་བརྒྱ་རྩ་བརྒྱད་བཟླས་སོ། །དེ་ནས་མདུད་པ་རང་ལ་སྔགས་ལན་བདུན་བཟླས་པའི་མདུད་པ་བྱས་ནས་ནད་པའི་སྐེ་ལ་གདགས་པར་བྱའོ། །རྟག་ཏུ་ཞེས་པ་གོང་བཞིན་ནོ། །མར་དང་ཏིལ་ཞེས་པ་ནི་ཉི་མ་རེ་རེ་བཞིན་དུ་ནད་ཞི་བ་ལ་བྱི་ལའི་རྐང་རྗེས་ཚད་ཙམ་གྱི་ཏིལ་གྱི་
བརྒྱ་རྩ་བརྒྱད་དང་། དེ་བཞིན་དུ་བ་དམར་མོའི་མར་ལ་ཡང་སྦྱིན་སྲེག་བརྒྱ་རྩ་བརྒྱད་བྱའོ། །དགོས་པ་ཆེན་པོ་ལ་སྦྱིན་སྲེག་སྟོང་ངོ་། །ཤིན་ཏུ་ཆེ་བ་ལ་ཁྲི་ཚོའོ། །ལན་བརྒྱ་སྒྲུབ་པ་ཞེས་པ་རྒྱུན་མ་ཆད་པར་སྔགས་བཟླས་ཤིང་སྣོད་ལ་མར་གཞག་ལ་བསྐུས་ཏེ་གཡས་སྐོར་གྱིས་ཆུ་དེ་དོར་
བར་བྱའོ། །དེ་ལྟར་ལན་བརྒྱའི་བར་དུ་བྱའོ། །གདུག་པའི་སྨན་ལ་ཞེས་པ་ནི། འབྲས་མཁར་མ་ཅན་གྱི་འདག་པ་ཆ་ལྔ་མཉམ་པོར་བྱས་ནས་རི་ལུ་བྱའོ། །རྗེས་ལ་ཆ་ལྔ་པོའི་ཕྱེད་མེ་ལ་གདུང་བར་བྱས་པ་དང་ཕྱེད་དེ་ལྟར་བཞག་ནས་ཡང་གཅིག་ཏུ་བྱས་ནས་གཡས་ངོས་ཀྱི་སྣོད་དུ་
གཞག་གོ། །གཡོན་དུ་ནི་ཚྭ་དང་སྐེ་ཚེའོ། །དེ་ནས་སྐྲངས་རློས་དང་ཐོར་པ་ལ་སོགས་པ་བྱུང་བའི་ནད་པ་བྱང་དུ་ཁ་བསྟན་ལ། སློབ་དཔོན་ལྷོར་ཁ་བལྟས་ནས་ལག་པ་གཉིས་ཀྱིས་འདག་པ་དེས་ནད་པ་ལ་བྱབ་པར་བྱའོ། །དེ་ནས་ཚྭ་དང་སྐེ་ཚེས་ཀྱང་བྱབ་པར་བྱའོ། །དེའི་རྗེས་ལ་ཆུས་

71-1-123a

གཡས་སྐོར་དང་གཡོན་སྐོར་བྱའོ། །དེ་ནས་དེ་དག་ཐམས་ཅད་ཁྲོན་པ་སྐམ་པོའམ་ལམ་རྒྱ་གྲམ་དུ་གཏོར་བར་བྱའོ། །བེ་དོ་ལ་སོགས་པ་ནི་ཤིང་ཏོག་གི་ཉེ་བར་མཚོན་པའོ། །གཟའ་ཉི་མའི་ཚེས་གྲངས་ལ་ནད་པ་བྱང་དུ་མགོ་བསྟན་ལ་གན་རྐྱལ་དུ་གཞག་སྟེ། དེའི་
གསུས་པའི་སྐྲན་གྱི་ཐོག་ཏུ་བེ་དོ་ལ་སོགས་པའི་ཤིང་ཏོག་གཞག་སྟེ། ཉི་མ་གསུམ་དུ་ལན་ཉི་ཤུ་རྩ་རེ་རེ་བཟླས་པའི་མཚོན་གྱིས་སྔགས་བཟླས་ཤིང་། སྟེང་འོག་ཏུ་གཤེགས་ལ་ཚལ་པ་བཞི་བྱའོ། །གཤེགས་པ་དེ་དག་ལས་ལོགས་སུ་ཐལ་བ་ཉེ་བའི་རྩིག་ལོགས་ལ་གཞག་
སྟེ། དེ་དག་བསྐམས་པ་དང་སྐྲན་ཡང་སྐམ་པར་འགྱུར་རོ། །དེ་ནས་ཡང་སྔགས་འདི་བཟླས་ཤིང་བྱང་ཤར་དུ་མགོ་བསྟན་པའི་སྐྲན་ནད་ཀྱི་སྟེང་དུ་ཏཱ་ལའི་ལོ་མ་གཞག་སྟེ། བེའི་ཤིང་ཐོག་གི་ཡུ་བ་ཚིག་པའི་སོལ་བའམ་དེའི་ཤིང་ཚིག་པའི་སོལ་བས་སྔགས་མགོ་ཞབས་བཟློག་
ལ་བྲིའོ། །ནི་རྒུན་ཐི་ཞེས་པ་ལ་སོགས་པ་ནི་སྨན་གསུམ་པོ་དེ་ཆ་མཉམ་པོར་བྱས་ལ་སྔགས་འདི་ཟློས་ཤིང་བདུག་པར་བྱའོ། །དེ་ལ་ནི་རྒུན་ཐི་ནི་སིན་དུ་བར་ལའོ། །ནིམ་པའི་རྩ་བ་ནི་གྲགས་པར་ཟད་དོ། །རྨ་བྱའི་མཇུག་སྒྲོ་ནི་ཤིང་ཁི་བི་ཚའོ། །ཁ་ཅིག་མཱ་ཡཱུ་ར་ཤིང་ཁ་ཡང་
ཟེར་རོ། །ལས་ཀྱི་སྦྱོར་བ་གཞན་ཡང་བྲམ་ཟེའི་སྲིན་པོ་ལ་སོགས་པ་དགྲ་གང་ཡང་རུང་བའི་སྐྲ་བཟུང་ནས་རང་སྐྲ་གྲོལ་བ་གཅེར་བུ་ཁྲོ་བ་ཅན་དུ་བྱས་ནས་ཐེམ་པ་ལ་གནས་ནས་མཚན་མོའི་ཐུན་གསུམ་དུ་མིང་དང་སྤེལ་བའི་སྔགས་བརྗོད་ཅིང་མཉེ་བར་བྱའོ། །ནུབ་གསུམ་གྱིས་འཆི་
བར་གདོན་མི་ཟའོ། །ཁྲུས་བྱས་ན་ཞེས་བསྙེན་གནས་ཡན་ལག་བརྒྱད་ལ་གནས་པའི་བུད་མེད་དོ། །རྗེས་སུ་དྲན་པ་ཞེས་པ་ནི་རྒྱུན་མ་ཆད་པར་བཟླས་ཞེས་པའི་ཐ་ཚིག་གོ། །གཞན་ཡང་ཐོ་རངས་ནམ་ལངས་པའི་དུས་སུ་མལ་ལས་མ་གཡོས་པར་སྔགས་ལན་བརྒྱ་རྩ་བརྒྱད་
བཟླས་པའི་ཆུ་ཁྱོར་བ་བདུན་ནས་ཇི་སྲིད་དུ་ཆུ་སྲང་བརྒྱད་ཀྱི་བར་དུ་འཐུངས་ན་དེ་སྲིད་དུ་ནད་བྱང་བར་འགྱུར་རོ། །བྱབ་པ་ཞེས་པ་ནི་ཉི་ཤུ་རྩ་གཅིག་བཟླས་པའི་ལག་པས་སམ་རྩྭ་ཀུ་ཤས་སོ། །ཨོཾ་པ་ད་ཞེས་པ་ལ་སོགས་པ་ལ། ལེགས་བསྒྲུབས་ན་ཞེས་པ་ནི་ཡི་གེའི་གྲངས་ཀྱི་

71-1-123b

བསྙེན་པ་འབུམ་བྱས་ལ་དེའི་བཅུའི་ཆ་སྦྱིན་སྲེག་བྱས་ན་དངོས་གྲུབ་ཀྱི་རྟགས་མཐོང་བའོ། །ཆུ་འཐུངས་ན་ཞེས་པ་ནི་ལན་བརྒྱ་རྩ་བརྒྱད་བཟླས་པའི་ཆུས་སོ། །མར་ལ་བཏགས་པའི་ཞེས་པ་ནི་ཐུན་གསུམ་དུ་བརྒྱ་ཕྲག་བརྒྱད་ཀྱིས་ལྷག་པ་སྟེ་དེའི་ཁྱད་པར་རོ། །ཨོཾ་པི་ཤཱ་ཙི་ཞེས་
པ་ལ་སོགས་པ་ནི་རི་ཁྲོད་ལོ་མའི་སྐུ་བསྒོམས་ནས་སྭཱ་ཧཱའི་འོག་ཏུ་ནད་པའི་མིང་སྦྱར་ཏེ་སྔགས་བཟླས་ཕྱི་དྲོའི་དུས་སུ་ཁ་ཤར་དུ་བལྟ་སྟེ་ཞི་བའི་ཐབ་ཁུང་དུ་མེ་ཏོག་དཀར་པོ་དང་ཞོའི་ཟན་དང་། འབྲས་མ་ཆག་པ་དང་། རྩྭ་དཱུར་བ་དང་། ཙནྡན་དཀར་པོ་རྣམས་ཀྱིས་སྦྱིན་སྲེག་བྱའོ། །
དེ་བཞིན་དུ་བརྒྱ་ཕྲག་བརྒྱད་བཟླས་པ་དང་། དེ་བཞིན་དུ་བུམ་པ་གསར་པས་བླངས་པའི་ཆུ་ལ་བརྒྱ་རྩ་བརྒྱད་བཟླས་པའི་ཆུས་ཁྲུས་བྱ་བ་དང་། དེ་བཞིན་དུ་སྔགས་འདིས་གོང་བཞིན་དུ་མདུད་པ་བྱ་བ་དང་། དེ་བཞིན་དུ་ལག་པ་གཡས་པའི་ཁྱོར་བས་ཆུ་བླུགས་ཏེ། གཡོན་པའི་སྲིན་
ལག་གིས་རེག་ནས་སྔགས་བརྒྱ་རྩ་བརྒྱད་བཟླས་པའི་ཆུ་ཁྱོར་བ་གསུམ་གསུམ་ཞག་བདུན་གྱི་བར་དུ་འཐུང་བ་དང་། དེ་བཞིན་དུ་བྱབ་པ་ཞེས་པ་གོང་བཞིན་དུ་སྔགས་ལན་ཉི་ཤུ་རྩ་གཅིག་བཟླས་པའི་ལག་པའམ་ཀུ་ཤས་བྱབ་པ་སྟེ། ལས་ཀྱི་ཚོགས་ཐམས་ཅད་ལ་སྦྱར་བར་བྱའོ། །
དེ་བཞིན་དུ་རྟག་ཏུ་ཞེས་པ་ཐུན་གསུམ་དུ་བརྒྱ་ཕྲག་བརྒྱད་བཟླས་པའམ། དེ་གསུམ་མི་ནུས་ན་ཐུན་གཅིག་ལའོ། །དེ་བཞིན་དུ་རབ་ཏུ་སྦྱོར་བ་གཞན་མན་ངག་གིས་ཀྱང་ཤེས་པར་བྱ་སྟེ། ཛ་ཡནྟི་དཀར་པོའི་ཡལ་ག་བདུན་བདུན་གཅིག་ཏུ་བསྡོམས་ཏེ་ལན་བདུན་བདུན་སྔགས་བཟླས་
ནས་ཕོན་བདུན་བྱ་སྟེ། འབྲུམ་བུ་གཅད་པའི་ཕྱིར་འབྲུམ་བུས་བཏབ་པའི་ནད་པ་ཤར་ཕྱོགས་སུ་མངོན་པར་བལྟས་ནས། བདག་ཉིད་ནད་པའི་མདུན་དུ་ལངས་ནས་ཐུན་གསུམ་དུ་བྱབ་པ་བྱས་པས་ནད་ལས་གྲོལ་བར་འགྱུར་རོ། །མན་ངག་གི་རབ་ཏུ་སྦྱོར་བ་གཞན་ཡང་། ཤར་དུ་
མངོན་པར་ཕྱོགས་པར་འཕགས་པ་སྤྱན་རས་གཟིགས་དང་རྡོ་རྗེ་གདན་པའི་མདུན་དུ་མཎྜལ་དང་མཆོད་པ་བྱ་སྟེ། ཞི་བ་དང་བྱམས་པའི་སེམས་དང་ལྡན་པས་ཞི་བའི་ཐབ་ཁུང་དུ་གཡུལ་དུ་ཤི་བའི་སྐྲ་དང་རུས་པ་བསྲེག་པར་བྱའོ། །མན་ངག་གཞན་ཡང་གཏམ་གྱི་སྦྱོར་བ་ནི་གླེང་གཞི་ལས་གླཱ་

71-1-124a

གཱ་ཞེས་བྱ་བའི་མ་དང་། གངས་ཞེས་བྱ་བའི་བུ་གླས་འཚོ་བ་ཞིག་ཡོད་དེ། དེ་ཉིན་པར་ལས་བྱས་ནས། དགོངས་མོ་བརྡོས་ཏེ་ཟས་ཟའོ། །ནམ་ཞིག་གི་ཚེ་རྨི་ལམ་དུ་ཁུ་བ་འཛགས་པ་གོས་ཧྲུལ་ལ་ལྷུང་སྟེ་དེ་སྐམ་པའི་ཕྱིར་ཚང་བང་གི་སྟེང་དུ་གཞག་གོ། །དེའི་
ཚེ་དེའི་མས་འབྲས་ཟན་གྱི་ཁུ་བ་ཞིག་བཏུང་བའི་ཕྱེད་འོག་ཏུ་བཞག་པ་དང་། དེའི་ནང་དུ་གོས་ཧྲུལ་ལྷུང་བར་གྱུར་ཏོ། །དེ་ནས་མ་དེས་ཁུ་བ་དང་འདྲེས་པའི་འབྲས་ཀྱི་ཆུ་དེ་འཐུངས་པ་དང་སྦྲུམ་མར་གྱུར་ཏེ། དུས་ལ་བབ་པ་དང་བུ་གཅིག་བཙས་སོ། །དེ་ནས་མས་སྡིག་པའི་ནད་བདག་
ལ་ཅི་ཡིས་བསྐྱེད་ཅེས་སྨྲས་ནས་གྲོང་གི་ཕྱི་རོལ་དུ་བོར་རོ། །དེ་ནས་བུ་དེས་སྡིག་པའི་ནད་ཅེས་བྱ་བ་འབྲུམ་ནད་དུ་གྱུར་ཏོ་ཞེས་གྲག་སྟེ་གཏམ་རྒྱུད་དེ་དྲན་དུ་གཞུག་ཅིང་བདག་གིས་ཀྱང་གཏམ་རྒྱུད་འདི་ཟློས་ཤིང་སྔགས་འདི་བཟླས་ཏེ། སྔགས་ཀྱི་ཡི་གེ་རེ་རེའི་བར་དུ་མ་སྨད་
གཉིས་ཀྱི་མིང་བཅུག་ནས་བྲིས་པའི་ཤོག་བུ་ཡང་ནད་པས་གྲང་ནད་བྱུང་དོགས་པས་རྟག་ཏུ་བལྟ་བར་བྱའོ། །ཨོཾ་ཨྱརྱ་ཞེས་པ་ལ་སོགས་པ་ལ་ཏྲི་ཏི་ཡ་ཞེས་པ་ནི་ཚེས་གཞན་མཚོན་པའི་བརྡའོ། །ནད་ལངས་པའི་ཉི་མ་ལ་བྱབས་ནས་ཕུ་གསུམ་བྱའོ། །དེ་མ་ཡིན་ན་མི་འགྲུབ་
བོ། །ཚེས་གང་ལ་ཞེས་པ་ལ་སོགས་པ་ནི་འདིའི་ལས་སྦྱོར་གཞན་ཡིན་ཏེ། ཐ་ཆེན་པོ་གསུམ་གྱི་ནང་དུ་ཕྲེང་བ་ཕྱེད་དང་གསུམ་གྱི་སྔགས་གསུམ་ཤེས་རབ་ཀྱི་ཕ་རོལ་ཏུ་ཕྱིན་པའི་ལས་སྦྱོར་གྱིས་བྲི་བར་བྱའོ། །ཨོཾ་ཤྩ་ཞེས་པ་ལ་སོགས་པ་སྲུང་བ་བྱེད་དོ་ཞེས་པ་ནི། རྟག་ཏུ་བཟླས་པས་
སོ་ཞེས་པ་ནི་ཚིག་གི་ལྷག་མའོ། །བལ་སྲན་ཞེས་པ་ལ་སོགས་པ་ལ། སོགས་ཀྱི་སྒྲས་བལ་སྲན་ཆུང་ཤོས་དང་ཀུ་ལངྠ་དང་ཡུངས་ཀར་དང་ཡུངས་ནག་དང་སྐེ་ཚེ་རྣམས་བསྡུའོ། །འདི་དག་ཀྱང་སྲིན་ལ་སོགས་པས་མ་ཁྱེར་བ་དང་མ་ཟོས་པ་དང་མ་ཚིག་པ་ལ་ལན་ཉི་ཤུ་རྩ་གཅིག་
བསྔགས་ཏེ། ནད་པའི་སྤྱི་བོར་བཅོམ་ལྡན་འདས་སྐུ་མདོག་དཀར་པོ་བདུད་རྩིའི་རང་བཞིན་གྱི་འོད་ཟེར་གྱི་རྒྱུན་འབབ་པར་བསྒོམས་པས་སྔགས་བཟླས་ཤིང་ཐུན་གྱིས་བརྡེག་གོ། །རྡོ་རྒྱུས་ཞེས་པ་ནི་ཤར་དུ་མངོན་པར་ཕྱོགས་པའི་བཅོམ་ལྡན་འདས་བསྒོམས་ནས་བརྒྱ་རྩ་བརྒྱད་བཟླས་

71-1-124b

པའི་རྡོ་རྒྱུས་ཀྱིས་རྫ་སོམ་བཏང་བའི་ཁམ་ཕོར་གཉིས་ལ་ལན་ཉི་ཤུ་རྩ་གཅིག་བསྔགས་ཏེ། བུ་ཆེ་གེ་མོ་བསྲུང་བར་གྱིས་ཤིག་ཅེས་པ་དང་སྤེལ་བའི་སྔགས་བྲིས་ཏེ་ཁ་སྦྱར་ནས་ལན་ཉི་ཤུ་རྩ་གཅིག་བཟླས་པའི་ཉ་རྒྱས་དྲིལ་ཏེ་གང་ན་བུ་ཡོད་པ་དེའི་ཁང་པའི་སྒོའི་ནང་ངོས་སུ་གདགས་
པར་བྱའོ། །སྤྲ་ཚིལ་ཞེས་པ་ནི་སྤྲ་ཚིལ་ལ་སྔགས་ལན་གཅིག་བཟླས་ནས་ཡང་སྔགས་བཟླས་ཤིང་དགྲ་བོའི་གཟུགས་བྱས་ན་ཞེས་འབྲེལ་ཏོ། །བརྐོས་ན་ཞེས་པ་ནི་དེ་ཁོ་ན་བཞིན་དུ་ཕུར་བའི་ལས་ཚོགས་རྣམས་ལ་ཡང་དགྲའི་སྒོའི་འོག་ཏུ་བརྐོའོ་ཞེས་པ་ནི་ཚིག་གི་ལྷག་མའོ། །
མངོན་པར་བསྔགས་པ་ཞེས་པ་ནི་ཁྲོ་བོ་གཏུམ་པོ་ཆེན་པོའི་རྣལ་འབྱོར་གྱིས་མར་ངོའི་ཚེས་བརྒྱད་དང་བཅུ་བཞི་ལ་དུར་ཁྲོད་ཀྱི་ཐལ་བ་ལ་ལན་བརྒྱ་རྩ་བརྒྱད་བཟླས་ནས་གཏོར་བར་བྱའོ་ཞེས་པ་ནི་མན་ངག་གོ། །མངོན་པར་བསྔགས་ཞེས་པ་ནི་ཤར་དུ་མངོན་པར་ཕྱོགས་པས་ཉི་མ་ནུབ་
པའི་དུས་སུ་བཅོམ་ལྡན་འདས་ཡང་དག་པར་མཆོད་དེ་རལ་གྲི་བཀྲུས་ནས་སྔགས་འདི་བཟླས་ཤིང་ཐལ་བ་ལ་ལན་བདུན་སྔགས་བཟླས་ནས་གཏོར་ཏེ་སྔགས་འདིས་ལན་བརྒྱ་རྩ་བརྒྱད་མངོན་པར་བསྔགས་ནས་སྒོའི་ཐད་ཀར་གཞག་གོ། །རང་རྒྱལ་བར་གསོལ་བ་བཏབ་ནས་སྔ་དྲོ་
གཡུལ་དུ་གཞུག་པར་བྱའོ། །སྙིང་རྗེའི་སེམས་བསྐྱེད་དེ་བདག་རྒྱལ་བར་གྱུར་པ་དང་། གཞན་ལ་མི་གནོད་པ་སེམས་ལ་བྱེད་ཅིང་གཡུལ་ངོར་འཇུག་པའི་དུས་སུ་དྲི་ཆུ་ལ་ལན་བདུན་བཟླས་ནས་རལ་གྲི་མྱུར་དུ་བཀྲུས་ཏེ་བཅོམ་ལྡན་འདས་ཀྱི་གཟུགས་བསྒོམས་ནས་གོང་བཞིན་མངོན་
པར་བསྔགས་པར་བྱའོ། །དེ་ནས་གཞན་ཡང་སྔར་བཤད་པ་ལྟར་རལ་གྲི་བཀྲུས་ཏེ་ལན་བརྒྱ་རྩ་བརྒྱད་མངོན་པར་བསྔགས་པའི་རྒྱ་སྐྱེགས་ཀྱི་ཁུ་བས་རལ་གྲི་ལ་ཧཱུཾ་ཕཊ་ཀྱི་གོང་དུ་རྒྱལ་བར་གྱུར་ཅིག་ཅེས་སྦྱར་བ་སྔོན་དུ་འགྲོ་བས་སྔགས་བྲིའོ། །དེ་ནས་གཞན་ཡང་གོང་བཞིན་དུ་
རྫའི་ཐལ་བ་རལ་གྲི་ལ་གཏོར་ནས་རྒྱ་སྐྱེགས་ཉིད་ཀྱིས་སྔགས་བྲིའོ། །བྱ་བ་གང་ལ་ཞེས་པ་ནི་ཁོང་པའི་མདུན་གྱི་གླ་ཡེར་མཐོ་སར་བའི་ལྕི་བ་གཙང་མས་བྱུག་པ་བྱས་ནས་རང་ཉིད་ཤར་དུ་མངོན་པར་ཕྱོགས་པར་བྱས་པའི་མདུན་དུ་བཅོམ་ལྡན་འདས་བསྒོམ་ཞིང་། དེའི་མདུན་

71-1-125a

དུ་ཞོ་རྫ་ཕོར་གང་དང་། འོ་མ་ཕོར་གང་དང་། མེ་ཏོག་དཀར་པོ་དྲི་ཞིམ་པོའི་ཆུ་རྫ་ཕོར་གང་དང་། ཉེར་སྤྱོད་ལྔའི་མཆོད་པ་དང་བཅས་ནས་དོན་བསམས་ནས་འདོད་པའི་དོན་ལ་གསོལ་བ་བཏབ་ནས། མཚན་མོའི་ཐུན་གཅིག་ལ་ལན་བརྒྱ་རྩ་བརྒྱད་བཟླས་ནས་
དབུལ་བར་བྱའོ། །གལ་ཏེ་བསོད་ནམས་ཅན་ཡིན་ན་དེའི་ཚེ་དགེ་བ་དང་མི་དགེ་བ་མངོན་སུམ་དུ་སྟོན་པར་འགྱུར་རོ། །ཡང་ན་རྨི་ལམ་དུ་བཅོམ་ལྡན་འདས་ཀྱིས་སྟོན་ཏོ། །དོན་ཐམས་ཅད་ལ་ཞག་ཉི་ཤུ་རྩ་གཅིག་གི་བར་དུ་བྱའོ། །དེ་ནས་གཞན་ཡང་རྩོད་པ་བྱུང་བའམ། 
གྲོང་གཞན་དུ་འགྲོ་བའམ། དོན་གཞན་བྱུང་བ་ལ་གོང་བཞིན་དུ་བཅོམ་ལྡན་འདས་ཀྱི་སྤྱན་སྔར་ཐམས་ཅད་བྱས་ནས་འབྲས་སཱ་ལུའི་མཁར་མ་ཟན་དང་འོ་མ་དང་ཉ་ཤ་བཙོས་པ་རྣམས་ཀྱིས་བཅོམ་ལྡན་འདས་ལ་གཏོར་མ་དབུལ་ལོ། །དེ་ནས་གཞན་ཡང་ཞོ་ལ་སོགས་པ་འདྲེས་
པའི་ཟན་གྱིས་བཀང་བའི་རྫ་ཕོར་གཉིས་ལག་པ་གཉིས་ཀྱིས་གཟུང་སྟེ། མཚན་མོ་མི་ཐམས་ཅད་ཉལ་བའི་དུས་སུ་རང་ཉིད་གཅིག་པུ་ཕྱི་རོལ་དུ་བྱུང་སྟེ་བཅོམ་ལྡན་འདས་ལ་གཏོར་མ་ཕུལ་ནས་བདག་གི་དོན་ལ་གསོལ་བ་བཏབ་སྟེ་བག་ཙམ་ཕྱིན་པ་ན། གལ་ཏེ་དེ་ལ་དགེ་
བའི་སྨྲ་བ་ཐོས་ན་དགེ་བའི་འབྲས་བུ་འགྲུབ་ལ། མི་དགེ་བའི་སྨྲ་བ་ཐོས་ན་མི་དགེ་བའི་འབྲས་བུ་འབྱུང་ངོ་། །དེ་ནས་གཞན་ཡང་བདག་གིས་བཅོམ་ལྡན་འདས་ཀྱི་བསྐྱེད་པའི་རིམ་པའམ། རྫོགས་པའི་རིམ་པ་བསྒོམ་པར་བྱ་སྟེ། བཅོམ་ལྡན་འདས་ཀྱི་གཟུགས་ཇི་ལྟ་བུ་ཞེ་ན། 
ས་ལ་བཙུགས་པ་ཞེས་ལ་སོགས་པ་ལ། ཐགས་མཁྲེགས་ནི་མཁྲེགས་པའོ། །ཐགས་བཟངས་ནི་བར་མེད་པའོ། །སྟོང་པ་ཉིད་ནི་དེའི་མཚན་ཉིད་དང་བྲལ་བ་སྟེ། དངོས་པོ་དེ་དག་གི་ཐུགས་སུ་སྲ་བའི་མཚན་ཉིད་གཟུགས་དང་རྗེས་སུ་མྱོང་བའི་མཚན་ཉིད་ཚོར་བ་ཞེས་པ་ལ་
སོགས་པའོ། །ཡ་སོས་མ་མཆུ་མནན་པ་དང་། པུས་མོ་ས་ལ་བཙུགས་པ་དང་། ང་རྒྱལ་ཐམས་ཅད་ཟིལ་གྱིས་མནན་པའི་ཕྱིར་སྟེང་འོག་ཏུ་མིག་གི་འབྲས་བུ་བལྟ་བ་དང་། དམ་ཚིག་སེམས་དཔའ་བཞིན་དུ་བསྒོམ་པར་བྱ་ཞེས་པ་ནི་རང་གི་སྙིང་གར་རོ་ཞེས་པའི་དོན་ཏོ། །

71-1-125b

དེ་ནས་གཞན་ཡང་སེམས་དཔའི་སྐྱིལ་ཀྲུང་གིས་སྔགས་ཉི་ཤུ་རྩ་གཅིག་བཟླས་ཏེ་དེའི་རྗེས་ལ་མལ་ན་འདུག་པ་ཙམ་གྱིས་ཀྱང་ཐམས་ཅད་བསྲུང་བར་འགྱུར་རོ། །དེ་ནས་གཞན་ཡང་ནི་ལས་བརྒྱ་རྩ་བརྒྱད་བཟླས་པའི་ལོ་མ་སྐམ་པོ་ལ་ཨོཾ་ཙཎྜ་མ་ཧཱ་རོ་ཥ་ཎ་ཆེ་གེ་མོའི་རིམས་
འཇིག་པར་གྱིས་ཤིག་ཧཱུཾ་ཕཊ་ཅེས་པའི་སྔགས་འདི་སྣག་ཚས་བྲིས་ནས་ཤོག་བུ་ཟུར་བཞི་ནས་དྲིལ་ཏེ་སྐུད་པ་དམར་པོས་ཕྱོགས་བཞིར་བཅིངས་ནས། དེ་ནས་མི་གཡོ་བའི་ང་རྒྱལ་གྱིས་ཤར་དུ་མངོན་པར་ཕྱོགས་ནས་བཅོམ་ལྡན་འདས་ཀྱི་གཟུགས་སུ་མངོན་པར་བགོམས་ནས་
པུས་མོ་བཙུགས་པས་རིམས་ནད་ཅན་མནན་ཏེ། གཟི་བརྗིད་ཆེན་པོས་སྐྲ་ལ་སོགས་པ་ལ་བཏགས་ན་རིམས་འཇིག་པར་འགྱུར་རོ། །རིམས་སོད་པའི་རྗེས་ལ་ཤོག་བུ་དེ་ཆུ་གཙང་མ་ལ་བསྒྱུར་རོ། །དེ་ནས་ཡང་ཐུན་ཕྱེད་ལུས་པའི་ནམ་གྱི་ཆ་སྨད་ལ་མལ་ནས་ལངས་ཏེ། སེམས་
དཔའི་སྐྱིལ་ཀྲུང་གིས་ཤར་དུ་མངོན་པར་ཕྱོགས་པར་འདུག་པ་ལ་བཅོམ་ལྡན་འདས་བསྒོམས་ཏེ། གཡས་པའི་ཁུ་ཚུར་གྱིས་སྡིགས་མཛུབ་གྱེན་དུ་བསྒྲེང་བ། གཡོན་པའི་ཁུ་ཚུར་གྱིས་བརྟན་པོར་བཟུང་ནས་ཤེས་རབ་འདོད་པས་རྒྱུན་མ་ཆད་པར་བཟླས་པ་བྱའོ། །ཞག་བདུན་
གྱི་བར་གྱིས་མཁས་པར་འགྱུར་རོ། །དེ་མ་ཡིན་ན་ཡང་ཉི་མ་རེ་རེ་ཞིང་རིམ་གྱིས་བཟླས་པས་ཤེས་རབ་དང་ལྡན་ཞིང་ཐོས་པ་འཛིན་པར་འགྱུར་རོ། །ཨོཾ་ཀཱ་ཤྱ་པ་ན་ཞེས་བྱ་བ་ལ་སོགས་པ་ལ་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་གྱིས་མིག་འགུལ་བའི་དུས་སུ་གལ་ཏེ་
མི་དགེ་ན་སྔགས་ཟློས་ཤིང་བྱབ་པ་བྱས་པས་དགེ་བར་འགྱུར་རོ། །ཨོཾ་ཛཾ་ལེན་ཞེས་པ་ལ་སོགས་པ་ནི་སྣ་ཚོགས་པདྨ་དང་ཟླ་བ་ལ་རྡོ་རྗེ་སྐྱིལ་ཀྲུང་གིས་བཞུགས་པ། ཞལ་གཅིག་ཕྱག་གཉིས་སྐུ་མདོག་དམར་པོ་ལང་ཚོ་ལ་བབ་པ། གཡས་པས་ལྕགས་ཀྱུ་དང་། གཡོན་པས་
ཨུཏྤ་ལ་འཛིན་པ། དབུ་ལ་འོད་དཔག་མེད་ཀྱིས་རྒྱས་བཏབ་པ། ཆགས་པ་ཆེན་པོའི་གདངས་ཅན་གྱིས་བཅོམ་ལྡན་འདས་མ་སྒྲོལ་མ་བདག་གིས་བསྒོམ་པར་བྱའོ། །བསྙེན་པ་སྔོན་དུ་འགྲོ་བས་ལས་སྦྱོར་བརྩམ་པར་བྱ་སྟེ། ཉི་མ་རེ་རེ་ཞིང་གདོང་བཀྲུ་བ་ནི་མན་ངག་གོ། །དུ་བ་

71-1-126a

བླངས་ལ་ཞེས་པ་ནི་མར་ངོའི་ཚེས་བརྒྱད་དམ་བཅུ་བཞི་ལ་ཉི་མ་ཕྱེད་དམ་ནམ་ཕྱེད་ན་ཁ་ནུབ་ཏུ་བལྟས་ཏེ་སྔགས་བཟླས་ཤིང་། བ་དམར་སྐྱའི་མར་གྱིས་སོ་མ་བཏང་བའི་རྫ་ཕོར་ལ་དུ་བ་ཕབ་ལ་ཞེས་པ་ནི་མན་ངག་གོ། །ཁ་ཐུར་དུ་བལྟས་པའི་མེ་ཏོག་ཅེས་པ་ནི་ཨ་
དྷོ་པུཥྤ་ཀེ་འམ། ཧེ་ཏ་ཧུ་ལི་འམ། གོ་བནྡྷ་ན་ཞེས་གྲག་གོ། །ཤྲཱི་ཁཎྜ་ཞེས་པ་ནི་ཙནྡན་དཀར་པོ་དང་དེ་གཉིས་ལས་སྦྱོར་གྱི་གོང་དུ་ཉི་མ་ལ་ཚགས་བྱས་ནས་གཞག་སྟེ། སྐར་མ་རྒྱལ་ལ་དེ་གཉིས་བཟུང་ནས་སྔགས་བཟླས་ཏེ། སྲང་ལ་གཞལ་ནས་མཉམ་པར་བྱ་སྟེ། བསྲེས་ཏེ་
ཉི་མ་དེ་ནས་བརྩམས་ནས་ཐིག་ལེ་བྱའོ། །ཆོ་ག་བཞིན་དུ་ཞེས་པ་ནི་ཟན་དང་མེ་ཏོག་ལ་སོགས་པ་དང་ལྡན་པའི་སྒྲུབ་པ་པོའི་གྲོགས་པོ་དང་བཅས་པ་དུར་ཁྲོད་དུ་ཕྱིན་ནས་རོའི་ཐབ་ཁུང་གི་སྟེང་དུ་དབང་དུ་བྱས་པའི་ཐོག་ཏུ་རྩྭ་ཀུ་ཤ་གཞག་པའི་མདུན་དུ་གོང་དུ་བཤད་པའི་
རྫས་ཀྱི་ཚོགས་བཤམས་ཏེ། འདོད་པའི་དོན་ལ་གསོལ་བ་བཏབ་ནས་སྨྲ་བ་བཅད་པས་ལིངྒ་ཁྱེར་ཏེ། རང་གི་ཁང་པར་འོངས་ནས་ཉི་མ་ཕྱེད་དམ་ནམ་ཕྱེད་ན་ལིངྒའི་ཐོག་ཏུ་ཉེ་བར་འདུག་སྟེ། ནུབ་ཏུ་མངོན་པར་ཕྱོགས་པས་སྙིང་གར་ཟླ་བ་ལ་གནས་པའི་ཧྲཱིཿའི་ཡི་གེ་ལས་སྤྲོས་པའི་འོད་
ཟེར་ལྕགས་ཀྱུ་དང་། ཞགས་པ་ལྟ་བུས་གཡོ་བ་དང་མི་གཡོ་བ་ཐམས་ཅད་སྙིང་གར་ཕུག་སྟེ། འགུགས་ཤིང་རང་གི་རྐང་པའི་འོག་ཏུ་ལྷུང་བར་བལྟས་ནས་ཉི་མ་རེ་རེ་ལ་བརྒྱ་ཕྲག་བརྒྱད་བཟླས་ཤིང་ཞེས་འབྲེལ་ལོ། །དེ་ནས་གཞན་ཡང་ཕྱག་གཉིས་པའི་ཀུ་རུ་ཀུལླེ་བསྒོམས་ཏེ། རང་
གི་སྙིང་གར་གནས་པའི་ཧྲཱིཿའི་ས་བོན་གྱི་འོད་ཟེར་གྱིས་བརྟན་པ་དང་གཡོ་བ་བཀུག་སྟེ་རང་གི་རྐང་པའི་དྲུང་དུ་ལྷུང་བ་དང་དབང་དུ་གྱུར་པ་དང་། ཅི་ཟེར་བ་ཉན་པ་དང་། རྗེས་སུ་གནང་བ་ཞུ་བའི་རྣམ་པར་བསྒོམས་ཏེ་གོང་དུ་བཤད་པའི་དུས་ཚོད་ལ་སྔགས་བཟླས་པར་བྱའོ། །ཨོཾ་སྟཾ་བྷ་ནི་ཞེས་པ་
ལ་སོགས་པ་ནི་སྤྱན་མའི་སྙིང་པོ་སྟེ། རྒྱུན་མ་ཆད་པར་ཟློས་པ་ལ་འཇིགས་པ་ཐམས་ཅད་སེལ་བར་བྱེད་དོ་ཞེས་པའི་ཚིག་གི་མཐའ་ཅན་དང་འབྲེལ་ལོ། །ཉོན་མོངས་པ་རྒྱུན་གྱིས་བརྒྱུད་པའི་ཚོགས་ལས་སྐྱོབ་པ་གོས་བཞིན་དུ་སྟེ་པ་ཊའོ། །དེ་རྣམ་པར་འཇིག་པའི་སྦྱོར་བས་ལེན་པའི་

71-1-126b

དོན་སྦྱར་བས་པ་ཊ་ལ་སྟེ་ལེའུའོ། །དང་པོ་ཞེས་པ་ནི་ཉོན་མོངས་ཀྱི་དགྲ་གསོད་པར་ཉེ་བར་བརྩམ་པ་ཐོག་མར་བྱེད་པས་སོ། །ལེའུ་དང་པོའི་འགྲེལ་པའོ།།      །།ལེགས་པར་སངས་རྒྱས་པའི་ཞེས་པ་ནི་སྟོན་པ་གཞན་མ་ཡིན་པས་སོ། །རབ་སད་ཅེས་པ་ནི་རྒྱུན་མ་ཆད་པར་གསུང་རབ་
ལ་གོམས་པས་དབང་པོ་རྣོན་པོ་རབ་ཏུ་སད་པའོ། །ཡོན་ཏན་གཞི་ཡིན་པ་ཞེས་པ་བླ་མའི་ཞབས་ཀྱི་པདྨ་ལ་ངེས་པས་དབང་བ་ལ་སོགས་པའི་རིམ་པས་བདེ་གཤེགས་ཀྱི་སྒྲུབ་ཐབས་རྟོགས་པས་སོ། །བླ་མ་ལ་གུས་པས་ཞེས་པ་ནི་ལུས་ངག་གི་སྲི་ཞུས་བླ་མ་མཉེས་པར་བྱའོ། ། 
བརྩོན་པ་ཞེས་པ་ནི་བྱ་བ་ངན་པ་དང་བྲལ་བ་སེམས་ཅན་གྱི་དོན་ལ་སྤྲོ་བ་ཅན་ནོ། །ཨོཾ་ན་མོ་ཞེས་པ་ལ་སོགས་པ་ནི་ཁརྶ་པཱ་ཎིའི་སྐུར་བདག་ཉིད་བསྒོམས་ནས་ཤར་དུ་མངོན་པར་ཕྱོགས་པས་ཁྱེའུའམ་བུ་མོ་ཁ་ཤར་དུ་བསྟན་ནས། ཨོཾ་ན་མོ་ཞེས་པ་ལ་སོགས་པ་ནས་སཱུ་ཏྲཱ་ཡ་ན་མོ་ཞེས་
པའི་མཐའ་ཅན་གྱི་སྔགས་བཟླས་ཤིང་མེ་ལོང་བཀྲུས་པས་དག་པར་བྱས་པའི་མེ་ལོང་བསྟན་པ་ཞེས་འབྲེལ་ལོ། །དགོངས་སྔར་དྲུང་དུ་ཞེས་པ་ནི་ཁྲུས་དང་གཙང་སྦྲ་དང་བསྙེན་གནས་ཀྱི་སྡོམ་པ་དང་ལྡན་པས་སོ། །ལྷའི་བུ་ཞེས་པ་ནི་གཞོན་ནུ་གཟུགས་ཅན་གསེར་གྱི་མདོག་ལྟ་
བུ་རྒྱལ་པོ་ཆེན་པོའི་རོལ་པས་བཞུགས་པའོ། །རྟག་ཏུ་བཟླས་ན་ཞེས་པ་ནི་འབུམ་བཟླས་པའི་རྗེས་ལ་ཉི་མ་རེ་རེ་ཞིང་རྒྱུན་མ་ཆད་པར་སྟོང་ཕྲག་རེ་རེ་བཟླས་པར་བྱ་ཞེས་འབྲེལ་ལོ། །ཨོཾ་ཤྲ་བ་ན་ཞེས་པ་ལ་སོགས་པ་ནི་གོང་བཞིན་དུ་ཐམས་ཅད་གོ་སླའོ། །ཨོཾ་ན་མ་ཞེས་པ་ལ་
སོགས་པ་ནི་ལྷ་མོ་ཙུནྡིའི་ཏིང་ངེ་འཛིན་གྱིས་བྱ་སྟེ། གཞན་ཐམས་ཅད་གོང་བཞིན་ནོ། །ཨོཾ་མུ་ཙི་ལི་ཞེས་པ་ལ་སོགས་པ་ལ། བསྙེན་གནས་ལ་སོགས་པ་ཐམས་ཅད་གོང་བཞིན་ནོ། །གཞན་ནི་གོ་སླའོ། །ཨོཾ་པྲ་ཛྭ་ལ་ལ་སོགས་པའི་ལས་སོ། །ཨོཾ་ན་མ་ཞེས་པ་ལ་སོགས་པ་ནི་
གོ་སླའོ། །ཨོཾ་ཀརྞ་ཞེས་པ་ལ་སོགས་པ་ལ། ཤ་ཟའི་ཤིང་ཞེས་པ་ནི་ཤ་ཀོ་ཌ་ཀའི་ཤིང་ངོ་། །འཇིག་རྟེན་གསུམ་ལས་རྣམ་པར་རྒྱལ་བའི་ཏིང་ངེ་འཛིན་ལ་གནས་ཤིང་ཞེས་པ་ནི་གཤིན་རྗེ་གཤེད་ཀྱི་ཏིང་ངེ་འཛིན་ལ་ཡང་དག་པར་ཞུགས་སོ། །ཨོཾ་ཙ་ཏུར་པཱུ་ཛ་ཞེས་པ་ལ་སོགས་པ་ནི་

71-1-127a

ལེགས་པར་གསལ་ལོ། །ཨོཾ་བྷུ་དྷ་ཞེས་པ་ལ་སོགས་པ་ལ། ཐེ་ཚོམ་མེད་པ་ནི་བསྙེན་གནས་ཀྱི་སྡོམ་པ་དང་ལྡན་པས་སོ། །ལིག་བུ་མིག་ཅེས་པ་ནི་ཚོང་དཔོན་ལས་འོང་བའི་རྫས་རྡོའི་བྱེ་བྲག་གོ། །མ་རི་ཤ་སྔོའི་ས་བོན་དང་འདྲ་བ་ལའི་ལུངས་སོ། །ཤིང་ཨ་
ག་སྟི་ཞེས་པ་ནི་ཤུ་ཀླ་བང་གླ་ཤ་ན་ཞེས་པ་རྒྱ་གར་དང་བལ་ཡུལ་ན་ཡོད། ཨོཾ་སྭ་བྷཱ་ན་ཞེས་པ་ལ་སོགས་པ་ནི་ཆོ་ག་གོང་དུ་བསྟན་པས་གོ་སླའོ། །ཨོཾ་ཨ་དྷིད་ཅེས་པ་ལ་སོགས་པ་ཡི་གེ་འབུམ་བཟླས་པ་ཞེས་པ་ནི་ཡི་གེ་རེ་རེ་ལ་འབུམ་བཟླས་ནས་དོན་བརྩམ་པར་བྱའོ། །པྲི་ཡང་ཀུའི་
མེ་ཏོག་ཅེས་པ་ལ་སོགས་པ་ནི་ཉི་མ་རེ་རེ་ཞིང་ཐུན་གསུམ་ཉི་ཤུ་རྩ་གཅིག་གི་ཞག་གི་བར་དུ་བརྒྱ་ཕྲག་བརྒྱད་སྦྱིན་སྲེག་བྱའོ། །པ་ལཱ་ཤ་ཞེས་པ་ལ་སོགས་པ་ནི་སྦྱིན་སྲེག་འབུམ་གྱིས་ཞེས་པའི་མཐའ་རྒྱུན་མ་ཆད་ཅེས་ལྷག་མའོ། །འོ་མ་ཅན་གྱི་ཡམ་ཤིང་ཞེས་པ་ནི་དུག་ཤིང་
གི་རིགས་སྤངས་པའི་གཞན་རྣམས་སོ། །བཟླས་པ་བྱས་པ་རྙེད་པར་འགྱུར། །ཞེས་པ་ནི་བདུན་ཕྲག་གསུམ་དུའོ། །གཞན་གོ་སླའོ། །ཨོཾ་ཛ་ཡེ་ཞེས་པ་ནི་འཇིག་རྟེན་དབང་ཕྱུག་གི་ཏིང་ངེ་འཛིན་ལ་ཡང་དག་པར་ཞུགས་པས་ཏེ། ཞལ་གཅིག་ཕྱག་གཉིས། སྐུ་མདོག་
དཀར་པོ། དཔེ་མེད་པའི་གཟུགས་ཅན་བདེ་བའི་གདན་ལ་གཞུགས་པའོ། །གཞན་གོ་སླའོ། །ཨོཾ་མེ་ཁེ་ཞེས་པ་ལ་སོགས་པ་ལ། འབུམ་ནི་མི་ཟད་པའི་ནོར་གྱི་ཕུང་པོའོ། །ཨོཾ་ཀ་མ་ལ་ཞེས་པ་ལ་སོགས་པ་ལ། དཔལ་ཆེན་མོ་ཞེས་པ་ནི་ཞལ་གཅིག་ཕྱག་གཉིས་པ་
མེ་ཏོག་པྲི་ཡང་ཀུ་ལྟ་བུའི་སྐུ་མདོག་ལྗང་གུ། སྣ་ཚོགས་པདྨ་དང་ཟླ་བ་ལ་གནས་པ། ཆོས་འཆད་ཀྱི་ཕྱག་རྒྱ་ཅན་རྒྱལ་པོ་ཆེན་པོའི་རོལ་པས་བཞུགས་པ། གཡོན་དུ་ཨུཏྤ་ལ་སྔོན་པོ་གཞག་པ། བུད་མེད་ཀྱི་སྒྱུ་མའི་ང་རྒྱལ་གྱིས་འགྱིང་བག་ཅན་གྱི་སྒྲོལ་མ་སྟེ། དཔལ་ཆེན་
མོའི་མིང་གི་རྣམ་གྲངས་སོ། །དེའི་ཏིང་ངེ་འཛིན་ལ་གནས་པའམ། ཁ་ཅིག་ན་རེ་ནོར་རྒྱུན་མའི་ཏིང་ངེ་འཛིན་ལ་གནས་པར་བྱའོ་ཞེས་ཟེར་རོ། །གཞན་གོ་སླའོ། །ཨོཾ་ནནྟི་ཞེས་པ་ལ་སོགས་པ་ལ། འདི་རུ་ཆོ་ག་ནི་འདི་ཁོ་ནའོ། །ཨོཾ་ཛཾ་བྷེ་ཞེས་པ་ལ་སོགས་པ་ལ། རྗེ་བཙུན་མ་

71-1-127b

སྒྲོལ་མ་ཞེས་པ་ནི་བྱིན་རླབས་དང་བཅས་པའོ། །མངོན་པར་མ་ཆད་ཅེས་པ་བརྩམས་པའི་ཉི་མ་ནས་བཟུང་ནས་ཇི་སྲིད་འབུམ་ཕྲག་བདུན་རྫོགས་པར་མ་གྱུར་པ་དེ་སྲིད་དུ་རྒྱུན་མ་ཆད་པར་ཉི་མ་རེ་རེ་ཐུན་གསུམ་དུ་ཇི་ལྟར་ནུས་པའི་སྔགས་བཟླས་ཤིང་མེ་ཏོག་རེ་རེའི་ཞབས་ལ་དབུལ་བར་
བྱའོ། །ཨོཾ་བ་སུ་ཞེས་པ་ལ་སོགས་པ་ལ། བའི་ལྕི་བ་ཞེས་པ་ནི་ས་ལ་མ་རེག་པས་སོ། །ལྷག་མ་གོ་སླའོ། །ཨོཾ་བ་སུ་ཞེས་པ་ལ་སོགས་པ་ལ་ངེས་པ་ལ་གནས་པ་ཞེས་པ་ནི་བསྙེན་གནས་ཀྱི་སྡོམ་པ་དང་ལྡན་པ་དང་། དཀར་གསུམ་ཟ་བ། དུས་གསུམ་ལ་མགོ་འཁྲུ་བ་དང་། རྩྭ་ཀུ་
ཤའི་གདན་ལ་བསྙལ་བའི་དོན་ཏོ། །ནོར་རྒྱུན་མའི་ཏིང་ངེ་འཛིན་ལ་གནས་པས་བྱའོ་ཞེས་པ་ནི་མན་ངག་གོ། །དེ་ཁོ་ན་བཞིན་བྱས་ནས་རྒྱུད་ལས་ཇི་ལྟར་གསུངས་པ་ལྟར་རྙེད་པར་འགྱུར་རོ། །ཨོཾ་བ་སུ་ཞེས་པ་ལ་སོགས་པ་ནི། བཅོམ་ལྡན་འདས་མའི་སྔགས་སོ། །ལྷག་མ་བརྒྱད་ནི་
འཁོར་གྱི་ལྷ་མོ་བརྒྱད་ཀྱིའོ། །བཅོམ་ལྡན་འདས་མ་ནི་སྣ་ཚོགས་པདྨ་དང་ཟླ་བ་ལ་སྐྱིལ་ཀྲུང་ཕྱེད་པས་བཞུགས་པ། གསེར་བཙོ་མའི་མདོག་ལྟ་བུ་དང་། ཕྱག་གཡས་ན་ཤིང་ཐོག་བི་ཛ་པཱུར་དང་བཅས་པའི་མཆོད་སྦྱིན་གྱི་ཕྱག་རྒྱ་ཅན། ཕྱག་གཡོན་པ་ན་འབྲས་ཀྱི་སྙེ་མ་བསྣམས་པ། 
རིན་པོ་ཆེའི་ཅོད་པན་ཅན། རྒྱན་ཀུན་གྱིས་ཡང་དག་པར་བརྒྱན་པ། བུད་མེད་ཀྱི་སྒྱུ་མའི་ང་རྒྱལ་གྱིས་འགྱིང་བ། རིན་པོ་ཆེ་འབར་བ་སྐྱུག་པར་གྱུར་པའི་པདྨའི་གཏེར་ལ་སོགས་པ་ཞབས་ཀྱིས་མནན་པ། ལྷ་མོ་གཞན་རྣམས་ནི་གཙོ་མོ་དང་འདྲ་བའོ། །གསེར་གྱི་འདབ་མ་ཞེས་པ་ནི་
ཁྲུས་བྱས་གོས་གཙང་མ་གྱོན་བསྙེན་གནས་ལ་གནས་པ་སྐར་མ་རྒྱལ་གྱི་ཉི་མ་ལ་གསེར་གྱི་སྨྱུ་གུས་མངོན་པར་བྲིས་ཞེས་འབྲེལ་ལོ། །བཅུག་སྟེ་ཞེས་པ་ནི་སྒྲུབ་པ་པོས་དེའི་ཉིན་པར་ཁོ་ན་རབ་གནས་བྱས་ཏེ་དབང་བསྐུར་ནས་ཉི་མ་དེ་ནས་བརྩམས་ཏེ་དུས་གསུམ་དུ་དེའི་མདུན་དུ་དེའི་
དཀྱིལ་འཁོར་དང་དེའི་མཆོད་པ་བྱས་ནས་བཅོམ་ལྡན་འདས་མའི་སྔགས་བརྒྱ་ཕྲག་བརྒྱད་བཟླས་པར་བྱ་ཞེས་པ་ནི་མན་ངག་གི་བཤད་པའོ། །ཨོཾ་ཛཾ་བྷ་ལ་ཞེས་པ་ལ་སོགས་པ་ལ། བཅས་པ་ཞེས་པ་ནི་བྱིན་པ་གཡོན་པའི་སྟེང་ནས་ལྷ་མོས་འཁྱུད་པའི་དོན་ཏེ། ཁ་སྦྱོར་

71-1-128a

དུ་བྱ་སྟེ་ཞེས་པ་གསུང་གི་ཚིག་གི་མཐའ་ཅན་གྱི་བར་དུ་བཅོམ་ལྡན་འདས་མའི་ཆོ་ག་བཞིན་དུ་མངར་གསུམ་གྱིས་ཡོངས་སུ་གང་བའི་སྣོད་ཀྱི་དབུས་སུ་བཞག་ནས་དེའི་མདུན་དུ་ཐུན་གསུམ་དུ་མཆོད་པ་དང་དཀྱིལ་འཁོར་ལ་སོགས་པ་བྱ་སྟེ། ཉིན་རེ་བཞིན་དུ་ཐུན་རེ་
བརྒྱ་རྩ་བརྒྱད་བཟླས་པའི་ཁྱོར་ཆུ་སྦྱིན་པའི་རྗེས་ལ་བཅོམ་ལྡན་འདས་ལ་མངར་གསུམ་ཕུལ་ནས། ཨོཾ་ཛཾ་ལུམ་སྭཱ་ཧཱ་ཞེས་པའི་སྔགས་འདིས་ཁ་བཀབ་པའི་རྫ་ཕོར་གྱི་སྟེང་དུ་ཆུ་ཁྱོར་བ་བརྒྱད་ཕུལ་ནས་སྔགས་བརྒྱ་ཕྲག་བརྒྱད་བཟླས་པར་བྱའོ། །ཟླ་བ་དྲུག་གི་བར་དུའོ་ཞེས་པ་ནི་
མན་ངག་གོ། །བདུད་ཀྱི་བར་ཆད་འབྱུང་བས་བརྩོན་འགྲུས་བསྐྱེད་པར་བྱའོ། །ནམ་དུ་ཡང་ཐེ་ཚོམ་མི་ཟ་བར་བྱའོ། །གཉིས་པ་ཞེས་པ་ནི་འཇུག་པའི་སེམས་རྟོགས་པས་སོ། །ལེའུ་ནི་སྔ་མ་བཞིན་ནོ། །ལེའུ་གཉིས་པའི་འགྲེལ་པའོ།།      །།ཨོཾ་བཛྲ་ཏཱིཀྵྞ་ཞེས་པ་ལ་སོགས་
པ་ལ། སྔགས་འདིས་བཅོམ་ལྡན་འདས་མཚན་ཡང་དག་པར་བརྗོད་པའི་སྐུས་ལས་ཀྱི་ཚོགས་བསྒྲུབ་པར་བྱ་སྟེ། མཚན་ཡང་དག་པར་བརྗོད་པའི་སྒྲུབ་ཐབས་ལས་ཤེས་པར་བྱའོ། །སྙིང་གའི་པདྨ་དང་ཟླ་བའི་སྟེང་དུ་ཞེས་པ་ནི་སྣ་ཚོགས་པདྨ་དང་ཟླ་བའི་སྟེང་དུའོ། །
སེམས་དཔའ་ཅན་ཞེས་པ་ནི་སེམས་དཔའི་སྐྱིལ་ཀྲུང་གིས་བཞུགས་པའོ། །ལག་པ་གཉིས་ཀྱིས་བདག་གི་མགོ་འཛིན་མ་ཞེས་པ་ནི་ལག་པ་གཉིས་ཀྱིས་སྤྱི་བོར་རྡོ་རྗེ་འཛིན་མ་ཞེས་པའོ། །རྡོ་རྗེ་ལྕགས་ཀྱུ་ལ་སོགས་སྔགས་རྣམས་ཀྱིས་ཞེས་པ་ནི་རིམ་པ་ཇི་ལྟ་བར་མདུན་དུ་
གནས་པ་པདྨ་དང་ཟླ་བའི་སྟེང་དུ་ཡེ་ཤེས་ཀྱི་འཁོར་ལོ་བཀུག་སྟེ། བདག་ལ་རབ་ཏུ་ཞུགས་ཤིང་དབང་སྡུད་ལ་སོགས་པས་ཚིམ་པར་བྱེད་པ་དང་། འགྲོ་བ་དགག་པ་དང་། དགག་པར་བྱས་ནས་རིམ་པ་བཞིན་དུ་ཡང་དག་པར་མཆོད། དེས་དེ་ཁོ་ན་བཞིན་དུ་རབ་ཏུ་ཞུགས་
པར་བྱའོ་ཞེས་སོ། །ནང་པར་བསམ་ཞེས་པའི་ཚིག་གི་མཐའ་ཅན་ལ་བཾ་གྱི་ས་བོན་ཡོངས་སུ་གྱུར་པ་ལས་སྣ་ཚོགས་པདྨའི་ནང་ན་གནས་པའི་ཟླ་བ་ལ་པདྨའི་སྐྱིལ་ཀྲུང་གིས་བཞུགས་པ་ཞེས་པ་ནི་ལྷག་མའོ། །དྷརྨ་དྷཱ་ཏུ་ཞེས་མཐར་རྣམ་པར་བསྒོམས་ནས་གོང་བཞིན་དུ་བསྙེན་གནས་

71-1-128b

ཀྱི་སྡོམ་པ་ལ་སོགས་པ་སྦྱོར་རོ། །ཤུ་དག་ཅེས་པ་ལ་སོགས་པ་ནི་བཅོམ་ལྡན་འདས་ཡང་དག་པར་མཆོད་པ་དང་མཎྜལ་བྱས་ལ་དེའི་མདུན་དུ་རིམ་གྱིས་ཤུ་དག་སྲན་མ་ཙམ་ནས་ཞོ་ཕྱེད་ཀྱི་བར་དུ་གོམས་པས་དེ་ནས་ཚད་དེ་ཉིད་ཀྱིས་འཐུང་བ་བརྩམ་པར་བྱ་ཞེས་པ་ནི་མན་ངག་གོ། །
གཞན་ནི་གོ་སླའོ། །ཨོཾ་བཱ་ཀྱེ་ཞེས་པ་ལ་སོགས་པ་ལ་མེ་ཏོག་སྤོས་མ་རེག་པ་དང་འབྲེལ་ལོ། །སྦྱིན་སྲེག་འབུམ་ཕྲག་བཞི་བྱས་ནས་ཞེས་པ་ནི་ཤར་དུ་ལས་ཐམས་ཅད་པའི་ཐབ་ཁུང་ཞེས་པ་ནི་ལྷག་མའོ། །འདི་དག་ནི་སྔོན་དུ་བསྙེན་གནས་སྡོམ་པ་དང་ལྡན་པས་བྱའོ། །རང་སྒྱུར་ཞེས་པ་ནི་
ལོ་མ་སྐྱུར་པོའི་དོན་ཏོ། །བྷྲ་མའི་ཕྱེ་དང་སྐྱུར་པོ་བསྲེས་པ་འདི་གཉིས་ཀྱི་ཉམས་ལེན་ནི་ཤུ་དག་གོང་བཞིན་ནོ། །ལྕགས་ལས་བྱས་པ་ཞེས་པ་ནི་མ་ཡུ་རལ་གྲི་བ་དང་། སུ་བར་པཎྜི་ཏ་ཞེས་པའི་ལྕགས་གཉིས་གང་ཡང་རུང་བ་ལས་བྱས་པའི་རལ་གྲི་ལག་པ་གཡོན་པས་བཟུང་
ནས། ཕྱི་རོལ་དུ་སྒྲུབ་པ་པོའི་གྲོགས་གཞག་སྟེ། གཟས་ཟིན་པ་མ་མཐོང་བར་གཡས་པས་ལྟེ་བའི་ཐད་ཀར་ཕྲེང་བ་བཟུང་ཞེས་གྲོགས་པོས་ཟླ་བ་གཟའ་ལས་གྲོལ་ལོ་ཞེས་མི་ཟེར་གྱི་བར་དུ་བཟླས་པ་བྱའོ། །འཁོར་ལོ་ཞེས་པ་ནི་གསེར་དང་དངུལ་དང་འཁར་བ་དང་ཟངས་དེ་
རྣམས་ཡང་གང་ཡང་རུང་བ་ཅིག་ལ་བྱས་པའོ། །རྡོ་རྗེ་ཞེས་པ་ནི་མེ་ཏོག་པུནྟ་ཀའི་ཤིང་དང་མེ་ཏོག་ནཱ་ག་གེ་སར་གྱི་ཤིང་གང་ཡང་རུང་བ་ཅིག་གིས་སོ། །རྩེ་གསུམ་པ་ཞེས་པ་ནི་བྱང་ཆུབ་ཀྱི་ཤིང་ལས་བྱས་པའོ། །འཇག་མ་ཤར་ཞེས་པ་ནི་མདའི་རྒྱུའོ། །ཐོ་བ་ཞེས་པ་ནི་མ་
དྷུ་ཀའི་ཤིང་ངམ། རཀྟ་ཙན་དྷ་ནའི་ཤིང་ངམ། ཨ་ཤོ་ཀའི་ཤིང་རྣམས་གང་ཡང་རུང་བ་ལས་བྱས་པའོ། །ཞགས་པ་ཞེས་པ་ནི་གསེར་དངུལ་ལ་སོགས་ལྕགས་བརྒྱད་ཀྱི་གང་ཡང་རུང་བ་ཞེས་པའོ། །ཡང་ན་རྩ་མུར་བའམ་འཇག་མ་བལ་པ་ཛས་བྱས་པའོ། །ལྕགས་ཀྱུ་
དང་། རལ་གྲི་ཁྲུ་གང་བ་དང་། མཚོན་བྷི་རྞ་ཌི་པཱ་ལ་དང་། མདུང་ཐུང་དང་། དགྲ་སྟ་དང་། མདུང་དང་། གཏུན་ཤིང་དང་། དབྱུག་པ་དང་། རས་དང་། ནོར་བུ་དང་། རྨ་བྱའི་མཇུག་མ་དང་། གཏེར་དང་། གདུགས་དང་། རྔ་ཡབ་དང་། རྒྱལ་མཚན་དང་། བ་དན་དང་། 

71-1-129a

མེ་ཏོག་ཨུཏྤ་ལ་དང་། མེ་ཏོག་པདྨ་དང་། ཏཱ་ལའི་ལོ་མ་དང་། ཏ་རི་རྣམས་ནི་ལ་སོགས་པའི་དོན་ཏེ། ཇི་ལྟར་འབྱོར་པ་ཁྱེར་ནས་བསྒྲུབ་པར་བྱའོ། །རིམ་པ་རྣམས་ཀྱིས་ཞེས་པ་ནི་བཛྲ་ཏཱིཀྵྞ་ལ་སོགས་པ་རྣམས་ཀྱིས་སོ། །བཅུད་ལེན་ལ་སོགས་པ་ནི་བདུད་རྩི་
རྣམ་པ་བདུན་དང་ཀ་རའི་བཟའ་བའོ། །འོ་མའི་ཐུག་པ་དང་། ལྕགས་སྨན་དང་། དབང་ཕྱུག་ཆེན་པོས་བྱས་པའི་དངུལ་ཆུའི་སྨན་དང་། ཀ་ར་དང་རྩ་བ་མེད་ཅེས་བྱ་བ་སྨན་སྦྱོར་དང་། ཀ་ར་དང་ཀུ་ཤུའམ་ཎ་ཌ་གཉིས་ལས་བྱུང་བའི་སྨན་སྦྱོར་དང་། བུ་རམ་དང་ཤིང་ཐོག་ཀུཥྨ་ཎ་པྜི་
ལས་བྱུང་བའི་སྨན་སྦྱོར་དང་། ཀ་ར་དང་སྐྱུ་རུ་ར་ལས་བྱུང་བའི་སྨན་སྦྱོར་རྣམས་སོ། །མིག་སྨན་ནི་ར་སཱ་ཉྫ་ན་ཞེས་པ་རྡོའི་བྱེ་བྲག་གོ། །བ་དམར་སྐྱའི་མར་དང་། པདྨ་དཀར་པོའི་སྐུད་པའི་སྡོང་བུ་ལས་བྱུང་བའི་སྣག་ཚ་དང་། སྔོ་བྷྲྀངྒ་ར་ཛའི་ཁུ་བས་སྦྱར་བའི་དུམ་བུ་དང་ཨརྐའི་ལོ་མ་
ལས་བྱས་པའི་སྣག་ཚའོ། །ཐིག་ལེ་ཞེས་པ་ནི་གི་ཝང་ངམ། ལྡོང་རོས་སམ། གུར་གུམ་མམ། ཙནྡན་དམར་པོས་སོ། །རྐང་ལ་བསྐུ་བ་ཞེས་པ་ནི་སྔོ་གོ་བནྡྷ་ན་དང་ཤིང་ཤལ་མ་ལིའི་ཁུ་བ་དང་བཅས་པས་སོ། །རྐང་ལ་བསྐུ་བ་ནི་ཉེ་བར་མཚོན་པའི་བརྡའོ། །ཡང་ན་ལྷམ་ནི་ཤིང་ལས་
བྱས་པའོ། །དབང་དུ་གྱུར་པའི་རྫས་ནི་མེ་ཏོག་པྲི་ཡང་ཀུ་དང་། སྤོས་ཀྱི་ཤིང་ས་ལི་ཧ་ཀ་དང་། རུ་ཏ་ཆ་ཕྱེད་དང་། མེ་ཏོག་ནཱ་ག་གེ་སར་ཆ་ཕྱེད་ཀྱིས་བྱུགས་པའོ། །སྨན་སྤོས་ནི་ལ་པ་ཎ་ཁ་ཌི་དང་། སྤོས་ནི་ན་ཁི་དང་། ཙནྡན་དཀར་པོ་དང་། ག་པུར་དང་། ཨ་རུ་ར་དང་། འདི་གཉིས་
ཆ་མཉམ་པའི་སྤོས་སོ། །གཞན་དུ་བསྟན་པའི་དབང་དུ་བསྡུ་བའི་རྫས་རྣམས་ལྷན་ཅིག་ཏུ་བསྡུས་ནས་ཀྱང་ཆོ་ག་འདིས་བསྒྲུབ་པར་བྱའོ། །འོ་མ་ཞེས་པ་ནི་དེ་བཞིན་དུ་ཟླ་བ་གཟས་ཟིན་པའི་དུས་སུ་མར་ཁུ་དང་ཀ་ར་བཏབ་པའི་འོ་མ་འབྲས་ཐུག་དང་དེ་བཞིན་དུ་ཞོ་དང་འདྲེས་པའི་ཟན་
དང་བཟའ་བར་བྱ་ཞེས་འབྲེལ་ཏོ། །བལ་སྲན་མ་ཤ་ཞེས་པ་ནི་མེ་དང་མར་ནག་དང་མར་ཁུ་དང་ཆུས་མ་རེག་པ་དང་། མ་རུལ་བ་དང་སྲིན་ལ་སོགས་པས་མ་ཁྱེར་བ་དང་། ཡོངས་སུ་རྒྱས་པ་དང་། བདུད་རྩི་ལྔས་ཡང་དག་པར་བྱུག་པ་བྱས་པ་དང་། ལེགས་པར་བསྐམས་པ་དང་། 

71-1-129b

སྤོས་དཀར་པོས་དྲིལ་བའི་བལ་སྲན་རྣམས་ཟླ་བ་གཟས་ཟིན་པའི་དུས་སུ་བཅོམ་ལྡན་འདས་ཡང་དག་པར་མཆོད་ནས་དེའི་མདུན་དུ་ཤར་ཕྱོགས་སུ་ཁ་བལྟས་ནས་དེ་དག་ཁར་བཅུག་སྟེ། བདེ་བའི་སྟན་ལ་འདུག་ནས་ཟླ་བ་མ་མཐོང་བར་ཟླ་བ་གཟའ་ལས་མ་གྲོལ་བར་དུ་མ་ཡེངས་པར་
བཟླས་པ་བྱའོ། །དེ་ནས་སྒྲུབ་པའི་གྲོགས་པོས་ཟླ་བ་གྲོལ་བ་བཤད་པ་དང་ཁ་ནས་ཕྱུང་ནས་བན་སྲན་མྱུ་གུ་ཅན་རྣམས་ཆུ་ཁྱོར་བ་གང་གི་ནང་དུ་བཞག་ནས་སོས་མ་རེག་པར་མིད་པར་བྱ་ཞེས་འབྲེལ་ལོ། །མྱུ་གུ་མེད་པ་དེ་དག་ས་ལ་མ་རེག་པར་བྱས་ནས་མི་མ་ཡིན་པས་ཟིན་པ་རྣམས་ཀྱི་
མགོར་སྔགས་བཟླས་ཤིང་ཕྱེ་མ་བྱས་ནས་བཏབ་ན་དེ་ལས་ཐར་བར་འགྱུར་རོ། །པདྨ་ཞེས་པ་ནི་ཇི་ལྟར་རྙེད་པའི་དཀར་པོ་ལ་སོགས་པའི་པདྨ་རྣམས་སོ། །བིལ་བ་རྣམས་ཀྱི་ཞེས་པ་ནི་སྲིན་ལ་སོགས་པས་མ་ཁྱེར་བ་དང་། དགོས་པ་ཅན་སྨིན་པ་དང་། མ་སྨིན་པ་རྣམས་ཀྱིའོ། །ཇི་ལྟ་བ་བཞིན་
དུ་རྙེད་པ་ཞེས་པ་ལ་སོགས་པ་ནི་དྲི་ཞིམ་པའི་མེ་ཏོག་དཀར་པོ་རྣམས་ཀྱིས་སོ། །པདྨ་ལ་སོགས་པ་མེ་ཏོག་གི་མཐའ་ཅན་གྱི་ལས་སྦྱོར་གསུམ་པོ་འདི་དག་འཇམ་དཔལ་གྱི་རྒྱུད་ལས་གསུངས་པའི་རྒྱས་པའི་ཐབ་ཁུང་ཁྲུ་བཅུ་དྲུག་ལ་རབ་ཏུ་སྦྱོར་རོ། །མར་ལ་བཏགས་པའི་ཞེས་
པ་ལ་སོགས་པ་ནི་བལ་སྲན་བཞིན་དུ་འབྲུ་ལྔས་དབང་གི་ཐབ་ཁུང་ལ་སྦྱིན་སྲེག་བྱའོ། །རྟག་ཏུ་ཞེས་པ་ལ་སོགས་པས་རྒྱུན་མ་ཆད་པར་བྱམས་པ་ལ་སོགས་པ་བསྒོམས་པའི་སེམས་དང་ལྡན་པ་དང་། མཚན་ཡང་དག་པར་བརྗོད་པའི་བཤད་པས་བཛྲ་ཏཱིཀྵྞ་ཞེས་པ་ལ་སོགས་པའི་སྔགས་
ཀྱི་དོན་སྐྱེ་བ་མེད་པའི་རང་བཞིན་བསྒོམས་པ་དང་ལྡན་པ་དང་། ཐེག་པ་ཆུང་ངུའི་བྱང་ཆུབ་ལ་རྒྱབ་ཀྱིས་ཕྱོགས་པ་དང་། བདག་དོན་བག་ཙམ་བྱེད་པ་ལས་ཀྱང་ལོག་པ་དང་། བསྐལ་པ་མཐར་ཐུག་པར་རྒྱུན་མ་ཆད་པར་གཞན་དོན་མངོན་པར་ཕྱོགས་པར་བྱེད་པ་དང་། བརྩོན་འགྲུས་
ཤིན་ཏུ་འབར་བ་དང་། དྲོད་ལ་སོགས་པ་ལྷག་པར་མོས་པའི་ས་རྣམས་རྟོགས་པས་རབ་ཏུ་དགའ་བ་ལ་སོགས་པ་རྣམས་ལ་རབ་ཏུ་འཇུག་པའི་རྗེས་སུ་རིམ་པས་ཆོས་ཀྱི་སྤྲིན་གྱི་ས་ཐོབ་པའི་རྗེས་ལ་ཀུན་དུ་འོད་ཀྱིས་སྐྱེ་བ་འདི་ལ་ཐོབ་པར་འགྱུར་རོ། །དེ་བཞིན་གཤེགས་པས་རྗེས་

71-1-130a

སུ་བཟུང་བ་ལ་ཡང་དག་པར་ཞུགས་པས་ཞེས་འབྲེལ་ལོ། །ཨོཾ་ཧྲཱིཿཞེས་པ་ལ་སོགས་པ་ནི་དཔའ་བོ་གཅིག་ཏུ་སྒྲུབ་པ་བཅོམ་ལྡན་འདས་ཀྱི་སྔགས་འདི་སྔར་གྱི་སྔགས་གཉིས་དང་བྱ་བ་མཚུངས་པས་གོང་གི་བཞིན་དུ་འབྲས་བུ་ཡང་མཚུངས་པར་འགྱུར་རོ་ཞེས་སོ། །
ཨོཾ་ཧྲཱིཿཞེས་པ་ལ་སོགས་པ་ནི། བཅོམ་ལྡན་འདས་མ་འདིའི་བསྒོམ་པ་བརྗོད་པའི་རྗེས་སུ་ཞེས་བརྗོད་དོ། །ཨོཾ་པྲ་ཀྲྀ་ཏི་ཞེས་པ་ལ་སོགས་པ་ནི་རང་བཞིན་གྱིས་ཡོངས་སུ་དག་པ་སྟེ་སྒྲིབ་པ་དང་བྲལ་བའི་ཕྱིར་རོ། །སརྦ་དྷརྨྨཱ་ཞེས་ཆོས་ཐམས་ཅད་ཅེས་པ་ཕྱི་རོལ་གྱི་ཆོས་རྣམས་སོ། །པྲ་
ཀྲྀ་ཡ་པ་རི་ཤུདྡྷོ྅ཧཾ་ཞེས་པ་ནི་པྲ་ཀྲྀ་ཡ་ནི་རང་བཞིན་གྱིས་སོ། །པ་རི་ཤུདྡྷ་ནི་ཡོངས་སུ་དག་པའོ། །ཨ་ཧཾ་ནི་བདག་སྟེ་ནང་གི་ཆོས་རྣམས་སོ། །དེ་གཉིས་ཀྱི་ཁྱད་པར་བཤད་པ་བརྗོད་པ་ནི་སྭ་བྷཱ་བ་ཞེས་པ་ལ་སོགས་པ་སྟེ་ཡོངས་སུ་རྫོགས་པའི་ཐ་སྙད་བཏགས་ནས་རྒྱུ་དང་མི་རྒྱུ་ཞེས་པ་ལ་
སོགས་པའོ། །འོད་གསལ་མངོན་པར་བརྗོད་ནས་རྫུས་སྐྱེས་ཀྱི་སེམས་ཅན་གྱི་ཚུལ་གྱིས་རྫོགས་རིམ་གྱིས་བཅོམ་ལྡན་འདས་མ་བརྗོད་པ་ནི་པདྨ་ཞེས་པ་ལ་སོགས་པའོ། །གོང་དུ་སྨོས་པ་ཞེས་པ་ནི་བཅོམ་ལྡན་འདས་མ་བཞིན་དུ་ལྷ་མོ་བཞི་ཡང་བསམ་པར་བྱའོ། །ལྟེ་བའི་ཕྱོགས་
སུ་ཞེས་པ་ནི་ལྟེ་བའི་ནང་དུའོ། །གཞན་ཡང་བསྒོམ་པ་བརྗོད་པ་ནི་ངེས་པར་བདག་ཉིད་ཅེས་པ་ནི་གོང་གི་དམིགས་པ་ལ་སེམས་རྩེ་གཅིག་པའོ། །ཨོཾ་མཛད་དེ་ཁོ་ནའི་ཡི་གེ་ནི་པདྨ་རཱ་ག་ལྟ་བུའོ། །སྔགས་དང་འདྲེས་པའི་སྨན་གྱི་ནུས་པ་བརྗོད་པ་ནི། པ་ཐ་ནི་སྔོ་ཨ་ཀ་ན་བྷིད་བྷི་ཞེས་
པའོ། །སེ་གྲུ་ཞེས་པ་ནི་སྨན་ཤོ་བཉྫ་ནའོ། །སེནྟ་པ་ནི་རྒྱམ་ཚའོ། །ཨ་རུ་ར་ལ་སོགས་པའི་ཕྱེ་མ་སྲང་གཅིག་ཁྱེར་ནས། མར་བྲེ་གང་ཞེས་པ་ནི་བ་མར་ཕུལ་བཞི་བླུགས་ནས་སྨན་བཏབ་ནས་ཆུ་འོ་མ་ལ་མ་ཐིམ་གྱི་བར་དུ་བསྐོལ་བར་བྱའོ། །སྔགས་འདིའི་སྦྱོར་བ་གཞན་ནི་ཤུ་དག་
ཅེས་པ་ལ་སོགས་པ་འདི་དག་ཐམས་ཅད་ཕྱེ་མ་མཉམ་པོར་བྱས་ནས་ཐུན་གཅིག་གི་ཚད་དམ་ཕྱེད་ཀྱི་ཚད་ཀྱིས་སོ། །ཨོཾ་བྷ་ག་བ་ཏི་ནི་ལ་སོགས་པ་གོ་སླའོ། །ཨོཾ་ཨརྐ་ཞེས་པ་ལ་སོགས་པ་ལ་བསྙེན་གནས་ལས་ཞེས་པ་ནི་གོང་བཞིན་དུ་སྒོམ་པ་པོས་བཟླས་པར་བྱ་ཞེས་སྦྱར་རོ། །དབྱངས་

71-1-130b

ཅན་གྱི་མར་རམ་ཞེས་པ་ནི་སྔར་གོང་དུ་བཤད་པའི་དབྱངས་ཅན་གྱི་མར་རམ། ཡང་ན་སྔོ་བྷ་རྨའི་མར་ཁོ་ན་དབྱངས་ཅན་གྱི་མར་རོ། །མར་སྲང་སུམ་ཅུ་རྩ་གཉིས་ནི་བ་མར་ཕུལ་བཞི་དང་། བྷ་རྨིའི་ཁུ་བ་ཕུལ་བཅུ་དྲུག རའི་འོ་མ་ཕུལ་བཅུ་དྲུག ཨུ་བ་ལ་སོགས་པ་སྲང་རེ་རེ། ཨ་རུ་
ར་ནི་ལྷོ་ལས་བྱུང་བའོ། །མ་ལ་ཏི་ནི་སྲེ་ཤིང་སྒེའུ་མེ་ཏོག་གོ། །པི་པི་ལིང་ལ་སོགས་པ་སྨན་ལྔ་སྲང་གི་བཞི་ཆ་བཞི་ཆའོ། །ཡང་དག་པར་བསྡུས་ནས་མར་དང་བསྲེས་ནས་སྨན་པའི་མན་ངག་གིས་ཞེས་འབྲེལ་ལོ། །ཨོཾ་ཨ་ནནྟ་ཞེས་པ་ལ་སོགས་པ་ནི་གོ་སླའོ། །ཨོཾ་ཨ་ར་ཞེས་པ་ལ་
སོགས་པ་ལ། དབེན་པ་ནི་ཡིད་དུ་འོང་བའི་གནས་སོ། །དེ་ལས་གཞན་པ་ནི་རི་བོང་འཛིན་པ་ཞེས་བྱ་བའི་སྒྲུབ་ཐབས་ལས་ཤེས་པར་བྱའོ། །རྒྱུད་འདི་ལས་བདག་ཉིད་བཅོམ་ལྡན་འདས་ཀྱི་སྐུ་དང་དེ་མ་ཡིན་པ་འཇམ་དཔལ་གྱི་སྐུའི་པདྨའི་འོག་ཏུ་བསྒྲུབ་བྱ་གན་རྐྱལ་དུ་བྱ་སྟེ། བཅོམ་
ལྡན་འདས་ཀྱི་ཕྱག་གི་ཨུཏྤ་ལ་ལས་བཅིངས་པར་བསམས་ནས་དེའི་ཁར་ཐུན་གསུམ་དུ་མེ་ཏོག་དཀར་པོ་བརྒྱ་རྩ་བརྒྱད་ཀྱི་སྦྱིན་སྲེག་བྱའོ། །ཨོཾ་བཱ་གཱི་ཞེས་པ་ལ་སོགས་པ་ལ་འཁོར་ལོའི་དབུས་སུ་ཞེས་པ་ནི་འཁོར་ལོ་ལ་གནས་པའི་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་མུཾ་དམར་
པོ་བསྒོམ་པར་བྱའོ། །ཨོཾ་དྷརྨཱ་ཞེས་པ་ལ་སོགས་པ་ནི་གོ་སླའོ། །ཨོཾ་བཛྲ་ཏཱིཀྵྞ་ཞེས་པ་ལ་སོགས་པ་གོ་སླའོ། །འཇུག་པའི་སེམས་བསྐྱེད་ཀྱིས་འབྲིང་གི་ཆེན་པོ་རྟོགས་ནས་གསུམ་པའོ། །པ་ཊ་ལ་སྔ་མ་བཞིན་ནོ། །ལེའུ་གསུམ་པའི་འགྲེལ་པའོ།།      །།ཨོཾ་ལ་བ་ཎ་ཞེས་
པ་ལ་སོགས་པ་ལ། སྒེག་པའི་ཆ་ལུགས་ཞེས་པ་ནི་སྒྲོལ་མ་དང་ཁྲོ་གཉེར་ཅན་ལ་རོལ་པས་བལྟ་བའོ། །བཞུགས་པ་ཞེས་པ་ནི་པདྨའི་སྐྱིལ་ཀྲུང་གིས་སོ། །ཚ་བའི་སྦྱིན་སྲེག་ཅེས་པ་ནི་དབང་དུ་སྡུད་པའི་ཆོ་ག་ལས་བཤད་པའི་སོར་བཅུ་གཉིས་པའི་ཐབ་ཁུང་སེང་ལྡེང་ངམ་ཁོང་ཁྲིའི་མེ་
མདག་དུ་བ་མེད་པ་ལ་རིན་ལ་མི་རྩེག་པར་ཉོས་པའི་ཐུན་གཅིག་གི་ཚད་ཀྱི་སྦྱིན་སྲེག་བྱའོ། །དེ་ནས་གཡས་པ་དང་གཡོན་པ་གཉིས་སུ་དགང་གཟར་དང་བླུགས་གཟར་བཟུང་ཚྭས་བཀང་ནས་གཟར་བུ་གཉིས་ཁ་སྦྱར་ཏེ་དེ་ལྟ་བུའི་དགང་བླུགས་གསུམ་དབུལ་བར་བྱའོ། །ཚྭ་དང་བཅས་པ་

71-1-131a

ཞེས་པ་ནི་རིན་ལ་མི་རྩེག་པར་ཉོས་པའི་ཚྭ་དང་བཅས་པའི་སྤྲ་ཚིལ་གྱིས་བསྒྲུབ་བྱ་ཕོའམ་མོའི་སོར་བཞིའི་ཚད་བྱས་ལ། སེང་ལྡེང་གི་མེ་མདག་ཅེས་པ་ནི་སེང་ལྡེང་གི་མེ་མདག་གམ་ཁོང་ཁྲིའི་མེ་མདག་པ་བ་སངས་ཀྱི་ཉིན་པར་བླངས་པའི་དུར་ཁྲོད་ཀྱི་སོལ་བ་དང་། 
བཅས་པས་གང་བའི་སྣོད་ལ་ཟངས་ཀྱི་ཐུར་མས་བུད་མེད་ཀྱི་མཚན་མ་ཕུག་པའི་རྐང་མཐིལ་ཕུག་ནས། ཐུར་མ་མ་ཞིག་པར་བྱ་སྟེ་མ་ལ་བདུག་པར་བྱའོ། །གལ་ཏེ་ཞིག་པར་འགྱུར་ན་དེ་གཉིས་ཐལ་བས་གང་བའི་སྣོད་ཀྱི་སྟེང་དུ་གཞག་སྟེ་དུས་བག་ཙམ་སོང་ནས་ཡང་
གཅིག་ཏུ་བྱའོ། །ཡང་ན་སྔར་བཞིན་ཚྭ་དང་བཅས་པའི་བསྒྲུབ་བྱ་ཕོ་དང་མོ་གང་ཡང་རུང་བའི་ལིངྒ་བསྐུ་བྱུག་བྱས་པའི་འདག་པའི་སྣོད་དུ་བྱས་ནས་གོང་བཞིན་དུ་བདུག་པར་བྱའོ། །གཞན་གོ་སླའོ། །ཨོཾ་ལ་བ་ཎ་ཞེས་པ་ལ་སོགས་པ་ལ། ཚྭ་དང་སྐེ་ཚེ་མཉམ་པོར་བྱས་པ་ཞེས་པ་ནི་
འགྲོན་བུ་རྡོག་པོ་ཉི་ཤུ་རྩ་གཅིག་གམ། བརྒྱད་ཅུ་རྩ་བཞིའམ། ཁལ་ཉི་ཤུ་རྩ་གཅིག་གི་རིན་མ་རྩེག་པར་སྐེ་ཚེ་ཉོས་ནས་ཐུམ་པོ་བྱས་ཏེ་དུར་ཁྲོད་ཀྱི་ཐབ་ཀྱི་སྟེང་དུ་ལིངྒ་དང་བཅས་པ་སྙིང་གར་བཅུག་ནས་ཐུན་གསུམ་དུ་མ་དང་བདེའམ། བཟའ་བདེའམ། ཉིན་མོ་བདེའམ། ཕྱི་ནས་
ཞག་བདུན་བར་དུ་བྲི་བར་བྱའོ། །དེ་རྗེས་ཁུགས་ན་རིན་ལ་མི་རྩེག་པར་ཉོ་བའི་ཚྭ་དང་མཉམ་པར་བྱས་ནས་གྱོ་མོག་ཆེ་ཤོས་ཀྱི་ཐབ་ཁུང་དུ་སྦྱིན་སྲེག་བྱའོ་ཞེས་འབྲེལ་ལོ། །ཨོཾ་ཀུ་རུ་ཀུ་ལླེ་ཞེས་པ་ལ་སོགས་པ་ལ། སྔར་སྨོས་པའི་ཏིང་ངེ་འཛིན་ལ་གནས་པ་ཞེས་པ་ནི་ཀུ་རུ་ཀུ་ལླེའི་
ཏིང་ངེ་འཛིན་ལ་གནས་པས་སོ། །ཡུངས་ཀར་དཀར་པོ་ཞེས་པ་ནི་འབུམ་ཕྲག་བདུན་སྦྱིན་སྲེག་བྱའོ། །སངས་རྒྱས་ཀྱིས་བཅོམ་ལྡན་འདས་མའི་བཟླས་པའི་ཚིག་འབུམ་ཕྲག་བདུན་གསུངས་ཀྱང་བསྙེན་པ་བྱེ་བ་བྱས་ན་ཞག་ཉི་ཤུ་རྩ་གཅིག་གིས་ལས་སྦྱོར་གྱི་སྒྲུབ་པ་པོའི་མངོན་པར་འདོད་པ་
བསྒྲུབ་པོ། །དེ་ནས་གཞན་ཡང་ལས་ལ་སྦྱར་ན་གོང་བཞིན་དུ་སྒྲུབ་པ་བྱས་པའི་སྐེ་ཚེ་དང་ཚྭ་ཆ་མཉམ་པོར་བྱས་ནས་གོང་བཞིན་དུ་སོལ་བས་གང་བའི་སྣོད་དུ་གྲོང་ཁྱེར་དཀྲུག་པའི་ཕྱིར་ནུབ་ཏུ་ཁ་བལྟས་རྡོ་རྗེ་སྐྱིལ་ཀྲུང་བཅས་ཏེ་དབང་དུ་བསྡུ་བའི་ཕྱིར་ཐུན་གསུམ་དུ་སྦྱིན་སྲེག་བྱའོ། །ཇི་ལྟར་བླ་

71-1-131b

མའི་རིམ་པ་དང་རིམ་པ་ལས་ལྷག་མ་འདིའི་ལས་སྦྱོར་ཡོད་པ་རྣམས་ཇི་བཞིན་དུ་གཟུངས་སྔགས་ཀྱི་རྒྱལ་པོ་འདི་ལ་ཡང་ཡོད་དོ། །ཏ་ཉི་ཀུ་རུ་ལླཱ། གྷུ་རུ་གྷུ་རཱ་སི། ཨགྣི་ནི་ཀུ་ཊ་ཛ་ཎི། ཏ་ཀ་ཏ་ཀ་མི། དེ་ཁ་ཀུ་རུ་ཀུ་ལླཱ། མོ་ཧ་རི་བྷི་བནྟི། ཚ་ཐ་པ་ཏེ་ར། ཨ་པ་ར་དྷོ་ཧི་ནི་བྷ་ཛ་བཱིཧི་ར་ཎི་ན་མ་
ཀ་ར་སི། ཏིནྣི་རྩུ་ལུ་རཀྟ་པི་ཡཾ། ཨ་མུ་ཀ་ཀ་ར་མ་བ་ཤཾ། སྔགས་ཀྱི་རྒྱལ་པོ་འདི་ལ་གང་གི་མིང་བཏགས་ནས་ཆུ་ལ་བརྒྱ་རྩ་བརྒྱད་བཟླས་ཏེ་འཐུངས་ན་དེ་ཇི་སྲིད་འཚོའི་བར་དུ་དབང་དུ་འགྱུར་རོ། །ཨོཾ་ཨ་མ་ལེ་ཞེས་པ་ལ་སོགས་པ་ནི་རྩིག་པ་འདོད་ཡོན་གྱི་སྣམ་བུ་ཟུར་བཞི་བྱས་ནས་དེའི་
ནང་དུ་གཡས་སྐོར་གྱིས་རྩྭ་ཀུ་ཤ་རྣམས་དགྲམ་མོ། །འགྲུབ་པར་འགྱུར་ཞེས་པ་ནི་སྐྱེས་བུའི་འདོད་པའི་དོན་བྱེད་པའི་མཆོག་དང་། གཞན་དོན་ལ་ཆགས་པས་བཀླགས་པ་ཙམ་གྱིས་སྔགས་འགྲུབ་པར་མི་འགྱུར་རོ་ཞེས་མི་མོས་པས་སྤྲོ་བར་མི་བྱའོ། །གསུང་རབ་ཁོ་ན་བཞིན་དུ་དད་པ་དང་
བརྩོན་འགྲུས་ཀྱི་སྒོ་ནས་ཇི་ལྟར་གསུངས་པའི་ལས་སྦྱོར་དང་བཟླས་པ་ལ་སོགས་པ་ཤིན་ཏུ་འབད་པར་བྱ་སྟེ་བརྩོན་འགྲུས་དང་ལྡན་པ་ལ་རེ་བ་ངེས་པར་འགྲུབ་ཅེས་པའི་དོན་ཏོ། །དེ་བཞིན་གཤེགས་པའི་གསུང་རབ་ལ་ནམ་ཡང་འགྱུར་བ་མེད་དོ། །མང་དུ་སྨོས་པས་ཅི་ཞིག་བྱ་སྟེ། བདེ་བར་
གཤེགས་པ་ལས་གཞན་པའི་བདེན་པ་སྨྲ་བ་དང་ཁམས་གསུམ་ལ་ཡང་དག་པར་སྤྱོད་པ་མི་སྲིད་དོ། །བཞི་པ་ཞེས་པ་ནི་རབ་ཀྱི་ཆེན་པོ་རྟོགས་ནས་སོ། །རྫོགས་པ་ཞེས་པ་ནི་དེ་བཞིན་གཤེགས་པའི་མདུན་དུ་བདག་གིས་མ་ལུས་པར་ཐོབ་པའི་དོན་ཏོ། །ལེའུ་བཞི་པའི་བཤད་པའོ།།      །། 
བསོད་ནམས་འདི་ཡིས་ཟག་མེད་ཕུང་པོ་ཐོབ་གྱུར་ནས། །འགྲོ་རྣམས་སྲིད་གསུམ་ལས་རྒྱལ་སངས་རྒྱས་མྱུར་ཐོབ་ཅིང་། །གཞན་ཡང་དགེ་བའི་ཚོགས་ཀྱི་ཉེས་པ་ཀུན་སྤངས་ཏེ། །ཡེ་ཤེས་བློ་ཅན་རྒྱལ་སྲས་ཡོན་ཏན་ལྡན་པར་ཤོག །དཔའ་བོ་གཅིག་ཏུ་སྒྲུབ་པའི་འགྲེལ་པ་གཙུག་
ལག་ཁང་ཛ་གད་ད་ལཱི་ལན་གྱི་སུ་བྷཱ་ཀ་ར་ཞེས་བྱ་བས་མཛད་པ་རྫོགས་སྷོ།།      །།པཎྜི་ཏ་དཱ་ན་ཤཱི་ལས་རང་འགྱུར་དུ་མཛད་པ་ལ་བོད་ཀྱི་བནྡེ་རྣམས་ཀྱིས་ལེགས་པར་ཞུས་སོ། །དགེ་བའི་འབྱུང་གནས་ཞེས་བྱ་བ་བླ་མ་ཤཱཀྱ་ཤྲཱིའི་བླ་མ་ཡིན་གསུངས།    ༄༅༅།  །རྒྱ་གར་སྐད་དུ། 

71-1-132a

ཨཱརྱ་ནཱི་ལཱཾ་བ་ར་དྷ་ར་བཛྲ་པཱ་ཎི་བི་དྷི་རྣཱ་མ་དྷཱ་ར་ཎི་ཊཱི་ཀཱ། བོད་སྐད་དུ། འཕགས་པ་ལག་ན་རྡོ་རྗེ་གོས་སྔོན་པོ་ཅན་གྱི་ཆོ་ག་ཞེས་བྱ་བའི་གཟུངས་ཀྱི་འགྲེལ་པ། དཀོན་མཆོག་གསུམ་ལ་ཕྱག་འཚལ་ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་ལ་ཕྱག་
འཚལ་ལོ། །གང་ཞིག་ཉོན་མོངས་སྐྱོན་གྱིས་མ་གོས་རིན་ཆེན་ལྟར་གསལ་རི་རབ་ལྟ་བུར་བརྗིད། །འགྲོ་ལ་རིམ་པར་སྟོན་ཕྱིར་སྤྲུལ་པ་རང་བྱུང་སྟོང་གསུམ་སྲེག་པར་མཛད་པ་ཉིད། །གདོད་ནས་མི་རྟོག་ཆོས་ཉིད་ངང་ལས་སྙིང་རྗེའི་སྟོབས་ཀྱིས་ཞེ་སྡང་ཆེན་པོར་གསལ། །སངས་རྒྱས་ཀུན་གྱི་
གསང་བའི་མཛད་གྱུར་རྡོ་རྗེ་འཛིན་པ་དེ་ལ་ཕྱག་བཙལ་ནས། །ཕྱི་དང་ནང་གི་སྡུག་བསྔལ་ཞི་མཛད་རྒྱུད་རྒྱལ་གསང་བ་ཟབ་མོའི་དོན། །བླ་མ་བརྒྱུད་པའི་སྟོབས་ལས་རང་བྱུང་བདུད་རྩིའི་འོད་ཟེར་ངེས་པར་རབ་རྙེད་ནས། །གང་མིང་ཐོག་མར་ལག་ན་རྡོ་རྗེའི་གཟུངས་ཞེས་ཀུན་ལ་གྲགས་པར་
གྱུར་པ་ཡི། །འགྲེལ་འདི་བདག་ཉིད་རྙེད་སོགས་ཕྱིར་མིན་འགྲོ་ལ་ཕན་ཕྱིར་གསལ་བར་བཤད་པར་བྱ། །དེ་ལ་དང་པོ་མཚན་གྱི་དོན་བསྟན་པའི་ཕྱིར། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་ཞེས་བྱ་བ་སྨོས་སོ། །དེ་ནི་ཐུགས་རྗེའི་ཆོ་འཕྲུལ་སྤྲུལ་པའི་སྐུ་གནོད་སྦྱིན་གྱི་
གཟུགས་བརྙན་ཀླུའི་སྙིང་པོ་ཕྱག་ན་རྡོ་རྗེའི་ངོ་བོ་སྟེ་མཐུ་སྟོབས་ཀྱི་བདག་ཉིད་ཅན་ནོ། །དེ་ལ་གནོད་སྦྱིན་ཞེས་བྱ་བ་ནི་རི་རབ་ཀྱི་ཐ་མ་ལྕགས་རིས་ཡོངས་སུ་བསྐོར་བའི་རྩེ་ན་གནོད་སྦྱིན་གོས་སྔོན་ཅན་དག་གནས་པ་དེ་དང་རྟགས་མཐུན་པར་བསྟན་པའོ། །སྡེ་དཔོན་ཆེན་པོ་ནི་དེ་ལྟ་བུའི་རིགས་
གནོད་སྦྱིན་རྣམས་ལས་དོན་ཡེ་ཤེས་ཆེན་པོས་འཕགས་པ་སྟེ་གཞན་འདུལ་བའོ། །ལག་ན་རྡོ་རྗེ་ཞེས་བྱ་བ་ནི་མཁྱེན་པ་ལྔའི་ཡེ་ཤེས་ཀྱི་རྡོ་རྗེ་སྟེ་ཉོན་མོངས་པ་ལྔ་འཇོམས་པའོ། །གོས་སྔོན་པོ་ཅན་ཞེས་བྱ་བ་ནི་ལུས་ཀྱི་རྒྱན་ཡིན་ཏེ། དེས་འགྲོ་བ་རྣམས་མོས་པ་བསྐྱེད་པའམ། རྔམ་ཞིང་
འཁོར་འདུལ་བའི་སོ་སོའི་རྟགས་བསྟན་པའོ། །སངས་རྒྱས་གང་གཱའི་ཀླུང་བྱེ་བ་ཕྲག་འབུམ་གྱི་བྱེ་མ་སྙེད་ཀྱིས་རྗེས་སུ་གནང་བ་ཞེས་པ་ནི་སྤྲུལ་པའི་སྐུ་དང་མཚུངས་པ་ལས་དེ་དག་ཐམས་ཅད་ཀྱིས་གསང་བའི་བདག་པོར་དབང་བསྐུར་ཞིང་བསྟན་པ་གཏད་པའམ། དེ་དག་གི་སྤྲུལ་

71-1-132b

པ་ཉིད་ཡིན་པའི་ཕྱིར་གནང་བའོ། །མཆེ་བ་ནི་ཡེ་ཤེས་དང་ཉོན་མོངས་པ་ལས་སྐྱེས་པའོ། །གཙིགས་པ་ཞེས་པ་ནི་དེ་ལྟ་བུ་དང་མཐུན་པའི་སྟེ། དུག་ཅན་རྣམ་པར་འདུལ་བས་གདུག་པ་འདུལ་བའོ། །འཚམ་པ་ཞེས་པ་ནི་ཉོན་མོངས་པའི་མཆེ་བ་ཅན་དང་འཚམ་པར་སྟོན་པའོ། །མིག་
མེ་མདག་གི་ཕུང་པོ་འདྲ་བ་ཞེས་པ་ནི་སྤྱན་གྱི་གཟིགས་སྟངས་ཏེ། སྤྱན་རྩ་དམར་ཞིང་ཁྲོས་པའི་ལྟ་སྟངས་ཀྱིས་ལྟ་བའི་དུག་ཅན་འདུལ་བར་བྱེད་པའོ། །དབུགས་མེ་ལྕེ་ལྟར་འབར་བ་ཞེས་པ་ནི་དབུགས་ཚ་ཞིང་རྩུབ་པས་ཁ་རླངས་ཀྱི་དུག་ཅན་འདུལ་བར་བྱེད་པའོ། །འཇིགས་པའི་
ང་རོ་ཅན་ཞེས་པ་ནི་ཧ་ཧ་དང་ཧཱུཾ་ཧཱུཾ་དང་ཕཊ་ཕཊ་ཀྱི་སྒྲས་གདུག་པའི་ཚོགས་ཀྱི་ང་རྒྱལ་འཇོམས་ཤིང་སྐྲག་པར་བྱེད་པའོ། །དེ་དག་ནི་དཔལ་གནོད་སྦྱིན་གྱི་རྒྱལ་པོའི་སྐུ་དྲག་པོའི་རང་བཞིན་བསྟན་པ་སྟེ། དེ་ལྟར་བསྒོམ་པའོ། །ལག་པ་དང་རྐང་པ་ཀླུ་ནོར་རྒྱས་ཀྱི་བུས་བརྒྱན་པ་ཞེས་པ་ནི་ནོར་
རྒྱས་ཀྱི་བུ་མཐུས་བཀུག་སྟེ། དུག་དང་ང་རྒྱལ་ཕྲོགས་ནས་རྒྱན་དུ་བྱས་པའོ། །ཀླུ་ནག་པོ་སེ་རལ་ཁར་ཐོགས་པ་ཞེས་པ་ནི་ཚངས་པ་ཉིད་ལ་ཡོད་པའི་རྟགས་སུ་གྱུར་པ་དེ་དང་མཐུན་པར་མ་དྲོས་པ་ནག་པོའི་མཐུ་ཕྲོགས་ཏེ། རྒྱན་དུ་བྱས་པས་གྲིབ་མའི་དུག་ཅན་འདུལ་བར་བྱེད་པའོ། །ཀླུ་
དགའ་བོ་དང་ཉེ་དགའ་བོ་འབར་བས་རྣ་ཆ་བྱས་པ་ཞེས་པ་ནི་ངག་གི་དུག་ཅན་གྱི་དུག་ཕྲོགས་ཏེ་དབང་དུ་བསྡུས་ནས་ཐལ་མོ་སྦྱར་ཏེ་ངག་སྙན་པར་བསྟོད་ཅིང་སྙན་གྱི་རྒྱན་དུ་བྱས་པའོ། །སྦྲུལ་གདུག་པ་འབར་བ་རིན་པོ་ཆེའི་ཅོད་པན་ཐོགས་པ་ཞེས་པ་ནི་སྟོབས་ཀྱི་རྒྱུ་བཀུག་སྟེ། དུག་དང་ཕྲལ་
ནས་མཐོང་བའི་དུག་ཅན་དབང་དུ་བསྡུས་ཏེ། དེ་བཞིན་གཤེགས་པའི་རང་བཞིན་གྱི་རྒྱན་དང་མཐུན་པར་བྱས་པའོ། །སྦྲུལ་གདུག་པ་འབར་བ་ཟ་ཞེས་པ་ནི་འཇོག་པོ་བཀུག་སྟེ་དུག་དང་བཅས་ཏེ་གསོལ་བས་དྲན་པའི་དུག་ཅན་འདུལ་བར་བྱེད་པ་སྟེ། དེ་དག་གི་གདུལ་བྱ་ལ་དེ་ལྟར་སྟོན་ཅིང་
ཀླུ་རིགས་བཞི་དབང་དུ་བསྡུ་བ་དང་། ནོར་དང་དངོས་གྲུབ་རིམ་པས་བསྒྲུབ་པའོ། །བཞིན་རྒྱས་པ་ཞེས་པ་ནི་སྒྲ་གཅན་འཛིན་ལ་སོགས་པའི་ང་རྒྱལ་ཕྲོགས་ཏེ་འདུལ་བར་བྱེད་པའོ། །སྨིན་མ་དཔྲལ་བར་བསྡུས་པ་ཞེས་བྱ་བ་ནི་ཤིན་ཏུ་ཁྲོས་པའི་ཆ་བྱད་ཀྱིས་སྤྱིར་གནོད་སྦྱིན་དང་། སྲིན་

71-1-133a

པོ་དང་། ཁྱད་པར་དུ་ཀླུ་ཁྲོ་བོ་དག་འདུལ་བར་མཛད་པའོ། །ཡ་སོས་མ་མཆུ་མནན་པ་ཞེས་པ་ནི་ཞལ་གྱི་བྱེ་བྲག་སྟེ། རྔམ་པར་བསྟན་པའོ། །གཤིན་རྗེའི་ཆ་བྱད་ཅན་ཞེས་པ་ལ། གཤིན་རྗེའི་ཆ་བྱད་ནི་གནག་པ་དང་། མཚོན་ཆ་སྣ་ཚོགས་འཛིན་པ་དང་། མིའི་
རྒྱུ་མའི་ཕྲེང་བ་དོ་ཤལ་དུ་འཕྱང་བ། མ་ཧེ་ལ་ཞོན་པ། འཆི་བདག་མོས་མགུལ་ནས་འཁྱུད་པ་སྟེ། དེ་དང་འདྲ་བར་བསྟན་པའོ། །ལྕེ་གློག་ལྟར་འགྱུ་བ་ཞེས་པ་ནི་ཧ་ཧ་ཞེས་སྒྲོགས་ཤིང་ལྕེ་ཡང་དང་ཡང་དུ་འགྱུར་བ་སྟེ། དེས་ནི་གློག་དང་ཐོག་ལ་སོགས་པའི་འཇིགས་པ་རྣམ་པར་
འཇིག་པར་བྱེད་པའོ། །གསུས་པོ་ཆེ་སྦྲུལ་ཟ་བ་ཞེས་པ་ནི་ལོག་འདྲེན་གླང་པོ་ཆེའི་གདོང་པ་ཅན་གྱི་ང་རྒྱལ་འཇོམས་པའོ། །སྦྲུལ་ཟ་བ་ཞེས་པ་ནི་ནམ་མཁའ་ལྡིང་གི་དྲེགས་པ་འཇོམས་པའོ། །ལག་པ་བརྡབས་པའི་སྒྲས་འཇིགས་པར་བྱེད་པ་ཞེས་པ་ནི་ཁྱབ་འཇུག་ལ་སོགས་པ་
དྲེགས་པ་ཅན་ཐམས་ཅད་སྐྲག་ཅིང་དངང་པར་བྱེད་པའོ། །ཀླུའི་རྒྱལ་པོ་འདབ་བཟངས་སྐ་རགས་སུ་བཅིངས་པ་ཞེས་པ་ནི་གང་གི་ཚེ་འདབ་བཟངས་ལ་འཁྱིལ་པ་བདུན་ཡོད་པ་དེ་ལ་ནམ་མཁའ་ལྡིང་གིས་དྲངས་པའི་ཚེ་འཁྱིལ་པ་ཕྱེད་དང་གཉིས་ཀྱིས་རི་རབ་ཀྱི་རྩེར་སླེབ་ལ་འཁྱིལ་པ་ཕྱེད་
དང་དྲུག་རྒྱ་མཚོར་ལུས་པ་དེ་མཐུས་བཀུག་སྟེ་སྐ་རགས་སུ་བཅིངས་པས་འཁྲེས་ཅིག་ལས་མ་བྱུང་བ་སྟེ། སྐུ་བོངས་ཀྱི་ཚད་དེ་དང་ལྡན་པའོ། །ཨ་ལ་ལ་ཞེས་སྒྲོགས་པར་བྱེད་པ་ནི་དྲག་པོའི་ང་རོ་སྟེ། གདུག་པ་ཅན་རྣམས་སྐྲག་པར་བྱེད་ཅིང་ཟིལ་གྱིས་མནན་པར་བྱེད་པའོ། །རྒྱ་
མཚོའི་ཟབས་སུ་དཔག་ཚད་བརྒྱད་ཁྲི་བཞི་སྟོང་ཡོད་པས་ཞབས་ཀྱི་པུས་མོར་ཕྱིན་པ་ཞེས་པ་ནི་ས་འོག་ས་བླ་ས་སྟེངས་ཁྱབ་པར་བྱེད་པའི་རྒྱུ་བསྟན་པ་སྟེ། དེའི་ཚད་ཀྱི་སྐུ་བསྟན་པ་ནི་འབུམ་ཕྲག་གཉིས་སུ་ཤེས་པར་བྱའོ། །དེ་བས་ན་དབང་པོ་དང་ཉི་མ་ཕྲག་པ་ལ་ཁུར་བ་ཞེས་སྨོས་ཏེ། 
ལྟ་བ་ལོག་པ་ཐམས་ཅད་འཇོམས་པའི་རྟགས་སུ་བརྒྱ་བྱིན་ཕྲག་པ་གཡས་པའི་སྟེང་དུ་གཞག་པ་དང་། དེ་ལྟ་བུའི་སྐུ་དེ་ཐུགས་རྗེ་ཆེན་པོས་ཀུན་དུ་ཁྱབ་པའི་རྟགས་སུ་ཕྲག་པ་གཡོན་པ་ལ་ཉི་མ་གཞག་པའོ། །ཀླུ་ཐམས་ཅད་རླག་པར་བྱེད་པ་ཞེས་པ་ནི་ཀླུ་རིགས་བཞིའི་དུག་ཕྲོགས་ཏེ། 

71-1-133b

སྟོབས་རྣམ་པར་འཇོམས་ཤིང་མ་རུངས་པ་སེལ་བར་བྱེད་པའོ། །གད་རྒྱངས་ཆེན་པོ་སྒྲོགས་པས་ཀུན་དུ་འཁྲུག་པར་བྱེད་པ་ཞེས་པ་ནི་གད་རྒྱངས་ནི་ཧ་ཧ་སྟེ། དེའི་ང་རོ་དྲག་པོས་བགེགས་དང་ལོག་འདྲེན་ཐམས་ཅད་ཀྱི་སྙིང་ཀུན་ནས་འཁྲུག་པར་བྱས་ཏེ་སྤ་བཀོང་བའོ། །གཤིན་རྗའི་གཟུགས་ཅན་
ཞེས་པ་ནི་ཡ་མ་ཞེས་བྱ་བ་སྐྲག་པར་བྱེད་པའོ། །ཁམས་གསུམ་པ་འཇིགས་པར་བྱེད་པ་ཞེས་བྱ་བ་ནི་དེ་ལྟ་བུའི་སྐུ་དེ་སྙིང་རྗེའི་རང་བཞིན་ཅན་ཡིན་ཡང་གདུག་པ་འདུལ་བའི་ཐབས་སུ་དེ་ལྟར་བསྟན་པས་ཁམས་གསུམ་པ་དེ་ལྟ་བུ་ལ་འཇིགས་པས་སྐྱབས་སུ་འདོང་བར་འགྱུར་བའོ། །ཀླུ་ཐམས་ཅད་
འཆིང་བར་བྱེད་པ་ལ་ཕྱག་འཚལ་ལོ་ཞེས་པ་ནི་ཀླུ་རིགས་བཞི་ལ་སོགས་པའི་དུག་ཕྲོགས་ཏེ་སྟོབས་འཇོམས་ཤིང་མ་རུངས་པ་རླག་པར་བྱེད་པའོ། །དེ་ལྟ་བུའི་སྐུ་དེ་ལ་ཀུན་ནས་འདུད་ཅིང་མཆོད་པ་ནི་དེ་སྐད་སྨོས་པ་ཡིན་ནོ། །དེ་ལྟར་མཚན་ཉིད་བསྟན་ནས་གསང་བའི་གསང་སྔགས་
བསྟན་པའི་ཕྱིར། དེ་ནས་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་ཀྱིས་གསུངས་པའི་རིག་སྔགས་འདི་གསུངས་སོ་ཞེས་སྨོས་པ་ལ། དེ་ནས་ཞེས་པ་ནི་དོན་དང་རྟགས་བསྟན་ནས་ཞེས་པའོ། །སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་ཀྱིས་གསུངས་
པ་ཞེས་པ་ནི་འདས་པ་དང་མ་འོངས་པ་དང་ད་ལྟར་བྱུང་བའི་སངས་རྒྱས་ཐམས་ཅད་ཀྱིས་གསུངས་པ་དང་། གསུང་བ་དང་། གསུང་བར་འགྱུར་བའི་རིག་སྔགས་འདི་ཉིད་མཆོག་ཡིན་པས་ནི་སྒྲུབ་པ་པོ་རྣམས་ཀྱིས་འདི་བརྗོད་པར་བྱའོ་ཞེས་པའོ། །རིག་སྔགས་འདི་གསུངས་སོ་
ཞེས་པ་ནི་གོང་གི་ཐུན་མོང་མ་ཡིན་པའི་སྐུ་དེ་དམིགས་ལ། གང་གིས་བཟླས་བརྗོད་བྱེད་ཀྱང་གསལ་བ་དང་ལྡན་པས། རིག་སྔགས་ཀྱི་སྦྱོར་བ་ལ་འཇུག་པར་བྱའོ་ཞེས་བྱ་བའི་དོན་ཏོ། རིག་སྔགས་དེ་དག་ཀྱང་གང་ཞེ་ན། ཏདྱ་ཐཱ་ཞེས་པ་ནས་རཱ་ཛྙཱ་པ་ཡ་ཏི་སྭཱཧཱ་ཞེས་པའི་
བར་དུའོ། །དེ་དག་གསལ་བར་བྱེད་པ་ནི་ཏདྱ་ཐཱ་ནི་བཤད་པའི་ལྟས་ཏེ་འདི་ལྟ་སྟེ་ཞེས་པའོ། །བྷོ་བྷོ་ཞེས་པ་ནི་བོད་པའོ། ཝཱན་ཞེས་པ་ནི་བཅོམ་ལྡན་འདས་སོ། །ནཱ་ག་ཞེས་པ་ནི་ཀླུའོ། །ཨ་དྷི་ཞེས་པ་ནི་ལྷག་པར་རོ། །པ་ཏ་ཡེ་ཞེས་པ་ནི་བརྒྱད་ཀྱི་བདག་པོའོ། །ཨི་ད་ན་ཞེས་

71-1-134a

པ་ནི་རྒྱན་ནོ། །གང་གི་རྒྱན་ཡིན་ཞེ་ན། ནང་གི་རྒྱན་ཡིན་ཞེས་པ་བཤད་པའི་ཕྱིར། ནཱི་ལཱཾ་བ་ར་དྷ་ར་ཤ་རཱི་རཾ་ཞེས་པ་ནི་གོས་སྔོན་པོ་ཅན་གྱི་སྐུའོ། །གང་གི་ཕྱིར་སྐུ་མ་རྟོགས་པར་སྔགས་འབྱུང་མི་སྲིད་པས་སྔགས་དང་སྐུ་གཉིས་སུ་མེད་པའོ། །བཛྲ་པཱ་ཎི་ཧྲྀ་ད་ཡ་ཞེས་
པ་ནི་ཕྱག་ན་རྡོ་རྗེའི་སྙིང་པོ་སྟེ། གང་གིས་བརྗོད་པས་བསྒྲུབ་བྱ་མངོན་དུ་བྱེད་པའོ། །ཡཿས་མཱ་ཏི་ཀྲཱ་མཱ་ཏི་ཞེས་པ་ནི་སྒྲུབ་པ་པོའི་བཀའ་འདོར་ཞིང་འདའ་བར་བྱེད་ན་ཞེས་པའོ། །ཨུཏྶཱ་ད་ན་ཞེས་པ་ནི་ཡུལ་གཞན་དུ་སྐྱོད་པར་བྱེད་པའོ། །བྷ་བི་ཥྱ་ནི་ཤིན་ཏུ་གདུག་པ་ཅན་ཞེས་པའོ། །སྙིང་པོ་
དེ་དག་གང་ཞེ་ན་ཏདྱ་ཐཱ་ཞེས་སྨོས་ཏེ། འདི་ལྟ་སྟེ་ཞེས་པའོ། །བུདྡྷ་བུདྡྷ་བི་བུདྡྷ་ཞེས་པ་ན་ཕྱག་ན་རྡོ་རྗེ་ལ་བོས་པའོ། །མ་ཧཱི་པྲཱཔྟ་ཞེས་པ་ནི་མ་འགོར་ཅིག་ཅེས་པའོ། །ཧ་ར་ཧ་ར་ཞེས་པ་ནི་གདུག་པ་ཅན་གྱི་སྟོབས་ཕྲོགས་ཤིག་པའོ། །གདུག་པ་ཅན་དེ་གང་ཞེ་ན། ནཱ་གཱ་ནཱཾ་ཞེས་སྨོས་ཏེ། ཀླུ་
རྣམས་ཀྱི་ཞེས་ཚིག་གི་འབྲེལ་པའོ། །པྲ་ཧ་ར་པྲ་ཧ་ར་ཞེས་པ་ནི་འོད་ཟེར་ལས་བྱུང་བའི་ཁྲོ་བོ་རྣམས་ཀྱིས་རྒྱོབ་ཅིག་པའོ། །གང་ལ་བརྡེག་ཅེ་ན། ནཱ་གཱ་ནཱཾ་ཞེས་སྨོས་ཏེ། ཀླུ་ལ་སོགས་པའི་སྟོབས་འཇོམས་པའོ། །ཙྪིནྡ་ཙྪིནྡ་ཞེས་པ་ནི་ཆོད་ཅིག་པའོ། །གང་གཅོད་ཅེ་ན། ནཱ་ག་ཧྲྀ་ད་ཡཱ་ན་
ཞེས་སྨོས་ཏེ། ཀླུའི་སྙིང་རྣམས་སོ། །བྷིནྡ་བྷིནྡ་ཞེས་པ་ནི་ཆོམས་ཤིག་པའོ། །གང་གཞོམ་ཞེ་ན། ནཱ་ག་ད་མཱ་ནི་ཞེས་སྨོས་ཏེ། ཀླུ་འཁྱིལ་པ་རྣམས་ཆོམས་ཤིག་པའོ། །བི་ཥཱི་རྱནྟུ་ནཱ་ག་ཤ་རཱི་ར་ཎི་ཞེས་པ་ནི་དུག་གིས་མྱོས་པའི་ཀླུའི་ལུས་ཤིན་ཏུ་ཆོམས་ཤིག་པའོ། །བི་སྤོ་ཊ་ཡ་ཞེས་
པ་ནི་གཟི་བརྗིད་ཀྱི་སྟོབས་ཆོམས་ཤིག་པའོ། །གང་གིས་ཞེ་ན། ནཱ་ག་ནཱ་ཡ་ནཱ་ནི་ཞེས་སྨོས་ཏེ། ཀླུའི་མིག་རྣམས་སོ། །སྔགས་ཀྱི་མཐུ་གཞན་ཡང་བསྟན་པའི་ཕྱིར། ཏདྱ་ཐཱ་ཞེས་པ་ནི་འཆད་པར་འགྱུར་བའི་སྔགས་ཀྱིས་སྐུ་ལ་བསྐུལ་བའོ། །གང་གིས་བསྐུལ་ན་ཧཱུཾ་ཕཊ་ཅེས་པས་
ཐུགས་བསྐུལ་བའོ། །ནཱ་ག་བི་དྷ་ར་ཎ་ཡ་ཞེས་པ་ནི་ཀླུ་རྣམས་ཟུངས་ཤིག་པའོ། །ཧཱུཾ་གིས་དབང་དུ་བསྡུས་ནས་ཕཊ་ཀྱིས་དུག་ཉམས་པར་གྱིས་ཤིག་པའོ། །ནཱ་གོཏྶཱ་དཱ་ནཱ་ཡ་ཕཊ་ཅེས་པ་ནི་གལ་ཏེ་ཤིན་ཏུ་གདུག་པའི་དུག་གིས་ཟིན་པ་མི་གཏོང་ན་གདུག་པ་ཅན་རྣམས་སྐྲོད་པ་དང་རེངས་

71-1-134b

པར་བྱེད་པའོ། །ནཱི་ལཱཾ་བ་ས་ནཱ་ཡ་ཕཊ་ཅེས་པ་ནི་ལས་དང་མཐུན་པའི་གོས་སྔོན་པོ་ཅན་མངོན་སྤྱོད་གྱིས་ཤིག་པའོ། །ཨ་པྲ་ཏི་ཧ་ཏ་བ་ལ་པ་རཱ་ཀྲ་མ་ཡ་ཕཊ་ཅེས་པ་ནི་གང་གི་ཕྱིར་ཁྱོད་ཀྱི་ཐོགས་པ་མེད་པའི་སྟོབས་དང་མཐུ་གཞན་གྱིས་མི་ཐུབ་པས་གདུག་པའི་སྟོབས་ཉམས་པར་གྱིས་ཤིག་
པའོ། །ཀྲི་ཏཱནྟ་ཡ་ཕཊ་ཅེས་པ་ནི་སྲུལ་པོའི་སྟོབས་ཕྲོགས་ཤིག་པའོ། །ཀྲི་ཏཱནྟ་རཱུ་པཱ་ཡ་ཕཊ་ཅེས་པ་ནི་ལུས་སྲུལ་པོའི་སྟོབས་ཕྲོགས་ཤིག་པའོ། །རོ་ཥ་ཎ་ཡ་ཕཊ་ཅེས་པ་ནི་གཏུམ་པོའི་སྟོབས་ཕྲོགས་ཤིག་པའོ། །ཏྲཱ་ས་ན་ཡ་ཕཊ་ཅེས་པ་ནི་ལྷ་མ་ཡིན་གྱི་གདོན་མེད་པར་གྱིས་ཤིག་པའོ། །
ཀུ་མྦྷ་ཎྜོ་ཏྶཱ་ད་ནཱ་ཡ་ཕཊ་ཅེས་པ་ནི་སྨྱོ་བྱེད་ཀྱིས་བྱས་པའི་སྟོབས་ཕྲོགས་ཤིག་པའོ། །པྲེ་ཏ་པི་ཤཱ་ཙ་བི་ནཱ་ཤ་ཀ་རཱ་ཡ་ཕཊ་ཅེས་པ་ནི་ཡི་དྭགས་དང་ཤ་ཟའི་ཚོགས་སྐྲོད་པར་བྱེད་པའོ། །ཡཀྵ་ཨ་པསྨཱ་ར་བི་ནཱ་ཤ་ཀ་རཱ་ཡ་ཕཊ་ཅེས་པ་ནི་གནོད་སྦྱིན་དང་བརྗེད་བྱེད་ཀྱི་ཚོགས་སྐྲོད་པར་བྱེད་པའོ། །ཧ་ས་ཧ་ས་ཞེས་པ་ནི་
བཞད་པ་ཙམ་གྱིས་སོ། །དྷ་ར་དྷ་ར་ཞེས་པ་ནི་དྲན་པ་ཙམ་གྱིས་སོ། །མཱ་ར་ཡ་མཱ་ར་ཡ་ཞེས་པ་ནི་གདུག་པ་ཅན་རྣམས་གསོད་པར་བྱེད་པའོ། །ནཱ་ཤ་ཡ་ནཱ་ཤ་ཡ་ཞེས་པ་ནི་གདུག་པ་ཅན་རྣམས་རེངས་པར་བྱེད་པའོ། །སརྦ་བི་ན་བི་ནཱ་ཤ་ཀ་རཱ་ཡ་ཕཊ་ཅེས་པ་ནི་གནོད་སྦྱིན་ལ་སོགས་པའི་
བགེགས་ཐམས་ཅད་དབང་དུ་བསྡུས་ཤིང་སྟོབས་ཕྲོགས་ནས་སྐྲོད་པར་བྱེད་པའོ། །སརྦ་ཤ་ཏྲཱུཾ་སཾ་གྷ་བི་ནཱ་ཤ་ཀ་རཱ་ཡ་ཕཊ་ཅེས་པ་ནི་དགེ་འདུན་གྱི་དགྲ་ཐམས་ཅད་སྟོབས་ཕྲོགས་ཏེ་རླག་པར་བྱེད་པའོ། །ནཱི་ལཱཾ་བ་ར་དྷ་ར་བཛྲ་པཱ་ཎི་རཱ་ཛྙཱ་པ་ཡ་ཏི་སྭཱཧཱ་ཞེས་པ་ནི་དུས་གསུམ་གྱི་དེ་བཞིན་
གཤེགས་པ་ཐམས་ཅད་ཀྱི་དབང་བསྐུར་བ་ནི་ཕྱག་ན་རྡོ་རྗེ་གསང་སྔགས་ཀྱི་སྐུ་སྟེ། སྒྲུབ་པ་པོས་ཉེ་བར་བསྡུས་པའོ། །དེ་ལྟར་གསང་སྔགས་ཀྱི་རིམ་པ་བཤད་ནས། ཕྲ་མོའི་ལས་ཀྱི་རིམ་པ་བསྟན་པར་བྱ་བའི་ཕྱིར། དེའི་ཆོ་ག་ལ་གནོད་སྦྱིན་གྱི་གདོན་གྱིས་ཟིན་པ་ལ་ནི་ཆུ་ལ་སྔགས་ཀྱིས་
བཏབ་ནས་གཏོར་ན་བཏང་བར་འགྱུར་རོ་ཞེས་པ་ལ། གནོད་སྦྱིན་གྱིས་ཟིན་པའི་རྟགས་ནི་བཞིན་འཇིགས་པ་དང་། ཁ་ཟས་ལྷག་པར་ཟ་བ་དང་། ཁ་བཙོག་སྨྲ་བ་དང་། གཞན་ལ་བརྡེག་པ་དང་། ང་རོ་མི་སྙན་པ་སྒྲོགས་པ་དང་། ནད་ཀྱི་ཟུག་རྔུ་དྲག་པོའོ། །དེ་ལ་ཐོག་མར་མཎྜལ་བྱས་

71-1-135a

ཏེ་འཁོར་ལོ་རྩིབས་བརྒྱད་ཀྱི་ཐིག་བཏབ་ལ། རྩིབས་ལ་གནོད་སྦྱིན་གྱི་ས་བོན་བྲི། རྩིབས་མཆན་དུ་འཁོར་ལོ་ཉིད་ཀྱི་ས་བོན་བྲིའོ། །དེ་ལ་བུ་མོ་ལོ་བརྒྱད་ལོན་པ་ལ་ཙནྡན་དང་། ག་པུར་དང་། གུར་ཀུམ་དང་། ཛཱ་ཏི་དང་། གླ་རྩི་ལྔ་ནི་དྲི་ལྔ་སྟེ། ཆུ་གཙང་མ་དང་
སྦྱར་ལ་བུ་མོ་ཁྲུས་བྱས་ནས་དཀོན་མཆོག་གསུམ་དང་མཎྜལ་གྱི་ལྷ་ལ་ཕྱག་བྱས་ཏེ། བསྙེན་གནས་ཀྱི་སྡོམ་པ་འཛིན་དུ་བཅུག་ལ། རིན་པོ་ཆེའི་སྣོད་ཐོགས་པས་བྱང་ཕྱོགས་ནས་ཉི་མའི་རྩེ་ལ་ཆུ་བླངས་ཏེ། སྣོད་དེ་ཉིད་མཉྫིའི་སྟེང་དུ་གཞག་ཀུ་ཤས་ཁ་བརྒྱན་ལ། དར་སྔོན་པོས་མགུལ་
པ་བཅིངས་ཤིང་མཎྜལ་གྱི་དབུས་སུ་བཀོད་ལ། སྐུད་པ་སྔོན་པོས་མགུལ་པ་ནས་བཏགས་ཏེ། སྒྲུབ་པ་པོའི་གཡོན་གྱི་སྲིན་ལག་ལ་དཀྲིས་ལ། གཡས་པར་ཡུངས་ཀར་བླུགས་ཏེ་རིག་སྔགས་རེ་རེ་རྫོགས་པ་དང་། ཡུངས་ཀར་རེ་རེ་བུམ་པར་བསྟིམ་མོ། །དེ་ལྟར་ཡུངས་ཀར་འབྲུ་རེ་རེ་ལ་ཁྲོ་བོ་རྡོ་རྗེས་མཚོན་པ་
གྲངས་མེད་པས་ཁྱབ་པར་བསམ་མོ། །བདག་ཉིད་གནོད་སྦྱིན་གོས་སྔོན་པོ་ཅན་དུ་བསྒོམས་ལ་ཁར་ཆུ་བླུགས་ཏེ། ནད་པའི་ལུས་ལ་ཁ་ཕྲུས་བཏབ་པ་དང་། ཁྲོ་བོ་རྡོ་རྗེའི་མཚོན་ཆ་ཅན་དག་གིས་གནོད་སྦྱིན་གྱི་གདོན་ཕྲལ་ཏེ་སོང་བར་བསམ་མོ། །དེ་ནས་གདོན་དེངས་པ་དང་བུམ་
པས་ནད་པའམ་རང་ལ་དབང་བསྐུར་བར་བྱའོ། །དེ་ནས་མཎྜལ་བསྡུས་ཏེ་ཡུངས་ཀར་དང་མཎྜལ་གྱིས་བསྲེས་པ་ཐོགས་ཏེ། བདག་ཉིད་བདུད་རྩི་འཁྱིལ་པའི་ཏིང་ངེ་འཛིན་དུ་ཞུགས་ལ་ཕྱོགས་མཚམས་བརྒྱད་དུ་གཏོར་ཞིང་མཚམས་བཅད་པ་དེ་ནི་གནོད་སྦྱིན་གྱིས་ཟིན་པའི་
ཆོ་གར་བསྟན་ཏོ་། །ཀླུ་བཟློག་པར་འདོད་ན་སྨྱག་ཤད་ཀྱི་ལྕུག་མའམ་བལ་པོ་སེའུའི་ལྕུག་མས་བྱའོ་ཞེས་པ་ནི། ཐོག་མར་ནད་པའི་ནད་བརྟག་པར་བྱ་སྟེ། ཀླུའི་ནད་སྤྱིར་མང་ན་ཡང་། ནད་པ་ཀླུ་ལ་དགའ་བ་དང་། ནུབ་མོ་ན་བ་དང་། ཡན་ལག་ན་བ་དང་། ནད་གནུར་ལྕི་བ་
དང་། སྙིང་མི་དགའ་བ་དང་། འཁྲུལ་ཞིང་དྲན་པ་མི་གསལ་བ་དང་། ཡན་ལག་འཁུམས་པ་དང་། ལུས་ལྕི་མིག་དམར། སྣ་འགག ལུས་དྲི་མི་ཞིམ་པ་རྣམས་ཀླུའི་ནད་ཡིན་ནོ། །གལ་ཏེ་མཛེ་གསོ་བར་འདོད་ན་ཡང་ཀླུའི་ནད་ཡིན་མིན་རྟོགས་པར་བྱས་ཏེ་གསོའོ། །དེ་སྨྱག་

71-1-135b

ཤད་ཀྱི་ལྕུག་མ་དང་། བལ་པོ་སེའུའི་ལྕུག་མ་ཁྱེའུ་ལོ་བརྒྱད་པའི་གནས་ལྔར་འབྲུ་ལྔས་བསྲུངས་ཏེ། ནུབ་ཕྱོགས་ནས་ལྕུག་མ་མཚར་བུའི་ཐེམས་ཀྱིས་གཅད་ལ། ལྕུག་མ་བདུན་བརྔས་པ་དང་། དངུལ་གཞོང་ཆུས་བཀང་བའི་ནང་དུ་ལྕུག་མ་བཅུག་སྟེ་གཞག འཁར་གཞོང་ཅིག་གི་
ནང་དུ་ཟན་ལ་པདྨ་འདབ་མ་དྲུག་པ་ཅིག་བྱས་ལ། དེའི་སྟེང་དུ་བ་སུ་ཏ་རིགས་དྲུག་དགོད་པ་ནི་གཅིག་ལ་བུ་མོ་དང་ཁྱེའུ་དགོད། གཅིག་ལ་སྦྲུལ་ཁ་དོག་འདྲེས་པ་སྦྲུལ་མགོ་བདུན་པ་དགོད། གཅིག་ལ་ཉ་དང་སྦལ་པ་དང་ལྕོང་མོ་དགོད། གཅིག་ལ་རྩངས་མ་མགོ་དགུ་དགོད། གཅིག་
ལ་བ་གླང་དགོད། གཅིག་ལ་སྦྲུལ་ནོར་བུ་རིན་པོ་ཆེས་བརྒྱན་པ་དགོད། དེའི་མཐའ་མ་ཤིང་གིས་བསྐོར་ལ་གཞག་གོ། །དེ་ནས་སྨྱག་ཤད་དང་བལ་པོ་སེའུའི་ལྕུག་མ་དྲིལ་ཏེ། སྐུད་པས་གསུམ་དུ་བཅིངས་ཏེ། དེ་ལ་རྨ་བྱའི་མདོངས་གསུམ་བཙུགས་ལ་བདག་ཉིད་གོས་སྔོན་
པོ་ཅན་དུ་གསལ་བས་ལྕུག་མ་དང་རྨ་བྱའི་དྲིལ་བ་ལག་ཏུ་ཐོགས་ཏེ། ནད་པ་སྔོན་དུ་བཞག་ལ་ནད་པ་ལ་བྱབ་ཅིང་པདྨ་དང་ཀླུ་ལ་དབབ། དེ་ནས་དུག་དེ་དས་ཁྱེར་བར་བསམས་ལ། ཀླུ་རྣམས་ཟླ་བའི་གདན་ལ་འདུག་པར་བསམས་པའི་འོག་ཏུ་ཡཾ་ལས་རླུང་གི་དཀྱིལ་འཁོར་བསྒོམས་
ཏེ། གཟུངས་ཀྱི་ཕྲེང་བའི་མཇུག་ཏུ་ནཱ་ག་སྥ་ར་ཎ་ཕཊ་ཅེས་བརྗོད་པས་ཀླུ་རྣམས་རང་གི་གནས་གང་ཡིན་པར་རླུང་གིས་བསྐྱོད་ནས་སྐད་ཅིག་གིས་ཕྱིན་པར་བསམ་མོ། །དེ་ལྟ་བུ་གཅིག་གིས་ཀྱང་ཕན་པར་ནུས་ན་མང་དུ་བྱས་ན་སྨོས་སུ་མེད་དོ། །དེ་ནི་ཀླུའི་ནད་གསོ་བའི་ཆོ་གའོ། །
ཡི་དྭགས་དང་བརྗེད་བྱེད་རྣམས་ལ་ནི་སྐུད་པས་བྱའོ་ཞེས་པ་ནི། བརྗེད་བྱེད་ཀྱི་རྟགས་ནི་དྲན་པ་ཉམས་པ་དང་། རྐང་ལག་སྤྲུག་པ་དང་། མི་སྨྲ་བ་དང་། ཁ་ཆུ་འཛག་པ་དང་། མེ་དང་ཆུ་དང་གཡང་ལ་མཆོང་པ་དང་། གཉིད་མང་བ་ལ་སོགས་པའོ། །དེ་ལ་སྐུད་པ་དཀར་པོ་ལ་
མདུད་པ་བརྒྱ་བྱས་ཏེ། མདུད་པ་རེ་རེ་ལ་སྔགས་རེ་རེ་བཟླས་ལ། སྐུད་པའི་མཐའ་གཉིས་དབུས་དང་གསུམ་དུ་ཟངས་ཀྱི་ཕུར་པ་སོར་གཉིས་པ་ལ་སྔགས་ལན་ཉི་ཤུ་རྩ་གཅིག་བཟླས་པས་མཚན་ཏེ། ནད་པའི་སྐེར་གདགས་སོ། །རིམ་པ་ནི་སྔ་མ་བཞིན་ནོ། །རིམས་ནད་

71-1-136a

མེད་པར་བྱ་བ་དང་། གཞོགས་ཕྱེད་ན་བ་དང་། ཡི་ག་འཆུས་པ་ལ་ནི་སྐུད་པ་སྔོན་པོས་བྱའོ་ཞེས་པ་ནི། རས་བལ་གྱི་སྐུད་པ་མེ་ཏོག་སྔོན་པོས་ཁ་བསྒྱུར་ཏེ། སྔགས་ཚིག་རྣམས་ཤོག་བུ་ལ་བྲིས་ཏེ། སྐུད་པ་དང་བཅས་མགུལ་པའམ་གང་ན་བར་བཏགས་ན་
འཚོ་བར་འགྱུར་རོ། །བྱིས་པ་གདོན་གྱིས་ཉེན་པ་དང་། ནད་ཀྱི་འཇིགས་པ་ཐམས་ཅད་ལ་སྐུད་པ་སྔོན་པོས་བྱའོ་ཞེས་པ་ནི། རས་བལ་གྱི་སྐུད་པ་མེ་ཏོག་སྔོན་པོས་ཁ་བསྒྱུར་ཏེ། མདུད་པ་བརྒྱ་རྩ་བརྒྱད་དམ་ཉི་ཤུ་རྩ་གཅིག་ཏུ་མདུད་དེ། མདུད་པ་རེ་རེ་ཞིང་སྔགས་
རེ་རེ་རྫོགས་པ་དང་བསྲུང་བྱའི་མགུལ་ལམ་ག་ཤར་བཏགས་ནས་ཏིང་ངེ་འཛིན་གྱིས་གདོན་གྱིས་ཉེན་པའི་ལུས་རྡོ་རྗེའི་དྲ་བར་བསྒོམས་ན་བསྲུང་བའི་མཆོག་ཏུ་འགྱུར་རོ། །ཆོམ་རྐུན་བཟློག་པར་འདོད་ན་སས་བྱའོ་ཞེས་པ་ནི་རྣལ་འབྱོར་པ་རང་གི་ཆག་གང་བརྐོས་པའི་གཏིང་
ནས་ས་རློན་པ་བླངས་ཏེ། གུ་གུལ་ནག་པོས་བདུགས་ལ་སྔགས་རེ་རེ་ཞིང་ཡུངས་ཀར་རེ་རེ་ས་ལ་བསྣུན་པར་བྱའོ། །དེ་ལྟར་སྔགས་སྟོང་རྩ་བརྒྱད་རྫོགས་པ་དང་། ས་དེ་ཁམ་པའི་གའུ་སྲུབས་མེད་པར་བླུགས་ལ། པར་བུའི་དཀྱིལ་དུ་བུག་པ་སྨྱུག་མ་ཙམ་ཅིག་ཕུག་སྟེ། དེའི་
ནང་དུ་ཡུངས་ཀར་སྟོང་ལ་སྔགས་སྟོང་ཐིམ་པ་དང་། ཤིང་ཁ་དྷི་རའི་སྡོང་པོས་བསྲེགས་ནས་ནང་གི་ས་དང་ཡུངས་ཀར་ཚིག་ཅིང་མདོག་འགྱུར་བར་བྱས་ནས། དེའི་ནང་ནས་ཕྱུང་ལ་སྣོད་ཀྱི་ནང་དུ་བླུགས་ལ་ཇག་རྐུན་བྱུང་བའི་དུས་སུ་གཏོར་ན་ལོག་པར་འགྱུར་རོ། །ཁྱད་པར་དུ་རྐུན་པོ་ལ་
ནོར་རྫས་གང་ཡིན་པ་ལ་སྔགས་ཁྲོས་པའི་ཤུགས་ཀྱིས་བཏབ་ན་རྐུན་པོ་ལྡོག་པར་འགྱུར་རོ། །དུག་ལ་ནི་རྩྭ་ཀུ་ཤས་བྱབ་པར་བྱའོ་ཞེས་པ་ནི། གང་དུག་གིས་ཟིན་པ་དེ་དུག་དང་དབྲལ་བར་འདོད་པ་རྩྭ་ཀུ་ཤ་བདག་གིས་བཟུང་སྟེ། མདུན་དུ་སོལ་བ་དང་རྡོ་རྒྱུས་ལ་སྦྲུལ་གྱི་
གཟུགས་ཅིག་བྱས་ལ་ནད་པའི་ལུས་ལས་དུག་དེ་ཀུ་ཤས་བྱབ་སྟེ་ཕྲེང་བའི་སྔགས་ཀྱི་ཞབས་ལ་ཁཾ་ཁཾ་ཞེས་བརྗོད་ཅིང་གཟུགས་དེ་ལ་ཕབ་པས་འགུལ་བར་བསམ་ཤིང་གཟུགས་ཀྱི་སྙིང་གར་ཧྲཱིཿལས་འོད་བྱུང་བས་ནད་དེ་བསྡུས་ནས་དེ་ཉིད་ཧྲཱིཿལ་ཐིམ་པར་བསམ་དེ་ནས་གཟུགས་

71-1-136b

དེ་གནས་མཐོན་པོར་ཕྱུང་ལ་རླུང་ལ་བསྐུར་ཏེ། ནམ་མཁའ་ལ་ཁྱེར་བར་བསམ་མོ། །དེ་ནི་དུག་དབྱུང་བའི་ཆོ་ག་སྟེ། ཤིན་ཏུ་རྩེ་གཅིག་དང་ལྡན་པས་བྱའོ། །ནོར་འདོད་ན་ཞག་གཅིག་སྨྱུང་བར་འདུག་སྟེ། པོག་གིས་བདུགས་ན་རྨི་ལམ་དུ་དགེ་བ་དང་མི་དགེ་བའི་དོན་ཐམས་ཅད་
སྟོན་ཅིང་གསེར་གྱི་དོང་ཚེ་བདུན་སྟོང་སྦྱིན་པར་བྱེད་དོ་ཞེས་པ་ནི། བདག་ཉིད་གོས་སྔོན་པོ་ཅན་དུ་བསྒོམས་ལ་མདུན་དུ་འཕགས་པ་ཛཾ་བྷ་ལ་བསམས་ལ་མཆོད་དོ། །དེ་ཡང་སྨྱུང་བར་གནས་པའི་ནང་པར་ཉི་མའི་རྩེ་ལ་ཆུ་ཁྱོར་བ་བརྒྱ་རྩ་བརྒྱད་སྔགས་འདིས་དབུལ་ལོ། །ཨོཾ་ཛམྦྷ་ལ་ཛ་
ལེནྡྲཱ་ཡེ་སྭཱཧཱ། ཞེས་པའོ། །རྒྱུན་དུ་ཕྲེང་བའི་སྔགས་འདི་ཁོ་ན་བརྗོད་པར་བྱའོ། །དེ་ལྟར་ཞག་བདུན་ཞིང་ཞག་རེ་རེ་སྨྱུང་བར་གནས་ཏེ། ག་པུར་དང་ཛཱ་ཏི་ཕ་ལ་དང་། གླ་རྩི་དང་། གུར་ཀུམ་ལ་སོགས་པ་དྲི་སྣ་ཚོགས་ཀྱིས་གོས་སྔོན་པོ་ཅན་གྱི་གཟུགས་བརྙན་དང་། མཆོད་
རྟེན་ལ་སོགས་པའི་མདུན་དུ་འདུག་པ་དང་། འཕགས་པ་གོས་སྔོན་པོ་ཅན་ཡང་དག་པར་མཆོད་ཅིང་ཡིད་ལ་བྱེད་པས་རྣམ་ཐོས་སྲས་ལ་བདག་དཀོན་མཆོག་གསུམ་ལ་མཆོད་པའི་ནོར་སློང་ངོ་ཞེས་བརྗོད་དེ་ཉལ་བར་བྱའོ། །རྨི་ལམ་ན་གསེར་གྱི་དོང་ཚེ་ཉིད་མཐོང་བའམ། 
རྙེད་པའམ། གཞན་གྱིས་བདག་ལ་བྱིན་པའམ། མང་པོ་ལ་ལོངས་སྤྱོད་པ་ནི་གྲུབ་པའི་མཚན་མ་སྟེ། གང་དག་སའི་དཀྱིལ་འཁོར་འདི་ན་ལས་དང་པོ་པའི་བསོད་ནམས་ལས་གྲུབ་པའི་གནོད་སྦྱིན་ཕོ་མོ་རྣམས་ཀྱིས་བདག་ལ་གཏེར་སྟེར་བ་དང་། ས་ལ་གནས་པའི་གཏེར་
དག་སྟོན་པར་འགྱུར་རོ། །རྨི་ལམ་དུ་དོང་ཚེ་བདུན་སྟོང་མཐོང་ན་ཐེ་ཚོམ་མེད་དོ། །གོ་ལྕགས་དབྱེ་བར་འདོད་ན་ཡུངས་ཀར་གྱིས་བྱའོ་ཞེས་པ་ནི། བྲམ་ཟེའི་རིགས་ཀྱི་ཐོད་པར་ཡུངས་ཀར་བླུགས་ཏེ་ཕྲེང་བའི་སྔགས་བརྗོད་ཅིང་བསྒྲུབ་པ་ལ་སོགས་པ། སྟོང་ངམ་ཁྲི་ལ་སོགས་
པ་ཐིམ་པ་དང་ཡུངས་ཀར་བྱིན་གྱིས་བརླབས་ལ། སྒོ་ལྕགས་འབྱེད་པའི་དུས་སུ་ཡང་ཕྲེང་བའི་སྔགས་བརྗོད་ཅིང་ལྡེ་ཁུང་དུ་ཡུངས་ཀར་བདུན་ནམ་ཉི་ཤུ་རྩ་གཅིག་བསྐྱུར་བས་ཕྱེད་པར་འགྱུར་རོ། །རྒྱས་བཏབ་པ་དགྲོལ་བར་འདོད་ན་ཐལ་བས་བྱའོ་ཞེས་པ་ནི། བའི་ལྕི་བ་ལ་སོགས་པ་རྣམ་

71-1-137a

པ་ལྔ་ས་དང་སྦྱར་ལ་ཞི་བའི་ཧོམ་ཁུང་དུ་བྱས་ཏེ། ཙནྡན་དམར་པོའི་མེ་བཏང་ལ་མེ་ཏོག་སྔོན་པོའི་ནང་དུ་མངར་གསུམ་གྱི་རི་ལུ་བག་ཕྱེར་གཏུམས་ཏེ་བཅུག་ལ། མེ་ཏོག་དང་ཕྲེང་བའི་སྔགས་བཟླས་ཏེ། སྟོང་ངམ་ཁྲི་ཐིམ་པར་བསྲེགས་པའི་ཐལ་བས་གཏོར་རམ་
བསྐུས་ན་གྲོལ་བར་འགྱུར་རོ། །འཇིགས་པ་ཐམས་ཅད་ལས་བསྲུང་བ་ནི་མར་རྙིང་པའམ་ཐལ་བའམ་ཡུངས་ཀར་གྱིས་བྱའོ་ཞེས་པ་ནི་མར་ལོ་དུ་མ་ལོན་པ་གའུའི་ནང་དུ་བཅུག་སྟེ། སྟེང་ན་བུ་ག་བྱས་པ་ལ་ཆུ་བཏང་སྟེ། ཕྲེང་བའི་སྔགས་སྟོང་ངམ་ཁྲི་ཐིམ་པ་དང་ཕྱག་ན་རྡོ་རྗེ་ཡང་དག་
པར་མཆོད་དོ། །གཟུངས་ཀྱི་བུམ་པ་དང་ལྡན་པའི་ཆུས་ལུས་བཀྲུས་ཏེ། གའུའི་མར་གྱིས་བསྐུས་ན་འཇིགས་པ་ཐམས་ཅད་ལས་ཐར་བར་འགྱུར་རོ། །ཡང་ན་གའུའི་བུ་ག་ན་མར་ཡུངས་ཀར་རེ་རེ་ཞིང་ཕྲེང་བའི་སྔགས་རེ་རེ་བརྗོད་ཅིང་། དེ་རེ་རེ་ཡང་ཁྲོ་ཆུང་རེ་རེར་གྱུར་པར་
བསམས་ལ། དེ་སྟོང་ངམ་ཁྲི་ལ་སོགས་པ་ཐིམ་པ་དང་། སྤྱི་བོ་ལ་སོགས་པར་ཕུར་བ་བྱས་ཏེ་བཏགས་ན་ཡང་འཇིགས་པ་ཐམས་ཅད་ལས་ཐར་བར་འགྱུར་རོ། །ཐལ་བ་ལ་ནི་ཞི་བའི་སྦྱིན་སྲེག་བྱས་པའི་ཐལ་བ་སྟེ། མར་རྙིང་པ་དང་ལྷན་ཅིག་ཏུ་གཟུངས་སྔགས་འབུམ་བཟླས་ཏེ་
བྱུག་པའམ། ཡང་ན་ཡུངས་ཀར་དང་ལྡན་པའི་བྱུག་པའམ། གདགས་པ་བྱས་ན་ཡང་ཐར་བར་འགྱུར་རོ། །བདག་བསྲུང་བ་ནི་ཡིད་ཀྱིས་སམ་ཆུས་བྱའོ་ཞེས་པ་ནི། ཏིང་ངེ་འཛིན་གསལ་བ་དང་། བཟླས་པ་རྫོགས་པ་ནི་དམིགས་པ་ཙམ་གྱིས་སོ། །ཡང་ན་ཆུ་ལ་བསྔགས་
ཏེ་སྟེང་འོག་ལ་སོགས་པར་གཏོར་ཞིང་བཏུང་བར་བྱའོ། །གཞན་བསྲུང་བ་ནི་སྐུད་པ་སྔོན་པོས་བྱའོ་ཞེས་པ་ནི་གོང་དུ་བཤད་པ་དང་སྦྱར་བར་བྱའོ། །ལས་དེ་དག་ཐམས་ཅད་ལ་སྔགས་བཟླས་པ་ནི་ལན་གསུམ་མམ། བདུན་ནམ། བཅུ་བཞིའམ། ཉི་ཤུ་རྩ་གཅིག་གམ། བརྒྱ་རྩ་
བརྒྱད་བརྗོད་པར་བྱའོ་ཞེས་པ་ནི་གོང་དུ་བསྙེན་པ་རྫོགས་པའི་རྣལ་འབྱོར་པས་ལས་ལ་སྦྱོར་བའི་དུས་སུ་རིག་པ་བརྗོད་པའི་གྲངས་ཀྱི་ཚད་དོ། །དེ་ལྟར་བྱས་ན་འགྲུབ་པར་འགྱུར་རོ་ཞེས་པ་ནི་གོང་དུ་བསྟན་པའི་ལས་ཚོགས་དེ་དག་ལྟར་རོ། །མཆོད་རྟེན་སྐུ་གདུང་དང་ལྡན་པའི་མདུན་དུ་

71-1-137b

མེ་ཏོག་སྔོན་པོས་མཆོད་དོ་ཞེས་པ་ནི་མཆོད་རྟེན་བདེ་བར་གཤེགས་པའི་གདུང་དང་ལྡན་པའི་རྩར་ཕྱག་ན་རྡོ་རྗེ་སྒྲུབ་ཐབས་ལས་འབྱུང་བ་བཞིན་མཆོད་དེ་མེ་ཏོག་སྔོན་པོ་གུར་ཀུམ་གྱི་ཆུར་བཅུག་སྟེ། ཉི་མ་རེ་རེ་ལ་དུས་གསུམ་དུ་ཉི་ཤུ་རྩ་གཅིག་ཏུ་མཆོད་པར་བྱའོ། །སྔགས་སྟོང་
བཟླས་བརྗོད་བྱས་ན་འགྲུབ་པར་འགྱུར་རོ་ཞེས་པ་ནི་ཐ་མའི་ཚད་བསྟན་པ་སྟེ། ཇི་སྲིད་སྐྱོ་བར་མ་གྱུར་གྱི་བར་དུ་བརྗོད་པར་བྱའོ། །གཞན་ཡང་ལྡེར་སོ་དང་། རས་རིས་ལ་སོགས་པ་ཕྱག་ན་རྡོ་རྗེའི་སྐུ་གཟུགས་ཀྱི་མདུན་དུ་ཇི་སྐད་བཤད་པའི་སྒྲུབ་ཐབས་བཞིན་དུ་ཡང་དག་པར་མཆོད་
དེ་མཉེས་པར་བྱས་ནས་ཕྲེང་བའི་སྔགས་འབུམ་མམ་བྱེ་བ་ལ་སོགས་པའི་སྦྱོར་བ་སྔོན་དུ་སོང་བས་ནི་འགྲུབ་པར་མི་འགྱུར་བ་གང་ཡང་ཡོད་པར་མི་འགྱུར་རོ། །སེམས་ཅན་འདོད་པ་ཐ་དད་རྣམས་ལ་གཟིགས་ནས་ནི། །བདེ་བར་གཤེགས་པས་བྱང་ཆུབ་ལམ་ནི་སྣ་ཚོགས་གསུངས། །
སྙིགས་མའི་དུས་ཀྱི་སེམས་ཅན་བརྩོན་འགྲུས་བློ་ཞན་རྣམས། །འཇུག་བྱའི་དོན་དུ་དེ་ཉིད་སྒྲོན་མ་འདི་བརྩམས་ཏེ། །བླ་མ་ལ་གུས་དད་ལྡན་སྙིང་རྗེ་ཤེས་རབ་ལྡན། །ཐེག་ཆེན་ཐབས་མཁས་ཚད་མེད་སྙིང་རྗེའི་སེམས་བསྐྱེད་པ། །དབང་རྣམས་རྫོགས་ཤིང་རྗེས་སུ་གནང་ཐོབ་
དམ་ཚིག་ཅན། །དེ་ལ་དཔའ་བོས་གནང་དབང་བརྒྱུད་དེ་བསྟན་པར་བྱ། །བླ་མ་མཉེས་བྱས་བརྩེ་བས་བདུད་རྩིའི་འོད་ཟེར་ཐོབ། །ཇི་སྲིད་མཉེས་བྱས་གཞན་དོན་ལྷག་ལྷས་གནང་བ་བྱིན། །རང་ཉམས་སྟོབས་གྱིས་སྒྲུབ་པོ་རྫས་གཟུང་རྒྱུད་དོན་བྲིས། །ངལ་བའི་དགེ་བས་དངོས་གྲུབ་རྣམ་
གཉིས་ཐོབ་པར་ཤོག །འཕགས་པ་ལག་ན་རྡོ་རྗེ་གོས་སྔོན་པོ་ཅན་གྱི་ཆོ་ག་ཞེས་བྱ་བའི་གཟུངས་ཀྱི་འགྲེལ་པ་དེ་ཁོ་ན་ཉིད་གསལ་བར་བྱེད་པའི་སྒྲོན་མ་ཞེས་བྱ་བ་སློབ་དཔོན་ཀླུ་གྲུབ་ཀྱིས་མཛད་པ་རྫོགས་སོ།།      །།རྒྱ་གར་གྱི་མཁས་པ་དཱི་པཾ་ཀཱ་ར་ཤྲཱི་ཛྙཱ་ན་དང་བོད་ཀྱི་ལོ་ཙཱ་བ་རྒྱ་བརྩོན་སེང་གེས་
ཤྲཱི་ན་ལེནྡྲའི་སྒོ་འགྲམ་དུ་བསྒྱུར་བའོ།།      །། ༄༅༅།  །རྒྱ་གར་སྐད་དུ། ཨཱརྱ་ནཱི་ལཱམྦ་ར་དྷ་ར་བཛྲ་པཱ་ནི་དྷཱ་ར་ཎཱི་བི་བྲྀཏྟི་ནཱ་མ།  བོད་སྐད་དུ། འཕགས་པ་ཕྱག་ན་རྡོ་རྗེ་གོས་སྔོན་ཅན་གྱི་གཟུངས་ཀྱི་འགྲེལ་པ་ཞེས་བྱ་བ། དཔལ་ཞེ་སྡང་རྡོ་རྗེ་ལ་ཕྱག་འཚལ་ལོ། །གདུག་

71-1-138a

པ་འཇོམས་པར་བྱེད་པའི་མཆོག །ཕྱག་ན་རྡོ་རྗེ་ལ་བཏུད་ནས། །དེ་ཡི་གཟུངས་ཀྱི་འགྲེལ་པ་འདི། །ལས་ཀྱི་རྡོ་རྗེ་བདག་གིས་བརྩམ། །དེ་ལ་ད་པ་དང་། བརྗོད་པར་བྱ་བ་དང་། འབྲེལ་པ་དང་། དགོས་པ་དང་། དགོས་པའི་དགོས་པ་མོད་ལ་གསུངས་ཏེ། འདིར་
བཤད་པར་བྱ་བ་ཡིན་ཏེ། གང་གི་ཕྱིར་བརྗོད་པ་ལ་སོགས་པ་མ་རྟོགས་པར་ཉན་པ་པོ་རྣམས་ནི་འཇུག་པར་མི་འགྱུར་བས། དེའི་ཕྱིར་གོས་སྔོན་པོ་ཞེས་བྱ་བའི་ལག་ན་རྡོ་རྗེའི་གཟུངས་ཞེས་བྱ་བ་ནི་རྗོད་པར་བྱེད་པའོ། །འཕགས་པ་ལག་ན་རྡོ་རྗེའི་གཟུངས་དང་སྟོབས་དང་མཐུ་ལ་སོགས་
པ་གཟུངས་ཀྱི་སྒོ་ནས་བསྟན་པ་ནི་བརྗོད་པར་བྱ་བའོ། །དེ་དག་གིས་ཕན་ཚུན་འབྲེལ་པ་ཡིན་ཏེ། རྗོད་པ་དང་། བརྗོད་པར་བྱ་བའི་ཕྱིར་རོ། །སེམས་ཅན་ཐམས་ཅད་ལ་དུག་དང་། འཆིང་བ་དང་འབྱུང་པོ་དང་། མཁའ་འགྲོ་དང་། མཁའ་འགྲོ་མ་རྣམས་ཀྱིས་རྒྱས་བཏབ་དང་། 
གནོད་སྦྱིན་དང་། བརྗེད་བྱེད་ལ་སོགས་པའི་འཇིགས་པ་ངེས་པར་བཟློག་པ་ནི་དགོས་པའོ། །དེ་དག་ཀྱང་ཚེ་རིང་བ་དང་ནད་མེད་པ་ལ་སོགས་པ་ཐོབ་ན་འཕགས་པ་ཕྱག་ན་རྡོ་རྗེའི་མཐུ་འདི་ཡིན་ནོ་ཞེས་ངེས་པར་འཛིན་པས་བདེ་བར་གཤེགས་པའི་བསྟན་པ་ལ་ཉེ་བར་འཇུག་ཅིང་། སངས་རྒྱས་
ཀྱི་བྱང་ཆུབ་ཐོབ་པར་འགྱུར་ཞིང་། དགོས་པའི་དགོས་པའོ། །དེ་ཡང་རིགས་པའི་རྗེས་སུ་འབྲང་བ་རྣམས་ལ་བརྟེན་ཏེ་བཤད་པར་བྱའོ། །དད་པའི་རྗེས་སུ་འབྲང་བ་རྣམས་ཀྱིས་གང་གི་ཚེ་འདྲི་བར་གྱུར་ན་འདི་གང་ཟག་གིས་བརྩམས་ཞེས་དེའི་ཚེ་ཆོས་སྟོན་པ་ལ་སོགས་ཕུན་
སུམ་ཚོགས་པ་མདོ་སྡེའི་རྗེས་སུ་འབྲངས་ནས་བཤད་པར་བྱའོ། །དེ་ལ་ཛེ་ཏའི་ཚལ་དུ་མགོན་མེད་ཟས་སྦྱིན་གྱི་ཀུན་དགའ་ར་བ་ན་ཞེས་བྱ་བས་གནས་ཕུན་སུམ་ཚོགས་པ་དང་། དེ་བཞིན་དུ་བཅོམ་ལྡན་འདས་ཞེས་བྱ་བས་སྟོན་པ་ཕུན་སུམ་ཚོགས་པ་དང་། དགེ་སློང་གི་དགེ་
འདུན་ཆེན་པོ་ཞེས་བྱ་བས་འཁོར་ཕུན་སུམ་ཚོགས་པ། གཟུངས་གསུངས་པ་ནི་བསྟན་པ་ཕུན་སུམ་ཚོགས་པ་དང་། དུས་གཅིག་ན་ཞེས་པས་དུས་ཕུན་སུམ་ཚོགས་པ་བསྟན་ཏོ། །དེ་ལ་བཅོམ་ལྡན་འདས་ཀྱིས་གནོད་སྦྱིན་གྱི་སྡེ་དཔོན་ཆེན་པོ་ཞེས་བྱ་བས་དྲག་པོ་ཆེན་པོ་འདུལ་བར་

71-1-138b

བྱེད་པ་བསྟན་པ་ཡིན་ཏེ། གནོད་སྦྱིན་གྱི་སྡེ་དཔོན་ཞེས་བྱ་བ་ནི་ཞེ་སྡང་གི་རང་བཞིན་ཅན་ནོ། །དེ་རྣམས་ཀྱི་ཞེས་བྱ་བ་ནི་གཙོ་བོ་ཞེ་སྡང་གི་རིགས་ལས་འབྱུང་བའི་སྤྲུལ་པའི་སྐུ་ཞལ་རྣམ་པར་འགྱུར་བ་བསྟན་པ་ནི་གདུག་པ་འདུལ་བ་འཛིན་པ་བསྟན་པ་ཡིན་ནོ། །དེ་བས་ན་ཕྱག་ན་རྡོ་རྗེ་
ཞེས་སྨོས་པ་ནི་རང་གི་རིགས་དང་མཐུན་པའི་རྡོ་རྗེ་མཚན་མ་འཛིན་པའོ། །གོས་སྔོན་པོ་ཅན་ཞེས་བྱ་བས་སྤྲིན་སྔོན་པོ་དང་འདྲ་བའི་ན་བཟའ་བསྣམས་པས་འདི་ནི་སྔོན་མ་མཐོང་བའི་ཀླུ་ཡིན་ཞེས་ཀླུའི་རྒྱལ་པོ་རྣམས་གྲགས་པ་འཇིག་པའི་དོན་ཏོ། །སངས་རྒྱས་གང་གཱའི་ཀླུང་གི་བྱེ་མ་
སྙེད་ཀྱིས་གནང་བ་ཞེས་བྱ་བས་ནི། ཕྱག་ན་རྡོ་རྗེ་ཉིད་ལ་དབང་བསྐུར་བ་ཐོབ་པ་བསྟན་ཏེ། གང་གི་ཕྱིར་དེ་བཞིན་གཤེགས་པ་ཐམས་ཅད་ཡོངས་སུ་མྱ་ངན་ལས་འདས་པ་ན་ཕྱག་ན་རྡོ་རྗེ་ཉིད་ལ་གནང་བ་ཞེས་བྱ་བ་ནི་བསྟན་པ་གཏད་དོ། །མཆེ་བ་གཙིགས་པ་ཞེས་བྱ་བ་ནི་མཆེ་
བའི་དུག་ཅན་ཀླུ་རྣམས་རྣམ་པར་འཇོམས་པའི་དམ་ཚིག་བསྟན་ཏོ། །མིག་མེ་མདག་གི་ཕུང་པོ་འདྲ་བ་ཞེས་བྱ་བས་ཡང་དག་པའི་ཡེ་ཤེས་ཀྱི་མེ་དཔུང་དང་མཚུངས་པའི་སྤྱན་གྱིས་ཁམས་གསུམ་པའི་སེམས་ཅན་རྣམས་ཀྱི་ཕྱིན་ཅི་ལོག་པའི་ལྟ་བ་སྲེག་པར་བྱེད་པའི་གོ་ནས་ལྟ་
བའི་དུག་ཅན་གྱི་ཀླུ་རྣམས་འཇོམས་པའི་དམ་ཚིག་བསྟན་ཏོ། །དབུགས་མེ་ལྕེ་ལྟར་འབར་བ་ཞེས་བྱ་བས་སྲོག་གི་དབུགས་ཀྱི་ཀླུ་དག་བདག་གི་དབང་དུ་བསྡུ་བའི་ཏིང་ངེ་འཛིན་ལ་བརྟེན་ཏེ། མེའི་ཕུང་པོ་དང་འདྲ་བའི་འོད་ཟེར་རྣམས་ཀྱིས་དབང་དུ་བསྡུ་ཞིང་བཅིངས་ཏེ། རྩོལ་
བའི་རླུང་རྣམས་ཀྱིས་ཀྱང་གདུག་པའི་སེམས་ཅན་ཐམས་ཅད་འགུགས་པར་མཛད་ཅེས་བྱ་བའི་དོན་ཏོ། །འཇིགས་པའི་ང་རོ་ཅན་ཞེས་བྱ་བ་ནི་རོ་ལངས་སྐྲག་པར་བྱེད་པའི་དམ་ཚིག་གིས་ཀླུ་རྣམས་ཀྱི་འབྲུག་སྒྲའི་རྗེས་སུ་བྱེད་པའི་དགོངས་པས་འཇིགས་པ་སྐྱེད་པར་མཛད་
ཅེས་པའི་དོན་ཏོ། །ལག་པ་དང་རྐང་པ་ཀླུ་ནོར་རྒྱས་ཀྱི་བུས་བརྒྱན་པ་ཞེས་བྱ་བས་ནོར་རྒྱས་ཀྱི་བུ་སྔགས་ཀྱིས་བཀུག་ནས་དུག་ཕྲོགས་ནས་ཕྱག་དང་ཞབས་ཀྱི་རྒྱན་ཉིད་དུ་མཛད་ཅེས་བྱ་བའི་དོན་ཏོ། །ཀླུ་ནག་པོ་སེ་རལ་ཁར་ཐོགས་པ་ཞེས་བྱ་བ་ལ། གྲིབ་མ་འགོམས་པ་ཙམ་གྱིས་

71-1-139a

དུག་འཕྲོ་བར་བྱེད་པ་གང་ཡིན་པ་དེ་དག་སྦྲུལ་ནག་པོ་སྟེ་གྲིབ་མ་དུག་ཅན་ནོ། །དེ་སེ་རལ་ཁ་ཞེས་བྱ་བ་ནི་ཚངས་པ་ཉིད་ལ་གནས་པའི་རྟགས་སུ་གྱུར་པ་ཚངས་སྐུད་ཐོགས་ཤིང་བརྒྱན་པས་གྲིབ་མའི་དུག་ཅན་གྱི་ཀླུ་རྣམས་འདུལ་བར་བྱེད་པར་བསྟན་ཏོ། །ཀླུ་དགའ་བོ་
དང་ཉེ་དགའ་བོ་འབར་བས་རྣ་ཆ་བྱས་བ་ཞེས་བྱ་བ་ལ། དུག་གི་ཁ་ཕྲུ་འབར་བ་རྣམས་ཀྱིས་སེམས་ཅན་ལ་གནོད་པ་བྱེད་པ་དགའ་བོ་དང་ཉེ་དགའ་བོའི་དབང་དུ་འདུས། སངས་རྒྱས་ལ་དད་ཅིང་ཞི་བར་གྱུར་པ་ཚིག་སྙན་པས་ཕྱག་ན་རྡོ་རྗེ་ལ་བསྟོད་ཅིང་ཐལ་མོ་སྦྱར་ཏེ་སྙན་པར་གྱུར་པས་
དེའི་ཕྱིར་འཕགས་པ་ཕྱག་ན་རྡོ་རྗེའི་སྙན་གྱི་རྒྱན་ཉིད་དུ་མཛད་ཅེས་དགོངས་པའོ། །སྦྲུལ་གདུག་པ་འབར་བ་རིན་པོ་ཆེའི་ཅོད་པན་ཐོགས་པ་ཞེས་བྱ་བ་ནི་རང་འབྱུང་དེ་བཞིན་གཤེགས་པའི་རིན་པོ་ཆེའི་དབུ་རྒྱན་ལ་བཅིངས་པའི་གདུག་པས་རབ་ཏུ་འབར་བའི་སྦྲུལ་གྱི་གདེངས་ཀའི་ཕྲེང་
བས་ཉེ་བར་མཛེས་པའི་དབུ་རྒྱན་ཐོགས་པར་བསྟན་ཏོ། །སྦྲུལ་གདུག་པ་འབར་བ་ཟ་བ་ཞེས་བྱ་བ་ནི་དེ་བཞིན་གཤེགས་པའི་གཉིས་སུ་མེད་པའི་ཏིང་ངེ་འཛིན་ལ་སྙོམས་པར་ཞུགས་པས་གཟུང་བ་དང་འཛིན་པ་ཉིད་དྲན་པའི་དུག་ཅན་གྱི་སྦྲུལ་ཟ་བར་བྱེད་པ་ལྟར་གདུལ་བྱ་རྣམས་
ཀྱིས་མཐོང་ཞེས་དགོངས་པའོ། །བཞིན་རྒྱས་པ་ཞེས་བྱ་བས་ནི་ཤིན་ཏུ་རྒྱས་པའི་ཞལ་གྱི་དཀྱིལ་འཁོར་ཡང་དག་པར་བསྟན་པས་སྒྲ་གཅན་འཛིན་ལ་སོགས་པ་ལྷ་མ་ཡིན་གྱི་རྒྱལ་པོ་རྣམས་ཀྱང་འདུལ་བར་མཛད་ཅེས་བྱ་བར་དགོངས་སོ། །སྨིན་མ་དང་དཔྲལ་བ་བསྡུས་པ་
ཞེས་བྱ་བས་ནི་སྨིན་མའི་ལྕང་ལོ་འདེགས་པས་དཔྲལ་བ་བསྡུས་པ་ཉིད་ཀྱིས་མ་རུངས་པའི་ང་རོ་དང་ལྡན་ཞིང་། གནོད་སྦྱིན་དང་། སྲིན་པོ་དང་། མཁའ་འགྲོ་དང་མཁའ་འགྲོ་མ་ཐམས་ཅད་བསྡིགས་པར་མཛད་ཅེས་བསྟན་ཏོ། །དེ་བས་ན་ཡ་སོས་མ་མཆུ་མནན་པ་ཞེས་
བྱ་བ་སྨོས་ཏེ། སེམས་ཅན་ཐམས་ཅད་ལ་ཐོགས་པ་མེད་པ་ནས་དགྲ་རུ་གྱུར་པའི་ཕུང་པོའི་བདུད་ལ་སོགས་པ་ཚར་གཅོད་པར་དམ་བཅས་པ་ལ་དྲན་པའི་བརྡའི་མཚན་ཉིད་ཀྱི་ཁྲོ་བོའི་བཞིན་གྱི་ཕྱག་རྒྱའི་མཚན་ཉིད་བསྟན་ཏོ། །གཤིན་རྗེའི་ཆ་བྱད་ཅན་ཞེས་བྱ་བ་ནི་སྐུ་

71-1-139b

མདོག་གནག་པ། དབྱུག་པ་དང་། བེ་ཅོན་དང་། ལྕགས་ཀྱུ་དང་ཞགས་པ་འཛིན་པ། མི་ཡི་རྒྱུ་མའི་ཕྲེང་བ་དོ་ཤལ་དུ་འཕྱང་ཞིང་མ་ཧེ་ལ་ཞོན་པ། ལྷ་མོ་ནག་མོས་མགུལ་བར་འཁྱུད་པ་སྐད་ཅིག་གིས་ཀྱང་སྣང་བར་གྱུར་ཏོ། །ལྕེ་གློག་ལྟར་འགྱུ་བ་ཞེས་བྱ་བ་ལ་གློག་ནི་ཀླུའི་
ལྕེའོ། །དེ་བས་ཀྱང་ལྷག་པར་རྣོ་ཞིང་འབར་བའི་ཕྲེང་བས་དཀྲིགས་པ། དེ་བསྐྱོད་པ་ཞེས་བྱ་བ་ནི་ཡང་དང་ཡང་དུ་བསྐུལ་བས་འཇིགས་པར་བྱེད་པའི་ལྕེ་འབར་བས་གློག་ཅེས་བྱ་བས་ཀླུའི་ལྕེ་འཇོམས་པས་སེམས་ཅན་ཐམས་ཅད་ལ་ཐོག་ལ་སོགས་པའི་འཇིགས་པ་མེད་
པར་བྱེད་དོ། །གསུས་པོ་ཆེ་སྦྲུལ་ཟ་བ་ཞེས་བྱ་བ་ལ། འཕགས་པ་ཕྱག་ན་རྡོ་རྗེའི་སྐུའི་ཆེ་བ་བསྟན་པར་བྱ་བའི་ཕྱིར་དེ་ལ་གསུས་པོ་ཆེ་ཞེས་བྱ་བས་ལོག་འདྲེན་གླང་པོ་ཆེའི་མགོ་ཅན་གསུས་པོ་ཆེས་འདུལ་བར་མཛད་ཅེས་བསྟན་ཏོ། །སྦྲུལ་ཟ་བ་ཞེས་བྱ་བས་ནམ་མཁའ་ལྡིང་
གི་རྟོག་པ་རབ་ཏུ་འཇོམས་པ་བསྟན་ཏོ། །ལག་པ་བརྡབས་པའི་སྒྲས་འཇིགས་པར་བྱེད་པ་ཞེས་བྱ་བ་ལ། ཤིན་ཏུ་ཐུགས་རྗེའི་ཁྲོ་བོས་དཀྲུགས་པའི་དབང་གིས་ཕྱག་བརྡབས་པ་ལས་བྱུང་བའི་སྒྲའི་འཇིགས་པས་ཁྱབ་འཇུག་དང་། མ་ཧཱ་དེ་བ་དང་། ཚངས་པ་ལ་
སོགས་པ་བཅོམ་ལྡན་འདས་གོས་སྔོན་པོ་ཅན་ཕྱག་ན་རྡོ་རྗེ་ལ་སྐྱབས་སུ་སོང་ངོ་ཞེས་བྱ་བའི་དོན་ཏོ། །ཀླུའི་རྒྱལ་པོ་འདབ་བཟངས་སྐེ་རགས་སུ་བཅིངས་པ་ཞེས་བྱ་བ་ལ། སྔོན་གང་གི་ཚེ་ས་འོག་གི་རིམ་པ་བདུན་ལ་བྲིས་པའི་འདབ་བཟངས་ནམ་མཁའ་ལྡིང་གིས་འདྲེན་པ་ན། 
འཁྱིལ་པ་བདུན་ལས་འཁྱིལ་པ་ཕྱེད་དང་གཉིས་རི་རབ་ཀྱི་རྩེ་མོར་སླེབས་པ་འཁྱིལ་པ་ཕྱེད་དང་དྲུག་སའི་འོག་ཏུ་ལུས་པས་དེའི་ཚེ་ཀླུ་དེ་ནམ་མཁའ་ལྡིང་གིས་ཟ་བར་མ་ནུས་སོ། །དེ་ལྟ་བུར་གྱུར་པའི་འདབ་བཟངས་ཀྱང་འཕགས་པ་ཕྱག་ན་རྡོ་རྗེས་ཐོགས་པ་མེད་པར་རྫུ་འཕྲུལ་
གྱི་སྟོབས་ཀྱིས་སྐ་རགས་སུ་བཅིངས་པ་ན་ཁྲིས་གཅིག་ལས་མ་བྱུང་ཞེས་སྐུ་བོང་གི་ཚད་བསྟན་ཏོ། །ཨ་ལ་ལ་ཞེས་སྒྲོགས་པར་བྱེད་པ་ཞེས་བྱ་བ་ལ། ཨ་ལ་ལའི་སྒྲ་ནི་རོ་ལངས་སྐྲག་པར་བྱེད་པའི་དམ་ཚིག་གོ། །ཀྱེ་རོ་ལངས་དང་མཁའ་འགྲོ་མ་དྲག་མོ་རྣམས་བདག་བཞེངས་པར་

71-1-140a

གྱུར་ནས་ཁྱེད་ཅག་གིས་ཅི་ཞིག་ནུས་ཞེས་སྒྲོགས་ཤིང་འཇིགས་པ་སྐྱེད་པར་བྱེད་ཅེས་བྱ་བའི་དོན་ཏོ། །རྒྱ་མཚོའི་ཟབས་སུ་དཔག་ཚད་བརྒྱད་ཁྲི་བཞི་སྟོང་ཡོད་པ་རྐང་པའི་པུས་མོར་ཕྱིན་པ་ཞེས་བྱ་བ་འདིས་ས་དང་ས་འོག་དང་ས་བླ་ཁྱབ་པར་བྱེད་པའི་སྐུ་བསྟན་པའོ། །
དེ་བཞིན་དུ་ཡང་དཔག་ཚད་སྟོང་ཕྲག་བརྒྱད་ཅུས་པུས་མོ་རིང་བའི་ཚད་ཀྱིས་སྐུ་སྟོད་ཀྱི་ཚད་དཔག་ཚད་འབུམ་ཕྲག་གཉིས་སུ་ཤེས་པར་བྱའོ། །དེ་བས་ན་དབང་པོ་དང་ཉི་མ་ཕྲག་པ་ལ་ཁུར་བ་ཞེས་བྱ་བ་སྨོས་ཏེ། རི་རབ་ཀྱི་རྩེ་མོ་ལས་ཀྱང་སྐུ་བོང་སྟེང་དུ་འཕགས་པས་བརྒྱ་བྱིན་
ལ་སོགས་པའི་ལྷ་རྣམས་ཀྱིས་ཕྱག་འཚལ་ཞིང་མཆོད་དོ། །ཀླུ་ཐམས་ཅད་འཇོམས་པར་བྱེད་པ་ཞེས་བྱ་བ་ལ་ཀླུ་རྣམས་ཀྱི་མགྲིན་པ་ན་གནས་པའི་གདུག་པ་སྔགས་ཀྱིས་འཕྲོག་པར་མཛད་ནས། དེ་རྣམས་ཀྱི་སེམས་ཀྱི་གདུག་པ་རྣམ་པར་འཇོམས་ཤིང་གསོད་པར་མཛད་
ཅེས་དགོངས་སོ། །གད་རྒྱངས་ཆེན་པོ་དགོད་པས་འཁྲུག་པར་བྱེད་པ་ཞེས་བྱ་བ་ལ། ཧ་ཧ་དགོད་པའི་དམ་ཚིག་ལ་གནས་པའི་ཕྱིའི་མཁའ་འགྲོ་རྣམས་ཀྱི་སྙིང་ཀུན་དཀྲུགས་ནས་འདུལ་བར་མཛད་ཅེས་དགོངས་སོ། །གཤིན་རྗེའི་གཟུགས་ཅན་ཁམས་གསུམ་པ་འཇིགས་པར་
བྱེད་པ་ཞེས་བྱ་བ་ལ། འཕགས་པ་ཕྱག་ན་རྡོ་རྗེ་གོས་སྔོན་པོ་ཅན་སྙིང་རྗེ་ཆེན་པོའི་རང་བཞིན་ཅན་ཡིན་ཡང་ཁམས་གསུམ་པའི་སེམས་ཅན་རྣམས་ཀྱིས་གཤིན་རྗེའི་གཟུགས་སུ་མཐོང་ནས་ཤིན་ཏུ་འཇིགས་པའི་དོན་གྱིས་སྐྱབས་སུ་སོང་ཞེས་བྱ་བའི་དོན་ཏོ། །དེ་བས་ན་དེ་
རྣམས་ཀྱི་ཇི་ལྟར་འདུད་པ་བྱེད་དོ། །ཀླུ་རྣམས་འཆི་བར་བྱེད་པ་ལ་ཕྱག་འཚལ་ལོ་ཞེས་བྱ་བ་ནི། འཆི་བར་བྱེད་པ་ནི་འདུལ་བར་བྱེད་པའི་དོན་ཏོ། །དེ་བས་ན་ལྷ་དང་མི་ཐམས་ཅད་ཀྱིས་བཅོམ་ལྡན་འདས་ཕྱག་ན་རྡོ་རྗེ་ལ་མཆོད་པ་དང་། བསྟོད་པ་སྔོན་དུ་འགྲོ་བས་ཕྱག་བྱེད་
པར་འགྱུར་རོ། །དེ་ལྟར་འཕགས་པ་ཕྱག་ན་རྡོ་རྗེའི་གཟུགས་དང་སྟོབས་དང་ཆེ་བའི་བདག་ཉིད་བསྟན་པའོ། །ད་ནི་སླར་ཡང་ཞེས་བྱ་བ་ནི་ཕྱག་ན་རྡོ་རྗེའི་རིག་སྔགས་ཀྱི་བསྔགས་པ་སྟོན་པར་བྱེད་དེ། སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་ཀྱིས་གསུངས་

71-1-140b

པའི་རིག་སྔགས་འདི་བརྗོད་པར་བྱའོ་ཞེས་བྱ་བ་ལ། འདས་པ་དང་མ་འོངས་པ་དང་ད་ལྟར་བྱུང་བའི་སངས་རྒྱས་ཐམས་ཅད་ཀྱིས་གསུངས་པ་དང་། གསུང་བ་དང་། གསུང་བར་འགྱུར་བའི་རིག་སྔགས་འདི་ཉིད་མཆོག་ཡིན་པས། ཀྱེ་སྐྱེས་བུ་སྒྲུབ་པ་པོ་རྣམས་ཁྱེད་ཅག་གིས་ཀྱང་འདི་
བརྗོད་པར་བྱ་བ་ཡིན་ཞེས་སོ། །སྡུད་པ་པོའི་གདམས་ངག་གི་རིག་སྔགས་དེ་གང་ཞེ་ན། ཏདྱ་ཐཱ་ཞེས་སྨོས་ཏེ། འཆད་པར་འགྱུར་བའི་སྔགས་སྟོན་པར་བྱེད་དོ། །བྷོ་བྷོ་བཱན་ནཱ་ག་ཨ་དྷི་པ་ཏ་ཡེ་ཞེས་བྱ་བ་ལ། ནཱ་ག་ནི་ཀླུའོ། །ཨ་དྷི་པ་ཏ་ཡེ་ཞེས་བྱ་བ་ནི་ལྷག་པར་བདག་པོ་སྟེ་ཀླུ་
རྒྱལ་བརྒྱད་དོ། །བྷོ་བྷོ་ཞེས་བྱ་བ་ནི་ཀྱེ་ཀྱེ་སྟེ་དེ་རྣམས་ལ་བོད་པ་སྟེ། ཨི་དན་ཞེས་བྱ་བ་ནི་འདི་སྟེ་འབོད་པར་འགྱུར་རོ། །དེ་གང་ཞེ་ན། ནཱི་ལཱཾ་བར་དྷ་ར་ཤ་རཱི་རཾ་ཞེས་བྱ་བ་སྨོས་ཏེ། གོས་སྔོན་པོ་ཅན་གྱི་སྐུའོ། །གང་གི་ཕྱིར་སྐུ་མ་རྟོགས་པར་སྔགས་འབྱུང་བ་མི་སྲིད་པར་སྔགས་དང་
སྐུ་གཉིས་སུ་མེད་པར་བསྟན་པའོ། །བཛྲ་པཱ་ཎི་ཧྲྀ་ད་ཡཾ་ཞེས་བྱ་བ་ལས། ཕྱག་ན་རྡོ་རྗེའི་སྙིང་པོ་སྟེ་གོས་སྔོན་པོ་ཅན་གྱི་ཁོ་ནའོ། །སྙིང་པོ་ཞེས་བྱ་བ་ནི་གདུག་པ་འདུལ་བའི་ཕྱིར་ངག་གི་བརྗོད་པ་གསུངས་པ། བསྒྲུབ་བྱ་མངོན་དུ་བྱེད་ནུས་པ་རྒྱུ་དེའི་ཕྱིར་ཡཿས་མཱ་ཏི་ཀྲཱ་མ་ཏི་ཞེས་བྱ་བ་
སྨོས་པ་ལ་སྒྲུབ་པ་པོ་གང་གིས་འདོར་ཞིང་འདའ་བར་བྱེད་ན་འདུག་པའི་སེམས་ཅན་དེ་ཨུཏྶཱ་ད་ནཾ་བྷ་བི་ཥྱ་ནི་ཞེས་བྱ་བ་ནི་ཡུལ་ནས་གཞན་གྱིས་བསྐྲད་པར་འགྱུར་རོ། །སྙིང་པོ་དེ་གང་ཞེ་ན། ཏདྱ་ཐཱ་ཞེས་བྱ་བ་སྨོས་ཏེ་འདི་ལྟ་སྟེ་ཞེས་བྱ་བས་སྙིང་པོ་མངོན་པར་བྱེད་དེ་བུདྡྷ་བུདྡྷ་བི་བུདྡྷ་ཞེས་བྱ་བ་
ཕྱག་ན་རྡོ་རྗེ་ལ་བོད་པའོ། །མ་ཧཱི་པྲཔྟ་ཞེས་བྱ་བ་ནི་མ་འགོར་ཅིག་ཅེས་བྱ་བའི་དོན་ཏོ། །གདུག་པ་འཇོམས་པ་ལ་མྱུར་དུ་རེ་མ་ཞིག་ཅེས་བྱ་བ་ཚིག་ལྷག་མ་དང་སྦྱར་རོ། །ཧ་ར་ཧ་ར་ཞེས་བྱ་བ་ནི་གདུག་པ་རྣམས་ཀྱི་སྟོབས་ལ་སོགས་པ་ཕྲོགས་ཤིག་ཕྲོགས་ཤིག་ཅེས་བྱ་བའི་དོན་ཏོ། །གདུག་
པ་དེ་གང་ཞེ་ན། ནཱ་གཱ་ནཱཾ་ཞེས་བྱ་བ་སྨོས་ཏེ་ཀླུ་རྣམས་ཀྱི་ཚིག་གིས་ཚིག་འབྲེལ་པའོ། །པྲ་ཧ་ར་པྲ་ཧ་ར་ཞེས་བྱ་བ་ནི་འོད་ཟེར་ལས་བྱུང་བ་ཁྲོ་བོ་རྣམས་ཀྱིས་རྒྱོབ་ཤིག་རྒྱོབ་ཤིག་པའོ། །གང་ལ་བརྡེག་ཅེ་ན། ནཱ་གཱ་ནཱཾ་ཞེས་བྱ་བ་སྨོས་ཏེ་ཀླུ་རྣམས་ཀྱི་སྟོབས་དང་། བརྩོན་འགྲུས་ལ་སོགས་

71-1-141a

པ་བརླག་པར་གྱིས་ཤིག་ཅེས་བྱ་བར་དགོངས་སོ། །ཙྪིནྡ་ཙྪིནྡ་ཞེས་བྱ་བ་ནི་རལ་གྲིས་ཆོད་ཅིག་ཆོད་ཅིག་པའོ། །གཅད་པར་བྱ་བ་གང་ཞེ་ན། ནཱ་ག་ཧྲྀ་ད་ཡཱ་ནི་ཞེས་བྱ་བ་སྨོས་ཏེ། ཀླུའི་སྙིང་རྣམས་སོ། །བྷིནྡ་བྷིནྡ་ཞེས་བྱ་བ་ནི་ཆོམས་ཤིག་ཆོམས་ཤིག་པའོ། །
གང་གཞོམ་ཞེ་ན། ནཱ་ག་ད་མ་ནི་ཞེས་བྱ་བ་ནི་ཀླུ་དང་ཀླུ་མོ་བཅིངས་པའི་ཚོགས་ཀྱིས་འཁྱིལ་པ་རྣམས་ཤིག་ཅིག་ཤིག་ཅིག་པའོ། །ནཱ་ག་ད་མ་ནི་ཞེས་བྱ་བ་ལ། ཀླུའི་ཁྱིམ་རྣམས་འཇོམས་པའོ། །བི་སི་མ་ད་ནཱ་ག་ཤ་རཱི་རཾ་ཞེས་བྱ་བ་ནི་དུག་གིས་མྱོས་བའི་ཀླུའི་ལུས་པོ་དེ་བཞིན་
དུ་ཆོམས་ཤིག་པའོ། །གཞན་ཡང་བི་སྤོ་ཊ་ཡ་ཞེས་བྱ་བ་ནི་གཟི་བརྗིད་ཀྱིས་འཇོམས་པར་མཛད་ཅིག་ཅེས་བསྐུལ་བའི་ཚིག་གོ། །འཇོམས་པར་བྱ་བ་དེ་གང་ཞེ་ན། ནཱ་ག་ནཱ་ཡ་ནཱ་ནི་ཞེས་བྱ་བ་སྨོས་ཏེ་ཀླུའི་མིག་རྣམས་སོ། །སྔགས་ཀྱི་མཐུ་གཞན་ཡང་བསྟན་པའི་ཕྱིར། ཏདྱ་ཐཱ་
ཞེས་བྱ་བ་སྨོས་ཏེ། འཆད་པར་འགྱུར་བའི་སྔགས་ཀྱི་སྐུ་ཕྱག་ན་རྡོ་རྗེ་ལ་བསྐུལ་བ་བསྟན་ཏེ། ཧཱུཾ་ཕཊ་ཅེས་སྨོས་ཏེ་ཕྱག་ན་རྡོ་རྗེ་གོས་སྔོན་པོ་ཅན་གྱི་ཐུགས་བསྐུལ་བའོ། །དེ་ཡང་གང་ཞེ་ན། ནཱ་ག་བི་དཱ་ར་ནཱ་ཡ་ཧཱུཾ་ཕཊ་ཅེས་བྱ་བ་སྨོས་ཏེ། ཀྱེ་ཀླུ་རྣམས་འཇོམས་པར་བྱེད་པ། ཀླུ
རྣམས་རླག་པར་བྱེད་པ་ཁྱོད་ལ་ཕྱག་འཚལ་ལོ་ཞེས་ཚིག་སྦྱར་རོ། །ཧཱུཾ་གི་སྒྲ་ནི་ཐུགས་བསྐུལ་བའོ། །ཕཊ་ཅེས་བྱ་བས་གདུག་པ་ཉམས་པར་གྱིས་ཞེས་བྱ་བའི་དོན་ཏོ། །ནཱ་གོཏྶཱ་ད་ནཱ་ཡ་ཕཊ་ཅེས་བྱ་བ་ནི་ཤིན་ཏུ་གདུག་པ་ཉིད་ཀྱི་ཕྱིར། གལ་ཏེ་དུག་གིས་ཟིན་པ་མི་གཏོང་ན་དེའི་ཚེ་
བསྐྲད་པར་མཛད་ནས་ཡི་གེ་ཕཊ་ཀྱིས་རེངས་པར་མཛོད་ཅིག་ཅེས་བསྐུལ་བའོ། །ནཱི་ལཱམྦ་ས་ན་ཡ་ཕཊ་ཅེས་བྱ་བས་ནི་མངོན་སྤྱོད་ཀྱི་ལས་དང་རྗེས་སུ་མཐུན་པའི་གོས་སྔོན་པོ་གནས་པ་ཁྱོད་ཡིན་པས། དེ་དང་རྗེས་སུ་མཐུན་པའི་ལས་མཛོད་ཅིག་པའོ་ཞེས་བསྐུལ་བའོ། །ལས་དེ་
ཇི་ལྟ་བུ་ཞེ་ན། ཕཊ་ཅེས་བྱ་བ་སྨོས་པ་ལ་དུམ་བུ་དུམ་བུར་གྱིས་ཤིག་པའོ། །ཨ་པྲ་ཏི་ཧ་ཏ་བ་ལ་པ་རཱ་ཀྲ་མ་ཡ་ཕཊ་ཅེས་བྱ་བ་ནི་གང་གི་ཕྱིར་ཁྱོད་ཀྱི་སྟོབས་དང་མཐུ་ལ་གཞན་གྱིས་མི་ཐུབ་པས་དེའི་ཕྱིར་ཕཊ་ཅེས་བྱ་བ་ནི་ཁྱོད་ཀྱིས་དགྲ་ཉམས་པར་གྱིས་ཤིག་ཅེས་བྱ་བའི་དོན་ཏོ། །ཀྲྀ་ཏཱནྟ་

71-1-141b

ཡ་ཕཊ་ཅེས་བྱ་བ་ལ། བགེགས་མཐར་བྱེད་པའི་གཟུགས་ཅན་ཕྱག་ན་རྡོ་རྗེ་ཁྱོད་ལ་ཕྱག་འཚལ་ནས། ཕཊ་ཀྱི་སྔགས་ཀྱིས་བགེགས་གདུག་པ་ཉམས་པར་གྱིས་ཤིག་ཅེས་བསྐུལ་བའོ། །ཀྲྀ་ཏཱནྟ་རཱ་པཱ་ཡ་ཕཊ་ཅེས་པ་ནི་གཤིན་རྗེའི་གཟུགས་ཅན་ཁྱོད་ལ་ཕྱག་འཚལ་ལོ། །ཕཊ་ཅེས་
བྱ་བ་ནི་མངོན་སྤྱོད་ལས་ལ་སྦྱོར་བའོ། །རོ་ཥ་ཎཱ་ཡ་ཕཊ་ཅེས་བྱ་བ་ལ། ཁྲོ་བོའི་ཆ་ལུགས་ཅན་ཡིན་གྱི་ཁྲོ་བོའི་རང་བཞིན་མ་ཡིན་པ་ཁྱོད་ལ་ཕྱག་འཚལ་ལོ་ཞེས་དགོངས་པའོ། །ཏྲཱ་ས་ནཱ་ཡ་ཕཊ་ཅེས་བྱ་བ་ལ། མཐོང་བ་ཙམ་གྱིས་གདུག་པ་སྐྲག་པར་བྱེད་པ་ཁྱོད་ལ་ཡིན་ཞེས་བསྟན་
པའོ། །ཕྱག་ཐམས་ཅད་དུ་དབྱེ་བའི་ཚིག་བཞི་པ་ཤེས་པར་བྱའོ། །ན་མ་ཿསྭསྟི་སྭ་ཧཱ་སཱ་དྷ་ཨ་ལམྦ་ཥཊ་ཡོ་གེ་ཙ་ཏྭེ་རྠི་ཞེས་སྒྲའི་མདོ་ལས་འབྱུང་བས་སོ། །ཀུསྨ་ཎྜོཏྶཱ་ད་ནཱ་ཡ་ཕཊ་ཅེས་བྱ་བ་ནི་ཀུསྨཎྜ་ནི་ཡི་དྭགས་ཀྱི་ཁྱད་པར་ཏེ། དམུ་ཆུ་དང་དྲིའུ་སྐྱེད་པར་བྱེད་པའོ། །དེ་རྣམས་
སྐྲག་པར་བྱེད་པ་ཁྱོད་ལ་ཕྱག་འཚལ་ལོ་ཞེས་བྱ་བའི་དོན་ཏོ། །ཕཊ་ཅེས་བྱ་བ་ནི། དེས་བྱས་པའི་སྐྱོན་ཕྲོལ་ཅིག་པའོ། །པྲེ་ཏ་པི་ཤཱ་ཙ་བི་ནཱ་ཤ་ཀ་རཱ་ཡ་ཕཊ་ཅེས་བྱ་བ་ནི་རྫུ་འཕྲུལ་དང་མཐུ་ཡོད་པའི་ཡི་དྭགས་གང་ཡིན་པ་དང་། དེ་བཞིན་དུ་ཤ་ཟ་ནི་མིའི་ཤ་ལ་དགའ་བའོ། །དེ་རྣམས་
ཉམས་པར་བྱེད་ཅིང་རྫུ་འཕྲུལ་དང་སྟོབས་དང་བརྩོན་འགྲུས་འཇོམས་པར་བྱེད་པ་ཕྱག་ན་རྡོ་རྗེ་ཁྱོད་ལ་ཕྱག་འཚལ་ལོ་ཞེས་ཚིག་ལྷག་མ་སྦྱར་བའོ། །ཕཊ་ཅེས་བྱ་བ་ནི་སྔ་མ་བཞིན་ནོ། །ཡཀྵ་ཨ་པསྨཱ་ར་བི་ནཱ་ཤ་ཀཱ་རཱ་ཡ་ཕཊ་ཞེས་བྱ་བ་ལ་འདྲེས་བྱས་པའི་སྐྱོན་གྱི་རྟགས་ནི་མི་གཙང་
བ་ཟ་བ་དང་། ཁ་ཟས་ལྷག་པར་ཟ་བ་དང་། ཁ་བཙོག་སྨྲ་བ་དང་། ཐལ་ལྕག་དང་དབྱུག་པ་དང་། རྐང་པ་གཞན་ལ་བརྡེགས་པ་དང་། ང་རོ་འཇིགས་པ་སྒྲོགས་པ་དང་། དེ་ལ་སོགས་པའི་མཚན་ཉིད་ཀྱི་འགྱུར་བ་རྣམས་ཀྱིས་གནོད་སྦྱིན་གྱི་རྟགས་སུ་ཤེས་པར་བྱའོ། །དེ་
བཞིན་དུ་ཡང་བརྗེད་བྱེད་ཀྱི་རྟགས་སུ་དྲན་པ་ཉམས་པ་དང་། རྐང་ལག་སྤྲུག་པ་དང་། མི་སྨྲ་བ་དང་། ཁ་ཆུ་འཛག་པ་དང་། མེ་དང་ཆུ་དང་གཡང་ལ་མཆོང་བ་དང་། གཉིད་མང་བ་ལ་སོགས་པའི་མཚན་ཉིད་ཤེས་པར་བྱའོ། །སྐྱོན་དེ་རྣམས་དྲན་པ་ཙམ་གྱིས་འཇོམས་པར་བྱེད་པ་

71-1-142a

ཁྱོད་ལ་ཕྱག་འཚལ་ལོ་ཞེས་ཚིག་ལྷག་མ་དང་སྦྱར་རོ། །ཕཊ་ཅེས་བྱ་བ་ནི་ཐར་བར་གྱིས་ཤིག་ཅེས་བྱ་བའི་དོན་ཏོ། །ཧ་ས་ཧ་ས་ཞེས་བྱ་བ་ནི་བཞད་པ་ཙམ་གྱིས་སོ། །དྷ་ར་དྷ་ར་ཞེས་བྱ་བ་ནི་དྲན་པ་ཙམ་གྱིས་སོ། །མཱ་ར་ཡ་མཱ་ར་ཡ་ཞེས་བྱ་བ་ནི་གདུག་པའི་སེམས་
ཅན་གྱི་བསམ་པ་གདུག་པ་མེད་པར་གྱིས་ཤིག་ཅེས་དགོངས་པའོ། །ནཱ་ཤ་ཡ་ནཱ་ཤ་ཡ་ཞེས་བྱ་བ་ནི་ལྟས་ངན་ལ་སོགས་པའི་འཇིགས་པ་བཟློག་པར་གྱིས་ཤིག་ཅེས་དགོངས་པའོ། །སརྦ་བི་གྷྣཱན་བི་ནཱ་ཤ་ཀ་རཱ་ཡ་ཧཱུཾ་ཕཊ་ཅེས་བྱ་བ་ནི་ཆོས་དང་ནོར་འདོད་པའི་བར་ཆད་བྱེད་པའི་
བགེགས་སོ། །ཁྱོད་ཀྱི་གཟུགས་སྔགས་བཀླགས་པ་ཙམ་གྱིས་དེ་རྣམས་འཇོམས་པར་བྱེད་པ་ཁྱོད་ལ་ཕྱག་འཚལ་ལོ་ཞེས་སྔ་མ་བཞིན་ནོ། །ཕཊ་ཅེས་བྱ་བ་ནི་སྔ་མ་བཞིན་དུ་བསྐུལ་བའོ། །སརྦ་ཤ་ཏྲཱུཾ་སཾ་གྷ་བི་ནཱ་ཤ་ཀ་རཱ་ཡ་ཕཊ་ཅེས་བྱ་བ་ལ། ཕ་རོལ་པོ་མུ་སྟེགས་དང་སོ་སོའི་སྐྱེ་བོ་
དང་། དཀོན་མཆོག་གསུམ་ལ་གནོད་པར་བྱེད་པ་ནི་བགེགས་ཀྱི་ཚོགས་སོ། །དེ་རྣམས་ཀྱིས་བྱས་པའི་འཁྲུལ་འཁོར་དང་། ངན་སྔགས་ཀྱི་སྦྱོར་བ་ཐམས་ཅད་ཁྱོད་ཀྱི་གཟུངས་སྔགས་བརྗོད་པ་ཙམ་གྱིས་རྣམ་པར་འཇིག་པར་འགྱུར་བ་དེ་བས་ཁྱོད་ལ་ཕྱག་འཚལ་ལོ་ཞེས་ཚིག་
ལྷག་མ་དང་སྦྱར་རོ། །ཕཊ་ཅེས་སྔ་མ་བཞིན་བསྐུལ་ལོ། །ནཱི་ལཱམྦ་ར་དྷ་ར་བཛྲ་པཱ་ཎི་རཱ་ཛྙཱ་པ་ཡ་ཏི་སྭཱཧཱ། ཞེས་བྱ་བ་ནི་སྒྲུབ་པ་པོས་ཕྱག་ན་རྡོ་རྗེ་གོས་སྔོན་པོ་ཅན་ལ། བདེ་བར་གཤེགས་པའི་བཀའ་བསྒོ་བར་བྱའོ་ཞེས་དགོངས་སོ། །སྭཱཧཱ་ཞེས་པ་ནི་གསང་སྔགས་ཀྱི་སྐུ་
དེ་ཉེ་བར་སྡུད་པ་བསྟན་ཏོ། །གཟུངས་སྔགས་ཀྱི་སྦྱོར་བའི་ནུས་པ་ནི་གོ་སླ་བས་མ་བཤད་དོ། །གོས་སྔོན་ཕྱག་ན་རྡོ་རྗེ་ཡི། །གཟུངས་ཀྱི་འགྲེལ་པ་འདི་བརྩམས་པས། །དགེ་བ་ཅུང་ཟད་གང་ཐོབ་པ། །དེ་ཡིས་འགྲོ་ཀུན་ནད་མེད་ཤོག།      །།དཔལ་ཕྱག་ན་རྡོ་རྗེ་གོས་སྔོན་པོ་ཅན་
གྱི་གཟུངས་ཀྱི་འགྲེལ་པ། རིག་པའི་གནས་ཐམས་ཅད་ལ་མཁས་པའི་པཎྜི་ཏ་ཆེན་པོ་ཀརྨ་བཛྲས་མཛད་པ་རྫོགས་སོ།།      །། ༄༅༅།  །རྒྱ་གར་སྐད་དུ།  ཤྲཱི་བྷཱུ་ཏ་ཌ་མ་ར་མཎྜ་ལ་བི་དྷི་ནཱ་མ།  བོད་སྐད་དུ། དཔལ་འབྱུང་པོ་འདུལ་བྱེད་ཀྱི་དཀྱིལ་འཁོར་གྱི་ཆོ་ག་ཞེས་བྱ་བ། དཔལ་

71-1-142b

འབྱུང་པོ་འདུལ་བྱེད་ལ་ཕྱག་འཚལ་ལོ། །ཆོ་གའི་དབྱེ་བའི་རང་བཞིན་དྲི་མེད་གྲུབ་པ་སྟེར་བ་མི་རྣམས་བསྒྲལ་བའི་དོན་དུ་སྟོང་ཉིད་དོན་རྟོགས་བློ་བཟང་སྐྱོང་བ་བདག་གིས་བཤད། འདི་ལྟར་སྔོན་དུ་བསྙེན་པ་བྱས་པས་སམ། རྟག་ཏུ་བཟླས་པའམ། ལོའི་ནང་དུའམ། ཟླ་བ་གཅིག་གི་ནང་དུ་
བསྙེན་པ་བྱས་པས་དཀྱིལ་འཁོར་བྲི་བར་བྱའོ། །དེ་ཡང་ཇི་ལྟར་འཆད་པའི་རིམ་པས་སོ། །དེ་ཡང་མིའི་རུས་པ་བཏགས་པས་བགེགས་བསལ་བའི་སྦྱིན་སྲེག་བྱ་སྟེ། སློབ་མའི་དོན་དུ་ཞི་བའི་སྦྱིན་སྲེག་བྱ་བ། ཉེས་པ་འཇོམས་པའི་སྔགས་བརྗོད་ལ། ཕྱོགས་བཅུའི་བགེགས་
ལ་ཕུར་པས་བཏབ་སྟེ། གནས་སྲུང་བར་བྱས་ལ། པུས་མོའི་བར་དུ་བརྐོས་ལ། ཡང་ན་བརླའམ་རྐེད་པའི་བར་དུ་བརྐོས་པ་ནི། མཆོག་དང་བར་དང་ཐ་མའི་གྲུབ་པ་སྟེར་རོ། །སྐྲ་ལ་སོགས་པའི་ཉེས་པ་ཐམས་ཅད་བསལ་ལ། དྲི་བཟང་པོའི་ཆུས་གཏོར་ཏེ་དག་པར་བྱའོ། །ཉེས་
པ་འཇོམས་པར་བྱེད་པའི་སྔགས་བརྗོད་ཅིང་། ཡང་ན་ས་གཞན་གྱིས་དགང་བར་བྱའོ། །རིན་པོ་ཆེ་ལྔ་དང་། སྨན་ལྔ་དང་། འབྲུ་ལྔ་ཡང་གཞུག་ཅིང་མཉམ་པར་བྱས་ལ། དྲི་ཞིམ་པོའི་ཆུས་བྱུག་གོ། །དེ་ལྟར་ས་ལ་བརྟག་པ་ལ་ནི། ཞ་ལ་དང་བཅས་པའི་གཙུག་ལག་ཁང་
རྙིང་པ་མཆོག་ཡིན་ལ། བྱེ་མ་དང་ཡུངས་ཀར་དང་ཆུ་དང་བཅས་པ་ལ་ལན་བདུན་བསྔགས་ཏེ་དཀྱིལ་འཁོར་གྱི་ས་གཞི་ལ་ཏོར་བར་བྱའོ། །རིན་པོ་ཆེ་དང་། བའི་རྣམ་པ་ལྔ་དང་། སྔོན་གྱི་སྨན་རྣམས་ཀྱིས་ཀྱང་བྱུག་པར་བྱ་སྟེ། ས་དག་པར་བྱ་བའི་ཆོ་གའོ། །དེ་ནས་ཡི་གེ་བཾ་ཡོངས་སུ་
རྫོགས་པ་ལས། གཏེར་གྱི་བུམ་པ་ཐོགས་པའི་སའི་ལྷ་མོ་དེ་ཡང་སྐུ་ཕྱེད་ཐོན་པ་ལ་བསྟོད་ཅིང་མཆོད་པ་བྱ་སྟེ། སྐྱོབ་པ་སངས་རྒྱས་ཐམས་ཅད་ཀྱི། །དཔང་དུ་གྱུར་པའི་ལྷ་མོ་ཁྱོད། །ས་དང་ཕ་རོལ་ཕྱིན་པ་དང་། །སྤྱོད་པའི་ཚུལ་གྱི་ཁྱད་པར་གྱི། །སྐྱོབ་པ་ཤཱཀྱ་སེང་གེ་ཡིས། །
ཇི་ལྟར་བདུད་ཀྱི་སྡེ་བཅོམ་པ། །དེ་ཚེ་ཁྱོད་ནི་དབང་དུ་གྱུར། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ལ་དཀྱིལ་འཁོར་བྲི། །འདིར་ནི་མི་བསྐྱོད་པའི་ཕྱག་རྒྱས་བསྟོད་པ་བྱས་ལ། མེ་ཏོག་ལ་སོགས་ལྔས་མཆོད་དེ། མཆོད་ཡོན་ལ་སོགས་པ་ཡང་བྱིན་ལ། དེའི་

71-1-143a

རྗེས་སུ་ལྷ་མོ་ཡང་དཀྱིལ་འཁོར་ལ་ཐིམ་པར་བསམ་ཞིང་། དེ་ནས་མེ་ཏོག་ལ་སོགས་པ་དང་ལྡན་པའི་དཀྱིལ་འཁོར་ལ་ལག་པ་རེག་ལ། ཧཱུཾ་ཉི་ཤུ་རྩ་གཅིག་བརྗོད་པས་བསྲུང་བར་འགྱུར་རོ། །དེ་ནས་དཀྱིལ་འཁོར་གྱི་དབུས་སུ་སློབ་དཔོན་འདུག་ལ། 
བདག་ཉིད་དགའ་བ་བསྐྱེད་པར་བྱ་སྟེ། དེང་དུ་བདག་ཚེ་འབྲས་བུ་ཡོད། །དེ་རིང་སངས་རྒྱས་རིགས་སུ་སྐྱེས། །བྱང་ཆུབ་སེམས་དང་བདག་ལྡན་ནོ། །བྱང་ཆུབ་སེམས་དཔའི་ཡེ་ཤེས་དང་། །བདག་ཀྱང་ད་ནི་ལྡན་པར་འགྱུར། །དེ་རིང་རྡོ་རྗེའི་རིགས་སུ་སྐྱེས། །དེ་རིང་བདག་ནི་གཅེས་
པའི་མཆོག །མཆོད་སྦྱིན་མཆོག་གི་འབྲས་བུ་བདག །ལུས་ཀྱི་མཆོག་ཏུ་བདག་གྱུར་ཏོ། །དེ་ནས་རང་གི་ལག་ཏུ་སྤོས་ཐོགས་ཏེ། དེ་བཞིན་གཤེགས་པ་ཐམས་ཅད་ལ་ཕྱག་བྱས་ལ། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་རྗེས་སུ་དགོངས་པར་བསམས་ཏེ། 
ཕྱོགས་བཅུའི་རྒྱལ་བ་མ་ལུས་པ། །དེང་དུ་བདག་ལ་དགོངས་སུ་གསོལ། །ཆེ་གེ་ཞེས་བྱའི་རྡོར་འཛིན་བདག །དཀྱིལ་འཁོར་ཆེན་པོ་བྲི་བར་འཚལ། །སངས་རྒྱས་ཐམས་ཅད་འདིར་བྱོན་ཅིག །རྗེས་སུ་བརྩེ་བར་ཉེར་དགོངས་ཏེ། །དངོས་གྲུབ་དམ་པ་སྩལ་དུ་གསོལ། །དེ་
སྐད་ཅེས་བརྗོད་ལ་དཀྱིལ་འཁོར་གྱི་དབུས་སུ་འདུག་སྟེ། འོད་ཟེར་འཕྲོས་ཅིང་བསྡུས་པ་ལས་བདག་ཉིད་རྡོ་རྗེ་འཛིན་པའི་སྐུར་བལྟ་བར་བྱའོ། །དེ་ནས་ཁྲོ་བོའི་རྒྱལ་པོའི་སྔགས་བརྗོད་ཅིང་། ཕྱག་རྒྱ་ཆེན་པོ་བསྒོམ་པར་བྱའོ། །དེ་ནས་ལས་ཀྱི་རྡོ་རྗེ་སློབ་དཔོན་ཤར་ཕྱོགས་སུ་འདུག་
ལ། ལྷོ་ཕྱོགས་ཀྱིས་དང་པོར་བྱས་པའི་ལན་གསུམ་བསྐོར་ཏེ། མཆོད་པ་རྣམ་པ་ལྔས་མཆོད་ལ། དབང་ཕྱུག་ཆེན་པོའི་གཟུགས་ཀྱིས་ཤར་ཕྱོགས་ནས་དཀྱིལ་འཁོར་ཞུ་བར་བྱའོ། །ཕྱོགས་གཞན་ནས་ཀྱང་དེ་བཞིན་ནོ། །དེ་ནས་སློབ་མ་བྱང་ཆུབ་སེམས་དཔས་བརྗོད་པར་བྱ། 
འཇིག་རྟེན་གསུམ་གྱིས་ཕྱག་བྱས་པ། །ཆོས་ཀྱི་རྒྱལ་པོ་ཆེན་པོ་ཁྱེད། །འབྱུང་པོ་ཀུན་དང་ཀླུ་རྣམས་དང་། །གནོད་སྦྱིན་རིག་པ་འཛིན་རྣམས་འཇིགས། །གེགས་རྣམས་ཐམས་ཅད་འཇོམས་མཛད་པ། །སྡུག་བསྔལ་ཉོན་མོངས་ཐམས་ཅད་འཇོམས། །གཟའ་རྣམས་ཀུན་

71-1-143b

དང་རོ་ལོངས་དང་། །ཡི་དྭགས་དང་ནི་བདུད་རྣམས་འཇོམས། །གྲུབ་པ་ཐམས་ཅད་སྟེར་མཛད་པའི། །དཀྱིལ་འཁོར་དམ་པ་བཤད་དུ་གསོལ། །དེ་ནས་ལས་ཀྱི་རྡོ་རྗེ་སློབ་དཔོན་ལངས་ལ། དེ་བཞིན་གཤེགས་པ་ཐམས་ཅད་ཀྱིས་ནམ་མཁའི་ཁམས་གང་བར་བསམས་ལ། 
ཕྱག་བྱས་ལ། བདག་ནི་ལེགས་མཛད་རྡོ་རྗེ་ཆེ། །བདག་ནི་རྡོ་རྗེ་སྟོབས་པོ་ཆེ། །བདག་ནི་རྣལ་འབྱོར་དབང་ཕྱུག་རྒྱལ། །ཕྱག་ན་རྡོ་རྗེ་བརྟན་པར་གནས། །བདག་ནི་དམ་ཚིག་རྡོ་རྗེ་སྟེ། །བྱིན་གྱིས་བརླབས་པ་མི་གཏོང་ངོ་། །དེ་ནས་རྡོ་རྗེ་སློབ་དཔོན་ཚིག་གསུམ་གྱིས་རྙེད་པ་དང་ལྡན་
པས། རང་ཉིད་ཀྱི་ཕྱག་རྒྱ་རྡོ་རྗེ་དང་དྲིལ་བུ་བཟུང་ལ། རྡོ་རྗེ་དྲིལ་བུ་གཟུང་བར་བྱ། །དཀྱིལ་འཁོར་ལས་རྣམས་ཐམས་ཅད་ལ། །འདི་ཉིད་བཟུང་ནས་བྱ་བ་ཡིན། །བཅོམ་ལྡན་འདས་ཀྱི་ཕྱག་རྒྱའོ། །ཨོཾ་བཛྲ་ཨུ་ཏིཥྠ། དཀྱིལ་འཁོར་ནམ་མཁའ་ལ་བལྟས་ལ། །རང་ཉིད་
ལངས་ལ་ཁྲོ་བོའི་ལྟ་བས། ཡི་གེ་ཧི་ལས་སྐྱེས་པའི་མིག་གཉིས་ལྟ་བས་བགེགས་ཐམས་ཅད་བསྲེགས་ཏེ། དེ་ནས་ཁྲོ་བོའི་ཕྱག་རྒྱ་བཅས་ལ། ཕྱོགས་ཐམས་ཅད་དུ་བལྟ་ཞིང་འགྲོ་བར་བྱའོ། །རང་ཉིད་ལྷའི་ང་རྒྱལ་དང་ལྡན་པས། སྔགས་བརྗོད་པར་བྱ་སྟེ། ཡི་གེ་ཨ་
ཡོངས་སུ་གྱུར་པ་ལས། སྣ་ཚོགས་རྡོ་རྗེས་བྱིན་གྱིས་བརླབས་པའི་འོད་ཟེར་གྱིས་ས་གཞི་ཐམས་ཅད་ཁེངས་པར་བསམ་ཞིང་རྡོ་རྗེའི་འགྲོས་ཀྱིས་བཅག་པར་བྱའོ། །ཤར་ལ་སོགས་པའི་བགེགས་རྣམས་དང་། ཕྱོགས་ཀྱི་ཡང་ཕུར་བུས་བཏབ་ལ། རྡོ་རྗེའི་ར་བ་དང་གུར་
བསམས་ཏེ། དཔལ་རྡོ་རྗེ་སེམས་དཔའ་དང་སྦྱོར་བས། ཀོ་སྐོས་ཨོལ་མདུད་པ་མནན་ལ། །གཡོན་ང་རྒྱལ་དུ་བལྟ་བས་དཔལ། །ཕྱོགས་བརྒྱད་འཁོར་ལོར་གནས་པ་དང་། །སྟེང་དང་འོག་ཀྱང་བྱིན་གྱིས་བརླབ། །བྷཱུར་བྷཱུ་བ་པ་ཙཾ་བནྡྷ་ཡ་ཏ། །སྔགས་ཀྱི་རྒྱལ་པོ་ཧཱུཾ་བརྗོད་
པས། །ཉེས་པ་ཀུན་གྱིས་ཚུགས་མ་ཡིན། །དེ་ནས་ཨོཾ་བཛྲ་མཎྜལ་ཧཱུཾ་ཛ། འདི་ཡིས་རྡོ་རྗེ་ཁུ་ཚུར་གཉིས་བརྐྱང་ལ། གསང་བའི་དཀྱིལ་འཁོར་དགུག་པར་བྱ་སྟེ། ཞལ་བཞི་པ། རྡོ་རྗེ་དབྱིངས་ཀྱི་རང་བཞིན་གྱི་གསལ་བའི་དཀྱིལ་འཁོར་དགུག་པར་བྱའོ། །ཨོཾ་བཛྲ་བཛྲེ་ཨ་

71-1-144a

དྷི་ཏིཥྛ་སིདྡྷི་ཧཱུཾ། དེ་ནས་རྡོ་རྗེ་བསྐོར་བའི་ཕྱག་རྒྱ་བྱས་ཏེ་བརྟན་པར་བྱའོ། །དེ་ནས་སེང་ལྡེང་གི་ཕུར་པ་ལ་བཟླས་པ་བྱས་ཏེ། ཀུན་དགའ་བ་དང་། རྣམ་པར་རྒྱལ་བ་དང་། སྤྲིན་གྱི་དབང་ཕྱུག་དང་། གསུས་པོ་ཆེ་དང་། རྣམ་པར་རྒྱལ་བ་དང་། ཇི་ལྟ་བའི་རིམ་པས། འཇིག་རྟེན་གསུམ་ལས་རྒྱལ་བ་དང་། 
གཤིན་རྗེ་གཤེད་དང་། སྟོབས་པོ་ཆེ་དང་། རྟ་མགྲིན་དང་། བདུད་རྩི་འཁྱིལ་པ་དང་། དེ་དག་ཀྱང་སྐུ་སྨད་ཕུར་པའི་དཔལ་དང་ལྡན་པ། ཙནྡན་དམར་པོའི་རང་བཞིན་དང་། སྐུད་པ་དམར་པོ་དཀྲིས་ཏེ། མེ་ཏོག་དམར་པོས་བརྒྱན་ཏེ། དཀྱིལ་འཁོར་གྱི་ཕྱི་རོལ་གྱི་ཟུར་དང་། ཕྱོགས་རྣམས་སུ་
ལག་པ་གཡོན་པས་བཟུང་སྟེ། གཡས་པ་རྡོ་རྗེ་དང་བཅས་པས་བརྟན་པར་བྱའོ། །ལོག་འདྲེན་གྱི་མཚམས་ལ་སོགས་པ་རུ། སྔགས་འདིས་ཕུར་བུ་བརྡེག་པར་བྱའོ། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བི་གྷཱན་བནྡྷ་བནྡྷ་ཧཱུཾ་ཕཊ། འདིར་དེ་ནས་རྡོ་རྗེ་རྣལ་འབྱོར་གྱི་ཁུ་ཚུར་གྱིས་
གོ་བགོ་སྟེ། བཅིང་བར་བྱས་པས། དཀྱིལ་འཁོར་གྱི་སྒོར་ཉེས་པ་ཐམས་ཅད་འཇོམས་པར་བྱེད་པའི་སྔགས་བརྗོད་ལ། བུམ་པ་ལྷག་པར་གནས་པར་བྱ་སྟེ། དྲི་བཟང་པོ་དང་བཅས་པའི་ཆུ་བླུགས་ཏེ། ལྷ་ཐམས་ཅད་ཀྱི་མིང་དང་བཅས་པ་ནམ་མཁའ་ལ་གནས་པ། སྙིང་
པོའི་འོད་ཟེར་གྱིས་བཀུག་སྟེ། ཡང་དག་པར་མཆོད་ནས། གཏོར་མ་ཡང་ཕུལ་ལ། བུམ་པར་གཞུག་པར་བྱའོ། །བུམ་པ་ཡང་ནག་པོ་སྤངས་པ་མགྲིན་པ་རིང་བ། མཆུ་འཕྱང་བ། ལྟོ་བ་རྒྱས་པ། མེ་ཏོག་གི་ཕྲེང་བ་དང་བཅས་པའི་རས་ཟུང་གིས་མགུལ་པ་དཀྲིས། 
འབྲས་བུ་དང་བཅས་པའི་ཤིང་གིས་བརྒྱན་པ། དཀྱིལ་འཁོར་གྱི་གཙོ་བོ་དང་། རིགས་ཀྱི་ལྷའི་མཚན་མ་དང་བཅས་པ། རིན་པོ་ཆེ་བདུན་ནམ་རྫ་ལས་བྱས་པའི་རྣམ་པར་རྒྱལ་བའི་བུམ་པའོ། །དེ་ཡང་ནང་དུ་བྱུ་རུ་དང་། གསེར་དང་དུང་དང་མུ་ཏིག་དང་། པདྨ་རཱ་གའི་རིན་
པོ་ཆེ་རྣམས་ཀྱིས་ནང་དུ་བཅུག་ལ་གཞན་ཡང་སྨན་བྲྀ་ཧ་ཏི་དང་། ཀཎྜ་ཀ་རི་དང་། མ་ཧཱ་དཎྜོ་དང་། ཨུཏྤ་ལ་དང་། ཨ་པ་རཱ་ཛི་ཏ་དཀར་པོ་དང་། འབྲས་མཁར་མ་དང་། གྲོ་དང་། སྲན་མ་དང་། ཏིལ་དང་། འབྲུ་རྣམས་ཀྱིས་ཀྱང་ངོ་། །ནང་བརྒྱན་ལ། བཅོམ་ལྡན་འདས་ཀྱི་

71-1-144b

སྔགས་བརྒྱ་རྩ་བརྒྱད་བཟླས་ལ། མཆོད་ཡོན་དང་། ཞབས་བསིལ་དང་བཅས་མཆོད་ཅིང་བསྟོད་དེ། ཡི་གེ་ཧཱུཾ་བརྗོད་པ་ལས། བཅོམ་ལྡན་འདས་ཡོངས་སུ་རྫོགས་པའི་སྐུར་བལྟས་ལ་རབ་ཏུ་མཆོད་དེ། བགེགས་རྣམས་འཇོམས་པར་བྱེད་པའི་སྔགས་བརྗོད་ཅིང་། ཕྲེང་
བའམ་མ་བརྒྱུས་པའི་མེ་ཏོག་གམ། སྤོས་ཀྱིས་ཀྱང་མཆོད་ལ། དེ་ནས་ཡི་གེ་བཞི་པའི་སྔགས་ཀྱིས་ཡང་དག་པར་བསྲུངས་ལ། ལས་ཐམས་ཅད་བྱ་སྟེ། དེ་ནས་དཀྱིལ་འཁོར་གྱི་བྱ་བ་ལ་འཇུག་པར་བྱ་སྟེ། ཐུན་གསུམ་དུ་ཡང་དག་པར་མཆོད་ཅིང་། དེ་ནས་བཅོམ་ལྡན་
འདས་ཀྱི་དྲུང་དུ་བུམ་པ་གཞག་པར་བྱ་སྟེ། འདི་ནི་བུམ་པ་རབ་ཏུ་གནས་པར་བྱ་བའི་ཆོ་གའོ། །དེ་ནས་བརྒྱ་བྱིན་ལ་སོགས་པ་ཤར་ལ་སོགས་པའི་ཕྱོགས་ནས་རང་རང་གི་སྔགས་དང་ཕྱག་རྒྱས་སྤྱན་དྲངས་ལ། མཆོད་ཡོན་ལ་སོགས་པ་ཕུལ་ཏེ། མེ་ཏོག་དང་བདུག་པ་ལ་
སོགས་པས་ཡང་དག་པར་མཆོད་དེ། ཨོཾ་ས་ར་ས་ར་གཙྪ་གཙྪ། དེ་ལ་སོགས་པས་གཤེགས་སུ་གསོལ་ཏེ། སྟེང་ནས་ཀྱང་ཟླ་བ་དང་། ཉི་མ་དང་། ཚངས་པ་དང་། མིག་གྱེན་དུ་བལྟས་ཏེ་གཤེགས། འོག་ཏུ་ཡང་ཨ་སུ་རེ་བྷྱ་སྭཱཧཱ། ནཱ་གེ་བྷྱཿསྭཱཧཱ། སོ་སོར་ཡང་
རྡོ་རྗེའི་སོར་མོ་གྱེན་དུ་ཕྱེ་ནས། རྡོ་རྗེ་འབར་བའི་ཕྱག་རྒྱས་གཏོར་མ་བྱིན་ལ། དེ་ནས་ཡང་། གཞན་གཏོར་མ་དམར་པོ། མེ་ཏོག་དང་བདུག་སྤོས་ལ་སོགས་པས་བརྒྱན་པའི་གཏོར་མ་བྱིན་ཞིང་ལྷ་རྣམས་སྤྱན་དྲང་བར་བྱའོ། །དེ་ནས་རས་དཀར་པོས་བུམ་པ་རྣམས་
གཡོགས་ཏེ། ལྷ་རྣམས་ཁ་སྦྱོར་དང་ལྡན་པ་འབྱུང་པོ་དང་བཅས་པ་ལ། ཡེ་ཏ་ཡ་ཏེ་མ་ཧཱ་བྷཱུ་ཏོ་རོ་ཏྲ་སྠ་ན་པྲ་མུཉྩ་ཏུ་སྭཱ་ཧཱ། དེ་ནས་སྔགས་དེ་ཉིད་ཀྱིས་ལྷ་བཤོས་ལ་སོགས་པ་དབུལ་ཏེ། སོ་སོར་འབྱུང་པོ་ཆེན་པོ་རྣམས། །རང་རང་གནས་སུ་ཅི་བདེར་གཤེགས་པར་བྱ། །
དུར་ཁྲོད་ཆེན་པོ་ལྷ་ཡི་གནས་རྣམས་དང་། །ཤིང་གཅིག་དང་ནི་ཆུ་བོའི་གནས་རྣམས་དང་། །ལམ་གྱི་བཞི་མདོ་ལིངྒ་གཅིག་པ་དང་། །ལྷའི་གནས་རྣམས་སུ་མྱུར་དུ་གཤེགས་བྱས་ལ། །དམ་ཚིག་གནས་ལ་རབ་ཏུ་གནས་པར་མཛོད། །ཇི་ལྟར་ཁྱེད་ནི་མི་འགྲོ་ན། །ཁྱེད་ཀྱི་

71-1-145a

མགོ་ནི་རྡོ་རྗེས་འགེམས། །ཡུད་ཙམ་གྱིས་ནི་ཉམས་པར་འགྱུར། །དམྱལ་བ་ཆེན་པོར་འཇུག་པར་བྱེད། །ཇི་ལྟ་ཇི་ལྟར་ཅི་བདེ་བར། །རང་གི་གནས་སུ་བདེ་བར་སོང་། །ཡང་མཆོད་ཡོན་ལ་སོགས་པ་བྱིན་ལ། མཆོད་དེ་ཅི་བདེ་བར་གཤེགས་པར་བྱའོ། །དེ་ནས་
དུར་ཁྲོད་དང་། ལྷའི་གནས་དང་། རིའི་རྩེ་མོ་དང་། ལམ་གྱི་བཞི་མདོ་དང་། དེ་དག་ཏུ་མྱུར་དུ་འགྲོ་བར་འགྱུར་ཏེ། གཏོར་མ་བྱིན་པས་སོ། །དམ་ཚིག་ལ་རབ་ཏུ་བརྟན་པར་དམ་ཚིག་རྣམས་རབ་ཏུ་སྐྱོང་ཞིང་། ཁྲོ་བོ་ཆེན་པོའི་བཀའ་སྩལ་ཇི་ལྟར་མནོས་པས། རང་རང་
གི་ལས་རྣམས་བྱེད་པར་འགྱུར་ཏེ། རུ་ཏྲ་སྠ་ན་པྲ་མུཉྩ་ན་ཏུ་སྭཱ་ཧཱ། དེ་ནས། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱ་ཏ། འདི་ནི་དབྱངས་ཆེན་པོའི་འབྱུང་པོ་ཐམས་ཅད་ལ་གཏོར་མ་སྦྱིན་པར་བྱའོ། །མཆོད་ཡོན་ལ་སོགས་པ་སྦྱིན་པ་འདི་ནི་གཏོར་མའི་ཆོ་གའོ། །ཞི་
བའི་རང་བཞིན་ནམ། རྒྱས་པ་ལ་ཉེས་པ་རྣམས་འཇོམས་པར་བྱ་བའི་ཕྱིར། རྣམ་པར་གྲོལ་གདོང་གིས། སྔགས་བརྒྱ་ཕྲག་བརྒྱད་བཟླས་ལ། འཁོར་ལོའི་ལྷ་རྣམས་མཆོད་དེ། མཆོད་ཡོན་ཡང་ཕུལ་ལ། སློབ་མ་ལྷག་པར་གནས་པར་བྱ་སྟེ། དེ་ནས་སློབ་དཔོན་གྱིས་
སློབ་མའི་མགོ་ལ་མེ་ཏོག་བཞག་སྟེ། སློབ་མས་ལག་པར་མེ་ཏོག་ཐོགས་ཏེ། འདི་སྐད་ཅེས་བརྗོད་པར་བྱའོ། །བདག་གིས་སྟོན་པ་དགའ་ཆེན་པོ། །མགོན་པོ་ཆེན་པོ་བདག་འཚལ་ལོ། །བྱང་ཆུབ་སེམས་མགོན་བརྟན་པ་པོ། །དམ་ཚིག་དེ་ཉིད་བདག་ལ་སྩོལ། །བདག་ལ་
བྱང་ཆུབ་སེམས་ཀྱང་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་འཚལ། །དེ་ནས་དཀྱིལ་འཁོར་གྱི་ཤར་སྒོར་སློབ་མ་བཞག་ལ། སྙིང་གར་ཨ་ལས་ཟླ་བའི་དཀྱིལ་
འཁོར། དེའི་སྟེང་དུ་ཡི་གེ་ཧཱུཾ་ལས་ཌཾ་ལས་བསྐྱེད་པའི་རྡོ་རྗེ་བསམས་ལ། གཡས་པའི་རྡོ་རྗེ་ཁུ་ཚུར་གྱིས་རྡོ་རྗེ་བཟུང་ལ། སློབ་མའི་སྙིང་གར་དེ་རེག་ཅིང་། སུ་ར་ཏེ་ས་མ་ཡ་སྟྭཾ་ཧོ། བཛྲ་སིདྷྱ་ཡ་ཐ་སུ་ཁཾ། ས་འདིར་སློབ་དཔོན་གྱིས་སྡིག་པ་བཤགས་པ་བྱ་བའི་དོན་དུ། ཕྱག་

71-1-145b

འཚལ་བདེ་གཤེགས་ཐམས་ཅད་ལ། །ཇི་ལྟར་ཐམས་ཅད་མཁྱེན་པ་པོ། །འཁོར་བ་ཀུན་གྱི་སྐྱབས་མཛོད་ཅིག །བདག་ནི་ཉེ་བར་སྐྱབས་སུ་མཆི། །གཙོ་བོ་ཀུན་དུ་བསྒོམ་པར་བགྱི། །སྡུག་བསྔལ་གསུམ་ལས་གྲོལ་བའི་ཕྱིར། །འཇིག་རྟེན་སྡུག་བསྔལ་བདག་གིས་མཐོང་། །
ཐམས་ཅད་བྱེད་པར་གནས་པ་ཡི། །སྡུག་བསྔལ་གསུམ་གྱིས་ཐམས་ཅད་གདུང་། །བདག་ནི་ཁྱེད་ལ་དབུལ་བར་བགྱི། །བདག་ནི་ཁྱེད་ཀྱིས་བཞེས་སུ་གསོལ། །སྡིག་པ་ཐམས་ཅད་བཤགས་པར་བགྱི། །ཕྱིན་ཆད་སྡིག་པ་བདག་མི་བགྱིད། །བསོད་ནམས་ཀུན་ལ་རྗེས་ཡི་རངས། །
བྱས་དང་བྱེད་བཅུག་དགེ་བ་ལ། །བདག་ནི་དེ་བཞིན་མངོན་པར་དགའ། །ཆོས་གསུང་མཛད་པའི་སངས་རྒྱས་རྣམས། །མྱ་ངན་མི་འདའ་བཞུགས་སུ་གསོལ། །སེམས་ཅན་ཀུན་གྱི་དོན་གྱི་ཕྱིར། །མཆོག་ཏུ་རྩོལ་བ་ཆེན་པོ་ཡིས། །བདག་ནི་སངས་རྒྱས་འགྱུར་བར་ཤོག ། 
སངས་རྒྱས་དབང་ཕྱུག་གནས་པ་ཡིས། །འཁོར་བ་ཐམས་ཅད་བསྒྲལ་དོན་དུ། །འཁོར་བའི་རྒྱ་མཚོ་མཐར་ཕྱིན་ཏེ། །སངས་རྒྱས་རྒྱུ་ལ་བཀོད་པའི་ཕྱིར། །ཇི་ལྟར་བཟོད་པའི་སྟོབས་རྣམས་ཀྱིས། །སྨོན་ལམ་ཆེན་པོ་གདབ་པར་བགྱི། །དེ་ལྟར་གྱུར་པའི་སྟོབས་ཀྱིས་སུ། །འདི་
ལྟར་རིགས་དང་རིགས་སྐྱེས་ཀྱང་། །ཐབས་ཀྱིས་འགྲོ་བ་བསྒྲལ་བར་བགྱི། །ཐམས་ཅད་མཉམ་པའི་གོ་འཕང་བ། །དྲི་མེད་སྟོང་པའི་ཡོན་ཏན་ཅན། །རིགས་ལས་བྱས་པའི་བསོད་ནམས་ཀྱིས། །བྱས་དང་བྱེད་དུ་བཅུག་པ་ཡི། །བདག་གི་བསོད་ནམས་ཅི་མཆིས་པས། །
གྲུབ་ཅིང་བདེ་བའི་གནས་ཕྱིན་ཤོག །དེ་ནས་རིན་ཆེན་དཔལ་མོས་ལག་པ་ན་དྲི་ཐོགས་པ། དཔལ་མོས་མེ་ཏོག་དང་། ཐིག་ལེ་མཆོག་མས་བདུག་སྤོས་དང་། རི་བོང་འཛིན་མས་མར་མེ་ཐོགས་པ་རྣམས་ཀྱིས་མཆོད་ལ། ཨོཾ་བཛྲ་ཧཱ་སྱེ་ཧཱུཾ། ཞེས་པའི་སྔགས་ཀྱིས། ཨུ་
དུམྺཱ་ར་དང་། བྱང་ཆུབ་ཀྱི་ཤིང་ལས་བྱས་པའི་སོ་ཤིང་། དྲི་དང་མེ་ཏོག་གི་ཕྲེང་བས་བརྒྱན་པ། སོ་འབྲུད་པའི་ཚུལ་གྱིས་བཟུང་ལ། དོར་བར་བྱའོ། །རྡོ་རྗེ་ཆོས་ཀྱིས་བཟླས་པའི་དྲི་བཟང་པོའི་མཆོད་ཡོན་གྱིས་ཆུས་ཁ་བཤལ་བྱིན་ལ། ཨོཾ་ཧྲཱིཿ་བི་ཤུདྡྷ་དྷརྨ་སརྦ་པཱ་པ་ནིཤྩ་

71-1-146a

སྱ་སརྦ་བི་ཀལྤཱ་ན་ཨ་པ་ན་ཡ་ཧཱུཾ། རྡོ་རྗེ་རྣོན་པོ་ཆེན་པོ་འདི། །ཡོངས་སུ་རྫོགས་ཤིང་མ་ཉམས་པ། །གཅིག་ནི་མགོ་བོ་གཞན་ནི་བསྟན། །ཨོཾ་བཛྲ་རཀྵ་ཧཱུཾ། བཟླས་པ་སྦྱིན་པར་བྱ་སྟེ། སྔས་དང་སྟན་དུ་བྱིན་ལ། རྡོ་རྗེའི་གོ་བསྐོན་ཏེ། སྐུད་པ་སུམ་སྒྲིལ་
རང་གི་སློབ་མའི་དཔུང་པ་གཡོན་པ་ལ་བཅིང་བར་བྱའོ། །དེ་ཡང་ཡི་གེ་དྲུག་པའི་སྔགས་དང་ཕྱག་རྒྱས་སོ། །སྲུང་བ་བྱས་ལ། སློབ་མ་ལ་ཆོས་བཤད་པར་བྱ་སྟེ། དེ་རིང་ཁྱོད་ནི་དགའ་བ་ཡིན། །རྙེད་པ་ཆེན་པོ་ཁྱེད་ཀྱིས་རྙེད། །དེ་རིང་སངས་རྒྱས་རིགས་སུ་སྐྱེས། །སངས་
རྒྱས་སྲས་པོ་དམ་པ་ཁྱོད། །སངས་རྒྱས་ཀུན་གྱིས་རྗེས་སུ་བཟུང་། །བདག་ཉིད་ཆེན་པོ་རྒྱལ་བའི་སྲས། །ཁྱོད་ནི་ཐེག་པ་ཆེན་པོ་ལ། །དགའ་བའི་རིགས་ཅན་ཐོབ་པར་འགྱུར། །འདི་ནི་ལམ་གྱི་མཆོག་ཡིན་ཏེ། །དཔལ་དང་ལྡན་པའི་ཐེག་པ་ཆེ། །ལམ་འདི་ལ་ནི་ཁྱོད་ཕྱིན་ན། །དེ་
བཞིན་གཤེགས་པར་ཁྱོད་འགྱུར་རོ། །རང་བྱུང་སྐལ་བ་ཆེ་དང་ལྡན། །འཇིག་རྟེན་ཀུན་གྱིས་མཆོད་པར་འགྱུར། །ཡོད་དང་མེད་པའི་དེ་ཉིད་སྤངས། །ནམ་མཁའ་ལྟར་དུ་དྲི་མ་མེད། །ཟབ་མོ་རྟོག་གེའི་ཡུལ་ལས་འདས། །རྟོག་དཔྱོད་ཡུལ་ལས་འདས་པ་པོ། །ཐམས་ཅད་ལྔ་རུ་
གནས་པས་ཏེ། །ལྔ་པ་ཀུན་ཀྱང་དེ་བཞིན་ནོ། །ལས་དང་སྤྱོད་པར་གནས་པ་ཀུན། །གཉིས་མེད་བདེན་པའི་དཔལ་དང་ལྡན། །འདི་ནི་ཐེག་པ་ཆེན་པོའི་མཆོག །འདི་འདྲ་ཁྱོད་ཀྱིས་ཐོབ་པར་འགྱུར། །དེ་སྐད་ཅེས་སློབ་མ་ལ་བརྗོད་པར་བྱས་ལ་སློབ་མ་རྣམས་བསྟན་པར་བྱ་
སྟེ། རྡོ་རྗེ་སློབ་དཔོན་གྱི་བཀའ་དྲིན་གྱིས་ཁྱེད་ཀྱིས་ནང་པར་གྲོལ་བའི་གྲོང་ཁྱེར་ཆེན་པོ་མཐོང་བར་འགྱུར་རོ། །བདུག་པ་ལ་སོགས་པ་ཅི་འབྱོར་པའི་མཆོད་པ་རྣམས་ཤོམས་ཤིག །བཅོམ་ལྡན་འདས་འཁོར་དང་བཅས་པ། བཅོམ་ལྡན་འདས་ཆེ་གེ་མོ་རིག་པ་འཛིན་པའི་རྒྱལ་
པོ་འཁོར་དང་བཅས་པ་ལ་ཕྱག་འཚལ་ཏེ། དཀྱིལ་འཁོར་སྙིང་རྗེ་ཆེན་པོ་བདག །ནང་པར་བདག་ནི་འདྲི་བར་འདོད། །སློབ་མ་རྗེས་སུ་གཟུང་ཕྱིར་དང་། །ཁྱེད་རྣམས་ཀྱིས་ཀྱང་མཆོད་པའི་ཕྱིར། །འདི་ལྟར་བདག་ནི་གུས་པ་ལ། །བཅོམ་ལྡན་འདས་ཀྱིས་བཀའ་དྲིན་མཛོད། །བདག་

71-1-146b

མིང་འདི་ཞེས་བགྱི་བ་ལ། །ཆེ་གེ་དཀྱིལ་འཁོར་ཅེས་པའི་མཆོག །ནང་པར་སངས་རྒྱས་དཀྱིལ་འཁོར་བྲི། །ཇི་ལྟར་འབྱོར་པའི་སྟོབས་ཀྱིས་སོ། །རྗེས་སུ་བཟུང་བའི་ཐབས་ཀྱིས་ནི། །བདག་གི་སློབ་མ་གང་ཡིན་ལ། །དཀྱིལ་འཁོར་ལྷ་ཚོགས་དགོངས་སུ་གསོལ། །དེ་སྐད་ཅེས་
ལན་གསུམ་བརྗོད་དོ། །དེ་ནས་དཀྱིལ་འཁོར་ལེགས་པར་མཆོད་ལ། མཆོད་ཡོན་ལ་སོགས་པ་ཡང་ཕུལ་ཏེ། ལས་ཀྱི་རྡོ་རྗེས་སློབ་མ་དཀྱིལ་འཁོར་གྱི་གནས་སུ་ཉལ་ལ་འདུག་པར་བྱའོ། །གཞན་ཉི་མ་ལ་ལྷའི་རྣལ་འབྱོར་བྱས་ལ། དཀྱིལ་འཁོར་ནམ་མཁའ་ལ་བལྟས་
ཏེ། དཀར་པོ་དང་། དམར་པོ་དང་། ལྗང་གུ་དང་། སྔོན་པོ་དང་། དྲི་བཟང་པོས་བྱུགས་ལ། དོན་གྲུབ་བཏགས་པས་ཀྱང་བྱུགས་ཏེ། དེ་ལྟར་སྐུད་པ་ལྔ་རྣམས་སོ་སོར་བཞག་སྟེ། ཨོཾ་ཏྲཱཾ་ཧྲཱིཿ ཨཿཧཱུཾ། རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་རྣམས་སུ་བསམས་
ལ། དེ་དག་ཀྱང་རང་རང་གི་གནས་སུ་བྱིན་གྱིས་བརླབ་ཅིང་ས་བོན་ལས་འོད་ཟེར་འཕྲོས་པ་དང་། རང་གི་སྙིང་ག་ལས་ཀྱང་འོད་ཟེར་འཕྲོས་ཏེ། དེ་བཞིན་གཤེགས་པ་ལྔའི་བདག་ཉིད་དུ་བྱིན་གྱིས་བརླབ་པར་བྱའོ། །ཨོཾ་དཱིཔྟ་དྲྀཥྚི་ཨཾ་ཀུ་ཤ་ཛ། འདི་ནི་མིག་ལྷག་པར་གནས་པ་
མིག་ཕྱོགས་ཐམས་ཅད་དུ་བལྟ་བར་བྱའོ། །གཟི་མ་བརྟགས་ཏེ་མིག་རབ་ཏུ་བགྲད་པས། སྲད་བུ་ནམ་མཁའ་ལ་བརྐྱང་བ་ལ་བལྟ་བར་བྱའོ། །ཆོས་རྣམས་ཐམས་ཅད་རྗེས་སུ་གཅིག་པ་ལ། །སྤྲོ་ཞིང་བསྡུས་པས་རྗེས་སུ་བརྟན་པར་བྱས། །ཆོས་རྣམས་ཐམས་ཅད་དེ་ཉིད་གཅིག་པ་ཡིན། །
ཧཱུཾ་ཞེས་བརྗོད་ལ་གཅིག་ཏུ་བསྒྲིལ་ལོ། །དེ་ནས་གསེར་ལ་སོགས་པའི་སྣོད་དུ་བཞག་ཅིང་མཆོད་ལ། རྡོ་རྗེ་བསྡམས་པའི་ཕྱག་རྒྱ་བཅས་ལ། སྔགས་འདི་བརྗོད་པར་བྱའོ། །ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུཾ། འདི་ནི་ལན་བརྒྱ་རྩ་བརྒྱད་དུ་བརྗོད་ལ། དེ་ནས་དཀྱིལ་འཁོར་གྱི་ས་
གཞི་ལ། ནམ་མཁའ་ལ་གནས་པ་རྣམས་རབ་ཏུ་བརྟན་པ་ལ། མེ་ཏོག་ལ་སོགས་པས་ཡང་དག་པར་མཆོད་དེ། མིག་གཉིས་སུ་ཡི་གེ་ཛཿ ཡོངས་སུ་གྱུར་པ་ལས། ཟླ་བ་དང་ཉི་མའི་དཀྱིལ་འཁོར་དུ་བལྟས་ལ། བྱང་ཕྱོགས་ཀྱི་སྒྲུབ་པ་པོ་བདུད་རྩི་འཁྱིལ་པའི་གཟུགས་ཀྱིས། 

71-1-147a

གཡོན་པའི་ཁུ་ཚུར་གྱིས་སྐུད་པ་ལྟེ་བར་བཟུང་སྟེ། ཨོཾཿཛཿཛཿཛཿ དེ་སྐད་ཅེས་བརྗོད་པས། བྱང་ཕྱོགས་ཀྱི་སྒྲུབ་པ་པོས་ཀྱང་། ཡང་། ཨོཾཿཛཿཛཿཛཿཞེས་བརྗོད་ཅིང་སློབ་དཔོན་གྱི་ལག་ཏུ་གཏད་དོ། །དེ་ལྟར་སློབ་དཔོན་དང་སློབ་མ་གདོང་ཕྱོགས་པས། ནུབ་དང་ལྷོ་
ཡང་སློབ་དཔོན་གྱི་གནས་ཡིན། ཤར་དང་བྱང་ན་སློབ་དཔོན་གྱི་གནས་སོ། །དེ་སྐད་ཅེས་ནམ་མཁའ་ལ་ཐིག་བཏབ་ལ། སེམས་ཀྱིས་ཕྱོགས་དང་མཚམས་ཐམས་ཅད་ཀྱི་ཕྱོགས་མཉམ་པར་བགོས་ཏེ། དེ་ཉིད་ཀྱི་རིམ་པས་ས་གཞི་ལ་ཚངས་པའི་ཐིག་ལ་སོགས་པ་གདབ་སྟེ། 
ཐིག་སྐུད་སྦོམས་སུ་དཀྱིལ་འཁོར་གྱི་སྒོའི་ཉི་ཤུ་ཆ། དཀྱིལ་འཁོར་ཉིས་འགྱུར་གྱི་ཚད་དོ། །དེ་ཡང་རྡོ་རྗེ་ཁུ་ཚུར་གྱིས་སྐུད་པ་ཤར་ཕྱོགས་སུ་བཟུང་ལ། ནུབ་ཏུའང་དེ་བཞིན་ནོ། །གནོད་སྦྱིན་དང་། ཡི་དྭགས་དང་། ལྷ་དང་། ཀླུ་དང་། དབང་ཕྱུག་དང་བདེན་བྲལ་གྱི་ཕྱོགས་སུ་གདོང་བལྟ་
ཞིང་། མེ་དང་རླུང་དང་ནི་སློབ་དཔོན་གྱི་གནས་ཡིན་ལ། ཤར་དང་ནུབ་དང་བྱང་དང་ཕྱོགས་བཞིར་མཉམ་པར་ཐིག་བཏབ་ལ། དེ་ཡང་ཆ་བརྒྱད་དུ་མཉམ་པར་བྱ་སྟེ། དེ་ཡང་སྐུད་པའི་སྒྲས་དེ་བཞིན་གཤེགས་པ་ཐམས་ཅད་སྤྱན་དྲངས་ཤིང་དགོངས་པར་བསམ་མོ། །དེ་ཡང་སློབ་དཔོན་
སློབ་མའི་གཡས་སུ་བསྐོར་ཞིང་འགྲོ་བར་བྱ་སྟེ། མེ་དང་རླུང་ནི་རྟག་ཏུ་སློབ་དཔོན་གྱི་གནས་ཡིན། སྲིན་པོ་དང་དབང་ལྡན་རྣམས་སུ་ཡང་ཟུར་གྱི་ཐིག་རྣམས་གདབ་བོ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་དང་ཡང་དག་ལྡན། །ཆ་རྣམས་བཅུ་དྲུག་དང་ལྡན་ཞིང་། །རྡོ་རྗེ་ར་བས་ཀུན་ནས་
བསྐོར། །དེ་ལྟར་དུ་ནི་བཤད་པ་ཡིན། །ཕྱི་རོལ་གྱི་དཀྱིལ་འཁོར་ལ་གནས་བཞི་སྟེ། སྙིང་པོའི་ལྟེ་བ་དང་རེའུ་མིག་བརྒྱད་དང་ལྡན་པ། ཕྱི་རོལ་ནས་རྡོ་རྗེ་ར་བས་ཀུན་ནས་བསྐོར་བ། གཉིས་གཉིས་དང་ལྡན་པའི་ཆ་གསུམ་དང་། ཐམས་ཅད་ཀྱི་དབུས་སུ་བརྒྱད་ཆའི་སྒོ་ཚད་དང་། 
སྒོའི་ཕྱེད་ཀྱིས་སྒོ་ཁྱུད་དང་། འགྲམ་དང་། ལོགས་ཀྱང་ངོ་། །འགྲམ་པའི་ཕྱེད་ཀྱི་རྡུལ་ཚོན་གྱིས་དང་། དེ་ནས་འགྲམ་པའི་ཚད་ཀྱིས། མཆོད་པའི་སྣམ་བུའི་ཚད་ཀྱིས་དྲ་བ་དང་དྲ་བ་ཕྱེད་པའི་སའོ། །རྡོ་རྗེའི་ཀ་བ་བརྒྱད་ཀྱིས་ནི་རྡུལ་ཚོན་གྱིས་ཡིན་ལ། སྒོའི་སུམ་འགྱུར་

71-1-147b

གྱིས་རྟ་བབས་སོ། །ཕྱོགས་ཀྱི་གནས་དང་སྙིང་པོའི་གནས་དེ་བཞིན་དུ་ཤེས་པར་བྱའོ། །འཁོར་ལོ་དང་། ཟུར་ལ་རྒྱལ་མཚན་དང་། དྲིལ་བུ་དང་། རྔ་ཡབ་དང་། དཔག་བསམ་གྱི་ཤིང་དང་། དེ་ནས་དཀྱིལ་འཁོར་ལྟེ་བར་ཕུར་པ་བཏབ་ལ། ཕྱི་རོལ་ནས་ཀུན་ནས་བསྐོར་བར་བྱ་སྟེ། 
རྡོ་རྗེའི་ཕྲེང་བ་དང་། དེ་བཞིན་རི་མོ་གཉིས་ཀྱིས་བསྐོར། གསུམ་ཡང་བསྐོར་ལ། ཁ་དོག་ལྔ་པའི་གཞི་ཡང་། རིང་པོ་བཞི་པའི་ཡང་། འཁོར་ལོ་གྲུ་བཞི་མཉམ་པ་ལ་བསྐོར་བ་བྱ། རི་མོ་བཅུ་བདུན། ཆ་བཅུ་དྲུག་དང་ལྡན་པ། གནས་བརྒྱད་ཟླུམ་པོར་བསྐོར་ཏེ། རྡོ་རྗེ་ཕྲེང་
བས་ཀུན་ནས་བསྐོར་བ། ཐམས་ཅད་ཀྱང་སྔོན་དུ་བཤད་པའི་མདོག་དང་ལྡན་པའོ། །དེ་ནས་ཡི་གེ་ཧི་ལས། མིག་གཡས་པ་དང་། གཡོན་པ་གཉིས་ཟླ་བ་དང་ཉི་མའི་དཀྱིལ་འཁོར་དུ་བྱས་ལ། དཀྱིལ་འཁོར་ལ་བལྟས་ལ། ཡེ་ཤེས་ཀྱི་ཐིག་གཤེགས་སུ་གསོལ་ཏེ། དེ་
ནས་བཾ་ལཾ་རཾ་ཧཾ་ཛཾ་ག་ས་བོན་ལས། རིམ་པ་བཞིན་ཡོངས་སུ་རྫོགས་པར་བྱས་ལ། སྐུད་པའི་ཁ་དོག་བཞིན་དུ་དཀར་པོ་ལ་སོགས་པ་རྣམས་ཀྱང་བྱིན་གྱིས་བརླབ་པར་བྱ་སྟེ། རིན་པོ་ཆེ་ལྔ་འམ། ལྕགས་ལྔ་འམ། བ་བླ་ལ་སོགས་པའི་ཁམས་གཞན་ནམ། འབྲས་མཁར་
བ་ལ་སོགས་པའི་འབྲུ་རྣམས་ཀྱིས་ཀྱང་རུང་སྟེ། ཡང་ན་སོ་ཕག་ལ་སོགས་པའི་ས་རྣམས་ཀྱིས་ཀྱང་བྱའོ། །ཨོཾ་ཏྲཾཿཧྲཱིཾཿཨཱཿཧཱུཾ། ས་བོན་འདི་དག་ཡོངས་སུ་རྫོགས་པ་ལས། རང་རང་གི་ཁ་དོག་གི་རིགས་བཞིན་དུ་བྱིན་གྱིས་བརླབ་པར་བྱ་སྟེ། ཨོཾ་བཛྲ་ཙི་ཏྲ་ས་མ་ཡ་ཧཱུཾ། དེ་
བཞིན་དུ་རྡུལ་ཚོན་རྣམས་ལ། ས་བོན་གྱི་འོད་ཟེར་ལས། དེ་བཞིན་གཤེགས་པ་ཐམས་ཅད་སྤྱན་དྲངས་ཏེ་བསྟིམས་ལ། ཡི་གེ་ཧྲཱིཿལས་གཟི་བརྗིད་དང་ལྡན་ཞིང་། རྡོ་རྗེ་ཁྲོ་བོ་ཉི་མའི་ལྟ་བས་བལྟས་ལ། ཨོཾ་བརྗོད་དོ། །ཡི་གེ་ཨ་བརྗོད་ཅིང་སྔགས་དང་ཕྱག་རྒྱ་བཅས་ཏེ། 
རྡུལ་ཚོན་རྣམས་རབ་ཏུ་འབར་བར་བསམ་མོ། །རྡོ་རྗེ་ཁུ་ཚུར་བཅས་ལ། སྙིང་གའི་ཧཱུཾ་ལས་འོད་ཟེར་དྲི་མ་མེད་པ་འཕྲོས་ཏེ་འབར་བར་བསམ་ཞིང་། སཱུརྱ་ཛྭ་ལ་མཎྜལ་ཧཱུཾ་ཕཊ། དེ་ནས་དཀྱིལ་འཁོར་གྱི་ལྟེ་བ་ལ་བཏབ་པའི་ཕུར་པ་ཡི་གེ་ཧཱུཾ་བརྗོད་ཅིང་། རང་གི་རྡོ་རྗེ་དང་བཅས་

71-1-148a

པའི་ལག་པར་བཟུང་ངོ་། །ཕུར་པའི་ཁུང་བུ་ཡང་རྡུལ་ཚོན་ལྔས་དགང་ངོ་། །རྡོ་རྗེ་དང་དྲིལ་བུ་བཟུང་ལ། རྡོ་རྗེའི་གླུ་བླང་ཞིང་། དགའ་བ་དང་ལྡན་པས་བྲི་བར་བྱའོ། །འདི་ནི་ཆོས་དབྱིངས་དག་པ་སྟེ། །སེམས་ཅན་ཁམས་ནི་གྲོལ་བར་བྱེད། །བདག་ནི་རྡོ་རྗེ་
འཛིན་པའི་རྒྱལ། །རྡུལ་ཚོན་ས་གཞིར་བཀོད་པར་བྱ། །དེ་ནས་རྡོ་རྗེ་ཁུ་ཚུར་གྱིས་ལོག་འདྲེན་གྱི་ཕྱོགས་ནས། ཇི་ལྟར་བདེ་བར་རྡུལ་ཚོན་དགོད་པར་བྱའོ། །དེ་ཡང་མཉམ་པར་སྲབ་མཐུག་མེད་པར་གཡས་སུ་བསྐོར་ཞིང་དཀར་པོ་དང་། སེར་པོ་དང་། དམར་པོ་དང་། ལྗང་གུ་
དང་། སྔོན་པོ་རྣམས་རིམ་པས་སྦྱིན་པར་བྱའོ། །གནས་གཉིས་པ་ལ། དཀར་པོ་དང་། དམར་པོ་དང་། ནག་པོ་དང་། ཁ་དོག་གསུམ་སྦྱིན་པར་བྱའོ། །ནང་གི་གནས་གཉིས་ལ། ནག་པོ་འབའ་ཞིག་གིས་བྲི་བར་བྱའོ། །དེ་དག་ཀྱང་སྦོམ་ཕྲ་སྒོའི་ཚད་ཙམ་གྱི་རི་མོ་བཅད་ཅིང་ནས་
ཀྱི་ཚད་ཙམ་དུ་སྦོམ་པར་བྱའོ། །དེ་ཡང་ཤར་ཕྱོགས་དཀར་པོ། གཤིན་རྗེ་སེར་པོ། ཆུ་ལྷའི་ཕྱོགས་དམར་པོ། ལུས་ངན་པོའི་ཕྱོགས་ལྗང་གུ། དབུས་ནག་པོ། དཀྱིལ་འཁོར་བྲི་བའི་དུས་སུ། བགེགས་ཀྱི་མཚན་མ་དང་ལྡན་ན། བགེགས་འཇོམས་པར་བྱེད་པའི་
སྔགས་དང་ཕྱག་རྒྱ་བཅས་ལ། བྱང་ཆུབ་ཀྱི་སེམས་དང་ལྡན་པས་བགེགས་བསྐྲད་པར་བྱའོ། །དེའི་དུས་སུ། ཡི་གེ་ཧཾ་ལས་གླང་པོ་ཆེའི་གདན་དེའི་སྟེང་དུ་ཡི་གེ་ཨོཾ་ལས་པདྨ་དང་ཉི་མའི་གདན། དེའི་དབུས་སུ་བཅོམ་ལྡན་འདས་རང་གི་བཞུགས་སྟངས་དང་ཁ་དོག་གིས་
གནས་པ་ལ། ཛཿཧཱུཾ་བཾ་ཧོཿཞེས་བརྗོད་པས། ཡི་གེ་ཧཱུཾ་བརྗོད་ཅིང་དམ་ཚིག་གི་ཕྱག་རྒྱ་བཅས་ལ་བསྟིམ་པར་བྱའོ། །དེ་ནས་དམ་ཚིག་གི་ཕྱག་རྒྱ་བཅས་ལ། དབང་ཕྱུག་ཆེན་པོ་རང་གི་ཁ་དོག་དང་གདན་དང་བཞུགས་ཐབས་མངོན་རྟོགས་སྒྲུབ་ཐབས་ལས་བཤད་པ་བཞིན་
དུ། ཛཿཧཱུཾ་བཾ་ཧོཿཞེས་བརྗོད་ལ། བཅོམ་ལྡན་འདས་ཀྱི་ཤར་ཕྱོགས་སུ་གཞག་པར་བྱའོ། །འཁོར་ལོ་ཐམས་ཅད་དགུག་པ་དང་། གཞུག་པ་དང་། བསྟིམ་ཞིང་ཡི་གེ་ཧཱུཾ་གིས་གཤེགས་སུ་གསོལ་ལོ། །ཇི་ལྟར་གཤེགས་སུ་གསོལ་བའི་ཚེ། ལག་པ་རྡོ་རྗེ་དང་ལྡན་

71-1-148b

པས་ཐིག་རྣམས་སྟེང་དུ་བཏེག་སྟེ། གཤེགས་སུ་གསོལ་ལོ། །དེ་ནས་སྔོན་དུ་བཤད་པའི་བུམ་པ་དྲི་བཟང་པོའི་ཆུས་བཀང་བ་མེ་ཏོག་གིས་བརྒྱན་ཏེ། བརྒྱད་དབང་ལྔ་ལ་སོགས་པ་དཀྱིལ་འཁོར་གྱི་ཕྱོགས་དང་མཚམས་དགོད་པར་བྱའོ། །དེ་ནས་རྡོ་རྗེ་སློབ་དཔོན་ཁྲོ་བོའི་
ཏིང་ངེ་འཛིན་དང་ལྡན་པས། གོས་སྔོན་པོ་བགོས་ཏེ་མེ་ཏོག་སྔོན་པོའི་ཕྲེང་བས་བཅིངས་ལ། དྲིལ་བུ་དཀྲོལ་ཞིང་བསྐོར་བ་ལན་གསུམ་བྱ་སྟེ། མེ་ཏོག་སྔོན་པོས་མཆོད་ལ། དཀྱིལ་འཁོར་གྱི་གནས་སུ་སོང་ལ་གར་བྱ་ཞིང་། མེ་ཏོག་གི་ཕྲེང་བ་བླངས་ལ། གར་བྱ་ཞིང་
མཆོད་ཡོན་ཕུལ་ལ། སྔགས་འདི་བརྗོད་པར་བྱའོ། །བཛྲོད་གྷ་ཊ་ཡ་ས་མ་ཡ་པྲ་བེ་ཤ་ཡ་ཧཱུཾ། རང་ཉིད་ཁྲོ་བོ་ཆེན་པོའི་ང་རྒྱལ་གྱིས་ཤར་སྒོ་ནས་སོང་སྟེ། ནུབ་ཀྱི་གོར་གནས་ལ། ལྷོ་དང་བྱང་གི་ཡང་སྒོར་ཕྱིན་ཏེ། དེ་ནས་རོལ་པའི་གར་གྱིས། ཤར་གྱི་གོར་བུམ་པའི་
ཕྱི་རོལ་ཏུ་ཕྱིན་ལ། མེ་ཏོག་གི་གཅལ་བཀྲམ་སྟེ། སྔོན་དུ་བཟླས་པ་ལ། ཨོཾ་ཏིཥྛི་སིདྡྷི་ཧཱུཾ། སྔགས་འདི་བརྗོད་ཅིང་དམ་ཚིག་གི་ཕྱག་རྒྱ་བཅའོ། །མེ་ཏོག་གི་ཕྲེང་བ་བླངས་ལ། ཡི་གེ་བཞི་པའི་སྔགས་སྟོང་ཕྲག་བརྒྱད་བཟླས་པར་བྱའོ། །དེ་ནས་དཀྱིལ་འཁོར་ལ་ལན་
གསུམ་བསྐོར་ཏེ། བསྐོར་བ་གསུམ་བྱས་ལ་དཀྱིལ་འཁོར་གྱི་བདག་པོའི་མདུན་དུ་གཞག་པར་བྱའོ། །ཡང་བུམ་པ་གཉིས་པ་བླངས་ལ། བརྒྱ་ཕྲག་བརྒྱད་བཟླས་པར་བྱའོ། །བུམ་པ་གཉིས་པའི་ཆུས་བདག་ཉིད་དང་སློབ་མའི་མགོ་ལ་གཏོར་བར་བྱའོ། །ཁྲོ་བོ་ཆེན་
པོའི་སྔགས་དང་ཕྱག་རྒྱ་བཅིང་ཞིང་བསྟིམས་ལ། དབང་ཕྱུག་ཆེན་པོའི་མཚན་མ་ཅན་གྱི་བུམ་པ་ལ་སོགས་པ་བླངས་ཏེ། རང་རང་གི་སྔགས་ཀྱིས་བརྒྱ་ཕྲག་བརྒྱད་བཟླས་ཏེ། དཀྱིལ་འཁོར་གྱི་ཕྱི་རོལ་རང་རང་གི་གནས་སུ་གཞག་པར་བྱའོ། །ཆུ་ཡིས་གང་པོས། 
དེ་ནས་རྣམ་པར་རྒྱལ་བའི་བུམ་པ་དང་། གཞན་ལ་འབྱོར་ན། དབང་ཕྱུག་ཆེན་པོ་དང་། བརྒྱ་བྱིན་དང་། ཉི་མ་དང་། མེ་ལྷ་རྣམས་ལ་བུམ་པ་གཅིག་གོ། །པདྨའི་དཔལ་མོ་དང་། རིན་ཆེན་དཔལ་མོ་དང་། རིན་ཆེན་དཔལ་མོ་ཆེན་མོ་དང་། དེའི་རིམ་པས་དབང་བསྐུར་

71-1-149a

བར་འགྱུར་རོ། །བུམ་པ་བཅུ་ལས་ཉུང་བ་ནི་མ་ཡིན་ལ། བུམ་པ་བཅུ་རྣམ་པར་གང་བས་དབང་བསྐུར་བར་འགྱུར་རོ། །དེ་ལྟར་དཀྱིལ་འཁོར་དེ་མངོན་སུམ་དུ་གནས་པ་ལ་མཆོད་ཅིང་། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་པྲ་ཎ་མེ་ན་བཛྲ་བནྡ་ནཱཾ་ཀ་རོ་མཱི་
ཏི་པྲ་ཎ་མ། སྔོན་དུ་བཤད་པའི་སྐྱབས་དཀོན་མཆོག་གསུམ་ལ་སྐྱབས་སུ་འགྲོ་བ་བྱ་ཞིང་སྡོམ་པ་ཡང་གཟུང་བར་བྱའོ། །བྱང་ཆུབ་སེམས་ནི་བསྐྱེད་པར་བགྱི། །སེམས་ཅན་མ་ལུས་བསྒྲལ་བའི་ཕྱིར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །
ཚུལ་ཁྲིམས་སྡོམ་པ་རྣམ་པ་གསུམ། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་ཀྱང་ནི་བརྟན་པར་གཟུང་། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །མཆོག་ཏུ་གུས་པས་གཟུང་བར་
བགྱི། །སྡོམ་པ་སངས་རྒྱས་རྣལ་འབྱོར་ཅན། །རྡོ་རྗེ་དྲིལ་བུའི་ཕྱག་རྒྱ་ཡང་། །བདག་གིས་དེ་ཉིད་གཟུང་བར་བགྱི། །རྡོ་རྗེ་ཆེན་པོའི་རིགས་དག་ལ། །སྦྱིན་པ་རྣམ་བཞི་སོ་སོར་སྦྱིན། །ཉིན་རེ་བཞིན་ལའང་དུས་དྲུག་ཏུ། །རིན་ཆེན་ཆེན་པོའི་རིགས་མཆོག་སྦྱོར། །ཏིང་
འཛིན་རབ་ཏུ་དགའ་བ་ཡིས། །ཆོས་རྣམས་ཐམས་ཅད་གཟུང་བར་བགྱི། །ཕྱི་ནང་གསང་བའི་ཐེག་པ་གསུམ། །པདྨ་ཆེན་པོའི་རིགས་དག་པ། །བྱང་ཆུབ་ཆེན་པོའི་རིགས་བྱུང་བ། །སྡོམ་པ་ཐམས་ཅད་ལྡན་པར་ནི། །དེ་ཉིད་བདག་གིས་གཟུང་བར་བགྱི། །མཆོད་པའི་
ལས་རྣམས་ཅི་འབྱོར་པ། །ལས་ཀྱི་རིགས་ནི་ཆེན་པོ་ལ། །མཆོག་ཏུ་བསྐྱེད་པར་བགྱི་བ་ནི། །བྱང་ཆུབ་སེམས་ནི་རྗེས་བསྒྲལ་བ། །སྡོམ་པ་གཟུང་བར་བགྱི་བ་ནི། །སེམས་ཅན་ཀུན་གྱི་དོན་གྱི་ཕྱིར། །མ་བསྒྲལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་གྲོལ་བར་བགྱི། །
དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད། །དེ་ནས་ཉེས་པ་འཇོམས་པར་བྱེད་པའི་སྔགས་བརྗོད་ཅིང་། གོ་ཆ་བགོས་ཏེ། ཧཱུཾ་བཟླས་ཤིང་གོས་སྔོན་པོ་གོན་ཏེ། ཕྲག་པ་ཕུད་དེ་གཙུག་ཏོར་དང་ལྡན་པས། མེ་ཏོག་གི་ཕྲེང་བའི་དོ་ཤལ་

71-1-149b

ལ། དྲི་བཟང་པོས་བྱུགས་ཤིང་། རྒྱན་ཐམས་ཅད་ཀྱིས་བརྒྱན་ཏེ། སྒོ་སྲུང་གི་སྔགས་བཟླས་ཤིང་། གོས་སྔོན་པོས་སྟོད་བཅིངས་ལ། ཕྱི་རོལ་དུ་གནས་པ་ལ་བུམ་པའི་ཆུས་གདབ་པར་བྱའོ། །ཁྲོ་བོའི་ཕྱག་རྒྱ་བཅིངས་ལ། སློབ་མ་ལ་གོ་ཆ་བསྐོན་ཅིང་སྲུང་བ་བྱས་ལ། 
སློབ་དཔོན་གྱིས་འདི་སྐད་ཅེས་བརྗོད་པར་བྱ་སྟེ། སེམས་ཅན་ཀུན་གྱི་དོན་གྱི་ཕྱིར། །དེ་མ་ཐག་ཏུ་དངོས་གྲུབ་ཐོབ། །ཁྲོ་བའི་རྒྱལ་པོ་གྲུབ་པའི་བདག །དམ་ཚིག་ལྷ་རྣམས་བརྟན་པར་བྱེད། །དེ་ནས་ཁྲོ་བོའི་ཕྱག་རྒྱ་བཅིངས་ལ། བཛྲ་ཀྲོ་དྷ་ཧཱུཾ་ཧཱུཾ་ཕཊ་ཕཊ། དེ་སྐད་ཅེས་བརྗོད་
ལ། ནང་དུ་གཞུག་ཅིང་བརྗོད་པར་བྱ་བ་ནི། རྡོ་རྗེ་ཁྲོ་བོ་རང་གིས་དབབ་པ་བྱ་སྟེ། ཏིཥྛ་བཛྲ། དེ་ལ་སོགས་པའི་སྔགས་ཀྱིས་རྣམ་པར་གྲོལ་བའི་ཕྱག་རྒྱ་བསྟན་པར་བྱ་སྟེ། ཕྲེང་བ་བཞག་ཅིང་གདོང་པ་དཀྲོལ་ལ། དེ་ནས་ཆུའི་དབང་དམ་ཚིག་གསུམ་སྦྱིན་ཞིང་། བཅོམ་ལྡན་
འདས་ཐམས་ཅད་སློབ་དཔོན་གྱི་གཟུགས་ཀྱི་གནས་པར། སྔོན་དུ་བརྗོད་པའི་རིམ་པས་བསམ་པར་བྱའོ། །དེ་ནས་དམ་ཚིག་གསུམ་གྱི་དོན་དུ་དབང་རྫས་སྦྱིན་ཞིང་། ཚིགས་སུ་བཅད་པ་ལྔས་བསྟོད་ལ། ཡི་གེ་བཞི་པའི་སྔགས་བརྗོད་ཅིང་ཕྱག་རྒྱ་བཅས་ཏེ། ལུང་བསྟན་
པ་བཟུང་ཞིང་ཡང་རྡོ་རྗེའི་མཆོག་སྦྱིན་པར་བྱེད་པ་རྡོ་རྗེ་ཆེ་གེ་མོ་ཞེས་བྱ་བ་ཁྱོད། ཆེ་གེ་མོ་ཞེས་བྱ་བའི་མིང་གིས། དཀྱིལ་འཁོར་བསྒོས་ན་རིམ་པ་འདིས། བཅོམ་ལྡན་འདས་ཀྱི་ཕྱག་རྒྱ་དང་སྔགས་བཟླས་པས། ཨའི་དབང་ཕྱུག་དེའི་གནས་སུ་ཁྲོ་བོའི་རྡོ་རྗེ་རང་གིས་གཟུང་
ཞིང་། ཁྲོ་བོའི་ང་རྒྱལ་བྱས་ལ། དེ་ནས་རྡོ་རྗེ་ཆེན་པོ་གཟུང་ངོ་། །ཁྲོ་བོའི་བདག་པོ་ཆེན་པོའི་ང་རྒྱལ་དུ་གནས་པས། དེ་ནས་སྔོན་ཁྲོ་བོའི་དབང་པོ་འགུགས་པའི་ཕྱག་རྒྱ་བཤད་པ། བཅོམ་ལྡན་འདས་ཀྱི་དཀྱིལ་འཁོར་ལ་རབ་ཏུ་བསྟོད་ཅིང་། སྔོན་གྱི་ཉེས་པ་འཇོམས་
པར་བྱེད་པའི་སྔགས་བཟླས་ཏེ། ཕྱོགས་བཅིང་བ་དང་། རྩིག་པ་དང་། ར་བ་དང་གུར་བསམས་ལ། མཆོད་ཡོན་དང་ཞབས་བསིལ་དབུལ་ཞིང་། དམ་ཚིག་ལ་གནས་པས། ཛཿཧཱུཾ་བཾ་ཧོཿས་མ་ཡ་སྟྭཾ། དེ་སྐད་ཅེས་སྒྲུབ་པ་པོས་བརྗོད་ལ། དེ་ལྷ་ཆེན་པོ་ལ་སོགས་

71-1-150a

པ་རྣམས་རང་རང་གི་དམ་ཚིག་ལ་གནས་པའི་ལྷའི་དཀྱིལ་འཁོར་བསྒོམ་པར་བྱའོ། །སྒྲུབ་ཐབས་དང་ཕྱག་རྒྱ་དང་དབང་ཡོངས་སུ་རྫོགས་པར་བྱས་ལ། ཉེས་པ་འཇོམས་པར་བྱེད་པའི་སྔགས་བརྗོད་ཅིང་། བདུག་པ་ལ་སོགས་པས་ཡང་དག་པར་མཆོད་
ཅིང་། མཆོད་ཡོན་ཡང་སྦྱིན་ལ། གོས་ལ་སོགས་པས་ཡང་དག་པར་མཆོད་ལ། དཔག་ཏུ་མེད་པའི་པི་ཝང་དང་། རྒྱལ་མཚན་མང་པོས་མཆོད་ཅིང་། ཨོཾ་དང་ཧཱུཾ་བརྗོད་ཅིང་། སྤྲོས་ཅིང་བསྡུས་པས། དེ་ནས་མེ་ཏོག་དང་སྤོས་དང་བདུག་པ་དང་མར་མེ་དང་། 
ཞལ་ཟས་རྣམས་ཀྱིས་མཆོད་པར་བྱ་སྟེ། ཨོཾ་བཛྲ་གནྡྷེ་ཧཱུཾ། དྲིའི་ཕྱག་རྒྱ་བཅས་ལ། ཇི་ལྟར་འབྱོར་པའི་དྲིས་མཆོད་པར་བྱའོ། །དེ་བཞིན་དུ། ཨོཾ་བཛྲ་པུཥྤེ་ཧཱུཾ། མེ་ཏོག་གི་ཕྱག་རྒྱའོ། །ཨོཾ་བཛྲ་དྷཱུ་པེ་ཧཱུཾ། འདི་ནི་བདུག་སྤོས་ཀྱི་ཕྱག་རྒྱས་སོ། །ཨོཾ་བཛྲ་ཨཱ་ལོ་ཀེ་ཧཱུཾ། 
མར་མེའི་ཕྱག་རྒྱས་སོ། །དེ་དག་གིས་དཔག་ཏུ་མེད་པའི་མཆོད་པའི་སྤྲིན་རྣམས་སྤྲོས་ཤིང་། བཟའ་བ་དང་། བཅའ་བ་དང་། ལོངས་སྤྱོད་པ་དང་། བལྡག་པ་དང་། གཞིབ་པ་དང་། བཏུང་བ་རྣམས་ཀྱིས་ཀྱང་མཆོད་པར་བྱའོ། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་
ནུཏྤན་ན་ཏྭཱ་ཏ། འདིས་རྡོ་རྗེ་དྲི་དང་། རལ་གྲིའི་ཕྱག་རྒྱས་དབུལ་བར་བྱའོ། །རྡོ་རྗེ་ཁུ་ཚུར་གྱིས་སོར་མོ་རྣམས་བསྒུལ་ཞིང་རོལ་མོའི་ཕྱག་རྒྱས་ཡི་གེ་ཧཱུཾ་བརྗོད་ཅིང་དབུལ་བར་བྱའོ། །རོལ་མོ་དང་། གར་དང་། རྒྱན་དང་། ལག་གདུབ་དང་། སོར་གདུབ་དང་། རྣ་རྒྱན་དང་ཅོད་
པན་ལ་སོགས་པ། ཨོཾ་བརྗོད་ཅིང་དབུལ་བར་བྱའོ། །གླང་པོ་ཆེ་དང་། བ་གླང་དང་། དེ་བཞིན་རྣ་བབས་དང་། གོས་བཟང་པོ་དང་། དྲིལ་བུ་དང་། རྔ་ཡབ་དབུལ་བར་བྱའོ། །ཨོཾ་སརྦ་བིད་པཱུ་ར་པཱུ་ར་ཨཱ་བརྟ་ཨཱ་བརྟ་ཧོ། དེ་ནས་རྡོ་རྗེ་སོར་མོ་རྣམས་སྤྱི་བོར་བཞག་ལ། སྔོན་
གྱི་ཨོཾ་བརྗོད་ཅིང་དབུལ་བར་བྱའོ། །བྱང་ཕྱོགས་སུ་ལས་ཀྱི་རྡོ་རྗེ་སློབ་དཔོན་གནས་ནས། དེ་ནས་ཁ་བཤལ་ལ། དཀྱིལ་འཁོར་གྱི་སྔོན་དུ་འདུག་སྟེ། ཡི་གེ་བཞི་པའི་སྔགས་སྟོང་ཕྲག་གཅིག་བཟླས་ཤིང་། དེ་བཞིན་དུ་དཀྱིལ་འཁོར་གྱི་ལྷ་རྣམས་ཀྱིས་ཀྱང་བཟླས་པར་

71-1-150b

བྱའོ། །དཀྱིལ་འཁོར་གྱི་ཤར་ཕྱོགས་སུ་གདོང་ཕྱོགས་ནས། ལས་ཐམས་ཅད་པའི་ཐབ་ཏུ་དཀྱིལ་འཁོར་གྱི་ལྷའི་རྣལ་འབྱོར་དང་ལྡན་པས། མེ་ཏོག་དང་མར་མེ་རྣམས་ཡི་གེ་བཞི་པའི་སྔགས་ཀྱིས་བརྒྱ་རྩ་བརྒྱད་སྦྱིན་སྲེག་བྱ་སྟེ། དབང་ཕྱུག་ཆེན་པོས་གཙོ་བྱས་པའི་
དཀྱིལ་འཁོར་གྱི་ལྷ་ཐམས་ཅད་ལ་སྔགས་བདུན་བདུན་གྱིས་དབུལ་ལོ། །དེ་ནས་མེའི་ཐབ་ཏུ། རྡོ་རྗེ་འཛིན་པ་ཆེན་པོས་མེ་ཏོག་དང་། སྤོས་ལ་སོགས་པ་དཀྱིལ་འཁོར་གྱི་ལྷ་ལ་དབུལ་ཞིང་། དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ། འདི་སྐད་ཅེས་བརྗོད་པར་བྱའོ། །
བདག་ནི་སྡོམ་པ་ཀུན་དང་ལྡན། །དམ་ཚིག་མགོན་པོས་རྗེས་སུ་གཟུང་། །ཕྱོགས་རྣམས་ཀུན་ན་བཞུགས་པ་རྣམས། །བདག་མིང་འདི་ཞེས་བགྱི་བ་ལ། །དཔང་པོར་གནས་པར་མཛད་དུ་གསོལ། །གསང་བའི་དཀྱིལ་འཁོར་ཆེན་པོ་འདིར། །སངས་རྒྱས་གར་མཛད་སྡོམ་
པ་ལ། །འཁོར་ལོ་རབ་ཏུ་བསྐོར་བར་མཛོད། །རྣམ་པར་གྲོལ་བའི་གྲོང་ཁྱེར་དུ། །མགོན་པོ་བདག་ནི་འཇུག་པར་འཚལ། །སློབ་དཔོན་ཆེན་པོ་ཁྱེད་ཀྱིས་ནི། །གསང་བ་ཆེན་པོའི་དཀྱིལ་འཁོར་དུ། །བདག་ནི་སྐལ་བར་ལྡན་པར་མཛོད། །དབང་བསྐུར་ཆེན་པོ་སྩལ་དུ་
གསོལ། །སློབ་དཔོན་བདག་ལ་སྦྱིན་པར་མཛོད། །མཚན་རྣམས་ཀུན་དང་ལྡན་པ་པོ། །བདག་ནི་རྗེས་སུ་གཟུང་དུ་གསོལ། །སངས་རྒྱས་སྐུ་བདག་ཡིད་དགའ་བ། །གཏེར་མཛོད་སློབ་དཔོན་ཆེན་པོ་ཁྱོད། །དབང་བསྐུར་ཆེན་པོ་སྩལ་དུ་གསོལ། །སེམས་ཅན་ཀུན་གྱི་དོན་གྱི་
ཕྱིར། །བདག་ཀྱང་སློབ་དཔོན་འགྱུར་བར་མཛོད། །དེ་སྐད་དུ་སློབ་དཔོན་ལ་མཎྜལ་ཕུལ་ཏེ་ཞུ་བར་བྱའོ། །བདག་ནི་སློབ་དཔོན་འདི་ཞེས་པས། །བྱང་ཆུབ་སེམས་ཀྱིས་གཟུང་བར་བྱ། །གསང་བའི་དཀྱིལ་འཁོར་འདོད་པ་ལ། །དཀྱིལ་འཁོར་འདིར་ནི་བསྟན་པར་བྱ། །
དེ་ནས་སློབ་དཔོན་གྱིས་དྲི་བར་བྱ། སྐྱེས་བུ་ཆེན་པོ་ཁྱོད་འདོད་པ། །གསང་བའི་རིགས་ནི་དག་པས་ཏེ། །དག་པ་བཞད་མཛད་ཟབ་མོ་གཟུང་། །དེ་ནས་འདི་སྐད་ཅེས་བརྗོད་པར་བྱའོ། །སློབ་མ་བདག་ནི་འདོད་དོ་ཞེས་བརྗོད་ལ། དེ་ནས་སློབ་དཔོན་དམ་ཚིག་དང་སྡོམ་པ་
71-1-151a

དང་ལྡན་པས། ཇི་ལྟར་བཀའ་སྩལ་པ་བཞིན་དུ་བདག་གིས་བགྱིས་ཏེ། དེ་ནས་བྱང་ཆུབ་ཀྱི་སེམས་བསྐྱེད་པ་དང་། འགྲོ་བ་དང་བསྟན་པ་ཐམས་ཅད་དུ། ཡང་དབང་བསྐུར་བར་འདོད་ཀྱིས་སྡོམ་པ་མི་བཟུང་ངོ་ཞེ་ན། དེ་ལ་དཀྱིལ་འཁོར་ཀྱང་བསྟན་
པར་མི་བྱ་ཞིང་དབབ་པར་མི་བྱའོ། །འགའ་ཞིག་སྡོམ་པ་དང་དམ་ཚིག་གཟུང་བར་འདོད་པ་ལ་ནི། སློབ་དཔོན་གྱིས་རྗེས་སུ་བཟུང་ཞིང་། དབང་སྦྱིན་པར་བྱའོ། །དེ་ནས་ཉེས་པ་འཇོམས་པར་བྱེད་པའི་སྔགས་བརྗོད་དེ། ཨོཾ་སརྦ་ཡོ་ག་ཙིཏྟཱ་ཨུཏ་པཱ་ད་ཡཱ་མི། སྔགས་
འདི་བརྗོད་ལ་བྱང་ཆུབ་ཀྱི་སེམས་དང་ལྡན་པར་བྱའོ། །སློབ་མའི་སྙིང་གར་རྡོ་རྗེ་རབ་ཏུ་གནས་པ་བྱས་ལ། ཨོཾ་སུ་ར་ཏ་ས་མ་ཡ་སྟྭཾ་ཧོ། བཛྲ་སིདྡྷྱ་ཡ་ཐཱ་སུ་ཁཾ། དེ་རིང་ཁྱོད་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབ་པར་འགྱུར་ཏེ། དེ་རིང་ཁྱོད་དེ་བཞིན་
གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་མཐོང་བར་འགྱུར་གྱིས། ཁྱོད་ཀྱིས་དཀྱིལ་འཁོར་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ། གུས་པ་དང་བྲལ་བ་རྣམས་ལ་ཡང་མ་ཡིན་ནོ། །དེ་ནས་སློབ་མས་ཡོན་ཕུལ་ལ། ཁྲོ་བོའི་རྒྱལ་པོས་
བྱིན་གྱིས་བརླབ་པར་བྱའོ། །དེའི་རྗེས་སུ་བརྟེན་པར་གནས་པ་ལ། བུམ་པའི་ནང་ནས་ཆུ་བླངས་པས་གཏོར་ཞིང་མགོ་ཐོག་ཏུ་བཞག་པས་བསྲུང་སྟེ། ཁྲོ་བོའི་རྒྱལ་པོའི་ཕྱག་རྒྱས་གོ་ཆ་བསྐོན་ལ། མེ་ཏོག་སྔོན་པོའི་ཐོད་བཅིང་ཞིང་། དཀྱིལ་འཁོར་བསྟན་པར་བྱའོ། །
ཨོཾ་བཛྲ་དྷ་རེ། དེ་ལས་གསང་བའི་སྔགས་ཀྱིས་དགུག་པར་བྱ་སྟེ། འདི་སྐད་ཅེས་བརྗོད་པར་བྱའོ། །མ་ཧཱ་སུ་ར་ཏ་སུ་དྲྀ་ཌྷ་དུ་ཏོ་སྭཱཧཱ། བཛྲ་ས་ཏྭཱ་ཨདྱ་སི་དྷྱ་མཱཾ། ཡང་འདི་སྐད་ཅེས་བརྗོད་པར་བྱ་སྟེ། དེ་རིང་སངས་རྒྱས་རིགས་སུ་སྐྱེས། །དེ་རིང་རྡོ་རྗེའི་ཡེ་ཤེས་
ཐོབ། །ཡེ་ཤེས་དེ་ཡིས་དེ་རིང་ཁྱོད། །དེ་བཞིན་གཤེགས་པ་ཐམས་ཅད་ཀྱིས། །དངོས་གྲུབ་ཀྱང་ནི་ཐོབ་འགྱུར་ན། །གྲུབ་པ་གཞན་ལྟ་སྨོས་ཅི་དགོས། །དཀྱིལ་འཁོར་དམ་པ་ཁྱེད་ཀྱིས་མཐོང་། །མ་མཐོང་བ་ལ་སྨྲ་མི་བྱ། །གལ་ཏེ་ཁྱོད་ཀྱིས་འདི་སྨྲས་ན། །

71-1-151b

དམ་ཚིག་རྣམ་པར་འགྱུར་བ་ཡིན། །དབབ་པའི་ཕྱག་རྒྱ་བཅས་ལ། དེ་སྐད་ཅེས་སློབ་མའི་མགོ་ཐོག་ཏུ་རྡོ་རྗེ་བཞག་ལ་སྨྲ་བར་བྱའོ། །འདི་ནི་དམ་ཚིག་རྡོ་རྗེ་སྟེ། །ཁྱོད་ཀྱིས་གལ་ཏེ་འདི་སྨྲས་ན། །ངེས་པར་མགོ་བོ་འགས་པར་འགྱུར། །དེ་ནས་དམ་ཚིག་གི་ཆུ་སྦྱིན་པར་བྱས་
ཏེ། སྙིང་པོའི་སྔགས་བཟླས་སོ། །སློབ་མས་འཐུང་བའི་དུས་སུ་འདི་སྐད་བརྗོད་པར་བྱ་སྟེ། དེ་རིང་རྡོ་རྗེ་སེམས་དཔའ་ནི། །ཁྱོད་ཀྱི་སྙིང་ལ་ཡང་དག་གནས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཨོཾ་ཏིཥྛ་སིདྡྷི་ཧཱུཾ། འདི་ནི་ཁྱོད་ཀྱི་དམྱལ་
བའི་ཆུ། །དམ་ཚིག་འདས་ན་རླག་པར་བྱེད། །དམ་ཚིག་བསྲུངས་ན་གྲུབ་པར་གྱུར། །རྡོ་རྗེ་བདུད་རྩིའི་ཆུ་འཐུང་ཅིག །རྡོ་རྗེ་དྲིལ་བུའི་ཕྱག་རྒྱ་སྤྱི་བོར་བཞག་ལ། གུས་པ་དང་ལྡན་པ་དང་མི་ལྡན་པའི་བསམ་པ་བརྟགས་ལ། སློབ་མ་ལ་འདི་སྐད་ཅེས་བརྗོད་པར་བྱ་སྟེ། དེ་རིང་
ཕན་ཆེད་ཁྱོད་ཀྱི་རྡོ་རྗེ་འཛིན་པ་ང་ཡིན་ཏེ། ངས་ཇི་སྐད་ཅེས་པ་དེ་ཁྱོད་ཀྱིས་བྱ་དགོས་སོ། །དེ་ལྟ་མ་ཡིན་ན་ཁྱོད་ཡིད་མི་བདེ་བ་ཆེན་པོ་དང་བཅས་ནས་ཚེའི་དུས་བྱས་ཏེ། དམྱལ་བར་འཇུག་པར་གྱུར་ཏ་རེ། དེ་ནས་རང་གི་སྙིང་གར་ཡི་གེ་ཨ་ལས་འོད་ཟེར་དམར་པོ་འཕྲོས་
པས། སྒོ་དབྱེ་བའི་ཕྱག་རྒྱ་བཅས་ཏེ་སློབ་མའི་སྙིང་གའི་རྡོ་རྗེ་ལ་ཞུགས་ནས། ལུས་ཐམས་ཅད་ཁེངས་པར་བསམ་ཞིང་། དེ་ནས་འདི་སྐད་བརྗོད་པར་བྱ་སྟེ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱི་རླབས་ཀྱིས། རྡོ་རྗེ་ཁྲོ་བོ་བདག་ལ་དབབ་པར་མཛད་
དུ་གསོལ། དེ་ནས་དབབ་པའི་ཕྱག་རྒྱ་སྙིང་གར་བཅས་ལ། འདི་སྐད་ཅེས་བརྗོད་པར་བྱ་སྟེ། འདི་ལྟར་དམ་ཚིག་རྡོ་རྗེ་འདི། །རྡོ་རྗེ་སེམས་དཔའ་དྲན་པར་བྱ། །ངེས་པར་ཁྱོད་ལ་འབབ་པར་འགྱུར། །རྡོ་རྗེ་ཡེ་ཤེས་རྗེས་སུ་སྒྲོལ། །ཨཱོཾ་པྲ་བེ་ཤ་བཛྲ་ཀྲོ་དྷ་ཧཱུཾ་ཧཱུཾ་ཧཱུཾ་ཨ། ཇི་
ལྟར་ནམ་མཁའ་ལས་ཁྲོ་བོའི་དབང་པོས་འབེབས་པར་བསམ་ཞིང་སྔགས་དེ་བརྗོད་པར་བྱའོ། །དེས་ཀྱང་འབབ་པར་མ་གྱུར་ན། དེ་ནས་ཁྲོ་བོ་དབབ་པའི་ཕྱག་རྒྱ་བཅས་ལ། སློབ་དཔོན་གཡོན་བརྐྱང་པས་གནས་ལ། རྡོ་རྗེ་འཛིན་རྣམ་པར་སྣང་མཛད་ཀྱི་གཟུགས་སུ་བལྟས་ལ། 

71-1-152a

སློབ་མའི་སྤྱི་བོར་གནས་པར་བསམས་ལ། འོད་ཟེར་གྱིས་ལུས་གང་བར་བསམ་ཞིང་། རླུང་གིས་རབ་ཏུ་གཡོས་པ་ལ་དམིགས་པ་གཏད་དེ། ཧཱུཾ་གིས་བྱིན་གྱིས་བརླབ་པར་བྱའོ། །རྡོ་རྗེ་སློབ་དཔོན་རང་ཉིད་མི་བསྐྱོད་པའི་གཟུགས་སུ་གནས་པས། ཧཱུཾ་ཏྲཱཾཿ 
ཧྲཱིཿཨཿ ས་བོན་འདི་རྣམས་འོད་ཟེར་འཕྲོས་པ། སློབ་མའི་ཁར་འཇུག་པར་བསམ་པར་བྱའོ། །ཨོཾ་པྲ་བེ་ཤ་ཀྲོ་དྷ་ཧཱུཾ་ཧཱུཾ་ཧཱུཾ་ཨཿ ཛྲ་ལཱ་མ་ལ་ཀུ་ལ་བ་ཁ་ན་བཛྲ་ཨ། དེས་ཀྱང་མི་འབབ་ན། སློབ་མ་སྡིག་པ་མང་པོ་བྱས་པས། སྡིག་པ་འདྲལ་བའི་ཕྱག་རྒྱ་བཅས་ལ། སྡིག་པ་
གཞོམ་པར་བྱས་ཏེ། བཅོམ་ལྡན་འདས་རྡོ་རྗེ་འཛིན་པ་སྐུ་མདོག་དམར་པོ། འོད་ཟེར་དམར་པོ་ཀུན་ནས་འབར་བའི་ཕྲེང་བས་བསྐོར་བ་བསམ་པར་བྱས་ལ། ཧཱུཾ་ཨཱཿ སྔགས་འདི་མང་དུ་བཟླས་པར་བྱའོ། །དེས་ཀྱང་འབབ་པར་མ་གྱུར་ཀྱང་། དབང་བསྐུར་བ་ནི་སྦྱིན་
པར་བྱའོ། །དེའི་ཚེ་འབབ་པར་འགྱུར་ན་མངོན་པར་ཤེས་པ་ལྔ་དང་ལྡན་པར་འགྱུར་རོ། །དེའི་བབས་པར་གྱུར་ན། ལྕེ་ལ་རྡོ་རྗེ་བསམས་ལ་འདི་སྐད་ཅེས་བརྗོད་པར་བྱ་སྟེ། འདས་པ་དང་། མ་འོངས་པ་དང་། དེ་ལྟར་བྱུང་བ་ཐམས་ཅད་སྨྲོས་ཤིག་ཅེས་བརྗོད་པས་སྨྲ་བར་
འགྱུར་རོ། །དེ་ནས་སྙིང་གར་རྣམ་པར་གྲོལ་བའི་ཕྱག་རྒྱ་བཅས་ལ། ཏིཥྛ་བཛྲ་དྲྀ་ཌྷོ་མེ་བྷ་བ་ཤཱ་ཤྭ་ཏོ་མེ་བྷ་བ། ཧྲྀ་ད་ཡ་མེ་ཨ་དྷི་ཏིཥྛ་སརྦ་སིདྡྷི་མྨེ་པྲ་ཡཙྪ་ཧཱུཾ་ཧ་ཧ་ཧ་ཧ་ཧོཿ འདིས་ཡེ་ཤེས་བརྟན་པར་བྱས་ལ། དེ་ནས་ཡི་གེ་ཏྲཱཾ་གིས་བྱིན་གྱིས་བརླབས་ལ། དཀྱིལ་འཁོར་བསྟན་
པར་བྱ་སྟེ། པྲ་ཏཱིཙྪ་བཛྲ་ཧོ། དེ་ནས་སློབ་མའི་མགོ་བོ་ལ་མེ་ཏོག་ཕྲེང་བ་བཅིངས་ཤིང་། སེམས་ཅན་སྟོབས་ཆེན་ཁྱོད་ཀྱིས་ནི། །འདི་ཉིད་ཡང་དག་གཟུང་བར་བྱ། །དེ་ནས་གདོང་གཡོགས་བཀྲོལ་ཞིང་། དི་རིང་རྡོ་རྗེ་སེམས་དཔའ་རང་། །ཁྱོད་ཀྱི་མིག་ནི་འབྱེད་པར་བརྩོན། །
རྡོ་རྗེའི་མིག་ནི་བླ་ན་མེད། །ཕྱེ་བས་མཆོག་ཏུ་གྱུར་པ་ཡིན། །ཧེ་བཛྲ་པ་ཤྱ། དེ་ནས་ཡི་གེ་ཨཾ་དང་ཧཱུཾ་གིས་མིག་གཉིས་བྱིན་གྱིས་བརླབས་ལ། པདྨ་ཝ་ཏིའི་ཏིང་ངེ་འཛིན་གྱིས་དཀྱིལ་འཁོར་གྱི་འཁོར་ལོ་བསྟན་པར་བྱ་སྟེ། དེ་ནས་གསུང་གི་དཀྱིལ་འཁོར་གྱི་ཕྱེད་ཀྱི་ཚད་ཀྱིས་སྙིང་

71-1-152b

པོའི་དཀྱིལ་འཁོར་གྲུ་བཞི་པ་སྒོ་རྩིག་པ་ཁ་དོག་ལྔ་དང་ལྡན་པ། ལྟེ་བ་ལ་པདྨ་འདབ་མ་བརྒྱད་པ་འོད་ཟེར་གྱི་ཕྲེང་བས་ཀུན་ནས་བསྐོར་བ། རྩ་བའི་དཀྱིལ་འཁོར་གྱི་ལྟེ་བ་ལ་གླང་པོ་ཆེའི་རྒྱལ་པའི་སྟེང་དུ་འབྱུང་པོ་གཞན་གྱིས་མི་ཐུབ་པའི་སྟེང་ན་ཉེས་པ་ཐམས་ཅད་འཇོམས་
པར་བྱེད་པའི་ཁྲོ་བོའི་རྒྱལ་པོ་ལ་སོགས་པའི་དཀྱིལ་འཁོར་གྱི་ལྷ་བལྟས་ལ། དེ་ནས་སློབ་དཔོན་གྱི་དབང་བསྐུར་བའི་དོན་དུ་སློབ་མ་ལ་བཀྲ་ཤིས་ལ་སོགས་པ་གསུངས་ཏེ། བཀྲ་ཤིས་ལ་སོགས་པ་ཡང་རྡོ་རྗེ་འཛིན་པས་བྱ་སྟེ། དམ་ཚིག་གི་ཕྱག་རྒྱ་དང་། སྔགས་ཀྱིས་གནས་དྲུག་ཏུ་ཕྱིན་
གྱིས་བརླབས་པར་བྱས་ཏེ། རོལ་པའི་འདུག་སྟངས་ཀྱིས་གནས་པ་ལ། གཞན་གྱིས་མི་ཐུབ་པའི་འབྱུང་པོ་གཞན་རྣམས་ཀྱིས་ཀྱང་ཡི་གེ་ཧཱུཾ་གི་སྒྲ་སྒྲོགས་ཤིང་། གདུགས་དང་རྒྱལ་མཚན་དཀར་པོ་དང་། གླིང་བུ་དང་། ཨོཾ་བཟླས་ཤིང་ཁ་དོག་སྣ་ཚོགས་པའི་རྒྱན་དང་། རྔ་ཡབ་
དང་། དེ་དག་ལ་སོགས་པ་དཔག་ཏུ་མེད་པའི་ཚོགས་པ་དང་། མེ་ཏོག་ལ་སོགས་པས་ཀྱང་མཆོད་དེ། དུང་དང་རྔ་རིངས་དང་། རྔ་ཟླུམ་དང་། རྔ་ཆུང་དང་། དེ་དག་ལ་སོགས་པའི་རོལ་མོ་དཔག་ཏུ་མེད་པ་དང་། གར་དང་། གླུ་དང་། བཀྲ་ཤིས་ཀྱི་ཚིགས་སུ་བཅད་པ་
བརྗོད་ཅིང་། བསྟོད་པའི་ཚོགས་ཀྱིས་ཀྱང་བསྟོད་ལ། གོ་སྐྱོང་གི་འགྲམ་ནས་བུམ་པ་བླངས་ལ། བཅོམ་ལྡན་འདས་ཀྱིས་བུམ་པས་སྤྱི་བོར་དབང་བསྐུར་ཞིང་། ཆུས་ཀྱང་གཏོར་ལ་དབང་བསྐུར་བར་བྱའོ། །ཨོཾ་བྷཱུཿ   ཤྲཱི་སིདྷ་དྷཱ་ཛ་ཤཾ་དྷ་ནི་ནི་ཧྲཱིཿ  བཛྲ་ཨ་བྷི་
ཥིཉྩ། དེ་ནས་འགྲོ་བ་ལ། ཧཱུཾ་བཛྲ་ཕཊ། བཛྲ་ཨ་བྷི་ཥིཉྩ་ཨ། བཅོམ་ལྡན་འདས་ཀྱིས་རྣམ་པར་རྒྱལ་བའི་ཆུས་ཀྱང་དབང་བསྐུར་བར་བྱའོ། །ཧཱུཾ་བཛྲ་ཨ་དྷི་པ་ཏི་སྟཾ་ཨ་བྷི་ཥིཉྩ་མི་ཏྲྀ་ཌྷོ་མེ་བྷ་བ་ཛཿཧཱུཾ་བཾ་ཧོཿ་ཧཱུཾ་ཕཊ། འདིར་ཇི་ལྟར་དབང་བསྐུར་བས་ཆུས་དབང་བསྐུར་བར་འགྱུར་རོ། །
བུམ་པའི་དབང་བསྐུར་བ་འདི་ནི། དེ་ནས་རིན་པོ་ཆེ་ལ་སོགས་པའི་རྒྱན་གྱིས་བརྒྱན་ལ། ཕྱག་རྒྱ་དང་། ཅོད་པན་དང་། དར་དཔྱངས་དང་། རྡོ་རྗེ་དང་། ཡི་གེས་དབང་བསྐུར་བ་རྣམས་རྡོ་རྗེ་བདག་པོའི་དབང་བསྐུར་བ་རྣམས་དྲིལ་བུ་ལ་སོགས་པ་རྣམས་མཆོད་པར་བྱ་སྟེ། སློབ་

71-1-153a

མས་ཀྱང་སྟོབས་ཀྱིས་ཅི་འབྱོར་པའི་ཡོན་འབུལ་བ་དང་ཕྱག་བྱས་ལ་དབང་གི་དོན་དུ་མེ་ཏོག་དབུལ་ཞིང་། དེ་ནས་གྲུབ་པའི་རྡོ་རྗེའི་བཀའ་དྲིན་སྦྱིན་པར་བྱ་སྟེ། ཁྲོ་བོའི་གཟུགས་ཀྱིས་གསང་བའི་གནས་སུ་བསྟན་ཅིང་། དེ་ནས་དྲག་པོའི་ཉེས་པ་འཇོམས་
པར་བྱེད་པའི་ཤེས་རབ་དང་ཐབས་ཀྱིས། རྡོ་རྗེ་དབྱིངས་ཀྱི་དེ་ཉིད་ལས། རྡོ་རྗེའི་རིགས་ཀྱིས་སེམས་ཅན་ཐམས་ཅད་ཀྱི་དོན་དུ། ཐམས་ཅད་གྲུབ་པ་ལ་དགོད་པའི་ཕྱིར། ཐབས་དང་ཤེས་རབ་ལས་རྫོགས་པའི་ཁྲོ་བོ་ཆེན་པོའི་གཟུགས་སུ་གྱུར་ཏེ། དེ་ནས་གསེར་གྱི་བདག་
ཉིད་ཀྱི་ཐུར་མ་ལ་བཟླས་པར་བྱ་སྟེ། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་བསལ་བ་ལྟར། །དེ་བཞིན་བུ་ཁྱོད་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནེ་ཏྲ་ཨ་པ་ཧཱ་ར་པ་ཊ་ལཾ་ཧྲཱི། སློབ་མའི་མིག་སྨན་ཐུར་མ་དང་བཅས་པས་བསལ་
བར་བྱའོ། །དེ་ནས་མེ་ལོང་བསྟན་ལ། ཨ་བཛྲ་སཏྭ། ཞེས་བྱ་བའི་སྔགས་བརྗོད་ཅིང་། མེ་ལོང་ནང་གི་གཟུགས་བརྙན་འདི། །རྡོ་རྗེ་སེམས་དཔའི་རང་བཞིན་ཏེ། །བྱང་ཆུབ་སེམས་འདི་དྲི་མ་མེད། །ཁྱོད་ཀྱིས་སྙིང་ལ་བརྟན་པར་གནས། །སངས་རྒྱས་ཀུན་གྱི་རང་བཞིན་
ཅན། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་དྲི་མ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་འབྱུང་། །ཆོས་རྣམས་དེ་ལྟར་ཤེས་པར་གྱིས། །རང་བཞིན་དྲི་མས་མ་གོས་པ། །སེམས་ཅན་དོན་ནི་ཁྱོད་ཀྱིས་གྱིས། །ཞེས་བརྗོད་
ལ། དེ་ནས་ཨ་ལས་སྐྱེས་པའི་དྲིལ་བུ་ཆོས་ཀྱི་སྒྲ་དང་ལྡན་པར་དཀྲོལ་ལ། དེ་ནས། རང་བཞིན་དག་པའི་ངོ་བོ་ཉིད། །ཡོད་དངམེད་པའི་ངོ་བོ་སྤངས། །རང་བཞིན་དག་པའི་སེམས་དཔའ་ཆེ། །རང་བཞིན་མཆོག་གི་སྤྱོད་པ་ཅན། །དེ་ནས་ཧོ་ཞེས་བརྗོད་ལ་དྲིལ་བུ་
སྦྱིན་པར་བྱའོ། །དེའི་རྗེས་སུ་མདའ་དང་གཞུ་བྱིན་ལ། དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པ། ཕྱོགས་བཞིར་འབིགས་པའི་ཚུལ་དུ་བྱའོ། །སྟེང་དང་འོག་ཏུའང་དེ་བཞིན་ནོ། །དེ་ནས་རྡོ་རྗེ་དང་། །ཆོས་ཀྱི་འཁོར་ལོ་རྐང་པའི་འོག་ཏུ་བྱིན་

71-1-153b

ལ། རཾ་ཡཾ་ཁཾ་རལ་གྲི་ཡང་ལག་པར་བྱིན་ལ། འདི་སྐད་ཅེས་བརྗོད་པར་བྱའོ། །དེ་རིང་བྱང་ཆུབ་སེམས་བསྐྱེད་ནས། ཆོས་ཀྱི་འཁོར་ལོ་བསྐོར་བར་བྱོས། །ཆོས་ཀྱི་དུང་ནི་རྗེས་སུ་བུས། །དོན་ལ་འཇིགས་པར་མི་བྱ་ཞིང་། །སེམས་ནི་རྟོག་པ་མེད་པར་བྱོས། །འཇིག་
རྟེན་ཐམས་ཅད་བསལ་བའི་ཕྱིར། །སྔགས་ཀྱི་སྤྱོད་པ་རྗེས་སུ་སྤྱོད། །དེ་ལྟར་བྱས་ན་དེ་དག་ཀྱང་། །སངས་རྒྱས་ཀྱིས་བཀའ་སྩལ་པ་དང་ལྡན་པས་སོ། །དེ་ནས་རྡོ་རྗེ་འཛིན་པས་སྲུང་བ་བྱ། འདིར་ནི་ཁོ་ན་ཉིད་དེ་བཞིན་གཤེགས་པ་རྡོ་རྗེ་སེམས་དཔའ་ཧཱུཾ་གི་ཡི་གེ་འཇིག་
རྟེན་དབང་ཕྱུག་དང་། ནམ་མཁའི་སྙིང་པོའི་ང་རྒྱལ་དུ་རིམ་པར་བྱ་སྟེ། སྐད་ལྔས་བརྗོད་པར་རྗེས་སུ་བྱིན་ལ། སེམས་ཅན་ཀུན་གྱི་དོན་གྱི་ཕྱིར། །སེམས་ཅན་ཐམས་ཅད་ཀུན་ལ་ཡང་། །ཇི་ལྟར་རྣམ་པར་རྗེས་སུ་དག །ཆོས་ཀྱི་འཁོར་ལོ་རབ་ཏུ་བསྐོར། །དེ་ནས་འདི་
ལྟར་ཁྲོ་བོ་ཡི། །ནོར་བུ་དང་འཁོར་ལོ་འདིར་ཚིགས་སུ་བཅད་པ་བཞིས་བརྗོད་པར་བྱ་ཞིང་། དེ་ནས་སྙིང་པོའི་སྔགས་བརྗོད་ལ་བྱིན་ཞིང་། སྒྲུབ་ཐབས་དང་། ཆོ་ག་ཕྱག་རྒྱ་བཞིའི་ཡེ་ཤེས་སློབ་མ་ལ་བསླབ་ཤིང་། རྡོ་རྗེ་ལག་པར་སྦྱིན་ཞིང་། ཕྱག་རྒྱ་བཅས་ལ་སློབ་
མ་ལུང་བསྟན་པར་བྱ་སྟེ། འདི་ལྟར་ཁྱོད་ལ་ལུང་བསྟན་པ། །རྡོ་རྗེ་སེམས་དཔའ་དེ་བཞིན་གཤེགས། །ངན་སོང་ལས་ནི་སྒྲོལ་བར་བྱོས། །གྲུབ་པའི་གནས་ལ་ཐམས་ཅད་འཁོད། །ཧེ་བཛྲ་ནཱ་མ་ཏ་ཐཱ་ག་ཏ་སིདྡྷ་ས་མ་ཡ་བྷཱུར་བྷཱུ་སྭཿ དེ་བཞིན་གཤེགས་པའི་གཟུགས་
སུ་བལྟས་ལ། ལག་པ་གཡོན་པས་སྣམ་སྦྱར་རྣ་མཆོག་ལྟར་བྱས་ལ། གཡས་པ་མི་འཇིགས་པ་སྦྱིན་པའི་ཕྱག་རྒྱ་བྱས་ཏེ། དེ་བཞིན་གཤེགས་པ་རིགས་ཀྱི་དམ་ཚིག་ལ་གནས་པས། བལྟ་བ་བསྟན་པ་མཆོག་ཏུ་བཞད་མཛད་དཀྱིལ་འཁོར་འདིར། །སྡིག་པ་ཐམས་ཅད་
གྲོལ་ཞིང་དྲི་མ་མེད་པ་ཁྱོད་ནི་བསྒོམ་པ་ཀུན་ལ་བསྟན་པར་མཛོད། །ཁྱོད་ལ་འཆི་མེད་བདེ་ཆེན་ཐེག་པའི་མཆོག །འཇིག་མེད་རྩོད་བྲལ་དགའ་བའི་གྲོང་ཁྱེར་འདི། །སྡུག་བསྔལ་ཀུན་ལས་ངེས་པར་གྲོལ། །རང་བཞིན་གྲུབ་པ་དམ་པ་ནི། །ཁྱོད་ཀྱིས་ངེས་པར་བསྲུང་བར་བྱོས། །

71-1-154a

དམ་ཚིག་ལྡན་ན་གྲུབ་པར་འགྱུར། །སངས་རྒྱས་ཀུན་གྱི་དམ་ཚིག་ནི། །ཡེ་ཤེས་བདེན་པའི་དོན་ལ་གནས། །བྱང་ཆུབ་སེམས་ནི་དེ་རིང་བསྐྱེད། །དེ་རིང་རྡོ་རྗེའི་དམ་ཚིག་ནི། །ཇི་ལྟར་བསྐྱེད་པ་དེ་མ་ཐག །འདི་ལྟར་ཐམས་ཅད་སངས་རྒྱས་འགྱུར། །ཆོས་
ལ་བསྐོར་ཞིང་བཟོད་པ་ཡི། །བཟོད་པ་དང་ནི་མི་ལྡན་ན། །མི་ཤེས་རྨོངས་པའི་རང་བཞིན་འགྱུར། །བརྟགས་ཤིང་དཔྱད་པར་མི་འགྱུར་རོ། །བདག་དང་བྲལ་བར་མ་གྱུར་བར། །ནམ་དུའང་བདེ་བ་མི་རྙེད་དེ། །འཛིན་པའི་བདེ་བ་བདེ་བ་མིན། །ཡང་དག་ཡིད་དུ་འོང་བ་ལ། །རྡོ་རྗེ་
དྲིལ་བུའི་ཕྱག་རྒྱ་ཡང་། །ནམ་དུ་ཡང་ནི་མི་བཏང་ངོ་། །སློབ་དཔོན་མིང་གིས་རྗེས་བཟུང་བ། །སངས་རྒྱས་ཀུན་དང་མཉམ་པ་ཡིན། །ཇི་ལྟར་རྡོ་རྗེ་སློབ་དཔོན་ནི། །སངས་རྒྱས་ཐམས་ཅད་དམ་ཚིག་བླ། །སངས་རྒྱས་ཀུན་གྱི་ཐུགས་དང་ནི། །སློབ་དཔོན་ལ་ཁྲོས་འགལ་བར་འགྱུར། །
རིམས་དང་དེ་བཞིན་དུག་དང་ནི། །རིམས་དང་མཁའ་འགྲོ་མ་རྣམས་ཀྱིས། །འཇིགས་པ་ཉེ་བར་སྐྱེ་བ་ཡིན། །དུག་དང་ལོག་པར་འདྲེན་པ་དང་། །རྟ་ཡི་འཇིགས་པ་ཉེ་བར་བསྐྱེད། །ཤི་ནས་དམྱལ་བར་སྦྱར་བར་འགྱུར། །དེ་ནས་རྩོལ་བ་ཆེན་པོ་ཡིས། །རྡོ་རྗེ་སློབ་དཔོན་བླ་མ་ཆེ། །
མཆོག་ཏུ་ཆེས་པས་མཉེས་པར་བྱ། །ནམ་དུའང་ཁྲོ་བར་མི་བྱ་སྟེ། །ཇི་ལྟར་འབྱོར་པའི་སྟོབས་ཀྱིས་སུ། །བླ་མ་མཉེས་ཤིང་མཆོད་པར་བྱ། །ཇི་ལྟར་རྒས་པ་ལ་སོགས་པས། །ཉེས་པ་གང་ཡང་མི་འབྱུང་བར། །དེ་ལྟར་བླ་མ་མཉེས་པར་བྱ། །རྟག་ཏུ་དམ་ཚིག་སློབ་དཔོན་ལ། །
གུས་པས་ལུས་ཀྱི་བསྙེན་བཀུར་བྱ། །ཇི་ལྟར་བུ་དང་ཆུང་མ་དང་། །མ་ལུས་ཕུལ་ནས་མཉེས་བྱ་ན། །ལོངས་སྤྱོད་གཡོ་བ་སྨོས་ཅི་དགོས། །བསྐལ་པ་བྱེ་བས་རྙེད་དཀའ་བའི། །སངས་རྒྱས་སྟེར་བའི་བླ་མ་ལ། །གུས་པས་བསྙེན་བཀུར་བསྒྲུབ་པར་བྱ། །བླ་མ་མཆོག་ལ་ཕུལ་
བ་ན། །སངས་རྒྱས་ཀུན་ལ་ཕུལ་དང་མཉམ། །དེ་ལྟའི་བསོད་ནམས་སྡོམ་པ་ནི། །སྡོམ་པ་བསོད་ནམས་ཀུན་གྱི་མཆོག །རྟག་ཏུ་དམ་ཚིག་ལ་གནས་ཤིང་། །རྟག་ཏུ་དེ་བཞིན་གཤེགས་པ་མཆོད། །རྟག་ཏུ་བླ་མ་ལ་ཕུལ་ཞིང་། །སངས་རྒྱས་ཀུན་དང་མཉམ་པ་ཡི། །

71-1-154b

འབྲས་བུ་ཚེ་འདིར་སྟེར་བར་འགྱུར། །ཇི་ལྟར་བསྟན་པའི་དམ་ཚིག་ནི། །རྟག་ཏུ་ལྷ་དང་དམ་ཚིག་བསྟན། །དེ་རིང་སངས་རྒྱས་རིགས་སུ་སྐྱེས། །ཚེ་འདིའི་འབྲས་བུ་ཁྱོད་ཀྱིས་ཐོབ། །སངས་རྒྱས་ཀུན་གྱི་རྡོ་རྗེའི་བདག །འཇིག་རྟེན་གསུམ་གྱི་རྒྱལ་པོ་སྟེ། །རྒྱལ་པོ་ཆེན་པོར་
འགྱུར་བ་ཡིན། །དེ་རིང་བདུད་རྣམས་ཀུན་ལས་རྒྱལ། །མཆོག་གི་གྲོང་ཁྱེར་ཆེན་པོར་ཞུགས། །སངས་རྒྱས་མཆོག་ཏུ་ཁྱེད་གྱུར་ཏོ། །དེ་ནས་སློབ་མས་བསྐོར་བ་བྱ་སྟེ། སློབ་མའི་ལག་པ་གཡས་པའི་མཐེ་བོ་སློབ་དཔོན་གྱིས་བཟུང་ལ། གཡོན་པར་ཆུ་བླུགས་ཏེ། མར་
གྱི་སྦྱིན་སྲེག་སྦྱིན་ཞིང་། སྦྲང་རྩི་དང་། དི་ཏིང་གི་མར་དང་། ཞོ་དང་། ཏིལ་དང་། ཐམས་ཅད་བསྲེས་པའི་སྦྱིན་སྲེག་དབུལ་ཞིང་། བསྐོར་བ་ཡང་བྱས་ལ། ཕྱག་བཙལ་ཞིང་། ཤར་སྒོར་ཕྱིན་ལ་འདི་སྐད་ཅེས་བརྗོད་པར་བྱ་སྟེ། བདག་གི་སློབ་མ་འདི་རུ་ནི། །རྒྱུད་
རྣམས་ཀྱིས་ནི་འཛིན་པ་པོ། །སངས་རྒྱས་བྱང་ཆུབ་སེམས་དཔའ་རྣམས། །ལྷ་ལ་དམ་ཚིག་ལྡན་པ་ནི། །དེ་ལ་འདི་སྐད་བརྗོད་པ་འདི། །སེམས་ཅན་རྗེས་སུ་གཟུང་བའི་ཕྱིར། །རྩོལ་བས་དཀྱིལ་འཁོར་ཆེན་པོ་འདི། །འབད་པ་དང་བཅས་བྲིས་པ་འདི། །སྒྲུབ་པ་པོ་
རྣམས་གྲུབ་དོན་དུ། །དེ་ནས་ཕྱི་རོལ་དུ་གཏོར་མ་བྱིན་ལ། མཆོད་ཡོན་དང་ཞབས་བསིལ་ཡང་ཕུལ་ཏེ། ཇི་ལྟར་འབྱོར་པའི་སྟོབས་ཀྱིས་མཆོད་པ་རྒྱ་ཆེན་པོ་ཕུལ་ལ། ཇི་ལྟར་འབྱོར་པའི་བཟའ་རྒྱུ་ལ་ལོངས་སྤྱད་དེ། ཕུད་ནས་དཀྱིལ་འཁོར་གྱི་ལྷ་རྣམས་ལ་མཆོད་ལ། 
བཅོམ་ལྡན་འདས་ལ་མཆོད་ཡོན་ཡང་ཕུལ་ལ། སྒྲུབ་ཐབས་ལས་བྱུང་བ་ལྟར་བསྒོམས་ལ། དཀྱིལ་འཁོར་ལ་བསྐོར་བ་ཡང་བྱས་ལ་ཕྱག་འཚལ་ལོ། །ཨོཾ་བཛྲ་སཏྭ་ས་མ་ཡ་མ་ནུ་པཱ་ལ་ཡ་བཛྲ་སཏྭ་ཏཱེ་ནོ་པ་ཏིཥྛ་ཌྀ་ཌྷོ་མེ་བྷ་བ་སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོ་ཥྱོ་མེ་
མེ་བྷ་བ། སརྦ་སིདྡྷི་མྨེ་པྲ་ཡཙྪ་སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿ བྷ་ག་ན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲི་བྷ་བ་མ་ཧཱ་ས་མ་ཡ་སཏྭ་ཨཱཿ འདི་ལན་གསུམ་བརྗོད་ལ། ཨོཾ་ཧཱུཾ་ཀཱ་ར་ཇི་ལྟར་འདོད་ན་འདི་ཡང་བདེན་པར་བྱའོ། །ཡི་གེ་ཧཱུཾ་བརྗོད་ཅིང་གཤེགས་

71-1-155a

སུ་གསོལ་ཏེ། རྡུལ་ཚོན་དྲི་མ་མེད་པ་ཆུ་བོའི་གཞུང་དུ་དོར་བར་བྱ་ཞིང་། ཡི་གེ་ཧཱུཾ་བརྗོད་ཅིང་ཕུར་པ་ཡང་བསྡུ་བར་བྱ་ཞིང་འོ་མ་དང་དྲི་བཟང་པོ་དང་ལྡན་པའི་ཆུས་བཀྲུ་བར་བྱའོ། །ཕུར་པའི་ཁུང་བུ་ཡང་དྲི་བཟང་པོ་དང་འོ་མས་བཀང་ལ། སློབ་མ་དང་ས་སྐྱོང་བའི་དོན་
དུ་ཞི་བའི་སྦྱིན་སྲེག་བྱའོ། །ལྷ་མཉེས་པར་བྱ་བའི་དོན་དུ་སྦྱིན་སྲེག་གི་ཐབ་ཟླུམ་པོ་ཁྲུ་གང་བ། ཐུར་དུ་ཡང་སོར་ཉི་ཤུ་བརྐོས་ཏེ། ལྟེ་བ་ལ་སོར་མོ་བརྒྱད་ལ་རྡོ་རྗེ་རྩེ་མོ་ལྔ་པས་མཚན་པ། ཐབ་ཀྱི་ཕྱི་རོལ་དུ་སོར་མོ་བཞི་དོར་བའི་དེ་དང་མཉམ་པའི་ཁ་ཁྱེར་སོར་བཞི་པ་ལས་བཞིན་དུ་བྱུགས་ཏེ། མེ་ཏོག་སིལ་མ་དང་ཕྲེང་བས་ཀྱང་
གཏོར་ལ། དགང་བླུགས་གསེར་རམ་ཟངས་ལས་ཀྱང་རུང་སྟེ། གཞན་ནིམ་པའི་ཤིང་ངམ། མཆོད་སྦྱིན་གྱི་ཤིང་ལས་ཀྱང་རུང་སྟེ། དབྱུག་པ་སོར་བཅུ་པ་དེའི་སྔོན་དུ། གྲུ་བཞི་པ་དམའ་བ་སོར་གཉིས་པ་རྡོ་རྗེ་རྩེ་ལྔ་པས་མཚན་པ། བཅུད་འཛག་པའི་ལམ་མཐེའུ་ཆུང་གི་ཚད་
ཙམ། རྡོ་རྗེ་རྩེ་མོ་གསུམ་པ་སོར་བཞིའི་ཚད་ཙམ་མོ། །བླུགས་གཟར་པདྨའི་འདབ་མ་དང་ལྡན་པ་རྒྱར་སོར་གཉིས་པ། ཞབས་སུ་སོར་མོ་གཅིག་པ། རྡོ་རྗེ་རྩེ་མོ་གསུམ་པས་མཚན་པ། ཐབས་ཀྱི་རང་བཞིན་རྡོ་རྗེ་ཁུ་ཚུར་གྱིས་མཚན་པའི་ཡུ་བ་དང་བཅས་པ་དབྱུག་པའི་རྩེ་མོར་སོར་དྲུག་པའི་རྡོ་རྗེའམ་རིན་པོ་ཆེ་
ཁྲུ་གང་གིས་དགང་གཟར་དང་བླུགས་གཟར་གྱི་ཚད་དོ། །དེ་ཡང་ཤིང་པ་ལཱ་ཤའམ། སེང་ལྡེང་ངམ། ཤིང་ཨརྒ་འམ། ཤིང་རྱ་གྲོ་དྷ་འམ། ཤིང་བྷི་ཀ་ཏ་འམ། ཤིང་ཨ་མྲ་འམ། ཤིང་ས་མི་འམ། ཤིང་གོད་སྲུང་ངམ། ཤིང་ཨ་པ་མརྒ་འམ། བྱང་ཆུབ་ཀྱི་ཤིང་ངམ། ཤིང་ཨུ་དུམ་
ཝཱ་ར་བ་འམ། དེ་དག་སོ་སོར་བྱས་ལ། གསར་པ་དང་། འདབ་མ་དང་ལྡན་པ་སྔོན་བླངས་ལ། སོར་བཅུ་གཉིས་པ། རྩེ་མོ་གཉིས་ལ་དྲི་ཞིམ་པོའི་ཆུས་བསངས་ལ། ལས་ཐམས་ཅད་པའི་དོན་དུའོ། །ཇི་ལྟར་ཞི་བ་དང་རྒྱས་པའི་དོན་དུ་དབུལ་བར་བྱའོ། །ཇི་ལྟར་རང་གི་
འབྱོར་པའི་ལོངས་སྤྱོད་ཐམས་ཅད་ཀྱང་དབུལ་ཞིང་། སྭཱཧཱའི་སྔགས་ཀྱི་མཐའ་དང་བཅས་པས། རྟག་ཏུ་མར་དང་། གུ་གུལ་དང་འབྲས་མཁར་མ་དང་བཅས་པ་སྔགས་ཀྱིས་དབུལ་བར་བྱའོ། །དྲི་དང་མེ་ཏོག་ལ་སོགས་པ་ཅི་འབྱོར་པ་ཇི་ལྟར་སྔགས་བཟླས་པ་བཞིན་དུ། 

71-1-155b

མཆོད་སྦྱིན་གྱི་ཤིང་ལ་སོགས་པ་འབུས་མ་ཟོས་ཅིང་དྲི་མ་མེད་ཅིང་གཙང་བས་སོ། །ཇི་ལྟར་བུད་ཤིང་མ་འབྱོར་ན་ནགས་ཀྱི་དགོན་པའི་ལྕི་བ་ལ་བྱའོ། །བ་གླང་གི་ལྕི་བ་མ་གཏོགས་པ་ཐམས་ཅད་ནི་རྒྱས་པའི་ལས་ལ་རུང་ངོ་། །རོ་ཚ་བ་དང་། ཚེར་མ་ཅན་དང་། དྲི་མི་ཞིམ་པ་དང་། དུར་ཁྲོད་
དུ་སྐྱེས་པའི་ནིམ་པའི་ཤིང་དང་། བོང་བུ་དང་རྔ་མོའི་རྟུག་པ་དང་། དེ་དག་གི་བུད་ཤིང་ནི་གསད་པ་དང་། བསྐྲད་པ་ལའོ། །ནིམ་པ་དང་། ཨ་བྷཱའི་མེ་ཏོག་དང་གཞན་མེ་ཏོག་ནི་ལས་ཐམས་ཅད་པའི་དོན་དུའོ། །དེ་ནས་ཁྲུས་བྱས་ལ་ལས་དང་མཐུན་པའི་རྒྱན་གྱིས་བརྒྱན་ཏེ། ལས་དང་
མཐུན་པའི་ལྷའི་ང་རྒྱལ་བྱས་ལ། པདྨ་ལ་སོགས་པའི་འདུག་སྟངས་ཀྱིས་འདུག་སྟེ། སྔོན་དུ་བརྗོད་པའི་སྔགས་སྭཱཧཱ་ལ་སོགས་པའི་མཐའ་དང་ལྡན་པས་ཞི་བ་ལ་སོགས་པ་ལ་བརྗོད་དོ། །ཉེས་པ་འཇོམས་པར་བྱེད་པའི་སྔགས་བརྗོད་ཅིང་ལས་གང་ཡང་རུང་བའི་སྔགས་བཟླས་
པར་བྱ་སྟེ། མཆོད་ཡོན་གྱི་སྔགས་གཡོན་དུ་གཞག་པར་བྱའོ། །སྦྱིན་སྲེག་གི་རྫས་ཐམས་ཅད་སྔགས་བདུན་གྱིས་བྱིན་གྱིས་བརླབས་ཏེ་གཡས་སུ་གཞག་པར་བྱའོ། །དྲག་པོའི་ལས་ལ་གོ་བཟློག་པས་སོ། །དེ་ཡང་འོ་མ་ཅན་གྱི་ཤིང་ལ་རྩུབ་མ་བཏོན་པས་སྤང་བར་བྱ་སྟེ། ཞི་
བའི་དོན་དུའོ། །གཞན་ཡང་བྲམ་ཟེའི་ཁྱིམ་ནས་བླངས་པའི་མེ་ལས་ཀྱང་རུང་ངོ་། །གཞན་དགེ་འདུན་ལས་ཀྱང་རུང་ངོ་། །རྒྱལ་པོ་དང་། རྗེའུ་རིགས་དང་། ནགས་ཀྱི་མེའམ། དགེ་འདུན་གྱི་མེས་ནི་རྒྱས་པའོ། །དུར་ཁྲོད་ཀྱི་མིའི་རུས་པ་འམ། རོ་བསྲེགས་པའི་མེ་འམ། གདོལ་པའི་ཁྱིམ་གྱི་མེས་ནི་དྲག་
པོའི་ལས་ལའོ། །སྨད་འཚོང་མའི་ཁྱིམ་ནས་བླངས་པའི་མེས་ནི་དགུག་པའོ། །གར་མཁན་དང་། སློང་མོ་བའི་མེས་ནི་དེ་བཞིན་དགུག་པའོ། །དེ་ནས་ཉེས་པ་འཇོམས་པར་བྱེད་པའི་སྔགས་ལན་གསུམ་བརྗོད་དེ། ཀུ་ཤའི་ཆུས་ལན་གསུམ་བསངས་ལ། ཤིང་སྐམ་
པོས་མེ་སྦར་བར་བྱའོ། །རླུང་གཡབ་ཀྱིས་གཡོབ་པར་བྱའི་ཁའི་དབུགས་ཀྱིས་ནི་མ་ཡིན་ནོ། །ཨོཾ་ཛྭ་ལ་ཛྭ་ལ་ཧཱུཾ་ཧཱུཾ་ལན་བདུན་བཟླས་ཏེ། མར་དབུལ་བར་བྱའོ། །ཨོཾ་བཛྲ་སཏྭ་ཨཱཿཞེས་བརྗོད་ལ། ཀུ་ཤ་ཕྱོགས་ཐམས་ཅད་དུ་དགྲམ་པར་བྱའོ། །རྩ་བ་གཙང་བ་དྲི་མ་མེད་

71-1-156a

པ། མ་གྲུགས་པ། མ་གས་པ། རློན་པ། རིང་ཐུང་སྙོམས་པ། ཐམས་ཅད་རྩེ་མོ་ཤར་དུ་བསྟན་ལ་དགྲམ་པར་བྱའོ། །ཐབ་ཀྱི་མཐའ་ཡོངས་སུ་རྫོགས་པར་བཀང་ལ། དེ་ནས་ཐབ་ཀྱི་དབུས་སུ་མེའི་ལྷ་ཡོངས་སུ་རྫོགས་པར་བསྒོམས་ལ། རྡོ་རྗེ་འཛིན་པས་
སྔགས་དང་ཕྱག་རྒྱ་བཅས་ལ། བགེགས་བསྐྲད་ཅིང་གོ་བསྐོན་ཞིང་ཕྱོགས་བཅིང་བར་བྱའོ། །ཡེ་ཤེས་པ་སྤྱན་དྲང་ཞིང་དགུག་པ་དང་། གཞུག་པ་དང་བཅིང་བ་དང་། དབང་དུ་བྱས་ལ། མཆོད་ཡོན་དང་། ཞལ་བསིལ་དང་། ཞབས་བསིལ་ལ་ཕུལ་ལ། མེའི་ལྷ་དམ་ཚིག་
ལ་གནས་པར་བྱ་སྟེ། ཛཿཧཱུཾ་བཾ་ཧོཿས་མ་ཡ་སྟྭཾ། ས་མ་ཡ་སྟྭཾ། ཞེས་བརྗོད་ལ། ཨོཾ་ཨགྣ་ཡེ་སྭཱ་ཧཱ། ལན་གསུམ་བརྗོད་པར་བྱའོ། །སྔོན་གྱི་དམ་ཚིག་གི་ཕྱག་རྒྱ་བྱས་ལ། གོ་ཆ་བགོ་ཞིང་གོ་ཆའི་ཕྱག་རྒྱ་བྱའོ། །བདག་གིས་ཇི་ལྟར་འདོད་པའི་ལས་རྣམས་མཛོད་ཅིག་ཅེས་
བརྗོད་ལ། ལས་དང་རྗེས་སུ་མཐུན་པའི་གཟུགས་སུ་བགོམ་པར་བྱའོ། །ཨུ་མ་ལ་སོགས་པའི་ལྷ་མོ་བཞིས་ཡང་དག་པར་མཆོད་ཅིང་། ཉེས་པ་འཇོམས་པར་བྱེད་པའི་སྔགས་བརྗོད་ཅིང་བསྐོར་བ་གསུམ་བྱ་སྟེ། གཡས་པའི་མཐེ་བོའི་ཁུ་ཚུར་གྱིས་འཇིགས་པར་
བྱས་ཏེ། མེ་ལྷའི་ལྕེ་ལ་ཧཱུཾ་བཀོད་པ་ལ། པུས་མོ་གཉིས་ཀྱི་སྟེང་ནས་དགང་བླུགས་ཀྱིས་མར་གསུམ་སྦྱིན་པར་བྱའོ། །དྲག་པོའི་ལས་ཁང་པར་ཏའི་སྦྱིན་པར་བྱའོ། །མེ་འབར་བའི་མཚན་མ་བརྟགས་ལ། མེ་བསྐོར་ཞིང་དགང་བླུགས་སྦྱིན་པར་
བྱའོ། །ཡང་བགེགས་ཀྱི་མཚན་མ་དང་ལྡན་ན། བསྐྲད་ཅིང་མར་གྱི་དགང་བླུགས་གསུམ་སྦྱིན་ཞིང་། གཞན་ཡང་གཅིག་ནས་བདུན་གྱི་བར་གང་ཡང་རུང་བས་སོ། །དེ་ནས་མར་གྱི་རྗེས་སུ་ཏིལ་དབུལ་ཞིང་། དེ་ནས་འབྲུ་གཞན་རྣམས་ཀྱང་རིམ་གྱིས་དབུལ་བར་བྱའོ། །
དྲག་པོའི་ལས་ལ་ནི་མིའི་རུས་པ་བཏགས་པའི་ཕྱེ་མ་དང་ལྡན་པའི་མར་དབུལ་ཞིང་། ཞོ་ལ་སོགས་པའི་རྫས་རྣམས་ནི་ཞལ་དུའོ། །མཆོད་ཡོན་ནི་ཕྱག་དུའོ། །དྲི་ནི་ཐུགས་ཀར་རོ། །མེ་ཏོག་ནི་དབུ་ལའོ། །བདུག་སྤོས་ནི་ཤངས་ལའོ། །ཞབས་བསིལ་ནི་ཞབས་ལའོ། །

71-1-156b

མཆོད་ཡོན་དང་མར་མེ་ནི་མདུན་དུའོ། །ཞལ་བསིལ་ནི་ཞལ་དུའོ། །ཡམ་ཤིང་ནི་འོད་ཀྱི་དཀྱིལ་འཁོར་ལའོ། །དེ་ནས་ལས་དང་རྗེས་སུ་མཐུན་པའི་རིམ་པས་བྱ་སྟེ། དེ་ནས་སྔགས་དྲུག་དང་། བྷ་ཁ་ཏྲ་བྷོ་ལ་ཏྲ་ཧཱུཾ་ཧོ་ཛ། ཞི་བ་དང་། རྒྱས་པ་དང་། དགུག་པ་དང་། དབང་དུ་བྱ་བ་ལ་དྲི་
དང་མར་མེ་ལ་སོགས་པ། ཞི་བ་ལག་པའི་གཟུགས་ཀྱིས་ཨུ་མ་ལག་པའི་ལྷ་མོ་རྣམས་ཀྱིས་མེ་ཏོག་ལ་སོགས་པའི་མཆོད་པ་རྣམས་ཀྱིས་ཡང་དག་པར་མཆོད་དེ། ལྕེ་རྡོ་རྗེའི་སྦུ་གུ་ཅན་ཡི་གེ་ཧཱུཾ་གིས་མཚན་པས་ཡང་དག་པར་མཆོད་དེ་བསྲེག་རྫས་ཐམས་ཅད་ཀྱང་སྔགས་གསུམ་
གསུམ་གྱིས་དབུལ་བར་བྱའོ། །རྡོ་རྗེ་ཁུ་ཚུར་གྱིས་དགང་བླུགས་བཟུང་ལ། ཆེ་གེ་མོ་ཞི་བའི་དོན་དུ་ཞེས་བྱ་བ་ལ་སོགས་པ་མཐའ་བསྒྱུར་གྱི་སྔགས་དང་ལྡན་པའོ། །དེའང་རྒྱུད་གཞན་གྱི་ཆོ་གའི་རྗེས་སུ་འཇུག་པར་བྱའོ། །དེ་ནས་ཡི་གེ་ཧཱུཾ་བརྗོད་ཅིང་། དེ་ནས་དགང་བླུགས་ལ་སོགས་
པ་ཡང་བྱིན་ལ། མཆོད་ཡོན་དང་ཞབས་བསིལ་ལ་སོགས་པ་ཕུལ་ཏེ། ཡང་དག་པར་བསྟོད་ནས། དེ་ནས་དངོས་གྲུབ་ཀྱི་དོན་དུ་མེ་ལ་གསོལ་བ་གདབ་པར་བྱ་སྟེ། ཡང་མཆོད་ཡོན་དང་ཞབས་བསིལ་ཕུལ་ལ། དེ་ལྟར་ལན་གསུམ་མམ་བཞི་ལག་པས་དབུལ་ཞིང་སྔགས་
བཟླས་པར་བྱའོ། །ཇི་ལྟར་སེམས་ཅན་ཀུན་གྱི་དོན། །སངས་རྒྱས་ཀུན་གྱིས་གསལ་བར་གསུངས། །སྦྱིན་སྲེག་ལ་སོགས་པ་རྣམས་དང་། །སྔགས་ཀྱི་བཟླས་པ་དག་པ་རྣམས། །ཇི་ལྟར་སེམས་ཅན་ཀུན་དོན་ལ། །ཇི་ལྟར་བྲིས་པའི་བསོད་ནམས་ཀྱིས། །སེམས་ཅན་ཀུན་གྱི་དོན་གྱི་ཕྱིར། །མྱུར་དུ་
མྱ་ངན་འདས་མཆོག་ཤོག །དཔལ་འབྱུང་པོ་འདུལ་བྱེད་ཀྱི་དཀྱིལ་འཁོར་གྱི་ཆོ་ག་རྫོགས་སོ།།      །།སློབ་དཔོན་ཆེན་པོ་བློ་བཟངས་སྐྱོང་གིས་མཛད་པའོ། །འདིའི་ཤློ་ཀའི་གྲངས་ནི་ཚིགས་སུ་བཅད་པ་བདུན་བརྒྱའོ། །རྒྱ་གར་གྱི་པཎྜི་ཏ་སྒྲ་པཱ་ཎཱི་ནི་ཡོངས་སུ་རྫོགས་པའི་སྙན་དངགས་དང་
ཚིག་གི་སྡེབས་ལ་མཁས་པ་ནོན་ནི་པཎྜི་ཏ་དང་། བོད་ཀྱི་ལོ་ཙཱ་བ་ཨུ་རྒྱན་པ་རིན་ཆེན་དཔལ་གྱིས་རི་བོ་ཆེན་པོ་སྦུ་ཏྲའི་མགུལ་དུ་བསྒྱུར་བའོ།།      །། ༄༅༅།  །རྒྱ་གར་སྐད་དུ། བཛྲ་བི་དཱ་ར་ཎ་ནཱ་མ་དྷཱ་ར་ཎི་ཊཱི་ཀཱ། བོད་སྐད་དུ། རྡོ་རྗེས་རྣམ་པར་འཇོམས་པ་ཞེས་བྱ་བའི་

71-1-157a

གཟུངས་ཀྱི་བཤད་པ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཐམས་ཅད་མཁྱེན་པ་འཇིག་རྟེན་མགོན། །དུག་གསུམ་ནད་སེལ་སྨན་གྱི་མཆོག །འཕགས་པའི་ཚོགས་ལ་ཕྱག་འཚལ་ཏེ། །དེ་ཡི་གཞུང་འགྲེལ་བྱ་བར་འདོད། །དེ་ལ་མདོ་སྡེ་
འདི་འཆད་པར་འདོད་པས། བསྡུས་པའི་དོན་རྣམ་པ་གཉིས་སུ་ཤེས་པར་བྱ་སྟེ། གླེང་གཞི་ཕུན་སུམ་ཚོགས་པ་དང་། མདོ་བཤད་པའོ། །དེ་ལ་མདོ་ལ་བཞི་སྟེ། ཡོན་ཏན་འབྱུང་བའི་རྒྱུའི་ཏིང་ངེ་འཛིན་གྱི་ཁྱད་པར་དང་། ཡོན་ཏན་གྱི་རང་བཞིན་དངོས་གཞི་དང་། ཡོན་
ཏན་གྱི་ཕན་ཡོན་གྱི་འབྲས་བུ་དང་། སྡུག་བསྔལ་ཞི་བར་བྱེད་པའི་སྒྲུབ་པའི་ཐབས་དང་བཅས་པ་རྣམས་བསྟན་ཏོ།    །དེ་ལ་གླེང་གཞི་ཕུན་སུམ་ཚོགས་པ་ནི། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྡོ་རྗེ་ལ་བཞུགས་ཏེ་ཞེས་བྱ་བའི་བར་གྱིས་
བསྟན་ཏོ། །དེ་ཡང་ལྔས་བསྟན་ཏེ། མདོ་སྡེའི་དོན་དང་། སྡུད་པ་པོ་དང་། དུས་དང་། སྟོན་པ་དང་། གནས་དང་ལྔ་སྟེ། འདི་སྐད་བདག་གིས་ཐོས་པ་དང་། དུས་གཅིག་དང་། བཅོམ་ལྡན་འདས་དང་། རྡོ་རྗེ་ལ་བཞུགས་ཏེ་རྣམས་གོ་རིམས་བཞིན་ནོ། །དེ་ལ་མདོ་སྡེའི་
དོན་ཇི་ལྟ་བུ་ཞེ་ན། མིང་གི་ཁྱད་པར་གྱིས་བསྟན་ཏེ། རྡོ་རྗེ་རྣམ་པར་འཇོམས་པའི་གཟུངས་ཞེས་སྨྲས་སོ། །འདི་ལྟར་རྡོ་རྗེ་ནི་ཕྱི་རོལ་གྱི་འདུས་བྱས་ཀྱི་རྫས་དཔེར་བསྟན་པ་ལྟ་བུ་སྟེ། ཡེ་ཤེས་རང་གི་ངོ་བོ་ལ་གཞན་གྱི་རྟོག་པ་དག་གི་བར་མི་ཆོད་དེ། འདི་ལྟར་འོག་ནས་མི་ཆོད་པ་
ནས་ཐམས་ཅད་དུ་མ་ཕམ་པ་ཞེས་བྱ་བའི་བར་དུ་བདུན་གྱིས་བསྟན་པར་མངོན་ནོ། །རྣམ་པར་འཇོམས་པ་ཞེས་བྱ་བ་ནི། འདུས་བྱས་རྫས་ཀྱི་དངོས་པོ་དེས་བཅད་པར་བྱ་བ་གང་དག་རིན་པོ་ཆེའི་རིགས་གཞན་དག་ལྟ་བུ་སྟེ། གཟུང་བ་དང་འཛིན་པ་ཅན་གྱི་སེམས་ཅན་དག་འདུལ་བ་
སྟེ། འདི་ལྟར་འོག་ནས་སེམས་ཅན་ཐམས་ཅད་སྐྲག་པར་བྱེད་པ་ཞེས་བྱ་བ་ནས་སེམས་ཅན་ཐམས་ཅད་བསྲུང་བ་ཞེས་བྱ་བའི་བར་དུ་བསྟན་ཏོ། །གཞན་དག་ཁ་ཅིག་ན་རེ་རྡོ་རྗེ་ནི་ཆོས་ཀྱི་དེ་ཁོ་ན་ཉིད་ཤིན་ཏུ་རྟོགས་པའི་ངོ་བོ་རྡོ་རྗེ་ལྟར་ཐོགས་པ་མེད་པའི་ཡེ་ཤེས་སུ་རྩེ་གཅིག་ཉིད་དུ་

71-1-157b

མཉམ་པར་གཞག་པའོ། །འཇོམས་པ་ནི་འཇིག་ཚོགས་ལ་ལྟ་བའི་བསམ་པ་ཅན་གྱིས་ཕྱི་ནང་གི་བགེགས་ལྡང་བའི་རྒྱུ་ལས་ཀྱི་བག་ལ་ཉལ་བ་དག་འདུལ་བའི་ཕྱིར་རོ་ཞེས་ཟེར་རོ། །གཟུངས་ཞེས་བྱ་བ་ནི་འཛིན་པ་དང་མི་གཏོང་བའི་ཐ་ཚིག་གོ། །དེ་ཡང་གང་གིས་གང་ཞིག་
ལ། རྡོ་རྗེ་ཞེས་བྱ་བ་དང་། རྣམ་པར་འཇོམས་པ་ཞེས་བྱ་བ་གཉིས་ཏེ། གོ་རིམས་བཞིན་ནོ། །ད་ནི་ཡང་དག་པར་སྡུད་པར་བྱེད་པས་གུས་པ་སྐྱེད་པ་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ་ཞེས་སྨོས་ཏེ། ཉོན་མོངས་པའི་འཆིང་བ་
དག་སྤངས་ཤིང་ཐམས་ཅད་མཁྱེན་པའི་ཡེ་ཤེས་རྫོགས་པའི་སངས་རྒྱས་ཞེས་བྱའོ། །གང་དག་གི་ཉོན་མོངས་པ་ཟད་པར་བྱས་ཤིང་། དེ་དག་ཕྱིས་ལྡང་བར་མི་འགྱུར་བའི་ཕྱིར་ན་བྱང་ཆུབ་ཅེས་བྱའོ། །གང་དག་རྟོགས་པར་བྱ་བའི་དོན་ལ་མི་ཞུམ་པར་བྱ་བའི་ཕྱིར་སེམས་དཔའ་
ཞེས་བྱའོ། །གཞན་དག་ན་རེ། དོན་བྱ་བའི་སེམས་ཅན་གྱི་དོན་ལ་མི་སྐྲག་པའི་སེམས་དཔའ་ཞེས་བྱའོ་ཞེས་ཟེར་རོ། །ཐམས་ཅད་ཅེས་པ་ནི་རིགས་སུ་མ་བཅད་པའི་ཐ་ཚིག་གོ། །ད་ནི་གླེང་གཞི་བསྟན་ཏེ། འདི་སྐད་བདག་གིས་ཐོས་པའི་དུས་གཅིག་ན་ཞེས་སྨོས་སོ། །དེ་ལ་
འདི་སྐད་ཅེས་བྱ་བ་ནི་གཟུངས་འདི་རྫོགས་པའི་བར་གྱི་ཐ་ཚིག་གོ། །ཚིག་དེ་དག་བརྒྱུད་པ་ལྟ་བུའི་མ་ཡིན་པས་བདག་གིས་ཞེས་བྱའོ། །བདག་ཉིད་སྟོན་པ་མ་ཡིན་པའི་ཕྱིར། ཐོས་པ་ཞེས་བྱའོ། །ཡུལ་ཡངས་པ་ཅན་དང་། རྒྱལ་པོའི་ཁབ་ལྟ་བུ་ན་བཞུགས་པ་མ་ཡིན་ཏེ། 
རྡོ་རྗེ་ན་བཞུགས་པའི་དུས་དེ་ན་ཐོས་པས་དུས་གཅིག་ན་ཞེས་བྱའོ། །བཅོམ་ལྡན་འདས་ཞེས་བྱ་བ་ནི་བཞི་བཅོམ་ཞིང་དྲུག་དང་ལྡན་པའོ། །ཁ་ཅིག་ན་རེ་དྲུག་དང་ལྡན་པས་བཞི་བཅོམ་མོ་ཟེར་རོ། །རྡོ་རྗེ་ལ་བཞུགས་ཏེ་ཞེས་བྱ་བ་ནི་གང་གི་ཚེ་མདོ་སྡེ་བཤད་པའི་དུས་ན་ཕྱི་རོལ་གྱི་གདན་
ལ་བཞུགས་ཀྱི། ནང་དུ་ཡང་དག་འཇོག་གིས་བཞུགས་པའོ། །ཁ་ཅིག་ན་རེ་ཕྱི་རོལ་གྱི་གདན་ཡང་མི་མངའ་བ་མ་ཡིན་མོད་ཀྱི། རྡོ་རྗེ་ལྟ་བུའི་ཡེ་ཤེས་གཙོར་མཛད་པའི་ཐ་ཚིག་གོ་ཞེས་ཟེར་རོ།    །འདི་ན་མར་སྤྱི་དོན་གཉིས་པ་སྟེ། དེ་ལ་བཞིས་བསྟན་པའི་དང་པོ་ལ་གཉིས་ཏེ། 

71-1-158a

བྱིན་གྱིས་བརླབ་པ་དང་། སྙོམས་པར་ཞུགས་པའོ། །དེ་ནས་སངས་རྒྱས་ཀྱི་མཐུས་ལག་ན་རྡོ་རྗེ་ལུས་ཐམས་ཅད་རྡོ་རྗེར་བྱིན་གྱིས་བརླབས་ནས། རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་བྱ་བས་བསྟན་ཏེ། བྱིན་གྱིས་བརླབ་པ་ནི། གང་གི་མཐུས་བྱིན་
གྱིས་བརླབ་པ་དང་། གང་གིས་བརླབ་པ་དང་། གང་ལྟར་བྱིན་གྱིས་བརླབ་པ་དང་། བཞིར་རིམ་པར་སྦྱར་རོ། །བྱིན་གྱིས་བརླབས་ནས་གང་ལ་སྙོམས་པར་ཞུགས་པ་ནི་དངོས་གཞི་དང་། ཡུལ་དང་། ཡུལ་ཅན་གསུམ་དང་། དཔེ་དང་རྣམ་པར་མི་རྟོག་པ་དང་། འབྱུང་འཇུག་
མེད་པ་གསུམ་རིམ་པར་སྦྱར་རོ། །དེ་ལ་མདོ་སྡེ་འདི་ཟབ་པའི་ཕྱིར་ལག་ན་རྡོ་རྗེ་ལྟ་བུ་དུས་གསུམ་གྱི་གསང་བ་ལ་དབང་བྱེད་པས་ཀྱང་བཤད་མི་ནུས་པའི་ཕྱིར་སངས་རྒྱས་ཀྱི་མཐུས་ཞེས་བྱའོ། །ཡེ་ཤེས་ལ་མངའ་བརྙེས་པས་ལག་ན་ཡང་རྡོ་རྗེ་བསྣམས་པའི་ཐ་ཚིག་གོ། །འབྱུང་བ་ཆེན་
པོའི་རྒྱུ་ལས་བྱུང་བའི་ལུས་མ་ཡིན་གྱི། བསོད་ནམས་དང་ཡེ་ཤེས་ཀྱི་ཚོགས་ཚད་མེད་པར་བསགས་པའི་རྒྱུ་ལས་བྱུང་བའི་ཡེ་ཤེས་ཀྱི་སྐུ་ཅན་དུ་བྱས་པའི་ཕྱིར་ལུས་ཐམས་ཅད་རྡོ་རྗེར་བྱིན་གྱིས་བརླབས་ནས་ཞེས་བྱའོ། །དེ་ལ་ལུས་ཐམས་ཅད་ཅེས་བྱ་བ་ནི་ཕྱི་དང་ནང་གི་དངོས་པོ་
མ་ལུས་པར་ཡེ་ཤེས་ཀྱི་ལུས་སུ་བྱིན་གྱིས་བརླབས་པའི་ཐ་ཚིག་གོ།    །ཆོས་ཀྱི་དེ་ཁོ་ན་ཉིད་ཀྱི་རྟོགས་པའི་ངོ་བོ་རྡོ་རྗེ་ལྟར་ཐོགས་པ་མེད་པའི་ཡེ་ཤེས་ལ་རྩེ་གཅིག་ཏུ་མཉམ་པར་གཞག་པའི་ཕྱིར་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་བྱ་བའོ། །ད་ནི་སྤྱི་དོན་གཉིས་པ་
ལ་བཞིས་བསྟན་པའི་མདོ་སྡེ་འདིའི་ཡོན་ཏན་གྱི་རང་བཞིན་དངོས་གཞིས་བསྟན་ཏེ། དེ་ལ་ཡང་གསུམ་སྟེ། ཡོན་ཏན་རྣམས་བྱིན་གྱི་རླབས་ལས་འབྱུང་བ་དང་། གཟུངས་ཀྱི་མཚན་ཉིད་ཀྱི་ཁྱད་པར་གྱི་ཡོན་ཏན་རང་བཞིན་གྱི་དངོས་གཞི་དང་། གཟུངས་ཀྱི་དཀྱིལ་འཁོར་གྱི་ལྷ་
རྣམས་ཀྱི་ཡོན་ཏན་གྱི་རང་བཞིན་གྱི་དངོས་གཞིའོ། །དེ་ནས་ལག་ན་རྡོ་རྗེ་སངས་རྒྱས་ཀྱི་མཐུ་དང་ཞེས་བྱ་བ་ནས་རྡོ་རྗེ་སྙིང་པོས་རབ་ཏུ་སྨྲས་ཏེ་ཞེས་བྱ་བའི་བར་དུ་ནི་དང་པོ་བསྟན་ཏོ། །མི་ཆོད་པ་བྱ་བ་ནས་ལག་ན་རྡོ་རྗེས་རབ་ཏུ་སྨྲས་སོ་ཞེས་བྱ་བའི་བར་ནི་དོན་གཉིས་པ་བསྟན་ཏོ། །ན་མོ་

71-1-158b

རཏྣ་ཏྲ་ཡཱ་ཡ་ཞེས་བྱ་བ་ནས། ཨ་མྲྀ་ཏེ་ཧཱུཾ་ཕཊ་ཞེས་བྱ་བའི་བར་གྱིས་ནི་དོན་གསུམ་པ་བསྟན་ཏོ། །དེ་ནས་ལག་ན་རྡོ་རྗེ་སངས་རྒྱས་ཀྱི་མཐུ་དང་། སངས་རྒྱས་ཀྱི་བྱིན་གྱི་རླབས་དང་། བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་ཀྱིས། རྡོ་རྗེ་ཁྲོ་བོ་ལས་བྱུང་བ། རྡོ་རྗེ་སྙིང་པོ་ཞེས་
བྱ་བ་ནི། གང་གིས་སྨྲས་པ་དང་། གང་གི་བྱིན་གྱི་རླབས་ཀྱིས་སྨྲས་པ་དང་། གང་ལས་བྱུང་བ་སྨྲས་པ་རྣམས་དང་། གང་སྨྲས་པ་དང་། ལག་ན་རྡོ་རྗེ་དང་། སངས་རྒྱས་དང་བྱང་ཆུབ་སེམས་དཔའི་བྱིན་གྱི་རླབས་དང་། རྡོ་རྗེ་ཁྲོ་བོ་ལས་བྱུང་བ་དང་། རྡོ་རྗེ་སྙིང་པོ་རྣམས་གོ་རིམས་
བཞིན་ནོ། །དེ་ལ་ལག་ན་རྡོ་རྗེ་བྱ་བ་དང་། སྨྲས་ཏེ་ཞེས་བྱ་བའི་བར་སྐབས་སྦྱར་རོ། །དྲིས་པ་ལག་ན་རྡོ་རྗེས་གང་སྨྲས་ཤེ་ན། སྨྲས་པ་རྡོ་རྗེ་ཁྲོ་བོ་ལས་བྱུང་བ། རྡོ་རྗེ་སྙིང་པོ་སྨྲས་ཏེ་ཞེས་བྱའོ།    །དེ་ལྟར་བཅོམ་ལྡ་འདས་ཀྱི་ཐུགས་ཡེ་ཤེས་ཀྱི་རྡོ་རྗེ་ཁྲོ་བོའོ། །ཅིའི་ཕྱིར་ཞེ་ན། དངོས་
པོ་རྟོག་པ་མེད་པའི་ཕྱིར་རོ། །དེ་ལ་བྱུང་བའི་རྡོ་རྗེ་སྙིང་པོ་ནི་མི་ཆོད་པ་ལ་སོགས་པ་རྣམས་སོ། །དེ་དག་ལག་ན་རྡོ་རྗེས་སྨྲས་སོ་ཞེས་བྱའོ། །གང་ཡེ་ཤེས་དེ་སྙིང་པོ་ཡིན་པའི་ཕྱིར་མི་ཆོད་པའོ། །རྩ་བར་གྱུར་པའི་ཕྱིར་མི་ཤིགས་པའོ། །གཞན་དག་ན་རེ། ཡེ་ཤེས་དེ་ལ་
རྟོག་པའི་དངོས་པོ་མེད་པའི་ཕྱིར་རོ། །མི་ཆོད་པ་མི་ཤིགས་པའོ། །ཟེར་རོ། །ཕྱིན་ཅི་མ་ལོག་པ་དང་ཡང་དག་པའི་ཕྱིར་བདེན་པའོ། །འདུས་བྱས་ལས་བྱུང་བ་མ་ཡིན་པའི་ཕྱིར་སྲ་བའོ། །རྟོག་པའི་རླུང་མེད་པའི་ཕྱིར་བརྟན་པའོ། །ཐམས་ཅད་མཁྱེན་པའི་ཡེ་ཤེས་ཡིན་པའི་ཕྱིར་
ཐམས་ཅད་དུ་ཐོགས་པ་མེད་པའོ། །དེ་ནི་མི་འཇིགས་པ་བཞི་དང་ལྡན་པས་ཐམས་ཅད་དུ་མ་ཕམ་པའོ། །རྡོ་རྗེ་ཞེས་བྱ་བའི་ངེས་པ་བསྟན་ཟིན་ཏོ། །གང་དག་དངོས་པོར་སྨྲ་བ་རྣམས་ཡེ་ཤེས་དེ་ཐོས་ན་གཟུང་འཛིན་ལ་ཆགས་པའི་དབང་དང་། གོམས་པའི་མཐུ་བརྟས་པའི་སེམས་ཅན་
ཐམས་ཅད་སྐྲག་པར་བྱེད་པའོ། །ཡེ་ཤེས་དེའི་བྱིན་རླབས་ཀྱིས་སྲོག་ཆགས་ཀྱི་རིགས་གང་དག་གིས་བདག་ལ་འཚེ་བར་བྱེད་པའི་བསམ་པ་རྣམས་ཕྱིར་ནུར་བར་གྱུར་པའི་ཕྱིར། སེམས་ཅན་ཐམས་ཅད་འཇིལ་བར་བྱེད་པའོ། །ཡེ་ཤེས་རྡོ་རྗེ་ལྟ་བུ་དེས་བྲམ་ཟེ་དང་དྲང་སྲོང་དག་གི་རིག་

71-1-159a

སྔགས་དང་། དམོད་མོ་གཅོད་པའི་ཕྱིར། རིག་སྔགས་ཐམས་ཅད་གཅོད་པར་བྱེད་པ། རིག་སྔགས་ཐམས་ཅད་གནོན་པར་བྱེད་པའོ། །ཡེ་ཤེས་དེ་བདག་གིས་མངོན་དུ་གྱུར་པའི་དུས་ན་རང་གི་ཤེས་པ་ལ་གནས་པའི་ངན་འགྲོའི་རྒྱུ་མེད་པའི་ཕྱིར། ལས་
ཐམས་ཅད་འཇོམས་པར་བྱེད་པའོ། །དྲིས་པ། བྱང་ཆུབ་སེམས་དཔའ་ནི་ཐམས་ཅད་དུ་དོན་སྤྱོད་པ་ཡིན་ན། རང་གི་ངན་འགྲོའི་རྒྱུ་མེད་པར་བྱེད་ཅེས་བཤད་པ་ཅིའི་ཕྱིར་ཞེ་ན། སྨྲས་པ་ཡེ་ཤེས་རྡོ་རྗེ་ལྟ་བུའི་ཡེ་ཤེས་ཀྱི་བྱིན་གྱི་རླབས་ཀྱིས་གཞན་གྱི་ཡང་ངན་འགྲོའི་རྒྱུ་མེད་པར་བྱེད་པས་
གཞན་གྱི་ལས་ཐམས་ཅད་འཇོམས་པར་བྱེད་པའོ། །ཡེ་ཤེས་དེས་མི་མ་ཡིན་པའི་དོན་དང་། འབྱུང་པོ་རྣམས་མི་གནས་ཤིང་མེད་པར་བྱ་བ་དང་། བརླག་པར་བྱ་བའི་ཕྱིར། གདོན་ཐམས་ཅད་རླག་པར་བྱེད་པའོ། །གང་ཞིག་གང་གིས་ཟིན་པ་དེ་ཡེ་ཤེས་དེས་ནི་དེ་ལས་ཐར་བར་
བྱེད་པས། གདོན་ཐམས་ཅད་ལས་ཐར་བར་བྱེད་པའོ། །གང་གི་དོན་དུ་གང་ཞིག་དགུག་ན་ཡེ་ཤེས་རྡོ་རྗེ་ལྟ་བུར་བྱེད་པའི་ཕྱིར། འབྱུང་པོ་ཐམས་ཅད་འགུགས་པར་བྱེད་པའོ། །རིག་སྔགས་ཀྱི་ལས་ཐམས་ཅད་ཅི་བྱ་བདག་ནི་གཞི་ཡང་ཡེ་ཤེས་རྡོ་རྗེ་ལྟ་བུ་དེ་ཡིན་པའི་ཕྱིར། རིག་སྔགས་
ཀྱི་ལས་ཐམས་ཅད་བྱེད་དུ་འཇུག་པའོ། །སྔར་མ་གྲུབ་པ་རྣམས་ནི་ད་ལྟར་གྲུབ་པར་བྱེད་པ་སྔར་གྲུབ་པ་རྣམས་ནི་ད་ལྟར་དང་མ་འོངས་པ་ན་དོན་འབྲས་བུ་ཆུད་མི་ཟ་བར་བྱེད་པས། མ་གྲུབ་པ་རྣམས་གྲུབ་པར་བྱེད་པ། གྲུབ་པ་རྣམས་ཆུད་མི་ཟ་བར་བྱེད་པའོ། །འདོད་པ་གཉིས་རབ་ཏུ་
སྦྱིན་པས་ནི། འདོད་པ་ཐམས་ཅད་རབ་ཏུ་སྦྱིན་པའོ། །ཡེ་ཤེས་དེའི་བྱིན་གྱི་རླབས་ཀྱིས་ཕྱི་ནང་གི་བགེགས་བསལ་བས་གློ་བུར་བའི་རྐྱེན་ཡང་མེད་པའི་ཕྱིར། སེམས་ཅན་ཐམས་ཅད་བསྲུང་བའོ། །ཁ་ཅིག་ན་རེ་ཐེག་པ་ཆེན་པོའི་རིགས་ཅན་དང་བདག་ལ་སྐྱབས་སུ་གསོལ་བ་དག་
སྲུང་ཞེས་ཟེར་ན། ཐམས་ཅད་ཀྱི་སྒྲས་རིགས་སུ་ཆད་པའི་སྐྱོན་དུ་འགྱུར་རོ། །དེ་དག་གིས་རྣམ་པར་འཇོམས་པའི་དོན་བཤད་ཟིན་ཏོ། །དེ་བས་ན་གཟུངས་མདོ་སྡེ་འདིའི་མཚན་རྡོ་རྗེ་རྣམ་པར་འཇོམས་པ་ཞེས་གྲགས་སོ། །ཡེ་ཤེས་རྡོ་རྗེ་ལྟ་བུ་དེས་དོན་མཛད་པའི་སྒོ་ནི་མང་མོད་ཀྱང་

71-1-159b

ལས་རྣམ་པ་བཞིའི་སྒོ་ནས་དོན་མཛད་དེ། ཞི་བ་དང་། རྒྱས་པ་དང་། དྲག་པོ་དང་། དབང་དང་བཞིའོ། །ཉོན་མོངས་པ་གསུམ་དང་། ཚེ་དང་ལོངས་སྤྱོད་དང་། གནོད་པར་བྱེད་པ་དག་དང་། མི་འཇིགས་པ་བཞི་དང་། ཞི་བ་དང་རྒྱས་པ་དང་། སེམས་ཅན་ཐམས་ཅད་
རེངས་པར་བྱེད་པ། སེམས་ཅན་ཐམས་ཅད་རྨུགས་པར་བྱེད་པ་བཞི་གོ་རིམས་བཞིན་ནོ། །དྲིས་པ། ཕྱི་རོལ་གྱི་རྟག་པར་སྨྲ་བར་དྲུག་ཅུ་རྩ་བཞི་ལ་སོགས་པ་ལ་ནི་བྱེད་པ་ཡོད་པར་འདོད་ཀྱི། ཆོས་འདི་ལམ་བྱེད་པ་ཞེས་མི་རིགས་སོ་ཞེ་ན། རྟག་པར་སྨྲ་བ་རྣམས་ཀྱི་བྱེད་
པ་ནི། བདག་རྟག་པས་དབང་ཕྱུག་ལ་སོགས་པས་བྱེད་པར་འདོད་པ་ཡིན་ལ། འདིར་ནི་བྱེད་པའི་གསང་སྔགས་ཀྱི་མཐུ་ཆེན་པོ་ཞེས་འབྱུང་སྟེ། སེམས་ཅན་ཐམས་ཅད་སྐྲག་པར་བྱེད་པ་དང་། རྨུགས་པར་བྱེད་པའི་བར་དག་གསང་སྔགས་ཀྱིས་བྱེད་པའི་ཐ་ཚིག་གོ། །
དྲིས་པ་མི་ཆོད་པ་ནས་རྨུགས་པར་བྱེད་པའི་བར་ལ། གོང་དུ་ནི་རྡོ་རྗེ་སྙིང་པོས་སྨྲས་ཞེས་འབྱུང་ལ། འདིར་ནི་རྨུགས་པར་བྱེད་པའི་གསང་སྔགས་མཐུ་ཞེས་སྨྲས་པས། གོང་མ་དག་འོག་གི་གསང་སྔགས་ཀྱིས་བྱེད་པ་དང་། བྱིན་གྱིས་བརླབས་པ་སྐད་འབྱུང་བ་ཅིའི་ཕྱིར་ཞེ་ན། སྨྲས་པ་
རྡོ་རྗེ་སྙིང་པོ་ཞེས་གོང་དུ་སླད་འདྲེན་པ་ནི། མི་ཆོད་པ་ནས་ཐམས་ཅད་དུ་མ་ཕམ་པའི་བར་ཡིན་ལ། དེ་དག་གིས་སེམས་ཅན་གྱི་དོན་བྱེད་པའི་ཐབས་ནི། སེམས་ཅན་ཐམས་ཅད་སྐྲག་པར་བྱེད་པ་ནས། རྨུགས་པར་བྱེད་པའི་བར་ནི་གསང་སྔགས་ཀྱི་མཐུས་བྱེད་དོ། །ཁ་ཅིག་ན་རེ་
གང་དུ་རྡོ་རྗེ་ཁྲོ་བོ་ལས་བྱུང་བ། རྡོ་རྗེ་སྙིང་པོས་ཞེས་འབྱུང་བས། རྡོ་རྗེ་ཁྲོ་བོ་ནི་འོག་གི་གསང་སྔགས་རྣམས་ལ་བྱ་བར་འདོད་དོ་ཞེས་ཟེར་རོ།    །ད་ནི་གཟུངས་ཀྱི་དཀྱིལ་འཁོར་གྱི་ལྷ་རྣམས་ཀྱི་ཡོན་ཏན་གྱི་རང་བཞིན་དངོས་གཞི་ལ་བབས་ཏེ། དེ་ཡང་རྡོ་རྗེ་སྙིང་པོར་བྱིན་གྱིས་བརླབས་པའི་
གསང་སྔགས་དང་། གཟུངས་ཀྱི་དཀྱིལ་འཁོར་གྱི་ལྷ་བསྐྱེད་པའི་གསང་སྔགས་དང་། བརྟན་པར་བྱིན་གྱིས་བརླབས་པའི་གསང་སྔགས་དང་། དབང་བསྐུར་བའི་གསང་སྔགས་དང་། གཟུངས་ཀྱི་དཀྱིལ་འཁོར་གྱི་ལྷ་སོ་སོའི་རྩ་སྔགས་རྣམས་བསྟན་ཏོ། །དེ་ལ་ན་མོ་རཏྣ་ཏྲ་ཡཱ་ཡ་ནི་

71-1-160a

དཀོན་མཆོག་གསུམ་ལ་ཕྱག་འཚལ་བའོ། །ན་མ་ཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ན་པ་ཏ་ཡེ་ཞེས་བྱ་བ་ནི། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ལ་ཕྱག་འཚལ་ལོ། །ཏདྱ་ཐཱ། ཨོཾ་ཏྲ་ཊ་ཏྲ་ཊ་ཞེས་བྱ་བ་ནས་སུ་བཛྲཱ་ཡ་སྭཱཧཱ། ཞེས་བྱ་བའི་བར་དུ་ནི། 
རྡོ་རྗེ་སྙིང་པོར་བྱིན་གྱིས་བརླབ་པའི་གསང་སྔགས་བསྟན་ཏོ། །དེ་ཡང་ཏྲ་ཊ་ཏྲ་ཊ་ཞེས་བྱ་བ་ནས་སཾ་གྷ་ཊ་སཾ་གྷ་ཊ་ཡའི་བར་གྱིས་ནི། སེམས་ཅན་ཐམས་ཅད་སྐྲག་པར་བྱེད་པ་ནས་རྨོངས་པར་བྱེད་པའི་བར་དུ་བྱིན་གྱིས་བརླབ་པ་ཡིན་ནོ། །སརྦ་བིདྱཱ་བཛྲ་བཛྲ་ནས་སུ་བཛྲ་སྭཱཧཱའི་བར་གྱིས་
ནི་མི་ཆོད་པ་ཞེས་བྱ་བ་ནས་ཐམས་ཅད་དུ་མ་ཕམ་པའི་བར་བྱིན་གྱིས་རློབ་པ་ཡིན་པར་བསྟན་ཏོ། །ཧེ་ཕུལླུ། ནི་རུ་ཕུལླུ་ཞེས་བྱ་བ་ནས། པྲ་ཧ་ར་པྲ་ཧ་ར་བཛྲ་པྲ་བྷཉྫ་ནཱ་ཡ་སྭཱཧཱའི་བར་དུ་ནི་ཁྲོ་བོ་རྣམས་ཀྱི་སྐུ་བསྐྱེད་པ་སྟེ། གཟུངས་ཀྱི་དཀྱིལ་འཁོར་གྱི་ལྷ་བསྐྱེད་པའི་གསང་སྔགས་
བསྟན་ཏོ། །ཁྲོ་བོ་ཧཱུཾ་ཀཱ་ར་དང་། ཨཱརྱ་ཨཱ་ཙ་ལ་དང་། ཡ་མཱནྟ་ཀ་དང་། ནཱི་ལ་དཎྜ་དང་། ཧ་ཡཱ་གྲཱི་བ་དང་། ཊཀྐི་རཱ་ཛ་དང་། ཨ་མོ་གྷ་པཱ་ཤ་དང་། མ་ཧཱ་བ་ལ་རྣམས། ཏྲཱ་ས་ཡ་ཏྲཱ་ས་ཡ། བཛྲ་ཀཱི་ལི་ཀཱི་ལ་ཡ་སྭཱཧཱ། ཡན་ཆད་རིམ་བཞིན་དུ་སྦྱར་རོ། །ཧ་ར་ཧ་ར་བཛྲ་དྷཱ་ར་ཡ་སྭཱཧཱ། 
ཞེས་པ་ནི་སྒོ་མ་རྣམས་བསྐྱེད་པའི་སྔགས་སོ། །པྲ་ཧ་ར་པྲ་ཧ་ར། བཛྲ་པྲ་བྷཉྫ་ན་སྭཱཧཱ་ནི། ཨ་པྲྀ་ཏ་ཀུཎྜ་ལི་བསྐྱེད་པའི་སྔགས་སོ། །མ་ཏིསྠི་ར་ཞེས་པ་ནས། ཨ་མུ་ཀཾ་མཱ་ར་ཡ་ཕཊ། བྱ་བའི་བར་དུ་ནི་བརྟན་པར་བྱིན་གྱིས་བརླབ་པའི་གསང་སྔགས་ཏེ། གཟུངས་ཀྱི་དཀྱིལ་འཁོར་
གྱི་ཁྲོ་བོ་རྣམས་ཀྱི་སྐུ་བསྐྱེད་པ་བརྟན་པར་བྱ་བ་དང་། བདག་ཉིད་ལ་བདེན་པའི་བྱིན་རླབས་བྱ་བའོ། །ན་མཿས་མནྟ་བཛྲཱ་ཎཱཾ། ཞེས་པ་ནས་བཛྲཱཾ་ཀུ་ཤ་ཛྲྭ་ལཱ་ཡ་སྭཱཧཱའི་བར་དུ་ནི་དབང་བསྐུར་བའི་གསང་སྔགས་བསྟན་ཏེ། གཟུངས་ཀྱི་བུམ་པས་སྤྱི་བོ་ནས་དབང་བསྐུར་བའི་ཚེ་བཟླས་
པར་བྱ་བ་དང་། དབང་བསྐུར་བའི་ཚིག་ཡིན་ནོ། །ན་མོ་རཏྣ་ཏྲ་ཡཱ་ཡ་ཞེས་པ་ནས་ཨ་མྲྀ་ཏེ་ཧཱུཾ་ཕཊ་ཀྱི་བར་དུ་ནི་གཟུངས་ཀྱི་དཀྱིལ་འཁོར་གྱི་ལྷ་སོ་སོའི་གསང་སྔགས་བསྟན་ཏོ། །དེ་ལ་ཕྱག་འཚལ་བའི་ཚིག་ནི་གོ་སླའོ། །ཨོཾ་ཧ་ར་ཧ་ར་བཛྲ་ནི་གཙོ་བོའི་ལས་ཀྱི་སྔགས་སོ། །མ་ཐ་མ་ཐ་

71-1-160b

བཛྲ་ནས་ཙྪིནྡ་ཙྪིནྡའི་བར་དུ་བརྒྱད་ནི་ཁྲོ་བོ་བརྒྱད་རིམ་བཞིན་ནོ། །བྷིནྡ་བྷིནྡ་བཛྲ་ཧཱུཾ་ཕཊ་ནི་ཨ་མྲྀ་ཏ་ཀུཎྜ་ལིའི་ལས་ཀྱི་སྔགས་སོ། །དེ་མན་ཆད་ཀྱི་སྔགས་ནི་སྒོ་མ་བཞིའི་ལས་ཀྱི་སྔགས་སོ། །སྔགས་འདི་དག་ནི་སང་སྐྲྀ་ཏའི་སྐད་ལ་སོགས་པ་སྒྲ་ཡན་ལག་མང་སྟེ། བྱིན་གྱིས་བརླབས་པ་
ཡིན་པས་བཟླས་པས་བྱིན་རླབས་ཅན་དུ་འགྱུར་བས། བོད་དུ་ཐང་ལོག་མི་འགྱུར་རོ། །ཞེས་མཁས་པ་དག་གིས་འཆད་དོ།    །ད་ནི་སྤྱི་དོན་གཉིས་ཀྱིས་བསྟན་པའི་གཉིས་པ་ལ་བཞིས་བསྟན་པའི་གསུམ་པ་ཡོན་ཏན་གྱི་ཕན་ཡོན་གྱི་འབྲས་བུ་འཆད་དོ། །དེ་ལ་ཡང་གཉིས་ཏེ། 
སྡུག་བསྔལ་སེལ་བར་བྱེད་པ་དང་། བདེ་བ་སྐྱེད་པར་བྱེད་པའོ། །ཚིག་རྐང་གཉིས་དང་སྦྱར་རོ། །གཟུངས་ཀྱི་དཀྱིལ་འཁོར་འདི་ལྟར་བྱས་ཏེ་བསྒྲུབས་ན། སྔོན་གྱི་ཚེ་རབས་གྲངས་མེད་པ་ནས་བསགས་པའི་སྡིག་པ་དང་། དེ་ལྟར་འཕྲལ་དུ་བྱས་པ་དག་འབྱང་བར་འགྱུར་ལ། 
རྒྱུ་སྡིག་པ་བྱས་ན་སྡིག་པའི་འབྲས་བུ་ངན་སོང་ཡོད་པའི་སྡུག་བསྔལ་མ་ལུས་པ་མེད་པའི་ཕྱིར། སྡིག་པ་ཐམས་ཅད་བྱང་བྱས་ནས། །སྡུག་བསྔལ་ཐམས་ཅད་མེད་པར་བྱེད། །ཅེས་བྱའོ།    །མདོ་སྡེ་འདི་ནི་དེ་ལྟར་ཡོན་ཏན་དང་གཟི་བརྗིད་དང་ཕན་ཡོན་ཆེ་བས། རྒྱུད་དང་མདོ་
སྡེ་ཀུན་གྱི་སྙིང་པོ་དང་རྩ་བ་ཡིན་པའི་ཕྱིར་ནི། རྒྱུད་དོ་ཅོག་གི་རྩ་བ་སྟེ། ཞེས་བྱ་བའོ། །ཅིའི་ཕྱིར་ན་རྒྱུད་དང་མདོ་སྡེ་མང་པོ་གཞན་དག་ལས་ཀྱང་། སེམས་ཅན་གྱི་སྒྲིབ་པ་བསལ་བ་དང་། སྡུག་བསྔལ་སྦྱང་བའི་ཐབས་ལས་གཞན་མི་སྟོན་པའི་ཕྱིར་རོ། །དེའི་ཕྱིར་ན་གཟུངས་འདི་ལྟར་བྱས་ན་
སངས་རྒྱས་ཀྱི་ཡོན་ཏན་ཅི་མངའ་བ་དེས་ཐོབ་པའི་ཕྱིར། དཔལ་ཀུན་གྱིས་ནི་ལེགས་པར་བརྒྱན། །ཞེས་བྱའོ།    །ད་ནི་སྤྱི་དོན་གཉིས་ཀྱིས་བསྟན་པའི་གཉིས་པ་ལ་བཞིས་བསྟན་པའི་བཞི་ལ་སྡུག་བསྔལ་ཞི་བར་བྱེད་པའི་ཐབས་བསྟན་ཏེ། དེ་ལ་ཡང་གསུམ་སྟེ། སྡུག་བསྔལ་གྱི་རྣམ་གྲངས་དང་། 
སྡུག་བསྔལ་འབྱུང་བའི་རྟགས་དང་། སྡུག་བསྔལ་འགོག་པའི་ཐབས་སོ། །དེ་ཡང་། སེམས་ཅན་དབང་པོ་ཉམས་པ་དང་། །ཞེས་བྱ་བ་ནས། མྱ་ངན་ངལ་ལས་བྱུང་བ་ཡི། །ཞེས་བྱ་བའི་བར་གྱིས་སྡུག་བསྔལ་གྱི་རྣམ་གྲངས་བསྟན་ཏོ། །རྨི་ལམ་སྡིག་པ་མཐོང་ན་ཡང་གིས་ནི་སྡུག་

71-1-161a

བསྔལ་འབྱུང་བའི་རྟགས་སོ། །དེས་ནི་རབ་ཁྲུས་བྱ་བ་ནས་རྫོགས་པའི་བར་དུ་སྡུག་བསྔལ་བཟློག་པའི་ཐབས་བསྟན་ཏོ། །དེ་ལ་ཡང་གསུམ་སྟེ། སྟ་གོན་ལ་གནས་པ་དང་། མདོ་སྡེ་འདི་མཉན་ཞིང་ཉམས་སུ་བླངས་པའི་ཕན་ཡོན་དང་། བུམ་པའི་དཀྱིལ་འཁོར་
རོ། །དེ་ལ་དེས་ནི་རབ་བཀྲུས་གཙང་མ་ཡིན་ནས། གཙང་མའི་གོས་ཀྱིས་རབ་བརྒྱན་ཏེ། །ཞེས་པའི་བར་དུ་ནི་སྟ་གོན་ལ་གནས་པ་བསྟན། ཟབ་མོ་སངས་རྒྱས་སྤྱོད་ཡུལ་བ། །ཞེས་བྱ་བ་ནས། སྡིག་པ་ཀུན་ལས་རྣམ་པར་ཐར། །ཞེས་བྱ་བའི་བར་དུ་ནི། མདོ་སྡེ་མཉན་པའི་ཕན་
ཡོན་བསྟན། ནོར་བུ་ཡུངས་ཀར་མན་ཆད་རྫོགས་པའི་བར་གྱིས་བུམ་པའི་དཀྱིལ་འཁོར་བསྟན་ཏོ། །དེ་ལ་བུམ་པ་ལ་ལྔ་སྟེ། ནང་གི་རྒྱུ་དང་། བུམ་པའི་རྒྱུ་དང་། མགུལ་དཀྲིས་ཀྱི་རྒྱུ་དང་། བཟླས་བརྗོད་ཀྱི་གྲངས་དང་། ཁྲུས་བྱ་བའི་ཐབས་དང་། གདམས་ངག་གོ། །དེ་ལ། ནོར་
བུ་ཡུངས་ཀར་དཱུར་བ་དང་། །བྱ་བ་ནས་ཆུའི་བྱ་བ་ཡན་ཆད་ཀྱིས་ནད་དག་པའི་གྱུ་བསྟན་ཏོ། །གསེར་རམ་ཡང་ན་ནི། དངུལ་གྱི་བུམ་པ་དག་ཀྱང་རུང་། །ཞེས་པས་བུམ་པའི་རྒྱུ་བསྟན་ཏོ། །གཙང་མའི་གོས་ཞེས་པས་མགུལ་དཀྲིས་ཀྱི་རྒྱུ་བསྟན་ནོ། །ལན་གྲངས་ཉི་ཤུ་རྩ་གཅིག་
གམ། །ཡང་ན་ལན་གྲངས་བརྒྱ་རྩ་བརྒྱད། །ཅེས་པས་བཟླས་བརྗོད་ཀྱི་གྲངས་བསྟན་ཏོ། །རྒྱལ་པོ་རྟག་ཏུ་ཁྲུས་ཀྱིས་ཤིག་པ་ནི་ཁྲུས་བྱ་བའི་ཐབས་དང་གདམས་ངག་གོ།    །དབང་པོ་ཉམས་ཞེས་པ་ནི་ཡིད་ཀྱི་དབང་པོ་ཉམས་པ་ལ་བྱ། ཁ་ཅིག་ན་རེ་མིག་ལ་སོགས་པའི་དབང་པོ་ཉམས་
པ་ལ་ཡང་བྱ་ཟེར་རོ། །ཚེ་ཟད་ཅེས་པ་ནི་སྔོན་གྱི་རྣམ་པར་སྨིན་པའི་ཚེ་ཟད་པའོ། །འཕྲལ་གྱི་རྐྱེན་གྱིས་བསྒྱུར་བ་ལ་ནི་ཚེ་ཉམས་ཞེས་བྱའོ། །ཕུན་སུམ་ཚོགས་མིན་གང་ཆགས་དང་། །ཞེས་བྱ་བ་ཆོས་ཀྱིས་ཕོངས་པའི་ལས་བྱས་པས་དེའི་ལོངས་སྤྱོད་དང་མི་ལྡན་པ་ལ་བྱའོ། །
 ཁ་ཅིག་ན་རེ་སེར་སྣའི་ལས་སྤྱད་པས་ལོངས་སྤྱོད་མི་ལྡན་པ་ལ་བྱ་ཞེས་ཟེར། ལྷ་རྣམས་རྒྱབ་ཀྱིས་ཕྱོགས་པ་དང་། །ཞེས་པ་ནི་འཇིག་རྟེན་པ་དང་། འཇིག་རྟེན་ལས་འདས་པ་དག་གིས་གྲོགས་མི་བྱེད་ཅིང་འདོད་པ་མི་སྦྱིན་པའི་ཐ་ཚིག་གོ། །གཞན་དག་ནི་གོ་སླའོ། །རྨི་ལམ་སྡིག་

71-1-161b

པ་མཐོང་ན་ཡང་། །ཞེས་པ་ནི་སེམས་ཅན་དག་གི་དབང་པོ་ཉམས་པའི་རྨི་ལམ་སྡིག་པ་མཐོང་ངམ་ཚེ་ཟད་པའི་རྨི་ལམ་ནས། མྱ་ངན་ངལ་ནས་བྱུང་བ་ཡི།    །རྨི་ལམ་སྡིག་པ་མཐོང་ན་ཡང་། །ཞེས་བྱའོ། །གཞན་ནི་གོ་སླའོ། །གང་དག་ཡིད་དགེ་སེམས་དང་ཞིང་། ཞེས་པས་
སྡིག་པ་ལུས་ངག་ཡིད་གསུམ་གྱི་སྒོ་ནས་མི་བྱེད་པ་ནི་ཡིད་དགེ་བའོ། །གང་གཞན་གྱི་དོར་བྱེད་པ་མ་ཡིན་པས་དགེ་བ་སྤྱོད་པ་ནི་སེམས་དང་བའོ། །གཙང་མའི་གོས་ནི་སྲོག་ཆགས་ཀྱི་རྒྱུ་ལས་མ་བྱུང་བ་ལ་བྱའོ། །ཟབ་མོ་སངས་རྒྱས་སྤྱོད་ཡུལ་བ། ཞེས་པ་ནི་མདོ་སྡེ་འདི་ཡེ་ཤེས་ཀྱི་
ངོ་བོ་ཡིན་པའི་ཕྱིར་ཟབ་མོའོ། །དེ་ནི་སངས་རྒྱས་ཉག་གཅིག་གི་སྤྱོད་ཡུལ་ཡིན་པའི་ཕྱིར་གཞན་དག་གིས་བཤད་མི་ནུས་པའི་ཐ་ཚིག་གོ། །དྲིས་པ་དེ་ལྟར་ན་ལག་ན་རྡོ་རྗེས་སྨྲས་སོ་ཞེས་འབྱུང་བ་ཅིའི་ཕྱིར་ཞེ་ན། སྨྲས་པ། དེ་ནས་སངས་རྒྱས་ཀྱི་མཐུ་ཞེས་འབྱུང་བས་འདི་ལ་འགལ་
བ་མེད་དོ། །གཞན་ནི་གོ་སླའོ། །མི་བཟད་པ་ཡི་ནད་རྣམས་ཀྱང་། །ཞེས་བྱ་བ་ནི། སེམས་ཅན་དབང་པོ་ཉམས་པ་དང་། །བྱ་བ་ནས། རྨི་ལམ་སྡིག་པ་མཐོང་ན་ཡང་། །ཞེས་པའི་བར་དག་ལ་བྱའོ། །གཞན་དག་ནི་གོ་སླ་བས་མ་བཤད་དོ། །རྒྱལ་པོ་རྟག་ཏུ་ཁྲུས་གྱིས་ཤིག །ཅེས་པ་ལ་
རྒྱལ་པོ་ཞེས་བྱ་བ་ནི་བོས་པའི་ཚིག་ཉིད་དོ། །གཟུངས་ནི་གྲངས་བཞིན་བཟླས་ལ་ཁྲུས་གྱིས་ཤིག་པའི་གདམས་ངག་གོ།     །།སློབ་དཔོན་བོ་དྷི་སཏྭས་མཛད་པའི་འགྲེལ་པ་ཕྱི་མ་རྫོགས་སོ།།      །།ལོ་ཙཱ་བ་དཔལ་བརྩེགས་ཀྱིས་བསྒྱུར་ཅིང་གཏན་ལ་ཕབ་པའོ།།      །། 
༄༅༅།  །རྒྱ་གར་སྐད་དུ།  བཛྲ་བི་དཱ་ར་ནཱ་མ་དྷཱ་ར་ཎི་བྱཱ་ཁྱཱན་བཛྲཱ་ལོ་ཀ་ནཱ་མ།  བོད་སྐད་དུ།  རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་རྣམ་པར་བཤད་པ་རྡོ་རྗེ་སྒྲོན་མ་ཞེས་བྱ་བ། མ་རུངས་པ་ཐམས་ཅད་འདུལ་བའི་རྒྱལ་པོ་ལ་ཕྱག་འཚལ་ལོ། །སྐུ་གསུང་ཐུགས་ཀྱི་
སྣང་བའི་རྣམ་འཕྲུལ་གྱིས། །བདུད་ཚོགས་རབ་འདུལ་མཛད་ལ་ཕྱག་འཚལ་ནས། །འགྲོ་བའི་ཉོན་མོངས་བགེགས་ཚོགས་ཞི་བའི་ཕྱིར། །རྡོ་རྗེ་རྣམ་འཇོམས་གཟུངས་ནི་ཅི་ནུས་དབྱེ། །འདི་སྐད་བདག་གིས་ཞེས་བྱ་བ་ལ་སོགས་པ་འདི་དག་གིས་བརྗོད་པར་བྱ་བ་ལ་སོགས་པ་ནི་ཐོག་

71-1-162a

མར་སྨྲ་དགོས་སོ་ཞེ་ན། དེ་ནི་རིགས་པ་ཁོ་ན་ཡིན་ཏེ་འདི་ནི་མདོ་ཡིན་པའི་ཕྱིར་རོ། །རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཞེས་བྱ་བ་ནི་མདོ་ཡིན་ལ། འདི་སྐད་ཅེས་བྱ་བ་ལ་སོགས་པ་ནི་འདི་ལ་གདུལ་བྱ་རྣམས་འདུན་པར་བྱ་བའི་ཕྱིར་གཟུངས་སོ། །དེ་
རྣམས་ལ་རྡོ་རྗེ་རྣམ་པར་འཇོམས་པའི་རང་བཞིན་བསྟན་པར་བྱ་བའི་ཕྱིར་སངས་རྒྱས་ཀྱི་མཐུ་ཞེས་བྱ་བ་ནས་བརྩམས་ཏེ། སྙོམས་པར་ཞུགས་སོ་ཞེས་བྱ་བའི་བར་དུ་ནི་བྱིན་གྱིས་བརླབས་པ་དང་། རྗེས་སུ་མཐུན་པའི་ཏིང་ངེ་འཛིན་བསྟན་ཏོ། །དེ་ནས་ལག་ན་རྡོ་རྗེ་ཞེས་བྱ་བ་ནས་
བརྩམས་ཏེ། རྡོ་རྗེ་ཁྲོ་བོ་ལས་བྱུང་བ་ཞེས་བྱ་བའི་བར་གྱིས་ནི་བྱིན་གྱི་རླབས་ཀྱིས་རྡོ་རྗེ་རྣམ་པར་འཇོམས་པའི་རང་བཞིན་གྱི་དཀྱིལ་འཁོར་སྤྲུལ་པ་བསྟན་ཏོ། །རྡོ་རྗེ་སྙིང་པོས་སྨྲས་ཏེ་ཞེས་བྱ་བ་ནས་བརྩམས་ཏེ། ཐམས་ཅད་དུ་མ་ཕམ་པ་ཞེས་པའི་བར་གྱིས་ནི་དཀྱིལ་འཁོར་གྱི་རང་
བཞིན་བསྟན་ཏོ། །སེམས་ཅན་ཐམས་ཅད་སྐྲག་པར་བྱེད་པ་ཞེས་བྱ་བ་ནས་བརྩམས་ཏེ། གདོན་ཐམས་ཅད་རླག་པར་བྱེད་པ་ཞེས་བྱ་བའི་བར་གྱིས་མི་མཐུན་པའི་ཕྱོགས་ཚར་གཅད་པ་བསྟན་ཏོ། །གདོན་ཐམས་ཅད་ལས་ཐར་བར་བྱེད་པ་ཞེས་བྱ་བ་ནས་བརྩམས་ཏེ། སེམས་ཅན་
ཐམས་ཅད་སྲུང་བ་ཞེས་བྱ་བའི་བར་གྱིས་ནི་བསྟན་པ་ལ་ཞུགས་པ་རྣམས་ལ་ཕན་གདགས་པ་བསྟན་ཏོ། །ཞི་བ་ཞེས་བྱ་བ་ནས་བརྩམས་ཏེ། རྨུགས་པར་བྱེད་པ་ཞེས་བྱ་བའི་བར་གྱིས་ནི་ལས་རྣམ་པ་གསུམ་མདོར་བསྡུས་ནས་བསྟན་ཏོ། །གསང་སྔགས་ཀྱི་མཐུ་ཆེན་པོ་འདི་ཞེས་བྱ་བ་
ནས་བརྩམས་ཏེ། རབ་ཏུ་སྨྲས་སོ་ཞེས་བྱ་བའི་བར་གྱིས་ནི་གསང་སྔགས་འབྱུང་བའི་རྒྱུ་བསྟན་ཏོ། །དེ་དག་གིས་ནི་མཚན་ཉིད་ཀྱིས་བསྡུས་པའི་དོན་བསྟན་ཏོ།    །ན་མོ་རཏྣ་ཏྲ་ཡཱ་ཡ་ཞེས་བྱ་བ་ནས་བརྩམས་ཏེ། སེ་ནཱ་པ་ཏཱ་ཡེ་ཞེས་བྱ་བའི་བར་གྱིས་ནི་གསང་སྔགས་གསུངས་པའི་ཐོག་
མར་དཀོན་མཆོག་གསུམ་དང་། ཕྱག་ན་རྡོ་རྗེ་ལ་ཕྱག་བཙལ་བ་བསྟན་ཏོ། །ཏདྱ་ཐཱ་ཞེས་བྱ་བ་ནས་བརྩམས་ཏེ། སུ་བཛྲཱ་ཡ་སྭཱཧཱ་ཞེས་བྱ་བའི་བར་གྱིས་ནི་བཅོམ་ལྡན་འདས་རྣམ་པར་འཇོམས་པའི་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་བསྐུལ་བ་བསྟན་ཏོ། །ཧེ་ཕུལླུ་ཞེས་

71-1-162b

བྱ་བ་ནས་བརྩམས་ཏེ། མཱ་ར་ཎ་ཞེས་བྱ་བའི་བར་གྱིས་ནི་དེ་ཁོ་ན་ཉིད་ཀྱི་ཡེ་ཤེས་བཞི་བསྐུལ་བ་བསྟན་ཏོ། །བཛྲ་བི་དཱ་ར་ཎཱ་ཡ་སྭཱཧཱ་ཞེས་བྱ་བ་ནས་བརྩམས་ཏེ། ཀཱི་ལི་ཀཱི་ལ་ཡ་ཞེས་བྱ་བའི་བར་གྱིས་ནི་དེ་ཁོ་ན་ཉིད་ཀྱི་རྒྱུའི་རང་བཞིན་བསྐུལ་བ་བསྟན་ཏོ། །ཙུ་རུ་ཙུ་རུ་ཞེས་བྱ་བ་ནས་བརྩམས་
ཏེ། བཛྲ་པྲ་བྷཉྫ་ནཱ་ཡ་སྭཱཧཱ། ཞེས་བྱ་བའི་བར་གྱིས་ནི་ཁྲོ་བོ་བཞིའི་སྙིང་པོའི་གོ་ནས་བསྐུལ་བ་བསྟན་ཏོ། །མ་ཏི་སྠིར་བཛྲ་ཞེས་བྱ་བ་ནས་བརྩམས་ཏེ། ཨ་མུ་ཀ་མཱ་ར་ཡ་ཕཊ་ཅེས་བྱ་བའི་བར་གྱིས་ནི་དེ་དག་ཉིད་ཀྱི་གསུང་གི་སྒོ་ནས་ཕྲིན་ལས་མཛོད་ཅིག་ཅེས་བསྐུལ་བ་བསྟན་
ཏོ། །ན་མཿས་མནྟ་བཛྲཱ་ཎཱཾ་ཞེས་བྱ་བ་ནས་བརྩམས་ཏེ། བཛྲ་ཨངྐུ་ཤ་ཛཱ་ལཱ་ཡ་སྭཱཧཱ། ཞེས་བྱ་བའི་བར་གྱིས་ནི་ཁྲོ་བོ་རྣམས་ཀྱི་སྐུ་གསུང་ཐུགས་དག་གིས་བཅོལ་བའི་ཕྲིན་ལས་མཛོད་ཅིག་ཅེས་བསྐུལ་བ་བསྟན་ཏོ། །ན་མོ་རཏྣ་ཏྲ་ཡཱ་ཡ་ཞེས་པ་ནས་བརྩམས་ཏེ། བྷིནྡ་བྷིནྡ་བཛྲ་ཧཱུཾ་
ཕཊ་ཅེས་བྱ་བའི་བར་གྱིས་ནི་བཅོམ་ལྡན་འདས་ཀྱི་སྙིང་པོའི་སྒོ་ནས་བསྐུལ་བ་བསྟན་ཏོ། །ན་མཿ ཙཎྜ་བཛྲ་ཀྲོ་དྷཱ་ཡ་ཞེས་བྱ་བ་ནས་བརྩམས་ཏེ། ཨ་མྲྀ་ཏེ་ཧཱུཾ་ཞེས་བྱ་བའི་བར་གྱིས་ནི་དེ་ཁོ་ན་ཉིད་ཀྱི་ཉེ་བའི་སྙིང་པོའི་སྒོ་ནས་བསྐུལ་བ་བསྟན་ཏོ། །དེ་དག་གིས་ནི་ཕྲིན་ལས་ལ་བསྐུལ་བའི་
བསྡུས་པའི་དོན་བསྟན་ཏོ།    །སྡིག་པ་ཐམས་ཅད་བྱང་བྱས་ནས། ཞེས་བྱ་བ་ནས་བརྩམས་ཏེ། དཔལ་ཀུན་གྱིས་ནི་ལེགས་པར་བརྒྱན། ཞེས་བྱ་བའི་བར་གྱིས་ནི་གཟུངས་འདིའི་དཀྱིལ་འཁོར་སྒྲུབ་པ་བསྟན་ཏོ། །སེམས་ཅན་དབང་པོ་ཉམས་པ་དང་། །ཞེས་བྱ་བ་ནས་བརྩམས་ཏེ། 
རྨི་ལམ་སྡིག་པ་མཐོང་ན་ཡང་། །ཞེས་བྱ་བའི་བར་གྱིས་ནི་ཇི་ལྟ་བ་བཞིན་དུ་བསྒྲུབས་པས་ཚེ་འདི་དག་དང་གཞན་ལ་གནོད་པར་གྱུར་པའི་མི་མཐུན་པའི་ཕྱོགས་འདི་ལྟ་བུ་དག་ཡོད་ན་ཡང་སྤང་བར་འགྱུར་རོ་ཞེས་བྱ་བར་བསྟན་ཏོ། །དེས་ནི་རབ་བཀྲུས་གཙང་མ་ཡིན། །ཞེས་བྱ་བ་ནས་
བརྩམས་ཏེ། མདོ་སྡེ་འདི་ནི་ཉན་བྱེད་ན། །ཞེས་བྱ་བའི་བར་གྱིས་ནི་མདོ་སྡེ་འདི་ཉན་པའི་ཐབས་བསྟན་ཏོ། །མདོ་སྡེ་འདི་ཡི་གཟི་བརྗིད་ཀྱིས། །ཞེས་བྱ་བ་ནས་བརྩམས་ཏེ། སྡིག་པ་ཀུན་ལས་རྣམ་པར་ཐར། །ཞེས་བྱ་བའི་བར་གྱིས་ནི་མཉན་པའི་ཕན་ཡོན་བསྟན་ཏོ། །ནོར་བུ་

71-1-163a

ཡུངས་ཀར་དཱུར་བ་དང་། །ཞེས་བྱ་བ་ནས་བརྩམས་ཏེ། གཙང་མའི་གོས་ཀྱིས་དཀྲིས་ཤིང་དགང་། །ཞེས་བྱ་བའི་བར་གྱིས་ནི་ཁྲུས་བྱས་པའི་ཡན་ལག་གི་གཙོ་བོར་བུམ་པའི་ཆོ་ག་བསྟན་ཏོ། །ལན་གྲངས་ཉི་ཤུ་རྩ་གཅིག་གམ། ཞེས་བྱ་བ་ནས་བརྩམས་
ཏེ། རྒྱལ་པོ་རྟག་ཏུ་ཁྲུས་གྱིས་ཤིག །ཅེས་བྱ་བའི་བར་གྱིས་ནི་མདོ་བཀླག་པའི་གྲངས་བསྟན་པའི་སྒོ་ནས་ཁྲུས་བྱ་བའི་ཆོ་ག་བསྟན་ཏོ། །དེ་དག་གིས་ནི་ཕན་ཡོན་གྱི་བསྡུས་པའི་དོན་བསྟན་ཏོ།    །དེ་ལྟ་བུའི་མཚན་ཉིད་ཀྱི་ཡེ་ཤེས་དང་ལྡན་པའི་བཅོམ་ལྡན་འདས་ནི་
བརྗོད་པར་བྱ་བ་ཡིན་ལ། གཞུང་འདི་ནི་རྗོད་པར་བྱེད་པ་ཡིན་ནོ། །མདོ་སྡེ་བཤད་པའི་སྒོ་དང་ལྡན་པའི་ཉན་པ་པོས་དོན་ཇི་ལྟ་བ་བཞིན་དུ་ཁོང་དུ་ཆུད་པ་ནི་དགོས་པ་ཡིན་ནོ། །ཁོང་དུ་ཆུད་པའི་གང་ཟག་གིས་འབྲས་བུ་རྣམ་པ་གཉིས་མངོན་དུ་གྱུར་པ་ནི་དགོས་པའི་དགོས་པ་ཡིན་ནོ། །
འདི་དག་གི་དོན་འབྲེལ་པ་ནི་དོན་གྱིས་ཤེས་པར་བྱ་སྟེ། འདི་ལྟར། བསྟན་བཅོས་དང་ནི་དགོས་པའི་དོན། །འབྲེལ་པ་བཞི་ནི་གཉིས་ལ་གནས། །དེ་བསྟན་འདུས་པ་དེ་ཡི་ཕྱིར། །དགོས་ལས་ལོགས་ཤིག་མ་བསྟན་ཏོ། །ཞེས་བཤད་པ་ལྟ་བུའོ། །རྡོ་རྗེ་རྣམ་པར་འཇོམས་པའི་གཟུངས་ཀྱི་
བསྡུས་པའི་དོན་བསྟན་ཏོ།།      །།དེ་ལྟར་བསྡུས་པའི་དོན་བསྟན་ནས་ད་ནི་ཚིག་གི་དོན་བཤད་པར་བྱ་སྟེ། འདི་ལྟར་མདོ་དོན་སྨྲ་བར་འདོད་པ་ཡིས། །དགོས་པ་བསྡུས་པའི་དོན་བཅས་དང་། །ཚིག་དོན་བཅས་དང་མཚམས་སྦྱར་བཅས། །བརྒལ་ལན་བཅས་པས་བསྙད་པར་
བྱ། །ཞེས་བསྟན་པས་སོ། །འདི་སྐད་དུ། གཞུང་འདི་ཇི་ལྟ་བུ་ཞིག ཉན་པ་པོ་སུ་ཞིག་གིས་ཐོས་པ་ན། དུས་ནི་གང་ཞིག་གི་ཚེ། སྟོན་པ་ནི་སུ་ཞིག གནས་ནི་གང་དུ་བསྟན་ཞེ་ན། རྟོག་པ་དེ་དག་བསལ་བའི་ཕྱིར་ལྕང་ལོ་ཅན་ན་བཞུགས་པའི་ས་བཅུའི་དབང་ཕྱུག་རྡོ་རྗེ་
འཛིན་པས་འདི་སྐད་ཅེས་བྱ་བ་ལ་སོགས་པ་གསུངས་ཏེ། འདི་སྐད་ཅེས་བྱ་བ་ནི་བཅོམ་ལྡན་འདས་ཀྱིས་གསུངས་པའི་དོན་ལ། འདི་ལ་ཅུང་ཟད་ཀྱང་ལྷག་པ་དང་ཆད་པར་གྱུར་པ་མེད་དོ་ཞེས་བྱ་བའི་དོན་ཏོ། །བདག་གིས་ཞེས་བྱ་བ་ནི་བདག་ཉིད་ཀྱིས་བཅོམ་ལྡན་འདས་ལས་

71-1-163b

མངོན་སུམ་དུ་ཐོས་ཀྱིས་བརྒྱུད་པས་ནི་མ་ཡིན་ནོ་ཞེས་བྱ་བའོ། །ཐོས་པ་ཞེས་བྱ་བ་ནི་བདག་གིས་རྣ་བའི་རྣམ་པར་ཤེས་པས་ཐོས་པ་ཡིན་གྱི་རྟོག་པ་ལ་སོགས་པས་ནི་མ་ཡིན་ནོ་ཞེས་བྱ་བའོ། །དུས་གཅིག་ན་ཞེས་བྱ་བ་ནི་བཅོམ་ལྡན་འདས་ཀྱིས་ནམ་གྱི་གུང་ཐུན་ལ་བདུད་ཀྱི་
དཔུང་གི་ཚོགས་ཆེན་པོ་འདུལ་བར་གྱུར་ནའོ་ཞེས་བྱ་བའོ། །ཡང་ན་བདག་ཉིད་ཐོས་པ་མང་བའམ་ཚད་མའི་སྐྱེས་བུ་ཡིན་པར་ཡང་བསྟན་ཏོ། །བཅོམ་ལྡན་འདས་ཞེས་བྱ་བ་ནི་བདུད་བཞི་བཅོམ་པ་དང་ལྡན་པ་ནི་བཅོམ་ལྡན་འདས་ཏེ། ཤཱཀྱ་ཐུབ་པ་ཞེས་གྲགས་པའི་རབ་ཏུ་
བྱུང་བའི་ཆ་ལུགས་ཅན་ནོ། །འདི་ལྟར་བཅོམ་པའི་ཕྱིར་ན། བཅོམ་ལྡན་འདས་ཞེས་བསྟན་པའི་ཕྱིར་རོ། །རྡོ་རྗེ་ལ་བཞུགས་ཏེ་ཞེས་བྱ་བ་ནི་བྱང་ཆུབ་ཀྱི་ཤིང་དང་ལྡན་པའི་རྡོ་རྗེའི་གདན་ལ་སྒོ་བཞི་ལ་སོགས་པས་བརྒྱན་པའི་གཞལ་ཡས་ཁང་ཕུན་སུམ་ཚོགས་པའི་དབུས་ན་
རྡོ་རྗེའི་སྐྱིལ་མོ་ཀྲུང་བདུད་འདུལ་བའི་ཕྱག་རྒྱས་བཞུགས་སོ། །ཡང་ན་བྱམས་པ་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་པ་ལ་བྱ་སྟེ། བྱམས་པ་ཆེན་པོས་བདུད་ཀྱི་སྟོབས་དག་བཅོམ། །ཞེས་བསྟན་པས་སོ། །འདི་ལ་འཁོར་གཞན་ནི་མེད་དོ་སྙམ་ན་བདེན་ཏེ། བཅོམ་
ལྡན་འདས་ཀྱི་ཉེ་གནས་སུ་གྱུར་པ་འཕགས་པ་ཀུན་དགའ་བོ་ལ་སོགས་པ་མེད་པ་ཁོ་ན་ཡིན་ཏེ་དེའི་དུས་ན་མ་བྱུང་བའི་ཕྱིར་རོ། །འོན་ཀྱང་བསྐལ་པ་བཟང་པོའི་བྱང་ཆུབ་སེམས་དཔའ་ལ་སོགས་པ་རྣམས་ནི་དོན་གྱིས་ཡོད་པར་ཤེས་པར་བྱ་སྟེ། དེ་ལྟ་མ་ཡིན་ན་བདག་ཅག་གི་ལུང་
དང་འགལ་བར་འགྱུར་བའི་ཕྱིར་རོ། །ཡང་ན་དཀྱིལ་འཁོར་གྱི་ཡན་ལག་ཏུ་གྱུར་པའི་རིགས་པའི་ཁྲོ་བོ་རྣམས་ཀྱིས་ཡིན་པར་ཤེས་པར་བྱའོ། །འདི་སྐད་སྟོན་ཏེ། གནས་པ་ལ་སོགས་པ་མ་བསྟན་ན་གཞན་དག་གཞུང་འདི་ལས་སོམ་ཉིར་འགྱུར་རོ་སྙམ་དུ་དགོངས་པ་སྟེ། 
འདི་ལྟར། སྟོན་པ་དང་ནི་འཁོར་དབང་པོ། །ཞེས་བསྟན་པ་ཡིན་པས་སོ། །དེ་དག་གིས་ནི་གདུལ་བྱ་འདུན་པར་བྱ་བའི་ཕྱིར་ཕུན་སུམ་ཚོགས་པ་རྣམས་དང་ལྡན་པའི་གླེང་གཞི་གསུངས་པ་ཡིན་ནོ།    །དེ་ལྟར་འདུན་པར་བྱ་བའི་འོག་ཏུ་ཅི་ཞིག་བསྟན་ཞེ་ན། དེའི་རང་བཞིན་བསྟན་

71-1-164a

པའི་ཕྱིར་སངས་རྒྱས་ཀྱི་མཐུས་ཞེས་བྱ་བ་ལ་སོགས་པ་གསུངས་ཏེ། སངས་རྒྱས་ཞེས་བྱ་བ་ནི་ཁྱད་པར་དུ་གྱུར་པའི་ཟག་པ་ཟད་པ་དང་ལྡན་པའི་སྐྱེས་བུ་ཆེན་པོ་སྟེ། འདི་ལྟར། མ་རིག་གཉིད་ལས་སངས་ཕྱིར་དང་། །ཤེས་བྱ་ལ་ཡང་བློ་རྒྱས་པས། །སངས་རྒྱས་
པདྨའི་འདབ་ལྟར་རྒྱས། །ཞེས་བཤད་པས་སོ། །མཐུ་ཞེས་བྱ་བ་ནི་དེ་དག་གི་བྱིན་གྱི་རླབས་ཀྱིས་ཏེ། ཁབ་ལེན་གྱིས་ལྕགས་འདྲེན་པ་ལྟ་བུའོ། །ལག་ན་རྡོ་རྗེ་ཞེས་བྱ་བ་ཀུན་དུ་བཟང་པོ་ཉིད་དོ། །ལུས་ཐམས་ཅད་ཅེས་བྱ་བ་ནི་བསགས་པའི་ཕྱིར་ན་ལུས་ཏེ་ཕྱག་ན་རྡོ་རྗེའི་ཚོགས་བསགས་
པ་ལས་བྱུང་བའི་ལུས་ཀྱི་ཆ་ཤས་རྣམས་སོ། །རྡོ་རྗེར་བྱིན་གྱིས་བརླབས་ནས་ཞེས་བྱ་བ་ནི་རིན་པོ་ཆེའི་རྡོ་རྗེ་ལྟར་བདག་ཉིད་ཀྱིས་ཡེ་ཤེས་ཀྱི་རང་བཞིན་དུ་བསྐྲུན་པའོ། །རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་བྱ་བ་ནི་མི་རྟོག་པའི་ཡེ་ཤེས་ལ་གནས་བཞིན་དུ་རྗེས་ལ་
ཐོབ་པའི་ཡེ་ཤེས་ཀྱིས་སྒྱུ་མའི་སྐུར་དཀྱིལ་འཁོར་སྤྲུལ་པ་དང་། རྒྱུད་བཤད་པ་ལ་དབང་ཐོབ་པར་བྱའོ་སྙམ་པའི་ཏིང་ངེ་འཛིན་ཐུགས་རྩེ་གཅིག་པར་བཞུགས་པ་སྟེ། འདི་ལྟར་རྣམ་པར་མི་རྟོག་པའི་ཡེ་ཤེས་ཀྱིས་ནི་ཆོས་ཐམས་ཅད་ནམ་མཁའི་དཀྱིལ་དང་འདྲ་བར་མཐོང་
ལ། རྗེས་ལས་ཐོབ་པའི་ཡེ་ཤེས་ཀྱིས་ནི་སྒྱུ་མ་ལྟ་བུར་མཐོང་ངོ་ཞེས་གསུངས་པས་སོ། །འདི་སྐད་སྟོན་ཏེ། བཅོམ་ལྡན་འདས་མངོན་པར་རྫོགས་པར་འཚང་རྒྱ་བའི་བར་དུ་གཅོད་པའི་ཕྱིར་བདུད་ཀྱི་ཚོགས་མང་པོ་སའི་སྟེང་དང་བར་སྣང་ལ་ལྷགས་པར་གྱུར་པ་ན། དེ་བཞིན་
གཤེགས་པ་རྣམས་ཀྱིས་ཕྱག་ན་རྡོ་རྗེ་ལ་བྱིན་གྱིས་བརླབས་ནས་བཀའ་སྩལ་པ། རིགས་ཀྱི་བུ་ཁྱོད་ཀྱིས་ལུས་མ་རུངས་པའི་ཁྲོ་བོར་བསྒྱུར་ཏེ་བདུད་འདི་དག་ཐུལ་ཅིག དེ་སྐད་ཅེས་གསུངས་པ་དང་། ཕྱག་ན་རྡོ་རྗེ་བདག་ཉིད་ཀྱི་ལུས་ཁྲོ་བོའི་རྒྱལ་པོ་ཆེན་པོ་རྡོ་རྗེ་རྣམ་པར་
འཇོམས་པ་སྐུ་མདོག་ལྗང་སྔོན་ཞལ་འབྱེས་པ། སྨིན་མ་ཁྲོ་གཉེར་ཅན། རལ་པ་དམར་སེར། ཞལ་གཅིག་པ། སྤྱན་གསུམ་པ། ཕྱག་གཉིས་པ། གཡས་པ་རྡོ་རྗེ་ཐུགས་ཀར་གསོར་བ། ཕྱག་གཡོན་པ་བཀུར་བརྟེན་པ། ཞབས་གཡོན་པ་རྡོ་རྗེའི་གདན་ལ་བརྐྱང་

71-1-164b

པ། རབ་ཏུ་བརྗིད་པའི་འགྱིང་བག་དང་ལྡན་པ། དར་དང་ལྭ་བའི་སྟོད་གཡོགས་དང་སྨད་གཡོགས་མནབས་པ། སྦྲུལ་གྱིས་བརྒྱན་པ། མེའི་ཚོགས་ཆེན་པོ་འབར་བ་ལྟ་བུའི་ནང་ན་གནས་པ། མ་རུངས་པ་ཐམས་ཅད་འདུལ་བའི་སྐུར་དཀྱིལ་འཁོར་གྱི་དབུས་སུ་སྤྲུལ་པར་
གྱུར་ཏེ། དེའི་རྗེས་ཐོགས་ལ་ཅི་ཞིག་མཛད་ཅེ་ན། དེ་ནས་ཞེས་བྱ་བ་ལ་སོགས་པས་འཁོར་གྱི་ཁྲོ་བོ་སྤྲུལ་པ་གསུངས་སོ།    །དེ་ནས་ཞེས་བྱ་བ་ནི་དེ་མ་ཐག་པ་སྟེ། གཙོ་བོའི་ཏིང་ངེ་འཛིན་ལ་སྙོམས་པར་ཞུགས་པའི་རྗེས་ཐོགས་ལའོ། །ལག་ན་རྡོ་རྗེ་ཞེས་བྱ་བ་ནི་གང་གི་ལག་ན་
རྡོ་རྗེ་གནས་པ་དེ་ལ་དེ་སྐད་ཅེས་བྱ་སྟེ། ལག་ན་རྫས་ཐོགས་པ་ལྟར་ཡེ་ཤེས་ཉེ་བ་ན་གནས་པའི་རྟགས་ཅན་ནོ། །སངས་རྒྱས་ཀྱི་མཐུ་དང་ཞེས་བྱ་བ་ནི་བཅོམ་ལྡན་འདས་ཉག་གཅིག་གི་བྱིན་གྱི་རླབས་ཀྱིས་དཀྱིལ་འཁོར་སྤྲུལ་པའི་ནུས་པ་བསྐྱེད་པའོ། །སངས་རྒྱས་ཀྱི་བྱིན་གྱི་
རླབས་དང་ཞེས་བྱ་བ་ནི་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་དང་ངོ་། །བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་ཀྱིས་ཞེས་པ་ནི་ས་ཆེན་པོ་ལ་གནས་པའི་བྱང་ཆུབ་སེམས་དཔའ་རྣམས་ཀྱི་ནུས་པ་ཅི་ཡོད་པར་བྱིན་གྱིས་བརླབས་པའོ། །
ཡང་ན་བྱང་ཆུབ་སེམས་དཔའ་ཞེས་བྱ་བ་ནི། བདུད་རྩི་ཐོབ་ཕྱིར་ལམ་ནི་མ་ཡིན་ཆད། །ལམ་ངན་སྤོངས་ལ་ལམ་ལ་མནོས་ཤིག་ཅེས། །ལྟ་ངན་སེམས་ཅན་རྣམས་ལ་གོ་བར་བྱེད། །རྒྱུ་དེས་བྱང་ཆུབ་སེམས་དཔའ་ཞེས་བཤད་དོ། ། ཞེས་གསུངས་པའི་ཚུལ་གྱིས་
ཡིན་ནོ། །རྡོ་རྗེ་ཁྲོ་བོ་ལས་བྱུང་བའི་ཞེས་བྱ་བ་ནི་རང་ཉིད་ཀྱི་སྐུ་ལས་མཚམས་བཞིར་ཕྱུང་བར་གྱུར་པའོ། །འདི་སྐད་སྟོན་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་ཀྱིས་ཕྱག་ན་རྡོ་རྗེའི་སྐུ་དང་གསུང་དང་ཐུགས་བྱིན་གྱིས་བརླབས་ཏེ་དཀྱིལ་
འཁོར་སྤྲུལ་པའི་ནུས་པ་བསྐྱེད་ནས་བདག་ཉིད་ཀྱིས་ཀྱང་དཀྱིལ་འཁོར་སྤྲུལ་པའི་ཏིང་ངེ་འཛིན་ལ་སྙོམས་པར་ཞུགས་སོ། །ཁྲོ་བོ་རྡོ་རྗེ་གཏུམ་པོ་ཞེས་བྱ་བ་སྐུ་མདོག་སྨུག་ནག་ཞལ་གྱི་བཞིན་ཁྲོ་གཉེར་ཅན། གཡས་པའི་ཕྱག་གིས་རྡོ་རྗེ་རྩེ་གཅིག་པ་འཛིན་པ། ཕྱག་གཡོན་

71-1-165a

པ་ཐུགས་ཀར་སྡིགས་མཛུབ་བསྒྲེང་བ། ཐུགས་ཀ་ནས་ཕྱུང་ནས་དབང་ལྡན་གྱི་ཕྱོགས་སུ་གཞག་གོ། །དེ་ནས་ཁྲོ་བོ་རྡོ་རྗེ་ཀཱི་ལི་ཀཱི་ལ་ཡ་ཞེས་བྱ་བ་སྐུ་མདོག་ལྗང་ནག དཔྲལ་བར་ཁྲོ་གཉེར་རབ་ཏུ་བསྙེར་བ། གཡས་པའི་ཕྱག་གིས་རྡོ་རྗེ་རྩེ་གཅིག་པ་འཛིན་པ། 
ཐུགས་ཀ་ནས་ཕྱུང་ནས་མེའི་མཚམས་སུ་གཞག་གོ། །དེ་ནས་ཁྲོ་བོ་རྡོ་རྗེ་བེ་ཅོན་ཞེས་བྱ་བ། སྐུ་མདོག་མཐིང་ནག་གཡས་པའི་ཕྱག་གིས་གཤིན་རྗེའི་བེ་ཅོན་བསྣམས་པ། ཐུགས་ཀ་ནས་ཕྱུང་ནས་བདེན་བྲལ་གྱི་མཚམས་སུ་གཞག་གོ། །དེ་ནས་ཁྲོ་བོ་རྡོ་རྗེ་ཐོ་བ་ཞེས་བྱ་བ་སྐུ་མདོག་
ནག་པོ་གཡས་པའི་ཕྱག་གིས་རྡོ་རྗེ་ཐོ་བ་བསྣམས་པ་ཐུགས་ཀ་ནས་ཕྱུང་ནས་རླུང་ལྷའི་མཚམས་སུ་གཞག་གོ། །ལྷག་མ་ནི་སྔ་མ་བཞིན་ནོ། །འདི་དག་ནི་རྟོགས་པར་བྱ་བའི་དོན་ཡིན་ནོ་སྙམ་དུ་དགོངས་སོ།    །དེ་ལྟར་རང་བཞིན་གྱི་དཀྱིལ་འཁོར་སྤྲུལ་པ་བསྟན་ནས། དེའི་རང་བཞིན་
ཇི་ལྟ་བུ་ཞིག་ཡིན་ཞེ་ན། དེ་བསྟན་པར་བཞེད་ནས་རྡོ་རྗེ་སྙིང་པོས་སྨྲས་ཏེ་ཞེས་བྱ་བ་ལ་སོགས་པ་གསུངས་ཏེ། ཡེ་ཤེས་ཀྱི་ཐུགས་མངའ་བས་ན། རྡོ་རྗེ་སྙིང་པོ་སྟེ་ཕྱག་ན་རྡོ་རྗེ་ཉིད་དོ། །སྨྲས་ཏེ་ཞེས་བྱ་བ་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་ནས་
འོག་ནས་བྱུང་བ་རྣམས་གོང་དུ་བརྗོད་པའོ། །འདི་སྐད་དུ་གལ་ཏེ་ཕྱག་ན་རྡོ་རྗེ་ཉིད་ཀྱིས་བཤད་པ་ཡིན་ན་ནི་གོང་དུ་བདག་གིས་ཐོས་པ་ཞེས་སྨྲས་པ་དང་འགལ་ལོ་ཞེ་ན། དེ་ནི་བྱིན་གྱིས་བརླབས་པ་ནི་འགལ་བ་མེད་དོ། །སངས་རྒྱས་ཀྱི་མཐུས་ཚེ་དང་ལྡན་པ་ཤཱ་རིའི་བུས་སྨྲས་སོ་
ཞེས་བྱ་བ་ལྟ་བུའོ། །དེ་ལྟར་ན་ཡང་གཅིག་ཉིད་ཡིན་ནོ་ཞེ་ན་མ་ཡིན་ཏེ་སྔར་ནི་དེ་བཞིན་གཤེགས་པའི་བྱིན་གྱིས་བརླབས་ནས་བཤད་པ་ཡིན་ལ། ཕྱིས་ནི་བཤད་པའི་གཞུང་བསྡུས་པ་ཡིན་ནོ། །དེ་ལྟ་ན་ཡང་སྐྱོན་ཡིན་ནོ་ཞེ་ན། ཐམས་ཅད་ལ་ཐལ་བར་འགྱུར་རོ། །སྤྲོས་
པས་ཆོག་གོ། །ད་ནི་དཀྱུས་མ་ཉིད་ལ་འཇུག་པར་བྱ་སྟེ། མི་ཆོད་པ་ཞེས་བྱ་བ་ནི་ཡེ་ཤེས་ཡིན་ཏེ། བདུད་ལ་སོགས་པས་བར་དུ་གཅད་པར་མི་ནུས་པས་སོ། །མི་ཤིགས་པ་ཞེས་བྱ་བ་ནི་མི་རྟོག་པའི་ཡེ་ཤེས་དེ་ཉིད་མཚན་མའི་རྣམ་པར་རྟོག་པས་བཤིག་པར་མི་ནུས་

71-1-165b

པའོ། །བདེན་པ་ཞེས་བྱ་བ་ནི་བརྟགས་པའི་དངོས་པོ་དང་བྲལ་བའོ། །སྲ་བ་ཞེས་བྱ་བ་ནི་ཉོན་མོངས་པའི་གསོས་མི་མངའ་བའོ། །བརྟན་པ་ཞེས་བྱ་བ་ནི་ཡེ་ཤེས་ཀྱི་རང་བཞིན་དེ་ཉིད་གཞན་དུ་མི་འདོར་བའོ། །ཐམས་ཅད་དུ་ཐོགས་པ་མེད་པ་ཞེས་བྱ་བ་ནི་ཤེས་བྱ་རྣམ་པ་གཉིས་
ལ་ཐོགས་པ་མེད་པའོ། །ཐམས་ཅད་དུ་མ་ཕམ་པ་ཞེས་བྱ་བ་ནི་ཐུགས་རྗེ་ཆེན་པོའི་ཡེ་ཤེས་ཀྱིས་ཁྱབ་པའོ། །འདི་སྐད་དུ་སྟོན་ཏེ་གོང་དུ་དཀྱིལ་འཁོར་སྤྲུལ་པ་ཡང་བྱིན་གྱི་རླབས་ཡིན་པ་ལྟར། དེ་དག་གིས་རྡོ་རྗེ་སྙིང་པོ་བསྐུལ་ནས་རང་བཞིན་བསྟན་པ་ཡང་འདི་ཡིན་ནོ། །
ཞེས་བྱ་བའི་དོན་ཏོ།    །ཡེ་ཤེས་ཀྱི་རང་བཞིན་དེ་ལྟ་བུ་ཞིག་ཡིན་ན་ཅི་མི་མཐུན་པའི་ཕྱོགས་ཚར་གཅོད་པ་ཡང་བྱེད་དམ་ཞེ་ན། དེ་ལྟ་མ་ཡིན་ནོ་ཞེས་བསྟན་པར་བྱ་བའི་ཕྱིར། སེམས་ཅན་ཐམས་ཅད་སྐྲག་པར་བྱེད་པ་ཞེས་བྱ་བ་ལ་སོགས་པ་གསུངས་ཏེ། སེམས་ཅན་
ཐམས་ཅད་ཅེས་བྱ་བ་ལ་སེམས་དང་ལྡན་པས་ན་སེམས་ཅན་ཏེ། དགའ་རབ་དབང་ཕྱུག་ལ་སོགས་པའི་བདུད་རྣམས་སོ། །སྐྲག་པར་བྱེད་པ་ཞེས་བྱ་བ་ནི་དེ་དག་དངངས་ཤིང་འདར་བར་བྱེད་པའོ། །སེམས་ཅན་ཐམས་ཅད་འཇིལ་བར་བྱེད་པ་ཞེས་བྱ་བ་ནི་བདུད་ཀྱི་རིས་སུ་
གྱུར་པ་རྣམས་འཇིགས་ཤིང་འབྱེར་བར་བྱེད་པའོ། །རིག་སྔགས་ཐམས་ཅད་གཅོད་པར་བྱེད་པ་ཞེས་བྱ་བ་ནི་བདུད་ལ་སོགས་པས་སྦྱར་བའི་རིག་སྔགས་ངན་པ་རྣམས་ཀྱི་མཐུ་ཉམས་པར་བྱེད་པའོ། །རིག་སྔགས་ཐམས་ཅད་གནོན་པར་བྱེད་པ་ཞེས་བྱ་བ་ནི་བྱད་སྟེམས་ལ་
སོགས་པའི་སྦྱོར་བའི་ནུས་པ་མེད་པར་བྱེད་པའོ། །ལས་ཐམས་ཅད་འཇོམས་པར་བྱེད་པ་ཞེས་བྱ་བ་ནི་སྨན་དང་རྫས་ལ་སོགས་པའི་སྦྱོར་བ་ལས་བྱུང་བའི་མཐུས་ངན་པ་རྣམས་ཉམས་པར་བྱེད་པའོ། །གཞན་གྱི་ལས་ཐམས་ཅད་འཇིག་པར་བྱེད་པ་ཞེས་བྱ་བ་ནི་གཅིག་གིས་
གཅིག་གི་དཔུང་བྱས་ནས་སྦྱོར་བའི་རིག་སྔགས་ལ་སོགས་པའི་མཐུ་ཉམས་པར་བྱེད་པའོ། །གདོན་ཐམས་ཅད་རླག་པར་བྱེད་པ་ཞེས་བྱ་བ་ནི་གང་དག་གིས་ཇི་ལྟར་བྱས་ཀྱང་རུང་བའི་ལས་ངན་པ་རྣམས་བཅོམ་ནས་མེད་པར་བྱེད་པའོ། །འདི་སྐད་སྟོན་ཏེ་བྱ་བའི་རྒྱུད་ཀྱི་གཟུངས་

71-1-166a

འདི་འཛིན་པའི་གང་ཟག་གིས་ཀྱང་གསང་སྔགས་དག་དང་། དཀྱིལ་འཁོར་གྱི་མཐུ་ཡང་དེ་ལྟ་བུ་ཡིན་པར་ཤེས་པར་བྱའོ་ཞེས་བྱ་བའི་དོན་ཏོ།    །ཚར་གཅོད་པ་ནི་དེ་ལྟ་བུ་ཡིན་ན། དཀར་པོའི་ཆོས་དང་ལྡན་པ་རྣམས་ལ་ཕན་འདོགས་པར་ཡང་བྱེད་དམ་ཞེ་ན། 
བྱེད་པ་ཡིན་ནོ་ཞེས་བསྟན་པར་བྱ་བའི་ཕྱིར་གདོན་ཐམས་ཅད་ལས་ཐར་བར་བྱེད་པ་ཞེས་བྱ་བ་ནི་འགའ་ཞིག་ལྷའི་གདོན་ལ་སོགས་པ་དེའི་ནང་དུ་ཁྲིད་ཅིང་དེ་དག་བདག་གིར་བྱས་པ་ལས་ཕྲོགས་ཏེ། རང་བཞིན་དུ་གནས་པར་བྱེད་པའོ། །འབྱུང་པོ་ཐམས་ཅད་འགུགས་པར་བྱེད་
པ་ཞེས་བྱ་བ་ནི་འགའ་ཞིག་ལ་ཤ་ཟ་བ་ལ་སོགས་པས་གནོད་པར་བྱེད་དེ་གཞན་དུ་བྱེད་པ་རྣམས་དེ་དག་ཚར་གཅད་པར་བྱ་བའི་ཕྱིར་བདག་གི་མདུན་དུ་འདྲེན་པར་བྱེད་པའོ། །རིག་སྔགས་ཀྱི་ལས་ཐམས་ཅད་བྱེད་དུ་འཇུག་པ་ཞེས་བྱ་བ་ནི་ལྷ་ལ་སོགས་པས་བདག་དང་གཞན་ལ་
གནོད་པ་མི་བྱེད་པའི་ཐོག་ཏུ་རིག་སྔགས་ལ་སོགས་པའི་སྦྱོར་བ་དེ་དག་ལ་ཕན་འདོགས་སུ་འཇུག་པའོ། །མ་གྲུབ་པ་རྣམས་གྲུབ་པར་བྱེད་པ་ཞེས་བྱ་བ་ནི་གང་གིས་ཞི་བ་ལ་སོགས་པ་བསྒྲུབས་པ་ལས་འབྲས་བུ་མ་བྱུང་བ་རྣམས་ཀྱི་འབྲས་བུ་འབྱིན་པར་བྱེད་པའོ། །གྲུབ་པ་
རྣམས་ཆུད་མི་ཟ་བར་བྱེད་པ་ཞེས་བྱ་བ་ནི་འབྲས་བུ་ཐོབ་པ་རྣམས་སླར་ཉམས་པར་མི་བྱེད་པའོ། །འདོད་པ་ཐམས་ཅད་རབ་ཏུ་སྦྱིན་པ་ཞེས་བྱ་བ་ནི་གནོད་སྦྱིན་མོ་ལ་སོགས་པ་དབང་དུ་བྱས་ནས་གཏེར་ལ་སོགས་པ་འགྲུབ་པའོ། །ཡང་ན་འདི་ཉིད་ལས་གྲུབ་པ་བརྒྱད་ལ་སོགས་པ་འབྱུང་
བའོ། །སེམས་ཅན་ཐམས་ཅད་སྲུང་བ་ཞེས་བྱ་བ་ནི་དེ་དག་ངན་སོང་གི་གཡང་ས་ལ་སོགས་པ་ལས་བཟློག་ནས་སྐྱོང་བར་བྱེད་པའོ། །འདི་སྐད་སྟོན་ཏེ་རྒྱུད་འདི་ལ་མོས་ཤིང་དབང་ཐོབ་པའི་སྔགས་པས་ཀྱང་བསྒྲུབས་ན་གསང་སྔགས་འདི་ལས་དེ་ལྟ་བུའི་ལས་ཀྱི་འགྲོ་བ་ལ་ཕན་
གདགས་པ་འཐོབ་པར་འགྱུར་རོ་ཞེས་བྱ་བའི་དོན་ཏོ།    །དེ་ལྟར་ཕན་གདགས་པ་ལ་སོགས་པ་འགྲུབ་ན་མདོར་ན་ལས་ཅི་ཞིག་འགྲུབ་པར་འགྱུར་ཞེ་ན། རྒྱུད་འདིར་ལས་རྣམས་ནི་ཞི་བ་ལ་སོགས་པ་གསུམ་ཡིན་ཏེ། འདི་ལྟར་རྒྱུད་ལས། ཞི་བ་དང་ནི་རྒྱས་པ་དང་། །དེ་བཞིན་དྲག་ཤུལ་སྤྱོད་

71-1-166b

པ་སྟེ། །མདོར་ན་ལས་ནི་རྣམ་གསུམ་དུ། །གསང་སྔགས་ཀུན་ལས་བསྒྲགས་པ་ཡིན། །ཞེས་གསུངས་པས་སོ། །དེ་དག་འགྲུབ་པར་འགྱུར་རོ་ཞེས་བསྟན་པར་བྱ་བའི་ཕྱིར། ཞི་བ་ལ་སོགས་པ་གསུངས་ཏེ། ཞི་བ་ཞེས་བྱ་བ་ནི་གང་གིས་སྡིག་པ་ལ་སོགས་པ་མེད་པར་བྱེད་པའོ། །
རྒྱས་པ་ཞེས་བྱ་བ་ནི་གང་གིས་ལོངས་སྤྱོད་ལ་སོགས་པ་འཕེལ་བའོ། །སེམས་ཅན་ཐམས་ཅད་རེངས་པར་བྱེད་པ་ཞེས་བྱ་བ་ནི་གདུག་པ་ཅན་དག་གིས་འབད་རྩོལ་མེད་པར་བྱེད་པའོ། །རྣགས་པར་བྱེད་པ་ཞེས་བྱ་བ་ནི་གང་གིས་དྲན་པ་ཉམས་པར་བྱེད་པའོ། །འདི་སྐད་སྟོན་ཏེ་འགའ་
ཞིག་ལ་མ་ཡིན་པ་ལ་སོགས་པའི་གནོད་པ་བྱུང་ན་སྒྲུབ་པ་པོ་བདག་གིས་ས་ཕྱོགས་དཀར་པོ་དག་ཏུ་གོས་ལ་སོགས་པ་དཀར་པོ་བགོས་ཏེ། ཡོ་བྱད་རྣམས་དཀར་པོ་བསོགས་ནས་འདི་དག་ཉིད་དང་ལྡན་པས་ཞི་བའི་ཡིད་ཀྱིས་ཞི་བའི་ལས་བྱས་ན་ཞི་བ་ཆེན་པོ་འགྲུབ་པར་འགྱུར་རོ། །
འགའ་ཞིག་ཚེ་ལ་སོགས་པ་འཕེལ་བར་འདོད་ན་གོས་ལ་སོགས་པ་སེར་པོ་གྱོན་ཏེ་ཡོ་བྱད་རྣམས་སེར་པོ་བསོགས་ནས་རྒྱས་པའི་ལས་བྱས་ན་རྒྱས་པ་འགྲུབ་པོ། །འགའ་ཞིག་ཤ་ཟ་བ་ལ་སོགས་པ་ལ་དྲག་པོའི་ལས་བྱེད་པར་འདོད་ན་ཕྱོགས་ནག་པོ་དག་ཏུ་གོས་ལ་སོགས་པ་ནག་
པོ་གྱོན་ཏེ། ཡོ་བྱད་རྣམས་ནག་པོ་བསོགས་ནས་སྡང་བའི་ཡིད་ཀྱིས་མངོན་སྤྱོད་ཀྱི་ལས་བྱས་ན་རེངས་པ་ལ་སོགས་པ་འགྲུབ་པར་འགྱུར་རོ་ཞེས་བྱ་བའི་དོན་ཏོ། །འདི་ལྟར་བྱ་བའི་རྒྱུད་འདིར་རིགས་དུ་ཞིག་ཏུ་འགྱུར་ཞེ་ན། རིགས་གསུམ་ཡིན་ཏེ། དེ་བཞིན་གཤེགས་པའི་རིགས་ལ་
སོགས་པའོ། །འདི་ཉིད་གང་གི་རིགས་ཡིན་ཞེ་ན། འདི་ནི་རྡོ་རྗེའི་རིགས་ཡིན་ཏེ་དྲག་ཤུལ་གྱི་ལས་བསྟན་པའི་ཕྱིར་རོ། །དེ་ལ་ཡང་རྒྱུད་ལས། བདེ་བར་གཤེགས་པས་ཞི་བ་བྱ། །རྒྱས་ལ་པདྨའི་རིགས་སྐྱེས་ཀྱིས། །རྡོ་རྗེ་རིགས་གསུང་གསང་སྔགས་ཀྱིས། །དྲག་ཤུལ་སྤྱོད་པའི་ལས་རྣམས་
བྱ། །ཞེས་གསུངས་པ་ལས། དེ་ལྟར་ན་སྔར་བསྟན་པ་དང་འགལ་ལོ་ཞེ་ན། རིགས་རེ་རེས་ཀྱང་ལས་གསུམ་གསུམ་བྱེད་པས་འགལ་བ་མེད་དེ། དེ་ལྟར་རྒྱུད་ལས། མཁས་པས་རིགས་ནི་གསུམ་ཆར་ལ། །རབ་ལ་སོགས་པ་བསྟན་པ་དང་། །ཞི་བ་ལ་སོགས་བྱེ་བྲག་གིས། །

71-1-167a

ལས་ནི་རྣམ་པ་གསུམ་དུ་བྱའོ། །ཞེས་བསྟན་པས་སོ། །དེ་ལྟར་ན་འགལ་ལོ་ཞེ་ན། འདི་ནི་དོན་གྱི་གཙོ་བོ་ལས་དགོངས་པ་ཡིན་ཏེ། དེ་ཡང་རྒྱུད་ཉིད་ལས། གླེང་གཞིའི་དབང་དུ་མཛད་ནས་ནི། །གསང་སྔགས་གང་དག་གསུངས་གྱུར་པ། །དེ་ཉིད་དེ་ལ་གཙོ་བོར་
བསྟན། །ལྷག་མ་གཞན་དུ་ཤེས་པར་བྱ། །ཞེས་གསུངས་པ་ཡིན་ནོ། །དེ་ཙམ་གྱིས་ཀྱང་ཡིད་མགུ་བར་མ་གྱུར་ན། ཁྱེད་ཉིད་ཀྱིས་ཉེས་པ་ཡིན་གྱི་ཁོ་བོ་ལ་ནི་སྐྱོན་མེད་དོ། །ཤིན་ཏུ་སྤྲོས་པས་ཆོག་གོ།    །ད་ནི་དཀྱུས་མ་ཉིད་ལ་འཇུག་པར་བྱ་སྟེ། དེ་ལྟ་བུའི་སྟོབས་དང་ལྡན་པའི་
གསང་སྔགས་དེ་དག་གང་ཞིག་གིས་མཐུས་སུ་ཞིག་གིས་བསྟན་ཞེ་ན། དེའི་ཕྱིར་གསང་སྔགས་ཀྱི་མཐུ་ཆེན་པོ་ཞེས་བྱ་བ་ལ་སོགས་པ་གསུངས་ཏེ། གསང་སྔགས་ཀྱི་ཞེས་བྱ་བ་ནི་དམ་པ་མ་ཡིན་པ་དག་ལ་སྦས་པའི་ཡིད་སྐྱོབ་པར་བྱེད་པ་སྟེ། འདི་ལྟར་རྒྱུད་ལས། ཡིད་ཀྱིས་
སྐྱོབ་པར་འགྱུར་བས་ན། སྔགས་ཀྱི་བདག་ཉིད་ཅེས་བརྗོད་དོ། །ཞེས་གསུངས་པའོ། །མཐུ་ཆེན་པོ་འདི་ཞེས་བྱ་བ་ནི་ལས་མང་པོ་དང་ལྡན་པའི་ནུས་པའོ། །སངས་རྒྱས་ཀྱི་མཐུས་ཞེས་བྱ་བ་ནི་སྔར་བསྟན་པ་ལྟ་བུའོ། །ལག་ན་རྡོ་རྗེས་རབ་ཏུ་སྨྲས་སོ་ཞེས་བྱ་བ་ནི་བྱང་ཆུབ་སེམས་དཔའི་
ཁྱད་པར་འགའ་ཞིག་ལ་མིང་གི་དབང་བསྐུར་བ་ཅན་དེས་དོན་ཇི་ལྟ་བུ་ཞིག་ཏུ་བརྗོད་པས་སོ། །འདི་སྐད་སྟོན་ཏེ། གོང་དུ་བསྟན་པའི་ཡོན་ཏན་རྣམས་དང་ཡང་དག་པར་ལྡན་པའི་གསང་སྔགས་འདི་དག་ཀྱང་སངས་རྒྱས་ཀྱི་བྱིན་གྱི་རླབས་ཀྱིས་ཕྱག་ན་རྡོ་རྗེས་བཤད་པ་ཡིན་གྱི་རང་དགར་
སྨྲས་པ་མ་ཡིན་ཏེ། གཞན་དུ་ན་ཟློས་པའི་སྐྱོན་དུ་ཡང་འགྱུར་རོ་ཞེས་བྱ་བའི་དོན་ཏོ།    །གསང་བའི་བདག་པོས་དེ་ལྟར་མཐུ་དང་ལྡན་པའི་གསང་སྔགས་གསུངས་པས་ན་ཐོག་མར་སུ་ཞིག་ལ་ཕྱག་འཚལ་ཞེ་ན། དེ་བསྟན་པར་བྱ་བའི་ཕྱིར་ན་མོ་རཏྣ་ཏྲ་ཡཱ་ཡ་ཞེས་བྱ་བ་ལ་སོགས་པ་གསུངས་
ཏེ། འདིར་ནི་ཐུན་མོང་དང་ཐུན་མོང་མ་ཡིན་པའི་དཀོན་མཆོག་གསུམ་ལ་ཕྱག་འཚལ་ལོ། །ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ་ཞེས་བྱ་བ་ནི་བསམ་པ་ཐམས་ཅད་རྫོགས་པར་བྱེད་པའི་གནོད་སྦྱིན་གྱི་སྡེ་དཔོན་ཆེན་པོ་ཐུགས་དྲག་པོ་དང་ལྡན་པའི་ཕྱག་ན་རྡོ་རྗེ་ལ་ཕྱག་

71-1-167b

འཚལ་ལོ། །འདི་སྐད་སྟོན་ཏེ། སྒྲུབ་པ་པོ་རྣམས་ཀྱིས་ཀྱང་བསོད་ནམས་འཕེལ་བ་དང་ལས་རྣམས་འགྲུབ་པར་བྱེད་པའི་གསང་སྔགས་བརྗོད་པའི་ཐོག་མར་འདི་ལྟར་ཕྱག་བཙལ་བར་བྱའོ་ཞེས་བྱ་བའི་དོན་ཏོ།    །དེ་ལྟར་ཕྱག་འཚལ་ནས་ཅི་ཞིག་མཛད་ཅེ་ན། བཅོམ་ལྡན་འདས་ཉིད་
ཀྱིས་ཆོས་ཀྱི་དབྱིངས་ཀྱི་རང་བཞིན་ལ་བསྐུལ་བ་བསྟན་པའི་ཕྱིར། ཏདྱ་ཐཱ་ཞེས་བྱ་བ་ལ་སོགས་པ་གསུངས་ཏེ། ཏདྱ་ཐཱ་ཞེས་བྱ་བ་ནི་འོག་མ་འདྲེན་པར་བྱེད་པའི་ཚིག་གོ། །ཨོཾ་ཏྲ་ཊ་ཏྲ་ཊ་ཞེས་བྱ་བ་ནི་ཆོས་ཀྱི་དབྱིངས་ཀྱི་ཡེ་ཤེས་ལས་བྱུང་བའི་སྤྲུལ་པས་བདག་དང་གཞན་གྱི་ཉོན་
མོངས་པ་ལ་སོགས་པ་རྣམས་མཐར་མཛོད་ཅིག་པའོ། །ཏྲོ་ཊ་ཡ་ཏྲོ་ཊ་ཡ་ཞེས་བྱ་བ་ནི་ཤིན་ཏུ་སོལ་ཅིག་པའོ། །སྥུ་ཊ་སྥུ་ཊ་ཞེས་བྱ་བ་ནི་སྤོར་ཅིག་པའོ། །སྤོ་ཊ་ཡ་སྤོ་ཊ་ཡ་ཞེས་བྱ་བ་ནི་ཤིན་ཏུ་སྤོར་ཅིག་པའོ། །གྷུརྞ་གྷུརྞ་ཞེས་བྱ་བ་ནི་ཐར་པར་མཛོད་ཅིག་པའོ། །གྷུརྞཱ་པ་ཡ་གྷུརྞཱ་པ་ཡ་
ཞེས་བྱ་བ་ནི་བསྲེག་ཏུ་མ་བཏུབ་པ་རྣམས་གཞན་དུ་ཤིན་ཏུ་འབྱེར་བར་མཛོད་ཅིག་པའོ། །ལན་གཉིས་སུ་བརྗོད་པ་ནི་ཤིན་ཏུ་ཡང་དོན་དུ་གཉེར་བར་བྱ་བ་ཡིན་པ་ནའོ། །ཡང་ན་གཅིག་གིས་ནི་གཙོ་བོ་ལ་བསྐུལ་བ་ཡིན་ལ་གཉིས་པས་ནི་འཁོར་དུ་གྱུར་པ་ལ་བསྐུལ་བའོ། །སརྦ་སཏྭཱ་ནི། བོ་
དྷ་ཡ་བོ་དྷ་ཡ། ཞེས་བྱ་བ་ནི་སེམས་ཅན་ཐམས་ཅད་ཁྱད་པར་ཅན་གྱི་སེམས་ལ་གནས་པར་མཛོད་ཅིག་པའོ། །སཾ་བོ་དྷ་ཡ་སཾ་བོ་དྷ་ཡ་ཞེས་བྱ་བ་ནི་ཤིན་ཏུ་གནས་པར་མཛོད་ཅིག་པའོ། །བྷྲ་མ་བྷྲ་མ་ཞེས་བྱ་བ་ནི་ཕྱུང་ཤིག་པའོ། །སཾ་བྷྲ་མ་ཡ་སཾ་བྷྲ་མ་ཡ་ཞེས་བྱ་བ་ནི་ཤིན་ཏུ་ཕྱུང་ཤིག་པའོ། །
སརྦྦ་བྷཱུཏ་ནི། ཀུ་ཊ་ཀུ་ཊ་ཞེས་བྱ་བ་ནི་གནོད་པ་རྣམས་དུམ་བུར་མཛོད་ཅིག་པའོ། །སཾ་ཀུ་ཊ་ཡ་སཾ་ཀུ་ཊ་ཡ་ཞེས་བྱ་བ་ནི་ཤིན་ཏུ་དུམ་བུར་མཛོད་ཅིག་པའོ། །སརྦ་ཤ་ཏྲཱུཾ་ནཱཾ་གྷ་ཊ་གྷ་ཊ་ཞེས་བྱ་བ་ནི་བརྩེ་བ་མེད་པ་རྣམས་གནས་གཞན་དུ་ཕྱིན་པར་མཛོད་ཅིག་པའོ། །སཾ་གྷ་ཊ་ཡ་སཾ་གྷ་ཊ་ཡ་ཞེས་བྱ་བ་
ནི་ཤིན་ཏུ་ཕྱིན་པར་མཛོད་ཅིག་པའོ། །སརྦ་བི་དྱཱཾ་བཛྲ་བཛྲ་ཞེས་བྱ་བ་ནི་ལས་དེ་དག་ཀྱང་རིག་པ་ཅན་ཁྱོད་ཀྱི་ཡེ་ཤེས་ཀྱི་རྡོ་རྗེས་མཛད་ཅིག་པའོ། །སྤོ་ཊ་ཡ་བཛྲ་བཛྲ་ཞེས་བྱ་བ་ནི་ཡེ་ཤེས་ཀྱིས་གཏོར་ཅིག་པའོ། །ཀ་ཊ་བཛྲ་བཛྲ་ཞེས་བྱ་བ་ནི་ཡེ་ཤེས་ཀྱིས་བསད་པར་མཛོད་ཅིག་པའོ། །མ་ཊ་

71-1-168a

བཛྲ་བཛྲ་ཞེས་བྱ་བ་ནི་ཡེ་ཤེས་ཀྱིས་དུམ་བུར་མཛོད་ཅིག་པའོ། །མ་ཐ་བཛྲ་བཛྲ་ཞེས་བྱ་བ་ནི་ཡེ་ཤེས་ཀྱིས་ཕུག་ཅིག་པའོ། །ཨཊྚ་ཧ་ས་ནཱི་ལ་བཛྲ་བཛྲ་ཞེས་བྱ་བ་ནི་ཁྱོད་ཀྱི་ཡེ་ཤེས་ཀྱི་རྡོ་རྗེ་སྔོན་པོ་ཕྱག་ན་བསྣམས་པས་དབྱུང་བ་དང་བཅད་པའི་ཕྲིན་ལས་མཛོད་ཅིག་
པའོ། །སུ་བཛྲཱ་ཡ་སྭཱཧཱ་ཞེས་བྱ་བ་ནི་གོང་དུ་བསྟན་པའི་ལས་ཐམས་ཅད་ཀྱང་ཆོས་ཀྱི་དབྱིངས་རྣམ་པར་དག་པའི་ཡེ་ཤེས་ཀྱིས་ལེགས་པར་མཛོད་ཅིག་པའོ། །འདི་སྐད་སྟོན་ཏེ་འགའ་ཞིག་གིས་བཅོམ་ལྡན་འདས་རྡོ་རྗེ་རྣམ་པར་འཇོམས་པ་མདུན་དུ་བསམས་ཏེ། དེ་ཉིད་ཀྱིས་ཆོས་
ཀྱི་དབྱིངས་ཀྱི་ཡེ་ཤེས་ལ་དམིགས་ནས་གསང་སྔགས་དེ་དག་བཟླས་ནས་གང་ལ་བྱ་བའི་ལས་སྣ་ཚོགས་པ་འགྲུབ་པར་འགྱུར་རོ་ཞེས་བྱ་བའི་དོན་ཏོ།    །དེ་ལྟར་ཆོས་ཀྱི་དབྱིངས་ཀྱི་ཡེ་ཤེས་ལ་བསྐུལ་བ་བསྟན་ནས། ཡེ་ཤེས་བཞི་ལ་སྤྱིར་བསྐུལ་བ་བསྟན་པའི་ཕྱིར། ཧེ་ཕུལླུ་ཞེས་བྱ་བ་
ལ་སོགས་པ་གསུངས་ཏེ། ཧེ་ཕུལླུ། ནི་རུ་ཕུལླུ་ཞེས་བྱ་བ་ནི་མེ་ལོང་ལྟ་བུའི་ཡེ་ཤེས་ལ་སོགས་པ་ལས་སྤྲུལ་པའི་ཁྲོ་བོ་རྣམས་ཀྱིས་སྡུག་བསྔལ་ཆེན་པོའི་རྒྱུ་རྣམས་གཅོད་ཅིག་པའོ། །གྲྀཧྞ་ཀུ་ལུ་ཞེས་བྱ་བ་ནི་གཞོམ་པར་མཛོད་ཅིག་པའོ། །མི་ལི་ཙུ་ལུ། ཀུ་རུ་ཀུ་ལུ་ཞེས་བྱ་བ་ནི་
དག་པར་མཛོད་ཅིག་པའོ། །བཛྲ་བི་ཛ་ཡཱ་ཡ་སྭཱཧཱ། ཞེས་བྱ་བ་ནི་རྣམ་པར་རྒྱལ་བའི་ཡེ་ཤེས་ཀྱི་རྡོ་རྗེས་ཞི་བར་མཛོད་ཅིག་པའོ། །ཀཱི་ལི་ཀཱི་ལཱ་ཡ་སྭཱཧཱ་ཞེས་བྱ་བ་ནི་ཡེ་ཤེས་ཀྱི་ཕུར་བུས་ཞི་བའི་ལས་མཛོད་ཅིག་པའོ། །ཀ་ཊ་ཀ་ཊ་ཞེས་བྱ་བ་ནི་སྤ་བཀོང་བར་མཛོད་ཅིག་པའོ། །མ་ཊ་མ་ཊ་
ཞེས་བྱ་བ་ནི་འགྲོ་བ་རྣམས་མྱ་ངན་ལས་འདས་པའི་བདེ་བ་ཆེན་པོ་ལ་སྦྱོར་ཅིག་པའོ། །ར་ཊ་ར་ཊ་ཞེས་བྱ་བ་ནི་སྡུག་བསྔལ་རྣམས་མི་འཕེལ་བར་མཛོད་ཅིག་པའོ། །མོ་ཊ་ཎ་པྲ་མོ་ཊ་ཎཱ་ཡ་སྭཱཧཱ་ཞེས་བྱ་བ་ནི་མི་མཐུན་པའི་ཕྱོགས་རྣམས་ལས་བསྒྲལ་བར་མཛོད་ཅིག་པའོ། །ཙ་ར་ཎི་ཙ་
ར་ཎི་ཞེས་བྱ་བ་ནི་དཔལ་ཕུན་སུམ་ཚོགས་པ་ལ་སྦྱོར་ཅིག་པའོ། །ཧ་ར་ཧ་ར་ཞེས་བྱ་བ་ནི་ཉོན་མོངས་པ་ལ་སོགས་པ་རྣམས་ཕྲོགས་ཤིག་པའོ། །ས་ར་ས་ར་ཞེས་བྱ་བ་ནི་ཕུལ་དུ་བྱུང་བའི་བློ་སྐྱེད་ཅིག་པའོ། །མཱ་ར་ཡ་ཞེས་བྱ་བ་ནི་མདོར་ན་ཡེ་ཤེས་བཞིའི་རང་བཞིན་གྱིས་བར་དུ་གཅོད་

71-1-168b

པ་རྣམས་ཞི་བར་མཛོད་ཅིག་པའོ། །འདི་སྐད་སྟོན་ཏེ་བཅོམ་ལྡན་འདས་ཀྱི་ཡེ་ཤེས་བཞི་ལ་དམིགས་ནས་བཟླས་བརྗོད་ལ་སོགས་པ་བྱས་པས་དེ་བཞིན་དུ་འགྲུབ་པར་འགྱུར་རོ་ཞེས་བྱ་བའི་དོན་ཏོ།    །དེ་ལྟར་ཐུགས་ཀྱི་རང་བཞིན་ཡེ་ཤེས་ལ་བསྐུལ་བ་བསྟན་ནས། ཁྲོ་བོ་རྣམས་ཀྱི་སྐུའི་
རང་བཞིན་ལ་བསྐུལ་བ་བསྟན་པར་བྱ་བའི་ཕྱིར། བཛྲ་བི་དཱ་ར་སྭཱཧཱ་ཞེས་བྱ་བ་ལ་སོགས་པ་གསུངས་ཏེ། བཛྲ་བི་དཱ་ར་སྭཱཧཱ་ཞེས་བྱ་བ་ནི་བཅོམ་ལྡན་འདས་རྡོ་རྗེ་རྣམ་པར་འཇོམས་པའི་སྐུའི་རང་བཞིན་གྱིས་སེམས་ཅན་རྣམས་ཀྱི་བག་ཆགས་ངན་པའི་དྲི་མ་རྣམས་ཞི་ཞིང་མེད་པར་མཛོད་
ཅིག་ཅེས་བསྐུལ་བའོ། །ཙྪིནྡ་ཙྪིནྡ་མ་ཧཱ་ཀཱི་ལི་ཀཱི་ལཱ་ཡ་སྭཱཧཱ་ཞེས་བྱ་བ་ནི་མཐར་ཕྱིན་པར་མཛོད་ཅིག་པའོ། །བྷིནྡ་བྷིནྡ་ཞེས་བྱ་བ་ནི་ཕྱེ་མར་རློགས་ཤིག་པའོ། །མ་ཧཱ་ཀཱི་ལི་ཀཱི་ལཱ་ཡ་སྭཱཧཱ་ཞེས་བྱ་བ་ནི་ཁྱེད་ཀྱི་སྐུའི་ཕུར་བུ་ཆེན་པོས་ཉོན་མོངས་པ་ལ་སོགས་པ་རྣམས་ཞི་བར་མཛོད་ཅིག་པའོ། །
བནྡྷ་བནྡྷ་ཞེས་བྱ་བ་ནི་མ་རུངས་པ་རྣམས་ཆིངས་ཤིག་པའོ། །ཀྲོ་དྷ་ཀཱི་ལི་ཀཱི་ལཱ་ཡ་སྭཱཧཱ་ཞེས་བྱ་བ་ནི་ཁྲོས་ཤིང་འཁྲུགས་པའི་ཕུར་བུས་ལས་ངན་པ་རྣམས་མེད་པར་མཛོད་ཅིག་པའོ། །འདི་སྐད་སྟོན་ཏེ། བཅོམ་ལྡན་འདས་ཀྱི་སྐུ་ལ་དམིགས་ནས་བསྐུལ་བ་བྱས་ན་སྔ་མ་ལྟར་འགྲུབ་
པར་འགྱུར་རོ་ཞེས་བྱ་བའི་དོན་ཏོ།    །དེ་ལྟར་འཁོར་གྱི་སྐུའི་རང་བཞིན་ལ་བསྐུལ་བ་བསྟན་ནས་ཁྲོ་བོ་བཞིའི་སྙིང་པོའི་སྒོ་ནས་བསྐུལ་བ་བསྟན་པར་བྱ་བའི་ཕྱིར་ཙུ་རུ་ཙུ་རུ་ཞེས་བྱ་བ་ལ་སོགས་པ་གསུངས་ཏེ། ཙུ་རུ་ཙུ་རུ་ཙཎྜ་ཀཱི་ལི་ཀཱི་ལཱ་ཡ་སྭཱཧཱ་ཞེས་བྱ་བ་ནི་ཁྲོ་བོ་ཆེན་པོ་རྡོ་རྗེ་གཏུམ་
པོའི་ཕུར་བུས་བགེགས་རྣམས་ཞི་བར་མཛོད་ཅིག་པའོ། །ཏྲཱ་ས་ཡ་ཏྲཱ་ས་ཡ་བཛྲ་ཀཱི་ལི་ཀཱི་ལཱ་ཡ་སྭཱཧཱ་ཞེས་བྱ་བ་ནི་ཁྲོ་བོ་ཆེན་པོ་ཀཱི་ལི་ཀཱི་ལ་ཡའི་ཕུར་བུས་བགེགས་རྣམས་སྐྲག་པར་མཛོད་ཅིག་པའོ། །ཧ་ར་ཧ་ར་བཛྲ་བི་དཱ་རཱ་ཡ་སྭཱཧཱ་ཞེས་བྱ་བ་ནི་ཁྲོ་བོ་ཆེན་པོ་རྡོ་རྗེ་བེ་ཅོན་གྱི་ཕུར་བུས་
བགེགས་རྣམས་འདར་བར་མཛད་ཅིག་པའོ། །པྲ་ཧ་ར་པྲ་ཧ་ར་བཛྲ་པྲ་བྷཉྫ་ནཱ་ཡེ་སྭཱཧཱ་ཞེས་བྱ་བ་ནི་ཁྲོ་བོ་ཆེན་པོ་རྡོ་རྗེ་ཐོ་བའི་ཕུར་བུས་བགེགས་རྣམས་མེད་པར་མཛོད་ཅིག་པའོ། །འདི་སྐད་སྟོན་ཏེ་བསྙེན་པ་ལ་སོགས་པ་བྱེད་པའི་དུས་སུ་གཟུངས་རྫོགས་པར་བཟླས་པར་མི་ནུས་ན་ཁྲོ་བོ་

71-1-169a

བཞིའི་སྙིང་པོའི་བཟླས་པར་བྱ་བ་ནི་འདི་དག་ཡིན་ནོ་ཞེས་བྱ་བའི་དོན་ཏོ།    །དེ་ལྟར་སྙིང་པོའི་སྒོ་ནས་བསྐུལ་བ་བསྟན་ནས། དེ་དག་གསུང་གི་སྒོ་ནས་བསྐུལ་བ་བསྟན་པའི་ཕྱིར། མ་ཏི་སྠིར་བཛྲ་ཞེས་བྱ་བ་ལ་སོགས་པ་གསུངས་ཏེ། མ་ཏི་སྠིར་བཛྲ་ཞེས་བྱ་བ་ནི་བློ་གྲོས་
ཕུལ་དུ་བྱུང་བ་རྣམས་ཀྱི་སེམས་རྡོ་རྗེ་ལྟར་བརྟན་ཞིང་མི་གཡོ་བར་མཛོད་ཅིག་པའོ། །སུ་ཏི་སྠིར་བཛྲ་ཞེས་བྱ་བ་ནི་ལེགས་པར་བརྟན་པར་མཛོད་ཅིག་པའོ། །པྲ་ཏི་སྠིར་བཛྲ་ཞེས་བྱ་བ་ནི་རབ་ཏུ་བརྟན་པར་མཛོད་ཅིག་པའོ། །མ་ཧཱ་བཛྲ་ཞེས་བྱ་བ་ནི་ཆེན་པོ་རྣམས་ཀྱི་ཚུལ་དུ་བརྟན་པར་མཛོད་
ཅིག་པའོ། །ཨ་པྲ་ཏི་ཧ་ཏ་བཛྲ་ཞེས་བྱ་བ་ནི་རབ་ཏུ་གཡོ་བ་མེད་པའི་ཡེ་ཤེས་ཀྱི་རྡོ་རྗེ་ལེགས་པར་གསོལ་ཅིག་པའོ། །ཨ་མོ་གྷ་བཛྲ་ཞེས་བྱ་བ་ནི་ཡེ་ཤེས་ཆེན་པོའི་ཕྲིན་ལས་རྣམས་དོན་ཡོད་པར་མཛོད་ཅིག་པའོ། །ཨེ་ཧི་བཛྲ་ཞེས་བྱ་བ་ནི་ཡེ་ཤེས་ཀྱི་རྡོ་རྗེ་དང་ལྡན་པ་གདུལ་བྱའི་རྒྱུད་
ལས་གཤེགས་ཤིག་པའོ། །ཤཱི་གྷྲཾ་བཛྲཱ་ཡ་ཞེས་བྱ་བ་ནི་བྱོན་ནས་ཀྱང་མྱུར་དུ་ཞི་བའི་ལས་གྲུབ་པར་མཛོད་ཅིག་པའོ། །དྷ་ར་དྷ་ར་ཞེས་བྱ་བ་ནི་འབྱུང་པོ་རྣམས་ཟུངས་ཤིག་པའོ། །དྷི་རི་དྷི་རི་ཞེས་བྱ་བ་ནི་བཟུང་ཟིན་པ་རྣམས་ཐོགས་ཤིག་པའོ། །དྷུ་རུ་དྷུ་རུ་ཞེས་བྱ་བ་ནི་བཏགས་པ་རྣམས་མི་
འཆོར་བར་མཛོད་ཅིག་པའོ། །སརྦ་བཛྲ་ཀུ་ལཾ་ཨཱ་བརྟཱ་ཡ་ཞེས་བྱ་བ་ནི་རྡོ་རྗེའི་རིགས་ཐམས་ཅད་ཀྱིས་ཞི་བ་དང་ལྡན་པའི་བྱིན་གྱི་རླབས་མཛོད་ཅིག་པའོ། །ཨ་མུ་ཀཾ་མཱ་ར་ཡ་ཕཊ་ཅེས་བྱ་བ་ནི་བར་དུ་གཅོད་པ་རྣམས་བཟློག་པ་དང་གཞོམ་པའི་ལས་མཛོད་ཅིག་པའོ། །འདི་སྐད་སྟོན་ཏེ་དེ་དག་གི་
གསུང་གི་རང་བཞིན་ལ་དམིགས་ནས་བསྒྲུབས་ན་ཡང་སྔ་མ་ལྟར་འགྲུབ་པར་འགྱུར་རོ་ཞེས་བྱ་བ་སྟོན་ཏོ།    །དེ་ལྟར་གསུང་གི་སྒོ་ནས་བསྒྲུབ་པ་བསྟན་ནས་སྐུ་དང་གསུང་དང་ཐུགས་ལ་སྤྱིར་བསྐུལ་བ་བསྟན་པར་བྱ་བའི་ཕྱིར། ན་མཿས་མནྟ་བཛྲ་ཎཱཾ་ཞེས་བྱ་བ་ནི་རྡོ་རྗེའི་རང་བཞིན་གྱིས་བདག་
ཀུན་ནས་ཕྱག་འཚལ་བའི་གནས་སུ་མཛོད་ཅིག་པའོ། །སརྦ་བཱ་ལེ་ཨཱ་བརྟཱ་ཡ་མ་ཧཱ་བ་ལེ་ཞེས་བྱ་བ་ནི་སྟོབས་ཆེན་པོ་དང་ལྡན་པ་ཐམས་ཅད་ཀྱིས་བསྟོད་ཅིང་དགྱེས་པའི་གནས་སུ་མཛོད་ཅིག་པའོ། །ཀ་ཏ་བེ་ཏ་ཏ་ལེ་ཨ་ཙ་ལེ་ཞེས་བྱ་བ་ནི་ཡེ་ཤེས་ཀྱི་མཆེ་བ་ཆེན་པོས་བགེགས་རྣམས་ལ་

71-1-169b

ཐོབ་ལ་མི་གཡོ་བར་མཛོད་ཅིག་པའོ། །མཎྜ་ལ་མ་ཡེ། ཨ་ཏི་བཛྲ་ཞེས་བྱ་བ་ནི་ཡེ་ཤེས་མཆོག་དང་ལྡན་པ་རྣམས་ཀྱིས་དཀྱིལ་འཁོར་སྐྱོང་བ་རྣམས་བདག་ལ་འགོ་བར་མཛོད་ཅིག་པའོ། །མ་ཧཱ་བ་ལེ་བེ་ག་ར་ཎ་ཞེས་བྱ་བ་ནི་སྟོབས་ཆེན་པོ་དང་བཅས་པ་རྣམས་ཀྱིས་བར་ཆོད་རྣམས་མྱུར་དུ་
མེད་པར་མཛོད་ཅིག་པའོ། །ཨ་ཛི་ཏེ་ཛྭ་ལ་ཛྭ་ལ་ཞེས་བྱ་བ་ནི་ཡེ་ཤེས་ཆེན་པོའི་མེ་འབར་བར་མཛོད་ཅིག་པའོ། །ཏི་ཊི་ཏི་ཊི་པིཾ་ག་ལེ་ཞེས་བྱ་བ་ནི་རབ་ཏུ་འབར་བར་བསྡུས་པས་གནོད་པ་རྣམས་ལས་སྲུངས་ཤིག་པའོ། །ད་ཧ་ད་ཧ་ཏེ་ཛོ་བ་ཏི་ཞེས་བྱ་བ་ནི་གཟི་བརྗིད་ལྡན་པའི་མེས་བསྲེག་པར་
མཛོད་ཅིག་པའོ། །ཏི་ལི་ཏི་ལི་ཞེས་བྱ་བ་ནི་བཅད་པར་མཛོད་ཅིག་པའོ། །བནྡྷ་བནྡྷ་ཞེས་བྱ་བ་ནི་སྲེགས་ཤིག་པའོ། །མ་ཧཱ་བཱ་ལེ་བཛྲ་ཨཾ་ཀུ་ཤ་ཛཱ་ལཱ་ཡ་སྭཱཧཱ་ཞེས་བྱ་བ་ནི་རྡོ་རྗེའི་ལུས་འབར་བ་དང་ལྡན་པའི་སྟོབས་ཆེན་པོས་བགེགས་རྣམས་ཞི་ཞིང་མེད་པར་མཛོད་ཅིག་པའོ། །འདི་
སྐད་སྟོན་ཏེ། ཁྲོ་བོ་རྣམས་ཀྱི་སྐུ་གསུང་ཐུགས་ལ་སྤྱིར་དམིགས་ནས་བཟླས་པར་བྱས་ན་ཡང་དེ་བཞིན་དུ་འགྱུར་རོ་ཞེས་བྱ་བའི་དོན་ཏོ།    །དེ་ལྟར་སྐུ་གསུང་ཐུགས་ཀྱི་ཕྲིན་ལས་ལ་སྦྱོར་ཞིང་བསྐུལ་བ་བསྟན་ནས། བཅོམ་ལྡན་འདས་ཀྱི་སྙིང་པོའི་སྒོ་ནས་བསྐུལ་བ་བསྟན་པར་བྱ་བའི་
ཕྱིར། ན་མོ་རཏྣ་ཏྲ་ཡཱ་ཡ་ཞེས་བྱ་བ་ལ་སོགས་པ་གསུངས་ཏེ། དེ་དག་ནི་སྔར་བཤད་པ་ལྟ་བུའོ། །ཨོཾ་ཞེས་བྱ་བ་ནི་རབ་ཏུ་བསྔགས་པའི་དོན་ཏེ། བཀྲ་ཤིས་པའི་དོན་ཏོ། །ཧ་ར་ཧ་ར་བཛྲ་ཞེས་བྱ་བ་ནི་གདུག་པ་ཅན་རྣམས་ཀྱི་སྲོག་ཡེ་ཤེས་ཀྱི་རྡོ་རྗེས་ཕྲོགས་ཤིག་པའོ། །མ་ཐ་མ་
ཐ་བཛྲ་ཞེས་བྱ་བ་ནི་ཡེ་ཤེས་ཀྱི་རྡོ་རྗེས་དེ་དག་ལ་བརྡེག་པར་མཛོད་ཅིག་པའོ། །ད་ཧ་ད་ཧ་བཛྲ་ཞེས་བྱ་བ་ནི་ཡེ་ཤེས་ཀྱི་རྡོ་རྗེས་སྲེགས་ཤིག་པའོ། །པ་ཙ་པ་ཙ་བཛྲ་ཞེས་བྱ་བ་ནི་ཡེ་ཤེས་ཀྱི་རྡོ་རྗེས་དེ་དག་ཆོམས་ཤིག་པའོ། །དྷ་ར་དྷ་ར་བཛྲ་ཞེས་བྱ་བ་ནི་གནོད་པ་ཅན་འབྲོས་པ་རྣམས་ཟུངས་ཤིག་
པའོ། །དྷཱ་ར་ཡ་དྷཱར་ཡ་བཛྲ་ཞེས་བྱ་བ་ནི་ཡེ་ཤེས་ཅན་ཁྱེད་ཀྱི་འཁོར་རྣམས་ཀྱང་འཛིན་དུ་ཆུག་ཅིག་པའོ། །དཱ་རུ་ཎ་དཱ་རུ་ཎ་བཛྲ་ཞེས་བྱ་བ་ནི་དྲག་ཏུ་ཟུང་ཞིག་པའོ། །ཚིནྡ་ཚིནྡ་བཛྲ་ཞེས་བྱ་བ་ནི་བཟུང་ཟིན་པ་རྣམས་རྡོ་རྗེས་ཆོད་ཅིག་པའོ། །བྷིནྡ་བྷིནྡ་བཛྲ་ཧཱུཾ་ཕཊ་ཅེས་བྱ་བ་ནི་ཡེ་ཤེས་ཀྱི་རང་བཞིན་

71-1-170a

གྱི་ཐུགས་ཀྱིས་ཁོས་ཤིག་པའོ། །འདི་སྐད་སྟོན་ཏེ་བསྙེན་པ་ལ་སོགས་པ་བྱེད་པའི་དུས་སུ་བཅོམ་ལྡན་འདས་ལ་དམིགས་ནས་བཟླས་པ་བྱས་ན་སྔ་མ་ལྟར་འགྲུབ་པར་འགྱུར་རོ་ཞེས་བྱ་བའི་དོན་ཏོ།    །དེ་ལྟར་དབུས་ཀྱི་གཙོ་བོའི་སྙིང་པོའི་སྒོ་ནས་བསྐུལ་བ་བསྟན་ནས། 
ཉེ་བའི་སྙིང་པོའི་སྒོ་ནས་བསྐུལ་བ་བསྟན་པའི་ཕྱིར། ན་མཿ་ཙཎྜ་བཛྲ་ཀྲོ་དྷཱ་ཡ་ཞེས་བྱ་བ་ལ་སོགས་པ་གསུངས་ཏེ། ན་མཿ ཤྩཎྜ་བཛྲ་ཀྲོ་དྷཱ་ཡ་ཞེས་བྱ་བ་ནི་དངོས་གྲུབ་ཀྱི་མཆོག་སྒྲུབ་པའི་ཕྱིར་རྡོ་རྗེ་ཁྲོ་བོ་དྲག་པོ་ལ་ཕྱག་འཚལ་ལོ་ཞེས་བྱ་བའོ། །ཧུ་ལུ་ཧུ་ལུ་ཞེས་བྱ་བ་ནི་དངོས་གྲུབ་ཀྱི་བགེགས་
སུ་གྱུར་པ་རྣམས་བདག་གི་མདུན་དུ་དྲག་ཏུ་ཁུག་ཅིག་པའོ། །ཏིཥྛ་ཏིཥྛ་ཞེས་བྱ་བ་ནི་དྲངས་པ་རྣམས་བདག་གི་མདུན་དུ་གནས་པར་མཛོད་ཅིག་པའོ། །བནྡྷ་བནྡྷ་ཞེས་བྱ་བ་ནི་གནས་པ་རྣམས་ཆིངས་ཤིག་པའོ། །ཧ་ན་ཧ་ན་ཞེས་བྱ་བ་ནི་བཅིངས་པ་རྣམས་ལ་རྡེགས་ཤིག་པའོ། །ཨ་
མྲྀ་ཏེ་ཧཱུཾ་ཕཊ་ཅེས་བྱ་བ་ནི་ལས་དེ་དག་ཐམས་ཅད་ཀྱང་མཐར་ཕྱིན་ཅིང་ཕྱིར་མི་ལྡོག་པའི་ས་ལ་བཞག་ནས་འཆི་བ་མེད་པའི་གནས་ལ་སྦྱོར་བར་མཛོད་ཅིག་པའོ། །འདི་སྐད་སྟོན་ཏེ། སྒྲུབ་པ་འདི་ལ་གནས་པའི་རྣལ་འབྱོར་པས་ཀྱང་དད་པས་བཅོམ་ལྡན་འདས་ལ་དམིགས་ནས་ཉེ་བའི་
སྙིང་པོ་འདི་བཟླས་ན། ཇི་ལྟར་བསམས་པ་དེ་བཞིན་དུ་འགྲུབ་པར་འགྱུར་རོ་ཞེས་བྱ་བའི་དོན་ཏོ།    །དེ་ལྟར་རང་རང་གི་ཕྲིན་ལས་བསྐུལ་བ་བསྟན་ནས་དཀྱིལ་འཁོར་སྒྲུབ་པ་བསྟན་པར་བྱ་བའི་ཕྱིར། སྡིག་པ་ཐམས་ཅད་བྱང་བྱས་ནས། །ཞེས་བྱ་བ་ལ་སོགས་པ་གསུངས་ཏེ། སྡིག་པ་
ཐམས་ཅད་ཅེས་བྱ་བ་ནི་མཚམས་མེད་པ་ལྔ་པོ་ལ་སོགས་པ་ངན་སོང་དུ་སྐྱེ་བར་འགྱུར་བའི་རྒྱུ་དང་རྐྱེན་རྣམ་པ་གཉིས་སོ། །བྱང་བྱས་ནས་ཞེས་བྱ་བ་ནི་དེ་དག་སྤངས་ཤིང་དག་པར་བྱས་པའི་འོག་ཏུའོ། །སྡུག་བསྔལ་ཐམས་ཅད་མེད་པར་བྱེད། །ཅེས་བྱ་བ་ནི་དེ་དག་གི་འབྲས་བུར་གྱུར་པ་
སྡུག་བསྔལ་གསུམ་ལ་སོགས་པ་མེད་པར་འགྱུར་བའོ། །འདི་སྐད་སྟོན་ཏེ་སྡིག་པ་སྤོང་བའི་གཞིའི་རྒྱུ་ནི་རྣམ་པ་གཉིས་ཏེ། ལྟ་བ་རྣམ་པར་དག་པ་དང་། སྤྱོད་པ་རྣམ་པར་དག་པའོ། །དེ་ལ་ཉན་ཐོས་བྱེ་བྲག་ཏུ་སྨྲ་བ་ལ་སོགས་པ་འདོད་པ་ཡང་དག་པ་ནི་བཏགས་པ་ཁོ་ན་ཡིན་

71-1-170b

ཏེ། ཚད་མ་ཉིད་ཀྱིས་མ་གྲུབ་པའི་ཕྱིར་རོ། །ནང་གི་ཡིན་པར་སྨྲ་བ་རྣམས་ཀྱི་ལྟར་ན། ཡང་ན་འཐད་པ་མ་ཡིན་ཏེ་ཕུལ་དུ་བྱུང་བའི་སྒྲུབ་པར་བྱེད་པ་མེད་པས་སོ། །འོ་ན་གང་ཞེན། ཁྱད་པར་དུ་འཕགས་པའི་ལམ་དབུ་མའི་གཞུང་ཁོ་ན་ལ་གནས་པ་ཡིན་ཏེ། བདེན་པ་གཉིས་ཀྱི་ཚུལ་ལས་
མ་འདས་ཤིང་མི་འགལ་བར་གནས་པའི་ཕྱིར་རོ། །ཅི་དེ་ཁོ་ནར་ཟད་དམ་ཞེ་ན་རྒྱས་པར་ནི་ཤེས་རབ་ཀྱི་མིག་དང་ལྡན་པ་རྣམས་ཀྱི་རྗེས་སུ་འབྲངས་ནས་ཤེས་པར་བྱའི། ཁོ་བོ་ལྟ་བུ་ལ་ནི་དོན་ཟབ་པ་དག་སྟོན་པའི་ནུས་པ་ཡོད་རེ་སྐན། དེ་ཡང་འགལ་བ་ཡིན་ནོ་ཞེ་ན་བདེན་ཏེ། དེ་དག་ནི་བླ་
མའི་མན་ངག་གིས་བཤད་པ་ཡིན་ནོ། །དེ་ནི་ལྟ་བ་རྣམ་པར་དག་པ་ཡིན་ནོ། །འདི་ལྟར། སྟོང་ཉིད་བསྒོམས་པས་གྲོལ་འགྱུར་གྱི། །སྒོམ་པ་ལྷག་མ་དེ་དོན་ཡིན། །ཞེས་བཤད་པ་ལྟ་བུའོ། །སྤྱོད་པ་ནི་གསུམ་སྟེ། བདེན་པ་དང་། ཕ་རོལ་ཏུ་ཕྱིན་པ་དང་། གསང་སྔགས་ཀྱི་
སྤྱོད་པ་ལ་བརྟེན་པ་ཡིན་ནོ། །དེ་དག་གི་ནང་ནས་མཆོག་ཏུ་གྱུར་པ་གཞི་གསང་སྔགས་ཀྱི་སྤྱོད་པ་ཡིན་ཏེ། འདི་ལྟར། རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་རྫོགས་སངས་རྒྱས། །དེ་དག་ཀུན་གྱི་གསང་སྔགས་ཀྱི། །ཆོ་ག་
བཟང་པོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་ཚད་མེད་བརྙེས། །གསང་སྔགས་སྤྱོད་པ་མཉམ་མེད་དེ། །སྐྱོབ་པ་ཤཱཀྱ་སེང་གེ་ཡིས། །བདུད་སྡེ་ཤིན་ཏུ་མི་བཟད་པའི། །དཔུང་ཆེན་དག་ཀྱང་དེ་ཡིས་བཅོམ། །ཞེས་རྒྱུད་ལས་གསུངས་པ་
ཡིན་ནོ། །དེ་གསལ་བར་བསྟན་པར་བྱ་བའི་ཕྱིར། རྒྱུད་དོ་ཅོག་གི་རྩ་བ་སྟེ། །ཞེས་བྱ་བ་ལ་སོགས་པ་གསུངས་ཏེ་རྒྱུད་དོ་ཅོག་གི་ཞེས་བྱ་བ་ནི་ཐུབ་པ་ཆེན་པོའི་སྐུ་རྣམ་པ་གཉིས་བསྐུལ་ཏེ་བྱུང་བའོ། །དེ་སྟོན་པའི་གཞུང་ལས་ཀྱང་འདི་སྐད་ཅེས་བྱ་སྟེ་མ་ལུས་པའོ། །རྩ་བ་སྟེ་ཞེས་
བྱ་བ་ནི་ཞི་བ་ལ་སོགས་པའི་ལས་ཐམས་ཅད་སྟོན་པས་སོ། །དཔལ་ཀུན་གྱིས་ནི་ལེགས་པར་བརྒྱན། །ཞེས་བྱ་བ་ནི་བསོད་ནམས་དང་ཡེ་ཤེས་ཀྱི་ཚོགས་མཐའ་དག་འབྱུང་ཞིང་སྐྱེ་བའི་གཞི་དང་གནས་སུ་གྱུར་པར་དཀྱིལ་འཁོར་ལ་སོགས་པ་སྟོན་པས་སོ། །འདི་སྐད་སྟོན་ཏེ། 

71-1-171a

ཚུལ་ཁྲིམས་ཀྱི་སྡོམ་པ་བླངས་ཏེ། དད་པས་བྱང་ཆུབ་ཏུ་སེམས་བསྐྱེད་ནས། སློབ་དཔོན་དུ་དབང་བསྐུར་བ་ཐོབ་པའི་རྣལ་འབྱོར་པ་གཞན་དག་གིས་ལན་གཉིས་སམ་གསུམ་དུ་གསོལ་བ་བཏབ་བམ་མ་བཏབ་ཀྱང་རུང་བར་ཐུན་མོང་གི་རྒྱུད་དག་ལས་བྱུང་བའི་ཆོ་གས་
བསྙེན་པ་དང་སའི་ཆོ་ག་ལ་སོགས་པ་བྱ་སྟེ། འདི་ལྟར་རྒྱུད་ལས། དེ་ནས་གཞན་ཡང་རྒྱུད་ཀུན་ལས། །དཀྱིལ་འཁོར་ཇི་ལྟར་རྒྱས་བཤད་པའི། །ཆོ་ག་ལྷག་མ་ལུས་པ་དག །འདིར་ནི་ལྷག་པར་རབ་ཏུ་བཤད། །ཅེས་གསུངས་པ་དང་། གཞན་ཡང་། གང་དག་དུ་ནི་རང་ཉིད་ཀྱིས། །ལས་
ཀྱི་ཆོ་ག་རྣམས་མེད་པ། །དེར་ནི་སྤྱི་ཡི་རྒྱུད་དག་ལས། །གསུངས་པའི་ཆོ་ག་མཁས་པས་བསྟེན། །ཞེས་བཤད་པས་ན་འགལ་བ་མེད་དོ། །དེ་ནས་རྒྱུད་ལས་གསུངས་པའི་སྟ་གོན་གྱི་ཆོ་ག་བྱ་སྟེ། དུས་མཚམས་དག་ལས་སྨྱུང་བྱས་ན། །ནུབ་གཅིག་གམ་ནི་ནུབ་གསུམ་དུ། །གཙང་
ཞིང་གོས་དཀར་གཙང་བགོས་ཏེ། །ཟླ་བས་སྟ་གོན་གནས་པར་བྱ། །དུས་མཚམས་མིན་ཡང་དགོས་ཡོད་ན། །ཡར་གྱི་ངོ་ཡི་ཚེས་བཟང་ལ། །ཞི་བ་མཆོག་གི་གསང་སྔགས་ཀྱིས། །སྟ་གོན་གནས་པར་རབ་ཏུ་བྱ། །སྐྱུ་རུ་ར་སོགས་ཁྲུས་རྩི་དང་། །དྲི་ཞིམ་སྤོས་ཀྱིས་ཁྲུས་བྱས་ཏེ། །
ཉེ་རེག་བྱས་ཏེ་སྲོད་ལ་ནི། །གསང་སྔགས་སྤྱན་དྲངས་མཆོད་པ་བྱ། །དེ་ནས་ལྷག་པར་མངོན་བསྔགས་པའི། །མཆོད་ཡོན་ཆོ་ག་བཞིན་དུ་དབུལ། །དེ་ནས་ཙནྡན་དཀར་པོ་དང་། །སྣ་མའི་མེ་ཏོག་ཁ་འབུས་དང་། །མ་ལི་ཏ་ཡི་ཕྲེང་བ་དང་། །བདུག་པས་བདུག་པའི་མཆོད་པ་
བྱ། །གཏོར་མ་མང་ཞིང་བཟང་བ་དག །ཞོ་དང་བཅས་ཤིང་དབུལ་བར་བྱ། །དེ་ནས་མར་གྱི་སྦྱིན་སྲེག་ནི། །ཚུལ་བཞིན་བརྒྱ་རྩ་བརྒྱད་བྱས་ཏེ། །གསང་སྔགས་ལས་དང་རྗེས་མཐུན་པར། །སརྫ་ར་ཡི་སྲེག་བླུགས་དབུལ། །བུ་མོས་བཀལ་པའི་སྲད་བུ་ལ། །མདུད་པ་བདུན་
བོར་ལན་བདུན་བསྔགས། །དཔུང་པ་གཡོན་པ་ལ་བཅིངས་ནས། །ཀུ་ཤའི་ལོ་མ་བཏིང་པ་ལ། །དེ་ཉིད་ཀྱིས་ནི་གློས་ཕབ་སྟེ། །བཀའ་ལུང་གསོལ་བ་བཏབ་ནས་ནི། །རང་གི་ལྷ་ཡི་ཚུལ་འདྲ་བར། །སེམས་ཀྱིས་ལེགས་པར་བསམ་བྱས་ཏེ། །ཡིད་ལ་གསང་སྔགས་འདོན་

71-1-171b

བཞིན་དུ། །ཀུ་ཤ་སར་པ་ཁྲེས་ཀྱི་སྔས། །མེ་ཏོག་སྤོས་ཀྱིས་བཀླུབས་པ་ལ། །ཇི་ལྟར་བདེ་བར་ཉལ་བར་བྱ། །གལ་ཏེ་གཉིད་ལོག་རྨི་ལམ་ན། །བརྟན་པར་རྟོགས་པའི་ལྷ་མཐོང་ན། །སོ་སོར་རིག་པའི་གཟུངས་དག་གམ། །དཀོན་མཆོག་གསུམ་ལ་གཅིག་ཙམ་མམ། །དེ་དག་
ལ་ནི་མཆོད་ལ་སོགས། །རྒྱལ་སྲས་རྫུ་འཕྲུལ་ཆེན་པོའམ། །འཁོར་ནི་རྣམ་པ་བཞི་རྣམས་སམ། །བདག་ཉིད་ཆོ་ག་སྤྱོད་པའམ། །ཡང་ན་གོས་ཀྱིས་སྤུད་པའམ། །མཐོང་ན་དངོས་གྲུབ་ཉེ་འགྱུར་བས། །སྒྲུབ་པ་པོས་ནི་ཤེས་པར་བྱ། །རི་དང་གླང་པོ་འབབ་ཆུ་དང་། །རྒྱ་མཚོ་དང་ནི་
འབྲས་བུའི་ཤིང་། །ངང་མོ་ལ་སོགས་བྱ་རྣམས་དང་། །སེང་གེ་ལ་སོགས་རི་དགས་ཚོགས། །ཁྱུ་མཆོག་བཀྲ་ཤིས་རྟ་ལ་སོགས། །བུ་མོ་བཟང་མོས་བརྒྱན་པ་དང་། །བུམ་པ་བཟང་པོས་བཀྲ་ཤིས་པ། །རྣམ་པ་སྣ་ཚོགས་གཡས་ཕྱོགས་ནའོ། །ནོར་དང་གོས་རྣམས་རྙེད་པ་
དང་། །དེ་ལ་སོགས་པ་རྣམ་དག་པའི། །རྨི་ལམ་བཟང་པོ་མཐོང་ན་ནི། །བློ་ཅན་གྲུབ་པར་ཤེས་པར་བྱ། །ཞོ་དང་འབྲས་ཡོས་འོ་མ་མར། །མེ་ཏོག་འབྲས་བུའི་རྩ་བ་དང་། །ཡང་ན་གྲུབ་པའི་རྫས་ཀྱང་རུང་། །རྨི་ལམ་དག་ན་རྙེད་པ་དང་། །དེ་འདྲའི་རྣམ་པ་མཐོང་གྱུར་ན། །རིག་
སྔགས་གྲུབ་པར་གསུངས་པས་ན། །དེས་ན་བློ་དང་ལྡན་པ་ཡིས། །བསྙེན་པ་སྒྲུབ་པའི་ལས་རྣམས་བརྩམ། །གལ་ཏེ་སྔགས་ཀྱིས་ནོར་བུའམ། །སྒྲུབ་པའི་རྫས་རྣམས་ཐོབ་ན་ནི། །དེ་ནས་བསྙེན་པའམ་སྒྲུབ་པ་ཡི། །ལས་རྣམས་མྱུར་དུ་བརྩམ་པར་བྱ། །གོས་དང་ཁྲུས་དང་
རྒྱན་དག་གིས། །བདག་ཉིད་བརྒྱན་པར་མཐོང་ན་ནི། །དེ་ཚེ་བསྙེན་པ་འམ་སྒྲུབ་པ་ཡི། །ལས་རྣམས་རབ་ཏུ་བརྩམ་པར་བྱ། །རང་གི་རིག་སྔགས་ཚུལ་བཞིན་དུ། །མཆོད་པ་བྱས་ནས་རིགས་ཡུམ་གྱི། །སྣ་མའི་མེ་ཏོག་བརྒྱད་དག་དང་། །རས་ཟུང་དག་གིས་མཆོད་པར་བྱ། །
ཙནྡན་གྱི་ནི་བདུག་སྤོས་ཀྱིས། །ལན་བརྒྱ་ཉིད་དུ་བདུགས་ནས་ནི། །དེ་ནས་ལྷ་ཉིད་རྨི་ལམ་དུ། །ཅི་རིགས་པར་ནི་བཀའ་ལན་གསོལ། །ཨུ་ཤི་ར་ཡི་གཟུགས་བརྙན་བཞིན། །གྲོག་མཁར་ས་ཡི་སྣོད་དུ་གཞག །མཆོད་ཅིང་ཡོངས་སུ་ཚིམ་བྱས་ནས། །ལན་བརྒྱ་དག་ཏུ་མངོན་

71-1-172a

བསྔགས་ཏེ། །དེ་ནི་འོ་མའི་ནང་དུ་འམ། །ཡང་ན་སྦྲང་རྩིའི་ནང་དུ་གཞག །དུས་གསུམ་དག་ཏུ་ལེགས་མཆོད་ནས། །སྲོད་དུ་ཡང་ནི་གསོལ་བ་གདབ། །རྣམ་པ་འདི་དག་ཉིད་ཀྱིས་ཀྱང་། །ཡོངས་སུ་དགྱེས་པ་བསྐྱེད་གྱུར་ན། །དེ་ལྟ་བྱའམ་མི་བྱ་བ། །ལྷ་
ཉིད་བཀའ་ལན་གསོལ་བར་མཛད། །སྨྱུང་བྱས་འདོད་པའི་དུས་མཚམས་ལ། །རིག་སྔགས་ཆོ་ག་བཞིན་མཆོད་དེ། །ཐ་ཆུངས་རྣམ་པ་བདུན་དག་དང་། །ཤིང་གི་སྙིང་པོ་དམ་པ་ལྔས། །སྦྱིན་སྲེག་བརྒྱ་རྩ་བརྒྱད་བྱས་པའམ། །ཡང་ན་བཟླས་བརྗོད་གྲངས་དག་གིས། །བྱས་ན་
རིག་སྔགས་ཉིད་ཀྱིས་ནི། །མྱུར་བ་ཉིད་དུ་བཀའ་སྩལ་ཏོ། །དེ་ལྟར་རིག་པ་སྟ་གོན་གནས། །དེས་ནི་མྱུར་དུ་འགྲུབ་པར་འགྱུར། །སྟ་གོན་གནས་པའི་ཆོ་ག་འདི། །རྒྱས་པར་རབ་ཏུ་གྲགས་པ་ཡིན། །འདི་དག་ནི་ཐུན་མོང་གི་ཆོ་ག་ཡིན་པས་ན་འདིར་བསྟན་པ་ལ་འགལ་བ་མེད་དོ། །སྟ་གོན་དུ་
གནས་པའི་ཆོ་ག་གསང་བའི་རིམ་པར་ཕྱེ་བའོ། །དེ་ནས་ནང་པར་སྔར་ལངས་ནས་ཁྲུས་ལ་སོགས་པ་བྱས་ཏེ་དཀྱིལ་འཁོར་བྱུགས་ལ་ཐིག་གདབ་པར་བྱའོ། །དེ་ཡང་སྒོ་བཞི་དང་། ཁ་ཁྱེར་དང་། དྲ་བ་དང་། དྲ་བ་ཕྱེད་པ་དང་། ཉི་མ་དང་། ཟླ་བ་དང་། རྔ་ཡབ་ཤིན་ཏུ་མཛེས་པ་དང་། ཕྱིའི་
ཁོར་ཡུག་ལ་རྡོ་རྗེའི་ཕྲེང་བ་འབར་བ་ཆེན་པོ་དང་བཅས་པ་དང་། ནང་གི་ཁྱམས་དང་། རབ་ཆུང་ངུ་དང་། སྣ་ཚོགས་པདྨ་རྣམས་ཀྱི་ཐིག་གདབ་པོ། །དེ་ནས་ཚོན་རྩི་བྱིན་གྱིས་བརླབས་ལ། བྲི་བ་ནི་གཞལ་ཡས་ཁང་རིམ་པ་ལྔར་བྱས་ཏེ། ཕྱི་རོལ་ནས་བརྩམས་ནས་དཀར་པོ་དང་། 
དམར་པོ་དང་། སེར་པོ་དང་། ལྗང་གུ་དང་། ནག་པོའི་ནང་དུ་སྟེ་གོ་རིམས་བཞིན་ནོ། །ཕྱོགས་ཀྱི་ཁ་དོག་གི་ངེས་པ་ཡང་འདི་ཉིད་ཡིན་ནོ། །དབུས་སུ་སྣ་ཚོགས་པདྨ་འདབ་མ་བརྒྱད་པ་བྲིའོ། །རྡོ་རྗེའི་ར་བ་ནི་ནག་པོའོ། །ཁྱམས་ཀྱིས་གཞི་ནི་དམར་པོའོ། །རིན་པོ་ཆེའི་ཕ་གུ་ནི་སེར་པོའོ། །མུ་ཏིག་
ཧ་ར་ནི་ནག་པོའོ། །རྟ་བབས་ནི་ཁ་དོག་སྣ་ཚོགས་པའོ། །བཅུ་གཅིག་རྡོ་རྗེ་དཀར་པོའོ། །ཆོས་ཀྱི་འཁོར་ལོ་སེར་པོའོ། །རི་དགས་ནི་ནག་པོ་བྲིའོ། །པདྨའི་དབུས་སུ་གཙོ་བོའི་ཕྱག་མཚན་རྡོ་རྗེ་རྩེ་དགུ་པ་བྲི་བར་བྱའོ། །དབང་ལྡན་ནས་བཟུང་སྟེ་མཚམས་བཞིར་ནི་རྡོ་རྗེ་ཁ་གྱེས་པ་དང་། རྡོ་རྗེ་

71-1-172b

རྩེ་གཅིག་པ་དང་། བེ་ཅོན་རྡོ་རྗེས་མཚན་པ་དང་། རྡོ་རྗེ་ཐོ་བ་རྣམས་གོ་རིམས་བཞིན་དུའོ། །ཁྱམས་ལ་ནི་བཀྲ་ཤིས་ཀྱི་ལྷ་མོ་རྣམས་དང་འཇིག་རྟེན་སྐྱོང་བ་རྣམས་ཀྱི་མཚན་མ་བྲིའོ། །དེ་ལྟར་བྲིས་ནས་བུམ་པ་ལ་སོགས་པའི་རྫས་རྣམས་བཀོད་ནས་ཁྲུས་བྱས་ཏེ་གནས་ལ་སོགས་པ་བསྐྱེད་
དེ། ལྷ་རྣམས་ཇི་ལྟ་བ་བཞིན་སྤྱན་དྲངས་ནས་ཕྱག་རྒྱ་རྣམས་བསྟན་པར་བྱའོ། །དེ་ལ་དང་པོ་ནི་རིགས་ཀྱི་སྙིང་པོའི་ཕྱག་རྒྱའོ། །གཉིས་པ་ནི་ལྷ་སོ་སོའིའོ། །གསུམ་པ་ནི་རིགས་ཀྱི་ཡུམ་གྱིའོ། །བཞི་པ་ནི་དམ་ཚིག་ཆེན་པོའི་ཕྱག་རྒྱའོ། །དེ་ལ་རིགས་ཀྱི་སྙིང་པོའི་ཕྱག་རྒྱ་ནི་ལག་པ་ཕན་ཚུན་
དུ་ཁུ་ཚུར་བཅངས་ཏེ། གཡས་པའི་མཐེ་བོང་བསྟན་པའོ། །སྔགས་ནི་བཛྲ་དྷྲྀཀ་སྭཱཧཱ་ཞེས་བྱ་བའོ། །ལྷ་སོ་སོའི་ཕྱག་རྒྱ་ནི། རྡོ་རྗེ་རྣམ་པར་འཇོམས་པའི་ཕྱག་རྒྱ་ནི་ལག་པ་གཉིས་ཐལ་མོ་ཁོང་སྟོང་དུ་སྦྱར་ལ་སྲིན་ལག་གཉིས་ནང་དུ་བཅུག་སྟེ། ཕན་ཚུན་བསྣོལ་བའི་རྩེ་མོ་མཛུབ་མོའི་
དྲུང་དུ་ཅུང་ཟད་དབྱུང་བར་བྱས་ནས། གུང་མོ་གཉིས་པའི་ཕྱི་རོལ་ནས་མཛུབ་མོ་གཉིས་བཀུག་ལ་བར་ནས་གང་ཙམ་གྱིས་མ་རེག་པར་བྱས་ཏེ། མཐེ་བོང་གཉིས་དང་མཐེའུ་ཆུང་གཉིས་གཞིབས་པའོ། །སྔགས་ནི་གོང་དུ་བསྟན་པའོ། །ཡང་ན་ཨོཾ་བཛྲ་ཛྭ་ལཱ་ཡ་སྭཱཧཱ་ཞེས་བྱའོ། །རྡོ་རྗེ་གཏུམ་
པའི་ཕྱག་རྒྱ་ནི་ལག་པ་གཡོན་པའི་མཛུབ་མོ་གཉིས་ཀའི་ལོགས་སུ་གཞག་ལ་གཡས་པའི་སོར་མོ་གསུམ་རྡོ་རྗེ་ལྟར་བྱས་པའོ། །སྔགས་ནི། ཨོཾ་ཙུ་རུ་ཙུ་རུ་ཙཎྜ་ལི། ཀཱི་ལི་ཀཱི་ལཱ་ཡ་སྭཱཧཱ། ཞེས་བྱའོ། །རྡོ་རྗེ་ཀཱི་ལི་ཀཱི་ལཱ་ཡའི་ཕྱག་རྒྱ་ནི་ལག་པ་གཉིས་ཀྱི་ཁུ་ཚུར་བཅངས་ལ་ཅུང་ཟད་བསྣོལ་
བའི་ཚུལ་དུ་བཅུག་སྟེ། མཐེ་བོང་གཉིས་གྱེན་དུ་གཤིབས་ནས་བསྒྲེང་བའོ། །སྔགས་ནི་ཨོཾ་ཏྲཱ་ས་ཡ་ཏྲཱ་ས་ཡ་བཛྲ་ཀཱི་ལི་ཀཱི་ལཱ་ཡ་སྭཱཧཱ་ཞེས་བྱ་བའོ། །རྡོ་རྗེ་བེ་ཅོན་གྱི་ཕྱག་རྒྱ་ནི་ཕྱག་འཚལ་བའི་ཐལ་མོ་སྦྱར་བ་ལས་མཐེ་བོང་གཉིས་བསྒྲེངས་ཏེ། ཚིགས་བཀུག་ནས། སྲིན་ལག་གི་མདུན་དུ་
གཟུགས་པར་བྱ་སྟེ། སྔགས་ནི་ཨོཾ་ཧ་ར་ཧ་ར་བཛྲ་དྷ་རཱ་ཡ་སྭཱཧཱ་ཞེས་བྱ་བའོ། །རྡོ་རྗེ་ཐོ་བའི་ཕྱག་རྒྱ་ནི་ལག་པ་གཉིས་ཁུ་ཚུར་བཅངས་ལ་མཐེ་བོང་གཉིས་བསྒྲེང་། མཐེའུ་ཆུང་གཉིས་ནང་དུ་གཞུག་གོ། །སྔགས་ནི་ཨོཾ་པྲ་ཧ་ར་པྲ་ཧ་ར་བཛྲ་པྲ་བྷཉྫ་ནཱ་ཡ་སྭཱཧཱ། ཞེས་བྱ་བའོ། །རྡོ་རྗེའི་རིགས་ཀྱི་

71-1-173a

ཡུམ་གྱི་ཕྱག་རྒྱ་ནི་ཕྱག་འཚལ་བའི་ཐལ་མོ་ལས་མཛུབ་མོ་གཉིས་དང་སྲིན་ལག་གཉིས་ལག་པའི་ནང་དུ་བཅུག་པའོ། །སྔགས་ནི་ཨོཾ་ཀུ་ལཾ་དྷ་རི་བནྡྷ་བནྡྷ་སྭཱཧཱ་ཞེས་བྱ་བའོ། །དམ་ཚིག་ཆེན་པོའི་ཕྱག་རྒྱ་ནི་སྲིན་ལག་གི་ཚིགས་བར་མ་མཐེ་བོས་མནན་མཐེའུ་ཆུང་དང་གུང་མོ་
གཉིས་གཤིབས་ཏེ་བསྒྲེང་། མཛུབ་མོ་གཉིས་གུང་མོའི་ཚིགས་གསུམ་པར་བཅུག་པའོ། །སྔགས་ནི་ཨོཾ་ཤཾ་ཀ་རེ་མ་ཧཱ་ས་མ་ཡེ་སྭཱཧཱ་ཞེས་བྱའོ། །དེ་ནས་འཇིག་རྟེན་སྐྱོང་བ་བཀུག་ནས་རང་རང་གི་ཕྱག་རྒྱ་བསྟན་ཏེ། ཐམས་ཅད་ལ་མཆོད་པ་ལ་སོགས་པ་བྱས་ནས་གཏོར་མ་སྦྱིན་ཏེ། སྦྱིན་སྲེག་
བྱས་ལ། མན་ངག་ཇི་ལྟ་བ་བཞིན་དུ་དཀྱིལ་འཁོར་རྣམས་ཀྱི་བཟླས་བརྗོད་བྱའོ། །དཀྱིལ་འཁོར་གྱི་ཆོ་ག་རིམ་པར་ཕྱེ་བའོ།    །དེ་ནས་རྒྱུད་ལས་གསུངས་པའི་རིགས་གཟུང་བའི་ཆོ་ག་བྱ་སྟེ། སློབ་མ་དཀྱིལ་འཁོར་ཕྱག་བྱས་ནས། །ཁྱད་པར་དུ་ནི་ཡོན་ཕུལ་ཏེ། །བླ་མའི་ཁ་ནས་མངོན་
སུམ་དུ། །རིག་སྔགས་ཡོངས་སུ་གཟུང་བར་བྱ། །སྙིམ་པ་མེ་ཏོག་གིས་བཀང་ནས། །གུས་ཤིང་རིམ་གྲོ་བསྐྱེད་བྱ་སྟེ། །བླ་མས་ཐོག་མར་ལན་གསུམ་བཟླས། །རང་གིས་ལན་གསུམ་བཟླས་ཏེ་མཆོད། །དེ་ནས་ཡི་གེ་མང་པོའི་སྔགས། །གི་ཝང་གིས་ནི་ཤོག་ཤོག་ལ། །ཇི་སྐད་
བསྟན་པ་མངོན་བྲིས་ཏེ། །དེ་ནས་ཅི་བདེར་ཁ་ཏོན་བསླབ། །བླ་མས་ཇི་ལྟར་མགུ་བ་ལས། །དུས་མཚམས་དག་གམ་ཚེས་གཞན་ལ། །རིག་སྔགས་དག་ནས་བྱིན་པ་དག །ཆོ་ག་བཞིན་དུ་གུས་པར་ནོད། །སློབ་མ་ལེགས་པར་མནོས་པ་དེ། །རིང་པོར་མི་ཐོགས་འགྲུབ་པར་འགྱུར། །
མ་བསྙེན་པར་ཡང་དེ་ལ་ནི། །རྟག་ཏུ་དེ་ལ་ཉེ་བར་གནས། །ཡང་ན་གསེར་ལ་སོགས་པ་ཡི། །བུམ་པ་གསར་ཞིང་གཙང་ལ་བཟང་། །སྐྱོན་ཀུན་རྣམ་པར་ངེས་པ་ལ། །བཀྲ་ཤིས་ངོ་མཚར་དག་ཀྱང་བྱས། །དེ་ལ་སྤོས་ཆུ་འབའ་ཞིག་མེད། །ཁྱད་པར་དུ་ནི་བཤམས་བྱས་ནས། །
གཙང་མར་བྱས་ཏེ་ནུབ་གཅིག་གམ། །ནུབ་གསུམ་དུ་ནི་སྨྱུང་བྱས་ཏེ། །སྲོད་ལ་རབ་ཏུ་བརྩམ་བྱ་སྟེ། །ཆོ་ག་འདི་དག་སྤྱད་པར་བྱ། །གསང་སྔགས་རིག་སྔགས་གདམས་པ་དག །གྲོ་ག་ལ་སོགས་ཤོག་ཤོག་ལ། །གི་ཝང་གིས་ནི་མཉམ་བྲིས་ཏེ། །ཤོག་ཤོག་རྣམས་ནི་ལྷན་ཅིག་

71-1-173b

གཞུག  །རིག་སྔགས་རྒྱལ་པོས་ལེགས་པར་ནི། །དྲི་དང་མེ་ཏོག་བདུག་མཆོག་སྟེ། །དེ་བཞིན་ལྷ་བཤོས་མར་མེ་དང་། །སྦྱིན་སྲེག་ལས་ཀྱིས་མཆོད་པར་བྱ། །དེ་ན་ཆོ་ག་འདི་དག་གིས། །ནུབ་གཞན་སྟ་གོན་གནས་པ་ལ། །བདེན་པ་དང་ནི་དམ་ཚིག་གིས། །ཁྱད་པར་དུ་ནི་གསོལ་
བ་གདབ། །ལན་བརྒྱར་བསྔགས་ནས་ཡང་དང་ཡང་། །བདུག་སྤོས་ཀྱིས་ནི་རབ་བདུགས་ཏེ། །དྲི་ཞིམ་ཁྲུས་བྱས་གཙང་བྱས་ནས། །ཕྱག་བྱས་ཡིད་ལ་བསམས་ནས་སུ། །གསང་བྱེད་བཅས་པའི་ལག་པ་ཡིས། །དེ་ལས་གཅིག་ནི་དབྱུང་བར་བྱ། །དེ་ཤེས་ནས་ནི་ཕྱག་འཚལ་ཏེ། །
གུས་པས་སྤྱི་བོའི་སྟེང་དུ་གཞག །ཤེས་རབ་ཅན་གྱིས་བསྔགས་ཏེ་སྒྲུབ། །དེ་ཉིད་དེ་ལས་མྱུར་དུ་སྒྲུབ། །ཤེས་རབ་ཅན་གྱིས་གཞན་མི་སྒྲུབ། །སྒྲུབ་ན་ཡང་ནི་འཆི་བར་འགྱུར། །གང་ཞིག་གྲུབ་ནས་བྱིན་པ་དག །ཆོ་ག་བཞིན་དུ་དེ་མནོས་ན། །སྒྲུབ་པ་པོ་ཡི་ལྷ་ཡིན་ཏེ། །དེ་ལ་དེ་ནི་
འགྲུབ་པར་ཤེས། །རིག་སྔགས་ཡིད་ཀྱིས་གསོལ་བཏབ་ནས། །ལན་བརྒྱར་ཡོངས་སུ་བཟླས་བརྗོད་དེ། །འདིར་ནི་ཁྱེར་ཅིག་ཁྱེར་ཅིག་ཅེས། །མེ་ཏོག་དྲི་ཞིམ་དག་གིས་བརྒྱན། །བཅོམ་ལྡན་འདི་ལ་བསྙེན་པ་དང་། །འདི་ལ་རབ་ཏུ་འགོ་བར་མཛོད། །བཅོམ་ལྡན་བདག་གིས་བཟུང་
ལགས་ཀྱིས། །བདག་ལ་འགོ་བར་མཛོད་ཅེས་བྱ། །སློབ་དཔོན་དང་ནི་སློབ་མ་ཡིས། །རིག་སྔགས་སྦྱིན་ཞིང་ཡོངས་བཟུང་བའི། །ཆོ་ག་འདི་ལྟར་བྱས་ནས་ནི། །ལྷ་ཉིད་རབ་ཏུ་འགྲུབ་པར་འགྱུར། །མཁས་པས་རིག་སྔགས་གྲུབ་པ་ཀུན། །གྲུབ་པ་ཉིད་དུ་ཤེས་པར་བྱ། །རྣམ་པ་དེ་ལྟའི་རྫས་
དག་ཀྱང་། །ཚུལ་བཞིན་ཐོབ་སྟེ་བསྙེན་མི་དགོས། །ཟློས་པ་གྲུབ་པ་པོ་དག་གིས། །རིག་སྔགས་ཚུལ་བཞིན་བཟླས་པ་ཡིས། །བསྙེན་པ་ཚད་བྱས་གང་ཡིན་པ། །དེ་ཡང་མ་བསྙེན་འགྲུབ་པར་འགྱུར། །དངོས་གྲུབ་ཕྱིར་ནི་གསང་སྔགས་ཡིན། །མེ་ཏོག་འབྲས་བུ་རྩ་བ་དང་། །རྡོ་གུ་གོས་དང་
གསེར་དང་ཞོ། །འབྲས་དང་ནོར་བུ་བུ་མོ་དང་། །མལ་ཆ་རྣམས་དང་ལྷམ་དག་དང་། །རྒྱན་གྱི་རྣམ་པ་ཐམས་ཅད་དང་། །སྒྲུབ་པའི་ཡོ་བྱད་རྣམས་དང་ནི། །གླང་པོ་བ་ལང་རྟ་ལ་སོགས། །བཀུར་སྟི་རྣམ་པ་དུ་མ་དང་། །བདག་གི་བདོག་པ་ཐམས་ཅད་དབུལ། །གུས་པར་ཐལ་སྦྱར་ཕྱག་

71-1-174a

འཚལ་ཏེ། །བདག་ཉིད་ཀྱང་ནི་དབུལ་བར་བྱ། །དེ་ལྟར་ཆོ་ག་ཤེས་པ་ཡིས། །རྣམ་པ་སྣ་ཚོགས་ཅི་རིགས་པར། །བླ་མ་ལ་ནི་ཡོན་དབུལ་ཏེ། །དེ་ནས་གསང་སྔགས་ནོད་པར་བྱ། །རིག་སྔགས་ཡོངས་སུ་གཟུང་བའི་རིམ་པར་ཕྱེ་བའོ།།      །།འདི་དག་ཀྱང་མཁས་པ་རྣམས་
ཀྱིས་རྟོགས་པར་བྱ་བའི་དོན་ཡིན་ནོ། །ཤིན་ཏུ་སྤྲོས་པས་ཆོག་གོ།    །ད་ནི་དཀྱུས་མ་ཉིད་ལ་འཇུག་པར་བྱའོ། །དེ་ལྟར་བསྒྲུབས་པས་ཅིར་འགྱུར་ཞེ་ན། ཚེ་འདི་དང་གཞན་དག་ལ་གནོད་པར་འགྱུར་བ་འདི་ལྟ་བུ་དག་ཡོད་པར་འགྱུར་རོ་ཞེས་བསྟན་པར་བྱ་བའི་ཕྱིར། སེམས་ཅན་དབང་པོ་ཉམས་པ་དང་། །
ཞེས་བྱ་བ་ལ་སོགས་པ་གསུངས་ཏེ། སེམས་ཅན་ནི་སྔར་བཤད་པར་ཟད་དོ། །དབང་པོ་ཉམས་པ་དང་ཞེས་བྱ་བ་ནི་མིག་ལ་སོགས་པའི་དབང་པོ་ལ་སྐྱོན་བྱུང་བའོ། །ཚེ་ཟད་པ་དང་ཞེས་བྱ་བ་ནི་སྲོག་གི་དབང་པོ་གནས་པའི་རྒྱུན་ཆད་པའོ། །ཚེ་ཉམས་དང་ཞེས་བྱ་བ་ནི་དེ་ཉིད་ཉམས་དམས་པར་གྱུར་
པའོ། །ཕུན་སུམ་ཚོགས་མིན་གང་ཆགས་དང་། །ཞེས་བྱ་བ་ནི་བཀྲ་ཤིས་པ་མ་ཡིན་པའི་དངོས་པོ་རྣམས་ཉེ་བར་གནས་པའོ། །ལྷ་རྣམས་རྒྱབ་ཀྱིས་ཕྱོགས་པ་དང་། །ཞེས་བྱ་བ་ནི་སྔོན་གྱི་དུས་ན་བདག་དང་གཞན་སྲུང་བའི་རྒྱལ་པོ་བཞི་ལ་སོགས་པ་རྣམས་བདག་ཅག་ལ་སྐྱོབས་མི་བྱེད་
པའོ། །མཛའ་སྡུག་སྐྱེ་བོ་སྡང་བ་དང་། །ཞེས་བྱ་བ་ནི་བདག་གི་བུ་ལ་སོགས་པ་ཉེ་དུར་གྱུར་པ་མཛའ་ཞིང་ཡིད་གཅུགས་པ་རྣམས་ལ་རྒྱལ་པོ་ལ་སོགས་པས་འཚེ་ཞིང་གནོད་པའོ། །བྲམ་ཟེ་ལ་སོགས་གཙེས་པ་དང་། །ཞེས་བྱ་བ་ནི་འཁོར་དུ་གཏོགས་པའི་ཞོ་ཤས་འཚོ་བ་རྣམས་ལ་གཞན་
དག་གིས་གཙེས་པར་གྱུར་པའོ། །ཕན་ཚུན་མཐུན་པ་མ་ཡིན་དང་། །ཞེས་བྱ་བ་ནི་དེ་དག་ཕན་ཚུན་ཞེ་འགྲས་པའོ། །ནོར་འགྲིབ་པས་ནི་གནོད་པ་དང་། །ཞེས་བྱ་བ་ནི་བདག་དང་གཞན་གྱི་བདོག་པ་རྣམས་ཉམས་པར་གྱུར་པའོ། །མྱ་ངན་ངལ་དང་གནོད་པ་དང་། །ཞེས་བྱ་བ་ནི་མྱ་ངན་ཞེས་བྱ་བ་ནི་སེམས་
མི་བདེ་བའོ། །ངལ་དང་ཞེས་བྱ་བ་ནི་དེ་ཉིད་ཀྱི་ལུས་རབ་ཏུ་སྡུག་བསྔལ་བར་གྱུར་པའོ། །གནོད་པ་དང་ཞེས་བྱ་བ་ནི་རྒྱུ་དེ་གཉིས་ཀྱིས་ཤ་ཟ་ལ་སོགས་པའི་གཟུགས་རྨི་ལམ་དུ་སྣང་བའོ། །འཇིགས་པ་དང་ནི་ཕོངས་པ་དང་། །ཞེས་བྱ་བ་ནི་འཇིགས་པ་ཞེས་བྱ་བ་ནི་རྒྱུ་མེད་པར་སྤུ་ཟིང་ཞེས་བྱེད་

71-1-174b

པའོ། །ཡང་ན་རྒྱལ་པོའི་ཆད་པ་ལ་སོགས་པའོ། །ཕོངས་པ་ཞེས་བྱ་བ་ནི་ནོར་ཉམས་པའི་སྔ་ལྟས་བྱུང་བས་བདག་ཉིད་དོགས་པ་སྐྱེས་པའོ། །གཟའ་དང་རྒྱུ་སྐར་བྱད་སྟེམས་དང་། །ཞེས་བྱ་བ་ལ། གཟའ་དང་ཞེས་བྱ་བ་ནི་ཉི་མ་ལ་སོགས་པའི་གནོད་པའོ། །རྒྱུ་སྐར་ཞེས་བྱ་བ་ནི་
སྨིན་དྲུག་ལ་སོགས་པའི་གནོད་པའོ། །བྱད་སྟེམས་ཞེས་བྱ་བ་ནི་དྲང་སྲོང་གི་དམོད་པ་ལ་སོགས་པའོ། །མི་བཟད་གདོན་གྱིས་ཉེན་པ་དང་། །ཞེས་བྱ་བ་ནི་སྲིན་པོ་ལ་སོགས་པ་མཐུ་ཆེན་པོ་དང་ལྡན་པའི་མ་རུངས་པ་རྣམས་ཀྱིས་གཟུང་བའོ། །མྱ་ངན་ངལ་ལས་བྱུང་བ་ཡི། །ཞེས་བྱ་
བ་ནི་ལུས་དང་སེམས་གདུངས་པར་གྱུར་པ་ལས་བྱུང་བའོ། །རྨི་ལམ་སྡིག་པ་མཐོང་ན་ཡང་། །ཞེས་བྱ་བ་ནི་ཐབས་འདིས་དེ་དག་རྣམས་སྤོང་བར་འགྱུར་རོ་ཞེས་བྱ་བ་ནི་ལྷག་མའོ། །འདི་སྐད་སྟོན་ཏེ་གོང་དུ་བཤད་པ་དང་འོག་ནས་འབྱུང་བའི་ཆོ་ག་རྣམས་ཚུལ་བཞིན་དུ་བསྒྲུབས་ན་
འགྲོ་བ་རྣམས་ཀྱི་དབང་པོ་ཉམས་པར་གྱུར་པ་ལ་སོགས་པ་གནོད་པ་རྣམས་བྱུང་བར་གྱུར་ན་ཡང་ངེས་པར་གྲོལ་བར་འགྱུར་རོ་ཞེས་བྱ་བའི་དོན་ཏོ།    །ཕན་ཡོན་དེ་ལྟ་བུ་དག་དང་ལྡན་པར་སྟོན་པར་བྱེད་པའི་མདོ་འདི་ཐོག་མར་མཉན་དགོས་པ་ཡིན་ནམ་ཞེ་ན། དེ་ནི་དགོས་པ་ཁོ་ན་ཡིན་
ཏེ། དཀྱིལ་འཁོར་དུ་འཇུག་པའི་ཡན་ལག་ཡིན་པའི་ཕྱིར་རོ། །དེ་ལ་ཐོག་མ་ཉིད་དུ་མདོ་སྡེ་འདི་མཉན་པའི་ཐབས་བསྟན་པར་བྱ་བའི་ཕྱིར། དེ་ནི་རབ་བཀྲུས་གཙང་མ་ཡིན། །ཞེས་བྱ་བ་ལ་སོགས་པ་གསུངས་ཏེ། དེ་ནི་ཞེས་བྱ་བ་ནི་དཀྱིལ་འཁོར་དུ་འཇུག་པར་འདོད་པས་སོ། །
རབ་བཀྲུས་གཙང་མ་ཡིན་ཞེས་བྱ་བ་ནི། གདོང་ལ་སོགས་པ་དག་པར་བྱས་ཏེ། སྤོས་ལ་སོགས་པ་དྲི་ཞིམ་པོས་བྱུགས་པའོ། །མདོ་སྡེ་དམ་པ་མཉན་པར་བྱ། །ཞེས་བྱ་བ་ནི་ཕན་ཡོན་མཐའ་ཡས་པ་དང་ལྡན་པའི་གཟུངས་འདི་མཉན་ཞིང་བཀླག་པར་བྱའོ། །འདི་ལ་འགའ་ཞིག་
འདི་སྙམ་དུ་སེམས་ཏེ་དཀྱིལ་འཁོར་དུ་མ་ཞུགས་པ་ལ་རྒྱུད་བཤད་པ་ནི་ཉེས་པར་འགྱུར་རོ་ཞེ་ན། མ་ཡིན་ཏེ་འདི་གཞུང་ཙམ་བསྟན་པ་ལ་ནི་ཉེས་པ་མེད་པར་ཤེས་པར་བྱའོ། །དེ་ལྟ་ན་ཡང་སྐྱོན་ཡིན་ནོ་སྙམ་དུ་སེམས་ན་ཐམས་ཅད་ཡང་དེ་ལྟར་འགྱུར་རོ། །གཞན་དུ་ཡང་སྤྲོས་པས་

71-1-175a

ཆོག་གོ། །ད་ནི་དཀྱུས་མ་ཉིད་ལ་འཇུག་པར་བྱ་སྟེ། གང་དག་ཡིད་དགེ་སེམས་དང་ཞིང་། །ཞེས་བྱ་བ་ལ་གང་དག་ཅེས་བྱ་བ་ནི་གང་ཡང་རུང་བ་འོ། །ཡིད་དགེ་ཞེས་བྱ་བ་ནི་འཚེ་བ་མེད་པའི་སེམས་དང་ལྡན་པའོ། །སེམས་དང་ཞིང་ཞེས་བྱ་བ་ནི་དད་པ་དང་ལྡན་པའོ། །
ཡང་ན་སྔ་མ་ནི་དད་པ་གཉིས་དང་ལྡན་པ་ཡང་ཡིན་ལ་ཕྱི་མ་ནི་དང་བའི་དད་པ་དང་ལྡན་པ་ལ་བྱའོ། །གཙང་མའི་གོས་ཀྱིས་རབ་བརྒྱན་ཏེ། ཞེས་བྱ་བ་ནི་དུ་གུ་ལའི་རས་ལ་སོགས་པ་སྨད་པ་མ་ཡིན་པའི་གོས་བགོས་པའོ། །ཟབ་མོ་སངས་རྒྱས་སྤྱོད་ཡུལ་བ། །ཞེས་བྱ་བ་ལ་ཟབ་མོ་ཞེས་བྱ་
བ་ནི་ཚིག་དང་དོན་གཞན་དག་གིས་རྟོགས་པར་མི་ནུས་པའོ། །སངས་རྒྱས་སྤྱོད་ཡུལ་བ་ཞེས་བྱ་བ་ནི་དེ་བཞིན་གཤེགས་པ་ཉག་གཅིག་གི་སྤྱོད་ཡུལ་དུ་གྱུར་པའོ། །མདོ་སྡེ་འདི་ནི་ཉན་བྱེད་ན། །ཞེས་བྱ་བ་ནི་དེ་ལྟ་བུར་གྱུར་པའི་མདོ་སྡེ་འདི་ཉན་ཅིང་ཀློག་པར་བྱེད་ན་ཞེས་བྱ་བའོ། །འདི་
སྐད་སྟོན་ཏེ་གོང་དུ་བསྟན་པའི་མི་མཐུན་པའི་ཕྱོགས་རྣམས་སྤང་བར་འདོད་པའི་གང་ཟག་གིས་སྤྱོད་ལམ་འདི་ལྟ་བུ་དག་དང་ལྡན་པར་བྱ་སྟེ། གཟུངས་འདི་མཉན་པ་ལ་སོགས་པ་བྱ་བའི་དོན་ཏོ།    །དེ་ལྟར་མཉན་པ་ལས་ཕན་ཡོན་ཅི་ཞིག་འགྱུར་ཞེ་ན། གཞན་དག་ཀྱང་ཐོབ་པར་འགྱུར་
རོ་ཞེས་བྱ་བའི་ཕྱིར། མདོ་སྡེ་འདི་ཡི་གཟི་བརྗིད་ཀྱིས། །ཞེས་བྱ་བ་ལ་སོགས་པ། སྲོག་ཆགས་དག་ནི་ཐམས་ཅད་ཀྱི། །ཞེས་བྱ་བ་གང་གི་ཆེད་དུ་བྱ་བ་ཐམས་ཅད་ཀྱིའོ། །མི་བཟད་པ་ཡི་ནད་རྣམས་ཀྱང་། ཞེས་བྱ་བ་ནི་འབྲུམ་བུ་མེ་དབལ་ནག་པོ་ལ་སོགས་པ་ཤིན་ཏུ་སྡུག་ཅིང་སྤང་
བར་དཀའ་བའི་ནད་ཆེན་པོ་སྤོང་ངོ་། །དེ་དག་ཐམས་ཅད་ཞི་བར་བལྟ། །ཞེས་བྱ་བ་ནི་དེ་ལྟ་བུ་དག་ཀྱང་ཟད་ཅིང་དེངས་པར་འགྱུར་བར་ཤེས་པར་བྱའོ། །ཚེ་དང་བསོད་ནམས་འཕེལ་བར་འགྱུར། །ཞེས་བྱ་བ་ནི་ཚེ་འདི་ལའོ། །སྡིག་པ་ཀུན་ལས་རྣམ་པར་ཐར། །ཞེས་བྱ་བ་ནི་ཚེ་རབས་གཞན་
གྱིའོ། །འདི་བསྟན་ཏེ་མཉན་པ་ལས་ཀྱང་ཕན་ཡོན་འདི་ལྟ་བུ་དག་འབྱུང་ན་གཞན་དུ་དཀྱིལ་འཁོར་དུ་ཞུགས་ཤིང་སྒྲུབ་པ་བྱས་པ་ལ་ལྟ་སྨོས་ཀྱང་ཅི་དགོས་སྙམ་དུ་དགོངས་པའོ།    །དེ་ལྟར་མཉན་པའི་ཕན་ཡོན་བསྟན་ནས་སྒྲུབ་པའི་ཡན་ལག་གི་གཙོ་བོ་བུམ་པའི་ཆོ་ག་བསྟན་པའི་

71-1-175b

ཕྱིར། ནོར་བུ་ཡུངས་ཀར་དུར་བ་དང་། ཞེས་བྱ་བ་ལ་སོགས་པ་གསུངས་ཏེ། ནོར་བུ་ཞེས་བྱ་བ་ནི་ནོར་བུ་རིན་པོ་ཆེ་ལ་སོགས་པའོ། །ཡུངས་ཀར་ཞེས་བྱ་བ་ནི་རྒྱལ་པོའི་ཡུངས་ཀར་རོ། །དཱུར་བ་ཞེས་བྱ་བ་ནི་རྩྭའི་ཁྱད་པར་འགའ་ཞིག་གོ། །རིན་ཆེན་རྨ་མེད་ཅེས་བྱ་བ་ནི་གས་པ་ལ་སོགས་
པའི་སྐྱོན་མེད་པའི་རིན་ཆེན་སྣ་ལྔ་དག་གོ། །ཙནྡན་བཅས་ཞེས་བྱ་བ་ནི་གོར་ཤིརཱ་ལ་སོགས་པ་དྲི་ཞིམ་པོ་དག་དང་ལྡན་པའོ། །ཤེལ་དང་ཞེས་བྱ་བ་ནི་གོང་དུ་བསྟན་པའི་ཉེ་བར་མཚོན་པའོ། །རྡོ་རྗེ་མེ་ཏོག་དང་ཞེས་བྱ་བ་ནི་བྱིན་གྱིས་བརླབས་པའི་མེ་ཏོག་གོ། །ཆུ་ཡིས་ཞེས་བྱ་བ་ལ་
དགང་ཞེས་བྱ་བར་སྦྱར་རོ། །གསེར་རམ་ཞེས་བྱ་བ་ལ་བུམ་པ་ཞེས་བྱ་བ་ནི་ལྷག་མའོ། །ཡང་ན་ནི་ཞེས་བྱ་བ་ནི་རྣམ་གྲངས་གཞན་སྟོན་པའི་ཚིག་གོ། །དངུལ་གྱི་བུམ་པ་དག་ཀྱང་རུང་། །ཞེས་བྱ་བ་ནི་ཟངས་ལ་སོགས་པ་ལས་བྱས་པ་དག་ཀྱང་རུང་གསུང་ངོ་། །གཙང་མའི་གོས་
ཀྱིས་དཀྲིས་ཤིང་དགང་། །ཞེས་བྱ་བ་ནི་བུམ་པའི་མགུལ་པར་རས་གཙང་མ་ཁ་ཚར་མ་ཉམས་པས་དཀྲི་བར་བྱའོ། །འདི་སྐད་སྟོན་ཏེ། གང་གི་དོན་དུ་བྱ་བ་དེ་ཉིད་ཀྱི་ནུས་པ་དང་སྦྱར་ནས་གསེར་ལ་སོགས་པའི་བུམ་པ་ལྟོ་བ་ཆེ་བ། མགྲིན་པ་མཐོ་བ་ཁ་གྱེད་པ། མཆུ་འཕྱང་བ་དག་པར་
བཀྲུས་ལ་མགུལ་པ་རས་ཀྱིས་བཅིངས་ཏེ། འབྲས་བུ་དང་ལྡན་པའི་ཤིང་གིས་ཁ་བརྒྱན་པར་བྱའོ། །གསེར་ལ་སོགས་པ་རིན་པོ་ཆེ་སྣ་ལྔ་དང་། འབྲས་སོ་བ་ལ་སོགས་པ་འབྲུ་སྣ་ལྔ་དང་། བྱ་ཀྲྀ་ལ་སོགས་པ་སྨན་སྣ་ལྔ་དང་། བུ་རམ་ལ་སོགས་པའི་སྙིང་པོ་ལྔ་དང་། ཡང་དྲི་
ཞིམ་པོའི་ཆུ་ལ་སོགས་པ་དང་བཅས་པ་བཅུག་ལ་ལུང་ཇི་ལྟ་བ་བཞིན་བསྙེན་པ་བྱས་ན་སྔར་བཤད་པ་ལྟར་འགྱུར་རོ། །ཞེས་པའི་དོན་ཏོ།    །ད་ནི་བཟླས་པའི་གྲངས་བསྟན་པའི་སྒོ་ནས་གང་ཞིག་ལ་ཁྲུས་བྱ་བ་དེ་བསྟན་པར་བྱ་བའི་ཕྱིར། ལན་གྲངས་ཉི་ཤུ་རྩ་གཅིག་གམ། །ཞེས་བྱ་
བ་ལ་སོགས་པ་གསུངས་ཏེ། དེ་དག་ནི་གོ་བར་སླའོ། །རྒྱལ་པོ་རྟག་ཏུ་ཁྲུས་གྱིས་ཤིག །ཅེས་བྱ་བ་ནི་ཡན་ལག་གི་མཆོག་མགོ་ཡིན་པས་སོ། །ཡང་ན་རྒྱལ་པོ་ཉིད་ལ་བྱ་སྟེ་དེ་ཡང་ཉེ་བར་མཚོན་པ་ཙམ་དུ་ཟད་དོ། །འདི་སྐད་སྟོན་ཏེ་ཐོག་མར་བསྙེན་པ་ནས་བརྩམས་ཏེ། དཀྱིལ་

71-1-176a

འཁོར་དུ་འཇུག་པའི་བར་དུ་གཟུངས་འདི་ཉིད་ཅི་ནུས་པར་བཀླགས་ཤིང་བཟླས་ནས་གཟོད་ཁྲུས་ཀྱི་ཆོ་ག་བྱའོ་ཞེས་པའི་དོན་ཏོ།    །ད་ནི་ཅུང་ཟད་མདོའི་མཚན་གྱི་དོན་ལ་འཇུག་པར་བྱ་སྟེ། རྡོ་རྗེ་ཞེས་བྱ་བ་ལ་རྡོ་རྗེ་ཞེས་བྱ་བ་ནི་སྟོང་པ་ཉིད་དང་ལྡན་པའི་ཡེ་ཤེས་སོ། །
དེ་ལས་བྱུང་བ་རྣམས་ལ་ཡང་དེ་སྐད་ཅེས་བྱ་སྟེ། སྟོང་པ་ཉིད་ནི་རྡོ་རྗེར་བཤད། །ཅེས་གསུངས་པས་སོ། །རྣམ་པར་ཞེས་བྱ་བ་ནི་གོང་དུ་བསྟན་པའི་ཁྱད་པར་རྣམས་སོ། །དེ་དག་འཇོམས་པ་ནི་ཞི་ཞིང་རླག་པར་བྱེད་པའོ། །ཡང་ན་ཡེ་ཤེས་དེ་ཉིད་ཀྱིས་གཞན་རྣམ་པར་འཇོམས་
པའོ། །གཟུངས་ཞེས་བྱ་བ་ནི་སྒྲུབ་པ་པོ་རྣམས་ཀྱིས་བསྟེན་ཅིང་དྲན་པར་བྱ་བ་ཡིན་པས་ནའོ། །རྫོགས་སོ་ཞེས་བྱ་བ་ནི་མཐར་ཐུག་པ་ཉིད་དོ་ཞེས་བྱ་བའི་དོན་ཏོ། །འདིའི་མཚན་བསྟན་པས་དོན་རྟོགས་པར་ནུས་པའི་གང་ཟག་ལ་ངེས་པར་བསྟན་པའོ། །སྙན་ཅིང་འཇམ་
པའི་ཚིག་དག་ཐོབ་པར་གྱུར་པ་ན། །འགྲོ་རྣམས་སེམས་ནི་རབ་ཏུ་དགའ་བར་འགྱུར་བ་ལྟར། །བདག་གིས་ལེགས་པར་སྦྱར་བའི་རྣམ་འགྲེལ་འདི་ཐོས་ན། །མཁས་པ་རྣམས་ཀྱི་ཡིད་ནི་ཤིན་ཏུ་དགའ་བར་གྱིས། །རྡོ་རྗེ་རྣམ་འཇོམས་གཟུངས་འདིའི་བཤད་པ་ནི། །
རྡོ་རྗེ་སྒྲོན་མ་ཞེས་བྱ་སྦྱར་བ་ལས། །བདག་གིས་ཟླ་འདྲའི་དགེ་བ་གང་ཐོབ་པ། །དེས་ནི་འགྲོ་བ་ཉོན་མོངས་ཉེར་ཞི་ཤོག །རྡོ་རྗེ་རྣམ་པར་འཇོམས་པའི་གཟུངས་ཀྱི་རྣམ་པར་བཤད་པ་རྡོ་རྗེ་སྒྲོན་མ་ཞེས་བྱ་བ། གསང་སྔགས་མཐའ་དག་ལ་མངའ་བརྙེས་པའི་སློབ་དཔོན་ཆེན་པོ་པདྨ་
འབྱུང་གནས་ཀྱིས་མཛད་པའོ།།      །། ༄༅༅།  །རྒྱ་གར་སྐད་དུ།    ཨཱརྱ་བཛྲ་བི་དཱ་ར་ཎ་ནཱ་མ་དྷཱ་ར་ཎཱི་ཊཱི་ཀཱ་རཏྣ་བྷ་སྭ་ར་ནཱ་མ། བོད་སྐད་དུ། འཕགས་པ་རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་རྒྱ་ཆེར་འགྲེལ་པ་རིན་པོ་ཆེ་གསལ་བ་ཞེས་བྱ་བ། རྡོ་རྗེ་རྣམ་པར་
འཇོམས་པ་ལ་ཕྱག་འཚལ་ལོ། །འཕགས་པ་འཇམ་དཔལ་གསུང་གི་དབང་ཕྱུག་ལ་ཕྱག་འཚལ་ལོ། །དོན་དམ་དབྱིངས་ཉིད་མཉམ་མེད་ཆོས་སྐུ་མཆོག་ཏུ་གསང་བའི་བདག །སངས་རྒྱས་བྱང་ཆུབ་སེམས་དཔའ་ལ་སོགས་བསྐྱེད་མཛད་རྡོ་རྗེའི་སྐུ། །སྣ་ཚོགས་དོན་རྣམས་

71-1-176b

འབྱོར་པ་སྐུ་གསུམ་ཡེ་ཤེས་བདག་གྱུར་པའི། །འཇམ་དཔལ་གསུང་གི་དབང་ཕྱུག་ལ་ནི་སྤྱི་བོས་རབ་ཏུ་འདུད། །རྡོ་རྗེས་ཐམས་ཅད་འཇོམས་མཛད་ཅིང་། །ཁྱད་པར་གདུག་པ་ཀུན་འདུལ་ཕྱིར། །རྡོ་རྗེའི་སྐུར་གནས་རྣམ་འཇོམས་དང་། །བླ་མ་གཞོན་ནུའི་སྡེ་ལ་བསྟོད། །སངས་
རྒྱས་ཀུན་གྱིས་གསུངས་པ་ཡི། །དོན་གྲུབ་རྡོ་རྗེ་རྣམ་འཇོམས་ནི། །བླ་མ་ལྷས་ནི་བྱིན་བརླབས་ནས། །འཇམ་དཔལ་གོ་ཆས་གསོལ་བཏབ་བཤད། །སངས་རྒྱས་མཆོག་གིས་ཆོས་གསུངས་པ། །མདོ་སྡེ་མངོན་པ་འདུལ་བ་དང་། །རིག་པ་འཛིན་པའི་སྡེ་བཞིར་གནས། །དེ་ཡང་
བཞི་སྟེ་བྱ་བའི་རྒྱུད། །སྤྱི་དང་བྱེ་བྲག་དེ་ལ་གཉིས། །རྟོག་པ་བདག་ནི་ལས་སུ་བཤད། །རིགས་གསུམ་ཕྱེ་ལ་རྡོ་རྗེ་སྟེ། །མི་བསྐྱོད་ཕྱག་རྡོར་བདུད་རྩི་དང་། །མཱ་མ་ཀཱི་དང་ལུ་གུ་རྒྱུད། །དེ་དག་དོན་སྟོན་རྡོ་རྗེ་ནི། །རྣམ་པར་འཇོམས་གཟུངས་གསུངས་པ་ནི། །ལོག་པའི་སྙིང་པོ་
གདུལ་ཕྱིར་དང་། །མ་འོངས་པ་ལ་ཕན་ཕྱིར་གསུངས། །འདི་ནི་རྩ་བའི་རྒྱུད་ཆེན་ཏེ། །རྡོ་རྗེ་ལྷུན་པོའི་རི་རབ་ཟོམ། །རྒྱུད་དོ་ཅོག་ནི་བརྒྱ་རྩ་བརྒྱད། །དེ་ཡི་དང་པོར་འདི་གསུངས་པས། །རྩ་བའི་བཤད་པར་རབ་ཏུ་གྲགས། །རྒྱུད་ཆེན་དེ་ཡི་དོན་རྣམས་ཀུན། །མདོར་བསྡུས་ཟབ་མོར་
སྟོན་པས་ན། །མདོ་སྡེར་བདེ་བར་གཤེགས་པས་གསུངས། །དེ་ཡི་དོན་རྣམས་མདོར་བསྡུ་ན། །སྔོན་བྱུང་སངས་རྒྱས་འཕྲུལ་པ་དང་། །རྗེས་འཇུག་མངོན་རྟོགས་མན་ངག་གོ། །དང་པོ་ལ་ནི་རྣམ་བཞི་སྟེ། །རྒྱུ་དང་རྐྱེན་དང་འབྲས་བུ་དང་། །དེ་ཡི་མཇུག་ནི་བསྡུ་བར་འདོད། །དང་
པོ་ལྔ་ཡིན་གཉིས་པ་ལ། །གཉིས་ཏེ་དེ་དག་གཉིས་གཉིས་གསུངས། །གསུམ་པ་གསུམ་སྟེ་དང་པོ་ལ། །གཉིས་གཉིས་དག་ཏུ་ཤེས་པར་བྱ། །བཞི་པ་གཉིས་བསྡུས་དང་པོ་གཉིས། །གཉིས་པ་བཞི་རུ་ཤེས་པར་བྱ། །དང་པོ་གཉིས་པ་མན་ངག་བཞིན། །དབང་པོ་རབ་འབྲིང་
ཐ་མ་ལ། །བཤད་པ་རྣམ་པ་གསུམ་བྱའོ། །དགོས་པ་རྣམ་པ་གཉིས་སུ་བསྟན། །ཚིག་དོན་བརྒལ་ལན་མཚམས་སྦྱར་བ། །རྣམ་པ་ལྔར་ནི་འདིར་ཤེས་བྱ།    །དེ་ལ་ལྷ་དང་སྔགས་དབྱེར་མེད་པས་རིག་པ་འཛིན་པའི་སྡེ་སྣོད་དེ། དེ་ཡང་རིག་པ་འཛིན་པའི་སྡེ་སྣོད་གསལ་བའོ་ཞེས་

71-1-177a

གསུངས་པ་དང་། སྔགས་ཉིད་ལྷ་སྟེ་དེ་ཉིད་སྔགས། །ཞེས་གསུངས་སོ། །དེ་ལྟ་བུ་དེ་ལ་མདོ་སྡེར་ཡང་གྲགས་ཏེ། དོན་ཉིད་མདོར་སྟོན་མདོ་སྡེ་ཞེས་པ་དང་། །གསང་སྔགས་མདོ་སྡེའི་ཚུལ་དུ་ངས་བཤད་ཉོན། །ཞེས་གསུངས་སོ། །དེ་བཤད་པར་བྱ་བ་ནི་ལྔ་སྟེ། 
བརྗོད་པར་བྱ་བ་ནི་སྟོང་པ་ཉིད་ཀྱི་དོན་རྡོ་རྗེ་རྣམ་པར་འཇོམས་པའི་ཐབས་དང་བཅས་པའོ། །རྗོད་པར་བྱེད་པ་ནི་གཞུང་གི་ཚོགས་སོ། །དེའི་དགོས་པ་ནི་རྒྱལ་པོ་ལོག་པའི་སྙིང་པོ་དང་། གདོན་མ་རུངས་པ་འདུལ་བ་དང་། མ་འོངས་པའི་སྐྱེ་བོ་བྱང་ཆུབ་ལ་གནས་པར་བྱའོ། །དགོས་པའི་ཡང་
དགོས་པ་ནི་དེ་དག་ཀྱང་དངོས་གྲུབ་རྣམ་པ་གཉིས་ཐོབ་པར་བྱེད་པའོ། །འབྲེལ་བ་ནི་བརྗོད་བྱ་རྗོད་བྱེད་དག་ཐབས་དང་ཐབས་ལས་བྱུང་བ་སྟེ། དེ་ཡང་། ཐབས་དང་ཐབས་བྱུང་ཇི་ལྟ་བུ། །ཞེས་གསུངས་སོ།    །ད་ནི་རྒྱུད་ཀྱི་དོན་ཉིད་བཤད་པར་བྱ་སྟེ། དེ་ཡང་ཤེས་རབ་དང་ལྡན་པ་ལ་མཚན་ཉིད་
བསྟན་པས་གོ་ལ། དེ་ཡང་ཕན་པའི་ཕྱིར་མཇུག་ནས་དྲང་བར་བྱ་སྟེ། རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཞེས་སྨོས་ཏེ། དེ་ལ་རྡོ་རྗེ་ནི་མི་ཕྱེད་ཅིང་མི་ཤིགས་པའི་ཕྱིར་ན་རྡོ་རྗེ་སྟེ། སྟོང་པ་ཉིད་ཀྱི་ཡེ་ཤེས་སོ། །དེ་ཉིད་ལྷ་དང་གཟུངས་ལ་གདགས་པར་བྱ་སྟེ། དེ་ཡང་རྡོ་རྗེ་ཞེས་
བརྗོད་པས། རྣམ་པ་ཀུན་མཆོག་ལྡན་པ་ཡི། །སྟོང་པ་ཉིད་ལ་རྡོ་རྗེར་བརྗོད། །ཅེས་པ་དང་། ལྷ་དང་སྔགས་ནི་རྡོ་རྗེར་འདུས། །ཞེས་གསུངས་སོ། །དེས་ནི་བདག་གི་དོན་གྲུབ་པར་བྱེད་པ་སྟེ་འོག་ནས་སྟོན་ཏོ། །རྣམ་པ་ནི་དངོས་པོ་མ་ལུས་པ་སྟེ། དེ་ཡང་འབྱུང་པོ་ལ་སོགས་པ་དང་། 
རྣམ་པར་རྟོག་པའོ། །དེ་དག་སྔགས་དང་རྡོ་རྗེའི་ཚིག་བླ་དྭགས་ཀྱི་གཉིས་སུ་མེད་པའི་ཡེ་ཤེས་ཀྱིས་འཇོམས་པ་ནི་མེད་ཅིང་བརླག་པར་མཛད་པའོ། །དེ་ཡང་། འཇོམས་ཕྱིར་ཡེ་ཤེས་བརྗོད་པ་ཡིན། །ཞེས་སོ། །དེས་ནི་གཞན་དོན་འགྲུབ་པར་བྱེད་པ་ཡིན་ཏེ། དེ་ཡང་འཆད་པར་
འགྱུར་རོ། །ཡང་རྡོ་རྗེ་རྣམ་པར་འཛིན་པ་ཞེས་བྱ་སྟེ། དོན་དང་རྣམ་པའི་སྒོ་ནས་བརྗོད་དོ། །གཉིས་ཀའི་དོན་སྒྲུབ་པ་ནི་གཟུངས་ཏེ་དེ་ཡང་ཉམས་པ་ལས་འཛིན་ཅིང་མི་བརྗེད་ལ་དོན་ཐམས་ཅད་འགྲུབ་པས་ནའོ། །དེ་ཡང་གཉིས་ཏེ། དོན་ནི་བརྗོད་པར་བྱ་བས་འབྱུང་པོ་དང་འཁོར་བ་ལས་

71-1-177b

སྐྱོབ་ལ། ཚིག་གིས་ཀྱང་དེ་དག་འབྱུང་བའོ། །དེ་ཡང་། ཉམས་པ་ལས་ནི་སྐྱོབ་པས་གཟུངས། །དེ་ཡང་དོན་དང་ཚིག་ཏུ་འདུས། །ཞེས་གསུངས་སོ་ཞེས་བྱ་བ་ནི་མིང་སྟེ་འདི་ཞེས་པའོ། །འདི་དག་གིས་ནི་གཞུང་གི་དོན་མ་ལུས་པ་སྟོན་པར་བྱེད་པས། གསུངས་པ་དང་མི་འགལ་
བ་ཡིན་ནོ། །མ་འོངས་པ་དག་གིས་ནི་རྡོ་རྗེ་རྣམ་པར་འཇོམས་པ་ནན་ཏན་དུ་བྱས་པས་བདག་དང་གཞན་གྱི་དོན་རྫོགས་པར་བྱེད་དོ་ཞེས་ཤེས་པར་བྱའོ།    །དེ་ལྟར་མཚན་བརྗོད་ནས། ད་ནི་རྡོ་རྗེའི་མདོའི་དོན་བསྟན་པར་བྱ་བ་ནི་འདི་སྐད་ཅེས་བྱ་བ་ལ་སོགས་པ་གསུངས་ཏེ། དེ་ཡང་སྔོན་གྱི་
དབང་དུ་བྱས་ནས་རྡོ་རྗེའི་མདོ་འབྱུང་བའི་རྒྱུ་ཡིན་ལ། མ་འོངས་པ་ལ་ནི་འབྲས་བུར་ཡང་འགྱུར་རོ། །དེ་ཡང་མ་ཚང་བ་མེད་པའི་ཕུན་སུམ་ཚོགས་པ་ལྔར་འགྱུར་ཏེ། དེ་ལ་འདི་སྐད་བདག་གིས་ཐོས་པ་ཞེས་བྱ་བས་སྡུད་པ་པོ་བསྟན་ཏེ། སྔོན་མཐོང་ཞིང་རྗེས་སུ་གནང་བའི་བཀའ་
ཡིན་པས་འགལ་བ་མེད་དོ། །དེ་ལ་ཇི་ལྟར་ཐོས་ཤེ་ན། དེ་ལ་འདི་སྐད་ཐོས་ཞེས་པ་ནི་གཞུང་འདིའི་དོན་དང་ཚིག་མ་ལུས་པ་ལ་འཇུག་པར་བྱེད་དེ་ཉེ་བར་མངོན་སུམ་དང་མ་བཅོས་པ་སྟེ། སྒྲོ་སྐུར་དང་བྲལ་བའོ། །སུས་ཐོས་ཞེས་པ་ནི་བདག་གིས་ཐོས་པ་ནི་སྡུད་པ་པོ་ཡང་ཕྱག་ན་
རྡོ་རྗེ་ཉིད་ཀྱིས་མཛད་པ་སྟེ། བདག་གསང་བ་ཐམས་ཅད་འཛིན་པའི་ཕྱག་ན་རྡོ་རྗེས་བཅོམ་ལྡན་འདས་ལ་རྣ་བས་མངོན་སུམ་དུ་སྒྲ་དོན་གྱི་རྣམ་པར་ཐོས་ཏེ། བརྒྱུད་པ་མ་ཡིན་པའོ། །ད་ནི་དུས་ཕུན་སུམ་ཚོགས་པ་སྟོན་ཏེ། དེ་ཡང་དུས་ཇི་ཙམ་ན་ཐོས་ཤེ་ན། དུས་གཅིག་ན་
ཐོས་ཏེ་མི་འདའ་བས་དུས་དེ་ཀུན་ཚོགས་པའོ། །དེས་ནི་དཀོན་པར་བསྟན་པའོ། །ཡང་ན་དུས་ནི་སྐད་ཅིག་མ་སྟེ། ཤེས་རབ་ཆེ་བར་སྟོན་ཏོ། །གང་ལས་ཐོས་ཤེ་ན། བཅོམ་ལྡན་འདས་ལས་ཐོས་ཏེ་ཞེས་གསུངས་ཏེ། དེས་ནི་སྟོན་པ་ཕུན་སུམ་ཚོགས་པ་ནི་བདེ་བར་གཤེགས་པ་
ལ་སོགས་པའི་ཡོན་ཏན་དཔག་ཏུ་མེད་པ་དང་ལྡན་པའི་བཅོམ་ལྡན་འདས་ཤཱཀྱ་ཐུབ་པ་བདུད་བཞི་བཅོམ་ཞིང་། ཡོན་ཏན་དྲུག་དང་ལྡན་པའི་སྟོན་པ་མཆོག་ཏུ་གྱུར་པ་ལས་ཐོས་པར་སྟོན་ཏོ། །འོ་ན་འདི་ནི་བཅོམ་ལྡན་འདས་ཀྱིས་མ་གསུངས་ལ་རྡོ་རྗེ་རྣམ་པར་འཇོམས་པས་

71-1-178a

སྨྲས་པ་ན་བཅོམ་ལྡན་འདས་ལས་ཐོས་པ་ཞེས་པ་འདི་ཇི་ལྟར་རུང་ཞེ་ན། འདི་ནི་བཅོམ་ལྡན་འདས་ཉིད་ཀྱིས་གསུངས་པ་ཡིན་ཏེ། ཁྲོ་བོ་གཉིས་པ་ཉིད་དེ་ཉིད་ཀྱི་ངོ་བོ་ཡིན་པ་དང་། དེ་ལ་དེའི་ནུས་པ་ཞུགས་པ་ཡིན་པས་འགལ་བ་མེད་དེ་མདོ་གཞན་བཞིན་ནོ། །གང་
དུ་ཐོས་ཤེ་ན། གནས་ཕུན་སུམ་ཚོགས་པ་ནི་རྡོ་རྗེ་ལ་བཞུགས་པ་ལས་ཐོས་པ་སྟེ། དེ་ཡང་དོན་ནི་གཉིས་སུ་མེད་པའི་ཡེ་ཤེས་ཡིན་ལ། རྣམ་པ་ནི་རྡོ་རྗེ་རིན་པོ་ཆེའི་གནས་རི་རབ་ཀྱི་བྱང་ཤར་ནས་རྡོ་རྗེ་ལྷུན་པོ་རི་རབ་ཀྱི་ཟོམ་ཞེས་བྱ་བའི་ས་ཕྱོགས་ལ་སོགས་པའི་རྡོ་རྗེར་གཏབས་
པར་ཐོས་པའོ། །རྡོ་རྗེ་གདན་ནི་མ་ཡིན་ཏེ་རྡོ་རྗེ་གདན་དུ་སྔགས་གསུངས་པ་ནི་མེད་དེ། དེ་ཡང་བསམ་གྱིས་མི་ཁྱབ་པའི་མདོ་ལས། ཤཱ་རིའི་བུ་དེ་བཞིན་གཤེགས་པ་ཐམས་ཅད་ནི་དང་པོ་རྡོ་རྗེ་གདན་ལ་མངོན་པར་རྫོགས་པར་སངས་རྒྱས་པ་ཡིན་ཡང་དེར་ཆོས་གསུངས་པར་ནི་མི་
འགྱུར་རོ། །དེ་ཅིའི་ཕྱིར་ཞེ་ན། དེར་ནི་བདུད་འདུལ་བ་ལས་སེམས་ཅན་གཞན་འདུལ་བའི་དོན་དུ་ནི་མ་ཡིན་ཏེ། རྡོ་རྗེ་སྙིང་པོ་དེ་ད་ལྟའི་སེམས་ཅན་རྣམས་ཀྱིས་མ་རྟོགས་པའི་ཕྱིར་རོ། །ཞེས་གསུངས་པའི་ལུང་དང་འགལ་བའི་ཕྱིར་རོ། །དེར་བཞུགས་པ་ནི་གནས་ཤིང་བརྟེན་
པར་སྟོན་ཏེ་མཛད་པ་རྣམ་པ་གསུམ་གྱིས་རྡོ་རྗེའི་སྐྱིལ་ཀྲུང་དུ་རྡོ་རྗེ་དང་སེང་གེའི་གདན་ལ་བཞུགས་སོ། །དེ་ནི་བཞི་པའི་དོན་ལས་གསུམ་པ་སྟེ་ཆོས་སྟོན་པའི་དོན་དུའོ། །འཁོར་གང་དང་ལྷན་ཅིག་ཏུ་ཐོས་ཤེ་ན། ཕྱག་ན་རྡོ་རྗེ་ཞེས་པ་ཐོག་མར་དྲངས་ནས་བསྟེན་ཏོ། །དེ་ཡང་མ་
སྨོས་ཀྱང་རྒྱལ་པོ་ལྟ་བུ་སྟེ་དེའི་དུས་ན་འཁོར་ཕྱག་ན་རྡོ་རྗེ་ལ་སོགས་པའི་རྡོ་རྗེ་མིང་ཅན་དུ་གྲགས་པའི་བྱང་ཆུབ་སེམས་དཔའ་དཔག་ཏུ་མེད་པ་དང་། ཤཱ་རིའི་བུ་ལ་སོགས་པ་ཉན་ཐོས་དཔག་ཏུ་མེད་པ་དང་། འོད་སྲུངས་ལ་སོགས་པའི་དགྲ་བཅོམ་པ་དང་། གཞན་ཡང་ལྷ་ལ་
སོགས་པ་གྲངས་མེད་པ་དང་། ལྷན་ཅིག་ཏུ་ཐོས་པར་སྟོན་ཏེ། རྡོ་རྗེ་ལྷུན་པོ་རི་རབ་ཀྱི་ཟོམ་གྱི་མདོ་བཞིན་ནོ། །དེ་དག་གིས་ནི་རྡོ་རྗེའི་མདོ་འདི་རྒྱུད་དང་མདོ་གཞན་ལས་ཁྱད་པར་དུ་འཕགས་པར་བསྟན་ཏོ། །འདིས་ནི་འདི་སྐད་བསྟན་པར་འགྱུར་ཏེ། མ་འོངས་པའི་གང་ཟག་དག་

71-1-178b

རིག་སྔགས་ཀྱི་སྒོའི་སྤྱོད་པ་སྤྱད་པར་འདོད་པ་དབང་དང་དམ་ཚིག་ཐོབ་ཅིང་ཡོན་ཏན་དང་ལྡན་པས་འཁོར་བཟང་པོ་དང་ལྷན་ཅིག་ཏུ་གནས་ལེགས་པར་དུས་བཟང་པོ་ལ་གནས་ཏེ། ཡོ་བྱད་དང་ལྡན་པས་མཎྜལ་བྱས་ལ་འོག་ནས་འབྱུང་བའི་བུམ་པ་བཅས་པ་སྟེ་བསྒྲུབ་པར་
བྱའོ་ཞེས་པའོ། །དེ་ཡང་། སྔགས་པས་གནས་བཟང་གནས་ཏེ་དུས་དང་ལྡན། །འཁོར་དང་འབྱོར་པ་རྟེན་དང་ལྡན་པས་བསྒྲུབ། །ཅེས་གསུངས་སོ།    །དེ་ལྟར་རྡོ་རྗེའི་མདོ་ལས་འབྱུང་བའི་རྒྱུ་བཤད་ནས། ད་ནི་དེའི་རྐྱེན་གླེང་བསླང་པ་བསྟན་པ་ནི་དེ་ནས་སངས་རྒྱས་ཀྱིས་མཐུས་
ཞེས་བྱ་བ་ལ་སོགས་པ་གསུངས་ཏེ། དེས་ནི་འཁོར་གྱི་གཙོ་བོ་ཏིང་ངེ་འཛིན་ལ་གནས་པའི་གླེང་བསླང་གི་རྒྱུ་རུ་གྱུར་པའོ། །དེ་ཡང་དུས་དེར་བཅོམ་ལྡན་འདས་ཀྱིས་འཁོར་རྣམས་ལ་ཆོས་གསུངས་པ་ནི་ཐོག་མར་དགེ་བ་ལ་སོགས་པ་སྟེ། འཛམ་བུའི་གླིང་ན་རྒྱལ་པོ་གཟུགས་
ཅན་སྙིང་པོའི་བུ་མ་སྐྱེས་དགྲ་ཞེས་ཀྱང་གྲགས། ལོག་པའི་སྙིང་པོ་སྐྱེས་ཙམ་ན་རྐང་པ་ལ་ལྕགས་ཀྱི་སྡིག་པའི་གཟུགས་ཅན་དེས་ཁ་ནས་མཱ་ར་ཡ་འདོན་ཅིང་མ་དང་ཕ་བསད་དེ་འཁོར་མི་དགེ་བ་བཅུ་ལ་བཙུད་པས་མི་མ་ཡིན་པ་ཐམས་ཅད་འཁྲུགས་པས་ནད་ལ་སོགས་པ་སྣ་
ཚོགས་བྱུང་ངོ་། །དེས་སེམས་ཅན་ཐམས་ཅད་སྡུག་བསྔལ་ནས་སྐྱབས་སོ་སོ་ལས་འདོང་ཞིང་སྨྲའོ། །དེ་རྒྱལ་པོ་བཞིས་གཟིགས་ནས་བཅོམ་ལྡན་འདས་ལ་བསྐྱབས་པས་ཅང་མི་གསུང་བར་ཕྱག་ན་རྡོ་རྗེ་ལ་བསྐུལ་ཏེ་རྡོ་རྗེ་གསོར་ཞིང་ཁས་བླངས་ཏེ་རྡོ་རྗེ་རྣམ་པར་འཇོམས་པ་
འཁོར་གྲངས་མེད་པ་བཅས་ཏེ། དེས་སྔགས་གསུངས་པས་འབྱུང་པོ་དང་ལོག་པའི་སྙིང་པོ་བཏུལ་ཏེ་འདི་ལ་ཞུགས་པས་བྱང་ཆུབ་ཐོབ་པར་མདོ་ནས་བཤད་དོ། །དེ་ཡང་བྲམ་ཟེ་ནི་མ་ཡིན་ནོ། །དེ་ལ་སངས་རྒྱས་ནི་ཉོན་མོངས་པའི་གཉིད་ལས་སད་ཅིང་། ཡེ་ཤེས་པདྨ་ལྟར་
གྱུར་པ་སྟེ། སྤངས་པ་དང་ཡེ་ཤེས་ཕུན་སུམ་ཚོགས་པའོ། །དེ་ནི་ཤཱ་ཀྱ་ཐུབ་པར་བསྟན་ཏེ་དེས་བསྐུལ་བའོ། །དེའི་མཐུ་ནི་ནུས་པ་སྟེ་དེའི་སྟོབས་ཀྱིས་ནུས་པ་དང་ལྡན་པའོ། །གང་ཞེ་ན། ལག་ན་རྡོ་རྗེ་ཞུགས་སོ་ཞེས་བྱ་བར་འབྲེལ་པའོ། །དོན་གཉིས་སུ་མེད་པའི་ཡེ་ཤེས་

71-1-179a

འཆང་བ་ཡིན་ལ། རྣམ་པ་ནི་སངས་རྒྱས་ཐམས་ཅད་ཀྱིས་བྱིན་གྱིས་བརླབས་ཤིང་། གསང་བ་གསུམ་སྟོན་པ་དྲག་པོའི་རྡོ་རྗེ་ཐོགས་པ་སྟེ། འཁོར་གྱི་གཙོ་བོ་གནོད་སྦྱིན་ཁྲོ་བོ་འཇིགས་པ་མཐུ་སྟོབས་དང་ལྡན་པ་སངས་རྒྱས་ཐམས་ཅད་ཀྱི་བསྟན་པ་འཛིན་པར་
གྲགས་པ་འདིའོ། །གང་ལྟར་ཞེ་ན་ལུས་ཐམས་ཅད་རྡོ་རྗེར་བྱིན་གྱིས་བརླབས་ནས་ཞེས་པའོ། །དེ་ཡང་ལུས་ནི་སྤྱི་བོ་ལ་སོགས་པའོ། །ཐམས་ཅད་ཅེས་པ་དག་དང་ཡིད་ཀྱང་ངོ་། །རྡོ་རྗེ་ནི་དེ་དག་དང་སྟོང་པ་ཉིད་དང་ཐོགས་པ་མེད་ཅིང་ནུས་པ་དང་ལྡན་པར་བྱིན་གྱིས་བརླབས་པ་
ནི་བསྒྱུར་བ་སྟེ་ནུས་པ་ཅན་དུའོ། །དེས་ནི་ཁྲོ་བོར་གྱུར་པར་བསྟན་ཏོ། །དེས་ནི་མ་འོངས་པའི་རྣལ་འབྱོར་པས་སྲུང་བའི་འཁོར་ལོ་བྱའོ་ཞེས་པའི་ཐ་ཚིག་གོ། །གང་ལ་ཞེ་ན། རྡོ་རྗེའི་ཏིང་ངེ་འཛིན་ལ་སྟེ་གཉིས་སུ་མེད་པའི་ཡེ་ཤེས་དང་ཐོགས་པ་མེད་པ་ལ་རྩེ་གཅིག་པར་སྙོམས་
པར་ཞུགས་པ་ནི་མཉམ་པར་གཞག་པའོ། །མདོར་ན་སྟོང་པ་ཉིད་ལས་ཐུགས་ཀྱི་སྤྲུལ་པ་རྡོ་རྗེ་རྣམ་པར་འཇོམས་པ་གདོན་པར་ཐུགས་རྩེ་གཅིག་པར་དགོངས་པ་སྟེ། ཁྱད་པར་དུ་བསྟན་པའི་ཕྱིར་རོ། །ཐུགས་ཀྱི་སྤྲུལ་པ་དངོས་པོས་བསྟན་པའི་ཕྱིར་རོ། །དེ་ནས་ཞེས་བྱ་བ་
ལ་སོགས་པ་གསུངས་ཏེ། སྨྲས་སོ་ཞེས་བྱ་བར་འབྲེལ་ཏོ། །དེ་ལ་དེ་ནས་ནི་འདས་མ་ཐག་པའོ། །ལག་ན་རྡོ་རྗེ་ནི་བཤད་དོ། །སངས་རྒྱས་ཤཱཀྱ་ཐུབ་པ་ལ་སོགས་པ་ཐམས་ཅད་ཀྱི་མཐུ་ནི་ནུས་པའོ། །བྱིན་གྱིས་བརླབས་པ་ནི་རང་བཞིན་གྱི་ཤུགས་ཀྱིས་སོ། །གཞན་ཡང་བྱང་ཆུབ་
སེམས་དཔའ་སྟེ་དེ་ཡང་དོན་དམ་པའི་འབྲས་བུ་གཉིས་སུ་མེད་པ་ལ་སྨོན་པ་དང་འཇུག་པས་གནས་པའོ། །དེ་ཡང་། བྱང་ཆུབ་ནམ་མཁའི་མཚན་ཉིད་དེ། །ཀུན་དུ་རྟོག་པ་ཐམས་ཅད་སྤངས། །དེ་ལ་སེམས་དཔའ་གང་ཡིན་པ། །བྱང་ཆུབ་སེམས་དཔའ་ཞེས་བཤད་དོ། །ཞེས་བྱ་བ་
དང་། བྱང་ཆུབ་ནི་དོན་དམ་པའོ། །སེམས་དཔའ་ནི་ཀུན་རྫོབ་ཅེས་གསུངས་སོ། །དེ་ཡང་སེམས་དཔའ་ཆེན་པོ་ཞེས་སྦྱར་རོ། །ཐམས་ཅད་ནི་མ་ལུས་པ་སྟེ་རྡོ་རྗེ་སྤྱན་རས་གཟིགས་ལ་སོགས་པའོ། །དེ་དག་གིས་ཀྱང་བྱིན་གྱིས་བརླབས་ཏེ། དེས་ནི་ཏིང་ངེ་འཛིན་གཞན་ལས་ཁྱད་པར་

71-1-179b

དུ་འཕགས་པ་བསྟན་ཏོ། །ལག་ན་རྡོ་རྗེའི་ཐུགས་གཉིས་སུ་མེད་པའི་ཁྲོ་བོ་གདུག་པའི་ཚུལ་དགུ་དང་ལྡན་པར་འབྱུང་བ་ནི་རྡོ་རྗེ་ཁྲོ་བོའོ། །ལས་བྱུང་བ་ནི་དེས་སྤྲུལ་པ་སྟེ་བཞི་པའོ། །གང་བྱུང་ཞེ་ན་རྡོ་རྗེ་སྙིང་པོ་སྟེ་རྡོ་རྗེ་རྣམ་པར་འཇོམས་པའི་ཁྲོ་བོ་རྡོ་རྗེ་བསྣམས་པ་ནི་ལྷ་དང་
སྔགས་ཐམས་ཅད་ཀྱི་འབྱུང་གནས་སུ་གྱུར་པའོ། །དེས་རབ་ཏུ་སྨྲས་པ་ནི་མྱུར་བར་རབ་ཏུ་སྔགས་གསུངས་པ་སྟེ་གསུམ་པའོ། །འོ་ན་འདི་ནི་ཕྱག་ན་རྡོ་རྗེ་དང་རྡོ་རྗེ་རྣམ་པར་འཇོམས་པས་སྨྲས་པས་བཅོམ་ལྡན་འདས་ཀྱི་བཀའ་མ་ཡིན་ཞེ་ན། འདི་ནི་བཅོམ་ལྡན་འདས་ཀྱི་བཀའ་ཉིད་
ཡིན་ཏེ། བཅོམ་ལྡན་འདས་ཀྱིས་བྱིན་གྱིས་བརླབས་པའི་ཕྱིར་དང་། ཐ་མི་དད་པའི་ཕྱིར་ཏེ། དཔེར་ན་མདོ་གཞན་བཞིན་ནོ། །དེ་དག་ནི་ཕྱག་ན་རྡོ་རྗེས་རྡོ་རྗེ་རྣམ་པར་འཇོམས་པ་འཁོར་བཅས་འོག་ནས་སྤྲུལ་ཏེ་མདུན་ན་གནས་པ་ལ་བཀའ་བསྒོས་ན། དེས་རྡོ་རྗེ་རྣམ་འཇོམས་
སྔགས་ཀྱིས་འབྱུང་པོ་འདུལ་བར་བྱེད་པ་གསུངས་པའོ། །ཕྱག་ན་རྡོ་རྗེས་སྨྲས་པ་ནི་མ་ཡིན་ཏེ། རྒྱུད་དང་འགལ་བའི་ཕྱིར་རོ། །འདིས་ནི་འདི་སྐད་ཅེས་སྟོན་ཏེ། རྣལ་འབྱོར་པས་ཁྲུས་ལ་སོགས་པ་བྱས་ཏེ། ཁྲོ་བོ་མི་འཆི་བ་དང་གནོད་པ་མེད་པར་བྱས་ཏེ། སྟན་ལ་གནས་
ནས་སྲུང་བ་བྱས་ལ་ཚོགས་བསགས་ཏེ། རྡོ་རྗེ་གདན་ལ་གནས་པས་བྱིན་གྱིས་བརླབ་པར་གསོལ་ཏེ་སངས་རྒྱས་དང་བྱང་ཆུབ་སེམས་དཔའ་ཞུགས་པས་སྟོང་པ་ཉིད་ལ་སོགས་པའི་བྱང་ཆུབ་པའི་ལྷ་དྲུག་གིས་བདག་ཕྱག་ན་རྡོ་རྗེར་བྱ་བ་དང་། མདུན་དུ་བུམ་པ་ལྷ་དྲུག་འཁོར་
དང་བཅས་པ་བསམ་པ་དང་། སྤྱན་དྲང་བ་དང་། མཆོད་པ་ལ་སོགས་པ་རྒྱུད་ལ་བརྟེན་པ་སྒྲུབ་ཐབས་བཞིན་དུ་བྱའོ་ཞེས་པའི་དོན་ཏོ། །དེ་ཡང་རྒྱུད་ལས། དང་པོ་ཁྲུས་བྱས་རྣལ་འབྱོར་པས། །རྡོ་རྗེ་གདན་ལ་གནས་ནས་ནི། །མཆོད་དང་གསོལ་བས་ལྷ་དྲུག་བསྒོམ། །སྟོང་
དང་ཡི་གེ་སྒྲ་གཟུགས་དང་། །ཕྱག་རྒྱ་མཚན་མ་དྲུག་ཡིན་ཏེ། །བུམ་པར་བསྐྱེད་སོགས་རྫོགས་བྱས་ལ། །ནོར་བུ་སྤྱོད་ལམ་སྔགས་བཟླས་ཏེ། །ཤ་ལ་སོགས་པ་བདུན་སྤོང་ངོ་། །ཞེས་གསུངས་སོ།།    །།དེ་ལྟར་གླེང་བསླང་བའི་རྒྱུ་བསྟན་ནས། ད་ནི་གླེང་བསླང་བ་དངོས་བསྟན་

71-1-180a

པའི་ཕྱིར། མི་ཆོད་པ་ཞེས་བྱ་བ་ལ་སོགས་པ་གསུངས་སོ། །དེ་ཡང་འདི་རྣམས་ནི་རྡོ་རྗེ་རྣམ་པར་འཇོམས་པའི་སྔགས་ཀྱི་ཡོན་ཏན་འདི་ལྟ་བུ་ཞེས་ཚིག་ཏུ་གསུངས་པ་དངོས་ཏེ། དེ་ལ་ཡང་གཉིས་ལས་བདག་གི་དོན་ཕུན་སུམ་ཚོགས་པ་ནི་རྡོ་རྗེའི་ཚིག་བདུན་
གྱིས་སྟོན་ཏོ། །དེ་ལ་སྟོང་པ་ཉིད་དང་སྔགས་དང་ཏིང་ངེ་འཛིན་རྡོ་རྗེ་སྟེ་ཕྱི་རོལ་གྱི་རྡོ་རྗེ་རིན་པོ་ཆེ་ལ་ཆོས་བདུན་ཡོད་པ་དང་འདྲ་བར་འདི་ལ་འབྱུང་བས་དུམ་བུར་མི་ཆོད་ཅིང་སྙིང་པོ་ཡོད་པའོ། །དེ་ལ་ཆུས་ཕྱེ་མར་མི་ཤིགས་ཤིང་མི་ཕྱེད་པའོ། །བདེན་པ་ནི་གནས་པ་སྟེ་མེས་ཐལ་བར་
མི་འགྱུར་བའོ། །སྲ་བ་ནི་གཞིག་པར་དཀའ་བ་སྟེ་རླུང་གིས་གཏོར་དུ་མེད་པའོ། །ཚིག་དེ་དག་གིས་རྡོ་རྗེ་ཡེ་ཤེས་དེ་ལ་སྐྱེ་བ་ལ་སོགས་པ་བཞི་དང་། མཐའ་བཞི་དང་བྲལ་བར་ཤེས་པར་བྱའོ། །དེས་ན་མཚན་མའི་དངོས་པོ་དང་། གདོན་ཐམས་ཅད་ལ་ཐོགས་པ་མེད་པ་སྟེ་གཅོད་ཅིང་
འཇོམས་ལ་བེམས་པོ་མ་ཡིན་པའོ། །དེའི་ཕྱིར་མི་འགྱུར་བར་གནས་པས་བརྟན་པ་ཞེས་སྦྱར་རོ། །ཚུར་ལ་ཚུགས་སམ་ཞེ་ན། ཐམས་ཅད་དུ་མ་ཕམ་པ་སྟེ་རང་ལ་ཉམས་པ་མེད་ཅིང་མ་བཅོམ་ལ་རྒྱལ་བས་སོ། །དེ་ཡང་། སྲ་བརྟན་སྙིང་ལྡན་ཁོང་སྟོང་མེད། །མི་ཕྱེད་མི་
ཤིགས་མི་འཚིག་པས། །རྡོ་རྗེ་ཞེས་ནི་བརྗོད་པའོ། །ཞེས་གསུངས་སོ། །དེ་དག་གིས་ནི་སྔོན་བྱུང་བ་རྒྱལ་པོ་ལོག་པའི་སྙིང་པོ་ལ་སོགས་པས་ཉམས་སུ་བླངས་ནས་བདག་གི་དོན་ཆོས་སྐུ་རྡོ་རྗེ་ལྟ་བུའི་ཏིང་ངེ་འཛིན་དང་། ལོངས་སྤྱོད་རྫོགས་པའི་སྐུ་རྡོ་རྗེ་ལྟ་བུ་གྲུབ་པའོ། །མ་འོངས་
པས་ནི་སྔོན་དུ་བསྙེན་པ་རྫོགས་པས་བདག་དོན་འགྲུབ་པར་ཤེས་པར་བྱའོ་ཞེས་བསྟན་ཏོ། །བདག་གི་དོན་གྲུབ་ནས་གཞན་གྱི་དོན་མེད་དམ་ཞེ་ན། སེམས་ཅན་ཐམས་ཅད་སྐྲག་པར་བྱེད་པ་ཞེས་བྱ་བ་ལ་སོགས་པ་བཅོ་ལྔས་སྤྲུལ་པའི་སྐུ་རྡོ་རྗེ་ལྟ་བུས་གཞན་གྱི་དོན་འགྲུབ་པར་
སྟོན་ཏོ། །དེ་ཡང་བསྡུ་ན་ལས་བཞིའོ། །དེ་ཡང་། བདེ་གཤེགས་ལས་ནི་སྣ་ཚོགས་པ། །བསྡུ་ན་ཞི་སོགས་ལས་བཞིའོ། །མངོན་སྤྱོད་བརྒྱད་དུ་རྣམ་པར་གྲགས། །ཚར་གཅད་དང་ནི་རྗེས་གཟུང་ངོ་། ཞེས་གསུངས་སོ། །དེ་ལ་སེམས་ཀྱི་ཀུན་གཞི་སྲོག་དང་བཅས་ཤིང་

71-1-180b

ཡིད་ཀྱི་རྣམ་པར་ཤེས་པ་དང་ལྡན་པ་སྟེ་སྐྱེ་གནས་བཞིས་བསྡུས་པ་འགྲོ་བ་རིགས་དྲུག་པོ་ཐམས་ཅད་དོ། །དེ་དག་སྐྲག་པར་བྱེད་པ་ནི་ལུས་སེམས་འཇིག་ཅིང་དངངས་ཏེ་དྲག་པོ་ཚར་གཅོད་པར་བྱེད་པའི་རིག་སྔགས་འདི་སྨྲས་སོ་ཞེས་བྱ་བར་སྦྱར་རོ། །འཇིལ་བ་ནི་ལུས་སེམས་སྤ་
བཀོང་ནས་འགུལ་མི་ནུས་པའོ། །དེ་ཡང་གསང་སྔགས་དང་ལྷ་འདིས་བྱེད་པའོ། །དེ་ཡང་དྲག་པོའོ། །རིག་པ་ནི་ལྷ་སྟེ་དེའི་སྔགས་ནི་ནུས་པ་ཅན་དེ་ཤེས་ནས་སྐྱོབ་པའོ། །དེ་ཡང་གཞན་ཐམས་ཅད་ཀྱི་སྦྱར་བ་སྟེ་དེ་དག་གཅོད་པ་ནི་ནུས་པའི་རྒྱུན་མེད་པར་བྱེད་པའོ། །དེ་ཡང་དྲག་
པོའོ། །གནོན་པར་བྱེད་པ་ནི་ནུས་པ་མེད་ཅིང་ཟིལ་གྱིས་མནན་ནས་མི་གཡོ་བ་སྟེ། སྒྱུ་མ་མཁན་བཟང་པོའི་སྒྱུ་མ་བཞིན་ནོ། །དེ་ནི་དབང་ངོ་། །ཞི་བའི་ལས་ནི་ལས་ཐམས་ཅད་འཇོམས་པར་བྱེད་པ་སྟེ་ཕ་རོལ་གྱི་སྦྱོར་བ་ངན་པ་བྱད་སྟེམས་ལ་སོགས་པ་དང་གོས་པའི་ནང་ལ་སྟེ་
སྔོན་གྱི་ལས་ཀྱི་སྒྲིབ་པ་ཐམས་ཅད་དོ། །དེ་དག་པར་བྱེད་ཅིང་བཟློག་པའོ། །གཞན་ནི་ཕ་རོལ་ཏེ་འབྱུང་པོ་སེམས་ཅན་ནོ། །དེ་དག་གི་ལས་ནི་ནད་ལ་སོགས་པ་དང་སྒྲིབ་པ་སྟེ་འཇིག་པ་ནི་བརླག་པར་མཛད་པའོ། །གདོན་ནི་གནོད་པར་བྱེད་པ་སྟེ་ལྷ་ལ་སོགས་པ་བཅོ་བརྒྱད་པ་ལ་
སོགས་པ་ཐམས་ཅད་དོ། །དེ་དག་བརླག་པ་ནི་ཐལ་བར་བྱེད་པ་སྟེ་དྲག་པོའོ། །ཐར་པ་ནི་སྔར་བཟུང་བ་ལས་གྲོལ་བའོ། །དེ་ནི་ཞི་བའོ། །གཞན་ཡང་དབང་ནི་འབྱུང་པོ་སྟེ་སེམས་ཅན་ཐམས་ཅད་དེ་ཁམས་གསུམ་དུ་འབྱུང་བས་སོ། །དེ་དག་འགུགས་པ་ནི་འདྲེན་པ་སྟེ་དབང་དུ་བྱས་ནས་
བསྟན་པ་ལ་གནས་པར་བྱེད་པའོ། །རིག་སྔགས་ནི་འཇིག་རྟེན་པ་དང་འཇིག་རྟེན་ལས་འདས་པའོ། །ལས་ནི་མ་ལུས་པ་སྟེ་ཞི་བ་ལ་སོགས་པ་ཐམས་ཅད་འདིས་མྱུར་དུ་བྱེད་དུ་འཇུག་པ་སྟེ་ལས་ལ་འཛུད་པའོ། །དེ་ཡང་དབང་ངོ་། །སྔར་མ་གྲུབ་པ་ནི་མངོན་དུ་མ་གྱུར་པ་སྟེ་ལྷ
རྣམ་པ་གཉིས་ཀྱི་དངོས་གྲུབ་བོ། །དེ་དག་འདིས་གྲུབ་པར་བྱེད་པ་ནི་མངོན་སུམ་དུ་གྱུར་པའོ། །སྔར་གྲུབ་ཟིན་པ་ནི་འབྲས་བུ་དེ་ཡང་བར་ཆད་ཀྱིས་མི་ཁྱེར་བར་བྱེད་ཅིང་དོན་ཡོད་པ་ཆུད་མི་ཟ་བའོ། །འདོད་པ་ནི་ཡིད་ཀྱིས་མངོན་པར་འདོད་ཅིང་དོན་དུ་གཉེར་བ་སྟེ་ནོར་ལ་སོགས་པ་

71-1-181a

ཕུན་སུམ་ཚོགས་པ་ཐམས་ཅད་དོ། །དེ་དག་འདིས་སྦྱིན་པ་འདི་ལས་བྱུང་ཞིང་སྟེར་བའོ། །དེ་དག་ནི་རྒྱས་པའོ། །སྲུང་བ་ནི་ནད་དང་གདོན་ལ་སོགས་པ་སྔར་མ་འོངས་པ་དག་ཕྱིས་མི་འོང་བར་བྱེད་ཅིང་སྡོམ་པའོ། །དེ་ཡང་ཞི་བའོ། །མཇུག་བསྡུ་བ་ནི་ཞི་བ་སྟེ་ནད་ལ་
སོགས་པ་ཐམས་ཅད་མེད་པར་བྱེད་པའོ། །རྒྱས་པ་ནི་ཚེ་ལ་སོགས་པ་མ་ལུས་པ་ཐམས་ཅད་འཕེལ་བར་བྱེད་པ་སྟེ། དེ་གཉིས་དང་དབང་ནི་རྗེས་སུ་གཟུང་བའོ། །གཞན་ཐམས་ཅད་ནི་ཚར་གཅོད་པའོ། །དྲག་པོའི་ལས་འབྱུང་པོ་དང་སེམས་ཅན་གང་དག་སངས་རྒྱས་ཀྱི་བསྟན་
པ་ལ་མ་དད་པ་དེ་དག་རེངས་པར་བྱེད་པ་ནི་མི་གཡོ་བ་སྟེ་ངག་དང་ལུས་སོ། །རྨུགས་པ་ནི་སེམས་རྨོངས་པ་སྟེ་ཅི་ཡང་མི་ཤེས་པར་བྱེད་པའོ། །གསུམ་པའི་སྒྲ་དང་འོག་གི་ཚིག་ནི་རེ་རེ་ལ་སྦྱར་རོ། །ཡང་ན་ཚིག་དེ་རྣམས་ནི་མན་ངག་གིས་འོག་གི་སྔགས་རེ་རེ་ལ་སྦྱར་བར་བྱའོ་ཞེས་
བསྟན་པའོ། །དེ་ལྟ་བུ་འདི་རྡོ་རྗེ་རྣམ་པར་འཇོམས་པས་ཁྲོ་བོའི་ཚིག་ཏུ་སྨྲས་སོ་ཞེས་སྦྱར་ཏེ་བརྗོད་པའོ། །གང་གིས་བརྗོད་ཅེ་ན་ལག་ན་རྡོ་རྗེ་སྟེ་འདིར་རྡོ་རྗེ་རྣམ་པར་འཇོམས་པ་ལ་བྱའི། ཕྱག་ན་རྡོ་རྗེ་དངོས་མ་ཡིན་ནོ། །གང་གིས་ན་ཤཱཀྱ་ཐུབ་པ་ལ་སོགས་པའི་ནུས་པས་བྱིན་
གྱིས་བརླབས་པ་ནི་སངས་རྒྱས་ཀྱི་མཐུ་སྟེ། དེ་ཡང་། རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་དང་། ཞེས་པ་ལ་སོགས་པ་དང་། ཡང་སྟོན་ཅིང་འཆད་པ་རྣམས་ནི་སངས་རྒྱས་ཀྱི་མཐུའོ་ཞེས་བསྟན་པའི་ཕྱིར་རོ། །གང་ལྟ་བུ་ཞེ་ན། གསང་སྔགས་ཏེ་སྦ་ཞིང་དམན་པ་
ལ་མི་བསྟན་པས་ནུས་པ་ཁྱད་པར་དུ་འཕགས་པའོ་ཞེས་བྱ་བའི་ཐ་ཚིག་གོ། །ནུས་པ་གཞན་ལས་ཁྱད་པར་དུ་འཕགས་ཤིང་ཕུལ་དུ་བྱུང་བའི་འོག་གི་རྡོ་རྗེའི་སྔགས་ནི་མཐུ་ཆེན་པོ་འདི་ཞེས་པ་སྟེ་དེ་དག་སྨྲས་པའོ། །དེ་དག་གིས་ནི་སྔོན་གྱི་འཁོར་ལ་ཡོན་ཏན་ནི་གཞན་དོན་
ཐམས་ཅད་འགྲུབ་པར་བསྟན་ལ་མ་འོངས་པ་ལ་ནི་སྔོན་དུ་བསྙེན་པ་རྫོགས་པས་སྒྲུབ་ཐབས་བཞིན་བྱས་པས་དེ་དག་འགྲུབ་པར་འགྱུར་རོ་ཞེས་པའོ། །འདི་སྐད་སྟོན་ཏེ་དེ་ལྟར་མཆོད་པ་ལ་སོགས་པ་རྫོགས་ནས་སྔགས་ཀྱི་ནོར་བུ་བཟུང་སྟེ། སྔགས་ཀྱི་གནས་དང་ལྡན་པས་

71-1-181b

རྡོ་རྗེའི་ཚིག་དང་ཁྲོ་བོའི་ངག་ཏུ་བཟླས་པས་བདག་དང་གཞན་གྱི་དོན་སྒྲུབ་པའི་སྤྲོ་བསྡུ་བྱ་སྟེ། དེ་ཡང་བསྙེན་པ་དང་ལས་སྦྱོར་གྱི་དུས་སུ་སྒྲིབ་པ་ལ་སོགས་པ་མེད་པའི་སྦྱོར་བས་སྤྱོད་ལམ་བྱའོ་ཞེས་པའི་དོན་ཏོ།    །དེ་ལྟར་རྒྱུ་དང་རྐྱེན་རྣམ་པ་གཉིས་བསྟན་ནས། ད་ནི་དེའི་
འབྲས་བུ་གང་བསྟན་པར་བྱ་བའི་ཆོས་ཕུན་སུམ་ཚོགས་པ་རྡོ་རྗེའི་རྒྱུད་དངོས་རྡོ་རྗེའི་སྔགས་ཟབ་མོ་སྔར་གྱི་ཡོན་ཏན་ཅན་དེ་བསྟན་པའི་ཕྱིར། ན་མོ་ཞེས་བྱ་བ་ལ་སོགས་པ་གསུངས་སོ། །དེ་ལ་དེ་དག་གིས་ངག་གི་དོན་རྟོགས་སླ་བའི་ཕྱིར་བརྗོད་པར་བྱ་སྟེ། སྔོན་བྱུང་བ་ལ་ནི་རྡོ་རྗེའི་
སྔགས་འདི་དག་བཀྲ་ཤིས་པ་བདག་པོ་ལ་མཆོད་པ་བརྗོད་ནས་རྣམ་པར་འཇོམས་པའི་རྡོ་རྗེ་གསུངས་པས་འབྱུང་པོ་ཐམས་ཅད་ལ་རྣམ་པ་བཞིས་ཚར་གཅད་པ་དང་། རྗེས་སུ་བཟུང་བས་སངས་རྒྱས་ལ་སྐྱབས་སུ་འདོད་པ་ལ་སོགས་པའི་ཚུལ་གྱིས་དཀྱིལ་འཁོར་དུ་བཙུད་དེ་ནད་
ལ་སོགས་པ་ཞི་བས་མི་དག་སངས་རྒྱས་ལ་སོགས་པ་ལ་དད་དེ། རྒྱལ་པོ་ལོག་པའི་སྙིང་པོ་ཡང་གནས་དེར་འོད་ཟེར་ལ་ཞོན་ཏེ་འོངས་ནས། དེ་བཞིན་དུ་བྱས་པས་བཀྲ་ཤིས་ལ་ཐར་པ་ལ་གནས་སོ། །དེ་ཡང་འོག་ནས་རྒྱལ་པོ་ཞེས་པས་སོ། །བསྐྲད་པ་དང་། ལས་བཞི་དང་། 
ཁྲོ་བོ་བཞི་དང་། བཅུ་བསྐུལ་བ་དང་། གཙོ་བོ་ལ་སོགས་པ་དྲུག་པོ་བསྐུལ་བའི་ཚུལ་གྱིས་སོ། །མ་འོངས་པའི་སྒྲུབ་པ་པོས་ནི་སྔོན་དུ་བསྙེན་པ་ལ་སོགས་པ་བསྲུང་བ་དང་། བསྙེན་པ་ལ་སྔགས་ཚིག་གསུམ་གང་ཡང་རུང་བ་བཟླས་པ་དང་། ལས་སྦྱོར་ལ་གཉིས་སུ་བྱ་བ་དང་། 
ལས་སྒྲུབ་ན་གཙོ་བོ་དང་འབྲེལ་པ་དང་འཁོར་དང་གཉི་ག་དང་འབྲེལ་པ་གསུམ་གྱིས་ཞི་བ་ལ་སོགས་པའི་ལས་ཀྱིས་ལྷ་དང་རྫས་དང་བསམ་པ་དང་། ཕྱོགས་དང་དུས་དང་སྔགས་དང་འཁོར་ལོ་དང་ཏིང་ངེ་འཛིན་དང་བྱ་བས་སྒྲུབ་པ་ནི་སྒྲུབ་པའི་ཐབས་བཞིན་དུ་ཤེས་པར་བྱའོ་ཞེས་བྱ་
བའི་དོན་ཏོ། །དེ་ཡང་། རྣལ་འབྱོར་བསྙེན་པ་གསུམ་དུ་བྱ། །ལས་ལ་གཉིས་ཏེ་ལས་ལ་གསུམ། །གཙོ་དང་འཁོར་དང་འདུལ་བ་ནི། །ལས་བཞི་སྔགས་སོགས་དབྱེ་བར་བྱ། །ཞེས་འདིའི་བཤད་པའི་རྒྱུད་ལས་གསུངས་སོ།    །ད་ནི་གཞུང་ཉིད་ལ་འཇུག་པར་བྱ་སྟེ། དེ་ལ་དང་

71-1-182a

པོ་བཀྲ་ཤིས་པའི་དོན་རྣམ་པ་གཉིས་ཀྱིས་ཕྱག་བྱ་བ་ནི། ན་མོ་རཏྣ་ཏྲ་ཡཱ་ཡ་ཞེས་པ་ལ་སོགས་པས་གཙོ་བོ་གསུམ་ལ་འདུད་པའོ། །དེ་དག་ནི་སྔགས་ཀུན་ལ་ཤེས་པར་བྱའོ། །འབྲུ་ནི་དོན་ཉམས་པའི་ཕྱིར་བཤད་པར་མི་བྱ་སྟེ་རང་ཉིད་ཀྱི་སྒྲས་ཤེས་པར་བྱས་
ལ་དོན་ཡིད་ལ་དྲན་པར་བྱའོ། །དེ་ནས་ཚར་གཅོད་ཅིང་བསྲུང་བའི་སྔགས་ནི་ཏདྱ་ཐཱ་ཨོཾ་ལ་སོགས་པ་སྟེ་ཉེ་བར་བསྟན་པའོ། །དེ་ཡང་དང་པོ་དང་ཐ་མར་ཡེ་ཤེས་དང་དྲག་པོ་དང་ཤིས་པ་བཞི་འཇུག་པ་ཅན་ཏེ་དེ་བཞིན་དུ་ཤེས་པར་བྱའོ།    །ད་ནི་གཟུངས་ལ་གསུམ་ལས་དང་པོ་
རྒྱས་པ་སྟེ་དེ་ཡང་གཙོ་བོའི་སྔགས་ན་སརྦ་བིདྱཱ་བཛྲ་བཛྲ་ཞེས་པ་ལ་སོགས་པ་སྟེ་བསྟོད་ཅིང་བོད་པའོ། །མ་འོངས་པས་ནི་འདི་ལ་སྔགས་གདགས་པར་ཤེས་པར་བྱའོ། །གཙོ་བོའི་ལས་དང་འབྲེལ་པ་ནི་མན་ངག་བཞིན་དུ་ཞི་བའི་སྔགས་ནི་ཧེ་ཕུ་ལུ་ཞེས་པ་ལ་སོགས་པ་སྟེ་
སྔ་མ་བཞིན་ནོ། །ཙ་ར་ནི་ཙ་ར་ལ་སོགས་པ་ནི་རྒྱས་པའིའོ། །ཀཱི་ལི་ཀཱི་ལཱ་ཡ་ལ་སོགས་པ་ནི་དབང་གིའོ། །མཱ་ར་ཡ་ལ་སོགས་པ་ནི་བསད་པའོ། །ཚིནྡ་ཚིནྡ་ལ་སོགས་པ་ནི་རིག་སྔགས་བཅད་པའོ། །བྷིནྡ་ལ་སོགས་པ་ནི་རིག་སྔགས་མནན་པའོ། །དེ་བཞིན་དུ་སྐྲག་པར་
བྱེད་པ་ལ་སོགས་པ་ལ་ཡང་མན་ངག་བཞིན་དུ་སྦྱར་རོ། །ད་ནི་འཁོར་གྱི་སྔགས་བསྟན་པ་ནི། ཙུ་རུ་ཞེས་པ་ལ་སོགས་པ་སྟེ། སྔ་མ་བཞིན་དུ་བྱས་པ་ནི་རྡོ་རྗེ་ཕུར་པའི་སྔགས་སོ། །ཏྲཱ་ས་ཡ་ལ་སོགས་པ་ནི་རྡོ་རྗེ་བེ་ཅོན་གྱིའོ། །ཧ་ར་ལ་སོགས་པ་ནི་རྡོ་རྗེ་ཐོ་བོའིའོ། །པྲ་ཧ་ར་ལ་
སོགས་པ་ནི་རྡོ་རྗེ་གཏུམ་པོའིའོ། །དེ་དག་ལ་བསྟོད་ཅིང་སྐུལ་བར་བྱེད་པ་ནི་ཨེ་ཧྱེ་ལ་སོགས་པའི་སྔགས་བཏགས་ཏེ་བཟླས་པར་བྱའོ། །དེ་དག་དང་འབྲེལ་པའི་ལས་སྔགས་ལ་ཞི་བའི་སྔགས་ནི་མ་ཏི་སྠི་ར་བཛྲ་ཞེས་བྱ་བ་ལ་སོགས་པའོ། །རྒྱས་པའི་སྔགས་ནི་དྷ་ར་དྷ་ར་ཞེས་པ་
ལ་སོགས་པའོ། །དབང་གི་སྔགས་ནི་ན་མ་ཿས་མཱནྟ་ཞེས་པ་ལ་སོགས་པའོ། །གསོད་པའི་སྔགས་ནི་ཨ་མུ་ཀཾ་མཱ་ར་ཡ་ཕཊ་ཅེས་པའོ། །རིག་སྔགས་བཅད་པའི་སྔགས་ནི་མ་ཧཱ་བ་ལེ་ཞེས་པ་ལ་སོགས་པའོ། །རིག་སྔགས་མནན་པ་ནི་ད་ཧ་ཞེས་པ་ལ་སོགས་པ་སྟེ། འདིར་ཡང་

71-1-182b

ཐམས་ཅད་སྔ་མ་བཞིན་དུ་བྱས་པས་ལས་ཀུན་འགྲུབ་པར་འགྱུར་ཏེ་སྦྱར་བ་གསུམ་ཤེས་པར་བྱའོ། །དེ་ཡང་རྡོ་རྗེའི་གསང་སྔགས་འདི་ཡིན་ཏེ། ལས་ཀུན་ཐོགས་པ་མེད་པར་འགྲུབ། །ཅེས་གསུངས་སོ། །འདིར་མན་ངག་གིས་གཙོ་བོ་ཡབ་ཡུམ་གྱི་སྔགས་ནི་དང་པོ་ཨོཾ་དང་ཐ་
མའི་ཡན་ལག་བོར་ལ་ཛྲ་ལ་ལ་སོགས་པའི་ན་བྱིན་ཏེ་ཡ་ཧཱུཾ་ཕཊ་སྭཱཧཱ་ཞེས་པ་བྱའོ། །སྟེང་དང་འོག་ཀྱང་དེ་བཞིན་དུ་བྱས་ལ་འཁོར་གྱི་རྒྱས་པའི་སྐུ་ལ་ལ་ཞི་བ་ལ་མ་བོར་ཏེ་ཕྱག་འཚལ་བ་ན་བྱིན་ཏེ་རྒྱས་པའི་དྷ་རའི་ར་ལ་ཨི་བྱིན་ལ་གཙོ་བོའི་རིག་པ་འཕྲོག་ལ་གཉིས་སུ་བྱའོ། །ཡང་ན་
འདི་ལྟར་ཡང་ཡིན་ཏེ། ཐམས་ཅད་སྔ་མ་བཞིན་ལ་བསྐྲད་པའི་ཤ་ལ་སཾ་གྱི་སྟོང་ཕྲོགས་ཏེ་བྱིན་ལ་གཙོ་བོ་ཞི་བའི་ཀུ་རུ་གཉིས་ཀྱིས་ཨུ་ཕྱི་མ་ལ་ཨེ་བྱིན་ཏེ་འཁོར་གྱི་ལྷའི་མ་ཧཱ་དང་དབང་གིས་མན་གྱི་ན་བསད་པའི་ཡ་གསོས་ལ་ཨེ་བྱིན་པ་ནི་གཅིག་སྟེ། དེ་གཉིས་གང་ཡང་
རུང་བས་དམ་ཚིག་བསྟན་ཅིང་བསྟན་པར་བྱ་བ་ཡིན་ནོ། །ཞེས་བླ་མས་བསྟན་ཏོ། །ཡང་ན་དེ་རྣམས་ནི་སེམས་ཅན་ཐམས་ཅད་སྐྲག་པར་བྱེད་པ་ཞེས་པ་ལ་སོགས་པ་དང་རིམ་པ་བཞིན་དུ་སྦྱར་བར་བྱའོ་ཞེས་དགོངས་སོ།    །ད་ནི་སྙིང་པོ་བསྡུས་པ་བསྟན་པའི་ཕྱིར། ན་མོ་ཞེས་
བྱ་བ་ལ་སོགས་པ་གསུངས་ཏེ་སྔ་མ་བཞིན་དུ་ཤེས་པར་བྱའོ། །དེ་ལྟར་ལྷ་ལྔ་པོའི་འཁོར་ན་གནས་པའི་ཐུགས་ཀྱི་ཁྲོ་བོ་བཅུ་སྔོན་ནི་བསྐུལ་ལ། མ་འོངས་པ་ལས་བཞི་འགྲུབ་པ་ཡིན་པས་དེ་བཤད་པ་ནི། ཧ་ར་ནི་ཧཱུཾ་མཛད་བསྐུལ་བ་སྟེ་དྲག་པོའོ། །མཐའ་ནི་རྣམ་པར་རྒྱལ་བ་
བསྐུལ་བ་སྟེ་དེ་ཡང་དྲག་པོའོ། །དྷུ་ན་ནི་དབྱུག་སྔོན་ཅན་དེ་དབང་ངོ་། །ད་ཧ་ནི་གཤིན་རྗེ་མཐར་བྱེད་དེ་དེ་ཡང་དབང་ངོ་། །པ་ཙ་ནི་མི་གཡོ་བ་སྟེ་དྲག་པོའོ། །དྷཱ་ར་ནི་རྟ་མཆོག་སྟེ་ཞི་བའོ། །དཱ་ར་ཡ་ནི་གཞན་གྱིས་མི་ཐུབ་པ་སྟེ་རྒྱས་པའོ། །དཱ་རུ་ཎ་ནི་བདུད་རྩི་འཁྱིལ་པ་སྟེ་ཞི་བའོ། །
ཙྪིནྡ་ནི་ཁམས་གསུམ་ལས་རྣམ་པར་རྒྱལ་བ་སྟེ་རིག་སྔགས་གཅད་པའོ། །བྷིནྡ་ནི་སྟོབས་པོ་ཆེའི་སྔགས་ཏེ་དེས་རིག་སྔགས་མནན་པ་འགྲུབ་པའོ། །དེ་དག་གིས་བྱ་བ་ཀུན་སྔ་མ་བཞིན་དུ་སྦྱར་བས་ལས་ཐམས་ཅད་འགྲུབ་པར་འགྱུར་རོ།    །ད་ནི་ལྷ་རྣམས་ཀྱི་ཡང་སྙིང་ཤིན་ཏུ་

71-1-183a

ཡང་བསྡུས་པ་གསུངས་པ་ནི་ན་མ་ཞེས་པ་ལ་སོགས་པ་སྟེ་དེ་ཡང་གཙོ་བོ་རྣམ་གཉིས་ལ་མཆོད་ཅིང་དེའི་སྙིང་པོའོ། །ཧུ་ལུ་ནི་རྡོ་རྗེ་ཀཱི་ལ་ཡའི་སྟེ་བྱས་པའོ། །ཏིཥྛ་ནི་རྡོ་རྗེ་བེ་ཅོན་གྱི་ཞི་བའིའོ། །བནྡྷ་ནི་རྡོ་རྗེ་ཐོ་བ་སྟེ་དབང་གིའོ། །ཧ་ན་ནི་རྡོ་རྗེ་གཏུམ་པོ་སྟེ་དྲག་
པོའིའོ། །ཨ་མྲྀ་ཏེ་ནི་ཕོ་ཉ་དང་མངག་པ་ཡབ་ཡུམ་ཁྲོ་བོ་མི་འཆི་བ་དང་། ལུ་གུ་རྒྱུད་མའི་སྔགས་ཏེ་ཁྲུས་དང་བསྐྲད་པ་ལ་ཤེས་པར་བྱ་སྟེ་དེ་དག་གིས་ཀྱང་དེ་བཞིན་དུ་འགྱུར་རོ། །འདི་སྐད་སྟོན་ཏེ་སྔོན་དུ་བསྙེན་པ་ལ་ནི་གསུམ་པོ་གང་ཡང་རུང་བ་བཟླས་ལ་སྒྲུབ་པ་ལས་ལ་སྦྱར་བ་ནི་
གཉིས་སུ་མེད་པར་ཤེས་པར་བྱ་སྟེ་ལས་སྒྲུབ་པ་ལ་ནི་མན་ངག་བཞིན་དུ་སྦྱར་རོ། །དེ་ཡང་བསྙེན་པ་གསུམ་སྟེ་སྒྲུབ་པ་གཉིས། །ལས་སྒྲུབ་སོ་སོར་ཤེས་པར་བྱ། །ཞེས་གསུངས་སོ།    །ད་ནི་དེ་དག་གི་མཇུག་བསྡུ་བའི་ཆོ་ག་ཕན་ཡོན་དང་བཅས་པ་ཕུན་སུམ་ཚོགས་པ་བསྟན་ཏེ། དེ་ཡང་
སྡུག་བསྔལ་ཐམས་ཅད་བྲལ་བར་བྱེདཔའི་ཕན་ཡོན་ནི། སྡིག་པ་ཐམས་ཅད་བྱང་བྱས་ནས། །ཞེས་བྱ་ལ་སོགས་པ་གསུངས་ཏེ། དེ་དག་གི་སྔོན་བྱུང་དུ་རྒྱལ་པོ་ལོག་པའི་སྙིང་པོ་ལ་སོགས་པའི་འཁོར་རྣམས་ཐེ་ཚོམ་སྐྱེས་པ་ལ་དེ་དག་བྲོད་པ་བསྐྱེད་པའི་ཕྱིར་གསུངས་ལ། མ་
འོངས་པ་ལ་ནི་སྒྲུབ་པའི་ཕན་ཡོན་དུ་སྦྱར་རོ། །དེ་ལ་སྡིག་པ་ནི་སྒྲིབ་པས་ན་སྡིག་པ་སྟེ་སྲོག་གཅོད་པ་ལ་སོགས་པ་མི་དགེ་བ་བཅུའི་ལས་སོ། །ཐམས་ཅད་ནི་དེ་དག་དང་ཉེ་བ་མ་ལུས་པའོ། །འདིས་དེ་དག་བྱང་བར་བྱས་པ་ནི་དག་པར་བྱེད་པའོ། །གཞན་ཡང་དེར་མ་ཟད་དེ་ལུས་
ངག་ཡིད་གསུམ་ཟུག་རྔུས་གཟིར་བས་ན་སྡུག་བསྔལ་ཏེ་འགྱུར་བ་ལ་སོགས་པ་གསུམ་མམ་བརྒྱད་དོ། །མེད་པར་བྱེད་པ་ནི་སེལ་བར་བྱེད་པའོ། །དེ་ནས་སེམས་ཅན་ཞེས་བྱ་བ་ལ་སོགས་པར་འབྲེལ་ཏེ། སེམས་ཅན་གང་དག་སྔོན་གྱི་ལས་དང་རྐྱེན་དང་འབྱུང་པོས་མིག་
ལ་སོགས་པའི་དབང་པོ་དྲུག་ཉམས་པ་ནི་ལོང་བ་ལ་སོགས་པ་སྟེ། དེ་ལ་སྔགས་འདིས་བཀྲུས་ནས་ཉམས་པ་ལས་སོས་ཏེ་ཐར་ཞེས་པར་འབྲེལ་ཏོ། །དེ་བཞིན་དུ་ཚེ་ནི་འཚོ་བ་སྟེ་དེ་ཟད་པ་ནི་དུས་ལ་བབ་པ་སྟེ་དེ་ཡང་རིང་བར་འགྱུར་རོ། །ཚེ་ཉམས་པ་ནི་རྐྱེན་གྱི་ཚེ་ཚད་ལས་

71-1-183b

ཐུང་བར་གྱུར་པ་སྟེ་དེ་ཡང་ཚད་དུ་འཚོའོ། །ཕུན་སུམ་ཚོགས་པ་ནི་མ་ཚང་བ་མེད་པ་སྟེ་ནོར་ལ་སོགས་པ་ཡིན་ལ། དེ་དག་མ་ཚོགས་པའི་བྱུར་ནི་མིན་པ་སྟེ་དེས་སེམས་ཅན་གང་ལ་ཆགས་པ་ནི་གང་ལ་བྱུང་ཞིང་གནས་པ་ཡང་ཕུན་སུམ་ཚོགས་པར་འགྱུར་རོ། །ལྷ་རྣམས་ནི་
མཐུ་དང་རྫུ་འཕྲུལ་ལ་སོགས་པ་དང་ལྡན་པའི་འཇིག་རྟེན་པ་དང་འཇིག་རྟེན་ལས་འདས་པའི་ལྷ་སྟེ། དེ་དག་བསྒྲུབས་ཀྱང་འཕངས་ནས་འགྲུབ་པར་མི་སྟེར་བ་ནི་རྒྱབ་ཀྱིས་ཏེ་ཕྱོགས་པ་ནི་རིང་བའོ། །དེ་ཡང་ཉེ་བར་བྱེད་དོ། །བདག་དང་ཡིད་གཅུགས་ཤིང་ཡིད་དུ་འོང་བ་ནི་
མཛའ་སྡུག་སྟེ་སོ་སོར་གནས་པས་སྐྱེ་བོ་སྟེ་བདེན་པ་མ་མཐོང་བའོ། །དེ་སྡང་བ་ནི་བྱམས་པ་དང་བྲལ་བ་སྟེ་དེ་ཡང་བྱམས་པའོ། །བྲན་ནི་འཁོར་བཟང་པོའོ། །བཟའ་མི་ནི་ཆུང་མ་ལ་སོགས་པའོ། །སོགས་པ་ནི་མ་ལུས་པའི་ཉེ་བའོ། །དེ་དག་འབྱུང་པོས་གཙེས་པ་ནི་སྐྲག་ཅིང་
བཅོམ་པ་སྟེ་དེ་ཡང་མི་འཚེ་བའོ། །ཡང་ན། བྲམ་ཟེ་ལ་སོགས་གཙེས་པ་དང་། །ཞེས་གླེགས་བམ་ལ་ལ་ན་གནས་ཏེ། འཇིག་རྟེན་ན་བྲམ་ཟེ་དང་རྒྱལ་པོ་དང་རྗེའུ་དང་དམངས་ཀྱིས་བདག་གཙེས་པ་ལས་ཐར་བའོ། །ཡང་ན་བདག་གིས་བྲམ་ཟེ་དང་དགེ་སློང་ལ་སོགས་པ་
ནུས་པ་ཅན་དང་ཞིང་དག་པས་གཙེས་པ་ཡང་ནུས་པ་བཟློག་ལ་སྡིག་པ་འདག་པར་འགྱུར་རོ། །ཡང་ན་བྲམ་ཟེས་ཁྱེར་བ་ཞེས་པ་སྟེ་གཟའ་སྐར་ངན་པ་ལ་ཤི་བ་ཡང་ཆོ་གས་ཕན་ནོ། །བདག་དང་གཞན་གཉིས་ནི་ཕན་ཚུན་ཏེ་དེ་དག་མི་མཐུན་པ་ནི་སེམས་མི་གཅུགས་ཤིང་ངག་
དང་ལུས་འཐབ་པ་སྟེ་མཐུན་པར་འགྱུར་རོ། །སྔར་ལོངས་སྤྱོད་ཆེ་བ་ལ་ཕྱིས་བྱིན་པ་ཡིན་པས་ནོར་ཏེ་གསེར་ལ་སོགས་པའོ། །འགྲིབ་པ་ནི་བྲི་བའོ། །དེས་རྒྱུད་ལ་སྡུག་བསྔལ་བསྐྱེད་པས་གནོད་པའོ། །མྱ་ངན་ངལ་དང་གནོད་པ་ནི་གདུངས་པས་དུབ་པ་སྟེ་དེ་ལ་གདོན་གྱིས་
ཚུགས་པར་སླའོ། །ཡང་ན་དང་ཞེས་སྦྱར་ཏེ་དུབ་པས་གནོད་པ་དང་ཕལ་པར་གནོད་པ་ཐམས་ཅད་དོ། །གཞན་ཡང་སྐྲག་ཅིང་བག་ཚ་བ་ནི་འཇིགས་པ་སྟེ་རྒྱལ་པོའི་ཆད་པ་ལ་སོགས་པ་བརྒྱད་དོ། །ཕོངས་པ་ནི་སྔ་ནས་དབུལ་བའོ། །གཞན་ཡང་གདུག་ཅིང་འཛིན་པས་

71-1-184a

གཟའ་སྟེ་པ་བ་སངས་ལ་སོགས་པས་གནོད་ཅིང་དེ་དག་ངན་པ་ལ་བབ་པའོ། །རྒྱུ་སྐར་ནི་ནམ་མཁའ་ལ་སོ་སོར་འཐོར་ནས་རྒྱུ་བ་སྟེ་སྨིན་དྲུག་ལ་སོགས་པའོ། །དེ་དག་ལ་ཁྲུས་བྱས་ཏེ་བཟློག་པས་ཞི་བར་འགྱུར་རོ། །བྱད་སྟེམས་ཞེས་པ་ནི་རིག་སྔགས་ངན་པའི་
འཁྲུལ་འཁོར་གྱིས་མིང་བཅུག་སྟེ་གསོད་པར་འདོད་པའོ། །མི་བཟད་པའི་གདོན་ནི་ནད་ལ་སོགས་པ་ཚབས་ཆེར་འདེབས་པ་སྟེ་རྫུ་འཕྲུལ་ཆེ་བའི་ལྷ་ལ་སོགས་པའོ། །དེ་དག་གིས་ཉེན་པས་ནི་བཏབ་པའོ། །མྱ་ངན་ནི་ལུས་ངག་ཡིད་གསུམ་གདུངས་པའི་ཁྱད་པར་ཏེ་དེས་
ཕུང་པོ་ངལ་ཏེ་གཉིད་ལོག་པའམ། དངོས་སུ་འབྱུང་པོ་བྱུང་བའོ། །དེའི་སྟོབས་ཀྱིས་གཉིད་ལོག་པས་སེམས་རྨོངས་ཏེ་ཡིད་ཀྱི་རྣམ་ཤེས་རྒྱུ་བས་རྨི་ལམ་སྟེ། དེར་སྡིག་པ་མཐོང་བས་ནི་ངན་པ་སྟེ་བཙོན་ར་ལ་སོགས་པའོ། །ཡང་ཞེས་པ་བཟླས་པ་སྟེ་ཀུན་ལ་སྦྱར་རོ། །ཡང་
ན་དང་ཞེས་པ་སོ་སོར་སྦྱར་རོ། །དེ་དག་ཐམས་ཅད་ཀྱང་འདིའི་སྒོ་ནས་སེལ་ཅིང་དེ་དག་ལས་ཐར་བར་འགྱུར་རོ་ཞེས་སྦྱར་རོ། །དེ་དག་གི་རྒྱུད་ལས་འབྱུང་བ་ཐམས་ཅད་སེལ་བའོ།    །ད་ནི་རྒྱུད་ལ་བདེ་བ་ཐམས་ཅད་ལྡན་པར་བྱེད་པ་གསུངས་པ་ནི། རྒྱུད་དོ་ཅོག་གི་རྩ་བ་སྟེ། །ཞེས་
པ་བླང་ངོ་། །དེ་ཡང་སྔོན་འབྱུང་དུ་ནི་འབྲེལ་ཅིང་རྒྱུན་ཆགས་པས་རྒྱུད་དེ་རྒྱུད་དོ། །ཅོག་ནི་མ་ལུས་པའོ། །རྩ་བ་ནི་གཞན་ལ་མ་ལྟོས་ཤིང་གཞན་སྐྱེད་པར་བྱེད་པ་སྟེ། དེ་ནི་རྡོ་རྗེ་ལྷུན་པོ་རི་རབ་ཟོམ་གྱི་རྒྱུད་ཅེས་བྱ་བ་ལེའུ་བརྒྱ་དང་བརྒྱད་པའི་ལེའུ་དང་པོར་འདི་གསུངས་ལ། 
དེས་འདི་བཤད་པའོ། །རྒྱུད་དེ་བདག་གིས་མཐོང་ངོ་། །མ་འོངས་པ་ལ་ནི་བདག་གི་ཡོན་ཏན་མ་ལུས་པ་ནི་རྒྱུད་དོ་ཅོག་ཡིན་ལ་དེ་ལས་འབྱུང་བས་རྩ་བའོ། །ཡང་ན་ཆོས་ཐམས་ཅད་ཀྱི་རྩ་བ་རྡོ་རྗེ་ལྟ་བུའི་ཏིང་ངེ་འཛིན་ཡིན་པས་སོ། །ལ་ལ་དག་རྒྱུད་ཐམས་ཅད་ཀྱི་རྩ་བ་དབང་བསྐུར་
བ་སྟེ། དེ་ཡང་ཆུ་ལ་རག་ལས་པས་ཞེས་འཆད་དེ་མ་ཡིན་ནོ། །གཞན་ཡང་དཔལ་ཀུན་ཏེ་བསྟེན་པར་འོས་ཤིང་ཡོན་ཏན་ཆེ་བ་སྟེ། འབྱོར་པ་དང་བུ་ལ་སོགས་པའམ་ཚོགས་གཉིས་སོ། །དེས་ལེགས་པར་བརྒྱན་པ་ནི་དེ་དག་ཡོངས་སུ་རྫོགས་ཤིང་ཚང་བ་འདིའི་སྒོ་ནས་བྱེད་པ་

71-1-184b

ཡིན་ནོ། །དེ་ནས། ཚེ་དང་བསོད་ནམས་འཕེལ་བར་འགྱུར། །ཞེས་པར་སྦྱར་ཏེ་བསོད་ནམས་ནི་གྲགས་པ་དང་ལོངས་སྤྱོད་དེ་ཡིད་བདེ་ཞིང་ལུས་ངག་རྒྱས་པར་བྱེད་པའོ། །སྡིག་པ་ཀུན་ནི་གོང་དུ་བསྟན་པའོ། །དེ་ལ་ཐར་བ་ནི་གྲོལ་བ་སྟེ། མངོན་པར་མཐོ་བ་དང་ངེས་པར་ལེགས་
པ་ཐམས་ཅད་ཐོབ་པར་འགྱུར་བའོ་ཞེས་དགོངས་སོ། །དེ་དག་ནི་སྤྱིའི་བྱ་བའི་ཆོ་གའི་ཕན་ཡོན་ནོ། །ཡང་ན་ལས་དེ་དག་ལ་བྱ་བ་སོ་སོར་སྦྱར་བར་ཤེས་པར་བྱའོ།    །དེ་ལྟར་ཕན་ཡོན་འབྱུང་བ་བཤད་ནས་ད་ནི་ཆོ་ག་བཤད་པར་བྱ་བའི་ཕྱིར། དེས་ནི་ཞེས་བྱ་བ་ལ་སོགས་པ་གསུངས་
ཏེ། དེ་ཡང་སྒྲུབ་པ་པོ་དང་བསྒྲུབ་བྱ་དག་སྟ་གོན་ལ་གནས་པའོ། །འདི་དག་གིས་ནི་འདས་པ་ལ་འདི་ལྟར་གྱིས་ཤིག་ཅེས་གདམས་ལ་མ་འོངས་པ་ལ་ཆོ་ག་བྱ་བ་དངོས་ཡིན་ནོ། །དེ་ལ་སྒྲུབ་པ་པོ་དང་བསྒྲུབ་བྱ། དེས་ནི་རབ་བཀྲུས་གཙང་མ་ཡིན། །ཞེས་གསུངས་ཏེ། ཕྱིའི་ཁྲུས་ནི་
ཆུ་དང་སས་ལེགས་པར་བཀྲུས་པས་དྲི་མ་དག་པར་བྱ་བ་སྟེ་ལན་གསུམ་དུའོ། །གཙང་མའི་གོས་ནི་གཞན་དུ་ལོངས་མ་སྤྱད་པའི་གོས་སར་པ་ལན་གསུམ་དུ་བརྗེའོ། །དེ་བཞིན་དུ་ཟས་དཀར་གསུམ་བཟའ་བ་དང་། ཞག་གཅིག་སྨྱུང་བར་གནས་པར་བྱས་ལའོ། །ནང་གི་ཁྲུས་ནི། 
གང་དག་ཡིད་དགེ་སེམས་དང་ཞིང་། །ཞེས་པ་སྟེ་ལུས་དང་ངག་དང་ཡིད་གསུམ་གྱིས་མི་དགེ་བ་བཅུ་མི་བྱེད་པར་སྡོམ་པ་ལ། སེམས་དང་བ་ནི་དད་པའོ། །དེ་དག་གིས་ནི་རྟེན་གྱི་གང་ཟག་དང་སྟ་གོན་ལ་གནས་པ་བསྟན་ཏོ། །དེ་ནས་ས་བླང་བ་ལ་སོགས་པ་ཆོ་ག་དང་སྒྲུབ་ཐབས་ལས་
བྱུང་བ་བཞིན་དུ་དཀྱིལ་འཁོར་འབྱོར་པའི་བྱེ་བྲག་གིས་བྲིས་ལ་རྫས་བཀོད་དེ་བསྒྲུབ་པར་བྱའོ། །ཞེས་བྱ་བའི་བར་དུའོ། །དེ་ཡང་དང་པོ་སྟ་གོན་གནས་པ་ཡིས། །ས་ཡི་ཆོ་ག་རྫོགས་བྱས་ཏེ། །འབྱོར་པ་དཀྱིལ་འཁོར་བྲི་བྱས་ལ། །རྟེན་ལ་བརྟེན་དེ་བསྒྲུབ་པར་བྱ། །ཞེས་གསུངས་
སོ། །དེའི་འོག་ཏུ་ཁྲུས་ལ་སོགས་པ་སྔོན་དུ་སོང་བས་ལྷ་བསྐྱེད་པ་ནི་མདོ་སྡེ་ཞེས་བྱ་བ་ལ་སོགས་པའོ། །དེ་ཡང་སྔོན་བྱུང་ལ་ནི་མདོ་སྡེ་ཟབ་མོ་སངས་རྒྱས་ཀྱི་གསུངས་པ་འདི་མཉན་པར་བྱ་བ་དང་། དེའི་ཕན་ཡོན་བསྟན་པ་ལ་རྗེས་སུ་འཇུག་པ་ནི་ལྷ་བསྐྱེད་པ་དང་སྔགས་བཟླས་

71-1-185a

པའི་ཐབས་སུ་འགྱུར་རོ་ཞེས་དགོངས་པའོ། །དེ་ལ་མདོ་སྡེ་ནི་རྒྱུད་དང་གཅིག་པ་སྟེ་དོན་ཟབ་མོ་སྡེར་སྟོན་ལ་ཚིག་གི་མདོ་ཙམ་དུ་གསུངས་པས་སོ། །ཡང་ན་གནས་དང་སྟོན་པ་ལ་སོགས་པ་གསུངས་པའོ། །དེ་ཡང་། གནས་རྣམས་དང་ནི་མཚན་ཉིད་དང་། །
ཆོས་དོན་སྨོས་ཕྱིར་མདོ་སྡེའོ། །ཞེས་པ་དང་། ཚིག་ཉུང་བ་ལ་དོན་རྒྱས་པའི། །མདོ་སྡེ་དམ་པ་བལྟ་བར་བྱ། །ཞེས་གསུངས་སོ། །དོན་དུ་བྱ་ན་གཟུངས་སྔགས་ཐམས་ཅད་དང་བཅས་པ་སྟེ་དམ་པ་ནི་མཆོག་གོ། །མཉན་པར་བྱ་བ་ནི་གདམས་པ་སྟེ་སངས་རྒྱས་དང་བླ་མ་ལ་རྣ་བས་ཐོས་
ཤིང་ཤེས་པར་བྱ་བའོ། །དེ་ཉིད་གཞན་གྱིས་རྟོགས་པར་དཀའ་བས། ཟབ་མོ་སངས་རྒྱས་སྤྱོད་ཡུལ་ཏེ། སངས་རྒྱས་ཀྱིས་གསུངས་པའོ། །ཡང་ན་ཆོས་ཉིད་སྟོང་པའི་ལྷ་ལ་སོགས་པ་དྲུག་པོ་ཟབ་ཅིང་དེས་སངས་རྒྱས་ཀྱི་སྐུ་སྟེ་སྤྱོད་ཡུལ་དུ་བསྐྱེད་པའོ། །དེས་ནི་བསྙེན་པ་སྒྲ་ལ་གནས་
པའི་བསམ་གཏན་གྱི་སྔགས་བཟླས་པ་ཡང་ཤེས་པར་བྱའོ་ཞེས་བྱ་བའི་དོན་ཏོ། །ཉན་བྱེད་ན་ནི་ཐོས་ནའོ། །གཟི་བརྗིད་ནི་འོད་ཟེར་ཏེ་དཔལ་གང་ཡིན་པའོ། །ཡང་ན་ལྷ་དྲུག་པོའི་དོན་ནི་མདོ་སྡེ་ཡིན་ལ་དེ་ཉན་པ་ནི་སྒོམ་པའོ།    །ད་ནི་བཟླས་པའི་བསམ་གཏན་ནི་ནོར་བུའི་ཕྲེང་བ་
དང་ལྡན་པས་མདོ་སྡེའི་ལྷ་རྣམས་ཀྱི་ཐུགས་ཀ་ན་གནས་པའི་ཟླ་བ་དང་། རྡོ་རྗེ་དང་སྔགས་སོ། །དེའི་འོད་ཟེར་གྱི་སྤྲོ་བསྡུ་ནི་གཟི་བརྗིད་དོ། །དེས་ཇི་ལྟར་བསམས་ན་སྲོག་ཆགས་ཏེ་རླུང་ནང་ན་གནས་པ་འཚོ་བའོ། །མི་བཟད་པའི་ནད་ནི་འཚོ་བར་དཀའ་བའི་མཛེ་སྟེ་འབྱུང་བ་ལས་གྱུར་པ་དང་། 
ཀླུའི་གདོན་ནོ། །ཀྱང་ཞེས་པ་ནི་མི་མཐུན་པའི་རྐྱེན་ཏེ་དེ་ཡང་ཞི་ན་གནས་གཞན་སྨོས་ཅི་དགོས་ཞེས་པའི་དོན་ཏོ། །ཞི་བར་བལྟ་ནི་ཞི་བར་འགྱུར་བའོ། །ཡང་ན་ཞི་བར་བལྟ་ནི་སྔགས་བཟླས་སོ། །དེ་ནི་ཁྲོ་བོའི་ངག་ཏུ་ལས་སྦྱོར་གྱི་སྔགས་བཟླས་པར་བསྟན་ཏོ།    །ད་ནི་རྟེན་གང་ལ་བརྟེན་
ཏེ་སྒྲུབ་པ་ནི་གསེར་རམ་ཡང་ན་ནི་ཞེས་བྱ་བ་ལ་སོགས་པ་གསུངས་ཏེ། བསྙེན་པ་ལ་བུམ་པ་གཅིག ལས་ལ་ལྔའོ། །དེའི་རྒྱུ་ནི་རིན་པོ་ཆེ་གསེར་ནི་རབ་བོ། །ཡང་ན་ནི་ཞེས་ཕྱོགས་གཞན་སྟོན་པ་སྟེ་དངུལ་ནི་འབྲིང་ངོ་། །ཀྱང་རུང་ཞེས་པ་ནི་བསྡུ་བ་སྟེ་ཟངས་ནི་ཐ་མའོ། །དེ་ལྟར་མ་

71-1-185b

འབྱོར་ན་ས་ལས་བུམ་པ་དམར་པོ་ནག་པོར་རི་མེད་པར་བྱའོ། །དེ་ཡང་། བུམ་པ་པདྨ་དམར་པོའི་མདོག་འདྲ་ཞིང་། །ཞེས་པ་ལ་སོགས་པ་གསུངས་སོ། །དེས་ནི་བུམ་པའི་རྒྱུ་བསྟན་ཏོ། །འདི་དག་ནི་སྔོན་གྱི་དུས་དང་རྗེས་ཀྱི་དུས་འདྲ་བའོ།    །ད་ནི་སྙིང་པོ་དང་རྒྱན་ནི་ཆུ་ཡིས་དགང་ཞེས་
པ་ལ་སོགས་པས་སྟོན་ཏེ། དེ་ཡང་འདིར་ཆུ་བོ་ཆེན་པོའི་ཆུ་དང་འོ་མས་ནང་དགང་བ་སྟེ་བཀྲུ་བ་དང་བསང་བས་བྱའོ། །འདིར་ཆུ་ཡི་གསེར་རམ་ཞེས་བྱ་བར་འདོད་དེ་འདི་ནི་རྨོངས་པས་མི་ཤེས་པར་བལྟའོ། །དེ་ནས་གཞན་དུ་ལོངས་མ་སྤྱད་པའི་རས་ཀྱི་གཙང་མས་ཐོར་ཅོག་གསུམ་
གྱི་ཚུལ་དུ་དཀྲིའོ། །དེར་སྙིང་པོ་ནི་ནོར་བུ་སྟེ་ཡིད་དུ་འོང་བའི་མུ་ཏིག་མིག་མེད་པ་དང་། ཡུངས་ཀར་ཏེ་སྒྲུབ་པའི་རྫས་བགེགས་བསྐྲད་པ་སྣོད་དམ་པར་བླུགས་ཏེ་སྟེང་དུ་གཞག་གོ། །དུར་བ་ནི་རམ་པ་སྟེ། བཀྲ་ཤིས་པས་ལོ་མ་དང་བཅས་པ་དང་། ཀུ་ཤ་དང་རྨ་བྱའི་སྒྲོ་བདུན་བདུན་
བུམ་པའི་ཁར་གཟུགས་སོ། །དཀོན་པས་ན་རིན་ཆེན་ཏེ་དེ་དག་རྨ་མེད་པ་ནི་མ་སྤྱད་ཅིང་མ་རྙིངས་པའི་སར་པའོ། །ཡང་ན་མིག་མེད་པ་སྟེ་གསེར་ལ་སོགས་པ་ལྔ་དང་། ཙནྡན་ནི་དྲི་དང་ལྡན་པ་དཀར་པོ་སྟེ། དེ་ལ་སོགས་པ་དྲི་ལྔ་དང་བཅས་པ་ནི་ལྷན་ཅིག་དོན་ཏེ་ཏིལ་ལ་སོགས་པ་
འབྲུ་ལྔ་དང་། ཧ་ས་དེ་བ་ལ་སོགས་པ་སྨན་ལྔ་དང་། བུ་རམ་ལ་སོགས་པ་སྙིང་པོ་ལྔ་གསང་བ་སྤྱི་རྒྱུད་བཞིན་དུ་བླུགས་པར་བྱའོ། །དེར་ཡང་ཤེལ་དང་། རྡོ་རྗེ་ཕ་ལམ་དང་མེ་ཏོག་སྔོན་པོ་བཅུག་ལ་དེའི་ཕྲེང་བས་ཁ་ལ་བརྒྱན་ནོ། །དེའི་ཁར་ནི་བཀྲ་ཤིས་པའི་ཤིང་མྱ་ངན་
མེད་པ་ལ་སོགས་པ་འབྲས་བུ་ཅན་གྱིས་བརྒྱན་ལ། རྡོ་རྗེ་གཞག་སྟེ་བཀྲ་ཤིས་པའི་ཐག་པས་བཏགས་ཏེ་ལས་ལ་སྔར་གཞུག་གོ། །དེ་དག་ནི་བསྙེན་པ་ལ་ཡང་ཤེས་པར་བྱའོ། །དེ་ཡང་རིན་པོ་ཆེ་ལ་སོགས་པའི་ཡོན་ཏན་ཤེས་པར་བྱ་སྟེ། ལྷའི་མཚན་མ་ནི་དགོད་པ་མ་ཡིན་
པར་ཤེས་པར་བྱའོ།    །དེ་ནས་བཟླས་པའི་གྲངས་བསྟན་པའི་ཕྱིར་ལན་གྲངས་ཞེས་པ་ལ་སོགས་པ་གསུངས་ཏེ། ཡང་ནས་ཡང་དུ་བསྐྱར་བས་ལན་གྲངས་ཏེ་གཟུངས་རིངས་ནི་ཉི་ཤུ་རྩ་གཅིག་ལ། སྙིང་པོ་དང་ཡང་སྙིང་ནི་བརྒྱ་རྩ་བརྒྱད་དུ་བཟླས་སོ། །སུ་ནི་བྱེད་པ་གསུམ་པའི་

71-1-186a

གསུམ་པ་སྟེ་དེ་ནས་ཁྲུས་བྱ་ཞེས་པའོ། །འདི་སྐད་སྟོན་ཏེ་འདས་པ་ལ་ནི་གྲངས་དེས་ཆོག་པ་ཡིན་ལ། མ་འོངས་པ་ལ་ནི་སྔོན་དུ་བསྙེན་པ་འབུམ་རྫོགས་ནས་ལས་ལ་བསམ་གཏན་དང་ལྡན་པས་ཤེས་པར་བྱའོ་ཞེས་པའི་ཐ་ཚིག་གོ།    །ལས་ལ་སྦྱར་བ་དངོས་
བསྟན་པའི་ཕྱིར་རྒྱལ་པོ་ཞེས་གསུངས་ཏེ། སྔོན་བྱུང་བ་ལ་ནི་ལྷའམ་མི་ཆེ་བས་རྒྱལ་པོ་སྟེ་ལོག་པའི་སྙིང་པོའོ། །དེ་ནི་འཁོར་ཉེ་བའི་གདུལ་བྱ་ལ་དགོངས་པ་སྟེ་འཁོར་གཞན་ཡང་བཀག་པ་ནི་མ་ཡིན་ནོ། །རྗེས་འཇུག་ལ་ནི་རྒྱལ་པོ་བསོད་ནམས་ཆེ་བས་སྨོས་ཏེ། རྒྱལ་པོ་ལ་
སོགས་པ་ཐམས་ཅད་ཅེས་སྦྱར་རོ། །རྟག་ཏུ་ནི་དུས་གསུམ་དུའོ། །བུམ་པའི་ཆུ་དེས་ཁྲུས་གྱིས་ཤིག་དང་ཞེས་གདམས་པའོ། །དེ་ལྟར་བྱས་ན་གོང་གི་ཕན་ཡོན་ཐོབ་པར་འགྱུར་རོ་ཞེས་སྦྱར་རོ། །དེས་ན་རྣལ་འབྱོར་པ་དུས་གསུམ་དུ་བཀྲུ་ལ། བསྒྲུབ་བྱ་ལ་ནི་མ་ཞི་བར་དུ་ཁྲུས་
བྱ་བ་དང་། བྱ་བའི་རྒྱུད་ཡིན་པར་བསྟན་ཏོ། །དེ་ཡང་། རྟེན་མཆོག་དག་དང་ལྡན་བྱས་ནས། །མཁས་པ་གང་ལ་བཀྲུ་བྱས་ན། །མངོན་མཐོ་ངེས་ལེགས་འབྱུང་བར་འགྱུར། །ཞེས་གསུངས་སོ། །དེ་དག་གིས་ནི་འདི་སྐད་བསྟན་པར་འགྱུར་ཏེ། སྔོན་དུ་བསྙེན་པ་རྫོགས་
ནས་སྟ་གོན་ལ་གནས་པས་སའི་ཆོ་གས་དཀྱིལ་འཁོར་འབྱོར་པའི་བྱེ་བྲག་གིས་བྲིས་ཏེ་བུམ་པ་དགོད་ཅིང་ལྷར་བསྐྱེད་ལ་སྔགས་དང་ཏིང་ངེ་འཛིན་དང་ལྡན་པས་བཟླས་ཏེ་ཁྲུས་ཀྱི་མན་ངག་བཞིན་བྱ་བ་དང་། བསྲུང་བ་དང་བཀྲུ་བ་ལ་སོགས་པ་བྱས་ཏེ་འབྱོར་པ་ཆུང་བས་
དཔའ་བོ་གཅིག་པ་བསྟན་པར་བྱའོ་ཞེས་དགོངས་སོ། །རྫོགས་པ་ནི་ཡང་དག་པར་ཐོབ་པ་སྟེ་རྒྱུད་ཆེན་པོ་ནས་ཕྱུང་ཞེས་པའོ། །འདི་ལྟར་རྡོ་རྗེའི་གདམས་ངག་འདི། །ང་ཡིས་སྔོན་དུ་དོན་མཐོང་གིས། །ཐེ་ཚོམ་མེད་པར་སྒྲུབས་ཤིག་དང་། །དཔག་མེད་བསམ་པ་རྫོགས་པར་བྱེད། །ལྷ་
དང་བླ་མས་བསྐུལ་བའི་ཕྱིར། །འགྲེལ་པ་དྲི་མ་མེད་པ་འདི། །སངས་རྒྱས་གསང་བས་བྱས་པ་སྟེ། །འདི་ཡིས་ཀུན་ཀྱང་དེ་གྲོལ་ཤོག །འཕགས་པ་རྡོ་རྗེ་རྣམ་པར་འཇོམས་པའི་འགྲེལ་པ་རིན་པོ་ཆེ་གསལ་བ་ཞེས་བྱ་བ། བྱ་བའི་རྒྱུད་ཀྱི་གྲུབ་པ་སངས་རྒྱས་གསང་བས་མཛད་

71-1-186b

པ་རྫོགས་སོ།།      །།མཁན་པོ་དེ་ཉིད་དང་། ལོ་ཙཱ་བ་དབས་མཉྫ་ཤྲཱི་ཝརྨས་བསྒྱུར་བའོ། །ཕྱིས་པཎྜི་ཏ་འཇོན་ཏེ་ཏའུ་ལ་དང་། ལོ་ཙཱ་བ་འོག་བསོད་ནམས་མོས་པས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །། ༄༅༅།  །རྒྱ་གར་སྐད་དུ། བཛྲ་བི་དཱ་ར་ཎ་ནཱ་མ་དྷཱ་ར་ཎི་ཊཱི་ཀཱ། 
བོད་སྐད་དུ། རྡོ་རྗེ་རྣམ་པར་འཇོམས་པའི་གཟུངས་ཞེས་བྱ་བའི་རྣམ་པར་བཤད་པ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །རྒྱལ་བ་ཀུན་གྱི་གསང་མཛོད་འཛིན་པ་ཡི། །རྒྱུད་ཀྱི་དོན་འབྱུང་སྟོན་པའི་ངོ་བོ་ལ། །སྒོ་གསུམ་དང་བས་འདུད་དེ་ཕྱག་འཚལ་ནས། །མདོ་ཡི་རྣམ་བཤད་
བདག་གིས་བྱ་བར་འདོད། །དེ་ལ་རྡོ་རྗེ་ཞེས་བྱ་བ་ནི་ཡང་དག་པའི་ཡེ་ཤེས་ལ་བྱ་སྟེ། རྟག་པ་དང་མི་རྟག་པ་བདེ་བ་དང་སྡུག་བསྔལ་གྱི་མཚན་མའི་དངོས་པོ་ཐམས་ཅད་འཇོམས་པ་ལ་བྱའོ། །དེ་ནས་འཇོམས་པ་ཞེས་བྱ་བའི་དོན་ཏོ། །གཟུངས་ཞེས་བྱ་བ་ནི་དབྱིངས་དང་ཡེ་ཤེས་གཉིས་སུ་མེད་པ་
ལ་བྱའོ།    །དེ་ལྟར་མདོའི་བསྟན་ནས། ད་དགོས་འབྲེལ་གྱི་དོན་སྟོན་ཏེ། མ་ནོར་བར་སྟོན་པའི་ཕྱིར་སྟོན་པ་དང་། ཡོངས་སུ་དག་པའི་འཁོར་དང་། གང་དུ་བཤད་པའི་གནས་དང་། མ་ནོར་སྡུད་པའི་སྡུད་པ་པོ་དང་། གང་བཤད་པའི་མདོའི་དོན་ཏོ། །དེ་ལ་སྟོན་པ་ནི་བཅོམ་ལྡན་འདས་
ཐུགས་ཡང་དག་པའི་ཏིང་ངེ་འཛིན་རྡོ་རྗེ་ལྟ་བུ་ལས་མ་གཡོས་ཀྱང་ཉིད་ཀྱི་ཆེ་བ་དབྱུང་བའི་དོན་དུ་ཐུགས་ཡང་དག་པའི་སྲས་གསང་བའི་བདག་པོ་ཕྱག་ན་རྡོ་རྗེ་ལ་ཤོད་ཅིག་པར་བྱིན་གྱིས་བརླབས་ནས། སངས་རྒྱས་ཀྱི་ཞིང་ཁམས་མཐའ་ཡས་པའི་ནང་དུ་རྡོ་རྗེ་རྣམ་པར་འཇོམས་པའི་དོན་
འདི་ཕྱག་ན་རྡོ་རྗེ་ལས་རབ་ཏུ་ཐོབ་པའི་ཕྱིར་ན། འདི་སྐད་བདག་གིས་ཐོས་པ་དུས་ཅིག་ན་ཞེས་བྱ་བའོ། །སྟོན་པ་དང་། འཁོར་དང་། སྡུད་པ་དང་ལྡན་པས་ན་དུས་ཞེས་བྱ་བའོ། །ལན་གྲངས་མང་དུ་མ་གསུངས་པར་བརྒྱ་ལམ་དུ་གསུངས་པས་དུས་གཅིག་ན་ཞེས་བྱ་བའོ།    །བཅོམ་
ལྡན་འདས་རྡོ་རྗེ་ལ་བཞུགས་ཏེ་ཞེས་པ་ནི་བདུད་བཞི་བཅོམ་པ་ལ་བྱའོ། །ཡང་ན་བཅོམ་ལྡན་འདས་རྡོ་རྗེ་ལྟ་བུའི་ཏིང་ངེ་འཛིན་ལ་ཐུགས་མཉམ་པར་གཞག་པ་ལ་བྱའོ། །སངས་རྒྱས་ཀྱི་མཐུས་ཞེས་པ་ནི་ཏིང་ངེ་འཛིན་ལ་སྙོམས་པར་ཞུགས་པ་ལ་བྱའོ། །ལག་ན་རྡོ་རྗེ་ལུས་ཐམས་

71-1-187a

ཅད་རྡོ་རྗེར་བྱིན་གྱིས་བརླབས་ནས་ཞེས་པ་ནི་ཡང་དག་པའི་ཡེ་ཤེས་རྡོ་རྗེ་ལྟར་འདུས་མ་བྱས་པ་ལ་བྱའོ། །རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་སོ། །ཞེས་པ་ནི་ཡང་དག་པའི་ཡེ་ཤེས་ཀྱི་ངོ་བོར་རབ་ཏུ་གནས་པ་ལ་བྱའོ། །དེ་ནས་ལག་ན་རྡོ་རྗེ་སངས་རྒྱས་ཀྱི་མཐུ་དང་
ཞེས་པ་ནི་སྙོམས་པར་ཞུགས་མ་ཐག་ཏུ་བྱང་ཆུབ་སེམས་དཔའ་ཐམས་ཅད་ལ་མཐུ་སྟོན་པའི་ཕྱིར་རོ། །སངས་རྒྱས་ཀྱི་བྱིན་གྱི་རླབས་ཀྱིས་ཞེས་པ་ནི་ཀླུའི་རྒྱལ་པོ་མ་དྲོས་པས་ཆར་འབེབས་པ་དེ་བཞིན་དུ་མཐུ་སྟོབས་བསྐྱེད་པའི་ཕྱིར་རོ། །རྡོ་རྗེ་ཁྲོ་བོ་ལས་བྱུང་བ་ཞེས་པ་ནི་ལག་ན་
རྡོ་རྗེར་བྱིན་གྱིས་བརླབས་པའི་མཐུས་དཀྱིལ་འཁོར་གྱི་ལྷ་རྣམས་ཀྱི་སྐུ་གསུང་ཐུགས་ལས་འཐོན་ནས་ཁམས་གསུམ་གྱི་དྲེགས་པ་ཅན་རྣམས་བཏུལ་བའོ། །རྡོ་རྗེ་སྙིང་པོས་རབ་ཏུ་སྨྲས་ཏེ་ཞེས་པ་ནི་སྐུ་གསུང་ཐུགས་རྡོ་རྗེ་ལྟར་འདུས་མ་བྱས་པ་དེས་སེམས་ཅན་ལ་ཕན་གདགས་པའི་
ཕྱིར་འདི་གསུངས་སོ།    །ད་ནི་ཁྲོ་བོ་རྣམས་ཀྱི་རང་བཞིན་གྱི་དོན་ཐུགས་ཀ་ནས་ཕྱུང་བའི་དོན་དེ། མི་ཆོད་པ། མི་ཤིགས་པ་བདེན་པ་ཞེས་པས་གཤིན་རྗེ་གཤེད་སྟོན་ཏེ། གཟུང་བའི་ཡུལ་མ་གྲུབ་པས་མཚན་མ་ཐམས་ཅད་འཇོམས་པས་ཐོ་བ་བསྣམས་པའོ། །རྩ་བའི་སྙིང་པོ་
མ་ཐ་ལས་བསྐྱེད་པས་མ་ཐ་ཞེས་བྱའོ། །དེ་བདག་གིས་བསྒོམས་ན་དངོས་གྲུབ་ཐོབ་སྟེ། དངོས་གྲུབ་དེ་བདུད་ཀྱིས་བར་དུ་མི་ཆོད་པས་ནི་མི་ཆོད་པ་ཞེས་བྱའོ། །སྐུ་གསུང་ཐུགས་མཚན་མའི་རྣམ་རྟོག་གིས་མི་ཤིགས་པས་ན། མི་ཤིགས་པ་ཞེས་བྱའོ། །བདེན་པ་ཞེས་པ་ནི་
གསུང་གི་ངོ་བོ་བདེན་པ་དང་ལྡན་པས་ན་བདེན་པ་ཞེས་བྱ་བས་ཧཱུཾ་ཀ་ར་སྟོན་ཏེ། སྐུ་གསུང་ཐུགས་མི་འགྱུར་བས་ན་བདེན་པ་སྟེ་རྩ་བའི་སྔགས་མ་ཐ་མ་ཐ་ཞེས་པའོ། །སྲ་བ་བརྟན་པ་ཐམས་ཅད་དུ་ཐོགས་པ་མེད་པ་ཞེས་པས། རྣམ་པར་རྒྱལ་བའི་དོན་སྟོན་ཏེ། ཉོན་མོངས་པ་དང་
འཁོར་བ་ལས་རྒྱལ་བའི་ཕྱིར་ན་ཡེ་ཤེས་ཀྱི་འཁོར་ལོ་བསྣམས་པ་སྐུ་གསུང་ཐུགས་རྡོ་རྗེ་ལྟར་སྲ་བས་ན་སྲ་བ་ཞེས་བྱའོ། །བྱང་ཆུབ་ཀྱི་སེམས་མི་འགྱུར་བས་ན་བརྟེན་པ་ཞེས་བྱའོ། །ཐུགས་རྡོ་རྗེ་དང་བརྩོན་འགྲུས་ཅི་ལ་ཡང་ཐོགས་པ་མེད་པས་ན་ཐོགས་པ་མེད་པའོ། །རྩ་བའི་ཡིག་

71-1-187b

འབྲུ་དྷུ་ན་ལས་བསྐྱེད་པས་ན་དྷུ་ན་དྷུ་ན་བཛྲ་ཞེས་བྱ་སྟེ་བདུད་ཀྱིས་གླགས་མི་རྙེད་པས་ན་སྲ་བ་བརྟན་པའི་དངོས་གྲུབ་ཐོབ་ལ། ཐམས་ཅད་དུ་ཐོགས་པ་མེད་པས་ན་ཐོགས་པ་མེད་པའི་དངོས་གྲུབ་ཐོབ་པའོ། །ཐམས་ཅད་དུ་མ་ཕམ་པ། སེམས་ཅན་ཐམས་ཅད་སྐྲག་པར་བྱེད་པ། སེམས་
ཅན་ཐམས་ཅད་འཇིལ་བར་བྱེད་པ་ནི་ད་ཧ་ད་ཧ་བཛྲ་ཞེས་པས་རྟ་མགྲིན་སྟོན་ཏེ། ཁམས་གསུམ་སེམས་ཅན་ཐམས་ཅད་བདུད་དང་དྲེགས་པ་ཐམས་ཅད་ལས་རྒྱལ་བས་ན། བདུད་ལ་སོགས་པ་སྐྲག་པར་བྱེད་པའོ། །འདོད་ཆགས་ལ་སོགས་པ་འཇིལ་བར་བྱེད་པས་ན་འཇིལ་བར་བྱེད་
པ་དང་། ཉོན་མོངས་པའི་སྐྱོན་གྱིས་མ་གོས་པས་ན་པདྨ་བསྣམས་པའོ། །རྩ་བའི་སྙིང་པོ་ད་ཧ་ལས་བསྐྱེད་པས་ན། ད་ཧ་ད་ཧ་བཛྲ་ཞེས་པའོ། །དེས་ནི་ཧ་ཡ་གྲྀ་བའི་དོན་ནོ། །རིག་སྔགས་ཐམས་ཅད་གཅོད་པར་བྱེད་པ། རིག་སྔགས་ཐམས་ཅད་གནོན་པར་བྱེད་པ། ལས་ཐམས་ཅད་
འཇོམས་པར་བྱེད་པ་ཞེས་པས་བདུད་རྩི་འཁྱིལ་པའི་དོན་བསྟན་ཏེ། ཕས་ཀྱི་དམོད་མོ་རྣམས་དང་། གཞན་གྱི་གནོད་པ་ཐམས་ཅད་ནི་ཡེ་ཤེས་ཀྱི་རང་བཞིན་གྱིས་གཅོད་པ་དང་། གནོན་པ་དང་འཇོམས་པས་ན་འཇོམས་པའོ། །རྩ་བའི་ཡི་གེ་པ་ཙ་ལས་བསྐྱེད་པས་ན། པ་ཙ་པ་ཙ་
བཛྲ་ཞེས་པའོ། །རྫས་དང་ཡོ་བྱད་དང་ཆོ་ག་ཚང་བར་བྱས་ན་དམོད་མོའི་བྱེ་བྲག་ཐམས་ཅད་ཐར་བར་འགྱུར་རོ། །དེས་ནི་བདུད་རྩི་འཁྱིལ་པའི་དོན་ནོ། །གཞན་གྱི་ལས་ཐམས་ཅད་འཇིག་པར་བྱེད་པ། གདོན་ཐམས་ཅད་རླག་པར་བྱེད་པ། གདོན་ཐམས་ཅད་ལས་ཐར་བར་བྱེད་པ་
ཞེས་པ་ནི་སྟོབས་པོ་ཆེའི་དོན་སྟོན་ཏེ། ཐུགས་རྗེ་ཆེན་པོའི་བྱེ་བྲག་གིས་ཕྱིར་རྒོལ་བ་ཐམས་ཅད་འཇིག་པར་བྱེད་པའོ། །སངས་རྒྱས་ཀྱི་ཡེ་ཤེས་ཀྱིས་གདོན་ཐམས་ཅད་མི་གནས་ཤིང་རླག་པར་བྱེད་པས་ན་རླག་པར་བྱེད་པའོ། །ཚེ་དང་དབང་ཐང་འཕྲོག་པ་ཐམས་ཅད་ལས་ཐར་བར་མཛད་པས་ན། གདོན་
ཐམས་ཅད་ལས་ཐར་བར་བྱེད་པ་ཞེས་བྱའོ། །རྩ་བའི་ཡི་གེ་དྷ་ར་ལས་བསྐྱེད་པས་ན་དྷ་ར་དྷ་ར་བཛྲ་ཞེས་པའོ། །འབྱུང་པོ་ཐམས་ཅད་འགུགས་པར་བྱེད་པ། རིག་སྔགས་ཀྱི་ལས་ཐམས་ཅད་བྱེད་དུ་འཇུག་པ་ཞེས་པ་ནི། གཞན་གྱིས་མི་ཐུབ་པའི་དོན་སྟོན་ཏེ། ཐབས་མཁས་པའི་

71-1-188a

ཐུགས་རྗེས་འབྱུང་པོའི་རིགས་ཐམས་ཅད་དབང་དུ་བསྡུས་ན་འཁོར་བས་ན་འབྱུང་པོ་ཐམས་ཅད་འགུགས་པར་བྱེད་པའོ། །ཐུགས་རྗེ་ཆེན་པོ་ལ་མངའ་བརྙེས་ཤིང་ལེགས་པ་ཐམས་ཅད་བྱེད་དུ་འཇུག་པ་ཞེས་གཞན་ལ་སྟོན་པ་དང་། ཉམས་སུ་ལེན་དུ་འཇུག་
པས་ན་རིག་སྔགས་ཀྱི་ལས་ཐམས་ཅད་བྱེད་དུ་འཇུག་པ་ཞེས་བྱའོ། །རྩ་བའི་ཡི་གེ་དཱ་ར་ཡ་ལས་བསྐྱེད་དེ་དཱ་ར་ཡ་དཱ་ར་ཡ་བཛྲ་ཞེས་པས་གཞན་གྱིས་མི་ཐུབ་པའི་དོན་བསྟན་པའོ། །མ་གྲུབ་པ་རྣམས་གྲུབ་པར་བྱེད་པ། གྲུབ་པ་རྣམས་ཆུད་མི་ཟ་བར་བྱེད་པ་འདོད་པ་ཐམས་ཅད་རབ་
ཏུ་སྦྱིན་པ་ཞེས་པས་ནི་མི་གཡོ་མགོན་པོའི་དོན་སྟོན་ཏེ་ཐུགས་ཡང་དག་པས་དངོས་གྲུབ་མ་གྲུབ་པ་རྣམས་གྲུབ་པར་བྱེད་པས་ན་གྲུབ་པར་བྱེད་པའོ། །གྲུབ་པ་རྣམས་བདུད་ཀྱི་དབང་དུ་མི་འགྱུར་བར་འགྲུབ་པས་ན། གྲུབ་པ་རྣམས་ཆུད་མི་ཟ་བའོ། །འདོད་པ་ཐམས་ཅད་སྐོང་བས་ན་འདོད་
པ་ཐམས་ཅད་རབ་ཏུ་སྦྱིན་པའོ། །རྩ་བའི་ཡི་གེ་དཱ་རུ་ཎ་ལས་བསྐྱེད་པས་ན། དཱ་རུ་ཎ་དཱ་རུ་ཎ་བཛྲ་ཞེས་པའོ། །སེམས་ཅན་ཐམས་ཅད་སྲུང་བ་ཞེས་པས་ནི་དབྱུག་པ་སྔོན་པོའི་དོན་སྟོན་ཏེ། ཐབས་མཁས་པའི་ཐུགས་རྗེས་ཁམས་གསུམ་གྱི་སེམས་ཅན་ཐམས་ཅད་ཀྱི་ཉོན་མོངས་པའི་
སྡུག་བསྔལ་ལས་ཕན་གདགས་པས་ན། སེམས་ཅན་ཐམས་ཅད་སྲུང་བའོ། །རྩ་བའི་ཡི་གེ་ཙྪིནྡ་ལས་བསྐྱེད་པས་ན་ཙྪིནྡ་ཙྪིནྡ་བཛྲ། ཞེས་པའོ། །ཞི་བ་རྒྱས་པ། སེམས་ཅན་ཐམས་ཅད་རེངས་པར་བྱེད་པ་ཞེས་པས། ཧ་ར་ཧ་ར་བཛྲ་ཞེས་པས་དབུས་ཀྱི་གཙོ་བོའི་དོན་
སྟོན་ཏེ། རྡོ་རྗེ་རྣམ་འཇོམས་དེས་ཕྱིན་ཅི་ལོག་གི་ཉོན་མོངས་པ་ཐམས་ཅད་ཞི་བར་མཛད་པས་ཡོན་ཏན་གྱི་ཚོགས་ཐམས་ཅད་རྒྱས་པར་བྱེད་པས་བདུད་དྲེགས་པ་ཅན་ཐམས་ཅད་རེངས་པར་བྱེད་པའོ། །རྩ་བའི་སྙིང་པོ་ཧ་ར་ཧ་ར་བཛྲ་ཞེས་པའོ། །སེམས་ཅན་ཐམས་ཅད་རྨུགས་པར་
བྱེད་པའི་གསང་སྔགས་ཀྱི་མཐུ་ཆེན་པོ་འདི་ཞེས་པས་ནི་ཐུགས་ཡེ་ཤེས་བཞིའི་ངོ་བོ་ལས་སྒོ་བ་བཞིར་སྤྲུལ་ནས་བདུད་དྲེགས་པ་ཅན་གླགས་ཚོལ་བ་རྣམས་རྨུགས་པར་བྱས་ཏེ། ཞི་བར་བྱས་པའི་དོན་ཏེ་སྒོ་བཞིའི་དོན་བསྟན་པའོ། །སངས་རྒྱས་ཀྱི་མཐུས་ལག་ན་རྡོ་རྗེས་ཞེས་

71-1-188b

པའི་གོང་དུ་ཁྲོ་བོ་རྣམས་ཀྱི་རང་བཞིན་བསྟན་པ་ལས་དུས་གསུམ་གྱི་སངས་རྒྱས་ཐམས་ཅད་ཀྱིས་ལག་ན་རྡོ་རྗེ་ལ་མཐུ་སྟོབས་ཀྱི་བདག་པོར་བྱིན་གྱིས་བརླབས་ནས། ལག་ཏུ་ཡེ་ཤེས་ཀྱི་རྟགས་རྡོ་རྗེ་བྱིན་ཏེ་མིང་གི་དབང་བསྐུར་ནས་སྲིད་པ་གསུམ་གྱི་མཐུ་ཅན་དུ་བྱིན་གྱིས་
བརླབས་པའོ། །དེས་ནི་ཁྲོ་བོ་བཅུའི་སྔགས་ཀྱི་དོན་བཤད་དོ།    །རབ་ཏུ་སྨྲས་སོ་ཞེས་པ་ནི་འདི་ནས་མར་ཕྱག་ན་རྡོ་རྗེ་ཉིད་ཀྱི་ཕྲིན་ལས་ཀྱི་དོན་བསྟན་པའོ། །ན་མོ་རཏྣ་ཏྲ་ཡཱ་ཡ་ཞེས་པ་ནི་དཀོན་མཆོག་གསུམ་ལ་ཕྱག་འཚལ་ལོ། ། ཞེས་པའི་དོན་ཏོ། །ན་མཤྩཎ་ཌ་བཛྲ་པཱ་ཎ་ཡེ། 
ཞེས་པ་ནི་རྡོ་རྗེ་རིན་ཆེན་གྱི་ངོ་བོ་ཕྱག་ན་རྡོ་རྗེའི་ཡང་དག་པའི་སྙིང་པོའོ། །མ་ཧཱ་ཡཀྵ་སེ་ན་པ་ཏ་ཡེ་ཞེས་པ་ནི། གནོད་སྦྱིན་གྱི་སྡེ་དཔོན་ཆེན་པོ་ཕྱག་ན་རྡོ་རྗེ་དྲག་པོ་ལ་ཕྱག་འཚལ་ལོ། །ཞེས་པའི་དོན་ཏོ། །ཏདྱ་ཐཱ་ཞེས་པའི་དོན་ནི་འདི་ལྟ་སྟེ་ཞེས་པའི་དོན་ནོ། །ཨོཾ་ཏྲ་ཊ་ཏྲ་ཊ་ཞེས་པ་
ནི་ཡེ་ཤེས་ཀྱི་ལྷའི་ངོ་བོ་ཡིན་པས་ཉོན་མོངས་པ་ཐམས་ཅད་སོད་སོད་ཅེས་པའོ། །ཏྲོ་ཊ་ཡ་ཏྲོ་ཊ་ཡ་ཞེས་པ་ནི་ཕྱག་ན་རྡོ་རྗེའི་བྱིན་རླབས་ཀྱིས་རབ་ཏུ་སོད་སོད་ཅེས་པའོ། །སྥུ་ཊ་སྥུ་ཊ་ཞེས་པ་ནི་བདག་གི་བགེགས་ཐམས་ཅད་ཟུང་ལ་ཡེ་ཤེས་ཀྱི་མེས་སྲེགས་སྲེགས་ཞེས་པའོ། །སྥོ་ཊ་
ཡ་སྥོ་ཊ་ཡ་ཞེས་པ་ནི་ཡེ་ཤེས་ཀྱི་ཐོ་བས་རྡུངས་ཤིག་རྡུངས་ཤིག་ཅེས་པའོ། །གྷུརྞ་གྷུརྞ་ཞེས་པ་ནི་ཐུགས་རྗེའི་ལྕགས་ཀྱུའི་ཟུང་ལ་བསྐྱོད་ཅིག་བསྐྱོད་ཅིག་ཅེས་པའོ། །གྷུརྞྞ་པ་ཡ་གྷུརྞྞ་པ་ཡ་ཞེས་པ་ནི་ལེགས་པར་སྐྲོད་ལེགས་པར་སྐྲོད་ཅེས་པའོ། །སརྦ་སཏྭཱ་ནི་ཞེས་པ་ནི་སེམས་
ཅན་ཐམས་ཅད་ལ་ཐུགས་རྗེས་གཟིགས་ཤིག་ཅེས་པའོ། །བོ་དྷ་བོ་དྷ་ཞེས་པ་ནི་ཁམས་གསུམ་གྱི་སེམས་ཅན་ཐམས་ཅད་བྱང་ཆུབ་ཏུ་སེམས་བསྐྱེད་ཅིག་ཅེས་པའོ། །སཾ་བོ་དྷ་ཡ་སཾ་བོ་དྷ་ཡ་ཞེས་པ་ནི་འགྲོ་བ་ཐམས་ཅད་ཁོངས་སུ་ཆུད་པར་མཛོད་ཅིག་ཅེས་པའོ། །བྷྲ་མ་བྷྲ་མ་ཞེས་
པ་ནི་བྱང་ཆུབ་སེམས་དང་མི་ལྡན་པའི་བགེགས་ཐམས་ཅད་སོད་ཅིག་ཅེས་པའོ། །སཾ་བྷྲ་མ་ཡ་སཾ་བྷྲ་མ་ཡ་ཞེས་པ་ནི་ཕྱིན་ཅི་ལོག་གི་ཉོན་མོངས་པ་ཐམས་ཅད་ཐུགས་རྗེས་ལེགས་པར་སོད་ཅིག་ཅེས་པའོ། །སརྦ་བྷཱུ་ཏ་ནི་ཞེས་པ་ནི་གདོན་དང་འབྱུང་པོ་ཐམས་ཅད་གཏུབས་ལ་ཐུགས་

71-1-189a

ཡེ་ཤེས་ཀྱི་སྤྱན་གྱིས་གཟིགས་ཤིག་ཅེས་པའོ། །ཀུ་ཊ་ཀུ་ཊ་ཞེས་པ་ནི་བདག་ལ་གནོད་པའི་གདོན་ཐམས་ཅད་རྡུངས་ཤིག་ཅེས་པའོ། །སཾ་ཀུ་ཊ་ཡ་སཾ་ཀུ་ཊ་ཡ་ཞེས་པ་ནི་འཇིག་རྟེན་ན་གནོད་པ་བྱེད་པ་ཐམས་ཅད་བྱམས་པའི་ཐུགས་རྗེས་རྡུངས་ཤིག་ཅེས་
པའོ། །སརྦ་ཤ་ཏྲཱུཾ་ནཱཾ་ཞེས་པ་ནི་བདག་ལ་གནོད་པའི་དགྲ་བགེགས་ཐམས་ཅད་ཡང་དག་པའི་ཡེ་ཤེས་ཀྱིས་སྲེགས་ཤིག་ཅེས་པའོ། །གྷ་ཊ་གྷ་ཊ་ཞེས་པ་ནི་བགེགས་ཐམས་ཅད་ཐུགས་རྗེས་སོད་ཅིག་ཅེས་པའོ། །སཾ་གྷ་ཊ་ཡ་སཾ་གྷ་ཊ་ཡ་ཞེས་པ་ནི་ལེགས་པར་སོད་ཅིག་
ཅེས་པའོ། །སརྦ་བིདྱཱ་བཛྲ་བཛྲ་ཞེས་པ་ནི། རིག་སྔགས་ཀྱི་མཐུ་གང་ལ་བྱ་བ་ཐམས་ཅད་རྡོ་རྗེ་འབར་བས་འགྲུབ་པར་གྱིས་ཤིག་པའོ། །སྥོ་ཊ་ཡ་བཛྲ་བཛྲ་ཞེས་པ་ནི་ཡེ་ཤེས་ཀྱི་རྡོ་རྗེ་འབར་བས་ཉོན་མོངས་པ་ཐམས་ཅད་སོད་ཅིག་ཅེས་པའོ། །ཀ་ཊ་བཛྲ་བཛྲ་ཞེས་པ་ནི་ཡེ་ཤེས་གྲུབ་པའི་རྡོ་རྗེ་
འབར་བས་ཉོན་མོངས་པ་ཐམས་ཅད་ཆོད་ཅིག་ཅེས་པའོ། །མ་ཊ་བཛྲ་བཛྲ་ཞེས་པ་ནི་བྱང་ཆུབ་ཀྱི་སེམས་ཀྱི་རྡོ་རྗེས་བདག་གི་གདུག་པ་ཐམས་ཅད་གཏུབས་ཤིག་ཅེས་པའོ། །མ་ཐ་བཛྲ་བཛྲ་ཞེས་པ་ནི་ཡང་དག་པའི་ཡེ་ཤེས་ཀྱི་རྡོ་རྗེས་བགེགས་ཐམས་ཅད་ཐུལ་ཅིག་ཅེས་པའོ། །
ཨཊྚ་ཧཱ་ས་ནཱི་ལ་ཡ་བཛྲ་ཞེས་པ་ནི་རྡོ་རྗེ་རྣོན་པོ་མེ་དང་འདྲ་བས་ཉོན་མོངས་པའི་བག་ཆགས་ཐམས་ཅད་ཆོད་ཅིག་དྲོལ་ཅིག་ཅེས་པའོ། །སུ་བཛྲ་བཛྲ་སྭཱཧཱ་ཞེས་པ་ནི་ཐུགས་ཡང་དག་པར་མཁྱེན་པའི་རྡོ་རྗེས་ཆོས་ཀྱི་དབྱིངས་རྣམ་པར་དག་པ་ལ་ལེགས་པར་སྤྱོད་ཅིག་ཅེས་པའོ།    །དེ་ཡན་
ཆད་ཀྱིས་ཕྱག་ན་རྡོ་རྗེའི་ཕྲིན་ལས་ཀྱི་དོན་བཤད་ནས། ད་ནི་ཁྲོ་བོ་རྣམས་ཀྱི་ཕྲིན་ལས་ཀྱི་དོན་སྟོན་ཏེ། ཧེ་ཕུལླུ་ནི་རུ་ཕུལླུ་ཞེས་པ་ནི། རྡོ་རྗེ་འབར་བ་ཁམས་གསུམ་པའི་ཉོན་མོངས་པ་རྣམས་ཐུགས་རྗེ་འབར་བས་ཆོད་ཅིག་ཅེས་པའོ། །གྲྀཧྞ་ཀུལླུ་ཞེས་པ་ནི་ཁམས་གསུམ་གྱི་སེམས་
ཅན་ཐམས་ཅད་ཀྱི་གཤིན་རྗེའི་སྡུག་བསྔལ་ཐམས་ཅད་ཆོམས་ཤིག་ཅེས་པའོ། །མི་ལི་ཙུལླུ་ཀུ་རུ་ཀུ་ལུ་ཞེས་པ་ནི་དཔལ་རྟ་མགྲིན་སྔོན་པོ་འབར་བས་སྡུག་བསྔལ་ཐམས་ཅད་སྦྱོང་ཤིག་ཅེས་པའོ། །བཛྲ་བི་ཛ་ཡ་སྭཱཧཱ་ཞེས་པ་ནི་ཁྲོ་བོ་བདུད་རྩི་འཁྱིལ་པས་ཉོན་མོངས་པ་ཐམས་

71-1-189b

ཅད་བདུད་རྩིར་བྱིན་གྱིས་རློབས་ཤིག་ཅེས་པའོ། །ཀཱི་ལི་ཀཱི་ལཱ་ཡ་སྭཱཧཱ་ཞེས་པ་ནི་ཁྲོ་བོ་སྟོབས་པོ་ཆེའི་དྲག་ཤུལ་གྱིས་མཛོད་ཅིག་ཅེས་པའོ། །ཀ་ཊ་ཀ་ཊ་ཞེས་པ་ནི་ཁྲོ་བོ་རྒྱལ་པོས་བདུད་ཐམས་ཅད་སྤ་བཀོང་ཤིག་ཅེས་པའོ། །མ་ཊ་མ་ཊ་ཞེས་པ་ནི་ཁྲོ་བོ་ཧཱུཾ་ཀ་རས་ཉོན་མོངས་པ་ཐམས་
ཅད་ལས་སྐྱོབས་ཤིག་ཅེས་པའོ། །ར་ཊ་ར་ཊ་ཞེས་པ་ནི་ཁྲོ་བོ་པདྨ་འཁྱིལ་པས་ཉོན་མོངས་པ་ཐམས་ཅད་ཞི་བར་མཛོད་ཅིག་ཅེས་པའོ། །མོ་ཊ་མོ་ཊ་པྲ་མོ་ཊ་ཎ་ཡ་སྭཱཧཱ་ཞེས་པ་ནི་ཡེ་ཤེས་ཀྱི་རྡོ་རྗེ་འབར་བས་གཤིན་རྗེ་རྟོགས་ཤིག་ཅེས་པའོ། །ཙ་ར་ནི་ཙ་ར་ཞེས་པ་ནི་ཁྲོ་བོའི་རྒྱལ་པོ་ནཱི་ལ་
དཎྜས་བདག་དང་སེམས་ཅན་ཐམས་ཅད་ལ་ཚེ་དང་དབང་རྩོལ་ཅིག་ཅེས་པའོ། །ཧ་ར་ཧ་ར་ཞེས་པ་ནི་ཡེ་ཤེས་ཀྱི་གཤོག་པས་འཁོར་བའི་སྡུག་བསྔལ་ལས་སྐྱོབས་ཤིག་ཅེས་པའོ། །ས་ར་ས་ར་མཱ་ར་ཡ་མཱ་ར་ཡ་ཞེས་པ་ནི་ཡེ་ཤེས་ཀྱི་རྡོ་རྗེས་ཉོན་མོངས་པ་རྣམས་སོད་ལ་རྡུལ་དུ་རློག་
གཅིག་ཅེས་པའོ། །བཛྲ་བི་དཱ་ར་ཎ་ཡ་སྭཱཧཱ་ཞེས་པས་རྡོ་རྗེ་རྣམ་པར་འཇོམས་པས་སེམས་ཅན་ཐམས་ཅད་ཀྱི་ལས་མཛོད་ཅིག་ཅེས་པའོ། །ཙྪིནྡ་ཙྪིནྡ་ཞེས་པ་ནི། རྟ་མགྲིན་གྱིས་ཉོན་མོངས་པ་ཐམས་ཅད་ཚར་ཆོད་ཅིག་ཅེས་པའོ། །བྷིནྡ་བྷིནྡ་ཞེས་པ་ནི། སེམས་ཅན་ཐམས་ཅད་སྡུག་བསྔལ་བ་
ཞི་བར་གྱིས་ཤིག་ཅེས་པའོ། །མ་ཧཱ་ཀཱི་ལི་ཀཱི་ལཱ་ཡ་སྭཱཧཱ། ཞེས་པ་ནི་ཁྲོ་བོ་སྟོབས་པོ་ཆེས་ཉོན་མོངས་པ་ཐམས་ཅད་ཞི་བར་མཛོད་ཅིག་ཅེས་པའོ། །བན་དྷ་བན་དྷ་ཞེས་པ་ནི་ཁྲོ་བོ་ཊཀྐི་རཱ་ཛས་གདུག་པ་ཅན་གྱི་བདུད་ཐམས་ཅད་ཟུང་ལ་ཆོམས་ཤིག་ཅེས་པའོ། །ཀྲོ་དྷ་ཀྲོ་དྷ་ཞེས་པ་ནི་
ཁྲོ་བོ་རྣམས་ཀྱིས་ཉོན་མོངས་པ་རྣམས་ལ་རོལ་ཅིག་ཅེས་པའོ། །ཀཱི་ལི་ཀཱི་ལཱ་ཡ་སྭཱཧཱ་ཞེས་པ་ནི་ཁྲོ་བོ་བདུད་རྩི་འཁྱིལ་པས་གདུག་པ་རྣམས་ཞི་བར་མཛད་ཅིག་ཅེས་པའོ། །ཙུ་རུ་ཙུ་རུ་ཞེས་པ་ནི་ཁྲོ་བོ་ཨ་མོ་གྷ་པཱ་ཤས་ཕྲིན་ལས་མཛོད་ཅིག་ཅེས་པའོ། །ཙཎྜ་ལི་ཞེས་པ་ནི་ཁྲོ་བོ་རྒྱལ་
པོ་ཚུར་སྤྱོན་དམ་ཚིག་ལ་དགོངས་ཤིག་ཅེས་པའོ། །ཀཱི་ལི་ཀཱི་ལཱ་ཡ་སྭཱཧཱ། ཞེས་པ་ནི་ཁྲོ་བོ་བདུད་རྩི་འཁྱིལ་པའི་ཐུགས་ཚད་མེད་པའི་གསུང་སྒྲས་ཐམས་ཅད་བྱང་ཆུབ་སེམས་སུ་ཞི་བར་མཛོད་ཅིག་ཅེས་པའོ། །ཏྲཱ་ས་ཡ་ཏྲཱ་ས་ཡ་ཞེས་པ་ནི་ཁྲོ་བོ་མ་ཧཱ་བ་ལས་བགེགས་ཐམས་ཅད་

71-1-190a

སྐྲོད་ཅིག་ཅེས་པའོ། །བཛྲ་ཀཱི་ལི་ཀཱི་ལཱ་ཡ་སྭཱཧཱ་ཞེས་པ་ནི་ཡེ་ཤེས་ཀྱི་རྡོ་རྗེ་འབར་བས་ཐམས་ཅད་ཞི་བར་མཛོད་ཅིག་ཅེས་པའོ། །ཧ་ར་ཧ་ར་བཛྲ་དྷ་རཱ་ཡ་སྭཱཧཱ་ཞེས་པ་ནི་རྡོ་རྗེ་འབར་བའི་སྒོ་བ་བཞིས་བགེགས་ཐམས་ཅད་སྲེགས་ཤིག་ཅེས་པའོ། །པྲ་ཧ་ར་པྲ་ཧ་ར་
ཞེས་པ་ནི་ཁྲོ་བོ་བདུད་རྩི་འཁྱིལ་པས་མཚན་མའི་རྟོག་པ་ཐམས་ཅད་ཞི་བར་མཛད་ཅིག་ཅེས་པའོ། །བཛྲ་པྲ་བྷཉྫ་ནཱ་ཡ་སྭཱཧཱ་ཞེས་པ་ནི་བྱང་ཆུབ་ཀྱི་སེམས་རྡོ་རྗེ་འབར་བས་ཉོན་མོངས་པའི་བག་ཆགས་ཐམས་ཅད་ཞི་བར་མཛོད་ཅིག་ཅེས་པའོ། །དེ་ཡན་ཆད་ཀྱིས་ནི་ཁྲོ་བོ་རྣམས་ཀྱི་
ཕྲིན་ལས་ཀྱི་དོན་བཤད་དོ།    །ད་ནི་ཁྲོ་བོ་རྣམས་ཀྱི་བསྲུང་བའི་དོན་སྟོན་ཏེ། མ་ཏི་སྠི་ར་བཛྲ་ཞེས་པ་ནི་བློ་བརྟན་པའི་རྡོ་རྗེས་བྱང་ཆུབ་སེམས་ཀྱི་རང་བཞིན་དང་ལྡན་པར་གྱིས་ཤིག་ཅེས་པའོ། །སུ་ཏི་སྠི་ར་བཛྲ་ཞེས་པ་ནི་ཤིན་ཏུ་བརྟན་པའི་རྡོ་རྗེས་ལེགས་པའི་ཡོན་ཏན་དང་ལྡན་པར་གྱུར་
ཅིག་ཅེས་པའོ། །པྲ་ཏི་སྠི་ར་བཛྲ་ཞེས་པ་ནི་སོ་སོར་བརྟན་པའི་རྡོ་རྗེས་བདག་གི་ལུས་བརྟེན་པར་མཛོད་ཅིག་ཅེས་པའོ། །མ་ཧཱ་བཛྲ་ཞེས་པ་ནེ་ཆེན་པོ་རྡོ་རྗེས་བདུད་ལས་རྒྱལ་བར་མཛོད་ཅིག་ཅེས་པའོ། །ཨ་པྲ་ཏི་ཧ་ཏ་བཛྲ་ཞེས་པ་ནི་རབ་ཏུ་བརྟན་པའི་རྡོ་རྗེས་བདག་ལ་ཡེ་ཤེས་ཀྱི་
མཚོན་ཆ་གསོལ་ཅིག་ཅེས་པའོ། །ཨ་མོ་གྷ་བཛྲ་ཞེས་པ་ནི་དོན་ཡོད་པའི་རྡོ་རྗེས་གཞན་ཐམས་ཅད་འཇོམས་པའོ་ཞེས་པའོ། །ཨེ་ཧྱ་ཧི་བཛྲ་ཞེས་པ་ནི་བདེན་པའི་རྡོ་རྗེས་བདག་འཁོར་བ་ལས་དྲོངས་ཤིག་ཅེས་པའོ། །ཤཱི་གྷཾ་བཛྲཱ་ཡ་སྭཱཧཱ་ཞེས་པ་ནི་དཔའ་བར་འགྲོ་བའི་རྡོ་རྗེས་
རིངས་པར་བདག་གི་ལས་འགྲུབ་པར་མཛོད་ཅིག་ཅེས་པའོ། །དྷ་ར་དྷ་ར་ཞེས་པ་ནི་སྒོ་བཞིའི་སྲུང་བ་བསྟན་ཏེ། བྱང་ཆུབ་སེམས་ཀྱི་རང་བཞིན་ཐམས་ཅད་ཁྱེར་ལ་གཟུངས་སུ་གྱིས་ཞེས་པའོ། །དྷི་རི་དྷི་རི་ཞེས་པ་ནི་དབྱིངས་ཀྱི་རང་བཞིན་ཆོས་ཉིད་དང་ལྡན་པར་གྱིས་ཤིག་ཅེས་
པའོ། །དྷུ་རུ་དྷུ་རུ་ཞེས་པ་ནི་ལུས་ཐམས་ཅད་ཐུགས་རྗེས་ཟུངས་ལ་ཐོགས་ཤིག་ཅེས་པའོ། །སརྦ་བཛྲ་ཀུ་ལཾ་ཨཱ་བརྟ་ཡ་སྭཱཧཱ། ཞེས་པ་ནི་རྡོ་རྗེ་འཁོར་ལོ་དང་བཅས་པས་བདག་ལ་བྱིན་གྱིས་རློབས་ཤིག་ཅེས་པའོ། །ཨ་མུ་ཀཾ་མཱ་ཡ་ཕཊ་ཅེས་པ་ནི་བདག་དུས་མ་ཡིན་པའི་འཇིགས་

71-1-190b

པ་ལས་བཟློག་ལ་བདུད་ཐམས་ཅད་ཆོམས་ཤིག་ཅེས་པའོ། །དེ་ཡན་ཆད་ཁྲོ་བོ་བཅུའི་སྲུང་བའི་དོན་བཤད་དོ།    །ད་ནི་ཁྲོ་བོའི་དབང་གི་དོན་སྟོན་ཏེ། ན་མཿས་མནྟ་བཛྲཱ་ཎཱཾ་ཞེས་པ་ནི་ཀུན་དུ་བཟང་པོའི་ཡེ་ཤེས་རྡོ་རྗེས་རང་བཞིན་གྱིས་དབང་བསྐུར་ཅིག་ཅེས་པའོ། །སརྦ་བ་ལཾ་ཨཱ་བརྟ་ཡ་
ཞེས་པ་ནི་སྟོབས་པོ་ཆེས་དབང་བསྐུར་ཅིག་ཅེས་པའོ། །མ་ཧཱ་བ་ལེ་ཞེས་པ་ནི་སྟོབས་པོ་ཆེས་མགྱོགས་པ་རླུང་དང་འདྲ་བར་དབང་བསྐུར་ཅིག་ཅེས་པའོ། །ཀ་ཏ་བེ་ཏ་ཏ་ལེ་ཞེས་པ་ནི་ཡེ་ཤེས་ཀྱི་མཆེ་བས་ཉོན་མོངས་པའི་བདུད་ཐུལ་ཅིག་ཅེས་པའོ། །ཨ་ཙ་ལེ་ཞེས་པ་ནི་ཁམས་གསུམ་རྣམ་
རྒྱལ་གྱི་སྤྲུལ་པས་དབང་བསྐུར་ལ་སྐྱོབས་ཤིག་ཅེས་པའོ། །མཎྜ་ལ་མ་ཡེ་ཞེས་པ་ནི་དཀྱིལ་འཁོར་གྱི་ཕྱིའི་སྲུང་མ་རྣམས་ཀྱིས་སྤྲུལ་པའི་ངོ་བོ་ཉིད་ཀྱི་ཆེ་བ་སྣ་ཚོགས་སུ་སྣང་བའོ། །ཨ་ཏི་བཛྲ་ཞེས་པ་ནི་རྡོ་རྗེ་བཟང་པོས་ཐམས་ཅད་ལ་སྐྱོབས་ཤིག་པའོ། །མ་ཧཱ་བ་ལེ་བེ་ག་ར་ཎ་ར་ཎ་
ཞེས་པ་ནི་སྟོབས་པོ་ཆེས་མགྱོགས་པ་རླུང་དང་འདྲ་བས་གནོད་པ་ཐམས་ཅད་ཞི་བར་མཛོད་ཅིག་པའོ། །ཨ་ཛི་ཏེ་ཛྭ་ལ་ཛྭ་ལ་ཞེས་པ་ནི་ཡང་དག་པའི་ཤེས་རབ་ཀྱིས་བདུད་དང་ལོག་འདྲེན་རྣམས་སྲེགས་ཤིག་ཅེས་པའོ། །ཏི་ཊི་ཏི་ཊི་པིང་ག་ལེ་ཞེས་པ་ནི་སོ་སོར་འབར་བས་སྡུག་བསྔལ་
ཐམས་ཅད་ལས་སྐྱོབས་ཤིག་པའོ། །ད་ཧ་ད་ཧ་ཞེས་པ་ནི་བདག་གི་ཉོན་མོངས་པ་རྣམས་སྲེགས་ཤིག་པའོ། །ཏེ་ཛོ་བ་ཏི་ཞེས་པ་ནི་ཡང་དག་པའི་ཡེ་ཤེས་ཀྱིས་གཏི་མུག་པ་རྣམས་སོལ་ཅིག་པའོ། །ཏི་ལི་ཏི་ལི་ཞེས་པ་ནི་བདག་གི་སྡུག་བསྔལ་ཐམས་ཅད་མེད་པར་གྱིས་ཤིག་
པའོ། །བྷནྡྷ་བྷནྡྷ་ཞེས་པ་ནི་བགེགས་དང་འབྱུང་པོ་ཐམས་ཅད་ཆིངས་ཤིག་པའོ། །མ་ཧཱ་བ་ལེ་ཞེས་པ་ནི་སྟོབས་པོ་ཆེས་ལས་མཛོད་ཅིག་པའོ། །བཛྲ་ཨཾ་ཀུ་ཤ་ཛྭཱ་ལཱ་ཡ་སྭཱཧཱ་ཞེས་པ་ནི་རྡོ་རྗེ་འཁོར་ལོ་མེ་དང་འདྲ་བས་མཚན་མ་ཐམས་ཅད་ཞི་བར་མཛོད་ཅིག་པའོ། །དེ་ཡན་ཆད་
ཁྲོ་བོ་བཅུའི་རང་གི་ལས་བཤད་པའོ།    །ད་ནི་ཡེ་ཤེས་ཀྱི་ཁྲོ་བོ་ལག་ན་རྡོ་རྗེའི་རང་བཞིན་སྟོན་ཏེ། ན་མོ་རཏྣ་ཏྲ་ཡཱ་ཡ་ཞེས་པ་ནི་དཀོན་མཆོག་གསུམ་ལ་ཕྱག་འཚལ་ལོ་ཞེས་པའོ། །ན་མཿ་ཙནྜ་བཛྲ་པཱ་ཎ་ཡེ་ཞེས་པ་ཁམས་གསུམ་གྱི་གནོད་སྦྱིན་རྣམས་གདུལ་བའི་ཕྱིར་ལག་ན་

71-1-191a

རྡོ་རྗེ་ཁྲོ་བོའི་ཚུལ་དུ་བཞུགས་པའོ། །མ་ཧཱ་ཡཀྵ་སེ་ནཱ་པ་ཏ་ཡེ་ཞེས་པ་ནི་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ཡེ་ཤེས་ཀྱི་ངོ་བོར་བཞུགས་པའོ། །ཏདྱ་ཐཱ་ནི་འདི་ལྟ་སྟེ་ཞེས་པའོ། །ཨོཾ་ཧ་ར་ཧ་ར་བཛྲ་ཞེས་པ་ནི་ཡེ་ཤེས་ཀྱི་ལག་ན་རྡོ་རྗེ་དབུས་སུ་བཞུགས་ཏེ། 
མ་ཐ་མ་ཐ་བཛྲ་ཞེས་པ་ནི་ཧཱུཾ་ཀ་ར་གཤིན་རྗེ་གཤེད་དུ་བསྟན་པའོ། །དྷུ་ན་དྷུ་ན་བཛྲ་ཞེས་པ་ནི་མཚན་མ་ཐམས་ཅད་འཇོམས་པས་ན། ཁམས་གསུམ་རྣམ་པར་རྒྱལ་བའི་སྙིང་པོའོ། །ད་ཧ་ད་ཧ་བཛྲ་ཞེས་པ་ནི་རྟ་མགྲིན་གྱི་སྙིང་པོའོ། །པ་ཙ་པ་ཙ་བཛྲ་ཞེས་པ་ནི་བདུད་རྩི་འཁྱིལ་
པའི་སྙིང་པོའོ། །དྷ་ར་དྷ་ར་བཛྲ་ཞེས་པ་ནི་སྟོབས་པོ་ཆེའི་སྙིང་པོའོ། །དཱ་ར་ཡ་དཱ་ར་ཡ་བཛྲ་ཞེས་པ་ནི་གཞན་གྱིས་མི་ཐུབ་པའི་སྙིང་པོའོ། །དཱ་རུ་ཎ་དཱ་རུ་ཎ་བཛྲ་ཞེས་པ་ནི་མི་གཡོ་མགོན་པོའི་སྙིང་པོའོ། །ཙྪིནྡ་ཙྪིནྡ་བཛྲ་ཞེས་པ་ནི་དབྱུག་པ་སྔོན་པོའི་སྙིང་པོའོ། །བྷིནྡ་བྷིནྡ་
བཛྲ་ཧཱུཾ་ཕཊ་སྭཱ་ཧཱ། ཞེས་པ་ནི་པདྨ་འཁྱིལ་པའི་སྙིང་པོའོ། །དེ་ཡན་ཆད་ཁྲོ་བོའི་རང་བཞིན་བཤད་དོ།།      །།ན་མ་ཤྩཎྜ་བཛྲ་ཀྲོ་དྷ་ཡ་ཧཱུཾ་ཞེས་པ་ནི་ཕྱག་འཚལ་བའི་དོན་ཏོ། །ད་ནི་སྒོ་བ་བཞིའི་དོན་སྟོན་ཏེ། ཧུ་ལུ་ཧུ་ལུ་ཞེས་པ་ནི་ཤར་གྱི་སྒོ་བས་བགེགས་དང་འབྱུང་པོ་ཐམས་
ཅད་ཚུར་དྲོངས་ཤིག་པའོ། །ཏིཥྛ་ཏིཥྛ་ཞེས་པ་ནི་ལྷོའི་སྒོ་བས་ཆིངས་ཤིག་ཆིངས་ཤིག་པའོ། །བནྡྷ་བནྡྷ་ཞེས་པ་ནི་ནུབ་ཀྱི་སྒོ་བས་བགེགས་དང་ལོག་འདྲེན་རྣམས་ཆོམས་ཤིག་ཆོམས་ཤིག་པའོ། །ཧ་ན་ཧ་ན་ཞེས་པ་ནི་བྱང་གི་གོ་བས་རྟོགས་ཤིག་རྟོགས་ཤིག་པའོ། །ཨ་མྲྀ་ཏེ་ཧཱུཾ་
ཕཊ་ཅེས་པ་ནི་བདུད་རྩི་འཁྱིལ་པའི་སྔགས་ཏེ། གང་གི་སྔགས་ཐམས་ཅད་ཀྱི་ལྷག་ཆད་སྐོང་བའོ།    །དེར་ཁྲོ་བོ་རྣམས་ཀྱི་དོན་བཤད་ནས། ད་ནི་ཡོན་ཏན་གྱི་རྣམ་གྲངས་ཀྱི་སྒོ་ནས་བྱེ་བྲག་འཆད་དེ། སྡིག་པ་ཐམས་ཅད་བྱང་བྱས་ནས། །སྡུག་བསྔལ་ཐམས་ཅད་མེད་པར་བྱེད། །
ཅེས་པ་ནི་རྒྱུད་འདིའི་དོན་ལ་ཞུགས་ཏེ་དཀྱིལ་འཁོར་གྱི་ཆོ་ག་གཞུང་བཞིན་དུ་བྱ་སྟེ། དཀྱིལ་འཁོར་དུ་གཞུག་པ་ལ་སོགས་པ་བྱས་ན་ཉོན་མོངས་པའི་སྒྲིབ་པ་དང་། ལས་ཀྱི་སྒྲིབ་པ་དང་། ཆོས་ཀྱི་སྒྲིབ་པའི་སྡིག་པ་ལ་སོགས་པ་བྱང་བར་འགྱུར་རོ། །སྡུག་བསྔལ་ཐམས་ཅད་མེད་པར་

71-1-191b

བྱེད། །ཅེས་པ་ནི་རྒྱུད་འདི་ཉམས་སུ་བླངས་ཤིང་བསྒྲུབས་ན། ཉོན་མོངས་པའི་སྡུག་བསྔལ་གསུམ་དང་བརྒྱད་ལ་སོགས་པའི་སྡུག་བསྔལ་ཐམས་ཅད་ཞི་བར་བྱེད་པའོ། །རྒྱུད་དོ་ཅོག་གི་རྩ་བ་སྟེ། །ཞེས་པ་ནི་བདེ་བར་གཤེགས་པའི་ཞལ་ནས་གསུངས་པའི་རྒྱུད་ཐམས་ཅད་ཀྱི་རྩ་བ་
ཡིན་པའི་ཕྱིར་རོ། །དཔལ་ཀུན་གྱིས་ནི་ལེགས་པར་བརྒྱན། །ཞེས་པ་ནི་དཔལ་ནི་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་ཐམས་ཅད་དང་ལྡན་པས་ནའོ། །ཀུན་ནི་དུས་གསུམ་གྱི་སངས་རྒྱས་ཐམས་ཅད་ཀྱང་དེའི་དོན་རྟོགས་པ་ལས་འབྱུང་བའོ། །དེའི་དོན་ཉམས་སུ་
བླངས་ཤིང་ཕུལ་དུ་ཕྱིན་ན་ལེགས་པར་བརྒྱན་ཞེས་པའོ།    །སེམས་ཅན་དབང་པོ་ཉམས་པ་དང་། །ཞེས་པ་ནི་ཁམས་གསུམ་གྱི་སེམས་ཅན་ཐམས་ཅད་ལ་མི་ནད་དང་ཕྱུགས་ནད་དང་ཚེ་དང་། མདངས་འཕྲོག་པ་ལ་སོགས་པའི་གནོད་པའི་བྱེད་པ་རྣམས་འདིའི་དོན་ཉམས་སུ་བླངས་ན་
བཟློག་པར་འགྱུར་རོ། །ཚེ་ཟད་པ་དང་ཚེ་ཉམས་དང་། ཞེས་པ་ནི་ཚེ་ཟད་པ་གསོ་བའི་ཐབས་སྟོན་ཏེ་དཀྱིལ་འཁོར་གྱི་ལྷ་རྣམས་ལ་ཕྲིན་ལས་བཞི་གཞུང་བཞིན་བྱས་ཏེ་མཆོད་ན་ཚེ་ཉམས་པ་སོས་པར་འགྱུར་རོ། །ཕུན་སུམ་ཚོགས་མིན་གང་ཆགས་དང་། ཞེས་པ་ནི་མདོག་ཉམས་པ་གསོ་
བའི་ཐབས་སྟོན་ཏེ། ཁམས་གསུམ་གྱི་སེམས་ཅན་བཀྲེས་པ་དང་གྲང་བ་ལ་སོགས་པའི་སྡུག་བསྔལ་གྱིས་བྱང་ཆུབ་ལ་མི་ཆགས་ཏེ། སྡུག་བསྔལ་ལ་ཆགས་པས་དེ་སྦྱང་བའི་ཐབས་ནི་དཀྱིལ་འཁོར་གྱི་ལྷ་རྣམས་སྤྱན་དྲངས་ལ་རྒྱས་པའི་ལས་བྱས་ན་བདེ་བ་ཕུན་སུམ་ཚོགས་
པ་དང་ལྡན་ནོ། །ལྷ་རྣམས་རྒྱབ་ཀྱིས་ཕྱོགས་པ་དང་། །ཞེས་པ་ནི། འཇིག་རྟེན་ལས་འདས་པའི་ལྷ་མི་དགའ་བ་སྟོན་ཏེ། བདེ་བར་གཤེགས་པའི་སྤྱན་སྔར་དབང་དང་དམ་ཚིག་ནོས་ནས་འཇིག་རྟེན་པའི་ལས་དང་མཐུན་པའི་སྤྱོད་པ་བྱས་པས་ལྷ་རྣམས་མི་དགྱེས་ཏེ། དེ་ཞི་བར་བྱ་བའི་
ཐབས་ནི་རང་ཡི་དམ་ལྷར་ཞུགས་ནས་དཀྱིལ་འཁོར་དང་། མཆོད་རྫས་ལ་སོགས་པ་ཐམས་ཅད་མང་པོར་བསྒྱུར་ཏེ། དབང་གི་ལས་བྱས་ན་འགྲུབ་བོ། །མཛའ་སྡུག་སྐྱེ་བོ་སྡང་བ་དང་། །ཞེས་པ་ནི་ལྷ་འཕངས་པའི་སྔ་ལྟས་ཏེ་རང་གི་མཛའ་བ་དང་འཁོར་ལ་སོགས་པ་ཞེ་སྡང་དང་ངན་

71-1-192a

སེམས་ལ་སོགས་པ་བྱེད་དེ་དེ་ཞི་བར་བྱ་བའི་ཕྱིར་དྲག་པོའི་ལས་བྱས་ནས་འགྲུབ་བོ། །བྲམ་ཟེ་ལ་སོགས་གཙེས་པ་དང་། །ཞེས་པ་ནི་རྒྱལ་པོ་ལོག་པའི་སྟོབས་ཅན་གྱིས་བྲམ་ཟེ་ལ་གསེག་ཤང་བརྒྱབ་པའི་རྣམ་སྨིན་ལ་བྱ་སྟེ། རང་གིས་བསྒྲུབས་ན་འགྲུབ་པར་གྱུར་རོ། །ཕན་
ཚུན་མཐུན་པ་མ་ཡིན་དང་། །ཞེས་པ་ནི་མི་མཐུན་པ་སྟོན་ཏེ། གདོན་འབྱུང་པོས་བྱིན་གྱིས་བརླབས་པས་སེམས་ཅན་ཐམས་ཅད་དགྲ་བྱེད་དེ། ཁྲུས་ཆོག་བྱས་ན་གང་ཡང་འགྲུབ་བོ། །ནོར་འགྲིབ་པས་ནི་གནོད་པ་དང་། ཞེས་པ་ནི་ནོར་ཡོད་པ་དེ་ཉམས་ཏེ་ཕོངས་པར་གྱུར་ན་རྒྱས་པའི་ལས་
བྱས་ན་ནོར་དང་ལྡན་པར་འགྱུར་རོ། །མྱ་ངན་ངལ་དང་གནོད་པ་དང་། །ཞེས་པ་ནི་མྱ་ངན་གྱི་གནས་སྟོན་ཏེ། ཁམས་གསུམ་གྱི་སེམས་ཅན་ཐམས་ཅད་ཉོན་མོངས་པའི་མྱ་ངན་གྱིས་གཟིར་བ་ལ་ཞི་བའི་ལས་བྱས་ན་འགྲུབ་པར་འགྱུར་རོ། །འཇིགས་པ་དང་ནི་ཕོངས་པ་དང་། །ཞེས་པ་ནི་
འཇིགས་ཤིང་ཕོངས་པ་སྟོན་ཏེ། སེམས་ཅན་རྒྱལ་པོའི་ཆད་པས་འཇིགས་པ་དང་། གནམ་ལྕགས་ཀྱི་འཇིགས་པ་དང་། གཅན་གཟན་གྱི་འཇིགས་པ་དང་། མེ་དང་ཆུས་འཇིགས་པ་དང་། སྐར་མདའ་ལྟུང་བས་འཇིགས་པ་དང་། མགོན་སྐྱོབ་མེད་དེ་ཕོངས་པ་ལ་སོགས་པ་
ལ་ཕྲིན་ལས་བཞིའི་ལས་བྱས་ན་འགྲུབ་པའོ། །གཟའ་དང་རྒྱུ་སྐར་བྱད་སྟེམས་དང་། ཞེས་པ་ནི་བྱད་སྟེམས་སྟོན་ཏེ། འཇིག་རྟེན་གྱི་གཟའ་ཆེན་པོ་བརྒྱད་དང་། རྒྱུ་སྐར་ཉི་ཤུ་རྩ་བརྒྱད་ཀྱི་བྱད་སྟེམས་ལ་གཟའ་དང་། རྒྱུ་སྐར་གྱི་ཆོ་ག་བྱས་ན་ཞི་བར་འགྱུར་རོ། །མི་བཟད་གདོན་གྱིས་
ཉེན་པ་དང་། ཞེས་པ་ནི་གདོན་སྟོང་ཕྲག་བརྒྱད་ཅུས་ཉེན་པ་ལ་ཕྲིན་ལས་བཞིའི་ལས་བྱས་ན་འགྲུབ་པར་འགྱུར་རོ། །མྱ་ངན་ངལ་ལས་བྱུང་བ་ཡི། །རྨི་ལམ་སྡིག་པ་མཐོང་ན་ཡང་། །ཞེས་པ་ནི་ཉོན་མོངས་པའི་སེམས་ཅན་ཕྱིན་ཅི་ལོག་གི་ལྟ་བ་ངན་པའི་མྱ་ངན་གྱིས་གདུངས་
པའམ། ལུས་སེམས་ན་ཞིང་ཐང་ཆད་པས་འཐིབས་པ་གཉིད་ལོག་པའི་རྨི་ལམ་ན་སྡིག་པའི་བག་ཆགས་རྨིས་ན་ཕྲིན་ལས་བཞིའི་ལས་བྱས་ན་འགྲུབ་པའོ།    །དེས་ནི་རབ་བཀྲུས་གཙང་མ་ཡིན། །ཞེས་པ་ནི་ཆོ་གའི་ཐབས་སྟོན་ཏེ། དཀྱིལ་འཁོར་གྱི་ཆོ་ག་རྫོགས་པར་བྱས་

71-1-192b

ལ། སློབ་དཔོན་གྱིས་བདུད་རྩིའི་བུམ་པས་སློབ་མའི་སྤྱི་བོར་དབང་བསྐུར་ཞིང་ཁྲུས་བྱས་ན་མི་གཙང་བ་ལ་སོགས་པ་ཐམས་ཅད་འདག་གོ། །གཙང་མ་ནི་ཉོན་མོངས་པ་མེད་པའོ། །མདོ་སྡེ་དམ་པ་མཉན་པར་བྱ། །ཞེས་པ་ནི་སློབ་མ་ནི་བྱང་ཆུབ་ཏུ་སེམས་བསྐྱེད་ལ། མདོ་སྡེའི་དོན་
ཉན་དུ་བཅུག་ལ་ལྷ་དཔོག་བསྒོམ་དུ་གཞུག་པ་བྱའོ། །གང་དག་ཡིད་དགེ་སེམས་དང་ཞིང་། །གཙང་མའི་གོས་ཀྱིས་རབ་བརྒྱན་ཏེ། །ཞེས་པ་ནི། སློབ་དཔོན་གྱིས་སློབ་མ་དེ་ལ་རས་སམ་དར་དཀར་ལ་སོགས་པའི་གོས་གཙང་མ་བསྐོན་ལ་དྲི་ཞིམ་པོའི་མེ་ཏོག་ལ་སོགས་པའི་
རྒྱན་མང་པོས་བརྒྱན་ལ་གཞག་གོ། །ཟབ་མོ་སངས་རྒྱས་སྤྱོད་ཡུལ་བ། །མདོ་སྡེ་འདི་ནི་ཉན་བྱེད་ན། །ཞེས་པ་ནི་ཐེག་པ་ཆེན་པོའི་ཆོས་མཉན་པའི་ཡོན་ཏན་སྟོན་ཏེ། སྐུལ་མ་གདབ་པོ། །མདོ་སྡེའི་རྒྱལ་པོ་འདི་ཀློག་པ་དང་འཛིན་པ་དང་གཞན་ལ་སྟོན་ཅིང་ཉམས་སུ་ལོངས་ཤིག་པ་
བསྟན་ཏོ།    །མདོ་སྡེ་འདི་ཡི་གཟི་བརྗིད་ཀྱིས། །སྲོག་ཆགས་དག་ནི་ཐམས་ཅད་ཀྱི། །ཞེས་པ་ནི་མདོ་སྡེ་འདི་ཉན་ཅིང་ཉམས་སུ་ལེན་པའི་གཟི་བྱིན་གྱིས་ཉོན་མོངས་པའི་རྣམ་པ་དང་། སྡུག་བསྔལ་གྱི་བྱེ་བྲག་ཐམས་ཅད་ཞི་བར་བྱེད་པའོ། །མི་བཟད་པ་ཡི་ནད་རྣམས་ཀྱང་། །དེ་དག་
ཐམས་ཅད་ཞི་བར་བལྟ། །ཞེས་པ་ནི། ཁམས་གསུམ་གྱི་སེམས་ཅན་ཐམས་ཅད་ཀྱི་ཉོན་མོངས་པའི་བག་ཆགས་མི་བཟད་པ་རྣམས་དང་། ནད་ཀྱི་རང་བཞིན་རྣམས་ཞི་བར་བྱ་བའི་ཕྱིར་རོ། །དེ་ལྟར་ནད་ཞི་ནས། དེའི་འོག་ཏུ་བདེ་བ་ཐོབ་པའི་རྟགས་སྟོན་ཏེ། ཚེ་དང་བསོད་ནམས་
འཕེལ་བར་འགྱུར། །སྡིག་པ་ཀུན་ལས་རྣམ་པར་གྲོལ། །ཞེས་པ་ནི། སེམས་ཅན་ཐམས་ཅད་ཀྱི་ཚེ་ཟད་པའམ་འཆི་བ་ལ་སོགས་པ་བཟློག་པ་སྟེ། མདོ་སྡེ་འདི་མཉན་པའམ་བསམ་པའམ་བསྒོམས་པས་ཚེ་དང་བསོད་ནམས་ཚད་མེད་པ་འཕེལ་བར་འགྱུར་རོ། །དེ་ཡན་ཆད་
ཀྱིས་ཆོ་གའི་ཐབས་དང་ཕན་ཡོན་བཤད་དོ།    །ད་ནི་བུམ་པའི་ཆོ་ག་དང་ཆ་རྐྱེན་སྟོན་ཏེ། ནོར་བུ་ཡུངས་ཀར་དཱུར་བ་དང་། །ཞེས་པ་ནི་ནོར་བུ་ནི་མུ་ཏིག་དང་གཟི་མཆོང་དང་བྱི་རུའོ། །ཡུངས་ཀར་ནི་འབྲུ་སྣ་ལྔའི་གཙོ་བོ་སྟེ། ནས་དང་། སོ་བ་དང་། ཏིལ་དང་། མོན་སྲན་ནོ། །དཱུར་བ་

71-1-193a

ནི་ཁ་རྒྱན་ནོ། །དེའི་ཁོངས་སུ་བྱ་ཀྲི་སེང་ཀྲི་ཙནྡན་ལ་སོགས་པ་སྟེ་ཤིང་ཡལ་ག་ཅན་ནོ། །རིན་ཆེན་རྨ་མེད་ཙནྡན་བཅས། །ཞེས་པ་ནི་རིན་པོ་ཆེ་ལྔ་དང་། སྙིང་པོ་ལྔ་སྟོན་ཏེ། རིན་ཆེན་ལྔ་ནི་གསེར་དང་། ཤེལ་དང་། ཨིནྡྲ་ནཱི་ལ་དང་བྱི་རུའོ། །རྨ་མེད་པ་ནི་དེ་རྣམས་སྐྱོན་
མེད་པ་ལ་བྱའོ། །ཙནྡན་ནི་གླ་རྩི་དང་གུར་གུམ་དང་། སྤོས་དང་། ཨ་ག་རུ་དང་། ལྔ་ནི་དྲི་ལྔའོ། །ཤེལ་དང་རྡོ་རྗེ་མེ་ཏོག་དང་། །ཞེས་པ་ནི་སྙིང་པོ་སྟེ། མེ་ཤེལ་དང་ཆུ་ཤེལ་དང་། རྩི་ཐོག་གི་སྙིང་པོ་མར་དང་། ཤིང་ཐོག་གི་སྙིང་བོ་བུ་རམ་དང་། མེ་ཏོག་གི་སྙིང་པོ་སྦྲང་རྩི་སྟེ་སྙིང་པོ་ལྔའོ། །
རྡོ་རྗེ་མེ་ཏོག་ནི་བུམ་པའི་གདན་ཏེ། དབྱར་མེ་ཏོག་གི་དཀྱིལ་འཁོར་བྱ། དགུན་ཚོན་སྣ་ལྔའི་དཀྱིལ་འཁོར་བྱ། ཡང་ན་འབྲུ་ལ་བྱའོ། །ཆུ་ཡིས་གསེར་རམ་ཡང་ན་ནི། །དངུལ་གྱི་བུམ་པ་དག་ཀྱང་རུང་། །གཙང་མའི་གོས་ཀྱིས་དཀྲི་ཞིང་དགང་། །ཞེས་པ་ནི་བུམ་པའི་རྒྱུ་སྟོན་ཏེ། རྒྱལ་
པོ་ལ་གསེར་གྱི་བུམ་པ། བློན་པོ་ལ་དངུལ་གྱི་བུམ་པ་དག་ཀྱང་ཞེས་པ་མང་པོ་སྟེ། དམངས་ལ་ཟངས་སམ་ས་ལས་བྱ། །གཙང་མའི་གོས་ནི་རས་ཁ་ཚར་མ་ཉམས་པ་ལ་བྱའོ།    །ལན་གྲངས་ཉི་ཤུ་རྩ་གཅིག་གམ། །ཡང་ན་ལན་གྲངས་བརྒྱ་རྩ་བརྒྱད། །རྡོ་རྗེ་རྣམ་འཇོམས་
བཟླས་ནས་ནི། །ཞེས་པ་གྲངས་སྟོན་ཏེ། རྒྱལ་པོ་དང་བློན་པོ་ལ་བརྒྱ་རྩ་བརྒྱད་དོ། །བློན་པོ་ཐ་མའམ་དམངས་ལ་ཉི་ཤུ་རྩ་གཅིག་བཟླས་སོ། །དམངས་ཐ་མ་ལ་བདུན་བཟླས་སོ། །རྒྱལ་པོ་རྟག་ཏུ་ཁྲུས་གྱིས་ཤིག །ཅེས་པ་ནི་རྒྱལ་པོ་སྟོབས་ཅན་སྙིང་པོ་ལ་བྱའོ། །རྒྱལ་པོ་སྔོན་ལ་
སྨོས་པ་ཅིའི་ཕྱིར་ཞེ་ན། བསོད་ནམས་ཅན་གྱིས་སྔོན་ལ་བྱས་ན་ཐམས་ཅད་ལ་བདེ་བའི་ཕྱིར་རོ། །འབངས་ནི་རྒྱལ་པོའི་འཁོར་ཡིན་ཏེ་དོན་གྱིས་ཤེས་པར་བྱའོ།།      །།རྡོ་རྗེ་རྣམ་པར་འཇོམས་པའི་དོན་རྣམ་པར་ཕྱེ་སྟེ་བཤད་པ། རྒྱ་གར་གྱི་སློབ་དཔོན་ཆེན་པོ་བཱི་མ་ལ་མི་ཏྲས་མཛད་པ་
རྫོགས་སོ།།      །། ༄༅༅།  །རྒྱ་གར་སྐད་དུ། ཨཱརྱ་བཛྲ་བི་དཱ་ར་ཎ་ནཱ་མ་དྷཱ་ར་ཎི་བྱཱ་ཁྱཱ་ན་བྲྀ་ཏྟི་ཊཱི་ཀཱ། བོད་སྐད་དུ། འཕགས་པ་རྡོ་རྗེ་རྣམ་པར་འཇོམས་པའི་གཟུངས་རྣམ་པར་བཤད་པའི་རྒྱ་ཆེར་འགྲེལ་པ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །གཉིས་ཀ་རྒྱུད་

71-1-193b

ཀྱི་མན་ངག་སྙིང་པོའི་དོན། །རྣམ་པར་བཤད་པའི་དོན་འདི་གསལ་བའི་ཕྱིར། །འགྲོ་དོན་རྣམ་པར་མཛད་ལ་ཕྱག་འཚལ་ཏེ། །འདི་ཡི་རྣམ་བཤད་འགྲེལ་པ་བྱ་བར་འདོད། །འདི་དོན་གླེང་གཞི་སྒྲུབ་ཐབས་བཤད་པ་རྣམས། །སྟོན་པའི་རང་བཞིན་འདུལ་དབང་བསྟན་པ་སྟེ། །མདོར་
བསྡུས་དཀྱིལ་འཁོར་སྒྲུབ་ཐབས་ཁྱད་པར་དག །རབ་ཏུ་བསྡུས་ནས་བསྟན་པའི་དགོས་པ་ཡིན། །འདི་བརྩམ་པར་བྱ་བའི་དོན་བཤད་པར་དམ་བཅའ་བ་བསྟན་པ་ནི། རྒྱལ་བ་ཀུན་གྱི་གསང་བའི་མཛོད་འཛིན་པ། །རྒྱུད་ཀྱི་དོན་བྱུང་སྟོན་པའི་ངོ་བོ་ལ། །སྒོ་གསུམ་དང་བས་བཏུད་དེ་ཕྱག་
འཚལ་ཏེ། །མདོ་ཡི་རྣམ་བཤད་བདག་གིས་བྱ་བར་འདོད། །ཅེས་སྨོས་པ་ནི་ཐུགས་ཀྱི་རྒྱུད་འདི་གསུངས་པའི་སྟོན་པ་དེ་ལ་བརྩམས་པ་མཐར་ཕྱིན་པར་བྱ་བའི་ཕྱིར་ཕྱག་འཚལ་ཞིང་བསྟོད་ནས་བཤད་པར་དམ་བཅའ་བར་བྱ་བའི་ཕྱིར་སྨོས་པ་དོན་དགྲོལ་བའི་མན་ངག་བསྟན་པའོ། །གོང་
འོག་གི་མཚམས་སྦྱར་བ་ནི། དེ་ལ་དང་པོར་རྒྱུད་ཀྱི་དོན་ལ་མོས་པ་དང་ཞེས་པ་དང་། གོ་རིམས་ལ་འཇུག་པའི་ཕྱིར་རོ་ཞེས་པས་ནི་ལས་དང་པོ་པ་རྡོ་རྗེ་རྣམ་པར་འཇོམས་པ་ལ་རབ་ཏུ་མོས་པ་རྣམས་ལ་རིགས་པས་ཕུན་སུམ་ཚོགས་པ་ལྔ་དང་། སྟོན་པའི་རང་བཞིན་དཀྱིལ་འཁོར་
དང་། སྒྲུབ་ཐབས་སུ་བསྟན་པའི་ཐབས་ཀྱི་དོན་གྱི་གོ་རིམས་ཀྱི་ཁྱད་པར་ཤེས་ནས་སྒྲུབ་པའི་ཕྱིར་སྨོས་སོ། །གང་ཡིན་པ་བསྟན་པའི་དགོངས་པ་ནི། དེ་ལ་དང་པོར་མདོའི་མཚན་གྱི་དོན་ཞེས་པ་ནི་དབང་པོ་རབ་མགོ་སྨོས་པས་གོ་བའི་དབང་དུ་བསྟན་ཏོ། །དེ་ལ་རྡོ་རྗེ་ནི་ཡང་དག་པའི་
ཡེ་ཤེས་ཀྱི་ཚིག་བླ་དྭགས་ཏེ་ཞེས་པ་དང་། དངོས་པོ་དང་བྲལ་བའི་དོན་ཏོ་ཞེས་པའི་བར་ནི་དོན་ལས་མཚན་དུ་བཏགས་པས་ན་ཆོས་ཉིད་རྟོགས་པ་ནི་ཡེ་ཤེས་ཏེ། ཡེ་ཤེས་ཀྱི་ཚིག་བླ་དྭགས་སུ་རྡོ་རྗེ་བསྟན་ལ། དེས་ཕྱི་རོལ་གྱི་མུ་སྟེགས་དང་། ཉན་ཐོས་རྣམས་སྐྱོན་དུ་བསྟན་ནས་
མཐའ་དང་བྲལ་བའི་རྟགས་སོ། །དེ་ནི་མི་མཐུན་པའི་རྣམ་པར་ནི་རྒྱུ་མེད་པ་དང་སྨོས་པའི་ཕྱིར་རོ་ཞེས་པའི་བར་གྱིས་བསྟན་ཏེ། མུ་སྟེགས་རྒྱུ་མེད་པ་དང་། དབང་ཕྱུག་ཆེན་པོ་རྒྱུ་དང་རྐྱེན་གྱིས་བསྐྱེད་པ་དང་། མུ་སྟེགས་རྟག་པར་ལྟ་བ་དང་། ཉན་ཐོས་ཀྱིས་མི་རྟོག་པར་ལྟ་བ་དང་། 

71-1-194a

སོ་སོའི་སྐྱེ་བོས་བདེ་བར་ལྟ་བ་དང་། ཉན་ཐོས་ཀྱིས་སྡུག་བསྔལ་བར་ལྟ་བའི་མཐའ་སེལ་བའི་དོན་དུ་བསྟན་ཏོ། །དེའི་གཉེན་པོ་དོན་དུ་བསྟན་པ་ནི་འཇོམས་པ་ཞེས་བསྟན་ཏོ། །རྒྱུད་ཀྱི་སྟོན་པའི་ཡེ་ཤེས་ཀྱིས་འཇོམས་པའི་རྟགས་དང་། དེ་སྒྲུབ་པའི་ཐབས་དཀྱིལ་
འཁོར་དང་། སྒྲུབ་ཐབས་ཀྱི་ཁྱད་པར་གྱིས་འཇོམས་པའི་ཕྱིར་རོ། །གཉེན་པོ་དང་མི་མཐུན་པས་གཟུངས་ནི་མི་འདའ་བའི་ཕྱིར་དང་། གཉིས་སུ་མེད་པའི་དོན་ཞེས་པ་ནི། གཉེན་པོ་དོན་ལས་མི་འདའ་བའི་ཕྱིར་དང་། གཉེན་པོ་དང་མི་མཐུན་པ་གཉིས་སུ་མེད་པར་བསྒོམ་པའི་དོན་
ཏོ། །དགོས་འབྲེལ་བསྟེན་པ་ནི། དེ་ལྟར་མདོའི་དགོས་ཆེད་རྣམས་བསྟན་ནས། དེའི་དོན་རྣམས་དགོས་པ་དང་འབྲེལ་པའི་དོན་སྟོན་ཏེ་ཞེས་པ་ནི། དགོས་པ་རྒྱུད་དང་འབྲེལ་པ་ཕུན་སུམ་ཚོགས་པའི་སྒོ་ནས་དཀྱིལ་འཁོར་དང་། སྒྲུབ་ཐབས་དང་། དབང་དང་། དམ་ཚིག་དང་། ལྟ་སྤྱོད་
དུ་འབྲེལ་པའི་དོན་དུ་སྨོས་སོ། །ཕུན་སུམ་ཚོགས་པའི་དགོས་པ་ནི་དེ་ལས་དགོས་པ་མི་འགལ་བར་སྟོན་པའི་སྟོན་པ་དང་། གང་དུ་བཤད་པའི་གནས་དང་། ཡོངས་སུ་དག་པའི་འཁོར་དང་། ཐ་ཚིག་ཅེས་པའི་བར་ནི་རྒྱུད་དང་མདོ་སྡེ་ཐམས་ཅད་ལུང་ཡིན་པས་སྔགས་དང་། ཕ་རོལ་ཏུ་
ཕྱིན་པའི་དོན་བྱུང་བ་ནི་ཕུན་སུམ་ཚོགས་པ་རྣམ་པ་ལྔའི་གོ་ནས་རབ་ཏུ་སྨོས་པའི་ཕྱིར་རོ། །དགོས་པ་ཕུན་སུམ་ཚོགས་པའི་སྒོ་ནས་ནི་དེ་ལ་འབྲེལ་བ་ནི་ཞེས་པས་བསྟན་ཏེ། དོན་ནི་ཕུན་སུམ་ཚོགས་པ་རྣམ་པ་དྲུག་དང་ལྔའི་སྒོ་ནས་རྒྱུད་ཀྱི་དོན་གཏན་ལ་འབེབས་པའི་ཕྱིར་རོ། །དོན་ཤེས་པར་
བྱ་བའི་དངོས་པོ་ནི། དེའི་འོག་ཏུ་ཇི་ལྟར་ཡོངས་སུ་ཤེས་པར་བྱ་བའི་དང་ཞེས་པ་ནས་ཕྱིར་རོ་ཞེས་པས་བསྟན་ཏེ། ཕུན་སུམ་ཚོགས་པ་དང་རྒྱུད་བྲེལ་པ་དང་། རྒྱུད་དང་དཀྱིལ་འཁོར། དཀྱིལ་འཁོར་དང་སྒྲུབ་ཐབས་སོ། །འདི་བསྡུས་པའི་དོན་ནི་དེ་ལྟར་དང་། སྨོས་པའི་ཕྱིར་རོ། །ཞེས་
པའི་བར་ཏེ་དགོས་འབྲེལ་གྱི་སྒོ་ནས་བསྟན་པ་ཡང་གོ་རིམས་དང་། བསྡུས་པའི་དོན་དུ་བསྟན་པ་བཅོམ་ལྡན་འདས་ཀྱིས་འདའ་ཀར་ཀུན་དགའ་བོ་ལ་གསུངས་པའོ།    །སྟོན་པ་སངས་རྒྱས་བཅོམ་ལྡན་འདས་དང་། རབ་ཏུ་ཐོས་པའི་ཕྱིར་ཞེས་པའི་བར་ནི་བཅོམ་ལྡན་འདས་སངས་རྒྱས་པ་

71-1-194b

ནི་རྡོ་རྗེ་ལྟ་བུ་སྟེ། བདུད་རྣམ་བཞི་བྱང་ཆུབ་ཀྱི་སྙིང་པོ་ག་ལ་བར་བཏུལ་ནས་གསུངས་པའི་དོན་དུ་བསྟན་པའི་ཐ་ཚིག་གོ། །དེ་ནི་འདི་སྐད་བདག་གིས་ཐོས་པ་དུས་གཅིག་ན་དང་ཞེས་བྱའོ། ཞེས་པའི་བར་ནི་སྟོན་པ་སངས་རྒྱས་བཅོམ་ལྡན་འདས་ནི་གསུང་ངག་ལ་མངའ་བརྙེས་པ་ན། གདུལ་
བྱ་སོ་སོའི་སྐད་དུ་ཆོས་རྣམས་གོ་བས་སྟོན་པ་ཐུགས་རྗེ་ཆེ་བ་དང་། སྡུད་པ་ཐོས་པ་ཆེ་བས་དོན་འདི་ལྡེམ་དགོངས་སུ་བསྟན་ཏོ། །བཅོམ་ལྡན་འདས་རྡོ་རྗེ་ལ་བཞུགས་ཏེ་དང་། ཆོས་སྟོན་པའི་ཚུལ་དུ་བཞུགས་སོ། ཞེས་པའི་བར་ནི་དེ་བཞིན་གཤེགས་པ་རྡོ་རྗེ་གདན་དུ་མངོན་པར་སངས་རྒྱས་པའི་དུས་དེར་བྱང་ཆུབ་ཀྱི་སྙིང་པོ་
ག་ལ་བ་དེར་སངས་རྒྱས་ནས་བདུད་འདུལ་བའི་དུས་སུ་གཉིས་ཀ་རྒྱུད་ཐུགས་ཀྱི་དོན་འདི་གསུངས་པས་སྨོས་པའི་ཕྱིར་རོ།    །དེའི་དུས་གསུམ་གྱི་སངས་རྒྱས་ཐམས་ཅད་ཀྱི་ཕྲིན་ལས་པ་ནི། ད་ནི་བྱིན་གྱི་རླབས་ཀྱི་སྟོན་པ་སྟེ། དུས་གསུམ་གྱི་སངས་རྒྱས་པ་དང་། སྙོམས་པར་ཞུགས་པའི་ཕྱིར་རོ་
ཞེས་པའི་བར་ནི་སྔོན་འདས་པའི་བསྐལ་པ་གྲངས་མེད་པའི་དུས་སུ་དེ་བཞིན་གཤེགས་པ་རིན་ཆེན་མང་ཞེས་བྱ་བ་འཇིག་རྟེན་དུ་བྱུང་ངོ་། །དུས་དེའི་ཚེ་ན་རྒྱལ་པོ་ཆེན་པོ་དཔའ་བོ་ཞེས་བྱ་བ་གླིང་བཞི་ལ་དབང་བྱེད་པར་སྲས་རྒྱལ་བུ་སྟོང་དུ་ཚང་བ་བྱུང་བས། ཀུན་བྱང་ཆུབ་ཏུ་སེམས་བསྐྱེད་པའི་
ཐ་མ་ཕྱག་ན་རྡོ་རྗེ་འདི་ཡིན་པས་ན། དུས་དེར་སྨོན་ལམ་ཆེན་པོ་རྣམས་ཀྱིས་བསྟན་པ་ལ་གནོད་པའི་བདུད་འདུལ་ཞིང་། སྐུ་དང་གསུང་དང་ཐུགས་གསང་བའི་མཛོད་འཛིན་པས་སྨོས་ཏེ། འདི་ཡང་བྱང་ཆུབ་ཀྱི་སྙིང་པོ་ལ་བདུད་བཏུལ་ནས་ཆོས་སྟོན་པའི་ཚེ་མངའ་བདག་ཏུ་དབང་བསྐུར་བས་
དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ནས་དབང་བསྐུར་བའི་དོན་ཏོ། །ལུས་ཐམས་ཅད་རྡོ་རྗེར་བྱིན་གྱིས་བརླབས་ནས་དང་། བྱིན་གྱིས་བརླབས་པའི་ཕྱིར་རོ། །ཞེས་པའི་བར་ནི་ལག་ན་རྡོ་རྗེས་སྔོན་གྱི་བདག་གི་སྨོན་ལམ་གྱིས་མི་མཇེད་ཀྱི་འཇིག་རྟེན་གྱི་ཁམས་འདི་སངས་
རྒྱས་ཤཱཀྱ་ཐུབ་པའི་ལས་རྣམས་བྱ་བའི་ཕྱིར་སྨོས་སོ། །རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པའི་བར་ནི་བཅོམ་ལྡན་འདས་དང་པོ་སངས་རྒྱས་པ་ཡང་རྡོ་རྗེ་ལྟ་བུ་སྟེ། དེ་དང་མཐུན་པའི་སྒོ་ནས་ལག་ན་རྡོ་རྗེས་ཀྱང་བདུད་འདུལ་བ། ཕྱི་རབས་ཀྱི་སེམས་ཅན་ལ་ཕན་པའི་ཐབས་

71-1-195a

བསྟན་པའི་ཕྱིར་རོ། །དེ་ནས་ལག་ན་རྡོ་རྗེ་སངས་རྒྱས་ཀྱི་མཐུ་དང་། ཐོགས་པ་མེད་པའི་ཡེ་ཤེས་ཀྱི་ཚིག་སྨྲ་བའི་ཕྱིར་ཞེས་པའི་བར་ནི་ལག་ན་རྡོ་རྗེ་དེ་སྔོན་གྱི་སྨོན་ལམ་དེས་ནི་རིགས་ལྔ་ལ་སོགས་པའི་ཕྱོགས་བཅུའི་སངས་རྒྱས་བཅོམ་ལྡན་འདས་དེ་དག་གི་མཐུས་
གཉིས་སུ་མེད་པའི་དབང་བསྐུར་ནས་བྱིན་གྱི་རླབས་བསྐྱེད་པའི་ཕྱིར་རོ། །སྡུད་པ་ལས་ཀྱང་། འཛམ་བུའི་གླིང་འདིར་ཆུ་ཀླུང་ཇི་སྙེད་ཅིག་འབབ་ཅིང་། ཞེས་པ་ལྟ་བུའོ། །སངས་རྒྱས་ཀྱི་བྱིན་གྱི་བརླབས་དང་། སྤོབས་པ་བསྐྱེད་པའི་ཕྱིར་རོ་ཞེས་པའི་བར་ནི་ལག་ན་རྡོ་རྗེ་སངས་རྒྱས་ཀྱི་བྱིན་གྱིས་བརླབས་
ནས་འཇིག་རྟེན་གྱི་ཁམས་སངས་རྒྱས་ཀྱི་ཞིང་ཐམས་ཅད་དུ་ལག་ན་རྡོ་རྗེ་ཞེས་ཀུན་དུ་གྲགས་པས་མཐུ་བོ་ཆེ་ཐམས་ཅད་དབང་དུ་གྱུར་པའི་དོན་ཏོ། །བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་ཀྱིས་ཞེས་པ་དང་། མཐུས་སྟོང་པའི་ཕྱིར་རོ་ཞེས་པའི་བར་ནི་ཕྱོགས་བཅུའི་སངས་
རྒྱས་ཀྱི་མཐུས་ལག་ན་རྡོ་རྗེ་དེ་སངས་རྒྱས་ཀྱི་ཞིང་གཞན་གྱི་བྱང་ཆུབ་སེམས་དཔའ་ཡང་། རང་རང་གི་སངས་རྒྱས་ལ་ཞུས་ནས། བདག་ཅག་ཀྱང་མི་མཇེད་ཀྱི་འཇིག་རྟེན་གྱི་ཁམས་ཀྱི་སངས་རྒྱས་ཤཱཀྱ་ཐུབ་པའི་འཁོར་ལག་ན་རྡོ་རྗེ་ལྟ་བར་མཆི་ཞེས་ཞུས་ནས་འདིར་བྱོན་ཏེ། བྱིན་གྱི་
རླབས་དང་མཐུ་སྔོན་གྱི་སྨོན་ལམ་དང་ལས་མཐུན་པས་བྱིན་གྱིས་རློབ་པའི་ཕྱིར་གསུངས་སོ།    །རྡོ་རྗེ་ཁྲོ་བོ་ལས་འབྱུང་བ་དང་། ཕྱིར་རོ་ཞེས་པའི་བར་ནི་དེ་ལྟར་ལག་ན་རྡོ་རྗེས་རྣམ་པར་འཇོམས་པའི་རྒྱུད་ཀྱི་དོན་འདི་དབྱུང་བའི་ཕྱིར། ཡེ་ཤེས་བཞི་དང་། ཕྲིན་ལས་རྣམ་པ་བཞི་དང་། ཁྲོ་བོ་
ཕྱོགས་བཞི་དང་། མཚམས་བཞི་དང་། ཚད་མེད་པ་བཞི་ལས་སྒོ་བ་བཞི་བྱུང་ནས་འཇིག་རྟེན་གྱི་ཁམས་ཐམས་ཅད་དཀྱིལ་འཁོར་གྱི་ལྷ་དེ་དག་གི་སྤྲུལ་པས་རབ་ཏུ་བཀང་ནས་བདུད་སྲིན་པོ་འདུལ་བའི་དོན་ཏོ། །རྡོ་རྗེ་སྙིང་པོས་སྨྲས་ཏེ་དང་གསུངས་པའི་ཕྱིར་རོ་ཞེས་པའི་བར་ནི་ལག་ན་
རྡོ་རྗེ་ལུས་སངས་རྒྱས་ཀྱི་སྐུ་རྡོ་རྗེ་ལྟ་བུ་དང་། སེམས་སངས་རྒྱས་ཀྱི་ཐུགས་སྙིང་པོ་བྱང་ཆུབ་སེམས་དང་ལྡན་པའི་སྒོ་ནས་སེམས་ཅན་ཐམས་ཅད་ལ་ཕན་པའི་ཕྱིར། དེ་བཞིན་གཤེགས་པའི་སྐུ་ལ་བརྟེན་ཅིང་ཐུགས་ཉིད་ལ་དགོངས་ནས་དོན་མ་ལུས་པར་སྨྲ་བའི་ཕྱིར་རོ། །ཤར་ཕྱོགས་ཀྱི་

71-1-195b

ཧཱུཾ་ཀ་རའི་དོན་སྟོན་ཏེ། མི་ཆོད་པ། མི་ཤིགས་པ། བརྟེན་པ་ཞེས་པ་དང་། ཕྲིན་ལས་རྣམ་བཞིའི་ལས་བྱས་པས་འགྲུབ་པོ་ཞེས་པའི་བར་ནི། ཉན་ཐོས་ཀྱི་ཡུལ་རྡུལ་ཕྲ་རབ་འདུས་པ་ལས་ཡུལ་དུ་གྲུབ་པར་འདོད་དེ། ཐུགས་ཀྱི་ཁྲོ་བོ་དེས་འཇོམས་པས་གཟུང་བ་བཅོམ་སྟེ། གཤིན་
རྗེ་གཤེད་དུ་བསྟན་ཏོ། །ནང་གི་འཛིན་སེམས་མུ་སྟེགས་ཀྱིས་བདག་ཏུ་བརྟགས་པ་དེ་འཇོམས་པས་ན་ཐོ་བ་ཡེ་ཤེས་ཀྱི་མེ་དབལ་ཅན་འཛིན། དེ་ལྟར་གཟུང་འཛིན་དང་བྲལ་བའི་བྱང་ཆུབ་སེམས་དཀར་པོས་འགྲོ་བ་འདུལ་བར་བྱེད་དོ། །དེ་རྣལ་འབྱོར་པས་དཀྱིལ་འཁོར་དུ་སྒྲུབ་ཐབས་ཚུལ་
བཞིན་དུ་བྱས་ནས་བསྒྲུབས་ན་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་དངོས་གྲུབ་ཡ་མཚན་ཅན་དག་སུས་ཀྱང་བར་མི་ཆོད་པར་ཐོབ་སྟེ། དེ་རྣམ་པར་ཐར་པའི་སྒོ་གསུམ་ལ་གནས་པས་མཚན་མ་རྣམས་ཀྱིས་མི་ཤིགས་ཏེ། བསྐལ་པ་གྲངས་མེད་པར་གསུང་བདེན་པའི་
འབྲས་བུ་ཚད་མེད་པའི་ཡོན་ཏན་དང་ལྡན་པས་འགྲོ་བ་ལ་ཆོས་སྟོན་པའི་ཤུགས་དང་ལྡན་པའོ། །འདི་ནི་ཁྲོ་བོ་ཐམས་ཅད་ཀྱི་ངོ་བོར་གྱུར་པས་ན། དེ་བཞིན་གཤེགས་པ་ཐམས་ཅད་ཀྱི་སྙིང་རྗེ་ཆེན་པོ་དང་ལྡན་པས་མི་དགེ་བ་ནི་སྤངས་པའི་དངོས་གྲུབ་རྣམས་རབ་ཏུ་འགྲུབ་པར་བྱེད་པས་མི་
ཤིགས་པས། དེ་དཔའ་བར་འགྲོ་བ་ལ་སོགས་ཏེ། ཏིང་ངེ་འཛིན་གྱི་སྒོའི་རྣམ་གྲངས་འབུམ་ཕྲག་ལ་མངའ་བརྙེས་པས་ན་ཅིས་ཀྱང་བར་དུ་གཅོད་པ་དང་བྲལ་ཏེ། ཕྱོགས་བཅུའི་དེ་བཞིན་གཤེགས་པའི་རང་བཞིན་དུ་གྱུར་པས་ནི་སྐྱེ་ཤི་དང་བྲལ་བའི་སྐུ་ཚེ་དང་ལྡན་པས་མི་ཤིགས་པ་སྟེ། 
བདེན་པའི་ཚིག་ལ་ཐོགས་པ་མེད་པས་འགྲོ་བའི་རྒྱུད་སྒྲོལ་བའི་བདེན་པའི་ཆོས་རྣམས་སྟོན་ཏེ། དེའི་སྒྲུབ་ཐབས་རྣམས་སླ་བས་མ་བརྗོད་དོ། །ཧཱུཾ་ཀ་རའི་དོན་རྒྱ་ཆེར་བཤད་ཟིན་ཏོ།།      །།ད་ནི་ལྷོ་ཕྱོགས་ཀྱི་ཁྲོ་བོ་ཁམས་གསུམ་རྣམ་པར་རྒྱལ་བའི་དོན་རྒྱ་ཆེར་སྟོན་ཏེ། སྲ་བ་བརྟན་པ་ཐམས་
ཅད་དུ་ཐོགས་པ་མེད་པ་ཞེས་པ་དང་ཐོགས་པ་མེད་པའི་དངོས་གྲུབ་ཐོབ་བོ་ཞེས་པའི་བར་ནི། དེ་བཞིན་གཤེགས་པའི་ཏིང་ངེ་འཛིན་ཚད་མེད་པའི་ཡོན་ཏན་གྱིས་འདོད་ཆགས་ལ་སོགས་པའི་ཉོན་མོངས་པས་འཁོར་བར་སྐྱེ་བར་བྱེད་པ་ལས་རྒྱལ་བའི་རྟགས་སུ་སྲིད་པའི་འཁོར་ལོ་

71-1-196a

བསྣམས་ཏེ། རྣམ་པར་ཐར་པའི་སྒོ་གསུམ་དང་ལྡན་པའི་ངང་དུ་འདུས་མ་བྱས་པས་ན་སྲ་བར་མཛད། དེ་སྙིང་རྗེ་ཚད་མེད་པའི་བྱང་ཆུབ་སེམས་མི་འགྱུར་བའི་སྒོ་ནས་བརྟན་པོར་མཛད་དོ། །སེམས་ཅན་ཐམས་ཅད་ཐུགས་རྗེས་འདུལ་ཞིང་། ཐབས་མཁས་པའི་བརྩོན་
འགྲུས་འགྲོ་བའི་དོན་མ་ལུས་པར་མཛད་པ་དེ་ཕྲིན་ལས་ཅི་ལ་ཡང་ཐོགས་པ་མེད་པས་བདེན་པའི་དངོས་གྲུབ་རྣམས་རྣལ་འབྱོར་པ་ལ་རབ་ཏུ་སྟེར་རོ། །དགེ་བའི་བར་དུ་གཅོད་པ་གཞན་འཕྲུལ་དབང་བྱེད་ལྷའི་རྒྱལ་པོའི་བདུད་སྡིག་ཅན་དང་། གནོད་སྦྱིན་དང་སྲིན་པོ་རྣམས་འདུལ་བས་ན། 
ཕ་རོལ་ཏུ་ཕྱིན་པའི་གོ་སྲ་བ་སྦྱིན་ཞིང་། ཐོགས་པ་མེད་པས་བསམ་པ་བརྟན་པའི་གོ་ནས་འགྲོ་བ་མ་ལུས་པ་སྒྲོལ་བ་ལ་ཐོགས་པ་མེད་པའོ། །ཁམས་གསུམ་ཐམས་ཅད་ལས་རྣམ་པར་རྒྱལ་བའི་དོན་རྒྱ་ཆེར་བཤད་ཟིན་ཏོ།།      །།ད་ནི་ནུབ་ཕྱོགས་ཀྱི་ཁྲོ་བོ་ཧ་ཡ་གྲི་བའི་དོན་སྟོན་ཏེ། གསུང་
གི་སྒོ་ནས་འགྲོ་བའི་ཕྲིན་ལས་སྣ་ཚོགས་པ་མངའ་བས་ན་ཐམས་ཅད་དུ་མ་ཕམ་པ། སེམས་ཅན་ཐམས་ཅད་སྐྲག་པར་བྱེད་པ། སེམས་ཅན་ཐམས་ཅད་འཇིལ་བར་བྱེད་པ་དང་། ཞེས་པ་དང་། བཀྲ་ཤིས་པར་འགྱུར་རོ་ཞེས་པའི་བར་གྱིས་ནི་འདོད་ཁམས་དང་། གཟུགས་ཁམས་དང་། 
གཟུགས་མེད་པའི་ཁམས་རྣམས་ཐབས་མཁས་པའི་སྤྲུལ་པས་ཐམས་ཅད་མ་ཕམ་པ། བདུད་ཀྱི་རྒྱལ་པོ་དེད་དཔོན་ནག་པོ་དང་། བགེགས་ཀྱི་རྒྱལ་པོ་བི་ནཱ་ཡ་ཀ་ལ་སོགས་པ་འཇིག་རྟེན་ན་མཐུ་ཆེ་བ་རྣམས་དངངས་ཤིང་སྐྲག་པར་མཛད་ཅིང་། ཉོན་མོངས་པའི་འདོད་ཆགས་དང་། ཞེ་སྡང་
དང་། གཏི་མུག་དང་། ང་རྒྱལ་དང་། ཕྲག་དོག་དག་གིས་ཁམས་གསུམ་དག་ཏུ་ཉོན་མོངས་པ་རྣམས་འཇིལ་ཞིང་། གསུང་མ་ཆགས་ཤིང་ཐུགས་རྗེས་འགྲོ་བ་ལ་རོལ་པའི་རྟགས་སུ་པདྨ་བསྣམས་སོ། །ཐུགས་རྗེ་ཐབས་མཁས་པས་སྐུ་བསྐལ་པའི་འོད་ཟེར་དམར་པོ་འཕྲོ་བ་མཚན་མའི་
རྣམ་པར་རྟོག་པ་རྣམས་དང་བྲལ་བས་ཆེ་བའི་ཡོན་ཏན་ཚད་མེད་པ་དཔག་ཏུ་མེད་པའི་ཡོན་ཏན་དང་ལྡན་པས་འགྲོ་བ་ལ་ཕན་འདོགས་པས་གཞུང་ནས་འབྱུང་བ་བཞིན་དུ་བསྒྲུབས་ན། ཡོན་ཏན་ཚད་མེད་པའི་བཀྲ་ཤིས་པར་འགྱུར་རོ། །ཁྲོ་བོ་རྒྱལ་པོ་རྟ་མཆོག་དཔལ་གྱི་དོན་རྒྱ་ཆེར་བཤད་ཟིན་

71-1-196b

ཏོ།།      །།ད་ནི་བྱང་ཕྱོགས་ཀྱི་ཁྲོ་བོ་བདུད་རྩི་འཁྱིལ་པའི་དོན་སྟོན་ཏེ། ཕྲིན་ལས་རྒྱ་མཚོས་འགྲོ་བ་འདུལ་བའི་ཕྲིན་ལས་མཛད་དེ། རིག་སྔགས་ཐམས་ཅད་གཅོད་པར་བྱེད་པ། རིག་སྔགས་ཐམས་ཅད་གནོན་པར་བྱེད་པ། ལས་ཐམས་ཅད་འཇོམས་པར་བྱེད་པ་ཞེས་པ་དང་། དམོད་པའི་བྱེ་
བྲག་ཐམས་ཅད་ལས་ཐར་བར་འགྱུར་རོ་ཞེས་པའི་བར་ནི། བདུད་དང་། སྲིན་པོ་དང་། གནོད་སྦྱིན་དང་། ཤ་ཟ་ལ་སོགས་པ་ཕས་ཀྱི་རྒོལ་བས་སེམས་ཅན་ལ་གནོད་པའི་ཐབས་དང་། དྲང་སྲོང་ནག་པོ་དང་། སྣག་ཚ་དང་། མིས་སྦྱིན་ལ་སོགས་པའི་དམོད་པ་རྣམས་ཀྱིས། སེམས་
ཅན་གྱི་སེམས་ཕྱིན་ཅི་ལོག་ཏུ་བྱེད་པ་རྣམས་ལ། སྡུག་བསྔལ་བ་གསུམ་དང་བརྒྱད་ཀྱིས་མནར་བ་རྣམས། དེ་བཞིན་གཤེགས་པའི་ཕྲིན་ལས་བྱ་བ་ནན་ཏན་གྱི་ཡེ་ཤེས་ཀྱིས་གོང་གི་སྡུག་བསྔལ་བ་དང་། གནོད་པ་མ་ལུས་པ་གཅོད་པར་བྱེད་པས། ཐབས་མཁས་པའི་ཐུགས་རྗེས་
སེམས་ཅན་གྱི་ལས་ཐམས་ཅད་རབ་ཏུ་མ་ལུས་པར་རྫོགས་པར་བྱེད་པས། འབྲས་བུའི་རང་བཞིན་ཡེ་ཤེས་ཀྱིས། སྡུག་བསྔལ་གྱི་རྣམ་པ་འཇོམས་པའི་ཕྲིན་ལས་སྣ་ཚོགས་པའི་རྟགས་སུ། དེ་བཞིན་གཤེགས་པའི་ཐབས་ཀྱི་ཕྱག་རྒྱ་བདུད་རྩི་འཁྱིལ་པ་སྟེ། ཡང་དག་པའི་ཡེ་ཤེས་
ལས་བྱུང་བའི་རྟགས་སུ། ཐམས་ཅད་རང་བཞིན་རྣམ་པར་དག་པའི་རྟགས་སུ་ཕྲིན་ལས་རྣམ་པ་སྣ་ཚོགས་པ་རྣམས་འགྲོ་བའི་དོན་དུ་མཛད་དོ། །དཀྱིལ་འཁོར་དུ་སྒྲུབ་ཐབས་ཀྱི་ཁྱད་པར་གཞུང་བཞིན་དུ་བྱས་ན། ཕ་རོལ་གྱི་ངན་སྔགས་ཀྱི་བྱེ་བྲག་རྣམས་འཇོམས་ཤིང་ཐར་བར་འགྱུར་རོ། །
ཁྲོ་བོ་བདུད་རྩི་འཁྱིལ་པའི་དོན་རྒྱ་ཆེར་བསྟན་ཟིན་ཏོ།།      །།ད་ནི་ཤར་ལྷོ་མཚམས་ཀྱི་ཁྲོ་བོ་ཡ་མཱནྟ་ཀའི་དོན་བཤད་དེ། གཤིན་རྗེ་དང་། མེ་ལྷ་ལ་སོགས་པའི་གནོད་པ་རྣམས་འཇོམས་པའི་རྟགས་སུ་བསྟན་ཏེ། གཞན་གྱི་ལས་ཐམས་ཅད་འཇིག་པར་བྱེད་པ། གདོན་ཐམས་ཅད་རླག་པར་
བྱེད་པ། གདོན་ཐམས་ཅད་ལས་ཐར་བར་བྱེད་པ་ཞེས་པ་དང་། ཁྲོ་བོའི་རྒྱལ་པོ་ཡ་མཱནྟ་ཀ་སྟེ་ཞེས་པའི་བར་གྱིས་བསྟན་ཏེ་བདུད་དང་། སྲིན་པོ་དང་། གནོད་སྦྱིན་ལ་སོགས་པ་ཕྱིར་རྒོལ་བ་རྣམས། སྔོན་གྱི་སྨོན་ལམ་གྱིས་སེམས་ཅན་མ་ལུས་པ་ཐམས་ཅད་ཐབས་མཁས་པའི་ཐུགས་

71-1-197a

རྗེས་འཇོམས་ཤིང་། གཉེན་པོ་ཡེ་ཤེས་ཀྱིས་དངོས་པོ་ཐམས་ཅད་འཇིག་པར་བྱེད་ཅིང་། སྙིང་རྗེ་ཆེན་པོ་རྒྱུ་མཐུན་པའི་བྱང་ཆུབ་ཀྱི་སེམས་གཞན་ལ་ཕན་འདོགས་པའི་ངོ་བོར་བསྒྱུར་བས། སེམས་ཅན་གྱི་ལས་ཐམས་ཅད་འཇོམས་པར་བྱེད་པའི་རྟགས་སུ་
གྱུར་པར་གསུངས་ཏེ། གདོན་མ་ལུས་པ་སྟོང་ཕྲག་བརྒྱད་ཅུ་རྩ་བཞིའི་དཔོན་པོ་བི་ནཱ་ཡ་ཀ་དང་དབང་ལྡན་ལ་སོགས་པའི་མཐུ་དང་བློ་གྲོས་ཚད་མེད་པ་དང་ལྡན་པས། གཞན་གྱི་རིག་སྔགས་ཐམས་ཅད་འགྲོ་བ་རྣམས་བྱེད་དུ་འཇུག་པར་གསུངས་སོ། །ཁམས་གསུམ་གྱི་སེམས་ཅན་ལ་
གནོད་པ་རྣམས་འཇོམས་པར་བྱེད་པའི་ཐབས་དང་ལྡན་པས། ཡེ་ཤེས་ཀྱི་རྟགས་ཀྱི་ཞབས་ཀྱི་ཟིལ་གྱི་ནོན་ཅིང་། སེམས་ཅན་རྣམས་ཀྱི་སྡུག་བསྔལ་ལ་རོལ་ཅིང་ཟད་པར་བྱེད་པས། གདོན་ཐམས་ཅད་འཇོམས་པར་བྱེད་ཅིང་བརླག་པར་གསུངས་ཏེ། ཉན་ཐོས་དང་མུ་སྟེགས་ལ་སོགས་
པའི་ཕྱི་ནང་གི་ལྟ་བ་རྣམས་ཀྱི་གནོད་པ་སྣ་ཚོགས་པ་རྣམས་ཏོག་པའི་རང་བཞིན་གྱིས་དགེ་བའི་བར་དུ་གཅོད་པའི་གནོད་པ་རྣམས། ཕྲིན་ལས་སྣ་ཚོགས་པས་གདུལ་བར་ཡང་མཛད་པས། ཁམས་གསུམ་གྱི་འགྲོ་བ་ལས་སྣ་ཚོགས་པས་ཕུང་པོ་ཉམ་ཐག་ནས་དང་། སྣ་ཚོགས་ཀྱིས་ཚེ་དང་
མདངས་འཕྲོག་པ་མ་ལུས་པ་རྣམས་ཐུགས་རྗེས་ཐབས་མཁས་པས་ཐར་བར་མཛད་ཅིང་། ཕྱིའི་གདོན་དང་། ནང་གི་གདོན་དང་། འབྱུང་བའི་ཁམས་མ་སྙོམས་པའི་གདོན་ཐམས་ཅད་ལས་རབ་ཏུ་ཐར་བའི་རྟགས་སུ། ཁྲོ་བོའི་རྒྱལ་པོ་ཡ་མཱནྟ་ཀར་བསྟན། དེ་བསྒྲུབ་པར་བྱ་བའི་ཕྱིར་ཞེས་
པ་དང་། བཀྲ་ཤིས་པར་འགྱུར་རོ་ཞེས་པའི་བར་ནི། རྣལ་འབྱོར་པས་དོན་རྣམས་མ་ནོར་བར་བསྒྲུབ་པར་བྱ་བའི་ཕྱིར། དུས་གསུམ་གྱི་དེ་བཞིན་གཤེགས་པ་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་དུ་གནས་པར་བྱིན་གྱིས་བརླབས་ནས། གཞལ་ཡས་ཁང་དུ་གནས་ཏེ། རང་བཞིན་
གྱིས་དག་པར་བསམས་ཏེ། དེ་ཉིད་བསྒོམ་པའི་རྒྱུ། ཡ་མཱནྟ་ཀའི་རྩ་བའི་ཡིག་འབྲུ། ཐུགས་བྱང་ཆུབ་སེམས་ཀྱི་དཀྱིལ་འཁོར་བསམས་ཏེ། འོད་དུ་ཞུ་བས་དངོས་པོའི་རང་བཞིན་བྱང་ཆུབ་སེམས་སུ་གནས་པས་ན་སྙིང་པོ་རྣམ་པ་ལྔ་ཐུགས་ཀྱི་རྟགས་དང་ལྡན་པ་ལ། རྒྱན་ཆས་རྣམ་པ་ཡོན་ཏན་གྱི་རྣམ་པ་སྣ་ཚོགས་

71-1-197b

པ་འབྱུང་བའི་གནས་སུ་ཐུགས་ཡེ་ཤེས་ཀྱི་བྱིན་གྱི་རླབས་ཀྱི་རྟགས་ཧ་འབར་བ་བསམས་ཏེ། ཧ་དེས་དངོས་པོ་རྣམས་འོད་དུ་དངོས་པོ་མེད་པར་ཞུ་བས་འབྲས་བུའི་རང་བཞིན་ཡོན་ཏན་གྱི་ངོ་བོ་རྒྱན་ཆས་དང་། བྱང་ཆུབ་སེམས་ཀྱི་སྙིང་པོ་དང་། རྒྱན་ལ་ཐིམ་པས་ཐམས་ཅད་རང་བཞིན་གཉིས་སུ་མེད་པར་
གྱུར་པར་བསམས་ཏེ། དུས་གསུམ་གྱི་སངས་རྒྱས་ཀྱི་ཡེ་ཤེས་ཀྱི་རྣམ་པར་ཐར་པའི་ཆོ་འཕྲུལ་བསམ་གྱིས་མི་ཁྱབ་པར་གྱུར་ནས། དེ་བཞིན་གཤེགས་པའི་སྐུ་གསུང་ཐུགས་ཀྱི་ཐུགས་རྡོ་རྗའི་བྱིན་རླབས། དངོས་གྲུབ་སྣ་ཚོགས་པ་འབྱུང་བས་སེམས་ཅན་ཐམས་ཅད་ཀྱི་དགོས་པ་སྣ་ཚོགས་པར་གྲུབ་
པར་བསམས་ཏེ། དེ་ནས་རྣལ་འབྱོར་སྒྲུབ་པ་པོས་བདག་ཡ་མཱནྟ་ཀའི་ཏིང་ངེ་འཛིན་དུ་ཞུགས་ཏེ། འགྲོ་བ་འདུལ་བའི་དབང་དུ་བདག་ཞི་བ་དང་། རྒྱས་པ་དང་། དབང་དང་། དྲག་པོའི་ལས་རྣམས་འགྲོ་བ་གང་ལ་མོས་པ་བཞིན་དུ། དཀར་བ་དང་། སེར་བ་དང་། དམར་བ་དང་། གནག་པ་ཕྲིན་
ལས་སོ་སོའི་ཁ་དོག་ཏུ་བསྒྱུར་ཏེ། ཡེ་ཤེས་ཀྱི་བུམ་པ་དེས་དབང་བསྐུར་ཞིང་བསྙེན་པ་ཡང་གྲངས་དང་། མཚན་མ་དང་། དུས་ཀྱི་བསྙེན་པ་དག ད་ཧ་བཛྲ་གྲངས་མང་པོར་བརྗོད་ན་བཀྲ་ཤིས་ཀྱི་ཡོན་ཏན་སྣ་ཚོགས་པ་རབ་ཏུ་ཐོབ་པར་འགྱུར་རོ། །གོང་དང་འོག་གི་སྒྲུབ་ཐབས་རྣམས་བཤད་པ་ལས་
འབྱུང་བ་ཡང་འདི་བཞིན་དུ་རྒྱས་པར་ཤེས་པར་བྱའོ། །རིག་པའི་གཏན་ཚིགས་གོང་འོག་ལ་སྦྱར་བར་ཤེས་པར་བྱའོ། །གཞན་དག་དོན་གཅིག་པས་མི་སྨོས་སོ། །ཤར་ལྷོ་མཚམས་ཀྱི་ཁྲོ་བོའི་རྒྱལ་པོ་ཡ་མཱནྟ་ཀའི་དོན་རྒྱ་ཆེར་བསྟན་ཟིན་ཏོ།།      །།ད་ནི་བྱང་ཤར་མཚམས་ཀྱི་ཁྲོ་བོ་ཊཀྐི་རཱ་ཛའི་དོན་རྒྱས་པར་
སྟོན་ཏེ། ཁམས་གསུམ་གྱི་འབྱུང་པོའི་རྒྱལ་པོ་དབང་ལྡན་རིག་སྔགས་ཀྱི་དམོད་པའི་ཚོགས་ཐམས་ཅད་ཞི་བར་བྱེད་པས་ཊཀྐི་རཱ་ཛ་ཕྱུང་ནས་འགྲོ་བའི་དོན་དུ་བཞུགས་པའི་ཐབས་ནི་འབྱུང་པོ་ཐམས་ཅད་འགུགས་པར་བྱེད་པ། རིག་སྔགས་ཀྱི་ལས་ཐམས་ཅད་བྱེད་དུ་འཇུག་པ་ཞེས་བྱ་བ་དང་། ལས་ཐམས་
ཅད་བྱེད་དུ་འཇུག་པ་གསུངས་ཞེས་པའི་བར་ནི། འདོད་ཁམས་ཀྱི་སེམས་ཅན་གྱི་གཟུང་བ་དང་། འཛིན་པའི་བག་ཆགས་རྣམས་པར་རྟོག་པ་ཀུན་གཞི་ལ་རབ་ཏུ་བསགས་པས་ནི། ནམ་མཁའ་ལ་སྤྲིན་གྱིས་བསྒྲིབས་པ་ལྟར། ཕྱིན་ཅི་ལོག་གི་བག་ཆགས་མཐུ་བརྟས་པས། བདག་ཏུ་ལྟ་བ་ལས་

71-1-198a

འབྱུང་བས་ན་འབྱུང་པོ་ལོག་པའི་མཐུ་རབ་ཏུ་ཞེན་པས་རྫས་ཀྱི་བྱེ་བྲག་སྣ་ཚོགས་པ་ལས་འབྱུང་བ་དང་། སྔོན་གྱི་ལས་ལས་གྱུར་པའི་འབྱུང་པོ་ཐམས་ཅད་ཀྱི་རྒྱལ་པོ་དབང་ལྡན་ལ་སོགས་པ་རྣམས་འགུགས་པར་བྱེད་པའི་རྟགས་ཀྱི་ཕྱག་རྒྱ་ནི་འདུལ་བའི་དབང་དུ་སྐུ་སྤྲུལ་སྟེ་འགྲོ་བའི་དོན་བྱེད་པའི་རྟགས་ཊཀྐི་རཱ་ཛ་སྟེ། 
འཇིག་རྟེན་གྱི་ཁམས་རྣམ་པ་གསུམ་གྱི་ནང་དུ་ཕྱིའི་འབྱུང་པོ་དང་ལས་ལས་གྱུར་པའི་འབྱུང་པོའི་རིགས་ཐམས་ཅད་ཐབས་མཁས་པའི་ཐུགས་རྗེས་དབང་དུ་བསྡུས་ནས་འཁོལ་བས་ན་བྱང་ཤར་མཚམས་ཀྱི་འབྱུང་པོ་རྣམས་འགུགས་ཤིང་དབང་དུ་བསྡུས་པས་འདོད་པའི་རྒྱལ་པོར་སྣང་བས། དེས་ཕྱོགས་བཅུའི་དེ་བཞིན་གཤེགས་པ་ཐམས་
ཅད་ཀྱི་ཕྲིན་ལས་སྣ་ཚོགས་པ་རབ་ཏུ་མཛད་པ་ཐམས་ཅད་བྱེད་དུ་འཇུག་ཅིང་ཉམས་སུ་ལེན་པ་རྣམས་བྱམས་པའི་རལ་གྲིས་མངོན་དུ་བཏུལ་ཏེ་ལེགས་པར་གནས་པའི་དོན་ཏོ། །བྱང་ཤར་མཚམས་ཀྱི་ཁྲོ་བོའི་རྒྱལ་པོ་ཊཀྐི་རཱ་ཛའི་དོན་རྒྱས་པར་བཤད་ཟིན་ཏོ།།      །།ད་ནི་ལྷོ་ནུབ་མཚམས་ཀྱི་ཁྲོ་བོའི་རྒྱལ་པོ་སྟོབས་པོ་ཆེའི་དོན་རྒྱས་པར་བཤད་དེ། 
ཡང་དག་པའི་ཡེ་ཤེས་ཀྱི་སྟོབས་ཀྱིས་སེམས་ཅན་རྣམས་ཀྱི་དོན་མ་གྲུབ་པར་གྲུབ་པར་བྱེད་པ་དོན་གྲུབ་པ་རྣམས་ཆུད་མི་ཟ་བར་བྱེད་པ། གང་བསྒྲུབ་པ་དེའི་དོན་རྣམས་ཕུན་སུམ་ཚོགས་པ་ཐོབ་པར་བྱེད་པས་ན། དེ་ནི་མ་གྲུབ་པ་རྣམས་གྲུབ་པར་བྱེད་པ། འདོད་པ་ཐམས་ཅད་རབ་ཏུ་སྦྱིན་པ་ཞེས་པ་དང་། ཁྲོ་བོའི་རྒྱལ་པོ་སྟོབས་པོ་ཆེར་བསྟན་
ཞེས་པའི་བར་ནི་རྣལ་འབྱོར་སྒྲུབ་པ་པོ་གང་ཡང་རུང་བ་དག་གིས་འདི་ཚུལ་བཞིན་དུ་བསྒྲུབས་ན་མདོ་ལས་འབྱུང་བའི་དེ་བཞིན་གཤེགས་པ་རྣམས་ཀྱི་སྐུ་གསུང་ཐུགས་ཀྱི་དངོས་གྲུབ་མ་གྲུབ་པ་རྣམས་གྲུབ་པར་བྱེད་པ། སྒྲུབ་པར་བྱེད་པའི་ཐབས་རྣམ་པ་སྣ་ཚོགས་པའི་ལས་རྣམས་ཕས་ཀྱི་རྒོལ་བ་བདུད་རྣམ་པ་བཞི་ཉོན་མོངས་
པ་དང་ཕུང་པོ་དང་ལྷའི་བུ་དང་འཆི་བདག་གི་བདུད་རྣམས་ཀྱི་དབང་དུ་མི་གཏོང་བར་མཛད་པ་དང་། དེ་བཞིན་གཤེགས་པའི་ཡོན་ཏན་གྱི་རྣམ་གྲངས་མ་ལུས་པ་ཐམས་ཅད་རབ་ཏུ་སྦྱིན་པར་མཛད་པ་དང་དཔའ་བར་འགྲོ་བ་དག་ཟླ་བའི་རྒྱལ་མཚན་ལ་སོགས་པའི་ཏིང་ངེ་འཛིན་གྱི་སྒོ་བསམ་གྱིས་མི་ཁྱབ་པའི་སྟོབས་དང་ལྡན་པ། འཇིག་རྟེན་གྱི་
ཁམས་ཀྱི་སེམས་ཅན་གྱི་འདོད་པ་ཕུན་སུམ་ཚོགས་པ་རྣམ་པ་བསམ་གྱིས་མི་ཁྱབ་པ་རྣམས་ཐོབ་པར་སྒྲུབ་ཅིང་དེ་བཞིན་གཤེགས་པའི་ཕྲིན་ལས་སྣ་ཚོགས་པ་མཛད་དོ། །ལྷོ་ནུབ་མཚམས་ཀྱི་ཁྲོ་བོའི་རྒྱལ་པོ་སྟོབས་པོ་ཆེའི་དོན་རྒྱས་པར་བཤད་ཟིན་ཏོ།།      །།ད་ནི་ནུབ་བྱང་མཚམས་ཀྱི་ཁྲོ་བོ་ཨ་མོ་གྷ་པཱ་ཤའི་དོན་སྟོན་ཏེ། ཐབས་མཁས་ཐུགས་

71-1-198b

རྗེའི་ཞགས་པས་ཁམས་གསུམ་གྱི་སེམས་ཅན་མ་ལུས་པ་རྣམས་འཁོར་བའི་སྡུག་བསྔལ་ལས་འདྲེན་ཅིང་ཐུགས་རྗེས་སྲུང་བར་བྱེད་པའི་དོན་ཏེ། སེམས་ཅན་ཐམས་ཅད་སྲུང་བཞེས་པ་དང་། བྱང་ཆུབ་སེམས་ཐབས་མཁས་པས་སྲུང་བར་བྱེད་དོ་ཞེས་པའི་བར་ནི། ཐབས་མཁས་པའི་ཐུགས་རྗེ་ཚད་མེད་
པའི་རང་བཞིན། སྔོན་བསྐལ་པ་ཚད་མེད་པར་སེམས་ཅན་མ་ལུས་པ་ཐམས་ཅད་ལ། བྱང་ཆུབ་སེམས་ཚད་མེད་པ་སྐྱེས་ནས། ཡེ་ཤེས་ཀྱི་ཁྲོ་བོའི་སྤྲུལ་པ་བསམ་གྱིས་མི་ཁྱབ་པ་ཕྱུང་ནས། སྤྲུལ་པ་དག་འདོད་ཁམས་དང་། གཟུགས་ཁམས་དང་། གཟུགས་མེད་པའི་ཁམས་ཀྱི་སེམས་ཅན་དག་ཇི་ལྟར་
འདུལ་བ་བཞིན་དུ། ཐབས་མཁས་པའི་ཐུགས་རྗེ་ཚད་མེད་པའི་སྤྲུལ་པ་དེས། འགྲོ་བ་སྣ་ཚོགས་པ་རྣམས་ཇི་ལྟར་འདུལ་བ་བཞིན་དུ་སྟོན་ཏེ། དེས་འདོད་ཆགས་དང་། ཞེ་སྡང་དང་། གཏི་མུག་ལ་སོགས་པས་སྡུག་བསྔལ་བའི་རྣམ་པ་ལ། ཚད་མེད་པའི་ཐུགས་རྗེ་ཡོན་ཏན་སྣ་ཚོགས་པས་ཕན་བཏགས་ནས། འཁོར་བའི་
སེམས་ཅན་རྣམས་བསྲུང་བའི་ཕྱིར་རོ། །དེ་ནི་ཐུགས་རྗེ་དང་ཕྲིན་ལས་དོན་ཡོད་པའི་ཞགས་པ་སྟེ། སྔོན་གྱི་ཕྲིན་ལས་ཚད་མེད་པའི་སྙིང་རྗེ་དང་། བྱམས་པ་དང་། དགའ་བ་དང་བཏང་སྙོམས་ཀྱིས་སེམས་ཅན་ཐམས་ཅད་ལ་ཕན་འདོགས་ཤིང་བསྡུ་བའི་དངོས་པོ་སྦྱིན་པ་དང་། སྙན་པར་སྨྲ་བ་དང་། དོན་སྤྱོད་པ་དང་། དོན་མཐུན་པའི་སྒོ་ནས་
སྡུད་ཅིང་སྲུང་བར་བྱེད་དོ། །ནུབ་བྱང་མཚམས་ཀྱི་ཁྲོ་བོ་དོན་ཡོད་ཞགས་པའི་དོན་རྒྱས་པར་བསྟན་ཟིན་ཏོ།།      །།ད་ནི་དཀྱིལ་འཁོར་གྱི་དབུས་ཀྱི་གཙོ་བོ་ཕྱག་ན་རྡོ་རྗེའི་དོན་སྟོན་ཏེ། རྒྱལ་བ་ཐམས་ཅད་ཀྱི་ཐུགས་གསང་བའི་མཛོད་འཛིན་པ། ཐུགས་ཆོས་ཉིད་ལས་མ་གཡོས་ཀྱང་། སྔོན་གྱི་བསོད་ནམས་ཀྱི་ཚོགས་ཀྱིས་སེམས་ཅན་
གྱི་དོན་འདོད་པ་ཕུན་སུམ་ཚོགས་པ་སྒྲུབ་ཅིང་། བདུད་དང་སྲིན་པོ་ལ་སོགས་པ་གདུལ་བའི་ཕྱིར་ཐུགས་རྗེས་ཁྲོ་བོར་སྐུ་སྤྲུལ་ཏེ། རེངས་པར་མཛད་དེ། ཞི་བ་རྒྱས་པ། སེམས་ཅན་ཐམས་ཅད་རེངས་པར་བྱེད་པ་ཞེས་པ་དང་། དབང་དུ་བསྡུས་ཕན་འདོགས་པའི་ཕྱིར་རོ། ཞེས་པའི་བར་ནི། སེམས་ཕྱིན་
ཅི་ལོག་དང་། ལྟ་བ་ཕྱིན་ཅི་ལོག་དང་། ཤེས་རབ་ཕྱིན་ཅི་ལོག་དང་། འདུ་ཤེས་ཕྱིན་ཅི་ལོག་གིས་ཉོན་མོངས་པ་ཐམས་ཅད་ལས། ཐབས་མཁས་པའི་སྔོན་གྱི་བསོད་ནམས་ཀྱི་ཚོགས་བསམ་གྱིས་མི་ཁྱབ་པ་རབ་ཏུ་བསགས་པས་ད་ལྟར་ཤཱཀྱ་ཐུབ་པའི་བསྟན་པ་ལ་གནོད་པའི་སེམས་ཅན་དྲེགས་པ་ཅན་

71-1-199a

ལ་འཇིགས་བྱེད་ཐབས་ལ་མཁས་པའི་སྤྲུལ་པ་བསམ་གྱིས་མི་ཁྱབ་པ་རྣམ་པ་སྣ་ཚོགས་པ་དག་གིས་གནོད་པར་བྱེད་པའི་སེམས་ཅན་གཞན་ལ་བསྣན་ནས། དེ་དག་གིས་ང་དང་བདག་ཏུ་ལྟ་བའི་འདུ་ཤེས་ཕྱིན་ཅི་ལོག་གི་ཉོན་མོངས་པའི་སྡུག་བསྔལ་མ་ལུས་པ་རྣམས་མེད་
པར་མཛད་དོ། །དྲེགས་པ་ཅན་དེ་དག་བཏུལ་ནས། བྱང་ཆུབ་ཆེན་པོ་ལ་ཇི་ལྟར་འདོད་པ་བཞིན་དུ། ཡོན་ཏན་གྱི་ཚོགས་བསམ་གྱིས་མི་ཁྱབ་པས་རྒྱས་པར་མཛད་ཅིང་། བདུད་ཀྱི་རྒྱལ་པོ་དང་། དྲེགས་པ་ཅན་ཁྱོ་ཤུག་ཅན་རྣམས་སྐྲག་ཅིང་དངངས་པ་དང་། རེངས་ཤིང་འདར་བར་མཛད་པའི་ཕྱིར་རོ། །
རྣམ་པ་གཞན་དུ་ཡང་རྣམ་པར་མི་རྟོག་པའི་བྱང་ཆུབ་སེམས་ཆོས་ཉིད་ཞི་བའི་ཏིང་ངེ་འཛིན་མཉམ་པའི་ངང་ལས་མ་གཡོས་ཀྱང་། ཚེ་རབས་སྔོན་གྱི་བསོད་ནམས་ཀྱི་ཚོགས་བསམ་གྱིས་མི་ཁྱབ་པ་ཐམས་ཅད་རྒྱས་པར་མཛད་དོ། །འཇིག་རྟེན་རྣམ་པ་གསུམ་ན་གནས་ནས་སེམས་ཅན་ཐམས་ཅད་
ལ། ཐུགས་རྗེས་ཐབས་ལ་མཁས་པའི་ཕྲིན་ལས་ཀྱིས། དེ་བཞིན་གཤེགས་པ་ཐམས་ཅད་ཀྱི་བསྟན་པ་ལ་གནོད་པའི་བདུད་རྣམས་འདུལ་བའི་ཕྲིན་ལས་སྣ་ཚོགས་པ་འབྱུང་བའི་ཡོན་ཏན་གྱི་རང་བཞིན་ཕུན་སུམ་ཚོགས་པ་གཞན་ལ་འབྱུང་བའི་ཕྱིར། རྣམ་གྲངས་སྣ་ཚོགས་པའི་སྒོ་ནས་སེམས་ཅན་
རྣམས་ཚིམ་ཞིང་བདེ་བར་མཛད་དོ། །གོང་གི་ཞི་བས་མི་འདུལ་བའི་བདུད་དང་སྲིན་བུ་དྲེགས་བྱེད་རྣམས་ཁྲོ་བོའི་ཏིང་ངེ་འཛིན་ལས་ཁྲོ་བོའི་སྤྲུལ་པ་སྣ་ཚོགས་དག་གིས་འདུལ་ཞིང་། སྡུག་བསྔལ་ལས་སྐྱོབ་ནས་བདེ་བ་ལ་དགོད་པའི་ཕྱིར། འཇིགས་བྱེད་ཀྱི་དྲག་ཤུལ་གྱིས་རེངས་ཤིང་འདར་བར
མཛད་དོ། །དེ་དག་དེ་བཞིན་གཤེགས་པའི་འཁོར་དུ་ཐུགས་རྗེས་དབང་དུ་བསྡུས་ནས། ཕན་པའི་ཡོན་ཏན་ཆེན་པོའི་སྒོ་ནས་དོན་མཛད་པའི་ཕྱིར་རོ། །དཀྱིལ་འཁོར་གྱི་དབུས་ཀྱི་གཙོ་བོ་ཕྱག་ན་རྡོ་རྗེའི་དོན་རྒྱས་པར་བཤད་ཟིན་ཏོ།    །ད་ནི་ཤར་དང་ལྷོ་དང་། ནུབ་དང་བྱང་གི་སྒོ་བའི་དོན་སྟོན་ཏེ། ཚད་
མེད་པ་རྣམ་པ་བཞིའི་རྟགས་ཏེ་སྙིང་རྗེའི་ལྕགས་ཀྱུ་དང་། བྱམས་པའི་ཞགས་པ་དང་། དགའ་བའི་ལྕགས་སྒྲོག་དང་། བཏང་སྙོམས་ཀྱི་དྲིལ་བུ་དང་ལྡན་པའི་སྒོ་ནས། སྦྱིན་པ་དང་། སྙན་པར་སྨྲ་བ་དང་། དོན་སྤྱོད་པ་དང་། དོན་མཐུན་པའི་སྒོ་ནས་འགྲོ་བའི་དོན་མཛད་པའི་རྟགས་སོ། །རྨུགས་

71-1-199b

པར་བྱེད་པའི་གསང་སྔགས་ཀྱི་མཐུ་ཆེན་པོ་འདི་ཞེས་པ་དང་། མི་གནས་པར་བྱེད་པའི་དོན་ཏོ་ཞེས་པས་བསྟན་ཏེ། ཡེ་ཤེས་ཀྱི་སྒོ་བ་རྣམ་པ་བཞིས་འདོད་པ་དང་། གཟུགས་དང་། གཟུགས་མེད་པའི་སེམས་ཅན་མ་ལུས་པ་རྣམས། ཕྱག་རྒྱ་རྣམ་པ་བཞིའི་སྒོ་ནས་འགྲོ་བའི་དོན་མཛད་པའི་ཐབས་
སྣ་ཚོགས་པ་བསྟན་ནས། མེ་ལོང་ལྟ་བུའི་ལྕགས་ཀྱུ་དང་། མཉམ་པ་ཉིད་ཀྱི་ཞགས་པ་དང་། སོ་སོར་ཀུན་ཏུ་རྟོག་པའི་ལྕགས་སྒྲོག་དང་། བྱ་བ་ནན་ཏན་གྱི་དྲིལ་བུར་སྐུ་སྤྲུལ་ཏེ། འདུལ་བའི་དབང་དུ་རྡོ་རྗེ་རྟ་གདོང་ལྕགས་ཀྱུ་མ་དང་། རྡོ་རྗེ་ཕག་གདོང་ཞགས་པ་མ་དང་། རྡོ་རྗེ་ལྕགས་སྒྲོག་ཉི་ཟླའི་
སྤྱན་དང་། རྡོ་རྗེ་ཐལ་བྱེད་དྲིལ་འཁྲོལ་མར་སྤྲུལ་ཏེ། ཤར་དྲི་ཟ་དང་། ལྷོ་གྲུལ་བུམ་དང་། ནུབ་ཀླུ་དང་། བྱང་གནོད་སྦྱིན་ལ་སོགས་པའི་བདུད་རྣམས་སྐབས་ཚོལ་ཞིང་གླགས་ལྟ་བ་རྣམས་ཐུགས་རྗེས་མ་རུངས་པ་རྣམས་རྨུགས་པར་བྱས་ནས། ལོག་པའི་ལམ་དུ་འདུག་ཏུ་མི་སྟེར་བར་གསང་བའི་
དྲག་ཤུལ་གྱི་མཐུས་བསྡིགས་ནས། སྡུག་བསྔལ་ལས་མི་གནས་པར་བྱེད་པའི་དོན་ཏོ། །ཚད་མེད་པའི་སྒོ་བ་བཞིའི་དོན་བཤད་ཟིན་ཏོ།།      །།སྔགས་དབྱུང་བའི་དོན་སྟོན་ཏེ། སྔགས་ནི་ཡེ་ཤེས་ཀྱི་རྟགས་ཀྱི་དོན་གསང་བ་དབྱུང་བའི་ཐབས་ཏེ། སངས་རྒྱས་ཀྱི་མཐུས། ལག་ན་རྡོ་རྗེས་རབ་ཏུ་
སྨྲས་སོ་ཞེས་པ་དང་། ཐུགས་ཁྲོ་བོའི་སྔགས་དང་དབྱུང་བར་བྱ་བའི་དོན་ཏོ་ཞེས་པའི་བར་ནི་དཀྱིལ་འཁོར་གྱི་རང་བཞིན་བཤད་པ་ལས། དེ་བཞིན་གཤེགས་པ་ཐམས་ཅད་ཀྱི་མཐུས་ལག་ན་རྡོ་རྗེ་ལ། སྐུ་དང་གསུང་དང་ཐུགས་ཀྱི་དབང་བསྐུར་བས་བྱིན་གྱིས་བརླབས་ནས། འདས་པ་དང་མ་བྱོན་པ་དང་། 
ད་ལྟར་བྱུང་བའི་སངས་རྒྱས་ཀྱི་ཡེ་ཤེས་ལག་ན་རྡོ་རྗེ་རབ་ཏུ་གནས་ནས། བྱང་ཆུབ་སྙིང་པོར་དབང་བསྐུར་བས། ལྷ་གནས་དང་ནི་མི་གནས་ཀུན་ཏུ་ཐུགས་ཡང་དག་པའི་ཡེ་ཤེས་རྡོ་རྗེ་ལྟ་བུའི་མཐུའི་དབང་བསྐུར་བར། བཅོམ་ལྡན་འདས་ཀྱི་འཁོར་འཇིག་རྟེན་པ་དང་། འཇིག་རྟེན་ལས་འདས་པས་
མཐོང་བར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱིས་བྱིན་གྱིས་བརླབས་ནས་ལྷའི་རྒྱལ་པོ་དབང་སྒྱུར་གྱི་གནས་དང་། ལྷོ་ཕྱོགས་གྱེད་ཀྱི་ཡུལ་དང་། སྙིང་པོ་བྱང་ཆུབ་ག་ལ་བ་འདིར་ལག་ཏུ་ཡེ་ཤེས་ཀྱི་རྡོ་རྗེ་བྱིན་ནས། རྡོ་རྗེ་མིང་འཛིན་པར་དབང་བསྐུར་བས། ལྷ་དང་། ཀླུ་དང་། གནོད་

71-1-200a

སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་སུ་ལག་ན་རྡོ་རྗེར་སོ་སོར་སྐད་དུ་འུར་ཅེས་རབ་ཏུ་གྲག་པར་གྱུར་པའི་དོན་ཏོ། །དུས་དེར་འདོད་ཁམས་དང་། གཟུགས་ཁམས་དང་། གཟུགས་མེད་པའི་ཁམས་ཀྱི་
སྲིད་པ་གསུམ་གྱི་མཐུ་ཆེ་བ་རྣམས་དབང་དུ་འདུས་པར་འགྱུར་རོ། །ཐམས་ཅད་ཞབས་འོག་ཏུ་བསྡུས་ནས་བཀའ་དམ་ལ་བཏགས་ནས་སོ་སོ་རང་རང་གི་སྙིང་པོ་མདོངས་གསོལ་དུ་ཕུལ་ནས། དམ་ཚིག་ཅན་དུ་བྱས་ནས་དེ་རྣམས་ཀྱང་དུས་གཅིག་ཏུ་གོ་སྟེ། གོང་གི་ཁྲོ་བོ་རྣམས་ཀྱི་སྔགས་དང་། ཆོ་གའི་ཕན་ཡོན་
རྣམས་འདུལ་བའི་དབང་གིས་འགྲོ་བའི་དོན་དུ་ལག་ན་རྡོ་རྗེ་ཕྱོགས་བཅུ་དེ་བཞིན་གཤེགས་པའི་ཡེ་ཤེས་ཀྱི་ཚིག་འཇིག་རྟེན་རྣམ་པ་གསུམ་དུ་སྲིད་པའི་སེམས་ཅན་ལ་ཕན་པའི་ཕྱིར་རོ། །གསུང་ཁྲོ་བོའི་ཀྱིལ་འཁོར་འདི་འདུལ་བའི་དབང་དུ་གསུངས་སོ། །གསང་སྔགས་གསུང་གི་དཀྱིལ་འཁོར་དབྱུང་བའི་
ཐབས་བཤད་ཟིན་ཏོ།།      །།ད་ནི་གསུང་ཡིག་འབྲུའི་དཀྱིལ་འཁོར་བཤད་པའི་དོན་སྟོན་ཏེ་དང་པོ་ཕྱག་ན་རྡོ་རྗེའི་ཕྲིན་ལས་བཤད་དོ། །ན་མོ་རཏྣ་ཏྲ་ཡཱ་ཡ། དཀོན་མཆོག་གསུམ་ལ་ཕྱག་འཚལ་བའི་དོན་ཏེ། ཕྱག་ན་རྡོ་རྗེ་དཀོན་མཆོག་གི་རང་བཞིན་དུ་གྱུར་པས་ན། ཡེ་ཤེས་ལས་གྲུབ་པའི་ཕྱིར་
ཞེས་པ་ནི། དུས་གསུམ་དུ་རྒྱལ་བའི་རང་བཞིན་དུ་གྱུར་པས་དཀོན་མཆོག་གསུམ་ཞེས་བརྗོད་དོ། །ན་མཤྩཎྜ་བཛྲ་པ་ཎཱ་ཡེ། རྡོ་རྗེ་རིན་ཆེན་གྱི་ངོ་བོ་ཕྱག་ན་རྡོ་རྗེའི་ཡང་དག་པའི་སྙིང་པོའོ་ཞེས་པ་ནི་ཐུགས་རྡོ་རྗེ་ལྟ་བུ་དང་། ཡོན་ཏན་རིན་ཆེན་ལྟ་བུ་དང་ལྡན་པའི་ཐ་ཚིག་གོ། །མ་ཧཱ་ཡཀྵ་སེ་ནཱ་པ་ཏ་ཡེ། 
གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་བའི་དོན་ཏེ། གནོད་སྦྱིན་རྣམས་ཐུགས་རྗེས་འདུལ་བས་དེ་སྐད་ཅེས་བརྗོད་དོ། །ཞེས་པ་ནི་ཁམས་གསུམ་གྱི་དྲེགས་པ་ཅན་འདུལ་བའི་ཕྱིར་རིགས་གནོད་སྦྱིན་དུ་བསྟན་ཏེ། ཐབས་མཁས་པའི་ཕྲིན་ལས་ཀྱིས་དབང་དུ་སྡུད་པས་སོ། །
ཏདྱ་ཐཱ། འདི་ལྟ་སྟེ་གང་ལྟ་ཞེ་ན། འོག་ནས་འབྱུང་བའི་སྔགས་ཀྱི་ཚིག་རྣམས་ཞེས་པ་ནི། འོག་གི་དོན་མ་ནོར་བར་བསྟན་པའི་ཕྱིར་གསལ་བར་བསྟན་ཅིང་སྨོས་པའི་དོན། ཨོཾ་ཏྲ་ཊ་ཏྲ་ཊ་ཡེ་ཤེས་ལྔའི་ངོ་བོ་དག་གིས་ཉོན་མོངས་པ་ཐམས་ཅད་སོད་ཅིག་པའི་དོན་ནི། ཆོས་ཀྱི་དབྱིངས་ཀྱི་ཡེ་ཤེས་

71-1-200b

ལ་སོགས་པ་རྣམ་པ་ལྔས། ཉོན་མོངས་པ་རྣམས་རབ་ཏུ་གཅོད་པའི་དོན་ནོ། །ཏྲོ་ཊ་ཡ་ཏྲོ་ཊ་ཡ་ཕྱག་ན་རྡོ་རྗེའི་བྱིན་གྱི་རླབས་ཀྱིས་རབ་ཏུ་གཅོད་ཅིང་ལེགས་པར་སོད་ཅིག་པའི་དོན་ནི། ཐུགས་གསང་བའི་མཛོད་འཛིན་པ་ཡེ་ཤེས་ཀྱི་དོན་ལ་དཔྱོད་ཅིང་། ཉོན་མོངས་པ་ལས་སྐྱོབས་ཤིག་པའོ། །སྥུ་ཊ་
སྥུ་ཊ་ཞེས་པ་ནི་ཉོན་མོངས་པ་ལས་ཡེ་ཤེས་ཀྱི་མེས་འབར་བར་གྱིས་ཤིག་པའི་དོན་ནི་སྡུག་བསྔལ་གྱི་རང་བཞིན་ཡེ་ཤེས་ཀྱི་ཕྲིན་ལས་ཉོན་མོངས་པ་ལ་དོན་གསལ་བར་གྱིས་ཤིག་པའོ། །སྥོ་ཊ་ཡ་སྥོ་ཊ་ཡ། བྱང་ཆུབ་ཀྱི་རང་བཞིན་གྱིས་ལེགས་པར་འབར་བར་གྱིས་ཤིག་པ་ནི་ཐུགས་རྗེ་ཚད་
མེད་པའི་ཕྲིན་ལས་ཀྱིས་ལེགས་པ་མཐོང་བར་བྱ་བའི་ཐ་ཚིག་གོ། །གྷཱུརྞ་གྷཱུརྞ། བདག་གི་བགེགས་རྣམས་ཟུངས་ལ་སྐྲོད་ཅིག །ཡེ་ཤེས་ཀྱི་མེས་མཚན་མ་སྲེགས་ཤིག་པའི་དོན་ནི། ལྟ་བ་ལོག་པ་ནི་བགེགས་དང་འདྲ་སྟེ། ཡང་དག་པའི་ལྟ་བའི་བགེགས་ཏེ། ཡེ་ཤེས་ཀྱི་མེས་ཉོན་
མོངས་པ་ཆོམས་ཤིག་པའི་དོན་ནོ། །གྷཱུརྞ་པ་ཡ་གྷཱུརྞ་པ་ཡ་ནི་ཐུགས་རྗེའི་ལྕགས་ཀྱུས་ཟུང་ལ་ལེགས་པར་སྐྲོད་ཅིག་པའི་དོན་ནི། ཕྲིན་ལས་ཀྱི་ལྕགས་ཀྱུས་གདོན་ཟུང་ལ་མཚན་མ་སྐྲོད་ཅིག་པའི་དོན་ནོ། །སརྦ་སཏྭ་ནི་སེམས་ཅན་ཐམས་ཅད་ཐུགས་རྗེའི་ཐུགས་ཀྱིས་གཟིགས་ཤིག་པའི་
དོན་ནི་ཐུགས་རྗེའི་ཞིང་སྟེ། དགོས་འབྲེལ་ཡོད་པས་གཟིགས་པའི་ཕྱིར་རོ། །བོ་དྷ་ཡ་བོ་དྷ་ཡ། ཁམས་གསུམ་གྱི་སེམས་ཅན་རྣམས། བྱང་ཆུབ་ཏུ་སེམས་རབ་ཏུ་བསྐྱེད་ཅིག་པའི་དོན་ནི། དངོས་པོར་ལྟ་བ་རྣམས་དངོས་པོ་མེད་པའི་བྱང་ཆུབ་སེམས་ལ་དགོད་པའི་ཕྱིར་རོ། །སཾ་བྷོ་དྷ་ཡ་སཾ་བོ་དྷ་
ཡ། འགྲོ་བ་རྣམས་ལེགས་པར་བྱང་ཆུབ་ཏུ་སེམས་བསྐྱེད་པའི་དོན་ནི། ལམ་ལོག་པའི་འགྲོ་བ་རྣམས་ཡང་དག་པའི་བྱང་ཆུབ་ལ་དགོད་པའི་ཕྱིར་རོ། །བྷྲ་མ་བྷྲ་མ། བྱང་ཆུབ་ཀྱི་སེམས་དང་མི་མཐུན་པའི་བགེགས་རྣམས་སྐྲོད་ཅིག་པའི་དོན་ནི། གཟུང་འཛིན་གྱི་བག་ཆགས་རྣམས་བྱང་ཆུབ་
ཀྱི་སྐྱོན་གྱིས་སོལ་ཅིག སཾ་བྷྲ་མ་ཡ་སཾ་བྷྲ་མ་ཡ། ཕྱིན་ཅི་ལོག་གི་ཉོན་མོངས་པ་རྣམས་ལས་ཐུགས་རྗེས་ལེགས་པར་སྐྲོད་ཅིག་པའི་དོན་ནི། ལྟ་བ་ལོག་པ་ནི་ཉོན་མོངས་པའི་རྒྱུ་ལས་ཕྲིན་ལས་ཀྱིས་སེལ་བའི་དོན་ཏོ། །སརྦ་བུདྡྷ། སངས་རྒྱས་ཐམས་ཅད་ཀྱི་ཐུགས་རྗེ་

71-1-201a

ཆེན་པོས་བདག་གི་སྡིག་པ་ཐམས་ཅད་ཆོམས་ཤིག་པའི་དོན་ཏོ། །ནི་སྔོན་གྱི་ཐུགས་རྗེས་ཕྱི་ནང་གི་གནོད་པ་ཐམས་ཅད་མེད་པར་བྱ་བའི་ཕྱིར་ཆོམས་ཤིག་ཅེས་གསུངས་སོ། །ཀུ་ཊ་ནི་ཀུ་ཊ་ནི། གདོན་འབྱུང་པོ་རྣམས་
གཏུབས་ཤིག་གཏུབས་ཤིག ཐུགས་རྗེ་ཡེ་ཤེས་ཀྱི་སྤྱན་གྱིས་གཟིགས་པའི་དོན་ནི། གནོད་པ་རྣམས་མེད་པར་བྱེད་པ་དང་། གདུག་པ་རྣམས་གཅད་པ་དང་། ཐུགས་རྗེས་གཟིགས་པར་བྱེད་པའི་ཐ་ཚིག་གོ། །སཾ་ཀུ་ཊ་ཡ་སཾ་ཀུ་ཊ་ཡ། འཇིག་
རྟེན་ན་གནོད་པར་བྱེད་པ་རྣམས་བྱམས་པའི་ཐུགས་ཀྱིས་གཏུབས་ཤིག ལེགས་པར་གཏུབས་ཤིག་པའི་དོན་ནི། སརྦ་ཤ་ཏྲུཾ། བདག་ལ་གནོད་པར་བྱེད་པའི་བགེགས་རྣམས་ཐམས་ཅད་རང་བཞིན་འདུལ་བའི་དོན་ནི། གནོད་སྦྱིན་དང་། སྲིན་པོ་དང་། 
བགེགས་ཀྱི་རིགས་རྣམས་འདུལ་བའི་ཕྱིར་རོ། །གྷ་ཊ་ཡ་གྷ་ཊ་ཡ། བགེགས་དང་འབྱུང་པོ་དེ་རྣམས་ཐུགས་རྗེས་སྐྲོད་ཅིག་པའི་དོན་ནི། བི་ནཱ་ཡ་ཀ་དང་དབང་ལྡན་ལ་སོགས་པ་རྣམས་ཐུགས་རྗེས་སྐྲོད་ཅིག་པའི་ཐ་ཚིག་གོ། །སཾ་གྷ་ཊ་ཡ་སཾ་གྷ་ཊ་
ཡ། ནི་ལེགས་པར་སྐྲོད་ཅིག་པའི་དོན་ཏེ། བདག་དང་སེམས་ཅན་ཐམས་ཅད་ཉོན་མོངས་པ་ལས་ཐར་བར་གྱིས་ཤིག་པའི་དོན་ནི། ཉོན་མོངས་པས་སེམས་ཅན་ཐམས་ཅད་འཁོར་བ་དེ་ལས་བཟློག་ཅིང་ཐར་བར་བྱ་བའི་ཕྱིར་རོ། །སརྦ་བིདྱཱ། 
རིག་སྔགས་ཀྱི་མཐུས་གང་ལ་བྱ་བའི་ལས་ཐམས་ཅད་རྡོ་རྗེ་འབར་བས་སྒྲུབ་པར་བྱེད་པའི་དོན་ནི། ཡེ་ཤེས་ཀྱི་མཐུ་དང་ལྡན་པས་དོན་མ་ལུས་པ་ཐམས་ཅད་འགྲུབ་པར་བྱ་བའི་ཕྱིར་སྨོས་སོ། །བཛྲ་བཛྲ་སྤོ་ཊ། ཡེ་ཤེས་འབར་བའི་ཆེ་བས་བགེགས་རྣམས་གཞན་དུ་སྤོར་
ཅིག་པའི་དོན་ནི། ཐུགས་རྗེ་ཐབས་ཀྱི་ཕྲིན་ལས་ཆེ་བ་དང་འདྲ་བས། སྐྱེ་བཞི་བགེགས་རྩད་གཅོད་པའི་ཕྱིར་སྨོས་སོ། །བཛྲ་བཛྲ་ཀ་ཊ། ཡེ་ཤེས་ལས་གྲུབ་པའི་རྡོ་རྗེ་འབར་བས་ཉོན་མོངས་པ་ཐམས་ཅད་ཆོད་ཅིག་པའི་དོན་ནི། དངོས་པོ་རྣམས་དངོས་པོ་མེད་པར་བྱ་བའི་

71-1-201b

ཕྱིར། འདུལ་དབང་དུ་ཆོད་ཅིག་པའི་དོན་ཏོ། །བཛྲ་བཛྲ་མ་ཊ། བྱང་ཆུབ་སེམས་ཀྱི་རྡོ་རྗེས་བདག་ལ་གདུག་པ་རྣམས་གཏུགས་ཤིག་པའི་དོན་ནོ། །ཆོས་ཉིད་ངོ་བོ་རྡོ་རྗེ་དང་འདྲ་བས་མཚན་མ་རྣམས་མེད་པར་བྱེད་པའི་ཐབས་སོ། །བཛྲ་བཛྲ་མ་ཐ། ཡང་དག་པའི་ཡེ་ཤེས་རྡོ་རྗེས་བགེགས་རྣམས་ཐུལ་
ཅིག་པའི་དོན་ནི། རྟོགས་པའི་ལྟ་བ་ནི་རྡོ་རྗེ་དང་འདྲ་བས། ལོག་པའི་ལྟ་བ་རྣམས་མེད་པར་བྱེད་པའི་ཐབས་སོ། །བཛྲ་བཛྲ་ཨཥྚ །ཡེ་ཤེས་ལས་གྲུབ་པའི་ཡང་དག་པའི་རྡོ་རྗེས་བདུད་རྣམས་གནས་དེར་མི་གནས་པར་གྱིས་ལ་སྐྲོད་ཅིག་པའི་དོན་ནི། དངོས་པོ་རྣམས་དངོས་པོ་མེད་པར་བྱེད་པའི་
ཡང་དག་པའི་དོན། རྡོ་རྗེས་མཚན་མ་རྣམས་མེད་པར་བྱེད་པའི་ཕྱིར་སྐྲོད་ཅིག་པའོ། །ཧ་ས་ནི་ལ་བཛྲ། རྡོ་རྗེ་རྣོན་པོ་མེ་དང་འདྲ་བས་བག་ཆགས་རྣམས་ཆོད་ཅིག་རོལ་ཅིག་པའི་དོན་ནི། ཏིང་ངེ་འཛིན་རལ་གྲི་དང་འདྲ་བས་དངོས་པོ་རྣམས་གཅོད་ཅིང་དོན་མཐོང་བའི་ཐ་ཚིག་གོ། །སུ་བཛྲ་སྭཱཧཱ། 
ཐུགས་མཁྱེན་པའི་རྡོ་རྗེ་ཆོས་ཀྱི་དབྱིངས་རྣམ་པར་དག་པ་ལ་ལེགས་པར་སྦྱོར་ཅིག་པའི་དོན་ནི། རྟོགས་པའི་ལྟ་བ་རྣམ་པར་དག་པས་དོན་རྣམས་མཐོང་ཞིང་ལེགས་པར་རྟོགས་པའི་ཕྱིར་རོ། །དཀྱིལ་ཁོར་གཙོ་བོ་ཕྱག་ན་རྡོ་རྗེའི་རང་བཞིན་གྱི་དོན་བཤད་ཟིན་ཏོ།།      །།ད་ནི་དེའི་ཐུགས་
ཁྲོ་བོའི་ཕྲིན་ལས་ཀྱི་དོན་བཤད་དེ། ཐུགས་ཡང་དག་པའི་ཡེ་ཤེས་ཀྱིས་ཉོན་མོངས་པ་རྣམས་འཇོམས་པའི་རྟགས་སུ་ཐུགས་རྗེས་ཁྲོ་བོར་སྤྲུལ་ཏེ། དྲེགས་པ་ཅན་འདུལ་བ་དང་། ཕྲིན་ལས་བྱ་བ་དང་། དངོས་གྲུབ་རྣམས་སྦྱིན་པའི་ཕྱིར། རྣམ་པར་ཐར་པ་བརྒྱད་ཀྱི་རྟགས་ཁོ་ནའི་དོན་
སྟོན་པའི་ཕྱིར་རོ། །ཧེ་ཕུལླུ་ནི་རུ་ཕུལླུ། དེ་ལྟར་ཕྱག་ན་རྡོ་རྗེ་ཐུགས་ཀྱི་ངོ་བོར་གསུངས་ནས། རྡོ་རྗེ་ཁྲོ་བོ་ལས་སྦྱོར་བའི་ཕྱིར་རོ། །རྡོ་རྗེ་ཁྲོ་བོ་འབར་བས་ཉོན་མོངས་པའི་གཤིན་རྗེ་ཁམས་གསུམ་པ་རྣམས་ཐུགས་རྗེས་འབར་བས་བྱེད་པའི་དོན་ནི། ཐུགས་ཀྱི་བདག་པོའི་དོན་བསྟན་ནས། དེའི་
འོག་ཏུ་ཁྲོ་བོའི་ལྟ་བ་ལ་སོགས་པ་རྣམས་ཐུགས་རྗེའི་ཁྲོ་བོའི་རང་བཞིན་གྱིས་འཇོམས་པའི་དོན། གྲྀཧྞ་ཀུལླུ། ཁམས་གསུམ་གྱི་གཤེད་ཀྱི་སྡུག་བསྔལ་དང་། ལས་རྣམས་འཇོམས་པའི་དོན་ནི། འཇིག་རྟེན་པ་རྣམས་ཉོན་མོངས་པས་གཤིན་རྗེའི་དབང་དུ་སོང་བའི་སྡུག་བསྔལ་རྣམས་

71-1-202a

ཐུགས་རྗེས་གཤིན་རྗེ་ལྟ་བུས་འཇོམས་པའི་རྟགས་སོ། །མི་ལླི་ཙུལླུ། ཀུ་རུ་ཀུལླུ། འཕགས་པ་རྟ་མགྲིན་སྔོན་པོ་འབར་བས་སྡུག་བསྔལ་རྣམས་སྦྱོངས་ཤིག་པའི་དོན་ནི། འཁོར་བ་ལས་འཕགས་པའི་གསུང་གི་རྟ་སྐད་དང་ལྡན་པས། ཆོས་ཉིད་ཀྱི་ངོ་བོས་སྡུག་བསྔལ་རྣམས་
ཆོམས་ཤིག་པའི་དོན་ཏོ། །བཛྲ་བི་ཛ་ཡ་སྭཱཧཱ། ཁྲོ་བོའི་རྒྱལ་པོ་བདུད་རྩི་འཁྱིལ་པ་འབར་བས་ཉོན་མོངས་པ་ཐམས་ཅད་བདུད་རྩིར་བྱིན་གྱིས་རློབས་ཤིག་པའི་དོན་ནི། ཡང་དག་པའི་རྟགས་གཟུང་འཛིན་ལས་རྒྱལ་ཞིང་། དུག་བདུད་རྩིར་གྱུར་ཞིང་ཉོན་མོངས་པ་འཇོམས་པའི་རྟགས་ཐུགས་ཆོས་
ཉིད་དུ་འཁྱིལ་པས་སྨོས་སོ། །ཀཱི་ལི་ཀཱི་ལཱ་ཡ་སྭཱཧཱ། ཨཱརྱ་ཨཱ་ཙ་ལས་ཐུགས་ཀྱི་ཕྲིན་ལས་མཛད་པ་དང་། སྟོབས་པོ་ཆེས་དྲག་ཤུལ་གྱིས་ཕྲིན་ལས་མཛད་པའི་དོན་ནི། འཁོར་བ་ལས་འཕགས་ཤིང་ཐུགས་ཀྱི་ཕྲིན་ལས་སྣ་ཚོགས་པའི་ངོ་བོ་དང་། ཡང་དག་པའི་ཤེས་རབ་ཀྱི་སྟོབས་དང་ལྡན་པ་
གཉིས་ཀྱི་ཕྲིན་ལས་སོ། །ཀ་ཊ་ཀ་ཊ། ཞེས་པ་ནི་ཡ་མཱནྟ་ཀ་ཁྲོ་བོས་བདུད་རྣམས་སྤ་བཀོངས་ཤིག་པའི་དོན་ནི། ཐུགས་ཡེ་ཤེས་ཀྱི་རྒྱལ་པོས་ལྟ་བ་ངན་པ་རྣམས་མེད་པར་བྱེད་པའི་ཐ་ཚིག་གོ། །མ་ཊ་མ་ཊ་ནི་ཧཱུཾ་ཀཱ་རས་ཉོན་མོངས་པ་རྣམས་ལས་ཐུགས་རྗེས་སྐྱོབས་ཤིག་པ་ནི། མཚན་མ་ཐམས་ཅད་
འཇིག་པར་ཡེ་ཤེས་ཀྱི་ཁྲོ་བོས་ལྟ་བ་ལོག་པ་རྣམས་མེད་པར་བྱེད་པའི་ཐ་ཚིག་གོ། །ར་ཊ་ར་ཊ་ཁྲོ་བོའི་རྒྱལ་པོ་པདྨ་འཁྱིལ་པས་ཉོན་མོངས་པ་རྣམས་ཞི་བར་མཛོད་ཅིག་པའི་དོན་ནི། ཉོན་མོངས་པ་ལ་ཁྲོ་ཞིང་མ་ཆགས་པའི་སྐྱོན་གྱི་དབུ་འཁྱིལ་པས་མཚན་མ་རྣམས་ཞི་བར་བྱེད་པའི་ཐ་ཚིག་གོ། །
མོ་ཊ་ན་པྲ་མོ་ཊ་ནཱ་ཡ་སྭཱཧཱ་ཡེ་ཤེས་ཀྱི་གནོད་སྦྱིན་འབར་བ་གཤིན་རྗེ་གཤེད་ཀྱིས་སྐྱོབས་ཤིག་པའི་དོན་ནི། འཁོར་བ་འཇོམས་པའི་ངོ་བོ་ཐུགས་རྗེའི་མེ་འབར་བས། མཚན་མ་རྣམས་མེད་པར་བྱེད་པའི་ཐ་ཚིག་གོ། །ཙ་ར་ནི་ཙ་ར་ཞེས་པ་ནི་ཁྲོ་བོའི་རྒྱལ་པོ་ནཱི་ལ་དཎྜས། བདག་དང་སེམས་ཅན་
ཐམས་ཅད་ལ་ཚེ་དང་དབང་ཐང་སྩོལ་ཅིག་པའི་དོན་ནི། མཚན་མ་མེད་པའི་ཡེ་ཤེས་ཀྱི་བདག་པོས། མི་འཆི་བའི་གཡུང་དྲུང་དང་། བསོད་ནམས་ཀྱི་ཚོགས་ཐོབ་པར་བྱེད་པའི་ཐ་ཚིག་གོ། །ཧ་ར་ཧ་ར་ཡེ་ཤེས་ཀྱི་གཤོག་པས་འཁོར་བའི་སྡུག་བསྔལ་ལས་སྐྱོབས་ཤིག་པའི་དོན་ནི། རྟོགས་

71-1-202b

པའི་ཡེ་ཤེས་པས་འཁོར་བའི་སྡུག་བསྔལ་རྣམས་ལས་ཐར་པར་མཛད་དོ། །ས་ར་ས་ར་ཏིང་ངེ་འཛིན་དྲག་ཤུལ་གྱི་སེམས་ཉམས་པ་རྣམས་དྲན་པར་གྱིས་ཤིག་པའི་དོན་ནི་ཐུགས་ཀྱི་རང་བཞིན་ཕུན་སུམ་ཚོགས་པ་དང་ལྡན་པས། སེམས་ཉམས་པའི་སྐྱོན་སྦྱོང་བའི་ཐབས་སོ། །མཱ་ར་ཡ་
ཉོན་མོངས་པ་འཇོམས་པའི་རྡོ་རྗེས་བགེགས་རྣམས་སོད་ཅིག ལས་དྲག་པོས་རྡུལ་དུ་ཐོང་ཤིག་པའི་དོན་ནི། ལྟ་བ་ངན་པ་འཇོམས་པའི་དྲག་པོའི་སྟོབས་དང་ལྡན་པའི་རྡོ་རྗེ་ལྟ་བུས་གནོད་པའི་གདོན་རྣམས་སྟོངས་པར་བྱེད་པའི་ཐབས་སོ། །བཛྲ་བི་དཱ་ར་ཎཱ་ཡ་སྭཱཧཱ། རྡོ་རྗེ་རྣམ་
པར་འཇོམས་པས་རྡོ་རྗེ་ལྟ་བུའི་ཏིང་ངེ་འཛིན་གྱི་གནོད་པ་རྣམས་ཞི་བར་མཛོད་ཅིག་པའི་དོན་ནི། ཡང་དག་པའི་ཡེ་ཤེས་ཀྱིས་མཚན་མ་ཐམས་ཅད་མཚན་མ་མེད་པར་བྱེད་པའི་ཐ་ཚིག་གོ། །ཚིནྡ་ཚིནྡ། ཁྲོ་བོའི་རྒྱལ་པོ་ཧ་ཡ་གྲྀ་བས། ཉོན་མོངས་པ་རྣམས་རྩད་ཆོད་པ་ནི། གསུང་གི་
བདག་པོ་ཆགས་པའི་བདག་ཉིད་ཀྱི་གདུག་པ་རྣམས་མེད་པར་བྱེད་པའི་དོན། བྷིནྡ་བྷིནྡ། བདག་དང་སེམས་ཅན་རྣམས་ཀྱི་སྡུག་བསྔལ་བཤིག་པའི་དོན། ཐུགས་རྗེ་ཕུན་སུམ་ཚོགས་པས་སྡུག་བསྔལ་གསུམ་དང་བརྒྱད་ལས་ཐར་བར་བྱེད་པའོ། །མ་ཧཱ་ཀཱི་ལི་ཀཱི་ལཱ་ཡ་སྭཱཧཱ། ཁྲོ་བོའི་
རྒྱལ་པོ་སྟོབས་པོ་ཆེ་ལས་དང་ཉོན་མོངས་པ་ཐམས་ཅད་ཐུགས་ཞི་བའི་སྒོ་ནས་ཞི་བར་མཛོད་ཅིག་པའི་དོན་ནི། འཁོར་བ་འཇོམས་པའི་སྟོབས་དང་ལྡན་པས་གཟུང་འཛིན་གྱི་བག་ཆགས་རགས་པ་རྣམས་སྟོངས་པར་བྱེད་པའི་ཐ་ཚིག་གོ། །བནྡྷ་བནྡྷ། ཊཀྐི་རཱ་ཛ་སྟེ་ཁྲོ་བོའི་རྒྱལ་པོས་གདུག་
པའི་བདུད་རྣམས་མགོ་ནས་བཟུང་ལ་ཆིངས་ཤིག་པའི་དོན་ནི། འཁོར་བ་འཇོམས་པའི་རྒྱལ་པོས་ལྟ་བའི་བདུད་རྣམས་རྩ་བ་ནས་འབྱིན་\པའི་ཐ་ཚིག་གོ། །ཏྲོ་ཊ་ཏྲོ་ཊ། ཁྲོ་བོའི་ཁྲོ་བོས་ཉོན་མོངས་པ་རོལ་ཅིག་པའི་དོན་ནི། ཉོན་མོངས་པ་ཁྲོ་བོ་ལ་ཐུགས་རྗེ་ཁྲོ་བོས་འཇོམས་པའི་ཐ་ཚིག་གོ། །
ཀཱི་ལི་ཀཱི་ལཱ་ཡ་སྭཱཧཱ། བྱང་ཆུབ་སེམས་ཀྱི་རང་བཞིན་བདུད་རྩི་འཁྱིལ་པས་ཐམས་ཅད་ཞི་བར་མཛོད་ཅིག་པའི་དོན་ནི། གཟུང་འཛིན་གྱི་སྐྱོན་སྤངས་པའི་བདུད་རྩི་དང་ལྡན་པས། ཆོས་ཉིད་དུ་དངོས་པོ་རྣམས་ལས་བཟློག་པའི་ཕྱིར་རོ། །ཙུ་རུ་ཙུ་རུ། ཁྲོ་བོའི་རྒྱལ་པོ་ཨ་མོ་གྷ་པཱ་ཤས་དམ་

71-1-203a

ཚིག་བཞིན་དུ་ཕྲིན་ལས་མཛོད་ཅིག་པའི་དོན་ནི། ཐབས་ཐུགས་རྗེ་ཆེན་པོའི་ཞགས་པ་དང་ལྡན་པས་སྔོན་གྱི་ཕྲིན་ལས་བཞིན་དུ་ལས་མཛོད་ཅིག་པའི་དོན་ནོ། །ཙཎྜ་ལི། ཁྲོ་བོའི་རྒྱལ་པོ་ཚུར་སྤྱོན། དམ་ཚིག་ལ་དགོངས་ཤིག་པའི་དོན་ནི། མ་རུངས་པ་འདུལ་བའི་
བདག་པོ་གཉིས་སུ་མེད་པར་བྱ་བ་དང་། མི་འདའ་བར་བྱ་བའི་ཕྱིར་རོ། །ཀཱི་ལི་ཀཱི་ལཱ་ཡ་སྭཱཧཱ། བདུད་རྩི་འཁྱིལ་པས་ཐུགས་རྗེ་ཚད་མེད་པའི་གསུང་སྒྲས་ཐམས་ཅད་བྱང་ཆུབ་སེམས་སུ་ཞི་བར་མཛོད་ཅིག་པའི་དོན་ནི། ལྟ་བའི་བདུད་རྣམས་བྱང་ཆུབ་སེམས་ཀྱི་རྩིས་བསྒྱུར་ཞིང་། ཤེས་རབ་
ཀྱི་སྒྲས་ཆོས་ཉིད་དུ་སྟོན་ཅིང་བྱང་ཆུབ་སེམས་ལ་དགོད་པའི་དོན། ཏྲཱ་ས་ཡ་ཏྲཱ་ས་ཡ། ཁྲོ་བོའི་རྒྱལ་པོ་མ་ཧཱ་བ་ལས་བདུད་དང་དྲེགས་བྱེད་རྣམས་སྐྲག་པར་གྱིས་སྐྲག་པར་གྱིས་ཤིག་པའི་དོན་ནི། ཉོན་མོངས་པ་འཇོམས་པའི་སྟོབས་དང་ལྡན་པ། བདུད་རྣམ་བཞི་འཇོམས་ཤིང་སྐྲག་པར་བྱེད་
པའི་དོན་ནོ། །བཛྲ་ཀཱི་ལི་ཀཱི་ལཱ་ཡ་སྭཱཧཱ། ཡེ་ཤེས་ཀྱི་རྡོ་རྗེ་འབར་བས་ཐམས་ཅད་ཞི་བར་མཛོད་ཅིག་པའི་དོན་ནི། ཡང་དག་པའི་ཡེ་ཤེས་ཀྱི་དངོས་པོ་རྣམས་དངོས་པོ་མེད་པར་གྱིས་ཤིག་པའི་དོན། ཧ་ར་ཧ་ར་བཛྲ་དྷཱ་རཱ་ཡ་སྭཱཧཱ། རྡོ་རྗེ་ཡེ་ཤེས་འབར་བའི་སྒོ་བ་བཞིས་བགེགས་སྐྲོགས་ཤིག་
སྐྲོགས་ཤིག་པའི་དོན་ནི། ཕྲིན་ལས་འཇོམས་པའི་བདག་ཉིད་ཀྱིས་ལྟ་བའི་བགེགས་རྣམས་མེད་པར་གྱིས་ཤིག་པའི་དོན་ནོ། །པྲ་ཧ་ར་པྲ་ཧ་ར། ཁྲོ་བོའི་རྒྱལ་པོ་བདུད་རྩི་འཁྱིལ་པས། མཚན་མའི་དངོས་པོ་ཐམས་ཅད་ཞི་བར་མཛད་ནས། བྱིན་གྱིས་རློབས་ཤིག་པའི་དོན་ནི། ཉོན་མོངས་
པའི་བདུད་འཇོམས་པའི་བདུད་རྩི་འཁྱིལ་པས་མཚན་མ་ཐམས་ཅད་བདུད་རྩིར་བྱིན་གྱིས་རློབས་ཤིག་པའི་དོན་ནོ། །བཛྲ་པྲ་བྷཉྫ་ནཱ་ཡ་སྭཱཧཱ། བྱང་ཆུབ་སེམས་ཀྱི་རྡོ་རྗེ་འབར་བས་ལས་དང་ཉོན་མོངས་པའི་བག་ཆགས་ཐམས་ཅད་ཞི་བར་མཛོད་ཅིག་པའི་དོན་ནི། འབྲས་བུའི་རང་བཞིན་མཚན་མ་
འཇོམས་པའི་ཡེ་ཤེས་ཀྱིས་དངོས་པོ་མ་ལུས་པ་རྣམས་ཞི་བར་གྱུར་པ་དང་། རབ་ཏུ་ཞི་བར་གྱུར་པའི་ཕྱིར་རོ། །ཡེ་ཤེས་ཀྱི་རྟགས་ཀྱི་ཁྲོ་བོ་རྣམས་ཀྱི་ཕྲིན་ལས་ཀྱི་དོན་རྣམས་བཤད་ཟིན་ཏོ།།      །།ད་ནི་ཐུགས་ཁྲོ་བོའི་ཕྲིན་ལས་བསྲུང་བའི་དོན་སྟོན་ཏེ། མ་ཏི་སྠི་ར་བཛྲ། བློ་གྲོས་བརྟན་པའི་རྡོ་རྗེས་བྱང་ཆུབ་སེམས་ཀྱི་

71-1-203b

རང་བཞིན་དང་ལྡན་པར་གྱིས་ཤིག་པའི་དོན་ནི། ཏིང་ངེ་འཛིན་གྱི་རྡོ་རྗེས་བདག་གི་ལུས་རྡོ་རྗེ་ལྟ་བུར་ཞི་བར་མཛོད་ཅིག་པའི་དོན་ནོ། །སུ་ཏི་སྠི་ར་བཛྲ། ཤིན་ཏུ་བརྟན་པའི་རྡོ་རྗེས་ལེགས་པའི་ཡོན་ཏན་རྡོ་རྗེ་ལྟ་བུ་ཞི་བ་དང་ལྡན་པར་གྱིས་ཤིག་པའི་དོན་ནི། ཏིང་ངེ་འཛིན་མི་འགྱུར་བའི་ངོ་བོས་སྐྱོན་སྤངས་
ནས་ཐམས་ཅད་ཞི་བར་བྱེད་པའི་དོན། པྲ་ཏི་སྠི་ར་བཛྲ། སོ་སོར་བརྟན་པའི་རྡོ་རྗེས་བདག་གི་ལུས་རྡོ་རྗེ་ལྟ་བུར་ཞི་བར་མཛོད་ཅིག་པའི་དོན་ནི། སོ་སོར་རྟོག་པའི་ཡེ་ཤེས་ཀྱིས་དངོས་པོ་རགས་པ་རྣམས་རབ་ཏུ་བཅོམ་ནས་ཆོས་ཉིད་ལ་གནས་པར་བྱེད་པའི་དོན་ནོ། །མ་ཧཱ་བཛྲ་ཆེན་པོ་རྡོ་རྗེས་ཞི་
བའི་ཚུལ་དུ་བདུད་ལས་རྒྱལ་བར་མཛོད་ཅིག་པའི་དོན་ནི། ལྟ་སྤྱོད་རྣམ་པར་དག་པས་གཟུང་འཛིན་གྱི་སྐྱོན་གྱི་བདུད་འདུལ་བའི་རྟགས་སོ། །ཨ་པྲ་ཏི་ཧ་ཏ་བཛྲ། རབ་ཏུ་བརྟན་པའི་རྡོ་རྗེས་བདག་ལ་ཡེ་ཤེས་ཀྱི་མཚོན་ཆ་སྩོལ་ཅིག གཞན་གྱི་གཏི་མུག་རྣམས་གཞོམ་པའི་ཕྱིར་རོ་ནི། ཆོས་ཀྱི་
དབྱིངས་ཀྱི་ཡེ་ཤེས་ཀྱིས་དངོས་པོའི་མཚན་མ་རྣམས་འཇོམས་ཤིང་གཏི་མུག་གནས་སུ་དག་པར་བྱེད་པའི་ཕྱིར་རོ། །ཨ་མོ་གྷ་བཛྲ། དོན་ཡོད་པའི་རྡོ་རྗེས་བདག་ལ་དོན་རྣམས་སྩོལ་ཅིག་པའི་དོན་ནི། དེ་བཞིན་གཤེགས་པའི་ཐུགས་རྗེའི་ཕྲིན་ལས་ཀྱིས་འཁོར་བ་ལས་འདྲེན་པ་དང་། 
དོན་རྣམས་སྦྱིན་པའི་ཐ་ཚིག་གོ། །ཨེ་ཧི་བཛྲ་བདེན་པའི་རྡོ་རྗེས་བདག་འཁོར་བ་ལས་དྲོངས་ཤིག ཚུར་གཤེགས་ཚུར་བྱོན་ཞེས་པ་ན། མེ་ལོང་ལྟ་བུའི་ཡེ་ཤེས་ཀྱིས་འཁོར་བ་རྣམས་སྟོངས་པར་གསལ་བར་བྱེད་པ། རྟོགས་ཤིང་འགྲོ་བའི་དོན་དུ་གཤེགས་པའི་ཐ་ཚིག་གོ། །ཤཱི་གྷཾ་བཛྲ་དྷ་
རཱ་ཡ་སྭཱཧཱ། དཔའ་བར་འགྲོ་བའི་རྡོ་རྗེ་ལ་གོར་རྒྱུག་པའི་ཕྱིར། དེ་བཞིན་གཤེགས་པའི་ཕྲིན་ལས་མཛོད་ཅིག་པའི་དོན་ནི། བྱ་བ་སྒྲུབ་པའི་ཡེ་ཤེས་ཀྱིས་ལས་ཀྱི་ཕྲིན་ལས་སྣ་ཚོགས་པ་མཛད་ཅིང་དངོས་པོ་རྣམས་འཇོམས་པའི་དོན། ཁྲོ་བོ་བསྲུང་བའི་ཕྲིན་ལས་བཤད་ཟིན་ཏོ།།      །།སྒོ་བཞིའི་
སྲུང་བ་སྟོན་ཏེ། ཡེ་ཤེས་ཀྱི་རྟགས་ཀྱིས་སྲུང་བར་བྱེད་པའོ། །དེ་ནི་ལྟ་བ་ལོག་པའི་སེམས་ཅན་རྣམས་ལ། ཡེ་ཤེས་རྣམ་པ་བཞིས་འགྲོ་བའི་དོན་དུ་ཐུགས་རྗེས་འདུལ་བའི་དབང་དུ་བསྟན་ཏོ། །སརྦ་ཀུ་ལཾ་ཨཱ་བརྟ་ཡ། རྡོ་རྗེ་འཛིན་འཁོར་དང་བཅས་པ་བདག་ལ་བྱིན་གྱིས་རློབས་ཤིག །གནོད་

71-1-204a

པའི་བྱེ་བྲག་ཐམས་ཅད་རབ་ཏུ་ཞི་བར་མཛོད་ཅིག་པའི་དོན་ནི། ཡེ་ཤེས་ཀྱི་འཁོར་རྟགས་ཀྱི་ཕྱག་རྒྱས་དངོས་གྲུབ་སྦྱིན་ཞིང་གནོད་པ་རྣམས་འདུལ་ཞིང་མེད་པར་བྱེད་པའི་དོན་ཏོ། །དྷ་ར་དྷ་ར། བྱང་ཆུབ་སེམས་ཀྱི་རང་བཞིན་ཞི་བས་ཐམས་ཅད་ཁྱེར་ལ་གཟུངས་སུ་གྱིས་
ཤིག་པའི་དོན་ནི། སྙིང་རྗེ་ཆེན་པོ་ཚད་མེད་པས་ཉོན་མོངས་པ་ཞི་བར་བྱ་བ་དང་། བྱང་ཆུབ་ཏུ་ཁྱེར་ལ་གཉིས་སུ་མེད་པར་བྱེད་པའི་དོན་ཏོ། །དྷི་རི་དྷི་རི། དབྱིངས་ཀྱི་རང་བཞིན་ཆོས་ཉིད་ཀྱིས་ལེགས་པར་ཐོགས་ཤིག་པའི་དོན་ནི། དེ་བཞིན་གཤེགས་པའི་ཡེ་ཤེས་ཀྱི་ཕྲིན་ལས་ཀྱིས་ཆོས་
ཉིད་ལ་ཟློ་བའི་དོན་ཏོ། །དྷུ་རུ་དྷཱ་རུ། ལུས་ཅན་ཐམས་ཅད་ཐུགས་རྗེས་རབ་ཏུ་ཟུངས་ལ་ཐོགས་ཤིག་པའི་དོན་ནི། སྒོ་བ་བཞིས་དངོས་པོ་རྣམས་ཐུགས་རྗེས་རབ་ཏུ་འདུལ་ཞིང་འཛིན་པར་གྱུར་པའི་ཐབས་སོ། །སརྦ་བཛྲ་ཀུ་ལཾ་ཨཱ་བརྟ་ཡ་སྭཱཧཱ། ཞེས་པ་ནི་རྡོ་རྗེ་འཁོར་དང་བཅས་པས་བདག་ལ་
བྱིན་གྱིས་རློབས་ཤིག གནོད་པར་བྱེད་པའི་བྱེ་བྲག་ཐམས་ཅད་རབ་ཏུ་ཞི་བར་མཛོད་ཅིག་པའི་དོན་ནོ། །ཨ་མུ་ཀ་མཱ་ར་ཡ་ཕཊ། བདག་དུས་མ་ཡིན་པའི་འཇིགས་པ་བཟློག་ཅིང་། བདུད་རྣམས་ཆོམས་ཤིག་པའི་དོན་ནི། དངོས་པོའི་བདུད་དངོས་པོ་མེད་པ་ལ་བཟླ་བའི་ཕྱིར་དང་། ཕྱི་ནང་གི་
བདུད་འཇོམས་པའི་རྟགས་སོ། །ཁྲོ་བོ་བརྒྱད་དང་། སྒོ་བ་བཞིའི་སྲུང་བའི་ཕྲིན་ལས་ཀྱི་དོན་བཤད་ཟིན་ཏོ།།      །།ད་ནི་ཁྲོ་བོའི་དབང་གི་དོན་སྟོན་ཏེ། ཐུགས་རྗེས་འཁོར་བ་དབང་དུ་སྡུད་པའི་ཕྱིར་འདུལ་བའི་དབང་དུ་དབང་གི་ལས་བསྟན་ཏེ། ན་མཿས་མནྟ་བཛྲཱ་ཎཱཾ། ཀུན་ཏུ་བཟང་པོ་ཡེ་ཤེས་ཀྱི་རྡོ་རྗེ་
རང་བཞིན་དུ་དབང་བསྐུར་བའི་དོན་ནི། ཆོས་ཀྱི་དབྱིངས་ཀྱི་ཡེ་ཤེས་ཀྱིས་དངོས་པོའི་སྐྱོན་རང་བཞིན་གྱིས་དག་པར་དབང་བསྐུར་བའི་དོན་ནི། སརྦ་བ་ལ། ཐམས་ཅད་ཀུན་གྱི་རང་བཞིན་སྟོབས་པོ་ཆེས་དབང་བསྐུར་བའི་དོན་ནི་ཆོས་ཉིད་ཀྱི་སྟོབས་ཀྱིས་དངོས་པོ་ཐམས་ཅད་འཇོམས་པའི་དབང་བསྐུར་
བའི་ཕྱིར་རོ། །ཨཱ་བརྟ་ཡ། མ་ཧཱ་བ་ལེ། མཉེས་པར་བྱེད་པ་སྟོབས་པོ་ཆེ་མགྱོགས་པ་རླུང་དང་འདྲ་བས་དབང་བསྐུར་བའི་དོན་ནི། མཉམ་པ་ཉིད་ཀྱི་ཡེ་ཤེས་ཀྱི་སྟོབས་མགྱོགས་པར་བྱེད་པ་དང་། མྱུར་བ་རླུང་ལྟ་བུས་དབང་བསྐུར་བའི་ཕྱིར་རོ། །ཀ་ཏ་བེ་ཏ་ཏ་ལེ། ཡེ་ཤེས་ཀྱི་མཆེ་བས་ཉོན་མོངས་

71-1-204b

པའི་བདུད་ཐུལ་ཅིག་པའི་དོན་ནི། སོ་སོར་ཀུན་དུ་རྟོག་པའི་ཡེ་ཤེས་ཀྱིས་མཆེ་བས་སྐྱེ་བཞི་འཇོམས་པའི་རྟགས་སོ། །ཨ་ཙ་ལེ། ཁམས་གསུམ་རྣམ་པར་རྒྱལ་བའི་དཀྱིལ་འཁོར་གྱི་མངའ་བདག་གི་སྤྲུལ་པས་བདག་ལ་དབང་བསྐུར་ལ་སྐྱོབས་ཤིག་པའི་དོན་ནི། འཇིག་རྟེན་ལས་ཡེ་ཤེས་ཀྱིས་རྒྱལ་
བར་བྱེད་པའི་ཐུགས་ཆོས་ཉིད་ཀྱི་མངའ་བདག་གིས་དབང་བསྐུར་བའི་དོན་ནོ། །མཎྜ་ལ་མ་ཡེ། དཀྱིལ་འཁོར་གྱི་སྲུང་མ་རྣམས་ཀྱིས་སྤྲུལ་པའི་ངོ་བོ་ཉིད་ཀྱི་མཆེ་བ་སྣ་ཚོགས་སུ་སྣང་བའི་དོན་ནི། ཐུགས་རྗེས་འདུལ་བའི་དབང་དུ་སྐུར་སྤྲུལ་ཏེ། འགྲོ་བའི་དོན་དུ་ཐབས་མཁས་པའི་བདེ་བ་སྦྱིན་པའི་དོན་ནོ། །
ཨ་ཏི་བཛྲ་རྡོ་རྗེ་བཟང་པོས་གནོད་པ་ཐམས་ཅད་ལས་བདག་སྐྱོབས་ཤིག་པའི་དོན་ནི། མེ་ལོང་ལྟ་བུའི་ཡེ་ཤེས་ཀྱིས་ལས་ཀྱི་བག་ཆགས་རྣམས་འཇོམས་པའི་ཕྱིར་རོ། །མ་ཧཱ་བ་ལེ་བེ་ག་ར་ཎ། སྟོབས་པོ་ཆེས་མགྱོགས་པ་རླུང་དང་འདྲ་བས། གནོད་པ་ཐམས་ཅད་ཞི་བར་མཛོད་ཅིག་པའི་དོན་ནི། མཉམ་
པ་ཉིད་ཀྱི་ཡེ་ཤེས་ཀྱི་སྟོབས་ཀྱི་ཕྲིན་ལས་ཀྱིས་ནི་སྡུག་བསྔལ་འཇོམས་པའི་ཐ་ཚིག་གོ། །ཨ་ཛི་ཏེ་ཛྭ་ལ་ཛྭ་ལ། ཡང་དག་པའི་ཤེས་རབ་ཀྱིས་བདུད་ཀྱི་དྲེགས་པ་རྣམས་སྲེགས་ཤིག འབར་བས་ཉོན་མོངས་པ་སྲེགས་ཤིག་པའི་དོན་ནི། དེ་བཞིན་གཤེགས་པའི་སོ་སོར་ཀུན་དུ་རྟོགས་པའི་ཡེ་ཤེས་
ཀྱིས་ལྟ་བའི་བདུད་རྣམས་མེད་པར་གྱིས་ཤིག་པའི་དོན། ཏི་ཊི་ཏི་ཊི་པིངྒ་ལེ། འབར་བ་སྐམ་པོ་འབར་བས་སྡུག་བསྔལ་ལས་སྐྱོབས་ཤིག་པའི་དོན་ནི། བྱ་བ་གྲུབ་པའི་ཡེ་ཤེས་ཀྱི་དངོས་པོ་རྣམས་མེད་པར་བྱེད་པའི་ཐ་ཚིག་གོ། །ད་ཧ་ད་ཧ། བདག་གི་ཉོན་མོངས་པ་རྣམས་སྲེགས་ཤིག ཡང་
དག་པའི་ཡེ་ཤེས་འབར་བར་གྱིས་ཤིག་པའི་དོན་ནི། མཉམ་པ་ཉིད་ཀྱི་ཡེ་ཤེས་ཀྱིས་རྟོག་པ་རྣམས་མི་རྟོག་པར་བྱེད་པའི་དོན་ཏོ། །ཏེ་ཛོ་བ་ཏི། ཡང་དག་པའི་ཡེ་ཤེས་ཀྱིས་གཏི་མུག་གི་མུན་པ་ལས་འབར་བར་གྱིས་ཤིག་པའི་དོན་ནི། མེ་ལོང་ལྟ་བུའི་ཡེ་ཤེས་ཀྱིས་མ་རིག་པའི་ལྟ་བ་རྣམ་པར་སེལ་
བའི་དོན་ཏོ། །ཏི་ལི་ཏི་ལི། བདག་གི་སྡུག་བསྔལ་ཐམས་ཅད་ཆོད་ཅིག་པའི་དོན་ནི། ཆོས་ཀྱི་དབྱིངས་ཀྱི་ཡེ་ཤེས་ཀྱིས་སྡུག་བསྔལ་རྣམས་མེད་པར་བྱེད་དོ། །བནྡྷ་བནྡྷ། བགེགས་དང་འབྱུང་པོ་ཐམས་ཅད་ཆིངས་ཤིག་པའི་དོན་ནི། བྱ་བ་གྲུབ་པའི་ཡེ་ཤེས་ཀྱིས་གནོད་པ་རྣམས་འཇོམས་པར་བྱེད་

71-1-205a

པའི་དོན་ནོ། །མ་ཧཱ་བ་ལེ། སྟོབས་པོ་ཆེས་ལས་མཛོད་ཅིག་པའི་དོན་ནི། མཉམ་པ་ཉིད་ཀྱི་ཡེ་ཤེས་ཀྱིས་འདོད་པ་འབྱུང་བའི་ལས་བྱེད་པའི་རྟགས་སོ། །བཛྲ་ཨཾ་ཀུ་ཤ་ཛྭཱ་ལཱ་ཡ་སྭཱཧཱ། རྡོ་རྗེ་མེ་དང་འདྲ་བས་མཚན་མ་ཐམས་ཅད་ཞི་བར་མཛོད་ཅིག་པའི་དོན་ནི། མེ་ལོང་ལྟ་བུའི་ཡེ་ཤེས་
ཀྱིས་སྡུག་བསྔལ་རྣམས་མེད་པར་བསྲེག་པའི་ཐབས་སོ། །ཐུགས་ཁྲོ་བོའི་དབང་གི་དོན་བཤད་ཟིན་ཏོ།།      །།ད་ནི་ཡེ་ཤེས་ཀྱི་ཁྲོ་བོ་ལག་ན་རྡོ་རྗེ་དང་། ཁྲོ་བོ་བརྒྱད་དང་སྒོ་བའི་དོན་སྟོན་ཏེ། དེ་ནི་དཀྱིལ་འཁོར་གྱི་བདག་པོ་དང་། འཁོར་གྱི་སྙིང་པོ་བྱང་ཆུབ་སེམས་ཡིན་པར་བསྟན་ཏོ། །ན་མོ་རཏྣ་ཏྲ་ཡཱ་
ཡ། ཡེ་ཤེས་ཀྱི་སྙིང་པོ་ལས་རྣམ་པ་བཞིའི་རང་བཞིན་ཏེ། དཀོན་མཆོག་གསུམ་ལ་ཕྱག་འཚལ་བའི་དོན་ཡིན་པས་ཕྱག་ན་རྡོ་རྗེ་བདུད་རྩི་ངོ་བོ་ནི་མེ་ལོང་ལྟ་བུ་ཡེ་ཤེས་ཀྱིས། ཡེ་ཤེས་ཐམས་ཅད་ཀྱི་རང་བཞིན་དང་། འབྱུང་གནས་ཡིན་པས་དཀོན་མཆོག་གི་དོན་དུ་བསྟན་ཏོ། །ན་མོ་ཤྩཎྜ་བཛྲ་པཱ་
ཎ་ཡེ། ཁམས་གསུམ་གྱི་སེམས་ཅན་རྣམས་འདུལ་བའི་དོན་དུ། ཐུགས་རྗེས་ཁྲོ་བོའི་ཚུལ་དུ་བཞུགས་པས་རྡོ་རྗེ་ཁྲོ་བོར་བསྟན་པ་ནི། སངས་རྒྱས་ཀྱི་ཐུགས་ལས་སྐྱེས་པས་བདུད་འདུལ་དབང་ཕྱུག་ཏུ་བསྟན། མ་ཧཱ་ཡཀྵ་སེ་ནཱ་པ་ཏ་ཡེ། གནོད་སྦྱིན་གྱི་སྡེ་དཔོན་ལག་ན་རྡོ་རྗེ་ཡེ་ཤེས་ཀྱི་ངོ་
བོར་གསུངས་པའི་ཕྱིར་རོ་ནི། འཇིག་རྟེན་གྱི་དྲེགས་པ་ཅན་ཐུགས་རྗེས་འདུལ་བའི་རྟགས་སུ་བསྟན་པའི་དོན་ཏོ། །ཧ་ར་ཧ་ར་བཛྲ། ཡེ་ཤེས་རྣམ་པ་ལྔའི་ངོ་བོ་ཕྱག་ན་རྡོ་རྗེ་དབུས་ན་བཞུགས་ཏེ། རུས་ནི་གནོད་སྦྱིན་དུ་བསྟན་པ་སྟེ། ལྷ་ཆེན་པོས་མ་ལུས་པ་འདུལ་བའི་ཕྱིར། དཀྱིལ་འཁོར་
གྱི་བདག་པོར་བསྟན་ཏོ། །གཤིན་རྗེ་གཤེད་ཀྱི་སྙིང་པོ་ནི་མ་ཐ་མ་ཐ་བཛྲ། ཧཱུཾ་ཀ་ར་གཤིན་རྗེ་གཤེད་ཀྱི་རྒྱལ་པོའི་རང་བཞིན་མེ་ལོང་ལྟ་བུའི་ཡེ་ཤེས་ཀྱིས་བདུད་གཡུལ་བཟློག་པའི་རྟགས་སུ་བསྟན་ཏོ། །ཁམས་གསུམ་རྣམ་པར་རྒྱལ་བའི་སྙིང་པོ་ནི། དྷུ་ན་དྷུ་ན་བཛྲ། མཚན་མའི་དངོས་པོ་
ཐམས་ཅད་འཇོམས་པས་ཁམས་གསུམ་རྣམ་པར་རྒྱལ་བའི་སྙིང་པོ་ནི། ཆོས་ཀྱི་དབྱིངས་ཀྱི་ཡེ་ཤེས་ནི་བདག་ཏུ་ལྟ་བའི་མཚན་མ་རྣམས་འཇོམས་ཤིང་དོན་མཐོང་བར་བྱེད་པའི་ཕྱིར་རོ། །ཡ་མཱནྟ་ཀའི་སྙིང་པོ་ནི། ད་ཧ་ད་ཧ་བཛྲ། ཡ་མཱནྟ་ཀ་ཁྲོ་བོའི་རྒྱལ་པོ་བྱང་ཆུབ་སེམས་ཀྱི་རང་བཞིན་ནི་

71-1-205b

སོ་སོར་ཀུན་དུ་རྟོགས་པའི་ཡེ་ཤེས་ཀྱིས་བྱང་ཆུབ་ཐོབ་པའི་རྒྱའོ། །ནཱི་ལ་དཎྜའི་སྙིང་པོ་ནི། པ་ཙ་པ་ཙ་བཛྲ། ནཱི་ལ་དཎྜའི་རང་བཞིན། རྟ་མགྲིན་སྔོན་པོའི་ངོ་བོར་བསྟན་པ་ནི། ཡེ་ཤེས་རྣམ་པ་བཞིའི་ཕྲིན་ལས་འདུལ་དབང་དུ་ཕྱུང་བའོ། །ཧ་ཡ་གྲྀ་བའི་སྙིང་པོ་ནི། ད་ར་ད་ར་བཛྲ། ཧ་ཡ་གྲྀ་བའི་རང་
བཞིན་སྔགས་ཀྱི་ས་བོན་བྱང་ཆུབ་སེམས་ཀྱི་ངོ་བོའི་སྙིང་པོ་ན། ཐབས་མཁས་པའི་ཆགས་པས་དབང་དུ་སྡུད་པ་པདྨ་འཁྱིལ་པའི་རྟགས་སུ་སྣང་ངོ་། །ད་ར་ཡ་ད་ར་ཡ་བཛྲ། བདུད་རྩི་འཁྱིལ་པའི་སྙིང་པོའི་རང་བཞིན། བྱང་ཆུབ་སེམས་མཚོན་པའི་རང་བཞིན་ནི། ཐབས་མཁས་པའི་ཐུགས་
རྗེའི་ཕྲིན་ལས་ཀྱིས་སེམས་ཅན་གྱི་འདོད་པ་སྐོང་བའི་ཕྱིར་རོ། །ཨ་མོ་གྷ་པཱ་ཤའི་སྙིང་པོ་ནི། དཱ་རུ་ཎ་དཱ་རུ་ཎ་བཛྲ། ཡང་དག་པའི་ཡེ་ཤེས་ཀྱི་སྟོབས་དང་ལྡན་པས། ཨ་མོ་གྷ་པཱ་ཤའི་རང་བཞིན་བྱང་ཆུབ་སེམས་ཀྱི་སྙིང་པོ་ནི། ཐུགས་རྗེ་ཐབས་ཀྱི་ཞགས་པས་འཁོར་བ་རྣམས་འདྲེན་པའི་ཕྱིར་རོ། །
སྟོབས་པོ་ཆེའི་སྙིང་པོ་ནི། ཚིནྡ་ཚིནྡ་བཛྲ། མ་ཧཱ་བ་ལ་སྟོབས་པོ་ཆེ། མ་ཧཱ་བ་ལ་དང་ཧཱུཾ་ཀ་ར་གཉིས་ཀྱི་རང་བཞིན་དུ་བསྟན་པ་ནི། ཡེ་ཤེས་ཀྱི་སྟོབས་ཀྱིས་ཐབས་དང་ཤེས་རབ་གཉིས་སུ་མེད་པའི་དོན་ཏོ། །དེ་རྣམས་ཀྱི་ཕྱག་རྒྱ་ནི། བྷིནྡ་བྷིནྡ་ཧཱུཾ་ཕཊ། པདྨོ་འཁྱིལ་པའི་རང་བཞིན་ཡེ་ཤེས་ཀྱི་
ཕྱག་རྒྱ་བཞིས་སྡོམས་ཤིག་པའི་དོན་ནི། མ་ཆགས་པ་ཆོས་ཉིད་ཀྱི་ཕྱག་རྒྱ་སྟེ། འཛིན་ཅིང་འདྲེན་པ་དང་། སྡུད་ཅིང་དགྱེས་པར་བྱེད་པའོ། །ཁྲོ་བོའི་སྙིང་པོའི་རང་བཞིན་བཤད་ཟིན་ཏོ།།      །།ད་ནི་ཕྱག་འཚལ་བ་དང་སྒོ་བའི་དོན་བཤད་དེ། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་
རྣམ་པ་བཞིས་མཚོན་པའི་ཐབས་སྒོ་བ་བཞི་བསྟན་ཏེ། ན་མ་ཤྩཎྜ་བཛྲ་ཀྲོ་དྷཱ་ཡ། ཕྱག་འཚལ་བའི་དོན་དང་། ཕྲིན་ལས་ཏེ་ཨ་མྲྀ་ཏ་ཀུཎྜ་ལིའི་སྙིང་པོའོ། །ཕྱག་ན་རྡོ་རྗེ་སྒྲུབ་པའི་ཐབས་ཀྱི་དོན་གྱིས་རྡོ་རྗེ་ཡེ་ཤེས་ཀྱི་ཁྲོ་བོ་ཞེས་སྨོས་སོ་ནི། དེ་བཞིན་གཤེགས་པའི་ཕྲིན་ལས་ནི་བདུད་རྩི་འཁྱིལ་
པས་དེའི་རྟགས་སུ་རྡོ་རྗེ་འཛིན་པ་སྟེ། ཡེ་ཤེས་ཀྱི་ཁྲོ་བོ་སྟེ། ཕྱག་ན་རྡོ་རྗེར་བསྟན་ཏེ། འདུལ་དབང་དུ་སྨོས་པས་མི་འགལ་ལོ། །ཧུ་ལུ་ཧུ་ལུ། བགེགས་དང་འབྱུང་པོ་རྣམས་ཚུར་ལྕགས་ཀྱུས་དྲངས་ཤིག ཤར་གྱི་ལྕགས་ཀྱུ་མེ་ལོང་ལྟ་བུའི་ཕྱག་རྒྱའོ་ནི། གནོད་པའི་བྱེ་བྲག་རྣམས་

71-1-206a

ཐུགས་རྗེ་ལྕགས་ཀྱུས་འདྲེན་ཅིང་། འགུགས་པའི་ཕོ་ཉའོ། །ཏིཥྛ་ཏིཥྛ། ཆིངས་ཤིག་ལྷོའི་ཞགས་པ་མ་སྟེ། མཉམ་པ་ཉིད་ཀྱི་ཡེ་ཤེས་ཀྱི་ཕྱག་རྒྱས་ཉོན་མོངས་པ་རྣམས་དབང་དུ་སྡུས་ཤིག་པ་ནི། ལས་དང་ཉོན་མོངས་པའི་བག་ཆགས་རྣམས་ཐབས་མཁས་
པའི་ཐུགས་རྗེས་འདྲེན་ཅིང་འཛིན་པའི་ཕྱིར་རོ། །བནྡྷ་བནྡྷ། ནུབ་ཀྱི་སྒོ་བ་ལྕགས་སྒྲོག་མ་སྟེ། སོ་སོར་ཀུན་དུ་རྟོགས་པའི་ཡེ་ཤེས་ཀྱི་ལྕགས་སྒྲོག་གིས་བགེགས་དང་འབྱུང་པོ་ཐམས་ཅད་སྡོམས་ཤིག་པའི་དོན་ནོ། །བྱང་ཆུབ་སེམས་ཐབས་དང་ཤེས་རབ་འབྲེལ་པའི་ལྕགས་སྒྲོག་གིས་གཉིས་སུ་
མེད་པར་བྱེད་པའི་དོན་ནོ། །ཧ་ན་ཧ་ན། བྱང་གི་དྲིལ་བུ་མ་སྟེ། བྱ་བ་ནན་ཏན་གྱི་ཡེ་ཤེས་ཀྱི་ངོ་བོས་བགེགས་དང་འབྱུང་པོ་ཐམས་ཅད་རྡུལ་དུ་རློགས་ཤིག་བྱ་བའི་དོན་ནི། ཕྱིན་ཅི་ལོག་གནོད་པའི་བྱེ་བྲག་ལ་ཐབས་མཁས་པའི་ཐུགས་རྗེས་སྟོངས་ཤིག་ཟད་པར་བྱེད་པའི་ཕྱིར་རོ། །ལས་ཀྱི་
ལྷག་ཆད་ཁ་སྐོང་བ་ནི། ཨ་མྲྀ་ཏེ་ཧཱུཾ་ཕཊ། དཀྱིལ་འཁོར་གྱི་སྔགས་ཞེས་པ་དང་། ཤེས་པར་བྱེད་པའི་བར་ནི། གོང་གི་དཀྱིལ་འཁོར་གྱི་ལྷ་རྣམས་ཀྱིས་ཐམས་ཅད་བདུད་རྩིར་བྱིན་གྱིས་བརླབས་པའི་ཕྱིར་དང་། དངོས་གྲུབ་འགྲུབ་པར་བྱེད་པའི་ཐབས་སོ། །སྒོ་བ་དང་སྒྲུབ་ཐབས་བསྟན་
ཟིན་ཏོ།།      །།དེ་ལྟར་ཁྲོ་བོ་རྣམས་ཀྱི་དོན་བཤད་ནས། དེའི་འོག་ཏུ་ཡོན་ཏན་གྱི་རྣམ་གྲངས་ཆོ་གའི་ཐབས་ཀྱི་བྱེ་བྲག་སྟོན་ཏེ་ནི། དཀྱིལ་འཁོར་གྱི་དོན་བསྟན་ནས། སྒྲུབ་ཐབས་དང་ཆོ་གའི་བྱེ་བྲག་སྟོན་པའི་ཐ་ཚིག་གོ། །སྡིག་པ་ཐམས་ཅད་བྱང་བྱས་ནས། དོན་རྣམ་པ་གཉིས་སུ་ཤེས་པར་
བྱའོ། །རྒྱུད་ཀྱི་དོན་ལ་འཇུག་པའི་ཕྱིར་དང་། རྒྱུད་ཀྱི་དོན་རྟོགས་པས་སྡིག་པ་འབྱང་བ་ནི། དང་པོ་ཉན་པའི་ཚེ་གཞན་ལ་རག་ལས་པས་ཉེས་པ་འགྱོད་ནས་འཇུག་པ་དང་། དེ་ནས་བསྲི་ཞིང་བསྒོམ་པའི་ཚེ། བར་ཆད་ཞི་བར་བྱ་བའི་ཕྱིར་གཤེགས་པའི་དོན་ནོ། །རྒྱུད་ཀྱི་དོན་ལ་འཇུག་པའི་ཕྱིར། སྡིག་
པ་ཐམས་ཅད་བྱང་བར་བྱ་བ་ནི། ཤེས་བྱའི་སྒྲིབ་པ་དང་། ཉོན་མོངས་པའི་སྡིག་པ་དང་། ཞེས་པ་དང་། སྡིག་པ་རྣམས་འགྱོད་པ་བསྐྱེད་པའི་དོན་ཞེས་པའི་བར་ནི། དང་པོར་ཉན་པའི་དོན་ལ་འཇུག་པའི་ཚེ། སྡིག་པའི་རྣམ་གྲངས་ཆོས་ལ་བདག་ཏུ་ལྟ་བ་དང་། གང་ཟག་ལ་བདག་ཏུ་ལྟ་བ་དང་། སྒོ་ལྔའི་

71-1-206b

ཡུལ་ལས་ཀྱིས་ཞེན་པའི་བག་ཆགས་ཀུན་གཞི་ལ་བསྒྲིབས་པ་དང་། སྔོན་གྱི་བག་ཆགས་ད་ལྟར་སྨིན་པ་དང་། དངོས་པོ་ལ་ཞེན་པའི་བདག་ཏུ་ལྟ་བ་དང་། ཡང་དག་པ་དང་རྒྱུ་འབྲས་ལ་ཡིད་མ་ཆེས་པའི་བག་ཆགས་རྣམས་རང་བཞིན་གྱི་དཀྱིལ་འཁོར་གྱི་ལྷ་རྣམས། ཏིང་ངེ་འཛིན་གྱི་དཀྱིལ་
འཁོར་དུ་སྤྱན་དྲངས་ནས། གསལ་བར་བསྒོམ་པར་བྱ་སྟེ། ཕྱི་ནང་གི་མཆོད་པ་ཕུལ་ནས། ཉེས་པ་བཤགས་ཏེ། ལུས་ངག་གི་དད་པས་བྱང་ཆུབ་ཀྱི་སེམས་རིན་པོ་ཆེ་རབ་ཏུ་བསྐྱེད་ནས་སྟ་གོན་ལ་སོགས་པའི་ཆོ་ག་བྱས་ནས། ལས་ཀྱི་གཞུང་མ་ནོར་བར་བགྱི་ཞིང་མཁྱེན་པར་གསོལ་ནས། ཉེས་
པ་ལ་སོགས་པ་བཤགས་པའི་དོན་ནོ། །དེ་ལ་རྒྱུད་ཀྱི་དོན་རྟོགས་པས་སྡིག་པ་འབྱང་བ་ནི་ཞེས་པ་དང་། འབྱང་བར་གསུངས་ཞེས་པའི་བར་ནི། དཀྱིལ་འཁོར་གྱི་ལྷ་རྣམས་ཀྱི་དོན་མ་ནོར་བར་བསྟན་ཅིང་། སློབ་དཔོན་གྱིས་རྒྱུ་འབྲས་ཀྱི་དོན་མ་ནོར་བར་བསྟན་པས་སེམས་གྲོལ་བའོ། །དེའི་
འོག་ཏུ་སྡིག་པ་བྱང་ནས། འབྲས་བུ་ཡོན་ཏན་ཐམས་ཅད་དང་ལྡན་པ་ཞེས་པ་ནི། གང་དུ་གསུངས་པ་བཞིན་བྱས་ནས་འབྲས་བུ་ཆུད་མི་ཟ་བའི་ཕྱིར་སྨོས་སོ། །སྡུག་བསྔལ་ཐམས་ཅད་མེད་པར་བྱེད། །ཅེས་པ་དང་། དེ་སྐད་གསུངས་ཞེས་པའི་བར་ནི། འདིའི་དོན་ཚུལ་བཞིན་དུ་བྱས་པས་སྡུག་
བསྔལ་གསུམ་སྤོང་བར་བྱེད་པ་ནི། ལྷ་འགྱུར་བའི་སྡུག་བསྔལ་དང་། འདུ་བྱེད་ཀྱི་སྡུག་བསྔལ་དང་། སྡུག་བསྔལ་གྱི་སྡུག་བསྔལ་དང་། རྣམ་པ་གསུམ་མོ། །སྡུག་བསྔལ་བརྒྱད་ཀྱང་སྤོང་སྟེ། སྐྱེ་བའི་སྡུག་བསྔལ་དང་། རྒས་པའི་སྡུག་བསྔལ་དང་། ན་བའི་སྡུག་བསྔལ་དང་། འཆི་བའི་
སྡུག་བསྔལ་དང་། དགྲ་སྡང་བ་དང་ཕྲད་ཀྱིས་དོགས་པའི་སྡུག་བསྔལ་དང་། གཉན་བྱམས་པ་དང་བྲལ་གྱིས་དོགས་པའི་སྡུག་བསྔལ་དང་། ཡོད་པ་མེད་པར་དོགས་པའི་སྡུག་བསྔལ་དང་། མེད་པ་མི་རྙེད་པའི་སྡུག་བསྔལ་ལོ། །དེའི་འོག་ཏུ་རྒྱུད་ཐམས་ཅད་ཀྱི་རྩ་བའི་དོན་སྟོན་ཏེ་ནི། འདི་ནི་རྣལ་
འབྱོར་གྱི་རྒྱུད་དང་བྱ་བའི་རྒྱུད་གཉིས་དོན་འདིར་འདུས་པས་རྩ་བའོ། །རྒྱུད་དོ་ཅོག་གི་རྩ་བ་སྟེ། །ཞེས་པ་དང་། དོན་གྱི་རྩ་བར་གསུངས་ཞེས་པའི་བར་ནི། དི་ནི། རྩ་བ་བྱང་ཆུབ་སེམས་དཔས་རྩ་བའི་དཀྱིལ་འཁོར་ཏེ། འཇིག་རྟེན་པ་དང་། འཇིག་རྟེན་ལས་འདས་པ་དབྱེར་མེད་པའི་དཀྱིལ་འཁོར་

71-1-207a

ཏེ། ཁྲོ་བོ་དང་། བསྐལ་བཟངས་དང་ཕྱི་ནང་ལྷ་མོ་དང་། བཀྲ་ཤིས་ཀྱི་རྟགས་བརྒྱད་དང་། ལྷ་བརྒྱད་དང་། གཟའ་བརྒྱད་དང་། རྒྱུ་སྐར་དང་། ཕྱོགས་སྐྱོང་བ་བཅུ་དང་། སྒོ་བ་རྣམས་བྲི་བའི་དོན་ནོ། །དེའི་འོག་ཏུ་ཡང་རྒྱུད་ཀྱི་དོན་གྱིས་དཔལ་གྱི་གཞིར་འགྱུར་བ་ནི། དེ་བཞིན་
གཤེགས་པས་འདི་གསུངས་ན་རྡོ་རྗེ་གདན་ལ་གཤེགས་པའི་ཚེ་བདུད་ལ་རྟགས་བརྒྱད་སྐུ་ལ་བསྟན་ནས་བདུད་བཏུལ་བའོ། །དཔལ་ཀུན་གྱིས་ནི་ལེགས་པར་བརྒྱན། །ཞེས་པ་དང་། ལེགས་པར་བརྒྱན་ཞེས་པའི་བར་ནི་སྐུ་ཡེ་ཤེས་ཀྱི་དཀྱིལ་འཁོར་ཏེ། དེ་བཞིན་གཤེགས་པའི་སྐུ་ལ་ཡེ་ཤེས་ཀྱི་རྟགས་
བཀྲ་ཤིས་ཀྱི་རྟགས་བསྟན་པས། འཇིག་རྟེན་དང་འཇིག་རྟེན་ལས་འདས་པའི་དཔལ་བསྒྲུབ་པའི་ཕྱིར་ན། ཐུགས་ཁྲོ་བོའི་དཀྱིལ་འཁོར་ལ་རྟགས་བརྒྱད་བྲི་བའི་ཕྱིར་རོ།    །དེའི་འོག་ཏུ་སེམས་ཅན་དབང་པོ་ཉམས་པ་ལ་ཕན་པའི་ཐབས་ནི་དབང་པོ་ཉམས་པའི་སྔ་ལྟས་བཅོ་བརྒྱད་གསོ་བའི་དོན་ཏེ། སེམས་ཅན་
དབང་པོ་ཉམས་པ་དང་། ཞེས་པ་དང་། འབྱང་བར་འགྱུར་རོ་ཞེས་པའི་བར་ན། དབང་པོ་ཉམས་པ་ནི། མིག་དང་། རྣ་བ་དང་། སྣ་དང་། ལྕེ་དང་། ཡིད་ཀྱི་དབང་པོ་ཉམས་པ་དང་། དེའི་ཡུལ་འབྲས་བུ་གཟུགས་ནི། གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་རྣམས་ཀྱང་མ་
གསལ་བས་ཉམས་ཏེ། དེའི་རྒྱུ་བཞི་མི་མཐུན་ཏེ། ས་དང་། ཆུ་དང་། མེ་དང་། རླུང་དག་མི་མཐུན་པས། དེའི་རྐྱེན་གྱིས་ན་བ་དང་། འཆི་བའི་སྔ་ལྟས་བྱུང་བ་དེ་བཟློག་པའི་ཐབས་སོ། །དེའི་འོག་ཏུ་ཚེ་ཉམས་པ་གསོ་བའི་ཐབས་ཏེ། ཚེ་སྲོག་སྟེ། རྣམ་པ་བཞིར་བསྟན་ཏེ། སྲོག་དབུགས་དང་། དྲོད་
དང་། ཟས་དང་། ལས་གསུངས་སོ། །ཚེ་ཟད་པ་དང་ཚེ་ཉམས་པ། །ཞེས་པ་དང་། སོས་པར་གསུངས་ཀྱི་བར་དུ། ཚེ་ཉམས་པའི་སྔ་ལྟས་རྣམ་པ་ལྔ་སྟེ། རྒྱུ་ནི་འདོད་ཆགས་དང་། ཞེ་སྡང་དང་། གཏི་མུག་དང་། ཕྲག་དོག་དང་། ང་རྒྱལ་ཏེ། རྒྱུ་དེ་དང་། སེམས་ཅན་ལྡན་པས། འབྱུང་བ་བཞི་དུས་
དང་ལྔ་གྱུར་པ་དང་། རྟགས་རྣམ་པ་ལྔ་འབྱུང་བའོ། །དེའི་འོག་ཏུ་དོགས་པ་ཉམས་པ་གསོ་བའི་ཐབས་ནི། དཀྱིལ་འཁོར་གྱི་ལྷ་རྣམས་ཆོ་ག་རྒྱས་པའི་སྦྱིན་སྲེག་ཚུལ་བཞིན་བྱ་བའི་ཐ་ཚིག་སྟེ། ཕུན་སུམ་ཚོགས་མིན་གང་ཆགས་དང་། ཞེས་པ་དང་ཕུན་སུམ་ཚོགས་པ་དང་ལྡན་པའི་ཐབས་ཞེས་

71-1-207b

པའི་བར་ནི། རྒྱས་པའི་སྦྱིན་སྲེག་བྱ་བའི་ཐབས། མཆོད་རྫས་རྣམས་དང་། བསྲེག་རྫས་རྣམས་ཚང་བར་བྱ་བ་དང་། གཞུང་གཞན་ནས་འབྱུང་བ་དག་ཏུས་སྟེགས་བརྩིགས་ལ། ཐམས་ཅད་ཁ་དོག་སེར་པོ་བྱས་ལ། གང་ལ་ལས་བྱས་པའི་སེམས་ཅན་གྱི་མིང་དང་། ལྷའི་སྔགས་སྡེ་ལ་ཞིང་ལས་
བྱས་ན་རྒྱས་པར་འགྱུར་རོ། །དེའི་འོག་ཏུ་ཉོན་མོངས་པའི་ཕྱོགས་ཀྱིས་འཇིག་རྟེན་དང་འཇིག་རྟེན་ལས་འདས་པའི་ལྷའི་མི་དགའ་བ་སྟོན་པ་ནི། ཐུགས་ཁྲོ་བོའི་དཀྱིལ་འཁོར་གྱི་ཕྱི་རོལ་དུ་ལྷ་བརྒྱད་ཀྱི་དཀྱིལ་འཁོར་བྲིས་ནས་ལས་བྱ་བའི་དོན་ནི། ལྷ་རྣམས་རྒྱབ་ཀྱིས་ཕྱོགས་པ་དང་། །ཞེས་པ་དང་། 
འགྲུབ་པར་གསུངས་པ་ནི་གོང་གི་དཀྱིལ་འཁོར་དུ་གཞུང་གི་ལྷ་མི་དགའ་བ་སྟེ། ལྷ་ཆེན་པོའི་དཀྱིལ་འཁོར་དང་། དབང་གི་སྦྱིན་སྲེག་གི་ལས་དག་ནི། གཞུང་གཞན་ནས་རྒྱས་པར་འབྱུང་བ་བཞིན་དུ་རྒྱས་པར་བྱ་བའི་ཐ་ཚིག་གོ། །དེའི་འོག་ཏུ་ལྷ་འཕངས་པའི་སྔ་ལྟས་སྟོན་ཏེ་ནི། དམ་ཚིག་ཉམས་པ་དང་། 
ལུས་ངག་ཡིད་ཀྱི་སྤྱོད་པ་མི་དགེ་བས་ཉམས་པའི་སྔ་ལྟས་ནི། མཛའ་སྡུག་སྐྱེ་བོ་སྡང་བ་དང་། །ཞེས་པ་དང་། འགྲུབ་པར་གསུངས་ཞེས་པའི་བར་ནི། དྲག་པོའི་སྦྱིན་སྲེག་དང་། དཀྱིལ་འཁོར་གྱི་ལས་དག་བྱས་པར་བདག་གིས་མཛའ་བོ་ཤག་བཤེས་དང་། སྙིང་དུ་སྡུག་པའི་བུ་སྨད་དང་། ཡོངས་
ཀྱི་སྐྱེ་བོ་རྣམས་ལ་སྡང་བའི་རྣམ་པ་མེད་པར་འགྱུར་རོ། །དེའི་འོག་ཏུ་འཁོར་བ་གནོད་པ་སྟེ། བསོད་ནམས་ཅན་གྱི་སེམས་ཅན་བསོད་ནམས་ཟད་དུ་ཉེ་བ་ན། དེའི་འཁོར་གྱི་བྲན་དང་། ནང་གི་བཟའ་མི་ལ་སོགས་པ། གནོད་སྦྱིན་དང་། གདོན་སྟོང་ཕྲག་བརྒྱད་བཅུའི་གནོད་པ་རྣམས་ཀྱིས་གཙེས་པ
རྣམས་བཟློག་པའི་ཐབས་ནི། བྲམ་ཟེ་ལ་སོགས་གཙེས་པ་དང་། །ཞེས་པའི་དོན་ནོ། །དེའི་འོག་ཏུ་མི་མཐུན་པ་སྟོན་པ་ནི། སེམས་ཅན་དེ་དག་ལས་ཀྱི་བག་ཆགས་གདན་གྱིས་བྱིན་གྱིས་བརླབས་པའི་མཐུས། ཕན་ཚུན་དགྲ་བོ་ལྟ་བུར་བྱེད་པས། དེ་དག་གི་མིང་དང་། ལྷའི་སྔགས་བསྲེ་
ཞིང་ལས་བྱས་ན། ཕན་ཚུན་ཞི་བས་ན། ཕན་ཚུན་མཐུན་པ་མ་ཡིན་དང་། །ཞེས་པའི་ཐ་ཚིག་གོ། །དེའི་འོག་ཏུ་དོགས་པ་ཉམས་པ་སྟོན་ཏེ་ནི། སེམས་ཅན་རྣམས་སྔོན་གྱི་བསོད་ནམས་ཟད་པའི་སྔ་ལྟས་ནི། བདོག་པའི་ནོར་རྫས་དང་འབྲེལ་ཏེ། ཤིན་ཏུ་ཕོངས་པས་སྡུག་བསྔལ་བ་ལ་རྒྱས་

71-1-208a

པའི་ལས་བྱས་ན་འགྲུབ་པའི་ཕྱིར་ན། ནོར་འགྲིབས་པས་ནི་གནོད་པ་དང་། ཞེས་པའི་ཐ་ཚིག་གོ། །དེའི་འོག་ཏུ་མྱ་ངན་གྱིས་གནོད་པ་སྟོན་ཏེ་ནི། སེམས་དེ་དག་གདོན་གྱིས་གནོད་པས་བྱིན་གྱིས་བརླབས་ནས། སེམས་སྡུག་བསྔལ་གྱིས་གནོད་པས་མྱ་ངན་སྐྱེས་པས་ལུས་ཐང་
ཆད་ནས་ངལ་བའི་སྡུག་བསྔལ་བ་དེ་དག་ལ་ལས་བྱ་བའི་དམིགས་ཡིན་པས་ན། མྱ་ངན་ངལ་དང་གནོད་པ་དང་། ཞེས་པའི་དོན་ནོ། །དེའི་འོག་ཏུ་འཇིགས་པ་དང་སྤང་པ་སྟོན་ཏེ། སེམས་ཅན་དེ་དག་ནི་འཇིགས་པ་བརྒྱད་དེ། མེ་དང་། ཆུ་དང་། དུས་མ་ཡིན་པའི་འཆི་བ་དང་། དགྲ་དང་། 
དུག་དང་། རྒྱལ་པོའི་ཆད་པ་དང་། གཅན་གཟན་ཁྲོ་བོ་དང་། མི་རྒོད་ཀྱི་ཆོམ་རྐུན་གྱི་འཇིགས་པ་རྣམས་ལ་སོགས་པ་ལ། ལས་བྱ་བའི་ཕྱིར་ན། འཇིགས་པ་དང་ནི་ཕོངས་པ་དང་། །ཞེས་པའི་ཐ་ཚིག་སྟེའོ། །དེའི་འོག་ཏུ་བྱད་སྟེམས་སྟོན་ཏེ་ནི། འཇིག་རྟེན་གྱི་སེམས་ཅན་རྣམས་གཟའ་དང་
རྒྱུ་སྐར་གྱི་བྱད་སྟེམས་ཀྱིས་ཕོག་པ་ལ། ཁྲོ་བོའི་དཀྱིལ་འཁོར་ཁོར་ལོ་ལ་གཟའ་དང་རྒྱུ་སྐར་གྱི་ལྷ་དགོད་ལ། སོ་སོའི་གདུག་པ་ཞི་བར་བྱ་བའི་ཕྱིར། དཀྱིལ་འཁོར་དང་སྦྱིན་སྲེག་གི་ལས་རྣམས་ཚུལ་བཞིན་དུ་བྱ་བ་དང་། དབང་བསྐུར་བའི་ཐབས་ལ་སོགས་པས་ཞི་བ་སྟེ། གཟའ་དང་རྒྱུ་སྐར་བྱད་
སྟེམས་དང་། ཞེས་པའི་ཐ་ཚིག་གོ། །དེའི་འོག་ཏུ་གདོན་གྱིས་ཉེན་པ་བསྟན་ཏེ་ནི། གདོན་སྟོང་ཕྲག་བརྒྱད་ཅུ་རྩ་བཞི་རྣམས། སེམས་ཅན་རྣམས་ལ་གནོད་པར་བྱེད་པ་ལ། དེ་བཞིན་གཤེགས་པས་དེ་དག་རབ་ཏུ་བཏུལ་ནས་བཀའ་དམ་ལ་བཏགས་ཏེ་གནས་པས། གདོན་གྱི་གཙོ་བོ་ཕྱོགས་
སྐྱོང་བ་བཅུའི་དཀྱིལ་འཁོར་གྱི་དབུས་སུ་ཁྲོ་བོ་རྣམས་རབ་ཏུ་བཀོད་ལ། ཆོ་གའི་ཁྱད་པར་དཀྱིལ་འཁོར་གྱི་ལས་དང་། སྦྱིན་སྲེག་དག་ཚུལ་བཞིན་དུ་བྱས་ཏེ། དབང་བསྐུར་བ་ནི་ཞི་བ་སྟེ། མི་བཟད་གདོན་གྱིས་ཉེན་པ་དང་། ཞེས་གསུངས་པའི་ཐ་ཚིག་གོ། །དེའི་འོག་ཏུ་མྱ་ངན་གྱི་ལས་ལས་བྱུང་
བའི་རྨི་ལམ་བསྟན་པ་ནི། འཁོར་བའི་སེམས་ཅན་རྣམས་ཉོན་མོངས་པའི་བག་ཆགས་མཐུར་བརྟས་པའི་སྡིག་པའི་སྔ་ལྟས་ཀྱི་རྨི་ལམ་སུམ་ཅུ་རྩ་གཉིས་ཏེ། དེ་ཡང་མདོ་འདི་གསུངས་པའི་ཚེ། དེ་བཞིན་གཤེགས་པ་བྱང་ཆུབ་ཀྱི་སྙིང་པོར་གཤེགས་ཀར་བདུད་ཀྱི་སྡེ་གཞོམ་པའི་ཕྱིར། བདུད་ཀྱི་

71-1-208b

གནས་ཐམས་ཅད་མོག་མོག་པོར་བྱས་ནས། བདུད་ཀྱི་རྨི་ལམ་ལྟས་ངན་སུམ་ཅུ་རྩ་གཉིས་རྨིས་པ་དག ཞིབ་ཏུ་རྒྱ་ཆེར་རོལ་པ་ལས་འབྱུང་བ་དང་སྦྱར་རོ། །ཡང་ནི་བསྣན་པའི་དོན་ཏེ། ཆོ་གའི་ཐབས་ཀྱིས་ཞི་བར་བྱེད་པས་ན། མྱ་ངན་ངལ་ལས་བྱུང་བ་ཡི། །རྨི་ལམ་སྡིག་པ་མཐོང་ན་ཡང་། །ཞེས་
གསུངས་པའི་ཐ་ཚིག་གོ།    །དེའི་འོག་ཏུ་ཆོ་གའི་ཐབས་སྟོན་ཏེ། དེས་ནི་རབ་བཀྲུས་གཙང་མ་ཡིན། །མདོ་སྡེ་དམ་པ་མཉན་པར་བྱ། །ཞེས་པ་དང་། ལྷ་ངོ་བོ་བསྟན་པའི་ཐ་ཚིག་གོ་ཞེས་པའི་བར་ནི། རྣལ་འབྱོར་པས་དང་པོ་དཀྱིལ་འཁོར་གྱི་ལས་བྱེད་པའི་ཚེ། སློབ་མ་ལ་བུམ་པ་བྱིན་གྱིས་
བརླབས་པ་དེར། སློབ་མ་ལ་སོགས་པའི་ཡོན་བདག་དག་པར་ཁྲུས་བྱས་ནས་ཕྱི་ནང་གི་དྲི་མ་རྣམས་རབ་ཏུ་བསལ་ཞིང་། དེའི་འོག་ཏུ་སྟ་གོན་ལ་གནས་པའི་ཆོ་ག་བྱའོ། །བྱང་ཆུབ་ཏུ་སེམས་བསྐྱེད་ནས། མདོའི་དོན་འདི་དད་པས་ཉན་པའི་བསོད་ནམས་བསྐུལ་ཞིང་ཕན་ཡོན་བཤད། དཀྱིལ་འཁོར་
དུ་གཞུག་ཅིང་ལྷའི་ངོ་བསྟན་ཅིང་། དམ་བསྒྲགས་ལ། བསྒོམ་པའི་ལུང་ཡང་དབོག་གོ། །དེའི་འོག་ཏུ་ཕྱི་ནང་གི་ཆོ་ག་བསྟན་ཞེས་པ་ནི། ཕྱིས་ནི་ས་གཞི་བྱིན་གྱིས་བརླབ་པ་ལ་སོགས་པ། ནང་གི་སྔགས་དང་ཕྱག་རྒྱ་ལ་སོགས་པ། ཏིང་ངེ་འཛིན་གྱི་ཁྱད་པར་དུ་གྱུར་པའི་སྒོམ་པའི་མན་ངག་ཏུ་
བསྟན་པའོ། །གང་དག་ཡིད་དགེ་སེམས་དང་ཞིང་། །གཙང་མའི་གོས་ཀྱིས་རབ་བརྒྱན་ཏེ། །ཞེས་པ་དང་། ཕྱི་ནང་གི་རྒྱན་གྱིས་ལུས་སེམས་མཛེས་པར་བརྒྱན་ཏེ། ཞེས་པའི་བར་ནི། སློབ་མ་གཞི་དད་པ་དང་ལྡན་ཞིང་རབ་ཏུ་ཡིད་ཆེས་པས་དམ་ཚིག་ལྔ་ལ་གནས་ཏེ། དཀོན་མཆོག་གསུམ་
གཙོར་ལྟ་བ་དང་རྡོ་རྗེ་སློབ་དཔོན་རིགས་གསུམ་གྱི་སངས་རྒྱས་འདྲ་བར་ལྟ་བ་དང་། རྡོ་རྗེ་སྤུན་དང་མིང་སྲིང་བྱང་ཆུབ་སེམས་དཔའི་ཚོགས་སུ་ལྟ་བ་དང་། སྔགས་ནི་གཙང་མ་མཆོག་གི་དངོས་གྲུབ་ཏུ་ལྟ་བ་དང་། ཕྱག་རྒྱ་ནི་དམ་ཚིག་གཙང་མའི་དཔུང་དུ་ལྟ་བའོ། །དམ་ཚིག་རྣམ་པ་དེ་ལྔ་དང་ལྡན་
པ་ཡང་། ཡིད་དགེ་བ་རྣམ་པ་བཅུ་སྟེ། ལུས་ཀྱི་རྣམ་པ་གསུམ་དང་། ངག་གི་རྣམ་པ་བཞི་དང་། ཡིད་ཀྱི་རྣམ་པ་གསུམ་དང་ལྡན་པས། སེམས་དང་ཞིང་། ཚུལ་ཁྲིམས་ཀྱི་སྤྱོད་པ་བསྙེན་གནས་ཡན་ལག་བརྒྱད་ལ་གནས་པས་སྤྱོད་པ་ཚང་བ་དང་། སློབ་དཔོན་གྱི་ལུང་ཇི་སྐད་གསུངས་པ་

71-1-209a

བཞིན་བགྱིད་པས་བཀའ་བློ་བདེ་ལ། གཡོ་སྒྱུ་ལ་སོགས་པ་ཆུང་བས་ངོ་རྟག་པ་སྟེ། སེམས་ཀྱི་དྲི་མ་བསལ་ཏེ། སློབ་མ་དེ་ལྟ་བུས་དེའི་འོག་ཏུ་ནི་བདག་གིས་ཡོན་ཏན་དང་ལྡན་པ་ཐོབ་པའི་ཕྱིར་སེམས་ཀྱི་དྲི་མའི་སྐྱོན་རབ་ཏུ་གསལ་ཏེ། ཉེས་པ་བསལ་ནས། དེའི་འོག་ཏུ་ནང་གི་རྟགས་
བསལ་སོགས་པ་རབ་ཏུ་སར་པ་རབ་ཏུ་གཙང་མ་རྣམས་སློབ་མའི་ལུས་དང་། སློབ་དཔོན་གྱི་ལུས་ལ་བསྐོན་ནས། ཟས་ནི་ཁ་ཟས་དཀར་གསུམ་བཟའ་ཞིང་། རྒྱན་གྱི་རྣམ་པ་བསམ་གྱིས་མི་ཁྱབ་པས་སློབ་དཔོན་དང་། སློབ་མའི་ལུས་དཀོན་མཆོག་མཆོད་པའི་ཕྱིར་དད་པས་རྒྱན་གྱི་རྣམ་པ་སྣ་ཚོགས་
ཀྱིས་མཛེས་པར་བྱ་བའི་ཐ་ཚིག་གོ།    །དེའི་འོག་ཏུ་ཐེག་པ་ཆེན་པོའི་ཆོས་ཉན་པའི་ཡོན་ཏན་བསྟན་ཅིང་སྐུལ་མ་གདབ་སྟེ་ཞེས་པ་ནི། སློབ་མ་དེ་ལྟ་བུ་དེ་ཆོས་ལ་སྐྱབས་སུ་སོང་བའི་ཕན་ཡོན་རྣམ་པ་བཞི་བསྟན་ཏེ། དང་པོར་ཆོས་མ་ནོར་བར་སྟོན་པའི་མཁན་པོ་སྨྲ་བ་བསྟེན་པ་དང་། གཉིས་པ་དེ་ལས་
ཆོས་ཉན་པ་དང་། གསུམ་པ་ཡིད་ལ་འཇོག་པ་དང་། བཞི་པ་གཞན་ལ་བསྟན་པའི་ཕན་ཡོན་སྟོན་པའོ། །ཟབ་མོ་སངས་རྒྱས་སྤྱོད་ཡུལ་བ། །མདོ་སྡེ་འདི་ནི་ཉན་བྱེད་ན། །ཞེས་པ་དང་། སློབ་མ་ལ་བསྟན་ཞེས་པའི་བར་ནི། འདས་པ་དང་། ད་ལྟར་དང་། མ་བྱོན་པ་ཐམས་ཅད་ཀྱིས་ཐུགས་ཡེ་
ཤེས་ཀྱི་རྟགས། མདོ་སྡེ་འདི་དོན་ཟབ་ལ་རྒྱ་ཆེ་བ། དེ་བཞིན་གཤེགས་པ་མངོན་པར་སངས་རྒྱས་པར་བྱེད་པའི་རྒྱུ་འདི་རིགས་ཀྱི་བུ་དང་། རིགས་ཀྱི་བུ་མོ་དད་པ་དང་ལྡན་པས། འདིའི་དོན་གཞན་ལ་ཉན་པ་དང་། གླེགས་བམ་ཀློག་པ་དང་། མན་ངག་མི་བརྗེད་པར་འཛིན་པ་དང་། དེ་ལྟར་ཤེས་པའི་
སྒོ་ནས་གཞན་ལ་སྟོན་པ་དང་། གུས་པའི་དད་པས་ཉམས་སུ་ལེན་པའི་དོན་དག་རྒྱས་པར་བསྟན་པའི་དོན་ནི། དེའི་འོག་ཏུ་ཉན་པའི་བསོད་ནམས་ཀྱི་ཕན་ཡོན་བསྟན། དེ་ནི་འདིའི་དོན་མི་ཤེས་པའི་མུན་པ་སེལ་བ་དང་། བློ་རྣོ་ཞིང་ཤེས་རབ་ཆེ་བ་དང་། རྟག་ཏུ་ཆོས་དང་ལྡན་ཞིང་། དེ་བཞིན་
གཤེགས་པ་དང་འགྲོགས་པར་འགྱུར་རོ། །མདོ་སྡེ་འདི་ཡི་གཟི་བརྗིད་ཀྱིས། །སྲོག་ཆགས་དག་ནི་ཐམས་ཅད་ཀྱི། །ཞེས་པ་དང་། ཕན་པའི་ཐ་ཚིག་གོ། ཞེས་པའི་བར་ནི། མདོ་སྡེ་འདིའི་དོན་སྒྲུབ་པའི་ཕན་ཡོན་ནི། དེ་བཞིན་གཤེགས་པའི་སྐུ་གསུང་ཐུགས་ཀྱི་གཟི་བརྗིད་ཀྱིས་ཁམས་

71-1-209b

གསུམ་ས་དགུའི་སོ་སོའི་ཉོན་མོངས་པའི་ཕྲ་རྒྱས་ཀྱི་མི་མཐུན་པའི་རྣམ་པར་རྟོག་པས་སྡུག་བསྔལ་གསུམ་དང་བརྒྱད་ཀྱི་ལས་རྣམས་ལས་ཐར་པར་འགྱུར་བའི་དོན་ཏོ། །ཅིའི་ཕྱིར་ཞེ་ན། མི་བཟད་པ་ཡི་ནད་རྣམས་ཀྱང་། །དེ་དག་ཐམས་ཅད་ཞི་བར་ལྟ། །ཞེས་པ་དང་། གོང་དུ་གསུངས་པ་ལྟར་
བྱ་བའི་ཐ་ཚིག་ཅེས་པའི་བར་ནི། འདོད་ཁམས་དང་། གཟུགས་ཁམས་དང་། གཟུགས་མེད་པའི་ཁམས་ཐམས་ཅད་ཉོན་མོངས་པའི་ལས་སྣ་ཚོགས་དང་། ཀུན་གཞི་ལ་བག་ཆགས་རྒྱུ་དང་འབྲས་བུའི་ཚུལ་དུ་སྔ་ཕྱི་ད་ལྟར་གློ་བུར་དུ་བསྒྲིབས་པས། དེས་ནད་བཞི་བརྒྱ་རྩ་བཞི་འབྱུང་བའི་
ཁམས་མ་སྙོམས་པའི་ནད་མདོའི་ཡོན་ཏན་གྱིས་ཞི་བར་འགྱུར་རོ། །དེའི་འོག་ཏུ་གནོད་པ་ཞི་ནས། བདེ་བ་ཐོབ་པའི་ཐབས་སྟོན་ཏེ། འདིའི་དོན་ལ་དོན་མ་ནོར་བར་བྱས་པས་གཡུང་དྲུང་གི་ཚེ་དང་། མི་ཟད་པའི་བསོད་ནམས་ཐོབ་པར་འགྱུར་རོ། །ཚེ་དང་བསོད་ནམས་འཕེལ་བར་འགྱུར། །སྡིག་
པ་ཀུན་ལས་རྣམ་པར་ཐར། །ཞེས་པ་དང་། ཐར་པར་འགྱུར་བའི་དོན་ཞེས་པའི་བར་ནི། འཛམ་བུའི་གླིང་གི་སེམས་ཅན་སྔོན་གྱི་ལས་ཀྱི་འཆི་བ་དེ་མི་འཆི་བར་བྱ་བ་དང་། བསོད་ནམས་ཟད་པ་བསོད་ནམས་རབ་ཏུ་འཕེལ་བ་དང་། སྡིག་པ་ཅན་རྣམས་སྡིག་པ་ལས་ཐར་བར་བྱ་བའི་ཕྱིར། ཆོ་ག་དང་
ལས་ཀྱི་བྱེ་བྲག་ཚུལ་བཞིན་དུ་བྱས་ན་བསོད་ནམས་ཐོབ་པར་འགྱུར་རོ། །དཀྱིལ་འཁོར་གྱི་ཆོ་གའི་ཐབས་དང་ཕན་ཡོན་བཤད་ཟིན་ཏོ།།      །།དཀྱིལ་འཁོར་གྱི་རྒྱན་དང་བུམ་པའི་ཆ་རྒྱན་སྟོན་ཏེ། ཆེ་བའི་ཡོན་ཏན་ལྔ་དང་ལྡན་པའི་རྟགས་སུ་སྣང་སྟེ། ནོར་བུ་ཡུངས་ཀར་དཱུར་བ་དང་ནི། ནོར་བུ་ནི་མུ་
ཏིག་དང་། བྱི་རུ་དང་། གཟི་དང་། མཆོང་དང་། རིན་ཆེན་ཆུ་ཞེས་པའི་ཐ་ཚིག་སྟེ་ནི། དེ་ནི་བུམ་པའི་སྙིང་པོ་བྱ་བའི་དོན་ནོ། །རྣམ་པ་གཅིག་ཏུ་དཀྱིལ་འཁོར་གྱི་ཚོན་སྣ་ལྔ་ཡང་བསྟན་ཏོ། །ཡུངས་ཀར་ནི་སྐུ་ལྔ་དག་པའི་རྟགས་སུ་བསྟན་ཏེ། དེའི་ཁོངས་སུ་བསྡུ་བ་ནི། ནས་སོ་བ་དང་། 
གྲོ་དང་། ཏིལ་དང་། འབྲས་སོ་བ་དང་། མོན་སྲན་གྲེའུ་ལ་སོགས་ཏེ། བུམ་པའི་ཡོ་བྱད་དུ་བསྟན་ཏོ། །གཞན་དུ་ཡང་རྒྱུ་ཆུང་ན། ཚོན་རྣམ་པ་ལྔས་ཁ་དོག་བསྒྱུར་ལ་བྱ་བའི་དོན་ཏོ། །དཀྱིལ་འཁོར་གྱི་མཆོད་རྫས་རྣམས་དེ་ལ་བྱ་བའི་དོན་དུ་ཡང་བསྟན། རྣམ་པ་གཅིག་ཏུ་ཡུངས་ཀར་ནི་མུ་

71-1-210a

ག་ཏི་ཧ་རར་བསྟན་ཏོ། །དཱུར་བ་ནི་ཁ་རྒྱན་གྱི་དོན་ཏེ། དེའི་ཁོངས་སུ་བྱ་ཀྲྀ་དང་། སིང་གྲི་དང་། ཙནྡན་ལ་སོགས་པ་དྲི་ཞིམ་པོའི་ཡལ་ག་དང་བཅས་པའོ། །དེ་ནི་སེམས་ཅན་གྱི་འདོད་པ་ཕུན་སུམ་ཚོགས་པའི་སྒྲུབ་པའི་རྟགས་སུ། དཔག་བསམ་གྱི་ཤིང་ལྗོན་པར་བསྟན། དཀྱིལ་
འཁོར་གྱི་གནས་སྐབས་སུ། དཱུར་བའི་གདན་བྱ་བ་དང་། ཀུ་ཤའི་གདུ་བུ་བྱ་བའི་དོན་ཏོ། །རིན་ཆེན་རྨ་མེད་ཙནྡན་བཅས། །ཞེས་པ་ནི། རིན་ཆེན་ནི་ལྔ་སྟེ། གསེར་དང་། བཻ་ཌཱུརྱ་དང་། ཤེལ་དང་། མུ་ཏིག་དང་། པདྨ་རཱ་གའོ། །ཞེས་པ་ནི་ཆེ་བའི་ཡོན་ཏན་ལྔ་དང་ལྡན་པའི་རྟགས་སུ་
བསྟན་ཏོ། །དཀྱིལ་འཁོར་གྱི་རིན་པོ་ཆེའི་ཕུང་པོ་ལ་བྱ་བའི་ཐ་ཚིག་གོ། །རྨ་མེད་ནི་སྐྱོན་ལ་སོགས་པ་མེད་པ་ནི་ཞེས་པ་ནི། རིན་པོ་ཆེ་མ་ཡིན་པའི་སྐྱོན་ཁ་དོག་འདྲ་བ་དང་། མ་དག་པའི་སེལ་མེད་པའོ། །དཀྱིལ་འཁོར་ཕོ་བྲང་དུ་གཅོད་པའོ། །ཙནྡན་བཅས་ནི། ཨ་ག་རུ་དང་། དུ་རུསྐ། 
ཤ་ཀ་ར་དང་། གུར་ཀུམ་མོ། །སྦྲུལ་གྱི་སྙིང་པོ་ལ་སོགས་པའི་བྱེ་བྲག་སྨོས་པའི་དོན་ནི། ཕྲིན་ལས་རྣམ་པ་ལྔ་དང་ལྡན་པའི་རྟགས་སོ། །དཀྱིལ་འཁོར་ལ་ནི་ལྷའི་གདན་ས་ལ་དེ་དག་སྟ་གོན་གྱི་དུས་སུ་ཐིག་ལེར་བྱ་བའི་ཐ་ཚིག་གོ། །ཤེལ་དང་རྡོ་རྗེ་མེ་ཏོག་དང་ནི། ཤེལ་དང་རྡོ་རྗེ་གཉིས་ནི་སྙིང་པོར་
ཤེས་པའི་དོན་ཏེ། ཤེལ་ནི་མེ་ཤེལ་དང་ཆུ་ཤེལ་གཉིས་ཀྱི་དོན་ཏེ་ནི། རྡོ་རྗེ་ནི་སྙིང་པོ་ཕྱི་མ་གསུམ་གྱི་དོན་ནི། ཤིང་གི་སྙིང་པོ་བུ་རམ། རྩིའི་སྙིང་པོ་མར། མེ་ཏོག་གི་སྙིང་པོ་སྦྲང་རྩི་ཞེས་པའི་དོན་ནི། དེ་བཞིན་གཤེགས་པའི་ཐུགས་ལྔ་རྣམ་པར་དག་པའི་རྟགས་སུ་སྙིང་པོ་རྣམ་པ་ལྔར་བསྟན་
པའི་དགོངས་པའོ། །མདོར་ན་ཐབས་དང་ཤེས་རབ་ཀྱི་རྟགས་དང་། དེ་བཞིན་གཤེགས་པའི་ཡེ་ཤེས་ཀྱི་དཔེར་སྣང་བས་ན། བྱང་ཆུབ་ཤིང་ལ་བརྟེན་ནས། རྩ་དཱུར་བའི་སྟེང་དུ་སངས་རྒྱས་ནས། སྤྲེའུའི་རྒྱལ་པོས་སྦྲང་རྩི་ཕུལ་ནས་ཆོ་འཕྲུལ་ཆེན་པོ་འབྱུང་བར་བསྟན་ཏོ། །གཞན་དུ་ན་
དཀྱིལ་འཁོར་བསྟན་པ་ནི། ཤེལ་ནི་དཀྱིལ་འཁོར་གྱི་ས་རི་སྟེ། ཤེལ་ལྟར་དཀར་ཞིང་དྲི་མ་མེད་པར་བསྟན་ཏེ། བྱང་ཆུབ་སེམས་རང་བཞིན་དག་པ་དྲི་མ་མེད་པའི་དོན། རྡོ་རྗེ་ནི་རྡོ་རྗེ་ར་བ་སྟེ། ཐུགས་མི་འགྱུར་བ་དང་། ཐབས་དང་ཤེས་རབ་འབྲེལ་བས། གྲྭའི་རྡོ་རྗེ་ཟླ་བུར་དུ་བསྟན་ཏོ། །མེ་

71-1-210b

ཏོག་ཅེས་པ་ནི། བུམ་པའི་གདན་གྱི་ཐ་ཚིག་སྟེ། དབྱར་ནི་མེ་ཏོག་གི་དཀྱིལ་འཁོར་བྱ། དགུན་ཚོན་སྣ་ལྔའི་པདྨ་འདབ་མ་བརྒྱད་པ་དང་། ནས་ལ་སོགས་པ་ལ་བྱ་བའི་དོན་ཏོ། །གཞན་དུ་ན་བུམ་པས་བརྒྱན་ཏེ། མེ་ཏོག་ལ་སོགས་པ་དང་། དར་གྱིས་ཁ་རྒྱན་བྱ་བའི་ཐ་ཚིག་ཅེས་པའི་བར་ནི། 
བུམ་པའི་གནས་དང་། ཁ་རྒྱན་དུ་བསྟན་ཏེ། གཞན་དུ་ན་དཀྱིལ་འཁོར་ལ་ནི་མེ་ཏོག་ནི་མཛེས་པས་མཆོད་པ་རྣམ་པ་ལྔར་ཡང་བསྟན་ཏོ། །རྣམ་གཅིག་ཏུ་དཀྱིལ་འཁོར་མེ་ཏོག་ལྟར་རབ་ཏུ་མཛེས་པའི་ཕྱིར་མདའ་དང་། རལ་གྲི་དང་། མེ་ཏོག་དང་། ཕུར་བུ་དང་། ཚོན་རྩི་དང་། སྲུང་
སྐུད་དང་ཚེམས་ཤིང་ལ་སོགས་པར་སྨོས་པའི་དོན་ཏོ། །ཆུ་ཡི་གསེར་རམ་ཡང་ན་ནི། །དངུལ་གྱི་བུམ་པ་དག་ཀྱང་རུང་། །གཙང་མའི་གོས་ཀྱིས་དཀྲི་ཞིང་དགང་ནི། བུམ་པའི་རྒྱུ་སྟེ། རྒྱལ་པོ་ནི་གསེར་གྱི་བུམ་པ། བློན་པོ་ནི་དངུལ་གྱི་བུམ་པ། ཀྱང་གི་ཚིག་ནི་ལྷག་མ་ཅན་ཏེ། འབངས་ཕལ་
ནི་ཟངས་དང་ལྕགས་ལ་སོགས་པའི་བུམ་པ་ལ་བྱ་བའི་ཐ་ཚིག་གོ། །གཞན་དུ་ནི་ཕྲིན་ལས་སོ་སོའི་བྱེ་བྲག་ཏུ་ཤེས་པར་བྱ་བའི་དོན་ནི། བུམ་པ་དེ་རྣམས་ཀྱང་། དཀྱིལ་འཁོར་གྱི་ཁྱད་པར་གྱི་རྒྱན་ཆས་ཏེ། དབུས་རྣམ་པར་རྒྱལ་བའི་བུམ་པ་གསེར་ལས་བྱས་པ་མི་བསྒུལ་བར་གཞག་པའི་ཐ་ཚིག་
གོ། །དངུལ་ལ་སོགས་པའི་ཕྱི་མ་རྣམས་ནི་ཐུགས་ཁྲོ་བོའི་དཀྱིལ་འཁོར་གྱི་ལྷ་གྲངས་སུ་བྱ་བར་འབྱུང་ངོ་། །ལྷ་སོ་སོའི་ཁ་དོག་བཞིན་དུ་བུམ་པ་ཡང་དེ་བཞིན་དུ་ཕྱོགས་ཕྱོགས་སུ་རྒྱན་ཆས་གོང་དུ་གསུངས་པ་བཞིན་བྱ་བའི་ཐ་ཚིག་གོ། །གཙང་མའི་གོས་ནི་རས་སར་པ་ཁ་ཚར་མ་ཉམས་པ་དང་། 
ཏིང་ངེ་འཛིན་གྱིས་བྱིན་གྱིས་བརླབས་པའི་ཐ་ཚིག་སྟེ། ཞེས་པ་ནི་བུམ་པ་དེ་རྣམས་ཀྱི་མགུལ་ཆིངས་ལྷའི་ན་བཟའ་ཀ་ཙ་ལིནྡ་ལྟར་བྱིན་གྱིས་བརླབས་ཤིང་། ཚུལ་ཁྲིམས་ཀྱི་གོས་མཆོག་ཏུ་བསྒོམ་མོ། །གཞན་དུ་ན་དཀྱིལ་འཁོར་གྱི་ཞལ་ཁབ་དང་། འགབ་དཀྲིས་སུ་ཤེས་པར་བྱའོ། །དཀྱིལ་
འཁོར་གྱི་རྒྱན་ཆོས་དང་། བུམ་པའི་དོན་སྦྱར་བ་བཤད་ཟིན་ཏོ།།      །།ད་ནི་གྲངས་ཀྱི་ཁྱད་པར་གྱི་དོན་སྟོན་ཏེ། ད་ནི་བཟླས་བརྗོད་ཀྱི་དོན་ལ་དགའ་བའི་དབང་དུ་གསུངས་ཏེ། ལན་གྲངས་ཉི་ཤུ་རྩ་གཅིག་གམ། །ཡང་ན་ལན་གྲངས་བརྒྱ་རྩ་བརྒྱད། །རྡོ་རྗེ་རྣམ་འཇོམས་བཟླས་ནས་སུ། །ཞེས་

71-1-211a

པ་དང་། གྲངས་ཀྱི་དོན་ཏེ། འབངས་ཉི་ཤུ་རྩ་གཅིག་ལ་སོགས་ཏེ། ཅི་འབྱོར་པ་བློན་པོ་ནི་བརྒྱ་རྩ་བརྒྱད་ལ་སོགས་ཏེ་འགྲུབ་ཚད་དོ། །རྒྱལ་པོ་ནི་བསོད་ནམས་ཆེ་བས་ཐ་མ་བརྒྱ་རྩ་བརྒྱད་དོ། །བློན་པོ་ཐ་མ་ཉི་ཤུ་རྩ་གཅིག འབངས་ཀྱི་ཐ་མ་བདུན་ནོ། །ད་ནི་གྲངས་ཀྱི་
བསྙེན་པའི་དོན། མཚན་མའི་བསྙེན་པ་དང་། ཚིག་དང་། དོན་དང་། བཟླས་བརྗོད་ནི། རང་བཞིན་གྱིས་ཤེས་པར་བྱ་བའི་ཐ་ཚིག་གོ་ཞེས་པ་ནི། གྲངས་ཀྱི་བསྙེན་པའི་དོན་དང་། དུས་ཀྱི་བསྙེན་པའི་དོན་དང་ལྡན་པ་སྟེ། དེ་ཡང་བཟླས་བརྗོད་ལ་དགའ་བ་དང་། དངོས་གྲུབ་ཀྱི་རྟགས་ཀྱི་མཚན་
མ་ལ་དགའ་བ་དང་། ནམ་སླ་དུས་བཞི་དང་། ཚེས་གྲངས་དང་། གཟའ་དང་། སྐར་མ་ལ་དགའ་བའི་དོན་གསུངས་སོ། །དེ་ཡང་བཟླས་པའི་དོན་ལ་དགའ་བ་ལ་སྔགས་ཀྱི་བཟླས་པ་གསུངས་སོ། །དོན་གྱི་བཟླས་པའི་ཏིང་ངེ་འཛིན་ལ་དགའ་བའི་ཕྱིར་རོ།    །གང་གིས་དེའི་འོག་ཏུ་ཁྲུས་བྱ་
བའི་དམིགས་ནི། རྒྱལ་པོ་རྟག་ཏུ་ཁྲུས་གྱིས་ཤིག །ཅེས་པའི་དོན་ནི། རྒྱལ་པོ་སྟོབས་ལྡན་སྙིང་པོ་ལ་སོགས་པ། རྒྱལ་པོའི་རིགས་སུ་གཏོགས་པ་རྣམས་སོ་ཞེས་པ་དང་། དོན་གྱིས་ཤེས་པར་བྱ་བའི་ཐ་ཚིག་ཏུ་རིག་པར་བྱའོ་ཞེས་པའི་བར་ནི། མདོའི་དོན་ནི་སེམས་ཅན་ཐམས་ཅད་
བྱང་ཆུབ་སྙིང་པོ་ཅན་དུ་བྱིན་གྱིས་བརླབས་པའི་ཕྱིར་ན། སེམས་ཅན་གྱི་དཔོན་པོ་རྒྱལ་པོ་སྨོས་པས་ན། ཕྱི་རབས་ཀྱི་འགྲོ་བའི་དཔོན་པོ་རྒྱལ་པོ་བས་གཙོར་བྱས་པས་ན། ཕྱིའི་ཁྲུས་བྱ་བ་དང་། ནང་གི་ཁྲུས་བྱ་བ་དང་། ཕྱི་ནང་གཉི་གའི་ཁྲུས་བྱའོ། །ཕྱི་ནི་བཟླས་བརྗོད་དང་། ནང་ཏིང་ངེ་འཛིན་
གྱི་དབང་དུ་བྱས་པ་སྟེ། དེས་ནི་གཟུང་བ་དང་། འཛིན་པ་དག་པར་བྱེད་པའོ། །རྣམ་པ་གཅིག་ཏུ་ཕྱི་ལུས་དང་། ནང་སེམས་ཀྱི་བག་ཆགས་ཀྱི་རྣམ་པའོ། །དེ་དག་པའི་ཕྱིར་རོ།    །ད་ནི་དགེ་བ་བསྔོ་བའི་ཚུལ་སྟོན་ཏེ། བརྩམས་པའི་དོན་ནི། མདོའི་དོན་གྱིས་དགོངས་པ་ལ་ཞེས་པའོ། །བརྩམས་
པའི་ཐབས་ནི། རིག་པའི་ཚུལ་གྱིས་འདི་གཞུང་འཆད། །བརྩམས་པ་དང་མི་མཐུན་པ་ནི། འཕགས་པ་རྣམས་ལ་བཟོད་པར་གསལ། །བརྩམས་པའི་འབྲས་བུ་ནི། འདི་གྲུབ་བརྩམས་པས་བདེ་གྲུབ་ཤོག །ཞེས་པ་དང་། སློབ་དཔོན་གྱིས་དགེ་བ་བསྔོ་བའི་ཚུལ་ལོ། །འདི་དོན་གཞན་གྱིས་

71-1-211b

བཤད་ཀྱང་དེ་གསལ་ཕྱིར། །གཏན་ཚིགས་རིགས་པས་མདོ་ཡི་དགོངས་པ་བཀྲོལ། །མཁས་པ་རྣམས་ཀྱིས་མི་དཔྱ་བཟོད་པར་གསོལ། །བསོད་ནམས་མི་སླུ་འགྲོ་བ་ཡོངས་ལ་བསྔོ། །རྡོ་རྗེ་རྣམ་པར་འཇོམས་པའི་གཟུངས་ཀྱི་དོན་རྣམ་པར་བཤད་པ་རྒྱ་ཆེར་འགྲེལ་པ། བཱི་མ་ལ་མི་ཏྲས་མཛད་པ་
རྫོགས་སོ།།      །། ༄༅༅།  །རྒྱ་གར་སྐད་དུ། བཛྲ་བི་དཱ་ར་ཎ་ནཱ་མ་དྷཱ་ར་ཎི་བྲྀཏྟི།  བོད་སྐད་དུ།  རྡོ་རྗེ་རྣམ་པར་འཇོམས་པའི་གཟུངས་ཀྱི་འགྲེལ་པ། བཅོམ་ལྡན་འདས་ཕྱག་ན་རྡོ་རྗེ་ལ་ཕྱག་འཚལ་ལོ། །དེ་ཉིད་རྟོགས་པས་རྡོ་རྗེ་དང་། །འཁོར་བའི་ཉེས་པ་འཇོམས་མཛད་པའི། །རྫོགས་
སངས་རྒྱས་ལ་ཕྱག་འཚལ་ཏེ། །སྤྱི་ཡི་རྒྱུད་ལ་སོགས་པ་དང་། །བླ་མའི་གདམས་ངག་ལ་བརྟེན་ནས། །བློ་དམན་རྣམས་ལ་ཕན་ཕྱིར་བརྩམ། །གླེང་གཞི་མཚན་ཉིད་རྒྱུད་དོན་དང་། །ཕན་ཡོན་ལྷག་གནས་དང་ནི་ལྔ། །གླེང་གཞི་ཕུན་སུམ་ཚོགས་ལྔའི་དོན། །བཞུགས་ཚུལ་ཞུས་དོན་རྒྱས་པའོ། །
འདི་སྐད་བདག་གིས་སངས་རྒྱས་ཀྱིས་མཐུས་ཞུས། སངས་རྒྱས་ཀྱི་བཀའ་འབྱུང་དཀའ་བས་དུས་གཅིག་ཐོས། བཅོམ་ལྡན་འདས་རྡོ་རྗེ་ལ་བྱང་ཆུབ་སེམས་དཔའ་ལ་སོགས་པ་དུ་མ་དང་བཞུགས་སོ། །དེའི་ཚེ་སྤྲུལ་པའི་ལུས་ཐམས་ཅད་རྡོ་རྗེར་བྱིན་གྱིས་བརླབས་ནས། རྡོ་རྗེའི་ཏིང་ངེ་འཛིན་ལ་
སྙོམས་པར་ཞུགས་ཞེས་བྱ་བ་ནི་ཆོས་སྐུར་རྡོ་རྗེའི་རྣམ་པར་རོ། །སངས་རྒྱས་ཀྱི་མཐུ་དང་། སངས་རྒྱས་ཀྱི་བྱིན་གྱི་རླབས་དང་། བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་ཀྱིས་བསྐུལ་ཅིང་གསོལ་བ་བཏབ་ནས་རྡོ་རྗེ་ལ་ཁྲོ་བོར་བྱུང་བའོ། །དེ་ལ་སངས་རྒྱས་ཀྱི་མཐུས། སྤོབས་
པ་བསྐྱེད་ནས་ལག་ན་རྡོ་རྗེ་ལ་ཞུས་པའི་ཚེ་འཁོར་དང་བཅས་པས་ཐོས་སོ། །གང་ཞེ་ན། རྡོ་རྗེའི་དོན་འགག་པ་མེད་པས་མི་ཆོད་པ་དང་། ཡོད་པ་དང་མེད་པས་མི་ཤིག་པ་དང་། ཕྱིན་ཅི་མ་ལོག་པས་བདེན་པ་དང་། སྐྱེ་བ་མེད་པས་སྲ་བ་དང་། མི་སླུ་བས་ན་བརྟན་པ་དང་། དངོས་པོར་འཛིན་པ་
འཇོམས་པས་ཐོགས་པ་མེད་པ་དང་། རྣམ་རྟོག་གི་མཚན་མ་ལས་མ་ཕམ་པ་ནི། དེ་ཁོ་ན་ཉིད་རྟོགས་པའི་ཤེས་རབ་ཀྱི་མཚན་ཉིད་དོ། །རྡོ་རྗེ་ལས་བྱུང་བའི་སྙིང་པོ་ཁྲོ་བོའི་དོན་ནི། ཨོཾ་ཏྲ་ཊ་ཏྲ་ཊ། ཁམས་གསུམ་རྣམ་རྒྱལ་གྱིས་ཞེ་སྡང་ཞི་བར་བྱེད་པས་སེམས་ཅན་ཐམས་ཅད་སྐྲག་པར་བྱེད་

71-1-212a

པ་དང་། ཏྲོ་ཊ་ཡ་ཏྲོ་ཊ་ཡ། གཤིན་རྗེ་གཤེད་ཀྱིས་གཟུང་འཛིན་ཞི་བར་བྱེད་པས། སེམས་ཅན་ཐམས་ཅད་འཇིལ་བར་བྱེད་པ་དང་། སྥུ་ཊ་སྥུ་ཊ། རྟ་མགྲིན་གྱིས་རྣམ་པར་རྟོག་པ་ཞི་བར་བྱེད་པས་རིག་སྔགས་ཐམས་ཅད་གཅོད་པར་བྱེད་པ་དང་། སྥོ་ཊ་ཡ་སྥོ་ཊ་ཡ། བདུད་རྩི་
འཁྱིལ་པས་ཡང་དག་པའི་དོན་འཕེལ་བར་བྱེད་པས་རིག་སྔགས་ཐམས་ཅད་གནོན་པར་བྱེད་པ་དང་། གྷཱུརྞ་གྷཱུརྞ་ཧཱུཾ་ཀ་རས་རང་དང་གཞན་རྗེས་སུ་འཛིན་པ་ལས་ཐམས་ཅད་འཇོམས་པར་བྱེད་པ་དང་། གྷཱུརྞ་པ་ཡ་གྷཱུརྞ་པ་ཡ། སྟོབས་པོ་ཆེས་རང་དོན་གྲུབ་པས་གཞན་གྱི་ལས་ཐམས་ཅད་འཇིག་པར་
བྱེད་པ་དང་། སརྦ་སཏྭ་ནི་ཡིད་ལ་སེམས་པ་ཐམས་ཅད་གྲུབ་པར་བྱེད་ཅེས་པའི་དོན་ཏོ། །བོ་དྷ་ཡ་བོ་དྷ་ཡ་རྡོ་རྗེ་ཞེ་སྡང་འཇོམས་པས་གདོན་ཐམས་ཅད་རླག་པར་བྱེད་པ་དང་། སཾ་བོ་དྷ་ཡ་སཾ་བོ་དྷ་ཡ། དོན་ཡོད་ཞགས་པས་ཡང་དག་པའི་དོན་རྟོགས་པས་གདོན་ཐམས་ཅད་ལས་ཐར་བར་བྱེད་པ་
དང་། བྷྲ་མ་བྷྲ་མ་འདོད་པའི་རྒྱལ་པོས་ཕྱིན་ཅི་ལོག་སྤོང་བས་འབྱུང་པོ་ཐམས་ཅད་འགུགས་པར་བྱེད་པ། སཾ་བྷྲ་མ་ཡ་སཾ་བྷྲ་མ་ཡ། རྡོ་རྗེ་འཁོར་ལོས་བྱམས་པ་ལ་སོགས་པ་གཞན་རྗེས་སུ་འཛིན་པས་རིག་སྔགས་ཀྱི་ལས་ཐམས་ཅད་བྱེད་དུ་འཇུག་པ་དང་། སརྦ་བྷཱུ་ཏ་ནི་འབྱུང་པོ་ལ་སོགས་པ་
ཐམས་ཅད་ཀྱི་བར་ཆད་སྲུངས་ཞེས་བྱ་བའི་དོན་ཏོ། །ཀུཊྚ་ཀུཊྚ་རྡོ་རྗེ་རྣོན་པོ་འཁོར་འགུགས་པས་མ་གྲུབ་པ་གྲུབ་པར་བྱེད་པ་དང་། སཾ་ཀུཊྚ་ཡ་སཾ་ཀུཊྚ་ཡ་རྡོ་རྗེ་ཁྲོས་པས་ཡང་དག་པར་འགུགས་པས་གྲུབ་པ་རྣམས་ཆུད་མི་ཟ་བར་བྱེད་པ་དང་། སརྦ་ཤ་ཏྲུཾ་ནཱཾ་དགྲ་བགེགས་ཐམས་ཅད་གནོད་པར་བྱེད་
ཅེས་པའི་དོན་ཏོ། །གྷ་ཊ་གྷ་ཊ་རྡོ་རྗེ་ལྕགས་སྒྲོག་ཡང་དག་པར་འཛུད་པས་འདོད་པ་ཐམས་ཅད་རབ་ཏུ་སྦྱིན་པ་དང་། སཾ་གྷ་ཊ་ཡ་སཾ་གྷ་ཊ་ཡ་རྡོ་རྗེ་དྲིལ་བུ་དགྱེས་པས་སེམས་ཅན་ཐམས་ཅད་སྲུང་བ། ཞི་བ། རྒྱས་པར་བྱེད་པའོ། །རྒྱུད་དོན་བསྙེན་པ་སྒྲུབ་པ་དང་། །འདོད་པའི་དོན་རྣམས་གྲུབ་པ་ཡི། །
རྩ་བའི་འཁོར་ལོ་བསྟན་པ་སྟེ། །ཁྲོ་བོའི་དོན་ནི་བཅོ་ལྔའོ། །དེ་ལ་རྣལ་འབྱོར་པ་དཀྱིལ་འཁོར་གྱི་སྒོར་ཞུགས་པའི་བླ་མ་དམ་པའི་མན་ངག་ཅན་གྱིས་བྱང་ཆུབ་ཏུ་སེམས་བསྐྱེད་དེ། གནས་དབེན་པར་མཎྜལ་དང་གཏོར་མ་ལ་སོགས་པ་བཤམས་ཏེ། བུམ་པའི་ཁ་རྒྱན་ལ་སོགས་པ་རྫོགས་

71-1-212b

པར་མཎྜལ་གྱི་སྟེང་དུ་གཞག་པར་བྱའོ། །དེ་ནས་སྙིང་གའི་ཧཱུཾ་ལས་བྱུང་བའི་སྒྲ་སྟོང་པར་བྱ་སྟེ། ལས་ཀྱི་ལྷ་ཕྱག་མཚན་མེད་པར་གྱུར་པའི་ལས་ཐམས་ཅད་བྱའོ། །ན་མོ་རཏྣ་ཏྲ་ཡཱ་ཡ། ན་མཿ ཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཞེས་པས་སྙིང་པོ་གསང་སྔགས་དང་། ཏདྱ་ཐཱ། 
ཨོཾ་ཏྲ་ཊ་ཏྲ་ཊ་ཞེས་པས་ཁྲོ་བོ་རྣམས་དང་། སརྦ་བིདྱཱ་བཛྲ་བཛྲ་སུ་བཛྲ་ཡན་ཆད་ཡང་སྙིང་དང་བཅས་པས་ལུས་བྱིན་གྱིས་བརླབས་པའོ། །སྙིང་པོའི་གསང་སྔགས་དང་། ཨོཾ་ཧ་ར་ཧ་ར་བཛྲ་ལ་སོགས་པ་ཕྱོགས་སྐྱོང་བཅུས་མཚམས་བཅད་དོ། །བཛྲ་ཨཾ་ཀུ་ཤ་ཛྭཱ་ལཱ་ཡ་སྭཱཧཱ་ཞེས་གཞལ་ཡས་
ཁང་བསྐྱེད་དོ། །སརྦ་བིདྱཱ་ནས། སུ་བཛྲ་ཡན་ཆད་བཛྲ་ཨཾ་ཀུ་ཤ་ཛྭཱ་ལཱ་ཡ་ཀཱི་ལི་ཀཱི་ལཱ་ཡ་སྭཱཧཱ། ཞེས་པས་གཙོ་བོ་བསྐྱེད། ཙུ་རུ་ཙུ་རུ་ཙཎྜ་ཀཱི་ལི་ཀཱི་ལཱ་ཡ་སྭཱཧཱ། ཞེས་པས་རྡོ་རྗེ་གཏུམ་པོ་བསྐྱེད། ཏྲཱ་ས་ཏྲཱ་ས་ཡ་བཛྲ་ཀཱི་ལི་ཀཱི་ལཱ་ཡ་སྭཱཧཱ་ཞེས་པས་རྡོ་རྗེ་ཕུར་བུ་བསྐྱེད། ཧ་ར་ཧ་ར་བཛྲ་དྷཱ་རཱ་ཡ་
སྭཱ་ཧཱ་ཞེས་པས་རྡོ་རྗེ་བེ་ཅོན་བསྐྱེད་དོ། །པྲ་ཧ་ར་པྲ་ཧ་ར་བཛྲ་པྲ་བྷཉྫ་ནཱ་ཡ་སྭཱཧཱ། ཞེས་པས་རྡོ་རྗེ་ཐོ་བ་བསྐྱེད་དོ། །གསང་སྔགས་འདི་ཐམས་ཅད་བཅོམ་ལྡན་འདས་རྡོ་རྗེ་རྣམ་པར་འཇོམས་པ་ཡིན་པས་ཁྱད་པར་མེད་ཀྱང་། བླ་མ་དག་གི་ཞལ་ནས་ཕྱོགས་སྐྱོང་བ་ལ་སོགས་པའི་ལྷ་དགུག་པ་
ཤེས་པའི་བསྙེན་པའི་རྩ་སྔགས་ཡིན་གསུངས་སོ། །དེ་ནས་རྡུལ་ཚོན་བཞེངས་སོ། །གཙོ་བོའི་སྔགས་གོང་དང་མཐུན། ཚིནྡ་ཚིནྡ། བྷིནྡ་བྷིནྡ། མ་ཧཱ་ཀཱི་ལི་ཀཱི་ལཱ་ཡ་སྭཱཧཱ། བནྡྷ་བནྡྷ། ཀྲོ་དྷ་ཀྲོ་དྷ་ཀཱི་ལི་ཀཱི་ལཱ་ཡ་སྭཱཧཱ། ཙུ་རུ་ཙུ་རུ་ཙཎྜ་ཀཱི་ལི་ཀཱི་ལཱ་ཡ་སྭཱཧཱ། ཏྲཱ་ས་ཡ་ཏྲཱ་ས་ཡ་བཛྲ་ཀཱི་ལི་ཀཱི་
ལཱ་ཡ་སྭཱཧཱ་ཞེས་རྡོ་རྗེ་གཏུམ་པོ་དང་། རྡོ་རྗེ་ཕུར་བུ་དང་རྡོ་རྗེ་བེ་ཅོན་དང་། རྡོ་རྗེ་ཐོ་བ་རྣམས་བསྐྱེད་དོ། །མ་ཏི་སྠི་ར་བཛྲ། ཤཱི་གྷཾ་བཛྲཱ་ཡ་སྭཱཧཱ་ཞེས་བརྒྱད་ཀྱིས་བརྟན་པར་བཞུགས་སུ་གསོལ་ལོ། །ན་མཿས་མནྟ་བཛྲཱ་ཎཱཾ་ཞེས་པ་དང་།  བཛྲ་ཨཾ་ཀུ་ཤ་ཛྭཱ་ལཱ་ཡ་སྭཱཧཱ་ཞེས་དབང་བསྐུར་རོ། །གཞན་
ཡང་འདི་ནི་ལས་ཐམས་ཅད་གཏོར་མ་དང་ཙཱ་རུའི་སྟོན་མོ་དང་། སློབ་མས་ཡང་ཁྲུས་བྱ། བ་ཡ་རྡོ་རྗེའི་གླུ་དང་བཅས་པས་བྱའོ། །དེ་ནས་མཆོད་པ་དང་བསྟོད་པ་བླ་མའི་གདམས་ངག་གིས་རྒྱས་པར་བྱ་སྟེ། བཟླས་པ་ནི་སྙིང་པོ་དང་རྩ་སྔགས་ཡང་སྙིང་དང་བཅས་པར་བླ་མའི་ངག་གིས་གདོན་ནོ། །

71-1-213a

དེ་ནས་སློབ་མས་ཁྲུས་བྱ་བ་ནི་ཧེ་ཕུལླུ་ནི་རུ་ཕུལླུ་གྲྀཧྞ་ཀུལླུ།  མིལླི་ཙུལླུ།  ཀུ་རུ་ཀུལླུ་བཛྲ་བི་ཛ་ཡ་སྭཱཧཱ། ཞེས་པས་བུམ་པ་ལག་པ་གཡས་པའི་ཁུང་དུ་བླངས་ལ་བབ། ཀ་ཊ་ཀ་ཊ། མ་ཊ་མ་ཊ ར་ཊ་ར་ཊ མོ་ཊ་ན་པྲ་མོ་ཊ་ནཱ་ཡ་སྭཱ་ཧཱ།  ཞེས་ཡུངས་ཀར་གྱིས་བྲག་ 
དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། སརྦ་བཛྲ་ཀུ་ལཾ་ཨཱ་བརྟ་ཡ་སྭཱཧཱ། ཨ་མུ་ཀ་མཱ་ར་ཡ་ཕཊ་ཅེས་རྨ་བྱའི་མདོངས་ཀྱིས་བྱབ། དེ་ནས་གསང་སྔགས་ཞི་བ་ལ་སོགས་པ་དང་བཅས་པས་སློབ་མའི་སྤྱི་བོ་ནས་ཁྲུས་བྱས་པས་ཉམས་གྲིབ་ལ་སོགས་པའི་སྡིག་པ་ཐམས་ཅད་དག་པར་འགྱུར་རོ། །
ནད་དང་གདོན་ལ་སོགས་པ་ཐམས་ཅད་མེད་པར་འགྱུར་རོ། །དེ་ནས། ན་མཿ སརྦ་ཏ་ཐཱ་ག་ཏེ་བྷྱོ། བི་ཤྭ་མུ་ཁེ་བྷྱཿ སརྦ་ཏ་ཏྑཾ་ཨུངྒ་རཀྵ་མ་ཧཱ་བ་ལེ། སརྦ་ཏ་ཐཱ་ག་ཏ་པུ་རྣ་ཎིར་ཛ་ཏེ་ཧཱུཾ་ཧཱུཾ་ཏྲ་ཐ་ཏྲ་ཐ། ཨ་པྲ་ཏི་ཧ་ཏ་ཧཱུཾ་ཕཊ་སྭཱཧཱ། ཞེས་པས་ལག་པ་རྡོ་རྗེ་ཁུ་ཚར་བཅིངས་ཏེ། མཐེའུ་ཆུང་གཉིས་
གཞིབས་ཏེ། མཐེ་བོང་དང་གུང་མོ་གཉིས་རྩེ་སྤྲད་ལ་སྲིན་ལག་གཉིས་རྩེ་སྤྲད་དེ་བསྒྲེང་བ་ནི་དམ་ཚིག་གི་ཕྱག་རྒྱ་བྱ་སྟེ་སྲུང་བ་ཆེན་མོའོ། །དེ་ནས་སྙིང་གའི་སྲུང་བ་དང་། སྤྱི་བོའི་སྲུང་བ་ལ་སོགས་པ་ཐམས་ཅད་ཀྱང་བྱའོ། །དེ་ནི་ཁྲུས་ཀྱི་ཆོ་གའོ། །གཞན་ཡང་ཞི་བ་ལ་སོགས་པའི་
དངོས་གྲུབ་འཁོར་ལོ་ལ་བརྟེན་པ་ནི་བླ་མའི་ཞལ་ལས་ཤེས་པར་བྱའོ། །གསང་སྔགས་ཀྱི་རྒྱུད་ཐམས་ཅད་ཀྱི་ཐོག་མར་གསུངས་པའི་རྡོ་རྗེ་རྣམ་པར་འཇོམས་པའི་གཟུངས་འདི་བསོད་ནམས་ཡེ་ཤེས་ཀྱི་དཔལ་ཀུན་གྱིས་ནི་ལེགས་བརྒྱན་པས། རྒྱུ་སྡིག་པ་ཐམས་ཅད་བྱང་ནས་འབྲས་བུ་
སྡུག་བསྔལ་ཐམས་ཅད་མེད་པར་བྱེད་པ་ནི་ཕན་ཡོན་མདོར་བསྟན་པའོ། །སེམས་ཅན་སྤྱི་དེ་རིགས་བཞི་གང་ཡང་རུང་བའོ། །དབང་པོ་ཉམས་པ་ནི་ལུས་ཀྱིའོ། །ཚེ་ཟད་པ་ནི་འཆི་བ་སྟེ་སྲོག་གོ། །ལོངས་སྤྱོད་ཕུན་སུམ་ཚོགས་པ་མེད་པ་དང་། ནོར་ཡོད་པ་འགྲིབས་པ་གང་ཞིག་འདོད་
ཆགས་ཀྱི་སེམས་ལ་གདུངས་པས་གནོད་པ་དང་། འཇིག་རྟེན་དང་འཇིག་རྟེན་ལས་འདས་པའི་ལྷ་རྣམས་རྒྱབ་ཀྱིས་ཕྱོགས་པ་ནི་ཕན་མི་འདོགས་པ་སྟེ། དེ་མ་ཡིན་པའི་གནོད་པ་འབྱུང་སྟེ་དེ་ཡང་གཟའ་བབས་པ་དང་། རྒྱུ་སྐར་ངན་པ་ལ་བབས་པ་དང་། གཞན་གྱི་བྱད་དུ་ཆུད་པ་ནི་རིག་སྔགས་

71-1-213b

ངན་པས་བསྡམས་པས་མི་བཟད་གདོན་གྱིས་ཉེན་པ་སྟེ། དེའི་དབང་གིས་ལུས་དང་སེམས་ཀྱི་གདུང་བ་ལ་སོགས་པ་འབྱུང་བ་དང་། རྨི་ལམ་ངན་པའི་སྡིག་པ་འདྲ་བའི་རྨི་བ་འདག་པར་བྱེད་དོ། །རང་གི་ཉེ་དུ་མཛའ་ཞིང་ཡིད་དང་འཐད་པའི་སྐྱེ་བོ་དང་བྲལ་བ་དང་། དགྲ་སྡང་བའི་སྐྱེ་བོ་དང་ཕྲད་པ་དང་། 
རྒྱལ་པོ་ལ་སོགས་པའི་ཆད་པས་གཙེས་པ་དེ་ཕན་ཚུན་མཐུན་པ་མ་ཡིན་པ་ནི་མི་ལས་གྱུར་པའི་གནོད་པ་སྟེ། ཚེ་འདིའིའོ། །གནོད་པ་འདི་དག་དང་གཞན་སེལ་བར་བྱེད་དོ། །གཞན་ཡང་ལས་མི་དགེ་བའི་དབང་གིས་དམྱལ་བ་ལ་སོགས་པའི་ངན་སོང་གསུམ་དུ་སྐྱེས་པས་ལུས་དང་སེམས་
གདུངས་པའི་མྱ་ངན་དང་ངལ་བའི་གནོད་པ་དང་། སྡུག་བསྔལ་གྱིས་འཇིགས་པ་དང་། བདེ་བས་ཕོངས་པ་དང་། དེ་ལྟ་བུའི་ཉེས་པ་ཐམས་ཅད་ལས་ཐར་བར་བྱེད་པ་ནི་ཕྱི་མའི་ཕན་ཡོན་ནོ། །དཔལ་རྡོ་རྗེ་རྣམ་པར་འཇོམས་པའི་ཁྲུས་ཀྱི་ཆོ་ག་དེས་ནི་རབ་བཀྲུས་གཙང་མ་ཡིན་ཞེས་བྱ་སྟེ་གང་དག་
ཡིད་དགེ་བ་སྟེ། བྱང་ཆུབ་ཏུ་སེམས་བསྐྱེད་པ་དང་། སེམས་དང་པོ་ནི་དཀོན་མཆོག་ལ་སྐྱབས་སུ་སོང་བ་ནི་གཙང་མའི་གོས་ཀྱིས་རབ་བརྒྱན་ཏེ། སློབ་མ་ལྷག་པར་གནས་པ་དང་། རྟེན་གྱི་གང་ཟག་བསྟན་པའོ། །ནོར་བུ་ནི་ཆུ་ཤེལ་ལ་སོགས་པའོ། །ཡུངས་ཀར་ནི་གོ་སླའོ། །དཱུར་བ་ནི་དག་བྱེད་
ཡིན་ཏེ། ཀུ་ཤའི་བྱེ་བྲག་ཅིག་གོ། །རིན་པོ་ཆེ་རྨ་མེད་པ་ནི་མུ་ཏིག་ལ་སོགས་པ་སྟེ་རྒྱན་དུ་རུང་བའོ། །ཙནྡན་ནི་མཚོན་པ་སྟེ་དྲིའི་བྱེ་བྲག་ཐམས་ཅད་དོ། །དེས་ནི་སྙིང་པོ་རྫས་བསྟན་ཏེ། ཤེལ་ལ་སོགས་པའི་རྒྱུ་ལས་བྱས་པའི་རྡོ་རྗེ་དང་། ཡུངས་ཀར་ནི་བར་ཆོད་ཐམས་ཅད་ཞི་བར་བྱེད་པའོ། ། 
མེ་ཏོག་ནི་པདྨ་སྟེ་གསུང་གི་རྟེན་ཡིན། ཆུ་ཡིས་བཀང་བའི་བུམ་པའི་རྒྱུ་གསེར་རམ་ཡང་ན་དངུལ་ལ་སོགས་པ་གང་ལས་བྱས་ཀྱང་རུང་སྟེ། མགྲིན་པ་ཕྲ་བ་ཁ་ཡེལ་བ་ལྟོ་བ་ལྡིར་བ་རྩ་བ་མེད་པ་ལ་གཙང་མའི་གོས་ཀྱིས་བརྒྱན་པ་འབྲས་བུ་ཅན་གྱི་ཤིང་གིས་བརྒྱན་པ་ནི་སྐུའི་རྟེན་ཡིན་ཏེ། བུམ་
པ་ལྷག་པར་གནས་པའོ། །དེར་ལྷ་བསྐྱེད་པ་ལ་སོགས་པ་ནི་ལྷ་ལྷག་པར་གནས་པའོ། །དེ་ལྟ་བུར་གྱུར་པའི་རྒྱུད་ཟབ་མོའི་དོན་སངས་རྒྱས་ཀྱི་སྤྱོད་ཡུལ་དུ་གྱུར་པ། རྟོག་གེ་པའི་སྤྱོད་ཡུལ་མ་ཡིན་པ། རིག་པ་གསུམ་དང་ལྡན་པའི་དཀྱིལ་འཁོར་འདིར་ཞུགས་ན་མདོ་སྡེ་དམ་པ་ཉན་པ་དང་། 

71-1-214a

གྲུབ་པ་དང་། གཞན་ལ་སྟོན་པ་ལ་སོགས་པའི་ནུས་པ་དང་ལྡན་པར་འགྱུར་རོ། །ཅིའི་ཕྱིར་ཞེ་ན། མདོ་སྡེ་འདི་ནི་ཉན་བྱེད་ན། །མདོ་སྡེ་འདི་ཡི་གཟི་བརྗིད་ཀྱིས། །སྲོག་ཆགས་དག་ནི་ཐམས་ཅད་ཀྱི། །མི་བཟད་པ་ཡི་ནད་རྣམས་དང་། །དེ་དག་ཐམས་ཅད་ཞི་བར་ལྟ། །ཚེ་དང་
བསོད་ནམས་འཕེལ་བར་འགྱུར། །སྡིག་པ་ཀུན་ལས་རྣམ་པར་ཐར། །སྡུག་བསྔལ་མ་ལུས་མེད་པར་འགྱུར། །ཞེས་འབྱུང་བའི་ཕྱིར། གཞན་ཡང་རྒྱུད་འདིའི་དོན་ནི་དེ་བཞིན་ཉིད་ཀྱི་ཏིང་ངེ་འཛིན་དང་། རྒྱུའི་ཏིང་ངེ་འཛིན་དང་། ཀུན་དུ་སྣང་བའི་ཏིང་ངེ་འཛིན་ལ་སོགས་པའི་བསྙེན་པའི་ཆོ་ག་དང་སྒྲུབ་
པ་ལ་སོགས་པའི་དོན་ཅི་རིགས་པར་ཡང་ངོ་། །གསང་སྔགས་བཟླས་པའི་གྲངས་ནི། ལན་གྲངས་ཉི་ཤུ་རྩ་གཅིག་གམ། །ཡང་ན་ལན་གྲངས་བརྒྱ་རྩ་བརྒྱད། །རྡོ་རྗེ་རྣམ་པར་འཇོམས་པའི་འཁོར་དང་རྩ་བའི་སྔགས་ཅི་རིགས་པའི་དོན་ཏོ། །རྒྱལ་པོ་རྟག་ཏུ་ཁྲུས་གྱིས་ཤིག །ཅེས་པ་ནི། རྒྱལ་
པོ་ནི་གཙོ་བོའི་དོན་ཏོ། །ཡང་ན་ལུས་ཀྱི་རྒྱལ་པོ་མགོ་ཡིན་པས་སོ། །གྲོང་ཁྱེར་སེར་སྐྱ་ཆུ་བོ་གངྒཱའི་ཀླུང་། །རྒྱུད་རྒྱལ་རྣམ་འཇོམས་བླ་མའི་བཀའ་བསྟན་སྒྲུབ། །བླ་མེད་དགེ་བ་ཆེན་པོ་བདག་གིས་ཐོབ། །གཞན་ལ་ཕན་ཕྱིར་བདག་གིས་དེ་དོན་བྲིས། །ཟླ་འདྲའི་དགེ་བ་ཅུང་ཟད་སྣང་བ་དེ། །འགྲོ་
རྣམས་རྣམ་འཇོམས་སྐུ་ཐོབ་དོན་ཕྱིར་བསྔོ། །སློབ་དཔོན་ཆེན་པོ་རྡོ་རྗེ་གོ་ཆས་མཛད་པ་རྡོ་རྗེ་རྣམ་པར་འཇོམས་པའི་རྒྱུད་ཀྱི་གྲེལ་པ་རྫོགས་སོ།།      །།རྒྱ་གར་གྱི་མཁན་པོ་ཤྲཱ་དྡྷཱ་ཀ་ར་ཝརྨ་དང་། བོད་ཀྱི་ལོ་ཙཱ་བ་ཤཱཀྱའི་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །། 
༄༅༅།  །རྒྱ་གར་སྐད་དུ། བཛྲ་བི་དཱ་རཱ་ཎ་ནཱ་མ་དྷཱ་ར་ཎི་བྱཱཀ་ཁྱཱ་ན། བོད་སྐད་དུ། རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་རྣམ་པར་བཤད་པ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །རྒྱལ་བ་ཀུན་གྱི་གསང་བའི་མཛོད་འཛིན་པ། །རྒྱུད་ཀྱི་དོན་འབྱུང་སྟོན་པ་ངོ་བོ་ལ། །སྒོ་གསུམ་
དང་བས་བཏུད་ཏེ་ཕྱག་འཚལ་ནས། །མདོ་ཡི་རྣམ་བཤད་བདག་གིས་བྱ་བར་འདོད། །དེ་ལ་དང་པོར་རྒྱུད་ཀྱི་དོན་ལ་མོས་པ་དང་དད་པ་རྣམས་ལ། མདོའི་དོན་ཕུན་སུམ་ཚོགས་པ་རྣམ་པ་ལྔ་ལ་རབ་ཏུ་མཁས་པར་བྱ་སྟེ། དེའི་འོག་ཏུ་ཇི་ལྟར་ཡོངས་སུ་ཤེས་པར་བྱ་བའི་གོ་རིམས་ལ་འཇུག་

71-1-214b

པར་བྱ་བའི་ཕྱིར་རོ། །དེ་ལ་དང་པོར་མདོའི་མཚན་གྱི་དོན་ཕུན་སུམ་ཚོགས་པ་ལ་མཁས་པར་བྱ་སྟེ། དེ་ལ་རྡོ་རྗེ་ནི་ཡང་དག་པའི་ཡེ་ཤེས་ཀྱི་ཚིག་བླ་དྭགས་ཏེ། ཅིའི་ཕྱིར་ཞེ་ན། རྡོ་རྗེ་ལྟར་དུས་མ་བྱས་པའི་ཕྱིར་དངོས་པོ་ལ་ཞེན་པ་རྣམས་དང་ལྟ་བ་ལོག་པའི་ཕྱོགས་ཐམས་ཅད་ཀྱིས་
མི་བསྐྱོད་ཅིང་། དངོས་པོ་དང་བྲལ་བའི་དོན་ཏོ། །རྣམ་པར་ནི་རྒྱུ་མེད་པ་དང་། རྒྱུ་དང་རྐྱེན་གྱིས་བསྐྱེད་པ་དང་། རྟག་པ་དང་མི་རྟག་པ་དང་བདེ་བ་དང་སྡུག་བསྔལ་བ་ལ་སོགས་ཏེ་མཚན་མའི་ཆོས་ཐམས་ཅད་སྨོས་པའི་ཕྱིར་རོ། །འཇོམས་པ་ནི་དེ་རྣམས་ཐུགས་ཡང་དག་པའི་ཡེ་ཤེས་
ཀྱིས་འཇོམས་པ་དང་། ཐུགས་རྗེ་ཐབས་ཀྱི་བྱེ་བྲག་གིས་འཇོམས་པའི་དོན་ཏོ། །གཟུངས་ནི་མི་འདའ་བའི་ཕྱིར་དང་གཉིས་སུ་མེད་པའི་དོན་ཏོ།    །དེ་ལྟར་མདོའི་དགོས་ཆེད་བསྟན་ནས། དེའི་འོག་ཏུ་དགོང་པ་དང་འབྲེལ་པའི་དོན་བསྟན་ཏོ། །ཅིའི་ཕྱིར་ཞེ་ན། དགོས་འབྲེལ་གྱི་སྒོ་ནས་
འཇུག་པའི་ཕྱིར་རོ། །མ་ནོར་བར་སྟོན་པའི་སྟོན་པ་ཕུན་སུམ་ཚོགས་པ་དང་། ཡོངས་སུ་དག་པའི་འཁོར་ཕུན་སུམ་ཚོགས་པ་དང་། གང་དུ་བཤད་པའི་གནས་དང་། མ་ནོར་བར་སྡུད་པའི་སྡུད་པ་པོ་དང་གང་བཤད་པའི་མདོའི་དགོས་པ་རྣམས་སུ་ཤེས་པར་བྱེད་པའི་ཐ་ཚིག་གོ། །དེ་ལ་འབྲེལ་
བ་ནི་ཕུན་སུམ་ཚོགས་ནས་དགོས་པ་གྲུབ་ཅིང་དོན་གཏན་ལ་འབེབས་པའི་ཕྱིར་རོ།    །དེའི་འོག་ཏུ་ཇི་ལྟར་ཡོངས་སུ་ཤེས་པར་བྱ་བའི་དོན་སྟོན་ཏེ། མདོའི་དོན་འབྱུང་བའི་གཏན་ཚིགས་དང་། དཀྱིལ་འཁོར་གྱི་དོན་འབྱུང་བའི་ཐབས་དང་། དགོས་ཆེད་ཕུན་སུམ་ཚོགས་པའི་དོན་རྣམས་སུ་ཤེས་
པར་བྱ་བའི་ཕྱིར་རོ། །དེ་ལྟར་དགོས་ཆེད་ཀྱི་དོན་བསྟན་ནས། དེའི་འོག་ཏུ་བསྡུ་བའི་དོན་དང་། གོ་རིམས་ལ་འཇུག་པའི་ཐབས་སྨོས་པའི་ཕྱིར་རོ། །སྟོན་པ་སངས་རྒྱས་བཅོམ་ལྡན་འདས་མཐའ་གཉིས་ཀྱི་སྐྱོན་སྤངས་ཏེ། ཐུགས་མཉམ་པ་ཉིད་ཀྱི་ཏིང་ངེ་འཛིན་རྡོ་རྗེ་ལྟ་བུ་ལས་མ་གཡོས་
ཀྱང་། ཉིད་ཀྱི་ཆེ་བའི་དོན་ཆེད་དུ་ཐུགས་ཡང་དག་པའི་སྲས་གསང་བའི་བདག་པོ་བྱིན་གྱིས་བརླབས་ནས། རྒྱུད་ཀྱི་དོན་འདི་གསུངས་པའི་ཚེ། སངས་རྒྱས་ཀྱི་ཞིང་མཐའ་ཡས་པ་ན་འདུས་པའི་འཁོར་རྣམས་ཀྱི་ནང་དུ་འཕགས་པ་འཇམ་དཔལ་གྱིས་དེ་བཞིན་གཤེགས་པ་དགྲ་བཅོམ་པ་ཡང་

71-1-215a

དག་པར་རྫོགས་པའི་སངས་རྒྱས་བཅོམ་ལྡན་འདས་ཀྱི་བྱིན་གྱིས་བརླབས་པས་འཕགས་པ་དཔལ་རྡོ་རྗེ་རྣམ་པར་འཇོམས་པའི་དོན་འདི་རྣ་བའི་དབང་པོ་ཡོངས་སུ་དག་པས་དཔལ་ཕྱག་ན་རྡོ་རྗེ་ལ་རབ་ཏུ་ཐོས་པའི་ཕྱིར་འདི་སྐད་བདག་གིས་ཐོས་པའི་དུས་གཅིག་ན་ཞེས་གསུངས་པ་
སྟེ། འདི་ལྟར་སྟོན་པ་སངས་རྒྱས་བཅོམ་ལྡན་འདས་ཀྱིས་རྒྱུད་ཀྱི་དོན་འདི་ལྟར་བཤད་དེ། ཏིང་ངེ་འཛིན་ཡེ་ཤེས་ཀྱི་ངོ་བོ་ལས་ཕྱག་ན་རྡོ་རྗེར་སྤྲུལ་ཏེ། ཡེ་ཤེས་ཀྱི་ངོ་བོ་སྔགས་ཀྱི་ཚིག་ཏུ་སྨྲས་ཏེ། འཁོར་རྣམས་དགའ་མགུ་བསྐྱེད་ནས་དད་པར་བྱ་བ་དང་། སེམས་ཅན་ཐམས་ཅད་ཀྱི་ཉོན་
མོངས་པའི་སྡིག་པ་རྣམ་པར་སྦྱང་བ་དང་། བླ་ན་མེད་པའི་བྱང་ཆུབ་ལ་དགོད་པའི་ཕྱིར་འདི་སྐད་ཅེས་བྱའོ། །བློ་རྣོ་ཞིང་ཤེས་རབ་མཆོག་ཏུ་གྱུར་པ་རྣམས་ཀྱིས་དོན་གྱི་རྒྱལ་པོ་འདི་ཐོས་པས་ན་བདག་གིས་ཐོས་པས་ཞེས་བྱའོ། །སྟོན་པ་དང་འཁོར་དང་སྡུད་པར་ལྡན་པ་ལ་ཞེས་བྱའོ། །ལན་གྲངས་
མང་དུ་མ་གསུངས་པར་ལན་ཅིག་བརྒྱ་ལམ་དུ་གསུངས་པས་ན། གཅིག་ན་ཞེས་བྱ་བའོ། །བཅོམ་ལྡན་འདས་རྡོ་རྗེ་ལ་བཞུགས་ཏེ་ནི་རང་བཞིན་གྱི་སྟོན་པའི་དོན་ཏེ། ཉོན་མོངས་པའི་བདུད་སྡེ་བཅོམ་སྟེ། ཐུགས་ཏིང་ངེ་འཛིན་གྱིས་མཁྱེན་པའི་ཡོན་ཏན་སྣ་ཚོགས་ཀྱི་ལེགས་པ་དང་ལྡན་པ། 
སངས་རྒྱས་བཅོམ་ལྡན་འདས་མཐའ་གཉིས་ཀྱི་སྐྱོན་སྤངས་པའོ། །རྡོ་རྗེ་ནི་གནས་ཕུན་སུམ་ཚོགས་པ་སྟེ། རྡོ་རྗེ་གདན་བྱང་ཆུབ་ཀྱི་ཤིང་དྲུང་ངོ་། རྣམ་པ་གཅིག་ཏུ་བཅོམ་ལྡན་འདས་རྡོ་རྗེ་ལྟ་བུའི་ཏིང་ངེ་འཛིན་ལ་ཐུགས་མཉམ་པར་གཞག་པ་ལ་བྱའོ། །བཞུགས་ཐབས་གསུམ་ལས་ནི་
མཉམ་པའི་སྐྱིལ་མོ་ཀྲུང་ལས་ཆོས་སྟོན་པའི་ཚུལ་དུ་བཞུགས་པའོ།    །ད་ནི་བྱིན་གྱི་རླབས་ཀྱིས་སྟོན་པའི་དུས་གསུམ་གྱི་རྒྱལ་བ་ཐམས་ཅད་ཀྱི་ཐུགས་གསང་བའི་མཛོད་འཛིན་པའི་ཡེ་ཤེས་ཀྱི་ངོ་བོ་སྟེ། དེའི་རྟགས་རྡོ་རྗེ་འཛིན་པའོ། །སངས་རྒྱས་ཀྱི་མཐུས་ནི་ཕྱོགས་བཅུའི་སངས་རྒྱས་ཐམས་
ཅད་ཀྱི་སྐུ་དང་། གསུང་དང་། ཐུགས་དང་། ཡོན་ཏན་དང་། ཕྲིན་ལས་ཀྱི་བྱིན་གྱིས་བརླབས་ཏེ། ཏིང་ངེ་འཛིན་ལ་སྙོམས་པར་ཞུགས་པའི་ཕྱིར་རོ། །ལུས་ཐམས་ཅད་རྡོ་རྗེར་བྱིན་གྱིས་བརླབས་ནས་ནི། ཡང་དག་པའི་ཡེ་ཤེས་དེ་ནི་ཆོས་ཐམས་ཅད་ཀྱི་རང་བཞིན་འདུས་མ་བྱས་པའི་དོན་

71-1-215b

ལུས་ངག་ཡིད་གསུམ་སྐུ་གསུང་ཐུགས་རྡོ་རྗེ་ལྟར་བྱིན་གྱིས་བརླབས་པའི་ཕྱིར་རོ། །རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་པ་ནི་ཡང་དག་པའི་ཡེ་ཤེས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་པས་དོན་ཐམས་ཅད་ལ་ཐོགས་པ་མེད་པའི་ཡེ་ཤེས་ཀྱི་ངོ་བོ་བདག་གནས་པའི་ཕྱིར་རོ། །དེ་ནས་
ལག་ན་རྡོ་རྗེ་སངས་རྒྱས་ཀྱིས་མཐུས་དང་ནི་སྐབས་ཀྱི་དེ་མ་ཐག་པ་སྟེ། སྙོམས་པར་ཞུགས་པའི་རྟིང་ཐོགས་སུ་ཕྱོགས་བཅུའི་སངས་རྒྱས་ཐམས་ཅད་ཀྱི་མཐུས་ཡེ་ཤེས་ཀྱི་འོད་ཟེར་སྐུ་དང་གསུང་དང་ཐུགས་ལས་འཐོན་ཏེ་ལག་ན་རྡོ་རྗེ་ལ་ཕོག་པས་སྐུ་གསུང་ཐུགས་ཡེ་ཤེས་ཀྱི་དོན་སྨྲ་བའི་དབང་
བསྐུར་ནས་ཐོགས་པ་མེད་པའི་ཡེ་ཤེས་ཀྱི་ཚིག་སྨྲ་བའི་ཕྱིར་རོ། །བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་ཀྱིས། སྔོན་གྱི་བསྐལ་པ་མཐའ་ཡས་པ་ནས། བྱང་ཆུབ་ཀྱི་སྤྱོད་པ་དཀའ་བ་ཉམས་སུ་བླངས་པའི་བྱིན་གྱི་རླབས་དང་། སངས་རྒྱས་ཀྱི་ཞིང་ཁམས་མཐའ་ཡས་པ་ན་
བྱང་ཆུབ་སེམས་དཔའ་རྣམས་ཀྱི་སྔོན་གྱི་དགེ་བའི་རྩ་བའི་ཚོགས་སུ་མཐུན་པས་བྱིན་གྱིས་བརླབས་པ་ལ་མཐུ་སྟོང་པའི་ཕྱིར་རོ། །སངས་རྒྱས་ཀྱི་བྱིན་གྱི་རླབས་ཀྱིས་ཞེས་པ་ནི་སངས་རྒྱས་དང་བྱང་ཆུབ་སེམས་དཔའི་བྱིན་གྱི་རླབས་ནི་མ་དྲོས་ལྟར་མཐུ་སྟོབས་མཐའ་ཡས་པའི་ཚིག་སྨྲ་བའི་
སྤོབས་པ་བསྐྱེད་པའི་ཕྱིར་རོ། །རྡོ་རྗེ་ཁྲོ་བོ་ལས་བྱུང་བ་ནི་དེ་ལྟར་ལག་ན་རྡོ་རྗེ་བྱིན་གྱིས་བརླབས་པའི་མཐུས་རྡོ་རྗེ་ལྟ་བུའི་ཡང་དག་པའི་ཡེ་ཤེས་ཀྱིས་ཁམས་གསུམ་གྱི་གྲགས་པ་ཅན་ལ་ཁྲོ་བོའི་ཐབས་ཀྱི་སྤྲུལ་པས་བདུད་རྣམས་འདུལ་བའི་ཕྱིར། འོག་ནས་འབྱུང་བའི་དཀྱིལ་འཁོར་གྱི་ལྷ་
རྣམས་སྐུ་གསུང་ཐུགས་ལས་འབྱུང་བའི་ཕྱིར་རོ། །རྡོ་རྗེ་སྙིང་པོ་རབ་ཏུ་སྨྲས་ཏེ་ཞེས་བྱ་བ་ནི་སྐུ་གསུང་ཐུགས་ཀྱི་རྡོ་རྗེ་ལྟར་འདུས་མ་བྱས་པ་དེས་སེམས་ཅན་ཐམས་ཅད་ལ་ཕན་པའི་ཕྱིར་འོག་ནས་འབྱུང་བའི་དོན་སྨྲ་བའི་དཀྱིལ་འཁོར་དང་། སྙིང་པོ་སྐྱོན་དང་བྲལ་བ་སྟོན་པས་གསུངས་
པའི་ཕྱིར་རོ།    །ད་ནི་ཁྲོ་བོ་རྣམས་ཀྱི་རང་བཞིན་གྱི་དོན་ཐུགས་ཀ་ནས་སྟོན་ཏེ། མི་ཆོད་པ་མི་ཤིགས་པ། བདེན་པ་སྲ་བ་ཞེས་བྱ་བ་ནི་གཟུང་བའི་ཡུལ་དུ་མ་གྲུབ་པས། མཚན་མ་འཇོམས་པས་གཤིན་རྗེ་གཤེད་དུ་བསྟན། ཉོན་མོངས་པའི་སྐྱོན་འཇོམས་པའི་ཐོ་བ་བསྣམས་སོ། །

71-1-216a

བྱང་ཆུབ་ཀྱི་སེམས་སྐྱོན་མེད་པས་སྐུ་མདོག་དཀར། རྩ་བའི་ཡིག་འབྲུ་མ་ལས་བསྐྱེད་པས། མ་ཐ་བཛྲ་ཞེས་བྱ་བ་ངག་གི་ལས་དང་ཆོ་ག་ཚང་བར་བྱས་ནས་བསྒོམས་ན་དངོས་གྲུབ་ཡ་མཚན་ཅན་ཐོབ་བོ། །དངོས་གྲུབ་དེ་བདུད་ཀྱིས་བར་དུ་མི་ཆོད་པས་མི་ཆོད་པ། སྐུ་གསུང་
ཐུགས་མཚན་མས་མི་ཤིགས་པས་མི་ཤིགས་པ་ཞེས་གསུངས་གསུང་གི་ངོ་བོ་བདེན་པ་དང་ལྡན་པས་ཚིག་གི་དངོས་གྲུབ་སྟེ། དེ་ལྟ་བུ་ནི་ཧཱུཾ་ཀ་ར་ཉིད་ཀྱི་རང་བཞིན་ཡང་ཡིན་ཏེ། ཅིའི་ཕྱིར་ན། གཅིག་གི་ངོ་བོར་ཀུན་གྱུར་ཅིང་དབྱེར་མེད་པའི་ཕྱིར་རོ། །ཐུགས་བྱང་ཆུབ་རྣམ་པར་དག་པས་
མཚན་མའི་སྐྱོན་གྱིས་རབ་ཏུ་མི་ཆོད་པའི་རྟགས་སུ་བསྟན་ཏེ། དེ་ནི་ཏིང་ངེ་འཛིན་འབུམ་ཕྲག་གི་སྒོ་ནས་འགྲོ་བའི་དོན་མཛད་པ་ལ་བར་མི་ཆོད་པའི་ཕྱིར་སྨོས་སོ། །སྐུ་གསུང་ཐུགས་རྡོ་རྗེ་ལྟ་བུའི་མི་འགྱུར་བའི་བྱང་ཆུབ་ཀྱི་ཆེ་བ་མངའ་བས་མི་ཤིགས་པ། བདེན་པའི་ཚིག་མི་འགྱུར་བས་
ཆོས་སྟོན་པས་བདེན་པ། དེ་ལྟ་བུའི་ཁྲོ་བོའི་རྒྱལ་པོ་དེ་བསྒོམས་པའི་ཕྱིར་ཕྲིན་ལས་རྣམས་བཞིའི་ལས་བྱས་ན་འགྲུབ་བོ། །ཧཱུཾ་ཀ་རའི་དོན་བཤད་ཟིན་ཏོ།།      །།སྲ་བ་བརྟན་པ་ཐམས་ཅད་དུ་ཐོགས་པ་མེད་པ་ཞེས་བྱ་བ་ཉོན་མོངས་པའི་འཁོར་བ་ལས་རྒྱལ་བའི་ཕྱིར་ཡེ་ཤེས་ཀྱི་འཁོར་ལོ་
རྣམས་སྐུ་གསུང་ཐུགས་རྡོ་རྗེ་ལྟར་སྲ་བས་སྲ་བ། བྱང་ཆུབ་ཀྱི་སེམས་མི་འགྱུར་བས་བརྟན་པ། ཐུགས་རྡོ་རྗེ་བརྩོན་འགྲུས་ཅི་ལ་ཡང་ཐོགས་པ་མེད་པས་ཐོགས་པ་མེད་པ། རྩ་བའི་སྙིང་པོ་ཡིག་འབྲུ་དུ་ལས་བསྐྱེད་པས། དུ་ན་བཛྲ་ཞེས་གསུངས་ཏེ། རྫས་དང་ཆོ་ག་ཚང་བར་བྱས་ན་དངོས་
གྲུབ་ཡ་མཚན་ཅན་ཐོབ་བོ། །དེ་ནས་བདུད་དང་བགེགས་བྱེད་ཀྱིས་གླགས་མི་རྙེད་པས་སྲ་བའི་དངོས་གྲུབ་ཅི་བྱ་བ་འགྲུབ་པས་བརྟན་པའི་དངོས་གྲུབ་ཐམས་ཅད་དབང་དུ་སྡུད་པའི་ཕྱིར་ཐོགས་པ་མེད་པའི་དངོས་གྲུབ་ཐོབ་བོ། །ཁམས་གསུམ་རྣམ་པར་རྒྱལ་བའི་དོན་བཤད་ཟིན་ཏོ།།      །།
ཐམས་ཅད་དུ་མ་ཕམ་པ། སེམས་ཅན་ཐམས་ཅད་སྐྲག་པར་བྱེད་པ། སེམས་ཅན་ཐམས་ཅད་འཇིལ་བར་བྱེད་པ་ནི་ཁམས་གསུམ་ཐམས་ཅད་དུ་བྱང་ཆུབ་སེམས་ཐུགས་རྗེའི་རང་བཞིན་དུ་གནས་པས་མ་ཕམ་པ། བདུད་དྲེགས་བྱེད་ཐམས་ཅད་ལས་རྒྱལ་བར་བྱེད་པས་ན་སྐྲག་པར་བསྟན། 

71-1-216b

འདོད་ཆགས་ལ་སོགས་པའི་ཉོན་མོངས་པ་འཇིལ་བའི་ཕྱིར་ན་འཇིལ་བར་བསྟན། དེའི་རྟགས་ཐབས་ཐུགས་རྗེ་ཆེན་པོའི་པདྨ་བསྣམས་པ། དེ་ལྟ་བུའི་ཁྲོ་བོའི་རྒྱལ་པོ་ཧ་ཡ་གྲྀ་བ་སྐུ་མདོག་དམར་པོ་ཉོན་མོངས་པའི་སྐྱོན་གྱིས་མ་གོས་པའི་ཕྱིར་ཡང་དག་པའི་ཡོན་ཏན་དང་ལྡན་པའི་རྩ་བའི་སྙིང་
པོ་སྟེ། བྱང་ཆུབ་སེམས་ཀྱི་ཡིག་འབྲུ་དྷ་ལས་བསྐྱེད་པས་དྷ་ར་བཛྲ་ཞེས་བརྗོད་དོ། །འོག་ནས་འབྱུང་བ་ལྟར་བསྒོམས་ན་བཀྲ་ཤིས་པར་འགྱུར་རོ། །ཧ་ཡ་གྲྀ་བའི་དོན་བཤད་ཟིན་ཏོ།།      །།རིག་སྔགས་ཐམས་ཅད་གཅོད་པར་བྱེད་པ། རིག་སྔགས་ཐམས་ཅད་གནོན་པར་བྱེད་པ། ལས་ཐམས་ཅད་
འཇོམས་པར་བྱེད་པ་ནི། ཕས་ཀྱི་རྒོལ་བའི་གནོད་པ་བྱེད་པ་ཐམས་ཅད་དང་། དྲང་སྲོང་གི་གནོད་པ་རྣམས་དང་། ཕྱིར་ལོག་གི་བྱེ་བྲག་རྣམས་དང་། སྡུག་བསྔལ་གྱི་གནོད་པ་རྣམས་བྱ་བ་ནན་ཏན་གྱི་ཡེ་ཤེས་ཀྱི་རང་བཞིན་གྱིས་ཐམས་ཅད་གཅོད་པར་བྱེད་པ། ཐམས་ཅད་གནོན་པའི་ཚུལ་དུ་གནས་
པས་ཡོན་ཏན་ཐམས་ཅད་མ་ལུས་པར་རྫོགས་པར་བྱེད་པ། ཡེ་ཤེས་ཀྱི་ངོ་བོ་ལས་མ་ཡིན་པ་ཐམས་ཅད་འཇོམས་པའི་རྟགས་སུ་ཁྲོ་བོ་བདུད་རྩི་འཁྱིལ་པས་མཁྱེན་པའི་ཡོན་ཏན་བྱང་ཆུབ་སེམས་ཀྱི་རང་བཞིན་ཡེ་ནས་རྣམ་པར་དག་པའི་ཕྲིན་ལས་སྣ་ཚོགས་པ་རྣམས་སོ། །རྩ་བའི་ཡིག་འབྲུ་ལས་
བསྐྱེད་པས་དྷ་ར་ཡ་བཛྲ་ཞེས་གསུངས་སོ། །དེ་བསྒྲུབ་པའི་ཕྱིར་རྫས་དང་ཡོ་བྱད་ལ་སོགས་པ་ཚོང་བར་བྱ་སྟེ་ལས་བྱས་ན་དམོད་པའི་བྱེ་བྲག་ཐམས་ཅད་ལས་ཐར་བར་འགྱུར་རོ། །བདུད་རྩི་འཁྱིལ་པའི་དོན་བཤད་ཟིན་ཏོ།།      །།ད་ནི་ཡ་མཱནྟ་ཀའི་དོན་བཤད་དེ། གཞན་གྱི་ལས་ཐམས་ཅད་འཇིག་
པར་བྱེད་པ། གདོན་ཐམས་ཅད་རླག་པར་བྱེད་པ། གདོན་ཐམས་ཅད་ལས་ཐར་བར་བྱེད་པ་ནི་ཕྱིར་རྒོལ་བ་མ་ལུས་པ་ཐམས་ཅད་ཐུགས་རྗེ་ཆེན་པོའི་ཡེ་ཤེས་ཀྱིས་ཐམས་ཅད་འཇིག་པར་བྱེད་ཅིང་། བྱང་ཆུབ་སེམས་ཀྱི་རང་བཞིན་དུ་འགྱུར་བས་གཞན་གྱི་ལས་ཐམས་ཅད་འཇིག་པར་གསུངས། 
གདོན་སྟོང་ཕྲག་བརྒྱད་ཅུ་རྩ་བཞི་ཐུགས་རྗེ་ཆེན་པོའི་ཡེ་ཤེས་ཀྱི་ཞབས་ཀྱིས་གནོན་ཅིང་གྲོལ་བར་བྱེད་པས་ན་གདོན་ཐམས་ཅད་བརླག་པར་གསུངས། གནོད་པའི་བྱེ་བྲག་བྱེད་པའི་ཉམས་ལེན་པ་སྣ་ཚོགས་དགེ་བའི་བར་དུ་གཅོད་པ་རྣམས་འདུལ་བར་མཛད་པ་དང་། གཞན་སེམས་ཅན་གང་

71-1-217a

ཞིག་ཉམ་ཐག་པ་སྣ་ཚོགས་ཚེ་དང་མདོངས་འཕྲོག་པ་ལས་ཐར་བར་མཛད་པས་ན་དེའི་ཕྱིར་གདོན་ཐམས་ཅད་ལས་ཐར་བར་བྱེད་པར་གསུངས་སོ། །དེའི་རྟགས་ཀྱི་ཆ་འཛིན་པ་ནི་ཁྲོ་བོའི་རྒྱལ་པོ་ཡ་མཱནྟ་ཀ་སྟེ། དེ་བསྒྲུབ་པར་བྱ་བའི་ཕྱིར་ཏིང་ངེ་འཛིན་གྱི་བུམ་པ་བྷྲཱུཾ་ལས་གཞལ་
ཡས་ཁང་དུ་བསྒོམ། རྩ་བའི་ཡིག་འབྲུ་བྱང་ཆུབ་སེམས་ཀྱི་རང་བཞིན་དུ་བསམ་སྟེ། དེ་འོད་དུ་ཞུ་བ་ལས་བྱང་ཆུབ་སེམས་ཀྱི་རང་བཞིན་དུ་གྱུར་ཏོ། །སྙིང་པོ་དང་རྒྱན་ཆ་རྣམས་ལ་ཡེ་ཤེས་ཀྱི་ལྷ་འབར་བར་བསམས་ཏེ་འོད་དུ་ཞུ་བས་རྒྱན་དང་སྙིང་པོ་ལ་ཐིམ་པས་གཉིས་སུ་མེད་པར་གྱུར་ཏོ། །ཡེ་ཤེས་
ཀྱི་ཆོ་འཕྲུལ་བསམ་གྱིས་མི་ཁྱབ་པ་བྱུང་ནས་དངོས་གྲུབ་སྣ་ཚོགས་པ་སྦྱིན་པར་བསམ། བདག་ཡ་མཱནྟ་ཀའི་ཏིང་ངེ་འཛིན་དུ་ཞུགས་ལ། ཕྲིན་ལས་རྣམ་བཞི་གང་བྱེད་པ་སོ་སོའི་ཁ་དོག་ཏུ་བསྒྱུར་ཏེ་བུམ་པས་དབང་བསྐུར་ན་ཐམས་ཅད་འགྲུབ་པར་གསུངས་སོ། །རྩ་བའི་ཡིག་འབྲུ་དེ་ལས་བསྐྱེད་པས་
ད་ཧ་བཛྲ་སྟེ། བསྙེན་པ་གྲངས་མང་པོར་བརྗོད་ན་བཀྲ་ཤིས་པར་འགྱུར་རོ། །ཡ་མཱནྟ་ཀའི་དོན་བཤད་ཟིན་ཏོ།།      །།ད་ནི་ཊཀྐི་རཱ་ཛའི་དོན་བཤད་དེ། འབྱུང་པོ་ཐམས་ཅད་འགུགས་པར་བྱེད་པ། རིག་སྔགས་ཀྱི་ལས་ཐམས་ཅད་བྱེད་དུ་འཇུག་པ་ནི་སེམས་ཅན་གྱི་རྣམ་པར་རྟོག་པ་ཕྱིན་ཅི་ལོག་གི་ལྟ་
བ་ལས་བྱུང་བས་ན་འབྱུང་པོ། བལ་སྣ་དྲུག་མགུལ་ལ་སོགས་པ་རྫས་ཀྱི་བྱེ་བྲག་ལས་བྱུང་བས་ན་འབྱུང་པོ། དེ་འགུགས་པར་བྱེད་པས་ནི་ཊཀྐི་རཱ་ཛའི་རང་བཞིན་དུ་བསྟན་ཏེ། ཐབས་མཁས་པའི་ཐུགས་རྗེས་ཁམས་གསུམ་གྱི་འབྱུང་པོའི་རིགས་ཐམས་ཅད་དབང་དུ་བསྡུས་ནས་འཁོར་བས། 
དེའི་ཕྱིར་འབྱུང་པོ་ཐམས་ཅད་འགུགས་པར་བྱེད་པར་གསུངས། གཞན་ཡང་དེ་བཞིན་གཤེགས་པའི་ཕྲིན་ལས་ལ་མངའ་བརྙེས་པས། ལས་ཐམས་ཅད་ཀྱང་བྱེད་དུ་འཇུག་ཅིང་གཞན་ལ་སྟོན་པ་དང་། ཉམས་སུ་ལེན་པའི་ནུས་པ་དང་ལྡན་པས་རིག་སྔགས་ཀྱི་ལས་ཐམས་ཅད་བྱེད་དུ་འཇུག་པར་
གསུངས། དེ་བསྒྲུབ་པར་བྱ་བའི་ཕྱིར་བུམ་པ་ལར་བསམས་ཏེ་འོད་དུ་ཞུ་བས། ཊཀྐི་རཱ་ཛའི་རང་བཞིན་དུ་བསམས། ནང་གི་ཆུ་ལ་ར་བསམས་ཏེ་འོད་དུ་ཞུ་བ་ལས་བྱང་ཆུབ་སེམས་ཟླ་བའི་དཀྱིལ་འཁོར་དུ་བསམ། བུམ་པའི་རྒྱན་ཆ་ལ་ཡ་བསམས་ཏེ་འོད་དུ་ཞུ་བས་ཏིང་ངེ་འཛིན་གྱི་ཆོ་འཕྲུལ་

71-1-217b

འབྱུང་བར་བསམ་མོ། །དེ་ལྟར་བྱིན་གྱིས་བརླབས་པའི་བུམ་པས་ཕྲིན་ལས་སོ་སོའི་ལས་བྱས་ན་འགྲུབ་པར་གསུངས། ཊཀྐི་རཱ་ཛའི་དོན་བཤད་ཟིན་ཏོ།།      །།ད་ནི་སྟོབས་པོ་ཆེའི་དོན་བཤད་དེ། མ་གྲུབ་པ་རྣམས་གྲུབ་པར་བྱེད་པ། གྲུབ་པ་རྣམས་ཆུད་མཱི་ཟ་བར་བྱེད་པ། འདོད་པ་ཐམས་ཅད་
རབ་ཏུ་སྦྱིན་པ་ནི། གང་ཞིག་གིས་བསྒྲུབས་པར་གྱུར་ན་དངོས་གྲུབ་མ་གྲུབ་པ་རྣམས་གྲུབ་པར་བྱེད་པ་དང་། ལས་གྲུབ་པ་རྣམས་ཆུད་ཟོས་ཀྱི་དབང་དུ་མི་གཏོང་བ་དང་། འདོད་པ་ཐམས་ཅད་རབ་ཏུ་སྦྱིན་པའོ། །ཏིང་ངེ་འཛིན་གྱི་སྟོབས་དང་ལྡན་པ། གཞན་གྱི་ཕུན་སུམ་ཚོགས་པ་སྒྲུབ་པ་ཁྲོ་བོའི་རྒྱལ་
པོ་སྟོབས་པོ་ཆེར་བསྟན། དེ་བསྒྲུབ་པར་བྱ་བའི་ཕྱིར་བུམ་པ་ལ་དུ་བསམས་ཏེ། འོད་དུ་ཞུ་བ་ལས་བྱང་ཆུབ་སེམས་སྟོབས་པོ་ཆེའི་རང་བཞིན་དུ་བསམ། བུམ་པའི་ཆུ་ལ་སུ་བསམས་ཏེ་འོད་དུ་ཞུ་བ་ལས་བྱང་ཆུབ་སེམས་ཟླ་བའི་དཀྱིལ་འཁོར་དུ་བསམ། བུམ་པའི་རྒྱན་ཆ་ལ་ན་བསམས་ཏེ་འོད་
དུ་ཞུ་བས་ཏིང་ངེ་འཛིན་བསམ་གྱིས་མི་ཁྱབ་པའི་ཆོ་འཕྲུལ་འབྱུང་བར་བསམ། དེ་ལྟར་བྱིན་གྱིས་བརླབས་པའི་བུམ་པ་དེ་ཕྲིན་ལས་རྣམ་བཞི་གང་བྱེད་པ་སོ་སོའི་ཁ་དོག་ཏུ་བྱིན་གྱིས་བརླབས་པའི་བུམ་པས་དབང་བསྐུར་ན་ཐམས་ཅད་འགྲུབ་པར་གསུངས། དེའི་ཕྱིར་དཱ་རུ་ཎ་བཛྲ་ཞེས་པ་རྩ་བའི་
བསྙེན་པ་གྲངས་མང་དུ་བརྗོད་ན་ལས་ཐམས་ཅད་གྲུབ་པས་ཆུད་མི་ཟ་བར་གསུངས་སོ། །སྟོབས་པོ་ཆེའི་དོན་བཤད་ཟིན་ཏོ།།      །།ད་ནི་ཨ་མོ་གྷ་པཱ་ཤའི་དོན་བཤད་དེ། སེམས་ཅན་ཐམས་ཅད་བསྲུང་བ་ནི་ཨ་མོ་གྷ་པཱ་ཤའི་དོན་ཏོ། །ཐུགས་རྗེ་ཆེན་པོ་བྱང་ཆུབ་སེམས་ཀྱི་རང་བཞིན་ལས་
ཐབས་མཁས་པའི་སྤྲུལ་པ་བྱུང་ནས་ཁམས་གསུམ་གྱི་སེམས་ཅན་ལ་ཐབས་མཁས་པའི་ཐུགས་རྗེའི་བྱེ་བྲག་སྣ་ཚོགས་བསྟན་ནས་ཉོན་མོངས་པའི་སྡུག་བསྔལ་ལས་ཕན་བཏགས་ནས་སེམས་ཅན་ཐམས་ཅད་བསྲུང་བའི་ཕྱིར་རོ། །དེའི་རང་བཞིན་ཨ་མོ་གྷ་པཱ་ཤ་སྟེ། དེ་ནི་སེམས་ཅན་ཐམས་
ཅད་ལ་བྱང་ཆུབ་སེམས་ཐབས་མཁས་པས་སྲུང་བར་བྱེད་དོ། །དེ་བསྒྲུབ་པར་བྱ་བའི་ཕྱིར་བུམ་པ་ལ་ར་བསམས་ཏེ་འོད་དུ་ཞུ་བས། ཨ་མོ་གྷ་པཱ་ཤའི་རང་བཞིན་དུ་བསམ་མོ། །བུམ་པའི་ཆུ་ལ་རུ་བསམས་ཏེ་འོད་དུ་ཞུ་བས་ཡེ་ཤེས་ཀྱི་སྤྲུལ་པ་སྣ་ཚོགས་པའི་ཡོན་ཏན་དང་ལྡན་པར་བསམ་མོ། །དེ་

71-1-218a

ནས་ཨ་མོ་གྷ་པཱ་ཤ་བསྒྲུབ་པར་བྱ་བའི་ཕྱིར། ཕྲིན་ལས་རྣམ་བཞི་གང་བྱེད་པའི་ཁ་དོག་སོ་སོའི་བྱེ་བྲག་ཏུ་བསྒོམས་ནས་དབང་བསྐུར་ཞིང་ལས་བྱས་ན་ཐམས་ཅད་འགྲུབ་པར་གསུངས་སོ། །ཨ་མོ་གྷ་པཱ་ཤའི་དོན་བཤད་ཟིན་ཏོ།།      །།ད་ནི་དབུས་ཀྱི་གཙོ་བོའི་དོན་བཤད་
དེ། ཞི་བ་རྒྱས་པ་སེམས་ཅན་ཐམས་ཅད་རེངས་པར་བྱེད་པ་ཞེས་པ་ནི་ཕྱིན་ཅི་ལོག་གི་ཉོན་མོངས་པ་ཐམས་ཅད་ལ་སྔོན་གྱི་བསོད་ནམས་ཀྱི་ཚོགས་དང་། ཕྲིན་ལས་ཀྱི་ཐུགས་རྗེ་ཐབས་མཁས་པའི་བྱེ་བྲག་སྣ་ཚོགས་པ་གཞན་ལ་བསྟན་ནས། ཕྱིན་ཅི་ལོག་གི་ཉོན་མོངས་པ་ཐམས་ཅད་མེད་པ་
མཛད་ཅིང་ཡོན་ཏན་གྱི་ཚོགས་བསམ་གྱིས་མི་ཁྱབ་པར་མཛད་པ་དང་། བདུད་དང་དྲེགས་བྱེད་ཅན་རྣམས་སྐྲག་ཅིང་རེངས་པར་བྱེད་པའི་ཕྱིར་རོ། །གཞན་ཡང་བྱང་ཆུབ་ཀྱི་སེམས་མཆོག་ཆོས་ཉིད་ཞི་བའི་དོན་ལས་མ་གཡོས་ཀྱང་། སྔོན་གྱི་བསོད་ནམས་ཀྱིས་ཁམས་གསུམ་གྱི་སེམས་
ཅན་ཐམས་ཅད་ལ་ཐབས་མཁས་པའི་ཕྲིན་ལས་སྣ་ཚོགས་འབྱུང་བའི་ཡོན་ཏན་བྱང་ཆུབ་ཀྱི་སེམས་གཞན་ལས་འབྱུང་བའི་ཕྱིར་ཆེ་བའི་ཡོན་ཏན་སྣ་ཚོགས་པ་བྱུང་ནས། སེམས་ཅན་རྣམས་ཀྱི་ཕོངས་པ་རྣམས་ཚིམ་ཞིང་བདེ་བར་མཛད་པ་དང་། འཇིག་རྟེན་གྱི་དྲེགས་བྱེད་ཐམས་ཅད་
ལ་ཏིང་ངེ་འཛིན་གྱི་ཆོ་འཕྲུལ་སྣ་ཚོགས་པ་བསྟན་ནས་བདེ་བ་ལ་བཀོད་པའི་ཕྱིར་རིངས་ཤིང་འདར་བར་མཛད་དེ་དབང་དུ་བསྡུས་ནས་ཕན་འདོགས་པའི་ཕྱིར་རོ། །དེ་ལྟར་ཡོན་ཏན་དང་ལྡན་པའི་ཕྱག་ན་རྡོ་རྗེ་བསྒོམ་པའི་ཕྱིར་རོ། །བུམ་པ་ལ་ཨོཾ་བསྒོམས་པས་འོད་དུ་ཞུ་བས་ཕྱག་ན་རྡོ་རྗེའི་སྐུར་བསྒོམ། 
བུམ་པའི་ཆུ་ལས་ཧ་བསམས་ཏེ་ཆོ་ག་རྣམ་གསུམ་གྱི་ཚུལ་སྤྲོ་བསྡུ་བྱས་པས་བྱང་ཆུབ་སེམས་ཟླ་བའི་དཀྱིལ་འཁོར་དུ་བསམ་མོ། །བུམ་པའི་རྒྱན་ཆ་ལ་ར་བསམས་ཏེ་འོད་དུ་ཞུ་བས་ཡོན་ཏན་དཔག་ཏུ་མེད་པའི་རྒྱན་ཆ་དང་ལྡན་པར་བསམ་མོ། །ཐུགས་ཀྱི་རང་བཞིན་དཔལ་ཕྱག་ན་རྡོ་རྗེའི་སྐུར་བསྒོམ་
པའི་ཕྱིར་ཕྲིན་ལས་རྣམ་བཞིའི་ལས་ཀྱི་བྱེ་བྲག་ཚང་བར་བྱ་སྟེ། བསྙེན་པ་སྟོང་དང་འབུམ་ལ་སོགས་པ་ཕུལ་ན་དངོས་གྲུབ་ཡ་མཚན་ཅན་ཐོབ་བོ། །ལས་ཀྱི་ལྷག་ཆད་ཁ་བསྐོང་བའི་ཕྱིར་ཁྲོ་བོའི་རྟིང་ལ་གསུངས། དཀྱིལ་འཁོར་གྱི་བདག་པོ་ཡིན་པའི་ཕྱིར་ཚོགས་ཀྱི་མཇུག་སྡུད་པའོ། །དབུས་

71-1-218b

ཀྱི་གཙོ་བོའི་དོན་བཤད་ཟིན་ཏོ།།      །།ད་ནི་སྒོ་བའི་དོན་བཤད་དེ། རྨུགས་པར་བྱེད་པའི་གསང་སྔགས་ཀྱི་མཐུ་ཆེན་པོ་འདི་ཞེས་བྱ་བ་ནི་ཐུགས་རྗེ་ཆེན་པོས་ཁམས་གསུམ་གྱི་སེམས་ཅན་ཐམས་ཅད་ལ་ཐུགས་རྗེ་ཐབས་མཁས་པའི་བྱེ་བྲག་སྣ་ཚོགས་པ་བསྟན་ནས་ཡེ་ཤེས་བཞིའི་ངོ་བོས་ཕན་གདགས་
པའི་ཕྱིར་སྒོ་བ་བཞིར་སྐུ་སྤྲུལ་ཏེ། བདུད་དང་དྲེགས་བྱེད་གླགས་དང་སྐབས་ཚོལ་བ་རྣམས་ལ་རྨུགས་པར་བྱེད་པའི་ཐབས་ཀྱིས་འདུག་ཏུ་མ་སྟེར་ནས་གསང་སྔགས་ཀྱི་མཐུ་ཆེན་པོ་བསྟན་ནས་མི་གནས་པར་བྱེད་པའི་དོན་ཏོ། །དེའི་རྟགས་ཀྱི་ཆ་འཛིན་པ་ནི་སྒོ་བ་ཆེན་པོ་བཞི་ཡིན་ཏེ། དེ་བསྒྲུབ་
པར་བྱ་བའི་ཕྱིར་བདག་གིས་བུམ་པ་ལ་ཧཱུཾ་བསམས་ཏེ། འོད་དུ་ཞུ་བས་སྒོ་བ་ལྕགས་ཀྱུ་མའི་རང་བཞིན་དུ་བསམ་མོ། །བུམ་པའི་ཆུ་ལ་ལུ་བསམས་ཏེ་འོད་དུ་ཞུ་བས་བྱང་ཆུབ་སེམས་ཟླ་བའི་དཀྱིལ་འཁོར་དུ་གྱུར་པར་བསྒོམ། བུམ་པའི་རྒྱན་ཆ་ལ་ཛཿ བསམས་ཏེ་ཡེ་ཤེས་ཀྱི་ཆོ་ག་རྣམ་པ་གསུམ་
གྱིས་སྤྲོ་བསྡུ་བྱ། ཡེ་ཤེས་ཀྱི་ལྕགས་ཀྱུས་ཕྱི་ནང་གི་བྱེ་བྲག་རྣམས་བསྡུས་ནས་བུམ་པ་མཛེས་པར་བསམ་མོ། །དེ་ནས་ལྷོ་ཕྱོགས་ཀྱི་བུམ་པ་ལ་ཏི་བསམས་ཏེ་འོད་དུ་ཞུ་བས་ཞགས་པའི་རང་བཞིན་དུ་བསམ། བུམ་པའི་ཆུ་ལ་ཤྚ་བསམས་ཏེ་འོད་དུ་ཞུ་བས་བྱང་ཆུབ་སེམས་ཟླ་བའི་དཀྱིལ་འཁོར་
དུ་བསམ་མོ། །བུམ་པའི་རྒྱན་ཆ་ལ་ཧཱུཾ་བསམས་ཏེ་ཆོ་ག་རྣམ་གསུམ་གྱིས་སྤྲོ་བསྡུ་བྱས་པས་ཏིང་ངེ་འཛིན་གྱི་རྒྱན་ཆས་བསམ་གྱིས་མི་ཁྱབ་པར་བསམ་མོ། །དེ་ནས་ནུབ་ཕྱོགས་ཀྱི་བུམ་པ་ལ་ལྷ་བསམས་ཏེ་འོད་དུ་ཞུ་བས་ལྕགས་སྒྲོག་གི་རང་བཞིན་དུ་བསམ་མོ། །བུམ་པའི་ཆུ་ལ་ད་བསམས་
ཏེ། འོད་དུ་ཞུ་བས་བྱང་ཆུབ་ཀྱི་སེམས་ཟླ་བའི་དཀྱིལ་འཁོར་དུ་བསམ་མོ། །བུམ་པའི་རྒྱན་ཆ་ལ་བཾ་བསམས་ཏེ་ཆོ་ག་རྣམ་པ་གསུམ་གྱིས་སྤྲོ་བསྡུ་བྱས་པས་མཆོད་པའི་རྒྱན་ཆས་བསམ་གྱིས་མི་ཁྱབ་པ་དང་ལྡན་པར་བསམ་མོ། །དེ་ནས་བྱང་ཕྱོགས་ཀྱི་བུམ་པ་ལ་ཧ་བསམས་ཏེ་འོད་དུ་ཞུ་བས་སྒོ་
བ་དྲིལ་བུའི་རང་བཞིན་དུ་བསམ་མོ། །བུམ་པའི་ཆུ་ལ་ནྟ་བསམས་ཏེ་འོད་དུ་ཞུ་བས་བྱང་ཆུབ་སེམས་ཟླ་བའི་དཀྱིལ་འཁོར་དུ་བསམ་མོ། །བུམ་པའི་རྒྱན་ཆ་ལ་ཧོཿ བསམས་ཏེ་ཆོ་ག་གསུམ་གྱིས་སྤྲོ་བསྡུ་བྱས་པས་ཏིང་ངེ་འཛིན་གྱི་ཆོ་འཕྲུལ་འབྱུང་བར་བསམ་མོ། །དེ་ལྟར་བསྒོམས་པའི་བུམ་པ་

71-1-219a

དེ་ལ་རང་བཞིན་གྱི་དཀྱིལ་འཁོར་ནས་འཕགས་པ་སྤྱན་དྲངས་ནས་མདུན་གྱི་ནམ་མཁའ་ལ་དམིགས་སོ། །བསྙེན་པ་དང་མཆོད་པ་ཕུལ་བས་རབ་ཏུ་མཉེས་ཏེ་འོད་དུ་ཞུ་བས་བདག་གིས་བསྒོམས་པའི་བུམ་པ་ལ་ཐིམ་ནས་གཉིས་སུ་མེད་པར་བསམ་མོ། །དེ་ལྟར་ཐིམ་
ནས་བྱང་ཆུབ་སེམས་ཆོས་ཉིད་ཀྱི་ཡོན་ཏན་འབྱུང་བར་བསམས་ཏེ། བྱིན་གྱིས་བརླབས་པའི་ཡོན་ཏན་བུམ་པ་དེས། གང་ཞིག་བཀྲ་མི་ཤིས་པ་ལ་ཡེ་ཤེས་ཀྱི་འོད་ཟེར་ཁ་དོག་དཀར་པོ་བསྟིམས་ནས་ཁྲུས་བྱས་ཏེ་ཞི་བའི་ལས་བྱས་ན་ཐམས་ཅད་ཞི་བར་འགྱུར་རོ། །གང་ཞིག་བདོག་པ་ཉམས་
པ་ལ་ཡེ་ཤེས་ཀྱི་འོད་ཟེར་ཁ་དོག་སེར་པོ་བསྟིམས་ནས་ཁྲུས་བྱས་ཏེ་རྒྱས་པའི་ལས་བྱས་ན་ཐམས་ཅད་རྒྱས་པར་འགྱུར་རོ། །གང་ཞིག་ཚེ་ཉམས་པ་ལ་ཡེ་ཤེས་ཀྱི་འོད་ཟེར་ཁ་དོག་དམར་པོ་བསྟིམས་ནས་ཁྲུས་བྱས་ཏེ། དབང་གི་ལས་བྱས་ན་ཐམས་ཅད་དབང་དུ་འགྱུར་རོ། །གང་ཞིག་
ཡུལ་དང་མཁར་ཤོར་བ་དང་། བགེགས་ཀྱི་ཆོ་འཕྲུལ་དང་ལྷ་འདྲེའི་ཆོ་འཕྲུལ་གནོད་པ་རྣམས་ལ་ཡེ་ཤེས་ཀྱི་འོད་ཟེར་ཁ་དོག་ནག་པོ་བསྟིམས་ནས་ཁྲུས་བྱས་ཏེ། དྲག་པོའི་ལས་བྱས་ན་ཐམས་ཅད་ཕུང་ནས་འཇིག་པར་འགྱུར་རོ། །སྒོ་བའི་དོན་བཤད་ཟིན་ཏོ།།      །།སངས་རྒྱས་
ཀྱི་མཐུས་ལག་ན་རྡོ་རྗེ་ཞེས་བྱ་བ་ནི་གོང་དུ་ཁྲོ་བོའི་རང་བཞིན་བསྟན་པ་ལས། བྱང་ཆུབ་སེམས་དཔའ་ལག་ན་རྡོ་རྗེ་ལ་དུས་གསུམ་གྱི་སངས་རྒྱས་ཐམས་ཅད་ཀྱི་ཐུགས་ཡང་དག་པའི་ཡེ་ཤེས་རྡོ་རྗེ་ལྟ་བུས་བྱིན་གྱིས་བརླབས་ནས། ལག་ཏུ་ཡེ་ཤེས་ཀྱི་རྟགས་རྡོ་རྗེ་བྱིན་ནས་མིང་གི་དབང་
བསྐུར་ཏེ། སྲིད་པ་གསུམ་གྱི་མཐུ་ཅན་ཞབས་འོག་ཏུ་བསྡུས་ནས། དམ་ལ་བཏགས་པའི་ཕྱིར་དང་འོག་གི་ཁྲོ་བོའི་སྔགས་དང་ཕན་ཡོན་སྨྲ་བ་ལ་གཞུག་པའི་ཕྱིར་དང་། དེ་བཞིན་གཤེགས་པས་བྱིན་གྱིས་བརླབས་ནས་ཆེ་བའི་ཡོན་ཏན་དང་ལྡན་པའི་ལག་ན་རྡོ་རྗེ་དེ་བཞིན་གཤེགས་པའི་
ཡེ་ཤེས་ཀྱི་ཚིག་གིས་ཁམས་གསུམ་གྱི་སེམས་ཅན་ལ་ཕན་གདགས་པའི་ཕྱིར་སྐུ་གསུང་ཐུགས་རྡོ་རྗེ་ལས་མཚོན་པའི་རྟགས་ཐུགས་རྡོ་རྗེའི་དཀྱིལ་འཁོར་གྱི་སྔགས་འདི་འབྱུང་བའི་དོན་ཏོ། །སྔགས་ཀྱི་དོན་འབྱུང་བའི་ཐབས་བཤད་ཟིན་ཏོ།།      །།ད་ནི་ཕྱག་ན་རྡོ་རྗེའི་ཕྲིན་ལས་ཀྱི་

71-1-219b

དོན་བཤད་དེ། ན་མོ་རཏྣ་ཏྲ་ཡཱ་ཡ་ཞེས་པ་ནི་དཀོན་མཆོག་གསུམ་ལ་ཕྱག་འཚལ་བའི་དོན་ཏོ། །ཕྱག་ན་རྡོ་རྗེ་ནི་དཀོན་མཆོག་གསུམ་གྱི་རང་བཞིན་དུ་གྱུར་པས་ན་ཡེ་ཤེས་ལས་བྱུང་བའི་ཕྱིར་རོ། །ན་མ་ཤྩཎྜ་བཛྲ་པཱ་ཎ་ཡེ་ཞེས་པ་ནི་རྡོ་རྗེ་གཏུམ་པོ་རིན་པོ་ཆེའི་ངོ་བོ་ཕྱག་ན་རྡོ་རྗེའི་ཡང་དག་
པའི་ཡེ་ཤེས་ཀྱི་སྙིང་པོའོ། །མ་ཧཱ་ཡཀྵ་སེ་ན་པ་ཏ་ཡེ་ཞེས་པ་ནི་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་བའི་དོན་ཏེ། གནོད་སྦྱིན་རྣམས་ཐུགས་རྗེས་བཏུལ་ལས་དེ་སྐད་ཅེས་བརྗོད་དོ། །ཏདྱ་ཐཱ་ཞེས་པ་ནི་འདི་ལྟ་སྟེ། གང་ལྟ་ཞེ་ན་འོག་ནས་འབྱུང་བའི་སྔགས་ཀྱི་ཚིག་
སྨྲས་སོ། །ཨོཾ་ཏྲ་ཊ་ཏྲ་ཊ་ཞེས་པ་ནི་ཡེ་ཤེས་ལྔ་པོས་བདག་གི་ཉོན་མོངས་པ་ཐམས་ཅད་སོད་ཅིག་པའི་དོན། ཏྲོ་ཊ་ཡ་ཏྲོ་ཊ་ཡ་ཞེས་པ་ནི་ཕྱག་ན་རྡོ་རྗེའི་བྱིན་གྱི་རླབས་ཀྱིས་རབ་ཏུ་སྤྱོད་ཅིག་ལེགས་པར་སྤྱོད་ཅིག་པའི་དོན། སྥུ་ཊ་སྥུ་ཊ་ཞེས་པ་ནི་ཉོན་མོངས་པའི་ལས་རྣམས་ཡེ་ཤེས་ཀྱི་མེ་འབར་བས་
སྲེགས་པར་གྱིས་ཤིག་པའི་དོན། སྥོ་ཊ་ཡ་སྥོ་ཊ་ཡ་ཞེས་པ་བྱང་ཆུབ་ཀྱི་སེམས་ཀྱི་རང་བཞིན་གྱིས་ལེགས་པར་འབར་བར་གྱིས་ཤིག་པའི་དོན། གྷཱུརྞ་གྷཱུརྞ་ཞེས་པ་ནི་བདག་གི་བགེགས་རྣམས་ཟུང་ལ་སྲེགས་ཤིག ཡེ་ཤེས་མེས་མཚན་མ་བསྲེག་པའི་དོན། གྷཱུརྞ་པ་ཡ་གྷཱུརྞ་པ་ཡ་ཞེས་
པ་ནི་ཐུགས་རྗེས་ལྕགས་ཀྱུས་ཟུང་ལ་ལེགས་པར་སྤྲོད་ཅིག་པའི་དོན། སརྦ་སཏྭ་ནི་ཞེས་པ་ནི་སེམས་ཅན་ཐམས་ཅད་ལ་ཐུགས་རྗེའི་ཐུགས་ཀྱིས་གཟིགས་ཤིག་པའི་དོན། །བོ་དྷ་བོ་དྷ་ཞེས་པ་ནི་ཁམས་གསུམ་གྱི་སེམས་ཅན་ལ་བྱང་ཆུབ་ཏུ་སེམས་རབ་ཏུ་བསྐྱེད་ཅིག་པའི་དོན། སཾ་བོ་དྷ་ཡ་སཾ་
བོ་དྷ་ཡ་ཞེས་པ་ནི་འགྲོ་བ་རྣམས་ལེགས་པར་བྱང་ཆུབ་ཏུ་སེམས་བསྐྱེད་ཅིག་པའི་དོན། བྷྲ་མ་བྷྲ་མ་ཞེས་པ་ནི་བྱང་ཆུབ་སེམས་དང་མི་མཐུན་པའི་བགེགས་རྣམས་སྐྲོད་ཅིག་པའི་དོན། སཾ་བྷྲ་མ་ཡ་སཾ་བྷྲ་མ་ཡ་ཞེས་པ་ནི་ཕྱིན་ཅི་ལོག་གི་ཉོན་མོངས་པ་རྣམས་ཐུགས་རྗེས་ལེགས་པར་སྐྲོད་ཅིག་པའི་
དོན། སརྦ་བྷཱུ་ཏ་ནཾ་ཞེས་པ་ནི་སངས་རྒྱས་ཐམས་ཅད་ཀྱི་ཐུགས་རྗེ་ཆེན་པོས་བདག་གི་སྡང་བ་ཐམས་ཅད་ཆོམས་ཤིག་པའི་དོན། ཀུ་ཊ་ཀུ་ཊ་ཞེས་པ་ནི་གདོན་འབྱུང་པོ་རྣམས་གཏུབས་ཤིག་གཏུབས་ཤིག་པའམ་ཐུགས་རྗེས་ཡེ་ཤེས་ཀྱི་སྤྱན་གྱིས་གཟིགས་ཤིག་པའི་དོན། སཾ་ཀུ་ཊ་ཡ་སཾ་ཀུ་ཊ་

71-1-220a

ཡ་ཞེས་པ་ནི་འཇིག་རྟེན་ན་གདོན་བར་ཆད་བྱེད་པ་རྣམས་བྱམས་པའི་ཐུགས་ཀྱིས་ལེགས་པར་གཏུབས་ཤིག་པའི་དོན། སརྦ་ཤ་ཏཱུཾ་ནི་ཞེས་པ་ནི་བདག་ལ་གནོད་པ་བྱེད་པའི་བགེགས་རྣམས་ཡང་དག་པའི་ཡེ་ཤེས་ཀྱིས་མཚན་མ་མེད་པའི་དོན་ཡང་བསྟན། གྷ་ཊ་གྷ་ཊ་
ཞེས་པ་ནི་བགེགས་དང་འབྱུང་པོ་རྣམས་ཐུགས་རྗེས་སྐྲོད་ཅིག་པའི་དོན། སཾ་གྷ་ཊ་ཡ་སཾ་གྷ་ཊ་ཡ་ཞེས་པ་ནི་ལེགས་པའི་ཡོན་ཏན་ཐམས་ཅད་འབྱུང་བར་བྱེད་པས་ན་ཐུགས་རྗེས་ཉོན་མོངས་པ་ཐམས་ཅད་ལས་ཐར་བར་གྱིས་ཤིག་པའི་དོན། སརྦ་བིདྱཱ་ཞེས་པ་ནི་རིག་སྔགས་ཀྱི་མཐུས་གང་ལ་བྱ་བའི་
ལས་ཐམས་ཅད་གྲུབ་པར་བྱེད་པའི་དོན། བཛྲ་བཛྲ་སྥོ་ཊ་ཡ་ཞེས་པ་ནི་ཡེ་ཤེས་ཀྱི་རྡོ་རྗེ་འབར་བའི་མེ་ཆེན་པོའི་བགེགས་རྣམས་རོལ་ཅིག་པའི་དོན། བཛྲ་བཛྲ་ཀ་ཊ་ཞེས་པ་ནི་ཡེ་ཤེས་ལས་གྲུབ་པའི་རྡོ་རྗེ་འབར་བས་ཉོན་མོངས་པ་ཐམས་ཅད་ཆོད་ཅིག་པའི་དོན། བཛྲ་བཛྲ་མ་ཊ་ཞེས་པ་ནི་བྱང་ཆུབ་ཀྱི་
སེམས་ཀྱི་རྡོ་རྗེས་བདག་ལ་གདུག་པ་རྣམས་གཏུབས་ཤིག་པའི་དོན། བཛྲ་བཛྲ་མཱ་ཐ་ཞེས་པ་ནི་ཡང་དག་པའི་ཡེ་ཤེས་རྡོ་རྗེས་བགེགས་རྣམས་ཐུལ་ཅིག་པའི་དོན། བཛྲ་བཛྲ་ཨཊྚ་ཞེས་པ་ནི་ཡེ་ཤེས་ལས་གྲུབ་པའི་ཡང་དག་པའི་ཡེ་ཤེས་རྡོ་རྗེས་བདུད་རྣམས་གནས་དེར་མི་གནས་པར་གྱིས་
ལ་སྐྲོད་ཅིག་པའི་དོན། ཧཱ་ས་ནཱི་ལ་བཛྲ་ཞེས་པ་ནི་རྡོ་རྗེ་རྣོན་པོ་མེ་དང་འདྲ་བས་བག་ཆགས་རྣམས་ཆོད་ཅིག་དྲོལ་ཅིག་པའི་དོན། སུ་བཛྲ་བཛྲཱ་ཡ་སྭཱཧཱ་ཞེས་པ་ནི་ཐུགས་མཁྱེན་པའི་རྡོ་རྗེ་ཆོས་ཀྱི་དབྱིངས་རྣམ་པར་དག་པ་ལ་ལེགས་པར་སྦྱོར་ཅིག་པའི་དོན་ཏོ། །ཕྱག་ན་རྡོ་རྗེའི་ཕྲིན་ལས་ཀྱི་
དོན་བཤད་ཟིན་ཏོ།།      །།ད་ནི་ཁྲོ་བོ་རྣམས་ཀྱི་ཕྲིན་ལས་ཀྱི་དོན་བཤད་དེ། ཧེ་ཕུལླུ་ནི་རུ་ཕུལླུ་ཞེས་པ་ནི་དེ་ལྟར་ཕྱག་ན་རྡོ་རྗེ་ཐུགས་ཀྱི་ངོ་བོ་གསུངས་ནས། རྡོ་རྗེ་ཁྲོ་བོ་ལ་སྦྱོར་བའི་ཕྱིར་རྡོ་རྗེ་ཁྲོ་བོ་འབར་བས་ཉོན་མོངས་པའི་གཤིན་རྗེས་ཁམས་གསུམ་པ་རྣམས་ཐུགས་རྗེས་འབར་བར་བྱེད་
པའི་དོན། གྷྀ་ཧྞ་ཀུལླུ་ཞེས་པ་ནི་ཁམས་གསུམ་གྱི་གཤིན་རྗེ་གཤེད་ཀྱི་སྡུག་བསྔལ་རྣམས་འཇོམས་པའི་དོན། མིལླི་ཙུལླུ་ཀུ་རུ་ཀུལླུ་ཞེས་པ་ནི་འཕགས་པ་རྟ་མགྲིན་སྔོན་པོ་འབར་བས་སྡུག་བསྔལ་སྦྱོངས་ཤིག་པའི་དོན། བཛྲ་བི་ཛ་ཡཱ་ཡ་སྭཱཧཱ་ཞེས་པ་ནི་ཁྲོ་བོ་བདུད་རྩི་འཁྱིལ་པ་འབར་བས་

71-1-220b

ཉོན་མོངས་པ་ཐམས་ཅད་བདུད་རྩིར་བྱིན་གྱིས་རློབས་ཤིག་པའི་དོན། ཀཱི་ལི་ཀཱི་ལཱ་ཡ་སྭཱཧཱ་ཞེས་པ་ནི་ཨཱརྱ་ཨ་ཙ་ལས་ཐུགས་ཀྱི་ཕྲིན་ལས་མཛད་པ་དང་། སྟོབས་པོ་ཆེས་དྲག་ཤུལ་གྱི་ཕྲིན་ལས་མཛད་པའི་དོན། ཀ་ཊ་ཀ་ཊ་ཞེས་པ་ནི་ཡ་མཱནྟ་ཀ་ཁྲོ་བོའི་རྒྱལ་པོས་བདུད་རྣམས་སྤ་བཀོངས་
ཤིག་པའི་དོན། མ་ཊ་མ་ཊ་ཞེས་པ་ནི་ཁྲོ་བོ་ཧཱུཾ་ཀ་རས་ཉོན་མོངས་པ་རྣམས་ལས་ཐུགས་རྗེས་སྐྱོབས་ཤིག་པའི་དོན། ར་ཊ་ར་ཊ་ཞེས་པ་ནི་ཁྲོ་བོའི་རྒྱལ་པོ་པདྨ་འཁྱིལ་པས་ཉོན་མོངས་པ་རྣམས་ཞི་བར་མཛོད་ཅིག་པའི་དོན། མོ་ཊ་ན་པྲ་མོ་ཊ་ནཱ་ཡ་སྭཱཧཱ་ཞེས་པ་ནི་ཡེ་ཤེས་ཀྱི་གནོད་སྦྱིན་
འབར་བ་གཤིན་རྗེ་གཤེད་ཀྱིས་སྐྱོབས་ཤིག་པའི་དོན། ཙ་ར་ནི་ཙ་ར་ཞེས་པ་ནི་ཁྲོ་བོའི་རྒྱལ་པོ་ནཱི་ལ་དཎྜ་ས་བདག་དང་སེམས་ཅན་ཐམས་ཅད་ལ་ཚེ་དང་དབང་ཐང་སྩོལ་ཅིག་པའི་དོན། ཧ་ར་ཧ་ར་ཞེས་པ་ནི་ཡེ་ཤེས་ཀྱི་གཤོག་པས་འཁོར་བའི་སྡུག་བསྔལ་སྐྱོབས་ཤིག་པའི་དོན། ས་ར་
ས་ར་ཞེས་པ་ནི་ཏིང་ངེ་འཛིན་གྱི་དྲག་ཤུལ་གྱི་སེམས་ཉམས་པ་རྣམས་དྲན་པར་གྱིས་ཤིག་པའི་དོན། མཱ་ར་ཡ་མཱ་ར་ཡ་ཞེས་པ་ནི་ཉོན་མོངས་པ་འཇོམས་པའི་རྡོ་རྗེས་བགེགས་རྣམས་སོད་ཅིག་པའི་ངང་ལས་དྲག་པོས་རྡུལ་དུ་ཐོང་ཤིག་པའི་དོན། བཛྲ་བི་དཱ་ར་ཎཱ་ཡ་སྭཱཧཱ་ཞེས་པ་ནི་རྡོ་རྗེ་རྣམ་
པར་འཇོམས་པས་སེམས་ཅན་གྱི་ལས་རྣམས་མཛོད་ཅིག་པའི་དོན། ཙྪིནྡ་ཙྪིནྡ་ཞེས་པ་ནི་ཁྲོ་བོའི་རྒྱལ་པོ་ཧ་ཡ་གྲྀ་བས་ཉོན་མོངས་པ་རྣམས་སོད་ཅིག་པའི་དོན། བྷིནྡ་བྷིནྡ་ཞེས་པ་ནི་བདག་དང་སེམས་ཅན་རྣམས་ཀྱི་སྡུག་བསྔལ་ཤིག་ཅིག་ཅེས་པའི་དོན། མ་ཧཱ་ཀཱི་ལི་ཀཱི་ལཱ་ཡ་སྭཱཧཱ་ཞེས་པ་ནི་
ཁྲོ་བོའི་རྒྱལ་པོ་སྟོབས་པོ་ཆེས་ལས་དང་ཉོན་མོངས་པ་ཐུགས་ཞི་བའི་སྒོ་ནས་ཞི་བར་མཛོད་ཅིག་པའི་དོན། བནྡྷ་བནྡྷ་ཞེས་པ་ནི་ཊཀྐི་རཱ་ཛ་སྟེ་ཁྲོ་བོའི་རྒྱལ་པོས་གདུག་པའི་བདུད་རྣམས་མགོ་ནས་ཆིངས་ཤིག་པའི་དོན། ཀྲོ་དྷ་ཀྲོ་དྷ་ཞེས་པ་ནི་ཁྲོ་བོའི་ཁྲོ་བོས་ཉོན་མོངས་པ་རྣམས་ལ་རོལ་ཅིག་
པའི་དོན། ཀཱི་ལི་ཀཱི་ལཱ་ཡ་སྭཱཧཱ་ཞེས་པ་ནི་བྱང་ཆུབ་སེམས་ཀྱི་རང་བཞིན་བདུད་རྩི་འཁྱིལ་པས་ཐམས་ཅད་ཞི་བར་མཛོད་ཅིག་པའི་དོན། ཙུ་རུ་ཙུ་རུ་ཞེས་པ་ནི་ཁྲོ་བོ་རྒྱལ་པོ་ཨ་མོ་གྷ་པཱ་ཤས་དམ་ཚིག་བཞིན་དུ་ཕྲིན་ལས་མཛོད་ཅིག་པའི་དོན། ཙཎྜ་ཞེས་པ་ནི་ཁྲོ་བོའི་རྒྱལ་པོ་ཚུར་སྤྱོན་ཚུར་

71-1-221a

སྤྱོན་དམ་ཚིག་ལ་དགོངས་པའི་དོན། བཛྲ་ཀཱི་ལི་ཀཱི་ལཱ་ཡ་སྭཱཧཱ་ཞེས་པ་ནི་བདུད་རྩི་འཁྱིལ་པས་ཐུགས་ཚད་མེད་པའི་གསུང་སྒྲས་ཐམས་ཅད་བྱང་ཆུབ་སེམས་སུ་ཞི་བར་མཛོད་ཅིག་པའི་དོན། ཏྲཱ་ས་ཡ་ཏྲཱ་ས་ཡ་ཞེས་པ་ནི་ཁྲོ་བོའི་རྒྱལ་པོ་མ་ཧཱ་བ་ལས་བདུད་དང་བགེགས་བྱེད་རྣམས་
སྐྲག་པར་གྱིས་ཤིག་པའི་དོན། བཛྲ་ཀཱི་ལི་ཀཱི་ལཱ་ཡ་སྭཱཧཱ་ཞེས་པ་ནི་ཡེ་ཤེས་ཀྱི་རྡོ་རྗེ་འབར་བས་ཐམས་ཅད་ཞི་བར་མཛོད་ཅིག་པའི་དོན། ཧ་ར་ཧ་ར་བཛྲ་དྷཱ་རཱ་ཡ་སྭཱཧཱ་ཞེས་པ་ནི་རྡོ་རྗེ་ཡེ་ཤེས་འབར་བའི་སྒོ་བ་བཞིས་བགེགས་རྣམས་སྐྲོགས་ཤིག་སྐྲོགས་ཤིག་བའི་དོན། པྲ་ཧ་ར་པྲ་ཧ་ར་ཞེས་པ་ནི་ཁྲོ་
བོའི་རྒྱལ་པོ་ཨ་མྲྀ་ཏ་ཀུཎྜ་ལིས་མཚན་མའི་དངོས་པོ་ཐམས་ཅད་ཞི་བར་མཛད་ནས་བྱིན་གྱིས་རློབས་ཤིག་པའི་དོན། བཛྲ་པྲ་བྷཉྫ་ནཱ་ཡ་སྭཱཧཱ་ཞེས་པ་ནི་བྱང་ཆུབ་སེམས་ཀྱི་རང་བཞིན་རྡོ་རྗེ་འབར་བས་ལས་དང་ཉོན་མོངས་པའི་བག་ཆགས་ཐམས་ཅད་ཞི་བར་མཛོད་ཅིག་པའི་དོན། ཁྲོ་བོ་རྣམས་ཀྱི་ཕྲིན་
ལས་ཀྱི་དོན་བཤད་ཟིན་ཏོ།།      །།ད་ནི་ཁྲོ་བོ་རྣམས་ཀྱི་བསྲུང་བའི་དོན་ཏེ། མ་ཏི་སྠི་ར་བཛྲ་ཞེས་པ་ནི་བློ་བརྟེན་པའི་རྡོ་རྗེས་བྱང་ཆུབ་སེམས་ཀྱི་རང་བཞིན་དང་ལྡན་པར་གྱིས་ཤིག་པའི་དོན་དང་། སུ་ཏི་སྠི་ར་བཛྲ་ཞེས་པ་ནི་ཤིན་ཏུ་བརྟན་པའི་རྡོ་རྗེས་ལེགས་པའི་ཡོན་ཏན་ཐམས་ཅད་རྡོ་རྗེ་ལྟ་བུ་ཞི་བ་དང་
ལྡན་པར་གྱིས་ཤིག་པའི་དོན། པྲ་ཏི་སྠི་ར་བཛྲ་ཞེས་པ་ནི་སོ་སོར་བརྟན་པའི་རྡོ་རྗེས་བདག་གི་ལུས་རྡོ་རྗེ་ལྟ་བུར་ཞི་བར་མཛོད་ཅིག་པའི་དོན། མ་ཧཱ་བཛྲ་ཞེས་པ་ནི་རྡོ་རྗེ་ཆེན་པོ་ཞི་བའི་ཚུལ་དུ་བདུད་ལས་རྒྱལ་བར་མཛོད་ཅིག་པའི་དོན། པྲ་ཏི་སྠི་ར་བཛྲ་ཞེས་པ་ནི་རབ་ཏུ་བརྟན་པའི་རྡོ་རྗེས་བདག་ལ་ཡེ་
ཤེས་ཀྱི་མཚོན་ཆ་སྩོལ་ཅིག་པ་སྟེ། གཞན་གྱི་གཏི་མུག་གཞོམ་པའི་ཕྱིར་རོ། །ཨ་མོ་གྷ་བཛྲ་ཞེས་པ་ནི་དོན་ཡོད་པའི་རྡོ་རྗེའི་ཞགས་པས་མ་གཏང་བའི་དོན། ཨེ་ཧི་བཛྲ་ཞེས་པ་ནི་བདེན་པའི་རྡོ་རྗེས་བདག་འཁོར་བ་ལས་དྲོངས་ཤིག་ཚུར་གཤེགས་ཚུར་གཤེགས་པའི་དོན། ཤཱི་གྷྲཾ་བཛྲ་དྷཱ་རཱ་ཡ་
སྭཱཧཱ་ཞེས་པ་ནི་དཔའ་བར་འགྲོ་བས་རྡོ་རྗེ་ལ་གོར་རྒྱུག་པའི་ཕྱིར་བདག་གི་ལས་གྲུབ་པར་མཛོད་ཅིག་པའི་དོན། དྷ་ར་དྷ་ར་ཞེས་པ་ནི་སྒོ་བཞི་སྲུང་བ་བཤད་དེ། བྱང་ཆུབ་ཀྱི་རང་བཞིན་ཞི་བ་ཐམས་ཅད་ཁྱེར་ལ་གཟུངས་སུ་གྱིས་ཤིག་པའི་དོན། དྷི་རི་དྷི་རི་ཞེས་པ་ནི་དབྱིངས་ཀྱི་རང་བཞིན་ཆོས་ཉིད་ཀྱིས་

71-1-221b

ལེགས་པར་ཐོགས་ཤིག་པའི་དོན། དྷུ་རུ་དྷུ་རུ་ཞེས་པ་ནི་ལུས་ཐམས་ཅད་ཐུགས་རྗེས་རབ་ཏུ་ཟུང་ལ་ཐོགས་ཤིག་པའི་དོན། སརྦ་བཛྲ་ཀུ་ལཾ་ཨཱ་བརྟ་ཡ་སྭཱཧཱ་ཞེས་པ་ནི་རྡོ་རྗེ་དང་བཅས་པས་བདག་ལ་བྱིན་གྱིས་རློབས་ཤིག གནོད་པ་བྱེད་པའི་བྱེ་བྲག་ཐམས་ཅད་རབ་ཏུ་ཞི་བར་མཛོད་ཅིག་པའི་དོན། 
ཨ་མུ་ཀཾ་མཱ་ར་ཡ་ཕཊ་ཅེས་པ་ནི་བདག་དུས་མ་ཡིན་པའི་འཇིགས་པ་ལས་ཟློགས་ཤིག བདུད་རྣམས་ཀྱི་འཇིགས་པ་ལས་ཆོམས་ཤིག་པའི་དོན་ནོ། །ཁྲོ་བོ་དང་སྒོ་སྲུང་བ་བཤད་ཟིན་ཏོ།།      །།ད་ནི་ཁྲོ་བོའི་ངོ་བོ་ཉིད་བསྟན་ཏེ། ན་མཿ ས་མནྟ་བཛྲཱ་ཎཱཾ་ཞེས་པ་ནི་ཀུན་དུ་བཟང་པོ་ཡེ་ཤེས་ཀྱི་རྡོ་རྗེས་
རང་བཞིན་གྱིས་དབང་པོའི་དོན་ཏོ། །སརྦ་བ་ལཾ་ཞེས་པ་ནི་ཐམས་ཅད་ཀུན་གྱི་རང་བཞིན་སྟོབས་པོ་ཆེས་དབང་བསྐུར་ཅིག་པའི་དོན། ཨཱ་བརྟ་ཡ་མ་ཧཱ་བ་ལེ་ཞེས་པ་ནི་མཉེས་པར་བྱེད་པའི་སྟོབས་པོ་ཆེ་མགྱོགས་པ་རླུང་དང་འདྲ་བས་དབང་བསྐུར་བའི་དོན། ཀ་ཏ་བེ་ཏ་ཏ་ལེ་ཞེས་པ་ནི་ཡེ་ཤེས་ཀྱི་མཆེ་བས་
ཉོན་མོངས་པའི་བདུད་ཐུལ་ཅིག་པའི་དོན། ཨ་ཙ་ལེ་ཞེས་པ་ནི་ཁམས་གསུམ་རྣམ་པར་རྒྱལ་བའི་དཀྱིལ་འཁོར་གྱི་མངའ་བདག་གི་སྤྲུལ་པས་བདག་ལ་དབང་བསྐུར་ལ་སྐྱོབས་ཤིག་པའི་དོན། མཎྜ་ལ་མཱ་ཡེ་ཞེས་པ་ནི་དཀྱིལ་འཁོར་གྱི་སྲུང་མ་རྣམས་ཀྱི་སྤྲུལ་པའི་ངོ་བོ་ཉིད་ཀྱི་ཆེ་བ་སྣ་ཚོགས་
སུ་སྣང་བའི་དོན། ཨ་ཏི་བཛྲ་ཞེས་པ་ནི་རྡོ་རྗེ་བཟང་པོས་གདོན་ཐམས་ཅད་ལས་བདག་ལ་སྐྱོབས་ཤིག་པའི་དོན། མ་ཧཱ་བ་ལེ་བི་ག་ར་ཎ་ཞེས་པ་ནི་སྟོབས་པོ་ཆེ་རླུང་དང་འདྲ་བ་མགྱོགས་པས་བདག་ལ་གནོད་པ་ཐམས་ཅད་ཞི་བར་མཛོད་ཅིག་པའི་དོན། ཨ་ཛི་ཏེ་ཛྭ་ལ་ཛྭ་ལ་ཞེས་པ་ནི་ཡང་དག་པའི་ཡེ་
ཤེས་ཀྱི་ཤེས་རབ་ཀྱིས་བདུད་ཀྱི་དྲེགས་པ་རྣམས་སྲེགས་ཤིག་པའི་དོན་འབར་བ་འབར་བས་ཉོན་མོངས་པ་སྲེགས་ཤིག་པའི་དོན། ཏི་ཊི་ཏི་ཊི་པིཾ་ག་ལེ་ཞེས་པ་ནི་འབར་བ་སྐམ་པོ་སོ་སོར་འབར་བས་སྡུག་བསྔལ་ལས་སྐྱོབས་ཤིག་པའི་དོན། ད་ཧ་ད་ཧ་ཞེས་པ་ནི་བདག་གི་ཉོན་མོངས་པ་རྣམས་
སྲེགས་ཤིག་ཡང་དག་པའི་ཡེ་ཤེས་འབར་བར་གྱིས་ཤིག་པའི་དོན། ཏེ་ཛོ་བ་ཏི་ཞེས་པ་ནི་ཡང་དག་པའི་ཡེ་ཤེས་ཀྱིས་གཏི་མུག་གི་མུན་པ་ལས་འབར་བར་གྱིས་ཤིག་པའི་དོན། ཏི་ལི་ཏི་ལི་ཞེས་པ་ནི་བདག་གི་སྡུག་བསྔལ་ཐམས་ཅད་ཆོད་ཅིག་པའི་དོན། བནྡྷ་བནྡྷ་ཞེས་པ་ནི་བགེགས་འབྱུང་པོ་

71-1-222a

རྣམས་ཆིངས་ཤིག་པའི་དོན། མ་ཧཱ་བ་ལེ་ཞེས་པ་ནི་སྟོབས་པོ་ཆེས་ལས་མཛོད་ཅིག་པའི་དོན། བཛྲཱཾ་ཀུ་ཤ་ཛྭཱ་ལཱ་ཡ་སྭཱཧཱ་ཞེས་པ་ནི་རྡོ་རྗེ་མེ་དང་འདྲ་བས་མཚན་མ་ཐམས་ཅད་ཞི་བར་མཛོད་ཅིག་པའི་དོན། ཁྲོ་བོའི་ངོ་བོ་དབང་གི་དོན་བཤད་ཟིན་ཏོ།།      །།ད་ནི་ཡེ་ཤེས་
ཀྱི་ཁྲོ་བོ་ལག་ན་རྡོ་རྗེས་མཚན་མ་འཇོམས་པ་དང་ཐུགས་ཁྲོ་བོའི་ཡེ་ཤེས་ཀྱི་སྙིང་པོ་ལས་རྣམ་བཞིའི་རང་བཞིན་དེ་དཀོན་མཆོག་གསུམ་ལ་ཕྱག་འཚལ་བའི་དོན་བྱས་ཕྱག་ན་རྡོ་རྗེའི་བདུད་རྩིའི་ངོ་བོའོ། །ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་པཱ་ཎ་ཡེ་ཞེས་པ་ནི་ཁམས་གསུམ་གྱི་གནོད་སྦྱིན་རྣམས་
འདུལ་བའི་ཕྱིར་ན་ཕྲིན་ལས་ཁྲོ་བོའི་ཚུལ་དུ་བཞུགས་པས་རྡོ་རྗེ་ཁྲོ་བོ་བསྟན། མ་ཧཱ་ཡཀྵ་སེ་ནཱ་པ་ཏ་ཡེ་ཞེས་པ་ནི་གནོད་སྦྱིན་གྱི་སྡེ་དཔོན་ལག་ན་རྡོ་རྗེས་ཡེ་ཤེས་ཀྱི་ངོ་བོ་ཞེས་གསུངས་པའི་ཕྱིར་རོ། །ཨོཾ་ཧ་ར་ཧ་ར་བཛྲ་ཞེས་གསུངས་པ་ནི་ཡེ་ཤེས་ལྔའི་ངོ་བོ་ཕྱག་ན་རྡོ་རྗེ་དབུས་ན་བཞུགས་ཏེ། ལུས་
གནོད་སྦྱིན་དུ་བསྟན་པའི་དོན། མ་ཐ་མ་ཐ་བཛྲ་ཞེས་པ་ནི་ཧཱུཾ་ཀ་ར་གཤིན་རྗེ་གཤེད་ཀྱི་དོན་རྒྱལ་པོར་བསྟན་པས་སྙིང་པོའི་རང་བཞིན་ནོ། །དྷུ་ན་དྷུ་ན་བཛྲ་ཞེས་པ་ནི་མཚན་མའི་དངོས་པོ་ཐམས་ཅད་འཇོམས་པས་ཁམས་གསུམ་རྣམ་པར་རྒྱལ་བའི་སྙིང་པོའོ། །ད་ཧ་ད་ཧ་བཛྲ་ཞེས་པ་ནི་ཡ་མཱནྟ་ཀ་ཁྲོ་བོའི་རྒྱལ་
པོའི་སྙིང་པོ་བྱང་ཆུབ་སེམས་ཀྱི་རང་བཞིན་ནོ། །པ་ཙ་པ་ཙ་བཛྲ་ཞེས་པ་ནི་ནཱི་ལ་དཎྜའི་རང་བཞིན་རྟ་མགྲིན་སྔོན་པོའི་རང་བཞིན་དུ་བསྟན། དྷ་ར་དྷ་ར་བཛྲ་ཞེས་པ་ནི་ཧ་ཡ་གྲྀ་བའི་རང་བཞིན་སྔགས་ཀྱི་ས་བོན་བྱང་ཆུབ་སེམས་ཀྱི་ངོ་བོའི་སྙིང་པོའོ། །དཱ་ར་ཡ་དཱ་ར་ཡ་བཛྲ་ཞེས་པ་ནི་བདུད་རྩི་འཁྱིལ་པའི་སྙིང་པོའི་རང་བཞིན་བྱང་ཆུབ་སེམས་ཀྱིས་
མཚོན་པའི་རང་བཞིན་ནོ། །དཱ་རུ་ཎ་དཱ་རུ་ཎ་བཛྲ་ཞེས་པ་ནི་ཡང་དག་པའི་ཡེ་ཤེས་ཀྱི་སྟོབས་དང་ལྡན་པས། ཨ་མོ་གྷ་པཱ་ཤའི་རང་བཞིན་བྱང་ཆུབ་སེམས་ཀྱི་སྙིང་པོར་བསྟན། ཙྪིནྡ་ཙྪིནྡ་བཛྲ་ཞེས་པ་ནི་མ་ཧཱ་བ་ལ་དང་། ཧཱུཾ་ཀ་ར་གཉིས་ཀྱི་རང་བཞིན་དུ་བསྟན། བྷིནྡ་བྷིནྡ་བཛྲ་ཧཱུཾ་ཕཊ་ཅེས་པ་ནི་པདྨ་འཁྱིལ་པའི་རང་བཞིན་
ཏེ། ཡེ་ཤེས་ཀྱི་ཕྱག་རྒྱ་བཞིས་སྡོམས་ཤིག་པའི་རང་བཞིན་ཏེ། ཁྲོ་བོའི་རང་བཞིན་བཤད་ཟིན་ཏོ།།      །།ད་ནི་ཕྱག་བཙལ་བའི་དོན་ཏེ། ན་མ་ཤྩཎྜ་བཛྲ་ཀྲོ་དྷ་ཡ་ཞེས་པ་ནི་ཕྱག་བཙལ་བའི་དོན་ཏེ་ཨ་མྲྀ་ཏ་ཀུཎྜ་ལིའི་སྙིང་པོ། ཕྱག་ན་རྡོ་རྗེ་གཏུམ་པོ་བསྒྲུབ་པའི་དོན་པས་རྡོ་རྗེ་ཁྲོ་བོ་ཞེས་པའི་དོན་

71-1-222b

ཏོ། །ད་ནི་གོ་བའི་དོན་བསྟན་ཏེ། ཧུ་ལུ་ཧུ་ལུ་ཞེས་པ་ནི་བགེགས་དང་འབྱུང་པོ་རྣམས་ཚུལ་བཞིན་དུ་དྲོངས་ཤིག་པའི་དོན། ཤར་ཕྱོགས་ཀྱི་ཁྲོ་བོ་ཨཾ་ཀུ་ཤའི་མེ་ལོང་ལྟ་བུའི་ཡེ་ཤེས་ཀྱི་ཕྱག་རྒྱའོ། །ཏིཥྛ་ཏིཥྛ་ཞེས་པ་ནི་ཆིངས་ཤིག་ཆིངས་ཤིག་པའི་ལྷོ་ཕྱོགས་ཀྱི་སྒོ་བ་ཞགས་པ་སྟེ། མཉམ་པ་ཉིད་ཀྱི་
ཡེ་ཤེས་ཀྱི་ཕྱག་རྒྱས་ཉོན་མོངས་པ་རྣམས་དབང་དུ་སྡུས་ཤིག་པའི་དོན་ཏོ། །བནྡྷ་བནྡྷ་ཞེས་པ་ནི་ནུབ་ཕྱོགས་ཀྱི་སྒོ་བ་ལྕགས་སྒྲོག་སྟེ། སོ་སོར་ཀུན་དུ་རྟོག་པའི་ཡེ་ཤེས་ཀྱི་ཕྱག་རྒྱ་སྟེ་ལྕགས་སྒྲོག་གིས་བགེགས་དང་འབྱུང་པོ་རྣམས་སྡོམས་ཤིག་པའི་དོན། ཧ་ན་ཧ་ན་ཞེས་པ་ནི་བྱང་ཕྱོགས་ཀྱི་སྒོ་བ་
དྲིལ་བུ་སྟེ། བྱ་བ་ནན་ཏན་གྱི་ཡེ་ཤེས་ཀྱི་ངོ་བོས་བགེགས་དང་འབྱུང་པོ་ལོག་ལྟ་རྣམས་རྡུལ་དུ་རློག་ཤིག་པའི་དོན། ཨ་མྲྀ་ཏེ་ཧཱུཾ་ཕཊ་ཅེས་པ་ནི། དཀྱིལ་འཁོར་གྱི་སྔགས་གོང་དུ་གསུངས་པ་དང་སྔགས་འབྱུང་བ་རྣམས་ཡེ་ཤེས་ཀྱི་ངོ་བོ་བས་ལས་ཀྱི་ཁ་བསྐང་བའི་ཕྱིར་བདུད་རྩིའི་ངོ་བོར་བྱིན་གྱིས་བརླབ་
པའི་ཐབས་སུ་ཤེས་པར་བྱའོ།།      །།དེ་ལྟར་ཁྲོ་བོ་རྣམས་ཀྱི་དོན་བཤད་ནས་དེའི་འོག་ཏུ་ཡོན་ཏན་གྱི་རྣམ་གྲངས་ཆོ་གའི་ཐབས་ཀྱི་བྱེ་བྲག་བསྟན་ཏེ། སྡུག་བསྔལ་ཐམས་ཅད་ལས་ཐར་བར་བྱེད་པའོ། །སྡིག་པ་ཐམས་ཅད་བྱང་བྱས་ནས། ཞེས་པ་ནི་དོན་རྣམ་པ་གཉིས་སུ་ཤེས་པར་བྱ་སྟེ། རྒྱུད་
ཀྱི་དོན་ལ་འཇུག་པར་བྱ་བའི་ཕྱིར་སྡིག་པ་ཐམས་ཅད་བྱང་བར་བྱ་བ་དང་། རྒྱུད་ཀྱི་དོན་རྟོགས་པས་སྡིག་པ་ཐམས་ཅད་བྱང་བ་དང་། དེ་ལྟར་དོན་གཉིས་སུ་ཤེས་པར་བྱའོ། །རྒྱུད་ཀྱི་དོན་ལ་འཇུག་པར་བྱ་བའི་ཕྱིར་སྡིག་པ་ཐམས་ཅད་སྦྱོང་བར་བྱེད་པ་ནི་ཉོན་མོངས་པའི་སྒྲིབ་པ་དང་། ལས་ཀྱི་སྒྲིབ་པ་དང་། 
རྣམ་པར་སྨིན་པའི་སྒྲིབ་པ་དང་། ཆོས་ཀྱི་སྒྲིབ་པ་དང་། ལྟ་བ་ལོག་པ་ལ་སོགས་པ་རྣམས་དཀྱིལ་འཁོར་གྱི་ལྷ་རྣམས་སྤྱན་དྲངས་ནས་མདུན་གྱི་བར་སྣང་ལ་གསལ་བར་བྱས་ཏེ། མཆོད་པ་ཕུལ་ལ་འགྱོད་པ་བསྐྱེད་དུ་གཞུག་གོ། །ཡན་ལག་ལྔ་ས་ལ་གཏུགས་ལ། སེམས་རྩེ་གཅིག་ཏུ་གུས་པ་
དང་ལྡན་པར་བྱས་ཏེ། བྱང་ཆུབ་མཆོག་ཏུ་སེམས་བསྐྱེད་དེ། སྟ་གོན་ལ་གནས་པའི་ཆོ་ག་བྱ། དེ་ནས་འཕགས་པ་རྣམས་ལ་མཁྱེན་པ་གསོལ་ཞིང་སྡིག་པ་རྣམས་ལ་འགྱོད་པ་བསྐྱེད་པའི་དོན་རྒྱུད་ཀྱི་དོན་རྟོགས་ནས་སྡིག་པ་སྦྱང་བ་ནི་དཀྱིལ་འཁོར་དུ་བཅུག་ནས་ལྷའི་གྲལ་རིམ་དང་། 

71-1-223a

བཞུགས་ཐབས་དང་། སྐུ་མདོག་དང་རྒྱན་ཆས་དང་བསྟོད་པ་དང་། མཆོད་པའི་བྱེ་བྲག་དང་། རྒྱུད་ཀྱི་དོན་བསྟན་ཏེ་སེམས་གྲོལ་ནས་སྡིག་པ་བྱང་བར་གསུངས། དེ་ལྟར་སྡིག་པ་སྦྱང་བ་བྱས་ཏེ། དེའི་འོག་ཏུ་འབྲས་བུ་ཡོན་ཏན་ཐམས་ཅད་དང་ལྡན་པའི་དོན་ཏེ། ཅིའི་ཕྱིར་
ཞེ་ན། སྡུག་བསྔལ་ཐམས་ཅད་མེད་པར་བྱེད། །ཅེས་གསུངས་ཏེ། དེ་ལྟར་རྒྱུད་དོན་ཉམས་སུ་བླངས་ཏེ། བསྒྲུབས་པས་ཉོན་མོངས་པའི་སྡུག་བསྔལ་གསུམ་དང་བརྒྱད་ལ་སོགས་པ་སྡུག་བསྔལ་གྱི་བྱེ་བྲག་ཐམས་ཅད་མེད་པར་མཛད་པས་དེ་སྐད་གསུངས། དེའི་འོག་ཏུ་རྒྱུད་ཐམས་ཅད་ཀྱི་རྩ་
བའི་དོན་ཡིན་པ་སྟོན་ཏེ། ཅིའི་ཕྱིར་ཞེ་ན། རྒྱུད་དོ་ཅོག་གི་རྩ་བ་སྟེ། །ཞེས་གསུངས་ཏེ། སྟོན་པའི་ཞལ་ནས་གསུངས་པའི་རྒྱུད་དེ་ཐམས་ཅད་ཀྱི་རྩ་བ་རྡོ་རྗེ་ལྟ་བུའི་ཏིང་ངེ་འཛིན་ཡིན་པས་དོན་གྱི་རྩ་བ་ཡིན་པར་གསུངས། དེའི་འོག་ཏུ་རྒྱུད་ཀྱི་དོན་གྱི་དཔལ་གྱི་གཞིར་འགྱུར་བའི་ཐབས་སྟོན་ཏེ། 
ཅིའི་ཕྱིར་ཞེ་ན། དཔལ་ཀུན་གྱིས་ནི་ལེགས་པར་བརྒྱན། །ཞེས་གསུངས་ཏེ། དཔལ་ནི་འཇིག་རྟེན་དང་འཇིག་རྟེན་ལས་འདས་པའི་ལེགས་པའི་ཡོན་ཏན་ཐམས་ཅད་ལ་བྱ། ཀུན་ནི་དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་ཀྱང་འདིའི་དོན་རྟོགས་པ་ལས་བྱུང་བའི་ཐ་ཚིག་གོ། །
དེ་ལྟ་བུའི་དོན་དེ་ནི་ཉེས་པ་ཐམས་ཅད་སྤངས་ཤིང་། ཡོན་ཏན་ཐམས་ཅད་ཀྱི་ཕུལ་དུ་ཕྱིན་པའི་རྒྱུ་ཡིན་པས་ལེགས་པར་བརྒྱན་ཞེས་པའི་དོན་ཏོ།    །དེའི་འོག་ཏུ་སེམས་ཅན་དབང་པོ་ཉམས་པ་ལ་ཕན་པའི་ཐབས་སྟོན་ཏེ། ཅིའི་ཕྱིར་ཞེ་ན། སེམས་ཅན་དབང་པོ་ཉམས་པ་དང་། །ཞེས་གསུངས་ཏེ། 
སེམས་ཅན་གྱི་རྒྱལ་པོ་སྟོབས་ལྡན་སྙིང་པོ་ལ་སོགས་ཏེ། ཁམས་གསུམ་གྱི་སེམས་ཅན་ཀུན་ལ་བྱ་བའི་ཐ་ཚིག་གོ། །དེ་རྣམས་ལ་དབང་པོ་ཉམས་པའི་སྐྱོན་བཅོ་བརྒྱད་ཡོད་དེ། དེ་བཟློག་པའི་ཐབས་ནི་རྒྱུད་ཀྱི་རྒྱུད་ནས་འབྱུང་བའི་ཕྲིན་ལས་རྣམ་བཞི་ཚང་བར་བྱས་ནས་སྦྱང་བའི་ཕྱིར་རོ། །དེའི་
འོག་ཏུ་ཚེ་ཉམས་པ་གསོ་བའི་ཐབས་སྟོན་ཏེ། ཅིའི་ཕྱིར་ཞེ་ན། ཚེ་ཟད་པ་དང་ཚེ་ཉམས་དང་། ཞེས་གསུངས་ཏེ། དེ་ནི་སྲོག་གོ། །ཟད་པ་ནི་མེད་པ་སྟེ། ཚེ་ཟད་པའི་སྔ་ལྟས་ལྔ་ཡོད་པ་ལ། དེ་གསོ་བའི་ཐབས་ནི་དཀྱིལ་འཁོར་གྱི་ལྷ་རྣམས་སྤྱན་དྲངས་ནས་སྔགས་དང་ཕྱག་རྒྱ་རྣམས་ཀྱིས་དབང་

71-1-223b

བསྐུར་ནས་སོས་པར་གསུངས། དེའི་འོག་ཏུ་བདོག་པ་ཉམས་པ་སྤེལ་བའི་ཐབས་སྟོན་ཏེ། དེ་ཅིའི་ཕྱིར་ཞེ་ན། ཕུན་སུམ་ཚོགས་མེད་གང་ཆགས་དང་། །ཞེས་གསུངས་ཏེ། ཁམས་གསུམ་གྱི་སེམས་ཅན་རྣམས་བདེ་བ་དང་བྲལ་ཏེ། ཉོན་མོངས་པའི་སྡུག་བསྔལ་བཀྲེས་གྲང་ལ་སོགས་པ་
གནོད་པའི་བྱེ་བྲག་རྣམས་ཀྱིས་བདེ་བ་མི་འཆགས་ཏེ། སྡུག་བསྔལ་ཆགས་པ་དེ་སྦྱང་བའི་ཐབས་ནི་དཀྱིལ་འཁོར་གྱི་ལྷ་རྣམས་སྤྱན་དྲངས་ཏེ་རྒྱས་པའི་ལས་བྱས་ན། བདེ་བ་ཕུན་སུམ་ཚོགས་པ་དང་ལྡན་པའི་ཐ་ཚིག་གོ། །དེའི་འོག་ཏུ་ཉོན་མོངས་པའི་ཕྱོགས་ཀྱིས་འཇིག་རྟེན་པའི་ལྷ་མི་དགའ་བ་སྟོན་
ཏེ། ཅིའི་ཕྱིར་ཞེ་ན། ལྷ་རྣམས་རྒྱབ་ཀྱིས་ཕྱོགས་པ་དང་། །ཞེས་གསུངས་ཏེ། རྒྱལ་བའི་སྤྱན་སྔར་དམ་ཚིག་མནོས་པ་ལས། གཞུང་དང་མ་མཐུན་པས་མྱ་ངན་ལས་འདས་པའི་ལྷ་འཕགས་པ་རྣམས་མ་མཉེས་པ་དང་། ཀུན་རྫོབ་ཀྱིས་མི་མཐུན་པའི་ཕྱོགས་པས་ལྷ་རྣམས་འཕོངས་པ་དང་། དེ་
ལ་སོགས་ཏེ་ལྷ་རྣམས་རྒྱབ་ཀྱིས་ཕྱོགས་པ་དེ་རྣམས་ཞི་བར་བྱ་བའི་ཐ་ཚིག་ནི། བདག་ཉིད་ལས་ཀྱི་ལྷའི་ཏིང་ངེ་འཛིན་དུ་ཞུགས་ཏེ། ལས་བྱ་བའི་ལྷ་དང་། མཆོད་རྫས་ལ་སོགས་པ་འོད་དང་། ཁ་དོག་དམར་པོར་བསྒྱུར་ཏེ། ཆགས་པའི་ཚུལ་གྱིས་དབང་གི་ལས་བསན་འགྲུབ་པར་གསུངས། དེའི་
འོག་ཏུ་ལྷ་མི་དགའ་བའི་སྔ་ལྟས་སྟོན་ཏེ། ཅིའི་ཕྱིར་ཞེ་ན། མཛའ་སྡུག་སྐྱེ་བོ་སྡང་བ་དང་། །ཞེས་གསུངས་ཏེ། ལྷ་ཕོངས་པའི་སྔ་ལྟས་བདག་ལ་མཛའ་བོ་དང་། འཁོར་ལ་སོགས་པ་རྣམས་བསམ་པ་དང་མི་མཐུན་པའི་ཕྱོགས་ཞེ་སྡང་དང་ངན་སེམས་ལ་སོགས་པའི་བྱད་སྟེམས་རྣམས་དྲག་པོའི་
ལས་བྱས་ན་འགྲུབ་པར་གསུངས། དེའི་འོག་ཏུ་འཁོར་ལ་གནོད་པ་སྟེ། ཅིའི་ཕྱིར་ཞེ་ན། བྲམ་ཟེ་ལ་སོགས་གཙེས་པ་དང་། ཞེས་གསུངས་ཏེ། རྒྱལ་པོ་སྟོབས་ལྡན་སྙིང་པོ་དང་། ཁམས་གསུམ་གྱི་སེམས་ཅན་གཡོག་བྲན་དང་། བཟའ་མི་ལ་སོགས་པ་ལ་གནོད་སྦྱིན་དང་བདུད་ལ་སོགས་
པས་གཙེས་པའི་རྒྱུས་རང་རེའི་མི་མཐུན་པ་ལ་ལས་བྱས་ན་འགྲུབ་པར་གསུངས། དེའི་འོག་ཏུ་མི་མཐུན་པ་སྟོན་ཏེ། ཅིའི་ཕྱིར་ཞེ་ན། ཕན་ཚུན་མཐུན་པ་མ་ཡིན་པ་དང་། ཞེས་གསུངས་ཏེ། གདོན་འབྱུང་པོས་བྱིན་གྱིས་བརླབས་པའི་མཐུས། སེམས་ཅན་རྣམས་ལ་ཕན་ཚུན་མི་མཐུན་

71-1-224a

ཏེ། དགྲ་བོ་ལྟ་བུར་སེམས་པ་ཞི་བའི་ལས་བྱས་ན་འགྲུབ་པར་གསུངས། དེའི་འོག་ཏུ་བདོག་པ་ཉམས་པ་སྟོན་ཏེ། དེ་ཅིའི་ཕྱིར་ཞེ་ན། ནོར་འགྲིབས་པས་ནི་གནོད་པ་དང་། །ཞེས་གསུངས་ཏེ། བདག་གི་བདོག་པ་ཕུན་སུམ་ཚོགས་པ་ཉམས་ནས་ཕོངས་པ་སྟེ། གཞན་ལ་
རག་ལུས་ནས་བདག་ཉོན་མོངས་པ་ལ། རྒྱས་པའི་ལས་བྱས་ན་བདོག་པ་ཡོད་པར་གསུངས། དེའི་འོག་ཏུ་མྱ་ངན་གྱི་གནོད་པ་སྟོན་ཏེ། ཅིའི་ཕྱིར་ཞེ་ན། མྱ་ངན་ངལ་ལས་གནོད་པ་དང་། ཞེས་གསུངས་ཏེ། ཁམས་གསུམ་གྱི་སེམས་ཅན་རྣམས་སེམས་ཀྱི་མྱ་ངན་སྣ་ཚོགས་དང་ལྡན་པས་ལུས་
རབ་ཏུ་ངལ་ཏེ། སྡུག་བསྔལ་རྣམས་ཀྱིས་རབ་ཏུ་གཟིར་བ་ལ་མྱ་ངན་གྱི་ཆོ་འཕྲུལ་ལ་སོགས་པ་ཞི་བའི་ལས་བྱས་ན་འགྲུབ་པར་གསུངས། དེའི་འོག་ཏུ་འཇིགས་ཤིང་ཕོངས་པ་སྟོན་ཏེ། ཅིའི་ཕྱིར་ཞེ་ན། འཇིགས་པ་དང་ནི་ཕོངས་པ་དང་། ཞེས་གསུངས་ཏེ། སེམས་ཅན་རྣམས་རྒྱལ་པོའི་ཆད་
པའི་འཇིགས་པ་དང་། གནམ་ལྕགས་ཀྱིས་འཇིགས་པ་དང་། རྐུན་པོས་འཇིགས་པ་དང་མེ་དང་ཆུས་འཇིགས་པ་དང་། མཚོན་ཆས་འཇིགས་པ་དང་། དུག་གིས་འཇིགས་པ་དང་། སྐར་མདའ་ལྟུང་བས་འཇིགས་པ་དང་བརྒྱད་དོ། །གཞན་ཡང་མགོན་སྐྱབས་མེད་ཅིང་ཕོངས་པའི་བྱེ་བྲག་རྣམས་
ཕྲིན་ལས་རྣམ་བཞིའི་ལས་བྱས་ན་འགྲུབ་པར་གསུངས། དེའི་འོག་ཏུ་བྱད་སྟེམས་བཤད་དེ། ཅིའི་ཕྱིར་ཞེ་ན། གཟའ་དང་རྒྱུ་སྐར་བྱད་སྟེམས་དང་། །ཞེས་གསུངས་ཏེ། འཇིག་རྟེན་གྱི་ཁམས་སུ་གཟའ་ཆེན་པོ་བརྒྱད་དང་། རྒྱུ་སྐར་ཉི་ཤུ་རྩ་བརྒྱད་ལ་སོགས་པ་སོ་སོའི་བྱད་སྟེམས་ཀྱི་འཛམ་བུའི་གླིང་གི་
སེམས་ཅན་རྣམས་ལ་མི་ནད་དང་ཕྱུགས་ནད་དང་། ཆོམ་རྐུན་དང་མདངས་འཕྲོག་པ་ལ་སོགས་པ་གནོད་པའི་བྱེ་བྲག་རྣམས་ལ། ཕྲིན་ལས་རྣམ་བཞིའི་ལས་བྱས་ན་འགྲུབ་པར་གསུངས། དེའི་འོག་ཏུ་གདོན་གྱིས་ཉེན་པ་སྟོན་ཏེ། ཅིའི་ཕྱིར་ཞེ་ན། མི་བཟད་གདོན་གྱིས་ཉེན་པ་དང་། །ཞེས་གསུངས་ཏེ། 
འཇིག་རྟེན་གྱི་སེམས་ཅན་རྣམས་ལ་ཕུང་པོ་དང་ཁམས་མ་སྙོམས་པ་དང་། སེམས་ཀྱི་རྣམ་པར་རྟོག་པ་ཉོན་མོངས་པའི་གདོན་དང་། གཞན་ཡང་བི་ནཱ་ཡ་ཀ་ལ་སོགས་པའི་གདོན་སྟོང་ཕྲག་བརྒྱད་ཅུ་རྩ་བཞིས་ཉེན་པ་ལ། ཕྲིན་ལས་རྣམ་བཞིའི་ལས་བྱས་ན་འགྲུབ་པར་གསུངས། དེའི་འོག་ཏུ་མྱ་

71-1-224b

ངན་ངལ་ལས་བྱུང་བའི་རྨི་ལམ་སྟོན་ཏེ། ཅིའི་ཕྱིར་ཞེ་ན། མྱ་ངན་ངལ་ལས་བྱུང་བ་ཡིས། །རྨི་ལམ་སྡིག་པ་མཐོང་ན་ཡང་། །ཞེས་གསུངས་ཏེ། ཉོན་མོངས་པའི་སེམས་ཅན་ཕྱིན་ཅི་ལོག་གི་ལྟ་བའི་བག་ཆགས་ཀྱི་མྱ་ངན་གྱིས་གདུངས་པ་ལངས་པའི་རྒྱུས་ལུས་དང་སེམས་ངལ་ཞིང་ཐང་ཆད་པས་
བློ་གཏིབས་པས། གཉིད་ལོག་པའི་རྨི་ལམ་ལ་ལྟས་ངན་གྱི་རྨི་ལམ་སྡིག་པའི་བག་ཆགས་ལས་བྱུང་བ་དམྱལ་བས་བསྲེགས་པ་ལ་སོགས་པའི་རྨི་ལམ་སུམ་ཅུ་རྩ་གཉིས་རྨིས་པ་རྣམས་ཕྲིན་ལས་རྣམ་བཞིའི་ལས་བྱས་ན་འགྲུབ་པར་གསུངས།    དེའི་འོག་ཏུ་ཆོ་གའི་ཐབས་སྟོན་ཏེ། ཅིའི་ཕྱིར་
ཞེ་ན། དེས་ནི་རབ་བཀྲུས་གཙང་མ་ཡིན། །མདོ་སྡེ་དམ་པ་མཉན་པར་བྱ། །ཞེས་གསུངས་ཏེ། སློབ་དཔོན་སློབ་མ་སྟ་གོན་ལ་གནས་པར་བྱ་བ་དང་། ལྷ་དང་མི་སྟ་གོན་ལ་གནས་པར་བྱ་བ་དང་། རྫས་དང་ཡོ་བྱད་ལ་སོགས་པ་སྟ་གོན་ལ་གནས་པའི་ཆོ་གའོ། །དེའི་འོག་ཏུ་སློབ་དཔོན་
གྱིས་དཀྱིལ་འཁོར་གྱི་ཆོ་ག་རྫོགས་པར་བྱས་ལ། བདུད་རྩིའི་བུམ་པས་སློབ་མ་ལ་སོགས་པའི་སྤྱི་བོ་ནས་དབང་བསྐུར་ཞིང་ཁྲུས་བྱ་བ་ནི་ཕྱི་ནང་གི་དྲི་མ་བཀྲུ་བའོ། །དེ་ལྟར་བདུད་རྩིའི་བུམ་པས་ཉོན་མོངས་པ་རྣམས་གཙང་བར་བྱིན་གྱིས་བརླབས་ནས། དེ་ནས་བྱང་ཆུབ་ཏུ་སེམས་བསྐྱེད་དེ། མདོ་སྡེའི་
དོན་བཤད་ཅིང་ཉན་དུ་བཅུག་ལ། བསྒོམ་པའི་ལུང་དབོག་ཅིག་ལྷའི་ངོ་བོ་བསྟན་པའི་ཐ་ཚིག་གོ། །དེའི་འོག་ཏུ་ཕྱི་ནང་གི་ཆོས་བསྟན་ཏེ། དེ་ཡང་ཅིའི་ཕྱིར་ཞེ་ན། གང་དག་ཡིད་དགེ་སེམས་དང་ཞིང་། །ཙང་མའི་གོས་ཀྱིས་རབ་བརྒྱན་ཏེ། །ཞེས་གསུངས་ཏེ། སློབ་མ་གཞི་དད་པ་དང་ལྡན་
ཞིང་། ཡིད་དགེ་བ་ལ་སེམས་དང་ཞིང་སྤྱོད་པ་ཚང་བ་དང་། དཀའ་བློ་བདེ་བ་ལ་ངོ་རྟག་པ་དེ་ལྟ་བུའི་དེ་སེམས་ཀྱི་དྲི་མ་དང་བྲལ་བར་བྱས་ཏེ། དེ་ནས་སློབ་དཔོན་གྱིས་སློབ་མ་ལ་དེ་ལྟ་བུ་ལ་ནི་རས་སམ་དར་དཀར་པོ་ལ་སོགས་པའི་གོས་གཙང་མ་བཀོན་ལ་དྲི་ཞིམ་པོའི་མེ་ཏོག་གི་ཅོད་པན་ལ་སོགས་
པའི་རྒྱན་མང་པོས་བརྒྱན་ལ། ཕྱི་ནང་གི་རྒྱན་གྱིས་ལུས་སེམས་མཛེས་པར་བརྒྱན་ལ།    དེའི་འོག་ཏུ་ཐེག་པ་ཆེན་པོའི་ཆོས་ཉན་པའི་ཡོན་ཏན་བསྟན་ཅིང་བསྐུལ་བ་གདབ་སྟེ། ཅིའི་ཕྱིར་ཞེ་ན། ཟབ་མོ་སངས་རྒྱས་སྤྱོད་ཡུལ་བ། །མདོ་སྡེ་འདི་ནི་ཉན་བྱེད་ན། །ཞེས་གསུངས་ཏེ། དུས་གསུམ་གྱི་

71-1-225a

སངས་རྒྱས་ཐམས་ཅད་ཀྱི་མཁྱེན་པའི་ཡེ་ཤེས་ཀྱི་རང་བཞིན་རྡོ་རྗེ་རྣམ་པར་འཇོམས་པའི་མདོའི་དོན་ཟབ་པ་རྒྱ་ཆེ་བ་སངས་རྒྱས་ཉིད་ཀྱི་སྤྱོད་ཡུལ། མདོ་སྡེ་ཐམས་ཅད་ཀྱི་སྙིང་པོ་འདི་ཐེག་པ་ཆེན་པོའི་རིགས་ཅན། སློབ་པའི་རྒྱུན་ལ་ཞུགས་པ་གང་ཞིག་གིས་མཉན་པར་བྱེད་
པ་དང་ཀློག་ཅིང་འཛིན་པ་དང་། གཞན་ལ་དོན་ཉམས་སུ་ལེན་པའི་ཡོན་ཏན་སློབ་དཔོན་གྱིས་སློབ་མ་ལ་བསྟན་ཏེ། དེ་ལྟར་བསྟན་ནས་དེའི་འོག་ཏུ་ཉན་པའི་བསོད་ནམས་ཀྱི་ཕན་ཡོན་སྟོན་ཏེ། ཅིའི་ཕྱིར་ཞེ་ན། མདོ་སྡེ་འདི་ཡི་གཟི་བརྗིད་ཀྱིས། །སྲོག་ཆགས་དག་ནི་ཐམས་ཅད་ཀྱི། །ཞེས་
གསུངས། མདོ་སྡེ་འདི་མཉན་ཅིང་ཉམས་སུ་བླངས་པའི་ཡོན་ཏན་གྱི་གཟི་བརྗིད་ཀྱིས། ཁམས་གསུམ་གྱི་སེམས་ཅན་རྣམས་ཀྱི་ཉོན་མོངས་པའི་རྣམ་པར་རྟོག་པ་དང་སྡུག་བསྔལ་གྱི་བྱེ་བྲག་རྣམས་ལ་ཕན་པའི་ཐ་ཚིག་གོ། །ཅིའི་ཕྱིར་ཞེ་ན། མི་བཟད་པ་ཡི་ནད་རྣམས་ཀྱང་། །དེ་དག་ཐམས་ཅད་
ཞི་བར་ལྟ། །ཞེས་གསུངས་ཏེ། ཁམས་གསུམ་གྱི་སེམས་ཅན་རྣམས་ལ་ལས་དང་ཉོན་མོངས་པའི་བག་ཆགས་རྒྱུ་དང་འབྲས་བུའི་ཚུལ་བཞིན་དུ་མི་བཟད་པའི་ནད་གྱི་རང་བཞིན་པས། དེ་ཞི་བར་བྱ་བ་གོང་དུ་གསུངས་པ་ལྟར་བྱ་བའི་ཐ་ཚིག་གོ། །དེ་ལྟར་གནོད་པ་ཞི་ནས་དེའི་འོག་ཏུ་བདེ་བ་ཐོབ་
པའི་ཐབས་སྟོན་ཏེ། དེ་ཅིའི་ཕྱིར་ཞེ་ན། ཚེ་དང་བསོད་ནམས་འཕེལ་བར་འགྱུར། །སྡིག་པ་ཀུན་ལས་རྣམ་པར་ཐར། །ཞེས་གསུངས་ཏེ། སེམས་ཅན་ལས་ཀྱི་བག་ཆགས་ཀྱི་མཐུས་ཚེ་ཟད་ཅིང་འཆི་བ་ལ་སོགས་པ་ལ་མདོའི་དོན་མཉན་པས་བསྒོམ་པའི་ཚུལ་མ་ནོར་བར་བྱས་ན་ཚེ་དང་བསོད་ནམས་ཚད་
མེད་པ་འཕེལ་བར་འགྱུར་ཞིང་། ཉོན་མོངས་པའི་སྡིག་པ་ཐམས་ཅད་ལས་ཐར་བར་འགྱུར་བའི་ཐ་ཚིག་གོ། །ཆོ་གའི་ཐབས་དང་ཕན་ཡོན་བཤད་ཟིན་ཏོ།།      །།ད་ནི་བུམ་པའི་ཆོ་གའི་རྐྱེན་བསྟན་ཏེ། ཅིའི་ཕྱིར་ཞེ་ན། ནོར་བུ་ཡུངས་ཀར་དཱུར་བ་དང་། ཞེས་གསུངས་ཏེ། ནོར་བུ་ནི་མུ་ཏིག་དང་། 
བྱི་རུ་དང་། གཟི་དང་། མཆོང་དང་། རིན་པོ་ཆེ་དང་ཞེས་བྱ་བའི་ཐ་ཚིག་གོ། །ཡུངས་ཀར་ནི་འབྲུ་སྣ་ལྔའི་གཙོ་བོ་སྟེ། དེའི་ཁོངས་སུ་བསྡུ་བ་ནི། ནས་གྲོ་ཏིལ་འབྲས་མོན་སྲན་ལ་སོགས་པའོ། །དཱུར་བ་ནི་ཁ་རྒྱན་གྱི་དོན་ཏེ། དེའི་ཁོངས་སུ་བསྡུ་བ་ནི་བྱཱ་གྲྀ་སེང་གྲི་ཙནྡན་ལ་སོགས་པ་དྲི་ཞིམ་པོའི་ཤིང་

71-1-225b

ཙནྡན་ལ་སོགས་པ་ཡལ་ག་དང་བཅས་ཞེས་པའོ། །ད་ནི་རིན་པོ་ཆེ་ལྔ་དང་སྙིང་པོ་སྟོན་ཏེ། རིན་ཆེན་རྨ་མེད་ཙནྡན་བཅས། །ཞེས་པ་ནི་རིན་པོ་ཆེ་ནི་རྣམ་པ་ལྔ་སྟེ། བཻ་ཌཱུརྱ་དང་། གསེར་དང་། ཤེལ་དང་། ཨིན་དྲ་ནཱི་ལ་དང་། བྱི་རུ་ཞེས་པའི་དོན་ནོ། །རྨ་མེད་པ་ནི་དེ་རྣམས་ལ་སྐྱོན་ལ་སོགས་པ་
མེད་པའོ། །ཙནྡན་ནི་གླ་རྩི་དང་གུར་གུམ་དང་། སྤོས་དང་། ཙནྡན་དང་། ཨ་ག་རུ་ལ་སོགས་པའི་བྱེ་བྲག་སྨོས་པའི་དོན་ཏོ། །ཤེལ་དང་རྡོ་རྗེ་མེ་ཏོག་དང་། ཞེས་པ་ནི་ཤེལ་དང་རྡོ་རྗེ་གཉིས་ནི་སྙིང་པོར་ཤེས་པའི་དོན་ནོ། །ཤེལ་ནི་མེ་ཤེལ་དང་ཆུ་ཤེལ་གཉིས་ཀྱི་དོན་ནོ། །ད་ནི་སྙིང་པོ་ཕྱི་མ་
གསུམ་གྱི་དོན་སྟོན་ཏོ། །འོ་མའི་སྙིང་པོ་མར་དང་། ཤིང་གི་སྙིང་པོ་བུ་རམ་དང་། མེ་ཏོག་གི་སྙིང་པོ་སྦྲང་རྩི་ཞེས་པའི་དོན་ནོ། །མེ་ཏོག་ནི་བུམ་པའི་གདན་གྱི་ཐ་ཚིག་གོ། །དབྱར་ནི་མེ་ཏོག་གི་དཀྱིལ་འཁོར་བྱ། དགུན་ནི་ཚོན་སྣ་ལྔའི་དཀྱིལ་འཁོར་པདྨ་ལ་སོགས་པ་ལ་བྱ་བའི་དོན་ཏོ། །
གཞན་དུ་བུམ་པའི་ཁ་རྒྱན་ཏེ། མེ་ཏོག་ལ་སོགས་པ་དག་གིས་ཁ་རྒྱན་བྱ་བའི་ཕྱིར་སྨོས་སོ། །ཆུ་ཡི་གསེར་རམ་ཡང་ན་ནི། །དངུལ་གྱི་བུམ་པ་དག་ཀྱང་རུང་། །གཙང་མའི་གོས་ཀྱིས་དཀྲིས་ཤིང་དགང་། །ཞེས་པ་ནི་བུམ་པའི་རྒྱུ་སྟེ། རྒྱལ་པོ་ནི་གསེར་གྱི་བུམ་པ་བྱ། བློན་པོ་ནི་དངུལ་གྱི་
བུམ་པ་ཀྱང་ནི་ཚིག་གི་ལྷག་མ་ཅན་ཏེ། འབངས་ཕལ་པ་ནི་ཟངས་དང་ལྕགས་ལ་སོགས་པའི་བུམ་པས་བྱ་བའི་དོན་ཏོ། །གཞན་དུ་ན་ཕྲིན་ལས་སོ་སོའི་བྱེ་བྲག་ཏུ་ཤེས་པར་བྱའོ། །གཙང་མའི་གོས་ནི་རས་ཁ་ཚར་མ་ཉམས་པ་ཏིང་ངེ་འཛིན་གྱིས་བྱིན་གྱིས་བརླབ་པའི་ཐ་ཚིག་གོ།    །དེའི་འོག་ཏུ་
གྲངས་སྟོན་ཏེ། ཅིའི་ཕྱིར་ཞེ་ན། ལན་གྲངས་ཉི་ཤུ་རྩ་གཅིག་གམ། །ཡང་ན་ལན་གྲངས་བརྒྱ་རྩ་བརྒྱད། །རྡོ་རྗེ་རྣམ་འཇོམས་བཟླས་ན་ནི། །ཞེས་གསུངས་ཏེ། གྲངས་ཀྱི་དོན་ཏེ། འབངས་ཀྱི་ནི་ཉི་ཤུ་རྩ་གཅིག་ལ་སོགས་ཏེ། ཇི་ཙམ་འབྱོར་པའོ། །བློན་པོ་ནི་བརྒྱ་རྩ་བརྒྱད་ལ་སོགས་པ་སྟེ། 
འགྲུབ་ཚད་དོ། །རྒྱལ་པོ་ནི་བསོད་ནམས་ཆེ་བས་ཐ་མ་བརྒྱ་རྩ་བརྒྱད་དོ། །བློན་པོ་ཐ་མ་ཉི་ཤུ་རྩ་གཅིག་གམ། འབངས་ཀྱི་ཐ་མ་བདུན་ནོ། །དེ་ནི་གྲངས་ཀྱི་བསྙེན་པའོ། །མཚན་མའི་བསྙེན་པ་དང་། ཚིག་དང་དོན་བཟློག་པ་ནི་རང་བཞིན་གྱིས་ཤེས་པར་བྱ་བའི་ཐ་ཚིག་གོ།    །དེའི་འོག་ཏུ་ཁྲུས་བྱ་

71-1-226a

བའི་དམིགས་སྟོན་ཏེ། ཅིའི་ཕྱིར་ཞེ་ན། རྒྱལ་པོ་རྟག་ཏུ་ཁྲུས་གྱིས་ཤིག །ཅེས་གསུངས་ཏེ། རྒྱལ་པོ་སྟོབས་ལྡན་སྙིང་པོ་ལ་སོགས་པ་རྒྱལ་པོའི་རིགས་སུ་གཏོགས་པ་རྣམས་སོ། །རྒྱལ་པོ་སྣ་ལ་སྨོས་པ་ཅིའི་ཕྱིར་ཞེ་ན། བསོད་ནམས་ཆེ་བས་བྱས་པ་སྣ་ལ་སྨོས་པའི་ཕྱིར་རོ། །
དེས་ཐམས་ཅད་བདེ་བའི་ཕྱིར་རོ། །འབངས་ནི་རྒྱལ་པོའི་འཁོར་བས་དོན་གྱིས་ཤེས་པར་བྱ་བའི་ཐ་ཚིག་གོ། །མདོ་ཡི་དོན་གྱི་དགོངས་པ་ལ། །རིགས་པའི་ཚུལ་གྱིས་འདི་གཞུང་འཆད། །འཕགས་པ་རྣམས་ལ་བཟོད་པར་གསོལ། །འདི་གྲུབ་བརྩམས་པས་དེ་གྲུབ་ཤོག །རྡོ་རྗེ་རྣམ་པར་
འཇོམས་པའི་གཟུངས་ཀྱི་དོན་རྣམ་པར་བཤད་པ། སློབ་དཔོན་བདེ་བའི་མྱུ་གུས་མཛད་པ་རྫོགས་སོ།།      །། ༄༅༅།  །རྒྱ་གར་སྐད་དུ།  བཛྲ་བི་དཱ་ར་ཎ་ནཱ་མ་དྷཱ་ར་ཎི་བྲྀ་ཏྟི། བོད་སྐད་དུ། རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་འགྲེལ་པ། བཅོམ་ལྗན་འདས་རྡོ་རྗེ་རྣམ་པར་
འཇོམས་པ་ལ་ཕྱག་འཚལ་ལོ། །རྡོ་རྗེ་ལྟ་བུའི་ཡེ་ཤེས་ཀྱིས། །གདུལ་དཀའ་རྣམས་ཀྱི་གཉེན་པོ་གང་། །མཆོག་ཏུ་ཟབ་པའི་ཆོས་ཉིད་ཅན། །རྡོ་རྗེ་རྣམ་འཇོམས་སྐུ་ལ་འདུད། །རེ་ཞིག་ཡོངས་སུ་ཤེས་པར་བྱ་བ་ཕ་རོལ་ཏུ་ཕྱིན་པའི་ཐེག་པ་དང་། རྗེས་སུ་བསྒྲུབ་པར་བྱ་བ་སྔགས་ཀྱི་ཐེག་པ་གཉིས་སོ། །
སྔགས་ལ་ཡང་རྡོ་རྗེ་འཆང་གིས་བཀའ་སྩལ་པའི་རྒྱུད་དང་། དེ་དང་མི་འགལ་བའི་བླ་མ་དམ་པའི་གདམས་ངག་གོ། །རྒྱུད་ལ་རྣམ་པར་གཞག་པ་དང་། བཤད་པའི་ཚུལ་གྱིས་རྟོགས་པར་བྱ་སྟེ། རེ་ཞིག་སྤྱི་རྒྱུད་ཀྱི་རྣམ་པར་གཞག་པ་ནི། གང་ཞིག་རྒྱུན་ཆགས་པ་དེའི་རྒྱུད་དོ། །རྒྱུད་ལས་ཇི་སྐད་དུ། 
རྒྱུད་ནི་རྒྱུན་ཆགས་ཞེས་བྱ་སྟེ། །འཁོར་བ་རྒྱུད་དུ་འདོད་པ་ཡིན། །མྱ་ངན་ལས་འདས་རྒྱུད་ཕྱི་མ། །ཞེས་གསུངས་སོ། །གཞན་ཡང་། མ་ཚང་མེད་དང་འབྲེལ་པ་དང་། །ཞེས་བྱ་བ་ལ་སོགས་པའི་དོན་ཡང་དེ་བཞིན་དུ་རིག་པར་བྱའོ། །དེ་ལྟ་བུའི་རྒྱུད་དེ་ལ་ཡང་གདུལ་བྱའི་ཁྱད་པར་དང་བརྗོད་བྱ་དོན་
གྱི་ཁྱད་པར་གྱིས་རྣམ་པ་བཞིའོ། །དེ་ཡང་གང་ཞེ་ན། བྱ་བ་དང་སྤྱོད་པ་དང་། རྣལ་འབྱོར་དང་། རྣལ་འབྱོར་བླ་ན་མེད་པའི་རྒྱུད་དོ། །གཞན་དག་རྒྱུད་གོང་མའི་ལྟ་བ་སྟོན་ཅིང་འོག་མའི་སྤྱོད་པ་སྟོན་པ་གཉིས་ཀའི་རྒྱུད་དང་ལྔའོ་ཞེས་འདོད་པ་ནི་མི་འཐད་དེ། དེ་ལྟ་ན་རྒྱུད་ལ་ལ་ནས་རྒྱུད་ཕལ་ཆེར་གྱི་དོན་

71-1-226b

ཚང་བར་གསུངས་པ་ཡང་ཡོད་པས་རྒྱུད་སྡེ་ལྔ་ལས་ཀྱང་ལྷག་པར་འགྱུར་ཏེ། ཉེས་པ་འདི་ཡང་སྤང་བར་དཀའོ། །དེའི་ཕྱིར་རྒྱུད་དེ་ནི་བཞི་ཁོ་ནའོ། །འདིར་ནི་བྱ་བའི་རྒྱུད་སྟོན་པའི་སྐབས་ཡིན་པས་དེ་བརྗོད་པར་བྱ་སྟེ། ལོངས་སྤྱོད་རྫོགས་པའི་སྐུའི་གཙུག་ཏོར་ལས་འོད་ཟེར་དང་བཅས་པའི་ཁྲོ་བོ་ཞིག་
བྱུང་སྟེ་ཞུས་པ་ལ་བཤད་པ་ནི་གཙུག་ཏོར་འཁོར་ལོས་སྒྱུར་བའི་རྒྱུད་ཅེས་བྱའོ། །དེ་བཞིན་དུ་ཞལ་ཁྲོ་བོ་མེ་ལྕེ་འབར་བ་དང་། ཤངས་དང་། དཔུང་པ་དང་། ཐུགས་ཀ་དང་། ལྟེ་བ་དང་། གསང་བ་དང་། ཞབས་ཀྱི་བོལ་གོང་ལ་སོགས་པ་ནས་སྤྲུལ་པའི་ཞུ་བ་པོ་ལ་གསང་བའི་སྤྱི་རྒྱུད་དང་། དཔུང་པ་
བཟང་པོ་ལ་སོགས་པའི་རྒྱུད་རྣམས་བཤད་དོ། །དེ་དག་ཐམས་ཅད་ཀྱི་དོན་ཟབ་མོ་མདོར་བསྡུས་ཏེ་ལག་ན་རྡོ་རྗེ་ལ་གསུངས་པ་ནི་རྡོ་རྗེ་རྣམ་པར་འཇོམས་པ་སྟེ། ལེ་ལག་གི་རྒྱུད་དམ་མན་ངག་གི་རྒྱུད་ཅེས་ཀྱང་བྱའོ། །དེ་ལྟར་ན་མདོར་བསྡུས་ཏེ་རྒྱུད་ཀྱི་རྣམ་པར་གཞག་པའི་བཤད་པའོ།    །དེ་ནས་རྒྱུད་
ཀྱི་བཤད་པའི་ཚུལ་བརྗོད་པར་བྱའོ། །དེ་ལ་ཕུན་སུམ་ཚོགས་པ་རྣམ་པ་ལྔ་སྟེ། སྟོན་པ་དང་། གནས་དང་། དུས་དང་། ཆོས་དང་། འཁོར་རོ། །དེ་ལ་སྟོན་པ་ནི་ལོངས་སྤྱོད་རྫོགས་པའི་སྐུའོ། །གནས་ནི་ཆོས་ཀྱི་དབྱིངས་ཀྱི་ཕོ་བྲང་ངོ་། །དུས་ནི་འཛམ་བུའི་གླིང་དུ་ཆོས་ཀྱི་འཁོར་ལོ་གསུམ་
གསུངས་པའི་རྗེས་ལའམ་བསམ་གྱིས་མི་ཁྱབ་པའི་དུས་སུའོ། །ཆོས་ནི་རྡོ་རྗེ་རྣམ་པར་འཇོམས་པ་ལ་སོགས་པའི་རྒྱུད་རྣམས་སོ། །འཁོར་ནི་ས་བཅུའི་བྱང་ཆུབ་སེམས་དཔའ་ལག་ན་རྡོ་རྗེ་ལ་སོགས་པའོ། །དེ་ལྟ་ན་རྒྱུད་བཤད་པའི་ཚུལ་ལོ།    །ད་ནི་གཞུང་གི་དོན་ལ་འཇུག་པར་བྱ་སྟེ། དེ་ཡང་
གཉིས་ཏེ་དྲང་བའི་དོན་དང་ངེས་པའི་དོན་ཡི་གེ་ལྟར་བཤད་པ་དང་། གདམས་ངག་གི་དོན་ཕྱི་དང་། ནང་དང་གསང་བ་དང་དེ་ཁོ་ན་ཉིད་ཀྱི་དབྱེ་བས་ཁྲུས་བཞི་བསྟན་པའོ། །དེ་ལ་རེ་ཞིག་ཡི་གེའི་དོན་བརྗོད་པར་བྱ་སྟེ། དེ་ལ་ཡང་དང་པོར་ངེས་པའི་དོན་བརྗོད་པར་བྱའི། ཡི་གེའི་དོན་བརྗོད་པ་ནི་སྒྲ་ཇི་
བཞིན་དུ་འོག་ནས་བརྗོད་པར་བྱའོ། །ངེས་པའི་དོན་དུ་སྦྱར་ན་ཆོས་ཐམས་ཅད་ཀྱི་དེ་བཞིན་ཉིད་ལ་བསྒྱུར་ཞིང་བཅོས་སུ་མི་རུང་བའི་ཕྱིར་གཞན་དུ་ནི་མ་ཡིན་གྱི་འདི་ལྟར་རོ་ཞེས་བསྟན་པའི་དོན་དུ་འདི་སྐད་ཅེས་བྱ་བ་གསུངས་སོ། །ཡང་དག་པར་ནི་ཆོས་ཐམས་ཅད་དེ་བཞིན་ཉིད་ལས་མ་གཡོས་ཤིང་

71-1-227a

དེ་ཁོ་ན་ཉིད་ཡིན་པས་ན་བདག་གིས་ཞེས་བྱའོ། །འོ་ན་དེ་བཞིན་ཉིད་ལ་ཁ་དོག་དང་དབྱིབས་ལ་སོགས་པའི་རང་བཞིན་མེད་པས་ཇི་ལྟར་རྟོགས་པར་རུང་སྙམ་པ་ལ་དེའི་ཕྱིར། བླ་མའི་དྲིན་གྱིས་རྟོགས་པར་འགྱུར། །ཞེས་གསུངས་པ་ནི་ཐོས་པ་ཞེས་བྱའོ། །དེ་ཡང་དཔེ་ལ་སོགས་
པའི་སྒོ་ནས་བླ་མས་མཚོན་པ་ལས་རིམ་གྱིས་ངེས་པར་སྐྱེ་བར་འགྱུར་གྱི་ཅིག་ཅར་དུ་རང་གི་ངོ་བོ་ཐོས་པའམ། རྟོགས་པ་མ་ཡིན་ནོ། །དེ་ལྟ་བུའི་བླ་མ་དམ་པ་རྙེད་དཀའ་ཞིང་དེས་རྗེས་སུ་བཟུང་ཡང་དེ་ཁོ་ན་ཉིད་མྱུར་དུ་རྟོགས་པར་དཀའ་སྟེ་རིམ་གྱིས་སྦྱངས་པ་ལས་ནམ་ཞིག་རྟོགས་པར་འགྱུར་བས་ན་
དུས་གཅིག་ན་ཞེས་གསུངས་སོ། །གང་གིས་དེ་ལྟར་རྟོགས་པའི་དོན་དེ་ལ་ནི་གྲུབ་པའི་མཐའ་ཞེའམ་ལྟ་བ་ཞེས་ཀྱང་ཟེར་རོ། །དེ་ལྟར་རྟོགས་པའི་དོན་ལ་གནས་ཏེ་འདྲིས་ཤིང་གོམས་པར་བྱེད་པ་ནི་བསྒོམ་པ་ཞེས་བྱ་བ་འམ་རྣལ་འབྱོར་ཞེས་ཀྱང་ཟེར་རོ། །དེ་ལྟ་བུའི་བསྟན་པ་དང་གོང་ནས་གོང་དུ་
བོགས་དབྱུང་བའི་གནས་སྐབས་ལ་ནི་ས་དང་ལམ་གྱི་རིམ་པ་ཞེས་ཟེར་རོ། །དེ་རབ་ཏུ་གསལ་ཞིང་ཁྱད་པར་དུ་གྱུར་པའི་གནས་སྐབས་ན་སྒྲུབ་པ་པོ་དེ་ལ་བྱང་ཆུབ་སེམས་དཔའ་ཞེས་ཟེར་རོ། །དེ་ཡང་ཉོན་མོངས་པའི་སེམས་ཀྱིས་མི་དགེ་བ་ལ་མི་འཇུག་ཅིང་རང་གིས་ཉམས་སུ་མྱོང་བ་ལ་གནོད་
པའི་ལས་མི་བྱེད་པ་ནི་སྤྱོད་པ་ཞེས་བྱའོ། །དེ་ལྟར་ན་ལྟ་བ་དང་། དེ་ལ་གནས་པ་དང་། སྒོམ་པ་དང་། དེ་དང་མི་འགལ་བའི་ལས་སྤྱོད་པ་སྟེ་དེ་དག་དང་ལྡན་པ་ནི་བརྩོན་འགྲུས་ཀྱི་ཁྱད་པར་ཀྱི་སྐྱེ་བ་གཅིག་གམ་གཉིས་ལ་སོགས་པ་ཅི་རིགས་པར་རང་འདོད་པའི་འབྲས་བུ་འཐོབ་པར་གྱུར་པས་
འབྲས་བུ་བསྟན་པ་ནི་བཅོམ་ལྡན་འདས་གསུངས་ཏེ། དེ་ནི་ཐོབ་པར་འདོད་པའི་ཕྱིར་འབྲས་བུའོ། །གནས་སྐབས་ཀྱི་འབྲས་བུའི་དྲང་བའི་དོན་བརྗོད་པའི་སྐབས་སུ་བརྗོད་པར་བྱའོ། །དེ་ལ་བཅོམ་ལྡན་འདས་ཞེས་བྱ་བ་ནི་ཕྱིན་ཅི་ལོག་འཇོམས་པའི་སྐལ་བ་ཅན་ཏེ་བྷ་ག་ཞེས་བྱ་བའི་དོན་ནི་སྐལ་
བ་འམ་འཇོམས་པ་ཡིན་པའི་ཕྱིར་རོ། །གང་འཇོམས་ཤེ་ན་བདུད་བཞི་འཇོམས་པ་སྟེ་སྐྱེ་བ་ནི་ཕུང་པོ་ལྔ་མངོན་པར་ལེན་པས་ན་ཕུང་པོའི་བདུད་དོ། །རྒས་པ་ནི་ལེགས་པ་ལས་ཉམས་པས་ན་ལྷའི་བུའི་བདུད་དོ། །ན་བ་ནི་བདེ་བས་ཕོངས་ཤིང་ཉོན་མོངས་པས་ན་ཉོན་མོངས་པའི་བདུད་དོ། །འཆི་

71-1-227b

བ་ནི་ཉིང་མཚམས་སྦྱོར་བར་འགྱུར་བ་སྟེ་འཆི་བདག་གི་བདུད་དོ། །བདུད་དེ་རྣམས་གང་ལས་བྱུང་ཞེ་ན། ཉོན་མོངས་པས་བསྐུལ་བ་ལས་བྱུང་བའོ། །དེ་ཡང་གང་ལས་བྱུང་ཞེ་ན་བག་ཆགས་དང་བཅས་པའི་སེམས་ལས་བྱུང་བས་ན་སེམས་དེ་ནི་ཉེས་པ་ཐམས་ཅད་འབྱུང་བའི་རྩ་བར་གྱུར་པས། 
རྒྱུད་དོ་ཅོག་གི་རྩ་བ་སྟེ། །ཞེས་གསུངས་སོ། །གཞན་ཡང་དེ་ལེགས་པར་རྟོགས་ཤིང་སེམས་དེའི་རང་བཞིན་ཁོང་དུ་ཆུད་པ་གོམས་པས་བདག་དང་གཞན་ལ་ཕན་པ་དང་བདེ་བ་ཐམས་ཅད་ཀྱང་དེ་ལ་འབྱུང་བས་དེའི་ཕྱིར། རྒྱུད་དོ་ཅོག་གི་རྩ་བ་སྟེ། །ཞེས་བྱའོ། །རྒྱུད་ཐམས་ཅད་དུ་ཡང་དོན་འདི་
རྟོགས་པའི་ཐབས་གཞན་དང་གཞན་གསུངས་པར་ཟད་ཀྱི་དོན་གྱི་གཙོ་བོ་ནི་འདི་ཉིད་ཡིན་པའི་ཕྱིར་ཡང་། རྒྱུད་དོ་ཅོག་གི་རྩ་བ་སྟེ། །ཞེས་གསུངས་སོ། །དེ་ལྟ་བས་ན་གཞོམ་ཞིང་གདུལ་བར་བྱ་བ་ནི་རང་གི་སེམས་ཡིན་ཏེ། མ་བཅོས་ན་ཉེས་པའི་རྒྱུད་དོ་ཅོག་ཡིན་ལ། བཅོས་པ་ནི་
ལེགས་པའི་དཔལ་ཀུན་ཐོབ་པར་བྱེད་པའི་ཕྱིར་རོ། །འོ་ན་གང་གིས་གཞོམ་ཞེ་ན། དེ་ལ་གསུམ་སྟེ། ཇི་ལྟར་གཞོམ་པ་དང་། གང་གཞོམ་པ་དང་། གང་གིས་བཅོམ་པའོ། །ཇི་ལྟར་གཞོམ་པ་ནི་རྟོགས་པའི་དོན་རྗེས་སུ་བསྒྲུབ་པ་མཐར་ཕྱིན་པས་སོ། །གང་གཞོམ་པ་ནི་བདུད་བཞི་ལ་
སོགས་པའི་རྒྱུད་དོ་ཅོག་གི་རྩ་བའོ། །གང་གིས་བཅོམ་པ་ནི་དབང་གི་རིམ་པ་དང་མཐུན་པའི་ཁྲུས་ཀྱིས་སོ། །དེ་ལྟར་བཅོམ་པས་དཔལ་ཀུན་གྱིས་ནི་ལེགས་པར་བརྒྱན་པ་དང་ལྡན་པར་འགྱུར་རོ། །དེ་གང་གིས་བཅོམ་པ་ལ་རྣམ་པར་རྟོག་པ་མེད་ཅིང་གང་ལ་ཡང་མི་གནས་པ་ཞེས་བྱའོ། །རྡོ་རྗེ་ལ་
བཞུགས་ཞེས་བྱ་བ་ནི་སྤངས་པ་དང་ཡེ་ཤེས་ཕུན་སུམ་ཚོགས་པའི་ངོ་བོ་ཉིད་ལས་མི་འགྱུར་ཞེས་བྱ་བའི་ཐ་ཚིག་གོ། །དེའི་ཆེ་བའི་རང་བཞིན་དང་ཡོན་ཏན་ནི་འོག་ནས་མི་ཆོད་པ་ཞེས་བྱ་བ་ལ་སོགས་པས་བསྟན་ཏོ། །དེའི་དོན་ནི་འདི་སྐད་དུ་བསྟན་པར་འགྱུར་ཏེ། གང་གི་བླ་མ་ལ་བརྟེན་ཏེ་དེ་ཁོ་ན་ཉིད་
རྟོགས་པ་མངོན་དུ་བྱས་པའི་འབྲས་བུ་ནི་དབྱིངས་དང་ཡེ་ཤེས་དབྱེར་མེད་པ་ལས་སྨིན་པའི་ཚུལ་དུ་དོན་མཛད་ཅིང་བཞུགས་སོ་ཞེས་རིག་པར་བྱའོ། །དེའི་ཡང་བཅོམ་ལྡན་འདས་ཞེས་བྱ་བས་ནི་ཆད་པའི་མཐའ་བསལ་ཏེ་རྫོགས་པའི་སངས་རྒྱས་ལ་ཟག་པ་མེད་པའི་རང་བཞིན་ཅན་བདེ་བ་ཆེན་པོའི་

71-1-228a

ཡེ་ཤེས་མངའ་བར་བསྟན་ཏོ། །རྡོ་རྗེ་ལ་བཞུགས་ཞེས་བྱ་བས་ནི་རྟག་པའི་མཐའ་བསལ་ཏེ། ཆོས་ཀྱི་དབྱིངས་སྟོང་པ་ཉིད་བསྟན་པའོ། །དེ་ལྟར་ན་ཆོས་ཀྱི་དབྱིངས་སྟོང་པ་ཉིད་དང་ཡེ་ཤེས་རྟོག་པ་མེད་པར་མར་ལ་མར་ཞུགས་པའམ། ཆུ་ལ་ཆུ་ཐིམ་པ་ལྟ་བུར་གྱུར་པ་སྟེ་དེ་ལ་ཆོས་ཀྱི་
སྐུ་ཞེས་ཀྱང་བྱ། སངས་རྒྱས་བཅོམ་ལྡན་འདས་ཞེས་ཀྱང་བྱ། རྡོ་རྗེ་འཆང་ཞེས་ཀྱང་བྱ། བྱང་ཆུབ་ཆེན་པོ་ཞེས་ཀྱང་བྱའོ། །སངས་རྒྱས་ཀྱི་མཐུ་ཞེས་བྱ་བ་ལ་སངས་རྒྱས་ནི་འདས་མ་ཐག་པར་བཤད་པ་ཉིད་དོ། །མཐུ་ནི་ཆོ་འཕྲུལ་ཏེ་ནམ་མཁའི་ཆོ་འཕྲུལ་སྤྲིན་ལ་སོགས་པ་སྣ་ཚོགས་འབྱུང་བ་ལྟ་
བུའོ། །གང་ལ་ནང་དུ་དོན་མི་གཡེང་བའི་ཡན་ལག་ཏུ་ཕྱག་ཏུ་དེ་མཚོན་བྱེད་ཀྱི་ཕྱག་མཚན་བསྣམས་པ་ལ་དེ་སྐད་དུ་བརྗོད་དེ་ལག་ན་རྡོ་རྗེའང་ནང་གི་སྟོང་པའི་ངང་ལ་མི་ཡེངས་པའི་བརྗེད་བྱང་དུ་རྡོ་རྗེ་ལག་ཏུ་ཐོགས་པས་ལག་ན་རྡོ་རྗེའོ། །རྣམ་པར་སྨིན་པ་ལས་གྲུབ་པ་ལས་གྲུབ་པ་དང་ཏིང་ངེ་འཛིན་གྱི་ལུས་
ལ་ནི་ལུས་ཐམས་ཅད་ཅེས་གསུངས་སོ། །རྡོ་རྗེར་བྱིན་གྱིས་བརླབས་ཞེས་བྱ་བ་ནི་སྟོང་པ་ཉིད་སྒོམ་པའི་སྣོད་དུ་རུང་བར་བྱས་ཤིང་སྟོང་པ་ཉིད་ཀྱིས་གདམས་ངག་གནང་བའོ། །རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་བྱ་བ་ནི་ལག་ན་རྡོ་རྗེས་གདམས་པ་དེ་ལྷུར་བླངས་ཏེ་སྒྲུབ་ཅིང་གནས་པའོ། །
ཞེས་རིག་པར་བྱའོ། །གདམས་པ་གང་ཞེ་ན་སྟོང་པ་ཉིད་དང་ལྡན་པའི་ཁྲུས་བཞིའོ། །དེ་དག་ནི་ཡི་གེའི་དོན་ངེས་པའི་དོན་དུ་མདོར་བསྡུས་ཏེ་བཀོད་པའོ།    །ད་ནི་གདམས་ངག་གི་དོན་བརྗོད་པར་བྱའོ། །དེ་ལ་བཞི་སྟེ། གཟུངས་སྔགས་ཀྱི་ཚུལ་ཟློས་པའི་ཕྱིའི་ཁྲུས་དང་། རིག་སྔགས་ཀྱི་ཚུལ་དུ་ཟློས་
པ་ནང་གི་ཁྲུས་དང་། གསང་སྔགས་སུ་ཟློས་པ་གསང་བའི་ཁྲུས་དང་། སྙིང་པོར་ཟློས་པ་དེ་ཁོ་ན་ཉིད་ཀྱི་ཁྲུས་སོ། །ཁྲུས་དེ་དག་ཀྱང་རིམ་པ་བཞིན་དུ་ཉན་ཐོས་དང་། རང་རྒྱལ་དང་། སེམས་ཙམ་པ་དང་། དབུ་མ་པ་རྣམས་ལ་སྦྱར་བར་བྱའོ། །དེ་ལ་དང་པོར་ཕྱིའི་ཁྲུས་ཀྱིས་ནི་ལུས་དག་པར་
བྱེད་ལ། ནང་གི་ཁྲུས་ཀྱིས་ནི་ངག་དག་པར་བྱེད་ཅིང་གསང་བའི་ཁྲུས་ཀྱིས་ནི་སེམས་དག་པར་བྱེད། དེ་ཁོ་ན་ཉིད་ཀྱི་ཁྲུས་རྡོ་རྗེ་ལྟ་བུའི་ཏིང་ངེ་འཛིན་གྱིས་ནི་ལུས་ངག་ཡིད་གསུམ་དབྱེར་མེད་པ་ཉིད་དུ་འགྱུར་རོ། །ད་ནི་ཕྱིའི་ཁྲུས་བྱ་བར་འདོད་པ་རྣམས་ལ་དེ་བཤད་པར་བྱ་སྟེ། དང་པོར་སྔགས་པ་སྙིང་

71-1-228b

རྗེ་ཆེ་ཞིང་བྱ་བ་ལ་མཁས་པས་ཕྱི་དང་ནང་གི་དྲི་མ་དག་པར་བྱས་ཏེ་གོས་སར་པ་བགོས་ལ་མདུན་དུ་བུམ་པ་རིན་པོ་ཆེ་ལས་གྲུབ་པའི་ནང་དུ་སྲོག་ཆགས་མེད་ཅིང་གཙང་བའི་ཆུ་བླུགས་ནས་སྐུའི་རྟགས་སུ་སྨན་ལྔ་དང་། གསུང་གི་རྟགས་སུ་སྤོས་ལྔ་དང་། ཐུགས་ཀྱི་རྟགས་སུ་སྙིང་པོ་ལྔ་དང་། ཕྲིན་ལས་
ཀྱི་རྟགས་སུ་འབྲས་བུ་ལྔ་དང་། ཡོན་ཏན་གྱི་རྟགས་སུ་རིན་པོ་ཆེ་ལྔ་དང་། དེ་བཞིན་ཉིད་ལ་ཉེས་པའི་དྲི་མས་མ་གོས་པའི་རྟགས་སུ་མགུལ་གོས་གཙང་མས་དགབ་ཅིང་བཞག་སྟེ། དེའི་ནང་དུ་སྐད་ཅིག་མ་ལ་བསྐྱེད་པའི་ལྷའི་སྐུ་དང་། གསུང་དང་། ཐུགས་དང་། ཕྲིན་ལས་དང་། ཡོན་ཏན་
རྣམས་མཚོན་པའི་ཕྱིར་རྫས་དེ་རྣམས་བུམ་པར་སྩོལ་ལོ། །སྔགས་པ་བདག་ཉིད་ཀྱང་ཡོན་ཏན་དེ་དག་ཐོབ་པར་བྱ་བའི་ཕྱིར། རྟག་ཏུ་ཡིད་ལ་དྲན་པའི་གཟུངས་ཐག་གདགས་པར་བྱ་སྟེ། སྲད་བུ་དཀར་པོ་གཙང་མ་ལ་སྐུ་གསུང་ཐུགས་ཀྱི་རང་བཞིན་སུམ་སྒྲིལ་དུ་བྱ་བ་བཟུང་སྟེ་མ་ཡེངས་པར་འདི་ལྟར་
བཟླས་པ་དང་བསྒོམ་པ་ལ་སོགས་པ་བྱའོ། །གོང་དུ་བརྗོད་པའི་མཚན་ཉིད་དང་ལྡན་པའི་སྔགས་པས་ཡུད་ཙམ་གྱིས་མདུན་གྱི་ནམ་མཁའ་ལ་སངས་རྒྱས་ཤཱཀྱ་ཐུབ་པ་སྟོང་པ་ཉིད་ལ་མཉམ་པར་གཞག་པ་འཇའ་ཚོན་ལྟ་བུར་སྣང་ལ་རང་བཞིན་མེད་པའི་སྤྲུལ་སྐུ་བཞུགས་པར་བསམས་ལ། རང་
ཉིད་ཡུད་ཙམ་གྱིས་ལག་ན་རྡོ་རྗེར་མོས་པར་བྱའོ། །དེ་ནས་བཅོམ་ལྡན་འདས་ཀྱིས་བདག་ལུས་ཐམས་ཅད་རྡོ་རྗེར་བྱིན་གྱིས་བརླབ་ཏུ་གསོལ་ཞེས་ལན་གསུམ་གསོལ་བ་གདབ་པར་བྱའོ། །གསོལ་བ་བཏབ་པས་ལུས་རྡོ་རྗེར་བྱིན་གྱིས་བརླབས་པས་སྟོང་པ་ཉིད་དུ་གྱུར་པ་ལ་ཅུང་ཟད་གནས་པར་
བྱའོ། །དེ་ནས་སྟོང་པའི་ངང་ལས་རང་ཉིད་ཡུད་ཙམ་གྱིས་རྡོ་རྗེ་རྣམ་འཇོམས་སྔོན་པོ་ཞལ་གཅིག་པ་ཕྱག་གཉིས་པ་གཡས་ན་རྡོ་རྗེ་གདེངས་པ་གཡོན་ན་དྲིལ་བུ་དཀུ་ལ་བརྟེན་ནས་བཞེངས་ཤིང་འགྱིང་བག་བཅས་པའི་ཞལ་ཁྲོ་ཞིང་མཆེ་བ་གཙིགས་པའི་སྐུ་འཇའ་ཚོན་ལྟ་བུར་བསམས་ལ། མདུན་
གྱི་ཁམས་གསུམ་རྣམ་པར་དག་པའི་རང་བཞིན་བུམ་པའི་ནང་དུ་ཡང་ཡུད་ཙམ་གྱིས་རང་དང་མཐུན་པའི་སྐུ་བསྐྱེད་ལ་དེའི་ཐུགས་ཀར་གཟུངས་ཐག་གི་སྣ་ཟུག་པར་བསམས་ལ་སྔགས་ཀྱི་སྒྲ་འབྲུག་ལྟ་བུར་སྟོང་གསུམ་གང་བར་བསམ་ཞིང་ངག་ཏུ་གདོན་པར་བྱའོ། །སྔགས་ཀྱི་ཕྲེང་བ་གཟུངས་

71-1-229a

ཐག་ལ་འཁྲིལ་ཞིང་བུམ་པར་ལྷའི་ཐུགས་ཀར་ཕོག་པར་བསམ་པར་བྱའོ། །གྲངས་ནི་ཐུན་རེ་ལ་བརྒྱ་རྩ་བརྒྱད་ལ་སོགས་པ་ཅི་ནུས་སུ་བཟླས་ནས་དེའི་རྗེས་ལ་བསྟོད་པ་ཡང་བྱ་སྟེ། རྡོ་རྗེ་ཡེ་ཤེས་ཉོན་མོངས་འཇོམས་པའི་སྐུ། །ཐུགས་རྗེ་བྱམས་པས་མ་རིག་སེལ་
བའི་གསུང་། །བདེ་ཆེན་མི་གཡོ་མཆོག་ཏུ་གསལ་བའི་ཐུགས། །རྡོ་རྗེ་རྣམ་པར་འཇོམས་ལ་ཕྱག་འཚལ་བསྟོད། །ཅེས་བསྟོད་པ་ཟིན་པ་དང་ལྷ་འོད་དུ་ཞུ་སྟེ་ཡེ་ཤེས་ཀྱི་བདུད་རྩིར་བསམས་ལ་བདག་དང་གཞན་ལ་ཁྲུས་བྱ་ཞིང་སྔགས་ཀྱི་མཐར་ཕྲིན་ལས་ཀྱི་སྤེལ་བ་དང་བཅས་པར་བཟླའོ། །
དེ་ནི་ཕྱིའི་ཁྲུས་ཏེ་ལུས་དག་པ་ཕུང་པོ་ལྷག་མ་མེད་པའི་ཉན་ཐོས་ཀྱི་བྲས་བུ་ཐོབ་པར་འགྱུར་རོ།    །དེ་ནས་ནང་གི་ཁྲུས་བཤད་པར་བྱའོ། །བུམ་པ་ནི་རང་གི་ལུས་ཏེ་ཁམས་གསུམ་རྣམ་པར་དག་པའི་གཞལ་ཡས་ཁང་ངོ་། །རྫས་ནི་དོན་སྙིང་རྣམ་ལྔ་དང་། སྣོད་རྣམ་དྲུག་དང་། ཕུང་པོ་ལྔ་དང་དབང་
པོ་ལྔ་དང་། འབྱུང་བ་བཞི་ལ་རིམ་པ་བཞིན་དུ། སྨན་དང་། སྤོས་དང་། འབྲུ་དང་། སྙིང་པོ་དང་། རིན་པོ་ཆེ་རྣམས་སུ་མོས་པར་བྱས་ལ་སྙིང་གར་ཡུད་ཙམ་གྱིས་ལྷ་བསྐྱེད་པའི་བར་དུ་གསོལ་བ་གདབ་པ་ལ་སོགས་པ་སྔ་མ་བཞིན་ནོ། །རང་ཉིད་ཟས་དཀར་གསུམ་ལ་སོགས་པ་གཙང་མ་ཟོས་པ་ནི་
ཆུའོ། །གོས་གཙང་མ་གྱོན་པ་ནི་མགུལ་ཆིངས་སོ། །དྲན་པ་མ་ཡེངས་པ་ནི་གཟུངས་ཐག་གོ། །སྔགས་ནི་སྒྲ་མི་ཆེ་བར་བཟླས་པར་བྱ་སྟེ་རིག་སྔགས་ཞེས་བྱའོ། །ཟིན་པ་དང་སྙིང་གའི་ལྷ་ལ་སོགས་པ་ཞུ་ནས་རྡོ་རྗེ་ནོར་བུ་ནས་བྱུང་བའི་རང་འབྱུང་གི་བདུད་རྩིས་བཀྲུ་བར་བྱའོ། །དེ་ནས་ཁྲུས་
བཤད་དེ། དེས་ནི་ཕྱི་ཡུལ་ལ་རྒྱུ་བ་བཀག་པས་ཆོས་ཀྱི་བདག་གཟུང་བའི་ཕྱོགས་གཅིག་ལ་བདག་མེད་པ་རྟོགས་པས་ངག་དག་པ་སྔགས་ཀྱི་ནུས་པ་ཐོབ་ནས་རང་སངས་རྒྱས་ཀྱི་འབྲས་བུ་མི་དམའ་བ་ཉིད་ཐོབ་པར་འགྱུར་རོ།    །དེ་ནས་གསང་བའི་ཁྲུས་བརྗོད་པར་བྱའོ། །གསོལ་བ་གདབ་པ་
ལ་སོགས་པ་སྔ་མ་ལྟར་བྱས་ནས་ཐམས་ཅད་སེམས་ཀྱི་རང་བཞིན་ཡིན་ནོ་ཞེས་ལྷག་པར་མོས་པར་བྱས་ལ། སེམས་དེའི་རང་བཞིན་ནི་འོད་གསལ་བ་ཡིན་མོད་ཀྱི་གནས་སྐབས་ཉོན་མོངས་པས་བསྒྲིབས་པ་དེ་གསལ་བའི་དོན་དུ་སེམས་དེ་ལུས་ངག་ཡིད་གསུམ་གྱི་རྣམ་པ་ཡི་གེ་ཨོཾ་ཨཱཿཧཱུཾ་

71-1-229b

གསུམ་དུ་བསམས་ལ་ཡི་གེ་གསུམ་ལས་སྔགས་ཀྱང་གསང་སྔགས་ཀྱི་ཚུལ་དུ་ལན་བདུན་ཡིད་ཀྱིས་བརྗོད་དེ་ཡི་གེ་གསུམ་པོ་རིམ་གྱིས་ཨོཾ་དང་ཨཱཿདང་ཧཱུཾ་ལ་འདུས་ཏེ་ཧཱུཾ་དེ་ཡང་ནཱ་དའི་བར་དུ་ཐིམ་སྟེ། ནཱ་ད་དེ་མར་མེ་ལྟར་རབ་ཏུ་གསལ་བར་འགྱུར་བས་ནི་སེམས་ཀྱི་སྒྲིབ་པ་དག་པར་བྱས་ནས་
སེམས་ཡོངས་སུ་དག་པ་སེམས་ཙམ་གྱི་འབྲས་བུ་ཐོབ་སྟེ་གསང་བའི་ཁྲུས་ཞེས་བྱའོ། །ལྡང་བར་འདོད་ན་ལུས་ངག་ཡིད་གསུམ་སྐུ་གསུང་ཐུགས་ཀྱི་རང་བཞིན་དུ་དབྱེར་མེད་པ་ལ་མོས་པས་སྤྱོད་ལམ་བྱའོ།    །ད་ནི་དེ་ཁོ་ན་ཉིད་ཀྱི་ཁྲུས་བརྗོད་པར་བྱའོ། །ཆོས་ཐམས་ཅད་སེམས་སུ་ལྷག་
པར་མོས་པར་སེམས་ཉིད་ཡི་གེ་གསུམ་དུ་བསམས་ལ་སྐུ་གསུམ་དུ་མོས་པ་བྱ་ཞིང་ཁམས་གསུམ་པ་རྣམས་ཀྱང་ཡི་གེ་གསུམ་ལས་བྱུང་ཞིང་དེ་ལ་སླར་ཐིམ་པར་གྱུར་པའོ་ཞེས་མོས་པར་བྱའོ། །དེ་ནས་ཡི་གེ་ཨོཾ་ནི་ཨཱཿ་ལ་ཐིམ་པས་ལོངས་སྤྱོད་རྫོགས་པའི་སྐུའི་རང་བཞིན་ངག་ནི་སྒྱུ་མ་ལྟ་བུར་
མི་བདེན་ཞེས་མོས་པ་བྱའོ། །དེ་མ་ཐག་ཏུ་ཧཱུཾ་ཡང་ཨཱཿ་ལ་ཐིམ་པས་སྤྲུལ་པའི་སྐུའི་རང་བཞིན་ལུས་ཀྱང་སྒྱུ་མ་ལྟ་བུ་སྟེ། ཡང་དག་པར་མ་གྲུབ་ཅེས་བསམས་ཞིང་དེ་མ་ཐག་ཏུ་ཡི་གེ་ཨཱཿ དེ་ཡང་གསལ་བར་བལྟས་ཏེ། ངག་ཏུ་ཡང་ཨཱཿཞེས་བྱ་བ་ཉི་ཤུ་རྩ་གཅིག་བརྗོད་པ་ནི་སྙིང་པོའི་ཚུལ་
དུ་སྔགས་བཟླས་པའོ། །དེ་ལྟར་བརྗོད་པས་བརྗོད་ཡལ་དུ་གྱུར་ཏེ་དེ་ནས་ཨཱཿ་ལ་སེམས་གསལ་བར་གཏད་པས་སེམས་ཉིད་རང་བཞིན་གྱིས་མ་སྐྱེས་པ་རྐྱེན་གྱིས་མི་འགག་པའི་ཆོས་ཉིད་བརྗོད་དུ་མེད་པ་ངང་དུ་གནས་ཏེ། ཨཱའི་མིང་ཙམ་ཡང་མི་དམིགས་པ་ནི་རྡོ་རྗེ་ལྟ་བུའི་ཏིང་ངེ་འཛིན་ཏེ་ནམ་
མཁའ་ལྟ་བུ་ཟག་པ་མེད་པའི་བདེ་བ་དང་སྤྲོས་པ་མེད་པའི་ཆོས་ཉིད་རོ་གཅིག་ཏུ་གྱུར་པ་བརྗོད་དུ་མེད་པའི་ཡེ་ཤེས་ཀྱི་ངང་ལ་ཇི་སྲིད་འདོད་པས་གནས་པར་བྱའོ། །དེ་ནི་རྡོ་རྗེ་ལྟ་བུའི་ཏིང་ངེ་འཛིན་ཡིན་པས་ན་རྡོ་རྗེའི་ཏེང་ངེ་འཛིན་ལ་སྙོམས་པར་ཞུགས་སོ་ཞེས་ཀྱང་གསུངས་སོ། །དེ་ནི་དེ་ཁོ་ན་ཉིད་ཀྱི་ཁྲུས་
ཏེ་སྒོ་གསུམ་དག་པ་དབྱེར་མེད་པ་དབུ་མའི་ལམ་མཐར་ཕྱིན་པའི་ཆོས་ཀྱི་སྐུ་ཐོབ་པ་ཞེས་བྱའོ། །ཏིང་ངེ་འཛིན་ལས་ལྡང་བར་འདོད་ན་ཡང་སྐད་ཅིག་ལས་ཁམས་གསུམ་པའི་ངོ་བོ་ཨ་ལས་སྐུར་མོས་པ་བྱ་སྟེ་སྤྱོད་ལམ་བྱའོ། །ཏིང་ངེ་འཛིན་དེའི་ཆེ་བ་ནི་དེ་ནས་ཞེས་བྱ་བ་ནས་རབ་ཏུ་སྨྲས་སོ་

71-1-230a

ཞེས་བྱ་བའི་བར་དུ་གསུངས་སོ། །དེ་ལྟར་ན་གདམས་ངག་གི་དོན་བརྗོད་པའོ།    །ད་ནི་ཡི་གེའི་དོན་བརྗོད་པར་བྱ་སྟེ། དེ་ལ་དང་པོར་རེ་ཞིག་ངེས་པའི་དོན་བཤད་པར་བྱའོ། །དེ་ནས་སངས་རྒྱས་དང་བྱང་ཆུབ་སེམས་དཔའི་མཐུས་ཞེས་བྱ་བ་ལ་སོགས་པ་ནི་རྟོགས་པར་སླའོ། །
རྡོ་རྗེ་ཞེས་བྱ་བ་ནི་སྟོང་པ་ཉིད་ཀྱི་ཏིང་ངེ་འཛིན་ཏོ། །གལ་ཏེ་དེ་ནི་ཁྲོ་བར་མི་འཐད་དོ་ཞེ་ན་སྤྲོས་པ་དང་མཚན་མ་ལ་སོགས་པ་འཁོར་བའི་ཆོས་ཐམས་ཅད་ལ་སྟོང་པ་ཉིད་དེ་ཁྲོ་ཞིང་གཏུམ་ལ་དེ་དག་འཇོམས་པ་ནི་དེའི་ཕྱིར་དེ་ལ་ཁྲོ་བོ་ཞེས་གསུངས་སོ། །ཆོས་ཐམས་ཅད་སྟོང་པ་ཉིད་ཆོས་ཉིད་སྐྱེ་བ་མེད་པའི་
ལས་བྱུང་བས་ན་རྡོ་རྗེ་ཁྲོ་བོ་ལས་བྱུང་བ་ཞེས་གསུངས་སོ། །གང་འབྱུང་ཞེ་ན་རྡོ་རྗེ་སྙིང་པོ་སྟེ། ཐམས་ཅད་ལ་དེ་བཞིན་གཤེགས་པའི་སྙིང་པོའི་ཁྱད་པར་གསུངས་པ་ཡིན་ནོ། །འདིར་བསྡུས་པའི་དོན་ནི་འདི་ཡིན་ཏེ་འཁོར་བ་དང་མྱ་ངན་ལས་འདས་པའི་དངོས་པོ་ཐམས་ཅད་ནི་རྒྱུད་དོ་ཅོག་གི་རྩ་བ་རང་གི་སེམས་ལས་
བྱུང་ལ། སེམས་དེ་ཡང་ཤིན་ཏུ་རྟོགས་པར་དཀའ་བས་སོ་སོ་སྐྱེ་བོ་ནས་བྱང་ཆུབ་སེམས་དཔའ་ལ་སོགས་པའི་བར་དུ་རྟོགས་པའི་བྱེ་བྲག་ཐ་དད་པ་སྣ་ཚོགས་འབྱུང་ངོ་། །དེ་ཡང་དམུས་ལོང་གིས་རྟ་དང་གླང་པོ་ལ་དཔྱད་པ་བཞིན་དུ་དེ་དག་གིས་ཀྱང་ཆ་ཤས་རེ་རེ་ཙམ་ལ། རང་རང་གི་གྲུབ་མཐའ་དང་
ལྟ་བར་འདོགས་པས་ཟད་དེ་གྲུབ་མཐའ་ཐ་དད་ཀྱང་སེམས་ཉིད་དེ་བཞིན་ཉིད་ལ་ནི་ཐ་དད་པའམ་རྣམ་པར་དབྱེ་བ་ཡོད་པ་མ་ཡིན་ཏེ་ཇི་སྐད་དུ། ཆོས་ཀྱི་དབྱིངས་ལ་དབྱེར་མེད་ཕྱིར། ཞེས་བྱ་བ་ལ་སོགས་པ་གསུངས་པའི་ཕྱིར་རོ། །སེམས་དེ་ཡང་རྒྱུད་དོ་ཅོག་གི་རྩ་བ་ཇི་ལྟར་ཡིན་ཞེ་ན་ལུང་ལས་
ཆོས་ཐམས་ཅད་སེམས་ཀྱི་སྤྲུལ་པའོ། །ཞེས་བྱ་བ་ལ་སོགས་པའི་ལུང་དང་རིགས་པ་མང་མོད་ཀྱི། འདིར་ནི་བླ་མའི་གདམས་ངག་ལ་གཙོ་བོ་ཡིན་ནོ། །གལ་ཏེ་གདམས་པ་ལྟར་ན་ཡང་སེམས་ཅིའི་ཕྱིར་ན་རྒྱུད་དོ་ཅོག་གི་རྩ་བ་ཡིན་སྙམ་པ་ལ། ཆོས་ཐམས་ཅད་ནི་སེམས་སུ་འདུས་ལ་སེམས་ཀྱི་
རང་བཞིན་ལེགས་པར་མ་རྟོགས་པས་འཁོར་བའི་རྒྱ་མཚོ་ཡང་བྱུང་ལ། རྟོགས་ཤིང་གོམས་པས་མྱ་ངན་ལས་འདས་པའི་བདེ་བ་ཡང་བྱུང་བའི་ཕྱིར་སེམས་ནི་རྒྱུད་དོ་ཅོག་གི་རྩ་བ་ཡིན་ནོ། །མ་རྟོགས་པ་ལས་འཁོར་བ་ཇི་ལྟར་འབྱུང་ཞེ་ན། མ་རིག་པའི་རྐྱེན་གྱིས་འཁོར་བ་ཞེས་བྱ་བ་སྟེ། དེའི་

71-1-230b

རྒྱུ་དང་། རྐྱེན་དང་། རང་བཞིན་དང་། དབྱེ་བའོ། །སེམས་དེ་ལེགས་པར་རྟོགས་ཤིང་བསྒྲུབ་པ་ལས་མྱ་ངན་ལས་འདས་པའི་བདེ་བ་ཇི་ལྟར་འབྱུང་ཞེ་ན། རང་བྱུང་གི་ཡེ་ཤེས་ཆེན་པོའི་རྐྱེན་གྱིས་མྱ་ངན་འདས་པ་ཞེས་བྱ་བ་སྟེ། རྒྱུ་དང་རྐྱེན་དང་རང་བཞིན་དང་དབྱེ་བའོ། །དེ་དག་ཞིབ་ཏུ་བླ་མའི་ལུང་
ལས་ཤེས་པར་བྱའོ། །དེ་ལྟར་ན་རྡོ་རྗེ་ཁྲོ་བོ་ལས་བྱུང་བའི་རྡོ་རྗེ་སྙིང་པོ་སེམས་ཀྱི་དེ་བཞིན་ཉིད་དེ་ལས་རྒྱུན་དུ་གནས་ཤིང་བརྟན་པ་ཐོབ་པས་ནི་རྣམ་པར་རྟོག་པས་བར་དུ་མི་ཆོད་པས་ན་མི་ཆོད་པ་ཞེས་བྱ་སྟེ་ཆོས་ཀྱི་སྐུའོ། །འདུས་མ་བྱས་པར་ལྷུན་གྱིས་གྲུབ་པའི་རྡོ་རྗེ་ལྟ་བུའི་སྐུ་ཡིན་པའི་ཕྱིར་རྐྱེན་གྱིས་མི་
ཤིགས་པའོ། །ཡང་དག་པའི་དོན་ལ་སྡུ་བ་མེད་པས་ན་བདེན་པའོ། །དོན་རྟོགས་པ་དང་ཐོག་པར་དཀའ་བས་ན་སྲ་བའོ། །རྡོ་རྗེ་སྙིང་པོ་དེ་ངན་སོང་དུ་གནས་པའི་ཚེ་དམན་པར་མི་འགྱུར་ལ་མྱ་ངན་ལས་འདས་པའི་དུས་ན་བཟང་བར་མི་འགྱུར་བས་ན་བརྟན་པའོ། །གང་གི་རྡོ་རྗེ་སྙིང་པོ་དེ་རྟོགས་པས་
ནམ་མཁའ་ལྟར་ཅིའི་ངོ་བོར་ཡང་མ་གྲུབ་པས་ན་ཐོགས་པ་མེད་པའོ། །སྟོང་པ་ཉིད་ནམ་མཁའ་ལྟ་བུ་དེ་ལ་གང་གིས་ཀྱང་མི་ཚུགས་ཤིང་གླགས་མི་རྙེད་པས་ན་ཐམས་ཅད་དུ་མ་ཕམ་པའོ། །རྡོ་རྗེ་གནས་བདུན་པོ་དེས་ནི་ཕལ་ཆེར་བདག་གི་དོན་ཡུལ་ཆོས་ཀྱི་དབྱིངས་བསྟན་ཏོ། །ད་ནི་ཕལ་ཆེར་གཞན་གྱི་
དོན་གྱི་དབང་དུ་མཛད་ནས་ཡེ་ཤེས་ཀྱི་ཁྱད་པར་གསུངས་པ་ནི་སེམས་ཅན་ཐམས་ཅད་སྐྲག་པར་བྱེད་པ་ཞེས་བྱ་བ་ལ་སོགས་པ་ཕྲིན་ལས་བཅོ་བརྒྱད་ནི་དྲང་བའི་དོན་ལྟར་ན་འཁྲུལ་འཁོར་བྲིས་ཏེ་སྒྲ་ཇི་བཞིན་ནོ་ཞེས་འཆད་པར་འགྱུར་རོ། །འདིར་ངེས་པའི་དོན་ལྟར་ན་བཅོ་བརྒྱད་པོ་དེ་ནི་ལམ་གྱི་རིམ་
པས་ནི་སྟོང་པ་ཉིད་བཅོ་བརྒྱད་ཡིན་ཞིང་འབྲས་བུའི་དུས་ན་ནི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དུ་རིག་པར་བྱའོ། །དེ་ལ་སེམས་ནི་རང་རིག་པ་དེ་ལུས་ལ་བརྟེན་པས་ན་སེམས་ཅན་ནོ། །ཐམས་ཅད་ནི་ཇི་སྙེད་པ་མ་ལུས་པའོ། །སྐྲག་པར་བྱེད་ཅེས་བྱ་བ་ནི་སྟོང་པ་ཉིད་ཀྱི་ཡེ་ཤེས་ཀྱི་མེས་
རང་གི་སེམས་ཀྱི་ཉོན་མོངས་པ་སྐྲག་པའོ། །སེམས་ཅན་ནི་སྔར་བཞིན་ནོ། །འཇིལ་བ་ནི་ཉོན་མོངས་པ་མངོན་དུ་རྒྱུ་བ་རྣམས་སོ། །རིག་སྔགས་ནི་ཕྱིའི་ཡུལ་རྣམས་སོ། །གཅོད་པ་ནི་སེམས་ལས་གཞན་པའི་དོན་མ་གྲུབ་པར་རྟོགས་པའོ། །རིག་སྔགས་ནི་སྔ་མ་བཞིན་ཏེ་གནོན་པའི་ཡུལ་ལ་

71-1-231a

འཕྲོ་བ་བཀག་པའོ། །ལས་ནི་འབད་པ་དང་རྩོལ་བའོ། །སྟོང་པ་ཉིད་ལ་འབད་ཅིང་སྒྲུབ་པའི་ལས་བྱེད་པས་ན་འཇོམས་པའོ། །ད་ལྟར་བ་གཞན་པའི་ལས་སྔོན་གྱི་ལས་སོ། །འཇིག་པ་ནི་ཟད་ཅིང་ཞི་བར་བྱེད་པའོ། །གདོན་ནི་རྣམ་པར་རྟོག་པའོ། །ཐམས་ཅད་ནི་བཟང་ངན་ལ་
སོགས་པའོ། །བརླག་པ་ནི་དོན་རྟོགས་པས་རང་བཞིན་གྱུར་པའོ། །གདོན་ནི་སྔ་མ་བཞིན་ནོ། །ཐར་པ་ནི་སླར་མི་སྐྱེ་བ་སྐྱེ་སྟེ་གཏན་སྤངས་པའོ། །འབྱུང་པོ་ནི་དབུགས་རྒྱུ་རླུང་ལ་སོགས་པ་འབྱུང་བ་བཞིའོ། །འགུགས་པ་ནི་རླུང་ལ་སོགས་པ་སྟེ་སྟོང་པའི་ཏིང་ངེ་འཛིན་ལ་གནས་པའི་སྟོབས་ཀྱིས་
རང་བཞིན་གྱི་རྒྱུ་བ་ཆད་དེ་བསྟན་པའོ། །རིག་སྔགས་ཡུལ་རྣམས་སོ། །ལས་ཐམས་ཅད་ནི་སྣང་བར་བསྒྱུར་བ་སྟེ་འབྱུང་བ་ལ་དབང་ཐོབ་པས་སོ། །མ་གྲུབ་པ་ནི་ཏིང་ངེ་འཛིན་མི་གསལ་བའོ། །གྲུབ་པར་བྱེད་པ་ནི་དེ་ཁོ་ན་ཉིད་ལ་སོགས་པའི་ཁྲུས་ཀྱིས་དེ་བཞིན་ཉིད་གསལ་ཞིང་བརྟན་པའོ། །གྲུབ་པ་
ནི་ཏིང་ངེ་འཛིན་ཉིད་དོ། །ཆུད་མི་ཟ་བ་ནི་སླར་མི་ཉམས་པའོ། །ཆོས་སྐུ་ལས་གཟུགས་སྐུར་འཆར་ཞིང་དེས་ཡིད་ལ་བསམས་པ་ལྟར་ཕན་འདོགས་པས་ན་འདོད་པ་ཐམས་ཅད་རབ་ཏུ་སྦྱིན་པའོ། །ཏི་ངེ་འཛིན་དེ་ལས་སངས་རྒྱས་ཀྱི་ཆོས་ཐམས་ཅད་འབྱུང་བས་ན་འདོད་པ་ཐམས་ཅད་སྦྱིན་པའོ། །སེམས་
ཅན་ནི་གདུལ་བྱའོ། །སྲུང་བ་ནི་འཁོར་བ་ལས་སོ། །ཇི་ལྟར་སྲུང་ཞེ་ན་ཉོན་མོངས་པ་བཞི་དང་། རྗེས་སུ་མཐུན་པའི་ཕྲིན་ལས་བཞིས་སོ། །གང་ཞེ་ན་འདོད་ཆགས་ཅན་དང་ཞེ་སྡང་ཅན་དང་། གཏི་མུག་ཅན་དང་ཆ་མཉམ་པ་ལ་ཞི་བ་དང་། མངོན་སྤྱོད་དང་དབང་དང་རྒྱས་པ་རྣམས་གོ་རིམས་ལྟར་སྦྱར་
རོ། །རེངས་པར་བྱེད་པ་ནི་ཞེ་སྡང་ཅན་ལའོ། །རྨུགས་པར་བྱེད་པ་ནི་གཏི་མུག་ཅན་ལའོ། །གཞན་ཡང་ཞི་བ་ནི་དེ་བཞིན་ཉིད་དང་ཆོས་ཀྱི་དབྱིངས་སོ། །རྒྱས་པ་ལ་ནི་མངོན་དུ་གྱུར་པའི་ཆོས་ཀྱི་སྐུའོ། །རེངས་པ་ནི་མངོན་སྤྱོད་དེ་བདེ་བ་ཆེན་པོ་ལ་མངོན་པར་ལོངས་སྤྱོད་པས་ན་ལོངས་སྤྱོད་རྫོགས་པའི་སྐུའོ། །
རྨུགས་པ་ནི་ཡེ་ཤེས་ལ་སོགས་པ་མི་མངའ་བའི་ཕྱིར་སྤྲུལ་སྐུར་རིག་པར་བྱའོ། །ཞི་བ་ནི་ཐབས་གང་གིས་སེམས་ཅན་གྱི་རྒྱུ་བ་རགས་པ་རྣམས་ཞི་ནས་གནས་པའོ། །རྒྱས་པ་ནི་དེ་ལས་ལྷག་པའི་མྱོང་བ་མཐོང་བ་འམ་རྟོགས་པའོ། །རེངས་པ་ནི་ཞི་བར་གནས་ཤིང་ལྷག་པས་མཐོང་བས་སེམས་

71-1-231b

ཉིད་མྱོང་བར་མི་འགྱུར་བས་དེའི་ཕྱིར་རེངས་པ་ཞེས་བྱའོ། །དེའི་ངང་ལ་གནས་ན་དམིགས་པའི་ཡུལ་ཅི་ཡང་མ་གྲུབ་ཅིང་མཐོང་བའམ་ཐོས་པའམ་རྟོགས་པའམ་བྱེ་བྲག་ཕྱེད་པའི་དངོས་པོར་འགྱུར་བ་ཅིའང་མེད་པའི་ཕྱིར་རྨུགས་པ་ཞེས་བྱ་སྟེ། སྟོང་པ་ཉིད་ཀྱི་ངང་ལ་གནས་པ་ཞེས་བྱ་བའི་དོན་ཏོ། །
གསང་སྔགས་ཀྱི་མཐུ་ཆེན་པོ་ཞེས་བྱ་བ་ནི་སྔར་བརྗོད་པའི་སྟོང་པ་ཉིད་ཆོས་ཐམས་ཅད་ཀྱི་རང་བཞིན་ཏེ་དེ་ནི་ངོ་བོ་ཉིད་ཀྱིས་གསང་བའམ་སྦས་པ་ལྟ་བུར་གནས་ཤིང་རྟོགས་པར་དཀའ་བས་གསང་སྔགས་ཞེས་བྱའོ། །དེའི་མཐུ་ནི་ཆོས་ཉིད་བདེན་པའི་ནུས་པའོ། །ཆེན་པོ་ནི་དངོས་པོ་དང་མཚན་མའི་
ཚོགས་ཆེན་པོ་ཡང་འཇོམས་ལ་མཚན་མས་སླར་གཞོམ་པ་འམ་གླགས་མི་རྙེད་པ་སྟེ། ཇི་ལྟར་ཉི་མས་མུན་པ་འཇོམས་ཀྱི་མུན་པ་དེ་ལྟར་མ་ཡིན་པ་བཞིན་ནོ། །རབ་ཏུ་སྨྲས་ཞེས་བྱ་བ་ནི་དོན་ཟབ་མོ་རྟོགས་པའི་ཡན་ལག་ཏུ་རེ་ཤིག་ཚིག་དང་ཡི་གེ་གསུངས་པར་ཟད་དེ། རྡོ་རྗེ་སྙིང་པོ་འམ་ཡང་དག་
པའི་དོན་ལ་ནི་སྨྲ་བའམ་བསྟན་པར་མི་ནུས་ཏེ་རང་རིག་པའི་ཡེ་ཤེས་ཀྱི་ངོ་བོ་ཡིན་པའི་ཕྱིར་རོ། །ན་མོ་རཏྣ་ཏྲ་ཡཱ་ཡ་ཞེས་བྱ་བ་ལ་སོགས་པའི་གསང་སྔགས་ཀྱི་དོན་ནི་བྱིན་གྱི་རླབས་ཆུང་བར་འགྱུར་བས་ན་མ་ཕྱེའོ། །དེ་ལྟར་བསྟན་པའི་དོན་དེས་ཅིར་འགྱུར་ཞེ་ན། རྒྱུད་དོ་ཅོག་གི་རྩ་བ་མ་རིག་པ་ལ་སོགས་པའི་ཉེས་པ་རྣམས་ཞི་ནས་
ཉེས་པའི་འབྲས་བུ་སྡུག་བསྔལ་ཐམས་ཅད་མི་འབྱུང་སྟེ་དེ་ལ་དགོངས་ནས། སྡིག་པ་ཐམས་ཅད་བྱང་བྱས་ནས། །སྡུག་བསྔལ་ཐམས་ཅད་མེད་པར་བྱེད། །ཅེས་གསུངས་སོ། །འདི་སྐད་དུ་གསུངས་པ་ཡིན་ཏེ་གང་ཞིག་སྐྱེ་བ་ལ་སོགས་པའི་སྡུག་བསྔལ་འདི་དག་ནི་སྔོན་རང་རང་གི་སྡིག་པ་མི་དགེ་བ་སྤྱད་པ་ལས་བྱུང་བས་ཏེ་སྡིག་པ་མི་
དགེ་བའི་ལས་དེ་ཡང་སེམས་ལ་གནས་པས་ན་གང་གིས་སེམས་ཀྱི་རང་བཞིན་འོད་གསལ་བ་རྟོགས་པ་དེའི་ཚེ་བག་ཆགས་ཀྱི་དྲི་མ་དག་པས་སྡིག་པ་ཐམས་ཅད་དག་པར་གྱུར་ནས་དེའི་འབྲས་བུ་ལས་ཀྱི་རྣམ་སྨིན་སྡུག་བསྔལ་ལ་སོགས་པ་མྱོང་བར་འགྱུར་བ་ཐམས་ཅད་ཀྱང་མེད་པར་བྱེད་དོ་ཞེས་བསྟན་པར་
འགྱུར་རོ། །ད་ནི་འཇིག་རྟེན་དང་འཇིག་རྟེན་ལས་འདས་པའི་འབྲས་བུ་ཕུན་སུམ་ཚོགས་པ་སྟོན་ཏེ། འདིར་གསང་སྔགས་ཀྱི་འབྲས་བུ་ཉན་ཐོས་ལ་སོགས་པ་ཕུང་པོ་ལྷག་མ་མེད་པའི་མྱ་ངན་ལས་འདས་པ་ཐོ་རངས་ཀྱི་མར་མེ་ཤི་བ་ལྟར་མི་འདོད་པས་ཡོན་ཏན་གྱི་དབང་དུ་མཛད་དེ། དཔལ་ཀུན་གྱིས་ནི་ལེགས་

71-1-232a

པར་བརྒྱན། ཞེས་གསུངས་སོ། །དེས་ནི་ངེས་པའི་དོན་རྣམས་བཤད་ཟིན་ཏོ།    །ད་ནི་དྲང་བའི་དོན་བརྗོད་པར་བྱ་སྟེ། དེ་ལ་ཕྲིན་ལས་ཀྱི་བྱེ་བྲག་བཅོ་བརྒྱད་དོ། །མདོར་བསྡུས་ན་ཕྲིན་ལས་བཞིའོ། །དེ་ལ་ལྷའི་རྣལ་འབྱོར་དང་ལྡན་པས་ལས་འདི་དག་བསྒྲུབ་པར་བྱའི་སྟོང་པ་ཉིད་ཀྱིས་མ་
ཡིན་ནོ། །དེ་ཡང་ཆོས་གསུམ་དང་ལྡན་པའི་སྔགས་པས་འགྲུབ་པར་རྗེ་བཙུན་གསུངས་ཏེ་དེ་གང་ཞེ་ན་རྟོགས་པའི་གདེངས་དང་ལྡན་པ་དང་ལྷ་ལས་སུ་རུང་བ་དང་། བཟླས་པ་མཐར་ཕྱིན་པའོ། །དེ་ལྟ་བུའི་སྔགས་པས་སྒྲུབ་པ་ནི་སྙིང་བརྩེ་བ་སྔོན་དུ་འགྲོ་བས་བྱའི་གཞན་དུ་ན་དམ་ཚིག་དང་འགལ་
བར་འགྱུར་བའི་ཕྱིར། དེ་ལ་དང་པོར་ལས་བཅོ་བརྒྱད་ལ་ཕྲིན་ལས་བཞིའི་འཁྲུལ་འཁོར་བྲི་བར་བྱ་སྟེ་འཁྲུལ་འཁོར་གྱི་རྒྱུ་དང་དུས་དང་ཁ་དོག་དང་དབྱིབས་སོ། །དེ་ལ་ཞི་བའི་འཁྲུལ་འཁོར་ནི་རྒྱུ་རས་ལ་སོགས་པ་ལ་འོ་མ་དང་ཙནྡན་ལ་སོགས་པས་སོ། །དུས་སྔ་དྲོའོ། །མདོག་དཀར་པོའོ། །དབྱིབས་ཟླུམ་པོ་
སྟེ་པདྨ་རྒྱས་པ་ལྟ་བུའོ། །རྒྱས་པའི་འཁྲུལ་འཁོར་ནི་རྒྱུ་ཤིང་ཤུན་ལ་སོགས་པ་ལ་གི་ཝང་ལ་སོགས་པས་སོ། །དུས་ཉ་འམ་ཕྱེད་གང་དུའོ། །མདོག་སེར་པོའོ། །དབྱིབས་གྲུ་བཞི་པའོ། །དབང་གི་རྒྱུ་ནི་རས་སམ་ཤིང་ཤུན་ལ་མཚལ་དང་ལི་ཁྲི་ལ་སོགས་པས་སོ། །དུས་ཕྱི་དྲོའོ། །མདོག་དམར་པོས་སོ། །བྱིབས་
ནི་ཟླ་གམ་མོ། །མངོན་སྤྱོད་ཀྱི་རྒྱུ་ནི་རོ་རས་སམ་ཞིང་ཆེན་ལ་དུག་དང་ཁྲག་གིས་བྲིས་པའོ། །དུས་ནི་དགྲ་ལ་མཚན་ཕྱེད་ནའོ། །བགེགས་ལ་ཉིན་ཕྱེད་ནའོ། །དབྱིབས་དང་ཁ་དོག་ནི་ནག་པོ་གྲུ་གསུམ་མོ། །སྔགས་དང་ཏིང་ངེ་འཛིན་ནི་ལུང་ལས་ཤེས་པར་བྱའོ། །སེམས་ཅན་ནི་གང་ཡང་རུང་
བའོ། །དབང་པོ་ནི་རྣམ་པར་ཤེས་པ་སྐྱེ་བའི་རྟེན་མིག་ལ་སོགས་པའོ། །ཉམས་པ་ནི་མི་གསལ་བའམ་དམན་པར་གྱུར་པའོ། །འོག་ནས་གནོད་པ་དང་ཞེས་བྱ་བ་ཐམས་ཅད་ལ་སྦྱར་ཏེ་དབང་པོ་ཉམས་པའི་གནོད་པ་དང་ཞེས་བྱ་བར་རིག་པའོ། །གནོད་པ་དེ་དག་ཁྲུས་བཞི་པོ་སྔར་བསྟན་པ་ལ་
གནས་པས་ཞི་བར་ཞེས་རིག་པར་བྱའོ། །ཚུལ་ཇི་ལྟར་གནས་པས་ཞེ་ན་སྒྲུབ་པ་པོ་གང་དག་ཡིད་དགེ་བ་ནི་ཀུན་ལ་ཕན་པར་འདོད་པས་སོ། །སེམས་དང་བ་ནི་ཆོས་ལ་གུས་པ་དང་སྤྲོས་པས་སོ། །དམ་ཚིག་དང་སྡོམ་པ་མ་ཉམས་པ་ན་གཙང་མའི་གོས་ཀྱིས་རབ་བརྒྱན་ཏེ། ཞེས་བྱའོ། །མཉན་པར་བྱ་

71-1-232b

ཞེས་འབྲེལ་ཏེ་གང་ཞེ་ན་མདོ་སྡེ་དམ་པའོ། །ཇི་ལྟ་བུ་ཞེ་ན། ཟབ་མོ་སངས་རྒྱས་སྤྱོད་ཡུལ་བའོ། །འདི་ནི་སློབ་དཔོན་ལ་ལུང་བླངས་པ་ལས་འབྲས་བུ་འཐོབ་ཀྱི་རང་དགས་ན་མ་ཡིན་ཞེས་དགོངས་པའོ། །ཆོས་རྣམས་ཀྱི་དེ་ཁོ་ན་ཉིད་མདོར་བསྡུས་ཏེ་གསུངས་པས་ན་མདོ་སྡེའོ། །དེ་ལ་ཉན་ཅིང་རྗེས་སུ་
བསྒྲུབས་པས་གནས་སྐབས་ཀྱི་འབྲས་བུ་ཡང་། མདོ་སྡེ་འདི་ཡི་གཟི་བརྗིད་ཀྱིས། །སྲོག་ཆགས་དག་ནི་ཐམས་ཅད་ཀྱི། །ཞེས་བྱ་བ་ལ་སོགས་པ་གསུངས་ཏེ། ཐམས་ཅད་ཀྱི་ནད་ཞི་ཞེས་བྱ་བ་ནི་གང་དག་ཉམས་སུ་ལེན་པ་རྣམས་ཀྱིའོ། །དྲང་བའི་དོན་བཤད་ཟིན་ཏོ།    །ད་ནི་རྫས་དང་སྔགས་ཀྱི་གྲངས་
གསུངས་པ་ནི། ནོར་བུ་ཡུངས་ཀར་དཱུར་བ་དང་། །ཞེས་བྱ་བ་ལ་སོགས་པ་སྟེ་ནོར་བུ་ཞེས་བྱ་བ་ནི་མུ་ཏིག་ལ་སོགས་པ་རིན་པོ་ཆེ་ལྔ་མཚོན་པའོ། །ཡུངས་ཀར་ཞེས་བྱ་བ་ནི་འབྲུ་ལྔའི་བརྡའོ། །དཱུར་བ་ཞེས་བྱ་བ་ནི་སྙིང་པོ་ལྔའོ། །རྨ་མེད་པ་ནི་མ་ཉམས་པ་སྟེ་ཙནྡན་གང་ལ་མ་ཉམས་པའི་དྲི་ཡོད་པ་དེ་ནི་དཀོན་
ཞིང་དྲིའི་མཆོག་སྟེ་སྤོས་ལྔའི་མཚོན་པའོ། །བཅས་ཞེས་བྱ་བ་ནི་དྲི་དེ་མ་རྙེད་ན་དྲི་གཞན་ཡང་རུང་ཞེས་བྱ་བའི་ཐ་ཚིག་གོ། །རིན་ཆེན་ཞེས་བྱ་བ་ནི་སྨན་ལྔའི་བརྡའོ། །སྨན་ལ་སོགས་པ་ལྔ་པོ་དེ་དག་ཅིའི་དོན་དུ་བུམ་པར་གཞུག་ཅེ་ན། ཟག་བཅས་ཀྱི་ཕུང་པོ་ལྔ་དང་། ས་ལ་སོགས་པའི་ཁམས་ལྔ་དང་རོ་ལ་
སོགས་པའི་ཡུལ་ལྔ་དང་། འདོད་ཆགས་ལ་སོགས་པའི་ཉོན་མོངས་པ་ལྔ་རྣམས་ཡོངས་སུ་དག་ནས་ཟག་པ་མེད་པའི་ཕུང་པོ་ལྔ་དང་ཡེ་ཤེས་ལྔ་དང་དེ་བཞིན་གཤེགས་པའི་སྐུ་དང་། གསུང་དང་། ཐུགས་དང་། ཕྲིན་ལས་དང་། ཡོན་ཏན་དེ་དག་གི་དོན་རྟོགས་ཤིང་ཐོབ་པར་བྱ་བའི་ཕྱིར་རོ། །རིན་པོ་ཆེ་
ལྔ་ལ་སོགས་པ་དབུལ་པོས་མི་འབྱོར་རོ་སྙམ་པ་ལ་སྐུ་གསུང་ཐུགས་ཀྱི་མཚོན་བྱེད་དུ་རྫས་གསུམ་གསུངས་ཏེ། ཤེལ་དང་རྡོ་རྗེ་མེ་ཏོག་གམ། །ཞེས་བྱ་བ་ནི་གཞན་མི་རྙེད་ན་ཞེས་བྱ་བའི་དོན་ཏོ། །དེ་ནི་ལུས་དང་ངག་དང་ཡིད་ཡོངས་སུ་དག་པའི་རང་བཞིན་སྐུ་གསུམ་ཐོབ་པའོ་ཞེས་མཚོན་པ་སྟེ་སྒོ་
གསུམ་དག་པ་ལས་སྐུ་གསུམ་འབྱུང་བ་ཡང་སེམས་དག་ཅིང་དྲི་མ་མེད་པ་ཤེལ་ལྟ་བུའི་ཆོས་ཀྱི་སྐུ་དང་། རྡོ་རྗེ་ལྟ་བུ་རྒྱན་ཐམས་ཅད་ཀྱིས་བརྒྱན་པ་ལོངས་སྤྱོད་རྫོགས་པའི་སྐུ་དང་། འགྲོ་བ་ཐམས་ཅད་ལ་ཡིད་དུ་འོང་ཞིང་མཛེས་པའི་མེ་ཏོག་ལྟ་བུ་སྤྲུལ་པའི་སྐུ་སྟེ་དེ་དག་མཚོན་པའི་ཕྱིར་རོ། །གལ་ཏེ་

71-1-233a

མཆོག་ཏུ་དབུལ་བས་གསུམ་མི་བྱོར་རོ་ཞེ་ན་དེའི་ཕྱིར། ཆུ་ཡི་གསེར་རམ་ཡང་ན་ནི། །ཞེས་བྱ་བ་གསུངས་ཏེ། དེ་ཙམ་ལ་བརྟེན་ཞེས་པའོ། །དེ་ལ་གསེར་ནི་བསྲེགས་པ་ལ་སོགས་པས་རང་བཞིན་སེར་པོ་བསྒྱུར་བར་མི་ནུས་པ་བཞིན་དུ་བྱང་ཆུབ་ཀྱི་སྙིང་པོ་ཡང་དེ་དེ་ལྟར་མཚོན་
པའི་བརྡའོ། །རམ་ཡང་ན་ནི་ཞེས་བྱ་བ་དེ་དག་གང་ཡང་མི་རྙེད་པས་བུམ་པ་རིན་པོ་ཆེ་ལས་གྲུབ་ཙམ་ལ་བརྟེན་ཞེས་བྱ་བའི་དོན་ཏོ། །གང་ཞེ་ན། དངུལ་གྱི་བུམ་པ་དག་ཀྱང་རུང་། །ཞེས་གསུངས་སོ། །ཀྱང་ཞེས་བྱ་བ་ནི་ས་ལ་སོགས་པའི་སྣོད་མཚོན་པའོ། །འདིར་རྟོགས་པར་བྱ་བ་ནི་འདི་ཡིན་ཏེ་
དངུལ་གྱི་བུམ་པ་ནི་དཀར་ཞིང་དྲི་མ་མེད་པ་དང་རིན་པོ་ཆེ་ཡིན་ཞིང་མཉེན་པ་ལྟར་བྱང་ཆུབ་ཀྱི་སེམས་འགྲོ་བ་ཀུན་ལ་ཁྱབ་པའི་དོན་གྱི་སྙིང་པོ་དེ་ཁོ་ན་ཉིད་ཀྱང་རྣལ་འབྱོར་པ་གང་གིས་མངོན་དུ་བྱས་ནས་མ་རིག་པའི་མུན་པ་ཞི་བ་དང་ཉོན་མོངས་པའི་དྲི་མ་དག་པ་དང་རིན་པོ་ཆེ་བཞིན་དུ་འདོད་པ་ཐམས་ཅད་
འབྱུང་བ་དང་ལམ་གྱི་དུས་ན་ལུས་དང་སེམས་མཉེན་ཞིང་ལས་སུ་རུང་བ་སྟེ། དེ་ལྟར་དངུལ་དང་བྱང་ཆུབ་ཀྱི་སེམས་ཆོས་མཚུངས་པའོ་ཞེས་གསུངས་པར་རིག་པར་བྱའོ། །གཙང་མའི་གོས་ཀྱིས་ཞེས་བྱ་བ་ཇི་ལྟར་གོས་ཀྱིས་ལྷགས་པ་དང་ངོ་ཚ་ལ་སོགས་པ་ལས་སྐྱོབ་པ་བཞིན་དུ། རྣལ་འབྱོར་པའི་
དམ་ཚིག་དང་སྡོམ་པ་ཡང་འཁོར་བ་དང་ངན་སོང་ལས་སྐྱོབ་པའོ་ཞེས་བྱ་བའི་ཐ་ཚིག་གོ། །གཙང་མའི་ཞེས་བྱ་བ་ནི་དམ་ཚིག་ལ་སོགས་པའི་སྐྱོན་མེད་དེ་མ་ཉམས་པའོ་ཞེས་རིག་པར་བྱའོ། །བཟླས་པའི་དབང་དུ་མཛད་དེ་ཐུན་རེ་རེ་ལ་གཟུངས་རིང་པོ་ཉི་ཤུ་རྩ་གཅིག་གམ་བརྒྱ་རྩ་བརྒྱད་དོ། །ཡང་སྙིང་
བཟླས་པར་འདོད་ན་བརྒྱ་རྩ་བརྒྱད་ཡན་ཆད་དོ་ཞེས་བྱ་བའི་དོན་ཏོ། །རྒྱལ་པོ་ནི་སེམས་ཏེ་བག་ཆགས་ཀུན་གྱི་གཞི་ཡིན་ལ་བརྟན་པས་རྒྱལ་པོ་དང་ཆོས་མཚུངས་སོ། །དེ་ཁྲུས་བྱས་པས་སྒྲིབ་པ་ཐམས་ཅད་དང་བྲལ་ནས་མ་བཅོས་པ་གཉུག་མའི་ངང་ལ་གནས་པར་འགྱུར་རོ་ཞེས་དགོངས་པའོ། །བློན་པོ་
ལྟ་བུ་ཉོན་མོངས་པ་ཡིད་དང་འབངས་ལྟ་བུའི་ཚོགས་དྲུག་ཀྱང་རྒྱལ་པོ་ནི་ཞི་བས་ཞི་བར་འགྱུར་རོ། །དེ་ལྟ་བས་ན་གང་ཞིག་འཁོར་བའི་སྡུག་བསྔལ་ལས་ཐར་བར་འདོད་པས་སེམས་ཀྱི་རྒྱལ་པོ་རྟག་ཏུ་ཁྲུས་གྱིས་ཤིག་ཅེས་གསུངས་སོ། །རྡོ་རྗེ་སྤུན་དང་དམ་ཚིག་འདི་ལ་མོས། །དེ་ཡི་ངོར་བྱས་

71-1-233b

བླ་མ་དམ་པའི་གསུང་། །ཤེས་རབ་མཐུ་ཡིས་བདག་གིས་རྣམ་པར་བཀོད། །དགེ་བ་ཐོབ་དེ་བྱང་ཆུབ་མཆོག་ཏུ་བསྔོ། །ཉེས་པར་གྱུར་ན་རྣམ་འཇོམས་ཉིད་ལ་བཤགས། །རྡོ་རྗེ་རྣམ་འཇོམས་ཀྱི་འགྲེལ་པ་ཇོ་བོ་སྨྲྀ་ཏིས་མཛད་པ་རྫོགས་སོ།།      །།པཎྜི་ཏ་ཆེན་པོ་དེ་ཉིད་ཀྱིས་བསྒྱུར། ཕྱི་དང་
ནང་དང་དེ་ཁོ་ན་ཉིད་ཀྱི་ཁྲུས་གསུམ་ནི་ཐེག་པ་གསུམ་དང་ཇི་བཞིན་དུ་སྦྱར་རོ།།      །། ༄༅༅།  །རྒྱ་གར་སྐད་དུ། བཛྲ་བི་ཛཱ་ར་ཎ་ནཱ་མ་དྷཱ་ར་ཎི་ཨུ་པ་དེ་ཤ། བོད་སྐད་དུ། རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་མན་ངག བཅོམ་ལྡན་འདས་རྡོ་རྗེ་རྣམ་པར་འཇོམས་
པ་ལ་ཕྱག་འཚལ་ལོ། །འདིར་བླ་མ་དམ་པའི་མན་ངག་གིས་ལས་ཀྱི་ཚོགས་ཅུང་ཟད་དྲན་པ་རྣམས་དགོད་པར་བྱའོ། །དེ་ལ་ལས་ཀྱི་རྣམ་པར་དབྱེ་བ་ནི་མང་མོད་ཀྱང་འདིར་ནི་ཕྲིན་ལས་བཅོ་བརྒྱད་ལས་མ་གསུངས་ལ། དེ་དག་གི་དོན་ཀྱང་མ་གསུངས་པས་དེ་དག་གི་དོན་ཀྱང་བསྡུས་ན་གཉིས་
ཉིད་དེ། ཕན་བཏགས་པས་རྗེས་སུ་གཟུང་བ་དང་ཚར་གཅད་པས་རྗེས་སུ་གཟུང་བའོ། །དེ་དག་ཀྱང་ཞི་བ་ལ་སོགས་ཕྲིན་ལས་བཞིས་འགྲུབ་པར་འགྱུར་ལ་ཕྲིན་ལས་ཀྱང་སྒྲུབ་པ་པོ་ཚད་དང་ལྡན་པས་ཡིན་གྱི་གཞན་དུ་ན་དོན་མེད་པར་འགྱུར་རོ། །ཐོག་མར་སྔགས་པ་སྙིང་རྗེ་ཆེན་པོས་བསྐུལ་
བའི་བསྙེན་པ་ཡོངས་སུ་རྫོགས་པར་བྱས་ལ། དེའི་འོག་ཏུ་ལས་དང་མཐུན་པའི་འཁྲུལ་འཁོར་བྲི་བར་བྱའོ། །དེ་ཡང་ཞི་བའི་འཁྲུལ་འཁོར་ནི་དཀར་པོའི་ཕྱོགས་ཀྱི་ཚེས་གང་ཡང་རུང་བ་ལ་རས་སམ་ཤིང་ཤུན་ལ་སོགས་པ་གཞི་དཀར་པོ་ལས་པདྨ་རྒྱས་པ་ལྟ་བུའི་རྩིབས་བརྒྱད་པའི་འཁོར་ལོ་
གུར་གུམ་ལ་སོགས་པའི་དྲིས་མཆོག་ཏུ་གཙང་སྦྲ་ལ་གནས་པ་བྲིའོ། །དེའི་ལྟེ་བ་ལ་ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཆེ་གེ་མོ་ལ་རཀྵ་རཀྵ་ཞེས་སྤེལ་ལ་བྲིའོ། །རྩིབས་རྣམས་ལ་རིམ་པ་བཞིན་དུ་གནོད་པར་བྱེད་པ་རྣམས་ཏྲ་ཊ་ཡ་ཏྲ་ཊ་ཡ་ཏྲོ་ཊ་ཡ་ཆེ་གེ་མོ་རཀྵ་
རཀྵ་ཞེས་བྲིའོ། །དེའི་མུ་ཁྱུད་ཕྱི་མ་ལ་ཡང་སྙིང་བྲི་བར་བྱ་སྟེ། སྔགས་དེ་ཐམས་ཅད་མགོ་ཕྱིར་བསྟན་པའོ། །དེ་ལྟར་བྲིས་པའི་འཁྲུལ་འཁོར་དེ་ལ་སྔགས་པས་འདི་ལྟར་ལས་ལ་སྦྱར་བར་བྱ་སྟེ། རང་ཉིད་ཡུད་ཙམ་གྱིས་ལྷར་བསམས་ལ་མདུན་གྱི་ནམ་མཁའ་ལ་བཅོམ་ལྡན་འདས་རྡོ་རྗེ་རྣམ་པར་

71-1-234a

འཇོམས་པ་བསྐྱེད་ལ་གསོལ་བ་གདབ་པ་ནི། བཅོམ་ལྡན་འདས་ཐུགས་རྗེ་ཆེན་པོ་ཁྱོད་ནི་ཐམས་ཅད་ལ་ཕན་པ་དང་བདེ་བའི་ཕྱིར་ཞུགས་པ་ཡིན་ན་དེ་ཡང་ཆེ་གེ་མོ་འདིའི་གནོད་པ་འདི་དག་ཉེ་བར་ཞི་བར་བྱིན་གྱིས་བརླབ་ཏུ་གསོལ་ཞེས་ངག་དང་ཡིད་ཀྱིས་ལན་གསུམ་གསོལ་བ་གདབ་
པར་བྱ་སྟེ། བར་གྱི་ཚིག་སྤྲོས་ལ་ཕྲིན་ལས་གཞན་ལ་ཡང་སྦྱར་བར་བྱའོ། །དེ་ལྟར་གསོལ་བ་གཏབ་པས་བདག་དང་བསྒྲུབ་བྱ་ལ་བྱིན་གྱིས་བརླབས་ནས་ཇི་ལྟར་འདོད་པ་གྲུབ་པར་བསམས་ཏེ་སླར་བཅོམ་ལྡན་འདས་འཁྲུལ་འཁོར་གྱི་ལྟེ་བ་ལ་བཞུགས་ཏེ་རྒྱུན་མི་འཆད་པར་བྱིན་གྱིས་རློབ་པར་མཛད་
པར་བསམས་ལ་སྤེལ་བ་དང་བཅས་པའི་བཟླས་པ་བྱའོ། །ཟིན་པ་དང་མཆོད་དེ་བསྟོད་པ་ཡང་བྱས་ལ་ཐམས་ཅད་ཞུ་བ་དང་བཅོམ་ལྡན་འདས་ཀྱི་ཐུགས་པདྨ་རྒྱས་པ་ལྟ་བུའི་ཐུགས་ཀར་བསྒྲུབ་བྱ་ཚུད་པས་མཆོག་ཏུ་བདེ་ཞིང་གནས་པར་བསམས་ལ་དེ་བཞིན་ཉིད་ཀྱི་བློས་མེ་ཏོག་ལ་ཡང་སྙིང་པོ་ཅི་
ནུས་པར་བཟླས་ལ་འཁོར་ལོ་ལ་གཏོར་བར་བྱའོ། །དེ་ནི་རབ་ཏུ་གནས་པ་ཞེས་བྱ་སྟེ། འཁོར་ལོ་དྲིལ་ནས་བསྒྲུབ་བྱ་ལ་བཏགས་ཏེ་དེ་ལ་འགོམ་པར་མི་བྱ་བ་ནི་དམ་ཚིག་གོ། །སེམས་ཅན་ཐམས་ཅད་འཇིལ་བར་བྱེད་པ་དང་ཞི་བ་དང་སྲུང་བ་སྟེ། ལས་གསུམ་དང་འབྲེལ་པའི་ཞི་བའི་འཕྲུལ་
འཁོར་གྱི་རྣམ་པར་བྱེད་པ་རྫོགས་སོ།།      །།ཇི་ལྟར་སྔར་བསྟན་པའི་ཚུལ་གྱིས་བར་གྱི་ཚིག་སྤོས་ལ་འདིར་ཡང་སྦྱར་ཏེ་རྒྱས་པའི་འཁྲུལ་འཁོར་ནི་གཞི་སེར་པོ་ཁ་རིན་པོ་ཆེའི་ཕུང་པོ་ལྟ་བུའི་དབྱིབས་ཅན་བྲིས་ལ་མིང་འདི་ཞེས་བྱ་བའི་ཆེ་གེ་མོ་རབ་ཏུ་གནས་པ་རྒྱས་པར་མཛོད་ཅིག་ཅེས་སྤེལ་
བར་བྲི་ཞིང་མུ་ཁྱུད་ཕྱི་མ་ལ་ནི་ཡང་སྙིང་བྲིའོ། །དེ་ནས་གསོལ་བ་གདབ་པ་སྔར་བཞིན་ནོ། །དེ་ལ་འདིར་ཁྱད་པར་གྱི་མན་ངག་ནི་འདི་ཡིན་ཏེ། འདོད་པ་ཐམས་ཅད་རབ་ཏུ་སྦྱིན་པ་ཞེས་གསུངས་པའི་ཕྱིར་ན་ཡོ་བྱད་དོན་དུ་གཉེར་བར་ནོར་གྱི་བདག་པོ་ལ་བསྐུལ་བར་བྱའོ། །དེ་ཡང་འཁོར་གྱི་སྦྱོར་བ་
སྤངས་ནས་ཡན་ལག་བརྒྱད་དང་ལྡན་པའི་ཆུ་ལ་སྤོས་ལ་སོགས་པའི་དྲི་ལ་སྩལ་ཏེ་ངོས་སུའམ་བསམས་པས་རྣལ་འབྱོར་པས་ཡུད་ཙམ་གྱིས་རྣམ་པར་འཇོམས་མཛད་དུ་བསམས་ལ་མདུན་གྱི་ནམ་མཁའ་ལ་དེ་བཞིན་གཤེགས་པ་བསམ་ཞིང་དེ་བས་དམའ་བར་ཇི་ལྟར་འདོད་པའི་ནོར་གྱི་ལྷ་

71-1-234b

བསམས་ཏེ་བདག་ནི་དབུལ་ཏེ་དེ་བཞིན་གཤེགས་པ་མཆོད་པ་དང་དབུལ་པོ་རྣམས་ལ་ཕན་པའི་ནུས་པ་མེད་པ་ལ་ཇི་ལྟར་བྱ་སྙམ་དུ་འདུན་པ་དྲག་པོ་བྱས་ལ་ཡང་འདི་སྙམ་དུ་དཀོན་མཆོག་མཆོད་པ་ལ་སོགས་པའི་ཡོ་བྱད་ཀྱི་དོན་དུ་ཛམྦྷ་ལ་ཁྱོད་ལ་ནོར་གྱི་དངོས་གྲུབ་སློང་གིས་བདག་ལ་མྱུར་དུ་ལོངས་
སྤྱོད་རྒྱ་ཆེན་པོ་སྩལ་དུ་གསོལ་ཞེས་དངོས་སམ་ཡིད་ཀྱིས་བརྗོད་ལ་དེའི་ངང་ལས་ཡང་སྙིང་བརྒྱ་རྩ་བརྒྱད་བཟླས་པའི་ཆུ་ལག་པ་གཡས་པས་ཛམྦྷ་ལའི་སྤྱི་བོར་བླུགས་པར་བསམས་ཏེ་དེ་ལ་སྦྱིན་ནོ། །དེའི་ཚེ་ཛམྦྷ་ལས་སྔོན་བཅོམ་ལྡན་འདས་ཀྱི་སྤྱན་སྔར་ཇི་ལྟར་ཁས་བླངས་པ་དང་ད་ལྟར་ཡང་ཆུ་སྟེར་
བའི་དུས་སུ་བཅོམ་ལྡན་འདས་དཔང་པོའི་ཚུལ་དུ་བཞུགས་པ་དང་བདག་ནི་བཅོམ་ལྡན་འདས་རྣམ་པར་འཇོམས་པའི་སྐུ་ཡིན་ལ་དེ་ནི་སངས་རྒྱས་ཀུན་གྱི་གསང་བའི་བདག་ཉིད་ཀྱང་ཡིན་ཏེ། ལག་ན་རྡོ་རྗེའོ། །ལག་ན་རྡོ་རྗེ་ནི་གནོད་སྦྱིན་གྱི་སྡེ་དཔོན་ཡིན་ལ་ཛམྦྷ་ལ་ཡང་གནོད་སྦྱིན་ཡིན་པས་འབངས་སམ་
འཁོར་ཛམྦྷ་ལ་ལ་བཀའ་སྩལ་པ་ནི་མི་སླུ་བས་ན་སྔགས་པའི་འདོད་པ་ཐམས་ཅད་ཛམྦྷ་ལས་རབ་ཏུ་སྦྱིན་པར་འགྱུར་ཏེ་འདི་ནི་ངེས་པའོ། །འཁྲུལ་འཁོར་རྒྱས་པ་འདི་ནི་གནས་དབེན་པར་མཆོད་ཅིང་གཞག་པར་བྱའོ། །འདིས་ནི་རྒྱས་པའི་ལས་དང་འདོད་པ་ཐམས་ཅད་རབ་ཏུ་སྦྱིན་པ་དང་མ་གྲུབ་
པ་རྣམས་གྲུབ་པར་བྱེད་པ་དང་གྲུབ་པ་རྣམས་ཆུད་མི་ཟ་བ་སྟེ། ཕྲིན་ལས་རྣམ་པ་བཞི་པོ་དེ་ནི་རྒྱས་པའི་འཁྲུལ་འཁོར་གྱི་ལས་སུ་རིག་པར་བྱའོ། །རྫོགས་སོ།།      །།དབང་གི་འཁྲུལ་འཁོར་དམར་པོ་ཟླ་གམ་བྲིས་ལ། དབུས་སུ་ཧཱུཾ་ནག་པོ་བྲི་ཞིང་དེའི་གཡས་དང་གཡོན་དུ་ཧྲཱིཿ
དམར་པོ་རེ་རེ་བྲིས་ཏེ་མུ་ཁྱུད་ཟླུམ་པོས་བསྐོར་བ་ལ་ཡང་སྙིང་བྲིས་ལ་སྟེགས་བུ་ལ་གཞག་གོ། །དེ་ནས་སྔགས་པས་གོས་དམར་པོ་བགོས་ལ་ནུབ་ཕྱོགས་སུ་ཁ་བལྟས་ཏེ་དེ་ནས་བརྩམས་ཏེ་ཆེ་གེ་མོ་དབང་དུ་བསྡུའོ་སྙམ་པའི་བློས་དང་པོ་གསོལ་བ་ལ་སོགས་པ་བྱས་དེའི་རྗེས་ལ་རང་གི་ལུས་
འཁྲུལ་འཁོར་གྱི་ལྟེ་བའི་ཧཱུཾ་ལ་ཐིམ་ནས་དེ་ཡོངས་སུ་གྱུར་པས་རྣམ་པར་འཇོམས་མཛད་དུ་རང་ཉིད་བསམ་མོ། །ལས་ཉེ་བར་བསྒྲུབ་པ་ནི་གནས་པ་ཉིད་མྱུར་བས་ན་རང་གི་སྲིན་ལག་གཡས་པ་ལས་ཧྲཱིཿ་དམར་པོ་ཅིག་བྱུང་ནས་རང་གི་གཡས་ན་འདུག་པར་བསམས་ལ་གཡོན་པ་ལས་ཀྱང་དེ་བཞིན་

71-1-235a

ཏེ་ཧྲཱིཿདེ་ལས་འོད་དམར་པོ་འཕྲོ་ཞིང་རང་འདོད་པའི་ལས་བྱས་ཏེ་སླར་ཡང་དེ་ཉིད་ལ་འདུས་པས་སྔགས་ཀྱང་རང་རང་གི་སྤེལ་བས་བཟླའོ། །དེའི་ཚེ་ན་ཡང་སྔར་གྱི་མདུན་གྱི་ནམ་མཁའི་བཅོམ་ལྡན་འདས་ནི་ཇི་སྲིད་འདོད་ཀྱི་བར་དུ་བྱིན་གྱིས་རློབ་ཅིང་བཞུགས་པར་བསམ་མོ། །འདོད་པའི་
དོན་གྲུབ་ནས་ཧྲཱིཿནི་རང་ལ་བསྡུས་ལ་རང་ཡང་ཞུ་ནས་ཇི་ལྟར་འདོད་པའི་ཚུལ་དུ་གནས་པར་བྱའོ། །འདིའི་འཁྲུལ་འཁོར་ནི་ཏིང་ངེ་འཛིན་ཉིད་ཀྱང་རུང་ངོ་། །འདིས་ནི་འབྱུང་པོ་ཐམས་ཅད་འགུགས་པ་དང་གདོན་ཐམས་ཅད་ལས་ཐར་བར་བྱེད་པ་ལ་སོགས་པ་ཕྲིན་ལས་གཉིས་གཙོར་བྱེད་དོ། །དབང་
གི་ཕྲིན་ལས་ཀྱི་རིམ་པ་རྫོགས་སོ།།      །།བཅོམ་ལྡན་འདས་དཔལ་རྡོ་རྗེ་རྣམ་པར་འཇོམས་པ་གཏུམ་པོ་ལ་ཕྱག་འཚལ་ལོ། །མངོན་སྤྱོད་ལ་གཉིས་ཏེ། མི་དང་མི་མ་ཡིན་པའི་དབྱེ་བས་སོ། །འཁོར་ལོ་བྲིས་ལ་ལྟེ་བའི་གྲུ་གསུམ་ལ་བསྒྲུབ་བྱའི་མིང་དང་མཱ་ར་ཡ་སོད་རཾ་ནན་ཞེས་བྱ་བ་ལ་སོགས་
པའི་སྤེལ་ཚིག་དང་བཅས་པ་བྲིའོ། །ཤར་གྱི་རྩིབས་ལ་སརྦ་ཤ་ཏཱུཾ་ནཱཾ་གྷ་ཊ་གྷ་ཊ་ཆེ་གེ་མོ་མཱ་ར་ཡ་རྦད་ཅེས་བྲིའོ། །གཡོན་དུ་བསྐོར་བའི་རྩིབས་ལ་སཾ་གྷ་ཊ་ཡ་ཆེ་གེ་མོ་མཱ་ར་ཡ་རྦད་ཅེས་སོ། །རྩིབས་གཅིག་ལ་ཨ་མུ་ཀཾ་མཱ་ར་ཡ་ཕཊ་ན་མཿས་མནྟ་བཛྲཱ་ཎཱཾ་སརྦ་བ་ལེན་ཨ་པ་ར་ཛ་ཡེ་མ་ཧཱ་བ་ལེ་ཆེ་གེ་མོ་
མཱ་ར་ཡ་རྦད་ཅེས་བྲི་ཞིང་མུ་ཁྱུད་ལ་ཡང་སྔགས་དེ་དག་ཉིད་དོ། །སྔགས་དེ་དག་ནི་མགོ་ནང་དུ་བསྟན་པས་སོ། །དེ་ནས་ཡང་གསོལ་བ་འདེབས་པ་ལ་སོགས་པ་སྔར་བཞིན་བྱ་སྟེ་བཅོམ་ལྡན་འདས་ནི་ཤིན་ཏུ་ཁྲོ་བར་བཞུགས་པ་ལ་གསོལ་བ་གདབ་པོ། །རང་ཉིད་རྣམ་པར་འཇོམས་མཛད་དུ་བསམས་
པའི་ཞལ་ནས་སྔགས་བརྗོད་པས་སྔགས་ཀྱི་ཕྲེང་བ་འཕྲོས་ནས་གང་ལ་བྱ་བའི་ལུས་ལ་ཕོག་པས་དེ་ཡོངས་སུ་ཞུ་ནས་རྣམ་ཤེས་ཡིག་འབྲུ་གཅིག་ཏུ་གྱུར་པ་འཕེལ་བ་ནི་རླུང་གིས་བཏེག་སྟེ། ཡི་གེ་ཡཾ་གི་སྟེང་ན་ཧྲཱིཿ་སྔོ་ནག་ཏུ་གནས་པ་བཀུག་ནས་འཁོར་ལོའི་ལྟེ་བར་ཆུད་པར་བསམས་ལ་དེ་ཡང་
འདར་ཞིང་འཕར་ལ་མི་བཟོད་བཞིན་དུ་གནས་པར་བསམ་མོ། །འཁོར་ལོའི་རྩིབས་ཀྱི་རྩེ་མོ་ལ་ཡང་གཟུགས་བརྙན་བྲི་བའམ་བསམ་པར་བྱའོ། །རབ་ཏུ་བསྒྲིམ་པར་བྱའི་གཞན་དུ་ན་རང་གི་སྲོག་ཀྱང་གཡོ་བར་འགྱུར་ན་དགྲ་བགེགས་ལྟ་ཅི་སྨོས། ཟིན་པ་དང་ལས་ཀྱི་མཐའ་བསྲེག་

71-1-235b

པའམ་མནན་པ་གང་ཡང་རུང་བར་བྱའོ། །འདིར་ཡང་མན་ངག་ནི་འདི་ཡིན་ཏེ་རིག་སྔགས་གཅོད་པ་ཞེས་བྱ་བའི་སྐབས་སུ་སྐུད་པ་སྔོན་པོ་ལ་སུམ་བསྒྲིལ་བྱས་ནས་བརྒྱ་རྩ་བརྒྱད་བཟླས་ཏེ་རྡོ་རྗེ་ལྟ་བུའི་མདུད་པའམ་ལྕགས་སྒྲོག་གམ་ཞགས་པ་ལྟ་བུའི་མདུད་པ་དོར་ཞིང་མདུད་པ་རེ་རེའི་ནང་དུ་ཕ་རོལ་
གྱིས་རྦད་པའི་མི་མ་ཡིན་པ་དང་། དེ་རྦོད་པར་བྱེད་པའི་དངོས་པོ་རྣམས་ཆུད་ཅིང་དེ་རབ་ཏུ་བསྡམས་ནས་སྔགས་བཟླས་པས་དེ་ལྟར་གྱུར་ཏེ་དེ་མགུལ་དུ་གདགས་སོ། །གང་གི་ཚེ་མི་དགོས་པ་དེའི་ཚེ་མདུད་པ་དགྲོལ་བར་བྱའི་གཞན་དུ་ན་བསོད་ནམས་མ་ཡིན་པ་སོག་པར་འགྱུར་རོ། །དེ་བཞིན་དུ་
རིག་སྔགས་ཐམས་ཅད་གནོན་པར་བྱེད་པ་ཞེས་བྱ་བ་དེ་ལ་ཡང་མན་ངག་གི་གནད་འདི་ལྟ་བུ་བརྩམ་པར་བྱའོ། །འཁྲུལ་འཁོར་གཞུང་ལྟར་བྲིས་ལ་འཁྲུལ་འཁོར་གྱི་ལྟེ་བར་བསྒྲུབ་བྱའི་གཟུགས་ལྕེ་ཤིན་ཏུ་ཆེ་བ་བྲིས་ལ་ལྕེ་ལ་རྩིབས་ཀྱི་སྔགས་རྣམས་དང་ཆེ་གེ་མོ་འདི་ཞེས་བྱ་བའི་ངག་རེངས་
པར་གྱིས་ཤིག་ཅེས་སྦྲེལ་ཏེ་བྲིའོ། །དེ་ལ་སྒྲུབ་པ་བྱས་ལ་རི་རབ་ས་ནག་པོ་ལས་བྱས་པའི་སྟེང་དུ་རྣམ་པར་འཇོམས་མཛད་ཀྱི་སྔགས་ཤོག་བུ་ལ་སོགས་པ་ལ་བྲིས་ལ་རྩལ། སྨད་དུ་བུག་པ་གྲུ་གསུམ་བྲུས་ལ་དེའི་ནང་དུ་འཁྲུལ་འཁོར་བྲིས་ལ་དེ་བཅུག་ལ་མནན་པར་བྱའོ། །འདི་ནི་
སྔགས་ཀྱི་ནུས་པའམ་རྦོད་གཏོང་ཉེ་བར་ཞི་བར་བྱེད་པ་སྟེ་མངོན་སྤྱོད་ཀྱི་ཁྱད་པར་རོ། །ཡང་སེམས་ཅན་ཐམས་ཅད་སྐྲག་པར་བྱེད་པ་ཞེས་བྱ་བ་ལ་འཁྲུལ་འཁོར་སྤངས་ལ་རྟ་ནག་པོའི་རྔ་མ་ལ་བཤང་བའི་སྲིན་བུ་བརྒྱུས་ཏེ། ཕྲེང་བ་བྱས་ནས་གང་ལ་དམིགས་ཏེ་ཁྲོས་པས་སྔགས་བཟླས་ན་གྲོང་
ཁྱེར་ལ་སོགས་པ་འཇིགས་ཤིང་སྐྲག་པར་འགྱུར་ཏེ་སྔགས་ལས་སུ་རུང་ན་ལས་དེ་དག་ལ་ཐེ་ཚོམ་མི་ཟའོ། །མངོན་སྤྱོད་གྱི་འཁྲུལ་འཁོར་ནི་སྐྲག་པ་དང་རིག་སྔགས་གཅོད་པ་དང་རིག་སྔགས་གནོན་པ་དང་ལས་འཇོམས་པ་དང་། རིག་སྔགས་ཀྱི་ལས་བྱེད་དུ་འཇུག་པ་དང་རེངས་
པར་བྱེད་པ་སྟེ་ལས་དྲུག་བྱེད་པའོ། །དགྲའི་མངོན་སྤྱོད་ཀྱི་འཁྲུལ་འཁོར་རྣམ་པར་ཕྱེ་བའི་རིམ་པའོ། །རྫོགས་སོ།།      །།ད་ནི་བགེགས་ཀྱི་མངོན་སྤྱོད་ཀྱི་འཁྲུལ་འཁོར་བརྩམ་པར་བྱ་སྟེ། རོ་རས་ལ་སོགས་པ་ལ་འཁྲུལ་འཁོར་གྲུ་གསུམ་སུམ་བརྩེགས་སུ་བྱས་ལ་གྲུབ་པ་རྣམས་ལ་

71-1-236a

ཨོཾ་བྷིནྡ་ཆེ་གེ་མོ་ཚིནྡ་བྷིནྡ་ཆེ་གེ་མོ་བྷིནྡ་མ་ཧཱ་ཀཱི་ལི་ཀཱི་ལཱ་ཡ་ཆེ་གེ་མོ་མཱ་ར་ཡ་ཕཊ་བྲིའོ། །དབུས་སུ་བགེགས་ཀྱི་གཟུགས་དང་མཱ་ར་ཡ་ཞེས་སྤེལ་ལ་བྲིའོ། །ཡང་གསོལ་བ་གདབ་པ་ལ་སོགས་པ་བྱས་ལ་རང་ཉིད་ཆུའི་ཟླ་བ་ལྟ་བུའི་རྣམ་པར་འཇོམས་མཛད་དུ་སྐུ་ཆེ་བ་ལ་ཡན་
ལག་རགས་པར་བསྒོམ་མོ། །དེ་ནས་རབ་ཏུ་བསྒྲིམས་ནས་སྔགས་རིང་པོ་འབའ་ཞིག་བཟླས་པར་བྱ་སྟེ་སྔགས་ཀྱི་འོད་ཀྱིས་གང་ལ་བྱ་བའི་ལུས་ལ་ཕོག་པས་རབ་ཏུ་གཟིར་ཞིང་མི་བཟོད་པར་བསམ་སྟེ་དཔེར་ན་ལོ་ཐོག་ལ་སེར་བ་བབ་པ་ལྟ་བུར་དམིགས་ཤིང་ཁྲོས་པས་བཟླའོ། །ཟིན་པ་དང་ལས་
ཀྱི་ཞབས་བསྲེག་པ་དང་མནན་པ་གང་འདོད་པ་བྱའོ། །འཁྲུལ་འཁོར་འདི་ནི་ཕལ་ཆེར་བགེགས་ལ་བྱེད་པར་བཤད་ཀྱི་འོན་ཀྱང་རྣལ་འབྱོར་ལས་སུ་རུང་བའི་སྔགས་པས་འཁྲུལ་འཁོར་གཅིག་གིས་ཀྱང་ལས་ཐམས་ཅད་ལ་སྦྱར་བར་ནུས་སོ། །འདིས་གདོན་རླག་པར་བྱེད་པ་དང་། རྨུགས་པར་
བྱེད་པའི་ལས་གཉིས་འགྲུབ་བོ། །དེ་ལྟར་ཕྲིན་ལས་བཅུ་བདུན། གཞན་གྱི་ལས་འཇིག་པ་ནི་སྡིག་པ་སྟེ་དེ་དག་པར་བྱེད་པ་ནི་བུམ་པ་ལ་སོགས་པའི་ཁྲུས་དང་འབྲེལ་པའི་ཕྱིར་འདིར་མ་སྨོས་སོ། །ཐམས་ཅད་ལ་ཡང་སྤེལ་ཚིག་ནི་སོ་སོའི་སྐབས་དང་སྦྱར་རོ། །རྡོ་རྗེ་རྣམ་པར་འཇོམས་པའི་
མན་ངག་པཎྜི་ཏ་སྨྲྀ་ཏི་ཛྙཱ་ན་ཀཱིརྟིས་མཛད་པ་རྫོགས་སོ།།      །།པཎྜི་ཏ་ཆེན་པོ་དེ་ཉིད་ཀྱིས་བསྒྱུར་བའོ།།      །། ༄༅༅།  །རྒྱ་གར་སྐར་དུ།  བཛྲ་བི་དཱ་ར་ཎ་ནཱ་མ་དྷཱ་ར་ཎི་རཏྣ་མཱ་ལ་བྲྀཏྟི་ནཱ་མ། བོད་སྐད་དུ། རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་འགྲེལ་པ་རིན་ཆེན་ཕྲེང་བ་
ཞེས་བྱ་བ། བཅོམ་ལྡན་འདས་ཕྱག་ན་རྡོ་རྗེ་ལ་ཕྱག་འཚལ་ལོ། །མ་རུངས་འཇོམས་མཛད་མི་ཤིགས་རི་བོ་འཛིན། །ཐུགས་རྗེའི་སྣང་བས་ཉོན་མོངས་འཇོམས་པའི་སྐུ། །རང་གཞན་དོན་རྣམས་མ་ལུས་སྡུད་མཛད་པའི། །དབྱེར་མེད་རང་བཞིན་གསལ་བའི་སྐུ་ལ་འདུད། །བླ་མའི་མན་ངག་
ལ་བརྟེན་ནས། །དམན་པའི་དོན་དུ་རྡོ་རྗེའི་དོན་བཤད་བྱ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྡོ་རྗེ་ལ་བཞུགས་ཏེ། ལུས་ཐམས་ཅད་རྡོ་རྗེར་བྱིན་གྱིས་བརླབས་ནས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་བྱ་བ་ནི་བཅོམ་ལྡན་འདས་རྡོ་རྗེ་གདན་བྱང་

71-1-236b

ཆུབ་སྙིང་པོ་ན་འཁོར་བྱང་ཆུབ་སེམས་དཔའ་དཔག་ཏུ་མེད་པ་དང་ཐབས་ཅིག་ཏུ་བཞུགས་སོ། །བཞུགས་པ་དེའི་ཚེ་བཅོམ་ལྡན་འདས་དེ་ཉིད་རྡོ་རྗེ་དེ་ཉིད་ལ་ཐིམ་ཞིང་སངས་རྒྱས་རྣམས་ཀྱིས་བྱིན་གྱིས་བརླབ་པ་མཛད་ནས། དེ་ནས་བཅོམ་ལྡན་འདས་ཀྱིས་རྡོ་རྗེ་དེ་ཉིད་ལས་ཏིང་ངེ་འཛིན་གྱི་རྣམ་པར་
འཕྲུལ་པ་མཛད་པ་ནི་རྣམ་པ་གསུམ་དུ་མཛད་དོ། །འདི་སྐད་དུ་རྡོ་རྗེ་དང་། ཁྲོ་བོ་གཉིས་སུ་ཐོས་སོ། །གང་གིས་ཤེ་ན། ཕྱག་ན་རྡོ་རྗེ་བདག་གིས་ཐོས་ཏེ་དུས་གཅིག་ན་ཐོས་ཞེས་བྱའོ། །ཇི་ལྟར་ཐོས་ཤེ་ན། དེ་ནས་སངས་རྒྱས་ཀྱི་མཐུ་དང་། བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་
རླབས་ཀྱིས་ཞུས་ནས་ཐོས་ཏེ། དེ་ཡང་དེ་གཉིས་ཀྱི་དོན་ཞེས་དྲིས་ནས་སོ། །རྡོ་རྗེ་སྙིང་པོ་ལས་བྱུང་བ། རྡོ་རྗེ་ཁྲོ་བོའི་དོན་སྨྲས་པ་ཞེས་བྱ་བ་ནི་རྡོ་རྗེ་ནི་འཇོམས་བྱ་འཇོམས་པ་ལ་བྱ། ཁྲོ་བོ་ནི་འཇོམས་བྱེད་ལ་བྱའོ། །དེའི་དོན་ནི་ཤེས་རབ་དང་སྙིང་རྗེ་ཞེས་པའོ། །ཤེས་རབ་ཀྱི་དོན་ནི་ཅི་ཞེ་ན། 
མི་ཆོད་པ། མི་ཤིགས་པ། བདེན་པ། སྲ་བ། བརྟེན་པ་ཐམས་ཅད་དུ་ཐོགས་པ་མེད་པ། ཐམས་ཅད་དུ་མ་ཕམ་པའོ། །དེའི་ཐབས་ནི་དོན་ཅི་ཞེ་ན། སེམས་ཅན་ཐམས་ཅད་སྐྲག་པར་བྱེད་པ། སེམས་ཅན་ཐམས་ཅད་འཇིལ་བར་བྱེད་པའོ། །འོ་ན་ཤེས་རབ་ཀྱི་ཡོན་ཏན་ཅི་ཞེ་ན། རིག་
སྔགས་ཐམས་ཅད་གཅོད་པར་བྱེད་པ། རིག་སྔགས་ཐམས་ཅད་གནོན་པར་བྱེད་པ། ལས་ཐམས་ཅད་འཇོམས་པར་བྱེད་པ། ལས་ཐམས་ཅད་སྒྲུབ་པར་བྱེད་པ། གཞན་གྱི་ལས་ཐམས་ཅད་འཇིག་པར་བྱེད་པའོ། །ཐབས་ཀྱི་ཡོན་ཏན་ཅི་ཞེ་ན། གདོན་ཐམས་ཅད་རླག་པར་བྱེད་པ། གདོན་
ཐམས་ཅད་ལས་ཐར་བར་བྱེད་པ། འབྱུང་པོ་ཐམས་ཅད་ཚར་གཅོད་པ། འབྱུང་པོ་ཐམས་ཅད་གུགས་པར་བྱེད་ཅིང་། གཞན་གྱི་རིག་སྔགས་དང་འབྱུང་པོའི་གདོན་རླག་པར་བྱེད། སྲུང་བར་བྱེད། དེ་ལས་ཐར་བར་བྱེད་དོ། །འོ་ན་ཤེས་རབ་ཀྱི་ལས་ཇི་ལྟ་བུ་ཞིག་བྱེད་ཅེ་ན། 
རིག་སྔགས་ཀྱི་ལས་ཐམས་ཅད་བྱེད་དུ་འཇུག་པ། མ་གྲུབ་པ་རྣམས་གྲུབ་པར་བྱེད་པ། གྲུབ་པ་རྣམས་ཆུད་མི་ཟ་བར་བྱེད་པ། འདོད་པ་ཐམས་ཅད་རབ་ཏུ་སྦྱིན་པར་བྱེད་པའོ། །ལས་ཐམས་ཅད་པའི་བུམ་པ་ལས་ཐམས་ཅད་ཀྱི་སྔོན་དུ་འགྲོ་བའོ། །དེས་མ་གྲུབ་པ་གྲུབ་པར་འགྲོ་སྟེ། དེས་

71-1-237a

བར་ཆད་མེད་པས་གྲུབ་པ་དེ་ཆུད་མི་ཟ་བར་སྒྲུབ་ནུས་ཤིང་། སེམས་ཅན་གཞན་ལ་ནུས་པ་སྐྱེད་པར་བྱེད་པའོ། །འོ་ན་ཐབས་ཀྱི་ལས་ཇི་ལྟ་བུ་ཞེ་ན། སེམས་ཅན་ཐམས་ཅད་སྲུང་བ། ཞི་བ་རྒྱས་པ། སེམས་ཅན་ཐམས་ཅད་རེངས་པར་བྱེད་པ། རྨུག་པར་བྱེད་པའི་གསང་
སྔགས་ཀྱི་མཐུ་ཆེན་པོ་འདི་རབ་ཏུ་སྨྲས་སོ། །ཞེས་བྱ་བ་ནི་སྲུང་བ་དང་། ཕྲིན་ལས་བཞིའི་ལས་དང་། ཁྱད་པར་དུ་རེངས་པར་བྱེད་པ་དང་། རྨུགས་པའི་བྱེད་པའི་ལས་སོ། །འོ་ན་ལས་དེ་གང་གིས་རྟོགས་པར་བྱ་ཞེ་ན། གསང་སྔགས་ཀྱི་མཐུ་ཆེན་པོ་འདིས་རྟོགས་པར་སྨྲ་བར་བྱའོ། །
འོ་ན་ཇི་ལྟར་སྨྲ་བར་བྱ་ཞེ་ན། ན་མོ་རཏྣ་ཏྲ་ཡཱ་ཡ་ན་མ་ཤྩཎྜ་བཛྲ་པཱ་ཎ་ཡེ་མ་ཧཱ་ཡཀྵ་སེ་ན་པ་ཏ་ཡེ་ཧཱུཾ་ཧཱུཾ་ཞེས་བྱ་བ་སྔོན་དུ་སོང་ནས་སོ། །དེའི་དོན་ནི་རང་སྟན་བདེ་བ་ལ་འདུག་སྟེ། ཚོགས་གཉིས་སྔོན་དུ་སོང་ནས་བདག་ཉིད་རིག་པ་ཧཱུཾ་དུ་བསམས་ཏེ། དེ་ལས་འོག་གི་ཕྱོགས་སུ་རྡོ་རྗེ་རྒྱ་གྲམ། སྟེང་གུར་
ཕྱོགས་མཚམས་རྩིག་པའོ། །དེ་ནས་ཧཱུཾ་དེ་ལས་བྷྲཱུཾ་ཞུ་བ་ལས་གཞལ་ཡས་ཁང་གྲུ་བཞི་སྒོ་བཞི་སྒོ་ཁྱུད་དང་བཅས་པ་ལྟེ་བ་ཉི་མའི་དཀྱིལ་འཁོར་ལ་འཁོར་ལོ་རྩིབས་བཅུ་པའོ། །དེའི་དབུས་ཀྱི་ལྟེ་བའི་ཉི་མ་ལ་ཧཱུཾ་བསམས་ཏེ་འོད་དུ་ཞུ་བ་ལས་རྡོ་རྗེ་དཀར་པོ་གཅིག་ཏུ་གྱུར་ནས་རྡོ་རྗེ་དེའི་ལྟེ་
བ་ལ་ཧཱུཾ་ལས་འོད་འཕྲོས་ནས་སེམས་ཅན་དང་སྣོད་དུ་བཅས་པ་སྦྱངས་ཏེ། རྡོ་རྗེ་ཞུ་བས་རྡོ་རྗེ་རྣམ་པར་འཇོམས་པ་ཞེས་བྱ་བ་སྐུ་མདོག་དཀར་པོ་རྡོ་རྗེ་དང་དྲིལ་བུ་བསྣམས་པ་རྡོ་རྗེ་སྐྱིལ་མོ་ཀྲུང་གིས་བཞུགས་པ། རྒྱན་རྣམ་པ་དུ་མས་བརྒྱན་པ། དེའི་ཐུགས་ཀར་ཟླ་བའི་སྟེང་ན་ཧཱུཾ་ངོ་། །ཧཱུཾ་དེ་ལས་
མ་བཅུ་ལས་ཉི་མའི་དཀྱིལ་འཁོར་བཅུར་བསྒོམས་ནས། དེའི་སྟེང་དུ་ཧཱུཾ་བཅུ་ཐམ་པ་ལས་ཁྲོ་བོ་བཅུ་རུ་བསྒོམ་པ་ནི་ཤར་དུ་ཁམས་གསུམ་རྣམ་རྒྱལ་སྐུ་མདོག་དཀར་པོ་རྡོ་རྗེ་འཛིན་པའོ། །ལྷོ་ཕྱོགས་སུ་གཤིན་རྗེ་གཤེད་པོ་སྐུ་མདོག་དམར་ནག་ཕྱག་ན་རིན་པོ་ཆེ་བསྣམས་པའོ། །ནུབ་ཕྱོགས་
སུ་རྟ་མགྲིན་རྟ་མགོ་ལྗང་གུ་མདོག་དམར་པོ་ཕྱག་ན་པདྨ་བསྣམས་པའོ། །བྱང་ཕྱོགས་སུ་བདུད་རྩི་འཁྱིལ་པ་ལྗང་གུ་ཕྱག་ན་རྡོ་རྗེ་རྒྱ་གྲམ་བསྣམས་པའོ། །ཤར་ལྷོ་མཚམས་སུ་དབྱུག་པ་སྔོན་པོ་རྡོ་རྗེ་བེ་ཅོན་ནོ། །ལྷོ་ནུབ་མཚམས་སུ་ཨ་མོ་གྷ་པཱ་ཤ་སྐུ་མདོག་མཐིང་ནག་སྦྲུལ་ཞགས་

71-1-237b

བསྣམས་པའོ། །ནུབ་བྱང་མཚམས་སུ་འདོད་པའི་རྒྱལ་པོ་དམར་ནག་ཕྱག་ན་གྲི་གུག་བསྣམས་པའོ། །བྱང་ཤར་མཚམས་སུ་རྡོ་རྗེ་འཁོར་ལོ་སྐུ་མདོག་ལྗང་གུ་ཕྱག་ན་འཁོར་ལོ་འཛིན་པའོ། །སྟེང་གི་ཕྱོགས་སུ་ཧཱུཾ་ཀར་མཐིང་ནག་ཕྱག་ན་རལ་གྲི་བསྣམས་པའོ། །འོག་གི་ཕྱོགས་སུ་སྟོབས་
པོ་ཆེ་ནམ་མཁའི་མདོག་ཅན་རྡོ་རྗེ་རྩེ་གསུམ་པ་འཛིན་པའོ། །དེ་རྣམས་ནི་ཞབས་བརྐྱང་བསྐུམ་དུ་བཞུགས་ཤིང་ཁྲོ་བོའི་ཆས་ཀྱིས་བརྒྱན་པ་ཐུགས་ཀར་ཧཱུཾ་བསམས་ཏེ། སྤྱན་དྲང་བ་ལ་སོགས་པ་བྱའོ། །དེའི་སྔགས་ནི། ཏདྱ་ཐཱ། ཨོཾ་ཏྲ་ཊ་ཏྲ་ཊ། ཏྲོ་ཊ་ཡ་ཏྲོ་ཊ་ཡ། སྥུ་ཊ་སྥུ་ཊ། 
སྥོ་ཊ་ཡ་སྥོ་ཊ་ཡ། །གྷུརྞ་གྷུརྞ། གྷུརྞཱ་པ་ཡ་གྷུརྞཱ་པ་ཡ། ཞེས་པ་ནི་གཙོ་བོ་དང་། ཁམས་གསུམ་རྣམ་རྒྱལ་དང་། གཤིན་རྗེ་གཤེད་དང་། རྟ་མགྲིན་དང་། བདུད་རྩི་འཁྱིལ་པ་དང་། ཧཱུཾ་མཛད་དང་། སྟོབས་པོ་ཆེའོ། །ཁམས་གསུམ་རྡོ་རྗེ་
རྣམ་རྒྱལ་གྱིས་ཞེ་སྡང་ཞི་བར་གྱིས་ཤིག རྡོ་རྗེ་བེ་ཅོན་གྱིས་ཞེ་སྡང་རབ་ཏུ་ཞི་བར་གྱིས་ཤིག བོ་དྷ་ཡ་བོ་དྷ་ཡ་ཞེས་པའོ། །གཤིན་རྗེ་གཤེད་པོས་གཟུང་འཛིན་རབ་ཏུ་ཞི་བར་གྱིས་ཤིག ཨ་མོ་གྷ་པཱ་ཤས་ཡང་དག་པའི་བྱང་ཆུབ་ཏུ་སེམས་བསྐྱེད་ཅིག སཾ་བོ་དྷ་ཡ་སཾ་བོ་དྷ་ཡ། 
རྟ་མགྲིན་གྱིས་འདོད་ཆགས་རབ་ཏུ་ཞི་ཞིང་ཞི་བར་གྱུར་ཅིག་ཡེ་ཤེས་ཀྱི་རང་བཞིན་གསལ་བ་དང་། འདོད་པའི་རྒྱལ་པོས་ཡེ་ཤེས་དེ་དང་མི་མཐུན་པ་སོལ་ཅིག བྷྲ་མ་བྷྲ་མ། བདུད་རྩི་འཁྱིལ་པས་བྱང་ཆུབ་ཀྱི་སེམས་གོང་ནས་གོང་དུ་སྤེལ་བ་དང་། ཁྲོ་བོ་རྡོ་རྗེ་འཁོར་ལོས་ཡང་དག་
པར་སོལ་ཅིག སཾ་བྷྲ་མ་ཡ་སཾ་བྷྲ་མ་ཡ། ཧཱུཾ་ཀ་རས་ཟུང་ཅིག སྟོབས་པོ་ཆེས་རྗེས་སུ་ཟུང་ཅིག དེ་ལྟར་རྩ་བའི་གསང་སྔགས་བསྟན་ནས། ད་སྒོ་བ་བསྟན་པ་ནི་རྡོ་རྗེ་རྣོན་པོ་མདོག་མཐིང་ནག་རྡོ་རྗེ་རྩེ་གཅིག་པ་བསྣམས་པའོ། །ལྷོ་ན་རབ་ཏུ་ཁྲོས་པ་མདོག་སེར་པོ་ཕྱག་ན་གྲི་གུག་
བསྣམས་པའོ། །ནུབ་ཏུ་རྡོ་རྗེ་ལྕགས་སྒྲོག་མདོག་དམར་པོ་ཕྱག་ན་ལྕགས་སྒྲོག་བསྣམས་པའོ། །བྱང་ན་རྡོ་རྗེ་དྲིལ་བུ་མདོག་ལྗང་གུ་དྲིལ་བུ་བསྣམས་པའོ། །དེ་ལྟར་དཀྱིལ་འཁོར་བསྐྱེད་ནས་ནི། །གཙོ་བོའི་ཐུགས་ཀའི་ཧཱུཾ་ལས་ནི། །ཤར་དུ་པདྨའི་གདན་སྟེངས་སུ། །བདག་ཉིད་

71-1-238a

ཕྱག་ན་རྡོ་རྗེར་བསྒོམ། །སྤྱན་དྲངས་བསྟིམས་ནས་གསང་སྔགས་བཟླ། །དེ་ནི་སྔོན་དུ་བསྙེན་པའི་དོན་ཏོ། །ད་ནི་ལས་ཀྱི་སོ་སོ་ལ་སྦྱར་བ་ནི། སྦྱིན་སྲེག་རིམ་པ་བྱ་བ་ནི། །དང་པོ་ཞི་བ་ཤར་དུ་བྱ། །ཁྲུ་གང་ཟླུམ་པོ་འདབ་བཞི་ལ། །རྡོ་རྗེ་དཀར་པོ་སོར་བརྒྱད་དགོད། །
དྲི་ཞིམ་དཀར་པོའི་ཤིང་ལས་བྱའོ། །མཆོད་རྫས་བསྲེག་རྫས་དྲི་ཞིམ་དཀར། །རྫས་རྣམས་ཀྱི་ནི་སྦྱིན་སྲེག་བྱའོ། །ཨོཾ་སརྦ་བི་ཤུདྡྷཿ སརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། དེ་ནས་སྟོང་པའི་ཏིང་འཛིན་ལས། །བདག་ཉིད་ཧཱུཾ་དུ་རབ་བསམས་ཏེ། །དེ་ལས་ཐབ་ཁུང་བྷྲཱུཾ་ལས་བསྐྱེད། །པདྨ་འདབ་
བཞི་གེ་སར་ལ། །དབུས་སུ་ཟླ་བའི་དཀྱིལ་འཁོར་བསམ། །དེའི་སྟེང་དུ་ཧཱུཾ་ལས་རྡོ་རྗེ་དཀར་པོ་གཅིག་ཏུ་གྱུར་པར་བསམས་ཏེ། དེ་ཡོངས་སུ་གྱུར་པ་ལས་རྡོ་རྗེ་རྣམ་པར་འཇོམས་པ་སྐུ་མདོག་དཀར་པོ་རྡོ་རྗེ་དང་དྲིལ་བུ་འཛིན་པའོ། །དེའི་ཐུགས་ཀ་ན་ཟླ་བའི་སྟེང་ན་རཾ་གྱི་མཐའ་མ་ན་
ཕར་ལ་ན་མ་ཤྩཎྜ་བཛྲ་པཱ་ཎ་ཡེ་ཧཱུཾ་གིས་བསྐོར་བར་བསྒོམ། ཤར་དུ་ཉི་མའི་སྟེང་དུ་ཧཱུཾ་ལས་རྡོ་རྗེ་དཀར་པོ་ལས་ཁམས་གསུམ་རྣམ་པར་རྒྱལ་བ་མདོག་དཀར་པོ་ཕྱག་ན་རྡོ་རྗེ་བསྣམས་པའོ། །ལྷོར་ཉི་མའི་སྟེང་དུ་ཧཱུཾ་ལས་རྡོ་རྗེ་དཀར་པོ་དེ་ལས་གཤིན་རྗེ་གཤེད་དམར་ནག་ཕྱག་ན་རིན་པོ་ཆེ་བསྣམས་
པའོ། །ནུབ་ཏུ་རྟ་མགྲིན་དམར་པོ་ཕྱག་ན་པདྨ་བསྣམས་པའོ། །བྱང་དུ་བདུད་རྩི་འཁྱིལ་པ་སྐུ་མདོག་ལྗང་གུ་ཕྱག་ན་རྡོ་རྗེ་རྒྱ་གྲམ་བསྣམས་པའོ། །ཞབས་བརྐྱང་བསྐུམ་སྟག་དང་སྦྲུལ་གྱིས་བརྒྱན་པ། ཐུགས་ཀ་ན་ཟླ་བའི་ཐོག་ན་རཾ་འོད་འབར་བ་ཅན་ནོ། །མཐའ་མ་ན་བསྐོར་བ་ནི། ཨོཾ་བོ་
དྷ་བོ་དྷ། སཾ་བོ་དྷ་ཡ་སཾ་བོ་དྷ་ཡ། བྷྲ་མ་བྷྲ་མ། སཾ་བྷྲ་མ་ཡ་སཾ་བྷྲ་མ་ཡ་ཞེས་པའོ། །སྤྱན་དྲང་བ་དང་བསྟིམ་པ་ལ་སོགས་པ་རྫོགས་ནས་ཞི་བར་བྱ་བའི་ཕྱིར་གོང་གི་རྩ་བའི་སྔགས་ལས་སརྦ་བྷཱུ་ཏ་ནི་ཤཱནྟིཾ་ཀུ་རུ་སྭཱཧཱ། ཞེས་པས་ཞི་བར་འགྱུར་རོ། །རྒྱས་པ་ལ་ནི་དབྱིབས་གྲུ་བཞི་ཁྲུ་གང་པ་
སེར་པོས་བྱུགས་ལ་ནང་དུ་འཁོར་ལོ་རྩིབས་བཞི་པ་གསེར་དང་འདྲ་བ་ལ་རྡོ་རྗེ་སེར་པོ་དགོད་པར་བྱའོ། །ཙནྡན་ནམ་དྲི་དང་ལྡན་པའི་མེ་ལ་ཏིལ་བསྲེག་པར་བྱའོ། །དེའི་དོན་ནི་སྟོང་པ་ཉིད་ལས་བདག་ཉིད་ཧཱུཾ་དུ་བསམས་ཏེ་དེ་ལས་འཕྲོས་པས་གསེར་གྱི་འཁོར་ལོ་རྩིབས་བཞི་པ་བསམས་ཏེ། 

71-1-238b

དེའི་ལྟེ་བ་ལ་ཉི་མའི་ཐོག་ཏུ་ཧཱུཾ་ཞུ་བ་ལས་རྡོ་རྗེ་སེར་པོ་ལས་རྡོ་རྗེ་རྣམ་པར་འཇོམས་པར་བསྐྱེད། གཞན་གོང་དང་འདྲ་བ་ལས་སེར་པོ་རཾ་སེར་པོའོ། །ན་མ་ཤྩཎྜ་བཛྲ་པཱ་ཎ་ཡེ། ཨོཾ་ཏྲ་ཊ་ཏྲ་ཊ། ཏྲོ་ཊ་ཡ་ཏྲོ་ཊ་ཡ།  སྥུ་ཊ་སྥུ་ཊ། སྤོ་ཊ་ཡ་སྥོ་ཊ་ཡ། ཏད་ཡ་ཐཱ། སརྦ་སཏྭ་ནི་པུཥྚིཾ་ཀུ་རུ་ཡེ་སྭཱཧཱ། 
དབང་གི་ཟླ་གམ་དམར་པོ་སྟེ་ནང་དུ་པདྨ་དམར་པོ་འདབ་མ་དྲུག་པའི་སྟེང་དུ་རྡོ་རྗེ་དམར་པོ་བྲི་བར་བྱའོ། །སེང་ལྡེང་ལ་སོགས་པ་དམར་པོའི་ཤིང་ལ་ཡུངས་ཀར་དམར་པོ་ལས་དགུག་པའི་ལས་བྱ་ཞིང་སྲེག་གོ། །དེའི་དོན་ནི་སྟོང་པ་ལས་བདག་ཉིད་ཧཱུཾ་དུ་བསམས་ཏེ། པཾ་ལས་པདྨ་དམར་པོའི་
འདབ་མའི་སྟེང་དུ་ཧཱུཾ་ལས་རྡོ་རྗེ་དམར་པོ་དེ་ལས་རྡོ་རྗེ་རྣམ་པར་འཇོམས་པ་སྐུ་མདོག་དམར་པོ་ཐུགས་ཀར་ཉི་མའི་ཐོག་ཏུ་རཾ་དམར་པོ་གཞན་གོང་དང་མཐུན་པ་ལས་དམར་པོ་ལ་རཾ་དམར་པོའོ། །སྟེང་དུ་ཧཱུཾ་ཀ་ར་མཐིང་ག་རལ་གྲི་འཛིན་པ། འོག་ཏུ་སྟོབས་པོ་ཆེ་ནམ་མཁའི་མདོག་ཅན་རྡོ་རྗེ་
རྩེ་གསུམ་པའོ། །ཀུ་ཊ་ཀུ་ཊ། སཾ་ཀུ་ཊ་ཡ་ས་ཀུ་ཊ་ཡ། གྷ་ཊ་གྷ་ཊ། སཾ་གྷ་ཊ་ཡ་སཾ་གྷ་ཊ་ཡ། གྷུརྞྞ་གྷུརྞྞ།  གྷུརྞྞ་པ་ཡ་གྷུརྞྞ་པ་ཡ། སརྦ་ཤ་ཏྲཱུཾ་ཨ་མོ་གྷ་ཀུ་རུ་ཀུ་ལེ་ཝ་ཤཾ་ཀུ་རུ་སྭཱཧཱ། བསད་པ་ལ་ནི་འདི་ཡིན་ཏེ། དུར་ཁྲོད་འཇིགས་པའི་གནས་ཕྱིན་ལ། །དུར་ཁྲོད་ས་ལས་
བྱས་པ་ཡི། །གྲུ་བཞི་སྒོ་བཞི་རྒྱ་གྲམ་བྲི། །ལྟེ་བར་གྲུ་གསུམ་ཐོད་པས་བསྐོར། །ཕུར་བུའི་རྫས་ནི་གཏོར་མ་བཞི། །ལྕགས་ཕྱེ་རྡོ་རྗེ་ཡུངས་ཀར་རྣམས། །གོ་རིམས་བཞིན་དུ་བསག་པར་བྱ། །རྫས་རྣམས་བཀྲམ་ནས་བསྒོམ་པ་ནི་དང་པོ་བསོད་ནམས་ཀྱི་བདག་ཉིད་སྡིག་པ་བཤགས་
པ་ལ་སོགས་པ་བྱའོ། །དེའི་རྗེས་ལ་ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བྱ་བས་སྟོང་པ་ཉིད་དུ་བསྒོམ་པའོ། །དེ་རྗེས་བྷྲཱུཾ་ལས་གཞལ་ཡས་ཁང་། །གྲུ་བཞི་པ་ལ་སྒོ་བཞི་པ། །ཀ་བ་བརྒྱད་དང་རིན་ཆེན་ཏེ། །ནང་ནི་དུར་ཁྲོད་འཇིགས་པའོ། །རྡོ་རྗེ་རྒྱ་གྲམ་ནག་པོ་སྟེ། །གྲུ་
གསུམ་ནམ་མཁའི་མདོག་ཅན་བསྒོམ། །གྲུ་གསུམ་ནང་དུ་ཟླ་སྟེང་དུ། །ཧཱུཾ་ལས་རྡོ་རྗེ་ནག་པོ་ཆེ། །རིག་པར་བྱས་ཏེ་འོད་དུ་ཞུ། །དེ་ལས་རྡོ་རྗེ་ནག་པོའི་སྐུ། །བརྐྱང་བསྐུམ་རྡོ་རྗེ་ནག་པོ་བསྣམས། །གཡོན་ན་དྲིལ་བུ་སྡིགས་མཛུབ་མཛད། །ཁྲོས་པའི་ཞལ་མདོག་སྟག་ལྤགས་

71-1-239a

གྱོན། །ཞལ་ནས་ཧཱུཾ་སྒྲོགས་དཔའ་བོ་ཆེ། །ཐུགས་ཀའི་ཧཱུཾ་ལས་འོད་འཕྲོས་པས། །ཤར་ཕྱོགས་རྡོ་རྗེ་རྩེ་མོ་ལ། །ཁྲོ་བོ་བདུད་ལས་རྒྱལ་བྱེད་ནི། །ལྕགས་ཀྱུ་ཕུར་བུ་སྐུ་མདོག་དཀར། །ཟླ་བའི་གདན་ལ་བརྐྱང་བསྐུམ་བཞུགས། །ལྷོ་ཕྱོགས་རྡོ་རྗེ་རྩེ་མོ་ལ། །
ཁྲོ་བོ་གཤིན་རྗེ་གཤེད་པོ་ནི། །སྐུ་མདོག་དམར་ནག་འཇིགས་པ་ལ། །ཕྱག་ན་གྲི་གུག་ཕུར་པ་བསྣམས། །ནུབ་ཕྱོགས་ཁྲོ་བོའི་རྒྱལ་པོ་ནི། །ཁྲོ་བོའི་རྒྱལ་པོ་རྟ་མགྲིན་ནི། །སྐུ་མདོག་དམར་པོ་འཇིགས་པ་ལ། །རྡོ་རྗེ་རྩེ་གཅིག་ཕུར་པ་བསྣམས། །བྱང་ཕྱོགས་ཁྲོ་བོའི་རྒྱལ་པོ་ནི། །ཁྲོ་བོའི་
རྒྱལ་པོ་བདུད་རྩི་འཁྱིལ། །སྐུ་མདོག་ལྗང་ནག་འཇིགས་པ་ལ། །ཕྱག་ན་ཞགས་པ་ཕུར་པ་འཛིན། །ཁྲོས་པའི་ཞལ་ལྡན་འཇིགས་པའོ། །རྒྱན་རྣམས་འཛིན་པར་བསྒོམ་པར་བྱའོ། །ཡེ་ཤེས་སེམས་དཔའ་སྤྱན་དྲངས་ནས། །གསང་བའི་སྔགས་ཀྱི་བཟླས་པ་བྱ། །ཨོཾ་ཧེ་ཕུ་ལུ་ནི་རུ་
ཕུ་ལུ་གྲྀཧྣ་ཀུ་ལུ་མི་ལི་ཙུ་ལུ་ཀུ་རུ་ཀུ་ལུ་བཛྲ་བི་ཛ་ཡ་སྭཱཧཱ། དེ་ནི་ཁམས་གསུམ་རྣམ་པར་རྒྱལ་བའི་རྩ་བའི་སྔགས་ཏེ། ཚར་གཅད་པའི་ལྕགས་ཀྱུ་དང་། ཕུར་པའིའོ། །ཨོཾ་ཀ་ཊ་ཀ་ཊ། མ་ཊ་མ་ཊ། ར་ཊ་ར་ཊ་མོ་ཊ་ནི་པྲ་མོ་ཊ་ནཱ་ཡ་ཀཱི་ལི་ཀཱི་ལཱ་ཡ་སྭཱཧཱ། དེ་ནི་གཤིན་རྗེ་གཤེད་པོའི་སྔགས་
ཏེ། ལས་ཀྱི་སྔགས་གྲི་གུག་དང་ཕུར་པའི་སྔགས་སོ། །ཙ་ར་ནི་ཙ་ར། ཧ་ར་ཧ་ར། ས་ར་ས་ར། མཱ་ར་ཡ་མཱ་ར་ཡ་བཛྲ་ཀཱི་ལི་ཀཱི་ལཱ་ཡ་སྭཱཧཱ། ཞེས་པ་རྟ་མགྲིན་གྱི་སྔགས་སོ། །ལས་ཀྱི་སྔགས་ཏེ། རྡོ་རྗེ་རྩེ་གཅིག་པ་དང་ཕུར་པའི་སྔགས་སོ། །ཙྪིནྡ་ཙྪིནྡ། བྷིནྡ་བྷིནྡ། མ་ཧཱ་ཀཱི་ལི་ཀཱི་ལཱ་ཡ་
སྭཱཧཱ། བནྡྷ་བནྡྷ། ཀྲོ་དྷ་ཀྲོ་དྷ། ཀཱི་ལི་ཀཱི་ལཱ་ཡ་སྭཱཧཱ། ཞེས་པ་ནི་སྒོ་བའི་སྔགས་སོ། །ལས་ཀྱི་ཡང་སྔགས་ཏེ། ཞགས་པ་དང་། ལྕགས་སྒྲོག་དང་། ལྕགས་ཀྱུ་དང་། དྲིལ་བུའོ། །ཙུ་རུ་ཙུ་རུ་ཙཎྜ་ཀཱི་ལི་ཀཱི་ལཱ་ཡ་སྭཱ་ཧཱ། ཞེས་བྱ་བ་ནི་བདུད་རྩི་འཁྱིལ་པའོ། ལས་ཀྱི་སྔགས་ཏེ་
ཞགས་པ་དང་། ཕུར་བུའོ། །ཏྲཱ་ས་ཡ་ཏྲཱ་ས་ཡ་བཛྲ་ཀཱི་ལི་ཀཱི་ལཱ་ཡ་སྭཱཧཱ་ཞེས་བྱ་བ་ནི་གཙོ་བོ་རྡོ་རྗེ་རྣམ་པར་འཇོམས་པའི་སྔགས་ཏེ། ལས་ཀྱི་རྡོ་རྗེ་དང་ཕུར་པའི་སྔགས་སོ། །ཀུ་ཊ་ཀུ་ཊ་སཾ་ཀུ་ཊ་ཡ་སཾ་ཀུ་ཊ་ཡ་སརྦ་ཤ་ཏྲཱུཾ་ཧཱུཾ་ཧཱུཾ་ཧཱུཾ་སྭཱ་ཧཱ། ཡུངས་ཀར་དང་ལྕགས་ཕྱེས་གདབ་པའོ། །

71-1-239b

དེའི་གཏོར་མ་བསྟན་པ་ནི། །གསེར་དངུལ་ཟངས་ལྕགས་སྣོད་ནང་དུ། །དཀར་གསུམ་མངར་གསུམ་ལ་དུ་དང་། །སྣུམ་ཁུར་འབྲུ་རྣམས་ཡོངས་སུ་དགང་། །དེ་རྣམས་བྱིན་བརླབ་རིན་ཆེན་སྣོད། །འབྲུ་གསུམ་སྔགས་ཀྱིས་སྦྱང་ཞིང་སྤེལ། །ཨོཾ་ཨཱཿཧཱུཾ། དེ་ནས་མཆོད་པ་བྱ་བ་ནི། 
དང་པོ་གཙོ་བོ་མཆོད་པ་ནི། ན་མཿས་མནྟ་བཛྲ་ཎཱཾ་སརྦ་བ་ལཾ་ཨཱ་ཝརྟ་ཡ་མ་ཧཱ་བ་ལེ། ཀ་ཏ་བེ་ཏ་ཏ་ལེ། ཨ་ཙ་ལེ་ཞེས་པ་ལྷ་མོའི་གླུ་དང་བཅས་པས་དབུལ་ཏེ། ཧ་ར་ཧ་ར་བཛྲ་དྷཱ་རཱ་ཡ་སྭཱ་ཧཱ། པྲ་ཧ་ར་པྲ་ཧ་ར་བཛྲ་པྲ་བྷཉྫ ནཱ་ཡ་སྭཱ་ཧཱ་ཞེས་བྱ་བས་སོ། །དཀྱིལ་འཁོར་གྱི་ལྷ་མཆོད་པ་ནི། 
མཎྜལ་མཱ་ཡེ་ཨ་ཏི་བཛྲ། མ་ཧཱ་བ་ལེ། བེ་ག་ར་ཎ་ར་ཎ། ཨ་ཛི་ཏེ་ཛྭ་ལ་ཛྭ་ལ། ཏི་ཊི་ཏི་ཊི་པིང་ག་ལེ། ད་ཧ་ད་ཧ། ཏེ་ཛ་བ་ཏི། ཏི་ལི་ཏི་ལི། བནྡྷ་བནྡྷ། ཞེས་བྱ་བའི་གླུ་དང་ལྡན་པས་མཆོད་པ་ནི། མ་ཧཱ་བ་ལི། ཧ་ར་ཧ་ར་བཛྲ་དྷཱ་རཱ་ཡ་སྭཱ་ཧཱ། པྲ་ཧ་ར་པྲ་ཧ་ར་བཛྲ་པྲ་བྷཉྫ་ནཱ་ཡ་སྭཱ་ཧཱ། 
བཛྲ་ཀྲོ་དྷ་ཛྲ་ལ་ཡ་སྭཱ་ཧཱ། ཞེས་པས་གཏོར་མ་དབུལ་བར་བྱའོ། །ད་ནི་རེངས་པའི་ལས་བྱ་བ་ནི་དོང་གྲུ་གསུམ་པ་བྱ་སྟེ། དེའི་ནང་དུ་འཁོར་ལོ་གཞུག་པ་ནི་གཟུགས་བཞག་འཁོར་ལོ་རྩེ་གསུམ་ལ་བརྒྱངས་ལ།  སྔགས་མ་ཏི་སྠི་ར་བཛྲ། སུ་ཏི་སྠི་ར་བཛྲ། པྲ་ཏི་སྠི་ར་བཛྲ། ཞེས་པ་ནི་
མགོ་བོ་དང་། རྐང་པ་གཉིས་ལའོ། །མ་ཧཱ་བཛྲ། ཨ་པྲ་ཏི་ཧ་ཏ་བཛྲ། ཨ་མོ་གྷ་བཛྲ། ཨེ་ཧི་བཛྲ། ཤཱི་གྷྲཾ་བཛྲ་དྷཱ་རཱ་ཡ་སྭཱ་ཧཱ། ལག་པ་གཉིས་དང་། རྩིབ་ལོགས་གཉིས་དང་། གསང་བའི་གནས་དང་ལྟེ་བའོ། །དེ་ལྟ་བུའི་རྡོ་རྗེ་ཕུར་བུ་བརྒྱད་ཀྱིས་བཏབ་ལ་དོང་གྲུ་གསུམ་དུ་
གཞུག་གོ། །རང་ཉིད་བསྒྲུབ་པའི་དཀྱིལ་འཁོར་བཞིན་བསྒོམས་ལ་ལས་བྱའོ། །སྲུང་བ་ནི་གྲོ་གའམ་རས་སམ་གང་ཡང་རུང་བ་ལ་འཁོར་ལོ་རྩིབས་དྲུག་པ་བྱ་སྟེ། དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། དགོད་པར་བྱའོ། །ལྟེ་བ་ལ་སརྦ་བཛྲ་ཀུ་ལཾ་ཨཱ་བརྟ་ཡ་སྭཱ་ཧཱ། དེའི་ཕྱི་རོལ་
དུ་འཁོར་ལོའི་མུ་ཁྱུད་ལ་གསལ་བྱེད་དགོད་དོ། །དེའི་ཕྱི་རོལ་དུ་འཁོར་ལོའི་རྩིབས་བརྒྱད་ལ། མ་ཏི་སྠི་ར་བཛྲ། སུ་ཏི་སྠི་ར་བཛྲ། པྲ་ཏི་སྠི་ར་བཛྲ། མ་ཧཱ་བཛྲ། ཨ་པྲ་ཏི་ཧ་ཏ་བཛྲ། ཨ་མོ་གྷ་བཛྲ། ཨཱེ་ཧི་བཛྲ། ཤཱི་གྷྲཾ་དྷཱ་རཱ་ཡ་བཛྲ་སྭཱ་ཧཱ། མུ་ཁྱུད་ལ་དབྱངས་ཀྱི་ཡི་གེ་ཚོ་དགོད་

71-1-240a

པར་བྱའོ། །དེའི་དོན་ནི་ཁྲོ་བོ་བཅུ་ཧཱུཾ་ལས་འཁོར་ལོ་ལ་བསྐྱེད་ལ་མཆོད་པ་དང་། བསྟོད་པ་དང་། སྟིམ་པ་བྱས་ལ་སྔགས་འདི་བཟླས་པ་བརྒྱ་རྩ་བརྒྱད་དམ་ཉི་ཤུ་རྩ་གཅིག་བཟླས་ཏེ་ལུས་ལ་བཏགས་ན། གཟའ་དང་རྒྱུ་སྐར་བྱད་སྟེམས་དང་། མི་བཟད་པའི་ནད
རྣམས་ཀྱང་ཞི་བར་འགྱུར་རོ། །དེས་ནི་ཐབས་ཀྱི་དོན་བཤད་ཟིན་ཏོ། །ད་ནི་ཤེས་རབ་ཀྱི་དོན་འཆད་པ་ནི་སའི་ཆོ་ག་ལ་སོགས་པ་རྫོགས་པར་བྱས་ནས། མཎྜལ་ཤིན་ཏུ་དྲི་ཞིམ་པ་དང་ལྡན་པའི་ཐོག་ཏུ་དྲིའི་ཐིག་ལེ་བཅོ་ལྔ་བྱ་སྟེ། བུམ་པ་མཚན་ཉིད་འཆད་པར་འགྱུར་བའི་རྫས་དང་བཅས་པར་
བཅོ་ལྔ་གཞག་པར་བྱའོ། །ཕྱོགས་སྐྱོང་བའི་གཏོར་མ་ཡང་གཞག་པར་བྱའོ། །མཆོད་པ་རྣམ་པ་ལྔ་ཡང་བཤམས་ཏེ། འོག་ནས་སྟོན་པའི་ལས་ཐམས་ཅད་བུམ་པའི་ཆུས་བསངས་ལ། བསྒྲུབ་པ་ནི་བྱང་ཆུབ་ཏུ་སེམས་བསྐྱེད་ཅིང་། ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་
ཞེས་པས་སྟོང་པར་བསྒོམ་མོ། །དེའི་རྗེས་ལ་བདག་ཕྱག་ན་རྡོ་རྗེར་བསྒོམས་པའི་ཐུགས་ཀའི་ཧཱུཾ་དེ་ལས་བཾ་བཅོ་ལྔ་འཕྲོས་པས་པདྨ་དེའི་སྟེང་དུ་བྷྲཱུཾ་ལས་བུམ་པ་བཅོ་ལྔ་བསྐྱེད་ལ། དེའི་ནང་དུ་ཧཱུཾ་དེའི་ཆ་ཤས་ཧཱུཾ་རེ་རེ་བསམ་མོ། །དེ་ཡོངས་སུ་གྱུར་པ་ལས་ཟླ་བའི་སྟེང་དུ་རྡོ་རྗེ་དཀར་
པོ་རྩེ་ལྔ་པ་ལྟེ་བ་ལ་ཧཱུཾ་དང་བཅས་པར་བསམས་ཏེ། རྡོ་རྗེ་ལ་སྔགས་ཀྱིས་བསྐོར་བ་ནི་སྟེང་དུ། ཨོཾ་ཧ་ར་ཧ་ར་བཛྲ། ཤར་དུ་ཨོཾ་མ་ཐ་མ་ཐ་བཛྲ། ཤར་ལྷོར་དྷུ་ན་དྷུ་ན་བཛྲ། ལྷོར་ད་ཧ་ད་ཧ་བཛྲ། ལྷོ་ནུབ་ཏུ་པ་ཙ་པ་ཙ་བཛྲ། ནུབ་ཏུ་དྷ་ར་དྷ་ར་བཛྲ། ནུབ་བྱང་མཚམས་སུ་དྷཱ་རཱ་ཡ་དྷཱ་རཱ་ཡ་
བཛྲ། བྱང་དུ་དྷཱ་རུ་ཎ་དྷཱ་རུ་ཎ་བཛྲ། བྱང་ཤར་དུ་ཙྪིནྡ་ཙྪིནྡ་བཛྲ། འོག་ཏུ་བྷིནྡ་བྷིནྡ་བཛྲ། དེ་ཡོངས་སུ་བསྐོར་བའི་རྡོ་རྗེའོ། །ཤར་དུ་མ་ཐ་བཛྲ་བཛྲ། ལྷོར་སྥོ་ཊ་བཛྲ་བཛྲ། ནུབ་ཏུ་ཀ་ཊ་བཛྲ་བཛྲ། བྱང་དུ་མ་ཐ་བཛྲ་བཛྲ། དབུས་སུ་སརྦ་བིདྱཱ་བཛྲ་བཛྲ། དེ་ལྟར་སྔགས་རྣམས་
བཀོད་ནས། ཧཱུཾ་ལས་འོད་འཕྲོས་སྤྱན་དྲང་བ་ནི་སངས་རྒྱས་ཐམས་ཅད་སྤྱན་དྲངས་ལ་བསྟིམ་མོ། །དེ་ནས་བཟླས་པ་བྱ་བ་ནི་ཉི་ཤུ་རྩ་གཅིག་གམ། བརྒྱ་རྩ་བརྒྱད་ཐིམ་པ་དང་། ཡེ་ཤེས་ནམ་མཁའ་ལ་ཉི་ཟླས་བཏེག་ལ་དམ་ཚིག་བསྡུའོ། །བུམ་པའི་ཆོ་ག་རྫོགས་པ་དང་། །མཎྜལ་

71-1-240b

གནས་ནི་གཞན་དུ་གཞག  །ཁ་ཚར་མ་ཉམས་རས་སྟེང་དུ། །སློབ་མ་བསངས་ནས་སྡོམ་པ་སྦྱིན། །དེ་ནས་ཐིག་གི་ལས་བྱ་སྟེ། །ཚད་དང་ལྡན་པའི་ཐིག་སྐུད་ལ། །དྲི་ཞིམ་ཆུ་ཡིས་བྱུགས་པ་ནི། །ཚངས་ཐིག་ནས་བཟུང་ཟུར་དང་ལོགས། །དེ་ནས་ཆ་རྣམས་དབྱེ་བར་བྱ། །དེ་ནས་
ཚོན་གྱི་ལས་བྱ་སྟེ། །རིན་ཆེན་སྣ་ལྔའི་ཕྱེ་མ་ལ། །བྱིན་རླབས་རྫོགས་ནས་དེ་ནས་དགྱེ། །དེ་ལྟར་ཟླ་བའི་མཎྜལ་བྲི། །འཁོར་ལོ་རྩིབས་བཅུ་སེར་པོ་བྲི། །གྲུ་བཞི་སྒོ་བཞི་རྟ་བབས་བྲི། །དེ་ལྟར་བྲིས་ནས་རྫས་རྣམས་ནི། །བུམ་པ་མ་ནོར་ཕྱོགས་སུ་དགྲམ། །རྡོ་རྗེ་རྡོ་རྗེའི་སྟེང་དུ་
དགོད། །ལས་ཀྱི་བུམ་པ་ཤར་དུ་དགོད། །མཆོད་པ་མེ་ཏོག་སྤོས་དག་དང་། །ལྷ་བཤོས་དྲི་དང་བུམ་པ་བཞིན། །དེ་ལྟར་བཀོད་ནས་ཆོ་ག་ནི། །སྡིག་པ་བཤགས་པ་ལ་སོགས་བྱའོ། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧཾ་ཞེས་བྱ་བས་སྟོང་པ་ཉིད་དུ་བསྒོམ་པར་བྱའོ། །
དེའི་རྗེས་ལ་བདག་ཉིད་ཧཱུཾ་དུ་བསྒོམས་ནས་བྷྲཱུཾ་ལས་གཞལ་ཡས་ཁང་བསྐྱེད་དེ་དེའི་སྟེང་དུ་པདྨ་བཅོ་ལྔ་བསམས་ལ། དེའི་ཐོག་ཏུ་བུམ་པ་བསྐྱེད་ལ་སྔ་མ་བཞིན་རྡོ་རྗེ་དང་ཧཱུཾ་ཡང་བསམས་ཏེ། ཡེ་ཤེས་བཏེག་པ་དེ་ཡང་བསྟིམ་མོ། །དེ་ལས་འོད་ཟེར་འཕྲོ་འདུ་ལས་རྡོ་རྗེ་དང་ཧཱུཾ་ཞུ་བ་ལས་ཁྲོ་
བོ་བཅོ་ལྔ་བསྐྱེད་པ་ནི་དབུས་སུ་རྡོ་རྗེ་རྣམ་པར་འཇོམས་པ་སྐུ་མདོག་དཀར་པོ་རྡོ་རྗེ་དང་དྲིལ་བུ་འཛིན་པ། ཤར་དུ་ཁམས་གསུམ་རྣམ་རྒྱལ་མདོག་དཀར་པོ་ཤེལ་གྱི་རྡོ་རྗེ་དང་སྡིགས་མཛུབ། ལྷོར་གཤིན་རྗེ་གཤེད་དམར་པོ་མེ་ཤེལ་དང་སྡིགས་མཛུབ། ནུབ་ཏུ་རྟ་མགྲིན་དམར་པོ་པདྨ་དང་
སྡིགས་མཛུབ། བྱང་དུ་བདུད་རྩི་འཁྱིལ་པ་དཱུར་བ་དང་སྡིགས་མཛུབ། ཤར་ལྷོར་དབྱུག་པ་སྔོན་པོ་རིན་པོ་ཆེའི་ཙནྡན་དང་སྡིགས་མཛུབ། ལྷོ་ནུབ་ཏུ་དོན་ཡོད་ཞགས་པ་མཐིང་ག་ཡུངས་ཀར་དང་སྡིགས་མཛུབ། ནུབ་བྱང་དུ་ཁྲོ་གཉེར་ཅན་དམར་ནག་རིན་པོ་ཆེ་དང་སྡིགས་མཛུབ། 
བྱང་ཤར་དུ་རྡོ་རྗེ་འཁོར་ལོ་ལྗང་གུ་རིན་པོ་ཆེ་གསེར་གྱི་འཁོར་ལོ་དང་སྡིགས་མཛུབ། སྟེང་དུ་གནོད་མཛེས་མཐིང་ནག་གདུགས་དང་སྡིགས་མཛུབ། འོག་ཏུ་རྡོ་རྗེ་སྡེར་མོ་རྒྱལ་མཚན་དང་སྡིགས་མཛུབ་མདོག་དཀར་པོ་བུམ་པའི་ནང་དུ་ཅུང་ཞིག་ཁྲོས་པའི་མདོག་གོ། །སྒོ་བ

71-1-241a

བཞི་ནི་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་རྣམས་མདོག་དཀར་པོ་རྡོ་རྗེ་ཞུ་བ་ལས་བསྐྱེད་ཅིང་བསྒོམ་མོ། །དེ་རྣམས་ཀྱང་ཐུགས་ཀར་རྡོ་རྗེ་དཀར་པོ་ལྟེ་བ་ལ་ཧཱུཾ་དང་བཅས་པ་ཟླ་བའི་སྟེང་དུ་བསམ་མོ། །དེ་ནས་ཡེ་ཤེས་སེམས་དཔའ་སྤྱན་དྲངས་ལ་མཆོད་པ་ནི། 
ཨོཾ་བཛྲ་དྷཱུ་པེ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུཾ། ཨོཾ་བཛྲ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཨོཾ་བཛྲ་ཨཱ་ལོ་ཀེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཨོཾ་བཛྲ་གནྡྷེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཨོཾ་བཛྲ་ནཻ་བི་དྱེ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུཾ། ཨོཾ་བཛྲ་ཤཔྟ་
པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ་ཞེས་བྱ་བས་མཆོད་ནས། ཛཿཧཱུཾ་བཾ་ཧོཿ ཞེས་བྱ་བས་བསྟིམ་མོ། །དེ་ནས་དབང་བསྐུར་བྱས་ནས་ཐམས་ཅད་ལ་རྡོ་རྗེ་སེམས་དཔས་མཚན་པར་བྱའོ། །དེ་ནས་གསང་སྔགས་བཟླས་པ་ནི། ན་མ་ཤྩཎྜ་བཛྲ་པཱ་ཎ་ཡེ། སརྦ་བིདྱཱ་བཛྲ་བཛྲ་སྭཱ་ཧཱ། མ་ཧཱ་
ཡཀྵ་སེ་ནཱ་པ་ཏ་ཡེ། ཧ་ར་ཧ་ར་བཛྲ། མ་ཐ་མ་ཐ་བཛྲ། དྷུ་ན་དྷུ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། དྷ་ར་དྷ་ར་བཛྲ། དྷཱ་རཱ་ཡ་དྷཱ་རཱ་ཡ་བཛྲ། དཱ་རུ་ཎ་དཱ་རུ་ཎ་བཛྲ། ཙྪིནྡ་ཙྪིནྡ་བཛྲ། བྷིནྡ་བྷིནྡ་བཛྲ་ཧཱུཾ་ཕཊ་སྭཱ་ཧཱ། ཨོཾ་མ་ཧཱ་ཡཀྵཱ་སེ་ནཱ་པ་ཏ་ཡེ། མ་ཊ་བཛྲ་བཛྲ། སྤོ་ཊ་བཛྲ་བཛྲ། 
ཀ་ཊ་བཛྲ་བཛྲ། མ་ཐ་བཛྲ་བཛྲ་ཧཱུཾ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་བརྒྱ་རྩ་བརྒྱད་དམ་ཉི་ཤུ་རྩ་གཅིག་གམ་བདུན་རྫོགས་ནས་མཆོད་པ་དབུལ་བར་བྱའོ། །དེ་ནས་ཁྲུས་བྱ་བའི་ཕྱིར། ན་མཤྩཎྜ་བཛྲ་པཱ་ཎ་ཡེ་སརྦ་བིདྱཱ་བཛྲ་བཛྲ་ཧཱུཾ། སྥ་ར་ཎ་ཨ་མྲྀ་ཏེ་ཧཱུཾ་ཕཊ། ཨོཾ་མ་ཧཱ་ཡཀྵ་སེ་ནཱ་པ་ཏ་ཡེ། ཧ་ར་ཧ་ར་
བཛྲ། མ་ཐ་མ་ཐ་བཛྲ། དྷུ་ན་དྷུ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། དྷ་ར་དྷ་ར་བཛྲ། དྷཱ་རཱ་ཡ་དྷཱ་རཱ་ཡ་བཛྲ། དཱ་རུ་ཎ་དཱ་རུ་ཎ་བཛྲ། ཙྪིནྡ་ཙྪིནྡ་བཛྲ། བྷིནྡ་བྷིནྡ་བཛྲ། སྥ་ར་ཎ་ཨ་མྲྀ་ཏེ་ཧཱུཾ་ཕཊ། ཅེས་བྱ་བས་དབུས་ཀྱི་གཙོ་བོ་བདུད་རྩིར་བྱ་སྟེ། སྒོ་བ་བཞི་བསྒོམ་པ་ནི། ཨོཾ་
མ་ཧཱ་ཡཀྵ་སེ་ན་པ་ཏ་ཡེ། མ་ཊ་བཛྲ་བཛྲ་ཛཿ སྤོ་ཊ་བཛྲ་བཛྲ་ཧཱུཾ། ཀ་ཊ་བཛྲ་བཛྲ་བ། མ་ཐ་བཛྲ་བཛྲ་ཧོཿ དེས་ནི་ཡེ་ཤེས་དབབ་ཅིང་བསྟིམས་ནས། དབང་བསྐུར་ཞིང་ཁྲུས་བྱ་བ་ནི་མཎྜལ་ལེགས་པར་བྱས་ལ་རྒྱལ་པོ་ལ་འཁོར་ལོ། །རྗེའུ་ལ་རིན་པོ་ཆེ། བྲམ་ཟེ་ལ་པདྨ། དམངས་

71-1-241b

རིགས་ལ་ལས་ཀྱི་རྡོ་རྗེ། སྔགས་ནི་རྡོ་རྗེ་བྲིས་ལ་ཐོག་ཏུ་བཞག་སྟེ་ཁྲུས་བྱེད་དུ་གཞུག་པའི། གང་དག་ཡིད་དགེ་སེམས་དང་ཞིང་། །གཙང་མའི་གོས་ཀྱིས་རབ་བརྒྱན་ཏེ། །དེ་ནི་རབ་བཀྲུས་གཙང་མ་ཡིན། །དེང་དུ་འབྲས་བུ་དམ་པ་བརྙེས། །དེ་ནས་ཅི་བྱ་ཞེ་ན། ཟབ་མོ་སངས་རྒྱས་སྤྱོད་
ཡུལ་བའི། །མདོ་སྡེ་དམ་པ་མཉན་པར་བྱ། །མདོ་སྡེ་དམ་པ་ཉན་བྱེད་ན། །མདོ་སྡེ་འདི་ཡི་གཟི་བརྗིད་ཀྱིས། །སྲོག་ཆགས་དག་ནི་ཐམས་ཅད་དང་། །མི་བཟད་པ་ཡི་ནད་རྣམས་དང་། །དེ་དག་ཐམས་ཅད་ཞི་བར་ལྟ། །ཚེ་དང་བསོད་ནམས་འཕེལ་བར་འགྱུར། །ཞེས་པས་བྲོད་པ་བསྐྱེད་
ནས། ད་བགེགས་བསྐྲད་པར་བྱ་སྟེ། ལས་ཀྱི་བུམ་པའི་མཚན་ཉིད་ནི། །གསེར་གྱི་བུམ་པའམ་ཡང་ན་ནི། །དངུལ་གྱི་བུམ་པ་དག་ཀྱང་རུང་། །གཙང་མའི་གོས་ཀྱིས་དཀྲིས་ཤིང་དགང་། །ནོར་བུ་ཡུངས་ཀར་དཱུར་བ་དང་། །རིན་ཆེན་རྨ་མེད་ཙནྡན་བཅས། །ཤེལ་དང་རྡོ་རྗེ་མེ་ཏོག་
དང་། །ཆུ་ཡི་གསེར་ལ་སོགས་པ་ནི། །ཞེས་བྱ་བ་ནི་རྫས་བསྟན་པ་སྟེ། བུམ་པར་བླུགས་ལ་ཁ་ཚར་མ་ཉམས་པའི་རས་ཀྱིས་མགུལ་པ་བཅིངས་ལ་ཤར་ཕྱོགས་སུ་གཞག་གོ། །གོང་གི་བུམ་པ་ཡང་དེ་བཞིན་ནོ། །དེ་བྱིན་གྱིས་བརླབ་པ་ནི། བུམ་པ་བྷྲཱུཾ་ལས་བསྐྱེད་པའི་ནང་དུ་འཁོར་
ལོ་རྩིབས་བཞི་པ་བསམས་ཏེ། དེའི་ནང་དུ་ཟླ་བའི་སྟེང་དུ། རྡོ་རྗེ་རྒྱ་གྲམ་ཧཱུ་གིས་མཚན་པ་ལས། ཁྲོ་བོ་བདུད་རྩི་འཁྱིལ་པ་མདོག་ལྗང་གུ་རྡོ་རྗེ་རྒྱ་གྲམ་སྡིགས་མཛུབ་བྲང་དུ་བསྣོལ་བའོ། །ཐུགས་ཀར་ཟླ་བའི་སྟེང་དུ་རྡོ་རྗེ་རྒྱ་གྲམ་ལ་ཟླ་བ་ལྔའི་སྟེང་དུ་རྡོ་རྗེའོ། །ཕྱིའི་རྡོ་རྗེ་རྒྱ་གྲམ་བཞིའི་
སྟེང་དུ་རྡོ་རྗེ་བཞིའོ། །ནང་གི་མཚམས་བཞིར་ཡང་རྡོ་རྗེ། ཕྱིའི་མཚམས་སུ་ཡང་རྡོ་རྗེའོ། །བདག་ཉིད་ཟླ་བའི་སྟེང་དུ་ཧཱུཾ་ལས་རྡོ་རྗེ་དཀར་པོ་ཧཱུཾ་གིས་མཚན་པ་ལས་རྡོ་རྗེ་རྣམ་པར་འཇོམས་པ་སྐུ་མདོག་དཀར་པོ་རྡོ་རྗེ་དྲིལ་བུ་བསྣམས་པར་བསྒོམས་ལ། ཐུགས་ཀར་རྡོ་རྗེ་དཀར་པོ་ཧཱུཾ་གིས་
མཚན་པ་གཅིག་ཏུ་བསྒོམས་ལ། སྤྱན་དྲང་བ་དང་། མཆོད་པ་དང་། བསྟོད་པ་དང་། བསྟིམ་པར་བྱའོ། །དེ་ལྟར་བྱས་ནས་གཞན་དུ་ནི། །བདག་ཉིད་ཕྱག་ན་རྡོ་རྗེ་སྟེ། །འགྱིང་བག་ལྗང་སྔོན་ཅུང་ཞིག་ཁྲོས། །དང་པོ་རང་ཉིད་བཟླས་པ་བསྲུང་། །ཨོཾ་ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་པཱ་ཎ་

71-1-242a

ཡེ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ། བདུན་ནམ་ཉི་ཤུ་རྩ་གཅིག་གིས། །བདག་ཉིད་བྱིན་གྱིས་བརླབས་ནས་ནི། །བསྐྱེད་པ་གཙོ་བོའི་ཐུགས་ཀ་ནས། །དམ་ཚིག་རྫོགས་ནས་ཤར་སྒོར་བསྒོམ། །བདག་གིས་ཡེ་ཤེས་སྤྱན་དྲངས་ཏེ། །འདིས་ནི་སྔོན་དུ་བསྙེན་པ་བསྟན། །སྒྲུབ་
པ་བདག་ཉིད་མི་བསྐྱེད་ཅིང་། །དཀྱིལ་འཁོར་ཉིད་དུ་བདག་བྱའོ། །དེ་ནི་ལས་དང་བསྒྲུབ་པ་བྱ་བའི་རིམ་པའོ། །བདག་ཉིད་གོང་བཞིན་བསྐྱེད་བྱས་ནས། །བཟླས་པའི་སྔགས་ཀྱི་རིམ་པ་ནི། །ན་མ་ཤྩཎྜ་བཛྲ་ཀྲོ་དྷཱ་ཡ་ཧཱུཾ་ཧཱུཾ་ཧཱུཾ་ཞེས་བྱ་བ་ནི་གཙོ་བོ་རྡོ་རྗེ་རྣམ་པར་འཇོམས་པའི་སྔགས་སོ། །
མ་ཧཱ་ཡཀྵ་སེ་ནཱ་པ་ཏ་ཡེ་ཨ་མྲྀ་ཏེ་ཧཱུཾ་ཧུ་ལུ་ཧུ་ལུ། ཏིཥྛ་ཏིཥྛ། བྷནྡ་བྷནྡ། ཧ་ན་ཧ་ན་ཧཱུཾ་ཞེས་བྱ་བ་ནི་བགེགས་བསྐྲད་པའི་སྔགས་སོ། །སྒྲུབ་པ་ནི། ན་མཤྩཎྜ་བཛྲ་ཀྲོ་དྷཱ་ཡ་ཧཱུཾ། བདག་ཉིད་ཀྱི་འོ། །ཧུ་ལུ་ཧུ་ལུ་ཏིཥྛ་ཏིཥྛ། བྷནྡ་བྷནྡ། ཧ་ན་ཧ་ན། ཧཱུཾ་ཧཱུཾ་ནི་ས་བོན་གྱི་སྔགས་སོ། །ཨ་མྲྀ་ཏེ་ཧཱུཾ་ཧཱུཾ་ཧཱུཾ་
ཕཊ་ཅེས་བྱ་བ་ལན་བདུན་ནམ་ཉི་ཤུ་རྩ་གཅིག་བཟླས་པས་བདུད་རྩིར་བསམ་མོ། །དེས་ནི་ལས་ཐམས་ཅད་འགྲུབ་པའི་བུམ་པའོ། །དེ་ལྟར་ཐབས་ཀྱི་དོན་དང་། ཤེས་རབ་ཀྱི་དོན་བཤད་ནས། དེའི་ཆེ་བའམ་ཕན་ཡོན་བཤད་པ་ནི། རྒྱུད་དོ་ཅོག་གི་རྩ་བ་སྟེ། །སྡིག་པ་ཐམས་ཅད་བྱང་
བྱས་ནས། །སྡུག་བསྔལ་ཐམས་ཅད་མེད་པར་བྱེད། །དཔལ་ཀུན་གྱིས་ནི་ལེགས་པར་བརྒྱན། །ཞེས་བྱ་བ་ནི་རྒྱུད་ཀྱི་རྩ་བར་གྲུབ་པ་ནི་ཕྱིའི་རྩ་བར་གྲུབ་པ་དང་། ནང་གི་རྩ་བར་གྲུབ་པ་དང་། སྤྱོད་པའི་རྩ་བར་གྲུབ་པའོ། །ཕྱིའི་རྩ་བར་གྲུབ་པ་ནི་རྒྱལ་བུ་ལས་རྒྱལ་པོར་བསྐྱེད་པའོ། །
ནང་གི་རྩ་བར་གྲུབ་པ་ནི་བུམ་པ་ལས་གསུམ་དུ་བསྐྱེད་པའོ། །སྤྱོད་པའི་རྩ་བར་གྲུབ་པ་ནི་ཁྲུས་འགྲོ་བའོ། །སྤང་བྱའི་རྩ་བར་འགྲོ་བ་སྟེ། ཕྱིས་མཚོན་ནས་ནད་དག་པའོ། །དེའི་ཕྱིར་རྩ་བའོ། །སྡིག་པ་ཐམས་ཅད་བྱང་བྱས་ནས། ། ཞེས་བྱ་བ་ནི་དེས་ནུས་པ་གཞག་ནས་གསུམ་པ་
ལ་ཞུགས་པ་དང་དག་པར་འགྲོ་བ་དང་རྒྱུད་ཟབ་མོ་མཉན་པས་དག་པ་དང་། རང་རང་ལ་རྟོགས་པ་ཁྱད་པར་ཅན་སྐྱེས་པས་དག་པའོ། །རྩ་བའི་དོན་གྱི་སྒོ་ནས་སོ། །རྒྱུད་འདི་ནི་ཕན་ཡོན་དུ་མཚོན་ནས་དག་པའོ། །དེའི་ཕྱིར་རྩ་བའོ། །སྡིག་པ་ཐམས་ཅད་བྱང་བྱས་ནས། །ཞེས་པ་སྡུག་

71-1-242b

བསྔལ་དང་བར་ཆོད་ཐམས་ཅད་སེལ་བར་བྱེད། དཔལ་ཀུན་ཏེ་འབྲས་བུ་བདེ་བའི་དོན་ཏོ། །འོ་ན་སྡུག་བསྔལ་ཇི་ལྟར་ཞི་བར་བྱེད་ཅེ་ན། འདིའི་ཕན་ཡོན་དང་ཕྱི་མའི་ཕན་ཡོན་ནོ། །དེ་ལ་འདིའི་ཕན་ཡོན་ནི། སེམས་ཅན་དབང་པོ་ཉམས་པ་དང་། །ཚེ་ཟད་པ་དང་ཚེ་ཉམས་དང་། །
ཞེས་བྱ་བ་ནི་དབང་པོ་ལྔ་ཉམས་པ་སྟེ་མི་གསལ་བ་གསལ་བར་འགྱུར་བ། ཡིད་མི་གསལ་ཏེ་གདོན་གྱིས་དཀྲུགས་ཤིང་། རྣལ་དུ་མི་གནས་པ་སེལ་བ་དང་། ཚེ་ཟད་པ་སེལ་བར་བྱེད་ཅིང་ཉམས་པ་འགུགས་པར་བྱེད་པའོ། །ཚེ་ནི་སྲོག་གོ། །ཉམས་པའི་རྒྱུ་ནི་རྐྱེན་ཟད་པ་དང་། 
བར་དུ་གཅོད་པ་སྟེ་གསོ་བར་བྱེད་པའོ། །ཕུན་སུམ་ཚོགས་མིན་གང་ཆགས་དང་། །ལྷ་རྣམས་རྒྱབ་ཀྱིས་ཕྱོགས་པ་དང་། །ཞེས་བྱ་བ་ནི་ཕུན་སུམ་ཚོགས་པ་མེད་པ་ནོར་དང་ལང་ཚོ་ལ་སོགས་པ་མེད་ཅིང་བྲན་དུ་འགྲོ་བ་དང་སྐྱེས་པའོ། །དེ་ཡང་སྡུག་བསྔལ་དང་ལྡན་མོད་ཀྱི། ལས་ངན་
པ་གང་ཞིག་གིས་ཆགས་ཤིང་འདུག་པའོ། །ལྷ་རྣམས་རྒྱབ་ཀྱིས་ཕྱོགས་ཞེས་བྱ་བ་ནི་རྒྱལ་པོས་ཆད་པ་བྱེད་པའོ། །ཡང་ན་འཇིག་རྟེན་གྱི་ལྷས་རྒྱབ་ཀྱིས་ཕྱོགས་པའོ། །རྒྱུ་མཚན་ཅི་ཞེ་ན། འགལ་བའི་སྟོབས་ཀྱིས་སོ། །དམན་པ་རྣམས་ཀྱིས་ཀྱང་གནོད་པ་ནི། བྲན་བཟའ་
ལ་སོགས་གཙེས་པ་དང་། །མཛའ་སྡུག་སྐྱེ་བོ་སྡང་བ་དང་། །ཞེས་བྱ་བ་ནི་མཛའ་སྡུག་སྐྱེ་བོ་ནི་རང་གི་མཛའ་བོ་དང་། གཞན་རྣམས་སྡང་བའོ། །བྲན་བཟའ་ནི་བྲན་མོ་དང་ཆུང་མའོ། །སོགས་པ་ནི་བུ་མོ་ལ་སོགས་པ་བསྡུས་པའོ། །ཕན་ཚུན་མཐུན་པ་མ་ཡིན་དང་། །ནོར་འགྲིབས་པས་
ནི་གནོད་པ་དང་། །ཞེས་བྱ་བ་ནི་ཕན་ཚུན་མཐུན་པ་མ་ཡིན་པ་ནི་དགྲ་བོའོ། །ནོར་འགྲིབས་པ་ནི་གནོད་པ་དང་། །ཞེས་བྱ་བ་ནི་ནོར་འཕྲོག་པའི་དགྲ་བོ་དེས་གནོད་པ་བསྐྱེད་པའོ། །དེ་ནི་འཇིག་རྟེན་འདིའི་གནོད་པ་སེལ་བའོ། །ཕྱི་མའི་གནོད་པ་གང་ཞེ་ན། མྱ་ངན་ངལ་དང་གནོད་པ་
དང་། །འཇིགས་པ་དང་ནི་ཕོངས་པ་དང་། །ཞེས་བྱ་བ་ནི་དམྱལ་བ་དང་ཡི་དྭགས་དང་། དུད་འགྲོ་སྟེ། མྱ་ངན་གྱིས་གདུངས་པ་དང་། ངལ་བ་དང་། ལུས་སེམས་ཀྱི་གནོད་པ་གཤིན་རྗེའི་འཇིགས་པ་དང་། བདེ་བས་ཕོངས་པ་སེལ་བར་བྱེད་པའོ། །མི་མ་ཡིན་གྱི་གནོད་པ་ནི། གཟའ་

71-1-243a

དང་རྒྱུ་སྐར་བྱད་སྟེམས་དང་། །མི་བཟད་གདོན་གྱིས་ཉེན་པ་དང་། །ཞེས་བྱབས་སོ། །ཡིད་མི་དགའ་བ་ལས་བྱུང་བ་ནི། མྱ་ངན་ངལ་ལས་བྱུང་བ་དང་། །རྨི་ལམ་སྡིག་པ་མཐོང་ན་ཡང་། །ཞེས་བྱ་བ་ནི་ཡིད་མི་དགའ་བས་ལུས་དུབ་པ་དང་། རྨི་ལམ་ངན་
པས་ཡིད་དུབ་པའོ། །དེ་དག་ཀྱང་དག་པ་གང་གིས་ཤེ་ན། དེས་ནི་རབ་བཀྲུས་གཙང་མ་ཡིན། །ཞེས་བྱ་བས་སོ། །འོ་ན་སྡིག་པ་ཇི་ལྟར་བྱང་ཞེ་ན། ཟབ་མོ་སངས་རྒྱས་སྤྱོད་ཡུལ་བ། །མདོ་སྡེ་དམ་པ་མཉན་པར་བྱ། །མདོ་སྡེ་དམ་པ་ཉན་བྱེད་ན། །མདོ་སྡེ་འདི་ཡི་གཟི་བརྗིད་ཀྱིས། །
ཞེས་བྱ་བ་ནི་ཟབ་མོ་སྟེ་བྱིན་གྱིས་བརླབས་པ་བུམ་པའི་དབང་འདི་དང་། འབྲེལ་པའི་དབང་གསུམ་དང་། མདོ་རྒྱུད་ཀྱི་སྤྱོད་པ་བཞི་འམ། །སྤྱོད་པའི་ཁྱད་པར་དང་། ལྟ་བ་དང་ལྟ་བའི་ཁྱད་པར་ཤེས་པས་སོ། །དེས་ཅིར་འགྱུར་ཞེ་ན། ཤེས་ནས་སྤོང་བ་སྟེ་གཉེན་པོས་སོ། །ཤེས་ནས་དག་པ་སྟེ་
རང་བཞིན་གྱིས་སོ། །དེ་ལྟར་དཔལ་ཀུན་གྱིས་ལེགས་པར་བརྒྱན་པ་ནི་གང་ཟག་དེས་གཞན་རྗེས་སུ་འཛིན་པར་འགྱུར་ཏེ། སྲོག་ཆགས་དག་ནི་ཐམས་ཅད་དང་། །མི་བཟད་པ་ཡི་ནད་རྣམས་ཀྱང་། །དེ་དག་ཐམས་ཅད་ཞི་བར་ལྟ། །ཚེ་དང་བསོད་ནམས་འཕེལ་བར་འགྱུར། །ཞེས་བྱ་བ་
ནི་ཐབས་ལ་བརྟེན་པས་ཞི་བ་དང་རྒྱས་པ་དང་། དབང་དང་མངོན་སྤྱོད་ཀྱིས་ཞི་བར་བྱེད་ཅིང་ཚེ་འཕེལ་བར་བྱེད་པའོ། །ཤེས་རབ་ཀྱི་དོན་གྱིས་གཞན་དག་གི་སྡིག་པ་དང་། དྲི་མ་དག་པར་བྱེད་པ་ནི། གསུམ་ཀ་ཡོངས་སུ་རྫོགས་པ་དང་། །ཡང་ན་ཐུགས་མཚན་གསལ་བ་དང་། །
ཡང་ན་ས་བོན་གསལ་བས་ནི། །བྱིན་རླབས་གཞན་ལ་ཁྲུས་བྱའོ། །དྲི་མ་ཐམས་ཅད་ཡོངས་སྤངས་པའི། །གཟུགས་ཀྱི་དྲི་མ་དག་བྱེད་པའི། །ཡོན་ཏན་ཆུ་འབྱུང་ནོར་བུ་འདིས། །བཀྲ་ཤིས་རྫས་ཀྱིས་དག་གྱུར་ཅིག །སྨིན་ཅིང་ཡོངས་སུ་འདུལ་བ་ཡི། །ཚོར་བའི་དྲི་མ་དག་བྱེད་པའི། །
ཡོན་ཏན་མར་འབྱུང་ཡུངས་ཀར་འདིས། །འདུ་ཤེས་དྲི་མ་དག་གྱུར་ཅིག །སེམས་ཅན་ཀླུ་ཡི་སྐྱབས་མཛད་པའི། །རང་བཞིན་ཡོན་ཏན་བདུད་རྩིར་ལྡན། །འདུ་བྱེད་དྲི་མ་དག་གྱུར་ནས། །འགྲོ་ཀུན་རང་བཞིན་སོས་གྱུར་ཅིག །ཕོངས་པ་ཀུན་གྱི་སྐྱབས་གྱུར་ཅིག །རང་བཞིན་གྱིས་ནི་འདོད་ཡོན་

71-1-243b

འབྱུང་། །རྣམ་ཤེས་དྲི་མ་དག་གྱུར་ཅིག །དབུལ་པོ་རྣམས་ཀྱི་སྐྱབས་གྱུར་ཅིག །རང་བཞིན་གྱིས་ནི་དྲི་དང་ལྡན། །ཚ་བའི་གདུང་བ་འཇོམས་པར་བྱེད། །རང་བཞིན་གྱིས་ནི་དག་པའི་མདོག །ཁ་དོག་སྣ་ཚོགས་འགྱུར་བའི་ཤེལ། །འདམ་གྱིས་མ་གོས་ཁ་དོག་གསལ། །ཉོན་མོངས་ནད་སེལ་
པདྨ་ལ། །རང་བཞིན་གྱིས་ནི་འོད་གསལ་བ། །མེ་ཏོག་གཡའ་བྲལ་ས་ལེ་སྦྲམ། །རང་བཞིན་གྱིས་ནི་དག་པ་ལ། །གློ་བུར་དྲི་མ་དག་གྱུར་ཅིག །ཡོན་ཏན་ཡོངས་སུ་བརྒྱན་པ་ཡི། །རྒྱུ་བཟངས་དབྱིབས་ལེགས་ཁ་དོག་མཛེས། །ཆུ་ཡི་བདག་ཉིད་མི་བསྐྱོད་པ། །རྣམ་ཤེས་དྲི་མ་དག་གྱུར་ཅིག ། 
ཅེས་གསུངས་སོ། །འོ་ན་གསང་སྔགས་བརྗོད་པའི་གྲངས་གང་ཞེ་ན། ལན་གྲངས་ཉི་ཤུ་རྩ་གཅིག་གམ། །ཡང་ན་ལན་གྲངས་བརྒྱ་རྩ་བརྒྱད། །ཅེས་བྱ་བ་བསྟན་ཏོ། །གང་བཟླས་ཤེ་ན། རྡོ་རྗེ་རྣམ་པར་འཇོམས་པའི་གསང་སྔགས་ཀྱི་གྲངས་ཏེ། རྡོ་རྗེ་རྣམ་འཇོམས་བཟླས་ནས་ནི། །རྒྱལ་
པོ་རྟག་ཏུ་ཁྲུས་གྱིས་ཤིག །བཅོམ་ལྡན་འདས་རྡོ་རྗེའི་ཏིང་ངེ་འཛིན་ལས་བཞེངས་ནས་འཛུམ་པ་མཛད་དོ། །དེའི་དོན་ནི་བསྐུར་བྱ་དང་། སྐུར་བྱེད་དོ། །དེ་བས་ཁྲུས་གྱིས་ཤིག་པའོ། །རྒྱུད་དང་གདམས་ངག་དག་ལས་ནི། །བསྒྲུབས་ན་དྲི་མེད་འབྲས་བུ་ཐོབ། །དེ་ཕྱིར་གཞན་ཕན་བྱ་ཕྱིར་
བརྩམས། །དེ་ཡིས་འགྲོ་ཀུན་འབྲས་ཐོབ་ཤོག །སིངྒ་ལར་ནི་འགྲེལ་དང་རྒྱུད་དོན་རྟོགས། །བཛྲ་རཏྣ་དེ་ཝས་དེ་དོན་བརྩམས། །དབང་འབྱོར་ཟད་མི་ཤེས་པའི་གཏེར། །དངོས་གྲུབ་འབྲས་བུ་བདག་གིས་ཐོབ། །དགེ་བ་དྲི་མེད་ཡོད་པ་དེས། །བླ་མ་རྣམས་དང་འགྲོགས་པར་ཤོག །རྡོ་རྗེ་
རྣམ་པར་འཇོམས་པའི་གཟུངས་ཀྱི་འགྲེལ་པ་རིན་ཆེན་ཕྲེང་བ་ཞེས་བྱ་བ་སློབ་དཔོན་ཆེན་པོ་ས་ཝ་རི་པས་མཛད་པ་རྫོགས་སོ།།      །།པཎྜི་ཏ་དེ་བ་པུནྱ་མ་ཏི་དང་། ལོ་ཙཱ་བ་དགེ་སློང་ཆོས་ཀྱི་བཟང་པོས་བསྒྱུར་བའོ།།      །། ༄༅༅།  །རྒྱ་གར་སྐད་དུ།  བཛྲ་བི་དཱ་ར་ཎ་ནཱ་མ་དྷཱ་ར་ཎི་ཕཊ་
ལ་ཀྲ་མ་བྷཱ་ཥ་བྲྀཏྟཱི་པྲ་དཱི་པཾ་ནཱ་མ། བོད་སྐད་དུ། རྡོ་རྗེ་རྣམ་པར་འཇོམས་པའི་གཟུངས་ཞེས་བྱ་བའི་རིམ་པར་ཕྱེ་བའི་རྒྱ་ཆེར་འགྲེལ་པ་གསལ་བའི་སྒྲོན་མེ་ཞེས་བྱ་བ། བཅོམ་ལྡན་འདས་དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །ཁྲོ་བོའི་རྒྱལ་པོ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །ཉེས་

71-1-244a

པ་ཀུན་དང་རྣམ་བྲལ་ཞིང་། །སེམས་ཅན་ཀུན་ལ་ཕན་བཞེད་པ། །རྟག་ཏུ་དངོས་པོ་ཀུན་བདག་གྱུར། །རྡོ་རྗེ་བསྣམས་ལ་ཕྱག་འཚལ་ལོ། །ཚིག་དང་ཡི་གེ་ཤིན་ཏུ་ཉུང་བ་ལ། །རབ་ཏུ་དོན་རྫོགས་རྡོ་རྗེ་རྣམ་འཇོམས་གཟུངས། །དེ་རྟོགས་དེང་སང་སྐྱེ་བོ་འགའ་ཙམ་སྲིད། །
དེ་བས་དེ་དོན་བདག་གིས་རབ་བཤད་འདོད། །གཟུ་ལུམས་རས་ཆོད་རང་དགར་བརྩམས་པ་མ་ཡིན་ཏེ། །བདེ་གཤེགས་བཀའ་དང་བླ་མའི་གདམས་ངག་ལ་བརྟེན་ནས། །དེའི་དོན་རིམ་པར་ཕྱེ་ནས་གསལ་སྒྲོན་གྱི། །དེ་དོན་རྒྱ་ཆེར་རབ་ཏུ་བཤད་པར་འདོད། །དེ་ལ་རྡོ་རྗེ་རྣམ་པར་འཇོམས་པའི་
གཟུངས་ཀྱི་དོན་རྒྱ་ཆེར་བཤད་པར་བྱ་སྟེ། དེ་ཡང་ཆོས་ཐམས་ཅད་སྤྲོས་པ་དང་བྲལ་བ་ཡིན་པ་ལ། མ་རིག་པའི་ལིང་ཏོག་གིས་བསྒྲིབས་ནས་དེ་མ་རྟོགས་པས། ཁམས་གསུམ་འཁོར་བར་འཁོར་ནས་ཉོན་མོངས་པ་བརྒྱད་ཁྲི་བཞི་སྟོང་འཕེལ་ཏེ། དེ་སྤང་བའི་གཉེན་པོ་དང་། ཆོས་ཐམས་
ཅད་སྤྲོས་པ་དང་བྲལ་བར་བྱ་བ་དེ་རྟོགས་པའི་ཐབས་སུ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་ཏེ། དེ་ཡང་བསྡུ་ན་མཚན་ཉིད་ཀྱི་ཐེག་པ་དང་། གསང་སྔགས་ཀྱི་ཐེག་པའོ། །དེ་ཡང་མཚན་ཉིད་ཀྱི་ཐེག་པ་ལ་ནི་མདོའི་མིང་གིས་བཏགས་ལ། གསང་སྔགས་ཀྱི་ཐེག་པ་ལ་ནི་རྒྱུད་
ཀྱི་མིང་གིས་བཏགས་སོ། །མཚན་ཉིད་ཀྱི་ཐེག་པ་ལ་མདོ་སྡེ་རུ་འདོགས་པའི་རྒྱུ་མཚན་ནི་དངོས་པོའི་གནས་ལུགས་འགའ་ཞིག་གཏན་ལ་འབེབས་པའི་མཚན་ཉིད་མདོར་བསྡུས་ནས་བསྟན་དུ་རུང་བས་ན་ཡང་མདོ་སྡེ་ཞེས་བྱ་ལ། གཉེན་པོ་རྣམས་འགལ་བར་སྤོང་བའི་སྒོ་ནས་མདོ་སྡེ་ཞེས་བྱའོ། །
རྒྱུན་ཆགས་ཕྱིར་ན་རྒྱུད་ཅེས་བྱ། །འཁོར་བ་རྒྱུད་དུ་འདོད་པ་ཡིན། །ཞེས་གསུངས་སོ། །ཡང་མཁའ་འགྲོ་མ་སྒྱུ་མ་བདེ་མཆོག་ལས་ཀྱང་། རྒྱུད་ཅེས་བྱ་བ་རབ་འབྲེལ་ཏེ། །དེ་ཡང་རྣམ་པ་གསུམ་ཡིན་ཏེ། །གཞི་དང་ཐབས་དང་འབྲས་བུའོ། །དེ་བཞིན་འབྲས་བུའི་བསྡུ་བ་མེད། །ཅེས་
གསུངས་ཏེ། འདིར་ཡང་རྒྱུད་རྣམ་གསུམ་དུ་ཤེས་པར་བྱ་སྟེ། སྦྱང་བར་བྱ་བ་རྒྱུའི་རྒྱུད་དང་། སྦྱངས་པ་འབྲས་བུའི་རྒྱུད་དང་། སྦྱོང་བར་བྱེད་པ་ཐབས་ཀྱི་རྒྱུད་དོ། །རྒྱུའི་རྒྱུད་ནི་ཁམས་གསུམ་གྱི་སེམས་ཅན་ཐམས་ཅད་ལ་བདེ་བར་གཤེགས་པའི་སྙིང་པོས་ཁྱབ་པས་དེ་རྣམས་སོ། །འབྲས་

71-1-244b

བུའི་རྒྱུད་ནི་བླ་ན་མེད་པའི་བྱང་ཆུབ་ཀྱི་འབྲས་བུ་ཐོབ་པ་དེ་རྣམས་སོ། །ཐབས་ཀྱི་རྒྱུད་ནི་སེམས་ཅན་གྱི་ཁམས་དང་དབང་པོ་དང་། བག་ལ་ཉལ་སྣ་ཚོགས་པ་ཡོད་པས། བཅོམ་ལྡན་འདས་ཀྱིས་རྒྱུད་སྡེ་བཞི་གསུངས་ཏེ། དེ་ཡང་བྱ་བའི་རྒྱུད་དང་། སྤྱོད་པའི་རྒྱུད་དང་། རྣལ་འབྱོར་གྱི་རྒྱུད་
དང་། རྣལ་འབྱོར་བླ་ན་མེད་པའི་རྒྱུད་དོ། །བྱ་བའི་རྒྱུད་སྤྱི་དང་བྱེ་བྲག་གི་རྒྱུད་ལས་བྱེ་བྲག་གི་རྒྱུད་དོ། །དེ་ལ་སྐུ་ཏ་ཐཱའི་རིགས་ཀྱི་རྒྱུད་དང་། གསུང་པདྨའི་རིགས་ཀྱི་རྒྱུད་དང་། ཐུགས་རྡོ་རྗེའི་རིགས་ཀྱི་རྒྱུད་ལས། འདི་ཐུགས་རྡོ་རྗེ་རིགས་ཀྱི་རྒྱུད་དོ། །དེ་ཡང་སྤྱི་དང་བྱེ་བྲག་ལས། འདི་
བྱེ་བྲག་གི་རྒྱུད་དོ། །དེ་ལ་འདི་ནི་རྡོ་རྗེ་ཁྲོ་བོ་རིགས་ཀྱི་རྒྱུད་དོ། །རྡོ་རྗེ་རིགས་ཀྱི་ཁྲོ་བོའི་རྒྱུད་འདིས་ནི་རྟོགས་པ་ཡིན་པ་ལ། གཟུངས་ཀྱི་མིང་གིས་བཏགས་སོ། །དེ་ནི་སྤྱིའི་རྣམ་པར་གཞག་པའོ།   །དེ་ཡང་རང་དང་གཞན་གྱི་དོན་བསྟན་པའི་སྒོ་ནས། མཚན་གྱི་དོན་ཕུན་སུམ་ཚོགས་པ་བསྟན་
པ་དང་། རྒྱུད་རྒྱས་པར་བཤད་པའོ། །དེ་ལ་དང་པོ་བཤད་དེ། རྡོ་རྗེ་ཞེས་བྱ་བ་ནི་རང་གི་དོན་ཕུན་སུམ་ཚོགས་པ་སྟེ། ཆོས་ཀྱི་སྐུ་སྟོང་པ་ཉིད་དོ། །རྣམ་པར་འཇོམས་པ་ཞེས་བྱ་བ་ནི། མཛད་པ་བཞིའི་སྒོ་ནས་འགྲོ་བ་སེམས་ཅན་གྱི་དོན་བྱེད་པའོ། །གཟུངས་ཞེས་བྱ་བ་ནི་གཉི་གའི་དོན་
ཕུན་སུམ་ཚོགས་པ་སྟེ། སྟོང་ཉིད་སྙིང་རྗེའི་སྙིང་པོ་ཅན་ནོ། །ཆོས་ཀྱི་སྐུ་སྟོང་པ་ཉིད་ལ་རྡོ་རྗེར་འདོགས་པའི་རྒྱུ་མཚན་དང་། དགོས་པ་ཅིའི་ཕྱིར་ཞེ་ན། སྟོང་པ་ཉིད་ལ་རྡོ་རྗེར་འདོགས་པའི་རྒྱུ་མཚན་ནི། འདུས་བྱས་རྫས་ཀྱི་རྡོ་རྗེ་ཕ་ལམ་དང་ཆོས་མཐུན་པ་རྣམས་ཡོད་དོ། །རྡོ་རྗེ་ཕ་ལམ་ལ་
མི་ཆོད་པ་བྱ་བ་ནས། མ་ཕམ་པ་བྱ་བའི་བར་དུ་ཆོས་བདུན་ཡོད་པ་དེ་བཞིན་དུ། ཆོས་ཀྱི་སྐུ་སྟོང་པ་ཉིད་ལ་མི་ཆོད་པ་བྱ་བ་ནས། ཐམས་ཅད་དུ་མ་ཕམ་པ་བྱ་བའི་བར་དུ་ཆོས་བདུན་ཡོད་དོ། །འོ་ན་རིན་པོ་ཆེ་རྡོ་རྗེ་ཕ་ལམ་དེ་ལ་ཇི་ལྟར་ས་ཡིས་མི་ཆོད་ཅེ་ན། འབྱུང་བ་ཆེན་པོ་ས་ཡིས་བཅད་པ་དང་གཏུབ་
པར་མི་ནུས་པས་ན། མི་ཆོད་པ་ཞེས་གསུངས་སོ། །ས་དག་གཅད་པར་མི་ནུས་པར་འདུག་སྟེ། རྡོ་རྗེ་ཕ་ལམ་དེ་ལ་འབྱུང་བ་ཆེན་པོ་ཆུ་ཡིས་སྤྲུལ་པ་ལ་སོགས་པ་གནོད་པར་བྱ་བར་མི་ནུས་སམ་ཞེ་ན། མ་ཡིན་ཏེ། དེས་གནོད་པར་མི་ནུས་པས་ན་མི་ཤིགས་པ་ཞེས་གསུངས་སོ། །དེ་གཉིས་

71-1-245a

ཀྱིས་ཀྱང་གནོད་པར་བྱ་བར་མི་ནུས་པར་འདུག་སྟེ། འབྱུང་བ་མེས་ཐལ་བའམ། སོལ་བར་བསྲེག་པར་མི་ནུས་སམ་ཞེ་ན། མ་ཡིན་ཏེ། དེས་བསྲེག་པར་མི་ནུས་པས་ན་བདེན་པ་ཞེས་གསུངས་ཏེ། དེ་གསུམ་གྱིས་ཀྱང་གནོད་པར་བྱ་བར་མི་ནུས་པར་འདུག་སྟེ། རླུང་སྤུ་
གྲི་ལྟ་བུས་ཀྱང་གཞིག་པར་མི་ནུས་སམ་ཞེ་ན། དེས་གཞིག་པར་མི་ནུས། ཞེས་གསུངས་སོ། །དེ་བཞིན་ད་ལྟར་གནོད་པར་བྱ་བར་མི་ནུས་པར་འདུག་སྟེ། ལོའམ་བསྐལ་པར་ལོན་ནས་གནོད་པར་བྱ་བར་མི་ནུས་སམ་ཞེ་ན། མ་ཡིན་ཏེ། དེ་བཞིན་དུས་ད་ལྟར་གནོད་པར་བྱ་བར་མི་ནུས་པ་
བཞིན་དུ། དུས་སམ་གནས་སྐབས་ཐམས་ཅད་དུ་མི་འགྱུར་བས་ན་བརྟེན་ཞེས་གསུངས་སོ། །འོ་ན་རྡོ་རྗེ་ཕ་ལམ་དེ་ལ་ཚུར་ལ་དང་། གང་གིས་ཀྱང་མི་གནོད་པར་འདུག་སྟེ། རྡོ་རྗེ་ཕ་ལམ་དེ་མཐུ་ཇི་ཙམ་དང་ལྡན་ཞེ་ན། དཔེར་ན་ཐོག་དང་འདྲ་སྟེ་དངོས་པོ་ཐམས་ཅད་འབིགས་པར་བྱེད་
པས་ན། ཐམས་ཅད་དུ་ཐོགས་པ་མེད་པ་ཞེས་གསུངས་སོ། །དེ་ལ་ཚུར་ལ་གནོད་པར་མི་འགྲོ་འམ་ཞེ་ན། མ་ཡིན་ཏེ། རྡོ་རྗེ་རིན་པོ་ཆེ་ཕ་ལམ་དེས། ཕར་མི་ཐམས་ཅད་འཇོམས་པར་ནུས་ལ། རང་ལ་ཚུར་གནོད་པར་མི་ནུས་པས་ན། ཐམས་ཅད་དུ་མ་ཕམ་པ་ཞེས་གསུངས་སོ། །
དཔེར་ན་རྡོ་རྗེ་ཕ་ལམ་ལ་གཞན་གྱིས་གནོད་པར་བྱ་བར་མི་ནུས་པ་དེ་བཞིན་དུ། སྟོང་པ་ཉིད་ཀྱི་རྡོ་རྗེ་དེ་ལ་སྐྱེ་བ་ལ་སོགས་པའི་སྡུག་བསྔལ་གྱིས་མི་གནོད་པས་ན། མི་ཆོད་པ་ལ་སོགས་པ་གསུངས་སོ། །འདུས་བྱས་ཀྱི་དངོས་པོ་འདི་ལ་སྐྱེ་བ་སྔ་མ་ནས་འདི་རུ་སྐྱེས། འདི་ནས་ཕྱི་མར་སྐྱེ་
བས། སྐྱེ་བའི་སྡུག་བསྔལ་གྱིས་བར་དུ་ཆོད་ཅིང་འདུག་པས་ན། སྟོང་པ་ཉིད་ལ་སྐྱེ་བ་མེད་པས། སྐྱེ་བའི་སྡུག་བསྔལ་གྱིས་བར་དུ་མི་ཆོད་པས་ན། མི་ཆོད་པ་ཞེས་གསུངས་སོ། །དུས་བྱས་ཀྱི་དངོས་པོ་འདི་ལ་རྣམ་པ་གཞན་ནས་གཞན་དུ་འགྱུར་བ་ཡོད་པས། རྒས་པའི་སྡུག་བསྔལ་
གྱིས་བར་དུ་ཆོད་ཅིང་འདུག་པ་ལ། སྟོང་པ་ཉིད་དེ་ལས་རྣམ་པ་གཞན་ནས་གཞན་དུ་འགྱུར་བ་མེད་པས། རྒས་པའི་སྡུག་བསྔལ་གྱིས་བར་དུ་མི་ཆོད་པས་ན། མི་ཤིགས་པ་ཞེས་གསུངས་སོ། །འདུས་བྱས་ཀྱི་དངོས་པོ་དེ་ཉིད་མཚམས་སྦྱོར་བའི་ཚེ། སྐྱེ་གནས་ཀྱི་དང་པོར་མིང་

71-1-245b

དང་གཟུགས་གྲུབ་ནས་ཐ་མར་མ་ཤིའི་བར་དུ་སྡུག་བསྔལ་རྣམ་པ་གསུམ་མམ། བརྒྱད་ལ་སོགས་པས་གདུངས་པས་ན། གནས་པའི་སྡུག་བསྔལ་གྱིས་བར་དུ་ཆོད་ཅིང་འདུག་པ་ལ། ཆོས་ཀྱི་སྐུ་སྟོང་པ་ཉིད་ལ་གཟུགས་ཀྱི་དངོས་པོར་གྲུབ་པ་མེད་པས། སྡུག་བསྔལ་རྣམ་པ་
གསུམ་དང་བརྒྱད་ལ་སོགས་པས་གཅོད་པར་མི་ནུས་པས་ན་བདེན་པ་ཞེས་གསུངས་སོ། །འདུས་བྱས་ཀྱི་དངོས་པོ་འདི་ཐ་མ་ཤི་ནས་རྒྱུན་ཆད་དེ་འགྲོ་བས་འཆི་བའི་དུས་ན་གནད་གཅོད་པའི་ཚོར་བའི་སྡུག་བསྔལ་ཡོད་པས་འཆི་བའི་སྡུག་བསྔལ་གྱིས་ཆོད་ཅིང་འདུག་པ་ལས། ཆོས་ཀྱི་སྐུ་
སྟོང་པ་ཉིད་ལ་སྐྱེ་བ་མེད་པས་ཐ་མ་འགགས་ཏེ་རྒྱུན་ཆད་པ་མེད་པས་འཆི་བའི་སྡུག་བསྔལ་གྱིས་བར་དུ་མི་ཆོད་པས་ན་སྲ་བ་ཞེས་གསུངས་སོ། །འོ་ན་སྟོང་པ་ཉིད་དེ་ལ་དུས་ད་ལྟར་སྡུག་བསྔལ་རྣམ་པ་བཞི་པོ་དེས་མི་གནོད་པར་འདུག་པ་ལ། ལོའམ་བསྐལ་པ་ཁོ་ནས་གནོད་པར་མི་ནུས་
སམ་ཞེ་ན། མ་ཡིན་ཏེ། དུས་ད་ལྟར་མི་གནོད་པ་བཞིན་དུ། དུས་དང་གནས་སྐབས་ཐམས་ཅད་དུ་གནོད་པར་མི་ནུས་པས་ན། བརྟན་པ་ཞེས་གསུངས་སོ། །འོ་ན་སྟོང་པ་ཉིད་དེ་ལ། སྡུག་བསྔལ་རྣམ་པ་བཞི་པོ་དེ་དག་གིས་ཀྱང་གནོད་པར་མི་ནུས་པར་འདུག་སྟེ། ཆོས་ཀྱི་སྐུ་སྟོང་པ་
ཉིད་དེ་མཐུ་ཇི་ཙམ་དང་ལྡན་ཞེ་ན། ཐམས་ཅད་དུ་ཐོགས་པ་མེད་པ་ཞེས་གསུངས་ཏེ། སྟོང་པ་ཉིད་ཀྱི་ཡེ་ཤེས་དེས་ནི། །བདག་དང་གཞན་ཡང་འཇིག་པར་བྱེད། འཁོར་བ་དང་མྱ་ངན་ལས་འདས་པ་ཡང་འཇིག་པར་བྱེད། གཟུང་བ་དང་འཛིན་པ་ཡང་འཇིག་པར་བྱེད། དངོས་
པོ་ལས་མངོན་པར་ཞེན་པ་ཐམས་ཅད་འཇིག་པར་བྱེད་པས་ན། ཐམས་ཅད་དུ་ཐོགས་པ་མེད་པ་ཞེས་གསུངས་སོ། །དེ་ལ་ཚུར་ལ་གནོད་པར་མི་ནུས་སམ་ཞེ་ན། མ་ཡིན་ཏེ། དེས་ན་མ་ཕམ་པ་ཞེས་གསུངས་ཏེ། ཆོས་ཀྱི་སྐུ་སྟོང་པ་ཉིད་དེ་ལ་ཚུར་ལ་གང་གིས་ཀྱང་གནོད་
པར་མི་ནུས་ལ། ཕར་ལ་ཐམས་ཅད་འཇོམས་པས་ན་མ་ཕམ་པ་ཞེས་གསུངས་སོ། །དེས་ན་སྟོང་པ་ཉིད་དེ་རིན་པོ་ཆེའི་རྡོ་རྗེ་ཕ་ལམ་དང་ཆོས་མཐུན་པས་ན། སྟོང་པ་ཉིད་ལ་རྡོ་རྗེ་ཞེས་བཏགས་སོ། །སྟོང་པ་ཉིད་ལ་རྡོ་རྗེར་བཏགས་པའི་དགོས་པ་ནི། སྟོང་པ་ཉིད་དེ་ལ་ཡང་ཡོན་ཏན་

71-1-246a

དེ་ཚོ་དང་ལྡན་པར་ཤེས་པར་བྱ་བའི་དགོས་པའོ། །དེ་ལྟར་ཤེས་པ་དེ་ཐོབ་པར་བྱ་བའི་དོན་དུ་གཞན་དག་སྒྲུབ་པ་དང་། སྒོམ་པ་ལ་འཇུག་པར་འགྱུར་བའི་དགོས་པའོ། །དེས་ན་སྟོང་པ་ཉིད་ལ་རྡོ་རྗེ་ཞེས་གསུངས་སོ། །རྣམ་པར་འཇོམས་པ་ཞེས་པ་ནི། གཟུགས་སྐུ་རྣམ་
པ་གཉིས་ཀྱིས་མཛད་པ་བཞི་བསྟན་ནས་འགྲོ་བ་སེམས་ཅན་གྱི་དོན་བྱེད་པས་ན་རྣམ་པར་འཇོམས་པ་ཞེས་གསུངས་སོ། །འོ་ན་རྣམ་པར་འཇོམས་པ་ནི་མངོན་སྤྱོད་ཀྱི་མིང་གི་རྣམ་གྲངས་ཡིན་ན། མཛད་པ་རྣམ་པ་བཞི་ལ་རྣམ་པར་འཇོམས་པའི་མིང་གིས་སྟོན་པ་ཅིའི་ཕྱིར་ཞེ་ན། དེ་ནི་རྒྱུད་འདི་
ནས་སྟོན་པའི་མཛད་པ་བཞི་པོ་འདི་ནི། རྒྱུད་གཞན་ནས་བཤད་པའི་མཚན་ཉིད་མ་ཡིན་ཏེ། འདི་ནས་བསྟན་པ་ནི་དྲག་པོའི་ལས་རྣམས་དང་དབྱེ་བ་ཡིན་ཏེ། དྲག་པོའི་སྒོ་ནས་ཞི་བ་དང་དབང་དང་རྒྱས་པར་འགྱུར་རོ། །དེས་ན་མཛད་པ་རྣམ་པ་བཞིའི་རྣམ་པར་འཇོམས་པ་ཞེས་གསུངས་
པ་མི་འགལ་ལོ། །གཟུངས་ལ་གཉིས་ཏེ། རིག་སྔགས་ཀྱི་གཟུངས་དང་། གསང་སྔགས་ཀྱི་གཟུངས་ལས། འདི་ནི་གསང་སྔགས་ཀྱི་གཟུངས་ཞེས་བྱའོ། །དེ་ལ་ཡང་གསུམ་སྟེ། ངོ་བོ་དང་ངེས་ཚིག་དང་། དབྱེ་བའོ། །གཟུངས་ཀྱི་ངོ་བོ་ནི་རང་དང་གཞན་གྱི་དོན་ཕུན་སུམ་ཆགས་   
པ་སྟོང་པ་ཉིད་དང་སྙིང་རྗེ་དབྱེར་མེད་པ་སྟེ། སྟོང་པ་ཉིད་སྙིང་རྗེའི་སྙིང་པོ་ཅན་ནོ། །ཐ་མ་གཉིས་ནི་གོ་མཐའ་ཡས་པའི་གཟུངས་འགྲེལ་ལས། གཟུངས་ནི་རྣམ་གསུམ་གང་ཕྱིར་གཟུངས། །དོན་དང་ཚིག་དང་གཉི་གའི་གཟུངས། །ལེགས་པ་ལས་ནི་ཉམས་པ་ལས། །འཛིན་
པར་བྱེད་པ་དེ་ཕྱིར་གཟུངས། །ཞེས་གསུངས་སོ། །དབྱེ་བ་ནི་གསུམ་སྟེ། དོན་དང་ཚིག་དང་གཉི་གའི་གཟུངས་སོ། །དོན་གྱི་གཟུངས་ནི་དཀོན་མཆོག་གསུམ་ལ་ཕྱག་འཚལ་ལོ་ཞེས་བྱ་བ་ནས། བདུད་རྩི་འཁྱིལ་པས་བསྡུས་ཤིག་པའི་བར་དུའོ། །རྒྱས་པར་འདིའི་
འགྲེལ་པ་གཞན་ལས་གསལ་ལོ། །ཚིག་གི་གཟུངས་ནི། ན་མོ་རཏྣ་ཏྲ་ཡཱ་ཡ་བྱ་བ་ནས། ཨ་མྲྀ་ཏེ་ཧཱུཾ་ཕཊ་བྱ་བའི་བར་དུའོ། །གཉི་གའི་གཟུངས་ནི། མིང་དོན་གཅིག་ཏུ་བསྲེས་ནས། སྒྲ་དང་དོན་དུ་སྦྲེལ་ནས་འཛིན་པའོ། །ཡང་ཨ་ལ་སོགས་པའི་དབྱངས་ཡིག་ལ་ནི་དོན་གྱི་གཟུངས་    

71-1-246b

ཞེས་བྱ་ལ། ཀ་ལ་སོགས་པའི་གསལ་བྱེད་ལ་ནི་ཚིག་གི་གཟུངས་ཞེས་བྱའོ། །ཨ་དང་ཀ་གཉི་ག་ཐ་མི་དད་པ་ལ་ནི་གཉི་གའི་གཟུངས་ཞེས་བྱའོ། །ངེས་པའི་ཚིག་ནི་ལེགས་པ་ལས་ནི་ཉམས་པས་ན། འཛིན་པར་བྱེད་པས་དེའི་ཕྱིར་གཟུངས། །ཞེས་གསུངས་པས། ཐར་པ་དང་མཐོ་རིས་
ཐོབ་པར་བྱེད་པའི་རྒྱུ། གསང་སྔགས་ཀྱི་དམ་ཚིག་དང་། ཉན་ཐོས་ཀྱི་འདུལ་ཁྲིམས་དང་། བྱང་ཆུབ་སེམས་དཔའི་སྨོན་འཇུག་གི་སེམས་དཔའོ། །དེ་ཚོ་ལས་ཉམས་ན་ངན་འགྲོར་འགྲོ་བ་སྟེ། འདིའི་ཆོ་ག་ཕུན་སུམ་ཚོགས་པ་བྱས་ཏེ། ཁྲུས་བྱས་ལ་དམ་ཚིག་ཉམས་པ་ལ་སོགས་པ་
སླར་གསོས་ཏེ། དེ་རུ་འགྲོ་རུ་མི་སྟེར་བས་ན། འཛིན་པར་བྱེད་པ་ཞེས་གསུངས་སོ། །ཡང་ན་དོན་ཚིག་མང་པོ་འཛིན་པས་གཟུངས་སོ། །རྡོ་རྗེ་རྩེ་མོ་ལས་དགེ་བའི་ཆོས་ཐམས་ཅད་ཀྱི་རྟེན་པ་བྱེད་པས་ན་ཡང་གཟུངས་སོ། །ཡང་ན་མི་བརྗེད་པའི་དོན་གྱིས་ན་གཟུངས་ཞེས་བྱའོ།   །སངས་རྒྱས་
དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ་ཞེས་པ་ནི། སངས་ཞེས་བྱ་བ་ནི། ཉོན་མོངས་པ་དང་། ཤེས་བྱའི་སྒྲིབ་པ་མཐའ་དག་སྤངས་ནས། མ་རིག་པའི་གཉིད་ལས་སངས་པས་ན་སངས་ཞེས་བྱའོ། །དཔེར་ན་སྐྱེས་བུ་གཉིད་ལས་སངས་པ་བཞིན་ནོ། །རྒྱས་ཞེས་བྱ་བ་ནི། 
ཤེས་བྱ་མཐའ་དག་ལ་ཡེ་ཤེས་རྒྱས་པས་ན་རྒྱས་ཞེས་གསུངས་སོ། །དཔེར་ན་ཀུ་མུ་ཏ་རྒྱས་པ་ལྟ་བུའོ། །སྤངས་པ་དང་ཡེ་ཤེས་ཕུན་སུམ་ཚོགས་པའོ། །ཉེས་པའི་སྐྱོན་ཐམས་ཅད་བྱང་ཤིང་ལེགས་པའི་ཡོན་ཏན་ཐམས་ཅད་ཀྱི་ངོ་བོར་ཆུབ་པས་ན་བྱང་ཆུབ་བོ། །འགྲོ་བའི་དོན་ལ་སེམས་
པས་ན་སེམས་སོ། །བདུད་དང་མུ་སྟེགས་ཐམས་ཅད་ཚར་གཅོད་པས་ན་དཔའ་བའོ། །ཡང་བདེ་བ་གཉིས་ཀྱི་དོན་ལ་ཡང་ནས་ཡང་དུ་བྱ་ཞིང་བདེན་པ་གཉིས་ཀྱི་དོན་ལ་ཆུབ་པས་ན་བྱང་ཆུབ་བོ། །བདེན་པ་གཉིས་ཀྱི་དོན་ལ་ཡང་ནས་ཡང་དུ་སེམས་པས་ན་སེམས་དཔའ་ཞེས་བྱའོ། །
དེའི་དོན་ལ་སྲན་ཚུགས་པས་ན་དཔའ་ཞེས་བྱའོ། །ཡང་ན་བྱང་ཆུབ་སེམས་དཔའ་ཐམས་ཅད་ཅེས་པ། ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་སྤངས་པས་ན་བྱང་ཞེས་བྱ་ལ། ཡེ་ཤེས་ཀྱིས་ཆོས་ཀྱི་དབྱིངས་རྟོགས་པས་ན་ཆུབ་ཅེས་བྱའོ། །སེམས་ཞེས་བྱ་བ་ནི། ཡེ་ཤེས་

71-1-247a

ཆེན་པོས་ཆོས་ཀྱི་དབྱིངས་ལ་སེམས་པ་དང་། ཐུགས་རྗེ་ཆེན་པོས་འགྲོ་བའི་དོན་ལ་སེམས་པས་ན་སེམས་ཤེས་བྱའོ། །དཔའ་བ་ནི་བླ་ན་མེད་པའི་བྱང་ཆུབ་སྒྲུབ་ཅིང་སེམས་ཅན་གྱི་དོན་བྱ་བ་ལ་ཕྱིར་མི་ལྡོག་ཅིང་སྲན་ཚུགས་པས་ན་དཔའ་བའོ། །ཐམས་ཅད་ཅེས་བྱ་ནི་རྒྱུ་དང་འབྲས་བུར་བཅས་པའི་བྱང་ཆུབ་
སེམས་དཔའ་ཐམས་ཅད་དོ། །ཕྱག་འཚལ་ཞེས་པ་ནི་ལུས་ངག་ཡིད་གསུམ་དང་བས་སོ། །ལོ་ཞེས་བྱ་བ་ནི་ཤིས་པ་བརྗོད་པའོ། །དེས་ནི་རང་དང་གཞན་གྱི་དོན་ཕུན་སུམ་ཚོགས་པ་བསྟན་པའི་སྒོ་ནས་མཚན་གྱི་དོན་བཤད་ཟིན་ཏོ།།      །།ད་ནི་རྒྱུད་རྒྱས་པར་བཤད་པར་བྱ་སྟེ། དེ་ལ་ཡང་གཉིས་ཏེ། རྒྱུད་འབྱུང་བའི་
གླེང་གཞི་ཕུན་སུམ་ཚོགས་པ་དང་བཅས་ཏེ་བསྟན་པ་དང་། རྒྱུད་དངོས་བསྟན་པའོ། །དང་པོ་ལ་གཉིས་ཏེ་རྐྱེན་གླེང་སློང་བ་དང་། གླེང་གཞི་དངོས་སོ། །དེ་ཡང་འདི་སྐད་བདག་གིས་ཐོས་པ་ཞེས་པས་ནི། རྐྱེན་གླེང་སློང་བ་བསྟན་ཏོ། །དུས་གཅིག་ན་བཅོམ་ལྡན་འདས་རྡོ་རྗེ་ལ་བཞུགས་ཏེ། གླེང་གཞི་དངོས་བསྟན་ཏོ། །བཅོམ་ལྡན་
འདས་རྣ་མཆོག་གི་གྲོང་ཁྱེར་དུ་མྱ་ངན་ལས་འདའ་ཀར། འཁོར་རྣམས་ཀྱིས་ཞུས་པ། བཅོམ་ལྡན་འདས་སྐུ་མྱ་ངན་ལས་འདས་ན།  ངེད་ཀྱི་སྟོན་པ་ནི་སུས་བྱེད། གནས་ནི་སུ་ལ་འཆའ། མུ་སྟེགས་ཀྱི་སྟོན་པ་དྲུག་ནི་སུས་འདུལ། སྡེ་སྣོད་བསྡུས་པའི་དབུར་ནི་ཇི་སྐད་བྱ་ཞེས་ཞུས་པས། གསུངས་པ། 
ཁྱེད་ཀྱི་སྟོན་པ་ནི་སོ་སོར་ཐར་པ་འདི་ཉིད་ཀྱིས་གྱིས་ཤིག་ཅེས་གསུངས་ཏེ། དེ་ཡང་། ང་ནི་མྱ་ངན་འདས་གྱུར་ན། །འདི་ནི་ཁྱེད་ཀྱི་སྟོན་པ་ཞེས། །རབ་བྱུང་ཉིད་ཀྱིས་གུས་བཅས་པར། །ནན་ཏན་དགེ་འདུན་ཚོགས་མདུན་བསྟོད། །ཅེས་གསུངས་སོ། །གནས་ནི་དྲན་པ་དང་ཤེས་བཞིན་ལ་ཆོས་ཤིག་ཅེས་གསུངས་སོ། །མུ་
སྟེགས་ཀྱི་སྟོན་པ་དྲུག་ནི་རང་ཞིར་འགྲོའོ་གསུང་ངོ་། །སྡེ་སྣོད་བསྡུས་པའི་དབུར་ནི་འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ག་གེ་མོ་ན་བཞུགས་ཏེ། འཁོར་འདི་དང་ཐབས་ཅིག་ཏུ་བཞུགས་ཏེ་ཞེས་གྱིས་ཤིག ཅེས་མྱ་ངན་ལས་འདས་པའི་མདོ་ལས་གསུངས་སོ། །རྒྱུད་ཀྱི་རྒྱུར་འགྲོ་བའི་རྒྱུ་
མཚན་ནི། འདི་སྐད་བདག་གིས་ཐོས་པ་བྱ་བས། འོད་སྲུངས་ལ་སོགས་པའི་འཁོར་རྣམས་ལ། རྣམ་པར་རྟོག་པ་རྣམ་པ་ལྔ་སྐྱེས་ཏེ། དྲི་བ་ལྔ་ཞུས་ཏེ། འདི་སྐད་བདག་གིས་ཐོས་ཟེར་བ། དུས་གང་གི་ཚེ་ཐོས། སྟོན་པ་གང་ལ་ཐོས། གནས་གང་དུ་ཐོས། འཁོར་གང་དང་ལྷན་ཅིག་ཏུ་ཐོས། བརྗོད་བྱ་ཕུན་སུམ་ཚོགས་པ་གང་ལ་ཐོས། 

71-1-247b

བརྗོད་ཅེས་དྲིས་སོ། །དེའི་ལན་དུ་གླེང་གཞི་བྱུང་ངོ་། །ད་ནི་ཚིག་གི་དོན་བཤད་དེ། འདི་སྐད་ཅེས་པ་ནི་ངེས་པར་བྱས་ནས་རང་དང་གཞན་རྗེས་སུ་མཐུན་པའི་ཤེས་པས། ངེས་པར་བཟུང་བའི་རྒྱུད་ཀྱི་དོན་མ་ལུས་པར་ངེས་པར་སྟོན་པ་ལ། གཅིག་ཏུ་ངེས་པར་བྱས་ནས་ཕྱིན་ཅི་མ་ལོག་པར་སྨྲ་བའོ། །བདག་གིས་ཐོས་ཞེས་བྱ་བ་ནི། བདག་
ཉིད་ཀྱིས་མངོན་སུམ་དུ་ཐོས་པ་སྟེ། བཅོམ་ལྡན་འདས་ལས་བདག་ཉིད་ཀྱིས་མིང་དང་དོན་དང་གཞུང་འདི་དག་ཐོས་ཀྱི་བདག་གིས་རང་དགར་བྱས་པ་ནི་མ་ཡིན་ཏེ། བཅོམ་ལྡན་འདས་ཀྱིས་གསུངས་པ་ཁོ་ན་ལྟར་བསྡུས་པ་ཡིན་པར་ཤེས་སོ། །དེ་ལྟར་ཤེས་པས་ཤུགས་ལ་རང་དགར་
བྱས་ལ་བཀག་གོ། །དེ་ལྟར་བསྡུས་ནས་འདུག་པས་བསྒྲུབས་ན་འབྲས་བུ་ཡང་འབྱུང་ལ། དངོས་པོའི་གནས་ལུགས་ཀྱང་སྟོན་པར་ཤེས་ནས་གང་ཟག་རྣམས་འཇུག་པར་འགྱུར་རོ། །ཡང་ན་བདག་གིས་ཐོས་ཞེས་པས། བདག་རང་གི་མོས་པའི་དབང་གིས་ཐོས་ཀྱི། གཞན་
གྱིས་ནི་གཞུང་གཞན་དུ་ཡང་ཡིན་ཏེ། འཆད་པར་འགྱུར་བའི་འཁོར་བསྟན་པས་སོ། །འདི་ནི་གཞན་དང་ལྡན་པ་རྣམ་པར་གཅོད་པ་སྤངས་པ་ཡིན་ནོ། །སློབ་དཔོན་མ་ཁོལ་གྱིས་ཀྱང་། གསུང་གཅིག་གིས་ཀྱང་བསྟན་མོད་ཀྱང་། །དུ་མ་ཉིད་དུ་རྟོགས་མཛད་པར། །བདག་ལ་ཉེ་
བར་སྟོན་ནོ་ཞེས། །སྐྱེ་བོ་ཀུན་གྱིས་ཤེས་པར་འགྱུར། །ཞེས་གསུངས་སོ། །བཅོམ་ལྡན་འདས་ལ་གསུང་གི་ཆེ་བ་མང་པོ་ཡོད་པར་བསྟན་ཏེ། གསུང་གཅིག་ལ་ཡང་དུ་མར་སྣང་བའོ། །ཡང་ན་བདག་གིས་ཐོས་ཞེས་པ། འཆད་པར་འགྱུར་བའི་བཅོམ་ལྡན་འདས་ལས། 
འཇིག་རྟེན་དབང་ཕྱུག་ལ་སོགས་པ་ལས་གཅིག་ནས་གཅིག་ཏུ་བརྒྱུད་ནས་ཐོས་པ་ཡང་མ་ཡིན་ཏེ། དངོས་སུ་བཅོམ་ལྡན་འདས་ལས་ཕྱག་ན་རྡོ་རྗེ་ཉིད་ཀྱིས་ཐོས་ཞེས་བྱ་བར་ཤེས་སོ། །དེ་ལྟར་ཤེས་པས་ཤུགས་ལས་བརྒྱུད་ནས་ཐོས་པ་བཀག་གོ། །ཐོས་པ་ཞེས་བྱ་བ་ནི། བདག་
ཉིད་ཉན་པའི་དུས་ན་བྱང་ཆུབ་སེམས་དཔའ་ཉིད་དུ་བསྟན་ལ་སྡུད་པའི་དུས་ནས་སངས་རྒྱས་ཉིད་ཡིན་ནོ། །འདི་ནི་བཟླས་ནས་བསྟན་པས་ཤིན་ཏུ་ཡང་ཚད་མ་ཡིན་ནོ་ཞེས་བསྟན་པ་ཡིན་ནོ། །མངོན་སུམ་དུ་ཐོས་པ་ལ་ཡང་འདི་ལྟར་ཤེས་པར་བྱ་སྟེ། སློབ་དཔོན་མེད་པར་འདིའི་བྱ་བ་

71-1-248a

མི་བྱའོ་ཞེས་ཡང་དག་པར་གསུངས་པར་ཤེས་པར་བྱའོ། །དེ་ལྟར་བསྟན་ནས་གང་གི་ཚེ། གང་ལས་གང་དུ་གང་དང་ལྷན་ཅིག་ཐོས་པ་དེ་དང་། དེའི་རིམ་པ་བཞིན་བསྟན་པའི་ཕྱིར། དུས་གཅིག་ན་ཞེས་བྱ་བ་བསྟན་ཏེ། འདི་ཤིན་ཏུ་དཀོན་པ་ཉིད་དང་། བདག་ཉིད་མང་
དུ་ཐོས་པ་ཉིད་དུ་སྒྲུབ་པར་བྱེད་དོ། །ཡང་ན་དུས་གཅིག་ན་ཞེས་པ་ཆོས་དང་སྦྱར་ན། དུས་གཅིག་གི་ཚེ་ན་བདག་གིས་འདི་ཐོས་བྱས་ནས། འདི་ལྟ་བུའི་ཕྱིན་ཅི་མ་ལོག་པའི་ངོ་མཚར་ཆེ་བའི་ཆོས་ནི་དུས་གཞན་གྱི་ཚེ་བསྟན་པ་མི་སྲིད་པའི་ཕྱིར་རོ་ཞེས་པས་ཡང་ནས་ཡང་དུ་འབྱུང་བར་དཀའ་
བར་ཤེས་སོ། །ཤུགས་ལས་ལན་གཅིག་ལས་ལན་གཉིས་སམ་གསུམ་དུ་གསུངས་པ་བཀག་གོ། །ཡང་ན་དུས་གཅིག་ན་ཞེས་པ་གང་ཟག་དང་སྦྱར་ན་དུས་གང་གི་ཚེ་བདག་གིས་འདི་ཐོས་ཀྱིས། གཞན་གྱི་ཚེ་གཞན་དང་གཞན་པའི་མདོ་ཐོས་སོ་ཞེས་མང་དུ་ཐོས་པ་ཉིད་དུ་བསྟན་
ཏེ། སྟོན་པས་ཀྱང་ལན་གཅིག་ལས་མ་གསུངས་པར་འདུག་ལ། ཉན་པའི་འཁོར་གྱིས་ཀྱང་ལན་གཅིག་ལས་མ་ཐོས་པར་འདུག་པ་ལ། གཟུངས་འདི་བསྡུས་ནས་འདུག་པས་གང་ཟག་འདི་ནི་མི་བརྗེད་པའི་གཟུངས་ཐོབ་པ་དང་ལྡན་པའི་གང་ཟག  གཅིག་ཏུ་འདུག་པར་ཤེས་
སོ། །དེ་ལྟར་ཤེས་པས་གང་ཟག་འདི་ནི་གཟུངས་ཐོབ་པ་དང་ལྡན་པ་གཅིག་ཏུ་འདུག་པས། བཅོམ་ལྡན་འདས་ཀྱིས་གསུངས་པ་ཁོ་ན་ལྟར་བསྡུས་པ་ཡོད་པས། བསྒྲུབས་ན་ནུས་པ་ཡང་འབྱུང་ལ། དངོས་པོ་གནས་ལུགས་ཀྱང་ཡིན་པར་ཤེས་ནས་གང་ཟག་རྣམས་འཇུག་
པར་འགྱུར་རོ། །ཤུགས་ལས་ལན་གཉིས་གསུམ་དུ་ཐོས་པ་བཀག་གོ།    །ད་ནི་གླེང་གཞི་དངོས་རྒྱུད་ཀྱི་རྒྱུ་རུ་འགྲོ་བ་བསྟན་ཏེ། དེ་ལ་གླེང་གཞི་ཕུན་སུམ་ཚོགས་པ་ནི། དུས་དང་སྟོན་པ་དང་། གནས་དང་། འཁོར་དང་། ཆོས་ཕུན་སུམ་ཚོགས་པའོ། །རྒྱུད་གསུངས་པ་དེ་
ཡང་དུས་ཁྱད་པར་དུ་འཕགས་པ་ཅིག་ཡོད་ན་གསུང་། མེད་ན་མི་གསུང་བས་ན། དུས་ཕུན་སུམ་ཚོགས་པ་རྒྱུད་འབྱུང་བའི་རྒྱུར་གསུངས་སོ། །གང་གི་ཚེ་གསུངས་ན་བདུད་བཏུལ་བའི་དུས་ན་གསུངས་སོ། །དེས་ན་དུས་གཅིག་ན་ཞེས་གསུངས་སོ། །དེ་ཡོད་ཀྱང་འཆད་པ་པོའི་

71-1-248b

སྟོན་པ་ཁྱད་པར་ཅན་ཅིག་ཡོད་ན་གསུང་། མེད་ན་མི་གསུང་བས་ན་སྟོན་པ་ཕུན་སུམ་ཚོགས་པ་རྒྱུད་འབྱུང་བའི་རྒྱུར་གསུངས་སོ། །གང་ལས་ཞེས་དྲིས་ན་བཅོམ་ལྡན་འདས་ལས་ཞེས་གསུངས་ཏེ། བཅོམ་ཞེས་པ་ནི་བདུད་ཞི་བཅོམ་སྟེ། དེ་ཡང་། ཉོན་མོངས་བདུད་སོགས་
འཇོམས་པ་དང་། །བཅོམ་པའི་ཕྱིར་ན་བཅོམ་པར་བཤད། །ཉོན་མོངས་ཤེས་རབ་དང་འབྲེལ་པས། །དེ་བས་ཤེས་རབ་བཅོམ་པར་བཤད། །ཅེས་གསུངས་སོ། །བདུད་བཞི་ནི་ཕུང་པོ་དང་། འཆི་བདག་དང་། ལྷའི་བུ་དང་། ཉོན་མོངས་པའི་བདུད་དོ། །དེ་བཅོམ་པའོ། །བདུད་བཞི་
བཅོམ་པ་ལ་ལུགས་གཉིས་ཏེ་གཟུགས་སྐུ་དང་། ཆོས་སྐུའོ། །དང་པོ་ཉོན་མོངས་པའི་བདུད་བཅོམ་པ་ནི། སྤང་བྱ་ཉོན་མོངས་པ་དང་ཤེས་བྱའི་སྒྲིབ་པ་མཐའ་དག་སྤངས་པའོ། །ཕུང་པོའི་བདུད་བཅོམ་པ་ནི་ཟག་བཅས་ཀྱི་ཕུང་པོ་མི་ལེན་པ་ཙམ་མོ། །ལྷའི་བུའི་བདུད་བཅོམ་པ་ནི་རྡོ་རྗེ་
གདན་གྱི་སྤོ་ལ་བདུད་བཏུལ་བའོ། །འཆི་བདག་གི་བདུད་བཅོམ་པ་ནི་འཇིག་རྟེན་པ་རྟག་ཏུ་རེ་བ་སུན་འདོན་པའི་དོན་དུ། ལོ་བརྒྱད་ཅུ་ཐམ་པ་ལ་སྐུ་མྱ་ངན་ལས་འདས་པ་ལ་བྲམ་ཟེ་སུ་ཀ་ཏོས་སྐྱེ་བ་འཕྱི་ནས། དཀར་པོའི་ཆོས་མ་ཤེས་ནས། དེས་མེ་ཏོག་ཨུཏྤ་ལ་ལྔ་ཕུལ་ནས། མྱ་ངན་
ལས་མི་འདའ་བར་གསོལ་བ་བཏབ་པས། ལོ་གཉིས་དེའི་ངོར་བཞུགས་ནས། བརྒྱད་ཅུ་རྩ་གཉིས་ལ་མྱ་ངན་ལས་འདས་ཏེ། ཚེ་ལ་དབང་ཐོབ་པས་འཆི་བདག་གི་བདུད་བཅོམ་མོ། །ཆོས་སྐུས་བདུད་བཅོམ་པ་ནི། ལྷའི་བུའི་བདུད་དང་། ཉོན་མོངས་པའི་བདུད་བཅོམ་པ་འདྲའོ། །
ཕུང་པོའི་བདུད་བཅོམ་པ་ནི་ཟག་བཅས་ཀྱི་དངོས་པོ་ཐམས་ཅད་འགགས་པའོ། །ཆོས་སྐུ་ལ་འགག་པ་མེད་པས་འཆི་བདག་གི་བདུད་བཅོམ་པའོ། །ལྡན་ཞེས་པ་ནི། དབང་ཕྱུག་དང་ནི་གཟུགས་བཟང་དང་། །དཔལ་དང་གྲགས་དང་ཡེ་ཤེས་དང་། །བརྩོན་འགྲུས་ཕུན་སུམ་ཚོགས་
པ་སྟེ། །དྲུག་པོ་དེ་ལ་ལྡན་ཞེས་བྱ། །དབང་ཕྱུག་ཅེས་པ་ནི། ཆོས་ཀྱི་དབྱིངས་ཀྱི་ཡེ་ཤེས་ལ་བྱ་སྟེ། དག་པའི་ཁམས་དང་། མ་དག་པའི་ཁམས་གཉིས་ལས། མ་དག་པའི་ཁམས་ནི་སོ་སོའི་སྐྱེ་བོའི་ཆོས་ཉིད་དེ། དེ་ལ་དམིགས་ནས་བསྒོམས་ན་ཐུན་མོང་དང་། ཐུན་མོང་མ་ཡིན་

71-1-249a

པའི་ཡོན་ཏན་སྐྱེད་པ་ལ་དབང་བྱེད་པས་དབང་ཕྱུག་ཅེས་བྱའོ། །དག་པའི་ཁམས་ཞེས་བྱ་བ་ནི་ཕྱུག་པོ་ནོར་ལ་དབང་བྱེད་པ་བཞིན་དེ་བཞིན་གཤེགས་པའི་རྒྱུད་ལ་ལྡན་པའི་ཡོན་ཏན་ལ་དབང་སྦྱོར་བའི་ཚུལ་དུ་དབང་བྱེད་པས་ན་དབང་ཕྱུག་ཅེས་བྱའོ། །གཟུགས་བཟང་
ཞེས་པ་ནི། མེ་ལོང་ལྟ་བུའི་ཡེ་ཤེས་ལ་བྱ་སྟེ། འབྲས་བུའི་མིང་རྒྱུ་ལ་བཏགས་ནས། གཟུགས་བཟང་ཞེས་བྱའོ། །གཟུགས་བཟང་བ་ནི་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་འགྲོ་བ་སེམས་ཅན་རྣམས་ལ་མོས་པ་ཇི་ལྟ་བ་བཞིན་དུ། སངས་རྒྱས་ཀྱི་སྐུ་ངེས་
པར་བསྟན་པར་མཛད་པ་སྟེ། ཁ་ཅིག་གིས་དེ་བཞིན་གཤེགས་པ་ལ་ཁ་དོག་སྔོན་པོར་མཐོང་། ཁ་ཅིག་གིས་ཁ་དོག་སེར་པོར་མཐོང་། འགྲོ་བ་གང་ལ་གང་འདུལ་བ་དེ་དང་དེར་སྣང་བ་དེ་ནི་མེ་ལོང་ལྟ་བུའི་ཡེ་ཤེས་ཀྱི་དབང་གིས་བྱུང་བས་ན། དེ་ལ་གཟུགས་བཟང་ཞེས་བྱའོ། །དེ་ལ་
གཟུགས་བཟང་ཞེས་བཏགས་པའི་དགོས་པ་ནི། སེམས་ཅན་ལ་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུར་སྣང་བ་དེ་ནི་མེ་ལོང་ལྟ་བུའི་ཡེ་ཤེས་ཀྱི་དབང་གིས་འབྱུང་བར་ཤེས་པར་དགོངས་སོ། །དཔལ་དང་གྲགས་དང་ཞེས་བྱ་བ་ནི་ཉོན་མོངས་པ་ཅན་གྱི་ཡིད་
གནས་གྱུར་པ་མཉམ་པ་ཉིད་ཀྱི་ཡེ་ཤེས་ལ་བྱ་བ་སྟེ། བྱང་ཆུབ་སེམས་དཔའ་ས་དང་པོ་མཐོང་ནས་ཆོས་ཐམས་ཅད་ལ་བདག་མེད་པར་རྟོགས་པའི་དུས་སུ། བདག་དང་སེམས་ཅན་ཐམས་ཅད་ལ་མཉམ་པ་ཉིད་ཀྱི་ཤེས་པ་ཐོབ་ནས། བདག་སྡུག་བསྔལ་ལས་ཐར་བར་འདོད་ཅིང་
བདེ་བ་འདོད་པ་དེ་བཞིན་དུ། སེམས་ཅན་ཐམས་ཅད་ཀྱི་སྡུག་བསྔལ་བསལ་ལ། བདེ་བ་ལ་དགོད་པས་ན་བདེ་བ་དང་ཕན་པ་སྐྱེད་པར་བྱེད་པའི་རྒྱུ་ཡིན་པས་ན་དཔལ་ཞེས་བྱའོ། །བདག་དང་གཞན་མཉམ་པོར་བྱེད་པས་སྐྱེས་བུ་འདི་འདྲ་བའི་འཇིག་རྟེན་གྱི་ཁམས་ན་མེད་དོ་ཞེས་ཕྱོགས་བཅུར་
སྙན་པ་ཆེན་པོ་དང་། གྲགས་པ་ཕུན་སུམ་ཚོགས་པ་འབྱུང་བས་ན་འདི་ལ་གྲགས་ཞེས་བརྗོད་དོ། །འབྲས་བུའི་མིང་རྒྱུ་ལ་བཏགས་སོ། །ཡེ་ཤེས་ཞེས་བྱ་བ་ནི་སོ་སོར་རྟོག་པའི་ཡེ་ཤེས་སོ། །བརྩོན་འགྲུས་ཕུན་སུམ་ཚོགས་པ་ཞེས་བྱ་བ་ནི་བྱ་བ་གྲུབ་པའི་ཡེ་ཤེས་ལ་བྱ་སྟེ། འཇིག་རྟེན་

71-1-249b

གྱི་ཁམས་ཐམས་ཅད་དུ་སྤྲུལ་པ་རྣམ་པ་སྣ་ཚོགས་པ་དཔག་ཏུ་མེད་པ་བསམ་གྱིས་མི་ཁྱབ་པས་སེམས་ཅན་གྱི་དོན་མཛད་དེ། དེས་ན། བྱང་ཐང་ཆེན་པོའི་མེ་དང་འདྲ། །གསུང་ངོ་། །དེ་དྲུག་གི་སྐལ་བ་དང་ལྡན་པས་སོ། །འདས་ཞེས་པ་ནི་འཁོར་བ་དང་མྱ་ངན་ལས་འདས་ནས་མི་གནས་
པའི་མྱ་ངན་ལས་འདས་པ་ཆེན་པོས་ཆོས་ཀྱི་སྐུ་ཐུགས་སུ་ཆུད་པ་དང་། སྙིང་རྗེ་ཆེན་པོས་སེམས་ཅན་ལ་ཆགས་པས་ཕུང་པོ་ལྷག་མེད་དུ་མྱ་ངན་ལས་མི་འདའོ། །ཤེས་རབ་ཆེན་པོས་སེམས་ཅན་གྱི་དོན་བྱེད་ཅིང་འཁོར་བ་ན་གནས་ཀྱང་དེའི་ཉེས་པས་མི་གོས་ཏེ། དཔེར་ན་པདྨ་འདམ་ལ་
གནས་ཀྱང་དེ་ཡིས་མི་གོས་པ་དང་འདྲའོ། །དེ་གཉིས་ཡོད་ཀྱང་གནས་ཁྱད་པར་དུ་འཕགས་པ་ཅིག་ཡོད་ན་གསུང་མེད་ན་མི་གསུང་བ་ན། དེ་དེའི་རྒྱུ་རུ་གསུངས་སོ། །གནས་གང་དུ་ཐོས་ཞེས་འདྲི་ན། རྡོ་རྗེ་ལ་བཞུགས་ཏེ། ཞེས་གསུངས་སོ། །དེ་ནས་གནས་ནི་རྡོ་རྗེའི་གདན་བྱང་ཆུབ་
ཀྱི་ཤིང་དྲུང་ངོ་། །དེ་གསུམ་ཀ་ཡོད་ཀྱང་རྒྱུད་བཤད་པའི་སྣོད་དུ་རུང་བ་ཅིག་མེད་ན་མི་གསུང་ངོ་། །ཡོད་ན་གསུང་བས་ན། དེ་དེའི་རྒྱུ་རུ་གསུང་ངོ་། །གང་དང་ལྷན་ཅིག་ཐོས་ཞེས་འདྲི་ན། བདག་གིས་ཐོས་ཞེས་གསུང་ངོ་། །འཁོར་ནི་བདུད་བཏུལ་བའི་དུས་ཀྱི་ཚེ་ན་ཡོད་པའི་ཕྱག་ན་རྡོ་རྗེ་
ལ་སོགས་པ། ཕྱོགས་བཅུའི་བྱང་ཆུབ་སེམས་དཔའ་རྣམས་དང་། ལྷ་མ་སྲིན་སྡེ་བརྒྱད་ལ་སོགས་པའོ། །དེ་བཞི་ཀ་ཡོད་ཀྱང་ཆོས་ཕུན་སུམ་ཚོགས་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་
དག་པ། ཡོངས་སུ་བྱང་བ། ཡོངས་སུ་རྫོགས་པ། གསལ་བ། ཚངས་པར་སྤྱོད་པ་ལ་སོགས་པ་ཅིག་ཡོད་ན་གསུང་། མེད་ན་མི་གསུང་བས་ན་དེའི་རྒྱུ་རུ་གསུངས་སོ། །གླེང་གཞི་གསུངས་པའི་དགོས་པ་ནི། ཕྱི་རབས་ཀྱི་གང་ཟག་རྣམས་འཇུག་པར་འགྱུར་བའི་དགོས་པའོ། །
རྒྱུད་འབྱུང་བའི་རྒྱུ་གླེང་གཞི་ཕུན་སུམ་ཚོགས་པ་རྐྱེན་གླེང་སློང་བ་དང་བཅས་པ་བཤད་ཟིན་ཏོ།།      །།ད་ནི་རྒྱུད་དངོས་སྟོན་ཏེ། དེ་ལ་བཞི་སྟེ། བསྙེན་སྒྲུབ་རྣམ་པ་གཉིས་ཀྱི་སྔོན་དུ་འགྲོ་བའི་ཆོ་ག་ཡན་ལག་དྲུག་གིས་བདག་ཉིད་ལྷར་ཇི་ལྟར་བསྐྱེད་པའི་ཚུལ་བསྟན་པ་དང་། 

71-1-250a

བསྙེན་སྒྲུབ་གང་གི་དོན་དུ་བྱ་བའི་གདུལ་བྱ་བསྟན་པ་དང་། བསྙེན་པའི་དུས་སུ་མཆོག་ཏུ་སྒྲ་ལ་གནས་པའི་བསམ་གཏན་ལ་བཅོམ་ལྡན་འདས་དགྱེས་པས། སྒྲ་ལ་གནས་པའི་བསམ་གཏན་བྱ་བར་བསྟན་པ་དང་། སྒྲུབ་པའི་དུས་སུ་བུམ་པའི་མཚན་ཉིད་བཟླས་
བརྗོད་བྱ་བའི་གྲངས་ངེས་པས་ཁྲུས་བྱ་བའི་གང་ཟག་ཉེ་བར་མཚོན་ཏེ་བསྟན་པའོ། །དེའི་དང་པོ་ལས་དཔྱོད་དམིགས་དྲུག་ཡོད་དེ་སྐབས་སྐབས་སུ་ངོ་སྤྲད་དོ། །གསང་སྔགས་སྤྱིའི་རྣམ་པར་གཞག་པ་ཅིག་བཤད་དེ། བསམ་གཏན་ཕྱི་མ་ལས། ལྷ་ཡི་སྐུ་ཡི་གནས་དེ་ལ། །དང་པོ་
ཁོ་ནར་མཆོད་ནས་ནི། །རྣལ་འབྱོར་གནས་བཅས་ཤེས་རབ་ཅན། །བདེ་གཤེགས་མདུན་དུ་བསམས་ན་ནི། །ཕྱི་ནས་ཡན་ལག་རྣམ་པར་གྲོལ། །མི་འབྱེད་འབྱེད་པ་རྣམ་པར་སྤངས། །ཕྲ་བ་མི་གཡོ་གསལ་བ་སྟེ། །བློ་ཡི་སྤྱོད་པ་མདུན་ན་གནས། །བདག་ཉིད་འདི་འདྲ་བཞག་
ནས་ནི། །གསང་སྔགས་རྣམ་པར་ཤེས་པས་བསྒོས། །བསྡམས་ནས་ཏིང་ངེ་འཛིན་ལ་གནས། །སྲོག་དང་རྩོལ་བ་རབ་ཏུ་བསྡུས། །གཉིད་སྤངས་ནས་ནི་རྣམ་པར་བསམ། །ཞེས་གསུངས་སོ། །དེ་ཡང་། ལྷ་ཡི་དྲུང་ནས་མཆོད་ནས་ནི། །བྱ་བའི་བར་ཚིག་རྐང་གཉིས་ཀྱིས་
ཚོགས་བསགས་པ་བསྟན་ཏོ། །རྣལ་འབྱོར་བྱ་བ་བསམས་ནས་ནི། །ཚིག་རྐང་གཉིས་ཀྱིས་ནི། འདུག་ཐབས་དང་གསོལ་བ་བཏབ་སྟེ། ཕྱི་ནས་བྱ་བ་ནས་བཞག་ནས་ནི་བྱ་བའི་བར་གྱིས་ཚིག་རྐང་ལྔ་ལས་མི་རྟོགས་པའི་ལྷ་བསྒོམ་པ་བསྟན་ཏོ། །གསང་སྔགས་རྣམ་པར་ཤེས་
པས་བསྒོས། ཞེས་པ་ནི་བདག་དང་ལྷའི་དེ་ཁོ་ན་ཉིད་བསྲེ་བ་དང་། ལྷའི་གཞི་བསྒོམ་པ་བསྟན་ཏོ། །བསྡམས་ནས་ཏིང་ངེ་འཛིན་ལ་གནས། ཞེས་པ་ནས། རྣམ་པར་བསམ་བྱ་བའི་ཚིག་རྐང་པ་གསུམ་གྱིས་ནི་ཏིང་ངེ་འཛིན་གྱི་ལྷ་བསྒོམ་པ་བསྟན་ཏོ། །སངས་རྒྱས་གསང་སྔགས་
ནི་དེ་དེ་ལྟར་གསལ་བར་བསམ་གཏན་ཕྱི་མའི་ཊཱི་ཀར་གསུང་ངོ་། །གཟུངས་འདི་དང་སྦྱར་ན། བཅོམ་ལྡན་འདས་བྱ་བ་ནས། བྱིན་གྱིས་བརླབས་ནས་ཞེས་པས་ལྷ་དྲུག་སྒོམ་པའི་སྔོན་དུ་གསོལ་བ་བཏབ་པ་བསྟན་ཏོ། །རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པས་རྣམ་

71-1-250b

པར་མི་རྟོག་པའི་ལྷ་བསྒོམ་པ་བསྟན་ཏོ། །དེ་ནས་ལག་ན་རྡོ་རྗེ་ཞེས་པ་ནས། རྡོ་རྗེ་ཁྲོ་བོ་ལས་བྱུང་བ་ཞེས་པས་སྟོང་པ་ཉིད་ལས་སྡང་བའི་ཐབས་བསྟན་ཏོ། །རྡོ་རྗེ་སྙིང་པོས་ཞེས་པ་ནས། ལག་ན་རྡོ་རྗེས་རབ་ཏུ་སྨྲས་ཞེས་པས་ལྷ་དྲུག་གི་ཡོན་ཏན་བསྟན་ཏོ། །ན་མོ་རཏྣ་ཏྲ་ཡཱ་ཡ་བྱ་བ་
ནས། ཨ་མྲྀ་ཏེ་ཧཱུཾ་ཕཊ་ཅེས་བྱ་བའི་བར་དུ། སྒྲའི་ལྷ་དང་ཡི་གེའི་ལྷ་བསྟན་ཏོ། །སྡིག་པ་ཐམས་ཅད་བྱང་བྱས་ནས། །བྱ་བ་ནས། དཔལ་ཀུན་གྱིས་ནི་ལེགས་པར་བརྒྱན། །བྱ་བས་གཟུགས་ཀྱི་ལྷ་བསྒོམ་པ་བསྟན་ཏོ། །ཕྱག་རྒྱ་ཏིང་ངེ་འཛིན་གྱི་ལྷ་ནི་སྤྱིའི་རྒྱུད་ལས་ཤེས་པར་བྱའོ།    །
དེ་ལས་གཟུངས་འདིའི་མངོན་རྟོགས་ཀྱི་རིམ་པ་ཉམས་སུ་བླང་བ་ནི་དང་པོར་ཕྱི་ནང་གི་ཁྲུས་རྣམ་པ་གཉིས་བྱས་ལ། ཀུ་ཤའི་སྟེང་དུ་སྟན་བདེ་བ་ལ་ཉེ་བར་འདུག་སྟེ། དེའི་ཆར་གཏོགས་པ་འཐོར་འཐུང་དང་ཉེ་རེག་བྱས་ལ། བདག་ཉིད་སྐད་ཅིག་གིས་ལྷ་གང་རུང་དུ་བསྐྱེད་ལ། མིག་
གཉིས་སུ་རཾ་ལས་ཉི་མའི་དཀྱིལ་འཁོར་རེ་བསམས་ལ། དེའི་སྟེང་དུ་ཧཱུཾ་ལས་ཡེ་ཤེས་ཀྱི་འོད་ཟེར་ཅན་རེ་རེ་བསམས་ལ། དེ་ལས་འོད་ཟེར་འཕྲོས་པས་བགེགས་ཐམས་ཅད་བསྲེགས་པར་བསམས་ལ། ངག་ཏུ་ཧཱུཾ་རིང་བརྗོད་ཅིང་བགེགས་ཐམས་ཅད་བསྐྲད་ཅིང་མཚམས་
བཅད་པ་དང་། ནང་གི་ཁྲུས་བྱང་ཆུབ་མཆོག་ཏུ་སེམས་བསྐྱེད་པ་ལ་སོགས་པ་བྱས་ལ། བདག་ཉིད་ལྷའི་སྐུ་ཕྱག་རྒྱ་ཆེན་པོར་བསྒོམ་པར་བྱའོ།    །དེ་ཡང་དང་པོར་ཀྲྀ་ཡ་དོན་གྱི་ལྷ་དྲུག་བསྒོམ་པར་བྱ་སྟེ། དེ་ལ་དང་པོར་བདག་ཉིད་ལས་ཀྱི་རྡོ་རྗེ་སེམས་དཔའ་འམ། ཡང་ན་ཐ་མལ་
པའི་ལུས་སམ། ལྷ་གང་རུང་ཅིག་ཏུ་མོས་པ་བྱས་ལ། མདུན་གྱི་ནམ་མཁའ་ལ་བཅོམ་ལྡན་འདས་ཤཱཀྱ་ཐུབ་པ་བདུད་བཏུལ་ནས་ས་གནོན་གྱི་ཕྱག་རྒྱ་ཅན། སེང་གེའི་ཁྲི་ལ་བཞུགས་པ་ཅིག་ཏུ་སྐད་ཅིག་གིས་བསམས་ལ། བཅོམ་ལྡན་འདས་ཀྱིས་བདག་གི་ལུས་རྡོ་རྗེར་བྱིན་གྱིས་བརླབ་ཏུ་
གསོལ་ཞེས་བརྗོད་པས། དེས་ཀྱང་བདག་ཉིད་ཀྱི་ལུས་སྟོང་པར་བྱིན་གྱིས་བརླབས་པར་བསམས་ཏེ། དངོས་པོ་ཐམས་ཅད་གཟུང་བ་མེད་པ། འཛིན་པ་མེད་པ། སྤྲོས་པ་ཐམས་ཅད་དང་བྲལ་བ་ནམ་མཁའ་ལྟ་བུར་བསམ་མོ། །དེ་ནས་སྟོང་པ་ཉིད་ཞི་བ་ཕྱོགས་གཅིག་པ་འབའ་ཞིག་
71-1-251a

གིས་འགྲོ་བའི་དོན་བྱ་བར་མི་ནུས་པ་དང་། ཉན་ཐོས་དང་རང་རྒྱལ་བའི་བྱང་ཆུབ་དང་ཁྱད་པར་མེད་པར་སོང་སྟེ་དོགས་ནས། བཅོམ་ལྡན་འདས་དང་བྱང་ཆུབ་སེམས་དཔའི་འོད་ཟེར་རམ་ཕྱག་གིས་རེག་ནས་མངོན་སུམ་དུ་བསླང་ངམ། ཡང་ན་དེ་གཉིས་ཏིང་ངེ་འཛིན་
ལ་ཞུགས་པའི་དབང་གིས། བདག་ཉིད་སྟོང་པ་ཉིད་ལས་བསླང་ངོ་། །གལ་ཏེ་སྐུར་བསླང་ངམ་ཞེ་ན། མ་ཡིན་ཏེ། སྟོང་པ་ཉིད་ཀྱི་སེམས་རྩེ་གཅིག་པའི་རྣམ་པ་མ་དོར་བ་ལ། སྟོང་པ་ཉིད་ཀྱི་སེམས་དཔྱོད་པ་དང་བཅས་པ་ཅིག་ཏུ་བསླང་ངོ་། །ཇི་ལྟར་དཔྱོད་ན་བདག་གི་དེ་ཁོ་ན་ཉིད་ནི། 
གཟུང་བ་མེད་པ། འཛིན་པ་མེད་པ། སྤྲོས་པ་ཐམས་ཅད་དང་བྲལ་བར་འདུག་ན། ལྷའི་དེ་ཁོ་ན་ཉིད་ཇི་ལྟར་འདུག་པར་དཔྱད་པས། ལྷའི་དེ་ཁོ་ན་ཉིད་དེ་ཡང་དོན་དམ་པར་སྤྲོས་པ་ཐམས་ཅད་དང་བྲལ་བར་འདུག་པར་ཤེས་སོ། །དེ་ལྟར་ཤེས་པས་སྟོང་པ་ཉིད་ཀྱི་རྣམ་པ་ལ་དབྱེ་བ་མེད་པས་
གཅིག་ཅིང་ཐ་མི་དད་པ་མེད་པ་ཡིན། དེ་མེད་ཙམ་ན་བདག་དང་ལྷའི་དེ་ཁོ་ན་ཉིད་དེ་ཡང་གཅིག་ཅིང་ཐ་མི་དད་པར་འདུག དེ་ལྟར་འདུག་ཙ་ན་བདག་གི་དེ་ཁོ་ན་ཉིད་གང་ཡིན་པ་དེ་ལྷའི་དེ་ཁོ་ན་ཉིད་ཡིན་ལ། ལྷའི་དེ་ཁོ་ན་ཉིད་གང་ཡིན་པ་དེ་བདག་གི་དེ་ཁོ་ན་ཉིད་ཡིན་པར་ཤེས་སོ། །དེ་ཤེས་
པས་རང་དང་ལྷའི་དེ་ཁོ་ན་ཉིད་གཅིག་ཅིང་ཐ་མི་དད་པར་རོ་གཅིག་ཏུ་གྱུར་པར་བསམ་མོ། །གཅིག་ཅིང་ཐ་མི་དད་པར་བསམས་པ་དེ་ལས་ཡོན་ཏན་གང་ཐོབ་ན། ལྷའི་དེ་ཁོ་ཉིད་ལ་རང་གི་ཕུན་སུམ་ཚོགས་པ་རྡོ་རྗེའི་ཆོས་བདུན་དང་། གཞན་གྱི་ཕུན་སུམ་ཚོགས་པ་དེ་མཛད་པ་རྣམ་པ་
བཞི་ཡོད་པ་དེ་དག་གི་དེ་ཁོ་ན་ཉིད་ལ་བསྒོས་ནས་ལྡན་པར་བསམ་མོ། །བདག་དང་ལྷའི་དེ་ཁོ་ན་ཉིད་གཅིག་ཏུ་བསེས་པས་དགོས་པ་གཉིས་འབྱུང་སྟེ། བདག་དང་ལྷ་རུ་ཐ་དད་པའི་འདུ་ཤེས་ཀྱང་འགོག་ལ། བདག་ཉིད་ཀྱི་ལུས་སེམས་བྱིན་རླབས་ཅན་ཅིག་ཏུ་བྱས་ཏེ་གཞག་གོ། །རྣམ་
པར་མི་རྟོག་པའི་ལྷ་སྒོམ་པ་རྫོགས་སོ།།      །།ད་ནི་སྒྲའི་ལྷ་བསྒོམ་པར་བྱ་སྟེ། བདག་ཉིད་ཀྱི་སེམས་སྟོང་པ་ཉིད་ལ་གནས་པའི་རྗེས། སྐད་ཅིག་མ་གཉིས་པ་ལ། དཔེར་ན་ནམ་མཁའ་སྟོང་པ་ལ་གློ་བུར་དུ་འབྲུག་གི་སྒྲ་རྣམ་པ་དྲག་པོ་གྲག་པ་ལྟར་བསམས་ཏེ། རང་གི་སེམས་ཉིད་

71-1-251b

ན་མོ་རཏྣ་ཏྲ་ཡཱ་ཡ། བྱ་བ་ནས་ཨ་མྲྀ་ཏེ་ཧཱུཾ་ཕཊ་བྱ་བའི་བར་དུ་སྒྲའི་རྣམ་པར་གྲག་པར་བསམ་མོ། །སྒྲའི་ལྷ་བསྒོམ་པ་རྫོགས་སོ།།      །།དེ་ནས་རང་གི་སེམས་ཡི་གེའི་རྣམ་པར་གསལ་བར་སྣང་བ་ལ། ཀུན་རྫོབ་བྱང་ཆུབ་སེམས་ཟླ་བའི་དཀྱིལ་འཁོར་ཅིག་ཆགས་པར་བསམ་མོ། །
དཔེར་ན་གསེར་ཕྱེ་མ་དངུལ་ཆུ་ལ་ཆགས་པ་བཞིན་ནོ། །དེ་ཡང་ཕྱི་ནས་བལྟས་ན་ནང་གསལ་བ། ནང་ནས་བལྟས་ན་ཕྱི་གསལ་བའི་གཟུགས་བརྙན་གྱི་རྣམ་པར་བལྟའོ། །ཡི་གེའི་ལྷ་བསྒོམ་པ་རྫོགས་སོ།།      །།དེ་ནས་ཟླ་བའི་སྟེང་དུ་གཟུངས་ལས་འོད་ཟེར་འཕྲོས་པས། དེའི་སྣ་ལ་
བཅོམ་ལྡན་འདས་རྡོ་རྗེ་རྣམ་པར་འཇོམས་པ་དཔག་ཏུ་མེད་པ། ནམ་མཁའི་མཐའ་གཏུགས་པ་ཁེངས་པ་བྱུང་སྟེ། མཛད་པ་རྣམ་པ་བཞིའི་སྒོ་ནས་འགྲོ་བ་རིགས་དྲུག་གི་སེམས་ཅན་རྣམས་ཀྱི་གནས་སུ་འཕྲོས་པས། སོ་སོའི་ལས་ཀྱི་སྡིག་སྒྲིབ་སྦྱངས། སྡུག་བསྔལ་མེད་པར་བྱས་ཏེ་
ཐར་པ་དང་ཐམས་ཅད་མཁྱེན་པ་ལ་བཀོད། ཕྱོགས་བཅུའི་སངས་རྒྱས་དང་། བྱང་ཆུབ་སེམས་དཔའ་རྣམས་ལ་མཆོད་པའི་སྤྲིན་ཆེན་པོས་མཆོད། ཐུགས་དམ་གྱི་རྒྱུད་བསྐུལ། བསོད་ནམས་དང་ཡེ་ཤེས་ཀྱི་ཚོགས་གཉིས་བསགས་ནས་སླར་ཚུར་འདུས་ནས་ཟླ་བའི་སྟེང་གི་
གཟུངས་ལ་ཐིམ། གཟུངས་ཟླ་བ་དང་བཅས་པ་ཡོངས་སུ་གྱུར་པ་ལས་བདག་ཉིད་བཅོམ་ལྡན་འདས་དཔལ་རྡོ་རྗེ་རྣམ་པར་འཇོམས་པ། ཞལ་གཅིག་པ། ཕྱག་གཉིས་པ། སྐུ་མདོག་སྔོན་པོ། ཕྱག་གཡས་ཀྱིས་རྡོ་རྗེ་རྒྱ་གྲམ་ལས་ཕྱོགས་གཅིག་མེད་པ་བསྣམས་པ་ཐུགས་
ཀར་འཛིན་པ། གཡོན་པ་རྡོ་རྗེ་ཁུ་ཚུར་དཀུར་བསྟེན་པ། ཅུང་ཟད་ཁྲོ་བ་ལ་སྒེག་ཅིང་འགྱིང་བག་དང་བཅས་པ། དབུ་རྒྱན་རྩེ་ཕྲན་དང་། རྒྱན་ཐམས་ཅད་ཀྱིས་བརྒྱན་པ། རིན་པོ་ཆེའི་ཁྲི་སྟེངས་ན་རྒྱལ་པོ་རོལ་པའི་ཚུལ་དུ་བཞུགས་པར་བསྒོམ་མོ། །གཟུངས་ཀྱི་ལྷ་བསྒོམ་པ་
རྫོགས་སོ།།      །།དེ་ནས་ལག་པ་གཉིས་ཐལ་མོ་སྦྱར་ཏེ། སྲིན་ལག་གཉིས་ནང་དུ་བཅུག་ལ། གུང་མོ་གཉིས་བསྒྲེང་ལ། མཛུབ་མོ་གཉིས་གུང་མོའི་རྒྱབ་ཏུ་ནས་གང་ཙམ་གྱིས་མ་འབྱར་བར་བྱས་ལ། མཐེ་བོང་གཉིས་དང་མཐེའུ་ཆུང་གཉིས་བསྒྲེང་སྟེ། ཁྲོ་བོའི་རྡོ་རྗེ་རྩེ་ལྔ་པ་

71-1-252a

ལྟར་བྱས་ལ། ཨོཾ་བཛྲ་ཛྭ་ལཱ་ཡ་ཏཱ་ཞེས་བརྗོད་ཅིང་། སྙིང་ག་དང་། ལྐོག་མ་དང་། སྤྱི་བོ་དང་། དཔུང་པ་གཡས་གཡོན་དུ་གཏུགས་ཏེ་བྱིན་གྱིས་བརླབ་བོ། །དེ་ལྟར་བྱས་ནས། སྔར་ཀུན་བརྟགས་ཀྱི་ལྷ་ཡིན་པ་ལ། དེས་གཞན་དབང་གི་ལྷ་རྒྱུ་རྐྱེན་ལས་གྲུབ་
པའི་ལྷ་དངོས་གཅིག་ཏུ་བསམ་མོ། །ཕྱག་རྒྱའི་ལྷ་རྫོགས་སོ།།      །།དེ་ནས་སྐུ་མདོག་དང་ཕྱག་མཚན་གསལ་བར་ཡང་དང་ཡང་དུ་བསྒོམ་པ་ནི། ཏིང་ངེ་འཛིན་གྱི་ལྷའོ། །ཏིང་ངེ་འཛིན་གྱི་ལྷ་བསྒོམ་པ་རྫོགས་སོ།།      །།དེ་ལྟར་ན་ཀྲྀ་ཡ་ལུས་ཀྱི་ལྷ་དྲུག་བསྒོམ་པ་རྫོགས་
སོ།།      །།ཡང་ན་འདི་ལྟར་བྱ་སྟེ། ཕྱག་རྒྱ་ཞེས་བྱ་བ་ནི། མཚན་མ་ཡང་ཟེར་ལ། ལག་པའི་འདུ་བྱེད་ལ་ཡང་ཕྱག་རྒྱ་ཟེར་ཏེ། དེ་ལྟར་གཉིས་སུ་ཡོད་པ་ལས། འདིའི་སྐབས་སུ་མཚན་མའི་དབང་དུ་བྱས་ནས་ཕྱག་རྒྱའི་ལྷ་ལྔ་ལ་གཉིས་པའི་སྐབས་སུ་བསྒོམ་པར་བྱ་སྟེ། 
བདག་དང་ལྷའི་དེ་ཁོ་ན་ཉིད་བསྲེ་བ་ཡན་ཆད་འདྲའོ། །བདག་དང་ལྷའི་དེ་ཁོ་ན་ཉིད་བསྲེས་པའི་རྗེས་ལ། བདག་ཉིད་ཀྱི་སེམས་དོན་དམ་པར་བྱང་ཆུབ་ཀྱི་སེམས་ལས། ཀུན་རྫོབ་བྱང་ཆུབ་ཀྱི་སེམས་ཟླ་བའི་དཀྱིལ་འཁོར་དུ་བསམ་མོ། །དེའི་སྟེང་དུ་ཡི་གེ་ཧཱུཾ་མཐིང་གཅིག་བསམ། 
དེ་ལས་འོད་ཟེར་འཕྲོས་འདུས་པ་ལས། ཁྲོ་བོ་རྡོ་རྗེ་རྩེ་ལྔ་པ་རྩེ་མོ་གྱེས་པ་ནག་པོ་ཞིག་ཏུ་བསམ་མོ། །དེའི་ལྟེ་བ་ལ་ཟླ་བའི་དཀྱིལ་འཁོར་གྱི་སྟེང་དུ་གཟུངས་རིངས་སམ། ཡང་སྙིང་ངམ། རིགས་ཀྱི་སྙིང་པོ་བཀོད་ལ། དེ་ནས་བདག་ཉིད་ཀྱི་སེམས་སྒྲའི་རྣམ་པར་གྲག་པར་བསམས་ཏེ། 
ནམ་མཁའ་ལ་ན་མོ་རཏྣ་ཏྲ་ཡཱ་ཡ་བྱ་བ་ནས། ཨ་མྲྀ་ཏེ་ཧཱུཾ་ཕཊ་བྱ་བའི་བར་དུ། སྒྲའི་རྣམ་པར་གྲག་པར་བསམ་མོ། །སྒྲའི་ལྷ་བསྒོམ་པ་རྫོགས་སོ།།      །།དེའི་རྗེས་ལ་བདག་ཉིད་ཀྱི་སེམས་དེའི་ལྟེ་བའི་སྟེང་ན་གཟུངས་སྔགས་ཡི་གེའི་རྣམ་པར་གསལ་བར་སྣང་བ་ནི་ཡི་གེའི་
ལྷའོ། །གཟུངས་ཀྱི་ལྷ་གོང་དང་འདྲའོ། །བར་འདིར་ཡང་། ཕྱག་རྒྱ་གནས་ལྔར་བྱིན་གྱིས་བརླབ། །གསུང་ངོ་། །དེ་ལྟར་བྱས་པས། ལྷ་བདུན་དུ་ཞེ་ན་མ་ཡིན་ཏེ་ཕྱག་རྒྱར་ངོ་བོ་གཅིག་པའི་ཕྱིར་རོ། །རྣམ་པར་རྟོག་པའི་ལྷ་ཡང་སྔ་མ་དང་འདྲའོ། །ཕྱག་རྒྱ་དང་ཏིང་ངེ་འཛིན་གྱི་

71-1-252b

ལྷ་ནི། སྤྱིའི་རྒྱུད་ལས་ཁ་བསྐངས་པ་ལས། བྱེ་བྲག་གི་རྒྱུད་འདི་ནས་ནི་མ་བཤད་དོ། །ཀྲྀ་ཡའི་དོན་གྱི་ལུགས་རྫོགས་སོ།།      །།ཡང་འདི་ལྟར་བྱ་སྟེ། འདི་ནི་ཤིན་ཏུ་ཡང་ལེགས་ཏེ། བླ་མ་ཡང་གསུང་། རང་གི་འདོད་པ་དང་ཡང་མཐུན་པར་འདུག་པས་ན། དེས་ན་འདི་
ལྟར་བསྒོམ་པར་བྱ་སྟེ། བཅོམ་ལྡན་འདས་སྐད་ཅིག་གིས་མདུན་གྱི་ནམ་མཁར་བསམས་ཏེ། རང་ཡི་དམ་ལྷ་གང་ཡིན་པ་དེའི་ལུས་སུ་བྱིན་གྱིས་རློབ་པར་གསོལ་བ་གདབ་པར་བྱའོ། །དེ་ལ་གསོལ་བ་གདབ་པ་ནི་འདི་ཡིན་ཏེ། བཅོམ་ལྡན་འདས་བདག་གི་ལུས་ལྷ་གང་ཡང་རུང་
བར་བྱིན་གྱིས་བརླབ་ཏུ་གསོལ་བྱས་ལ། སྙིང་ག་དང་ངག་དང་། མིག་དང་། དཔྲལ་བ་དང་། སྤྱི་བོར་ཨ་དང་། བྷི་དང་། ར་དང་། ཧཱུཾ་དང་། ཁཾ་སྟེ། དཔའ་བོ་འབྲུ་ལྔར་བྱིན་གྱིས་བརླབ་པར་བྱའོ། །ཡང་ན་ཨོཾ་ཨཱཿཧཱུཾ་གསུམ་གྱིས་བྱིན་གྱིས་བརླབ་པར་བྱས་ནས། བདག་ཉིད་ཀྱི་
ལུས་དང་ལྷ་རུ་དབྱེར་མི་ཕྱེད་པ་ཅིག་ཏུ་བསམ་མོ། །ཡང་ན་རྡོ་རྗེ་ལུས་ཅན་ནམ། མི་ཆོད་པ་ལ་སོགས་པའི་ཡོན་ཏན་དང་ལྡན་པར་བསམ་མོ། །བྱིན་རླབས་དང་པོ་ནི་བྱ་བའི་རྒྱུད་ཀྱི་ལུགས་སོ། །དེ་ལྟར་བྱས་ནས་བདག་ཉིད་ལྷ་གང་ཡང་རུང་བའི་ཐུགས་ཀར་ཟླ་བའི་དཀྱིལ་འཁོར་
ཅིག་བསམ། དེའི་སྟེང་དུ་ཧཱུཾ་མཐིང་ནག་ཅིག་བསམ། དེ་ལས་འོད་ཟེར་འཕྲོས་འདུས་པ་ལས། ཁྲོ་བོའི་རྡོ་རྗེ་རྩེ་ལྔ་པ་གདེངས་པ་ནག་པོ་ཅིག་ཏུ་བསམ་མོ། །དེའི་ལྟེ་བ་ལ་ཟླ་བའི་སྟེང་དུ་ས་བོན་གྱི་ཡི་གེ་བཀོད་ལ། ཁྲོ་བོའི་རྡོ་རྗེ་དེ་ལ་དམིགས་པ་རྩེ་གཅིག་ཏུ་སེམས་གཏད་
དེ་ཅུང་ཞིག་མཉམ་པར་གཞག་པ་དེ་ནི་རྡོ་རྗེའི་ཏིང་ངེ་འཛིན་ཏོ། །དེ་ནས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་གསུངས་སོ། །འོ་ན་གལ་ཏེ་བདག་ཉིད་ལྷ་གཞན་ཞིག་ཏུ་བསྒོམས་ནས། མདུན་དུ་ལྷ་གཞན་ཞིག་བསྒོམས་ནས་བཟླས་བརྗོད་བྱེད་པ་མི་འགལ་ལམ་ཞེ་ན། དེ་ནི་
འགལ་བ་མེད་དེ། མི་གཡོ་བའི་རྟོག་པ་ལས་ཀྱང་བདག་ཉིད་ཁྲོ་བོ་མི་གཡོ་བར་བསྒོམས་ལ། མདུན་དུ་ཤཱཀྱ་ཐུབ་པ་བསྒོམས་ལ། དེ་གཉིས་ཀྱི་ཐུགས་ཀར་ཡི་གེ་འབྲུ་བཅུ་པའི་སྔགས་བཀོད་ལ་བཟླས་བརྗོད་བྱའོ་ཞེས་གསུངས་པ་དང་། ངན་སོང་སྦྱོང་བའི་རྒྱུད་ལས་ཀྱང་བདག་ཉིད་

71-1-253a

ཡི་གེ་བ་ལས་ཤཱཀྱ་ཐུབ་པར་བསྒོམས་ལ། མདུན་དུ་ངན་སོང་ཡོངས་སུ་སྦྱོང་བའི་གཟི་བརྗིད་ཀྱི་རྒྱལ་པོ་བསྒོམས་ལ། དེའི་ཐུགས་ཀར་ཟླ་བའི་དཀྱིལ་འཁོར་ལ་ཤོ་དྷ་ན་ལ་སོགས་པའི་སྔགས་བསམས་ལ། འོད་ཟེར་འཕྲོ་འདུས་བཟླས་བརྗོད་བྱའོ་ཞེས་གསུངས་
པ་དང་། གཅེས་པ་བསྡུས་པ་ལས་ཀྱང་ཆོ་ག་འདི་བཞིན་དུ་རྫོགས་པར་བྱ་བར་མི་བདེན་ན་ཡང་། རང་གི་ལྷ་ཉིད་ཀྱི་ཏིང་ངེ་འཛིན་བསྒྱུར་བ་ལས་དགོངས་པ་མཉམ་པར་བྱ་སྟེ། མཆོད་རྟེན་དང་མཆོད་པའི་ཡོ་བྱད་ལ་སོགས་པ་ཐམས་ཅད། རང་བཞིན་གྱིས་ཆོས་ཀྱི་དབྱིངས་ཀྱི་རྣམ་
པར་དགོངས་ཏེ། མཆོད་རྟེན་ལ་ཡང་ཆོ་ག་རྒྱས་པར་བྱ་བ་དང་འགལ་བ་མེད་དོ་ཞེས་གསུངས་པ་དང་འདྲ་བར་འགལ་བ་མེད་དོ། །དེ་ལྟར་བདག་གི་ཆོ་ག་ཡན་ལག་དྲུག་གིས་ལྷར་བསྐྱེད་པ་རྫོགས་ནས། གཞལ་ཡས་ཁང་བསྐྱེད་པ་དང་བུམ་པའི་ནང་དུ་གདན་བསྐྱེད་པ་དང་། ཡེ་ཤེས་
སེམས་དཔའ་སྤྱན་དྲང་བ་དང་། དེ་ནས་ལྷའི་ཕྱི་ནས་འོངས་པའི་བགེགས་དང་ཀཱི་ལི་ཀཱི་ལཱའི་སྔགས་ཀྱིས་བསྐྲད་པ་དང་། རིག་པས་མཉེས་པར་བྱ་བའི་ཕྱིར་དམ་ཚིག་གི་ཕྱག་རྒྱ་བསྟན་པ་དང་། གདན་བསྟན་པ་དང་། བྱེ་བྲག་ཏུ་སྤྱན་དྲངས་པ་མ་འཁྲུལ་བར་བྱ་བའི་ཕྱིར་ཉིད་ཀྱི་རྩ་བའི་
ཕྱག་རྒྱ་བསྟན་པ་དང་། དེ་ནས་མཆོད་པ་རྣམས་རིམ་པ་བཞིན་དུ་དབུལ་བ་དང་། དེ་ནས་བགེགས་དང་ཕྱོགས་སྐྱོང་ལ་གཏོར་མ་བྱིན་ནས། དེ་ནས་བཟླས་པ་བྱས་ཏེ། བསྙེན་པའི་དུས་སུ་སྒྲ་ལ་གནས་པའི་བསམ་གཏན་བྱའོ། །སྒྲུབ་པའི་དུས་སུ་བཟླས་བརྗོད་དམིགས་པ་གསུམ་
དང་། ཡན་ལག་བཞིས་བྱའོ། །དེ་ཡང་ནོར་བུ་ལག་པ་གཡས་པས་བླངས་ལ། སྙིམ་པར་བཅུག་ལ། བདུད་རྩི་ཐབ་སྦྱོར་བའི་སྔགས་བཟླས་ལ། དེའི་འོག་ཏུ་ཡུམ་གྱི་སྔགས་བཟླས་སོ། །ནོར་བུ་རེ་རེ་ནས་དྲང་ཞིང་མགོ་མཇུག་ཏུ་ཡང་ཕྱག་བྱའོ། །རང་གི་སྙིང་ག་ན་གནས་པའི་
ཟླ་བའི་དཀྱིལ་ཁོར་དང་། ལྷའི་ཐུགས་ཀའི་ཟླ་བའི་དཀྱིལ་འཁོར་ལ། རང་གིས་བཟླས་པར་བྱའོ། །སྔགས་ཀྱི་ཡི་གེ་རིམ་པ་བཞིན་དུ་བཀོད་ནས། མངོན་སུམ་དང་འདྲ་བར་བལྟས་ཏེ། རྡོ་རྗེའི་ཚིག་གམ། ཤུ་བུའི་སྦྱོར་བས། ཧ་ཅང་མི་མྱུར་མི་ངལ་བར་སྔགས་ཀྱི་ཡི་གེ་

71-1-253b

བརྗོད་ཅིང་བཟླས་བརྗོད་བྱའོ། །དེ་ཡང་རྩ་བའི་རྒྱུད་ལས་འདི་སྐད་ཅེས། བློ་ལ་སྐྱོན་མེད་བྱས་ནས་སུ། །སྔགས་ཀྱི་ཡི་གེ་དག་པ་ལ། །མཉམ་པར་གཞག་པས་རྩེ་གཅིག་ཏུ། །བཟླས་བརྗོད་དུས་གསུམ་དག་ཏུ་བྱ། །ཞེས་གསུངས་སོ། །དེ་ལ་འདི་ནི་ཚིག་ཡིན་ཏེ། །སོ་དང་
མཆུ་ནི་ལེགས་སྦྱར་ཏེ། །ལྕེ་རྩེ་ཧ་ཅང་མི་བསྐྱོད་པར། །སྒྲ་སྤངས་པ་ནི་རྡོ་རྗེའི་ཚིག །ཆོ་ག་ཀུན་ལ་སྦྱར་བར་བྱའོ། །ཤུ་བུའི་བཟླས་བརྗོད་ནི། འདི་ལྟར་བདག་ཉིད་སྔགས་ཀྱི་ཡི་གེ་འདོན་པ་ན། དྲུང་ན་འདུག་པ་སུས་ཀྱང་མི་ཐོས་ཙམ་དུ་བྱའོ། །རྟོག་པ་ངན་པ་རྣམས་བསལ་ཏེ། །
ཡིད་ཀྱིས་གསང་སྔགས་མཚན་ཉིད་ནི། །ཡང་ནས་ཡང་དུ་མངོན་བསམས་ཏེ། །མཁས་པས་བཟླས་བརྗོད་བརྩམ་པར་བྱ། །བཟླས་བརྗོད་བྱེད་ཚེ་མི་དལ་མི་མྱུར་ཞིང་། །སྒྲ་ཆེ་མ་ཡིན་ཧ་ཅང་ཆུང་བའང་མིན། །སྨྲ་བཞིན་མ་ཡིན་གཞན་དུ་ཡེངས་བཞིན་མིན། །གུག་སྐྱེད་ཀླད་ཀོར་
ཚེག་དྲག་ཉམས་པར་མིན། །ཚུལ་ནི་དེ་ལྟར་བྱས་ན་ཡོན་ཏན་ནི། །བཟླས་བརྗོད་མེ་ལ་ཚུལ་ཁྲིམས་རླུང་གིས་སྦར། །བརྩོན་འགྲུས་ཆེན་པོའི་མེ་ལྕེས་བསྐལ་པའི་སྡིག་དཔུང་བསྲེག །བསྐལ་པ་གྲངས་མེད་འདས་པའི་སྔོན་རོལ་ནས། །མཚམས་མེད་ལྔ་ལ་སོགས་ཏེ་མི་
དགེ་བཅུ་སྤྱད་པའི། །སྡིག་པ་གང་ཡིན་བཟླས་བརྗོད་བྱས་པས་འབྱང་བར་བྱེད། །ཅེས་འབྱུང་ངོ་། །གསང་སྔགས་དངོས་སུ་བདག་ཉིད་འདོན་ཀྱང་། ལྷའི་སྐུས་འདོན་པར་བསམ་མོ། །བཟླས་བརྗོད་ཚར་རེ་ཞིང་སྤྲོ་བསྡུས་སེམས་ཅན་གྱི་དོན་བྱེད་ཅིང་བཟླས་སོ། །ཡང་ན་
རྡོ་རྗེའི་ལྟེ་བའི་ས་བོན་ལས། འོད་ཟེར་ཁ་དོག་ལྔ་དང་ལྷའི་སྐུ་དཔག་ཏུ་མེད་ཅིང་བསམ་གྱིས་མི་ཁྱབ་པར་སྤྲོས་པས། བགེགས་དང་ལོག་འདྲེན་ཐམས་ཅད་དང་། མངོན་པར་ཞེན་པ་ཐམས་ཅད་བསྲེགས་པར་བསམ་ཞིང་ལྷའི་སྐུ་དེ་ཚོའི་ཞལ་ནས་གསང་སྔགས་འདོན་ཙམ་ན། 
དེ་རྣམས་ཀྱི་རྣ་བར་རྒྱོབ་རྒྱོབ་སོད་སོད་ཟེར་བར་ཐོས་པར་བསམ་མོ། །དེ་ལྟར་བཟླས་བརྗོད་ཟིན་ནས། བསྟོད་པའི་རྒྱལ་པོ་གང་ཡང་རུང་བས་བསྟོད་དོ། །དེ་ནས་ཁྲུས་ལ་སོགས་པ་ཁྲུས་ཀྱི་ཆོ་ག་ལས་ཤེས་པར་བྱའོ། །དེ་ནས་ཡེ་ཤེས་སེམས་དཔའ་གཤེགས་སུ་གསོལ། རང་ལྷའི་

71-1-254a

ང་རྒྱལ་གྱིས་གནས་པར་བྱའོ། །སྤྱི་རྒྱུད་ཐམས་ཅད་བསྒོམ་པའི་ལུགས་རྫོགས་སོ།།      །།སྤྱིའི་རྒྱུད་ཀྱི་རྣམ་པར་གཞག་པ་དང་། མངོན་རྟོགས་ལམ་གྱི་རིམ་པ་རྫོགས་སོ།།      །།དང་པོར་བདག་ཉིད་ཆོས་དྲུག་གིས་ལྷར་བསྐྱེད་པའི་སྔོན་དུ་ཇི་ལྟར་བྱིན་གྱིས་
བརླབས་པའི་གསོལ་བ་གདབ་པའི་ཐབས་བསྟན་པ་ནི། བཅོམ་ལྡན་འདས་ཞེས་པ་ནི། མཚན་གྱི་དོན་གྱི་སྐབས་སུ་བཤད་པ་དང་འདྲའོ། །རྡོ་རྗེ་ལ་བཞུགས་ཞེས་པ་ནི། དེ་གཤེགས་པའི་གནས་དེ་ལ་རྡོ་རྗེ་ཞེས་པ་ནི། དཔེར་ན་རྡོ་རྗེ་ཕ་ལམ་ལ། འབྱུང་བ་ཆེན་པོ་ལྔས་གནོད་པར་བྱ་
བར་མི་ནུས་པ་དེ་བཞིན་དུ་དེ་ལ་མེ་བདུན་ཆུ་གཅིག་གིས་བཤིགས་པར་མི་ནུས་པས་ན། རྡོ་རྗེ་ཞེས་གསུངས་སོ། །རྡོ་རྗེ་ལ་བཞུགས་ཏེ་ཞེས་བྱ་བ་ནི། ཀྲྀ་ཡ་སྤྱིའི་རྒྱུད་ལས་བཞུགས་ཚུལ་གསུམ་སྟེ། བཀྲ་ཤིས་པའི་སྐྱིལ་ཀྲུང་དང་། པདྨའི་སྐྱིལ་ཀྲུང་དང་། རྡོ་རྗེའི་སྐྱིལ་ཀྲུང་དང་
གསུམ་ལས་འདི་ནི་རྡོ་རྗེའི་སྐྱིལ་ཀྲུང་དུ་བཞུགས་པའོ། །ཡང་ན་རྡོ་རྗེ་ལ་བཞུགས་ཏེ་ཞེས་བྱ་བ་ནི། བཞུགས་པ་རྣམ་པ་བཞི་སྟེ། སྤྱོད་ལམ་གྱིས་བཞུགས་པ་དང་། འཆད་པས་བཞུགས་པ་དང་། སྙོམས་པར་འཇུག་པས་བཞུགས་པ་དང་། ནང་དུ་ཡང་དག་འཇོག་གིས་བཞུགས་
པའོ། །སྐུའི་ཕྲིན་ལས་སུ་བགྲངས་པ་གང་ཡང་རུང་སྟེ། དེ་དག་ཐམས་ཅད་ནི་སྤྱོད་ལམ་གྱིས་བཞུགས་པའོ། །གསུང་གི་ཕྲིན་ལས་གང་ཅི་ཡང་རུང་བ་དེ་དག་ཐམས་ཅད་ནི་ཆོས་འཆད་པས་བཞུགས་པའོ། །ཐུགས་ཀྱི་ཕྲིན་ལས་གང་ཅི་ཡང་རུང་བ་དེ་དག་ཐམས་ཅད་ནི་དེ་དག་ལས་
བཞུགས་པ་གཉིས་ཏེ། རྟག་ཏུ་མཉམ་པར་བཞུགས་པའི་ཕྱིར་ཏིང་ངེ་འཛིན་དང་། སྙོམས་པར་འཇུག་པའི་བཞུགས་པའོ། །ནང་དུ་ཡང་དག་འཇོག་གིས་བཞུགས་པ་ནི། ཐུགས་རྗེ་ཆེན་པོས་འཇིག་རྟེན་ལ་གཟིགས་པ་དང་། ལྷ་ལ་སོགས་པ་འོང་བ་ནི་ནང་དུ་ཡང་དག་འཇོག་གིས་
བཞུགས་པའོ་ཞེས་པ་ནི་གདན་དེ་ལ་བཞུགས་ཏེ། གཟུངས་འདིས་བདུད་བཏུལ་ནས་ཆོས་ཀྱི་འཁོར་ལོ་བསྐོར་བ་ལ་སོགས་པ་བྱེད་ཅེས་པའི་དོན་ཏོ། །བདུད་ཇི་ལྟར་བཏུལ་ན། བཅོམ་ལྡན་འདས་ཀྱིས་སྲོད་ལ་བདུད་བཏུལ་ནས། ཕྱག་གཡས་པ་ལན་གཉིས་སུ་མཉམ་གཞག་གི་

71-1-254b

ཕྱག་རྒྱ་བཤིག་སྟེ། ལན་ཅིག་བདུད་ཀྱི་དམག་བྱུང་སྟེ། ཕྱག་སྤྱི་བོ་ལ་བསྐོར་བས་རལ་གྲི་མེ་ཆེན་པོ་མཆེད། རབ་ཏུ་མཆེད་ཀུན་ཏུ་མཆེད་པ་ཅིག་ཏུ་བདུད་རྣམས་ཀྱིས་མཐོང་སྟེ་བདུད་ཀྱི་དམག་ཕམ་པར་བྱས་སོ། །ལན་ཅིག་བདུད་ཀྱིས་ངན་སྨྲས་བྱས་ནས། ཁྱོད་ཡང་དག་པར་སངས་རྒྱས་
མ་ཡིན་ཞིང་། བརྫུན་པོའི་སངས་རྒྱས་ཡིན་ཏེ། སངས་རྒྱས་པ་ལ་བསྐལ་པ་གྲངས་མེད་པ་གསུམ་གྱི་བར་དུ་ཚོགས་རྣམ་པ་གཉིས་ཀྱང་བསགས་དགོས་ལ། ས་བཅུ་ཡང་མཐར་ཕྱིན་དགོས་སོ་ཟེར་རོ། །དེ་ལྟར་བྱས་སོ་གསུངས་པས། འོ་ན་ཁྱོད་ལ་ཆེ་བཞི་དང་། དཔང་པོ་སུ་ཡོད་
ཟེར། དེའི་ཚེ་ང་ལ་ཆེ་བཞི་དང་དཔང་པོ་ས་ཆེན་པོ་འདི་ཡོད་ཅེས་གསུངས་ཏེ། ཕྱག་གཡས་པས་ལན་ཅིག་བརྡབས་པས། ས་གསེབ་ནས་སའི་ལྷ་མོ་སྐུ་ལྟེ་བ་ཡན་ཆད་འཐོན་ཏེ། བཅོམ་ལྡན་འདས་མེད་དོ། །བདེ་བར་གཤེགས་པ་མེད་དོ། །བརྫུན་གྱི་སངས་རྒྱས་མ་ཡིན་ཏེ། 
ཡང་དག་པའི་སངས་རྒྱས་ཡིན་ཏེ། ས་ཆེན་པོ་འདིའི་སྟེང་དུ་ཚོགས་རྣམ་པ་གཉིས་ཀྱང་བསགས་སོ། །བསྐལ་པ་གྲངས་མེད་པ་གསུམ་གྱི་བར་དུའོ། །ས་བཅུ་ཡང་རིམ་གྱིས་བགྲོད་དེ། མཐར་ཕྱིན་པར་བྱས་ཟེར་རོ། །དེས་ན་བཅོམ་ལྡན་འདས་ས་གནོན་གྱི་ཕྱག་རྒྱ་ཅན་ཅིག་བསམ་མོ། །
སངས་རྒྱས་ཀྱི་མཐུས་ཞེས་པ་ནི། བྱིན་གྱི་རླབས་ཀྱིས་སོ། །ལག་ན་རྡོ་རྗེ་ཞེས་པ་ནི། ལག་ན་རྡོ་རྗེ་ཐོགས་པས་ན་ལག་ན་རྡོ་རྗེའོ། །དེ་ཡང་ཡེ་ཤེས་རྣམ་པ་ལྔ་གསང་བའི་ཐིག་ལེས་འཛིན་པས་ན་ལག་ན་རྡོ་རྗེར་བཤད་དོ། །ཡང་ན་ལག་ན་རྡོ་རྗེ་ཞེས་བྱ་བ་ནི། ཀུན་ཏུ་བཟང་པོ་ལ་གསང་
བ་དང་། མིང་གི་དབང་བསྐུར་བའི་དོན་དུ། ལྷོ་ཕྱོགས་ཀྱི་གྲོང་ཁྱེར་ཆེན་པོ་རུ། རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་ཆེན་པོ་ཅིག་མངོན་པར་སྤྲུལ་ཏེ། བཅོམ་ལྡན་འདས་རྡོ་རྗེ་འཆང་ཆེན་པོས། ཕྱོགས་བཅུའི་དེ་བཞིན་གཤེགས་པ་ཐམས་ཅད་དང་ཐབས་ཅིག་
ཏུ་མོས་ཏེ། ཕྱོགས་བཅུའི་དེ་བཞིན་གཤེགས་པའི་ཡེ་ཤེས་ཐམས་ཅད་གཅིག་ཏུ་བསྡུས་ཏེ། ཡེ་ཤེས་ཀྱི་རྡོ་རྗེ་རྩེ་ལྔ་པ་གཅིག་ཏུ་བྱིན་གྱིས་བརླབས་ཏེ། ཀུན་ཏུ་བཟང་པོའི་ལག་ཏུ་གཏད་པ་ཙམ་གྱིས་གསང་བའི་དབང་ཐོབ་སྟེ། དེ་བཞིན་གཤེགས་པའི་སྐུ་གསུང་ཐུགས་

71-1-255a

ཀྱི་གསང་བ་དཔག་ཏུ་མེད་ཅིང་། བསམ་གྱིས་མི་ཁྱབ་པ་བསྟན་མི་དགོས་པར་དུས་གཅིག་ཏུ་སྐད་ཅིག་ལ་རྟོགས་པས་གསང་བའི་དབང་ཐོབ་བོ། །དེའི་མོད་ལ་བརྒྱ་བྱིན་ལ་སོགས་པའི་གནས་སུ། བྱང་ཆུབ་སེམས་དཔའ་ཀུན་ཏུ་བཟང་པོ་ནི་ཕྱག་ན་རྡོ་རྗེར་གྱུར་ཏོ་ཞེས་
བྱ་བའི་སྒྲ་བྱུང་སྟེ། དེའི་མོད་ལ་དེ་རྣམས་ཀྱིས་ཀྱང་། མཆོད་པའི་ཚོགས་ཆེན་པོ་ཁྱེར་ནས་འོངས་ཏེ། མཆོད་པ་ཆེན་པོས་མཆོད་དོ། །དེས་ནི་མིང་གི་དབང་ཐོབ་པའི་རྟགས་སུ་ལག་ཏུ་རྡོ་རྗེ་གཏད་པས་ཀྱང་ལག་ན་རྡོ་རྗེ་ཞེས་བཤད་དོ། །ལུས་ཐམས་ཅད་ཅེས་བྱ་བ་ནི། དེའི་དུས་
ནའོ། །ད་ལྟར་ནི་སྒྲུབ་པ་པོའམ་ལས་ཀྱི་ལྷ་རྡོ་རྗེ་སེམས་དཔའ་འམ། ཡི་དམ་གྱི་ལྷ་གང་ཡང་རུང་བ་རྡོ་རྗེར་བྱིན་གྱིས་བརླབས་ནས་ཞེས་པ་ནི་སྟོང་པ་ཉིད་དུ་བྱིན་གྱིས་བརླབས་ནས། རྣམ་པར་མི་རྟོག་པའི་ལྷ་བསྒོམ་མོ་ཞེས་པའི་དོན་ཏོ། །དེས་ནི་ཆོ་ག་ཡན་ལག་དྲུག་གིས་བདག་ཉིད་
ལྷར་བསྐྱེད་པའི་སྔོན་དུ་ཇི་ལྟར་བྱིན་གྱིས་རློབ་པའི་གསོལ་བ་གདབ་པའི་ཐབས་བསྟན་པའོ།    །ད་ནི་བདག་གི་དེ་ཁོ་ན་ཉིད་རྣམ་པར་མི་རྟོག་པའི་ལྷ་བསྒོམ་པའི་ཞར་ལ་འབྱུང་བ་ལྡང་བའི་ཐབས་དང་བཅས་པ་བསྟན་ཏེ། དེ་ཡང་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་གསུངས་
ཏེ། ཞེས་པ་ནི་ཆོས་ཀྱི་སྐུ་སྟོང་པ་ཉིད་དོ། །ཏིང་ངེ་འཛིན་ཞེས་བྱ་བ་ནི། སྟོང་པ་ཉིད་ཀྱི་དམིགས་པ་སེམས་རྩེ་གཅིག་ཏུ་ཡང་ནས་ཡང་དུ་གཏོད་པར་བྱེད་པས་ཏིང་ངེ་འཛིན་ཏོ། །རྡོ་རྗེའི་ཏིང་ངེ་འཛིན་ཞེས་གསུངས་པ་ནི། སྟོང་པ་ཉིད་ཀྱི་ཏིང་ངེ་འཛིན་དེ་ལ་མངོན་པར་ཞེན་པས། 
དབྱེར་མི་ཕྱེད་པས་རྡོ་རྗེའི་ཏིང་ངེ་འཛིན་ཏོ། །ཡང་ན་སྟོང་པ་ཉིད་དང་བདག་ཉིད་ཀྱི་ཡང་དབྱེར་མེད་པས་ན་ཡང་རྡོ་རྗེའི་ཏིང་ངེ་འཛིན་ཏོ། །དེ་ཡང་རྡོ་རྗེའི་ཏིང་ངེ་འཛིན་ཞེས་བྱ་བ་ནི། བཤད་ལུགས་དང་པོ་དང་གཉིས་པའི་སྐབས་སུ་ནི། རྣམ་པར་མི་རྟོག་པའི་ལྷ་བསྒོམ་པ་ལ་བྱའོ། །
བཤད་ལུགས་ཐ་མའི་སྐབས་སུ་རང་ལྷ་གང་རུང་དུ་བསྐྱེད་པའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ། ཧཱུཾ་ཡིག་བལྟས་ཏེ་དེ་འཕྲོ་འདུ་ལས་ཁྲོ་བོའི་རྡོ་རྗེ་རྩེ་ལྔ་པ་ལྟེ་བ་ལ་ཧཱུཾ་གིས་མཚན་པ་ཅིག་བསམས་ལ། དེ་ལ་དམིགས་པ་རྩེ་གཅིག་ཏུ་ཡང་ནས་ཡང་དུ་སེམས་གཏད་ནས། 

71-1-255b

ཅུང་ཞིག་མཉམ་པར་གཞག་པ་ནི་རྡོ་རྗེའི་ཏིང་ངེ་འཛིན་ཏོ། །སྙོམས་པར་ཞུགས་སོ་ཞེས་བྱ་བ་ནི་སྟོང་པ་ཉིད་སྒོམ་པའི་གནས་སྐབས་ན། བྱིང་རྒོད་ཀྱི་རྙོག་མ་དང་བྲལ་ནས་འདོད་ཆགས་ལ་སོགས་པའི་ཉོན་མོངས་རྣམས་མི་འབྱུང་བར་རྒྱ་མཚོ་ཆེན་པོ་ལྟར་དང་སྟེ། མ་སྙོམས་པ་མེད་
དེ། སྙོམས་པར་གནས་སོ། །དེ་ནས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་དགོངས་སོ། །དེ་ནས་ཞེས་པ་ནི། སྟོང་པ་ཉིད་བསྒོམས་པའི་རྗེས་དེ་ནས་ཞེས་པའོ། །ལག་ན་རྡོ་རྗེ་ཞེས་པ་ནི། གོང་དང་མཐུན་ནོ། །སངས་རྒྱས་ཀྱི་མཐུས་ཞེས་པ་ནི། དངོས་སུ་འོད་ཟེར་
རམ། ཕྱག་གིས་རེག་པའམ། སེ་གོལ་གྱི་བརྡས་བླང་བའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་ཀྱིས་ཞེས་པ་ན། དེ་གཉིས་ཏིང་ངེ་འཛིན་ལ་སྙོམས་པར་ཞུགས་པའི་དབང་ངམ་སྟོབས་ཀྱིས། བདག་ཉིད་ཏིང་ངེ་འཛིན་ལས་བསླང་བའོ། །དཔེར་
ན་ས་བཅུའི་བྱང་ཆུབ་སེམས་དཔའ་སྟོང་པ་ཉིད་ཀྱི་བདེ་བ་ལ་ཆགས་པས། སེམས་ཅན་གྱི་དོན་བྱ་བར་མི་ནུས་པས། ཕྱོགས་བཅུའི་དེ་བཞིན་གཤེགས་པ་རྣམས་ཀྱི་འོད་ཟེར་གྱིས་བསྐུལ་ནས། སྟོང་པ་ཉིད་ལས་བསླང་ནས་སེམས་ཅན་གྱི་དོན་བྱེད་དུ་བཅུག་པ་བཞིན་ནོ། །རྡོ་རྗེ་ཁྲོ་བོ་ཞེས་པ་ནི། 
སྟོང་པ་ཉིད་ཀྱི་ཏིང་ངེ་འཛིན་ལ་རྡོ་རྗེ་ཁྲོ་བོ་ཞེས་བཏགས་ནས་བཤད་དོ། །འོ་ན་སྟོང་པ་ཉིད་དེ་ལ་རྡོ་རྗེ་ཁྲོ་བོ་ཞེས་བཏགས་པ་ཅིའི་ཕྱིར་ཞེ་ན། དེ་ནི་དེ་དང་ཆོས་མཐུན་པ་ཡོད་དེ། འདོགས་པའི་རྒྱུ་མཚན་ནི་འདྲ་བ་རྒྱུ་མཚན་དུ་བྱས་ནས། ཆོས་ཀྱི་སྐུ་སྟོང་པ་ཉིད་ལ་རྡོ་རྗེ་ཁྲོ་བོ་ཞེས་བཤད་དོ། །
ཡང་ན་ཁྲོ་བོ་རྡོ་རྗེ་དངོས་ལ་ཁྲོ་བོ་ཞེས་བཤད་དོ། །དེ་ཡང་དཔེར་ན་རྡོ་རྗེ་རིན་པོ་ཆེ་ཕ་ལམ་དེས་ཕར་ལ་ནི་རིན་པོ་ཆེ་ཐམས་ཅད་འབིགས་ཤིང་འཇོམས་ལ་ཚུར་ལ་ནི་གནོད་པར་མི་ནུས་པ་དང་། ཁྲོ་བོ་རྡོ་རྗེ་གཤིན་རྗེ་གཤེད་ལ་སོགས་པས་ཀྱང་ཕར་ལ་ནི་དངོས་པོ་དང་མཚན་མའི་རྣམ་པར་
རྟོག་པ་ཐམས་ཅད་འཇིག་ཅིང་འཇོམས། ཚུར་ལ་ནི་གང་གིས་ཀྱང་གནོད་པར་མི་འགྱུར་བ་བཞིན་དུ་ཆོས་ཀྱི་སྐུ་སྟོང་པ་ཉིད་དེས་ཀྱང་ཕར་ལ་དངོས་པོ་དང་། མཚན་མར་འཛིན་པའི་མཐའ་དང་བདག་དང་གཞན་གྱི་མཐའ་དང་། རྟག་པ་དང་ཆད་པའི་མཐའ་དང་། གཟུང་བ་དང་འཛིན་

71-1-256a

པའི་མཐའ་དང་། ཡོད་པ་དང་མེད་པའི་མཐའ་ཐམས་ཅད་འཇིག་ཅིང་འཇོམས་ལ། ཚུར་ལ་ནི་གང་ཆོས་ཀྱི་སྟོང་པ་ཉིད་ལ་གང་གིས་ཀྱང་བཤིག་ཅིང་འཇོམས་པར་མི་ནུས་པས་ན་རྡོ་རྗེ་ཁྲོ་བོ་ཞེས་བཤད་དོ། །དེ་ཡང་བཤད་ལུགས་དང་པོའི་སྐབས་སུ། སྟོང་པ་ཉིད་
ཀྱི་ཏིང་ངེ་འཛིན་ལ་རྡོ་རྗེ་ཁྲོ་བོ་ཞེས་བཤད་དོ། །བར་བའི་སྐབས་སུ་ཐུགས་མཚན་རྡོ་རྗེ་ཁྲོ་བོ་ཞེས་བཤད་དོ། །བཤད་ལུགས་ཐ་མའི་སྐབས་སུ་ནི། བདག་ཉིད་ཐུགས་ཀར་ཡི་གེ་ཧཱུཾ་གི་སྤྲོ་བསྡུ་ལས། ཁྲོ་བོའི་རྡོ་རྗེ་རྩེ་གཅིག་པ་བསམས་ལ། རྡོ་རྗེ་ཁྲོ་བོ་ཞེས་བཤད་དོ། །ལས་བྱུང་བ་ཞེས་
པ་ནི་དང་པོའི་སྐབས་སུ། དེ་ཁོ་ན་ཉིད་བསྲེ་བ་ལ་སོགས་པ་སྟེ། སྔ་མའི་སྟོང་པ་ཉིད་ལ་མཉམ་པར་གཞག་པའི་སེམས་ལས། སྟོང་པ་ཉིད་སྤྱོད་པ་དང་བཅས་པའི་སེམས་བདག་དང་ལྷའི་དེ་ཁོ་ན་ཉིད་བསྲེ་བའི་སེམས་ཕྱི་མ་བྱུང་བའོ། །བར་པའི་སྐབས་སུ་སྒྲའི་ལྷ་བསྒོམ་པ་ལ་སོགས་པ་
བྱུང་བའོ། །ཐ་མའི་སྐབས་སུ་བདག་ཉིད་ཀྱིས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་པས་ཉེ་བར་ལེན་པའི་རྒྱུ་བྱས་ནས། སངས་རྒྱས་དང་བྱང་ཆུབ་སེམས་དཔའི་བྱིན་གྱི་རླབས་ཀྱིས་ལྷན་ཅིག་བྱེད་པའི་རྐྱེན་བྱས་ཏེ་ཁྲོ་བོ་རྡོ་རྗེ་ལྟེ་བའི་ཡི་གེ་ལས། འོད་ཟེར་ཁ་དོག་སྣ་ལྔ་པ་དང་། 
ལྷའི་སྐུ་དཔག་ཏུ་མེད་ཅིང་བསམ་གྱིས་མི་ཁྱབ་པ་ནམ་མཁའི་ཁམས་ཁེངས་པ་བྱུང་ངོ་། །བྱུང་ནས་ཅི་མཛད་ཅེ་ན་འཕགས་པ་མཆོད་པ་དང་། སེམས་ཅན་གྱི་དོན་བྱེད་དོ། །དེས་ན་བདག་གི་དེ་ཁོ་ན་ཉིད་རྣམ་པར་མི་རྟོག་པའི་ལྷ་བསྒོམ་པ། ལྡང་བའི་ཐབས་དང་བཅས་པ་བཤད་ཟིན་
ཏོ།།      །།ད་ནི་ལྷ་དྲུག་གི་ཡོན་ཏན་རང་དང་གཞན་གྱི་དོན་ཕུན་སུམ་ཚོགས་པ་བསྟན་པའི་རྗེས་ལ། བདག་དང་ལྷའི་དེ་ཁོ་ན་ཉིད་བསྲེས་པ་ལས། ལྷ་དྲུག་གི་ཡོན་ཏན་ཕུན་སུམ་ཚོགས་པ་གང་ཐོབ་པ་བསྟན་ཏེ། ཡོན་ཏན་ནི་གཉིས་ཏེ་རང་གི་དོན་ཕུན་སུམ་ཚོགས་པ་རྡོ་རྗེའི་ཆོས་བདུན་
དང་། གཞན་གྱི་དོན་ཕུན་སུམ་ཚོགས་པ་མཛད་པ་རྣམ་པ་བཞི་བསྟན་པའོ། །དེ་ཡང་རྡོ་རྗེ་སྙིང་པོས་རབ་ཏུ་སྨྲས་ཏེ་ཞེས་པ་ནི། སྟོང་པ་ཉིད་དང་སྙིང་རྗེ་དབྱེར་མེད་པ་ལ་བྱ་སྟེ། རྡོ་རྗེ་ནི་སྟོང་པ་ཉིད་དོ། །སྙིང་པོ་ནི་སྙིང་རྗེ་ཆེན་པོས་སེམས་ཅན་ལ་ཆགས་ནས་མྱ་ངན་ལས་འདས་པའི་མཐའ་

71-1-256b

ལ་མི་གནས་པའོ། །ཡང་ན་སྙིང་པོ་ཞེས་བྱ་བ་ནི། རིམ་པ་དུ་མའི་ནང་ན་འདུག་པ་ལ་ཡང་ཟེར་ལ། འབྲས་བུར་གྱུར་པ་ལ་ཡང་ཟེར་ལ། མཆོག་ཏུ་གྱུར་པ་ལ་ཡང་ཟེར་བ་ལས། འདིར་ནི་མཆོག་ཏུ་གྱུར་པས་ན་སྙིང་པོ་ཞེས་གསུངས་ཏེ། ཇི་ལྟར་མཆོག་ཏུ་གྱུར་ན། ཞི་བས་མི་ཐུལ་བའི་
འགྲོ་བ་རྣམས་ལ། ཁྲོ་བོའི་སྐུར་སྤྲུལ་ནས་ཀྱང་འདུལ་བར་བྱེད་དོ། །དེ་ཡང་རྒྱུད་ལས། ཤིན་ཏུ་ཁྲོ་ཞིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་རྣལ་འབྱོར་ལས། །ཁྲོ་བོར་དེ་བཞིན་གཤེགས་ཀུན་མཛད། །ཅེས་གསུངས་སོ། །ཡང་ན་མཆོག་
ཏུ་གྱུར་པ་ནི། རིག་སྔགས་དང་གསང་སྔགས་གཞན་ཁོ་ན་ལས་མཆོག་ཏུ་གྱུར་ཏེ། གསང་སྔགས་ཀྱི་མཐུ་ཆེན་པོ་འདིས་ནི་རིག་སྔགས་ལ་སོགས་པ་གཞན་ཐམས་ཅད་གཅད་པ་དང་། མནན་པར་ཡང་ནུས་ལ་རིག་སྔགས་ལ་སོགས་པ་གཞན་གྱིས་གཅད་པ་ལ་སོགས་པ་བྱས་པ་    
ལས་ཀྱང་གྲོལ་བར་བྱེད་པ་དང་། བདག་ཉིད་ལ་རིག་སྔགས་གཞན་གྱིས་གཅད་པ་ལ་སོགས་པ་བྱ་བར་མི་ནུས་པས་ན་ཡང་། མཆོག་ཏུ་གྱུར་པའོ། །འོ་ན་རྡོ་རྗེ་སྙིང་པོས་སྨྲས་སོ། །མི་གསུང་བར་སྨྲས་ཏེ་གསུངས་པ་འགལ་ལམ་ཞེ་ན། ཏེ་ཞེས་ནི་སྒྲ་རྣམ་པ་གཉིས་ལ་འཇུག་པ་
ལས། འདིར་ཚིག་གི་ལྷག་མ་ལུས་པའི་སྒྲ་ཡིན་ཏེ། ཚིག་གི་ལྷག་མ་གང་ཡིན་ཞེ་ན། ཚིག་གི་ལྷག་མ་ནི་ཡོན་ཏན་ཕུན་སུམ་ཚོགས་པ་རྣམ་པ་གཉིས་སྟོན་པའི་སྒྲའོ། །ཡོན་ཏན་རྣམ་པ་གཉིས་པ་ནི། རང་གི་དོན་ཕུན་སུམ་ཚོགས་པ་རྡོ་རྗེའི་ཆོས་བདུན་དང་། གཞན་གྱི་དོན་ཕུན་
སུམ་ཚོགས་པ་མཛད་པ་རྣམ་བཞིའོ། །རྡོ་རྗེའི་ཆོས་བདུན་ནི་མི་ཆོད་པར་བྱ་བ་ནས། ཐམས་ཅད་དུ་མ་ཕམ་པ་བྱ་བའི་བར་དུའོ། །མཛད་པ་རྣམ་པ་བཞི་ནི། དྲག་པོ་དང་། དབང་དང་། རྒྱས་པ་དང་། ཞི་བའོ། ། དེའི་དང་པོ་དྲག་པོའི་མཛད་པ་ནི། སེམས་ཅན་ཐམས་ཅད་སྐྲག་པར་བྱེད་
པ་དང་། བྱ་བ་ནས། གདོན་ཐམས་ཅད་རླག་པར་བྱེད་པ་བྱ་བའི་བར་དུ་ཚིག་རྐང་བརྒྱད་ཀྱིས་བསྟན་ཏོ། །དབང་གི་མཛད་པ་ནི་འབྱུང་པོ་ཐམས་ཅད་འགུགས་པར་བྱེད་པ། རིག་སྔགས་ཀྱི་ལས་ཐམས་ཅད་བྱེད་དུ་འཇུག་པ་ཞེས་པའི་ཚིག་རྐང་གཉིས་བསྟན་ཏོ། །རྒྱས་པའི་མཛད་པ་

71-1-257a

ནི། མ་གྲུབ་པ་ཐམས་ཅད་གྲུབ་པར་བྱེད་པ་བྱ་བ་ནས། རྒྱས་པ་བྱ་བའི་ཚིག་རྐང་པ་བཞིས་བསྟན་ཏོ། །ཞི་བའི་མཛད་པ་ནི། སེམས་ཅན་ཐམས་ཅད་སྲུང་བ། ཞི་བར་བྱ་བའི་བར་དུ་ཚིག་རྐང་གཉིས་ཀྱིས་བསྟན་ཏོ། །རྨུགས་པར་བྱེད་པ་དང་། རེངས་པར་
བྱེད་པ་གཉིས་ནི་སྔ་མའི་བརྒལ་ལན་གྱི་སྒོ་ནས་བཤད་པ་ཡིན་ནོ། །ཡང་ན་རྒོལ་ཏེ། གསང་སྔགས་སྤྱིའི་རྒྱུད་ཀྱི་ལུགས་ཀྱིས་རྣམ་པར་མི་རྟོག་པའི་ལྷ་བསྒོམས་པའི་རྗེས་ལ། སྒྲའི་ལྷ་བསྒོམ་པ་ལ་སོགས་པ་སྟོན་པ་ཡིན་ན། གཟུངས་འདིའི་ནང་དུ་རྣམ་པར་མི་རྟོག་པའི་ལྷ་
བསྒོམས་པའི་རྗེས་ལ། སྒྲའི་ལྷ་སྒོམ་པ་མི་སྟོན་པར། ལྷ་དྲུག་གི་ཡོན་ཏན་ཕུན་སུམ་ཚོགས་པ་གསུངས་པ་ཅི་ལས་དགོངས་ཤེ་ན། དེ་ལྟར་གསུངས་པའི་དགོངས་པ་ནི། རྣམ་པར་མི་རྟོག་པའི་ལྷ་དེ་ཡོན་ཏན་ཕུན་སུམ་ཚོགས་པ་གཉིས་དང་ལྡན་བཞིན་དུ་སྒྲའི་ལྷ། ན་མོ་རཏྣ་ཏྲ་ཡཱ་
ཡ། བྱ་བ་ལ་སོགས་པ་གཞན་ཡང་ཡོན་ཏན་ཕུན་སུམ་ཚོགས་པ་གཉིས་དང་ལྡན་པར་ཤེས་པར་བྱ་བའི་དོན་དུ་རྣམ་པར་མི་རྟོག་པའི་ལྷ་བསྒོམས་པའི་རྗེས་ལ། ལྷ་དྲུག་གི་ཡོན་ཏན་ཕུན་སུམ་ཚོགས་པ་རྣམ་པ་གཉིས་གསུངས་ཀྱི་སྒྲའི་ལྷ། ན་མོ་རཏྣ་ཏྲ་ཡཱ་ཡ། བྱ་བ་ལ་སོགས་པ་
ལྷ་གཞན་བསྒོམ་པ་ལ་སོགས་པ་ནི། དེ་ལ་དགོངས་པའོ། །ཡང་ན་བདག་དང་ལྷའི་དེ་ཁོ་ན་ཉིད་བསྲེས་པ་ལས། ལྷ་དྲུག་ལ་ཡོན་ཏན་གཉིས་དང་ལྡན་པ་དེའི་བདག་གི་དེ་ཁོ་ན་ཉིད་ལ་ལྡན་པར་ཤེས་པར་བྱ་བའི་དོན་དུ། རྣམ་པར་མི་རྟོག་པའི་ལྷ་བསྒོམས་པའི་རྗེས་ལ། ལྷ་དྲུག་གི་
རང་དང་གཞན་གྱི་ཡོན་ཏན་རྣམ་པ་གཉིས་གསུངས་ཀྱི། སྒྲའི་ལྷ་ལ་སོགས་པ་མ་གསུངས་པ་ནི། དེ་ལ་དགོངས་པའོ།    །དེ་ལ་རྡོ་རྗེའི་ཆོས་བདུན་ནི། མི་ཆོད་པ་བྱ་བ་ནས། མ་ཕམ་པ་བྱ་བའི་བར་དུ། ཚིག་རྐང་བདུན་གྱིས་བསྟན་ཏེ། ཆོས་ཀྱི་སྐུ་སྟོང་པ་ཉིད་དེ་ལ་སྐྱེ་བའི་སྡུག་བསྔལ་
གྱིས་མི་གནོད་པས་ན། མི་ཆོད་པ་ཞེས་གསུངས་སོ། །རྒས་པའི་སྡུག་བསྔལ་གྱིས་མི་གནོད་པས་ན་མི་ཤིགས་པ་ཞེས་གསུངས་སོ། །ན་བའི་སྡུག་བསྔལ་གྱིས་མི་གནོད་པས་ན། བདེན་པ་ཞེས་གསུངས་སོ། །འཆི་བའི་སྡུག་བསྔལ་གྱིས་མི་གནོད་པས་ན་སྲ་བ་ཞེས་གསུངས་སོ། །

71-1-257b

ཆོས་ཀྱི་སྐུ་སྟོང་པ་ཉིད་དེ་ལ་དུས་དང་། གནས་སྐབས་ཐམས་ཅད་འཁོར་བ་དང་། སྡུག་བསྔལ་གྱིས་མི་གནོད་པས་ན། བརྟན་པ་ཞེས་གསུངས་སོ། །མཚན་མའམ་དངོས་པོ་ཐམས་ཅད་འཇོམས་པས་ན། ཐམས་ཅད་དུ་ཐོགས་པ་མེད་པ་ཞེས་གསུངས་སོ། །ཆོས་ཀྱི་སྐུ་སྟོང་པ་
ཉིད་དེ་ལ་འཁོར་བའི་སྡུག་བསྔལ་གྱིས་མི་གནོད་པ་ལ། དངོས་པོར་ལྟ་བའི་མཚན་མ་ཐམས་ཅད་འཇོམས་པས་ཐམས་ཅད་དུ་མ་ཕམ་པ་ཞེས་གསུངས་སོ། །དེས་ནི་རང་གི་དོན་ཕུན་སུམ་ཚོགས་པ་རྡོ་རྗེའི་ཆོས་བདུན་བཤད་ཟིན་ཏོ།།      །།ད་ནི་གཞན་གྱི་དོན་ཕུན་སུམ་ཚོགས་པ་བཞིའི་
མཚན་ཉིད་བཤད་པར་བྱ་སྟེ། དེ་ཡང་དང་པོ་དྲག་པོའི་མཚན་ཉིད་བཤད་དེ། སེམས་ཅན་ཐམས་ཅད་ཅེས་པ་ནི་རྒྱ་གར་གྱི་སྒྲ་ལས་དྲངས་ནས། སརྦ་མ་ནུ་ཤཱ་ཞེས་བྱ་བ་སྟེ། སྣོད་ཀྱི་འཇིག་རྟེན་ཇི་ཙམ་ཁྱབ་པ་ཐམས་ཅད། བཅུད་ཀྱི་འཇིག་རྟེན་གྱིས་ཀྱང་ཁྱབ་པས་སྐྱེ་འགྲོ་
སྲོག་གིས་བསྡུས་པའི་སེམས་ཅན་ཐམས་ཅད་ལ་བྱའོ། །སྐྲག་པར་བྱེད་པ་ཞེས་བྱ་བ་ནི། གསང་སྔགས་བདག་མེད་ཀྱི་དོན་སྟོན་པ་འདི་བསྒྲགས་པས། སེམས་ཅན་ཐམས་ཅད་འཇིགས་པ་དང་། བག་ཚ་བ་དང་། སྤུ་ཟིང་ཞེས་བྱ་བ་དང་། ཡིད་མི་དགའ་བ་ལ་སོགས་པ་བྱས་པའི་
སྒོ་ནས་སངས་རྒྱས་ཀྱི་བསྟན་པ་ལ་འཛུད་དོ། །དཔེར་ན་བདུད་རྣམས་བསྟན་པ་ལ་འཛུད་པའི་དོན་དུ། བཅོམ་ལྡན་འདས་གྱིས་ཕྱག་ན་རྡོ་རྗེ་ལ་བཀའ་བསྒོས་ཏེ། བཅོམ་ལྡན་འདས་དང་ཕྱག་ན་རྡོ་རྗེ་རི་རབ་རིའི་རྩེ་མོ་ཁང་བུ་བརྩེགས་པའི་ནང་དུ། ཕྱེད་ཀྲུང་དུ་བཞུགས་པའི་ཞབས་གཡས་
པའི་མཐེ་བོང་དང་། སྨིན་མཚམས་གཉིས་ནས། ཁྲོ་བོ་ཤིན་ཏུ་ཁྲོ་ཞིང་གཏུམ་པ་གསུམ་སྤྲུལ་ཏེ། བདུད་ཀྱི་ཁང་པར་གཏང་སྟེ། ཁྲོ་བོ་དེ་གསུམ་གྱིས་བ་སྤུའི་བུ་ག་ནས་འོད་ཟེར་བཀྱེ་སྟེ། དེ་རྣམས་ཀྱི་ཁང་པར་མེ་རབ་ཏུ་འབར་ཀུན་ཏུ་འབར། ཤིན་ཏུ་འབར་བར་བྱས་ནས། དེ་རྣམས་
ཀྱི་ལུས་ཤིན་ཏུ་ཉམ་སྨད་པར་བྱས་ནས། སྡུག་བསྔལ་ཆེན་པོ་དང་ལྡན་པར་བྱས་པས། དེ་རྣམས་ན་རེ་རྒྱུ་དང་རྐྱེན་མེད་པར་གཞལ་མེད་ཁང་འདི་དག་མི་གཡོ་ན། འདི་སུའི་རྫུ་འཕྲུལ་དང་། ཆོ་འཕྲུལ་ཡིན། བདག་ཅག་གིས་བལྟ་གོར་མ་ཆག་སྙམ་སྟེ། བལྟས་པས་ལྷའི་བུ་དེ་རྣམས་

71-1-258a

ལ་མངོན་པར་ཤེས་པ་ཡོད་པས་གཽ་ཏ་མས་ཁང་བུ་བརྩེགས་པའི་གཟུངས་གསུངས་པའི་ཆོ་འཕྲུལ་ཡིན་པར་མཐོང་སྟེ། གཽ་ཏ་མ་ཐུགས་རྗེ་ཆེན་པོ་དང་ལྡན་པ་ཡིན། དེ་ལ་སྐྱབས་ཚོལ་དུ་འདོང་ཟེར་ཏེ། གཽ་ཏ་མའི་དྲུང་དུ་འདོང་ཟེར་ནས། གཽ་ཏ་མའི་དྲུང་དུ་ཕྱིན་ཏེ། ཐུགས་
རྗེ་ཆེན་པོ་དང་ལྡན་པ་བདག་བསྐྱབ་ཏུ་གསོལ་བྱས་པས། ངས་བསྐྱབ་པར་མི་ནུས་པས་ཕྱག་ན་རྡོ་རྗེ་ལ་སྐྱབས་སུ་སོང་ཞིག་གསུངས་པ་དང་། དེ་རྣམས་ཀྱིས་དེའི་དྲུང་དུ་ཕྱིན་ཏེ། བདག་ཅག་བསྐྱབ་ཏུ་གསོལ་བྱས་པས། ངས་བསྐྱབ་པར་མི་ནུས་པས། ངས་སྤྲུལ་པའི་ཁྲོ་བོ་གསུམ་ཡོད་
པས། དེའི་དྲུང་དུ་སོང་ཤིག་གསུངས་པ་དང་། དེ་གསུམ་གྱི་དྲུང་དུ་ཕྱིན་པ་དང་། བདག་ཅག་ལ་བསྐྱབ་ཏུ་གསོལ་ཞེས་ཞུས་པ་དང་། ངས་བསྐྱབ་པར་ག་ལ་ནུས་ཀྱིས། དཀོན་མཆོག་གསུམ་ལ་སྐྱབས་སུ་སོང་ཤིག སངས་རྒྱས་ཀྱི་བསྟན་པ་ལ་བར་དུ་གཅོད་པ་མི་བྱེད་པར་
ཁས་ལོང་ཤིག བྱང་ཆུབ་ཏུ་སེམས་བསྐྱེད་ཅིག སྡུག་བསྔལ་ལས་ཐར་བར་འགྱུར་རོ། །བྱས་པ་དང་། དེ་རྣམས་ཀྱིས་མགྲིན་གཅིག་ཏུ་དཀོན་མཆོག་གསུམ་ལ་སྐྱབས་སུ་འགྲོ་བ་ཡང་བྱས། སངས་རྒྱས་ཀྱི་བསྟན་པ་ལ་བར་ཆད་མི་བྱེད་པར་ཁས་བླངས་སོ། །བྱང་ཆུབ་
ཏུ་ཡང་སེམས་བསྐྱེད་དོ། །དེ་ལྟར་བྱས་པས་སྡུག་བསྔལ་ལས་ཐར་རོ། །དེ་ལྟར་བྱས་པའི་སྒོ་ནས་བསྟན་པ་ལ་བཙུད་པ་བཞིན་དུ། སེམས་ཅན་ཐམས་ཅད་སྐྲག་པར་བྱེད་པའི་སྒོ་ནས། སེམས་ཅན་གྱི་དོན་བྱེད་དོ། །ཡང་ན་གསང་སྔགས་ཀྱི་མཐུ་ཆེན་པོ་འདིའི་ལས་སྔགས་
དང་སྦྱར་ཏེ། དྲག་པོའི་ལས་ལ་སྦྱོར་བས་ན། སེམས་ཅན་ཐམས་ཅད་སྐྲག་ཅིང་འཇིགས་པ་དང་། སྔངས་པར་གྱུར་ཏེ། དཔེར་ན་གཅན་གཟན་གྱི་རྒྱལ་པོས་སྒྲ་བསྒྲགས་པས། གཅན་གཟན་ཕྲ་མོ་ཐམས་ཅད་སྐྲག་པར་བྱེད་པ་ལྟ་བུའོ། །སེམས་ཅན་ཐམས་ཅད་འཇིལ་བར་བྱེད་པ་
ཞེས་པ་ནི། བདག་ཉིད་ལ་རྒྱལ་པོའི་ཆད་པ་དང་། བདུད་དང་ལོག་འདྲེན་གྱི་གནོད་པ་བྱེད་དུ་འོང་བའི་སྦྱོར་བ་བརྩམས་པ་ཐམས་ཅད་རྩེ་འཇིལ་བར་བྱེད་པའོ། །ཡང་ན་གསང་སྔགས་ཀྱི་མཐུ་ཆེན་པོ་འདིའི་ལས་སྔགས་དང་སྦྱར་ཏེ། དྲག་པོའི་ལས་སྦྱོར་བྱས་ན། རྒྱལ་པོའི་ཆད་པ་ལ་

71-1-258b

སོགས་པ་དང་། བདུད་དང་མུ་སྟེགས་ཀྱི་དོན་ལ་བྱ་བར་སེམས་པའི་ཤེས་པ་ཐམས་ཅད་ཕྱིར་ནུར་ནས། ཤེས་པ་རྩེ་འཇིལ་བར་འགྱུར་བ་སྟེ། དཔེར་ན་དེ་བཞིན་གཤེགས་པའི་འོད་ཀྱིས་ལྷ་རྣམས་ཀྱི་འོད་མོག་མོག་པོར་བྱས་ཏེ། རྩེ་འཇིལ་བ་ལྟ་བུའམ། འཁོར་ལོས་སྒྱུར་བའི་རྒྱལ་པོས་
དམག་གི་དཔུང་འཇོམས་པ་ལྟ་བུའོ། །རིག་སྔགས་ཐམས་ཅད་ཅེས་པ་ནི། ལྷ་མོའི་སྐུ་མདོག་དང་། གཟུགས་དང་། དབྱིབས་ཀྱི་ལྷ་དང་། དེའི་སྟོན་པའི་སྒྲ་དང་། ཕྱག་རྒྱ་ལ་སོགས་པའོ། །གཅོད་པར་བྱེད་པ་ཞེས་པ་ནི། དེ་སྦྱིན་སྲེག་གི་སྒོ་ནས་གཅོད་པར་བྱེད་པ་སྟེ། དེ་ཡང་
གཞན་གྱི་རིག་སྔགས་གྲོ་གའམ་ཤིང་ཤུན་ལ་བྲིས་ཏེ། ཐབ་ཁུང་གྲུ་གསུམ་མཐའ་མ་ཟླུམ་པོ་བྱས་ལ། དེའི་ནང་དུ་ཚེར་མ་ཅན་གྱི་ཤིང་ལ་མེ་བཏང་ལ། མེ་ལྷ་ཤིན་ཏུ་ཁྲོ་བ་ཅིག་སྤྱན་དྲངས་ཏེ། དེ་ལ་གཞན་གྱི་རིག་སྔགས་ལ་སོགས་པ་ཕུལ་ལ། དེའི་ཐུགས་ཀར་ལྷའི་ཕོ་བྲང་
བཅས་ལ། མེ་ལྷའི་ཁ་ན་མར་ལ་བརྒྱུད་ནས་ལྷ་ལ་ཕུལ་ཏེ། གཞན་གྱི་རིག་སྔགས་དབུལ་པོའི་རལ་གྲིས་གཏུབས་ཏེ། དུག་ཆུར་བཅུག་ནས་མེ་རུ་བསྲེག་ཅིང་། ཨོཾ་བཛྲ་ཛྭཱ་ལཱ་ན་ཡཱ་ཆེ་གེ་མོའི་རིག་སྔགས་ཙྪིནྡ་ཙྪིནྡ་མཱ་ར་ཡ་ཧཱུཾ་ཕཊ། ཅེས་བརྗོད་ཅིང་མེའི་ནང་དུ་བསྲེག་གོ། །དེ་ལྟར་ལན་ཉི་
ཤུ་རྩ་གཅིག་གམ། ལན་བརྒྱ་རྩ་བརྒྱད་དུ་སྦྱིན་སྲེག་གི་ལས་བྱས་ན། གཞན་གྱི་རིག་སྔགས་གཅོད་པར་འགྱུར་རོ། །ཡང་ན་གསང་སྔགས་ཀྱི་མཐུ་ཆེན་པོ་འདིའི་ལས་སྔགས་དང་སྦྱར་ཏེ། དྲག་པོའི་ལས་སྦྱིན་སྲེག་བྱས་ན། གང་གཅད་པར་བྱ་བའི་འདོད་པ་དེ་ཐམས་ཅད་ཉེ་བར་གྲུབ་པར་འགྱུར་
ཏེ་དཔེར་ན། སྐྱེསབུས་མཚོན་རྣོན་པོ་ལ་ལེགས་པར་མ་བཟུང་བ་ལྟ་བུའོ། །རིག་སྔགས་ཐམས་ཅད་ཅེས་པ་ནི། གོང་དང་འདྲའོ། །གནོད་པར་བྱེད་པ་ཞེས་པ་ནི། རིག་སྔགས་མནན་པར་བྱ་བའི་དོན་ཏེ། དེ་ཡང་རིག་སྔགས་གྲོ་ག་ལ་སོགས་པ་ལ་ལྡོང་རོས་ཀྱིས་བྲིས་ཏེ། དྲིལ་ལ་སྐུད་པ་
སེར་པོས་དཀྲིས་ཏེ། རྡོ་ལེབ་གཉིས་ལ་རྡོ་རྗེ་རྒྱ་གྲམ་རེ་རེ་བྲིས་ལ། དེ་གཉིས་ཀྱི་བར་དུ་བཅུག་ལ། རི་རབ་ལྕོག་བརྒྱད་དང་བཅས་པ་ཅིག་གིས་མནན་ཞིང་སྔགས་ཀྱི་མཇུག་ལ། ཆེ་གེ་མོའི་རིག་སྔགས་སྟཾ་བྷ་ཡ་སྟཾ་བྷ་ཡ་ནན་ཧཱུཾ་ཕཊ། ཅེས་བརྗོད་ཅིང་མནན་ན། རིག་སྔགས་ཐམས་ཅད་

71-1-259a

མནན་པར་འགྱུར་རོ། །དེ་གཉིས་ནི་མཚོན་པ་ཙམ་ཡིན་ཏེ། བཅིངས་པ་དང་། གདབ་པར་ཡང་བྱའོ་གསུང་ངོ་། །རིག་སྔགས་བཅིང་བར་འདོད་ན། བུ་མོ་གཞོན་ནུ་མ་དམ་ཚིག་དང་ལྡན་པ། གྲོང་བའི་ཆོས་ཀྱིས་མ་ཕོག་པ་ཅིག་ལ། ཚོན་སྣ་ལྔའི་སྐུད་པ་འཁལ་
དུ་བཅུག་ལ། གཅིག་ཏུ་བསྒྲིམས་ཏེ། རྡོ་རྗེའི་མདུད་པ་བརྒྱབ་ཅིང་། གཞན་གྱི་རིག་སྔགས་བྲིས་པ་དེ་རུ་གཞུག་ཅིང་། སྔགས་ཀྱི་མཇུག་ཏུ་ཆེ་གེ་མོའི་རིག་སྔགས་བནྡྷ་བནྡྷ་ཧཱུཾ་ཕཊ་ཅེས་བརྗོད་ཅིང་། མདུད་པའི་བར་དུ་བཅུག་པས་རིག་སྔགས་ཐམས་ཅད་བཅིངས་པར་འགྱུར་རོ། །
ཕུར་བུས་གདབ་པར་འདོད་ན་གཞན་གྱི་རིག་སྔགས་ཀྱི་གཟུགས་སྤྲ་ཚིལ་ལ་བྱས་ཏེ། དེའི་སྙིང་ག་ལ་སོགས་པའི་གནས་རྣམས་སུ་ཕུར་བུས་གཟུགས་ཏེ། སྔགས་ཀྱི་མཇུག་ལ་ཆེ་གེ་མོ་ལྷའི་གཟུགས་ཀཱི་ལི་ཀཱི་ལཱ་ཡ་ཧཱུཾ་ཕཊ་ཅེས་བརྗོད་ཅིང་སྙིང་གར་བཙུགས་ན་རིག་སྔགས་ཐམས་ཅད་
ཕུར་བུས་བཏབ་པར་འགྱུར་རོ། །རིག་སྔགས་ནི་ཉེ་བར་མཚོན་པ་ཙམ་དུ་ཟད་དེ། འཇིག་རྟེན་དང་འཇིག་རྟེན་ལས་འདས་པའི་རིག་སྔགས་དང་། གསང་སྔགས་དང་། སྒྲུབ་པ་པོའི་ངག་དང་ལྷའི་གཟུགས་ལ་སོགས་པ་ཐམས་ཅད་ལ་ཡང་གཅད་པ་ལ་སོགས་པ་བྱ་གསུང་ངོ་། །
ཡང་ན་གསང་སྔགས་ཀྱི་མཐུ་ཆེན་པོ་འདིའི་ལས་སྔགས་དང་སྦྱར་ཏེ་མནན་པའི་ལས་བྱས་ན། གང་མནན་པར་འདོད་པ་དེ་ཐམས་ཅད་ཉེ་བར་མནན་པར་འགྱུར་ཏེ། དཔེར་ན་རི་རབ་ལྟ་བུའོ། །ལས་ཐམས་ཅད་ཅེས་པ་ནི་ཕྲིན་ལས་རྣམ་པ་བཞིའོ། །འཇོམས་པར་བྱེད་པ་ཞེས་པ་ནི། 
གསང་སྔགས་ལ་ཡོད་པའི་ཡོན་ཏན་གྱིས་བདག་ལ་གནོད་པ་བྱེད་དུ་འོང་བ་རྣམས་འཇིག་པར་བྱེད་དོ། །ཡང་ན་གསང་སྔགས་ཀྱི་མཐུ་ཆེན་པོ་འདིའི་ལས་སྔགས་དང་སྦྱར་ཏེ་དྲག་པོའི་ལས་སྦྱོར་བྱས་ན། མི་མ་ཡིན་གྱི་གནོད་པ་གང་འཇོམས་པར་འདོད་པ་དེ་ཐམས་ཅད་ངེས་པར་འཇོམས་
པར་བྱེད་པ་སྟེ། དཔེར་ན་ཆོམ་རྐུན་གྱི་རྩར་བ་ལྟ་བུའོ། །གཞན་གྱི་ལས་ཐམས་ཅད་འཇིག་པར་བྱེད་པ་ཞེས་པ་ནི། སྒྲུབ་པ་པོ་ལ་ཡོད་པའི་ཡོན་ཏན་གྱིས། བསྐྲད་པ་ཙམ་དང་རྡོ་རྗེས་བྱབས་པ་ཙམ་གྱིས། བདག་ཉིད་བཅིང་པ་ལ་སོགས་པ་ཐམས་ཅད་ཀྱིས་མི་ཚུགས་པས་ན། 

71-1-259b

གཞན་གྱི་ལས་ཐམས་ཅད་འཇིག་པར་བྱེད་པ་ཞེས་གསུངས་སོ། །ཡང་ན་གསང་སྔགས་ཀྱི་མཐུ་ཆེན་པོ་འདིའི། ལས་སྔགས་དང་སྦྱར་ཏེ་དྲག་པོའི་ལས་སྦྱོར་བྱས་ན་སྒྲུབ་པ་པོ་གཞན་གྱི་ལས་ཐམས་ཅད་འཇིག་པར་འགྱུར་ཏེ། དཔེར་ན་འདམ་བུའི་ཁྱིམ་ལ་གླང་པོ་ཆེས་འཇིག་
པར་འགྱུར་བ་ལྟ་བུའོ། །གདོན་ཐམས་ཅད་ཅེས་པ་ནི། གདོན་ཆེན་པོ་བཅོ་བརྒྱད་ལ་སོགས་པའོ། །རླག་པར་བྱེད་པ་ཞེས་པ་ནི་བདག་ཉིད་ལ་གནོད་པར་བྱེད་དུ་འོང་བ་ཐམས་ཅད་འདིས་འཇོམས་པར་བྱེད་པའོ། །ཡང་ན་གསང་སྔགས་ཀྱི་མཐུ་ཆེན་པོ་འདི་ལས་སྔགས་དང་སྦྱར་ཏེ། དྲག་
པོའི་ལས་སྦྱོར་བྱས་ན་བི་ནཱ་ཡ་ཀ་ལ་སོགས་པའི་གདོན་ཐམས་ཅད་ལ་གསད་པའི་ལས་བྱས་ན། ངེས་པར་ལུས་ངག་རྡུལ་ཕྲན་བཞིན་དུ་བརླག་པར་འགྱུར་ཏེ། དཔེར་ན་གྲོང་ཁྱེར་ཆེན་པོ་ལ་མེ་ཤོར་བ་ལྟ་བུའོ། །གདོན་ཐམས་ཅད་ཅེས་པ་ནི་གྲོང་གི་ཚེའོ། །ཐར་བར་བྱེད་ཅེས་པ་ནི། གང་ཟག་
འགའ་ཞིག་ལ་གདོན་དེ་ཚོས་བརླབས་པ་ཡིན་ན། འདིའི་བསྙེན་པ་སྔོན་དུ་སོང་བས་འདིའི་དཀྱིལ་འཁོར་བྱས་ཏེ། ཕྱག་ན་རྡོ་རྗེའི་སྐུ་གཟུགས་ཀྱི་དྲུང་དུ་ཁྲུས་ཀྱི་ཆོ་ག་འདི་བྱས་ཏེ། བསྐྲད་པ་ཙམ་དང་། རྡོ་རྗེ་བྱབས་པ་ཙམ་གྱིས་ཐར་བར་འགྱུར་རོ། །ཡང་ན་གསང་སྔགས་ཀྱི་མཐུ་ཆེན་པོ་
འདིའི། ལས་སྔགས་དང་སྦྱར་ཏེ། དྲག་པོའི་ལས་སྦྱོར་བྱས་ན། བསྐྲད་པ་ཙམ་དང་། རྡོ་རྗེས་བྱབས་པའི་ལས་བྱས་ན་གང་གདོན་གྱིས་ཟིན་པ་དེ་ལས་ངེས་པར་ཐར་བར་འགྱུར་ཏེ། དཔེར་ན་བཙོན་ར་དང་། ཁྲི་མོན་དང་། ལྕགས་སྒྲོག་དང་། ཤིང་སྒྲོག་ལས་ཐར་བ་བཞིན་ནོ། །དེ་ཚོས་
ནི་དྲག་པོའི་མཚན་ཉིད་བཤད་ཟིན་ཏོ།།      །།ད་ནི་དབང་གི་མཚན་ཉིད་བཤད་དེ། འབྱུང་པོ་ཐམས་ཅད་ཅེས་པ་ནི་ཚོགས་བདག་གླང་པོ་ཆེའི་སྣ་ཅན་ལ་སོགས་པའོ། །ཐམས་ཅད་ཅེས་པ་ནི་མང་པོ་ཡོད་པས་ན་ཐམས་ཅད་དོ། །འགུགས་པར་བྱེད་པ་ཞེས་པ་ནི། དབང་དུ་བྱ་བའི་དོན་ཏེ། 
བདག་ཉིད་ནག་པོ་ཆེན་པོ་འགུགས་པར་འདོད་ན། བདག་ཉིད་མཚན་མོ་དུར་ཁྲོད་དུ་སོང་སྟེ། འབྲས་ཐུག་པོ་ཆེའི་གཏོར་མ་བྱ་སྟེ། ཁྱིའི་ཤ་ཁྲག་དང་། རའི་ཤ་ཁྲག་དང་། དམ་རྫས་རྣམས་བསགས་ཏེ། བདག་ཉིད་ལྷའི་ང་རྒྱལ་དང་ལྡན་པར་བྱས་ཏེ། གསང་སྔགས་ཀྱི་མཇུག་ལ་

71-1-260a

དེའི་སྲོག་སྙིང་བཏགས་ཏེ་བགྲངས་ན། དེ་ཉིད་ཨ་ཅི་བྱ་ཟེར་ནས་བདག་ཉིད་ཀྱི་དྲུང་དུ་འོང་བར་འགྱུར་རོ། །དེས་དེ་ལ་ཁྱོད་འདི་ཁྱེར་ཟོ་ལ། སངས་རྒྱས་ཀྱི་བསྟན་པ་བཤིག་པ། དཀོན་མཆོག་གསུམ་གྱི་དབུ་འཕང་སྨོད་པ། དམ་ཉམས་པའི་ཆེ་གེ་མོ་ཞེས་བྱ་བ་འདི། དཀོན་
མཆོག་གསུམ་གྱི་ཁ་ཐབས་སུ་མ་བཏང་བར། དུས་འདི་ཙམ་ལས་མི་འདའ་བར་ཚེའི་འདུ་བྱེད་སྐུལ་ཅིག་ཅེས་བསྒོའོ། །དེས་དེའི་བཀའ་མཉན་ནས་བྲན་བཞིན་དུ་ལས་བྱེད་པར་འགྱུར་རོ། །དེ་བཞིན་དུ་དཔལ་ལྷ་མོ་ལ་སོགས་པ་ལ་ཡང་། གཏོར་མ་དང་། དམ་རྫས་དང་། སྲོག་  
གི་སྙིང་པོ་ལ་སོགས་པ་ལ་དྲངས་པ་ཡང་ལས་བྱེད་པར་འགྱུར་རོ། །ཡང་ན་གསང་སྔགས་ཀྱི་མཐུ་ཆེན་པོ་འདིའི་ལས་སྔགས་དང་སྦྱར་ཏེ། དགུག་པའི་ལས་སྦྱོར་བྱས་ན་ཉེ་བར་ལྷ་དང་། ཀླུ་དང་། རྒྱལ་པོའི་བུ་མོ་ལ་སོགས་པ་ལ་ཡང་ཉེ་བར་ཁུགས་པར་འགྱུར་བ་སྟེ། དཔེར་ན་          
འཁོར་ལོས་སྒྱུར་བའི་རྒྱལ་པོ་སྦྱིན་བདག་གི་དྲུང་དུ་སྐྱེ་བོ་སློང་མོ་བ་རྣམས་འདུ་བ་ལྟ་བུའོ། །བཀུག་ནས་ཅི་བྱེད་ཅེ་ན། རིག་སྔགས་ཀྱི་ལས་ཐམས་ཅད་ཅེས་པའི་ཕྲིན་ལས་རྣམས་བསྟན་ཏོ། །བྱེད་དུ་འཇུག་པ་ཞེས་པ་ནི། བདག་ཉིད་ཀྱི་སྒྲ་ལ་གནོད་སྦྱིན་དང་སྲིན་པོ་རྣམས་ཀྱང་བྲན་
བཞིན་དུ་བསྒོ་བ་ལྟར་ངག་ཉན་ཏེ། རང་དབང་མེད་པར་ལས་བྱེད་པར་འགྱུར་ཏེ། གསད་པ་དང་འགུགས་པ་ལ་སོགས་པ་བྱེད་དུ་འཇུག་པའོ། །ཡང་ན་གསང་སྔགས་ཀྱི་མཐུ་ཆེན་པོ་འདི་ལས་སྔགས་དང་སྦྱར་ཏེ། དབང་དུ་བྱ་བའི་ལས་སྦྱོར་བྱས་ན། དེ་རྣམས་ཀྱིས་དབང་དུ་བྱ་བའི་
ལས་ཐམས་ཅད་ངེས་པར་བྱེད་པར་འགྱུར་ཏེ། དཔེར་ན་འཁོར་ལོས་སྒྱུར་བའི་རྒྱལ་པོ་བཏང་སྙོམས་སུ་འདུག་ཅིང་། བཀའ་ཐོབ་པའི་བློན་པོ་ལས་ཀུན་བྱེད་པ་ལྟ་བུའོ། །དེས་ནི་དབང་གི་མཚན་ཉིད་བཤད་ཟིན་ཏོ།།      །།ད་ནི་རྒྱས་པའི་མཚན་ཉིད་བཤད་པར་བྱ་སྟེ། མ་གྲུབ་
པ་རྣམས་ཞེས་པ་ནི་བདག་ཉིད་ཀྱི་ཡི་དམ་གྱི་ལྷ་ལ་སོགས་པ་བསྒྲུབས་པས། གཞན་གྱི་རིག་སྔགས་བཅད་པ་ལ་སོགས་པ་བྱས་པས་མ་གྲུབ་པའོ། །གྲུབ་པར་བྱེད་ཅེས་པ་ནི་གཞན་གྱི་རིག་སྔགས་ཀྱིས་བདག་གི་རིག་སྔགས་ལ་སོགས་པ་གཅད་པ་ལ་སོགས་པ་བྱས་པ་ཡིན་ན། བདག་

71-1-260b

ཉིད་ཀྱི་རིག་སྔགས་ལ་སོགས་པ། གྲོ་ག་འམ། ཤིན་ཤུན་ནམ། རས་ལ་གུར་གུམ་མམ། གི་ཝང་གིས་བྲིས་ཏེ། འདིའི་བསྙེན་པ་སྔོན་དུ་སོང་བས། འདིའི་དཀྱིལ་འཁོར་བྱས་ཏེ། ཕྱག་ན་རྡོ་རྗེའི་སྐུ་གཟུགས་སྔོན་དུ་བཞག་སྟེ། དེ་ལ་མར་ཁུ་འམ། འོ་མས་ཁྲུས་ཞག་བདུན་དུ་
ཉིན་ལན་གསུམ་མཚན་ལན་གསུམ་ཁྲུས་བྱས་ན། རིག་སྔགས་ལ་སོགས་པས་བཅད་པ་ལ་སོགས་པ་བྱས་པ་ལས་ཐར་བར་འགྱུར་རོ། །དེ་ལྟར་བྱས་ནས་བསྒྲུབས་ནས་མ་གྲུབ་ན། བདག་ཉིད་ཀྱི་ལྷ་ལ་ཕུར་བུས་བཏབ་པ་ཡིན་པས་ན། དེའི་ཆོ་ག་ནི་ས་གཙང་མ་ལ་ལྷའི་སྐུ་མདོག་དང་། 
ཕྱག་མཚན་ལ་སོགས་པ་བྱས་ལ། འདིའི་དཀྱིལ་འཁོར་བྱས་ལ། ཕྱག་ན་རྡོ་རྗེའི་སྐུ་གཟུགས་ཀྱི་མདུན་དུ་བཞག་སྟེ། མར་ཁུ་འམ། འོ་མས་ཁྲུས་ཞག་བདུན་དུ་ཉིན་ལན་གསུམ་མཚན་ལན་གསུམ་དུ་བྱས་ན། ཕུར་པ་བཏབ་པ་ལས་གྲོལ་བར་འགྱུར་རོ། །དེ་བྱས་ནས་བསྒྲུབས་
ཀྱང་མ་གྲུབ་ན། བདག་ཉིད་ཀྱི་ངག་བཅིང་བ་ལ་སོགས་པ་བྱས་པ་ཡིན་པས། སྒྲུབ་པ་པོ་བདག་ཉིད་ཀྱི་ངག་བཅིངས་ན། འདིའི་བསྙེན་པ་སྔོན་དུ་སོང་བས་འདིའི་དཀྱིལ་འཁོར་བྱས་ཏེ། ཕྱག་ན་རྡོ་རྗེའི་སྐུ་གཟུགས་ཀྱི་མདུན་དུ་བདག་ཉིད་ལ་ཁྲུས་འདི་བྱས་པས། བདག་ཉིད་ཀྱི་ངག་
བཅིང་བ་ལ་སོགས་པ་བྱས་པ་ལས་གྲོལ་བར་འགྱུར་རོ། །གཞན་གྱིས་བདག་ཉིད་ཀྱི་རིག་སྔགས་བཅད་པ་ལ་སོགས་པ་བྱས་ཀྱང་། དེ་ལྟར་བྱས་ནས་བསྒྲུབས་ན་འགྲུབ་པར་འགྱུར་རོ། །ཡང་ན་གསང་སྔགས་ཀྱི་མཐུ་ཆེན་པོ་འདི་ལས་སྔགས་དང་སྦྱར་ཏེ་རྒྱས་པའི་ལས་སྦྱོར་བྱས་ན། 
གང་མ་གྲུབ་པ་རྣམས་ངེས་པར་འགྲུབ་པར་འགྱུར་ཏེ། དཔེར་ན་འཁོར་ལོས་སྒྱུར་བའི་རྒྱལ་པོའི་སྐྱེས་བུ་བརྒྱད་པ་ལྟ་བུའོ། །གྲུབ་པ་རྣམས་ཆུད་མི་ཟ་བར་བྱེད་པ་ཞེས་པ་ནི། བདག་ཉིད་ཀྱི་ལྷ་འགའ་ཞིག་བསྒྲུབས་པས་གྲུབ་པའི་སྒོ་ནས། དངོས་གྲུབ་སྟེར་བར་བྱེད་པ་སྟེ། མི་མ་ཡིན་པ་ལ་
སོགས་པས་དངོས་གྲུབ་འཕྲོག་ཏུ་འོང་བ་ལའང་། ཁྲུས་ཀྱི་ཆོ་ག་འདི་བྱས་པས་འཕྲོག་པར་མི་ནུས་སོ། །དེས་ན་གྲུབ་པ་རྣམས་ཆུད་མི་ཟ་བར་བྱེད་པ་ཞེས་གསུངས་སོ། །ཡང་ན་གསང་སྔགས་ཀྱི་མཐུ་ཆེན་པོ་འདི་ལས་སྔགས་དང་སྦྱར་ཏེ། རྒྱས་པའི་ལས་སྦྱོར་བྱས་ན། གང་བསྒྲུབས་པ་

71-1-261a

རྣམས་ཆུད་མི་ཟ་བར་བྱེད་པ་སྟེ། དཔེར་ན་འགྲོ་བ་བཟང་མོ་ལྟ་བུའོ། །དེ་ལྟར་བྱས་པས་ཅི་འབྱུང་ཞེ་ན། འདོད་པ་ཐམས་ཅད་རབ་ཏུ་སྦྱིན་པ་ཞེས་གསུངས་ཏེ། འདོད་པ་ཐམས་ཅད་ཅེས་པ་ནི་བདག་ཉིད་ཀྱི་བསམ་པ་ལ་ཅི་དང་ཅི་འདོད་པའོ། །སྦྱིན་པ་ཞེས་པ་ནི་ཐུན་མོང་
དང་ཐུན་མོང་མ་ཡིན་པའི་དངོས་གྲུབ་སྟེར་བར་བྱེད་དོ། །ཡང་ན་གསང་སྔགས་ཀྱི་མཐུ་ཆེན་པོ་འདི་ལས་སྔགས་དང་སྦྱར་ཏེ། རྒྱས་པའི་ལས་སྦྱོར་བྱས་ན། ཡིད་ལ་ཅི་དང་ཅི་འདོད་པ་ཐམས་ཅད་འབྱུང་བར་འགྱུར་ཏེ། དཔེར་ན་ཡིད་བཞིན་གྱི་ནོར་བུ་རིན་པོ་ཆེ་ལྟ་བུའོ། །རྒྱས་པ་ཞེས་པ་ནི། 
འཇིག་རྟེན་པ་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་རྒྱས་པའོ། །ཡང་ན་གསང་སྔགས་ཀྱི་མཐུ་ཆེན་པོ་འདི་ལས་སྔགས་དང་སྦྱར་ཏེ། རྒྱས་པའི་ལས་སྦྱོར་བྱས་ན། ཚེ་དང་ཡེ་ཤེས་དང་། ལོངས་སྤྱོད་དང་། བསོད་ནམས་མཉེས་པར་རྒྱས་པར་འགྱུར་ཏེ། དཔེར་
ན་ལྷའི་དྲི་རྒྱས་པ་ལྟ་བུའོ། །དེས་ནི་རྒྱས་པའི་མཚན་ཉིད་བཤད་ཟིན་ཏོ།།      །།ད་ནི་ཞི་བའི་མཚན་ཉིད་བཤད་པར་བྱ་སྟེ། སེམས་ཅན་ཐམས་ཅད་ཅེས་པ་ནི། འགྲོ་བ་རིགས་ལྔའོ། །སྲུང་བ་ཞེས་པ་ནི། དེ་དག་ལ་མི་མ་ཡིན་པ་འགའ་ཞིག་གནོད་པ་བྱེད་དུ་འོང་བ་ལ། རྡོ་རྗེ་རྣམ་པར་
འཇོམས་པ་འདིའི་བསྙེན་པ་སྔོན་དུ་སོང་བས། དཀྱིལ་འཁོར་བྱས་ཏེ། ཁྲུས་དང་། བྱབ་པ་དང་། བསྐྲད་པ་དང་། སྲུང་བ་ལ་སོགས་པ་བྱས་ནས། དེ་ལ་མི་མ་ཡིན་ལ་སོགས་པས་གནོད་པ་བྱ་བར་མི་ནུས་སོ། །དེས་ནི་སེམས་ཅན་ཐམས་ཅད་སྲུང་བ་ཞེས་གསུངས་སོ། །ཡང་
ན་གསང་སྔགས་ཀྱི་མཐུ་ཆེན་པོ་འདི་ལས་སྔགས་དང་སྦྱར་ཏེ། ཞི་བའི་ལས་སྦྱོར་དབང་བསྐུར་བ་དང་། བྱབ་པ་དང་། སྲུང་བ་བྱས་ན་གང་ཟག་ལ་གདོན་གྱིས་མི་ཚུགས་པར་འགྱུར་ཏེ། དཔེར་ན་རྩི་མ་གྷིའི་ནུས་པའི་མཐུ་ལྟ་བུའོ། །ཞི་བ་ཞེས་པ་ནི། དེ་དག་ལ་མི་མ་ཡིན་པ་ལ་
སོགས་པས་གནོད་པ་བྱས་ནས། ལུས་སེམས་སྡུག་བསྔལ་བར་གྱུར་ཀྱང་འདིའི་དཀྱིལ་འཁོར་བྱས་ལ། ཁྲུས་ཀྱི་ཆོ་ག་བྱས་པས། ཕྱི་ནང་གི་བགེགས་ཐམས་ཅད་ཉེ་བར་ཞི་བར་འགྱུར་རོ། །ཡང་ན་གསང་སྔགས་ཀྱི་མཐུ་ཆེན་པོ་འདི་ལས་སྔགས་དང་སྦྱར་ཏེ། ཞི་བའི་ལས་སྦྱོར་

71-1-261b

ཁྲུས་དང་། བྱབ་པ་དང་། སྲུང་བ་དང་། བསྐྲད་པའི་ལས་བྱས་ན། གང་ཟག་གི་གདོན་དང་། ཉོན་མོངས་པ་ངེས་པར་ཞི་བར་འགྱུར་ཏེ། དཔེར་ན་ཚ་བའི་རིམས་ལ་སོགས་པ་ལ། ག་པུར་ལ་སོགས་པའི་བསིལ་སྨན་སྩལ་བ་ལྟ་བུའོ། །ཞི་བའི་མཚན་ཉིད་བཤད་ཟིན་ཏོ།།      །།
ད་ནི་མཛད་པ་རྣམ་པ་གཉིས་སྔ་མའི་བརྒལ་ལན་དུ་བསྟན་པ་ནི། དེ་ཡང་དང་པོའོ། །འོ་ན་འདི་དག་ཐམས་ཅད་འཇོམས་པར་བྱེད་ན། དེ་ལ་གཞན་གྱི་རིག་སྔགས་དང་། གསང་སྔགས་ལ་སོགས་པས། གནོད་པར་བྱ་བར་མི་ནུས་སམ་ཞེ་ན། མ་ཡིན་ཏེ། གཞན་གྱི་རིག་སྔགས་དང་། 
གསང་སྔགས་ཀྱི་སྒོ་ནས། ལུས་ཀྱི་གནོད་པ་བྱེད་དུ་འོང་བའི་ལུས་ཀྱི་ཀུན་དུ་སྦྱོར་བ་ངེས་པར་བྱེད་དོ། །ངག་གིས་གྱིས་ལ་ཤོག་ཟེར་བའི་ངག་གི་ཀུན་དུ་སྤྱོད་པ་རེངས་པར་བྱེད་དོ། །འོ་ན་སེམས་ཅན་ལ་དབང་ཐོབ་པས་གནོད་པར་བྱ་བར་མི་ནུས་སམ་ཞེ་ན། སེམས་རྨུགས་པར་བྱེད་དོ། །
རྨུགས་པར་བྱེད་ན། དེའི་སེམས་ནུས་པ་ཁྱད་པར་ཅན་དུ་མི་འབྱུང་ངོ་། །ལུས་དང་ངག་རེངས་པར་བྱེད་པས་ན། སེམས་ཅན་ཐམས་ཅད་རེངས་པར་བྱེད་པ་ཞེས་གསུངས་སོ། །ཡང་གསང་སྔགས་ཀྱི་མཐུ་ཆེན་པོ་འདི་ལས་སྔགས་དང་སྦྱར་ཏེ་རེངས་པར་བྱེད་པའི་ལས་སྦྱོར་བྱས་ན། ངེས་
པར་རེངས་པར་འགྱུར་བ་སྟེ། དཔེར་ན་མི་ཐུབ་པ་ནང་དུ་ཕྲད་པ་ལྟ་བུའོ། །དེ་ལ་ངག་རེངས་པར་བྱ་བར་འདོད་པས། ཕ་རོལ་པོའི་གཟུགས་སྤྲ་ཚིལ་ལ་བྱས་ཏེ། ཁ་ཚེར་མས་བཀང་སྟེ། ངག་བཅིང་བའི་ཆོ་ག་བྱས་ན། ཕ་རོལ་པོའི་ངག་རེངས་ནས་སྨྲ་བ་ལ་ལན་མི་ཐེབས་པར་འགྱུར་རོ། །ཕ་
རོལ་པོའི་ལུས་རེངས་པར་འདོད་ན། རྣལ་འབྱོར་པའི་འདུག་ས་གང་ཡིན་པའི་སར་རང་གི་ཆག་གང་བརྐོས་པའི་གཏིང་ནས། ས་རློན་པ་བླངས་ནས་གུ་གུལ་ནག་པོས་བདུགས་ལ། སྔགས་རེ་རེ་ལ་ཡུངས་ཀར་རེ་རེ་བསྣུན་པར་བྱའོ། །དེ་ལྟར་སྔགས་སྟོང་རྩ་བརྒྱད་རྫོགས་པ་དང་། ས་དེ་
ཁམ་ཕོར་སྲུབས་མེད་པའི་ནང་དུ་བླུགས་ལ། ཕུར་བུའི་དཀྱིལ་དུ་བཅུག་ལ་སྨྱུག་མ་ཤོང་ཙམ་ཅིག་བཅུག་ལ། དེའི་ནང་དུ་ཡུངས་ཀར་སྟོང་ལ་སྔགས་དེ་ཐེམ་པ་དང་། དེ་ཤིང་གདུག་པ་ཅན་གྱིས་བསྐོར་ལ་བསྲེག་གོ། །ནང་གི་ས་དང་ཡུངས་ཀར་ཚིག་ཅིང་མདོག་འགྱུར་བ་དང་། དེ་

71-1-262a

ཕྱུང་སྟེ་སྣོད་གཙང་མའི་ནང་དུ་བླུགས་ལ། ཇག་པ་དང་ཆོམ་རྐུན་བྱུང་བའི་དུས་སུ། རྐང་པའི་འོག་གི་ས་དང་བསྲེས་ནས་གཏོར་ན། དེ་རྣམས་རེངས་ཤིང་ལྡོངས་པར་འགྱུར་རོ། །སེམས་རྨོངས་པར་བྱེད་པས་ན་རྨུགས་པར་བྱེད་པ་ཞེས་གསུངས་སོ། །ཡང་ན་
གསང་སྔགས་ཀྱི་མཐུ་ཆེན་པོ་འདི་ལས་སྔགས་དང་སྦྱར་ཏེ། རྨུགས་པར་བྱ་བའི་ལས་སྦྱོར་བྱས་ན། ངེས་པར་མྱོས་པར་འགྱུར་ཏེ། དཔེར་ན་རིམས་ནད་ཆེན་པོས་བཏབ་པ་ལྟ་བུའོ། །དེ་ལ་དེའི་དྲན་པ་ཉམས་པར་འདོད་ན། ཕ་རོལ་པོའི་ལིངྒ་བྱས་ཏེ། བྷ་དུ་རའི་ཁུ་བ་དང་། དུག་སྣ་ཚོགས་
དང་། ཆང་གིས་ཁ་ཕྲུ་བཏབ་པ་ན་ཡིད་དྲན་པ་ཉམས་པར་འགྱུར་རོ། །གསང་སྔགས་ཀྱི་ཞེས་པའི་ངོ་བོ་ནི། ལྷའི་གཟུགས་དང་། ཕྱག་རྒྱ་དང་། ཚིག་དང་། ཡི་གེ་དང་། སྒྲ་དང་། རྣམ་པ་དང་བཅས་པའོ། །གསང་སྔགས་ཀྱི་ངེས་པའི་ཚིག་དང་། བཅོམ་ལྡན་འདས་ཉིད་ཀྱིས་
མཛད་པ་ནི། འདིས་ཉོན་མོངས་པ་རྣམས་འཇོམས་པ་དང་། ཕུན་སུམ་ཚོགས་པ་འཐོབ་པའམ། དངོས་པོ་ཡང་དག་པ་ཇི་ལྟ་བ་བཞིན་དུ་རིག་པས་ན་རིག་པ་སྟེ། ལྷ་རྣམ་པ་དྲུག་གི་རང་བཞིན་ལ་ཡང་གསང་སྔགས་ཞེས་བྱའོ། །ཡང་ན་རྒྱ་གར་གྱི་སྒྲ་ལས་དྲངས་ན། མནྟྲ་ཞེས་བྱ་སྟེ། 
ཤེས་པ་དང་། སྐྱོབ་པའི་དོན་གྱིས་ནི། གསང་སྔགས་ཞེས་བྱའོ། །ཡང་ན་ཞེས་པ་དང་ལྡན་པས་ན་འམ་གསང་སྟེ་བརྗོད་པའི་ཕྱིར་གསང་སྔགས་ཏེ། གསང་སྔགས་ནི་ཆོས་གསང་བ་ཉིད་ཀྱིས་གྲུབ་པར་ཤེས་པར་བྱའོ། །རྒྱ་གར་གྱི་ཡུལ་ན་དངོས་གྲུབ་འཕྲོག་པའི་ཆོ་ག་ཡོད་དེ། 
བསྒྲུབ་པར་བྱ་བའི་ལྷ་དེའི་ཕྱག་རྒྱ་དང་། གསང་སྔགས་མི་ཤེས་ན་འཕྲོག་ཏུ་མི་ཚུགས་པས་ན་གསང་ངོ་། །མཐུ་ཆེན་པོ་འདི་ཞེས་པ་ནི། གང་གཟུངས་རིངས་སྟོང་པ་ཉིད་ཀྱི་སྙིང་པོར་བྱུང་བ་འདིས། བདག་གི་དོན་ཡང་སྒྲུབ་པར་ནུས་ལ། གཞན་གྱི་དོན་ཡང་བྱ་བར་ནུས་པས་ན་མཐུ་
ཆེན་པོའོ། །ཡང་ན་གང་ཟག་ཕ་རོལ་པོ་རྗེས་སུ་བཟུང་སྟེ། གསོ་བ་ཐུན་མོང་མ་ཡིན་པའི་ལས་སྒྲུབ་པ་ལ། གང་ཟག་ཕ་རོལ་པོ་ཚར་བཅད་པ་དེ་བསད་པ་ཐུན་མོང་མ་ཡིན་པའི་ལས་ཀྱང་གྲུབ་པས་ན་ཡང་མཐུ་ཆེན་པོ་འདི་ཞེས་གསུངས་སོ། །འོན་ཏེ་གང་སུའི་མཐུས་སྨྲས་ན། སངས་

71-1-262b

རྒྱས་ཀྱི་མཐུས་སྨྲས་སོ་ཞེས་གསུངས་སོ། །སངས་རྒྱས་ཞེས་པ་ནི་གོང་དུ་བཤད་ཟིན་ཏོ། །འོ་ན་དེ་གང་གིས་སྨྲས་ན། ལག་ན་རྡོ་རྗེས་རབ་ཏུ་སྨྲས་སོ་ཞེས་གསུངས་སོ། །ལག་ན་རྡོ་རྗེ་ཞེས་པ་ཡང་གོང་དུ་བཤད་ཟིན་ཏོ། །འོ་ན་གང་སྨྲས་ཤེ་ན། གསང་སྔགས་ཀྱི་མཐུ་ཆེན་པོ་འདི་
རབ་ཏུ་སྨྲས་སོ་ཞེས་གསུངས་སོ། །གསང་སྔགས་ཞེས་པའང་གོང་དུ་བཤད་ཟིན་ཏོ། །འོ་ན་ཡོན་ཏན་དུ་དང་ལྡན་པ་ཅིག་སྨྲས་ཤེ་ན། བདག་དང་གཞན་གྱི་ཕུན་སུམ་ཚོགས་པའི་ཡོན་ཏན་རྣམ་པ་གཉིས་དང་ལྡན་པ་ཅིག་སྨྲས་སོ། །དེ་ཡང་བཤད་ཟིན་ཏོ། །དེས་ནི་ལྷ་དྲུག་གི་ཡོན་ཏན་
ཕུན་སུམ་ཚོགས་པ་བཤད་ཟིན་ཏོ།།      །།ད་ནི་སྒྲ་དང་ཡི་གེའི་མཚན་ཉིད་བཤད་དེ། ན་མོ་རཏྣ་ཏྲ་ཡཱ་ཡ་ཞེས་པ་ནས་ཨ་མྲྀ་ཏེ་ཧཱུཾ་ཕཊ་ཅེས་པའི་བར་གྱིས་སྒྲ་དང་ཡི་གེའི་ལྷ་གཉིས་ཀ་བསྟན་ཏོ། །སྔགས་དོན་རྣམ་པར་དབྱེ་བ་ནི་འདིར་ཡང་མ་བཤད་དེ། དེའི་དོན་མི་འཆད་པ་ནི། ནུས་པ་ཆུང་བར་
འགྱུར་བའི་ཕྱིར་དང་། སློབ་དཔོན་བི་མ་ལ་མི་ཏྲས་མཛད་པའི་སྔགས་དོན་རྣམ་པར་འབྱེད་པའི་འགྲེལ་པ་ལས་ཤེས་པར་བྱའོ། །དེས་ནི་སྒྲ་དང་ཡི་གེ་གཅིག་ཏུ་བསྡུས་ཏེ་བཤད་ཟིན་ཏོ།།      །།ད་ནི་འོད་ཟེར་སྤྲོ་བསྡུ་ལས་གཟུགས་ཀྱི་ལྷ་བསྐྱེད་པའི་མཚན་ཉིད་བཤད་པར་བྱ་སྟེ། དེ་ཡང་སྡིག་པ་
ཐམས་ཅད་བྱང་བྱས་ནས། ཞེས་བྱ་བ་ལ་སོགས་པ་གསུངས་ཏེ། དེ་ཡང་སྡིག་པ་ཞེས་པ་ནི་རྒྱ་གར་གྱི་སྒྲ་ལས་དྲངས་ན་པཱ་པཾ་ཀ་ལས་དངས་ན་སྡིག་པ་ཞེས་བྱ་སྟེ། སྡིག་པའི་ངོ་བོ་ནི་མི་མཛེས་པར་འཇུག་པའོ། །ངེས་པའི་ཚིག་ནི་ཅི་ཕྱིར་སྡིག་པ་ཞེ་ན། རྣམ་པར་སྨིན་པ་ཡིད་དུ་མི་འོང་
བ་འབྱིན་པར་བྱེད་པས་ན་སྡིག་པའོ། །ཡང་ན་སྡིག་པ་ཞེས་བྱ་བ་ནི། ལུས་ལ་སོགས་པ་ལས་བྱུང་བ་མི་འདོད་པའི་བག་ཆགས་སེམས་ལ་ཡོད་པར་བྱའོ་ཞེས་གསུངས་སོ། །ཡང་ན་སྡིག་པ་ཞེས་བྱ་བ་ནི། སྡུག་བསྔལ་གཅིག་ནས་གཅིག་ཏུ་བརྒྱུད་དེ། རབ་ཏུ་བྱུང་བ་ཉིད་ཀྱིས་ཤིན་ཏུ་
འཇོམས་པ་ཉིད་ཡིན་པའི་ཕྱིར་ན། སྡིག་པ་ཞེས་གསུངས་སོ། །ཡང་ན་སྡིག་པ་ཐམས་ཅད་ཅེས་པ་ནི། སེམས་ཅན་ཉོན་མོངས་པ་ཐམས་ཅད་དོ། །བྱང་བྱས་ནས་ཞེས་པ་ནི་ཟླ་བའི་དཀྱིལ་འཁོར་གྱི་གཟུགས་ཀྱི་སྟེང་གི་གཟུགས་ལས་འོད་ཟེར་དང་། ལྷའི་སྐུ་བསམ་གྱིས་མི་ཁྱབ་

71-1-263a

ཅིང་། དཔག་ཏུ་མེད་པ་འཕྲོས་པས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་ནས། ཐར་པ་དང་ཐམས་ཅད་མཁྱེན་པ་ལ་བཀོད་པའོ། །དཔེར་ན་མེ་ཡིས་རྩྭ་བསྲེག་པ། །རླུང་གིས་ཐལ་བ་མྱུར་དུ་དེད། །དེ་བཞིན་ཚེ་རབས་སྔ་མ་ལ། །བསགས་པའི་སྡིག་པ་
ཐམས་ཅད་བསྲེགས། །དཔེར་ན་ཆར་པ་བབ་གྱུར་ཏེ། །རི་ལས་འབབ་ཆུ་འབབ་པ་ཡིས། །ས་ཡི་སྟེང་གི་ཕྱག་དར་དང་། །ཉལ་ཉིལ་ཐམས་ཅད་འདེད་པར་འགྱུར། །དེ་བཞིན་གཟུངས་འདི་མཐོང་བ་དང་། །ཐོས་པ་ཙམ་གྱིས་སྡིག་པ་འབྱང་། ཞེས་གསུངས་སོ། །སྡུག་བསྔལ་
ཞེས་བྱ་བའི་ངོ་བོ་ནི། ལུས་དང་སེམས་ལ་གནོད་པའི་མཚན་ཉིད་བཀྲེས་པ་དང་། སྐོམ་པ་དང་། བསད་པ་དང་། ཡིད་མི་བདེ་བ་ལ་སོགས་པའི་རང་བཞིན་ནོ། །ངེས་པའི་ཚིག་ནི་ཅིའི་ཕྱིར་ན་སྡུག་བསྔལ། ལུས་སེམས་ངལ་ཞིང་དུབ་པས་ན་སྡུག་བསྔལ་ལོ། །ཐམས་ཅད་ཅེས་པ་ནི་
སྡུག་བསྔལ་གསུམ་མམ། བརྒྱད་ལ་སོགས་པ་ལ་བྱའོ། །སྡུག་བསྔལ་གསུམ་ནི་སྡུག་བསྔལ་གྱི་སྡུག་བསྔལ་དང་། གྱུར་བའི་སྡུག་བསྔལ་དང་། འདུ་བྱེད་ཀྱི་སྡུག་བསྔལ་ལོ། །སྡུག་བསྔལ་བརྒྱད་ནི། སྐྱེ་བའི་སྡུག་བསྔལ་དང་། རྒས་པའི་སྡུག་བསྔལ་དང་། ན་བའི་
སྡུག་བསྔལ་དང་། འཆི་བའི་སྡུག་བསྔལ་དང་། དགྲ་སྡང་བ་དང་ཕྲད་ཀྱིས་དོགས་པའི་སྡུག་བསྔལ་དང་། གཉེན་བྱམས་པ་དང་བྲལ་གྱིས་དོགས་པའི་སྡུག་བསྔལ་དང་། འདོད་པ་བཙལ་གྱིས་མི་རྙེད་པའི་སྡུག་བསྔལ་དང་། ཡོད་པ་བརླག་གིས་དོགས་པའི་སྡུག་བསྔལ་ལོ། །
མེད་པར་བྱེད་ཅེས་པ་ནི། རྒྱུ་ཉོན་མོངས་པ་མེད་པས། འབྲས་བུ་སྡུག་བསྔལ་མི་འབྱུང་ངོ་། །རྒྱུད་དོ་ཅོག་གི་རྩ་བ་སྟེ། །དཔལ་ཀུན་གྱིས་ནི་ལེགས་པར་བརྒྱན། །འོད་ཟེར་དང་ལྷའི་སྐུ་འཕྲོས་པ་ཚུར་བཏུས་པའི་དོན་ཏོ། །རྒྱུད་དོ་ཅོག་ཅེས་པ་ནི། འོད་ཟེར་དང་ལྷའི་སྐུའི་རྒྱུད་ཐམས་
ཅད་ཀྱིས་ནམ་མཁའི་ཁམས་གང་བས་ན། རྒྱུད་དོ་ཅོག་གསུངས་སོ། །ཀྱི་ཞེས་པ་ནི་དྲུག་པ་འབྲེལ་པ་སྟོན་པར་བྱེད་པའི་སྒྲ་སྐྱེས་བུའིའོ། །རྩ་བ་ཞེས་པ་ནི་ཟླ་བའི་སྟེང་གི་གཟུངས་རིངས་སོ། །སྟེ་ཞེས་པ་ནི་ལྷག་མ་ལུས་པའི་ཚིག་སྟེ། ཡང་འོད་ཟེར་དང་ལྷའི་སྐུ་སླར་ལ་ཚུར་འདུས་

71-1-263b

པའོ། །དེས་ན། རྒྱུད་དོ་ཅོག་གི་རྩ་བ་སྟེ། །ཞེས་གསུངས་སོ། །དཔལ་ཀུན་ཞེས་པ་ནི། འོད་ཟེར་དང་ལྷའི་སྐུ་ཡིས་སེམས་ཅན་གྱི་དོན་བྱས་པ་དང་། འཕགས་པ་མཆོད་པས་བསོད་ནམས་དང་། ཡེ་ཤེས་ཀྱི་ཚོགས་བསགས་པའོ། །གྱིས་ཞེས་པ་ནི་དྲུག་པ་འབྲེལ་པར་བྱེད་པའི་
སྒྲའོ། །ལེགས་པར་བརྒྱན་ཞེས་པ་ནི་ཟླ་བའི་སྟེང་ན་གཟུགས་ཚོགས་གཉིས་ཀྱི་ཡོན་ཏན་དང་ལྡན་པའམ། མཛེས་པར་བྱེད་པ་ནི། དཔལ་ཀུན་གྱིས་ནི་ལེགས་པར་བརྒྱན། །ཞེས་གསུངས་སོ། །དེས་ནི་འོད་ཟེར་སྤྲོ་བསྡུ་ལས། གཟུགས་ཀྱི་ལྷ་བསྐྱེད་པ་བསྟན་ཏེ། བཤད་ཟིན་
ཏོ། །ཡང་རྒོལ་ཏེ་གསང་སྔགས་སྤྱིའི་རྒྱུད་ཀྱི་ལུགས་ཀྱིས། ལྷའི་སྐུ་བསྒོམས་པས་སྐྱོ་ན། བཟླས་བརྗོད་བྱ་བ་སྟོན་པ་ཡིན་པ་ལ། གཟུངས་འདིའི་ནང་དུ་ལྷའི་སྐུ་བསྒོམས་པའི་རྗེས་ལ། བཟླས་བརྗོད་བྱ་བ་མི་སྟོན་པར། འོད་ཟེར་སྤྲོ་བསྡུ་དང་། བཟླས་བརྗོད་དང་། བསྙེན་སྒྲུབ་
གང་གི་དོན་དུ་བྱ་བའི་གང་ཟག་སྟོན་པ་ཅི་ལས་དགོངས་ཤེ་ན། དེ་ལྟར་གཟུངས་ཀྱི་དགོངས་པ་ནི། །འོད་ཟེར་སྤྲོ་བསྡུ་ཡང་སེམས་ཅན་དབང་པོ་ཉམས་པ་ལ་སོགས་པའི་གང་ཟག་འདི་དག་གི་དོན་དུ་བྱས་པའི་ཕྱིར་དང་། འོད་ཟེར་སྤྲོ་བསྡུ་དང་། བསྙེན་སྒྲུབ་བྱ་བ་ཡང་གང་ཟག་འདི་
རྣམས་ཀྱི་དོན་དུ་བྱེད་པ་ཡིན་པའི་ཕྱིར་ན། ལྷའི་སྐུ་བསྒོམ་པ་གསུངས་པའི་རྗེས་ལ། ལྷའི་སྐུ་བསྒོམས་ནས། འོད་ཟེར་སྤྲོ་བསྡུ་དང་བཟླས་བརྗོད་དང་། བསྙེན་སྒྲུབ་གང་གི་དོན་དུ་བྱ་བའི་གང་ཟག་བསྟན་གྱི། བཟླས་བརྗོད་བྱ་བ་དང་། བསྙེན་སྒྲུབ་བྱ་བ་མ་གསུངས་པ་ནི། དེ་ལ་དགོངས་པའོ། །
ཡང་ན་ཚིག་ཚོགས་ཆུང་བར་བྱ་བའི་ཕྱིར་རོ།    །ད་ནི་འོད་ཟེར་སྤྲོ་བསྡུ་གང་གི་དོན་དུ་བྱ་བའི་གདུལ་བྱ་བཤད་པར་བྱ་སྟེ། འོ་ན། སྡིག་པ་ཐམས་ཅད་བྱང་བྱས་ནས། །སྡུག་བསྔལ་ཐམས་ཅད་མེད་པར་བྱེད། །ཅེས་གསུངས་ཏེ། གང་གི་སྡིག་པ་བྱང་བར་བྱས་ནས། སྡུག་བསྔལ་མེད་པར་
བྱེད་ཅེ་ན། སེམས་ཅན་དབང་པོ་ཉམས་པ་དང་། །བྱ་བ་ལ་སོགས་པ་དེ་དག་གི་སྡིག་པ་བྱང་ནས། སྡུག་བསྔལ་མེད་པར་བྱེད་དོ། །སེམས་ཅན་ཞེས་པ་ནི་འགྲོ་བ་རིགས་དྲུག་ཐམས་ཅད་དོ། །དབང་པོ་ཞེས་པ་ནི་མིག་ལ་སོགས་པའི་དབང་པོ་དྲུག་དང་། དད་པ་ལ་སོགས་པའི་དབང་པོ་ལྔའོ། །

71-1-264a

ཉམས་པ་ཞེས་པ་ནི། གདོན་ཆེན་པོ་བརྒྱད་ལ་སོགས་པས་བྱིན་གྱིས་བརླབས་པའོ། །དེ་ལ་དབང་པོ་དྲུག་ཉམས་པ་ནི། མིག་ཏུ་ལིང་ཏོག་ཞུགས་པ་དང་། །རྣ་བ་འོན་པ་ལ་སོགས་པའོ། །འོག་མ་ལྔ་ཉམས་པ་ནི་སྔར་དད་པ་ཆེ་བ་ལ། ཕྱིས་ཆུང་བར་སོང་བ་དང་
སྔར་བརྩོན་འགྲུས་ཆེ་བ་ལ་ཕྱིས་ཆུང་ངུར་སོང་བ་དང་སྔར་དྲན་པ་གསལ་བ་ལ་ཕྱིས་བརྗེད་པར་སོང་བ་དང་། སྔར་ཏིང་ངེ་འཛིན་བཟང་པོ་ཡོད་པ་ལ་ཕྱིས་ངན་པར་སོང་བ་དང་། སྔར་ཤེས་རབ་རྣོན་པོ་ལས། ཕྱིས་ཤེས་རབ་རྟུལ་དུ་སོང་བའོ། །དེ་ཚོ་ཐམས་ཅད་ཀྱང་གདོན་གྱིས་བྱས་པར་དཔུང་
བཟངས་དང་། རིག་པ་མཆོག་ལས་གསུངས་སོ། །དེ་ཚོ་གང་ཉམས་ཀྱང་འདིའི་བསྙེན་པ་སྔོན་དུ་སོང་བས། འདིའི་དཀྱིལ་འཁོར་བྱས་ཏེ་ཁྲུས་དང་། བྱབ་པ་དང་། བསྐྲད་པ་དང་། སྲུང་བ་ལ་སོགས་པ་བྱས་ན་གྲོལ་བར་འགྱུར་རོ། །བསྙེན་སྒྲུབ་རྣམ་པ་གཉིས་ནི་འདི་དག་ཐམས་ཅད་ལ་
སྦྱར་བར་བྱའོ། །ཚེ་ཟད་པ་དང་། ཞེས་པ་ནི། སྔོན་གྱི་རྣམ་སྨིན་གྱིས་ཚེ་ཟད་པ་ལ་ཆོ་ག་འདི་བྱས་ཏེ། བསྐྲད་པ་དང་། རྡོ་རྗེས་བྱབ་པ་ཙམ་གྱིས། དེའི་ཚེ་ཡོངས་སུ་ཟད་པ་ལས་ཀྱང་རྣམ་པར་འཕེལ་ཏེ། རིང་དུ་བདེ་བར་འཚོ་བར་འགྱུར་རོ། །ཚེ་ཉམས་དང་ཞེས་པ་ནི། སྔོན་གྱི་རྣམ་སྨིན་གྱིས་
ཚེ་མ་ཟད་ཀྱང་འཕྲལ་གྱི་རྐྱེན་གྱིས་སྲོག་གི་བར་ཆད་དུ་འགྱུར་བ་ལ་ཡང་། འདིའི་ཆོ་ག་བྱས་ན་ཚེའི་བར་ཆད་དང་། དུས་མ་ཡིན་པར་འཆི་བ་བརྒྱད་རྣམ་པ་ཐམས་ཅད་དུ་མི་འབྱུང་ངོ་། །འབྱུང་བར་མི་འགྱུར་རོ། །དཔེར་ན་སྐམ་པོར་འགྲེ་ལྡོག་ཉ། །ཆུ་དང་བྲལ་བས་འཆི་སྒོར་འགྲོ། །ལ་ལས་སླར་
ཡང་ཆུ་བོར་ན། །དེ་ན་གནས་ཤིང་ཡང་རྩེའོ། །དེ་བཞིན་དྲན་པ་ཙམ་གྱིས་ཀྱང་། །མི་རྣམས་ཚེ་ནི་ཟློག་པར་བྱེད། །ཅེས་གསུངས་སོ། །ཕུན་སུམ་ཚོགས་པ་ནི། བཀྲ་ཤིས་པའམ། བསམ་པ་ཐམས་ཅད་ཡིད་བཞིན་དུ་གྲུབ་པ་སྟེ། དེ་ལས་བཟློག་པ་སྟེ། ཕུན་སུམ་ཚོགས་མིན་ཞེས་
གསུངས་སོ། །གང་ཆགས་དང་ཞེས་པ་ནི། གང་ཟག་དེའི་རྒྱུད་ལ་བཀྲ་མི་ཤིས་པ་ཐམས་ཅད་དང་ལྡན་པའོ། །ལྷ་རྣམས་ཞེས་པ་ནི། འཇིག་རྟེན་པའི་ལྷ་དང་། ཡེ་ཤེས་ཀྱི་ལྷ་མང་པོ་ཡོད་པས་ན་ལྷ་རྣམས་ཞེས་གསུངས་སོ། །རྒྱབ་ཀྱིས་ཕྱོགས་པ་དང་ཞེས་པ་ནི། བདག་ཉིད་ཀྱི་སྐུ་

71-1-264b

གསུང་ཐུགས་ཀྱི་དམ་ཚིག་ཉམས་པའི་དབང་གིས། ལྷ་གཉིས་པོ་དེ་མ་རྗེས་ཏེ། བདག་ལ་མགོན་སྐྱབས་དང་། དཔུང་གཉེན་མི་བྱེད་པ་དང་། སྐྱབས་བྱིན་ལ་སོགས་པ་མི་བྱེད་པའོ། །འཇིག་རྟེན་པའི་ལྷ་རྒྱབ་ཀྱིས་ཕྱོགས་པ་ནི། འཕངས་པ་སྟེ་བདག་གི་སྟོང་གྲོགས་མི་བྱེད་པའོ། །འཇིག་
རྟེན་ལས་འདས་པའི་ལྷ་རྒྱབ་ཀྱིས་ཕྱོགས་པ་ནི། དབང་བསྐུར་བའི་དུས་སུ། སློབ་དཔོན་གྱི་སྔགས་དང་། ཕྱག་རྒྱ་དང་། ཏིང་ངེ་འཛིན་གྱིས་ཡེ་ཤེས་སེམས་དཔའ་བསྟིམས་ནས་གཞན་པ་བདག་ཉིད་ཀྱིས་དམ་ཚིག་ཉམས་པའི་དབང་གིས་སྙིང་ག་དྲལ་ཏེ་གཤེགས་པའོ། །དེ་ལྟར་
གྱུར་ན་ཡང་། བདག་ཉིད་ལ་ཁྲུས་ཀྱི་ཆོ་ག་འདི་བྱས་པས། དམ་ཚིག་ཉམས་པ་ལས་བསྐོངས་ཏེ། བྱིན་གྱིས་རློབ་པ་ལ་སོགས་པ་བྱེད་པར་འགྱུར་རོ། །འཇིག་རྟེན་པའི་ལྷ་རིང་དུ་འཕངས་ཀྱང་ཁུགས་ཏེ། དཔུང་གཉེན་ལ་སོགས་པ་བྱེད་པར་འགྱུར་རོ། །མཛའ་བའི་སྐྱེ་བོ་ཞེས་པ་
ནི། ཕེབས་པར་སྨྲ་བའམ། ཡིད་བཅུགས་པ་ལ་སོགས་པ་བྱེད་པའོ། །སྡུག་པའི་སྐྱེ་བོ་ཕེབས་པར་སྨྲ་བ་ལ་སོགས་པ་མ་ཡིན་གྱི་ཕན་ཚུན་གཅིག་ལ་གཅིག་ཡིད་དུ་འོང་བ་དང་། སྙིང་དུ་སྡུག་པའོ། །སྡང་བ་ཞེས་པ་ནི། བདག་ཉིད་ཀྱིས་ཉེས་པ་ཅི་ཡང་མ་བྱས་པར། དེ་གཉིས་
བདག་ལ་སྡང་བར་གྱུར་པ་ཡང་གདོན་གྱིས་བྱས་པར་རིག་པ་མཆོག་གི་རྒྱུད་ལས་གསུངས་སོ། །བྲན་སོགས་ཞེས་པ་ནི་རང་གི་འཁོར་དང་གཡོག་ལ་སོགས་པའོ། །གཟའ་ལ་སོགས་ཞེས་པ་ནི། རང་གི་བུ་དང་ཆུང་མ་ལ་སོགས་པའོ། །གཙེས་པ་དང་ཞེས་པ་ནི། དེ་ལ་དེ་ཚེ་གནོད་པ་
བྱེད་པའོ། །ཕན་ཚུན་མཐུན་པ་མ་ཡིན་དང་། །ཞེས་པ་ནི། སྐྱེ་བོ་ནང་ཕན་ཚུན་གནོད་པ་དང་། རྣམ་པར་རྩོད་པའོ། །རྩོད་པ་ནི་གཅིག་དང་ཤགས་འགྱེད་པའོ། །རྣམ་པར་རྩོད་པ་ནི། གཡུལ་བཤམས་ནས་འཐབ་པའོ། །ནོར་འགྲིབས་པས་ནི་གནོད་པ་དང་། །ཞེས་པ་ནི། བདག་
ཉིད་སྔར་ཕྱུག་པ་ལས། ཕྱིས་དབུལ་པོར་གྱུར་པ་འམ། ཚོང་བྱས་ཀྱང་ལེགས་པར་མི་འོང་བ་དང་། སོ་ནམས་བྱས་ཀྱང་འབྲས་བུ་ལ་སོགས་པ་མང་པོ་མི་འབྱུང་བའོ། །མྱ་ངན་ལས་བྱུང་བའི་གནོད་པ་ཞེས་བྱ་བ་ནི། དཔེར་ན་རྒན་མོ་ཅིག་གི་བུ་གཅིག་པ་ཤི་སྟེ། ཡིད་ལ་བུའི་ཁ་དོག་

71-1-265a

དང་། དབྱིབས་ཀྱི་རྣམ་པ་ཡིད་ལ་བྱས་ཤིང་། ངག་ཏུ་བུ་བུ་ཞེས་བརྗོད་པས། བུ་ལ་སེམས་ཟིན་ནས་བུ་ཤི་བའི་གཟུགས་མིག་སྔར་བྱུང་བས། ངའི་བུ་ཁྱེར་བའི་འདྲེ་བྱུང་ངོ་ཟེར་བའི་ལོག་པའི་ཤེས་པ་ལ་བརྟེན་ནས། གདོན་ལ་སོགས་པ་འཇུག་གོ། །ངལ་བ་ལས་
བྱུང་བའི་གནོད་པ་དང་ཞེས་པ་ནི། དག་ཉིད་ཀྱི་ལུས་དང་སེམས་དུབ་པར་གྱུར་ནས་ཡིད་འཁྲུལ་ནས། འདྲེ་ལ་སོགས་པས་ཁྱེར་བ་ཡིན་ནམ་སྙམ་པའི་ལོག་པའི་ཤེས་པ་ལ་བརྟེན་ནས། གདོན་ལ་སོགས་པ་འཇུག་པར་འགྱུར་རོ། །འཇིགས་པ་དང་ནི་ཞེས་པ་ནི། སྦྲུལ་དང་གླང་
པོ་ཆེའི་འཇིགས་པ་ལ་སོགས་པ་བརྒྱད་ཡོད་དོ། །ཡང་ན་དམྱལ་བའི་འཇིག་རྟེན་མཐའ་ཡས་པ་དང་། ཡི་དྭགས་ཀྱི་འཇིག་རྟེན་མཐའ་ཡས་པ་དང་། དུད་གྲོའི་འཇིག་རྟེན་མཐའ་ཡས་པ་དང་། གཤིན་རྗེའི་འཇིག་རྟེན་མཐའ་ཡས་པ་དང་། བགྲོད་དཀའ་བའི་འཇིག་
རྟེན་མཐའ་ཡས་པ་དང་། སྐྱེ་བའི་འཇིགས་པ་མཐའ་ཡས་པ་དང་། ན་བའི་འཇིགས་པ་མཐའ་ཡས་པ་དང་། འཆི་བའི་འཇིགས་པ་མཐའ་ཡས་པའོ། །ཕོངས་པ་དང་ཞེས་པ་ནི། བདག་ཉིད་དང་པོ་ནས་དབུལ་བར་གྱུར་པའོ། །གཟའ་དང་ཞེས་པ་ནི་གཟའ་ཆེན་པོ་རཱ་ཧུ་ལ་ལ་
སོགས་པ་བརྒྱད་དོ། །རྒྱུ་སྐར་ཞེས་པ་ནི་སྨིན་དྲུག་ལ་སོགས་པ་ཉི་ཤུ་རྩ་བརྒྱད་དོ། །གཟའ་སྐར་ངན་པ་ལ་ན་བ་དང་། ཤི་བ་དང་། སྐྱེས་པ་ལ་སོགས་པ་བྱུང་ན། ཡང་འདིའི་ཆོ་ག་བྱས་ན་ངེས་པར་ཞི་བར་འགྱུར་རོ། །བྱད་སྟེམས་དང་ཞེས་པ་ནི། འཁྲུལ་འཁོར་ལ་སོགས་པར་བདག་གི་
མིང་རུས་ལ་སོགས་པ་བཅུག་པའམ། མི་བཟད་གདོན་གྱིས་ཞེས་པ་ནི་ལྷའི་གདོན་ལ་སོགས་པ་གདོན་ཆེན་པོ་བཅོ་བརྒྱད་ལས་དགེ་སློང་དང་། རྒྱལ་པོ་ལ་འཛིན་པའི་སྲིན་པོའི་གདོན་ལ་སོགས་པའི་གདོན་ཆེན་པོ་བཞིའོ། །ཉེན་པ་ཞེས་པ། སེམས་ཅན་གྱི་ལུས་སམ། སེམས་ལ་
ཞུགས་པའོ། །མྱ་ངན་ངལ་ནས་བྱུང་བ་ཡི། །རྨི་ལམ་སྡིག་པ་མཐོང་ན་ཡང་། །ཞེས་པ་ནི། གང་གི་རང་གི་རྨི་ལམ་དུ་བྱུང་བ་སྟེ། རྨི་ལྟས་ངན་པ་སུམ་ཅུ་རྩ་གཉིས་པོ་གང་བྱུང་ཡང་འདིའི་ཆོ་ག་བྱས་ན་བཟློག་གོ། །སྡིག་པ་མཐོང་ན་ཡང་ཞེས་པ་བཀྲ་མི་ཤིས་པའི་མཚན་མ་ལ་སོགས་པ་

71-1-265b

མཐོང་པའོ། །དེ་ཚོ་གང་བྱུང་ཡང་བཟླས་བརྗོད་བྱས་པའི་སྒོ་ནས། འོད་ཟེར་སྤྲོ་བསྡུ་དང་། ཁྲུས་ཀྱི་ཆོ་ག་བྱས་པས། དེ་དག་ཐམས་ཅད་ལས་གྲོལ་བར་འགྱུར་རོ། །དེས་ནི་བསྙེན་སྒྲུབ་གང་གི་དོན་དུ་བྱ་བའི་གདུལ་བྱ་བསྟན་ཏོ།    །ད་ནི་བསྙེན་པའི་དུས་ན་སྒྲ་ལ་གནས་པའི་བསམ་གཏན་
བསྟན་ཏེ། དེ་ལ་གསུམ། སྦྱོར་བའི་ཆོ་ག་སྔོན་དུ་བྱ་བ་དང་། སྒྲ་ལ་གནས་པའི་བསམ་གཏན་དངོས་དང་། དེ་བྱ་བའི་ཕན་ཡོན་ནོ། །དང་པོ་ནི། དེ་ནི་རབ་བཀྲུས་གཙང་མ་ཡིན། །བྱ་བ་དང་། གང་དག་ཡིད་དགེ་སེམས་དང་ཞིང་། །གཙང་མའི་གོས་ཀྱིས་རབ་བརྒྱན་ཏེ། །བྱ་བའི་ཚིག་
རྐང་གསུམ་གྱིས་སོ། །མདོ་སྡེ་དམ་པ་མཉན་པར་བྱ། །ཟབ་མོ་སངས་རྒྱས་སྤྱོད་ཡུལ་བ། །མདོ་སྡེ་དི་ནི་ཉན་བྱེད་ན། །ཞེས་པའི་ཚིག་རྐང་གསུམ་གྱིས་ནི་དངོས་གཞི་བསྟན་ཏོ། །མདོ་སྡེ་འདི་ཡི་གཟི་བརྗིད་ཀྱིས། །ཞེས་པ་ནས། སྡིག་པ་ཀུན་ལས་རྣམ་པར་ཐར། །ཞེས་པའི་
ཚིག་རྐང་བདུན་གྱིས་ཕན་ཡོན་བསྟན་ཏོ། །སྔོན་དུ་བྱ་བ་ནི། དེ་ཡང་སུ་སིདྡྷི་ཀ་ར་ལས། ལུས་དང་ངག་གི་གཙང་སྦྲ་དང་། །གསུམ་པ་ཡིད་ཀྱི་གཙང་སྦྲ་སྟེ། །བཞི་པ་བདེན་པར་སྨྲ་བའོ། །ལྔ་པ་ཕྱི་ཡི་གཙང་སྦྲར་བཤད། །ཅེས་གསུངས་སོ། །དེས་ནི་ཞེས་པས་ནི་སྒྲུབ་པ་པོ་བསྟན་
ཏོ། །རབ་བཀྲུས་ཞེས་པ་ནི། ཕྱིའི་གཙང་སྦྲ་སྟེ། ས་དང་ཆུའི་ཁྲུས་དང་། འཐོར་འཐུང་ཉེ་རེག་གི་བར་དུའོ། །གཙང་མ་ཞེས་པ་ནི། མི་གཙང་བ་དག་པའི་གནས་སྐབས་སོ། །ཡིད་ཅེས་པ་ནི། དག་པར་བྱས་ནས་སྒྲ་ལ་གནས་པའི་བསམ་གཏན་བྱ་བའི་དོན་ཏོ། །འདིས་མཚོན་ཏེ། 
ཆོ་ག་ཡན་ལག་དྲུག་གིས་ལྷ་བསྐྱེད་པའི་སྔོན་དུ་ཡང་། ཁྲུས་དང་གཙང་སྦྲ་ལ་སོགས་པ་བྱའོ། །གང་དག་ཡིད་དགེ་ཞེས་པ་ནི་ཡིད་ཆེས་པའི་དད་པས་ཀུན་ནས་བསླངས་ནས། ལུས་ངག་ཡིད་གསུམ་གྱི་སྒོ་ནས་སྡིག་པ་མི་དགེ་བ་མི་བྱེད་པའོ། །སེམས་དང་ཞིང་ཞེས་པ་ནི། དད་པ་རྣམ་པ་
གསུམ་ལས་དང་བའི་དད་པ་སྟེ། བདག་ཉིད་ཀྱི་སེམས་ཉོན་མོངས་པའི་རྙོག་མ་དང་མི་ལྡན་པའོ། །གཙང་མའི་གོས་ཞེས་པ་ནི་སྔགས་པས་ཐང་གོས་དཀར་ལ་ཤིན་ཏུ་འཇམ་པ་ལ། དུས་གསུམ་དུ་བཀྲུ་བ་དང་། ཡང་གུ་གུལ་གྱི་དུད་པས་བདུག་ཅིང་སྔགས་བཟླས་སོ། །ཡང་ན་བསང་གཏོར་

71-1-266a

བྱའོ། །དེ་ཡང་སུ་སིདྡྷི་ཀ་ར་ལས། སྔགས་པས་ཐང་གོས་མི་སྤང་ཞིང་། །དཀར་ལ་ཤིན་ཏུ་འཇམ་པོ་དེ། །ཉིན་གཅིག་བཞིན་དུ་བསང་བར་བྱ། །ཞེས་གསུངས་སོ། །རབ་བརྒྱན་ཏེ་ཞེས་པ་ནི། སྔགས་གོས་ཀྱིས་སྔགས་པ་ཤིན་ཏུ་མཛེས་པར་བྱས་པའོ། །སྒྲ་ལ་
གནས་པའི་བསམ་གཏན་གྱི་སྦྱོར་བའི་ཆོ་གའི་སྔོན་དུ་བྱ་བ་བཤད་ཟིན་ཏོ།།      །།ད་ནི་སྒྲ་ལ་གནས་པའི་བསམ་གཏན་གྱི་དངོས་གཞིའི་ཆོ་ག་དངོས་བསྟན་ཏེ། མདོ་སྡེ་ཞེས་པ་ནི། མཚན་ཉིད་མདོར་བསྡུས་ནས་བསྟན་དུ་རུང་བ་དང་། གཉེན་པོ་རྣམ་པར་འགལ་བའི་སྒོ་ནས་སྤོང་བས་ན་མདོ་སྡེའོ། །དམ་ཞེས་    
པ་ནི། བསྐྱེད་རིམ་གསུམ་ཀ་བྱ་བར་འཐད་པས་ན། དམ་པ་ཞེས་གསུངས་སོ། །ཡང་ན་མཚན་ཉིད་ཀྱི་ཐེག་པ་ལས་མཆོག་ཏུ་གྱུར་པས་ན། དམ་པ་ཞེས་བྱའོ། །ཇི་ལྟར་མཆོག་ཏུ་གྱུར་ནས་མཚན་ཉིད་ཀྱི་ཐེག་པས་ཁྲུས་དང་གཙང་སྦྲ་དང་། དཀའ་ཐུབ་ལ་སོགས་པའི་སྒོ་ནས་
དངོས་གྲུབ་བསྒྲུབས་ཀྱང་ཚེ་འདི་ལ་མཁའ་སྤྱོད་ཀྱི་དངོས་གྲུབ་ལ་སོགས་པ་མི་ཐོབ་ལ། གཟུངས་འདིས་ནི་ཚེ་འདི་ལ་མཁའ་སྤྱོད་ལ་སོགས་པའི་དངོས་གྲུབ་ཐོབ་པར་འགྱུར་བས་ན། དམ་པ་ཞེས་གསུངས་སོ། །མཉན་པར་བྱ་ཞེས་པ་ནི་ངག་གི་བརྗོད་བྱ་རྗོད་བྱེད་ཀྱི་ཚིག་སྤངས་ཏེ། 
བདག་ཉིད་ཀྱི་སེམས་སྒྲ་སྤྱིའི་རྣམ་པར་སྣང་བའོ། །ཟབ་མོ་ཞེས་པ་ནི། སྒྲུབ་པ་པོའི་སྒྲ་ལ་གནས་པའི་བསམ་གཏན་བྱེད་པ་དེ། ཐ་མལ་པའི་སོ་སོའི་སྐྱེ་བོས་མི་རྟོགས་པས་ན་ཟབ་མོ་ཞེས་པའོ། །འོ་ན་སྒྲ་ལ་གནས་པའི་བསམ་གཏན་ཏེ་སུས་རྟོགས་ཤེ་ན། སངས་རྒྱས་སྤྱོད་ཡུལ་བ་ཞེས་པ་
གསུངས་ཏེ། སངས་རྒྱས་ཉག་གཅིག་ཁོ་ནའི་སྤྱོད་ཡུལ་ཡིན་པས་དེས་མཁྱེན་ཏོ། །མདོ་སྡེ་འདི་ནི་ཉན་བྱེད་ན། །ཞེས་པ་ནི་སྒྲ་ལ་གནས་པའི་བསམ་གཏན་འདི་བྱེད་ན་ཞེས་པའི་དོན་ཏོ། །སྒྲ་ལ་གནས་པའི་བསམ་གཏན་གྱི་མཚན་ཉིད་བཤད་ཟིན་ཏོ།།      །།ད་ནི་སྒྲ་ལ་གནས་པའི་བསམ་
གཏན་གྱི་ཕན་ཡོན་བཤད་པར་བྱ་སྟེ། མདོ་སྡེ་འདི་ཡི་གཟི་བརྗིད་ཀྱིས། །ཞེས་པ་ནི་སྒྲ་ལ་གནས་པའི་བསམ་གཏན་གྱི་ཕན་ཡོན་གྱིས་ཞེས་པའི་དོན་ཏོ། །སྲོག་ཆགས་དག་ནི་ཐམས་ཅད་ཀྱི། །ཞེས་པ་ནི་འགྲོ་བའི་རིས་ལྔའོ། །མི་བཟད་པ་ཡི་ནད་རྣམས་ཀུན། །ཞེས་པ་ནི་མཛེའི་ནད་ལ་

71-1-266b

སོགས་པའོ། །དེ་དག་ཐམས་ཅད་ཞི་བར་བལྟ། །ཞེས་པ་ནི་མི་བཟད་པའི་ནད་ཆེན་པོ་ལས་ཐར་བར་བྱེད་ཅེས་པའི་དོན་ཏོ། །ཚེ་དང་བསོད་ནམས་འཕེལ་བར་འགྱུར། །ཞེས་པ་ནི་སྔོན་གྱི་རྣམ་པར་སྨིན་པ་ལས་ཚེ་སླར་ནུར་ཏེ་རིང་པོར་ཐུབ་པའོ། །དཔེར་ན་བཅུད་ལེན་གྱི་སྨན་སྦྱོར་ལྟ་བུའོ། །
བསོད་ནམས་འཕེལ་བར་འགྱུར་ཞེས་པ་ནི། བདག་གི་ཕུན་སུམ་ཚོགས་པ་ཐམས་ཅད་རྒྱས་པར་འགྱུར་བའོ། །དཔེར་ན་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གླེགས་བམ་དུ་འདྲིའམ། བྲིས་ནས་འཛིན་ཏམ། འཆང་ངམ། ཀློག་གམ། ཀུན་ཆུབ་
པར་བྱེད་པ་ལ་སོགས་པ་བྱས་ནས། མེ་ཏོག་ལ་སོགས་པས་མཆོད་པ་དང་། རིམ་གྲོ་ལ་སོགས་པ་བྱས་ན། དེ་དང་དེའི་བསོད་ནམས་འཕེལ་བར་འགྱུར་བ་ལྟ་བུ་འམ། ས་ཆེན་པོ་ལ་ས་བོན་བཏབ་ནས་རྒྱུ་རྐྱེན་ཚོགས་པར་གྱུར་ནས། རྣམ་པར་འཕེལ་བར་འགྱུར་བ་ལྟ་བུའོ། །སྡིག་
པ་ཀུན་ལས་རྣམ་པར་ཐར། །ཞེས་པ་ནི་ཡིད་དུ་མི་འོང་བ་ཐམས་ཅད་མི་འབྱུང་བའོ། །ཡང་ན་མི་དགེ་བ་བཅུ་དང་། ལས་ཀྱི་སྒྲིབ་པ་གདོན་མི་ཟ་བར་མྱོང་བར་འགྱུར་བ་ཐམས་ཅད་སྤངས་པའོ། །དཔེར་ན་མི་དགེ་བ་བཅུ་སྤངས་ནས། དགེ་བ་བཅུ་སྤྱོད་པའི་གང་ཟག་ལྟ་བུའོ། །སྒྲ་ལ་གནས་
པའི་བསམ་གཏན་བྱ་བར་འདོད་ན། བསམ་གཏན་ཕྱི་མ་ལས་ཀྱང་། གསང་སྔགས་ལ་གནས་དངོས་གྲུབ་སྟེར། །སྒྲ་གནས་རྣལ་འབྱོར་སྟེར་བར་དྲན། །སྒྲ་མཐར་ཐར་པ་སྟེར་བ་ཉིད། །འདི་དག་དེ་ཉིད་གསུམ་པ་ཡིན། །ཞེས་གསུངས་སོ། །སྒྲ་ལ་གནས་པའི་བསམ་གཏན་ནི། 
བདག་ཉིད་ལྷར་བསྐྱེད་པ་མི་དམིགས་པར་བསམས་ལ་བདེ་བའི་རྗེས་ལ། བདག་ཉིད་ཀྱི་སེམས་སྟོང་པ་ཉིད་ཀྱི་ངང་ལས། ནམ་མཁའ་ལས་ཟླ་བའི་དཀྱིལ་འཁོར་གྱི་སྟེང་ན། གཟུངས་སྔགས་ལ་སོགས་པ་དཀར་ཤ་རེ་ཡོད་པར་བསམས་ལ། ཡི་གེ་དེའི་འོད་ཟེར་མེ་འབར་བ་ལྟ་བུར་
བསམས་ཏེ། ཕྱི་ནས་དེ་ཚོ་ཡང་མི་དམིགས་པར་བསམས་ལ། བདག་ཉིད་ཀྱི་སེམས་ན་མོ་རཏྣ་ཏྲ་ཡཱ་ཡ་བྱ་བ་ནས། ཨ་མྲྀ་ཏེ་ཧཱུཾ་ཕཊ་བྱ་བའི་བར་དུ་ཡི་གེའི་རང་སྒྲ་སྒྲོགས་པ་དེ་ཡང་དཔེར་ན་དྲིལ་བུའི་སྒྲ་དང་འདྲ་བར་རྒྱུན་མི་འཆད་པར་བདག་ཉིད་ཀྱི་སེམས་སྒྲ་སྤྱི་ཡི་རྣམ་པར་གྲག་པར་བསམ་

71-1-267a

མོ། །དེ་ནི་སྒྲ་ལ་གནས་པའི་བསམ་གཏན་ནོ། །དེ་མི་བྱེད་ན་དམིགས་པ་གསུམ་གྱིས་བྱ་བའམ། ཡན་ལག་བཞིས་བྱ་སྟེ། དམིགས་པ་གསུམ་ནི། སྒྲ་དང་སེམས་དང་གཞི་ལ་གཞོལ། །གསང་སྔགས་ཡི་གེ་བཞི་ལ་གནས། །ཞེས་བསམ་གཏན་ཕྱི་མ་
ལས་གསུངས་སོ། །གསང་སྔགས་ཀྱི་ཡི་གེ་དང་། དེའི་གདན་ཟླ་བའི་དཀྱིལ་འཁོར་དང་། དེ་བཞིན་གཤེགས་པའི་སྐུའོ། །དང་པོ་ནི་གཟུགས་ལ་དམིགས། དེ་ནས་ཟླ་བའི་དཀྱིལ་འཁོར་ལ་དམིགས། དེ་ནས་བཅོམ་ལྡན་འདས་ལ་དམིགས་སོ། །ཡན་ལག་བཞི་ནི། བཅོམ་
ལྡན་འདས་བུམ་པའི་ནང་ན་བཞུགས་པ་དང་། བདག་ཉིད་ལྷ་རུ་བསྐྱེད་པ་དང་། དེ་གཉིས་ཀྱི་ཐུགས་ཀ་ན་ཟླ་བའི་དཀྱིལ་འཁོར་རེ་རེ་ཡོད་པ་དང་། དེའི་སྟེང་ན་གཟུངས་རིངས་སམ། ཡང་སྙིང་ངམ། རིགས་ཀྱི་སྙིང་པོ་གང་རུང་གནས་པར་བསམ་མོ། །འོ་ན་ལྷ་ནི་གཉིས་སུ་བཤད་ལ། 
སྔགས་དང་། ཟླ་བ་གཉིས་གཉིས་སུ་མི་འཆད་པ་ཅིའི་ཕྱིར་ཞེ་ན། ནང་དུ་བསྡུས་ཙམ་ན་གསུམ་ལས་མེད་པས་དེ་རུ་ཡང་འདྲ་གསུང་ངོ་། །ཡང་ན་གསང་སྔགས་དང་བཟླས་པ་གཉིས་ནི་རིགས་མི་མཐུན་ཡང་རྣམ་པར་བཅད་པའི་ལྡོག་པ་མཚུངས་ལ་ལྷ་ནི་མི་མཚུངས་པ་ཡང་སྲིད་པས་ན་ལྷ་ལ་
གསུམ་དུ་བཤད་པ། སྔགས་དང་ཟླ་བ་གཉིས་ལ་རིགས་འདྲ་བས་རེ་རེར་མ་བཤད་དོ། །བཟླས་བརྗོད་བྱེད་པའི་ཟློས་ལུགས་ནི་གཉིས་ཏེ། རྡོ་རྗེའི་ཚིག་གམ། ཤུ་བུའི་སྦྱོར་བས་ཧ་ཅང་མི་དལ་མི་མྱུར་བར་སྔགས་ཀྱི་ཡི་གེ་བརྗོད་ཅིང་བཟླས་བརྗོད་བྱའོ། །དེ་གཉིས་ཀྱི་གྲངས་ནི་གཙོ་འཁོར་ཡོད་ན་
གཙོ་བོ་ལ་འབུམ་ཕྲག་གཅིག འཁོར་རྣམས་ལ་ཁྲི་ཕྲག་རེ་རེ་བྱའོ། །ཡི་གེའི་གྲངས་ཀྱིས་བྱེད་ན། བཅོ་ལྔ་མན་ཆད་ཀྱི་ཡི་གེ་རེ་རེ་ཞིང་འབུམ་ཕྲག་རེ་རེ་བྱའོ། །བཅུ་དྲུག་ཡན་ཆད་ནས། སུམ་ཅུ་རྩ་གཉིས་མན་ཆད་ལ་ནི་འབུམ་ཕྲག་གསུམ་བྱའོ། །དེ་ཡན་ཆད་ལ་ནི་འབུམ་ཕྲག་
གསུམ་བྱའོ་གསུང་ངོ་། །འདིར་ནི་བཅོམ་ལྡན་འདས་རྡོ་རྗེ་རྣམ་པར་འཇོམས་པ། སྒྲ་ལ་གནས་པའི་བསམ་གཏན་ལ་མཆོག་ཏུ་བརྙེས་པ། བསྙེན་པའི་དུས་སུ་དེ་བྱའོ། །བུམ་པ་ལ་བྱེད་ན་གཅིག་བྱའོ། །བསྙེན་པ་དང་སྒྲུབ་པའི་བར་དུ་བཟླས་བརྗོད་བྱེད་པ་ནི་གཉིས་ཀའི་ཤེས་པར་

71-1-267b

བྱའོ།    །ད་ནི་སྒྲུབ་པའི་ཆོ་ག་བསྟན་ཏེ། འོ་ན་སྒྲུབ་པའི་ལུགས་ཀྱིས་དཀྱིལ་འཁོར་གྱི་ཆོ་ག་དགོས་པ་ཡིན་ན་བྱེ་བྲག་གི་རྒྱུད་འདི་རུ་དཀྱིལ་འཁོར་གྱི་ཆོ་ག་མི་སྟོན་པ་ཅིའི་སླད་དུ་ཞེ་ན། བུམ་པའི་ཆོ་ག་ནི་དཀྱིལ་འཁོར་ལ་རག་ལས་པ་ཡིན་པས། དེ་བསྟན་པས་དཀྱིལ་འཁོར་ཡང་ཤུགས་
ཀྱིས་ཤེས་པ་ཡིན་ནོ། །བུམ་པའི་ཆོ་ག་དཀྱིལ་འཁོར་ལ་རག་ལས་པར་ནི་དཔུང་བཟངས་ཀྱི་རྒྱུད་ལས་གསུངས་ཏེ། དཀྱིལ་འཁོར་ཁོར་ཡུག་བུམ་པ་གཞག་པར་བྱ། །ཞེས་གསུངས་པ་དང་། བུམ་པ་བརྒྱད་ཡོད་ན་བུམ་པ་སྒོ་བཞིའི་ལོགས་སུ་གཞག་པ་དང་། བཅུ་གཉིས་ཡོད་
ན་ཟུར་བཞིར་ཡང་གཞག་གསུང་ངོ་། །གསང་བ་སྤྱི་རྒྱུད་ལས་ཀྱང་། གྲྭ་དང་སྒོ་ནི་མ་ལུས་པར། །བུམ་པ་དག་ཀྱང་བཞག་ནས་ནི། །བར་སྒོ་ཆེན་པོ་གཉིས་གཉིས་ཤིག །ཁྱད་པར་དུ་ནི་གཞག་པར་བྱ། །བུམ་པ་གཅིག་ནི་ཕྱི་སྒོ་ཡི། །དྲུང་དུ་མངོན་པར་གཞག་པར་བྱ། །ཞེས་གསུངས་
སོ། །འོ་ན་འདི་རུ་དཀྱིལ་འཁོར་བསྟན་ལ། བུམ་པའི་ཆོ་ག་སྤྱི་རྒྱུད་དུ་ཁ་མི་བསྐང་བ་ཅིའི་ཕྱིར་ཞེ་ན། དེ་ནི་མི་འདྲ་སྟེ། དཀྱིལ་འཁོར་གྱི་ཆོ་ག་དང་བྲི་བ་ཙམ་དུ་ཁྱད་མེད་ལ། བུམ་པའི་ཆོ་ག་ལ་ནི་བྱེ་བྲག་ཡོད་པས། རྡོ་རྗེ་རྣམ་པར་འཇོམས་པའི་བུམ་པའི་རྫས་ཐུན་མོང་མ་ཡིན་པ་
དགོས་ཏེ། ཡུངས་ཀར་དང་། རྩྭ་དཱུར་བ་དང་། རྡོ་རྗེ་ཕ་ལམ་དང་། མེ་ཏོག་དམར་པོའི་ཕྲེང་བ་རྣམས་སོ། །དེས་ན་དཀྱིལ་འཁོར་གྱི་ཆོ་ག་ལ་ནི་ཁྱད་པར་མེད་པས་འདིར་མ་གསུངས་ཏེ། རྡོ་རྗེ་རིགས་ཀྱི་སྤྱི་རྒྱུད་ལས་ཤེས་པར་བྱའོ། །བུམ་པའི་ཆོ་ག་ལ་ནི་བྱེ་བྲག་ཡོད་པས་
འདིར་གསུངས་སོ། །དེས་ན་དཀྱིལ་འཁོར་འདིར་མ་བསྟན་པ་ལ་འགལ་བ་མེད་དོ།    །ད་ནི་སྒྲུབ་པའི་དུས་ན་བུམ་པའི་མཚན་ཉིད་བཟླས་བརྗོད་ཀྱི་གྲངས་ངེས་པར་ཁྲུས་བྱ་བ་དང་བཅས་པ་བསྟན་པ་ལ་གསུམ་སྟེ། བུམ་པ་རྫས་དང་བཅས་པའི་མཚན་ཉིད་བསྟན་པ་དང་། དེ་ལ་བཟླས་
བརྗོད་ཇི་ལྟར་བྱ་བའི་གྲངས་བསྟན་པ་དང་། གདུལ་བྱ་ཉེ་བར་མཚོན་པ་དང་བཅས་པར་བསྟན་པའོ། །དེ་ལ་དང་པོར་བུམ་པའི་མཚན་ཉིད་བཤད་དེ། ནོར་བུ་ཞེས་པ་ནི་སྤྱིའི་མིང་དུ་སྨོས་ཏེ། བྱེ་བྲག་དུ་མ་ཕྱེ་བ་དང་། ཨིནྡྲ་ནཱི་ལ་དང་། པདྨ་རཱ་ག་ལ་སོགས་པའོ། །ཡུངས་ཀར་

71-1-268a

ཞེས་པ་ནི། བུམ་པའི་ཁ་ཆོད་པའི་དོན་དུ་གསེར་ལ་སོགས་པའི་སྣོད་གཙང་མའི་ནང་དུ། ཡུངས་ཀར་བླུགས་པའི་སྣོད་གཙང་མ་འཇོག་པའི་དོན་ཏོ། །ཡུངས་ཀར་དེ་རྣམས་ཀྱང་རྡོ་རྗེ་རྩེ་གཅིག་པར་བསམ་པ་འམ། ཡང་ན་ཁྲོ་བོ་རེ་རེ་བསམ་མོ། །དཱུར་བ་ཞེས་
པ་ནི་མགུལ་ཆིངས་ཀྱིས་བཅིངས་པའི་སྣ་ལ་མདུད་པ་བརྒྱབ་པ་དང་། བའི་ལྕི་བས་རྒྱས་བཏབ་པའི་ཚུལ་དུ་གླན་ལ་དེའི་སྟེང་དུ་རྩྭ་དཱུར་བ་ཉག་མ་བདུན་བཙུགས་ཏེ། བགེགས་ལ་སོགས་པ་མི་འཇུག་པའི་དོན་དུའོ། །རིན་ཆེན་ཞེས་པ་ནི། རིན་པོ་ཆེ་ལྔ་སྟེ། ནོར་བུ་རིན་པོ་ཆེ་དང་། བྱི་རུ་
དང་། གསེར་ས་ལེ་སྦྲམ་དང་། མུ་ཏིག་དང་། ཤེལ་ལོ། །རྨ་མེད་ཅེས་པ་ནི་གས་ཆག་མེད་ཅིང་རྒྱན་གྱི་བྱ་བ་བྱེད་ནུས་པའོ། །ཙནྡན་ཞེས་པ་ནི་དྲི་ལྔ་སྟེ་ཙནྡན་དང་། ག་པུར་དང་། གུར་ཀུམ་དང་། ཛཱ་ཏི་ཕ་ལ་དང་། གླ་རྩི་ཡང་བླ་མ་ན་རེ་གཞུག་གསུང་། ཀྲྀ་ཡ་ལས་ནི། 
སྲོག་ཆགས་ཡན་ལག་འབྱུང་མི་ཤིས། །ཞེས་གསུངས་སོ། །ཀླུ་གནོད་ན་གླ་རྩི་བཅུག་ན་ནུས་པ་འབྱུང་གསུང་ངོ་། །བཅས་ཞེས་པ་ནི། སྨན་ལྔ་དང་། འབྲུ་ལྔ་དང་། སྙིང་པོ་ལྔ་བསྡུས་ཏེ། སྨན་ལྔ་ནི། བྱ་གྲི་དང་། སེང་ཀྲི་དང་།  གི་རི་ཀརྞི་ཀ་དང་། ཧ་ས་དང་། ཧ་ས་དེ་བའོ། །
འབྲུ་ལྔ་ནི། འབྲས་ཀྱི་སོ་བ་དང་། མོན་སྲན་གྲེའུ་དང་། ནས་དང་། གྲོ་དང་། ཏིལ་དང་ལྔའོ། སྙིང་པོ་ལྔ་ནི། སའི་སྙིང་པོ་ཏིལ་དང་། ཆུའི་སྙིང་པོ་ལན་ཚྭ་དང་། རྩི་ཐོག་གི་སྙིང་པོ་མར་དང་། ཤིང་ཐོག་གི་སྙིང་པོ་བུ་རམ་དང་། མེ་ཏོག་གི་སྙིང་པོ་སྦྲང་རྩིའོ། །ཤེལ་དང་ཞེས་པ་ནི་དངོས་སོ། །
རྡོ་རྗེ་ཞེས་པ་ནི། རིན་པོ་ཆེ་ཕ་ལམ་མོ། །དེ་མེད་ན་ཤེལ་ཀུན་ནས་ལྕིམ་གཞོག་ཟུར་བརྒྱད་པ་ཅིག་གཞུག་གསུང་ངོ་། །མེ་ཏོག་ཅེས་པ་ནི་མེ་ཏོག་དམར་པོ་དྲི་ཞིམ་པོ་ལ་ཕྲེང་བ་བྱས་ལ་བུམ་པའི་མགུལ་ལ་བརྒྱན་པར་བྱའོ། །ཆུ་ཡིས་ཞེས་པ་ནི་བླངས་པའི་ཆུ་གཙང་མ་སྲོག་ཆགས་མེད་པས་
དགང་བའོ། །དྲི་ཞིམ་པོའི་ཆུ་ཡང་བླུག་གོ། །གསེར་རམ་ཡང་ན་ནི། དངུལ་གྱི་བུམ་པ་ཞེས་པ་ནི་བུམ་པའི་རྒྱུ་བསྟན་པའོ། །ཚད་ལ་སོགས་པ་ནི་ཁྲུས་ཀྱི་ཆོ་གར་ཤེས་པར་བྱའོ། །དག་ཅེས་པ་ནི་ཟངས་ལ་སོགས་པ་བསྟན་ཏོ། །ཀྱང་ཞེས་པ་ནི་བསྡུ་བའི་དོན་ཏོ། །དབུལ་པོ་རྣམས་ཀྱིས་

71-1-268b

མི་རྙེད་པས། རྫ་ལ་སོགས་པའི་བུམ་པ་སོ་བཏང་བའི་ཉེས་པ་ནག་པོར་རི་མེད་པ་དང་། དཀྱིལ་ཁོར་གཞན་དུ་ལོངས་མ་སྤྱད་པ་ལ་བྱའོ། །གཙང་མའི་གོས་ཀྱིས་དཀྲི་ཤིང་ཞེས་པ་ནི་མགུལ་པ་དཀྲི་བ་སྟེ། རས་ཁ་ཚར་དང་ཕུན་ཚར་མ་ཉམས་པ། གཞན་དུ་ལོངས་མ་སྤྱད་པ། མི་གཙང་
བས་མ་སྦགས་པའི་རས་དཀར་པོའོ། །བོ་དྷི་སཏྭ་ས་ནི། འདིའི་འགྲེལ་པ་ཕྱི་མ་ལས་སྲོག་ཆགས་ཀྱི་རྒྱུ་ལས་མ་བྱུང་བ་ལས་གཙང་མ་ཞེས་བྱའོ་ཞེས་བཤད་དོ། །ཞེས་པ་ནི་རྫས་དེ་རྣམས་ཀྱི་བུམ་པའི་ནང་དག་ཏུའོ། །དེས་ནི་རྒྱུ་དང་། རྫས་དང་མཚན་ཉིད་བསྟན་ཏོ།    །ད་ནི་སྒྲུབ་པའི་
དུས་ཀྱི་བཟླས་བརྗོད་བྱ་བའི་གྲངས་ཀྱི་ཚད་བསྟན་པ་ནི། གཟུངས་རིངས་ཉི་ཤུ་རྩ་གཅིག་བྱ། །ཡང་སྙིང་ངམ། རིགས་ཀྱི་སྙིང་པོ་བརྒྱ་རྩ་བརྒྱད་ཟློས་པས་ན། ལན་གྲངས་ཉི་ཤུ་རྩ་གཅིག་གམ། །ཡང་ན་ལན་གྲངས་བརྒྱ་རྩ་བརྒྱད། །ཅེས་གསུངས་སོ། །ཐུན་མཚམས་སུའམ། 
བུམ་པ་རེ་རེ་ལ་གྲངས་འདི་ཙམ་རེ་རེ་བྱའོ། །དེས་ནི་བཟླས་བརྗོད་བྱ་བ་བསྟན་ཏོ།    །ད་ནི་གདུལ་བྱ་ཉེ་བར་མཚོན་པ་བསྟན་ཏེ། རྡོ་རྗེ་རྣམ་འཇོམས་བཟླས་ན་ནི། །བཟླས་བརྗོད་བྱས་པའི་འོག་ཏུ་ཁྲུས་ཀྱི་གང་ཟག་བསྟན་པའི་དོན་ཏོ། །རྒྱལ་པོ་ཞེས་བྱ་བའི་རིགས་བྱེ་བྲག་ཏུ་ཤེས་པར་བྱའོ། །
རྟག་ཏུ་ཞེས་པ་ནི། དུས་ཐམས་ཅད་དུའམ། ཉིན་དང་མཚན་ཐམས་ཅད་དུའོ། །རྒྱལ་པོ་ཞེས་བྱ་བ་ནི་ཁྲུས་བྱ་བའི་གང་ཟག་མཚོན་པ་ཙམ་དུ་ཟད་དེ། རིགས་བྱིན་པོ་གསུམ་ལ་ཡང་བྱའོ། །འོ་ན་རིགས་བཞི་ཀ་ལ་བྱེད་ན། འདིར་རྒྱལ་པོ་གཅིག་ཏུ་སྨོས་པ་ཅིའི་སླད་དུ་ཞེ་ན། དེ་ནི་
གཙོ་བོ་ཙམ་སྨོས་པ་ཡིན་ཏེ། དེ་བདེ་ན་ཐམས་ཅད་བདེ་བར་འགྱུར། དེ་སྡུག་བསྔལ་ན་ཐམས་ཅད་སྡུག་བསྔལ་བར་འགྱུར་རོ། །དེའི་ཕྱིར། གཙོ་བོ་ཙམ་སྨོས་སོ་ཞེས་གསུངས་སོ། །དེས་ནི་རྡོ་རྗེ་རྣམ་པར་འཇོམས་པའི་དོན་མ་ལུས་པར་རྒྱས་པར་བཤད་པའོ། །རྡོ་རྗེ་རྣམ་པར་
འཇོམས་པའི་འགྲེལ་པ་འདི་བྱས་པས། །དེ་རིང་བདག་གིས་དགེ་བ་གང་ཞིག་ཐོབ་འགྱུར་བ། །ཟླ་འོད་གསལ་དང་མུ་ཏིག་དོ་ཤལ་དྲི་མེད་དཀར་པོ་འདྲ་བ་དེས། །ཉོན་མོངས་མི་ཤེས་སྒྲིབ་པའི་གློ་བུར་གྱུར་པ་སྤང་ཕྱིར་སེམས་ཅན་བྱང་ཆུབ་ཡིད་གྱུར་ཅིག །ཡང་དག་རྟོགས་པའི་གཏམ་

71-1-269a

འདི་ཡེ་ཤེས་རྡོ་རྗེས་སྨྲས་པས་སེམས་ཅན་རྣམས་ཀྱིས་ཉོན། །རྡོ་རྗེ་རྣམ་པར་འཇོམས་པའི་གཟུངས་ཞེས་བྱ་བའི་རིམ་པར་ཕྱེ་བ་རྒྱ་ཆེར་འགྲེལ་པ་གསལ་བའི་སྒྲོན་མེ་ཞེས་བྱ་བ་སློབ་དཔོན་ཡེ་ཤེས་རྡོ་རྗེས་མཛད་པ་རྫོགས་སོ།།      །།དབང་ཕྱུག་དམ་པའི་མངའ་
བདག་རྒྱལ་པོ་ཆེན་པོ་དཔལ་ལྷ་བཙན་པོའི་བཀའ་ལུང་གིས། རྒྱ་གར་གྱི་མཁན་པོ་ཆེན་པོ་ཐེག་པ་ཆེན་པོ་གསང་སྔགས་ལ་མཁས་པ། སློབ་དཔོན་བུདྡྷ་གུ་ཧྱ་དང་། བོད་ཀྱི་ཞུ་ཆེན་གྱི་ལོ་ཙཱ་བ་བནྡེ་སྐ་བ་དཔལ་བརྩེགས་རཀྵི་ཏས་བསྒྱུར་ཅིང་ཞུས་ཏེ་གཏན་ལ་ཕབ་པ་ལས། སླད་ཀྱི་
རྒྱ་གར་གྱི་མཁན་པོ་ཆེན་པོ། ཤྲཱདྡྷཱ་ཀ་ར་ཝརྨ་དང་། བོད་ཀྱི་ལོ་ཙཱ་བ་མཁས་པ་ཆེན་པོ་རིན་ཆེན་བཟང་པོས་རྒྱ་དཔེ་དང་གཏུགས་ནས་བཅོས་པའོ།།      །། ༄༅༅།  །རྒྱ་གར་སྐད་དུ།  ས་མནྟ་མུ་ཁ་པྲ་བེ་ཤ་རསྨི་བི་མ་ལོ་ཥྞཱི་ཥ་པྲ་བྷཱ་སརྦྦ་ཏ་ཐཱ་ག་ཏཱ་ཧྲྀ་ད་ཡ་ས་མ་ཡ་བི་ལོ་ཀི་ཏེ་ནཱ་མ་དྷཱ་
ར་ཎི་སཾ་བྲྀཏྟཱི།  བོད་སྐད་དུ།  ཀུན་ནས་སྒོར་འཇུག་པའི་འོད་ཟེར་གཙུག་ཏོར་དྲི་མ་མེད་པར་སྣང་བ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་དང་དམ་ཚིག་ལ་རྣམ་པར་བལྟ་བ་ཞེས་བྱ་བའི་གཟུངས་ཀྱི་རྣམ་པར་བཤད་པ། བྱང་ཆུབ་སེམས་དཔའ་སེམས་དཔའ་ཆེན་པོ་ཐུགས་རྗེ་ཆེན་
བོ་དང་ལྡན་པ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །དབུའི་གཙུག་ཏོར་འོད་ཟེར་གྱིས། །རྨོངས་པའི་དྲི་མ་སེལ་མཛད་རྒྱལ། །གཟུགས་ཀྱི་རྒྱན་དང་ལྡནཔའི་སྐུ། །ཐུགས་རྗེ་མངའ་ལ་ཕྱག་འཚལ་ནས། །ལུང་དང་བླ་མའི་མན་ངག་ལས། །གཟུངས་
ལ་རྟོགས་པ་སྐྱེས་པས་འདིར། །ཤེས་རབ་གཟུངས་དང་བྲལ་རྣམས་ལ། །བརྩེ་བས་གཟུངས་ཀྱི་རྣམ་འགྲེལ་བཤད། །ལོག་རྟོག་ཅན་རྣམས་ཐ་དད་དུ། །རྩོད་པའི་དུས་སུ་རྩོད་མོད་ཀྱང་། །རྩོད་མེད་ཐུབ་པའི་བཀའ་སྡེ་རྣམས། །རྩོད་པ་བཅད་ཕྱིར་གཟིགས་མོ་འཚལ། །ཡང་དག་
བཀའ་རྣམས་མ་མཐོང་ཞིང་། །ངེས་པའི་ལམ་ལ་མི་མོས་པའི། །ལམ་ལོག་ལམ་གོལ་ཞུགས་པ་རྣམས། །ལམ་མཆོག་རྡོ་རྗེ་ཐེག་པའི་གཞུང་། །སེངྒེའི་ང་རོ་གྲག་པ་ལ། །སྨོད་ཅིང་ཐག་རིང་འབྲོས་པར་འགྱུར། །དགྲོལ་དཀའ་སྨོངས་པ་དེ་དག་ལ། །བརྒྱུད་པ་ལས་བྱུང་

71-1-269b

གདམས་ངག་སྦ། །ཐུབ་པའི་བསྟན་རྩ་དགེ་སློང་ཡིན། །དམ་ཆོས་ཚུལ་བཞིན་སྤྱོད་པ་ཡི། །དགེ་སློང་དེ་ནི་ཤིན་ཏུ་དཀོན། །རྟགས་དང་ཆ་ལུགས་ཙམ་བཟུང་ནས། །རྡོ་རྗེ་ཐེག་པ་སྨོད་བྱེད་པའི། །རྟོག་གེས་གཞུང་འདི་སྨད་མི་བྱ། །སྔགས་གཞུང་ལ་ལ་ཆུད་མོད་ཀྱང་། །ལོག་སྤྱོད་དམ་
ཚིག་མི་བསྲུང་ལ། །སྔགས་གཞུང་གསང་བར་བྱ་དགོས་ན། །བྱིས་པ་གཞན་ལྟ་སྨོས་ཅི་དགོས། །དད་མེད་རྣམ་གཡེང་ལེ་ལོ་ཅན། །བག་མེད་སེམས་རྩུབ་སེར་སྣ་ཆེ། །གཡོ་སྒྱུ་འདོད་སྲེད་གཉིད་བརྐམ་ཆེ། །བྱས་གཟོ་སྙིང་རྗེ་ཤེས་རབ་ཆུང་། །བར་ཆད་འདི་དག་དང་ལྡན་ནོ། །
གཟུངས་འདི་འགྲུབ་པར་མི་འགྱུར་རོ། །དད་ལྡན་དཔའ་བརྟན་བརྩོན་འགྲུས་ཅན། །གཏོང་ཕོད་ངག་འཇམ་དུལ་བག་ཆེ། །དྲང་ངེས་གསལ་ལ་ཆགས་པ་ཆུང་། །བློ་ལྡན་དྲིན་གཟོ་འཚེ་བ་བྲལ། །ནད་དང་ང་རྒྱལ་ཐེ་ཚོམ་མེད། །དེས་ནི་མྱུར་དུ་འགྲུབ་པར་འགྱུར། །དེ་ལྟ་བུའི་ཡོན་ཏན་
དང་ལྡན་པའི་གང་ཟག་ལ་རྟོགས་པ་འདིའི་དོན་བཤད་པར་བྱའོ། །དེ་ཡང་། མདོ་དོན་སྨྲ་བར་འདོད་རྣམས་ཀྱིས། །བསྡུས་པ་དགོས་པའི་དོན་བཅས་དང་། །ཚིག་དོན་བཅས་དང་བརྒལ་ལན་བཅས། །མཚམས་སྦྱར་བཅས་པས་བསྙད་པར་བྱ། །ཞེས་པའི་ཚུལ་གྱིས་རྟོགས་པ་འདིའི་
བསྡུས་པའི་དོན་རྣམ་པ་བདུན་ཏེ། གླེང་གཞི་དང་། གླེང་བསླང་བ་དང་། རྟེན་དང་། ཤེས་པར་བྱ་བའི་ཡུལ་དང་། ཉམས་སུ་བླང་བའི་ཐབས་དང་། བསྒྲུབ་པར་བྱ་བའི་དངོས་པོ་དང་། ཐོབ་པའི་འབྲས་བུའོ། །དེ་ལ་གླེང་གཞི་ལ་གཉིས་ཏེ། ཐུན་མོང་དང་། ཁྱད་པར་རོ། །དང་པོ་
ནི་སྡུད་པ་པོ་རང་ཉིད་ལ་ཡིད་ཆེས་པར་བྱ་བའི་ཕྱིར་ཐམས་ཅད་དུ་སྨོས་སོ། །གཉིས་པ་ནི་དོན་གྱི་གནས་སྐབས་བརྡ་སྤྲད་པའི་ཕྱིར་ཞུས་ལན་གྱི་ཚུལ་དུ་གསུངས་སོ། །དེ་གཉིས་ཅར་ཡང་རང་ལ་ལྡོག་པ་གཅོད་ཅིང་དོན་ལ་དྲན་པ་བསྐྱེད་པ་སྟེ། གཞུང་འབྱུང་བའི་རྒྱུའོ། །གླེང་བསླང་བ་ནི་དོན་ཉིད་
གཞན་གྱི་སྤྱོད་ཡུལ་དུ་ཇི་ལྟར་འགྱུར་བ་ཞུས་ལེན་གྱི་ཚུལ་གྱིས་བསྡུས་ནས་བཀོད་པ་སྟེ་གཞུང་འབྱུང་བའི་རྐྱེན་ནོ། །རྟེན་གྱི་གང་ཟག་ནི་བསྒྲུབ་ཏུ་རུང་བ་དང་། ངེས་པར་འགྲུབ་པའི་རིགས་སོ། །ཤེས་པར་བྱ་བའི་ཡུལ་ནི་དོན་དམ་དང་ཀུན་རྫོབ་བོ། །ཀུན་རྫོབ་ལ་གཉིས་ཏེ། ཀུན་ནས་ཉོན་

71-1-270a

མོངས་པ་དང་། རྣམ་པར་བྱང་བའོ། །རྣམ་པར་བྱང་བ་ནི་གཉིས་ཏེ། བྱང་ཆུབ་སེམས་དཔའ་རྣམས་ཀྱི་ཤེས་རབ་དང་སྙིང་རྗེའོ། །དེ་ནི་ཤེས་རབ་ཀྱིས་ཁོར་བར་མི་ལྟུང་བ་དང་། སྙིང་རྗེས་མྱ་ངན་ལས་འདས་པར་མི་བཞུགས་པའོ། །དང་པོ་ནི་ལྷག་པ་ཤེས་རབ་
སྟེ་དོན་གྱི་གཟུངས་སོ། །གཉིས་པ་ནི་འཇུག་ལྡོག་པ་རྨོངས་པའི་སེམས་ཅན་རྣམས་ལ་སྙིང་རྗེ་ཆེན་པོ་འབྱུང་བའི་ཕྱིར་ཚིག་གི་གཟུངས་སོ། །བསྒྲུབ་པར་བྱ་བའི་དངོས་པོ་ནི་སྔགས་དང་རྒྱུད་དང་ཕྱག་རྒྱའི་ཚུལ་ལོ། །ཐོབ་པར་བྱ་བའི་འབྲས་བུ་ནི་ཐུན་མོང་གི་དངོས་གྲུབ་དང་མཆོག་གི་
དངོས་གྲུབ་བོ། །དེ་དག་ནི་བསྡུས་པའི་དོན་ཏོ།   །དགོས་པའི་དོན་ནི་ཡང་དག་པའི་ལམ་གྱི་གོལ་ས་གཅད་པའོ། །དྲན་པ་དང་ཤེས་རབ་ཀུན་ནས་སྒོ་དབྱིངས་རྣམ་པར་དག་པ་ལ་འཇུག་པ་དང་། འོད་ཟེར་ཁྱད་པར་གྱི་དཔྱོད་པ་རྟོག་པའི་དྲ་བ་སེལ་བ་དེ་དག་ཡང་དག་པའི་ལམ་མོ། །གོལ་
ས་ནི་མ་རྟོགས་པ་དང་། ལོག་པར་རྟོགས་པ་དང་། ཐེ་ཚོམ་མོ། དོན་འདི་ལ་ཞུགས་ན་སྐྱོན་གསུམ་པོ་དང་བྲལ་བར་འགྱུར་རོ། །དེ་ལྟར་ན་དེ་ལ་རིམ་གྱིས་སྦྱངས་པའི་མཐུས་སྒྲིབ་པ་གཉིས་དང་བྲལ་ནས་དོན་ཡང་བདག་པར་བདེ་བླག་ཏུ་རྙེད་པ་ནི་དགོས་པའི་དགོས་པའོ།   །ད་ནི་ཚིག་གི་
དོན་བརྗོད་དེ། དེ་ལ་བརྒལ་ལན་དང་མཚམས་སྦྱར་བ་ནི་ཤུགས་ཀྱིས་འོང་ངོ་། །དེ་ནས་ཞེས་པ་ནི་དབང་དུ་བྱ་བ་དང་མཚམས་སྦྱར་བ་དང་བཀྲ་ཤིས་པའི་དོན་ཏོ། །དེ་ལ་བྱང་ཆུབ་སེམས་དཔའ་སྒྲིབ་པ་རྣམ་སེལ་གྱི་རྒྱུད་དགའ་ལྡན་གྱི་གནས་སུ་གསུངས་པ་འདས་མ་ཐག་ཏུ་ཡང་སུམ་ཅུ་རྩ་
གསུམ་པའི་ལྷའི་དོན་དུ་འདི་ཉིད་གསུངས་པ་ནི། དེ་ནས་ཏེ་དེ་དང་མཚམས་སྦྱར་བའོ། །ནི་བརྒལ་བ་འདི་ཁོ་ན་གསུངས་པའི་ཕྱིར་དབང་དུ་བྱའི་དེ་ནས་སོ། །ཨ་ཐ་ཁ་ལ་ཞེས་ཀྱེ་འམ་ལེགས་སོའི་སྒྲ་ཡོད་པས་བཀྲ་ཤིས་པའི་དེ་ནས་སོ། །བཅོམ་ལྡན་འདས་ནི་རྡོ་རྗེ་ལྟ་བུའི་ཏིང་ངེ་
འཛིན་གྱིས་ལྷན་ཅིག་སྐྱེས་པའི་མ་རིག་པ་བཅོམ་པས་ཉོན་མོངས་པ་གཏན་མི་སྐྱེ་སྟེ། ཉོན་མོངས་པའི་བདུད་བཅོམ་པའོ། །རྒྱུ་ཉོན་མོངས་པ་མེད་ན་འབྲས་བུ་དངོས་པོ་ལ་མངོན་པར་ཞེན་པ་མེད་པས་ལྷའི་བུའི་བདུད་བཅོམ་པའོ། །དངོས་པོའི་མངོན་ཞེན་མེད་པས་བག་ཆགས་ཀྱི་མཚམས་

71-1-270b

མི་སྦྱོར་ཏེ་དེས་ཕུང་པོའི་བདུད་བཅོམ་པའོ། །སྡུག་བསྔལ་གྱི་ཕུང་པོ་ཟད་ན་རྣམ་རྟོག་གི་ཁར་མི་ལྟུང་བས་སྐྱེ་ཤི་དང་བྲལ་བས་འཆི་བདག་གི་བདུད་བཅོམ་མོ། །ལྡན་པ་ནི། དབང་ཕྱུག་དང་ནི་གཟུགས་བཟང་དང་། །དཔལ་དང་གྲགས་དང་ཡེ་ཤེས་དང་། །བརྩོན་འགྲུས་ཕུན་སུམ་ཚོགས་
ལྡན་པ། །དྲུག་ནི་སྐལ་དང་ལྡན་ཞེས་བཤད། །ཅེས་ཏེ། དབང་ཕྱུག་ནི་སྒྲིབ་པ་ཐམས་ཅད་ཀྱི་དབང་དུ་མ་གྱུར་པའི་རང་དབང་ཆེན་པོ་དང་ལྡན་པའོ། །གཟུགས་བཟང་ནི་མཚན་དང་དཔེ་བྱད་དོ། །དཔལ་ནི་བསོད་ནམས་དང་ཡེ་ཤེས་ཀྱི་ཚོགས་ཏེ། །གཞན་གྱིས་བསྟེན་བྱ་མིན་པས་སོ། ། 
གྲགས་པ་ནི་ཚངས་པའི་འཇིག་རྟེན་ལ་ཐུག་གི་བར་དུ་བཅོམ་ལྡན་འདས་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་སོ་ཞེས་པ་ལ་སོགས་པ་དུ་མ་གྲགས་ཏེ་ཡོན་ཏན་ནོ། །ཡེ་ཤེས་ནི་ཤེས་བྱ་ཇི་སྙེད་པ་དང་། 
ཇི་ལྟ་བ་ལག་མཐིལ་གྱི་སྐྱུ་རུ་ར་ལྟར་མཁྱེན་པའོ། །བརྩོན་འགྲུས་ནི་སྐུ་གསུང་ཐུགས་ཀྱི་མཛད་པ་རྒྱུན་མི་འཆད་སྟེ། །ཐུགས་རྗེའོ། །དེ་ལ་དབང་ཕྱུག་དང་ཡེ་ཤེས་ནི་ཆོས་ཀྱི་སྐུའོ། །གཟུགས་བཟང་ནི་ལོངས་སྤྱོད་རྫོགས་པའི་སྐུའོ། །དཔལ་དང་གྲགས་པ་ནི་སྤྲུལ་པའི་སྐུའོ། །བརྩོན་
འགྲུས་ནི་གསུམ་ཀའོ། །ཡང་ན་ཕྱིར་མི་ལྡོག་པ་འཁོར་ལོའི་མདོ་ལས།  ནམ་མཁའ་འདྲ་བའི་ཆོས་རྣམས་ནི། །ལུས་ཅན་དག་ལ་རབ་སྟེན་ཀྱང་། །དེ་ལ་བསྙལ་བ་མ་མངའ་བས། །དེ་ཕྱིར་བཅོམ་ལྡན་འདས་ཞེས་བྱ། །ཞེས་གསུངས་སོ། །སྐྱེ་བ་གཅིག་གིས་ཐོགས་པའི་བྱང་ཆུབ་
སེམས་དཔའ་ཆེན་པོས་རྒྱུན་མི་འཆད་པར་ལྷའི་བུ་རྣམས་ལ་ཆོས་ཀྱི་དགའ་བའི་རོ་མྱོང་བར་མཛད་པས་དགའ་ལྡན་ལྷའི་གནས་ཞེས་བྱ་སྟེ།  གནས་ཕུན་སུམ་ཚོགས་པའོ། །གནས་འདི་སྨྲས་པས་ནི་རྟགས་པ་འདིའི་སྒོར་ཞུགས་པའི་རིགས་ཀྱི་བུ་མོ་རྣམས་ཀྱང་ཇི་སྲིད་
ཆོས་དགའ་བ་ཆེན་པོའི་རིགས་རྒྱུན་མི་འཆད་པར་མྱོང་བར་འགྱུར་བའི་དོན་ཏོ། །འཁོར་གསུངས་པ་བྱང་ཆུབ་ནི་རྣམ་པར་དཀར་བའི་ལམ་རྒྱུ་དང་འབྲས་བུར་བཅས་པའོ། །དེ་ལ་སེམས་དཔའ་ནི་བྱང་ཆུབ་སེམས་དཔའོ། །དེ་ཉིད་ཉན་ཐོས་དང་རང་རྒྱལ་ལ་ཡང་ཡོད་པས་འདིར་ཆེན་པོ

71-1-271a

གསུངས་སོ། །དེ་ལ་ཆེ་བ་རྣམ་པ་བདུན་དང་ལྡན་པས་བྱང་ཆུབ་སེམས་དཔའ་ཆེན་པོའོ། །དེ་ལ་ཆོས་ཆེན་པོ་ནི་རིག་པ་མཆོག་དང་དབང་བསྐུར་བའི་རྒྱུད་ཆེན་པོ་དང་། ཏ་ཐཱ་སཾ་གྲ་ཧ་ལ་སོགས་པའི་གཞུང་རྒྱ་ཆེན་པོ་རྣམས་ལ་དབང་མཛད་པའི་ཕྱིར་རོ། །སེམས་
བསྐྱེད་པ་ཆེན་པོ་ནི་བདེ་བར་གཤེགས་པ་རིགས་ལྔ་དང་གོ་འཕང་མཉམ་པ་ལ་དབང་སྒྱུར་བ་ཐོབ་པས་སོ། །མོས་པ་ཆེན་པོ་ནི་དོན་ཟབ་པ་དང་རྒྱ་ཆེ་བ་ལ་མོས་པའོ། །བསམ་པ་རྒྱ་ཆེ་བ་ལ་མོས་པ་ནི་སེམས་ཅན་ཐམས་ཅད་ལ་ཕན་པ་དང་། བདེ་བ་སྐྱེད་པའི་ཕྱིར་རོ། །ཚོགས་ཆེན་པོ་ནི་
བསོད་ནམས་དང་ཡེ་ཤེས་ཀྱི་ཚོགས་རྒྱུན་མི་འཆད་པས་སོ། །དུས་ཆེན་པོ་ནི་འཁོར་བ་ཇི་སྲིད་པར་གཞན་དོན་ལ་འཇུག་པར་ཞལ་གྱིས་བཞེས་པས་སོ། །ཐོབ་པ་ཆེན་པོ་ནི་ཡང་དག་པར་རྫོགས་པའི་སངས་རྒྱས་ཕྱག་རྒྱ་ཆེན་པོའི་སྐུའོ། །ལྟ་བ་དང་རྟོགས་པ་གཅིག་ཅིང་མཆོག་གཅིག་པ་དང་
འདུན་པ་གཅིག་པས་སྤང་བྱ་སྤང་བ་བར་ཆད་མེད་པའི་ཕྱིར་དགེ་འདུན་ནོ། །དེ་ནི་ཡོན་ཏན་ནོ། །གྲངས་ནི་རྩོད་པར་འགྱུར་བའི་ཕྱིར་མ་གསུངས་མོད་ཀྱི་བྱང་ཆུབ་སེམས་དཔའ་སྒྲིབ་པ་རྣམ་སེལ་གྱི་རྒྱུད་དུ་གསུངས་པ་དང་། བྱང་ཆུབ་སེམས་དཔའ་ཆེན་པོ་རྡོ་རྗེའི་རིགས་བྱེ་བ་ཕྲག་
བརྒྱད་ཅུ་དང་། རིན་པོ་ཆེའི་རིགས་དང་། པདྨའི་རིགས་དང་། ལས་ཀྱི་རིགས་དང་། བདེ་བར་གཤེགས་པའི་རིགས་དང་། དེ་ལྟ་བུ་ལ་སོགས་པ་མུ་མཐའ་ཡས་སོ་ཞེས་གསུངས་སོ། །ཞབས་འབྲིང་པ་ལྷའི་ཚོགས་ཞེས་པ་ནི་ཆོས་ཆེ་བར་བྱེད་ཅིང་བསྟན་པ་རྒྱས་པར་བྱེད་པའི་ཕྱིར་
སྟོན་པའི་ཞབས་སུ་འབྲང་བའོ། །དེ་ལ་ཆོས་ལ་མོས་པ་བསྐྱེད་པའི་འཁོར་ནི་ཚངས་པའོ། །རྒོལ་བ་ཚར་གཅོད་པར་བྱེད་པའི་འཁོར་ནི་ཁྱབ་འཇུག་གོ། །བསྟན་པ་འཛིན་པར་བྱེད་པའི་འཁོར་ནི་དབང་ཕྱུག་ཆེན་པོའོ། །སོགས་ཀྱིས་ནི་ཕུལ་དུ་བྱུང་བའི་སྦྱིན་བདག་གི་འཁོར་བརྒྱ་
བྱིན་དང་། གདུལ་བྱ་བཟོད་པའི་འབྲས་བུ་ཚིམ་པར་བྱེད་པའི་འཁོར་མཚེ་མའི་ལྷ་དང་། རྫུ་འཕྲུལ་སྣ་ཚོགས་པ་ལ་དབང་སྒྱུར་བ་འཕྲུལ་དགའི་ལྷ་དང་། འདོད་པ་ལ་གཅིག་ཏུ་ཞེན་པ་དང་བྲལ་བའི་འཁོར་གཞན་འཕྲུལ་དབང་བྱེད་པའི་ལྷ་དང་། འདོད་པ་ལ་ལྷག་པར་ཆགས་པ་དང་། 

71-1-271b

 བྲལ་བ་གཟུགས་ཁམས་ཀྱི་ལྷ་རྣམས་དང་། རིགས་གནས་སྟོན་པར་བྱེད་པ་སུམ་ཅུ་རྩ་གསུམ་པའི་ལྷའི་ཁོར་དང་། ཆོས་འཛིན་པའི་གང་ཟག་སྐྱོང་བར་བྱེད་པའི་འཁོར་རྒྱལ་པོ་ཆེན་པོ་འཁོར་དང་བཅས་པའོ། །ཐབས་ཅིག་པ་ནི་གསུམ་སྟེ། སྡུད་པའི་འཁོར་ཕྱག་ན་རྡོ་རྗེ་དང་
སྤོབས་པ་གཅིག་ཏུ་སྦྱར་བའོ། །ཉན་པའི་འཁོར་ནི་གུས་པ་དང་དབྱེར་མི་ཕྱེད་པའོ། །གདུལ་བྱའི་དུས་ལ་མི་ལྡོག་པས་ཐབས་ཅིག་པའོ། །བཞུགས་ཞེས་པ་ཡང་གསུམ་སྟེ། སྐུའི་བཞུགས་པ་ནི་འཆག་པ་དང་། བཞེངས་པ་དང་། སེང་གེ་ལྟ་བུར་གཟིམས་པ་ཞེས་པའོ། །
གསུང་གི་བཞུགས་པ་ནི། གསུང་གཅིག་གིས་ནི་གསུངས་མོད་ཀྱང་། དུ་མ་ཉིད་དུ་སོ་སོར་གོ། །ཞེས་དབང་པོ་རབ་འབྲིང་ཐ་མ་རྒྱུན་མི་འཆད་པའི་ཚུལ་གྱིས་གསུང་དབྱུང་ངོ་། །ཐུགས་ཀྱི་བཞུགས་པ་ནི་གཉིས་ཏེ། འཇིག་རྟེན་པ་དང་མཐུན་པའི་ཐུགས་བསྐྱེད་ནས་ཏིང་ངེ་
འཛིན་གང་ལ་ཞུགས་ན་གྲོག་སྦུར་ལ་སོགས་པ་ཡན་ཆད་ཀྱིས་ཀྱང་བཅོམ་ལྡན་འདས་ཀྱི་ཐུགས་རིག་པར་མཛད་པ་ནི་ནང་དུ་ཡང་དག་འཇོག་གིས་བཞུགས་པའོ། །སྙོམས་པར་འཇུག་པ་ལ་གསུམ་སྟེ། ལྷའི་ཚུལ་དང་མཐུན་པར་བསམ་གཏན་བཞིས་སྙོམས་པར་འཇུག་པ་དང་། 
ཚད་མེད་པ་བཞིས་ཚངས་པའི་སྙོམས་པར་འཇུག་པ་དང་། རྣམ་ཐར་གསུམ་གྱིས་འཕགས་པའི་སྙོམས་པར་འཇུག་པའོ། །ཏེ་ཞེས་པས་བཞུགས་པ་ཉིད་ནི་འདས་པ་བསྟན་ཏོ། །འཁོར་མང་པོ་ཚོགས་པ་ནི་མི་མཐུན་པ་ཡོད་ན་གཉེན་པོ་འབྱུང་བའི་ཕྱིར་བར་དུ་གཅོད་པའི་འཁོར་
ཏེ་བདུད་ཀྱང་ཤེས་པར་བྱའོ། །དེས་ན་གདུལ་བྱའི་འཁོར་རོ། །དེ་ནས་བཅོམ་ལྡན་འདས་དགའ་ལྡན་གྱི་གནས་དེ་ན་ཆོས་གསུངས་བའི་དུས་སུ་འདོད་པ་དང་གཟུགས་ཀྱི་ལྷའི་བུ་ཐམས་ཅད་ཚོགས་ཏེ་བཅོམ་ལྡན་འདས་ཀྱི་རྫུ་འཕྲུལ་གྱི་ལམ་བྱིན་གྱིས་བརླབས་པའོ། །དེས་ན་
གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོར་ཇི་སྐད་གསུངས་པ་ལྟར་དགའ་ལྡན་གྱི་ལྷའི་གནས་ནོར་བུ་རིན་པོ་ཆེའི་ཁང་སྒྲོམ་ཆེན་པོ་སྤྲུལ་ནས། ལྷའི་གནས་ཐམས་ཅད་ནས་རིན་པོ་ཆེའི་ཐེམ་སྐས་དུ་མ་བརྟེན་ཏེ། སྐུའི་འོད་ཟེར་རིགས་མི་མཐུན་པ་བྱེ་བ་ཕྲག་བརྒྱད་ཅུ་

71-1-272a

རེ་རེ་མངོན་པར་འདུས་བྱས་ནས་སྟོང་གསུམ་གྱི་སྟོང་ཆེན་པོའི་རབ་འབྱམས་ཀྱི་འཇིག་རྟེན་གྱི་ཁམས་ཐམས་ཅད་ཀྱི་ལྷ་ཚོགས་རྣམས་འདིར་ལྷགས་པར་གྱུར་ཏོ་ཞེས་བྱ་བའི་བར་དུའོ། །དེར་གསུངས་པའི་ཆོས་ནི་ཕ་རོལ་ཏུ་ཕྱིན་པ་དྲུག་གི་དོན་གྱི་རྒྱས་པའི་གསང་
སྔགས་འདི་ཁོ་ནའོ། །དེ་ལ་ཕ་རོལ་ཏུ་ཕྱིན་པ་དྲུག་ནི་འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་ནི་གང་བྱང་ཆུབ་སེམས་པའི་ཆོས་ཉིད་ལ་གནས་པའི་བྱང་ཆུབ་སེམས་དཔའ་བྱང་ཆུབ་ཀྱི་སེམས་ལ་བརྟེན་ནས་སྙིང་རྗེ་སྔོན་དུ་བཏང་བའི་སེམས་ཀྱིས་བདོག་པ་ཐམས་ཅད་ཡོངས་སུ་གཏོང་
བ་ལ་ལུས་དང་ངག་དང་ཡིད་ཀྱི་ལས་ཏེ་དེ་ལྟར་བྱས་ན་སྦྱིན་པའི་ཕ་རོལ་ཏུ་ཕྱིན་པའི་མཚན་ཉིད་ནི་རིགས་དང་། སྨོན་ལམ་དང་། བསམ་པ་དང་། དངོས་པོ་དང་། ངོ་བོ་ཉིད་ཀྱིས་བསྟན་པར་རིག་པར་བྱའོ། །འདི་ལྟ་སྟེ་བྱང་ཆུབ་སེམས་དཔའི་ཆོས་ཉིད་ནི་རིགས་སོ། །བྱང་ཆུབ་
ཀྱི་སེམས་ནི་སྨོན་ལམ་མོ། །སྙིང་རྗེ་སྔོན་དུ་གཏོང་བའི་སེམས་ནི་བསམ་པའོ། །བདོག་པ་ཐམས་ཅད་ཡོངས་སུ་གཏོང་བ་ནི་དངོས་པོའོ། །ལུས་དང་ངག་དང་ཡིད་ཀྱི་ལས་ནི་ངོ་བོ་ཉིད་དོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་བར་ཡང་དེ་བཞིན་དུ་རིག་པར་བྱའོ། །
འདི་ནི་བྱེ་བྲག་ཡིན་ཏེ། ཚུལ་ཁྲིམས་དང་བཟོད་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྣམས་ལ་ནི་སྡོམ་པ་ཐམས་ཅད་ཡང་དག་པར་ལེན་པ་དང་རྗེས་སུ་བསྲུང་བ་དང་། གནོད་པར་བྱེད་པ་དང་དུ་ལེན་པ་དང་། སྡུག་བསྔལ་ཇི་མི་སྙམ་པར་འཛིན་པ་དང་། དགེ་བའི་ཆོས་
ཐམས་ཅད་ཡང་དག་པར་སྒྲུབ་པ་ལ་ལུས་དང་ངག་དང་ཡིད་ཀྱི་ལས་སོ་ཞེས་གོ་རིམས་བཞིན་དུ་བརྗོད་པར་བྱའོ། །བསམ་གཏན་གྱི་ཕ་རོལ་ཏུ་ཕྱིན་པ་ལ་ནི་ལུས་དང་ངག་དང་ཡིད་ཀྱི་ལས་ཀྱི་རྣམ་པ་ཐམས་ཅད་དབང་འབྱོར་པ་དང་སེམས་ཀྱི་གནས་རྣམ་པ་ཐམས་ཅད་དང་ལྡན་ནོ། །
ཤེས་རབ་ཀྱི་ཕ་རོལ་ཏུ་ཕྱིན་པ་ལ་ནི་ལུས་དང་ངག་དང་ཡིད་ཀྱི་ལས་ཀྱི་རྣམ་པ་ཐམས་ཅད་དབང་འབྱོར་པ་ལ་གང་རྣམ་པ་ཐམས་ཅད་དུ་ཆོས་རབ་ཏུ་རྣམ་པར་འབྱེད་པའོ་ཞེས་བརྗོད་པར་བྱའོ། །ལྷག་མ་ཐམས་ཅད་ནི་སྦྱིན་པའི་རང་བཞིན་དུ་རིག་པར་བྱའོ། །གང་སྦྱིན་པ་ནི་

71-1-272b

ཐམས་ཅད་མཁྱེན་པ་ཉིད་ལས་བརྩམས་པ་དང་། ཐམས་ཅད་མཁྱེན་པ་ཉིད་དུ་འགྱུར་བ་དང་། ཐམས་ཅད་མཁྱེན་པ་ཉིད་དུ་འཛིན་པ་དང་། ཐམས་ཅད་མཁྱེན་པ་ཉིད་ཀྱི་བྱ་བ་བྱེད་པ་སྟེ། དེ་ནི་སྦྱིན་པའི་ཕ་རོལ་ཏུ་ཕྱིན་པ་ཉིད་ཅེས་བྱའོ། །ཚིག་བཞི་པོ་དེ་དག་ནི་གོ་རིམས་བཞིན་
དུ་རྩོམ་པ་དང་བག་ཆགས་དང་ལུས་དང་རྒྱུ་མཐུན་པར་རིག་པར་བྱའོ། །དེ་ལ་རྩོམ་པ་ནི་ཐམས་ཅད་མཁྱེན་པ་ཉིད་ལས་བརྩམས་ཏེ་འབྱུང་བ་དང་། འབྱུང་བ་དེར་ཡོངས་སུ་བསྔོ་བའི་ཕྱིར་རོ། །སྦྱིན་པ་དེ་རྒྱུད་ལ་བག་ཆགས་སུ་བསྒོ་སྟེ་དེ་ཕྱི་མ་ལས་ཐམས་ཅད་མཁྱེན་པ་ཉིད་དུ་འགྱུར་རོ། །གང་གི་ཚེ་
དེ་ཉིད་ཡོངས་སུ་རྫོགས་པར་གྱུར་པ་དེའི་ཚེ་ཆོས་ཀྱི་སྐུ་ཡོངས་སུ་འགྲུབ་པའི་ཚུལ་གྱིས་ཐམས་ཅད་མཁྱེན་པ་ཉིད་ཡོངས་སུ་འཛིན་ཏོ། །དེའི་འོག་ཏུ་ལོངས་སྤྱོད་རྫོགས་པ་དང་སྤྲུལ་པའི་སྐུ་རྒྱུ་མཐུན་པའི་སྒོ་ནས་ཐམས་ཅད་མཁྱེན་པའི་བྱ་བ་བྱེད་དོ། །ཤེས་རབ་ཀྱི་ཕ་རོལ་ཏུ་ཕྱིན་
པའི་བར་ལ་ཡང་དེ་བཞིན་དུ་རིག་པར་བྱའོ། །གོ་རིམས་ཀྱི་འོག་མ་འོག་མ་ལ་བརྟེན་པའི་ཕྱིར་ཏེ། སྦྱིན་པའི་ཕ་རོལ་ཏུ་ཕྱིན་པས་ནི་ནང་དང་ཕྱིའི་དང་དངོས་པོ་ཐམས་ཅད་ཡོངས་སུ་གཏོང་བར་གོམས་པས་ལུས་དང་སྲོག་ལ་མི་ལྟ་བའི་བྱང་ཆུབ་སེམས་དཔའ་ལོངས་སྤྱོད་ཀྱི་ཕུང་པོ་ཆེན་
པོ་ཡང་སྤངས་ནས་ཚུལ་ཁྲིམས་ཡང་དག་པར་འཛིན་པར་བྱེད་དོ། །ཚུལ་ཁྲིམས་རྗེས་སུ་བསྲུང་བ་ནི་གཤེ་ཡང་སླར་གཤེ་བར་མི་བྱེད་དེ་ཞེས་བྱ་བ་ལ་སོགས་པ་རྣམས་ཀྱིས་བཟོད་པར་འགྱུར་རོ། །གྲང་བ་ལ་སོགས་པ་བཟོད་པ་ནི་དེའི་གཞི་ལ་སྦྱོར་བ་མི་ཉམས་པས་བརྩོན་འགྲུས་
བརྩམས་པ་ཡིན་ནོ། །བརྩོན་འགྲུས་བརྩམས་པ་ནི་སྦྱོར་བ་མཐའི་འབྲས་བུ་ཐོབ་པས་བསམ་གཏན་སྒྲུབ་པའོ། །བསམ་གཏན་ཕུན་སུམ་ཚོགས་ཏེ་སེམས་མཉམ་པར་གཞག་པ་ནི་ཡང་དག་པ་ཇི་ལྟ་བ་བཞིན་དུ་ཤེས་པས་འཇིག་རྟེན་ལས་འདས་པའི་ཤེས་རབ་འཐོབ་བོ། །ཡང་གོང་
མ་གོང་མ་ནི་གཞི་ཡིན་པའི་ཕྱིར་རོ། །ཚུལ་ཁྲིམས་ནི་སྦྱིན་པའི་གཞི་ཡིན་ནོ། །དེ་བཞིན་དུ་ཤེས་རབ་ནི་བསམ་གཏན་གྱི་གཞི་ཡིན་པའི་བར་དུའོ། །འདི་ལྟར་ཚུལ་ཁྲིམས་དང་ལྡན་པའི་སྦྱིན་པས་ཕན་བཏགས་པའི་ཚུལ་ཁྲིམས་ཀྱིས་གནོད་པ་མི་བྱེད་པའི་ཕྱིར་སྦྱིན་པ་རྣམ་པར་

71-1-273a

དག་པར་འགྱུར། དེ་ལྟར་བྱང་ཆུབ་སེམས་དཔའི་ལེན་པ་པོ་སོ་སོ་དེ་རྣམ་པར་འཚེ་བ་དང་བྲལ་བར་ཡོ་བྱད་ཀྱིས་བདེ་བར་སྦྱོར་བས་ཚུལ་ཁྲིམས་ཀྱི་སྟོབས་ཀྱིས་སྦྱིན་པ་རྣམ་པར་དག་པར་རིག་པར་བྱའོ། །དེ་ལྟར་བཟོད་པ་དང་ལྡན་པ་ནི་གཞན་གནོད་པ་བྱེད་པ་དག་གིས་
བསླབ་པའི་གཞི་མི་འདྲལ་བ་ཚུལ་ཁྲིམས་རྣམ་པར་དག་གོ། །བརྩོན་འགྲུས་བརྩམས་པས་སྤྲོ་བའི་སྟོབས་ཀྱིས་ཆེད་དུ་འཁོར་བ་ཁས་བླངས་པ་ནི་སེམས་ཅན་གྱི་ལོག་པར་སྒྲུབ་པའི་སྡུག་བསྔལ་དེ་བླག་ཏུ་བཟོད་པས་བཟོད་པ་རྣམ་པར་དག་གོ། །བསམ་གཏན་ནི་བདེ་བ་དང་
བཅས་པ་དང་ཡིད་བདེ་བ་དང་བཅས་པར་དགེ་བའི་ཆོས་ཐམས་ཅད་ལ་སྦྱོར་བ་བརྩོན་འགྲུས་རྣམ་པར་དག་གོ། །ཤེས་རབ་དང་ལྡན་པའི་ཆོས་རྣམ་པ་མང་པོ་ལ་རྣམ་པར་བལྟས་ནས་ནང་དུ་ཞི་བར་བྱེད་པ་ནི་ཏིང་ངེ་འཛིན་རྣམ་པར་འཕེལ་བས་བསམ་གཏན་རྣམ་པར་དག་སྟེ། ཤེས་
རབ་མེད་ལ་བསམ་གཏན་མེད། །ཅེས་པའི་ཚིགས་སུ་བཅད་པ་ལས་གསུངས་པའི་ཕྱིར་རོ། །ཇི་ལྟར་རགས་པའི་རིམ་གྱིས་ཀྱང་གོ་རིམས་བཞིན་དུ་རིག་པར་བྱའོ། །སྦྱིན་པ་ནི་ཐམས་ཅད་ཀྱི་ནང་ན་རགས་ཏེ་དེའི་ཕྱིར་ཐོག་མར་རྣམ་པར་གཞག་གོ། །དེའི་འོག་ཏུ་བཟོད་པ་
ལ་སོགས་པས་ཚུལ་ཁྲིམས་རགས་སོ། །དེ་བཞིན་དུ་ཤེས་རབ་པས་བསམ་གཏན་རགས་པའི་བར་དུའོ། །ཤེས་རབ་ནི་ཐམས་ཅད་ཀྱི་ནང་ན་ཕྲ་སྟེ་དེའི་ཕྱིར་ཐམས་ཅད་ཀྱི་ཐ་མར་བཞག་གོ། །ངེས་པའི་ཚིག་ནི་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་ཞེས་བྱ་ཞེ་ན། སྦྱིན་
པ་ཆེན་པོ་དང་། སྐྱོན་མེད་པ་དང་། དྲི་མ་མེད་པ་ནི་སྦྱིན་པའི་ཕ་རོལ་ཏུ་ཕྱིན་པ་ཞེས་བྱའོ། །དེ་ལ་སྦྱིན་པ་ཆེན་པོ་ནི་ནང་དང་ཕྱིའི་དངོས་པོ་ཐམས་ཅད་སྦྱིན་པ་དང་ཡུན་རིང་དུ་སྦྱིན་པའི་ཕྱིར་རོ། །སྐྱོན་མེད་པ་ནི་གནོད་པས་ཀུན་ཏུ་ཚོལ་བ་ལ་སོགས་པ་རྣམ་པར་སྤངས་པའི་ཕྱིར་རོ། །
ཇི་སྐད་དུ་འཕགས་པ་བློ་གྲོས་མི་ཟད་པས་བསྟན་པའི་མདོ་ལས་སྦྱིན་པ་མི་ཟད་པ་ལས་བརྩམས་ཏེ་བསྟན་ལ། བཙུན་པ་ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ཀྱི་སྦྱིན་པ་ཡང་མི་ཟད་པ་སྟེ། དེ་ཅིའི་ཕྱིར་ཞེ་ན། ཚད་མེད་པའི་ཕྱིར་རོ། །བཙུན་པ་ཤ་ར་དྭ་ཏིའི་བུ་

71-1-273b

བྱང་ཆུབ་སེམས་དཔའ་རྣམས་ཀྱི་སྦྱིན་པ་ཡོངས་སུ་སྦྱང་བ་ཡང་ཚད་མེད་པ་སྟེ། ཚེ་དང་། སྤོབས་པ་དང་། བདེ་བ་དང་། སྟོབས་དང་། ཁ་དོག་ཉེ་བར་བརྟག་པའི་ཕྱིར་ཟས་འདོད་པ་རྣམས་ལ་ནི་ཟས་སྦྱིན་ནོ། །ཉོན་མོངས་པའི་སྲེད་པ་བསལ་བའི་ཕྱིར་བཏུང་བ་འདོད་པ་རྣམས་
ལ་ནི་བཏུང་བ་སྦྱིན་ནོ། །བདེ་བ་དང་འབྱོར་པའི་དངོས་པོ་ཐམས་ཅད་བསྡུས་པའི་ཕྱིར་བཞོན་པ་འདོད་པ་རྣམས་ལ་ནི་བཞོན་པ་སྦྱིན་ནོ། །ངོ་ཚ་ཤེས་པ་དང་ཁྲེལ་ཡོད་པ་དང་། མདོག་གསེར་གྱི་ཁ་དོག་ཡོངས་སུ་སྦྱང་བའི་ཕྱིར་གོས་འདོད་པ་རྣམས་ལ་གོས་ཡོངས་སུ་སྦྱིན་པའོ། །དེ་བཞིན་
གཤེགས་པའི་ལྷའི་སྤྱན་ཡོངས་སུ་རྫོགས་པར་བྱ་བའི་ཕྱིར་མར་མེ་འདོད་པ་རྣམས་ལ་ནི་མར་མེ་ཡོངས་སུ་སྦྱིན་པའོ། །དེ་བཞིན་གཤེགས་པའི་ལྷའི་སྙན་ཡོངས་སུ་དང་བར་བྱ་བའི་ཕྱིར་སིལ་སྙན་འདོད་པ་རྣམས་ལ་ནི་སིལ་སྙན་ཡོངས་སུ་སྦྱིན་པའོ། །ཚུལ་ཁྲིམས་དང་ཐོས་པ་
དང་ཏིང་ངེ་འཛིན་གྱི་དྲིས་བྱུག་པའི་ཕྱིར་སྤོས་དང་བྱུག་པ་འདོད་པ་རྣམས་ལ་ནི་སྤོས་དང་བྱུག་པ་སྦྱིན་པའོ། །གཟུངས་དང་སྤོབས་པ་དང་བྱང་ཆུབ་ཀྱི་ཡན་ལག་གི་མེ་ཏོག་ཐོབ་པར་བྱ་བའི་ཕྱིར་ཕྲེང་བ་འདོད་པ་རྣམས་ལ་ནི་ཕྲེང་བ་སྦྱིན་པར་བྱའོ། །ལུས་ཀྱི་དྲི་ཡིད་དུ་འོང་བ་ཐོབ་པར་བྱ་
བའི་ཕྱིར་ཕྱེ་མ་འདོད་པ་རྣམས་ལ་ཕྱེ་མ་སྦྱིན་པའོ། །སྐྱེས་བུ་ཆེན་པོའི་མཚན་རོ་བྲོ་བ་མཆོག་ཏུ་ཡོངས་སུ་རྫོགས་པར་བྱ་བའི་ཕྱིར་རོ་བྲོ་བ་ཐམས་ཅད་འདོད་པ་རྣམས་ལ་རོ་བྲོ་བ་ཐམས་ཅད་སྦྱིན་པའོ། །སེམས་ཅན་ཐམས་ཅད་ཀྱི་གནས་དང་སྐྱབས་དང་། མགོན་དང་དཔུང་གཉེན་
བྱ་བའི་ཕྱིར་གནས་འདོད་པ་རྣམས་ལ་གནས་སྦྱིན་པར་བྱའོ། །སྒྲིབ་པ་ཐམས་ཅད་རབ་ཏུ་སྤངས་པ་དང་ཚངས་པའི་གནས་པ་དེ་བཞིན་གཤེགས་པའི་གཟིམས་ཆ་ཐོབ་པར་བྱ་བའི་ཕྱིར་མལ་ཆ་འདོད་པ་རྣམས་ལ་མལ་ཆ་སྦྱིན་པར་བྱེད་དོ། །སྟོང་གསུམ་གྱི་སྟོང་ཆེན་པོའི་ས་
ཐམས་ཅད་ཀྱི་བྱང་ཆུབ་ཀྱི་སྙིང་པོ་རྡོ་རྗེའི་གདན་ཐོབ་པར་བྱ་བའི་ཕྱིར་སྟན་འདོད་པ་རྣམས་ལ་སྟན་སྦྱིན་པར་བྱེད་དོ། །བྱང་ཆུབ་ཀྱི་ཡོ་བྱད་ཐམས་ཅད་བཀངབའི་ཕྱིར་ཡོ་བྱད་འདོད་པ་རྣམས་ལ་ཡོ་བྱད་སྦྱིན་པའོ། །མི་རྒ་མི་འཆི་བའི་བདུད་རྩིས་ཡོངས་སུ་བཀང་བའི་ཕྱིར་སྨན་འདོད་པ་རྣམས་

71-1-274a

ལ་སྨན་སྦྱིན་པའོ། །རང་དབང་དང་རང་ཉམས་དང་རང་བྱུང་གི་ཡེ་ཤེས་བསྐང་བའི་ཕྱིར་བྱང་ཆུབ་སེམས་དཔའ་རྣམས་ཀྱི་བྲན་ཕོ་དང་བྲན་མོ་ཡོངས་སུ་བཏང་བའི་སྦྱིན་པའོ་ཞེས་རྒྱ་ཆེར་འབྱུང་བ་ལྟ་བུའོ། །དྲི་མ་མེད་པ་ནི་མི་མཐུན་པའི་ཕྱོགས་བག་ཆགས་དང་
བཅས་པ་སྤངས་པའི་ཕྱིར་རོ། །དམ་པ་རྣམ་པ་འདི་གསུམ་གྱིས་སྦྱིན་པའི་ཕ་རོལ་ཏུ་ཕྱིན་པ་ཞེས་བརྗོད་པ་ཡིན་ཏེ། དམ་པ་རྣམ་གསུམ་ནི་འདྲིས་པ་དང་བཅས་པའི་ངོ་བོ་ཉིད་དམ་པ་དང་ཐབས་དམ་པ་དང་འབྲས་བུ་དམ་པའོ། །འདྲིས་པ་དམ་པ་ནི་ཡུན་རིང་པོ་ནས་སྦྱིན་པར་རིག་
པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་ཡང་དེ་བཞིན་དུ་རིག་པར་བྱའོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྐྱོན་མེད་པ་ནི་བདག་ཏུ་སྒྲོ་འདོགས་པ་རྣམ་པར་སྤངས་པའི་ཕྱིར་ཏེ་ཅི་རིགས་སུ་དེ་མི་ཟད་པར་བལྟ་བར་བྱའོ། །ཡང་དམ་པ་རྣམ་པ་བཅུ་གཉིས་དང་ལྡན་པའི་ཕྱིར་ཕ་
རོལ་ཏུ་ཕྱིན་པ་ཞེས་བྱའོ། །དམ་པ་རྣམ་པ་བཅུ་གཉིས་ལ་རྒྱ་ཆེ་བ་དམ་པ་ནི་འཇིག་རྟེན་གྱི་ཕུན་སུམ་ཚོགས་པ་ཐམས་ཅད་མི་འདོད་པ་དང་མཆོག་ཏུ་གྱུར་པའི་ཕྱིར་རོ། །ཡུན་རིང་པོ་དམ་པ་ནི་བསྐལ་པ་གྲངས་མེད་པ་གསུམ་དུ་ཡོངས་སུ་བསྒོམས་པའི་ཕྱིར་རོ། །ཆེད་དུ་བྱ་བ་དམ་པ་ནི་
སེམས་ཅན་གྱི་དོན་བྱ་བའི་ཆེད་ཀྱི་ཕྱིར་རོ། །ཟད་མི་ཤེས་པ་དམ་པ་ནི་བྱང་ཆུབ་ཆེན་པོར་ཡོངས་སུ་བསྔོས་པས་གདུང་བར་མི་འགྱུར་བའི་ཕྱིར་རོ། །རྒྱུན་མི་འཆད་པ་དམ་པ་ནི་བདག་དང་གཞན་མཉམ་པ་ཉིད་དུ་མོས་པའི་ཕྱིར་རོ། །སེམས་ཅན་ཐམས་ཅད་ལ་སྦྱིན་པ་ལ་སོགས་པ་ཕ་
རོལ་ཏུ་ཕྱིན་པ་རྣམས་ཡོངས་སུ་རྫོགས་པར་བྱ་བའི་ཕྱིར་རོ། །ཚིགས་མེད་པ་དམ་པ་ནི་གཞན་གྱི་སྦྱིན་པ་ལ་སོགས་པ་ལ་རྗེས་སུ་ཡི་རང་བ་ཙམ་གྱིས་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བའི་ཕྱིར་རོ། །དབང་འབྱོར་པ་དམ་པ་ནི་ནམ་མཁའ་མཛོད་ཀྱི་ཏིང་ངེ་འཛིན་ལ་སོགས་
པས་སྦྱིན་པ་ལ་སོགས་པ་ཡོངས་སུ་རྫོགས་པའི་ཕྱིར་རོ། །ཡོངས་སུ་གཟུང་བ་དམ་པ་ནི་རྣམ་པར་མི་རྟོག་པའི་ཡེ་ཤེས་ཀྱིས་ཡོངས་སུ་གཟུང་བའི་ཕྱིར་རོ། །རྩོམ་པ་དམ་པ་ནི་མོས་པ་སྤྱོད་པའི་ས་ལ་བཟོད་པ་ཆེར་གྱུར་པ་ལའོ། །ཐོབ་པ་དམ་པ་ནི་ས་དང་པོ་ལའོ། །རྒྱུ་

71-1-274b

མཐུན་པ་དམ་པ་ནི་དེ་མ་ཡིན་པ་གཞན་བརྒྱད་པོ་དག་ལའོ། །འགྲུབ་པ་དམ་པ་ནི་ས་བཅུ་པ་དང་། དེ་བཞིན་གཤེགས་པའི་ས་ལ་བྱང་ཆུབ་སེམས་དཔའ་འགྲུབ་པ་དང་སངས་རྒྱས་འགྲུབ་པའི་ཕྱིར་རོ། །ཡང་དམ་པ་རྣམས་ཀྱིས་སྤྱད་པ་དང་བགྲོད་པའི་ཕྱིར་ཕ་རོལ་ཏུ་ཕྱིན་པ་རྣམས་ཏེ། 
སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་སྤྱད་པ་དང་བགྲོད་ཅེས་པའི་ཐ་ཚིག་གོ། །ཡང་ཤེས་བྱའི་ཕ་རོལ་ཏུ་སོན་པས་ཕ་རོལ་ཏུ་ཕྱིན་པ་སྟེ། སངས་རྒྱས་ཉིད་ལ་གནས་ཞེས་པའི་ཐ་ཚིག་གོ། །ཡང་བདག་དང་གཞན་མཆོག་ཏུ་གནོད་པ་ལས་སྒྲོལ་བར་བྱེད་པའི་ཕ་རོལ་
ཏུ་ཕྱིན་པ་རྣམས་ཏེ། བདག་དང་གཞན་སྡུག་བསྔལ་གྱི་རྒྱ་མཚོ་ལས་བཟླ་བར་བྱེད་ཅེས་པའི་ཐ་ཚིག་གོ། །འདི་ནི་རེ་ཞིག་ཐུན་མོང་གི་ངེས་ཚིག་གོ། །སོ་སོར་ངེས་པའི་ཚིག་ནི་སྦྱིན་བདག་གི་དབུལ་བ་སེལ་བ་དང་། ལེན་པ་པོ་རྣམས་ཀྱི་གདུང་བ་སེལ་བའི་ཕྱིར་སྦྱིན་པའོ། །
དབང་པོ་ཞི་བ་ཐོབ་པ་དང་འགྲོ་བ་བཟང་པོར་སྦྱོར་བ་དང་། གསལ་བའི་གནས་ཡིན་པས་ཚུལ་ཁྲིམས་ཏེ། གོ་རིམས་བཞིན་དུ་དབང་པོ་རྣམས་ཀྱི་སྒོ་སྡོམ་པར་བྱེད་པ་དང་བདེ་འགྲོར་འགྲོ་བའི་རྒྱུར་གྱུར་པ་དང་འགྱོད་པ་མེད་པ་ལ་སོགས་པའི་རིམ་གྱིས་མྱ་ངན་ལས་འདས་པའི་
བར་གྱི་གནས་ཡིན་པའི་ཕྱིར་རོ། །ཁྲོ་བའི་ན་ཚ་སེལ་བ་དང་རྨ་འབྱིན་པའི་སེམས་འོངས་པ་སེལ་བ་དང་། ཞི་བ་བརྗོད་པའི་བཟོད་པའོ། །རྨ་འབྱིན་པ་སེམས་པ་ནི་གང་གིས་གནོད་པ་བྱེད་པ་རྣམས་ལ་ལན་དུ་གནོད་པ་སྟེ་དེ་འོངས་པ་འདིས་འབྲལ་བར་བྱེད་པ་ནི་སེལ་བར་རིག་པར་
བྱའོ། །རྨ་འབྱིན་པ་ནི་འདི་དག་ལས་ཤར་གཉེར་བ་ཡོད་པས་རྨ་བྱིན་པ་ཅན་ཏེ་དེ་དག་བདག་ལ་མི་འཇིགས་པ་སྒྲོགས་པས་བདེ་བ་ནི་བདེ་བ་སྒྲོགས་པར་རིག་པར་བྱའོ། །སེལ་བ་འཕེལ་བར་སྤྱོད་པས་བརྩོན་འགྲུས་ཏེ་དེ་སེལ་བའི་ཕྱིར་སྤྱོད་པ་ནི་ཡང་དག་པར་སྤོང་བ་གཉིས་ཀྱིས་མི་
དགེ་བའི་ཆོས་དང་བྲལ་བར་བྱེད་པའོ། །འཕེལ་བའི་ཕྱིར་སྤྱོད་པ་ནི་ཡང་དག་པར་སྤོང་བ་གཉིས་ཀྱིས་དགེ་བའི་ཆོས་ཡང་དག་པར་སྒྲུབ་པའོ། །འཛིན་པ་དང་སྡོམ་པ་དང་དུལ་བ་དང་ཐོབ་པར་བྱེད་པས་བསམ་གཏན་ཏེ། དེ་ལ་འཛིན་པ་ནི་དམིགས་པ་ལ་སེམས་འཛིན་པའོ། །སྡོམ་

71-1-275a

པ་ནི་རྣམ་པར་གཡེང་བ་ལས་སེམས་ཡང་དག་པར་སྡོམ་པའོ། །འདུལ་བ་ནི་ཀུན་ནས་དཀྲིས་པ་རྣམས་རྣམ་པར་གནོན་པའོ། །ཐོབ་པར་བྱེད་པ་ནི་དབང་འབྱོར་པ་ཐོབ་པར་བྱེད་པར་རིག་པར་བྱའོ། །གཞན་གྱིས་སྨྲས་པ་ཤེས་པ་དང་སོ་སོ་རང་གིས་ཤེས་པ་དང་། 
རྣམ་པར་ཤེས་པ་དང་། ཞི་བ་ཐོབ་པ་དང་། རབ་ཏུ་ཞི་བ་ཐོབ་པ་དང་། ཡོན་ཏན་མཆོག་ཏུ་སྦྱིན་པས་ཤེས་རབ་སྟེ་དེ་ལ་གཞན་གྱི་སྨྲས་པ་ལས་བྱུང་བའི་ཚུལ་བཞིན་ཡིད་ལ་བྱེད་པ་དང་མཚུངས་པར་ལྡན་པའི་ཤེས་རབ་བོ། །སོ་སོ་རང་གིས་ཤེས་པ་ནི་འཇིག་རྟེན་ལས་འདས་པའོ། །
རྣམ་པར་ཤེས་པ་ནི་འཇིག་རྟེན་ལས་འདས་པའི་རྗེས་ལས་ཐོབ་པའོ། །ཞི་བ་ཐོབ་པར་བྱ་བའི་ཕྱིར་ཤེས་པ་ནི་བསྒོམ་པའི་ལམ་ལ་གཉེན་པོར་གྱུར་པའོ། །ཡོན་ཏན་མཆོག་ཏུ་ཕྱིན་པར་བྱ་བའི་ཕྱིར་ཤེས་པ་ནི་ཡོན་ཏན་ཁྱད་པར་ཅན་མངོན་པར་སྒྲུབ་པའི་ཤེས་རབ་ཏུ་རིག་པར་བྱའོ། །བསྒོམ་
པ་ནི་རྣམ་པ་ལྔ་སྟེ། ཕུང་པོ་ལ་གནས་པ་ནས་དབང་འབྱོར་པ་ལ་གནས་པའི་བར་དུའོ། །འདིར་ཚིགས་སུ་བཅད་པ། ཕུང་པོ་གནས་པ་བགོམ་པ་སྟེ། །ཡིད་ལ་བྱེད་པ་བསམ་པ་ཡིན། །ཐབས་དང་དབང་འབྱོར་དེ་བཞིན་ཏེ། །དེ་དག་ཐམས་ཅད་བརྗོད་པ་ཡིན། །ཇི་སྐད་དུ། རྒྱུ་
དང་རྣམ་སྨིན་སྨོན་ལམ་དང་། །སོ་སོར་རྟོག་པ་ཕུང་པོ་འདྲ། །ཞེས་བཤད་པ་ལྟ་བུའོ། །དེ་ལ་ཕུང་པོ་ལ་རྣམ་པ་བཞི་སྟེ། དེ་ལ་རྒྱུ་ལ་གནས་པ་ནི་ཤེས་རབ་ཀྱི་སྟོབས་ཀྱིས་ཕ་རོལ་ཏུ་ཕྱིན་པ་རྣམས་ལ་ནན་ཏན་གྱིས་གོམས་པར་བྱེད་པའོ། །རྣམ་པར་སྨིན་པ་ལ་གནས་པ་ནི་གང་ཕུན་སུམ་
ཚོགས་པའི་སྟོབས་ཀྱིས་སོ། །སྨོན་ལམ་ལ་གནས་པ་ནི་གང་སྔོན་གྱི་སྨོན་ལམ་གྱི་སྟོབས་ཀྱིས་སོ། །སོ་སོར་རྟོག་པའི་སྟོབས་ཀྱིས་གནས་པ་ནི་ཤེས་རབ་ཀྱི་སྟོབས་ཀྱིས་ཕ་རོལ་ཏུ་ཕྱིན་པ་རྣམས་ལ་ནན་ཏན་གྱིས་གོམས་པར་བྱེད་པའོ། །ཡིད་ལ་བྱེད་པ་ལ་གནས་པ་ནི་བཞི་སྟེ། 
མོས་པ་ཡིད་ལ་བྱེད་པ་བསྒོམ་པ་ནི་གང་ལ་ཕ་རོལ་ཏུ་ཕྱིན་པ་ཐམས་ཅད་དང་ལྡན་པའི་མདོ་སྡེ་ལ་མོས་པ་བསྒོམ་པའོ། །རོ་མྱོང་བ་ཡིད་ལ་བྱེད་པས་བསྒོམ་པ་ནི་ཕ་རོལ་ཏུ་ཕྱིན་པ་ཐོབ་པ་རྣམས་ལ་ཡོན་ཏན་མཐོང་བའི་ཚུལ་གྱིས་རོ་མྱང་བར་བྱེད་པའོ། །རྗེས་སུ་ཡི་རང་བ་ཡིད་ལ་བྱེད་པས་

71-1-275b

བསྒོམ་པ་ནི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་ཀྱི་སྦྱིན་པ་ལ་སོགས་པ་ལ་རྗེས་སུ་ཡི་རང་བའོ། །མངོན་པར་དགའ་བ་ཡིད་ལ་བྱེད་པས་བསྒོམ་པ་ནི་བདག་དང་སེམས་ཅན་ཐམས་ཅད་ཀྱི་མ་འོངས་པའི་ཕ་རོལ་ཏུ་ཕྱིན་པའི་ཁྱད་པར་ལ་མངོན་པར་དགའ་བའོ། །བསམ་
པ་ལ་གནས་པ་ནི་ཕ་རོལ་ཏུ་ཕྱིན་པའི་བསྒོམ་པ་རྣམ་པ་དྲུག་སྟེ། མི་ངོམས་པའི་བསམ་པ་དང་། ཡངས་པའི་བསམ་པ་དང་། དགའ་བའི་བསམ་པ་དང་། ཕན་འདོགས་པའི་བསམ་པ་དང་། གོས་པ་མེད་པའི་བསམ་པ་དང་། དགེ་བའི་བསམ་པའོ། །དེ་ལ་བྱང་ཆུབ་སེམས་
དཔའ་སྦྱིན་པ་ལ་མི་ངོམས་པའི་བསམ་པ་ནི་བྱང་ཆུབ་སེམས་དཔའ་གཅིག་ཅིག་གངྒཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་རིན་པོ་ཆེ་སྣ་བདུན་གྱིས་ཡོངས་སུ་གང་བ་དང་ལུས་གངྒཱའི་ཀླུང་གཅིག་ལ་སྦྱིན་པར་བྱེད་ཅེས་སོ། །དེ་བཞིན་དུ་སྐད་ཅིག་རེ་རེ་ལ་གངྒཱའི་ཀླུང་གི་བྱེ་མ་སྙེད་ཀྱི་བསྐལ་
པར་སྦྱིན་པར་བྱེད་ཅིང་སེམས་ཅན་གཅིག་ལ་ཇི་ལྟ་བ་བཞིན་དུ་སེམས་ཅན་གྱི་ཁམས་ཇི་སྙེད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡོངས་སུ་སྨིན་པར་བྱེད་ལ། རྣམ་གྲངས་འདིས་དེ་ལ་སྦྱིན་པས་མི་ངོམས་པ་ཉིད་ནི་བྱང་ཆུབ་སེམས་དཔའ་སེམས་དཔའ་ཉིད་དེ། རྣམ་པ་
འདི་ལྟ་བུའི་བསམ་པ་གང་ཡིན་པ་འདི་ནི་སྦྱིན་པ་ལ་བྱང་ཆུབ་སེམས་དཔའི་བསམ་པ་མི་ངོམས་པ་ཡིན་ནོ། །བྱང་ཆུབ་ཀྱི་སྙིང་པོ་ལ་འདུག་གི་བར་དུ་བྱང་ཆུབ་སེམས་དཔའ་རྣམས་རྣམ་པ་དེ་ལྟ་བུར་སྦྱིན་པ་གཅིག་ནས་གཅིག་ཏུ་བརྒྱུད་པ་སྐད་ཅིག་ཙམ་ཡང་ཉམས་པར་མི་བྱེད་ཅིང་རྒྱུན་མི་
གཅོད་དེ། རྣམ་པ་འདི་ལྟ་བུའི་བསམ་པ་གང་ཡིན་པ་འདི་ནི་སྦྱིན་པ་ལ་བྱང་ཆུབ་སེམས་དཔའི་ཡངས་པའི་བསམ་པའོ། །དེ་ལྟར་སྦྱིན་པས་སེམས་ཅན་དེ་དག་རྗེས་སུ་འཛིན་པའི་བྱང་ཆུབ་སེམས་དཔའ་ནི་ཤིན་ཏུ་དགའ་བ་ཡིན་གྱི་སྦྱིན་པ་དེས་ཡོངས་སུ་གཟུང་བའི་སེམས་ཅན་
དེ་དག་ནི་དེ་ལྟ་མ་ཡིན་ཏེ། རྣམ་པ་འདི་ལྟ་བུའི་བསམ་པ་གང་ཡིན་པ་འདི་ནི་སྦྱིན་པ་ལ་བྱང་ཆུབ་སེམས་དཔའི་དགའ་བའི་བསམ་པའོ། །གང་དག་ལ་དེ་ལྟར་སྦྱིན་པས་ཕན་འདོགས་པའི་སེམས་ཅན་དེ་དག་ནི་བདག་ལ་ཕན་འདོགས་པར་བྱང་ཆུབ་སེམས་དཔའ་མཐོང་གི་བདག་གིས་ནི་

71-1-276a

མ་ཡིན་ཏེ། དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བརྟན་པའི་ཕྱིར་རོ། །རྣམ་པ་འདི་ལྟ་བུའི་བསམ་པ་གང་ཡིན་པ་དེ་འདི་ནི་སྦྱིན་པ་ལ་བྱང་ཆུབ་སེམས་དཔའ་ཕན་འདོགས་པའི་བསམ་པའོ། །བྱང་ཆུབ་སེམས་དཔའ་ནི་སེམས་ཅན་རྣམས་ལ་དེ་
ལྟར་སྦྱིན་པ་ལས་བྱུང་བའི་བསོད་ནམས་ཡངས་པ་མངོན་པར་འདུ་བྱས་ཀྱང་ལན་དུ་ཕན་འདོགས་པའམ་རྣམ་པར་སྨིན་པ་མི་འདོད་དེ་རྣམ་པ་འདི་ལྟ་བུའི་བསམ་པ་གང་ཡིན་པ་འདི་ནི་སྦྱིན་པའི་ཕ་རོལ་ཏུ་ཕྱིན་པ་བསྒོམ་པ་ལ་བྱང་ཆུབ་སེམས་དཔའི་གོས་པ་མེད་པའི་བསམ་པའོ། །བྱང་ཆུབ་སེམས་
དཔའི་སྦྱིན་པའི་ཕུང་པོ་སྤངས་པའི་རྣམ་པར་སྨིན་པ་དེ་ལྟ་བུའང་སེམས་ཅན་རྣམས་ཀྱི་ཡིན་པར་མངོན་པར་དགའ་བར་བྱེད་ཀྱི་བདག་ལ་ནི་དེ་ལྟ་མ་ཡིན་ཏེ། སེམས་ཅན་ཐམས་ཅད་དང་ཐུན་མོང་དུ་བྱས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །རྣམ་པ་
འདི་ལྟ་བུའི་བསམ་པ་གང་ཡིན་པ་འདི་ནི་སྦྱིན་པའི་ཕ་རོལ་ཏུ་ཕྱིན་པ་བསྒོམ་པ་དང་བྱང་ཆུབ་སེམས་དཔའི་དགེ་བའི་བསམ་པའོ། །དེ་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པའི་བར་ལ་བྱང་ཆུབ་སེམས་དཔའ་མི་ངོམས་པའི་བསམ་པ་ནི་
གང་བྱང་ཆུབ་སེམས་དཔའ་ལུས་གངྒཱའི་ཀླུང་གི་བྱེ་མ་སྙེད་དུ་གྱུར་ཞིང་དེའི་ཚེའི་ཚད་བསྐལ་པ་གངྒཱའི་ཀླུང་གི་བྱེ་མ་སྙེད་དུ་གྱུར་ལ། རྒྱུན་དུ་ཡོ་བྱད་ཐམས་ཅད་ཀྱིས་ཕོངས་པར་གྱུར་ཅིང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མེས་རབ་ཏུ་གང་བ་ན་སྤྱོད་ལམ་བཞི་བྱེད་ཀྱང་། སྐད་
ཅིག་གཅིག་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ནས་སྐད་ཅིག་གཅིག་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་བར་ལ་བསྒོམ་ཞིང་རྣམ་གྲངས་འདིས་ཚུལ་ཁྲིམས་ཀྱི་ཕུང་པོ་ཇི་སྙེད་པ་དང་། ཤེས་རབ་ཀྱི་ཕུང་པོ་ཇི་སྙེད་པ་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་འཚང་རྒྱ་བའི་ཚུལ་ཁྲིམས་ཀྱི་ཕུང་པོ་ནས་ཤེས་རབ་ཀྱི་ཕུང་པོ་དེ་བསྒོམ་ཡང་བྱང་ཆུབ་སེམས་དཔའ་དེ་མི་ངོམས་པའོ། །བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་འདུག་གི་བར་དུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་

71-1-276b

བསྒོམ་པའི་བར་དུ་བསྒོམ་ལ་བྱང་ཆུབ་སེམས་དཔའ་ཡངས་པའི་བསམ་པའོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་དེས་སེམས་ཅན་རྗེས་སུ་འཛིན་པའི་བྱང་ཆུབ་སེམས་དཔའ་ནི་རབ་ཏུ་དགའ་བ་ཡིན་གྱི་རྗེས་སུ་གཟུང་བའི་སེམས་
ཅན་དེ་དག་ནི་དེ་ལྟར་མ་ཡིན་ཏེ། རྣམ་པ་དེ་ལྟ་བུའི་བསམ་པ་གང་ཡིན་པ་འདི་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་བསྒོམ་པ་ནི་བྱང་ཆུབ་སེམས་དཔའ་དགའ་བའི་བསམ་པའོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ནས་ཤེས་
རབ་ཀྱི་ཕ་རོལ་ཏུ་ཕྱིན་པའི་བར་དུ་བསྒོམས་ནས་གང་དག་ལ་ཕན་འདོགས་པའི་སེམས་ཅན་དེ་དག་ནི་བདག་ལ་ཤིན་ཏུ་ཕན་འདོགས་པར་བྱང་ཆུབ་སེམས་དཔའ་མཐོང་གི་བདག་ནི་མ་ཡིན་ཏེ། དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྟོན་པའི་ཕྱིར་རོ། །རྣམ་པ་
འདི་ལྟ་བུའི་བསམ་པ་གང་ཡང་ཡིན་པ་འདི་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་བསྒོམ་པ་ལ་བྱང་ཆུབ་སེམས་དཔའ་ཕན་འདོགས་པའི་བསམ་པའོ། །དེ་ལ་བྱང་ཆུབ་སེམས་དཔའ་ནི་དེ་ལྟར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལས་
བྱུང་བ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་ལས་བྱུང་བའི་བསོད་ནམས་མང་པོ་མངོན་པར་འདུ་བྱས་ཀྱང་དེ་ལ་ལན་དུ་ཕན་འདོགས་པའམ་རྣམ་པར་སྨིན་པ་ལ་འདོད་པ་མེད་དེ། འདི་ལྟ་བུའི་བསམ་པ་གང་ཡིན་པ་འདི་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ནས་ཤེས་རབ་ཀྱི་
བར་གྱི་བསྒོམ་པ་ལ་གོས་པ་མེད་པའི་བསམ་པའོ། །དེ་ལ་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་བསྒོམ་པ་ལས་བྱུང་བ་ནས་ཤེས་རབ་ཀྱི་བར་གྱི་བསོད་ནམས་ཀྱི་ཕུང་པོའི་རྣམ་པར་སྨིན་པའི་འབྲས་བུ་ཡང་སེམས་ཅན་རྣམས་ཀྱི་ཡིན་པར་མངོན་པར་དགའ་བར་
བྱེད་ཀྱི་བདག་ལ་ནི་མ་ཡིན་ཏེ། སེམས་ཅན་ཐམས་ཅད་དང་ཐུན་མོང་དུ་བྱས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བའོ། །རྣམ་པ་འདི་ལྟ་བུའི་བསམ་པ་གང་ཡིན་པ་འདི་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ནས་ཤེས་རབ་ཀྱི་ཕ་རོལ་ཏུ་ཕྱིན་

71-1-277a

པའི་བར་དུ་བསྒོམ་པ་ལ་བྱང་ཆུབ་སེམས་དཔའི་དགེ་བའི་བསམ་པའོ། །ཐབས་ལ་གནས་ཏེ་ཕ་རོལ་ཏུ་ཕྱིན་པ་བསྒོམ་པ་གང་ཞེ་ན། རྣམ་པ་གསུམ་སྟེ། སོ་སོར་རྟོག་པའི་ཕྱིར་རྣམ་པར་མི་རྟོག་པའི་ཡེ་ཤེས་ཀྱི་འཁོར་གསུམ་ཡོངས་སུ་དག་པ་སྟེ་ཐབས་དེ་
ནི་ཡིད་ལ་བྱེད་པ་ཐམས་ཅད་མངོན་པར་གྲུབ་པའི་ཕྱིར་རོ། །དབང་འབྱོར་པ་ལ་གནས་ཏེ་ཕ་རོལ་ཏུ་ཕྱིན་པ་བསྒོམ་པ་ནི་རྣམ་པ་གསུམ་སྟེ། ལུས་ལ་དབང་འབྱོར་པ་དང་། སྤྱོད་པ་ལ་དབང་འབྱོར་པ་དང་། བཤད་པ་ལ་དབང་འབྱོར་པའོ། །ལུས་ལ་དབང་འབྱོར་པ་ནི་དེ་བཞིན་
གཤེགས་པའི་སྐུ་གཉིས་སུ་བལྟ་བར་བྱ་སྟེ། རང་བཞིན་དང་ལོངས་སྤྱོད་རྫོགས་པའོ། །དེ་ལ་སྤྱོད་པ་ལ་དབང་འབྱོར་པ་ནི་སྤྲུལ་པའི་སྐུར་བལྟ་བར་བྱ་སྟེ། དེས་སེམས་ཅན་ཐམས་ཅད་ལ་སྤྱོད་པ་ཀུན་དུ་སྟོན་པའོ། །བཤད་པ་ལ་དབང་འབྱོར་པ་ནི་ཕ་རོལ་ཏུ་ཕྱིན་པ་དྲུག་རྣམ་པ་
ཐམས་ཅད་དུ་བཤད་པ་ལ་ཐོགས་པ་མེད་པའོ། །རབ་ཏུ་དབྱེ་བ་ནི་རྟོན་པ་བཅོ་བརྒྱད་ཀྱིས་ཕ་རོལ་ཏུ་ཕྱིན་པ་དྲུག་རབ་ཏུ་དབྱེ་བར་བལྟའོ། །རྟོན་པ་བཅོ་བརྒྱད་ནི་ལུས་རྟོན་པ་དང་སེམས་རྟོན་པ་དང་། དགེ་བ་རྟོན་པ་དང་། བདེ་འགྲོ་རྟོན་པ་དང་། བྱང་ཆུབ་རྟོན་པ་དང་། སྙིང་རྗེ་
རྟོན་པ་དང་། སེམས་ཅན་ཡོངས་སུ་མི་གཏོང་བར་རྟོན་པ་དང་། དམན་པའི་སེམས་ཡོངས་སུ་འདོར་བར་རྟོན་པ་དང་། མི་སྐྱེ་བའི་ཆོས་ལ་བཟོད་པ་རྟོན་པ་དང་། དགེ་བའི་རྩ་བ་སྦྱོར་བ་ལ་རྟོན་པ་དང་། དགེ་བའི་རྩ་བ་ཡང་དག་པར་སྒྲུབ་པ་རྟོན་པ་དང་། དགེ་བའི་རྩ་བ་མི་
ཟད་པར་རྟོན་པ་དང་། དགེ་བའི་རྩ་བ་ལ་ཡོངས་སུ་མི་སྐྱོ་བར་རྟོན་པ་དང་། བསམ་པའི་དོན་ཐམས་ཅད་འབྱོར་པར་རྟོན་པ་དང་། ཚོགས་སྡུད་པར་རྟོན་པ་དང་། ས་ལ་འཇུག་པ་རྟོན་པ་དང་། སངས་རྒྱས་ཀྱི་ཆོས་ཡང་དག་པར་སྒྲུབ་པ་རྟོན་པ་དང་། སངས་རྒྱས་ཀྱི་སྒྲུབ་པ་
རྟོན་པ་སྟེ་སྦྱིན་པ་ལ་སོགས་པ་རྣམ་པ་གསུམ་ཐ་དད་པས་གསུམ་གསུམ་གྱིས་གོ་རིམས་བཞིན་དུ་བསྡུས་པར་རིག་པར་བྱའོ། །དེ་ལ་སྦྱིན་པ་རྣམ་པ་གསུམ་ནི་ཟང་ཟིང་གི་སྦྱིན་པ་དང་། མི་འཇིགས་པའི་སྦྱིན་པ་དང་། ཆོས་ཀྱི་སྦྱིན་པའོ། །ཚུལ་ཁྲིམས་ལ་རྣམ་པ་གསུམ་སྟེ་སྡོམ་

71-1-277b

པའི་ཚུལ་ཁྲིམས་དང་། དགེ་བ་ཆོས་སྡུད་པའི་ཚུལ་ཁྲིམས་དང་། སེམས་ཅན་དོན་བྱེད་པའི་ཚུལ་ཁྲིམས་སོ། །བཟོད་པ་རྣམ་པ་གསུམ་ནི་གནོད་པ་བྱེད་པ་ལ་ཇི་མི་སྙམ་པའི་བཟོད་པ་དང་། སྡུག་བསྔལ་དང་དུ་ལེན་པའི་བཟོད་པ་དང་། ཆོས་ལ་ངེས་པར་སེམས་པའི་
བཟོད་པའོ། །བརྩོན་འགྲུས་རྣམ་པ་གསུམ་ནི་གོ་ཆའི་བརྩོན་འགྲུས་དང་། སྦྱོར་བའི་བརྩོན་འགྲུས་དང་། སེམས་ཅན་དོན་བྱ་བའི་བརྩོན་འགྲུས་སོ། །བསམ་གཏན་རྣམ་པ་གསུམ་ནི་མཐོང་བའི་ཆོས་ལ་བདེ་བར་གནས་པར་འགྱུར་བའི་བསམ་གཏན་དང་། མངོན་པར་ཤེས་
པ་མངོན་པར་གསལ་བའི་བསམ་གཏན་དང་། སེམས་ཅན་གྱི་དོན་བྱ་བའི་བསམ་གཏན་ནོ། །ཤེས་རབ་རྣམ་པ་གསུམ་ནི་ཀུན་རྫོབ་ལ་དམིགས་པ་དང་། དོན་དམ་པ་ལ་དམིགས་པ་དང་། སེམས་ཅན་གྱི་དོན་ལ་དམིགས་པའོ། །དེ་ལ་ཟང་ཟིང་གི་སྦྱིན་པ་ནི་ལུས་ལ་རྟོན་པ་
ཏེ་བཟའ་བ་དང་བཏུང་བ་ལ་སོགས་པའི་ཡོ་བྱད་རྣམས་ཀྱིས་ལེན་པ་པོ་ལ་ཕན་འདོགས་པའི་ཕྱིར་རོ། །མི་འཇིགས་པ་སྦྱིན་པ་ནི་སེམས་ལ་རྟོན་པ་སྟེ། ཡིད་མི་བདེ་བའི་བྱེ་བྲག་དང་བྲལ་བར་བྱས་པས་སེམས་ཀྱི་དབུགས་ཉེ་བར་སྒྲུབ་པའི་ཕྱིར་རོ། །གཞན་ཡང་དེ་བཞིན་དུ་སྦྱར་
བར་བྱའོ། །དམན་པའི་སེམས་ནི་བྱང་ཆུབ་སེམས་དཔའ་འཁོར་བའི་སྡུག་བསྔལ་གྱིས་ཡོངས་སུ་སྐྱོ་བས་ཉན་ཐོས་དང་རང་སངས་རྒྱས་ཀྱི་སེམས་ཏེ། དེ་ཡོངས་འདོར་བ་རྟོན་པ་ནི་སྡུག་བསྔལ་དང་དུ་ལེན་པའི་བཟོད་པར་རིག་པར་བྱའོ། །དགེ་བའི་རྩ་བ་མི་ཟད་པ་ནི་
སེམས་ཅན་ཐམས་ཅད་ཀྱི་དོན་བྱ་བ་ལྷག་པར་བྱེད་པས་འཁོར་བ་ཇི་སྲིད་པ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡང་ཡོངས་སུ་མི་གཏོང་བས་ཏེ། དེ་རྟོན་པ་ནི་སེམས་ཅན་གྱི་དོན་བྱ་བའི་བརྩོན་འགྲུས་སུ་རིག་པར་བྱའོ། །ཚོགས་སྡུད་པ་ནི་ཐོབ་པ་ལ་
བརྟེན་ནས་གདུལ་བྱ་རྣམས་མཉམ་པར་གཞག་པར་བྱ་བ་དང་། སེམས་མཉམ་པར་གཞག་པར་བྱ་བའི་ཕྱིར་གདམས་པ་དང་། རྗེས་སུ་བསྟན་པ་རབ་ཏུ་སྦྱིན་པ་སྟེ་དེ་རྟོན་པ་ནི་སེམས་ཅན་གྱི་དོན་བྱ་བའི་བསམ་གཏན་ནོ། །ས་ལ་འཇུག་པ་ནི་ཆོས་ལ་མོས་པ་སྔོན་དུ་བཏང་བའི་

71-1-278a

བཤད་པ་གང་གིས་ཚོགས་ཡོངས་སུ་རྫོགས་པར་བྱས་ནས་རབ་ཏུ་དགའ་བའི་ས་ལ་འཇུག་པ་སྟེ་དེ་སྟོན་པར་ནི་ཀུན་རྫོབ་ཀྱི་བདེན་པ་ལ་དམིགས་པའོ། །ལྷག་མ་ནི་ལེགས་པར་སྦྱར་བའི་ཕྱིར་སྦྱར་བར་མ་བྱས་སོ། །རབ་ཏུ་དབྱེ་བ་ནི་སྦྱིན་པ་བདུན་ཏེ། རྩ་བའི་
སྦྱིན་པ་ནི་རིགས་ཀྱི་གནས་སྐབས་པའི་བྱང་ཆུབ་སེམས་དཔའི་སྦྱིན་པའི་ཕ་རོལ་ཏུ་ཕྱིན་པ་སྟེ་རིགས་ཙམ་ལ་བརྟེན་ནས་སྦྱིན་པའི་ཕྱིར་རོ། །བླངས་པའི་སྦྱིན་པ་ནི་སེམས་བསྐྱེད་པའི་གནས་སྐབས་པ་སྟེ་སྨོན་ལམ་ཡང་དག་པར་བླངས་པ་ལ་བརྟེན་ནས་སྦྱིན་པའི་ཕྱིར་རོ། །རྗེས་སུ་འཛིན་
པའི་སྦྱིན་པ་ནི་བདག་དང་གཞན་དོན་སྒྲུབ་པའི་གནས་སྐབས་པའོ། །འཛིན་པ་ངེས་པ་མེད་པའི་སྦྱིན་པ་ནི་དེ་ཁོ་ནའི་དོན་ལ་ཡོངས་སུ་རྟོགས་པ་གནས་སྐབས་པའི་སྟེ། སྦྱིན་བདག་ལ་གནས་པ་རྣམ་པར་རྟོག་པ་ལ་མངོན་པར་ཞེན་པའི་འཛིན་པ་མེད་པའི་ཕྱིར་རོ། །ཡོངས་སུ་འཛིན་པ་
མེད་པའི་སྦྱིན་པ་ནི་མཐུན་པའི་གནས་སྐབས་པ་ནི། ཕ་རོལ་གྱི་ཡོ་བྱད་ཡོངས་སུ་འཛིན་པ་མེད་པའི་ནམ་མཁའ་མཛོད་ལ་སོགས་པའི་ཏིང་ངེ་འཛིན་རྣམས་ཀྱིས་ནམ་མཁའ་ལས་ལག་པ་བརྐྱང་ནས་ཇི་ལྟར་འདོད་པ་བཞིན་དུ་རིན་པོ་ཆེ་ལ་སོགས་པའི་ཆར་འབེབས་པའི་ཕྱིར་རོ། །སོ་
སོར་རིག་པའི་སྦྱིན་པ་ནི་ཡོངས་སུ་སྨིན་པའི་གནས་སྐབས་པ་སྟེ། འདུལ་བ་ཇི་ལྟ་བ་བཞིན་དུ་མཐུན་པར་བྱ་བའི་ཕྱིར་རོ། །སྦྱིན་པ་ཆེན་པོའི་ཆེན་པོ་ནི་བྱང་ཆུབ་མཆོག་གི་གནས་སྐབས་པའི་སྟེ་བླ་ན་མེད་པའི་ཕྱིར་རོ། །དེ་བཞིན་དུ་ཤེས་རབ་ཀྱི་བར་དུ་ཅི་རིགས་སུ་སྦྱར་བར་རིག་པར་
བྱའོ། །བསྡུས་པ་ནི་སྦྱིན་པ་ལ་སོགས་པས་བྱང་ཆུབ་སེམས་དཔའི་སས་བསྡུས་པའི་ཕྱིར་ཏེ་དེ་ལ་ཕ་རོལ་ཏུ་ཕྱིན་པ་རྣམས་ཀྱི་རིགས་བསྡུས་པ་འདི་ནི་དཔེ་ཙམ་མོ། །སྦྱིན་པའི་ཕ་རོལ་ཏུ་ཕྱིན་པ་ལ་སོགས་པ་ནི་རིགས་ཀྱིས་བསྡུས་པར་ཤེས་པར་བྱའོ། །སེམས་བསྐྱེད་པ་བསྡུས་
པ་ནི་ཁྱད་པར་དུ་འཕགས་པའི་སེམས་བསྐྱེད་པས་བསྡུས་པའི་ཕྱིར་རོ། །སེམས་བསྐྱེད་པ་ནི་རྣམ་པ་གཉིས་ཏེ། ཁྱད་པར་ཅན་མ་ཡིན་པ་དང་། ཁྱད་པར་དུ་འཕགས་པའོ། །དེ་ལ་ཁྱད་པར་ཅན་མ་ཡིན་པ་ནི། ཀྱེ་མའོ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་

71-1-278b

པར་རྫོགས་པར་འཚང་རྒྱ་བར་ཤོག་ཅིག་སྙམ་པའོ། །ཁྱད་པར་དུ་འཕགས་པ་ནི་དེ་ལྟར་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་ཤོག་ཤིག་སྙམ་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུའོ། །ཁྱད་པར་དུ་འཕགས་པའི་སེམས་བསྐྱེད་པ་འདི་ནི་ཕ་རོལ་ཏུ་ཕྱིན་པ་རྣམས་
བསྡུས་པར་རིག་པར་བྱ་སྟེ། དེ་དག་གི་རྒྱུ་ཡིན་པའི་ཕྱིར་རོ། །བདག་དང་གཞན་གྱི་དོན་བསྡུས་པ་གང་སྦྱིན་པའི་ཕུང་པོ་ཡོངས་སུ་རྫོགས་པ་འདི་དག་ནི་བདག་གི་དོན་ཏོ། །གང་གཞན་ལ་ཡོ་བྱད་ཉེ་བར་བསྒྲུབས་པས་རྗེས་སུ་འཛིན་པ་འདི་ནི་གཞན་གྱི་དོན་ཏོ། །ལྷག་མ་
རྣམས་ཀྱིས་བསྡུས་པ་ཡང་དེ་བཞིན་དུ་རིག་པར་བྱའོ། །དོན་དམ་པ་ཆོས་ཀྱི་དབྱིངས་ལས་བརྩམས་པ་ནི་དེ་བཞིན་ཉིད་ཀྱི་སྦྱིན་པ་ལ་སོགས་པ་སྤྱིའི་མཚན་ཉིད་ཡིན་པའི་ཕྱིར་རོ། །ཡེ་ཤེས་ཀྱི་ཚོགས་བསག་པ་ནི་ཐམས་ཅད་མཁྱེན་པའི་སྣོད་དུ་བསྒྲུབ་པའི་ཕྱིར་རོ། །ཡེ་ཤེས་
ཡོངས་སུ་འཛིན་པ་ལས་བརྩམས་པ་ནི་ཐམས་ཅད་མཁྱེན་པ་ཉིད་ཡོངས་སུ་བསྒྲུབ་པའི་ཕྱིར་རོ། །ཡེ་ཤེས་ཀྱི་རྗེས་སུ་འཛིན་པ་ལས་བརྩམས་པ་ནི་ལྔ་པོ་དག་ཤེས་རབ་ཀྱི་ཕ་རོལ་ཏུ་ཕྱིན་པའི་རྗེས་སུ་མཐུན་པའི་ཕྱིར་རོ། །ཡེ་ཤེས་ཀྱི་མཚན་ཉིད་ལས་བརྩམས་པ་ནི་ཤེས་རབ་
ཀྱི་ཕ་རོལ་ཏུ་ཕྱིན་པ་ཡང་དག་པའི་ཡེ་ཤེས་ཀྱི་ངོ་བོ་ཉིད་ཡིན་པའི་ཕྱིར་རོ། །དེ་ལྟར་ན་དེ་བཞིན་ཉིད་དང་ཡང་དག་པའི་ཡེ་ཤེས་ཀྱི་ངོ་བོ་ཉིད་དེ་ནི་དམ་པ་ནི་སྦྱིན་པ་ལ་སོགས་པས་བསྡུས་པར་རིག་པར་བྱའོ། །དཔེ་བརྗོད་པ་འདིས་བསྡུས་པ་ལྷག་མ་རྣམས་བསྟན་པར་བྱའོ། །མི་
མཐུན་པའི་ཕྱོགས་སེར་སྣ་དང་འཆལ་པའི་ཚུལ་ཁྲིམས་དང་ཁྲོ་བ་དང་ལེ་ལོ་དང་རྣམ་པར་གཡེང་བ་དང་འཆལ་པའི་ཤེས་རབ་སྟེ། སྦྱིན་པ་ལ་སོགས་པའི་གོ་རིམས་བཞིན་ནོ། །ཕ་རོལ་ཏུ་ཕྱིན་པ་རྣམས་ཀྱིས་བསྡུས་པའི་ཕྱིར་སྦྱིན་པའི་ཆོས་ཇི་སྙེད་པ་དེ་དག་གི་མི་མཐུན་པའི་ཕྱོགས་
གང་ཡིན་པ་དང་། ཤེས་བྱའི་སྒྲིབ་པ་དེ་ཡང་དག་པའི་མི་མཐུན་པའི་ཕྱོགས་སུ་རིག་པར་བྱའོ། །ཕན་ཡོན་ནི་འབྲས་བུ་རྣམ་པ་ལྔའི་སྐབས་སུ་དཔག་ཏུ་མེད་པར་རིག་པར་བྱའོ། །དེ་ཡང་བསྡུས་ན་འདི་དག་གི་རང་གི་མི་མཐུན་པའི་ཕྱོགས་སྤང་བ་བྲལ་བའི་འབྲས་བུ་དང་། མཐོང་

71-1-279a

བའི་ཆོས་ལ་བདག་གཞན་རྗེས་སུ་འཛིན་པ་སྐྱེས་བུ་བྱེད་པའི་འབྲས་བུ་དང་། ཕྱི་མ་ལ་གོང་ནས་གོང་དུ་ཁྱད་པར་དུ་འཕགས་པ་མཆོག་དམ་པ་འབྱུང་བའི་རྒྱུ་མཐུན་པའི་འབྲས་བུ་དང་། བྱང་ཆུབ་ཆེན་པོ་དབང་གི་འབྲས་བུ་དང་། ལོངས་སྤྱོད་ཆེན་པོ་དང་བདེ་འགྲོར་འགྲོ་
བ་དང་ཁོ་ན་མེད་པ་དང་། དབྱེ་བ་མེད་པ་དང་མི་བདེ་བ་མེད་པ་དང་ཡིད་བདེ་བ་མང་བ་དང་། སེམས་ཅན་ལ་དབང་བ་དང་ལུས་ལ་གནོད་པ་མེད་པ་དང་དབང་ཆེ་བར་གྲགས་པ་ནི་གོ་རིམས་བཞིན་དུ་སྦྱིན་པ་ལ་སོགས་པའི་རྣམ་པར་སྨིན་པར་རིག་པར་བྱའོ། །གཅིག་ལ་གཅིག་རྣམ་པར་
ངེས་པ་ནི་རྣམ་པ་གསུམ་སྟེ། སྦྱོར་བ་ལས་གྱུར་པ་དང་། དབྱེ་བ་ལས་གྱུར་པ་དང་། རབ་ཏུ་ཕྱེ་ནས་བསྟན་པ་ལས་གྱུར་པའོ། །དེ་ལ་སྦྱོར་བ་ལས་གྱུར་པ་ནི་སྦྱིན་པ་ལ་སོགས་པ་ཐམས་ཅད་འདུས་པར་དམིགས་ཏེ་འདི་ལྟ་སྟེ་ནང་དང་ཕྱིའི་དངོས་པོ་ཡོངས་སུ་གཏོང་བའི་སྦྱིན་པ་ལ་
སྦྱོར་བའོ། །དེ་ལ་གང་ཡོངས་སུ་གཏོང་བ་དེ་ནི་སྦྱིན་པའི་ཕ་རོལ་ཏུ་ཕྱིན་པའོ། །དེ་ལ་བྱམས་པའི་སེམས་དང་ལྡན་པ་ནི་གང་གཞན་ལ་ཀུན་ནས་མནར་སེམས་དང་གནོད་པ་དང་རྣམ་པར་འཚེ་བ་སྡོམ་པ་དེ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །དེ་ཉིད་ལ་གང་ཉེ་བར་བསྐོར་
བ་དང་ཕོངས་པ་དང་སྐྱོ་བ་ལ་ཇི་མི་སྙམ་པ་དེ་ནི་བཟོད་པའི་ཕ་རོལ་ཏུ་ཕྱིན་པའོ། །དེ་ཉིད་ལ་གང་ཕྱིར་ཞིང་སེམས་སྤྲོ་བ་དེ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །དེ་ཉིད་ལ་གང་སེམས་རྩེ་གཅིག་པ་སྟེ་དགེ་བ་ལས་ཕྱི་རོལ་དུ་མི་འཕྲོ་བ་དེ་ནི་བསམ་གཏན་གྱི་ཕ་རོལ་ཏུ་ཕྱིན་པའོ། །
དེ་ཉིད་ལ་རྒྱུ་དང་འབྲས་བུ་ཇི་ལྟ་བ་བཞིན་དུ་ལེགས་པར་གཟུང་བ་དང་ལྟ་བ་མཆོག་ཏུ་འཛིན་པ་མེད་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་བར་ལ་ཡང་ཅི་རིགས་སུ་སྦྱར་བར་བྱ་སྟེ། མི་འཇིགས་པ་སྦྱིན་པ་ནི་ཐམས་ཅད་དུ་སྦྱིན་པ་ཡིན་
པའི་ཕྱིར་རོ། །དེ་རབ་ཏུ་དབྱེ་བ་ལས་གྱུར་པ་ནི་ངོ་བོ་ཉིད་ཀྱིས་རབ་ཏུ་དབྱེ་བ་དང་། རྗེས་སུ་སྦྱོར་བས་རབ་ཏུ་དབྱེ་བ་དང་། བསྐྱེད་པས་རབ་ཏུ་དབྱེ་བའོ། །དེ་ལ་སོགས་པའི་ངོ་བོ་ཉིད་ནི་རྣམ་པར་གཏོང་བ་དང་སྡོམ་པ་དང་ཇི་མི་སྙམ་པ་དང་མངོན་པར་སྤྲོ་བ་དང་སེམས་གནས་པ་དང་རབ་

71-1-279b

ཏུ་རྣམ་པར་དབྱེ་བ་སྟེ་གོ་རིམས་བཞིན་ནོ། །དེ་ལ་སྦྱིན་པ་ལ་སོགས་པ་ལ་སྦྱོར་བ་ནི་དེ་ལ་གནས་པའི་ཕ་རོལ་ཏུ་ཕྱིན་པ་རྣམས་རྗེས་སུ་འཇུག་པ་སྟེ་སྔ་མ་བཞིན་ནོ། །དེ་ལ་སྦྱིན་པ་ལ་སོགས་པའི་རྗེས་སུ་སྦྱོར་བ་ནི་འཛིན་དུ་འཇུག་པ་དང་། བསྔགས་པ་བརྗོད་པ་དང་། རབ་ཏུ་དགའ་
བའོ། །དེ་ལ་སྦྱིན་པ་ལ་སོགས་པ་བསྐྱེད་པ་ནི་གཞན་གྱི་སེམས་ཀྱི་རྒྱུད་ལ་འཇོག་པའོ། །དེ་ལ་སྦྱིན་པའི་ཕ་རོལ་ཏུ་ཕྱིན་པ་ནི་ཟང་ཟིང་གི་སྦྱིན་པའོ། །དེ་མ་ཡིན་པའི་གཞན་ལྔ་ནི་མི་འཇིགས་པའི་སྦྱིན་པའོ། །ཐམས་ཅད་ནི་དམ་པའི་ཆོས་ཀྱི་སྦྱིན་པ་སྟེ་གཞན་གྱི་སེམས་རྒྱུད་ལ་
བསྐྱེད་པའི་ཕྱིར་རོ། །དེ་ལས་རབ་ཏུ་ཕྱེ་ནས་བསྟན་པ་ལས་གྱུར་པ་ནི་གཅིག་ནས་རྟོགས་པ་ལ་སོགས་པ་སྟེ། འདི་ལྟ་སྟེ་སྦྱིན་པའི་ཕ་རོལ་ཏུ་ཕྱིན་པ་གང་ཡིན་པ་དེ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡང་དེ་ཡིན་ནམ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གང་ཡིན་པ་སྦྱིན་པའི་ཕ་རོལ་ཏུ་ཕྱིན་པ་ཡང་དེ་
ཡིན་ནམ་ཞེ་ན། ཚིག་འོག་མ་དང་སྦྱོར་བ་སྟེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གང་ཡིན་པ་སྦྱིན་པའི་ཕ་རོལ་ཏུ་ཕྱིན་པ་ཡང་དེའོ། །སྦྱིན་པའི་ཕ་རོལ་ཏུ་ཕྱིན་པ་ཡིན་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་མ་ཡིན་པ་ཡང་ཡོད་དེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པས་མ་ཟིན་པའི་
སྦྱིན་པའི་ཕ་རོལ་ཏུ་ཕྱིན་པའོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་སྦྱིན་པའི་ཕ་རོལ་ཏུ་ཕྱིན་པའི་ཚིག་འོག་མ་དང་སྦྱོར་བ་རྣམས་དང་སྦྱར་བར་བྱའོ། །སྦྱིན་པ་གང་ཡིན་པ་དེ་ཐམས་ཅད་སྦྱིན་པའི་ཕ་རོལ་ཏུ་ཕྱིན་པ་ཡིན་ནམ་ཕ་རོལ་ཏུ་ཕྱིན་པ་དེ་ཐམས་ཅད་སྦྱིན་པ་ཡིན་
ནམ་ཞེ་ན། མུ་གསུམ་དུ་འགྱུར་ཏེ་སྦྱིན་པ་ཡིན་ལ་ཕ་རོལ་ཏུ་ཕྱིན་པ་མ་ཡིན་པ་ནི་བྱང་ཆུབ་ཆེན་པོར་ཡོངས་སུ་མ་བསྔོས་པའི་སྦྱིན་པའོ། །སྦྱིན་པ་མ་ཡིན་པ་ལ་ཕ་རོལ་ཏུ་ཕྱིན་པ་ཡིན་པ་ཡང་ཡོད་དེ་བཤད་པ་མ་གཏོགས་པའི་ཆོས་རྣམས་སོ། །དེ་བཞིན་དུ་ཤེས་རབ་ཀྱི་ཕ་
རོལ་ཏུ་ཕྱིན་པའི་བར་ལ་བརྩམས་ཏེ་རེ་རེ་ལ་མུ་གསུམ་གསུམ་དུ་སྦྱར་བར་བྱའོ། །སྦྱིན་པ་ཀུན་དུ་སྤྱོད་པ་གང་ཡིན་པ་དེ་དག་ཐམས་ཅད་སྦྱིན་པའི་ཕ་རོལ་ཏུ་ཕྱིན་པའི་རྒྱུ་ལས་བྱུང་བའི་བསོད་ནམས་བསྐྱེད་དམ་ཞེ་ན་མུ་བཞིར་འགྱུར་ཏེ། མུ་དང་པོ་ནི་བྱང་ཆུབ་ཆེན་པོར་ཡོངས་སུ་མ་

71-1-280a

བསྔོས་པའི་སྦྱིན་པ་སྤྱོད་པའོ། །མུ་གཉིས་པ་ནི་སྦྱིན་པའི་ཕ་རོལ་ཏུ་ཕྱིན་པ་ལ་ཡང་དག་པར་འཛིན་དུ་འཇུག་པ་དང་། བསྔགས་པ་བརྗོད་པ་དང་། ཡིད་རབ་ཏུ་དགའ་བས་སོ། །མུ་གསུམ་པ་ནི་བྱང་ཆུབ་ཆེན་པོར་ཡོངས་སུ་བསྔོས་པའི་སྦྱིན་པས་
སོ། །མུ་བཞི་པ་ནི་རྣམ་པ་འདི་དག་མ་རྟོགས་པའོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་བར་ལས་བརྩམས་ཏེ་རེ་རེ་ལ་ཡང་མུ་བཞི་བཞིར་སྦྱར་བར་བྱའོ། །ཕ་རོལ་ཏུ་ཕྱིན་པ་དེ་དག་ཀྱང་བསྡུ་བའི་དངོས་པོ་བཞི་ཡིན་ཏེ་སྦྱིན་པ་དེ་ཉིད་དོ། །ཚུལ་ཁྲིམས་དང་བཟོད་པ་ནི་ངག་
སྙན་པའོ། །བརྩོན་འགྲུས་དང་བསམ་གཏན་ནི་དོན་མཐུན་པའོ། །ཤེས་རབ་ནི་དོན་དཔྱོད་པའོ། །སྡོམ་པ་གསུམ་ཡང་ཡིན་ཏེ། དང་པོ་བཞི་སྡོམ་པའི་ཚུལ་ཁྲིམས་དང་། བསམ་གཏན་ནི་སེམས་ཅན་དོན་བྱེད་དོ། །ཤེས་རབ་ནི་དགེ་བའི་ཆོས་སྡུད་དོ། །བསླབ་པ་
གསུམ་ཡང་དེ་ཉིད་དོ། །བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡང་དེ་ཉིད་ཡིན་ཏེ་ལམ་གཉིས་ཀྱི་སྐབས་སུ་བཤད་དོ། །ལམ་གཉིས་ཀྱང་ཚོགས་ལམ་དང་སྦྱོར་ལམ་ནི་འཇིག་རྟེན་པའོ། །མཐོང་ལམ་དང་སྒོམ་ལམ་ནི་འཇིག་རྟེན་ལས་འདས་པ་ཡིན་ཏེ། དེ་དག་
རྒྱས་པར་ཕྱེ་སྟེ་བསྟན་པ་ནི་ཐབས་ཉམས་སུ་བླང་བའི་རིམ་པའོ། །དེ་ལྟར་ཐབས་ཀྱི་ཁྱད་པར་དང་ཐེག་པ་འོག་མ་ལས་ཁྱད་པར་དགུས་འཕགས་ཏེ་གང་ཞེ་ན་དམིགས་པའི་ཁྱད་པར་ནི་ཤེས་བྱ་ཇི་སྙེད་པ་དང་ཇི་ལྟ་བ་ལ་དམིགས་པའོ། །ཉེ་བར་བསྟན་པའི་ཁྱད་པར་ནི་བསྐལ་པ་
གྲངས་མེད་པར་བསོད་ནམས་དང་ཡེ་ཤེས་ཀྱི་ཚོགས་རྫོགས་པར་བྱེད་པའོ། །རབ་ཏུ་རྟོགས་པའི་ཁྱད་པར་ནི་སོ་སོར་རང་གིས་རིག་པའི་ཡེ་ཤེས་ཀྱིས་གང་ཟག་དང་ཆོས་བདག་མེད་པར་རྟོགས་པའོ། །ཁས་ལེན་པའི་ཁྱད་པར་ནི་བདག་དང་སེམས་ཅན་ཐམས་ཅད་མཉམ་པ་ཉིད་དུ་
ཁས་ལེན་པའོ། །ངེས་པར་འབྱུང་བའི་ཁྱད་པར་ནི་ས་བཅུ་དག་གིས་ངེས་པར་འབྱུང་བའོ། །ཡོངས་སུ་འཛིན་པའི་ཁྱད་པར་ནི་མི་གནས་པའི་མྱ་ངན་ལས་འདས་པར་ཡོངས་སུ་འཛིན་པའོ། །གནས་དང་གཡོག་འཁོར་གྱི་ཁྱད་པར་ནི་སངས་རྒྱས་ཀྱི་ཞིང་ཡོངས་སུ་སྦྱང་བ་དང་གདུལ་

71-1-280b

བྱ་ཉེ་བར་སྡུད་པའོ། །བཙུན་པ་ཉེ་བར་སྐྱེས་པའི་ཁྱད་པར་ནི་སངས་རྒྱས་ཀྱི་གདུང་རིས་སུ་སྐྱེས་པའོ། །སྐྱེ་བའི་ཁྱད་པར་ནི་སྨོན་ལམ་གྱི་དབང་གིས་སྲིད་པ་ཐམས་ཅད་དུ་སྐྱེ་བའོ། །དྲུག་པོ་དེ་དག་དང་ལྡན་པའི་ཆོས་ཀྱང་རྣམ་པ་གཉིས་སུ་བཤད་དེ། སྒྲུབ་པའི་ཆོས་དང་། འབྲས་
བུའི་ཆོས་སོ། །སྒྲུབ་པའི་ཆོས་ནི་འཕགས་པའི་ལམ་ཡན་ལག་བརྒྱད་པ་སྟེ་དེ་ཉིད་འདིར་ཡོངས་སུ་ཤེས་པའོ། །འདུས་བྱས་དང་འདུས་མ་བྱས་ཀྱི་བྱེ་བྲག་གིས་འབྲས་བུའི་ཆོས་ཀྱང་རྣམ་པ་གཉིས་སུའོ། །དེ་ལ་འདུས་བྱས་ནི་དགེ་སྦྱོང་གི་འབྲས་བུ་བཞི་སྟེ་རྣམ་པར་གྲོལ་
བའི་ལམ་གྱི་རང་བཞིན་ནོ། །འདུས་མ་བྱས་ནི་ཉོན་མོངས་པ་སྤངས་པའི་མཚན་ཉིད་མྱ་ངན་ལས་འདས་པའོ། །བསྟན་བཅོས་ལས་ནི་འདུས་བྱས་དང་འདུས་མ་བྱས་ཀྱི་རང་བཞིན་དགེ་སྦྱོང་གི་འབྲས་བུར་རྣམ་པར་གཞག་མོད་ཀྱི་འོན་ཀྱང་མྱ་ངན་ལས་འདས་པར་ལོགས་
ཤིག་ཏུ་བཤད་པས་བ་ལང་དང་། གླང་ཞེས་བྱ་བའི་ཚུལ་དུ་འདུས་བྱས་ཉིད་དུ་གཟུང་ངོ་། །ཡང་ན་ཡོངས་སུ་དག་པའི་དེ་བཞིན་ཉིད་གང་ཡིན་པ་འདིར་མྱ་ངན་ལས་འདས་པར་འདོད་དེ་དེ་ལ་ཉོན་མོངས་པའི་ཕྱིར་རོ། །འབྲས་བུ་འདི་བརྗོད་པ་ནི་ཉན་ཐོས་དང་རང་སངས་
རྒྱས་རྣམས་ལམ་འདི་ཉིད་ཀྱི་གང་ཟག་དང་ཆོས་ལ་བདག་མེད་པའི་ཚུལ་དུ་བསྒྲུབས་ན་འབྲས་བུ་རྙེད་པར་འགྱུར་རོ་ཞེས་གོ་རིམས་བཞིན་དུ་བསྟན་པའི་ཕྱིར་རོ། །དེ་ཡང་དེ་ཁོ་ན་མ་ནོར་བའི་རང་བཞིན་རྟོགས་པ་ནི་ཡང་དག་པའི་ལྟ་བའོ། །དེ་ཉིད་ལ་ཚུལ་བཞིན་དུ་རྟོག་ཅིང་
དཔྱོད་པ་ནི་ཡང་དག་པའི་རྟོག་པའོ། །དེ་ཡང་གཞན་དག་ལ་མ་ནོར་བའི་རང་བཞིན་དུ་འཆད་ཅིང་བརྫུན་ལ་སོགས་པའི་ཉེས་པ་སྤངས་པའི་ཚིག་ནི་ཡང་དག་པའི་ངག་གོ། །དེ་ནས་སྲོག་གཅོད་པ་ལ་སོགས་པའི་ཉེས་པ་སྤངས་ཤིང་ལུས་ཀྱི་ལས་ཡོངས་སུ་དག་པ་ནི་ཡང་
དག་པའི་མཐའོ། །དེ་ནས་ཚུལ་འཆོས་པ་དང་གཞོགས་སློང་ལ་སོགས་པ་ལོག་པར་འཚོ་བའི་ཉེས་པ་སྤངས་ཤིང་ཡོངས་སུ་དག་པའི་ལུས་དང་ངག་གི་ལས་ཡོངས་སུ་སྤྱོད་པ་ནི་ཡང་དག་པའི་འཚོ་བའོ། །ཉེས་པ་ལྷག་མ་རྣམས་སྤངས་པའི་ཕྱིར་མངོན་པར་སྤྲོ་བ་ནི་ཡང་

71-1-281a

དག་པའི་རྩོལ་བའོ། །དེ་ཁོ་ན་ཉིད་མི་བརྗེད་པ་ནི་ཡང་དག་པའི་དྲན་པའོ། །གོང་ནས་གོང་དུ་ཡོན་ཏན་གྱི་ཁྱད་པར་རྣམས་མངོན་པར་བསྒྲུབ་པའི་ཕྱིར་རྟག་ཏུ་མཉམ་པར་གཞག་པ་ནི་ཡང་དག་པའི་ཏིང་ངེ་འཛིན་ཏོ། །ལམ་ལ་སྙོམས་པར་ཞུགས་པ་ལས་
ཡང་དག་པའི་ལྟ་བ་ལ་སོགས་པ་ཇི་ལྟར་འབྱུང་ན་རྒྱུ་གང་གིས་འཕགས་པའི་ལམ་ཡན་ལག་བརྒྱད་པར་འགྱུར་ཞེ་ན། འདི་ལ་ངེས་པ་མེད་དེ་འཇིག་རྟེན་ལས་འདས་པའི་ལམ་གྱི་གནས་སྐབས་ན་རྣལ་འབྱོར་པ་དེ་ལྟ་བུའི་སོ་སོ་རང་གིས་རིག་པའི་དེ་ཁོ་ན་མྱོང་བར་ཡང་འགྱུར་ཞིང་
གནས་གྱུར་པར་ཡང་ཐོབ་པ་ལ། དེ་ལས་ལངས་པའི་ཚེ་ན་ཡང་དག་པའི་ངག་ལ་སོགས་པ་ལ་འཇུག་སྟེ་ལོག་པའི་ངག་ལ་སོགས་པ་ལ་ནི་མི་འཇུག་གོ། །དེས་ན་རྒྱུ་ལ་འབྲས་བུར་བཏགས་ཏེ་ཡང་དག་པའི་ལྟ་བ་ལ་སོགས་པ་ཡན་ལག་བརྒྱད་ནི་རྣམ་པར་དག་པའི་རྒྱུར་གྱུར་
པས་དེ་ལམ་ཡན་ལག་བརྒྱད་པ་ཞེས་བྱ་སྟེ། དེའི་ཚེ་ན་དེའི་ཚིག་ཀྱང་མི་སྨྲ་ལ་གོས་ལ་སོགས་པ་ཡང་མི་ཚོལ་བས་དེའི་གནས་སྐབས་ན་ཡན་ལག་བརྒྱད་མི་འབྱུང་སྟེ་འགལ་བའི་ཕྱིར་རོ། །དེ་ལ་ཡང་དག་པའི་ལྟ་བ་ནི་ཡོངས་སུ་གཅོད་པའི་ཡན་ལག་སྟེ། དེས་ཇི་ལྟར་མྱོང་
བའི་དེ་ཁོ་ན་ངེས་པར་འཛིན་པའི་ཕྱིར་རོ། །ཡང་དག་པའི་རྟོག་པ་ནི་གཞན་གོ་བར་བྱེད་པའི་ཡན་ལག་སྟེ། དེ་ཇི་ལྟར་རྟོགས་པའི་དེ་ཁོ་ན་རྩམ་པར་གཞག་ནས་ཚིག་ཏུ་འདོན་པའི་ཕྱིར་རོ། །ཡང་དག་པའི་ངག་དང་། ལས་ཀྱི་མཐའ་དང་འཚོ་བ་ནི་གཞན་ཡིད་ཆེས་པར་བྱེད་པའི་ཡན་
ལག་སྟེ། དེ་དག་གོ་རིམས་བཞིན་དུ་རྣལ་འབྱོར་གྱི་ལྟ་བ་དང་། ཚུལ་ཁྲིམས་དང་ཡོ་བྱད་བསྙུངས་པ་རྣམ་པར་དག་པ་གཞན་ཡིད་ཆེས་པར་འགྱུར་ཏེ། འདྲི་བའི་ལན་ཡང་དག་པར་ལྡོན་པས་ཡང་དག་པའི་ངག་གི་ལྟ་བ་རྣམ་པར་དག་པར་ཡིད་ཆེས་སོ། །ཡང་དག་པའི་
ལས་ཀྱི་མཐའ་བྱ་བ་མ་ཡིན་པ་མི་བྱེད་པའི་ཚུལ་ཁྲིམས་རྣམ་པར་དག་པར་རོ། །ཡང་དག་པའི་འཚོ་བས་གོས་ལ་སོགས་པ་ཆོས་བཞིན་ཚོལ་བས་ཡོ་བྱད་བསྙུངས་པར་རྣམ་པར་དག་པར་རོ། །འདི་དག་ནི་གོ་རིམས་བཞིན་ངག་དང་ལུས་དང་། གཉིས་ཀའི་ལས་ཀྱི་རང་བཞིན་

71-1-281b

ནོ། །ཡང་དག་པའི་རྩོལ་བ་ནི་ཉན་ཐོས་དང་བྱང་ཆུབ་སེམས་དཔའ་གཉི་གའི་ཉོན་མོངས་པའི་སྒྲིབ་པ་རྣམ་པར་སྦྱོང་བས་སྒྲིབ་པ་རྣམ་པར་སྦྱོང་བའི་ཡན་ལག་གོ། །ཡང་དག་པའི་དྲན་པ་ནི་བྱིང་བ་དང་རྒོད་པ་དང་ཉེ་བའི་ཉོན་མོངས་པའི་སྒྲིབ་པ་རྣམ་པར་སྦྱོང་བའི་ཡན་ལག་སྟེ། 
དྲན་པ་ཉེ་བར་གཞག་པས་ཡང་དག་པའི་མཚན་མར་རྟོག་པས་བྱིང་བ་དང་རྒོད་པ་ལ་སོགས་པའི་སྐབས་མེད་པའི་ཕྱིར་རོ། །ཡང་དག་པའི་ཏིང་ངེ་འཛིན་ནི་ཡོན་ཏན་གྱི་ཁྱད་པར་མངོན་པར་བསྒྲུབ་པ་ལ་སྒྲིབ་པ་རྣམ་པར་སྦྱོང་བའི་ཡན་ལག་སྟེ། དེས་མངོན་པར་ཤེས་པ་ལ་སོགས་པ་
ཡོན་ཏན་མངོན་པར་བསྒྲུབ་པའི་ཕྱིར་རོ། །སྟོན་པར་མཛད་དོ་ཞེས་པ་ནི་དབང་པོ་རྣོན་པོས་མགོ་སྨོས་པས་གོ་བ་དང་། རྟུལ་པོས་ཤིན་ཏུ་རྒྱས་པས་ཀྱང་རྟོགས་པར་དཀའ་བས་འབྲིང་པོའི་དབང་དུ་བྱས་པའི་ཕྱིར་རོ། །ལྡེམ་པོར་དགོངས་པ་བཞི་དང་བཞིས་ཆོས་ཐམས་ཅད་སྟོན་ཏོ། །
དེ་ནི་གཞུག་པ་ལ་ལྡེམ་པོར་དགོངས་པ་དང་། མཚན་ཉིད་ལ་ལྡེམ་པོར་དགོངས་པ་དང་། གཉེན་པོ་ལ་ལྡེམ་པོར་དགོངས་པ་དང་། བསྒྱུར་བ་ལ་ལྡེམ་པོར་དགོངས་པ་དང་། མཉམ་པ་ཉིད་ལ་དགོངས་པ་དང་། དོན་གཞན་ལ་དགོངས་པ་དང་། དུས་གཞན་ལ་དགོངས་པ་དང་། 
གང་ཟག་གཞན་ལ་དགོངས་པའོ། །ད་ནི་མ་འོངས་པའི་སློབ་དཔོན་དང་སློབ་མ་ཆོས་ལ་འཇུག་པའི་ཚུལ་སྦྱར་བའི་ཕྱིར་ཆོས་ལ་འཇུག་པའི་ཚུལ་གསུངས་པ། ཉིན་མཚན་དུ་བསམ་པ་ནི་ཐོས་པའི་དོན་བསམ་པ་ཉིད་དོ། །རྗེས་སུ་དཔྱད་པ་ནི་ཐོས་པའོ། །བསྒོམ་པ་ནི་བསམ་པའི་
དོན་བསྒོམ་པ་ཉིད་དོ། །དགའ་བ་ཆེན་པོ་ནི་ཤེས་རབ་གསུམ་ལ་བར་ཆད་དང་བྲལ་བའོ། །ད་ནི་ཤེས་རབ་རྣམ་པ་གསུམ་དང་བྲལ་བའི་འཇིག་རྟེན་གྱི་དངོས་པོ་ཐམས་ཅད་མི་རྟག་ཅིང་སླུ་བ་དང་བཅས་པར་གསུངས་པ། དེ་ནས་ལྷའི་འཁོར་དེ་ཉིད་ཀྱི་ནང་ནས་ཞེས་བྱ་བ་ལ་སོགས་
པའོ། །ཡང་དག་པའི་ལམ་ལ་འདྲེན་པ་པོ་དགོས་པར་བསྟན་པའི་ཕྱིར། དེ་ནས་གནས་མཆོག་དེ་ན་ཞེས་པ་ལ་སོགས་པ་གསུངས་སོ། །ཉམ་ང་བ་མ་རྟོགས་ན་ཡང་དག་པ་ལ་ཡིད་མི་ཆེས་པར་བསྟན་པའི་ཕྱིར་དེ་ནས་ལྷའི་བུ་ལ་སོགས་པ་གསུངས་སོ། །ལམ་ཐམས་ཅད་ཀྱི་

71-1-282a

གཞི་སྐྱབས་སུ་འགྲོ་བ་ཡིན་པར་བསྟན་པའི་ཕྱིར་དེ་ནས་ལྷའི་བུ་ནོར་བུའི་སྙིང་པོ་དྲི་མ་མེད་པ་དེ་བརྒྱལ་བ་སངས་ཏེ་ཞེས་པ་ལ་སོགས་པ་གསུངས་སོ། །སྐྱབས་སུ་སོང་བའི་སློབ་མ་ལ་དབུགས་དབྱུང་བའི་ཕྱིར་ཕན་ཡོན་བཤད་པ་ནི་ལྷའི་དབང་པོ་ལ་སོགས་པས་
གསུངས་སོ། །དེ་དག་ནི་དོན་གྱི་སྒོ་ནས་གླེང་བསླང་བའོ། །ད་ནི་ཚིག་གི་སྒོ་ནས་གླེང་བསླང་བའི་ཕྱིར་དེ་ནས་ལྷའི་དབང་པོ་བརྒྱ་བྱིན་གྱིས་དམན་པའི་ཚིག་གིས་ཞེས་པ་ལ་སོགས་པ་གསུངས་སོ། །ལྷའི་དབང་པོ་ཞེས་པ་ལ་སོགས་པ་ནི་ལྷའི་བུ་ལ་སོགས་པའི་ལེ་ལོའི་འགྱོད་པ་
བསལ་བའི་ཕྱིར་ལས་རྒྱུ་འབྲས་ཀྱི་འབྲེལ་པ་གསུངས་པའོ། །དེ་ནས་ལྷའི་དབང་པོ་བརྒྱ་བྱིན་གྱིས་ལྷའི་བུ་ནོར་བུའི་སྙིང་པོ་དྲི་མ་མེད་པའི་གཏམ་ངན་ཐོས་ནས་ཞེས་བྱ་བ་ལ་སོགས་པས་ནི་རྗེས་འཇུག་གི་ཉམས་སུ་བླང་བ་ཞུས་པ་ནས་ཀྱིས་བསྟན་ཏོ། །གུས་པའི་རྩོལ་བ་དང་བྲལ་ན་
ཡང་དག་པའི་ལམ་རྙེད་པར་མི་འགྱུར་བའི་ཕྱིར་དེ་ནས་ལྷའི་དབང་པོ་ལ་སོགས་པས་ཆོས་ལ་གུས་པ་བསྟན་ཏོ། །ཞུས་པའི་དོན་ནི་རྒྱས་པ་དང་བསྡུས་པའོ། །དང་པོ་ནི་དོན་ངེས་པར་ཐོབ་པ་དང་། དོན་ལ་བར་ཆད་བསལ་བ་དང་། ལུས་ཅན་ཐམས་ཅད་འཇུག་ཏུ་རུང་བར་བྱིན་
གྱིས་བརླབ་ཏུ་གསོལ་བ་དང་། ཁྱད་པར་གྱི་རྐྱེན་བསལ་བ་དང་། ཤིན་ཏུ་བག་ཚ་བའི་འབྲས་བུ་གཉིས་དང་བྲལ་བར་མཛད་པ་དང་། འཁོར་བ་ལས་བསྒྲལ་བ་དང་། རང་གི་དོན་དང་། གཞན་གྱི་དོན་དང་། ཐུན་མོང་གི་དོན་ཡོད་པར་གསོལ་བ་གདབ་པ་སྟེ། རེ་བ་
འཕེལ་བར་མཛད་དུ་གསོལ་ཞེས་པ་ལ་སོགས་པའི་ཚིག་བཅུ་གཅིག་དང་རིམ་པར་སྦྱར་རོ། །བསྡུས་པ་ལ་གཉིས་ཏེ། མཐོང་བའི་ཆོས་ཀྱི་དོན་དང་། ལན་གྲངས་གཞན་གྱིའོ། །མ་འོངས་པའི་སྟོན་པ་ང་ལོ་བདེ་བ་ལ་སྦྱར་བའི་ཕྱིར་བཅོམ་ལྡན་འདས་ཀྱིས་གསུངས་པའི་
ཚུལ་ནི། ཤཱཀྱ་ཐུབ་པ་སྔོན་དུ་མི་བརྗོད་པར་བཅོམ་ལྡན་འདས་སྔོན་དུ་གསུངས་པ་ནི་བདུད་བཅོམ་པ་དང་དབང་ཕྱུག་གི་ཡོན་ཏན་དྲུག་དང་ལྡན་པ་དེ་ནི་མུ་སྟེགས་པ་ལ་སོགས་པ་གཞན་ལ་མེད་པ་དང་། ཕྱི་རབས་ཀྱང་རང་གི་བླ་མའི་གནས་ལ་སོགས་པ་ཡོན་ཏན་སྔོན་དུ་བཏང་

71-1-282b

ནས་བརྗོད་པ་ལ་གཞུག་པའི་ཕྱིར་རོ། །ཤཱཀྱ་ནི་རིགས་ལ་མངོན་པར་ཞེན་པ་རྣམས་འཇུག་པའི་རིགས་སྨོས་ཏེ། རྒྱལ་རིགས་ཕྱོགས་གཅིག་གི་མིང་ངོ་། །ཐུབ་པ་དང་རྒྱལ་བ་དང་འདྲེན་པ་ལ་སོགས་པ་ནི་སངས་རྒྱས་ཀྱི་ཡོན་ཏན་གྱི་མིང་གི་རྣམ་གྲངས་སོ། །ཐུགས་སུ་ཆུད་པ་
ནི་གཉིས་ཏེ། རང་དོན་དུ་དང་། གཞན་དོན་དུ་བཤད་པར་གསོལ་བ་བཏབ་པར་རོ། །རྣམ་པ་ཀུན་དུ་ནི་ཡུལ་དང་དུས་དང་གནས་སྐབས་སོ། །རྣམ་པར་གཟིགས་པ་ནི་ཕན་པ་དང་བདེ་བའོ། །ཏིང་ངེ་འཛིན་ནི་ཞི་གནས་དང་ལྷག་མཐོང་སྟེ། སྟོང་པ་དང་ཡེ་ཤེས་སུ་མཉམ་པར་
གྱུར་པའོ། །སྙོམས་པར་ཞུགས་པ་ནི་དེ་ཉིད་མངོན་སུམ་དུ་བྱས་པའོ། །མདོར་ན་དབྱིངས་དང་རིག་པ་དབྱེར་མེད་པ་ནི་ཏིང་ངེ་འཛིན་ཏེ་ཆོས་ཀྱི་སྐུ་ཡིན་ལ། སྙོམས་པར་ཞུགས་པ་ནི་དེ་ཉམས་སུ་མྱོང་བ་སྟེ་ལོངས་སྐུའོ། །གལ་ཏེ་སངས་རྒྱས་ནི་རྟག་ཏུ་མཉམ་པར་གཞག་པ་མ་ཡིན་
ནམ་ཅིའི་ཕྱིར་སྐབས་འདི་ཁོ་ན་མཉམ་པར་གཞག་ཅེས་སྨོས། ཡང་ན་ཤཱཀྱ་ཐུབ་པ་སྤྲུལ་པའི་སྐུ་ཡིན་པས་རྟག་ཏུ་མཉམ་པར་གཞག་པ་མི་མངའ་བ་ཡིན་ནམ་ཞེ་ན། མ་ཡིན་ཏེ། གདུལ་བྱ་ཉིད་ལ་དེ་ལྟར་སྣང་བ་དང་མ་འོངས་པ་ནི་འཆད་པ་པོ་བསམས་བཞིན་དུ་སྨྲ་བར་བྱའོ་ཞེས་གདམས་
པའོ། །ཞུགས་མ་ཐག་པ་ནི་གཞན་ཅིས་ཀྱང་བར་མ་ཆོད་པར་སྣོད་གཉིས་དང་འཚམ་པར་འབྱུང་བ་སྟེ་དེ་ཡང་ཟབ་པ་དང་རྒྱ་ཆེ་བ་ཐུགས་སུ་ཆུད་པ་ཕ་རོལ་ཏུ་ཕྱིན་པ་དྲུག་གི་མཚན་ཉིད་ལ་མོས་པ་དང་། གཏིང་དཔག་དཀའ་བ་ཐུགས་སུ་ཆུད་པ་རྡོ་རྗེ་ཐེག་པ་ལ་ཞུགས་པའོ། །དེ་རེ་རེ་ལའང་
ཞུགས་པ་དང་ཞུགས་པ་བསྟན་པའོ། །དང་པོ་ནི་མོས་པ་སྤྱོད་པ་ལ་སོགས་པ་ལ་གསུང་གི་སྒོ་ནས་འབྱུང་ངོ་། །གཉིས་པས་ཆེན་པོ་ལ་རབ་ཏུ་བཞུགས་པ་རྣམས་ལ་འོད་ཟེར་གྱི་སྒོ་ནས་སོ། །རྣམ་པ་ཀུན་དུ་ཞེས་བྱ་བ་ནི་ཡེ་ཤེས་ཀྱི་སྐུ་ལ་བརྟེན་ནས་རིག་པའི་གནས་ལྔའི་སྣང་བ་རྒྱ་ཆེན་
པོས་ཁྱབ་པས་གདུལ་བྱ་ཚིམ་པར་མཛད་དོ། །དེ་ལ་སྒྲ་རིག་པ་ནི་བྱཱ་ཀ་ར་ཎ་སྟེ་དོན་གསལ་བར་བྱེད་དོ། །གཏན་ཚིགས་རིག་པ་ནི་ཚད་མ་སྟེ་རྒོལ་བ་ཚར་གཅོད་དོ། །གསོ་བ་རིག་པས་ནི་ལུས་གནས་པར་བྱེད་དོ། །བཟོ་རིག་པས་ནི་འཚོ་བ་མི་ཉམས་པ་དང་ཡིད་སྐྱོ་བ་མེད་པར་བྱེད་དོ། །

71-1-283a

རྟོགས་པ་རིག་པས་ལམ་གོམས་ན་ཉོན་མོངས་པ་བཅོམ་ཞིང་ཡེ་ཤེས་སྐྱེད་པར་བྱེད་དོ། །ལམ་དེ་ཡང་དབང་པོ་རབ་འབྲིང་ཐ་མའི་བྱེ་བྲག་གིས་ཚར་གཅད་པ་དང་རྗེས་སུ་བཟུང་བའི་བྱེ་བྲག་གིས་རྣམ་པ་ཐ་དད་དོ། །དབུའི་གཙུག་ཏོར་ནི་འབྱུང་གནས་སོ། །ལྷ་རྣམས་
རྡོ་རྗེ་ཐེག་པ་ལ་གུས་པར་གཟུད་པའི་ཕྱིར་རོ། །ཕྱོགས་བཅུ་ཀུན་དུ་སྣང་བར་བྱས་པ་ནི་གཉིས་ཏེ། ཀུན་རྫོབ་ཏུ་སྟོང་པ་ཉིད་མི་རྟོག་པའི་ཡེ་ཤེས་ཀྱི་འོད་ཟེར་གྱིས་ནི་ཕྱོགས་བཅུའི་སངས་རྒྱས་ཀྱི་ཞིང་དུ་ས་བཅུའི་བྱང་ཆུབ་སེམས་དཔའ་ལ་སོགས་པ་གང་ཡང་མི་གསལ་བ་མེད་པར་བྱས་སོ། །
དོན་དམ་པའི་སྔགས་ཀྱི་ཕྲེང་བས་ནི་གདུལ་དཀའ་བ་གང་ཡང་མི་འདུལ་བ་མེད་པར་བྱས་སོ། །གདུགས་ལྟ་བུ་ནི་ཆར་དང་ཚད་པ་ལས་སྐྱོབ་པ་ལྟར་འཁོར་བའི་ཆུ་ལས་སྐྱོབ་པར་འགྱུར་བ་དང་། ཕྱིན་ཅི་ལོག་གི་གདུང་བ་སེལ་བར་འགྱུར་བས་སྔགས་རྣམས་ཀྱང་གདུགས་ཀྱི་ཚུལ་དུ་སྣང་
བའོ། །འཛུམ་པ་མཛད་པ་ནི་འཁོར་སྤོབས་པ་བསྐྱེད་པ་དང་ཆོས་འདི་རྙེད་པར་དཀའ་བ་དང་ཐབས་ཆེན་པོ་ཐོབ་པ་ཉིད་ཀྱི་ཕྱིར་རོ། །གཟིགས་པ་ནི་བྱམས་པ་ཆེན་པོ་དང་སྙིང་རྗེ་ཆེན་པོས་གདུལ་བྱ་ལ་གཟིགས་པའོ། །བཀའ་སྩལ་པ་ནི་ཐོག་མ་དང་བར་དང་ཐ་མར་དགེ་བའི་ཚུལ་གྱིས་
སོ། །ད་ནི་གདམས་ངག་གི་སྣོད་དུ་རུང་བར་བྱ་བའི་ཕྱིར་སེམས་བསྐྱེད་པ་གསུངས་སོ། །དེ་ལ་སྤྲོ་བ་བསྐྱེད་པའི་ཡན་ལག་ཏུ་རྟོགས་པ་འདིའི་མཚན་གསུངས་པ། ཀུན་ནས་སྒོར་འཇུག་པ་ནི་རྣམ་པར་སྣང་མཛད་ཆེན་པོའི་ཞལ་ནས་གསུངས་པའི་སྔགས་དང་རྒྱུད་དང་ཕྱག་རྒྱའོ། །འཇུག་
པ་ནི་ཐོས་པ་དང་སྒྲུབ་པའོ། །སྔགས་འདི་ཉིད་བཅོམ་ལྡན་འདས་ཀྱི་དབུའི་གཙུག་ཏོར་ནས་འོད་ཟེར་གྱི་ཚུལ་དུ་བྱུང་སྟེ། གདུལ་བྱ་ཚིམ་པར་བྱ་བའི་ཕྱིར་རོ། །དྲི་མ་མེད་པ་ནི་ཕྲིན་ལས་ཀྱི་མིང་སྟེ། འདིར་ཞུགས་པ་ཙམ་གྱིས་བསྐལ་པ་དུ་མའི་སྒྲིབ་པ་ཐམས་ཅད་སེལ་བར་བྱེད་པས་སོ། །
སྣང་བ་ནི་དབང་པོ་རབ་འབྲིང་ཐ་མ་ཐམས་ཅད་ཀྱི་སྤྱོད་ཡུལ་དུ་གྱུར་པའོ། །དེ་བཞིན་གཤེགས་པ་ཐམས་ཅད་ནི་རིགས་ལྔའོ། །དེ་བཞིན་ནི་ཞི་བའམ་མྱ་ངན་ལས་འདས་པ་སྟེ་མི་སླུ་བས་དེ་བཞིན་ཁོ་ནའོ། །དེ་ཁོང་དུ་ཆུད་པ་ནི་གཤེགས་པའོ། །དེ་ཁོང་དུ་ཆུད་ཅིང་རྟོགས་ན་མངོན་པར་

71-1-283b

རྫོགས་པར་སངས་རྒྱས་པའི་ཕྱིར་རོ་ཞེས་ཀུན་ལ་སྦྱར་རོ། །ཡང་དེ་བཞིན་ནི་རྣམ་ཐར་སྒོ་གསུམ་མོ། །ཡང་ན་བདེན་པ་བཞིའོ། །ཡང་ན་བདེན་པ་དང་སྟོང་པ་དང་ཉེ་བར་ཞི་བ་དང་ཤེས་རབ་པོ། །ཡང་ན་སངས་རྒྱས་ཀྱི་ཆོས་ཐམས་ཅད་དོ། །དེ་དག་ཐུགས་སུ་ཆུད་པས་ཞེས་ཀུན་ལ་སྦྱར་རོ། །ཡང་ན་དེ་བཞིན་ནི་ཕ་རོལ་ཏུ་ཕྱིན་
པ་དྲུག་གོ། །དེས་སངས་རྒྱས་སུ་གཤེགས་པའོ། །ཡང་ན་ས་བཅུའོ། །ཡང་ན་འཕགས་པའི་ལམ་ཡན་ལག་བརྒྱད་དོ། །ཡང་ན་ཚོགས་གཉིས་སོ། །ཡང་ན་བརྩོན་འགྲུས་ཆེན་པོའོ། །ཡང་ན་དེ་བཞིན་ནི་བསྐལ་པ་གྲངས་མེད་པ་གསུམ་དུ་རྟ་དང་གླང་པོ་ལ་སོགས་པ་དང་། བུ་དང་
བུ་མོ་ལ་སོགས་པ་དང་། མགོ་དང་ཤ་རུས་རྐང་ལག་དུ་མ་བཏང་ཡང་གཏན་པ་མེད་པས་ནོར་ལྷ་དང་དབང་ཕྱུག་དང་། ཚངས་པ་དང་། སེར་སྐྱ་དང་། གཟིགས་ཟན་དང་། རྐང་མིག་དང་། འཕེལ་བ་དང་། རྒྱལ་དཔོག་གི་བུ་ལ་སོགས་པར་མི་འོང་སྟེ་དེ་ཁོ་ན་ལྟར་སངས་
རྒྱས་སུ་གཤེགས་པའོ། །ཡང་ན་ཐུགས་རྗེ་དང་བྱམས་པས་གཞན་དོན་གྱི་སྨོན་ལམ་བཞིན་ནོ། །དེ་ལྟར་སངས་རྒྱས་པའོ། །ཡང་ན་བསམ་གཏན་བཞི་ལ་བརྟེན་ནས་སྐྱེས་པ་རྡོ་རྗེ་ལྟ་བུའི་ཏིང་ངེ་འཛིན་གྱིས་སྲིད་རྩེའི་ཉོན་མོངས་པ་སྤངས་ནས་ཕྱིར་མི་ལོག་པ་སྟེ་མུ་སྟེགས་པས་སྤོང་
མི་ཤེས་པས་འཁོར་བར་ཕྱིར་ལྡོག་པ་ལྟ་བུ་མ་ཡིན་པ་དེ་བཞིན་ནོ། །དེས་མྱ་ངན་ལས་འདས་པའི་གྲོང་ཁྱེར་དུ་གཤེགས་པའོ། །ཡང་ན་སྔ་རབས་འདས་པ་རྣམས་ཀྱང་སྐལ་བ་དང་ལྡན་པ་རྣམས་མྱ་ངན་ལས་འདས་པའི་ལམ་ཇི་ལྟ་བ་བཞིན་བཞག་ནས་རང་མྱ་ངན་ལས་འདས་པ་ལྟར་
འདིར་ཡང་དེ་བཞིན་མཛད་དམ་གཤེགས་པས་སོ། །ཡང་ན་ལས་དང་ཉོན་མོངས་པ་དང་། ཤེས་བྱའི་སྒྲིབ་པ་སྤོང་བ་ལ་མུ་སྟེགས་བྱེད་པ་དག་གིས་མི་ནུས་པའོ། །དེས་ན་མྱ་ངན་ལས་འདས་པའོ། །ཡང་ན་གསུམ་པོ་དེ་སྤངས་ནས་ལས་དང་ཉོན་མོངས་པའི་དབང་གིས་མི་སྐྱེ་སྟེ་ཐོགས་པ་མེད་པའི་
ཡེ་ཤེས་ལ་དབང་ནས་མྱ་ངན་ལས་འདས་པའོ། །ཡང་ན་ཕུང་པོ་དེ་རྣམ་རྟོག་དང་སྤྲོས་པར་བཅས་པ་སྤངས་ནས་དེ་དག་སླར་མི་འབྱུང་བས་མྱ་ངན་ལས་འདས་པའོ། །ཡང་ན་དེ་བཞིན་ཉིད་ཐོབ་པ་མེད་པར་ཐོབ་པའོ། །ཡང་ན་དེ་བཞིན་ཉིད་རྟོགས་པའོ། །ཡང་ན་དེ་བཞིན་ཉིད་

71-1-284a

གསུང་བས་ཏེ་ས་སྟེངས་སྒྲོགས་ཞེས་པ་དང་འདྲའོ། །ཡང་ན་འཁོར་བ་དང་མྱ་ངན་ལས་འདས་པ་བདེན་པ་གཉིས་སུ་བསྡུས་ནས་ཐུགས་སུ་ཆུད་པས་དམིགས་བཅས་དང་དམིགས་མེད་ཀྱི་ཚུལ་དུ་གནས་པས་དེ་གསུངས་པའོ། །ཡང་ན་དེ་བཞིན་ཉིད་ངར་འཛིན་པ་དང་བདག་
འཛིན་པ་དང་སྒྲིབ་པ་དང་རྣམ་རྟོག་དང་སྤྲོས་པ་སྟེ། འཁོར་བའི་སྡུག་བསྔལ་གྱི་རྒྱུ་དྲུངས་ཕྱུང་ནས་ཡོན་ཏན་རིན་ཆེན་མི་ཟད་པའི་གཏེར་བླ་ན་མེད་པ་བསམ་གྱིས་མི་ཁྱབ་པ་རྨད་དུ་བྱུང་བ་ལ་ལུས་ཉེ་བར་སྒྲུབ་པ་མཛད་ནས་གཞན་དོན་འདི་བྱ་ཞེས་རྟོག་ཚོམ་མེད་པར་འཁོར་བ་ཇི་སྲིད་དུ་སྨོན་ལམ་
གྱི་ཤུགས་ཀྱིས་དགའ་ལྡན་གྱི་གནས་ན་བཞུགས་པ་དང་། ལྷུམས་སུ་འཕོ་འཇུག་གནས་པ་དང་། བལྟམས་པ་དང་། གཞོན་ནུ་རོལ་པ་དང་། བཙུན་མོའི་འཁོར་དང་། མངོན་པར་འབྱུང་བ་དང་། དཀའ་བ་སྤྱོད་པ་དང་། བྱང་ཆུབ་སྙིང་པོར་གཤེགས་པ་དང་། བདུད་འདུལ་བ་
དང་། མངོན་པར་བྱང་ཆུབ་པ་དང་། ཆོས་ཀྱི་འཁོར་ལོ་བསྐོར་བ་དང་། ཡོངས་སུ་མྱ་ངན་ལས་འདས་པ་ལ་སོགས་པ་མཛད་པ་གཞལ་དུ་མེད་པ་ལ་འཇུག་བཞིན་སྐྱེ་འགག་མེད་པའི་མྱ་ངན་ལས་འདས་པ་ཆོས་ཀྱི་སྐུར་གཤེགས་པའོ། །ཡང་ན་ཕྱིར་མི་ལྡོག་པའི་འཁོར་ལོ་ལས། 
ཇི་ལྟར་བྱིས་པས་རྣམ་བརྟགས་པ། །དེ་དག་བྱང་ཆུབ་མི་རྙེད་དེ། །ཆོས་ཀུན་བཙལ་ན་རྙེད་མེད་པ། །རྟོགས་པས་དེ་བཞིན་གཤེགས་ཞེས་བྱ། །ཞེས་སོ། །སྙིང་པོ་ནི་ཨོཾ་དང་ཧཱུཾ་བཞིའི་ཧཱུཾ་དང་པོ་གསུམ་ནི་དེ་དག་གི་སྐུ་བྱིན་གྱིས་བརླབ་པའི་སྔགས་སོ། །ཨཾ་བཾ་སཾ་ཛཾ་ཞེས་ཡི་གེ་
བཞི་པོ་ནི་རིག་པའི་ལྷ་མོ་དང་བྱང་ཆུབ་སེམས་དཔའ་ཐམས་ཅད་ཀྱི་སྙིང་པོའོ། །དམ་ཚིག་ལ་རྣམ་པར་བལྟ་བ་ནི་གོང་ནས་གོང་དུ་རྟོགས་པ་འཕེལ་བར་བྱེད་པ་སྟེ་རིག་སྔགས་ཀྱི་ངོ་བོ་ཉིད་དོ། །དོན་གྱི་གཟུངས་ནི་ཤེས་རབ་དང་སྙིང་རྗེ་དབྱེར་མེད་པ་ཡིན་ཏེ། ཚིག་གི་གཟུངས་
ཀྱིས་ཀྱང་དེ་ལ་སྦྱར་བར་བྱེད་དོ། །ཡང་དག་པའི་དོན་ངོ་ཤེས་ཤིང་དེ་ལ་འཇུག་པའི་བར་དུ་གཅོད་པ་ལས་སྐྱོབ་པས་སོ། །འདི་ཡང་མནྠ་ཏྲ་ནཱནྠ་མནྟྲའི་སྒྲས་རང་དོན་མ་ལུས་པ་ཐོབ་ཅིང་གཞན་དོན་ཤུགས་ཀྱིས་འབྱུང་བ་དང་། མན་ཛྙཱ་ན་མ་མི་ཏྲ་ན་ཨརྠ་མནྟྲ་དཀྱིལ་འཁོར་ལ་

71-1-284b

སོགས་པའི་ངོ་བོ་ཙམ་དུ་ཡོད་པ་དང་། ཨ་ནུ་ཨ་བ་བོ་དྷ་ན་ཏྲ་ན་ཨཪྠ་མནྟྲ་སྟེ་ཐམས་ཅད་གཉིས་སུ་མེད་པར་རྟོགས་པར་འགྱུར་བའོ། །དོན་གསུམ་པོ་དེ་གང་གིས་མཚོན་པ་ནི་ཕྱག་རྒྱ་སྟེ་གསང་སྔགས་སོ། །དེ་ལྟར་ན་རིག་སྔགས་དང་གཟུངས་སྔགས་དང་གསང་སྔགས་གསུམ་དང་ལྡན་པ་ནི་རྟོགས་པ་
འདིའི་ངོ་བོ་ཉིད་དོ། །གངྒཱའི་ཀླུང་ལ་སོགས་པས་ནི་སྔགས་ལ་ཇི་ལྟར་ཡི་རང་བ་ལྟར་སྔགས་ལ་ཞུགས་པར་སེམས་བསྐྱེད་མ་ཐག་གི་བྱང་ཆུབ་སེམས་དཔའ་ལ་ཡང་ཡི་རང་ཞིང་བསྔགས་པ་བརྗོད་དོ། །མཐོང་བ་ནི་སྔགས་བཞུགས་པའི་ས་ཆ་དང་སྐུ་གདུང་མཆོད་རྟེན་ལ་སོགས་པའོ། །
ཐོས་པ་ནི་བརྗོད་པའོ། །སྡིག་པ་དང་སྒྲིབ་པ་ནི་རྒྱུ་སྟེ་དེའི་འབྲས་བུ་ནད་དང་གནོད་པ་བྱེད་པ་སྟེ། མཐོང་བའི་ཆོས་སོ། །ངན་སོང་གསུམ་སྤོང་སྟེ་མ་འོངས་པའི་དུས་སོ། །སྡིག་པ་དང་སྒྲིབ་པ་འཇིག་པ་དང་། མཉམ་པར་མི་སྐྱེ་བར་བྱེད་པའི་གཞན་དོན་ཏེ་ཐོས་པ་དང་མ་ཐོས་པས་སོ། །
ད་ནི་ཕན་ཡོན་དཔེ་ལྔའི་སྒོ་ནས་འཇུག་པའི་གོ་རིམས་ཀྱི་ཁྱད་པར་གསུངས་པ། དད་པའི་མེས་ལས་ཀྱི་སྒྲིབ་པ་མཐའ་དག་སེལ་བ་དང་། སྙིང་རྗེའི་ཆུ་རྒྱུན་གྱིས་ཉོན་མོངས་པའི་ནད་སེལ་བ་དང་། ཐོས་པའི་ཤེས་རབ་ཀྱིས་ལྟ་བ་ངན་པའི་དྲི་མའི་ཚོགས་སེལ་བ་དང་། བསམ་པའི་ཉི་མས་མ་རིག་
པའི་མུན་པ་མཐའ་དག་སེལ་བ་དང་། བསྒོམ་པའི་ཤེས་རབ་ཀྱིས་ཡེ་ཤེས་ཀྱི་ཆུ་རྒྱུན་ཆེན་པོར་འཇུག་པ་སྟེ་དཔེར་ན་ལ་སོགས་པ་དང་རིམ་པ་བཞིན་སྦྱར་རོ། །མི་རྣམས་ཚེ་བཟློག་པ་ནི་ཁྱད་པར་གྱི་ལས་སོ། །ཉོན་ཅིག་ཅེས་སྣོད་ཞབས་རྡོལ་བ་ལྟར་བརྗེད་ངས་པ་དང་། སྣོད་ཁ་བུབ་ལྟར་
དོན་མི་རྟོགས་པ་དང་། སྣོད་མི་གཙང་བ་ལྟར་དོན་ལེགས་པར་མི་འཛིན་པ་སྤོང་ཞེས་གུས་པ་ལ་སྦྱར་རོ། །དེ་ལ་སྔགས་ནི་ན་མཿཞེས་པ་ནས་བྷ་ཡ་ཧ་ར་ཎི་ཞེས་པ་ཡན་ཆད་རྩ་བ་སྟེ་ཐུན་མོང་གི་སྔགས་སོ། །ཧཱུཾ་ཧཱུཾ་ཧཱུཾ་མྲྀ་ཏྱུ་དཎྜ་དྷ་རེ་ཞེས་པ་ནས་གཟུངས་ཀྱི་སྔགས་སོ། །སརྦ་ཏ་ཐཱ་ག་ཏོ་ཥྞཱི་ཥ་
བི་ལོ་ཀི་ཏེ་སྭཱ་ཧཱ། ཞེས་པ་ནས་རིག་པའི་སྔགས་སོ། །རྗེས་སུ་སྟོན་ཅིག་ཅེས་པ་ནི་བླ་མ་དང་སློབ་མའི་འབྲེལ་པ་ལུང་ནོད་པའི་ཆོ་གའོ། །ཡུན་རིང་པོ་ལ་སོགས་པ་ནི་དེའི་ཕན་ཡོན་ཏེ་ཕན་པ་ནི་འཁོར་ལོས་སྒྱུར་བའི་རྒྱལ་པོ་ལ་སོགས་པ་མི་དང་། རྒྱལ་ཆེན་བཞི་ནས་ཚངས་པའི་འཇིག་རྟེན་

71-1-285a

ལ་ཐུག་པའི་ལྷའོ། །བདེ་བ་ནི་བྱང་ཆུབ་ཆེན་པོའོ། །ཀུན་ནས་ལ་སོགས་པས་ཚ་ཚ་གཅིག་པའི་ཆོ་ག་བཤད་དོ། །དེ་ནས་ཉི་མ་ཤར་བ་ལ་སོགས་པས་ནི་ལུང་ནོད་པ་དང་ཆོ་ག་ལ་འཇུག་པ་ཐམས་ཅད་ཀྱི་ཐུན་མོང་དང་དངོས་གཞིའོ། །མཆོད་རྟེན་བརྒྱ་རྩ་བརྒྱད་ལ་
སོགས་པས་ཚ་ཚ་བརྒྱ་པའི་ཆོ་གའོ། །ཨོཾ་ན་མཿསྟྲཻ་ཡ་དྷི་ལ་སོགས་པ་འདི་ནི་གསང་སྔགས་སོ། །སྔགས་གོང་འོག་གཉིས་འབྲེལ་པ་ན་དོན་གྱི་གཞུང་གཅིག་ཏུ་བསྒྲུབ་པའོ། །དེ་ཡང་འདི་ལྟར་ཡིན་ཏེ། དང་པོར་ན་མཿསརྦ་ཏ་ཐཱ་ག་ཏཱ་ནཱཾ་ཞེས་དེ་བཞིན་གཤེགས་པ་ཐམས་ཅད་ལ་ཕྱག་
འཚལ་ཞེས་གསུངས་པ་ནི་སྔགས་འདི་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་ཡིན་པས་སོ། །ཨོཾ་ནི་ཡི་གེའི་ཤུགས་ཀྱིས་དང་པོར་བཀྲ་ཤིས་དོན་གྱི་ཕྱིར་ཕྱག་འཚལ་ཞེས་བྱ་སྟེ། འཇིག་རྟེན་དང་འཇིག་རྟེན་ལས་འདས་པའི་བཀྲ་ཤིས་པའི་མངའ་
ཐམས་ཅད་གྱི་གཙོ་བོ་ཡིན་པའི་ཕྱིར་རོ། །དེས་ཡི་གེ་ཐམས་ཅད་བྱིན་གྱིས་བརླབས་ནས་སྔགས་སུ་གྱུར་པར་གདོན་མི་ཟ་བའི་ཕྱིར། དང་པོར་གདགས་དགོས་པ་ཁོ་ནའོ། །དེ་ལ་སྔགས་འདིའི་ཡོན་ཏན་གྱི་ཆེ་བའི་དཔེ་ནི། ཡི་གེའི་སྒོ་ནས་བརྗོད་པ་གཉིས་ཁོ་ན་སྟེ། མ་ཧཱ་ཙིནྟ་མ་ཎི་ཛྭཱ་
ལ་ན་ཡིད་བཞིན་གྱི་ནོར་བུ་འབར་བ་ཆེན་པོ་ཞེས་པ་སྟེ། དེ་ནི་རང་དང་གཞན་གྱི་དོན་རྒྱུན་མི་ཆད་པ་འབྱུང་བ་དང་ལྡན་པའི་དཔེའོ། །དེས་ནི་ཡེ་ཤེས་བསྟན་ཏོ། །སཱ་ག་ར་གམྦྷཱི་ར་ཞེས་པས་རྒྱ་མཚོ་ཟབ་མོ་ཞེས་པ་སྟེ་རིག་སྔགས་འདིར་འཇུག་པའི་གང་ཟག་གི་རིགས་ལ་གོ་རིམས་མེད། ལུས་
ཅན་ཐམས་ཅད་འཇུག་ཏུ་རུང་བ་དང་བསྐལ་པ་དུ་མའི་མི་དགེ་བའི་དྲི་མ་དག་པར་བྱེད་པ་དག་འདིར་ཞུགས་པ་ལ་བྱང་ཆུབ་ཀྱི་མྱུ་གུ་མྱུར་དུ་བསྐྱེད་པའི་དོན་ནོ། །དེས་ནི་ཐུགས་རྗེའོ། །ཡོན་ཏན་དེ་ལྟ་བུ་དང་ལྡན་པའི་སྔགས་ཀྱི་ལུགས་ལ་གསོལ་བ་གདབ་པ་ཡང་གཉིས་ཏེ། སྐྱེ་བ་
འདི་དང་སྐྱེ་བ་དུ་མའི་དོན་དུའོ། །དང་པོ་ལ་དགུ་སྟེ། ཨཱ་ཀཱཪྵ་ཡ་ཨཱ་ཀཱཪྵ་ཡ་ཞེས་པས་སྔགས་འདི་ཐོས་པ་དང་མཐོང་བ་ཙམ་གྱིས་ལམ་འདི་ལ་དྲོངས་ཤིག་དྲོངས་ཤིག་ཅེས་པ་དང་པོའོ། །གཉིས་པ་ནི། ཨཱ་ཡུནྡྷ་ར་ཨཱ་ཡུནྡྷ་ར་ཞེས་པ་སྟེ། ཞུགས་པའི་གང་ཟག་རྣམས་ཚེ་

71-1-285b

ཟུང་ཅིག་པའོ། །གསུམ་པ་ན་ཡོན་ཏན་དང་ལོངས་སྤྱོད་དང་ལྡན་དགོས་པས་སནྡྷ་ར་སནྡྷ་ར་ཞེས་ཏེ་ལུས་དང་སེམས་ཀྱི་རྒྱན་ཤིན་ཏུ་ཟུང་ཤིག་ཤིན་ཏུ་ཟུང་ཤིག་ཅེས་པའོ། །བཞི་པ་ནི་ཚེ་རིང་ན་ཡང་ལུས་ཅན་གྱི་གནོད་པ་ཐམས་ཅད་བསལ་བའི་ཕྱིར། ཀྵ་ཎ་ཀྵ་ཎ། ཀྵི་ཎི་ཀྵི་ཎི། 
ཀྵུ་ཎུ་ཀྵུ་ཎུ། ཞེས་ཏེ་སྲུངས་ཤིག་སྲུངས་ཤིག །སྐྱོབས་ཤིག་སྐྱོབས་ཤིག །ཚོས་ཤིག་ཚོས་ཤིག ། ཅེས་པའོ། །ལྔ་པ་ནི་གནོད་པ་མེད་པ་ཡང་ལམ་ལོག་པ་ལ་འཇུག་པ་བསལ་བའི་ཕྱིར། སརྦ་ཏ་ཐཱ་ག་ཏཱ་ས་མ་ཡེ་ཏིཥྛ་ཏིཥྛ་ཞེས་པ་སྟེ། དེ་བཞིན་གཤེགས་པ་ཐམས་ཅད་ཀྱི་
དམ་ཚིག་ལ་ཞོག་ཞོག་ཅེས་པའོ། །དྲུག་པ་ནི་བདག་གཞན་གྱི་བརྩོན་འགྲུས་བསྐྱེད་པའི་ཕྱིར། མ་ཧཱ་བྷུ་བ་ན་སཱ་ག་ར་སཾ་ཤོ་དྷ་ཡ་མ་མ་སརྦ་སཏྭ་ཤྩ་ཞེས་ཏེ། བདག་དང་སེམས་ཅན་ཐམས་ཅད་ས་ཆེན་པོ་དང་། རྒྱ་མཚོ་ལྟར་སྦྱོངས་ཞེས་པའོ། །འདིས་ནི་སྨོན་པའི་སེམས་གཞི་ཆེན་པོ་
ལྟ་བུ་དང་འཇུག་པའི་སེམས་རྒྱ་མཚོ་ལྟ་བུ་བསྐྱེད་ཅེས་སྐུལ་པའོ། །བདུན་པ་ནི་རང་དོན་ལ་དམིགས་པ་བསྐྱེད་པའི་ཕྱིར། བྷ་ག་ཝ་ཏེ་སརྦ་པཱ་པཾ་བི་མ་ལེ་ཛ་ཡ་ཛ་ཡ། ཛ་ཡ་ལབྡྷེ་ཞེས་ཏེ། བཅོམ་ལྡན་འདས་མ་སྡིག་པའི་དྲི་མ་ཐམས་ཅད་ལས་གྲོལ་ཞིང་རྒྱལ་ཞིང་རྒྱལ་བས་བདག་
རྒྱལ་བ་མཛོད་ཅེས་བྱ་བས་སེམས་བསྐྱེད་པའི་མཐུ་ལ་དམིགས་པའོ། །བརྒྱད་པ་གཞན་དོན་ལ་དམིགས་པ་ནི། སྥུ་ཊ་སྥུ་ཊ། སྥོ་ཊ་ཡ་སྥོ་ཊ་ཡ། ཞེས་པ་སྟེ་སོལ་སོལ། ངེས་པར་སོལ་ངེས་པར་སོལ། ཞེས་བྱ་བས་ཀུན་ནས་ལྡང་བ་དང་བག་ལ་ཉལ་བ་ཐམས་ཅད་སོལ་ཞེས་བྱའོ། །
དགུ་པ་ནི་རང་གཞན་གཉིས་ཀའི་སྟེ། བྷི་ག་ཏ། ཨཱ་ཝ་ར་ཎ་བྷ་ཡ་ཧ་རེ་ཎ་ཞེས་ཏེ་རྣམ་པར་འགལ་བའི་སྒྲིབ་པས་འཇིགས་པ་འཕྲོགས་ཞེས་བྱ་བས་བརྩོན་འགྲུས་ཀྱི་ཕན་ཡོན་བསྟན་ཏོ། །ད་ནི་སྐྱེ་བ་དུ་མའི་དོན་དུ་གསོལ་བ་གདབ་པར་བྱ་བ་ནི་གཉིས་ཁོ་ན་སྟེ། དམིགས་པའི་
གཞི་དང་དེ་ལས་བྱུང་བའི་ཕྲིན་ལས་སོ། །དམིགས་པའི་གཞི་ལ་དྲུག་ཁོ་ན་སྟེ། ས་བོན་ལ་དམིགས་པ་དང་། སྐུ་ལ་དམིགས་པ་དང་། ཕྱག་རྒྱ་ལ་དམིགས་པ་དང་། རྒྱན་ལ་དམིགས་པ་དང་། ལྷ་ལ་དམིགས་པ་དང་། སྔགས་ལ་དམིགས་པའོ། །དེ་ལ་ས་བོན་ལ་དམིགས་

71-1-286a

པ་ནི་ཧཱུཾ་སྟེ། དུས་གསུམ་གྱི་སངས་རྒྱས་ཐམས་ཅད་ཀྱི་ས་བོན་ཡིན་པས་གསུམ་མོ། །ཧཱུཾ་ཡིག་གིས་འབྲས་བུ་ཡེ་ཤེས་ལྔ་མཚོན་ནུས་པའི་ཕྱིར་རོ། །དེའི་ཕྲིན་ལས་ནི་མྲྀ་ཏྱུ་དཎྜ་དྷ་རེ་ཨ་བྷ་ཡ་བྲ་ཏེ་ཞེས་པས་འཆི་བདག་གི་དབྱུག་པས་མི་འཇིགས་པ་སྩོལ་ཞེས་ཏེ་
མཚན་མོ་ཉལ་བ་འམ་འགྲོ་བ་ལ་སོགས་པ་དང་ཐུན་དང་ཐུན་མཚམས་སུ་ལུས་ངག་ཡིད་གསུམ་གྱི་གནས་སུ་པདྨ་དང་ཟླ་བའི་དཀྱིལ་འཁོར་ལ་གནས་པའི་ཧཱུཾ་ཡིག་ཁ་དོག་གསུམ་ལ་དམིགས་པས་དུས་མ་ཡིན་པར་འཆི་བ་ལས་སྐྱོབ་པའོ། །སྐུ་ལ་དམིགས་པ་ནི་ཨུཥྚི་ཥ་བྱ་བ་ལོ་ཀི་ཏེ། ས་
མནྟ་མུ་ཁེ། ས་མནྟ་བྱ་བ་ལོ་ཀི་ཏེ། མ་ཧཱ་མཱ་ཡེ། མ་ཧཱ་པཱ་ཤ་དྷ་རེ། ཨ་མོ་གྷ་བི་མ་ལེ་ཞེས་པས་གཙུག་ཏོར་རྣམ་པར་གཟིགས་མ། ཀུན་ནས་སྒོར་འཇུག་མ། ཀུན་ནས་རྣམ་པར་གཟིགས་མ། སྒྱུ་མ་ཆེན་མོ། ཞགས་པ་ཆེན་མོ་འཆང་མ། དོན་ཡོད་མའི་དྲི་མ་བྲལ་མ་
ཞེས་ཏེ་དང་པོ་ནི་འབྱུང་ཁུངས་ཀྱི་མིང་ངོ་། །གཉིས་པ་ནི་ངོ་བོ་ཉིད་ཀྱི་མིང་ངོ་། །གསུམ་པ་ནི་ཡོན་ཏན་གྱི་མིང་ངོ་། །བཞི་པ་ནི་རང་བཞིན་གྱི་མིང་ངོ་། །ལྔ་པ་ནི་རྟགས་ཀྱི་མིང་ངོ་། །དྲུག་པ་ཕྲིན་ལས་ཀྱི་མིང་ངོ་། །གང་གིས་སྤྱི་བོའི་སྟེང་དུ་སྒྱུ་མ་ཆེན་མོ་དཀར་མོ་ཞལ་གཅིག་ཕྱག་བཞི་མ། 
གཡས་ན་རིན་པོ་ཆེ། གཡོན་ན་ཞགས་པ། ལྷག་མ་མདའ་གཞུ་བཀང་བ་དམིགས་ཏེ་བཞིའོ། །དེའི་ཕྲིན་ལས་ནི། ཨཱ་ཀཱཪྵ་ཡ་ཨཱ་ཀཱཪྵ་ཡ། ཡང་དག་པའི་ཡེ་ཤེས་ཁུག་ཤིག་ཁུག་ཤིག་པའོ། །ཨཱ་ཀཌྜྡྷཱ་ཡ་ཨཱ་ཀཌྜྡྷཱ་ཡ། ཡོན་ཏན་དྲོངས་ཤིག་ཡོན་ཏན་དྲོངས་ཤིག་པའོ། །བྷ་ར་
བྷ་ར། བྱང་ཆུབ་སེམས་ཀྱིས་ཁོང་ཤིག་ཁོང་ཤིག་པའོ། །གང་གིས་བཀང་ན་སཾ་བྷ་ར་སཾ་བྷ་ར་ཞེས་པ་སྡོམ་པ་དང་མཆོག་གི་སྡོམ་པ་སྟེ་དབང་པོ་རྒྱས་པ་དང་ཁམས་རྒྱས་པར་བྱེད་པའི་ཚད་མེད་པའི་སྒོའོ། །ཕྱག་རྒྱ་ལ་དམིགས་པ་ནི་བྷཱུ་ཥི་ཏེ་བྷཱུ་ཛེ་མ་ཧཱ་མུ་དྲ་ལོ་ཀི་ཏེ་ཞེས་པ་ཕྱག་རྒྱ་ཆེན་པོས་ཕྱག་
བརྒྱན་ནས་ཀུན་དུ་གཟིགས་མ་ཞེས་ཏེ། ཐབས་དང་ཤེས་རབ་མཚོན་པའི་མདའ་དང་གཞུ་རིན་ཆེན་རྡོ་ལས་བྱས་པ་བཀང་བའི་ཚུལ་དུ་བྱས་པ་ཐམས་ཅད་ཀྱི་སྣ་ལ་ཕྱོགས་ཐམས་ཅད་དུ་དམིགས་སོ། །དེའི་ཕྲིན་ལས་ནི་ཛ་ཡ་ཛ་ཡ་ཞེས་པ་རྒྱལ་ཞིང་རྒྱལ་བ་ཞེས་ཏེ་བདུད་ལས་སོ། །སིདྡྷི་

71-1-286b

སིདྡྷི། གྲུབ་ཅིང་གྲུབ་པ་ཞེས་པ་ཞི་བ་ལ་སོགས་པའི་ལས་སོ། །བོ་དྷ་ནི་བོ་དྷ་ནི་ཞེས་ཏེ་རྟོགས་ཤིང་རྟོགས་པ་ཞེས་པ་རིག་པའི་གནས་སོ། །སཾ་བོ་དྷ་ནི་སཾ་བོ་དྷ་ནི། ཞེས་ཏེ་ལེགས་པར་རྟོགས་ཤིང་ལེགས་པར་རྟོགས་པ་ཞེས་པས་རལ་གྲིའི་རིག་པ་འཛིན་པ་ལ་སོགས་པ་ཉི་ཤུ་རྩ་བཞིའོ། །
ཤོ་དྷ་ནི་ཤོ་དྷ་ནི་ཞེས་ཏེ་སྦྱོང་ཞིང་སྦྱོང་བ་ཞེས་པས་ཉོན་མོངས་པ་དང་ཤེས་བྱའི་སྒྲིབ་པ་ཐོས་པའི་ཤེས་རབ་ཀྱིས་སྦྱོངས་ཤིག་པའོ། །སཾ་ཤོ་དྷ་ནི་སཾ་ཤོ་དྷ་ནི། ཞེས་པས་ལེགས་པར་སྦྱོངས་ལེགས་པར་སྦྱོངས་ཞེས་ཏེ་བསམ་པའི་ཤེས་རབ་ཀྱིས་མངོན་དུ་རྒྱུ་དང་བག་ལ་ཉལ་སོལ་ཞེས་པའོ། །
བི་ཤོ་དྷ་ནི་བི་ཤོ་དྷ་ནི་ཞེས་པ་རྣམ་པར་སྦྱོངས་རྣམ་པར་སྦྱོངས་ཞེས་ཏེ་བསྒོམ་པའི་ཤེས་རབ་ཀྱིས་ལྟ་བའི་དྲི་མ་དང་ཏིང་ངེ་འཛིན་གྱི་དྲི་མ་གཏན་ཕྱུང་ཞེས་པའོ། །ཧ་ར་ཧ་ར་མ་མ་སརྦ་པཱ་པཾ་ཞེས་པས་བདག་གི་སྡིག་པ་ཐམས་ཅད་ཕྲོགས་ཤིག་ཕྲོགས་ཤིག་ཅེས་ཏེ། རྒྱུ་ལ་ལོག་པར་སྤྱོད་པ་དང་འབྲས་བུ་ལ་
ལོག་པར་སྤྱོད་པའི་གཞུང་དང་ཕྲོལ་ཞེས་པའོ། །རྒྱན་ལ་དམིགས་པ་ནི། སརྦ་ཏ་ཐཱ་ག་ཏཱ་ཀུ་ལ་བྷུ་ཛེ་ས་མ་ཡ་ནི་ཥྐེ་པྲ་ས་ར་ཏུ། ཞེས་པ་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ལྟར་དམ་ཚིག་ལ་སོ་སོར་རྟོག་ཅིང་ཞེས་ཏེ་བཀྲ་ཤིས་ཀྱི་རྫས་ལ་སོགས་པའམ་སངས་རྒྱས་ཀྱི་རྒྱན་གང་ཡང་རུང་བ་
ཅིག་ལ་དམིགས་པའི་གཞིའོ། །དེའི་ཕྲིན་ལས་ནི། མ་མ་པུཎྱེ། ཞེས་པ་བསོད་ནམས་འཕེལ་བར་འདོད་པས་སྤྱི་བོའི་སྟེང་དུ་རིན་པོ་ཆེའི་གདུགས་དཀར་པོ་ལ་སྔགས་ཀྱི་ཕྲེང་བས་བསྐོར་ལ་བཟླའོ། །བི་ནཱ་ཤ་དྲུཾ་པཱ་པཾ། ཞེས་པས་སྡིག་པ་བཅོམ་པར་འདོད་པས་རང་གི་མཛོད་སྤུའི་
ནང་དུ་ནོར་བུ་རིན་པོ་ཆེ་ལ་སྔགས་ཀྱི་ཕྲེང་བ་བཀོད་དེ་བཟླས་སོ། །སརྦ་ཀེ་ལ་བི་ཤ་ཧ་རེ་ཞེས་ཉོན་མོངས་པའི་དུག་ཐམས་ཅད་འཕྲོག་འདོད་པས་རང་གི་སྣ་རྩེར་དཔལ་བེའུའི་རི་མོ་སྔོན་པོ་བཀོད་དེ་བཟླས་པ་བྱའོ། །མ་ནི་བི་ཤུད་དྷེ་ཤོ་དྷ་ཡ་བི་མ་ལེ། ཡིད་རྣམ་པར་དག་ཅིང་བྱང་ནས་དྲི་མ་དང་
བྲལ་བར་འདོད་ན་སྤྱི་བོར་ཟླ་བའི་སྟེང་དུ་བུམ་པ་གང་བ་ལས་ཆུ་རྒྱུན་བྱུང་བས་ལུས་ཚིམ་པར་གྱུར་པར་བསམས་ཏེ་བརྗོད་དོ། །བི་ཀ་སི་ཏ་པདྨེ་ཀཱ་ཡ་བཱག་ཙིཏྟཱ་བྷུ་ཛེ་ཥ་ཊ་པཱ་ར་མི་ཏཱ་པ་རི་པཱུ་ར་ཎི། ཞེས་པས་ཕྱག་ན་པདྨ་རྒྱས་པ་ལྟར་ལུས་ངག་ཡིད་ཕ་རོལ་ཏུ་ཕྱིན་པ་དྲུག་གིས་གང་བར་འདོད་

71-1-287a

པས་ནི་ཕྱོགས་དུས་ཀྱི་སངས་རྒྱས་ཐམས་ཅད་དང་བདག་རྒྱང་རིང་བ་ཡང་མ་ཡིན་ཉེ་བ་ཡང་མ་ཡིན་པར་དམིགས་ཏེ་གསོལ་བ་འདེབས་པའི་ཚུལ་དུ་བརྗོད་དོ། །ད་ནི་ལྷ་ལ་དམིགས་པ་ནི་སངས་རྒྱས་དང་བྱང་ཆུབ་སེམས་དཔའ་དང་རིག་པའི་ལྷ་མོ་དང་ཁྲོ་བོ་ཐམས་ཅད་ཀྱང་
འདིར་ནི་རིག་པའི་ལྷ་མོ་ཉིད་དུ་བལྟའོ། །དེ་ལ་ཆོས་ཐམས་ཅད་ཀྱི་རང་བཞིན་བསྡུས་ན་བཅུ་བདུན་ཉིད་དུ་འགྱུར་བས་འདིར་ཡང་ལྷ་བཅུ་བདུན་ཁོ་ན་གསུངས་སོ། །རང་བཞིན་སེམས་བཅུ་བདུན་ནི་རྣམ་པར་ཤེས་པའི་ཚོགས་བརྒྱད་དང་། འབྱུང་བ་བཞི་དང་། ནམ་མཁའ་དང་། གཟུགས་དང་། 
ཚོར་བ་དང་། འདུ་ཤེས་དང་། འདུ་བྱེད་དེ་དེས་ན་ལྷ་བཅུ་བདུན་ནོ། །ཕྱིས་ནི་རིགས་དུ་མ་ཉིད་དུ་འགྱུར་རོ། །ལྷ་དེ་དག་གི་མིང་བཤད་པ། སརྦ་ཏ་ཐཱ་ག་ཏོཥྞཱི་ཥ་བི་ལོ་ཀི་ཏེ་སྭཱ་ཧཱ། ཞེས་པས་དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་རྣམ་པར་གཟིགས་མ་ཞེས་པས་རྣམ་པར་
སྣང་མཛད་ཀྱི་རང་བཞིན་ནོ། །སརྦ་ཏ་ཐཱ་ག་ཏཱ་གུ་ཧྱ་ཨ་དྷིཥྛཱ་ན་ཨ་དྷིཥྛི་ཏེ་སྭཱ་ཧཱ། དེ་བཞིན་གཤེགས་པ་ཐམས་ཅད་གསང་བའི་བྱིན་གྱི་རླབས་ཀྱིས་བྱིན་གྱིས་བརླབས་མ་ཞེས་རྡོ་རྗེ་འཆང་གི་རང་བཞིན་ནོ། །ཨཱ་ཡུརྡ་དེ་སྭཱ་ཧཱ། ཚེ་འཛིན་མ་སྤྱན་མའི་རང་བཞིན་ནོ། །པུ་ཎྱ་ད་དི་སྭཱ་ཧཱ། 
བསོད་ནམས་འཛིན་མ་མཱ་མ་ཀཱིའི་རང་བཞིན་ནོ། །པུ་ཎྱ་བི་ལོ་ཀི་ཏེ་སྭཱ་ཧཱ། བསོད་ནམས་རྣམ་པར་གཟིགས་མ་ན་བཟའ་དཀར་མོའི་རང་བཞིན་ནོ། །པུ་ཎྱ་ཨཱ་བ་ལོ་ཀི་ཏེ་སྭཱ་ཧཱ། ཞེས་པ་བསོད་ནམས་སྤྱན་རས་གཟིགས་མ་སྟེ་སྒྲོལ་མའི་རང་བཞིན་ནོ། །མྲྀ་ཏྱུ་དཎྜེ་སྭཱ་ཧཱ། འཆི་བདག་
རྣམ་པར་འཇོམས་མ་སྟེ། སྒྲིབ་པ་རྣམ་སེལ་གྱི་རང་བཞིན་ནོ། །ཡཱ་མ་དནྟཱི་སྭཱ་ཧཱ། གཤིན་རྗེ་འཇོམས་མ་སྟེ་འཇམ་དཔལ་གྱི་རང་བཞིན་ནོ། །ཡ་མ་དཱུ་ཏེ་སྭཱ་ཧཱ། གཤིན་རྗེ་དབྱུག་པ་མ་སྟེ་ཕྱག་ན་རྡོ་རྗེའི་རང་བཞིན་ནོ། །སཾ་ཧ་ར་ཎི་སྭཱ་ཧཱ། ཤིན་ཏུ་རོལ་མ་སྟེ་བྱམས་པའི་རང་བཞིན་ནོ། །སཾ་
བ་ར་ཎི་སྭཱ་ཧཱ། བདེ་མཆོག་མ་སྟེ་སྤྱན་རས་གཟིགས་དབང་ཕྱུག་གི་རང་བཞིན་ནོ། །སན་དྷ་ར་ཎི་སྭཱ་ཧཱ། བདེ་འཛིན་མ་སྟེ་ནམ་མཁའི་སྙིང་པོའི་རང་བཞིན་ནོ། །པྲ་ཏི་ས་ར་ཎི་སྭཱ་ཧཱ། སོ་སོ་འབྲང་མ་སྟེ། ཀུན་དུ་བཟང་པོའི་རང་བཞིན་ནོ། །ཇོ་བ་ཏི་སྭཱ་ཧཱ། མདངས་ལྡན་མ་སྟེ་སའི་

71-1-287b

སྙིང་པོའི་རང་བཞིན་ནོ། །ཏེ་ཛོ་བ་ཏི་སྭཱ་ཧཱ། གཟི་བརྗིད་ལྡན་མ་སྟེ་རིན་ཆེན་འབྱུང་གནས་ཀྱི་ངོ་བོ་ཟླ་བ་རྣམ་པར་སྣང་མཛད་ཀྱི་རང་བཞིན་ནོ། །ཛ་ཡ་བ་ཏི་སྭཱ་ཧཱ། རྒྱལ་ལྡན་མ་སྟེ་སྣང་བ་མཐའ་ཡས་ཀྱི་ངོ་བོ་ཉི་མ་རྣམ་པར་སྣང་མཛད་ཀྱི་རང་བཞིན་ནོ། །སརྦ་ཏ་ཐཱ་ག་ཏཱ་མུ་དྲ་ཨ་དྷིཥྛ་ན་ཨ་དྷིཥྛི་ཏེ་
སྭཱ་ཧཱ། དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱའི་བྱིན་གྱི་རླབས་ཀྱིས་བྱིན་གྱིས་བརླབས་པ་ཞེས་པ་སྟེ། མི་བསྐྱོད་པའི་རང་བཞིན་ནོ། །དེ་དག་ནི་དམིགས་པའི་གཞིའི་ལྷའོ། །དེ་དག་གི་ཕྲིན་ལས་ནི་སྭཱ་ཧཱ། ཞེས་པ་ཐམས་ཅད་ཀྱིས་ཀྱང་བསྲེག་པ་དང་། ཞི་བ་དང་། དག་པ་དང་། 
རྟོགས་པ་དང་། བྱང་བའི་སྒྲ་ཡོད་དེ། དང་པོ་ནི་སྡིག་པ་མི་དགེ་བའི་ཚོགས་ཀྱི་ནགས་ཚལ་ལོ། །གཉིས་པ་ནི་ལས་ངན་པ་སྣ་ཚོགས་པའོ། །གསུམ་པ་ནི་ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པའོ། །བཞི་པ་ནི་ཡང་དག་པའི་ལྟ་བ་ལ་སོགས་པའོ། །ལྔ་པ་ནི་མ་རིག་པའི་བག་ལ་
ཉལ་ཐམས་ཅད་དོ། །ད་ནི་སྔགས་ལ་དམིགས་པ་ནི། ཨོཾ་ན་མཿ སྟྲཻ་ཡ་དྷྲེ་སརྦ་ཏ་ཐཱ་ག་ཏཱ་ཧྲྀ་ད་ཡ་ཞེས་ཏེ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་ལ་ཕྱག་འཚལ་ལོ་ཞེས་པས་མིང་ངོ་། །དངོས་གང་ཞེ་ན། གརྦྷ་ཛྭཱ་ལ་ཛྭཱ་ལ་དྷརྨ་དྷཱ་ཏུ་གརྦྷེ་སཾ་ཧ་ར། ཞེས་སྙིང་པོ་འབར་ཞིང་འབར་
བས་ཆོས་ཀྱི་དབྱིངས་ཀྱི་སྙིང་པོར་བསྐྱོད་ཅིག་ཅེས་པས་ཆོས་ཀྱི་སྐུ་མཚོན་ཏེ་དམ་པའི་སྔགས་སོ། །དེའི་ཕྲིན་ལས་ནི་མ་མ་ཨཱ་ཡུཿ སཾ་ཤོ་དྷ་ཡ་ཞེས་སྐྱེ་བ་འདིར་བདག་གི་ཚེ་དག་པར་རོ། །མ་མ་སརྦ་པཱ་པཾ་སྐྱེ་བ་དུ་མར་བདག་གི་སྡིག་པ་ཐམས་ཅད་དག་པར་རོ། །རྒྱུ་ཆོས་ཀྱི་སྐུ་དེ་ལ་འཚམ་
པའི་རྐྱེན་གསུངས་པ། སརྦ་ཏ་ཐཱ་ག་ཏོ་ཥྩི་ཥ་བི་མ་ལ་དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་དྲི་མ་མེད་པ་ཞེས་པས་དམིགས་པ་དང་བཅས་པའི་སྔགས་སོ། །དེའི་ཕྲིན་ལས་བི་ཤུད་དྷེ་ཞེས་པ་རྣམ་པར་དག་པ་ནི་ལས་དང་ཉོན་མོངས་པའི་སྒྲིབ་པའོ། །ཧཱུཾ་ཧཱུཾ་ཧཱུཾ་ཧཱུཾ། ཞེས་པ་
ནི་ཡེ་ཤེས་བཞིའི་ངོ་བོ་ཉིད་དོ། །ཨཾ་བཾ་སཾ་ཛཾཿཞེས་པ་རིགས་བཞིའི་ངོ་བོ་ཉིད་དོ། །དེ་དག་ནི་བརྡར་གྱུར་པའི་སྔགས་སོ། །སྔགས་དེ་དག་ཕྱིར་འབྲེལ་པ་ནི་བརྗོད་པ་དང་བཅས་པའི་སྔགས་སོ། །དེའི་ཕྲིན་ལས་ནི་ལྷག་པའི་ཤེས་རབ་འཕེལ་བ་དང་། བར་དུ་གཅོད་པ་དང་བྲལ་བ་སྟེ་

71-1-288a

སྭཱ་ཧཱ་ཞེས་པའི་སྒྲས་གྲུབ་པོ། །ཀུན་ནས་སྒོར་འཇུག་པ་ལ་སོགས་པ་ནི་སྤྱིར་ཕན་ཡོན་ཐུན་མོང་པའོ། །དེ་ཡང་འོག་ནས་རྒྱས་པར་བཤད་དོ། །ལམ་གྱི་བྱེ་བྲག་བཤད་པ་ལ་གཉིས་ཏེ། དང་པོ་ལྷའི་འཇུག་ཚུལ་དང་། མི་འཇུག་པའི་ཚུལ་ལོ། །དེ་ནས་ལྷའི་
དབང་པོ་ལ་སོགས་པས་ལྷའི་འཇུག་པའི་ཚུལ་ལོ། །བྱས་མ་ཐག་ལ་སོགས་པས་ཉམས་སུ་བླངས་པའི་ཕན་ཡོན་ཏེ་ཕ་རོལ་ཏུ་ཕྱིན་པ་དྲུག་གི་ཕན་ཡོན་ནོ། །དེ་ནས་ལྷའི་བུ་ལ་སོགས་པས་ནི་རྗེས་སུ་ཡི་རང་བའི་བསྟོད་པ་དང་མཆོད་པའོ། །དེ་ནས་རྒྱལ་པོ་ཆེན་པོ་བཞི་ལ་སོགས་པས་
ནི་སྔོན་དུ་གསུངས་པའི་ལས་རྒྱུ་འབྲས་ཀྱི་འབྲེལ་པ་དེ་ཉིད་དོ། །ཞུས་ལེན་གྱི་ཚུལ་གྱིས་རྒྱས་པར་ཏེ་མ་འོངས་པའི་སྐྱེ་བོ་ལས་ལ་ཡིད་ཆེས་པར་བྱ་བའི་ཕྱིར་རོ། །ཞུ་བ་པོ་དེ་དག་གི་ནང་ནས་ལག་ན་རྡོ་རྗེ་ལ་བོས་པ་ནི། ལག་ན་རྡོ་རྗེ་འདི་དུས་གསུམ་གྱི་སངས་རྒྱས་ཐམས་ཅད་ཀྱི་
བསྟན་པའི་མཛོད་འཛིན་པ་སྟེ། དཔལ་ཕྱག་ན་རྡོ་རྗེ་དབང་བསྐུར་བའི་རྒྱུད་ལས། དཔལ་ཕྱག་ན་རྡོ་རྗེ་ནི་སངས་རྒྱས་ཀྱི་གཟུགས་ཀྱི་སྐུའི་རྗེས་སུ་འབྲང་བ་དང་ཆོས་ཀྱི་སྐུ་བསྲུང་བ་པོ་ཞེས་ཏེ་ཆོས་ཀྱི་སྐུ་ནི་བྱང་ཆུབ་སེམས་དཔའི་ཡུལ་མ་ཡིན་པར་བསྟན་པའི་ཆོས་སོ། །རྒྱལ་པོ་ཡུལ་
འཁོར་སྐྱོང་གིས་ཞུས་པ་ལས་ནི་དཔལ་ཕྱག་ན་རྡོ་རྗེ་ནི་ཐེག་པ་ཐམས་ཅད་ཀྱི་བདག་པོར་ཁས་བླངས་པར་གསུངས་སོ། །ཀུན་དུ་བཟང་པོ་དང་ཕྱག་ན་རྡོ་རྗེ་ལ་སོགས་པ་ནི། མིང་གི་རྣམ་གྲངས་ཏེ། སངས་རྒྱས་ཐམས་ཅད་ཀྱི་ཐུགས་ཡང་དག་པའི་ཡེ་ཤེས་ལས་བྱུང་བས་ཐ་མི་དད་པར་
གསུངས་སོ། །དེ་ཉིད་འདུས་པ་ལས་ཀྱང་དེ་ཁོ་ན་ལྟར་གསུངས་སོ། །དེའི་ཕྱིར་བསྟན་པའི་བདག་པོ་ཡིན་པས་སོ། །དེའི་ཚེ་དེའི་དུས་ན་ལ་སོགས་པས་ནི་ལས་རྒྱུ་འབྲས་ཐ་དད་དུ་མི་འགྱུར་བར་གསུངས་སོ། །དྲན་པ་ཉེ་བར་གཞག་པའི་མདོ་ལས་ཀྱང་། ལུས་ཅན་རྣམས་ཀྱི་ལས
རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིན་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་བཅོམ་ལྡན་འདས་ཀྱིས་གསུངས་སོ། །སྡོམ་པ་གསུམ་གྱིས་བསྡམས་ཞེས་པ་ནི་ལྷ་དང་མི་ཐུན་མོང་དུ་གསུངས་ཏེ་རྒྱ་ཆེ་བ་དང་གཏིང་དཔག་དཀའ་བའི་

71-1-288b

ཐེག་པ་གསུམ་མི་ཉམས་པའི་ཚུལ་གྱིས་བསླབ་བྱ་གང་ཡང་མི་སྤོང་བས་རིམ་པ་བཞིན་བསྲུང་བའོ། །དེ་ནས་ལྷའི་འཁོར་ལ་སོགས་པས་ནི་བྱིན་གྱི་རླབས་ཀྱི་ཁྱད་པར་ལ་ཆེད་དུ་བརྗོད་པའོ། །ཕྱིར་མི་ལྡོག་པ་ནི་མི་སྐྱེ་བའི་ཆོས་ལ་བཟོད་པ་ཐོབ་པའོ། །ད་ནི་མི་རྣམས་ཀྱི་འཇུག་པའི་ཚུལ་
ཞུས་པ་དང་ལན་གྱི་ཚུལ་གྱིས་གསུངས་སོ། །དེ་ནས་བཅོམ་ལྡན་འདས་ལ་སོགས་པ་ཆེ་བའི་ཡོན་ཏན་གྱི་སྒོ་ནས་བསྟོད་པ་ཡིན་ཏེ། རྒྱལ་པོ་ཞེས་པས་ནི་སྔགས་འདི་རྒྱལ་བའི་སྲས་ཐམས་ཅད་ཀྱི་འབྱུང་ཁུངས་ཡིན་པས་གསུངས་སོ། །མཐུ་ཆེན་པོ་ནི་སྤང་བྱ་ཐམས་ཅད་སྤོང་བའི་
ཕྱིར་རོ། །ཕན་ཡོན་ཆེ་བ་ནི་ཐོབ་བྱ་ཐམས་ཅད་ཐོབ་པའི་ཕྱིར་ཏེ། དེ་དག་གིས་ནི་ཐར་པ་ཐོབ་པའི་ཐབས་ཞུས་པའོ། །ཕན་པ་ནི་ནད་དང་གནོད་པ་བསལ་བའོ། །བདེ་བ་ནི་ཚེ་དང་ལོངས་སྤྱོད་དོ། །དམྱལ་བ་དང་དུད་འགྲོ་ནི་སྤང་བྱ་སྤོང་བའི་ཁྱད་པར་རོ། །དེ་དག་གིས་ནི་མཐོ་རིས་
ཐོབ་པའི་ཐབས་ཞུས་སོ། །ལན་གསུངས་པ་ལ། བཅོམ་ལྡན་འདས་ལ་སོགས་པ་ནི་ཉན་པར་གདམས་པའོ། །བཤད་པའི་དོན་མདོར་བསྟན་པ་ལ་རིག་སྔགས་ཀྱི་རྒྱལ་མོ་ནི་མནྟྲའོ། །རིང་བསྲེལ་གྱི་སྙིང་པོ་ནི་ཏནྟྲའོ། །མཆོད་རྟེན་ནི་ཡནྟྲའོ། །དེ་ནས་གངྒཱ་ལ་སོགས་པས་
ལས་སྦྱོར་ཐམས་ཅད་ཕན་ཡོན་གྱི་ཚུལ་དུ་མདོར་བསྟན་པ་ལས་དགེ་བའི་རྩ་བ་བསྐྱེད་པ་ནི་མཎྜལ་ཟླུམ་པོ་བྱས་ནས་སྐུ་གདུང་ངམ་རིང་བསྲེལ་བཞུགས་ཏེ་གནས་བདུན་དུ་བསྒྲུབ་བྱའི་མིང་ཙམ་བཅུག་ནས་བརྗོད་པ་སྟེ། གཞན་སྔགས་ཀྱི་སྦྱོར་བ་མེད་པའོ། །བསོད་ནམས་འཕེལ་བ་ནི་
དཀྱིལ་འཁོར་དཔལ་བེའུ་ལྟ་བུར་བྱས་ནས་མ་མ་པུཥྚིཾ་ཀུ་རུ་ཞེས་སྦྱར་རོ། །ལས་དང་ཉོན་མོངས་པའི་སྒྲིབ་པ་སྦྱང་བ་ལ་ནི་དཀྱིལ་འཁོར་མཆེ་བ་ལྟ་བུ་བྱས་ནས་སརྦ་པཱ་པཾ་རཀྵ་ཀུ་རུ་ཞེས་སྤེལ་ལོ། །ངན་སོང་གསུམ་གྱི་འཇིགས་པ་བསལ་བ་ལ་ནི་དཀྱིལ་འཁོར་པདྨ་རྒྱས་པ་ལྟ་བུ་བྱས་ནས་
སརྦ་དུརྒ་ཏི་པ་རི་ཤོ་དྷ་ཡ་ཞེས་བྱ་བ་སྦྱར་བར་བྱའོ། །ཚེ་རིང་བར་འདོད་ན་དཀྱིལ་འཁོར་ནོར་བུ་རིན་པོ་ཆེ་ལྟ་བུར་བྱས་ཏེ་མ་མ་ཨཱ་ཡུ་སྠཱ་ན་ཀུ་རུ་ཞེས་སྦྱར་རོ། །བདེ་བ་ཅན་དུ་སྐྱེ་བར་འདོད་ན་དཀྱིལ་འཁོར་གདུགས་ཀྱི་རྣམ་པ་ལྟར་བྱས་ཏེ། མ་མ་སུ་ལོ་ཀ་པྲ་བ་ཏ་ཀུ་རུ་ཞེས་སྦྱར་རོ། །བུ་

71-1-289a

བསླང་བའི་དཀྱིལ་འཁོར་བུམ་པ་ལྟ་བུ་བྱས་ཏེ་མེ་པུ་ཏྲ་བྷ་བནྟུ་ཞེས་སྦྱར་རོ། །ཤི་བ་ལ་ཕན་གདགས་པ་ཡང་རྫུས་ཏེ་སྐྱེ་བའི་ཕྱིར་དཀྱིལ་འཁོར་པདྨ་ཅན་དུ་བྱའོ། །དྲན་པ་ཉམས་པ་གསོ་བ་ལ་དཀྱིལ་འཁོར་ཟླ་བ་རྒྱས་པ་ལྟར་བྱས་ནས་དུར་ས་ཏྱ་ཨ་པ་ན་ཡ་ཞེས་སྦྱར་རོ། །
འཇིགས་པ་བསལ་བར་འདོད་ན་མ་མ་ཨ་བྷ་ཡཾ་ཀ་རི་ཞེས་སྦྱར་ཞིང་དཀྱིལ་འཁོར་མཆོད་རྟེན་ལྟ་བུ་བྱའོ། །བསམ་པ་ཡོངས་སུ་རྫོགས་འཕྲལ་གྱི་རྐྱེན་དང་བྲལ་བ་སྟེ། རྨི་ལམ་ངན་པ་ལ་དུར་སྭ་པྣི་ཨ་པ་ན་ཡ་དང་། ལྟས་ངན་པ་ལ་ནི་དུརྨི་ཏཾ་ཨ་པ་ན་ཡ་ཞེས་པ་དང་། ཨཱ་ཀཱ་ལ་མྲྀ་ཏྱུ་པྲ་ཤ་མ་
ཎ་ཞེས་དུས་མ་ཡིན་པར་འཆི་བ་བཟློག་པ་དང་། ཙིཏྟ་བྱཱ་ཀུ་ལ་ནི་སེམས་གཡེང་བའོ། །ཛྭ་ར་སཾ་བྱཱ་དྷི་ཨ་པ་ན་ཡ་ནད་སོལ་ཅིག་པ་ལ་སོགས་པ་སྦྱོར་བ་དང་བཅས་པ་བརྗོད་ཅིང་དཀྱིལ་འཁོར་གྲུ་བཞི་པར་བྱས་ནས་འདོད་པའི་ལས་དེ་དག་གྲུབ་པོ། །ད་ནི་ཆོ་གའི་ཚུལ་བརྗོད་དེ། ཁྲུས་
བྱས་ལ་ཞེས་པ་ལ་སོགས་པ་ཆོ་ག་ལ་འཇུག་པའི་སྔ་རོལ་དུ་ཆུ་གཙང་མ་འམ་སྨན་དང་སྦྱར་བའི་ཆུ་ལ་སྔགས་ཐུང་བ་བརྗོད་ཅིང་གདོང་ལ་སོགས་པ་བཀྲུ་བར་བྱའོ། །དེའི་དུས་སུ་རིག་པའི་ལྷ་མོ་སྤྱན་མ་དང་མཱ་མ་ཀཱི་དང་གོས་དཀར་མོ་དང་སྒྲོལ་མ་རྣམས་ཀྱི་སྔགས་ཀྱི་ཕྲེང་བ་བརྗོད་ཅིང་བདག་ལ་
ཁྲུས་བྱེད་པར་ཡང་བསམ་མོ། །གཟུངས་ཀྱི་སྙིང་པོ་འདི་ཉིད་དམ་རྟེན་ཅིང་འབྲེལ་བར་འབྱུང་བའི་སྔགས་ལ་སོགས་པས་བྱིན་གྱིས་བརླབས་པའི་གོས་སར་པ་གྱོན་པར་བྱ་བའམ། ཨོཾ་ཨ་མི་ཀ་པ་རི་ཤུདྡྷེ་ཤོ་དྷ་ཡ་ས་མ་ཏེ་ན་དྷི་རི་དྷི་རི། ཤུདྡྷེ་ཤོདྷ་ཡ། མ་ཧཱ་པདྨེ་ཧཱུཾ་སྭཱ་ཧཱ། བའི་རྣམ་ལྔ་ལ་ 
སྟོང་བཟླས་ཏེ་གོས་དང་སྣོད་སྤྱད་དང་ཟས་ཀྱི་རྒྱུ་ལ་གཏོར་གནས་ཁང་ལ་ཆག་ཆག་གདབ་བོ། །བཟའ་ཉེས་དང་བགོ་ཉེས་ལ་སོགས་པ་ཀུན་སེལ་ཏོ། །ཡང་ཙནྡན་དང་གླ་བའི་ཆུ་ལ་སོགས་པ་ལ་ཨོཾ་ཤྲཱི་མ་ཧཱ་ཀཱ་རུ་ཎ་པདྨ་ཨ་མོ་གྷ་ཨ་མོ་གྷ་ཨ་པྲ་ཏི་ཧ་ཏ་བཛྲ་ཨ་དྷིཥྛཱ་ན་བྷུ་རུ་བྷ་ནཾ་དྷ་རི་སྭཱ་ཧཱ། ཞེས་
པས་གནས་ཁང་ལ་སོགས་པ་དང་ཕྱོགས་ཐམས་ཅད་དྲི་ཞིམ་པོར་བྱའོ། །སྤོས་ཀྱིས་དཀྱིལ་འཁོར་གྲུ་བཞི་པར་བྱ་ཞེས་བྱ་བ་ནི་ཨོཾ་བཛྲ་བྷཱུ་མི་ཧཱུཾ་ཞེས་བརྐོ་བའམ། འཆད་པར་འགྱུར་བའི་ཆོ་གས་ས་བརྐོ་བ་དང ཨོཾ་བཛྲཱ་ས་ནཱ་ཡ་ཧཱུཾ་ཆུ་བླངས་ནས། ཨོཾ་བཛྲ་གོ་མ་ཡེ་ཧཱུཾ་ཞེས་གཅི་བ་

71-1-289b

དང་བསྲེས་ནས་འཇིམ་པ་བྱ་བ་དང་དཀྱིལ་འཁོར་འདོམ་གང་པ་ལ་སོགས་པ་ཅི་འདོད་པར་བརྩིགས་ནས་ཨོཾ་བཛྲ་རེ་ཁེ་ཧཱུཾ་ཞེས་པས་བའི་རྣམ་ལྔ་ཙནྡན་གྱི་ཆུ་དང་བསྲེས་ནས་གཡས་སྐོར་དུ་བྱུག་གོ། །ཨོཾ་སུ་རེ་ཁེ་སརྦ་ཏ་ཐཱ་ག་ཏཱ་ཨ་དྷིཥྛནྟུ་སྭཱ་ཧཱ། ཞེས་ལག་པའི་རྒྱབ་ཏུ་མེ་ཏོག་བཞག་
ལ་ཨོཾ་སརྦ་བིགྷྣཾ་ཨུཏྶཱ་ར་ཡ་ཧཱུཾ་ཞེས་མཎྜལ་གྱི་དབུས་སུ་དོར་ནས། ཨོཾ་སརྦ་སུ་བི་ཤུདྡྷ་དྷརྨཱ་ཎཱཾ་སྭཱ་ཧཱ། ཞེས་ལག་པ་བཀྲུས་ཏེ། ཨོཾ་ཨཱཿཧཱུཾ་ཧོཿསྭཱ་ཧཱ། ཞེས་མེ་ཏོག་དེ་སྤྱི་བོར་བཞག་གོ། །དེ་ནས་འཆད་པར་འགྱུར་བའི་ཆོ་གས་ཐིག་གང་འདོད་པའི་ཚུལ་དུ་གདབ་བོ། །ཚོན་སྣ་མ་
ལུས་པས་བྲི་བར་བྱའོ། །དེ་ཡང་། ཨོཾ་ཨཾ་བཾཾ་སཾ་ཛཾ་ཧཱུཾ་ཞེས་པ་དཀར་པོ་དང་སེར་པོ་དང་དམར་པོ་དང་ལྗང་གུ་དང་ནག་པོ་དང་སྔོན་པོ་རྣམས་རྣམ་པར་སྣང་མཛད་དང་རིན་ཆེན་འབྱུང་ལྡན་དང་སྣང་བ་མཐའ་ཡས་དང་དོན་ཡོད་གྲུབ་པ་དང་རྡེ་རྗེ་སེམས་དཔའ་མི་བསྐྱོད་པར་བསམ་ནས་
ཡེ་ཤེས་ཀྱི་ལྷ་དང་གཉིས་སུ་མེད་པར་བྱས་ནས་མཆོད་པ་དང་བསྟོད་པ་ལ་སོགས་པས་མཉེས་པར་བྱས་ནས་སྙིང་པོ་འབའ་ཞིག་བརྒྱ་རྩ་བརྒྱད་བརྗོད་དོ། །ཡང་དེ་དག་དང་འཁོར་ལོ་དང་རིན་པོ་ཆེ་དང་པདྨ་དང་རལ་གྲི་དང་རྡོ་རྗེ་དག་གི་ཕྱག་རྒྱར་གྱུར་པར་མོས་ལ་རིན་པོ་ཆེའི་ཕྱག་རྒྱ་
དེ་དག་གི་རྩིག་པར་བསམ་ཞིང་བྲི་བར་བྱ་སྟེ། རྟེན་ཅིང་འབྲེལ་པར་འབྱུང་བའི་སྔགས་བརྗོད་ཅིང་དབང་ལྡན་ནས་གཡས་སྐོར་དུ་བྲི་བར་བྱའོ། །དེའི་འོག་ཏུ་དཀྱིལ་འཁོར་དེའི་ས་ཕྱོགས་སུ་བ་དན་ཉི་ཤུ་རྩ་བཞི་ཁ་དོག་ཐ་དད་བྲིའོ། །བླ་རེ་ནི་སྔོན་པོའོ། །ཡོལ་བ་ནི་དམར་པོའོ། །
གཡེར་ཁའི་ཕྲེང་བ་དང་སྲང་བུའི་ར་བ་དང་གདུགས་དང་རྒྱལ་མཚན་དང་སིལ་སྙན་དང་མདའ་ཡབ་དང་རལ་གྲི་དང་མེ་ལོང་དང་རྨ་བྱའི་སྒྲོའི་ཆུན་པོ་སྦྱང་བར་བྱའོ། །སྙིང་པོའི་རིག་སྔགས་གྲོ་ག་ལ་བྲི་བར་བྱའོ་ཞེས་པ་ལ། གཟུངས་སྔགས་ཡི་གེའི་ཚུལ་དུ་བྲི་བ་ནི། རས་སཾ་ཤིང་ཤུན་
གྲོ་གའམ། །ཏཱ་ལའི་ལོ་མ་སར་པའམ། །གུར་གུམ་གི་ཝང་གླ་རྩི་ལ། །གསེར་འདབ་གཙུག་གི་རྩ་བ་འམ། །གསེར་གྱི་སྡོང་པོ་སར་པ་ཡིས། །གཟུངས་སྔགས་ཕྲེང་བ་མ་ཉམས་པ། །སྐར་མ་མགོ་རྒྱལ་ལྷ་མཚམས་ལ། །ཤར་དུ་བལྟས་ནས་བྲི་བར་བྱ། །ཞེས་པའི་ཚུལ་

71-1-290a

གྱིས་ལག་པ་གཡས་པ་ནི་འཕགས་པ་འཇམ་དཔལ་དུ་བསམ་མོ། །གཡོན་པ་ནི་ཀུན་དུ་བཟང་པོར་བསམ་མོ། །བྲི་གཞི་ནི་ཕྱོགས་བཅུའི་ཞིང་ཁམས་སུ་བསམ་མོ། །སྨྱུ་གུ་ནི་ཕྱག་ན་རྡོ་རྗེར་བསམ་མོ། །སྣག་ཚ་ནི་ཡི་གེ་ཨའི་རྣམ་པར་བསམ་མོ། །བྲི་བའི་
དུས་སུ་འཇམ་དཔལ་དང་ཀུན་དུ་བཟང་པོས་དྲང་བའི་དོན་དང་ངེས་པའི་དོན་གྱི་ཆོས་ཀྱི་འཁོར་ལོ་རྒྱུན་མི་འཆད་པར་གསུངས་པ་དེ་ཕྱག་ན་རྡོ་རྗེས་ཕྱོགས་བཅུའི་ཞིང་ཐམས་ཅད་དུ་ཡི་གེའི་ཚུལ་དུ་སྒྲོགས་ཤིང་བཀྲམ་པས་སྐད་ཐ་དད་ཡི་གེའི་དབྱིབས་དང་ཁ་དོག་ཐ་དད་དུ་སྣང་བར་མོས་ཏེ་
ཤར་རམ་བྱང་དུ་བལྟས་པས་དུས་ཚོད་བཟང་པོ་ལ་ལྷག་པའི་བསམ་པ་མ་འཁྲུགས་པས་བྲི་བར་བྱའོ། །འདོད་ཆགས་ཀྱི་སེམས་དང་བཅས་པས་མ་ཡིན་ནོ། །དེ་བཞིན་དུ་ཞེ་སྡང་དང་ང་རྒྱལ་དང་ཕྲག་དོག་དང་སེར་སྣ་དང་རྒྱགས་པ་དང་བག་མེད་པ་དང་རྣམ་པར་གཡེང་བར་བྱེད་པ་དང་
ལྟ་བ་ངན་པ་དང་བཅས་པས་མ་ཡིན་ནོ། །དེ་ནི་ཡི་གེའི་ཚུལ་ལོ། །ཡང་ན་རིན་པོ་ཆེའམ་རྡོ་འམ་རྭ་འམ་ཤིང་གི་ཁམས་ལས་ཡི་གེ་ཕྲེང་བ་ཁོལ་དུ་བརྐོས་ནས་ས་འཇམ་པོའི་འཇིམ་པ་ཤིན་ཏུ་ལེགས་པ་ལ་སྤྲད་དེ་ཇི་ཙམ་འདོད་པའི་གྲངས་སུ་བྱེད་པ་འདི་སྐུ་ཕྱག་རྒྱའི་ཚུལ་དུ་བཀོད་
པའོ། །ཡང་ན་རྡོ་བའམ་རིན་པོ་ཆེ་ལ་སོགས་པ་ལ་ཐུབ་པའི་སྐུའི་མཐའ་སྐོར་དུ་སྔགས་ཀྱི་ཕྲེང་བ་ཟླུམ་པོའི་ཚུལ་དུ་བཀོད་དེ་ཁོལ་དུ་བརྐོས་ནས་འཇིམ་པ་དང་སྤྲོད་པར་བྱའོ། །དེའི་གྲངས་ཇི་ཙམ་འདོད་པ་བྱས་པ་ནི་སྐུའི་ཚུལ་དུའོ། །སྔགས་དེ་དག་གོས་དམར་པོས་དཀྲིས་ཏེ་མགོའི་
ཕྱོགས་གསལ་བར་བྱ་སྟེ་ས་ཕྱོགས་གཙང་མར་གཞག་གོ། །དེ་ནི་ཡི་གེ་བྲི་བའི་རིམ་པའོ། །མཆོད་རྟེན་ལྔ་གདབ་པར་བྱའོ་ཞེས་བྱ་བ་ནི་མཚོན་པ་སྟེ་བརྒྱ་རྩ་བརྒྱད་དམ་ཉི་ཤུ་རྩ་ལྔ་འམ་དགུ་འམ་ལྔ་འམ་གཅིག་ལ་སོགས་པའོ། །དེ་ལ་སཱཙྪའི་ཆོ་ག་ནི། སྐྱོན་བྲལ་རབ་ཏུ་འཇམ་
པའི་ས། །དྲི་བཟངས་ཆུ་ཡིས་འཇིམ་པ་ལ། །རྒྱ་འབུར་གསལ་བའི་སཱཙྪ་ནི། །བདེ་བར་གཤེགས་པའི་མཆོད་རྟེན་ནོ། །ཞེས་པའི་ཚུལ་གྱིས་གྱོ་མོ་དང་སོལ་བ་དང་རྡོ་དང་གསེག་མ་དང་རྩྭ་ལ་སོགས་པའི་སྐྱོན་ཐམས་ཅད་དང་བྲལ་བ་བཀྲ་ཤིས་པའི་ཕྱོགས་ནས་བླངས་ཏེ་ཙནྡན་ལ་

71-1-290b

སོགས་པ་དྲི་ཞིམ་པོའི་ཆུས་བླངས་ཏེ་ལེགས་པར་བརྡུང་ཞིང་འཐས་པ་དང་འདྲེས་པར་བྱའོ། །དེ་ཡང་། ཨོཾ་ན་མཿསརྦ་བུདྡྷ་ཨ་དྷིཥྛི་ཏེ་བྷཱུ་མི་རཀྵ་རཀྵ་ཧཱུཾ་ཕཊ་སྭཱ་ཧཱ། ཞེས་པས་བགེགས་བསལ་ལོ། །ལག་པའི་སོར་མོས་ལ་རེག་ནས། ཨོཾ་ན་མཿ ས་མནྟ་བུད་དྷཱ་ནཱཾ་སརྦ་ཨ་དྷིཥྛཱ་ན་རཏྣ་བྷཱུ་མི་ཡེ་ཧཱུཾ་
ཕཊ་སྭཱ་ཧཱ། ཞེས་རིན་པོ་ཆེའི་ས་གཞིར་བསམ་མོ། །ཨོཾ་ཨཱཿབཛྲ་ཁ་ན་ཁ་ན་ཧཱུཾ་ཕཊ་སྭཱ་ཧཱ། ཞེས་བརྐོ་ཞིང་བརྐོས་པ་ཐམས་ཅད་ཡི་གེ་ཨའི་ངོ་བོར་བསམ་མོ། །ཨོཾ་ན་མཿ སརྦ་ཏ་ཐཱ་ག་ཏེ་བྷྱོ། ཨ་དྷིཥྛཱ་ན་ཨ་དྷིཥྛཱི་ཏེ། ཨ་མ་ལ་བི་མ་ལ་ནིརྨ་ལེ་བི་ཤུད་དྷེ་སྭཱ་ཧཱ། ཞེས་བྱང་ཆུབ་
སེམས་ཀྱི་ཆུ་ཙནྡན་ལ་སོགས་པ་དྲི་ཞིམ་པོས་བྲན་ནོ། །ཨོཾ་ན་མཿསརྦ་བུདྡྷ་བོ་དྷི་ས་ཏྭེ་བྷྱཿ ཨ་དྷིཥྛཱ་ན་ཨ་དྷིཥྛི་ཏེ། སརྦ་སཏྭ་བི་ཀལྤ་ཧ་ན་ཧ་ན་ཧཱུཾ་ཕཊ་སྭཱ་ཧཱ། ཞེས་རྡོ་རྗེ་དབྱུག་པས་བརྡུང་ཞིང་བསྲེ་བར་བྱའོ། །ཨོཾ་ན་མཿས་མནྟ་བུ་དྡྷཱ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་མ་བཛྲ་ཨཱཿ ཡུ་ཥེ་སྭཱ་ཧཱ། 
ཞེས་འཇིམ་པའི་གོང་བུ་གཅིག་ཏུ་བྱས་ནས། ན་མཿསརྦ་ཏ་ཐཱ་ག་ཏེ་བྷྱོ། ཨོཾ་བཛྲ་པྲ་མརྡྷ་ན་ཡ་སརྦ་པྲ་མརྡྷ་ན་ཡ་ཧཱུཾ་ཕཊ་ཅེས་བརྗོད་པས་འཇིམ་པའི་གོང་བུ་དེ་ཉིད་ཏྲཱཾ་ལས་རིན་པོ་ཆེའི་རི་བོར་གྱུར་པར་བསམ་མོ། །ན་མ་སྟྲཻ་ཡ་དྷི་ཀཱ་ནཱཾ། ན་མཿསརྦ་ཏ་ཐཱ་ག་ཏེ་བྷྱོ། ཏདྱ་ཐཱ། ཨོཾ་
སུཀྵྨཻ་སུཀྵྨཻ་ཡ་ནུ་ག་ཏ། ཤནྟེ་དནྟེ་ནིར་ཀུ་ལེ། ཡ་ཤ་ཡ་ཤོ་བ་ཏི་ཏེ་ཇོ་བ་ཏི། སརྦ་བུདྡྷ་ཨ་དྷིཥྛཱ་ན་ཨ་དྷིཥྛཱི་ཏེ་ཧཱུཾ་ཕཊ། འདི་ནི་སྒྲིབ་པ་རྣམ་སེལ་གྱི་རྒྱུད་ལས་སྔགས་འདི་བྱེ་མ་འམ་འཇིམ་པའི་གོང་བུ་ལ་ཉི་ཤུ་རྩ་གཅིག་བཟླས་ནས་སཱ་ཙྪ་བྱས་ན་མཆོད་རྟེན་དེའི་རྡུལ་ཕྲ་རབ་རེ་རེ་
ལའང་མཆོད་རྟེན་རེ་རེར་འགྱུར་ལ་རྡུལ་ཕྲ་རབ་དེ་ཉིད་ཀྱི་གྲངས་ཙམ་གྱི་ལྷ་དང་མིའི་གོ་འཕང་ཐོབ་པར་འགྱུར་རོ། །གང་དུ་སྐྱེས་པ་དེའི་སྐྱེ་བ་ཡང་དག་པར་འགྱུར་རོ། །མྱུར་དུ་སངས་རྒྱས་རྣམ་པར་སྣང་མཛད་དང་མཚུངས་པའི་སྐུ་ཐོབ་པར་འགྱུར་རོ། ཞེས་ཏེ་འཇིམ་པའི་
གོང་བུ་དེ་ཉིད་པདྨ་དང་ཟླ་བའི་སྟེང་དུ་ཨོཾ་ལས་རྣམ་པར་སྣང་མཛད་གང་ཆེན་མཚོ་རི་རབ་བྱེ་བའི་ཚད་ཀྱི་སྐུ་བ་སྤུའི་གསེབ་ཐམས་ཅད་རྣམ་པར་སྣང་མཛད་ལ་སོགས་པ་ཕྱོགས་ཀྱི་རིགས་ཀྱི་སྐུས་གང་བར་བསམ་མོ། །ཨོཾ་བཛྲ་བྷེ་བཱ་དྷ་ཡེ་སྭཱ་ཧཱ། ཞེས་འཇིམ་པ་བཅད་

71-1-291a

པའི་ཚེ་རྣམ་པར་སྣང་མཛད་ཆེན་པོའི་བ་སྤུའི་གསེབ་ནས་སྐུ་རེ་རེ་སྤྱན་དྲང་བར་བསམ་མོ། །ཨོཾ་རཏྣོ་བྷ་བནྟེ་ཧཱུཾ་ཞེས་འབི་འབི་བྱས་ལ་སྐུ་རིན་པོ་ཆེའི་ན་བཟའ་ལྕིབ་མས་བླངས་པར་བསམ་ཞིང་། ཨོཾ་དྷརྨ་དྷཱ་ཏུ་གརྦྷེ་སྭཱ་ཧཱ། ཞེས་སྙིང་པོ་
བཅུག་པས་ཐུགས་བསྐྱེད་པར་བསམ་མོ། །ཨོཾ་ཨ་ར་ཛེ་བི་ར་ཛེ་སྭཱ་ཧཱ། ཞེས་མར་གྱི་སྣུམ་གྱིས་བྱུག་པ་ནི། ལྷའི་ཚོགས་ཀྱིས་དྲིའི་ཆར་ཕབ་པར་བསམ་མོ། །ཨོཾ་བཛྲ་བྷེ་དྷེ་སྭཱ་ཧཱ། ཞེས་འཇིམ་པ་བཅད་པའོ། །ཨོཾ་དྷརྨཱ་ཧ་རོ་དྦྷ་བེ་ཡེ་སྭཱ་ཧཱ། ཞེས་བསྐོལ་
ཕོར་དུ་བཅུག་པའི་ཚེ་ཆོས་འབྱུང་དུ་ཞུགས་པར་བསམ་མོ། །ཨོཾ་བཛྲ་མུངྒ་ར་ཨཱ་ཀོ་ཊ་ཧཱུཾ་ཕཊ་ཅེས་བརྡུང་བའི་ཚེ་མིང་གི་ཡི་གེ་ཕྲེང་བ་དུ་མ་དང་བཅས་པར་བསམ་ཞིང་སྤྲུལ་པ་དུ་མའི་སྟེང་དུ་གྱུར་པར་བསམ་ལ། ཨོཾ་སརྦ་ཏ་ཐཱ་ག་ཏ་སམྦྷོ་ག་ཀཱ་ཡ་སྭཱ་ཧཱ། ཞེས་བསྐོལ་
ཕོར་ནས་དྲངས་པའི་ཚེ་ལོངས་སྤྱོད་རྫོགས་པའི་སྐུར་བསམ། ཨོཾ་སརྦ་ཏ་ཐཱ་ག་ཏཱ་ནིརྨ་ན་ཀཱ་ཡ་སྭཱ་ཧཱ། ཕྱུང་མ་ཐག་ཏུ་སྤྲུལ་པའི་སྐུར་བསམ་མོ། །ཨོཾ་དྷརྨ་རཏྣོ་རཏྣ་སཾ་བྷ་བེ་སྭཱ་ཧཱ། ཞེས་པས་སྐུ་དེ་བ་སྤུའི་གསེབ་ཐམས་ཅད་སྐུས་གང་བར་བསམ་མོ། །དེ་ཡང་སྐུ་རེ་
རེ་ཕོ་བྲང་ཡེ་ཤེས་ཀྱི་སྙིང་པོ་ཅན་མཐོང་ན་དགའ་བའི་མཆོད་རྟེན་དུ་བཞུགས་པར་བསམས་ནས། །ཨོཾ་ཨཱཿཡུ་ཥེ་སྭཱ་ཧཱ། ཞེས་སྲོག་ཤིང་གཟུགས་སོ། །ཨོཾ་པྲ་མརྡྷ་ན་ཡེ་སྭཱ་ཧཱ། ཞེས་འཁོར་ལོ་བཞག་ནས། ཨོཾ་པ་ཏཾ་ཀཱ་ལམ་བ་སྭཱ་ཧཱ། ཞེས་ཅོད་པན་གདགས་
སོ། །ཨོཾ་ས་ར་ར་ཏ་སྭཱ་ཧཱ། ཞེས་པས་བ་དན་དབུལ་ལོ། །ཨོཾ་དུམ་བི་ར་དུཾ་བཾ་སྭཱ་ཧཱ། ཞེས་ཆུ་སྲིན་རྒྱལ་མཚན་དབུལ་ལོ། །ཨོཾ་པྲ་མ་ཎ་ཡེ་སྭཱ་ཧཱ། ཞེས་གདུགས་དབུལ་ལོ། །ཨོཾ་རཏྣ་མཱ་ལ་ཏྲཱཾ་ཞེས་པས་ཕྲེང་བ་གདགས་ལ། ཨོཾ་ན་མ་ཤེ་ཡ་ད་བུག་དྷ་པྲ་ཏི་ཤ་ག་
ཏ་ཏི་བྷེ། ཏ་ཐཱ་ག་ཏོ་ཨརྷ་ཏེ་བྷྱཿས་མྱཀྶཾ་བུདྡྷ་ཡ། ཏདྱ་ཐཱ། ཨོཾ་སུ་སུ་ཡེ་སྭཱ་ཧཱ། ཞེས་བླ་རེ་དབུལ་ལོ། །ཨོཾ་དྷརྨྨཱ་ད་མི་ལེ་ཛ་ལེ་སྭཱ་ཧཱ། ཞེས་གདན་ལ་བཞུགས་སོ། །ཨོཾ་བཛྲ་དྷཱ་ཏུ་ཨ་དྷི་ཀྵ་དྷེ་ཧཱུཾ་ཞེས་བརྟེན་པར་གསོལ་བ་གདབ་པོ། །དེའི་འོག་ཏུ་རྟེན་འབྲེལ་གི་སྔགས་བརྗོད་

71-1-291b

དྲི་བཟང་པོའི་ཆུས་བསངས་ཏེ་མེ་ཏོག་ལ་སོགས་པས་རྒྱས་པར་མཆོད་དོ། །དེ་ནས་གཟུངས་གང་དུ་བཞུགས་པ་དེ་བརྗོད་ཅིང་བསྐོར་བ་གསུམ་མམ་ཉི་ཤུ་རྩ་གཅིག་ལ་སོགས་པ་བྱའོ། །སཱཙྪ་བྱ་བའི་རིམ་པའོ། །བུམ་པ་གང་བ་ལྔ་གཞག་གོ། །ཞེས་བྱ་བ་ཡང་མཚོན་པ་སྟེ་
བུམ་པ་ཉི་ཤུ་རྩ་ལྔའམ་བཅུའམ་དྲུག་གམ་ཡང་ན་གཅིག་གོ། །དེ་ཡང་། གསེར་དངུལ་ཐངས་སམ་ཤིང་དག་གམ། །ས་རྡོ་ལས་བྱས་ལྟོ་བ་ཆེ། །ཞབས་ཕྲ་སྐེ་རིང་མཆུ་ཕྱང་བ། །གསེར་རམ་བཀྲུས་པའི་བུམ་པ་ནི། །ལྷ་ཡི་གྲངས་སམ་རིགས་བདག་གི། །ཚད
རྣམས་ཅི་འབྱོར་བཀོད་པར་བྱ། །ཡིད་འོང་གཙང་མའི་ཆུས་བཀང་ནས། །བྱི་རུ་གསེར་དངུལ་མུ་ཏིག་དང་། །ནོར་བུ་རྨ་མེད་རིན་ཆེན་ལྔ། །སེང་གྲྀ་བྱཱ་གྲྀ་གིར་ཀརྣི། །པ་ཏོ་ཧ་ས་དེ་བ་སྨན། །གྲོ་ནས་འབྲས་ཀྱི་སོ་བ་ཏིལ། །མོན་སྲན་གྲེའུ་འབྲུ་ལྔའོ། །ཙནྡན་ག་པུར་
གུར་གུམ་དང་། །ཛཱ་ཏི་ཨ་ཀ་རུ་དྲི་ལྔ། །ལན་ཚྭ་བུ་རམ་སྦྲང་དང་མར། །བྲག་ཞུན་འབྱུང་བའི་སྙིང་པོ་ལྔ། །བུམ་པ་བཟང་པོའི་གཏེར་ཡིན་ཏེ། །མ་ཉམས་གོས་དང་ལོ་མས་ནི། །མགྲིན་པ་དང་ནི་དབུ་རྒྱན་བྱ། །འཇིག་རྟེན་འཇིག་རྟེན་འདས་པ་ཡི། །དཔལ་
འབྱོར་འདོད་པས་འདི་མཆོད་དོ། །ཞེས་བྱང་ཆུབ་སེམས་དཔའ་སྒྲིབ་པ་རྣམ་སེལ་གྱི་རྟོག་པར་གསུངས་སོ། །དེ་ལ་ཐུགས་རྗེ་ཆེན་པོའི་བརླན་གྱི་ཕྱིར་ཆུ་དང་བའོ། །མྱ་ངན་ལས་འདས་པའི་ས་བོན་སོགས་པའི་ཕྱིར་འབྲུ་ལྔའོ། །ཆོས་ཀྱི་སྐུའི་གདུང་རྒྱུན་མི་བཅད་པའི་
ཕྱིར་རིན་པོ་ཆེ་ལྔའོ། །ཉོན་མོངས་པའི་གདུང་བ་སེལ་བའི་ཕྱིར་སྨན་ལྔའོ། །གདུལ་བྱ་བྱང་ཆུབ་ཀྱི་ལམ་གྱི་བསྲུང་བ་བསྐྱེད་པའི་ཕྱིར་དྲི་ལྔའོ། །འཁོར་བ་མ་སྟོངས་ཀྱི་བར་དུ་གཟུགས་ཀྱི་སྐུ་རྒྱུན་མི་འཆད་པའི་ཕྱིར་འབྱུང་བའི་སྙིང་པོ་ལྔའོ། །ཆོས་ཀྱི་གསུང་ལ་ཉམས་
པ་མེད་པའི་ཕྱིར་མགྲིན་པ་གོས་བཟང་གིས་བཅིང་བའོ། །འགྲོ་བའི་བསམ་པ་ཡིད་བཞིན་དུ་སྐོང་བའི་ཕྱིར་ཁ་རྒྱན་ནོ། །ལམ་ངན་པ་དམན་པའི་གང་ཟག་གིས་རྟོགས་དཀའ་བ་དང་དབང་པོ་རྣོན་པོ་ལ་རྒྱ་ཆེ་བ་དང་ཆོས་ཉིད་ཟབ་མོ་རྟོགས་པར་རིགས་པའི་སྤྱོད་ཡུལ་

71-1-292a

མ་ཡིན་པ་དང་རྟོགས་ན་ཕྱི་ནང་གཉིས་སུ་མེད་པའི་རྟགས་སུ་བུམ་པ་ཞབས་ཕྲ་ཞིང་ལྟོ་ཆེ་བ་དང་སྐེ་བ་ཕྲ་བ་དང་མཆུ་འཕྱང་བའོ། །གལ་ཏེ་བུམ་པ་ལྔ་ལ་སོགས་པ་ཡིན་ན་རིགས་ཀྱི་ཕྱག་རྒྱ་ཡང་དགོད་པར་བྱའོ། །བུམ་པ་དེ་དག་ལ་ཡང་རྨ་བྱའི་གདུགས་
དང་ཅོད་པན་དང་རྒྱལ་མཚན་དང་བ་དན་ལ་སོགས་པའི་རྒྱན་གྱིས་སྤྲས་ཏེ་བཀོད་དོ། །གྲ་བཞིར་པོག་ཕོར་བཞི་ཞེས་པ་ཡང་མ་ཆག་པ་དང་མ་གས་པའི་སྣོད་དུ་ཏུ་རུ་སྐ་ནི་བྱང་ཤར་དུ་བསྲེག་གོ་ཨ་ག་རུ་ནི་ཤར་ལྷོར་རོ། །ཙནྡན་ནི་ལྷོ་ནུབ་ཏུའོ། །གུ་གུལ་ནི་ནུབ་བྱང་དུའོ། །
སྣོད་བཞི་ནི་མཚོན་པ་ཙམ་སྟེ་སྤོས་དང་མེ་ཏོག་ཐ་དད་པ་དང་ཡོན་ཆབ་དང་མར་མེ་དང་བྱུག་པ་དང་ཞལ་ཟས་དང་སྐུ་གདུང་གི་གྲངས་དང་སྦྱར་ནས་དགོད་དོ། །དེ་ཡང་ཆོ་ག་རྒྱས་པ་དང་བསྡུས་པ་ཀུན་མཚོན་པར་ཤེས་པར་བྱའོ། །དེ་རེ་ཞིག་སཱཙྪ་བརྒྱ་པའི་དབང་དུ་བྱས་ན་རང་
ཉིད་ལྷག་པའི་བསམ་པ་དང་ལྡན་པས་ཐམས་ཅད་དུ་སྔོན་གྱི་ཉིན་པར་སྐྱབས་སུ་འགྲོ་བ་བྱས་ནས་སྡོམ་པ་བཟུང་སྟེ་མཎྜལ་ཕུལ་ནས་མཆོད་དེ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མདུན་གྱི་ནམ་མཁའ་ལ་དམིགས་ཏེ་དབང་པོར་བྱས་ནས་ཚིགས་བཅད་འདིས་གསོལ་
བ་གདབ་བོ། །ཨོཾ་བཛྲ། རྡོ་རྗེའི་རིགས་དང་རིན་ཆེན་རིགས། །པདྨའི་རིགས་དང་ལས་ཀྱི་རིགས། །བདེ་གཤེགས་རིགས་ཚོགས་མ་ལུས་པའམ། །སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་རང་རྒྱལ་རྫུ་འཕྲུལ་ཅན། །བརྗོད་མི་ལང་སོགས་
ཚོགས་བཅས་དང་། །དེད་དཔོན་འཇིག་རྟེན་སྐྱོང་བའི་ཚོགས། །ཀུན་ནས་བདག་ལ་དགོངས་སུ་གསོལ། །བདག་ཀྱང་ཡོངས་སུ་དག་པ་དང་། །འགྲོ་བ་ཉོན་མོངས་གནས་བསྒྲལ་ཕྱིར། །ཆོ་ག་བཟང་པོ་འདིའི་སྒོ་ནས། །ཡིད་བཞིན་ནོར་འདྲ་སྒྲུབ་བྱེད་ན། །
བདག་ལ་ཡོངས་སུ་བསྐྱབ་པ་དང་། །སེམས་ཅན་རྣམས་ལ་ཐུགས་བརྩེའི་ཕྱིར། །ཡེ་ཤེས་ཅན་གྱི་གཟིགས་ནས་ཀྱང་། །ཉེ་བར་བྱིན་གྱིས་བརླབ་ཏུ་གསོལ། །སྭཱ་ཧཱ་ཞེས་ལན་གསུམ་ལ་སོགས་པ་བརྗོད་དེ་ཤར་ཕྱོགས་སུ་ཁ་བལྟས་ཏེ་གཟུངས་ཉི་ཤུ་རྩ་

71-1-292b

གཅིག་བརྗོད་ལ་ཉལ་ལོ། །གལ་ཏེ་རྨི་ལམ་དང་ལྟས་ངན་ན་རིགས་པའི་ཁྲོ་བོ་གང་ཡང་རུང་བའི་སྔགས་མང་དུ་བརྗོད་དེ་གཏོར་མ་དང་མཆོད་པ་བུལ་ཞིང་ཚིམ་པར་བྱའོ། །ལྷག་པར་ཡང་ཡི་དྭགས་ལ་གཏོར་མ་མང་དུ་སྦྱིན་ནོ། །དེ་ནི་ཆོ་ག་ཐམས་ཅད་ཀྱི་སྔོན་དུ་འགྲོ་བ་
དང་པོའོ། །དེ་ནས་སཱཙྪ་བརྒྱ་པའི་དབང་དུ་བྱས་ན་དཀྱིལ་འཁོར་གྲུ་བཞི་སྒོ་བཞི་པ་དབུས་ཀྱི་ཕོ་བྲང་རེ་མིག་བརྒྱ་པར་བྱས་ཏེ་དེ་ཡང་ལེ་ཚེ་འམ་པདྨའི་ཁོར་ཡུག་གམ་སྐུ་གདུང་མཆོད་རྟེན་བཞི་བསྡུས་པའི་གཟུགས་སུ་བྱས་ལ་ཆོ་ག་དང་ལྡན་པའི་སཱཙྪ་རེ་རེ་རྒྱན་དང་བཅས་པ་
ལེ་ཚེ་རེ་རེ་ལ་མེ་ཏོག་སྟེང་དུ་གཞག སྒོའི་ནང་རོལ་དུ་ཟུང་རེ་གཞག་གོ། །ལྷ་སྣམ་གྱི་ཟུར་བཞིར་བུམ་པ་གང་བ་བཞི་གཞག་གོ། །ཤར་དུ་དཀྱིལ་འཁོར་ཁྲུ་གང་བ་བདུན་གྱི་སྟེང་དུ་སྐུ་གདུང་རིང་བསྲེལ་དང་བཅས་པ་ཁྲིའུའི་སྟེང་དུ་གཞག་གོ། །དེའི་དྲུང་དུ་བུམ་པ་གང་བ་ཆོ་ག་
དང་བཅས་པ་གཞག་གོ། །མེ་ཏོག་གི་སྣོད་དང་སྤོས་སྣོད་དང་བྱུག་པ་དང་མར་མེ་དང་ཞལ་ཟས་རྣམས་རེ་རེ་ལའང་བརྒྱ་རྩ་བརྒྱད་དཀྱིལ་འཁོར་གྱི་མཐའ་ནས་བསྐོར་རོ། །དགུ་པ་འམ་ལྔ་པ་ལ་སོགས་པ་ལ་ནི་རྡོ་རྗེ་རྒྱ་གྲམ་མམ་པདྨ་བྲིས་ཏེ་གཞལ་ཡས་ཁང་ཡོད་དམ་མེད་
ཀྱང་རུང་ངོ་། །བུམ་པ་དང་སཱཙྪ་དང་སྐུ་གདུང་ཐམས་ཅད་ཀྱང་ནང་དུ་ཚུད་པར་བྱའོ། །ཤར་དུ་ཤེས་རབ་ཀྱི་ཕ་རོལ་ཏུ་ཕྱིན་པ་བཀླག་གོ། །ལྷོར་སྟོབས་པོ་ཆེ་བཀླག་གོ། །ནུབ་དུ་རྨ་བྱ་ཆེན་མོའོ། །བྱང་དུ་མདོ་སྡེའི་དབང་པོ་གསེར་འོད་དམ་པའི་མདོ་བཀླག་གོ། །ཤར་ཕྱོགས་
སུ་འབྱུང་པོ་ཐམས་ཅད་ལ་གཏོར་མ་སྦྱིན་ནོ། །ལྷོ་ཕྱོགས་ནས་དད་པ་ལྡན་པས་མ་མོ་རྣམས་ལ་གཏོར་མ་སྦྱིན་ནོ། །ནུབ་ཕྱོགས་ནས་ཀླུ་ལ་སྦྱིན་ནོ། །བྱང་ཕྱོགས་ནས་འཇིག་རྟེན་སྐྱོང་བ་རྣམས་ལ་གཏོར་མ་སྦྱིན་ནོ། །དེ་ལ་སྨོན་ལམ་གསོལ་བའི་ཚིགས་སུ་གཅད་པ་ནི་འདི་དག་
ཡིན་ཏེ། ཤར་ཕྱོགས་སུ་སྙིང་པོའི་སྔགས་དང་བཅས་པ་བརྗོད་དེ། ཚངས་པ་བརྒྱ་བྱིན་དབང་ཕྱུག་ཆེ། །ཁྱབ་འཇུག་ལྷ་ཀླུ་གནོད་སྦྱིན་སོགས། །དེད་དཔོན་བརྒྱད་པོ་འཁོར་བཅས་དང་། །འཕྲོག་མ་བུ་དང་བཅས་རྣམས་དང་། །འབྱུང་པོའི་ཚོགས་རྣམས་ཀུན་ཉོན་

71-1-293a

ཅིག །བདག་གིས་ཁྲུས་དང་མེ་ཏོག་དང་། །སྤོས་དང་མར་མེ་བྱུག་པ་དང་། །ཞལ་ཟས་ཚོགས་རྣམས་ཁྱེད་ལ་འབུལ། །ཁྱེད་ཀྱི་དཔལ་དང་བརྩོན་འགྲུས་དང་། །གཟི་བརྗིད་དབང་ཕྱུག་སྟོབས་ཀྱིས་ནི། །ནད་དང་གནོད་པ་བསལ་ནས་ཀྱང་། །ཆེ་གེའམ་
བདག་ལ་བཀྲ་ཤིས་མཛོད། །ཤར་ཕྱོགས་སུ་སེམས་ཅན་ཐམས་ཅད་བདེ་ལེགས་སུ་གྱུར་ཅིག་སྭཱ་ཧཱ། ལྷོ་ཕྱོགས་སུ་ཡང་དེ་བཞིན་དུ་བརྗོད་དེ། དེ་བཞིན་དུ་ནུབ་དང་བྱང་དུའང་བརྗོད་དོ། །དེ་དག་ནི་སྔོན་དུ་འགྲོ་བའི་ཆོ་ག་གཉིས་པའོ། །དེ་ནས་བསྒྲུབ་བྱ་དང་སྒྲུབ་པ་པོ་རྣམས་
གོས་སར་པ་གྱོན་ཅིང་ཁྲུས་བྱས་ནས་ཁ་བྱང་དུ་བལྟས་ཏེ་ཡུངས་ཀར་དང་ནས་ལ་སོགས་པའི་འབྲུ་སྣ་ཚོགས་ཀྱིས་བདག་གི་ལག་པ་གཡོན་པས་བསྐོར་ཞིང་ཁམ་ཕོར་གྱི་ཙནྡན་མེའི་ནང་དུ་དོར་རོ། །དེ་ནས་ཚིགས་སུ་བཅད་པ་འདི་བརྗོད་ལ་ཁམ་ཕོར་སྒོར་བསྐུར་རོ། །གང་
དག་སངས་རྒྱས་རང་སངས་རྒྱས། །འཕགས་པ་ཉན་ཐོས་ཐམས་ཅད་དང་། །ཚངས་པ་བརྒྱ་བྱིན་དབང་ཕྱུག་ཆེ། །ཁྱབ་འཇུག་དབང་ཕྱུག་ཀླུ་དབང་པོ། །གཞན་ཡང་འཇིག་རྟེན་སྐྱོང་བ་རྣམས། །རང་རང་འཁོར་དང་བཅས་པ་དང་། །འཕྲོག་མ་བུ་དང་བཅས་པ་
དང་། །གཞན་ཡང་འབྱུང་པོ་མཐུ་ཆེན་རྣམས། །དེ་དག་ཀུན་གྱི་མཐུ་དང་དཔལ། །བརྩོན་འགྲུས་གཟི་བརྗིད་བྱིན་གྱིས་བརླབས། །རོ་ལངས་ལ་སོགས་གདོན་རྣམས་ཀྱིས། །ནད་དང་གནོད་པ་ཆད་འགྱུར་ཅིག །རྡོ་རྗེས་རིན་ཆེན་ཕུག་པ་དང་། །མེ་ཡིས་བུད་ཤིང་སྲེག་བྱེད་
དང་། །རླུང་གིས་སྤྲིན་རྣམས་འཐོར་བ་དང་། །ཉི་མས་འདམ་སོགས་སྐེམས་པ་དང་། །སེང་གེས་རི་དགས་ཀུན་སྐྲག་ལྟར། །སྔགས་དང་ཕྱག་རྒྱ་བདེན་པའི་མཐུས། །རོ་ལངས་འབྱུང་པོའི་ཚོགས་རྣམས་དང་། །བྱད་སྟེམས་ཐམས་ཅད་ཚིག་པར་ཤོག །དེ་ནས་སྒྲུབ་
པ་པོ་དང་བསྒྲུབ་བྱ་ཐམས་ཅད་ཀྱི་མགོ་ལ་མེ་ཏོག་གི་ཕྲེང་བ་གདགས་ཤིང་། ལུས་དྲི་ཞིམ་པོས་བྱུག་པར་བྱའོ། །དེ་དག་ནི་སྔོན་དུ་འགྲོ་བའི་ཆོ་ག་གསུམ་པའོ། །ཡིད་བཞིན་གྱི་ནོར་བུ་འདི་གཉིས་ཀྱང་ལན་བརྒྱ་རྩ་བརྒྱད་ཟླས་བརྗོད་བྱའོ། །སྙིང་པོའི་སྔགས་བརྗོད་ཅིང་དཀྱིལ་

71-1-293b

འཁོར་ལ་བསྐོར་བ་བརྒྱ་རྩ་བརྒྱད་བྱའོ་ཞེས་པ་ནི་གོང་དུ་གསུངས་པའི་རིག་སྔགས་ཀྱི་རྒྱལ་མོ་འདི་གཉིས་དུས་གཅིག་ཏུ་དྲན་པར་བྱའོ། ཞེས་པ་ལ་སོགས་པ་ཚིག་གསུམ་དང་བྲེལ་ཏེ་དྲན་པར་བྱའོ། །ཞེས་པའི་དོན་འདི་ལྟར་ཤེས་པར་བྱའོ། །སཱཙྪ་ནི་ཐམས་ཅད་དུ་
རྣམ་པར་སྣང་མཛད་སངས་རྒྱས་ཀྱི་སྐུ་ཁོ་ནར་བསམས་ཏེ། སཱཙྪ་རེ་རེ་ལ་ཡང་རྣམ་པར་སྣང་མཛད་རེ་རེར་བསམས་ལ་དེའི་བ་སྤུའི་གསེབ་ཐམས་ཅད་རྣམ་པར་སྣང་མཛད་ཀྱིས་གང་བའོ། །དེ་ནས་སཱཙྪའི་གྲངས་ཀྱི་རྣམ་པར་སྣང་མཛད་བྱེ་བ་བརྒྱ་ཕྲག་གོ། །དེ་ལ་
འདིར་གཟུངས་ཡི་གེའི་ཚུལ་དུ་ཀློག་ན་བུམ་པ་ནི་ཨ་ལས་ཟླ་བའི་དཀྱིལ་འཁོར་དུ་བསམས་ནས་དེའི་སྟེང་དུ་ཨ་ལས་གཟུངས་ཀྱི་ཕྲེང་བ་དཀར་པོས་བསྐོར་བའམ་ཡང་ན་ཕྱོགས་བཞིར་ཨཾ་བཾ་སཾ་ཛཿཞེས་དམིགས་ཏེ་གཡེང་བ་ལ་སོགས་པའི་སྐྱོན་སྤངས་ནས་གཟུངས་རིང་ཐུང་
གཉིས་སྤེལ་བ་བརྒྱ་རྩ་བརྒྱད་བརྗོད་དོ། །དེའི་ཚེ་སྔགས་དང་ཟླ་བའི་འོད་ཀྱིས་ཡེ་ཤེས་ཀྱི་འོད་ཟེར་དང་འཇིག་རྟེན་གྱི་བདུད་རྩི་ཐམས་ཅད་བསྡུས་ནས་ཟླ་བ་དང་ཡི་གེ་ཐམས་ཅད་ལ་ཐིམ་པར་བསམ་མོ། །དེ་ནས་གཟུངས་ཐུང་འབའ་ཞིག་གདོན་ཞིང་བསྐོར་བ་བརྒྱ་རྩ་བརྒྱད་བྱའོ། །
དེའི་ཚེ་སྔགས་དང་ཡི་གེའི་འོད་ཀྱིས་བདག་དང་སེམས་ཅན་ཐམས་ཅད་ཀྱི་སྡིག་པ་དག་པར་བསམ་མོ། །དེ་ནས་ཡི་གེ་དང་སྔགས་བདུད་རྩིར་ཞུ་བར་བསམ་མོ། །བསྐོར་བའི་དུས་སུ་ནི་སྐུ་གདུང་གི་ལྷའི་གྲངས་བརྗོད་ཀྱིས་མི་ལང་བ་བུམ་པའི་ནང་དུ་ཡི་གེའམ་ཕྱག་རྒྱའམ་ལྷ་
གཅིག་པུའི་སྐུའི་འོད་ཀྱིས་བདག་དང་འགྲོ་བ་ཐམས་ཅད་ཀྱི་སྒྲིབ་པ་བསལ་བ་དང་ནད་སྦྱང་བ་དང་དབང་བསྐུར་བར་བསམ་མོ། །ནད་ཀྱིས་བཏབ་པ་ལ་སོགས་པ་རྒྱད་པོ་ནི་གོང་གི་ལས་སྦྱོར་གྱི་བྱེ་བྲག་སྟེ་སྔོན་དུ་བཤད་པའི་སྔགས་ཀྱི་སྦྱོར་བ་དང་བཅས་པའི་ཆུས་བཀྲུ་ཞིང་དབང་
པོའི་སྒོ་ལྔ་རྨ་བྱའི་སྒྲོས་བྱབ་པའོ། །དེ་ཡང་ཁྲུས་བྱ་བའི་རིམ་པ་ནི་འདི་ཡིན་ཏེ་བུམ་པ་བདུད་རྩིའི་ཆུར་བསམས་ཏེ། རོལ་མོ་སིལ་སྙན་དུ་མར་བཅས། །འདོད་པ་འཛུམ་ཞིང་ཡོན་བཅས་པས། །ཉམས་དགའི་ཚུལ་དུ་གསོལ་བ་གདབ། །ཨོཾ་བྱང་ཆུབ་རྡོ་རྗེ་སངས་རྒྱས་

71-1-294a

ལ། །མཆོག་ཆེན་ཇི་ལྟར་སྩལ་བ་ལྟར། །བདག་ལ་བསྲུང་བའི་དོན་གྱི་ཕྱིར། །སྔགས་ཀྱི་ཆུ་ཡིས་བྱིན་བརླབ་སྩོལ། །གསུམ་བརྗོད་ཕྱག་འཚལ་བསྐོར་བ་བྱ། །ཡོན་ནི། བསྲུང་ལ་རས་སོགས་ཁ་དོག་དཀར། །ཚེ་བསྲིང་སོགས་ལ་སེར་པོའི་རྫས། །
ཤི་བ་སླུ་བ་ངུར་སྨྲིག་མདོག །བུ་སློང་སོགས་ལ་དམར་པོ་སྟེ། །གནོད་པ་བཟློག་པ་སྔོན་པོས་བྱ། །ལས་ཀུན་ལ་ནི་ལྗང་གུ་ཤིས། །སེར་སྣ་མེད་པར་ཡོན་ཕུལ་ནས། །བློ་ལྡན་སློབ་དཔོན་ཕྱག་གིས་ནི། །ཡལ་གས་བུམ་པ་བླང་བར་བྱ། །འགྲོ་ན་ལྷག་པའི་སེམས་བཏང་ནས། །འགྱིང་
དང་བཅས་པས་ཁྲུས་གསོལ་ལོ། །ཞེས་པའི་ཚུལ་གྱིས་དང་པོར་བཀྲ་ཤིས་བརྗོད་ཅིང་སྨོན་ལམ་དུ་ཡང་བསྔོས་ནས་བདེན་པའི་བྱིན་རླབས་འདི་བརྗོད་དོ། །སྟོན་མཆོག་དམ་པ་ལྷ་མིས་མཆོད་འོས་པ། །སངས་རྒྱས་ཕྱག་འཚལ་དེང་འདིར་བདེ་ལེགས་ཤོག །ཞི་བ་ཆགས་བྲལ་ལྷ་
མིས་མཆོད་འོས་པ། །ཆོས་ལ་ཕྱག་ཚལ་དེང་འདིར་བདེ་ལེགས་ཤོག །ཚོགས་ཀྱི་དམ་པ་ལྷ་མིས་མཆོད་འོས་པ། །དགེ་འདུན་ཕྱག་འཚལ་དེང་འདིར་བདེ་ལེགས་ཤོག །འཇིག་རྟེན་འདིའམ་ཡང་ན་འདས་པ་ཡི། །མཐོ་རིས་དག་ལ་རིན་ཆེན་མཆོག་ཡོད་པ། །དེ་བཞིན་གཤེགས་
པ་ལྷ་ཡི་ལྷར་གྱུར་ཏེ། །མི་མཆོག་འདི་དང་གང་ཡང་མཚུངས་པ་མེད། །དེ་ཕྱིར་སངས་རྒྱས་རིན་ཆེན་མཆོག་ཏུ་གསུངས། །བདེན་པ་དེས་ནི་དེང་དིར་བདེ་ལེགས་ཤོག །ཟག་པ་ཆགས་བྲལ་བདུད་རྩི་འདུས་མ་བྱས། །མཁྱེན་ལྡན་ཤཱཀ་ཐུབ་ཀྱིས་ནི་རབ་དབྱེ་མཛད། །འཆི་མེད་དམ་
ཆོས་ཞི་བ་འདུ་བྱེད་བྲལ། །ཆོས་འདི་དག་དང་མཚུངས་པ་གང་ཡང་མེད། །དེ་ཕྱིར་དམ་ཆོས་རིན་ཆེན་མཆོག་ཏུ་གསུངས། །བདེན་པ་དེས་ནི་དེང་འདིར་བདེ་ལེགས་ཤོག །གང་འདོད་དེ་ལ་ཚུལ་བཞིན་མཆོག་སྟོན་པ། །སྟོན་པ་བླ་མེད་རྟག་བསྒྲུབ་རྣལ་བྱོར་གཞི། །རྡོ་རྗེ་ལྟ་བུ་གཉིས་
མེད་ལམ་གསལ་བས། །ཏིང་འཛིན་འདི་དང་མཚུངས་པ་འགའ་ཡང་མེད། །དེ་ཕྱིར་དམ་ཆོས་རིན་ཆེན་མཆོག་ཏུ་གསུངས། །བདེན་པ་དེ་ཡིས་དེང་འདིར་བདེ་ལེགས་ཤོག །གང་ཟག་ཆེན་པོ་བརྒྱད་པོ་རབ་བསྔགས་ཤིང་། །གང་ཟག་ཟུང་བཞིར་བརྗོད་པ་འདི་དག་ནི། །དྲང་

71-1-294b

སྲོང་ཆེན་པོ་གང་ཟག་མཚུངས་པ་མེད། །བདེ་བར་གཤེགས་པས་སྦྱིན་པའི་གནས་ཞེས་གསུངས། །དེ་ཕྱིར་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་དེང་འདིར་བདེ་ལེགས་ཤོག །གང་དག་བརྟན་པའི་ཡིད་ཀྱིས་རབ་བརྩོན་ཞིང་། །གཽ་ཏ་མའི་བསྟན་ལ་
རབ་ཞུགས་ནས། །དམ་ཆོས་ཐོས་མང་བདུད་རྩི་མཆོག་རྙེད་དེ། །མུན་པ་བསལ་ནས་མྱ་ངན་འདས་ཐོབ་པ། །དེ་ཕྱིར་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་དེང་འདིར་བདེ་ལེགས་ཤོག །ལུས་སམ་ངག་གམ་དེ་བཞིན་ཡིད་ཀྱིས་ཀྱང་། །འཇིག་ཚོགས་
ལྟ་དང་ཚུལ་ཁྲིམས་བརྟུལ་ཞུགས་དང་། །ཐེ་ཚོམ་དང་ནི་ཉོན་མོངས་གསུམ་པོ་དག །ཅིག་ཅར་སྤངས་ཏེ་འཕགས་པའི་བདེན་པ་མཐོང་། །དེ་ཕྱིར་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་དེང་དིར་བདེ་ལེགས་ཤོག །ལུས་སམ་ངག་གམ་འོན་ཏེ་ཡིད་ཀྱིས་
ཀྱང་། །སྡིག་པ་རྣམ་བཅུ་ནམ་ཡང་མི་བྱེད་ལ། །གློ་བུར་བྱས་ཀྱང་མི་འཆབ་མྱུར་དུ་བཤགས། །དེ་ལྟར་ལོག་ལྟ་དེ་དག་འཛིན་མི་བྱེད། །དེ་ཕྱིར་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་དེང་འདིར་བདེ་ལེགས་ཤོག །ཅི་ལྟར་དབང་པོའི་སྡོང་པོ་སར་བཙུགས་
པ། །ཕྱོགས་བཞིའི་རླུང་རྣམས་ཀྱིས་ནི་མི་བསྐྱོད་ལྟར། །འཕགས་པའི་ལམ་གྱི་དམ་པ་འཐོབ་པ་ཡིས། །འཕགས་པའི་དགེ་འདུན་རྣམ་རྟོག་གིས་མི་གཡོ། །དེ་ཕྱིར་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེས་ནི་དེང་འདིར་བདེ་ལེགས་ཤོག །ཤེས་རབ་ཤིན་
ཏུ་ཟབ་ཅིང་བརྟན་པ་ཡིས། །འཕགས་པའི་བདེན་རྣམས་ཡང་དག་རབ་བསྒོམས་ནས། །ལུས་ཀྱི་སྦྱིན་པ་ཡིད་ལ་བྱས་པས་ནི། །དེ་དག་འཇིགས་པ་བརྒྱད་དང་ཕྲད་མི་འགྱུར། །དེ་ཕྱིར་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེས་ནི་དེང་འདིར་བདེ་ལེགས་ཤོག ། 
ཇི་ལྟར་རླུང་གིས་མེ་ནི་རབ་གཏོར་ན། །ལག་ཏུ་བླངས་ཏེ་བགྲང་དུ་མེད་པ་ལྟར། །སངས་རྒྱས་སྲས་རྣམས་ཀུན་དུ་སྦྱོར་བ་ཡིས། །རབ་སྔགས་འཇིག་ཚོགས་བསྟན་དུ་མེད་པར་འགྲོ། །དེ་ཕྱིར་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེས་ནི་དིང་འདིར་བདེ་ལེགས་ཤོག །བླ་མ་

71-1-295a

མཁན་པོ་ཕ་མ་གྲོགས་པོ་དང་། །ཡོན་བདག་གཉེན་བཤེས་ཆོས་ཀྱི་རྒྱལ་པོ་དང་། །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་ལེགས་ཤོག །ཅེས་བརྗོད་ནས་བུམ་པའི་ཆུ་ལས་ཉུངས་ཟད་བླངས་ཏེ་མདུན་དུ་སངས་རྒྱས་དང་བྱང་ཆུབ་སེམས་
དཔའི་ཚོགས་བསམས་ལ་ཡོན་ཆབ་ཀྱི་ཚུལ་དུ་མཆོད་དོ། །ཨོཾ་ན་མཿསརྦ་བུདྡྷ་བོ་དྷི་སཏྭེ་བྷྱཿསཾ་ཤོ་དྷ་ནི་སྭཱ་ཧཱ། དེ་བཞིན་དུ་འཕགས་པ་ཉན་ཐོས་དང་རང་སངས་རྒྱས་ཐམས་ཅད་ལ་ཡང་མཆོད་པ་བྱ་སྟེ། ཨོཾ་ན་མཿསརྦ་ཨ་ཧཾ་ཤྲ་བ་ཀ་བྷྱོ་ཀཱ་ཡ་ཝཱ་ཀ་ཙིཏྟ་སཾ་ཤོ་དྷ་ནི་སྭཱ་ཧཱ། དེ་ནས་འཇིག་རྟེན་
སྐྱོང་བ་རྣམས་མཆོད་པར་བྱ་སྟེ། བདུད་རྩི་ཡེ་ཤེས་ཆུ་བོར་ནི། །བདེན་པའི་མཐུ་ཡིས་བྱིན་བརླབས་པ། །རྣམ་དག་སྔགས་ཀྱི་ཆུ་རྒྱུན་གྱིས། །འཇིག་རྟེན་བག་ཆགས་དག་གྱུར་ཅིག །ཨོཾ་སརྦ་ས་དི་བ་ལོ་ཀ་ཕྲི་ཐ་ཀ་སཾ་ཤོ་དྷ་ཡ་སྭཱ་ཧཱ། ཞེས་ལན་གསུམ་བརྗོད་དོ། །དེས་གང་ཞིག་
ཁྲུས་བྱ་བ་དེ་གོས་དང་རྒྱན་སར་པས་བརྒྱན་ཏེ། སྡིག་པ་བཤགས་པ་དང་སྐྱབས་སུ་འགྲོ་བ་དང་། སེམས་བསྐྱེད་པ་དང་སྡོམ་པ་འཛིན་དུ་བཅུག་ལ་ཁྲུས་བྱས་ནས་མེ་ཏོག་ཕྲེང་བ་མགོ་ལ་གདགས་སོ། །དེ་བཞིན་དུ་དང་པོར་གཟུངས་འདི་གཉིས་བརྗོད་དེ་རྨ་བྱའི་སྒྲོའམ་ཀུ་ཤའི་ཆུན་
པོས་ནད་དམ་སྡིག་པ་ལ་སོགས་པ་བྱབ་པ་ལན་བདུན་ནམ་ཉི་ཤུ་རྩ་གཅིག་ལ་སོགས་པ་བྱའོ། །དེའི་འོག་ཏུ་སྤྱན་མ་ལ་སོགས་པ་རིག་པའི་ལྷ་མོ་བཞིའི་སྔགས་ཀྱིས་མགོ་ནས་ཁྲུས་བྱའོ། །དེ་ནས་རིག་པའི་ལྷ་མོ་གཞན་ཐམས་ཅད་དང་། བྱང་ཆུབ་སེམས་དཔའི་
སྔགས་གང་དག་བརྗོད་ནུས་པས་ཡན་ལག་ཐམས་ཅད་ཁྲུས་བྱའོ། །དེ་ལ་འདི་ཡང་བརྗོད་པར་བྱའོ། །ཇི་ལྟར་བལྟམས་པ་ཙམ་གྱི་ཚེ། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་རིང་འདིར་ཡང་སྐུ་ཁྲུས་གསོལ། །དེ་མ་ཐག་
ཕྱག་འཚལ་ནས་ལྡང་བར་བྱའོ། །དེའི་ལྷག་མར་གྱུར་པའི་བུམ་པའི་ཆུས་ཕྱུགས་ལྷས་དང་། རྟ་དང་གླང་པོའི་བྲེས་དང་། ཞིང་དང་གཙུག་ལག་ཁང་དང་། མཁར་དང་ཁྱིམ་དང་ར་བ་དང་།  ལམ་སྲང་ལ་སོགས་པ་ཐམས་ཅད་དུ་གཏོར་རོ། །སཱཙྪ་དང་སྐུ་གདུང་

71-1-295b

ལ་སོགས་པ་ནི། དབེན་པའི་ས་ཕྱོགས་སུ་བཞུགས་སོ། །རྡུལ་ཚོན་ནི་ཅི་བདེ་བར་དོར་རོ། །བུམ་པའི་ཡོ་བྱད་དང་དཀྱིལ་འཁོར་གྱི་རྒྱན་ལ་སོགས་པ་ཐམས་ཅད་ནི། གང་རྡོ་རྗེ་སློབ་དཔོན་མཁས་པས་དགེ་བའི་ཆེད་དུ་ལོངས་སྤྱོད་ཀྱི་ཐ་མལ་པར་ནི་འགལ་ཚབས་
ཆེའོ། །ཟས་ཀྱི་ལྷག་མས་ནི་ཡི་དྭགས་ལ་གཏོར་མ་སྦྱིན་ནོ། །དེའི་རྗེས་སུ་ནི་ཀུན་ཏུ་བཟང་པོའི་སྨོན་ལམ་བདུན་ནམ་ཉི་ཤུ་རྩ་གཅིག་ཁོ་ན་གཡེང་བ་མེད་པར་བཀླག་གོ། །དེ་དག་གིས་ནི་གཟུངས་ཡི་གེའི་ཚུལ་དུ་བཀླག་པ་དང་པོ་སྟེ། གཞན་ལ་རྒྱ་ཆེར་སྐབས་
འདིར་ཤེས་པར་བྱའོ། །ཡང་ན། འདི་ལྟ་བུ་བུམ་པ་དང་པདྨ་དང་ཟླ་བའི་སྟེང་དུ་ཨ་ཡིག་དཀར་པོ་དེའི་སྟེང་དུ་ཉི་མ་ལ་ཨཾ་ཡིག་དེ་གཉིས་ཆར་ཧཱུཾ་བཞིས་བསྐོར་ཏེ། རེ་རེ་ལ་སོ་སོར་སྔགས་ཕྲེང་ཁ་དོག་སྣ་ཚོགས་པ་འཁོར་བར་བསམས་ལ་དེའི་འོད་ཟེར་གྱིས་རང་
བཞིན་གྱི་སྔགས་ཐམས་ཅད་བཀུག་ཅིང་དེ་ཉིད་དུ་ཐིམ་པར་བསམས་ཏེ་བཟླས་པ་བྱའོ། །བསྐོར་བའི་དུས་སུ་ཡི་གེ་དང་སྔགས་ཀྱི་འོད་ཀྱིས་ཡེ་ཤེས་ཀྱི་འོད་ཟེར་དང་འཇིག་རྟེན་གྱི་བདུད་རྩི་ཐམས་ཅད་དེར་ཐིམ་ཞིང་། དེའི་འོད་ཟེར་གྱིས་བདག་དང་འགྲོ་བ་ཐམས་ཅད་ཀྱི་ནད་
དང་འཚེ་བ་ཐམས་ཅད་སེལ་བར་བསམས་ལ་བྱའོ། །ལྷག་མ་ནི་སྔོན་ལྟར་ཤེས་པར་བྱའོ། །ཡང་ན། བུམ་པ་པདྨ་དཀར་པོའི་སྟེང་དུ་ཟླ་བ་དང་ཉི་མ་ཁ་སྦྱར་བའི་བར་དུ་ཨ་དང་ཨཾ་ལས་ཕྱོགས་བཞིར་ཧཱུཾ་བཞི་དང་མཚམས་སུ་ཨཾ་བཾ་སཾ་ཛཾཿ བསྐོར་ཏེ་དེ་ལ་ཡང་སོ་སོར་
སྔགས་ཀྱིས་བསྐོར་བར་བསམས་ལ། སྔགས་བརྗོད་པས་ཡི་གེ་དང་སྔགས་ཀྱི་འོད་ཟེར་གྱིས་རང་བཞིན་གྱི་སྔགས་བཀུག་ཅིང་དེར་ཐིམ་པ་དང་། བསྐོར་བའི་དུས་སུ་ཡེ་ཤེས་ཀྱི་འོད་ཟེར་དང་འཇིག་རྟེན་གྱི་བདུད་རྩི་བསྡུས་ནས་དེར་ཐིམ་སྟེ། འོད་ཀྱིས་བདག་དང་
འགྲོ་བ་ཐམས་ཅད་ཀྱི་ནད་དང་འཚེ་བ་དང་། སྡིག་པ་ཐམས་ཅད་ཟད་པར་བསམ་མོ། །ལྷག་མ་ཆོ་ག་སྔོན་ལྟར་ཤེས་པར་བྱའོ། །ད་ནི་གཟུངས་ཕྱག་རྒྱ་ལ་དམིགས་ནས་བཀླག་པ་ནི། བུམ་པ་པདྨ་དང་ཟླ་བའི་སྟེང་དུ་ཨ་ལས་སྐྱེས་པ་རིན་པོ་ཆེ་ཆ་གཅིག་པ་ཨ་ཡིག་དཀར་པོ་

71-1-296a

ལ་སྔགས་ཀྱིས་བསྐོར་བ་ཁོ་ན་ལ་དམིགས་པ་གཏད་དེ་བརྗོད་ལ་ཕྱག་རྒྱ་དང་སྔགས་དེའི་འོད་ཀྱིས་རང་བཞིན་གྱིས་གྲུབ་པའི་ཡེ་ཤེས་ཀྱི་འོད་ཟེར་དང་འཇིག་རྟེན་གྱི་བདུད་རྩི་ཐམས་ཅད་དེར་བསྡུས་པར་བསམ་མོ། །བསྐོར་བའི་དུས་སུ་ནི་དེ་དག་གི་འོད་ཟེར་གྱིས་བདག་
དང་སེམས་ཅན་ཐམས་ཅད་ཀྱི་ནད་དང་འཚེ་བ་དང་སྡིག་པ་ཟད་པར་བྱས་པར་བསམ་མོ། །ཡང་ན་པདྨ་དང་ཟླ་བའི་སྟེང་དུ་ཨ་ཡིག་ལས་རིན་པོ་ཆེ་ཆ་གསུམ་པ་ཡི་གེ་དང་སྔགས་བསམས་ལ་བརྗོད་པས་སྔགས་དང་ཕྱག་རྒྱའི་འོད་ཟེར་གྱིས་རང་བཞིན་གྱི་སྔགས་དང་ཕྱག་རྒྱ་བསྟིམ་ཞིང་བརྗོད་དེ་
བསྐོར་བའི་དུས་སུ་སྔགས་དང་ཕྱག་རྒྱའི་འོད་ཟེར་གྱིས་ཡེ་ཤེས་ཀྱི་འོད་ཟེར་དང་འཇིག་རྟེན་གྱི་བདུད་རྩི་ཐམས་ཅད་བསྡུ་ཞིང་དེར་ཐིམ་པས་དེའི་འོད་ཀྱིས་བདག་དང་འགྲོ་བ་ཐམས་ཅད་ཀྱི་ནད་དང་འཚེ་བ་དང་སྡིག་པའི་ཚོགས་ཐམས་ཅད་ཟད་པར་ཡང་བསམ་མོ། །ཆོ་ག་ལྷག་མ་ཐམས་
ཅད་སྔོན་ལྟར་ཤེས་པར་བྱའོ། །ཡང་ན་བུམ་པ་དང་པདྨ་ཟླ་བའི་སྟེང་དུ་ཨ་ཡིག་ལ་རིན་པོ་ཆེ་ཆ་བཞི་པ་འོད་ཀྱི་ཕྲེང་བ་དང་བཅས་པ་ཡི་གེ་དང་སྔགས་ཀྱི་ཕྱག་རྒྱས་བཏབ་པ་བསམས་ཏེ། སྔགས་དང་ཕྱག་རྒྱ་དེའི་འོད་ཟེར་གྱིས་རང་བཞིན་གྲུབ་པའི་ཡེ་ཤེས་བདུད་རྩི་བསྟིམ་ནས་བརྗོད་
པས་བདག་གི་ལུས་ངག་ཡིད་ཀྱི་སྒོ་གང་བར་བསམས་ཏེ་བསྐོར་བའི་དུས་སུ་སེམས་ཅན་ཐམས་ཅད་ཀྱི་ལུས་ངག་ཡིད་ཀྱི་སྒོ་དག་པར་བསམ་མོ། །ལྷག་མ་ཆོ་ག་ཐམས་ཅད་སྔར་ལྟར་རོ། །སྐུ་ལ་དམིགས་ནས་གཟུངས་བཀླག་པའི་ཚུལ་དུ་ནི་བུམ་པ་དང་པདྨ་ཟླ་བའི་སྟེང་དུ་ཨ་ཡིག་སེར་པོ་
ལས་བཅོམ་ལྡན་འདས་བྱང་ཆུབ་ཆེན་པོས་གསིལ་བྱེད་དང་པར་བུ་འཆང་བ་གསེར་བཙོ་མའི་མདོག་ཅན་འཛུམ་པའི་མདངས་ཀྱིས་རིན་པོ་ཆེའི་ཁྲི་ལ་བཞུགས་པ་བསམས་ཏེ། དེའི་སྙིང་གར་ཟླ་བ་ལ་ཨ་ཡིག་སྔགས་ཀྱིས་བསྐོར་བ་བསམས་ཏེ་རང་བཞིན་གྱིས་བྱང་ཆུབ་ཆེན་པོ་དང་ཐ་མི་དད་པར་
བྱས་ནས་སྔགས་བརྗོད་པའི་ཚེ་དུས་གསུམ་གྱི་དེ་བཞིན་གཤེགས་པ་དང་ལྷ་མོ་དང་བྱང་ཆུབ་སེམས་དཔས་བུམ་པ་དུ་མ་དུས་གསུམ་གྱི་ཡེ་ཤེས་ཀྱི་ཆུས་གང་བ་དུ་མ་ཐོགས་ནས་དབང་བསྐུར་བས་དེའི་དབུ་ལ་སངས་རྒྱས་མི་བསྐྱོད་པ་བསམ་པ་དང་སྐུ་དུ་མ་ཡང་གཞུག་པར་བྱའོ། །དེ་ནས་བསྐོར་

71-1-296b

བའི་དུས་སུ་སྐུ་དེ་ལས་བྱུང་བའི་ལྷ་མོའི་ཚོགས་ཀྱིས་བདག་ལ་དབང་བསྐུར་ཏེ་བདག་གི་འོད་ཟེར་གྱིས་འགྲོ་བ་ཐམས་ཅད་ཡོངས་སུ་དག་པར་བསམ་མོ། །དེ་ནས་རང་བཞིན་གྱི་ལྷ་ཐམས་ཅད་གཤེགས་ཏེ། སྐུ་དེ་འོད་དུ་ཞུ་བར་དམིགས་ཏེ་ཁྲུས་བྱའོ། །ལྷག་མ་ཆོ་ག་ཐམས་ཅད་སྔོན་ལྟར་རོ། །ཡང་
ན་པདྨ་དང་ཟླ་བའི་དབུས་སུ་བདུད་འདུལ་བའི་ཕྱག་རྒྱ་དང་ལྡན་པའི་བྱང་ཆུབ་ཆེན་པོ་བསམ་པའམ་ཡང་ན་ཆོས་འཆད་པའི་ཕྱག་རྒྱ་དང་ལྡན་པ་བསམས་ཏེ་ཆོ་ག་ཐམས་ཅད་སྔོན་ལྟར་ཤེས་པར་བྱའོ། །སྐུ་དཀྱིལ་འཁོར་འཁོར་ལོ་ལ་དམིགས་ནས་གཟུངས་བཀླག་པ་ནི། ཨོཾ་སྭ་བྷཱ་བ་ཤུདྡྷཿ སརྦ་
དྷརྨཿསྭ་བྷཱ་བ་ཤུདྡྷོ྅ཧྃ། ཞེས་བརྗོད་པས་བུམ་པ་མི་དམིགས་པའི་ངང་ལས་ཡི་གེ་བྷྲཱུྃ་ལས་སྤོས་ཀྱི་ཁང་པ་རིམ་པ་གསུམ་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་ཅིང་ཏྭ་ར་ཎ་ལ་སོགས་པས་མཛེས་པ་དྲ་བ་དང་དྲ་བ་ཕྱེད་པ་དང་། དར་དཔྱངས་དང་དྲིལ་བུ་དང་ཟླ་ཕྱེད་རྡོ་རྗེ་དང་ཀྲ་མ་ཤིཪྵ་དང་དར་དུ་
ཀན་ལ་སོགས་པ་གཞལ་ཡས་ཁང་གི་རྒྱན་དུ་མས་ལེགས་པར་སྤྲས་པ་རྩེ་མོ་གཅིག་ཏུ་བསྡུས་པའོ། །པཾ་ལས་པདྨ་དང་ཨ་ལས་ཟླ་བའི་སྟེང་དུ་ལྷ་ཐམས་ཅད་བསམ་པར་བྱའོ། །དེའང་བྱང་ཆུབ་སེམས་དཔའ་སྒྲིབ་པ་རྣམ་སེལ་གྱི་རྒྱུད་ལས་ཇི་སྐད་གསུངས་པ་ལྟར་ཏེ། རིན་ཆེན་རབ་
བཀོད་གཞལ་ཡས་ནི། །སྤོས་ཀྱིས་བརྒྱན་པའི་ཁང་པ་རུ། །རབ་ཞི་སྣ་ཚོགས་རྒྱན་ལྡན་པའི། །དཀྱིལ་འཁོར་ལྷ་ཡི་ཚོགས་རྣམས་བསྒོམ། །ཨཱཿལས་བྱུང་བའི་བཅོམ་ལྡན་འདས། །ཐུབ་པའི་ཉི་མ་བྱེ་བའི་འོད། །ངུར་སྨྲིག་གོས་ཅན་གསེར་མདོག་སྐུ། །ཆོས་འཆད་ཕྱག་རྒྱ་
ལྡན་པ་ནི། །ཞལ་བཞི་ཕྱག་བརྒྱད་ཞབས་བཞི་པ། །སེམས་དཔའི་སྐྱིལ་ཀྲུང་བཞུགས་ནས་ནི། །འགྲོ་ལ་ཐུགས་རྗེའི་གཟིགས་པ་པོ། །དཀྱིལ་འཁོར་དབུས་སུ་བསྒོམ་པར་བྱ། །དེ་ཡི་མདུན་དུ་གསང་སྒྲུབ་མོ། །གུར་སྐྱེས་དཀར་མོ་བསིལ་ཡབ་འཆང་། །གཙོ་བོའི་
གཡས་སུ་ཨ་ཡིག་ལས། །ཚེ་འཛིན་མ་སྟེ་གསེར་མདོག་ཅན། །དཀར་མོ་བུམ་པ་འཆང་བ་ནི། །འགྱིང་པའི་ཚུལ་དུ་བཞུགས་པའོ། །གཙོ་བོའི་གཡོན་དུ་བྷྲཱུྃ་ཡིག་ལས། །བསོད་ནམས་ལྡན་མ་དཀར་མོ་ནི། །སྐྱབས་སྦྱིན་པདྨ་དཀར་པོ་འཆང་། །སྒེག་པའི་སྤྱན་དང་ལྡན་

71-1-297a

པའོ། །རྒྱབ་ཏུ་ཕྱག་རྒྱ་བསྟན་པ་ནི། །ཡུཾ་སྐྱེས་དམར་པོ་ཕྲེང་བ་འཆང་། །ཤར་གྱི་འདབ་མར་སུཾ་ཡིག་ལས། །བསོད་ནམས་གཟིགས་མ་དཀར་གསལ་མོ། །གཡས་ཀྱིས་ལེགས་སོ་གཡོན་པས་ནི། །མར་མེ་འོད་རབ་གསལ་བ་འཆང་། །ལྷོར་ནི་པུརྞ་
རྣམ་གཟིགས་མ། །སེར་མོ་གླེགས་བམ་འཆང་བའོ། །ནུབ་ཏུ་ཤིན་ཏུ་གོ་ཆ་མོ། །སཾ་སྐྱེས་དམར་མོ་པདྨ་འཆང་། །བྱང་དུ་ཡང་དག་འཆང་བྱེད་མོ། །སཾ་སྐྱེས་ལྗང་གུ་ཨུཏྤལ་འཆང་། །བྱང་ཤར་པྲཾ་ཡིག་ལས་སྐྱེས་པའི། །སོ་སོ་འབྲང་མ་ལྗང་སེར་མོ། །ལག་གཡས་སྐྱབས་ཀྱི་
ཕྱག་རྒྱ་དང་། །གཡོན་པ་ལྕགས་ཀྱུ་འཆང་བའོ། །ཤར་ལྷོར་ཨཾ་ལས་མདངས་ལྡན་མོ། །ཀུ་མུ་ཏ་འཛིན་སེར་སྐྱ་མོ། །ལྷོ་ནུབ་པཾ་ལས་གཟི་ལྡན་མོ། །དམར་སེར་མེ་ལོང་འཆང་བའོ། །ནུབ་བྱང་ཛཾ་ལས་རྒྱས་ལྡན་མ། །ལྗང་གུ་འབྲས་ཀྱི་སྙེ་མ་འཆང་། །དེ་ཀུན་ཞི་བའི་ཆ་བྱད་
ཅན། །ཞལ་གཅིག་ཕྱག་གཉིས་ལྡན་པ་ལ། །རིན་ཆེན་སྣ་ཚོགས་ཀྱིས་སྤྲས་པ། །བཞེངས་ཏེ་མེ་ཏོག་འཐོར་བའོ། །ཤར་སྒོ་ལཾ་ལས་སྐྱེས་པ་ཡི། །འཆི་འཇོམས་དཀར་མོ་ལྕགས་ཀྱུ་འཆང་། །ལྷོ་སྒོར་གཤིན་རྗེ་འཇོམས་པ་ནི། །ཡཾ་སྐྱེས་སྔོ་ནག་དབྱུག་པ་འཆང་། །ནུབ་སྒོར་
གཤིན་རྗེ་སྡོམ་བྱེད་མ། །ཡཾ་སྐྱེས་དམར་མོ་ལྕགས་སྒྲོག་འཆང་། །བྱང་སྒོར་སཾ་སྐྱེས་ལེགས་སྐྱོང་མ། །རྡོ་རྗེ་ཞགས་འཛིན་དཱུར་པའི་མདོག །དེ་ཀུན་ཁྲོ་མོའི་ཆ་བྱད་ལ། །ཞལ་གཅིག་ཕྱག་གཉིས་བརྐྱང་བསྐུམ་ཅན། །རིན་ཆེན་རྒྱན་དང་སྦྲུལ་གྱིས་སྤྲས། །སྤྱན་གསུམ་སྐྲ་
སེར་མཆེ་བ་གཙིགས། །དཀྱིལ་འཁོར་དེ་ཡི་རྒྱབ་ཏུ་ནི། །ཕྱག་རྒྱ་ཁ་དོག་ཐ་དད་པའི། །སངས་རྒྱས་སྟོང་རྣམས་བསམ་བྱ་བ། །ཆོས་གོས་གསུམ་དང་ལྡན་པ་སྟེ། །ཀུན་ཀྱང་པདྨ་ཟླ་བ་ལ། །སེམས་དཔའ་ཡི་ནི་སྐྱིལ་ཀྲུང་གིས། །འགྲོ་ལ་ཐུགས་རྗེ་ཆེར་གཟིགས་ནས། །
འཛུམ་པའི་མདངས་ཀྱིས་བཞུགས་པའོ། །དཀྱིལ་འཁོར་དེའི་རྒྱབ་ཏུ་ནི། །བྱང་ཆུབ་སེམས་ཚོགས་ཉན་ཐོས་བཅས། །དེད་དཔོན་འཁོར་དང་བཅས་པ་རྣམས། །མདོག་དབྱིབས་གོས་རྒྱན་ཐ་དད་ཅན། །ཐལ་མོ་སྦྱར་བ་བྱས་ནས་ཀྱང་། །དམ་ཆོས་གླེང་སློང་རྒྱས་བྱེད་

71-1-297b

ཚུལ། །པུས་རྨོའི་ལྷ་ང་སར་བཙུགས་ནས། །པདྨའི་སྟན་ལ་བཞུགས་པའོ། །ཞེས་གསུངས་པའི་ཚུལ་དུ་བསྒོམས་ནས་བདག་གི་སྙིང་གའི་ས་བོན་གྱི་འོད་ཀྱིས་རང་བཞིན་གྱི་དཀྱིལ་འཁོར་སྤྱན་དྲངས་ནས་མཆོད་དེ། ཛཿཧཱུཾ་བཾ་ཧོཿཞེས་བསྲེས་ནས་ཐ་མི་དད་པར་བསམ་མོ། །ཡང་རྩ་བའི་
དཀྱིལ་འཁོར་གྱི་དབུ་ལ་པདྨ་དང་ཟླ་བ་ལ་ཨོཾ་ཡིག་དཀར་པོའོ། །མགྲིན་པར་པདྨ་དམར་པོ་ལ་གནས་པའི་ཡི་གེ་ཨཿདམར་པོ་དང་སྙིང་གར་ཉི་མ་ལ་གནས་པའི་ཧཱུཾ་ཡིག་སྔོན་པོ་བསམ་པར་བྱའོ། །དེ་ནས་གཟུངས་ཀྱི་ཕྲེང་བ་བཀླགས་པའི་ཚེ་ལྷ་ཐམས་ཅད་སྙིང་གར་རང་གི་ས་བོན་དང་སྔགས་ཀྱི་
ཕྲེང་བའི་འོད་ཟེར་གྱིས་རང་བཞིན་གྱི་འོད་ཟེར་དང་འཇིག་རྟེན་གྱི་བདུད་རྩི་ཐམས་ཅད་བསྡུས་ཏེ་ལྷ་ཐམས་ཅད་ལ་སོ་སོར་ཐིམ་པར་ཡང་བསམ་མོ། །ལྷག་མ་ཐམས་ཅད་སྔོན་གྱི་ཆོ་གས་ཤེས་པར་བྱའོ། །ཡང་ན་དཀྱིལ་འཁོར་དུ་ལྷ་མོ་བརྒྱད་བསམ་སྟེ། ཤར་དུ་ལཾ་ལས་ཚེ་འཛིན་མ། །དཀར་མོ་
རྡོ་རྗེ་དྲིལ་བུ་འཆང་། །ལྷོར་ནི་བཾ་ལས་རྣམ་རྒྱལ་མ། །སེར་མོ་གོས་བཟང་རྔ་ཡབ་འཆང་། །ནུབ་ཏུ་སཾ་ལས་བདེ་སྦྱིན་མ། །དམར་མོ་ཨུ་དུམྺཱ་ར་འཛིན། །བྱང་དུ་ཛཾ་ལས་འབར་བྱེད་མ། །ལྗང་གུ་ཨུཏྤལ་སྔོན་པོ་འཆང་། །ཧཱུཾ་ལས་སྐྱེས་པའི་ཁྲོ་མོ་བཞི། །སྒོ་བཞིར་མཁས་པས་དགོད་པར་བྱ། །
ཤར་དུ་གཤིན་རྗེ་འཇོམས་མ་ནི། །དཀར་མོ་ཐོ་བ་འཆང་བའོ། །ལྷོར་ནི་གཤིན་རྗེ་དབྱུག་པ་མོ། །སེར་མོ་རིན་ཆེན་དབྱུག་ཐོ་འཛིན། །ནུབ་ཏུ་འཆི་བདག་འདུལ་བ་མོ། །དམར་མོ་པདྨའི་ཕྲེང་བ་ཅན། །བྱང་དུ་གཤིན་རྗེ་དྲག་སེལ་མོ། །སྔོན་མོ་ཆུ་སྲིན་འཛིན་པ་མོ། །ཞེས་པ་བྱང་ཆུབ་སེམས་
དཔའ་སྒྲིབ་པ་རྣམ་སེལ་གྱི་རྒྱུད་དུ་གསུངས་ཏེ། ལྷ་དགུར་བསྒོམ་པ་རྩ་བའི་འཁོར་ལོ་ཡིན་ཏེ་གཙོ་བོ་ནི་སྔོན་ལྟར་རོ། །གཞན་ཡང་སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་སྡེ་དཔོན་ཐམས་ཅད་སྔོན་ལྟར་ཤེས་པར་བྱའོ། །ཡང་ན་འདི་ལྟར་སྔར་མོས་ན། །ཤར་དུ་ཨཾ་ལས་ལྕགས་
ཀྱུ་མ། །དཀར་མོ་ལྕགས་ཀྱུ་ཕྲེང་བ་འཆང་། །ལྷོར་ནི་བཾ་ལས་ཞགས་པ་མོ། །སེར་མོ་ཞགས་པ་རྔ་ཡབ་འཆང་། །ནུབ་ཏུ་ཡུཾ་ལས་ལྕགས་སྒྲོག་མ། །དམར་མོ་ལྕགས་སྒྲོག་རིལ་བ་འཆང་། །བྱང་དུ་ཛཾ་ལས་འབེབས་བྱེད་མ། །ལྗང་གུ་དྲིལ་བུ་སིལ་ཕྲེང་འཆང་། །ཞེས་རྒྱུད་དུ་གསུངས་

71-1-298a

པའི་ལྷ་མོ་བཞིས་གཙོ་བོ་ལ་བསྐོར་བའོ། །གཞན་ཡང་སངས་རྒྱས་དང་བྱང་ཆུབ་སེམས་དཔའི་ཚོགས་ལ་སོགས་པ་མི་དགོས་སོ། །དེ་ལྟར་རྒྱས་བསྡུས་གང་བསྒོམ་ཡང་རང་བཞིན་གྱི་ལྷ་དང་ཐ་མི་དད་པར་བྱས་ནས་མཆོད་པར་བྱའོ། །དེ་ནས་བཟླས་པའི་དུས་སུ་
ལྷ་སོ་སོའི་སྙིང་གར་སྔགས་ཀྱི་འོད་ཀྱིས་སངས་རྒྱས་ཐམས་ཅད་བསྡུས་ནས་དབང་བསྐུར་རིགས་ཐ་དད་ཀྱིས་དབུ་བརྒྱན་པར་བལྟའོ། །བསྐོར་བའི་དུས་སུ་ཆོ་ག་ལྷག་མ་སྔོན་ལྟར་ཤེས་པར་བྱའོ། །གཞན་ཡང་རིག་སྔགས་ཡི་གེའི་ཚུལ་དུ་བཀླག་པ་ནི་བུམ་པར་པདྨ་དཀར་པོའི་སྟེང་དུ་
ཟླ་བ་ལ་གནས་པའི་ཧཱུཾ་སྔོན་པོ་ལ་སྔགས་ཀྱི་ཕྲེང་བས་བསྐོར་བའམ་ཡང་ན་དབུས་ཀྱི་ཕྱོགས་སུ་ཧཱུཾ་ཁ་དོག་བཞིར་བསམ། མཚམས་བཞིར་ཨཾ་བཾ་སཾ་ཛཾ་བཞི་ཁ་དོག་བཞི་དང་ཡི་གེ་དགུ་པོ་རེ་རེ་ཡང་སྔགས་ཀྱི་ཕྲེང་བ་ཁ་དོག་ཐ་དད་པས་བསྐོར་བ་ལ་དམིགས་ནས་བརྗོད་པར་བྱའོ། །ཆོ་
ག་ལྷག་མ་སྔོན་ལྟར་ཤེས་པར་བྱའོ། །གཞན་ཡང་རིག་སྔགས་ཕྱག་རྒྱ་ལ་དམིགས་ནས་བཀླག་པ་ནི་བུམ་པ་བྷྲུཾ་ལས་རིན་པོ་ཆེའི་མཆོད་རྟེན་སྒོ་གཅིག་པ་དཀར་པོའི་ནང་དུ་པདྨ་དང་ཟླ་བ་ལ་ཧཱུཾ་ལས་རྡོ་རྗེ་དཀར་པོ་རྩེ་ལྔ་པ་སྔགས་ཀྱི་ཕྲེང་བ་དང་བཅས་པ་དམིགས་ལ་སྔོན་ལྟར་བརྗོད་
དོ། །ཡང་ན་བུམ་པ་མཆོད་རྟེན་གྱི་ནང་དེར་པདྨ་དང་ཟླ་བའི་སྟེང་དུ་འཁོར་ལོ་སེར་པོ་རྩིབས་བཞི་པའི་སྟེང་དུ་རྡོ་རྗེ་དཀར་པོ་རྩེ་ལྔ་པ་བསམས་ཏེ་འཁོར་ལོའི་རྩིབས་ལ། ཨཾ་བཾ་སཾ་ཛཾ་བཞི་བསམ་མོ། རྡོ་རྗེའི་ལྟེ་བ་ལ་ཧཱུཾ་བསམ་མོ། །དེ་རེ་རེ་ལ་སྔགས་ཀྱི་ཕྲེང་བས་སོ་སོར་བསྐོར་བར་
དམིགས་ཏེ་བཀླག་པར་བྱའོ། །ཡང་ན་དེ་ཉིད་ལྷར་བསམས་པ་ལས་རྡོ་རྗེའི་སྟེང་དུ་གདུགས་དཀར་པོ་སྔགས་ཀྱི་ཕྲེང་བ་དང་བཅས་པ་ལ་དམིགས་པ་གཏད་དེ་བཀླག་གོ། །ཆོ་ག་ལྷག་མ་སྔོན་ལྟར་རོ།།      །།རིག་སྔགས་སྐུ་ལ་དམིགས་ནས་བརྗོད་པ་ནི། བུམ་པ་ལ་མཆོད་
རྟེན་སྔོན་ལྟར་དམིགས་པ་ལས་པདྨ་དང་ཟླ་བའི་སྟེང་དུ་ཨ་ལས་དང་པོའི་སངས་རྒྱས་དཀར་པོར་དམིགས་ཏེ་བཀླག་པར་བྱའོ། །དེ་ཡང་ཆོས་འཆད་པའི་ཕྱག་རྒྱ་ཅན་ནམ་ཡང་ན་སྙིང་གར་ཐལ་མོ་སྦྱར་བའམ་ཡང་ན་རྡོ་རྗེ་དྲིལ་བུ་འཛིན་པའོ། །དཀྱིལ་འཁོར་འཁོར་ལོར་མོས་ཀྱང་དང་པོར་སངས་

71-1-298b

རྒྱས་ལ་བསྐོར་བའི་ལྷའི་ཚོགས་གང་འདོད་པ་གོང་ལྟར་རོ། །གལ་ཏེ་བུམ་པ་ལ་བརྟེན་ཏེ་གསང་སྔགས་ཀྱི་ཚུལ་དུ་ཀློག་ན་ཡང་དེ་ལྟར་ཚུལ་གསུམ་ཁོ་ནའོ། །གསང་སྔགས་ཡི་གེའི་ཚུལ་དུ་བཀླག་ན་བུམ་པ་དང་པདྨ་ཟླ་བ་ལ་ཨོཾ་ཡིག་དཀར་པོ་ལ་སྔགས་ཕྲེང་དཀར་པོས་བསྐོར་
བ་ལ་དམིགས་ནས་བཀླག་པར་བྱའོ། །ཡང་ན་ཨོཾ་ཡིག་ལ་ཨཾ་བཾ་སཾ་ཛཾ་གྱིས་བསྐོར་བའི་ཡི་གེ་ལྔའམ། ཡང་ན་ཧཱུཾ་བཞིས་བསྐོར་བའི་ཡི་གེ་ལྔའམ། ཡང་ན་ཨཾ་ལ་སོགས་པ་ཡི་གེ་དགུ་ལ་སྔགས་ཀྱི་ཕྲེང་བ་དཀར་པོས་བསྐོར་ནས་གསལ་བའི་རྣམ་པ་ལ་དམིགས་ཏེ། བརྗོད་
པའོ། །གསང་སྔགས་ཕྱག་རྒྱ་ལ་དམིགས་པ་ཡང་བུམ་པ་མཆོད་རྟེན་དུ་སྔར་ལྟར་བསམས་ནས་དེའི་ནང་དུ་པདྨ་དང་ཟླ་བའི་སྟེང་དུ་འཁོར་ལོར་ཨོ་དང་བཅས་པ་ལ་ཡི་གེའི་ཚོགས་ཀྱིས་བསྐོར་བ་འམ། ཡང་ན་རིགས་ལྔའི་ཕྱག་རྒྱ་ལ་དེ་ལྟར་བསམ་པ་འམ། ཡང་ན་ཡུམ་བཞིའི་
ཕྱག་རྒྱ་དང་དགུ་ལ་བརྟེན་པའི་ས་བོན་དང་སྔགས་སུ་བཅས་པའི་དམིགས་པ་གཏད་ནས་བརྗོད་པར་བྱའོ། །གསང་སྔགས་ཀྱི་ཚུལ་སྐུ་ལ་བརྟེན་ནས་བརྗོད་པ་ནི་བུམ་པ་མཆོད་རྟེན་དུ་དམིགས་ཏེ་རྣམ་པར་སྣང་མཛད་དཀར་པོ་ཞལ་གཅིག་ཕྱག་གཉིས་པ་བྱང་ཆུབ་མཆོག་གི་ཕྱག་རྒྱ་ཅན་ནམ། 
ཡང་ན་ཞལ་གཅིག་ཕྱག་བཞི་པ་ཕྱག་གཉིས་བྱང་ཆུབ་མཆོག་གི་ཕྱག་རྒྱ་ཅན། ཕྱག་གཉིས་ཆོས་འཆད་པའི་ཕྱག་རྒྱ་ཅན་བྱའོ། །ཡང་ན་ཞལ་བཞི་ཕྱག་བརྒྱད་པ་ཞབས་ཀྱང་བརྒྱད་དེ་བྱང་ཆུབ་མཆོག་གི་ཕྱག་རྒྱ་དང་སེམས་དཔའི་སྐྱིལ་ཀྲུང་ཅན་ནོ། །དེ་ལྟར་སྐུ་སྔགས་དང་བཅས་
པ་ལ་དམིགས་ནས་བརྗོད་པ་ནི་སྐུ་དཔའ་བོ་གཅིག་པུ་ལ་དམིགས་པ་གསུམ་མོ། །གསང་སྔགས་ཀྱི་ཚུལ་དཀྱིལ་འཁོར་ལ་དམིགས་པ་ནི་བུམ་པ་བྷྲཱུཾ་ལས་གཞལ་ཡས་ཁང་གྲུ་བཞི་སྒོ་བཞི་པ་པདྨ་དང་ཟླ་བས་བརྒྱན་པའི་སྟེང་དུ་གོང་གི་ལྷ་ཚོགས་གང་འདོད་པ་རྣམ་པར་སྣང་མཛད་ལ་བསྐོར་བ་
དམིགས་ཏེ། བརྗོད་པར་བྱའོ། །མཆོད་རྟེན་གྱི་དཀྱིལ་འཁོར་མཆོད་པར་བྱའོ་ཞེས་པ་ནི་བཀའ་དྲིན་རྗེས་སུ་དྲན་པའི་མཆོད་པ་སྟེ། དཀྱིལ་འཁོར་ཡང་མཆོད་ཅིང་དགེ་འདུན་གྱི་སྟོན་མོ་དང་ཐ་ན་བྱིས་པ་དང་དུད་འགྲོ་ཡན་ཆད་ལ་སྦྱིན་གཏོར་ཅི་འབྱོར་པ་བྱའོ། །ཆོ་ག་དེ་དག་གི་ཕན་ཡོན་གསུངས་

71-1-299a

པ། ཆོ་ག་འདི་ལན་ཅིག་བྱས་ན་ལ་སོགས་པ་སྟེ་གོ་སླའོ། །འདིར་བཟླས་བརྗོད་ཀྱི་ཆོ་ག་བཞིན་དུ་ལ་སོགས་པ་ནི་རྒྱུན་དུ་བཟླས་པ་ཕན་ཡོན་དང་བཅས་པ་གསུངས་སོ། །དེ་ལ་རྒྱུན་དུ་བཟླས་པའི་ཆོ་ག་ནི་འདི་ཡིན་ཏེ། སྔོན་གྱི་དྲན་ཞེས་དང་སྦྱར་ནས་དྲན་ཞེས་བྱ་བ་ནི་གཉིས་ཏེ། 
བག་ཡོད་པའི་གནས་དྲན་པ་དང་། ཏིང་ངེ་འཛིན་གྱི་གནས་དྲན་པའོ། །དེ་ལ་བག་ཡོད་པའི་གནས་ནི་གཟུངས་སྔགས་རིན་པོ་ཆེ་འདི་བརྗོད་པ་ཡང་ལུས་མ་གུས་པ་དང་ངག་མ་གུས་པ་དང་བྲལ་བར་བྱ་སྟེ། ར་རོ་བ་དང་རྣམ་པར་གཡེང་བ་དང་བྱ་བ་གཞན་གྱིས་གཡེང་བ་དང་ཆུ་དང་བཤང་བ་
འདོར་བ་དང་ཟས་ཟ་བ་དང་འཆག་པ་དང་ཉལ་བ་དང་འཕྲེས་པ་དང་གཏམ་གྱིས་བར་ཆོད་པ་ལ་སོགས་པ་གང་ཡང་མེད་པ་དལ་བ་དང་དགའ་བ་དང་རངས་པའི་ཚུལ་གྱིས་ཏིང་ངེ་འཛིན་གྱི་དོན་དྲན་པ་ནི་དང་པོར་ཁ་ལ་སོགས་པ་ཁྲུས་བྱས་ལ་གསུམ་ལ་སྐྱབས་སུ་འགྲོ་བ་བྱས་ནས་སྐྱིལ་ཀྲུང་ལེགས་
པར་སྟན་བདེ་བ་ལ་གནས་ཏེ་ཐལ་མོ་སྙིང་གར་སྦྱར་སྔགས་ཚར་གཅིག་བརྗོད་ནས་ཕྲེང་བ་བགྲང་ཞིང་བདུན་ལ་སོགས་པ་ཅི་ནུས་པའི་གྲངས་མ་ནོར་བར་སྔགས་ཡི་གེ་ལྷག་ཆད་མེད་པ་ལ་དམིགས་ཏེ། ཧ་ཅང་དལ་བ་དང་མྱུར་བ་སྤངས་ཏེ་གསལ་ཞིང་ཕྱེད་པར་ཆད་ལྷག་མེད་པར་གཞན་གྱི་གཏམ་
ལ་སོགས་པས་བར་མ་ཆོད་པར་བཟླའོ། །དེའི་རྗེས་སུ་སྨོན་ལམ་ཤློ་ཀ་གཅིག་ལ་སོགས་པས་དགེ་བ་བསྔོ་བར་བྱའོ། །སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་རང་རྒྱལ་འཇིག་རྟེན་སྐྱོང་། །མཐུ་དང་བདེན་པའི་བྱིན་རླབས་ཀྱིས། །འདོད་པ་ཐམས་ཅད་འགྲུབ་པར་ཤོག ། 
ཅེས་སོ། །ཡང་ན་དང་པོར་སྐྱབས་སུ་འགྲོ་བ་བྱས་ནས་བྱང་ཆུབ་ཏུ་སེམས་བསྐྱེད་དེ་སྡོམ་པ་གཟུང་བ་ནས་རྡོ་རྗེ་ཐལ་མོ་དང་པོ་ཁའི་ཐད་དུ་སྦྱར། དེ་ནས་སྙིང་གར་སྦྱར་ལ་སྙིང་གར་པདྨ་དང་ཟླ་བ་ལ་ཨ་ཡིག་དཀར་པོ་ལ་དམིགས་ཏེ་སྔགས་དེ་ལ་བཟླས་པའི་འོད་ཟེར་གྱིས་བདག་གི་སྡིག་པ་དག་པར་
བསམ་ཞིང་སྔགས་དལ་བ་དང་མྱུར་བ་དང་མི་གསལ་བའི་སྐྱོན་དང་བྲལ་བས་འབྱེས་ཤིང་གདངས་སྙན་པོས་ལྷག་ཆད་མེད་པར་བཀླག་ཅིང་གཞན་གྱི་གཏམ་ལ་སོགས་པའི་བར་ཆད་སྤངས་ནས་བཟླས་པ་བྱའོ། །སྔགས་ཚར་གཉིས་པ་ནས་ནི་ཕྲེང་བ་བགྲང་ཞིང་གྲངས་མ་ནོར་བར་བྱས་ཏེ་ཉི་ཤུ་རྩ་

71-1-299b

གཅིག་ལ་སོགས་ཅི་ནུས་པ་བཀླག་པར་བྱའོ། །དེ་ནས་བདག་དང་གཞན་གྱི་དོན་དུ་ཤློ་ཀ་གཉིས་ལ་སོགས་པས་དགེ་བ་བསྔོ་བར་བྱའོ། །སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་རང་རྒྱལ་འཕགས་ཚོགས་དང་། །འཇིག་རྟེན་སྐྱོང་བ་མཐུ་ཆེན་རྣམས། །ཀུན་ནས་བདག་
ལ་དགོངས་སུ་གསོལ། །མཐུ་སྟོབས་བདེན་པའི་བྱིན་རླབས་ཀྱིས། །འཇིག་རྟེན་པ་རྣམས་སྐྱིད་པ་དང་། །འབྱུང་པོ་ཐམས་ཅད་བདེ་བ་དང་། །ཆོས་རྣམས་དུས་སུ་སྟོན་པར་ཤོག །ཅེས་སོ། །ཡང་ན་ཁྲུས་བྱས་དྲི་ཞིམ་པོ་དང་ལྡན་པས། དང་པོར་འགྲོ་བ་ལ་ཚད་མེད་པ་བཞི་བསྒོམས་
ནས་སྐྱབས་སུ་འགྲོ་བ་དང་སེམས་བསྐྱེད་པ་དང་སྡོམ་པ་གཟུང་བ་བྱས་ནས། སྤྱི་བོ་དང་མགྲིན་པ་དང་སྙིང་གར་རྡོ་རྗེ་ཐལ་མོ་སྦྱར་ཞིང་སྔགས་ལན་གསུམ་བརྗོད་ལ་སྙིང་གར་པདྨ་དང་ཟླ་བའི་སྟེང་དུ་ཨ་ཡིག་དཀར་བོ་སྔགས་ཕྲེང་དཀར་པོས་བསྐོར་བ་ལ་དམིགས་ཏེ། དེ་ལ་སྒྲ་གྲག་པར་
བསམ་ཞིང་ཕྲེང་བ་བླངས་ནས་མྱུར་བ་དང་དལ་བ་དང་མི་གསལ་བ་དང་འདྲེས་པའི་སྐྱོན་དང་བྲལ་བས། སྙན་པའི་གདངས་ཀྱིས་ལྷག་ཆད་མེད་པར་གཡེང་བའི་རྣམ་པར་རྟོག་པ་དང་། གཞན་གྱི་ཚིག་བར་ཆད་ལ་སོགས་པའི་སྐྱོན་དང་བྲལ་བས། བརྒྱ་རྩ་བརྒྱད་ལ་སོགས་པ་ཅི་རིགས་པར་མ་ནོར་
བར་བཀླག་པར་བྱའོ། །དེ་ནས་ནི་བདག་དང་གཞན་སྐྱེ་བ་འདིར་སྡུག་བསྔལ་མི་བསྐྱེད་པ་དང་སྐྱེ་བ་གཞན་དུ་བདེ་བ་དང་མྱུར་དུ་བྱང་ཆུབ་ཐོབ་པའི་སྨོན་ལམ་ཚིགས་སུ་བཅད་པ་གསུམ་ལ་སོགས་པས་ལེགས་པར་བསྔོ་ཞིང་རྡོ་རྗེ་སེམས་དཔའི་ཡི་གེ་བརྒྱ་པ་ལན་གསུམ་ལ་སོགས་པ་བརྗོད་པར་བྱའོ། །སངས་
རྒྱས་བྱང་ཆུབ་སེམས་དཔའ་དང་། །འཕགས་པ་ཉན་ཐོས་རང་རྒྱལ་དང་། །འཇིག་རྟེན་སྐྱོང་བ་མཐུ་ཆེན་དང་། །སྔགས་ཀྱི་བདེན་པའི་བྱིན་རླབས་ཀྱིས། །བདག་དང་སེམས་ཅན་ཐམས་ཅད་ཀྱི། །ནད་མེད་ཚེ་རིང་དཔལ་འབྱོར་དང་། །བདེ་སྐྱིད་ཉམས་དག་འཐོབ་པ་དང་། །སེམས་ཀྱི་གཡེང་བ་
བྲལ་ནས་ཀྱང་། །ཟབ་མོའི་ཆོས་ལ་ལོངས་སྤྱོད་ཅིང་། །གཞན་དོན་བྱེད་ལ་བརྩོན་པ་ཡི། །ཐུགས་རྗེའི་རྒྱུན་དང་མི་འབྲལ་བར། །བདེ་བའི་ཞིང་མཆོག་རོལ་པར་ཤོག །ཅེས་བྱ་བ་ཐུགས་རྗེ་མི་བཤོལ་པའི་རྒྱུད་དུ་གསུངས་པས་དེ་ལྟར་སྤྱད་པར་བྱའོ། །དེ་གསུམ་ནི་སྔགས་ལ་དམིགས་པ་

71-1-300a

ཁོ་ན་སྟེ། བྱང་ཆུབ་སེམས་དཔའ་སྒྲིབ་པ་རྣམ་པར་སེལ་བའི་རྒྱུད་ལས། ཁམས་དང་དབང་པོའི་བྱེ་བྲག་གིས། །སྔགས་བརྗོད་དམིགས་པ་ཐ་དད་དེ། །སྒྲ་གསལ་ཙམ་ལ་རྟོག་པ་དང་། །སྙིང་པོ་ཡི་གེ་ལ་དམིགས་དང་། །སྔགས་ཕྲེང་ལ་ནི་དམིགས་པ་རྣམས། །ཤེས་
རབ་ཀྱིས་ནི་ཅི་བདེར་སྦྱར། །དམིགས་དང་བཅས་པར་བརྗོད་པ་ནི། །ནད་སེལ་དུག་སེལ་ཤེས་རབ་འཕེལ། །ཚེ་རིང་དཔལ་འབྱོར་ཐོབ་པ་དང་། །བྱང་ཆུབ་མྱུར་དུ་ཐོབ་པར་འགྱུར། །དེ་ཕྱིར་བརྩོན་པས་རྩེ་གཅིག་ཏུ། །བཀླགས་ལ་ཤིན་ཏུ་བརྩོན་པར་བྱ། །ཞེས་བཅོམ་ལྡན་འདས་ཀྱིས་གསུངས་
སོ། །འདིར་སྨྲས་པ། མྱུར་དལ་མི་གསལ་འདྲེས་དང་འཁྲུགས། །ལྷག་ཆད་ང་རོ་ངན་སྤངས་ནས། །སེམས་གཡེང་རྨུགས་པར་མི་བྱ་ཞིང་། །གཏམ་གཞན་སྦྱོར་བ་རབ་དོར་ཏེ། །ལྷ་འམ་ཡི་གེ་འམ་ཕྱག་རྒྱའམ། །མཆོད་རྟེན་བུམ་པ་འམ་འོད་ཟེར་སོགས། །བསྒྲུབ་བྱ་ལ་སོགས་གང་ཡིན་
ལ། །སེམས་རྩེ་གཅིག་པས་སྙན་པར་བརྗོད། །ཅེས་བར་སྐབས་ཀྱི་ཚིགས་སུ་བཅད་པའོ། །ད་ནི་ཕྱག་རྒྱ་ལ་དམིགས་པ་གསུམ་བརྗོད་དེ། ཡང་ན་དང་པོར་གདོང་ལ་སོགས་པ་ཁྲུས་བྱས་ནས་ཁ་དྲི་ཞིམ་པར་བྱས་ཏེ། ཚད་མེད་པ་བསྒོམ་པ་ལ་སོགས་པ་སྔོན་དུ་འགྲོ་བས་ཐལ་མོ་སྙིང་གར་
སྦྱར་ནས་སྔགས་ལན་ཅིག་བརྗོད་དོ། །དེ་ནས་ཕྲེང་བ་བླངས་ནས་བརྗོད་པའི་ཚེ་སྔགས་ཀྱི་མཐུས་མདུན་གྱི་ནམ་མཁའ་ལ་རིན་པོ་ཆེ་ཆ་གསུམ་པ་ཞིག་བྱུང་ཞིང་ཡང་ནས་ཡང་དུ་བདག་གི་མཛོད་སྤུར་ཐིམ་པར་བསམ་པར་བྱའོ། །དེ་ལྟར་མྱུར་བ་དང་དལ་བ་དང་མི་གསལ་བ་དང་འདྲེས་པ་དང་
འཁྲུགས་པ་དང་ལྷག་པ་དང་ཆད་པ་དང་ང་རོ་ངན་པ་སྤངས་ནས་གཡེང་བ་སྤངས་ལ་སེམས་རྩེ་གཅིག་པས་སྙན་པའི་སྒྲས་བརྗོད་པར་བྱའོ། །དེ་བཞིན་དུ་གཞན་གྱི་གཏམ་ལ་སོགས་པས་བར་མ་ཆོད་པར་བྱའོ། །དེ་ལྟར་བདེན་པའི་བྱིན་རླབས་ཀྱིས་བདག་ཉིད་ཀྱི་ལུས་སེམས་ཡིད་བཞིན་
གྱི་ནོར་བུ་རིན་པོ་ཆེ་འབར་བ་ལྟར་འགྱུར་བར་ཡང་བསམ་པར་བྱའོ། །དེ་ནས་དགེ་བའི་སྨོན་ལམ་ཤློ་ཀ་གཅིག་ལ་སོགས་པ་ཡང་བརྗོད་དོ། །ཡང་ན་དང་པོ་གདོང་ལ་སོགས་པ་དག་པར་བྱས་ནས་ཁ་དང་ལུས་སྨན་དྲི་ཞིམ་པོས་བྱུགས་ལ་འགྲོ་བ་ལ་སྙིང་རྗེ་ལྷག་པའི་བསམ་པས་དམིགས་ནས་

71-1-300b

སྐྱབས་སུ་འགྲོ་བ་དང་སེམས་བསྐྱེད་པ་དང་སྡོམ་པ་གཟུང་བ་བྱས་ལ་ཁ་དང་སྙིང་གར་ཐལ་མོ་སྦྱར་ནས་སྔགས་ཚར་གཉིས་བཀླགས་ལ་ཕྲེང་བ་བཟུང་ནས་འདི་བསམ། མདུན་དུ་ཡིད་བཞིན་གྱི་ནོར་བུ་རིན་པོ་ཆེ་འབར་བ་སྔོན་པོ་འོད་དཀར་པོ་འཕྲོ་བ་ཆ་གསུམ་དང་ལྡན་པ་པདྨའི་སྟེང་ན་ཡོད་པར་
བསམས་ལ། དེའི་འོད་ཟེར་གྱིས་བདག་གི་ལུས་དང་ངག་དང་ཡིད་ཀྱི་སྒོ་དག་པར་བསམ་ཞིང་མྱུར་བ་དང་དལ་བ་དང་མི་གསལ་བ་དང་མ་འདྲེས་པ་དང་འཁྲུགས་པ་དང་ལྷག་པ་དང་ཆད་པ་དང་ང་རོ་ངན་པ་སྤངས་ནས་གཞན་གྱི་གཏམ་ལ་སོགས་པ་བར་ཆད་ཐམས་ཅད་བྲལ་བར་བྱས་ལ། གཡེང་
བ་དང་རྨུགས་པ་མེད་པར་སེམས་རྩེ་གཅིག་པའི་སེམས་དང་ལྡན་ཞིང་སྙན་པའི་སྔགས་ཀྱིས་ཉི་ཤུ་རྩ་གཅིག་ལ་སོགས་པ་ཅི་ནུས་པ་བཀླག་པར་བྱའོ། །དེའི་དགེ་བའི་བྱིན་གྱི་རླབས་ཀྱིས་རང་གི་ལུས་ངག་ཡིད་གསུམ་འགྲོ་བའི་དོན་བྱེད་པའི་མཐུ་ཁྱད་པར་ཅན་དང་ལྡན་པར་གྱུར་པར་
ཡང་བསམ་པར་བྱའོ། །དེ་ནས་རང་དང་གཞན་དོན་དུ་དགེ་བའི་སྨོན་ལམ་ཚིགས་སུ་བཅད་པ་གཉིས་ལ་སོགས་པ་ཅི་རིགས་པར་བཀླགས་ཏེ་རིན་པོ་ཆེ་པདྨ་དང་བཅས་པ་དག་གི་མགྲིན་པའི་ནང་དུ་ཐིམ་ནས་སྙིང་གར་ཞུགས་པར་བསམ་པར་བྱའོ། །ཡང་ན་དང་པོར་གདོང་ལ་སོགས་པ་
དག་པར་བྱས་ནས་ཁ་དང་ཡན་ལག་དྲི་ཞིམ་པོས་བྱུགས་ཏེ། སྤྱི་བོ་དང་། མགྲིན་པ་དང་། སྙིང་གར་ཐལ་མོ་སྦྱར་ཞིང་སྔགས་ཚར་གསུམ་བརྗོད་ལ། མདུན་གྱི་ནམ་མཁའ་ལ་པདྨའི་སྟེང་ཡིད་བཞིན་གྱི་ནོར་བུ་རིན་པོ་ཆེ་ཆ་གསུམ་པ་འོད་ཁ་དོག་སྣ་ཚོགས་དང་ལྡན་པ་རབ་ཏུ་འཕྲོ་བ་དེའི་
ནང་ནས་ཨ་ཡིག་ལ་སྔགས་དཀར་པོས་བསྐོར་བ་བསམས་ནས་ཕྲེང་བ་བླངས་ཏེ་སྔགས་བརྗོད་པའི་ཚེ་རིན་པོ་ཆེའི་འོད་དང་སྔགས་ཀྱི་འོད་ཟེར་གྱིས་བདག་གི་ལུས་ངག་ཡིད་གསུམ་གྱི་སྒྲིབ་པ་ཡང་བསལ་ཏེ་གཞན་ཁམས་གསུམ་པ་ཐམས་ཅད་ཀྱི་སྒྲིབ་པ་ཡང་བསལ་བར་བསམ་པར་
བྱའོ། །དེ་ལྟར་མྱུར་བ་དང་དལ་བ་དང་མི་གསལ་བ་དང་འདྲེས་པ་དང་འཁྲུགས་པ་དང་ལྷག་པ་དང་ཆད་པ་དང་ང་རོ་ངན་པ་སྤངས་ཏེ། གཞན་གྱི་གཏམ་ལ་སོགས་པས་བར་མཆོད་པར་གཡེང་བ་དང་རྨུགས་པ་མེད་ཅིང་སེམས་རྩེ་གཅིག་པ་དང་ལྡན་པས་བསྙེན་པའི་སྔགས་ཀྱིས་བརྒྱ་རྩ་བརྒྱད་

71-1-301a

ལ་སོགས་པ་ཅི་རིགས་པར་བཟླས་ཏེ། དེའི་དགེ་བའི་བྱིན་གྱི་རླབས་ཀྱིས་བདག་གི་ལུས་ངག་ཡིད་གསུམ་ཡིད་བཞིན་གྱི་ནོར་བུ་རིན་པོ་ཆེ་འབར་བ་ལྟར་གྱུར་ནས་གཞན་གྱི་དོན་ལ་ཐོགས་པ་མེད་པའི་མཐུ་དང་ལྡན་པར་བསམས་ལ། མདུན་གྱི་པདྨ་དང་ནོར་བུ་རིན་པོ་ཆེ་
ཡང་བདག་གི་སྤྱི་གཙུག་ཏུ་ཐིམ་ནས་ལུས་ཐམས་ཅད་དུ་ཁྱབ་སྟེ་སྙིང་གར་གནས་པར་བསམ་མོ། །དེ་ནས་བདག་དང་གཞན་སྐྱེ་བ་འདིར་སྡུག་བསྔལ་མེད་པ་དང་། སྐྱེ་བ་གཞན་དུ་བདེ་བ་དང་། བྱང་ཆུབ་མྱུར་དུ་ཐོབ་པར་བྱ་བའི་ཕྱིར་དགེ་བའི་དོན་དུ་སྨོན་ལམ་གྱི་ཚིགས་སུ་བཅད་པ་གསུམ་ལ་
ལ་སོགས་པས་ལེགས་པར་བསྔོས་ལ། རྡོ་རྗེ་སེམས་དཔའི་ཡི་གེ་བརྒྱ་པ་ཡང་ལན་གསུམ་ལ་སོགས་པ་ཅི་ནུས་པར་དལ་གྱིས་བཀླགས་ནས་ལྡང་བར་བྱའོ། །དེ་ལྟར་ཕྱག་རྒྱ་ལ་དམིགས་པ་ནི་གསུམ་ཁོ་ན་སྟེ། བྱང་ཆུབ་སེམས་དཔའ་སྒྲིབ་པ་རྣམ་པར་སེལ་བའི་རྒྱུད་ཆེན་པོ་ལས་ཀྱང་། 
རགས་པ་ལ་འཇུག་གང་ཟག་དང་། །རྟེན་པ་ངག་ནི་གོམས་པ་ཡི། །ཁམས་དང་དབང་པོའི་བྱེ་བྲག་གིས། །ཕྱག་རྒྱ་ལ་ནི་དམིགས་པ་ཡང་། །བརྗོད་པ་ཐ་དད་གསུམ་ཡིན་ནོ། །དོན་གྱིས་དག་པར་བྱེད་པ་དང་། །སྙིང་པོའི་ཚུལ་དུ་སྦྱོར་བ་དང་། །རང་བཞིན་ཉིད་དུ་བྱིན་བརླབས་ནས། །
གང་གིས་ཡང་དང་ཡང་བརྗོད་ན། །ཕྱག་རྒྱ་རྟེན་གྱི་བྱིན་རླབས་དང་། །སྔགས་ཀྱི་མཐུ་ནི་སྒྲུབ་པ་ལ། །ནད་དང་གདོན་དང་དུག་རྣམས་དང་། །འཇིགས་པ་བརྒྱད་པོ་སེལ་བར་བྱེད། །བདག་ཉིད་ཚེ་རིང་དཔལ་འཕེལ་ཞིང་། །ལོངས་སྤྱོད་རྒྱས་ཏེ་དབང་པོ་རྒྱས། །འགྲོ་བ་རྣམས་ཀྱང་དད་
པར་འགྱུར། ཞེས་བཅོམ་ལྡན་འདས་ཀྱིས་གསུངས་སོ། །སྐུ་ལ་དམིགས་པ་ནི་དང་པོ་ཁྲུས་བྱས་ཏེ་ཁ་དང་ཡན་ལག་དྲི་ཞིམ་པས་བསྒོས་ནས་ཐལ་མོ་སྙིང་གར་སྦྱར་ནས་སྔགས་ལན་ཅིག་བརྗོད་དེ། མདུན་དུ་བྱང་ཆུབ་ཆེན་པོའི་སྐུ་པདྨ་དང་ཟླ་བ་ལ་གནས་པ་གསེར་བཙོ་མའི་མདོག་ཅན་
རིན་པོ་ཆེའི་ཁྲི་ལ་བཞུགས་པ། གསིལ་བྱེད་དང་པར་བུ་འཆང་བ། ཤིན་ཏུ་འཛུམ་བཞིན་པར་བཞུགས་པས་བདག་གི་སྔགས་བརྗོད་པའི་དཔང་པོ་བྱེད་པར་བསམས་ལ་ཕྲེང་བ་བླངས་ལ་མྱུར་བ་དང་དལ་བ་དང་མི་གསལ་བ་དང་འདྲེས་པ་དང་འཁྲུགས་པ་དང་ལྷག་པ་དང་ཆད་པ་དང་ང་རོ་

71-1-301b

ངན་པ་དག་སྤངས་ནས་གཞན་གྱི་གཏམ་ལ་སོགས་པས་བར་མཆོད་པར་གཡེང་བ་དང་རྨུགས་པ་མེད་ཅིང་སེམས་རྩེ་གཅིག་པ་དང་ལྡན་པས་སྙན་པའི་སྔགས་ཀྱིས་བདུན་ལ་སོགས་པ་ཅི་རིགས་པར་བཟླས་ཏེ། དེའི་དགེ་བའི་བྱིན་རླབས་ཀྱིས་བདག་གི་སྡིག་པ་ཐམས་ཅད་དག་པར་ཡང་དང་ཡང་དུ་
བསམ་པར་བྱའོ། །དེ་ནས་རང་གྲོལ་བ་དག་པའི་དོན་དུ་དགེ་བའི་སྨོན་ལམ་ཤློ་ཀ་གཅིག་ལ་སོགས་པ་བརྗོད་པར་བྱའོ། །ཡང་ན་དང་པོར་ཁྲུས་དང་ཙང་སྦྲ་དང་ལྡན་ཞིང་ཁ་དང་ཡན་ལག་ཐམས་ཅད་དྲི་ཞིམ་པོས་བྱུགས་ནས་རྡོ་རྗེ་ཐལ་མོ་སྤྱི་བོ་དང་མགྲིན་པ་དང་། སྙིང་གར་སྦྱར་ནས་སྔགས་ཚར་རེ་རེ་
ལེགས་པར་བརྗོད་ནས་མདུན་དུ་པདྨ་དང་ཟླ་བ་ལ་དམིགས་པའི་བྱང་ཆུབ་ཆེན་པོ་གོང་གི་མཚན་ཉིད་ཅན་བདུད་འདུལ་བའི་ཕྱག་རྒྱ་མཛད་པ་དེས་བདག་ལ་ཆོས་འཆད་པར་བསམས་ལ། ཕྲེང་བ་བླངས་ལ་མྱུར་བ་ལ་སོགས་པའི་སྐྱོན་སྤངས་ཏེ། སྔགས་སྙན་པས་ཉི་ཤུ་རྩ་གཅིག་ལ་སོགས་པ་
ཅི་རིགས་པར་བརྗོད་ནས་བདེན་པ་དེའི་བྱིན་གྱི་རླབས་ཀྱིས་བདག་གི་སྡིག་པ་ཐམས་ཅད་དག་ཅིང་ལུས་ངག་ཡིད་གསུམ་གྱི་སྒོ་ནས་གཞན་གྱི་དོན་བྱེད་པ་ལ་ཐོགས་པ་མེད་པ་དང་ལྡན་པར་གྱུར་པར་ཡང་དང་ཡང་དུ་བསམ་པར་བྱའོ། །དེ་ནས་བདག་དང་གཞན་གྱི་དོན་དུ་དགེ་བའི་སྨོན་ལམ་
ཚིགས་སུ་བཅད་པ་གཉིས་ལ་སོགས་པ་ཅི་རིགས་པར་བཀླགས་ཏེ། བཅོམ་ལྡན་འདས་གདན་དང་བཅས་པ་བདག་གི་མགྲིན་པའི་གནས་སུ་བཞུགས་ནས་སྙིང་གར་ཐིམ་སྟེ་སྐྱིལ་ཀྲུང་གིས་གནས་པར་བསམ་མོ། །ཡང་ན་གདོང་ལ་སོགས་པ་དག་པར་བྱས་ནས་ཁ་དང་ཡན་ལག་
ཐམས་ཅད་དྲི་ཞིམ་པོས་བྱུགས་ཏེ། སྤྱི་བོ་དང་མགྲིན་པ་དང་སྙིང་གར་ཐལ་མོ་སྦྱར་ཏེ། སྔགས་ཚར་རེ་རེ་བརྗོད་ནས་མདུན་དུ་པདྨ་དང་ཟླ་བ་ལ་བཞུགས་པའི་བྱང་ཆུབ་ཆེན་པོ་ཆོས་འཆད་པའི་ཕྱག་རྒྱ་ཅན་མཚན་ཉིད་ཐམས་ཅད་གོང་ལྟར་བསམས་ནས་ཕྲེང་བ་བླངས་ཏེ་སྔགས་བརྗོད་པའི་ཚེ་
སྐུའི་བ་སྤུའི་གསེབ་ཐམས་ཅད་དང་། ཞབས་ལོང་བུ་ལ་སོགས་པ་ཐམས་ཅད་ནས་འོད་ཟེར་ཁ་དོག་སྣ་ལྔ་ལ་གྲངས་བྱེ་བ་ཕྲག་དྲུག་ཅུ་བྱུང་ནས་བདག་གི་ལུས་ངག་ཡིད་གསུམ་གྱི་སྒོ་ཐམས་ཅད་དག་པར་བྱས་པར་བསམ་མོ། །དེ་ལྟར་གཡེང་བ་དང་རྨུགས་པ་དང་། གཞན་གྱི་

71-1-302a

གཏམ་ལ་སོགས་པའི་བར་ཆད་ཐམས་ཅད་དང་བྲལ་བ་དང་མྱུར་བ་དང་ངལ་བ་དང་མི་གསལ་བ་དང་འདྲེས་པ་དང་འཁྲུགས་པ་དང་ལྷག་པ་དང་ཆད་པ་དང་ང་རོ་ངན་པ་སྤངས་ཏེ། ངག་སྙན་པོས་བརྒྱ་རྩ་བརྒྱད་ལ་སོགས་པ་ཅི་རིགས་པར་བརྗོད་པར་བྱའོ། །བདེན་པ་
དེའི་བྱིན་རླབས་ཀྱིས་བདག་དང་སེམས་ཅན་ཐམས་ཅད་ཀྱི་སྡིག་པ་ཐམས་ཅད་དག་ཅིང་བདག་གི་ལུས་ཀྱི་འོད་ཀྱིས་འགྲོ་བ་ཐམས་ཅད་ཀྱི་སྡིག་པ་ཐམས་ཅད་བསལ་བར་བསམ་པར་བྱའོ། །དེ་ནས་བཅོམ་ལྡན་འདས་གདན་དང་བཅས་པ་བདག་གི་སྤྱི་བོ་ནས་སྙིང་གར་ཞུགས་ཏེ་དགྱེས་ 
ཤིང་འཛུམ་པའི་མདངས་དང་ལྡན་པས་སྐྱིལ་ཀྲུང་གིས་བཞུགས་པར་བསམས་ལ་དེའི་བདེན་པའི་བྱིན་གྱི་རླབས་ཀྱིས་བདག་དང་འགྲོ་བ་ཐམས་ཅད་སྐྱེ་བའི་སྡུག་བསྔལ་མཐའ་དག་དང་བྲལ་བ་དང་། སྐྱེ་བ་གཞན་དུ་བདེ་བ་ཁྱད་པར་ཅན་དང་ལྡན་པ་དང་བྱང་ཆུབ་མྱུར་དུ་ཐོབ་པར་བྱ་
བའི་དགེ་བའི་སྨོན་ལམ་ཚིགས་སུ་བཅད་པ་གསུམ་ལ་སོགས་པས་ལེགས་པར་བསྔོས་ལ་རྡོ་རྗེ་སེམས་དཔའི་ཡི་གེ་བརྒྱ་པ་ཡང་ལན་གསུམ་ལ་སོགས་པ་ཅི་རིགས་སུ་དལ་གྱིས་བཀླགས་ནས་ལྡང་བར་བྱའོ། །དེ་ལྟར་སྐུ་ལ་དམིགས་པ་གསུམ་ཁོ་ན་སྟེ། བྱང་ཆུབ་སེམས་
དཔའ་སྒྲིབ་པ་རྣམ་པར་སེལ་བའི་རྒྱུད་ཆེན་པོ་ལས། གཙོ་བོ་ཤཱཀྱ་སེང་གེའི་སྐུ། །འོད་ཟེར་འབུམ་ཕྲག་མཐའ་ཡས་ཅན། །མཚན་དང་དཔེ་བྱད་རབ་རྒྱས་ལ། །འདྲེན་པ་འགྲོ་བའི་མགོན་གཅིག་པུ། །ཁམས་དང་དབང་པོའི་བྱེ་བྲག་གིས། །མཛད་པའི་རྣམ་པ་ཐ་དད་པར། །
གདུལ་བྱའི་དོན་དུ་རབ་ཏུ་སྣང་། །བདག་གིས་གང་མོས་དེ་དང་དེར། །དམིགས་ཏེ་སྔགས་བརྗོད་མཐུ་ཡིས་ནི། །འགྲོ་བའི་ནད་སེལ་སྨན་པ་ཆེ། །ཚེ་འཕེལ་ལོངས་སྤྱོད་རབ་ཏུ་འཕེལ། །དབུལ་ཕོངས་མྱ་ངན་འཇིགས་པ་མེད། །ཞིང་ཁམས་ཐམས་ཅད་རབ་སྦྱོང་ཞིང་། །འགྲོ་
བའི་དོན་ལ་རབ་བརྩོན་པ། །དེད་དཔོན་ཆེན་པོ་སྐྱབས་ཀྱི་མཆོག །རབ་གྲགས་སྐུ་ནི་ཐོབ་པར་འགྱུར། །ཞེས་བཅོམ་ལྡན་འདས་ཀྱིས་གསུངས་སོ། །དེ་ལྟར་སྔགས་ཀྱི་སྦྱོར་བའི་གཟུངས་སྔགས་སུ་སྒྲུབ་པའི་ཕྱོགས་བརྗོད་ནས། ད་ནི་རིགས་སྔགས་སུ་སྒྲུབ་པའི་ཕྱོགས་བརྗོད་

71-1-302b

པར་བྱའོ། །འདི་ཡང་སྔགས་དང་ཕྱག་རྒྱ་དང་སྐུ་ལ་དམིགས་པ་སྟེ། དེ་དག་དབང་པོའི་བྱེ་བྲག་གིས་གསུམ་གསུམ་བརྗོད་པར་བྱའོ། །དེ་ཡང་སྔགས་ལ་དམིགས་པ་ནི་ཁྲུས་དང་གཙང་སྦྲ་དང་སྐྱབས་སུ་འགྲོ་བ་དང་སེམས་བསྐྱེད་པ་དང་སྡོམ་པ་གཟུང་བ་སྔོན་ལྟར་བྱས་ནས་སྙིང་གར་ཐལ་
མོ་སྦྱར་ནས་སྔགས་ཚར་གཅིག་བརྗོད་ནས་བདག་གི་སྙིང་གར་པདྨ་དང་ཟླ་བ་ལ་གནས་པའི་ཧཱུཾ་ཡིག་དཀར་པོ་སྔགས་ཀྱིས་བསྐོར་བ་བསམས་ལ། ཕྲེང་བ་བླངས་ལ་བདུན་ལ་སོགས་པ་བརྗོད་པའི་ཚེ་ཧཱུྃ་ཡིག་གི་འོད་ཀྱིས་བདག་གི་ལུས་ངག་ཡིད་ཀྱི་སྒྲིབ་པ་དག་པར་བསམ་མོ། །གཡེང་
བ་ལ་སོགས་པའི་སྐྱོན་ནི་རྣམ་པ་བཅུ་གཅིག་དང་བྲལ་བས་སྙན་པའི་སྒྲས་བཀླག་པར་བྱའོ། །བརྗོད་པ་དེའི་བདེན་པའི་བྱིན་རླབས་ཀྱིས་འགྲོ་བ་ཐམས་ཅད་གཟུངས་ཀྱི་ཕྲེང་བ་འདི་ཁོ་ན་དང་བདག་ལ་ཡང་དག་པར་བསམས་ལ་དེ་ལས་བྱུང་བའི་དགེ་བས་བདག་སྡུག་བསྔལ་ཐམས་ཅད་དང་
བྲལ་བར་བྱ་བའི་སྨོན་ལམ་ཤློ་ཀ་གཅིག་ལ་སོགས་པས་བསྔོ་བར་བྱའོ། །ཡང་ན་དང་པོར་ཁྲུས་དང་གཙང་སྦྲ་ལ་སོགས་པ་དང་ལྡན་པ་དང་འགྲོ་བ་ལ་ཚད་མེད་པ་བསྒོམ་པ་དང་སྐྱབས་སུ་འགྲོ་བ་དང་སེམས་བསྐྱེད་པ་དང་སྡོམ་པ་གཟུང་བ་བྱས་ནས་སྙིང་ག་དང་འགྲིན་པར་ཐལ་མོ་སྦྱར་
བར་བྱས་ནས་ཚར་རེ་རེ་བརྗོད་དེ། ཕྲེང་བ་བླངས་ནས་བདག་གི་སྙིང་ག་དང་མགྲིན་པར་པདྨ་དང་ཟླ་བ་ལ་ཧཱུཾ་ཡིག་དཀར་པོ་སྔགས་ཀྱི་ཕྲེང་བ་དང་བཅས་པ་བསམས་ནས་བརྗོད་པའི་ཚེ་སྔགས་ཀྱི་འོད་ཀྱིས་བདག་དང་ཁམས་གསུམ་པའི་སྒྲིབ་པ་ཐམས་ཅད་དག་པར་བསམ་མོ། །དེ་ལྟར་གཡེང་བ་
ལ་སོགས་པའི་སྐྱོན་བཅུ་གཅིག་དང་བྲལ་བས་ཉི་ཤུ་རྩ་གཅིག་ལ་སོགས་པ་ཅི་རིགས་པར་བཀླགས་ནས་དེའི་བདེན་པའི་བྱིན་གྱི་རླབས་ཀྱིས་བདག་གི་བསམ་པའི་རྒྱུད་འགྲོ་བ་ཚིམ་པའི་ཆོས་ཀྱི་ཆར་ཆེན་པོའི་གཞིར་གྱུར་པར་བསམས་ལ། བདག་དང་གཞན་གྱི་དོན་དུ་བསྔོ་བ་ཤློ་ཀ་གཉིས་
ལ་སོགས་པ་སྨོན་ལམ་ཡང་བཏབ་ནས་ལྡང་བར་བྱའོ། །ཡང་ན་དང་པོ་ཁྲུས་དང་གཙང་སྦྲ་དང་ལྡན་པས་ཚད་མེད་པ་བཞིས་འགྲོ་བ་ལ་བལྟས་ནས་སྐྱབས་སུ་འགྲོ་བ་དང་། སེམས་བསྐྱེད་པ་དང་། སྡོམ་པ་བཟུང་ནས་གནས་གསུམ་དུ་ཐལ་མོ་སྦྱར་ཞིང་བརྗོད་ནས་བདག་གི་གནས་

71-1-303a

གསུམ་དུ་པདྨ་དང་ཟླ་བ་ལ་ཧཱུཾ་ཡིག་དཀར་པོ་སྔགས་ཕྲེང་གིས་བསྐོར་བ་ལ་དམིགས་ཏེ། གཡེང་བ་ལ་སོགས་པའི་སྐྱོན་བཅུ་གཅིག་དང་བྲལ་ཞིང་སྙན་པའི་ངག་ཀྱིས་བརྗོད་དེ། སྔགས་ཀྱི་འོད་ཟེར་ཁ་དོག་ལྔའི་ཚུལ་དུ་འཕྲོ་བས་འགྲོ་བ་མ་ལུས་པའི་ནད་དང་གནོད་
པ་དང་ཉོན་མོངས་པ་ལྔ་ལ་སོགས་པ་ཟད་པར་བྱས་པར་བསམ་ཞིང་རྒྱུན་ནི་འཆད་པའམ་བརྒྱ་རྩ་བརྒྱད་ལ་སོགས་པ་བཀླག་པར་བྱའོ། །དེའི་བྱིན་རླབས་ཀྱིས་བདག་གི་ལུས་སྒྱུ་མ་ལྟ་བུར་གྱུར་ནས་སྔགས་ཀྱི་རང་བཞིན་དུ་གྱུར་པར་བསམས་ལ། བདག་དང་སེམས་ཅན་ཐམས་ཅད་ནད་དང་
གནོད་པ་ཐམས་ཅད་དང་བྲལ་བ་དང་། སྐྱེ་བ་ཐམས་ཅད་དུ་གནོད་པ་མེད་ཅིང་བདེ་བ་དང་བྱང་ཆུབ་ཐོབ་པར་བྱ་བའི་དོན་དུ་དགེ་བའི་སྨོན་ལམ་ཚིགས་སུ་བཅད་པ་གསུམ་ལ་སོགས་པས་བསྔོ་བར་བྱའོ། །དེ་ལྟར་དེ་དག་ནི་རིག་སྔགས་ཡི་གེའི་ཚུལ་དུ་འདོན་པ་སྟེ་སྒྲིབ་པ་ཐམས་ཅད་རྣམ་
པར་སེལ་བའི་རྒྱུད་ལས། རིག་སྔགས་ཡི་གེའི་ངོ་བོ་ཉིད། །ཁམས་དང་དབང་པོའི་བྱེ་བྲག་གིས། །ཐ་དད་དུ་མར་གནས་མོད་ཀྱང་། །དོན་ནི་སྔགས་ཀྱི་རང་བཞིན་དངོས། །གང་གིས་དེ་ཤེས་འདོན་པ་ལ། །ཚེ་འདིར་གནོད་པ་ཀུན་བྲལ་ནས། །བདེ་བའི་རྒྱུ་དང་མ་བྲལ་བར། །
བདེ་བ་ཅན་དུ་མྱུར་དུ་སྐྱེ། །ཞེས་བྱ་བ་ལ་སོགས་པ་རྒྱས་པར་བཅོམ་ལྡན་འདས་ཀྱིས་གསུངས་སོ། །ཡང་ན་རིག་སྔགས་ཕྱག་རྒྱའི་ཚུལ་དུ་བརྗོད་ན་ཁྲུས་ལ་སོགས་པ་གཙང་སྦྲ་དང་། ཚད་མེད་པ་བསྒོམ་པ་དང་། སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། སྡོམ་
པ་གཟུང་བ་ལ་སོགས་པ་སྔོན་ལྟར་བྱས་སྙིང་གར་ཐལ་མོ་སྦྱར་ནས་སྔགས་བརྗོད་དེ། བདག་གི་སྙིང་གར་པདྨ་དང་ཟླ་བ་ལ་གནས་པའི་རྡོ་རྗེ་དཀར་པོ་རྩེ་ལྔ་པ་ཨས་མཚན་པ་སྔགས་ཀྱི་ཕྲེང་བ་དང་བཅས་པ་དམིགས་ཏེ། གཡེང་བ་ལ་སོགས་པའི་སྐྱོན་བཅུ་གཅིག་དང་བྲལ་བས་
བདུན་ལ་སོགས་པ་ཅི་རིགས་པར་བརྗོད་པའི་ཚེ་རྡོ་རྗེ་སྔགས་དང་བཅས་པ་དེའི་འོད་ཟེར་གྱིས་བདག་གི་ལུས་ངག་ཡིད་གསུམ་གྱི་སྒོ་དག་པར་བྱས་ཤིང་དེའི་བྱིན་རླབས་ཀྱིས་བདག་རྡོ་རྗེའི་རང་བཞིན་དུ་གྱུར་པར་བསམ་པར་བྱའོ། །དེ་ནས་དགེ་བའི་སྨོན་ལམ་ཤློ་ཀ་གཅིག་ལ་སོགས་པ་བརྗོད་

71-1-303b

ནས་ཅི་རིགས་པར་ལྡང་བར་བྱའོ། །ཡང་ན་ཁྲུས་དང་གཙང་སྦྲ་དང་ཚད་མེད་པ་བསྒོམ་པ་དང་སྐྱབས་སུ་འགྲོ་བ་དང་སེམས་བསྐྱེད་པ་དང་སྡོམ་པ་གཟུང་བ་སྔོན་ལྟར་བྱས་ནས། སྙིང་ག་དང་མགྲིན་པར་རྡོ་རྗེ་ཐལ་མོ་སྦྱར་ནས་སྔགས་བརྗོད་པས་བདག་གི་སྙིང་ག་དང་མགྲིན་པར་པདྨ་
དང་ཟླ་བ་ལ་གནས་པའི་རྡོ་རྗེ་དཀར་པོ་རྩེ་ལྔ་པ་ཨཾ་ཡིག་ལ་སྔགས་ཕྲེང་གིས་བསྐོར་བ་དང་བཅས་པ་དམིགས་ལ། གཡེང་བ་ལ་སོགས་པའི་སྐྱོན་དང་བྲལ་བས་ཉི་ཤུ་རྩ་གཅིག་ལ་སོགས་པ་ཅི་རིགས་སུ་བརྗོད་པའི་ཚེ་རྡོ་རྗེ་དང་སྔགས་ཀྱི་འོད་ཀྱིས་བདག་དང་འགྲོ་བ་ཐམས་ཅད་ཀྱི་
སྡིག་པའི་ཚོགས་སྦྱོངས་ཤིང་ཇི་སྲིད་འཁོར་བའི་སྐྱེ་རྒ་ན་འཆིའི་ཆུ་བོ་འཇོམས་པར་བྱེད་ཅིང་རྡོ་རྗེའི་ལུས་སུ་གྱུར་ནས་བསྟན་པའི་རང་བཞིན་དུ་བྱིན་གྱིས་བརླབས་པར་བསམ་པར་བྱའོ། །དེ་ནས་བདག་དང་འགྲོ་བ་ཐམས་ཅད་སྡིག་པ་ཐམས་ཅད་ཟད་པ་ལ་སོགས་པའི་ཕྱིར་དགེ་བའི་སྨོན་
ལམ་ཚིགས་སུ་བཅད་པ་གཉིས་ལ་སོགས་པ་ཅི་རིགས་པར་བསྔོས་ནས་ལྡང་བར་བྱའོ། །ཡང་ན་ཁྲུས་དང་གཙང་སྦྲ་དང་ཚད་མེད་པ་བསྒོམ་པ་དང་སྐྱབས་སུ་འགྲོ་བ་སྔོན་ལྟར་བྱས་ཏེ། སེམས་བསྐྱེད་པ་དང་སྡོམ་པ་གཟུང་བ་སྔོན་ལྟར་བྱས་ནས་རྡོ་རྗེ་ཐལ་མོ་གནས་གསུམ་དུ་སྦྱར་ཏེ། 
སྔགས་ཚར་གསུམ་དུ་བརྗོད་ནས་གནས་གསུམ་དུ་པདྨ་དང་ཟླ་བ་ལ་གནས་པའི་རྡོ་རྗེ་དཀར་པོ་རྩེ་ལྔ་པ་ཨ་ཡིག་ལ་སྔགས་ཀྱིས་བསྐོར་བར་བསམས་ནས། གཡེང་བ་ལ་སོགས་པའི་སྐྱོན་རྣམས་སྤངས་ནས། བརྒྱ་རྩ་བརྒྱད་ལ་སོགས་པ་ཅི་རིགས་པར་བརྗོད་པའི་སྔགས་རྡོ་རྗེའི་འོད་
ཀྱིས་བདག་དང་འགྲོ་བ་ཐམས་ཅད་ལ་རེག་པ་ཙམ་གྱིས་ནད་དང་གནོད་པ་ཐམས་ཅད་བསལ་ཞིང་། སྡིག་པ་ཐམས་ཅད་དག་པར་བྱས་ནས། བྱང་ཆུབ་ཀྱི་སེམས་རྒྱ་ཆེར་འཕེལ་བར་བསམ་པར་བྱའོ། །དེའི་བདེན་པའི་བྱིན་གྱི་རླབས་ཀྱིས་འགྲོ་བ་ཐམས་ཅད་ཆོས་སྤྱོད་པ་
རྒྱུན་མི་འཆད་པར་བསམ་མོ། །དེ་ནས་བདག་དང་འགྲོ་བ་ཐམས་ཅད་སྐྱེ་བ་ནས་སྐྱེ་བར་སྡུག་བསྔལ་ཐམས་ཅད་དང་བྲལ་བ་དང་། བདེ་བ་ཁྱད་པར་ཅན་དང་ལྡན་པ་དང་། བྱང་ཆུབ་མྱུར་དུ་ཐོབ་པར་བྱ་བའི་ཕྱིར། སྨོན་ལམ་ཚིགས་སུ་བཅད་པ་གསུམ་ལ་སོགས་པས་དགེ་བ་བསྔོས་

71-1-304a

ཏེ། རྡོ་རྗེ་སེམས་དཔའི་ཡི་གེ་བརྒྱ་པ་ཡང་ལན་གསུམ་ལ་སོགས་པ་བརྗོད་དོ། །དེ་ལྟར་རིག་སྔགས་ཕྱག་རྒྱའི་ཚུལ་གསུམ་པ་དེ་ནི་བྱང་ཆུབ་སེམས་དཔའ་སྒྲིབ་པ་རྣམ་སེལ་གྱི་རྒྱུད་ལས་གསུངས་ཏེ། གང་ཞིག་ཡིད་མཉམ་འཇོག་པ་ནི། །རྡོ་རྗེའི་མཚན་མ་
སྔགས་བཅས་ལ། །སྒོ་གསུམ་གང་དང་གང་དུ་དམིགས། །དེ་དང་དེར་ནི་བློ་གཏད་ནས། །བརྗོད་པས་ནད་སེལ་ཚེ་རིང་ཞིང་། །དཔལ་འཕེལ་ལོངས་སྤྱོད་ཆེན་པོར་འགྱུར། །བློ་འཕེལ་རིག་པ་ཆེན་པོའི་ས། །སྐྱེས་བུ་དེས་ནི་མྱུར་ཐར་འགྱུར། །ཞེས་བཅོམ་ལྡན་འདས་ཀྱིས་གསུངས་
སོ། །རིག་སྔགས་སྐུ་ལ་དམིགས་པ་ནི་ཁྲུས་དང་གཙང་སྦྲ་དང་སྐྱབས་འགྲོ་དང་སེམས་བསྐྱེད་ལ་སོགས་པ་གོང་ལྟར་བྱས་ནས་རང་གི་སྙིང་གར་ཐལ་མོ་སྦྱར་ཏེ་ཚར་གཅིག་བརྗོད་ནས་རང་གི་སྙིང་གར་པདྨ་དང་ཟླ་བ་ལ་གནས་པའི་དང་པོའི་སངས་རྒྱས་རྡོ་རྗེ་དང་དྲིལ་བུ་འཛིན་པ་དཀར་པོ་
སེམས་དཔའི་སྐྱིལ་ཀྲུང་གིས་བཞུགས་པར་བསམས་ལ། དེའི་འོད་ཟེར་དང་མཚན་དང་དཔེ་བྱད་ཀྱིས་རྒྱས་པ་ལ་བློ་གཏད་ནས་གཡེང་བ་ལ་སོགས་པའི་སྐྱོན་དང་བྲལ་བས་སྙན་ཅིང་གྲིམས་པའི་ཚུལ་གྱིས་ཚར་བདུན་ལ་སོགས་པ་བཀླགས་ནས་བདེན་པ་དེའི་བྱིན་རླབས་ཀྱིས་བདག་གི་ལུས་དང་
པོ་སངས་རྒྱས་སུ་བརྟན་པར་གྱུར་པར་བསམ་པར་བྱའོ། །སྨོན་ལམ་ཤློ་ཀ་གཅིག་ལ་སོགས་པ་ཡང་གདབ་པར་བྱའོ། །ཡང་ན་ཁྲུས་ལ་སོགས་པ་སྔོན་ལྟར་བྱས་ལ་སྙིང་ག་དང་མགྲིན་པའི་གནས་སུ་ཐལ་མོ་སྦྱར་ཏེ་ཚར་རེ་བརྗོད་པས་དང་པོའི་སངས་རྒྱས་བསམས་ཏེ། དེ་དག་གི་འོད་ཟེར་དང་
གཟི་བརྗིད་ཀྱིས་བདག་གི་ལུས་ངག་ཡིད་གསུམ་སྦྱངས་ཤིང་དང་པོའི་སངས་རྒྱས་ཀྱི་སྐུར་བསྒྲུབས་ཏེ། གཡེང་བ་ལ་སོགས་པའི་སྐྱོན་དང་བྲལ་བས་ཉི་ཤུ་རྩ་གཅིག་ལ་སོགས་པ་བཀླག་གོ། །བདེན་པ་དེའི་མཐུས་བདག་གཞན་དོན་བྱེད་པའི་ནུས་པ་ཐོགས་པ་མེད་པ་དང་ལྡན་པར་ཡང་
བསམ་མོ། །དེ་ནས་ཤློ་ཀ་གཉིས་ལ་སོགས་པས་སྨོན་ལམ་དགེ་བའི་ཕྱིར་བསྔོ་བར་བྱའོ། །ཡང་ན་གནས་གསུམ་དུ་ཐལ་མོ་སྦྱར་ཏེ་ཚར་རེ་བརྗོད་པས་བདག་གི་གནས་གསུམ་དུ་པདྨ་དང་ཟླ་བ་ལ་གནས་པའི་དང་པོའི་སངས་རྒྱས་བསམས་ལ། དེ་དག་གི་མཚན་དང་དཔེ་བྱད་དང་

71-1-304b

གཟི་བརྗིད་ཀྱི་མཐུས་བདག་དང་འགྲོ་བ་ཐམས་ཅད་ཀྱི་སྡིག་པ་ཐམས་ཅད་དག་པར་བསམ་ཞིང་གཡེང་བ་ལ་སོགས་པའི་སྐྱོན་དང་བྲལ་བས་བརྒྱ་རྩ་བརྒྱད་ལ་སོགས་པ་ཅི་རིགས་པར་བཀླགས་ནས། དེའི་བདེན་པའི་བྱིན་གྱི་རླབས་ཀྱིས་འགྲོ་བ་ཐམས་ཅད་ཀྱི་སྡིག་པའི་ཚོགས་བདག་གི་
ལུས་ཀྱི་འོད་ཀྱིས་ཀྱང་སེལ་བར་གྱུར་པར་བསམ་མོ། །དེ་ནས་བདག་དང་གཞན་གྱི་དོན་དུ་ཚིགས་སུ་བཅད་པ་གསུམ་ལ་སོགས་པས་སྨོན་ལམ་གྱི་བསྔོ་བ་བརྗོད་པར་བྱས་ལ། ཡི་གེ་བརྒྱ་པ་ཚར་གསུམ་ལ་སོགས་པ་བརྗོད་ནས་ཅི་བདེ་བས་གནས་པར་བྱའོ། །དེ་ལྟར་རིག་
སྔགས་ཀྱི་སྐུ་ལ་དམིགས་ནས་བརྗོད་པ་སྟེ། གསུམ་པོ་འདི་ཡང་བྱང་ཆུབ་སེམས་དཔའ་སྒྲིབ་པ་རྣམ་པར་སེལ་བའི་རྒྱུད་ལས་གསུངས་ཏེ། ལུས་ངག་ཡིད་ཀྱི་སྒོ་ནས་སམ། །ཡང་ན་གཅིག་གམ་གཉིས་ཀྱང་རུང་། །དང་པོའི་སངས་རྒྱས་སྐུར་གསལ་ལ། །བློ་གཏད་མ་
གཡེངས་སེམས་ཀྱིས་བཀླག །ནད་དང་གདོན་དང་འཇིགས་བརྒྱད་སོགས། །འཚེ་བ་རྣམས་དང་བྲལ་ནས་ཀྱང་། །ཚེ་རིང་ཤེས་རབ་ཆེན་པོ་སྟེ། །འཁོར་བའི་འཆིང་བ་ལས་གྲོལ་འགྱུར། །ཞེས་གསུངས་སོ། །དེ་ལྟར་རིག་སྔགས་ཀྱི་ཚུལ་དུ་བཀླགས་པ་བརྗོད་ནས། 
ད་ནི་གསང་སྔགས་ཀྱི་ཚུལ་དུ་བཀླག་པ་བཤད་པར་བྱ་སྟེ། དེ་ལ་གསང་སྔགས་ཀྱི་ཚུལ་ཡི་གེ་ལ་དམིགས་ནས་བརྗོད་པ་ནི། ཁྲུས་ལ་སོགས་པ་ཐམས་ཅད་སྔོན་ལྟར་བྱས་ནས་སྙིང་གར་ཐལ་མོ་སྦྱར་ཏེ་ཚར་གཅིག་བརྗོད་པའི་མཐུས་བདག་གི་སྙིང་གར་པདྨ་དང་ཟླ་བ་ལ་ཨཾ་དཀར་
པོ་སྔགས་ཕྲེང་འོད་ཟེར་ལྔ་དང་ལྡན་པ་དམིགས་ལ། དེའི་འོད་ཀྱིས་བདག་སྔགས་ཀྱི་རང་བཞིན་དུ་བསྒྲུབ་པར་བསམ་ཞིང་གཡེང་བ་ལ་སོགས་པའི་སྐྱོན་སྤངས་ནས་ཚར་བདུན་ལ་སོགས་པ་ཅི་རིགས་པར་བརྗོད་དེ། དེའི་བདེན་པའི་བྱིན་གྱི་རླབས་ཀྱིས་བདག་སྔགས་བསྒྲུབ་པ་ལ་
ནུས་པ་ཐོགས་པ་མེད་པ་དང་ལྡན་པར་གྱུར་པར་བསམས་ཏེ། དགེ་བའི་སྨོན་ལམ་ཚིགས་སུ་བཅད་པ་གཅིག་ལ་སོགས་པ་ཅི་རིགས་པར་བརྗོད་པར་བྱའོ། །ཡང་ན་ཁྲུས་ལ་སོགས་པ་སྔོན་ལྟར་བྱས་ལ། སྙིང་ག་དང་མགྲིན་པར་ཐལ་མོ་སྦྱར་ཏེ་སྔགས་ཚར་རེ་རེ་བརྗོད་པས་

71-1-305a

བདག་གི་སྙིང་ག་དང་མགྲིན་པར་པདྨ་དང་ཟླ་བ་ལ་གནས་པའི་ཨོཾ་ཡིག་དཀར་པོ་ལ་སྔགས་ཕྲེང་འོད་ཟེར་ཁ་དོག་སྣ་ཚོགས་པ་བསམས་ནས། དེའི་འོད་ཀྱིས་བདག་གི་སྡིག་པ་ཐམས་ཅད་དག་པར་བསམ་ཞིང་གཡེང་བ་ལ་སོགས་པའི་རྟོག་པ་དང་བྲལ་བས་ཉི་
ཤུ་རྩ་གཅིག་ལ་སོགས་པ་ཅི་རིགས་པར་བརྗོད་ནས། དེའི་བདེན་པའི་བྱིན་གྱི་རླབས་ཀྱིས་བདག་གཞན་གྱི་དོན་བྱེད་པ་ལ་ནུས་པ་ཐོགས་པ་མེད་པ་དང་ལྡན་པར་གྱུར་པ་ཡང་ཡང་བསམ་པར་བྱའོ། །རང་དང་གཞན་གྱི་དོན་དུ་ཤློ་ཀ་གཉིས་ལ་སོགས་པའི་སྨོན་ལམ་གྱི་དགེ་བ་
བསྔོ་བར་བྱའོ། །ཡང་ན་ཁྲུས་ལ་སོགས་པ་ཡན་ལག་ཐམས་ཅད་སྔོན་ལྟར་བྱས་ནས་གནས་གསུམ་དུ་ཐལ་མོ་སྦྱར་ཏེ་ཚར་གསུམ་བརྗོད་ནས་གནས་གསུམ་དུ་པདྨ་དང་ཟླ་བ་ལ་ཨོཾ་ཡིག་དཀར་པོ་སྔགས་ཀྱི་ཕྲེང་བ་ཁ་དོག་སྣ་ཚོགས་པས་བསྐོར་བར་བསམས་ལ། ཕྲེང་བ་བླངས་ལ་
གཡེང་བ་ལ་སོགས་པའི་སྐྱོན་དང་བྲལ་བས་བརྒྱ་རྩ་བརྒྱད་ལ་སོགས་པ་བརྗོད་པས་བདག་གི་སྡིག་པ་ཐམས་ཅད་ཟད་ཅིང་སྔགས་ཀྱི་འོད་ཟེར་གྱིས་འགྲོ་བ་ཐམས་ཅད་ཀྱི་སྡིག་པ་ཐམས་ཅད་ཟད་པར་ཡང་བསམས་ནས། དེའི་བདེན་པའི་བྱིན་རླབས་ཀྱིས་འགྲོ་བ་ཐམས་ཅད་ཆོས་དོན་དུ་གཉེར་
བ་རྒྱུན་མི་འཆད་པ་དང་ལྡན་པར་གྱུར་ནས་བསྟན་པ་ཤིན་ཏུ་རྒྱས་པར་བསམ་མོ། །དེ་ནས་དགེ་བའི་སྨོན་ལམ་ཤློ་ཀ་གསུམ་ལ་སོགས་པ་བརྗོད་ནས་ཡི་གེ་བརྒྱ་པ་བརྗོད་དེ་ལྡང་བར་བྱའོ། །དེ་ལྟར་གསང་སྔགས་ཡི་གེའི་ཚུལ་དུ་བཀླག་པ་ཡང་བྱང་ཆུབ་སེམས་དཔའ་སྒྲིབ་པ་རྣམ་སེལ་གྱི་རྒྱུད་
ལས། གསུང་གི་དམ་ཚིག་ཕྱག་རྒྱ་ཅན། །གསང་བའི་ཡི་གེའི་ཚུལ་དུ་བརྗོད། །གནས་གསུམ་དག་ཏུ་རྒྱས་བཏབ་བསམ། །ཡང་ན་གཅིག་གམ་གཉིས་ཀྱང་རུང་། །བརྟན་པར་དམིགས་ནས་བརྗོད་པ་ཡིས། །ནད་སེལ་སྡིག་སྤོང་ཚེ་རིང་ཞིང་། །འཇིགས་མེད་བློ་བརྟན་ལོངས་སྤྱོད་
འཕེལ། །གསང་སྔགས་ལོངས་སྤྱོད་བདག་པོར་འགྱུར། །ཞེས་བཅོམ་ལྡན་འདས་ཀྱིས་གསུངས་སོ། །གསང་སྔགས་ཕྱག་རྒྱ་ལ་དམིགས་ནས་བཀླག་པ་ནི་ཁྲུས་ལ་སོགས་པ་ཐམས་ཅད་སྔོན་ལྟར་བྱས་ནས་སྙིང་གར་ཐལ་མོ་སྦྱར་ནས་སྔགས་བརྗོད་པས་སྙིང་ག་ཉིད་དུ་པདྨ་དང་ཟླ་

71-1-305b

བ་ལ་གནས་པའི་འཁོར་ལོ་རྩིབས་བཞི་པ་ཨོཾ་ཡིག་སྔགས་དང་བཅས་པ་བསམས་ཏེ། ཕྲེང་བ་བླངས་ནས་གཡེང་བ་ལ་སོགས་པའི་རྟོག་པ་ཐམས་ཅད་སྤངས་ཏེ་བརྗོད་པས་བདག་ཆོས་ཀྱི་འཁོར་ལོའི་བདག་པོར་གྱུར་པར་བསམས་ལ་བདུན་ལ་སོགས་པ་ཅི་རིགས་བརྗོད་པར་བྱའོ། །དེའི་
བྱིན་རླབས་ཀྱིས་བདག་ཆོས་ཀྱི་འཁོར་ལོ་བསྐོར་བར་གསོལ་བ་ལ་ཐོགས་པ་མེད་པར་གྱུར་པར་ཡང་བསམ་མོ། །དེ་ནས་དགེ་བའི་སྨོན་ལམ་ཚིགས་སུ་བཅད་པ་གཅིག་ལ་སོགས་པ་ཅི་རིགས་པས་བསྔོ་བར་བྱས་ལ། རྡོ་རྗེ་སེམས་དཔའི་ཡི་གེ་བརྒྱ་པ་ལན་གསུམ་ལ་སོགས་པ་
བརྗོད་ནས་ཅི་བདེ་བར་སྤྱད་པར་བྱའོ། །ཡང་ན་ཁྲུས་ལ་སོགས་པ་ཐམས་ཅད་སྔོན་ལྟར་བྱས་ནས་སྙིང་ག་དང་མགྲིན་པར་ཐལ་མོ་སྦྱར་ཏེ། ཚར་རེ་རེ་བརྗོད་པས་པདྨ་དང་ཟླ་བ་ལ་གནས་པའི་འཁོར་ལོ་རྩིབས་བརྒྱད་པ་ཨཱཾ་ཡིག་སེར་པོ་དང་བཅས་པ་སྔགས་ཀྱིས་བསྐོར་བར་བསམས་ལ། གཡེང་བ་ལ་
སོགས་པའི་རྟོག་པ་སྤངས་ནས་ཕྲེང་བ་བླངས་ཏེ་ཉི་ཤུ་རྩ་གཅིག་ལ་སོགས་པ་ཅི་རིགས་པ་བརྗོད་དེ་བདག་དང་འགྲོ་བ་ཐམས་ཅད་ཀྱི་སྡིག་པ་ཟད་པར་བྱས་པར་བསམས་ལ། འདིའི་བདེན་པའི་བྱིན་རླབས་ཀྱིས་བདག་གིས་འགྲོ་བའི་དོན་དུ་ཆོས་ཀྱི་འཁོར་ལོ་རྒྱུན་མི་འཆད་པ་བསྐོར་བར་བསམ་མོ། །
དེ་ནས་རང་བཞིན་གྱི་དོན་དུ་སྨོན་ལམ་ཚིགས་སུ་བཅད་པ་གཉིས་ལ་སོགས་པས་བསྔོ་བར་བྱའོ། །ཡང་ཁྲུས་ལ་སོགས་པ་ཐམས་ཅད་སྔོན་ལྟར་བྱས་ནས། གནས་གསུམ་དུ་ཐལ་མོ་སྦྱར་ཏེ་ཚར་རེ་རེ་བརྗོད་དེ། གནས་གསུམ་དུ་པདྨ་དང་ཟླ་བའི་སྟེང་དུ་འཁོར་ལོ་རྩིབས་བཅུ་དྲུག་པ་
དཀར་པོ་ཨོཾ་ཡིག་དང་སྔགས་ཕྲེང་དུ་བཅས་པ་བསམས་ནས་གཡེང་བ་ལ་སོགས་པ་ཐམས་ཅད་སྤངས་ཏེ། བརྒྱ་རྩ་བརྒྱད་ལ་སོགས་པ་བརྗོད་པའི་ཚེ། འཁོར་ལོ་དང་སྔགས་ཕྲེང་ལ་སོགས་པའི་འོད་ཀྱིས་བདག་དང་འགྲོ་བ་ཐམས་ཅད་ཆོས་ཀྱི་འཁོར་ལོ་དང་ལྡན་པར་གྱུར་པར་བསམ་པར་བྱའོ། །
བདེན་པའི་བྱིན་རླབས་ཀྱིས་ཞིང་ཁམས་ཐམས་ཅད་དུ་ཆོས་ཀྱི་འཁོར་ལོ་རྒྱུན་མི་འཆད་པར་གྱུར་པར་བསམ་མོ། །དེ་ནས་ཚིགས་སུ་བཅད་པ་གསུམ་ལ་སོགས་པ་ཅི་རིགས་པར་བརྗོད་ནས་ཡི་གེ་བརྒྱ་པ་ཡང་བརྗོད་དེ་ལངས་ནས་ཅི་བདེ་བར་སྤྱད་དོ། །དེ་ལྟར་གསང་སྔགས་ཕྱག་རྒྱའི་ཚུལ་

71-1-306a

དུ་འདོན་པ་གསུམ་པོ་ནི་བྱང་ཆུབ་སེམས་དཔའ་སྒྲིབ་པ་རྣམ་པར་སེལ་བའི་རྒྱུད་ལས། བསྐལ་པ་སྟོང་ཕྲག་བསགས་པ་ཡི། །སྡིག་དང་གང་ཞིག་ལྡན་པས་ཀྱང་། །གནས་གསུམ་པའམ་གཉིས་སམ་གཅིག །ཕྱག་རྒྱས་བཏབ་ནས་སྔགས་བརྗོད་ན། །ཆོས་ཀྱི་
ཆར་ཆེན་བབས་པ་ནི། །སྡིག་པའི་དྲི་མ་ཀུན་བཀྲུས་ཏེ། །ནད་མེད་ཚེ་རིང་དཔལ་འཕེལ་ཞིང་། །ལྷ་མི་ཀུན་གྱི་མཆོད་ཆེན་འཐོབ། །གང་གིས་ཡིད་མཉམ་གཞག་ནས་ནི། །ཕྱག་རྒྱ་སྔགས་དང་བཅས་དྲན་ལ། །འཇིགས་དང་འཚེ་བ་ཀུན་མེད་དེ། །ཆོས་ཀྱི་ཁོར་ལོ་བསྐོར་བར་
འགྱུར། །ཞེས་གསུངས་སོ། །གསང་སྔགས་སྐུ་ལ་དམིགས་པ་ནི་ཁྲུས་ལ་སོགས་པ་སྔོན་ལྟར་བྱས་ནས། རང་གི་སྙིང་གར་ཐལ་མོ་སྦྱར་ཏེ་ཚར་གཅིག་བརྗོད་པས་སྙིང་གར་པདྨ་དང་ཟླ་བ་ལ་གནས་པའི་རྣམ་པར་སྣང་མཛད་ཞལ་གཅིག་ཕྱག་གཉིས་པ་དཀར་པོ་བྱང་ཆུབ་མཆོག་གི་ཕྱག་
རྒྱ་ཅན་སེམས་དཔའི་སྐྱིལ་ཀྲུང་གིས་བཞུགས་པར་བསམས་ལ། གཡེང་བ་ལ་སོགས་པའི་སྐྱོན་དང་བྲལ་བས་བདུན་ལ་སོགས་པ་བརྗོད་པའི་ཚེ་སྐུ་དེའི་མཚན་དང་དཔེ་བྱད་དང་གཟི་བརྗིད་ཐམས་ཅད་རང་ལ་འབར་བར་བསམ་མོ། །དེའི་བདེན་པའི་བྱིན་རླབས་ཀྱིས་བདག་རྣམ་པར་སྣང་མཛད་
ཀྱིས་བྱིན་གྱིས་བརླབས་པར་མོས་ལ། ཚིགས་སུ་བཅད་པ་གཅིག་ལ་སོགས་པས་སྨོན་ལམ་དགེ་བའི་ཕྱིར་བསྔོ་བར་བྱའོ། །ཡང་ན་ཁྲུས་ལ་སོགས་པ་སྔོན་ལྟར་རྒྱས་པར་བྱས་ནས་སྙིང་ག་དང་མགྲིན་པར་ཐལ་མོ་སྦྱར་ཏེ། སྔགས་ཚར་རེ་རེ་བརྗོད་པས་སྙིང་ག་དང་མགྲིན་པར་པདྨ་དང་
ཟླ་བ་ལ་གནས་པའི་རྣམ་པར་སྣང་མཛད་ཞལ་བཞི་ཕྱག་བཞི་ཞབས་གཉིས་སེམས་དཔའི་སྐྱིལ་ཀྲུང་གིས་བཞུགས་པ། ཕྱག་དང་པོ་གཉིས་ཆོས་ཀྱི་འཁོར་ལོ་དང་ཆོས་འཆད་པའི་ཕྱག་རྒྱ་ཅན་གཉིས་ཀྱིས་བྱང་ཆུབ་མཆོག་གི་ཕྱག་རྒྱ་ཅན་གངས་ཀྱི་རི་བོ་འདྲ་བ་ལ་རྒྱན་ཐམས་ཅད་
ཀྱིས་བརྒྱན་པར་བསམས་ལ། སྐུ་དེ་ལ་དམིགས་པ་གཏད་ནས་གཡེང་བ་ལ་སོགས་པའི་རྟོག་པ་ཐམས་ཅད་དང་བྲལ་བས་ཉི་ཤུ་རྩ་གཅིག་ལ་སོགས་པ་བརྗོད་པས་སྐུ་དེའི་འོད་ཟེར་གྱིས་བདག་དང་གཞན་གྱི་སྡིག་པ་ཐམས་ཅད་ཟད་པར་ཡང་ཡང་བསམ་པར་བྱས་ནས། དེའི་བདེན་

71-1-306b

པའི་བྱིན་རླབས་ཀྱིས་འགྲོ་བ་ཐམས་ཅད་སངས་རྒྱས་རྣམ་པར་སྣང་མཛད་ཀྱི་སྐུ་ལ་ཤིན་ཏུ་དད་པར་གྱུར་པར་ཡང་བསམ་མོ། །དེ་ནས་ཚིགས་སུ་བཅད་པ་གཉིས་ལ་སོགས་པས་དགེ་བའི་སྨོན་ལམ་བསྔོ་བར་བྱའོ། །ཡང་ན་ཁྲུས་ལ་སོགས་པ་སྔར་ལྟར་རྒྱས་པར་བྱས་ནས། 
གནས་གསུམ་དུ་རྡོ་རྗེ་ཐལ་མོ་སྦྱར་ནས་སྔགས་ཚར་རེ་བརྗོད་ནས་གནས་གསུམ་དུ་པདྨ་དང་ཟླ་བ་ལ་བཞུགས་པའི་སངས་རྒྱས་རྣམ་པར་སྣང་མཛད་དཀར་པོ། ཞལ་བཞི་ཕྱག་བརྒྱད་ཞབས་བརྒྱད། བྱང་ཆུབ་མཆོག་གི་ཕྱག་རྒྱ་དང་སེམས་དཔའི་སྐྱིལ་ཀྲུང་གིས་བཞུགས་པ། རིན་
པོ་ཆེའི་ན་བཟའ་དང་རྒྱན་དུ་མས་བརྒྱན་ཅིང་འཛུམ་པའི་མདངས་དང་ལྡན་པ་བསམས་ལ། གཡེང་བ་ལ་སོགས་པའི་སྐྱོན་དང་བྲལ་བས་བརྒྱ་རྩ་བརྒྱད་ལ་སོགས་པ་བརྗོད་པའི་ཚེ་སྐུ་དེ་དག་ཀུན་གྱི་མཚན་དང་དཔེ་བྱད་ཀྱི་འོད་ཀྱིས་བདག་དང་འགྲོ་བ་ཐམས་ཅད་ལོངས་སྤྱོད་རྫོགས་པའི་སྐུའི་
ཆ་བྱད་དུ་བྱས་པར་བསམ། དེའི་བྱིན་རླབས་ཀྱིས་འགྲོ་བ་ཐམས་ཅད་རྣམ་པར་སྣང་མཛད་ཀྱི་སྐུ་མངོན་དུ་གྱུར་པར་བསམས་ལ་བདག་གཞན་གྱི་དོན་དུ་སྨོན་ལམ་དགེ་བའི་དོན་དུ་བསྔོ་བར་བྱའོ། །གསང་སྔགས་ཀྱི་ཚུལ་སྐུ་ལ་དམིགས་པ་འདི་གསུམ་ཡང་། བྱང་ཆུབ་སེམས་དཔའ་
སྒྲིབ་པ་རྣམ་པར་སེལ་བའི་རྒྱུད་ལས་གསུངས་ཏེ། སངས་རྒྱས་ཐུབ་པ་རྣམ་སྣང་མཛད། །འོད་འཕྲོ་ཉི་མ་འབུམ་གཟི་ཅན། །མཚན་དཔེ་དུ་མས་སྤྲས་པའི་སྐུ། །ཕྱག་གཉིས་པའམ་ཕྱག་བཞི་འམ། །ཡང་ན་ཕྱག་བརྒྱད་པ་ཡང་རུང་། །རང་གི་ལུས་ངག་ཡིད་གནས་ན། །
བསམས་ནས་དེ་དང་དེ་དག་ཏུ། །དམིགས་པ་གཏད་ནས་སྔགས་བརྗོད་པས། །ནད་དང་སྡུག་བསྔལ་ཚ་བ་དང་། །འཇིགས་དང་ཕོངས་དང་དབུལ་བ་དང་། །ཚེ་ལ་གནོད་བྱེད་ལ་སོགས་པའི། །གདོན་དང་བར་ཆད་ཐམས་ཅད་སེལ། །ཡང་དང་ཡང་དུ་གོམས་པས་ནི། །གོ་འཕང་
རིག་འཛིན་གནས་ཐོབ་འགྱུར། །རིག་སྔགས་བྱང་ཆུབ་སེམས་དཔའ་ཡང་། །སྐྱེ་བ་དུ་མས་དཔགས་ནས་ཀྱང་། །སངས་རྒྱས་ཞིང་ཁམས་སྦྱངས་བྱས་ཏེ། །དག་པའི་ཞིང་རྣམས་རྣམ་འཕྲུལ་གྱི། །སྐུ་ཡི་འདུ་བྱེད་དུ་མས་ནི། །གདུལ་བྱ་ཚིམ་པར་མཛད་པར་འགྱུར། །ཞེས་སོ། །

71-1-307a

རྨི་ལམ་ལྟ་བུར་ཀུན་དུ་ཤེས་སོ་ཞེས་པ་དངོས་གྲུབ་ཀྱི་རྟགས་ཐ་མ་རྨི་ལམ་དུ་འབྱུང་བ་ཡང་ཤེས་པར་བྱའོ། །ཚེས་བརྒྱད་ལ་སོགས་པའི་དུས་ཁྱད་པར་ཅན་དུ་བསྒྲུབ་པ་ཕན་ཡོན་དང་བཅས་པའོ། །བྱེ་མ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ནས་ལ་
སོགས་པ་ནི་ཤི་བ་ལ་ཕན་གདགས་པའི་ཆོ་གའོ། །དེ་ཡང་ཤི་བ་ལ་གཉིས་ཏེ། རྙིང་པ་དང་། སར་པའོ། །དང་པོ་ལ་རོ་མེད་པ་དང་། རོ་ཡོད་པའོ། །དེ་ལ་རོ་མེད་པ་ནི་མིང་དང་བཅས་པའི་སྔགས་བརྗོད་ཅིང་བདེན་པ་དང་སྨོན་ལམ་གདབ་པའོ། །རོའི་རུས་པའམ་གོས་ལ་
སོགས་པ་ཡོད་པ་ལ་ནི་ཡུངས་ཀར་དང་བྱེ་མ་ལ་སྔགས་བརྗོད་ཅིང་གཏོར་བའོ། །སར་པ་ལ་ནི་བདུན་ཚིགས་བྱའོ། །བདུན་ཚིགས་སུ་བྱ་བ་ལ་འདི་ལྟར་རྟེན་རོ་ཡོད་པ་དང་མེད་པའོ། །གལ་ཏེ་རོ་ཡོད་ན་དང་པོར་ཆོ་ག་ཚུལ་བཞིན་དུ་བྱས་པའི་བུམ་པའི་ཆུ་སྔ་ནས་ཡོད་དམ་འཕྲལ་དུ་
བསྒྲུབས་ཀྱང་རུང་སྟེ། སྤོས་ལྔ་དང་བཅས་པས་རོ་ལ་སྙིང་པོའི་སྔགས་བརྗོད་ཅིང་རོ་ཁྲུས་བྱའོ། །དེ་ནས་གྲོ་གའམ་རས་ལ་སོགས་པའི་གཞི་ལ་གུར་གུམ་དང་གི་ཝང་གིས་སྙིང་པོའི་སྔགས་བྲིས་ལ་རོའི་སྙིང་གར་གདགས་སོ། །སརྦ་ཏ་ཐཱ་ག་ཏ་སཱུརྱ་གུ་ཧྱ་ཨ་དྷིཥྛཱ་ན་ཨ་དྷིཥྛི་ཏེ་སྭཱ་ཧཱ། ཞེས་
གསང་གནས་སུའོ། །ཨཱ་ཡུརྡཏྟེ་སྭཱ་ཧཱ། རྐང་བོལ་གཡས་ལའོ། །པུ་ཎྱུན་དཏྟི་སྭཱ་ཧཱ། རྐང་བོལ་གཡོན་ལའོ། །པུ་ཎྱུམ་བི་ལོ་ཀི་ཏེ་སྭཱ་ཧཱ། པུས་མོ་གཡས་སུའོ། །པུ་ཎྱུམ་ཨཱ་བ་ལོ་ཀི་ཏེ་སྭཱ་ཧཱ། པུས་མོ་གཡོན་པ་ལའོ། །མྲྀ་ཏྱུ་དཎྜི་སྭཱ་ཧཱ། དཔྱི་གཡས་སུའོ། །ཡཱ་མ་དཎྜི་
སྭཱ་ཧཱ། དཔྱི་གཡོན་པར་རོ། །ཡ་མ་དཱུ་ཏེ་སྭཱ་ཧཱ། ལྟེ་བར་རོ། །སཾ་གྷ་ར་ཎི་སྭཱ་ཧཱ། ནུ་མ་གཡས་སུའོ། །སཾ་བྷ་ར་ཎི་སྭཱ་ཧཱ། ནུ་མ་གཡོན་དུའོ། །སན་དྷཱ་ར་ཎི་སྭཱ་ཧཱ། མགྲིན་པར་རོ། །པྲ་ཏི་ས་ར་ཎི་སྭཱ་ཧཱ། ལག་ངར་གཡས་པར་རོ། །ཨོཾ་ཛོ་བི་ཏ་སྭཱ་ཧཱ། ལག་ངར་གཡོན་དུའོ། །ཏེ་
ཛོ་བ་ཏི་སྭཱ་ཧཱ། དཔུང་པ་གཡས་སུའོ། །ཛ་ཡ་བ་ཏི་སྭཱ་ཧཱ། དཔུང་པ་གཡོན་ལའོ། །སརྦ་ཏ་ཐཱ་ག་ཏ་མུ་དྲ་ཨ་དྷིཥྛཱ་ན་ཨ་དྷིཥྛི་ཏེ་སྭཱ་ཧཱ། དཔྲལ་བར་རོ། །ཡང་སྔགས་རིང་ཐུང་གཉིས་ཀ་སྤྱི་བོར་གདགས་སོ། །མིག་གཡས་སུ་ཨཾ་ཧཱུཾ། གཡོན་པར་བཾ་ཧཱུཾ། རྣ་བ་གཡས་སུ་སཾ་ཧཱུཾ། 

71-1-307b

གཡོན་པ་ཛཾ་ཧཱུཾ། སྔགས་ཐམས་ཅད་ཡིག་འབྲུ་གསལ་བར་བྲིའོ། །རྒྱན་དུ་མ་ཡང་རོ་ལ་གདགས་སོ། །གལ་ཏེ་རོ་མེད་ན་ཡང་ཤིང་སྟག་མ་ལ་ཤི་བའི་གཟུགས་བྲིས་ནས་ཡི་གེ་དེ་ལྟར་དགོད་དོ། །དེ་ནས་རོ་ཡོད་ན་སྣོད་ཀྱི་ནང་དུ་གཞག་པར་བྱ་སྟེ། རྡོ་འམ་ས་འམ་ཤིང་ངམ་འབྱོར་ན་
ཟངས་སམ་དངུལ་ལམ་གསེར་ལས་བརྡུངས་ལ་བྱའོ། །དེ་ཡང་རབ་ཏུ་བྱུང་བ་ལ་དཀར་པོ་མཆོད་རྟེན་གྱི་དབྱིབས་སོ། །དགེ་བསྙེན་ལ་ནི་པདྨ་དམར་པོ་ཁ་སྦྱར་གྱི་གཟུགས་སོ། །རྒྱལ་པོ་ལ་ནི་སྔོན་པོ་གཙུག་ཏོར་ལྟ་བུའོ། །བློན་པོ་ལ་ནི་དམར་སྐྱ་ཟ་མ་ཏོག་ལྟ་བུའོ། །ཐ་མལ་པ་
ཕོ་ལ་ནི་སེར་སྐྱ་གདན་ཁྲི་ལྟ་བུའོ། །མོ་ལ་སྔོ་སྐྱ་བིལ་བའི་འབྲས་བུ་ལྟ་བུའོ། །བྱིས་པ་ལ་ནི་ལྷུང་བཟེད་ལྟར་དམར་སེར་བྱས་ནས་ཕྱོགས་ཐམས་ཅད་དུ་རླུང་མི་ཐར་བར་འཇམ་ཞིང་དབྱིབས་ལེགས་པར་བཟོས་ནས་དེའི་ཁ་ནས་ནང་དུ་བཞག་སྟེ། དྲི་བཟང་པོ་དུ་མ་བསྒོས་པའི་རས་
དཀར་པོས་དཀྲིས་ནས་རོའི་ཁ་ནི་ལྷོར་བསྟན་མགོ་ནི་ནུབ་ཏུ་བསྟན་ནས་ཅུང་ཟད་བསླངས་ཏེ་རབ་ཏུ་དབེན་པའི་ས་ཕྱོགས་སུ་གཞག་གོ། །རོའི་སྤྱི་བོའམ་སྙིང་ག་ནས་གཟུངས་ཐག་སྲད་བུ་དམར་པོ་ཞིག་བཏགས་ལ་སྒྲོམ་གྱི་ནུབ་ཕྱོགས་སུ་དྲང་བར་བྱའོ། །སྒྲོམ་དེའི་སྟེང་དུ་གདུགས་
ཁྲ་བོ་ཞིག་དབུབ་པར་བྱའོ། །སྒྲོམ་གྱི་ཕྱོགས་བཞིར་རིན་པོ་ཆེ་སྣ་བདུན་ལ་སོགས་པ་མཁོ་བའི་ཡོ་བྱད་དུ་མ་འདྲ་འབག་ཏུ་བྱས་ནས་དགོད་པར་བྱའོ། །གཞན་ཡོལ་བ་ནི་དཀར་པོའམ་ཡང་ན་དམར་པོས་བསྐོར་བར་བྱའོ། །གཞན་ཡང་བ་དན་དང་རྒྱལ་མཚན་དང་བླ་རེ་དང་ལྷབ་ལྷུབ་
དང་ལྡ་ལྡི་དང་ཆུན་འཕྱང་དུ་མ་ཡང་ཅི་འབྱོར་བ་བྲི་བར་བྱའོ། །གཞན་ཡང་འབྲས་ཆན་དང་ཐུག་པ་དང་ཁུར་བ་དང་ཟན་དྲོན་དང་འབྲས་དང་ཁྲེ་དང་ཅི་ཙེ་དང་གྲོ་དང་མོན་སྲན་དང་རྒྱ་སྲན་དང་ནས་ལ་སོགས་པའི་འབྲུ་ཐམས་ཅད་ལས་ཁ་ཟས་ལེགས་པར་བཤམས་ནས་སྣོད་མཛེས་པ་དུ་
མའི་ནང་དུ་བཞག་གོ། །གཞན་ཡང་ཡོན་ཆབ་དང་བདུག་སྤོས་དང་མེ་ཏོ་དང་ཕྲེང་བ་དང་མར་མེ་དང་བྱུག་པ་དང་ཞལ་ཟས་དང་འཛམ་བུ་ཏི་བ་དང་བུ་རམ་དང་ཀ་ར་ཤིང་ཐོག་སྣ་ཚོགས་དང་ཤ་བཙོས་དང་ཉ་ཤ་དང་ཚོད་མ་དུ་མ་ཡང་ཕྱོགས་རེ་རེར་དགྲམ་མོ། །སིལ་སྙན་གྱི་ཕྲེང་བ་ཡང་བྲི་བར་

71-1-308a

བྱའོ། །གལ་ཏེ་མ་འབྱོར་པ་ཐམས་ཅད་ནི་རྡོ་ལ་སོགས་པའི་སྣོད་རྒྱན་མེད་དོ། །འབྱོར་པ་འབྲིང་གིས་རྒྱན་ཡོད་པའོ། །རབ་ཀྱིས་ནི་རིན་པོ་ཆེ་ལས་བྱས་པའམ་རིན་པོ་ཆེའི་ཕྲ་བཏབ་པའོ། །ད་ནི་ཆོ་ག་ཡང་གང་ཟག་གཅིག་གིས་གཟུངས་སྔགས་ཅེས་བརྗོད་
ཅིང་མཎྜལ་ལ་མེ་ཏོག་བཀྲམ་ནས་བུམ་པ་གཅིག་དང་སཱཙྪ་གཅིག་བྱས་ཏེ་འོག་ནས་འཆད་པའི་ཏིང་ངེ་འཛིན་དང་ལྡན་པར་བྱའོ། །འབྱོར་པ་འབྲིང་གིས་མཎྜལ་ཁྲུ་གང་བར་མེ་ཏོག་བཀྲམ་ནས་སཱཙྪ་ལྔ་དང་བུམ་པ་ལྔ་དང་གཟུངས་དང་ཕ་རོལ་ཏུ་ཕྱིན་པའི་མདོ་ཕྲན་གཅིག་བཀླག་ཅིང་འོག་
ནས་འབྱུང་བའི་ཏིང་ངེ་འཛིན་དང་བདེན་པ་བརྗོད་པ་དང་སྨོན་ལམ་གདབ་པར་བྱའོ། །ཐུན་མཚམས་ཞག་གྲངས་ནི་མཐུན་ནོ། །འབྱོར་པ་རབ་ཀྱིས་ནི་རོ་དང་རོའི་སྣོད་བརྒྱན་ཅིང་རོ་བཅུག་ནས། རོའི་ལྷོ་ཕྱོགས་སུ་ས་ལེགས་པར་བསྟར་བའི་དཀྱིལ་འཁོར་གྲུ་བཞི་ནས་བཅུ་དྲུག་གི་བར་
དུ་ཅི་རིགས་པར་བྱ་སྟེ། ཁྲུ་བཞི་པ་མཐོ་གང་ནས་ཁྲུ་གང་གི་བར་བརྩིག་པར་བྱའོ། །དེ་ལ་མཁས་པས་ཐིག་འདི་ལྟར་གདབ་པོ། །ཚངས་ཐིག་ཟུར་ངོས་ལེགས་བཏབ་ནས། །ཟུར་བཞི་ལོ་མ་གདབ་པར་བྱ། །ཆ་ཆེན་བཞི་རུ་འགྱུར་བ་ཡིན། །དེ་ནས་གསུམ་གསུམ་བགོས་ནས་
ནི། །ཆ་ཆེན་བཅུ་གཉིས་འགྱུར་བ་ཡིན། །དེ་ནས་གཉིས་སུ་བགོས་ནས་ནི། །ཆ་ཆེན་ཉི་ཤུ་བཞི་རུ་འགྱུར། །དེ་ནས་ཆ་ཕྲན་བགོས་ནས་ནི། །ཚངས་པའི་ཐིག་གི་ངོས་གཉིས་ཀྱི། །ཆ་ཆེན་དང་པོའི་ཕྱེད་དུ་བགོ། །ཕྱི་ཡི་ཆ་ཕྱེད་དེ་བཞིན་བགོ། །ཆ་ཆེན་གཉིས་པའང་ཕྱེད་དུ་བགོ། །
ནང་གི་ཆ་ཕྱེད་དེ་བཞིན་བགོ། །ཆ་ཆེན་གསུམ་པའི་མཐའ་ལ་གཅིག །ཆ་ཆེན་བཞི་པའི་ཕྱི་ནང་གི། །ཆ་རེ་བཏབ་ཅིང་ལྔ་པ་ཕྱེད། །ཆ་ཆེན་དྲུག་པ་ལྷ་སྣམ་འགྱུར། །ཆ་ཆེན་བདུན་པ་ཕྱི་ནང་གི། །ཆ་རེ་གདབ་ཅིང་དབུས་གཉིས་བཞག །ཆ་ཆེན་བརྒྱད་པ་ཕྱེད་དུ་བགོ། །ཆ་ཆེན་
དགུ་པ་བཞི་རུ་བགོ། །ཆ་ཆེན་བཅུ་པ་ཕྱི་ནང་གི། །ཆ་རེ་གདབ་ཅིང་དབུས་གཉིས་གཞག །ཆ་ཆེན་བཅུ་གཅིག་ཕྱེད་དུ་བགོ། །ཆ་ཆེན་བཅུ་གཉིས་ཁོར་ཡུག་འགྱུར། །ཕྱོགས་གསུམ་དུའང་དེ་བཞིན་ནོ། །སྒོ་གཅིག་བྱེད་ན་ཚངས་ཐིག་དང་། །ཕྱོགས་གཅིག་ཟུར་ཐིག་གདབ་

71-1-308b

བྱས་ནས། །ཚངས་པའི་ཐིག་གི་ངོས་གཉིས་སུ། །ཆ་ཆེན་ལྔ་ལྔར་བགོ་བྱས་ནས། །ཆ་ཆེན་བཅུ་རུ་འགྱུར་བ་ཡིན། །དེ་ནས་གཉིས་སུ་བགོ་བྱས་ནས། །ཆ་ཆེན་ཉི་ཤུར་འགྱུར་བ་ཡིན། །དེ་ནས་ཆ་ཕྲན་བགོ་བར་བྱ། །ཚངས་པའི་ཐིག་གི་ངོས་གཉིས་ཀྱི། །ཆ་ཆེན་དང་པོ་ཕྱེད་དུ་
བགོ། །ཕྱི་ཡི་ཆ་ཕྱེད་དེ་བཞིན་བགོ། །ཆ་ཆེན་གཉིས་ནི་ཕྱེད་དུ་བགོ། །ནང་གི་ཆ་ཕྱེད་དེ་བཞིན་བགོ། །ཆ་ཆེན་གསུམ་པའི་མཐར་ཆ་གཅིག །ཆ་ཆེན་བཞི་པ་ལྷ་སྣམ་འགྱུར། །ཆ་ཆེན་ལྔ་པ་ཕྱི་ནང་གི། །ཆ་རེ་གདབ་ཅིང་དབུས་གཉིས་གཞག །ཆ་ཆེན་དྲུག་པ་ཕྱེད་དུ་བགོ། །ཆ་
ཆེན་བདུན་པ་བཞི་རུ་བགོ། །ཆ་ཆེན་བརྒྱད་པ་ཕྱི་ནང་གི། །ཆ་རེ་གདབ་ཅིང་དབུས་གཉིས་གཞག །ཆ་ཆེན་དགུ་པ་ཕྱེད་དུ་བགོ། །དེ་ལ་བསྐོར་བ་རིམ་གཉིས་བྱ། །གསུམ་པ་མཐའ་ཡི་ཆ་ཕྲན་སྐོར། །ཆ་ཆེན་བཅུ་པ་ཁོར་ཡུག་འགྱུར། །སྒོ་གསུམ་པ་སོགས་བྱེད་འདོད་
ན། །ཕྱི་ནང་དཀྱིལ་འཁོར་གང་ཡིན་པའི། །ཚད་ཀྱི་རིམ་པས་བྱ་བ་ནི། །ཆ་ཕྲན་དབྲི་དང་བསྣན་པར་བྱ། །དེ་ནས་བློ་དང་ལྡན་པས་ཚོན་སྣ་མ་ལུས་པས། དཀྱིལ་འཁོར་གྲུ་བཞི་པ་རིམ་པ་གཉིས་སམ་ཡང་ན་རིམ་པ་གཅིག་ཁོ་ན་བྲིའོ། །དེར་སྔོན་དུ་བཤད་པའི་དཀྱིལ་འཁོར་
ལྷ་གང་མོས་པ་དགོད་པར་བྱའོ། །གལ་ཏེ་རིམ་པ་གཉིས་བྲིས་ན་བར་ཁྱམས་ལ་འཇིག་རྟེན་སྐྱོང་བ་བཅུ་དགོད་པར་བྱའོ། །དེ་ཡང་། བརྒྱ་བྱིན་དཀར་པོ་རྡོ་རྗེ་འཆང་། །མེ་ལྷ་དམར་པོ་མེ་ཐབ་འཆང་། །གཤིན་རྗེ་སྔོན་པོ་བེན་ཅོན་འཆང་། །བདེན་བྲལ་སྔོ་སྐྱ་རལ་གྲི་འཆང་། །
ཆུ་བདག་དཀར་པོ་ཞགས་པ་འཆང་། །རླུང་ལྷ་ལྗང་སེར་བ་དན་འཛིན། །གནོད་སྦྱིན་ལྗང་སྔོན་དབྱུག་པ་འཆང་། །དབང་ཕྱུག་ལྗང་སྐྱ་རྩེ་གསུམ་འཛིན། །ས་བདག་མོ་ནི་བུམ་ལྗང་སེར། །ཉི་ཟླ་ཚངས་པ་དཀར་སེར་ནི། །འོད་འཕྲོ་འཁོར་ལོ་འཛིན་པའོ། །ལྷ་དེ་དག་གི་སྔགས་
སམ་ཕྱག་རྒྱའམ་སྐུ་དགོད་པར་བྱའོ། །གཞན་ཡང་གོང་དུ་བཤད་པའི་མཆོད་པའི་ཡོ་བྱད་ཐམས་ཅད་དཀྱིལ་འཁོར་གྱི་མཐའ་ནས་བསྐོར་བར་བྱའོ། །ཡོལ་བ་ནི་དམར་པོའོ། །བླ་རེ་ནི་སྔོན་པོའོ། །དེ་ནས་སྔོན་གྱི་ཆོ་གས་དཀྱིལ་འཁོར་བསྒོམ་པ་སྟེ། རང་བཞིན་གྱི་དཀྱིལ་འཁོར་

71-1-309a

དང་གཉིས་སུ་མེད་པར་བྱས་ནས་མཆོད་བསྟོད་ནས་ཚིག་འདིས་གསོལ་བ་གདབ་པོ། །དཀྱིལ་འཁོར་གཙོ་བོ་ལ་སོགས་པའི། །སངས་རྒྱས་བྱང་ཆུབ་སེམས་དཔའ་རྣམས། །ཀུན་ནས་བདག་ལ་དགོངས་སུ་གསོལ། །བདག་མིང་འདི་ཞེས་བྱ་བ་ཡིས། །ཚེ་འདས་
འདི་ཞེས་བྱ་བ་ཡི། །དོན་དུ་དཀྱིལ་འཁོར་འདི་བཞེངས་ན། །ཡོ་བྱད་ཅི་འབྱོར་བདག་གིས། །གུས་པས་ཁྱོད་ལ་མཆོད་བྱེད་ན། །སྙིང་བརྩེར་དགོངས་ནས་བཞེས་སུ་གསོལ། །དེ་ནས་འཇིག་རྟེན་སྐྱོང་བ་ལ་མཆོད་ཅིང་གཏོར་མ་ཕུལ་ནས་ཚེ་འདས་པའི་དོན་དུ་ཆོ་ག་བྱད་པ་ལ་བར་
དུ་གཅོད་པ་སོལ་ཅིག་ཅེས་གསོལ་བ་གདབ་པོ། །དེ་ནས་རྡོ་རྗེ་གནོད་སྦྱིན་ལ་སོགས་པའི་ཁྲོ་བོ་ཆེན་པོ་རྣམས་ལ་ཡང་མཆོད་པ་དང་གཏོར་མ་ཕུལ་ཏེ། དེ་བཞིན་དུ་གསོལ་བ་གདབ་པོ། །དཀྱིལ་འཁོར་དེ་དང་འབྲེལ་བར་ལྷོ་ཕྱོགས་སུ་ནི་སཱཙྪ་བརྒྱ་རྩ་བརྒྱད་བཀོད་པའི་དཀྱིལ་འཁོར་
དང་འབྲེལ་པར་གཟུངས་ཀྱི་ཆོ་གས་སྔགས་བརྗོད་དོ། །ཤར་ཕྱོགས་སུ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་བཀླག་གོ། །ནུབ་ཕྱོགས་སུ་ནི་ཐེག་པ་ཆེན་པོའི་མདོ་སྣ་ཚོགས་པ་ཇི་སྙེད་ཅི་ནུས་པ་བཀླག་གོ། །བྱང་ཕྱོགས་སུ་ནི་མྱ་ངན་ལས་འདས་པའི་མདོ་བཀླག་གོ། །དེའི་ཚེ་སློབ་
དཔོན་ལ་སོགས་པ་ཐམས་ཅད་ཀྱིས་རང་གི་ལྷག་པའི་ལྷར་བསྒོམས་ནས་མདུན་དུ་གཙུག་ཏོར་དྲི་མ་མེད་པའི་ལྷའི་དཀྱིལ་འཁོར་དམིགས་ནས་བཀླག་པ་དང་སྔགས་བརྗོད་དེ་བདག་གི་སྙིང་གའི་ས་བོན་གྱི་འོད་ཀྱིས་མདུན་གྱི་དཀྱིལ་འཁོར་གྱི་ལྷ་བསྐུལ་ནས་ལྷའི་ཐུགས་ཀའི་འོད་ཟེར་གྱིས་ཁམས་
གསུམ་ཐམས་ཅད་ཁྱབ་ནས་ཁྱད་པར་དུ་བསྒྲུབ་བྱ་ལ་ཕོག་པས་སྔོན་གྱི་རྣམ་པར་སྨིན་པའི་ལུས་གསལ་བར་བལྟས་ནས་བསྒྲུབ་བྱ་དེའི་བཤང་ལམ་དུ་ཡི་གེ་དུ་ནག་པོ་ཅིག་བསམ་མོ། །ཡི་གེ་དུ་དེའི་འོད་ཀྱིས་ས་འོག་སྟོང་ཕྲག་ཉི་ཤུ་ཞབས་སུ་གསལ་བར་བྱས་ནས་བསྒྲུབ་བྱ་དེའི་
དབང་པོའི་སྤྱོད་ཡུལ་དུ་དམྱལ་ཁམས་བཅུ་དྲུག་གསལ་བར་བྱ་བར་བསམ་མོ། །དེ་ནས་བསྒྲུབ་བྱ་དེ་ཤིན་ཏུ་འགྱོད་ཅིང་འདར་ནས་མྱ་ངན་གྱིས་གདུངས་ཏེ་སྔོན་དུ་སྤྱད་པའི་སྡིག་པའི་ལས་ཐམས་ཅད་དྲན་ནས་འགྱོད་ཅིང་སྨྲེ་སྔགས་འདོན་ཅིང་བཤགས་པར་བསམས་ལ། སྐབས་འདིར་ལས་

71-1-309b

ཀྱི་སློབ་དཔོན་གྱིས་རོ་དེ་ལ་ཁྲུས་བྱས་བདེན་པའི་ཚིགས་བཅད་ཀྱིས་དུག་བསལ་བར་བྱའོ། །དེ་ལ་ཚིགས་བཅད་འདི་ཡང་བརྗོད་དོ། །འཇིག་རྟེན་འདི་འམ་འཇིག་རྟེན་ལ་སོགས་པ་གོང་དུ་སྨོས་པའི་ཚིགས་སུ་བཅད་པ་རྣམས་ཅི་རིགས་པར་བསྒྱུར་ཅིང་བརྗོད་པར་བྱའོ། །སྐབས་དེར་
བསྒྲུབ་བྱ་ཐལ་མོ་སྦྱར་ནས་གསུམ་ལ་སྐྱབས་སུ་འགྲོ་ཞིང་ཕྱག་འཚལ་བར་བསམས་ཤིང་གཉེན་འདུན་ཞིག་གིས་ཚུལ་ཁོ་ན་ལྟར་བྱའོ། །སློབ་དཔོན་གྱིས་ཀྱང་སྔགས་ཨ་མོ་གྷ་བི་མ་ལེ་ཨཱ་ཀཪྵ་ཡ་ཞེས་པའི་སྐབས་སུ་ཨ་མོ་གྷའི་སྐབས་སུ་བསྒྲུབ་བྱའི་མིང་བཅུག་ནས་བརྗོད་དོ། །
དེས་དཀྱིལ་འཁོར་གྱི་ལྷ་རྣམས་ཀྱི་ཐུགས་ཀའི་སྔགས་ཀྱི་འོད་ཟེར་གྱིས་བསྒྲུབ་བྱའི་བཤང་སྐོའི་ཡི་གེ་དུ་ནག་པོ་ལ་ཕོག་པས་རྐེད་པ་ཡན་ཆད་ནི་སྡིག་པའི་གཟུགས་རྐེད་པ་མན་ཆད་ནི་མིའི་གཟུགས་ཤིག་བུད་ནས་གཟུགས་དེ་ཉིད་དེ་འདྲ་བ་དུ་མར་གྱུར་ནས་དམྱལ་བ་བཅུ་དྲུག་
གི་གནས་ཁང་ཁེངས་པར་སོང་བར་བསམ་མོ། །ལུས་འདི་ནི་ལྷ་དང་སྔགས་ཀྱི་འོད་ཟེར་གྱིས་སྦྱངས་པས་སྔོན་གྱི་གཟུགས་བྱད་ལས་ཤིན་ཏུ་མདངས་བཟང་བར་བསམ་མོ། །ཨཾ་བཾ་སཾ་ཛཾ་ཆེ་གེ་མོ་ན་ར་ཀ་སྱ་སརྦ་ཀརྨ་པ་རི་ཤོདྷ་ཡ་སྭཱ་ཧཱ། ཞེས་རྒྱུན་དུ་བརྗོད་དོ། །ཐུན་མཚམས་
སུ་ནི་སློབ་དཔོན་ཉིད་ཀྱིས་དཀྱིལ་འཁོར་ལ་ཕྱག་འཚལ་ནས་ཐལ་མོ་སྦྱར་ཏེ་སྔགས་ཚར་བརྒྱད་བཀླག་པའི་ཚེ་ནི་ཆེ་གེ་མོ་མོཀྵ་ཐ་ལ་པྲཔྟ་ཀུརྦནྟུ་སྭཱ་ཧཱ། ཞེས་བརྗོད་ནས་སྨོན་ལམ་འདི་ཡང་གདབ་པར་བྱའོ། །འདི་ཞེས་བྱ་བ་རིགས་ཀྱི་བུ། །དཀོན་མཆོག་གསུམ་ལ་བདག་སྐྱབས་
མཆི། །སངས་རྒྱས་དམ་ཆོས་དགེ་འདུན་དང་། །རིག་སྔགས་གསང་སྔགས་གཟུངས་སྔགས་དང་། །སྙིང་པོ་ཕྱག་རྒྱའི་བདེན་པ་དང་། །གཞན་ཡང་བདེན་པའི་བྱིན་རླབས་ཀྱིས། །དམྱལ་བའི་སྡུག་བསྔལ་མྱུར་ཞི་ནས། །བདེ་བའི་ཞིང་དུ་མྱུར་སྐྱེ་ཤོག །ཅེས་ལན་གསུམ་
བརྗོད། གཞན་ཡང་སྨོན་ལམ་དུ་མ་ཡང་བརྗོད་དོ། །དེ་ནས་ལྕགས་སྣོད་ཀྱི་ནང་དུ་དུ་བ་མེད་པའི་མེ་ལ་ཏིལ་ནག་པོ་བསྲེག་ཅིང་ཨོཾ་ཆེ་གེ་མོ་སརྦ་པཱ་པཾ་ད་ཧ་ན་སརྦ་བི་ཤོ་དྷ་ནི་སྭཱཧཱ་ཞེས་བརྒྱ་རྩ་བརྒྱད་བསྲེག་གོ། །དེ་ནས་བུམ་པའི་ཆུས་ཁྲུས་བྱས་ཡུངས་ཀར་དང་བྱེ་མ་ལ་དྲི་མ་མེད་པའི་

71-1-310a

སྙིང་པོ་བརྒྱ་རྩ་བརྒྱད་བརྗོད་ནས་རོ་འམ་རའི་སྣོད་བྲབ་པར་བྱའོ། །དེའི་འོག་ཏུ་སིལ་སྙན་དུ་མ་དཀྲོལ་ཞིང་བཀྲ་ཤིས་ཚིགས་སུ་བཅད་པ་དུ་མ་བརྗོད་དོ། །དེ་ནས་དཀོན་མཆོག་གི་མཆོད་པ་དང་དགེ་སློང་དང་སྟོན་པ་དང་ནང་དུ་ཡང་དག་འཇོག་ལ་སྟོན་མོ་དྲང་ངོ་། །དེའི་
འོག་ཏུ་བྱིས་པ་དང་དུད་འགྲོ་ལ་ཡང་ཅི་རིགས་པའི་ཟས་སྦྱིན་ཏེ་དེ་ཐམས་ཅད་ལ། ན་མཿསརྦ་ཏ་ཐཱ་ག་ཏ་ཨ་བ་ལོ་ཏེ་ཨོཾ་སཾ་བྷ་ར་སཾ་བྷ་ར་ཧཱུཾ་ཞེས་ལག་པ་གཡས་པས་མཆོག་སྩོལ་བའི་ཕྱག་རྒྱ་དང་བཅས་པར་བདུན་བརྗོད་དེ་སྩལ་ཏོ། །དེ་ནས་སྔགས་འདི་ཚར་གསུམ་བརྗོད་དོ། །ཨོཾ་བཛྲ་
སཏྭ་ས་མ་ཡ། མ་ནུ་པཱ་ལ་། བཛྲ་སཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲི་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་ཝཱན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་
ཡ་སཏྭ་ཨཱཿ  དེ་ལྟར་སྔགས་འདོན་པ་དང་གསུང་རབ་བཀླག་པ་རྒྱུན་མི་ཆད་པར་བྱ་སྟེ། སྡོམ་པ་དང་ལྡན་པའམ་སྐབས་སུ་སྡོམ་པ་བླངས་ཀྱང་རུང་ལྡན་པར་བྱས་ནས་གསུམ་མམ་བཞི་ལ་སོགས་པའི་བར་དུ་མི་ཚིག་གིས་བར་མ་ཆོད་པར་བྱའོ། །འདི་ནི་ཞག་བདུན་ཕྲག་དང་པོ་དམྱལ་
བའི་འཇིག་རྟེན་དག་པ་འཇིག་རྟེན་དབང་ཕྱུག་གི་ཏིང་ངེ་འཛིན་ཞེས་བྱའོ། །ཚིགས་གཉིས་པ་ལ་ནི་བསྒྲུབ་བྱའི་ལྟེ་བར་ཡི་གེ་ཏྲཱཾ་སྔོན་པོ་བསམས་ལ་པ་རི་ཤོ་དྷ་ཡ་སྭཱཧཱ་ཞེས་པ་དང་བཅས་པའི་སྔགས་བརྗོད་པའི་ཚེ་ལྷ་དང་སྔགས་ཀྱི་འོད་ཟེར་གྱིས་བསྒྲུབ་བྱའི་ལུས་ལ་ཕོག་པས་བསྒྲུབ་བྱའི་ལྟེ་
བའི་ཏྲཱཾ་ཡིག་ལས་དུད་འགྲོ་སྣ་ཚོགས་མགོ་ཡོད་པ་སྟེ། མགོ་བྱེ་བ་ལ་ཡན་ལག་བྱེ་བ་དང་ལྡན་པ་སྟེ། སྐེད་པ་ཡན་ཆད་སྦལ་པ་སྔོ་ནག་རྐེད་པ་མན་ཆད་མི་སྔོ་ནག་ཞིག་བུད་ནས་གཟུགས་དེ་འདྲ་བ་དུ་མར་གྱུར་ཏེ་མཐའི་རྒྱ་མཚོའི་ནང་དུ་སོང་བས་རྒྱ་མཚོ་ཁེངས་ཤིང་དེར་ཡང་འགྱོད་པ་དྲག་པོས་
གནས་སོ། །ལུས་འདི་ནི་སྔོན་གྱི་བས་གཟུགས་བཟང་པོར་གྱུར་པར་བསམ་མོ། །བདེན་པ་བརྗོད་པ་དང་སྨོན་ལམ་གྱི་སྐབས་ཐམས་ཅད་དུ་དུད་འགྲོའི་འཇིགས་པ་དང་བྲལ་བར་གྱུར་ཅིག་ཅེས་བརྗོད་པར་བྱའོ། །ལྷག་མ་ཐམས་ཅད་སྔོན་ལྟར་རོ། །འདི་ནི་ཞག་བདུན་ཕྲག་གཉིས་ལ་བྱོལ་

71-1-310b

སོང་གི་འཇིག་རྟེན་དག་པ་འཕགས་པ་འཇམ་དཔལ་གྱི་ཏིང་ངེ་འཛིན་ཞེས་བྱའོ། །ཚིགས་གསུམ་པ་ལ་ནི་བསྒྲུབ་བྱའི་གསང་གནས་སུ་ཡི་གེ་པྲེ་སེར་པོ་བསམས་ལ། ལྷ་དང་སྔགས་ཀྱི་འོད་ཟེར་གྱིས་བསྒྲུབ་བྱའི་ལུས་ལ་ཕོག་ནས་གནས་གསུམ་གྱི་སྒྲིབ་པ་ཐམས་ཅད་ཡི་གེ་པྲེ་ལ་བསྡུས་
ནས་དེ་ལས་མིའི་གཟུགས་ཤིན་ཏུ་རིད་ཅིང་ཡན་ལག་དང་སྐེ་རབ་ཏུ་ཕྲ་བ། གསུས་པ་ཆེ་བ། མདོག་སེར་སྐྱ། ཁ་གདངས་པ་བུད་ནས་ས་འོག་དཔག་ཚད་ལྔ་བརྒྱའི་ཞབས་སུ་གཟུགས་དུ་མར་གྱུར་ནས་ས་འོག་ས་སྟེངས་ཐམས་ཅད་ཁྱབ་པར་གྱུར་ཅིང་སྔོན་གྱི་ལས་ལ་ཡང་འགྱོད་པར་བསམ་
མོ། །པྲེ་ཏ་སརྦ་ཀརྨ་ཨཱ་བ་ར་ཎ་པ་རི་ཤོ་དྷ་ཡ་སྭཱ་ཧཱ་དང་བཅས་པ་བརྗོད་ཅིང་བདེན་པ་བརྗོད་པ་དང་སྨོན་ལམ་གྱི་སྐབས་སུ་ཡང་མིང་འདི་ཞེས་བྱ་བ་ཡི་དྭགས་ཀྱི་འཇིག་རྟེན་ལས་ཐར་བར་གྱུར་ཅིག་ཅེས་བརྗོད་དོ། །ལྷག་མ་ཐམས་ཅད་སྔོན་ལྟར་རོ། །འདི་ནི་ཞག་བདུན་ཕྲག་གསུམ་པའི་ཡི་
དྭགས་ཀྱི་འཇིག་རྟེན་དག་པ་འཕགས་པ་ཀུན་དུ་བཟང་པོའི་ཏིང་ངེ་འཛིན་ཞེས་བྱའོ། །ཚིགས་བཞི་པ་ལ་བསྒྲུབ་བྱའི་ཁའི་ནང་དུ་སུཾ་ཡིག་ལྗང་གུ་བསམ་མོ། །ལྷ་དང་སྔགས་ཀྱི་འོད་ཟེར་གྱིས་བསྒྲུབ་བྱའི་ལུས་ལ་ཕོག་ནས་ལུས་ངག་ཡིད་གསུམ་གྱི་སྒྲིབ་པ་ཐམས་ཅད་སུཾ་ཡིག་ལ་བསྡུས་
ནས་ལྷ་མ་ཡིན་གྱི་གཟུགས་ནི་ལྗང་སྔོན་སྐྲ་སེར་བ་མཆེ་བ་བཞི་པ་མིག་དམར་སེར་ཟུར་གསུམ་པ། སྤུ་མང་ཞིང་རྩུབ་པ། སེན་མོ་རིང་ཞིང་ལྕེ་འདྲིལ་བ་བུད་ནས་ལུས་དུ་མར་གྱུར་ཏེ། རི་རབ་ཀྱི་རྩེ་དང་རི་བདུན་གྱི་ངོས་དང་འཛམ་བུའི་གླིང་ཁྱབ་པར་རྒྱུ་ཞིང་སྔོན་གྱི་ལས་ངན་པ་ཐམས་
ཅད་ལ་འགྱོད་པར་བསམ་མོ། །དེའི་ཚེ་རྣམ་སྨིན་གྱི་ལུས་འདི་ཉིད་སྐྲག་ནས་སྐྱབས་སུ་འགྲོ་བ་དང་དགེ་བསྙེན་གྱི་སྡོམ་པ་བཟུང་ནས་སྔོན་གྱི་བས་གཟུགས་བྱད་བཟང་པོར་གྱུར་པར་བསམ་མོ། །ཆེ་གེ་མོ་ཨཱ་ཡུཿ སརྦ་ཨཱ་བ་ར་ཎ་པ་རི་ཤོ་དྷ་ཡ་སྭཱ་ཧཱ་བརྗོད་ཅིང་བདེན་པ་བརྗོད་པ་དང་སྨོན་
ལམ་གྱི་སྐབས་སུ་ལྷ་མ་ཡིན་གྱི་འཇིགས་པ་ལས་ཐར་བར་གྱུར་ཅིག་ཅེས་ཡང་དང་ཡང་བརྗོད་པར་བྱའོ། །འདི་ནི་ཞག་བདུན་ཕྲག་བཞི་པ་ལྷ་མ་ཡིན་གྱི་འཇིག་རྟེན་དག་པ་སའི་སྙིང་པོའི་ཏིང་ངེ་འཛིན་ཞེས་བྱའོ། །ཚིགས་ལྔ་པ་ལ་བསྒྲུབ་བྱའི་སྙིང་གར་ཎི་ཡིག་སེར་སྐྱ་བསམ་མོ། །ལྷ་

71-1-311a

དང་སྔགས་ཀྱི་འོད་ཟེར་གྱིས་ལུས་ངག་ཡིད་གསུམ་སྒྲིབ་པ་ཎི་ལ་བསྡུས་པས་མིའི་གཟུགས་སེར་སྐྱ་བུད་དེ་ལུས་སྔ་མ་ལས་མར་མེ་ལས་མར་མེ་ཆད་པ་ལྟར་རོ། །ལུས་དེ་སྔོན་གྱི་ལས་ལ་འགྱོད་ཅིང་འཛམ་བུའི་གླིང་ཁྱད་པར་ཉུལ་བར་བསམ་མོ། །རྣམ་སྨིན་གྱི་ལུས་སྔ་
མ་ནི་གཟུགས་བྱད་བཟང་བར་གྱུར་ནས་འོད་ཟེར་གྱིས་རེག་པའི་མཐུས་གསུམ་ལ་སྐྱབས་སུ་འགྲོ་བ་དང་། སོ་སོར་ཐར་པའི་སྡོམ་པ་དང་བྱང་ཆུབ་ཏུ་སེམས་བསྐྱེད་པར་བསམས་ནས་གང་ཉེ་དུས་ལན་བརྗོད་ཅིང་སྡོམ་པ་གསུམ་གཟུང་བར་བྱའོ། །ཆེ་གེ་མོ་སརྦ་མ་ནུ་ཥྱ་ཨཱ་བ་ར་ཎ་པ་རི་ཤོ་དྷ་
ཡ་སྭཱཧཱ་ཞེས་བརྗོད་ཅིང་བདེན་པ་བརྗོད་པ་དང་སྨོན་ལམ་གྱི་སྐབས་སུ་མིའི་གནས་ཀྱི་སྡུག་བསྔལ་ཟད་པར་གྱུར་ཅིག་ཅེས་བརྗོད་པར་བྱའོ། །འདི་ནི་ཞག་བདུན་ཕྲག་ལྔ་པ་མིའི་འཇིག་རྟེན་དག་པ་ནམ་མཁའི་སྙིང་པོའི་ཏིང་ངེ་འཛིན་ཞེས་བྱའོ། །ཚིགས་དྲུག་པའི་བསྒྲུབ་བྱའི་སྤྱི་བོར་
ཡི་གེ་ཨ་དཀར་པོ་བསམས་ནས་ལྷ་དང་སྔགས་ཀྱི་འོད་ཟེར་གྱིས་ལུས་དང་ངག་དང་ཡིད་ཀྱི་སྒྲིབ་པ་སྦྱངས་ནས་ཡི་གེ་ཨ་ལ་བསྡུས་པས་པདྨ་དང་ཟླ་བ་ལ་གནས་པའི་ལྷའི་བུ་ཤིན་ཏུ་དཀར་ཞིང་དལ་བར་གྱུར་ཏེ་མགོན་པོ་བྱམས་པ་ལ་སོགས་པའི་བྱང་ཆུབ་སེམས་དཔའི་སྡོམ་པ་སྩལ་
ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་གསུང་བར་བསམ་མོ། །རྣམ་པར་སྨིན་པ་འདིས་ཀྱང་བྱང་ཆུབ་སེམས་དཔའི་སྡོམ་པ་དང་། གསང་སྔགས་ཀྱི་དམ་ཚིག་ནོད་པར་བསམ་མོ། །བདེན་པ་བརྗོད་པ་དང་སྨོན་ལམ་གྱི་སྐབས་སུ་ཡང་འདོད་པའི་ལྷ་རྣམ་པར་གཡེང་བའི་འཇིགས་པ་ལས་
ཐར་བར་གྱུར་ཅིག་ཅེས་བརྗོད་དོ། །ཆེ་གེ་མོ་སརྦ་དེ་བ་ཨཱ་བ་ར་ཎ་པ་རི་ཤོ་དྷ་ཡ་སྭ་ཧཱ་ཞེས་པ་ལ་སོགས་པ་ལྷག་མ་སྔར་ལྟར་རོ། །འདི་ནི་ཞག་བདུན་ཕྲག་དྲུག་པ་ལྷའི་འཇིག་རྟེན་པ་འཕགས་པ་བྱམས་པའི་ཏིང་ངེ་འཛིན་ཞེས་བྱའོ། །ཚིགས་བདུན་པ་ལ་བསྒྲུབ་བྱའི་མཛོད་སྤུར་ཡི་
གེ་ཨོཾ་དཀར་པོ་བསམ་མོ། །ལྷ་དང་སྔགས་ཀྱི་འོད་ཟེར་གྱི་རྩེ་མོར་ལྷའི་བུ་དང་ལྷའི་བུ་མོ་བུམ་པ་ཐོགས་པ་དུ་མ་བྱུང་བས་བསྒྲུབ་བྱའི་སྤྱི་བོ་ནས་དབང་བསྐུར་ནས་སྒྲིབ་པ་དག་པས་སྤྱི་བོར་སངས་རྒྱས་རྣམ་པར་སྣང་མཛད་བཞུགས་པར་བསམ་ཞིང་འོག་མིན་གྱི་རྣམ་པར་སྣང་མཛད་འཁོར་དང་བཅས་པའི་

71-1-311b

སྐུའི་འོད་ཟེར་གྱིས་བསྒྲུབ་བྱ་རྣམ་པར་སྣང་མཛད་དང་བཅས་པ་ལ་ཕོག་པ་ཙམ་གྱིས་བསྒྲུབ་བྱའི་སྙིང་གར་ཟླ་བའི་དཀྱིལ་འཁོར་གདུགས་ལྟ་བུའི་རྣམ་པར་གྱུར་ནས། ཨཱ་ལི་དང་ཀཱ་ལིའི་ཕྲེང་བ་དཀར་པོ་གསལ་བར་དམིགས་སོ། །དེ་ནས་སངས་རྒྱས་ཐམས་ཅད་ཀྱིས་ཨོཾ་སརྦ་ཏ་ཐཱ་ག་ཏ་བོ་དྷི་
ཙིཏྟ་པྲ་ཏི་བྱ་དྷཾ་ནཱཾ་ཀ་རོ་མི་ཞེས་ཕྱོགས་བཅུ་ན་བསྒྲགས་པའི་དེ་མ་ཐག་ཏུ་ཟླ་བའི་དཀྱིལ་འཁོར་གང་བའི་སྟེང་དུ་ཧཱུཾ་ཡིག་དཀར་པོའི་འོད་ཀྱིས་སྦྲུལ་ཤུན་པ་བརྗེས་པ་ལྟར་ཁོག་པ་འདིར་གཞག་ནས། ཁོག་པའི་ནང་ནས་རྣམ་སྨིན་གྱི་ལུས་དང་འདྲ་བ་ཞིག་འོད་ཟེར་གྱིས་ཁྲིད་ནས་པདྨའི་
གནས་ཆེན་པོའི་དྲུང་དུ་འཁོད་པའི་ཚེ་ཕྱོགས་བཅུའི་སངས་རྒྱས་ཀྱིས་ཨོཾ་སརྦ་ཏ་ཐཱ་ག་ཏ་ཡསྠཱ་ཨ་ཧཾ་ཞེས་གསུངས་པ་ཙམ་གྱིས་སྙིང་གའི་ཟླ་བའི་སྟེང་དུ་རྡོ་རྗེ་དཀར་པོ་རྩེ་ལྔ་པའི་རྣམ་པར་སྣང་ངོ་། །དེའི་ཤར་ཕྱོགས་ཀྱི་འཇིག་རྟེན་གྱི་ཁམས་དུ་མ་ནས་བྱོན་པའི་སངས་རྒྱས་ཐམས་ཅད་
བྱོན་ནས། ཀྱེ་རྡོ་རྗེ་དབྱིངས་ཞེས་བརྗོད་ཅིང་རིན་པོ་ཆེའི་བུམ་པའི་བདུད་རྩིའི་ཆུ་དུ་མས་དབང་བསྐུར་བར་བསམ་མོ། །ལྷོ་ཕྱོགས་པ་ཐམས་ཅད་ཀྱིས་རིན་པོ་ཆེའི་དབུ་རྒྱན་གཞག་པར་བསམ་མོ། །ནུབ་ཕྱོགས་པ་ཐམས་ཅད་ཀྱིས་ལག་ཏུ་རྡོ་རྗེ་གཏད་པ་དང་། བྱང་ཕྱོགས་པས་དྲིལ་བུ་
གཏད་པ་དང་། ཞིང་འདི་ཉིད་ཀྱི་རྣམ་པར་སྣང་མཛད་ཆེན་པོས་མེ་ཏོག་གི་ཕྲེང་བ་དབུ་ལ་བཞག་པའི་དེ་མ་ཐག་ཏུ་སྐུ་མདོག་དཀར་པོ། ཞལ་བཞི་ཕྱག་བརྒྱད། བྱང་ཆུབ་མཆོག་གི་ཕྱག་རྒྱ་ཅན་ཞབས་བཞི་སེམས་དཔའི་སྐྱིལ་མོ་ཀྲུང་དུ་བཞུགས་པར་གྱུར་ནས་ཕྱོགས་བཅུའི་
སངས་རྒྱས་ཐམས་ཅད་ཀྱང་རྣམ་པར་སྣང་མཛད་ཆེན་པོ་ཞེས་བརྗོད་པར་བསམ་མོ། །བདེན་པ་དང་སྨོན་ལམ་བརྗོད་པ་ཐམས་ཅད་ཀྱི་མཐར་ཡང་ཞེས་བྱའི་སྒྲིབ་པ་ཐམས་ཅད་ལས་གྲོལ་བར་གྱུར་ཅིག་ཅེས་བརྗོད་ཅིང་སྔགས་ཀྱི་མཐར་ཡང་སརྦ་སཾ་སྐཱ་ར་པ་རི་ཤུདྡྷ་སྭཱ་ཧཱ། ཞེས་བརྗོད་
དོ། །འདི་ཐུན་མཚམས་ཐམས་ཅད་དུ་རིག་པའི་དབང་བསྐུར་ཞིང་ཞག་བདུན་གྱི་མཐར་རྡོ་རྗེ་སློབ་དཔོན་གྱི་དབང་བསྐུར་ནས་སངས་རྒྱས་ཀྱི་ཞིང་དུ་ཡང་དང་པོའི་སངས་རྒྱས་ཞེས་མཚན་བཏགས་པར་བསམ་མོ། །ཚིགས་ཐ་མ་གསུམ་པོ་འདི་དག་གི་ཚེ་ལམ་སྦྱང་བ་དང་ལམ་བསྟན་

71-1-312a

པ་ཐུན་མཚམས་ཐམས་ཅད་དུ་བྱའོ། །དེ་ལྟར་ཚིགས་བདུན་ཕྲག་གི་རྗེས་སུ་སྦྱིན་སྲེག་བྱ་སྟེ། དེ་ཡང་ལྷའི་གྲོང་ཁྱེར་དུ་བསམས་ནས། བསྲེག་རྫས་ཀྱི་མཆོད་པའམ། ཡང་ན་ཐབ་ཏུ་ལྷའི་དཀྱིལ་འཁོར་བསམས་ནས་རོ་ལ་ཞལ་ཟས་སུ་བྱིན་གྱིས་བརླབས་
ནས་བསྲེགས་ཏེ་ཐལ་བར་གྱུར་པ་དང་རུས་པའི་ཐལ་བ་དེ་བརྡུངས་ནས་སྔོན་ལྟར་སཙྪའི་ཆོ་ག་འབི་འབིའི་ནང་དུ་བཅུག་ནས་ཚ་ཚ་བྱའོ། །ཚ་ཚ་དེ་དག་ཀྱང་སྔོན་གྱི་ཆོ་གས་བྱས་པའི་མཆོད་རྟེན་གྱི་ནང་དུ་འམ་ཡང་ན་ཆུ་བོ་ཆེན་པོའི་འགྲམ་དུ་གཞག་གོ། །རོ་བསྲེག་པའི་ཆོ་ག་ཡང་གཞན་དུ་ཤེས་
པར་བྱའོ། །འདི་ལྟར་ཆོ་ག་འདིའི་དཀྱིལ་འཁོར་གྱི་རྡུལ་ཚོན་གྱིས་ར་བར་གཏོར་ན་ཕྱུགས་ནད་མེད་པར་བྱེད་དོ། །ཡང་ཐོག་དང་ཚང་མང་དང་ཉལ་སར་གཏོར་ན་མིག་ནད་ལ་སོགས་པ་སེལ་ཏོ། །ཞིང་ལ་གཏོར་ན་འབུ་དང་རྩ་དང་སད་དང་སེར་བ་དང་མྱགས་པ་དང་བསྐམས་པ་ཐམས་ཅད་མེད་པར་
བྱེད་དོ། །འདི་ནི་ཞག་བདུན་ཕྲག་བདུན་པ་འཇིག་རྟེན་དང་འཇིག་རྟེན་ལས་འདས་པ་དག་པ་སྒྲིབ་པ་རྣམ་སེལ་གྱི་ཏིང་ངེ་འཛིན་ཞེས་བྱའོ། །དེ་ལྟར་བདུན་ཚིགས་ཀྱི་ཚུལ་དེ་ཡང་བྱང་ཆུབ་སེམས་དཔའ་སྒྲིབ་པ་རྣམ་སེལ་གྱི་རྒྱུད་ལས་གསུངས་ཏེ། དགེ་བས་ངན་འགྲོ་ལས་གྲོལ་ཞིང་། །ཤེས་རབ་
ཀྱིས་ནི་བྱང་ཆུབ་ཐོབ། །ཕུན་སུམ་ཚོགས་གང་སྔོན་བྱས་ནས། །དེ་བཞིན་ཉིད་རྟོགས་སངས་རྒྱས་འགྱུར། །ལམ་རྒྱུ་བཟང་ཞིང་གསོན་ཚེ་ལ། །དགེ་སྤྱོད་ཤིན་ཏུ་དྲག་པ་ནི། །མཐོ་རིས་སམ་ནི་ཐར་པར་ངེས། །དེ་ལ་བར་དོ་མ་མཆིས་སོ། །ལམ་རྒྱུད་དམན་ཞིང་ཚེ་འདིར་ཡང་། །ངན་
སྤྱོད་ཤིན་ཏུ་མང་པོ་རྣམས། །ལྷ་མི་དམན་དང་ངན་འགྲོར་ངེས། །དེ་ཉིད་ནམ་ཡང་བར་དོ་མེད། །ལས་རྒྱུ་སྣ་ཚོགས་སྣང་མོད་ཀྱང་། །དགེ་ལ་སྤྲོ་ཞིང་མི་དགེ་སྤང་། །ཅུང་ཟད་སྤྱོད་པའི་མིང་གང་དེ། །བར་དོ་དེ་ལ་ཡོད་མོད་ཀྱང་། །བདུན་ཕྲག་གཅིག་སོགས་བདུན་གྱི་མཐའ། །དེ་ལས་
ལྷག་པར་མི་གནས་ལགས། །མི་ཡི་ཞག་བདུན་བར་དོའི་ཚེ། །དེ་ཡི་བར་དོ་ཡུད་ཙམ་བདུན། །ཤི་བའི་རྗེས་སུ་དགེ་སྤྱོད་ན། །བར་དོ་བདེ་ཞིང་སྐྱེ་བ་ཡང་། །བཟང་པོ་དེ་མ་ཐག་ཏུ་འགྲོ། །སྐྱེ་བ་གཞན་དུ་བདེ་སྤྱོད་འགྱུར། །ཤི་བའི་རྗེས་སུ་ངན་སྤྱོད་ན། །བར་དོ་སྡུག་བསྔལ་སྐྱེ་གཞན་

71-1-312b

དུ། །དམན་པར་སྐྱེ་ཞིང་ངན་སྤྱོད་འགྱུར། །བརྩེ་བ་ཅན་གྱིས་ཤིན་ཏུ་སྤང་། །ཞེས་གསུངས་པ་དང་། ཡང་དེ་ཉིད་ལས། ཡིད་བཞིན་ནོར་འདྲའི་གཟུངས་འདི་ནི། །དཔལ་དང་འབྱོར་པ་ཀུན་བྱེད་དེ། །ཤི་བའི་དོན་དུ་བརྗོད་པའམ། །ཡང་ན་ཞག་གྲངས་བདུན་ཕྲག་བདུན། །དཀྱིལ་
འཁོར་ཆེན་པོའི་ལྷ་མཆོད་ཕྱིར། །བུམ་པ་ཚ་ཚ་དང་འབྲེལ་ཅིག །འགྲོ་གནས་སྡིག་པ་ཀུན་སེལ་བྱ། །སྔགས་དང་ལྷ་ཡི་གཟི་བརྗིད་ཀྱིས། །མི་དགེའི་ལས་རྣམས་འགྲོ་གཟུགས་སུ། །རྣམ་སྨིན་ལུས་ལ་བྱུང་ནས་ཀྱང་། །རང་རིག་གནས་སུ་སོང་བར་དམིགས། །འགྲོ་བ་དྲུག་
གི་དུག་བསལ་ནས། །མཐར་ནི་ཐར་པའི་ལམ་གཞག་ཕྱིར། །འདྲེན་པའི་འོད་ཀྱིས་རབ་བསྐུལ་ཏེ། །སངས་རྒྱས་ཞིང་དུ་བཞག་ནས་ཀྱང་། །ཐུབ་རྣམས་དེ་ལ་དབང་བསྐུར་མཛད། །རྣམ་དག་སངས་རྒྱས་སྐུར་གྱུར་ནས། །མཚན་ཡང་ཆེ་གེ་རྣམ་སྣང་མཛད། །ཅེས་པ་ལ་སོགས་པ་
རྒྱ་ཆེར་གསུངས་སོ། །གཞན་ཡང་མཆོད་རྟེན་རྨང་ཞབས་སུ་ཤི་བ་པོའི་བར་དུ་གཅོད་པ་ཐམས་ཅད་ཀྱི་མིང་བྲིས་ནས་རྫ་སར་པའི་བུམ་པར་བཅུག་ལ་བཞག་གོ། །མཆོད་རྟེན་དང་ཚ་ཚའི་ཆུ་ཇི་སྲིད་པ་ནི་ཤི་བ་པོའི་རོའམ་རུས་པའམ་གོས་བཀྲུས་པའི་ཆུས་བྱའོ། །བུམ་པའི་ནང་གི་སྟེང་
གི་ཁྲི་ལ་ཡང་ཤི་བ་པོའི་རྟེན་བཞག་གོ། །ཡང་ན་ཚ་ཚའི་དུས་སུ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་བཀླགསཔའི་དྲུང་དུ་རུས་པ་གཟུངས་སྔགས་ཀྱི་ཆུས་ཁྲུས་བྱས་ནས་སྙིང་པོ་བྲིས་པ་དཀྲིས་ཏེ་ཚ་ཚའི་ནང་དུ་གཞུག་གོ། །དེ་ནས་ཚ་ཚ་བརྒྱ་རྩ་བརྒྱད་རེ་རེ་ཞིང་དཀྱིལ་འཁོར་བྲིས་ནས་
བུམ་པ་གང་བ་དང་བཅས་པ་མཆོད་ཅིང་གཟུངས་སྔགས་བརྗོད་དོ། །དེའི་ཚེ་དཀྱིལ་འཁོར་པའི་ལྷ་ཐམས་ཅད་ཀྱིས་བསྒྲུབ་བྱ་དེ་དབང་བསྐུར་བར་བསམ་མོ། །གཟུངས་ཀྱི་ཆོ་ག་ཚར་བ་དང་བསྒྲུབ་བྱའི་རྟེན་དེ་ལ་ཁྲུས་བྱའོ། །རུས་པའམ། གོས་སམ། གཟུགས་བརྙན་སྟོང་ཁྲུས་ཀྱིས་
དག་པར་བྱས་པར་འགྱུར་རོ། །ཆོ་གའི་ཚུལ་དེ་དང་ལྡན་པའི་ཚ་ཚ་སྟོང་གིས་ནི་བསྒྲུབ་བྱ་དེ་ལྷའི་དབང་པོར་འགྱུར་རོ། །ཁྲིས་ནི་མཐའ་བྲལ་གྱི་བདག་པོར་འགྱུར་རོ། །འབུམ་གྱིས་ནི་དགའ་ལྡན་གྱི་བདག་པོར་འགྱུར་རོ། །ས་ཡས་ནི་འཕྲུལ་དགའི་བདག་པོར་འགྱུར་རོ། །བྱེ་བས་ནི་གཞན་

71-1-313a

འཕྲུལ་དབང་བྱེད་ཀྱི་བདག་པོར་འགྱུར་རོ། །དེའི་འོག་ཏུ་གཟུངས་ཀྱི་སྒོ་འབུམ་ཕྲག་ལ་མངའ་བརྙེས་པར་འགྱུར་རོ། །ཏིང་ངེ་འཛིན་གྱི་སྒོ་འབུམ་ཕྲག་ཐོབ་པར་འགྱུར་རོ། །ཞིང་འབུམ་ཕྲག་མཐའ་ཡས་པ་སྦྱོང་བར་འགྱུར་རོ། །ཆོ་ག་ལྷག་མ་ནི་སྔར་ལྟར་བྱའོ། །
ཤི་བ་ལ་ཕན་གདགས་པའི་རིམ་པའོ།།      །།གཅན་གཟན་དང་ལ་སོགས་པ་ནི་རྒྱུ་དེ་ཕན་གདགས་པའོ། །ཀུན་ནས་སྒོར་འཇུག་པ་ལ་སོགས་པས་ནི་བཟླས་པའི་གྲངས་གསུངས་ཏེ། ལན་སྟོང་ནི་ཤི་བ་ལ་ཕན་གདགས་པའི་བཟླས་བརྗོད་ཀྱི་གྲངས་སོ། །ཁྲི་ནི་
འཆི་བ་སླུ་བའི་ཚེས་བརྒྱད་ནས་ཉའི་བར་དུ་དགེ་སློང་ལ་སོགས་པ་གང་ཟག་བཅུས་བྱེད་པའི་གྲངས་སོ། །འབུམ་ནི་བསྙེན་པའི་བཟླས་བརྗོད་ཀྱི་གྲངས་སོ། །འབུམ་བྲི་ཏེ་མཆོད་རྟེན་གྱི་ནང་དུ་བཅུག་ཅེས་པ་ནི་སྙིང་པོ་འབའ་ཞིག་གུར་གུམ་དང་གི་ཝང་དང་ཙནྡན་ལ་སོགས་པས་
སྔོན་བཞིན་བྲིས་ནས་ཚ་ཚའི་ནང་དུ་བཅུག་པའོ། །འབུམ་ཚང་ནས་མཆོད་རྟེན་ཆེན་པོ་ཅིག་གི་ནང་དུ་བཅུག་སྟེ་ཤིང་བུ་བསྒྲེང་ཞིང་རྒྱན་བཏགས་ནས་མཆོད་དོ་ཞེས་པ་ནི་འབུམ་གཏེར་ཆེན་པོའི་རིང་བསྲེལ་ལོ། །དེ་ལ་མཆོད་རྟེན་གྱི་རིམ་པ་ནི། རིའམ་ཐང་ངམ་ལྗོངས་གང་དག །དུར་ཁྲོད་
ལ་སོགས་སྤངས་པ་ཡི། །ཡིད་འོང་གནས་སུ་རྒྱལ་བ་ཡི། །སྐུ་གདུང་མཆོད་རྟེན་བརྩིག་པར་བྱ། །ཡང་ན་སའམ་རྡོ་དག་ལ། །མཁས་པས་ཚུལ་བཞིན་བརྐོ་བར་བྱ། །སའམ་རྡོ་འམ་ཤིང་དག་གམ། །ཡང་ན་ཚོགས་པས་བརྩིག་པར་བྱ། །དེ་ལ་སངས་རྒྱས་ཀྱི་མཆོད་རྟེན་ནི་
ཁྲི་འཕང་བཅུ་གསུམ་ཡན་ཆད། སུམ་ཅུ་རྩ་གཉིས་མན་ཆད་དོ། །རང་སངས་རྒྱས་ཀྱི་དགུ་ཡན་ཆད་བཅུ་གཅིག་མན་ཆད་དེ། ཆར་ཁེབ་དང་ཏོག་ཀྱང་མེད་དོ། །དགྲ་བཅོམ་པའི་ཁྲི་འཕང་བཞི་ཡན་ཆད་དོ། །འཁོར་ལོ་ལྔ་པའོ། །རྒྱུན་དུ་ཞུགས་པ་ནས་ཕྱིར་མི་འོང་བའི་བར་གྱི་
ཁྲི་འཕང་གསུམ་ཁོ་ནའོ། །འཁོར་ལོ་བདུན་པའོ། །སོ་སོའི་སྐྱེ་བོའི་ཁྲི་འཕང་གཉིས་འཁོར་ལོ་བཞིའོ། །དེ་ལས་སངས་རྒྱས་ཀྱི་སྐུ་གདུང་ཆ་བརྒྱད་དུ་བགོས་པའི་མཆོད་རྟེན་ཆེན་པོ་བརྒྱད་ནི་གྲོང་ཁྱེར་སེར་སྐྱར་རྒྱལ་པོ་ཟས་གཙང་གིས་ཡོན་བདག་བྱས་ནས་དཔལ་ལྷ་ལས་བབས་

71-1-313b

པའི་མཆོད་རྟེན་བརྩིགས་སོ། །ཡུལ་མ་ག་དྷཱ་དབུས་འགྱུར་ཚལ་དུ་རྒྱལ་པོ་མ་སྐྱེས་དགྲས་ཡོན་བདག་བྱས་ནས་བྱང་ཆུབ་ཆེན་པོའི་མཆོད་རྟེན་བརྩིགས་སོ། །གྲོང་ཁྱེར་རྩ་མཆོག་ཏུ་གྱད་རྣམས་ཀྱིས་ཡོན་བདག་བྱས་ནས་ཆོ་འཕྲུལ་ཆེན་པོའི་མཆོད་རྟེན་བརྩིགས་སོ། །ཡུལ་བཱ་རཱ་ཎ་སཱི་རུ་
སེར་སྐྱའི་རྒྱལ་པོ་ཚངས་བྱིན་གྱིས་ཡོན་བདག་བྱས་ནས་དཔལ་ཆོས་ཀྱི་འཁོར་ལོའི་མཆོད་རྟེན་བརྩིགས་སོ། །ཡུལ་ཡངས་པ་ཅན་དུ་རྒྱལ་པོ་ལི་ཙ་བྱི་གཞོན་ནུས་ཡོན་བདག་བྱས་ནས་དཔལ་ཀ་ནི་ཀའི་མཆོད་རྟེན་བརྩིགས་སོ། །ཡུལ་མཉན་ཡོད་དུ་རྒྱལ་པོ་གསལ་རྒྱལ་གྱིས་
ཡོན་བདག་བྱས་ནས་དཔལ་བཀྲ་ཤིས་སྒོ་མངས་བརྩིགས་སོ། །ཡུལ་ཆ་དགེར་རྒྱལ་པོ་འདུན་འཛིན་ཏ་ལས་ཡོན་བདག་བྱས་ནས་དཔལ་འོད་ཅན་གྱི་མཆོད་རྟེན་བརྩིགས་སོ། །ཡུལ་ཏི་ཀ་ཙ་ཤིར་རྒྱལ་པོ་ཨིནྡྲ་བ་མིས་ཡོན་བདག་བྱས་ནས་མཆོད་རྟེན་པདྨ་ཅན་བརྩིགས་སོ། །སླན་
ཆད་ཀྱང་དེ་དག་གི་རྗེས་སུ་འབྲངས་ཏེ་བརྩིག་པར་བྱའོ། །དེ་ལ་བྱང་ཆུབ་ཆེན་པོའི་མཆོད་རྟེན་གྱི་ཚུལ་དུ་བརྩིགས་ན། སྐུ་གདུང་གི་རྨང་ཡོད་ན་རྨང་རྟེན་ཇི་ལྟར་མཐོ་བ་བཟང་པོ་རྟེན་མེད་ན་བང་རིམ་དང་པོའི་སུམ་ཆའི་ཚད་དོ། །དེའི་སྟེང་དུ་དགེ་བཅུ་ནི་ཕྱིར་བསྐྱེད་པ་དང་རྔམས་བང་རིམ་དང་
པོའི་རྔམས་ཕྱེད་དོ། །གནམ་འཕང་ཕྱི་ལ་བང་རིམ་དང་པོའི་ངོས་ཚད་དོ། །དེ་ཡན་ཆད་སྲོག་ཤིང་སྟེ་བང་རིམ་དང་པོའི་གཞི་གསུམ་གྱི་ཚད་དོ། །བང་རིམ་བཞི་འཕང་མཉམ་མོ། །བང་རིམ་རྔམས་ཀྱི་ཕྱིར་ཚད་ཁྲི་འཕང་ངོ་། །བུམ་རྟེན་ཁྲི་འཕང་གི་ཕྱེད་ཚད་དོ། །བུམ་པ་ནི་བང་རིམ་དང་
པོའི་སུམ་གཉིས་ཀྱི་ཚད་དོ། །སྟོད་ཀྱི་སྐེད་ནི་བང་རིམ་གསུམ་པ་དང་མཉམ་མོ། །བྲེ་རྟེན་གྱི་རྒྱ་ནི་བང་རིམ་བཞི་པའི་ལྔ་ཆ་གཅིག་གོ། །བྲེ་ནི་བང་རིམ་བཞི་པའི་བཞི་ཆ་གཅིག་གོ། །དེ་གཉིས་ཀའི་འཕང་ནི་བང་རིམ་གྱི་སུམ་གཉིས་དང་བང་རིམ་གྱི་ཕྱེད་དོ། །བང་རིམ་བཞི་པའི་ཤར་དང་
ལྷོར་གསལ་ཁུང་བང་རིམ་ཉིད་ཀྱི་བརྒྱད་ཆའོ། །སྲོག་ཤིང་གི་རྩ་བ་བང་རིམ་བཞི་པ་ལ་རེག་གོ། །འཁོར་ལོ་བཅུ་གསུམ་གྱི་འཕང་དུ་བང་རིམ་དང་པོའི་བཞི་གསུམ་གྱི་ཚད་དོ། །འཁོར་ལོ་དང་པོ་ནི་བྲེའི་ཟུར་བཞི་ལ་སླེབས་སོ། །དེ་བཞི་ཆས་འཁོར་བའི་ཚད་ནི་འཁོར་ལོ་བཅུ་གསུམ་པའོ། །

71-1-314a

བཅུ་གཅིག་པོ་ཡང་དེའི་རིམ་གྱིས་གཞོལ་བའོ། །རྩེག་པར་ཐམས་ཅད་ནི་ཅི་མཛེས་སུ་བྱའོ། །ཐུགས་རྗེས་མདོ་གཟུངས་འཕང་ལོ་ཆུང་བ་དང་མཉམ་མོ། །དེའི་རྨད་དུ་རྔམས་ཀྱི་གཞི་གསུམ་ནི་འཇམ་པོ་ཉིད་སྟོད་དུ་བཞི་ཆ་གཅིག་ནི་ཕྲེང་བའི་སུལ་བཅུ་དྲུག་པའོ། །དེའི་སྟེང་
དུ་འཁོར་ལོ་བཅུ་གསུམ་པ་ཉིད་ཀྱི་ཤིང་གི་ཕྱེད་ཚད་ཡང་རྩེ་ཕྲ་བ་བང་རིམ་ཉིད་ཀྱི་འཕང་ཕྱེད་དོ། །ཡང་སྲོག་ཤིང་འཕང་དུ་བྲེ་ཕྱེད་ཙམ་སྟེང་དུ་ཟླ་བའི་རྩེ་མོ་གདུགས་དང་མཉམ་སྲོག་ཤིང་ལ་བསྐོར་ཏེ་རྩེ་མོ་བགྲད་དོ། །གདུགས་ནི་འཁོར་ལོ་བདུན་པ་དང་མཉམ་མོ། །གདུགས་ཁེབས་འཁོར་ལོ་
དྲུག་པ་དང་མཉམ་མོ། །ཟ་ར་ཚགས་ནི་བྲེའི་འཕང་དང་མཉམ་མོ། །ཡང་སྲོག་ཤིང་འཕང་དུ་བྲེའི་སུམ་ཆའི་ཚད་ཀྱི་སྟེང་དུ་ཉི་མ་ཟླ་བ་ལས་ཁྱད་ཡུད་ཙམ་མོ། །ཉི་མའི་སྟེང་དུ་ཏོག་གི་ཨུཏྤ་ལ་སེར་པོའི་ཏོག་བུ་འདྲ་སྟེ་ཅི་མཛེས་ཉི་མ་དང་ཟླ་བ་དང་ཏོག་པ་ཐམས་ཅད་ཀྱི་ཟུར་ལ་བྱ་མི་ཆགས་པར་
བྱ་བའི་ཕྱིར་ལྕགས་ཀྱི་ཐུར་མ་རྣོན་པོ་གཟེར་བར་བྱའོ། །ཏོག་ནི་སེར་པོ་ཉི་མ་ནི་དམར་པོ། ཟླ་བ་ནི་དཀར་པོ། གདུགས་ཁེབས་ནི་དཀར་པོའོ། །གདུགས་ནི་སྔོན་པོ། གདུགས་ཀྱི་ཕྱོགས་བཞིར་རིགས་བཞིའི་ཕྱག་རྒྱ་བྲིའོ། །ཐུགས་རྗེའི་ཕུལ་ནི་དམར་པོའོ། །ཐུགས་རྗེ་ཉིད་དང་ཤེས་བཅུ་
ནི་སེར་པོའོ། །འཁོར་ལོ་ཐམས་ཅད་དང་སྲོག་ཤིང་དམར་པོའོ། །མཆོད་རྟེན་ཀྱང་དཀར་པོའོ། །དགེ་བཅུ་ཡང་སེར་པོའོ། །རྨང་དང་རྨང་རྟེན་ལྗང་གུའོ། །མཆོད་རྟེན་བརྩིག་པའི་རིམ་པའོ། །ད་ནི་མཆོད་རྟེན་གྱི་བུམ་རྟེན་གྱི་སྟེང་དུ་སྔོན་ནས་གདུང་མ་བཞི་རྒྱ་གྲམ་དུ་བྲི་བར་བྱའོ། །དེ་ཇི་ལྟར་
འཚམ་པའི་དཀྱིལ་འཁོར་བཞེངས་པར་བྱ་སྟེ། དཀྱིལ་འཁོར་གྱི་ཚད་དང་མཉམ་པའི་ཞེང་གི་གཞི་བྲིའོ། །དེའི་སྟེང་དུ་རྡོ་ལེབ་བམ་སོ་བཏང་བའི་སོ་ཕག་ལེགས་པར་གཞིབ་བོ། །དེའི་སྟེང་དུ་བཀྲ་ཤིས་པའི་ས་རྩྭ་མུཉྫ་གཏུབས་པ་དང་། བསྲེས་པའི་དྲི་བཟང་པོའི་ཆུས་སྦྲུས་ནས་གྲོ་ཕྱེ་
དང་ཤིང་བལ་བསྐོལ་བས་བསྲེ་བར་བྱའོ། །རྒྱ་ཇི་ཙམ་ཡོད་པའི་བཅུ་དྲུག་གམ་བརྒྱད་ཀྱི་ཆ་ནི་འཕངས་སུ་བྱའོ། །གཉེར་མ་དང་སྒོ་འབུར་མེད་པའི་གྲུ་བཞི་པར་བྱའོ། །དེ་ནས་ཐིག་གདབ་པར་བྱ་སྟེ དཀྱིལ་འཁོར་ཆེན་པོ་བཀོད་པའི་རྒྱུད་ལས་སྐྱོན་མེད་རས་བལ་འཇམ་པོ་ནི། ཤིན་ཏུ་

71-1-314b

གཙང་བའི་བུ་མོས་ནི། །ཤར་དུ་བལྟས་ནས་དགུ་བསྒྲིལ་དུ། །སྔགས་འདི་བརྗོད་ཅིང་བཀལ་བར་བྱ། །ཨོཾ་ཨ་ནྱོ་ནྱ་ཨ་ནུ་ག་ཏ། སརྦ་དྷརྨཱ་སྥ་ར་སྥ་ར་སརྦ་དྷརྨཱ་ཨ་ཏྱནྟ་ཨ་ནུ་པྲ་བིཥྚ་སརྦ་དྷརྨཱ་ཧཱུཾ། ཤར་ནུབ་ལྷོ་བྱང་ཚངས་ཐིག་གདབ། །ཚངས་དང་ངོས་དང་གྲུ་ཆད་གདབ། །ནང་གི་ཕྱེད་
ཀྱང་ཕྱེད་ཚད་གདབ། །རྒྱབ་ཏུ་ཕྱེད་ཕྱེད་ཚད་བཏབ་ནས། །ལྔ་པ་ཕྱི་ནས་ཆ་རེ་གདབ། །དྲུག་པ་དབུས་དཀར་རྒྱབ་མ་བཀས། །བཞི་རྒྱབ་ཕྱོགས་བཞིར་དབུས་ཆ་བཞི། །རེ་རེ་ཡང་ནི་བཞི་བཞིར་བགོ། །དེས་ནི་སྒོ་ཡི་དཀྱིལ་འཁོར་རོ། །ཕོ་བྲང་ཅི་བདེར་བསྒྲུབ་པར་བྱའོ། །དེའི་རྒྱབ་ཏུ་
ཆ་གཉིས་ཀྱང་། །ཕྱེད་ཆ་རེ་རེར་བསྐོར་བ་ནི། །པདྨ་རྡོ་རྗེ་འོད་ཕྲེང་དང་། །མཆོད་པ་དགོད་པའི་ས་གཞི་སྟེ། ཞེས་པའི་ཚུལ་གྱིས་ཐིག་བཏབ་ནས་ས་ཚོན་བཀྱེ་བས་གྲུ་བཞི་སྒོ་བཞི་རྟ་བབས་དང་དྲ་ཤར་དང་ཟླ་མཛེས་དང་བ་དན་ལ་སོགས་པའི་དཀྱིལ་འཁོར་གྱི་ཡོན་ཏན་ཐམས་ཅད་དང་
ལྡན་པ་བྲིའོ། །ཕྱི་རོལ་དུ་ར་བ་རིམ་པ་གསུམ་ནི་སྣ་ཚོགས་པདྨ་དང་རྡོ་རྗེ་སྔོན་པོའི་ཕྲེང་བ་དང་དམར་སེར་མེ་འོད་འབར་བ་ཐམས་ཅད་དུ་ཟླུམ་པོ་དྲང་བའོ། །དཀྱིལ་འཁོར་དེ་ལ་ལྷའི་རྟེན་དགོད་པར་བྱ་སྟེ། སྐུའམ་ཙ་ག་ལི་འམ་ཕྱག་རྒྱའམ་མིང་ཡིག་ཀྱང་རུང་སྟེ། ཚོན་མ་ལུས་པས་བྲིས་
ནས་དགོད་པར་བྱའོ། །དེ་ཡང་བྱང་ཆུབ་སེམས་དཔའ་སྒྲིབ་པ་རྣམ་པར་སེལ་བའི་རྒྱུད་ལས། ཕུང་པོ་ལྔ་དང་བཅོ་བརྒྱད་ཁམས། །འབྱུང་བཞིར་བཅས་པའི་ལུས་ཀྱིས་ནི། །དཀྱིལ་འཁོར་ཆེན་པོ་འདི་བལྟས་ན། །མི་དེ་མྱུར་དུ་གྲོལ་བར་འགྱུར། ཞེས་སོ། །དེ་ནས་ལུས་
དཀྱིལ་འཁོར་ཅི་ལྟ་བ་གཟུགས་བརྙན་གྱི་དཀྱིལ་འཁོར་ལའང་ལྷ་ཉི་ཤུ་རྩ་བདུན་དུ་ངེས་སོ། །དེའང་གཟུངས་ཀྱི་དཀྱིལ་འཁོར་ནི་རྣམ་པར་སྣང་མཛད་ལ་སོགས་པ་གཙོ་བོ་ཡབ་ཡུམ་ལ་ལྷ་མོ་ཉི་ཤུ་རྩ་དྲུག་གིས་བསྐོར་བའོ། །རིག་སྔགས་ཀྱི་དཀྱིལ་འཁོར་ལྷ་མོ་དང་བྱང་ཆུབ་སེམས་
དཔའོ། །གསང་སྔགས་ཀྱི་དཀྱིལ་འཁོར་ལ་ལྷ་མོ་དང་བྱང་ཆུབ་སེམས་དཔའ་དང་ཁྲོ་བོ། འོན་ཀྱང་ཉི་ཤུ་རྩ་བདུན་དེ་དག་ཀྱང་ཕྱོགས་དང་ཁ་དོག་གི་བྱེ་བྲག་གིས་ལྷ་རེ་རེ་ཡང་བཞི་བཞིར་འགྱུར་ལ་དེ་ལྟར་ན་རིགས་འདུས་པའི་ལྷ་བརྒྱ་རྩ་བརྒྱད་དོ། །དེ་ཉི་ཤུ་རྩ་ལྔར་འདུ་ཞིང་དགུ་དང་ལྔ་དང་གཅིག་

71-1-315a

ཁོ་ནར་ཡང་ངེས་སོ། །དེ་བརྒྱ་རྩ་བརྒྱད་ཀྱི་དབང་དུ་བྱས་ནས་དབུས་སུ་རྣམ་པར་སྣང་མཛད་ཆེན་པོ་ཞལ་བཞི་ཕྱག་བརྒྱད་ཞབས་བརྒྱད་པ་ཡུམ་དང་བཅས་པའོ། །གཡས་སུ་ཉི་མ་རྣམ་པར་སྣང་མཛད་དོ། །གཡོན་དུ་ཟླ་བ་རྣམ་པར་སྣང་མཛད། ཤར་དུ་མི་བསྐྱོད་
པ་ལ་རིགས་བཞི་དང་སྤྱན་མ་ལ་སོགས་པ་བཞི་དང་། གཟུགས་རྡོ་རྗེ་ལ་སོགས་པ་བཞི་དང་། ལཱ་སྱེ་ལ་སོགས་པ་བཞིས་བསྐོར་བའོ། །དེ་ཁོ་ན་བཞིན་དུ་ལྷོ་དང་ནུབ་དང་བྱང་དུ་ཡང་ཤེས་པར་བྱའོ། །དེ་ནི་དབུས་ཀྱི་ཕོ་བྲང་ངོ་། །དེ་ཡང་སྒྲིབ་པ་རྣམ་པར་སེལ་བའི་རྒྱུད་ལས། ཐབས་
དང་ཤེས་རབ་རང་བཞིན་གྱི། །དཀྱིལ་འཁོར་གཙོ་བོ་རྣམ་སྣང་མཛད། །མདོག་སྐྱ་བྱང་ཆུབ་མཆོག་གི་རྒྱ། །ཞལ་བཞི་པ་ལ་ཕྱག་བརྒྱད་དོ། །རིག་པ་ཀུན་གྱི་འབྱུང་གནས་མཆོག །ཟླ་བ་ཉི་མ་རྣམ་སྣང་མཛད། །ཉི་མ་ཟླ་བ་འཆང་བའོ། །ཕྱོགས་བཞི་ཕོ་བྲང་དབུས་སུ་ནི། །རྡོ་རྗེ་
རིན་ཆེན་པདྨའི་རིགས། །ལས་ཀྱི་རིགས་རྣམས་སོ་སོར་ཡང་། །རང་རིག་སངས་རྒྱས་སྲས་པོ་དང་། །སྤྱན་མ་བདག་མོ་གོས་དཀར་སྒྲོལ། །གཟུགས་སྒྲ་དྲི་རོ་ལྷ་མོ་དང་། །སྒེག་མོ་གར་ཕྲེང་གླུ་མ་རྣམས། །ཕྱོགས་མདོག་རིགས་ཀྱི་ཕྱག་རྒྱ་ཅན། །གཡོན་པ་རང་རྟགས་ཕྱག་
རྒྱ་འཆང་། །ལྡེམ་བག་ཞི་བའི་ཚུལ་དུ་བསམ། ཞེས་པ་དང་། ཡང་། བྱང་ཆུབ་སེམས་དཔའ་སུམ་ཅུ་གཉིས། །ལྷ་ཡི་སྣམ་བུར་དགོད་པར་བྱ། །རིག་པའི་ལྷ་མོ་ཁྲོ་མོ་ཆེ། །མོས་པས་སྒོ་ལ་དགོད་པར་བྱ། །ཞེས་གསུངས་སོ། །དེ་ཡི་རྒྱབ་ཏུ་ལྷ་རྣམས་ལ། །བསྐལ་
བཟང་སེམས་དཔའ་བཅུ་དྲུག་གོ། །སྒོ་བཞིར་ལྷ་མོ་བཞི་འམ་ཁྲོ་བོ་བཞི་དབུས་ཀྱི་གཙོ་བོ་ལ་ཡང་གཟུངས་ཀྱི་ཚུལ་དུ་སྒྲུབ་པ་ལ་ལྷ་མོ་བཞིའོ། །རིག་སྔགས་དང་གསང་སྔགས་ཀྱི་ཚུལ་དུ་སྒྲུབ་པ་ལ་རིགས་བཞི་ཉིད་དོ། །ཡང་དབུས་སུ་རིགས་ལྔ་མཚམས་སུ་སྤྱན་མ་ལ་སོགས་པ་
བཞི་དང་ཕོ་བྲང་གི་དབུས་སུ་གཟུགས་རྡོ་རྗེ་ལ་སོགས་པ་བཞི་དང་། སྒོ་བཞིར་ལྕགས་ཀྱུ་མ་ལ་སོགས་པ་བཞི་འམ་ཡང་ན་ཁྲོ་མོ་བཞིའོ། །སྒོའི་ནང་གི་ལྷ་རྣམས་ལ་བྱམས་པ་ལ་སོགས་པ་བྱང་ཆུབ་སེམས་དཔའ་ཟུང་རེ་སྟེ་བརྒྱད་དོ། །རྟེན་དེ་དག་བཀོད་ནས་དཀྱིལ་འཁོར་ཡོལ་

71-1-315b

བ་དམར་པོ་དང་བླ་རེ་སྔོན་པོས་བྱའོ། །ཅོད་པན་དང་བ་དན་དང་རྒྱལ་མཚན་དང་གདུགས་ལ་སོགས་པ་ངོས་རེ་རེ་ཡང་བརྒྱད་བརྒྱད་མངོན་པར་འདུ་བྱ་སྟེ་ལེགས་པར་དགོད། དེའི་སྟེང་དུ་ཁྲི་བཅས་ནས་ཡོན་གྱི་བདག་པོ་གང་དེའི་གོས་ལ་སོགས་པ་དང་གཟུགས་བརྙན་གཞག་པར་
བྱའོ། །དེ་ནི་དཀྱིལ་འཁོར་གྱི་རིམ་པའོ། །ད་ནི་དཀྱིལ་འཁོར་དེ་ལ་མཆོད་པར་བྱ་སྟེ། ལྷའི་གྲངས་ཀྱི་མཆོད་པས་དཀྱིལ་འཁོར་དེ་ཡོངས་སུ་བསྐོར་ནས་སྒྲུབ་པ་པོ་ཕྱོགས་བཞིར་བཞུགས་ཏེ་ཇི་ལྟར་བཀོད་པའི་དཀྱིལ་འཁོར་རིན་པོ་ཆེ་སྣ་ཚོགས་ཀྱི་གཞལ་ཡས་ཁང་པར་ལྷའི་ཚོགས་དང་
བཅས་པ་སྐད་ཅིག་གིས་དམིགས་ནས་རང་བཞིན་གྱིས་ལྷ་བཅུག་སྟེ། ནམ་མཁར་ཟླ་བའི་དཀྱིལ་འཁོར་ལ་གནས་པའི་ཨོཾ་ཡིག་ལས་འཕྲུལ་པའི་ལྷ་མོའི་ཚོགས་ཀྱིས་མཆོད་པར་བསམ་ཞིང་། གཞུང་གཞན་དུ་གསུངས་པའི་ཚིགས་བཅད་དང་སྔགས་དུ་མས་མཆོད་ཅིང་བསྟོད་པར་
བྱའོ། །སིལ་སྙན་དུ་མའི་ཚོགས་དཀྲོལ་ཞིང་བཀྲ་ཤིས་ཀྱི་གླུ་དུ་མ་དང་སྨོན་ལམ་དུ་མ་བརྗོད་པར་བྱའོ། །དེ་ལ་བཀྲ་ཤིས་ནི། རྨི་ངན་འཇིགས་དང་སྡིག་པ་ཐམས་ཅད་འཇིག་བྱེད་པ། །ཚེ་དང་འབྱོར་དང་སྟོབས་དང་བདེ་བ་རྣམ་འཕེལ་བ། །ཁྱེད་ཀྱི་བཀྲ་ཤིས་ཐམས་ཅད་འགྲུབ་པར་
བྱེད་འདི་དག །རབ་ཏུ་བརྗོད་ཀྱིས་དེ་ཕྱིར་མི་རྣམ་བསྒྲིམས་ཏེ་ཉོན། །རྣམ་པར་སྣང་མཛད་ཡེ་ཤེས་དམ་པ་མཚོ་ཆེན་ལྡན། །ཟླ་བ་ཉ་འདྲའི་སྐུ་མངའ་སྲིད་པའི་མཐར་ཕྱིན་པ། དགོངས་པ་མཐའ་དག་རྫོགས་པའི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་ཞི་བྱེད
ལེགས་གྱུར་ཅིག །མི་འཁྲུགས་རྒྱལ་པོ་སྲིད་དང་གཏི་མུག་རྣམ་སྤྱོད་པ། །མགོན་པོ་ཡོན་ཏན་ཐམས་ཅད་རྫོགས་པའི་བཀྲ་ཤིས་གང་ཡིན་དང་། །དགེ་བ་ཉམས་སེམས་རྫོགས་པའི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་ཞི་བྱེད་ལེགས་གྱུར་ཅིག །སངས་
རྒྱས་ཡོན་ཏན་ཀུན་གྱི་རྒྱན་གྱིས་བརྒྱན་མཛད་ཅིང་། །ཡང་དག་སྦྱིན་མཛད་འགྲོ་བའི་དོན་ལ་མི་སླུ་བའི། །རིན་ཆེན་འབྱུང་ཞེས་བྱའི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་ཞི་བྱེད་ལེགས་གྱུར་ཅིག །བསམ་གཏན་ཏིང་འཛིན་དམ་པ་ཕ་རོལ་ཕྱིན་པའི་

71-1-316a

གནས། །ཡེ་ཤེས་པདྨའི་སྟེང་བཞུགས་དཔག་མེད་ཚེ་ལྡན་པ། །ཚེ་གྲངས་མེད་པར་བྱིན་གྱིས་བརླབས་པའི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་ཞི་བྱེད་ལེགས་གྱུར་ཅིག །སེམས་ཅན་རྣམས་ཀྱི་དོན་ལ་ཐུགས་ནི་རབ་ཏུ་དགོངས་མཛད་
དེ། །འགྲོ་བ་མཐའ་དག་འཆིང་བས་བཅིངས་ལས་གྲོལ་མཛད་པ། །ཐུབ་མཆོག་དོན་ཡོད་གྲུབ་པའི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་ཞི་བྱེད་ལེགས་གྱུར་ཅིག །སངས་རྒྱས་པདྨ་རྒྱས་པའི་འདབ་འདྲའི་སྤྱན་མངའ་བ། །གསེར་གྱི་མདོག་ཅན་འགྲོ་བའི་
རྩ་ལག་གཅིག་པུ་དང་། །ཆོས་དང་དགེ་འདུན་ལྷ་དང་ལྷ་མིན་གྱིས་བསྟོད་པ། །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །བདུད་སྟོབས་རབ་ཏུ་འཇོམས་པའི་བཀྲ་ཤིས་གང་ཡིན་དང་། །རྣམ་སྣང་མཛད་དང་ཐམས་ཅད་སྐྱོབ་དང་རྣམ་པར་གཟིགས། །ཀུན་དུ་མཆོད་
ཅིང་རྒྱས་པར་གྱུར་པ་གཟི་ཆེན་མཆོག །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །པདྨའི་བླ་དང་ཤཱཀྱ་ཐུབ་དང་ཐུབ་ཆེན་དང་། །ཡེ་ཤེས་དབང་ཕྱུག་སྤྱན་ལེགས་པ་དང་ཟླ་ཞལ་དང་། །འབྲུག་གི་སྒྲ་དང་རྔ་སྒྲ་ལྟ་བུར་དབྱངས་སྙན་པ། །བཀྲ་ཤིས་རྣམ་པར་སྤེལ་
ཕྱིར་རྟག་ཏུ་དྲན་པར་བྱེད། །འོད་ཟེར་རྒྱལ་མཚན་དང་ནི་གསེར་ཐུབ་འོད་སྲུངས་དང་། །མར་མེ་མཛད་དང་ཤིན་ཏུ་བརྗིད་པར་གཤེགས་པ་དང་། །འདྲེན་པ་གཙུག་ཏོར་ཅན་དང་འོད་ཏོག་དཔག་མེད་འོད། །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །པདྨ་མཛེས་དང་ཡེ་ཤེས་
སྟོབས་དང་ཟླ་འོད་དང་། །ཉི་མའི་ཞལ་དང་དགྲ་ལས་རྒྱལ་དང་བལྟམས་པ་དང་། །ཡོན་ཏན་འབྱུང་གནས་དཔལ་གྱི་གཟི་བརྗིད་འཇིག་རྟེན་གཙོ། །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །མི་འཁྲུགས་པ་ནི་རྡོ་རྗེའི་གདན་ལ་བཞུགས་པ་དང་། །འདྲེན་པ་མཆོག་སྦྱིན་རིན་
ཆེན་ཏོག་ཏུ་བྱས་པ་དང་། །རྣམ་པར་སེལ་དང་ལག་ན་རིན་ཆེན་རྒྱལ་པོ་མཆོག །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །འཇིག་རྟེན་དབང་ཕྱུག་རྟག་ཏུ་རྒྱལ་དབང་གཙུག་ཏོར་ཅན། །སྟོན་ཟླ་དྲི་མེད་ལྟ་བུར་ཞལ་རས་མཛེས་པ་དང་། །ནམ་མཁའི་སྙིང་པོ་དང་ནི་

71-1-316b

ས་ཡི་སྙིང་པོ་དག །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །འཇམ་དཔལ་གཙུག་ཕུད་ཤིན་ཏུ་མཛེས་པར་རབ་བརྒྱན་པ། །གཞོན་ནུའི་གཟུགས་ནི་གསེར་མཆོག་འོད་དང་ལྡན་པ་དང་། །རྟག་ཏུ་རྒྱལ་བར་དཀའ་བ་ལག་ན་རྡོ་རྗེ་དཔལ། །བཀྲ་ཤིས་རྣམ་པར་སྤེལ་ཕྱིར་
རྟག་ཏུ་དྲན་པར་བྱེད། །བྱམས་པ་ཤིན་ཏུ་རྨད་དུ་བྱུང་བའི་གཟུགས་མངའ་བ། །ལྕང་ལོ་འཁྲིལ་མངའ་མཆོད་རྟེན་གཙུག་ཏོར་གནས་པ་དང་། །ཀུན་དུ་བཟང་དང་ནོར་བཟངས་དང་ནི་སྒྲ་གཅན་འཛིན། །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །སྐུལ་བྱེད་མ་དང་སྒྲོལ་
མ་ཁྲོ་གཉེར་འགྲོ་ཕན་དང་། །དེ་བཞིན་ཤེས་རབ་ལ་སོགས་ཕ་རོལ་ཕྱིན་དྲུག་དང་། །རྨ་བྱ་དང་ནི་འཕགས་མ་གཞན་གྱིས་མི་ཐུབ་དག །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །གཙུག་ཏོར་ལས་བྱུང་གསང་སྔགས་རྗེས་འཛིན་བཅས་པ་དང་། །ཕྱིར་བཟློག་མ་དང་
བསིལ་བའི་ཚལ་ནི་རྒྱལ་ལས་འཁྲུངས། །ལྷ་མོ་རི་ཁྲོད་ལོ་མ་ཅན་དང་བཅས་པ་རྣམས། །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །དོན་ཡོད་གྲུབ་དང་སྟོང་ཆེན་རབ་ཏུ་འཇོམས་མ་དང་། །གྲོང་ཁྱེར་ཝ་རཱ་ཎ་སཱི་ཞེས་བྱར་གྲགས་པ་དང་། །པད་མའི་སྙིང་པོ་གཅིག་
དང་ཀུ་ཤའི་གྱད་ལྡན་པ། །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །རྡོ་རྗེ་ལྕགས་ཀྱུ་དང་ནི་གཙུག་འཕྱང་འོད་པོ་ཆེ། །དེ་བཞིན་བགེགས་འཇོམས་འཕགས་པ་བདུད་རྩི་ཐབ་སྦྱོར་དང་། །ཟླ་འོད་དེ་ཡང་གཞོན་ནུའི་གཟུགས་དང་ལྡན་པ་ནི། །བཀྲ་ཤིས་རྣམ་པར་སྤེལ་ཕྱིར་
རྟག་ཏུ་དྲན་པར་བྱེད། །གཤིན་རྗེ་གཤེད་པོ་འཇིགས་ཀུན་རབ་ཏུ་འཇོམས་མཛད་དང་། །པདྨ་མཐར་བྱེད་གནོད་མཛེས་དེ་བཞིན་འཁོར་ལོ་ཅན། །གཞན་གྱིས་མི་ཐུབ་དབྱུག་སྔོན་བསྣམས་པར་མཛད་པ་དག །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །འཕགས་པ་མི་གཡོ་
བགེགས་རིགས་རབ་ཏུ་འཇོམས་པ་དང་། །ཕུན་སུམ་ཚོགས་བྱེད་རྨུགས་འཛིན་ཨུཏྤལ་མདོག་ཅན་དང་། །གླང་ཆེན་ཀོ་རློན་སྟག་ལྤགས་དག་གིས་བརྒྱན་གྱུར་པ། །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །འཕགས་པ་ཤཱ་རིའི་བུ་དང་མོོ་དགལ་འོད་སྲུངས་དང་། །

71-1-317a

ནོར་བུ་འཛིན་དང་མ་འགགས་ཉེ་བ་འཁོར་དང་བཅས། །རབ་འབྱོར་དང་ནི་ལུས་འཕགས་རི་བོ་ཀུན་དགའ་བོ། །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །སྟོབས་ཆེན་བགེགས་ཀྱི་རིགས་ནི་རབ་ཏུ་འཇོམས་པ་དང་། །འོད་ཟེར་ལྡན་དང་ཆ་བྱད་རབ་ཏུ་འཚེར་བ་
དང་། །དུག་སེལ་སྦྲུལ་གདུག་རབ་ཏུ་རྒྱགས་པ་འཇིག་བྱེད་པ། །བཀྲ་ཤིས་རྣམ་པར་སྦེལ་ཕྱིར་རྟག་ཏུ་དྲན་པར་བྱེད། །འཕྲོག་མ་རྣ་ཆ་རྣམ་པ་སྣ་ཚོགས་གཡོ་འགུལ་བ། །བུ་ཕོ་ལྔ་བརྒྱ་དག་གིས་བརྒྱན་པར་གྱུར་དེ་དང་། །གནོད་སྦྱིན་བདག་པོ་ལྔ་རྩེན་དང་ནི་པདྨའི་མིག །བཀྲ་ཤིས་རྣམ་
པར་སྤེལ་ཕྱིར་རྟག་ཏུ་དྲན་པར་བྱེད། །ཧ་ལ་ཧ་ལ་སེམས་ཅན་ཀུན་ལ་ཕན་མཛད་དང་། །རིན་ཆེན་སྒྲོལ་མར་གྲགས་དང་ནོར་གྱི་རྒྱུན་མཆོག་དང་། །གནོད་སྦྱིན་བདག་པོ་རྣམ་ཐོས་སྲས་པོའི་དཔལ་ཐོབ་པ། །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །ཐམས་ཅད་སྒྲོལ་བ་
སྦྱིན་ཕོད་དམ་པ་གཟི་ཆེན་དང་། །བྱམས་པའི་སྟོབས་ནི་གཏོང་བའི་སྟོབས་ཆེན་ལྡན་པ་དང་། །སྤྲིན་གྱི་ཏོག་དང་ལྡན་པའི་བུ་ནི་གང་ཡིན་པ། །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །རབ་ཏུ་དགའ་བ་ལ་སོགས་ས་བཅུ་དེ་དག་དང་། །དཔའ་བས་བྱིན་པ་དེ་དང་གཙུག་ན་ནོར་བུ་
དང་། །རྒྱལ་པོ་དམ་པ་ཟས་གཙང་དང་ནི་ཀ་པི་ན། །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །ལུམྦའི་ཚལ་ནི་བུང་བ་ལང་ལོང་འཕུར་ལྡིང་ཞིང་། །མེ་ཏོག་འབྲས་བུ་རྣམ་པ་སྣ་ཚོགས་རྣམས་ཀྱིས་བརྒྱན། །རྨ་བྱ་དང་ནི་ཁུ་བྱུག་མང་པོའི་སྒྲ་འབྱིན་པ། །བཀྲ་ཤིས་རྣམ་པར་
སྤེལ་ཕྱིར་རྟག་ཏུ་དྲན་པར་བྱེད། །བཙུན་མོ་སྒྱུ་འཕྲུལ་དང་ནི་དེ་བཞིན་གཽ་ཏ་མི། །ཤཱཀྱའི་བུ་མོ་རྫུ་འཕྲུལ་ཆེན་མོ་གྲགས་འཛིན་དང་། །ནཻ་རཉྫ་ན་བསོད་ནམས་ལྡན་པ་འབབ་ཆུར་བཅས། །བཀྲ་ཤིས་རྣམ་པར་སྦེལ་ཕྱིར་རྟག་ཏུ་དྲན་པར་བྱེད། །འཇིག་རྟེན་དབང་ཕྱུག་པདྨ་བུང་བའི་ཁྱུ་ལྡིང་དང་། །
འཇམ་དཔལ་ཨུཏྤལ་སྔོན་པོ་ཡིད་དུ་འོང་བ་དང་། །མགོན་པོ་བྱམས་པ་ཡི་ནི་ཀླུ་ཤིང་མེ་ཏོག་བསྣམས། །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །དོན་ཡོད་གྲུབ་པས་ལེགས་བསྣམས་རལ་གྲི་མཆོག་དང་ནི། །མི་བསྐྱོད་རྡོ་རྗེའི་རྡོ་རྗེ་ཉིད་དང་གཞན་ཡང་ནི། །སྐྱོབ་པ་ཐམས་

71-1-317b

ཅད་ཀྱི་ནི་ཕྱག་མཚན་མ་ལུས་པ། །བཀྲ་ཤིས་རྣམ་པར་སྤེལ་ཕྱིར་རྟག་ཏུ་དྲན་པར་བྱེད། །ཡིད་བཞིན་ནོར་བུ་འདོད་འཇོའི་བ་དང་བཅས་པ་དང་། །དཔག་བསམ་གྱི་ནི་ཤིང་དང་བུམ་པ་བཟང་པོ་དང་། །རྒྱལ་བ་ཀུན་གྱིས་ངེས་པར་བསྟན་པའི་བྱང་ཆུབ་ཤིང་། །བཀྲ་ཤིས་རྣམ་པར་སྤེལ་ཕྱིར་
རྟག་ཏུ་དྲན་པར་བྱེད། །ལམ་འཇུག་དུས་དང་ནོར་དང་འབྲུ་རྣམས་སྡུད་པ་དང་། །ནང་པར་དུས་སམ་ཡང་ན་ཞི་བའི་ལས་བྱེད་ཚེ། །དགའ་སྟོན་ཀུན་ན་འཇུག་དང་དགོས་པ་སྒྲུབ་པ་དང་། །མིང་མཚན་འདི་དག་མི་ཡིས་རབ་ཏུ་བསྒྲིམས་ཏེ་ཉོན། །རྒྱལ་བ་དག་དང་རྒྱལ་བའི་སྲས་ཀྱི་མཚན་
འདི་མ་ལུས་པར། །ལྷ་ལ་གུས་བཞིན་ཉིན་ཅིག་བཞིན་དུ་ནང་པར་སུ་བརྗོད་པ། །དེ་ནི་དམྱལ་བ་ཡི་དྭགས་གནས་སུ་མི་སྐྱེ་ནད་མེད་ཅིང་། །དཔལ་དང་བསོད་ནམས་ནོར་དང་བཀྲ་ཤིས་རྣམ་པར་འཕེལ། །ཆེ་བའི་ཆེ་མཆོག་དཀོན་མཆོག་བླ་ན་མེད། །ཆོས་རྗེ་ཉི་མ་རྒྱལ་བའི་བྱིན་རླབས་
ཀྱིས། །བདུད་དང་བགེགས་རིགས་གནོད་པའི་དགྲ་ཞི་སྟེ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །འབྱུང་པོ་གང་དག་དེང་འདིར་ལྷགས་གྱུར་ཏེ། །སའམ་འོག་ཏེ་བར་སྣང་འཁོད་པ་དག །སྐྱེ་དགུ་རྣམས་ལ་རྟག་ཏུ་བྱམས་བྱེད་ཅིང་། །ཉིན་དང་མཚན་དུ་ཆོས་ཀྱང་སྤྱོད་
པར་ཤོག །རྒྱལ་བ་དགྲ་རྒྱལ་བདེན་པའི་བྱིན་རླབས་ཀྱིས། །བདེན་པ་འདི་གསུངས་དེ་ལ་སྡིག་མེད་ཅིང་། །ལྷར་བཅས་ལྷ་མིན་གྱིས་རྟག་མཆོད་འོས་པའི། །བདེན་པ་འདིས་ནི་དེང་འདིར་བདེ་ལེགས་ཤོག །ཕྱོགས་བཞི་ནས་སྙན་པ་བརྗོད་པར་བྱའོ། །སྨོན་ལམ་ནི། ཨོཾ་བདེ་
གཤེགས་རིགས་དང་རྡོ་རྗེའི་རིགས། །རིན་ཆེན་པདྨོ་ལས་ཀྱི་རིགས། །སྣ་ཚོགས་རིགས་ཀྱི་རྒྱལ་བ་དང་། །རྫས་ཀྱི་ཚོགས་རྣམས་བདག་ལ་དགོངས། །ཐོག་མེད་ལས་ཀྱི་སྲིད་རྒྱུན་ནས། །བསགས་པའི་དགེ་བ་ཅི་སྙེད་དང་། །གཟུངས་སྔགས་འདི་ཡི་མཐུ་དང་ནི། །རིག་སྔགས་
ཕྱག་རྒྱའི་བདེན་པ་དང་། །གསང་སྔགས་འདི་ཡི་བྱིན་རླབས་ཀྱིས། །ཟག་མེད་ཡེ་ཤེས་སྣང་བའི་རྒྱན། །ནམ་མཁའི་མཐའ་དང་མཉམ་པ་སྟེ། །མྱུར་བ་ཉིད་དུ་སྐྱེ་བར་ཤོག །མིག་དང་རྣ་བའི་མངོན་ཤེས་དང་། །གཞན་གྱི་སེམས་དོན་ཤེས་པ་དང་། །སྔ་ཕྱི་སྐྱེ་གནས་ཤེས་

71-1-318a

པ་དང་། །རྫུ་འཕྲུལ་དུ་མ་བསྒྱུར་བ་ཡང་། །ད་ལྟ་ཉིད་དུ་ཐོབ་པར་ཤོག །ཆུ་སྟེངས་འགྲོ་དང་རིགས་མྱུར་ཕྱིན། །མིག་སྨན་བུམ་པ་གཏེར་དང་ནི། །རལ་གྲི་བཟུང་ནས་མཁའ་ལ་འགྲོ། །མི་སྣང་བསྒྱུར་ལུས་ཐོབ་པར་ཤོག །ས་འོག་འགྲོ་དང་གཏེར་མཐོང་
དང་། །བཅུད་རྣམས་རྙེད་ཅིང་རིང་འཚོ་དང་། །གཞན་ལུས་དབང་པོ་བསྒྱུར་བ་དང་། །མདོག་བཟང་ན་རྒ་མེད་ཐོབ་ཤོག །ཞི་རྒྱས་དབང་དང་མངོན་སྤྱོད་ཀྱིས། །འགྲོ་དོན་སྣ་ཚོགས་ཅི་འདོད་པ། །རང་རང་སྐལ་པ་ཇི་བཞིན་དུ། །ཐོགས་པ་མེད་པར་བྱེད་པར་ཤོག །གལ་ཏེ་
ལེ་ལོའི་རྐྱེན་གྱིས་གོལ་གྱུར་ནས། །འབྲས་བུ་དམ་པ་མྱུར་དུ་མ་རྙེད་ཀྱང་། །བདེ་འགྲོ་མཐོ་རིས་ལྷ་དབང་དམ་པ་དང་། །ཆོས་ལྡན་ཡུལ་དབུས་མི་ལུས་ཐོབ་པར་ཤོག །དེ་ནས་བླ་མེད་བྱང་ཆུབ་མ་ཐོབ་པར། །ལས་ཀྱི་འཁོར་ལོས་སྲིད་གསུམ་གར་སྐྱེས་ཀྱང་། །ལུས་དང་
སྲོག་ནི་ཡལ་བར་གྱུར་ཀྱང་རུང་། །བླ་མེད་བྱང་ཆུབ་སེམས་ནི་མི་གཏོང་ཤོག །བླ་མེད་བྱང་ཆུབ་མ་ཐོབ་བར་དུ་ནི། །ལུས་དང་སྲོག་ལ་ཆགས་པ་མེད་པར་ཡང་། །བག་ཡོད་མགོ་ལ་མེ་འབར་ཇི་བཞིན་དུ། །བརྩོན་འགྲུས་ཆེན་པོ་རྒྱུན་མི་འཆད་པར་ཤོག །བདག་དང་གཞན་དོན་
བྱང་ཆུབ་སྒྲུབ་པ་ལ། །བར་ཆད་མེད་ཅིང་བརྩོན་པ་མ་གཏོགས་པ། །འཇིག་རྟེན་དག་ན་སེམས་ནི་སྐད་ཅིག་ཀྱང་། །བདག་གིས་དོན་མེད་གཡེང་བར་མ་གྱུར་ཅིག །ཚེ་རབས་ཀུན་དུ་དམ་ཆོས་སྤྱོད་པ་ལ། །མི་དགེ་གཞན་གྱི་དབང་དུ་མ་གྱུར་ཅིག །ཚེ་ལ་ནད་ཀྱི་བར་ཆད་མེད་པ་དང་། །སྐྱེས་
མ་ཐག་ཏུ་ཆོས་དང་ཕྲད་པར་ཤོག །དགེ་བཤེས་དམ་པ་རྣམས་དང་མི་འབྲལ་ཞིང་། །རྣལ་འབྱོར་བརྩོན་པའི་གྲོགས་དང་འགྲོགས་པ་དང་། །སྐྱོན་བྲལ་སེམས་དང་སྤྱོད་པ་མཐུན་པ་ཡིས། །འཇིག་རྟེན་དམན་པའི་གནས་ལ་ཆགས་མ་གྱུར། །བྱང་ཆུབ་རང་བཞིན་བྱང་ཆུབ་ཐོབ་པའི་རྒྱུ། །
ཤེས་རབ་ཆེ་དང་སྙིང་རྗེ་ཆེ་ལ་སོགས། །བདག་ཅག་ཚེ་རབས་ཀུན་དུ་མི་འབྲལ་ཞིང་། །རྣམ་ཐར་མང་པོའི་སྒོར་ནི་འཇུག་པར་ཤོག །རྒྱལ་སྲིད་མཐོ་རིས་སྡུག་དང་གཉེན་བཤེས་དང་། །འདོད་པའི་ཡོན་ཏན་ལྔ་པོ་ཐམས་ཅད་དང་། །ཐབས་ལ་མཁས་པའི་སྤྱོད་ཡུལ་མ་གཏོགས་པ། །ཤེས་

71-1-318b

རབ་མཆོག་གིས་གང་ལའང་ཆགས་མ་གྱུར། །གཞན་དོན་འཁོར་བ་རྣམས་སུ་སྤྱོད་པ་ན། །བསྡུ་བའི་དངོས་དང་ཕ་རོལ་ཕྱིན་ལ་སོགས། །ཐབས་ལ་མཁས་པའི་སྤྱོད་པ་སྣ་ཚོགས་ཀྱིས། །འགྲོ་བ་རྣམས་སུ་བྱང་ཆུབ་སྤྱོད་པར་ཤོག །དེ་བཞིན་དུ་གཞན་ཡང་སྨོན་ལམ་གདབ་པར་བྱའོ། །དེ་ནི་
དཀྱིལ་འཁོར་མཆོད་པའི་རིམ་པའོ། །དེ་ནས་མཆོད་རྟེན་ཡང་དང་ཡང་དུ་དྲི་ཞིམ་པོའི་ཆུ་བའི་ལྕིབ་དང་བཅས་པས་བྱུགས་ཏེ། །སྔོན་ལྟར་ཐིག་བཏབ་ལ་ལྷའི་ཕོ་བྲང་ཐམས་ཅད་དང་སྒོ་ལ་སོགས་པ་ཐམས་ཅད་ཀྱི་རིས་སུ་བྲིས་ནས་པདྨ་དང་ཟླ་བའི་སྟེང་དུ་མེ་ཏོག་ཚོམ་བུ་ལྷ་གྲངས་སུ་བཞག་ནས། 
ཞིང་ཁམས་བྱེ་བ་ཕྲག་བརྒྱ་དཀྱིལ་འཁོར་གྱི་ཁང་པ་བརྗོད་ཀྱིས་མི་ལང་བར་ཁེངས་པར་བསམས་ནས་ཚ་ཚ་རེ་རེ་ཞིང་དཀྱིལ་འཁོར་རེ་རེ་རུ་བསམས་ནས། ཚོམ་བུ་ལྷ་གྲངས་སུ་བཞག་ནས་བརྒྱའམ་སྟོང་ངམ་ཁྲིའམ་འབུམ་མམ་ས་ཡའི་བར་དུ་གཞུག་པར་བྱའོ། །མཆོད་རྟེན་གཅིག་གི་ནང་དུ་བྱེ་བ་
ལས་ལྷག་པར་གཞུག་པར་མི་བྱའོ། །དེ་ནས་སྐུ་གདུང་གི་ནང་གི་ཁྲི་འམ་ཐམས་ཅད་དུ་ཕྱུང་སྟེ། སྒོ་ཐམས་ཅད་བཅད་ནས་ལེགས་པར་ཞལ་བྱུག་བྱའོ། །འདི་ནི་ཚ་ཚ་གཞུག་པའི་རིམ་པའོ། །དེའི་འོག་ཏུ་མཆོད་རྟེན་གྱི་ངོས་ཐམས་ཅད་དུ་ཐུར་མ་མང་དུ་བཙུགས་ནས་དེ་ལ་མེ་ཏོག་ཕྲེང་
བ་དང་བ་དན་ལ་སོགས་པས་ཕྲེང་བའི་ཚུལ་དུ་བརྒྱན་པར་བྱའོ། །མཆོད་རྟེན་གྱི་ཕྱོགས་བཞིར་མཆོད་པའི་དཀྱིལ་འཁོར་བཞི་བྱས་ཏེ། ཡོན་ཆབ་ལ་སོགས་པའི་མཆོད་པའི་བྱེ་བྲག་དངོས་སུ་བཤམས་པ་དང་། འདོད་པའི་ཡོན་ཏན་གྱི་ཚོགས་དང་ནོར་བུ་དང་འཁོར་ལོ་དང་རྟ་དང་གླང་པོ་ཆེ་
དང་། བཙུན་མོ་དང་། བློན་པོ་དང་། དམག་མི་ལ་སོགས་པ་ནི་བཅོས་པའི་ཚུལ་དུ་བྱས་ནས་ཚིགས་སུ་བཅད་པའི་དབྱངས་དང་སྔགས་སུ་བཅས་པས་དབུལ་བར་བྱའོ། །ཕྱོགས་བཞིར་མདོ་བཞི་བཀླག་པར་བྱའོ། །དེའི་འོག་ཏུ་སྙིང་པོ་ཉི་ཚེ་བརྗོད་ཅིང་བསྐོར་བ་བརྒྱ་རྩ་བརྒྱད་བྱ་སྟེ། བཀྲ་
ཤིས་བརྗོད་ལ་སྨོན་ལམ་གདབ་པར་བྱའོ། །དེ་ཡང་མཆོད་རྟེན་ནི་མཆོད་རྟེན་ཆེན་པོ་རིན་པོ་ཆེའི་སྙིང་པོ་ནམ་མཁའ་མ་ལུས་པ་ཁྱབ་པ་ཁ་དོག་སྣ་ཚོགས་པ་གྲུ་བཞི་སྒོ་བཞི་པ་རིན་པོ་ཆེ་དུ་མ་ལས་གྲུབ་པ་འོད་ཀྱི་སྣང་བ་དང་ལྡན་པ་བསམ་མོ། །ཚ་ཚ་རེ་རེ་ཡང་གཞལ་ཡས་ཁང་རེ་རེར་

71-1-319a

བསམས་ཏེ་བུམ་པའི་ནང་དུ་ཇི་ལྟར་བཀོད་པའི་དཀྱིལ་འཁོར་གྱི་ལྷ་རྣམས་དང་གྲངས་མཉམ་པར་བསམས་ནས་ཁྲུས་བྱས་ནས་རང་བཞིན་གྱི་ལྷ་དང་གཉིས་སུ་མེད་པར་བྱས་ནས་ན་བཟའ་དང་རྒྱན་ཕྲེང་ལ་སོགས་པ་ཐམས་ཅད་དབུལ་བར་བྱའོ། །དེ་ནི་མཆོད་རྟེན་
མཆོད་པའོ། །མཆོད་རྟེན་ཐམས་ཅད་འབར་བར་འགྱུར་རོ། །བདག་ཀྱང་འབར་བར་འགྱུར་རོ་ཞེས་པའི་ཚིག་འདི་ནི་སྔོན་དུ་གསུངས་པའི་རྨི་ལམ་ལྟ་བུར་ཀུན་དུ་ཤེས་སོ་ཞེས་བྱ་བའི་ཚིག་དང་འབྲེལ་ཏེ་རྨི་ལམ་དུ་བྱུང་བ་ནི་རྗེས་སུ་སྤྱོད་པའི་རྟགས་ཏེ། ལས་དང་པོ་པས་མང་དུ་བརྗོད་ན་སྔགས་ཀྱི་མཐུ་
བྱ་བ་དང་བྱ་བ་མ་ཡིན་པ་རྨི་ལམ་དུ་ཤེས་པར་བྱའོ། །ཚིག་གཉིས་པ་འདི་མངོན་དུ་གྱུར་པའི་རྟགས་སོ། །དེ་ལ་མཆོད་རྟེན་འབར་བ་ནི་སྔགས་དང་རྫས་ཀྱི་མཐུས་དྲོད་ཐོབ་པའོ། །བདག་འབར་བ་ནི་ཏིང་ངེ་འཛིན་གྱི་མཐུས། རྫུ་འཕྲུལ་དང་མངོན་པར་ཤེས་པ་ཐོབ་པའོ། །དེ་ལ་རྟགས་ཀྱི་
རིམ་པ་ནི་གང་ཡང་གཟུངས་ཀྱི་ཆོ་ག་ལ་འཇུག་པའམ་ཞུགས་པའི་ཚེ་རྨི་ལམ་དུ་ཡིད་དུ་འོང་བའི་ཚལ་དང་། ཁང་བཟངས་དང་། ཁྱེའུ་དང་བུ་མོ་འམ། དགེ་སློང་ངམ། དགེ་འདུན་ལ་སོགས་པ་ལྷན་ཅིག་དགའ་བ་འམ། ག་ཞ་འམ། ཆོས་ཉན་པའམ། ཁྲི་ལ་སོགས་པའི་སྟེང་
དུ་གནས་པའམ། གྲུ་འམ་ཟམ་གཟིངས་ལ་སོགས་པ་བསྒྲལ་བར་རྨི་ན་འདོད་པ་གྲུབ་པོ། །སྐྱུགས་པ་འམ་ཁྲག་འབྱུང་བའམ། ཁྲུས་བྱས་པ་ལ་སོགས་པ་རྨི་ན་སྡིག་པ་ཟད་དོ། །མཆོད་རྟེན་ནམ་ཚ་ཚ་ལ་དྲི་ཞིམ་པོ་བྲོ་ན་ལྷ་གནས་དྲུག་ཏུ་སྐྱེ་བར་ངེས་སོ། །གལ་ཏེ་དྲི་ཅུང་ཟད་བྲོ་བ་
ཡང་ལོངས་སྤྱོད་དང་ལྡན་པའི་མིར་སྐྱེའོ། །སྒྲ་གྲག་ན་གཟུགས་ཁམས་ཀྱི་ལྷར་སྐྱེའོ། །འོད་བྱུང་ན་རིག་འཛིན་མཆོག་ཐོབ་པར་འགྱུར་རོ། །དེ་དང་དེ་ལ་སོགས་པ་ཡོན་ཏན་མཐའ་ཡས་ཏེ་སྒྲིབ་པ་རྣམ་པར་སེལ་བའི་རྒྱུད་དུ་ཤེས་པར་བྱའོ། །གང་འཇིག་རྟེན་འདིར་ཐོབ་པར་འགྱུར་
བའི་ཡོན་ཏན་རྣམས་ནི་རྫས་དང་ཡོ་བྱད་ཚང་ཞིང་མ་ཉམས་པ་དང་། དུས་ཚོད་བཟང་པོ་དང་། སྦྱོར་བ་བཟང་པོ་དང་། ཚུལ་བསྡམས་པས་ཐོབ་པར་འགྱུར་རོ། །མ་འོངས་པའི་དུས་ཀྱི་འབྲས་བུ་བཟང་པོ་ཇི་སྙེད་པ་ནི་དད་པ་དང་། སྙིང་རྗེ་མཆོག་དང་ལྡན་པ་དང་། ལྷག་པའི་ཤེས་རབ་

71-1-319b

ཀྱིས་ཐོབ་པར་འགྱུར་རོ། །དེ་ནི་ལྟས་ཀྱི་རིམ་པའོ། །ངེས་པར་འཕྲལ་དུ་ལ་སོགས་པ་ནི་ཕན་པར་གསུངས་སོ། །ངེས་པར་འཕྲལ་དུ་ཕྱིར་མི་ལྡོག་པ་ནི་ཞི་བ་ལ་སོགས་པའི་ལས་གྲུབ་ན་གཞན་གྱི་དོན་སྤྱོད་ད་པ་ལ་ཐོགས་པ་མེད་པའོ། །ས་བཅུ་ལ་གནས་པ་ནི་རལ་གྲི་ལ་སོགས་པ་རིག་པ་
འཛིན་པའི་གནས་བརྒྱད་ཐོབ་པའོ། །ལུང་བསྟན་པ་ཐོབ་པ་ནི་མངོན་པར་ཤེས་པ་དྲུག་ཐོབ་པའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་ནི་ཕྱག་རྒྱ་ཆེན་པོའི་སྐུ་ཐོབ་པའོ། །ད་ནི་སྔོན་བྱུང་རྗེས་འཇུག་གཉིས་པོས་མཚམས་སྦྱར་བས་གཞུང་
བསྡུ་བ་ནི་དེ་ནས་ལ་སོགས་པ་གསུངས་ཏེ། མཐུ་ཆེན་པོ་ནི་གོང་དུ་གསུངས་པའི་ཕན་ཡོན་ཐམས་ཅད་བསྐྱེད་པ་ལ་གདོན་མི་ཟ་བའོ། །ཡོན་ཏན་གྲངས་མེད་པའི་འབྱུང་ཁུངས་ཡིན་པའི་ཕྱིར་དཔེ་ནོར་བུ་རིན་པོ་ཆེ་ལྟ་བུའོ། །ཉན་ཐོས་ལ་སོགས་པས་མཐོང་བར་དཀའ་བ་འདིའི་དོན་གྱི་སྒྲ་
དང་ཚད་མའི་སྤྱོད་ཡུལ་མ་ཡིན་པས་ཐོབ་པར་དཀའ་བའོ། །གཟུང་བར་བགྱིའོ་ཞེས་པ་ནི་བསྟན་པའི་དོན་ལ་ནུས་པ་མེད་པའོ། །རྒྱས་པར་བགྱིའོ་ཞེས་པས་སྔགས་ཀྱི་ངོ་བོ་བཟུང་སྟེ་སྐྱེ་བ་མེད་ན་འགག་པ་གཏན་མེད། མ་འགགས་པའི་ཆོས་ལ་དབང་པོ་རབ་འབྲིང་ཐམས་ཅད་རྒྱུན་མི་
འཆད་པར་ལོངས་སྤྱོད་པར་འགྱུར་བའོ། །སེམས་ཅན་ཐམས་ཅད་ལ་བསྒྲག་པར་བགྱིའོ་ཞེས་པ་ནི། སྣོད་དུ་མ་གྱུར་པ་གང་ཡང་མེད་ཅེས་བྱ་བའོ། །དཔེར་ན་གླ་རྩི་བཅུག་པའི་སྣོད་དྲི་ཞིམ་པོར་འགྱུར་བ་ལྟར་སྔགས་འཆད་པ་པོ་ཡང་བྱིན་གྱི་རླབས་ཀྱི་སྒོ་དུ་མ་དང་ལྡན་པར་འགྱུར་བས་
སེམས་ཅན་ཆེན་པོ་ཞེས་བྱའོ། །ཕྱི་བཞིན་འབྲང་ཞེས་པ་ནི་དཔེར་ན་མིའི་མིག་གང་གི་སྤྱོད་ཡུལ་ལ་སྲིན་བུ་ལ་སོགས་པ་ལ་རྒྱང་རིང་ངོ་། །དེ་བཞིན་དུ་བྱང་ཆུབ་སེམས་དཔའ་ཆེན་པོའི་སྤྱོད་ཡུལ་དུ་ཁམས་གསུམ་ཐམས་ཅད་ལ་ཉེ་བ་དང་རིང་བ་མི་མངའོ། །བསྲུང་བ་དང་ནི་གནས་དང་
ལུས་དང་ལོངས་སྤྱོད་དོ། །བསྐྱབ་པ་ནི་འཁོར་བའི་རྒྱ་མཚོ་ལས་སོ། །སྦ་བ་ནི་བདུད་ཀྱི་འཆིང་བ་ལས་སོ། །བསྐྱང་བ་ནི་ལམ་ལོག་པ་ལས་སོ། །བུ་བཞིན་ཞེས་པ་ནི་ཚད་མེད་པས་གཟིགས་པ་རྒྱུན་མི་གཅོད་པའོ། །བཅོམ་ལྡན་འདས་ཀྱིས་བཀའ་སྩལ་པ་ལ་སོགས་པ་ནི་

71-1-320a

དམ་བཅའ་རྗེས་སུ་གདམས་པ་གསུངས་ཏེ། ཕྱག་ན་རྡོ་རྗེ་ཡང་བདག་ལྟར་འགྲོ་བ་ལ་དགོངས་པའི་ཕྱིར་གྲོགས་པོ་ཞེས་བོས་སོ། །ལེགས་སོ་དང་པོས་ནི་ཀུན་རྫོབ་ཏུ་ཐ་དད་པར་མཁྱེན་པ་སྟེ་ཆོས་འཛིན་པ་ནི་བསྐྱང་བ་ལེགས་སོ། །ལེགས་སོ་གཉིས་པ་ནི་དོན་དམ་
པར་ཐ་མི་དད་པར་མཁྱེན་པ་སྟེ་ཆོས་བསྐྱང་བ་ལེགས་སོ། །ཁྱོད་ཀྱིས་དེ་ལྟར་གྱིས་ཤིག་ཅེས་པ་ནི་རང་དོན་རྫོགས་པར་མཛད་ཅེས་པའོ། །ངས་ཁྱེད་ལ་གཏད་དོ་ཞེས་པས་གཞན་དོན་ཡང་རྫོགས་པར་གྱིས་ཤིག་ཅེས་པའོ། །དཔེར་ན་ཕས་བུ་ལ་ནོར་གཏད་པ་ཡང་ཚ་བོ་ལ་སོགས་པ་ཕྱིས་
འབྱུང་བའི་གཞི་ཤུགས་ཀྱིས་འབྱུང་བ་དང་འདྲ་བར་གང་ཟག་སྣོད་ལྡན་རྣམས་བྱིན་གྱིས་རློབས་ལ་བརྒྱུད་པ་རྒྱུན་མ་ཆད་པར་མཛད་ཅེས་པའི་དོན་ཏོ། །ཕན་ཡོན་ལ་སོགས་པ་གང་བརྡ་ཕྲད་པར་སླ་བ་ནི་མ་བཀྲལ་ལོ། །སྒྲིབ་པ་རྣམ་སེལ་ལ་སོགས་པ། །སེམས་དཔའ་བཅུ་དྲུག་རྟོག་པ་དང་། །
སོ་སོར་འབྲང་དང་སྟོང་འཇོམས་སོགས། །རིག་པའི་ལྷ་མོའི་རྒྱུད་རྣམས་དང་། །ཀྲྀ་ཡའི་རིགས་བསྡུས་ལ་སོགས་དང་། །རྣལ་འབྱོར་པ་མཆོག་ལ་སོགས་དང་། །དང་པོ་སངས་རྒྱས་ལ་སོགས་དང་། །གཟུངས་འདིའི་ཆོ་ག་རྒྱས་གསུངས་ཀྱང་། །ལེ་ལོ་ཅན་རྣམས་སྤྲོ་བསྐྱེད་
ཕྱིར། །ཤིན་ཏུ་བསྡུས་ནས་བཤད་པ་ལ། །ཚུལ་བཞིན་གཞུང་ནས་གསུངས་པ་ལྟར། །ཕན་ཡོན་ཐམས་ཅད་ཐོབ་པར་འགྱུར། །གང་གི་ལྕགས་ཀྱུ་བཟུང་ནས་ཉ་ར་ཡིས། །ཀླུ་ཡི་ཕྱུགས་རྣམས་འབུམ་ཕྲག་བཏོན་པ་ལྟར། །བདག་དགེ་ཀུན་སློང་འགྲོ་རྣམས་བྱང་ཆུབ་ཀྱི། །
རིན་ཆེན་གླིང་ཐོབ་མཛད་ཕྱིར་བྲིས་པ་ལས། །སྐྱེ་འགྱུར་དགེ་བས་གཟུངས་དོན་ལ་འཇུག་ཅིང་། །འགྲོ་ཀུན་དྲི་མེད་ཡིད་བཞིན་ནོར་ཐོབ་ཤོག །ཀུན་ནས་སྒོར་འཇུག་པའི་འོད་ཟེར་གཙུག་ཏོར་དྲི་མ་མེད་པར་སྣང་བ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་དང་། དམ་ཚིག་ལ་
རྣམ་པར་བལྟ་བ་ཞེས་བྱ་བའི་གཟུངས་ཀྱི་རྣམ་པར་བཤད་པ། སློབ་དཔོན་ཆེན་པོ་དངོས་གྲུབ་ཐོབ་པ་ལྷན་ཅིག་སྐྱེས་པའི་རོལ་པས་མཛད་པ་རྫོགས་སོ།།      །།གསང་སྔགས་རིག་འཛིན་སྡེ་སྣོད་ལ། །མཁའ་ལྟར་ཤེས་རབ་དང་བ་ནི། །ཉི་མ་ལྟ་བུར་མ་རྨོངས་པའི། །

71-1-320b

མཁས་པ་ཛ་ཡ་དེ་བ་ལ། །ལང་སོ་བནྡེ་ཚུལ་བརྩེགས་ཀྱིས། །གུས་བཅས་མང་དུ་གསོལ་བཏབ་ནས། །སྤུ་རྒྱལ་བོད་ལས་ཁྱད་པར་དུ། །ནད་མེད་ས་གཙང་མདོ་ཁམས་སུ། །ཡིད་བཞིན་ནོར་འདྲའི་གཟུངས་མཆོག་གི། །འགྲེལ་པ་དཔག་བསམ་ཤིང་འདྲ་འདི། །བསྒྱུར་
བའི་དགེ་བས་དད་ལྡན་རྣམས། །གཟུངས་འདི་རྒྱ་ཆེར་སྤྱོད་པར་ཤོག།      །།པཎྜི་ཏ་ཛ་ཡ་དེ་བ་དང་། ལོ་ཙཱ་བ་ལང་སོ་བནྡེ་ཚུལ་ཁྲིམས་བརྩེགས་ཀྱིས་བསྒྱུར་བའོ།།      །། ༄༅༅།  །རྒྱ་གར་སྐད་དུ། སརྦ་ཏཐཱ་ག་ཏཥྞཱ་ཥ་བྷཱ་བ་སི་ཏཱ་ཏ་པ་ཏྲེ་ནཱ་མ་
བྲྀཏྟི། བོད་སྐད་དུ། དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བ་གདུགས་དཀར་མོ་ཅན་ཞེས་བྱ་བའི་འགྲེལ་པ། འཕགས་པ་གཞན་གྱིས་མི་ཐུབ་པ་ཕྱིར་ཟློག་པ་ཆེན་མོ་མཆོག་ཏུ་གྲུབ་པ་ལ་ཕྱག་འཚལ་ལོ། །གཞན་གྱིས་མི་ཐུབ་དྲག་ཤུལ་ཆེ། །གཏུམ་
མོ་ཆེན་མོ་སྟོབས་ཆེན་མོ། །འབར་བ་ཆེན་མོ་གཟི་བརྗིད་ཆེ། །དཀར་ཆེན་འབར་ཕྲེང་ཞབས་བཏུད་ནས། །རྫོགས་ལྡན་གྱི་ནི་བསྐལ་པ་ལ། །རྒྱལ་བ་འཁོར་འཇིག་དབུ་གཙུག་ལས། །ལེགས་ལྡན་ནག་པོ་འདུལ་མཛད་པའི། །རིག་སྔགས་དཀྱིལ་འཁོར་བཤད་པར་བྱ། །འདིའི་
བརྗོད་པར་བྱ་བ་ནི་གང་། འབྲེལ་པ་ནི་ཅི་ཞིག དགོས་པ་ནི་གང་། དགོས་པའི་དགོས་པ་ནི་ཅི་ཞིག་ཡིན་ཞེ་ན། བརྗོད་པར་བྱ་སྟེ། འདུས་མ་བྱས་མཁྱེན་པའི་ཡེ་ཤེས་བཞི་ཆོས་ཀྱི་སྐུ་དང་། དག་པ་འཇིག་རྟེན་པའི་ཡེ་ཤེས་རིགས་བཞི་ལོངས་སྤྱོད་རྫོགས་པའི་སྐུ་དང་། དཀྱིལ་
འཁོར་བཞིའི་རང་བཞིན་བདུད་བཞི་འདུལ་བའི་སྤྲུལ་པའི་སྐུ་ནི་བརྗོད་པར་བྱ་བ་ཡིན་ལ། གདོན་མི་ཟ་བར་ཁོང་དུ་ཆུད་པ་ནི་དགོས་པ་ཡིན་ནོ། །བརྗོད་བྱ་ལས་འདོད་པ་སྐྱེས་པ་ནི་དེ་ལས་བྱུང་བའི་འབྲེལ་པ་ཡིན་ནོ། །དགོས་པའི་དགོས་པ་ནི་འཇིག་རྟེན་དང་འཇིག་རྟེན་ལས་འདས་པའི་དངོས་
གྲུབ་ཐོབ་པའོ། །བསྡུས་པའི་དོན་ནི་ཕྱོགས་བཅུ་དང་དུས་གསུམ་དང་གཉིས་སུ་མེད་པའི་སེམས་དང་སེམས་ལས་བྱུང་བ་ནི་དེ་བཞིན་གཤེགས་པ་ཐམས་ཅད་དོ། །དེའི་དབུའི་གཙུག་ཏོར་ནི་དོན་དམ་པར་ཆོས་ཀྱི་དབྱིངས་ཀྱི་ཡེ་ཤེས་ཡིན་ལ། ཀུན་རྫོབ་ཏུ་ནི་དབུའི་གཙུག་ཏོར་

71-1-321a

ནས་བྱུང་བའི་སྔགས་ཀྱི་དོན་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་ཀྱིས་བསྲུང་བ་དང་། བསྐྱབ་པ་དང་སྦ་བར་མཛད་པའི་གསང་སྔགས་དང་རིག་སྔགས་དང་སྙིང་པོ་དང་ཉེ་བའི་སྙིང་པོའི་དཀྱིལ་འཁོར་གྱི་འཁོར་ལོའི་གཞི་ཕན་ཡོན་ལས་
ཚོགས་དང་བཅས་པའོ།   །དེ་ལྟར་དགོས་པ་དང་བསྡུས་པའི་དོན་བཤད་ནས། ཡན་ལག་གི་དོན་བརྗོད་པར་བྱ་སྟེ། ལྕང་ལོ་ཅན་གྱི་ཕོ་བྲང་ན་གནས་པ་སྡུད་པར་བྱེད་པ་ལག་ན་རྡོ་རྗེ་ལ་འཁོར་ས་བཅུའི་བྱང་ཆུབ་སེམས་དཔའ་ཀུན་དུ་བཟང་པོ་དང་། རྡོ་རྗེ་ཆོས་ལ་སོགས་པས་བླ་གོས་ལྔ་བརྒྱ་
སྟན་དུ་བཏིང་ནས། ཆོས་ཀྱི་འཁོར་ལོ་བསྐོར་བའི་མདོ། །བདེ་བར་གཤེགས་པས་གང་དུ་གསུངས། །རྡོ་རྗེ་འཆང་བ་ཁྱོད་སྨྲོས་ཤིག །ཤེས་རབ་སྲས་པོ་ཁྱོད་སྨྲོས་ཤིག །ཅེས་གསོལ་བ་བཏབ་པའི་རྗེས་ལ་འདི་སྐད་བདག་གིས་ཐོས་པ་ཞེས་གླེང་སློང་བ་གསུངས་སོ། །ལྕང་ལོ་ཅན་གྱི་བདག་
པོ་ས་བཅུའི་དབང་ཕྱུག་གི་བློ་དྲན་པ་ཉམས་པ་མེད་པའི་ཏིང་ངེ་འཛིན་གྱིས་ཚིག་དང་དོན་མ་ལུས་པ་ནི་འདི་སྐད་དོ། །འཁོར་ལས་ཐོས་པ་མ་ཡིན་པ་དང་། སྤྲུལ་པ་མ་ཡིན་པ་དང་། བརྒྱུད་པ་ལས་མ་ཡིན་པ་དང་། ཕྲིན་བཏང་བ་ལས་ཐོས་པ་མ་ཡིན་པས་ན་བདག་གིས་ཐོས་པའོ། །བདག་ཉིད་ཀྱིས་
བརྩོམས་པ་མ་ཡིན་ཏེ། བདེ་བར་གཤེགས་པ་ལས་ཐོས་པ་དེ་སྟོན་པས་ན་ཐོས་པའོ། །ཁྱོད་ཀྱིས་དུས་ནམ་གྱི་ཚེ་ཐོས། སྟོན་པ་གང་ལས་ཐོས། གནས་གང་དུ་ཐོས། འཁོར་སུ་དང་ལྷན་ཅིག་ཐོས། བཤད་པའི་ཆོས་དེ་གང་ཡིན་སྙམ་པ་ལ། ཀུན་རྫོབ་ཏུ་འདི་དང་ལྷན་ཅིག་དུས་ཅིག་གི་ཚེ་ཐོས་པས་
དུས་གཞན་དུ་ཆོས་གཞན་དག་ཀྱང་ཐོས་པས་ཐོས་པ་མང་བ་དང་། དོན་དམ་པར་སངས་རྒྱས་ཀྱི་བྱིན་གྱིས་བརླབས་པས་དུས་མཐའི་སྐད་ཅིག་མ་གཅིག་ལ་བློ་གྲོས་ཆེན་པོས་རྣམ་པ་ཅིག་ཅར་ངེས་ཏེ། ལྷས་བསྟན་པའི་རྨི་ལམ་དུས་ཐུང་ངུ་ལ་དུས་གསུམ་གྱི་བསྐལ་པ་རྣམས་ཀྱང་ཅིག་ཅར་སྣང་བ་
བཞིན་ཡིན་པས་དུས་གཅིག་ནའོ། །བདུད་བཞི་བཅོམ་པས་ན་བཅོམ་ལྡན་འདས་སོ། །ཉི་མ་བཅུ་གཉིས་དྲག་པོ་བཅུ་གཅིག་ཕྱོགས་སྐྱོང་བ་བཅུ་སྟེ་སུམ་ཅུ་རྩ་གསུམ་གྱི་བདག་པོ་བརྒྱ་བྱིན་ལྷའི་གནས་ཆོས་བཟང་ཞེས་བྱ་བ་ལྷ་རྣམས་ཀྱང་ཆོས་ཉན་པས་འདུ་བའི་ཕྱིར་འདུན་སའི་གནས་ནའོ། །དེར་རྒྱུན་

71-1-321b

ཏུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དང་། རང་སངས་རྒྱས་དང་། ཉོན་མོངས་པ་བཅོམ་པའི་དགེ་སློང་འདོད་ཁམས་དང་། གཟུགས་ཁམས་ཀྱི་ལྷའི་བུ་རབ་ཏུ་བྱུང་བའི་གཟུགས་ཅན་དེ་རྣམས་བདུད་དང་བདུད་ཀྱི་རིས་ཀྱི་ལྷ་རྣམས་ཀྱིས་མི་ཕྱེད་པས་
ན་དགེ་འདུན་ནོ། །བྱེ་བ་ཕྲག་བརྒྱ་སྟོང་གི་གྲངས་ཀྱིས་ཆེ་བའམ། དགྲ་བཅོམ་པ་ཟག་པ་ཟད་པ་ལ་སོགས་པའི་ཡོན་ཏན་གྱིས་ཆེ་བས་ན་ཆེན་པོའོ། །ཟག་མེད་སྐྱེ་མེད་ཀྱི་བྱང་ཆུབ་ལ་སེམས་དཔའི་ཡེ་ཤེས་ཕུན་སུམ་ཚོགས་པ་དང་། ཉོན་མོངས་པ་དང་ཤེས་བྱའི་སྒྲིབ་པ་སྤངས་པས་སྤངས་པ་ཕུན་སུམ་
ཚོགས་པ་དང་ལྡན་པའི་དཔའ་བོ་སེམས་ཅན་ལ་དམིགས་པའི་ཡོན་ཏན་ཕུན་སུམ་ཚོགས་པ། བསྐལ་པ་ཆེན་པོ་སྟོང་ཕྲག་བརྒྱད་ཅུ་རྩ་བཞི་མཁྱེན་པའི་མངོན་པར་ཤེས་པ་དྲུག་དང་ལྡན་པས་ཡོན་ཏན་གྱིས་ཆེ་བའམ། རྡོ་རྗེའི་རིགས་ཀྱི་ཕོ་ཉ་དྲུག་ཅུ་རྩ་བཞི་ལ་སོགས་པའི་གྲངས་ཀྱིས་ཆེ་བའི་དགེ་འདུན་འཇིག་
རྟེན་ལས་འདས་པའི་འཁོར་དང་། འཇིག་རྟེན་པའི་འཁོར་ལྷའི་དབང་པོ་བརྒྱ་བྱིན་ལ་སོགས་པས་ཡོངས་སུ་བསྐོར་ཅིང་མདུན་གྱིས་བལྟས་ཏེ་ཆོས་འཆད་ཅིང་བཞུགས་སོ། །ཤུགས་ཀྱིས་ན་ཚད་མེད་ཚངས་པའི་གནས་པས་ལེགས་ལྡན་བྱེད་དྲག་པོ་ལ་སོགས་པ་འདུལ་བ་དང་། བསམ་གཏན་
ལྷའི་གནས་པས་མེ་དང་ཆུ་དང་རླུང་གི་བསྐལ་པའི་བར་དུ་བསྲུང་བ་དང་། རྣམ་ཐར་འཕགས་པའི་གནས་པས་གདོན་སྟོང་ཕྲག་བརྒྱད་ཅུ་དང་། ནད་བཞི་བརྒྱ་རྩ་བཞི་རྣམས་དཔག་ཚད་བཅུ་གཉིས་ཀྱི་ནང་ཚུན་ཆད་དུ་བཟློག་པར་མཛད་པས་ཐབས་ཅིག་ཏུ་བཞུགས་པའོ། །གདུལ་བྱ་རྣམས་ཀྱི་བསམ་
པའི་དུས་མཁྱེན་པས་དེའི་ཚེ་བཅོམ་ལྡན་འདས་ཏིང་ངེ་འཛིན་ལ་སྙོམས་པར་ཞུགས་སོ། །གདན་བཤམས་པ་ཉིད་ལ་ནི་པདྨའི་སྙིང་པོ་སེང་གེའི་ཁྲི་ཟླ་བའི་དཀྱིལ་འཁོར་དང་ཉི་མའི་འོད་མངའ་བ་རྒྱ་ཆེར་རོལ་པ་ནས་འབྱུང་བ་བཞིན་དུ་ཐུགས་རྗེ་ཆེན་པོའི་ནམ་མཁའ་ལྡིང་གིས་འཁོར་བའི་ལས་
དང་ཉོན་མོངས་པའི་ཆུ་སྲིན་གཟུང་བ་དང་། སྟོབས་བཅུའི་གླང་པོ་ཆེ་དང་། མི་འཇིགས་པ་བཞིའི་སེང་གེ་དང་། སོ་སོ་ཡང་དག་པར་རིག་པ་བཞིའི་ཤང་ཤང་དང་། སངས་རྒྱས་ཀྱི་ཆོས་མ་འདྲེས་པའི་རྨ་བྱ་དམ་པས་བརྒྱན་ཅིང་བཤམས་པ་ཉིད་ལ་བཞུགས་ནས། བཅོམ་ལྡན་འདས་

71-1-322a

རྡོ་རྗེ་སྐྱིལ་མོ་ཀྲུང་དང་མཉམ་པར་གཞག་པ་དང་སྐུ་ལུས་བསྲང་བ་ནི་ཤུགས་ལས་ཤེས་པར་བྱའོ། །དཀྱིལ་འཁོར་གྱི་འཁོར་ལོ་བཞི་བསྐྱེད་པའི་ཕྱིར་གཙུག་ཏོར་རྣམ་པར་བལྟ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་ཞེས་བྱ་
བ་ནི་རྗེས་ཐོགས་ལའོ། །བཅོམ་ལྡན་འདས་ཀྱི་མཚན་སུམ་ཅུ་རྩ་གཉིས་ཀྱི་གཙོ་བོ་དབུའི་གཙུག་ཏོར་གྱི་དབུས་ནས་ཆོས་ཀྱི་དབྱིངས་རིག་ཅིང་ཁམས་གསུམ་འཁོར་བ་ལས་སྐྱོབ་པར་བྱེད་པའི་གསང་སྔགས་འདི་གསུངས་ཏེ། གསང་སྔགས་ཀྱི་ཚིག་འདི་དག་ནི་རྗོད་བྱེད་ཡིན་པས་ཞལ་
ནས་བྱུང་བའོ། །དེའི་བརྗོད་བྱའི་དོན་འགྲོ་བ་ཐམས་ཅད་ཀྱི་སྐྱབས་སུ་འགྲོ་ཞིང་ཕྱག་འཚལ་བའི་གནས་སངས་རྒྱས་དང་། ཆོས་དང་། དགེ་འདུན་གསུམ་གཙུག་ཏོར་ནས་བྱུང་བ་ནི་མདོར་བསྟན་པའོ། །དེ་ལ་སངས་རྒྱས་དཀོན་མཆོག་གི་རྒྱས་བཤད་ནི་ཡང་དག་པར་རྫོགས་པའི་སངས་
རྒྱས་རྣམ་པར་གཟིགས་དང་། གཙུག་ཏོར་ཅན་དང་། ཐམས་ཅད་སྐྱོབ་དང་། འཁོར་བ་འཇིག་དང་། གསེར་ཐུབ་དང་། འོད་སྲུངས་དང་། ཤཱཀྱ་ཐུབ་པ་བྱེ་བ་ཕྲག་བདུན་དང་། བྱང་ཆུབ་སེམས་དཔའི་དགེ་འདུན་བྱེ་བ་ཕྲག་བདུན་དང་། ཉན་ཐོས་ཀྱི་དགེ་འདུན་བྱེ་བ་ཕྲག་བདུན་གྱིས་
བསྐོར་བ་སྟེ། དེ་ལ་བྱང་ཆུབ་སེམས་དཔའི་དགེ་འདུན་ནི་བྱམས་པ་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་སྟོང་ངོ་། །ཉན་ཐོས་ཀྱི་དགེ་འདུན་ནི་དགྲ་བཅོམ་པ་དང་། རྒྱུན་དུ་ཞུགས་པ་མཐོང་ལམ་ཐོབ་པ་དང་། ལན་ཅིག་ཕྱིར་འོང་བ་ནི་འདོད་པའི་ཁམས་ཀྱི་ཉོན་མོངས་
པ་དྲུག་སྤངས་པའོ། །ཕྱིར་མི་འོང་བ་ནི་དགུ་སྤངས་པའོ། །ཡང་དག་པར་སོང་བ་ནི་འབྲས་བུ་བཞི་ལ་གནས་པའོ། །ཡང་དག་པར་ཞུགས་པ་ནི་འདོད་པའི་ཁམས་ཀྱི་ཉོན་མོངས་པ་བཞི་ཚུན་ཆད་སྤངས་པའི་སྐད་ཅིག་མ་བཅོ་ལྔ་ཐོབ་པ་ནི་རྒྱུན་དུ་ཞུགས་པའི་རྒྱུ་དང་། འདོད་པའི་ཁམས་ཀྱི་ཉོན་
མོངས་པ་ལྔ་སྤངས་པ་ནི་ལན་ཅིག་ཕྱིར་འོང་བའི་རྒྱུ་དང་། བདུན་པ་དང་བརྒྱད་པ་སྤངས་པ་ནི་ཕྱིར་མི་འོང་བའི་རྒྱུ་དང་། སྲིད་པའི་རྩེ་མོའི་ཆུང་ངུའི་འབྲིང་སྤངས་པ་ནི་དགྲ་བཅོམ་པའི་རྒྱུ་ལ་ཞུགས་པའོ། །བསམ་གཏན་བཞི་ཐོབ་པའི་ལྷའི་དྲང་སྲོང་སངས་རྒྱས་རབས་བདུན་གྱི་འཁོར་ཞི་བ་དང་རྒྱས་

71-1-322b

པས་ཕན་འདོགས་པ་དང་། དབང་དང་མངོན་སྤྱོད་ཀྱིས་གནོད་པ་བྱེད་པའི་བསམ་གཏན་གྱི་རིག་སྔགས་ཀྱི་དམོད་པ་འདོར་བ་རྣམས་དང་། གཟུགས་མེད་པའི་སྙོམས་པར་འཇུག་པ་བཞི་ཐོབ་པའི་རིག་སྔགས་གྲུབ་པའི་དྲང་སྲོང་ཕྲིན་ལས་རྣམ་བཞིས་ཕན་འདོགས་ནུས་པ་རྣམས་དང་། འགོག་
པའི་སྙོམས་པར་འཇུག་པ་ཐོབ་པ་མངོན་པར་ཤེས་པ་ལྔའི་རིག་སྔགས་འཆང་གྲུབ་པ་རྣམས་དང་། སྟེང་གི་ཚངས་པ་གཟུགས་ཁམས་གནས་རིས་བཅུ་བདུན་གྱི་ལྷ་དང་། དབང་པོ་སུམ་ཅུ་རྩ་གསུམ་གྱི་ལྷ་དང་། ལེགས་ལྡན་དྲག་པོ་སྲིད་པའི་རྩེ་མོའི་ཏིང་ངེ་འཛིན་གྱི་དཀའ་ཐུབ་
བསྒོམ་པ་ལ་ཨུ་མས་དཀའ་ཐུབ་ཟློག་པའི་བདག་པོ་རྩེ་གསུམ་འཆང་བའི་འཁོར་དང་བཅས་པ་དང་། ལེགས་ལྡན་ལྷ་མ་ཡིན་གྱི་གཡུལ་ལས་རྒྱལ་བ་ཁྱབ་འཇུག་སྲེད་མེད་ཀྱི་བུ་རྒྱལ་ཆེན་རིགས་བཞི་དགའ་རབ་དབང་ཕྱུག་དང་ཕྱག་རྒྱ་ཆེན་པོ་ལྔས་ཕྱག་བྱས་པ་དང་། སྲིད་པའི་རྩེ་
མོའི་ཏིང་ངེ་འཛིན་ཐོབ་པའི་ལེགས་ལྡན་ནག་པོ་ཆེན་པོ་རྒྱལ་པོ་མང་པོས་བཀུར་བའི་གྲོང་ཁྱེར་སུམ་བརྩེགས་འཇིག་པར་བྱེད་པའི་དུར་ཁྲོད་ཆེན་པོ་སོ་ས་ལི་ལ་སོགས་པ་བརྒྱད་དུ་གནས་ནས་ཕྱོགས་སྐྱོང་བ་བརྒྱད་ཀྱི་ཆུང་མ་མ་མོའི་ཚོགས་ཀྱིས་ཕྱག་བྱས་པས་བསྐོར་བའི་དེ་བཞིན་གཤེགས་
པའི་དཀྱིལ་འཁོར་བྱུང་སྟེ། དེ་དག་ཐམས་ཅད་ནི་རྗེའུ་རིགས་བདུན་དུ་ངེས་ཏེ། རྣམ་པར་གཟིགས་ནི་དེ་བཞིན་གཤེགས་པའི་རིགས་སོ། །གཙུག་ཏོར་ཅན་ནི་པདྨའི་རིགས་སོ། །ཐམས་ཅད་སྐྱོབ་ནི་རྡོ་རྗེའི་རིགས་སོ། །ཁོར་བ་འཇིག་ནི་ནོར་བུའི་རིགས་སོ། །གསེར་ཐུབ་
ནི་དཔལ་གྱི་གླང་པོ་ཆེ་བཞིན་དུ་དཔུང་གི་ཚོགས་འདུལ་བས་ན་གླང་པོའི་རིགས་སོ། །འོད་སྲུངས་ནི་སེམས་ཅན་ཐམས་ཅད་ལ་བྱང་ཆུབ་ཀྱི་སེམས་བསྐྱེད་པས་གཞོན་ནུའི་རིགས་སོ། །ཤཱ་ཀྱ་ཐུབ་པ་ནི་ཀླུའི་རྒྱལ་པོ་རྒྱ་མཚོ་དང་མ་དྲོས་པ་ལ་སོགས་པ་བཏུལ་བས་ཀླུའི་རིགས་སོ། །དེ་
ལྟར་སངས་རྒྱས་རབས་བདུན་དང་། སྟོང་མི་མཇེད་ཀྱི་འོག་མིན་གྱི་ཙནྡན་སྦྲུལ་གྱི་སྙིང་པོའི་ཞིང་ཁམས་ན་ཉོན་མོངས་པ་དང་ཤེས་བྱའི་སྒྲིབ་པ་སྤངས་པས་དཔའ་བརྟན་པའི་སྡེ་ཡེ་ཤེས་ཕུན་སུམ་ཚོགས་པ་མཚོན་ཆའི་རྒྱལ་པོ་དང་། ཤར་ཕྱོགས་མངོན་པར་དགའ་བའི་མི་བསྐྱོད་པ་

71-1-323a

དང་། ལྷོ་ཕྱོགས་རྡུལ་དང་བྲལ་བའི་སྨན་གྱི་བླ་བཻ་ཌཱུརྱའི་འོད་ཀྱི་རྒྱལ་པོ་དང་། ནུབ་ཕྱོགས་བདེ་བ་ཅན་གྱི་སཱ་ལའི་དབང་པོའི་མེ་ཏོག་ཀུན་དུ་རྒྱས་པ་དང་། བྱང་ཕྱོགས་འབྲུག་སྒྲ་བསྒྲགས་པའི་ཤཱཀྱ་ཐུབ་པ་དང་། བྱང་ཤར་གྱི་མཚམས་ཀྱི་ཏིང་ངེ་འཛིན་
དམ་པ་ན་རིན་པོ་ཆེའི་ཏོག་གི་རྒྱལ་པོ་དང་། ཤར་ལྷོའི་མཚམས་ཀྱི་བྱང་ཆུབ་ཀྱི་རྒྱན་ན་ཀུན་དུ་བཟང་པོ་དང་། ལྷོ་ནུབ་ཀྱི་མཚམས་ཀྱི་རྡུལ་དང་བྲལ་བ་ན་རྣམ་པར་སྣང་མཛད་དང་། ནུབ་བྱང་གི་མཚམས་ཀྱི་དབང་དུ་གྱུར་པ་ན་སྤྱན་རྒྱས་པ་ཨུཏྤ་ལའི་དྲིའི་ཏོག་གི་རྒྱལ་པོ་བྱང་ཆུབ་
སེམས་དཔའ་དང་། ཉན་ཐོས་ཀྱི་དགེ་འདུན་དང་འཇིག་རྟེན་པའི་འཁོར་དང་བཅས་པ་དེ་རྣམས་ལ་ཕྱག་འཚལ་ནས་ཞེས་བྱ་བ་ནི། མ་འོངས་པའི་གསང་སྔགས་ཀྱི་སྒོའི་སྤྱད་པ་སྤྱོད་པར་འདོད་པ་རྣམས་ཀྱིས་རང་གི་སྤྱི་གཙུག་ནས་འོད་ཟེར་འཕྲོས་པས་ཚོགས་བསོགས་པའི་ལྷ་དེ་རྣམས་
སྤྱན་དྲངས་ལ་ཡོན་ཆབ་དང་བཅས་པའི་མཆོད་པ་ལྔས་མཆོད་པ་དང་། སྡིག་པ་བཤགས་པ་དང་། རྗེས་སུ་ཡི་རང་བ་དང་། ཆོས་ཀྱི་འཁོར་ལོ་བསྐོར་བར་བསྐུལ་བ་དང་། ཡོངས་སུ་མྱ་ངན་ལས་མི་འདའ་བར་གསོལ་བ་གདབ་པ་དང་། ལུས་དབུལ་ཞིང་དགེ་བའི་རྩ་བ་བསྔོའོ་
ཞེས་བྱ་བའི་དོན་ཡིན་ནོ།   །དེ་ལྟར་ཚོགས་བསགས་པའི་དཀྱིལ་འཁོར་བཤད་ནས་སྲུང་བའི་འཁོར་ལོ་སྟོན་པ་ནི། བཅོམ་ལྡན་འདས་དེ་བཞིན་གཤེགས་པའི་དབུའི་གཙུག་ཏོར་ནས་བྱུང་བའི་གདུགས་དཀར་མོ་ཅན་གྱི་ལྷ་ཁྲོ་མོ་བཅུ་བདུན་ཕྱུང་བ་ནི། བདུད་དང་བདུད་ཀྱི་རིགས་ཀྱི་ལྷ་
གཞན་གྱིས་མི་ཐུབ་པ་བར་དུ་གཅོད་པ་བཅུ་བདུན་ཕྱིར་བཟློག་པ་ཆེན་མོ་འདི་ཞེས་བྱ་བ་ནི། དབུས་ཀྱི་ཁྲོ་མོ་གཞན་གྱིས་མི་ཐུབ་པས་འབྱུང་པོའི་གདོན་ཕྱོགས་སྐྱོང་བཅུའི་རིགས་ཐམས་ཅད་ཚར་གཅོད་པར་བྱེད་དོ། །ཤར་ཕྱོགས་ཀྱི་གཏུམ་པ་ཆེན་མོས་ནི་གཞན་གྱི་རིག་སྔགས་ཐམས་
ཅད་གཅོད་པར་བྱེད་དོ། །ལྷོའི་འབར་མ་ཆེན་མོས་ནི་དུས་མ་ཡིན་པར་འཆི་བ་བརྒྱད་པོ་ཐམས་ཅད་བཟློག་གོ། །ནུབ་ཕྱོགས་ཀྱི་དཀར་མོ་ཆེན་མོས་ནི་གསོད་པ་དང་བཅིངས་པ་ཐམས་ཅད་ལས་གྲོལ་བར་བྱེད་དོ། །བྱང་ཕྱོགས་ཀྱི་སྒྲོལ་མས་ནི་ངན་སོང་དུ་སྐྱེ་བའི་རྨི་ལམ་ངན་པ་

71-1-323b

ཐམས་ཅད་བཟློག་གོ། །བྱང་ཤར་གྱི་རྒྱལ་བའི་རྡོ་རྗེ་མས་ནི་གནོད་སྦྱིན་དང་། སྲིན་པོའི་གདོན་ཐམས་ཅད་འཇིག་གོ། །ཤར་ལྷོ་མཚམས་ཀྱི་པདྨའི་མངོན་མཚན་ཅན་གྱིས་ནི་གདོན་སྟོང་ཕྲག་བརྒྱད་ཅུ་འཇིག་གོ། །ལྷོ་ནུབ་མཚམས་ཀྱི་གཞན་གྱིས་མི་ཐུབ་མས་ནི་རྒྱུ་སྐར་ཉི་ཤུ་
རྩ་བརྒྱད་འདུལ་ལོ། །ནུབ་བྱང་མཚམས་ཀྱི་རྡོ་རྗེ་མཆུས་ནི་གཟའ་ཆེན་པོ་བརྒྱད་འཇིག་གོ། །ཕྱི་རོལ་གྱི་མཚམས་ཀྱི་ཞི་བའི་ལྷ་མོས་ནི་དགྲ་ཐམས་ཅད་བཟློག་གོ། །མཚམས་གཉིས་པའི་ཞི་བ་གསེར་ཕྲེང་མས་ནི་གཟའ་སྒྲ་གཅན་འཛིན་མ་རུངས་པ་འཇིག་གོ། །མཚམས་
གསུམ་པའི་དཀར་ཕྲེང་ཆེན་པོ་འབར་བ་མས་ནི་སྡང་བ་གཤིན་རྗེའི་གདོན་འཇིག་གོ། །མཚམས་བཞིའི་འཕགས་མ་སྒྲོལ་མས་ནི་འཆི་ལྟས་ཀྱི་རྨི་ལམ་ངན་པ་ཐམས་ཅད་འཇིག་གོ། །ཤར་སྒོའི་རྡོ་རྗེ་ལུ་གུ་རྒྱུད་ཀྱིས་ནི་དུག་ཐམས་ཅད་བཟློག་གོ། །ལྷོ་སྒོའི་རྡོ་རྗེ་གཞོན་ནུ་མས་ནི་མཚོན་
ཐམས་ཅད་བཟློག་གོ། །ནུབ་སྒོའི་ལག་ན་རྡོ་རྗེ་མས་ནི་མེ་དང་ཆུ་བཟློག་གོ། །བྱང་སྒོའི་རིན་ཆེན་མས་ནི་ངན་སོང་གི་འཇིགས་པ་ཐམས་ཅད་ལས་སྒྲོལ་བ་སྟེ། ཁྲོ་མོ་དེ་རྣམས་ཀྱི་མཚན་དང་སྐུ་མདོག་དང་ཕྱག་མཚན་ཇི་ལྟ་བུ་ཞེ་ན། གཞན་གྱིས་མི་ཐུབ་དྲག་ཤུལ་ཆེ། ཞེས་བྱ་བ་ལ་
སོགས་པ་གསུངས་ཏེ། གཞན་གྱིས་མི་ཐུབ་པ་ནི་མཚན་ནོ། །དྲག་ཤུལ་ཆེན་མོ་ནི་སྐུ་མདོག་ནག་མོ་རྡོ་རྗེ་དང་སྡིགས་མཛུབ་མཛད་པའོ། །ཤར་ཕྱོགས་ཀྱི་གཏུམ་པ་ཆེན་མོ་ནི་མཚན་ནོ། །སྟོབས་ཆེན་མོ་ནི་སྐུ་མདོག་དཀར་མོ་འཁོར་ལོ་དང་སྡིགས་མཛུབ་མཛད་པའོ། །ལྷོ་ཕྱོགས་ཀྱི་
འབར་བ་ཆེན་མོ་ནི་མཚན་ནོ། །གཟི་བརྗིད་ཆེ་བ་ནི་སྐུ་མདོག་སེར་མོ་རིན་པོ་ཆེ་དང་སྡིགས་མཛུབ་མཛད་པའོ། །ནུབ་ཕྱོགས་ཀྱི་དཀར་ཆེན་འབར་ཕྲེང་མ་ནི་མཚན་ནོ། །གོས་དཀར་མོ་ནི་སྐུ་མདོག་དམར་མོ་པདྨ་དང་སྡིགས་མཛུབ་མཛད་པའོ། །བྱང་ཕྱོགས་ཀྱི་འཕགས་མ་
སྒྲོལ་མ་ནི་མཚན་ནོ། །ཁྲོ་གཉེར་ཅན་ནི་སྐུ་མདོག་ལྗང་གུ་སྣ་ཚོགས་རྡོ་རྗེ་དང་སྡིགས་མཛུབ་མཛད་པའོ། །བྱང་ཤར་མཚམས་ཀྱི་རྒྱལ་བ་རྡོ་རྗེ་མ་ནི་མཚན་ནོ། །ཕྲེང་ཞེས་གྲགས་ཞེས་བྱ་བ་ནི་སྐུ་མདོག་སྔོན་མོ་དབྱིག་པ་དང་སྡིགས་མཛུབ་མཛད་པའོ། །ཤར་ལྷོ་མཚམས་

71-1-324a

ཀྱི་པདྨའི་མངོན་མཚན་ནི་མཚན་ནོ། །རྡོ་རྗེས་མཚན་ནི་སྐུ་མདོག་སེར་མོ་རྡོ་རྗེས་མཚན་པའི་ལྕགས་ཀྱུ་དང་སྡིགས་མཛུབ་མཛད་པའོ། །ལྷོ་ནུབ་མཚམས་ཀྱི་གཞན་གྱིས་མི་ཐུབ་པ་ནི་མཚན་ནོ། །ཕྲེང་བ་ཅན་ནི་སྐུ་མདོག་དམར་མོ་རྡོ་རྗེའི་ཕྲེང་བ་དང་སྡིགས་མཛུབ་
མཛད་པའོ། །ནུབ་བྱང་མཚམས་ཀྱི་རྡོ་རྗེའི་མཆུ་ཅན་ནི་མཚན་ནོ། །རྣམ་སྒེག་མོ་ནི་སྐུ་མདོག་ལྗང་གུ་རལ་གྲི་དང་སྡིགས་མཛུབ་མཛད་པའོ། །མཚམས་ཀྱི་ལྷ་མོ་མཆོད་པ་བྱེད་པ་བཞི་ནི་ཞི་བའི་ལྷ་རྣམས་ནི་མཚན་ནོ། །མཆོད་མ་ནི་ཉེ་བའི་ལྷ་མོ་སངས་རྒྱས་སྤྱན་ཡིན་པས་སྐུ་
མདོག་དཀར་མོ་རྡོ་རྗེས་མཚན་པའི་བདུག་སྤོས་དང་སྡིགས་མཛུབ་མཛད་པའོ། །གཉིས་པའི་མཚན་ནི་ཞི་བ་མའོ། །གསེར་གྱི་ཕྲེང་བ་ཅན་ནི་སྐུ་མདོག་སེར་མོ་གསེར་གྱི་ཕྲེང་བ་དང་སྡིགས་མཛུབ་མཛད་པའོ། །གསུམ་པ་དཀར་ཆེན་འབར་ཕྲེང་མ་ནི་མཚན་ནོ། །གོས་དཀར་མོ་ནི་
སྐུ་མདོག་དཀར་དམར་མར་མེ་འབར་བ་དང་སྡིགས་མཛུབ་མཛད་པའོ། །བཞི་པ་འཕགས་མ་སྒྲོལ་མ་ནི་མཚན་ནོ། །སྟོབས་ཆེན་མོ་ནི་སྐུ་མདོག་ལྗང་གུ་དྲིའི་དུང་ཆོས་དང་སྡིགས་མཛུབ་མཛད་པའོ། །ཤར་སྒོར་རྡོ་རྗེ་ལུ་གུ་རྒྱུད་ནི་མཚན་ནོ། །གཞན་ནི་སྐུ་མདོག་སྔོན་མོ་རྡོ་རྗེ་
ལུ་གུ་རྒྱུད་དང་སྡིགས་མཛུབ་མཛད་པའོ། །ལྷོ་སྒོའི་རྡོ་རྗེ་གཞོན་ནུ་མ་ནི་མཚན་ནོ། །རིག་འཛིན་མ་ནི་སྐུ་མདོག་སེར་མོ་ཞགས་པ་དང་སྡིགས་མཛུབ་མཛད་པའོ། །ནུབ་སྒོའི་ལག་ན་རྡོ་རྗེའི་རིགས་ནི་མཚན་ནོ། །གསེར་ཕྲེང་ནི་སྐུ་མདོག་དམར་མོ་ལྕགས་ཀྱུ་དང་སྡིགས་
མཛུབ་མཛད་པའོ། །བྱང་སྒོའི་རིན་ཆེན་མ་ནི་མཚན་ནོ། །ལེབ་རྒན་རྩི་ནི་སྐུ་མདོག་དམར་ལྗང་དྲིལ་བུ་དང་སྡིགས་མཛུབ་མཛད་པའོ། །ཁྲོ་མོ་བཅུ་བདུན་པོ་དེ་རྣམས་གང་གི་རིགས་ཡིན་ཞེ་ན། རྣམ་པར་སྣང་མཛད་རིགས་ཞེས་གསུངས་སོ། །གང་ནས་སྐྱེས་ཤེ་ན། 
གཙུག་ཏོར་གྲགས་ཞེས་བྱ་སྟེ། དབུའི་གཙུག་ཏོར་ལས་སྐྱེས་པའོ། །ཁྲོ་མོ་བཅུ་བདུན་པོ་དེ་རྣམས་ཀྱི་ཕྱག་རྒྱའི་དཀྱིལ་འཁོར་དང་། ཕྱིས་འབྱུང་བའི་གསང་སྔགས་ཀྱི་ཚོགས་བཅུ་གསུམ་པོ་དེ་དག་ཐམས་ཅད་ཀྱིས་རྣལ་འབྱོར་པ་བདག་ཅག་འཁོར་དང་བཅས་པ་དང་། 

71-1-324b

ཁམས་གསུམ་གྱི་སེམས་ཅན་ཐམས་ཅད་བསྲུང་དུ་གསོལ་ཞེས་འཁོར་ལོའི་ལྷ་དང་སྔགས་ལ་གསོལ་བ་འདེབས་པའོ། །དེ་རྣམས་ཀྱི་སྔགས་ནི་ཨོཾ་སརྦ་ཏ་ཐཱ་ག་ཏོཥྞི་ཥ་སི་ཏཱ་ཏ་པ་ཏྲེ་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བའི་གདུགས་དཀར་
མོ་ཅན་ཞེས་བོད་པའོ། །ཧཱུཾ་དྲཱུཾ་ཧྲཱིཿཥྚོཾ་ཞེས་བྱ་བ་ནི་གཙོ་མོ་གཞན་གྱིས་མི་ཐུབ་མ་ནི་འབྱུང་པོའི་གདོན་ཐམས་ཅད་ཚར་གཅོད་པར་གྱིས་ཤིག་པའོ། །ཤར་ཕྱོགས་ཀྱི་གཏུམ་ཆེན་མོའི་སྔགས་ནི་ཛམྦྷ་ན་ཀཱ་རཱི་ཧཱུཾ་དྲཱུཾ་ཧྲཱིཿཥྚོཾ་ཞེས་བྱ་བ་ནི། གཞན་གྱི་རིག་སྔགས་ཐམས་ཅད་ཆོད་
ཅིག་ཅེས་པའོ། །ཡི་གེ་ཧཱུཾ་གིས་དགུག་པ་དང་། དྲཱུཾ་གིས་གཞུག་པ་དང་། ཧྲཱིཿས་འཆིང་བ་དང་། ཥྚོཾ་གྱིས་དབང་དུ་བྱེད་པའོ། །དེ་ལྟར་ཡི་གེ་བཞིའི་དོན་ནི་ཐམས་ཅད་ལ་སྦྱར་བར་བྱའོ། །ལྷོ་ཕྱོགས་ཀྱི་འབར་བ་ཆེན་མོའི་སྔགས་ནི་སྟཾ་བྷ་ན་ཀཱ་རཱི་དང་། ཡི་
གེ་བཞིས་དུས་མ་ཡིན་པར་འཆི་བ་བརྒྱད་ཟློགས་ཤིག་པའོ། །ནུབ་ཕྱོགས་ཀྱི་གོས་དཀར་མོའི་སྔགས་ནི་མོ་ཧ་ན་ཀཱ་རཱི་དང་། ཡི་གེ་བཞིས་རྒྱལ་པོའི་ཆད་པའི་གསོད་པ་དང་འཆིང་བ་ལས་ཁྲོལ་ཅིག་པའོ། །བྱང་ཕྱོགས་ཀྱི་སྒྲོལ་མའི་སྔགས་ནི་སམྦྷ་ཀྵ་ཎ་ཀཱ་རཱི་དང་། ཡི་
གེ་བཞིས་རྨི་ལམ་ངན་པ་ཐམས་ཅད་ཟློགས་ཤིག་པའོ། །བྱང་ཤར་གྱི་རྒྱལ་བའི་རྡོ་རྗེ་མའི་སྔགས་ནི་བནྡྷ་ན་ཀཱ་རཱི་དང་། ཡི་གེ་བཞིས་གནོད་སྦྱིན་དང་སྲིན་པོའི་གདོན་ཐམས་ཅད་འཇིག་པར་གྱིས་ཤིག་པའོ། །ཤར་ལྷོའི་པདྨའི་མངོན་མཚན་ཅན་མའི་སྔགས་ནི་པ་ར་བི་ཥ་
བྷཀྵ་ཎ་ཀཱ་རཱི་དང་། ཡི་གེ་བཞིས་གདོན་སྟོང་ཕྲག་བརྒྱད་ཅུ་རྩ་བཞི་འཇིག་པར་གྱིས་ཤིག་པའོ། །ལྷོ་ནུབ་ཀྱི་གཞན་གྱིས་མི་ཐུབ་མའི་སྔགས་ནི་སརྦ་དུཥྚ་པྲ་དུཥྚ་ན་སྟཾ་བྷ་ན་ཀཱ་རཱི་དང་། ཡི་གེ་བཞིས་རྒྱུ་སྐར་ཉི་ཤུ་རྩ་བརྒྱད་ཞི་བར་གྱིས་ཤིག་པའོ། །ནུབ་བྱང་གི་རྡོ་རྗེ་
མཆུའི་སྔགས་ནི་སརྦ་ཡཀྵ་རཱཀྵ་སཾ་གྲ་ཧཱ་ཎཱཾ་བི་དྷཱཾ་ས་ན་ཀཱ་རཱི་དང་། ཡི་གེ་བཞིས་གཟའ་ཆེན་པོ་བརྒྱད་འཇིག་པར་གྱིས་ཤིག་པའོ། །ཉེ་བའི་ལྷ་མོ་བཞི་ནི་ཞི་བ་ཡིན་པས་སྔགས་སྔ་མ་དང་འདྲ་བར་དགོངས་སོ། །ཤར་ཕྱོགས་ཀྱི་སྒོའི་རྡོ་རྗེ་ལུ་གུ་རྒྱུད་ཀྱི་སྔགས་ནི་སརྦ་པ་ར་བི་དྱཱཾ་ཙྪེ་

71-1-325a

ད་ན་ཀཱ་རཱི་དང་། ཡི་གེ་བཞིས་དུག་ཐམས་ཅད་ཟློགས་ཤིག་པའོ། །ལྷོ་ཕྱོགས་ཀྱི་སྒོའི་རྡོ་རྗེ་གཞོན་ནུ་མའི་སྔགས་ནི་ཙ་ཏུ་རྴི་ཏི་ནཾ་གྲ་ཧ་སྭཱ་ཎཱཾ་བི་དྷཾ་ས་ན་ཀཱ་རཱི་དང་། ཡི་གེ་བཞིས་མཚོན་ཐམས་ཅད་ཟློགས་ཤིག་པའོ། །ནུབ་ཕྱོགས་ཀྱི་སྒོའི་ལག་ན་རྡོ་རྗེའི་
སྔགས་ནི་ཨཥྚ་བིཾ་ཤ་ཏཱི་ནཱཾ་ནཀྵ་ཏྲཱ་ཎཱཾ་པྲ་ས་དྷ་ན་ཀཱ་རཱི་དང་། ཡི་གེ་བཞིས་མེ་དང་ཆུ་ལས་ཟློགས་ཤིག་པའོ། །བྱང་གི་སྒོའི་རིན་ཆེན་མའི་སྔགས་ནི་ཨཥ་ཎཱཾ་མ་ཧཱ་གྲ་ཧ་ཎཱཾ་བི་དྷཾ་ས་ན་ཀཱ་རཱི་དང་། ཡི་གེ་བཞིས་ངན་འགྲོའི་འཇིགས་པ་ཐམས་ཅད་ལས་སྒྲོལ་ཅིག་པའོ། །ཡི་གེ་
བཞི་པོ་དེ་ཡང་བདུད་བཞི་འཇོམས་པ་དང་། ཉོན་མོངས་པ་བཞི་སྤོང་བ་དང་། སྒྲིབ་པ་བཞི་སྦྱོང་བ་དང་། ཡེ་ཤེས་བཞི་དགུག་གཞུག་གི་ཕྲིན་ལས་བཞི་བྱེད་པར་གསུངས་སོ། །རཀྵ་རཀྵ་མཱཾ་སརྦ་ས་ཏཾ་ཤྩ་ཞེས་བྱ་བ་ནི་བདག་དང་སེམས་ཅན་ཐམས་ཅད་སྲུངས་ཤིག་སྲུངས་ཤིག་ཅེས་
གསོལ་བ་འདེབས་པར་བྱེད་པ་ཡིན་ནོ།   །ད་ནི་ཕྱོགས་སྐྱོང་བ་བཅུ་འདུལ་བའི་དཀྱིལ་འཁོར་ཁྲོ་མོ་བཅུ་གཅིག་གི་སྐུའི་དཀྱིལ་འཁོར་བསྒོམས་ཏེ། སྔགས་བཅུ་གཅིག་བཟླས་ནས་བསྙེན་པ་འབུམ་དང་ཉེ་བའི་བསྙེན་པ་ཁྲི་བྱས་ནས། གྲོག་མཁར་གྱིས་འམ་དུར་ཁྲོད་ཀྱི་ས་ལ་གདོན་
ལ་སོགས་པ་ཐམས་ཅད་ཀྱི་ལིང་ག་བྱས་ལ་དེའི་སྙིང་གར་ཧཱུཾ་དྲཱུཾ་ཧྲཱིཿཥྚོཾ་གྱི་དབུས་སུ་གདོན་ལ་སོགས་པའི་མིང་བྲིས་ལ་ཕྱི་རོལ་ནས་ཏདྱ་ཐཱ། ཨོཾ་ཨ་ན་ལེ་ཨ་ན་ལེ་ཞེས་བྱ་བ་ལ་སོགས་པའི་སྔགས་འཁོར་ལོ་རྩིབས་བརྒྱད་ལ་དགོད། ཕྱག་ན་རྡོ་རྗེའི་འཁྲུལ་འཁོར་གྱི་སྔགས་ལྟེ་བ་ལ་
བཀོད་ནས་ལིང་གའི་སྙིང་གར་བཅུག་སྟེ་དུམ་བུར་གཏུབས་ནས་མེ་ལ་སྦྱིན་སྲེག་བྱ་བའམ། ཡང་ན་ཕུར་བུས་བཏབ་ནས་མནན་པར་བྱའོ་ཞེས་པ་བཅོམ་ལྡན་འདས་མ་དེ་བཞིན་གཤེགས་པའི་གཙུག་ཏོར་ནས་བྱུང་བའི་གདུགས་དཀར་མོ་ཅན་རྡོ་རྗེ་གཙུག་ཏོར་ཕྱོགས་བཅུའི་
གདོན་ཕྱིར་ཟློག་མ་ཆེན་མོ་ཞེས་བྱ་བ་ནི་མཚན་ཡིན་ནོ། །དེའི་སྐུ་མདོག་དང་ཕྱག་མཚན་བཤད་པ་ན་ཕྱག་སྟོང་མངའ་བ་ཆེན་མོ་ཞེས་བྱ་བ་སྟེ། བསྐལ་པ་བཟང་པོའི་སངས་རྒྱས་སྟོང་གི་སྤྲུལ་པ་རྡོ་རྗེ་བརྒྱ་དང་། འཁོར་ལོ་བརྒྱ་དང་། རིན་ཆེན་འབར་བ་བརྒྱ་དང་། པདྨ་འབར་བ་

71-1-325b

བརྒྱ་དང་། སྣ་ཚོགས་རྡོ་རྗེ་འབར་བ་བརྒྱ་དང་། མདའ་དང་གཞུ་འབར་བ་ཉིས་བརྒྱ་དང་། རལ་གྲི་དང་ཞགས་པ་འབར་བ་ཉིས་བརྒྱ་དང་། ལྕགས་ཀྱུ་ཉིས་བརྒྱ་ཕྱག་ན་བསྣམས་པའོ། །དབུ་སྟོང་མངའ་བ་ཆེན་མོ་ནི་བསྐལ་པ་བཟང་པོའི་སངས་རྒྱས་སྟོང་གི་ཞལ་སྒེག་པོ་
བརྒྱ་དང་། དཔའ་བ་བརྒྱ་དང་། འཇིགས་སུ་རུང་བ་བརྒྱ་དང་། རྒོད་པ་བརྒྱ་དང་། གཤེ་བ་བརྒྱ་དང་། རྔམ་པ་བརྒྱ་དང་། སྙིང་རྗེ་བརྒྱ་དང་། ཞི་བ་བརྒྱ་དང་། ངོ་མཚར་བ་བརྒྱ་དང་། དྲག་པོ་མི་སྡུག་པ་བརྒྱ་སྟེ་སྟོང་ལ་སྤྱན་གསུམ་གསུམ་མངའ་བས་སྤྱན་བྱེ་བ་བརྒྱ་སྟོང་
མངའ་བ་ཞེས་བྱའོ། །དབུ་སྟོང་གི་སྟེང་ན་སངས་རྒྱས་བྱེ་བ་ཕྲག་བདུན་དང་། སངས་རྒྱས་དཔའ་བརྟན་པའི་སྡེ་མཚོན་ཆ་ལ་སོགས་པ་དགུས་ཅོད་པན་མཛད་པས་ན་མི་ཕྱེད་པའོ། །བ་སྤུའི་བུ་ག་ནས་བསྐལ་པ་ཆེན་པོའི་མེའི་འོད་ཟེར་འཕྲོ་བས་ན་འབར་བའི་མཚན་རྟགས་ཅན་ནོ། །
ཞབས་སྟོང་རྡོ་རྗེ་ཡངས་པ་ཆེན་མོས་ས་གསུམ་གྱི་དཀྱིལ་འཁོར་ཐམས་ཅད་དུ་བདག་དང་སེམས་ཅན་ཐམས་ཅད་ཀྱི་རྒྱལ་པོའི་འཇིགས་པ་ནས། ཟས་སུ་སྦྱིན་སྲེག་ཟ་བའི་བར་དེ་དག་ཐམས་ཅད་ཞབས་ཀྱིས་མནན་པར་མཛད་པའོ། །དེ་ཕྱིར་བདག་དང་སེམས་ཅན་ཐམས་ཅད་བདེ་
ལེགས་སུ་གྱུར་ཅིག་ཅེས་གསོལ་བ་གདབ་བོ། །དེའི་ཤར་ཕྱོགས་འཁོར་ལོའོ་རྩིབས་ལ་རྣམས་པར་བསྒྱིངས་པའི་རྡོ་རྗེ་ལ་སྡོམ་མོ་རྡོ་རྗེ་དང་ཨུཏྤལ་བསྣམས་པའོ། །ལྷོ་ཕྱོགས་ཀྱི་རྩིབས་ལ་གསེར་འོད་ལྟ་བུའི་སྤྱན་མངའ་མ། སེར་མོ་འཁོར་ལོ་དང་། པདྨ་དཀར་པོའི་སྟེང་ན་
སྤྱན་དང་ལྡན་པའོ། །ནུབ་ཕྱོགས་ཀྱི་རྩིབས་ལ་དཀར་མོ་པདྨའི་རྡོ་རྗེ་དང་པདྨའི་སྡོང་བུ་བསྣམས་པའོ། །བྱང་ཕྱོགས་ཀྱི་རྩིབས་ལ་རྡོ་རྗེ་འགྲོས་ལྗང་གུ་སྣ་ཚོགས་རྡོ་རྗེ་དང་ཨུཏྤལ་བསྣམས་པའོ། །བྱང་ཤར་མཚམས་སུ་པདྨའི་སྤྱན་དམར་མོ་འཁོར་ལོ་དང་པདྨ་བསྣམས་པའོ། །
ཤར་ལྷོ་མཚམས་སུ་ཟླ་འོད་དཀར་མོ་རྡོ་རྗེ་དང་ཟླ་བ་ཚེས་པ་བསྣམས་པའོ། །ལྷོ་ནུབ་མཚམས་སུ་སངས་རྒྱས་དཔལ་དམར་མོ་པདྨའི་རྡོ་རྗེ་དང་། པདྨའི་སྟེང་ན་སྣང་བ་མཐའ་ཡས་བསྣམས་པའོ། །ནུབ་བྱང་གི་མཚམས་སུ་སངས་རྒྱས་སྤྱན་སེར་མོ་སྣ་ཚོགས་རྡོ་རྗེ་དང་ཨུཏྤ་ལའི་སྟེང་ན་

71-1-326a

སྤྱན་དང་ལྡན་པའོ། །ཤར་ཕྱོགས་སུ་སྟེང་གི་ལྷ་མོ་རྡོ་རྗེ་ཉི་མ་འོད་ཅེས་བྱ་བ་དམར་མོ་རྡོ་རྗེ་དང་ཉི་མ་བསྣམས་པའོ། །དེ་བཞིན་དུ་ནུབ་ཕྱོགས་སུ་འོག་གི་ལྷ་མོ་ཟླ་བ་རྡོ་རྗེ་འཛིན་ཞེས་བྱ་བ་དཀར་མོ་རྡོ་རྗེ་དང་ཟླ་བ་བསྣམས་པའོ། །དེ་བཅུའི་རིག་པ་ནི་ཧཱུཾ་དྲཱུཾ་བཅུ་ཐམ་པའོ། །ཕྱག་རྒྱ་ནི་
སྐུ་མདོག་དང་ཕྱག་མཚན་ཅན་གྱི་ལྷའོ། །གསང་སྔགས་ཀྱི་ཚོགས་ནི་འོག་ནས་འབྱུང་བའི་སྔགས་བཅུའོ། །དེ་དག་ཐམས་ཅད་ཀྱིས་ཞེས་བྱ་བ་ནི་སྐུ་གསུང་ཐུགས་དེ་དག་གིས་སོ། །བདག་དང་སེམས་ཅན་ཐམས་ཅད་ཀུན་ནས་བསྲུང་བར་མཛད་དུ་གསོལ་ཞེས་བྱ་བ་ནི་བདེན་པ་བདར་
ནས་གསོལ་བ་འདེབས་པའོ། །དེ་ལ་གཙུག་ཏོར་ཕྱིར་བཟློག་པ་ཆེན་མོའི་སྔགས་ནི་ཨོཾ་རི་ཥྀ་ག་ཎ་ཞེས་བྱ་བ་ནས་ཧཱུཾ་དྲཱུཾ་ཞེས་བྱ་བའི་བར་ཡི་གེ་ཉི་ཤུ་རྩ་གཅིག་པས་སྲུང་བ་ལ་སོགས་པའི་ཕྲིན་ལས་བཞི་བྱེད་དོ། །རྣམ་བསྒྱིངས་རྡོ་རྗེ་མའི་ཛམྦྷ་ན་ཀཱ་རཱི་ཧཱུཾ་དྲཱུཾ་ཞེས་བྱ་བས་འཇིགས་པ་དང་། གདོན་
དང་ཟ་བ་པོ་རྣམས་དང་། རིག་སྔགས་འཆང་བ་དང་བཞི་ལ་ཧཱུཾ་གིས་རྡོ་རྗེས་གཅོད་པ་དང་། དྲཱུཾ་གིས་ཕུར་བུས་གདབ་པའོ། །གསེར་འོད་ལྟ་བུའི་སྟཾ་བྷ་ན་ཀཱ་རཱི་ཧཱུཾ་དྲཱུཾ་གིས་ནི་འཇིགས་པ་དང་། གདོན་དང་། ཟ་བ་པོ་རྣམས་དང་། རིག་སྔགས་འཆང་བ་བཞི་ལ་འཁོར་ལོས་གཅོད་པ་དང་ཕུར་
བུས་གདབ་པའོ། །རྡོ་རྗེ་དཀར་མོའི་མ་ཧཱ་བིདྱཱ་སཾ་བྷཀྵ་ཎ་ཀཱ་རཱི་ཧཱུཾ་དྲཱུཾ་གིས་ནི་སྔ་མ་བཞིན་དུ་བཞི་ལ་པདྨའི་རྡོ་རྗེས་གཅོད་ཅིང་ཕུར་བུས་འདེབས་པའོ། །རྡོ་རྗེ་འགྲོས་མའི་པ་ར་བིདྱཱ་སམྦྷ་ཀྵ་ཎ་ཀཱ་རཱི་ཧཱུཾ་དྲཱུཾ་ཞེས་བྱ་བས་སྔ་མ་བཞིན་དུ་བཞི་ལ་སྣ་ཚོགས་རྡོ་རྗེས་གཅོད་ཅིང་ཕུར་བུས་འདེབས་པའོ། །
པདྨའི་སྤྱན་གྱིས་སརྦ་དུཥྚ་ཎཱཾ་སྟཾ་བྷ་ན་ཀཱ་རཱི་ཧཱུཾ་དྲཱུཾ་ཞེས་བྱ་བས་སྔ་མ་བཞིན་དུ་བཞི་ལ་འཁོར་ལོས་གཅོད་ཅིང་ཕུར་བུས་འདེབས་པའོ། །ཟླ་འོད་ཀྱིས་སརྦ་ཡཀྵ་རཀྵ་སཱཾ་གྲ་ཧཱ་ཎཱཾ་བི་དྡྷཱཾ་ས་ན་ཀཱ་རཱི་ཧཱུཾ་དྲཱུཾ་ཞེས་བྱ་བས་སྔ་མ་བཞིན་དུ་བཞི་ལ་རྡོ་རྗེས་གཅོད་ཅིང་ཕུར་བུས་འདེབས་པའོ། །སངས་རྒྱས་
དཔལ་གྱིས་ཙ་ཏུ་རཱ་ཤི་ཏཱི་ནཱཾ་གྲ་ཧ་ས་ཧ་སྲ་ཎཱཾ་བི་དྷྲཾ་ས་ན་ཀཱ་རཱི་ཧཱུཾ་དྲཱུཾ་ཞེས་བྱ་བས་སྔ་མ་བཞིན་དུ་བཞི་ལ་སྒྲུབ་པའི་པདྨའི་རྡོ་རྗེས་གཅོད་ཅིང་ཕུར་བུས་འདེབས་པའོ། །དེ་བཞིན་སྤྱན་གྱིས་ཨཥྚ་བིཾ་ཤ་ཏཱི་ནཱཾ་ནཀྵ་ཏྲཱ་ཎཱཾ་པྲ་ས་དྷ་ན་ཀཱ་རཱི་ཧཱུཾ་དྲཱུཾ་ཞེས་བྱ་བས་སྔ་མ་བཞིན་དུ་བཞི་ལ་སྣ་ཚོགས་རྡོ་རྗེས་གཅོད་ཅིང་ཕུར་བུས་

71-1-326b

འདེབས་པའོ། །སྟེང་གི་རྡོ་རྗེ་ཉི་མའི་འོད་དང་། འོག་གི་དེ་བཞིན་ཟླ་བ་རྡོ་རྗེ་འཛིན་མ་དང་གཉིས་ཀྱི་སྔགས་གཅིག་སྟེ། ཨཥྚ་ཎཱ་མ་ཧཱ་གྲ་ཧ་ཎཱཾ་བི་དྷཱཾ་ས་ན་ཀཱ་རཱི་ཧཱུཾ་དྲཱུཾ་ཞེས་བྱ་བས་རྡོ་རྗེས་གཅོད་ཅིང་ཕུར་བུས་འདེབས་པའོ། །དེ་རྣམས་ཀྱི་ཕྲིན་ལས་བསྟན་པ་ནི་བཅོམ་ལྡན་འདས་མ་ཞེས་པ་ནས་
རྡོ་རྗེ་ཡངས་པ་ཆེན་མོས་ཞེས་བྱ་བའི་བར་དུ་དཀྱིལ་འཁོར་གྱི་འཁོར་ལོའི་ལྷ་བྱེད་པ་པོ་ཡིན་པར་སྟོན་ཏོ། །གནས་ནི་ས་གསུམ་གྱི་དཀྱིལ་འཁོར་དུ་བསྲུང་བར་བྱ་བ་ནི་བདག་དང་སེམས་ཅན་ཐམས་ཅད་དོ། །མི་མཐུན་པའི་ཕྱོགས་གང་ལས་བསྲུང་ཞེ་ན། རྒྱལ་པོའི་འཇིགས་པ་ནས་
གཅན་གཟན་ཁྲོ་བོའི་འཇིགས་པའི་བར་དུ་རཀྵ་རཀྵ་མཱཾ་ཞེས་པས་བདག་ལ་སྲུངས་ཤིག་སྲུངས་ཤིག་ཅེས་པའོ། །ཡང་གཉིས་པ་གང་ལས་བསྲུང་ཞེ་ན། ཕོ་ཉ་ཀིང་ཀ་རའི་གདོན་ལས་ཏེ། ལྷའི་གདོན་ནས་ཚེར་མ་འདོན་པའི་གདོན་གྱི་བར་ལས་རཀྵ་རཀྵ་མཱཾ་ཞེས་པས་བདག་བདེ་ལེགས་
སུ་གྱུར་ཅིག་ཅེས་པའོ། དེ་རྣམས་ཅི་ཞིག་ཟ་སྙམ་པ་ལ། ལྷ་མདངས་ཟ་བ་དང་། ཀླུ་མངལ་ཟ་བ་དང་།  ལྷ་མ་ཡིན་ཁྲག་འཐུང་བ་དང་། གནོད་སྦྱིན་ཞག་ཟ་བ་དང་། སྲིན་པོ་ཤ་ཟ་བ་དང་། ཡི་དྭགས་ཚིལ་ཟ་བ་དང་། ཤ་ཟ་རྐང་ཟ་བ་དང་། འབྱུང་པོ་བཙས་པ་ཟ་བ་དང་། གྲུལ་བུམ་སྲོག་
འཕྲོག་པ་དང་། སྲུལ་པོ་སྐྱུགས་པ་ཟ་བ་དང་། ལུས་སྲུལ་པོ་མཆིལ་མ་ཟ་བ་དང་། སྐེམ་བྱེད་གཅིན་འཐུང་བ་དང་། བརྗེད་བྱེད་སྟོར་ཁུང་ནས་འབབ་པ་འཐུང་བ་དང་། སྨྱོ་བྱེད་ལྷག་མ་ཟ་བ་དང་། གྲིབ་གནོན་སྣབས་ཟ་བ་དང་། གནོན་པོ་ངར་སྣབས་ཟ་བ་དང་། མཁའ་འགྲོ་མ་མི་གཙང་བ་ཟ་བ་དང་། 
ནམ་གྲུ་གཏོར་མ་ཟ་བ་དང་། གཤིན་རྗེ་ཕྲེང་བ་ཟ་བ་དང་། བྱའི་གདོན་དྲི་ཟ་བ་དང་། མ་མོ་དགའ་བར་བྱེད་པ་མེ་ཏོག་ཟ་བ་དང་། ཀུན་དུ་ཕྲེང་བ་འབྲས་དང་ལོ་ཏོག་ཟ་བ་དང་། ཚེར་མ་འདོན་པས་ཟས་སུ་སྦྱིན་སྲེག་ཟ་བ་སྟེ། གདོན་དེ་དག་ཐམས་ཅད་ཀྱི་འཇིགས་པ་དང་། རིག་སྔགས་རྣམས་ལིང་ག་ལ་
མཚོན་གྱིས་གཅོད་དོ། །ལིང་ག་ལ་ཕུར་བུས་བཏབ་ནས་མནན་པར་བྱའོ། །དེ་བཞིན་དུ་གདོན་ཕོ་ཉ་དེ་དག་གཏོང་བར་བྱེད་པ་དང་པོ་མུ་སྟེགས་ཀྱི་ཀུན་དུ་རྒྱུ་དང་། གཉིས་པ་མཁའ་འགྲོ་མ་རྣམས་དང་། གསུམ་པ་ཚངས་པ་དང་། བཞི་པ་དབང་ཕྱུག་ཆེན་པོ་དང་། ལྔ་པ་ཁྱབ་འཇུག་སྲེད་མེད་ཀྱི་བུ་དང་། 

71-1-327a

དྲུག་པ་ནམ་མཁའ་ལྡིང་དང་། བདུན་པ་ནག་པོ་ཆེན་པོ་དང་། བརྒྱད་པ་གཤིན་རྗེའི་ཆུང་མ་མ་མོའི་ཚོགས་དང་། དགུ་པ་མུ་སྟེགས་ཀྱི་བརྟུལ་ཞུགས་མིའི་ཐོད་པ་ཅན་དང་། བཅུ་པ་རྒྱལ་བར་བྱེད་པ་ལ་སོགས་པ་མིང་པོ་གསུམ་དང་། བཅུ་གཅིག་པ་སྲིང་མོ་བཞི་དང་། བཅུ་
གཉིས་པ་བྷྲྀང་གི་རི་ཏི་དང་། དགའ་བྱེད་དབང་ཕྱུག་དང་། ཚོགས་ཀྱི་བདག་པོ་སྤུན་གསུམ་དང་། བཅུ་གསུམ་པ་དགེ་སྦྱོང་གཅེར་བུ་དང་། བཅུ་བཞི་པ་དགེ་སྦྱོང་མགོ་རེག་དང་། བཅོ་ལྔ་པ་དགྲ་བཅོམ་པ་དང་། བཅུ་དྲུག་པ་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་
བ་སྟེ། འདོད་ཆགས་དང་བྲལ་བ་དང་། བཅུ་བདུན་པ་རྒྱལ་ཚབ་ཏུ་དབང་བསྐུར་བ་འཇིག་རྟེན་དབང་ཕྱུག་ཆེན་པོ་འཁོར་དང་བཅས་པ་དང་། བཅོ་བརྒྱད་པ་ལག་ན་རྡོ་རྗེ་འཁོར་དང་བཅས་པ་ཐམས་ཅད་དང་། བཅུ་དགུ་པ་ཕོ་ཉ་ཕྱོགས་སྐྱོང་བ་བཅུ་དང་། ཕོ་ཉ་མོ་དེ་རྣམས་ཀྱི་ཆུང་མ་བཅུ་དང་། བྲན་མོ་ས་འོག་
གི་ཕག་དང་། གཤིན་རྗེ་དང་། ལོག་འདྲེན་དང་། ཀླུ་བཞི་དང་། དེའི་ཆུང་མ་བཞི་བྲན་མོས་བྱས་པ་དང་། ཉི་ཤུ་པ་དྲང་སྲོང་གི་ཚོགས་དང་། ཉེར་གཅིག་པ་ལྷའི་ཚོགས་དང་། ཉེར་གཉིས་པ་མི་འཕྲོད་པ་ཟ་བའི་ཚོགས་ཀྱི་ལིང་ག་དུམ་བུར་བཅད་ནས་སྦྱིན་སྲེག་བྱ་བ་དང་། ཕུར་བུས་བཏབ་ནས་མནན་
པ་བྱ་བ་ནི་སྔ་མ་བཞིན་དུ་ཤེས་པར་བྱའོ།    །དེ་ལྟར་ཚོགས་བསགས་པའི་དཀྱིལ་འཁོར་དང་། བསྲུང་བས་ཕྱིར་བཟློག་པའི་དཀྱིལ་འཁོར་དང་། གདུག་པ་ཐམས་ཅད་ཚར་གཅོད་པའི་དཀྱིལ་འཁོར་གསུམ་བཤད་ནས། ད་ནི་གཙུག་ཏོར་གདུགས་དཀར་མོ་ཅན་བདག་ཉིད་བསྒོམ་པའི་དཀྱིལ་
འཁོར་བཤད་པར་བྱ་སྟེ། དང་པོ་སྟོང་པའི་བྱང་ཆུབ་དང་། གཉིས་པ་ཟླ་བའི་དཀྱིལ་འཁོར་དང་། གསུམ་པ་ཡིག་འབྲུ་དང་། བཞི་པ་རྡོ་རྗེ་དཀར་མོ་རྩེ་དགུ་པ་དང་། ལྔ་པ་སྐུ་ཡོངས་སུ་རྫོགས་པ་དང་། དྲུག་པ་ལུས་ལ་ལྷ་ཡོངས་སུ་དགོད་པ་སྟེ་ཆོ་ག་དེ་རྣམས་ཀྱིས་རང་ཉིད་ལྷར་བསྐྱེད་ལ་
དཔག་ཚད་བཅུ་གཉིས་ཀྱི་ནང་ཚུན་ཆད་དུ་ནད་བཞི་བརྒྱ་རྩ་བཞི་དང་། གདོན་གྱི་རིགས་སྟོང་ཕྲག་བརྒྱད་ཅུ་ཚར་གཅོད་པར་བྱ་བའི་ཕྱིར་བདག་ཉིད་གཙུག་ཏོར་དཀར་མོ་ཞལ་ལྔ་པ་ཕྱག་བརྒྱད་པར་བསྒོམས་ཏེ། ཞལ་བཞི་དཀར་པོ་སྟེང་མ་སྔོན་པོའོ། །ཕྱག་དང་པོ་ན་རྡོ་རྗེ་འབར་བ། གཉིས་པ་ན་རལ་གྲི། 

71-1-327b

གསུམ་པ་ན་གཏུན་ཤིང་། བཞི་པ་ན་འཁོར་ལོ། གཡོན་གྱི་དང་པོ་ན་ལྕགས་ཀྱུ། གཉིས་པ་ན་དགྲ་སྟ། གསུམ་པ་ན་མདུང་། བཞི་པ་ན་ཞགས་པ་བསྣམས་པ། ཉི་མའི་འོད་མངའ་མ། མེ་དཔུང་འབར་བའི་དབུས་ན་བཞུགས་པ། དེ་དང་ཐ་མི་དད་ཀྱི་ཡེ་ཤེས་སེམས་དཔའ་དང་གཅིག་ཏུ་
གྱུར་པ་བསམས་ལ། བཅོམ་ལྡན་འདས་མ་ཞེས་བྱ་བ་ནས་བདག་ལ་བསྲུང་དུ་གསོལ་བསྲུང་དུ་གསོལ་ཞེས་བྱ་བའི་བར་གྱིས་ཕྱག་འཚལ་ཞིང་གསོལ་བ་བཏབ་ནས་སྙིང་པོ་བཟླ་བར་བྱ་སྟེ། ཨོཾ་ཨ་སི་ཏ་ཨ་ན་ལཱརྐ་པྲ་བྷཱ་སྥུ་ཏ་ཏེ་ཞེས་བྱ་བའི་ཡི་གེའི་དོན་ནི་མི་ཐུབ་པ་ཉི་མའི་མེའི་
འོད་ཟེར་འཕྲོ་བའོ། །བི་ཀ་སི་ཏ་ཏཱ་པ་ཏྲི་ནི་གཙུག་ཏོར་གདུགས་དཀར་མོ་ཡངས་པའོ། །ཨོཾ་ཛྭ་ལ་ཛྭ་ལ་ནི་གཡས་པའི་རྡོ་རྗེ་འབར་བའོ། །ཁ་ད་ཁ་ད་ནི་རལ་གྲིས་གཅོད་ཅིང་ཟ་བའོ། །ཧ་ན་ཧ་ན་ནི་གཏུན་ཤིང་གིས་བསྣུན་པའོ། །དྷ་ར་དྷ་ར་ནི་འཁོར་ལོ་འཆང་བའོ། །བི་དྷ་ར་བི་དྷ་ར་ནི་ལྕགས་
ཀྱུས་འཛིན་པའོ། །ཙྪིན་ད་ཙྪིན་ད་ནི་དགྲ་སྟས་གཅོད་པའོ། །བྷིནྡ་བྷིན་ད་ནི་མདུང་གིས་འབིགས་པའོ། །བྷནྡྷ་བྷནྡྷ་ནི་ཞགས་པས་འཆིང་བའོ། །ཧཱུཾ་ཧཱུཾ་ནི་ཐབས་དང་ཤེས་རབ་བོ། །ཕཊ་ཕཊ་ནི་གདུག་པ་འདུལ་བའོ། །སྭཱ་ཧཱ་ནི་ཞི་བའོ། །དེ་ནི་སྙིང་པོའོ། །ཧེ་ཧེ་ཕཊ་ཅེས་པས་མགོ་
བོ་ལ་རྣམ་བསྒྱིངས་རྡོ་རྗེ་མ་སྔ་མ་བཞིན་དུ་བསམ་མོ། །ཧོ་ཧོ་ཕཊ་ཅེས་པས་ལྐོག་མར་གསེར་འོད་ལྟ་བུའི་སྤྱན་མངའ་མ་བསམ་མོ། །ཨ་མོ་གྷཱ་ཡ་ཕཊ་ཅེས་བྱ་བ་སྙིང་གར་རྡོ་རྗེ་འགྲོས་བསམ་མོ། །ཨ་པྲ་ཏི་ཧ་ཏ་ཡ་ཕཊ་ཅེས་པས་ལྟེ་བར་དཀར་མོ་བསམ་མོ། །བ་ར་དཱ་ཡ་ཕཊ་ཅེས་པས་
དཔུང་པ་གཡས་པ་ལ་པདྨའི་སྤྱན་བསམ་མོ། །པ་ར་པྲ་དཱ་ཡ་ཕཊ་ཅེས་པས་དཔུང་པ་གཡོན་པ་ལ་ཟླ་འོད་བསམ་མོ། །ཨ་སུ་ར་བི་དྲཱ་པ་ཎ་ཀ་རཱ་ཡ་ཕཊ་ཅེས་པས་བརླ་གཡས་པ་ལ་སངས་རྒྱས་དཔལ་བསམ་མོ། །བ་ར་བི་དྲཱ་པ་ཎ་ཀ་རཱ་ཡ་ཕཊ་ཅེས་པས་བརླ་གཡོན་པ་ལ་དེ་བཞིན་སྤྱན་
བསམ་མོ། །མིག་གཡས་པ་ལ་རྡོ་རྗེ་ཉི་མའི་འོད་བསམ་མོ། །མིག་གཡོན་པ་ལ་དེ་བཞིན་དུ་ཟླ་བ་རྡོ་རྗེ་འཛིན་བསམ་མོ། །དེ་ལྟར་བསྐྱེད་ནས་ཤར་ཕྱོགས་སུ་ཨིནྡྲ་ཡེ་ཕཊ་ཅེས་པས་བརྒྱ་བྱིན་དང་། ཤར་ལྷོར་ཨགྣ་ཡེ་ཕཊ་ཅེས་པས་མེ་ལྷ་དང་། ལྷོར་ཡ་མ་ཡེ་ཕཊ་ཅེས་པས་གཤིན་རྗེ་

71-1-328a

དང་། ལྷོ་ནུབ་ཏུ་ནཻ་རྲྀ་ཏ་ཡེ་ཕཊ་ཅེས་པས་བདེན་བྲལ་དང་། ནུབ་ཏུ་བ་རུ་ཎ་ཡེ་ཕཊ་ཅེས་པས་ཆུ་ལྷ་དང་། ནུབ་བྱང་དུ་མཱ་རུ་ཏི་ཡེ་ཕཊ་ཅེས་པས་རླུང་ལྷ་དང་། བྱང་དུ་སཽ་མ་ཡེ་ཕཊ་ཅེས་པས་གནོད་སྦྱིན་དང་། བྱང་ཤར་དུ་ཨཱི་ཤྭ་ན་ཡེ་ཕཊ་ཅེས་པས་དབང་ལྡན་དང་། ཤར་སྒོར་
ཀཱ་ལ་དཎྜི་ཡེ་ཕཊ་ཅེས་པས་དབྱུག་པ་ནག་མོ་དང་། ལྷོ་སྒོར་ཀཱ་ལ་རཱ་ཏྲི་ཡེ་ཕཊ་ཅེས་པས་དུས་མཚན་ནག་མོ་དང་། ནུབ་སྒོར་ཡ་མ་དཎྜི་ཡེ་ཕཊ་ཅེས་པས་གཤིན་རྗེ་དབྱིག་པ་མ་དང་། བྱང་སྒོར་ཡ་མ་རཱ་ཏྲཱི་ཡེ་ཕཊ་ཅེས་པས་གཤིན་རྗེ་དུས་མཚན་མ་དང་། དུར་ཁྲོད་བརྒྱད་ཀྱི་གནས་
སུ་ཀ་པཱ་ལཱི་ཡེ་ཕཊ་ཅེས་པས་ཞིང་སྐྱོང་རྣམས་དང་། དུར་ཁྲོད་རྣམས་སུ་ཨ་དྷི་མུཀྟི་ཤྨ་ཤཱ་ན་བ་སི་ནཱི་ཡེ་ཕཊ་ཅེས་པས་མ་མོ་བརྒྱད་དགོད་དོ། །ཨོཾ་ཥྚོཾ་བནྡྷ་བནྡྷ་རཀྵ་རཀྵ་མཱཾ་སྭཱཧཱ་ཞེས་བྱ་བས་ནི་ལྷའི་གདོན་ལ་སོགས་པ་ནས་ཚེར་མ་འདོན་པའི་གདོན་གྱི་བར་དུ་ཞགས་པས་ཆིངས་ལ་བདག་
ལ་སྲུངས་ཤིག་པའོ། །དེ་ནས་གཏོར་མ་བྱིན་ལ་སྔགས་ཀྱི་ཕྲིན་ལས་བཅོལ་བ་ནི་སརྦ་དེ་བཱི་བྷྱཿ ཕཊ་ནི་ལྷ་མ་རྣམས་ལའོ། །ནཱ་ག་ནི་ཀླུའོ། །ཡཀྵ་གནོད་སྦྱིན་ནོ། །རཀྵ་སཱ་ནི་སྲིན་པོའོ། །བྷཱུ་ཏ་ནི་འབྱུང་པོའོ། །པྲེ་ཏ་ནི་ཡི་དྭགས་སོ། །པི་ཤཱ་ཙི་ནི་ཤ་ཟའོ། །ཀུམྦྷ་ཎྜ་ནི་གྲུལ་བུམ་
མོ། །པཱུ་ཏ་ན་ནི་སྲུལ་པོའོ། །ཀ་ཊ་བུ་ཏ་ན་ནི་ལུས་སྲུལ་པོའོ། །སྐནྡྷེ་ནི་སྐེམ་བྱེད་དོ། །ཨུནྨཱ་ད་ནི་སྨྱོ་བྱེད་དོ། །ཙྪེ་ཡཱེ་ནི་གྲིབ་གནོན་ནོ། །ཨ་བསྨཱ་ར་ནི་བརྗེད་བྱེད་དོ། །ཨོ་སྟ་ར་ཀཱ་ནི་གནོན་པོའོ། །ཌཱ་ཀི་ནི་མཁའ་འགྲོ་མའོ། །རེ་བ་ཏི་ནི་ནམ་གྲུའི་གདོན་ནོ། །ཡ་མ་ཀེ་ནི་གཤིན་རྗེའི་གདོན་ནོ། །ཤ་ཀུ་ན་
ནི་བྱའི་གདོན་ནོ། །མཱ་ཏྲི་ག་ཎ་ནི་མ་མོ་དགའ་བར་བྱེད་པའི་གདོན་ནོ། །ཀཽ་མ་རཱི་ཀུན་དུ་འགྲོ་བའི་གདོན་ནོ། །ཨ་བ་ལམྦ་ག་ནི་རེ་ལྡེའི་གདོན་ནོ། །ཀ་ཊ་ཌ་ནི་ཀུན་དུ་འགྲོ་བའི་གདོན་ནོ། །ཀཎྜི་ནི་ཚེར་མ་འདོན་པའི་གདོན་ནོ། །གནྡྷརྦ་ནི་དྲི་ཟའི་གདོན་ནོ། །ཨ་སུ་ར་ནི་ལྷ་མ་ཡིན་གྱི་གདོན་ནོ། །ཀི་ཎ་ར་ནི་
མིའམ་ཅིའི་གདོན་ནོ། །ག་རུ་ཌ་ནི་ནམ་མཁའ་ལྡིང་ངོ་། །མ་ཧོ་ར་ག་ནི་ལྟོ་འཕྱེ་ཆེན་པོའོ། །དུར་ལང་གི་ནི་བསྒོམ་ཉེས་སོ། །དུཿཔྲེཀྵི་ཏི་ནི་བལྟ་ཉེས་སོ། །ཛཱ་ར་ནི་རིམས་སོ། །བྷ་ཡེ་ནི་འཇིགས་པའོ། །ཨུ་པ་དྲ་བ་ནི་ཉེ་བར་འཚེ་བའོ། །ཨུ་པ་སརྒ་ནི་ཉེ་བར་གནོད་པའོ། །ཤྲ་མ་ཎ་ནི་དགེ་སྦྱོང་མགོ་རེག་

71-1-328b

གོ། །ཏིཪྠི་ཀ་ནི་དགེ་སྦྱོང་གཅེར་བུའོ། །པཱ་ཏ་ཀ་ནི་རྒྱལ་མཚན་འཆང་བའོ། །བིདྱཱ་དྷ་རེ་ནི་རིག་པ་འཛིན་པའོ། །ཛ་ཡ་ཀ་ར་ནི་རྒྱལ་བར་བྱེད་པའོ། །མ་དྷུ་ཀ་ར་ནི་སྦྲང་རྩིར་བྱེད་པའོ། །སརྦ་ཨརྠ་སཱ་དྷ་ཀ་ནི་དོན་ཀུན་གྲུབ་པ་སྟེ་མིང་པོ་གསུམ་མོ། །ཙ་ཏུར་བྷྱོ་བྷ་གི་ན་ནི་སྲིང་མོ་བཞིའོ། །བཛྲ་ཀུ་མཱ་ར་
བཛྲ་ཀུ་ལནྡྷ་ར་ནི་རྡོ་རྗེ་གཞོན་ནུ་མ་རྡོ་རྗེ་རིག་འཛིན་ནོ། །མ་ཧཱ་པྲ་ཏྱཱཾ་གི་ར་ནི་གཤེད་བྱེད་དོ། །བཛྲ་ཤྲཱིཾ་ཁ་ལ་ཡ་པྲ་ཏྱཱཾ་གི་ར་རཱ་ཛ ནི་རྡོ་རྗེ་ལྕགས་སྒྲོག་གཤེད་བྱེད་ཀྱི་རྒྱལ་བའོ། །མ་ཧཱ་ཀཱ་ལཱ་ཡ་མཱ་ཏྲི་ག་ཎ་ན་མཿཀྲྀ་ཏ་ཡ་ནི་ནག་པོ་ཆེན་པོ་མ་མོའི་ཚོགས་ཀྱིས་ཕྱག་བྱས་པའོ། །བྲཧྨཱ་ཎི་ནི་ཚངས་
མའོ། །བིཥྞ་བི་ནི་ཁྱབ་འཇུག་མའོ། །མ་ཧེ་ཤྭ་རི་ནི་དབང་ཕྱུག་ཆེན་མོའོ། །རུ་དྲི་ནི་དྲག་མོའོ། །མ་ཧཱ་ཀཱ་ལི་ནི་ནག་མོ་ཆེན་མོའོ། །ཙ་མུཎྜི་ནི་གཤིན་རྗེའི་ཆུང་མའོ། །ཀུ་མཱ་རི་ནི་གཞོན་ནུ་མའོ། །བཱ་རཱ་ཧཱི་ནི་ཕག་མོའོ། །དེ་རྣམས་ལ་གཏོར་མ་བྱིན་ལ་སྔགས་དེ་རྣམས་ཀྱིས་བསྔོས་ཏེ་སྨོན་
ལམ་གདབ་པར་བྱའོ། །སེམས་ཅན་གང་སུ་དག་བདག་ལ་གདུག་པ་དང་གདུག་པའི་སེམས་དང་ལྡན་པ་ཞེས་བྱ་བ་ནས་སྟོན་བརྒྱ་མཐོང་བར་གྱུར་ཅིག་ཅེས་བྱ་བའི་བར་དུ་སྨོན་ལམ་གདབ་པར་བྱའོ། །གནོད་སྦྱིན་དང་གདོན་གང་སུ་དག་ཟས་སུ་མདངས་ཟ་བ་དང་ཞེས་བྱ་བ་ནས་ཟས་སུ་
གཏོར་ཁུང་ནས་འབབ་པ་འཐུང་བ་རྣམས་དང་ཞེས་བྱ་བའི་བར་ནི་སྔར་བཤད་ཟིན་པའི་ཆོ་འབྲང་བརྗོད་པས་འཚང་བྲུས་ནས་གཏོར་མ་ལེན་པའོ། །སྡིག་པའི་སེམས་དང་ལྡན་ཞེས་བྱ་བ་ནས་སྟོན་བརྒྱ་མཐོང་བར་གྱུར་ཅིག་ཅེས་བྱ་བའི་བར་དུ་གདོན་དེ་རྣམས་ལས་བདག་ལ་བསྲུང་བར་མཛད་དུ་གསོལ་
ཞེས་ཕྲིན་ལས་བཅོལ་བའོ། །གདོན་ལས་བསྲུང་བ་བསྟན་ནས། ནད་ལས་བསྲུང་བའི་ཕྲིན་ལས་བཅོལ་བ་ནི་རིམས་ཉིན་གཅིག་པ་ཞེས་བྱ་བ་ནས་ཉིང་ལག་ན་བ་བསལ་དུ་གསོལ་ཞེས་བྱ་བའི་བར་གྱིས་ནད་མེད་པའི་ཕྲི་ལས་བཅོལ་བའོ། །གདུགས་དཀར་མོ་ཅན་ཞེས་བྱ་བ་ནས་ཆུ་སྲིན་ལ་སོགས་པའི་སྲོག་
ཆགས་རྣམས་བསལ་དུ་གསོལ་ཞེས་བྱ་བའི་བར་གྱིས་འབྱུང་པོ་དང་རོ་ལངས་དང་མཁའ་འགྲོ་མ་དང་གནོད་སྦྱིན་དང་སྲིན་པོས་བྱས་པའི་ནད་དང་སྲོག་ཆགས་ཀྱི་གློ་བུར་གྱི་གནོད་པ་རྣམས་བསལ་དུ་གསོལ་ཞེས་བྱ་བས་ཕྲི་ལས་གསུམ་བཅོལ་བའོ། །དེ་དག་ཐམས་ཅད་ཀྱི་ལིང་ག་བྱས་ལ་སྙིང་གར་མིང་ཡིག་བཅུག་

71-1-329a

ནས་རིག་སྔགས་དང་གཟི་བརྗིད་བཅིང་བའི་མནན་པ་བྱ་བ་དང་། དགྲ་བོ་གཞན་ཐམས་ཅད་ཀྱི་རིག་སྔགས་བཅིང་བའི་མནན་པ་བྱ་བ་དང་། དཔག་ཚད་བཅུ་གཉིས་ཀྱི་ནང་ཚུན་ཆད་དུ་མཚམས་བཅིང་བ་དང་ཕུར་བུས་གདབ་པར་བྱའོ། །སྙིང་པོའི་དཀྱིལ་འཁོར་གྱི་ཆོ་ག་སྟེ་བཞི་པའོ།།      །། 
དེ་ནས་ཉེ་བའི་སྙིང་པོ་བཤད་པ་ནི། ཏདྱ་ཐཱ་ཞེས་པ་ནས་བི་ནཱ་ཡ་ཀཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་པའི་བར་གྱིས་ཉེ་བའི་སྙིང་པོའོ། །སུས་ཞེས་བྱ་བ་ནི་ཁྱིམ་པ་འམ་རབ་ཏུ་བྱུང་བ་འམ་ཁྱེའུ་འམ་བུ་མོ་གང་ལ་ལ་ཞེས་བྱ་བའི་དོན་ནོ། །དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བ་
གདུགས་དཀར་མོ་ཅན་གཞན་གྱིས་མི་ཐུབ་པ་ཞེས་བྱ་བས་ནི་རས་ལ་བྲི་བའི་ཆོ་ག་བསྟན་ཏེ། ཕྱིར་བཟློག་པའི་རིག་སྔགས་ཀྱི་རྒྱལ་མོ་འདི་ཞེས་བྱ་བ་ནི་སྔགས་ཀྱི་དོན། གཞན་གྱིས་མི་ཐུབ་དྲག་ཤུལ་ཆེ། ཞེས་བྱ་བ་ནི་འཁོར་ལོའི་ལྟེ་བ་ལ་སྐུ་མདོག་ནག་མོ་རྡོ་རྗེ་དང་སྡིགས་མཛུབ་མཛད་པའོ། །དེའི་
ཤར་གྱི་རྩིབས་ལ། གཏུམ་པ་ཆེན་མོ་སྟོབས་ཆེན་མོ། །ཞེས་བྱ་བ་སྐུ་མདོག་དཀར་མོ་འཁོར་ལོ་དང་སྡིགས་མཛུབ་མཛད་པའོ། །ལྷོའི་རྩིབས་ལ། འབར་བ་ཆེན་མོ་གཟི་བརྗིད་ཆེ། །ཞེས་བྱ་བ་སྐུ་མདོག་སེར་མོ་རིན་པོ་ཆེ་རྡོ་རྗེས་མཚན་པ་དང་སྡིགས་མཛུབ་མཛད་པའོ། །ནུབ་ཀྱི་འཁོར་ལོའི་རྩིབས་ལ། 
དཀར་ཆེན་འབར་ཕྲེང་གོས་དཀར་མོ། །ཞེས་བྱ་བ་སྐུ་མདོག་དམར་མོ་རྡོ་རྗེ་པདྨ་དང་སྡིགས་མཛུབ་མཛད་པའོ། །བྱང་གི་རྩིབས་ལ། འཕགས་མ་སྒྲོལ་མ་ཁྲོ་གཉེར་ཅན། །ཞེས་བྱ་བ་སྐུ་མདོག་ལྗང་གུ་སྣ་ཚོགས་རྡོ་རྗེ་དང་སྡིགས་མཛུབ་མཛད་པའོ། །བྱང་ཤར་གྱི་རྩིབས་ལ། རྒྱལ་བའི་རྡོ་རྗེ་ཕྲེང་ཞེས་
གྲགས། །ཞེས་བྱ་བ་སྐུ་མདོག་སྔོན་མོ་དབྱིག་པ་དང་སྡིགས་མཛུམ་མཛད་པའོ། །ཤར་ལྷོའི་རྩིབས་ལ་པདྨའི་མངོན་མཚན་ཞེས་བྱ་བ་སྐུ་མདོག་སེར་མོ་ལྕགས་ཀྱུ་དང་སྡིགས་མཛུབ་མཛད་པའོ། །ལྷོ་ནུབ་ཀྱི་རྩིབས་ལ། གཞན་གྱིས་མི་ཐུབ་ཕྲེང་བ་ཅན། །ཞེས་བྱ་བ་སྐུ་མདོག་དམར་མོ་རྡོ་རྗེ་ཕྲེང་བ་དང་
སྡིགས་མཛུབ་མཛད་པའོ། །ནུབ་བྱང་གི་རྩིབས་ལ། རྡོ་རྗེའི་མཆུ་ཅན་རྣམ་སྒེག་མོ། །ཞེས་བྱ་བ་སྐུ་མདོག་ལྗང་གུ་རལ་གྲི་དང་སྡིགས་མཛུབ་མཛད་པའོ། །དེ་རྣམས་ཀྱི་སྔགས་ནི་དེ་བི་བཛྲ་དྷཱ་རི་བནྡྷ་བནྡྷ་ནི་བཛྲ་པཱ་ན་ཕཊ་ཨོཾ་ཧཱུཾ་དྲཱུཾ་ཧྲཱིཿཥྚོཾ་ཕཊ་སྭཱཧཱ་ཞེས་པ་སྟེ། ལྷ་མོ་རྡོ་རྗེ་འཆང་མ་ཞེས་པ་མཚན་གཉིས་པ་ཡིན་ནོ། །ཤར་དུ་ཨོཾ་

71-1-329b

ཨ་ན་ལེ་ཨ་ན་ལེ་ཞེས་པ་མཚན་གཉིས་པ་མེ་འབར་མའོ། །ལྷོ་ཕྱོགས་སུ་ཁ་ས་མེ་ཁ་ས་མེ་ཞེས་པ་མཚན་གཉིས་པ་མཁའ་སྤྱོད་མའོ། །ནུབ་ཏུ་བྷཻ་ར་བྷཻ་ར་ཞེས་པ་མིང་ནི་འཇིགས་མའོ། །བྱང་དུ་སཽ་མེ་སཽ་མེ་ཞེས་པ་མིང་ནི་ཟླ་བ་མའོ། །བྱང་ཤར་དུ་ཤཱནྟེ་ཤཱནྟེ་ཞེས་པ་མིང་ནི་ཞི་བ་མའོ། །ཤར་ལྷོར་དཎྜེ་དཎྜེ་
ཞེས་པ་མིང་ནི་དབྱིག་པ་མའོ། །ལྷོ་ནུབ་ཏུ་བི་ཤ་དེ་བི་ཤ་དེ་ཞེས་པ་མིང་ནི་འཇོམས་པ་མའོ། །ནུབ་བྱང་དུ་བཱི་རེ་བཱི་རེ་ཞེས་པ་མིང་ནི་དཔའ་མོའོ། །ཡང་ན་དེ་རྣམས་ཀྱི་དབུས་སུ་བཅོམ་ལྡན་འདས་ཕྱག་ན་རྡོ་རྗེ་རྡོ་རྗེ་དང་ཞགས་པ་བསྣམས་པ་བགེགས་ཀྱི་རྒྱལ་པོ་ལོག་འདྲེན་མནན་པ་བྲིས་ལ་སྙིང་པོ་ནི་
ཨོཾ་བཛྲ་པཱ་ཎི་བནྡྷ་བནྡྷ་བཛྲ་པཱ་ཤེ་ན་མཱ་མ་སརྦ་དུཥྚཱ་ན་བིགྷྣཾ་བི་ནཱ་ཡ་ཀཱཾ་ཧཱུཾ་ཧཱུཾ་ཕཊ་ཕཊ་སྭཱཧཱ་ཞེས་བྱ་བ་ཉེ་བའི་སྙིང་པོའོ། །ལྷའི་འཁོར་ལོ་འདི་གྲོ་གའམ་རས་སམ་ཤིང་ཤུན་ལ་བྲིས་ཏེ་ལུས་སམ་མགུལ་དུ་བཏགས་ནས་ཀློག་ཅིང་ཟློས་པར་བྱེད་ན་དེ་ལ་ཇི་སྲིད་འཚོའི་བར་དུ་དུག་གིས་མི་ཚུགས་
ཞེས་བྱ་བ་ནས་ལོག་འདྲེན་ཐམས་ཅད་ཀྱང་དགའ་བར་འགྱུར་རོ་ཞེས་བྱ་བའི་བར་ནི་ཕན་ཡོན་ནོ།    །དེ་ལྟར་ཉེ་བའི་སྙིང་པོའི་ལྷའི་འཁོར་ལོའི་བསྙེན་པ་དང་དཀྱིལ་འཁོར་བྱེད་པ་ལ་རྡོ་རྗེའི་རིགས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་རྣམས་དང་། གྲུབ་པའི་ལྷ་མོ་སྔ་མ་རྣམས་ཀྱིས་ཀྱང་
ལས་དང་པོ་པའི་རྣལ་འབྱོར་པ་དེ་ལ་རྟག་ཏུ་མཐུན་པར་ནང་གི་ནད་བཞི་བརྒྱ་རྩ་བཞི་ལས་བསྲུང་བ་དང་། ཕྱི་རོལ་གྱི་བགེགས་སྟོང་ཕྲག་བརྒྱད་ཅུ་རྩ་བཞི་ལས་སྐྱོབ་པ་དང་། གཉིས་ཀ་ལས་སྦེད་པར་བྱེད་པ་དང་། དེ་རྣམས་ཀྱི་ཡིད་དུ་འོང་བ་དང་དགའ་བར་བྱེད་པར་ཡང་འགྱུར་རོ། །བསྙེན་པ་དང་
དཀྱིལ་འཁོར་ལ་མཚན་མ་ཐོབ་པ་ནི་བསྐལ་པ་ཆེན་པོ་སྟོང་ཕྲག་བརྒྱད་ཅུ་རྩ་བཞིར་སྐྱེ་བ་དྲན་པར་འགྱུར་རོ་ཞེས་པ་ནས། མི་དབུལ་པོར་མི་འགྱུར་རོ་ཞེས་པའི་བར་ནི་ཕན་ཡོན་ཡིན་ནོ། །བསྙེན་པ་དང་དཀྱིལ་འཁོར་གྱི་མཚན་མ་ཐོབ་པའི་རྣལ་འབྱོར་པ་ལ་སངས་རྒྱས་བཅོམ་ལྡན་འདས་
གྲངས་མེད་དཔག་ཏུ་མེད་པ་ཞེས་བྱ་བ་ནས་དགྱེས་པར་ཡང་འགྱུར་རོ་ཞེས་བྱ་བའི་བར་ནི་ཕན་ཡོན་ཡིན་ནོ། །བསྙེན་པ་དང་དཀྱིལ་འཁོར་ལ་སྟོང་པ་ཉིད་བསྒོམ་པའི་རྣལ་འབྱོར་པ་དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བ་ཞེས་བྱ་བ་ནས་སྔོན་གྱི་ལས་ཀྱི་སྒྲིབ་པ་མ་ལུས་

71-1-330a

པར་བྱང་བར་འགྱུར་རོ་ཞེས་བྱ་བའི་བར་དུ་ཕན་ཡོན་བསྟན་ཏོ། །ཞན་ཡང་གཙུག་ཏོར་གདུགས་དཀར་མོ་འདི་ཡི་གེར་འབྲི་བ་དང་མཆོད་པ་དང་སྦྱིན་པ་དང་ཉན་པ་དང་ཀློག་པ་དང་ལེན་པ་དང་འཆང་བ་དང་ཁ་ཏོན་བྱེད་པ་དང་དེ་སེམས་པ་དང་བསྒོམ་པའི་རིགས་ཀྱི་བུའམ། 
རིགས་ཀྱི་བུ་མོ་བུ་འདོད་པ་གང་ལ་ལ་ཞེས་བྱ་བ་ནས་བདེ་བ་ཅན་དུ་སྐྱེ་བར་འགྱུར་རོ་ཞེས་བྱ་བའི་བར་ནི་ཕན་ཡོན་ཡིན་ནོ། །རིག་སྔགས་ཀྱི་རྒྱལ་མོ་འདི་བྲིས་ནས་རྒྱལ་མཚན་གྱི་རྩེ་མོ་ལ་བཏགས་ཏེ་སྟ་གོན་གྱི་རིམ་གྲོ་ཆེར་བྱས་ཏེ་མཆོད་པ་ཆེན་པོ་བྱས་ལ་སྤྱན་ཕྱེ་ནས། གྲོང་ངམ་གྲོང་རྡལ་
ལ་སོགས་པར་བཙུགས་ན་མི་ནད་དང་། ཕྱུགས་ནད་དང་། ཡམས་ཀྱི་ནད་དང་ཞེས་བྱ་བ་ནས་འབྲུག་གི་སྒྲ་སྒྲོགས་པར་འགྱུར་རོ་ཞེས་བྱ་བའི་བར་དུ་ཕན་ཡོན་ཡིན་ནོ། །ཉེ་བར་འཚེ་བ་དུས་མ་ཡིན་པར་འཆི་བ་བརྒྱད་དང་། འཇིགས་པ་བརྒྱད་དང་། སྡུག་བསྔལ་བརྒྱད་བྱུང་བ་དེའི་ཚེ་སྔར་
བསྟན་པའི་ཚོགས་བསགས་པའི་སངས་རྒྱས་ཀྱི་རྣལ་འབྱོར་བྱས་ནས་ལན་གསུམ་བཟླས་ན་དེ་ཐམས་ཅད་ཉེ་བར་ཞི་བར་འགྱུར་རོ། །ཉེ་བའི་སྙིང་པོའི་འཁོར་ལོ་རས་ལ་བྲིས་ནས་སྔགས་ལན་གསུམ་བཟླས་ན་ཡང་ཉེ་བར་ཞི་བར་འགྱུར་རོ། །གཞུང་གི་དོན་བཤད་ཟིན་ཏོ།    །རྗེས་སུ་ཡི་རང་
ཞིང་བསྟོད་པ་ནི་སངས་རྒྱས་དང་བྱང་ཆུབ་སེམས་དཔའ་ལ་སོགས་པ་འཇིག་རྟེན་ལས་འདས་པའི་འཁོར་རྣམས་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་པའི་འཁོར་གྱིས་རྗེས་སུ་ཡི་རང་ཞིང་བསྟོད་པའོ། །གཙུག་ཏོར་གདུགས་དཀར་མཆོག་
གྲུབ་གཟུངས། །སངས་རྒྱས་ཀྱིས་ནི་གསུངས་པ་ལ། །ལག་ན་རྡོ་རྗེས་རབ་བསྡུས་པ། །བརྒྱུད་པའི་རིམ་པ་བླ་མས་བཤད། །ཐོས་ནས་གདམས་ངག་བྲིས་པ་ལས། །བདག་གིས་དགེ་བ་ཅི་བསགས་པ། །དེ་ཡིས་སེམས་ཅན་ཐམས་ཅད་ནི། །རྣམ་སྣང་མཛད་ཆེན་གྲགས་ཆེན་ཤོག །
འཕགས་མ་དེ་བཞིན་གཤེགས་པའི་གཙུག་ཏོར་ནས་བྱུང་བ་གདུགས་དཀར་མོ་ཅན་གཞན་གྱིས་མི་ཐུབ་པ་ཕྱིར་བཟློག་པ་ཆེན་མོ་ཞེས་བྱ་བའི་འགྲེལ་པ་སློབ་དཔོན་ཤཱུ་རཾ་ག་ཝརྨ་བཛྲས་མཛད་པ་རྫོགས་སོ།།      །།ཟངས་དཀར་འཕགས་པ་ཤེས་རབ་ཀྱིས་བསྒྱུར།།      །། 

71-1-330b

empty page