73-1-1a



73-1-1b

༄༅༅། །རྒྱ་གར་སྐད་དུ། ཨཱརྱ་མུ་ཁ་ཥ་ཊ་དྷཱ་ར་ཎི་བྱཱ་ཁྱ་ཏ། བོད་སྐད་དུ། འཕགས་པ་སྒོ་དྲུག་པའི་གཟུངས་ཀྱི་རྣམ་པར་བཤད་པ། འཇམ་དཔལ་གཞོན་ནུར་གྱུར་པ་ལ་ཕྱག་
འཚལ་ལོ། །གཟུངས་འདི་ནི་དོན་དྲུག་ལ་བརྩམས་ནས་གསུངས་པར་མངོན་ཏེ། ཤེས་རབ་ཡོངས་སུ་རྫོགས་པ་དང་། སྙིང་རྗེའི་སྟོབས་རྣམ་པར་དག་པ་དང་། རང་གི་རྒྱུད་རྣམ་པར་དག་པ་དང་། གཞན་
གྱིས་བསྒྲུབས་པའི་གེགས་ཡོངས་སུ་ཤེས་པ་དང་། བྱང་ཆུབ་ཀྱི་ཚོགས་ཀུན་དུ་སྡུད་པ་དང་དེའི་འབྲས་བུ་ཡང་དག་པའི་ཡེ་ཤེས་དང་དེ་བཞིན་ཉིད་དོ། །རྣམ་གྲངས་གཞན་ཡང་སྡུག་བསྔལ་བའི་
དུས་དང་། བདེ་བའི་དུས་ན་སེམས་ཅན་གྱི་ཁམས་འཛིན་པ་དང་། བདག་དང་གཞན་ལས་ཚོགས་ཀྱི་བར་ཆད་ཡོངས་སུ་སྤོང་བ་དང་། ཚོགས་ཀྱི་རྣམ་པ་ཐམས་ཅད་སོགས་པ་དང་། ཚོགས་བསགས་
པ་ཡང་རང་གི་དོན་ཕུན་སུམ་ཚོགས་པ་དང་། གཞན་གྱི་དོན་ཕུན་སུམ་ཚོགས་པ་ལས་བརྩམས་ནས་བསྟན་ཏོ། །རྣམ་གྲངས་གཞན་དུའང་རྟོགས་ཏེ། ཐམས་ཅད་མཁྱེན་པ་ཉིད་ལས་ལྡོག་པའི་རྒྱུ་ནི་དྲུག་

73-1-2a

སྟེ། སེམས་ཅན་ལ་མི་ཕྱོགས་ཤིང་འཁོར་བའི་སྡུག་བསྔལ་ལ་ཇི་སྙམ་པ་མེད་པ་དང་། འཇིག་རྟེན་པའི་ཕུན་སུམ་ཚོགས་པ་དག་ལ་ཀུན་དུ་འཛིན་པའི་སེམས་ཉིད་དང་། ཉོན་མོངས་དང་ལས་ཀྱི་སྒྲིབ་པ་
སོགས་པ་དང་། མི་དགེ་བའི་གྲོགས་པོས་ཡོངས་སུ་བསྐྱོད་པའི་རྗེས་སུ་འཇུག་པ་དང་། ཚོགས་མ་བསགས་པ་ཉིད་དང་། སྲིད་པའི་ཕུན་སུམ་ཚོགས་པ་ལ་གཞོལ་བའི་སེམས་ཟང་ཟིང་དང་བཅས་པ་ཉིད་དེ། དེའི་གཉེན་པོར་གོ་
རིམས་བཞིན་དུ་སྒོ་དྲུག་པོ་དག་རིག་པར་བྱའོ། །དང་པོ་དང་གཉིས་པས་ནི་སྡུག་བསྔལ་བ་དང་བདེ་བའི་གནས་སྐབས་ན། སེམས་ཅན་ཡོངས་སུ་མི་གཏོང་བས་སེམས་ཅན་ཡོངས་སུ་སྨིན་པར་བྱེད་པ་བསྟན་ཏོ། །ལྔ་པས་
ནི་སངས་རྒྱས་ཀྱི་ཆོས་ཡོངས་སུ་སྨིན་པར་བྱེད་དོ། །གསུམ་པ་དང་བཞི་པས་ནི་གེགས་སེལ་བས་བདག་ཉིད་ཀྱིས་བསྒྲུབ་པར་ཉིད་དོ། །དྲུག་པས་ཉན་ཐོས་དང་། རང་སངས་རྒྱས་དང་ཐུན་མོང་མ་ཡིན་པའི་འབྲས་བུ་ཆོས་ཀྱི་
སྐུ་ཞེས་བྱ་བ་ཕུལ་དུ་དབྱུང་དུ་མེད་པའི་ཕྱིར་དང་། སེམས་ཅན་ཐམས་ཅད་ཀྱི་དོན་བྱ་བར་ཉེ་བར་གནས་པའི་ཕྱིར་འཁོར་བའི་མཐའ་ཇི་སྲིད་པ་ཡིན་པར་རིག་པར་བྱའོ། །རྣམ་པ་གཅིག་ཏུ་ན་རྣམ་གྲངས་གཞན་ཡང་བསམ་པ་

73-1-2b

ཡོངས་སུ་དག་པ་རྣམ་པ་བཞིས་ཡོངས་སུ་བསྟན་ཏེ། ཆོས་ལ་བདག་མེད་པར་རབ་ཏུ་རྟོགས་པས། སེམས་ཅན་ལོག་པར་ཞུགས་པ་རྣམས་དང་། འཁོར་བའི་སྡུག་བསྔལ་རྣམས་ཀྱིས་མི་གཡོས་པ་ཉིད་དང་། ཕུན་སུམ་ཚོགས་པའི་དུས་ན་སེམས་ཅན་ལ་བལྟ་བ་དང་བཅས་པ་ལ་ཀུན་དུ་
རྨོངས་པ་མི་འབྱུང་བ་དང་། མ་དག་པའི་རྒྱུ་གནས་ངན་ལེན་གྱི་འབྲས་བུ་སྐྱེད་པའི་མཐུ་དང་མི་མཐུན་པར་བྱེད་པ་དང་། དེ་ཡོངས་སུ་བརྟས་པར་བྱེད་པའི་རྒྱུ་ཡོངས་སུ་སྤོང་བས་སོ། །སྦྱོར་བ་རྣམ་པར་དག་པ་ནི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་ལ་སྦྱོར་བར་བྱེད་པའོ། །བསམ་
པ་རྣམ་པར་དག་པའི་འབྲས་བུ་ནི་བླ་ན་མེད་པའི་ཡེ་ཤེས་སོ།།      །།སྦྱོར་བ་རྣམ་པར་དག་པའི་འབྲས་བུ་ནི། རྣམ་པར་གྲོལ་བ་སྟེ་གནས་གྱུར་པའོ། །བླ་ན་མེད་པའི་ཡེ་ཤེས་དང་། རྣམ་པར་གྲོལ་བ་ནི་སྦྱོར་བ་རྣམ་པར་དག་པའི་འབྲས་བུ་ཡིན་ཏེ། ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་
འཇིག་རྟེན་པའམ་འཇིག་རྟེན་ལས་འདས་པའང་རུང་གང་ཅི་ཡོད་པ་དེ་བླ་ན་མེད་པའི་ཡེ་ཤེས་ཀྱི་འབྲས་བུར་གྱུར་ཅིག་ཅེས་བྱ་བ་ལ་སོགས་པ་གསུང་བའི་ཕྱིར་རོ། །ཕ་རོལ་ཏུ་ཕྱིན་པ་ཡོངས་སུ་མ་རྫོགས་ན། བསམ་པ་འབའ་ཞིག་གིས་བླ་ན་མེད་པའི་ཡེ་ཤེས་བསྐྱེད་མི་ནུས་པའི་ཕྱིར་ཏེ། 
ཕ་རོལ་ཏུ་ཕྱིན་པའི་འབྲས་བུར་བཤད་དེ། རིགས་མཐུན་པའི་ཕྱིར་བླ་ན་མེད་པའི་ཡེ་ཤེས་ཉིད་བསམ་པ་རྣམ་པར་དག་པའི་འབྲས་བུར་རིགས་སོ། །དེ་གཉིས་ཀའི་འབྲས་བུ་ནི་གཉིས་ཀ་སྟེ་བསམ་པ་དང་སྦྱོར་བ་གཅིག་ལ་གཅིག་ལྟོས་པ་གཉིས་ཤིན་ཏུ་མཐར་ཐུག་པའི་ཕྱིར་རོ། །ཆོས་ཐམས་ཅད་
མི་དམིགས་པའི་རྣམ་པར་ཡོངས་སུ་བསྒོམས་པས་ཡོངས་སུ་བསྔོས་པའི་དབང་གིས་ཐམས་ཅད་མཁྱེན་པའི་ཡེ་ཤེས་དང་། དེ་བཞིན་གཤེགས་པའི་ཡོན་ཏན་གཞན་རྣམས་ཀྱང་འཐོབ་སྟེ་རྒྱུ་ཡིན་པའི་ཕྱིར་རོ། །དེ་ལྟ་མ་ཡིན་ན་ནི་བསམ་པ་ཡོངས་སུ་སྦྱངས་པ་འབྲས་བུ་མེད་པ་ཁོ་ནར་འགྱུར་
རོ། །དེ་གཉིས་ནི་འཁོར་བ་དང་མྱ་ངན་ལས་འདས་པ་ལ་མི་གནས་པ་ཡིན་ནོ། །རྒྱུ་རྣམ་པ་གཉིས་ཀྱང་ཤེས་རབ་དང་སྙིང་རྗེ་མཉམ་པ་ཉིད་ཀྱིས་ཡོངས་སུ་ཟིན་པ་སྟེ། རྣམ་པ་དེ་ཉིད་ཀྱིས་ཡང་དག་པར་བསྒྲུབས་པའི་ཕྱིར་རོ། །ཡོན་ཏན་དེ་ལྟ་བུ་ཐོབ་པར་བྱ་བའི་ཕྱིར་བྱང་ཆུབ་སེམས་དཔའ་

73-1-3a

དགེ་བའི་རྩ་བ་ཐམས་ཅད་ཡོངས་སུ་བསྔོ་བར་བྱའོ། །དེ་ལྟ་བས་ན་འདི་ནི་དགེ་བའི་རྩ་བ་ཡོངས་སུ་བསྔོ་བ་ཆེན་པོ་ཞེས་བྱའོ། །དེ་ལྟར་རྣམ་པ་དྲུག་པོ་བདག་གིས་བསྒོམས་པ་དེ་དག་གི་ཕན་ཡོན་རྣམ་པ་དྲུག་ཁོང་དུ་ཆུད་པར་བྱ་སྟེ་གོ་རིམས་བཞིན་ནོ། །དགེ་བའི་རྩ་བ་
འདི་དང་ལྡན་པའི་བྱང་ཆུབ་སེམས་དཔའ་ནི་འཁོར་བར་འཁོར་བ་ན་སྡུག་བསྔལ་སྲབ་མོར་མྱོང་བར་འགྱུར་ཏེ་དེས་ཡོངས་སུ་གཏུགས་པར་མི་འགྱུར་བ་དང་། ཟད་མི་ཤེས་པ་དང་རྒྱ་ཆེ་བའི་རྒྱུན་གྱིས་འཇིག་རྟེན་པའི་ཕུན་སུམ་ཚོགས་པ་མྱོང་བར་འགྱུར་ཞིང་སེམས་ཅན་གྱི་ཁམས་ཚད་མེད་པ་
ཡོངས་སུ་སྨིན་པར་བྱེད་པ་དང་། སྒྲིབ་པ་མེད་པར་དགེ་བའི་རྩ་བ་རྣམས་མྱུར་དུ་ཡང་དག་པར་སྡུད་པར་བྱེད་ལ་དགེ་བ་ལ་ཀུན་དུ་དགའ་ཞིང་དགེ་བ་ལ་མོས་པ་དང་། བྱང་ཆུབ་སེམས་དཔའ་ལ་འཁྲུལ་པ་ཤིན་ཏུ་ཕྲ་བ་ཡང་མི་སྣང་ཞིང་རབ་ཏུ་རྟོགས་པས་སེལ་བ་དང་། མྱུར་དུ་ཚོགས་ཡོངས་སུ་རྫོགས་
པར་བྱེད་ཅིང་ཐམས་ཅད་མཁྱེན་པ་ཉིད་མངོན་པར་བསྒྲུབ་པའི་ཏིང་ངེ་འཛིན་ཀྱང་ཐོབ་པ་དང་། འཇིག་རྟེན་ཇི་ཙམ་པ་དང་སེམས་ཅན་ཇི་སྙེད་དེ་ཙམ་དུ་སེམས་ཅན་ཐམས་ཅད་ཀྱི་དོན་བྱེད་པར་སྣང་སྟེ་དེ་ཡང་བསྒྲུབ་པོ། །འཕགས་པ་སྒོ་དྲུག་པའི་གཟུགས་ཀྱི་རྣམ་པར་བཤད་པ། སློབ་
དཔོན་དབྱིག་གཉེན་གྱིས་མཛད་པ་རྫོགས་སོ།།      །།༄༅༅། རྒྱ་གར་སྐད་དུ། ཨཱརྱ་ཨ་ནནྟ་མུ་ཁ་ནིརྷཱ་ར་དྷཱཿརི་ཎཱི་བྱཱ་ཁྱཱ་ནཾ་ཀཱ་རི་ཀཱ། བོད་སྐད་དུ། འཕགས་པ་སྒོ་མཐའ་ཡས་པ་སྒྲུབ་པའི་གཟུངས་རྣམ་པར་བཤད་པའི་ཚིག་ལེའུར་བྱས་པ། འཇམ་དཔལ་གཞོན་ནུར་གྱུར་པ་
ལ་ཕྱག་འཚལ་ལོ། །རྫོགས་པའི་སངས་རྒྱས་ཆོས་དང་ནི། །དགེ་འདུན་ལ་ཡང་ཕྱག་འཚལ་ནས། །མཐའ་ཡས་སྒོས་སྒྲུབ་གཟུངས་ཀྱི་དོན། །མདོར་བསྡུས་རྣམ་པར་དབྱེ་བར་བྱ། །རྫོགས་པའི་སངས་རྒྱས་སྲས་དང་བཅས་པ་ཤེས་བྱ་ཀུན་གྱི་ཡང་དག་ཐུགས་ཆུད་པའི། །སྤྱོད་ཡུལ་ཟབ་
མོའི་གཟུངས་འདི་ཅིག་བདག་འདྲ་ཉོན་མོངས་བློ་ཞན་པ་ཡིས་ག་ལ་ལྕོགས། །དེ་ནི་གནས་མ་ཡིན་པར་ཤིན་ཏུ་མངོན་བཞིན་འོན་ཀྱང་གཟུངས་དོན་རྣམ་པར་དབྱེ་བྱ་བར། །བདག་ནི་དད་པས་གུས་པར་བསྐུལ་ལ་གཞན་དབང་བློ་ཅན་བདག་གིས་མི་བྱ་ཅི་ཡང་མེད། །འཇིག་རྟེན་མ་ལུས་ཡང་

73-1-3b

དག་འདོད་པའི་དངོས་པོ་སྒྲུབ་པ་ཡི། །མཐུ་དང་ལྡན་པ་མ་ཡིན་དམན་ཞིང་དོན་ཀྱང་མ་བྱས་པས། །བདག་ནི་ཚེ་རབས་ཕྱི་མ་ལ་ཡང་བླུན་པོ་འདི་འདྲ་བར། །འགྱུར་དུ་དོགས་ཕྱིར་འདི་ཡི་ལུས་ནི་རབ་ཏུ་དབྱེ་བར་བྱ། །གླེང་བསླང་བ་དང་གླེང་གཞི་དང་། །འདུས་པ་དང་ནི་དགོས་པ་ལ། །
ཡང་དག་བརྟགས་ན་དོན་ཆེན་ཕྱིར། །ཞུ་བ་ལ་ནི་ནན་ཏན་བྱས། །དོན་ཆེན་བས་ན་ཐུབ་པ་ལ། །རྒྱ་ཆེར་མཁྱེན་པར་གསོལ་བ་དང་། །ཐུབ་ལ་གསོལ་བ་འདེབས་པ་དང་། །དམ་བཅའ་མངོན་དུ་ཕྱོགས་བྱ་དང་། །སྒྲུབ་དང་གཟུངས་ཀྱི་ངོ་བོ་དང་། །དེ་ལ་བསྟོད་དང་ཕན་ཡོན་དང་། །ཐོབ་
པའི་ཐབས་དང་ཕན་ཡོན་དང་། །དེ་ནི་སྔོན་བྱུང་བརྗོད་པ་དང་། །ཆོས་ཀྱི་རྣམ་གྲངས་ཆེ་ཉིད་དང་། །མིང་ཞུས་པ་དང་བྱ་བ་གཉིས། །ཡི་རངས་པ་དང་བསྟན་པ་སྟེ། །འདི་ལ་འདི་ནི་མདོར་བསྡུས་པའོ། །བསྒྲུབ་བྱ་སྒྲུབ་པའི་བྱེ་བྲག་གིས། །གླེང་བསླང་རྣམ་པ་བརྒྱད་དུ་བསྟན། །མདོར་
ན་འདི་ལ་བསྒྲུབ་བྱ་གསུམ། །སྒྲུབ་པ་རྣམ་པ་ལྔར་འདོད་དོ། །གླེང་གཞི་ཐུབ་པས་གསུངས་པ་འདི། །དེ་ཡིས་གདུལ་བའི་དབང་མཛད་ནས། །རྣམ་པ་ལྔ་དང་ལྡན་པ་སྟེ། །ཕོངས་པ་རྣམ་པ་གསུམ་དུ་འདོད། །འདི་དག་ལ་སོགས་ཚིག་གིས་ནི། །དེ་དག་བྱིན་གྱིས་བརླབ་པར་བསྟན། །
བདུད་གཉིས་དེ་དག་བཅོམ་པ་ཡིས། །གདུལ་བ་ལ་ནི་ཐུགས་བརྩེའི་ཕྱིར། །སྤྲུལ་པའི་སྐུས་ནི་མྱ་ངན་ལས། །འདའ་བར་འདོད་ཀྱི་ཅིག་ཤོས་མིན། །གཏན་དུ་གནས་པའི་རྒྱུ་ལྡན་པ། །མྱ་ངན་འདའ་བར་ཡང་མི་རིགས། །རྫོགས་སངས་རྒྱས་ཀྱི་མཐུས་བསྟན་པས། །མ་བསྒྲིམས་
བསྒྲིམས་དང་བསྒྲིམས་པ་ཡིས། །འཕྱས་སུ་འགྱུར་བ་བསལ་བའི་ཕྱིར། །བསྡུ་བ་རྣམ་པ་གསུམ་དུ་གཞག །བཙུན་པར་མི་འགྱུར་བསལ་བའི་ཕྱིར། །ཐུབ་པས་མངོན་དུ་མ་མཛད་དེ། །གུས་པ་བསྐྱེད་པར་བྱ་བའི་ཕྱིར། །གཞན་དག་སྡུད་པར་བྱེད་དུ་བཅུག །དེས་འདུལ་དབང་
མཛད་བཅོམ་ལྡན་གྱིས། །དེ་གཉིས་མྱ་ངན་འདས་པར་བསྟན། །འདིར་ནི་དེ་སྨོས་པ་ཡི་ཕྱིར། །ཡང་དག་མྱ་ངན་འདས་མ་ཡིན། །བསྡུ་བ་གསུམ་ལ་སྐོ་བ་དང་། །བསྐོ་བར་བྱ་བའི་བྱ་བ་དང་། །དེ་ཡི་འབྲས་བུ་གོ་རིམས་དག །བསྟན་པ་ཟད་པར་འདོད་པ་ཡིན། །བྱང་ཆུབ་མཆོག་གི་རིམ་ཡིན་ལ། །

73-1-4a

བློ་ཞན་བཤེས་གཉེན་དམན་བསྟེན་པ། །གང་དག་དམན་པའི་ལམ་བསྟེན་པ། །དེ་དག་རྣམ་པ་བཞི་དག་གིས། །མངོན་དུ་ཕྱོགས་པར་མཛད་པ་ན། །མཐའ་དག་ཀྱང་ནི་འདུས་པ་དང་། །ཆེ་བ་ཉིད་ནི་རྒྱལ་བས་བསྟན། །གང་ཞིག་བསྒྲིམས་ཏེ་བསྡུ་བ་དང་། །གང་ཡང་བསྒྲིམ་
ནི་མི་དགོས་ལ། །འཇིག་རྟེན་སྤྱོད་པའི་ཚུལ་གྱིས་འཇུག །གང་ཕྱིར་དེ་བཞིན་གཤེགས་པ་ནི། །སྐྱོན་དང་ཉོན་མོངས་ཕུང་པོ་བསྩལ། །དོན་ཀུན་ཡང་དག་མཁྱེན་པ་སྟེ། །དེ་ཕྱིར་རྒྱལ་བ་ཞུ་བར་འོས། །དད་པས་མོས་པ་ལ་སོགས་པས། །གོང་ནས་གོང་དུ་ཐོབ་པའི་ཕྱིར། །གདུལ་བྱའི་བསམ་པའི་
བྱེ་བྲག་གིས། །དོན་ནི་རྣམ་ལྔར་བསྟན་པ་ཡིན། །སྡུག་བསྔལ་ལ་སོགས་ཡུལ་རྣམས་ལ། །ནེམ་ནུར་བྱེད་པ་སོམ་ཉིར་བསྟན། །དེ་སྤངས་ས་ཐོབ་འདི་ཡིན་པར། །འདིར་ནི་དོན་གྱིས་བསྟན་པ་ཡིན། །ཕྱིར་མི་ལྡོག་པའི་ས་ལ་ནི། །ཐོབ་པ་རྣམ་པ་གཉིས་སུ་བསྟན། །སྐྱེ་བ་གཅིག་གིས་
ཐོགས་པ་རྣམས། །ས་ནི་རྟེན་བཞིས་ཐོབ་པར་འགྱུར། །སྤྱོད་པ་སྦྱིན་སོགས་ཕ་རོལ་ཕྱིན། །ཚོགས་ཀྱིས་རྣམ་པ་གཉིས་སུ་འགྱུར། །གསུམ་ནི་བསོད་ནམས་ཕ་རོལ་ཕྱིན། །ལྷག་མ་ཡེ་ཤེས་ཅིག་ཤོས་གཉིས། །དེས་གདུལ་ཕྱིར་ནི་གནས་པ་དང་། །བསྟན་པ་དོན་ཡོད་མཚུངས་པ་མེད། །
སྨོན་ལམ་འབྲས་བུ་འགྲུབ་པ་དང་། །དགའ་དགུར་ཞིང་ནི་སྟོན་པར་བྱེད། །སེམས་ཅན་ལ་སོགས་རྣམ་དག་ནི། །སེམས་ཅན་ཆོས་དོན་གཉེར་དང་ཞིང་། །རང་བཞིན་བདག་མེད་མཐོང་བ་ཡིན། །དེ་ནི་འདོད་པའི་དོན་གྲུབ་བྱེད། །གདུལ་བྱ་རྣམས་ཀྱི་བྱེ་བྲག་གིས། །ལུས་སོགས་ཡིད་དུ་འོང་
བར་གཞག །ཐམས་ཅད་མཁྱེན་པའི་ཡོན་ཏན་གྱིས། །ཚོགས་ཀྱི་གཞི་ཡང་སྐྱེ་བ་ཡིན། །གཟུངས་ནི་རྣམ་གསུམ་གང་གི་ཕྱིར། །ཚིག་དང་དོན་དང་གཉི་ག་འཛིན། །ལེགས་པ་ལས་ནི་ཉམས་པ་ན། །འཛིན་པར་བྱེད་པས་དེ་ཕྱིར་གཟུངས། །བདག་དང་གཞན་གྱི་དོན་གྲུབ་ཕྱིར། །གཟུངས་
ཉིད་སྒོ་མོ་སྒོ་ཡིན་ནོ། །དེ་ལ་འཇུག་པ་དེ་ཤེས་པ། །དེ་ཡང་རྣམ་བཞིར་བསྟན་པ་ཡིན། །ཞུ་བ་འདི་ནི་མདོར་བསྡུ་ན། །བྱང་ཆུབ་སེམས་དཔའ་ཀུན་ལ་ཡང་། །གང་ལ་ཇི་སྙེད་འོས་ཡིན་པ། །དེ་ལ་དེ་སྙེད་འགྱུར་བ་ཡིན། །ཞུ་བའི་འབྲས་བུ་བློ་ལྡན་གྱིས། །ཞུ་བ་ཉིད་དུ་རབ་ཏུ་གསུངས། །

73-1-4b

ཡང་ན་འབྲས་དང་ཐ་དད་པར། །སྒྲོ་བཏགས་ཞུ་བ་ཉིད་དུ་གསུངས། །ཚིག་དང་དོན་དང་གཉི་ག་དང་། །ཐོས་སོགས་ཤེས་པའི་བྱེ་བྲག་དང་། །མངོན་སུམ་རྗེས་དཔག་རྣམ་གཉིས་ཀྱིས། །རྣམ་པར་དག་པས་རྣམ་གསུམ་མོ། །སྤྱོད་པ་ཕ་རོལ་ཕྱིན་བཅུ་དང་། །ཡང་ན་སྟོང་ཉིད་སྐྱོན་མེད་ཉིད། །དེ་ཡི་
དག་པས་ཐོབ་པས་ན། །ཐམས་ཅད་མཁྱེན་པའི་གོ་འཕང་ཐོབ། །སྣོད་ནི་ཁས་ཕུབ་རྡོལ་བ་དང་། །མི་གཙང་བ་ཡི་གཉེན་པོར་རམ། །གཟུ་བ་ལ་སོགས་ཡོན་ཏན་ལྡན། །ཁྱོད་ཀྱིས་ཉོན་ལ་གཞན་དུ་མིན། །གང་ཕྱིར་ཚད་མ་ལྡན་པས་ན། །ཐོག་མ་བར་དང་ཐ་མར་དགེ། །ཆུང་ངུ་འབྲིང་དང་ཆེན་
པོ་ཡི། །ཉེས་པ་རྣམས་ནི་ཟད་བྱེད་དང་། །ཚིག་འབྲུ་དོན་དང་གཉི་ག་ཤེས། །མངོན་སུམ་ལ་སོགས་མི་འགལ་བ། །ཐོས་ལ་སོགས་པས་བློ་བསྐྱེད་དང་། །བདག་སོགས་འབྱོར་པའི་རྒྱུ་ཡིན་ཕྱིར། །དོན་གསོལ་ཞལ་གྱིས་བཞེས་པས་ན། །དེ་ཡིས་བདག་ཉིད་གསོལ་བར་ཕྱོགས། །ཐུབ་པ་
སེམས་ཅན་དོན་མཁྱེན་ཕྱིར། །འདིར་ནི་བསྲུང་བ་ལ་སོགས་གསུངས། །ཡང་དག་ཏུ་ན་དེ་ཆོས་ལྡན། །དངོས་པོའི་ངོ་བོར་ཁས་མི་ལེན། །རྐྱེན་ལ་རག་ལས་འབྱུང་ཕྱིར་ཏེ། །སྒྱུ་མ་རྨི་ལམ་སྨིག་རྒྱུ་བཞིན། །དགག་པར་བྱ་བ་མེད་པས་ན། །ཡང་དག་ཏུ་ན་བདག་མེད་མངོན། །ཡང་དག་
མཁྱེན་ཏེ་ཆོས་རྣམས་ཀུན། །ཐམས་ཅད་དངོས་པོར་འཛིན་མི་མཛད། །ཚད་མ་ལྡན་པ་མ་ཡིན་པས། །ཡོད་མེད་ལ་སོགས་མཚན་ཉིད་དུ། །དེ་ནི་ཆོས་ཀུན་ཁས་མི་ལེན། །དེ་ཕྱིར་མཁས་པ་འཛིན་མི་བྱེད། །དེ་ཕྱིར་དེ་ནི་སྟོང་པ་མིན། །མི་སྟོང་མ་ཡིན་ཡོད་མེད་མིན། །མི་སྐྱེ་མ་ཡིན་
སྐྱེ་མིན་ཞེས། །བྱ་བ་ལ་སོགས་བཅོམ་ལྡན་གསུངས། །བསམ་གཏན་གྱི་ནི་ལམ་འདི་ཡིས། །གསང་སྔགས་ཚིག་རྣམས་བསམས་ན་ནི། །འབྲས་བུ་རྫོགས་པར་འཐོབ་འགྱུར་གྱི། །འདོད་པ་ཉི་ཚེས་དེ་ལྟ་མིན། །ཚིག་རྣམས་རེ་རེའི་རྣལ་འབྱོར་ལ། །མངོན་དུ་ཕྱོགས་པར་བྱེད་བཞིན་དུ། །
གསང་སྔགས་རན་པར་བརྗོད་བྱ་སྟེ། །དེ་ཕྱིར་འདིར་ནི་ཚིག་སྨྲས་སོ། །ཡི་གེ་རེ་རེ་བསམ་པ་ཡི། །རྣལ་འབྱོར་སུས་ཀྱང་མི་ནུས་ཏེ། །ཚིག་རེ་ནས་ནི་ངེས་པར་ཡང་། །བརྗོད་པར་བྱ་བས་དེ་སྨོས་སོ། །རྣལ་འབྱོར་མེད་པའི་གསང་སྔགས་འདྲི། །དེ་ལྟར་འབྲས་བུ་སྟོན་མི་འགྱུར། །གསང་

73-1-5a

སྔགས་ཚིག་ནི་གསང་སྔགས་ཏེ། །དེ་ཕྱིར་རྣལ་འབྱོར་མེད་མི་བྱ། །གསུངས་པའི་མིང་ནི་འདོགས་པ་དང་། །ཐོབ་པའི་ཐབས་ནི་བསྟན་པ་དང་། །དེས་ཞེས་བྱ་བ་སོགས་ཚིག་གིས། །གཟུངས་ནི་འོག་ནས་འབྱུང་བ་ཉིད། །འདི་ཞེས་གསུངས་པ་བརྗོད་བྱ་ཡིན། །འཛིན་
པ་དོན་ལས་བཞེད་པ་ཡིན། །རློམ་སེམས་མངོན་པར་ཞེན་པ་སྟེ། །མ་དམིགས་ཕྱིར་ན་དེ་འདིར་མེད། །མི་སྡུག་མ་ཡིན་གཉི་གར་སྡུག །སྡུག་པ་དེ་ཡང་རྣམ་གཉིས་འདོད། །ཆོས་རྣམས་ཐམས་ཅད་ཐུབ་པ་ཡིས། །རྣམ་པ་བཞིར་ནི་བསྡུ་བ་མཛད། །གནོད་སེམས་གཏི་མུག་འདོད་ཆགས་
རྣམས། །དེ་ཡི་སྒོ་ནས་འབྱུང་ཕྱིར་རོ། །སྤང་བའི་ཐབས་ནི་བསྒྲུབ་པའི་ཕྱིར། །དེ་དག་དངོས་པོ་མེད་པར་བསྟན། །འདི་ལ་ཐོབ་བྱ་རྣམས་ཐོབ་དང་། །དེ་དག་ཉིད་ནི་བསྒོམ་པ་དང་། །སྤང་བྱ་རྣམས་ནི་སྤང་བ་དང་། །འཕེལ་བ་ཐམས་ཅད་ཡིན་པར་བཞེད། །དེ་ཕྱིར་རྣལ་འབྱོར་ཅན་དེ་ནི། །
ཐོས་བསམ་ལ་སོགས་བྱུང་བ་ཡི། །ཤེས་པ་རྣམས་ཀྱིས་ནམ་དུ་ཡང་། །འདུས་བྱས་འདུས་མ་བྱས་ཀྱི་ཆོས། །དེ་དག་ཐོབ་སོགས་སྦྱོར་མི་བྱེད། །ཡང་ན་ཆུང་འབྲིང་ཆེན་པོ་ཡི། །སྦྱོར་བ་རྣམས་ཀྱིས་སྦྱོར་མི་བྱེད། །དེ་བཞིན་ཟག་བཅས་སློབ་སོགས་ཀྱི། །ལམ་རྣམས་ཀྱིས་ཀྱང་སྦྱོར་མི་བྱེད། །
རྒྱུ་དང་རྐྱེན་ནམ་ཆགས་སོགས་ཀྱི། །བག་ཉལ་རྣམས་དང་ལྡན་དེ་དག །འདིར་ནི་མཚུངས་ལྡན་ཤེས་བྱ་སྟེ། །བཟློག་པ་ལས་ནི་ལྡན་པ་མིན། །རྣམ་པ་མེད་པའི་ཤེས་པ་ཡིས། །ཡུལ་ལ་འཛིན་པར་མི་རུང་ངོ་། །རྣམ་པ་ཚད་མ་མིན་ཕྱིར་དང་། །མི་རུང་ཕྱིར་ན་ཅིག་ཤོས་མིན། །ལུས་དང་ལུས་
མེད་འཕེལ་བ་དེ། །རྫས་དང་རྫས་མེད་རྣམ་པ་གཉིས། །ལྟོས་པར་གནས་པའི་ངོ་བོའི་ཕྱིར། །མི་མཐུན་པ་དང་ལྷན་ཅིག་བཤད། །ཡང་དག་ཏུ་ན་སྐུ་གཉིས་ཀྱི། །རང་བཞིན་མ་མཐོང་གང་ཡིན་པ། །དེ་ཉིད་སངས་རྒྱས་རྗེས་དྲན་ཏེ། །རྟོག་པ་ཐམས་ཅད་སེལ་བ་ཡིན། །རྐྱེན་ལ་རག་ལས་འབྱུང་
བའི་ཕྱིར། །སྒྱུ་མ་བཞིན་དུ་གང་མ་སྐྱེས། །བདེན་པར་བསམས་ན་གཟུགས་ལ་སོགས། །དེ་ནི་དེ་བཞིན་གཤེགས་མ་ཡིན། །དགག་པར་བྱ་བ་མེད་པས་ན། །ཡང་དག་ཏུ་ན་དགག་མེད་མངོན། །དེ་ཕྱིར་བརྟགས་ན་གཟུགས་མེད་སོགས། །དེ་ནི་དེ་བཞིན་གཤེགས་མ་ཡིན། །དེས་ན་གཉི་ག་མ་ཡིན་

73-1-5b

དང་། །ཅིག་ཤོས་དེ་དག་བཀག་ཤེས་བྱ། །དེ་ཡི་ཕྱིར་ན་དེ་གཉིས་དེ། །སོ་སོར་དགག་པ་མ་མཛད་དོ། །དེ་ལྟར་རྣམ་རྟོག་མེད་གྱུར་ན། །ཆོས་ཀྱི་སྐུ་ནི་མཐོང་བ་སྟེ། །སངས་རྒྱས་རྗེས་དྲན་ཀུན་མཁྱེན་གྱི། །ཡོན་ཏན་ཕུན་སུམ་ཚོགས་པའི་གཞི། །ལོངས་སྤྱོད་རྫོགས་པར་མཛད་པའི་སྐུ། །རྣམ་
པ་ཉི་ཤུས་བཤད་པ་ཡིན། །ཅིག་ཤོས་བཅོ་བརྒྱད་ཤེས་པར་བྱ། །འདིར་ནི་དེ་གཉིས་ཕྲིན་ལས་བཞི། །དེ་ཡི་མཛད་པའི་འབྲས་བུ་དྲུག །དེ་དངོས་རྣམ་གཉིས་རྒྱུ་རྣམ་བདུན། །མཉམ་པ་ཉིད་ལ་གནས་ནས་སུ། །དེ་དག་ལ་ནི་བསྒོམ་པར་བྱ། །ཡང་ན་ལོངས་སྤྱོད་རྫོགས་པའི་སྐུ། །རྒྱུ་དང་
བཅས་དང་འབྲས་བུར་བཅས། །ཡང་དག་ཏུ་ན་གང་མ་མཐོང་། །དེ་ནི་སངས་རྒྱས་རྗེས་སུ་དྲན། །ལོངས་སྤྱོད་རྫོགས་པ་ཉི་ཤུ་སྟེ། །འབྲས་བུ་ཉི་ཤུ་གཉིས་སུ་བཞེད། །དེ་ཡི་རྒྱུ་ནི་བཅོ་ལྔ་སྟེ། །གང་གི་ཕྱིར་ནི་ནན་ཏན་བྱེད། །ཇི་ལྟར་གང་ལ་བྱེ་བྲག་གིས། །ཟག་བཅས་ཅིག་ཤོས་བྱེ་
བྲག་གིས། །བྱ་བ་རྣམ་གཉིས་ཤེས་པར་བྱ། །ལྷག་མ་དག་ནི་སྔར་བཤད་བཞིན། །སར་པ་འཇུག་པའི་རྒྱུ་ཉིད་ཡིན། །གང་ཚེ་དེ་ལས་མ་ཐོབ་པ། །སངས་རྒྱས་ཉིད་དུ་གཅིག་ཏུ་ངེས། །སངས་རྒྱས་ཉིད་ཀྱིས་ཐོབ་ལ། །གནས་སྐབས་དག་ནི་ཐམས་ཅད་དུ། །བདུད་ཀྱི་ལས་ནི་རྣམ་སྤོང་
ན། །གཟུངས་ཀྱིས་ཐོབ་པར་མི་འགྱུར་གང་། །ཐོབ་བྱ་གཞན་ནི་ཅི་ཞིག་ཡོད། །ཡང་ན་དད་པས་མོས་ལ་སོགས། །དབང་དུ་མཛད་དེ་གོ་རིམས་བཞིན། །མིང་རྣམས་ལྔ་པོ་འདི་དག་ནི། །དོན་དང་མཐུན་པར་གསུངས་པ་ཡིན། །འབྲས་བུ་ཡང་དག་བསྟན་པས་ཀྱང་། །འདུལ་བ་རྣམས་
ནི་འཇུག་འགྱུར་ཏེ། །དེ་ཡི་ཕྱིར་ན་ཐུབ་པ་ཡིས། །ཐུགས་རྗེས་ཕན་ཡོན་ཡང་དག་གསུངས། །ཆོས་དང་དད་པས་རྗེས་འབྲང་བའི། །དབང་མཛད་འདི་ཡི་ཕན་ཡོན་གཉིས། །རྒྱལ་བས་གསུངས་ཏེ་སྔ་མ་སྔ། །ཕྱི་མ་པོ་ནི་ཕྱི་མ་ཡིན། །ཡང་ན་ཕན་ཡོན་གཉིས་ཀ་ཡང་། །ཆོས་དང་དད་
པས་རྗེས་འབྲངས་པའི། །ཕྱི་མ་སྔ་མའི་བཏགས་པ་ཡིན། །ཕྱི་མ་ཡི་ནི་གཉིས་ཀ་དངོས། །སྟོབས་དང་ཕ་རོལ་ཕྱིན་ས་དང་། །མི་འཇིགས་ཡོན་ཏན་ལ་སོགས་པ། །རྣམ་ཐར་སྒོ་དང་མངོན་ཤེས་དང་། །གཟུངས་སྒོར་བཅས་པ་མཐའ་ཡས་སམ། །དེ་དག་མཐའ་ཡས་ཐབས་རྣམས་ཀྱི། །

73-1-6a

བསྒྲུབ་པར་བྱ་བ་གང་ཡིན་པ། །དེ་ཕྱིར་མཐའ་ཡས་སྒོས་སྒྲུབ་པའི། །གཟུངས་ཞེས་བྱ་བར་བསྒྲགས་པ་ཡིན། །འདིར་ནི་དོན་གྱི་གཟུངས་ཡིན་པའམ། །ཡང་ན་གཟུངས་དོན་སྟོན་པ་ཡི། །ཡི་གེ་ཚོགས་ནི་འདི་ཉིད་ལ། །གཟུངས་ཞེས་བྱ་བར་དགོངས་པ་ཡིན། །ཐོས་སོགས་
ལས་བྱུང་ཤེས་པ་རྣམས། །ཆུང་དང་འབྲིང་ལ་སོགས་ལྡན་པ། །གཟུངས་ཀྱི་དོན་ནི་ཐོབ་འགྱུར་ནས། །བྱང་ཆུབ་སེམས་དཔར་འགྱུར་བ་གང་། །དེ་དག་ཕྱིར་མི་ལྡོག་ཉིད་དུ། །མཚུངས་དེ་དུས་ནི་ཐ་དད་དོ། །བྱང་ཆུབ་མྱུར་བ་ཉིད་གསུངས་དང་། །དེ་ནི་གཞན་ལ་ལྟོས་ཏེ་དགོངས། །
དམིགས་པ་ཐམས་ཅད་ཡོད་མིན་པ། །འདིར་ནི་དམིགས་པ་མེད་པར་བསྒྲགས། །དམིགས་པ་ཡོད་པ་མ་ཡིན་ཕྱིར། །དམིགས་པ་མེད་པའང་རིགས་ལྡན་མིན། །གང་ཚེ་འདི་ལ་དམིགས་མེད་པའི། །སྤྱོད་པ་ཆེན་པོ་ཡོད་གྱུར་ན། །དེ་ཉིད་ཡང་དག་ཤེས་དེའི་ཕྱིར། །དེ་ལས་མི་འགྲུབ་ཅི་
ཞིག་ཡོད། །ཁྱོད་ཀྱིས་ཉེས་པ་མ་ལུས་པ། །སྤོང་བ་སངས་རྒྱས་རྗེས་དྲན་ཉིད། །དེ་ཡི་གཉེན་པོ་ཡིན་པས་ན། །དེ་ཕྱིར་ཅི་བདེར་བསྒོམ་པར་གྱིས། །འཁོར་གསུམ་རྣམ་པར་དག་པའི་ཕྱིར། །སྦྱིན་པ་ལ་སོགས་མཆོག་དང་ལྡན། །ཡང་དག་རྫོགས་པའི་བྱང་ཆུབ་རྒྱུའི། །ཁྱད་པར་འདི་ལས་ཐོས་
པར་འགྱུར། །འདིར་ནི་ཐུབ་པའི་དབང་པོ་ཡིས། །ཡི་གེའི་དོན་དང་གཉི་ག་ཡི། །གཟུངས་ཀྱི་ཕན་ཡོན་བཀའ་སྩལ་ཏེ། །ཅི་རིགས་པར་ནི་སྦྱར་བར་ཟད། །ཡང་ན་ཕན་ཡོན་ཐམས་ཅད་ཀྱང་། །གཟུངས་རྣམས་ཀུན་ལ་བཤད་བྱ་སྟེ། །ཁ་ཅིག་དག་ནི་དུས་གཞན་ལས། །དགོངས་པ་ཙམ་
དུ་ཟད་པ་ཡིན། །མཉམ་ཉིད་ཅེས་བྱ་དུས་དང་དོན། །གང་ཟག་གཞན་ཞེས་བྱ་བ་ཡི། །དགོངས་པ་རྣམས་ཀྱིས་ཐུབ་པའི་གསུང་། །ཅི་རིགས་པར་ནི་རྟོགས་པར་བྱ། །གཟུངས་ཞེས་བྱ་འདིར་ཁ་ཅིག་ཏུ། །མགོན་པོ་ཐུགས་རྗེ་ཅན་གྱིས་ནི། །གཟུངས་ཞེས་པ་ནི་ཆེན་པོ་ཡི། །ཆེན་པོའང་
ཡིན་པར་བཀའ་སྩལ་ཏོ། །གསང་སྔགས་ཚིག་ནི་སྔ་མ་ཡིས། །བསྲུང་བའི་ཆོ་ག་འདི་བྱས་ལ། །གཙང་མས་འདུ་དང་ཆགས་སྤངས་ཤིང་། །ལུས་ཀྱི་འདུ་འཛི་སྤང་བྱ་སྟེ། །དེ་ནི་རྟོག་པའི་དྲ་བ་ཡི། །རྒྱུན་རྣམས་མ་ལུས་སྤངས་ན་ནི། །སངས་རྒྱས་རྗེས་སུ་དྲན་པ་ཙམ། །རབ་ཏུ་བསྒོམ་པ་

73-1-6b

གུས་བྱས་ལས། །སེམས་ནི་རྩེ་གཅིག་བྱས་ནས་སུ། །སངས་རྒྱས་རྗེས་སུ་དྲན་པ་ནི། །དེ་ནི་ཆོ་ག་བཞིན་དུ་བསྒོམ། །སྐྱོ་བར་གྱུར་ན་བློ་ཅན་གྱིས། །དེར་གནས་སེམས་ཀྱིས་དུས་བསྟུད་དོ། །བློ་ཅན་དེ་ལྟར་སྒོམ་བྱེད་པ། །དེ་ལ་ཞག་བདུན་ཐ་མར་ནི། །སངས་རྒྱས་བྱེ་བ་བརྒྱད་ཅུ་རྣམས། །
དེ་ཡི་འོག་ཏུ་གཟུངས་སྦྱིན་མཛད། །གསང་སྔགས་ཚིག་ནི་རེ་རེ་ཞིང་། །སངས་རྒྱས་བྱེ་བས་བྱིན་བརླབས་ལ། །དེས་ཀྱང་སྔར་ནི་དེ་དག་གིས། །བཟླས་ནས་བསྲུང་སོགས་ཕུན་ཚོགས་བྱས། །དེ་ཕྱིར་སངས་རྒྱས་བྱེ་བ་ནི། །བརྒྱད་ཅུས་དེ་ལ་གཟུངས་སྦྱིན་མཛད། །ཡང་ན་དགུ་བཅུ་
ལས་ཐོས་ལྟར། །བསྒོམས་མཐུ་དེ་ནི་འདི་འདྲའོ། །གཟུངས་སོགས་བསམ་པ་བསམ་བྱ་ཡིན། །གཟུངས་མེད་སོགས་པ་བསམ་བྱ་མིན། །ཡང་ན་སྤྲུལ་པ་བསམ་བྱ་ཡིན། །ལོངས་སྤྱོད་རྫོགས་པ་བསམ་བྱ་མིན། །ཡང་ན་བསམ་བྱ་བསམ་བྱ་མིན། །དངོས་བསམ་བསམ་བྱ་བསམ་བྱ་མིན། །གཟོད་ནས་མ་སྐྱེས་
པས་མེད་ཕྱིར། །བསམ་པ་དེ་དག་བསམ་མི་བྱ། །ཆོས་དབྱིངས་སོམས་ཤིག་དེ་ལ་ཡང་། །ལོག་པར་བསམ་པར་མི་བྱའོ། །དེ་ལྟར་ཞག་བདུན་སེམས་ན་ནི། །དེ་ཡི་འོག་ཏུ་གཟུངས་ཐོབ་འགྱུར། །བློ་ལྡན་ཅི་འདྲ་གང་དུ་དང་། །ཇི་ལྟར་གནས་དང་གང་བསྒོམས་དང་། །གང་བྱས་པས་
ནི་ཐོབ་འགྱུར་བ། །དེ་ནི་བཞི་པ་རྣམས་ཀྱིས་བསྟན། །ཁྲིམས་ལྡན་དེ་ཡི་མི་མཐུན་ཕྱོགས། །གཉིས་གྲོལ་དེ་ཡི་འཕེལ་བྱེད་ལྡན། །ཉེས་པ་དང་ནི་ཕན་ཡོན་རྣམས། །བསྟན་པས་དེ་ལ་འཛུད་པར་བྱེད། །སྔར་བསྟན་པ་ཡི་དོན་ཉིད་ནི། །ཆོས་ཀྱི་རྗེས་འབྲངས་ཆེད་དུ་སྟེ། །རིགས་
པ་ཕན་ཡོན་བྱེ་བྲག་གིས། །ཚིགས་བཅད་རྣམས་ཀྱིས་ཡང་བསྟན་ཏོ། །དགོན་སོགས་གནས་ཤིང་ཟབ་མོ་ལ། །ཆོས་རྣམས་ལ་ནི་ལེགས་པར་སྤྱོད། །རྙེད་དང་བཀུར་སྟི་ཚིགས་བཅད་ལ། །ལྷག་པར་ཆགས་མེད་བརྟུལ་ཞུགས་ཅན། །རྟག་ཏུ་སྡུག་པའི་དངོས་པོ་ཀུན། །
འབྲས་བུ་ལ་ནི་མི་ལྟའམ། །འཛིན་མེད་སེམས་ཀྱིས་གཏོང་བྱེད་པས། །གཟུངས་འདི་ཐོབ་པར་འགྱུར་བ་ཡིན། །དང་པོ་གནས་ཡིན་དེ་ནས་ལས། །དེ་ནས་རྙེད་སོགས་ཚོལ་བ་སྤོང་། །དེར་ཡང་མ་ཟད་ཐམས་ཅད་ལ། །མི་ལྟ་བར་ཡང་གཏོང་བར་བྱེད། །དོན་གཅིག་

73-1-7a

རྟོགས་ནས་ཀུན་ཤེས་ན། །བརྒྱད་ཅེས་བྱ་བས་ཅི་ཞིག་བྱ། །ཡི་གེ་སོ་སོའི་དོན་ཤེས་ན། །འདི་ཡང་ཧ་ཅང་ཉུངས་པ་ཡིན། །བསྟན་བྱ་སྟོན་པ་ཉེན་པ་ཡིན། །ངོ་བོ་དེ་ཉིད་རྣམ་གསུམ་བསྟན། །བརྒྱ་ལས་བསྟན་བྱ་གང་ཡིན་དེ། །རྣམ་གཉིས་ཐམས་ཅད་རྣམ་པ་གཅིག །
ཡི་གེ་འབྲུ་བརྒྱད་འདི་དག་ནི། །བྱང་ཆུབ་སེམས་དཔའ་མཁས་ལྡན་པ། །བརྒྱད་པོ་དག་གི་ཏིང་འཛིན་རྣམས། །སྨོས་པ་ཡིན་པར་ཐུབ་པས་གསུངས། །དེ་ཡི་དོན་ནི་བསྒོམས་པ་ལ། །དེ་ཀུན་མངོན་དུ་ཕྱོགས་པར་གནས། །གཟུངས་ནི་ཐོབ་པར་བྱ་བའི་ཕྱིར། །ཀུན་དུ་བརྩོན་པར་རབ་ཏུ་
བྱེད། །བྱང་ཆུབ་སེམས་དཔའ་རྣམས་དང་ནི། །སངས་རྒྱས་རྣམས་དང་གནོད་སྦྱིན་རྣམས། །རིམ་བཞིན་བཀོད་པའི་དཀྱིལ་འཁོར་འདི། །རྨི་ལམ་དུ་ནི་བསྟན་པ་ཡིན། །པདྨའི་རྒྱལ་པོ་དཀར་པོ་ཞིག །འདབ་མ་བརྒྱད་པ་ཡིད་དུ་འོང་། །དེ་དབུས་ཐུབ་པ་མཚུངས་མེད་པ། །བུམ་པ་དང་ནི་
བཅས་པར་གཞག །འདབ་བརྒྱད་དག་ལ་ཐུབ་པའི་སྲས། །རྣམ་པར་སྣང་བྱེད་སོགས་བརྒྱད་ཀུན། །ཐུབ་པ་དང་ནི་རང་རང་གི། །ཡི་གེ་ས་བོན་ལྡན་པར་དགོད། །འདབ་མ་རྣམས་ཀྱི་བར་དག་ཏུ། །གནོད་སྦྱིན་བརྒྱད་གཞག་ཆོ་ག་གཅིག །ཆོ་ག་གཞན་ཡང་དེ་བཞིན་དུ། །ཚོན་ཕྱེ་སྣ་ལྔས་
གྲུ་བཞིར་བྲི། །མཁས་པས་དེ་དབུས་ཐུབ་པ་ནི། །པདྨ་དཀར་པོ་འདབ་བརྒྱད་ལ། །བུམ་པ་ཆུས་བཀང་ལྡན་པར་གཞག །དེ་བཞིན་ཐུབ་སྲས་དེ་དག་ཀྱང་། །པདྨ་གདན་བཅས་ཆུ་བུམ་བཅས། །ཕྱོགས་བཞི་དག་ཏུ་གཉིས་གཉིས་དགོད། །ཕྱོགས་ཀུན་བྱང་ཆུབ་སེམས་དཔའ་ཡི། །བར་དུ་གནོད་
སྦྱིན་དེ་དག་དགོད། །དཀར་པོའི་སྟན་ལ་འཁོད་རྣམས་སོ། །སློབ་མ་གཙང་མ་ཡོན་ཏན་ཅན། །གཟུངས་བསྒོམས་རྣལ་འབྱོར་གྲུབ་འདོད་ལ། །བུམ་པ་དེ་དག་གིས་དབང་བསྐུར། །དེ་ལྟར་རྨི་ལམ་བསྟན་པ་ཡིན། །ཆོ་ག་བདག་གིས་གསལ་བརྗོད་ལ། །བདག་ཉིད་ལེགས་དྲན་བྱ་ཕྱིར་
གྱིས། །མངོན་པའི་ང་རྒྱལ་ཅུང་ཟད་མེད། །དམ་པའི་དོན་དུ་སྟོང་པ་དང་། །སྟོང་མིན་ལ་སོགས་ཆོས་རྣམས་ཀུན། །ངོ་བོ་ཉིད་མེད་རྣམ་ཤེས་པ། །ཁོང་དུ་ཆུད་ཕྱིར་དང་པོར་བཞེད། །ལོངས་སྤྱོད་རྫོགས་པའི་སྐུ་དང་ནི། །སྤྲུལ་པའི་སྐུ་གཉིས་ལས་སྐུར་བསྟན། །དེ་གཉིས་འཇིག་རྟེན་དོན་

73-1-7b

འབྱོར་པ། །མ་ལུས་ཕྱིར་ནི་མཛད་ཕྱིར་རོ། །ཀུན་རྫོབ་ཏུ་དང་དོན་དམ་པར། །མཚན་དང་མཚན་མེད་ལ་སོགས་པའི། །སྐུ་གཉིས་རྣམ་པར་ཤེས་པ་ནི། །ཁོང་དུ་ཆུད་ཕྱིར་གཞན་དུ་བཞེད། །བྱིས་པ་དང་ནི་མཁས་པའི་ཆོས། །དྲི་མ་ཅན་དང་དྲི་མ་མེད། །མི་སྟོང་མིན་སོགས་སྟོང་མིན་སོགས། །ཇི་
བཞིན་གཉིས་ནི་བསྟན་པ་ཡིན། །དེ་ཡི་འཇུག་པར་རྣམ་པར་ཤེས། །ཁོང་དུ་ཆུད་པ་མངོན་སུམ་བྱེད། །གསུམ་པ་འདི་ནི་མཁས་པ་ཡིས། །དེ་ལྟ་བུར་ནི་ཤེས་པར་བྱ། །སྐྱེ་སོགས་སྐྱེ་བ་མེད་སོགས་ཀྱིས། །འཇུག་པ་སྐྱེ་བ་མེད་པ་དང་། །འགག་མེད་ཤེས་པ་གང་ཡིན་དེ། །ཁོང་དུ་ཆུད་
ཕྱིར་གཞན་དུ་བཞེད། །སྔ་མ་ཇི་ལྟར་སྣང་བར་ཏེ། །ཕྱི་མ་དམ་པའི་དོན་དུ་ཡིན། །དེ་ལྟར་གང་གང་དོན་ཤེས་པ། །ཁོང་དུ་ཆུད་ཕྱིར་ལྔ་པར་བཞེད། །ཡང་ན་ཡང་དག་མི་སྣང་ཕྱིར། །དེ་གཉིས་ངོ་བོ་ཉིད་མེད་ཉིད། །དེ་ལྟར་ཡང་དག་དོན་ཤེས་པ། །ཁོང་དུ་ཆུད་ཕྱིར་ལྔ་པར་བཞེད། །གཟུངས་
ཀྱི་ཆོས་ཀྱི་རྣམ་གྲངས་ཀྱི། །སྟོང་པ་ཉིད་ལ་སོགས་པ་ཡི། །ཆོས་ཀྱི་དབྱིངས་ནི་འདི་ཤེས་པ། །རྟོགས་ཕྱིར་དྲུག་པ་འདིར་བཞེད་དོ། །ཡང་ན་གཟུངས་ཆོས་རྣམ་གྲངས་ཀྱིས། །སྟོང་པ་ཉིད་ལ་སོགས་པ་ཉིད། །ཆོས་དབྱིངས་ཡིན་པར་རྣམ་ཤེས་པ། །ཁོང་དུ་ཆུད་ཕྱིར་དྲུག་པར་བཞེད། །ངོ་བོ་ཉིད་
སོགས་རྣམ་རྟོག་པ། །སྤང་བའི་ཐབས་ནི་གདུལ་རྣམས་ལ། །བསྟན་པར་བྱ་ཕྱིར་མགོན་རྣམས་ཀྱིས། །སྟོང་ཉིད་ལ་སོགས་བསྟན་པ་མཛད། །ཞི་གནས་ལ་སོགས་ཉིད་ཡིན་ཞེས། །ཆོས་རྣམས་ཐམས་ཅད་མདོར་སྡུད་དེ། །དེ་དག་དེ་བཞིན་ཉིད་ཤེས་པ། །ཁོང་དུ་ཆུད་ཕྱིར་བདུན་
པར་བཞེད། །ཀུན་རྫོབ་ཏུ་ནི་ཆོས་རྣམས་ཀུན། །སྐད་ཅིག་པ་གང་དེ་དག་ནི། །གཟོད་ནས་ཞི་ཕྱིར་དོན་དམ་དུ། །ཟད་མེད་ལ་སོགས་བྱེ་བྲག་བསྟན། །མངོན་ཞེན་རྣམ་གསུམ་སྤང་བའི་ཕྱིར། །ཟད་མེད་ལ་སོགས་བྱེ་བྲག་གམ། །ཡང་ན་ཁམས་ཀྱི་བྱེ་བྲག་གིས། །རྣམ་པ་གསུམ་དུ་གསུངས་
པ་ཡིན། །ཆོས་ཀུན་མྱ་ངན་འདས་པ་གང་། །དེ་འདིར་དེ་བཞིན་ཉིད་དུ་བསྟན། །དེ་ལ་འཇུག་པ་རྟོགས་པ་སྟེ། །དེ་རྟོགས་ཕྱིར་ན་བརྒྱད་པར་བཞེད། །དེས་ནི་བསོད་ནམས་སྐྱེད་པ་ན། །གཟུངས་སམ་ཡང་ན་ཡི་གེ་ཡི། །དོན་ལ་གང་གིས་འཇུག་འགྱུར་བ། །དོན་རྟོགས་དེ་ནི་གསུམ་དུ་བསྟན། །

73-1-8a

ཐོས་པར་འདོད་པས་ཉིན་རེ་ཞིང་། །ལྷག་པར་རྗེས་སུ་དྲན་པར་བྱེད། །གཟུངས་ནི་བསོད་ནམས་ཆུང་ངུ་ཡིས། །ཤིན་ཏུ་ཐོས་པར་མི་འགྱུར་རོ། །བྱེ་བྲག་ལ་ནི་དགོངས་པའི་ཕྱིར། །བརྩོན་པ་ཡི་ནི་ཚིག་ཀྱང་གསུངས། །དེ་ཕྱིར་ཁྲུས་སོགས་སྔར་བྱས་ལ། །ཀློག་པ་ལ་སོགས་
དེ་དག་བྱ། །དེ་ནི་སྦྱིན་པ་ལ་སོགས་ལ། །རྟག་ཏུ་ཡང་དག་དགའ་སོགས་དང་། །དེ་ནི་བདག་མེད་ལ་འཇུག་བྱ། །ཡང་ན་དེ་དག་ཉིད་ལ་འཇུག །གཟུངས་ཀྱི་ཆོས་ཀྱི་རྣམ་གྲངས་ལ། །ཞུགས་པ་དག་ལ་སོགས་པ་དེ། །ཡང་དག་དགའ་བ་ལ་སོགས་བྱ། །ཡང་ན་གཟུངས་ལ་
གཞུག་པར་བྱ། །དོན་ནི་སྔར་ཡང་བཤད་མོད་ཀྱི། །ཆོས་ཀྱི་རྗེས་སུ་འབྲང་བའི་ཕྱིར། །རིགས་པ་ཕན་ཡོན་བྱེ་བྲག་གིས། །ཚིགས་སུ་བཅད་པ་གཉིས་ཀྱིས་བསྟན། །གཟུངས་ལ་བརྩོན་པའི་རྣལ་འབྱོར་པ། །ཐོབ་བྱ་མ་ཐོབ་བར་དུ་ཡང་། །ཕན་ཡོན་རྣམ་པ་བཞི་པོ་དག །བཞི་
པོ་གསུམ་གྱིས་ཐོབ་པར་འགྱུར། །སྔོན་འབྱུང་བ་ནི་མདོར་བསྡུ་ན། །རྣམ་པ་དགུར་ནི་བསྟན་པར་མཛད། །དེར་ཡང་སོ་སོར་དབྱེ་བ་ནི། །རྣམ་པ་མང་པོའི་དབྱེ་བ་ཡོད། །ཆགས་བྲལ་སློབ་དང་མི་སློབ་དང་། །བསེ་རུ་ལ་སོགས་རྒྱལ་བའི་སྲས། །དེ་དག་གིས་ཤེས་ལམ་ལས་འདས། །གྲངས་མེད་ལ་སོགས་བསྟན་
པ་ཡིན། །གཞལ་བྱའི་དངོས་པོ་བྱེ་བྲག་དག །གོ་བྱེད་གྲངས་དང་བསྟོད་གཞལ་དང་། །ཀུན་ནས་གཞལ་དང་ཚད་ཅེས་བྱ། །དེ་དག་མེད་ཕྱིར་དེ་སྐད་བསྟན། །སྔ་མ་སྔ་མ་སྒྲུབ་པ་ཡི། །གཏན་ཚིགས་ཕྱི་མ་ཕྱི་མ་ཡིན། །ཡང་ན་ལ་ལ་སྔར་མ་ཐོས། །གང་ཡང་རུང་བས་དོན་དེ་སྟོན། །གདུལ་
བྱའི་དོན་ནི་རབ་སྒྲུབ་ཕྱིར། །ཡེ་ཤེས་སྤངས་པའི་རང་བཞིན་ཉིད། །ཅི་འདྲ་དེ་ནི་རྒྱུ་དང་བཅས། །ཕུན་སུམ་ཚོགས་གཉིས་བསྟོད་པ་གསུངས། །སྟོན་པ་རྣམ་གཉིས་གང་གིས་ཐོབ། །ཅི་འདྲ་དེ་ཡི་ལམ་རྣམ་གཉིས། །གང་དག་ལ་ནི་དེ་གནས་དང་། །དེ་དང་ལྡན་པར་སྟོན་པར་བྱེད། །
འཇིག་རྟེན་ཚེ་ནི་དཔག་མེད་ཚེ། །ཐུབ་པ་ཆེན་པོ་སྐྱེས་པ་དེ། །ཡོངས་སུ་མྱ་ངན་འདས་པ་ཡི། །དུས་བབ་པ་ནི་དེ་འདྲའོ། །དེ་ཡི་རྒྱུ་ནི་སྤངས་པའི་ཕྱིར། །དེས་ནི་རྨུགས་གཉིད་དེ་མ་བསྟེན། །དངོས་པོའི་ངོ་བོ་ཉིད་ཤེས་པས། །དགའ་བ་རྣམ་གསུམ་སྤང་བར་བྱ། །འཇིག་རྟེན་ཁམས་གཞན་སངས་

73-1-8b

རྒྱས་རྣམས། །སྣང་བ་ཐོབ་པ་དེས་མཐོང་སྟེ། །ཆོས་བསྟན་པ་ནི་ཐོས་སོ་ཞེས། །བྱས་པའི་ཆོས་ལ་ཉེས་པ་མེད། །ཡང་ན་བློ་བཟང་འཇིག་རྟེན་ཁམས། །འདི་གཞན་སངས་རྒྱས་བཞུགས་པ་མཐོང་། །བསྟན་པ་འབྱུང་ལ་བརྟེན་ནས་ནི། །ཅིག་ཅར་སྐྱེ་བ་འགག་པ་ཡིན། །རྫོགས་པའི་
སངས་རྒྱས་ཐམས་ཅད་ཀྱིས། །བསྟན་དེ་དགུ་བཅུ་ལས་ཐོབ་པ། །དེས་ན་ཆོས་ཀྱི་དེ་ཁོ་ན། །བསྟན་པ་ཐབས་དང་བཅས་པ་བརྗོད། །འདི་ལས་ཆོས་ནི་ནན་ཏན་དུ། །ལེགས་སུ་ཉམས་སུ་ལེན་པར་བསྟན། །ཡང་ན་འཛིན་པ་ལ་སོགས་པ། །ཡོན་ཏན་བསྐྱེད་པར་འགྱུར་བ་ཡིན། །སངས་
རྒྱས་གཞན་དག་མ་ཡིན་ཞེས། །དེ་ཡི་མཚན་ནི་སྨོས་པ་མཛད། །དེས་ན་ཐུབ་པ་བཞུགས་པ་ནི། །འཇིག་རྟེན་ཕན་ཕྱིར་ཉིད་དུ་བསྟན། །སྡོམ་བརྩོན་ཚུལ་ཁྲིམས་ལྡན་པ་དང་། །གཞན་དོན་གཞོལ་བས་རྩོལ་བ་ལས། །གཟུངས་ནི་ཐོབ་པར་ཐུབ་པ་དེས། །རབ་ཏུ་བྱུང་དང་ལྡན་པས་
བསྟན། །མོད་ལ་ཞེས་བྱ་དེ་མ་ཐག །ཡང་ན་ཅིག་ཅར་འབྱུང་བ་ཡིན། །དགུ་བཅུ་ཞེས་བྱ་ལ་སོགས་ཚིག །དེས་ནི་དུས་གཞན་དགོངས་པ་ཡིན། །ཕུལ་ཕྱིན་ཡོན་ཏན་ལྡན་པ་ཡི། །གཟུངས་ནི་ཐོབ་པར་འགྱུར་བའི་ཕྱིར། །བདེ་བར་གཤེགས་པའི་སྲས་པོ་དེ། །གཟུངས་ཐོབ་རྣམས་
ཀྱི་མཆོག་ཡིན་ནོ། །ཡེ་ཤེས་ཁྱད་འཕགས་འབྲེལ་པ་དང་། །ཡོན་ཏན་ཕུལ་ཕྱིན་ལྡན་པའི་ཕྱིར། །དེ་ནི་གཟུངས་ཚིག་ལྡན་རྣམས་ཀྱི། །མཆོག་ཏུ་རྒྱལ་བ་རྣམས་ཀྱིས་བསྟན། །སྤོབས་པ་རྒྱུན་མི་ཆད་པ་རྣམས། །སོ་སོ་ཡང་དག་རིག་ཐོབ་རྣམས། །དེ་དག་ཕུལ་ཕྱིན་ལྡན་པའི་
ཕྱིར། །དེ་ནང་རྒྱལ་སྲས་དེ་མཆོག་གོ། །དེ་དག་གིས་གསུངས་ཚུལ་ཁྲིམས་ནི། །བསྒྲུབ་པ་མཉེས་བྱེད་རུང་བར་འདོད། །བསྐལ་པ་གསུམ་དུ་ཚོགས་རྣམས་ནི། །ཡོངས་སུ་རྫོགས་བྱས་བྱང་ཆུབ་ཐོབ། །དངོས་པོ་སྟོང་པས་འདོད་མི་བྱ། །ཚད་མ་དང་ཡང་འགལ་བའི་
ཕྱིར། །མི་མཐུན་བློ་ནི་མི་བསྐྱེད་ཅིང་། །ཅིས་ཀྱང་ཐེ་ཚོམ་མི་བྱའོ། །ཐོས་པ་ལ་སོགས་ཤེས་པའམ། །ཡང་ན་ཚད་མ་གསུམ་པོ་ཡིས། །ཡོངས་སུ་བཅད་པར་མི་རུང་ཕྱིར། །སོམ་ཉི་ལ་སོགས་ཚིག་གསུམ་སྨོས། །སྤྱིར་བསྟན་པ་ནི་ཡོད་མོད་ཀྱི། །འོན་ཀྱང་བདག་གིས་འབྲས་

73-1-9a

བུར་བཤད། །འདི་ནི་མཚོན་པ་ཁོ་ན་སྟེ། །མདོ་ཡི་ཚིག་གིས་མངོན་པ་ཡིན། །དེ་ནི་མི་ལྡོག་ས་ཡི་དང་། །རྫོགས་པའི་སངས་རྒྱས་མཉེས་བྱ་ཡི། །རྒྱུར་འགྱུར་བས་ན་དེ་ཡི་ཕྱིར། །དེ་ཡིས་བྱང་ཆུབ་མྱུར་དུ་ཐོབ། །དོན་དང་ཡི་གེ་གཉིས་ཀ་ལས། །འདི་ནི་ཀུན་ཆུབ་བྱེད་པར་
བསྟན། །ཐོས་བསམ་ལ་སོགས་ཐམས་ཅད་དང་། །ཡང་ན་ཡི་གེར་འདྲི་སོགས་ཀུན། །རིགས་པས་འགལ་བ་མ་ཡིན་དང་། །ཡང་ན་ཇི་སྐད་ཐོས་པ་བཞིན། །ཡིད་ལ་བྱེད་པ་གང་ཡིན་པ། །དེ་ནི་ཚུལ་བཞིན་ཡིད་བྱེད་ཡིན། །དོན་དང་ཡི་གེའི་སྒོ་ནས་འདི། །རྒྱ་ཆེར་ཡང་དག་སྟོན་པར་
བྱེད། །ཡང་ན་རྣམ་པ་ཐམས་ཅད་དུ། །གཟུངས་འདི་ཡང་དག་སྟོན་པར་བྱེད། །དེ་ཡི་དེ་ནི་བདག་ཉིད་ཀྱིས། །ཚད་མས་ཤེས་པར་མི་ནུས་ལ། །གཞན་དག་གིས་ནི་བསྟན་ན་ཡང་། །དེ་ནི་བསམ་པར་མི་ནུས་སོ། །ཤེས་བྱ་མ་ལུས་མཁྱེན་པའི་ཕྱིར། །འདྲེན་པ་རྣམས་ཀྱིས་དེ་ཚད་དེ། །མངོན་
སུམ་ཡོངས་སུ་མཁྱེན་པ་དང་། །དགོངས་པར་ཡང་ནི་སྤྱོད་པ་ཡིན། །བློ་རྨོངས་རྣམས་དང་མ་འདུས་དང་། །སྐྱེ་བོ་བློ་ནི་གཡེངས་རྣམས་ཕྱིར། །དོན་དེ་ཚིགས་སུ་བཅད་རྣམས་ཀྱིས། །ཐུབ་པ་ཡིས་ནི་བཟླས་ཏེ་གསུངས། །གཞི་དང་རྫས་བཟང་མང་པོ་དང་། །ཡོངས་སུ་བཀང་བའི་
བྱེ་བྲག་གིས། །སྦྱིན་པར་བྱ་བའི་ཁྱད་ལས་འདི། །སྦྱིན་པ་ཁྱད་པར་འཕགས་པར་བསྟན། །གཟུངས་ཀྱི་ཆོས་ཀྱི་རྣམ་གྲངས་ལ། །མངོན་པར་བརྩོན་པ་གང་ཡིན་པ། །དེ་ནི་གཟུངས་ལ་བརྩོན་ཞེས་བྱ། །དེ་ལྟར་སྐབས་ཀྱིས་མངོན་པ་ཡིན། །ལུས་དང་ངག་དང་བློ་གྲོས་ལ། །སྟོབས་
དང་གཟི་བརྗིད་རབ་རྣོ་བ། །རིམ་བཞིན་གཟི་བརྗིད་ཤེས་པར་བྱ། །ལུས་ཀྱི་སྒྲ་དེས་ལུས་གནས་བསྡུ། །ལུས་ནི་རྣམ་གསུམ་བྱེ་བྲག་གིས། །བསྲུང་སྐྱོབ་སྦེད་གསུངས་ཡང་ན་ནི། །གང་ཕྱིར་གནམ་བསྐོས་ལ་སོགས་པའི། །བྱེ་བྲག་གིས་ནི་གནོད་པ་གསུམ། །ཡང་ན་བདག་
གཞན་རྐྱེན་གྱུར་ལས། །གནོད་པ་རྣམ་གསུམ་ཤེས་པར་བྱ། །སེམས་ཅན་སེམས་ཅན་མིན་བགྲང་བའི། །བྱེ་བྲག་གིས་ནི་གཞན་གཉིས་བསྟན། །མངོན་དུ་ཕྱོགས་པར་བྱ་བ་གཉིས། །འོང་བར་བྱ་བའི་ཕྱིར་གསུངས་ཏེ། །གཅིག་གིས་སྤྲོ་བར་བྱ་བ་བསྟན། །གཉིས་ཀྱིས་དེ་དག་

73-1-9b

གུས་པ་སྟེ། །གནོད་སྦྱིན་རྣམས་ནི་འདོང་བྱའི་ཕྱིར། །འཆག་པ་བསུ་བའི་བསམ་པར་བསྟེན། །དེ་ལྟར་མིན་དུ་ཟིན་ན་ནི། །དེ་ཡིས་ལྷག་པ་ཅི་ཞིག་བསྟན། །དེ་ལྟར་དོན་དུ་གཉེར་ཤེས་ནས། །འོང་བར་སྤྲོ་བའི་སེམས་ལྡན་རྣམས། །སྤྲོ་བའི་མཐུ་ལ་དམིགས་ནས་ནི། །དེ་དག་ངེས་པར་འོང་བར་
འགྱུར། །གནོད་སྦྱིན་དེ་དག་ལྷགས་ནས་ནི། །བརྟན་བཞིན་བརྟུལ་ཞུགས་སྤྱོད་དེ་ལ། །མྱུར་དུ་གཟུངས་ཀྱི་སྒོ་རྣམས་ནི། །ཐེ་ཚོམ་མེད་པར་སྟོན་པར་བྱེད། །ཡན་ལག་ཀུན་གྱི་གཙོ་བོ་བཞིན། །བསྙད་པས་དེ་དག་བློ་དགའ་བས། །ལྷགས་པ་ཡིན་ཏེ་དེ་དག་ལས། །འབྲས་བུར་འགྱུར་བར་ཐེ་ཚོམ་
མེད། །ཡི་གེ་བརྒྱད་པོ་དེ་དག་ནི། །བྱང་ཆུབ་སེམས་དཔའ་བརྒྱད་པོ་ཡིན། །དེ་ཕྱིར་དོན་དེ་བསྒོམས་པ་ལ། །དེ་དག་ཐམས་ཅད་ཕན་འདོགས་སོ། །གཞན་ལ་ཕན་འདོགས་ཞུགས་པའི་ཕྱིར། །སྨོན་ལམ་སྟོབས་ཀྱིས་དེ་དག་རྣམས། །དེ་དང་དེར་ནི་སྐྱེད་བྱེད་པ། །གང་ཡིན་དེ་ལ་ཐེ་ཚོམ་མེད། །
སེམས་དཔའ་ཞེས་ནི་གསུངས་པ་འདི། །སེམས་ནི་སྙིང་རྗེས་བརླན་རྣམས་ཀྱིས། །ཕན་པར་བྱ་བ་འདོད་པའི་བློས། །སྙིང་བརྩེ་ནས་ནི་བལྟས་པ་ཡིན། །རྒྱལ་བའི་སྲས་པོ་དེ་དག་ནི། །ཕན་པ་ཉེ་བར་བསྒྲུབ་པ་དང་། །གནོད་པ་མེད་པར་སྤང་བ་ཡིས། །གཟུངས་ཐོབ་བྱ་ཕྱིར་མངོན་
པར་བརྩོན། །གཟུངས་ལ་བརྩོན་བྱེད་གང་ཞེ་ན། །གང་ཞིག་ཉན་སེམས་རྗེས་ཡི་རང་། །འདྲི་དང་ལུང་ནོད་འདོན་ལ་སོགས། །སྟོན་པའི་ཚུལ་གྱིས་བརྩོན་བྱེད་པའོ། །གཟུངས་བསྐྱེད་ཆོ་ག་རྒྱལ་བ་ཡིས། །བདག་གཞན་ལྟོས་ལས་བཟླས་ཏེ་གསུངས། །སྟོན་པ་ལ་སོགས་བྱེ་བྲག་
གིས། །གཞན་ནི་རྣམ་པ་གསུམ་དུ་འགྱུར། །ཆོས་དང་ཟང་ཟིང་བྱེ་བྲག་ལས། །བགོ་བཤའ་རྣམ་པ་གཉིས་སུ་བསྟན། །ཆུང་དང་ཉུང་དང་མང་པོ་ནི། །རྫས་དང་གྲངས་དང་གཉི་གར་བསྟན། །གཟུངས་དོན་བསྟན་པ་ཡིན་མོད་ཀྱི། །འོན་ཀྱང་སྤྱིར་ཡང་བསྟན་པ་མཛད། །བྱས་གཟོ་
ལ་སོགས་གཞན་དུ་ཡང་། །བྱ་བའི་ཕྱིར་ན་གསུངས་པ་ཡིན། །འདིར་ནི་གཙོ་བོར་ཐུབ་པ་ཡིས། །འབྲས་བུ་གཉིས་སུ་བསྟན་པ་ཡིན། །མཐོ་རིས་ལ་སོགས་འབྲས་བུ་ནི། །གཞན་བསྟན་པ་ལས་རྟོགས་པར་འགྱུར། །བདག་དང་གཞན་དོན་རིམ་བཞིན་དུ། །ཞུས་པ་དང་

73-1-10a

ནི་དགོས་པ་ལྟར། །ཡང་ན་དོན་ནི་ཆེ་བའི་ཕྱིར། །ཚིག་གཉིས་ཀྱིས་ནི་བཟླས་ཏེ་ཞུས། །འདི་ནི་གོ་རིམས་ཁོ་ན་བཞིན། །རྒྱུ་དང་འབྲས་བུའི་དངོས་པོ་ཡིས། །མིང་ནི་རྣམ་པ་བཞིར་མཛད་དེ། །དེ་ཕྱིར་མིང་ཉུང་ལྷག་པ་མེད། །ལུགས་འབྱུང་ལུགས་
འབྱུང་མ་ཡིན་ལས། །སྒྲུབ་དང་བསྒྲུབ་བྱའི་དངོས་པོ་ཡིས། །མིང་ནི་རྣམ་པ་བཞིར་མཛད་ཏེ། །དེ་ཕྱིར་མི་ཉུང་ལྷག་པ་མེད། །ཡང་ན་ཡོན་ཏན་ཐམས་ཅད་དང་། །ཡེ་ཤེས་ཕུན་སུམ་སྤོང་ཕུན་སུམ། །ཁྱད་པར་འཕགས་པ་ཕུན་སུམ་གྱི། །རྟེན་ནི་དེ་ཉིད་ཡིན་ཕྱིར་རོ། །ཐུབ་པའི་
གསུང་ལས་འཇིག་རྟེན་གྱིས། །དོན་ཆེན་སྐྱེས་པ་མཐོང་གྱུར་ནས། །སེམས་ནི་རངས་པར་གྱུར་པའི་ཕྱིར། །མཁས་རྣམས་མངོན་པར་བསྟོད་པར་བྱེད། །ཐུབ་པའི་གསུང་ལས་རྐྱེན་རྐྱེན་དུ། །ཁྱད་པར་ཐོབ་པར་གྱུར་ནས་ནི། །ཡིད་ཀྱང་དགའ་བར་གྱུར་པའི་ཕྱིར། །མཁས་པས་ཁ་ཅིག་
མངོན་པར་བསྟོད། །གསལ་ཞིང་དྲི་མེད་ཡོན་ཏན་ལྡན་པ་ཤིན་ཏུ་གཏིང་དཔག་དཀའ་བས་ཉམས་དགའ་གཟུངས་སྔགས་འདི། །བདག་འདྲ་ཉོན་མོངས་ཤིན་ཏུ་བློ་ཞན་གཞན་དུ་བདག་གིས་ཆེ་ལོང་རྣམ་པར་ཕྱེ་བ་ཡི། །བསོད་ནམས་ཕུང་པོ་ཕལ་ཆེན་རྣམས་ལ་ཕན་པ་རྙེད་པའི་མཐུ་
ཅན་ཐོས་པ་གང་ཡིན་པ། །དེ་དག་ཐམས་ཅད་ཀྱིས་ནི་འགྲོ་བ་འདི་དག་ཀུན་གྱིས་ཡེ་ཤེས་སྙིང་པོ་རྟག་ཏུ་འཆང་བར་ཤོག །འཕགས་པ་སྒོ་མཐའ་ཡས་པ་བསྒྲུབ་པའི་གཟུངས་རྣམ་པར་བཤད་པ་ཚིག་ལེའུར་བྱས་པ། སློབ་དཔོན་ཡེ་ཤེས་སྙིང་པོས་མཛད་པ་རྫོགས་སོ།།      །།
རྒྱ་གར་གྱི་མཁན་པོ་པྲཛྙཱ་བརྨ་དང་། ཞུ་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །།༄༅༅། །རྒྱ་གར་སྐད་དུ། ཨཱརྱ་ཨ་ནནྟ་མུ་ཁ་ནིརྷ་ར་དྷཱ་ར་ཎི་ཊཱི་ཀཱ། བོད་སྐད་དུ། འཕགས་པ་སྒོ་མཐའ་ཡས་པ་སྒྲུབ་པའི་
གཟུངས་ཀྱི་རྒྱ་ཆེར་འགྲེལ་པ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །རྫོགས་སངས་རྒྱས་དང་ཆོས་དང་ནི། །དགེ་འདུན་ལ་ཡང་ཕྱག་འཚལ་ནས། །མཐའ་ཡས་སྒོ་སྒྲུབ་གཟུངས་ཀྱི་དོན། །མདོར་བསྡུས་རྣམ་པར་དབྱེ་བར་བྱ། །རྫོགས་པའི་སངས་རྒྱས་སྲས་དང་

73-1-10b

བཅས་པ་ཤེས་བྱ་ཀུན་གྱི་ཡང་དག་ཐུགས་སུ་ཆུད་གྱུར་པའི། །སྤྱོད་ཡུལ་ཟབ་མོའི་གཟུངས་འདི་ཇི་ག་བདག་འདྲ་ཉོན་མོངས་བློ་ཞན་པ་ཡིས་ག་ལ་ལྕོགས། །དེ་ནི་གནས་མ་ཡིན་པར་ཤིན་ཏུ་མངོན་བཞིན་འོན་ཀྱང་གཟུངས་དོན་རྣམ་པར་དབྱེ་བར་བྱ། །བདག་ནི་དད་པས་གུས་པར་བསྐུལ་ལ་
གཞན་དབང་བློ་ཅན་དག་གིས་མི་བྱ་ཅི་ཡང་མེད། །འཇིག་རྟེན་མ་ལུས་ཡང་དག་འདོད་པའི་དངོས་པོ་སྒྲུབ་པ་ཡི། །མཐུ་དང་ལྡན་པ་མ་ཡིན་དམན་ཞིང་དོན་ཀྱང་མ་བྱས་པས། །བདག་ནི་ཚེ་རབས་ཕྱི་མ་ལ་ཡང་སྐྱེ་བོ་འདི་འདྲ་བར། །འགྱུར་དུ་དོགས་ཕྱིར་འདི་ལུས་རབ་ཏུ་དབྱེ་བར་བྱ། །
གླེང་བསླང་བ་དང་གླེང་གཞི་དང་། །འདུས་པ་དང་ནི་དགོས་པ་ལ། །ཡང་དག་བརྟགས་ནས་དོན་ཆེན་ཕྱིར། །ཞུ་བ་ལ་ནི་ནན་ཏན་བྱས། །དོན་ཕྱེ་བས་ན་ཐུབ་པ་ལ། །རྒྱ་ཆེར་མཁྱེན་པར་གསོལ་བ་དང་། །ཐུབ་ལ་གསོལ་བ་འདེབས་པ་དང་། །དམ་བཅའ་མངོན་དུ་ཕྱོགས་བྱ་དང་། །
བསྲུང་དང་གཟུངས་ཀྱི་ངོ་བོ་དང་། །དེ་ལ་བསྟོད་དང་ཕན་ཡོན་དང་། །འཐོབ་པའི་ཐབས་དང་ཕན་ཡོན་དང་། །དེ་ཡི་སྔོན་བྱུང་བརྗོད་པ་དང་། །ཆོས་ཀྱི་རྣམ་གྲངས་ཆེ་ཉིད་དང་། །མིང་ཞུས་པ་དང་བྱ་བ་གཉིས། །ཡི་རངས་པར་ཡང་བསྟན་པ་སྟེ། །འདི་ལ་འདིར་ནི་མདོར་བསྡུས་པའོ། །མདོ་འདིར་
དོན་རྣམ་པ་བཅུ་དགུས་བསྟན་ཏེ་དེ་ལ་ཡང་དག་པར་སྡུད་པར་བྱེད་པས་བདག་ཉིད་ཚད་མ་ཉིད་དུ་བརྗོད་པས་ཡང་དག་བསྡུ་བར་བྱ་བའི་དོན་ཕྱིན་ཅི་མ་ལོག་པར་བསྟན་པའི་ཕྱིར་ཐོག་མར་གླེང་བསླང་བ་བསྟན་ཏེ། ཕྱིན་ཅི་མ་ལོག་པར་བསྟན་པ་དེ་ཡང་གདུལ་བྱའི་སྐྱེ་བོ་ཐེ་ཚོམ་
མེད་པར་འདི་ལ་གཟུད་པའི་ཕྱིར་རོ། །དེའི་འོག་ཏུ་གླེང་གཞི་ནི་བསྟན་པའི་གཞིར་གྱུར་པའི་ཕྱིར་དེ་བསྟན་ཏོ། །དེ་ནས་བསྟན་པའི་གནས་དེ་ཡིན་པའི་ཕྱིར་དང་། དེའི་དགོས་པ་ཡིན་པའི་ཕྱིར་འཁོར་རྣམས་འདུས་པ་བསྟན་ཏོ། །དེ་ནས་འཁོར་འདུས་པ་མཐོང་ནས་དགོས་པ་ལ་བརྟགས་
པའི་ཞུ་བ་བྱ་བ་བསྟན་ཏོ། །དེ་ནས་དེ་ལྟར་དགོས་པ་ལ་བརྟགས་ཏེ་གཞག་པའི་དོན་བཅོམ་ལྡན་འདས་ལ་མཁྱེན་པར་གསོལ་བ་བསྟན་ཏོ། །དེ་ནས་མཁྱེན་པར་གསོལ་བའི་དོན་ལ་དགོས་པ་ཡོད་པའི་ཕྱིར་དེས་ན་དེ་ཉིད་ཀྱི་ཕྱིར་བསྟན་པར་དམ་བཅའ་བ་བསྟན་ཏོ། །དེ་ནས་དྲིས་པ་དང་

73-1-11a

ལན་གདབ་པའི་ཆེ་བ་ཉིད་བརྗོད་པའི་ཕྱིར་འདྲི་བ་པོ་མངོན་དུ་ཕྱོགས་པར་བྱ་བ་བསྟན་ཏོ། །དེ་ནས་བདུད་ལ་སོགས་པས་གནོད་པ་བྱེད་པ་བསལ་བའི་ཕྱིར་ཀུན་ནས་བསྲུང་བ་བསྟན་ཏོ། །དེ་ནས་བསྲུང་བ་རྙེད་པ་ལ་སེམས་ཅན་རྣམས་འདི་ལ་གུས་པ་བསྐྱེད་པའི་ཕྱིར་དང་། ཡོན་
ཏན་ཕུན་སུམ་ཚོགས་པ་ཐམས་ཅད་ཀྱི་རྟེན་ཡིན་པས་འདྲི་བ་པོའི་དོན་འདོད་པ་བསྒྲུབ་པའི་ཕྱིར་ཆེ་བ་ཉིད་བརྗོད་པའི་དོན་དུ་གཟུངས་ཀྱི་ངོ་བོ་བསྟན་ཏོ། །དེ་ནས་སེམས་ཅན་རྣམས་སྤྲོ་བ་བསྐྱེད་པ་དང་། ལྷག་པར་གུས་པ་བསྐྱེད་པའི་ཕྱིར་ཆེ་བ་ཉིད་བརྗོད་པའི་དོན་དུ་གཟུངས་ཀྱི་ངོ་བོ་
ཉིད་དེ་ལ་བསྟོད་པ་བསྟན་ཏོ། །དེ་ནས་འབྲས་བུ་ཡང་དག་པར་བསྟན་པས་ཀྱང་སེམས་ཅན་རྣམས་དེ་ལ་གཟུངས་པའི་ཕྱིར་གཟུངས་ཀྱི་ངོ་བོའི་ཕན་ཡོན་བརྗོད་དོ། །དེ་ནས་གཟུངས་ཀྱི་འབྲས་བུ་ཐོས་ནས་མཆོག་ཏུ་དགའ་བ་དགའ་སྟོན་ལྟ་བུ་སྐྱེས་པས་ཐོབ་པར་བྱ་བའི་ཐབས་ཚོལ་བས་དེའི་
འོག་ཏུ་དེ་ཐོབ་པར་བྱ་བའི་ཐབས་བསྟན་ཏོ། །དེ་ནས་དེ་ལ་གུས་པར་འཇུག་པར་བྱ་བའི་ཕྱིར་དང་། གཟུངས་ཀྱི་ངོ་བོའི་ཆེ་བ་ཉིད་བརྗོད་པར་བྱ་བའི་ཕྱིར། དེ་ཐོབ་པར་བྱ་བའི་ཐབས་ལ་འཇུག་པའི་ཕན་ཡོན་བསྟན་ཏོ། །དེ་ནས་དེའི་འོག་ཏུ་གཟུངས་ལ་སོགས་པའི་འབྲས་བུ་དེ་ལ་ངེས་
པ་ཤིན་ཏུ་བརྟན་པ་བསྐྱེད་པའི་ཕྱིར་སྔོན་བྱུང་བ་བསྟན་ཏོ། །དེས་འདོད་པའི་དོན་རབ་ཏུ་བསྒྲུབས་ནས་ཀྱང་བརྗོད་པར་བྱ་བ་དང་བརྗོད་པ་ལ་གུས་པ་བསྐྱེད་པའི་ཕྱིར། དེའི་འོག་ཏུ་ཆོས་ཀྱི་རྣམ་གྲངས་ཀྱི་ཆེ་བ་ཉིད་མཇུག་སྡུད་པར་བྱེད་དོ། །དེ་ནས་ཆོས་ཀྱི་རྣམ་གྲངས་ཀྱི་ཆེ་བ་ཉིད་ཐོབ་སྟེ་
དགའ་བ་སྐྱེས་ནས་ཐ་སྙད་དུ་བྱ་བའི་ཕྱིར་མིང་ཞུའོ། །དེ་ནས་ཆོས་ཀྱི་རྣམ་གྲངས་ཀྱི་འབྲས་བུའི་བྱེ་བྲག་ཡང་དག་པར་བསྟན་པའི་ཕྱིར་མིང་འདོགས་སོ། །དེ་ནས་མདོ་ཡོངས་སུ་རྫོགས་པ་ན། བཅོམ་ལྡན་འདས་ཆོས་སྟོན་པ་དོན་མེད་པ་མ་ཡིན་པར་བསྟན་པའི་ཕྱིར། ཐམས་ཅད་
ཀྱང་སྐལ་བ་ཇི་ལྟ་བ་བཞིན་དུ་འབྲས་བུ་ཐོབ་པར་གྱུར་ཏོ་ཞེས་རབ་ཏུ་བསྟན་པའི་དོན་དུ་ཡི་རང་བ་བསྟན་ཏེ། དོན་དེ་དག་གི་སྦྱར་བ་ནི་དེ་ལྟ་བུ་ཡིན་ནོ།    །དེ་ལ། བསྒྲུབ་བྱ་སྒྲུབ་པའི་བྱེ་བྲག་གིས། །གླེང་བསླང་རྣམ་པ་བརྒྱད་དུ་བསྟན། །མདོར་ན་འདི་ལ་བསྒྲུབ་བྱ་གསུམ། །སྒྲུབ་པ་རྣམ་པ་ལྔར་

73-1-11b

འདོད་དོ། །འདི་ལྟར་གླེང་བསླང་བ་ནི་བསྒྲུབ་པར་བྱ་བ་དང་སྒྲུབ་པའི་བྱེ་བྲག་གིས་རྣམ་པ་གཉིས་སུ་འགྱུར་ཏེ། བསྒྲུབ་པར་བྱ་བ་ནི་ཡང་དག་པར་སྡུད་པར་བྱེད་པས་བདག་ཉིད་ཚད་མ་ཉིད་དུ་བྱ་བ་ཡིན་ཏེ། དེའི་ཚིག་གིས་ཆོས་ཀྱི་རྣམ་གྲངས་འདི་ལ་གཞན་དག་གིས་ངེས་པ་བསྐྱེད་
པའི་ཕྱིར་དང་། ངེས་པ་སྐྱེས་ནས་མི་རྣམས་ནན་ཏན་བྱེད་པ་ལ་གནས་པས་འདོད་པ་ཐོབ་པར་འགྱུར་གྱི། དེ་ལྟ་མ་ཡིན་ན་མི་འཐོབ་པར་བསྟན་པའི་ཕྱིར་རོ། །ཚད་མ་ཉིད་དུ་བྱ་བ་དེ་ཡང་ཡུལ་དང་། ལུས་དང་། རང་གི་ངོ་བོ་དང་རྣམ་པ་གསུམ་གྱིས་བསྟན་ཏེ། དེ་ལ་ཡུལ་ནི་མདོའི་
དོན་འོག་ནས་འབྱུང་བ་རྣམས་སོ། །ལུས་ནི་བདག་ཉིད་དེ་ཡང་དག་པར་སྡུད་པར་བྱེད་པའོ། །རང་གི་ངོ་བོ་ནི་རྣ་བའི་རྣམ་པར་ཤེས་པས་ངེས་པར་འཛིན་པ་སྟེ། འདི་སྐད་ཅེས་བྱ་བ་ལ་སོགས་པའི་ཚིག་གསུམ་གྱིས་དེ་དག་གོ་རིམས་བཞིན་དུ་བསྟན་ཏོ། །སྒྲུབ་པ་ནི་རྣམ་པ་ལྔས་བསྟན་ཏེ། དུས་
ཀྱི་བྱེ་བྲག་ནི་དུས་གཅིག་ན་ཞེས་བྱ་བ་སྟེ། དེ་ཡང་གང་གི་ཚེ་གོང་མ་དང་སྦྱར་ན་དེའི་ཚེ་འཁོར་རྣམས་ཀྱི་ངེས་པ་བསྐྱེད་པའི་ཕྱིར་བདག་ཉིད་མང་དུ་ཐོས་པར་བསྟན་ཏེ། འདི་ལྟར་བདག་གིས་དུས་གཅིག་ན་འདི་ཐོས་ཀྱི་དུས་གཞན་ན་ཡང་གཞན་དག་ཐོས་སོ། །དེ་བས་ན་བདག་ནི་མང་དུ་ཐོས་
པ་ཡིན་ཏེ། དེའི་བདག་གི་ཚིག་ནི་ཡིད་ཆེས་པར་བྱ་བ་ཡིན་པར་བསྟན་པའི་ཕྱིར་རོ། །གང་གི་ཚེ་འོག་མ་དང་སྦྱར་ན་དེའི་ཚེ་དུས་གཅིག་ན་བཅོམ་ལྡན་འདས་གྲོང་ཁྱེར་ཡངས་པ་ཅན་ན་བཞུགས་ཀྱི་དུས་གཞན་གྱི་ཚེ་ནི་གུད་ན་ཡང་བཞུགས་ཏེ། དེ་བས་ན་ཡུལ་དེ་དག་ཀྱང་ལེགས་པ་འདོད་
པ་རྣམས་ཀྱིས་བསྟེན་པར་བྱ་བ་ཡིན་པར་བསྟན་ཏོ། །བྱེད་པ་པོའི་བྱེ་བྲག་ནི་བཅོམ་ལྡན་འདས་ཞེས་པ་སྟེ། བདུད་བཞི་བཅོམ་པའམ། དབང་ཕྱུག་ལ་སོགས་པའི་ཡོན་ཏན་དང་ལྡན་པས་བྱེད་པ་པོ་ཁྱད་པར་དུ་འཕགས་ཏེ། འདི་ནི་འདི་ལྟ་བུ་ཞིག་གིས་བསྟན་པ་ལས་ནི་ཕྱིན་ཅི་མ་ལོག་པ་
ཡིན་ནོ། །ས་གཞི་འདི་ནི་འདི་ལྟ་བུ་ཞིག་གནས་པ་ལས་ན་བསོད་ནམས་ཀྱི་ཁྱད་པར་དང་ལྡན་པ་ཡིན་གྱི་ཐེ་ཚོམ་མ་བྱེད་ཅིག་པར་བསྟན་པའི་ཕྱིར་རོ། །བྱ་བའི་བྱེ་བྲག་ནི་བཞུགས་ཏེ་ཞེས་བྱ་བ་སྟེ། ལྷ་དང་ཚངས་པ་དང་། སངས་རྒྱས་ལ་སོགས་པའི་གནས་པ་རྣམས་ཀྱིས་

73-1-12a

གནས་པའོ། །ཡང་ན་རྫུ་འཕྲུལ་ལ་སོགས་པ་རྣམ་པ་སྣ་ཚོགས་ཀྱིས་གདུལ་བྱ་རྣམས་ཀྱི་སེམས་འཕྲོག་པས་གནས་པ་སྟེ། འདི་གཉིས་ཀྱིས་ནི་བཅོམ་ལྡན་འདས་ཚུལ་ཡོངས་སུ་དག་པ་དང་། གཞན་ལ་ཕན་འདོགས་པའི་བྱ་བ་ལ་མཁས་པར་ཡང་བསྟན་ཏོ། །ཡུལ་གྱི་བྱེ་
བྲག་ནི་ཡུལ་ཡངས་པ་ཅན་ན་ཚལ་ཆེན་པོའི་ཁང་པ་བརྩེགས་པའི་ཁང་བཟངས་ན་ཞེས་བྱ་བ་སྟེ། དེ་ཡང་རྣམ་པ་གསུམ་སྟེ། ལོངས་སྤྱོད་པའི་ཕྱིར་ཉེ་བ་དང་རབ་ཏུ་ཉེ་བ་དང་ཤིན་ཏུ་ཉེ་བར་བསྟན་ཏོ། །ཉེ་བ་དང་རབ་ཏུ་ཉེ་བ་དང་། ཤིན་ཏུ་ཉེ་བདག་གིས་ནི་འཇིག་རྟེན་གྱི་གུས་པའི་ཁྱད་པར་ཆུང་ངུ་
དང་། འབྲིང་དང་ཆེན་པོ་བསྐྱེད་པས་བསོད་ནམས་ཀྱི་ཕུང་པོའི་ཁྱད་པར་ཆུང་ངུ་དང་འབྲིང་དང་ཆེན་པོ་བསྐྱེད་པར་བྱ་བའི་ཕྱིར་རོ། །ཐ་གྲུ་ཆེ་བའི་ཕྱིར་ཡངས་པའོ། །ཡང་ན་བྲམ་ཟེ་དང་ཁྱིམ་བདག་རྣམས་འབྱོར་པ་རྒྱ་ཆེན་པོས་དེ་ན་གནས་པའི་ཕྱིར་ཡངས་པའོ། །ཞ་འབྲིང་བའི་བྱེ་བྲག་
ནི་བསོད་ནམས་ཆེ་བར་བསྟན་པའི་ཕྱིར་རོ། །དེ་ཡང་རྣམ་པ་གཉིས་ཏེ། ཞ་འབྲིང་བ་ཉན་ཐོས་ཀྱི་བྱེ་བྲག་དང་། ཞ་འབྲིང་བ་བྱང་ཆུབ་སེམས་དཔའི་བྱེ་བྲག་གོ། །དེ་ལ་ཞ་འབྲིང་བ་ཉན་ཐོས་ཀྱི་བྱེ་བྲག་ནི་རྣམ་པ་ལྔས་བསྟན་ཏེ། ཡོན་ཏན་ནི་ཆེན་པོ་ཞེས་བྱ་བ་སྟེ། བྱམས་པ་ལ་སོགས་པའི་
ཡོན་ཏན་གྱི་ཆེ་བ་ཉིད་དང་ལྡན་པའི་ཕྱིར་རོ། །ཉོན་མོངས་པ་སྤངས་པ་ནི་དགེ་སློང་ཞེས་བྱ་བ་སྟེ། ཉོན་མོངས་པ་བཅོམ་པས་ན་དགེ་སློང་ཡིན་པའི་ཕྱིར་རོ། །དེ་ཁོ་ན་ཤེས་པ་བསྐྱེད་པ་ནི་དགེ་འདུན་ཞེས་བྱ་བ་སྟེ། ཆོས་ཀྱི་དེ་ཁོ་ན་ཉིད་མངོན་སུམ་དུ་བྱེད་པས་བདུད་ལ་སོགས་པ་དག་གིས་
ཕྱེད་པར་དཀའ་བས་དགེ་འདུན་ཡིན་པའི་ཕྱིར་རོ། །ཚུལ་ཁྲིམས་ནི་དགེ་སློང་ཞེས་བྱ་བ་སྟེ། སོ་སོར་ཐར་པའི་སྡོམ་པ་ཐོབ་པས་དགེ་སློང་ཡིན་པའི་ཕྱིར་ཏེ། དེའི་ཕྱིར་དོན་གྱི་བྱེ་བྲག་གིས་དགེ་སློང་ལན་གཉིས་སུ་སྨོས་སོ། །གྲངས་ནི་བརྒྱད་སྟོང་ཞེས་བྱ་བ་སྟེ། གྲངས་བརྒྱད་
སྟོང་དུ་ངེས་པར་ཆད་པའོ། །ཞ་འབྲིང་བ་བྱང་ཆུབ་སེམས་དཔའི་བྱེ་བྲག་ནི་རྣམ་པ་གསུམ་དུ་བསྟན་ཏེ། གྲངས་ནི་རབ་ཏུ་མང་པོ་ཞེས་བྱ་བ་སྟེ། ཞ་འབྲིང་བ་ཉན་ཐོས་པས་ལྷག་པའི་ཕྱིར་རབ་ཏུ་མང་པོ་ཡིན་ནོ། །ཤེས་རབ་དང་ཐབས་དང་ལྡན་པ་ནི། བྱང་ཆུབ་སེམས་དཔའ་ཞེས་བྱ་བ་སྟེ། 

73-1-12b

སྒྲ་འདི་གཉིས་ནི་ཤེས་རབ་དང་ཐབས་ལ་བྱ་བར་དོན་ཡོད་ཞགས་པའི་མདོ་ལས་འབྱུང་བའི་ཕྱིར་རོ། །སྟོང་པ་ཉིད་ལ་གནས་པ་དང་ལྡན་པ་ནི་སེམས་དཔའ་ཆེན་པོ་ཞེས་བྱ་བ་སྟེ། ཆོས་ཐམས་ཅད་ཀྱི་ངོ་བོ་ཉིད་མེད་པ་ཆེན་པོ་ལ་སེམས་དཔའི་ཕྱིར་རོ། །ཡང་ན་སེམས་ཅན་གྱི་ཁམས་མ་ལུས་
པ་ཡོངས་སུ་བསྐྱབ་པའི་བསམ་པ་དང་ལྡན་པ་སྟེ། བསམ་པ་ཆེ་བའི་ཕྱིར་རོ། །ཡང་ན་སྨོན་ལམ་ཆེན་པོ་དང་ལྡན་པ་སྟེ། སྔོན་བྱང་ཆུབ་ཏུ་སྨོན་ལམ་བཏབ་པའི་ཕྱིར་ཏེ། དེ་བས་ན་དེ་དག་གི་བསམ་པ་ཆེ་བའི་ཕྱིར་སེམས་དཔའ་ཆེན་པོ་སྨོས་སོ། །དེ་ལྟར་ན་རྣམ་པ་ལྔས་བདག་ཉིད་ཚད་མ་
ཉིད་དུ་བསྒྲུབས་ཏེ། འདི་ལྟར་འཇིག་རྟེན་ན་ཡང་ལོག་པར་ཞུགས་པ་ལ། དུས་དང་ཡུལ་དང་བྱ་བ་ལ་སོགས་པ་དྲན་པར་བྱེད་པས་བརྡ་སྤྲོད་པ་སྣང་བའི་ཕྱིར་རོ། །ཇི་སྐད་བསྟན་པའི་དགོས་པ་ཡང་ཞར་ལ་འགྲུབ་སྟེ། ཆུར་བ་ལ་སོགས་པའི་དོན་བྱེད་པ་ན་ཞོ་ལ་སོགས་པ་ཡང་འགྲུབ་
པ་བཞིན་ནོ།    །ད་ནི་གླེང་གཞི་བརྗོད་པར་བྱ་སྟེ། གླེང་གཞི་ཐུབ་པས་གསུངས་པ་འདི། །དེ་ཡིས་གདུལ་བའི་དབང་མཛད་ནས། །རྣམ་པ་ལྔ་དང་ལྡན་པ་སྟེ། །ཕོངས་པ་རྣམ་པ་གསུམ་དུ་འདོད། །གླེང་གཞི་དེས་གདུལ་བ་རྣམས་ལ་དགོངས་པར་མཛད་ནས། བཅོམ་ལྡན་འདས་ཀྱིས་གླེང་
གཞི་རྣམ་པ་དང་ལྡན་པ་བཀའ་སྩལ་ཏོ། །གླེང་གཞི་དེ་ནི་གཟུངས་བསྟན་པའི་ཕྱིར་ཏེ། འདི་ལྟར་བཅོམ་ལྡན་འདས་སྐུ་རུས་པ་རྡོ་རྗེ་ལྟར་སྲ་བའི་སྐུ་མངའ་བ་ཡང་མི་རྟག་པར་ཡང་རྟོགས་ཏེ། ལྷག་པར་ཆེས་སྐྱོ་བ་སྐྱེས་ནས་གཟུངས་མཉན་པའི་སྣོད་དུ་འགྱུར་ཞིང་མྱུར་དུ་བསྒྲུབ་པར་ཡང་
འགྱུར་བས་དེའི་ཕྱིར་བཅོམ་ལྡན་འདས་ཀྱིས་བསྟན་ཏོ། །འཇིག་རྟེན་ན་ཡང་འཆི་བའི་ཚེ་སྣོད་དུ་གྱུར་པ་དག་ཁོ་ན་ལ་ཞེས་པ་སྟོན་པར་བྱེད་པས་དེའི་ཕྱིར་དེ་དང་འདྲ་བར་ཆོས་ཀྱི་རྣམ་གྲངས་འདི་ཉིད་ཆོས་ཐམས་ཅད་ཀྱི་ནང་ན་གཅེས་པར་སྟོན་ཅིང་གཙོ་བོ་ཡིན་པར་ཡང་སྟོན་ཏོ། །རྣམ་པ་ལྔ་དང་
ལྡན་པ་ནི་འདི་ལྟ་སྟེ། ཐུགས་རྗེ་ཆེན་པོ་དང་ལྡན་པ་ནི། དེ་ཡང་བཅོམ་ལྡན་འདས་ཀྱིས་ཞེས་བྱ་བས་བསྟན་ཏེ། འདི་ལྟར་དབང་ཕྱུག་ལ་སོགས་པའི་ཡོན་ཏན་དང་ལྡན་བཞིན་དུ། སྐུ་ཚེའི་འདུ་བྱེད་དག་འདོར་བར་མཛད་པ་ནི་ཐུགས་རྗེ་ཆེན་པོ་མེད་པར་མི་རུང་ངོ་། །སྨོན་ལམ་ཆེན་པོ་དང་ལྡན་

73-1-13a

པ་ནི། དེ་ཡང་དྲན་པ་དང་ལྡན་ཞིང་ཞེས་པས་བསྟན་ཏེ། སྔོན་བཅོམ་ལྡན་འདས་ཀྱིས་བདག་གི་སྲོག་ཡོངས་སུ་བཏང་བས་ཀྱང་སེམས་ཅན་གྱི་དོན་བྱའོ་ཞེས་སྨོན་ལམ་བཏབ་པོ། །དེའི་ཕྱིར་དྲན་པ་དང་ལྡན་བཞིན་དུ་སྐུ་ཚེའི་འདུ་བྱེད་དག་བོར་ཏེ། སྔོན་གྱི་སྨོན་ལམ་དྲན་
པས་བོར་རོ་ཞེས་བྱ་བའི་ཐ་ཚིག་གོ། །ཤེས་རབ་དང་ལྡན་པ་ནི། དེ་ཡང་མཁྱེན་བཞིན་དུ་ཞེས་བྱ་བས་བསྟན་ཏེ། འདི་ལྟར་མཁྱེན་བཞིན་དུ་སྐུ་ཚེའི་འདུ་བྱེད་དག་བོར་རོ། །དེ་ནི་འདི་སྐད་དུ་ཅི་ནས་གཞན་གྱི་དོན་འགྲུབ་པར་འགྱུར་བ་དེ་ལྟར་བོར་རོ་ཞེས་བསྟན་པར་འགྱུར་རོ། །ཕོངས་
པའི་དངོས་པོ་གཏོང་བ་དང་ལྡན་པ་ནི། ཚེའི་འདུ་བྱེད་དག་གཏང་བར་གྱུར་ཏོ་ཞེས་བྱ་བས་བསྟན་ཏེ། དེ་ཡང་བཅོམ་ལྡན་འདས་ཀྱིས་བདག་ཅག་གི་ཕྱིར་སྐུ་ཡོངས་སུ་བཏང་བ་ཡང་མཛད་དོ་སྙམ་དུ་འཛིན་པ་རྣམས་བཅོམ་ལྡན་འདས་ལ་གུས་པ་བསྐྱེད་པའི་ཕྱིར་རོ། །ཕོངས་པའི་
དངོས་པོ་ཡང་རྣམ་པ་གསུམ་གྱིས་བསྟན་ཏེ། ནང་གི་ཁྱད་པར་དུ་འཕགས་པ་དང་། མང་བ་དང་། ཡོངས་སུ་གཏོང་བའི་ཡུལ་གྱིས་བསྟན་ཏོ། །ཚེ་རྣམས་བཏང་བར་གྱུར་ཏོ་ཞེས་བྱ་བས་ཀྱང་ཆོག་ན། འདུ་བྱེད་སྨོས་པ་ནི་ཚེའི་རྫས་གུང་ན་མེད་པར་བསྟན་པའི་ཕྱིར་རོ། །དགོས་
པ་དང་ལྡན་པ་ནི། དེ་ཡང་འདི་དག་ཅེས་བྱ་བ་ལ་སོགས་པས་བསྟན་ཏེ། དེ་ཡང་བཅོམ་ལྡན་འདས་ནི་དགོས་པ་མངོན་དུ་གཏོང་བར་བསྟན་པ་ཡིན་ནོ། །དགོས་པ་དེ་ཡང་རྣམ་པ་ལྔས་བསྟན་ཏེ། ཉེ་བ་མངོན་སུམ་གྱི་དངོས་པོ་བསྟན་པ་དང་། གྲངས་བསྟན་པ་དང་། དུས་བསྟན་པ་འདི་
གསུམ་ནི། སངས་རྒྱས་ཀྱིས་གདུལ་བའི་སེམས་ཅན་ཡོངས་སུ་སྨིན་པར་མཛད་པའི་དུས་འདིར་ཟད་དོ་ཞེས་བསྟན་པའི་ཕྱིར་རོ། །འདས་པ་བསྟན་པ་དང་། ཡོངས་སུ་མྱ་ངན་ལས་འདའ་བར་བསྟན་པ་འདི་ནི། སངས་རྒྱས་ཀྱིས་གདུལ་བའི་སེམས་ཅན་ཡོངས་སུ་སྨིན་པར་མཛད་པའི་
དུས་མེད་པར་འགྱུར་བ་བསྟན་པའི་ཕྱིར་རོ། །གལ་ཏེ་ཚེའི་འདུ་བྱེད་རྣམས་བཏང་བར་གྱུར་ན། འདི་དག་ཅེས་བྱ་བ་ལ་སོགས་པའི་ཚིག་ཇི་ལྟ་བུ་ཞེ་ན། སྨྲས་པ། འདི་དག་ལ་སོགས་ཚིག་གིས་ནི། །དེ་དག་བྱིན་གྱིས་བརླབ་པར་བསྟན། །ཟླ་བ་གསུམ་པོ་འདི་དག་འདས་ནས་ཡོངས་

73-1-13b

སུ་མྱ་ངན་འདའོ་ཞེས་བྱ་བའི་ཚིག་འདིས་ཚེའི་འདུ་བྱེད་དེ་དག་བྱིན་གྱིས་བརླབ་པར་བཅོམ་ལྡན་འདས་ཀྱིས་བསྟན་ཏོ། །དེ་ནི་བདུད་གཉིས་བཅོམ་པ་ཡིས། །གདུལ་བ་ལ་ནི་ཐུགས་བརྩེ་ཕྱིར། །འཆི་བ་དག་དང་ཕུང་པོའི་མཚན་ཉིད་ཀྱི་བདུད་གཉིས་བཅོམ་པས་གདུལ་
བ་གང་ཡིན་པ་དེ་ལ་ཐུགས་བརྩེ་བའི་ཕྱིར་བྱིན་གྱིས་བརླབ་པ་དེ་མཛད་དེ། འཆི་བ་ལ་དབང་བར་བསྟན་པའི་ཕྱིར་ནི་བཏང་ངོ་། །ཕུང་པོ་ལ་དབང་མངའ་བར་བསྟན་པའི་ཕྱིར་ནི་བྱིན་གྱིས་བརླབས་ཏེ་དེ་ལྟར་ངེས་པར་གཟུང་བར་བྱའོ། །ཡང་ན་འཆི་
བདག་དང་ཕུང་པོ་གཉིས་ལས་བཟློག་སྟེ་ཤེས་པར་བྱའོ། །ཡང་ན་ལྷག་པ་རྣམས་ནི་བཏང་ལ། ཟླ་བ་གསུམ་གྱི་དུས་ཚུན་ཆད་ནི་གཞག་པར་ཁོང་དུ་ཆུད་པར་བྱའོ། །འདི་ལ་ཡང་བཅོམ་ལྡན་འདས་ལ་བདུད་གཉིས་བཅོམ་པ་མངའ་སྟེ་སྦྱར་བར་བྱའོ། །གདུལ་བའི་བསམ་པའི་བྱེ་བྲག་
གིས་མྱ་ངན་ལས་འདའ་བར་འཇུག་པའི་ཕྱིར། སྤྲུལ་པའི་སྐུས་ནི་མྱ་ངན་ལས། །འདའ་བར་འདོད་ཀྱི་ཅིག་ཤོས་མིན། །ལོངས་སྤྱོད་རྫོགས་པའི་སྐུས་མྱ་ངན་ལས་འདའ་བར་ནི་མི་འདོད་དོ། །ཅིའི་ཕྱིར་ཞེ་ན། གཏན་དུ་གནས་པའི་རྒྱུ་ལྡན་པ། །སངས་རྒྱས་རྣམས་ནི། མྱ་ངན་འདའ་
བར་ཡང་མི་རིགས། གཏན་དུ་གནས་པའི་རྒྱུ་ནི་བསོད་ནམས་དང་ཡེ་ཤེས་ཀྱི་ཚོགས་ཡིན་ལ། དེ་ཡང་གུས་པར་བསྐལ་པ་གྲངས་མེད་པ་དུ་མར་རྒྱུན་དུ་བསྒྲུབས་པའི་ཕྱིར་ཕུལ་དུ་བྱུང་བ་སྟེ། དེ་བས་ན་འབྲས་བུ་ནི་རྒྱུ་དང་འདྲ་བའི་ཕྱིར། དེའི་འབྲས་བུ་ཡང་ཕུལ་དུ་བྱུང་བ་ཡིན་པས་
ལོངས་སྤྱོད་རྫོགས་པའི་སྐུས་མྱ་ངན་ལས་འདའ་བར་ག་ལ་འགྱུར། དེ་ལྟ་མ་ཡིན་དུ་ཟིན་ན་ཆེན་པོའི་འབྲས་བུ་ཆུང་ངུར་གྱུར་ལ། ཆུང་ངུའི་འབྲས་བུ་ཆེན་པོར་འགྱུར་བས་སྲོག་གཅོད་པ་སྤངས་པ་ལ་སོགས་པ་དང་། ཚེ་རིང་བར་འགྱུར་བ་ལ་སོགས་པ་དག་རྒྱུ་དང་འབྲས་བུའི་དངོས་པོ་ཉིད་དུ་
མི་འགྱུར་བའི་རིགས་སོ། །གལ་ཏེ་ཚེ་དཔག་ཏུ་མེད་པ་ཞིག་ལས་བཅོམ་ལྡན་འདས་ཀྱིས་སྐུ་ཚེ་བཏང་བའི་ཕྱིར་མྱ་ངན་ལས་འདས་སོ་ཞེ་ན་མ་ཡིན་ཏེ། རྫུ་འཕྲུལ་གྱི་རྐང་པ་བཞི་པོ་འདི་དག་ཅེས་བྱ་བ་ལ་སོགས་པ་གསུངས་པའི་ཕྱིར་རོ། །ཡང་ཞེས་བྱ་བ་ནི་དམ་བཅས་པ་མ་རྫོགས་

73-1-14a

པ་རྣམས་མྱ་ངན་ལས་འདའ་བར་མི་རིགས་པ་ཁོ་ནར་ངེས་པར་གཟུང་བར་བྱ་སྟེ། དགེ་བ་གཞན་ཡང་དམ་བཅས་པ་ལས་འགལ་བར་མི་བྱེད་ན། དགེ་བ་མ་ལུས་པའི་བླ་མར་གྱུར་པ། སངས་རྒྱས་བཅོམ་ལྡན་འདས་རྣམས་ལྟ་མཛད་པར་ག་ལ་འགྱུར་བ་དེ་དག་གིས་ནི་
བདག་ཅག་གིས་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ཏུ་དགོད་པར་བྱའོ་ཞེས་བྱ་བ་ལ་སོགས་པར་ཐུགས་དམ་བཅས་ཏེ། དེ་བས་ན་ཇི་སྲིད་དུ་གཟུང་བར་བྱ་བའི་སེམས་ཅན་གཅིག་ཙམ་ཡོད་པ་དེ་སྲིད་དུ་དེ་དག་མྱ་ངན་ལས་འདའ་བ་ནི་མི་རིགས་པ་དང་། སངས་རྒྱས་
ཀྱིས་གདུལ་བའི་སེམས་ཅན་མེད་དུ་ཟིན་ཀྱང་བརྒྱ་བྱིན་ལ་སོགས་པའི་གཟུགས་ཀྱིས་གདུལ་བ་ཡོད་པའི་ཕྱིར་རོ། །དེ་བས་ན་སྤྲུལ་པའི་སྐུ་ཁོ་ནས་མྱ་ངན་ལས་འདའ་བར་འདོད་དེ། དེ་ལྟར་ཡང་ངེས་པར་གཟུང་བར་བྱའོ། །སངས་རྒྱས་མྱ་ངན་ཡོང་མི་འདའ། །ཆོས་ཀྱང་ནུབ་པར་མི་
འགྱུར་ཏེ། །སེམས་ཅན་ཡོངས་སུ་སྨིན་མཛད་ཕྱིར། །ཡོངས་སུ་མྱ་ངན་འདའ་བ་སྟོན། །ཞེས་བྱ་བ་ལ་སོགས་པ་གསུངས་པའི་ཕྱིར་རོ།    །ད་ནི་འཁོར་རྣམས་བསྡུ་བ་བསྟན་ཏེ། རྫོགས་སངས་རྒྱས་ཀྱི་མཐུས་བསྟངས་པས། །མ་བསྒྲིམས་བསྒྲིམས་དང་བསྒྲིམས་པ་ཡིས། །འཕྱས་
སུ་འགྱུར་བ་བསལ་བའི་ཕྱིར། །བསྡུ་བ་རྣམ་པ་གསུམ་དུ་གཞག །བཅོམ་ལྡན་འདས་ཀྱིས་བསྡུ་བ་རྣམ་པ་གསུམ་བྱེད་དུ་བཅུག་པ་ལ། མ་བསྒྲིམས་པར་བསྡུས་པ་ནི་མཽད་གལ་གྱི་བུ་ཆེན་པོས་བྱས་པ་སྟེ། དེ་བས་ན་སྟོང་སྨོས་པ་ཡིན་ཏེ། འཇིག་རྟེན་གྱི་ཁམས་སྟོང་དུ་ནི་ཉན་ཐོས་ཀྱིས་
ཀྱང་མངོན་པར་འདུ་བྱ་མི་དགོས་པར་བྱེད་ནུས་སོ། །བསྒྲིམས་ཏེ་བསྡུས་པ་ནི་ཤཱ་རིའི་བུས་བྱས་པ་སྟེ། དེ་བས་ན་དེར་རྫུ་འཕྲུལ་མངོན་པར་བྱ་བར་སྨོས་སོ། །བསྒྲིམས་ཏེ་བསྡུས་པ་ཅིག་ཤོས་ནི། བྱང་ཆུབ་སེམས་དཔའ་ཆེན་པོ་རྣམས་ཀྱིས་བྱས་པ་སྟེ། དེ་བས་ན་དེ་བལྟས་ཞེས་སྨོས་ཏེ། 
ཏིང་ངེ་འཛིན་གྱི་བྱེ་བྲག་གིས་བསྐྱེད་པའི་རྟགས་ཀྱིས་བྱེ་བྲག་འགའ་ལ་བལྟས་ཞེས་བྱའོ། །འདི་དག་ཐམས་ཅད་ཀྱང་བཅོམ་ལྡན་འདས་ཀྱིས་མཛད་པ་ཡིན་ཏེ། དང་པོ་དང་ཐ་མ་ནི་བཀས་མཛད་དོ། །བར་མ་ནི་མཐུས་མཛད་དེ། བཅོམ་ལྡན་འདས་ཀྱིས་གང་གིས་མ་མཛད་པའི་རྣམ་པ་

73-1-14b

དེ་མེད་པར་བསྟན་པའི་ཕྱིར་རོ། །བསྡུ་བ་གསུམ་པོ་འདི་ལྟ་བུ་བཅོམ་ལྡན་འདས་ཀྱིས་མཛད་པ་འདི་ཡང་། ལ་ལ་འདི་སྙམ་དུ་བཅོམ་ལྡན་འདས་ནི་གདུལ་བའི་ཕྲིན་ལས་ཡོངས་སུ་མ་རྫོགས་པར་མྱ་ངན་ལས་འདས་སོ་སྙམ་དུ་འཕྱ་བར་འགྱུར་བ་བསལ་བའི་ཕྱིར་རོ། །དེ་བས་ན་ཉན་ཐོས་ཆེན་པོ་
ལ་སོགས་པ་སྨོས་སོ། །དེ་ལྟ་མ་ཡིན་དུ་ཟིན་ན་སུ་ཡང་རུང་བ་ལ་བཅོམ་ལྡན་འདས་ཀྱིས་བྱིན་གྱིས་བརླབས་ན་ཡང་ཐམས་ཅད་སྡུད་ནུས་པས་ཉན་ཐོས་ཆེན་པོ་ལ་སོགས་པ་སྨོས་ཅི་དགོས་ཏེ། སྨོས་པས་ན་གང་དུ་བཅོམ་ལྡན་འདས་ཀྱིས་འདི་ལྟ་བུ་དག་བྱིན་གྱིས་བརླབས་ཏེ། འཁོར་
སྡུད་པ་དེར་སངས་རྒྱས་ཀྱིས་གདུལ་བའི་སེམས་ཅན་གང་འདུ་བར་མི་འགྱུར་བ་དང་། ཡོངས་སུ་སྨིན་པར་མི་འགྱུར་བ་སུ་ཡང་མེད་དོ་ཞེས་སྟོན་ཏོ། །དེ་བས་ན་གདུལ་བའི་དོན་ཡོངས་སུ་རྫོགས་ནས་གདོད་བཅོམ་ལྡན་འདས་ཡོངས་སུ་མྱ་ངན་ལས་འདས་སོ། །བཙུན་པར་མི་འགྱུར་བསལ་བའི་ཕྱིར། །
ཐུབ་པས་མངོན་དུ་མ་མཛད་དེ། །གུས་པ་བསྐྱེད་པར་བྱ་བའི་ཕྱིར། །གཞན་དག་སྡུད་པར་བྱེད་དུ་བཅུག །བཅོམ་ལྡན་འདས་ཉིད་ཀྱི་མཛད་སྤྱོད་མོད་ཀྱི། མི་བཙུན་པར་འགྱུར་བ་བསལ་བའི་ཕྱིར་གདུལ་བ་ཐམས་ཅད་བདག་ཉིད་ཀྱིས་བསྡུ་བ་མ་མཛད་དོ། །དེ་བས་ན་གུས་པ་
བསྐྱེད་པའི་ཕྱིར་བཅོམ་ལྡན་འདས་ཀྱིས་མཽད་གལ་གྱི་བུ་ཆེན་པོ་ལ་སོགས་པ་ལ་སྡུད་དུ་བཅུག་གོ། །དེས་འདུལ་དབང་མཛད་བཅོམ་ལྡན་གྱིས། །དེ་གཉིས་མྱ་ངན་འདས་པར་བསྟན། །འདིར་ནི་དེ་གཉིས་སྨོས་པའི་ཕྱིར། །ཡང་དག་མྱ་ངན་འདས་མ་ཡིན། །འཕགས་པ་ཤཱ་རིའི་
བུ་དང་། མཽད་གལ་གྱི་བུ་གཉིས་དེའི་སྔ་རོལ་དུ་མྱ་ངན་ལས་འདས་པས་གདུལ་བའི་སེམས་ཅན་རྣམས་ཀྱི་དབང་དུ་མཛད་ནས་བཅོམ་ལྡན་འདས་ཀྱིས་དེ་གཉིས་མྱ་ངན་ལས་འདས་པར་བསྟན་པ་ཡིན་གྱི་དེ་གཉིས་ལ་འདིར་བསྐུལ་བ་མཛད་པས་ཡང་དག་པའི་དོན་དུ་དེ་གཉིས་མྱ་ངན་ལས་
འདས་པ་ནི་མ་ཡིན་ནོ། །བསྡུ་བ་གསུམ་ལ་སྐོ་བ་དང་། །བསྐོ་བར་བྱ་བའི་བྱ་བ་དང་། །དེ་ཡི་འབྲས་བུ་གོ་རིམས་དག །བསྟན་པ་ཟད་པར་འདོད་པ་ཡིན། །བསྡུ་བ་རྣམ་པ་གསུམ་ལ་ཡང་མདོར་བསྡུ་བསྐོ་བ་པོའི་བྱ་བ་དང་། བསྐོ་བར་བྱ་བའི་བྱ་བ་དང་། དེའི་འབྲས་བུ་དང་། འབྲས་བུའི་གོ་

73-1-15a

རིམས་བསྟན་པར་ཁོང་དུ་ཆུད་པར་བྱའོ། །དེ་ལ་བསྡུ་བ་དང་པོ་ལ་སྐོ་བ་པོའི་བྱ་བ་ནི་མངོན་དུ་ཕྱོགས་པར་བྱ་བ་དང་། བྱ་བ་ལ་བསྐོ་བའོ། །བྱ་བ་ལ་བསྐོ་བ་དེ་ལ་ཡང་གཙོ་བོ་མ་ཡིན་པའི་བྱ་བ་དང་། གཙོ་བོའི་བྱ་བ་དང་རྣམ་པ་གཉིས་སོ། །དེ་ཡང་སོང་ལ་ཞེས་བྱ་བ་ལ་
སོགས་པས་གོ་རིམས་བཞིན་བསྟན་ཏོ། །བསྐོ་བར་བྱ་བའི་བྱ་བ་ནི་བཀའ་མཉན་པ་དང་། དེ་བཞིན་དུ་སྒྲུབ་པ་སྟེ། དེ་བཞིན་དུ་བསྒྲུབ་པ་ནི། བཅོམ་ལྡན་འདས་ཀྱིས་བཀའ་སྩལ་མ་ཐག་ཏུ་རི་རབ་ཀྱི་རྩེ་མོ་ལ་འདུག་སྟེ། སྐད་ཅིག་གིས་གོ་བར་བྱས་པའོ། །སྐད་ཅིག་དེ་ཉིད་ལ་ཞེས་བྱ་བ་ནི་བཅོམ་
ལྡན་འདས་ལ་གུས་པར་བྱེད་པ་བསྟན་པའི་ཕྱིར་དང་། གདུལ་བའི་དུས་ལས་ཡོལ་བ་བསལ་བའི་ཕྱིར་དང་། གདུལ་བའི་བྱ་བ་དག་ལ་གུས་པར་བྱེད་པ་བསྟན་པའི་ཕྱིར་རོ། །མངོན་པར་འདུ་བྱེད་པ་མེད་པའི་རྫུ་འཕྲུལ་དང་ལྡན་པར་བསྟན་པར་ཡང་མངོན་ནོ། །འདི་ནི་འདུག་པ་དང་གོ་
བར་བྱེད་པ་གཉིས་ཀ་ལ་ཡང་སྦྱར་བར་བྱའོ། །རང་གི་རྫུ་འཕྲུལ་གྱི་སྟོབས་སྨོས་པ་ཡང་གཉིས་ཀ་དང་སྦྱར་བར་བྱའོ། །རི་རབ་ཀྱི་རྩེ་མོ་སྨོས་པ་དང་། སྟོང་གི་འཇིག་རྟེན་གྱི་ཁམས་སུ་གོ་བར་བྱེད་པ་འདི་གཉིས་ནི་ཆེ་བ་ཉིད་བསྟན་པའི་ཕྱིར་ཏེ། འདིས་ནི་གང་ན་འདི་ལྟ་བུའི་
སྡུད་པ་པོ་ཡོད་པ་དེར་ནི་སངས་རྒྱས་ཀྱིས་གདུལ་བ་སུ་ཡང་མི་འདུལ་བ་མེད་པར་བསྟན་ཏོ། །གོ་བར་བྱེད་པ་ཡང་དོན་རྣམ་པ་བརྒྱད་དང་ལྡན་ཏེ་གུས་པར་ཉམས་སུ་ལེན་དུ་གཞུག་པའི་ཕྱིར་མངོན་དུ་ཕྱོགས་པར་བྱ་བའི་དོན་དང་། རྗེས་སུ་ཆགས་པ་ལ་སོགས་པ་མེད་པར་ཤེས་པར་བྱ་བའི་
ཕྱིར་མཐའ་དག་གི་དོན་དང་། བཀའ་དང་མཐུན་པའི་དོན་བསྒྲུབ་པའི་ཕྱིར་གཞིའི་དོན་དང་། དེ་ཁོ་ན་རྟོགས་པ་དག་སློབ་མར་གྱུར་ཏེ། དེ་ལྟ་བུ་དག་ལ་ཡང་ཕན་འདོགས་པས་ཆོས་ཀྱི་རྣམ་གྲངས་ཀྱི་ཆེ་བ་ཉིད་བསྟན་བའི་ཕྱིར་ཆོས་ཀྱི་དེ་ཁོ་ན་རྟོགས་པའི་དོན་དང་། བསྐུལ་བ་ལ་སོགས་པའི་
མ་ལོངས་པ་མེད་པ་བསྟན་པའི་ཕྱིར་འཇུག་པར་བྱ་བའི་དོན་དང་། དེ་དག་ཉིད་ལ་ཆོས་བསྟན་པས་ཕན་འདོགས་པའི་ཕྱིར་ཆོས་འདོད་པའི་དོན་དང་། རང་གི་དོན་རབ་ཏུ་བསྟན་པས་དེ་དག་གི་སྤྲོ་བ་བསྐྱེད་པའི་ཕྱིར་འབྲས་བུ་ཉེ་བར་བསྟན་པའི་དོན་དང་། བསྒྲིམས་པ་མེད་པར་འདུལ་བར་

73-1-15b

བསྟན་པའི་ཕྱིར་རང་དབང་ཡོད་པར་བསྟན་པའི་དོན་ཏོ། །དེ་གཉིས་ཀྱི་འབྲས་བུ་ཡང་རྣམ་པ་གསུམ་གྱིས་བསྟན་ཏེ། གྲངས་དང་། ཉོན་མོངས་པ་སྤངས་པ་དང་ལྡན་པ་དང་འདུས་པའོ། །དེའི་གོ་རིམས་ཀྱང་རྣམ་པ་བཞིས་བསྟན་ཏེ། མཐོང་བ་དང་ཕྱག་འཚལ་བ་དང་། བསྐོར་བ་བྱེད་པ་
དང་། འཁོད་པའོ། །དེ་དག་ཀྱང་དངོས་པོས་གོ་རིམས་སུ་གྱུར་པར་རིག་པར་བྱ་སྟེ། ལྷགས་པའི་འོག་ཏུ་ཐོག་མ་ཁོ་ནར་མཐོང་ངོ་། །དེ་ནས་མཐོང་བས་ལུས་ཚིམ་པར་གྱུར་ནས་ཕྱག་འཚལ་ལོ། །དེ་ནས་དད་པའི་ཤུགས་མངོན་པར་འཕེལ་ནས་བསྐོར་བ་བྱེད་དོ། །དེ་ནས་གོ་རིམས་བཞིན་
བྱས་ནས་གོང་གི་ཕྱིར་ལྷགས་པ་དེའི་ཕྱིར་འཁོད་དོ། །བསྡུ་བ་གཉིས་པ་ལ་སྐོ་བ་པོའི་བྱ་བ་ནི་སངས་རྒྱས་ཀྱི་མཐུ་སྟེ། མཐུ་ནི་དབང་ཡིན་ནོ། །བསྐོ་བར་བྱ་བའི་བྱ་བ་ནི་ཐབས་དཔྱོད་པ་དང་། དེའི་འབྲས་བུ་དཔྱོད་པ་དང་། ཐབས་སྒྲུབ་པ་དང་། དེའི་འབྲས་བུ་བསྒྲུབ་པ་སྟེ། རྟོག་པ་
མངོན་དུ་གཏོང་བ་ནི་ཐབས་དང་དེའི་འབྲས་བུ་དཔྱད་ནས་དེ་བསྒྲུབས་པས་འབྲས་བུ་འགྲུབ་པར་བྱེད་དོ། །དེ་བས་ན་དེ་དག་གོ་རིམས་ནི་དེ་ལྟ་བུ་ཡིན་ནོ། །འབྲས་བུ་དཔྱོད་པ་ཡང་རྣམ་པ་ལྔ་སྟེ། མཐའ་དག་པ་དག་དང་གཞི་དང་། གདུལ་བ་དང་། དེའི་རབ་ཏུ་དབྱེ་བ་དང་། རང་གི་ངོ་བོ་
སྟེ། ཉན་ཐོས་ཀྱི་ཐེག་པ་ཅན་ལ་སོགས་པ་སྨོས་པའི་ཕྱིར་རོ། །བྱང་ཆུབ་མཆོག་གི་རིགས་ཡིན་ལ། །བློ་ཞན་བཤེས་གཉེན་དམན་བསྟེན་པས། །གང་དག་དམན་པའི་ལམ་བསྟེན་པ། །དེ་དག་འདིར་བཀུག་ཤེས་པར་བྱ་སྟེ་དེ་ལྟ་མ་ཡིན་ན་ཆོས་བསྟན་པ་འདི་དག་ལ་ཕན་མེད་པས་དེ་
དག་བཀུག་པས་ཅི་ཞིག་བྱ་སྟེ། མདོ་རྫོགས་ཀྱི་བར་དུ་ཡང་གཞན་ནས་ཇི་སྐད་འབྱུང་བ་བཞིན་དུ། ཉན་ཐོས་ཀྱི་ཐེག་པ་ཅན་རྣམས་ཀྱིས་འབྲས་བུ་ནི་ཅི་ཡང་མ་བསྟན་ལ། བཅོམ་ལྡན་འདས་ཀྱིས་ཆོས་བསྟན་པ་ནི་འབྲས་བུ་མེད་པ་མ་ཡིན་ནོ། །དེ་ལྟ་བས་ན་དེ་དག་ལ་ཡང་དེའི་ཚེ་ཕྱིར་
མི་ལྡོག་པའི་ས་ལ་འགོད་པ་ལ་སོགས་པའི་འབྲས་བུ་ཡོད་པར་ངེས་པར་གཟུང་བར་བྱའོ། །དེ་བས་ན་དེ་དག་ནི་སངས་རྒྱས་ཀྱི་རིགས་ཅན་ཁོ་ན་ཡིན་པ་ལས། ཅི་ཞིག་ལྟར་གྱུར་ཏེ། ཐེག་པ་གཞན་ལ་ཞུགས་པར་ཤེས་པར་བྱའོ། །འབྲས་བུ་དེའི་གོ་རིམས་ཀྱང་རྣམ་པ་བཞི་སྟེ། སྔ་མ་བཞིན་

73-1-16a

དུ་ངེས་པར་གཟུང་ངོ་། །བསྡུ་བ་གསུམ་པ་ལ་སྐོ་བ་པོའི་བྱ་བ་ནི། མངོན་དུ་ཕྱོགས་པར་བྱ་བ་དང་། བྱ་བ་ལ་བསྐོ་བའོ། །དེ་དག་རྣམ་པ་བཞི་དག་གིས། །མངོན་དུ་ཕྱོགས་པར་མཛད་པ་ན། །བསྡུ་བའི་མཐའ་དག་ཉིད་དང་ནི། །ཆེན་པོ་ཉིད་ཀྱང་རྒྱལ་བས་བསྟན། །མངོན་
དུ་ཕྱོགས་པར་བྱ་བ་ཡང་རྣམ་པ་བཞི་སྟེ། ཏིང་ངེ་འཛིན་ཐོབ་པ་ནི། མཐོང་བ་དོན་ཡོད་ཅེས་བྱ་བའི་ཏིང་ངེ་འཛིན་ཏེ། དེ་ཐོབ་པའི་ཕྱིར་བྱང་ཆུབ་སེམས་དཔའ་ཡང་མཐོང་བ་དོན་ཡོད་ཅེས་གསུངས་པ་དང་། ཏིང་ངེ་འཛིན་དེའི་འབྲས་བུ་ཐོབ་པ་ནི། ཏིང་ངེ་འཛིན་འགའ་ཞིག་འབྲས་བུ་མཐོང་
བ་དོན་ཡོད་པ་ཉིད་དེ། དེ་ཐོབ་པའི་ཕྱིར་མཐོང་བ་དོན་ཡོད་ཅེས་གསུངས་པ་དང་། སྨོན་ལམ་གྱི་འབྲས་བུ་ཐོབ་པ་ནི། སྔོན་གྱི་སྨོན་ལམ་གྱི་འབྲས་བུ་ཐོབ་པར་བྱ་བའི་ཕྱིར། མཐོང་བ་དོན་ཡོད་ཅེས་གསུངས་པ་དང་། ཡོན་ཏན་བསྒྲུབས་པའི་འབྲས་བུ་ཐོབ་པ་དེས་གང་གིས་མཐོང་
བ་དོན་ཡོད་པར་གྱུར་པ་དེ་ལྟ་བུའི་ཡོན་ཏན་བསྒྲུབས་པས་ན་དེའི་ཕྱིར་མཐོང་བ་དོན་ཡོད་གསུངས་པའོ། །དེའི་མཐོང་བ་དོན་ཡོད་པ་ཉིད་ནི། དེ་མཐོང་བ་འབྲས་བུ་མེད་པར་མི་འགྱུར་བའི་ཕྱིར་རོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་ལ་ཡང་སྦྱར་བར་བྱའོ། །རྣམ་པ་འདི་
དག་གིས་བསྡུ་བའི་མཐའ་དག་ཉིད་དང་། ཆེན་པོ་ཉིད་བསྟན་ཏེ། སྡུད་པ་པོ་རྣམས་ཆེ་བའི་ཕྱིར་རོ། །བྱ་བ་ལ་བསྐོ་བ་ནི་རྣམ་པ་གཉིས་ཏེ། གཙོ་བོ་མ་ཡིན་པའི་བྱ་བ་དང་། གཙོ་བོའི་བྱ་བའོ། །གཙོ་བོ་མ་ཡིན་པའི་བྱ་བ་ཡང་རང་གི་ངོ་བོ་དང་། ཡུལ་གྱིས་རྣམ་པ་གཉིས་སུ་འགྱུར་ཏེ། 
ཡུལ་ནི་ཐམས་ཅད་ཀྱི་ཞེས་བྱ་བ་ལ་སོགས་པ་སྟེ། དེ་ཕན་ཆད་ནས་སངས་རྒྱས་ཀྱིས་གདུལ་བ་མེད་པའི་ཕྱིར་རོ། །གཙོ་བོའི་བྱ་བ་ནི་མཐའ་དག་དང་། གདུལ་བའི་རང་གི་ངོ་བོ་དང་། དེའི་དབྱེ་བ་དང་། གཞི་དང་། རང་གི་ངོ་བོས་བསྟན་ཏེ། དེའི་གདུལ་བའི་རང་གི་ངོ་བོ་བསྟན་པ་ནི། 
ཉན་ཐོས་ལ་སོགས་པ་གཞན་སངས་རྒྱས་ཀྱིས་གདུལ་བ་མེད་པའི་ཕྱིར་རོ། །དེའི་དབྱེ་བ་བསྟན་པ་ནི། དེ་སྙེད་ཅིག་གི་དབྱེ་བས་ཐ་དད་པའི་བྱང་ཆུབ་སེམས་དཔའ་རྣམས་བཀུག་པའོ། །ཉན་ཐོས་སོགས་པ་གང་ཡིན་པ་དེ་དག་དགུག་པ་ལ་ཤིན་ཏུ་དཀའ་བ་ཅི་ཞིག་ཡོད་ན་མ་བཀུག་པར་ཞེ་ན། དེའི་

73-1-16b

ཕྱིར་དེ་དག་ལ་དེས་གདུལ་བ་མེད་པར་བསྟན་པའི་ཕྱིར་རོ། །སྲིད་པ་ཐ་མ་པ་ནི་ཚེ་འདི་ཉིད་ལ་མངོན་པར་རྫོགས་པར་འཚང་རྒྱ་བའོ། །སྐྱེ་བ་གཅིག་གིས་ཐོགས་པ་ནི་ཚེ་ཕྱི་མ་ལ་མངོན་པར་རྫོགས་པར་འཚང་རྒྱ་བའོ། །ཕྱིར་མི་ལྡོག་པ་ནི་ས་བརྒྱད་པ་ཐོབ་པ་རྣམས་སོ། །མི་སྐྱེ་བའི་ཆོས་ལ་བཟོད་
པ་ཐོབ་པ་ནི་རབ་ཏུ་དགའ་བ་ལ་སོགས་པའི་ས་ཐོབ་པ་རྣམས་སོ། །དད་པས་མོས་པ་ནི་མོས་པས་སྤྱོད་པའི་ས་ཐོབ་པ་རྣམས་སོ། །སྲིད་པ་ཐ་མ་པ་སྨོས་པ་ནི་ཆོས་ཀྱི་རྣམ་གྲངས་ཀྱི་ཆེ་བ་ཉིད་བསྟན་པའི་ཕྱིར་ཏེ། བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པ་རྣམས་ལ་ཡང་ཕན་
འདོགས་པ་ཡིན་པའི་ཕྱིར་རོ། །བསྡུ་བ་ཞེས་བྱ་བ་འདི་ནི་གཞན་ཡིན་ལ། དེ་ཡང་བསྡུ་བར་བྱ་བའི་བྱ་བ་བརྗོད་པར་འདོད་ན་རུང་སྟེ། དེ་ལྟ་ན་བསྒྲིམས་ཏེ་བསྡུ་བ་འདི་ཇི་ལྟར་རུང་ཞེ་ན། ཉེས་པ་མེད་དེ་འདི་ལྟར་གང་ཞིག་བསྒྲིམས་ཏེ་བསྡུ་བ་དང་། །གང་ཡང་བསྒྲིམས་ནི་མི་དགོས་པ། །
བརྗོད་པར་འདོད་པ་འདི་ལ་འདི། །འཇིག་རྟེན་སྤྱོད་པའི་ཚུལ་གྱིས་འཇུག །བྱ་བ་མ་སྦྱར་དུ་ཟིན་ཀྱང་ནུས་པ་ལ་སོགས་པ་མཐོང་བའི་དབང་གིས་སྒྲ་འདི་འཇིག་རྟེན་ན་སྦྱོར་ཏེ། ཚོང་པའི་གྲོང་ནན་གྱིས་སྡུས་ཤིག་ཅེས་བྱ་བ་ལ་སོགས་པ་དང་འདྲ་བས་ན་ཉེས་པ་མེད་དོ། །བསྐོ་བར་བྱ་བའི་བྱ་
བ་ནི། བཀའ་མཉན་པ་དང་། དེ་བཞིན་དུ་བསྒྲུབ་པའོ། །དེའི་འབྲས་བུ་དང་། དེའི་གོ་རིམས་ཀྱི་དོན་ནི་ཕལ་ཆེར་གོང་དུ་ཐལ་བས་རྣམ་པར་མི་ཕྱེའོ། །ལེགས་སོ་ཞེས་བྱ་བའི་སྒྲ་ནི་འདིར་དེ་ལྟར་འཚལ་ལོ་ཞེས་བྱ་བའོ། །བརྗོད་དུ་མེད་པ་ནི་གྲངས་ཀྱི་བྱེ་བྲག་ཡིན་ཏེ། དེས་ཀྱང་བརྗོད་
དུ་མེད་པའོ། །ཡང་ན་བརྗོད་དུ་མེད་པའི་ཡང་། བརྗོད་དུ་མེད་པ་ཉིད་གྲངས་ཀྱི་བྱེ་བྲག་ཡིན་ཏེ། བརྒྱ་ཞེས་བྱ་བ་ལ་སོགས་པ་བཞིན་ནོ། །དེ་ཡང་བྱེ་བ་ཁྲག་ཁྲིག་ཕྲག་འབུམ་གྱི་བྱེ་བྲག་ཡིན་ནོ།    །ད་ནི་དགོས་པ་བརྟགས་ནས་ཕན་པ་ཆེ་བ་དང་། གདུལ་བའི་བྱེ་
བྲག་དང་། གུས་པའི་བྱེ་བྲག་དང་། སྟོན་པ་པོའི་བྱེ་བྲག་དང་། དགོས་པའི་བྱེ་བྲག་དང་། རྣམ་པ་ལྔས་ཞུ་བ་བསྟན་ཏོ། །སྟོན་པ་པོ་ནི་བྱེ་བྲག་རྣམ་པ་གསུམ་གྱིས་ཁྱད་པར་དུ་འཕགས་ཏེ། གང་ཕྱིར་དེ་བཞིན་གཤེགས་པ་ནི། །སྐྱོན་དང་ཉོན་མོངས་ཕུང་པོ་བསྩལ། །དོན་ཀུན་

73-1-17a

ཡང་དག་མཁྱེན་པ་སྟེ། །དེ་ཕྱིར་རྒྱལ་ལ་ཞུ་བར་འོས། །གང་གི་ཕྱིར་ཕྱིན་ཅི་མ་ལོག་པར་གསུངས་པས་ན་དེ་བཞིན་གཤེགས་པ་སྟེ། དེའི་ཕྱིར་ཞུ་བར་འོས་ཏེ། དེ་ཡང་ཉོན་མོངས་པ་དང་ཤེས་བྱའི་སྒྲིབ་པ་སྤངས་པའི་ཕྱིར་རོ། །དེའི་དེ་ཡང་དོན་ཐམས་ཅད་ཡང་དག་པར་
མཁྱེན་པའི་ཕྱིར་རོ། །ཡང་ན་གང་གི་ཕྱིར་ཡང་དག་པར་རྫོགས་པའི་སངས་རྒྱས་ཡིན་པ་དེའི་ཕྱིར་ཞུ་བར་འོས་ཏེ། དེའི་དེ་ཡང་ཉོན་མོངས་པ་དང་ཤེས་བྱའི་སྒྲིབ་པ་སྤངས་པའི་ཕྱིར་རོ། །དེའི་དེ་ཡང་དེ་བཞིན་གཤེགས་པ་ཡིན་པའི་ཕྱིར་ཏེ། བདེ་བར་གཤེགས་པ་རྣམས་ཀྱིས་བགྲོད་པ་དང་། རྗེས་སུ་བགྲོད་
པའི་ལམ་དུ་གཤེགས་པའི་ཕྱིར་རོ་ཞེས་བྱ་བའི་ཐ་ཚིག་གོ། །དད་པས་མོས་པ་ལ་སོགས་པས། །གོང་ནས་གོང་དུ་འཐོབ་པའི་ཕྱིར། །གདུལ་བྱའི་བསམ་པའི་བྱེ་བྲག་གིས། །དོན་ནི་རྣམ་ལྔར་བསྟན་པ་ཡིན། །དགོས་པའི་བྱེ་བྲག་ནི་རྣམ་པ་ལྔ་སྟེ། དད་པས་མོས་པ་རྣམས་ཀྱིས་མི་སྐྱེ་བའི་ཆོས་ལ་བཟོད་པ་
འཐོབ་པ་དང་། མི་སྐྱེ་བའི་ཆོས་ལ་བཟོད་པ་ཐོབ་པ་རྣམས་ཀྱིས་ཕྱིར་མི་ལྡོག་པའི་ས་འཐོབ་པ་དང་། དེ་རྣམས་ཀྱིས་སྐྱེ་བ་གཅིག་གིས་ཐོགས་པ་ཉིད་འཐོབ་པ་དང་། དེ་རྣམས་ཀྱིས་ཀྱང་སྲིད་པ་ཐ་མ་པ་ཉིད་འཐོབ་པ་དང་། སྲིད་པ་ཐ་མ་པ་རྣམས་ཀྱིས་ཀྱང་གཟུངས་ཀྱི་སྒོར་འཇུག་པ་འཐོབ་
པའོ། །སྡུག་བསྔལ་ལ་སོགས་ཡུལ་རྣམས་ལ། །ནེར་ནུར་བྱེད་པ་སོམ་ཉིར་བསྟན། །དེ་སྤངས་ས་ཐོབ་འདི་ཡིན་པར། །འདིར་ནི་དོན་གྱིས་བསྟན་པ་ཡིན། །དོན་གྱིས་ན་སྡུག་བསྔལ་ལ་སོགས་པའི་བདེན་པ་ལ་དམིགས་པའི་ཐེ་ཚོམ་སྤངས་ན། དད་པས་མོས་པ་རྣམས་ཀྱིས་ས་ཐོབ་པར་
བསྟན་ཏོ། །སོམ་ཉི་སྤངས་པས་སྡུག་བསྔལ་ལ་སོགས་པའི་བདེན་པ་མཐོང་བས་སྤང་བར་བྱ་བའི་ཉོན་མོངས་པའི་ཚོགས་ཀྱང་སྤངས་པར་ཁོང་དུ་ཆུད་པར་བྱ་སྟེ། དེ་དག་ནི་ཅིག་ཅར་སྤོང་བར་འགྱུར་བའི་ཕྱིར་རོ། །ཐམས་ཅད་ཅེས་སྨོས་པ་ནི་བདེན་པ་བཞི་ལ་དམིགས་པའི་སོམ་ཉི་བསྡུ་བའི་
ཕྱིར་རམ། ཆུང་ངུ་ལ་སོགས་པའི་བྱེ་བྲག་གིས་ཐ་དད་པ་བསྡུ་བའི་ཕྱིར་རོ། །ཕྱིར་མི་ལྡོག་པའི་ས་ནི་འདིར། །རྣམ་པ་གཉིས་ཀྱིས་འཐོབ་པར་བསྟན། །ས་དང་པོ་ཐོབ་པས་མི་སྐྱེ་བའི་ཆོས་ལ་བཟོད་པ་ཐོབ་པ་རྣམས་ཀྱིས་ནི་རང་གི་སྟོབས་དང་གཞན་གྱི་སྟོབས་རྣམ་པ་གཉིས་ཀྱིས་ཕྱིར་མི་ལྡོག་

73-1-17b

པའི་ས་ཐོབ་པར་བསྟན་ཏོ། །སྒྲིབ་པ་མེད་པ་ནི་ཉོན་མོངས་པ་དང་ཤེས་བྱའི་སྒྲིབ་པ་སྤངས་པའི་ཕྱིར་ཏེ། ཡེ་ཤེས་དང་སྤོབས་པ་གང་ལ་ཡོད་པ་དེའི་ངོ་བོ་ནི་ཞེས་བྱ་བར་ཚིག་རྣམ་པར་སྦྱར་རོ། །ཡང་ན་སྒྲིབ་པ་མེད་པ་ནི་ཐམས་ཅད་མཁྱེན་པའི་ཡེ་ཤེས་ཏེ། འདིས་སྣང་བར་བྱེད་པས་དེའི་ངོ་བོ་ཉིད་དེ་
ཡིན་པས་ཡང་ངེས་པར་གཟུང་བར་བྱའོ། །འདིས་མི་གཡོས་པའི་ས་བསྟན་ཏེ། དེ་ནི་རང་གི་སྟོབས་ཡིན་ནོ། །གཞན་གྱི་སྟོབས་ནི་རྣམ་པ་གསུམ་གྱིས་བསྟན་ཏེ། དགེ་བའི་བཤེས་གཉེན་དུ་མ་ལ་བརྟེན་པས། ཐོས་པ་ལས་བྱུང་བའི་ཤེས་པ་འཐོབ་པ་དང་། བསམས་པ་ལས་བྱུང་པའི་ཤེས་པ་
འཐོབ་པ་དང་། བསྒོམས་པ་ལས་བྱུང་བའི་ཤེས་པ་འཐོབ་པ་སྟེ། དེས་དྲན་པ་བརྗེད་པར་མི་འགྱུར་རོ། །ཡང་ན་ཆོས་བསྟན་པ་ཉན་པ་དང་། དེའི་དོན་འཛིན་པ་དང་། དུས་གཞན་ན་མི་བརྗེད་པ་དང་། དེ་ལྟར་ན་དགེ་བའི་བཤེས་གཉེན་མཆོག་ལ་བརྟེན་ནས། བླ་ན་མེད་པའི་བྱང་ཆུབ་ཏུ་ངེས་
པར་གྱུར་པས་ཕྱིར་མི་ལྡོག་པར་བསྟན་པའི་ཕྱིར། བར་དུ་ཞེས་པ་ལ་སོགས་པ་ཞུས་སོ། །སྐྱེ་བ་གཅིག་གིས་ཐོགས་རྣམས་ཀྱིས། །ས་ནི་རྟེན་བཞིས་ཐོབ་པར་འགྱུར། །ཕྱིར་མི་ལྡོག་པ་རྣམས་ཀྱིས་ནི་རྣམ་པ་བཞིས་སྐྱེ་བ་གཅིག་གིས་ཐོགས་པའི་ས་འཐོབ་པར་འགྱུར་ཏེ། སྤྱོད་པ་སྦྱིན་སོགས་
ཕ་རོལ་ཕྱིན། །ཚོགས་ཀྱིས་རྣམ་པ་གཉིས་སུ་འགྱུར། །གསུམ་ནི་བསོད་ནམས་ཕ་རོལ་ཕྱིན། །ལྷག་མ་ཡེ་ཤེས་ཅིག་ཤོས་གཉིས། །སྦྱིན་པ་དང་། ཚུལ་ཁྲིམས་དང་། བཟོད་པའི་ཕ་རོལ་ཏུ་ཕྱིན་པ་གསུམ་ནི་བསོད་ནམས་ཀྱི་ཚོགས་སོ། །བསམ་གཏན་དང་། ཤེས་རབ་དང་། 
ཐབས་དང་། སྨོན་ལམ་དང་། སྟོབས་དང་། ཡེ་ཤེས་ཞེས་བྱ་བ་ནི་ཡེ་ཤེས་ཚོགས་སོ། །བརྩོན་འགྲུས་ནི་གཉི་ག་སྟེ། གཉི་གར་བྱ་བ་བྱེད་པའི་ཕྱིར་རོ། །སྤྱོད་པ་དེས་ཐོབ་པར་བྱ་བ་ནི་ཡོངས་སུ་དག་པ་རྣམ་པ་བཞི་སྟེ། དེས་སྐྱེ་བ་གཅིག་གིས་ཐོགས་པར་འགྱུར་རོ། །དེས་གདུལ་
ཕྱིར་ནི་གནས་པ་དང་། །བསྟན་པ་དོན་ཡོད་མཚུངས་པ་མེད། །སྨོན་ལམ་འབྲས་བུ་འགྲུབ་པ་དང་། །དགའ་མགུར་ཞིང་ནི་སྟོན་པར་བྱེད། །སྨོན་ལམ་གྱིས་བསྒྲུབས་པའི་བསོད་ནམས་དང་ཡེ་ཤེས་ཀྱི་ཚོགས་ཀྱི་སྟོབས་ཀྱིས་བྱང་ཆུབ་སེམས་དཔས་གདུལ་བ་ཉིད་དུ་སེམས་ཅན་རྣམས་

73-1-18a

གནས་པ་ནི་སེམས་ཅན་ཡོངས་སུ་དག་པའོ། །མདོ་སྡེ་ལ་སོགས་པ་ཆོས་བསྟན་པ་དོན་ཡོད་ཅིང་མཚུངས་པ་མེད་པའི་འབྲས་བུ་དང་ལྡན་པས་ན་ཆོས་ཡོངས་སུ་དག་པའོ། །སྨོན་ལམ་མ་ལུས་པར་འབྲས་བུར་འགྲུབ་པས་ན་སྨོན་ལམ་ཡོངས་སུ་དག་པའོ། །གདུལ་བའི་
བསམ་པའི་བྱེ་བྲག་གིས་ཅི་འགའ་འགྱུར་ཞིང་ཀུན་དུ་སྟོན་པས་ན་ཞིང་ཡོངས་སུ་དག་པའོ། །ཡང་ན། སེམས་ཅན་ལ་སོགས་རྣམ་དག་ནི། །སེམས་ཅན་ཆོས་དོན་གཉེར་དང་ཞིང་། །རང་བཞིན་བདག་མེད་མཐོང་བ་ཡིན། །དེ་ནི་འདོད་པའི་དོན་གྲུབ་བྱེད། །འདིས་ཡོངས་སུ་དག་པར་
འགྱུར་བས་ན་ཡོངས་སུ་དག་པ་སྟེ་ཡོངས་སུ་དག་པ་བཞི་ནི། སེམས་ཅན་ལ་སོགས་པ་བདག་མེད་པར་མཐོང་བ་ཉིད་དོ། །བདག་མེད་པར་མཐོང་བ་ལས་བྱང་ཆུབ་སེམས་དཔས་གདུལ་བ་ཉིད་དུ་སེམས་ཅན་རྣམས་གནས་པ་ཞེས་བྱ་བ་ལ་སོགས་པ་ལྔར་བསྟན་པའི་འདོད་པ་ཐམས་ཅད་
འགྲུབ་པར་འགྱུར་རོ། །དོན་དུ་གཉེར་བ་ཞེས་བྱ་བ་ནི་སྨོན་ལམ་མོ། །ད་ནི་སྐྱེ་བ་གཅིག་གིས་ཐོགས་རྣམས་ཀྱིས། །སྲིད་པ་ཐ་མ་པའི་ས་ནི་རྟེན་བཞིས་འཐོབ་པར་འགྱུར་བར་བཤད་ཅེས་བྱ་བ་ཚིག་གི་ལྷག་མའོ། །གདུལ་བ་རྣམས་ཀྱི་བྱེ་བྲག་གིས། །ལུས་སོགས་ཡིད་དུ་འོང་བར་གནས། །ཐམས་
ཅད་མཁྱེན་པའི་ཡོན་ཏན་གྱིས། །ཚོགས་ཀྱི་གཞི་ཡང་སྐྱེ་བ་ཡིན། །ལུས་དང་ངག་དང་ཡིད་དེ་དག་ནི་གདུལ་བའི་བསམ་པའི་བྱེ་བྲག་གིས་དུས་གཅིག་ཏུ་གནས་ན་ཡང་དེ་དག་ཡིད་དུ་འོང་སྟེ། དེ་དག་རྗེས་སུ་མཐུན་པའི་ཕྱིར་རོ། །ཐམས་ཅད་མཁྱེན་པའི་ཡོན་ཏན་རྣམས་ཀྱི་རྟེན་དུ་གྱུར་པའི་
ཕྱིར་སྐྱེ་བ་ཡིད་འོང་ངོ་། །ཡང་གི་སྒྲ་ནི། བཀག་པའི་ལས་ལུས་ལ་སོགས་པས་མི་སྤྱོད་པའི་ཕྱིར་དང་། མ་བཀག་པ་ཀུན་དུ་སྤྱོད་པའི་ཕྱིར་དང་། སྐྱེ་བ་འཇིག་རྟེན་ཐམས་ཅད་ཀྱི་དོན་དུ་གཉེར་བར་བྱ་བ་ཡིན་པའི་ཕྱིར། ལུས་ལ་སོགས་པ་ཡིད་དུ་འོང་། །ཞེས་བྱ་བའོ་ཞེས་བསྡུ་བའི་དོན་ཏོ། །
ད་ནི་སྲིད་པ་ཐ་མ་པ་རྣམས་ཀྱིས་གཟུངས་ཀྱི་སྒོར་འཇུག་པ་ཇི་ལྟར་འཐོབ་པར་འགྱུར་བ་བསྟན་ཏེ། གཟུངས་ནི་རྣམ་གསུམ་གང་གི་ཕྱིར། །ཚིག་དང་དོན་དང་གཉི་གའི་གཟུངས། །ལེགས་པ་ལས་ནི་ཉམས་པ་ན། །འཛིན་པར་བྱེད་པས་དེ་ཕྱིར་གཟུངས། །ལེགས་པ་ནི་བདག་དང་གཞན་གྱི་

73-1-18b

དོན་ཕུན་སུམ་ཚོགས་པའོ། །དེ་ཡང་ཕན་པ་དང་ཕན་པ་མ་ཡིན་པ་འཐོབ་པ་དང་། སྤང་བའི་མཚན་ཉིད་དེ། སྲོག་ཆགས་དེ་ལས་ཉམས་པ་ན་འཛིན་པར་བྱེད་པས་གཟུངས་སོ། །བདག་དང་གཞན་གྱི་དོན་འགྲུབ་ཕྱིར། །གཟུངས་ཉིད་སྒོ་མོ་སྒོ་ཡིན་ནོ། །དེ་ལ་འཇུག་པ་དེ་ཤེས་པ། །དེ་ཡང་
རྣམ་བཞིར་བསྟན་པ་ཡིན། །འདི་ལྟར་གྲངས་མེད་པས་སམ། དུས་མཐའ་ཡས་པ་ནས་ཞུགས་པས་མཐུ་ཟད་མི་ཤེས་པ་མི་ཟད་པའི་སྒོ་ཐབས་རྣམས་ཀྱིས་སེམས་ཅན་ཡོངས་སུ་སྨིན་པར་བྱེད་པའམ། བདག་དང་གཞན་གྱི་དོན་ཕུན་སུམ་ཚོགས་པ་སྒྲུབ་པ་སྟེ། དེ་གཟུངས་ཀྱི་སྒོར་འཇུག་
པ་གང་ལ་ཡོད་པ་ཞེས་ཚིག་རྣམ་པར་སྦྱར་ནས། གཟུངས་ཀྱི་སྒོར་འཇུག་པ་ཞེས་པའི་སྒྲས་ཁྱད་པར་དུ་ཚིག་བསྡུའོ། །དད་པ་ལ་སོགས་པའི་དབང་པོ་རྣམས་ལ་མཁས་པ་གཟུངས་ཀྱི་སྒོར་འཇུག་པ་གང་ལ་ཡོད་པ་ཞེས་ཚིག་རྣམ་པར་སྦྱོར་ནས་སྔ་མ་བཞིན་དུ་ཁྱད་པར་དུ་ཚིག་བསྡུའོ། །
དབང་པོ་ལ་མཁས་པ་ནི་ཆུང་ངུ་ལ་སོགས་པའི་བྱེ་བྲག་དང་། ཡོངས་སུ་སྨིན་པའི་དུས་ལ་སོགས་པའི་བྱེ་བྲག་ལ་སྤྱོད་པའོ། །འདི་ལ་འདུ་བྱེད་པ་མེད་པས་ན་ལས་དང་རྣམ་པར་སྨིན་པ་ལ་མཁས་པ་འདུས་མ་བྱས་པའོ། །འདུས་མ་བྱས་པ་ནི་མ་བསྒྲིམས་པར་འཇུག་པ་སྟེ། །དེ་གཟུངས་ཀྱི་
སྒོར་འཇུག་པ་གང་ལ་ཡོད་པ་ཞེས་ཚིག་རྣམ་པར་སྦྱར་ནས་སྔ་མ་བཞིན་དུ་ཁྱད་པར་དུ་བསྡུའོ། །ཡང་ན་ལས་དང་རྣམ་པར་སྨིན་པ་ལ་མཁས་པ་དང་། འདུས་མ་བྱས་གཉིས་ལ་གཟུངས་ཀྱི་སྒོར་འཇུག་པ་ཞེས་བྱ་བར་རིག་པར་བྱའོ། །དེ་ལ་འདུས་མ་བྱས་པ་ནི་སྟོང་པ་ཉིད་ཡིན་པར་གཟུང་བར་བྱའོ། །
ལས་རྣམ་པར་སྨིན་པའི་རང་གི་ངོ་བོ་དང་། དུས་དང་གནས་སྐབས་དང་། ཡུལ་ལ་སོགས་པའི་བྱེ་བྲག་ལས་དཔྱོད་པ་ནི་ལས་དང་རྣམ་པར་སྨིན་པ་ལ་མཁས་པའོ། །ཆོས་ཟབ་མོ་ལ་བཟོད་པའི་གཟུངས་ཀྱི་སྒོར་འཇུག་པ་གང་ལ་ཡོད་པ་དེ་ཞེས་ཚིག་རྣམ་པར་སྦྱར་ནས། སྔ་མ་བཞིན་དུ་ཁྱད་
པར་དུ་ཚིག་བསྡུའོ། །སེམས་ཅན་རྣམས་ཞེས་བྱ་བ་ནི་འོག་མ་གཉིས་དང་ཡང་འབྲེལ་པར་རིག་པར་བྱའོ། །ཡང་ན། ཞུ་བ་འདི་ནི་མདོར་བསྡུ་ན། །བྱང་ཆུབ་སེམས་དཔའ་ཀུན་ལ་ཡང་། །གང་ལ་ཇི་སྙེད་འོས་ཡིན་པ། །དེ་ལ་དེ་སྙེད་འགྱུར་བ་ཡིན། །འདི་ལྟར་དད་པས་མོས་པའི་དབང་

73-1-19a

དུ་བྱས་ན་ནི། འདི་དག་ཐམས་ཅད་ཡོད་པ་རབ་ལྟ་བར་བྱའོ། །མི་སྐྱེ་བའི་ཆོས་ལ་བཟོད་པ་ཐོབ་པའི་དབང་དུ་བྱས་ན་ནི་སོམ་ཉི་ཐམས་ཅད་སྤོང་བ་མ་གཏོགས་པར། ཞུ་བ་ལྷག་མ་རྣམས་ཡོད་པར་ངེས་པར་གཟུང་བར་བྱའོ། །དེ་བཞིན་དུ་བྱང་ཆུབ་སེམས་དཔའ་གཞན་དག་
ལ་ཡང་ཅི་རིགས་པར་བྱའོ།    །ད་ནི་བཅོམ་ལྡན་འདས་ལ་ཞུ་བ་མཁྱེན་པར་གསོལ་བ་སྟོན་ཏེ། ཞུ་བའི་འབྲས་བུ་བློ་ལྡན་གྱིས། །ཞུ་བ་ཉིད་དུ་རབ་ཏུ་གསུངས། །ཡང་ན་འབྲས་དང་ཐ་དད་པས། །སྒྲོ་བཏགས་ཞུ་བ་ཉིད་དུ་གསུངས། །ཞུ་བ་ཞེས་བྱ་བའི་སྒྲ་ནི་འཕགས་པ་ཤཱ་རིའི་བུས་ཞུ་བའི་
དངོས་པོའི་འབྲས་བུ་གང་ཡིན་པ་སོམ་ཉི་ཐམས་ཅད་སྤོང་བ་ལ་སོགས་པ་དེ་ཡིན་པར་གསུངས་ཏེ། འབྲས་བུ་ལ་རྒྱུ་བཏགས་པ་སྟེ། མཇུག་གི་འབྲས་བུའི་ཚིག་མི་མངོན་པར་བྱས་པའི་ཕྱིར་རོ། །དེ་ལྟ་མ་ཡིན་དུ་ཟིན་ན་ཞུ་བའི་རང་གི་ངོ་བོ་ངེས་པར་མ་བྱས་པའི་ཕྱིར། དེ་དག་ཅེས་བྱ་
བའི་སྒྲ་དང་སྦྱོར་བར་བྱེད་པ་མི་རིགས་ཏེ། དེ་ལྟར་ན་ཞུ་བ་དེ་དག་ལ་ཞུ་བའི་འབྲས་བུ་དེ་དག་ཅེས་བྱ་བར་ཁོང་དུ་ཆུད་པར་བྱའོ། །ཇི་སྐད་སྨོས་པ་ཞེས་བྱ་བ་ནི་རང་གི་ངོ་བོ་ཡིན་ནོ། །གཟུང་བ་ཞེས་བྱ་བ་ལ་སོགས་པའི་ཚིག་གསུམ་ནི། ཚིག་འབྲུ་དང་། དོན་དང་། གཉི་གའོ། །ཡང་
ན་ཉན་ཐོས་དང་། རང་སངས་རྒྱས་དང་། ཐེག་པ་ཆེན་པོའི་ཐེག་པ་ཅན་རྣམས་ལ་ཕན་གདགས་པའི་ཕྱིར་རོ། །བདག་དང་གཞན་དང་གཉི་གའི་དོན་འགྲུབ་པའི་ཕྱིར་ཡང་བརྗོད་པར་ཤེས་པར་བྱའོ། །ཡང་ན་རང་གི་ངོ་བོ་དང་། རབ་ཏུ་དབྱེ་བ་གཉིས་ཀྱིས་ནི་གཟུང་ངོ་། །སོ་སོ་རང་གིས་
རིག་པར་སྤྱད་པས་ནི་ཡིད་ལ་བྱས་སོ། །ཚད་མ་ཐམས་ཅད་ཀྱིས་རྣམ་པར་དག་པས་ནི་ཀུན་ཆུབ་པར་བྱས་སོ། །རྣམ་པ་གཞན་ཡང་ཇི་སྐད་སྨོས་པའི་འབྲས་བུའི་བྱེ་བྲག་གིས་ཞུ་བའི་རང་གི་ངོ་བོ་དམིགས་ཀྱིས་མ་ཕྱེ་བ་དམིགས་ཀྱིས་ཕྱེ་ནས། དེ་དག་ཅེས་བྱ་བ་ལ་སོགས་པ་བརྗོད་དེ། 
ཇི་སྐད་སྨོས་པའི་འབྲས་བུ་ཞེས་བྱ་བའི་ཐ་ཚིག་གོ། །གཟུང་བ་ལ་སོགས་པའི་ཚིག་གསུམ་གྱི་བཤད་པ་འདིར་ནི་བཤད་པ་བར་མ་གཉིས་ལ་ལྟོས་པར་ཤེས་པར་བྱའོ།    །དེ་ལྟར་ཞུ་བ་མཁྱེན་པར་གསོལ་བ་བསྟན་ནས། ད་ནི་བཅོམ་ལྡན་འདས་ལ་གསོལ་བ་འདེབས་ཏེ། ཚིག་དང་དོན་

73-1-19b

དང་གཉི་ག་དང་། །ཐོས་སོགས་ཤེས་པའི་བྱེ་བྲག་དང་། །མངོན་སུམ་རྗེས་དཔག་རྣམ་གཉིས་ཀྱིས། །རྣམ་པར་དག་པ་རྣམ་གསུམ་མོ། །གཟུང་བ་དང་། ཡིད་ལ་བྱས་པ་དང་། ཀུན་ཆུབ་པར་བྱས་པ་རྣམས་ནི། ཚིག་དང་། དོན་དང་། གཉི་གའམ། ཐོས་པ་དང་། བསམས་པ་
དང་། བསྒོམས་པའི་ཤེས་པས། ཡོངས་སུ་བཅད་པ་འམ། མངོན་སུམ་དང་། རྗེས་སུ་དཔག་པ་དང་། ཚད་མ་གཉི་གས་རྣམ་པར་དག་པ་ལས་རྣམ་པ་གསུམ་དུ་གོ་རིམས་བཞིན་དུ་ཤེས་པར་བྱའོ། །དེ་ལ་བཤད་པ་དང་པོ་ལ་ཞུ་བའི་འབྲས་བུ་ནི་ཞུ་བའི་སྒྲས་བརྗོད་དོ་ཞེས་བསྟན་ཏེ། 
དེ་ལྟར་ན་འདི་སྐད་དུ་གང་གིས་ཞུ་བའི་འབྲས་བུ་འདི་འགྲུབ་པར་འགྱུར་བ་དང་། དེ་ལས་ཐོས་པ་ལ་སོགས་པའི་ཤེས་པས་བསྡུས་པས་སྤྱོད་པ་ཡོངས་སུ་དག་པར་འགྱུར་བ་དེ་ལྟ་བུའི་ཞུ་བ་བཅོམ་ལྡན་འདས་ཀྱིས་བཤད་དུ་གསོལ་ཞེས་བྱ་བའི་ཐ་ཚིག་གོ། །བཤད་པ་གཉིས་པ་ལ་
ཇི་སྐད་སྨོས་པ་ཞེས་བྱ་བ་ནི་ཇི་སྐད་སྨོས་པ་ཞེས་བྱ་བའི་འབྲས་བུ་ཁོང་དུ་ཆུད་པར་བྱ་སྟེ། དེ་ལྟར་ན་འདི་སྐད་དུ་ཞུ་བ་གང་ལས་འབྲས་བུ་འདི་འགྲུབ་པར་འགྱུར་བ་དང་། ཐོས་པ་ལ་སོགས་པའི་ཤེས་པས་བསྡུས་པས་སྤྱོད་པ་ཇི་ལྟར་ཡོངས་སུ་དག་པར་འགྱུར་བ་དེ་ལྟ་བུའི་ཞུ་བ་བཅོམ་
ལྡན་འདས་ཀྱིས་བཤད་དུ་གསོལ་ཞེས་བྱ་བའི་ཐ་ཚིག་གོ། །དེ་ནས་སྤྱོད་པ་དེ་ནི་གང་ཡིན། དེའི་རྣམ་པར་དག་པ་ནི་ཇི་ལྟ་བུ། དེའི་འབྲས་བུ་ནི་ཅི་ཞིག་འཐོབ་པར་འགྱུར་ཞེ་ན། སྨྲས་པ། སྤྱོད་པ་ཕ་རོལ་ཕྱིན་པ་བཅུ། །ཡང་ན་སྟོང་ཉིད་དེ་ཡི་ནི། །རྣམ་དག་སྐྱོན་མེད་ས་ཐོབ་པས། །ཐམས་
ཅད་མཁྱེན་པའི་གོ་འཕང་འཐོབ། །སྤྱོད་པ་ནི་སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་བཅུ་སྟེ། སྤྱད་པར་བྱ་བ་ཡིན་པའི་ཕྱིར་རོ། །ཡང་ན་སྟོང་པ་ཉིད་དེ། དེ་རྟོགས་ན་མི་དམིགས་པའི་ཚུལ་གྱིས་སྦྱིན་པ་ལ་སོགས་པ་ལ་སྤྱོད་པའི་ཕྱིར་རོ། །ཕ་རོལ་ཏུ་ཕྱིན་པ་རྣམས་ཀྱི་སྐྱོན་ནི་འཁོར་གསུམ་
དམིགས་པ་དང་། སེར་སྣ་ལ་སོགས་པའི་དྲི་མའོ། །སྟོང་པ་ཉིད་ནི་དངོས་པོ་དང་། དངོས་པོ་མེད་པ་ལ་སོགས་པའི་ངོ་བོར་མངོན་པར་ཞེན་པའོ། །དེ་མེད་པས་སྐྱོན་མེད་པ་ཉིད་ཀྱིས་མཚན་ཉིད་ཀྱི་དྲི་མ་མེད་པ་ནི་དེ་དག་གི་རྣམ་པར་དག་པའོ། །དེས་རབ་ཏུ་དགའ་བ་ལ་སོགས་པའི་ས་

73-1-20a

ཐོབ་པས་རྣལ་འབྱོར་ཅན་གྱིས་ཐམས་ཅད་མཁྱེན་པའི་གོ་འཕང་འཐོབ་པར་འགྱུར་ཏེ། འདི་ལྟར་སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་རྣམས་ཕུལ་དུ་ཕྱིན་པར་རྣམ་པར་དག་པ་ལ་བསྟན་ནས། གོ་རིམས་བཞིན་དུས་བཅུར་རྣམ་པར་གཞག་སྟེ། དེའི་འོག་ཏུ་ཐམས་
ཅད་མཁྱེན་པའི་གོ་འཕང་འཐོབ་པར་འགྱུར་རོ། །སྟོང་པ་ཉིད་རྣམ་པར་དག་པ་ལས་ཀྱང་བསྟན་ཏེ། ཀུན་དུ་འགྲོ་དོན་ཞེས་བྱ་བ་ལ་སོགས་པ་ཇི་སྐད་བཤད་པ་ལྟ་བུའོ།    །དེ་ལྟར་གསོལ་བ་བཏབ་ནས། ད་ནི་གུས་པ་བསྐྱེད་པར་བྱ་བའི་ཕྱིར་དང་། ཆེ་བ་ཉིད་བསྟན་པའི་ཕྱིར་གསོལ་བ་
བཏབ་པའི་དོན་ལ་བཅོམ་ལྡན་འདས་ཀྱིས་མངོན་དུ་ཕྱོགས་པར་མཛད་ནས། ཞལ་གྱིས་བཞེས་སོ། །ཞལ་གྱིས་བཞེས་པ་དེ་ཡང་ཉན་པ་པོའི་བྱེ་བྲག་དང་། རང་གི་ངོ་བོ་རྣམ་པ་གཉིས་ཀྱི་ཕྱིར་རོ། །ཉན་པ་པོའི་བྱེ་བྲག་ནི་རྣམ་པ་བཞིར་གསུངས་ཏེ། ཉན་པ་དང་། ལེགས་པར་
ཉན་པ་དང་། རབ་ཏུ་ཉན་པ་དང་། ཡང་དག་པར་ཡིད་ལ་བྱེད་པ་སྟེ། སྣོད་ནི་ཁས་ཕུབ་རྡོལ་བ་དང་། །མི་གཙང་བ་ཡི་གཉེན་པོའམ། །གཟུ་བོ་ལ་སོགས་ཡོན་ཏན་ལྡན། །ཁྱོད་ཀྱིས་ཉོན་ལ་གཞན་དུ་མིན། །གང་ཕྱིར་ཚད་མ་ལྡན་པས་ན། །ཐོག་མ་བར་དང་ཐ་མར་དགེ། །
ཆུང་ངུ་འབྲིང་དང་ཆེན་པོ་ཡི། །ཉེས་པ་རྣམས་ནི་ཟད་བྱེད་དང་། །ཚིག་འབྲུ་དོན་དང་གཉི་ག་ཤེས། །མངོན་སུམ་ལ་སོགས་མི་འགལ་བ། །ཐོས་ལ་སོགས་ལས་བློ་བསྐྱེད་དང་། །བདག་སོགས་འབྱོར་པའི་རྒྱུ་ཡིན་ཕྱིར། །ཆར་པ་འབབ་ན་བུམ་པ་ཁས་ཕུབ་པའི་ནང་དུ་ཆུ་ཅུང་ཟད་
ཀྱང་མི་འགྲོ་བ་དེ་བཞིན་དུ། ཁྱོད་སྣོད་ཁས་ཕུབ་པ་ལྟ་བུར་ཉན་པར་མ་བྱེད་ཅིག་བྱ་བའི་ཕྱིར། ལེགས་པར་ཞེས་གསུངས་སོ། །བུམ་པ་རྡོལ་བའི་ནང་དུ་ནི་ཆུ་སོང་དུ་ཟིན་ཀྱང་གནས་པར་མི་འགྱུར་བ་དེ་བཞིན་དུ་ཁྱོད་ཉན་པར་མ་བྱེད་པར། ཅི་ནས་ཐོས་པ་བརྟན་པར་འགྱུར་བ་དེ་ལྟ་
བུར་ཉོན་ཅིག་ཅེས་བྱ་བའི་ཕྱིར་རབ་ཏུ་ཞེས་གསུངས་སོ། །བུམ་པ་མི་གཙང་བའི་ནང་དུ་ནི་ཆུ་ཅི་སོང་བ་དེ་དག་ཐམས་ཅད་མི་གཙང་བར་འགྱུར་ཏེ། སྤྱད་དུ་མི་རུང་བ་དེ་བཞིན་དུ། ཁྱོད་ཀྱིས་ཚུལ་བཞིན་མ་ཡིན་པ་ཡིད་ལ་བྱེད་པའི་མི་གཙང་བར་མ་བྱེད་ཅིག་ཅེས་བྱ་བའི་ཕྱིར། ཚུལ་

73-1-20b

བཞིན་ཡིད་ལ་ཟུང་ཤིག་ཅེས་གསུངས་སོ། །ཡང་ན་གཟུ་བོ་ལྟ་བུ་དང་། དོན་དུ་གཉེར་བ་དང་། རྟོག་པ་ཅན་དུ་གྱིས་ལ་ཉོན་ཅིག་ཅེས་གསུངས་ཏེ། ལེགས་པར་ཞེས་བྱ་བ་ལ་སོགས་པའི་ཚིག་དང་གོ་རིམས་བཞིན་དུ་སྦྱར་རོ། །དེ་ལྟར་བྱས་ན་ཁྱོད་ཀྱིས་མཉན་པ་འབྲས་བུ་ཡོད་པར་
འགྱུར་གྱི། དེ་ལྟ་མ་ཡིན་ན་མི་འགྱུར་བར་དགོངས་པའོ། །ཡང་ན་གང་གི་ཕྱིར་ཐོག་མ་ཉིད་དུ་ཚད་མ་དང་ལྡན་པས་དགེ་བ་དེའི་ཕྱིར་ལེགས་པར་ཉོན་ཞེས་གསུངས་སོ། །གང་གི་ཕྱིར་ཐ་མར་ཡང་དགེ་བ་དེའི་ཕྱིར་རབ་ཏུ་ཉོན་ཅིག་ཅེས་གསུངས་སོ། །གང་གི་ཕྱིར་ཐ་མར་ཡང་
དགེ་བ་དེའི་ཕྱིར་ཚུལ་བཞིན་ཡིད་ལ་བྱོས་ཤིག་ཅེས་གསུངས་སོ། །ཡང་ན་ཉེས་པ་ཆུང་ངུ་དང་འབྲིང་པོ་དང་། ཆེན་པོ་རྣམས་ཀྱི་གཉེན་པོ་ཡིན་པའི་ཕྱིར་ལེགས་པར་ཞེས་བྱ་བ་ལ་སོགས་པའི་ཚིག་དང་གོ་རིམས་བཞིན་དུ་སྦྱར་རོ། །ཡང་ན་ཚིག་འབྲུ་དང་། དོན་དང་། གཉི་ག་འཛིན་
དུ་གཞུག་པའི་ཕྱིར། ལེགས་པར་ཞེས་བྱ་བ་ལ་སོགས་པའི་ཚིག་དང་གོ་རིམས་བཞིན་དུ་སྦྱར་རོ། །ཡང་ན་མངོན་སུམ་དང་། རྗེས་སུ་དཔག་པ་དང་། ཚད་མ་གཉི་ག་དང་མི་འགལ་བའི་ཕྱིར། ལེགས་པར་ཞེས་བྱ་བ་ལ་སོགས་པའི་ཚིག་དང་གོ་རིམས་བཞིན་དུ་སྦྱར་རོ། །
ཡང་ན་ཐོས་པ་ལས་བྱུང་བ་ལ་སོགས་པའི་ཤེས་རབ་རྣམ་པ་གསུམ་གྱི་རྒྱུ་ཡིན་པའི་ཕྱིར། ལེགས་པར་ཞེས་བྱ་བ་ལ་སོགས་པའི་ཚིག་དང་གོ་རིམས་བཞིན་དུ་སྦྱར་རོ། །ཡང་ན་བདག་དང་། གཞན་གྱི་དོན་དང་། གཉི་གའི་དོན་གྱི་རྒྱུ་ཡིན་པའི་ཕྱིར། ལེགས་པར་ཞེས་བྱ་བ་ལ་སོགས་
པའི་ཚིག་དང་གོ་རིམས་བཞིན་དུ་སྦྱར་རོ། །ཡང་ན་མཐོང་བ་ལ་སོགས་པའི་ལམ་གསུམ་གྱི་རྒྱུ་ཡིན་པའི་ཕྱིར། ལེགས་པར་ཞེས་བྱ་བ་ལ་སོགས་པའི་ཚིག་དང་གོ་རིམས་བཞིན་དུ་སྦྱར་རོ། །དོན་གསོལ་ཞལ་གྱིས་བཞེས་པས་ན། །དེ་ཡིས་བདག་ཉིད་གསོལ་བར་ཕྱོགས། །ཐུབ་པ་
སེམས་ཅན་དོན་མཁྱེན་ཕྱིར། །འདིར་ནི་བསྲུང་བ་ལ་སོགས་གསུངས། །དེ་ལྟར་འཚལ་ཞེས་བྱ་བ་ལ་སོགས་པ་ནི། མངོན་དུ་ཕྱོགས་པར་མཛད་པ་བསྟན་ཏོ།    །ད་ནི་བསྲུང་བ་བསྟན་ཏེ། དེ་ཡང་རྣམ་པ་གཉིས་ཏེ། བསམ་གཏན་གྱི་རྣལ་འབྱོར་དང་། གསང་སྔགས་ཀྱི་ཡི་གེའོ། །

73-1-21a

དེ་ལ་བསམ་གཏན་གྱི་རྣལ་འབྱོར་ནི། ཡང་དག་ཏུ་ན་དེ་ཆོས་ཀུན། །དངོས་པོའི་ངོ་བོར་ཁས་མི་ལེན། །རྐྱེན་ལ་རག་ལས་འབྱུང་ཕྱིར་ཏེ། །སྒྱུ་མ་རྨི་ལམ་སྨིག་རྒྱུ་བཞིན། །དགག་པར་བྱ་བ་མེད་པས་ན། །ཡང་དག་ཏུ་ན་བདག་མེད་མངོན། །ཡང་དག་མཁྱེན་ཏེ་ཆོས་
རྣམས་ཀུན། །ཐམས་ཅད་དངོས་པོར་འཛིན་མི་མཛད། །ཆོས་ཐམས་ཅད་ནི་རྐྱེན་ལ་རག་ལས་ཏེ་འབྱུང་བའི་ཕྱིར་དང་། སྒྱུ་མ་ལ་སོགས་པ་བཞིན་དུ། ཡང་དག་པར་ན་དངོས་པོའི་ངོ་བོ་ཉིད་མ་ཡིན་ནོ། །དེ་བཞིན་དུ་སྐྱེས་པ་ལ་སོགས་པའི་ངོ་བོ་ཉིད་ཀྱང་ཡང་དག་པར་མེད་དོ་ཞེས་བརྗོད་
པར་བྱའོ། །དེ་ལྟར་གྱུར་ན་ཆོས་ཐམས་ཅད་ཡང་དག་པར་དངོས་པོ་ཡོད་པ་མ་ཡིན་པའི་ཕྱིར། ཡང་དག་པར་དགག་པ་དང་འབྲེལ་པ་མ་ཡིན་ཏེ། མོ་གཤམ་གྱི་བུའི་སྔོ་བསངས་ལ་སོགས་པ་བཞིན་ཏེ། དགག་པར་བྱ་བ་མེད་པས་དགག་པ་ཡང་མི་འཇུག་པའི་ཕྱིར་རོ། །མི་
མཐུན་པ་རྟག་པ་ཡིན་ན་ནི། དགག་པ་ཡང་དེ་དང་འདྲ་བར་འགྱུར་ཏེ། དེ་ལྟར་ན་ཆོས་ཐམས་ཅད་དོན་དམ་པར་དངོས་པོ་མེད་པའི་ངོ་བོ་ཉིད་མ་ཡིན་ནོ། །དེ་བཞིན་དུ་མ་སྐྱེས་པ་ལ་སོགས་པའི་ངོ་བོ་ཉིད་ཀྱང་མ་ཡིན་ནོ་ཞེས་སྦྱར་རོ། །ཡང་ན། ཚད་མ་ལྡན་པ་མ་ཡིན་པས། །ཡོད་མེད་ལ་
སོགས་མཚན་ཉིད་དུ། །དེ་ནི་ཆོས་ཀུན་ཁས་མི་ལེན། །དེ་ཕྱིར་མཁས་པ་འཛིན་མི་བྱེད། །མངོན་པར་ཞེན་པར་མི་བྱེད་ཅེས་བྱ་བའི་ཐ་ཚིག་གོ། །ཚད་མ་དང་མི་ལྡན་པའི་ངོ་བོ་ནི་བཤད་ཟིན་ཏོ། །དེ་ཕྱིར་དེ་ནི་སྟོང་པ་མིན། །མི་སྟོང་མ་ཡིན་ཡོད་མེད་མིན། །མི་སྐྱེ་མ་ཡིན་སྐྱེ་མིན་ཞེས། །བྱ་བ་
ལ་སོགས་བཅོམ་ལྡན་གསུངས། །བསམ་གཏན་གྱི་ནི་ལམ་འདི་ཡིས། །གསང་སྔགས་ཚིག་རྣམས་བསམས་ན་ནི། །འབྲས་བུ་རྫོགས་པར་ཐོབ་འགྱུར་གྱི། །འདོད་པ་ཉི་ཚེས་དེ་ལྟ་མིན། །རྣལ་འབྱོར་ཅན་བསམ་གཏན་གྱི་རྣལ་འབྱོར་འདི་ལ་གནས་ཤིང་གསང་སྔགས་ཀྱི་ཡི་གེ་
རྣམས་བརྗོད་ན། ཡིད་ལ་འདོད་པའི་འབྲས་བུ་རྫོགས་པར་འཐོབ་པར་འགྱུར་གྱི། སེམས་ཕྱི་རོལ་དུ་བལྟས་པས་བཏོན་ན་ནི་གསང་སྔགས་རྣམས་ངོ་བོ་ཉིད་ཤིན་ཏུ་བསམ་གྱིས་མི་ཁྱབ་པ་དང་ལྡན་པས་འབྲས་བུ་འཐོབ་པར་ལྟ་འགྱུར་མོད་ཀྱི་རྫོགས་པར་ནི་མ་ཡིན་ནོ། །ཚིག་རྣམས་རེ་རེའི་

73-1-21b

རྣལ་འབྱོར་ལ། །མངོན་དུ་ཕྱོགས་པར་བྱེད་བཞིན་དུ། །གསང་སྔགས་རན་པར་བརྗོད་བྱ་སྟེ། །དེ་ཕྱིར་འདིར་ནི་ཚིག་སྨོས་སོ། །མྱུར་ཆེས་པ་དང་། དལ་ཆེས་པ་དང་། མི་གསལ་བ་ལ་སོགས་པའི་ཉེས་པ་དང་བྲལ་བ་ནི་རན་པ་ཉིད་དེ་གསང་སྔགས་ཀྱི་ཡི་གེ་རྣམས་ལ་སེམས་
གཏོད་པའོ། །ཚིག་རེ་རེའི་རྣལ་འབྱོར་ལ་མངོན་དུ་ཕྱོགས་པར་བྱེད་ཅིང་གསང་སྔགས་རན་པར་བརྗོད་པར་བྱ་སྟེ། དེ་བས་ན་ཚིག་སྨོས་སོ། །དེ་ལྟ་མ་ཡིན་ན། གཟུངས་ཀྱི་གསང་སྔགས་གཟུང་བར་བྱ། །ཞེས་དེ་སྐད་འབྱུང་བའི་རིགས་སོ། །ཡི་གེ་རེ་རེ་བསམ་
པ་ཡི། །རྣལ་འབྱོར་སུས་ཀྱང་མི་ནུས་ཏེ། །ཚིག་རེ་ནས་ནི་ངེས་པར་ཡང་། །བརྗོད་པར་བྱ་བས་དེ་སྨོས་སོ། །དེ་སྨོས་ཞེས་བྱ་བ་ནི་ཚིག་སྨོས་པའོ། །གལ་ཏེ་ཡི་གེ་རེ་རེ་ལ་རྣལ་འབྱོར་དུ་བྱེད་ནུས་ན་ལྟ་རབ་ཏུ་ལེགས་པ་ཡིན་ནོ། །གལ་ཏེ་མི་ནུས་ན་ཚིག་རེ་རེ་ལ་ནི་བསྒྲིམས་ཏེ་ཡང་བྱ་དགོས་
ཏེ། འདི་ལྟར། རྣལ་འབྱོར་མེད་པའི་གསང་སྔགས་འདི། །དེ་ལྟར་འབྲས་བུ་སྟོན་མི་འགྱུར། །གསང་སྔགས་ཚིག་ནི་གསང་སྔགས་ཏེ། །དེ་ཕྱིར་རྣལ་འབྱོར་མེད་མི་བྱ། །འདིའི་དོན་ནི་བརྡ་ཕྲད་པར་ཟད་དོ། །གཟུངས་ཀྱི་དོན་གྱི་གསང་སྔགས་ཀྱི་ཚིག་རྣམས་ཡིན་པས་གཟུངས་ཀྱི་གསང་
སྔགས་ཀྱི་ཚིག་རྣམས་སོ།    །ད་ནི་གཟུངས་ཀྱི་ངོ་བོ་བརྗོད་པར་བྱ་སྟེ། གསུངས་པའི་མིང་ནི་འདོགས་པ་དང་། །འཐོབ་པའི་ཐབས་ནི་བསྟན་པ་དང་། །དེས་ཤེས་བྱ་ལ་སོགས་ཚིག་གིས། །གཟུངས་ནི་འོག་ནས་འབྱུང་བ་ཉིད། །གང་གི་ཕྱིར་བཅོམ་ལྡན་འདས་དེས། འདི་ནི་ཤཱ་རིའི་བུ་
བྱང་ཆུབ་སེམས་དཔའ་སེམས་དཔའ་ཆེན་པོའི་ཆོས་ཐམས་ཅད་མི་འཛིན་པ་ལ་འཇུག་པ་ཞེས་བྱ་བའི་སངས་རྒྱས་རྗེས་སུ་དྲན་པ་ཞེས་བྱའོ་ཞེས་བྱ་བ་ལ་སོགས་པས་སངས་རྒྱས་རྗེས་སུ་དྲན་པ་གསུངས་པའི་མིང་འདོགས་པར་མཛད་དོ། །གང་གི་ཕྱིར་དེ་ནས་བཅོམ་ལྡན་འདས་ཀྱིས་ཡང་ཞེས་
བྱ་བ་ལ་སོགས་པས་ནི་འཐོབ་པའི་ཐབས་བསྟན་ཏོ། །གང་གི་ཕྱིར་དེས་སྒོ་མཐའ་ཡས་བསྒྲུབ་པའི་གཟུང་འདི་བསྒྲུབས་ཏེ་ཞེས་གསུངས་པ་དེའི་ཕྱིར། བདག་ནི་སངས་རྒྱས་རྗེས་སུ་དྲན་པ་འོག་ནས་འབྱུང་བ་ཉིད་གཟུངས་ཡིན་པར་འཛིན་ཏོ། །དེ་ལྟ་མ་ཡིན་གྱི་གསང་སྔགས་ཀྱི་ཡི་གེ་རྣམས་གཟུངས་

73-1-22a

ཉིད་ཡིན་ན་ནི། འདི་རིགས་པ་དང་ལྡན་པར་མི་འགྱུར་ཏོ། སྐབས་མ་ཡིན་པའི་ཕྱིར་ཏེ། སངས་རྒྱས་རྗེས་སུ་དྲན་པ་བསྟན་པའི་སྐབས་ཀྱིས་བར་དུ་ཆོད་པའི་ཕྱིར་དང་། གསང་སྔགས་ཀྱི་ཡི་གེ་རྣམས་ནི་ཡི་གེའི་འབྲུ་དང་། སྒྲའི་བདག་ཉིད་ཡིན་པས་མིག་དང་
རྣ་བའི་རྣམ་པར་ཤེས་པས་ངེས་པར་གཟུང་བ་ཡིན་པའི་ཕྱིར་རོ། །དེ་བས་ན། འདི་ཞེས་གསུངས་པ་བརྗོད་བྱ་མིན། །འོག་ནས་འབྱུང་བའི་ཆིངས་ཐུགས་ལ་བཞག་ནས། འདི་ཞེས་བྱ་བ་གསུངས་སོ། །འཛིན་པ་འདིར་ནི་དོན་ལས་བཞེད། །རློམ་སེམས་མངོན་པར་ཞེན་པ་
སྟེ། །མི་དམིགས་ཕྱིར་ན་དེ་མེད་དོ། །འཛིན་པ་ནི་འདིར་དོན་ལ་རྟོགས་པར་བཞེད་ཀྱི། ཡི་གེ་ལས་ནི་མ་ཡིན་ཏེ། ཡི་གེ་འཛིན་པས་ནི་ཕན་ཡོན་འདི་དག་འཐོབ་པར་མི་འགྱུར་རོ། །རློམ་སེམས་ནི་མངོན་པར་ཞེན་པ་ཡིན་པས་དེ་ལྟར་ན་འདི་ལྟར་འགྱུར་རོ། །འདུས་བྱས་དང་འདུས་མ་
བྱས་ཀྱི་ཆོས་རྣམས་ལ་རློམ་སེམས་སུ་མི་བྱེད་ཅེས་བྱ་བ་ནི་མངོན་པར་ཞེན་པར་མི་བྱེད་ཅེས་བྱ་བའི་ཐ་ཚིག་གོ། །ཅིའི་ཕྱིར་མངོན་པར་ཞེན་པར་མི་བྱེད་ཅེ་ན། དེའི་ཕྱིར་དམིགས་པར་མི་བྱེད་ཅེས་གསུངས་སོ། །ཡང་ན་ངོ་བོ་ཉིད་མེད་པའི་ཕྱིར་འདུས་བྱས་དང་འདུས་མ་བྱས་ཀྱི་ཆོས་
རྣམས་ལ་ངོ་བོ་ཉིད་དང་བཅས་པར་རློམ་སེམས་སུ་མི་བྱེད་པར་ངེས་པར་གཟུང་བར་བྱའོ། །མི་སྡུག་གཉི་ག་མ་ཡིན་སྡུག །སྡུག་པ་དེ་ཡང་རྣམ་གཉིས་འདོད། །ཆོས་རྣམས་ཐམས་ཅད་ཐུབ་པ་ཡིས། །རྣམ་པ་བཞིར་ནི་བསྡུ་བ་མཛད། །ཆོས་རྣམ་པ་བཞི་ནི་མི་སྡུག་པའི་ངོ་བོ་ཉིད་དང་། 
གཉི་ག་མ་ཡིན་པའི་ངོ་བོ་ཉིད་དང་། སྡུག་པའི་ངོ་བོ་ཉིད་དེ། དེ་དག་ཀྱང་ཟག་པ་དང་བཅས་པ་དང་། ཟག་པ་མེད་པའི་བྱེ་བྲག་གིས་རྣམ་པ་གཉིས་ཏེ། དེ་བས་ན་རྣམ་པ་བཞིར་འགྱུར་རོ། །ཇི་སྟེ་ཅིའི་ཕྱིར་ཆོས་རྣམས་རྣམ་པ་བཞིར་བསྟན་པར་མཛད་ཅེ་ན། སྨྲས་པ། གནོད་སེམས་
གཏི་མུག་འདོད་ཆགས་རྣམས། །དེ་ཡི་སྒོ་ནས་འབྱུང་ཕྱིར་རོ། །སྤང་བའི་ཐབས་ནི་བསྒྲུབ་པའི་ཕྱིར། །དེ་དག་དངོས་པོ་མེད་པར་བསྟན། །ཞེ་སྡང་ནི་མི་སྡུག་པ་ལས་འབྱུང་། གཏི་མུག་ནི་དངོས་པོ་རྣམ་པ་གསུམ་ཆར་ལས་འབྱུང་། འཁོར་བའི་རྩ་བ་ནི་འདོད་ཆགས་ལ་སོགས་པ་ཡིན་ཏེ། 

73-1-22b

དེ་བས་ན་དེ་དག་སྤང་བའི་ཐབས་བསྟན་པའི་ཕྱིར། དངོས་པོ་རྣམ་པ་གསུམ་པོ་དེ་དག་ངོ་བོ་ཉིད་མེད་པ་སྟོན་པར་མཛད་དེ། ཇི་སྐད་དུ། དེས་གང་ཆགས་པར་བྱེད་པའི་ཆོས་དེ་དག་ཡང་དག་པར་རྗེས་སུ་མི་མཐོང་ངོ་ཞེས་བྱ་བ་ལ་སོགས་པ་གསུངས་པ་ལྟ་བུའོ། །གང་གི་ཕྱིར་འདུས་བྱས་དང་
འདུས་མ་བྱས་ཀྱི་ཆོས་རྣམས་ལ་རློམ་སེམས་སུ་མི་བྱེད་པ་དེའི་ཕྱིར། མི་སྡུག་པ་རྣམས་ལ་སྨོད་པ་མི་བྱེད་དེ། བཤུང་བར་མི་བྱེད་ཅེས་བྱ་བའི་ཐ་ཚིག་གོ། །བར་མ་རྣམས་ལ་བཏང་སྙོམས་སུ་མི་བྱེད་དེ། དེ་དག་གི་རྗེས་སུ་ཆགས་པ་དང་། ཁྲོ་བའི་ཡུལ་མ་ཡིན་པའི་ཕྱིར། བཏང་སྙོམས་སུ་
གཞག་པར་བྱ་བ་རྣམས་སོ། །སྡུག་པ་རྣམས་ལེན་པར་མི་བྱེད་དེ། སྲིད་པས་བདག་གིར་བྱེད་པ་ནི་ལེན་པ་ཡིན་པའི་ཕྱིར་རོ། །སྡུག་པ་ཟག་པ་མེད་པ་ལ་བརྩོན་པར་མི་བྱེད་དེ། དེ་དག་ནི་རབ་ཏུ་མངོན་པར་འདུ་བྱེད་པ་ཆེན་པོས་བསྒྲུབ་པར་བྱ་བས་བརྩམ་པར་བྱ་བ་ཡིན་པའི་ཕྱིར་རོ། །འདི་ལ་
ཐོབ་བྱ་རྣམ་འཐོབ་དང་། །དེ་དག་ཉིད་ནི་བསྒོམ་པ་དང་། །སྤང་བྱ་རྣམས་ནི་སྤང་བ་དང་། །འཕེལ་བ་ཐམས་ཅད་ཡིན་པར་བཞེད། །འཐོབ་པར་བྱ་བར་འོས་པ་གང་ཡིན་པ་དེ་དག་ནི་འཐོབ་པར་བྱ་བ་རྣམས་སོ། །དེ་དག་ཀྱང་ཟག་པ་མེད་པའི་ཆོས་རྣམས་དང་། ཟག་པ་དང་བཅས་པའི་ཆོས་
རྣམས་ཏེ། བསམ་གཏན་དང་། གཟུགས་མེད་པ་དང་། མངོན་པར་ཤེས་པ་དང་། ནམ་མཁའ་མཛོད་ཀྱི་ཏིང་ངེ་འཛིན་ལ་སོགས་པའོ། །བསྒོམ་པར་བྱ་བ་ནི་དེ་དག་ཉིད་བརྟན་པར་བྱ་བའི་ཕྱིར་ཡང་དང་ཡང་དུ་གོམས་པར་བྱ་བའོ། །སྤང་བར་བྱ་བ་ནི་ཟག་པ་དང་བཅས་པ་རྣམས་ཏེ་དེ་
དག་ནི་སྤང་བར་འོང་བའམ། སྤང་བར་འོས་པའི་ཕྱིར་རོ། །འཐོབ་པར་བྱ་བ་དང་། བསྒོམ་པར་བྱ་བའི་འཕེལ་བ་ནི་གོང་ནས་གོང་དུ་ཁྱད་པར་འཐོབ་པའོ། །སྤང་བའི་འཕེལ་བ་ནི་གོང་ནས་གོང་དུ་ཉོན་མོངས་པ་སྤངས་པ་ངེས་པར་འཐོབ་པར་འགྱུར་བའི་ཕྱིར་རོ། །གང་གི་ཕྱིར་འདུས་
བྱས་དང་། འདུས་མ་བྱས་ཀྱི་ཆོས་རྣམས་ལ་རློམ་སེམས་མི་བྱེད་པ། དེའི་ཕྱིར་རྣལ་འབྱོར་ཅན་དེ་ནི། །ཐོས་དང་བསམ་ལ་སོགས་བྱུང་བའི། །ཤེས་པ་རྣམས་ཀྱིས་ནམ་དུ་ཡང་། །འདུས་བྱས་འདུས་མ་བྱས་ཀྱི་ཆོས། །དེ་དག་འཐོབ་སོགས་སྦྱོར་མི་བྱེད། །འཐོབ་པར་བྱ་བའི་

73-1-23a

ཕྱིར་ཐོས་པ་དང་། བསམ་པ་དང་། བསྒོམས་པ་ལས་བྱུང་བའི་ཤེས་པ་རྣམས་ཀྱིས་གོ་རིམས་བཞིན་དུ་སྦྱོར་བར་མི་བྱེད་པའི་ཕྱིར་མི་བྱེད། རྣམ་པར་མི་བྱེད། མངོན་པར་འདུ་མི་བྱེད་ཅེས་གསུངས་ཏེ། སྤང་བ་ལ་སོགས་པ་ལ་ཡང་དེ་བཞིན་དུ་བརྗོད་པར་བྱའོ། །
ཡང་ན་ཆུང་འབྲིང་ཆེན་པོ་ཡི། །སྦྱོར་བ་རྣམས་ཀྱིས་སྦྱོར་མི་བྱེད། །འཐོབ་པར་བྱ་བའི་ཕྱིར་གོ་རིམས་བཞིན་དུ་མི་བྱེད་ཅེས་བྱ་བ་ལ་སོགས་པ་གསུངས་ཏེ། སྤང་བ་ལ་སོགས་པ་ལ་ཡང་དེ་བཞིན་དུ་བརྗོད་པར་བྱའོ། །དེ་བཞིན་ཟག་བཅས་སློབ་སོགས་ཀྱི། །ལམ་རྣམས་ཀྱིས་ཀྱང་
སྦྱོར་མི་བྱེད། །རྣལ་འབྱོར་པ་དེ་འཐོབ་པ་ལ་སོགས་པ་ལ་ཞེས་བྱ་བར་སྙེགས་ཏེ། སོགས་པ་སྨོས་པས་ནི་མི་སློབ་པའི་ལམ་བསྡུའོ། །ཅིའི་ཕྱིར་འདུས་བྱས་དང་། འདུས་མ་བྱས་ཀྱི་ཆོས་རྣམས་མི་དམིགས་པས་དེའི་ཕྱིར་རློམ་སེམས་སུ་མི་བྱེད་ཅེ་ན། དེའི་ཕྱིར་མཚུངས་པར་
ལྡན་པའི་ཆོས་རྣམས་ཞེས་བྱ་བ་ལ་སོགས་པ་གསུངས་ཏེ། རྒྱུ་དང་རྐྱེན་ནམ་ཆགས་སོགས་ཀྱི། །བག་ཉལ་རྣམས་དང་ལྡན་དེ་དག །འདིར་ནི་མཚུངས་ལྡན་ཤེས་བྱ་སྟེ། །བཟློག་པ་ལས་ནི་ལྡན་པ་མིན། །རྒྱུ་དང་རྐྱེན་རྣམས་དང་ལྡན་པས་ན་མཚུངས་པར་ལྡན་པ་དག་སྟེ། འདུས་བྱས་
ཀྱི་ཆོས་མཐའ་དག་གོ། །དེ་ལས་བཟློག་པ་ནི་ལྡན་པ་ཡིན་པ་དག་སྟེ། འདུས་མ་བྱས་རྣམས་སོ། །ཡང་ན་འདོད་ཆགས་པ་ལ་སོགས་པ་ཉོན་མོངས་པ་ལྟ་བར་གྱུར་པ་དང་ལྡན་པ་གང་ཡིན་པ་དེ་དག་ནི་མཚུངས་པར་ལྡན་པ་དག་སྟེ། ཟག་པ་དང་བཅས་པའི་ཆོས་རྣམས་སོ། །དེ་ལས་
བཟློག་པ་ནི་ལྡན་པ་མ་ཡིན་པ་དག་སྟེ། ཟག་པ་མེད་པ་རྣམས་སོ། །གང་གི་ཕྱིར་མཚུངས་པར་ལྡན་པ་སྡུག་པ་ལ་སོགས་པའི་བྱེ་བྲག་གིས་ཐ་དད་པའི་ཆོས་རྣམས་ཀྱང་མི་མཐོང་ལ། ལྡན་པ་མ་ཡིན་པ་རྣམས་ཀྱང་མི་མཐོང་བ་དེའི་ཕྱིར་མི་དམིགས་སོ། །གང་གི་ཕྱིར་མི་དམིགས་པ་དེའི་
ཕྱིར་རློམ་སེམས་སུ་མི་བྱེད་དོ། །དེ་ཅིའི་ཕྱིར་མི་མཐོང་ཞེ་ན་སྨྲས་པ། རྣམ་པ་མེད་པའི་ཤེས་པ་ཡིས། །ཡུལ་ལ་འཛིན་པར་མི་རུང་ངོ་། །རྣམ་པ་ཚད་མ་མིན་ཕྱིར་དང་། །མི་རུང་ཕྱིར་ན་ཅིག་ཤོས་མིན། །རེ་ཞིག་དོན་བྱེ་བྲག་ཏུ་ཡོངས་སུ་གཅོད་པ་མི་རུང་བའི་ཕྱིར་རོ། །རྣམ་པ་མེད་པའི་

73-1-23b

ཤེས་པས་ནི་མི་མཐོང་སྟེ། འབྲེལ་བའི་རྒྱུ་མེད་པའི་ཕྱིར་རོ། །རྣམ་པ་ཚད་མ་མ་ཡིན་པའི་ཕྱིར། རྣམ་པ་དང་བཅས་ཀྱང་ཡུལ་འཛིན་པར་མི་རུང་སྟེ། གང་གི་ཕྱིར་མྱོང་བའི་ཚེ་དངོས་པོ་རིག་པར་འགྱུར་བས་དངོས་པོས་རྣམ་པ་ལ་མ་ཁྱབ་སྟེ། རྨི་ལམ་ལ་སོགས་པ་ན་དངོས་པོ་མེད་
བཞིན་དུ་ཡང་དེ་ཡོད་པའི་ཕྱིར་རོ། །རྣམ་པ་ཡང་མི་རུང་སྟེ། གཞན་དུ་ན་ནི་དངོས་པོ་གཅིག །སྣ་ཚོགས་ཚུལ་དུ་སྣང་བ་དག །དེ་ཡི་གཅིག་པུ་ཉམས་འགྱུར་ཕྱིར། །རྣམ་པ་ཇི་ལྟར་བདེན་པར་འགྱུར། །ཞེས་བྱ་བ་ལ་སོགས་པ་འབྱུང་བའི་ཕྱིར་རོ། །རྣམ་པ་གཞན་ནི་ཡོད་པ་
མ་ཡིན་ཏེ། དེ་ལྟ་བས་ན་མངོན་སུམ་གྱིས་མི་མཐོང་ངོ་། །དེ་ཉིད་ཀྱི་ཕྱིར་རྟགས་ལ་སོགས་པས་ཡོངས་སུ་མ་བཅད་པས་ན་རྗེས་སུ་དཔག་པས་ཀྱང་མི་མཐོང་ངོ་། །གང་གི་ཕྱིར་མཚུངས་པར་ལྡན་པའི་ཆོས་རྣམས་དང་། ལྡན་པ་མ་ཡིན་པ་རྣམས་དེ་ལྟར་མི་མཐོང་བ་དེའི་ཕྱིར། ཐོབ་པར་
བྱ་བའི་ཆོས་རྣམས་ཀྱི་སྐྱེ་བ་ཡང་མི་མཐོང་ལ་སྤོང་བར་བྱ་བ་རྣམས་ཀྱི་འགོག་པ་ཡང་མི་མཐོང་ངོ་། །བསྒོམ་པར་བྱ་བའི་དབང་དུ་མཛད་དེ། འདས་པའི་ཆོས་རྣམས་ཀྱང་མི་མཐོང་། །ཞེས་བྱ་བ་ལ་སོགས་པ་གསུངས་སོ། །ལུས་དང་ལུས་མེད་འཕེལ་བ་དེ། །རྫས་དང་རྫས་མེད་
རྣམ་པ་གཉིས། །ལྟོས་པར་གནས་པའི་ངོ་བོའི་ཕྱིར། །མི་མཐུན་པ་དང་ལྷན་ཅིག་བཤད། །ལུས་མེད་པའི་དངོས་པོ་འཕེལ་བ་དེའི་དབང་དུ་མཛད་ནས། ལུས་མེད་པའི་ཆོས་རྣམས་ཀྱི་འཕེལ་བ་མི་མཐོང་ཞེས་གསུངས་སོ། །ལུས་ཡོད་པའི་དངོས་པོའི་འཕེལ་བའི་དབང་དུ་མཛད་
ནས། ལུས་ཡོད་པའི་ཆོས་གང་ཡང་སོགས་པར་མི་བྱེད་ཅེས་གསུངས་སོ། །འཕེལ་བ་དེ་རྣམ་པ་གཉིས་སུ་བཤད་པ་དེ་བཞིན་དུ། རྫས་སུ་ཡོད་པའི་འཕེལ་བ་དེའི་དབང་དུ་མཛད་པ་ནི་སྔ་མ་ཡིན་ལ། བཏགས་པར་ཡོད་པའི་འཕེལ་བ་དེའི་དབང་དུ་མཛད་པ་ནི་ཕྱི་མ་ཡིན་པས། 
འཕེལ་བ་འདི་ཡང་རྣམ་པ་གཉིས་སུ་བཤད་དེ། དེ་ཡང་མདོར་བསྡུ་ན་རྣམ་པ་བཞིར་བཤད་དོ། །འཕེལ་བ་དེ་ཡང་ཉུང་ངུ་ལས་ལྟོས་ནས། ཕ་རོལ་དང་ཚུ་རོལ་བཞིན་དུ་བཏགས་པའི་ཡོད་པ་ཡིན་ཏེ། དེ་བས་ན་མི་མཐུན་པའི་ཕྱོགས་འབྲི་བ་དང་འགྲིབ་པ་ལྷན་ཅིག་ཏུ་བཤད་དོ། །ཡང་དག་

73-1-24a

ཏུ་ན་སྐུ་གཉིས་ཀྱི། །རང་བཞིན་མ་མཐོང་གང་ཡིན་པ། །དེ་ཉིད་སངས་རྒྱས་རྗེས་དྲན་ཏེ། །རྟོག་པ་ཐམས་ཅད་སེལ་བ་ཡིན། །རྐྱེན་ལ་རག་ལས་འབྱུང་བའི་ཕྱིར། །སྒྱུ་མ་བཞིན་དུ་གང་མ་སྐྱེས། །བདེན་པར་བསམས་ན་གཟུགས་ལ་སོགས། །དེ་ནི་དེ་བཞིན་གཤེགས་
མ་ཡིན། །དགག་པར་བྱ་བ་མེད་པས་ན། །ཡང་དག་ཏུ་ན་དགག་མེད་མངོན། །དེ་ཕྱིར་བརྟགས་ན་གཟུགས་མེད་སོགས། །དེ་ནི་དེ་བཞིན་གཤེགས་མ་ཡིན། །སྐུ་གཉིས་ནི་ལོངས་སྤྱོད་རྫོགས་པ་དང་སྤྲུལ་པའོ། །རྟོགས་པ་ཐམས་ཅད་སེལ་བ་ནི་རྟོག་པ་ཐམས་ཅད་ཀྱི་གཉེན་པོར་
གྱུར་པའི་ཕྱིར་རོ། །གཟུགས་ལ་སོགས་པ་ནི་ཡང་དག་པར་ན་མ་སྐྱེས་པའི་ངོ་བོ་ཉིད་དེ། རྐྱེན་གྱི་དབང་གིས་འབྱུང་བའི་ཕྱིར། སྒྱུ་མ་ལ་སོགས་པ་བཞིན་ནོ། །སོགས་པ་སྨོས་པས་ནི་མཚན་ལ་སོགས་པ་བསྡུའོ། །ལོངས་སྤྱོད་རྫོགས་པ་དང་སྤྲུལ་པའི་སྐུའི་མཚན་ཉིད་མ་སྐྱེས་པ་
གང་ཡིན་པ་དེ་ནི་བདེན་པར་ན་དེ་བཞིན་གཤེགས་པ་མ་ཡིན་ཏེ། སྒྱུ་མ་ལ་སོགས་པ་བཞིན་ནོ། །གཟུགས་མེད་པ་ལ་སོགས་པ་ཡང་དགག་པར་བྱ་བ་མེད་པའི་ཕྱིར་བདེན་པར་མེད་དེ། དགག་པར་བྱ་བ་མེད་ན་དགག་པ་ཡོད་པར་མི་རུང་སྟེ། མོ་གཤམ་གྱི་བུའི་སྔོ་བསངས་ལ་སོགས་
པ་དགག་པ་བཞིན་ནོ། །དེ་བས་ན་གཟུགས་མེད་པ་ལ་སོགས་པའི་ངོ་བོ་ཉིད་ཀྱང་བདེན་པར་ན་ལོངས་སྤྱོད་རྫོགས་པ་དང་། སྤྲུལ་པའི་སྐུའི་མཚན་ཉིད་ཀྱི་དེ་བཞིན་གཤེགས་པ་མ་ཡིན་ནོ། །སོགས་པ་སྨོས་པ་ནི་མཚན་མ་མེད་པ་ལ་སོགས་པ་བསྡུའོ། །དེས་ན་གཉི་ག་མ་ཡིན་དང་། །ཅིག་
ཤོས་དེ་དག་བཀག་ཤེས་བྱ། །དེ་ཡི་ཕྱིར་ན་དེ་གཉིས་ནི། །སོ་སོར་དགག་པ་མ་མཛད་དོ། །གལ་ཏེ་དེ་བཞིན་གཤེགས་པ་གཟུགས་ཡོད་པ་ཡང་མ་ཡིན། གཟུགས་མེད་པ་ལ་སོགས་པ་ཡང་མ་ཡིན་ན། འོ་ན་གཉི་གའི་ངོ་བོའམ། གཉི་གའི་ཡིན་པའི་ངོ་བོར་འགྱུར་རོ་ཞེ་ན། དེ་ནི་མེད་དེ། 
གཉི་གའི་ཕྱོགས་དགག་པས་ནི། གཉི་གའི་ངོ་བོ་དེ་བཞིན་གཤེགས་པ་ཡིན་པ་ཡང་བཀག་པ་ཁོ་ནར་འགྱུར་རོ། །གཉི་ག་མ་ཡིན་པའི་ངོ་བོ་ནི་མེད་པ་ཉིད་དེ། གཟུགས་དང་གཟུགས་མེད་པ་གཉིས་ནི་ཕན་ཚུན་རྣམ་པར་གཅོད་པར་གནས་པའི་ངོ་བོ་ཅན་ཡིན་པས་གཟུགས་དང་གཟུགས་

73-1-24b

མེད་པའི་ངོ་བོ་ཉིད་དུ་འགྱུར་བའི་ཕྱིར་རོ། །དེ་ལྟར་རྣམ་རྟོག་མེད་གྱུར་ན། །ཆོས་ཀྱི་སྐུ་ནི་མཐོང་བ་སྟེ། །སངས་རྒྱས་རྗེས་དྲན་ཀུན་མཁྱེན་གྱི། །ཡོན་ཏན་ཕུན་སུམ་ཚོགས་པའི་གཞི། །དེ་ལྟར་ཇི་སྐད་བསྟན་པའི་རྣམ་པས་རྣམ་པར་རྟོག་པ་མེད་པར་གྱུར་ན་ཆོས་ཀྱི་སྐུ་མཐོང་བ་ཡིན་ཏེ། དེ་ནི་རྟོག་པ་
ཐམས་ཅད་དང་བྲལ་བའི་ངོ་བོ་ཉིད་ཡིན་པའི་ཕྱིར་རོ། །མཐོང་བ་དེ་ནི་སངས་རྒྱས་རྗེས་སུ་དྲན་པ་ཡིན་ཏེ། ཐམས་ཅད་མཁྱེན་པའི་སྟོབས་བཅུ་དང་། མི་འཇིགས་པ་ལ་སོགས་པ་ཡོན་ཏན་རྣམས་ཀྱི་གཞི་ཡིན་ན། གཞན་དག་གི་ལྟ་ཅི་སྨོས། ད་ནི་སངས་རྒྱས་རྗེས་སུ་དྲན་པའི་ལུས་རྣམ་པར་
དབྱེ་བ་བརྗོད་པར་བྱ་སྟེ། ལོངས་སྤྱོད་རྫོགས་པར་མཛད་པའི་སྐུ། །རྣམ་པ་ཉི་ཤུས་བཤད་པ་ཡིན། །ཅིག་ཤོས་བཅོ་བརྒྱད་ཤེས་པར་བྱ། །འདིར་ནི་དེ་གཉིས་ཕྲིན་ལས་བཞི། །དེ་ཡི་མཛད་པའི་འབྲས་བུ་དྲུག །དེ་དངོས་རྣམ་གཉིས་རྒྱུ་རྣམ་བདུན། །མཉམ་པ་ཉིད་ལ་གནས་
བཞིན་དུ། །དེ་དག་ལ་ནི་བསྒོམ་པར་བྱ། །ལོངས་སྤྱོད་རྫོགས་པའི་སྐུ་ནི་རྣམ་པ་ཉི་ཤུས་བཤད་དེ། གཟུགས་སུ་མ་ཡིན་ཞེས་བྱ་བ་ནས་བཟུང་སྟེ། རྣམ་པར་གྲོལ་བའི་ཡེ་ཤེས་མཐོང་བ་མེད་པ་མ་ཡིན་ཞེས་བྱ་བ་ཡན་ཆད་དོ། །གཟུགས་ནི་སྤྱི་ཡིན་ལ། མཚན་དང་དཔེ་བྱད་བཟང་
པོ་གཉིས་ནི་བྱེ་བྲག་ཡིན་པའི་ཕྱིར་བྱེ་བྲག་ཏུ་ཕྱེ་སྟེ་བསྟན་ཏོ། །རྣམ་པར་ཤེས་པ་སྨོས་པས་ནི། ལྷན་ཅིག་སྤྱོད་པའི་ཚོར་བ་ལ་སོགས་པ་ཡང་བསྡུ་སྟེ། དེས་ནི་རྣམ་པར་སྨིན་པའི་ཕུང་པོ་ལྔ་པོ་འདི་བསྟན་ཏོ། །དེའི་རྒྱུ་ནི་ཉོན་མོངས་པའོ། །ཉོན་མོངས་པ་ཡང་དཀའ་བ་སྤྱོད་པ་དང་། སྦྱིན་པ་
ལ་སོགས་པའི་མཚན་ཉིད་དོ། །ཟག་པ་མེད་པའི་ཕུང་པོ་ལྔའི་རྒྱུ་ཡང་དེ་ཉིད་དེ། དེས་ན་བར་དུ་བསྟན་ནོ། །ཚུལ་ཁྲིམས་ནི་རྣམ་པ་གསུམ་སྟེ། སྡོམ་པའི་ཚུལ་ཁྲིམས་དང་། སེམས་ཅན་གྱི་དོན་བྱེད་པའི་ཚུལ་ཁྲིམས་དང་། དགེ་བའི་ཆོས་སྡུད་པའི་ཚུལ་ཁྲིམས་སོ། །ཏིང་ངེ་འཛིན་ནི་
ཟག་པ་དང་། ཟག་པ་མེད་པ་དང་། རོ་མྱང་བར་བྱེད་པ་དང་ལྡན་པའི་བྱེ་བྲག་གིས་རྣམ་པ་གསུམ་ཡོད་མོད་ཀྱི། འདིར་ནི་ཟག་པ་མེད་པ་གཟུང་ངོ་། །ཤེས་རབ་ནི་རབ་ཏུ་དགའ་བ་ལ་སོགས་པའི་སས་བསྡུས་པའོ། །རྣམ་པར་གྲོལ་བ་ནི་ཉོན་མོངས་པ་དང་། ཤེས་བྱའི་སྒྲིབ་པ་སྤངས་པའོ། །

73-1-25a

རྣམ་པར་གྲོལ་བའི་ཡེ་ཤེས་མཐོང་བ་ནི་སྒྲིབ་པ་གཉིས་ལས་ངེས་པར་གྲོལ་བའི་ཐམས་ཅད་མཁྱེན་པའི་ཡེ་ཤེས་གང་ཡིན་པའོ། །ཡང་ན་ཡེ་ཤེས་ནི་ཡེ་ཤེས་ཉིད་དོ། །མཐོང་བ་ནི་མངོན་པར་ཤེས་པ་རྣམས་སོ། །སྐྱེ་བར་མ་ཡིན་ཞེས་བྱ་བ་ནས་བཟུང་སྟེ། 
ཕུང་པོ་དང་ཁམས་དང་སྐྱེ་མཆེད་མེད་པར་མ་ཡིན་ཞེས་བྱ་བའི་བར་རྣམས་ནི། རྣམ་པ་བཅོ་བརྒྱད་ཀྱིས་སྤྲུལ་པའི་སྐུ་བསྟན་པར་ཤེས་པར་བྱ་སྟེ། སྐྱེ་བ་ནི་མངལ་ན་གནས་པ་བཟུང་ངོ་། །རིགས་ནི་ཤཱཀྱའི་རིགས་ལ་སོགས་པའོ། །རུས་ནི་གཽ་ཏམ་ལ་སོགས་པའོ། །འཁོར་ནི་ཉན་
ཐོས་དང་བྱང་ཆུབ་སེམས་དཔའ་དང་། རྒྱལ་པོ་ལ་སོགས་པའོ། །གནས་པ་ནི་བྱམས་པ་ལ་སོགས་པ་དང་། སངས་རྒྱས་ཀྱི་གནས་པ་ལ་སོགས་པའོ། །ཐོབ་པ་ནི་ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བའི་ལམ་ཐོབ་པའོ། །མངོན་པར་རྟོགས་པ་ནི་ཐམས་ཅད་མཁྱེན་པའི་ཡེ་
ཤེས་ཏེ། གང་གི་ཕྱིར་འདིར་གཙོ་བོར་ཀུན་ནས་ཁོང་དུ་ཆུད་པ་མངོན་པར་རྟོགས་པ་ཡིན་པའི་ཕྱིར་རོ། །ཉོན་མོངས་པ་ནི་འདོད་ཆགས་ལ་སོགས་པའོ། །ཕུང་པོ་ལ་སོགས་པ་ནི་ཟག་པ་དང་བཅས་པ་དང་། ཟག་པ་མེད་པ་རྣམ་པ་གཉིས་ཏེ། མཐུན་མཐུན་དུ་གཟུང་བར་བྱའོ། །དེ་དག་
ཐམས་ཅད་ཀྱང་བཅོམ་ལྡན་འདས་ཀྱིས་གདུལ་བའི་བསམ་པའི་བྱེ་བྲག་གིས་བསྟན་ཏོ། །ལོངས་སྤྱོད་རྫོགས་པ་དང་། སྤྲུལ་པའི་སྐུ་དེ་གཉིས་ཀྱི་ཕྲིན་ལས་ནི་རྣམ་པ་བཞིར་གསུངས་པར་རིག་པར་བྱ་སྟེ། ཤེས་པར་མ་ཡིན་ཞེས་བྱ་བ་ནས་བཟུང་སྟེ། ཆོས་མི་སྟོན་པར་མ་ཡིན་ཞེས་བྱ་བ་ཡན་
ཆད་དོ། །དེ་ལ་གདུལ་བ་རྣམས་ཀྱི་ཁམས་དང་། བསམ་པ་དང་། དབང་པོ་དང་། སྤྱོད་པ་ལ་སོགས་པ་ལ་ལྟ་བ་ནི་ཤེས་པའོ། །ཁམས་ལ་སོགས་པ་ལ་གཟིགས་ནས་ཉོན་མོངས་པ་སྤང་བའི་ཐབས་སྟོན་པ་ནི་ཆོས་སྟོན་པའོ། །ལོངས་སྤྱོད་རྫོགས་པ་དང་སྤྲུལ་པའི་སྐུ་དེ་གཉིས་ཀྱིས་མཛད་
པའི་འབྲས་བུ་ནི་རྣམ་པ་དྲུག་ཏུ་གསུངས་པར་ཤེས་པར་བྱ་སྟེ། བདག་རྣམ་པར་དག་པར་མ་ཡིན་ཞེས་བྱ་བ་ནས་བཟུང་སྟེ། གཞན་གྱི་དོན་དུ་མ་ཡིན་ཞེས་བྱ་བ་ཡན་ཆད་དོ། །བདག་རྣམ་པར་དག་པར་བྱ་བ་ནི་ཉན་ཐོས་རྣམས་ཀྱིའོ། །གཞན་རྣམ་པར་དག་པར་བྱ་བ་ནི་བྱང་ཆུབ་སེམས་དཔའ་

73-1-25b

རྣམས་ཀྱིའོ། །སེམས་ཅན་རྣམ་པར་དག་པར་བྱ་བ་ནི་གང་ཟག་ལ་མངོན་པར་ཞེན་པ་རྣམས་ཀྱིའོ། །སེམས་ཅན་མེད་པ་རྣམ་པར་དག་པར་བྱ་བ་ནི་བདག་མེད་པ་མཐོང་བ་རྣམས་ཀྱིའོ། །བདག་གི་དོན་ནི་ཉན་ཐོས་ལ་སོགས་པ་རྣམས་ཀྱིའོ། །གཞན་གྱི་དོན་ནི་བྱང་ཆུབ་སེམས་དཔའ་རྣམས་ཀྱིའོ། །
དེའི་དངོས་པོ་རྣམ་པ་གཉིས་ནི་ཕྲིན་ལས་ཐ་མའི་ངོ་བོ་རྣམ་པ་གཉིས་སུ་གསུངས་པར་ཤེས་པར་བྱ་སྟེ། ཆོས་སུ་མ་ཡིན། འདུལ་བ་མ་ཡིན་ཞེས་བྱ་བ་སྟེ་། ཆོས་ནི་མདོ་སྡེ་ལ་སོགས་པའོ། །འདུལ་བ་ནི་བྱང་ཆུབ་སེམས་དཔའི་འདུལ་བའི་སྡེ་སྣོད་དང་། ཉན་ཐོས་ཀྱི་འདུལ་བའི་སྡེ་སྣོད་དོ། །
མཛད་པའི་འབྲས་བུ་རྒྱུ་གང་གིས་འགྲུབ་པར་འགྱུར་བའི་རྒྱུ་དེ་ནི་རྣམ་པ་བདུན་དུ་གསུངས་ཏེ། ལུས་རྣམ་པར་དག་པར་མ་ཡིན་ཞེས་བྱ་བ་ནས་བཟུང་སྟེ། ད་ལྟར་བྱུང་བའི་སྤྱོད་པ་རྣམ་པར་དག་པར་མ་ཡིན་ཞེས་བྱ་བ་ཡན་ཆད་དོ། །ལུས་རྣམ་པར་དག་པ་ནི་ལུས་ཀྱི་ལས་རྣམ་པ་གསུམ་ཡོངས་
སུ་དག་པའོ། །ངག་རྣམ་པར་དག་པ་ནི་ངག་གི་ལས་རྣམ་པ་བཞི་ཡོངས་སུ་དག་པའོ། །ཡིད་རྣམ་པར་དག་པ་ནི་ཡིད་ཀྱི་ལས་རྣམ་པ་གསུམ་ཡོངས་སུ་དག་པ་སྟེ། ཐབས་འདིས་ནི་ཉན་ཐོས་ལ་སོགས་པའི་བྱ་བའི་འབྲས་བུ་འགྲུབ་པོ། །བྱང་ཆུབ་སེམས་དཔའ་རྣམས་ཀྱི་འབྲས་བུ་ནི་སྤྱོད་
པ་རྣམ་པར་དག་པས་འགྲུབ་སྟེ། སྤྱོད་པ་ནི་ཕ་རོལ་ཏུ་ཕྱིན་པ་བཅུའོ། །ཤིན་ཏུ་མྱུར་ན་བསྐལ་པ་གྲངས་མེད་པ་གསུམ་གྱིས་སངས་རྒྱས་སུ་འགྱུར་ཏེ། དེའི་ཕྱིར་སྤྱོད་པ་འདི་ནི་ཡུན་རིང་མོ་ཞིག་གིས་རྣམ་པར་དག་པར་འགྱུར་བས་སྔོན་གྱི་མཐའ་ལ་སོགས་པ་སྨོས་སོ། །བདག་གི་རྣམ་པར་མ་ཡིན། 
གཞན་གྱི་རྣམ་པར་མ་ཡིན་ཞེས་བྱ་བ་ནི་སངས་རྒྱས་རྗེས་སུ་དྲན་པ་དེ་རྣལ་འབྱོར་ཅན་གྱིས་མཉམ་པ་ཉིད་ལ་གནས་ནས་བསྒོམ་པར་བྱའི། དེ་མ་ཡིན་པར་མི་བྱ་བར་བསྟན་ཏོ། །བདག་ཅེས་སྨོས་པ་ནི་སྒོམ་པ་པོ་བསྟན་ཏོ། །གཞན་ཞེས་སྨོས་པ་ནི་བསྒོམ་པར་བྱ་བ་དང་། བསྒོམ་པའི་རྣམ་པ་བསྟན་
ཏོ། །མཉམ་པ་ཉིད་ནི་བསྒོམ་པར་བྱ་བ་དེ་བཞིན་གཤེགས་པ་དང་། སྒོམ་པ་པོ་རྣལ་འབྱོར་ཅན་དང་། གཟུགས་ལ་སོགས་པ་རྣམ་པ་གང་གིས་བསྒོམ་པར་བྱ་བ་སྟེ། དེ་ཡང་དེ་བཞིན་ཉིད་དུ་རོ་གཅིག་པའི་ཕྱིར་ཏེ། དེ་ལྟར་ན་སངས་རྒྱས་རྗེས་སུ་དྲན་པ་འཁོར་གསུམ་ཡོངས་སུ་དག་པར་

73-1-26a

བསྒོམ་པ་ཡིན་ནོ། །དེ་ལྟར་མ་བྱས་ན་ནི་དམིགས་པ་ཁོ་ནར་ལྟུང་བར་འགྱུར་རོ། །རྣམ་པ་གཞན་ཡང་། ཡང་ན་ལོངས་སྤྱོད་རྫོགས་པའི་སྐུ། །རྒྱུ་དང་བཅས་དང་འབྲས་བུར་བཅས། །ཡང་དག་ཏུ་ན་གང་མ་མཐོང་། །དེ་ནི་སངས་རྒྱས་རྗེས་སུ་དྲན། །ལོངས་སྤྱོད་
རྫོགས་པ་ཉི་ཤུ་སྟེ། །སྔ་མ་བཞིན་ནོ། །ཉོན་མོངས་ཞེས་པ་ནི། བཤད་པ་འདིའི་སྐབས་སུ་ཉོན་མོངས་པ་རྣམ་པ་གཉིས་ལ་བྱའོ། །འབྲས་བུ་ཉི་ཤུ་གཉིས་སུ་བཞེད། །སྐྱེ་བར་མ་ཡིན་ཞེས་བྱ་བ་ནས་བཟུང་སྟེ། ཆོས་མི་སྟོན་པར་མ་ཡིན་ཞེས་བྱ་བ་ཡན་ཆད་དོ། །སྤྲུལ་པའི་སྐུ་དེའི་འབྲས་བུ་
ཡིན་ནོ། །དེའི་རྒྱུ་ནི་བཅོ་ལྔ་སྟེ། ལོངས་སྤྱོད་རྫོགས་པའི་སྐུ་དེའི་རྒྱུའི་གྲངས་ནི་བཅོ་ལྔའོ་ཞེས་བྱ་བའི་ཐ་ཚིག་གོ། །བདག་རྣམ་པར་དག་པར་བྱ་བར་མ་ཡིན་ཞེས་བྱ་བ་ནས་བཟུང་སྟེ། ད་ལྟར་བྱུང་བའི་སྤྱོད་པ་རྣམ་པར་དག་པར་མ་ཡིན་ཞེས་བྱ་བ་ཡན་ཆད་དོ། །ཅིའི་ཕྱིར་རྣམ་པ་བཅོ་ལྔ་
ཞེ་ན། སྨྲས་པ། གང་གི་ཕྱིར་ནི་ནན་ཏན་བྱེད། །ཇི་ལྟར་གང་ལ་བྱེ་བྲག་གིས། །ཅིའི་ཕྱིར་ནན་ཏན་བྱེད་ཅེ་ན། བདག་རྣམ་པར་དག་པར་བྱ་བའི་ཕྱིར་དང་། གཞན་རྣམ་པར་དག་པར་བྱ་བའི་ཕྱིར་དང་། སེམས་ཅན་རྣམ་པར་དག་པར་བྱ་བའི་ཕྱིར་དང་། བདག་གི་དོན་དང་གཞན་གྱི་དོན་
གྱི་ཕྱིར་རོ། །དེ་ལ་བདག་རྣམ་པར་དག་པར་བྱ་བ་ནི་གཞན་རྣམ་པར་དག་པར་བྱ་བའི་ཐབས་སུ་གྱུར་པ་ཡིན་པའི་ཕྱིར་སྔར་བཤད་དེ། བྱང་ཆུབ་སེམས་དཔའ་རྣམས་ཀྱི་ནི་གཞན་རྣམ་པར་དག་པ་གཙོ་བོ་ཡིན་པའི་ཕྱིར་རོ། །རྣམ་པར་དག་པ་འདི་གཉིས་ནི་ཉོན་མོངས་པ་དང་། ཤེས་
བྱའི་སྒྲིབ་པ་སྤོང་བའི་མཚན་ཉིད་དེ། བདག་དང་གཞན་དང་མཐུན་མཐུན་དུ་སྦྱར་རོ། །རྣམ་པར་དག་པ་དེ་གཉིས་ཀ་ཡང་སེམས་ཡིན་པའི་ཕྱིར་དེའི་འོག་ཏུ་སེམས་ཅན་རྣམ་པར་དག་པར་བྱ་བ་བསྟན་ཏེ། སེམས་ཅན་ནི་སེམས་ཡིན་ནོ། །ཡང་ན་རྣམ་པར་དག་པ་འདི་གཉིས་ལ་བརྟེན་ནས། སེམས་རྣམ་
པར་དག་པ་ཐོབ་པའི་ཕྱིར། སེམས་ཅན་རྣམ་པར་དག་པར་བྱ་བར་བསྟན་ཏོ། །བདག་ཉིད་སྟོབས་བཅུ་དང་མི་འཇིགས་པ་ལ་སོགས་པ་ཡོན་ཏན་རྣམས་ཀྱི་སྣོད་དུ་འགྱུར་བར་བྱ་བ་ནི་བདག་གི་དོན་ཏོ། །གཞན་དག་ཐེག་པ་གསུམ་ལ་གནས་པའི་ཡོན་ཏན་རྣམས་དང་། བདེ་འགྲོའི་སྣོད་དུ་

73-1-26b

འགྱུར་བར་བྱ་བ་ནི་གཞན་གྱི་དོན་ཏེ། དེ་གཉིས་ཀྱི་སྔོན་དུ་དག་པ་འགྲོ་བས་དེའི་ཕྱིར་ཕྱིས་བསྟན་ཏོ། །ཇི་ལྟར་ན་ནན་ཏན་བྱེད་ཅེ་ན། ཆོས་དང་འདུལ་བས་སོ། །གང་ལ་ནན་ཏན་བྱེད་ཅེ་ན། དེ་ནི། ཟག་བཅས་ཅིག་ཤོས་བྱེ་བྲག་གིས། །བྱ་བ་རྣམ་གཉིས་ཤེས་པར་བྱ། །ཅིག་ཤོས་ཞེས་
བྱ་བ་ཟག་པ་མེད་པའོ། །ཟག་པ་དང་བཅས་པའི་ལུས་རྣམ་པར་དག་པ་ལ་སོགས་པ་བསྟན་ཏོ། །ཟག་པ་མེད་པ་ནི་སྤྱོད་པ་རྣམ་པར་དག་པའོ། །སྤྱོད་པ་རྣམ་པར་དག་པ་ནི་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་རྣམས་ཏེ། །དེ་ཡང་འདིར་སས་བསྡུས་པ་གཟུང་བར་བྱའོ། །ལུས་རྣམ་པར་
དག་པ་ལ་སོགས་པ་ནི་སྤྱོད་པ་རྣམ་པར་དག་པའི་སྔོན་དུ་འགྲོ་བའི་ཕྱིར་ཕྱིས་བསྟན་ཏོ། །ལྷག་མ་དག་ནི་སྔར་བཤད་བཞིན། །མ་ལུས་པར་བཟུང་ངོ་ཞེས་བྱ་བའི་ཚིག་གི་ལྷག་མའོ།    །ད་ནི་སངས་རྒྱས་རྗེས་སུ་དྲན་པ་དེ་ཉིད་ཀྱི་རྣམ་གྲངས་བརྗོད་པས་བསྟོད་པར་མཛད་དེ། སར་པ་འཇུག་
པའི་རྒྱུ་ཉིད་ཡིན། །གང་ཚེ་དེ་ལས་མ་འཐོབ་པ། །སངས་རྒྱས་ཉིད་དུ་གཅིག་ཏུ་ངེས། །སངས་རྒྱས་ཉིད་ཀྱི་ས་འཐོབ་ལ། །གནས་སྐབས་དག་ནི་ཐམས་ཅད་དུ། །བདུད་ཀྱི་ལས་ནི་རྣམ་སྤོང་ན། །གཟུངས་ཀྱིས་འཐོབ་པར་མི་འགྱུར་གང་། །ཐོབ་བྱ་གཞན་ནི་ཅི་ཞིག་ཡོད། །ཤེས་པ་གང་གིས་ཆོས་
ཐམས་ཅད་ཀྱི་དངོས་པོ་ཡོད་པ་དང་། དངོས་པོ་མེད་པ་ལ་སོགས་པའི་ངོ་བོར་མི་འཛིན་པ་དེ་ནི། ཆོས་ཐམས་ཅད་མི་འཛིན་པར་མོས་པས་སྤྱོད་པའི་ས་ཆེན་པོའི་ཆེན་པོས་བསྡུས་པའི་ཤེས་པ་སྟེ། དེ་འདིས་འཇུག་པར་བྱེད་པས་ན། ཆོས་ཐམས་ཅད་མི་འཛིན་པ་ལ་འཇུག་པ་ཞེས་བྱ་བའི་སངས་རྒྱས་
རྗེས་སུ་དྲན་པ་སྟེ། འདིས་ནི་གཟུངས་མོས་པས་སྤྱོད་པའི་ས་ཆེན་པོའི་ཆེན་པོ་ལ་འཇུག་པའི་རྒྱུ་ཉིད་དུ་བསྟན་ཏོ། །ཆོས་ཐམས་ཅད་ཡང་དག་པར་འདུ་བ་ནི་སྟོང་པ་ཉིད་དེ། དེར་ཆོས་ཐམས་ཅད་དེའི་བདག་ཉིད་དུ་འདུ་བའོ། །དེ་ལ་མི་འཇིགས་པ་ནི་མི་སྐྲག་པའོ། །མི་སྐྲག་པ་ནི་ས་དང་པོ་སྟེ། 
དེ་རྟོགས་པས་དེ་ལ་མི་འཇིགས་སོ། །དེ་གཟུངས་འདིས་འཐོབ་པར་འགྱུར་བས་ན། ཆོས་ཐམས་ཅད་ཡང་དག་པར་འདུ་བ་ལ་མི་འཇིགས་པ་འཐོབ་པ་ཞེས་བྱ་བའི་གཟུངས་སོ། །དེ་ཅིའི་ཕྱིར་ཞེ་ན། དེའི་ཕྱིར་དོན་དམ་པ་སྒྲུབ་པས་ཞེས་གསུངས་སོ། །དོན་དམ་པ་ནི་ཆོས་ཀྱི་སྐུ་སྟེ། 

73-1-27a

དོན་དམ་པ་སྒྲུབ་པ་དེས་ནི་གཟུངས་འདི་ས་དང་པོ་ལ་སོགས་པའི་རྒྱུར་བསྟན་ཏོ། །གཟུངས་འདིས་གཅིག་ཏུ་ངེས་པར་སངས་རྒྱས་སུ་འགྱུར་ཏེ། འདི་ལྟར་གཅིག་ཏུ་ངེས་པ་ནི་སངས་རྒྱས་ཉིད་གདོན་མི་ཟ་བ་སྟེ། དེ་འཐོབ་པའོ། །དེ་བས་ན་གཅིག་ཏུ་ངེས་པ་འཐོབ་པའི་
ཕྱིར་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་ཞེས་བྱ་བའི་ཏིང་ངེ་འཛིན་ཏོ། །འདིས་ནི་ས་བརྒྱད་པ་ལ་སོགས་པ་འཐོབ་པར་བསྟན་ཏེ། ས་བརྒྱད་པ་ལ་ནི་གཅིག་ཏུ་ངེས་པ་འཐོབ་བོ། །སངས་རྒྱས་ཀྱི་ས་ཡང་གཟུངས་འདི་ཉིད་ཀྱིས་འཐོབ་པར་འགྱུར་ཏེ། འདི་ལྟར་འཇིག་རྟེན་
པ་དང་། འཇིག་རྟེན་ལས་འདས་པའི་དགེ་བ་ཐམས་ཅད་གང་གི་རྩ་བ་རྒྱུ་ཡིན་པ་དེ་ནི་དགེ་བ་ཐམས་ཅད་ཀྱི་རྩ་བ་ཅན་ནོ། །དེ་ནི་དགེ་བ་ཐམས་ཅད་ཀྱི་རྩ་བ་ཅན་ཡང་ཡིན་ལ། གཞན་ལ་རག་མ་ལས་པའི་ཡེ་ཤེས་ཀྱང་ཡིན་ཏེ། གཞན་ལ་རག་མ་ལས་པའི་ཡེ་ཤེས་ནི་རང་བྱུང་གི་ཡིན་ནོ། །
ཡང་ན་དགེ་བའི་རྩ་བ་ཐམས་ཅད་ལ་གཞན་ལ་རག་མ་ལས་པའི་ཡེ་ཤེས་ཞེས་བྱ་བར་རྟོགས་པར་བྱའོ། །དེ་རྟོགས་པ་ནི་འདིས་རྟོགས་པར་བྱེད་པས་ན་གཟུངས་འདི་ཉིད་ཡིན་ནོ། །དེ་ལྟ་བས་ན་དགེ་བའི་རྩ་བ་ཐམས་ཅད་ལ་གཞན་ལ་རག་མ་ལས་པའི་ཡེ་ཤེས་རྟོགས་པའི་ཕྱིར། ཆོས་ཀྱི་
གཏེར་གྱི་རིགས་ལས་བྱུང་བའི་མཚན་དང་། དཔེ་བྱད་བཟང་པོས་གནས་པ་ཟིལ་གྱིས་མི་ནོན་པ་ཞེས་བྱ་བའི་གཟུངས་ཏེ། འཇིག་རྟེན་པ་དང་། འཇིག་རྟེན་ལས་འདས་པའི་ཆོས་རྣམས་ཀྱི་གཏེར་ནི་སངས་རྒྱས་བཅོམ་ལྡན་འདས་སོ། །དེ་ཉིད་རིགས་ཡིན་ཏེ། མཚན་དང་། དཔེ་བྱད་
བཟང་པོ་དེ་དག་གི་སྐྱེ་བའི་གནས་སོ། །ཆོས་ཀྱི་གཏེར་གྱི་རིགས་ལས་བྱུང་བའི་མཚན་དང་དཔེ་བྱད་བཟང་པོ་བྱེད་པར་གྱུར་པ་དེ་དག་གིས་ན། །གཞན་སུ་དག་གིས་ཀྱང་གཟུངས་འདིའི་གནས་པ་ཟིལ་གྱིས་མི་ནོན་ཞེས་ཚིག་རྣམ་པར་སྦྱར་རོ། །འདི་ལས་མོས་པས་སྤྱོད་པའི་ས་ལ་སོགས་པའི་
གནས་སྐབས་ཐམས་ཅད་ལ་གནས་པའི་རྣལ་འབྱོར་ཅན་གྱིས་བདུད་ཀྱི་ལས་རྣམ་པར་སྤོང་བ་ཡང་འཐོབ་པར་འགྱུར་རོ། །ཅིའི་ཕྱིར་ཞེ་ན། དེ་ཕྱིར་དམ་པ་ཞེས་གསུངས་ཏེ། སངས་རྒྱས་ཉིད་དོ། །འདིས་ཀུན་ནས་སྔོན་དུ་ཚོལ་བས་ན། དམ་པ་ཡོངས་སུ་ཚོལ་བ་ནི་སྟོང་པ་ཉིད་དེ། དེ་ལ་མཁས་པའོ། །དེ་ལྟ་

73-1-27b

བས་ན་དམ་པ་ཡོངས་སུ་ཚོལ་བ་ལ་མཁས་པའི་ཕྱིར། བདུད་ཀྱི་ལས་ཐམས་ཅད་ཡང་དག་པར་འདའ་བ་ཞེས་བྱ་བའི་གཟུངས་ཏེ། རྣམ་གྲངས་དེ་དག་གིས་གཟུངས་ནི་དོན་ཐམས་ཅད་འཐོབ་པའི་རྒྱུ་ཡིན་པའི་ཕྱིར་དོན་ཆེ་བ་ཉིད་དུ་བསྟན་པ་ཡིན་ནོ། །རྣམ་པ་གཞན་ཡང་། ཡང་ན་
དད་པས་མོས་ལ་སོགས། །དབང་དུ་མཛད་དེ་གོ་རིམས་བཞིན། །མིང་རྣམ་ལྔ་པོ་འདི་དག་ནི། །དོན་དང་མཐུན་པར་གསུངས་པ་ཡིན། །འདི་ལྟར་དད་པས་མོས་པ་རྣམས་ཀྱི་དབང་དུ་མཛད་ནས་མིང་དང་པོ་གསུངས་ཏེ། དེ་དག་ཆོས་ཐམས་ཅད་མི་འཛིན་པ་ལ་འཇུག་པའི་ཕྱིར་རོ། །
མི་སྐྱེ་བའི་ཆོས་ལ་བཟོད་པ་ཐོབ་པ་རྣམས་ཀྱི་དབང་དུ་མཛད་ནས་མིང་གཉིས་པ་གསུངས་ཏེ། དེ་དག་གིས་ཆོས་ཐམས་ཅད་ཡང་དག་པར་འདུ་བ་ལ་མི་འཇིགས་པ་འཐོབ་པའི་ཕྱིར་རོ། །ཕྱིར་མི་ལྡོག་པ་རྣམས་ཀྱི་དབང་དུ་མཛད་ནས་མིང་གསུམ་པ་གསུངས་ཏེ། དེ་དག་གིས་གཅིག་ཏུ་
ངེས་པ་འཐོབ་པའི་ཕྱིར་རོ། །སྐྱེ་བ་གཅིག་གིས་ཐོགས་པའི་དབང་དུ་མཛད་ནས་མིང་བཞི་པ་གསུངས་ཏེ། དེ་དག་དགེ་བའི་རྩ་བ་ཐམས་ཅད་ལ་གཞན་ལ་རག་མ་ལུས་པའི་ཡེ་ཤེས་རྟོགས་པས། ཇི་སྐད་གསུངས་པ་ཐམས་ཅད་འགྲུབ་པོ། །ཡང་ན་དངོས་པོ་ཐམས་ཅད་རྟོགས་པ་ན་
དགེ་བའི་རྩ་བ་བསོད་ནམས་དང་ཡེ་ཤེས་ཀྱི་ཚོགས་ཀྱི་མཚན་ཉིད་དེ་དག་ཐམས་ཅད་སྒྲུབ་པའི་ཕྱིར། གཞན་ལ་རག་ལས་པ་མེད་པའི་ཡེ་ཤེས་སྒྲུབ་བོ། །སྒྲུབ་པ་ཞེས་བྱ་བ་ནི་ནན་ཏན་བྱེད་པ་སྟེ། དེ་ལས་ཇི་སྐད་གསུངས་པ་ཐམས་ཅད་འགྲུབ་པར་འགྱུར་རོ། །སྲིད་པ་ཐ་མ་པ་རྣམས་
ཀྱི་དབང་དུ་མཛད་ནས་མིང་ལྔ་པ་གསུངས་ཏེ། དེ་དག་བྱང་ཆུབ་ཀྱི་ཤིང་དྲུང་ཁོ་ནར་བྱང་ཆུབ་འཐོབ་པའི་ཚེ། སྟོང་པ་ཉིད་ལ་གོམས་པས་བདུད་ཀྱི་ལས་ཐམས་ཅད་ལས་ཡང་དག་པར་འདའ་བར་འགྱུར་རོ།    །ད་ནི་ཤཱ་རིའི་བུ་བྱང་ཆུབ་སེམས་དཔའ་གང་དག་ཅེས་བྱ་བ་ལ་
སོགས་པས་ཕན་ཡོན་བསྟན་ཏེ། འབྲས་བུ་ཡང་དག་བསྟན་པས་ཀྱང་། །གདུལ་བ་རྣམས་ནི་འཇུག་འགྱུར་ཏེ། །དེ་ཡི་ཕྱིར་ན་ཐུབ་པ་ཡིས། །ཐུགས་རྗེས་ཕན་ཡོན་ཡང་དག་གསུངས། །ཆོས་དང་དད་པས་རྗེས་འབྲང་བའི། །དབང་མཛད་འདི་ཡི་ཕན་ཡོན་གཉིས། །རྒྱལ་བས་

73-1-28a

གསུངས་ཏེ་སྔ་མ་སྔ། །ཕྱི་མ་པོ་ནི་ཕྱི་མ་ཡིན། །གདུལ་བའི་རྣམ་པ་གཉིས་ཡིན་ཏེ། །ཆོས་ཀྱི་རྗེས་སུ་འབྲང་བ་དང་། །དད་པས་རྗེས་སུ་འབྲང་བའོ། །དེ་ལ་སྔ་མ་ཆོས་ཀྱི་རྗེས་སུ་འབྲང་བའི་དབང་དུ་མཛད་ནས་ཕན་ཡོན་སྔ་མ་སྟེ། འཐད་པ་དང་བཅས་པ་བསྟན་པའོ། །
ཕྱི་མ་དད་པས་རྗེས་སུ་འབྲང་བའི་དབང་དུ་མཛད་ནས་ཕན་ཡོན་ཕྱི་མ་སྟེ། ཚིགས་སུ་བཅད་པ་རྣམས་ཀྱིས་བསྟན་ཏོ། །ཡང་ན་ཕན་ཡོན་གཉིས་ཀ་ཡང་། །ཆོས་དང་དད་པས་རྗེས་འབྲང་བའི། །ཕྱི་མ་སྔ་མའི་བཏགས་པ་ཡིན། །ཕྱི་མ་ཡི་ནི་གཉི་ག་དངོས། །ཡང་ན་ཕན་ཡོན་སྔ་མ་ནི་
འཐད་པ་དང་བཅས་པའི་ཕྱིར། སྔ་མ་ཆོས་ཀྱི་རྗེས་སུ་འབྲང་བའི་དངོས་ཡིན་ལ། ཕན་ཡོན་ཕྱི་མ་ནི་བཏགས་པ་ཡིན་ཏེ། དེ་དག་ཀྱང་དེ་ལ་ཤས་ཀྱིས་ཕན་འདོགས་པའི་ཕྱིར་རོ། །ཕྱི་མ་དད་པས་རྗེས་སུ་འབྲང་བ་ལ་ནི་ཕན་ཡོན་གཉི་གས་ལྷུར་ཕན་འདོགས་པའི་ཕྱིར་དངོས་ཡིན་ནོ། །
སྟོབས་དང་ཕ་རོལ་ཕྱི་ནས་དང་། །མི་འཇིགས་ཡོན་ཏན་ལ་སོགས་པ། །རྣམ་ཐར་སྒོ་དང་མངོན་ཤེས་དང་། །ཏིང་འཛིན་གཟུངས་སྒོ་མཐའ་ཡས་པའམ། །དེ་དག་མཐའ་ཡས་ཐབས་རྣམས་ཀྱི། །སྒྲུབ་པར་བྱེད་པ་གང་ཡིན་པ། །དེ་ཕྱིར་མཐའ་ཡས་སྒོས་བསྒྲུབ་པའི། །
གཟུངས་ཞེས་བྱ་བར་བསྒྲགས་པ་ཡིན། །སྟོབས་ནི་གནས་དང་གནས་མ་ཡིན་པ་མཁྱེན་པའི་སྟོབས་ལ་སོགས་པ་བཅུའོ། །ཕ་རོལ་ཏུ་ཕྱིན་པ་ནི་སྦྱིན་པ་ལ་སོགས་པ་བཅུའོ། །ས་ནི་མོས་པས་སྤྱོད་པའི་ས་ཡན་ཆད། སངས་རྒྱས་ཀྱི་ས་ཀུན་དུ་འོད་མན་ཆད་ས་བཅུ་གཉིས་སོ། །མི་འཇིགས་
པ་ནི་ས་བཅུའོ། །སོགས་པའི་སྒྲས་ནི། དྲན་པ་ཉེ་བར་གཞག་པ་གསུམ་དང་། ཐུགས་རྗེ་ཆེན་པོ་དང་། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། བྱམས་པ་ལ་སོགས་པའི་ཡོན་ཏན་རྣམས་བསྡུའོ། །རྣམ་པར་ཐར་པའི་སྒོ་རྣམས་ནི་ཐུགས་རྗེ་ཆེན་པོ་དང་། བཤོལ་བ་
མེད་པ་ལ་སོགས་པའོ། །མངོན་པར་ཤེས་པ་རྣམས་ནི་ལྷའི་མིག་ལ་སོགས་པ་ལྔའོ། །ཏིང་ངེ་འཛིན་རྣམས་ནི་ནམ་མཁའི་མཛོད་ལ་སོགས་པའོ། །གཟུངས་ཀྱི་སྒོ་ནི་ཆོས་ཟབ་མོ་ལ་བཟོད་པའི་གཟུངས་ཀྱི་སྒོ་ལ་སོགས་པ་སྟེ། གང་གི་ཕྱིར་མཐའ་ཡས་པ་འདི་དག་ཐམས་

73-1-28b

ཅད་སྒྲུབ་ཅིང་རྫོགས་པར་བྱེད་པ་དེའི་ཕྱིར། སྒོ་མཐའ་ཡས་པ་སྒྲུབ་པའི་གཟུངས་ཞེས་བསྒྲགས་སོ། །ཡང་ན་གང་གི་ཕྱིར་ཇི་སྐད་བསྟན་པ་འདི་དག་ཐམས་ཅད་མཐའ་ཡས་སྒྲུབ་པ་དེའི་ཕྱིར། སྒོ་མཐའ་ཡས་པས་སྒྲུབ་པ་ཞེས་བསྒྲགས་སོ། །འདིར་ནི་དོན་གྱི་གཟུངས་ཡིན་པའམ། །
ཡང་ན་གཟུངས་དོན་སྟོན་པ་ཡི། །ཡི་གེའི་ཚོགས་ནི་འདི་ཉིད་ལ། །གཟུངས་ཞེས་བྱ་བར་དགོངས་པ་ཡིན། །ཐོས་སོགས་ལས་བྱུང་ཤེས་པ་རྣམས། །ཆུང་དང་འབྲིང་ལ་སོགས་ལྡན་པས། །གཟུངས་ཀྱི་དོན་ནི་ཐོབ་གྱུར་ནས། །བྱང་ཆུབ་སེམས་དཔར་འགྱུར་བ་གང་། །དེ་དག་
ཕྱིར་མི་ལྡོག་ཉིད་དུ། །མཚུངས་ཏེ་དུས་ནི་ཐ་དད་དོ། །བྱང་ཆུབ་མྱུར་བ་ཉིད་གསུངས་གང་། །དེ་ནི་གཞན་ལ་ལྟོས་ཏེ་དགོངས། །གང་གི་ཚེ་སྒོ་མཐའ་ཡས་པས་བསྒྲུབ་པའི་གཟུངས་ཞེས་བྱ་བ། འདིར་གཟུངས་ཉིད་སངས་རྒྱས་རྗེས་སུ་དྲན་པའི་མཚན་ཉིད་དུ་བཟུང་བ་དེའི་ཚེ་ནི། དོན་
ཐོབ་པ་ཞེས་བྱ་བ་འདི་ལ་དོན་གྱི་སྒྲ་ནི་ངོ་བོ་ཉིད་དུ་བསྟན་པ་ཡིན་ཏེ། ངོ་བོ་ཉིད་དེ་ཡང་འདིར་སངས་རྒྱས་རྗེས་སུ་དྲན་པ་ཉིད་ལ་བྱའོ། །གང་གི་ཚེ་གཟུངས་ཀྱི་དོན་སྟོན་པའི་ཡི་གེའི་ཚོགས་ལ་འདིར་གཟུངས་ཞེས་བྱ་བར་གཟུང་བ་དེའི་ཚེ་ནི། སྒོ་མཐའ་ཡས་པས་བསྒྲུབ་པའི་གཟུངས་འདིའི་དོན་
གང་རྗོད་པར་བྱད་པའི་ངོ་བོར་གནས་པ་ལ་བྱ་བ་སྟེ། དེ་ཡང་སངས་རྒྱས་རྗེས་སུ་དྲན་པ་ཉིད་དེ། དེ་ཐོབ་པ་ནི་ཐོས་པ་ལས་བྱུང་བའི་ཤེས་པའམ། བསམས་པ་ལས་བྱུང་བའམ། བསྒོམས་པ་ལས་བྱུང་བ་ཆུང་ངུའམ། འབྲིང་ངམ། ཆེན་པོའམ། གཅིག་པུ་འམ། གཉིས་སམ། 
མཐའ་དག་གིས་ཐོབ་པའི་བྱང་ཆུབ་སེམས་དཔར་གྱུར་པ་གང་དག་ཡིན་པའོ། །སེམས་ཅན་རྣམས་ལ་བྱང་ཆུབ་ཀྱི་རྣམ་པར་བསྒོམ་པས་ན། བྱང་ཆུབ་སེམས་དཔའ་རྣམས་ཏེ། དེ་དག་ནི་གཟུངས་ཐོབ་པས་སེམས་ཅན་ཐམས་ཅད་ལ་སྟོང་པ་ཉིད་ཀྱི་རྣམ་པར་སྒོམ་པར་བྱེད་དོ། །ཡང་
ན་སེམས་དཔའི་སྒྲ་ནི་དངོས་པོར་བསྟན་པར་བལྟ་བར་བྱ་སྟེ། འདི་དག་ཐམས་ཅད་ནི་ཕྱིར་མི་ལྡོག་པར་མཚུངས་སོ། །ཕྱིར་ལྡོག་པ་ནི་ཕྱིར་ནུར་བ་སྟེ། འཁོར་བ་དང་། ཉན་ཐོས་ལ་སོགས་པའི་བྱང་ཆུབ་ཏུ་ལྟུང་བའོ། །དེ་ཡོད་པ་དག་ནི་ཕྱིར་ལྡོག་པའོ། །ཕྱིར་ལྡོག་པ་མ་ཡིན་པ་

73-1-29a

དག་ནི། ཕྱིར་མི་ལྡོག་པ་དག་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་པ་ཞེས་བྱ་བའི་ཐ་ཚིག་གོ། །དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་པའི་དུས་ལ་ནི་བྱེ་བྲག་ཡོད་དེ། འདི་ལྟར་གང་དག་ཐོས་པ་ལས་བྱུང་
བའི་ཤེས་པ་ཆེན་པོས་གཟུངས་ཀྱི་དོན་ཐོབ་པ་དེ་དག་གི་བྱང་ཆུབ་འཐོབ་པའི་དུས་ནི་རིང་བའོ། །འབྲིང་གིས་ཐོབ་པ་གང་ཡིན་པ་དེ་དག་ནི་ཤིན་ཏུ་རིང་བའོ། །ཆུང་ངུས་ཐོབ་པ་གང་ཡིན་པ་དེ་དག་ནི་ཆེས་ཤིན་ཏུ་རིང་བའོ། །དེ་བཞིན་དུ་བསམས་པ་ལས་བྱུང་བ་ལ་སོགས་པ་ལ་ཡང་
མཐུན་མཐུན་དུ་སྦྱར་བར་བྱའོ། །མྱུར་བའི་ཚིག་གསུངས་པ་གང་ཡིན་པ་དེ་ནི། བྱང་ཆུབ་སེམས་དཔའ་གཟུངས་ཀྱི་དོན་ཐོབ་པ་དག་ལས་གཞན་པའི་བྱང་ཆུབ་སེམས་དཔའ་གང་ཡིན་པ་དེ་དག་གིས་བྱང་ཆུབ་འཐོབ་པའི་དུས་ལ་ལྟོས་པར་རིག་པར་བྱའོ། །དེ་ཅིའི་ཕྱིར་ཞེ་ན་ཞེས་བྱ་བ་དེས་
ནི་གཏན་ཚིགས་དྲི་བ་བསྟན་ཏེ། གཏན་ཚིགས་ཤཱ་རིའི་བུ་འདིར་ཞེས་བཀའ་སྩལ་པ་ནི་དམིགས་པ་མེད་པའི་སྤྱོད་པ་དང་ལྡན་པའི་གཟུངས་ཞེས་བྱ་བ་དང་སྦྱར་བའོ། །དམིགས་པ་ཐམས་ཅད་ཡོད་མིན་པ། །འདིར་ནི་དམིགས་པ་མེད་པར་བསྒྲགས། །དམིགས་པ་ཡོད་པ་མ་ཡིན་ཕྱིར། །
དམིགས་པ་མེད་པའང་རིགས་ལྡན་མིན། །དངོས་པོ་དམིགས་པ་མེད་པ་དག་ལ་དམིགས་པ་ནི་དམིགས་པ་ཐམས་ཅད་དེ། དེ་མེད་པ་གང་ཡིན་པ་དེ་ལ་ནི་འདིར་བཅོམ་ལྡན་འདས་ཀྱིས་དམིགས་པ་མེད་པ་ཞེས་བསྟན་ཏེ། དམིགས་པར་བྱ་བ་མེད་པའི་ཕྱིར། དམིགས་པ་མེད་པ་ཙམ་དུ་ཟད་པ་ནི་མ་ཡིན་གྱི། 
དམིགས་པ་མེད་པའི་ཕྱིར། དམིགས་པ་མེད་པ་ཡང་། ཡང་དག་པར་ན་མི་དམིགས་པ་ཁོ་ན་སྟེ། དགག་པར་བྱ་བ་མེད་པའི་ཕྱིར་རོ། །གང་ཚེ་འདི་ལ་དམིགས་མེད་པའི། །སྤྱོད་པ་ཆེན་པོ་ཡོད་གྱུར་ན། །དེ་ཉིད་ཡང་དག་ཤེས་དེའི་ཕྱིར། །དེ་ལ་མི་འགྲུབ་ཅི་ཞིག་ཡོད། །སྤྱོད་པ་
ནི་སྔར་བསྟན་པའི་དམིགས་པ་མེད་པས་སོ། །ཆེན་པོ་ནི་ཡོན་ཏན་རྣམ་པ་སྣ་ཚོགས་མཐའ་ཡས་པ་སྡུད་པ་ཡིན་པའི་ཕྱིར་རོ། །དེ་ཉིད་མི་སླུ་བ་ཡིན་པའི་ཕྱིར་ཡང་དག་པའི་ཤེས་པ་ཡིན་ཏེ། གང་གི་ཚེ་འདི་ལ་ཡོད་པ་དེ་ནི་དམིགས་པ་མེད་པའི་སྤྱོད་པ་དང་ལྡན་པའོ། །དེ་ལྟ་བུའི་གཟུངས་

73-1-29b

དེ་ལས་ཅི་ཞིག་འགྲུབ་པར་མི་འགྱུར་ཏེ། ཐམས་ཅད་ཀྱང་འགྲུབ་པར་འགྱུར་རོ་ཞེས་བྱ་བའི་ཐ་ཚིག་གོ། །ཁྱོད་ཀྱིས་ཉེས་པ་མ་ལུས་པ། །སྤང་བ་སངས་རྒྱས་རྗེས་དྲན་ཉིད། །དེ་ཡི་གཉེན་པོ་ཡིན་པས་ན། །དེ་ཕྱིར་ཅི་བདེར་སྒོམས་པར་གྱིས། །དེ་ཕྱིར་འདིར་སངས་རྒྱས་ཀྱི་ཆོས་དང་
ཡོན་ཏན་ཐམས་ཅད་ཀྱི་གཏེར་ངེས་པ་སྟེ། སངས་རྒྱས་ཀྱི་ཆོས་ནི་ཐུན་མོང་མ་ཡིན་པ་རྣམས་སོ། །སངས་རྒྱས་ཀྱི་ཡོན་ཏན་རྣམས་ནི་ཉན་ཐོས་ལ་སོགས་པ་དང་ཐུན་མོང་པའམ། སངས་རྒྱས་ཀྱི་ཆོས་རྣམས་ཁོ་ནའོ། །གནས་དང་གནས་མ་ཡིན་པ་མཁྱེན་པའི་སྟོབས་ལ་སོགས་
པ་ནི་ཡོན་ཏན་རྣམས་ཏེ། གོམས་པར་བྱ་བ་ཡིན་པའི་ཕྱིར་རོ། །དེ་དག་གི་གཏེར་ནི་རྒྱུ་སྟེ་ངེས་པའོ། །ཡང་དེ་ན་སངས་རྒྱས་ཀྱི་ཆོས་དང་ཡོན་ཏན་ཐམས་ཅད་ཡོད་པས་ན་སངས་རྒྱས་ཀྱི་ཆོས་དང་ཡོན་ཏན་ཐམས་ཅད་ཀྱི་གཏེར་ཏེ། ཐམས་ཅད་མཁྱེན་པའི་ཡེ་ཤེས་སོ། །དེ་ངེས་
པ་ནི་སངས་རྒྱས་ཀྱི་ཆོས་དང་ཡོན་ཏན་ཐམས་ཅད་ཀྱི་གཏེར་ངེས་པའོ། །གང་གི་ཕྱིར་ཆོས་ཀྱི་ཉེས་པ་མ་ལུས་པ་སྤོང་བ་ནི་དེའི་གཉེན་པོར་གྱུར་པའི་སངས་རྒྱས་རྗེས་སུ་དྲན་པ་ཁོ་ན་ཡིན་པ་དེའི་ཕྱིར། ཁྱོད་ཀྱིས་ཅི་བདེར་སྒོམས་ཤིག་ཅེས་བྱ་བར་བཅོམ་ལྡན་འདས་ཀྱིས་དགོངས་ཏེ། 
འདི་ལྟར་འདོད་ཆགས་ལ་སོགས་པ་ཉོན་མོངས་པའི་སྒྲིབ་པ་ནི་དངོས་པོ་ལ་མངོན་པར་ཞེན་པ་སྔོན་དུ་འགྲོ་བ་ཅན་ལ། དངོས་པོ་ལ་མངོན་པར་ཞེན་པ་ཡང་ཤེས་བྱའི་སྒྲིབ་པ་ཡིན་ཏེ། སངས་རྒྱས་རྗེས་སུ་དྲན་པ་ནི་ཆོས་ཐམས་ཅད་ཀྱི་ངོ་བོ་ཉིད་ཀྱི་སྒོ་ནས་དེ་སྤོང་བར་བྱེད་པ་ཡིན་ནོ། །དེའི་ཕྱིར་
སངས་རྒྱས་རྗེས་སུ་དྲན་པ་ཡིད་ལ་གོམས་པའི་མི་ལ་ནི་ཉོན་མོངས་པ་དང་། ཤེས་བྱའི་སྒྲིབ་པ་རྣམ་པ་གཉིས་ཀ་ཡང་མི་གནས་སོ། །འདི་ལྟར་གང་ལ་གང་གི་མི་མཐུན་པའི་ཕྱོགས་ཟིལ་གྱིས་གནོན་པའི་ཤེས་ཆེ་བ་ཡོད་པ་དེ་ལ་དེ་མེད་དེ། ཇི་ལྟར་རྒྱ་མཚོ་ན་མེ་ལྕེའི་ཚོགས་མེད་པ་དེ་བཞིན་དུ། 
སངས་རྒྱས་རྗེས་སུ་དྲན་པ་ཡིད་ལ་གོམས་པའི་ཉོན་མོངས་པ་དང་། ཤེས་བྱའི་སྒྲིབ་པ་མི་མཐུན་པའི་ཕྱོགས་ཟིལ་གྱིས་གནོན་པའི་ཤས་ཆེ་བ་ཡོད་དོ། །རིགས་པར་རྗེས་སུ་སྒྲུབ་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་

73-1-30a

འབའ་ཞིག་ཏུ་ཡང་མ་ཟད་དེ། འདི་ནི་རྒྱུ་ཉེ་བར་གནས་པས་ཀྱང་ཁོང་དུ་ཆུད་པར་བྱ་བའི་ཕྱིར་འདི་ཉིད་ལས་བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་བྱེ་བྲག་མཆོག་འཐོབ་པའི་ཕྱིར་རོ་ཞེས་གསུངས་སོ། །བྱེ་བྲག་ཕུལ་དུ་ཕྱིན་པ་ནི་བྱེ་བྲག་མཆོག་སྟེ། འདི་ལྟར་
འཁོར་གསུམ་རྣམ་པར་དག་པའི་ཕྱིར། །སྦྱིན་པ་ལ་སོགས་མཆོག་དང་ལྡན། །ཡང་དག་རྫོགས་པའི་བྱང་ཆུབ་རྒྱུའི། །ཁྱད་པར་འདི་ལས་འཐོབ་པར་འགྱུར། །སྦྱིན་པར་བྱ་བ་དང་། སྦྱིན་པ་པོ་དང་། ལེན་པ་པོ་ལ་སོགས་པ་མི་དམིགས་པས། སྦྱིན་པ་ལ་སོགས་པ་
རྣམ་པར་དག་པ་ནི་དེ་ཡིན་ཏེ། དེའི་མི་མཐུན་པའི་ཕྱོགས་ཀྱི་དྲི་མ་མེད་པའི་ཕྱིར་རོ། །དེས་ཤིན་ཏུ་ཁྱད་པར་དུ་འཕགས་པའི་སྦྱིན་པ་ལ་སོགས་པ་སྤྱོད་པའི་མཚན་ཉིད་བླ་ན་མེད་པའི་བྱང་ཆུབ་ཀྱི་བྱེད་རྒྱུ་འདི་ཉིད་ལས་ཐོབ་པར་འགྱུར་རོ། །དེ་ལྟར་འཐད་པ་དང་བཅས་པའི་ཕན་ཡོན་བསྟན་
ནས། ཕན་ཡོན་གཞན་ཡང་གསུངས་ཏེ། འདིར་ནི་ཐུབ་པའི་དབང་པོ་ཡིས། །ཡི་གེའི་དོན་དང་གཉི་ག་ཡི། །གཟུངས་ཀྱི་ཕན་ཡོན་བཀའ་སྩལ་ཏེ། །ཅི་རིགས་པར་ནི་སྦྱར་བར་ཟད། །ཡང་ན་ཕན་ཡོན་ཐམས་ཅད་ཀྱང་། །གཟུངས་རྣམས་ཀུན་ལ་བཤད་བྱ་སྟེ། །ཁ་ཅིག་དག་ནི་
དུས་གཞན་ལས། །དགོངས་པ་ཙམ་དུ་ཟད་པ་ཡིན། །ཡི་གེའི་གཟུངས་ནི་གཟུངས་ཀྱི་དོན་སྟོན་པའི་ཡི་གེ་སྟེ། ཁར་བ་བསད་པ་ལ་སོགས་པ་བཞིན་ནོ། །དོན་གྱི་གཟུངས་ནི་སངས་རྒྱས་རྗེས་སུ་དྲན་པའོ། །གཉི་གའི་གཟུངས་ནི་གཉིས་པོ་དེ་ཉིད་དོ། །གཟུངས་རྣམ་པ་གསུམ་
པོ་འདི་དག་གི་ཕན་ཡོན་ནི། འདིར་བཅོམ་ལྡན་འདས་ཀྱིས་སྤྱིར་བཀའ་སྩལ་ཏོ། །སྐྱེས་བུ་ཤེས་པ་དང་ལྡན་པས་ཅི་རིགས་པར་སྦྱར་བར་བྱ་བ་འབའ་ཞིག་ཏུ་ཟད་དོ། །ཡང་ན་ཕན་ཡོན་ཐམས་ཅད་ཀྱང་གཟུངས་ཐམས་ཅད་ཀྱི་ཡིན་པར་གསུངས་སོ། །བྱེ་བྲག་ནི་འདི་ཡོད་དེ། ཁ་ཅིག་
ཏུ་ནི་དུས་གཞན་ལ་དགོངས་པར་བཤད་པར་བྱ་སྟེ། འདི་ལྟར། མཉམ་ཉིད་ཅེས་བྱ་དུས་དང་དོན། །གང་ཟག་གཞན་ཞེས་བྱ་བ་ཡི། །དགོངས་པ་རྣམས་ཀྱིས་ཐུབ་པའི་གསུང་། །ཅི་རིགས་པར་ནི་རྟོགས་པར་བྱ། །བཅོམ་ལྡན་འདས་ཀྱི་དགོངས་པ་ནི་རྣམ་པ་བཞིར་ཁོང་དུ་ཆུད་པར་བྱ་

73-1-30b

སྟེ། མཉམ་པ་ཉིད་ལ་དགོངས་པ་ཞེས་བྱ་བ་ནི། ཇི་སྐད་དུ་བཅོམ་ལྡན་འདས་ཀྱིས་ང་ཉིད་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ་ཞེས་གསུངས་པ་ལ་སོགས་པ་ལྟ་བུའོ། །དོན་གཞན་ལ་དགོངས་པ་ཞེས་བྱ་བ་ནི། ཇི་སྐད་དུ་བཅོམ་ལྡན་འདས་ཀྱིས་སངས་
རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་ལ་བསྙེན་བཀུར་བྱས་ནས་གདོད་ཐེག་པ་ཆེན་པོ་སྟོན་པའི་མཆོག་ཏུ་ཟབ་མོའི་དོན་རྟོགས་པར་འགྱུར་རོ་ཞེས་བྱ་བ་ལ་སོགས་པ་ལྟ་བུའོ། །གང་ཟག་གཞན་ལ་དགོངས་པ་ཞེས་བྱ་བ་ནི། ཇི་སྐད་དུ་བཅོམ་ལྡན་འདས་ཀྱིས། སྦྱིན་པ་ཡིས་ནི་
དགའ་བར་འགྱུར། །ཞེས་བྱ་བ་ལ་སོགས་པ་གསུངས་པས། སྦྱིན་པ་ལ་སོགས་པའི་བསྔགས་པ་བརྗོད་པར་མཛད་ནས། ཡང་གང་ཟག་ཁ་ཅིག་ལ་བརྟེན་ཏེ། སྦྱིན་པ་སྦྱིན་པས་ཕན་ཚུན་དག་ཏུ་བརྟེན་དེ་དག །གཞན་དང་གཞན་ལ་གུས་པར་མི་འགྱུར་བས། །སངས་རྒྱས་
མཁས་པ་བག་ཆགས་སྤངས་རྣམས་ནི། །དེ་འདྲར་བརྟེན་པ་དེ་དག་བསྔགས་མི་མཛད། །ཅེས་བྱ་བ་ལ་སོགས་པས་སྦྱིན་པ་ལ་སོགས་པ་དེ་དག་ཉིད་སྨོད་པར་མཛད་པ་ལྟ་བུའོ། །དགོངས་པ་བཞི་པོ་འདི་དག་གིས་ཐུབ་པའི་དབང་པོའི་གསུང་རབ་ཀྱི་མདུད་པའི་གནད་རྣམས་
བཤད་པར་བྱའོ། །དགོངས་པ་བསྟན་པའི་དགོས་པ་ནི་ཡི་གེ་མངས་སུ་དོགས་པས་མ་བཤད་དོ། །སྐབས་འདིར་ཁ་ཅིག་ཏུ་ནི་དུས་གཞན་ལ་དགོངས་ཏེ་ཕན་ཡོན་བསྟན་ཏོ། །གང་ཟག་གཞན་ལ་དགོངས་པས་ཀྱང་བསྟན་ཏེ། དེ་ནི་གསལ་བའི་ཕྱིར་བདག་གིས་མ་སྦྱར་རོ། །གཟུངས་
ཞེས་བྱ་འདིར་ཁ་ཅིག་ཏུ། །མགོན་པོ་ཐུགས་རྗེ་ཅན་གྱིས་ནི། །གཟུངས་ཞེས་པ་ནི་ཆེན་པོ་ཡི། །ཆེན་པོའང་ཡིན་པར་བཀའ་སྩལ་ཏོ། །གཟུངས་ལ་དམིགས་པ་ཤེས་རབ་ཀྱི་མཐའ་ལ་གནས་པ་ལ་གཟུངས་ཞེས་བྱ་བར། སེམས་ཅན་གྱི་དོན་ལ་མཁས་པ་བཅོམ་ལྡན་འདས་
ཀྱིས་ཁ་ཅིག་ཏུ་གསུངས་ཏེ། མི་སྡུག་པ་བཞིན་ནོ། །དེ་ལྟར་དོན་བསྡུས་པ་བསྟན་ནས། ད་ནི་དེའི་ཕན་ཡོན་གྱི་ཚིགས་སུ་བཅད་པ་སོ་སོར་བརྟག་པར་བྱ་སྟེ། ཅི་འདི་དག་སྟོང་པ་ཡིན་ནམ་འོན་ཏེ་མ་ཡིན་སྙམ་དུ། ཆོས་རྣམས་སྟོང་པར་དོགས་མེད་ཅིང་། །མདོ་སྡེ་འདི་ཐོས་ནས་

73-1-31a

སྟོང་པ་ཁོ་ནའོ་སྙམ་དུ་སེམས་ཏེ། འདི་ནི་ཐེ་ཚོམ་མེད་པའི་ཕན་ཡོན་བསྟན་ཏོ། །ཆོས་རྣམས་སྟོང་པ་ལ། །བྱང་ཆུབ་ཆེད་དུ་སྤྲོས་མི་བྱེད། །ཆོས་རྣམས་དང་བྱང་ཆུབ་ཀྱི་རང་བཞིན་མེད་པའི་ཕྱིར་རོ། །འདི་དག་ནི་བྱང་ཆུབ་འཐོབ་བོ་སྙམ་དུ་དམིགས་པ་ནི་སྤྲོས་པའོ། །
འདིས་ནི་དམིགས་པ་མེད་པའི་ཕན་ཡོན་བསྟན་ཏོ། །ཆོས་དབྱིངས་འཁྲུག་པར་མི་བྱེད་ན། །ཆོས་ཀྱི་དབྱིངས་འཁྲུག་པ་ནི་ཕྱིན་ཅི་ལོག་ཏུ་མངོན་པར་ཞེན་པ་སྟེ། འདི་ལྟར་ཆོས་ཀྱི་དབྱིངས་ནི་ཡང་དག་པར་སྟོང་པའང་མ་ཡིན། མི་སྟོང་པའང་མ་ཡིན་ན། དེ་ལ་སྟོང་པ་ཉིད་ལ་
སོགས་པའི་ངོ་བོ་ཉིད་དུ་འཛིན་པ་ནི་འཁྲུག་པའོ། །འདིས་ནི་ཆོས་ཀྱི་དབྱིངས་ཀྱི་ངོ་བོ་ཉིད་ཡང་དག་པར་ཁོང་དུ་ཆུད་པའི་ཕན་ཡོན་བསྟན་ཏོ། །དེ་ཕྱིར་གཟུངས་ནི་འཐོབ་པར་འགྱུར། །ཞེས་བྱ་བ་འདི་ནི་དོན་གྱི་གཟུངས་ཏེ། འདི་ནི་ཡི་གེའི་གཟུངས་ཀྱི་ཕན་ཡོན་དངོས་དང་བརྒྱད་
པའི་བྱེ་བྲག་གིས་བསྟན་ཏོ། །ཡང་ན་ཕན་ཡོན་འདི་ནི་གཟུངས་རྣམ་པ་གསུམ་ཆར་ལ་ཡང་མཐུན་མཐུན་དུ་སྦྱར་བར་བྱ་སྟེ། གང་གི་ཚེ་དོན་གྱི་གཟུངས་ཀྱི་ཕན་ཡོན་དུ་བསྟན་པ་དེའི་ཚེ་ནི་གཟུངས་སྨོས་པས་རབ་ཀྱི་མཐའ་ལ་གནས་པའི་གཟུངས་ཀྱི་ཡེ་ཤེས་གཟུང་ངོ་། །མདོ་སྡེ་འདི་ནི་མཉན་
པར་བྱ་བ་ཞེས་བྱ་བ་འདིས་ནི་ཡི་གེའི་གཟུངས་ཀྱི་ཕན་ཡོན་རྣམ་པ་གསུམ་དུས་གཞན་ལ་དགོངས་པའི་སྒོ་ནས་བསྟན་ཏོ། །གཟུངས་འཐོབ་པ་དང་། ཡེ་ཤེས་འབྱོར་པ་འཐོབ་པ་དང་བྱང་ཆུབ་འཐོབ་པའོ། །ཡང་ན་གང་གི་ཚེ། འདི་ལ་གཟུངས་ནི་ཟད་པ་མེད། །ཅེས་བརྗོད་པར་བྱ་ཞེས་
བྱ་བ་ལྷག་མ་ཡིན་པ་དེའི་ཚེ་ན་གཟུངས་སྨོས་པ་མངོན་སུམ་གྱི་ཕན་ཡོན་ཡིན་ལ། གཞན་གཉིས་པོ་ནི་དུས་གཞན་དགོངས་པའོ། །ཡང་ན་གཟུངས་རྣམ་པ་གསུམ་ཆར་གྱི་ཕན་ཡོན་ཡིན་ཏེ། ཡི་གེའི་གཟུངས་ཀྱི་ཕན་ཡོན་ནི་རྣམ་པ་གསུམ་མོ། །དོན་གྱི་གཟུངས་ཀྱི་ནི་རྣམ་གཉིས་སོ། །
ཡེ་ཤེས་ཀྱི་གཟུངས་ཀྱི་ནི་གཅིག་ཏུ་བསྟན་ཏོ། །ཡོན་ཏན་ཟད་པ་མེད་པའི་ཕྱིར་མི་ཟད་པའོ། །གཟུངས་ཞེས་བྱ་བ་ལ་སོགས་པས་ནི། ཡི་གེའི་གཟུངས་ཀྱི་ཕན་ཡོན་དུས་གཞན་ལ་དགོངས་པའི་སྒོ་ནས་རྣམ་པ་གཉིས་སུ་བསྟན་ཏེ། སྟོང་པ་ཉིད་དང་། འཚོ་བ་མེད་པ་དང་། ཚིགས་སུ་བཅད་

73-1-31b

པ་མེད་པ་ལ་སོགས་པའི་འཇིགས་པ་མ་ལུས་དང་བྲལ་བའི་ཕྱིར་འཇིགས་པ་མེད་པ་དང་། ཕྱོགས་བཅུར་རྣམ་པར་བཞུགས་པའི་སངས་རྒྱས་རྣམས་ཀྱི་ཆོས་བསྟན་པ་ཐོས་པའོ། །གཟུང་བ་ནི་མ་བརྗེད་པའོ། །དོན་གྱི་གཟུངས་ཀྱི་ནི་ཕན་ཡོན་དེ་གཉི་ག་མངོན་སུམ་ཁོ་ནའི་ཡིན་ཏེ། 
གཟུང་བ་ནི་བསྒོམ་པའོ། །མཆོག་གི་ཆོས་ཞེས་བྱ་བ་འདིས་ནི་དུས་གཞན་ལ་དགོངས་པའི་སྒོ་ནས་ཡི་གེའི་གཟུངས་ཀྱི་ཕན་ཡོན་དུ་བསྟན་ཏོ། །ཅིག་ཤོས་ཀྱིས་ནི་མངོན་སུམ་གྱི་ཕན་ཡོན་དུ་བསྟན་ཏོ། །འདིས་ནི་སོ་སོ་ཡང་དག་པར་རིག་པ་རྣམ་པ་བཞི་ཐོབ་པར་བསྟན་ཏེ། དེ་ལ་མཆོག་གི་ཆོས་ཞེས་
བྱ་བ་འདིས་ནི། ཆོས་སོ་སོ་ཡང་དག་པར་རིག་པ་བསྟན་ཏོ། །དོན་ཐམས་ཅད་ཅེས་སྨོས་པས་ནི་དོན་སོ་སོ་ཡང་དག་པར་རིག་པ་བསྟན་ཏོ། །ཚིག་འབྲུ་ཐམས་ཅད་ཅེས་སྨོས་པས་ནི་ངེས་པའི་ཚིག་སོ་སོ་ཡང་དག་པར་རིག་པ་བསྟན་ཏོ། །ཉི་མའི་འོད་ཟེར་ཇི་སྙེད་པ། །ཞེས་བྱ་བ་ལ་སོགས་པ་
སྨོས་པས་ནི། སྤོབས་པ་སོ་སོ་ཡང་དག་པར་རིག་པ་བསྟན་ཏེ། མཆོག་སྨོས་པ་ནི་སངས་རྒྱས་ཀྱི་རིགས་ཅན་གྱི་སོ་སོ་ཡང་དག་པར་རིག་པ་ཡིན་པར་བསྟན་པའི་ཕྱིར་རོ། །དོན་དང་ཚིག་འབྲུས་བསྐྱོད་ཀུན་གྱི། །ཞེས་བྱ་བའི་ཚིག་ནི། དེ་དག་གིས་ཆོས་སོ་སོ་ཡང་དག་པར་རིག་པར་འཇུག་
པའི་ཕྱིར་རོ། །ཉི་མའི་འོད་ཟེར་གྱི་དཔེ་ནི་མཐའ་ཡས་པ་ཉིད་དུ་བསྟན་པའི་ཕྱིར་རོ། །ཚིག་སྨོས་པ་ནི་ཚིག་དང་ཚིག་གི་དོན་གཟུང་བའི་ཕྱིར་རོ། །ཡང་ན་མཆོག་གི་ཆོས་སྟོང་པ་ཉིད་ཀྱི་ཆོས་རྣམ་པར་ཤེས་སོ། །དོན་ཐམས་ཅད་ནི་སྟོང་པ་ཉིད་དེ། དེ་ནི་དངོས་པོ་ཐམས་ཅད་ཀྱི་ངོ་བོ་ཉིད་ཡིན་པའི་
ཕྱིར་རོ། །དེ་ཚིག་གང་དག་གིས་གསལ་བར་བྱེད་པ་དེ་དག་གིས་བསྐྱོད་དེ། འཇུག་པར་བྱེད་ཅེས་བྱ་བའི་ཐ་ཚིག་གོ། །ཚིག་འབྲུ་སྨོས་པས་ནི་ཚིག་རྣམས་བསྟན་ཏོ། །འདིའི་རྒྱུ་བསྟན་པ་ནི་ཇི་སྙེད་ཅེས་བྱ་བ་ལ་སོགས་པའོ། །ཡང་ན་མཆོག་གི་ཆོས་ནི་འཇིག་རྟེན་ལས་འདས་པའི་
ཆོས་རྣམས་ཏེ། ཚིག་འབྲུ་གང་དག་ལ་མཆོག་གི་ཆོས་དང་དོན་ཐམས་ཅད་ཡོད་པ་དེ་དག་གིས་བསྐྱོད་དེ་འཇུག་པར་བྱེད་ཅེས་བྱ་བའི་ཐ་ཚིག་གོ། །ལྷག་མ་ནི་སྔ་མ་བཞིན་ཏེ། འདིས་ཀྱང་སོ་སོ་ཡང་དག་པར་རིག་པ་རྣམས་འཐོབ་པར་བསྟན་ཏོ། །གང་དག་ཆོས་ཀྱི་མཆོག་འགྱུར་བ། དེ་དག་

73-1-32a

གང་ཞེ་ན། བཀའ་སྩལ་པ། རླབས་ཆེན་གཟུངས་ཀྱི་སྒོ་རྣམས་ཏེ། །གང་ཞིག་མདོ་འདི་འཛིན་དེ་ལ། །ཐམས་ཅད་རྟག་ཏུ་མངོན་དུ་འགྱུར། །ཞེས་བྱ་བ་སྟེ། དུས་གཞན་ལ་དགོངས་པའི་སྒོ་ནས་དེ་སྐད་ཅེས་གསུངས་སོ། །གལ་ཏེ་སེམས་ཅན་ཐམས་ཅད་ཀྱིས། །ཞེས་
བྱ་བ་ལ་སོགས་པས་ནི་ཕན་ཡོན་འདི་དངོས་དང་བརྒྱུད་པའི་སྒོ་ནས་གཟུངས་རྣམ་པ་གསུམ་ཆར་གྱི་ཡང་ཡིན་པར་གསུངས་སོ། །དེ་ཡི་ཡེ་ཤེས་མི་ཟད་དོ། །ཞེས་བྱ་བ་འདི་རྒྱུའི་ཚིག་གོ། །བསྐལ་པ་སྨོས་པ་ནི་ཉེ་བར་མཚོན་པའི་ཕྱིར་ཏེ། བསྐལ་པ་གྲངས་མེད་པ་དག་ཀྱང་གཟུང་བར་བྱའོ། །མདོ་སྡེ་
འདི་ལ་སུ་དགའ་བ། །ཞེས་བྱ་བ་ནི། དེ་ལ་དད་པ་ལ་སོགས་པ་དང་ལྡན་པའི་ཕྱིར་རོ། །འདིས་ནི་ཡི་གེའི་གཟུངས་ཀྱི་ཕན་ཡོན་དུས་གཞན་ལ་དགོངས་པའི་སྒོ་ནས་བསྟན་ཏོ། །དོན་གྱི་གཟུངས་ཀྱི་ནི་མངོན་སུམ་དུ་བྱས་པས་མདོ་སྡེ་ལ་དགའ་བར་འགྱུར་བས་དེའི་ཕྱིར་དོན་གྱི་གཟུངས་ཀྱི་ཡང་འདིར་
བསྟན་པར་རིག་པར་བྱའོ། །དེ་ནི་ཆོས་ཀྱི་རྒྱལ་པོའི་སྲས། །ཞེས་བྱ་བ་ནི་ས་དང་པོ་ཐོབ་པའི་ཕྱིར་ཏེ། དེའི་ཚེ་དེ་བཞིན་གཤེགས་པའི་རིགས་སུ་སྐྱེས་པ་ཡིན་ནོ། །བྱང་ཆུབ་མཆོག་ལ་ཉེ་བ་ཡིན། །ཞེས་བྱ་བ་ནི་ཕྱིར་མི་ལྡོག་པ་ལ་སོགས་པའི་ས་ཐོབ་པའི་ཕྱིར་རོ། །ཡིད་བརྟན་པ་ནི་དེ་ཁོ་ནའི་ཡེ་
ཤེས་སྐྱེས་པས་མི་སླུ་བ་ཡིན་པའི་ཕྱིར་རོ། །ཆོས་ཀྱང་འཛིན་ཞེས་བྱ་བ་ནི་ལེགས་པའི་བློ་གྲོས་ལ་སོགས་པའི་ས་ཐོབ་པས་དེ་བཞིན་གཤེགས་པའི་ཆོས་མ་ལུས་པར་འཛིན་པའི་ཕྱིར་རོ། །དེ་ལ་སེམས་ཅན་ཐམས་ཅད་དགའ། །ཞེས་བྱ་བ་འདིས་ཀྱང་གཟུངས་རྣམ་པ་གསུམ་ཆར་གྱི་ཕན་ཡོན་
བསྟན་པར་རིག་པར་བྱའོ། །སངས་རྒྱས་རྣམས་ཀྱང་དེ་ལ་དགྱེས། །ཞེས་བྱ་བ་ནི། དེ་ངེད་ཅག་གིས་གཅེས་པ་འཛིན་པར་འགྱུར་རོ་སྙམ་དུ་དགོངས་པའི་ཕྱིར་རོ། །ཅིའི་ཕྱིར། དེ་ནི་འཆི་བའི་དུས་བྱེད་ཚེ། །སངས་རྒྱས་བྱེ་བ་བརྒྱད་ཅུ་མཐོང་ཞེ་ན། གསང་སྔགས་ཀྱི་ཚིག་བརྒྱད་ཅུ་
ཡོད་པའི་ཕྱིར་ཏེ། གསང་སྔགས་ཀྱི་ཚིག་རེ་རེ་ཞིང་ཡང་སངས་རྒྱས་བྱེ་བ་བྱེ་བས་བྱིན་གྱིས་བརླབས་པའི་ཕྱིར་རོ། །ཡང་ན་གཟུངས་ཀྱི་མཐུ་ཉིད་འདི་འདྲ་སྟེ། དེས་འཆི་བའི་དུས་ཀྱི་ཚེ་སངས་རྒྱས་བྱེ་བ་བརྒྱད་ཅུ་མཐོང་ངོ་། །ལག་པ་དེ་ལ་ཉེ་བར་འཇོག །ཅེས་བྱ་བ་ནི། རིགས་ཀྱི་བུ་

73-1-32b

མ་འཇིགས་ཤིག་ཅེས་བྱ་བའམ། ཡང་ན་དེད་ཀྱི་ཐད་དུ་ཤོག་ཅེས་བྱ་བའི་ཕྱིར་རོ། །སུ་ཞིག་མདོ་སྡེ་འདི་འཛིན་པ། །ཞེས་བྱ་བ་འདིས་ནི་ཕན་ཡོན་འདི་ཡི་གེའི་གཟུངས་ཀྱི་ཡིན་ནོ་བསྟན་ཏེ། ཤུགས་ཀྱིས་ན་ཕན་ཡོན་འདི་དོན་གྱི་གཟུངས་ཀྱི་ཡང་ཡིན་པར་ངེས་པར་གཟུང་བར་བྱའོ། །
བསྐལ་པ་བྱེ་བ་སྟོང་རྣམས་སུ། །ཞེས་བྱ་བ་འདིས་ནི་ཕན་ཡོན་འདི་གཟུངས་གསུམ་ཆར་གྱི་ཡང་ཡིན་པར་རིག་པར་བྱ་སྟེ། སྒྲོན་མས་སྐད་ཅིག་གཅིག་གིས་ཀྱང་དུས་རིང་པོ་ནས་བསགས་པའི་མུན་པ་སེལ་བར་མཐོང་བའི་ཕྱིར་བསྐལ་པ་བྱེ་བ་སྟོང་དུ་བསགས་པའི་སྡིག་པ་
ཟླ་བ་གཅིག་གིས་ཇི་ལྟར་འབྱང་བར་འགྱུར་སྙམ་དུ་འཁྲུལ་པ་བསྐྱེད་པར་མི་བྱའོ། །བྱང་ཆུབ་སེམས་དཔས་བསོད་ནམས་གང་། །ཞེས་བྱ་བ་ལ་སོགས་པས་ནི་ཕན་ཡོན་འདི་དོན་གྱི་གཟུངས་ཀྱི་ཡིན་པར་བསྟན་ཏོ། །ཡི་གེའི་གཟུངས་ཀྱི་ནི་མ་ཡིན་ཏེ། འདི་ལྟར་ཟླ་བ་གཅིག་སྨོས་
པས་ན་ཕན་ཡོན་འདི་དུས་གཞན་ལ་དགོངས་པའི་སྒོ་ནས་ཀྱང་དེ་ཡིན་པར་མི་སྲིད་དོ། །བསོད་ནམས་ནི་གཟུངས་འདིས་ཀུན་ནས་བསླང་བ་ལས་གཞན་པ་གཟུང་ངོ་། །འཛིན་པ་གཟུངས་མངོན་སུམ་དུ་བྱ་བའོ། །ཁམས་གསུམ་སེམས་ཅན་ཇི་སྙེད་པ། །ཞེས་བྱ་བ་ལ་སོགས་པས་ནི་ཕན་ཡོན་
འདི་ཡི་གེའི་གཟུངས་ཀྱི་ཡིན་པར་དུས་གཞན་ལ་དགོངས་པར་བསྟན་ཏོ། །ཕན་ཡོན་འདི་དོན་གྱི་གཟུངས་ཀྱི་ཡིན་པར་ནི་དོན་གྱིས་བསྟན་ཏོ། །ཡི་གེའི་གཟུངས་ཀྱི་ཕན་ཡོན་འདི་ཡང་དོན་གྱི་གཟུངས་ཀྱི་སྒོ་ཁོ་ན་ལས་བྱུང་བའི་ཕྱིར་རོ། །བྱང་ཆུབ་ཏུ་འཚང་རྒྱ་བའི་བར་དུ་དེ་དྲན་པ་དང་ལྡན་པར་
འགྱུར་ཞེས་བྱ་བར་སྦྱར་ཏེ། བློ་གྲོས་རྟོགས་ལྡན་འགྱུར་ཞེས་བྱ་བ་ལ་སོགས་པ་ཡང་དེ་བཞིན་སྦྱར་བར་བྱའོ། །གཟུངས་ཀྱི་དམ་པ་གང་ཡིན་པ་ནི་དམ་པའི་དོན་སྟོན་པའི་ཡི་གེའི་གཟུངས་ཡིན་ཏེ། དེ་ཡི་ལྕེ་ཡི་རྩེ་མོར་གནས། །ཞེས་བྱ་བ་ལ་སོགས་པར་སྦྱར་བར་བྱ་སྟེ། འདི་ཡང་ཡི་གེ་དང་
དོན་གྱི་གཟུངས་གཉི་གའི་ཕན་ཡོན་དུ་ཤེས་པར་བྱའོ། །བློ་གྲོས་ནི་མཉམ་པར་བཞག་པ་མ་ཡིན་པའི་ཤེས་རབ་བོ། །རྟོགས་པ་ནི་མཉམ་པར་གཞག་པའི་ཤེས་རབ་བོ། །ཡང་ན་རྟོགས་པ་ནི་ཐམས་ཅད་དུ་ཐོགས་པ་མེད་པར་འཇུག་པ་ཉིད་དོ། །ཇི་ལྟར་མདོ་སྡེ་བསྟན་འདི་ལ། །གཟུངས་དོན་

73-1-33a

གྱི་གཟུངས་ཀྱི་ཕྱིར་སོ་སོར་ངེས་པ་བཞིན། ཡང་ན་གཟུངས་ནི་གཟུངས་ཞེས་པ་སྟེ། དེ་བཞིན་དུ་མདོ་སྡེ་བསྟན་པ་འདི་ལས་ཐམས་ཅད་མཁྱེན་པ་ཉིད་བསྟན་པ་ངེས་པར་འཐོབ་པར་འགྱུར་ཞེས་བྱ་བར་སྦྱར་རོ། །དེ་བཞིན་དུ་འདི་ལས་བྱང་ཆུབ་ངེས་པར་འཐོབ་
པར་འགྱུར་ཞེས་བྱ་བར་ཡང་གཟུང་བར་བྱ་སྟེ། ཕན་ཡོན་འདི་ནི་མངོན་སུམ་དང་། དུས་གཞན་ལ་དགོངས་པའི་སྒོ་ནས་ཡི་གེའི་གཟུངས་ཀྱི་ཡིན་པར་རིག་པར་བྱའོ། །དོན་གྱི་གཟུངས་ཀྱི་ནི་སྔ་མ་བཞིན་དུ་ཤུགས་ཀྱིས་ཁོང་དུ་ཆུད་པར་བྱའོ། །ཐམས་ཅད་མཁྱེན་
པ་ཉིད་ནི་ཤེས་བྱའི་སྒྲིབ་པ་སྤངས་པ་ལས་འགྱུར་རོ། །བྱང་ཆུབ་ནི་ཉོན་མོངས་པའི་སྒྲིབ་པ་སྤངས་པ་ལས་སོ། །ཡང་ན་ཐམས་ཅད་མཁྱེན་པ་ཉིད་ནི་ཐམས་ཅད་མཁྱེན་པའི་ཡེ་ཤེས་སོ། །བྱང་ཆུབ་ནི་ཉོན་མོངས་པ་དང་ཤེས་བྱའི་སྒྲིབ་པ་སྤངས་པའོ། །
ཡང་ན་རྒྱུ་དང་རྒྱུ་ཅན་གྱི་ཚུལ་དུ་གཉི་ག་རྟོགས་པར་བྱའོ། །འདི་ལས་བྱང་ཆུབ་འཐོབ་པར་འགྱུར། །ཞེས་བྱ་བ་འདི་ནི། བདག་ཉིད་དཔེར་བསྟན་པས་བརྡའ་སྤྲད་པའི་ཕྱིར། གཟུངས་འདི་ཐོས་མ་ཐག་ཏུ་ཡང་། །ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་
མར་མེ་ཞེས་བྱ་བ་ནི་བཅོམ་ལྡན་འདས་མར་མེ་མཛད་ཡིན་ནོ། །བདག་ཅག་གིས་གཟུངས་ཐོས་ཀྱང་ལུང་ཡང་མ་བསྟན་ལ། སངས་རྒྱས་རྣམས་ཀྱང་མི་མཐོང་བ་མ་ཡིན་ནམ། ཅིའི་ཕྱིར་དེ་སྐད་གསུངས། ཐོས་མ་ཐག་ཏུ་ཞེས་གསུངས་པའི་ཕྱིར་དང་། སྐད་ཅིག་དེ་ལ་ཞེས་
གསུངས་པའི་ཕྱིར། འདིར་དུས་གཞན་ལ་དགོངས་པ་ཡང་མ་ཡིན་ནོ། །ཞེ་ན་ཉེས་པ་མེད་དེ། འདི་ལྟར་འདིས་ནི་བཅོམ་ལྡན་འདས་ཀྱི་ཚེ་རབས་གཞན་དུ། བཅོམ་ལྡན་འདས་མ་འདི་ལ་གོམས་ན། ཇི་ལྟ་བ་བཞིན་དུ་ངེས་པ་ཁོ་ནར་ཚེ་འདི་ལ་ཁྱད་པར་འདི་སྒྲུབ་པར་བྱེད་དོ་
ཞེས་བྱ་བ་སྟེ་སྟོན་པར་མཛད་པ་ཡིན་ཏེ། དེ་བས་ན་གལ་ཏེ་དེ་བཞིན་དུ། གཞན་ཚེ་རབས་གཞན་ན་གོམས་པ་གང་ཡིན་པ་དེ་ཡང་གཟུངས་ཐོས་མ་ཐག་ཏུ་ངེས་པར་ལུང་བསྟན་པར་འགྱུར་ཞིང་། སྐད་ཅིག་དེ་ཉིད་ལ་སངས་རྒྱས་རྣམས་མཐོང་བར་འགྱུར་ཏེ། འདི་ལ་

73-1-33b

འཁྲུལ་པ་བསྐྱེད་པར་མི་བྱའོ། །འདིས་ནི་ཕན་ཡོན་འདི་ཡི་གེ་དང་དོན་གྱི་གཟུངས་ཀྱི་ཡིན་པར་བསྟན་ཏོ། །གཟུངས་འདིའི་ཕན་ཡོན་སངས་རྒྱས་ཐམས་ཅད་ཀྱི་ཆོས་ཀྱི་ཚུལ་འཛིན་པ་ཡིན་པར་བསྟན་པའི་ཕྱིར། གང་ཞིག་ཅེས་བྱ་བ་ལ་སོགས་པ་གསུངས་ཏེ། སྟོན་པའི་གསུང་
རབ་ཡན་ལག་བཅུ་གཉིས་སོ། །སངས་རྒྱས་ཐམས་ཅད་ཀྱིས་བསྟན་པ་ཤེས་པར་བྱ་བའི་ཐབས་གཞན་ཡང་ཡོད་མོད་ཀྱི། འདི་མྱུར་བས་ན་མྱུར་བའི་ཚིག་གིས་སྟོན་པར་མཛད་དེ། ཕན་ཡོན་འདི་ནི་ཡི་གེའི་གཟུངས་ཀྱི་ཡིན་པར་དུས་གཞན་ལ་དགོངས་པའི་སྒོ་ནས་བསྟན་པའོ། །
དོན་གྱི་གཟུངས་ཀྱི་ནི་དོན་གྱིས་བསྟན་པ་ཡིན་པར་རིག་པར་བྱའོ། །སངས་རྒྱས་ཞིང་ནི་རྣམ་དག་དང་། །ཞེས་བྱ་བ་ལ་སོགས་པས་ནི་ཕན་ཡོན་གཞན་སྟོན་ཏེ། འདི་ནི་ཡི་གེའི་གཟུངས་ཀྱི་ཕན་ཡོན་དུས་གཞན་ལ་དགོངས་པ་བསྟན་ཏེ། བྱེད་པར་འགྱུར་ཞེས་འབྱུང་བའི་ཕྱིར་རོ། །
དོན་གྱི་གཟུངས་ཀྱི་ནི་དོན་གྱི་དངོས་དང་བརྒྱུད་པར་ཅི་རིགས་པར་རིག་པར་བྱ་སྟེ། འདིའི་ཕན་ཡོན་གསུམ་པོ་འདི་ལ་ཐེ་ཚོམ་མི་བྱ་བར་འདི་ན་དེ་ཁོ་ན་བཞིན་ནོ་སྙམ་དུ་གཟུང་བར་བྱའོ། །གལ་ཏེ་ཁྱོད་ལ་ཐེ་ཚོམ་ཡོད་ན། དེའི་ཚེ་ཞག་བདུན་ཙམ་གྱི་བར་དུ་འདི་སེམས་ཤིག་དང་། དེས་ན་ཁྱོད་བདག་
ཉིད་ཀྱིས་ཚེ་འདི་ལ་ཡིད་ཆེས་པའི་རྟགས་མཐོང་བར་འགྱུར་རོ་བྱ་བའི་དོན་དུ། དེ་བས་བག་ནི་ཡོད་གྱུར་ལ། །ཞེས་བྱ་བ་ལ་སོགས་པ་གསུངས་ཏེ། གསང་སྔགས་ཚིག་ནི་སྔ་མ་ཡིས། །བསྲུང་བའི་ཆོ་ག་འདི་བྱས་ལ། །གཙང་མས་འདུ་དང་འབྲེལ་སྤང་ཞིང་། །ལུས་ཀྱི་འདུ་འཛི་སྤང་བྱ་སྟེ། །
དེས་ནི་རྟོག་པའི་དྲ་བ་ཡི། །རྒྱུན་རྣམས་མ་ལུས་སྤངས་ན་ནི། །བག་མེད་པའི་རྣམ་པ་གཉིས་ཏེ། །གཞན་ལས་བྱུང་བ་དང་། བདག་ལས་བྱུང་བའོ། །གཞན་ལས་བྱུང་བ་ཡང་རྣམ་པ་གཉིས་ཏེ། གནམ་བབས་པ་དང་། རྩལ་ལས་བྱུང་བའོ། །བདག་ལས་བྱུང་བ་ནི་རྣམ་པ་གསུམ་སྟེ། 
འདུ་བ་ལས་བྱུང་བ་དང་། ལུས་ཀྱི་འདུ་འཛི་ལས་བྱུང་བ་དང་། ལོག་པར་རྣམ་པར་བརྟགས་པ་ལས་བྱུང་བའོ། །དེ་དག་མེད་པས་བག་ཡོད་པར་གྱུར་ནས། ལས་ངན་པ་མ་ལུས་པར་ཡོངས་སུ་སྤངས་ཏེ། སངས་རྒྱས་རྗེས་སུ་དྲན་པ་ཙམ། །རབ་ཏུ་བསྒོམས་པ་གུས་བྱས་ལ། །སེམས་ནི་

73-1-34a

རྩེ་གཅིག་བྱས་ནས་སུ། །སངས་རྒྱས་རྗེས་སུ་དྲན་བྱེད་པ། །དེ་ནི་ཆོ་ག་བཞིན་དུ་བསྒོམ། །བསམ་གཏན་གྱི་ཚེར་མ་ནི་སྒྲ་ཡིན་པའི་ཕྱིར། སྒྲ་མེད་པའི་ས་ཕྱོགས་སུ་སྐྱིལ་མོ་ཀྲུང་བཅས་ནས། དབུགས་རྔུབ་པ་དང་། འབྱུང་བ་དག་བསྟུད་པར་མི་བྱ་བར། ལུས་དྲང་པོར་
བསྲང་ལ། ཧ་ཅང་མ་རེངས་པར་བྱ་སྟེ། སེམས་ཀྱི་ཚོགས་ཕྱི་རོལ་དུ་འཕྲོ་བ་བཟློག་པའི་ཕྱིར། སེམས་སྣའི་རྩེ་མོ་ལ་གཏད་དེ་ཅི་ནུས་ཀྱིས་བསྒོམ་པར་བྱའོ། །དེ་ནས། སྐྱོ་བར་གྱུར་ན་བློ་ཅན་གྱིས། །དེར་གནས་སེམས་ཀྱིས་དུས་བསྟུད་དོ། །ཧ་ཅང་བསྒོམ་དྲགས་པས་རྣལ་འབྱོར་པ་
སེམས་སྐྱོ་བར་གྱུར་ན། བསྒོམ་པ་དེ་ལས་ལངས་ལ་ཀློག་འདོན་བྱ་བའམ། འགྲེང་བའམ། འགྲོ་བའམ། ཟན་ཟ་བའམ། བྱ་བ་གཞན་ཅི་ཡང་རུང་བ་བྱེད་ཅིང་སྐྱོ་བ་མེད་པར་མ་གྱུར་གྱི་བར་དུ་སངས་རྒྱས་རྗེས་སུ་དྲན་པ་ལ་གནས་པའི་སེམས་ཀྱིས་དུས་བསྟུད་པར་བྱ་སྟེ། སྐྱོ་བ་མེད་པར་
གྱུར་ནས་ཀྱང་བསྒོམ་པར་བྱའོ། །བློ་ལྡན་དེ་ལྟར་སྒོམ་བྱེད་པ། །དེ་ལྟར་ཞག་བདུན་ཐ་མར་ནི། །སངས་རྒྱས་བྱེ་བ་བརྒྱད་ཅུ་རྣམས། །དེ་ཡི་འོག་ཏུ་གཟུངས་སྦྱིན་མཛད། །ཅིའི་ཕྱིར་སངས་རྒྱས་བཅོམ་ལྡན་འདས་དེ་སྙེད་ཀྱིས་དེ་ལ་གཟུངས་སྦྱིན་པར་མཛད་ཅེ་ན། སྨྲས་པ། གསང་སྔགས་
ཚིག་ནི་རེ་རེ་ཞིང་། །སངས་རྒྱས་བྱེ་བས་བྱིན་བརླབས་ལ། །དེས་ཀྱང་སྔར་ནི་དེ་དག་གིས། །བཟླས་བསྲུང་ལ་སོགས་ཕུན་ཚོགས་བྱས། །འདི་ལྟར་གསང་སྔགས་ཀྱི་ཚིག་བརྒྱད་ཅུ་པོ་རྣམས་སངས་རྒྱས་བྱེ་བ་ཕྲག་བརྒྱད་ཅུས་བྱིན་གྱིས་བརླབས་ལ། གསང་སྔགས་ཀྱི་ཚིག་དེ་དག་གིས་ཀྱང་
རྣལ་འབྱོར་པ་དེས་བཟླས་བརྗོད་བྱེད་པར་གྱུར་པས། བསྲུང་བ་དང་། མདངས་དང་། སྟོབས་དང་། ནད་མེད་པ་ལ་སོགས་པ་ཕུན་སུམ་ཚོགས་པར་བྱས་པའི་ཕྱིར་ཏེ། བསྒོམ་པའི་སྔ་རོལ་དུ་བཟླས་བརྗོད་བྱ་བའི་སྒོ་ནས་ཅི་ནུས་སུ་གསང་སྔགས་ཀྱི་ཚིག་རྣམས་བརྗོད་ལ། དེའི་འོག་ཏུ་
བསྒོམ་པར་བྱའོ། །གང་གི་ཕྱིར་དེ་ལྟ་ཡིན་པ། །དེའི་ཕྱིར་སངས་རྒྱས་བྱེ་བ་ནི། །བརྒྱད་ཅུས་དེ་ལ་གཟུངས་སྦྱིན་མཛད། །ཡང་ན་དགུ་བཅུ་ལས་ཐོས་ལྟར། །བསྒོམས་མཐུ་དེ་ནི་འདི་འདྲའོ། །ཡང་ན་སངས་རྒྱས་རྗེས་སུ་དྲན་པ་བསྒོམ་པའི་མཐུ་ཉིད་འདི་འདྲ་སྟེ། དེས་སངས་རྒྱས་བྱེ་བ་

73-1-34b

ཕྲག་བརྒྱད་ཅུས་དེ་ལ་གཟུངས་སྦྱིན་པར་མཛད་དོ། །དཔེར་ན་འདི་ཉིད་ལས་སངས་རྒྱས་བྱེ་བ་ཕྲག་དགུ་བཅུ་ལས་ཆོས་བསྟན་པ་ཐོས་སོ་ཞེས་ཡང་དང་ཡང་དུ་གསུངས་པ་ལྟ་བུའོ། །གཟུངས་དེ་རྣམ་པ་ཇི་ལྟ་བུར་བསམས་ན་ཐོབ་པར་འགྱུར་ཞེ་ན། སྨྲས་པ། གཟུགས་སོགས་
བསམ་པ་བསམ་བྱ་ཡིན། །གཟུགས་མེད་སོགས་པ་བསམ་བྱ་མིན། །ཡང་ན་སྤྲུལ་པ་བསམ་བྱ་ཡིན། །ལོངས་སྤྱོད་རྫོགས་པ་བསམ་བྱ་མིན། །ཡང་ན་བསམ་བྱ་བསམ་བྱ་མིན། །བྱ་བསམ་བྱ་མིན་དངོས་བསམ་བྱ། །གཟོད་ནས་མ་སྐྱེས་པས་མེད་ཕྱིར། །བསམ་པ་དེ་དག་བསམ་མི་
བྱ། །གཟུགས་ལ་སོགས་པ་ལ་བསམ་པ་ནི་བསམ་བྱ་མིན་པ་སྟེ། དེ་ནི་དངོས་པོ་མེད་པའི་ངོ་བོ་ཡིན་པས་དོན་གྱི་བྱ་བ་མི་བྱེད་པའི་ཕྱིར། བསམ་པར་བྱ་བའི་འོས་མ་ཡིན་པའི་ཕྱིར་རོ། །སོགས་པ་སྨོས་པས་ནི་མཚན་ལ་སོགས་པ་སྔར་བསྟན་པ་རྣམས་ཉིད་གཟུང་ངོ་། །ཡང་ན་སྤྲུལ་
པའི་སྐུ་ལ་བསམ་པ་གང་ཡིན་པ་དེ་ནི་བསམ་པར་བྱ་བ་ཡིན་ཏེ། དེ་ནི་སྐྱེ་བ་ལ་སོགས་པའི་བྱེ་བྲག་གིས་བསམ་པར་བྱ་བར་ནུས་པའི་ཕྱིར་རོ། །ལོངས་སྤྱོད་རྫོགས་པའི་སྐུ་ལ་བསམ་པ་གང་ཡིན་པ་དེ་ནི་བསམ་པར་བྱ་བ་མ་ཡིན་པ་སྟེ། དེ་ནི་སྐྱེ་བ་ལ་སོགས་པའི་བྱེ་བྲག་གིས་བསམ་པར་མི་
ནུས་པའི་ཕྱིར་རོ། །རྣམ་པ་གཞན་ཡང་བསམ་པར་བྱ་བ་བསམ་པར་ནུས་པའི་དངོས་པོ་ལ་བསམ་པ་གང་ཡིན་པ་དེ་ནི་བསམ་པར་བྱ་བ་ཡིན་ནོ། །བསམ་པར་བྱ་བ་མ་ཡིན་པ་སངས་རྒྱས་ཀྱི་ཆོས་ལ་སོགས་པ་དག་ལ་བསམ་པ་ཡིན་པ་དེ་ནི་བསམ་པར་བྱ་བ་མ་ཡིན་པའོ། །གཟོད་མ་ནས་
མ་སྐྱེས་པས་གཟུགས་ལ་སོགས་པ་མེད་པའི་ཕྱིར། བསམ་པ་དེ་དག་ནི་བསམ་པར་མི་བྱའོ། །ཇི་ལྟར་ཆོས་ཐམས་ཅད་གཟོད་མ་ནས་མ་སྐྱེས་པ་དེ་ལྟ་ན་སྔར་བསྟན་ཟིན་ཏོ། །འོ་ན་ཅི་ཞིག་སོམས་ཤིག་ཅེ་ན། སྨྲས་པ་ཆོས་ཀྱི་དབྱིངས་སོམས་ཤིག །དེ་ལ་ཡང་ལོག་པར་བསམ་པར་མི་བྱའོ། །
ཆོས་ཀྱི་དབྱིངས་ཇི་ལྟར་བསམ་ཞེ་ན། ཇི་ལྟར་ཡང་འགལ་བར་ཡང་མ་སེམས་ཤིག །ཅིའི་ཕྱིར་དེ་ལྟ་ཞེ་ན། འདི་ལྟར་རྣམ་པ་གང་དང་གང་གིས་ཆོས་ཀྱི་དབྱིངས་སེམས་པར་བྱེད་པ་རྣམས་དེ་དང་དེ་མེད་པའི་ཕྱིར་རོ། །སྟོང་པ་དང་། རང་བཞིན་གྱིས་སྐྱེ་བ་མེད་པ་ལ་སོགས་པ་ནི། དོན་དམ་

73-1-35a

པར་ན་དགག་པར་བྱ་བ་མེད་པ་ལ་དགག་པ་མི་འཇུག་པའི་ཕྱིར་མེད་པ་ཁོ་ན་སྟེ། དེ་ལྟ་བས་ན་ཆོས་ཀྱི་དབྱིངས་དེ་ལ་ཡང་བསམ་པར་མི་བྱ་སྟེ། ལོག་པར་བསམ་པར་མི་བྱའོ་ཞེས་བྱ་བའི་ཐ་ཚིག་གོ། །འགལ་བར་སེམས་པ་ནི་སྐྱེ་བ་མེད་པ་ལ་སོགས་པའི་རྣམ་པ་དང་། 
དངོས་པོ་ལ་སོགས་པའི་རྣམ་པ་དང་། དངོས་པོ་ཐ་དད་པ་ཉིད་དང་། གཅིག་པ་མ་ཡིན་པའི་མཚན་ཉིད་ལ་སོགས་པ་རྣམ་པར་སེམས་པ་སྟེ། གང་གི་དབང་དུ་མཛད་ནས། གང་སྟོང་པ་ཉིད་དུ་ལྟ་བ་ནི་ཞེས་བྱ་བ་ལ་སོགས་པ་གསུངས་པ་ལྟ་བུའོ། །རྣལ་འབྱོར་པས་ཇི་སྐད་བསྟན་པའི་
རྣམ་པ་ཁོ་ནས། དེ་ལྟར་ཞག་བདུན་སེམས་ན་ནི། །དེ་ཡི་འོག་ཏུ་གཟུངས་ཐོབ་འགྱུར། །བཅོམ་ལྡ་འདས་ཀྱིས་ཡང་ཡང་དུ་བཤད་པས་ཅི་ཞིག་བྱ་སྙམ་དུ་དགོངས་ནས། དཔེར་ན་ཞེས་བྱ་བ་ལ་སོགས་པ་གསུངས་ཏེ། ཕན་ཡོན་འདི་ནི་གཟུངས་རྣམ་པ་གསུམ་ཆར་གྱི་ཡིན་ནོ། །བདེ་
བ་ནི་ངེས་པར་ལེགས་པ་དང་མངོན་པར་མཐོ་བའི་བདེ་བའོ། །སོམ་ཉི་ནི་ཐེ་ཚོམ་ཟ་ཞེས་བྱ་བའི་ཐ་ཚིག་གོ། །དེ་ལྟར་ཕན་ཡོན་རྣམ་པ་དུ་མ་བསྟན་ནས། འབྲས་བུ་ཉེ་བ་གཙོ་བོ་བསྟན་པས་འདུལ་བའི་འཇིག་རྟེན་གཟུངས་འདི་ལ་འཇུག་ཅིང་མཇུག་སྡུད་པར་མཛད་དེ། འདི་ལས་རྫོགས་
པའི་བྱང་ཆུབ་ཉེ། །དེ་བས་འདི་ལ་སྦྱོར་བར་གྱིས། །ཐོས་པ་ལ་སོགས་པའམ། ལུས་ལ་སོགས་པའམ། འོག་ནས་བཞི་ཚན་བསྟན་པ་རྣམས་ཀྱིས་སྦྱར་བར་བྱ་སྟེ། འདིས་ནི་རང་གི་དོན་ཕུན་སུམ་ཚོགས་པ་ཡེ་ཤེས་ཕུན་སུམ་ཚོགས་པ་དང་། སྤངས་པ་ཕུན་སུམ་ཚོགས་པ་རྣམ་པ་
གཉིས་བསྟན་ཏེ། བྱང་ཆུབ་ནི་ཡེ་ཤེས་དང་སྤངས་པའི་མཚན་ཉིད་ཡིན་པའི་ཕྱིར་རོ། །ཡེ་ཤེས་ཕུན་སུམ་ཚོགས་པ་ནི་རྣམ་པ་བཞི་སྟེ། ཐམས་ཅད་མཁྱེན་པ་དང་། རྣམ་པ་ཐམས་ཅད་མཁྱེན་པ་ཉིད་དང་། མ་འབད་པར་མཁྱེན་པ་དང་། མ་བསྟན་པར་མཁྱེན་པའོ། །སྤངས་པ་ཡང་
རྣམ་པ་བཞི་སྟེ། ཉོན་མོངས་པ་དང་། ཤེས་བྱའི་སྒྲིབ་པ་སྤངས་པ་དང་། གཏན་དུ་སྤངས་པ་དང་། བག་ཆགས་དང་བཅས་པར་སྤངས་པ་དང་། ཏིང་ངེ་འཛིན་དང་སྙོམས་པར་འཇུག་པའི་སྒྲིབ་པ་ཐམས་ཅད་སྤངས་པ་སྟེ། དེ་དག་ཀྱང་རྫོགས་པའི་བྱང་ཆུབ་སྨོས་པས་བསྟན་ཏོ། །

73-1-35b

ཁྱེད། ཞི་བའི་གནས་ནི་ཐོབ་གྱུར་ནས། །རྫོགས་པའི་བྱང་ཆུབ་ཐོབ་བྱེད་འགྱུར། །འཇིག་རྟེན་ནོ་སྙམ་དུ་དགོངས་པ་སྟེ། འདིས་ནི་གཞན་གྱི་དོན་ཕུན་སུམ་ཚོགས་པ་བསྟན་པར་རིག་པར་བྱའོ། །ཞི་བའི་གནས་ནི་ཉོན་མོངས་པ་དང་ཤེས་བྱའི་སྒྲིབ་པ་ཞི་བར་འགྱུར་བའི་ཕྱིར་རམ། 
མེ་གསུམ་ཞི་བར་འགྱུར་བའི་ཕྱིར། མི་གནས་པའི་མྱ་ངན་ལས་འདས་པའོ། །རྫོགས་པའི་བྱང་ཆུབ་ནི་རྣམ་པ་གསུམ་པོ་སྟེ། འདིས་ནི་བྱང་ཆུབ་གསུམ་ལ་འགོད་པའི་གཞན་གྱི་དོན་ཕུན་སུམ་ཚོགས་པ་བསྟན་ཏོ། །ངན་སོང་གསུམ་ལས་ངེས་པར་ཐར་པ་དང་། མཐོ་རིས་སུ་
འགོད་པ་དང་། འཁོར་བའི་སྡུག་བསྔལ་ལས་གཏན་དུ་རྣམ་པར་ཐར་པ་ནི་ཤུགས་ཀྱིས་བསྟན་པར་ཤེས་པར་བྱའོ། །ཡང་ན་ཅིའི་ཕྱིར། འདི་ལས་རྫོགས་པའི་བྱང་ཆུབ་ཉེ་ཞེ་ན། འདི་ལྟར་ཁྱེད། ཞི་བའི་གནས་ནི་ཐོབ་གྱུར་ནས། །རྫོགས་པའི་བྱང་ཆུབ་ཐོབ་པར་འགྱུར། །
ཞེས་བྱ་བ་འདིས་ཉེ་སྟེ། ཚིགས་སུ་བཅད་པ་རིལ་པོ་འདིས་ནི་རང་གི་དོན་ཕུན་སུམ་ཚོགས་པ་བསྟན་ཏོ།    །ད་ནི་དེ་ནས་བཅོམ་ལྡན་འདས་ཀྱིས་ཞེས་བྱ་བ་ལ་སོགས་པ་གཟུངས་འདི་འཐོབ་པའི་ཐབས་བསྟན་ཏེ། བློ་ལྡན་ཅི་འདྲ་གང་དུ་དང་། །ཇི་ལྟར་གནས་དང་གང་བསྒོམས་དང་། །
གང་བྱས་པས་ནི་འཐོབ་འགྱུར་བ། །དེ་ནི་བཞི་ཚན་རྣམས་ཀྱིས་བསྟན། །རྣལ་འབྱོར་པ་ཇི་ལྟ་བུས་གཟུངས་འདི་ཐོབ་པར་འགྱུར་བ་དེ་ནི་བཞི་ཚན་དང་པོས་བསྟན་ཏོ། །གང་དུ་གནས་པ་དང་། ཇི་ལྟར་གནས་པ་དེ་གཉིས་ནི་གཉིས་པས་བསྟན་ཏོ། །གང་སྒོམ་པ་དང་། གང་བྱ་བ་
དེ་གཉིས་ནི་གསུམ་པས་བསྟན་ཏོ། །རྣལ་འབྱོར་པ་ཇི་ལྟ་བུས་གཟུངས་འདི་ཐོབ་པར་འགྱུར་ཞེ་ན། སྨྲས་པ། ཁྲིམས་ལྡན་དེ་ཡི་མི་མཐུན་ཕྱོགས། །གཉིས་གྲོལ་དེ་ཡི་འཕེལ་བྱེད་ལྡན། །ཉེས་པ་དང་ནི་ཕན་ཡོན་རྣམས། །བསྟན་པས་དེ་ལ་འཛུད་པར་བྱེད། །འདོད་པ་རྣམས་
ལ་ལྷག་པར་ཆགས་པ་མེད་པ་ཞེས་བྱ་བས་ནི་ཚུལ་ཁྲིམས་དང་ལྡན་པར་བསྟན་ཏེ། ཚུལ་ཁྲིམས་ནི་ཡོན་ཏན་ཐམས་ཅད་ཀྱི་གཞི་ཡིན་ནོ། །འདོད་པ་ལྔའི་ཡོན་ཏན་རྣམས་ལྷག་པར་ཆགས་པ་མེད་ན། སྲོག་གཅོད་པ་ལ་སོགས་པ་མི་བྱེད་དོ། །དེ་ལྟ་བས་ན་དེ་སྤངས་པའི་

73-1-36a

མཚན་ཉིད་ཀྱི་ཚུལ་ཁྲིམས་ཀྱང་ཐོབ་པ་ཉིད་པས་ལོགས་ཤིག་ཏུ་མ་བསྟན་ཏོ། །ཚུལ་ཁྲིམས་ཀྱི་མི་མཐུན་པའི་ཕྱོགས་ཕྲག་དོག་དང་སེར་སྣ་ལས་གྲོལ་བ་ནི། སེམས་ཅན་ཐམས་ཅད་ལ་ཕྲག་དོག་མེད་པ་དང་། བདོག་པ་ཐམས་ཅད་ཡོངས་སུ་གཏོང་ཞིང་འགྱོད་པ་མེད་
པ་ཡིན་ཞེས་བྱ་བ་འདིས་བསྟན་ཏོ། །ཕྲག་དོག་དང་སེར་སྣ་དག་ནི་ཚུལ་ཁྲིམས་ཀྱི་མི་མཐུན་པའི་ཕྱོགས་རྣམས་ཡིན་ཏེ། འདི་ལྟར་འདོད་པ་རྣམས་ལ་ལྷག་པར་ཆགས་ན་ཕྲག་དོག་བྱེད་པ་དང་། སེར་སྣ་བྱེད་པར་འགྱུར་རོ། །སེམས་ཅན་ཐམས་ཅད་ལ་ཞེས་སྨོས་པ་ནི། དགྲ་བོ་དང་མཛའ་
བོ་དང་ཐ་མལ་པ་ཡོངས་སུ་གཟུང་བའི་ཕྱིར་རོ། །བདོག་པ་ཐམས་ཅད་ཅེས་སྨོས་པ་ནི་ཕྱི་རོལ་དང་ནང་གི་བསྡུ་བའི་ཕྱིར་རོ། །འགྱོད་པ་མེད་པ་ཞེས་སྨོས་པ་ནི་སེམས་ལ་འཛིན་པ་མེད་པ་ཉིད་དུ་བསྟན་པའི་ཕྱིར་ཏེ། ཚིག་འདི་གསུམ་གྱིས་ནི་ཚུལ་ཁྲིམས་ཤིན་ཏུ་རྣམ་པར་དག་པ་བསྟན་ཏོ། །འགྱོད་པ་
མེད་པར་སྦྱིན་པའི་ཚུལ་ཅན་ནི་ཡིད་ལ་གཅགས་པ་མེད་པར་སྦྱིན་ཞེས་བྱ་བའི་ཐ་ཚིག་གོ། །ཉིན་མཚན་དུ་ཆོས་འདོད་ཅིང་ཆོས་ཀྱི་ཀུན་དགའ་ལ་དགའ་བ་ཡིན་ཏེ་ཞེས་བྱ་བ་འདིས་ནི་ཚུལ་ཁྲིམས་འཕེལ་བར་བྱེད་པ་གང་དག་དང་ལྡན་པ་ཉིད་བསྟན་ཏོ། །ཆོས་ལ་སྲེད་པའི་ཕྱིར་ཆོས་འདོད་པར་འགྱུར་
རོ། །ནན་ཏན་བྱེད་པས་ནི་ཆོས་ལ་དགའོ། །ཡང་ན་ཆོས་རྣམས་ལ་འཇུག་ཕྱིར་ཆོས་འདོད་དོ། །གོམས་པའི་ཕྱིར་ཆོས་ལ་དགའོ། །ཡང་ན་ནམ་གྱི་ཆ་སྟོད་དང་ནམ་གྱི་ཆ་སྨད་ལ་སོགས་པར་བརྩོན་པའི་ཕྱིར་ཆོས་འདོད་པར་འགྱུར་རོ། །སྟོང་པ་ཉིད་ལ་སོགས་པའི་ཆོས་བསྒོམ་པའི་ཕྱིར་
ཆོས་ལ་དགའོ། །ཡང་ན་གཉིས་སུ་ངེས་པར་གཟུང་བའི་ཕྱིར་གསུངས་ཏེ། འདིས་ནི་རྟོག་པ་ངན་པ་མེད་པའི་ཕྱིར་དོན་གྱིས་ན། འཁྲིག་པའི་སྦྱོར་བ་བདུན་དང་བྲལ་བའི་ཚུལ་ཁྲིམས་བསྟན་ཏོ། །ཉེས་པ་དང་ཕན་ཡོན་བསྟན་པའི་རྒྱུས་ཚུལ་ཁྲིམས་ལ་སོགས་པ་དེ་དག་ལ་འཛུད་དེ། གདུལ་
བ་ཞེས་བྱ་བའི་ཚིག་ལྷག་མའོ། །དེ་ཡང་ཚིགས་སུ་བཅད་པ་རྣམས་ཀྱིས་བསྟན་ཏོ། །དེ་ལ་རྣམ་པ་ལྔས་ཚུལ་ཁྲིམས་ལ་འཛུད་དེ། འདོད་པ་རྣམས་ཀྱི་ཉེས་པ་བསྟན་པའི་ཕྱིར་གསུངས་པ་ལ། དྲིང་བ་ནི་འཆལ་བའི་ཚུལ་ཁྲིམས་ཀྱི་དྲི་དང་ལྡན་པའི་ཕྱིར་རོ། །ཡང་ན་འདོད་པའི་རྩ་བ་ལུས་ཀྱི་

73-1-36b

མི་གཙང་བའི་དྲི་དང་ལྡན་པའི་ཕྱིར་རོ། །ངན་པ་ནི་ཐམས་ཅད་ཀྱི་ཐ་ཆད་དུ་གྱུར་པའི་ཕྱིར་དང་། སེམས་ཅན་ངན་པས་བསྟེན་པའི་ཕྱིར་དང་། དམ་པ་རྣམས་ཀྱིས་སྨད་པའི་ཕྱིར་དང་། བུམ་པ་མི་གཙང་བ་ཅན་ལ་སོགས་པ་དང་འདྲ་བའི་ཕྱིར་དང་། འབྲས་བུ་ངན་པ་འགྲུབ་པའི་ཕྱིར་རོ། །
བདུད་ཀྱི་སྤྱོད་ཡུལ་ནི་བདུད་ཀྱི་ཡུལ་ལས་མ་འདས་པའི་ཕྱིར་རོ། །བདུད་ནི་ལྷའི་བུའམ། འདོད་ཆགས་ལ་སོགས་པ་ཉོན་མོངས་པའམ། གཉིས་ཀའོ། །སེམས་ཅན་དམྱལ་བའི་རྐྱེན་ནི་དེ་འགྲུབ་པར་བྱེད་པ་དང་། དེ་འགྲུབ་པར་འགྱུར་བའི་ལས་ཀྱིས་སེམས་ཅན་དམྱལ་བར་འགྲོ་བར་
འགྱུར་བའི་ཕྱིར་རོ། །སེམས་ཅན་དམྱལ་བ་སྨོས་པ་ནི་གཙོ་བོ་ཡིན་པའི་ཕྱིར་ཏེ། དུད་འགྲོ་དང་ཡི་དགས་གཉིས་ཀྱི་རྐྱེན་ཡང་འདོད་པ་རྣམས་ཡིན་པའི་ཕྱིར་རོ། །ངན་སོང་གི་རྒྱུ་ནི་མ་རུངས་པར་འགྱུར་བའི་རྒྱུ་ཡིན་པའི་ཕྱིར་ཏེ། འདོད་ཕྱིར་འཇིག་རྟེན་བཅིང་དང་བསད་པར་འགྱུར། །ཞེས་བྱ་བ་ལ་
སོགས་པ་འབྱུང་བ་ལྟ་བུའོ། །ཡང་ན་ངན་སོང་གི་རྒྱུ་ནི་ངན་སོང་གསུམ་གྱི་རྒྱུ་ཡིན་པའི་ཕྱིར་རོ། །སེམས་ཅན་དམྱལ་བ་སྨོས་པ་ནི་གཙོ་བོར་བསྟན་པའི་ཕྱིར་རོ། །དེའི་མི་མཐུན་པའི་ཕྱོགས་ཕྲག་དོག་སྤོང་བ་ལ་འཛུད་པ་ནི། ཕན་ཡོན་བསྟན་པའི་ཕྱིར་རྣམ་པ་ལྔས་བསྟན་ཏེ། སྤང་བར་བྱ་བའི་རང་
བཞིན་བསྟན་པ་དང་། སྤང་བར་བྱ་བའི་ཡུལ་བསྟན་པ་དང་། སྤང་བར་བྱ་བའི་རྒྱུ་བསྟན་པ་ལ། རྒྱུ་དེ་ཡང་ཤེས་ཀྱི་ཁེ་དང་རྙེད་པ་དང་གྲགས་པའི་བྱེ་བྲག་ལས་རྣམ་པ་གསུམ་དུ་བསྟན་ཏོ། །ཤེས་ཀྱི་ཁེ་ནི་ཀུན་དུ་བསྟན་པས་འདུ་བར་འགྱུར་རོ། །དེའི་རང་བཞིན་བསྟན་པ་ནི། དགའ་
བའི་མིག་ནི་དགའ་བས་ལྟ་བ་སྟེ། ཁྲོ་བ་ལ་སོགས་པའི་ཉེས་པ་དང་བྲལ་བའི་ཕྱིར་རོ། །དེ་སྤང་བའི་ཕན་ཡོན་བསྟན་པ་དེ་ཡང་རྣམ་པ་གཉིས་ཏེ་མཐུ་ཆེ་བ་ཐོབ་པ། ནོར་དང་འཁོར་ལ་སོགས་འབྱོར་པ་འཐོབ་པའི་ཕྱིར་དང་། གཟུགས་མཛེས་པ་འཐོབ་པ་ཡན་ལག་དང་ཉིང་ལག་
གི་གཟུགས་མཛེས་པ་འཐོབ་པའི་ཕྱིར་རོ། །དེའི་མི་མཐུན་པའི་ཕྱོགས་སེར་སྣ་སྤང་བ་ལ་འཇུག་པ་ནི། ཉེས་པ་དང་ཕན་ཡོན་བསྟན་ཕྱིར་རྣམ་པ་བཞིས་བསྟན་ཏེ། ཉེས་དམིགས་བསྟན་པ་ནི་རྩོད་པ་སྟེ་ལུས་ལ་སོགས་པའི་བྱ་བ་གནོད་པ་དང་ལྡན་པའོ། །དེའི་རྒྱུ་བསྟན་པ་ནི་ཡོངས་སུ་འཛིན་པ་སྟེ། 

73-1-37a

བདག་དང་བདག་གིར་མངོན་པར་ཞེན་པས་དངོས་པོར་འཛིན་པའོ། །གཞི་རྩ་སྨོས་པས་ནི་དངོས་དང་བརྒྱུད་པའི་རྒྱུའི་རང་བཞིན་བསྟན་པའི་དོན་ཏེ། འདི་ཡང་ཡོངས་སུ་འཛིན་པ་འདི་ནི་རྣམ་པ་ཐམས་ཅད་དུ་གནོད་པའི་རྒྱུ་ཡིན་པར་བསྟན་པས་གདུལ་བ་རྣམས་དེ་ལས་འདུན་པ་བཟློག་
པའི་ཕྱིར་རོ། །སྲེད་པའི་ཡུལ་ཡོངས་སུ་སྤང་བ་ནི་སྤང་བ་སྟེ། དེ་ལ་ལྷག་པར་ཆགས་པ་སྤང་བའི་ཕྱིར་རོ། །དེའི་ཕན་ཡོན་བསྟན་པ་ནི། གཟུངས་ཞེས་བྱ་བ་སྟེ། གཟུངས་འདི་ཉིད་ཡིན་ནོ། །དེ་ཡང་དུས་གཞན་ལ་དགོངས་ཏེ་གསུངས་སོ། །དེ་འཕེལ་བར་བྱེད་པ་ལ་འཇུག་པ་ནི། 
ཕན་ཡོན་བསྟན་པའི་ཕྱིར་རྣམ་པ་ལྔས་བསྟན་ཏེ། ཆོས་ཚོལ་བ་ནི་ཆོས་ནི་སྟོང་པ་ཉིད་དང་། དེ་སྟོན་པའི་ཡི་གེའོ། །དེ་འདྲི་བ་ནི་འདྲི་བ་ལ་སོགས་པའི་རིམ་པ་སྟེ། དེའི་ཕྱིར། ཡི་གེ་འདྲི་མཆོད་སྦྱིན་པ་དང་། །ཀློག་དང་ཉན་དང་འཛིན་པ་དང་། །སྟོན་དང་ཁ་ཏོན་བྱེད་པ་དང་། །སེམས་
དང་བསྒོམ་པ་གང་ཡིན་པ། །ཞེས་བྱ་བ་ལ་སོགས་པ་གསུངས་སོ། །རྒྱུན་མི་ཆད་པར་ཚོལ་བ་ནི་ལས་ངན་པ་ཡོངས་སུ་སྤང་བའི་ཕྱིར་རོ། །གཞན་མི་སེམས་པར་ཚོལ་བ་ནི་ལོག་པར་རྣམ་པར་རྟོག་པ་ཡོངས་སུ་སྤང་བ་དང་། མཐོ་རིས་ལ་སོགས་པའི་འབྲས་བུ་འཐོབ་པ་རྣམ་པར་རྟོག་
པ་ཡོངས་སུ་སྤོང་བའི་ཕྱིར་རོ། །བྱང་ཆུབ་འདོད་ཅིང་ཚོལ་བ་ནི་དེ་བྱང་ཆུབ་ཀྱི་རྒྱུ་ཡིན་པར་བསྟན་པའི་ཕྱིར་བྱང་ཆུབ་ཀྱི་རྒྱུ་གཟུངས་ཡིན་པའི་ཕྱིར་རོ། །ཆོས་ཚིག་ནི་སྟོང་པ་ཉིད་དང་། དེ་སྟོན་པའི་མདོ་སྡེ་ལ་སོགས་པའོ། །ཚིགས་སུ་བཅད་པ་དང་པོ་ལས་ནི་མི་མཐུན་པའི་ཕྱོགས་ཀྱི་
ཉེས་པ་འབའ་ཞིག་བསྟན་ལ། གཉེན་པོའི་ཡོན་ཏན་ནི་མ་བསྟན། གཉིས་པ་དང་ཐ་མ་ལས་ནི་གཉེན་པོའི་ཡོན་ཏན་འབའ་ཞིག་བསྟན་ལ། མི་མཐུན་པའི་ཕྱོགས་ཀྱི་ཉེས་པ་མ་བསྟན། གསུམ་པ་ལས་ནི་མི་མཐུན་པའི་ཕྱོགས་དང་། གཉེན་པོ་གཉི་གའི་ཡོན་ཏན་དང་སྐྱོན་
བསྟན་པ་མ་ཡིན་ནམ། ཅིའི་ཕྱིར་དེ་ལྟར་བསྟན་ཞེ་ན། དེ་ནི་གཉེན་པོ་དང་མི་མཐུན་པའི་ཕྱོགས་གཉིས་ཀྱི་ཡོན་ཏན་དང་ཉེས་པ་བསྟན་པ་གུད་དུ་གཅེས་པ་ཡོད་དོ། །དེའི་ཕྱིར་ཚིགས་སུ་བཅད་པ་དང་པོ་ལ་ནི། འདོད་པའི་གཉེན་པོའི་ཚུལ་ཁྲིམས་དྲི་ཞིམ་པོ་བསྟེན་པར་བྱའོ་ཞེས་

73-1-37b

བྱ་བ་ལ་སོགས་པས་ཡོན་ཏན་ཡང་བལྟ་བར་བྱའོ། །ཚིགས་སུ་བཅད་པ་གཉིས་པ་དང་། བཞི་པ་དག་ལ་ཡང་དེའི་མི་མཐུན་པའི་ཕྱོགས་ཀྱི་ཉེས་པ་ཡང་བལྟ་བར་བྱའོ། །སྔར་བསྟན་པ་ཡི་དོན་ཉིད་ནི། །ཆོས་ཀྱི་རྗེས་འབྲང་ཆེད་དུ་སྟེ། །རིགས་པ་ཕན་ཡོན་བྱེ་བྲག་གིས། །ཚིགས་བཅད་རྣམས་ཀྱིས་ཡང་བསྟན་ཏོ། །
རྣམ་པ་གཞན་ཡང་སྔར་བསྟན་པའི་དོན་ཉིད་ཆོས་ཀྱི་རྗེས་སུ་འབྲང་བ་དང་། ཞར་ལ་དད་པས་རྗེས་སུ་འབྲང་བའི་དབང་དུ་ཡང་མཛད་དེ། རིགས་པ་དང་ཕན་ཡོན་གྱི་བྱེ་བྲག་གི་རྒྱུས། ཡང་ཚིགས་སུ་བཅད་པ་དག་གིས་བསྟན་ཏེ། འདི་ལྟར་འདོད་པ་རྣམས་སྤང་བའི་ཕྱིར་ནི་དྲི་ང་བ་ལ་
སོགས་པའི་རིགས་པ་གསུངས་སོ། །ཕྲག་དོག་མི་བྱ་བའི་ཕྱིར་ནི་མཐུ་ཆེ་བ་ལ་སོགས་པ་ཐོབ་པའི་ཕན་ཡོན་གསུངས་ལ། དེ་མི་བྱ་བའི་ཕྱིར་འབྲས་བུ་ཁྱད་པར་ཅན་འཐོབ་བོ་ཞེས་རྒྱུ་ཡང་གསུངས་སོ། །སེར་སྣའི་རྒྱུ་སྲེད་པའི་ཡུལ་ཡོངས་སུ་སྤང་བའི་ཕྱིར་ནི་རྒྱུ་རྩོད་པ་གསུངས་སོ། །རྩ་བ་
བཞི་པས་ནི་ཕན་ཡོན་བསྟན་ཏོ། །ཚུལ་ཁྲིམས་འཕེལ་བར་བྱེད་པའི་ཆོས་བསྟན་པའི་ཕྱིར་ནི་འབྲས་བུ་ཁྱད་པར་ཅན་འཐོབ་བོ་ཞེས་རྒྱུ་སྨོས་ལ། ཕན་ཡོན་ནི་དངོས་སུ་བསྟན་པ་ཉིད་དོ། །ད་ནི་གང་དུ་གནས་པ་དང་། ཇི་ལྟར་གནས་པ་དེ་བསྟན་པའི་ཕྱིར། གཞན་ཡང་ཞེས་བྱ་བ་ལ་སོགས་པ་
གསུངས་ཏེ། དགོན་སོགས་གནས་ཤིང་ཟབ་མོ་ཡི། །ཆོས་རྣམས་ལ་ནི་ལེགས་པར་སྤྱོད། །རྙེད་དང་བཀུར་སྟི་ཚིགས་བཅད་ལ། །ལྷག་པར་ཆགས་མེད་བརྟུལ་ཞུགས་ཅན། །རྟག་ཏུ་སྡུག་པའི་དངོས་པོ་ཀུན། །འབྲས་བུ་ལ་ནི་མི་ལྟ་བའམ། །འཛིན་མེད་སེམས་ཀྱིས་གཏོང་བྱེད་པས། །
གཟུངས་འདི་འཐོབ་པར་འགྱུར་བ་ཡིན། །གོང་དུ་གནས་པ་ཞེས་བྱ་བ་དེ། དགོན་པ་དང་། གཡེའི་ཚིག་གིས་བསྟན་ཏེ། ལུས་ཀྱི་འདུ་འཛི་ཡོངས་སུ་སྤངས་པས་འདུ་བའི་ཉེས་པ་ཡོངས་སུ་སྤང་བའི་ཕྱིར་རོ། །དགོན་པ་ནི་གྲོང་ནས་འདོམ་ལྔ་བརྒྱ་ཕན་ཆད་དོ། །གཡེ་ནི་དེ་བས་ཀྱང་རིང་བའོ། །
སོགས་པ་སྨོས་པ་ནི་དབྱེ་བསྡུའོ། །ཇི་ལྟར་གནས་པ་དེ་ནི་ལོག་པར་རྣམ་པར་རྟོག་པའི་ཉེས་པ་དང་། འདུ་འཛི་ཡོངས་སུ་སྤང་བའི་ཕྱིར། རྣམ་པ་གསུམ་གྱིས་བསྟན་ཏེ། དེས་ནི་ལུས་དང་སེམས་ངག་གིས་བསྲིངས་ན་ཆོས་གང་བསྐྱེད་མི་ནུས་པ་དེ་འགའ་ཡང་མེད་དོ་སྙམ་དུ་དགོངས་པའོ། །

73-1-38a

ཆོས་ཟབ་མོ་ལ་སྤྱོད་པ་ནི་ཆོས་ཟབ་མོ་ལ་བཟོད་པའི་སྟོབས་བསྐྱེད་པ་ཉིད་ཅེས་གསུངས་པ་གང་ཡིན་པ་སྟེ། ཆོས་ཟབ་མོ་དག་ལ་བཟོད་པ་ནི་འདོད་པའོ། །དེའི་སྟོབས་བསྐྱེད་པ་ནི་ཆེན་པོ་ལ་སོགས་པའི་རིམ་པ་བསྐྱེད་པའོ། །དེའི་དངོས་པོ་ནི་ཆོས་ཟབ་མོ་ལ་བཟོད་པའི་སྟོབས་
བསྐྱེད་པ་དེ་ཉིད་དོ། །ཡང་ན་ཆོས་ལ་བཟོད་པ་ཟབ་མོ་ཞེས་བྱ་བར་ཤེས་པར་བྱ་སྟེ། ཡུལ་ཟབ་པའི་ཕྱིར་དེ་ཡང་ཟབ་པའོ། །རྙེད་པ་དང་བཀུར་སྟི་དང་ཚིགས་སུ་བཅད་པ་དག་ལ་ལྷག་པར་ཆགས་པ་མེད་པ་ནི། རྙེད་པ་དང་བཀུར་སྟི་དང་ཚིགས་སུ་བཅད་པ་དག་ལ་ལྷག་པར་ཆགས་པ་
མེད་ཅེས་གསུངས་པ་གང་ཡིན་པ་སྟེ། ཚིགས་སུ་བཅད་པ་ནི་གྲགས་པའོ། །ལྷག་པར་ཆགས་པ་མེད་པ་ནི་མངོན་པར་ཞེན་པ་མེད་པའོ། །རྟག་ཏུ་སྡུག་པའི་དངོས་པོ་ཐམས་ཅད་མི་ལྟ་བ་ཡོངས་སུ་གཏོང་བ་ནི་སྡུག་པའི་དངོས་པོ་ཐམས་ཅད་ལ་མི་ལྟ་བར་ཡོངས་སུ་གཏོང་ཞེས་གསུངས་པ་
གང་ཡིན་པ་སྟེ། ཐམས་ཅད་སྨོས་པ་ནི་ཕྱི་ནང་གི་དངོས་པོ་ཡོངས་སུ་བསྡུ་བའི་ཕྱིར་རོ། །མི་ལྟ་བར་གཏོང་བ་ནི་མཐོ་རིས་དང་། ལན་དུ་ཕན་འདོགས་པ་ལ་སོགས་པའི་འབྲས་བུ་ལ་མི་ལྟ་བར་ཡོངས་སུ་གཏོང་བའི་ཕྱིར་རམ། འཛིན་པ་མེད་པའི་སེམས་ཀྱིས་ཡོངས་སུ་གཏོང་བས་ན་སྡུག་པའི་དངོས་པོ་ཐམས་
ཅད་ལ་མི་ལྟ་བར་ཡོངས་སུ་གཏོང་བ་ཞེས་བྱ་སྟེ། བཏང་ངམ་མི་བཏང་སྙམ་པ་ལ་སོགས་པའི་ནེམ་ནུར་དང་། ལེ་ལོ་ལ་སོགས་པའི་འཛིན་པ་མེད་པའི་ཕྱིར་རོ། །ཆེར་ན་ལུས་དང་སྲོག་ཀྱང་ཞེས་བྱ་བ་ནི། བུ་ལ་སོགས་པ་འབའ་ཞིག་ཏུ་མ་ཟད་ཀྱི་སྙམ་དུ་དགོངས་པའོ། །ལུས་དང་སྲོག་
གཏོང་བ་ནི་ནང་གི་ཡིན་པས་དཀའ་བའི་ཕྱིར་དེ་ཉིས་སྨོས་སོ། །བུ་ལ་སོགས་པ་གཏོང་བ་ནི་ཕྱི་རོལ་གྱི་ཡིན་པའི་ཕྱིར་སླའོ། །ལུས་གཏོང་བ་ནི་ལག་པ་དང་རྐང་པ་ལ་སོགས་པ་གཏོང་བའི་ཕྱིར་རོ། །ལུས་ཐམས་ཅད་གཏོང་ན་སྲོག་གཏོང་བ་ཡིན་ནོ། །དང་པོ་གནས་ཡིན་དེ་ནས་ལས། །དེ་
ནས་རྙེད་སོགས་ཚོལ་བ་སྤོང་། །དེར་ཡང་མ་ཟད་ཐམས་ཅད་ལ། །མི་ལྟ་བ་ཡང་གཏོང་བར་བྱེད། །བཞི་ཚན་འདིའི་དོན་གོ་རིམས་བཞིན་དུ་བསྟན་པར་བྱ་སྟེ། གནས་མེད་པར་བསྒོམ་དུ་མི་རུང་བའི་ཕྱིར། རེ་ཞིག་ཐོག་མར་དགོན་པ་ལ་སོགས་པ་གནས་གསུངས་སོ། །དེར་གནས་ནས་

73-1-38b

ཀྱང་ཞིང་ལ་སོགས་པའི་ལས་ནི་མི་བྱའོ། །ལས་འདི་ལྟ་བུ་བྱའོ་ཞེས་བསྟན་པའི་ཕྱིར། གནས་ཀྱི་འོག་ཏུ་ཆོས་ཟབ་མོ་ལ་བཟོད་པའི་སྟོབས་བསྐྱེད་པ་གསུངས་སོ། །གནས་དང་ལས་དེ་དག་གིས་རྙེད་པ་ལ་སོགས་པ་བཙལ་བ་སྤང་བར་བྱའོ། །དེ་ལྟ་མ་ཡིན་ན་དགོན་པར་གནས་པ་དང་། ཆོས་
ཟབ་མོ་ལ་བཟོད་པའི་སྟོབས་བསྐྱེད་པ་དོན་མེད་པར་འགྱུར་བ་བསྟན་པའི་ཕྱིར། ལས་ཀྱི་འོག་ཏུ་རྙེད་པ་དང་བཀུར་སྟི་དང་ཚིགས་སུ་བཅད་པ་དག་ལ་ལྷག་པར་ཆགས་པ་མེད་པ་གསུངས་སོ། །ཕྱི་རོལ་གྱི་ཡན་ལག་རྙེད་པ་ལ་སོགས་པ་དག་ལ་ལྷག་པར་ཆགས་པར་མི་བྱ་བར་ཡང་མ་ཟད་
ཀྱི། སྡུག་པའི་དངོས་པོ་ཐམས་ཅད་ལ་ཡང་མི་ལྟ་བར་སྤང་ངོ་ཞེས་བསྟན་པའི་ཕྱིར། དེའི་འོག་ཏུ་སྡུག་པའི་དངོས་པོ་ཐམས་ཅད་ལ་མི་ལྟ་བར་ཡོངས་སུ་གཏོང་བ་ཞེས་གསུངས་སོ། །སྔར་བསྟན་པའི་དོན་ཉིད་ཆོས་ཀྱི་རྗེས་སུ་འབྲང་བའི་ཆེད་དུ་གཏན་ཚིགས་དང་ཕན་ཡོན་གྱི་བྱེ་བྲག་
གིས། ཚིགས་སུ་བཅད་པ་རྣམས་ཀྱིས་ཡང་གསུངས་ཏེ། རྒྱལ་བས་བསྔགས་པའི་ཞེས་བྱ་བ་ནི་གཏན་ཚིགས་བསྟན་པའོ། །དགོན་པར་གནས་པར་གྱིས་ཞེས་བྱ་བ་ནི་དམ་བཅའ་བའོ། །བཅོམ་ལྡན་འདས་ནི་ཉེས་པ་དང་བདུད་ཀྱི་དགྲ་ཐམས་ཅད་ལས་རྒྱལ་བས་ན་རྒྱལ་བའོ། །དེས་
བསྔགས་པ་ནི་འདུ་འཛི་ལ་སོགས་པའི་ཉེས་པ་ཡོངས་སུ་སྤོང་བའི་ཕྱིར་དང་། ཡོན་ཏན་སྐྱེ་བའི་རྒྱུའི་ཕྱིར་རོ། །བསྒྲུབ་པར་བྱ་བ་དང་། སྒྲུབ་པའི་དབང་གིས་དཔེ་བརྟག་པར་བྱའོ། །བདག་ནི་དགོན་པ་ན་གནས་པའོ་སྙམ་པ་ལ་སོགས་པས་མངོན་པའི་ང་རྒྱལ་བྱེད་པས། དེ་ན་གནས་
པས་གཞན་ལ་བརྙས་མི་བྱ། དེ་ལྟ་ན་དགོན་པ་དེ་རྒྱལ་བས་བསྔགས་པ་ཡིན་གྱི། དེ་ལྟ་མ་ཡིན་ནི་དེ་རྒྱལ་བས་སྨད་པ་ཁོ་ན་ཡིན་ནོ། །འདི་ལྟར། རྒྱལ་བས་བསྔགས་པའི་དགོན་པར་གནས་པར་གྱིས། །ཞེས་བྱ་བ་ནི་གཏན་ཚིགས་སོ། །དེ་ན་གནས་པས་གཞན་ལ་བརྙས་མི་བྱ་བ་ནི་དམ་
བཅའ་བའོ། །ཟབ་མོའི་ཆོས་ཞེས་བྱ་བ་ནི་རྒྱལ་བས་བསྔགས་པ་ཞེས་བྱ་བར་སྦྱར་ཏེ། རྒྱལ་བས་བསྔགས་པ་ཉིད་ནི་ཇི་སྐད་དུ་བསྟན་པའི་ཆོས་ཟབ་མོ་ལ་བཟོད་པའི་ཕྱིར་རོ། །དེ་ལྟ་མ་ཡིན་ན་ནི་ལོག་པར་ལྟ་བ་ཁོ་ནར་འགྱུར་རོ། །དེ་ལྟར་ན་ཆོས་ཟབ་མོ་ལ་བཟོད་པ་ལ་འདུན་པ་བསྐྱེད་པ་

73-1-39a

ནི་དམ་བཅའ་བའོ། །བདེ་བར་གཤེགས་པས་བསྔགས་པ་ནི་གཏན་ཚིགས་སོ། །ཟབ་མོ་ལ་བཟོད་པ་དེ་ལ་འདུན་པ་བསྐྱེད་ནས་ཅི་ཞིག་བྱ་ཞེ་ན། བག་ཡོད་མགོ་ལ་འབར་བཞིན་གནས་པར་གྱིས། །ཞེས་གསུངས་པ་སྟེ། མགོ་ལ་འབར་བ་བཞིན་ཞེས་སྨོས་པ་ནི་འབད་པ་དང་
ལྡན་པ་ཉེ་བར་མཚོན་པའི་ཕྱིར་ཏེ། དཔེར་ན་མགོ་ལ་མེ་འབར་ན་འབད་པ་ཆེན་པོས་མགོ་ལས་མེ་སེལ་བ་དེ་བཞིན་དུ་འབད་པ་དང་ལྡན་པར་བྱའོ་ཞེས་བྱ་བའི་ཐ་ཚིག་གོ། །བག་ཡོད་ཅེས་བྱ་བ་འདིས་ནི་འདི་སྟོན་པར་བྱེད་དོ། །ཆགས་པ་དང་། ཞེ་སྡང་དང་། གཏི་མུག་དང་། ལེ་ལོ་རྣམས་
སྤངས་ཏེ། མ་ཆགས་པ་དང་། ཞེ་སྡང་མེད་པ་དང་། གཏི་མུག་མེད་པ་དང་། བརྩོན་འགྲུས་དང་ལྡན་པར་གནས་པར་གྱིས་ཤིག་ཅེས་བྱ་བའི་ཐ་ཚིག་སྟེ། ཆོས་བཞི་པོ་འདི་དག་ལ་བག་ཡོད་པ་ཞེས་མིང་དུ་འདོགས་པའི་ཕྱིར་རོ། །འདི་ལྟར་ཚུལ་འཆོས་བྱེད་ཀྱི་གཞི་ཡིན་པ། །ཞེས་བྱ་བ་ནི་
གཏན་ཚིགས་སོ། །ཤེས་ཁེ་རྙེད་པ་རྣམས་ལ་གནས་མ་བྱེད། །ཅེས་བྱ་བ་ནི་དམ་བཅའ་བ་སྟེ། རྙེད་པ་སྨོས་པས་ནི་རྫས་དང་བཀུར་སྟི་དང་། ཚིགས་སུ་བཅད་པ་དང་། འཚོ་བ་ལོག་པ་ལ་སོགས་པའི་རྙེད་པ་བསྡུའོ། །ཚུལ་འཆོས་པ་སྨོས་པ་ནི་ཉེ་བར་མཚོན་པའི་དོན་ཏེ། ཁ་གསག་ལ་སོགས་
པ་ཡང་བསྡུའོ། །གནས་པ་ནི་ལྷག་པར་ཆགས་པའོ། །འོ་ན་ཇི་ལྟར་འཚོ་བར་བྱ་ཞེ་ན། ངན་ངོན་དག་གིས་ཆོག་བྱ་སྟེ། །ཞེས་བྱ་བ་གསུངས་ཏེ། རྩྭ་དང་། ལོ་མ་དང་། ཆུ་ལ་སོགས་པ་ཅི་ཡང་རུང་ཅི་རྙེད་པས་ཆོག་པར་བྱའོ་ཞེས་བྱ་བའི་ཐ་ཚིག་གོ། །དེ་ལྟ་བུས་ཇི་ལྟར་འཚོ་བར་ནུས་ཤེ་ན། བྱ་དང་
འདྲ་བར་ཞེས་གསུངས་སོ། །དེ་ལྟ་བུའི་བརྟུལ་ཞུགས་དྲག་པོས་ཡོན་ཏན་ཅི་ཞིག་འཐོབ་པར་འགྱུར་ཞེ་ན། མིར་གྱུར་པ་ཡི་འབྲས་བུ་ཡོད་པར་བྱོས། །ཞེས་གསུངས་པ་སྟེ། དེས་ནི་ཕན་ཡོན་བསྟན་ཏོ། །ཕན་པ་རྙེད་པ་དང་། གནོད་པ་སྤངས་པས་མིར་གྱུར་པའི་འབྲས་བུ་ཡོད་པར་བྱ་བའི་
ཕྱིར། ཀྱེ་མ་སངས་རྒྱས་བསྟན་པ་ལེགས་པར་རྙེད། །ཅེས་གསུངས་ཏེ། དེས་ནི་ཕན་པ་རྙེད་པར་བསྟན་ཏོ། །སྡུག་བསྔལ་མང་པོའི་རྩ་བ་ཁྱིམ་ཡང་སྤོངས། །ཞེས་བྱ་བ་འདིས་ནི་གནོད་པ་སྤང་བར་བསྟན་ཏོ། །ཀྱེ་མ་ཞེས་བྱ་བ་འདི་ཡ་མཚན་ལ་བྱ་སྟེ། ལེགས་པར་རྙེད་ཅེས་བྱ་བ་དེ་དང་སྦྱར་

73-1-39b

བར་བྱ་སྟེ། འཁོར་བ་ན་འདྲིས་པ་མ་ཡིན་པའི་ཆོས་ཡིད་བཞིན་གྱི་ནོར་བུ་དང་འདྲ་བ་རྙེད་པ་ནི་ཤིན་ཏུ་རྙེད་པར་དཀའ་བའི་ཕྱིར། ཀྱེ་མ་ལེགས་པར་རྙེད་དོ་ཞེས་གསུངས་སོ། །ཐོག་མ་མེད་པའི་འཁོར་བ་ནས་བསྐྱེད་པའི་ཆགས་པ་སྤང་བར་དཀའ་བའི་ཕྱིར་ཡང་། ཀྱེ་མ་སྤངས་སོ་ཞེས་གསུངས་
སོ། །སངས་རྒྱས་ཀྱི་བསྟན་པ་འདི་རབ་ཏུ་འབྱུང་བའོ། །ལེགས་པར་རྙེད་པ་ནི་མཛེས་པར་རྙེད་པ་སྟེ། ཡོན་ཏན་ཕུན་སུམ་ཚོགས་པ་ཐམས་ཅད་ཀྱི་རྒྱུ་ཡིན་པའི་ཕྱིར་དང་། མངོན་པར་མཐོ་བ་དང་། ངེས་པར་ལེགས་པར་འདྲེན་པའི་ཕྱིར་དང་། འཁོར་བ་ན་འདྲིས་པ་མ་ཡིན་པའི་ཕྱིར་རོ། །ཡང་
ན་ཕྱིར་མི་ལྡོག་པ་རྙེད་པ་ནི་ལེགས་པར་རྙེད་པ་སྟེ། ཚེ་རབས་གཞན་དུ་ཡང་ཕྱིར་མི་བཟློག་པའི་ཕྱིར་ཏེ། མྱ་ངན་ལས་འདས་པ་ལ་གཞོལ་བའི་ཕྱིར་རོ། །ཡང་ན་ཤིན་ཏུ་ཡོངས་སུ་རྫོགས་པར་རྙེད་པས་ན་ལེགས་པར་རྙེད་པ་སྟེ། འདོད་པ་ལ་ཀུན་ཏུ་རྟོག་པ་ལ་སོགས་པས་ཉམས་པར་མ་བྱས་པའི་
ཕྱིར་རོ། །སྡུག་བསྔལ་མང་པོའི་རྩ་བ་ནི། བསྒྲུབ་པ་དང་། བསྲུང་བ་དང་། སྡུག་པ་དང་བྲལ་བ་དང་། མི་སྡུག་པ་དང་ཕྲད་པ་ལ་སོགས་པའི་སྡུག་བསྔལ་གྱི་རྩ་བ་ཡིན་པའི་ཕྱིར་རོ། །སངས་རྒྱས་ཀྱི་བསྟན་པ་ལེགས་པར་རྙེད་པའི་རྒྱུ་ནི་ཁྱིམ་སྤངས་པའོ། །ཁྱིམ་པའི་ཚིག་ནི་དགོན་
པ་ན་གནས་པ་ཉེ་བར་མཚོན་པའི་དོན་ཏེ། གཙུག་ལག་ཁང་ལ་སོགས་པ་ན་ཡང་ཁྱིམ་གྱི་ཉེས་པ་སྲིད་པའི་ཕྱིར་རོ། །ཁྱིམ་སྤང་བའི་རྒྱུ་ནི་སྡུག་བསྔལ་མང་པོའི་རྩ་བ་ཉིད་དོ། །གང་གི་ཕྱིར་སངས་རྒྱས་ཀྱི་བསྟན་པར་ལེགས་པར་རྙེད་པ་དང་། སྡུག་བསྔལ་མང་པོའི་རྩ་བ་ཁྱིམ་སྤངས་པ་དེའི་
ཕྱིར། ལུས་དང་ངག་དང་ཡིད་ཀྱང་ཡོངས་དག་པས། །ཁྱེད་སངས་རྒྱས་དང་ནི་ཆོས་ལ་གུས་པར་གྱིས། །ངག་དག་པ་ནི་ངག་གི་ལས་དགེ་བ་རྣམ་པ་བཞིའོ། །ལུས་དག་པ་ནི་ལུས་ཀྱི་ལས་དག་པ་རྣམ་པ་གསུམ་མོ། །ཡིད་དག་པ་ནི་བརྣབ་སེམས་མེད་པ་ལ་སོགས་པ་ཡིད་ཀྱི་ལས་རྣམ་
པ་གསུམ་པོ་ཉིད་དོ། །འདིས་ནི་དགེ་བ་བཅུའི་ལས་ཀྱི་ལམ་དག་ལ་གནས་པ་བསྟན་ཏོ། །སངས་རྒྱས་ལ་གུས་པར་བྱ་བ་ནི་ལམ་བཟང་པོ་སྟོན་པས་མཆོག་ཏུ་ཕན་འདོགས་པའི་ཕྱིར་རོ། །ཆོས་ལ་གུས་པར་བྱ་བ་ནི་མྱ་ངན་ལས་འདས་པ་ལ་སོགས་པའི་ཡོན་ཏན་ཕུན་སུམ་ཚོགས་པ་འཐོབ་

73-1-40a

པར་བྱེད་པའི་ཕྱིར་རོ། །ཡང་ན་སངས་རྒྱས་དང་ཆོས་ལ་གུས་པར་བྱ་བ་ནི། ནན་ཏན་གྱིས་བསྒྲུབ་པའི་ཕྱིར་ཏེ། སངས་རྒྱས་བླ་མར་གྱིས་ཤིག །ཆོས་བླ་མར་གྱིས་ཤིག་ཅེས་བྱ་བ་ལ་སོགས་པ་གསུངས་པ་ལྟ་བུའོ། །དེ་ལྟར་ཕན་པ་རྙེད་པ་ལ་སོགས་པས་མིར་གྱུར་
པ་འབྲས་བུ་ཡོད་པར་བྱེད་པས། རྙེད་པའི་ཉེས་དམིགས་བསྟན་པས་རྫས་ལ་སོགས་པའི་རྙེད་པ་གཞན་སྤང་བར་བྱའོ་ཞེས་བརྗོད་པའི་ཕྱིར། རྙེད་འདོད་ཅེས་བྱ་བ་ལ་སོགས་པ་གསུངས་ཏེ། རྙེད་པ་འདོད་པ་ནི་དྲན་པ་ལ་སོགས་པ་མེད་པར་འགྱུར་བ་རེ་རེའི་རྒྱུ་ཡིན་པར་ཁོང་དུ་ཆུད་པར་བྱ་སྟེ། 
འདི་ལྟར་རྙེད་པ་འདོད་པས་སེམས་གཡེངས་ནས་ཕན་ཚུན་འགྲོ་བ་ལ་ནི་དྲན་པ་ལ་སོགས་པ་མེད་པར་འགྱུར་ཞིང་བྱང་ཆུབ་ཀྱང་རིང་བར་འགྱུར་རོ། །དྲན་པ་ལ་སོགས་པ་མེད་པ་ཡང་རེ་རེ་ནས་རྙེད་པ་ཡོངས་སུ་སྤང་བའི་རྒྱུ་ཡིན་ནོ། །ཡང་ན་རྙེད་པ་འདོད་པ་ནི་དྲན་པ་མེད་པ་ཁོ་ནའི་རྒྱུའོ། །དེ་ཡང་ཤེས་
རབ་མེད་པའི་རྒྱུ་ཡིན་ཏེ། དེ་བཞིན་དུ་སྔ་མ་སྔ་མ་མེད་པ་ནི་ཕྱི་མ་ཕྱི་མ་མེད་པའི་རྒྱུ་ཡིན་པར་ཁོང་དུ་ཆུད་པར་བྱ་སྟེ། བྱང་ཆུབ་རིང་བར་འགྱུར་བ་རྙེད་པ་ཡོངས་སུ་སྤང་བའི་རྒྱུ་ཡིན་པའི་བར་དུའོ། །ཡང་ན་རྣམ་པ་གཞན་ཡང་རྙེད་པ་འདོད་པ་ནི་དྲན་པ་མེད་པའི་རྒྱུའོ། །དེ་གཉིས་ཀྱང་ཤེས་རབ་མེད་པའི་
རྒྱུ་སྟེ། དེ་བཞིན་དུ་གོང་ནས་གོང་དུ་ལྔའི་བར་གྱིས་བསྐྱེད་པ་ནི་བྱང་ཆུབ་ལས་རིང་བའི་རྒྱུ་ཡིན་ནོ། །ཉེས་དམིགས་རབ་འབྱམས་འདི་ཐམས་ཅད་ཀྱི་རྩ་བ་ནི་རྙེད་པ་འདོད་པ་ཡིན་པས། དེ་ལྟས་རྙེད་པ་ཡོངས་སུ་སྤང་བར་བྱ། །ཞེས་གསུངས་སོ། །དེ་ནི་གང་བསྒོམ་པ་དང་། གང་བྱ་བ་ཞེས་བསྟན་
པ་གང་ཡིན་པ་དེ་བཤད་པར་བྱ་སྟེ། དོན་གཅིག་རྟོགས་ནས་ཀུན་ཤེས་ན། །བརྒྱད་ཅེས་བྱ་བས་ཅི་ཞིག་བྱ། །ཡི་གེ་སོ་སོའི་དོན་ཤེས་ན། །འདི་ཡང་ཧ་ཅང་ཉུངས་པ་ཡིན། །རྣལ་འབྱོར་པས་ཞེས་བྱ་བའམ། གཞན་ཡང་རུང་སྟེ། ཡི་གེ་གཅིག་གི་དོན་ཁོང་དུ་ཆུད་པས་ཐམས་ཅད་
རྟོགས་ན་ཅིའི་ཕྱིར་ཡི་གེ་འབྲུ་བརྒྱད་ཅེས་བསྟན། འོན་ཏེ་ཡི་གེ་སོ་སོའི་དོན་ཤེས་པར་བསྒྲུབ་པ་ཡིན་ན་ནི། དེ་ལྟར་ན་འཇིག་རྟེན་ན་ཨ་ཞེས་བྱ་བ་ལ་སོགས་པ་ཡི་གེ་ཆེས་མང་པོ་ཞིག་ཡོད་པས། ཡི་གེ་འབྲུ་བརྒྱད་ཅེས་བྱ་བ་འདི་ཡང་ཧ་ཅང་ཉུངས་སོ་ཞེ་ན། ཉེས་པ་མེད་པ་དེ་འདི་ལྟར། །བསྟན་བྱ་

73-1-40b

སྟོན་པ་ཉེས་པ་ཡི། །ངོ་བོ་དེ་ཉིད་རྣམ་གསུམ་བསྟན། །བསྟན་པར་བྱ་བ་ནི་ཆོས་ཐམས་ཅད་དོ། །སྟོན་པ་པོ་ནི་ལོངས་སྤྱོད་རྫོགས་པ་དང་སྤྲུལ་པའི་སྐུའོ། །ཉན་པ་ནི་གདུལ་བྱའི་སྐྱེ་བོ་སྟེ། དེ་ཡང་བྱིས་པ་དང་། མཁས་པའི་བྱེ་བྲག་གིས་རྣམ་པ་གཉིས་སོ། །དེ་དག་གི་ངོ་བོའི་དེ་ཁོ་ན་ནི་ཕྱིན་
ཅི་མ་ལོག་པའི་ངོ་བོ་ཉིད་དེ། དེ་ཡང་རྒྱུ་ལས་རྣམ་གསུམ་དུ་བསྟན་ཏེ། རྒྱུ་དེ་ཡང་གང་ཞེ་ན། རྣམ་པར་རྟོག་པ་རྣམ་པ་གསུམ་སྤོང་བ་སྟེ། རྣམ་པར་རྟོག་པ་རྣམ་པ་གསུམ་ནི་བསྟན་པར་བྱ་བ་དང་། སྟོན་པ་པོ་དང་། ཉན་པ་པོར་རྣམ་པར་རྟོག་པ་སྟེ། དེ་སྤངས་ན་སངས་རྒྱས་རྗེས་སུ་
དྲན་པ་རྟོགས་པ་མེད་པའི་ཕྱིར་རོ། །བསྟན་བྱ་གང་ཡིན་དེ། རྣམ་གཉིས་འཇིག་རྟེན་འདི་ན་འདྲིས་པ་དང་། མ་འདྲིས་པ་ཐ་དད་པའི་ཕྱིར་རོ། །ཅིའི་ཕྱིར་བསྟན་པར་བྱ་བ་དེ་རྣམ་པ་གཉིས་སུ་མཛད་ཅེ་ན། རྒྱུ་ལས་མཛད་དེ། རྒྱུ་དེ་ཡང་གང་ཞེ་ན། མངོན་པར་འདུ་བྱ་བ་ཆེན་པོས་
བསྒྲུབ་པའི་ཆོས་གཟུངས་ལ་སོགས་པ་རྣམས་ཀྱང་ངོ་བོ་ཉིད་མེད་པ་ཡིན་ན། སྐྱེ་བ་ལ་སོགས་པ་གཞན་ལྟ་ཅི་སྨོས་ཞེས་བསྟན་པའི་ཕྱིར། བསྟན་པར་བྱ་བ་ཉིད་དབྱེ་བར་མཛད་དེ་ཁྱབ་པའི་ཕྱིར་རོ། །འཇིག་རྟེན་ན་འདྲིས་པའི་བསྟན་པར་བྱ་བ་ཡང་། མཚན་ཉིད་དང་མཚན་གཞིའི་
བྱེ་བྲག་གིས་རྣམ་པ་གཉིས་ཏེ་རྒྱུ་ལས་སོ། །རྒྱུ་དེ་ཡང་གང་ཞེ་ན། གང་ལ་མཚན་ཉིད་ཡོད་པ་དང་རྒྱུས་བསྐྱེད་པའི་ངོ་བོ་དེ་ཇི་ལྟར་མེད་སྙམ་དུ་རྟོག་པ་སྤང་བའི་ཕྱིར་རོ། །རྣམ་པར་སྨིན་པ་སྨོས་པས་ནི་བདག་པོའི་འབྲས་བུ་ཡང་མཚོན་ཏེ། དེ་ཡང་སྨིན་པའི་ངོ་བོ་ཡིན་པའི་ཕྱིར་རོ། །འཇིག་
རྟེན་ན་མ་འདྲིས་པའི་བསྟན་པར་བྱ་བ་ཡང་། ལམ་དང་ལམ་མ་ཡིན་པའི་བྱེ་བྲག་གིས་རྣམ་པ་གཉིས་ཏེ། རྒྱུ་ལས་མཛད་དོ། །རྒྱུ་དེ་ཡང་གང་ཞེ་ན། ཆོས་དེ་གཉི་ག་ཡང་རྣམ་པར་རྟོག་པ་སྤང་བར་འགྱུར་ཏེ། དེ་དག་ཇི་ལྟར་མེད་སྙམ་དུ་རྣམ་པར་རྟོག་པ་དེ་སྤང་བའི་ཕྱིར་རོ། །ཡང་ཐམས་ཅད་
རྣམ་པ་གཅིག་ཏུ་མཛད་དེ་རྒྱུ་ལས་སོ། །རྒྱུ་དེ་ཡང་གང་ཞེ་ན། བསྟན་པར་བྱ་བ་ལ་སོགས་པར་རྣམ་པར་རྟོག་པ་སྤོང་བ་སྟེ། དེ་ནི་མདོར་བསྡུས་པ་ལ་དགའ་བའི་སེམས་ཅན་ལ་ཕན་འདོགས་པའི་ཕྱིར་བསྟན་ཏོ། །ཡང་ན། ཡི་གེ་འབྲུ་བརྒྱད་འདི་དག་ནི། །བྱང་ཆུབ་སེམས་དཔའ་མཁས་ལྡན་པ། །

73-1-41a

བརྒྱད་པོ་དག་གི་ཏིང་འཛིན་རྣམས། །སྨོས་པ་ཡིན་པར་ཐུབ་པས་གསུངས། །དེ་ཡི་དོན་ནི་བསྒོམས་པ་ལ། །དེ་ཀུན་མངོན་དུ་ཕྱོགས་པར་གནས། །གཟུངས་ནི་ཐོབ་པར་བྱ་བའི་ཕྱིར། །ཀུན་དུ་བརྩོན་པར་རབ་ཏུ་བྱེད། །ཡི་གེ་འབྲུ་བརྒྱད་པོ་འདི་དག་ནི་རྣམ་པར་སྣང་བྱེད་ལ་སོགས་
པ་འོག་ནས་འབྱུང་བ་བྱང་ཆུབ་སེམས་དཔའ་བརྒྱད་པོ་དག་གིས་ཏིང་ངེ་འཛིན་གང་དག་ཡིན་པའི་ཏིང་ངེ་འཛིན་དེ་དག་སྨོས་པར་བྱེད་པ་ཡིན་པར་གོ་རིམས་བཞིན་དུ་བཅོམ་ལྡན་འདས་ཀྱིས་གསུངས་ཏེ། ཡི་གེ་དེ་དག་ཏིང་ངེ་འཛིན་གྱི་དོན་བསྒོམས་པ་ལ། བྱང་ཆུབ་སེམས་དཔའ་དེ་དག་ཐམས་
ཅད་མངོན་དུ་ཕྱོགས་པར་འགྱུར་རོ། །དེ་ནས་མངོན་དུ་ཕྱོགས་པར་གྱུར་ནས་སྒོམ་པ་དེ་གཟུངས་ཐོབ་པར་བྱ་བའི་ཕྱིར་བརྩོན་པར་བྱེད་དེ། འདི་ལྟར་འོག་ནས་བྱང་ཆུབ་སེམས་དཔའ་ཆེན་པོ་བརྒྱད་པོ་དེ་དག་དེས་གཟུངས་ཐོབ་པར་བྱ་བའི་ཕྱིར་མངོན་པར་བརྩོན་པར་འགྱུར་རོ་ཞེས་འབྱུང་སྟེ། 
དེ་ལྟ་བས་ན་ཡི་གེ་འབྲུ་བརྒྱད་པོ་འདི་དག་གསུངས་ཏེ། ཉུང་ངུ་ཡང་མ་གསུངས་ལ། དགོས་པ་མེད་པའི་ཕྱིར་ལྷག་པར་ཡང་མ་གསུངས་སོ། །བྱང་ཆུབ་སེམས་དཔའ་རྣམས་དང་ནི། །སངས་རྒྱས་རྣམས་དང་གནོད་སྦྱིན་རྣམས། །རིམ་བཞིན་དགོད་པའི་དཀྱིལ་འཁོར་འདི། །རྨི་ལམ་
དུ་ནི་བསྟན་པ་ཡིན། །པདྨའི་རྒྱལ་པོ་དཀར་པོ་ཞིག །འདབ་མ་བརྒྱད་པ་ཡིད་དུ་འོང་། །དེ་དབུས་ཐུབ་པ་མཚུངས་མེད་པ། །བུམ་པ་དང་ནི་བཅས་པར་གཞག །འདབ་བརྒྱད་དག་ལ་ཐུབ་པའི་སྲས། །རྣམ་པར་སྣང་བྱེད་སོགས་བརྒྱད་ཀུན། །ཐུབ་པ་དང་ནི་རང་རང་གི། །ཡི་གེའི་ས་
བོན་ལྡན་པར་དགོད། །འདབ་མ་རྣམས་ཀྱི་བར་དག་ཏུ། །གནོད་སྦྱིན་བརྒྱད་གཞག་ཆོ་ག་གཅིག །ཆོ་ག་གཞན་ཡང་དེ་བཞིན་དུ། །ཚོན་ཕྱེ་སྣ་ལྔས་གྲུ་བཞིར་བྲི། །མཁས་པས་དེའི་དབུས་ཐུབ་པ་ནི། །པདྨ་དཀར་པོ་འདབ་བརྒྱད་ལ། །བུམ་པ་ཆུས་བཀང་ལྡན་པར་གཞག །དེ་
བཞིན་ཐུབ་སྲས་དེ་དག་ཀྱང་། །པདྨའི་གདན་བཅས་ཆུ་བུམ་བཅས། །ཕྱོགས་བཞི་དག་ཏུ་གཉིས་གཉིས་དགོད། །ཕྱོགས་ཀུན་བྱང་ཆུབ་སེམས་དཔའ་ཡི། །བར་དུ་གནོད་སྦྱིན་དེ་དག་དགོད། །སློབ་མ་གཙང་མ་ཡོན་ཏན་ཅན། །གཟུངས་བསྒོམ་རྣལ་འབྱོར་གྲུབ་འདོད་པ། །དཀར་པོའི་

73-1-41b

སྟན་ལ་འདུག་པ་ལ། །བུམ་པ་དེ་དག་གིས་དབང་བསྐུར། །དེ་ལྟར་རྨི་ལམ་བསྟན་པ་ཡི། །ཆོ་ག་བདག་གིས་གསལ་བརྗོད་པ། །བདག་ཉིད་ལེགས་དྲན་བྱ་ཕྱིར་གྱིས། །མངོན་པའི་ང་རྒྱལ་ཅུང་ཟད་མེད། །དེ་ལྟར་སྤྱིར་ཡི་གེ་འབྲུ་བརྒྱད་པོ་རྣམས་ཀྱི་རང་བཞིན་བསྡུ་བ་བྱས་ནས། ད་ནི་
སོ་སོའི་དོན་དེ་ལ་འཇུག་པ་བཤད་པར་བྱ་སྟེ། དོན་དམ་པར་སྟོང་པ་དང་སྟོང་པ་མ་ཡིན་པའི་ཆོས་ཐམས་ཅད་ཇི་ལྟར་ངོ་བོ་ཉིད་མེད་པ་དེ་ལྟར་ནི་དང་པོས་བསྟན་ཏོ། །སོགས་པ་སྨོས་པས་ནི་སྐྱེ་བ་དང་སྐྱེ་བ་མེད་པ་ལ་སོགས་པ་བསྡུའོ། །དེ་རྣམ་པར་ཤེས་པ་ནི་གང་གིས་ཆོས་དེ་དག་བདག་
མེད་པ་ལ་འཇུག་པར་འགྱུར་བའོ། །དེ་ཁོང་དུ་ཆུད་པ་ནི་མངོན་སུམ་དུ་བྱ་བའོ། །དེ་ལྟ་བས་ན། དམ་པའི་དོན་དུ་སྟོང་པ་དང་། །སྟོང་མིན་ལ་སོགས་ཆོས་རྣམས་ཀུན། །ངོ་བོ་ཉིད་མེད་རྣམ་ཤེས་པ། །ཁོང་དུ་ཆུད་ཕྱིར་དང་པོར་བཞེད། །པ་ཞེས་བྱ་བའི་དོན་ཁོང་དུ་ཆུད་པ་སྟེ། དེ་ནི་ཐོག་
མར་གསུངས་པའི་ཕྱིར་དང་པོའོ། །དེ་བསྟན་པ་འདི་ལྟ་སྟེ་ཞེས་བྱ་བ་ལ་སོགས་པ་སྟེ། འདི་ལྟ་སྟེ་ཞེས་བྱ་བའི་སྒྲ་ནི་ངོ་བསྟན་པའི་དོན་ཏོ། །པ་ཞེས་བྱ་བའི་དོན་ཁོང་དུ་ཆུད་པ་ཞེས་བྱ་བ་ནི་ཁོང་དུ་ཆུད་པས་ཞེས་བྱ་བར་རྣམ་པར་དབྱེ་བ་བསྒྱུར་བར་བྱ་སྟེ། གང་གིས་ཤེ་ན། བཀའ་སྩལ་པ། དོན་དམ་
པར་སྟོང་པ་དང་སྟོང་པ་མ་ཡིན་པ་ལ་སོགས་པ་ཆོས་ཐམས་ཅད་ནི་བདག་མེད་པའོ། །དེ་ལ་འཇུག་པ་ནི་རྟོགས་པ་སྟེ། འདིས་འཇུག་པའི་ཕྱིར་རོ། །དེ་ཁོང་དུ་ཆུད་པ་ནི་ཆོས་ཐམས་ཅད་བདག་མེད་པ་ལ་འཇུག་པ་ཁོང་དུ་ཆུད་པ་དེས་སོ། །ལོངས་སྤྱོད་རྫོགས་པའི་སྐུ་དང་ནི། །སྤྲུལ་པའི་
སྐུ་གཉིས་ལས་སྐུར་བསྟན། །དེ་གཉིས་འཇིག་རྟེན་དོན་འབྱོར་པ། །མ་ལུས་པར་ནི་མཛད་ཕྱིར་རོ། །ལོངས་སྤྱོད་རྫོགས་པ་དང་སྤྲུལ་པའི་སྐུ་དེ་གཉིས་འཇིག་རྟེན་གྱི་དོན་ཕུན་སུམ་ཚོགས་པ་མ་ལུས་པ་མཛད་པའི་ཕྱིར། བཅོམ་ལྡན་འདས་ཀྱིས་ལས་ཀྱི་སྐུར་གསུངས་ཏེ། ལས་ལ་
དང་། ལས་ཀྱི་ཕྱིར་དང་། ལས་ཀྱི་སྐུ་ཡིན་པའི་ཕྱིར་རོ། །ཀུན་རྫོབ་ཏུ་དང་དོན་དམ་པར། །མཚན་དང་མཚན་མེད་སོགས་པའི་རྒྱུས། །སྐུ་གཉིས་རྣམ་པར་ཤེས་པ་ནི། །ཁོང་དུ་ཆུད་ཕྱིར་གཞན་དུ་བཞེད། །ལ་ཞེས་བྱ་བ་ནི་ཁོང་དུ་ཆུད་པ་ཞེས་བྱ་བའི་ཐ་ཚིག་གོ། །ཕྲིན་ལས་ཀྱི་སྐུ་ལོངས་

73-1-42a

སྤྱོད་རྫོགས་པ་དང་སྤྲུལ་པ་དང་གཉིས་ཀྱི་རང་བཞིན་དེ་ཡང་། ཀུན་རྫོབ་ཏུ་ནི་མཚན་དང་ལྡན་ནོ། །དོན་དམ་པར་ནི་མཚན་མེད་དོ། །སོགས་པ་སྨོས་པས་ནི། མདོ་ལས་དཔེ་བྱད་བཟང་པོ་དང་དཔེ་བྱད་བཟང་པོ་མེད་པར་ཞེས་སྨོས་པ་བསྡུ་སྟེ། དེ་ཡང་ཉེ་བར་མཚོན་པའི་དོན་ཡིན་པའི་
ཕྱིར། སྟོང་པ་མ་ཡིན་པ་དང་། སྟོང་པ་ལ་སོགས་པ་ཡང་བསྡུའོ། །དེ་བསྟན་པ་ལ་ཞེས་བྱ་བའི་དོན་ཁོང་དུ་ཆུད་པ་ཞེས་བྱ་བ་དང་སྦྱར་ཏེ། ཇི་ལྟར་དེ་བཞིན་གཤེགས་པའི་ལས་ཀྱི་སྐུ་ལ་འཇུག་པ་ཁོང་དུ་ཆུད་ཞེས་བྱ་བ་གསུངས་པའོ། །རྣམ་པ་ཇི་ལྟ་བུར་ཁོང་དུ་ཆུད་ཅེ་ན། མཚན་དང་དཔེ་བྱད་
བཟང་པོ་དང་། མཚན་དང་དཔེ་བྱད་བཟང་པོ་མེད་པར་ཞེས་གསུངས་པའོ། །ཁ་ཅིག་ལས་ནི་དེ་བཞིན་གཤེགས་པའི་ཆོས་ཀྱི་སྐུ་ལ་འཇུག་པ་ཁོང་དུ་ཆུད་པ་ཞེས་ཀྱང་འབྱུང་སྟེ། དེའི་ཚེ་ན་དོན་ཡིན་ཏེ། མཚན་དང་དཔེ་བྱད་བཟང་པོ་གང་ཡིན་པ་དེ་ཆོས་ཀྱི་སྐུ་འདི་ལ་མཚན་དང་དཔེ་བྱད་བཟང་པོ་
མེད་དེ། དེས་ན་མཚན་དང་དཔེ་བྱད་བཟང་པོ་དང་། མཚན་དང་དཔེ་བྱད་བཟང་པོ་མེད་པར་ཞེས་བྱ་བ་ནི། ཆོས་ཀྱི་སྐུ་འདི་ལ་ཆོས་ཐམས་ཅད་ཅི་ཡང་མེད་པའི་དོན་ཏོ། །མཚན་ལ་སོགས་སྨོས་པ་ནི། མཚོན་པའི་ཕྱིར་རམ། ཆོས་ཀྱི་སྐུ་ལ་འཇུག་པ་ཁོང་དུ་ཆུད་པའི་སྒོ་བསྟན་པའི་ཕྱིར་ཏེ། དེ་བཞིན་
གཤེགས་པ་སྨོས་པ་ཡང་དེ་དང་འདྲ་བར་བཤད་པར་བྱའོ། །ཆོས་ཀྱི་སྐུ་ལ་ནི་འདི་ནི་དེ་བཞིན་གཤེགས་པའི་ཆོས་ཀྱི་སྐུའོ། །འདི་ནི་དེ་བཞིན་གཤེགས་པའི་ཆོས་ཀྱི་སྐུ་མ་ཡིན་ནོ་ཞེས་དབྱེར་མེད་དེ། དབྱེར་ཡོད་དུ་ཟིན་ན་ཆོས་ཀྱི་སྐུ་ཉིད་ཉམས་པའི་ཕྱིར་རོ། །ཡང་ན་དོན་ཁོང་དུ་ཆུད་པ་ཞེས་བྱ་བ་འདི་སངས་
རྒྱས་རྗེས་སུ་དྲན་པའི་ངོ་བོ་ཡིན་པའི་ཕྱིར་གཉིས་གསུངས་སོ། །བྱིས་པ་དང་ནི་མཁས་པའི་ཆོས། །དྲི་མ་ཅན་དང་དྲི་མ་མེད། །མི་སྟོང་མིན་སོགས་སྟོང་མིན་སོགས། །ཇི་བཞིན་གཉིས་ནི་བསྟན་པ་ཡིན། །གང་དག་ལ་དྲི་མ་ཅན་གྱི་རང་བཞིན་ཡོད་པ་དེ་དག་ནི་བྱིས་པའི་ཆོས་རྣམས་སོ། །གང་དག་
ལ་དྲི་མ་མེད་པའི་རང་བཞིན་ཡོད་པ་དེ་དག་ནི་མཁས་པའི་ཆོས་རྣམས་ཏེ། ཟག་པ་དང་བཅས་པ་དང་། ཟག་པ་མེད་པ་ཞེས་བྱ་བའི་ཐ་ཚིག་གོ། །དེ་དག་ནི་སྟོང་པ་ཡིན་པ་ལ་སོགས་པ་དང་། སྟོང་པ་མ་ཡིན་པ་ལ་སོགས་པ་ཇི་ལྟ་བ་བཞིན་གཉིས་བསྟན་ཏེ། ཚད་མ་དང་ལྡན་པའི་ཕྱིར་ཕྱིན་ཅི་མ་

73-1-42b

ལོག་པ་གཉིས་ཞེས་བྱ་བའི་ཐ་ཚིག་གོ། །ཁ་ཅིག་ལས་ནི་གཉིས་སུ་མེད་པར་འབྱུང་སྟེ། དེའི་ཚེ་ན་ནི། མི་སྟོང་མིན་སོགས་སྟོང་མིན་སོགས། །གཉིས་མེད་ཇི་བཞིན་ཤེས་པར་བྱ། །ཞེས་བརྗོད་པར་བྱ་སྟེ། དེ་ལྟ་ན་ནི་བྱིས་པ་དང་། མཁས་པའི་ཆོས་གཉི་ག་ཡང་ངོ་བོ་ཉིད་གཅིག་ཏུ་
བསྟན་པ་ཡིན་ནོ། །དེའི་འཇུག་པ་ནི་བྱིས་པ་དང་མཁས་པའི་ཆོས་གཉིས་སམ་གཉིས་སུ་མེད་པར་ཇི་ལྟ་བ་བཞིན་བགྱིའོ། །རྣམ་པར་ཤེས་པ་སྟེ་འདིས་འཇུག་པའི་ཕྱིར་རོ། །ཁོང་དུ་ཆུད་པ་མངོན་སུམ་བྱེད། །རྟོགས་ཞེས་བྱ་བའི་ཐ་ཚིག་གོ། །གསུམ་པ་འདི་ནི་མཁས་པ་ཡིས། །དེ་ལྟ་
བུར་ནི་ཤེས་པར་བྱ། །བ་ཞེས་བྱ་བའི་དོན་ཁོང་དུ་ཆུད་ཅེས་བྱ་བའི་ཐ་ཚིག་སྟེ། དེ་བསྟན་པ། བཞེས་བྱ་བའི་དོན་ཁོང་དུ་ཆུད་པ་ཞེས་བྱ་བ་དང་སྦྱར་ཏེ། ཇི་ལྟར་ཞེ་ན་བྱིས་པའི་ཆོས་རྣམས་ཞེས་བྱ་བ་ལ་སོགས་པ་གསུངས་པའོ། །སྐྱེ་སོགས་སྐྱེ་བ་མེད་སོགས་ཀྱིས། །འཇུག་པ་སྐྱེ་བ་མེད་པ་དང་། །
འགག་མེད་ཤེས་པ་གང་ཡིན་དེ། །ཁོང་དུ་ཆུད་ཕྱིར་གཞན་དུ་བཞེད། །སོགས་པ་སྨོས་པས་ནི་རྒ་ཤི་མེད་པ་བསྡུའོ། །དེ་ལས་དོན་འདི་འབྱུང་སྟེ། སྐྱེ་བ་ལ་སོགས་པ་དང་། སྐྱེ་བ་མེད་པ་ལ་སོགས་པའི་འཇུག་པ་གང་ཡིན་པའི་འཇུག་པ་དེའི་སྐྱེ་བ་མེད་པ་དང་། འགག་པ་མེད་
པ་གང་དག་ཡིན་པ་དེ་སྡེ་ཚན་དེ་གཉིས་ངོ་བོ་ཉིད་ཀྱིས་སྟོང་པས་ན། འཇུག་པ་ཡང་དེ་དང་འདྲ་བའི་ཕྱིར་རོ། །སྐྱེ་བ་མེད་པ་དང་འགག་པ་མེད་པ་དེ་གཉིས་ཤེས་པ་གང་ཡིན་པའི་ཤེས་པ་དེ་ཁོང་དུ་ཆུད་པའི་ཕྱིར་གཞན་དུ་བཞེད་དེ། བཞི་པ་ཛ་ཞེས་བྱ་བའི་དོན་ཁོང་དུ་ཆུད་པ་ཞེས་བྱ་བའི་ཐ་
ཚིག་གོ། །དེ་བསྟན་པ་ཛ་ཞེས་བྱ་བའི་དོན་ཁོང་དུ་ཆུད་པ་ཞེས་བྱ་བ་དང་སྦྱར་ཏེ། ཇི་ལྟ་ཞེ་ན། སྐྱེ་བ་དང་། རྒ་བ་དང་། འཆི་བ་དང་། སྐྱེ་བ་དང་། རྒ་བ་དང་། འཆི་བ་མེད་པ་རྣམས་ཀྱི་འགྲོ་བ་དང་འཇུག་པ་གང་ཡིན་པ་དེའི། མི་སྐྱེ་མི་འགག་པ་གང་ཡིན་པ་དེ་དག་ལ་འཇུག་པ་དེ་ཁོང་དུ་
ཆུད་པ་སྟེ། དེས་ཞེས་བྱ་བའི་ཐ་ཚིག་གོ། །སྔ་མ་ཇི་ལྟར་སྣང་བར་ཏེ། །ཕྱི་མ་དམ་པའི་དོན་དུ་ཡིན། །དེ་ལྟར་ཡང་དག་དོན་ཤེས་པ། །ཁོང་དུ་ཆུད་ཕྱིར་ལྔ་པར་བཞེད། །ལས་དང་རྣམ་པར་སྨིན་པ་དག་ནི་ཇི་ལྟར་སྣང་བ་བཞིན་ཡིན་པའི་ཕྱིར་རོ། །ལས་དང་རྣམ་པར་སྨིན་པ་མེད་པ་ནི་དོན་དམ་

73-1-43a

པ་སྟེ། དེ་ལྟར་ཀུན་རྫོབ་དང་དོན་དམ་པའི་བདེན་པ་གཉིས་ལ་བརྟེན་ནས་ལས་དང་རྣམ་པར་སྨིན་པ་དང་། ལས་དང་རྣམ་པར་སྨིན་པ་མེད་པ་དག་གི་དེ་ཁོ་ན་ཤེས་པ་དེ་ཁོང་དུ་ཆུད་པའི་ཕྱིར་ལྔ་པར་བཞེད་དེ། ཀ་ཞེས་བྱ་བའི་དོན་ཁོང་དུ་ཆུད་ཅེས་བྱ་བའི་ཐ་ཚིག་གོ། །ལས་དང་
རྣམ་པར་སྨིན་པ་མེད་པ་སྨོས་པ་ཡང་འཇིག་རྟེན་ལས་འདས་པའི་ཀུན་རྫོབ་ཀྱི་བདེན་པ་ལ་བརྟེན་ནས་གསུངས་ཏེ། ཡང་དག་པར་ན་དགག་པར་བྱ་བ་མེད་པས། དགག་པ་མི་འཇུག་པའི་ཕྱིར་དེ་ནི་མེད་པ་ཁོ་ནའོ། །ཡང་ན་ཡང་དག་མི་སྣང་ཕྱིར། །དེ་གཉིས་ངོ་བོ་ཉིད་མེད་ཉིད། །དེ་ལྟར་ཡང་
དག་དོན་ཤེས་པ། །ཁོང་དུ་ཆུད་ཕྱིར་ལྔ་པར་བཞེད། །ཡང་ན་གང་གི་ཕྱིར་ལས་དང་རྣམ་པར་སྨིན་པ་དང་ལས་དང་རྣམ་པར་སྨིན་པ་མེད་པ་གཉིས་ཡང་དག་པར་མི་སྣང་བས་ན། ངོ་བོ་ཉིད་མེད་པ་ཁོ་ན་ཡིན་པ་དེའི་ཕྱིར། ངོ་བོ་ཉིད་མེད་པའོ་ཞེས་དེ་ཁོ་ན་ཉིད་ཀྱི་དོན་ཤེས་པ་ཁོང་དུ་ཆུད་པའི་
ཕྱིར་ལྔ་པར་བཞེད་དོ། །དེ་བསྟན་པ་ཀ་ཞེས་བྱ་བའི་དོན་ཁོང་དུ་ཆུད་པ་ཞེས་བྱ་བ་དང་སྦྱར་ཏེ། ཇི་ལྟ་ཞེ་ན། ལས་དང་རྣམ་པར་སྨིན་པ་དང་། ལས་དང་རྣམ་པར་སྨིན་པ་མེད་པ་ལ་འཇུག་པ་ཁོང་དུ་ཆུད་པ་ཞེས་གསུངས་པའོ། །གཟུངས་ཀྱི་ཆོས་ཀྱི་རྣམ་གྲངས་ཀྱིས། །སྟོང་པ་ཉིད་ལ་སོགས་པ་ཡི། །ཆོས་ཀྱི་དབྱིངས་ནི་འདི་
ཤེས་པ། །རྟོགས་ཕྱིར་དྲུག་པ་འདིར་བཞེད་དོ། །ཆོས་ཀྱི་དབྱིངས་འདི་ནི་གཟུངས་ཀྱི་ཆོས་ཀྱི་རྣམ་གྲངས་ཀྱི་སྟོང་པ་ཉིད་ལ་སོགས་པ་གང་དག་ཡིན་པ་དེ་དག་གི་ཡིན་ནོ་སྙམ་དུ་ཤེས་པ་གང་ཡིན་པ་དེ་ཁོང་དུ་ཆུད་པའི་ཕྱིར། དྲུག་པར་བཞེད་དེ། དྷ་ཞེས་བྱ་བའི་དོན་ཁོང་དུ་ཆུད་ཅེས་བྱ་བའི་
ཐ་ཚིག་གོ། །སྟོང་པ་ཉིད་ལ་སོགས་པ་ཡང་། ཡང་དག་པར་དཔྱད་ན་དགག་པར་བྱ་བ་མེད་པའི་ཕྱིར་ངོ་བོ་ཉིད་སྟོང་པ་ཁོ་ནའོ། །ཡང་ན་གཟུངས་ཆོས་རྣམ་གྲངས་ཀྱིས། །སྟོང་པ་ཉིད་ལ་སོགས་པ་ཉིད། །ཆོས་དབྱིངས་ཡིན་པར་རྣམ་ཤེས་པ། །ཁོང་དུ་ཆུད་ཕྱིར་དྲུག་པར་བཞེད། །ཡང་ན་
གཟུངས་ཀྱི་ཆོས་ཀྱི་རྣམ་གྲངས་ཀྱི་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་གང་ཡིན་པ་དེ་ཉིད་ཆོས་ཀྱི་དབྱིངས་ཡིན་པར་ཤེས་པ་གང་ཡིན་པ་དེ་ཁོང་དུ་ཆུད་པའི་ཕྱིར་དྲུག་པར་བཞེད་དོ། །སྟོང་པ་ཉིད་ལ་སོགས་པ་ཡང་ངོ་བོ་ཉིད་ཀྱིས་སྟོང་པ་ཁོ་ན་ཡིན་མོད་ཀྱི། འོན་ཀྱང་ངོ་བོ་

73-1-43b

ཉིད་ལ་སོགས་པ་ལ་རྣམ་པར་རྟོག་པ་སྤངས་པའི་ཐབས་བསྟན་པའི་ཕྱིར། ཡང་དག་པའི་ཀུན་རྫོབ་ལ་བརྟེན་ནས་ཆོས་ཀྱི་དབྱིངས་ཞེས་གསུངས་སོ། །ངོ་བོ་ཉིད་སོགས་རྣམ་རྟོག་པ། །སྤངས་པའི་ཐབས་ནི་གདུལ་རྣམས་ལ། །བསྟན་པར་བྱ་ཕྱིར་མགོན་རྣམས་ཀྱིས། །སྟོང་ཉིད་ལ་སོགས་བསྟན་པ་
མཛད། །རྣམ་པར་རྟོག་པ་ནི་རྣམ་པ་གསུམ་སྟེ། ངོ་བོ་ཉིད་ལ་རྣམ་པར་རྟོག་པ་དང་། མཚན་མ་ལ་རྣམ་པར་རྟོག་པ་དང་། སྨོན་པ་ལ་རྣམ་པར་རྟོག་པའོ། །དེ་ལ་ངོ་བོ་ཉིད་ལ་རྣམ་པར་རྟོག་པ་ནི་གཞན་གཉིས་ཀྱི་སྔོན་དུ་འགྲོ་བའོ། །མཚན་མ་ལ་རྣམ་པར་རྟོག་པ་ནི་སྨོན་པ་ལ་རྣམ་པར་རྟོག་པའི་སྔོན་
དུ་འགྲོ་བ་སྟེ། དེ་ལྟར་འདི་ནི་དེའི་གཉེན་པོ་དེ་དག་གི་གོ་རིམས་བསྟན་པ་ཡིན་ཏེ། དེ་བསྟན་པ། དྷ་ཞེས་བྱ་བའི་དོན་དུ་ཁོང་དུ་ཆུད་པ་ཞེས་པ་དང་སྦྱར་ཏེ། ཇི་ལྟ་ཞེ་ན། ཟུངས་ཀྱི་ཆོས་ཀྱི་རྣམ་གྲངས་ཀྱི། །ཞེས་བྱ་བ་ལ་སོགས་པ་གསུངས་པའོ། །ཞི་གནས་ལ་སོགས་ཉིད་ཡིན་ཞེས། །ཆོས་
རྣམས་ཐམས་ཅད་མདོར་སྡུད་དེ། །དེ་དག་དེ་བཞིན་ཉིད་ཤེས་པ། །ཁོང་དུ་ཆུད་ཕྱིར་བདུན་པར་བཞེད། །ཞི་གནས་ནི་ཏིང་ངེ་འཛིན་ཏོ། །སོགས་པ་སྨོས་པས་ནི་ལྷག་མཐོང་ལ་སོགས་པ་བསྡུའོ། །ལྷག་མཐོང་ནི་ཤེས་རབ་སྟེ། ཆོས་ཐམས་ཅད་ནི་ཞི་གནས་དང་ལྷག་མཐོང་དང་། ཞི་གནས་དང་
ལྷག་མཐོང་མ་ཡིན་པ་ཉིད་དམ་དེ་དང་ལྡན་པ་ཉིད་དོ། །དེ་དག་གི་དེ་བཞིན་ཉིད་ནི་རེ་ཞིག་ཞི་གནས་དང་ལྷག་མཐོང་དག་གི་དེ་བཞིན་ཉིད་ཡིན་ཏེ་གཟོད་མ་ནས་མ་སྐྱེས་པའི་ཕྱིར་རོ། །དགག་པར་བྱ་བ་མེད་ན་དགག་པ་མི་འཇུག་པའི་ཕྱིར། ཞི་གནས་དང་ལྷག་མཐོང་མ་ཡིན་པ་དག་ཀྱང་དེ་དང་
འདྲའོ། །དེ་བཞིན་ཉིད་དེ་ཤེས་པ་གང་ཡིན་པ་ཁོང་དུ་ཆུད་པའི་ཕྱིར་བདུན་པར་བཞེད་དེ། ཤ་ཞེས་བྱ་བའི་དོན་ཁོང་དུ་ཆུད་ཅེས་བྱ་བའི་ཐ་ཚིག་གོ། །དེ་བསྟན་པ། ཤ་ཞེས་བྱ་བའི་དོན་ཁོང་དུ་ཆུད་པ་ཞེས་བྱ་བ་དང་སྦྱར་རོ། །ཇི་ལྟ་བུའི་ཚུལ་དུ་ཞེ་ན། ཞིག་ནས་ཞེས་བྱ་བ་ལ་སོགས་པ་གསུངས་
པའོ། །ཀུན་རྫོབ་ཏུ་ནི་ཆོས་རྣམས་ཀུན། །སྐད་ཅིག་གང་ཡིན་དེ་དག་ནི། །གཟོད་ནས་ཞི་ཕྱིར་དོན་དམ་དུ། །ཟད་མེད་ལ་སོགས་བྱེ་བྲག་བསྟན། །ཇི་ལྟར་གྲགས་པའི་སྐད་ཅིག་པའི་ཆོས་གང་དག་ཡིན་པ་དེ་དག་རིམ་པས་དཔྱད་ན་སྐད་ཅིག་མའི་མི་རྟག་པའི་ཕྱིར་ཟད་པ་མེད་པའོ། །རྒྱུན་གྱི་མི་རྟག་པ་

73-1-44a

མེད་པའི་ཕྱིར་འཇིག་པ་མེད་པའོ། །རྒྱུད་ཀྱི་མི་རྟག་པ་མེད་པའི་ཕྱིར་རྒྱུ་བ་མེད་པ་སྟེ། གང་དག་ལ་འགྲོ་བ་མེད་པ་དེ་དག་ནི་རྒྱུ་བ་མེད་པའོ། །འདིར་རྒྱུན་ནི་ཚེ་གཅིག་གི་རྒྱུན་ནོ། །རྒྱུད་ནི་ཚེ་དུ་མའི་ཡིན་པར་བཞེད་དོ། །ཅིའི་ཕྱིར་དེ་དག་རིག་པས་དཔྱད་ན། ཟད་པ་མེད་པ་ལ་སོགས་
པའི་ངོ་བོ་ཡིན་ཞེ་ན། གཟོད་མ་ནས་ཞི་བའི་ཕྱིར་ཞེས་གསུངས་ཏེ། ཆོས་ཐམས་ཅད་སྐྱེ་བ་མེད་པའི་ཕྱིར་ཞེས་བྱ་བའི་ཐ་ཚིག་གོ། །སྐྱེ་བ་ནི་འཇིག་པའི་ཐོག་མར་འབྱུང་བ་སྟེ། དེ་སྔོན་དུ་འགྲོ་བའི་ཕྱིར་རོ། །ཡང་ན་གཟོད་མ་ནས་ཞི་བའི་ཕྱིར་ཞེས་བྱ་བ་ནི་ངོ་བོ་ཉིད་ཀྱིས་ཞི་བའི་ཕྱིར་ཞེས་བྱ་བའི་ཐ་ཚིག་གོ། །
གཟོད་མ་ནི་ངོ་བོ་ཉིད་ལ་བྱ་སྟེ། འཇིག་པའི་ཐོག་མར་དེ་འགྲོ་བའི་ཕྱིར་རོ། །ཅིའི་ཕྱིར་དེ་དག་ཟད་པ་མེད་པ་ལ་སོགས་པ་བྱེ་བྲག་གིས་བསྟན་ཞེ་ན། སྨྲས་པ། མངོན་ཞེན་རྣམ་གསུམ་སྤང་བའི་ཕྱིར། །ཟད་མེད་ལ་སོགས་བྱེ་བྲག་གམ། །ཡང་ན་ཁམས་ཀྱི་བྱེ་བྲག་གིས། །རྣམ་པ་གསུམ་དུ་
གསུངས་པ་ཡིན། །མི་རྟག་པ་ལ་སོགས་པ་ལ་གདུལ་བའི་སྐྱེ་བོའི་མངོན་པར་ཞེན་པ་རྣམ་པ་གསུམ་ཡོད་དེ། སྐད་ཅིག་པའི་མི་རྟག་པ་ལ་མངོན་པར་ཞེན་པ་དང་། དུས་གཞན་གྱི་གནས་སྐབས་ཀྱི་མི་རྟག་པ་ལ་མངོན་པར་ཞེན་པ་དང་། འཁོར་བ་ཇི་སྲིད་དུ་གནས་པ་མྱ་ངན་ལས་འདས་པའི་གྲོང་དུ་
འཇུག་པ་ལ་མངོན་པར་ཞེན་པའོ། །ཡང་ན་ཁམས་གསུམ་གྱི་བྱེ་བྲག་ལ་བརྟེན་ནས། ཟད་པ་མེད་པ་ལ་སོགས་པའི་བྱེ་བྲག་གོ་རིམས་བཞིན་བསྟན་ཏེ། ཁམས་གསུམ་པ་ལ་མ་གཏོགས་པ་འཁོར་བ་པའི་དངོས་པོ་གཞན་མེད་ལ། དེ་ཡང་ཚུལ་དེ་ལྟ་བུ་ཡིན་པས་དེའི་ཕྱིར་དེ་ལ་མངོན་པར་ཞེན་པ་སྤོང་
བའི་ཕྱིར་ཞེས་བསྟན་པའི་ཕྱིར་རོ། །ཡང་ན་གང་གི་ཕྱིར་སྐད་ཅིག་པའི་ཆོས་ཐམས་ཅད་ལ་བརྟགས་ན། སྐད་ཅིག་པའི་མི་རྟག་པ་མེད་པའི་ཕྱིར་ཟད་པ་མེད་ལ། རྒྱུན་གྱི་མི་རྟག་པ་མེད་པའི་ཕྱིར་འཇིག་པ་དེའི་ཕྱིར་རྒྱུ་བ་མེད་དེ་ཉོན་མོངས་པ་མེད་ཅེས་བྱ་བའི་ཐ་ཚིག་གོ། །དེ་ལྟ་བུ་དག་ལ་ཉོན་མོངས་པ་
རྣམས་ཀྱིས་གནས་མི་ཐོབ་པའི་ཕྱིར་རོ། །ཟད་པ་མེད་པ་ལ་སོགས་པ་དེ་དག་ཉིད་ཅིའི་ཕྱིར་ཞེ་ན། གཟོད་མ་ནས་ཞི་བའི་ཕྱིར་ཞེས་གསུངས་པའོ། །ཆོས་ཀུན་མྱ་ངན་འདས་པ་གང་། །དེ་འདིར་དེ་བཞིན་ཉིད་དུ་བསྟན། །འདིར་ཆོས་ཐམས་ཅད་མི་སྣང་བར་འགྱུར་བའི་ཚུལ་གྱིས་མྱ་ངན་ལས་འདས་པ་ན། 

73-1-44b

ཆོས་ཐམས་ཅད་མྱ་ངན་ལས་འདས་པ་ནི། འདིར་དེ་བཞིན་ཉིད་ཡིན་པར་གསུངས་སོ། །དེ་ལ་འཇུག་པ་རྟོགས་པ་སྟེ། །དེ་རྟོགས་ཕྱིར་ན་བརྒྱད་པར་བཞེད། །ཆོས་ཐམས་ཅད་མྱ་ངན་ལས་འདས་པ་དེ་ལ་འཇུག་པ་ནི་རྟོགས་པའོ། །དེ་རྟོགས་པ་ཁོང་དུ་ཆུད་ཅིང་མངོན་སུམ་དུ་བྱ་བའི་ཕྱིར་བརྒྱད་པར་
བཞེད་དེ། ཀྵ་ཞེས་བྱ་བའི་དོན་ཁོང་དུ་ཆུད་ཅེས་བྱ་བའི་ཐ་ཚིག་གོ། །དེ་བསྟན་པ། ཀྵ་ཞེས་བྱ་བའི་དོན་དུ་ཁོང་དུ་ཆུད་པ་ཞེས་བྱ་བ་དང་སྦྱར་ཏེ་ཇི་ལྟ་ཞེ་ན། སྐད་ཅིག་པ་ཞེས་བྱ་བ་ལ་སོགས་པ་གསུངས་པའོ། །འདིས་དོན་རྣམས་ཁོང་དུ་ཆུད་པར་བྱེད་པས་ན་དོན་ཁོང་དུ་ཆུད་པ་ནི་རྟོགས་པའོ། །
དེ་རྟོགས་པར་བྱ་བ་ནི་མངོན་སུམ་དུ་ཞེས་བྱ་བའི་ཐ་ཚིག་གོ། །དེས་ནི་བསོད་ནམས་སྐྱེད་པ་ན། །གཟུངས་སམ་ཡང་ན་ཡི་གེ་ཡི། །དོན་ལ་གང་གིས་འཇུག་འགྱུར་བ། །དོན་རྟོགས་དེ་ནི་གསུམ་དུ་བསྟན། །རྣལ་འབྱོར་པ་དེ་བསོད་ནམས་སྐྱེད་པར་བྱེད་པ་ན། སྒོ་མཐའ་ཡས་པས་བསྒྲུབ་
པའི་གཟུངས་སམ། ཡི་གེ་འབྲུ་བརྒྱད་པོ་འདི་དག་གི་དོན་ལ་གཟུངས་ལ་སོགས་པ་གང་གིས་རྟོགས་ཤིང་ཁོང་དུ་ཆུད་པར་འགྱུར་བ་གཟུངས་ལ་སོགས་པའི་དོན་ཁོང་དུ་ཆུད་པ་དེ་ནི་བཅོམ་ལྡན་འདས་ཀྱིས་ཚིག་གསུམ་དུ་བསྟན་ཏོ། །ལེགས་པར་བྲི་བ་ནི་རྣམ་པ་གསུམ་གྱིས་བསྟན་ཏེ། 
བསམ་པ་དང་། སྦྱོར་བ་དང་། སྒྲུབ་པས་སོ། །བསམ་པ་ཡང་བྱང་ཆུབ་ཏུ་ཡོངས་སུ་བསྔོ་བ་ལ་སོགས་པའི་བསམ་པའི་བྱེ་བྲག་གིས་རྣམ་པ་དུ་མ་ཡོད་དོ། །སྦྱོར་བ་ཡང་བཀུར་སྟི་དང་། ཁ་ཟས་དང་། ས་ཕྱོགས་གཙང་མ་དང་། ནན་ཏན་དུ་བྱ་བ་ལ་སོགས་པའི་སྦྱོར་བ་བྱེ་བྲག་གིས་རྣམ་པ་
དུ་མ་ཡོད་དོ། །སྒྲུབ་པ་ཡང་ཡི་གེ་གསལ་བ་དང་། ཟུར་ཕྱིན་པ་ལ་སོགས་པར་སྒྲུབ་པའི་བྱེ་བྲག་གིས་རྣམ་པ་དུ་མ་ཡོད་དོ། །ཡང་ན་ལེགས་པར་བྲི་བ་ནི། མཛེས་པར་བྲིས་པ་སྟེ། བྱང་ཆུབ་ཡོངས་སུ་བསྔོ་བ་ལ་སོགས་པའི་བསམ་པས་འདྲི་བའི་ཕྱིར་རོ། །ཕྱིར་མི་ལྡོག་པའི་དགེ་བའི་
ཆོས་འཕེལ་བར་བྱེད་པའི་སྦྱོར་བས་འདྲི་བའི་ཕྱིར་རོ། །ཡོངས་སུ་རྫོགས་པར་འདྲི་བ་སྟེ། ཡི་གེའི་ཡོན་ཏན་ཐམས་ཅད་དང་ལྡན་པར་འདྲི་བའི་ཕྱིར་རོ། །གཟུང་བ་ནི་རྣམ་པ་བཞི་སྟེ། གླེགས་བམ་དང་། ཚིག་དང་། དོན་དང་། དེ་གཉི་གའོ། །ཀློག་པ་ནི་བསམ་པ་དང་། བརྗོད་པའི་སྒོ་

73-1-45a

ནས་རྣམ་པ་གཉིས་སོ། །དེ་ལ་བསམ་པ་ནི་རྣམ་པ་གཉིས་ཏེ། བྱང་ཆུབ་ཏུ་ཡོངས་སུ་བསྔོ་བའི་བསམ་པ་དང་། ཡི་གེ་ལ་སོགས་པ་ལ་གཏད་པའི་བསམ་པའོ། །བརྗོད་པ་ནི་ཟུར་ཆག་པ་ལ་སོགས་པའི་ཉེས་པ་དང་བྲལ་བ་སྟེ། རྣམ་པ་དུ་མ་ཡོད་པར་རིག་པར་བྱའོ། །རྗེས་སུ་
དྲན་པར་བྱ་བ་ནི་རྣམ་པ་གསུམ་སྟེ། བསམ་པས་དང་། ཡུལ་གྱིས་དང་། རང་གི་ངོ་བོས་སོ། །དེ་ལ་བསམ་པ་ནི་རྣམ་པ་གཉིས་ཏེ། བྱང་ཆུབ་ཏུ་ཡོངས་སུ་བསྔོ་བའི་བསམ་པ་དང་། ཡི་གེ་དང་། དོན་དང་། གཉི་ག་ལ་སེམས་པའི་བསམ་པས་སོ། །ཡུལ་ནི་རྣམ་པ་གསུམ་སྟེ། ཡི་གེ་རྗེས་སུ་
དྲན་པ་དང་། དོན་རྗེས་སུ་དྲན་པ་དང་། གཉི་ག་རྗེས་སུ་དྲན་པའོ། །རང་གི་ངོ་བོ་ནི་རྣམ་པ་གཉིས་ཏེ། བསམ་པ་རྗེས་སུ་དྲན་པ་དང་། སྒོམ་པ་རྗེས་སུ་དྲན་པའོ། །ཐོབ་པར་འདོད་པས་ཉིན་རེ་ཞིང་། །ཀློག་དང་རྗེས་སུ་དྲན་པར་བྱ། །གཟུངས་འདི་ཞེས་བྱ་བའི་ཚིག་གི་ལྷག་མའོ། །དེ་ནི་དེ་ལྟ་ན་རིགས་
ཀྱི། །གཟུངས་ནི་བསོད་ནམས་ཆུང་ངུ་ཡིས། །ཤིན་ཏུ་ཐོབ་པར་མི་འགྱུར་རོ། །དེ་ལྟ་བས་ན་རྟག་ཏུ་བཀུར་སྟིར་བྱས་ལ་ཡུན་རིང་པོར་རྒྱུན་དུ་གོམས་པར་བྱས་པའི་བསོད་ནམས་ཀྱི་ཚོགས་དང་ལྡན་པས་གཟུངས་ཐོབ་པར་འགྱུར་རོ། །ཟླ་བ་ཕྱེད་ཕྱེད་ཅིང་ཞེས་བྱ་བའི་ཚིག་གིས་ཡིན་པ་དེ་ནི་བཅོམ་ལྡན་
འདས་ཀྱིས་བྱེ་བྲག་ཏུ་བྱ་བའི་ཕྱིར་གསུངས་ཏེ། འདི་ལྟར་ཟླ་བ་ཕྱེད་ཕྱེད་ཅིང་གུས་པར་བྱས་ལ་ཤིན་ཏུ་བསྒྲིམས་པ་དང་ལྡན་ཞིང་ཁྲུས་ལ་སོགས་པ་སྔར་བྱས་ལ། ལེགས་པར་ཀློག་པ་ལ་སོགས་པ་བྱའོ་ཞེས་གསུངས་པ་ཡིན་ཏེ། དེ་དེ་ལྟ་བུ་ཡིན་པར་ཤེས་པར་བྱ་བའི་ཕྱིར་སྨྲས་པ། བྱེ་བྲག་ལ་ནི་
དགོངས་པའི་ཕྱིར། །བརྩོན་པ་ཡི་ནི་ཚིག་ཀྱང་གསུངས། །གང་གི་ཕྱིར་བརྩོན་པར་བྱ་ཞེས་གསུངས་པ་དེའི་ཕྱིར། བྱེ་བྲག་ལ་དགོངས་པར་མངོན་ནོ། །བརྩོན་པའི་སྒྲ་ནི་གུས་པ་ལ་སོགས་པའི་སྦྱོར་བ་ཉིད་དང་སྦྱར་བར་བྱའོ། །གང་གི་ཕྱིར་དེ་ལྟ་ཡིན་པ། །དེའི་ཕྱིར་ཁྲུས་སོགས་སྔར་བྱས་ལ། །བཀླག་
པ་ལ་སོགས་དེ་དག་བྱ། །ཁྲུས་བྱ་བ་དང་། སྨྱུང་བ་བྱ་བ་དང་། ངེས་པར་གནས་པ་དང་། དཀྱིལ་འཁོར་དང་། མེ་ཏོག་དང་། བདུག་པ་དང་། སྤོས་དང་། བཤོས་དང་། གཏོར་མ་དང་། མར་མེ་དབུལ་བ་དང་། བྱང་ཆུབ་ཏུ་སྨོན་ལམ་གདབ་པ་དང་། སྡིག་པ་བཤགས་པ་ལ་སོགས་པ་སྔར་

73-1-45b

བྱས་ནས། བཀླག་པ་ལ་སོགས་པ་བྱའོ། །བཀླགས་པས་སྐྱོ་བར་གྱུར་ན་རྗེས་སུ་དྲན་པར་བྱའོ། །དེས་སྐྱོ་བར་གྱུར་ན། ཡང་བཀླག་པར་བྱའོ། །དེ་ལྟ་བུས་ཉིན་མཚན་དེ་འདའ་བར་བྱའོ། །སྦྱིན་ལ་སོགས་ལ་ཞུས་ལ་སོགས། །ཡང་དག་དགའ་བྱ་ལ་སོགས་དེ། །རྟག་བྱ་དེ་གཟུངས་བདག་མེད་ལ། །
སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་རྣམས་དང་། ཏིང་ངེ་འཛིན་དང་། རྣམ་པར་ཐར་པ་དང་། གཟུངས་ཀྱི་ཆོས་ཀྱི་རྣམ་གྲངས་ལ་སོགས་པའམ། དགེ་བའི་ཆོས་གཞན་དག་ལེགས་པར་ཞུགས་པ་ནི་ཡང་དག་པར་དགའ་བར་བྱའོ། །མ་ཞུགས་པ་ནི་ཡང་དག་པར་འཛིན་དུ་གཞུག་གོ། །
ཞུགས་པ་བརྩོན་འགྲུས་ཆུང་བ་ཕྱིར་ལྡོག་པར་འདོད་པ་ནི། ཡང་དག་པར་གཟེངས་བསྟོད་པར་བྱའོ། །དེ་ལྟར་ཡང་དག་པར་དགའ་བ་ལ་སོགས་པ་མཐུན་མཐུན་དུ་བྱས་ནས་རིམ་གྱིས་ནོང་དུ་གྱུར་པ་དེ། བདག་མེད་པ་ལ་གཟུད་པའི་ཕྱིར་བརྩོན་པར་བྱའོ། །ཡང་ན་དེ་དག་ཉིད་ལའོ། །ཡང་ན་སྦྱིན་
པ་ལ་སོགས་པ་དེ་དག་ལ་མ་ཞུགས་པ་གཟུད་པར་བྱའོ། །ཡང་ན་ཡང་དག་པར་དགའ་བ་ལ་སོགས་པ་དེ་དག་ལ་གཟུད་པ་ཞེས་བྱ་བར་སྦྱར་ཏེ། །དེ་ལྟར་ན་ཡང་དག་པར་དགའ་བར་བྱ་བ་ལ་སོགས་པ་ལ་གཟུད་པ་ཞེས་བྱ་བར་ཚིག་བསྡུའོ། །གལ་ཏེ་དེ་ལྟ་ན་སེམས་ཅན་ཀྱང་འདི་འཛིན་གཞུག་པར་བྱ་ཞེས་
པ་ལ་སོགས་པ་ཡང་ཇི་ལྟར་དྲང་སྟེ། འདི་ལྟར་འདི་ཞེས་བྱ་བའི་སྒྲ་ནི། སེམས་པ་དང་། འདྲི་བ་དང་། གཟུང་བ་དང་། ཀློག་པའི་སྐབས་དང་སྦྱར་བ་ཡིན་ནོ། །མཚོན་པའི་དོན་ཡིན་པའི་ཕྱིར་ཉེས་པ་མེད་དེ། སྦྱིན་པ་ལ་སོགས་པ་གཞན་ཡང་བསྡུའོ། །དཔེར་ན་འདི་ཉིད་ལས་ཡང་དག་པར་
འཛིན་དུ་གཞུག་པ་མཚོན་པའི་དོན་དུ་གསུངས་ཏེ། དེས་ན་ཡང་དག་པར་དགའ་བ་ལ་སོགས་པ་གཞན་ཡང་བསྡུ་བ་ལྟ་བུ་དང་། དཔེར་ན། བཀླག་པར་བྱ་བས་རྗེས་སུ་དྲན་པ་བསྡུ་བ་བཞིན་ནོ། །ཡང་ན། གཟུངས་ཀྱི་ཆོས་ཀྱི་རྣམ་གྲངས་ལ། །ཞུགས་པར་གྱུར་ལ་སོགས་པ་དག །ཡང་དག་
དགའ་ལ་སོགས་དེ་བྱ། །འདིར་གཟུངས་ཀྱི་ཆོས་ཀྱི་རྣམ་གྲངས་སྨོས་པས་ནི་ཡི་གེ་དང་དོན་གཟུང་ངོ་། །བཤད་པ་སྔ་མ་ལ་ནི་བྱང་ཆུབ་སེམས་དཔའ་མངོན་པར་བརྩོན་པའི་བྱེ་བྲག་བསྟན་པའི་དོན་དུ་བཤད་པར་བྱའོ། །འདིར་ནི་ལན་གཉིས་སུ་འདུས་པ་ལ་སོགས་པའི་རིམ་པ་ལ་བརྟེན་ནས། 

73-1-46a

ཡང་དག་པར་དགའ་བ་ལ་སོགས་པ་དེའི་ཡུལ་བསྟན་པའི་ཕྱིར་ཡང་ཡིན་པར་རིག་པར་བྱའོ། །དེ་ལ་གཟུངས་ཀྱི་ཆོས་ཀྱི་རྣམ་གྲངས་ལ་ལེགས་པར་ཞུགས་པ་ལ་སོགས་པ་ཡང་དག་པར་དགའ་བར་བྱ་བ་ལ་སོགས་པ་ནི་སྔ་མ་བཞིན་དུ་སྦྱར་བར་བྱའོ། །ཡང་ན་གཟུངས་ལ་གཟུད་
པར་བྱ། །ཡང་ན་གཟུངས་སངས་རྒྱས་རྗེས་སུ་དྲན་པའི་མཚན་ཉིད་ལ་གཟུད་པར་ཤེས་པར་བྱའོ། །དོན་ནི་སྔར་ཡང་བཤད་མོད་ཀྱི། །ཆོས་ཀྱི་རྗེས་སུ་འབྲང་བའི་ཕྱིར། །རིགས་པ་ཕན་ཡོན་བྱེ་བྲག་གིས། །ཚིགས་སུ་བཅད་པ་གཉིས་ཀྱིས་བསྟན། །ཚིགས་སུ་བཅད་པ་དང་པོ་ནི་རིགས་པ་དང་ཕན་
ཡོན་གྱི་ཡུལ་བསྟན་པའི་ཕྱིར་དོན་ཁོང་དུ་ཆུད་པ་སྔར་བསྟན་པ་རྣམས་ཡང་དག་པར་བཟླས་པ་གསུངས་སོ། །གཉིས་པས་ནི་ཁོང་དུ་ཆུད་པ་བཞི་པོ་རྣམས་ཀྱི་ཕན་ཡོན་བཞི་གོ་རིམས་བཞིན་དུ་བསྟན་ཏོ། །ཡང་ན་དོན་ཁོང་དུ་ཆུད་པ་རེ་རེ་ཕན་ཡོན་བཞི་དང་། རིགས་པ་བཞི་སྨོས་པ་ཡིན་ཏེ། བྱང་ཆུབ་དང་ཉེ་
བ་ལ་བྱང་ཆུབ་ནི་བླ་ན་མེད་པའོ། །ཤེས་རབ་རྒྱ་ཆེ་བ་ལ་རྒྱ་ཆེ་བ་ནི་རྣམ་པ་གསུམ་གྱིས་བསྟན་ཏེ། ཡུལ་ལས་ནི་ཡུལ་མཐའ་དག་ལ་ཁྱབ་པའི་ཕྱིར་རོ། །འབྲས་བུ་ལས་ནི་བདག་དང་གཞན་གྱི་དོན་ཕུན་སུམ་ཚོགས་པ་རྒྱ་ཆེན་པོའི་འབྲས་བུ་དང་ལྡན་པའི་ཕྱིར་རོ། །ངོ་བོ་ཉིད་ལས་ནི་ཤེས་རབ་ཀྱི་ཡོན་
ཏན་མ་ལུས་པ་དང་ལྡན་པའི་ཕྱིར་རོ། །སངས་རྒྱས་ཐམས་ཅད་མངོན་སུམ་དུ་མཐོང་བ་དང་། སངས་རྒྱས་ཐམས་ཅད་ཀྱི་རྗེས་སུ་སློབ་པར་འདོད་པས་སོ། །རིགས་པ་རྣམ་པ་བཞི་ཇི་ལྟར་སྨོས་ཤེ་ན། འདི་ལྟར་དོན་དེ་དག་ནི་བྱང་ཆུབ་དང་ཉེ་བའི་རྒྱུ་ཡིན་པ་དང་། ཤེས་རབ་རྒྱ་ཆེན་པོའི་རྒྱུ་ཡིན་པ་དང་། 
སངས་རྒྱས་ཐམས་ཅད་མངོན་སུམ་དུ་མཐོང་བའི་རྒྱུ་ཡིན་པ་དང་། སངས་རྒྱས་ཐམས་ཅད་ཀྱི་རྗེས་སུ་སློབ་པའི་རྒྱུ་ཡིན་ཏེ། འདི་ལྟ་བུ་གང་ཡིན་པ་དེ་དག་ནི། ངེས་པར་ནན་ཏན་དུ་བསྒྲུབ་པར་བྱ་བ་ཡིན་ཏེ། དཔེར་ན་སྦྱིན་པ་ལ་སོགས་པ་ལྟ་བུ་ཡིན་ལ། དེ་དང་འདྲ་བར་དོན་རྣམ་པ་བཞི་པོ་ཇི་སྐད་
བསྟན་པ་འདི་དག་ཀྱང་དེ་ལྟ་བུ་ཡིན་ནོ།    །ད་ནི་གཟུངས་ཀྱི་ངོ་བོ་འཐོབ་པར་བྱ་བའི་ཐབས་ལ་གནས་པའི་ཕན་ཡོན་བསྟན་ཏེ། བཞི་ཚན་གསུམ་གྱིས་གཟུངས་ལ་ནི། །མངོན་པར་བརྩོན་པའི་རྣལ་འབྱོར་པས། །ཐོབ་བྱ་མ་ཐོབ་བར་དུ་ཡང་། །ཕན་ཡོན་རྣམ་པ་བཞི་འཐོབ་འགྱུར། །བཞི་ཚན་

73-1-46b

གསུམ་གྱིས་བསྟན་པའི་ཐབས་གང་ཡིན་པ་དེ་ལ་ནི་བཞི་ཚན་གསུམ་ཞེས་བྱ་སྟེ། བཞི་ཚན་གསུམ་བསྟན་པའི་ཐབས་དེས་གཟུངས་ལ་མངོན་པར་བརྩོན་པའི་རྣལ་འབྱོར་པས། ཐོབ་པར་བྱ་བ་མ་ཐོབ་སྟེ། །གཟུངས་མ་ཐོབ་པའི་བར་སྐབས་སུ་ཕན་ཡོན་རྣམ་པ་བཞིར་འགྱུར་བ་ལ། ཕྱོགས་
བཅུ་ན་བཞུགས་པའི་སངས་རྒྱས་ཐམས་ཅད་ཀྱིས་དགོངས་པར་འགྱུར་ཏེ། དགོངས་པ་ཡང་མཁྱེན་པ་ཙམ་དུ་ནི་མ་ཟད་དོ། །གལ་ཏེ་མཁྱེན་པ་ཙམ་དུ་ཟད་ན་ནི་ཕན་ཡོན་དུ་མ་ཡང་མི་རུང་སྟེ། མཚམས་མེད་པ་ལྔ་བྱེད་པ་ཡང་ཐམས་ཅད་མཁྱེན་པས་དགོངས་པའི་ཕྱིར་རོ། །དེ་བས་ན་དགོངས་
པ་ནི་ཕན་གདགས་པར་བཞེད་པའི་ཕྱིར་གཟིགས་པ་ལ་བྱ་སྟེ། བདག་དང་གཞན་གྱི་དོན་བསྒྲུབ་ནུས་པར་ཉེ་བར་བསྒྲུབ་པའི་མཚན་ཉིད་དོ། །དེ་ཡང་ཕན་པ་འཐོབ་ནུས་པར་ཉེ་བར་བསྒྲུབ་པ་དང་། གནོད་པ་སྤོང་ནུས་པར་ཉེ་བར་བསྒྲུབ་པ་དང་། རྣམ་པ་གཉིས་སུ་ཤེས་པར་བྱའོ། །བདུད་ཀྱི་
ལས་མེད་པར་འགྱུར་ཏེ། བདུད་ནི་ཉོན་མོངས་པའི་བདུད་དང་། ལྷའི་བུའི་བདུད་དང་། རྣམ་པ་གཉིས་སོ། །དེའི་ལས་ནི་ཕན་པ་དང་། གནོད་པ། འཐོབ་པར་བྱ་བ་དང་། སྤང་བར་བྱ་བ་ལ་བར་ཆད་བྱེད་པའོ། །དེ་ལ་སྔ་མ་མེད་པ་ནི་གཟུངས་འཐོབ་པར་བྱ་བའི་ཐབས་བསྒོམས་པས་ཉོན་མོངས་པའི་
བདུད་རྣམ་པར་བསལ་བའི་ཕྱིར་ཏེ། དེ་ཉིད་ཀྱི་ཕྱིར་ཕྱི་མ་ཤོས་ཀྱང་མེད་པར་འགྱུར་རོ། །ལས་ཀྱི་སྒྲིབ་པ་མྱུར་དུ་འབྱང་བ་སྟེ། ལས་ཀྱི་སྒྲིབ་པ་ནི་མཚམས་མེད་པ་ལྔ་ལ་སོགས་པ་སྟེ། དེ་གཟུངས་ལ་སོགས་པ་སྐྱེ་བ་ལ་སྒྲིབ་པའི་ཕྱིར་ན་སྒྲིབ་པ་ཞེས་བྱའོ། །དེ་ཡང་རྣམ་པ་བཞིས་ཡོངས་སུ་ཟད་
པར་འགྱུར་ཏེ། རྣམ་པར་སུན་འབྱིན་པ་ཀུན་སྤྱོད་པ་དང་། གཉེན་པོ་ཀུན་དུ་སྤྱོད་པ་དང་། སོར་ཆུད་པར་བྱེད་པའི་སྟོབས་དང་། རྟེན་གྱི་སྟོབས་ཏེ། དེ་སྐད་དུ་ཆོས་བཞི་པའི་མདོ་ལས་འབྱུང་བའི་ཕྱིར་རོ། །དེ་ལ་རྣམ་པར་སུན་འབྱིན་པ་ཀུན་དུ་སྤྱོད་པས་ནི་ལས་ཀྱི་སྒྲིབ་པ་དེ་མཇུག་འཇོམས་པར་
བྱེད་དོ། །གཉེན་པོ་ཀུན་དུ་སྤྱོད་པས་ནི་དེ་རྣམ་པར་སྨིན་པར་བྱེད་པའི་མཐུ་ཉམས་སྨད་པར་བྱེད་དོ། །སོར་ཆུད་པར་བྱེད་པའི་སྟོབས་ཀྱིས་ནི་དེ་རྣམ་པར་སྨིན་པར་བྱེད་པའི་མཐུ་སེལ་བར་བྱེད་དོ། །རྟེན་གྱི་སྟོབས་ཀྱིས་ནི་སྔར་བྱུང་བ་ནི་རྒྱང་སྲིང་བར་བྱེད་ལ། སྔར་མ་བྱུང་བ་ནི་མི་སྐྱེ་བར་བྱེད་དོ། །འདི་

73-1-47a

ལྟར་རྟེན་གྱི་སྟོབས་ནི་དགེ་བའི་གཤེས་གཉེན་ལ་བརྟེན་པ་དང་། ཆོས་ཀྱི་དེ་ཁོ་ན་ལ་སྤྱོད་པ་སྟེ། དེ་ལྟ་བས་ན་རྣམ་པ་དེ་དག་གིས་ལས་ཀྱི་སྒྲིབ་པ་བྱས་ཤིང་བསགས་པ་ཡང་མ་ལུས་པར་འབྱང་བར་འགྱུར་ཞེས་བྱ་བ་ནི་རིགས་པ་ཡིན་ནོ། །གཟུངས་ཐོབ་པར་བྱ་བའི་ཐབས་བསྟན་པ་ནི་
རྣམ་པར་སུན་འབྱིན་པ་ཀུན་དུ་སྤྱོད་པ་ལ་སོགས་པ་དེ་དག་ངེས་པར་བསྟན་ཏེ། འདི་ལྟ་བུས་ལས་ཀྱི་སྒྲིབ་པ་དེ་དག་མ་ལུས་པར་འབྱང་བར་འགྱུར་བའི་ཕྱིར་རོ། །འདི་ལྟར་འགྲིབ་པ་དང་འཕེལ་བ་ཅན་གང་ཡིན་པ་དེ་ནི། མི་མཐུན་པའི་ཕྱོགས་ཀྱིས་ཟིལ་གྱིས་མནན་པ་འཕེལ་ན། འགྲིབ་པར་འགྱུར་བའི་
ཆོས་ཅན་ཡིན་ཏེ། དཔེར་ན་མེ་འབར་བ་ལ་སོགས་པ་བཞིན་ནོ། །དེ་བཞིན་དུ་ལས་ཀྱི་སྒྲིབ་པ་ཡང་འགྲིབ་པ་དང་འཕེལ་བ་ཅན་ཡིན་ནོ། །ཆུད་ཟ་བར་མི་འགྱུར་ཞེས་བྱ་བ་ལ་སོགས་པ་གསུངས་པ་གང་ཡིན་པ་དེ་ནི། གཉེན་པོ་བསྒོམ་པ་མེད་པ་ལ་བྱ་བར་ཤེས་པར་བྱའོ། །དེ་ལྟ་མ་ཡིན་ན་ནི་རིགས་
པ་དང་འགལ་བ་དང་། མདོ་སྡེ་མང་པོ་དག་དང་འགལ་བར་འགྱུར་རོ། །ངེས་པ་ཞེས་བྱ་བའི་ཚིག་ཀྱང་དེ་ཉིད་ཀྱིས་བསྟན་ཏོ། །མ་ངེས་པ་ནི་གཉེན་པོ་བསྒོམ་པ་མེད་བཞིན་དུ་ཡང་ཇི་སྟེ་ན་འབྲས་བུར་མི་འགྱུར་བའི་ཕྱིར་རོ། །སྤོབས་པ་རྒྱུན་མི་འཆད་པ་ཡང་འཐོབ་པར་འགྱུར་ཏེ། སྤོབས་པ་རྒྱུན་
མི་འཆད་པ་ནི་རྣམ་པ་གཉིས་ཏེ། མི་མཐུན་པའི་ཕྱོགས་ཀྱིས་ཟིལ་གྱིས་མི་ནོན་པ་དང་། གོང་ནས་གོང་དུ་སྤོབས་པའི་མཐུ་དང་ལྡན་པའོ། །གང་གི་ཕྱིར་སངས་རྒྱས་ཐམས་ཅད་ཀྱིས་དགོངས་པ་དེའི་ཕྱིར་བདུད་ཀྱི་ལས་མེད་དོ། །བདུད་ཀྱི་ལས་ལས་རིང་བར་གྱུར་ན་ལས་ཀྱི་སྒྲིབ་པ་བདེ་བླག་ཏུ་འབྱང་
བར་འགྱུར་རོ། །ལས་ཀྱི་སྒྲིབ་པ་བྱང་ན་སྤོབས་པ་རྒྱུན་མི་འཆད་པ་ཐོབ་པར་འགྱུར་ཏེ། འདི་ནི་ཕན་ཡོན་གྱི་རིམ་པ་ཡིན་ནོ། །དོན་དེ་ཡང་ཚིགས་སུ་བཅད་པས་གསུངས་ཏེ། ཅིའི་ཕྱིར་བཟླས་ཏེ་གསུངས་ཤེ་ན། ངེས་པར་གཟུང་བའི་ཕྱིར་ཏེ། དེས་ནི་འདི་བསྟན་ཏེ། གཟུངས་ལ་མངོན་པར་བརྩོན་
པ་ཐམས་ཅད་ཀྱི་ཕན་ཡོན་འདི་དག་ངེས་པ་ཁོ་ན་འཐོབ་པ་ལ་བྱའི། ཁ་ཅིག་ལ་སྲིད་པ་ཙམ་གྱི་ཕྱིར་ཕན་ཡོན་དུ་བསྟན་པ་ནི་མ་ཡིན་ནོ། །ཡང་ན་གང་དག་ཕན་ཡོན་སྟོན་པའི་ཚེ་ནི་མ་འདུས་ལ། ཕྱིས་ལྷགས་པ་དེ་དག་གི་ཆེད་དུ་ཕན་ཡོན་དེ་ཚིགས་སུ་བཅད་པས་བརྡ་སྤྲད་པར་མཛད་དེ། ཚིག་དང་

73-1-47b

ཡི་གེའི་འབྲུ་དེ་དག་ཉིད་ཀྱིས་བརྡ་སྤྲད་དུ་ཟིན་ན། གདུལ་བ་སྔ་མ་རྣམས་འཕྱ་བར་འགྱུར་བའི་ཕྱིར་རོ། །ཡང་ན་བདག་ཉིད་ཀྱིས་སོ་སོ་ཡང་དག་པར་རིག་པའི་ཆེ་བ་ཉིད་བསྟན་པའི་ཕྱིར་ཡང་ཚིགས་སུ་བཅད་དེ་ཕན་ཡོན་གསུངས་སོ། །ཡང་ན་འཐད་པ་བསྟན་པའི་ཕྱིར་ཏེ། འདི་ལྟར་སྤོབས་པ་མཐའ་
ཡས་ཀྱང་ཐོབ་པར་འགྱུར་ཞེས་བྱ་བ་དེའི་འཐད་པ་ནི། དེའི་ལས་ཀྱི་སྒྲིབ་པ་མྱུར་དུ་འབྱང་ཞེས་བྱ་བ་ཡིན་ནོ། །དེའི་འཐད་པ་ནི། དེ་ལ་བདུད་ཀྱིས་གླགས་ནི་རྙེད་མི་འགྱུར། །ཞེས་བྱ་བ་ཡིན་ནོ། །དེའི་འཐད་པ་ནི། དེ་ནི་སངས་རྒྱས་ཀུན་གྱིས་ཡིད་ལ་མཛད། །ཅེས་བྱ་བ་ཡིན་ནོ། །དེའི་འཐད་པ་ནི། 
གཟུངས་འདི་ལ་མངོན་པར་བརྩོན་པ་ཞེས་བྱ་བ་ཡིན་ཏེ། དེའི་ཕྱིར་དེ་ལྟར་གཟུངས་ལ་མངོན་པར་བརྩོན་པ་དེའི་ཕན་ཡོན་ནི། འདི་ནི་སངས་རྒྱས་ཀུན་གྱིས་ཡིད་ལ་མཛད། །ཅེས་བྱ་བ་འདི་ཁོ་ན་ཡིན་ནོ། །གཞན་ནི་བརྒྱུད་པར་ཤེས་པར་བྱའོ། །མཐའ་ཡས་པ་ནི་ཟད་པ་མེད་པའམ། ཡོན་ཏན་མཐའ་ཡས་པ་
དང་ལྡན་པའི་ཕྱིར་རོ།    །ད་ནི་སྔོན་བྱུང་བ་བསྙད་པ་བརྗོད་པར་བྱ་སྟེ། སྔོན་བྱུང་བ་ནི་མདོར་བསྡུ་ན། །རྣམ་པ་དགུར་ནི་བསྟན་པར་མཛད། །དེ་ཡང་སོ་སོར་དབྱེ་བ་ནི། །རྣམ་པ་མང་པོའི་དབྱེ་བ་ཡོད། །བསྒྲུབ་པར་བྱ་བའི་དངོས་པོ་ལ་ངེས་པ་བསྐྱེད་པའི་ཕྱིར། བཅོམ་ལྡན་འདས་ཀྱིས་སྔོན་བྱུང་བ་བསྙད་
པ་རྣམ་པ་དགུའི་རིམ་གྱིས་སྟོན་པར་མཛད་དེ། དགུ་གང་ཞེ་ན། འདི་ལྟ་སྟེ་སྟོན་པ་པོ་བསྟན་པ་ནི། སྟོན་པ་དེ་འདྲ་བ་ལས་ན། གདོན་མི་ཟ་བར་འབྲས་བུ་དེ་ལྟ་བུ་ཐོབ་པར་འགྱུར་རོ་ཞེས་ཐེ་ཚོམ་མི་བྱ་བར་བསྟན་པའི་ཕྱིར་རོ། །གཟུངས་ཐོབ་པ་པོའི་རིགས་བསྟན་པ་དང་། ཐོབ་པ་པོ་བསྟན་པ་དང་། ཐོས་ནས་
ཐོབ་པར་བྱ་བའི་ཕྱིར་མངོན་པར་བརྩོན་པ་བསྟན་པ་དང་། ཐོབ་པ་བསྟན་པ་དང་། ཐོབ་པའི་འབྲས་བུ་བསྟན་པ་སྟེ། འདི་ལྟ་བུའི་རིགས་སུ་སྐྱེས་ལ། ན་ཚོད་འདི་ཙམ་གྱིས་བརྩོན་འགྲུས་འདི་ལྟ་བུ་བྱས་ཏེ་འབྲས་བུ་འདི་ལྟ་བུ་ཐོབ་ནས། གཞན་ལ་ཕན་པ་འདི་ལྟ་བུ་བྱེད་ན། བདག་ཅག་གིས་ཀྱང་འདི་ལྟ་བུ་
ཅིའི་ཕྱིར་མི་བྱ་སྙམ་དུ་བརྩོན་འགྲུས་ཆུང་བ་རྣམས་སྤྲོ་བ་བསྐྱེད་པའི་ཕྱིར་རོ། །རྗེས་སུ་ཡི་རང་བྱེད་པ་བསྟན་པ་ནི་རྗེས་སུ་ཡི་རང་བ་ཙམ་གྱིས་ཀྱང་འབྲས་བུ་དེ་ལྟ་བུ་འཐོབ་ན། ཇི་སྐད་བསྟན་པའི་སྤྱོད་པ་ལ་ནན་ཏན་དུ་སྒྲུབ་པས་ལྟ་ཅིའི་ཕྱིར་ཐོབ་པར་མི་འགྱུར་སྙམ་དུ་ངེས་པ་བསྐྱེད་པའི་ཕྱིར་རོ། །དེ་ཇི་ལྟར་

73-1-48a

མངོན་སྙམ་པའི་ཐེ་ཚོམ་བསལ་བའི་ཕྱིར་རྗེས་སུ་ཡི་རང་བའི་འབྲས་བུ་བསྟན་པ་དང་། བདག་དང་གཞན་དག་ལས་དཔེ་བླངས་ནས། རྗེས་སུ་ཡི་རང་བའི་འབྲས་བུ་བརྡ་སྤྲད་པ་སྟེ། འདི་ནི་མདོར་བསྟན་པའོ། །འདི་ལྟར་སྔོན་བྱུང་བ་བསྙད་པ་དེ་སོ་སོར་དབྱེ་ན་ནི་རྣམ་པ་དུ་མར་
དབྱེ་བ་ཡོད་དོ། །གང་གི་ཕྱིར་སྟོན་པ་པོ་ཡང་། དུས་དང་མཚན་དང་ཡོན་ཏན་དང་། ཡོངས་སུ་མྱ་ངན་ལས་འདས་པ་རྣམ་པ་བཞིར་བསྟན་པའི་ཕྱིར་རོ། །དེ་ལ་དུས་ནི་སྔོན་ཞེས་བྱ་བ་ལ་སོགས་པས་བསྟན་ཏེ། ཆགས་བྲལ་སློབ་དང་མི་སློབ་དང་། །བསེ་རུ་ལ་སོགས་རྒྱལ་བའི་སྲས། །དེ་དག་
གིས་ཤེས་ལམ་ལས་འདས། །གྲངས་མེད་ལ་སོགས་བསྟན་པ་ཡིན། །གྲངས་མེད་པ་ནི་འཇིག་རྟེན་པའི་འདོད་ཆགས་དང་བྲལ་བ་རྣམས་ཀྱི་ཤེས་པའི་ལམ་ལས་འདས་པའོ། །ཆེས་གྲངས་མེད་པ་ནི་སློབ་པ་འདོད་ཆགས་དང་བྲལ་བ་རྣམས་ཀྱི་ཤེས་པའི་ལམ་ལས་འདས་པའོ། །ཡངས་པ་ནི་
མི་སློབ་པ་རྣམས་ཀྱི་ཤེས་པའི་ལམ་ལས་འདས་པའོ། །རྒྱ་ཆེར་གྱུར་པ་ནི་བསེ་རུ་ལ་སོགས་པའི་ཤེས་པའི་ལམ་ལས་འདས་པ་སྟེ། སོགས་པ་སྨོས་པས་ན། རང་སངས་རྒྱས་ཚོགས་དང་སྤྱོད་པ་རྣམས་བསྡུའོ། །ཚད་མེད་པ་ལས་ནི་བདེ་བར་གཤེགས་པའི་སྲས་རྣམས་ཀྱི་ཤེས་པའི་ལམ་ལས་
འདས་པའོ། །ཡང་ན། གཞལ་བྱའི་དངོས་པོ་བྱེ་བྲག་དག །གོ་བྱེད་གྲངས་དང་བསྟོད་གཞལ་དང་། །ཀུན་ནས་གཞལ་དང་ཚད་ཅེས་བྱ། །དེ་དག་མེད་ཕྱིར་དེ་སྐད་བསྟན། །གྲངས་མེད་པ་ལ་སོགས་ཞེས་བྱ་བའི་ཐ་ཚིག་སྟེ། གྲངས་མེད་པ་ནི་ཡོངས་སུ་གཅོད་པར་བྱེད་པའི་གྲངས་མེད་པའི་
ཕྱིར་རོ། །ཆེས་གྲངས་མེད་པ་ནི་གནས་དྲུག་ཅུ་པར་བབ་པའི་གྲངས་ལ་གྲངས་མེད་པ་ཞེས་བྱ་བ་ཡིན་པར་དོགས་པ་བསལ་བའི་ཕྱིར་གྲངས་མེད་པའི་བྱེ་བྲག་སྨོས་པར་མཛད་པའོ། །ཡངས་པ་སྨོས་པ་ནི་བསྟོད་དེ་གཞལ་བ་མེད་པའི་ཕྱིར་རོ། །ཀུན་ནས་གཞལ་བ་ནི་ཀུན་ཏུ་གཞལ་བ་ཡིན་པའི་ཕྱིར་ཡོངས་
སུ་གཞལ་བ་སྟེ། དེ་མེད་པའི་རྒྱ་ཆེ་བར་གྱུར་པའོ། །ཚད་མེད་པ་ནི་ཚད་མེད་པའི་ཕྱིར་རོ། །དེ་ལྟར་ན་དེ་ལ་ཡོངས་སུ་གཅོད་པར་བྱེད་པ་ཐམས་ཅད་མེད་པར་བསྟན་པའི་ཕྱིར་རོ། །སྔ་མ་སྔ་མ་སྒྲུབ་པ་ཡི། །གཏན་ཚིགས་ཕྱི་མ་ཕྱི་མ་ཡིན། །ཡང་ན་གྲངས་མེད་པ་ལ་སོགས་པ་སྔ་མ་སྔ་མ་བསྒྲུབ་པའི་

73-1-48b

གཏན་ཚིགས་ནི། ཆེས་གྲངས་མེད་པ་ལ་སོགས་པ་ཕྱི་མ་ཕྱི་མ་ཡིན་པར་ཤེས་པར་བྱའོ། །ཡང་ན་ལ་ལ་སྔར་མ་ཐོས། །གང་ཡང་རུང་བས་དོན་དེ་སྟོན། །ཡང་གདུལ་བྱ་ཁ་ཅིག་སྔ་མ་བསྟན་པའི་ཚེ། དོན་དེ་མ་ཐོས་པ་ལ་ཕྱིས་ཆེས་གྲངས་མེད་པ་ལ་སོགས་པའི་ཚིག་གཞན་གྱིས་བརྡ་སྤྲོད་པར་མཛད་དོ། །
མཚན་ནི་རིན་ཆེན་དཔལ་གྱི་གཟི་བརྗིད་རྒྱལ་པོ་ཞེས་བྱ་བའོ། །ཡོན་ཏན་ནི་དེ་བཞིན་གཤེགས་པ་ཞེས་བྱ་བ་ལ་སོགས་པས་བསྟན་ཏེ། གདུལ་བྱའི་དོན་ནི་རབ་བསྒྲུབ་ཕྱིར། །ཡེ་ཤེས་སྤངས་པའི་རང་བཞིན་ཉིད། །ཅི་འདྲ་དེ་ནི་རྒྱུ་དང་བཅས། །ཕུན་སུམ་ཚོགས་གཉིས་བསྟོད་པ་གསུངས། །གདུལ་
བ་བཅོམ་ལྡན་འདས་ལ་མངོན་པར་མ་དད་པ་རྣམས་དད་པ་བསྐྱེད་པའི་ཕྱིར་དང་། མངོན་པར་དད་པ་རྣམས་དད་པ་འཕེལ་བར་བྱ་བའི་ཕྱིར། བདག་དང་གཞན་གྱི་དོན་ཕུན་སུམ་ཚོགས་པ་རྣམ་པ་གཉིས་ཀྱིས་བསྟོད་པ་གསུངས་སོ། །རང་གི་དོན་ཕུན་སུམ་ཚོགས་པ་སྔར་སྨོས་པ་ནི་དེ་ཞར་ལས་བྱུང་བ་
ཡིན་ཡང་། དེ་ཅིག་ཤོས་ཀྱི་སྔོན་དུ་འགྲོ་བ་ཡིན་པའི་ཕྱིར་རོ། །དེ་ལ་ཡེ་ཤེས་དང་སྤངས་པ་ཕུན་སུམ་ཚོགས་པའི་རྒྱུ་མཚོན་པ་ནི། དེ་བཞིན་གཤེགས་པ་ཉིད་ཀྱིས་བསྟན་ཏེ། ཡང་དག་པར་རྫོགས་པའི་སངས་རྒྱས་སྔ་མ་རྣམས་ལམ་གང་ནས་གཤེགས་པ་ཉིད་ནས་གཤེགས་པས་ན་དེ་བཞིན་གཤེགས་
པ་ཞེས་བྱ་བའི་ཕྱིར་རོ། །དགྲ་རྣམས་བཅོམ་པས་ན་དགྲ་བཅོམ་པ་སྟེ། འདིས་ནི་སྤངས་པ་ཕུན་སུམ་ཚོགས་པ་བསྟན་ཏོ། །དགྲ་དག་ནི་འདོད་ཆགས་ལ་སོགས་པ་ཉོན་མོངས་པ་རྣམས་ཏེ། དགེ་བའི་ཆོས་ཐམས་ཅད་ལ་གནོད་པ་བྱེད་པའི་ཕྱིར་རོ། །སྤངས་པ་ཕུན་སུམ་ཚོགས་པ་འདི་སྔར་སྨོས་པ་ནི། དེ་ལ་ཡི་
ཤེས་ཕུན་སུམ་ཚོགས་པའི་སྔོན་དུ་འགྲོ་བའི་ཕྱིར་རོ། །ཡང་དག་པ་ཕྱིན་ཅི་མ་ལོག་པར་ཀུན་ནས་སངས་རྒྱས་པས་ན་ཡང་དག་པར་རྫོགས་པའི་སངས་རྒྱས་ཞེས་བྱའོ། །འདིས་ནི་ཡེ་ཤེས་ཕན་སུམ་ཚོགས་པ་བསྟན་ཏེ། ཐམས་ཅད་མཁྱེན་པའི་ཡེ་ཤེས་ཕྱིན་ཅི་མ་ལོག་པར་བསྟན་པའི་ཕྱིར་རོ། །གལ་ཏེ་ཐུབ་
པ་སྔ་མ་རྣམས་ལམ་གང་ནས་གཤེགས་པའི་ལམ་དེ་ནས་འདི་ཡང་གཤེགས་པའི་ཕྱིར། དེ་བཞིན་གཤེགས་པ་ཞེས་བྱ་ན། ལམ་དེ་ཉིད་གང་ཡིན་ཞེ་ན། རིག་པ་དང་ཞབས་སུ་ལྡན་པ་སྟེ། འདིས་ནི་འཕགས་པའི་ལམ་ཡན་ལག་བརྒྱད་པ་བསྟན་ཏེ། རིག་པ་ནི་ཡང་དག་པའི་ལྟ་བའོ། །ཡང་དག་པའི་

73-1-49a

རྟོག་པ་ལ་སོགས་པ་ཡན་ལག་བདུན་ནི་ཞབས་ཏེ། ཡང་དག་པའི་ལྟ་བས་དེ་ཁོ་ན་གཟིགས་ནས། ཡང་དག་པའི་རྟོག་པ་ལ་སོགས་པ་ཞབས་སུ་གྱུར་པ་རྣམས་ཀྱིས་གཤེགས་པའི་ཕྱིར་རོ། །ཡང་ན་བསླབ་པ་གསུམ་ནི། རིག་པ་དང་ཞབས་ཏེ། ལྷག་པའི་ཤེས་རབ་ཀྱི་བསླབ་
པ་ནི་རིག་པའོ། །ལྷག་པའི་སེམས་དང་། ལྷག་པའི་ཚུལ་ཁྲིམས་ཀྱི་བསླབ་པ་ནི་ཞབས་ཏེ། ཤེས་རབ་ཀྱི་སྔོན་དུ་ཡོངས་སུ་སྤྱོད་པར་གྱུར་པ་ནི་ཞབས་ཏེ་སྤྱོད་པ་ཡིན་པའི་ཕྱིར་རོ། །རིག་པ་སྔར་སྨོས་པ་ནི་དེ་ཡོངས་སུ་དག་པས་ཚུལ་ཁྲིམས་དང་ཏིང་ངེ་འཛིན་ཡོངས་སུ་དག་པར་འགྱུར་བའི་ཕྱིར་རོ། །
ཡང་ན་སྔོན་གྱི་གནས་རྗེས་སུ་དྲན་པ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་དང་། འཆི་འཕོ་དང་། སྐྱེ་བ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་དང་། ཟག་པ་ཟད་པ་མངོན་སུམ་དུ་བྱ་བའི་མངོན་པར་ཤེས་པ་དང་། འདི་གསུམ་ནི་རིག་པའོ། །ཞབས་ནི་ཚུལ་ཁྲིམས་ཕུན་སུམ་
ཚོགས་པ་དང་། སྤྱོད་པ་ཕུན་སུམ་ཚོགས་པ་དང་། བཟློག་པ་ཕུན་སུམ་ཚོགས་པ་དང་། ལྷག་པའི་སེམས་ལས་བྱུང་བ་ཚེ་འདི་ལ་བདེ་བར་གནས་པ་བཞི་པོ་རྣམས་ཏེ། རིག་པ་རྣམས་ཀྱི་སྔོན་དུ་ཡོངས་སུ་སྤྱོད་པར་གྱུར་པའི་ཕྱིར་ཏེ། སྔར་སྤྱད་པ་ཡིན་པའི་ཕྱིར་རོ། །དེ་ལ་ཚུལ་ཁྲིམས་ཕུན་སུམ་ཚོགས་
པ་ནི་རང་བཞིན་དང་བཅས་པའི་ཁ་ན་མ་ཐོབ་སྤངས་ཤིང་མ་ཉམས་པ་ལ་སོགས་པའི་ཡོན་ཏན་དང་ལྡན་པའོ། །སྤྱོད་པ་ཕུན་སུམ་ཚོགས་པ་ནི་སྤྱོད་ལམ་ཐམས་ཅད་ཤེས་བཞིན་དུ་གནས་པའོ། །བཟློག་པ་ཕུན་སུམ་ཚོགས་པ་ནི་མིག་ལ་སོགས་པའི་ཡུལ་རྣམས་ལ་མཚན་མར་མི་འཛིན་པས། དབང་པོ་བསྡམས་
པའོ། །དེ་ལྟར་ཚུལ་ཁྲིམས་ཡོངས་སུ་དག་པ་དང་། ཤེས་བཞིན་དུ་གནས་པ་དང་། དབང་པོ་རྣམས་ཀྱི་སྒོ་བསྲུང་བ་ནི། ལྷག་པའི་སེམས་ལས་བྱུང་བ། ཚེ་འདི་ལ་བདེ་བར་གནས་པ་བཞི་སྒྲུབ་པར་བྱེད་དེ། དེ་དག་ནི་བསམ་གཏན་བཞི་པོ་རྣམས་སོ། །དེའི་ཕྱིར་འདི་ལྟར་བཅོམ་ལྡན་འདས་དེ་ནི་རིག་པ་
རྣམས་དང་། ཞབས་འདི་རྣམས་དང་ལྡན་པས། རང་གི་དོན་ཕུན་སུམ་ཚོགས་པ་བརྙེས་པར་གྱུར་པའི་ཕྱིར། རིག་པ་དང་ཞབས་སུ་ལྡན་པ་ནི་རང་གི་དོན་ཕུན་སུམ་ཚོགས་པ་འཐོབ་པའི་རྒྱུར་བསྟན་པ་ཡིན་ནོ། །རང་གི་དོན་ཕུན་སུམ་ཚོགས་པ་དེ་ཇི་ལྟ་བུ་ཡིན་པ་དེ་ཡང་། བདེ་བར་གཤེགས་པ་ཞེས་བྱ་

73-1-49b

བས་བསྟན་ཏེ། འདི་ལྟར་འཇིག་རྟེན་ལས་འདས་པའི་ལམ་ནས་ཡེ་ཤེས་དང་སྤངས་པ་ཕུན་སུམ་ཚོགས་པར་ལེགས་པར་གཤེགས་པས་ན་བདེ་བར་གཤེགས་པ་སྟེ། གཟུགས་ལེགས་པ་བཞིན་ནོ། །ཡང་ན་ཕྱིར་མི་ལྡོག་པར་གཤེགས་པས་ན་བདེ་བར་གཤེགས་པ་སྟེ། རིམས་ནད་ལེགས་པར་སོས་པ་
བཞིན་ནོ། །མ་ལུས་པར་གཤེགས་པའི་ཕྱིར་ཡང་བདེ་བར་གཤེགས་པ་སྟེ། བུམ་པ་ཤིན་ཏུ་གང་བ་བཞིན་ནོ། །དོན་འདི་གསུམ་ཡང་ཕྱི་རོལ་པའི་འདོད་ཆགས་དང་བྲལ་བ་དང་། སློབ་པ་དང་། མི་སློབ་པ་རྣམས་ལས་རང་གི་དོན་ཕུན་སུམ་ཚོགས་པ་བྱེ་བྲག་ཏུ་བྱ་བའི་ཕྱིར་རོ། །འཇིག་རྟེན་མཁྱེན་པ་ནི་སྐལ་
བ་དང་ལྡན་པ་དང་། སྐལ་བ་དང་ལྡན་པ་མ་ཡིན་པ་མཁྱེན་པའི་ཕྱིར་རོ། །འདིས་ནི་གཞན་གྱི་དོན་ཕུན་སུམ་ཚོགས་པའི་རྒྱུ་བསྟན་ཏོ། །སྐལ་བ་དང་ལྡན་པ་དང་། སྐལ་བ་དང་ལྡན་པ་མ་ཡིན་པ་ཐུགས་སུ་ཆུད་ནས། སྐལ་བ་དང་ལྡན་པ་རྣམས་འདུལ་བར་མཛད་པས་ན། སྐྱེས་བུ་གདུལ་བའི་ཁ་ལོ་སྒྱུར་བ་བླ་ན་མེད་
པ་ཞེས་གསུངས་ཏེ། འདིས་ནི་གཞན་གྱི་དོན་ཕུན་སུམ་ཚོགས་པ་བསྟན་ཏོ། །གདུལ་བར་འོས་པ་དང་། གདུལ་བར་ནུས་པ་ཡིན་པའི་ཕྱིར། གདུལ་བ་སྟེ་སྐྱེས་བུ་ཉིད་གདུལ་བ་ཡིན་པའི་ཕྱིར་རོ། །སྐྱེས་བུ་གདུལ་བའོ། །དེ་དག་གིས་ཁ་ལོ་སྒྱུར་བ་ནི་ལམ་ངན་པ་ནས་བཟློག་སྟེ་ལམ་བཟང་པོར་འཛུད་
པའི་ཕྱིར་དང་། ཡོན་ཏན་གྱི་ཁྱད་པར་བསྐྱེད་པའི་ཕྱིར་ཏེ། རྟ་ལ་སོགས་པའི་ཁ་ལོ་སྒྱུར་བ་བཞིན་ནོ། །བླ་ན་མེད་པ་སྨོས་པ་ནི། གདུལ་དཀའ་བ། འདོད་ཆགས་དང་། ཞེ་སྡང་དང་། གཏི་མུག་དང་། ང་རྒྱལ་ཤས་ཆེ་བ་འཕགས་པ་མཛེས་དགའ་དང་། སོར་ཕྲེང་དང་། ལྟེང་རྒྱས་འོད་སྲུངས་
དང་། རྒྱལ་པོ་ཆེན་པོ་ཀ་པི་ན་ལ་སོགས་པ་གདུལ་བ་ཡང་ཡིན་ནོ་ཞེས་བསྟན་པའི་དོན་ཏོ། །ལྷ་དང་མི་རྣམས་ཀྱི་སྟོན་པ་ཞེས་བྱ་བ་འདིས་ནི་གཞན་གྱི་དོན་ཕུན་སུམ་ཚོགས་པ་ཇི་ལྟ་བུ་ཡིན་པ་བསྟན་ཏོ། །སྟོན་པའི་ཕྱིར་ནི་སྟོན་པ་སྟེ། བསྟན་པ་ན་འཕགས་པའི་བདེན་པ་བཞི་ཁོང་དུ་ཆུད་པའོ། །དེ་བས་ན་ལྷ་དང་མི་
སྨོས་ཏེ། དེ་དག་ཁོ་ན་ཁོང་དུ་ཆུད་པའི་སྐལ་བ་དང་ལྡན་པའི་ཕྱིར་རོ། །ལམ་བཟང་པོ་སྟོན་པ་ལ་སོགས་པའི་རྒྱུ་ཉིད་ཀྱིས་ནི་ཐམས་ཅད་ཀྱི་ཡང་སྟོན་པ་ཡིན་ཏེ། དེའི་ཕྱིར་སེམས་ཅན་ཐམས་ཅད་ཀྱི་སྟོན་པ་ཞེས་གསུངས་སོ། །འཕགས་པའི་བདེན་པ་རྟོགས་པ་དེས་ཞུགས་ན། ཐེག་པ་ཇི་ལྟ་བ་བཞིན་དུ་

73-1-50a

ཡེ་ཤེས་དང་སྤངས་པ་ཕུན་སུམ་ཚོགས་པར་འགྱུར་བའི་ཕྱིར། ཡེ་ཤེས་དང་སྤངས་པ་ཕུན་སུམ་ཚོགས་པ་གཞན་གྱི་དོན་ཕུན་སུམ་ཚོགས་པ་ཞེས་བྱའོ། །དེ་ལྟར་ན་བདག་དང་གཞན་གྱི་དོན་ཕུན་སུམ་ཚོགས་པ་དང་ལྡན་པ་དེ་སུ་ཡིན་ཞེ་ན། སངས་རྒྱས་བཅོམ་ལྡན་འདས་རིན་ཆེན་དཔལ་
གྱི་གཟི་བརྗིད་རྒྱལ་པོ་ལྟ་བུ་ཞེས་བྱ་བ་ཞེས་གསུངས་པ་དང་སྦྱར་ཏེ། བློ་ཁྱད་པར་དུ་འཕགས་པ་འདི་ལ་ཡོད་པས་ན་སངས་རྒྱས་ཞེས་བྱའོ། །བློ་ཁྱད་པར་དུ་འཕགས་པ་ཡང་རྣམ་པ་དགུ་སྟེ། ཐམས་ཅད་མཁྱེན་པ་དང་། རྣམ་པ་ཐམས་ཅད་མཁྱེན་པ་དང་། བསྒྲིམ་མི་དགོས་པར་མཁྱེན་པ་དང་། ལུང་
ཕོག་པ་མེད་པར་མཁྱེན་པ་དང་། ཉོན་མོངས་པ་དང་ཤེས་བྱའི་སྒྲིབ་པ་བག་ཆགས་དང་བཅས་པ་སྤངས་པ་དང་། རྣམ་པ་ཐམས་ཅད་དུ་སེམས་ཅན་ཐམས་ཅད་ཀྱི་དོན་མཛད་པར་སྤྱོད་པ་དང་། ཐུགས་རྗེ་ཕུན་སུམ་ཚོགས་པ་དང་། ཟད་མི་ཤེས་པ་ཕུན་སུམ་ཚོགས་པ་དང་། མཚུངས་པ་མེད་པ་ཕུན་སུམ་
ཚོགས་པས་སོ། །ཡང་ན་དངོས་པོ་ཐམས་ཅད་རྣམ་པ་ཐམས་ཅད་དུ་ཐུགས་སུ་ཆུད་པའི་ཕྱིར་སངས་རྒྱས་ཞེས་བྱ་སྟེ། ད་ལྟར་གྱི་དུས་ལ་བྱའོ། །མ་འོངས་པ་ཡང་དེ་དེའི་རང་བཞིན་ཡིན་པའི་ཕྱིར། སངས་རྒྱས་ཞེས་བྱ་སྟེ། འོ་མ་དང་བུད་ཤིང་བཞིན་ནོ། །གལ་ཏེ་དེ་ལྟར་ན་འདས་པ་ན་སངས་རྒྱས་མ་
ཡིན་པར་འགྱུར་རོ་ཞེ་ན་མི་འགྱུར་ཏེ། སངས་རྒྱས་འདས་པ་ནི་མེད་པས་ཡོངས་སུ་མྱ་ངན་ལས་འདས་པ་ནི་མི་སྲིད་པར་བསྟན་ཟིན་ཏེ། འཁོར་བ་ཇི་སྲིད་ཡོད་ཀྱི་བར་དུ་སྐད་ཅིག་རེ་རེ་ལ་དངོས་པོའི་ཡུལ་མ་ལུས་པ་ལ་མཁྱེན་པ་འཇུག་པའི་ཕྱིར་རོ། །ཡང་ན་རྣམ་པ་ཐམས་ཅད་དུ་ལྷག་པ་མེད་པའི་ཡོན་ཏན་ཐམས་ཅད་
དང་ལྡན་པ་དེ་ལ་ནི་སངས་རྒྱས་ཞེས་བྱ་སྟེ། དེའི་ཕྱིར་འདི་ལ་ཉེས་པ་མེད་དོ། །ཡང་ན་སྟོན་པ་པོ་བཅོམ་ལྡན་འདས་ལ་དད་པའི་ཁྱད་པར་བསྐྱེད་པའི་ཕྱིར་རོ། །སྟོང་པ་ཉིད་ཕུན་སུམ་ཚོགས་པ་ཡོན་ཏན་གྱི་ཆེ་བ་ཉིད་བསྟན་ཏེ། སྟོན་པ་རྣམ་གཉིས་གང་གིས་འཐོབ། །ཅི་འདྲ་དེ་ཡི་ལམ་རྣམ་གཉིས། །གང་དག་ལ་ནི་
དེ་གནས་དང་། །དེ་དང་ལྡན་པའང་སྟོན་པར་བྱེད། །དེ་ལ་སྟོན་པ་ཉིད་ཕུན་སུམ་ཚོགས་པ་རྣམ་པ་གཉིས་ནི། གསུངས་པ་ཉིད་ཀྱི་མཚན་ཉིད་དང་། བསྒྲུབ་པ་ཉིད་ཀྱི་མཚན་ཉིད་དོ། །དེ་ལ་གསུངས་པ་ཉིད་ཀྱི་མཚན་ཉིད་ནི། དེ་བཞིན་གཤེགས་པ་ཞེས་གསུངས་པ་ཡིན་ཏེ་ཆོས་རྣམས་ཇི་ལྟར་གནས་

73-1-50b

པ་དེ་ཁོ་ན་བཞིན་དུ་གསུངས་པས་ན་དེ་བཞིན་གསུངས་པ་ཞེས་བྱ་བའི་ཕྱིར་རོ། །འདིས་ནི་ཕྱིན་ཅི་མ་ལོག་པར་ཆོས་སྟོན་པ་པོ་ཉིད་ཡིན་པར་བསྟན་ཏོ། །སྒྲུབ་པ་ཉིད་ཀྱི་མཚན་ཉིད་ནི། སྤངས་པ་དང་ཡེ་ཤེས་ཕུན་སུམ་ཚོགས་པའི་ངོ་བོ་ཉིད་རྣམ་པ་གཉིས་ཏེ་གོ་རིམས་བཞིན་དུ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ཞེས་གསུངས་པ་ཡིན་ནོ། །དེའི་ཕྱིར་དེ་ལྟར་ཕྱིན་ཅི་མ་ལོག་པར་ཆོས་སྟོན་པ་པོ་ཉིད་དང་། ཉོན་མོངས་པ་ཐམས་ཅད་སྤངས་པ་དང་། རྣམ་པ་ཐམས་ཅད་དུ་ཆོས་ཐམས་ཅད་ཐུགས་སུ་ཆུད་པས་བཅོམ་ལྡན་འདས་ཀྱིས་སྟོན་པ་ཉིད་ཕུན་སུམ་ཚོགས་པ་ཐུན་མོང་མ་ཡིན་པ་དང་། ཡོངས་
སུ་རྫོགས་པར་བསྟན་ཏེ། འདི་ལྟར་ཕྱི་རོལ་པ་རྣམས་ལ་ཕྱིན་ཅི་མ་ལོག་པར་ཆོས་སྟོན་པ་པོ་ཉིད་མེད་དེ། ཉོན་མོངས་པ་ཐམས་ཅད་མ་སྤངས་པའི་ཕྱིར་རོ། །དེ་ཉིད་ཀྱི་ཕྱིར་དེ་དག་ཡང་དག་པའི་སྟོན་པ་མ་ཡིན་ནོ། །ཉན་ཐོས་དང་རང་སངས་རྒྱས་རྣམས་ནི་ཉོན་མོངས་པ་ཐམས་ཅད་སྤངས་པ་ཡིན་པའི་ཕྱིར། 
ཡང་དག་པའི་སྟོན་པ་ཡིན་མོད་ཀྱི། རྣམ་པ་ཐམས་ཅད་དུ་ཆོས་ཐམས་ཅད་ཁོང་དུ་ཆུད་པ་མ་ཡིན་པས་ན། རྣམ་པ་ཐམས་ཅད་ཀྱི་སྟོན་པ་མ་ཡིན་ནོ། །བཅོམ་ལྡན་འདས་ནི་ཡང་དག་པའི་སྟོན་པ་དང་རྣམ་པ་ཐམས་ཅད་ཀྱི་སྟོན་པ་ཡིན་ནོ། །སྟོན་པ་ཉིད་ཕུན་སུམ་ཚོགས་པ་དེ་གང་གིས་འཐོབ་པ་དེ་ནི་རིག་པ་
དང་ཞབས་སུ་ལྡན་པ་ཞེས་བྱ་བས་བསྟན་ཏོ། །སྟོན་པ་ཉིད་ཕུན་སུམ་ཚོགས་པ་རྣམ་པ་གཉིས་པ་དེ་ཅི་འདྲ་བ་དེ་ཡང་། བདེ་བར་གཤེགས་པ་ཞེས་བྱ་བས་བསྟན་ཏོ། །དེ་ཡང་ལེགས་པར་ཞེས་བྱ་བ་ལ་སོགས་པ་དོན་གསུམ་སྨོས་པས་ཅི་རིགས་པར་བཤད་པར་བྱའོ། །སྟོན་པ་ཉིད་ཕུན་སུམ་ཚོགས་
པ་དེའི་ཕྲིན་ལས་རྣམ་པ་གཉིས་ལ་སེམས་ཅན་སྐལ་བ་དང་ལྡན་པ་དང་། སྐལ་བ་དང་ལྡན་པ་མ་ཡིན་པ་ལ་གཟིགས་པའི་ཕྲིན་ལས་གང་ཡིན་པ་དེ་ནི་འཇིག་རྟེན་མཁྱེན་པ་ཞེས་བྱ་བས་བསྟན་ཏོ། །སྐལ་བ་དང་ལྡན་པ་འདུལ་བ་གང་ཡིན་པ་དེ་ནི་སྐྱེས་བུ་གདུལ་བའི་ཁ་ལོ་སྒྱུར་བ་བླ་ན་མེད་པ་ཞེས་བྱ་བས་
བསྟན་ཏོ། །སྐལ་བ་དང་ལྡན་པའི་གདུལ་བའི་ཕྲིན་ལས་གང་དག་ལ་གནས་པ་དེ་ནི། ལྷ་དང་མི་རྣམས་ཀྱི་སྟོན་པ་ཞེས་བྱ་བས་བསྟན་ཏོ། །སུ་སྟོན་པ་ཕུན་སུམ་ཚོགས་པ་དེ་དང་ལྡན་པ་དེ་ནི་སངས་རྒྱས་བཅོམ་ལྡན་འདས་ཞེས་བྱ་བས་བསྟན་ཏོ། །ཚིག་གི་དོན་ནི་སྔར་བཤད་ཟིན་པས་འདིར་ནི་སྦྱར་བ་ཙམ་དུ་ཟད་དོ། །

73-1-51a

ཡོངས་ས་མྱ་ངན་ལས་འདའ་བའི་སྒོ་ནས་སྟོན་པ་པོ་བསྟན་པ་ནི། ཤཱ་རིའི་བུ་ཞེས་བྱ་བ་ལ་སོགས་པས་མཚན་དང་། ཡོན་ཏན་དང་། ཡོངས་སུ་མྱ་ངན་ལས་འདས་པའི་དུས་ངེས་པ་རྣམ་པ་གསུམ་དུ་ཕྱེ་སྟེ། ཀྱེ་མ་འདིར་སངས་རྒྱས་བཅོམ་ལྡན་འདས་ཡོན་ཏན་གྱི་གཞི་འདི་ལྟ་བུ་
ཡང་། མི་རྟག་པ་ཉིད་ཀྱི་ལམ་ན་འདུག་ན། བདག་ཅག་ལྟ་སྨོས་ཀྱང་ཅི་དགོས་སྙམ་དུ་སེམས་ཏེ། སྲོག་ཆགས་རྣམས་ཀྱིས་སྐྱོ་བའི་བྱེ་བྲག་བསྐྱེད་པའི་ཕྱིར་རོ། །ཚེ་ཞེས་བྱ་བ་ནི་ངེས་པའམ། ཡང་ན་ཁོང་དུ་ཆུད་པ་ལ་བྱ་བར་ཤེས་པར་བྱའོ། །གལ་ཏེ་ཡོངས་སུ་མྱ་ངན་ལས་འདའ་བའི་དུས་ལ་བབ་པར་
ངེས་ན། དེས་ལོ་བདུན་ཁྲིར་ཞེས་བྱ་བ་ལ་སོགས་པའི་ཚིག་ཇི་ལྟར་སྐྱོན་དུ་མི་འགྱུར་ཞེ་ན། སྨྲས་པ། འཇིག་རྟེན་ཚེ་ནི་དཔག་མེད་ཚེ། །ཐུབ་པ་ཆེན་པོ་སྐྱེས་པ་དེ། །ཡོངས་སུ་མྱ་ངན་འདའ་བ་ཡི། །དུས་བབ་པ་ནི་དེ་འདྲའོ། །འཇིག་རྟེན་གྱི་ཚེ་དཔག་ཏུ་མེད་པ་ན་བཅོམ་ལྡན་འདས་དེ་བཞིན་གཤེགས་
པ་རིན་ཆེན་དཔལ་གྱི་གཟི་བརྗིད་རྒྱལ་པོ་ལྟ་བུ་བྱུང་སྟེ། དེའི་ཕྱིར་དུས་དེ་ལ་ལྟོས་ནས། དེའི་ཡོངས་སུ་མྱ་ངན་ལས་འདའ་བའི་དུས་ལ་བབ་པ་ཡང་ཡུན་རིང་བར་འགྱུར་ཏེ། དེ་ལྟ་བས་ན་དེ་ལོ་བདུན་ཁྲིར་ཞེས་བྱ་བ་ལ་སོགས་པའི་ཚིག་ལ་སྐྱོན་མེད་དོ། །གཟུངས་ཐོབ་པ་པོའི་རིགས་བསྟན་པ་ནི་རྣམ་པ་
ལྔར་མཛད་དོ། །མིང་དང་། རྒྱལ་པོ་དང་། གླིང་བཞིའི་བདག་པོ་དང་། དབང་ཕྱུག་དང་། མིའི་བདག་པོའོ། །སྣང་བ་འཛིན་ཞེས་བྱ་བ་ནི་གཞན་ཡང་ཡོད་པའི་ཕྱིར་རྒྱལ་པོ་སྨོས་སོ། །རྒྱལ་པོ་ནི་རྒྱལ་ཕྲན་ལ་ཡང་བྱ་བའི་ཕྱིར། འཁོར་ལོས་སྒྱུར་བ་སྨོས་སོ། །འཁོར་ལོས་སྒྱུར་བ་ཞེས་བྱ་བ་ནི་དེ་བཞིན་
གཤེགས་པ་ལ་ཡང་ཡོད་པའི་ཕྱིར་རྒྱལ་པོ་སྨོས་སོ། །འཁོར་ལོས་སྒྱུར་བ་སྨོས་པས་ཀྱང་རིན་པོ་ཆེ་སྣ་བདུན་དང་ལྡན་པར་མངོན་མོད་ཀྱི། རིན་པོ་ཆེ་སྣ་བདུན་དང་ལྡན་པ་སྨོས་པ་ནི་བྱེ་བྲག་ཏུ་དབྱེ་བའི་དོན་ཏེ། དེས་ནི་གླིང་བཞིའི་བདག་པོ་བསྡུའོ། །རིག་སྔགས་འཆང་གི་འཁོར་ལོས་སྒྱུར་བ་ཡང་ཡོད་པས་
ན། མིའི་དབང་པོ་སྨོས་སོ། །ཐོབ་པ་པོ་བསྟན་པ་ནི་རྣམ་པ་ལྔས་མཛད་དེ་མིང་དང་འབྲེལ་པ་དང་། ན་ཚོད་དང་། ཆོས་ཀྱི་རྣམ་གྲངས་ཐོབ་པ་དང་། སྟོན་པ་པོ་དང་འབྲེལ་པའོ། །ཐོས་ནས་ཐོབ་པར་བྱ་བའི་ཕྱིར་མངོན་པར་བརྩོན་པ་བསྟན་པ་ནི་རྣམ་པ་གཉིས་ཏེ། སྤྱི་དང་བྱེ་བྲག་གོ། །བྱེ་བྲག་ཀྱང་རྣམ་པ་

73-1-51b

བརྒྱད་དེ། དུས་དང་རྨུགས་པ་དང་གཉིད་མེད་པ་དང་། དགའ་བ་མེད་པ་དང་། བརྩོན་འགྲུས་དང་། སེམས་རྩེ་གཅིག་པ་དང་། དེའི་འབྲས་བུ་དང་། དེ་ཉམས་སུ་ལེན་པ་དང་། རབ་ཏུ་འབྱུང་བའོ། །དེ་ལ་དུས་ནི་ལོ་བདུན་ཁྲི་སྟེ། འདི་ནི་རབ་ཏུ་མ་བྱུང་བའི་སྔ་རོལ་གྱི་ཡིན་པར་ཤེས་པར་བྱའོ། །དེ་
ཕྱིན་ཆད་ལོ་དགུ་ཁྲི་ནི་གཟུངས་སྒྲུབ་པའི་དུས་ཡིན་ནོ། །དེའི་རྒྱུ་ནི་སྤངས་པའི་ཕྱིར། །དེས་ནི་རྨུགས་གཉིད་དེ་མ་བསྟེན། །རྨུགས་པ་ནི་ལུས་དང་སེམས་ལས་སུ་མི་རུང་བ་ཉིད་དོ། །གཉིད་ནི་སེམས་མངོན་པར་སྡུད་པའོ། །དེ་གཉིས་ཀྱི་རྒྱུ་ནི་ཧ་ཅང་མང་དུ་ཟ་བ་དང་། ཧ་ཅང་ཉུང་ངུ་ཟ་བ་སྟེ། དེ་སྤངས་
པས་རྒྱལ་པོའི་བུ་དེས་རྨུགས་དང་གཉིད་མ་བསྟེན་ཏོ། །དེ་གཉིས་ནི་སེམས་རྩེ་གཅིག་ཏུ་བྱ་བ་ལ་བགེགས་བྱེད་པ་ཡིན་ཏེ། དེའི་ཕྱིར་འབྲས་བུ་ཐ་མི་དད་པས་མཚན་གཅིག་ཏུ་བསྡུའོ། །དངོས་པོའི་ངོ་བོ་ཉིད་ཤེས་པས། །དགའ་བ་རྣམ་གསུམ་སྤང་བར་བྱ། །འདུ་བྱེད་འདི་དག་མི་རྟག་པ་སྤོང་
བར་རྟོགས་པས་དགའ་བ་རྣམ་པ་གསུམ་མི་བྱེད་དེ། འདི་ལྟར་ཕྱི་རོལ་དང་། ནང་གི་ཡུལ་གྱི་བྱེ་བྲག་གིས་དགའ་བ་རྣམ་པ་གཉིས་ཡོད་ལ། ཕྱི་རོལ་གྱི་ཡུལ་ཡང་གཙོ་བོ་དང་། དེའི་ཡན་ལག་དང་རྣམ་པ་གཉིས་ཡོད་དོ། །དེས་ན་རྣམ་པ་གསུམ་དུ་འགྱུར་ཏེ། གཙོ་བོ་ནི་རྒྱལ་སྲིད་དོ། །དེའི་ཡན་ལག་
ནི་ནོར་ཡིན་ཏེ། དེ་ཡང་རིན་པོ་ཆེ་སྣ་བདུན་ལ་སོགས་པའོ། །བདག་གི་ལུས་དང་། དེའི་ཡན་ལག་ལ་སོགས་པ་ལ་དགའ་བ་ནི་བདག་ལ་དགའ་བའོ། །རྨུགས་པ་དང་གཉིད་ལ་སོགས་པ་དང་། དེ་གསུམ་ཡོངས་སུ་སྤངས་ནས་བརྩོན་འགྲུས་བརྩམས་པའི་ཕྱིར། དེ་ལོ་བདུན་ཁྲིར་ལན་འགའ་
ཡང་ས་ལ་གློས་མ་ཕབ་སྟེ་ཞེས་གསུངས་སོ། །དེ་ནས་ཏིང་ངེ་འཛིན་བསྒོམ་པའི་ཕྱིར། གཅིག་ཏུ་ངེས་པར་ནང་དུ་ཡང་དག་འཇོག་ལ་གནས་སོ་ཞེས་གསུངས་ཏེ། གནས་སོ་ཞེས་བྱ་བའི་ཐ་ཚིག་གོ། །གཅིག་ཏུ་ངེས་པའི་སྐྱེ་བོ་མེད་པའི་ཕྱོགས་སམ། གཅིག་ཏུ་ངེས་པར་ནང་དུ་ཡང་དག་འཇོག་པས་
རང་བཞིན་གྱིས་སེམས་རྩེ་གཅིག་ཏུ་བྱེད་པ་ལ་ནི། གཅིག་ཏུ་ངེས་པར་ནང་དུ་ཡང་དག་འཇོག་ལ་བྱའོ། །ཏིང་ངེ་འཛིན་དེའི་འོག་ཏུ་ཏིང་ངེ་འཛིན་གྱི་འབྲས་བུ་འཐོབ་པ་ཡིན་ཏེ། ལོ་དགུ་ཁྲི་ཞེས་གསུངས་སོ། །འཇིག་རྟེན་ཁམས་གཞན་སངས་རྒྱས་རྣམས། །བཞུགས་པ་བྱང་ཆུབ་སེམས་

73-1-52a

དཔའ་ཡོན་ཏན་རིན་པོ་ཆེ་བསམ་གྱིས་མི་ཁྱབ་པའི་དཔལ་སྣང་བ་ཐོབ་པ་དེས་མཐོང་སྟེ། འཇིག་རྟེན་གྱི་ཁམས་གཅིག་ཏུ་མ་ཡིན་ཏེ། དེ་བཞིན་གཤེགས་པ་གཉིས་ནི་འཇིག་རྟེན་གྱི་ཁམས་གཅིག་ཏུ་ཅིག་ཅར་འབྱུང་བ་འགལ་བའི་ཕྱིར་རོ། །དེ་ལྟ་བས་ན་སངས་རྒྱས་བྱེ་བ་
ཕྲག་དགུ་བཅུ་ལས། ཆོས་བསྟན་པ་ནི་ཐོས་སོ་ཞེས། །བྱས་པའི་ཚིག་ལ་ཉེས་པ་མེད། །ཡང་ན་བློ་བཟང་འཇིག་རྟེན་ཁམས། །འདི་གཞན་སངས་རྒྱས་བཞུགས་པ་མཐོང་། །བསྟན་པ་འབྱུང་ལ་བརྟེན་ནས་ནི། ཅིག་ཅར་སྐྱེ་བ་དགག་པ་ཡིན། །ཡང་ན་
བྱང་ཆུབ་སེམས་དཔའ་བློ་བཟང་པོ་དེས་སངས་རྒྱས་འཇིག་རྟེན་གྱི་ཁམས་འདི་ན་བཞུགས་པ་རྣམས་དང་། འཇིག་རྟེན་གྱི་ཁམས་གཞན་ན་བཞུགས་པ་རྣམས་མཐོང་སྟེ། དེའི་ཕྱིར་སངས་རྒྱས་བྱེ་བ་ཕྲག་དགུ་བཅུ་ཞེས་བྱ་བ་ལ་སོགས་པ་འདི་སྤྱིར་གསུངས་སོ། །སྔ་ཕྱི་མེད་པར་དེ་བཞིན་
གཤེགས་པ་གཉིས་འཇིག་རྟེན་དུ་མི་འབྱུང་ཞེས་བྱ་བ་འདི་ནི། དེའི་བསྟན་པ་འབྱུང་བ་ལ་དགོངས་ནས་ཅིག་ཅར་སྐྱེ་བ་དགག་པ་ཡིན་ནོ། །དེ་ཕྱིར་དེ་བཞིན་གཤེགས་པ་གཉིས་ཀྱི་བསྟན་པ་འཇིག་རྟེན་དུ་ཅིག་ཅར་མི་འབྱུང་སྟེ་དོན་དུ་དེ་ལ་བྱའོ། །དེ་གཉིས་ཀྱི་སྐྱེ་བ་དེ་ནི་འདི་ལྟར་བསྟན་པ་འབྱུང་
བ་ལ་བྱ་སྟེ། སངས་རྒྱས་བཅོམ་ལྡན་འདས་རྣམས་ནི་གཞན་གྱི་དོན་དང་། གཞན་གྱི་དབང་གིས་སྐྱེ་བར་ཟད་པའི་ཕྱིར་རོ། །ཡང་ན་སྔ་ཕྱི་མེད་པར་མི་འབྱུང་ཞེས་སྨོས་པས་དེ་དག་རིམ་གྱིས་བྱུང་བ་ཁོ་ནར་བཀའ་སྩལ་པ་ཡིན་ནོ། །འབྱུང་བ་དེ་དག་ཀྱང་ཡོངས་སུ་མྱ་ངན་ལས་མི་འདའ་སྟེ། ལོངས་སྤྱོད་
རྫོགས་པའི་སྐུའི་ཚུལ་གྱིས་བཞུགས་པ་དེས་ན། བསོད་ནམས་དང་ལྡན་པ་མ་ཡིན་པ་རྣམས་ཀྱིས་མི་མཐོང་ལ། བསོད་ནམས་ཅན་རྣམས་ཀྱིས་ནི་བསོད་ནམས་ཇི་ལྟ་བ་བཞིན་དུ་ཉུང་ངུའམ། མང་པོ་ཡང་དག་པར་དམིགས་པ་ཙམ་དུ་ཟད་པའི་ཕྱིར་ཉེས་པ་མེད་དོ། །ཐོས་པ་ནི་བསྟན་པ་ཐོས་པར་ཟད་ན། 
བསྟན་པ་ཞེས་སྨོས་ཅི་དགོས་ཞེས་དེ་སྐད་ཟེར་ན་ནི། དོན་འདི་ཡིན་ཏེ། རྫོགས་པའི་སངས་རྒྱས་ཐམས་ཅད་ཀྱིས། །བསྟན་ཏེ་དགུ་བཅུ་དག་ལས་ཐོས། །ཆོས་ཞེས་བྱ་བ་ལྷག་མའོ། །དེ་དེ་ལྟ་ན་དོན་ནི་འདི་ཡིན་ཏེ། སངས་རྒྱས་ཐམས་ཅད་ཀྱིས་ཆོས་བསྟན་པ་སངས་རྒྱས་བྱེ་བ་ཕྲག་དགུ་བཅུ་ལས་ཐོས་

73-1-52b

སོ་ཞེས་བྱ་བའི་ཐ་ཚིག་སྟེ། དེས་ན་ཆོས་ཀྱི་དེ་ཁོ་ན། །བསྟན་པ་ཐབས་དང་བཅས་པ་བརྗོད། །རྒྱུ་དེས་བརྗོད་པ་ཡིན་ཏེ། ཆོས་ཀྱི་དེ་ཁོ་ན་ནི་སྟོང་པ་ཉིད་དོ། །ཐབས་ནི་སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་ཞེས་བྱ་སྟེ། ཆོས་ཀྱི་དེ་ཁོ་ན་ཐབས་དང་བཅས་པ་འདི་ནི་སངས་རྒྱས་ཐམས་ཅད་ཀྱིས་
བསྟན་པ་དང་། སྟོན་པ་དང་། སྟོན་པར་འགྱུར་རོ། །སྐྱེས་པའི་རབས་ལ་སོགས་པ་གང་ཡིན་པ་དེ་དག་ལ་ནི། སངས་རྒྱས་ཐམས་ཅད་ཀྱིས་བསྟན་པ་ཚངས་པར་ངེས་པ་མེད་དེ། འདི་ལས་ཆོས་ནི་ནན་ཏན་དུ། །ལེགས་བསྒྲུབ་ཉམས་སུ་ལེན་པར་བསྟན། །གསུང་རབ་འདི་ལ་ལས་སུ་བྱས་པས་
སྟོང་པ་ཉིད་ཀྱི་ཆོས་ཡང་དག་པར་སྒྲུབ་ཅིང་རྟོགས་པར་བྱ་བ་དང་། སྦྱིན་པ་ལ་སོགས་པ་བསྒྲུབ་པ་འདི་ནི་ཉམས་སུ་བླང་བའོ། །ཡང་ན་འཛིན་པ་ལ་སོགས་པ། །ཡོན་ཏན་སྐྱེད་པར་འགྱུར་བ་ཡིན། །ཉམས་སུ་བླང་བ་ཞེས་བྱ་བ་ལ་སྙེགས་ཏེ། ཡང་ན་འཛིན་པ་དང་། སེམས་པ་དང་། བསྒོམ་
པ་དང་། གཞན་ལ་སྟོན་པ་ལ་སོགས་པ་ཡོན་ཏན་བསྐྱེད་པ་དེ་ཕྱིན་ཅི་མ་ལོག་པའི་ཕྱིར་ཉམས་སུ་བླང་བའོ། །ཡང་ན་རྗེས་སུ་ཡི་རང་བ་ཡང་ཉམས་སུ་བླང་བ་ཡིན་ནོ། །སངས་རྒྱས་གཞན་དག་མ་ཡིན་ཞེས། །དེ་ཡི་མཚན་ནི་སྨོས་པ་མཛད། །སངས་རྒྱས་བྱེ་བ་ཕྲག་དགུ་བཅུ་པོ་གང་ཡང་རུང་བ་
ལས་རང་བྱུང་བར་འཛིན་པ་བསལ་བའི་ཕྱིར། རིན་ཆེན་དཔལ་གྱི་གཟི་བརྗིད་རྒྱལ་པོ་ལྟ་བུའི་མཚན་སྨོས་སོ། །མཚན་སྨོས་པ། དེས་ན་ཐུབ་པ་བཞུགས་པ་ནི། །འཇིག་རྟེན་ཕན་ཕྱིར་ཉིད་དུ་བསྟན། །འདི་ལྟར་ཡོངས་སུ་མྱ་ངན་ལས་འདའ་བའི་དུས་དཔགས་པ་ལས་ཀྱང་། བཅོམ་ལྡན་
འདས་དེ་དེ་སྲིད་ཀྱི་བར་དུ་བཞུགས་པ་ནི་རྒྱལ་པོའི་བུ་དེ་དེས་གདུལ་བ་ཡིན་པའི་ཕྱིར་ཏེ། དེའི་ཕྱིར་འདི་དག་གིས་ནི་སངས་རྒྱས་བཅོམ་ལྡན་འདས་རྣམས་ནི་འཇིག་རྟེན་ལ་ཕན་པ་ཁོ་ནའི་ཕྱིར་དུས་མཐའ་ཡས་པར་ཡང་བཞུགས་པར་མཛད་དོ་ཞེས་བསྟན་ཏོ། །སྡོམ་བརྩོན་ཚུལ་ཁྲིམས་ལྡན་པ་
དང་། །བརྩོན་དང་གཞན་དོན་གཞོལ་བ་ཡིས། །གཟུངས་ནི་ཐོབ་པར་ཐུབ་པ་དེས། །རབ་བྱུང་ལ་སོགས་ཚིག་གིས་བསྟན། །ཡོན་ཏན་ཐམས་ཅད་ཀྱི་གཞི་ནི་ཚུལ་ཁྲིམས་ཡིན་པའི་ཕྱིར། ཚུལ་ཁྲིམས་དང་ལྡན་པས་གཟུངས་འདི་འཐོབ་པར་འགྱུར་གྱི་གཞན་གྱིས་མ་ཡིན་པར་བཅོམ་ལྡན་

73-1-53a

འདས་ཀྱིས་རབ་ཏུ་བྱུང་བའི་ཚིག་གིས་བསྟན་ཏེ། འདི་རྣམས་ཀྱིས་ནི། ཐོས་ནས་ཐོབ་པར་བྱ་བའི་ཕྱིར་མངོན་པར་བརྩོན་པར་བྱ་བ་བསྟན་པ་བསྙད་དོ། །བརྩོན་འགྲུས་བརྩམས་པས་གཟུངས་འདི་ཐོབ་པར་འགྱུར་གྱི། གཞན་གྱིས་མ་ཡིན་པར་ནི་ལོ་དགུ་ཁྲི་ཞེས་བྱ་བ་ལ་སོགས་
པས་བསྟན་ཏེ། འདིས་ནི་འཐོབ་པ་བསྟན་པ་བསྙད་དོ། །གཞན་གྱི་དོན་སྒྲུབ་པའི་བསམ་པ་ཅན་གྱིས། གཟུངས་འདི་འཐོབ་པར་འགྱུར་གྱི། གཞན་གྱིས་མ་ཡིན་པར་ནི་བསྒྲུབས་ནས་ཀྱང་ཞེས་བྱ་བ་ལ་སོགས་པས་བསྟན་ཏེ། འདིས་ནི་ཐོབ་པའི་འབྲས་བུ་བསྟན་པ་བསྙད་དེ་དེ་ཁོ་ན་ཡིན་ནོ་
ཞེས་གཟུང་བར་བྱའོ། །དེ་ལྟ་མ་ཡིན་ན་ནི་རབ་ཏུ་བྱུང་བ་ལ་སོགས་པ་བསྟན་པ་ཡང་དོན་མེད་པར་འགྱུར་རོ། །དེ་ལ་ཐོབ་པའི་འབྲས་བུ་བསྟན་པ་ནི་རྣམ་པ་གཉིས་ཀྱིས་བཤད་དེ། ཡང་དག་པར་རབ་ཏུ་བསྟན་པ་དང་། ཡང་དག་པར་རབ་ཏུ་བསྟན་པའི་འབྲས་བུའོ། །ཡང་དག་པར་རབ་ཏུ་བསྟན་
པ་ཡང་། ཡང་དག་པར་སྦྱིན་པ་དང་། རྒྱས་པ་དང་། རང་གི་ངོ་བོ་དང་རྣམ་པ་གསུམ་སྟེ། ཡང་དག་པར་སྦྱིན་པ་ནི་སེམས་ཅན་ཐམས་ཅད་ལའོ། །དེ་དག་ཀྱང་གཟུངས་ཡང་དག་པར་རབ་ཏུ་བསྟན་པས་འདུལ་བ་ཁོ་ན་ཡིན་པར་གཟུང་བར་བྱ་སྟེ། ཐམས་ཅད་ཀྱི་སྒྲ་ནི་བརྗོད་པར་འདོད་པས་མ་
ལུས་པ་ལ་བྱ་བའི་ཕྱིར་རོ། །སེམས་ཅན་ཐམས་ཅད་ཁོ་ན་ལ་བྱ་བ་མ་ཡིན་ཏེ། དེ་དག་ལ་ནི་ཐམས་ཅད་མཁྱེན་པ་མ་ཡིན་པས་ཡང་དག་པར་རབ་ཏུ་བསྟན་པར་བྱ་མི་ནུས་པའི་ཕྱིར་རོ། །ཐམས་ཅད་མཁྱེན་པས་དེ་བསྟན་དུ་ཡང་སེམས་ཅན་ཐམས་ཅད་ཡུལ་དུ་འགྱུར་མི་སྲིད་དེ། དགོས་པ་
མེད་པའི་ཕྱིར་མི་རུང་ངོ་། །རྒྱས་པ་ཞེས་བྱ་བ་ནི་གཟུངས་ལ་སྦྱོར་བ་དང་། འཐོབ་པ་དང་། འབྲས་བུ་དང་། ཡོན་ཏན་ཆུང་ངུ་དང་། འབྲིང་དང་། ཆེན་པོའི་བྱེ་བྲག་ལ་སོགས་པའི་རང་གི་ངོ་བོ་ཚད་མ་དང་ལྡན་པའི་ཕྱིར། ཡང་དག་པར་ཕྱིན་ཅི་མ་ལོག་པ་དང་། ཕོ་བྲང་འཁོར་གྱི་སྐད་ལ་སོགས་
པའི་ཡོན་ཏན་ཡན་ལག་བཅུ་དང་ལྡན་པའི་ཚིག་གིས་རབ་ཏུ་དང་། ཕ་རོལ་རྣམས་ཟིལ་གྱིས་མནན་ནས་བསྟན་པའོ། །ཡང་དག་པར་རབ་ཏུ་བསྟན་པའི་འབྲས་བུ་ནི། ཕྱིར་མི་ལྡོག་པའི་ས་ལ་འགོད་པ་སྟེ། འདི་ནི་ཤིན་ཏུ་ཁྱད་ཞུགས་པའི་འབྲས་བུར་བསྟན་ཏོ། །ལྷ་དང་། མིར་སྐྱེ་བ་དང་ས་འཐོབ་པ་

73-1-53b

ལ་སོགས་པའི་འབྲས་བུ་གཞན་ནི་མ་སྨོས་ཀྱང་འགྲུབ་པའི་ཕྱིར་མ་བསྟན་ཏོ། །ཉན་ཐོས་ལ་སོགས་པའི་བྱང་ཆུབ་ལས་ཕྱིར་མི་ལྡོག་པའི་ས་ཡང་ཡོད་པའི་ཕྱིར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྨོས་སོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་ཕྱིར་མི་ལྡོག་
པའི་ས་ཡོད་པའི་ཕྱིར་ཕྱིར་མི་ལྡོག་པ་སྨོས་ཏེ། འདིས་ནི་གཟུངས་འཐོབ་པ་རྒྱུན་གྱིས་འབྲེལ་པའི་དོན་དུ་བསྟན་ཏོ། །དེའི་ཕྱིར་དེའི་འོག་ཏུ་ཤཱ་རིའི་བུ་འཁོར་དེ་ན་ཞེས་བྱ་བ་ལ་སོགས་པ་གསུངས་ཏེ། གཟུངས་ཐོབ་པ་རྒྱུན་གྱིས་འབྲེལ་པས་ནི་ཇི་ལྟ་བུར་བརྩོན་པར་བྱེད་ཀྱང་རུང་བ་གང་དང་
གང་ཡིན་པ་དེ་དང་དེས་ནི། གཟུངས་འདི་ངེས་པ་ཁོ་ནས་འཐོབ་པར་འགྱུར་ཏེ། ལ་ལས་མ་ཐོབ་པ་གང་ཡིན་པ་དེ་ནི་བདག་ཉིད་ཀྱི་ཉེས་པ་ལ་སོགས་པ་ལས་གྱུར་པར་བསྟན་ཏོ། །རྗེས་སུ་ཡི་རང་བར་བྱེད་པ་བསྟན་པ་ནི། འཁོར་དང་། འབྲེལ་པ་དང་། རིགས་དང་། མིང་དང་། དགེ་བའི་
བཤེས་གཉེན་དང་། འབྲེལ་པ་དང་། རྗེས་སུ་ཡི་རང་བའོ། །རྗེས་སུ་ཡི་རང་བའི་འབྲས་བུ་བསྟན་པ་དགུ་སྟེ། ཡང་དག་པའི་དགེ་བའི་བཤེས་གཉེན་རྙེད་པ་དང་། དེ་ལས་ཆོས་ཐོས་པ་དང་། དེ་ཉམས་སུ་བླངས་པ་དང་། གཟུངས་ཐོབ་པ་རྣམས་ཀྱི་མཆོག་དང་། གཟུང་བའི་ཚིག་དང་
ལྡན་པ་རྣམས་ཀྱི་མཆོག་དང་། སྤོབས་པ་རྒྱུན་མི་འཆད་པ་རྣམས་ཀྱི་མཆོག་དང་། དེ་དག་མཉེས་པར་བྱ་བའི་དུས་དང་། མཉེས་པར་བྱ་བ་དང་། བླ་ན་མེད་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །དེ་ལ། མོད་ལ་ཞེས་བྱ་དེ་མ་ཐག །ཡང་ན་ཅིག་ཅར་འབྱུང་བ་ཡིན། །རྗེས་
སུ་ཡི་རང་བའི་མོད་ལ་ཞེས་བྱ་བ་ནི་འདི་ལ་མོད་ལ་ཞེས་བྱ་བའི་སྒྲ་སྨོས་པ་དེ་ནི་འདིར་དེ་མ་ཐག་ཏུ་བྱུང་བ་ལ་བྱ་སྟེ། དཔེར་ན་བྱམས་པའི་མོད་ལས་སྐྱེས་པ་དྲན་པ་ཡང་དག་བྱང་ཆུབ་ཀྱི་ཡན་ལག་སྒོམ་པར་བྱེད་དོ་ཞེས་བྱ་བ་དེ་བཞིན་དུ། འདིར་ཡང་རྗེས་སུ་ཡི་རང་མ་ཐག་པའོ། །སྐྱེས་པ་ནི་
ཐོབ་ཅེས་བྱ་བའི་ཐ་ཚིག་གོ། །ཡང་ཅིག་ཅར་འབྱུང་བ་ལ་བྱ་སྟེ། འཁོར་ལོ་དང་བཅས་པར་ཟུང་ཤིག་ཅེས་བྱ་བ་ལ་སོགས་པ་དེ་བཞིན་དུ། རྗེས་སུ་ཡི་རང་བའི་མོད་ལས་སྐྱེས་པ་ནི་ཐོབ་སྟེ། བྱུང་ཞེས་བྱ་བའི་ཐ་ཚིག་གོ། །དགུ་བཅུ་ཞེས་བྱ་ལ་སོགས་ཚིག །དེས་ནི་དུས་གཞན་དགོངས་

73-1-54a

པ་ཡིན། །དགུ་བཅུ་ཞེས་བྱ་བའི་ཚིག་གང་ཡིན་པ་དེས་ནི་དུས་གཞན་ལ་དགོངས་ཏེ་གསུངས་པ་ཡིན་ནོ། །རྗེས་སུ་ཡི་རང་བའི་མོད་ཁོ་ན་ལས་སྐྱེས་པའི་དགེ་བའི་རྩ་བ་ལས་དེ་མ་ཐག་ཏུ་དེ་ལྟ་བའི་འབྲས་བུ་ཐོབ་པ་ནི་མ་ཡིན་ཏེ་ཐལ་ཆེས་བའི་ཕྱིར་རོ། །ཕུལ་ཕྱིན་ཡོན་ཏན་ལྡན་པ་ཡི། །
ཕུལ་དུ་ཕྱིན་པ་ཆེན་པོའི་ཡང་ཆེན་པོའི་མཚན་ཉིད་ཀྱིས་དང་། གཟུངས་ཐོབ་པ་དང་འབྲེལ་པའི་ཡོན་ཏན་གྱིས་སོ། །ཡང་ན་ཕུལ་དུ་ཕྱིན་པ་མ་ལུས་པའི་མཚན་ཉིད་དང་ལྡན་པའི་སྒོ་མཐའ་ཡས་སྒྲུབ་པའི་གཟུངས་ནི་ཐོབ་པར་གྱུར་པའི་ཕྱིར། དེའི་རྒྱུས། བདེ་བར་གཤེགས་པའི་སྲས་པོ་དེ། །
སངས་རྒྱས་བྱེ་བ་ཕྲག་དགུ་བཅུ་པོ་དེ་དག་གི་འཁོར་དུ་གང་དག་གཟུངས་ཐོབ་པར་གྱུར་པ། གཟུངས་ཐོབ་རྣམས་ཀྱི་མཆོག་ཡིན་ནོ། །བྱང་ཆུབ་སེམས་དཔའ་དེ་དག་གི་མཆོག་ཡིན་ནོ། །ཡེ་ཤེས་ཁྱད་འཕགས་འབྲེལ་བ་དང་། །ཡོན་ཏན་ཕུལ་ཕྱིན་ལྡན་པའི་ཕྱིར། །དེའི་རྒྱུས་དེ་དག་གི་
འཁོར་དུ་བྱང་ཆུབ་སེམས་དཔའ། དེ་ནི་ཚིག་གཟུངས་ལྡན་རྣམས་ཀྱི། །བྱང་ཆུབ་སེམས་དཔའ་རྣམས་ཀྱི་ནང་ན། མཆོག་ཏུ་རྒྱལ་བ་རྣམས་ཀྱིས་བསྟན། །ཡེ་ཤེས་ཁྱད་པར་དུ་འཕགས་པ་ནི། ས་དང་། གཟུངས་དང་། ཡེ་ཤེས་ལ་སོགས་པ་ཕུལ་དུ་ཕྱིན་པ་དང་ལྡན་པའོ། །ཡོན་ཏན་ནི་
མངོན་པར་ཤེས་པ་ལ་སོགས་པ་སྟེ། གང་གིས་སེམས་ཅན་རྣམས་ཀྱི་རང་བཞིན་དང་། བསམ་པ་དང་། བག་ལ་ཉལ་ལ་སོགས་པ་རྟོགས་ན། རྫུ་འཕྲུལ་ལ་སོགས་པས་འདུན་པར་བྱེད་པའོ། །སྤོབས་པ་རྒྱུན་མི་ཆད་པ་རྣམས། །གང་ལ་བྱ་ཞེ་ན། གང་དག་སོ་སོ་ཡང་དག་རིག་ཐོབ་རྣམས། །
དེ་དག་ནི་བཞི་སྟེ།  ཆོས་དང་། དོན་དང་། ངེས་པའི་ཚིག་དང་། སྤོབས་པ་སོ་སོ་ཡང་དག་པར་རིག་པའོ། །སོ་སོ་ཡང་དག་པར་རིག་པ། །དེ་དག་ཕུལ་ཕྱིན་ལྡན་པའི་ཕྱིར། །དེའི་རྒྱུས་སངས་རྒྱས་དེ་དག་གི་འཁོར་ན་བྱང་ཆུབ་སེམས་དཔའ་སྤོབས་པ་རྒྱུན་མི་ཆད་པ། དེ་ནང་རྒྱལ་སྲས་
དེ་མཆོག་གོ། །བྱང་ཆུབ་སེམས་དཔའ་སྨོས་པ་ནི། །སངས་རྒྱས་བཅོམ་ལྡན་འདས་ལ་མི་བྱ་བར་དགར་བའི་ཕྱིར་རོ། །དེ་དག་གིས་གསུངས་ཚུལ་ཁྲིམས་ནི། །བསྒྲུབ་པ་མཉེས་བྱེད་ཡིན་པར་འདོད། །སངས་རྒྱས་དེ་དག་གིས་གསུངས་པའི་ཚུལ་ཁྲིམས། སྡོམ་པ་དང་། སེམས་

73-1-54b

ཅན་གྱི་དོན་བྱ་བ་དང་། དགེ་བའི་ཆོས་སྡུད་པའི་མཚན་ཉིད། མ་ཞིག་མ་རལ་བ་ལ་སོགས་པའི་ཡོན་ཏན་དང་ལྡན་པ་སྒྲུབ་པ་གང་ཡིན་པ་དེ་ནི་མཉེས་པར་བྱེད་པ་ཡིན་པར་འདོད་དོ། །བསྐལ་པ་གསུམ་དུ་ཚོགས་རྣམས་ནི། །ཡོངས་སུ་རྫོགས་བྱས་བྱང་ཆུབ་ཐོབ། །ཚོགས་ཡོངས་སུ་
རྫོགས་པ་ནི་མཉེས་པར་བྱས་ནས་ཞེས་བྱ་བ་འདིས་བསྟན་ཏེ། གལ་ཏེ་ཚོགས་རྣམས་ཡོངས་སུ་རྫོགས་པར་བྱེད་ན་དེ་ལྟར་དེ་དག་ཤིན་ཏུ་མཉེས་པར་བྱས་པ་ཡིན་ནོ། །ཇི་ལྟར་བསྐལ་པ་གསུམ་གྱིས་ཚོགས་ཡོངས་སུ་རྫོགས་ཤེ་ན། ཉེས་པ་མེད་དེ། གང་གི་ཕྱིར་དེས་སྔོན་བསྐལ་པ་གྲངས་
མེད་དུ་མར་ཚོགས་བསྒྲུབས་ཏེ། སངས་རྒྱས་བྱེ་བ་ཕྲག་དགུ་བཅུ་པོ་རྣམས་ནི་བསྐལ་པ་གསུམ་དུ་མཉེས་པར་བྱས་པས་ཚོགས་ཡོངས་སུ་རྫོགས་ནས་བྱང་ཆུབ་ཐོབ་པར་གྱུར་པའི་ཕྱིར་རོ། །མངོན་པར་རྫོགས་པར་སངས་རྒྱས་པར་ཡང་མ་ཟད་ཀྱི། དེ་བཞིན་གཤེགས་པ་མར་མེ་མཛད་དུ་
གྱུར་ཏོ་ཞེས་ངེས་པར་བྱ་བའི་ཕྱིར་ཡང་། ཚོང་དཔོན་གྱི་བུ་ཞེས་བྱ་བ་ལ་སོགས་པ་གསུངས་སོ། །རྒྱལ་པོའི་བུ་ཡོན་ཏན་རིན་པོ་ཆེ་བསམ་གྱིས་མི་ཁྱབ་པའི་དཔལ་ཡང་དེ་བཞིན་གཤེགས་པ་ཚེ་དཔག་མེད་དུ་གྱུར་ཏོ་ཞེས་ཞར་ལ་བསྟན་ཏེ། དེའི་ཕྱིར་དེ་ནི་ཕྱིས་གསུངས་སོ། །དངོས་པོ་སྟོང་
པས་འདོད་མི་བྱ། །ཚད་མ་དང་ཡང་འགལ་བའི་ཕྱིར། །མི་མཐུན་བློ་ནི་མི་བསྐྱེད་ཅིང་། །ཅིས་ཀྱང་ཐེ་ཚོམ་མི་བྱའོ། །ཚོང་དཔོན་གྱི་བུ་ཟླ་བའི་ཏོག་ཅེས་བྱ་བ་ནི་མར་མེ་མཛད་ལས་ཐ་དད་དོ་སྙམ་དུ་སོམ་ཉི་འདོད་པའི་མཚན་ཉིད་ལྟ་བུ་ཡང་མི་བྱའོ། །དེ་ནི་དངོས་པོ་སྟོང་པའི་ཕྱིར་ཏེ། འདི་ལྟར་མར་
མེ་མཛད་ཉིད་ཚོང་དཔོན་གྱི་བུ་ཟླ་བའི་ཏོག་ཡིན་པའི་ཕྱིར་རོ། །ཁྱོད་ཀྱིས་མི་འདོད་པའི་ཕྱིར། ཟླ་བའི་ཏོག་མར་མེ་མཛད་མ་ཡིན་པར་མི་འགྱུར་ཏེ་ཐལ་ཆེས་པའི་ཕྱིར་རོ། །ཟླ་བའི་ཏོག་ནི་དངོས་པོ་ཁོ་ནར་མར་མེ་མཛད་མ་ཡིན་ནོ་སྙམ་དུ་མི་མཐུན་པའི་བློ་ཡིད་གཉིས་དེ་ལྟ་བུ་ཡང་ཚད་མ་དང་འགལ་བའི་
ཕྱིར་མི་བྱ་སྟེ། འདི་ལྟར་དེ་བཞིན་གཤེགས་པ་ཐམས་ཅད་ཀྱིས་ཀྱང་མར་མེ་མཛད་ཉིད་ཟླ་བའི་ཏོག་ཡིན་པར་མངོན་སུམ་དུ་གཟིགས་སོ། །ཅི་ཟླ་བའི་ཏོག་འདི་དེ་བཞིན་གཤེགས་པ་མར་མེ་མཛད་ཡིན་ནམ། འོན་ཏེ་མ་ཡིན་སྙམ་དུ་ཐེ་ཚོམ་དེ་ལྟ་བུ་ཡང་མི་བྱ་སྟེ། འདི་ལྟར་མར་མེ་མཛད་

73-1-55a

ཉིད་ཟླ་བའི་ཏོག་ཡིན་པར་སངས་རྒྱས་ཐམས་ཅད་དང་ངས་ཀྱང་མཁྱེན་ཏོ། །ཐོས་པ་ལ་སོགས་ཤེས་པའམ། །ཡང་ན་ཚད་མ་གསུམ་པོ་ཡིས། །ཡོངས་སུ་བཅད་པར་མི་རུང་ཕྱིར། །སོམ་ཉི་ལ་སོགས་ཚིག་གསུམ་སྨོས། །ཡང་ན་སོམ་ཉི་དང་ཐེ་ཚོམ་རྣམས་ནི་དོན་
གཅིག་ཡིན་དུ་ཟིན་ཀྱང་ཐོས་པའི་ཤེས་པའི་ཡོངས་སུ་བཅད་དུ་མི་རུང་བའི་ཕྱིར་ནི་སོམ་ཉིའོ། །བསམ་པ་ཡི་ནི་ཡིད་གཉིས་སོ། །བསྒོམ་པ་ཡི་ནི་ཐེ་ཚོམ་སྟེ། དེའི་ཕྱིར་མིང་གསུམ་དུ་གསུངས་སོ། །ཡང་ན་མངོན་སུམ་གྱིས་ཡོངས་སུ་བཅད་དུ་མི་རུང་བ་ནི་སོམ་ཉིའོ། །རྗེས་སུ་དཔག་པ་ཡི་ནི་
ཡིད་གཉིས་སོ། །ལུང་གི་ནི་ཐེ་ཚོམ་སྟེ། དེའི་ཕྱིར་ཚིག་གསུམ་སྨོས་སོ། །ཤཱ་རའི་བུ་ཁྱོད་ཀྱིས་ཞེས་བྱ་བ་ལ་སོགས་པ་བཅོམ་ལྡན་འདས་ཀྱིས་གསུངས་པ་འདི་ནི་ངེད་ཀྱིས་ཀྱང་ཟླ་བའི་ཏོག་ནི་མར་མེ་མཛད་ཁོ་ན་ཡིན་པར་མངོན་སུམ་དུ་ཡིད་ཆེས་ཀྱིས། ཁྱོད་ཀྱང་ངེད་ཀྱི་ཚིག་གིས་ཡིད་ཆེས་
པར་བྱོས་ལ་སོམ་ཉི་ལ་སོགས་པ་ལ་གནས་པར་མ་བྱེད་ཅིག་ཅེས་བྱ་བའི་ཐ་ཚིག་གོ། །ཤཱ་རིའི་བུ་ང་དང་བསྐལ་པ་བཟང་པོའི་ཞེས་བྱ་བ་ལ་སོགས་པ་འདི་ནི་སྤྱིར་གསུངས་པ་ཡིན་ཏེ། དེའི་ཕྱིར། སྤྱིར་བསྟན་པ་ནི་ཡིན་མོད་ཀྱི། །འོན་ཀྱང་བདག་གིས་འབྲས་བུ་བཤད། །བཅོམ་ལྡན་
འདས་ཀྱིས་བསྐལ་པ་འབུམ་ཕྲག་བཞི་ཁྲིར་ཞེས་བྱ་བ་ལ་སོགས་པས། ཉིད་ཀྱི་དེ་རྗེས་སུ་ཡི་རང་བའི་མོད་ལས་སྐྱེས་པའི་དགེ་བའི་རྩ་བ་བཤད་ཀྱི། བསྐལ་པ་བཟང་པོ་པ་རྣམས་ཀྱི་མ་ཡིན་ཏེ། དེའི་ཕྱིར་འདི་ནི་མཚོན་པ་ཁོ་ན་སྟེ། དེ་དག་གི་རྗེས་སུ་ཡི་རང་བའི་མོད་ལས་སྐྱེས་པའི་དགེ་བའི་རྩ་
བའི་འབྲས་བུ་ཡང་ཡོད་མོད་ཀྱི། མཚོན་པའི་ཕྱིར་བདག་ཉིད་ཀྱི་འབྲས་བུ་བསྟན་ཏོ། །ཅིའི་ཕྱིར་དེ་ལྟ་ཞེ་ན། དེ་ལྟ་བས་ན་ཞེས་བྱ་བ་ལ་སོགས་པའི་མདོའི་ཚིག་གིས་མངོན་པ་ཡིན་བསམ་པ་ལ་སོགས་པའི་སྟོབས་བསྐྱེད་པ་ལས། ཁ་ཅིག་ནི་བསྐལ་པ་མང་པོ་ཞིག་ཏུ་འཁོར་བ་ཕྱིར་བསྙིལ་བར་བྱེད་
ལ། ཁ་ཅིག་ཏུ་ནི་ཉུང་ངུ་ཞིག་ཏུ་བྱེད་པར་འགྱུར་བ་ཙམ་དུ་ཟད་དོ། །སངས་རྒྱས་བྱེ་བ་ཕྲག་དགུ་བཅུ་ཞེས་བྱ་བ་ལ་སོགས་པའི་འབྲས་བུ་དེ་ནི་ཐམས་ཅད་ཀྱི་ཡིན་པར་འདྲ་སྟེ། དེ་ལྟར་ན་སྔ་མའི་སྐབས་སུ་ཟླ་བའི་ཏོག་གི་འབྲས་བུ་བསྟན་པ་ཡང་མཚོན་པའི་ཕྱིར་ཏེ། གཟུངས་བསྟན་པས་གདུལ་བ་

73-1-55b

ཐམས་ཅད་ཀྱི་འབྲས་བུ་ནི་དེ་ཡིན་པར་ཤེས་པར་བྱའོ། །ད་ནི་བཞེད་པའི་དོན་བསྒྲུབས་ནས། དེ་ལྟ་བས་ན་ཞེས་བྱ་བ་ལ་སོགས་པས་མཇུག་སྡུད་པར་མཛད་དེ། དེ་མན་ཆད་ནི་ཆོས་ཀྱི་རྣམ་གྲངས་ཀྱི་ཆེ་བ་ཉིད་བསྟན་ཏོ། །མཇུག་བསྡུས་པ་དེ་ཡང་རྣམ་པ་གཉིས་ཏེ། བརྗོད་ཟིན་པའི་དོན་བསྙད་པ་དང་། མ་
བརྗོད་པའི་དོན་བསྙད་པའོ། །མ་བརྗོད་པའི་དོན་བསྙད་པ་ཡང་རྣམ་པ་གསུམ་སྟེ། གནོད་སྦྱིན་གྱི་ཕན་ཡོན་བསྙད་པ་དང་། བྱང་ཆུབ་སེམས་དཔའི་ཕན་ཡོན་བསྙད་པ་དང་། འཆད་པའི་ཚེའི་ཕན་ཡོན་བསྙད་པའོ། །བརྗོད་ཟིན་པ་བསྙད་པ་ཡང་རྣམ་པ་ལྔར་མཛད་དེ། ཆོས་ཀྱི་རྣམ་གྲངས་
ལ་རྗེས་སུ་ཡི་རང་བ་ཙམ་གྱིས་གཟུང་བ་བསྙད་པ་དང་། དེའི་འབྲས་བུ་བསྙད་པ་དང་། སྦྱོར་བས་གཟུང་བ་བསྙད་པ་དང་། དེའི་འབྲས་བུ་བསྙད་པ་དང་། ཚིགས་སུ་བཅད་པ་དག་གིས་གསུངས་པའི་དོན་བསྙད་པའོ། །རྗེས་སུ་ཡི་རང་བ་ཙམ་གྱིས་བཅོམ་ལྡན་འདས་ཤཱཀྱ་ཐུབ་པས་བསྐལ་
པ་བྱེ་བ་འབུམ་ཕྲག་བཞི་ཁྲིར་འཁོར་བ་ཕྱིར་བསྙིལ་ཏོ། །དེ་བཞིན་དུ་གཞན་ཡང་བསམ་པའི་སྟོབས་ཀྱིས་དེ་ལས་ལྷག་པར་ཡང་ཕྱིར་བསྙིལ་བར་བྱེད་དེ། དེ་ལྟ་བས་ན་མྱུར་དུ་ཞེས་བྱ་བ་གསུངས་སོ། །དེའི་གཏན་ཚིགས་བཀའ་སྩལ་པ། དེ་ནི་མི་ལྡོག་ས་ཡི་དང་། གང་གི་ཕྱིར་རྗེས་སུ་ཡི་རང་
བ་ཙམ་དང་ལྡན་པ་དེ་རྒྱུར་འགྱུར་བ་དེ་ནི་དེས་ཚེ་གཅིག་པོ་དེ་ཉིད་ལ་ཞེས་བྱ་བ་ལ་སོགས་པ་གསུངས་པ་ཡིན་ནོ། །རྫོགས་པའི་སངས་རྒྱས་མཉེས་བྱ་བའི། །རྒྱུར་འགྱུར་བས་ན་རྒྱུ་གང་གིས་འགྱུར་བ་དེ་ནི་དེས་བསྐལ་པ་གསུམ་དུ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེའི་ཕྱིར་རྒྱུ་གཉིས་ཀྱིས། 
དེ་ཡིས་བྱང་ཆུབ་མྱུར་དུ་འཐོབ། །དེ་ཐམས་ཅད་མྱུར་དུ་བྱང་ཆུབ་འཐོབ་པའི་རྒྱུ་ཁོ་ནར་གནས་པ་ཡིན་ནོ་ཞེས་བྱ་བའི་ཐ་ཚིག་གིས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་ཞེས་བྱ་བ་འདི་ནི་རྒྱུའི་དོན་ཏོ། །ཆོས་སྨྲ་བ་རྣམས་ནི་སངས་རྒྱས་བཅོམ་ལྡན་འདས་རྣམས་སོ། །སྦྱོར་བས་གཟུད་པ་བསྙད་
པ་ནི་ཡི་གེར་འདྲི་བ་ལ་སོགས་པ་རྣམ་པ་བདུན་གསུངས་པ་ཡིན་ནོ། །དོན་དང་ཡི་གེ་གཉི་ག་ལས། །འདིར་ནི་ཀུན་ཆུབ་བྱེད་པར་བསྟན། །དོན་དང་ཡི་གེ་གཉི་གའི་སྒོ་ནས་ཀུན་ཆུབ་པར་བྱེད་པ་ནི། ཀུན་ཆུབ་པར་བྱེད་པ་སྟེ། ཀུན་ནས་ཆུབ་པར་བྱེད་པའི་ཕྱིར་རོ། །ཡང་ན་བསམ་པ་

73-1-56a

ལ་སོགས་ཐམས་ཅད་དང་། འདིར་ཡང་ཀུན་ཆུབ་པར་བྱེད་པར་བསྟན་ཞེས་བྱ་བ་དང་སྦྱར་རོ། །སོགས་པ་སྨོས་པས་ནི་བསྒོམས་པ་ལས་བྱུང་བའི་ཤེས་པ་བསྡུའོ། །ཡང་ན་ཡི་གེར་འདྲི་སོགས་ཀུན། །འདིར་ཡང་ཀུན་ཆུབ་བྱེད་པར་བསྟན། །ཞེས་བྱ་བ་དང་སྦྱར་རོ། །སོགས་
པ་སྨོས་པས་ནི། ལུང་ནོད་པ་དང་། འཛིན་པ་དང་། ཀློག་པ་དང་། ཚུལ་བཞིན་ཡིད་ལ་བྱེད་པ་ལ་སོགས་པ་བསྡུའོ། །རིགས་པས་འགལ་བ་མ་ཡིན་དང་། །ཡང་ན་ཇི་སྐད་ཐོས་པ་བཞིན། །ཡིད་ལ་བྱེད་པ་གང་ཡིན་པ། །དེ་ནི་ཚུལ་བཞིན་ཡིད་བྱེད་ཡིན། །མངོན་སུམ་ལ་སོགས་པའི་
ཚད་མ་དང་མི་འགལ་བའི་དོན་ཡིད་ལ་བྱེད་པ་གང་ཡིན་པ་དེ་ནི་ཚུལ་བཞིན་ཡིད་ལ་བྱེད་པ་ཞེས་བྱའོ། །ཡང་ན་སློབ་དཔོན་གྱི་ཁ་ནས་ཇི་སྐད་ཐོས་པ་བཞིན་དུ་ཡིད་ལ་བྱེད་པ་གང་ཡིན་པ་དེ་ནི་ཚུལ་བཞིན་ཡིད་ལ་བྱེད་པ་སྟེ། སློབ་དཔོན་ནི་ཡང་དག་པ་ཉིད་ཀྱི་ལུང་འབོགས་པ་ལ་བྱའོ། །དོན་
དང་ཡི་གེའི་སྒོ་ནས་ནི། ཆོས་ཀྱི་རྣམ་གྲངས་འདི་རྒྱ་ཆེར་ཡང་དག་པར་རབ་ཏུ་སྟོན་པ་གང་ཡིན་པ་དེ་རྒྱ་ཆེར་ཡང་དག་པར་སྟོན་པར་བྱེད། སྦྱོར་བ་དང་། འགྲུབ་པ་དང་། ཡོངས་སུ་རྫོགས་པ་ཆུང་ངུ་དང་། འབྲིང་དང་། ཆེན་པོ་ལ་སོགས་པའི་བྱེ་བྲག་གིས་སོ། །ཡང་ན་རྣམ་པ་ཐམས་
ཅད་དུ། །གཟུངས་འདི་ཡང་དག་རབ་སྟོན་བྱེད། །དེ་ནི་རྒྱ་ཆེར་ཡང་དག་པར་རབ་ཏུ་སྟོན་པའོ། །དེ་ཡི་དེ་ནི་བདག་ཉིད་ཀྱིས། །ཚད་མས་ཤེས་པར་མི་ནུས་ལ། །བསོད་ནམས་ཀྱི་ཕུང་པོ་དེའི་ཚད་ནི། ཉན་པ་པོ་དེའི་བདག་ཉིད་དམ། སྟོན་པ་པོས་ཀྱང་མངོན་སུམ་ལ་སོགས་པའི་ཚད་མས་
ཤེས་པར་མི་ནུས་ལ། སྟོན་པ་པོ་གཞན་དག་གིས་ནི་བསྟན་ན་ཡང་། ཉན་པ་པོས་ཚད་དེ་ནི་བསམ་པར་མི་ནུས་སོ། །དེ་ལྟར་ན་བསོད་ནམས་ཀྱི་ཕུང་པོ་དེའི་ཚད་ནི། ཤེས་པར་བྱར་མེད་པ་དང་། བསམ་གྱིས་མི་ཁྱབ་པ་ཁོ་ནར་དེ་གཉིས་ལས་མངོན་ནོ། །ཤེས་བྱ་མ་ལུས་མཁྱེན་པའི་ཕྱིར། །འདྲེན་
པ་རྣམས་ཀྱིས་དེའི་ཚད་དེ། །མངོན་སུམ་ཡོངས་སུ་མཁྱེན་པ་དང་། །དགོངས་པར་ཡང་ནི་སྤྱོད་པ་ཡིན། །དེ་བས་ན་དེ་བཞིན་གཤེགས་པ་མ་གཏོགས་པར་ཞེས་གསུངས་པའི་ལྷག་མའོ། །བློ་རྨོངས་རྣམས་དང་མ་འདུས་དང་། །སྐྱེ་བོ་བློ་ནི་གཡེངས་རྣམས་ཕྱིར། །དོན་དེ་ཚིགས་སུ་བཅད་རྣམས་

73-1-56b

ཀྱིས། །ཐུབ་པ་ཡིས་ནི་བཟླས་ཏེ་གསུངས། །གང་དག་གིས་དོན་ཐོས་ཀྱང་བློ་རྨོངས་པའི་ཕྱིར་ལེགས་པར་ཁོང་དུ་མ་ཆུད་པ་རྣམས་དང་། གང་དག་དོན་དེ་བསྟན་པའི་དུས་ན་མ་འདུས་ཏེ་ཕྱིས་ལྷགས་པ་རྣམས་དང་། གང་དག་དེར་འདུས་ཀྱང་བློ་རྣམ་པར་གཡེངས་པའི་ཕྱིར་དོན་དེ་མ་ཐོས་པ་དག་
ཡོད་དེ། དེ་དག་ཐམས་ཅད་ལ་ཕན་གདགས་པའི་ཕྱིར་དང་། བདག་ཉིད་ངེས་པའི་ཚིག་སོ་སོ་ཡང་དག་པར་རིག་པ་ཐོབ་པ་ཡིན་པར་བསྟན་པའི་ཕྱིར་ཡང་དོན་དེ་ཉིད་ཚིགས་སུ་བཅད་པ་དག་གིས་བཟླས་ཏེ་གསུངས་སོ། །དགོངས་པ་འདི་ནི་གཞན་དག་ཏུ་ཚིགས་སུ་བཅད་དེ་གསུངས་པ་
ལ་ཡང་དེ་བཞིན་དུ་ཤེས་པར་བྱའོ། །ཚིགས་སུ་བཅད་པ་རྣམས་ནི་རྣམ་པ་དྲུག་གིས་བསྟན་ཏེ། བསོད་ནམས་ཀྱི་ཕུང་པོ་ཚད་མེད་པར་བསྙད་པ་དང་། དེའི་འབྲས་བུ་བསྙད་པ་དང་། སྔོན་བྱུང་བ་བསྙད་པ་དང་། ཚེགས་ཆུང་ངུས་འབྲས་བུ་འགྲུབ་པར་བསྙད་པ་དང་། དཔེ་བསྟན་པས་
བསོད་ནམས་ཀྱི་ཕུང་པོ་དཔེ་མེད་པ་རབ་སྙད་པ་དང་། སྨྲ་བར་འདོད་པའི་དོན་བསྒྲུབས་ནས་མཇུག་བསྡུ་བ་བསྙད་པའོ། །བསོད་ནམས་ཀྱི་ཕུང་པོ་ཚད་མེད་པར་བསྙད་པ་ནི་མདོ་སྡེ་ཐོབ་དང་ཞེས་བྱ་བ་ལ་སོགས་པ་རྣམ་པ་ལྔས་བསྟན་ཏོ། །དེ་དག་ཀྱང་མཚོན་པ་ཡིན་ཏེ། དེས་ན་ལུང་ནོད་པ་དང་
ཀུན་ཆུབ་པར་བྱེད་པ་དང་ཚུལ་བཞིན་ཡིད་ལ་བྱེད་པ་དང་། གཞན་ལ་སྟོན་པ་ཡང་བསྡུའོ། །དེའི་འབྲས་བུ་བསྙད་པ་ནི་རྣམ་པ་བཅུ་སྟེ། ཚེ་རབས་ཐམས་ཅད་དུ་སངས་རྒྱས་མཐོང་བ་དང་། སངས་རྒྱས་དེ་དག་ལ་དད་པ་བསམ་གྱིས་མི་ཁྱབ་པ་རྙེད་པ་སྟེ། དད་པ་བསམ་གྱིས་མི་ཁྱབ་པ་ནི་འབྲས་བུ་
བསམ་གྱིས་མི་ཁྱབ་པ་འཕེན་པའི་ཕྱིར་དང་ཆེན་པོའི་ཆེན་པོ་ཡིན་པའི་ཕྱིར་རོ། །མདོ་སྡེ་ཟབ་མོ་ཚུལ་ཤེས་པ་སྟེ། མདོ་སྡེ་ཟབ་མོ་གང་དུ་སྐྱེ་བ་མེད་པ་དང་། འགག་པ་མེད་པ་ལ་སོགས་པ་སྟོན་པ་དེ་དག་གི་ཚུལ་ནི་ཡང་དག་པའི་ཀུན་རྫོབ་ཉེ་བར་བཟུང་སྟེ་དེ་དག་བསྟན་པ་དང་། དོན་དམ་པར་དེ་དག་
བསྟན་པ་ལ་སོགས་པའི་དགོངས་པའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཆེས་མྱུར་དུ་རྟོགས་པར་འགྱུར་བ་དང་། ཏིང་ངེ་འཛིན་ལས་ཉམས་པར་མི་འགྱུར་ཏེ། ཏིང་ངེ་འཛིན་ནམ་མཁའི་མཛོད་ལ་སོགས་པའོ། །མངོན་པར་ཤེས་པ་ལས་ཉམས་པར་མི་འགྱུར་བ་སྟེ། མངོན་པར་ཤེས་པ་

73-1-57a

ནི་དྲུག་གོ། །དེ་ལ་ཟག་པ་ཟད་པའི་མངོན་པར་ཤེས་པ་མེད་པ་ཉིད་ཡིན་ན། དེ་ལས་ཉམས་པར་མི་འགྱུར་བར་ཇི་སྙེད་དུ་བརྗོད། དེ་ནི་བདེན་ཏེ། ཐོབ་པ་ཡོངས་སུ་ཉམས་པར་འགྱུར་བའི་ཉམས་པ་ནི་མེད་མོད་ཀྱི། མ་ཐོབ་པའི་ཡོངས་སུ་ཉམས་པར་འགྱུར་བ་ནི་ཡོད་པ་ཉིད་དེ། 
མི་ཉམས་པ་ཇི་ལྟ་བུ་ཞེ་ན། མ་ཐོབ་པ་དེ་བསྐྱེད་པར་འོས་པའི་བདག་ཉིད་དུ་གནས་པའོ། །གཟུངས་ཉམས་པར་མི་འགྱུར་བ་སྟེ། གཟུངས་ནི་སྒོ་མཐའ་ཡས་པས་བསྒྲུབ་པ་ལ་སོགས་པའོ། །གཟུངས་ཉམས་པར་མི་འགྱུར་བ་སྟེ་གཟུངས་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་
ལ་སོགས་པས་བརྒྱན་པའོ། །ལོངས་སྤྱོད་རྣམས་ཉམས་པར་མི་འགྱུར་བ་སྟེ། ལོངས་སྤྱོད་ནི་རྫས་ལ་སོགས་པ་འབྱོར་བའོ། །སངས་རྒྱས་མཐོང་བ་ལས་ཉམས་པར་མི་འགྱུར་བ་སྟེ། མཐོང་བ་སྨོས་པས་ནི་མཚོན་པའི་དོན་དེ་བསྙེན་བཀུར་བྱེད་པ་ལ་སོགས་པ་ཡང་བསྡུའོ། །བླ་ན་མེད་
པའི་བྱང་ཆུབ་ལ་རེག་པར་མ་གྱུར་གྱི་བར་དུ་ཞེས་འབྱུང་ན། ཅི་བྱང་ཆུབ་ཐོབ་ཟིན་པ་ལ་དེ་དག་ཉམས་པར་འགྱུར་བ་ཡོད་དམ་ཞེ་ན། དེ་ནི་མེད་དོ། །བྱང་ཆུབ་ཐོབ་པའི་སྔ་རོལ་ན་ཡང་ཉམས་པར་འགྱུར་བ་མེད་ན། བྱང་ཆུབ་ཐོབ་ཟིན་པ་ལྟ་ལ་ཧ་ཅང་ཡང་ཆེས་མེད་སྙམ་དུ་དགོངས་ནས་
གསུངས་པ་ཡིན་ནོ། །སྔོན་བྱུང་བ་བསྙད་པ་ནི་རྣམ་པ་གཉིས་ཏེ། རྗེས་སུ་དྲན་པ་བསྙད་པ་ནི། རྗེས་སུ་དྲན་པ་བསྙད་པ་དེ་ཡང་། མངོན་སུམ་མཚོན་པའི་དོན་ཏོ། །དྲན་པ་ནི་ཉམས་སུ་མྱོང་བ་སྔོན་དུ་འགྲོ་བའི་ཕྱིར་རོ། །འདིས་ནི་འདི་ནི་ངའི་མངོན་སུམ་དུ་གྱུར་པ་ཡིན་ཏེ། དེ་བས་ན་འདི་
ལ་ཐོ་ཚོམ་མ་བྱེད་ཅིག་ཅེས་བྱ་བར་སྟོན་ཏོ། །རྗེས་སུ་དྲན་པའི་ཡུལ་བསྙད་པ་དེ་ཡང་། དུས་དང་རིགས་དང་། ཐོས་པ་དང་། གཟུངས་ཀྱི་ཁྱད་པར་གྱི་རྒྱུ་ལས་བྱུང་བ་ལ་སོགས་པའི་ཡུལ་གྱི་བྱེ་བྲག་བསྟན་པར་ཆེས་བརྟན་པོར་ངེས་པ་བསྐྱེད་པའི་ཕྱིར་རོ། །སངས་རྒྱས་བྱེ་བ་ཕྲག་དགུ་བཅུ་
ཞེས་གསུངས་སམ། གང་གཱའི་བྱེ་མ་སྙེད་ཅེས་ཇི་སྐད་དུ་བྱ་ཞེ་ན། ཉེས་པ་མེད་དེ། དེ་ནི་འབྲས་བུ་ཁྱད་པར་དུ་འཕགས་པ་ཐོབ་པར་བསྙད་པའི་ཕྱིར་དུས་གཞན་ལ་དགོངས་ནས་གསུངས་ཏེ། སྔོན་རོལ་དུ་དེས་སངས་རྒྱས་བཅོམ་ལྡན་འདས་གང་གཱའི་བྱེ་མ་སྙེད་མཐོང་བའི་ཕྱིར་རོ། །འདོད་

73-1-57b

བཞིན་ཞེས་གསུངས་པ་ནི། གཟུངས་ཐོབ་པའི་མཐུས་ཉོན་མོངས་པ་མེད་པར་བྱང་ཆུབ་ཐོབ་པར་བསྙད་པའི་ཕྱིར་རོ། །འོད་ཟེར་མཐའ་ཡས་པ་སྨོས་པ་ནི་ཟླ་བའི་ཏོག་མཚོན་པའི་ཕྱིར། ཡང་ན་ཤེས་པའི་བདག་ཉིད་དམ། ལུས་དང་འབྲེལ་པའི་འོད་ཟེར་མཐའ་ཡས་པ་གང་ལ་ཡོད་པ་ནི་
འོད་ཟེར་མཐའ་ཡས་པ་སྟེ། དེ་ཡང་མར་མེ་མཛད་དང་། ཚོང་དཔོན་གྱི་བུ་ལ་སོགས་པ་ཐམས་ཅད་ཀྱི་ཁྱད་པར་ཡིན་ནོ། །ཚེགས་ཆུང་ངུས་འབྲས་བུ་འགྲུབ་པར་བསྙད་པ་ནི་རྣམ་པ་གསུམ་གྱིས་བསྟན་ཏེ། བྱང་ཆུབ་ཐོབ་པ་དང་། བདུད་བཅོམ་པ་སྟེ། བདུད་སྨོས་པས་ནི་ཉོན་མོངས་
པ་དང་། ལྷའི་བུ་དང་། ཕུང་པོ་དང་། འཆི་བདག་གི་བདུད་རྣམས་བསྡུའོ། །བསོད་ནམས་བརྒྱས་མཚན་འགྲུབ་པ་སྟེ། སྐབས་འདིར་ཡང་མྱུར་དུ་ཞེས་བྱ་བ་དང་སྦྱར་རོ། །བསོད་ནམས་བརྒྱའི་ཚད་ནི། འཕགས་པ་དཀོན་མཆོག་སྤྲིན་ལ་སོགས་པའི་མདོ་ལས་ཤེས་པར་བྱའོ། །བྱང་
ཆུབ་ལ་རེག་པ་ཞེས་བྱ་བ་ལ་སོགས་པ་རྣམས་ནི། གཅིག་བསྟན་པས་གཞན་གཉིས་ཀྱང་བསྟན་པ་ཁོ་ནར་འགྱུར་ཏེ། འཁྲུལ་པ་མེད་ན་ཅིའི་ཕྱིར་གསུམ་ཆར་གསུངས་ཤེ་ན། འབྲས་བུའི་རབ་ཏུ་དབྱེ་བ་བསྙད་པས། གཟུངས་ལ་བརྩོན་པ་ལ་གུས་པའི་ཁྱད་པར་བསྐྱེད་པའི་ཕྱིར་རོ། །
དཔེ་བསྟན་པས་བསོད་ནམས་ཀྱི་ཕུང་པོ་དཔེ་མེད་པ་བསྙད་པ་ནི། གང་གཱའི་ཀླུང་གི་བྱེ་མ་སྙེད་ཅེས་བྱ་བ་ལ་སོགས་པས་བསྟན་ཏེ། ཞི་དང་མང་དང་རྫས་ཟང་དང་། །ཡོངས་སུ་བཀང་བའི་བྱེ་བྲག་གིས། །སྦྱིན་པར་བྱ་བའི་ཁྱད་ལས་འདིར། །སྦྱིན་པ་ཁྱད་པར་འཕགས་པར་བསྟན། །
སྦྱིན་པའི་ཁྱད་པར་ནི་འདིར་སྦྱིན་པར་བྱ་བའི་ཁྱད་པར་རྣམ་པ་བཞི་ལས་བསྟན་ཏེ། དེ་ལ་གཞིའི་ཁྱད་པར་ནི། འཇིག་རྟེན་ཁམས་ཏེ། དེ་ཡང་སྟོང་གསུམ་གྱི་སྟོང་ཆེན་པོའོ། །མང་པོའི་ཁྱད་པར་ནི། གང་གཱའི་ཀླུང་གི་བྱེ་མ་སྙེད་དེ། དེས་ན་གཞི་ཚད་ཆེ་བ་དང་། གྲངས་མང་བར་དེ་ལྟར་
བསྟན་ཏོ། །རྫས་བཟང་བའི་ཁྱད་པར་ནི། རིན་ཆེན་རྣམས་སོ། །ཡོངས་སུ་བཀང་བའི་ཁྱད་པར་ནི་བྱུར་བུར་བཀང་བ་སྟེ། དེས་ན་བཅུད་ཀྱི་རིགས་ཆེ་བ་དང་། གྲངས་མང་བར་དེ་ལྟར་བསྟན་ཏོ། །བསོད་ནམས་དེ་ལྟ་བུ་ཡང་ཡི་གེར་བྲིས་པ་ཙམ་མམ། ཡང་ན་བཟུང་བ་ཙམ་གྱིས་ཡིན་པར་

73-1-58a

ཤེས་པར་བྱའི། གཉི་གའི་ནི་མ་ཡིན་ནོ། །འདི་ཡང་མཚོན་པ་ཡིན་ཏེ། དེས་ན་ལུང་ནོད་པ་ལ་སོགས་པ་ཙམ་གྱིས་ཡང་དེ་བཞིན་དུ་ཁོང་དུ་ཆུད་པར་བྱའོ། །སྨྲ་བར་འདོད་པའི་དོན་བསྒྲུབས་ནས་མཇུག་བསྡུ་བ་བསྙད་པ་ནི་རྣམ་པ་གསུམ་སྟེ། རྒྱུ་དང་། སླ་བ་དང་འབྲས་བུའོ། །དེ་
ལ་རྒྱུ་ཡང་རྣམ་པ་བརྒྱད་དེ། གཟུངས་ཉན་པ་དང་། སེམས་གཏོད་པ་དང་། དད་པ་དང་། གཟུངས་འཛིན་པ་སྟེ། དེ་ཡང་ཡི་གེ་དང་། དོན་གཉི་གའི་སྒོ་ནས་ཇི་ལྟ་བ་བཞིན་དུ་ཤེས་པ་དང་། ཚུལ་ཁྲིམས་དང་ལྡན་པ་སྟེ། ཚུལ་ཁྲིམས་དང་ལྡན་པ་ཉིད་མཁས་པ་ཡིན་པའི་ཕྱིར་རོ། །
དེ་ཡང་དགེ་སློང་དག །ལྔ་པོ་འདི་དག་མཁས་པ་རྣམས་ཀྱི་མཁས་པའི་མཚན་ཉིད་དོ་ཞེས་གསུངས་པ་ལྟ་བུའོ། །བྱང་ཆུབ་ཏུ་སྨོན་ལམ་འདེབས་པ་དང་། གཟུངས་ཡི་གེར་འདྲི་བ་དང་། གླེགས་བམ་དུ་བྱས་ཏེ་འཆང་བའོ། །སེམས་པ་ནི་ཕྱིན་ཅི་མ་ལོག་པའི་ཚུལ་གྱིས་སོ། །འདིར་སེམས་
གཏོད་པ་དང་། དད་པ་ནི་ཉན་པ་དང་འཛིན་པ་ཇི་ལྟ་བ་བཞིན་དུ་ཤེས་པ་དང་། བྱང་ཆུབ་ཏུ་སྨོན་ལམ་འདེབས་པ་དང་། ཡི་གེར་འདྲི་བ་འཆང་བའམ། སེམས་པའི་རྒྱུར་འགྱུར་བར་སྦྱར་རོ། །སླ་བ་ནི་རྙེད་པར་དཀའ་བ་མེད་ཅེས་བྱ་བ་འདིས་བསྟན་ཏོ། །འབྲས་བུ་ནི་བླ་ན་མེད་པའི་བྱང་ཆུབ་བོ། །
ད་ནི་སྒོ་མཐའ་ཡས་པས་བསྒྲུབ་པའི་གཟུངས་འདི་ལ་ཞེས་བྱ་བ་ལ་སོགས་པས་གནོད་སྦྱིན་གྱི་ཕན་ཡོན་བསྟན་ཏེ། གཟུངས་ཀྱི་ཆོས་ཀྱི་རྣམ་གྲངས་ལ། །མངོན་པར་བརྩོན་པ་གང་ཡིན་པ། །དེ་ནི་གཟུངས་ལ་བརྩོན་ཞེས་བྱ། །དེ་ལྟར་སྐབས་ཀྱིས་མངོན་པ་ཡིན། །གཟུངས་ཀྱི་ཆོས་ཀྱི་རྣམ་གྲངས་
ལ་མངོན་པར་བརྩོན་པ་གང་ཡིན་པ་དེ་ནི། གཟུངས་འདི་ལ་མངོན་པར་བརྩོན་པ་ཞེས་བྱ་བར་འདོད་དོ། །ཇི་ལྟ་ཞེ་ན། དེས་སྒོ་མཐའ་ཡས་པས་བསྒྲུབ་པའི་གཟུངས་ཀྱི་ཆོས་ཀྱི་རྣམ་གྲངས་འདི་དེ་བཞིན་གཤེགས་པ་དེ་ལས་ཐོས་ཏེ་ཞེས་བྱ་བ་ལ་སོགས་པས་གཟུངས་ཀྱི་ཆོས་ཀྱི་རྣམ་གྲངས་ཐོག་
མ་ཁོ་ནར་དམིགས་ཀྱིས་གླེངས་པའི་ཕྱིར་རོ། །ཕན་ཡོན་བསྙད་པ་དེ་ཡང་རྣམ་པ་བདུན་གྱིས་བསྙད་དེ། དེ་ལ་རིགས་ནི་གྲངས་ན་གནས་པ་རྣམས་རིགས་ཆེ་བར་བསྙད་པའི་ཕྱིར་དང་། གྲངས་ནི་ཡི་གེ་འབྲུ་བརྒྱད་བསྒོམ་པའི་མཐུ་བསྟན་པའི་ཕྱིར་དང་། གཟི་བྱིན་འཇུག་པར་བྱེད་པ་དང་། 

73-1-58b

ཉིན་མཚན་དུ་སྲུང་ཞིང་སྐྱོབ་ལ་སྦེད་པ་སྟེ། འདི་གཉིས་ནི་ཆོས་ཀྱི་རྣམ་གྲངས་ཀྱི་ཆེ་བ་ཉིད་ཤེས་པར་བྱ་བ་དང་། བདག་ཉིད་བསྟན་པ་ལ་ཕན་འདོགས་པ་པོར་ཤེས་པར་བྱ་བ་དང་། བཅོམ་ལྡན་འདས་ལ་བཀའ་དྲིན་དུ་གཟོ་བ་ཤེས་པར་བྱ་བའི་ཕྱིར་རོ། །ལུས་དང་ངག་དང་བློ་གྲོས་ལ། །སྟོབས་
དང་གཟི་བརྗིད་རབ་རྣོ་བ། །རིམ་བཞིན་གཟི་བརྗིད་ཤེས་པར་བྱ། །ལུས་ཀྱི་སྒྲ་དེས་ལུས་གནས་བསྡུ། །ལུས་ཀྱི་སྟོབས་གང་ཡིན་པ་དང་། ཚིག་གི་གཟི་བརྗིད་གང་ཡིན་པ་དང་། བློའི་རྣོ་བ་གང་ཡིན་པ་དེ་གསུམ་ལ་གཟི་བྱིན་ཞེས་བྱའོ། །ལུས་ཞེས་བྱ་བའི་སྒྲ་གང་ཡིན་པ་དེ་ནི་གཙོ་བོ་ལུས་
ཡིན་པའི་ཕྱིར་རོ། །ལུས་ལ་གནས་པའི་ཚིག་དང་བློ་གཉིས་ནི་ཡོན་ཏན་གྱི་བརྡར་རིག་པར་བྱའོ། །ལུས་ནི་རྣམ་གསུམ་བྱེ་བྲག་གིས། །སྲུང་སྐྱོབ་སྦེད་གསུངས་ཡང་ན་ནི། །གང་ཕྱིར་གནམ་བསྐོས་ལ་སོགས་པའི། །བྱེ་བྲག་གིས་ནི་གནོད་པ་གསུམ། །ལས་མི་དགེ་བ་རྣམ་པ་གསུམ་ཡོད་དེ། 
ཚེ་འདི་ལ་མྱོང་བར་འགྱུར་བ་དང་། སྐྱེས་ནས་མྱོང་བར་འགྱུར་བ་དང་། ལན་གྲངས་གཞན་ལ་མྱོང་བར་འགྱུར་བ་སྟེ། དེ་དག་ལས་གྱུར་པའི་གནོད་པའི་གཉེན་པོར། སྲུང་བ་དང་། སྐྱོབ་པ་དང་སྦེད་པ་རྣམས་གོ་རིམས་བཞིན་དུ་བཅོམ་ལྡན་འདས་ཀྱིས་བཀའ་སྩལ་ཏོ། །ཡང་ན་གང་གི་ཕྱིར་
གནམ་གྱིས་བསྐོས་པ་ལ་སོགས་པའི་བྱེ་བྲག་གིས་གནོད་པ་རྣམ་པ་གསུམ་དུ་འགྱུར་ཏེ། དེའི་ཕྱིར་སྲུང་བ་དང་། སྐྱོབ་པ་དང་། སྦེད་པ་གསུམ་གོ་རིམས་བཞིན་དུ་གསུངས་ཏེ། གནམ་གྱིས་བསྐོས་པའི་གནོད་པ་ནི་གོང་དུ་མི་དགེ་བ་ཁོ་ནས་བྱས་པར་མངོན་གྱི། སྲོག་ཆགས་གཞན་
གྱིས་བྱས་པ་མ་ཡིན་པ་སྟེ། དཔེར་ན་མི་ངས་དང་། མུ་གེ་དང་། ཐོག་ལ་སོགས་པ་འབབ་པ་ལྟ་བུའོ། །མི་ལས་གྱུར་པའི་གནོད་པ་ནི། །གང་དུ་སྲོག་ཆགས་རྣམས་ཀྱིས་གནོད་པར་བྱས་པར་མངོན་ལ། གནམ་གྱིས་བསྐོས་པ་ཡོད་བཞིན་དུ་མི་མངོན་པ། གང་གི་ཕྱིར་ལས་མ་
གཏོགས་པར་འབྲས་བུ་ཅི་ཡང་མེད་པའི་ཕྱིར་ཏེ། དཔེར་ན་ལོ་ཏོག་ལ་སོགས་པ་སྨིན་དུ་ཟིན་ཀྱང་། ཕ་རོལ་གྱི་དམག་ཚོགས་ཀྱིས་གནོད་པར་བྱས་ཏེ་མུ་གེར་གྱུར་པ་ལ་སོགས་པ་ལྟ་བུའོ། །གནམ་གྱི་ས་བསྐོས་པ་དང་མི་ལས་གནོད་པར་གྱུར་པ་ནི་གང་དུ་གཉི་གས་བྱས་པར་མངོན་པའོ། །

73-1-59a

ལས་ནི་གནམ་གྱིས་བསྐོས་པ་དང་། མི་ལས་གྱུར་པ་ཁོ་ནར་ཟད་དེ། གནམ་གྱིས་བསྐོས་པ་དང་། མིའི་ལས་ཀྱིས་འཇིག་རྟེན་འཚོ་བར་བྱེད་དོ་ཞེས་ཟེར་བ་ལྟ་བུའོ། །ཡང་ན་བདག་གཞན་རྐྱེན་གྱུར་ལས། །གནོད་པ་རྣམ་གསུམ་ཤེས་པར་བྱ། །སེམས་ཅན་སེམས་ཅན་མིན་
བགྲང་བའི། །བྱེ་བྲག་གིས་ནི་གཞན་གཉིས་བསྟན། །ཡང་ན་གནོད་པ་རྣམ་པ་གསུམ་ཡོད་དེ། རང་གི་རྐྱེན་ལས་གྱུར་པ་དང་། གཞན་གྱི་རྐྱེན་ལས་གྱུར་པའོ། །གཞན་གྱི་རྐྱེན་ལས་གྱུར་པ་འང་རྣམ་པ་གཉིས་ཏེ། སེམས་ཅན་དུ་མི་བགྲང་བའི་རྐྱེན་ལས་གྱུར་པ་དང་། སེམས་ཅན་
དུ་བགྲང་བའི་རྐྱེན་ལས་གྱུར་པའོ། །དེ་བསྡུས་ན་རྣམ་པ་གསུམ་དུ་འགྱུར་ཏེ། དེའི་གཉེན་པོར་སྲུང་བ་དང་། སྐྱོབ་པ་དང་། སྦེད་པ་གསུམ་པོ་གོ་རིམས་བཞིན་དུ་ཤེས་པར་བྱའོ། །མིང་གི་ཁྱད་པར་ནི་གདུལ་བ་རྣམས་མངོན་པར་ཡིད་ཆེས་པ་བསྐྱེད་པའི་ཕྱིར་རོ། །གནོད་སྦྱིན་རྣམས་
འོང་བར་བྱ་བའི་ཆོ་ག་བསྟན་པ་ནི། རྣམ་པ་ལྔར་གསུངས་པ་སྟེ། ཇི་ལྟ་ཞེ་ན། མངོན་དུ་ཕྱོགས་པར་བྱ་བ་གཉིས། །འོང་བར་བྱ་བའི་ཕྱིར་གསུངས་ཏེ། །འོང་བར་བྱ་བའི་ཕྱིར་ཤིན་ཏུ་ཁྲུས་བྱ་བ་དང་། གོས་ཤིན་ཏུ་གཙང་མ་བགོ་བར་བྱས་ན། གནོད་སྦྱིན་དེ་དག་མངོན་དུ་ཕྱོགས་པར་བྱེད་དེ། 
འདི་ལྟར་ཤིན་ཏུ་ཁྲུས་བྱ་བ་ཡང་རྣམ་པ་གཉིས་ཏེ། ཕྱི་རོལ་གྱི་ཆོ་ག་དང་སྦྱར་ཏེ་ཆུས་བཀྲུ་བ་དང་། ནང་གི་ཚུལ་ཁྲིམས་ཡོངས་སུ་དག་པས་སོ། །གོས་ཤིན་ཏུ་གཙང་མ་བགོ་བ་ཡང་རྣམ་པ་གཉིས་ཏེ། ཕྱི་རོལ་གྱི་བགོ་བ་གཙང་མ་ལ་སོགས་པས་ལུས་གཡོགས་པ་དང་། ནང་གི་བྱམས་པ་ལ་
སོགས་པས་སེམས་ཀྱིས་ལུས་དཀྲི་བ་སྟེ། ཕ་རོལ་དང་ནང་རྣམ་པར་དག་པས་མཛེས་པ་མཐོང་ན་གནོད་སྦྱིན་དེ་དག་འོང་བར་སྤྲོ་བར་འགྱུར་བའི་ཕྱིར་ཏེ། དེ་ལྟར་ན་འོང་བའི་ཕྱིར་སྤྲོ་བ་སྐྱེད་པར་འགྱུར་རོ། །གཅིག་གིས་སྤྲོ་བར་བྱ་བ་བསྟན། །འཆག་པར་འགྲོ་བ་ཞེས་བྱ་བའི་ཚིག་གིས་བསྟན་ཏེ། 
གནོད་སྦྱིན་རྣམས་ནི་འདོང་བྱའི་ཕྱིར། །འཆག་པ་བསུ་བའི་བསམ་པར་བསྟན། །དེ་ལྟ་མིན་དུ་ཟིན་ན་ནི། །དེ་ཡིས་ལྷག་པར་ཅི་ཞིག་བསྟན། །དེ་ལྟར་དོན་དུ་གཉེར་ཤེས་ནས། །འོང་བར་སྤྲོ་བའི་སེམས་ལྡན་རྣམས། །སྤྲོ་བའི་མཐུ་ལ་དམིགས་ནས་ནི། །དེ་དག་ངེས་པར་འོང་བར་འགྱུར། །དེ་དག་ནི་

73-1-59b

བརྡ་ཕྲད་པར་སླ་བས་མ་བཤད་དོ། །གཉིས་ཀྱིས་དེ་དག་གུས་པ་སྐྱེས། །ཞེ་འགྲས་པ་མེད་པའི་སེམས་དང་། ཆོས་ཀྱི་རྣམ་གྲངས་ཡིད་ལ་བྱེད་པ་གཉིས་ནི་གནོད་སྦྱིན་དེ་དག་གུས་པ་སྐྱེ་བར་འགྱུར་ཏེ། འདི་ལྟར་ཞེ་འགྲས་པ་མེད་པའི་སེམས་ཀྱིས་བསམ་པ་དགེ་བར་གྱུར་པའི་ཕྱིར། ཡོན་ཏན་
ལ་གུས་པ་སྐྱེ་བ་དང་། ཆོས་ཀྱི་རྣམ་གྲངས་ཡིད་ལ་བྱེད་པས་ཆོས་ལ་གུས་པ་སྐྱེ་བར་འགྱུར་རོ། །དེ་ལྟར་འོང་འདོད་པའི་སྤྲོ་བ་སྐྱེས་ནས་ཀྱང་། དེ་དག་གུས་པར་ངེས་པ་ཁོ་ན་བཞིན་སྟོན་པར་འགྱུར་བའི་ཕྱིར། དེ་ལ་ཞེས་བྱ་བ་ལ་སོགས་པ་གསུངས་སོ། །གནོད་སྦྱིན་དེ་དག་ལྷགས་ནས་ནི། །བརྟན་
བཞིན་བརྟུལ་ཞུགས་སྤྱོད་དེ་ལ། །མྱུར་དུ་གཟུངས་ཀྱི་སྒོ་རྣམས་ནི། །ཐེ་ཚོམ་མེད་པར་སྟོན་པར་བྱེད། །སྒོ་ཞེས་བྱ་བའི་སྒྲས་ནི་སྒོ་ཟད་མི་ཤེས་པའི་གཟུངས་ཀྱི་སྒོ་ལ་སོགས་པ་བསྡུའོ། །ཚིགས་སུ་བཅད་པའི་དོན་ལྷག་མ་ནི་མ་བཤད་དོ། །ཡང་ན། ཡན་ལག་ཀུན་གྱི་གཙོ་བོ་བཞིན། །བསྙད་པས་
དེ་དག་བློ་དགའ་བས། །ལྷགས་པ་ཡིན་ཏེ་དེ་དག་ལས། །འབྲས་བུར་འགྱུར་བར་ཐེ་ཚོམ་མེད། །དགའ་བར་མ་གྱུར་ན་བཞིན་སྟོན་པར་མི་བྱེད་དོ་སྙམ་དུ་དགོངས་སོ། །བྱང་ཆུབ་སེམས་དཔའི་ཕན་ཡོན་བསྙད་པ་ནི་རྣམ་པ་དྲུག་སྟེ། གྲངས་དང་། རིམ་པ་དང་། སེམས་པ་དང་། མིང་དང་གཟུངས་
ཐོབ་པར་བྱ་བའི་ཕྱིར་མངོན་པར་བརྩོན་པ་དང་། གཟུངས་ལ་བརྩོན་པ་ལ་གཟུངས་སྟོན་པའོ། །ཡི་གེ་བརྒྱད་པོ་དེ་དག་ནི། །བྱང་ཆུབ་སེམས་དཔའ་བརྒྱད་པོ་ཡིན། །དེའི་ཕྱིར་དོན་དེ་བསྒོམ་པ་ལ། །དེ་དག་ཐམས་ཅད་ཕན་འདོགས་སོ། །པ་ཞེས་བྱ་བ་ལ་སོགས་པའི་ཡི་གེ་བརྒྱད་པོ་དེ་དག་ནི། རྣམ་
པར་སྣང་བྱེད་ལ་སོགས་པའི་བྱང་ཆུབ་སེམས་དཔའ་བརྒྱད་པོ་དག་གི་ཡིན་ཏེ། དེ་དག་གི་ཏིང་ངེ་འཛིན་སྟོན་པས་ན། དེའི་ཕྱིར། ཡི་གེ་དེ་དག་ནི་དོན་བསྒོམ་པ་ན་དེ་དག་ཐམས་ཅད་ཕན་འདོགས་པར་བྱེད་པར་འོས་པ་སྟེ། དེའི་ཕྱིར་བརྒྱད་ཅེས་གསུངས་སོ། །གཞན་ལ་ཕན་འདོགས་ཞུགས་
པའི་ཕྱིར། །སྨོན་ལམ་སྟོབས་ཀྱིས་དེ་དག་རྣམས། །དེ་དང་དེར་ནི་སྐྱེད་བྱེད་པ། །གང་ཡིན་དེ་ལ་ཐེ་ཚོམ་མེད། །གང་གི་ཕྱིར་བྱང་ཆུབ་སེམས་དཔའ་འདི་དག་ནི་བློ་སྙིང་རྗེས་དབང་དུ་བྱས་ཤིང་ཕ་རོལ་ལ་ཕན་པར་བྱ་བ་ལ་གཞོལ་བས། འདོད་པ་ན་སྤྱོད་པའི་ལྷ་རྣམས་ཀྱི་ནང་དུ་དེ་དང་དེར་སྐྱེ་བར་བྱེད་

73-1-60a

དེ། དེའི་ཕྱིར་དེ་དག་ཀྱང་དེ་ལ་ཞེས་བྱ་བ་ལ་སོགས་པ་འདི་གསུངས་པ་གང་ཡིན་པ་དེ་ལ་ཐེ་ཚོམ་མི་བྱ་བར་ངེས་པ་ཁོ་ནར་གཟུང་བར་བྱ་སྟེ། འདི་ལ་འཁྲུལ་པ་བསྐྱེད་པར་མི་བྱའོ་ཞེས་བྱ་བའི་ཐ་ཚིག་གོ། །གནོད་སྦྱིན་གྱི་རིགས་བསྙད་པ་ན་ཡང་འདི་ཉིད་དགོངས་ཏེ། དེ་དག་
བྱང་ཆུབ་སེམས་དཔའ་ཉིད་ཡིན་ལ། མངོན་པར་ཤེས་པ་ཆེན་པོ་གནོད་སྦྱིན་གྱིས་གདུལ་པ་རྣམས་ལ་ཕན་གདགས་པའི་ཕྱིར། འཕགས་པ་ལག་ན་རྡོ་རྗེ་བཞིན་དུ་སྐྱེས་པ་ཡིན་ཏེ། དེ་ལྟ་བུ་ཡིན་གྱི་བྱང་ཆུབ་སེམས་དཔའ་མིན་ན་དེ་ལྟ་མ་ཡིན་ན་ནི། གནོད་སྦྱིན་དེ་དག་མཐུ་མེད་པའི་ཕྱིར། 
གཟུངས་ལ་བརྩོན་པ་འཇིག་རྟེན་གྱི་ཁམས་གཞན་དག་ན་འཁོད་པ་རྣམས་ལ་ཕན་འདོགས་པར་མི་བྱེད་པས། གནོད་སྦྱིན་གྱི་ཕན་ཡོན་བསྙད་པ་ཁྱབ་པ་མ་ཡིན་པར་འགྱུར་རོ། །སེམས་དཔའ་ཞེས་ནི་གསུངས་པ་འདི། །སེམས་ནི་སྙིང་རྗེས་བརླན་རྣམས་ཀྱིས། །ཕན་པར་བྱ་བ་འདོད་པའི་
བློས། །སྙིང་བརྩེ་ནས་ནི་བལྟས་པ་ཡིན། །ཚིགས་སུ་བཅད་པ་འདིའི་དོན་ནི་གསལ་བའི་ཕྱིར་མ་བཤད་དོ། །རྒྱལ་བའི་སྲས་པོ་དེ་དག་ནི། །ཕན་པ་ཉེ་བར་བསྒྲུབ་པ་དང་། །གནོད་པ་མེད་པར་སྤོངས་པ་ཡིས། །གཟུངས་ཐོབ་བྱ་ཕྱིར་མངོན་པར་བརྩོན། །ཕན་པ་ནི་དགེ་བའི་བཤེས་གཉེན་ལ་བརྟེན་པ་དང་། 
བསོད་ནམས་དང་ཡེ་ཤེས་ཀྱི་ཚོགས་བསྒྲུབ་པ་དང་། མཐུ་ཡོད་པར་བྱ་བ་ལ་སོགས་པའོ། །གནོད་པ་ནི་སྡིག་པའི་གྲོགས་པོ་དང་འདྲེ་བ་དག །རྒོད་པ་དང་འགྱོད་པ་ལ་སོགས་པའོ། །ཕན་པ་དང་གནོད་པ་དེ་གཉིས་གོ་རིམས་བཞིན་དུ་བྱ་བ་དང་། གསལ་བས་བྱང་ཆུབ་སེམས་དཔའ་དེས་གཟུངས་
ཐོབ་པར་བྱ་བའི་ཕྱིར། བྱང་ཆུབ་སེམས་དཔའ་བརྒྱད་པོ་དེ་དག་བརྩོན་པར་འགྱུར་རོ། །གཟུངས་ལ་བརྩོན་པའི་བྱ་བ་བསྟན་པ་ཡང་རྣམ་པ་བདུན་དུ་གསུངས་ཏེ། དམ་བཅས་པ་ལ་བརྟན་པ་དང་། བྱས་པ་གཟོ་བ་དང་། བྱས་པ་ཚོར་བ་དང་། ཆོས་འདོད་པ་དང་། ཆོས་ལ་དགའ་བ་དང་། ཟབ་མོའི་
ཆོས་ལ་བཟོད་པ་ལ་བརྩོན་པ་དང་། བགོ་བཤའ་བྱེད་པའི་ངང་ཚུལ་ཅན་དུ་བྱ་བའོ། །གཟུངས་ལ་བརྩོན་བྱེད་གང་ཞེ་ན། །གང་ཞིག་ཉན་སེམས་རྗེས་ཡི་རང་། །འདི་དང་ལུང་ནོད་འདོན་ལ་སོགས། །སྟོན་པའི་ཚུལ་གྱིས་བརྩོན་བྱེད་པའོ། །སོགས་པ་སྨོས་པས་ནི་འཛིན་པ་དང་། ཀུན་ཆུབ་

73-1-60b

པར་བྱེད་པ་དང་། ཚུལ་བཞིན་ཡིད་ལ་བྱེད་པ་ལ་སོགས་པ་བསྡུའོ། །ལྷག་མའི་དོན་ནི་གསལ་བས་མ་བཤད་དོ། །གཟུངས་བསྐྱེད་ཆོ་ག་རྒྱལ་བ་ཡིས། །བདག་གཞན་ལྟོས་ལ་བཟླས་ཏེ་གསུངས། །སྟོན་པ་ལ་སོགས་བྱེ་བྲག་གིས། །གཞན་ནི་རྣམ་པ་གསུམ་དུ་འགྱུར། །སྔར་ཡང་བཅོམ་ལྡན་
འདས་ཀྱིས་གཟུངས་བསྐྱེད་པའི་ཆོ་ག་གསུངས་མོད་ཀྱི། དེ་ཡང་བདག་དང་གཞན་ལ་ལྟོས་པའི་སྒོ་ནས་གསུངས་ཏེ། དེ་ལ་བདག་ལ་ལྟོས་པ་ནི། བདེན་པར་དམ་བཅའ་བར་བྱའོ་ཞེས་བྱ་བས་བསྟན་ཏོ། །བདེན་པར་དམ་བཅའ་བ་ནི་བརྟན་པོར་དམ་བཅའ་བའོ། །དེ་འདྲ་བ་དེ་ནི་གཟུངས་ངེས་
པར་སྐྱེད་པར་བྱེད་དེ། འདི་ལྟར་དེས་གཟུངས་བདག་གིས་བསྐྱེད་པར་བྱའོ་ཞེས་དམ་བཅས་ན། དེ་ནི་དེ་མ་བསྐྱེད་ཀྱི་བར་དུ་བར་མ་དོར་ཕྱིར་མི་ལྡོག་གོ། །ལྷག་མ་རྣམས་ཀྱིས་ནི་གཞན་ལ་ལྟོས་པའི་སྒོ་ནས་གཟུངས་བསྐྱེད་པར་བྱ་བའི་ཆོ་ག་བསྟན་ཏེ། གཞན་པོ་དེ་ཡང་། སྟོན་པ་དང་། 
ཆོས་དང་། འདུ་བའི་བྱེ་བྲག་གིས་རྣམ་པ་གསུམ་དུ་འགྱུར་ཏེ། དེ་ལ་སྟོན་པའི་ལྟོས་པ་ནི། བྱས་པ་གཟོ་བ་དང་། བྱས་པ་ཚོར་བ་ཅན་ཞེས་བྱ་བ་འདི་གཉིས་ཀྱིས་གཟུངས་བསྐྱེད་པའི་ཆོ་ག་བསྟན་ཏེ། འདི་ལྟར་བཅོམ་ལྡན་འདས་དང་། འབྲེལ་པའི་སྐྱབས་གསུམ་ཐོབ་པ་ལ་སོགས་པ་
བཀའ་དྲིན་དྲན་ནས། དེས་གསུངས་པ་བཞིན་དུ་ངེས་པ་ཁོ་ནར་སྒྲུབ་པར་བྱེད་དེ། དེས་གསུངས་པའི་གཟུངས་ནི་དོན་ཆེན་པོ་ཡིན་པས་ན་བསྐྱེད་དགོས་སོ་སྙམ་པའི་ཕྱིར་རོ། །སུས་བྱས་པ་ཚོར་བ་དེ་ཡང་ངེས་པ་ཁོ་ནར་གཟུངས་སྐྱེད་པར་བྱེད་དེ། འདི་ལྟར་གཟུངས་བསྒྲུབས་པས་བཅོམ་
ལྡན་འདས་ཀྱི་བཀའ་དྲིན་ཚོར་བའི་ཕྱིར་རོ། །དེ་བྱས་པ་ཚོར་བར་བྱེད་པའི་ངང་ཚུལ་ཅན་ཡིན་པས་ན་བྱས་པ་ཚོར་བ་ཅན་ནོ། །ཆོས་ལ་ལྟོས་པ་ནི་ཆོས་འདོད་པ་ཞེས་བྱ་བ་ལ་སོགས་པས་གཟུངས་བསྐྱེད་པའི་ཆོ་ག་བསྟན་ཏེ། གང་གི་ཕྱིར་སུ་ཆོས་ལ་འདོད་ཅིང་སྲེད་པ་དེ་ནི་ངེས་པར་གཟུངས་
བསྐྱེད་པར་འགྱུར་ཏེ། དེ་ནི་ཆོས་ཀྱི་མཆོག་ཡིན་པའི་ཕྱིར་རོ། །ཆོས་ལ་དགའ་བ་ནི། གང་ཆོས་ལ་ཤིན་ཏུ་ཞུགས་པ་སྟེ། དེ་ལྷུར་ལེན་པའི་ཕྱིར་རོ། །དེ་འདྲ་བ་དེ་ནི་གཟུངས་མ་བསྐྱེད་པར་མི་འདུག་གོ། །ཟབ་མོའི་ཆོས་ལ་བཟོད་པ་ལ་བརྩོན་པ་ནི་ག་ལ་ཞིག་གཟུངས་བསྐྱེད་པར་མི་བྱེད་དེ། 

73-1-61a

དེ་ནི་མཆོག་ཏུ་ཟབ་པའི་ཕྱིར་རོ། །གཞན་གྱི་དོན་གྱི་ཕྱིར་ཡང་གཟུངས་འདི་བསྐྱེད་པར་བྱ་བའི་ཕྱིར། བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ལ་བརྩོན་པས་ཞེས་བྱ་བ་ལ་སོགས་པ་གསུངས་ཏེ། ཆོས་དང་ཟང་ཟིང་བྱེ་བྲག་གིས། །བགོ་བཤའ་རྣམ་པ་གཉིས་
སུ་བསྟན། །བགོ་བཤའ་ནི་རྣམ་པ་གཉིས་ཏེ། ཆོས་ཀྱི་བགོ་བཤའ་དང་། ཟང་ཟིང་གི་བགོ་བཤའོ། །ངང་ཚུལ་སྨོས་པས་ནི་བགོ་བཤའི་ངོ་བོ་ཉིད་བསྟན་ཏེ། དེས་ན་སེམས་ཀྱི་ཤིན་ཏུ་འཛིན་པ་མེད་པར་བསྟན་ཏོ། །ཆུང་དང་ཉུང་དང་མང་པོ་ནི། །རྫས་དང་གྲངས་དང་གཉི་གར་བསྟན། །
ཆུང་ངུ་ནི་རྫས་ཆུང་བའི་ཕྱིར་རོ། །ཉུང་ངུ་ནི་གྲངས་ཉུང་བའི་ཕྱིར་རོ། །མང་པོ་ནི་རྫས་དང་གྲངས་མང་བའི་ཕྱིར་རོ། །གཟུངས་དོན་བསྟན་པ་ཡིན་མོད་ཀྱི། །འོན་ཀྱང་སྤྱིར་ཡང་བསྟན་པ་མཛད། །བྱས་གཟོ་ལ་སོགས་གཞན་དུ་ཡང་། །བྱ་བའི་ཕྱིར་ན་གསུངས་པ་ཡིན། །གཟུངས་ཀྱི་དོན་བསྟན་པའི་
སྐབས་ཡིན་མོད་ཀྱི་སྤྱིར་བསྟན་ཏེ་གསུངས་པའི་བྱས་པ་གཟོ་བ་ལ་སོགས་པ་གང་ཡིན་པ་དེ་ནི་གཞན་དུ་ཡང་བྱ་དགོས་པའི་ཕྱིར་དོན་དེ་བསྟན་པའི་ཐ་ཚིག་གོ། །བཤད་པའི་ཚེ་ཕན་ཡོན་བསྙད་པ་ནི་རྣམ་པ་གཉིས་ཏེ། ཕྱིར་མི་ལྡོག་པའི་ས་འཐོབ་པ་དང་། བླ་ན་མེད་པའི་བྱང་ཆུབ་ཏུ་སེམས་བསྐྱེད་
པའོ། །དེ་ཡང་། འདིར་ནི་གཙོ་བོར་ཐུབ་པ་ཡིས། །འབྲས་བུ་གཉིས་སུ་བསྟན་པ་ཡིན། །ཇི་ལྟ་ཞེ་ན། སྨྲས་པ། མཐོ་རིས་ལ་སོགས་འབྲས་བུ་ནི། །གཞན་བསྟན་པ་ལས་རྟོགས་པར་འགྱུར། །བཅོམ་ལྡན་འདས་ཀྱིས་བསྟན་པ་ནི་ཐམས་ཅད་ཀྱང་ལྷ་དང་མི་ལ་སོགས་པར་སྐྱེ་བ་དང་། 
རྒྱལ་སྲིད་ལ་སོགས་པ་དང་མི་འབྲལ་བར་འཕེན་པ་ཡིན་ནོ། །འབྲས་བུ་འདི་གཉིས་གཙོ་བོར་བསྟན་པ་ཡང་བྱང་ཆུབ་ཆེན་པོར་ངེས་པར་འགྱུར་བའི་རྒྱུ་ཡིན་པའི་ཕྱིར་དང་། གཞིར་གྱུར་པའི་ཕྱིར་རོ། །ཕྱིར་མི་ལྡོག་པའི་ས་ཐོབ་པ་ནི། བྱང་ཆུབ་སེམས་དཔའ་རྣམས་ཁོ་ན་ཡིན་པའི་ཕྱིར། སྔ་
མའི་སྐབས་སུ་བྱང་ཆུབ་སེམས་དཔའ་སྨོས་སོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ནི་བྱང་ཆུབ་སེམས་དཔའ་མ་ཡིན་པ་ཁོ་ན་དག་བྱེད་པ་ཡིན་པས་ན། ཕྱི་མའི་སྐབས་སུ་ནི་བྱང་ཆུབ་སེམས་དཔའམ་སྨོས་སོ།    །ད་ནི་མིང་ཞུས་པ་བརྗོད་པར་བྱ་སྟེ། བདག་དང་

73-1-61b

གཞན་དོན་རིམ་བཞིན་དུ། །ཞུས་པ་དང་ནི་དགོས་པ་བསྟན། །ཡང་ན་དོན་ནི་ཆེ་བའི་ཕྱིར། །ཚིག་གཉིས་ཀྱིས་ནི་བཟླས་ཏེ་ཞུས། །འདིའི་མིང་ཅི་ལགས་ཞེས་བྱ་བས་ནི་མིང་ཞུས་པ་བསྟན་ཏོ། །མིང་ཞུས་པ་དགོས་པ་མེད་དུ་དོགས་པ་ལ། འདི་ཇི་ལྟར་གཟུང་བར་བགྱི་ཞེས་བྱ་བས་དགོས་པ་བསྟན་ཏེ། ཐ་སྙད་གདགས་
པའི་དུས་ན་འདི་ཇི་ལྟར་གཟུང་བར་བགྱི་ཞེས་བྱ་བའི་ཐ་ཚིག་གོ། །དེས་ན་ཕྱིས་ཐ་སྙད་གདགས་པའི་བྱ་བ་ཞུས་པའི་དགོས་པ་ཡིན་པར་བསྟན་པ་ཡིན་ནོ། །ཡང་ན་འདིའི་མིང་ཅི་ལགས་ཞེས་བྱ་བ་ནི་བདག་གི་དོན་དུ་ཞུ་བའི། འདི་ཇི་ལྟར་གཟུང་བར་བགྱི་ཞེས་བྱ་བ་ནི་གཞན་གྱི་དོན་དུ་ཞུ་བ་སྟེ། 
དེ་དག་ཀྱང་ཐ་སྙད་གདགས་པར་བྱ་བའི་ཕྱིར་ཆོས་ཀྱི་རྣམ་གྲངས་ཀྱི་མིང་ཐོས་པར་འདོད་ན། ཆོས་ཀྱི་རྣམ་གྲངས་འདི་གཞན་དག་འཛིན་ན་ཇི་ལྟར་འཛིན་དུ་གཞུག་པར་བགྱི་ཞེས་བྱ་བའི་ཐ་ཚིག་གོ། །ཡང་ན་ཆོས་ཀྱི་རྣམ་གྲངས་འདི་དོན་ཆེ་བའི་ཕྱིར། དད་པས་འདུན་པར་བྱས་པའི་སེམས་ཀྱིས་
ཡང་དང་ཡང་དུ་མིང་ཞུ་བར་བྱེད་དོ། །ཡང་ཞེས་བྱ་བ་ནི་མ་སྨོས་པ་བསྡུ་བའི་དོན་ཏེ། དེ་བས་ན་ཚིག་གཉིས་ཀྱིས་བདག་ཉིད་ཀྱི་མིང་ཐོས་པར་འདོད་པ་བསྟན་ཏེ། འདི་ལྟར་སྤྱིར་ཞུས་མོད་ཀྱི། འོན་ཀྱང་བདག་ཉིད་ལ་བསྡུ་བའི་ཕྱིར། འདི་ཇི་ལྟར་གཟུང་བར་བགྱི་ཞེས་སྨྲས་སོ།    །ད་ནི་མིང་འདོགས་
པ་བསྟན་ཏེ། འདི་ནི་གོ་རིམས་ཁོ་ན་བཞིན། །རྒྱུ་དང་འབྲས་བུའི་དངོས་པོ་ཡིས། །མིང་ནི་རྣམ་པ་བཞིར་མཛད་དེ། །དེ་ཕྱིར་མི་ཉུང་ལྷག་པ་མེད། །མིང་རྣམ་པ་བཞི་པོ་འདི་ནི་ཆོས་ཀྱི་རྣམ་གྲངས་འདིའི་བརྒྱུད་པའི་འབྲས་བུར་འགྱུར་བ་གང་ཡིན་པ་དེའི་རྒྱུ་དང་འབྲས་བུའི་དངོས་པོར་འདུག་པའི་ཕྱིར་
ཏེ། ས་དང་ཕ་རོལ་ཏུ་ཕྱིན་པ་དང་། ཏིང་ངེ་འཛིན་དང་། རྣམ་པར་ཐར་པ་དང་། མངོན་པར་ཤེས་པ་ལ་སོགས་པའི་ཡོན་ཏན་རྣམས་སྒོ་མཐའ་ཡས་པས་བསྒྲུབ་པའི་ཕྱིར་ན་ཆོས་ཀྱི་རྣམ་གྲངས་འདིའི་མིང་སྒོ་མཐའ་ཡས་པས་བསྒྲུབ་པ་ཞེས་བྱའོ། །གང་གི་ཕྱིར་འདིའི་མིང་སྒོ་མཐའ་ཡས་
པས་བསྒྲུབ་པ་ཞེས་བྱ་བ་དེའི་ཕྱིར། འདིའི་མིང་བྱང་ཆུབ་སེམས་དཔའ་གཅིག་ཏུ་ངེས་པར་མངོན་པར་འཕགས་པར་བྱེད་པ་ཞེས་བྱ་བར་ཡང་ཟུང་ཤིག་ཅེས་གསུངས་ཏེ། གང་གི་ཕྱིར་རྒྱུ་དེ་ལྟ་བུ་ལས་འབྲས་བུ་དེ་ལྟ་བུ་ངེས་པར་འབྱུང་བའི་ཕྱིར་རོ། །གཅིག་ཏུ་ངེས་པར་ཞེས་བྱ་བ་ནི་

73-1-62a

ལྡན་པའི་དོན་ཏེ། འདི་ལས་བྱང་ཆུབ་སེམས་དཔའ་གཅིག་ཏུ་ངེས་པར་མངོན་པར་འཕགས་པར་འགྱུར་རོ་ཞེས་བསྡུ་བར་བྱའོ། །མངོན་དུ་ཕྱོགས་པས་གོང་ནས་གོང་དུ་ཁྱད་པར་འཐོབ་པའི་ཕྱིར་འཕགས་པ་ནི་མངོན་པར་བྱེད་པའོ། །གང་གི་ཕྱིར་འདིའི་མིང་བྱང་ཆུབ་
སེམས་དཔའ་ཐམས་ཅད་གཅིག་ཏུ་ངེས་པར་མངོན་པར་འཕགས་པར་བྱེད་པ་ཞེས་བྱ་བ་དེའི་ཕྱིར། འདིའི་མིང་བདུད་ཐམས་ཅད་རྣམ་པར་འཇིག་པར་བྱེད་པ་ཞེས་བྱ་བར་ཡང་ཟུང་ཤིག་ཅེས་གསུངས་ཏེ། འབྲས་བུ་ནི་རྒྱུ་དང་འདྲ་བའི་ཕྱིར་རོ། །བདུད་སྨོས་པས་ནི་ཉོན་མོངས་དང་། ལྷའི་
བུའི་བདུད་བསྡུས་ཏེ། འདིས་བདུད་ཐམས་ཅད་རྣམ་པར་འཇིག་པའི་ཕྱིར་ཞེས་ཚིག་སྦྱར་བར་བྱའོ། །གང་གི་ཕྱིར་འདིའི་མིང་བདུད་ཐམས་ཅད་རྣམ་པར་འཇིག་པ་ཞེས་བྱ་བའི་ཕྱིར། གཅིག་ཏུ་ངེས་པར་རྣམ་པ་ཐམས་ཅད་མཁྱེན་པ་ཉིད་ཐོབ་པར་བྱེད་པ་ཞེས་བྱ་བར་ཡང་ཟུང་ཤིག་ཅེས་
གསུངས་ཏེ། དེ་གཅིག་ཏུ་ཡང་ངེས་པ་ཡིན་ལ། ཐམས་ཅད་མཁྱེན་པ་ཉིད་ཐོབ་པར་བྱེད་པ་ཡང་ཡིན་ནོ་ཞེས་ཚིག་སྦྱར་བར་བྱའོ། །ཡང་ན་འབྲུ་མང་པོ་མ་ཡིན་པར་སྦྱར་རོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་འབྲས་བུ་གཞན་ཡོད་པས་ན་མི་ཉུང་བ་ཡང་མ་ཡིན་ལ། དེ་ཡན་ཆད་འབྲས་
བུ་མེད་པའི་ཕྱིར་ལྷག་པ་མེད་དོ། །ལུགས་འབྱུང་ལུགས་འབྱུང་མ་ཡིན་ལས། །སྒྲུབ་དང་བསྒྲུབ་བྱའི་དངོས་པོ་ཡིས། །མིང་ནི་རྣམ་པ་བཞིར་མཛད་དེ། །དེ་ཕྱིར་མི་ཉུང་ལྷག་པ་མེད། །ཡང་ན་ལུགས་སུ་འབྱུང་བའི་ཚུལ་གྱིས་སྔ་མ་སྔ་མ་ནི་རྒྱུ་ཡིན་ལ། ཕྱི་མ་ཕྱི་མ་ནི་བསྒྲུབ་པར་བྱ་བ་ཡིན་
པའི་ཕྱིར་མིང་རྣམ་པ་བཞིར་མཛད་དོ། །ལུགས་སུ་འབྱུང་བ་མ་ཡིན་པ་ནི་ཕྱི་མ་ཕྱི་མ་ནི་རྒྱུ་ཡིན་ལ། སྔ་མ་སྔ་མ་ནི་བསྒྲུབ་པར་བྱ་བ་ཡིན་པའི་ཕྱིར། མིང་རྣམ་པ་བཞིར་མཛད་དེ། ལྟོས་པ་དང་བཅས་པའི་ཕྱིར། ཉུང་བ་ཡང་མ་ཡིན་ལ། སྒྲུབ་པ་པོའི་ལྟོས་པ་མེད་པས། མིང་གཞན་བྱར་
མེད་པའི་ཕྱིར། ལྷག་པར་ཡང་མ་མཛད་དོ། །བཤད་པ་འདིའི་སྐབས་སུ་བདུད་སྨོས་པས་ནི་བདུད་ཐམས་ཅད་བསྡུའོ། །ཡང་ན་ཡོན་ཏན་ཐམས་ཅད་དང་། ཡེ་ཤེས་ཕུན་སུམ་སྤོང་ཕུན་སུམ། །ཁྱད་པར་འཕགས་པ་ཕུན་སུམ་གྱི། །རྟེན་ནི་དེ་ཉིད་ཡིན་ཕྱིར་རོ། །ཡང་ན་ཆོས་ཀྱི་རྣམ་

73-1-62b

གྲངས་འདི་ནི། ཕུན་སུམ་ཚོགས་པ་རྣམ་པ་བཞིའི་རྟེན་ཡིན་ཏེ། དེའི་ཕྱིར་མིང་རྣམ་པ་བཞིར་མཛད་དོ། །ཕུན་སུམ་ཚོགས་པ་རྣམ་པ་བཞི་ནི། ཡོན་ཏན་ཐམས་ཅད་ཕུན་སུམ་ཚོགས་པ་དང་། ཡེ་ཤེས་ཕུན་སུམ་ཚོགས་པ་དང་། སྤང་བ་ཕུན་སུམ་ཚོགས་པ་དང་། ཁྱད་པར་འཕགས་པ་ཕུན་
སུམ་ཚོགས་པ་སྟེ། ཁྱད་པར་འཕགས་པ་ཕུན་སུམ་ཚོགས་པ་ཞེས་བྱ་བ་ནི་གོང་ནས་གོང་དུ་ཞེས་བྱ་བ་བར་གྱི་ཚིག་མི་མངོན་པར་བྱས་ནས་བསྟན་པ་ཡིན་ནོ། །ཡེ་ཤེས་ཕུན་སུམ་ཚོགས་པ་ལ་སོགས་པ་ནི་ཡོན་ཏན་ཐམས་ཅད་ཕུན་སུམ་ཚོགས་པའི་ཁོངས་སུ་ཡང་འདུས་མོད་ཀྱི་གཙོ་བོར་
བསྟན་པའི་ཕྱིར་ལོགས་ཤིག་ཏུ་བསྟན་ཏོ། །ཕུན་སུམ་ཚོགས་པ་ནི་གུད་ན་ཅི་ཡང་མེད་པའི་ཕྱིར་མིང་རྣམ་པ་བཞིར་མཛད་དེ། ལྷག་པ་ཡང་མེད་ལ་ཉུང་བ་ཡང་མི་ཉུང་ངོ་། །སྤང་བ་ནི་བདུད་ཐམས་ཅད་འཇིག་པ་སྟེ། དེ་ཡང་ལྷའི་བུ་ལ་སོགས་པ་ནི་ཟིལ་གྱིས་གནོན་པའོ། །འདོད་ཆགས་ལ་
སོགས་པ་ནི་བག་ཆགས་དང་བཅས་པ་རྩ་ནས་འདོན་པའོ། །སྔར་ནི་གཟུངས་ཀྱི་མིང་དུ་བསྟན་པར་མཛད་ལ། ད་ནི་ཆོས་ཀྱི་རྣམ་གྲངས་ཀྱི་མིང་དུ་བསྟན་པས་ན་ཟློས་བུར་འགྱུར་བར་དོགས་པར་མི་བྱའོ།    །ད་ནི་ཡི་རངས་པ་བསྟན་ཏེ། ཐུབ་པའི་གསུང་ལས་འཇིག་རྟེན་གྱིས། །དོན་ཆེན་སྐྱེས་
པ་མཐོང་གྱུར་ནས། །སེམས་ནི་རངས་པར་གྱུར་པའི་ཕྱིར། །མཁས་རྣམས་མངོན་པར་བསྟོད་པར་བྱེད། །ཐུབ་པའི་གསུང་ལས་རྐྱེན་རྐྱེན་དུ། །ཁྱད་པར་ཐོབ་པར་གྱུར་ནས་ནི། །ཡིད་ཀྱང་དགའ་བར་གྱུར་པའི་ཕྱིར། །མཁས་པས་ཁ་ཅིག་མངོན་པར་བསྟོད། །བཅོམ་ལྡན་འདས་ཀྱིས་འདི་
བསྟན་པས་ལྷ་དང་མི་རྣམས་ཀྱིས་འཁོར་ལོས་སྒྱུར་བའི་རྒྱལ་སྲིད་ལ་སོགས་པ་དང་། བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་དང་། ཕྱིར་མི་ལྡོག་པའི་ས་དང་། ཕ་རོལ་ཏུ་ཕྱིན་པ་ཡོངས་སུ་རྫོགས་པ་དང་། ཏིང་ངེ་འཛིན་དང་། རྣམ་པར་ཐར་པ་དང་། མངོན་པར་ཤེས་པ་དང་། 
གཟུངས་དང་གཟུངས་ཀྱི་སྒོ་དང་། སོ་སོ་ཡང་དག་པར་རིག་པ་ཐོབ་པ་ལ་སོགས་པ་སྐལ་བ་ཇི་ལྟ་བ་བཞིན་དུ། དངོས་དང་། བརྒྱུད་པའི་སྒོ་ནས་འཇིག་རྟེན་གྱི་དོན་ཆེན་པོ་སྐྱེས་པ་མཐོང་ནས་ཐུབ་པའི་དབང་པོས་གསུངས་པ་ལ། ཤཱ་རིའི་བུ་ལ་སོགས་པ་མཁས་པ་རྣམས་ཡིད་ཡང་དག་

73-1-63a

པར་དགའ་བར་གྱུར་ནས་བསྟན་པ་དེ་ཉིད་ཀྱི་མོད་ལ་མངོན་པར་བསྟོད་དོ། །བཅོམ་ལྡན་འདས་ཀྱིས་བསྟན་པ་འདི་ལྟ་བུར་ཤིན་ཏུ་རྨད་དུ་བྱུང་བ་གང་གིས་ལྷག་པ་མེད་པའི་དོན་འདི་ལྟ་བུ་འཇིག་རྟེན་མ་ལུས་པའི་དོན་བྱེད་ལ། བསྟན་པ་དེས་ཀྱང་དེ་ཉིད་ཀྱི་མོད་ལ། མཁས་པ་ཁ་
ཅིག་རྒྱུ་ཇི་ལྟ་བ་བཞིན་དུ་བྱང་ཆུབ་ཏུ་སེམས་བསྐྱེད་པ་དང་། རབ་ཏུ་དགའ་བ་ལ་སོགས་པའི་ས་ཐོབ་པའི་ཁྱད་པར་སོ་སོ་རང་གིས་རིག་པར་བྱེད་པ་ན་ཡིད་ཡང་དག་པར་དགའ་ནས་མངོན་པར་བསྟོད་དོ། །ཁ་ཅིག་ཅེས་སྨོས་པ་ནི། དོན་ཡོད་མཐོང་བ་ལ་སོགས་པ་བྱང་ཆུབ་སེམས་དཔའ་ཆེན་པོ་
རྣམས་ལ་དེ་མེད་པའི་ཕྱིར་རོ། །གལ་ཏེ་བདག་གིས་ཀྱང་ལྷག་པ་འགའ་ཞིག་ཐོབ་པར་གྱུར་ན་ནི། ཕྱིར་མི་ལྡོག་པའི་ས་ཐོབ་པ་བཞིན་དུ། ཁྱད་པར་དུ་འཕགས་པའི་ཕྱིར། དེ་ཡང་བསྟན་པར་འགྱུར་བ་ཞིག་ན་མ་བསྟན་པས་དེའི་ཕྱིར་ཚོགས་ཡོངས་སུ་རྫོགས་པ་དེ་དག་གིས་ནི་ལྷག་པ་འགའ་
ཡང་ཐོབ་པ་མེད་དེ། འོན་ཀྱང་དེ་དག་དེར་འདུས་པ་ཡང་དོན་མེད་པར་མི་འགྱུར་ལ། བཅོམ་ལྡན་འདས་ཀྱིས་ཆོས་བསྟན་པ་ཡང་དོན་མེད་པར་མི་འགྱུར་ཏེ། ས་ཡོངས་སུ་རྫོགས་པར་བྱ་བ་ལ་སོགས་པའི་ཡོན་ཏན་རྣམས་བརྒྱུད་པའི་ཚུལ་གྱིས་ཡོད་པའི་ཕྱིར་རོ། །འཕགས་པ་ཤཱ་རིའི་བུ་ལ་
སོགས་པ་དག་གི་ནང་ནས་ནི་སྐལ་བ་ཇི་ལྟ་བ་བཞིན་དུ། ཁ་ཅིག་གིས་ནི་ཕྱིར་མི་ལྡོག་པའི་ས་ཐོབ་ལ། ཁ་ཅིག་གིས་ནི་བྱང་ཆུབ་ཏུ་སེམས་བསྐྱེད་དེ། དེ་དག་ནི་བྱང་ཆུབ་ཆེན་པོའི་རིགས་དང་ལྡན་པ་ཉིད་ཡིན་པ་ལས་ཇི་ཞིག་ལྟར་ཉན་ཐོས་ཀྱི་བྱང་ཆུབ་ལ་ཞུགས་ནས་ཉོན་མོངས་པ་སྤང་བར་བྱས་པར་ཟད་
དོ། །བྱང་ཆུབ་ཆེན་པོའི་རིགས་དེ་ཉིད་ལ་བརྟེན་ནས། དེ་དག་ཐམས་ཅད་བཅོམ་ལྡན་འདས་ཀྱིས་འཕགས་པ་དམ་པའི་ཆོས་པདྨ་དཀར་པོའི་མདོ་ལས་ལུང་བསྟན་ཏེ། ཆོས་བཅུ་པའི་མདོ་ལས་ཀྱང་། དེ་བཞིན་དུ་དགོངས་པས་བཤད་པའི་ཕྱིར་རོ། །ཚོང་དཔོན་དང་། དེད་དཔོན་གྱི་དཔེ་ལ་
སོགས་པ་རྣམས་ཀྱང་བྱང་ཆུབ་ཆེན་པོའི་རིགས་དང་ལྡན་པ་དེ་དག་ཉིད་ཀྱི་དབང་དུ་བྱས་པ་ཁོང་དུ་ཆུད་པར་བྱའོ། །ཉོན་མོངས་པའི་བུད་ཤིང་ཐམས་ཅད་མ་ལུས་པར་བསྲེགས་པའི་རྒྱུད་ཅན་ཉན་ཐོས་རྣམས། ཇི་ལྟར་བྱང་ཆུབ་ཆེན་པོའི་ཚོགས་ཡོངས་སུ་རྫོགས་པར་བྱེད་པར་འགྱུར་སྙམ་དུ་

73-1-63b

ཡང་ཡིད་ལ་མི་བྱ་སྟེ། དེའི་དོན་ནི་མདོ་གཞན་ལས་རྣམ་པར་ཕྱེ་བའི་ཕྱིར་རོ། །འདིར་ནི་གཏམ་དེ་ཤིན་ཏུ་རྒྱས་པ་དང་ལྡན་པ་ཡིན་པས། ཡི་གེ་མངས་སུ་དོགས་པའི་ཕྱིར་མ་བཤད་དོ། །ཚེ་དང་ལྡན་པ་ཤཱ་རིའི་བུ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ་ཞེས་བྱ་
བར་སྦྱར་ཏེ། ཉན་ཐོས་ཆེན་པོ་ལ་སོགས་པའི་ཚོགས་རྣམས་དང་། དེ་བཞིན་དུ་སོ་སོར་ཚིག་གི་དོན་བསྟན་པའི་ལུགས་དང་སྦྱར་བར་བྱའོ། །གསལ་ཞིང་དྲི་མེད་ཡོན་ཏན་ལྡན་པ་ཤིན་ཏུ་རབ་ཏུ་གཏིང་དཔག་དཀའ་བས་ཉམས་དགའ་གཟུངས་སྔགས་འདི། །བདག་འདྲ་ཉོན་མོངས་ཤིན་ཏུ་བློ་
ཞན་བཞིན་དུ་བདག་གིས་ཆེ་ལོང་ཆེ་ལོང་རྣམ་པར་ཕྱེ་བ་ཡིས། །བསོད་ནམས་ཕུང་པོ་སྐྱེ་བོ་ཕལ་ཆེན་རྣམས་ལ་སྐྱེ་བའི་མཐུ་ཅན་གང་ཡིན་པ། །དེ་དག་ཐམས་ཅད་ཀྱིས་ནི་འགྲོ་བ་འདི་དག་ཀུན་གྱིས་ཡེ་ཤེས་སྙིང་པོ་རྟག་ཏུ་འཆང་བར་ཤོག །འཕགས་པ་སྒོ་མཐའ་ཡས་པས་བསྒྲུབ་པའི་
གཟུངས་རྒྱ་ཆེར་འགྲེལ་པ་སློབ་དཔོན་ཡེ་ཤེས་སྙིང་པོས་མཛད་པ་རྫོགས་སོ།།      །།རྒྱ་གར་གྱི་མཁན་པོ་པྲ་ཛྙཱ་ཝརྨ་དང་། ཞུ་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པའོ།    །༄༅༅། །རྒྱ་གར་སྐད་དུ། ཏྲི་ས་མ་ཡ་བྱཱུ་ཧ་རཱ་ཛ་ཤ་ཏ་ཨཀྵ་
ར་སཱ་དྷ་ནཾ། བོད་སྐད་དུ། དམ་ཚིག་གསུམ་བཀོད་པའི་རྒྱལ་པོའི་ཡི་གེ་བརྒྱ་པའི་སྒྲུབ་ཐབས། དུས་གསུམ་གྱི་དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །གང་འདིར་ངན་འགྲོའི་རྒྱུན་གཅོད་ཅིང་། །མངོན་མཐོ་དངོས་གྲུབ་ཀུན་འབྱུང་གནས། །སྔོན་བསགས་སྡིག་པ་དག་བྱའི་
ཕྱིར། །བླ་མར་གྱུར་པ་ཀུན་ལ་འདུད། །དེ་ལ་དང་པོ་རྣལ་འབྱོར་པས། །བྱང་ཆུབ་ཏུ་ནི་སེམས་བསྐྱེད་ཅིང་། །བླ་མ་མཉེས་བྱས་རྗེས་གནང་ཐོབ། །མན་ངག་ཇི་བཞིན་རྙེད་པ་དང་། །འཇིག་རྟེན་ཆོས་དག་རྣམ་པར་སྤངས། །སེམས་ཅན་ཀུན་ལ་སྙིང་བརྩེ་བ། །རྟག་ཏུ་བསྒོམ་དང་བཟླས་ལ་དགའ། །
དེ་ནི་རྒྱལ་བས་རྣལ་འབྱོར་གསུངས། །དགོན་པ་ཆེན་པོའི་ས་ཕྱོགས་སམ། །དུར་ཁྲོད་ནགས་ཚལ་མཆོད་རྟེན་དྲུང་། །མེ་ཏོག་འབྲས་བུའི་ཚོགས་ཀྱིས་བརྒྱན། །ཨ་ཤོ་ཀ་ཡི་ཤིང་དྲུང་དུ། །དངོས་གྲུབ་ཐམས་ཅད་བསྡུས་པ་འགྲུབ། །ཡོན་ཏན་ཀུན་ཚང་རྣལ་འབྱོར་པས། །ཡིད་དང་རྗེས་

73-1-64a

མཐུན་ནགས་སུ་ནི། །འཇམ་པའི་སྟན་ལ་ལེགས་འདུག་ནས། །སེམས་དཔའི་སྐྱིལ་མོ་ཀྲུང་བཅས་ཏེ། །ཁྲོ་བོ་འདོད་པའི་རྒྱལ་པོ་ཡི། །སྔགས་ཀྱིས་བགེགས་རྣམས་གཞོམ་པར་བྱ། །ན་མཿས་མནྟ་ཀཱ་ཡ་ཝཱཀ་ཙིཏྟ་བཛྲཱ་ཎནྟ་ཀྲྀ་ཏ་ཧཱུཾ་ཛ་ཤ །དེ་ནས་ཆ་གསུམ་ལ་གོ་རིམས་
བཞིན་དུ་སྔགས་བཟླས་ནས་ལུས་ཀྱི་ཆ་གསུམ་བསྲུང་བར་བྱ་སྟེ། ཨོཾ་བྷུར་སྭཱ་ཧཱ། ཨོཾ་བྷུ་བ་སྭཱ་ཧཱ། ཨོཾ་བྷུརྦྷུ་བ་སྭཱ་ཧཱ། རིགས་ཀྱི་སྙིང་པོ་ལེགས་བཟླས་ཤིང་། །གསར་ཞིང་མ་གྲུགས་ཀུ་ཤ་ཡི། །དག་བྱེད་སོར་ནི་བཅུ་གཉིས་ཆད། །སྲིན་ལག་ལ་ནི་གདགས་པར་བྱ། །ཨོཾ་ཨ་ཛི་ན་ཛིཀ །དམར་
སེར་བ་ཡི་འོ་མ་དང་། །བ་ཡི་ཞོ་དང་བ་མར་དང་། །བ་ཡི་ཆུ་དང་ལྕི་བ་རྣམས། །ཤར་བལྟས་མི་སྨྲ་ཙོག་ཙོག་པོར། །འདུག་སྟེ་སྦྱར་ལ་སྲང་གསུམ་ཙམ། །པ་ལཱ་ཤ་ཡི་འདབ་མས་བཏུང་། །ཨོཾ་བཱཀ་བི་ཤུདྡྷ་ཡེ་སྭཱ་ཧཱ། དེ་ནས་ཆུ་ངོགས་སུ་ཕྱིན་ལ་ལུས་ཐམས་ཅད་དམ་ཡང་ན་ཡན་ལག་ལྔ་
བཀྲུས་ཏེ། ཆུའི་བགེགས་བཟློག་པ་ནི། གཡས་པའི་ཁྱོར་བས་ཆུ་བཅུས་ཏེ། གཡོན་པའི་སྡིགས་མཛུབ་བསྒྲེངས་ལ། ཨོཾ་དུ་པི་ཀཱ་ཡ་དུ་པི་དུ་པི་སྭཱ་ཧཱ། ཞེས་བཟླས་པས་ལུས་ལ་གཏོར་བར་བྱའོ། །ལུས་ཐམས་ཅད་འཁྲུ་བའི་སྔགས་ནི། ཨོཾ་པྲ་ཀྲྀ་ཏི་པ་རི་ཤུདྡྷཿསརྦ་དྷརྨཱཿཔྲ་ཀྲྀ་ཏི་པ་རི་
ཤུདྡྷོ྅ཧཾ། དེ་ནས་ལག་པ་གཡས་པའི་ཁུ་ཚུར་བཅིངས་པའི་མཐེ་བོ་བསྒྲེངས་ནས་མཛུབ་མོ་བཀུག་པས་སྙིང་ག་དང་། ལྐོག་མ་དང་སྤྱི་གཙུག་དང་དཔུང་པ་གཉིས་ཏེ་གནས་ལྔར་གཏུག་ཅིང་ཁྲོ་བོ་གཙང་སྨེ་མེད་པའི་སྔགས་ཀྱིས་བདག་ཉིད་བསྲུང་སྟེ། ཨོཾ་བཛྲ་ཀྲོ་དྷ་ཧཱུཾ་ཛཿ། ལག་པ་གཡས་
པའི་གུང་མོ་དང་སྲིན་ལག་བཀུག་སྟེ། ཨོཾ་ཤུདྡྷེནྟུ་ཤོ་དྷ་ཡ་སྭཱ་ཧཱ། དེ་ནས་སེམས་མ་ཡེངས་པར་བསམ་གཏན་གྱི་ཁང་པར་སོང་སྟེ། བཅོམ་ལྡན་འདས་དམ་ཚིག་གསུམ་བཀོད་པའི་རྒྱལ་པོ་འོག་ནས་འཆད་པ་བཞིན་འཁོར་དང་བཅས་པ་མདུན་གྱི་ནམ་མཁའ་ལ་དམིགས་ཏེ། ཨོཾ་སརྦ་ཏ་
ཐཱ་ག་ཏ་པཱ་ད་བནྡ་ནཾ་ཀ་རོ་མི་ཞེས་པས་ཞབས་ལ་ཕྱག་བྱའོ། །ཨོཾ་པྲ་བ་ར་སཏྐཱ་ར་པྲ་ཏཱིཙྪ་ར་ས་སྭཱ་ཧཱ། ཞེས་པས་ཞབས་བསིལ་དབུལ་བ་དང་། ཇི་ལྟར་རྙེད་པའི་མཆོད་པ་ལྔའམ། མ་རྙེད་ན་ཡང་ཡིད་ཀྱིས་སྤྲུལ་ནས། ཨོཾ་བཛྲ་པུཥྤེ་ཧཱུཾ། ཨོཾ་བཛྲ་གནྡྷེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་ནཻ་བི་དྱེ་ཧཱུཾ། 

73-1-64b

ཨོཾ་བཛྲ་ཨཱ་ལོ་ཀེ་ཧཱུཾ་ཞེས་པས་གོ་རིམས་ཇི་ལྟ་བ་བཞིན་དུ་མཆོད་པ་དབུལ་བ་དང་། སྡིག་པ་བཤགས་པ་ལ་སོགས་པ་བྱ་སྟེ། དབང་མེད་བདག་གིས་སྡིག་པ་བགྱིས་པ་དང་། །བགྱིད་དུ་སྩལ་ལམ་རྗེས་སུ་ཡི་རང་གང་། །དེ་དག་ཐམས་ཅད་བྱང་ཆུབ་མཆོག་གིས་ནི། །སྤྱན་སྔར་ད་ལྟ་མ་ལུས་སོ་སོར་
བཤགས། །བདེ་གཤེགས་སྲས་ཀྱི་ཚོགས་གཉིས་ཟབ་པ་དང་། །རྒྱ་ཆེར་འགྲོ་བ་མ་ལུས་པ་ཡི་དོན། །སྒྲུབ་པ་མཛད་དང་དེ་ལས་གཞན་པ་ལའང་། །བདག་ནི་གུས་པར་རྗེས་སུ་ཡི་རང་ངོ་། །ཐུགས་རྗེས་ཁྱབ་པའི་ཐུགས་དང་ལྡན་གྱུར་ཅིང་། །བློ་གྲོས་སྡིག་བྲལ་གཏི་མུག་ཚོགས་ཀུན་
བཅོམ། །མ་ལུས་རིགས་ཀྱི་པདྨའི་ནང་བཞུགས་པའི། །བདེ་བར་གཤེགས་པ་རྣམས་ལ་སྐྱབས་སུ་མཆི། །བློ་མཆོག་རྣམས་ཀྱི་ཀུན་དགའ་ར་བ་སྟེ། །དམན་པ་འཇིགས་པ་ཉིད་ཀྱི་རྒྱལ་བྱེད་ཚལ། །སྲིད་པའི་རྣལ་འབྱོར་ཟིལ་གྱིས་གནོན་པའི་མཆོག །གསུང་མཆོག་ཆོས་ལ་བདག་
ནི་སྐྱབས་སུ་མཆི། །འདོད་ཆགས་ལ་སོགས་སྦྲུལ་གྱི་དུག་བཅོམ་ཞིང་། །བློ་ལྡན་རྣམ་རྒྱལ་ཐུགས་རྗེ་ཆེར་ལྡན་པའི། །བརྟུལ་ཞུགས་བཟང་པོའི་ཚོགས་ལ་སྐྱབས་སུ་མཆི། །སྲིད་དང་བྲལ་བ་རྣམས་ལ་བདག་ཕྱག་འཚལ། །ཞེས་བརྗོད་ཅིང་དེ་བཞིན་དུ་བྱང་ཆུབ་སེམས་བསྐྱེད་པ་དང་། 
ཆོས་ཀྱི་འཁོར་ལོ་བསྐོར་བའི་ཕྱིར་བསྐུལ་བ་དང་། གསོལ་བ་གདབ་པ་དང་། དགེ་བའི་རྩ་བ་བསྔོ་བས་དེ་ལྟར་ཚོགས་བསགས་ནས་བརྟན་པ་དང་གཡོ་བ་ཐམས་ཅད་སྟོང་པ་ཉིད་དུ་བལྟས་ནས། དེ་བརྟན་པར་བྱེད་པའི་སྔགས་བརྗོད་པར་བྱའོ། །ཨོཾ་སྭ་བྷཱ་བ་ཤུདྡྷཿསརྦ་དྡྷརྨཱཿ སྭ་བྷཱ་བ་
ཤུདྡྷོ྅ཧཾ། དེ་ནས་སྟོང་པའི་ངང་ལས་མཾ་ལྗང་གུ་ལས་བྱུང་བའི་པདྨ་འདབ་མ་བརྒྱད་པ་ལྟེ་བ་དང་ཟེའུ་འབྲུ་ལ་མཾ་གྱིས་མཚན་པ་དང་བཅས་པ་བསམས་ལ། དེའི་སྟེང་དུ་ཨ་ལས་ཟླ་བའི་དཀྱིལ་འཁོར་དེའི་སྟེང་དུ་ཏྲཻཾ་ལས་བྱུང་བའི་བཅོམ་ལྡན་འདས་དམ་ཚིག་གསུམ་བཀོད་པའི་རྒྱལ་པོ་སྐུ་མདོག་
གསེར་བཙོ་མ་ལྟ་བུ། མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་སྤྲས་པ། ཆོས་འཆད་ཀྱི་ཕྱག་རྒྱ་ཅན་དུ་བདག་ཉིད་བསྒོམས་ལ། དེའི་གཡས་ཕྱོགས་སུ་བྱང་ཆུབ་སེམས་དཔའ་རྡོ་རྗེ་འཛིན་སྟོན་ཀའི་འདམ་བུ་ལྟར་སེར་སྐྱ། རྒྱན་ཐམས་ཅད་ཀྱིས་བརྒྱན་པ། 

73-1-65a

ཕྱག་གཉིས་ཀྱིས་རྡོ་རྗེ་བཟུང་ནས་སྙིང་གར་ཐལ་མོ་སྦྱར་བའོ། །གཡོན་དུ་བྱང་ཆུབ་སེམས་དཔའ་རྡོ་རྗེ་འཛིན་ཆེན་པོ་སྐུ་མདོག་སེར་པོ་གཡས་ན་ནོར་བུ་བཟང་པོ་བསྣམས་པ། མཆན་ཁུང་གཡོན་པས་དུང་ངམ་རྡོ་རྗེ་བཟུང་བ། རྒྱན་ཐམས་ཅད་ཀྱིས་སྤྲས་པའོ། །གཡས་ཀྱི་
མདུན་རོལ་དུ་ཁྱེའུ་མཐའ་ཡས་ཁྲོ་བོའི་ཆ་བྱད་ཅན། སྐུ་མདོག་མེ་ཏོག་པ་ལཱ་ཤ་ལྟ་བུ་གཡས་ན་ཤན་པའི་ཟངས་གྲི། གཡོན་ན་ཀ་པཱ་ལ་མེ་ཏོག་གི་ཚོགས་ཀྱིས་བཀང་བ། རྒྱན་ཐམས་ཅད་ཀྱིས་བརྒྱན་པ། སྦྲུལ་དཀར་པོའི་མཆོད་ཕྱིར་ཐོགས་པ་འཆང་བའོ། །གཡོན་གྱི་མདུན་རོལ་དུ་
བུ་མོ་མཐའ་ཡས་ཞི་བའི་ཆ་བྱད་ཅན་སྐུ་མདོག་དཱུར་བའི་མྱུ་གུ་ལྟ་བུ་གཡས་པའི་ཐལ་མོས་རང་གི་གཙོ་བོ་ལ་ཕྱག་འཚལ་བ། གཡོན་པས་པདྨ་ཡུ་བ་དང་བཅས་པ་བསྣམས་པ། རྒྱན་ཐམས་ཅད་ཀྱིས་བརྒྱན་པ་བསམ་པར་བྱའོ། །དེ་ནས་རང་གི་སྙིང་གའི་ཟླ་བའི་སྟེང་དུ་ས་བོན་གྱི་ཡི་གེ་ཏྲཻཾ་
ལས་འོད་ཟེར་ཁ་དོག་ལྔ་པ་ཤིན་ཏུ་གསལ་བ་སྤྲོས་པས་བཅོམ་ལྡན་འདས་འཁོར་དང་བཅས་པ་མདུན་གྱི་ནམ་མཁའ་ལ་སྤྱན་དྲངས་ཏེ། མཆོད་པ་རྣམ་པ་ལྔ་ཕུལ་ནས་དེའི་སྤྱན་སྔར་འཁོར་བ་ཐོག་མ་མེད་པ་ནས་བསགས་པའི་སྒྲིབ་པའི་ཚོགས་དག་པར་བྱ་བའི་ཕྱིར་ལྷའི་སྐུ་སྒྱུ་མ་ལྟ་བུ་
དེ་ཉིད་ལ་དམིགས་ཏེ་བཟླས་བརྗོད་བྱའོ། །བཟླས་རྗོད་བྱེད་པ་མི་མྱུར་མི་དལ་ཞིང་། །ཧ་ཅང་ཆེ་མིན་ཧ་ཅང་ཆུང་བའང་མིན། །སྨྲ་བཞིན་མ་ཡིན་གཞན་དུ་ཡེངས་བཞིན་མིན། །གུག་སྐྱེད་ཀླད་ཀོར་ཚེག་དྲག་ཉམས་པས་མིན། །འཕགས་པའི་ཡི་གེ་བརྒྱ་པ་ཡི། །རྟོག་པའི་
རྒྱལ་པོའི་ཆོ་གར་བཤད། །སྔགས་ཀྱི་མཐུ་ནི་བསམ་མི་ཁྱབ། །མཐུ་ནི་རྣམ་པ་དུ་མ་མཐོང་། །བཟང་སྤྱོད་ཡི་དམ་བཅས་པ་ཡི། །ཆོ་ག་ཡིས་ནི་འདི་བཟླས་ན། །ཐར་པའང་ངེས་པར་སྐྱེད་བྱེད་ན། །འཆི་བ་སླུ་བ་སྨོས་ཅི་དགོས། །ཨོཾ་ན་མ་སྟྲཻ་ཡ་ངྷྭི་ཀཱ་ནཱཾ། སརྦ་ཏ་ཐཱ་ག་ཏཱ་ནཱཾ། སརྦ་ཏྲ་ཨ་པྲ་
ཏི་ཧ་ཏ་པ་བྷི་དྷརྨ་ཏཱ་བ་ལི་ནཱཾ། ཨོཾ་ཨ་ས་མ་ས་མ། ས་མནྟ་ཏོ་ཨ་ནནྟ་ཏྲཱ་པཔྟེ་ཤཱ་ས་ནི་ཧ་ར་ཧ་ར། སྨ་ར་སྨ་ར་ཎ་བི་ག་ཏ་རཱ་ག་ཏ་རཱ་ག །བུདྡྷ་དྷརྨ་ཏེ། ས་ར་ས་ར། ས་མ་བ་ལཱ། ཧ་ས་ཧ་ས། ཏྲཱ་ཡ་ཏྲཱ་ཡ། ག་ག་ན་མ་ཧཱ་བ་ར་ལཀྵ་ཎེ་ཛྭ་ལ་ཛྭ་ལ་ན་སཱ་ག་རེ་སྭ་ཧཱ། བཅོམ་ལྡན་འདས་ཀྱིའོ། །

73-1-65b

ཨོཾ་བཾཾ་བཛྲ་དྷ་རཱ་ཡ་སྭཱ་ཧཱ། ཨོཾ་མཾ་མ་ཧཱ་བཛྲ་དྷ་རོདྡྷ་བ་སྭཱ་ཧཱ། ཨོཾ་ཊཾ་ཊ་ཀི་ཡ་སྭཱ་ཧཱ། ཨོཾ་ནཾ་ནནྡི་ཀ་ཡེ་སྭཱ་ཧཱ། འཁོར་རྣམས་ཀྱི་སྔགས་སོ། །འདིའི་ཆོ་ག་ནི་ཡར་གྱི་ངོ་ཚེས་བརྒྱད་རྒྱུ་སྐར་བཟང་པོ་དང་ལྡན་པའི་ཞག་ནས་བརྩིས་ཏེ། རང་ཉིད་ཁྲུས་དང་བསྲུང་བ་ལ་སོགས་པ་སྔར་སྨོས་པ་བཞིན་
བྱས་ལ། ཙནྡན་དཀར་པོའི་ཆུས་ཉེ་བར་བྱུགས་པའི་མཎྜལ་བྱས་ནས་འདོད་པའི་ལྷ་གྲངས་དང་མཉམ་པའི་མེ་ཏོག་གི་ཚོམ་བུ་ལེགས་པར་བཀོད་ནས། དང་པོར་བསྙེན་པ་བརྩམ་པར་བྱ་སྟེ། དེའི་འོག་ཏུ་ནི་ལས་ལ་སྦྱར་བར་བྱའོ། །དེ་ནས་ཡང་གཙོ་བོ་ལ་འབུམ་བཟླས་ཤིང་འཁོར་རྣམས་
ལ་ཁྲི་བཟླས་པར་བྱ་ཞེས་བསམ་གཏན་གྱི་ཕྱི་མ་ལས་བཤད་དོ། །དེ་ནས་ལས་ལ་སོགས་པ་བཤད་པར་བྱ་སྟེ། ལུས་ཀྱི་ཀུན་ཏུ་སྤྱོད་པ་དང་ལྡན་པའི་སྔགས་པས་གཞན་མི་སྨྲ་བར་རྒྱུ་སྐར་རྒྱལ་གྱི་ཞག་ལ་དཀའ་ཐུབ་ལ་གནས་ཏེ། གཙང་སྦྲའི་སྤྱོད་པས་ཤིང་མྱ་ངན་མེད་ཀྱི་དྲུང་དུ་གདོང་གྱེན་དུ་
ཕྱོགས་པས་སྟོང་ཕྲག་བཅུ་གཉིས་བཟླས་ན་ལས་ཀྱི་སྒྲིབ་པ་ཇི་སྙེད་པ་ཟད་པར་འགྱུར་རོ། །འཆི་ཀར་ཆོ་ག་འདི་ཉིད་བཟླས་ན་བཅོམ་ལྡན་འདས་རྗེ་བཙུན་ཉིད་མདུན་དུ་བྱོན་ནས་ཞལ་མངོན་སུམ་དུ་སྟོན་པར་འགྱུར་རོ། །ཀུན་ཏུ་སྤྱོད་པ་གཙང་མས་མཆོད་རྟེན་གྱི་དྲུང་དུ་སྤོས་དཀར་པོ་བསྲེགས་ནས་མི་སྨྲ་
བར་སྟོང་ཕྲག་བཅུ་བཟླས་ནས། རལ་གྲི་དང་རྐང་མགྱོགས་དང་། རི་ལུ་དང་གནོད་སྦྱིན་མོ་དང་། ལྷ་མ་ཡིན་གྱི་ཕུག་དང་། མིག་སྨན་དང་། གཏེར་དང་། མི་སྣང་བ་རྣམས་གྲུབ་པོ། །ཆུ་ཀླུང་གི་ནང་དུ་མགྲིན་པ་མན་ཆད་ནུབ་པར་ཞུགས་ནས་གཟའ་ཕུར་བུའི་ཞག་ལ་སྟོང་ཕྲག་ཉི་ཤུ་རྩ་
བརྒྱད་བཟླས་ན་ས་འོག་དང་ས་སྟེང་དང་ས་བླ་གསུམ་ལས་རྣམ་པར་རྒྱལ་བར་འགྱུར་རོ། །སྔར་སྨོས་པ་ལྟར་བསྙེན་པ་བྱས་ཏེ། ཕྱིས་སྒྲུབ་པའི་དུས་སུ་འབྱུང་པོའི་ཉིན་ཞག་གི་ནམ་ཕྱེད་ན་བདུད་རྩི་ལྔ་ལ་སྤངས་པའི་པདྨའི་སྐུད་པ་ལས་སྙིང་པོ་བྱས་ལ། ཆུ་སྲིན་གྱི་ཞག་གིས་བཀང་བའི་
ཐོད་པར་མར་མེ་སྦར་བར་བྱའོ། །དེ་ནས་ཐོད་པ་གསུམ་གྱི་སྒྱེད་པོའི་སྟེང་དུ་བཙུགས་ནས། དེ་ནས་ཐོད་པའི་སྟེང་ན་གནས་པའི་སྒྲུབ་པ་པོས་སྔར་སྨོས་པའི་ཆོ་གས་བསྲུང་བར་བྱ་སྟེ། གཙོ་བོའི་སྔགས་བརྒྱ་རྩ་བརྒྱད་བཟླས་པར་བྱའོ། །དེ་ནས་དུ་བ་བླངས་ཏེ་ཐ་མ་ཏོག་ཏུ་ལེགས་པར་

73-1-66a

བཞག་ནས་ཚོན་སྣ་ལྔའི་སྐུད་པས་རྒྱ་གྲམ་དུ་བཅིངས་ཏེ། ཡང་བརྒྱ་རྩ་བརྒྱད་བཟླས་ན་དངོས་གྲུབ་གསུམ་འགྲུབ་པར་འགྱུར་ཏེ། དེ་ཡང་མི་སྣང་བ་ནི་མཆོག་གོ། །སའི་འོག་ན་གནས་པའི་གཏེར་མཐོང་བ་ནི་འབྲིང་ངོ་། །རྒྱལ་པོའི་བུ་མོ་དབང་དུ་བྱེད་པ་ནི་ཐ་མའོ། །དེ་དག་
ཀྱང་རང་གི་མིག་ལ་བསྐུ་བའི་སྦྱོར་བའོ། །སྔ་མ་ལྟར་བསྙེན་པ་བྱས་ལ་བྷྲཱུཾ་ལས་བྱུང་བའི་འཁོར་ལོ་དཀར་པོ་རྩིབས་བརྒྱད་པའི་སྟེང་དུ་དུག་གིས་ཟིན་པ་བཞག་ལ། དུག་གི་གཟི་བརྗིད་སེར་པོ་རྣམས་ཀྱིས་མ་ལུས་པ་ཁྱབ་པ་ལ་འཁོར་ལོ་དཀར་པོ་ཉིད་ཀྱི་འོག་ནས་མནན་ཏེ། དེའི་འོད་ཟེར་གྱི་
ཚོགས་ཀྱིས་འོད་ཟེར་དཀར་པོ་གསལ་བར་བསམ་པ་ནི་དུག་བསལ་བའི་ཆོ་གའོ། །དགོན་པའི་བ་ལང་གི་ལྕི་བའི་སྟོང་ཕྲག་བརྒྱད་བཟླས་ཏེ། དར་སྔོན་པོས་གཏུམས་ནས་ཚོན་སྣ་ལྔའི་སྐུད་པས་བཅིངས་ནས་མཆོད་རྟེན་ཆེན་པོའི་སྲོག་ཤིང་ལ་བཏགས་ནས་ཇི་སྲིད་མ་གྲོལ་བ་དེ་སྲིད་དུ་སེར་བ་བསྲུང་བར་
འགྱུར་རོ། །བག་ཟན་དང་ཙནྡན་དམར་པོའི་ཕྱེ་མ་ལ་ཀླུའི་རྒྱལ་པོ་བ་རུ་ཎའི་གཟུངས་བརྙན་བྱས་ཏེ། ནིམ་པའི་ཁུ་བས་བྱུགས་ལ་དུས་གསུམ་དུ་འབྲས་ཆན་དང་འོ་མ་དང་འབྲས་བུ་གསུམ་གྱི་གཏོར་མ་གཏོར་བཞིན་པས་གཙོ་བོའི་སྔགས་གྱི་སྭཱ་ཧཱ། རྒོང་དུ་ཨོཾ་ནཱ་ག་རཱ་ཛ་བ་རུ་ཎ་ཡེ་ཤཱི་གྷྲཾ་
མུཉྫ་བ་རི་ཤ་ཡ་དཏྟཱཾ་སྭཱ་ཧཱ་ཞེས་ཞག་བདུན་གྱི་བར་དུ་ཉིན་སྟོང་ཕྲག་བཅུ་བཟླས་ནས་གཟུགས་བརྙན་ཀླུའི་མཚོར་བསྐྱལ་ན་ཆར་འབེབས་སོ། །བཅོམ་ལྡན་འདས་ཉིད་ལ་ཕུལ་བའི་མེ་ཏོག་རྙིང་པ་གར་མཁན་གྱི་ཁྱིམ་ནས་བླངས་པའི་མེས་ཁམ་ཕོར་སར་པ་བཀང་བའི་ནང་དུ་བསྲེགས་
ནས་བླ་གབ་མེད་པར་བརྒྱ་རྩ་བརྒྱད་བཟླས་ན་ཚར་འཆད་པར་འགྱུར་རོ། །གྲོ་གའམ་ཆུ་ཤིང་གི་འདབ་མ་ལ་སྔགས་གུར་གུམ་གྱིས་བྲིས་ཏེ། སྐར་མ་མེ་བཞི་ལ་སྟོང་རྩ་བརྒྱད་བཟླས་ནས་མགུལ་དུ་བཏགས་ན་བྱིས་པ་ཆུང་ངུ་བསྲུང་བར་འགྱུར་རོ། །རྨ་བྱའི་སྒྲོའམ་ཐིང་རིལ་གྱི་རྐང་ལ་ལན་
སྟོང་ཕྲག་གསུམ་བཟླས་ནས་སྒོ་ཁང་གི་རྟ་བབས་སམ་སྒོ་སྟེང་དུ་བཙུགས་ནས། དེའི་འོག་ནས་འཛུལ་བའི་སྲོག་ཆགས་ཐམས་ཅད་ལ་ཡམས་ཀྱི་ནད་ཀྱིས་མི་ཚུགས་སོ། །ལས་ཚོགས་གཞན་དག་འདིར་གཞུང་མངས་ཀྱིས་དོགས་ནས་མ་བྲིས་སོ། །ལས་དེ་ཐམས་ཅད་སེམས་

73-1-66b

ཅན་ཐམས་ཅད་ལ་བརྩེ་བ་ནི་ཁ་སྐོང་གི་མན་ངག་གོ། །རྟོག་པའི་རྒྱལ་པོ་ལ་བརྟེན་ནས། །བླ་མའི་མན་ངག་ཇི་བཞིན་དུ། །གོ་རིམས་ཇི་བཞིན་བྲིས་པ་ལས། །མཁས་པ་རྣམས་ཀྱིས་བཟོད་པར་རིགས། སྔོན་དུ་བསྙེན་པ་བྱས་ནས་ནི། །སྔགས་འདི་ཡིས་ནི་ལས་རྣམས་ཀུན། །བརྩོན་
ལྡན་ཐེ་ཚོམ་མེད་པ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །དམ་ཚིག་གསུམ་བཀོད་པའི་རྒྱལ་པོའི་ཡི་གེ་བརྒྱ་པ་སྒྲུབ་པའི་ཐབས་སློབ་དཔོན་ཆེན་པོ་ཀེ་དྷ་ར་ཎ་དྷིས་མཛད་པ་རྫོགས་སོ།།      །།རྒྱ་གར་གྱི་མཁན་པོ་པཎྜི་ཏ་དཔལ་གོ་མི་འཆི་མེད་དང་། བོད་ཀྱི་ལོ་ཙཱ་བ་བློ་ལྡན་ཤེས་
རབ་ཀྱིས་བསྒྱུར་བའོ། །༄༅༅། །རྒྱ་གར་སྐད་དུ། ཨ་པ་རི་མི་ཏཱ་ཡུ་རཾ་སྟོ་ཏྲ། བོད་སྐད་དུ། ཚེ་དཔག་མེད་ལ་བསྟོད་པ། ཆོས་ཀྱི་འཁོར་ལོ་རྒྱ་ཆེན་བསྐོར། །སེམས་ཅན་སྡུག་བསྔལ་མ་ལུས་རྣམས། །སྐད་ཅིག་ཉིད་ལ་སེལ་བྱེད་པའི། །སངས་རྒྱས་ཚེ་དཔག་
ཕྱག་འཚལ་ལོ། །རྡོ་རྗེ་སེམས་དཔའ་ལས་བྱུང་ཞིང་། །ཉེས་པ་ཀུན་ལས་ཁྱོད་གྲོལ་ནས། །རྡོ་རྗེ་ལུས་ཅན་རྡོ་རྗེ་ཅན། །རྡོ་རྗེ་ཚེ་དཔག་ཕྱག་འཚལ་ལོ། །ཇི་ལྟར་ཉོན་མོངས་དྲི་མ་ཡིས། །ཀུན་ནས་གོས་པར་མི་འགྱུར་ཞིང་། །ཐུགས་རྗེས་ཆགས་ཚུལ་སྟོན་མཛད་པ། །པདྨ་ཚེ་དཔག་
ཕྱག་འཚལ་ལོ། །བསམ་པ་དངོས་ཀུན་སྐད་ཅིག་གིས། །རང་འདོད་བཞིན་དུ་ཚིམ་དང་དཔལ། །ཚོགས་ཀྱི་བདག་པོ་ཆེན་པོ་སྟེ། །རིན་ཆེན་ཚེ་དཔག་ཕྱག་འཚལ་ལོ། །འདོད་པའི་དོན་རྣམས་མ་ལུས་པ། །སྐད་ཅིག་ཉིད་ལ་རྫོགས་དང་དཔལ། །བསམ་ཀུན་འཕེལ་བྱེད་དཔག་
བསམ་ཤིང་། །ཕྲིན་ལས་ཚེ་དཔག་ཕྱག་འཚལ་ལོ། །ཉེས་པ་ཀུན་ལས་རྣམ་གྲོལ་བས། །སྣ་ཚོགས་ཡོན་ཏན་རྣམས་ཀྱིས་བརྒྱན། །ཚོགས་ཀྱི་བདག་པོ་ཆེན་པོ་སྟེ། །ཀུན་གཟིགས་ཚེ་དཔག་ཕྱག་འཚལ་ལོ། །སྟོབས་ཆེན་རྣམས་ཀྱིས་རབ་བརྒྱན་ཏེ། །མ་ལུས་མི་མཐུན་ཚོགས་འཇོམས་
པ། །སྟོན་པ་སྲེད་མེད་བུ་ཡི་མཐུ། །ཡོན་ཏན་ཚེ་དཔག་ཕྱག་འཚལ་ལོ། །མེ་ལོང་མཉམ་ཉིད་ལ་སོགས་པ། །ཡེ་ཤེས་མང་པོའི་མཛོད་འཛིན་པ། །རྣམ་པར་རྟོག་པ་མཐའ་དག་སྤངས། །ཡེ་ཤེས་ཚེ་དཔག་ཕྱག་འཚལ་ལོ། །རྣམ་རྟོག་རླུང་གིས་ཁྱོད་མི་གཡོ། །མཐའ་བྲལ་ཏིང་འཛིན་

73-1-67a

ཞི་བ་སྟེ། །བདུད་དང་མུ་སྟེགས་ཚོགས་འཇོམས་པ། །མི་གཡོ་ཚེ་དཔག་ཕྱག་འཚལ་ལོ། །འཁོར་བའི་སེམས་ཅན་ཐམས་ཅད་ཀྱིས། །ཁྱེད་ཀྱི་མཚན་ཙམ་འཛིན་པ་ལ། །ཚེ་དང་ཡེ་ཤེས་རྒྱས་མཛད་པ། །ཚེ་དཔག་མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཛེ་ཏཱ་
རི་དགྲ་ལས་རྣམ་པར་རྒྱལ་བས་མཛད་པའོ། །འདིའི་བརྒྱུད་པ་ནི། ཚེ་དཔག་མེད། གྲུབ་པ་བརྙེས་པའི་སྙིང་པོ་ཞབས། ཛེ་ཏཱ་རི་དགྲ་ལས་རྣམ་པར་རྒྱལ་བ། རྡོ་རྗེ་གདན་པ་ཆེ་ཆུང་གཉིས། བ་རི་ལོ་ཙཱ་བ། མཆིམས་བརྩོན་འགྲུས་སེང་གེ། རྒྱ་ནག་ཕུག་པ། དབུས་པ་སངས་རྒྱས་འབུམ། 
བླ་མ་དགེ་སྡིངས་པ། བླ་མ་བསམ་གཏན་བཟང་པོའོ།།      །།༄༅༅། །རྒྱ་གར་སྐད་དུ། ཨཱརྱ་ཨཱ་ཡུརྫྙཱ་ནཱ་པ་རི་མི་ཏ་སཱ་དྷ་ནཾ། བོད་སྐད་དུ། འཕགས་པ་ཚེ་དང་ཡེ་ཤེས་དཔག་ཏུ་མེད་པའི་སྒྲུབ་ཐབས། འཕགས་པ་ཚེ་དང་ཡེ་ཤེས་དཔག་ཏུ་མེད་པ་ལ་ཕྱག་འཚལ་ལོ། །འཁོར་
བ་སེམས་ཅན་ཐམས་ཅད་ཀྱི། །འཚེ་བ་ལ་ནི་སྲུང་འདོད་པས། །འཕགས་པ་ཚེ་དཔག་མེད་པ་ཡི། །སྒྲུབ་ཐབས་རིམ་པ་བྲི་བར་བྱ། །དབང་དང་དམ་ཚིག་སྡོམ་ལྡན་པས། །དབེན་ཞིང་ཉམས་དགའི་ས་ཕྱོགས་སུ། །མཎྜལ་མཆོད་དང་ཁྲུས་བྱས་ལ། །ལུས་ངག་ཡིད་གསུམ་དག་པ་
ཡིས། །བླ་མ་སངས་རྒྱས་ལ་སོགས་ལ། །སྤྱན་དྲངས་པ་ལ་ཕྱག་མཆོད་ཅིང་། །བསྟོད་པ་ལུས་ངག་དང་བ་ཡིས། །སྡིག་པ་བཤགས་པ་ལ་སོགས་བྱ། །ཚད་མེད་བཞི་བསྒོམ་ཆོས་རྣམས་ཀུན། །སྟོང་པ་ཉིད་དུ་བསྒོམས་བྱས་ལ། །སྔགས་ཀྱི་དོན་ལ་བསྒོམ་པར་བྱ། །ཨོཾ་སྭ་བྷཱ་བ་བི་
ཤུདྡྷཿསརྦ་དྷརྨཱཿསྭ་བྷཱ་བ་བི་ཤུདྡྷོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། སྟོང་པའི་ངང་ལས་པདྨ་དང་། །ཟླ་བའི་སྟེང་དུ་སེམས་ཉིད་ཧྲཱིཿ། །བྱི་རུ་ལྟ་བུར་བསམ་བྱས་ལ། །འོད་ཟེར་འཕྲོ་ཞིང་སླར་འདུས་པས། །འཕགས་པ་རྗེ་བཙུན་ཚེ་དཔག་མེད། །སྐུ་མདོག་དམར་ཞིང་འོད་ཟེར་
འཁྲིགས། །ཞལ་གཅིག་ཕྱག་གཉིས་མཉམ་པར་གཞག །སྐྱིལ་ཀྲུང་གིས་བཞུགས་འཛུམ་བཅས་དང་། །འོད་དཔག་གིས་མཛེས་ཡེ་ཤེས་བསྟིམ། །དབང་བསྐུར་རབ་ཏུ་བརྟན་པར་བྱ། །ཇི་སྲིད་སྐྱོ་བར་མ་གྱུར་པར། །བསྒོམ་པའམ་ཡང་ན་སྔགས་འདི་བཟླས། །མིང་གི་སྔགས་དང་

73-1-67b

སྙིང་པོའི་སྔགས། །མིང་གིས་བསྒྱུར་ན་གཟུངས་ཀྱང་བཟླས། །གཟུངས་ནི་འཆི་མེད་རྔ་སྒྲའོ། །རྗེས་སུ་བདག་ནི་ཚེ་རིང་འགྱུར། །ཡང་ན་སྐད་ཅིག་ལྷར་བསམས་ཏེ། །སྔགས་གསུམ་ཅི་རིགས་བཟླས་པའམ། །བུམ་པ་བདུད་རྩིའི་ཆུ་རྒྱུན་གྱིས། །བདག་ལ་ཡང་ཡང་འཁྲུད་པར་
བསམ། །སླར་ཡང་བསྟོད་ཅིང་གསོལ་བཏབ་པས། །གཏོར་མས་ལྷ་རྣམས་མཆོད་པར་བསམ། །སྲུང་འཁོར་བཅིང་དང་ཚེ་བསྒྲུབ་པས། །འོན་ཀྱང་འཆི་ལྟས་བཟློག་ལ་སོགས། །བླ་མའི་མན་ངག་ཡོད་པར་བྱ། །དེ་ཡི་བསོད་ནམས་མཐུ་ཡིས་ནི། །འཁོར་བའི་འགྲོ་དྲུག་མ་ལུས་
པས། །ཚེ་དཔག་མེད་པའི་སྐུ་ཐོབ་ནས། །གནད་གཅོད་ལ་སོགས་སྡུག་བསྔལ་རྣམས། །ཞི་ནས་བདེ་བ་ཅན་འགྱུར་ཤོག །འཕགས་པ་ཚེ་དང་ཡེ་ཤེས་དཔག་ཏུ་མེད་པའི་སྒྲུབ་ཐབས། སློབ་དཔོན་མཁས་པ་ཛཻ་ཏཱ་རི་དགྲ་ལས་རྣམ་པར་རྒྱལ་བས་མཛད་པ་རྫོགས་སོ།།      །།རྒྱ་གར་
གྱི་པཎྜི་ཏ་འཇམ་པའི་དབྱངས་དང་། ལོ་ཙཱ་བ་ལྕེ་དགའ་བའི་དཔལ་གྱིས་བསྒྱུར་བའོ། །མིང་སྔགས་ནི། ཨོཾ་ཏདྱ་ཐཱ་ཨ་པ་རི་མི་ཏཱ་ཡུརྫྙཱ་ན་ཧྲཱིཿཧཱུཾ་བྷྲཱུཾ་སྭཱ་ཧཱ། ཞེས་པའོ། །༄༅༅། །རྒྱ་གར་སྐད་དུ། ཨ་པ་རི་མི་ཏཱ་ཨཱ་ཡུརྫྙཱ་ན་བི་དྷི་ནཱ་མ། བོད་སྐད་དུ། ཚེ་དང་ཡེ་ཤེས་དཔག་ཏུ་
མེད་པའི་ཆོ་ག་ཞེས་བྱ་བ། བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པ་ལ་ཕྱག་འཚལ་ལོ། །སྔགས་པ་མཚན་ཉིད་ལྡན་པ་ཡིས། །སྒྲུབ་པའི་གནས་རབ་ཉེར་བཟུང་ནས། །ས་ཡི་སྟེགས་བུ་ཆག་ཆག་གདབ། །འཐས་པར་བཅགས་ཏེ་སྤོས་ཀྱིས་བྱུག །ཐིག་གདབ་ཚོན་གྱིས་དཀྱིལ་
འཁོར་བྲི། །འདབ་བརྒྱད་སྒོ་ལ་སོགས་པས་བརྒྱན། །བུམ་པ་དགུ་འམ་གཉིས་ལ་སོགས། །ཚད་ལྡན་ཕྱི་ནང་བཅུད་ཀྱིས་བརྒྱན། །སྟེང་དུ་རྒྱལ་མཚན་གདུགས་ཀྱིས་བརྒྱན། །མཆོད་པ་རྣམ་པ་ལྔས་བརྒྱན་ཏེ། །ཁྱད་པར་ཤར་དུ་འོ་མ་ཡིས། །གཏོར་མ་བྱས་ཏེ་ལྷོ་ཕྱོགས་སུ། །ཉ་ཤའི་
གཏོར་མ་དབུལ་བར་བྱ། །ནུབ་ཏུ་ཁྲག་ལ་བྱང་དུ་ཆང་། །བྱིན་གྱིས་བརླབས་ཏེ་གཞག་པར་བྱ། །ལྷོ་དང་བྱང་དུ་སྟེགས་བུ་ལ། །ཚེ་དཔག་མེད་པའི་མདོ་གཉིས་བཞུགས། །དེ་ནས་རྣལ་འབྱོར་ཁྲུས་བྱས་ཏེ། །བདེ་བའི་སྟན་ལ་ཉེར་འདུག་སྟེ། །བླ་མ་སངས་རྒྱས་མདུན་བྱས་ལ། །ཕྱག་

73-1-68a

འཚལ་སྐྱབས་འགྲོ་སྔིག་བཤགས་བྱ། །བསྔོ་དང་ཚད་མེད་བཞི་བསྒོམས་ལ། །སྟོང་པ་ཉིད་དུ་བསྒོམ་པར་བྱ། །དེ་ནས་སྣང་བ་བྷྲཱུཾ་བསམས་ཏེ། །གྱུར་པས་གཞལ་ཡས་ཁང་བསམ་བྱ། །དེ་ནས་པདྨའི་སྟེང་དག་ཏུ། །ཡི་གེ་ཧྲཱིཿལས་བྱུང་བ་ཡི། །སངས་རྒྱས་ཚེ་དཔག་མེད་
པ་ནི། །སྐུ་མདོག་དམར་པོ་ཞི་བའི་ཞལ། །མཉམ་བཞག་ཕྱག་ན་བུམ་པས་མཚན། །བདག་ཉིད་ལྷ་དེར་བསྐྱེད་པར་བྱ། །ཡེ་ཤེས་བསྟིམས་ལ་དབང་བྱིན་བརླབས། །ཐུགས་ཀའི་ཧྲཱིཿལས་འོད་འཕྲོས་ཏེ། །སེམས་ཅན་སངས་རྒྱས་ཀུན་སྦྱང་བྱ། །དེ་ནས་ཟླ་སྟེང་ཧྲཱིཿདམར་ལས། །གསང་
སྔགས་འདི་ཡིས་བསྐོར་བར་བསམ། ཨོཾ་ན་མོ་བྷྲཱུཾ་ཨཱ་ཡུརྫྙཱ་ན་ཧྲཱིཿཨ་རོ་ལྀ་ཀ་ཧཱུཾ་ཧྲཱིཿ། ཞེས་དཀར་པོར་བསམ་པར་བྱ། །ཡང་ན་གཟུངས་ཀྱི་སྔགས་རིངས་བསམ། །དེ་ནས་དཀྱིལ་འཁོར་བསྒྲུབ་པར་བྱ། །སྟོང་པའི་ངང་ལས་བྷྲཱུཾ་བསམས་ཏེ། །དེ་ནས་གཞལ་ཡས་ཁང་པ་བསམ། །དེ་ནས་
པདྨ་ཉི་མའི་སྟེང་། །སངས་རྒྱས་ཚེ་དཔག་མེད་པ་བསམ། །ཤར་དུ་རྡོ་རྗེ་ཚེ་དཔག་མེད། །ནུབ་ཏུ་པདྨ་ཚེ་དཔག་མེད། །ལྷོ་ན་རིན་ཆེན་ཚེ་དཔག་མེད། །བྱང་དུ་ལས་ཀྱི་ཚེ་དཔག་མེད། །བྱང་ཤར་ཀུན་གཟིགས་ཚེ་དཔག་མེད། །ཤར་ལྷོར་ཡོན་ཏན་ཚེ་དཔག་མེད། །ལྷོ་ནུབ་ཡེ་ཤེས་ཚེ་
དཔག་མེད། །ནུབ་བྱང་མི་གཡོ་ཚེ་དཔག་མེད། །ཐམས་ཅད་ཁ་དོག་དམར་བ་ལ། །ཞི་ཞལ་མཉམ་པར་བཞག་པའི་ཕྱག །བུམ་པས་མཚན་ཏེ་བསམ་པར་བྱ། །ཡེ་ཤེས་བསྟིམས་ལ་དབང་བྱིན་བརླབས། །དེ་ནས་བུམ་པ་གཞལ་ཡས་ཁང་། །ལྷག་པའི་ཚེ་དཔག་མེད་པ་བསམ། །
སྙིང་གར་སྔགས་རིངས་བཀོད་ལ་བཟླས། །ཡང་ན་སྙིང་པོ་བཀོད་ལ་བཟླས། །དེ་ནས་ཁམ་ཕོར་གསར་པའི་ནང་། །ནད་པ་ལ་སོགས་ལུས་བཀྲུས་ཏེ། །ཆུ་ཡིས་བཀང་སྟེ་ཤར་དུ་གཞག །དེ་ལ་ཁྲོ་བོའི་སྔགས་བཟླས་ལ། །ཚ་ཚ་རྙིང་པ་ས་ནག་དང་། །བསྲེས་ལ་འཆི་བདག་ཆེན་པོའི་
གཟུགས། །ཁྲུ་གང་ལ་སོགས་ཚད་ལྡན་བྱ། །དེ་ནི་ཁ་བུབ་སྟེང་དུ་ནི། །བལ་དང་རས་སམ་དར་ནག་དགབ། །ལྷོ་ཡི་ཕྱོགས་སུ་བསྟན་ལ་བཞག །དེ་དང་ཉེ་བར་དར་དམར་ལ། །གཟུངས་ཀྱི་ཚིག་རྣམས་བྲི་བའམ། །ཡང་ན་ཁྲོ་བོའི་སྔགས་བྲིས་གཟུགས། །བྱང་དུ་ནད་པའི་གོས་

73-1-68b

དག་ལ། །བལ་ཚོན་སྣ་ལྔའི་སྲད་བུས་དཀྲིས། །ཀུ་ཤའི་སྟེང་དུ་གཞག་པར་བྱ། །དེ་ནས་སློབ་དཔོན་བསྲུང་བྱ་སྟེ། །མཆོད་དང་གཏོར་མ་དབུལ་བར་བྱ། །སློབ་དཔོན་བསྙེན་པ་ལ་ཞུགས་ནས། །ཕྲེང་བ་འཁོར་ཚུལ་བཟླས་པ་བརྩམ། །བསྒྲུབ་བྱ་བུམ་པའི་ནང་དུ་བསམ། །སློབ་མ་གཅིག་
གིས་ལྷོར་འདུག་ལ། །ཚེ་དཔག་མེད་པའི་གཟུངས་བཀླག་ཅིང་། །ཚར་རེ་ཞིང་ཡང་མེ་ཏོག་ནི། །ནག་པོ་འཆི་བདག་སྟེང་དུ་དོར། །དེ་ལྟར་བརྒྱའམ་ཉི་ཤུ་སོགས། །རྒྱས་བསྡུས་ཅི་རིགས་སྦྱར་བར་བྱ། །གཅིག་གིས་བྱང་དུ་སྙིང་པོ་བཀླག །ཚར་རེ་ཞིང་ནི་ཚོན་སྐུད་ལ། །ཉ་ཡི་བདུག་སྤོས་
རེ་རེ་དབུལ། །དེ་ཡི་གྲངས་ཀྱང་གོང་དང་འདྲ། །དེ་ནས་སློབ་དཔོན་གཏོར་མ་ཀུན། །སྤྱི་གཞུང་དག་གིས་བྱིན་བརླབས་ནས། །རང་རང་གནས་སུ་དབུལ་བར་བྱ། །དེ་རྗེས་ནད་པ་མདུན་བྱས་ཏེ། །འབྲང་རྒྱས་ཕྱེད་ལ་མར་བྱུགས་ཏེ། །དཔལ་ཕྲེང་ལྔ་ཡི་ཕུད་གཟུགས་བྱ། །མར་མེ་གཏམས་
ལ་འཆི་བདག་དང་། །ལྷོ་ཕྱོགས་དག་ཏུ་དོར་བར་བྱ། །ཆུ་དང་འོ་མ་བསྲེས་པའི་ནང་། །ཚོན་སྐུད་ནད་པ་ལ་དཀྲིས་ཏེ། །སྙིང་པོའི་སྔགས་ཀྱིས་མཚོན་གྱིས་ནི། །བཅད་ལ་བྱང་གི་ཕྱོགས་སུ་དོར། །དེ་ནས་སློབ་དཔོན་ཁྲུས་བྱས་ལ། །སྟན་བཟང་དག་ལ་ཉེར་འདུག་སྟེ། །བུམ་པ་རིམ་པས་དབང་
བསྐུར་བྱ། །ཨོཾ་བཻ་རོ་ཙ་ན་ཨཱ་ཡུརྫྙཱ་ན་སིདྡྷི་ས་མ་ཡ་ཨ་བྷི་ཥིཉྩ་ཧཱུཾ། དབུས་ཀྱི་གཙོ་བོའི་དབང་བསྐུར་བས། །སྡིག་སྒྲིབ་དག་སྟེ་ཚེ་འཕེལ་བསམ། །ལུས་ལ་རྣམ་སྣང་ཚེ་དབང་བསྐུར། །བུ་ཁྱོད་འཆི་བདག་ལས་གྲོལ་ནས། །བསྐལ་པ་སྟོང་དུ་ཚེ་འཕེལ་ཏེ། །སྲོག་གཅོད་སྡིག་པ་དག་གྱུར་ཅིག །ཅེས་
བྱ་ཡང་ན་གཟུངས་ཀྱི་ནི། །ཕར་ཕྱིན་དྲུག་གི་ཚིགས་བཅད་བརྗོད། །ཤར་ལ་སོགས་པའི་རིམ་པ་ཡིས། །རྡོ་རྗེ་ལ་སོགས་མིང་བསྒྱུར་ཏེ། །བུམ་པ་ལྔ་ཡིས་དབང་བསྐུར་བྱ། །མཚམས་ཀྱི་བུམ་པ་ཀུན་གྱི་ཆུ། །ལས་བུམ་ནང་དུ་བསྡུ་བྱ་སྟེ། །ནད་པ་ལ་སོགས་བཀྲུ་བར་བྱ། །དེ་ནས་ཆུ་དེ་མ་བོ་
བར། །ཆུ་བོ་ཆེའམ་ལྟེང་ཀ་མཚོ། །ཆུ་ཆེན་རྣམས་ལ་དོར་གྱུར་ན། །ངེས་པར་འཆི་ལས་བཟློག་པ་ཡིན། །དེ་རྗེས་སློབ་མས་བླ་མ་ལ། །ཡོན་དབུལ་སྡོམ་པ་ཁས་བླངས་ཏེ། །བླ་མས་སློབ་མའི་སྤྱི་བོར་ནི། །རྡོ་རྗེ་ངེས་གཟུང་ཚིག་འདི་བརྗོད། །ད་ནི་ཡེ་ཤེས་ཚེ་དཔག་མེད། །ཀུན་ཏུ་བརྙས་པ་སྤང་

73-1-69a

བར་གྱིས། །འཆི་བདག་ཆེན་པོ་ངས་བཅོམ་པས། །བུ་ཁྱོད་ཚེ་ཡི་དངོས་གྲུབ་བརྙེས། །དེ་སྐད་བྱ་སྟེ་སློབ་མ་ནི། །ཐ་མལ་ལུས་སུ་བསམས་པ་ལ། །སྙིང་གི་པདྨའི་རྩ་བ་ལ། །དབུ་མར་རྣམ་སྣང་ཚེ་དཔག་མེད། །ཕྱོགས་བཞིར་རིགས་བཞི་བསམ་བྱ་སྟེ། །སྤྱི་བོར་ཡེ་ཤེས་
ཚེ་དཔག་མེད། །བསམས་པས་བདག་གི་ཐུགས་ཀ་ནས། །བསྐུལ་བས་བདུད་རྩི་ཆུ་རྒྱུན་དབབ། །རིགས་ལྔ་སྤྱི་བོར་སླེབས་གྱུར་ཏེ། །ཐམས་ཅད་བདུད་རྩིར་ཞུ་གྱུར་ནས། །ལུས་ནང་ཐམས་ཅད་ཁྱབ་པར་བསམ། །ཚེ་དཔག་མེད་པའི་གཟུངས་ཀྱང་འདོན། །དེ་ལྟར་ལན་གཉིས་ལན་གསུམ་བྱ། །
དེ་ནས་མཆོད་པ་གཤེགས་པར་བྱ། །མཇུག་ཏུ་ཚ་ཚ་ཅུང་ཟད་གདབ། །ས་ཚོན་ལ་སོགས་ཆུར་དོར་ཏེ། །ཉེ་བར་འཁོར་བས་འཆི་བདག་གཞོམ། །ཚེ་དཔག་མེད་པའི་གཟུངས་ཀྱང་འདོན། །སློབ་དཔོན་ཛཻ་ཏཱ་རི་དགྲ་ལས་རྣམ་པར་རྒྱལ་བས། བྲམ་ཟེ་ནམ་མཁའི་དབྱིངས་ཀྱི་བུའི་ཆེད་དུ་མཛད་པ་
རྫོགས་སོ།།      །།རྒྱ་གར་གྱི་མཁན་པོ་ཤྲཱི་མཉྫུ་དང་། ལོ་ཙཱ་བ་ལྕེ་དགའ་བའི་དཔལ་གྱིས་བསྒྱུར་བའོ།།      །།༄༅༅། །རྒྱ་གར་སྐད་དུ། མཉྫུ་ཤྲཱི་བཛྲ་པྲཛྙཱ་བརྡྷ་ན་ནཱ་མ། བོད་སྐད་དུ། འཇམ་དཔལ་རྡོ་རྗེ་བློ་གྲོས་འཕེལ་བ་ཞེས་བྱ་བ། བཅོམ་ལྡན་འདས་འཇམ་པའི་མགོན་
ལ་ཕྱག་འཚལ་ལོ། །ཤེས་རབ་འཕེལ་བར་འདོད་པས་གནས་ཁང་དབེན་ཞིང་ཉམས་དགའ་བར་གཙང་བ་དྲི་ཞིམ་པོའི་ཆུས་ཆག་ཆག་བཏབ་ལ། མཎྜལ་ཁྲུ་གང་བ་ཅིག་བྱས་ཏེ། དེའི་དབུས་སུ་པདྨ་འདབ་མ་བརྒྱད་པ་སེར་པོ་དབུས་དཀར་པོར་བྱས་ལ། དེའི་སྟེང་དུ་ལྷུང་བཟེད་དུ་ཤེས་
རབ་འཕེལ་བར་བྱེད་པའི་རྫས། དབང་པོ་ལག་པ། གླ་རྩི། གི་ཝང་། སྤང་རྒྱན་དཀར་པོ། ཙནྡན་དཀར་པོ་རྣམས་བ་དམར་པོའི་འོ་མས་སྦྲུས་ཏེ། རིལ་བུ་སྲན་མ་ཙམ་བྱའོ། །དེའི་སྟེང་དུ་འཇམ་དཔལ་དང་དབྱངས་ཅན་མ་གཉིས་ཞལ་སྦྱོར་གྱི་ཙཀ་ལི་ཅིག་བཞུགས་པར་བྱའོ། །དེ་ནས་ཨོཾ་སྭ་བྷཱ་བ་བི་ཤུདྡྡྷཿ
སརྦ་དྷརྨཱཿསྭ་བྷཱ་བ་བི་ཤུདྡྷོ྅ཧཾ་གི་སྔགས་ཀྱིས་ཆོས་ཐམས་ཅད་སྟོང་པ་ཉིད་དུ་བསྒོམ་པར་བྱའོ། །དེའི་ངང་ལས་པདྨ་དམར་པོ་འདབ་མ་བརྒྱད་པ་ཅིག་བསམ། དེའི་སྟེང་དུ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་དྷཱིཿསེར་པོ་གུར་གུམ་གྱི་མདོག་ཅན་ཅིག་བསམ། དེ་ཡོངས་སུ་གྱུར་པ་ལས་བདག་

73-1-69b

ཉིད་འཕགས་པ་འཇམ་དཔལ་སྐུ་མདོག་དམར་པོ་ཕྱག་གཡས་ན་ཤེས་རབ་ཀྱི་རལ་གྲི་གཡོན་ན་ཤེས་རབ་ཀྱི་པུསྟི་བསྣམས་པ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། ཞལ་འཛུམ་བག་དང་ལྡན་པ་བསྒོམ་པར་བྱའོ། །མདུན་གྱི་ལྷུང་བཟེད་ཀྱི་ནང་དུ་ཧྲཱིཿདཀར་པོ་ཡོངས་སུ་གྱུར་པ་ལས་
པདྨ་དང་ཟླ་བའི་སྟེང་དུ། དབྱངས་ཅན་མ་དཀར་མོ་གཡས་ན་རལ་གྲི་གཡོན་ན་པུསྟི་བསྣམས་པ། རིན་པོ་ཆེའི་རྒྱན་དང་བཅས་པ་ཞལ་འཛུམ་བག་དང་ལྡན་པ་དག་བསྒོམ་པར་བྱའོ། །དེ་ནས་ས་བོན་གཉིས་ལས་འོད་འཕྲོས་པས་རང་བཞིན་གྱི་གནས་ནས། ཡེ་ཤེས་སེམས་དཔའ་
སྤྱན་དྲངས་ནས་སོ་སོར་བསྟིམ་མོ། །ཡང་འོད་ཟེར་འཕྲོས་པས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཤེས་རབ་དང་མཐུ་དང་ནུས་པ་ཐམས་ཅད་བསྡུས་ནས་རང་དང་རྫས་ལ་བསྟིམ་པར་བྱའོ། །དེ་ནས་བཟླས་པ་བྱ་སྟེ། ན་མོ་མཉྫུ་ཤྲཱི་བཱ་གཱི་ཤྭ་རི་མུཾ། བཱ་གཱི་ཤྭ་རི་ཧོཿ། ཨུ་
པ་དེ་ཤ་པྲ་མོ་ད་ཏ་དྷ་བ་ནི་ཧྲཱིཿསྭཱ་ཧཱ། སྔགས་ཀྱི་འོད་ཟེར་བདག་གི་ཞལ་ནས་ལྷ་མོའི་ཞལ་དུ། ལྷ་མོའི་ཞལ་ནས་བདག་གི་ཐུགས་ཀར་ཐིམ་པར་བསྒོམ། དེ་ལས་འོད་ཟེར་འཕྲོས་པས་སེམས་ཅན་ཐམས་ཅད་ཀྱི་དོན་དུ་ཤེས་རབ་ཀྱི་མི་མཐུན་པའི་ཕྱོགས། གཏི་མུག་ལ་སོགས་པ་ཐམས་
ཅད་བསལ་བར་བསྒོམ། འཇིག་རྟེན་དྲག་བྱེད་ཀྱི་པྲཛྙཱ་ཐམས་ཅད་བསྡུས་པར་བསྒོམ། སྨན་གྱི་རི་ལུ་དང་བདག་ལ་ཐིམ་པས་ཇི་ལྟར་འདོད་པའི་མཚན་ཉིད་ལ་སོགས་པའི་དངོས་གྲུབ་ཐམས་ཅད་ཐོབ་པར་བསྒོམ་མོ། །འདིའི་ཕན་ཡོན་ནི་ཉིན་གཅིག་བསྒྲུབས་ན་ཉིན་གཅིག་
ཚིགས་སུ་བཅད་པ་སྟོང་ཟིན་པར་འགྱུར་རོ། །ཉི་མ་གཉིས་བསྒྲུབས་ན་བསྟན་བཅོས་ཐམས་ཅད་ལ་མཁས་པར་འགྱུར་རོ། །ཉི་མ་གསུམ་བསྒྲུབས་ན་སྐྱེ་བ་དྲན་པར་འགྱུར་རོ། །ཉི་མ་བཞི་ཡིས་སངས་རྒྱས་དང་པྲ་ཛྙཱ་མཉམ་པར་འགྱུར་རོ། །ལྔ་ཡིས་མ་བསླབས་པའི་ཆོས་ལ་མཁས་
པར་འགྱུར་རོ། །དྲུག་གིས་འཇམ་དཔལ་གྱི་ཞལ་མཐོང་བར་འགྱུར་རོ། །བདུན་གྱིས་གཞན་གྱི་སེམས་ཤེས་པར་འགྱུར་རོ། །སྒྲུབ་པའི་ཚད་ཞག་བདུན་དུ་བྱའོ། །རྟགས་ནི་འོད་དང་སྒྲ་ལ་སོགས་པ་འབྱུང་ངོ་། །ཞག་བརྒྱད་ན་དཀྱིལ་འཁོར་གྱི་ལྷ་རང་དང་རི་ལུ་ལ་བསྟིམ་རིལ་

73-1-70a

བུ་དེ་སྒྲུབ་པ་པོས་ཟོས་པས། འཇམ་པའི་དབྱངས་དང་ཤེས་རབ་མཉམ་པར་འགྱུར་རོ། །ཐུན་མོང་ཚེའི་དངོས་གྲུབ་ཀྱང་འཐོབ་སྟེ། དེ་ལྟར་ཡང་། འདི་ཟོས་ཡོན་ཏན་བསམ་མི་ཁྱབ། །ལོ་བརྒྱ་ཐུབ་པ་བརྒྱད་བརྒྱར་འགྲོ། །དགུ་བཅུ་ལོན་པ་བཅུ་དྲུག་ལྟ་བུ་འགྱུར། །
སྐྲ་དཀར་བུད་ནས་ནག་པོར་འགྱུར། །བང་ནི་རྟ་དང་མཉམ་པར་འགྱུར། །སྐྲ་ནི་མེ་ཏོག་པདྨ་འདྲ། །ལུས་ནི་དཀར་ལ་སྦོམ་པར་འགྱུར། །ཉམས་སྟོབས་ལུས་ཟུངས་འཕེལ་བར་འགྱུར། །ལྷ་འདྲེ་རྣམས་ཀྱང་སྟོང་གྲོགས་བྱེད། །ཡོན་ཏན་སྨོན་འཇུག་སེམས་དང་ལྡན། །སེམས་བསྐྱེད་དེ་དང་
ལྡན་པ་ཡི། །སྐྱེས་བུ་དེ་ནི་དམ་པ་ཡིན། །ཡོན་ཏན་དེ་དང་ལྡན་ཞེས་སྨྲ། །འཇམ་དཔལ་རྡོ་རྗེ་བློ་གྲོས་འཕེལ་བ་ཞེས་བྱ་བ་ཀུན་གྱི་ཐུན་མོང་མ་ཡིན་པ་སློབ་དཔོན་ཀླུ་སྒྲུབ་ཞབས་ཀྱིས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། སིད་དྷཻ་ཀ་བཱི་ར་མཉྫུ་གྷོ་ཥ་སཱ་དྷ་ནཾ། བོད་སྐད་དུ། 
འཇམ་པའི་དབྱངས་དཔའ་བོ་གཅིག་ཏུ་གྲུབ་པའི་སྒྲུབ་ཐབས། འཇམ་པའི་དབྱངས་དཔའ་བོ་གཅིག་ཏུ་གྲུབ་པ་ལ་ཕྱག་འཚལ་ལོ། །དེ་ལ་དང་པོར་སྔགས་པས་གདོང་བ་བཀྲུ་བ་ལ་སོགས་པ་བྱ་སྟེ་ཡིད་དང་མཐུན་པའི་བསམ་གཏན་གྱི་གནས་གཙང་ཞིང་། མེ་ཏོག་དྲི་ཞིམ་པོས་གཅལ་དུ་བཀྲམ་
པར། སྟན་གཙང་ལ་བདེ་བར་སྐྱིལ་མོ་ཀྲུང་གིས་འདུག་སྟེ། འབྱུང་པོ་ཐམས་ཅད་པའི་གཏོར་མའི་སྔགས་ཀྱིས་གཏོར་མ་བྱིན་གྱིས་བརླབས་ལ། ཨོཾ་ཨཱཿབིགྷྣཱནྟ་ཀྲྀཏ་ཧཱུཾ་ཕཊ་ཅེས་བྱ་བའི་སྔགས་ལན་བཅུའི་བར་དུ་བརྗོད་དེ་ཕྱོགས་བཅུ་ན་གནས་པའི་བགེགས་ཐམས་ཅད་བསྐྲད་པར་བྱའོ། །དེ་ནས་
རང་གི་སྙིང་གར་ཨ་ཆོས་ཐམས་ཅད་ཆོས་ཀྱི་དབྱིངས་ཀྱི་རང་བཞིན་སྐྱེ་བ་མེད་པར་སྟོན་པར་བྱེད་པ། སྟོན་ཀའི་ཟླ་བ་ལྟར་དཀར་བ། འོད་ཟེར་དཀར་པོ་འཕྲོས་པས་རང་གི་ལུས་གསལ་བར་བྱེད་པ་ཤིན་ཏུ་ཕྲ་བ་བསམས་ལ། དེ་ཡོངས་སུ་གྱུར་པས་འོད་ཟེར་དཀར་པོའི་ཐིག་ལེ་ཤེལ་སྒོང་དག་
པ་ལྟ་བུ། དེ་རིམ་གྱིས་འཕེལ་བར་གྱུར་པས་ཟླ་བའི་དཀྱིལ་འཁོར་གྱི་གཟུགས་སུ་བསམ་ཞིང་། དེའི་སྟེང་དུ་ཡི་གེ་དྷཱིཿདེའི་འོད་ཟེར་གྱི་ཚོགས་འཕྲོ་བ་རིན་པོ་ཆེའི་སྒྲོན་མ་ལྟར་དཀར་བ་རྣམ་པར་བསམ་མོ། །དེ་ནས་ཡི་གེ་དྷཱིཿདེའི་འོད་ཟེར་ཤིན་ཏུ་དཀར་བའི་ཚོགས་ཀྱིས་འཇིག་རྟེན་གྱི་ཁམས་

73-1-70b

ཐམས་ཅད་གསལ་བར་བྱས་པ་སྔོན་དུ་འགྲོ་བས་འཕགས་པ་འཇམ་དཔལ་ལ་སོགས་པ་སངས་རྒྱས་དང་བྱང་ཆུབ་སེམས་དཔའ་དང་། བླ་མ་རྣམས་བསྐུལ་ཏེ་སྤྱན་དྲངས་ལ་མདུན་གྱི་ནམ་མཁའི་ཕྱོགས་ལ་རྣམ་པར་བསམས་ལ་ཕྱག་བྱའོ། །དེའི་འོག་ཏུ་ཡིད་ཀྱིས་རང་བཞིན་གྱི་མཆོད་པས་
མཆོད་པར་བྱ་བ་ཡིན་ལ། དེ་ལ་མཆོད་པའི་ཆོ་གའི་རིམ་པ་ནི་འདི་ཡིན་ཏེ། ཨོཾ་བཛྲ་པུཥྤེ་ཧཱུཾ་ཞེས་བྱ་བའི་སྔགས་བརྗོད་ལ། ཡི་གེ་དྷཱིཿལས་བྱུང་བའི་མེ་ཏོག་གི་མཆོད་པའི་ཚོགས་ཀྱིས་མཆོད་པར་བྱའོ། །དེ་ནས་ཨོཾ་བཛྲ་དྷཱུ་པེ་ཧཱུཾ་ཞེས་བྱ་བའི་སྔགས་བརྗོད་ལ། ཡི་གེ་དྷཱིཿདེ་ཉིད་ལས་ཡང་དག་
པར་སྤྲོས་པའི་བདུག་པའི་མཆོད་པའི་ཚོགས་ཀྱིས་མཆོད་པར་བྱའོ། །དེའི་འོག་ཏུ་ཨོཾ་བཛྲ་དཱི་པེ་ཧཱུཾ་ཞེས་བྱ་བའི་སྔགས་བརྗོད་ལ། ཡི་གེ་དྷཱིཿདེ་ཉིད་ལས་རིན་པོ་ཆེའི་སྒྲོན་མ་སྤྲོས་ལ་མཆོད་པར་བྱའོ། །དེ་ནས་ཨོཾ་བཛྲ་གནྡྷེ་ཧཱུཾ་ཞེས་བྱ་བའི་སྔགས་བརྗོད་ལ། ཡི་གེ་དྷཱིཿདེ་ཉིད་ལས་བྱུང་བའི་དྲིའི་མཆོད་
པའི་སྤྲིན་ཡང་དག་པར་སྤྲོས་པས་མཆོད་པར་བྱའོ། །དེ་ནས་ཨོཾ་བཛྲ་ནཻ་བི་དྱེ་ཧཱུཾ་ཞེས་བྱ་བའི་སྔགས་བརྗོད་པས། ཡི་གེ་དྷཱིཿདེ་ཉིད་ལས་རིན་པོ་ཆེ་སྣ་ཚོགས་ཀྱི་སྣོད་དུ་བཅུག་པའི་ཞལ་ཟས་རོ་མཆོག་དང་ལྡན་པའི་མཆོད་པའི་སྤྲིན་རྣམ་པ་སྣ་ཚོགས་ཡང་དག་པར་སྤྲོས་པས་མཆོད་པར་བྱའོ། །དེ་
ནས་ཨོཾ་སརྦ་བི་ཤིཥྚ་བུ་ཛ་མེ་གྷ་པྲ་ས་ར་ས་མུ་དྲ་ཨཱ་ཧཱུཾ་ཞེས་བྱ་བའི་སྔགས་བརྗོད་ལ། དེ་ཉིད་ལས་རིན་པོ་ཆེ་སྣ་ཚོགས་ཀྱི་གདུགས་དང་། རྒྱལ་མཚན་དང་། དྲིལ་བུ་དང་། བ་དན་དང་། བླ་རེ་ལ་སོགས་པ་དང་། འཁོར་ལོས་སྒྱུར་བའི་རིན་པོ་ཆེ་སྣ་བདུན་གྱིས་མཆོད་པར་བྱའོ། །དེ་ལྟར་
མཆོད་པ་བྱས་ནས་དེ་དག་གི་སྤྱན་སྔར་སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་གསོལ་བ་གདབ་པ་དང་། བསྐུལ་བ་དང་། བསོད་ནམས་ཡོངས་སུ་བསྔོ་བ་དང་། གསུམ་ལ་སྐྱབས་སུ་འགྲོ་བ་བྱས་ལ། བྱམས་པ་དང་། སྙིང་རྗེ་དང་། དགའ་བ་དང་། བཏང་
སྙོམས་ཏེ་ཚངས་པའི་གནས་བཞི་བསྒོམས་ནས་བྱང་ཆུབ་ཀྱི་སེམས་བརྟན་པར་བྱའོ། །དེ་ནས་ཨོཾ་སྭ་བྷཱ་བ་བི་ཤུ་དྡྷཿསརྦ་དྷརྨཱཿསྭ་བྷཱ་ཝ་བི་ཤུདྡྷོ྅ཧཾ་ཞེས་བྱ་བའི་སྔགས་ལན་བདུན་བརྗོད་ལ། འགྲོ་བ་ཐམས་ཅད་སྒྱུ་མ་དང་། རྨི་ལམ་དང་སྨིག་རྒྱུ་ལྟ་བུར་སྟོང་པ་ཉིད་ཀྱི་རང་བཞིན་དུ་དམིགས་པར་བྱའོ། །

73-1-71a

དེ་ནས་རང་གི་སྙིང་གར་ཆུད་པའི་ཡི་གེ་དྷཱིཿདེའི་འོད་ཟེར་གྱི་ཚོགས་སྤྲོས་པས་རང་གི་ལུས་སྟོང་པར་བལྟ་ཞིང་། དེ་ནས་བདག་ཉིད་འཇམ་དཔལ་ཡེ་ཤེས་ཀྱི་སྐུའི་བདག་ཉིད་ཅན་ཡི་གེ་དྷཱིཿཙམ་དུ་གནས་པར་བྱའོ། །ཕྱིས་ཡི་གེ་དྷཱིཿདེ་ཡོངས་སུ་གྱུར་པའི་ཨུཏྤལ་སྔོན་པོ་
བསྒོམས་པ་ལ་དེའི་དབུས་སུ་ཡང་ཡི་གེ་དྷཱིཿགནས་པར་བསམ་མོ། །འོད་ཟེར་དེ་ཡིས་འགྲོ་བ་ཀུན། །ཀུན་ནས་ཡོངས་སུ་སྦྱངས་ནས་ནི། །རང་གི་འདོད་ལྷའི་གཟུགས་དག་ཏུ། །གྱུར་པ་ཨུཏྤལ་ལ་བསྟིམ་མོ། །དེ་ནས་དེ་ཡོངས་སུ་གྱུར་པ་ལས་ཤེལ་སྒོང་དག་པ་དང་འདྲ་བ། དབུ་གཅིག་
པ་དང་ཕྱག་གཉིས་པ། །ཟླ་བའི་གདན་བཞུགས་ཟླ་བ་འདྲའོ། །ཟུར་ཕུད་ལྔ་པོ་དག་གི་ཐོད། །ཞི་བ་རིན་ཆེན་ཅོད་པན་འཆང་། །རྒྱན་ཀུན་རྣམ་པར་འཛིན་འགྱུར་དང་། །གཡས་ཀྱིས་མཆོག་སྦྱིན་གཡོན་དག་གིས། །ཨུཏྤལ་སྔོན་པོ་འཛིན་འགྱུར་པ། །ཨུཏྤལའི་སྟེང་དུ་ཤེས་རབ་ཀྱི་ཕ་རོལ་
ཏུ་ཕྱིན་པའི་གློགས་བམ་ཡང་དག་པར་འཛིན་པའོ། །འཇམ་པའི་དབྱངས་སུ་བདག་ཉིད་བསྒོམས་ལ། རང་གི་ལུས་ལས་འོད་ཟེར་འཕྲོས་པས་ནམ་མཁའི་ཁམས་མ་ལུས་པ་ཁྱབ་པར་བྱའོ། །དེའི་འོག་ཏུ་ཉིད་ཀྱི་ཐུགས་ཀའི་ཟླ་བའི་དཀྱིལ་འཁོར་ལ་ཡི་གེ་དྷཱིཿདཀར་པོ་འབར་བའི་ཕྲེང་བ་
གཏམས་པར་བསམས་ལ། དེ་ནས་རང་གི་སྙིང་ག་ལ་གནས་པའི་ཡི་གེ་དྷཱིཿལས་འོད་ཟེར་གྱི་ཚོགས་ཀྱི་སྤྲིན་ཀུན་ཏུ་སྤྲོས་པ་དེས། དམ་ཚིག་སེམས་དཔའ་དང་འདྲ་བའི་ཡེ་ཤེས་སེམས་དཔའ་བསྐུལ་ནས། སྤྱན་དྲངས་པ་མདུན་གྱི་ནམ་མཁའ་ལ་རྣམ་པར་བསམས་ལ། སྔ་མ་བཞིན་ཡང་དག་པར་མཆོད་དེ། ཛཿ
ཧཱུཾ་བཾ་ཧོཿཞེས་བྱ་བའི་ཡི་གེ་བཞིས་སྤྱན་དྲངས་ནས། དམ་ཚིག་སེམས་དཔའ་བདག་ཉིད་ལ་དགུག་པ་དང་། གཞུག་པ་དང་། བཅིང་བ་དང་། དགྱེས་པ་བྱས་ལ། ཨོཾ་དྷརྨ་དྷཱ་ཏུ་བཱ་གཱི་ཤྭ་རི་སྭ་བྷཱ་བ་ཨཱཏྨ་ཀོ྅ཧཾ། ཞེས་ང་རྒྱལ་བྱའོ། །དེའི་རྗེས་ལ་ཡི་གེ་དྷཱིཿལས་འོད་ཟེར་སྤྲོ་བ་བྱས་ལ་དེ་བཞིན་གཤེགས་
པ་མདུན་གྱི་ནམ་མཁའ་ལ་རྣམ་པར་བསམས་ལ། དབང་བསྐུར་བའི་ཚིགས་སུ་བཅད་པ་འདིས་དོན་དུ་མཉེས་པར་བྱ་སྟེ། བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་མཆོད་ཆེན་སྩོལ་མཛད་པ། །བདག་ལའང་བསྲུང་བའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །དེ་ནས་

73-1-71b

དེ་བཞིན་གཤེགས་པ་དེ་དག་གི་སྐུ་ལས་བྱུང་བའི་ལོ་ཙ་ན་དང་། མཱ་མ་ཀཱི་དང་། གོས་དཀར་མོ་དང་། ཏཱ་རས་རིན་པོ་ཆེའི་བུམ་པ་ཡེ་ཤེས་ཀྱི་བདུད་རྩིས་བཀང་བ་ཕྱག་ན་བསྣམས་པས། རྡོ་རྗེ་ཆེན་པོའི་དབང་བསྐུར་བ། །ཁམས་གསུམ་པོ་ཡིས་ཕྱག་བྱས་པ། །གསང་བ་གསུམ་གྱི་
གནས་ལས་བྱུང་། །སངས་རྒྱས་ཀུན་གྱིས་སྦྱིན་པར་བྱ། །ཞེས་བྱ་བ་འདོན་ཅིང་དབང་བསྐུར་བར་བསམ་མོ། །དབང་བསྐུར་བ་རྫོགས་མ་ཐག་རིན་པོ་ཆེའི་ཅོད་པན་གྱི་སྟེང་དུ། དེ་བཞིན་གཤེགས་པ་མི་བསྐྱོད་པ་བསམས་ལ། ལུས་དང་ངག་དང་ཡིད་གསུམ་བྱིན་གྱིས་བརླབ་པའི་
ཕྱིར། སྤྱི་བོ་ལ་ཡི་གེ་ཨོཾ་དཀར་པོ་ཟླ་བའི་དཀྱིལ་འཁོར་ལ་གནས་པ་དང་། ལྐོག་མར་ཡི་གེ་ཨཱཿདམར་པོ་ཟླ་བའི་དཀྱིལ་འཁོར་ལ་གནས་པ་དང་། སྙིང་གར་ཡི་གེ་ཧཱུཾ་ནག་པོ་ཟླ་བའི་དཀྱིལ་འཁོར་ལ་གནས་པ་རྣམ་པར་བཀོད་པ་ལ། སྤྲོ་བ་དང་བསྡུ་བའི་སྦྱོར་བས་ཇི་སྲིད་མངོན་སུམ་དང་
འདྲ་བར་སྣང་བ་དེ་སྲིད་དུ་བསྒོམ་པར་བྱ་ཞིང་། བསྒོམས་པས་སྐྱོ་བར་གྱུར་ན་སྔགས་བཟླ་བར་བྱའོ། །སྔགས་ཇི་ཙམ་འོས་པ་བཟླས་པ་བྱས་ནས། ཆོ་ག་ཉམས་པ་བསྐང་བར་བྱ་བའི་ཕྱིར་རྡོ་རྗེ་སེམས་དཔའི་སྙིང་པོ་ཡི་གེ་བརྒྱ་པ་ཞེས་བྱ་བའི་སྔགས་བཟླས་ནས། ཡེ་ཤེས་སེམས་དཔའ་ཡང་དག་
པར་མཆོད་དེ་བསོད་ནམས་སུ་བསྔོས་ལ་གཤེགས་སུ་གསོལ་ལོ། །དེ་ལ་ཡེ་ཤེས་སེམས་དཔའ་གཤེགས་སུ་གསོལ་བའི་ཚིགས་སུ་བཅད་པ་ནི། ཨོཾ་ཁྱོད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་
འབྱོན་པར་མཛད་དུ་གསོལ། །མུཿཞེས་བྱ་བ་འདི་ཡིན་ནོ། །དེ་ལ་རྡོ་རྗེ་སེམས་དཔའི་སྙིང་པོའི་ཡི་གེ་བརྒྱ་པའི་སྔགས་ནི། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོ་ཥྱོ་མེ་བྷ་བ། སརྦ་སིདྡྷི་སྨེ་པྲ་ཡཙྪ། སརྦ་
ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿ བྷ་ག་བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿཞེས་བྱ་བ་འདི་ཡིན་ནོ། །དེ་ལ་བཟླས་པའི་སྔགས་ནི། ཨོཾ་ཨཱཿདྷཱིཿཧཱུཾ་ཞེས་བྱ་བ་འདི་ཡིན་ནོ། །ཡང་ཨོཾ་བཛྲ་ཏཱིཀྵྞ་དུཿཁ་ཙྪེད་པྲ་ཛྙཱ་ཛྙཱ་ན་མཱུརྟ་ཡེ། ཛྙཱ་ན་ཀཱ་ཡ་བཱ་གཱི་ཤྭ་ར། 

73-1-72a

ཨ་ར་པ་ཙ་ནཱ་ཡ་ཏེ་ན་མཿཞེས་བྱ་བ་ནི་བཟླས་པའི་སྔགས་སོ། །འཇམ་པའི་དབྱངས་དཔའ་བོ་གཅིག་ཏུ་གྲུབ་པ་ཞེས་བྱ་བའི་སྒྲུབ་ཐབས། སློན་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།།      །།རྒྱ་གར་གྱི་མཁན་པོ་དཱི་པཾ་ཀ་ར་ཤྲཱི་ཛྙཱ་ན་དང་། བོད་ཀྱི་
ལོ་ཙཱ་བ་དགེ་བའི་བློ་གྲོས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།    །༄༅། །འཇམ་དབྱངས་སྨྲ་བའི་སེང་གེའི་སྒྲུབ་ཐབས་བཞུགས། བླ་མ་དམ་པ་རྣམས་ལ་ཕྱག་འཚལ་ལོ། །ཤེས་རབ་འཕེལ་བར་འདོད་པ་ཡིས། །སྤང་རྒྱན་གླ་བ་མཚལ་དཀར་གསུམ། །ཡུང་བ་ཙནྡན་
ཨ་ཀ་རུ། །སྤང་སྤོས་དབང་ལག་ཤུ་དག་གསུམ། །གསེར་མདོག་རྒྱ་སྐྱེགས་ཤིང་མངར་གསུམ། །དཔའ་བོ་བཅུ་གཉིས་བསྡུས་ནས་ནི། །ཞིབ་པར་བཏགས་ཏེ་སྦྲང་རྩི་དང་། །བ་དམར་འོ་མས་རི་ལུ་བྱ། །བརྒྱ་དང་རྩ་བརྒྱད་བྱས་ནས་ནི། །རི་ལུ་རྣམས་ལ་ཧྲཱིཿདང་དྷཱིཿ། །བྲི་བའི་སྣག་ཚ་
གུར་ཀུམ་དང་། །རྒྱ་སྐྱེགས་གི་ཝང་བསྲེས་པས་བྲི། །རིན་ཆེན་སྣོད་དུ་བླུགས་བྱས་ནས། །པདྨ་སེར་པོ་འདབ་བརྒྱད་དབུས། །གོང་གི་རི་ལུ་བཞག་བྱས་ནས། །དམར་སེར་དར་གྱི་གུར་ཡང་དབུབ། །ཤར་དུ་ཁ་བལྟས་སྟོང་ཉིད་བསྒོམ། །སྟོང་པའི་ངང་ལས་སེང་གེའི་གདན། །དེ་སྟེང་པདྨ་
ཟླ་བའི་དབུས། །ཡི་གེ་དྷཱིཿདམར་ཚེག་དྲག་ཅན། །འོད་ཟེར་དམར་པོ་འཕྲོ་བ་ཡི། །དེ་ལས་བདག་ཉིད་འཇམ་དཔལ་ནི། །སྐུ་མདོག་དམར་པོ་རྒྱན་དང་ལྡན། །འོད་ཟེར་དམར་པོ་འཕྲོ་བ་ཅན། །གཡས་པ་རལ་གྲི་གཡོན་པ་ན། །པུསྟི་བསྣམས་ཤིང་རྒྱན་དང་ལྡན། །རལ་པའི་ཐོར་ཚུགས་གྱེན་དུ་
འགྲེང་། །དེ་ལྟར་བདག་ཉིད་བསམས་ནས་ནི། །ཐུགས་ཀར་བྷྲཱུཾ་ལས་འཁོར་ལོ་བསམ། །ལྟེ་བར་རལ་གྲི་སོར་བཞི་པ། །རྩ་བའི་སྔགས་ཀྱིས་བསྐོར་བར་བསམ། །འོད་ཟེར་དམར་པོ་འཕྲོས་ནས་ནི། །ཡེ་ཤེས་སེམས་དཔའ་སྤྱན་དྲང་གཞུག །མདུན་གྱི་ལྷུང་བཟེད་དབུས་སུ་ནི། །ཡི་གེ་ཧྲཱིཿལས་
དབྱངས་ཅན་མ། །སྐུ་མདོག་སྔོན་མོ་གཟི་བརྗིད་ཅན། །གཡས་ན་རལ་གྲི་གཡོན་པུསྟི། །བསྣམས་ཤིང་རྒྱན་དང་ཡང་དག་ལྡན། །ཐུགས་ཀར་རལ་གྲི་སྔགས་ཀྱིས་བསྐོར། །འོད་ཀྱིས་ཡེ་ཤེས་སྤྱན་དྲང་གཞུག །མདུན་དུ་སངས་རྒྱས་ཐམས་ཅད་དང་། །བྱང་ཆུབ་སེམས་དཔའ་རྣམས་

73-1-72b

ཀྱང་བསམ། །བདག་དང་སེམས་ཅན་ཐམས་ཅད་ཀྱི། །བློ་ཡི་མུན་པ་བསལ་བར་བསམ། །དེ་ལྟར་བསམས་ནས་དང་པོ་ནི། །བདག་གི་ཐུགས་ཀར་རལ་གྲི་དང་། །ས་བོན་དྷཱིཿདང་བཅས་པ་ལས། །འོད་ཟེར་དམར་པོ་འཕྲོས་པ་ཡིས། །བདག་གི་སྣ་བུག་གཡས་ནས་བྱུང་། །དབྱངས་ཅན་
མ་ཡི་གཡོན་དུ་ཞུགས། །ཐུགས་ཀའི་སྔགས་དང་ཧྲཱིཿལ་ཐིམ། །ཐུགས་ཀའི་གནས་ནས་ཚུར་ལ་བྱུང་། །བདག་གི་ཐུགས་ཀར་ཞུགས་པ་ལས། །ཨཱ་ལི་ཀཱ་ལིའི་སྔགས་སུ་གྱུར། །ཁོང་བའི་ནང་དང་བ་སྤུའི་གསེབ། །དཔག་ཏུ་མེད་པས་ཁེངས་པར་བསམ། །བར་གྱི་སྔགས་ཀྱི་ཕྲེང་བ་ལས། །འོད་
ཟེར་དཔག་ཏུ་མེད་པ་འཕྲོས། །སངས་རྒྱས་བྱང་ཆུབ་སེམས་དཔའ་དང་། །དུས་གསུམ་བླ་མ་ཡི་དམ་དང་། །དཔའ་བོ་དཔའ་མོ་ལ་སོགས་པའི། །སྐུ་གསུང་ཐུགས་ཀྱི་བྱིན་རླབས་བསྡུས། །བདག་དང་ལྷ་མོའི་སྤྱི་བོར་བསྟིམ། །བདག་དང་སེམས་ཅན་ཐམས་ཅད་ཀྱི། །བློ་ཡི་མུན་པ་བསལ་བར་
བསམ། །ཡང་གཅིག་འཕྲོས་པའི་བྱིན་རླབས་ཀྱིས། །སྡེ་སྣོད་གསུམ་དང་རྒྱུད་སྡེ་བཞི། །དགེ་བཤེས་རྣམས་ཀྱི་ནུས་མཐུ་དང་། །མཐའ་ཡི་ནོར་བུའི་འོད་ཟེར་དང་། །རྩི་ཤིང་ནགས་ཚལ་བཅུད་རྣམས་བསྡུས། །བདག་དང་ལྷ་མོའི་སྤྱི་བོར་བསྟིམ། །ལུས་ལ་ཡེ་ཤེས་བདུད་རྩིས་གང་། །
དེས་ནི་ཤེས་རབ་འཕེལ་བར་བསམ། །བཟླས་པ་བྱེད་པའི་དུས་དག་ཏུ། །མདུན་དུ་རི་ལུ་ལ་དམིགས་ཤིང་། །སྔགས་ནི་སྟོང་ཕྲག་བཞི་རུ་བཟླས། །ཨོཾ་ཧྲཱིཿདྷཱི་མ་མེ་དཱི་པ་མཉྫུ་ཤྲཱི་མུཾ། པྲཛྙཱ་དྷཱ་ཏུཿཧྲཱིཿསྭཱ་ཧཱ། བརྒྱ་རྩས་མི་བརྗེད་གཟུངས་ཐོབ་འགྱུར། །སྟོང་གིས་སྒྲ་སྐད་ཀུན་ལ་མཁས། །ཁྲི་ཕྲག་གཅིག་
ནི་བཟླས་གྱུར་ན། །ཉི་མ་རེ་རེ་དག་ལ་ཡང་། །ཤློ་ཀ་ནི་ལྔ་སྟོང་རེ། །འཛིན་འགྱུར་འདི་ལ་ཐེ་ཚོམ་མེད། །མངོན་པར་ཤེས་པ་འཆར་བ་དང་། །གཞན་གྱི་སེམས་ནི་ཤེས་པ་དང་། །ཡི་གེའི་རིགས་ནི་ཐམས་ཅད་ཀྱང་། །ཐོགས་པ་མེད་པར་ཤེས་པར་འགྱུར། །སྒྲ་དང་བསྟན་བཅོས་ཐམས་ཅད་ཀྱང་། །
བཀའ་བཞིན་རྩོམ་པར་ནུས་པ་ཡིན། །ཕྱིས་ནི་ས་ཡི་དབང་ཕྱུག་འཐོབ། །རི་ལུ་རྒྱལ་ཆེན་བཞིར་མཐོང་ན། །ཤེས་རབ་འཇམ་པའི་རྡོ་རྗེ་དང་། །སངས་རྒྱས་ཀུན་དང་མཉམ་པར་འགྱུར། །རི་ལུ་དབྱངས་ཅན་མར་མཐོང་ན། །སངས་རྒྱས་ཞིང་དུ་འགྲོ་བར་འགྱུར། །རི་ལུ་ཉི་ཟླར་མཐོང་གྱུར་ན། །སྔོན་གྱི་

73-1-73a

སྐྱེ་བ་དྲན་པར་འགྱུར། །རི་ལུ་འོད་དུ་མཐོང་གྱུར་ན། །སྨྲ་བཞི་དག་ལ་མཁས་པ་དང་། །འོད་དང་དུང་དང་རྔ་སྒྲ་དང་། །རླུང་དང་ཉི་མ་མེ་ཏོག་དང་། །ཡི་གེ་འདྲི་ཀློག་མཐོང་བ་དང་། །སྣག་ཚ་འཐུངས་དང་ཉམས་དགའ་དང་། །མེ་ཏོག་འཛུགས་དང་ཞིང་རྨོ་བ། །ཤེས་རབ་འཕེལ་
བའི་རྟགས་སུ་འདོད། །དེ་ནས་མདུན་གྱི་སངས་རྒྱས་དང་། །དབྱངས་ཅན་མ་དང་བཅས་པ་རྣམས། །འོད་དུ་ཞུ་ནས་རིལ་བུར་ཐིམ། །ནང་མ་ཉི་ཤུ་རྩ་གཅིག་ལ། །རིལ་བུ་རེ་རེ་ཟོས་གྱུར་ན། །ཤེས་རབ་འཕེལ་བར་ཐེ་ཚོམ་མེད། དང་པོར་རྗེས་གནང་ཐོབ་ནས་ནི། །སྐར་མ་རྒྱལ་ལ་བསྒྲུབ་པར་བྱ། །
གཅིག་དང་བརྒྱད་དང་བཅོ་ལྔ་ལ། །བསྒྲུབས་ན་ཤེས་རབ་འཕེལ་བར་འགྱུར། །བརྫུ་དང་ཤ་ཆང་སྒོག་པ་དང་། །སྔོ་ངད་ལ་སོགས་གཡེང་བ་དང་། །འཁོན་དང་ཞེ་སྡང་དྲག་པོ་དང་། །གྲོགས་ངན་མྱ་ངན་སྨྲེ་སྔགས་དང་། །སེམས་ལ་གནོད་པའི་ལས་རྣམས་སྤང་། །བཟའ་བ་བདོག་པ་ཐམས་
ཅད་ཀྱིས། །འཇམ་པའི་རྡོ་རྗེ་མཆོད་ནས་ནི། །རྟག་ཏུ་ལྷ་ལ་གསོལ་བ་གདབ། །སེམས་ཅན་རྣམས་ལ་སྙིང་རྗེ་བསྒོམ། །གལ་ཏེ་ལས་འཕྲོ་ཡོད་གྱུར་ན། །སྲིད་པའི་འཆིང་བ་ཐམས་ཅད་ཀུན། །ཉི་མ་གཅིག་གིས་གྲོལ་བར་འགྱུར། །འབྲིང་གིས་གཉིས་ཀྱིས་རྟོགས་པ་སྟེ། །ཉི་མ་གསུམ་དུ་བསྒྲུབས་
གྱུར་ན། །ལས་འཕྲོ་མེད་ཀྱང་འགྲུབ་པར་འགྱུར། །གཞན་གྱི་རྩོད་པ་བཟློག་པ་ནི། །དཔྲལ་བར་དྷཱིཿཡིག་དམར་པོ་བསམ། །དྷཱིཿལས་འོད་ཟེར་འཕྲོས་ནས་ནི། །ཁོ་ཡི་ཤེས་པ་བཀུག་ནས་ཀྱང་། །སྲིན་ལག་བཞི་ལ་བསྟིམ་ནས་ནི། །ཨོཾ་ཧྲཱིཿདྷཱིཿཆེ་གེ་མོ་ནན་ཧཱུཾ་ཕཊ། །རྩོད་པ་ཀུན་ལས་རྒྱལ་བར་
འགྱུར། །གཅན་གཟན་རྒྱལ་པོ་སེང་གེའི་སྒྲ་བསྒྲགས་པས། །དུར་ཁྲོད་ཝ་ཚོགས་ཐམས་ཅད་བརྒྱལ་བར་འགྱུར། །ཉོན་མོངས་དུག་རྣམས་འཇོམས་པའི་ཤེས་རབ་མཆོག །བདག་གིས་འཇམ་པའི་དཔལ་ལ་རབ་ཞུས་པས། །འགྲོ་རྣམས་ཤེས་རབ་གྲུ་ཡིས་འདོན་པར་ཤོག །རྗེ་བཙུན་དམ་
པ་རྒྱ་གར་གྱི་གདམས་པ་རྫོགས་སོ།།      །།༄༅༅། །རྒྱ་གར་སྐད་དུ། མཉྫུ་ཤྲཱི་བྷཊྚ་རཱ་ཀ་སཱ་དྷ་ནཾ་པྲཛྙཱ་ཙཀྲ། བོད་སྐད་དུ། རྗེ་བཙུན་འཇམ་དཔལ་ཤེས་རབ་འཁོར་ལོའི་སྒྲུབ་ཐབས། འཕགས་པ་འཇམ་པའི་དབྱངས་ལ་ཕྱག་འཚལ་ལོ། །གང་མཐུས་སྙིང་གི་མ་རིག་མུན་སེལ་ཤེས་རབ་

73-1-73b

སྣང་བ་ཀུན་བསྐྱེད་མཛད། །སྣ་ཚོགས་བསྟན་བཅོས་རིག་པ་དང་ནི་གསང་སྔགས་ཕན་པ་རྣམས་སྦྱིན་པ། །འདོད་དགུའི་གཏེར་གཅིག་གཞོན་ནུ་ཡིད་འོང་ཟུར་ཕུད་ལྔ་དང་ལྡན་པ་གང་། །འཇམ་དབྱངས་མགོན་ལ་གུས་པས་བཏུད་དེ་དེ་བསྟེན་མན་ངག་བྲི་བར་བྱ། །སྔགས་པས་རྗེས་སུ་མཐུན་
པའི་གནས། །བྱི་དོར་བྱུག་པ་བཟང་བྱས་ལ། །ཁྱད་པར་སྐྱབས་རྟེན་སེམས་བསྐྱེད་ནས། །གཞོན་ནུ་ཤེས་རབ་འཁོར་ལོ་བསྒོམ། །སྙིང་དབུས་བུ་གར་རི་བོང་འཛིན། །ཡེ་ཤེས་ས་བོན་དྷཱིཿཡིག་འོད། །སྐར་མདོག་རྣམ་པར་གསལ་བར་བལྟ། །དེ་ལས་ཚོགས་རྟེན་དཀྱིལ་འཁོར་དགུག །
དངོས་དང་ཡིད་ལས་བྱུང་དང་གཞན། །ཡང་དག་ཡེ་ཤེས་མཆོད་པས་མཆོད། །ཕྱག་འཚལ་བ་དང་སྡིག་སེལ་དང་། །བསོད་ནམས་ཕུང་པོ་གཞན་ཡང་ངོ་། །བྱམས་དང་སྙིང་རྗེ་དགའ་བ་དང་། །བཏང་སྙོམས་ཚངས་པའི་གནས་བཞི་ཡིས། །སྐྱེ་བོ་མ་ལུས་རྗེས་ཆགས་ཤིང་། །ཆགས་བྲལ་
སྡོམ་པ་གཟུང་བར་བྱ། །དེ་རྗེས་གསང་སྔགས་གཉིས་བརྗོད་པས། །ཡུལ་དང་ཡུལ་ཅན་དག་བྱའི་ཕྱིར། །སྤྲིན་མེད་ནམ་མཁའི་དཀྱིལ་ལྟ་བུར། །མཁས་པས་སྟོང་ཉིད་བསྒོམ་པར་བྱ། །ཨོཾ་སྭ་བྷཱ་བ་ཤུདྡྷཿསརྦ་དྷརྨྨཱཿསྭ་བྷཱ་བ་ཤུདྡྷོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། བ་ཡིག་ཨ་
དང་དྷཱིཿཡིག་ལས་གྲུབ་ཆུ་སྐྱེས་དང་། །ཟླ་རྒྱས་གདན་ལ་ཤེས་རབ་རལ་གྲི་ས་བོན་མཚན། །དཀར་བསིལ་ཟླ་བ་བྱེ་བའི་གཟི་འོད་ལས་ལྷག་པའི། །དཔལ་གྱིས་ས་གསུམ་ཤེས་རབ་སྣང་བ་བསྐྱེད་པར་བསྒོམ། །དུས་གསུམ་གཤེགས་དང་ཕྱོགས་བཅུའི་ཆར་བཞུགས་སངས་རྒྱས་དང་། །དེ་སྲས་དེ་
བཞིན་དྲང་སྲོང་དང་ནི་རིག་འཛིན་ཚོགས། །མ་ལུས་ཡོན་ཏན་བློ་གྲོས་སྣང་བ་བསྡུས་ནས་ཀྱང་། །སྐད་ཅིག་རྣམ་པས་འཇིག་རྟེན་གསུམ་མགོན་འཇམ་དབྱངས་གྱུར། །གཞོན་ནུའི་ངང་ཚུལ་རལ་གྲི་པུསྟི་འཁོར་ལོ་འཛིན། །ར་བསྒེག་བརྟན་མཛེས་དུལ་བའི་རང་བཞིན་བློ་བཟང་པོ། །སྐྱིལ་ཀྲུང་
རབ་གསལ་རིན་ཆེན་དཔག་མེད་འཕྲོ་བ་ཡི། །བློ་ངན་སེལ་མཁས་སངས་རྒྱས་སྲས་ནི་སྒྲུབ་པོས་བལྟ། །དེ་སྙིང་ཟླ་སྟེང་དྷཱིཿཡིག་ལས་བྱུང་འོད་ཟེར་གྱིས། །ཡེ་ཤེས་མགོན་བཀུག་ཚོན་གང་གཟུགས་ཀྱི་སྙིང་གར་གནས། །དེ་སྙིང་དབུས་སུའང་ངྷཱིཿཡིག་འབར་བས་བརྒྱན་བསམས་ཏེ། །དྲི་མེད་

73-1-74a

དཀར་གསལ་འོད་ཚོགས་ཕྲེང་བས་བརྒྱན་པར་བསྒོམ། །སེམས་དཔའ་གཉིས་ཀྱི་གདན་གང་ཡིན། །རང་སྙིང་ཟླ་བ་རྩིབས་བརྒྱད་རྣོ། །ཤེས་རབ་རིག་པ་བརྒྱད་ཀྱིས་མཚན། །རྫ་མཁན་འཁོར་ལོ་ལྟ་བུར་འཁོར། །རབ་དཀར་སྣང་བས་མུན་སེལ་བྱེད། །རྣོན་པོས་མི་ཤེས་
སྨག་རུམ་འཇིག །ཤུགས་དྲག་ལས་དང་ཉོན་མོངས་གཅོད། །ཕན་ཚུན་བཟློག་པས་འཁྲུལ་པ་འཇོམས། །ཨ་ར་པ་ཙ་ན་དྷཱིཿཧཱུཾ། །ཨོཾ་གྱིས་ཐོག་མར་བརྒྱན་པ་ནི། །རིག་པའི་རྒྱལ་པོ་བརྒྱད་པར་གྲགས། །ལོ་ཕྱེད་འབྲས་བུ་མཐོང་བར་གྱུར། །གཟུགས་བརྙན་བྲག་ཅ་དེ་བཞིན་དུ། །འཇའ་ཚོན་
ལྟ་བུར་སྐུ་གསུང་ཐུགས། །མི་རྟོག་གསལ་བར་གང་གིས་དྲན། །མ་ཡེངས་ཡིད་ཅན་དེ་ཡིས་འགྲུབ། །ལྡང་བར་འདོད་ཚེ་འོད་འཕྲོས་པས། །སླར་ཡང་སྲིད་གསུམ་བསྡུ་བའམ། །ཡང་ན་དངོས་གྲུབ་བླངས་ནས་སུ། །བསོད་ནམས་འགྲོ་ལ་སྦྱིན་པར་བྱ། །གང་ཕྱིར་འདི་ན་ལ་ལས་སྔོན་
ཆད་དགེ་མ་བསགས། །ལ་ལས་ལམ་འཚོལ་ལ་ལས་ལེགས་སྤྱད་བར་ཆད་བྱ། །གཞན་གྱིས་དེ་བཞིན་ཡུན་རིང་ལྷ་མཆོག་མཉེས་མ་བྱས། །དེ་ཕྱིར་སྐྱེ་བོ་མ་རིག་མུན་འཐོམས་རྣམས་འཁྱམས་སྙམ། །དེ་དག་བརྩེ་བས་རབ་ཏུ་འབད་པའི་ཤུགས་ནི་འདིར་བསྐྱེད་པའི། །མཐུ་ཡིས་
མངོན་གྲུབ་མཚན་མ་ཅུང་ཟད་རྙེད་པ་ལ་བརྟེན་ཏེ། །འཁོར་ལོ་དྲི་མེད་རབ་ཏུ་དཀར་རྒྱས་ཟླ་བ་ཉ་འདྲའི་ཚུལ། །བརྗོད་པས་སྐྱེ་བོ་རྣམས་ནི་འཇམ་དབྱངས་ཉིད་མྱུར་མཐོང་གྱུར་ཅིག །རྗེ་བཙུན་འཇམ་པའི་དབྱངས་ཤེས་རབ་འཁོར་ལོའི་སྒྲུབ་ཐབས། སློབ་དཔོན་ཆེན་པོ་ཙནྡྲཱ་ཀ་ར་གུཔྟས་མཛད་
པ་རྫོགས་སོ།།      །།པཎྜི་ཏ་ཤཱཀྱ་ཤྲཱི་བྷ་དྲ་དང་བྱམས་པ་དཔལ་གྱིས་བསྐྱུར་ཅིང་གཏན་ལ་ཕབ། ༄༅༅། །རྒྱ་གར་སྐད་དུ། མཉྫུ་ཤྲཱི་ཙ་ལ་ཙཀྲ། བོད་སྐད་དུ། འཇམ་དཔལ་གཡོ་བའི་འཁོར་ལོ། །འཇམ་པའི་དབྱངས་ལ་ཕྱག་འཚལ་ལོ། །སྔོན་དུ་འགྲོ་བ་བསོད་ནམས་ཀྱི་
ཚོགས་ལ། མདུན་གྱི་ནམ་མཁའ་ལ་རང་གི་བླ་མ་དང་འཇམ་དབྱངས་ལ་སོགས་པ་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་བཞུགས་པར་བསམས་ལ་ཡན་ལག་བདུན་པ་རྒྱས་པར་བྱ། དེ་ནས་ཚད་མེད་པ་བཞི་བསྒོམ་དངོས་པོ་ཐམས་ཅད་རྨི་ལམ་ལྟ་བུའི་བློ་ཉེ་བར་གཞག །

73-1-74b

རང་གི་ལུས་དབུལ། དེ་ནས་དྲི་བཟངས་ཀྱི་ཆུས་ཆག་ཆག་བཏབ་ལ་སྟན་བདེ་བའི་སྟེང་དུ་ཏིང་ངེ་འཛིན་སྐྱེ་བ་དང་མཐུན་པའི་ལུས་ཀྱི་རྣལ་འབྱོར་དང་ལྡན་པས་ཆོས་ཐམས་ཅད་སྟོང་པ་ཉིད་དུ་བསྒོམ་སྟེ། བྱིན་གྱིས་རློབ་པའི་སྔགས། སྭ་བྷཱ་བ་ལ་སོགས་ཀྱང་བརྗོད་དོ། །དེ་ལས་སྐྱོ་བར་གྱུར་ན་
གང་དུ་ཡང་མ་གྲུབ་པའི་ངང་ལས་རང་གི་སྔར་གྱི་གདན་གང་ན་ཡོད་པའི་སར་ཨ་དཀར་པོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་དེའི་སྟེང་དུ་ཡི་གེ་དྷཱིཿའོད་ཀྱི་ཕུང་པོ་རབ་ཏུ་འབར་བར་བསམས་ལ་དེ་ལས་འོད་ཟེར་འཕྲོས་པས་ཕྱི་རོལ་གྱི་སྣོད་དང་། ནང་བཅུད་ཀྱི་དངོས་པོ་གང་ལ་ཕོག་པ་
རྣམས་འཕགས་པར་གྱུར། དེ་རྣམས་འོད་ཟེར་གྱིས་དྷཱིཿལ་བསྡུ། དེ་ཡོངས་སུ་གྱུར་པ་ལས་འཕགས་པ་སྐུ་མདོག་དཀར་པོ། ཞབས་རྡོ་རྗེའི་སྐྱིལ་ཀྲུང་དུ་བཞུགས་པ། ཕྱག་གཡས་ན་རལ་གྲི། གཡོན་གྱིས་ཐུགས་ཀར་པུསྟི་བཟུང་བ། ཞལ་ཅུང་ཟད་འཛུམ་པ་པདྨ་ཁ་བྱ་བ་ལྟ་བུའི་སྤྱན་དཀྱུས་
རིང་བ། དབུ་ལ་གཙུག་ཕུད་ལྔ་འཕྱང་བ། རིན་པོ་ཆེའི་རྒྱན་མང་པོས་མཛེས་པ། བཅུ་དྲུག་ལོན་པའི་ཁྱེའུ་ལྟར་གཞོན་ཤ་དང་བཅས་པ་ཟླ་བ་བྱེ་བའི་གཟི་བརྗིད་ལྟར་འོད་ཟེར་རབ་ཏུ་འབར་བའི་སྐུ་བསྐྱེད་དེ། དེའི་ཐུགས་ཀར་ཨཾ་འོད་ཟེར་གྱི་ཕུང་པོ་ཅན་ཡོངས་སུ་གྱུར་པ་ལས་འཁོར་ལོ་རྩིབས་བརྒྱད་
པ་ཁ་དོག་ཤིན་ཏུ་དཀར་ཞིང་འོད་ཟེར་དཔག་ཏུ་མེད་པ་འཕྲོ་བ། དེའི་སྟེང་དུ་ཨ་ལས་ཟླ་བའི་དབུས་སུ་ཨཾ་ཡོངས་སུ་གྱུར་པ་ལས་འཇམ་དབྱངས། ཤར་དུ་རཾ་ཡོངས་སུ་གྱུར་པ་ལས་དྲ་བ་ཅན་གྱི་འོད། རྒྱབ་ཏུ་པཾ་ཡོངས་སུ་གྱུར་པ་ལས་ཟླ་འོད། གཡས་སུ་ཙཾ་ཡོངས་སུ་གྱུར་པ་ལས་སྐྲ་ཅན་མ། 
གཡོན་དུ་ནཾ་ཡོངས་སུ་གྱུར་པ་ལས་ཉེ་བའི་སྐྲ་ཅན་མའོ། །འདི་དག་གི་སྐུ་མདོག་ཕྱག་མཚན་ནི་ཕྱི་རོལ་གྱི་འཕགས་པ་བཞིན་ནོ། །སྐུ་ཕྱི་ནང་ཐམས་ཅད་དྲི་མ་ཡོངས་སུ་དག་ཅིང་འོད་ཟེར་འཕྲོས་པས་མ་རིག་པའི་རྫབ་བསལ་བར་བསམ། གཡོ་བའི་འཁོར་ལོ་ཞེས་བྱ་བ་ནི། འཁོར་ལོ་དེ་གཡོ་ཞིང་འཁོར་
བས་རྫ་མཁན་གྱི་འཁོར་ལོ་ལྟར་རབ་ཏུ་འཁོར་བས་མ་རིག་པ་ལ་སོགས་པ་ཉོན་མོངས་པ་རྣམས་གཅོད་པར་བྱེད་དོ། །ཡེ་ཤེས་སེམས་དཔའ་དགུག་པ་དང་། གཞུག་པ་དང་། རིགས་ལྔས་དབང་བསྐུར་ཏེ། རིགས་ཀྱི་བདག་པོས་དབུ་བརྒྱན་པ་ནི་གཞན་དང་མཐུན་ནོ། །ཟླ་བ་དང་འཁོར་ལོ་དང་། 

73-1-75a

ལྷའི་སྐུ་དྲི་མ་ཡོངས་སུ་དག་པ་འཇའ་ཚོན་ལྟ་བུ་ལ་དམིགས་ལ། ཨོཾ་ཨ་ར་པ་ཙ་ན་དྷཱིཿཞེས་བྱ་བའི་སྔགས་བཟླས་སོ། །འདིའི་བསྙེན་པའི་ཚད་ནི་ཡི་གེ་རེ་རེ་ལ་འབུམ་ཚོ་རེ་རེ་ཡིན་ནོ། །འགྲུབ་པའི་དུས་ནི་རྒྱུན་མི་འཆད་པ་དང་གུས་པའི་སྒོ་ནས་བསྒྲུབས་ན་འགྲུབ་པར་འགྱུར་རོ། །
འཕགས་པ་འཇམ་དཔལ་གཡོ་བའི་འཁོར་ལོའི་མན་ངག །ཁ་ཆེའི་པཎྜི་ཏ་ཤཱཀྱ་ཤྲཱི་བྷ་དྲའི་ཞལ་སྔ་ནས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། བཱ་གཱི་ཤྭ་ར་སྟོ་ཏྲ། བོད་སྐད་དུ། ངག་གི་དབང་ཕྱུག་ལ་བསྟོད་པ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །
གཞོན་ནུའི་སྐུ་ལུས་འཆང་བ་བོ། །ཡེ་ཤེས་སྒྲོན་མས་རབ་བརྒྱན་ཅིང་། །འཇིག་རྟེན་གཏི་མུག་མུན་སེལ་བ། །འཇམ་པའི་དབྱངས་ལ་ཕྱག་འཚལ་བསྟོད། །ཉིད་ཀྱི་མདངས་བཟང་ཚོགས་ཀྱིས་ནི། །ཟླ་བ་རྒྱས་པ་ཟིལ་གནོན་ཅིང་། །རིག་པ་རྣམ་པར་གསལ་འགྱུར་བ། །འཇམ་དཔལ་
ཁྱེད་ལ་ཕྱག་འཚལ་བསྟོད། །མ་བགོས་ཟུར་ཕུད་གསལ་བ་ལ། །ནོར་བུ་འབར་བའི་སྐུ་མངའ་ཞིང་། །ཉིད་ནི་ཀུན་ཏུ་འབར་བའི་སྐུ། །འཇམ་དཔལ་ཁྱོད་ལ་ཕྱག་འཚལ་བསྟོད། །བདུད་རྩི་དྲི་ཞིམ་འཇམ་ལ་ཟབ། །ཡིད་འོང་གསུང་གི་སྒྲ་སྒྲོགས་པ། །དམ་པའི་ཆོས་ཀྱི་རིན་ཆེན་མཛོད། །འཇམ་
དཔལ་ཁྱོད་ལ་ཕྱག་འཚལ་བསྟོད། །གང་གཱའི་ཆུ་ཐིགས་ལྟར་གྲངས་མེད། །འཇིག་རྟེན་ཁམས་ཀུན་མ་ལུས་པ། །ཉོན་མོངས་དྲི་མ་རབ་སྤངས་པའི། །འཇམ་དཔལ་ཁྱོད་ལ་ཕྱག་འཚལ་བསྟོད། །མཆེ་བ་གཙིགས་ཤིང་བསྒྱིངས་པ་ཡི། །འཇིགས་པའི་སྐུ་ཡི་ཚུལ་གྱིས་ནི། །གཤིན་རྗེའི་
དྲེགས་པ་འཇོམས་མཛད་པ། །འཇམ་དཔལ་ཁྱོད་ལ་ཕྱག་འཚལ་བསྟོད། །རང་གི་སྤྱན་དང་མདངས་འདྲ་བའི། །ཨུཏྤལ་སྔོན་པོ་རབ་མཛེས་པ། །ལྷུང་བཟེད་ཕྱག་མཆོག་བསྣམས་པ་ཡི། །འཇམ་དཔལ་ཁྱོད་ལ་ཕྱག་འཚལ་བསྟོད། །ཕྱོགས་བཅུར་བཞུགས་པའི་སངས་རྒྱས་ལ། །
རྒྱ་ཆེར་བསྟོད་པ་སྤྱོད་པ་དང་། །འགྲོ་བའི་ལམ་ནི་སྟོན་པ་པོ། །འཇམ་དཔལ་ཁྱོད་ལ་ཕྱག་འཚལ་བསྟོད། །ངག་གི་དབང་ཕྱུག་ལ་བུ་མོ་བརྒྱད་ཀྱིས་བསྟོད་པ་རྫོགས་སོ།།      །།༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་སྟོ་ཏྲ། བོད་སྐད་དུ། འཕགས་པ་འཇམ་དཔལ་ལ་བསྟོད་པ། འཕགས་པ་

73-1-75b

འཇམ་དཔལ་ལ་ཕྱག་འཚལ་ལོ། །དཔལ་གྱི་འབྱུང་གནས་འཇམ་དཔལ་ཀུན་གྱི་དཔལ། །མཐའ་དག་བྱམས་པས་ཁྱབ་པས་འཇམ་པའི་ངང་། །འཇམ་དང་དཔལ་དུ་གྲགས་པས་དོན་དང་ལྡན། །འཇམ་དཔལ་ཡང་དག་དཔལ་ལ་ཕྱག་འཚལ་བསྟོད། །གཞོན་ནུའི་སྐུ་མདོག་གསེར་མདངས་
འོད་ལམ་འབར། །རིན་ཆེན་མཆོག་གིས་བརྒྱན་པས་ས་ལེ་སྤ། །བྱིན་ཆེན་དང་བའི་ཐུགས་མངའ་འཛུམ་པ་པོ། །གཟི་བརྗིད་མཛེས་དང་ལྡན་ལ་ཕྱག་འཚལ་བསྟོད། །ཡོན་ཏན་གཏེར་གྱི་ཨུཏྤལ་ཕྱག་ན་བསྣམས། །པདྨ་རྒྱས་པའི་སྙིང་པོའི་གདན་ལ་བཞུགས། །ལྷ་ཡི་ཆ་ལུགས་ལྷ་ལས་ཁྱད་
པར་འཕགས། །ལྟ་བས་མི་སྐྱོ་ཁྱོད་ལ་ཕྱག་འཚལ་བསྟོད། །གཞོན་ནུ་སྒེག་པའི་ཚུལ་དུ་གདའ་མོད་ཀྱི། །ཡེ་ཤེས་ཐོགས་མེད་མངའ་བས་ཀུན་མཁྱེན་པས། །སེམས་ཅན་དོན་ལ་ནན་ཏན་དོན་དུ་གཉེར། །འགྲོ་བ་མཐའ་དག་སྒྲོལ་ལ་ཕྱག་འཚལ་བསྟོད། །གཞོན་ནུ་སྤྲུལ་པའི་མཚན་དང་དཔེ་
བྱད་ལ། །གང་གིས་ཡུད་ཙམ་མཐོང་བས་འདུན་པ་སྐྱེ། །གང་ལ་ཅིས་འདུལ་དེ་ལྟར་སྤྲུལ་མཛད་པ། །ཐབས་ཀྱིས་འདྲེན་པའི་མགོན་ལ་ཕྱག་འཚལ་བསྟོད། །བསམ་རྟོག་སྤྲོས་ལ་དབེན་པས་སངས་རྒྱས་བརྙེས། །ཡོད་མེད་རྟག་ཆད་མཐའ་ལ་མི་གནས་ཤིང་། །གཉིས་མེད་མཉམ་
པས་ཆོས་ཀྱི་ཚུལ་ལ་གནས། །ཡང་དག་དོན་གྱི་མཆོག་ལ་ཕྱག་འཚལ་བསྟོད། །ཁྱོད་ནི་ཆོས་དབྱིངས་ཟབ་མོའི་འབྱུང་གནས་ཏེ། །ཡི་གེ་སྨྲ་བས་རྟོག་པའི་ཡུལ་མེད་ཀྱང་། །འདུལ་བའི་དབང་གིས་ཆོ་འཕྲུལ་གཟུགས་སྟོན་པ། །དམ་པས་མཐོང་བར་མཛད་ལ་ཕྱག་འཚལ་བསྟོད། །ཚུལ་བཞིན་
མ་ཡིན་ཡིད་ལ་བྱེད་པ་སྤངས། །རིགས་པས་དགོན་པར་གྱུར་པའི་ཐབས་ལ་དབེན། །ཡེ་ཤེས་བདུད་རྩིའི་ཆར་གྱིས་བརླན་མཛད་ཅིང་། །བྱང་ཆུབ་མྱུ་གུ་སྐྱེད་ལ་ཕྱག་འཚལ་བསྟོད། །བྱམས་ཆེན་འགྲན་ཟླ་མེད་པ་དག་གི་དབང་། །མཚན་མར་སྤྲོས་པའི་རྩོད་པ་ཚར་བཅད་དེ། །
ཞི་བ་མི་གཡོ་དབྱིངས་སུ་འཛུད་མཛད་པ། །འཇིག་རྟེན་དེད་དཔོན་མཆོག་ལ་ཕྱག་འཚལ་བསྟོད། །དབང་མཁྱེན་ཆེན་པོ་ཤེས་རབ་རལ་གྲི་ཡིས། །ལྟ་བ་དམན་པས་བསླད་པའི་དྲ་བ་འདྲལ། །བག་ཡངས་མི་རྟོག་དབྱིངས་སུ་ཡུན་དུ་བཞུགས། །སྐྱེ་དགུ་བདེ་བར་འགོད་

73-1-76a

ལ་ཕྱག་འཚལ་བསྟོད། །ཁྱོད་ནི་ཆོས་དབྱིངས་ཟབ་མོའི་འབྱུང་གནས་ཏེ། །གསུང་རབ་མདོ་སྡེ་བཅུ་གཉིས་གང་ལ་ཡང་། །གང་དུ་ཁྱོད་ཀྱིས་གསུངས་པ་ལྷག་པར་ཟབ། །ཆོས་ཉིད་དོན་མཆོག་སྟོན་ལ་ཕྱག་འཚལ་བསྟོད། །དངོས་པོ་མཚན་མར་ཆགས་པའི་དུག་འཐུངས་
པས། །སྡུག་བསྔལ་ནད་ཀྱིས་བརྒྱལ་བའི་སེམས་ཅན་རྣམས། །གཉིས་མེད་རང་བཞིན་མྱ་ངན་འདས་སྟོན་པ། །བདུད་རྩི་སྟོབས་པར་མཛད་ལ་ཕྱག་འཚལ་བསྟོད། །མ་རིག་རྨོངས་པས་བསླད་པའི་མུན་རུམ་ནས། །ཐར་བའི་དུས་མེད་མུ་ཅོར་འཁྱམས་པ་ལ། །ཡེ་ཤེས་སྒྲོན་མའི་འོད་ཀྱིས་
གསལ་མཛད་ནས། །སྣང་བས་ཐར་བར་མཛད་ལ་ཕྱག་འཚལ་བསྟོད། །ཡོན་ཏན་རྫོགས་ཏེ་བཙལ་བར་བྱ་མིན་པས། །ཐུགས་རྗེས་ཐུགས་དམ་བཙན་པར་གྱུར་པ་ཡང་། །བརྩོན་འགྲུས་སྐྱོ་བ་མི་མངའ་སྲིད་པ་སེལ། །སེམས་ཅན་མཐའ་དག་སྒྲོལ་ལ་ཕྱག་འཚལ་བསྟོད། །སེམས་ཅན་མཐུན་པར་
སྲིད་པ་མི་འདོར་ཞིང་། །ཇི་ལྟར་ཉེས་པའི་སྐྱོན་གྱིས་མི་གོས་པ། །འདམ་ནས་པདྨ་གསལ་བར་འབྱུང་བ་ལྟར། །སྐྱོན་མེད་དག་པ་ཁྱོད་ལ་ཕྱག་འཚལ་བསྟོད། །སེམས་ཅན་ཟད་པའི་མཐའ་ནི་དཔག་དཀའ་སྟེ། །སྲིད་པ་སྟོངས་པར་ཐུགས་དམ་བཅས་པ་ཡིས། །ཡོན་ཏན་དེས་ན་བྱང་ཆུབ་གཞན་ལས་འཕགས། །
ཐུགས་རྗེ་མཐུ་སྟོབས་ཆེ་ལ་ཕྱག་འཚལ་བསྟོད། །འཕགས་པ་འཇམ་དཔལ་ལ་ཁྱེའུ་བཅུ་དྲུག་གིས་བསྟོད་པ་རྫོགས་སོ།།      །།༄༅༅། །རྒྱ་གར་སྐད་དུ། ཨཱརྱ་བཱ་གཱི་ཤྭ་ར་སྟོ་ཏྲཾ། བོད་སྐད་དུ། འཕགས་པ་ངག་གི་དབང་ཕྱུག་ལ་བསྟོད་པ། འཕགས་པ་ངག་གི་དབང་ཕྱུག་ལ་ཕྱག་
འཚལ་ལོ། །གཞོན་ནུ་ཡིད་འོང་མཛེས་པའི་ཆ་ལུགས་ཅན། །ཉོན་མོངས་རྣམ་དག་པུཎྜ་རཱི་ཀའི་མདོག །ཟླ་བ་བྱེ་བའི་མདོག་ཅན་མཚུངས་མེད་སྐུ། །འཇམ་དབྱངས་སྙིང་རྗེ་ཅན་ལ་ཕྱག་འཚལ་ལོ། །ངག་གི་ཉེས་སྤངས་ཀ་ལ་པིང་ཀའི་གསུང་། །སྟོང་ཉིད་ཟབ་མོའི་སྒྲ་ནི་བསྒྲགས་པ་ཡིས། །འགྲོ་
ཀུན་མ་རིག་གཉིད་ལས་སད་མཛད་པ། །འཇམ་དབྱངས་དག་པའི་གསུང་ལ་ཕྱག་འཚལ་ལོ། །གཉིས་མེད་བདེ་ཆེན་མཐའ་དང་བྲལ་བའི་ཐུགས། །མཁའ་ལྟར་ཚད་མེད་འགྲོ་བ་ཀུན་ལ་གཟིགས། །སྒྱུ་མའི་ཚུལ་གྱིས་འགྲོ་དོན་རྫོགས་མཛད་པ། །འཇམ་དབྱངས་སྤྲོས་བྲལ་ཐུགས་ལ་ཕྱག་འཚལ་ལོ། །

73-1-76b

མི་རྟོག་ཡེ་ཤེས་དོན་གྱི་འཁོར་ལོ་དང་། །དམིགས་མེད་ཐུགས་རྗེ་དྲ་བས་འབྲེལ་པ་ཡིས། །སྲིད་གསུམ་འཁོར་བའི་དྲ་བ་གཅོད་མཛད་པའི། །མགོན་པོ་དྲ་བ་ཅན་ལ་ཕྱག་འཚལ་ལོ། །ཤེས་རབ་མིག་གིས་འགྲོ་བ་ཀུན་ལ་གཟིགས། །འོད་གསལ་དྲི་མེད་ཤེས་རབ་ཟླ་འོད་ཀྱིས། །མ་རིག་མུན་ནག་
ཐིབས་པོ་སེལ་མཛད་པའི། །མགོན་པོ་ཟླ་འོད་དེ་ལ་ཕྱག་འཚལ་ལོ། །བདེ་ཆེན་དོན་མཚོན་ཤེས་རབ་མ་ཡི་གཟུགས། །འགྲོ་ལ་ཆགས་པའི་སྤྱན་ནི་ཟུར་གྱིས་བལྟ། །བདག་མེད་སེང་གེའི་སྒྲ་ཆེན་སྒྲོགས་མཛད་པའི། །ལྷ་མོ་སྐྲ་ཅན་མ་ལ་ཕྱག་འཚལ་ལོ། །གཟུགས་དང་ལང་ཚོས་རྣམ་སྒེག་བུད་མེད་
ཚུལ། །ཐབས་དང་ཤེས་རབ་ཡོངས་རྫོགས་ནུ་མ་རྒྱས། །གཞན་དོན་མཛད་ལ་ཉེ་བའི་དགོངས་པ་ཅན། །ཉེ་བའི་སྐྲ་ཅན་མ་ལ་ཕྱག་འཚལ་ལོ། །ཀྱེ་མ་མགོན་པོ་འཇམ་པའི་དབྱངས། །མི་དགེའི་སེམས་ལས་བཟློག་ཏུ་གསོལ། །རྨི་ལམ་དུའང་སྡིག་པའི་སེམས། །ཕྱིན་ཆད་འབྱུང་བར་མ་གྱུར་ཅིག །
བདག་ནི་ཚེ་རབས་ཐམས་ཅད་དུ། །འཇམ་དབྱངས་ཁྱོད་ལ་རྩེ་གཅིག་གིས། །བསམ་པ་གུས་པས་གསོལ་འདེབས་ཤིང་། །རྟག་ཏུ་སྒྲུབ་པས་མཉེས་བྱེད་ཤོག །ཀྱེ་མ་འཇམ་དབྱངས་སྙིང་རྗེ་ཅན། །དུས་གསུམ་གཤེགས་པའི་ལམ་ཆེན་ནས། །བྱང་ཆུབ་སེམས་ཀྱི་ཤིང་རྟ་དང་། །འདྲེན་པའི་བཤེས་
གཉེན་ཁྱོད་ཀྱིས་མཛད། །འཕགས་པ་ངག་གི་དབང་ཕྱུག་གཙོ་འཁོར་ལྔ་པའི་བསྟོད་པ་པཎྜི་ཏ་ཐིག་ལེ་བུམ་པས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། ན་བ་ཀུཾ་ཀུ་མ་སྟ་བ། བོད་སྐད་དུ། གུར་ཀུམ་གཞོན་ནུ་ལྟ་བུའི་བསྟོད་པ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་
ལོ། །གུར་གུམ་གཞོན་ནུའི་གེ་སར་མདངས་འདྲའི་སྐུ། །ལྷག་པར་ཆགས་ཤིང་མོས་པ་འཛིན་འདི་ནི། །འགྲོ་བ་རྗེས་སུ་ཆགས་པས་འདུལ་གཟིགས་ནས། །ཐུགས་རྗེ་ཉིད་ཀྱིས་གཞན་གྱི་དབང་དུ་བཟུང་། །ཆར་སྤྲིན་གཞོན་དང་ཟླ་བ་ལྟ་བུའི་ཞལ། །གཉིས་ཀྱི་བར་ན་གནས་པ་རབ་མཛེས་པ། །འཆར་
ཁའི་ཉི་མའི་ཟེར་གྱིས་ཕོག་པ་ཡི། །གསེར་གྱི་པདྨ་ལྟ་བུ་རོལ་པའི་ཞལ། །ཐུབ་པ་ཡན་ལག་དྲི་མེད་རིན་ཆེན་བརྒྱས། །བརྒྱན་ཅིང་ཡིད་འོད་འོད་ཟེར་རབ་འཕྲོ་བ། །ཆར་སྤྲིན་གཞོན་ནུ་གློག་གིས་བསྐོར་འདྲས་ནི། །སྤྲས་པ་ཁྱོད་ཀྱི་ཅོད་པན་སྟེང་ན་འཛིན། །འཆར་ཁའི་ཟེར་གྱིས་པདྨ་དམར་ཕོག་པའི། །

73-1-77a

མདངས་འདྲ་དགེ་བའི་མཚན་དང་རྒྱན་གྱི་གཞི། །ཁྱོད་ཀྱི་ཕྱག་ན་རལ་གྲི་མདའ་དག་དང་། །ཨུཏྤལ་སྔོན་པོ་དང་ནི་གཞུ་དག་འཛིན། །ཁྱོད་ཀྱི་འོད་ཀྱི་ཕུང་པོས་ཕྱོགས་མཚམས་སུ། །ཐུབ་རྣམས་རབ་སྐྱེད་ཡོན་ཏན་རབ་རྒྱས་བྱས། །ཡང་ཡང་རབ་འཕྲོས་ཡང་ཡང་རབ་བསྡུས་
པས། །གདུལ་བྱའི་བློ་ཡི་མ་རིག་མུན་པ་འཇོམས། །བཅོམ་ལྡན་སྲིད་པའི་འཇིགས་པ་སེལ་མཛད་ལ། །ཚད་མེད་མཆི་མས་མིག་བརླན་བཀང་བྱས་ནས། །ཐལ་སྦྱར་སྤྱི་བཏུད་བ་སྤུ་ལངས་པ་ཡིས། །ཐུགས་རྗེ་ཅན་ལ་མོས་པས་གུས་ཕྱག་འཚལ། །སྲིད་པའི་སྡུག་བསྔལ་གྱིས་བསྡམས་འགྲོ་
གསུམ་པོ། །ཐུགས་རྗེ་ཆེན་པོས་འགྲེལ་པར་མཛད་པ་ལ། །ལུས་དང་བཅས་པས་ཕྱག་འཚལ་ངག་དང་ཡང་། །ཕྱག་འཚལ་ཡིད་ཀྱིས་གུས་པས་ཕྱག་འཚལ་ལོ། །ཁྱོད་འབངས་སྐྱེ་བོ་སྐྱབས་གཞན་མ་མཆིས་པས། །འདི་ནི་ཡང་དང་ཡང་དུ་སློང་ལགས་སོ། །བདག་ནི་སྐྱེ་བ་སྐྱེ་བར་
མགོན་ཁྱོད་ལ། །སྐྱབས་སུ་མཆི་ཡིས་སྲིད་པའི་སྡུག་བསྔལ་སོལ། །གུར་གུམ་གཞོན་ནུ་ལྟ་བུའི་བསྟོད་པ། སློབ་དཔོན་སེང་གེ་མི་གཡོ་བས་མཛད་པ་རྫོགས་སོ།།      །།རྒྱ་གར་གྱི་མཁན་པོ་དཱི་པཾ་ཀ་ར་ཤྲཱི་ཛྙཱ་ན་དང་། ཞུ་ཆེན་གྱི་ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་
ལ་ཕབ་པའོ། །༄༅༅། །རྒྱ་གར་སྐད་དུ། བྷ་ག་བཱན་ཨཱརྱ་མཉྫུ་ཤྲཱི་སཱ་དྷིཥྛཱ་ན་སྟུ་ཏི། བོད་སྐད་དུ། བཅོམ་ལྡན་འདས་འཕགས་པ་འཇམ་དཔལ་གྱི་བསྟོད་པ་བྱིན་རླབས་དང་བཅས་པ། བཅོམ་ལྡན་འདས་འཕགས་པ་འཇམ་དཔལ་ལ་ཕྱག་འཚལ་ལོ། །འཇམ་དབྱངས་ཕྱོགས་
བཅུའི་དེ་བཞིན་གཤེགས་པ་བྱེ་བ་རྣམས་ཀྱིས་བསྟོད་པར་གྱུར་མོད་དེ་ལྟ་ནའང་། །བསམ་པ་བླུན་པོའང་བླ་མ་ལ་གུས་དབང་གིས་ཀྱང་ནི་ཁྱོད་ཀྱི་ཡོན་ཏན་བརྗོད་བགྱི་སྟེ། །རབ་ཏུ་དྲེགས་བཅས་དད་པའི་རྒྱལ་པོའི་སྡེ་དག་གིས་བསྟེན་ཆུ་དང་ལྡན་པའི་ཡིད་བཞིན་མཚོར། །བཞད་རྣམས་ཀྱང་ནི་ཡིད་
ལ་རབ་ཏུ་དགའ་བ་བསྐྱེད་དེ་རྒྱུ་ཞིང་རྣམ་པར་གནས་པར་བགྱིད། །ཟུར་ཕུད་གསལ་ལྡན་གསེར་མཆོག་སྙན་ཆས་ལེགས་པར་རྣམ་བརྒྱན་མགུལ་ནི་རབ་ཏུ་སྒེག་བཅས་ཤིང་། །སྙན་གྱི་གོང་རྒྱན་ཨུཏྤལ་མཛེས་འདྲ་མངའ་སླད་ཁྱོད་ནི་གཞོན་ནུར་རབ་གྲགས་དེ་ལྟ་ནའང་། །ཀུན་ཏུ་བཟང་པོ་འཇིག་རྟེན་

73-1-77b

དབང་ཕྱུག་རྡོ་རྗེ་འཛིན་སོགས་རྔ་ཡབ་མཆོག་ཏུ་མཛེས་འཛིན་པའི། །མཁས་པ་རྣམས་ཀྱིས་བླ་མ་ལྟ་བུར་འཁོར་གྱི་དཀྱིལ་འཁོར་རྣམས་སུ་ཁྱོད་ནི་བསྟེན་པར་གྱུར། །དོ་ཤལ་ཕྲེང་བའི་སིལ་སིལ་སྒྲོགས་བྱེད་མཆོག་ཏུ་དགའ་སྐྱེད་སྙན་གདུབ་མངའ་བ་སྤྱི་གཙུག་གི། །རིན་ཆེན་འོད་མཛེས་འཕྲོ་བ་དང་
ལྡན་གཞོན་ནུའི་ན་ཚོད་དགེ་ལེགས་མངའ་བ་གང་ན་ཡང་། །བཅོམ་ལྡན་ས་གསུམ་དག་ན་གུས་པས་ཕྱག་བྱར་འོས་པ་ཁྱོད་ནི་རྩེ་གཅིག་ཉེར་ཞི་ཡི། །སྣོད་གྱུར་མཆོད་པར་འོས་འདི་གང་ནའང་དེ་སླད་སུ་ཞིག་ངོ་མཚར་ཅི་ཕྱིར་སྐྱེ་མི་འགྱུར། །ཤིན་ཏུ་རྣམ་འགྱུར་བཞིན་ལྡན་སྦྲུལ་སྟོང་དག་གི་ཆུན་པོ་གདུ་
བུར་བྱས་པ་འཛིན་མཛད་ཅིང་། །རྣོ་བའི་མཚོན་བསྣམས་གཡུལ་ངོར་རབ་དཔའ་གཤིན་རྗེ་རྣམས་ནི་རབ་ཏུ་སྐྲག་པར་མཛད་པ་ཡི། །མི་བཟད་འཕགས་པ་གཤིན་རྗེའི་གཤེད་དང་བཅས་པར་གྱུར་ཀྱང་ཁྱོད་ནི་ཞི་བའི་དཀྱིལ་འཁོར་ཏེ། །ཆ་ཡི་ཚོགས་ཀུན་ཡོངས་རྫོགས་ལུས་ལྡན་སྟོན་ཀའི་ཟླ་བ་
ཉ་བ་ལྟ་བུར་གྱུར་པ་ལགས། །ཁྱོད་ནི་ཆོས་ལམ་ཉེ་བར་སྟོན་ལ་མཁས་ཀྱང་ཆོས་འདིར་འགའ་ཡང་གཟིགས་པ་ཡོད་མ་ཡིན། །ཁྱོད་ནི་སེམས་ཅན་ཕན་ལ་དགྱེས་ཀྱང་སེམས་ཅན་ཉིད་ནི་འགའ་ཡང་དམིགས་པར་གྱུར་མ་ལགས། །བདེ་གཤེགས་དགྱེས་པ་ཕན་ཚུན་དུ་ནི་མི་འགྲིགས་འགྱུར་བའི་མཛད་
སྤྱོད་མང་པོ་འདི་འགལ་བས། །ཁྱོད་ནི་ས་གསུམ་ངོ་མཚར་རྒྱུ་གཅིག་གྱུར་པ་དེ་སླད་ཁྱོད་འདིར་བསྙེན་པར་བགྱིད་པ་ལགས། །གཞན་དོན་འབྲས་བུ་སྨིན་པས་ཤིང་བཞིན་རྣམ་པར་གནས་པས་གངས་ཆེན་ལྟ་བུར་གྱུར་པ་སྟེ། །བརྟན་པ་ཡི་ནི་རི་རབ་དང་འདྲ་གྲུབ་པས་བསྟེན་པས་རི་རྒྱལ་མ་ལ་
ཡ་དང་མཚུངས། །གཏི་མུག་རབ་རིབ་ཞི་བར་མཛད་པས་ཉི་མ་བཞིན་ཏེ་ཕུན་སུམ་ཚོགས་གཟུགས་ཟླ་འདྲ་ཡི། །མགོན་ཁྱོད་གཞན་དོན་མཛད་སླད་འགྲོ་ན་བྱིས་པ་རོལ་འདྲའི་མཛད་པ་ཡིས་ནི་རྣམ་པར་རྒྱུ། །དྲི་ཞིམ་གྱིས་བསྒོས་མཆོག་ཏུ་མཛེས་པའི་ཨུཏྤལ་སྔོན་པོ་བསྣམས་པས་རྫིང་བུ་ལྟ་བུ་སྟེ། །ཤིན་
ཏུ་རྣམ་སྒེག་ཚུལ་དང་ལྡན་པས་ཡུལ་གྱི་བྱིས་པ་ལོ་བརྒྱད་ལོན་པ་དང་འདྲ་ཞིང་། །ཆོས་ཆར་དྲི་མ་མེད་པ་འབེབས་པས་ཆར་སྤྲིན་འབྲུག་སྒྲ་རབ་ཏུ་སྒྲོགས་པ་ལྟ་བུ་དང་། །ངང་པའི་རྒྱལ་པོ་ཡིད་འོང་སྒྲ་སྐད་ཟིལ་གནོན་གསུང་མངའ་ཁྱོད་ལ་སུ་ཞིག་བསྙེན་མི་བགྱིད། །སྐད་ཅིག་ཉིད་ལ་ཡོངས་སུ་འབར་གྱུར་

73-1-78a

གཏི་མུག་རབ་རིབ་སྐད་ཅིག་ཉིད་ལ་ཟད་གྱུར་ཅིང་། །ཐམས་ཅད་དུ་ནི་ལེགས་པའི་ལམ་སྟོན་བདེ་གཤེགས་སྡིག་མེད་མྱ་ངན་འདས་པར་གྱུར་པ་ན། །གཞོན་ནུའི་ཚུལ་འཛིན་འོད་ཟེར་སྟོང་ཕྲག་འབར་བའི་རྒྱན་གྱིས་ལེགས་པར་སྤྲས་པར་གྱུར་པ་ཡི། །ཁྱོད་ཉིད་གཅིག་པུ་ཕྱོགས་
བཅུ་རྣམས་ན་ད་ལྟ་མཆོག་ཏུ་སྣང་བར་མཛད་པ་མ་ལགས་སམ། །མགོན་པོ་ཀྱེ་མ་ཁྱོད་གཟུགས་རི་མོར་བྱས་པས་ཀྱང་ནི་ཇི་ལྟར་ཚིམ་པ་སྐྱེད་བྱེད་ལྟར། །སྟོན་ཀའི་མཚན་མོ་དཀར་ཞིང་རབ་ཏུ་མཛེས་པར་གྱུར་པ་ཟླ་བའི་དཀྱིལ་འཁོར་མ་ལགས་ཏེ། །ཨུཏྤལ་སྔོན་པོ་མཛེས་པའི་དྲི་ངད་ཞིམ་པོས་བསྒོས་
པའི་སེར་བུའི་ངད་ཀྱང་མ་ལགས་ཤིང་། །ལྷ་ཡི་བུ་མོས་བསྟབས་པར་གྱུར་པའི་ཧ་རི་ཙནྡན་དྲི་བཟངས་ལྡན་པའང་དེ་ལྟ་མིན། །གཞོན་ནུ་ཁྱོད་ཞབས་སེན་མོའི་འོད་ཟེར་ཕྲེང་བ་རྒྱ་ཆེན་ཐུན་མཚམས་སུ་ཤར་ཟླ་འོད་བཞིན། །ཤིན་ཏུ་ཡིད་འོང་དཀར་དམར་མདོག་ཅན་རབ་བཏུད་ལྷ་དང་ལྷ་མིན་གཙུག་ནོར་
འོད་ཟེར་དང་། །འདྲེས་པས་གང་རིག་རལ་པ་ཅན་གྱི་མི་དེ་དག་ཀྱང་སྐྱེ་བོ་ཀུན་གྱིས་ཕྱག་བྱར་འོས། །མགོན་པོ་ཁྱོད་ཀྱི་སྔགས་འཛིན་གྲུབ་པ་ཐོབ་ནས་རབ་ཆགས་སྒེག་པ་ལས་བྱུང་བའི། །གོམ་ཚུགས་ཀྱིས་འགྲོ་རྒྱན་ཕྲེང་རྐང་གདུབ་ཡིད་འཕྲོག་དང་ལྡན་མཛེས་མ་བརྒྱ་དང་ལྷན་ཅིག་ཏུ། །ས་སྟེངས་ན་
རོལ་གཞན་ནི་ལྷ་ཡི་དབང་པོས་ཙནྡན་གཏུལ་བའི་དྲི་ཞིམ་དང་ལྡན་པའི། །ལི་ཤི་མེ་ཏོག་དྲི་ལྡན་སྦྲང་མས་དཀྲིགས་པའི་ཙནྡན་གྱི་ནི་ནགས་ན་གནས་པར་བྱེད། །ན་ཚོད་གཞོན་ཞིང་དྲེགས་དང་བཅས་པས་སྒེག་ཅིང་རྣམ་པར་འཕྱེན་བྱེད་གསལ་བར་བྱས་གྱུར་པའི། །དྲི་ཞིམ་ལ་ནི་ཆགས་པ་སྐྱེད་བྱེད་སྦྲང་མའི་
ཚོགས་རྣམས་ཀྱིས་ནི་རབ་ཏུ་དཀྲིགས་གྱུར་ཅིང་། །པི་ཝང་གླིང་བུ་ངང་པའི་རྒྱལ་པོ་དང་འདྲ་ཤིན་ཏུ་སྙན་པའི་དབྱངས་དང་ལྡན་གྱུར་པའི། །གནོད་སྦྱིན་བུ་མོ་མཆོག་ཀྱང་ཁྱོད་ཀྱི་སྔགས་བཟླས་པ་ཡི་མི་ཡིས་རབ་ཏུ་འགུགས་པར་བྱེད། །འགྲོ་བ་གསུམ་གྱི་མགོན་པོ་འབྲས་བུ་མེད་པའི་མང་དུ་བརྗོད་པ་
ཡིས་ནི་ཅི་བགྱིར་མཆིས། །ཁྱོད་ཀྱི་ཡོན་ཏན་རྒྱ་མཚོ་ཡང་ཡང་བརྗོད་པར་ཐུབ་པའི་མཁྱེན་པས་སྤྱོད་པ་མ་ལགས་པ། །དེ་ཕྱིར་འཇམ་པའི་དབྱངས་ཀྱི་ཡོན་ཏན་འདི་ཙམ་ཞེས་བྱ་བདག་གིས་རྟོགས་པར་ནུས་མ་ལགས། །ཀུན་ནས་དཔག་མེད་ཆུ་དང་ལྡན་པའི་རྒྱ་མཚོ་ལས་ནི་ཕན་ཚུན་འགྲོ་བ་བསྒྲལ་

73-1-78b

བའི་ཕྱིར། །མགོན་པོ་སེམས་དང་བཅས་པའི་མི་རྣམས་དག་ལས་སུ་ཞིག་འདིར་ནི་འཇུག་པར་འཚལ་བར་བགྱིད། །དེ་ལྟར་བཅོམ་ལྡན་འདས་ནི་མགོན་པོ་འཇམ་པའི་དབྱངས་ལ་མངོན་པར་བསྟོད་པ་བགྱིད་པ་ལས། །བདག་གིས་དགེ་བ་གང་ཞིག་བསགས་པ་དེས་ནི་འགྲོ་བ་ཀུན་གྱི་རྙོག་པ་
ཞི་གྱུར་ཅིག །དེ་ཡིས་བདག་ཀྱང་སྐྱེ་བ་དང་ནི་སྐྱེ་བར་བརྟན་ཞིང་མཚུངས་པ་མེད་པའི་སྙན་དངགས་དང་། །རིགས་དང་ལྡན་ཞིང་ཚེ་རབས་དྲན་དང་སྙིང་རྗེ་རྒྱ་ཆེན་ཡིད་འཕྲོག་པ་དང་ལྡན་པར་ཤོག །བཅོམ་ལྡན་འདས་འཕགས་པ་འཇམ་པའི་དབྱངས་ཀྱི་བསྟོད་པ་བྱིན་རླབས་དང་བཅས་པ་སྙན་
དངགས་མཁན་རྣམས་ཀྱི་གཙུག་གི་ནོར་བུ་བྱང་ཆུབ་སེམས་དཔའི་རིགས་ཅན་མཁས་པ་ཆེན་པོ་ཙནྡྲ་གོ་མིས་མཛད་པ་རྫོགས་སོ།།      །།རྒྱ་གར་གྱི་མཁན་པོ་མཁས་པ་ཆེན་པོ་སུ་མ་ཏི་ཀཱིརྟིའི་ཞལ་སྔ་ནས། བོད་ཀྱི་ལོ་ཙཱ་བ་དགེ་སློང་བློ་ལྡན་ཤེས་རབ་དང་། མར་པ་ཆོས་ཀྱི་དབང་ཕྱུག་གིས་བསྒྱུར་
བའོ། །༄༅༅། །རྒྱ་གར་སྐད་དུ། ཤྲཱི་ཛྙཱ་ན་གུ་ཎ་ཕ་ལ་ནཱ་མསྟུ་ཏིཿ། བོད་སྐད་དུ། དཔལ་ཡེ་ཤེས་ཡོན་ཏན་བཟང་པོ་ཞེས་བྱ་བའི་བསྟོད་པ། བཅོམ་ལྡན་འདས་འཇམ་པའི་དབྱངས་ལ་ཕྱག་འཚལ་ལོ། །གང་གི་བློ་གྲོས་སྒྲིབ་གཉིས་སྤྲིན་བྲལ་ཉི་ལྟར་རྣམ་དག་རབ་གསལ་བ། །
ཇི་སྙེད་དོན་ཀུན་ཇི་བཞིན་གཟིགས་ཕྱིར་ཉིད་ཀྱི་ཐུགས་ཀར་གླེགས་བམ་འཛིན། །གང་དག་སྲིད་པའི་བཙོན་རར་མ་རིག་མུན་འཐོམས་སྡུག་བསྔལ་གྱིས་གཟིར་བའི། །འགྲོ་ཚོགས་ཀུན་ལ་བུ་གཅིག་ལྟར་བརྩེ་ཡན་ལག་དྲུག་ཅུའི་དབྱངས་ལྡན་གསུང་། །འབྲུག་ལྟར་ཆེར་སྒྲོགས་ཉོན་མོངས་གཉིད་སློང་
ལས་ཀྱི་ལྕགས་སྒྲོག་འགྲོལ་མཛད་ཅིང་། །མ་རིག་མུན་སེལ་སྡུག་བསྔལ་མྱུ་གུ་ཇི་སྙེད་གཅོད་མཛད་རལ་གྲི་བསྣམས། །གདོད་ནས་དག་ཅིང་ས་བཅུའི་མཐར་སོན་ཡོན་ཏན་ལུས་རྫོགས་རྒྱལ་སྲས་སྐུ། །བཅུ་ཕྲག་བཅུ་དང་བཅུ་གཉིས་རྒྱན་སྤྲས་བདག་བློའི་མུན་སེལ་ཁྱོད་ལ་འདུད། །གང་ཞིག་ལྷག་པའི་
བསམ་པ་རྣམ་པར་དག་པས་གཅིག་དང་བདུན་དང་། ཉི་ཤུ་རྩ་གཅིག་དང་། བརྒྱ་དང་། སྟོང་ལ་སོགས་པ་དག་ཉིན་རེ་བཞིན་དུ་སྒྲོགས་པ་དེ་ནི་གོ་རིམས་ཇི་ལྟ་བ་བཞིན་དུ། སྒྲིབ་པ་འདག་པ་དང་། ཐོས་པ་འཛིན་པ་དང་། སྤོབས་པ་དང་། མི་བརྗེད་པའི་གཟུངས་དང་། ཕྱིར་རྒོལ་བ་ཐམས་ཅད་འཇོམས་

73-1-79a

པའི་ཤེས་རབ་ཀྱི་དབང་པོ་དང་སྟོབས་ལ་སོགས་པ་ཡོན་ཏན་དཔག་ཏུ་མེད་པ་དང་ལྡན་པར་འགྱུར་རོ། །གང་ཞིག་ཉིན་རེ་བཞིན་དུ་ལན་གསུམ་དུ་བསྟོད་པ་བྱེད་པ་དེ་ནི་ཇི་སྐད་བཤད་པའི་ཡོན་ཏན་དེ་དག་དང་ལྡན་པས་ཤེས་རབ་དང་སྙིང་རྗེ་ལམ་དང་ས་རྣམས་རིམ་གྱིས་བགྲོད་དེ། གོང་ནས་གོང་དུ་ཆེས་
ཆེར་འཕགས་ནས་མྱུར་དུ་རྣམ་པ་ཐམས་ཅད་མཁྱེན་པའི་གྲོང་ཁྱེར་དུ་ཕྱིན་ནས་འགྲོ་བ་མ་ལུས་པ་འཁོར་བ་ལས་སྒྲོལ་བའི་དེད་དཔོན་ཆེན་པོར་འགྱུར་རོ། །དཔལ་ཡེ་ཤེས་ཡོན་ཏན་བཟང་པོ་ཞེས་བྱ་བའི་བསྟོད་པ། སློབ་དཔོན་རྡོ་རྗེ་མཚོན་ཆས་མཛད་པ་རྫོགས་སོ།།      །།རྒྱ་གར་གྱི་པཎྜི་ཏ་འབུམ་ཕྲག་གསུམ་པ་
དང་། བོད་ཀྱི་རྔོག་ལོ་ཙཱ་བས་བསྒྱུར་བའོ། །༄༅༅། །རྒྱ་གར་སྐད་དུ། ཨཱརྱ་མཉྫུ་གྷོཥ་སྟོ་ཏྲ། བོད་སྐད་དུ། འཕགས་པ་འཇམ་པའི་དབྱངས་ཀྱི་བསྟོད་པ། འཇམ་དཔལ་གཞོན་ནུ་གྱུར་པ་ལ་ཕྱག་འཚལ་ལོ། །སྡིགས་མཛུབ་གདོང་ཉིད་བསྟན་པ་ཡིས། །རི་རབ་ལྷུན་པོ་དུ་མ་གཡོས། །མ་ལུས་རྒྱ་མཚོ་ཆེན་པོའི་ཆུ། །
སེན་མོའི་རྩེ་མོས་གྱེན་དུ་བླངས། །ནམ་མཁའ་མུ་མེད་པ་ཡི་ཁམས། །ཞབས་ཀྱི་གོམ་པ་གཅིག་གིས་མནན། །ཟད་པའི་དུས་ཀྱི་མེ་འབར་བ། །ཞལ་གྱི་དབུགས་ཀྱིས་བཏབ་པས་བཅིལ། །དུས་མཚུངས་སྐུ་ཡི་ཆ་གཅིག་ལ། །ཆུ་དང་མེ་ཡི་ཆར་ཕབ་པ། །ལ་ལར་ཟད་པར་སངས་རྒྱས་སུ། །གྱུར་ནས་ཆོས་ཀྱི་འཁོར་ལོ་
བསྐོར། །ལ་ལར་ཉོན་མོངས་མ་ལུས་པ། །ནུབ་པས་ཞི་བའི་དེ་ཉིད་སྟོན། །དལ་བས་དབང་པོ་བདེ་སོགས་ཀྱི། །གདོང་ལ་རྣམ་པར་གཟིགས་པའི་སྤྱན། །ཕྱོགས་ཀྱི་འཁོར་ལོས་བཀབ་པ་ཡིས། །ཕྱག་མཐིལ་དམར་པོ་ཉི་མ་རྨུགས། །ལ་ལར་ལྷ་མ་ཡིན་གྱི་དཔལ། །མཐུ་གྱུར་དམ་པར་གྱུར་པ་འཛིན། །
ཁྱིམ་པ་དང་ནི་བརྟུལ་ཞུགས་པ། །ཚངས་སྤྱོད་རྟག་ཏུ་ཡེ་ཤེས་ཅན། །བྱིས་པའི་གཟུགས་ཅན་འགྲོ་བའི་ཡབ། །འཇམ་པའི་དབྱངས་ལ་ཕྱག་འཚལ་ལོ། །མི་འཇིགས་པ་དང་སྟོབས་མངའ་བ། །ཐུབ་པའི་གཟུགས་བརྙན་དང་མཚུངས་པ། །ཕྱེ་མ་མིག་སྨན་དང་མཚུངས་འདི། །ཁྱོད་ལ་སྐྱབས་
སུ་རབ་ཏུ་མཆི། །ཉོན་མོངས་བུད་ཤིང་ཡེ་ཤེས་མེ། །དུ་མ་མཚོན་པ་བགྲང་བ་ལྟར། །འཁོར་བ་སྲིད་པའི་སྦྱོར་བ་དང་། །མྱ་ངན་འདས་ལ་ཁྱོད་མི་གནས། །མགོན་པོ་རྟག་ཏུ་དབུ་མ་མཆོག །ཡང་དག་བརྙེས་པ་མ་ལགས་སམ། །ཆུ་དང་བཅས་པའི་སྣོད་རྣམས་སུ། །ཟླ་བའི་གཟུགས་བརྙན་ཤར་བ་ལྟར། །གཅིག་

73-1-79b

ཏུ་གདུལ་བྱ་གཡོ་བའི་ཡིད། །རྣམ་པ་མང་པོ་འདྲ་བའི་མཚན། །ཉིད་ཀྱི་བག་ཆགས་ཡིད་གཅིག་ཏུ། །ཡེ་ཤེས་གྲུབ་པའི་གསལ་གྱུར་པ། །བཀའ་དྲིན་དོན་གཉེར་ཚུལ་གྱིས་ནི། །ཆགས་པས་ཁྱོད་ཀྱི་ཞབས་དྲུང་ལྷུང་། །ཁྱོད་ཀྱི་འོད་ཟེར་འཕྲོ་བའི་ཆ། །ཕྱོགས་ཀྱི་ཁོངས་སུ་རྣམ་སྤྲོས་པ། །ཟླ་བའི་
འོད་ཟེར་གང་གྱུར་མཉམ། །བྱིས་པའི་གཟུགས་ཅན་མཛེས་པ་འདི། །ཚེས་གཅིག་ཟླ་བ་ལྟ་མཉེས་པ། །ཁྱོད་ཀྱི་སྤྱོད་པ་བཟློག་དཀའ་བས། །བདུད་ཀྱི་མཐུ་རྩལ་འཇོམས་པས་ཅི། །ཁྱོད་ཀྱི་མཚན་ཙམ་དྲན་པས་ནི། །དམྱལ་བ་པ་ཡི་ཁྲག་དང་ཞག །མེད་པར་སྐམས་པས་དམྱལ་བ་པའི། །
འོད་འཕྲོ་དེ་དག་ཞི་བར་འགྱུར། །ཤེས་རབ་བྲལ་བས་མདུན་དུ་ཁྱོད། །དྲན་པའི་ཡུལ་དུ་གྱུར་པས་ཀྱང་། །མཁས་པ་རྣམས་ཀྱང་ཐེ་ཚོམ་གྱི། །མདུད་པ་དམ་པོས་འཆིང་བར་བྱེད། །ཐམས་ཅད་ལྟ་ཞོག་སྐད་ཅིག་ཏུ། །ཁྱོད་ཀྱི་སྤྱན་ཟུར་གྱིས་གཟིགས་ནས། །རྔ་ཡབ་གཡོབ་པའི་བཞད་
གད་ཀྱིས། །བསྟེན་པའི་དཔལ་ལྡན་ཉིད་བདག་གིས། །གདུལ་བྱ་པདྨོའི་སྣོད་རྣམས་ལ། །འོད་ཟེར་དྲ་བས་ཁ་འབྱེད་པས། །མགོན་པོ་སྔོན་མེད་ཉི་མ་ཡི། །རོལ་པས་ཉིན་མཚན་སྣང་བར་མཛད། །དོན་གསལ་མཛད་པའི་གསུང་གིས་ནི། །གཟུང་དང་འཛིན་པ་རྣམ་པར་སྤངས། །སྟོང་པ་ཉིད་ནི་
མངོན་སུམ་ལྟར། །གསུང་གི་དབང་ཕྱུག་སྟོན་པར་མཛད། །རྣམ་པར་རྟོག་ལས་མ་གཏོགས་པ། །འཁོར་བ་ཞེས་བྱ་ཅི་ཡང་མེད། །རྣམ་རྟོག་དེ་དང་བྲལ་བས་ན། །ཁྱོད་ནི་རབ་ཏུ་མྱ་ངན་འདས། །ཁྱོད་ཀྱི་ཡོན་ཏན་ཆ་བརྗོད་ལས། །བྱུང་བས་བསོད་ནམས་འཕེལ་བ་ཡིས། །འགྲོ་བ་རྣམས་ནི་ཁྱོད་བརྗོད་
པས། །ཕུན་སུམ་ཚོགས་པ་ལ་གནས་ཤོག །བཅོམ་ལྡན་འདས་འཇམ་པའི་དབྱངས་ཀྱི་བསྟོད་པ། རྟོག་གེ་པ་རྣམས་ཀྱི་གཙུག་གི་ནོར་བུ་སློབ་དཔོན་ཕྱོགས་ཀྱི་གླང་པོས་མཛད་པ་རྫོགས་སོ།།      །།རྒྱ་གར་གྱི་མཁན་པོ་ཤྲདྡྷཱ་ཀ་ར་ཝརྨ་དང་། ཞུ་ཆེན་གྱི་ལོ་ཙཱ་བ་རིན་ཆེན་བཟང་པོས་བསྒྱུར་
ཅིང་ཞུས་ཏེ་གཏན་ལ་ཕབ་པའོ། །༄༅༅། །རྒྱ་གར་སྐད་དུ། ཨ་ར་པ་ཙ་ན་སཱ་དྷ་ན་བི་དྷིཿ། བོད་སྐད་དུ། ཨ་ར་པ་ཙ་ནའི་སྒྲུབ་ཐབས་ཀྱི་ཆོ་ག །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །རྣལ་འབྱོར་པས་དང་པོར་གདོང་བཀྲུ་བ་ལ་སོགས་པ་བྱས་ལ། བསམ་གཏན་

73-1-80a

གྱི་ཁང་པ་དྲི་དང་བྱུག་པ་ལ་སོགས་པས་བྱུགས་ལ། སྟན་འཇམ་པོ་ལ་སེམས་དཔའི་སྐྱིལ་མོ་ཀྲུང་གིས་འདུག་སྟེ། བདག་དང་གཞན་ལ་ཕན་པའི་ཕྱིར། བྱང་ཆུབ་ཀྱི་སེམས་བསྒོམ་པར་བྱས་ལ། ཨོྃ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཞེས་བརྗོད་ལ། བདག་དང་
གཞན་སྟོང་པ་ཉིད་དུ་བསྒོམ་པར་བྱ་སྟེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ནས་རང་གི་ལུས་ཀྱི་མགོ་ནས་རྐང་པའི་མཐར་ཐུག་བར་དང་བའི་ཤེལ་སྒོང་ལྟ་བུར་དྲི་མ་མེད་པར་བསམ་མོ། །དེ་ནས་རང་གི་སྙིང་གའི་ནམ་མཁའ་ལ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་དྷཱིཿསྟོན་ཀའི་ཟླ་
བའི་མདོག་འདྲ་བ་འོད་ཚོགས་འཕྲོ་བར་བསམས་ལ། དེ་ཡོངས་སུ་གྱུར་པ་ལས་ཤེས་རབ་ཀྱི་རལ་གྲི་བསམས་ཏེ། དེ་ཡོངས་སུ་གྱུར་པ་ལས་འཇམ་པའི་རྡོ་རྗེར་བདག་ཉིད་བསམ་པར་བྱ་སྟེ། ཞལ་གཅིག་ཕྱག་གཉིས་པ། སྟོན་ཟླ་བྱེ་བ་དང་འདྲ་བར་སྣང་བ། རྒྱན་ཐམས་ཅད་ཀྱིས་བརྒྱན་
པ་བསམ་གཏན་གྱིས་འཛུམ་པའི་སྤྱན་ཅན། པདྨ་དང་ཟླ་བའི་དཀྱིལ་འཁོར་གྱི་གདན་ལ་བཞུགས་པ། ཕྱག་གཡས་ཀྱིས་ཤེས་རབ་ཀྱི་རལ་གྲི་འཕྱར་བ། གཡོན་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་ཐུགས་ཀར་འཛིན་པ་ཞལ་ཅུང་ཟད་བཞད་པ། དེའི་ཐུགས་ཀའི་ནམ་མཁའ་ལ་ཨ་ཡོངས་
སུ་གྱུར་པ་ལས་འཁོར་ལོ་རྩིབས་བརྒྱད་པ། དེའི་སྟེང་དུ་དེའི་ས་བོན་གྱུར་པ་ལས་ཟླ་བ་དེ་ལ་བླ་མའི་མན་ངག་གིས་ཡི་གེ་ལྔ་བསམ་པར་བྱའོ། །དེ་ལ་མན་ངག་ནི་འདི་ཡིན་ཏེ། དེ་ལ་ཨ་ཡོངས་སུ་གྱུར་པ་ལས། བཅོམ་ལྡན་འདས་མཉྫུ་ཤྲཱི་སྐུ་མདོག་དང་དབྱིབས་སྔར་བཤད་པ་ལྟ་བུ། ར་ལས་དྲ་
བ་ཅན་གྱི་འོད་པ་ལས་ཟླ་འོད། ཙ་ལས་སྐྲ་ཅན། ན་ལས་ཉེ་སྐྲ་ཅན། ཐམས་ཅད་ཀྱང་བཅོམ་ལྡན་འདས་དང་འདྲ་བར་བསམ་པར་བྱའོ། །དེ་ནས་ལྷ་ལྔ་པོ་དེ་དག་ལས་ཡི་གེ་ལྔ་འབར་བའི་འོད་ཀྱི་ཚོགས་འཕྲོ་བའི་རང་བཞིན་དུ་བསམས་ལ། རང་གི་སྙིང་གི་མི་ཤེས་པ་སྦྱང་བར་བྱ་ཞིང་སེམས་
ཀྱི་རྒྱུད་དྲི་མ་མེད་པར་བྱའོ། །དེ་ནས་སྐད་ཅིག་གིས་འཁོར་ལོ་གཡས་སུ་འཁོར་བར་བསམ་ཞིང་། ལྷ་རྣམས་མི་གཡོ་བར་བསམས་ལ་གཏི་མུག་གི་མུན་པ་བཟློག་པར་བྱ་བའི་ཕྱིར། འཁོར་ལོ་དང་དེ་བཞིན་དུ་ཟླ་བའི་དཀྱིལ་འཁོར་ལས་འོད་ཀྱི་ཚོགས་མང་པོ་བྱུང་ལ། ཕྱོགས་བཅུའི་སེམས་

73-1-80b

ཅན་ཐམས་ཅད་ཀྱི་མི་ཤེས་པའི་སྒྲིབ་པ་སྦྱངས་ལ། རྒྱུད་དྲི་མ་མེད་པར་བྱས་ཏེ། སླར་འོངས་ནས་དེ་ཉིད་དུ་ཞུ་བར་གྱུར་པར་བསམ་པར་བྱའོ། །དེ་ནས་བསྒོམ་པ་ལ་སེམས་བརྟན་ཞིང་། བླ་མའི་མན་ངག་གིས་སྤྲོ་བ་དང་བསྡུ་བའི་སྦྱོར་བས་བཟླས་པ་བྱ་སྟེ། ཨ་ར་པ་ཙ་ན་དྷཱིཿཞེས་བྱ་བས་བཅོམ་
ལྡན་འདས་ཀྱི་ཐུགས་ཀའི་ཡི་གེ་རྣམས་ལས་སྔགས་ཀྱི་ཕྲེང་བ་ཤེལ་ལྟ་བུ་བྱུང་ནས། རང་གི་ལྟེ་བ་ལས་ཐུགས་ཀ་དེ་ཉིད་དུ་ཞུགས་པར་བསམ་མོ། །དེ་ལྟར་ཇི་སྲིད་མི་སྐྱོའི་བར་དུ་བཟླས་པར་བྱེད་ཅིང་བསྒོམས་ལ་དང་བའི་སེམས་དང་ལྡན་ནས་ས་དང་ཕ་རོལ་ཏུ་ཕྱིན་པ་མྱུར་དུ་འཐོབ་པར་འགྱུར་
རོ། །དེ་ལྟར་དུས་གསུམ་དུ་རྣལ་འབྱོར་བྱས་ན་རིང་པོ་མི་ཐོགས་པར་བློ་མཆོག་ཏུ་འགྱུར་རོ། །ཨ་ར་པ་ཙ་ནའི་སྒྲུབ་ཐབས་ཀྱི་ཆོ་ག །སློབ་དཔོན་ཤྲདྡྷཱ་ཀ་ར་ཝརྨྨས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། ཨ་ར་པ་ཙ་ན་སཱ་དྷ་ནཾ། བོད་སྐད་དུ། ཨ་ར་པ་ཙ་ནའི་སྒྲུབ་
ཐབས། བཅོམ་ལྡན་འདས་འཇམ་པའི་དབྱངས་ལ་ཕྱག་འཚལ་ལོ། །རི་བོང་འཛིན་པ་ལྟར་དཀར་ཕྱག་མཚན་གླེགས་བམ་རལ་གྲི་ཅན། །རབ་མཛེས་ཤིན་ཏུ་ཞི་བའི་གཞོན་ནུ་ཟུར་ཕུད་ལྔ་དང་ལྡན། །དགའ་བ་རྒྱ་ཆེར་ཐར་མཆོག་སྤྱན་ནི་པདྨའི་འདབ་ལྟར་ཡོངས། །བློ་གྲོས་ངན་པ་སྲེག་མཁས་
འཇམ་པའི་དབྱངས་ལ་ཕྱག་འཚལ་ནས། །ལོ་ཕྱེད་རྒྱུན་དུ་བསྒོམ་པ་མངོན་སྦྱོར་སྐྱེ་བོ་གང་། །ངེས་པར་གནས་ཀུན་ཁོང་དུ་ཆུད་འགྱུར་མཆོག་གི་བློ། །ཐོབ་འགྱུར་ཨ་ར་པ་ཙ་ན་ནི་ལེགས་འགྲུབ་ཕྱིར། །འཁོར་ལོ་རིན་ཆེན་ཤིན་ཏུ་བསྡུས་པའི་གདམས་པ་བརྩམ། །མཉམ་ཞིང་གཙང་ལེགས་ཡིད་
འོང་དྲི་ཞིམ་མེ་ཏོག་བཀྲམ། །དྲི་ཡི་ཆུས་བཏབ་ས་ཕྱོགས་འགར་ནི་སྔགས་རིག་པས། །ཤིན་ཏུ་ཉམས་དགའ་འཇམ་པའི་སྟན་ལ་ཉེར་འདུག་ནས། །བདེ་བའི་ཡིད་ཀྱིས་མཚན་མེད་བྱང་ཆུབ་སེམས་བསྒོམ་བྱ། །སྭ་བྷཱ་བ་ཤུདྡྷའི་སྔགས་བརྗོད་ཅིང་། །དངོས་པོ་ཀུན་ནས་མ་ལུས་སྟོང་ཉིད་དུ། །
རྣམ་པར་བསྒོམ་བྱ་སླར་ཡང་བདག་གི་ལུས། །སྐད་ཅིག་ཉིད་ལ་འོད་གསལ་ཉིད་དུ་བལྟ། །དེ་ནས་ནམ་མཁར་དབྱངས་ཡིག་དང་པོ་ལས། །ཟླ་བའི་དཀྱིལ་འཁོར་འོད་ཟེར་འཕྲོ་བ་བསྒོམ། །དེ་ནས་དེ་ལ་དྷཱིཿཡིག་ཤིན་ཏུ་དཀར། །དེ་ནི་འཇམ་དབྱངས་དྲི་མ་མེད་པར་བསྒོམ། །རྩེ་གཅིག་བསམ་

73-1-81a

གཏན་གྱིས་ནི་པད་སྟེང་གནས། །ཆགས་བཅས་ཅུང་ཟད་འཛུམ་ཞིང་ཡིད་དུ་འོང་། །རི་བོང་གིས་མཚན་བྱེ་བའི་འོད་ཟེར་ཅན། །རྒྱན་ཀུན་གྱིས་བརྒྱན་རབ་གསལ་བསྒོམ་པར་བྱ། །རང་གི་སྙིང་གར་རབ་འཕྲོ་ཨ་ཡིག་མཆོག་བསྒོམ་སྟེ། །འོད་ཀྱི་དྲ་བ་དཔག་མེད་རྩིབས་བརྒྱད་འཁོར་
ལོའི་ཚུལ། །དེ་སྟེང་ཟླ་གཟུགས་བསྒོམ་བྱ་དེ་ལས་སྔགས་པ་ཡིས། །རི་བོང་འཛིན་འོད་ལྟར་དཀར་འཇམ་པའི་དབྱངས་དེ་ཉིད། །དེ་གཡས་སྐྲ་ཅན་གཟུགས་མཛེས་ཟུར་མིག་རྒྱས་པ་ཅན། །ཆོས་དེའི་ནུ་མ་ཟུང་ལྡན་རབ་བལྟ་གཡོན་དུ་ནི། །རབ་མཛེས་རོལ་པའི་འགྱིང་ལྡན་ཉེ་བའི་སྐྲ་ཅན་མ། །མཐའ་
དག་ཡོན་ཏན་གཏེར་དག་ཙ་དང་ན་ལས་བསྒོམ། །རབ་དཀར་རེ་ཕ་ལས་བྱུང་དྲི་མ་མེད། །དྲ་བ་ཅན་གྱི་འོད་ཉིད་མདུན་དུ་བསྒོམ། །པ་ཡིག་ལས་སྐྱེས་འོད་ཟེར་རང་བཞིན་ཅན། །ཡིད་འཕྲོག་ཟླ་བའི་འོད་དེའི་རྒྱབ་ཏུ་བསྒོམ། །ཡང་ན་འོད་ཟེར་འབར་བའི་ཡི་གེ་རྣམས། །རྒྱ་ཆེར་ནུས་མཐུ་ལྡན་པ་
བསྒོམ་པར་བྱ། །དེ་རྣམས་མི་ཤེས་རི་བོ་འཇོམས་བྱེད་ཅིང་། །རྙོག་པ་མེད་པའི་ཡེ་ཤེས་བཟང་པོ་མཛད། །འོག་ཏུ་འཁོར་ལོ་མྱུར་དུ་འཁོར་བ་ལས། །གཏི་མུག་མུན་པ་ཐམས་ཅད་བཅད་པར་བསམ། །ཟླ་གཟུགས་འོད་ཟེར་ཆེན་པོའི་དྲ་བ་ཅན། །ལྷར་བཅས་གཡོ་བ་མེད་པ་ཉིད་དུ་བལྟ། །
རི་བོང་གིས་མཚན་ལས་བྱུང་འོད་ཟེར་གྱི། །སྤྲིན་ཚོགས་དཔག་མེད་ཕྱོགས་བཅུར་རབ་འཕྲོས་ནས། །སེམས་ཅན་དྲི་མེད་བྱས་ནས་དེ་བཞིན་མཐར། །སླར་ལོག་བདག་ལུས་ཟླ་བ་ལ་ཞུགས་བསམ། །ཡིད་བརྟན་སྔགས་ཀྱི་སྒོ་ཅན་མན་ངག་བཞིན་བསྒོམ་ཞིང་། །སྔགས་ཀྱི་དམ་པ་ཨ་ར་པ་ཙ་ན་བཟླས་
ན། །མྱུར་དུ་བློ་ངན་སྐྱོན་བཅོམ་ཡིད་འོང་དྲི་མེད་མཆོག །རྒྱལ་བའི་ས་དང་མཆོག་གི་དབང་ཕྱུག་ཀུན་ཀྱང་ཐོབ། །མཆོག་གི་བླ་མ་དགའ་བའི་རྡོ་རྗེ་དམ་ཆོས་མཆོག་གི་མཛོད་གྱུར་པས། །བདེ་བར་གཤེགས་ཚོགས་མདུན་དུ་གང་ཞིག་ཆོ་ག་ཇི་བཞིན་དབང་བསྐུར་བའི། །བློ་གྲོས་བཟང་པོ་མི་ཕམ་
བཤེས་གཉེན་དེ་ཡིས་སྐྱེ་བོ་རྣམས་ཀྱིས་ནི། །བློ་གྲོས་འགྲུབ་ཕྱིར་ཨ་ར་པ་ཙ་ན་མཆོག་འཁོར་ལོའི་གཞུང་འདི་བྱས། །འཁོར་ལོའི་ཆོ་ག་མཆོག་ནི་ལེགས་བསྒྲིགས་ལས། །བསོད་ནམས་མཐའ་ཡས་དྲི་མེད་གང་ཐོབ་པ། །དེ་ཡིས་འཇིག་རྟེན་མ་ལུས་སྡིག་སྤངས་ཤིང་། །འཇམ་དབྱངས་བདེ་བ་

73-1-81b

གཅིག་པུར་གནས་གྱུར་ཅིག །ཨ་ར་པ་ཙ་ནའི་སྒྲུབ་ཐབས། དངོས་གྲུབ་བརྙེས་པའི་སློབ་དཔོན་མི་ཕམ་པའི་བཤེས་གཉེན་གྱིས་མཛད་པ་རྫོགས་སོ།།      །།རྒྱ་གར་གྱི་མཁན་པོ་བི་བྷཱུ་ཏི་ཙནྡྲ་དང་། ཆག་ལོ་ཙཱ་བ་དགེ་སློང་ཆོས་རྗེ་དཔལ་གྱིས་བསྒྱུར་བའོ། །༄༅༅། །རྒྱ་གར་སྐད་དུ། 
ཨ་ར་པ་ཙ་ན་སཱ་དྷ་ནཾ། བོད་སྐད་དུ། ཨ་ར་པ་ཙ་ནའི་སྒྲུབ་ཐབས། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དཀར་པོ་རི་བོང་འཛིན་པ་དང་འདྲ་གླེགས་བམ་རལ་གྲིས་ཕྱག་མཚན་ཞིང་། །ལེགས་པར་མཛེས་པའི་གཞོན་ནུ་ཟུར་ཕུད་ལྔ་པ་ཤིན་ཏུ་ཞི་བ་ཅན། །དགའ་བ་རབ་རྒྱས་ཐར་པའི་
མཆོག་སྟེར་པདྨའི་འདབ་མ་ཡངས་པའི་སྤྱན། །ངན་པའི་བློ་གྲོས་བསྲེག་པ་ལ་མཁས་འཇམ་པའི་དབྱངས་ལ་ཕྱག་འཚལ་ལོ། །སྐྱེ་བོ་གང་དག་རྣམས་ཀྱིས་ཨ་ར་པ་ཙ་ན་ཡི་དངོས་གྲུབ་ཕྱིར། །ལོ་ཕྱེད་བར་དུ་རྒྱུན་མི་འཆད་པར་སྦྱོར་བ་བསྒོམ་པ་གང་ཡིན་པ། །མཆོག་གི་བློ་དང་ཁྱད་པར་བྱང་ཆུབ་
གོ་འཕང་ངེས་པར་འཐོབ་ལྡན་པའི། །འཁོར་ལོ་རིན་པོ་ཆེ་ཡི་མན་ངག་ཤིན་ཏུ་བསྡུས་པ་བགྱི་བ་ལགས། །དྲི་ཞིམ་མེ་ཏོག་གཅལ་དུ་བཀྲམ་ཞིང་དྲི་ཡི་ཆུ་ཡིས་ཆག་ཆག་བཏབ། །མཉམ་ཞིང་གཙང་མ་སྔགས་རིག་ཡིད་དུ་འོང་བའི་ས་ཡི་ཆ་དག་ཏུ། །ཡིད་འོང་འཇམ་པའི་སྟན་ནི་ཅི་ཡང་རུང་བ་དག་ལ་
ཉེར་འདུག་ནས། །བདེ་བར་ཤིན་ཏུ་མཚན་མ་མེད་པའི་བྱང་ཆུབ་སེམས་ནི་བསྒོམ་པར་བྱ། །དངོས་དོན་དོན་དང་བཅས་པ་མ་ལུས་ཀུན་ནས་ནི། །སྟོང་པར་རྣམ་པར་བསྒོམ་བྱ་སླར་ཡང་བདག་གི་ལུས། །དེ་དང་དེ་ནི་འོད་གསལ་ཉིད་དུ་བལྟས་བྱས་ལ། །སྭ་བྷཱ་ཝ་ཤུདྡྷའི་གསང་སྔགས་ཡང་དག་བརྗོད་
པར་བྱ། །དེ་ནས་རང་སྙིང་དང་པོའི་དབྱངས་ལས་བར་སྣང་དུ། །ཟླ་བའི་དཀྱིལ་འཁོར་འོད་བཟང་ལྡན་པ་བསྒོམ་པར་བྱ། །དེ་ནས་འདིར་ནི་དྷཱིཿཡིག་དུ་བརྗོད་དཀར་པོ་སྟེ། །དེ་ནི་ལྷག་པར་དྲི་མེད་འཇམ་པའི་དབྱངས་སུ་བསམ། །ཟླ་བ་བྱེ་བ་དག་དང་མཚུངས་པའི་མདངས་འཛིན་ཅིང་། །ཀུན་
ནས་འབར་བའི་རྒྱན་རྣམས་ཀྱིས་ནི་སྤྲས་པ་སྟེ། །ཆགས་དང་བཅས་པར་ཅུང་ཟད་འཛུམ་ཞིང་ཡིད་འཕྲོག་པ། །པདྨའི་སྟེང་ན་གཅིག་ཏུ་བསམ་གཏན་ངེས་པས་བཞུགས། །རང་གི་སྙིང་གར་ཨ་ཡིག་མཆོག་ལས་འཁོར་ལོ་ཙིབས་བརྒྱད་པ་ཡི་གཟུགས། རྣམ་པར་འཕྲོ་བའི་མཉམ་

73-1-82a

མེད་འོད་ཟེར་དྲ་བ་ཅན་ནི་ཡང་དག་བསམ། །དེ་ཡི་སྟེང་དུ་ཟླ་བའི་གཟུགས་བརྙན་དག་ལ་སྔགས་པས་བསྒོམ་བྱ་སྟེ། །དེ་ནི་རི་བོང་འཛིན་པ་ལྟ་བུའི་བླ་མ་འཇམ་དཔལ་དབྱངས་ཉིད་དོ། །གཡས་སུ་མཛེས་པའི་གཟུགས་ལྡན་སྐྲ་ཅན་མ་ནི་རྣམ་པར་འཛུམ་པ་དང་། །
ཤིན་ཏུ་རྒྱས་པའི་ནུ་མ་ཟུང་ལྡན་ཟུར་གྱིས་དེ་ལ་བལྟ་བ་སྟེ། །ཤིན་ཏུ་མཛེས་ཤིང་སྒེག་པའི་ལུས་ལ་ཉེ་བའི་སྐྲ་ཅན་གཡོན་ལོགས་སུ། །མཐའ་དག་ཡོན་ཏན་གཏེར་དུ་གྱུར་པ་ཙ་ན་དག་ལས་བསྒོམ་པར་བྱ། །དྲི་མེད་ལེགས་པར་དཀར་བ་དྲ་བ་ཅན་གྱི་འོད། །རེ་ཕ་ལས་བྱུང་མདུན་དུ་ངེས་པར་
བསམ་པ་ཉིད། །འོད་ཀྱི་རང་བཞིན་ཡིད་འཕྲོག་ཟླ་བའི་འོད་ཅན་ནི། །པ་ཡི་ཡི་གེ་ལས་སྐྱེས་རྒྱབ་ཏུ་གཞག་པར་བྱ། །ཡང་ན་ཡི་གེ་བཀོད་པའི་འོད་ཟེར་འབར་བ་ཡི། །རྒྱ་ཆེར་རབ་ཏུ་སྣང་བ་ངེས་པས་རྣམ་བསྒོམ་བྱ། །དེས་ནི་མི་ཤེས་རི་བོ་འཇོམས་པར་འགྱུར་བ་དང་། །ཡིད་ནི་རྙོག་པ་
མེད་པའི་ཡེ་ཤེས་དམ་པར་བྱེད། །གཏི་མུག་མུན་ནག་ཀུན་ནས་རྣམ་པར་འཇོམས་པ་ཡི། །ཟླ་བའི་གཟུགས་བརྙན་དང་འདྲ་འོད་ཟེར་དྲ་བ་ཅན། །འོག་གི་འཁོར་ལོ་མྱུར་དུ་འཁོར་བར་བསམ་བྱ་ཞིང་། །ལྷ་དེ་རྣམས་ནི་གཡོ་བ་མེད་པ་ཉིད་དུ་བལྟ། །རི་བོང་ཅན་ལྟའི་འོད་ཟེར་སྤྲིན་ནི་རྒྱ་ཆེན་པོ། །
ཕྱུང་ནས་ཕྱོགས་བཅུ་པོ་རྣམས་གསལ་བར་གྱུར་པ་ཡིས། །རང་ལུས་བཞིན་དུ་སེམས་ཅན་རྣམས་ནི་བརྒྱན་བྱས་ཏེ། །སླར་ཡང་འོངས་པ་སྙིང་གའི་ཟླ་བ་ལ་གཞུག་བྱ། །སྔགས་པས་གསང་སྔགས་དམ་པ་ཨ་ར་པ་ཙ་ན་ནི་ལེགས་ཟློས་ཤིང་། །བརྟན་པའི་བློ་ཡིས་མན་ངག་བསྒོམས་ལས་བློ་ངན་
སྡུག་བསྔལ་རབ་བཅོམ་སྟེ། །ཡིད་ཀྱི་ཤེས་པ་དྲི་མེད་དག་དང་ཕ་རོལ་ཕྱིན་པ་རྣམས་དང་ཡང་། །མཆོག་ཏུ་གྱུར་པའི་ས་རྣམས་དང་ནི་གང་དེས་རྒྱལ་བ་ཐོབ་པར་འགྱུར། །དམ་པའི་ཆོས་ཀྱི་མཛོད་གྱུར་བླ་མ་དམ་པ་དགའ་མཆོག་རྡོ་རྗེ་ཡིས། །བདེ་གཤེགས་ཚོགས་ཀྱི་སྤྱན་སྔར་ཆོ་གས་གང་ཞིག་
མངོན་པར་དབང་བསྐུར་བ། །བློ་བཟང་མི་ཕམ་བཤེས་གཉེན་དེས་ནི་སྐྱེ་བོས་བློ་མཆོག་གྲུབ་བྱའི་ཕྱིར། །ཨ་ར་པ་ཙ་ན་ཡི་འཁོར་ལོ་གཞུང་དུ་ཡང་དག་སྦྱར་བ་ཡིན། །འཁོར་ལོའི་ཆོ་ག་བཟང་པོ་གཞུང་མཆོག་ཏུ་སྦྱར་བས། །བསོད་ནམས་རྒྱ་ཆེན་ཀུན་ནས་བདག་གིས་ཐོབ་གྱུར་པ། །གང་ཡིན་དེས་ནི་

73-1-82b

འཇིག་རྟེན་ཉོན་མོངས་ལས་རྒྱལ་ཞིང་། །ངེས་པའི་དེ་བ་གཅིག་པུ་འཇམ་པའི་དབྱངས་གྱུར་ཅིག །ཨ་ར་པ་ཙ་ནའི་སྒྲུབ་ཐབས་སློབ་དཔོན་ཆེན་པོ་མི་ཕམ་བཤེས་གཉེན་གྱིས་མཛད་པ་རྫོགས་སོ།།      །།ལྷག་པའི་ལྷ་འདི་ཉིད་ཀྱིས་མངོན་སུམ་དུ་བྱིན་གྱིས་བརླབས་པའི་པཎྜི་ཏ་ཆེན་པོ་ཤྲཱི་བ་ན་རཏྣའི་
ཞལ་སྔ་ནས་ཀྱི་བཀའ་དྲིན་ལས། ལེགས་པར་སྦྱར་བའི་སྐད་ཀྱི་ཆ་ཤས་རིག་པ་དགེ་སློང་རྒྱ་མཚོའི་སྡེས་འགྱུར་རྙིང་ལས་ཅུང་ཟད་བཅོས་ཤིང་། རྒྱ་དཔེའི་རྐང་པ་དང་མཐུན་པར། དཔལ་གནོད་གནས་ཀྱི་གཙུག་ལག་ཆེན་པོར་བསྒྱུར་བའོ། །༄༅༅། །རྒྱ་གར་སྐད་དུ། ཤུཀླ་
མཉྫུ་གྷོ་ཥ་པཱུ་ཛ་བི་དྷི་ནཱ་མ། བོད་སྐད་དུ། འཇམ་དབྱངས་དཀར་པོ་མཆོད་པའི་ཆོ་ག་ཞེས་བྱ་བ། རྗེ་བཙུན་འཇམ་པའི་དབྱངས་ལ་ཕྱག་འཚལ་ལོ། །ལྷ་ཡི་སྒྲུབ་ཐབས་ཞེས་བྱ་བ། །ཏིང་འཛིན་བསྒོམ་པ་བཟླས་པ་དང་། །བསྟོད་དང་མཆོད་པ་ཕྱག་བགྱི་བའི། །ཡན་ལག་དྲུག་ཏུ་རྒྱལ་བས་
གསུངས། །དེ་ནས་སྔགས་པས་སྒྲུབ་པ་དང་རྗེས་སུ་མཐུན་པའི་གནས་མཆོག་ཏུ་གཙང་བར་བྱས་ནས། དམའ་བའི་སྟན་ལ་འདུག་སྟེ། ཚགས་ཀྱིས་ཡང་དག་པར་བཙགས་པའི་ལྷའི་ཆུ་སྔགས་འདི་ལན་གསུམ་གྱིས་སྦྱང་བར་བྱའོ། །ཨོཾ་ཨཱཿབཛྲོ་ད་ཀེ་ཨ་མྲྀ་ཏཾ་བྷ་བ་ཧཱུཾ་སྭཱ་ཧཱ། དེ་ལས་བླངས་ནས། 
ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བགྱིའོ། །ཨོཾ་ཨཱཿསརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། ཁྲུས་ཀྱི་སྔགས་སོ། །དེ་ནས་ཧྲཱིཾ་ཏྲཱཾ་ཨོཾ་ཧཱུཾ་ཁཾ་བཾ་ཞེས་པ་དེ་བཞིན་གཤེགས་པ་དྲུག་དག་པའི་
ཕྱིར། དབང་པོ་དྲུག་ལ་དགོད་པར་བྱ་སྟེ། ཁ་དང་། སྣ་དང་། མིག་དང་། རྣ་བ་དང་། ལུས་དང་། སྙིང་ག་རྣམས་སུ་རིམ་པ་ཇི་ལྟ་བར་སྔོན་དུ་ས་བོན་དྲུག་བརྗོད་ཅིང་། སོར་མོ་ལྔའི་རྩེ་མོས་རེག་ནས་སྲོག་རྩོལ་བྱའོ། །ཨོཾ་བཿསྭཱ་ཧཱ། ཞེས་པས་ལག་པ་དང་རྐང་པ་དག་ལ་འཐོར་ཞིང་། ཨོཾ་
ཧྲཱིཿསྭཱ་ཧཱ་ཞེས་པས་ཞལ་བསིལ་ལོ། །ཨོཾ་ན་མོ་བྷ་ག་བ་ཏེ་པུཥྤེ་ཀེ་ཏུ་རཱ་ཛཱ་ཡཱ་ཏ་ཐཱ་ག་ཏཱ་ཡ་ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ་པུ་པུཥྤེ་པུཥྤེ་མ་ཧཱ་པུཥྤེ་སུ་པུཥྤེ་པུཥྤོ་དྦྷ་བ། པུཥྤ་སཾ་བྷ་བེ། པུཥྤཱ་ཝ་ཀཱིརྞྞེ་སྭཱ་ཧཱ། ཞེས་པ་འདི་ལན་བདུན་གྱིས་མེ་ཏོག་སྦྱང་བའོ། །དེ་ནས་གཡོན་པའི་མཐེ་བོང་དང་སྲིན་ལག་

73-1-83a

གིས་མེ་ཏོག་བླངས་ནས། ཨོཾ་ཨཱཿཧཱུཾ་གིས་ལུས་དང་ངག་དང་ཡིད་བྱིན་གྱིས་བརླབ་པར་བྱའོ། །ཡང་དེ་བཞིན་དུ་མེ་ཏོག་གཅིག་བླངས་ལ། ཨོཾ་མ་ཎི་དྷ་རི་བཛྲིན་མ་ཧཱ་པྲ་ཏི་སཱ་རེ་རཀྵ་རཀྵ་མཱཾ་སརྦྦ་ས་ཏ་ཥྛཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འདིས་བདག་ཉིད་ཀྱི་མགོ་བོར་བསྲུང་བར་བྱའོ། །ཨོཾ་སྭ་
བྷཱུ་མེ་བཛྲཱི་བྷ་བ་ཧཱུཾ། འདི་དག་གིས་དཀྱིལ་འཁོར་བྱ་བའི་ས་ལ་བསང་གཏོར་བྱ་ཞིང་སྦྱངས་ལ། དེ་ནས་ཨོཾ་བཛྲ་སཏྭ་སརྦྦ་བིགྷྣཱ་ནུཏྶཱ་ར་ཡ་ཧཱུཾ་ཕཊ། ཞེས་པས་གཡོན་སྐོར་གྱིས་བགེགས་བསྐྲད་པར་བྱའོ། །དེ་ནས་སྲོག་ཆགས་མེད་པའི་བ་བྱུང་ངམ་ཙནྡན་ལ་སོགས་པ་དྲི་བཟང་པོའི་ཆུས་ལག་
པ་གཡས་པས་དཀྱིལ་འཁོར་ཟླུམ་པོར་ཉེ་བར་བྱུགས་ལ། ཚིགས་སུ་བཅད་པ་གཉིས་པོ་བཀླག་པར་བྱའོ། །བ་ཡི་ལྕི་བ་ཆུར་བཅས་སྦྱིན་པ་ཡང་དག་བྱི་དོར་ཚུལ་ཁྲིམས་དང་། །སྲོག་ཆགས་ཕྲ་མོའང་བསལ་བ་བཟོད་པ་བྱ་བ་ཉེར་གནས་བརྩོན་འགྲུས་སོ། །སེམས་རྩེ་གཅིག་དེའི་སྐད་ཅིག་
བསམ་གཏན་རི་མོ་མཛེས་འབར་ཤེས་རབ་ཡིན། །ཐུབ་པའི་མཎྜལ་བགྱིས་ལས་ཕ་རོལ་ཕྱིན་དྲུག་འདི་དག་ཐོབ་འགྱུར་ཞིང་། །ཁ་དོག་གསེར་དུ་འགྱུར་ཞིང་ནད་ཀུན་ལས་ནི་རྣམ་པར་གྲོལ་བར་འགྱུར། །ལྷ་དང་མི་ལས་ཆེས་ལྷག་འགྱུར་དང་ཟླ་བ་ལྟ་བུའི་མཛེས་པ་འབར། །འདིར་ནི་ལུས་ཀྱི་ལས་
བགྱིས་པ་ལས་སངས་རྒྱས་པ་ཡི་ཁྱིམ་དག་ཏུ། །ནོར་དང་གསེར་གྱིས་ཡང་དག་འབྱོར་ཞིང་རྒྱལ་པོའི་རིགས་སུ་སྐྱེ་བར་འགྱུར། །དེ་ནས་སྐྱོང་ནུལ་བྱས་པའི་དཀྱིལ་འཁོར་གྱི་དབུས་སུ། གཡས་པའི་མཐེ་བོང་བཞག་ནས། མཛུབ་མོས་ཟླ་བ་གང་བ་ལྟ་བུའི་རེ་ཁཱ་ཨོཾ་བཛྲ་རེ་ཁེ་སུ་རེ་ཁེ་ཧཱུཾ་ཕཊ། ཅེས་
པས་གཡས་སྐོར་དུ་བྱ་སྟེ། ལག་པ་གཡོན་པས་མེ་ཏོག་གཅིག་བླངས་ལ་གཡས་པའི་རྒྱབ་ཏུ་མེ་ཏོག་དེ་བཞག་ནས། ཨོཾ་སུ་རེ་ཁེ་སརྦ་ཏ་ཐཱ་ག་ཏཱ་དྷི་ཏིཥྛ་ནྟུ་སྭཱ་ཧཱ། ཞེས་པས་ལག་པའི་རྒྱབ་བསྒྱུར་ཏེ། མེ་ཏོག་དེ་དཀྱིལ་འཁོར་གྱི་དབུས་སུ་དབུལ་བར་བྱའོ། །དེ་ནས་ལག་པ་བཀྲུས་ནས་གཡོན་པ་
དང་གཡས་པ་དག་གིས་མེ་ཏོག་བླངས་ལ། ཨོཾ་ཙནྡྲརྐ་བི་མ་ལེ་སྭཱ་ཧཱ། ཞེས་པས་དཀྱིལ་འཁོར་ལ་བཀྲམ་པར་བྱའོ། །དེ་ལྟར་ཟླ་བ་དང་ཉི་མའི་ངོ་བོས་དཀྱིལ་ཁོར་བྱིན་གྱིས་བརླབས་ནས། རང་གི་སྙིང་གར་ཨ་ཡིག་ཡོངས་སུ་གྱུར་པའི་ཟླ་བ་ལ་དྷཱིཿཡིག་བསམས་ལ། དེའི་འོད་ཟེར་གྱི་དྲ་བས་

73-1-83b

ནམ་མཁར་བཅོམ་ལྡན་འདས་སྣང་བར་བྱས་པ། སྔགས་འདིས་སྤྱན་དྲང་བར་བྱ་སྟེ། ཨོཾ་ཤ་རད་མ་ལ་མ་དྷྱཱ་ཧྞ་ག་ག་ནོ་པ་མ། དྷརྨ་དྷཱ་ཏུ་སྭ་བྷཱ་ཝ་བྷ་ག་བཱན་མཉྫུ་གྷོ་ཥ་ཨི་ཧཱ་གཙྪ་མཎྜ་ལེ་ཨ་དྷིཥྛཱ་ནཾ་ཀུ་རུ་ཛཿཧཱུཾ་བཾ་ཧོཿཞེས་པས་དཀྱིལ་འཁོར་དུ་སྤྱན་དྲང་བ་དང་། བྱིན་གྱིས་བརླབ་པ་དང་། རྗེས་
སུ་བཅིང་བ་དང་། ཡོངས་སུ་མཉེས་པ་རྣམས་བྱས་ནས། ཨོཾ་པྲ་བ་ར་སཏྐ་ར་ཤྲཱི་མཉྫུ་གྷོ་ཥ་ཨརྒྷཾ་པཱ་དྱཾ་ཨཱཉྩ་མ་ནཾ་པོྲཀྵ་ཎཾ་པྲ་ཏིཙྪ་སྭཱ་ཧཱ། དེ་ནས་སེམས་གཞན་དུ་མ་ཡེངས་པར་ཡང་དག་པའི་དད་པ་དང་། ལྷག་པའི་བསམ་པས་མཆོད་པར་བྱ་སྟེ། དབུས་སུ་ཨོཾ་ཨ་ར་པ་ཙ་ནཱ་ཡ་བཛྲ་པུཥྤེ་དྷཱིཿ
སྭཱ་ཧཱ། མདུན་དུ་ཨོཾ་ཛཱ་ལི་ནི་པྲ་བྷཱ་ཡ་བཛྲ་པུཥྤེ་རཾ་སྭཱ་ཧཱ། རྒྱབ་ཏུ་ཨོཾ་ཙནྡྲ་པྲ་བྷཱ་ཡ་བཛྲ་པུཥྤེ་སཾ་སྭཱ་ཧཱ། གཡས་སུ་ཨོཾ་ཀེ་ཤི་ནྱེ་བཛྲ་པུཥྤེ་ཙཾ་སྭཱ་ཧཱ། གཡོན་དུ་ཨོཾ་ཨུ་པ་ཀེ་ཤི་ནྱེ་བཛྲ་པུཥྤེ་ནཾ་སྭཱ་ཧཱ། རང་རང་གི་སྔགས་འདིས། མེ་ཏོག་དང་། བདུག་སྤོས་དང་། མར་མེ་དང་། དྲི་མཆོག་དང་། ཞལ་
ཟས་ལ་སོགས་པ་རྣམས་ཀྱིས་ཡང་དག་པར་མཆོད་ནས། གཏོར་མའི་སྔགས་ཀྱིས་གཏོར་མ་དབུལ་བར་བྱ་སྟེ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱད་ཨོཾ་ཨཱཿཧཱུཾ་ཧོཿའདི་དག་གིས་གཏོར་མ་སྦྱང་བར་བྱའོ། །དེ་ནས་ཨོཾ་ཨ་ར་པ་ཙ་ནཱ་ཡ། ཀུ་མཱ་རི་ད་ཧ་ན་དཀྵཱ་ཡ། ཙནྡྲ་ཀཱནྟི་མ་ཎི་པྲ་དྷཱ་ཡ། ཁངྒ་
པུསྟཾ་ཀ་བྱ་གྲཱ་ཡ། ཧསྟ་ཡཾ་མཉྫུ་བ་ནི་ཝ་ར་པྲ་དཱ་ཡ། ཨི་མཾ། བ་ལིཾ། གནྡྷཾ། པུཥྤཾ། དྷཱུ་པཾ། དཱི་པཾ། མ་དྷུ། ཤ་ཀ་རཱ་རི། ས་ཧི་ཏཾ། གྲྀཧྞ་གྲྀཧྞ། །ག་ག ཁཱ་ཧི་ཁཱ་ཧི། མ་མ་ཤཱནྟིཾ། པུཥྚིཾ། རཀྵ་བ་ར་ཎ་གུཔྟཾ་ཀུ་རུ་ཨོཾ་ཨཱཿདྷཱིཿཧཱུཾ་སྭཱ་ཧཱ། གཏོར་མའི་སྔགས་སོ། །དེ་ནས་མངོན་པར་བསྟོད་པར་
བྱའོ། །དེ་ནས་ཚིགས་སུ་བཅད་པ་འདི་བརྗོད་པར་བྱ་སྟེ། རྨོངས་པའི་བློ་ཡིས་བདག་གིས་ཅི་ནས་ཀྱང་། །ནོངས་པ་བགྱིས་དང་བགྱིས་སྩལ་གང་ཅི་འང་རུང་། །གང་ཕྱིར་ལུས་ཅན་ཀུན་གྱི་སྐྱབས་ཡིན་ཕྱིར། །དེ་ཀུན་མགོན་པོ་ཁྱོད་ཀྱིས་བཟོད་པར་འཚལ། །དེ་ནས་ཚིགས་བཅད་འདིས་སྨོན་
ལམ་བྱ་སྟེ། དགེ་བ་འདི་ཡིས་བདག་ཉིད་ནི། །སངས་རྒྱས་ཉིད་དུ་མངོན་གྱུར་ནས། །འགྲོ་ཀུན་གཏིང་མཐའ་མེད་པ་ཡི། །སྲིད་པའི་མཚོ་ལས་སྒྲོལ་གྱུར་ཅིག །དེ་ནས་ཚིགས་བཅད་འདིས་གཤེགས་སུ་གསོལ་བར་བྱ་སྟེ། ཁྱེད་ཀྱིས་སེམས་ཅན་དོན་ཀུན་མཛད། །ཇི་ལྟའི་རྗེས་མཐུན་དངོས་

73-1-84a

གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །ཚུལ་ཁྲིམས་ཙནྡན་གྱིས་ལུས་བྱུགས། །བསམ་གཏན་དག་གི་གོས་གྱོན་ཞིང་། །བྱང་ཆུབ་ཡན་ལག་མེ་ཏོག་བཀྲམ། །ཇི་ལྟར་བདེ་བར་བཞུགས་སུ་གསོལ། །དེ་ནས་སྔགས་ཀྱི་
རྒྱལ་པོ་ཡི་གེ་བརྒྱ་པ་གདོན་པར་བྱ་སྟེ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་ཀྟོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿ ཀུ་རུ་ཧཱུཾ། ཧ་ཧ་ཧ་ཧ་ཧོཿ བྷག་བཱན། སརྦ་ཏ་ཐཱ་ག་ཏ། 
བཛྲ་མཱ་མེ་མུཉྩ་བཛྲཱི་བྷ་བ། མ་ཧཱ་ས་མ་ཡ་སཏྭ་ཨཱཿ འཇམ་དབྱངས་དཀར་པོ་ཨ་ར་པ་ཙ་ན་མཆོད་པའི་ཆོ་ག་ཞེས་བྱ་བ་སློབ་དཔོན་མི་ཕམ་བཤེས་གཉེན་གྱིས་མཛད་པ་རྫོགས་སོ།།      །།པཎྜི་ཏ་ཆེན་པོ་ཤྲཱི་བ་ན་རཏྣའི་སྤྱན་སྔར། ཆོས་འཁོར་ལོ་ཙཱ་བས་བསྒྱུར་བ་ལས་དགེ་སློང་རྒྱ་
མཚོས་བཅོས་པའོ། །༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་སཱ་དྷ་ནཾ། བོད་སྐད་དུ། འཕགས་པ་འཇམ་དཔལ་གྱི་སྒྲུབ་པའི་ཐབས། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཚད་མེད་པ་དང་བྱང་ཆུབ་སེམས་བསྐྱེད་དེ། །སྔགས་འདི་བརྗོད་ཅིང་མི་དམིགས་སྟོང་པར་
བསྒོམ། །ཨོཾ་སྭ་བྷཱ་བ་བི་ཤུདྡྷཿསརྦ་དྷརྨྨཿསྭ་བྷ་བ་བི་ཤུདྡྷོ྅ཧཾ། སྟོང་ཉིད་ངང་ལས་བཾ་པཾ་ཨ་དཀར་ལས། །རྒྱ་མཚོའི་སྟེང་དུ་པདྨ་ཟླ་བ་བསམ། །དེ་སྟེང་རང་སེམས་ཨ་དཀར་ཉིད་གྱུར་ལས། །འོད་འཕྲོས་དོན་བྱས་འདུས་པར་ལྷར་གྱུར་ཏེ། །ཞལ་གཅིག་ཕྱག་གཉིས་མཆོག་སྦྱིན་ཨུཏྤལ་བསྣམས། །
རྡོ་རྗེའི་སྐྱིལ་ཀྲུང་འོད་ཟེར་རབ་འཕྲོ་བ། །དར་དཀར་ན་བཟའ་རིན་ཆེན་རྒྱན་གྱིས་སྤྲས། །སྟོན་ཟླའི་མདོག་ཅན་ལང་ཚོ་ལྡན་པ་བསྒོམ། །ཨོཾ་བཱ་ཀྱཻ་དཾ་ན་མཿ རིག་སྔགས་རྒྱལ་པོ་འབུམ་ཕྲག་གཅིག་གིས་འགྲུབ། །ཟླ་བ་གཅིག་གིས་བློ་འཕེལ་རིག་པ་འཛིན། །དངོས་སམ་རྨི་ལམ་ཉིད་དུ་མཐོང་
ཐོས་འགྱུར། །གྲུབ་པའི་མཚན་མ་གཞན་ཡང་སྣང་བར་འགྱུར། །ཉི་ཟླ་གཟས་ཟིན་དུས་སུ་མ་ཤ་ཉིད། །དར་དཀར་གྱིས་དྲིལ་ལྕེ་འོག་བཅུག་ལ་བཟླས། །མྱུ་གུ་བྱུང་གྱུར་འདི་ནི་གྲུབ་པ་ཡིན། །ཡང་ན་རལ་གྲི་ཉིད་བཟུང་རིག་འཛིན་འགྱུར། །གྲེ་ཕུགས་ཨ་དཀར་དག་ལས་འོད་འཕྲོས་པས། །

73-1-84b

རྒྱལ་བ་ཀུན་གྱི་བློ་གྲོས་དཔག་མེད་དག །འདུས་ནས་ཁོང་དུ་ཐིམ་པས་ལུས་ཀུན་ཁེངས། །མི་བརྗེད་དྲན་པའི་གཟུངས་ནི་ཐོབ་པར་འགྱུར། །སྙིང་དབུས་ཟླ་བའི་དཀྱིལ་འཁོར་རྩིབས་དྲུག་ལ། །འབྲུ་དྲུག་ཡི་གེ་བཀོད་ལ་གཡས་གཡོན་བསྐོར། །ཤུགས་དྲག་རྩེ་མོ་རྣོ་ཞིང་རབ་དཀར་
བས། །ཉེས་འཇོམས་སྟོབས་ལྡན་མྱུར་འཛིན་རབ་གསལ་འགྱུར། །ཕ་རོལ་ཕྱིན་དང་བསྟོད་པ་མང་པོ་དང་། །མཚན་ནས་བརྗོད་དང་མཆོད་པ་སྣ་ཚོགས་དང་། །མཎྜལ་དབུལ་ཞིང་གསོལ་བ་གདབ་པར་བྱ། །འདི་ནི་མྱུར་དུ་འགྲུབ་པར་འགྱུར་བ་ཡིན། །འཇམ་པའི་དབྱངས་ཀྱིས་བྱིན་གྱིས་
རླབས་པའི་པཎྜི་ཏ་ཆེན་པོ་མ་ཏིས་མཛད་པ་རྫོགས་སོ།།      །།རྒྱ་གར་ཤར་ཕྱོགས་ཛ་ག་ཏཱ་ལའི་པཎྜི་ཏ་ཆེན་པོ་དཱ་ན་ཤཱི་ལས་བོད་ཡུལ་གྱི་དབུས་དྲང་སྲོང་སྲིན་པོའི་རིར་ལྷའི་སྐད་ལས་བོད་ཀྱི་བརྡར་འཁྲུལ་པ་མེད་པར་བསྒྱུར་བའོ། །༄༅༅། །རྒྱ་གར་སྐད་དུ། ཨཱརྱ་མཉྫུ་
ཤྲཱི་སྟོ་ཏྲ་ནཱ་མ། བོད་སྐད་དུ། འཕགས་པ་འཇམ་དཔལ་གྱི་བསྟོད་པ་ཞེས་བྱ་བ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དོན་ཟབ་སྔགས་ཀྱི་སྟོབས་ཀྱིས་རབ་སྦྱངས་པའི། །སྟོང་གསལ་ནམ་མཁའ་དྲི་མེད་དང་མཚུངས་ལས། །བཾ་ཡིག་ལས་གྲུབ་དཀར་མདངས་
བདུད་རྩིའི་མཚོ། །གཏིང་ཟབ་ཡངས་པ་ཅན་ལ་ཕྱག་འཚལ་ལོ། །མཚོ་མཐའ་གླང་ཆེན་ཐལ་ཀར་གྱིས་བསྐོར་ཞིང་། །མཉེན་ལྕུག་འཁྲིལ་ལྡེམ་པད་ཟླུམ་དྲ་བས་ཁྱབ། །ལོ་མའི་གུར་ལྡིང་དཀར་མཛེས་མེ་ཏོག་ལས། །ཡིད་འཕྲོག་དྲི་བསུང་ལྡན་ལ་ཕྱག་འཚལ་ལོ། །མཚོ་ཆེན་དབུས་ན་བཾ་
ཡིག་ལས་བྱུང་བའི། །པད་སྡོང་ཡལ་ག་ལོ་མ་ཕུན་ཚོགས་སེར། འདབ་རྒྱས་དཀར་གསལ་གེ་སར་དམར་སེར་ཅན། །ལྟེ་བ་ལྗང་སེར་མཐོ་ལ་ཕྱག་འཚལ་ལོ། །དེ་སྟེང་ཡི་གེ་མཆོག་རབ་ཡོངས་གྱུར་ལས། །རབ་ཟླུམ་འཁོར་ལོ་རྣམ་དག་ཕུན་ཚོགས་མཛེས། །ཤིན་ཏུ་མདོག་དཀར་ཡིད་འོང་འཛིན་
གཟུགས་ཅན། །བསིལ་ཟེར་ཕྱོགས་བཅུར་འགྱེད་ལ་ཕྱག་འཚལ་ལོ། །དེར་བཞུགས་ཨ་དཀར་ལས་གྲུབ་དཔའ་བོའི་སྐུ། །ཟུང་བཞིའི་ན་ཚོད་རྡོ་རྗེ་སྐྱིལ་ཀྲུང་བརྟན། །ཆུ་ཤེལ་དྲི་མེད་ཇི་བཞིན་རབ་དཀར་མདངས། །མཚན་མཆོག་དཔེ་བྱད་འབར་ལ་ཕྱག་འཚལ་ལོ། །ཐོར་ཚུགས་རྩེ་ན་རིན་ཆེན་

73-1-85a

མེ་ཏོག་སྤུད། །རྩེ་མོ་ལྔ་ལྡན་ཟུར་ཕུད་ཤིན་ཏུ་གསལ། །སྙན་གོང་ཨུཏྤལ་དྲི་ལྡན་དར་དཔྱངས་འཕུར། །སྙན་ཤལ་ནོར་བུ་འཕྱང་ལ་ཕྱག་ཚལ་ལོ། །དེ་བཞིན་མགུལ་རྒྱན་དཔུང་རྒྱན་ཕྱག་གདུབ་དང་། །ཞབས་གདུབ་སྐ་རགས་དོ་ཤལ་བཟང་པོ་དང་། །སྣ་ཚོགས་ན་བཟའ་
རིན་ཆེན་རྒྱན་གྱིས་སྤྲས། །སིལ་སིལ་སྒྲ་སྙན་འཁྲོལ་ལ་ཕྱག་འཚལ་ལོ། །ཕྱག་གཡས་མཆོག་སྦྱིན་ལེགས་པར་བརྐྱང་མཛད་ནས། །གཡོན་པས་ཨུཏྤལ་སྡོང་པོ་ཐུགས་ཀར་འཛིན། །སྲབ་འཇམ་དུང་མདོག་ན་བཟས་རབ་བརྒྱན་ཅིང་། །མུ་མེད་འོད་ཟེར་འཕྲོ་ལ་ཕྱག་འཚལ་ལོ། །དཔའ་
མཆོག་སྐུ་ཡི་རྣམ་པ་དྲན་གྱུར་ནས། །རིག་སྔགས་ཅུང་ཟད་བཟླས་པ་ཙམ་གྱིས་ཀྱང་། །དུས་དེས་དར་དཀར་མ་ཤའི་སྦྱོར་བ་ཡིས། །ཕུན་ཚོགས་བློ་གྲོས་སྤེལ་ལ་ཕྱག་འཚལ་ལོ། །གཞན་ཡང་གཞོན་ནུ་དཔའ་བོས་ལེགས་བསྟེན་པའི། །ཏིང་འཛིན་སྔགས་དང་ཅི་རིགས་རྫས་སྦྱོར་གྱིས། །གནས་
སྐབས་མཐར་ཐུག་ཡོན་ཏན་མ་ལུས་ཀུན། །སླུ་མེད་ངེས་པར་འགྲུབ་ལ་ཕྱག་འཚལ་ལོ། །ངོ་བོ་མ་ནོར་ཆོས་ཉིད་རབ་མཁྱེན་ཅིང་། །རྣམ་པ་མ་ལུས་ཆོས་ཅན་ལྷང་ངེར་གཟིགས། །ཐུགས་རྗེ་ཆེ་དང་ཐབས་ཚུལ་དཔག་མེད་ཀྱིས། །སྲིད་མཚོ་མཐའ་ཡས་སྐྱོབ་ལ་ཕྱག་འཚལ་ལོ། །འཇམ་
དབྱངས་མགོན་ཁྱད་གུས་པས་རྗེས་དྲན་ཅིང་། །བསྒོམ་བཟླས་ལེགས་མཆོད་མངོན་པར་བསྟོད་པ་ཡིས། །བློ་ངན་མུན་ནག་ཐིབས་པོའི་ཚོགས་རྣམས་ཀུན། །སྤྲིན་མེད་ཉི་ཤར་ཇི་བཞིན་དངས་པར་མཛོད། །དཔལ་ལྡན་མཁས་པ་རྣམས་ཀྱི་ནང་ནས་རྒྱལ་མཚན་རྩེ་མོ་ལྟར་ཤིན་ཏུ་མཐོ་ཞིང་གསལ་
བར་གྱུར་པའི་པཎྜི་ཏ་ཆེན་པོ་མ་ཏིས་འཇམ་པའི་དབྱངས་ཀྱི་སྒྲུབ་ཐབས་དང་བསྟུན་ཏེ། བསྐྱེད་པའི་རིམ་པའི་གསལ་འདེབས་བདེ་བའི་ཏིང་འཛིན་གྱི་བསྟོད་པ་རྫོགས་སོ།།      །།པཎྜི་ཏ་ཤཱཀྱ་ཤྲཱི་བྷ་དྲ་དང་། བོད་ཀྱི་ལོ་ཙཱ་ཁྲོ་ཕུ་བ་གནུབས་བྱམས་པའི་དཔལ་གྱིས་སྲིན་པོའི་རིར་བསྒྱུར་
བའོ། །༄༅༅། །རྒྱ་གར་སྐད་དུ། ཨཱརྱ་ཨ་ར་པ་ཙ་ན་པཱུ་ཛ་བི་དྷི་ནཱ་མ། བོད་སྐད་དུ། འཕགས་པ་ཨ་ར་པ་ཙ་ནའི་མཆོད་པའི་ཆོ་ག་ཞེས་བྱ་བ། འཕགས་པ་ཨ་ར་པ་ཙ་ན་ལ་ཕྱག་འཚལ་ལོ། །སྒྲུབ་ཐབས་སུ་བཤད་པའི་རིམ་པས་དེ་ལྟར་བླ་མའི་མཎྜལ་སྔོན་དུའོ། །ཤིན་ཏུ་མཉམ་པར་

73-1-85b

གཞག་ལ་འགྲོ་ལ་ཕན་པའི་སེམས་ཀྱིས་མཆོད་པར་བྱའོ། །ཨོཾ་ཨཱཿཧཱུཾ་གནས་དང་བདག་དང་རྣལ་འབྱོར་བསྲུང་བའོ། །དེ་ནས་ཨོཾ་སརྦ་ཏ་ཐཱ་ག་ཏཱ་སུ་ལ་ལི་ཏ། ལ་ལི་ཏཻ་རྣ་ནཱ་མཱ་མི་བྷ་ག་བནྟཾ་ཨ་ར་པ་ཙ་ན་ནཱ་ཐ། ཛཿཧཱུཾ་བཾ་ཧོཿཔྲ་ཏཱིཙྪ་མཾ་ཀུ་སུ་མཱཉྫ་ལི་ནཱ་ཐ་ཧོཿ། ཨོཾ་ཨཱཿཧྲཱིཿཔྲ་བར་སཏྐཱ་ར་ཡ་ཨ་ར་པ་ཙ་ནཱ་
ཡ་པཱ་དྱཾ་པྲ་ཏཱིཙྪ་ཧཱུཾ་སྭཱ་ཧཱ། ཨོཾ་ཨཱཿཧྲཱིཿཔྲ་བར་སཏྐཱ་ར་ཡ་ཨ་ར་པ་ཙ་ནཱ་ཡ་པྲོ་ཀྵ་ཎ་པྲ་ཏཱིཙྪ་ཧཱུཾ་སྭཱ་ཧཱ། ཨོཾ་ཨཱཿཧྲཱིཿཔྲ་བར་སཏྐཱ་ར་ཡ་ཨ་ར་པ་ཙ་ནཱ་ཡ་ཨརྩྩ་མ་ནཾ་པྲ་ཏཱིཙྪ་ཧཱུཾ་སྭཱཧཱ། ཨོཾ་ཨཱཿཧྲཱིཿཔྲ་བར་སཏྐཱ་ར་ཡ་ཨ་ར་པ་ཙ་ནཱ་ཡ་ཨརྒྷཾ་པྲ་ཏཱིཙྪ་ཧཱུཾ་སྭཱ་ཧཱ། ཨོཾ་ན་མོ་མཉྫུ་གྷོ་ཥ་ཡ་དྷཱིཿཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་ཛཱ་ལི་ནཱི་
པྲ་བྷཱ་ཡ་རཾ་ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མ་ཤྩནྡྲ་པྲ་བྷཱ་ཡ་པཾ་ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མཿཀེ་ཤི་ནྱེ་ཙཾ་ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མ་ཨུ་པ་ཀེ་ཤི་ནྱེ་ནཾ་ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མཿཨ་ཀྵོ་བྷཱ་ཡ་ཧཱུཾ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་བ་རོ་ཙ་ནཱ་ཡ་ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་རཏྣ་
སཾ་བྷ་བཱ་ཡ་ཏྲཱཾ། ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་ཨ་མི་ཏཱ་བྷཱ་ཡ་ཧྲཱིཿཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་ཨ་མོ་གྷ་སིདྡྷི་ཁཾ་ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མ་ལོ་ཙ་ནཱ་ཡེ་ལཱཾ་ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མོ་མཱ་མེ་ཀྱེ་མཱཾ་ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མཿཔཎྜ་རཱ་ཡཻ་པཱཾ་ཨོཾ་བཛྲ་པུཥྤེ་ཧཱུཾ་སྭཱ་ཧཱ། ཨོཾ་ན་མ་སྟཱ་རཱ་ཡཻ་ཏཱཾ་
ཨོཾ་བཛྲ་པུཥྤེ་ཧཱུ་སྭཱ་ཧཱ། ཨོཾ་ཨཱཿཧཱུཾ། འདི་ཡི་རིམ་པས། ཨོཾ་བཛྲ་དྷཱུ་པེ་ཧཱུ་སྭཱ་ཧཱ། ཨོཾ་བཛྲ་དཱི་པེ་ཧཱུཾ་སྭཱ་ཧཱ། ཨོཾ་བཛྲ་གནྡྷེ་ཧཱུཾ་སྭཱ་ཧཱ། ཨོཾ་བཛྲ་ནཻ་བི་དྱེ་ཧཱུཾ་སྭཱ་ཧཱ། དེ་རྣམས་ཀྱི་མདུན་དུ་འདོད་པའི་ཡོན་ཏན་ལྔ་པོ་རྣམས་ཉེ་བར་ཡང་དག་པར་དབུལ་བར་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་མེ་གྷ་པྲ་ས་ར་ས་མུ་དྲ་སྥ་ར་ཎ་ཧི་མཾ་ག་ག་ན་ཁཾ་ཧཱུཾ་
ཕཊ། མཆོད་པ་བྱིན་གྱིས་བརླབ་པར་བྱའོ། །དངོས་པོ་མེད་ཀྱང་ཡིད་ལས་བྱུང་བའི་མཆོད་པ་དབུལ་ལོ། །ནམཿསརྦ་བུདྡྷ་བོ་དྷི་སཏྭཱ་ནཱཾ་སརྦ་ཐཱ་ཁཾ་ཨུངྒ་ཏེ་སྤར་ཎ་ཧི་མཾ་ག་ག་ན་ཁཾ་ས་མནྟ་སྭཱ་ཧཱ། ཡིད་ཀྱིས་མཆོད་པ་བྱིན་གྱིས་བརླབ་པའོ། །རི་བོང་འཛིན་པ་ལྟ་བུ་ཡི། །ཅེས་པ་ལ་སོགས་
པ་དང་། རིན་ཆེན་གསུམ་རྣམས་ཕྱག་འཚལ་ལོ། །མཆོད་པའང་རིན་ཆེན་གསུམ་པོ་ལ། །སྡིག་པ་གང་རྣམས་བརྗོད་པར་བགྱི། །བསོད་ནམས་ཀུན་ལ་རྗེས་སུ་དགའ། །ཆོས་ཀྱི་འཁོར་ལོ་རབ་བསྐོར་ཞིང་། །མྱ་ངན་མི་འདའ་རྟག་ཏུ་བཞུགས། །བདག་གིས་སྦྱིན་སོགས་བསོད་

73-1-86a

ནམས་ཀྱིས། །བདག་ལ་ཀུན་རྟོག་ཡོངས་སུ་བསྒྱུར། །ཞེས་པ་རྣམ་པ་བདུན་བླ་ན་མེད་པའི་མཆོད་པ་བྱས་ནས་དབང་བསྐུར་བའི་ཕྱིར། སྤྱན་མ་ལ་སོགས་པའི་ལྷ་མོས་མངོན་པར་དགའ་བས་དབང་བསྐུར་བའོ། །རང་གི་རིགས་ཀྱི་ངོ་བོར་བྱས་ནས་འདོད་པའི་ཕྱིར་
བདག་ལ་དབང་བསྐུར་རོ། །གཙང་མའི་གནས་ཀྱི་ལྷ་རྣམས་ཀྱིས། །ཇི་ལྟར་དེ་བཞིན་གཤེགས་འཁྲུངས་ཚེ། །ཀུན་བཀྲུས་དེ་བཞིན་བདག་དབང་བསྐུར། །ཨོཾ་ཨཱཿསརྦ་ཏ་ཐཱ་ག་ཏཱ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ། ཨོཾ་སརྦ་ཏ་ཐཱ་ག་ཏཱ་བྷི་ཥེ་ཀ་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཡི་གེའི་རང་བཞིན་འབྱུང་
གནས་དང་། །ལྷན་ཅིག་ཀུན་དུ་རྣམ་པར་རྟོག །གྲངས་མེད་ཨཱ་ལི་ཀཱ་ལིའི་ཚོགས། །དེ་ཉིད་རྟོགས་པའི་རྣམ་པར་འགྲོ། །ཨོཾ་པ་དེ་པ་དེ་མ་ཧཱ་ཛྙཱ་ན་སརྦ་བུདྡྷ་མ་ཡཾ་བྷ་མེ་ཧཱུཾ་ཧཱུཾ་ཧཱུཾ་ཧོཿཧོཿཧོཿཨ་ཁཾ་སྭཱ་ཧཱ། འདི་ཡིས་གསང་སྔགས་ཀྱི་ཕྲེང་བ་རྣམས་བྱིན་གྱིས་བརླབས་ལ་གསང་སྔགས་བཟླས་སོ། །
གསང་སྔགས་བླ་མའི་ཉེ་བར་བཤད་པ་ལས་རྟོགས་པར་བྱའོ། །བཟླས་པ་བྱས་ནས་གཏོར་མ་བྱིན་གྱིས་བརླབ་པར་བྱ་སྟེ། ཡཾ་ཡིག་གིས་རླུང་གི་དཀྱིལ་འཁོར་རོ། །རཾ་ཡིག་གིས་མེའི་དཀྱིལ་འཁོར་རོ། །དེའི་སྟེང་དུ་ཀཾ་ཡིག་གིས་སྒྱེད་པུ་གསུམ་གྱི་སྟེང་དུ། ཨ་ཡིག་ལས་སྐྱེས་
པའི་སྣོད་དུ་འཆི་མེད་ལྔ་དང་རབ་ཏུ་གསལ་བ་ལྔ་པོ་ལྷན་ཅིག་བཞུ་ནས། འཆི་མེད་ཡེ་ཤེས་བཅུག་ནས་དབུལ་བར་བྱ་སྟེ། ཨོཾ་ཨ་ར་པ་ཙ་ནཱ་ཡ་ཨངྒ་པུསྟཱ་ཀ་ཧསྟཱ་ཡ་ཨི་མཾ་བ་ལིཾ་ཁ་ཁ་ཁཱ་ཧི་ཁཱ་ཧི། ཧ་ན་ཧ་ན། ད་ཧ་ད་ཧ། པ་ཙ་པ་ཙ། མ་མ་སརྦ་སཏྭཱ་ནཱཉྩ་པྲ་ཏྱཱརྠ་ཀ་ན་བནྡྷ་བནྡྷ་ནཱི་དྷཱིཿ
ཤྲཱི་ཁམ། ཨ་ར་པ་ཙ་ནཱ་སྭཱ་ཧཱ། གཏོར་མའི་སྔགས་སོ། །ཆད་པ་དང་ལྷག་པ་དགང་བའི་ཕྱིར། ཡི་གེ་བརྒྱ་པ་བརྗོད་པར་བྱ་སྟེ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། 
སརྦ་སིདྡྷི་མྨེ་པྲ་ཡཙྪ། སརྦ་ཀརྨྨ་སུ་ཙ་མེ་ཙིཏྟཱཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿ བྷག་བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿ བདག་ཅག་སེམས་ཅན་དོན་ཀུན་མཛད། །ཇི་ལྟར་རྗེས་རྟོགས་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་པ་དང་། །

73-1-86b

སླར་ནི་བྱོན་པར་མཛད་གྱུར་ཅིག །ཨོཾ་མུཿསྭཱ་ཧཱས་གཤེགས་པར་བྱའོ། །སྨོན་ལམ་གྱི་བྱེ་བྲག་ཀྱང་གདབ་པར་བྱའོ། །དུས་གསུམ་བསགས་དང་ཡོད་པའི་དགེ་བ་ཡིས། བདག་ཅག་སྲིད་ཀུན་ཕ་རོལ་ཕྱིན་ནས་ནི། །སེམས་ཅན་ཀུན་བཅས་རིན་ཆེན་རྟོགས་ལྡན་པའི། །བླ་ན་
མེད་པའི་འབྲས་བུ་ཐོབ་པར་གྱུར། །འཕགས་པ་ཨ་ར་པ་ཙ་ནའི་མཆོད་པའི་ཆོ་ག་ཞེས་བྱ་བ་རྫོགས་སོ། །ལུང་དུ་སྟོན་པའི་བསྟན་བཅོས་ཀྱི་སྐད་ཅུང་ཟད་རྟོགས་པའི། ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས། གྲུབ་པའི་ཞིང་དམ་པ་མང་ཡུལ་སྐྱིད་གྲོང་འཕགས་པ་
འཇིག་རྟེན་དབང་པོའི་གཙུག་ལག་ཁང་ལས། ཅུང་ཟད་མི་རིང་བའི་ཆེན་པོ་རྣམས་ཀྱི་གདན་ས། དཔལ་ཤེར་གྱི་གཙུག་ལག་ཁང་དུ་བསྒྱུར་བའོ།།      །།༄༅༅། །རྒྱ་གར་སྐད་དུ། ཨཱརྱ་ཨ་མོ་གྷ་པཱ་ཤ་པཉྩ་དེ་བ་སྟོ་ཏྲ། བོད་སྐད་དུ། འཕགས་པ་དོན་ཡོད་ཞགས་པ་
ལྷ་ལྔའི་བསྟོད་པ། རྗེ་བཙུན་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །མཁའ་ལྟར་རང་བཞིན་རྣམ་དག་ལས། །པཾ་ཡིག་ཨ་དཀར་ཡོངས་གྱུར་པའི། །པདྨ་དཀར་པོ་ཟླ་སྟེང་དུ། །ཧྲཱིཿཡིག་དཀར་པོ་ལས་འཁྲུངས་ཤིང་། །གཡས་བརྐྱང་རོལ་པའི་ཚུལ་གྱིས་བཞུགས། །གངས་
རི་ལྟར་གསལ་ཀུནྡའི་མདོག །གཡས་པ་མཆོག་གི་དོན་སྦྱིན་མཛད། །འཁོར་བའི་སྐྱོན་གྱིས་མ་གོས་པའི། །པདྨ་དཀར་པོ་གཡོན་ན་འཛིན། །འཛུམ་བཅས་ཞི་བའི་ཉམས་དང་ལྡན། །རིན་ཆེན་སྣ་ཚོགས་རྒྱན་གྱིས་མཛེས། །མ་ཆགས་དཀྱིལ་འཁོར་གཙོ་ལ་བསྟོད། །པདྨ་དཀར་པོ་ཟླ་སྟེང་དུ། །
ཧ་ཡིག་དམར་པོ་ལས་འཁྲུངས་ཤིང་། །མཉམ་པར་བཞེངས་ནས་འགྲོ་དོན་མཛད། །པདྨ་རཱ་ག་དམར་པོའི་མདོག །ཞགས་པ་དང་ནི་རྡོ་རྗེ་གཡས། །ལྕགས་ཀྱུ་བགྲང་ཕྲེང་གཡོན་ན་འཛིན། །སྣ་ཚོགས་རྒྱན་གྱིས་མཛེས་པ་ཡི། །དོན་ཡོད་ཞགས་ལ་ཕྱག་འཚལ་བསྟོད། །པདྨ་ཉི་སྟེང་
ཧཱུཾ་ལས་འཁྲུངས། །གཡོན་བརྐྱང་གྱད་ཀྱི་ཚལ་གྱིས་བཞུགས། །སྐུ་མདོག་དམར་པོ་བྱི་རུའི་ཚུལ། །སྟག་དང་སྦྲུལ་གྱིས་རྣམ་བརྒྱན་ཅིང་། །བེ་ཅོན་དང་ནི་སྡིགས་མཛུབ་གཡས། །འཁོར་ལོ་པདྨ་དམར་པོ་གཡོན། །སྤྱི་གཙུག་རྟ་མགོ་ལྗང་གུ་འཚེར། །ཧ་ཡ་གྲཱྀ་ལ་ཕྱག་འཚལ་

73-1-87a

བསྟོད། །ཆུ་སྐྱེས་ཉི་མར་ཕ་ལས་འཁྲུངས། །ནམ་མཁའི་མདོག་ཅན་གཡོན་བརྐྱང་ཚུལ། །མཆེ་གཙིགས་ཁྲོ་མོའི་ཆ་ལུགས་འཛིན། །སྟག་གི་པགས་པས་རྣམ་པར་དཀྲིས། །རལ་གྲི་ཞགས་པ་པདྨ་མདའ། །འཁོར་ལོ་དབྱིག་པ་རྩེ་གསུམ་གཞུ། །གཡས་དང་
གཡོན་གྱི་ཕྱག་ན་བསྣམས། །རལ་གཅིག་མ་ལ་ཕྱག་འཚལ་བསྟོད། །པདྨ་དཀར་པོ་ཟླ་སྟེང་དུ། །ཊ་ཡིག་དཀར་པོ་ལས་འཁྲུངས་ཤིང་། །ཟླ་བ་ཆུ་ཤེལ་ནོར་བུའི་མདོག །འགྱིང་ཞིང་ལྡེམ་པའི་ཚུལ་གྱིས་བཞུགས། །དབྱིག་པ་པདྨ་དཀར་པོ་གཡས། །བགྲང་ཕྲེང་དང་ནི་སྤྱི་བླུགས་
གཡོན། །སྣ་ཚོགས་རྒྱན་གྱིས་མཛེས་པ་ཡི། །ཁྲོ་གཉེར་ཅན་ལ་ཕྱག་འཚལ་བསྟོད། །འཕགས་པ་དོན་ཡོད་ཞགས་པ་ལྷ་ལྔའི་བསྟོད་པ། སློབ་དཔོན་ཆེན་པོ་ཙནྡྲ་གོ་མིས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། ཨཱརྱ་ཨ་མོ་གྷ་པཱ་ཤ་མཎྜ་ལ་དེ་ཝ་ག་ཎཾ་སྟོ་ཏྲ་བི་མ་
ལ་པྲ་བྷཱ་ནཱ་མ། བོད་སྐད་དུ། འཕགས་པ་དོན་ཡོད་ཞགས་པའི་དཀྱིལ་འཁོར་གྱི་ལྷ་ཚོགས་ལ་བསྟོད་པ་དྲི་མ་མེད་པའི་འོད་ཅེས་བྱ་བ། བཅོམ་ལྡན་འདས་ཐུགས་རྗེ་ཆེན་པོ་ལ་ཕྱག་འཚལ་ལོ། །རང་བཞིན་ཆོས་ཀྱི་དབྱིངས་ལས་མ་གཡོས་ཀྱང་། །ཐུགས་རྗེ་ཆེན་པོས་གདུལ་བྱའི་
སྣང་ངོ་ལ། །གང་ལ་གང་འདུལ་དེ་ལ་དེ་སྟོན་པའི། །འཇིག་རྟེན་དབང་ཕྱུག་ཁྱེད་ལ་བསྟོད་པར་བགྱི་། །འཁོར་བར་གནས་ཀྱང་སྐྱོན་གྱིས་མ་གོས་ཕྱིར། །པདྨ་དཀར་པོ་རབ་རྒྱས་ལྟེ་བ་ལ། །ཐུགས་རྗེའི་ཆུ་རྒྱུན་འབེབས་མཛད་ཟླ་བའི་གདན། །ཡེ་ཤེས་འགྱིང་ཚུལ་བཞུགས་མཛད་
ཁྱོད་ལ་བསྟོད། །འཇིག་རྟེན་ལོག་རྟོག་སྟོན་པ་འདུལ་བའི་ཕྱིར། །རྒྱལ་པོའི་རོལ་སྟབས་དབང་ཕྱུག་ཆ་ལུགས་འཛིན། །སྣ་ཚོགས་ཐབས་མངའ་རིན་ཆེན་རྒྱན་གྱིས་སྤྲས། །འཇིག་རྟེན་ཀུན་གྱིས་བསྟོད་པ་ཁྱོད་ལ་འདུད། །དོན་དམ་ཆོས་སྐུ་ཉག་གཅིག་ཞལ་མངའ་ཞིང་། །ཐུགས་རྗེས་
འགྲོ་ལ་ཆགས་པས་ཧྲཱིཿལས་འཁྲུངས། །སངས་རྒྱས་ཀུན་གྱིས་དབང་བསྐུར་འོད་དཔག་མེད། །རལ་པའི་ཁུར་ན་འཆང་བ་ཁྱོད་ལ་བསྟོད། །འགྲོ་དྲུག་སྒྲོལ་ཕྱིར་རལ་པའི་ཅོད་པན་འཛིན། །རྒྱལ་བའི་རྒྱལ་པོ་རིན་ཆེན་དབུ་རྒྱན་ཅན། །མེ་ཏོག་ཅོད་པན་རྒྱལ་སྲས་འགྲན་ཟླ་བྲལ། །དུས་

73-1-87b

གསུམ་རྒྱལ་བའི་བདག་པོ་ཁྱོད་ལ་བསྟོད། །ནོར་བུའི་སྙན་ཆས་འགྲོ་ལ་ཆོས་སྒྲ་སྒྲོགས། །སྤྱན་གསུམ་དུས་གསུམ་ཤེས་དང་ཤེས་བྱ་མཁྱེན། །འཛུམ་པའི་ཞལ་མངའ་འགྲོ་བའི་དོན་ལ་དགྱེས། །སྟོང་ཉིད་ཐུགས་རྗེ་ཅན་ལ་ཕྱག་འཚལ་བསྟོད། །ཀུན་རྫོབ་ཙམ་དུ་འཁོར་བའི་སྡུག་
བསྔལ་གྱི། །ཉོན་མོངས་ཀུན་སྐྱོབ་བདེ་བའི་མཆོག་སྦྱིན་ཅིང་། །དོན་དམ་རྣམ་དག་པདྨ་དཀར་པོ་བསྣམས། །ཐབས་ཤེས་ཟུང་འཇུག་ཕྱག་གཉིས་ཕྱག་འཚལ་བསྟོད། །སྲེད་པའི་མེས་གདུངས་རྒྱུད་ལྔའི་སེམས་ཅན་ལ། །བདུད་རྩིའི་རྒྱུན་འབེབས་གཡས་ན་སྤྱི་བླུགས་འཛིན། །བདུད་
བཞིའི་འཇིགས་སྐྱོབ་གཡོན་པ་སྐྱབས་སྦྱིན་མཛད། །འཁོར་འདས་གཉིས་མེད་གཟིགས་ལ་ཕྱག་འཚལ་བསྟོད། །སྲིད་གསུམ་གཟོད་ནས་དབེན་པར་རྟོགས་པའི་ཕྱིར། །རི་དགས་ལྤགས་པས་སྐུ་ཡི་ཤམ་ཐབས་མཛད། །འཁོར་འདས་རང་བཞིན་སྤྲོས་བྲལ་རྟོགས་པའི་ཕྱིར། །
གངས་རི་ཀུནྡའི་མདངས་ལྡན་ཁྱོད་ལ་བསྟོད། །ཁྱོད་ཀྱི་ཐུགས་རྗེའི་རྒྱུན་གྱིས་དུས་གསུམ་གྱི། །རྒྱལ་བ་སྲས་བཅས་འགྲོ་དོན་ལ་བསྐུལ་ནས། །མཛད་བྱའི་ཕྲིན་ལས་མ་ལུས་མཛད་པའི་ཕྱིར། །དཀྱིལ་འཁོར་གཙོ་བོར་བཞུགས་པ་ཁྱོད་ལ་བསྟོད། །ཕ་རོལ་ཕྱིན་བཅུའི་ཡོན་ཏན་
རབ་རྫོགས་ཕྱིར། །ཕྱག་ཞབས་ཀུན་ལ་ནོར་བུའི་རྒྱན་གྱིས་སྤྲས། །ས་བཅུའི་སྟོབས་རྫོགས་ཡེ་ཤེས་མངའ་བའི་ཕྱིར། །མུ་ཏིག་དོ་ཤལ་འཕྱང་ལ་ཕྱག་འཚལ་བསྟོད། །རྫུ་འཕྲུལ་མཐུ་ཡིས་འགྲོ་བ་དྲང་བ་དང་། །སྟོབས་བཅུའི་རྩལ་གྱིས་བདུད་དཔུང་གཞོམ་པའི་ཕྱིར། །ཞབས་གཉིས་
ཅུང་ཟད་བརྐྱང་བསྐུམ་རོལ་པས་བཞུགས། །རྟག་པར་གཞན་དོན་མཛད་ལ་ཕྱག་འཚལ་བསྟོད། །སྲིད་པ་གསུམ་པོ་དབྱིངས་སུ་བསྒྲལ་བའི་ཕྱིར། །འཛམ་བུ་ཆུ་བོའི་གསེར་ལྟར་འབར་བའི་སྐུས། །ཡེ་ཤེས་རལ་པའི་འོད་ཟེར་འགྱེད་མཛད་པའི། །མ་རིག་མུན་པ་འཇོམས་ལ་ཕྱག་འཚལ་
བསྟོད། །གཟུང་འཛིན་དྲི་མ་དང་བྲལ་པདྨའི་གདན། །ཉོན་མོངས་གདུང་སེལ་ཟླ་བའི་གདན་ལ་བཞུགས། །འགྲོ་དོན་ཡེངས་པ་མི་མངའ་བཞེངས་ཚུལ་ཅན། །ཐུགས་རྗེ་ཆགས་པའི་མདོག་མངའ་ཁྱོད་ལ་འདུད། །ཐབས་ཀྱི་ཞགས་པས་འགྲོ་བ་དྲང་བའི་ཕྱིར། །ཧ་ལས་འཁྲུངས་

73-1-88a

པའི་ཚུལ་སྟོན་དོན་ཆེན་མཛད། །སྐྱེ་མེད་ཞལ་མངའ་སྲིད་གསུམ་གཟིགས་པའི་སྤྱན། །དབུ་རྒྱན་རྒྱལ་བའི་ཅོད་པན་འཆང་ལ་བསྟོད། །བདེན་བཞིའི་ཕྱག་གིས་ཆོས་ཀྱི་འཁོར་ལོ་བསྐོར། །སྙིང་རྗེའི་ཞགས་པས་འགྲོ་བ་འདྲེན་པར་མཛད། །རྟོགས་པའི་རྡོ་རྗེས་
ལོག་རྟོག་མཚན་མ་འཇོམས། །སྒྱུ་མའི་རྫུ་འཕྲུལ་མངའ་བ་ཁྱོད་ལ་བསྟོད། །མཁྱེན་བརྩེའི་ལྕགས་ཀྱུས་འཁོར་བ་བདེ་བར་འགུགས། །ནུས་ལྡན་བགྲང་ཕྲེང་ཡོན་ཏན་གཏེར་མཛོད་འཛིན། །འགྲོ་དོན་མཛོད་མཁས་ཞབས་གཉིས་བརྐྱང་བསྐུམ་ཚུལ། །མཚན་དོན་ལྡན་པར་བཞུགས་
པ་ཁྱོད་ལ་བསྟོད། །མ་ཆགས་པདྨའི་རིགས་ཏེ་སྐྱོན་བྲལ་སྟེང་། །མཁྱེན་པས་ཉོན་མོངས་ཚོགས་འཇོམས་ཉི་མའི་གདན། །བདུད་དཔུང་མཇོམས་མཛད་ཁྲོ་རྒྱལ་ཧཱུཾ་ལས་འཁྲུངས། །ཁྲོ་བས་ཁྲོ་བ་འདུལ་མཛད་ཁྱོད་ལ་བསྟོད། །རྔམ་པའི་ཞལ་གྱིས་ལོག་རྟོག་དབྱིངས་སུ་གསོལ། །
དམར་སེལ་རལ་པས་ལོག་འདྲེན་བྲན་དུ་འདུལ། །ཡེ་ཤེས་སྤྱན་གྱིས་ཁམས་གསུམ་སྐུ་གསུམ་གཟིགས། །རྟ་མགྲིན་རྟ་སྐད་སྒྲོགས་ལ་ཕྱག་འཚལ་བསྟོད། །རྡོ་རྗེའི་དབྱུག་པས་བགེགས་དཔུང་རྡུལ་དུ་རློག །རྡོ་རྗེ་སྡིགས་མཛུབ་བདུད་སྡེ་སྐྲག་པར་མཛད། །གསེར་གྱི་འཁོར་ལོས་
འཁོར་བའི་རྩ་བ་གཅོད། །ཆགས་བྲལ་པདྨ་འཆང་ལ་ཕྱག་འཚལ་བསྟོད། །རིན་ཆེན་སྦྲུལ་རྒྱན་ཀླུ་རྒྱལ་གདུག་པ་འདུལ། །གླང་ཆེན་གཡང་གཞི་སྟོབས་བཅུ་མངའ་བའི་དཔལ། །སྟག་ཤམ་པ་ཏིས་ཕྲིན་ལས་རྣམ་བཞི་མཛད། །ཁྲོ་རྒྱལ་བརྐྱང་བསྐུམ་བཞུགས་ལ་ཕྱག་འཚལ་བསྟོད། །
སྐྱོན་བྲལ་གདན་ལ་རྨོངས་སེལ་ཉི་མའི་སྟེང་། །ཕ་ལས་འཁྲུངས་པའི་བདུད་འདུལ་ནག་མོ་ཆེ། །རྔམ་པའི་སྟབས་ཀྱིས་གདུག་པ་སྒྲོལ་བར་མཛད། །མཆེ་བ་གཙིགས་པས་བདུད་བཞི་གསོལ་ལ་བསྟོད། །རྣམ་ཐར་ཕྱག་བརྒྱད་ཡེ་ཤེས་རྣོ་བའི་མཚོན། །ཤེས་རབ་རལ་གྲིས་གཏི་མུག་རྩད་ནས་
གཅོད། །ཐུགས་རྗེའི་ཞགས་པ་སྐྱོན་བྲལ་པདྨ་འཆང་། །ཐབས་མཁས་བརྩེ་བའི་མདའ་འཕེན་ཁྱོད་ཕྱག་འཚལ། །འཁོར་ལོས་སྲིད་པའི་འཁོར་ལོ་འཇོམས་མཛད་ཅིང་། །དབྱུག་པས་བགེགས་འདུལ་རྩེ་གསུམ་དུག་གསུམ་གཅོད། །སྤྲོས་བྲལ་གཞུ་ཡིས་ཐུགས་རྗེའི་མདའ་འཕེན་

73-1-88b

མ། །འཕགས་ལམ་དོན་ལྡན་རལ་གཅིག་མ་ལ་བསྟོད། །ཁྲོ་རྒྱལ་ཀུན་འདུས་དབུ་རྒྱན་རིན་ཆེན་འཆང་། །བདུད་དགྲ་ཀུན་འཇོམས་ཁྲོ་མོའི་ཆ་ལུགས་རྫོགས། །སྟག་ལྤགས་ཤམ་ཐབས་སྟོབས་བཅུའི་རྩལ་མངའ་བའི། །རྒྱལ་བ་ཀུན་སྐྱེད་ཁྲོ་རྒྱལ་ཡུམ་ལ་བསྟོད། །སྐྱོན་བྲལ་ཆུ་སྐྱེས་གདུང་
བ་སེལ་བའི་སྟེང་། །ཊ་ལས་འཁྲུངས་པའི་ཕྲིན་ལས་ཀུན་རྫོགས་མ། །བརྩེ་བའི་ཞལ་མང་འཕྲིན་ལས་རྒྱས་པའི་ཕྱག །རལ་པའི་ཅོད་པན་རྡོ་རྗེས་བརྒྱན་ལ་བསྟོད། །ཐོད་དབྱུག་བགེགས་འདུལ་པདྨོས་འཁོར་བ་སྐྱོབ། །ཕྲེང་བས་སེམས་ཅན་རྗེས་འཛིན་འགྲོ་དྲུག་ལ། །དམ་ཆོས་བདུད་རྩིའི་
རྒྱུན་འབེབས་སྤྱི་བླུགས་འཛིན། །སྒྲུབ་པ་པོ་ལ་མཆོག་སྩོལ་མཛད་ལ་བསྟོད། །རིན་ཆེན་རྒྱན་འཆང་ས་དང་ཡོན་ཏན་རྫོགས། །དར་ཤམ་པ་ཏིས་མི་འཇིགས་ལྷ་ཆེན་འདུལ། །ཆགས་ཅན་འདུལ་ཕྱིར་ཆགས་པ་ལྟར་སྟོན་པའི། །ལྷ་མོ་ཁྲོ་གཉེར་ལྡན་ལ་ཕྱག་འཚལ་བསྟོད། །ཀུན་ཀྱང་ཡེ་
ཤེས་འོད་དཔུང་ཀློང་ན་བཞུགས། །ཐབས་ལ་མཁས་པས་སྣ་ཚོགས་ཅིར་ཡང་སྟོན། །ཉམ་ཐག་འགྲོ་ལ་ཀུན་ཏུ་བརྩེ་བ་ཅན། །ཐུགས་རྗེས་རྟག་ཏུ་གཟིགས་མཛད་ཁྱོད་ལ་བསྟོད། །ཡེ་ཤེས་རོལ་པ་ཆེན་པོའི་བདག་ཉིད་ལས། །སྦྱིན་པའི་ཕ་རོལ་ཕྱིན་པ་རབ་རྫོགས་ཕྱིར། །སྒེག་པའི་
ཚུལ་འཆང་བདེ་བའི་མཆོད་འབུལ་མ། །སྒེག་ཅིང་བཞད་པར་མཛད་ལ་ཕྱག་འཚལ་བསྟོད། །བྱང་ཆུབ་ཡན་ལག་འབྲས་བུ་ཀུན་སྟེར་བས། །ཚུལ་ཁྲིམས་ཕ་རོལ་ཕྱིན་པ་རབ་རྫོགས་ཕྱིར། །རིན་ཆེན་ཕྲེང་བ་འཆང་ཞིང་མཆོད་པ་འབུལ། །ཆགས་བྲལ་བལྟ་བར་མཛད་ལ་ཕྱག་འཚལ་
བསྟོད། །གཟོད་ནས་ཞི་བའི་དོན་ལ་རབ་མོས་པས། །བཟོད་པའི་ཕ་རོལ་ཕྱིན་པ་རབ་རྫོགས་ཕྱིར། །སྙན་པའི་གླུ་དབྱངས་སྒྲོགས་ཤིང་མཆོད་པ་འབུལ། །དོན་དམ་རྟོགས་པར་མཛད་ལ་ཕྱག་འཚལ་བསྟོད། །རྒྱལ་བ་མཆོད་པར་བྱ་ཕྱིར་སྐྱོ་བ་མེད། །བརྩོན་འགྲུས་ཕ་རོལ་ཕྱིན་པ་རབ་
རྫོགས་ཕྱིར། །སྣ་ཚོགས་རོལ་པས་དགྱེས་པའི་གར་མཛད་མ། །མཉེས་པའི་གཟིགས་མོ་མཛད་ལ་ཕྱག་འཚལ་བསྟོད། །སངས་རྒྱས་རྒྱུ་འབྲས་བྱང་ཆུབ་སེམས་ཡིན་པས། །བསམ་གཏན་ཕ་རོལ་ཕྱིན་པ་རབ་རྫོགས་ཕྱིར། །ཡིད་འོང་མེ་ཏོག་རྣམས་ཀྱིས་མཆོད་མཛད་མ། །རྣམ་ཐར་སྒོ་

73-1-89a

གསུམ་རྟོགས་ལ་ཕྱག་འཚལ་བསྟོད། །ཐར་པར་འཇུག་པ་དབུ་མར་གྲུབ་པ་དང་། །ཤེས་རབ་ཕ་རོལ་ཕྱིན་པ་རབ་རྫོགས་ཕྱིར། །བདུག་སྤོས་སྤྲིན་ཚོགས་རྣམས་ཀྱིས་རྒྱལ་བ་མཆོད། །དོན་དམ་གོ་བར་མཛད་མ་ཁྱོད་ལ་བསྟོད། །མི་ཤེས་མུན་པ་ལྷག་མཐོང་གིས་འཇོམས་
ཤིང་། །ཐབས་མཆོག་ཕ་རོལ་ཕྱིན་པ་རབ་རྫོགས་ཕྱིར། །སྣང་བའི་སྒྲོན་མས་ཀུན་ཏུ་མཉེས་མཛད་མ། །མ་རིག་མུན་སེལ་མཛད་མ་ཁྱོད་ལ་བསྟོད། །ཉོན་མོངས་དྲི་ང་རབ་ཏུ་འཇོམས་པ་དང་། །སྨོན་ལམ་ཕ་རོལ་ཕྱིན་པ་རབ་རྫོགས་ཕྱིར། །དྲི་མཆོག་བྱུག་པས་རྒྱལ་བ་མཉེས་མཛད་མ། །
དྲི་རབ་བསྣམས་མཛད་མ་ཁྱོད་ཕྱག་འཚལ་བསྟོད། །སྙིང་རྗེ་ཆེན་པོས་འགྲོ་བ་ཀུན་བསྡུས་ནས། །སྟོབས་བཅུའི་ས་ལ་ཀུན་ཏུ་དགོད་བྱའི་ཕྱིར། །ལྕགས་ཀྱུ་འཛིན་ཅིང་ཞི་བའི་ལས་མཛད་མ། །ཤར་སྒོར་བཞུགས་ཚུལ་མཛད་མ་ཁྱོད་ཕྱག་འཚལ། །བྱམས་པ་ཆེན་པོས་སྡུག་བསྔལ་ཀུན་བསལ་
ནས། །ཡང་དག་རིག་པའི་དོན་ལ་འགོད་པའི་ཕྱིར། །ཞགས་པ་འཛིན་ཅིང་རྒྱས་པའི་ལས་མཛད་མ། །ལྷོ་སྒོར་བཞུགས་ཚུལ་མཛད་མ་ཁྱོད་ཕྱག་འཚལ། །དགའ་བ་ཆེན་པོས་འགྲོ་ཀུན་བདེ་ལ་འགོད། །སྲིད་གསུམ་འགྲོ་བ་དབང་དུ་བྱ་བའི་ཕྱིར། །ལྕགས་སྒྲོག་བསྣམས་ནས་དབང་
གི་ལས་མཛད་མ། །ནུབ་སྒོར་བཞུགས་ཚུལ་མཛད་མ་ཁྱོད་ཕྱག་འཚལ། །བཏང་སྙོམས་ཆེན་པོས་འགྲོ་ཀུན་བདག་ཏུ་མཛད། །མ་ལུས་སངས་རྒྱས་ས་ལ་རབ་འགོད་ཕྱིར། །དྲིལ་བུ་འཆང་ཞིང་མངོན་སྤྱོད་ལས་མཛད་མ། །བྱང་སྒོར་བཞུགས་མ་ཁྱོད་ལ་གུས་པས་བསྟོད། །ཚངས་པ་དྲག་པོ་
ཉི་མ་ཟླ་བ་དང་། །དབང་པོ་གཤིན་རྗེ་ཆུ་ལྷ་ནོར་གྱི་བདག །དྲང་སྲོང་སྲིན་པོ་རླུང་དང་དབང་བདག་སྟེ། །འཇིག་རྟེན་འདུལ་ཕྱིར་ཞབས་དྲུང་འདུད་མཛད་བསྟོད། །བདག་འདྲ་ལས་ཀྱིས་མནར་བའི་སྐྱེ་བོ་ཡིས། །ཡོན་ཏན་རྒྱ་མཚོ་མངའ་བའི་མགོན་པོ་ཡི། །ཡོན་ཏན་ཆ་ཤས་ཙམ་ཡང་མ་རིག་
པས། །ཁྱོད་ཀྱི་མཛད་ཚུལ་དཔག་པར་མི་ནུས་མོད། །མུན་ཁུང་ནང་ནས་མེ་ཁྱེར་འོད་ཙམ་གྱིས། །ཁྱོད་ཀྱི་མཐུ་ཡིས་དད་པའི་བློ་ཐོབ་ནས། །རྒྱ་མཚོ་ཆེ་ལས་སྐྲ་རྩེའི་ཆུ་ཐིགས་ཙམ། །བདག་ཡིད་སྤྲོ་བས་ཁྱོད་ལ་བསྟོད་པ་འདིས། །ཅུང་ཟད་ཙམ་རྙེད་དགེ་བ་དྲི་མ་མེད། །གངས་རི་ལྟར་དཀར་ཤེས་ཙམ་

73-1-89b

ཐོབ་པ་དེས། །རྒྱུད་ལྔའི་འགྲོ་བས་ཉེས་པ་ཀུན་སྤངས་ནས། །མགོན་པོ་འོད་དཔག་མེད་པའི་གནས་ཐོབ་ཤོག །འཕགས་པ་དོན་ཡོད་ཞགས་པའི་དཀྱིལ་འཁོར་གྱི་ལྷ་བཅུ་བདུན་ལ་དོན་རྟོགས་ཀྱི་སྒོ་ནས་བསྟོད་པ་དྲི་མ་མེད་པའི་འོད་ཅེས་བྱ་བ་རྫོགས་སོ།།      །།༄༅༅། །རྒྱ་གར་སྐད་དུ། 
པཱ་པ་བི་དཱ་ར་ཎ་མ་ན་ཧ་ར་ན་ནཱ་མ་ལོ་ཀ་ནཱ་ཐ་སྟོ་ཏྲ། བོད་སྐད་དུ། འཇིག་རྟེན་མགོན་པོའི་བསྟོད་པ་ཡིད་འཕྲོག་སྡིག་འཇོམས་ཞེས་བྱ་བ། ཐུགས་རྗེ་ཆེན་པོ་ལ་ཕྱག་འཚལ་ལོ། །ལྷ་དང་ལྷ་མིན་མི་ཡིས་ཞབས་ལ་ཕྱག་བྱས་ཤིང་། །སྐྱེ་རྒ་ན་འཆི་མ་ལུས་རབ་ཏུ་འཇོམས་པའི་སྐུ། །འཇིག་རྟེན་
དབང་ཕྱུག་ཐུགས་རྗེ་ལྡན་པ་ཁྱོད་ཀྱིས་ནི། །མགོན་མེད་བདག་ལ་བསྲུང་མཛད་ཐུགས་རྗེ་མཛད་དུ་གསོལ། །འཁོར་བའི་རྒྱ་མཚོའི་ཀློང་དཀྱིལ་དུ་ནི་ནུབ་གྱུར་ཏེ། །ཉོན་མོངས་དབའ་རླབས་ཀྱིས་ནི་ཡང་དག་ཉམས་ཉེས་ཤིང་། །ཆོ་ངེས་འདེབས་པ་བདག་ལ་བཏང་སྙོམས་མ་མཛད་པར། །ཁྱོད་ལ་
བསྟོད་བགྱིད་ཐུགས་རྗེ་ཆེན་པོས་བསྲུང་དུ་གསོལ། །སྲིད་པའི་རབ་རིབ་ཀྱིས་ནི་བློ་མིག་ཉེར་གཙེས་ཤིང་། །འཆི་བའི་འཇིགས་པ་ཡིས་ནི་ལུས་སེམས་གཡེངས་གྱུར་པ། །ཇི་སྲིད་མི་བཟད་མནར་མེད་གནས་སུ་མ་ལྷུང་བ། །བཅོམ་ལྡན་སྤྱན་རས་གཟིགས་ཀྱིས་བདག་ལ་བསྐྱབ་ཏུ་གསོལ། །རྨོངས་
པས་རྒྱུན་དུ་གཞན་གྱི་བུད་མེད་བསྟེན་བགྱིས་དང་། །སྲོག་ཆགས་སྟོང་ཕྲག་སྲོག་དང་བྲལ་བ་ལ་སོགས་པ། །མགོན་པོ་བདག་གིས་སྡུག་བསྔལ་རྒྱུ་ནི་ཚང་བར་བགྱིས། །ལུས་ཀྱི་ཉེས་པ་དེ་དག་ཡང་དག་སྦྱང་དུ་གསོལ། །གང་ཞིག་བཀུར་སྟིའི་ཆེད་དང་འཚོ་བའི་ཆེད་དུ་ནི། །འཇིག་རྟེན་མི་བདེན་བརྫུན་
ཚིག་བརླང་པོ་ལ་སོགས་པ། །འཇིག་རྟེན་དབང་ཕྱུག་ངག་གི་ཉེས་པའི་ཀུན་སྦྱོར་ཡང་། །དམྱལ་བའི་རྒྱུ་དེ་ཡུན་རིངས་མ་ལུས་གོམས་པར་བགྱིས། །སེམས་ཅན་རྣམས་ལ་རང་གིས་གནོད་པ་གང་བགྱིས་དང་། །གཞན་གྱིས་བགྱིས་པ་ལ་ནི་རྗེས་སུ་ཡི་རང་བའི། །བདག་གིས་ཡིད་ཀྱི་སྡིག་དེ་དག་ནི་སྨྲེ་སྔགས་
སུ། །འདོན་ཞིང་མཆིས་པས་བསལ་དུ་གསོལ་དང་མགོན་པོ་ཀྱེ། །ལྷ་དང་མི་དང་ལྷ་མིན་སྐྱེ་བ་རྣམས་དང་ནི། །དུད་འགྲོ་དང་ནི་དམྱལ་བ་ཡི་དགས་རྣམས་སུ་ཡང་། །སྡུག་བསྔལ་དང་བཅས་འགྲོ་བ་གང་གནས་དེ་དག་ལ། །བསྲུང་བ་མཛད་ཅེས་ཁྱོད་ཀྱི་ལོ་རྒྱུས་བདག་ལ་ཁུམས། །དེས་ན་བདག་ལ་

73-1-90a

ཐུགས་རྗེ་ཡང་དག་མཛད་དུ་གསོལ། །གཡར་ལུས་དར་ལ་བབ་པ་ཡལ་བར་ཉམས་ལ་ཁད། །དེ་ཕྱིར་ཇི་སྲིད་དམྱལ་བའི་གནས་སུ་མ་ཞུགས་པར། །བཅོམ་ལྡན་ཁྱོད་ནི་བདག་གིས་ཞུ་བ་གསན་པར་མཛད། །གཞན་ཡང་གཞན་དོན་ལ་ནི་རང་ཉིད་གཤེགས་མཛད་ན། །བསོད་ནམས་
མ་བསགས་བདག་ནི་སྤྱན་སྔར་མཆིས་ཀྱང་སྤོང་། །ཁྱོད་ཀྱི་ཐུགས་རྗེ་བསོད་ནམས་དག་ལ་ལྟོས་སམ་ཅི། །སྡུག་བསྔལ་མེད་ལ་སྙིང་རྗེ་བྱ་བར་སུ་ལགས་ན། །དྲན་པ་ཙམ་གྱིས་ཁྱོད་ནི་ཡོངས་སུ་མཉེས་ནས་སུ། །སྡིག་ཟད་མཛད་ཅེས་བདག་གིས་མ་ཁུམས་ལགས་སམ་ཅི། །དེ་ཕྱིར་བཅོམ་ལྡན་
གཞན་ཕན་མཛད་ལ་ཕུལ་དུ་བྱུང་། །བདག་འདིར་མ་དོར་བསྲུང་དང་བསྐྱབ་པ་མཛད་དུ་གསོལ། །གླང་ཆེན་དག་དང་ནོར་བུ་སྲས་བཅས་བཙུན་མོ་དང་། །གནོད་མེད་རྒྱལ་སྲིད་ཁང་བཟངས་རྣམ་པར་བཀྲ་བ་དང་། །ཤ་དང་རུས་པ་དབུ་ནི་སྐུ་མཚལ་མཐར་ཐུག་བཏང་། །གྲུབ་པའི་མིག་སྨན་རྐང་
པ་བྱུག་པ་དག་དང་ནི། །གྲུབ་པའི་གནོད་སྦྱིན་དང་ནི་གནོད་སྦྱིན་མོ་དག་ཀྱང་། །འཇིག་རྟེན་མངའ་བདག་ཁྱོད་ནི་མཉེས་པར་གང་སུ་དག །དོན་གཉེར་རྣམས་ལ་མཐར་ཐུག་མ་མཆིས་སྦྱིན་པར་མཛད། །གང་དག་རྐང་པ་ལག་པ་མིག་དང་བྲལ་རྣམས་དང་། །སྣ་ཚོགས་བྲོ་འཚལ་གྱིས་ནི་འཇིགས་
པ་དང་བཅས་རྣམས། །ཡོན་ཏན་ཟབ་མོ་ཁྱོད་མཉེས་པ་ཡིས་དེ་དག་གི། །ཡན་ལག་སོབས་འགྱུར་བྲོ་འཚལ་དག་ཀྱང་ཞི་བར་འགྱུར། །མཁའ་ལྡིང་སྦྲུལ་གདུག་གནོད་དང་མཁའ་འགྲོ་མ་དང་ནི། །རྣལ་འབྱོར་མ་ཡི་གནོད་ཀུན་རྟག་ཏུ་ཞི་མཛད་ཅིང་། །རྒྱལ་བ་ཁྱོད་ཀྱིས་གང་ལ་དགོངས་པ་དེ་ལ་ནི། །
གཤིན་རྗེའི་ཕོ་ཉ་རྨི་ལམ་དུ་ཡང་མཐོང་མི་འགྱུར། །མགོན་པོ་བདག་ནི་འཇིགས་པས་རྣམ་པར་གཡེངས་པ་ཡིས། །ཉིན་དང་མཚན་དུ་ལག་པ་གྱེན་དུ་བརྐྱང་སྟེ་ངུ་། །འཇིག་རྟེན་དབང་ཕྱུག་དེས་ན་བདག་ནི་འགུམས་པ་དང་། །ཉེ་བ་ལགས་ན་བཅོམ་ལྡན་སྐྱབས་མེད་འབོར་རམ་ཅི། །ཡུལ་དང་དབང་པོ་
གདུལ་དཀའ་སེམས་ཀྱང་གཡོ་བ་དང་། །མཉམ་པར་མ་བཞག་ལུས་ཀྱིས་སྡིག་པ་མང་པོ་བགྱིས། །ཉམས་པ་བདག་གི་འཁོར་བཞིན་དུ་ནི་སྐྱེ་བ་འདིར། །ཐམས་ཅད་ཀྱིས་ནི་སྡིག་པ་འབའ་ཞིག་བསྒྲུབས་པར་ཟད། །དེ་ཕྱིར་དེ་ལྟར་ཁྱོད་ལ་ཐལ་མོ་སྦྱར་ནས་ནི། །འཇིག་རྟེན་དབང་ཕྱུག་གང་གིས་

73-1-90b

ངན་སོང་སྡུག་བསྔལ་དག །མྱོང་མི་འགྱུར་བར་ཁྱོད་ཀྱི་སྤྱན་སྔར་བདེ་འགྲོར་ནི། །མཆི་བར་བདག་ཞུ་འདི་ནི་གནང་བར་མཛད་དུ་གསོལ། །ཁྱོད་ནི་འདོད་ཆགས་ཞེ་སྡང་རྣམ་པར་འཇོམས་པའི་སྐུ། །ཁྱོད་ནི་འཁོར་བའི་མཚོ་ཆེན་གྱི་ནི་ཆུ་ལོན་ལགས། །ཁྱོད་ནི་ལྟུང་བས་སྐྲག་པ་འདྲེན་པའི་ལག་པ་སྟེ། །
ཁྱོད་ནི་བརྗོད་བཅས་མི་དགེ་འཛིན་པའི་སྒྲ་གཅན་ལགས། །ཁྱོད་ནི་བདེ་གཤེགས་བླ་མེད་དེ་ཉིད་སྟོན་པ་པོ། །ཁྱོད་ནི་སྡུག་བསྔལ་མང་ལྡན་འགྲོ་བའི་སྐྱོབ་བྱེད་ཡིན། །ཁྱོད་ནི་ཡིད་འཇོམས་གདུལ་དཀའི་བདུད་ལས་ངེས་བརྒལ་བ། །ཁྱོད་ནི་སྲིད་པའི་རྒྱ་མཚོའི་ཕ་རོལ་བརྒལ་བ་ལགས། །ཁྱོད་
ནི་ནད་པ་མ་ལུས་ནད་ནི་རྒྱུན་གཅོད་སྐུ། །ཁྱོད་ཀྱི་སྐུ་ནི་འགྲོ་བའི་ནང་ན་མཆོག་ཏུ་མཛེས། །ཁྱོད་ནི་དཔེ་མེད་ཐུགས་རྗེའི་རྒྱ་མཚོ་ཆེན་པོ་སྟེ། །ཁྱོད་ནི་རྒྱུ་མེད་གཉེན་དུ་འགྲོ་བ་རྣམས་ཀྱིས་རྟོགས། །ཁྱེད་ཀྱིས་གཡོ་བའི་དབང་པོ་འབད་པ་མེད་པར་བཏུལ། །ཁྱེད་ནི་ཡུལ་ལ་ཆགས་པ་ཡོངས་སུ་བཅོམ་
པ་ལགས། །ཁྱོད་ཀྱི་ཐུགས་ནི་བསམ་གཏན་མཆོག་ལ་མཉམ་པར་བཞག །ཁྱོད་ཀྱི་ཐུགས་ནི་སློང་བ་ཀུན་ལ་སྙོམས་པར་མཛད། །ཐུགས་རྗེ་ལྡན་པ་གཞན་ལ་ཕན་པར་མཛད་ཀྱང་ནི། །མ་རིག་སྦྲུལ་ཆེན་རྒྱབ་ཏུ་ཞོན་ནས་ཡུལ་རྣམས་ཀྱི། །འདོད་པས་དགེ་བ་ཉམས་པར་གྱུར་པ་བདག་ལ་འདིར། །
ཁྱོད་ནི་གང་གིས་ཡོངས་སུ་དགྱེས་པར་མི་མཛད་ལགས། །ཁྱོད་ཀྱི་སྤྱན་སྔར་གཡར་ཆབ་འབྱིན་ཅིང་སྨྲེ་བ་ཡི། །སྡིག་ལྡན་བདག་ལ་གང་གིས་བསྲུང་བ་མི་མཛད་ན། །མགོན་པོ་འགྲོ་བ་ཀུན་རྟེན་ཐུགས་རྗེ་གང་ལགས་པ། །དེ་ཅི་ཁྱོད་ཀྱིས་ཉི་ཚེ་བ་རུ་བསྐྱེད་ལགས་སམ། །མགོན་པོ་ཁྱོད་ཀྱི་ཐུགས་
རྗེས་ནམ་མཁའ་ཁྱབ་པ་ཡི། །སྤྲིན་བྱུང་ཆར་པའི་རྒྱུན་ནི་ཆུ་དང་སྐམ་དག་དང་། །མཐོན་དམན་ཡུལ་ནི་ཀུན་ལ་འབབ་ཅིང་སེམས་ཅན་གྱི། །དོན་དུ་ཀུན་ལ་ཉིན་མཚན་རྒྱུན་མི་འཆད་དུ་འཇུག །དེ་ལྟར་བཅོམ་ལྡན་དྲན་པའི་བདག་གི་བསོད་ནམས་གང་། །དེས་ནི་འགྲོ་བའི་སྡུག་བསྔལ་མང་ལྡན་དེ་དག་གིས། །
འགྲོ་ནང་མཛེས་པ་རྣམ་མང་རྣམ་པར་རོལ་པ་ཡི། །པོ་ཏ་ལ་ཡི་རི་རྩེར་གནས་པ་ཐོབ་པར་ཤོག །འཇིག་རྟེན་དབང་ཕྱུག་གི་བསྟོད་པ་ཡིད་འཕྲོག་སྡིག་འཇོམས་ཞེས་བྱ་བ། ཤར་ཕྱོགས་བ་རེན་ཌའི་སློབ་དཔོན་མཁས་པ་ཆེན་པོ་ཙནྡྲ་གོ་མིས་མཛད་པ་རྫོགས་སོ།།      །།རྒྱ་གར་ཤར་ཕྱོགས་བ་རེན་ཌའི་

73-1-91a

ཛཱ་ག་ཏ་ལའི་པཎྜི་ཏ་ཆེན་པོ་དཱ་ན་ཤཱི་ལས་བསྒྱུར་བ།    ༄༅༅། །རྒྱ་གར་སྐད་དུ། མ་ཧཱ་ཀཱ་རུ་ཎཱི་ཀ་སྟོ་ཏྲ་ཙོ་ད་ནཾ། བོད་སྐད་དུ། ཐུགས་རྗེ་ཆེན་པོ་ལ་བསྟོད་ཅིང་བསྐུལ་བ། བཅོམ་ལྡན་འདས་ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆགས་པས་རྣམ་གཟིགས་
བཅོམ་ལྡན་འདས། །སྤྱན་རས་ཀྱིས་གཟིགས་སྤྱན་ཟུར་བདག་ལ་གཟིགས། །སྤྱན་ཟུར་གཟིགས་པ་ཙམ་གྱིས་འགྲོ་རྣམས་ཀྱི། །སྡུག་བསྔལ་ཉམ་ཐག་ཞི་མཛད་ཁྱོད་ལ་མངའ། །མཐའ་མེད་གཡང་སར་ལྷུང་ནས་ས་འོག་གི། །མུན་ནག་ཐིབས་པོར་གཏན་དུ་འཁྱམས་པ་བདག །ཉམ་ཐག་
ཕོངས་པས་ཐུགས་རྗེ་མཆོག་སྦྱིན་ཅིང་། །ཡོངས་སུ་བསྐྱབ་པའི་དུས་ལ་དི་རིང་བབ། །སྡུག་ཕོངས་གང་གིས་ང་ནི་དྲན་བྱས་ན། །དེ་ཡི་ཉམ་ཐག་ང་ཡིས་བསལ་ལོ་ཞེས། །ཁྱོད་ཀྱིས་ཞལ་བཞེས་མངོན་མཛད་དེང་བདག་གི། །ཉམ་ཐག་བསལ་ཏེ་འབྲས་བུ་མཆིས་པར་མཛད། །མཐོང་དང་
ཐོས་དང་རེག་དང་དྲན་པ་ཡིས། །ནད་གདོན་ཐམས་ཅད་ངས་བསལ་ཞེས་གསུངས་པས། །ནད་ཀྱིས་གདུངས་པའི་འགྲོ་བ་བདག་ཅག་ལའང་། །མཆོག་སྦྱིན་ཉིད་ཀྱིས་ཞལ་བཞེས་མ་བསྙེལ་མཛོད། །འགྲོ་རྣམས་གང་དག་སྡུག་བསྔལ་དེ་དག་གི། །ཉམ་ཐག་ཀུན་ཏུ་བཅད་པར་བྱའོ་ཞེས། །
དགོངས་ནས་མགོན་པོ་གཞན་དུ་རྣམ་རྒྱུ་ན། །བདག་ཅག་སྡུག་བསྔལ་ཁྱོད་ཀྱིས་མ་གཟིགས་སམ། །གང་གིས་ཁྱོད་ཉིད་དྲན་པ་ཙམ་གྱིས་ཀྱང་། །དེ་མོད་ཉམ་ཐག་མ་བསལ་འགའ་མེད་ལ། །བདག་ཀྱང་རྟག་ཏུ་ཉམ་ཐག་གཟིར་བཞིན་དུ། །ཁྱོད་ཀྱི་དྲིན་ཀྱིས་མ་བསྐྱབས་སྐལ་ཆུངས་སོ། །
མཐུ་ལྡན་ཁྱོད་ཀྱི་ཐུགས་རྗེའི་བློ་གྲོས་ཀྱིས། །ལན་ལ་མི་རེ་བཞིན་དུ་ཕན་འདོགས་ལ། །བདག་ཀྱང་ཁྱོད་ལ་སྐྱབས་སུ་མཆི་བཞིན་དུ། །སྡུག་ཕོངས་འདི་འདྲའང་མི་གཟིགས་ཀྱེ་མའོ་བརླག །ཇི་ལྟ་ཇི་ལྟར་ཉོན་མོངས་གྱུར་པ་དང་། །ཇི་ལྟ་ཇི་ལྟར་བརྟེན་མེད་ཕོངས་གྱུར་པ། །དེ་ལྟ་དེ་ལྟར་ཁྱོད་ཀྱི་
ཐུགས་རྗེ་ཡང་། །དེར་ནི་ཕྱི་ཕྱིར་མངོན་པར་འཕེལ་ལོ་སྐད། །སྡིག་ལྡན་བདག་གི་ཉམ་ཐག་སྡུག་བསྔལ་ཡང་། །ཤིན་ཏུ་བརྣག་དཀའ་རྟེན་མེད་སྐྱབས་མེད་བཞིན། །དེ་དག་ལས་བདག་ཐུགས་རྗེས་བཀོལ་མཛད་ན། །ཁྱོད་ཀྱི་ཐུགས་རྗེ་ཕྱོགས་གཅིག་ཅི་རུ་རུང་། །འགྲོ་བ་གང་གིས་

73-1-91b

སྐྱེས་མཆོག་ཁྱོད་དྲན་ན། །དོན་མེད་གྱུར་པ་སྔོན་ཆད་འགའ་མ་མཆིས། །སྡུག་བསྔལ་ཤིན་ཏུ་དྲག་པོས་ཉམ་ཐག་འདིས། །བརླག་ལ་ཁད་ཀྱི་མགོན་ཁྱོད་བདག་ལ་དགོངས། །ཐུགས་རྗེའི་གནས་གྱུར་སྡུག་ཕོངས་མ་ལུས་པ། །ཕོངས་པ་ཐུགས་རྗེ་ཆེན་པོས་འཕྲོགས་མཛད་པ། །ཁྱོད་
ཀྱིས་གལ་ཏེ་བདག་ལ་མ་གཟིགས་ན། །བདག་གི་རྟེན་གཞན་གང་ལགས་གསུང་དུ་གསོལ། །མགོན་པོ་ཁྱོད་ལ་སྐྱབས་སུ་མཆི་དགུ་ལ། །མོད་ལ་སྡུག་བསྔལ་མ་ཞི་འགའ་མ་མཆིས། །བདག་ཀྱང་སྐྱབས་སུ་མཆི་ཡིས་བརྩེ་བ་ཡིས། །སྡུག་བསྔལ་ཉམ་ཐག་འདི་ལས་བསྐྱབ་ཏུ་གསོལ། །
ཁྱོད་ཀྱི་མཚན་ཙམ་གྲག་ལ་བརྟེན་པས་ཀྱང་། །སྡུག་ཕོངས་མ་ལུས་ཞི་བར་འགྱུར་ལགས་ན། །བདག་གིས་འབད་ཀྱང་འབྲས་བུ་མ་མཆིས་པ། །དེ་འདྲའི་ཐུགས་རྗེ་ཅི་ལས་གྱུར་པ་ལགས། །ཁྱོད་ཀྱིས་གྲུབ་བརྙེས་བཞིན་དུ་སེམས་ཅན་རྣམས། །ཡོངས་སུ་བསྐྱབ་ཕྱིར་སྨོན་ལམ་མཛད་
ལགས་ན། །བདག་ཀྱང་སེམས་ཅན་གྲངས་ལས་མ་འདས་པས། །མཆོག་སྦྱིན་བདག་གི་སྡུག་བསྔལ་དབྲོག་ཏུ་གསོལ། །ཉི་མའི་འོད་ཀྱིས་མུན་པའི་ཚོགས་བཅོམ་བཞིན། །ཟླ་གསལ་དྲི་མེད་ཁྱོད་ནི་རབ་བཞུགས་ཀྱང་། །ད་དུང་བདག་ནི་སྡུག་བསྔལ་གྱིས་ནོན་ཅིང་། །སྡིག་པའི་མུན་པས་
ནོན་པ་སྐལ་ཆུངས་སོ། །སྐྱེ་བོ་རྣམས་ཀྱིས་གང་ཞུས་སྐྱོང་མཛད་པ། །དེ་ཉིད་བདག་གིས་ཞུས་བཞིན་མི་གནང་བ། །མཚམས་ལས་ཐར་བར་སྐལ་བ་མེད་དམ་ཅི། །ཤིན་ཏུ་ངན་ནམ་ཅིར་ཐལ་ཡི་རེ་མུག །མགོན་པོ་ཁྱོད་ནི་སེམས་ཅན་ཕན་པའི་ཕྱིར། །ཐུགས་རྗེ་ཆེན་པོ་མ་སྤངས་བཞིན་དུ་ཡང་། །
སྡུག་བསྔལ་བརྣག་དཀའི་རང་བཞིན་གསོལ་འདེབས་ལ། །སྐྱོབ་པ་མདུན་ན་གནས་བཞིན་འོ་དོད་འབོད། །འཇིག་རྟེན་སྐྱེ་བོའི་ཕ་མའང་འདི་ལྟར་དུ། །ཁ་མཆུས་བཏབ་པར་གྱུར་ཀྱང་མི་སྐྱོ་བཞིན། །སེམས་ཅན་ཕན་བརྩོན་ཁྱེད་ལའང་འཁོར་བ་ནས། །འཁོར་བའི་ཚེ་ན་བདག་ནི་སྐྱབས་མཆི་
ཞིང་། །ནག་པོའི་ལས་ཀྱིས་ཉིན་དང་མཚན་དུ་ནི། །མངོན་པར་ཟིལ་གྱིས་ནོན་པར་གྱུར་པ་དང་། །སྡུག་བསྔལ་ཆེར་གདུངས་འདི་ལས་ཐར་བྱའི་ཕྱིར། །ཉིན་རེར་འོ་དོད་འབོད་ཀྱིས་མ་སྐྱོ་སྲུངས། །དེ་ལྟར་བདག་གིས་བོས་ཤིང་སྨྲེ་བ་ཡིས། །ཁྱོད་ཐུགས་ཤིན་ཏུ་ཐུགས་རྗེས་བརླན་གྱུར་པ། །

73-1-92a

དེ་ལྟར་སྐྱེ་བོ་སྡུག་བསྔལ་བརྒྱས་གཟིར་བ། །ཀུན་ལའང་སྲིད་བཅོམ་ཁྱོད་ནི་དགོངས་མཛད་ཅིང་། །ཐུགས་རྗེའི་དབང་གྱུར་ཐུགས་ན་བརྟན་པ་ཡིས། །གཞན་དོན་འབའ་ཞིག་ལྷུར་ལེན་ཡོན་ཏན་ནི། །བླ་མའི་གནས་གྱུར་ཁྱོད་ནི་སྡུག་བསྔལ་ཀུན། །འཕྲོག་པའི་ནུས་མཐུ་ལྡན་
པ་དེ་བཞིན་ཤོག །བདག་གི་སྲིད་པ་མཐར་མཛད་སྤྱན་རས་གཟིགས་དབང་ལ། །བསྟོད་བསྐུལ་འདི་བགྱིས་བསོད་ནམས་ཐོབ་པ་གང་ཡིན་དེས། །བཅོས་མིན་རབ་ཞིའི་བདེ་ལྡན་བདེ་བ་ཅན་དུ་ནི། །འགྲོ་ཀུན་སྡུག་བསྔལ་གཟིར་སྤངས་རབ་ཏུ་ཕྱིན་གྱུར་ཅིག །ཐུགས་རྗེ་ཆེན་པོ་ལ་བསྟོད་
ཅིང་བསྐུལ་བ་ཉེར་བཞི་པ། དགེ་བསྙེན་ཆེན་པོ་ཟླ་བས་མཛད་པ་རྫོགས་སོ།།      །།རྒྱ་གར་གྱི་མཁན་པོ་པར་མེ་ཤྭ་ར་དང་། བོད་ཀྱི་ལོ་ཙཱ་བ་འགོས་ལྷས་བཙས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །།༄༅༅། །རྒྱ་གར་སྐད་དུ། ལོ་ཀེ་ཤྭ་ར་སྟོ་ཏྲ་ནཱ་མ། བོད་སྐད་དུ། 
འཇིག་རྟེན་དབང་ཕྱུག་གི་བསྟོད་པ་ཞེས་བྱ་བ། འཇིག་རྟེན་དབང་ཕྱུག་ལ་ཕྱག་འཚལ་ལོ། །ལྷ་དང་ལྷ་མིན་གྱིས་ནི་ཞབས་བཏུད་ཅིང་། །སྐྱེ་རྒ་ན་དང་འཆི་བ་རབ་བཅོམ་པ། །འཇིག་རྟེན་དབང་བྱེད་བདག་ལ་སྐྱབས་མཛད་ན། །བརྩེ་དང་སྙིང་རྗེ་ལྡན་པ་སྐྱོང་བར་མཛོད། །འཁོར་བའི་རྒྱ་མཚོའི་
དབུས་སུ་ངེས་ལྷུང་བ། །ཉོན་མོངས་དབའ་ཀློང་མཉམ་བཞག་གིས་ནི་བཅོམ། །ཁོ་བོ་བརྟན་པར་ཟུང་ཞེས་ཀུན་དུ་ངུ་། །བརྩེ་བ་ཆེན་པོ་ཁྱེད་ལ་ཕྱག་འཚལ་ལོ། །མིག་ལ་སྲེད་པའི་རབ་རིབ་ཉེ་བར་འཚེ། །ལུས་ནི་འཆི་བས་འཇིགས་པའི་རྣམ་པར་དུ། །ཇི་སྲིད་མནར་མེད་ཉམ་ངར་མ་སོང་བར། །
བཅོམ་ལྡན་ཀུན་ཏུ་གཟིགས་ལ་བདག་ལ་སྐྱོངས། །གཞན་གྱི་བུད་མེད་སུན་པར་བྱས་ཤིང་བཅོམ། །མི་ཤེས་པ་ཡི་སྲོག་ཆགས་སྟོང་ཕྲག་བསད། །མགོན་པོ་བདག་གིས་སྡིག་པ་མ་ལུས་བྱས། །སོ་སོའི་ལུས་ཀྱི་ཉེས་པ་ཉམས་པར་མཛོད། །གང་ཞིག་འཚོ་དང་བཀུར་སྟིའི་ཆེད་རྣམས་སུ། །
འཇིག་རྟེན་པ་རྣམས་མི་འདོད་མི་བདེན་སྨྲས། །མ་ལུས་དམྱལ་བ་གང་གིས་ཡུན་རིང་གོམས། །དེ་རྣམས་འཇིག་རྟེན་དབང་པོས་ཞི་བར་མཛད། །སེམས་ཅན་རྣམས་ལ་མི་ཕན་བསམ་པ་གང་། །རང་དང་གཞན་གྱིས་བྱས་ལའང་ཡི་རང་བ། །དེ་འདིར་བདག་གི་ཡིད་ཀྱི་སྡིག་པ་རྣམས། །བསལ་

73-1-92b

བར་མཛོད་ཅིག་མགོན་པོ་སྨྲེ་སྔགས་འདོན། །ལྷ་དང་མི་དང་ལྷ་མིན་སྐྱེ་བ་རྣམས། །དུད་འགྲོ་དམྱལ་བ་ཡི་དགས་འགྲོ་བ་རྣམས། །སེམས་ཅན་ངེས་གནས་རྟག་པར་ཉམ་ཐག་གང་། །དེ་རྣམས་སྲུང་ཞེས་ཁྱེད་གཏམ་བདག་གིས་ཐོས། །དེས་ན་བདག་ལ་སྙིང་རྗེར་ཀུན་དུ་མཛོད། །ལུས་ཀྱི་ལང་
ཚོ་ངལ་བར་རྟོགས་གྱུར་ན། །ཇི་སྲིད་དམྱལ་བ་ཉིད་དུ་མ་ཞུགས་པར། །དེ་ཕྱིར་བཅོམ་ལྡན་ཁྱེད་ལ་གསོལ་བར་བགྱི། །ཅུང་ཟད་བཏང་སྙོམས་མཛད་པ་གཞན་དོན་ཕྱིར། །བདག་གི་དོན་ཕྱིར་བཅོམ་ལྡན་ཉིད་དམིགས་ན། །ཡང་ན་བརྩེ་བ་བསོད་ནམས་ལ་ལྟོས་སམ། །གང་ལ་ཕོངས་མེད་
མཐོང་བ་བསྐྱེད་པར་གྱིས། །ཉིད་དྲན་པ་ཡིས་ཀུན་ནས་ཡོངས་ཚིམ་ན། །ཉེས་པ་ཟད་པར་མཛོད་ཅིག་བརྩེ་མེད་དམ། །དེ་ཡི་ཕྱིར་ན་བཅོམ་ལྡན་གཞན་ཕན་མཁས། རྣམ་གཡེང་མ་མཛད་ཁོ་བོ་འདིར་ནི་སྲུངས། །གླང་པོ་རྟ་དང་བུ་དང་ཆུང་མ་དང་། །རྒྱལ་སྲིད་ཚེར་མ་མེད་དང་
ཁྱིམ་སྣ་ཚོགས། །ཤ་རུས་མགོ་དང་ཁྲག་གི་མཐར་ཐུག་པར། །དོན་གཉེར་རྣམས་ལ་ཁྱེད་ཀྱིས་མཐའ་ཡས་བྱིན། །མིག་སྨན་རི་ལུ་རྐང་མགྱོགས་གྲུབ་པ་དང་། །གྲུབ་པའི་སྨན་དང་ནོར་བུ་རྣམ་དག་སྔགས། །གྲུབ་པ་གནོད་སྦྱིན་མོ་ནི་གྲོང་ལ་འཇུག །འཇིག་རྟེན་དབང་པོ་གང་གིས་ཉིད་དགྱེས་
པ། །རྐང་ལག་རྣམ་པར་ལྟ་བའི་སྨན་པ་གང་། །སྣ་ཚོགས་འཇིགས་ཆེན་ནད་ཀྱིས་ཞུ་བ་གང་། །ཁྱེད་མཉེས་པ་ལས་དེ་རྣམས་ལུས་རྒྱས་ཤིང་། །ནད་མེད་ཡོན་ཏན་ཟབ་མོའི་རྣམ་རོལ་འགྱུར། །མཁའ་ལྡིང་སྦྲུལ་དང་གཟའ་དང་མཁའ་འགྲོ་མ། །སྦྱོར་བ་པ་རྣམས་རྟག་པར་ཞི་འཐོབ་ཅིང་། །ཁྱེད་
མཉེས་གང་ཡིན་དེ་ཡི་མདུན་དུ་ནི། །གཤིན་རྗེའི་ཕོ་ཉ་མི་འགྲོ་རྒྱལ་བར་འགྱུར། །དེ་ཕྱིར་ལག་པ་སྤྱི་བོར་ཐལ་སྦྱར་ཏེ། །སྤྱི་བརྟོལ་མི་བརྟན་ངག་གིས་ཉིན་རེ་བཞིན། །ངུ་བ་སྐྱབས་མེད་བདག་ནི་མཆི་བ་ལ། །བཅོམ་ལྡན་འཇིག་རྟེན་དབང་ཕྱུག་འདོར་རམ་ཅི། །མི་སྲུན་ཡུལ་ལ་གཡོ་བ་ཡིད་དབང་
པོ། །མི་བརྟན་ལུས་ཀྱིས་སྡིག་པ་མང་བྱས་ཤིང་། །ལྟོ་བའི་ཆེད་དུ་འཁྲུལ་ཞིང་འབྲས་བུ་མེད། །བདག་གི་འདི་ནི་སྐྱེ་བོ་ཐམས་ཅད་ལུགས། །གང་གི་ལུས་ཀྱི་སྡུག་བསྔལ་མ་མྱོང་བར། །ཁྱེད་ཀྱི་མངོན་སུམ་དུ་ནི་བཟང་འགྲོ་བ། །བདག་འདིར་ཐལ་སྦྱར་རབ་བཏུད་བདག་གི་དེ། །འཇིག་

73-1-93a

རྟེན་དབང་ཕྱུག་ད་ལྟ་ཉིད་དུ་མཛད། །རྨོངས་དང་ཞེ་སྡང་རྣམ་པར་ཉམས་པའི་རྒྱུ། །ཁྱོད་ནི་འཁོར་བའི་རྒྱ་མཚོའི་ཟམ་པ་སྟེ། །གཡང་སར་ལྷུང་བ་གྱེན་དུ་འདྲེན་པའི་ཕྱག །ཁྱོད་ནི་ཉེས་ལྕིའི་མཚན་མོའི་སྒྲ་གཅན་ནམ། །བདེ་གཤེགས་བླ་མེད་བསྟན་པ་དེ་ཁོ་ན། །ཁྱོད་ནི་སྡུག་བསྔལ་
མང་པོའི་སེམས་ཅན་སྐྱོང་། །རྒྱལ་དཀའ་ཡིད་དཀྲུགས་བདུད་ལས་ངེས་རྒྱལ་ཞིང་། །ཁྱེད་ནི་སྲིད་པའི་མཚོ་ལས་ཕ་རོལ་བརྒལ། །ནད་ཀུན་མཐའ་ཡས་ངེས་པར་གཅོད་མཛད་ལུས། །ཁྱེད་སྐུ་འགྲོ་བ་ཀུན་ལ་མཆོག་ཏུ་མཛེས། །དཔེ་མེད་ཐུགས་རྗེའི་རྒྱ་མཚོ་བཅོམ་ལྡན་འདས། །ཁྱོད་ནི་
རྒྱུ་མེད་གཉེན་དུ་སྐྱེ་བོས་ཤེས། །བྱེད་པ་རྣམས་བཅོམ་རོལ་པ་རིག་ཅིང་སྒེག །ཁྱོད་ནི་ཡུལ་ལ་ཞེན་པ་ཡོངས་སུ་བོར། །ལྷ་ཡི་བསམ་གཏན་ལ་ནི་སེམས་མཉམ་གཞག །ཁྱོད་ནི་སློང་བ་པོ་ལ་སྙོམས་པའི་ནོར། །ཐུགས་རྗེ་ཅན་ཁྱོད་གཞན་ལ་ཕན་མཛད་ཀྱང་། །ཁོ་བོ་འདིར་ནི་སྲུང་བ་
མི་མཛད་ཅིང་། །གཏི་མུག་ལྟོ་འཕྱེ་ཆེན་པོས་སོས་བཏབ་ལ། །ཡུལ་ལ་རློམ་སེམས་པ་ཡིས་དགེ་ལས་ལྟུང་། །ཁྱེད་ཀྱི་ཐུགས་རྗེ་གང་དེ་མཐའ་ཡས་པའི། །སྐྱེ་བོ་ཀུན་ལ་འཕྲོ་ན་གང་གི་ཕྱིར། །སྡིག་ལྡན་བདག་ལ་སྲུང་བ་མི་མཛད་པ། །ངེས་པ་ལགས་སམ་མདུན་ནས་ངུད་མོ་འབྱིན། །མགོན་
པོ་ཁྱེད་ཀྱི་བརྩེ་བ་མཁའ་ཡངས་སུ། །སེམས་ཅན་རྣམས་ལ་ཆུ་འཛིན་སྤྲིན་ཇི་ལྟར། །སྐམ་པ་ཆུ་དང་མཐོ་དམན་ཡུལ་མང་པོར། །མ་ལུས་རྒྱུན་ཏུ་རྒྱུན་མི་འཆད་པར་འབབ། །དེ་ལྟར་བཅོམ་ལྡན་དྲན་པས་བསོད་ནམས་གང་། །དེས་ནི་ཁོ་བོས་འགྲོ་བ་སྐྱོ་མེད་འདིར། །པོ་ཏ་ལ་ཀེ་གཡོ་བ་མེད་པའི་
གནས། །རྣམ་རོལ་སྣ་ཚོགས་མཛེས་པར་སྐྱེ་བར་གྱུར། །ཞེས་པ་འདི་འཕགས་པ་སྤྱན་རས་གཟིགས་དབང་ཕྱུག་གི་ཞབས་ལ། ཙརྱ་དཱི་པ་ཞབས་ཀྱིས་བསྟོད་པ་རྫོགས་སོ།།      །།སྒྲ་མཁན་ཆེན་པོ་རྒྱལ་བའི་སྙན་གྱི་ཞལ་སྔ་ནས། ལོ་ཙཱ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་
བཟང་པོས་བསྒྱུར་བའོ།།      །།༄༅༅། །རྒྱ་གར་སྐད་དུ། ཨཱརྱ་ཨ་མོ་གྷ་པཱ་ཤ་པཉྩ་དེ་བ་སྟོ་ཏྲ། བོད་སྐད་དུ། འཕགས་པ་དོན་ཡོད་ཞགས་པ་ལྷ་ལྔའི་བསྟོད་པ། འཕགས་པ་དོན་ཡོད་ཞགས་པ་ལྷ་ལྔ་ལ་ཕྱག་འཚལ་ལོ། །སེམས་ཅན་སྡུག་བསྔལ་མེ་ཚོགས་ཀྱིས་

73-1-93b

གདུངས་ལ། །ཐུགས་རྗེའི་ཆར་རྒྱུན་བསིལ་བས་ཞི་མཛད་ཅིང་། །རང་བཞིན་བདེ་ལྡན་གནས་སུ་འདྲེན་མཛད་པ། །མགོན་པོ་སྤྱན་རས་གཟིགས་ལ་ཕྱག་འཚལ་ལོ། །ཐུགས་རྗེ་ཆེན་པོའི་ཞགས་པས་འགྲོ་ཀུན་གྱི། །གནོད་པ་ངེས་སེལ་བདེ་ལ་འགོད་མཛད་ཅིང་། །སྣ་ཚོགས་སྤྲུལ་
པས་འགྲོ་བའི་དོན་མཛད་པ། །དོན་ཡོད་ཞགས་པར་གྲགས་ལ་ཕྱག་འཚལ་ལོ། །མ་ཆགས་པདྨའི་རིགས་ཀྱི་སྤྲུལ་པ་སྟེ། །ཀླུ་རྒྱལ་ཚུལ་གྱིས་གདུག་པ་འདུལ་མཛད་པ། །དབང་ཆེན་བསྐལ་པའི་མེ་ལྟར་རབ་བརྗིད་འབར། །ཁྲོ་རྒྱལ་རྟ་མགྲིན་རྒྱལ་ལ་ཕྱག་འཚལ་ལོ། །ཆོས་ཉིད་
སྤྲོས་བྲལ་རོ་གཅིག་མངོན་གྱུར་ཚུལ། །རལ་པ་གཅིག་འཆང་ལྷ་མོའི་སྐུར་སྟོན་ཅིང་། །བགེགས་ཚོགས་འདུལ་ཕྱིར་ཁྲོ་མོའི་ཆ་ལུགས་འཛིན། །རལ་པ་གཅིག་མ་ཁྱེད་ལ་ཕྱག་འཚལ་ལོ། །དུས་གསུམ་རྒྱལ་བའི་ཡོན་ཏན་གཞིར་གྱུར་ཅིང་། །སྐལ་ལྡན་རྗེས་མཐུན་འགྲོ་དོན་མཛད་ལ་
བརྩོན། །མགོན་པོའི་ཕྲིན་ལས་མ་ལུས་རྫོགས་མཛད་མ། །ལྷ་མོ་ཁྲོ་གཉེར་ཅན་ལ་ཕྱག་འཚལ་ལོ། །འཕགས་པ་དོན་ཡོད་ཞགས་པ་ལྷ་ལྔའི་བསྟོད་པ། པཎྜི་ཏ་ཆེན་པོ་ཨེ་ར་པ་ཏིས་མཛད་པ་རྫོགས་སོ།།      །།རྒྱ་གར་གྱི་པཎྜི་ཏ་དོན་ཡོད་རྡོ་རྗེ་དང་། ལོ་ཙཱ་བ་བ་རི་རིན་ཆེན་གྲགས་
པས་བསྒྱུར་བའོ།།      །།༄༅༅། །རྒྱ་གར་སྐད་དུ། ཨཱརྱཱ་བ་ལོ་ཀི་ཏེ་ཤྭ་ར་སྱ་ཙརྤྤ་ཊི་རུ་ཙི་ཏ་སྟོ་ཏྲཾ། བོད་སྐད་དུ། འཕགས་པ་སྤྱན་རས་གཟིགས་དབང་ཕྱུག་ལ་ཙརྤྤ་ཊིས་བསྟོད་པ། འཇིག་རྟེན་མགོན་པོ་ལ་ཕྱག་འཚལ་ལོ། །ལྷ་མི་ལྷ་མིན་གྱིས་ནི་ཞབས་ལ་བཏུད། །སྐྱེ་རྒ་ན་
དང་འཆི་བ་རབ་ཏུ་བཅོམ། །ཐུགས་རྗེའི་ངང་ཅན་འཇིག་རྟེན་དབང་པོ་ཁྱེད། །སྐྱབས་མེད་བདག་ལ་སྙིང་རྗེ་མཛོད་ཅིག་ཀྱེ། །ཉོན་མོངས་རླབས་ཆེན་ཚོགས་ཀྱིས་འཇོམས་བྱེད་ཅིང་། །སྣ་ཚོགས་སྒྲ་སྒྲོགས་འཁོར་བའི་ཆུ་གཏེར་དབུས། །བྱིང་བ་བདག་ནི་ཟུང་ལ་བསྲུང་བར་མཛོད། །བརྩེ་བ་
ཆེན་པོ་ཁྱེད་ལ་བསྟོད་པར་བགྱིད། །སྲིད་པའི་མུན་པས་མིག་ལ་ཉེར་འཚེ་ཞིང་། །འཆི་བའི་འཇིགས་པ་ཆེན་པོས་ལུས་ཉམ་ཆུང་། །ཇི་སྲིད་མནར་མེད་མི་མཉམ་འགྲོ་མིན་པར། །བསྲུང་ལ་བཅོམ་ལྡན་བདག་ལ་ཀུན་ཏུ་གཟིགས། །རྟག་ཏུ་གཞན་གྱི་བུད་མེད་གཟུང་བ་བྱས། །མི་ཤེས་པ་ཡིས་སྲོག་

73-1-94a

ཆགས་སྟོང་ཕྲག་བསང་། །བདག་གི་སྡིག་བྱས་དེང་དུ་མགོན་པོ་ཡིས། །ལུས་ཅན་སྐྱོན་རྣམས་མ་ལུས་ཉམས་པར་མཛོད། །གང་ཞིག་འཚོ་བ་དང་ནི་བཀུར་སྟིའི་ཕྱིར། །བདེན་མིན་འཇིག་རྟེན་འདོད་པ་མིན་པ་སྨྲས། །དམྱལ་བ་ཡུན་དུ་གོམས་པའི་སྨྲ་བ་ཅན། །དེ་ཀུན་
འཇིག་རྟེན་དབང་པོས་ཞི་བར་མཛོད། །བདག་གིས་སེམས་ཅན་ཕན་མིན་གང་བསམས་དང་། །གཞན་གྱིས་བྱ་ལའང་རྗེས་སུ་ཡི་རང་བ། །མགོན་པོ་དེ་ལ་དུ་བར་བགྱིད་པ་ན། །དེང་བདག་ཡིད་ཀྱི་སྡིག་པ་བསལ་དུ་གསོལ། །ལྷ་དང་མི་དང་ལྷ་མིན་རིས་རྣམས་དང་། །དུད་འགྲོ་ཡི་
དྭགས་དམྱལ་བར་འགྲོ་བ་ནི། །གནས་ཤིང་རྟག་ཏུ་གདུང་བའི་སེམས་ཅན་གང་། །ཁྱོད་ནི་དེ་རྣམས་བསྲུང་ཞེས་བདག་ལ་གྲགས། །དེ་ཕྱིར་གཞོན་ནུ་ཉིད་སོང་ལུས་ལ་ནི། །ཐུགས་རྗེའི་གཟིགས་པ་བདག་གི་སྟེང་སྤྲོས་ཞེས། །དམྱལ་བར་ཞུགས་པ་མིན་པ་ཇི་སྲིད་དུ། །སྨྲ་བར་བགྱིད་
ཡིས་བཅོམ་ལྡན་ཁྱེད་ཀྱིས་གསོན། །འོན་ཀྱང་གཞན་གྱི་དོན་ལ་བཏང་སྙོམས་པ། །དོར་ཞིག་བཅོམ་ལྡན་བདག་དོན་མ་མཛད་དོ། །ཡང་ན་བརྩེ་བའི་དབང་གྱུར་ཁྱོད་ཀྱིས་ནི། །བསོད་ནམས་བསྐྱེད་མཛོད་རྒུད་པ་མ་གཟིགས་སམ། །དྲན་པས་ཀྱང་ནི་ཁྱོད་ནི་ཡོངས་ཚིམ་ན། །སྡིག་པ་དོར་
བར་མཛོད་ཅིག་མ་གཟིགས་སམ། །དེ་སླད་བཅོམ་ལྡན་གཞན་ཕན་ལ་མཁས་པ། །བདག་ནི་འདོར་བར་མ་མཛད་འདི་རུ་སྲུངས། །གླང་ཆེན་རྟ་དང་བུར་བཅས་ཆུང་མ་དང་། །དམག་བཅས་རྒྱལ་སྲིད་ཁང་པ་སྣ་ཚོགས་དང་། །ཤ་རུས་མགོ་དང་ཁྲག་གི་མཐར་ཐུག་པ། །དོན་དུ་གཉེར་ལ་མཐའ་
དག་ཁྱོད་ཀྱིས་བྱིན། །སུ་ཞིག་འཇིག་རྟེན་དབང་པོ་ཁྱོད་མཉེས་བྱེད། །རི་ལུ་མིག་སྨན་མཆིལ་ལྷམ་གྲུབ་པ་དང་། །གྲུབ་པའི་སྨན་དང་ནོར་བུ་རྣམ་དག་སྔགས། །གནོད་སྦྱིན་མོ་དང་གྲོང་འཇུག་སྒྲུབ་པར་བྱེད། །གང་དག་མིག་དང་རྐང་ལག་སྨྲས་པ་ཡི། །སྣ་ཚོགས་ནད་ཀྱིས་འཇིག་རྟེན་
ཉམ་ཐག་པ། །ཁྱོད་མཉེས་ན་ནི་དེ་རྣམས་ཡོངས་རྒྱས་ལས། །རྣམ་སྒེག་ནད་མེད་ཡོན་ཏན་ཟབ་མོར་འགྱུར། །ཁྱོད་དགྱེས་གང་ལགས་རྒྱལ་འགྱུར་ག་རུ་ཌ། །གཅན་གཟན་གཟའ་དང་མཁའ་འགྲོ་རྣལ་འབྱོར་མ། །རྟག་ཏུ་ཞི་འགྱུར་དེ་ཡི་མདུན་དུ་ནི། །གཤིན་རྗེའི་ཕོ་ཉ་རྒྱུ་བར་མི་བྱེད་

73-1-94b

དོ། །འཇིག་རྟེན་དབང་ཕྱུག་དགྱེས་བཞིན་སྐྱབས་མེད་བདག །འདོར་བ་ཅི་ཞེས་བཅོམ་ལྡན་བདག་སྨྲེ་སྟེ། །ཉི་མ་སོ་སོར་ལག་པ་བསྒྲེང་བྱས་ནས། །ཚིག་འཁྲུགས་པ་ཡི་སྐྲག་པ་ཞི་བར་མཛོད། །འཁྲུགས་པའི་ལུས་ཀྱིས་སོང་བའི་སྐྱེ་བར་བདག །ཡུལ་དྲུག་ལ་ནི་དབང་པོ་གཡོ་བའི་ཡིད། །
སྡིག་པ་མང་བྱས་འདིར་ནི་མ་ལུས་པ། །དབྲེས་པའི་རྒྱུ་ཡིས་འཁོར་ཞིང་རྣམ་པར་འཛིངས། །གང་གིས་ངན་སོང་སྡུག་བསྔལ་མ་མྱོང་བར། །བདེ་འགྲོར་མངོན་སུམ་འགྲོ་དེ་ཁྱེད་ཀྱིས་མཛོད། །དེང་བདག་འཇིག་རྟེན་དབང་ལ་ཕྱག་དང་ཞིང་། །སྣ་ཚོགས་ཐལ་སྦྱར་འདི་ནི་ཕྱག་གིའོ། །ཁྱོད་ནི་རྨོངས་
དང་སྡང་བ་འཇིག་པའི་རྒྱུ། །འཁོར་བའི་ཆུ་གཏེར་ཆེན་པོའི་ཟམ་པ་ལགས། །ལྟུང་ཞིང་སྐྲག་པ་སློང་བའི་དཔུང་པ་ཁྱོད། །སྡིག་ལྕི་མཚན་མོར་བྱེད་པའི་སྒྲ་གཅན་ནོ། །བླ་མེད་བདེ་གཤེགས་ཀྱིས་གསུངས་དེ་ཉིད་ཀྱིས། །ཁྱོད་ཀྱིས་སེམས་ཅན་སྡུག་བསྔལ་མང་པོ་བསྐྱང་། །རྒྱལ་དཀའ་ཡིད་
སྲུབས་བདུད་ལས་ཁྱོད་རྒྱལ་ཏེ། །ཀུན་ཏུ་གྲོལ་བ་སྲིད་མཚོའི་ཕ་རོལ་ལོ། །ནད་ཀུན་གཅོད་པར་མཛད་པ་ཁྱོད་ཀྱི་སྐུ། །མ་ལུས་འགྲོ་བར་མཆོག་ཏུ་ལུས་མཛེས་པ། །བཅོམ་ལྡན་དཔེ་མེད་སྙིང་རྗེའི་སིན་དྷུ་ཁྱོད། །རྒྱུ་མེད་གཉེན་དུ་སྐྱེ་བོ་རྣམས་ལ་གྲགས། །རོལ་པས་དབང་པོ་འཇོམས་ཤིང་རྣམ་པར་
བྱེད། །ཁྱོད་ནི་ཡུལ་ལ་ཀུན་ནས་ཆགས་པ་འདོར། །ལྷ་ཡི་བསམ་གཏན་མཉམ་བཞག་ཁྱོད་ཀྱི་ཐུགས། །ནོར་ནི་སློང་བ་པོ་དང་ཐུན་མོང་ལགས། །བརྩེ་ལྡན་ཁྱོད་ནི་གཞན་ལ་ཕན་མཛད་ཀྱང་། །གཏི་མུག་ལྟོ་འཕྱེ་ཆེན་པོས་སོས་ཟིན་ཅིང་། །ཡུལ་ལ་ཀུན་རྟོག་དགེ་བ་ལས་ལྟུང་བ། །བདག་ནི་
ཚིམ་པར་མི་མཛད་ཅི་ལྟར་ལགས། །མཐའ་དག་འགྲོ་བའི་དོན་བསྟེན་སྙིང་རྗེ་གང་། །ཁྱོད་ཀྱིས་སྤྲོས་དེ་ངེས་པ་ལགས་སམ་ཅི། །ཁྱོད་ཀྱི་སྤྱན་སྔར་སྣ་ཚོགས་སྒྲ་སྒྲོགས་པའི། །སྡིག་ལྡན་བདག་ལ་གང་ལས་བསྲུང་མི་མཛད། །མགོན་ཁྱོད་སྙིང་རྗེ་ནམ་མཁའ་ལས་ཡངས་ཏེ། །སེམས་ཅན་
རྣམས་ལ་ཆུ་འཛིན་ཆུ་རྒྱུན་ལྟར། །མྱ་ངན་ཆུ་དང་མཐོ་དམའི་ཡུལ་ཀུན་ཏུ། །མ་ལུས་ཉིན་མཚན་བར་མེད་འབབ་པར་འགྱུར། །བཅོམ་ལྡན་དག་ལས་བདག་གིས་བསོད་ནམས་གང་། །དེ་ནི་འགོ་འདིས་བདེ་བླག་ཐོབ་གྱུར་ཏེ། །དཔལ་ལྡན་པོ་ཏ་ལ་ཡི་རི་བོར་གནས། །མཛེས་ཞིང་སྣ་

73-1-95a

ཚོགས་རོལ་པས་སྐྱེ་བར་ཤོག །འཕགས་པ་འཇིག་རྟེན་དབང་ཕྱུག་གི་བསྟོད་པ་གྲུབ་ཐོབ་ཆེན་པོ་ཙརྤྤ་ཊིས་མཛད་པ་རྫོགས་སོ།།      །།རྒྱ་གར་ཤར་ཕྱོགས་ཀྱི་པཎྜི་ཏ་ཆེན་པོ་ནགས་ཀྱི་རིན་ཆེན་གྱི་ཞལ་སྔ་ནས་དང་། ལོ་ཙཱ་བ་འགོས་གཞོན་ནུ་དཔལ་གྱིས་བསྒྱུར་
བའོ།།      །།༄༅༅། །རྒྱ་གར་སྐད་དུ། ཤྲཱི་ཁཪྶ་པཱ་ཎ་ལོ་ཀ་ནཱ་ཐ་སཱ་དྷ་ན་ནཱ་མ། བོད་སྐད་དུ། དཔལ་འཇིག་རྟེན་མགོན་པོ་མཁའ་ལ་སྤྱོད་པའི་སྒྲུབ་ཐབས་ཞེས་བྱ་བ། འཇིག་རྟེན་མགོན་པོ་ལ་ཕྱག་འཚལ་ལོ། །དཔལ་ལྡན་མངོན་འདོད་འབྲས་བུ་སྟེར་བའི་གཟི་ལྡན་དཔག་བསམ་རྐང་
འཐུང་ནི། །བདེ་བར་གཤེགས་རྣམས་བཞེད་པའི་དོན་ཆེན་བཟོད་མཛད་དེད་དཔོན་ཆེན་པོ་སྟེ། །སྲིད་དང་ཞི་བ་མཉམ་པའི་དངོས་གྱུར་དངོས་པོ་ཀུན་གྱི་ངོ་བོ་ཉིད། །ཕྱག་ན་པདྨ་དེ་ཡིས་འགྲོ་བའི་སྡིག་པ་ཞི་བར་མཛད་དུ་གསོལ། །སྐྱེ་བོས་དབེན་པའི་གནས་དག་ཏུ། །སྔར་ལངས་ཁ་གདོང་དག་བྱས་
ནས། །འཇམ་པའི་སྟན་ལ་ཡང་དག་གནས། །སྙིང་གར་ཟླ་རྒྱས་འོད་གསལ་བའི། །སྟེང་དུ་རང་གི་ས་བོན་བསམ། །སྙིང་གའི་ཟླ་འོད་ཀྱིས་ས་བོན། །ཡོངས་བསྐུལ་དེ་ཡི་ས་བོན་གྱིས། །ཁཪྶ་པཱ་ཎ་མགོན་དཔལ་ལྡན། །བླ་མ་སངས་རྒྱས་དེ་སྲས་མཆོག །མདུན་གྱི་ནམ་མཁར་སྤྱན་དྲངས་ལ། །
ས་བོན་དེ་དག་ལས་བྱུང་བའི། །སྣ་ཚོགས་མཆོད་པའི་སྤྲིན་གྱིས་མཆོད། །དེ་ནས་མངོན་པར་ཕྱག་བྱས་ནས། །སྡིག་པ་བཤགས་པ་ལ་སོགས་བྱ། །ཐོག་མེད་འཁོར་བར་གང་ཞིག་རྣམ་འཁོར་ཚེ། །བདག་གིས་མི་དགེ་བགྱིས་དང་བགྱིད་སྩལ་བའམ། །གཞན་གྱིས་བགྱིས་ལ་རྗེས་སུ་ཡི་རང་བ། །ཐམས་ཅད་
བཅོམ་ལྡན་རྣམས་ཀྱི་སྤྱན་སྔར་བཤགས། །རྫོགས་སངས་རྒྱས་དང་རྒྱལ་སྲས་འཕགས་རྣམས་དང་། །གཞན་དག་གིས་ཀྱང་དགེ་བ་གང་བགྱིས་ལ། །རྗེས་སུ་ཡི་རང་དེ་དག་མ་ལུས་པ། །རྫོགས་པའི་བྱང་ཆུབ་ཏུ་ནི་ཡོངས་སུ་བསྔོ། །སྙིང་རྗེ་དམ་པ་ལས་འཁྲུངས་པའི། །སངས་རྒྱས་རྣམས་ལ་
སྐྱབས་སུ་མཆི། །ཆོས་ཀུན་རོ་གཅིག་རང་བཞིན་ཅན། །གོས་པ་མེད་པའི་ཆོས་དག་དང་། །རབ་དགའ་ལ་སོགས་སར་བཞུགས་པའི། །བྱང་སེམས་རྣམས་ལའང་དེ་བཞིན་ནོ། །སངས་རྒྱས་མྱ་ངན་འདའ་བཞེད་གྱུར་པ་རྣམས། །གཞན་ལ་ཕན་ཕྱིར་ཡུན་དུ་བཞུགས་པར་གསོལ། །སྒྲིབ་པ་ཐམས་

73-1-95b

ཅད་དཔྱིས་འབྱིན་གྱུར་པ་ཡི། །རྒྱུར་གྱུར་བྱང་ཆུབ་སེམས་ནི་བསྐྱེད་བགྱི་ཞིང་། །བདེ་གཤེགས་རྣམ་དག་ལམ་གྱི་དགོངས་པ་དང་། །རྟག་པར་ཡང་དག་ཀུན་ནས་བསྟེན་པར་བགྱི། །དེ་ནས་རྒྱུ་དང་མི་རྒྱུའི་འགྲོ་བ་འདི་དག་ཀུན། །གཅིག་དང་དུ་མ་རྣམ་བྲལ་སྟོང་པ་ཉིད་དུ་རྣམ་བསམ་བྱ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་
སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བས་སྟོང་པ་ཉིད་ལྷག་པར་གནས་པར་བྱའོ། །ཆོས་འདི་དག་ཐམས་ཅད་ནི་རང་བཞིན་གྱིས་ཡོངས་སུ་དག་པའོ་ཞེས་ལྷག་པར་གནས་པ་དེ་ལྟར་བདག་ཉིད་ལའང་ཀུན་དུ་བལྟས་ནས། ཨོཾ་སྭ་བྷཱ་ཝ་ཤུདྡྷཱཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཞེས་བརྗོད་པར་བྱའོ། །དེ་
ནས་སྒོམ་པ་པོས་སྔོན་གྱི་སྨོན་ལམ་གྱིས་ཡང་དག་པར་བསྐུལ་བའི་རྣམ་པར་ཤེས་པ་ཙམ་གྱི་བ་ཡིག་ཡོངས་སུ་གྱུར་པ་ལས་ཁ་དོག་སྣ་ཚོགས་པའི་པདྨར། ཨ་ཡིག་ལས་སྐྱེས་པའི་དྲི་མ་མེད་པའི་ཟླ་བའི་དཀྱིལ་འཁོར་ཡོངས་སུ་རྫོགས་པ། དེའི་སྟེང་དུ་ཧྲཱིཿཡིག་འཕྲོས་པའི་འོད་ཟེར་གྱིས་ནམ་
མཁའི་ཁྱོན་ཀུན་ཡང་དག་པར་གསལ་བ་བསམ་པར་བྱ་ཞིང་། དེ་ཡོངས་སུ་གྱུར་པ་ལས་པདྨའི་སྙིང་པོར་རང་གི་ས་བོན་འོད་ཟེར་གྱི་ཕྲེང་བས་བརྒྱན་པ་བལྟ་བར་བྱའོ། །དེ་ནས་འདི་དག་ཡོངས་སུ་གྱུར་པ་ལས་བདག་ཉིད་བཅོམ་ལྡན་འདས་སུ་བསམ་པར་བྱ་སྟེ། ཟླ་བའི་དཀྱིལ་འཁོར་གྱི་འོད་ལྟར་
དཀར་བའི་སྐུ་ཅན། རལ་པ་བཅིངས་པ་ལ་དབུ་རྒྱན་དང་། སྤྱི་གཙུག་ཏུ་འོད་དཔག་མེད་བཀོད་པ། སྣ་ཚོགས་པདྨ་དང་ཟླ་བ་ལ་སྐྱིལ་ཀྲུང་ཕྱེད་པས་བཞུགས་པ། སྐུ་ལ་མཆོག་གི་རྒྱན་དང་ལྡན་ཞིང་། ཞལ་འཛུམ་པ། བརྒྱད་གཉིས་ལོན་པའི་ལང་ཚོ་ཅན། ཕྱག་གཡས་མཆོག་སྦྱིན་དང་
གཡོན་པ་སྡོང་བུ་དང་བཅས་པའི་པདྨ་འཛིན་པ། དེའི་འོག་ཏུ་མདོག་ལྷག་པར་ནག་པའི་ཡི་དགས་གདོང་པ་གྱེན་དུ་ཕྱོགས་ཤིང་ཁ་གདངས་པ། གྲེ་བ་ཁབ་ཀྱི་མིག་ཅན། གསུས་པ་ཆེ་བ། ཤིན་ཏུ་རིང་པ་རྣམས་ཕྱག་ནས་བདུད་རྩིའི་རྒྱུན་སིམ་པར་འབབ་པ་མཐོང་བས་ཚིམ་པར་མཛད་པ། སྙིང་
རྗེས་བརླན་པའི་དཔལ་དང་ལྡན་ཞིང་གྲུ་འཛིན་གྱི་རི་བོའི་སྤོ་ལ་བཞུགས་པ། ལྷག་པར་ཞི་བས་རྣམ་པར་གཟིགས་པ་ཅན། སྒེག་པའི་ཉམས་དང་ལྡན་པ། སྣ་ཚོགས་པའི་མཚན་རྣམས་ཀྱིས་བརྒྱན་པའོ། །དེའི་མདུན་དུ་སྒྲོལ་མ་དང་། གཡས་ལོགས་སུ་གཞོན་ནུ་ནོར་བཟངས་སོ། །དེ་ལ་སྒྲོལ་མ་

73-1-96a

ལྗང་གུ་ཕྱག་གཡོན་པས་སྡོང་བུ་དང་བཅས་པའི་ཨུཏྤལ་འཛིན་ཅིང་། གཡས་པས་ཁ་འབྱེད་པའི་ཚུལ་ཅན། སྣ་ཚོགས་པའི་རྒྱན་དང་ལྡན་པ། ལང་ཚོ་གཞོན་ཞིང་ནུ་འབུར་རྒྱས་པའོ། །གཞོན་ནུ་ནོར་བཟངས་གསེར་གྱི་མདོག་ཅན། ཐལ་མོ་སྦྱར་བ། གཞོན་ནུའི་གཟུགས་འཆང་ཞིང་། 
མཆན་ཁུང་གཡོན་དུ་གླེགས་བམ་བཅུག་པ། རྒྱན་ཐམས་ཅད་དང་ལྡན་པའོ། །རྒྱབ་ཏུ་ཁྲོ་གཉེར་ཅན་དང་། གཡོན་དུ་རྟ་མགྲིན་ཏེ། དེ་ལ་ཁྲོ་གཉེར་ཅན་སེར་མོ། །ཕྱག་བཞི་མ། རལ་པའི་ཆ་ཤས་རྫོགས་པ། གཡོན་པས་དབྱུ་གུ་གསུམ་པ་དང་། སྤྱི་བླུགས། གཡས་པས་ཕྱག་འཚལ་བའི་
ཚུལ་དང་། བགྲང་ཕྲེང་འཛིན་པ། སྤྱན་གསུམ་དང་ལྡན་པའོ། །རྟ་མགྲིན་མདོག་དམར་པོ་ཐུང་ཞིང་གསུས་པ་འཕྱང་བ། སྐྲ་དམར་སེར་གྱེན་དུ་འབར་བ། སྦྲུལ་གྱི་མཆོད་ཕྱིར་ཐོགས་དང་ལྡན་པ། བཞིན་གྱི་དཀྱིལ་འཁོར་ལ་སྨ་ར་དམར་སེར་གྱིས་སྦས་པ། སྤྱན་གསུམ་དམར་ཞིང་ཟླུམ་པ། ཁྲོ་
གཉེར་དང་སྨིན་མ་འཁྱུག་པ། སྟག་གི་པགས་པའི་ཤམ་ཐབས་འཕྱང་བ། གཡོན་པས་དབྱུག་པའི་མཚོན་ཆ་དང་། གཡས་པས་ཕྱག་འཚལ་བའི་ཚུལ་ཅན་ཏེ། འདི་དག་ཐམས་ཅད་རང་གི་གཙོ་བོ་ལ་ཇི་ལྟར་མཛེས་པའི་མིག་དག་གིས་བལྟ་ཞིང་འདུག་པ་རྣམ་པར་བསམ་པར་བྱའོ། །དེ་ནས་
རང་གི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿཡིག་བསམས་ལ། དེ་ལས་རྣམ་པ་སྣ་ཚོགས་པའི་འོད་ཟེར་འཕྲོས་པས། ཁམས་གསུམ་པོ་ཡོངས་སུ་གང་ཞིང་སེམས་ཅན་ཐམས་ཅད་འཇིག་རྟེན་དབང་ཕྱུག་གི་གོ་འཕང་ལ་རབ་ཏུ་བཀོད་ནས། སླར་ཡང་འོད་ཟེར་དེ། ས་བོན་གྱི་ཡི་གེ་དེ་
ལ་གཞུག་པར་བྱའོ། །ཕྱི་ནས་འོད་ཟེར་དེ་ཉིད་ཀྱིས་ཡེ་ཤེས་སེམས་དཔའ་སྤྱན་དྲངས་ཏེ། དམ་ཚིག་སེམས་དཔའ་དང་ཆུ་དང་འོ་མ་འདྲེས་པ་ལྟར་གཅིག་ཏུ་གྱུར་པའི་སྐུར་བསམ་པར་བྱའོ། །དེ་ནས་ལུས་ངག་ཡིད་གསུམ་རྣམ་པར་དག་པར་བྱ་སྟེ། རིམ་པ་ཇི་ལྟ་བར་སྤྱི་བོར་ཨོཾ་ཡིག་དཀར་པོ་དང་། 
མགྲིན་པར་ཨཱཿཡིག་དམར་པོ་དང་། ཐུགས་ཀར་ཧཱུཾ་ཡིག་སྔོན་པོ་རྣམས་བསམས་ལ། འདི་རྣམས་ལས་མཐའ་ཡས་པའི་འོད་ཟེར་གྱི་དྲ་བ་རྟག་ཏུ་འཕྲོས་པས། སེམས་ཅན་གྱི་ཕུང་པོ་ཐམས་ཅད་ཀྱི་སྡིག་པའི་ཚོགས་གཞོམ་པར་བྱའོ་ཞེས་ནུས་པ་ཇི་ལྟ་བས་གསལ་བ་བསྒོམ་པར་བྱའོ། །

73-1-96b

རྣལ་འབྱོར་བརྩོན་ལྡན་སྒོམ་པ་པོ། །སྒྲིབ་པ་རབ་སྤོང་ཤེས་རབ་དང་། །སྐལ་བཟང་ནད་མེད་ཕུན་སུམ་ཚོགས། །མངོན་དུ་བྱེད་པ་འཐོབ་པར་འགྱུར། །བསྒོམས་པས་དུབ་ན་སེམས་རྩེ་གཅིག་པས་བཟླས་པ་བྱ་སྟེ། དེ་ལ་སྔགས་ནི་འདིའོ། །ཨོཾ་ཧྲཱིཿསྭཱ་ཧཱ། འདི་རྣམས་སྟོན་ཀའི་རྒྱུ་སྐར་དྲི་མ་མེད་
པའི་ཕྲེང་བ་ལྟ་བུའི་ཁ་དོག་དང་འོད་ཀྱི་སྣང་བ་ཅན་ལས། འོད་ཟེར་དུ་མ་འཕྲོ་བས་བཟླས་པར་བྱའོ། །དུབ་པར་གྱུར་ན་བསོད་ནམས་ཡོངས་སུ་བསྔོ་ཞིང་། ལངས་པ་ཇི་ལྟར་བདེ་བར་ལྷའི་ང་རྒྱལ་གྱིས་གནས་པར་བྱའོ། །དཔལ་ལྡན་འཇིག་རྟེན་དབང་ཕྱུག་གི། །ཡིད་འོང་སྒྲུབ་ཐབས་བགྱིས་
པ་ཡིས། །བདག་གིས་བསོད་ནམས་གང་ཐོབ་དེས། །འགྲོ་ཀུན་དེ་ཡི་གོ་འཕང་གྱུར། །དཔལ་ལྡན་འཇིག་རྟེན་མགོན་པོ་ཁཪྶ་པཱ་ཎའི་སྒྲུབ་ཐབས་ཞེས་བྱ་བ་གྲུབ་ཆེན་པདྨ་འབྱུང་གནས་ཞབས་ཀྱིས་མཛད་པ་རྫོགས་སོ།།      །།རྒྱ་གར་ཤར་ཕྱོགས་ཀྱི་པཎྜི་ཏ་ཆེན་པོ་ཤྲཱི་བ་ན་རཏྣའི་ཞལ་སྔ་ནས་
དང་། ཆོས་འཁོར་ལོ་ཙཱ་བས་བསྒྱུར་བ་ལས། སླད་ཀྱིས་བཙུན་པ་རྒྱ་མཚོས་དག་པར་བཅོས་ཤིང་གཏན་ལ་ཕབ་པའོ།།      །།༄༅༅། །རྒྱ་གར་སྐད་དུ། ལོ་ཀེ་ཤྭ་ར་ཤ་ཏ་ཀ་སྟོ་ཏྲ། བོད་སྐད་དུ། འཇིག་རྟེན་དབང་ཕྱུག་གི་བསྟོད་པ་བརྒྱ་པ། འཇིག་རྟེན་མགོན་པོ་ལ་ཕྱག་འཚལ་ལོ། །
མཐོ་རིས་མགོན་པོའི་ཡན་ལག་མཆོག་བཏུད་ཅོད་པན་འཛིན་ལ་འོད་དང་ལྡན་པའི་ནོར་བུ་ལྟ་བུའི་འོད། །མཚོ་སྐྱེས་སྟན་ལྡན་གུས་པས་རབ་བཏུད་མགོ་བོ་ལ་ནི་ཛཱ་ཏིའི་མེ་ཏོག་རྒྱས་ཕྲེང་འོད་ལྟར་ཏེ། །བདེ་འབྱུང་དབུ་ཡི་དབུ་རྒྱན་རི་དགས་མཚན་ལྡན་དཀར་སེར་མི་དམན་དམན་ཞིང་ཉམས་པ་
ཉིད་བགྱིད་པ། །འཇིག་རྟེན་དབང་པོའི་ཞབས་སེན་དྲི་མེད་རི་བོང་འཛིན་པའི་མཛེས་པ་ཞི་སླད་འཇིག་རྟེན་ལ་གྱུར་ཅིག །རལ་ཁུར་འཛིན་པའི་ཟླ་བ་རབ་གསལ་རལ་པ་དམར་སེར་དང་འགྲོགས་ལྷན་ཅིག་བཀྲ་བའི་ཟེར་རྣམས་ཀྱིས། །ངེས་པར་མི་བརྫི་འཕྲོག་བྱེད་ཀྱི་ནི་དམན་པ་མིན་པའི་ཅོད་པན་ནོར་
བུའི་འོད་རྣམས་ཀྱིས་ཀྱང་མིན། །ལྷ་ཚོགས་རྣམས་ཀྱི་སྐྲ་ཕྲེང་མཛེས་པ་ནག་པོ་དག་དང་འགྲོགས་པ་ལས་ནི་རྣམ་པར་མི་ཉམས་པ། །མི་བཟློགས་འཇིག་རྟེན་དབང་ཕྱུག་ཞབས་སེན་འོད་ཟེར་ཁྱེད་རྣམས་དག་གི་མུན་པ་ཞི་བའི་སླད་གྱུར་ཅིག །ཡོངས་སུ་རྫོགས་ཤིང་རྒྱ་ཆེའི་བང་མཛོད་རབ་ཏུ་གསལ་ཞིང་

73-1-97a

དཔལ་འབྱོར་ཕུན་སུམ་ཚོགས་པ་རྣམས་ཀྱི་རྒྱུ། །སྡུག་པ་དང་ནི་རིང་དུ་གྱུར་པའི་སྐྱེ་བོ་རྣམས་ཀྱི་མི་བཟད་འཇིགས་པའི་དོགས་པ་རྣམ་པར་སེལ། །སྤྲིན་རྣམས་ཀྱིས་ཀྱང་བསྒྲིབ་པར་མི་ནུས་མུན་ཅན་གདུག་པའི་གཟའ་ལས་བྱུང་བའི་འཇིགས་པ་ཞི་གྱུར་པ། །འཇིག་རྟེན་དབང་པོའི་ཞབས་ཀྱི་སེན་མོ་
བསིལ་ཟེར་ལྡན་པའི་སྔོན་མེད་ཟེར་གྱིས་ཁྱེད་རྣམས་དག་གྱུར་ཅིག །ཉོན་མོངས་ཕུང་པོའི་བུད་ཤིང་དགུ་ནི་ལུས་པ་མེད་པར་སྲེག་བྱེད་མེ་ཆེན་མཐོན་པོར་གྱུར་པའི་རྩེ། །འཇིག་རྟེན་གསུམ་པོ་དག་ཏུ་རབ་དགར་གསལ་ཞིང་གཏི་མུག་མུན་གནག་དག་གི་སྨག་རུམ་ཐིབས་པོ་སེལ། །དམྱལ་བའི་ས་གཞིར་མེ་
ཡི་ཕུང་པོ་རྣམས་ལ་བདུད་རྩིའི་ཆུ་བོ་རྒྱ་ཆེན་རྒྱུན་ནི་འབྲས་བཅས་པ། །པདྨོ་འཛིན་ཞབས་ལས་འཁྲུངས་སེན་ཚོགས་འོད་ཟེར་རྣམས་ཀྱིས་ཁྱེད་ཀྱི་འཁོར་བ་ཡང་དག་སེལ་གྱུར་ཅིག །རང་གི་འདུན་པས་སྤྱད་པའི་འདོད་པ་སྦྱིན་ལ་ཤིན་ཏུ་མཁས་གྱུར་ཡིད་བཞིན་ནོར་བུ་བསམ་ཡས་ཤིང་། །ཤིན་ཏུ་འཇིགས་
པའི་དོགས་པས་གདུངས་གྱུར་ཞི་བར་བགྱིད་པའི་བསིལ་བའི་འོད་ཟེར་ཡིད་ནི་རབ་འཕྲོག་ལ། །ཡོན་ཏན་དུ་མའི་ཚོགས་རྣམས་འཛིན་པ་གསལ་བར་གྱུར་ཅིང་མཛེས་པ་དང་ལྡན་མེ་ལོང་དག་གི་གཟུགས། །འཇིག་རྟེན་དབང་ཕྱུག་ཞབས་ལས་སྐྱེས་པའི་སེན་མོ་དེས་བསྐྱེད་འོད་ཟེར་མཛེས་པས་ཁྱེད་
རྣམས་སྐྱོང་གྱུར་ཅིག །འོད་ཟེར་དཔག་མེད་ལས་འཁྲུངས་ཆེ་བའི་འོད་ཟེར་རྣམས་ཀྱིས་མཛེས་པ་དང་ལྡན་གཙུག་ཕུད་ཆེན་པོ་ནི། །མཛེས་ལྡན་མགོན་པོའི་རབ་ཏུ་མཛེས་ཞབས་སེན་མོའི་འོད་ཟེར་ཚོགས་ནི་དེ་ལ་མཆོད་མཁས་ལྷ་རྣམས་ཀྱི། །མགོ་ཡི་རིན་ཆེན་མཆོག་གི་ཚོགས་ལས་ངེས་པར་འཕྲོས་
གྱུར་ཤིན་ཏུ་རབ་བཀྲའི་འོད་ཟེར་ཚོགས་རྣམས་ཀྱིས། །བདེ་སོགས་དགའ་བའི་གཞུ་ལ་ཉེ་བར་སྤྱོད་བྱེད་འདི་དག་གིས་ནི་ཁྱེད་རྣམས་ཡུན་རིང་དར་གྱུར་ཅིག །མངོན་པར་འདོད་པའི་ཡུལ་རྣམས་འཐོབ་པའི་སྦྱིན་པ་ལས་ནི་དཔལ་དང་ལྡན་པའི་ལོངས་སྤྱོད་ཀྱིས་མཐོ་ཞིང་། །ཀུན་ཏུ་རྣམ་པར་མི་གཡོའི་
འོད་ནི་བརྟེན་བྱེད་སྣོད་རྣམས་དག་གི་མགུ་བསྐྱེད་པར་བྱེད་གྱུར་ལ། །དྲི་མ་དང་བྲལ་མཚུངས་པ་མེད་པའི་གཟུགས་ནི་རི་བོང་ཅན་ལས་ལྷག་ཅིང་སྐྱོན་གྱི་མུན་སེལ་བ། །ནོར་བུའི་འོད་ཟེར་ལྟ་བུ་ཕྱག་ན་པདྨའི་ཞབས་ཀྱིས་ཁྱེད་རྣམས་དག་ལ་ཚིམ་པ་སྦྱིན་གྱུར་ཅིག །རབ་མཛེས་ཕྱག་ན་པདྨའི་ཞབས་ཀྱི་

73-1-97b

པདྨ་ལས་འཁྲུངས་སེན་མོའི་ཚོགས་རྣམས་དག་གི་འོད་ཟེར་ནི། །རྒྱུན་ཆད་མེད་པར་སྙིང་རྗེའི་ཆུ་ཡིས་ཉེ་བར་བྲན་པ་དེ་ཡི་སྐུ་ལུས་དག་གི་ས་གཞི་ལ། །ཁྱད་འཕགས་ཡེ་ཤེས་ས་བོན་བཏབ་པ་ལས་སྐྱེས་མི་ཆུང་དཔག་བསམ་ཤིང་གི་མྱུ་གུའི་ཚོགས་རྣམས་དང་། །མཚུངས་པ་གང་ཡིན་འདི་ཡིས་
ཁྱེད་ཀྱི་སྲིད་པའི་འཇིགས་པ་རབ་མང་མཐུ་ཚོགས་ཉམས་པར་བྱེད་གྱུར་ཅིག །འཇིག་རྟེན་དབང་པོའི་ཞབས་པད་ལས་སྐྱེས་སེན་མོའི་འོད་ཟེར་བདུད་དང་དགྲ་སྟེ་བདག་ལ་སྐྲག་སྟེར་ཞིང་། །ཨུཏྤལ་དམར་མདོག་དོང་པར་དོན་ཡོད་མདའ་རྣམས་མདེའུ་རྩེ་གྱེན་དུ་བསྟན་བཅུག་འོད་ཟེར་ལྟར་མཛེས་
ལ། །འཇིགས་རུང་འཁོར་བའི་དོང་དུ་རྟག་ཏུ་ལྷུང་བའི་སྐྱེ་བོ་འདྲེན་བྱེད་སྲ་མཁྲེགས་ཐག་པའི་དཔྱངས་ཐག་འདིས། །ཤིན་ཏུ་རྙེད་དཀའི་ཕུན་སུམ་ཚོགས་པ་ཆེན་པོ་མཐོ་བའི་གོ་འཕང་དག་ལ་ཁྱེད་རྣམས་འགོད་གྱུར་ཅིག །འོད་དང་ལྡན་ཞིང་ཉོན་མོངས་ལས་ཀྱི་རང་དབང་མེད་དུབ་འགྲོ་བའི་སྡུག་བསྔལ་
རྣམ་པར་གཅོད་ལ་དཔའ། །སྐྱོན་གྱི་དམིགས་པ་ལས་རིང་གསལ་ཞིང་མཁས་པའི་བླ་མ་སྐྱེ་བོ་རྣམས་ཀྱི་སྒྲོལ་བར་བྱེད་གྱུར་ལ། །ཀུན་དུ་དགའ་བ་རབ་སྡུག་སྟེར་ཞིང་རི་བོང་འཛིན་དཔལ་མཐའ་དག་འཛིན་གྱུར་དྲི་མ་དང་བྲལ་བ། །བསམ་ཡས་ཕྱག་ན་པདྨའི་ཞབས་འཁྲུངས་སེན་མོ་གང་ཡིན་
དེ་ཡིས་ཁྱེད་ཀྱི་བསམ་པ་རྒྱལ་གྱུར་ཅིག །ཅི་ཞིག་བདེ་འབྱུང་གིས་འདི་ཟླ་དུམ་རྣམས་ཀྱིས་མཆོད་པར་བཀོད་བྱས་འོད་དང་ལྡན་པའི་དུམ་བུའམ། །ཡང་ན་ངེས་པར་ཁྱེད་འཕགས་ཡིད་གྱུར་བྱང་ཆུབ་དཔལ་མོས་རིན་ཆེན་ཕྲེང་བ་བཀོད་དམ་ཅི་ཞིག་ཡིན། །ལྷ་རྣམས་ཀྱིས་ནི་ལྷ་ཡི་མེ་ཏོག་རྨད་བྱུང་མཚུངས་
པ་མེད་རྣམས་ཕྲེང་བརྒྱུས་དཔྱངས་པ་མིན་ནམ་ཞེས། །བློ་གྲོས་བསྐྱེད་པ་འཇིག་རྟེན་མགོན་པོའི་ཞབས་ལས་འཁྲུངས་པ་སེན་མོའི་ཕྲེང་བས་ཁྱེད་རྣམས་དགྱེས་གྱུར་ཅིག །གང་དུ་འདི་ནི་པདྨོ་ལས་སྐྱེས་ཕྱག་བགྱིད་འཆི་མེད་མགོ་བོར་ནོར་བུའི་ཁྲི་སྟན་མཐོན་པོ་ལ། །ཞབས་རྡུལ་དག་ནི་རྒྱུན་དུ་
གཟིམས་ཤིང་གང་དུ་ཡང་ནི་འཛིན་བྱེད་གཞི་ལ་མགོ་འཆང་རབ་འདུད་པ། །དེ་ལྟར་རབ་བསྐྱེད་འོད་ཟེར་ཚོགས་ཀྱི་སོ་རིང་གསལ་ཞིང་བཞད་གད་བགྱིད་འདྲ་འཇིག་རྟེན་དབང་ཕྱུག་གི། །ཞབས་སྐྱེས་སེན་མོ་གང་ཡིན་དེ་དག་རྣམས་ནི་ཁྱེད་ཀྱི་མཐའ་བྲལ་མུན་པ་གཞིལ་བའི་སླད་གྱུར་ཅིག །ཚ་

73-1-98a

གདུང་སེལ་བྱེད་དཔའ་བོ་དཀར་བསིལ་མཆོག་ལྡན་བདུད་རྩིའི་ཐིགས་པའི་ཆར་གྱི་རྒྱུན་ནི་འབེབས་མཛད་ཅིང་། །མི་བཟད་མདའ་ཆེན་ཆར་གྱི་རྒྱུན་ནི་དྲག་པོ་རབ་འགྲེམས་བདུད་ལ་གནོད་བྱེད་ཕྱི་ར་ལྟར་གྱུར་པ། །ཕྱག་ན་པདྨའི་ཞབས་ཀྱི་སེན་མོའི་འོད་ཟེར་དཔལ་མཛད་དག་གིས་ཁྱེད་
ཀྱི་འཁོར་བའི་རྣམ་པ་ཡི། །ཁོངས་ཆེན་བཙོན་རར་རྒྱ་ཆེའི་སྡུག་བསྔལ་རྣམ་མང་འཇིགས་སུ་རུང་རྣམས་ཡང་དག་འཕྲོག་པར་བྱེད་གྱུར་ཅིག །འཇིག་རྟེན་དབང་པོའི་ཞབས་ལས་རབ་སྐྱེས་སེན་མོའི་གནས་ལ་སྣང་བ་དག་ནི་ཤིན་ཏུ་བཟློག་དཀའ་བའི། །བདུད་ཀྱིས་ཀུན་ནས་རབ་འཕངས་མདའ་
ཡིས་ཁྱབ་རྣམས་སྒྲིབ་པར་བྱེད་པའི་ཡོལ་བར་འཁྲུལ་པ་སྐྱེད་བྱེད་ཅིང་། །ཀུན་ནས་ཉོན་མོངས་དཔུང་རྣམས་བརླག་འགྱུར་གསལ་བར་གོ་འབྱེད་མཇུག་རིངས་ཆེན་པོའི་ཚོགས་སུ་རྟག་བྱ་བ། །འཇིག་རྟེན་གསུམ་གྱིས་མི་ནུས་ནུས་པ་སྲིད་པ་གསུམ་ལས་རྒྱལ་བའི་རུ་མཚོན་ཆེན་པོས་རྒྱལ་གྱུར་ཅིག །ཡང་
དག་རྫོགས་པའི་བྱང་ཆུབ་སེམས་ཀྱི་ཟླ་བ་ཀུན་ནས་མཛེས་ལྡན་འོད་ཀྱི་ཚོགས་པ་ལྟ་བུ་ཡིས། །ཉོན་མོངས་ངེས་བསྲེགས་ཐལ་བའི་ཚོགས་རྣམས་གྲོལ་བའི་ལམ་གྱི་རླུང་གིས་བདས་ནས་བགྲོད་པ་ལྟ་བུ་དང་། །མི་བཟད་བདུད་རྣམས་ཀྱིས་ནི་རྣམ་པར་མི་བྱེད་མི་ཆུང་རྡོ་དཀར་གླེགས་བུ་བཀོད་པ་ལྟ་བུ་
ཡིས། །ཉེ་བར་མཚོན་འོས་ཕྱག་ན་པདྨའི་ཞབས་སྐྱེས་སེན་མོའི་འོད་ཟེར་ཚོགས་ཀྱིས་ཁྱེད་རྣམས་སྲུང་གྱུར་ཅིག །མཚན་མོའི་མགོན་པོ་ངེས་པ་ཁོ་ནར་ཕྱོགས་ལ་ཟད་ཅིང་རང་ཉིད་དམན་པ་སྐྱེངས་པར་གྱུར་པས་ནི། །སྐད་ཅིག་བརྟག་པར་བྱ་བ་མཚུངས་མེད་མུན་པ་སྤོང་མཁས་དྲི་མ་དང་ནི་ཟད་པ་མི་
མངའ་ཞིང་། །མི་དམན་དགྲ་ཡི་སྲིན་པོ་ཟད་བྱེད་ཕ་རོལ་འགྲོ་སྦྱོང་བརྫི་བ་མེད་པའི་བརྟུལ་ཞུགས་ཉེར་མཚོན་པ། །འཇིག་རྟེན་དབང་ཕྱུག་ཞབས་སེན་གང་དེ་རྣམས་ཀྱིས་མི་ཁོམ་འཕེན་པ་དག་ལས་ཁྱེད་རྣམས་སྲུང་གྱུར་ཅིག །ཕུན་ཚོགས་དམ་པའི་སྒྲུབ་བྱེད་རབ་ཏུ་སྟོབས་ལྡན་པདྨོ་འཛིན་
པའི་ཞབས་ཀྱི་རྫོང་ལ་གནས་བཅས་ཤིང་། །འཇིག་རྟེན་གསུམ་དཔལ་རྒྱལ་བར་བཞེད་པ་སེན་མོའི་འོད་ཟེར་ཚོགས་ནི་མཚུངས་མེད་མངོན་པར་རབ་མཐོ་བ། །བཤེས་གཉེན་འཆར་བས་ཐོབ་པའི་རབ་གསལ་རྗེས་སུ་འགྲོགས་ལྡན་ཤིན་ཏུ་ཕུལ་བྱུང་འཕེལ་བ་རྙེད་གྱུར་པ། །རྒུད་པ་ཀུན་གྱི་

73-1-98b

དགྲར་གྱུར་ཐེག་ཆེན་ཡང་དག་འགྲུབ་པའི་རྒྱུ་དེས་ཁྱེད་རྣམས་ཕོངས་ལས་སྲུང་གྱུར་ཅིག །གཙུག་ཕུད་ལ་ནི་ཟླ་ཕྱེད་རྒྱན་འཛིན་བཞེད་པར་གྱུར་པའི་ཕྱུགས་བདག་འདི་ནི་ངོ་ཚ་དང་བྲལ་ལ། །ནུབ་པར་མི་འགྱུར་ནོར་བུས་མངོན་པར་མཛེས་འདོད་ཁྱབ་འཇུག་དག་ཀྱང་ཇི་ལྟར་མཁས་པ་ལྟ་བུ་ཡིན། །
དབང་པོ་ཡི་ནི་མགོ་བོ་ཆེ་ལ་ནོར་བུ་འདི་ཡང་དོན་ཡོད་མིན་ཞེས་བྱ་བ་ཕྱག་ན་པད་ཞབས་ཀྱི། །སེན་མོའི་ཚོགས་འདི་མཐོང་གྱུར་གང་ཞིག་མཛེས་པས་སེམས་ཟིན་འཇིག་རྟེན་གྱིས་བསམས་དེ་ཡིས་རྒྱལ་གྱུར་ཅིག །རྒྱ་ཁྱོན་ཆེར་བྱས་རིང་དུ་སྟེང་དུ་འགྲོ་ཞིང་འོག་ཏུའང་དམྱལ་བ་རྣམས་ཀྱི་
སྒྲོལ་བ་བྱེད་པར་གྱུར། །བསིལ་ཟེར་ལྡན་པ་འཆར་ཀར་གྱུར་ལྟར་དཀར་ཞིང་དགྲ་རྣམས་བཞིན་ནི་ནག་པོ་ཉིད་དུ་འགྱུར་བའི་རྒྱུ། །ནུས་མཐུ་རྣམ་པར་ཤེས་པར་བྱ་བ་དཀའ་ཞིང་མ་ལུས་འགྲོ་བས་མཆོག་ཏུ་གསལ་བར་མཐོང་ཞིང་སྣང་། །དབུ་ལ་སངས་རྒྱས་ཀྱི་ནི་ཞབས་པད་ལ་གནས་སེན་
མོའི་འོད་ཟེར་ཚོགས་ཀྱིས་ཁྱེད་རྣམས་སྲུང་གྱུར་ཅིག །ལྷ་དབང་དགྱེས་པའི་མཆོད་པ་ལ་མཁས་ལྷ་མོས་རབ་གཏོར་ག་པུར་ཕྱེ་མ་ཀུན་ནས་འཐུལ་བ་ཡི། །འོད་ལྟར་སྣང་ཞིང་གུས་པའི་ཁུར་ཐོགས་འཕྲོག་བྱེད་ཕྱག་འཚལ་རལ་པའི་ཐལ་བར་རྣམ་པར་འཁྲུལ་པའི་ས། །དཔལ་མོ་མཆོད་
པ་འབུལ་བའི་ལག་གི་པདྨའི་གེ་སར་རྩེ་ཡི་རྡུལ་ཕྲན་ཟག་པ་ལྟར་མཛེས་པ། །ཕྱག་ན་པདྨའི་ཞབས་ལས་སྐྱེས་གྱུར་སེན་མོའི་འོད་ཟེར་ཚོགས་ཀྱིས་ཁྱེད་རྣམས་ཕོངས་ལས་སྲུང་གྱུར་ཅིག །ལྷུན་པོའི་འོད་ཟེར་སེར་པོ་མིན་བགྱིད་ལྷ་ཡི་གླང་ཆེན་ལི་ཁྲིའི་ཚོན་གྱིས་གསལ་བྱས་དམར་པོའི་དཔལ། །
ཉམས་པར་བྱེད་ལ་དཔའ་ཞིང་རྟ་ལྗང་ཅན་གྱི་རྟ་ཡི་མི་དམན་ལྗང་བ་ཉིད་ཀྱི་འཕྲོག་བགྱིད་ལ། །སྔོན་པོའི་སྣང་བ་ཉམས་བགྱིད་འཆི་མེད་བུ་མོས་འོ་མའི་ཆུ་གཏེར་ལུད་པར་རྣམ་བརྟགས་སྐྲག་གྱུར་པ། །པདྨོ་འཛིན་པའི་ཞབས་ཀྱི་པདྨོ་ལས་འཁྲུངས་སེན་མོའི་འོད་ཟེར་ཚོགས་ཀྱིས་ཁྱེད་རྣམས་
སྲུང་གྱུར་ཅིག །ལྷ་རྣམས་ཁྱེད་ཀྱི་རྔ་ཡབ་བསིལ་ཟེར་བྱེད་ལྟར་དཀར་བ་དག་གིས་འདི་ལ་མཛེས་པར་མི་འོས་ཏེ། །ཀྵ་ཡེ་རམ་བྷེ་དགོས་པ་མེད་པའི་ག་བུར་ཕྱེ་མ་གུས་པའི་རྩོམ་པས་ཡོངས་སུ་འཐོར་བ་ཅི། །བདེ་སོགས་ཁྱོད་ཀྱི་མེ་ཏོག་དཀར་པོ་རྣམས་ཀྱིས་རབ་ཏུ་གཏོར་བས་ཅི་ཞེས་མཐོ་

73-1-99a

རིས་ས་ཡི་རྗེ། །མཆོད་ལ་བསྔགས་མཛད་ཕྱག་ན་ཆུ་སྐྱེས་ཞབས་འཁྲུངས་སེན་མོའི་འོད་ཟེར་ཚོགས་ཀྱིས་ཁྱེད་རྣམས་སྲུང་གྱུར་ཅིག །ཀཻ་ལ་ཤ་ལྟར་འབིགས་བྱེད་མཛེས་སྐྱེས་ལྷ་མིན་ལས་རྒྱལ་ལུས་ཀྱི་ནག་པོ་ཉིད་ནི་ཉམས་པར་བགྱིད། །ནག་མོ་རྩེ་འཇོས་མཛེས་ལྡན་བྱུགས་ཤིང་ཉི་
མའི་རྟ་ཡི་འོད་ཟེར་ལྗང་གུ་ཉིད་ཀྱང་དཀར་པོར་མཛད། །མཆོད་མཁས་ལྷ་ཡི་སྐྱེ་བོས་གཏོར་བའི་ཀུནྡའི་ཟིལ་ལས་བསིལ་ཟེར་ཅན་གྱི་དུམ་བུ་ལྟར་གྱུར་རྣམས། །ཅི་ཞིག་ལ་དགོས་འཇིག་རྟེན་དབང་པོའི་ཞབས་སེན་འོད་ཟེར་ཆེ་བའི་ཚོགས་ཀྱིས་ཁྱེད་རྣམས་སྲུང་གྱུར་ཅིག །འཁོར་བའི་ཆུ་སྲིན་
བདག་པོ་ཕ་རོལ་བགྲོད་པ་རྣམས་ལ་བསྡམས་པའི་ལམ་ཆེན་དག་དང་མཚུངས་འགྱུར་ཞིང་། །བཟློག་པར་དཀའ་བའི་སྡུག་བསྔལ་མེ་འབར་ཞི་བར་མཛད་པ་བསོད་ནམས་ཆེན་པོའི་ཚོགས་ཀྱི་ཆུ་བོ་ནི། །དངས་པ་རང་དགའ་དག་ཏུ་འབབ་པ་ལྟ་བུ་དབུ་ལ་སངས་རྒྱས་ཀྱི་ནི་ཞབས་ལས་འཁྲུངས་པ་
ཡི། །འོད་ཟེར་མཆོག་ཏུ་རྣམ་པར་རྒྱལ་བར་གྱུར་རྣམས་ཁྱེད་ཀྱི་སྲིད་པ་མྱུར་དུ་སེལ་བར་མཛད་གྱུར་ཅིག །ནག་མོ་དགའ་བའི་ཟླ་བའི་མཛེས་པ་ཟིལ་གྱིས་ནོན་བགྱིད་ས་གཞི་འཛིན་པ་ཀཻ་ལ་ཤ་ཡི་ནི། །སྣང་བ་རྒྱས་པ་གསལ་བར་ཉམས་ཤིང་དཀར་པོ་ཉིད་གྱུར་ཁ་བ་ཅན་གྱི་དཀར་བ་ཉིད་ཀྱང་འཕྲོག །
འོ་མའི་རྒྱ་མཚོ་རྒྱས་པ་ལུད་པ་དང་མཚུངས་ཕྱུགས་རྣམས་ཀྱི་ཡང་ལྷ་ཡི་གླང་ཆེན་སོ་རྣམས་ནི། །བཅག་པའི་དུམ་བུ་ལྟར་མཛེས་འཇིག་རྟེན་དབང་ཕྱུག་ཞབས་སེན་འོད་ཟེར་རྒྱས་པས་ཁྱེད་རྣམས་སྲུང་གྱུར་ཅིག །གང་ཞིག་ཡོངས་འདུའི་མེ་ཏོག་གིས་མཆོད་མཚོ་སྐྱེས་དཔལ་ནི་འཛུམས་ཤིང་བུང་བའི་ཚོགས་
རྣམས་གར་སྒྱུར་བགྱིད། །གང་ལ་གནས་བཞིན་བསྙེན་བཀུར་ལ་ཆགས་པདྨ་ཅུང་ཟད་ཟུམ་ཞིང་རང་བྱུང་འདུག་པ་དཀའ་བར་གྱུར། །གང་གིས་ལྷ་ཡི་ཆུང་མ་གདུང་བའི་སྐྱོན་སེལ་ཉིན་མོའི་དཔལ་ནི་ནག་མོ་མིན་པར་མཚན་མོར་གྱུར། །ཕྱག་ན་པདྨའི་ཞབས་སེན་ཟླ་བ་མཛེས་པ་དང་ལྡན་ཟླ་བའི་འོད་འདིས་
ཁྱེད་རྣམས་སྲུང་གྱུར་ཅིག །ལྷ་ཡི་ན་ཆུང་སྐྱེ་བོ་མཛེས་མ་རྣམས་ཀྱིས་འདོད་འོས་སུ་འཁྲུལ་མིག་ཚུགས་ལྟ་ཞིང་མཆོད་གྱུར་ལ། །སེན་མོའི་འོད་གསལ་དཀར་ཞིང་མཛེས་པར་གྱུར་པ་པདྨའི་རྩ་བའི་ཚོགས་པ་ལྟ་བུ་འཛིན་མཛད་ཅིང་། །མི་ཆུང་འདོད་པ་རབ་རྒྱས་འདོད་ལྡན་ལྟ་བུར་གཞན་གྱི་དབང་གྱུར་

73-1-99b

མ་ཡི་སྤྱོད་ལ་རབ་ཏུ་འཇུག །མི་དམན་ལྷ་ཡི་གྲོང་གི་ཙནྡན་གྱིས་བྱུགས་ཕྱག་ན་པདྨའི་ཞབས་ཀྱིས་ཁྱེད་རྣམས་སྲུང་གྱུར་ཅིག །ཀུན་དགའི་ཁུར་བུ་མི་དམན་རབ་རྒྱས་ལྷ་ཡི་ལག་པས་ཡོངས་འདུའི་མེ་ཏོག་རབ་ཏུ་གཏོར་རྣམས་ལ། །བུང་བའི་དོན་མཐུན་ནག་པོ་བརྩེགས་པ་ཤིན་ཏུ་གནག་པར་གསལ་
བའི་ཚོགས་པ་ལྟ་བུ་རབ་རྒྱས་པ། །ཕྱག་ན་པདྨའི་ཞབས་ཀྱི་མཚོ་སྐྱེས་དག་གི་སེན་མོའི་འོད་ནི་དྲི་མེད་འོ་མའི་ཆུ་གཏེར་གྱི། །དབུས་ལས་འཁྲུངས་པའི་དཔལ་མོ་གཡོ་མེད་དགའ་བའི་རྒྱུ་འདིས་ཁྱེད་ཀྱི་དགེ་ལེགས་མཆོག་ཏུ་སྒྲུབ་གྱུར་ཅིག །རེ་བ་རྣམ་ཆད་སྐྱོ་བས་འཕེལ་བའི་མེ་ཡི་རྩེ་མོ་གཅོད་
པའི་ཆུ་ཆེན་རབ་ཏུ་རྒྱས་གྱུར་ཅིག །པདྨ་མཛེས་པའི་རྗེས་མཐུན་གྱིས་དྲངས་སྦྲང་རྩི་བྱེད་པའི་སྒྲིབ་བྱེད་རྣམས་ཀྱིས་བསྒྲིབས་པར་གྱུར་པའི་དཔལ། །སེན་མོའི་འོད་ཟེར་དཀར་ཞིང་རགས་ལ་སྟུག་པོར་གྱུར་པས་རང་དགར་ཁྱབ་ཅིང་ནང་ནི་ཁེངས་གྱུར་པ། །སོར་མོ་ཆུ་སྐྱེས་དཔལ་ལ་རེག་པའི་ཞབས་
ཀྱིས་ཚེགས་མེད་མ་ཆད་ཁྱེད་ཀྱི་འདོད་པ་སྦྱིན་གྱུར་ཅིག །འཁོར་ལོའི་འོད་ནི་རབ་ཏུ་མཛེས་དང་ལྡན་གྱུར་དྲི་མེད་སེན་མོས་བསྐྱེད་པ་དོ་ཟླ་མེད་པའི་དཔལ། །མཚུངས་མེད་ཡོན་ཏན་གྲངས་མེད་བསོད་ནམས་རྣམས་ཀྱིས་འཐོབ་པའི་མཚན་གྱི་ཚོགས་ནི་རྣམ་པར་འཛིན་གྱུར་ཅིང་། །མ་ལུས་གླིང་
རྣམས་གསལ་བའི་མཐུ་ལྡན་ཤིན་ཏུ་ཆེ་བར་ཕུན་སུམ་ཚོགས་པས་ས་ཡི་བདག་པོ་རྣམས། །ཕྱག་བགྱིད་མགོ་ཡི་འཁོར་ལོས་སྒྱུར་བ་དབུ་ལ་སངས་རྒྱས་ཞབས་ཀྱིས་ཁྱེད་རྣམས་ཡུན་རིང་སྲུང་གྱུར་ཅིག །མཐོ་རིས་གང་གཱའི་གསེར་གྱི་པད་ལྗོན་མེ་ཏོག་ཅུང་ཟད་དབྱེ་བས་འདི་ལ་གཏོར་བའི་ཡོན་ཏན་
ཅི། །གསལ་ལྡན་མཚོ་སྐྱེས་སུ་འཁྲུལ་བུང་བའི་ཕྲེང་བས་གླུ་དབྱངས་ཉིད་ལ་གླུ་རྣམས་ཀྱིས་ནི་ཅི་ཞིག་བྱ། །རབ་མཛེས་སེན་མོ་འདི་ལ་ནོར་བུའི་ཕྲེང་བ་རྣམས་ཀྱིས་མཛེས་པ་ཉིད་དུ་བགྱི་བར་ནུས་མིན་ཞེས། །གང་ཞིག་མཆོད་ལ་ལྷ་ཡི་དབང་པོས་གསུངས་གྱུར་ཕྱག་ན་ཆུ་སྐྱེས་བསྡམས་པའི་ཞབས་དེས་རྒྱལ་
གྱུར་ཅིག །གང་ཞིག་མགོན་པོ་ཁོ་ནའི་བདེ་བར་གཤེགས་པའི་རྒྱུར་གྱུར་འབའ་ཞིག་མ་ཡིན་སྐྱེ་བའི་སྣོད་ཀྱི་ཡང་། །གང་དུ་པདྨོ་མངོན་འདོད་སྦྲང་རྩི་འཐུང་བའི་ཚོགས་ཉིད་འདབ་བསྐྱོད་མ་ཡིན་སྐྱེ་བོ་རྣམས་ཀྱི་ཡང་། །གང་གིས་རབ་ལྕི་ས་ཉིད་ཤིན་ཏུ་བླ་མར་གྱུར་ཅིང་འདུད་རྙེད་མ་ཡིན་འཇིག་རྟེན་

73-1-100a

གསུམ་པོ་ཡང་། །དབུ་ལ་བདེ་གཤེགས་རི་བོང་འཛིན་པའི་འོད་ཀྱིས་རྣམ་པར་གསལ་ལྡན་ཞབས་དེས་འཇིག་རྟེན་སྲུང་གྱུར་ཅིག །གང་ཞིག་སྟེན་བྱེད་བུང་བ་རྣམས་ལ་བཏུད་པའི་སྦྱིན་པས་དགའ་མགུ་རངས་པའི་ཚོགས་ནི་སྐྱེད་མཛད་ཅིང་། །གང་གི་རྩ་བ་མི་དམན་ངེས་པ་ཁོ་ནར་ལྗང་གུ་
ཉིད་མིན་མཆོག་ཏུ་མཛེས་པ་ཉེར་འཛིན་ལ། །རྡུལ་གྱི་ཚོགས་རྣམས་འཆི་མེད་མགོར་ཉལ་དཔལ་ནི་གནས་པའི་སར་གྱུར་སེན་མོའི་འོད་ཟེར་བཞད་པ་ཡི། །གེ་སར་དང་ལྡན་འཇིག་རྟེན་མགོན་པོའི་ཞབས་ཀྱི་པདྨས་ཁྱེད་ལ་ཡུན་རིང་དགེ་ལེགས་སྦྱིན་གྱུར་ཅིག །ལུས་འཇོམས་ཉམས་བྱེད་འཇིགས་སུ་
རུང་བའི་དགྲ་འཇོམས་སྒྲུབ་པ་ལུས་ཅན་རྣམས་ཀྱི་མཚོན་ཏེ་འདོད་པ་ཡི། །དངོས་གྲུབ་འབོད་པར་བྱེད་ཅིང་ཀྱེ་མ་ཤིན་ཏུ་ཆེར་བསགས་མི་བཟད་སྡིག་པའི་ཚོགས་ཆེན་ཟད་མཛད་པ། །ཉོན་མོངས་བཀོད་པ་དགྲ་ཡི་བསམ་པའི་སྲེག་བླུགས་ཀྱིས་བསྐྱེད་སྡུག་བསྔལ་མེ་ཆེན་གྱིས་ནི་བསྲེགས་པ་དག །
སེལ་བའི་ཆུ་ཀླུང་ཕྱག་ན་པདྨའི་ཞབས་ཀྱི་འོད་ཀྱིས་ཁྱེད་ཀྱི་ཟེར་ལ་རྣམ་མང་ཕན་པ་སྒྲུབ་གྱུར་ཅིག །དབུ་ལ་སངས་རྒྱས་རྒྱན་ལྡན་ཞབས་ཀྱི་ཉེ་འཁོར་དུ་རྒྱུ་ཚད་མེད་པ་ཡི་པདྨོར་འཁྲུལ་ལྡན་པ། །བུང་བའི་ཕྲེང་བ་སྒྲ་སྙན་སྒྲོགས་པ་རྣམས་ནི་སེམས་ཅན་བསྐྱབ་སའི་བྱ་བ་གཅིག་པུར་རབ་བརྟན་ལ། །
ཡུན་རིང་བཞུགས་པར་བརྟན་པར་བགྱི་སླད་སྟོབས་ཆེན་སྙིང་རྗེ་དག་གིས་སྦོམ་ཞིང་གནག་པ་ལྕགས་ཀྱི་ནི། །ལྕགས་སྒྲོག་བཀོད་པ་ལྟ་བུས་ཁྱེད་རྣམས་དག་གི་ཕུན་སུམ་ཚོགས་པ་ངེས་པར་གཡོ་མེད་སྒྲུབ་གྱུར་ཅིག །པདྨའི་ནང་གི་འདབ་མའི་ཕྲེང་བ་ལྟར་མཛེས་འཇམ་ཞིང་རྡོ་རྗེ་ལྟ་བུ་སྲ་ལ་རྣམ་པར་
བརྟན། །གདུག་པའི་དགྲ་རྣམས་ཀྱིས་ནི་རབ་ཏུ་བསྣུན་བྱས་མཚོན་ཆའི་ཚོགས་རྣམས་རྣམ་པར་ཉམས་པར་འགྱུར་བའི་ས། །དམར་ཞིང་ཆགས་པ་ཉེ་བར་ཞི་བ་འཁོར་བའི་ཆུ་གཏེར་དག་ལས་སྒྲོལ་བར་བགྱིད་པའི་བྱེད་པ་པོ། །ཤིན་ཏུ་སྟོབས་ལྡན་བདེ་བར་གཤེགས་པའི་རི་བོང་ཅན་འཛིན་ཞབས་
ཀྱིས་ཁྱེད་ཀྱི་སྐྱོ་བ་སེལ་གྱུར་ཅིག །དབང་པོའི་ཆུ་སྐྱེས་རབ་ཏུ་རྒྱས་ཤིང་མཛེས་པའི་ཚོགས་ལ་བུང་བ་གཡོ་ལྡན་ཡིན་ཡང་མི་གཡོ་ཞིང་། །ཀུན་དུ་དགའ་བའི་ཀུནྡ་འཕྲོག་བྱེད་ལག་ན་གནས་པའི་ཚོགས་ལ་སྲེག་ལྡན་ཡིན་ཡང་མི་སྲེད་དེ། །མདུན་དུ་ཁྱབ་འཇུག་གིས་གཏོར་མཛེས་ལྡན་ཡོངས་འདུའི་མེ་

73-1-100b

ཏོག་དྲི་བཟངས་ལྡན་ལའང་དགའ་བ་མི་སྐྱེ་བར། །གང་དུ་བུང་བའི་ཕྲེང་བ་དགར་འགྱུར་རྒྱལ་བ་འཛིན་པའི་ཞབས་ཀྱི་པདྨ་དེས་ཁྱེད་སྲུང་གྱུར་ཅིག །འོད་ཟེར་རབ་ཏུ་མང་བའི་ཚོགས་ལས་གྱུར་པའི་རལ་པ་གཡོ་ཞིང་ཤིན་ཏུ་རབ་མཛེས་གསལ་ལྡན་ལ། །དམར་ཞིང་མཛེས་པས་རྩེས་འབྲེལ་རབ་ཏུ་
མཐོ་བ་སེན་མོའི་སོ་གཙིགས་ཀུན་ནས་མཛེས་ཤིང་ཡིད་དུ་འོང་། །ཉེས་པར་ཞུགས་པའི་གཉིས་འཐུང་དགྲ་བོ་སྐྲག་བགྱིད་རིང་དུ་གཡོ་བའི་སྤྱན་གྱིས་ཀུན་ཏུ་གཟིགས་གྱུར་པ། །པད་སྐྱེས་རལ་པའི་ནགས་ཉལ་འཇིག་རྟེན་དབང་པོའི་ཞབས་ཀྱི་སེང་གེ་ཁྱེད་རྣམས་ཞི་བའི་སླད་གྱུར་ཅིག །ཤིན་ཏུ་དྲི་མ་
མེད་ཀྱང་མི་ཆུང་ཡང་བ་མིན་ཡང་མྱུར་དུ་ཕྱོགས་ཀྱི་སྒོ་རྣམས་འགོད་པར་བགྱིད། །འཇིག་རྟེན་གསུམ་པོ་ཀུན་དུ་དགའ་བར་བགྱིད་ཀྱང་སྟོབས་ལྡན་ཕ་རོལ་ལུས་ཁྱབ་ཡོངས་སུ་གདུང་བའི་རྒྱུ། །མཛེས་སྡུག་འགྱུར་བྱེད་བྱུག་པར་ལྡན་ཡང་ཕུལ་བྱུང་ཡིད་འོང་རྒྱལ་བའི་འོད་ཟེར་དག་གིས་མེ་
ཏོག་ནི། །རྣམ་རྒྱས་ཕྲེང་བའི་ཐོད་ཅན་ཞབས་ཀྱི་འོད་ཟེར་ཁྱེད་རྣམས་ཕོངས་པའི་ཟུག་རྔུ་འགོག་པར་མཛད་གྱུར་ཅིག །གང་ལ་རྒྱལ་པོའི་རྒྱལ་པོས་མེ་ཏོག་རྣམས་དང་འཕྲོག་བྱེད་ཀྱིས་ཀྱང་ཡོངས་འདུའི་ལྗོན་ཤིང་ཡིད་འཕྲོག་རྣམས། །ཟླ་བས་ཀུན་དགའ་ལྡན་པར་ཀུནྡ་རྣམས་དང་ནོར་ལྷའི་རྒྱུད་
ཀྱིས་འོད་ལྡན་ནོར་བུ་མང་པོའི་ཚོགས། །ཞབས་ལྡན་དགའ་བས་པཱ་ལ་ཤ་སྟེ་དེ་ལྟར་ལྷ་ཡི་སྐྱེ་བོས་མཆོད་པའི་ཁྱད་པར་རབ་མང་རྣམས། །རྗེས་སུ་ཁྲིད་པའི་སྙན་ངག་ལྟ་བུས་མཆོད་བགྱིད་ཕྱག་ན་ཆུ་སྐྱེས་ཞབས་དེས་ཁྱེད་རྣམས་སྲུང་གྱུར་ཅིག །འོད་རྣམས་རྣམ་པར་གསལ་བ་ཉི་མས་བསྟོད་བགྱིས་
སེན་མོ་རྣམས་ལ་མཐོ་རིས་མགོན་པོ་ཡིས། །སོར་མོའི་རྩེ་མོའི་ཚོགས་ལ་དབང་ཕྱུག་འདྲེན་བྱེད་རྣམ་པར་མི་གཡོ་མཛེས་པའི་མཐའ་ལ་མཐར་བྱེད་ཀྱང་། །ལྷ་ཡི་འཇིག་རྟེན་རྣམས་ལ་གང་གི་ཐུན་མོང་མིན་པའི་མཛེས་པ་ཕུལ་དུ་བྱུང་བའི་ཡུལ་རྣམས་ནི། །མ་ལུས་མཐོང་བའི་ནུས་པ་ཡོད་མིན་མགོ་
ལ་སངས་རྒྱས་གཟུགས་ཀྱིས་མཚན་པའི་ཞབས་དེས་རྒྱལ་གྱུར་ཅིག །ཡང་དག་རྫོགས་པའི་སངས་རྒྱས་འོད་ཀྱིས་རབ་གསལ་རལ་པའི་ཚོགས་ཀྱི་རྩི་ཤིང་ལྡན་པ་ཆེ་བའི་སྐུ། །འཁོར་བའི་ཆུ་གཏེར་གཏིང་དུ་འཇུག་བྱེད་སྐྱེ་བོའི་ཚོགས་ཀྱི་ཤིན་ཏུ་ལྕི་བའི་ས་གཞི་རབ་གནོན་ཞིང་། །མཐའ་རྣམས་

73-1-101a

དག་ལས་ཡང་དག་བྱུང་བ་ཡིད་འོང་ཟབ་ཅིང་དམར་བའི་ཁམས་ཆེན་ལྡན་པའི་ཆུ་རྣམས་འབབ། །གྲུབ་པའི་དོན་མཐུན་གྱིས་བསྟེན་པདྨོ་འཛིན་པ་རི་བོའི་ཞབས་ནི་ཁྱེད་ཀྱི་བཟང་པོའི་སླད་གྱུར་ཅིག །འཁོར་བའི་ལམ་ལ་རབ་བགྲོད་འགྲོ་བ་མཐའ་དག་ངལ་ཞིང་དུབ་ལྡན་ཞི་བའི་རྒྱུ་ཡི་གྲིབ་
བསིལ་ཅན། །རབ་ཏུ་མཛེས་པའི་ཡལ་ག་རང་གསལ་སེན་མོའི་མེ་ཏོག་འཛིན་ཅིང་འདོད་དོན་འབྲས་བུ་དང་ལྡན་པ། །ལྷ་ཡི་སྐྱེ་བོས་རབ་བཏུད་མགོ་ཡི་ཕྲེང་བས་བསྐྱོར་བའི་རྩ་བར་ནོར་བུའི་བུམ་པ་གང་བ་ཡི། །དྲི་མེད་འོད་ཀྱི་ཆུས་བྲན་འཇིག་རྟེན་དབང་པོའི་ཞབས་ཀྱི་ལྗོན་ཤིང་ཚོགས་ཀྱིས་ཁྱེད་རྣམས་
སྲུང་གྱུར་ཅིག །རྩ་བ་རབ་བརྟན་ཉོན་མོངས་ཚོགས་པའི་དགྲ་བོ་སྟོབས་ལྡན་སྟོབས་རྣམས་རྩད་བཅད་རྙེད་པ་ཆེན་པོ་ཡིས། །རངས་པ་ཐོབ་གྱུར་རྣམ་པར་སྒེག་ལྡན་སྟོབས་ལྡན་ལས་རྒྱལ་མགོ་ཡི་གནས་ལ་གཡོ་ཞིང་རྣམ་པར་རྩེ། །ཆུ་སྐྱེས་རྒྱས་པའི་རྒྱུན་ལ་ཆགས་ཤིང་ཀུན་དུ་སྲེད་ལྡན་དར་དིར་མེད་
པོ་རབ་ཏུ་སྒྲོགས་པ་ཡི། །བུང་བའི་ཚོགས་པ་མི་བཟློགས་མཚུངས་མེད་དྲི་བྲལ་པདྨ་འཛིན་པའི་ཞབས་ཀྱིས་ཁྱེད་ལ་སྲུང་གྱུར་ཅིག །འཇིག་རྟེན་གསུམ་གྱི་དབང་ཕྱུག་དཔལ་འབྱོར་ལག་ལྡན་ཆུང་མ་གཡོ་བའི་སྡོམ་ཐག་གདགས་སའི་དབྱུག་པ་སྟེ། །ཉོན་མོངས་སྡུག་བསྔལ་སྦྲུལ་གདུག་སོས་
ཟིན་འགྱེལ་བའི་འགྲོ་བ་མཐའ་དག་སྐྱོང་བར་བྱེད་མཁས་ནམ་མཁའ་ལྡིང་། །མི་ཆུང་དམྱལ་བའི་གྲོང་ཁྱེར་ནང་ན་བཟློག་དཀར་འཇུག་པའི་སྒོ་སྡོམ་རབ་བརྟན་སྲིད་པའི་ཆུ་གཏེར་ནི། །ལེགས་པར་རྒལ་བའི་གདོས་པ་གཅིག་པུ་འཇིག་རྟེན་དབང་པོའི་ཞབས་ནི་ཁྱེད་རྣམས་འབྱོར་པའི་སླད་གྱུར་ཅིག །
འདུན་ས་གང་དུ་ལྷ་ཡི་རོལ་མོ་མཁན་རྣམས་མཛེས་པས་ཡིད་བཟུང་མཆོད་པ་བགྱིད་པར་མི་ནུས་ཏེ། །གང་རྣམས་རྣམ་པ་ལས་འདས་སིལ་སྙན་རིག་བྱེད་ཁ་ན་མ་ཐོ་མེད་རྣམས་དེ་ཚེ་རྣམ་པར་ཉམས། །དམན་པ་མིན་པའི་གླུ་དབྱངས་མི་ལེན་ཉམས་རྣམས་དག་གིས་སྤྲས་པའི་དངོས་པོ་ཉིད་མིན་ངོ་བོར་གྱུར། །
དེ་ལྟས་བརྒྱ་བྱིན་ནང་དུ་བཞད་གྱུར་ལྟ་བས་མི་ངོམས་གཟུགས་ཅན་མཚོ་སྐྱེས་ཅན་དེས་རྒྱལ་གྱུར་ཅིག །དཔལ་ལྡན་བར་མེད་རབ་ཏུ་མཚུངས་པ་མེད་ཅིང་ཆེར་གྱུར་འདོད་པ་ཆེན་པོའི་ཁང་པ་མཆོག་གི་སར། །ལྷག་པའི་སྟོབས་ལྡན་གཡོན་གྱི་རིམ་པར་མི་ཟད་འདུས་པའི་བདུད་ཀྱི་ཡིད་རྣམས་རབ་

73-1-101b

ཏུ་འཇོམས་མཛད་ཅིང་། །སེམས་ཅན་དགའ་བདེ་རབ་བཞེད་གྲགས་པ་དང་ནི་འཇམ་པའི་ཐུགས་ལྡན་ངལ་བས་སྐྱོ་བར་མི་འགྱུར་བ། །མགོ་ལ་འོད་དཔག་མེད་པས་ཁྱེད་ཀྱི་གཏི་མུག་གིས་བསྐྲུན་རབ་འཇོམས་རྒྱ་ཆེའི་འཇིགས་པ་འཇོམས་གྱུར་ཅིག །བརྟན་པའི་ར་བ་འཇིགས་སུ་རུང་བས་བསྐོར་ཞིང་སྒྲ་
ལྡན་བཅིང་བས་དམ་བཅིངས་རིང་པོར་གསལ་བའི་སྒྲ། །དྲག་པོ་ཤིན་ཏུ་འཇིགས་རུང་དམྱལ་བའི་གྲོང་ཁྱེར་ཉིད་ཀྱི་རྣམ་པར་འཛིན་པའི་དགྲ་བོ་རྣམས་དག་ནི། །བཙོན་ཁང་ནང་དུ་གདུང་བ་དྲག་པོས་ཤིན་ཏུ་འཇིགས་པར་གྱུར་རྣམས་དྲན་ནས་སྐྱབས་ལ་རབ་གཤེགས་ཤིང་། །བཀུར་སྟིར་སྒྲུབ་མཛད་
སྙིང་རྗེ་རབ་ལྕི་འཇིག་རྟེན་དབང་ཕྱུག་གང་ཡིན་དེ་ཡིས་ཁྱེད་རྣམས་སྲུང་གྱུར་ཅིག །བསྐལ་པའི་མཐའ་ཡིས་དབའ་རླབས་ལྟར་འཕྱོ་གཡོ་བའི་རླུང་གི་སྟོབས་ཀྱིས་རབ་གཙུབས་དབའ་རླབས་ཕྲེང་བ་རྣམས། །སྒྲ་དྲག་སྒྲོགས་ཤིང་ཐོར་ཐོར་དང་ལྡན་ཆུ་སྲིན་ཚོགས་ཀྱིས་གང་བ་འཇིགས་རུང་ཆུ་ཡི་ཆུ་
གཏེར་ནི། །གང་ཞིག་དམིགས་པ་ཉིད་ན་མཐོན་མཐིང་དྲི་མ་མེད་པའི་ཚོགས་ཆེན་བཀྲམ་པ་རྩེ་དགའ་དག་གི་གནས། །ཉམས་རབ་དགའ་བར་འགྲུབ་འགྱུར་པདྨོ་ཅན་དེ་ཤིན་ཏུ་མྱུར་བར་འགྲོ་རྣམས་སྲུང་བའི་སླད་གྱུར་ཅིག །དུ་བའི་ཚོགས་ཀྱི་འཆིང་བས་བཅིངས་པས་ཟླ་བ་ཉི་མའི་འོད་ཟེར་ཉམས་ཤིང་
འབྲས་བུ་མེད་པར་བྱེད། །འགོག་པ་བསྐྱེད་པའི་བགེགས་ལ་མཁས་པའི་ལྷ་ཡི་ཆུང་མ་རྣམས་ཀྱང་བརྟེན་པའི་མཐུ་རྣམས་ཉམས་འགྱུར་བའི། །དུ་བའི་རྒྱལ་མཚན་ཅན་ཡང་གང་གི་མིང་བརྗོད་རྒྱུན་འཛིན་འཛིན་བྱེད་རྣམས་ལ་རབ་ཏུ་ཉམས་འགྱུར་བ། །སངས་རྒྱས་འཛིན་པས་ཁྱེད་ལ་ཉམས་དགར་རྒྱུན་ཆད་
མེད་ཅིང་སྒྲུབ་བྱེད་དང་བཅས་ལེགས་པ་སྒྲུབ་གྱུར་ཅིག །ཁྲོས་པས་རབ་བསླང་ལག་པ་དུས་ཀྱི་མཚོན་ཆ་དང་འདྲ་འཇིགས་སུ་རུང་བའི་ཕུད་ཅེས་སྒྲོགས་པར་བྱེད། །ཆང་གིས་བསྒོས་པའི་འགྲམ་པ་དག་ཏུ་བུང་བའི་ཚོགས་གཏིབས་གློ་བུར་གནག་གྱུར་དར་ཞིང་ཆེ་བའི་ལུས། །ལག་ལྡན་དབང་པོ་འོང་བ་གང་
གི་མཚན་གྱི་ལྕགས་ཀྱུ་བརྣག་དཀས་བཏབ་ནས་ཞུམ་ཞིང་སྐྲག་འགྱུར་བ། །འཇིག་རྟེན་དབང་པོའི་ཐུགས་རྗེ་རབ་འདོད་ཡོ་བྱད་དེ་ནི་ཁྱེད་ཀྱི་འདོད་པའི་བྱ་བ་མཛད་གྱུར་ཅིག །ཕུད་ཅེས་དབུགས་ནི་འཇིགས་རུང་ཁྲོ་བའི་རང་གནས་ཟ་བས་སྲེག་བྱེད་མི་ཆུང་དུག་གི་དུ་བར་ལྡན། །མོ་ཡི་བཟའ་བ་མཐོང་བས་མགོ་བོ་

73-1-102a

ཤིན་ཏུ་རབ་ཏུ་གདེངས་གྱུར་ཉེས་བྱེད་སོ་རྩེ་ལྡན་པ་རྣམས། །རང་གི་མཚན་ནི་དུ་གསོ་དབང་པོའི་དགྲར་གྱུར་བློ་ལ་རྣམ་པར་བཞུགས་པས་ནུས་མེད་ཉམས་འགྱུར་བ། །འཇིག་རྟེན་དབང་དེ་ཀུན་གྱི་ཉོན་མོངས་ཕུང་པོ་ཤིན་ཏུ་མི་བཟད་མངོན་གྱུར་ཞི་བའི་སླད་གྱུར་ཅིག །སྤོས་དྲིས་རབ་ཏུ་བསླང་བའི་
དྲེགས་པ་ཆེ་འཛིན་གླང་ཆེན་ཚོགས་རྣམས་ཟ་བར་སྒྲོགས་ཤིང་འཇིགས་པའི་ཤུགས། །ཁྲོ་བས་རྩེ་གཅིག་ཏུ་འགྲོ་མགྲིན་པའི་ཕུག་ཟབ་དག་ནས་དྲག་པོའི་ངར་སྒྲ་ཟབ་མོ་སྒྲོགས་བྱེད་པའི། །རི་དགས་དབང་པོ་འཁོལ་བྱེད་ཀྱིས་བཀོལ་འོས་པ་ཉིད་དུ་གང་གི་ཡོན་ཏན་བརྗོད་པས་ལྡན་འགྱུར་བ། །ཡན་ལག་མཆོག་
འཐོར་བདེ་གཤེགས་གནས་ཤིང་རྣལ་འབྱོར་ལྡན་དེས་ཁྱེད་ཀྱི་ངན་པར་འབྲེལ་པ་སེལ་གྱུར་ཅིག །རབ་མང་གནོད་པས་རྗེས་སུ་དཔག་བྱ་བརྩེ་བ་ཟད་པའི་སྙིང་ལྡན་འཇིགས་པ་སྒྲུབ་པར་བྱེད་གྱུར་པ། །མཁའ་ལ་གནས་ཤིང་རི་ཡིས་ཉེ་བར་གཞལ་བྱ་བུང་བ་མ་ཧེ་མངོན་འགྱུར་འོད་ལྟའི་ལུས་ཀྱི་ཚོགས། །
སྦྱོར་ཐབས་ལེགས་ལྡན་སྒྱུ་མའི་རང་བཞིན་ལྟ་བུ་གང་ཞབས་བརྗོད་པས་དམན་ཞིང་བརྩོན་འགྲུས་མེད་པ་དང་། །རྣམ་པར་ཉམས་པར་བགྱིད་ལྡན་བདེ་བར་གཤེགས་པའི་གནས་དེས་ཁྱེད་རྣམས་རྣམ་པར་རྒྱལ་བའི་སླད་གྱུར་ཅིག །གླང་ཆེན་ཚོགས་ཀྱི་ཆུ་སྲིན་རབ་རྒྱུ་རལ་གྲི་མདུང་རིངས་འོད་དང་ལྡན་
པའི་དབའ་རླབས་འཁྲུག་ཅིང་རྒྱུག །རབ་བསླང་དཀར་ཞིང་གཡོ་བའི་ཏོག་གི་དབུ་བ་ལེགས་པར་གསལ་ལྡན་སྐྲག་པའི་གནས་ཀྱི་སར་གྱུར་པ། །མཚུངས་མེད་སྒྲ་རྣམས་ཡང་དག་སྒྲོགས་པའི་སྡེ་བརྟན་ཆུ་བོ་དག་ནི་གང་ཞིག་བརྟན་པ་ལེགས་པའི་གྲུས། །སྤྲོ་བ་དང་བཅས་ཡང་དག་རྒལ་གྱུར་མཚོ་
སྐྱེས་ཅན་དེས་ཁྱེད་ཀྱི་བདེ་མིན་བདེ་བར་སེལ་གྱུར་ཅིག །ས་འཛིན་ཚོགས་རྣམས་འབྱེད་པའི་མཐུ་ལྡན་འོད་ཟེར་རབ་མང་འབྱོར་པའི་འོད་ལ་སྤྱོད་ཅིང་འཇིགས་བྱེད་པ། །རབ་ཏུ་བཀྲ་བའི་མེ་འོད་རྣམ་འཛིན་འཇིགས་པས་ཟིལ་གནོན་འབྱུང་པོ་རྣམས་ནི་རྨོངས་ཤིང་འཁྲུལ་བསྐྱེད་པ། །རྡོ་རྗེ་འཇིགས་
པའི་སྣོད་ཀྱི་མངོན་དུ་ལྷུང་བ་དག་ནི་གང་ལ་གུས་པའི་མཐུ་ལས་མྱུར་ཉིད་དུ། །རྣམ་པར་ཉམས་པའི་སར་འགྱུར་མཛེས་ལྡན་མཚོ་སྐྱེས་འཛིན་པ་དེ་ཡིས་ཁྱེད་ཀྱི་སྲིད་པ་འབྱེད་གྱུར་ཅིག །ཀུན་ཏུ་གཟིར་བས་བརྟེན་ཉམས་འཕོ་བའི་སྒྲུབ་བྱེད་ཉེ་གྱུར་ལྷ་ངན་ཁྲོས་པས་ཁ་རྗེ་ཞན་གྱུར་པ། །ཟུག་གཟེར་

73-1-102b

བརྣག་དཀའ་དྲག་པོས་འགོག་བྱེད་རྣམ་པ་སྣ་ཚོགས་མང་པོའི་ནད་ཀྱིས་རབ་ཏུ་གཟིར་བའི་ལུས། །གང་གིས་བསམ་གཏན་ངེས་བརྗོད་བདུད་རྩི་འཛིན་བྱེད་ཀྱིས་བཟུང་འགྲོ་བ་བློ་ལྡན་ཟུག་རྔུས་མི་བརྫི་བར། །ལྷག་པར་དགའ་བསྐྱེད་མགོ་ལ་སངས་རྒྱས་དེ་ཡིས་ཁྱེད་རྣམས་བློ་ནི་བྱང་ཆུབ་སླད་དུ་སྲུང་གྱུར་
ཅིག །རིང་ནས་འཁོད་བཞིན་གཤེགས་པའི་ས་བདག་མཚུངས་མེད་དགྲ་རྣམས་ཉམས་ཤིང་རབ་ཏུ་གདུང་བར་བྱེད་པའི་གླུ། །དྲག་ཏུ་ལེན་ཅིང་ཁྲིམས་ལུགས་གྲགས་པ་ཕ་མེས་བདག་པོའི་གྲགས་པ་ལས་རྒྱལ་ཁྲིམས་ལུགས་དག་དང་ལྡན། །འབྱོར་པ་རྣམ་ཀུན་བརླག་པ་བསྐྱེད་པའི་རྒྱུར་གྱུར་ཁྲོས་
པའི་བློ་ཅན་གང་ཞབས་བརྗོད་པའི་ནུས་པ་ཡིས། །མཆོག་ཏུ་མཛའ་བར་འགུགས་བྱེད་རྒྱལ་བའི་ཁྱུ་མཆོག་གནས་དེས་ཁྱེད་ཀྱི་འཇིགས་པ་ཡང་དག་འཕྲོག་གྱུར་ཅིག །ཚངས་པ་དམན་པ་ཉིད་གྱུར་བླ་མ་ཡང་ནི་བླ་མ་མིན་དང་མ་ཉམས་པར་བརྗོད་ཉམས་པ་ཉིད། །ཁྱབ་འཇུག་མི་སྨྲའི་ངང་ཚུལ་དབང་
ཕྱུག་ཀྱང་ནི་ཚིག་རྣམས་རྣམ་པར་འགོད་པའི་ཁེངས་པ་མེད་གྱུར་ལ། །ཚིམ་ཞིང་གསལ་བར་བསྟོད་འདོད་རྣམས་ཀྱང་དེ་ལྟར་ལྷ་རྣམས་གང་གི་ཡོན་ཏན་བརྗོད་ལ་མཁས་མིན་ཏེ། །རྒྱལ་བའི་ཐུགས་ཀྱི་སྤྱོད་ཡུལ་ནང་གི་ཡོན་ཏན་ཚོགས་མངའ་ཕྱག་ན་པདྨ་དག་གིས་རྒྱལ་གྱུར་ཅིག །ཡབ་ཀྱིས་ཡ་
མཚན་ལ་སྟེ་ལྷ་དགྲའི་དགྲ་ཡིས་སྤྱོད་པ་དང་ནི་མིག་གསུམ་ལྡན་པས་མིག་དག་ལ། །རིགས་ཀྱི་དགྲ་ཡིས་རིགས་ལ་བླ་མ་ཡིས་ཀྱང་གཤེགས་པ་ལ་སྟེ་མཚན་མོའི་བདག་པོས་སྐུ་ལའོ། །གྲོགས་པོ་ཡིས་ནི་བྱམས་པ་ལ་སྟེ་ཨ་ཏྲའི་བུ་ཡིས་འགྲོ་ཀུན་བུ་ལྟར་གྱུར་པའི་མཉེས་གཤིན་ལ། །འདི་བསྟོད་
བསྟོད་པའི་སྣོད་གང་མཐའ་ཡས་སྦྱིན་མཛད་ཕྱག་ན་ཆུ་སྐྱེས་དེ་ཡིས་ཁྱེད་རྣམས་སྲུང་གྱུར་ཅིག །གང་ལ་ཚངས་པས་རང་གི་ཞལ་རྣམས་མང་པོ་ཉིད་ལས་མང་པོ་ལེགས་པར་བཞད་དང་ལྡན་པས་བསྟོད། །ཀུན་དགས་ཁེངས་ཤིང་ཕུང་པོས་ཀྱང་ངོ་གླུ་རྣམས་དག་གི་མགོན་པོས་ཀྱང་ནི་སྤྱི་བོས་
འདུད་པར་བགྱིད། །བརྒྱ་བྱིན་འདྲེན་བྱེད་བརྒྱ་ཕྲག་བཅུ་རྣམས་བསྔགས་པ་བགྱིད་ཅིང་གང་ལ་རྣམ་གཟིགས་རྒྱུན་ཆད་མེད་པར་ནི། །འདྲེན་བྱེད་དགའ་བས་ཕྱག་འཚལ་བསྟོད་པའི་སྣོད་གྱུར་འཇིག་རྟེན་གཉེན་དེས་འཇིག་རྟེན་གསུམ་རྣམས་སྲུང་གྱུར་ཅིག །པདྨ་འཛིན་པའི་གདུང་མེད་རབ་

73-1-103a

གསལ་འཇིག་རྟེན་པ་རྣམས་སྣང་བའི་དོན་དུ་ཡོད་པ་མིན་ནམ་ཞེས། །མཁའ་ཡི་ལམ་ལ་ཉི་མའི་འགྲོན་པོ་འདི་ནི་ངལ་ཞིང་སྣང་བྱེད་འོད་ཟེར་འབྲས་བུ་མེད་པར་གླེང་། །བློ་ཡི་ནོར་ཅན་བློ་ལྡན་རྣམས་ཀྱིས་བསྟོད་པ་བགྱིས་པས་འདུན་སར་རགས་པའི་སྣང་བ་སྒྲུབ་བྱེད་ལ། །གང་གི་བཀའ་དྲིན་
མྱུར་དུ་དགྲ་རྣམས་ཉམས་པར་བྱེད་པ་དེ་ལས་འགྲོ་བ་དགེ་ལེགས་ལྡན་གྱུར་ཅིག །ཕྱག་འོས་གང་ལ་ཕྱག་འཚལ་བཀོད་པ་ལས་ཀྱང་བསོད་ནམས་སྣོད་རྣམས་ཤིན་ཏུ་མཐོ་བ་ཉིད་འགྱུར་ལ། །ཐུན་མོང་མིན་པའི་མཆོད་འོས་གཅིག་པུ་མཆོད་ཀྱང་གུས་པའི་སྣོད་རྣམས་ཉེ་བར་བསགས་པ་ཤིན་ཏུ་མང་། །
གང་གི་བསམ་གཏན་གནས་པ་དྲན་པ་ཡིས་ཀྱང་འབྱུང་པོའི་འཇིགས་པ་དག་ནི་འཕྲལ་ལ་བརྗེད་འགྱུར་བ། །མཐའ་ཡས་བསམ་གྱིས་མི་ཁྱབ་འཇིག་རྟེན་ཕན་པའི་སྒྲུབ་ལམ་འཇིག་རྟེན་མགོན་དེས་ཁྱེད་རྣམས་སྲུང་གྱུར་ཅིག །དབང་པོའི་རྡོ་རྗེ་བརྫུན་ཏེ་ལྷ་ཡི་དགྲ་རྣམས་ཉམས་པར་གང་གིས་བྱས་ཤིང་སྟོབས་
ལྡན་འཕྲོག་བྱེད་ནི། །ཤིན་ཏུ་རྣོ་ཞིང་ཡིད་འཕྲོག་མངོན་པར་མེ་ཏོག་མདའ་ཅན་དག་ལ་མེ་ཏོག་ཅན་ནི་འབྲས་བུ་མེད། །ཁྱབ་འཇུག་འཁོར་ལོ་ལ་ནི་འཁོར་ལོ་དོན་ཡོད་མིན་ཞེས་སྐྱེ་བོའི་ཚོགས་ཀྱིས་ངེས་པར་བརྗོད་ཅེས་ནས། །མཚོན་ཚོགས་བཟུང་བ་མེད་པར་དགྲ་ཡི་སྐྱེ་བོ་དགའ་བས་བཅོམ་པ་མཚོ་སྐྱེས་ལྡན་
པས་རྒྱལ་གྱུར་ཅིག །འཇིག་རྟེན་འདས་པའི་བདེ་བ་འཛིན་པར་གྱུར་ཀྱང་འགྲོ་བའི་སྡུག་བསྔལ་དྲག་པོ་དག་གིས་སྡུག་བསྔལ་ལྡན། །རྟག་ཏུ་རྗེས་སུ་ཆགས་པ་བཏང་བར་གྱུར་ཀྱང་སྐྱབས་མེད་སྡུག་པའི་སྲོག་ཆགས་གཏོང་བ་དག་ལས་གྲོལ། །འཇིག་རྟེན་གསུམ་གྱི་མགོན་པོ་ཉིད་དུ་གྱུར་ཀྱང་མི་མཉམ་
སྲེད་ལྡན་འགྲོ་ལ་བརྟེན་ཞིང་འདུད་པ་བགྱིད། །མཚུངས་བྲལ་བསམ་ཡས་སྤྱོད་པ་སྒྲུབ་མཛད་མགོ་ལ་སངས་རྒྱས་གང་དེས་ཁྱེད་རྣམས་ཡུན་རིང་སྲུང་གྱུར་ཅིག །རྒྱུན་མི་འཆད་པར་འཇིག་རྟེན་གསུམ་དུ་དཔེ་མེད་མཉེས་གཤིན་སྣུམ་བླུགས་སྦྱོར་བ་དག་ལས་ཞི་བར་ནི། །གང་ཞིག་མི་གཤེགས་སྟོབས་ལྡན་
མི་ཆུང་མུ་སྟེགས་རླུང་འཚུབས་དག་གིས་རབ་ཏུ་རྣམ་པར་མི་གཡོ་ཞིང་། །གཞན་ཕན་རྒྱུ་ལ་བརྩོན་པ་རབ་བརྟན་སྡོང་བུ་མི་ཉམས་འོད་ཟེར་དང་ལྡན་སྲིད་པའི་ཁང་པར་ནི། །གཏི་མུག་མུན་ནག་རབ་ཏུ་འཐིབས་པ་སེལ་བྱེད་འཇིག་རྟེན་དབང་པོའི་སྒྲོན་མ་དེ་ཡིས་རྒྱལ་གྱུར་ཅིག །གང་དུ་འདི་ནི་ཀུན་ལ་བྱམས་ལྡན་

73-1-103b

མི་བཟད་མང་པོར་གྱུར་པའི་ཉོན་མོངས་དགྲ་རྣམས་ཅི་ལ་བསྲེག །གང་དུ་གྲོལ་བར་ནུས་པའི་མཐུ་ལྡན་སྙིང་རྗེའི་ཞགས་པ་བརྟན་པོས་གཡོ་བ་མེད་པར་ཅི་ལ་འཆིང་། །གང་དུ་བཏང་སྙོམས་ཕྱོགས་ཉིད་ལ་བརྟེན་གཞན་ལ་ཕན་པར་བགྱིད་སླད་ཅི་ལ་འཁྲུག་སྟེ་དེ་ཡི་ཕྱིར། །རྣམ་བཀྲ་ངོ་མཚར་ཕྱག་ན་པདྨའི་སྤྱོད་
པ་འགྲོ་ལས་འདས་པས་ཁྱེད་རྣམས་དམན་ལས་རྒྱལ་གྱུར་ཅིག །ཀུན་ལ་ཕན་ཞིང་ཀུན་གྱི་རང་བཞིན་དུ་གསལ་རྒྱ་ཆེ་ཚུལ་ལྡན་དུས་ཀུན་དུ་ནི་ཀུན་གྱི་མགོན། །ཀུན་གྱི་དོན་ཆེན་ཐམས་ཅད་སྒྲུབ་སླད་གང་ཞིག་འདུལ་བའི་སྒྲུབ་བྱེད་རྣམ་པ་ཀུན་ནི་སྟེར་བར་བགྱི། །བླ་མར་གྱུར་ཅིང་ཆེ་བའི་ཡོན་ཏན་ཀུན་གྱིས་ཀུན་
ལས་འདས་ཤིང་ཁེངས་པ་ཀུན་ནི་ཞུམ་པར་བགྱིད། །ཀུན་ནི་ཀུན་ལ་རབ་སྦྱིན་མགོ་ལ་ཀུན་མཁྱེན་དེས་ནི་སྲིད་ཆེན་ཁྱེད་རྣམས་འབྲས་དང་བཅས་གྱུར་ཅིག །དབང་པོ་རྗེ་བོ་སྐྱེ་དགུ་རྣམས་བདག་འཆི་མེད་བླ་མ་འཇིག་རྟེན་སྐྱོང་བ་དག་དང་དབང་པོ་ཆེ། །འོད་ལྡན་དང་ནི་དགྲ་ཐུལ་དབྱུག་པ་གཞན་
ལས་རྒྱལ་བའི་སྟོབས་ལྡན་ལས་རྒྱལ་ནོར་སྦྱིན་རྒྱལ་བའི་ཞབས། །དོན་ལྡན་མིང་གི་སྣོད་ནི་རྒྱལ་བ་ཉིད་ཅེས་ཁོང་བཤད་ཀྱིས་ཁེངས་འཁོར་གྱི་སྐྱེ་བོས་སྨྲས་པ་ལས། །ལྷ་མི་སྐྱེ་བོ་ངོ་མཚར་གྱུར་རྣམས་གང་ལ་ཕྱག་བགྱིད་ཕྱག་ན་ཆུ་སྐྱེས་དེ་ཡིས་རྒྱལ་གྱུར་ཅིག །གཙོ་བོ་འཕགས་པ་རྣམས་ཀྱི་མཆོག་
གྱུར་བསྡོམས་པ་དག་ནི་ཕ་རོལ་ཕོངས་པ་རབ་ཏུ་སེལ་བའི་མཆོག །རབ་ཏུ་མང་བའི་མཆོག་སྦྱིན་རྒྱ་ཆེའི་ཚོགས་ཀྱི་ཆུ་ཡི་ཆར་དྲག་གསལ་ཞིང་ཆེ་བའི་རྒྱུན་ཚོགས་ཀྱི། །སྦྱིན་པ་མི་དམན་རྒྱུན་འཛིན་གྱུར་ཅིང་བཟློག་དཀར་རབ་བརྟེན་བདུད་ཀྱི་དགྲ་ཡི་དཔའ་བོས་མི་ཐུལ་བ། །དཔག་མེད་འོད་ཟེར་འཛིན་པའི་
དཔའ་བོ་ཡིས་ནི་ཁྱེད་རྣམས་དག་གི་དཔའ་བོས་དགྲ་རྣམས་བཟློག་གྱུར་ཅིག །གང་དུ་ཕྱག་ན་པདྨོ་མཛེས་ལྡན་ནུས་པ་མཆོག་གྱུར་མཐུ་དང་ལྡན་ཞིང་རྟག་ཏུ་སྦྱོར་བ་ལ། །འཁོར་བའི་ཆུ་བདག་ལམ་ཞུགས་འཇིག་རྟེན་མགོན་པོ་མཐའ་དག་མགོན་དང་བཅས་ཞེས་རྣམ་པར་བསམས་ནས་ནི། །སངས་རྒྱས་
སྙིང་རྗེ་མི་ཆུང་ཀུན་གྱི་སྒྲོན་མར་གྱུར་པར་དོན་དང་ལྡན་པ་དམ་བཅའི་ཁུར་པོ་དག །རྣམ་པར་དོར་ནས་ཡང་ཞིང་མྱ་ངན་འདས་པ་འཐོབ་པར་དགྱེས་འཕེལ་དེ་ཡིས་ཁྱེད་རྣམས་སྲུང་གྱུར་ཅིག །འགྲོ་བའི་བྱ་བའི་ཚོགས་ཀྱི་ཁུར་ནི་བླ་མར་གྱུར་པའི་བདེ་གཤེགས་བཞིན་དུ་གཙུག་གིས་ལེགས་པར་

73-1-104a

བླངས། །བསྔགས་པར་འོས་པ་པདྨོའི་རྒྱན་ནི་གུས་པའི་སྣོད་ལ་རང་ཉིད་བཞིན་དུ་ལག་ཏུ་ལེགས་པར་གཏོད། །སེམས་ཅན་ཚོགས་ཀྱིས་ཞི་བ་དག་ནི་དམྱལ་མེ་བཞིན་དུ་ཡུན་རིང་འཐོབ་པར་བགྱིད། །གང་གི་ཉོན་མོངས་རབ་འཆིང་རྣམས་ནི་ཤིན་ཏུ་མི་བཟད་འགྲོ་བ་བཞིན་དུ་ཞི་མཛད་
དེས་ཁྱེད་སྲུངས། །གང་ཞིག་སྒྱུ་ཅན་མིན་ཡང་རང་བཞིན་སྣ་ཚོགས་མཐའ་ཡས་སྟོན་བྱེད་གསལ་བར་གྲགས་པའི་རྒྱུ་དང་ལྡན། །འཇིགས་ཀུན་ཡང་དག་ཞི་ཡང་ཤིན་ཏུ་སྙིང་རྗེ་ལྡན་པ་ཉིད་ཀྱིས་འཇིགས་པར་གྱུར་པའི་ཀུན་སྤྱོད་མཛད། །ཁྲོ་དང་བྲལ་བ་ཡིན་ཡང་གདུག་པའི་བསམ་པ་འདུལ་ལ་
མཁས་པའི་ཁྲོ་བ་རྟག་ཏུ་རྗེས་སུ་འབྲེལ། །བསམ་གྱིས་ཁྱབ་པ་མིན་ཡང་ཆེན་པོས་བསམ་བྱ་མགོ་ལ་རྫོགས་སངས་རྒྱས་མཛེས་ལྡན་དེས་རྒྱལ་གྱུར་ཅིག །ཡན་ལག་དམ་པ་ཁོ་ན་མ་ལགས་སྐུ་ལུས་མཆོག་ཀྱང་དཔག་མེད་འོད་ཀྱིས་མངོན་པར་དགའ་བ་འཛིན། །གང་གི་པདྨོ་ཁོ་ན་མ་ལགས་དགྲ་
སྡེ་དག་ཀྱང་ཅི་འཇིགས་བཟོད་པར་དཀའ་བ་དག་ཀྱང་སནྣཱ་ལམ། །གང་གིས་རལ་པ་ཁོ་ན་མ་ལགས་ནུས་པ་དག་ཀྱང་འགྲོ་བའི་དགྲ་འཇོམས་བྱེད་པར་ཆས་ཤིང་བསྡངས། །མཁས་པ་འཇིག་རྟེན་མགོན་འདིས་གཤིན་རྗེ་ཁྲོས་པའི་བཞིན་ནི་སྣང་བ་དག་ལས་ཁྱེད་རྣམས་སྲུང་གྱུར་ཅིག །
མ་ལུས་སེམས་ཅན་དོན་གྱི་བྱ་བ་བགྱི་སླད་ནུས་པ་དག་ནི་ཀུན་ནས་རབ་ཏུ་བསྟར་བྱས་ཤིང་། །ཆས་ཀྱིས་བསྡམས་པ་གང་གི་ཚེ་ན་སྲིད་པའི་ཆུ་གཏེར་དག་ནི་སྐམས་ཀྱི་དོགས་ནས་འདར་བྱེད་ཅིང་། །ཉོན་མོངས་དོན་མཐུན་རབ་འབྲོས་བྱང་ཆུབ་སེམས་དཔའ་ངལ་སོ་ཐུབ་པ་རྣམས་ཀྱང་མྱ་ངན་
འདས་པ་ལ། །དགེ་ཞེས་བསྔགས་ཤིང་གཞོལ་བྱེད་མགོ་ལ་བདེ་གཤེགས་གནས་དེས་ཁྱེད་ཀྱི་རབ་འདོད་དྲི་མ་ཞི་གྱུར་ཅིང་། །བགེགས་ཀྱི་ཚོགས་རྣམས་གནོད་པ་དག་གིས་རྣམ་པར་འཇོམས་པ་མི་བཟད་ཡིད་ཀྱིའང་སྤྱོད་ཡུལ་མིན་པའི་ལས། །གཅིག་ཏུ་ངེས་པར་བདེ་བ་གཅོད་པའི་འགྲོ་
བའི་དགྲ་བོ་བཅད་པའི་སླད་དུ་ཕྱག་ན་པདྨོ་ནི། །དབང་མེད་མྱོས་བཞིན་ཤིན་ཏུ་འཇིགས་ལྡན་རྣམ་པར་མི་འགྱུར་གང་གིས་སྐོ་བྱེད་མགོན་པོ་དག་གི་ཡང་། །ལྕི་བར་འགྱུར་བའི་ཇོ་བོ་བརྩེ་བ་དེས་ནི་ཁྱེད་རྣམས་བརྩེ་མེད་མཐར་བྱེད་དག་ལས་སྲུང་གྱུར་ཅིག །ཟིལ་གྱིས་མནན་པའི་ས་ཉིད་མ་ཡིན་

73-1-104b

ཤིན་ཏུ་འཇམ་པ་ཡིན་ཡང་ཇི་སྙེད་འཇིག་རྟེན་མཁས་མཐའ་ཡས། །བརྩོན་འགྲུས་ཤིན་ཏུ་བཟློག་བྱ་མ་ཡིན་དུས་གཅིག་ལ་ཡང་རབ་ཏུ་སྣང་བ་དག་གིས་ཁྱབ་པར་བྱེད། །མ་ལུས་ཤིན་ཏུ་གསལ་བ་མ་ཡིན་གཟི་ལྡན་གཟི་ཡང་མེ་ཁྱེར་འོད་ཀྱི་ཆ་ཤས་རྗེས་མཐུན་པ། །འཇིག་རྟེན་དབང་ཕྱུག་གཟི་
བརྗིད་དེ་ཡིས་འཇིགས་པ་ཞི་སླད་ཁྱེད་ཀྱི་གཏི་མུག་མུན་ཆེན་འཕྲོག་གྱུར་ཅིག །མ་ལུས་ནམ་མཁའི་ཁམས་ནི་སྐྱེ་བོ་བཞིན་དུ་ཀུན་ནས་ཡོངས་སུ་རྫོགས་པར་བྱས་གྱུར་རེ་བའི་ཕྱོགས། །ལྟུང་བའི་ཕུང་པོ་ཐམས་ཅད་སྣང་བ་བཞིན་དུ་རྣམ་པར་ཉམས་པར་རབ་བརྩོན་ཕུལ་བྱུང་མེད་པར་བགྱིད། །གང་
གི་རྫུ་འཕྲུལ་ཆེ་ལྡན་ཡིད་ཀྱི་བདུད་ནི་མུན་པའི་ཚོགས་དང་ལྷན་ཅིག་ཞི་བར་འགྲོ་བགྱིད་པ། །མཚོ་སྐྱེས་ལྡན་པའི་སྣང་བ་དེ་ནི་ཁྱེད་རྣམས་དག་གི་རབ་མང་འབྱོར་པ་འཕེལ་བའི་སླད་གྱུར་ཅིག །གཞན་གྱི་འོད་རྣམས་ཉམས་བྱེད་དབང་ཕྱུག་ཅིག་ཤོས་འོད་ཀྱིས་མཚུངས་དཀའ་མུན་པའི་ཕུང་པོའི་སྟོབས་
འབིགས་ཤིང་། །སེམས་ཅན་འཚེ་བའི་བསམ་པ་ཅན་རྣམས་ཁྱད་པར་དུ་ནི་གདུང་བྱེད་བཀྲ་བའི་འོད་ཟེར་མི་ཉམས་པ། །སྣ་ཚོགས་མཐའ་ཡས་གཡོ་མེད་ལ་སོགས་བསྒྲིབས་པའི་ཡུལ་རྣམས་དག་ནི་གསལ་བར་བྱེད་པའི་ནུས་པ་འཛིན། །འཇིག་རྟེན་དབང་པོའི་སྣང་བ་གཅིག་ཀྱང་འཆི་མེད་ཚོགས་
མཚུངས་དེ་ནི་ཁྱེད་ཀྱི་འཇིགས་སེལ་སླད་གྱུར་ཅིག །གང་དུ་སེམས་ཅན་མ་ལུས་རབ་མང་འདོད་པའི་ཆུ་ལ་རྒྱུ་བའི་བདེ་བ་རྙེད་དཀའ་ཕུན་ཚོགས་ཤིང་། །དོན་མེད་མུ་སྟེགས་ངན་པའི་སྐྱེ་བོ་རི་བོ་ལྟ་བུ་རྒལ་བར་དཀའ་བའི་གཏིང་དུ་འགྲོ་བྱེད་ལ། །བཟློག་དཀའ་ཀུན་ནས་རབ་རྒྱས་འགྲོ་བའི་སྲིད་པ་
ཉམས་པར་བྱེད་པའི་རླབས་ཕྲེང་རབ་ཏུ་འཕེལ་ལྡན་པ། །ཕྱག་ན་པདྨའི་འོད་ཟེར་ཆུ་གཏེར་ཁྱེད་ཀྱི་ནགས་མེའི་འཇིགས་པ་ཞི་སླད་རྣམ་པར་འཕེལ་གྱུར་ཅིག །ཆོས་ཀྱི་བདུད་རྩིའི་ཆུ་བོ་གདུལ་བྱ་ལ་ཡོད་གལ་ཏེ་དམྱལ་བའི་མེ་རྣམས་ཞི་བ་འདི་ནི་ཅི། །བཅིང་བར་བྱས་པ་རལ་པའི་ཕུང་པོ་ལ་ཡོད་གལ་ཏེ་
དགྲ་ཡི་ཚོགས་རྣམས་འགྲོ་བ་བྲལ་བ་ཅི། །སྤྱི་བོའི་ཁང་པར་རྒྱལ་བ་རབ་ལྕི་གནས་གྱུར་གལ་ཏེ་མགོན་པོ་འཇིག་རྟེན་གསུམ་རྣམས་དུད་པ་ཅི། །དེ་ལྟར་འཇིག་རྟེན་གཉེན་གྱིས་རྣམ་པར་བཀྲ་བའི་ཐ་སྙད་དག་གིས་ཁྱེད་ཀྱི་དགྲ་རྣམས་འཇོམས་གྱུར་ཅིག །མངོན་པར་དགའ་བས་རྒྱས་པ་གཅིག་པུ་ཉིད་ཀྱང་

73-1-105a

སེམས་ཅན་བསམ་པའི་དབང་བྱས་རྣམ་པ་ཐ་དད་པ། །དབྱེ་དཀའ་ཡང་དག་མིན་པའི་རྟོག་པ་གཡོ་མེད་མི་གཡོ་དག་ལ་རྩོམ་པ་ཆེན་པོ་རྡོ་རྗེའི་རྩེ། །དམ་པའི་བློ་གྲོས་ཀུ་མུ་ཏི་ལ་ཟླ་བའི་འོད་ཟེར་མུ་སྟེགས་དོན་མེད་ཅན་བརྗོད་མུན་པ་ལ། །ཉམས་པར་བྱེད་པའི་ཉི་མ་འཇིག་རྟེན་དབང་པོས་
གསུངས་པའི་བསྟན་པ་ཁྱེད་ཀྱི་སྲིད་འབྱེད་སླད་གྱུར་ཅིག །སྣ་ཚོགས་རྣམ་པར་རྩོད་པའི་གནས་ཀྱི་འདུན་སར་འདུས་པ་རྒྱ་ཆེར་དྲེགས་པའི་ཆ་ལས་སྨྲ་བ་པོ། །བཟློག་དཀར་རབ་གྱུར་བསྙོན་པའི་སྒྲ་ཆེན་ལྡན་པ་རྐང་མིག་ལ་སོགས་དམན་པ་དང་བཅས་ཞུམ་གྱུར་ཅིང་། །བག་མེད་མྱོས་པའི་སྐྱེ་བོ་རྣམས་
ཀྱིས་རྣམ་པར་ལྟུང་བ་རབ་སེལ་མཁས་པ་རྣམས་ཀྱི་དགའ་སྐྱེད་པ། །མགོ་ལ་རྒྱལ་བའི་སྐུ་ལུས་འོད་ཟེར་ཕུན་ཚོགས་དག་གི་དངོས་པོ་སྐྱེ་མེད་གསུང་དེས་རྒྱལ་གྱུར་ཅིག །དགྲ་རྣམས་དབང་འགྱུར་རྒྱལ་ལྡན་མཚོན་གང་འོད་ཟེར་ཚོགས་ནི་རབ་ཏུ་མཛེས་ཤིང་འགྲོ་བ་དག་གིས་བསྟོད། །མྱ་ངན་
དམྱལ་བའི་གནས་རྣམས་དག་ལ་རྒྱ་ཆེར་གདུང་བ་རབ་ཏུ་འཇོམས་བྱེད་རྣམ་པར་རྒྱས་པའི་ཆུ། །དགྲ་ཡིས་འཕངས་པའི་མཚོན་ཕྲེང་དག་ལ་སྟོབས་ལྡན་རྡོ་རྗེ་སྲིད་གསུམ་མཐའ་དག་འཇིགས་པར་གྱུར་པ་རྣམས། །ཉམས་པར་བགྱིད་པ་ལ་བསྔགས་ཕྱག་ན་པདྨའི་ཕྱག་ནི་ཁྱེད་རྣམས་ཆགས་ཉམས་མེད་
པའི་སླད་གྱུར་ཅིག །འཇིག་པའི་འཐོར་རླུང་དག་གིས་རབ་ཏུ་དཀྲུགས་ལྟར་ཡུལ་གྱི་རི་བོ་རབ་མཐོར་ལྗོན་པའི་ཕྲེང་བའི་རྩ་བ་རྣམས། །རྩད་ནས་འབྱིན་པའི་སྟོབས་དང་ལྡན་ཞིང་དགྲ་ཡི་གླང་ཆེན་དྲེགས་པ་མི་ཆུད་ཉམས་པ་ཉིད་དུ་བགྱིད། །སློང་བའི་སྦྲང་རྩི་བྱེད་འགུགས་སྦྱིན་པའི་རྒྱུན་འབེབས་འཇིག་རྟེན་
དབང་ཕྱུག་ཕྱག་གི་སྡོང་པོ་ལ་དགའ་བ། །བཟང་པོ་དག་ནི་ཁྱེད་ཀྱི་དགྲ་ཡི་གྲོང་ཁྱེར་སྲིད་པ་འཇོམས་པའི་སླད་དུ་བརྟུན་ཏེ་འཇུག་གྱུར་ཅིག །དམ་པའི་ཁོངས་ནི་གང་ཞིག་ནོར་ལ་སྲེད་ལྡན་སྐྱེ་བོའི་ཚོགས་ཀྱི་རེ་བ་མི་འཆད་གྲུབ་པའི་གཏེར། །གང་ཞིག་ཡུ་བ་དག་ནི་རྡོ་རྗེའི་རྗེས་མཐུན་དགྲ་རྣམས་སྐྲག་བགྱིད་འདབ་
མ་དམ་པར་གྱུར་པའི་ཚེ། །ཡང་དག་རྫོགས་ཟེར་པགས་པའི་བྱང་ཆུབ་དཔལ་མོས་གནས་བགྱིས་ཡོན་ཏན་བསྔགས་པར་འོས་ལྡན་རྣམ་པར་མ་བཏང་བ། །འཇིག་རྟེན་མགོན་པོའི་ཕྱག་གི་ཡོངས་རྫོགས་པདྨ་དེ་ནི་ཁྱེད་རྣམས་དག་གི་གྲོལ་བའི་རྒྱུར་གྱུར་ཅིག །རྟག་ཏུ་སྲེད་པ་རྣམ་པར་འཕེལ་ཞིང་མགྲིན་པའི་

73-1-105b

ཕུགས་སྐམས་དམན་པར་གྱུར་པའི་ཡི་དགས་ཕུང་པོ་རྣམས། །ཀུན་ཏུ་དགའ་བ་སྐྱེད་བྱེད་དམ་པའི་བཅུད་ལྡན་མཆོག་ཏུ་བྱང་ཆུབ་དཔལ་མོ་ལྷག་པར་གནས་པ་ཅན། །འབྱོར་འདོད་ཡིད་དང་ལྡན་པ་རྣམས་ཀྱིས་ལེགས་པར་བསྟེན་གནས་དམ་པའི་པདྨ་གསལ་ཞིང་མཛེས་པ་ཡི། །ཚོགས་ཀྱིས་རབ་
སྤྲས་ཟེ་བ་དང་ལྡན་འཇིག་རྟེན་དབང་པོའི་ཆུ་སྐྱེས་གང་དེས་ཁྱེད་རྣམས་སྲུང་གྱུར་ཅིག །ཉོན་མོངས་ཉི་མ་སྡུག་བསྔལ་ཚོགས་ཀྱི་འོད་ཟེར་ཆུང་བ་མ་ཡིན་སྟུག་པོར་གྱུར་པའི་ཚ་གདུང་གིས། །གདུང་ཞིང་དམན་པའི་སྐྱེ་བོ་གང་དག་རྣམས་ལ་ཚད་པའི་གདུགས་དང་མཚུངས་པར་རྗེས་སུ་གྲུབ་བྱེད་ཅིང་། །མི་དམན་
གདུང་བར་མི་འགྱུར་མ་ལུས་འཇིག་རྟེན་དག་ལ་མ་ཚང་མེད་འོད་སྟེང་གི་བླ་རེར་བྲིས། །འཇིག་རྟེན་དབང་པོའི་ཕྱག་ན་འབྱོར་པའི་དྲི་མེད་པདྨོས་ཁྱེད་ཀྱི་སྡིག་པ་ཉམས་པར་འགྲོ་གྱུར་ཅིག །སྟོབས་རྣམས་ཀྱི་གནས་བདག་ཉིད་ཆེ་རྣམས་ཆེ་བར་དར་བའི་གཞི་དང་འོད་ཟེར་གྲགས་པ་དག་གི་ཁྱིམ། །དགྲ་རྣམས་
སྐྲག་པར་འགྱུར་བའི་གནས་དང་བརྣག་པར་དཀའ་བའི་འཇིགས་པ་འཇོམས་པའི་ས་གཞི་ཉིད་གྱུར་པ། །སྡུག་ཅིང་མཛེས་པའི་བསྟི་གནས་དང་ནི་འགྲོ་ལས་འདས་པའི་བརྩོན་འགྲུས་ཕུང་པོ་རྒྱ་ཆེར་གྱུར་པའི་གནས། །འཇིག་རྟེན་དབང་པོའི་དཔུང་པ་འགྲོ་བ་རྣམས་ཀྱི་དགྲ་མང་ཚར་གཅོད་གཏུམ་པོའི་དབྱུག་
པ་ཉིད་གྱུར་ཅིག །གང་ཞིག་རྣམ་མཛེས་བདུད་རྩིའི་རྒྱུན་གྱི་འགྱུར་བག་ལྡན་ཡང་དགྲ་བོ་རྣམས་ནི་འཇིགས་པ་ཁོ་ནར་བགྱིད། །མཐོང་བ་རྩོལ་བར་བགྱིད་པ་མིན་ཉིད་དེ་ལྟ་ན་ཡང་ལྟ་བྱེད་རྣམས་ཀྱི་དགའ་བ་ཆུང་བ་མིན། །རྒྱན་རྣམས་ཀུན་གྱིས་རབ་ཏུ་མཛེས་པའི་ཁང་པ་ཡིན་ཡང་འགྲོ་ཀུན་རྒྱན་རྣམས་མཛེས་
དང་བྲལ་བར་བགྱིད། །འོད་ལྡན་ཆུ་སྐྱེས་ཅན་གྱི་གོས་ནི་གཅིག་པུ་དེ་ཡིས་ཁྱེད་ཀྱི་བདེ་མིན་བདེ་བར་སེལ་གྱུར་ཅིག །གང་ཞིག་རབ་མཛེས་རྒྱ་མཚོར་གཟུགས་ཀྱི་མངོན་པའི་ང་རྒྱལ་ནུབ་ཅིང་བསོད་ནམས་སྣོད་ཀྱི་ལྟ་བྱེད་རྣམས། །འགྲོ་བ་འབྲས་བུ་དང་བཅས་སྲེད་པ་སྐྱེས་པ་ཡང་ནི་མི་གནས་རབ་ཏུ་
གཡོ་བས་འཇོམས་འགྱུར་བ། །མཚུངས་མེད་རབ་ཏུ་མཛེས་ལྡན་རི་བོང་མཚན་མ་ཅན་སོགས་གྲངས་མེད་རྣམས་ནི་གཅིག་ཏུ་བགྱིས་སམ་ཞེས། །སྙམ་པར་འགྱུར་ཞེས་དེ་ཡི་པདྨ་ལས་ཀྱང་རྒྱལ་ལྡན་ཕྱག་ན་པདྨའི་བཞིན་དེས་རྒྱལ་གྱུར་ཅིག །གང་ཞིག་རྒྱུན་ཆད་མེད་པར་མཛེས་པའི་ཆུ་ཚོགས་ལྡནཔའི་
73-1-106a

སྤྲིན་རྣམས་ཀྱིས་བསྒྲིབས་དགྲ་རྣམས་སྣོད་ལ་ནི། །ཤིན་ཏུ་རབ་གསལ་ལན་ཅིག་མ་ཡིན་འཚིག་པ་སྟེར་བའི་ཡུལ་ངན་དུ་གྱུར་ལུས་ཅན་རྣམས་ལ་ཡང་། །ཤིན་ཏུ་རྗེས་འབྲེལ་དྲི་མ་མང་པོའི་སྣག་ཚའི་འདམ་གྱི་ཚོགས་ཀྱིས་རབ་ཏུ་བསྒོས་རྣམས་འཁྲུ་བར་བགྱིད། །མགོ་ལ་སངས་རྒྱས་ཁང་
པའི་བཞིན་ནི་ཤིན་ཏུ་བཞིན་བཟངས་ཁྱེད་ཀྱི་རྣམ་བཀྲའི་བྱ་བ་མཛད་གྱུར་ཅིག །ཕྱག་ན་བཞད་པའི་ཆུ་སྐྱེས་དག་གིས་སྐྱོ་བ་མེད་པའི་རལ་པའི་ཐོར་ཚུགས་དག་ནི་རབ་གསལ་ཞིང་། །ཆེ་བར་བརྩིགས་ཏེ་བཀོད་པའི་ནང་ན་རྣམ་བཞུགས་གསལ་བ་དང་འདྲེས་འོད་དཔག་མེད་ཀྱི་འོད་གསལ་ཚོགས། །ཐ་
དད་དུ་བྱས་འོད་ནི་གསལ་ལྡན་གྱེན་དུ་བརྩམས་ཤིང་བཅིངས་པའི་སྟེང་གི་སྟུག་པོ་བཀོད་པ་ནི། །མཛེས་པས་ཚིམ་པ་མི་མཐོང་དྲག་རྣམས་རབ་འཇིགས་གསལ་ཞིང་སྒྲ་ལྡན་གོ་ཆས་ཁྱེད་རྣམས་སྲུང་གྱུར་ཅིག །རྒྱུན་ཆད་མེད་པར་རྣམ་འཕྲོ་ཤིན་ཏུ་ཀུན་དགའི་རྒྱུར་གྱུར་འོད་དཔག་མེད་འོད་ཆུ་ཡི་
ཚོགས་ལྟ་བུས། །བྲན་པ་ལས་ནི་ཤིན་ཏུ་ཕུལ་བྱུང་དག་ཅིང་མཛེས་པའི་འཕེལ་བ་རྙེད་གྱུར་ལྷག་པའི་དྲི་བཟངས་ཅན། །ལྷ་ཡི་མེ་ཏོག་རྨད་བྱུང་ཚོགས་རྣམས་རྫོགས་པའི་པདྨོ་འཛིན་པའི་རལ་པ་དག་གི་ནི། །དཔག་བསམ་འཁྲི་ཤིང་ཚོགས་ནི་ཁྱེད་རྣམས་དག་གི་བསམ་པའི་དོན་རྣམས་ཕུན་ཚོགས་
འགྲུབ་པའི་རྒྱུར་གྱུར་ཅིག །གང་ཞིག་བཅིངས་པར་གྱུར་ཀྱང་རྣམ་པར་གྲོལ་བར་ངེས་པར་བགྲོད་བྱེད་གང་ཞིག་ལུས་ལ་ལྷག་གནས་པ། །གཞན་རྣམས་ངེས་པར་སྤངས་ཀྱང་ཐུན་མོང་མིན་པར་མགོན་པོ་འོད་དཔག་མེད་ཀྱིས་རྣམ་པར་བརྒྱན་པར་མཛད། །དྲི་བཟངས་ཐམས་ཅད་སྤངས་ཀྱང་གང་ཞིག་
མཚུངས་མེད་དྲི་བཟངས་མང་པོས་མ་ལུས་ཕྱོགས་རྣམས་འགེངས་གྱུར་པ། །འཇིག་རྟེན་དབང་པོའི་ཤིན་ཏུ་ཆེ་བའི་རལ་པ་དེ་ཡིས་ཁྱེད་ཀྱི་ངེས་པར་ཐོབ་བྱའི་འཆིང་བ་འཕྲོག་གྱུར་ཅིག །རལ་ཚོགས་མ་ལགས་སྐྱེ་བོ་མ་ལུས་རྣམས་ཀྱི་ཡིད་ནི་འཆིང་བར་བགྱིད་པ་ཞགས་པའི་ཕུང་པོ་ལགས། །
མཛེས་སྡུག་མ་ལགས་འོན་ཀྱང་སྡུག་བསྔལ་མེ་ཡིས་རྣམ་བཅོམ་འགྲོ་རྣམས་གསོ་བྱེད་བདུད་རྩི་དག་གི་རྒྱུན། །པདྨོ་མ་ལགས་མ་རུངས་མཐར་བྱེད་རྟ་རྒོད་འདུལ་ལྕག་རྒྱལ་བའི་རི་བོང་ཅན་སྦྱར་སྐྲ་ཡི་དཔལ། །ཁྱེད་ཀྱི་ཉོན་མོངས་སྐྱོན་རྣམས་ཤིན་ཏུ་འཇོམས་ཤིང་མངོན་པར་འདོད་པའི་དངོས་

73-1-106b

གྲུབ་སྦྱིན་པར་མཛད་གྱུར་ཅིག །མ་ལུས་ཕྱོགས་རྣམས་སྲེག་བྱེད་ལྷག་པར་ཀུན་ཏུ་དམར་སེར་གཟི་བརྗིད་ལྡན་པ་རྣམ་པར་བཀོད་གྱུར་པ། །འཇིག་རྟེན་གསུམ་པོ་རྨོངས་ཤིང་འཇིགས་ལ་སྐྱབས་མེད་ཟ་བའི་ཚོགས་འབར་བསྐལ་པའི་མེ་ལྟར་བརྟག་བྱ་བ། །སོ་བསྡམས་སྡང་མིག་རབ་ཏུ་འབར་བའི་རྟ་
མགྲིན་དག་གིས་རྗེས་སུ་ཀུན་ནས་གཏད་དེ་གཟིགས་པ་ལས། །མཚུངས་མེད་བརྩེ་ལྡན་འཇིག་རྟེན་དབང་ཕྱུག་སྐད་ཅིག་འཇིགས་པའི་གཟིགས་སྟངས་སྐྱེས་པས་ཁྱེད་རྣམས་སྲུང་གྱུར་ཅིག །འཇིག་རྟེན་རྣམས་ནི་བརླག་པར་རབ་གཏོང་གསལ་བ་མ་ལུས་ས་འཛིན་ཆེ་རྣམས་དི་རིང་མྱུར་བར་ནི། །ཕྱེ་མར་
འགྱུར་བགྱིད་འཛིན་པར་བྱེད་པ་ཡང་སྟེ་མཐའ་མེད་ཆུ་ཡི་གཏེར་རྣམས་སྐམ་པ་ཉིད་བགྱིད་པ། །དེ་ལྟས་གང་ཞིག་ཁྲོ་བ་བཟུང་སྟེ་ཁྲོ་གཉེར་རབ་རྒྱས་བསྡུས་གྱུར་འཇིགས་སུ་རུང་བའི་དཔྲལ་བ་ལས། །ངེས་འཐོན་ལྷ་མོ་མཚུངས་མེད་དཔུང་སྟོབས་ཅན་གྱིས་མཐོང་ནས་སྐྲག་འགྱུར་མཚོ་སྐྱེས་
ཅན་དེས་རྒྱལ་གྱུར་ཅིག །བསྟོད་འོས་རྣམས་ཀྱིས་བསྟོད་ཅིང་བླ་མ་རྣམས་ཀྱིའང་འགྲོ་བའི་བླ་མ་ཕྱག་བྱ་རྣམས་ཀྱིས་ཕྱག་བྱས་པ། །མི་ཉུང་བསྐལ་པར་བསྒྲུབས་པའི་ཟོལ་མེད་ནུས་ལྡན་མཐའ་དག་འགྲོ་བའི་སྐྱབས་གྱུར་མཚུངས་པ་མེད་པ་ཡིས། །བརྩེ་བ་རང་ཉིད་ལུས་ཅན་བཞིན་དུ་འཇིག་རྟེན་སྡུག་
བསྔལ་གཞིལ་ཕྱིར་པདྨོ་ཅན་ལས་ལེགས་འཐོན་པ། །སྒྲོལ་མ་ཡིས་ནི་ཁྱེད་ཀྱི་འཁོར་བའི་བཙོན་རའི་ནང་དུ་ལྕི་བར་གྱུར་པའི་གདུང་བྱེད་འཕྲོག་གྱུར་ཅིག །ཚིག་མཐའ་ལྡན་པའི་ཚོགས་ཀྱི་གྲངས་ནི་བགྲང་བར་ལྕི་ཞིང་ཚིག་བདག་མཆོག་གི་ཚིག་གི་སྡེ་ཚན་ཡང་། །རྗེས་སུ་གཟུང་བར་ནུས་པ་མ་
ཡིན་ངང་པའི་འགྲོས་དང་དྲག་པོའི་ཚིག་རྣམས་ཀྱིས་ཀྱང་གསལ་བར་ནི། །བརྗོད་པར་རྟོགས་དཀའ་བརྗོད་བྱ་མིན་པའི་ཚོགས་ནི་ཆ་ཤས་ཆུང་ངུས་གུས་པས་བརྗོད་དེ་ཡོངས་རྫོགས་པ། །བདེ་གཤེགས་ཚིག་གིས་ཡང་དག་བརྗོད་བྱ་ཆུ་སྐྱེས་ལྡན་པའི་ཡོན་ཏན་ཚོགས་ཀྱིས་ཁྱེད་རྣམས་སྲུང་གྱུར་ཅིག །
སྐྱེ་བའི་སྐྱེ་བ་རྣམས་སུ་སྤྱན་རས་གཟིགས་དབང་གི། །ཞབས་ལ་གུས་ཤིང་རང་བཞིན་ཤིན་ཏུ་དྲང་བ་དང་། །བློ་གྲོས་མི་གཡོ་གཞན་ཕན་བླ་མའི་བྱ་བ་དག །བྱ་བར་ལྡན་ཞིང་སྙན་ངག་མཁན་དུའང་འགྱུར་བར་ཤོག །འཇིག་རྟེན་དབང་ཕྱུག་གི་བསྟོད་པ་བརྒྱ་པ། སྙན་ངག་མཁན་ཆེན་པོ་ཤྲཱི་

73-1-107a

བཛྲ་དེ་བ་ཞེས་བྱ་བས་མཛད་པ་རྫོགས་སོ།།      །།ཡོན་ཏན་ཕུལ་དུ་བྱུང་བ་དཔག་ཏུ་མེད་པ་དང་ལྡན་པ་བླ་མ་དམ་པ་ཆོས་ཀྱི་རྒྱལ་པོ་དང་། མིའི་དབང་པོ་དཔོན་ཆེན་ཤཱཀྱ་བཟང་པོའི་བཀའ་ལུང་གིས། རྒྱ་གར་གྱི་མཁན་པོ་སྙན་ངག་མཁན་པོ་མ་ཧཱ་པཎྜི་ཏ་ལཀྵྨཱི་ཀ་ར་དང་། བོད་ཀྱི་ལོ་ཙཱ་བ་
དགེ་སློང་ཤོང་སྟོན་གྱིས་བསྒྱུར་བའོ།།      །།༄༅༅། །རྒྱ་གར་སྐད་དུ། ལོ་ཀེ་ཤྭ་རཱ་ཡ་སྟོ་ཏྲ། བོད་སྐད་དུ། འཇིག་རྟེན་དབང་ཕྱུག་ལ་བསྟོད་པ། འཇིག་རྟེན་དབང་ཕྱུག་ལ་ཕྱག་འཚལ་ལོ། །འཇིག་རྟེན་བླ་མ་ས་གསུམ་གྱིས་ཕྱག་བྱས། །ལྷ་དབང་ཚངས་པ་མཆོག་གིས་བསྟོད་པ་སྟེ། །
ཐུབ་མཆོག་རྒྱལ་པོ་མྱུར་དུ་དངོས་གྲུབ་སྩོལ། །སྤྱན་རས་གཟིགས་མགོན་མཆོག་ལ་ཕྱག་འཚལ་ལོ། །བདེ་གཤེགས་རང་བཞིན་བདུད་རྩིའི་ངོ་བོ་འཆང་། །སྣ་ཚོགས་མཚན་གྱིས་སྤྲས་པའི་སྐུ་ལུས་མཆོག །བདེ་གཤེགས་འོད་དཔག་མེད་པའི་དབུ་རྒྱན་ཅན། །གསེར་གྱི་པདྨས་གཡོན་གྱི་ཕྱག་
བརྒྱན་པ། །དྲི་མེད་རལ་པ་འཁྱིལ་ནག་ཅུང་ཟད་སེར། །ཟླ་བའི་དབྱིབས་འདྲ་གསལ་ཞིང་རྫོགས་པའི་ཞལ། །པདྨ་ལྟར་ཡངས་མཆོག་ཏུ་མཛེས་པའི་སྤྱན། །མཁུར་བ་གངས་ཀྱི་དུམ་བུ་ལྟ་བུར་དཀར། །རི་དགས་རྒྱལ་པོའི་དགའ་བཞིན་ཞལ་སྒྲོས་དམར། །ཉི་མ་འཆར་ཀ་ལྟར་དམར་བཙོད་ཀྱི་མདོག །
པདྨ་གཞོན་ནུ་ལྟ་བུར་མཆུ་དམར་ལ། །སྟོན་ཀའི་སྤྲིན་ཚོགས་ལྟ་བུར་སྒྲ་སྒྲོགས་པ། །དཔུང་གཉིས་སྣ་ཚོགས་མཚན་གྱིས་མཛེས་པ་སྟེ། །ཕྱག་མཐིལ་པདྨ་གཞོན་ནུ་ལྟ་བུར་འཇམ། །རི་དགས་པགས་པ་སྐུ་ཡི་སྟོད་ན་མནབས། །སྙན་གཉིས་རྣ་རྒྱན་གཡོ་ཞིང་མཛེས་པ་མངའ། །ཕྱག་ནི་ཡངས་ཤིང་
ལྟེ་བ་ཟབ་པ་སྟེ། །པདྨ་དྲི་མ་མེད་པ་ལྟ་བུ་ལགས། །གསེར་མཆོག་སྐུ་རགས་ནོར་བུའི་རྒྱན་ལྡན་པ། །ན་བཟའ་མཛེས་པས་སྐུ་ཡི་སྨད་བརྒྱན་པ། །རྒྱལ་བ་ཡེ་ཤེས་རྒྱ་མཚོའི་ཕ་རོལ་ཕྱིན། །བསོད་ནམས་དུ་མ་ལས་ནི་འཁྲུངས་པའི་མགོན། །རིམས་དང་ནད་འཇོམས་བདེ་བ་མཆོག་བསྐྱེད་པ། །སྲིད་པ་
མཐར་མཛད་མཁའ་ལ་རྒྱུ་བ་དང་། །ཀུན་ཏུ་རྒྱུ་བའི་སྐུ་མཆོག་ལ་བསྟོད་པ། །བདུད་རིགས་སྣ་ཚོགས་སྟོབས་ནི་ངེས་པར་འཇོམས། །ཞབས་མཆོག་རྐང་གདུབ་མཆོག་གི་སྒྲ་སྒྲོགས་ལ། །གླང་པོ་དྲེགས་དང་ངང་པའི་སྟབས་སུ་གཤེགས། །བདུད་རྩི་ཆེན་པོ་ཐུགས་ཆུང་ཡོངས་རྫོགས་

73-1-107b

བརྙེས། །གསེར་བཞིན་རྟག་ཏུ་དགྱེས་པའི་རྒྱན་མངའ་བ། །རི་བོ་གྲུ་འཛིན་ན་ནི་དགྱེས་པར་བཞུགས། །འཇིག་རྟེན་དབང་ཕྱུག་ཁྱེད་ལ་རབ་ཏུ་བསྟོད། །དགེ་སློང་མ་དཔལ་མོས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། མ་ཎི་དྭཱི་པ་མ་ཧཱ་ཀཱ་རུ་ཎི་ཀ་དེ་བ་པཉྩ་སྟོ་ཏྲ། བོད་སྐད་དུ། 
ནོར་བུ་གླིང་གི་ཐུགས་རྗེ་ཆེན་པོ་ལྷ་ལྔ་ལ་བསྟོད་པ། རྗེ་བཙུན་སྤྱན་རས་གཟིགས་ལ་ཕྱག་འཚལ་ལོ། །ནོར་བུའི་གླིང་དུ་ཐུགས་རྗེའི་སྐྲ་འཁྲུངས་དཔལ་ལྡན་པདྨའི་རིགས། །རི་རྒྱལ་པོ་ཏ་ལ་ཡི་རིན་ཆེན་བྲག་ཕུག་ཉམས་དགའ་བར། །པད་ཟླའི་དབུས་ན་ཐུགས་རྗེའི་སྐུ་ནི་འགྱིང་ཞིང་རོལ་པའི་
ཉམས། །ཐུགས་རྗེའི་སྨན་གྱིས་བདག་ནད་གསོ་བ་མགོན་པོ་ཐུགས་རྗེ་ཅན། །མ་རིག་ཐིབས་པོ་འགྲོ་བའི་མུན་སེལ་རྗེ་བཙུན་རབ་རིབ་སེལ། །སྐྱེ་རྒ་ན་འཆི་ཐར་དཀའ་ཡང་སྲིད་རྩིབས་དྲུག་འཁོར་ལོར་ཆུད། །སྲིད་པའི་འཁྲུལ་འཁོར་བཟློག་དཀའ་སེམས་ཅན་འཁོར་བའི་རྒྱ་མཚོར་བྱིང་། །མགོན་
པོ་ཆོས་ཀྱི་འཁོར་ལོ་བསྐོར་མཛད་ཐུགས་རྗེའི་སྐུ་ཡིས་སྒྲོལ། །ཟླ་བ་ལྟར་དཀར་ཕྱག་གཉིས་པདྨ་གདུང་བ་སེལ་བའི་ཕྱག །དཔག་མེད་ཅོད་པན་རིན་ཆེན་མཛེས་བརྒྱན་གཞོན་ནུ་ཞི་བའི་སྐུ། །ཐུགས་རྗེ་བདུད་རྩིའི་རྒྱུན་གྱིས་ཟུག་རྔུའི་ནད་དང་སྡུག་བསྔལ་སེལ། །ཐུགས་རྗེ་རི་དགས་ལྤགས་འཛིན་
སྲིད་པའི་བླ་མ་ཕྱག་འཚལ་ལོ། །ཐུགས་རྗེའི་ཐུགས་གདུངས་སྤྱན་གཡས་ཆབ་ལས་ལྷ་མོ་ཐུགས་རྗེའི་སྐུ། །ཡིད་འོང་སྒྲོལ་མ་ལྗང་སེར་བདེ་མ་རིན་ཆེན་རྒྱན་མཛེས་སྒེག །པདྨོའི་སྐུ་ལ་ཕྱག་མཚན་ཨུཏྤལ་ཁ་འབྱེད་ཕྱག་གཉིས་ཀྱིས། །བཅུད་རྒྱས་ནུ་མས་གསོ་མཛད་འགྲོ་བའི་ཡུམ་ལ་ཕྱག་འཚལ་
ལོ། །སེམས་ཅན་སྡུག་བསྔལ་གཟིགས་ནས་སྙིང་རྗེའི་ཆུ་ལས་མཛེས་མ་འཁྲུངས། །ཁྲོ་གཉེར་ཞི་བ་སེར་མོ་རིན་ཆེན་སྐུ་བརྒྱན་ཐུགས་རྗེས་འགྱིང་། །རྗེ་བཙུན་མགོན་གཟིགས་ཕྱག་མཚན་གུས་པའི་ཕྱག་རྒྱ་དབྱུག་པ་བསྣམས། །མཆོག་སྦྱིན་བུམ་ཆུས་འགྲོ་བའི་རེ་སྐོང་ཡུམ་ལ་ཕྱག་འཚལ་ལོ། །ཐུགས་
རྗེས་ཕྲིན་ལས་དྲེགས་པ་ཚར་གཅོད་དབང་མཛད་ཁྲོ་རྒྱལ་སྐུ། །སྦྲུལ་བརྒྱན་འོད་དམར་རྟ་གདོང་ལྗང་གུ་སྤྱི་བོར་རྟ་སྐད་བཞད། །མགོན་པོ་པ་ནེ་ལ་འདུད་པུས་བཙུགས་རྡོ་རྗེ་དབྱུག་པ་བསྣམས། །པདྨའི་རིགས་སྤྲུལ་ཐུགས་རྗེའི་བརླན་གྱིས་སྒེག་ཁྲོ་ཕྱག་འཚལ་ལོ། །ཕྱག་ན་པདྨའི་དྲུང་ན་དམ་ཆོས་

73-1-108a

ཉེར་ཞུ་ཚོང་དཔོན་བུ། །ནོར་བཟངས་སྲས་པོ་གསེར་མདོག་སྐལ་ལྡན་ཉིད་བཞུགས་རིན་ཆེན་བརྒྱན། །ཨེ་མ་བླ་མ་ལ་གུས་ཐལ་སྦྱར་པུས་བཙུགས་པུསྟི་བསྣམས། །བཞིན་བཟངས་ཁྱེའུ་དད་ལྡན་ནོར་བཟངས་བུ་ལ་ཕྱག་འཚལ་ལོ། །རྗེ་བཙུན་གསུང་གི་དབང་ཕྱུག་ཁརྶ་པཱ་ཎི་
འཁོར་བཅས་ལ། །བདག་གིས་གུས་པར་བསྟོད་བགྱིས་ཟླ་ལྟར་དགེ་བ་དྲི་མེད་དེས། །སྲིད་མཚོ་སྐེམས་ཤིང་ཐུགས་རྗེའི་ཆུ་ཡིས་སྐྱེ་འགྲོ་ཀུན་ངོམས་ནས། །རྒྱལ་བའི་དཀྱིལ་འཁོར་ཉམས་དགའ་པོ་ཊ་ལ་རུ་སྐྱེ་བར་ཤོག །སྡུག་བསྔལ་རྒྱ་མཚོ་རྒྱ་ཆེན་ཕ་རོལ་རབ་ཏུ་རྒལ་གྱུར་པ། །ཐུབ་པ་རྒྱལ་
བ་འགྲོ་བའི་གཙོ་ལ་བསྟོད་པ་ཡིས། །བསོད་ནམས་ཅི་མཆིས་དེས་ནི་འདི་ན་འགྲོ་བ་མ་ལུས་ཀུན། །བྱང་ཆུབ་རིན་ཆེན་རབ་མཆོག་ཞི་ཞིང་བདེ་ལ་རེག་པར་ཤོག །ནོར་བུ་གླིང་གི་ཐུགས་རྗེ་ཆེན་པོ་ལྷ་ལྔའི་བསྟོད་པ། སློབ་དཔོན་རྟ་དབྱངས་ཀྱི་ཞལ་སྔ་ནས་མཛད་པ་རྫོགས་སོ།།      །།
༄༅༅། །རྒྱ་གར་སྐད་དུ། ཨཱ་བ་ལོ་ཀི་ཏེ་ཤྭ་རཱ་ཡ་སྟོ་ཏྲ། བོད་སྐད་དུ། འཕགས་པ་སྤྱན་རས་གཟིགས་དབང་ཕྱུག་ལ་བསྟོད་པ། འཇིག་རྟེན་དབང་ཕྱུག་ལ་ཕྱག་འཚལ་ལོ། །པདྨ་དཀར་པོ་འདབ་བརྒྱད་ཀྱི། །གེ་སར་དཀྱིལ་ན་སྤྱན་རས་གཟིགས། །མན་འཛིའི་རི་དང་མཆོད་ཕྲེང་གཡས། །
གཡོན་པ་པདྨོ་ཞགས་པ་འཛིན། །སྤྱན་གསུམ་དབུ་ལ་འོད་དཔག་མེད། །ཤེལ་གྱི་རི་ལྟར་དཀར་བ་སྟེ། །རིན་ཆེན་རྒྱན་གྱིས་རྣམ་པར་སྤྲས། །མ་ཆགས་དཀྱིལ་འཁོར་གཙོ་ལ་བསྟོད། །དོན་ཡོད་ཞགས་པ་སྡུག་བསྔལ་འདྲེན། །སྤྱན་གསུམ་ཕྱག་བཞི་རྒྱན་གྱིས་བཀླུབས། །རྡོ་རྗེ་དང་ནི་ཞགས་པ་
གཡས། །གཡོན་པ་པདྨོ་ལྕགས་ཀྱུ་དང་། །འོད་དཔག་མེད་ཀྱི་དབུ་རྒྱན་མཐོ། །དམར་སྐྱ་ཕྱེད་བསྐུམ་ཕྱེད་ལྡན་བསྟོད། །ཀྲོ་དྷ་མགྲིན་སྔོན་གདུག་པ་སེལ། །ཞལ་གཅིག་སྤྱན་གསུམ་ཕྱག་བཞི་སྟེ། །གཡས་ན་རྡོ་རྗེ་བེ་ཅོན་འཛིན། །སྡིགས་མཛུབ་པདྨ་ཟུམ་པ་གཡོན། །སྦྲུལ་དང་སྟག་ལྤགས་
སྐུ་བརྒྱན་པ། །དམར་པོ་རྟ་དབུར་ལྡན་ལ་བསྟོད། །དོ་ཀེར་གཅིག་མ་བྲན་བཞིན་ཉན། །སྤྱན་གསུམ་ཕྱག་བརྒྱད་ཤིན་ཏུ་ཁྲོ། །རྡོ་རྗེ་རལ་གྲི་བེ་ཅོན་དང་། །ཐོད་པ་གཡས་ན་འཛིན་པ་སྟེ། །དགྲ་སྟེ་ཤཀྟི་ཐོད་ཞགས་གཡོན། །མཐིང་ནག་གླང་གཟིགས་དཔའ་གང་བསྟོད། །ཁྲོ་གཉེར་ཅན་ནི་

73-1-108b

བཀའ་བཞིན་བྱེད། །ཞལ་གཅིག་སྤྱན་གསུམ་ཕྱག་བཞིར་ལྡན། །བགྲང་ཕྲེང་ཕྱག་འཚལ་ཐལ་མོ་གཡས། །གཡོན་ན་དབྱུག་པ་གུནྡྷེ་འཛིན། །རིན་ཆེན་རྒྱན་ལྡན་ཤེལ་ལྟར་དཀར། །སྐྱིལ་ཀྲུང་ཕྱེད་པའི་གར་ལྡན་བསྟོད། །ཚིམ་པར་མཛད་དང་མཛེས་པར་མཛད། །སྣང་བར་མཛད་དང་བདེ་བར་
མཛད། །རྒྱལ་བའི་ཡོན་ཏན་མཛེས་ཚུལ་འཛིན། །ལྷ་མོ་རྨད་བྱུང་བཞི་ལ་བསྟོད། །སྒོ་ཡི་དབུས་ན་བཞུགས་པ་གང་། །ལྕགས་ཀྱུ་ཞགས་པ་ལྕགས་སྒྲོགས་དྲིལ། །ཚད་མེད་བཞི་ཡི་ངོ་བོ་ཉིད། །སྒོ་སྐྱོང་རྣམ་པ་བཞི་ལ་བསྟོད། །ཚངས་དབང་དྲག་པོ་ཉི་ཟླ་དང་། །ཕྱོགས་བཞིའི་འཇིག་རྟེན་
སྐྱོང་ལ་སོགས། །གཙང་མ་རིགས་ཀྱི་སྲུང་མར་བཅས། །རྣམ་ཀུན་འཁོར་ལྡན་ཀུན་ལ་བསྟོད། །མི་རྟོག་ཡེ་ཤེས་ཁྱད་པར་ལས། །སེམས་ཅན་ཀུན་ལ་ཐུགས་བརྩེའི་ཕྱིར། །ཕྲིན་ལས་བཞི་ཡིས་དོན་མཛད་པ། །དཀྱིལ་འཁོར་གྲྭ་གནས་བཞི་ལ་བསྟོད། །ཁྱོད་ཀྱི་ཡོན་ཏན་དཔག་མེད་ལས། །
ཤིན་ཏུ་ཕྲ་བའི་ཆ་བླངས་ནས། །མངོན་སུམ་ལྟ་བུར་དད་དམིགས་པས། །ཁྱེད་ལྟར་ཡོན་ཏན་རབ་རྫོགས་ཤོག །འཕགས་པ་སྤྱན་རས་གཟིགས་དབང་ཕྱུག་འཁོར་དང་བཅས་པ་ལ་བསྟོད་པ། སློབ་དཔོན་ཙནྡྲ་གོ་མིས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། མ་ཧཱ་ཀཱ་རུ་ཎི་ཀ་ཀུ་
བཱཀྱ་སྟོ་ཏྲ་ནཱ་མ། བོད་སྐད་དུ། ཐུགས་རྗེ་ཆེན་པོ་ལ་སྨྲེ་སྔགས་ཀྱི་བསྟོད་པ་ཞེས་བྱ་བ། ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །དྲི་མེད་དུང་མདོག་མཆོག་ཏུ་གཟུགས་བཟང་བ། །རྣམ་དག་འོད་གསལ་ཟླ་བའི་དཀྱིལ་བཞིན་མཛེས། །ཇི་ལྟར་མཁའ་ལ་ཉི་སྟོང་འབར་བ་བཞིན། །དཔའ་བོ་འོད་
ཟེར་ཚོགས་ཀྱིས་རྣམ་པར་མཛེས། །སྲིད་པ་གསུམ་གྱི་ས་མཁན་སྟོན་པར་གྲགས། །ཁམས་གསུམ་འགྲོ་བ་ཡོངས་ཀྱི་གཉེན་གཅིག་པུ། །ཐུགས་རྗེའི་ལྷ་ཁྱོད་བདག་ལ་དགོངས་སུ་གསོལ། །ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །བདག་ནི་ཐོག་མ་མེད་པའི་དུས་མཐའ་ནས། །ལམ་
སྟོར་ལམ་ལོག་སྲིད་པའི་འཁོར་བར་འཁྱམས། །སྔོན་ཚེ་ལས་ལོག་སྡིག་པ་བྱས་པས་ནོངས། །སྡིག་པའི་ལས་ནི་ཅི་བྱས་རང་གནོང་འགྱོད། །དར་ཞིང་རྒྱས་པའི་ལས་དབང་དེ་བཙན་པས། །འཁོར་བའི་སྡུག་བསྔལ་རྒྱ་མཚོར་བྱིང་གྱུར་ཏེ། །ཞེ་སྡང་འབར་བའི་མེ་ཡིས་རང་རྒྱུད་བསྲེགས། །གཏི་

73-1-109a

མུག་མུན་པ་ཆེན་པོས་ཤེས་རབ་རྨོངས། །འདོད་ཆགས་རྒྱ་མཚོའི་ནང་དུ་རྣམ་ཤེས་བྱིང་། །ང་རྒྱལ་མཐོན་པོའི་རི་བོས་ངན་འགྲོར་མནན། །ཕྲག་དོག་རླུང་ནག་འཚུབ་མས་འཁོར་བར་གཡེངས། །བདག་ཏུ་འཛིན་པའི་མདུད་པ་དམ་པོས་བཅིངས། །འདོད་པ་མེ་དང་འདྲ་བའི་འོབས་སུ་ལྷུང་། །
སྡུག་བསྔལ་དྲག་པོའི་མདའ་ཆར་དྲག་ཏུ་བབ། །མེ་ཁམས་ཉི་མའི་དུག་ནི་སྟེང་ནས་ཚ། །ཆུ་ཁམས་ས་ཡི་རླན་ནི་འོག་ནས་གྲང་། །ཕྱི་རོལ་སེར་བུའི་དད་ནི་མཐའ་ནས་ཚ། །བད་ཀན་རླུང་མཁྲིས་ནད་ནི་ཁོང་ནས་ལྡང་། །དེ་འདྲའི་སྡུག་བསྔལ་དྲག་པོ་བཟོད་དཀའ་ནའང་། །སྡོམ་པའི་དམ་ཚིག་བཤིག་
པར་ག་ལ་རུང་། །སྡུག་བསྔལ་ཀུན་དང་བསྡོས་ནས་སྡོམ་བསྲུང་ཞིང་། །མོས་ཤིང་དད་པས་འཕགས་མཆོག་མི་གཏོང་ན། །འཕགས་མཆོག་འགྲོ་དོན་མི་མཛད་ཅི་ལ་དགོངས། །བྱམས་མགོན་ཅི་སླད་བདག་ལ་ཐུགས་མི་བརྩེ། །ཡེ་ཤེས་སྤྱན་ཅན་ཁྱེད་ཀྱི་སྤྱན་སྔ་རུ། །བདག་འདྲས་སྨྲེ་སྔགས་
གསོལ་བར་མི་རིགས་ཀྱང་། །ཤིན་ཏུ་སྐྲག་པའི་སྨྲེ་སྔགས་གསོལ་ལགས་ན། །ཐུགས་རྗེ་ཆེན་པོས་བདག་ལ་དགོངས་སུ་གསོལ། །བདག་འདྲའི་སྐྱེ་བོ་ལས་ངན་སྡིག་པོ་ཆེ། །ལས་ཀྱི་དབང་གིས་སྙིགས་མའི་དུས་འདིར་སྐྱེས། །སྐྱེས་པས་འགྱོད་ཀྱང་ལས་དབང་བཅོས་སུ་མེད། །ལས་
ཀྱི་ཤུགས་ནི་ཆུ་བོའི་རྒྱུན་དང་འདྲ། །ལས་དབང་ཆུ་རྒྱུན་འཕྲལ་ལ་ག་ལ་ཟློག །བཀའ་ལ་ཞུགས་ཀྱང་བཀའ་བཞིན་རྔོ་མ་ཐོགས། །ལུས་ངག་ཡིད་གསུམ་སྡིག་པའི་དབང་དུ་ཐལ། །ལས་ཀྱི་འབྲས་བུ་ངན་པས་ཤིན་ཏུ་བསྲེགས། །ལས་དབང་སྲེག་པའི་མེ་ནི་རབ་འབར་ཞིང་། །རྣམ་ཤེས་དབང་
པོའི་མྱུ་གུ་གདུངས་གྱུར་ན། །ཕུང་པོ་སྒྱུ་མའི་ལུས་ཀྱིས་མི་བཟོད་པས། །བྱམས་མགོན་ཐུགས་རྗེ་ཅན་གྱིས་བཟོད་ལགས་སམ། །ཡེ་ཤེས་སྤྱན་ཅན་ཁྱེད་ཀྱི་སྤྱན་སྔ་རུ། །སྡིག་པའི་རྣམ་གྲངས་མ་ལུས་མཐོལ་བཤགས་ན། །ཐུགས་རྗེ་ཆེན་པོས་དག་པར་མཛད་དུ་གསོལ། །ད་ནས་བཟུང་ནས་
སྡིག་པ་མི་བགྱིད་སྤོང་། །བཀའ་ཡི་དོན་ལ་མངོན་སུམ་ཕྱོགས་པར་བགྱིད། །ནམ་ཡང་སྡིག་པའི་དབང་དུ་མ་གྱུར་ཅིག །ཉི་ལྟར་འོད་གསལ་ཟླ་ལྟར་འོད་མདངས་པ། །ཐུགས་རྗེ་ཆེན་པོའི་ཞལ་མཐོང་འཚལ་ལགས་ན། །ཐོག་མ་མེད་ནས་མ་རིག་ལིང་ཐོག་གིས། །བསྒྲིབས་ཤིང་ནོངས་པའི་

73-1-109b

མིག་གིས་མ་མཐོང་ན། །འགྲོ་བའི་མགོན་ཁྱོད་ད་ལྟ་གང་ན་བཞུགས། །སྡུག་བསྔལ་དྲག་པོ་ཤིན་ཏུ་མི་བཟད་པས། །ཤིན་ཏུ་བསྲེགས་པས་སྐྱི་གཡའ་རབ་འཇིགས་ཤིང་། །ད་དུང་གདུང་བའི་སྨྲེ་སྔགས་ཉིད་འདོན་ན། །ཉམ་ཐག་ཕོངས་པའི་ང་རོས་འོ་དོད་འབོད། །བྱམས་མགོན་ཐུགས་རྗེ་ཅན་
གྱིས་གསན་ལགས་སམ། །ཕོངས་པ་གང་གིས་ང་ཡི་མཚན་ཐོས་ན། །དེ་ཡི་སྡུག་བསྔལ་ཞི་བར་བྱའོ་ཞེས། །འགྲོ་ལ་ཉིད་ཀྱི་ཐུགས་རྗེས་ཞལ་བཞེས་ནས། །བདག་ཅག་འགྲོ་བ་སེམས་ཅན་ཐམས་ཅད་ལ། །དུག་ལྔ་དུག་གསུམ་ནད་ཀྱིས་གཟིར་ལགས་ན། །མི་བཟད་ནད་ནི་ཐུགས་རྗེས་ཞི་བར་
འདོད། །ཐུགས་རྗེའི་ཐུགས་ཀྱིས་བདག་ལ་དགོངས་སུ་གསོལ། །ཐུགས་རྗེའི་སྤྱན་གྱིས་བདག་ལ་གཟིགས་སུ་གསོལ། །ཐུགས་རྗེའི་གསུང་གིས་བདག་ལ་སྒྲོགས་སུ་གསོལ། །བདག་ནི་ཤི་འཕོས་ལུས་སེམས་བརྗེས་པའི་ཚེ། །གཉེན་བཤེས་གྲོགས་དང་བྲལ་ནས་གཤིན་རྗེས་ཁྲིད། །དེ་དུས་
འཇིག་རྟེན་ཉེ་དུས་མི་ཕན་པས། །ལས་ཀྱིས་མནར་བས་བདག་རང་གཅིག་པུར་འཁྱམ། །དེ་དུས་བདག་ལ་མགོན་སྐྱབས་མ་མཆིས་ན། །ཐུགས་རྗེ་ཆེན་པོས་མགོན་སྐྱབས་མཛད་དུ་གསོལ། །ལས་ཀྱིས་མནར་བའི་སྐྱེ་བོ་བདག་འདྲ་བ། །ཐོག་མ་མེད་ནས་ཕྱིན་ཅི་ལོག་རྟོགས་པས། །ཁམས་གསུམ་
འཁོར་བའི་འདམ་ལས་མ་ཐར་ཏེ། །བསྐལ་པ་དཔག་མེད་སྐྱེ་བ་གྲངས་མེད་དུ། །གདོས་བཅས་ལུས་བླངས་སྐྱེ་བ་དཔག་མེད་ཞིག །ཤ་རུས་བསགས་ན་འཇིག་རྟེན་གཏོས་དང་མཉམ། རྣག་ཁྲག་བསགས་ན་རྒྱ་མཚོ་ཆེན་པོ་ཙམ། །ལས་འཕྲོ་བསགས་ན་མཐའ་ཡས་བརྗོད་མི་ལང་། །ཁམས་
གསུམ་བགྲངས་ཤིང་སྐྱེ་བའི་ཁ་བརྒྱུད་ཀྱང་། །བྱས་པའི་ལས་རྣམས་དོན་མེད་ཆུད་རེགས་ན། །བཀའ་ཡི་གཏན་ཚིགས་ཟབ་མོ་མ་ཁྲོལ་ཅིང་། །ཤེས་རབ་ཟབ་མོའི་མིག་བུ་མ་བྱེ་བས། །སྲིད་པའི་ཡོ་བྱད་གཏོང་བར་མ་ཕོད་ཅིང་། །ཕུང་པོ་སྒྱུ་མའི་ལུས་ལ་ཆགས་ཤིང་ཞེན། །ལས་ཀྱི་དབང་བཙན་
ཉོན་མོངས་སྟོབས་ཆེ་བས། །ཤ་ཁྲག་དྲ་བའི་ལུས་བླངས་འཁོར་བར་འཁྱམས། །སྡུག་བསྔལ་དྲག་པོ་སྲིད་པའི་བཙོན་རར་ཚུད། །མི་བཟད་སྡུག་བསྔལ་དྲག་པོ་འདི་འདྲ་ན། །ཉེས་པ་ཐམས་ཅད་རང་གི་ལས་ལས་བྱུང་། །ཐུགས་རྗེ་ཆེན་པོས་ལས་ངན་རྒྱུན་བཅད་དེ། །ཉོན་མོངས་ལས་

73-1-110a

ཀྱི་རྒྱུན་ནི་བཟློག་ཏུ་གསོལ། །ཉོན་མོངས་ལས་ཀྱི་རྒྱུན་ནི་དབང་བཙན་པས། །མ་རིག་མུན་པའི་ནང་དུ་གཏན་འཁྱམས་ཏེ། །ཡེ་ཤེས་ཉི་མའི་འོད་ཀྱིས་བསལ་དུ་གསོལ། །ཉེས་བྱས་ལས་ཀྱི་འབྲས་བུ་མི་བཟད་ན། །ཐུགས་རྗེ་ཆེན་པོས་ཕྲིན་ལས་མཛད་དུ་གསོལ། །དུག་གསུམ་སྡུག་
བསྔལ་ནད་ཀྱིས་གཟིར་ལགས་ན། །ཐབས་མཁས་ཐུགས་རྗེའི་སྨན་གྱིས་གསོ་བར་གསོལ། །ཕྱིན་ཅི་ལོག་གི་གཡང་སར་ལྷུང་ལགས་ན། །མྱུར་མགྱོགས་ཐུགས་རྗེའི་ཕྱག་གིས་གཟུང་དུ་གསོལ། །སྲིད་པའི་ཆུ་བོས་བདག་ཅག་ཁྱེར་ལགས་ན། །ཟག་མེད་ཡེ་ཤེས་གྲུ་ཡིས་བསྒྲལ་དུ་གསོལ། །
རྒྱལ་བའི་མཚན་བརྗོད་ཡོན་ཏན་བསམ་མི་ཁྱབ། །ཡོན་ཏན་གཞུང་ལས་ཇི་ལྟར་བྱུང་བ་བཞིན། །མ་ལུས་བདག་ལ་མྱུར་དུ་སྩལ་དུ་གསོལ། །རྒྱལ་བའི་ཐུགས་ཀྱིས་བདག་ལ་བྱིན་གྱིས་རློབས། །ཕྱག་འཚལ་བསྟོད་དང་སྡིག་བཤགས་སྨྲེ་གསོལ་དང་། །དགེ་བའི་ལས་ནི་ཅུང་ཟད་ཅི་བསགས་པ། །
ཐམས་ཅད་བླ་མེད་བྱང་ཆུབ་ཆེན་པོར་བསྔོ། །མི་དམིགས་བསྔོ་དང་གསོལ་བཏབ་སྨོན་ལམ་དང་། །སྤྱན་རས་གཟིགས་དབང་ཐུགས་རྗེའི་བྱིན་རླབས་ཀྱིས། །ཞིང་རབ་དམ་པའི་གནས་སུ་སྐྱེ་བར་ཤོག །ཞིང་རབ་དམ་པའི་གནས་སུ་སྐྱེས་ནས་ཀྱང་། །རྒྱལ་བ་སྲས་བཅས་ཞལ་མཐོང་གསུང་
ཐོས་ཤོག །ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །མཆོད་པའི་ཡོ་བྱད་བདག་ལ་མ་མཆིས་པས། །སྨྲེ་སྔགས་ཆེན་པོས་ཁྱེད་ལ་གསོལ་འདེབས་ན། །མཆོག་གི་དངོས་གྲུབ་མ་ལུས་སྩལ་དུ་གསོལ། །ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །གང་དང་གང་ལ་མགོན་
དང་སྐྱབས་མེད་པ། །དེ་དང་དེ་ཡི་མགོན་སྐྱབས་ཞལ་བཞེས་ན། །སྐྱབས་མེད་སྡིག་ཅན་རྣམས་ལ་བསྐྱབ་ཏུ་གསོལ། །སྐྱབས་མེད་ཚེ་འདས་རྣམས་ལ་བསྐྱབ་ཏུ་གསོལ། །སྐྱབས་མེད་འཁོར་བར་འཁྱམས་ལ་བསྐྱབ་ཏུ་གསོལ། །ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །ཉིན་
རེ་བཞིན་དུ་སྡིག་པ་ཟིལ་གྱིས་ནོན། །ལས་ངན་སྒྲིབ་པ་ཅི་མཆིས་བསལ་དུ་གསོལ། །ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །བདག་ནི་ཉོན་མོངས་དབང་དུ་མི་འགྲོ་བར། །སྡིག་པའི་ལས་ནི་གང་ཡང་མི་བྱེད་ཅིང་། །ཉིན་དང་མཚན་དུ་ཆོས་ལ་སྤྱོད་པ་རུ། །ཐུགས་རྗེ་ཆེན་པོས་བྱིན་གྱིས་

73-1-110b

བརླབ་ཏུ་གསོལ། །ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །མཚན་ནས་བརྗོད་པ་ཙམ་གྱིས་སྡུག་བསྔལ་རྣམས། །ཞི་བར་མཛད་པ་ཁྱེད་དང་མཇལ་གྱུར་ན། །བདག་གིས་འབད་ཀྱང་འབྲས་བུ་མ་མཆིས་ན། །ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །ཁྱེད་ཀྱི་གཟུངས་སྔགས་
བརྗོད་པའི་ཕན་ཡོན་ནམ། །ཡོན་ཏན་གཞུང་ལས་ཇི་ལྟར་བཤད་པ་བཞིན། །མ་ལུས་བདག་ལ་མྱུར་དུ་སྩལ་དུ་གསོལ། །ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །བདག་གིས་ཁྱེད་བསྒོམས་སྙིང་པོ་བཟླས་པ་དང་། །ཕྱག་འཚལ་བསྟོད་དང་སྡིག་བཤགས་སྨྲེ་གསོལ་བས། །མགོན་
པོ་ཁྱེད་ཀྱི་ཞལ་མཐོང་གསུང་ཐོས་ནས། །ཁྱེད་ཀྱི་གོ་འཕང་མྱུར་དུ་ཐོབ་ནས་ཀྱང་། །བདག་ཀྱང་ཁྱེད་ལྟར་འགྲོ་དོན་བྱེད་པར་ཤོག །ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །ཇི་སྲིད་བདག་ནི་འཁོར་བའི་ཚེ། །དེ་སྲིད་བདག་གི་ལུས་སྐྱེད་པས། །ལུས་ཀྱིས་མགོན་པོ་མཆོད་བྱེད་ཅིང་། །ལུས་
ཀྱི་ཚོགས་ནི་རྫོགས་པར་ཤོག །ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །ཇི་སྲིད་བདག་ནི་འཁོར་བའི་ཚེ། །དེ་སྲིད་བདག་གི་ངག་སྐྱེད་པས། །ངག་གིས་མགོན་པོའི་མཚན་བརྗོད་ཅིང་། །ངག་གི་ཚོགས་ནི་རྫོགས་པར་ཤོག །ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །ཇི་སྲིད་
བདག་ནི་འཁོར་བའི་ཚེ། །དེ་སྲིད་བདག་གི་ཡིད་སྐྱེད་པས། །ཡིད་ཀྱིས་མགོན་པོ་རྗེས་དྲན་ཞིང་། །ཡིད་ཀྱི་ཚོགས་ནི་རྫོགས་པར་ཤོག །དེ་ལྟར་ལུས་ངག་ཡིད་གསུམ་གྱིས། །ཐུགས་རྗེའི་དབང་ཕྱུག་བསྟེན་བགྱིས་པས། །ལུས་ངག་ཡིད་གསུམ་སྐྱོན་བྲལ་ནས། །ཡོན་ཏན་ཕུན་སུམ་ཚོགས་པར་ཤོག །
དེ་ལྟར་ལུས་ངག་ཡིད་གསུམ་གྱི། །ཐུགས་རྗེའི་དབང་ཕྱུག་སྐུ་གསུང་ཐུགས། །རྟག་ཏུ་དད་གུས་བགྱིས་པ་ན། །ཐུགས་རྗེའི་དབང་ཕྱུག་སྤྱན་རས་གཟིགས། །སྲིད་གསུམ་རེ་བའི་གནས་གཅིག་པོ། །ཡོན་ཏན་བསམ་གྱིས་མི་ཁྱབ་པ། །དེ་འདྲ་བདག་ཀྱང་འགྲུབ་གྱུར་ནས། །སྲིད་གསུམ་རེ་བ་
རྫོགས་པར་ཤོག །སྲིད་གསུམ་འདོད་དགུ་འབྱུང་བར་ཤོག །སྲིད་པ་གསུམ་གྱི་སེམས་ཅན་ལ། །དངོས་སམ་བརྒྱུད་པས་ཕན་ཐོགས་ཤོག །འཕགས་པ་སྤྱན་རས་གཟིགས་དབང་ཕྱུག་ལ། སློབ་དཔོན་ཙནྡྲ་གོ་མིས་བསྟོད་པ་སྨྲེ་སྔགས་སུ་གསོལ་བ་རྫོགས་སོ།།      །།

73-1-111a

༄༅༅། །རྒྱ་གར་སྐད་དུ། མ་ཧཱ་ཀཱ་རུ་ཎི་ཀ་ཀུ་བཱཀྱ་སྟོ་ཏྲཱ་དྷི་ཏིཥྛཱ་ཏ་ནཱ་མ། བོད་སྐད་དུ། ཐུགས་རྗེ་ཆེན་པོ་ལ་སྨྲེ་སྔགས་ཀྱིས་བསྟོད་པ་བྱིན་རླབས་ཅན་ཞེས་བྱ་བ། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །
དྲི་མེད་དུང་མདོག་མཆོག་ཏུ་གཟུགས་བཟང་བ། །རྣམ་དག་འོད་གསལ་ཟླ་བའི་དཀྱིལ་ལྟར་མཛེས། །ཇི་ལྟར་མཁའ་ལ་ཉི་འོད་སྟོང་འབར་བཞིན། །དཔའ་བོ་འོད་ཟེར་སྟོང་འབར་ལྷམ་མེ་བ། །སྲིད་པ་གསུམ་གྱི་ས་མཁན་སྟོན་པར་གྲགས། །ཁམས་གསུམ་འགྲོ་བ་ཀུན་གྱི་གཉེན་གཅིག་
པོ། །བྱམས་མགོན་ཐུགས་རྗེའི་ལྷ་ཁྱོད་བདག་ལ་དགོངས། །བདག་ནི་ཐོག་མ་མེད་པའི་དུས་མཐའ་ནས། །ལམ་ལོག་ལམ་སྟོར་སྲིད་པའི་འཁོར་བར་འཁྱམ། །སྔོན་ཚེ་ལས་ལོག་སྡིག་པ་སྤྱད་པས་ནོངས། །སྡིག་པའི་ལས་རྣམས་ཅི་བྱས་རབ་གནོང་འགྱོད། །དར་ཞིང་དྲག་པའི་ལས་དེ་དབང་བཙན་
པས། །འཁོར་བའི་སྡུག་བསྔལ་རྒྱ་མཚོར་བྱིང་གྱུར་ཏེ། །ཞེ་སྡང་འབར་བའི་མེ་ཡིས་རང་རྒྱུད་བསྲེགས། །གཏི་མུག་མུན་པའི་ཚོགས་ཀྱིས་ཤེས་རྒྱུད་རྨོངས། །འདོད་ཆགས་རྒྱ་མཚོའི་ནང་དུ་རྣམ་ཤེས་བྱིང་། །ང་རྒྱལ་ཆེན་པོའི་རི་བོས་ངན་འགྲོར་མནན། །ཕྲག་དོག་རླུང་དམར་འཚུབ་མས་འཁོར་བར་
གཡེངས། །བདག་ཏུ་འཛིན་པའི་མདུད་པ་དམ་པོས་བཅིངས། །འདོད་པ་མེ་མདག་དོང་འདྲའི་འོབས་སུ་ལྷུང་། །སྡུག་བསྔལ་དྲག་པོའི་འདམ་རྫབ་ཆར་ལྟར་བབ། །མེ་ཁམས་ཉི་མའི་དུགས་ནི་སྟེང་ནས་ཚ། །ཆུ་ཁམས་ས་ཡི་རླན་ནི་འོག་ནས་གྲང་། །ཕྱི་ཡི་སེར་བུའི་ངད་ནི་ཐད་ནས་ཚ། །ཀུན་ནས་
འཁྲུགས་པའི་རླུང་ནི་ཁོང་ནས་ལྡང་། །དེ་ལྟའི་སྡུག་བསྔལ་ཤིན་ཏུ་བཟོད་དཀའ་ཡང་། །སྡོམ་པའི་ཡི་དམ་གཞིག་ཏུ་ག་ལ་རུང་། །སྡུག་བསྔལ་ཀུན་དང་བསྡོས་ནས་སྡོམ་བསྲུང་ཞིང་། །མོས་པའི་དད་པས་འཕགས་མཆོག་མི་འདོར་ན། །འཕགས་མཆོག་འགྲོ་དོན་མི་མཛད་ཅི་ཞིག་དགོངས། །
བྱམས་མགོན་ཅི་སླད་བདག་ལ་ཐུགས་མི་བརྩེ། །བདག་འདྲའི་བླུན་རྨོངས་ལས་ངན་སྡིག་པོ་ཆེ། །ལས་ཀྱི་དབང་གིས་སྙིགས་མའི་དུས་འདིར་སྐྱེས། །སྐྱེས་པས་འགྱོད་དེ་ལས་ལ་ཡི་རེ་ཆད། །ཡི་ཆད་འགྱོད་ཀྱང་ལས་དབང་བཅོས་སུ་མེད། །ལས་ཀྱི་ཤུགས་ནི་ཆུ་བོའི་རྒྱུན་དང་འདྲ། །ལས་

73-1-111b

དབང་ཆུ་རྒྱུན་འབོག་པར་ཤིན་ཏུ་དཀའ། །བཀའ་ལ་ཞུགས་ཀྱང་བཀའ་བཞིན་རྔོ་མ་ཐོགས། །ལུས་ངག་ཡིད་གསུམ་སྡིག་པའི་དབང་དུ་སོང་། །སྡིག་པའི་ལས་དབང་དྲག་པོའི་མེ་འབར་བས། །རྣམ་ཤེས་དབང་པོའི་མྱུ་གུ་གདུངས་གྱུར་ཏེ། །ཕུང་པོ་སྒྱུ་མའི་ལུས་འདིས་མི་བཟོད་ན། །བྱམས་
མགོན་ཐུགས་རྗེ་ཅན་གྱིས་དགོངས་ལགས་སམ། །ཉི་ལྟར་འོད་གསལ་ཟླ་ལྟར་མདངས་གསལ་བའི། །ཐུགས་རྗེའི་ཞལ་ཉིད་བལྟ་བར་འཚལ་ལགས་ན། །ཐོག་མ་མེད་ནས་མ་རིག་ལིང་ཐོག་གིས། །ལྡོངས་པའི་ཆུ་བུར་མིག་གིས་མ་མཐོང་ན། །འགྲོ་བའི་མགོན་ཁྱོད་ད་ལྟ་ག་ན་བཞུགས། །སྡུག་
བསྔལ་དྲག་པོ་ཤིན་ཏུ་མི་བཟོད་པ། །ཤིན་ཏུ་སྐྲག་ཅིང་སྐྱི་གཡའ་རབ་འཇིགས་ནས། །དུང་དུང་གདུངས་པའི་སྨྲེ་སྔགས་འདི་འདོན་ཅིང་། །ཉམ་ཐག་ཕོངས་པའི་ང་རོས་འོ་དོད་འབོད། །བྱམས་མགོན་ཐུགས་རྗེ་ཅན་གྱིས་གསན་ལགས་སམ། །ནམ་ཞིག་འཆི་འཕོ་ལུས་སེམས་བརྗེ་བའི་ཚེ། །གཉེན་
བཤེས་གྲོགས་དང་ཕྲལ་ཏེ་གཤིན་རྗེས་ཁྲིད། །དེ་ཚེ་འཇིག་རྟེན་ཉེ་དུས་མི་སྟོངས་ཏེ། །ལས་ཀྱི་དབང་གིས་བདག་རང་གཅིག་པུར་ཁྲིད། །དུས་དེར་བདག་ལ་མགོན་སྐྱབས་མ་མཆིས་ན། །བྱམས་མགོན་ཁྱེད་ཀྱིས་འཁོར་བར་བདག་གཏོང་ངམ། །ལས་ཀྱིས་མནར་བའི་སྐྱེ་བོ་བདག་འདྲ་བ། །ཐོག་
མ་མེད་པའི་དུས་ནས་ལམ་ལོག་པས། །ཁམས་གསུམ་འཁོར་བའི་གནས་ལས་མ་ཐར་ཏེ། །བསྐལ་པ་དཔག་མེད་སྐྱེ་བ་ཇི་སྙེད་དུ། །སྔོན་ཆད་ལུས་བླངས་གྲངས་མེད་ཞིག་གྱུར་ཏེ། །ཤ་རུས་བསགས་ན་འཇིག་རྟེན་གཏོས་དང་མཉམ། །རྣག་ཁྲག་བསགས་ན་རྒྱ་མཚོ་ཆེན་པོ་ཙམ། །ལས་འཕྲོ་
བསགས་ན་བསམ་འདས་བརྗོད་མི་ལང་། །ཁམས་གསུམ་བགྲང་ཞིང་སྐྱེ་བ་མང་བརྒྱུད་ཀྱང་། །བྱས་པའི་ལས་རྣམས་དོན་མེད་ཆུད་རེ་ཟོས། །སྐྱེ་བ་གྲངས་མེད་ཇི་སྙེད་དེ་ཙམ་ལ། །སྐྱེ་བ་གཅིག་གིས་ཁོ་ན་ཙམ་གྱི་ལས། །བླ་མེད་བྱང་ཆུབ་དོན་དུ་རབ་འབད་ན། །དེ་ཙམ་བྱས་པའི་ལས་ལའང་དོན་རེ་ཡོད། །
ལས་ནི་དབང་བཙན་ཉོན་མོངས་སྟོབས་ཆེ་བས། །ཤ་ཁྲག་འདུས་པའི་ལུས་བླངས་འཁོར་བར་འཁྱམས། །སྡུག་བསྔལ་དྲག་པོས་སྲིད་པའི་བཙོན་རར་ཚུད། །མི་བཟོད་སྡུག་བསྔལ་དྲག་པོ་འདི་མྱོང་ན། །ཉེས་བྱས་ཐམས་ཅད་རང་གི་ལས་ལས་བྱུང་། །བྱམས་མགོན་ཐུགས་རྗེ་ཅན་གྱིས་

73-1-112a

བཟོད་ལགས་སམ། །ཐུགས་རྗེ་ཆེན་པོས་ངན་སོང་རྒྱུན་གཅད་དེ། །ཉོན་མོངས་ལས་ཀྱི་རླུང་ནི་ཟློག་ཏུ་གསོལ། །ཉོན་མོངས་ལས་ཀྱི་རླུང་ནི་དབང་བཙན་ནས། །མ་རིག་མུན་པའི་གླིང་དུ་གཏན་འཁྱམས་ན། །ཡེ་ཤེས་སྒྲོན་མེའི་ཟེར་གྱིས་མི་གཟིགས་སམ། །ཉེས་བྱས་ལས་ཀྱི་འབྲས་
བུ་མི་བཟོད་ན། །ཐུགས་རྗེ་ཅན་ཁྱོད་ཕྲིན་ལས་མི་མཛད་དམ། །དུག་གསུམ་བཟོད་དཀའི་ནད་ཀྱིས་གདུངས་ལགས་ན། །ཐུགས་རྗེ་ཐབས་མཁས་སྨན་གྱིས་མི་གསོ་འམ། །ཕྱིན་ཅི་ལོག་གི་གཡང་སར་ལྷུང་ལགས་ན། །ཐུགས་རྗེས་མྱུར་མགྱོགས་ཕྱག་གིས་མི་འཛིན་ནམ། །སྡུག་བསྔལ་དྲག་
པོའི་ལས་དབང་མེ་འབར་ན། །ཐུགས་རྗེས་བསིལ་བའི་ཆུ་རྒྱུན་མི་འབེབས་སམ། །སྡུག་བསྔལ་ཆེན་པོས་མནར་རོ་ར་མདའ་མཛོད། །རེ་སས་སླུ་བར་མ་མཛད་སྤྱན་རས་གཟིགས། །གང་ལ་གང་འདུལ་འགྲོ་བའི་དོན་མཛད་པར། །ཞལ་བཞེས་མང་པོའི་དམ་བཅའ་མི་མཛད་དམ། །མཐོང་ཐོས་དྲན་
རེག་འབྱུང་བར་མ་གསུངས་སམ། །སྙིགས་མའི་དུས་ཀྱི་ངན་སྤྱོད་མ་གཟིགས་སམ། །ངན་སོང་རྒྱུ་འབྲས་བསྒྲུབ་པ་མ་གཟིགས་སམ། །སྡུག་བསྔལ་དབའ་ཀློང་འཁྲུགས་པ་མ་མཁྱེན་ནམ། །ནུས་མཐུ་དཔག་མེད་མངའ་བ་མ་ལགས་སམ། །བྱམས་མགོན་འགྲོ་དོན་མཛད་པར་འཕྱིས་པ་ཙམ། །
ཁམས་གསུམ་འཁོར་བའི་གནས་སུ་སྦྱངས་སྦྱངས་ནས། །ནམ་ཞིག་རང་གིས་འབྲས་བུ་ཐོབ་པའི་ཚེ། །འཕགས་པའི་ཐུགས་རྗེས་ཅི་འཚལ་དོན་མ་མཆིས། །སེམས་ཅན་ལས་འཕྲོ་རང་སོར་བཞག་ན་ནི། །འཕགས་པའི་ཐུགས་རྗེས་སུ་ལ་ཅི་ཞིག་བགྱི། །ཐུགས་རྗེས་འགྲོ་རྣམས་སྒྲོལ་བར་ཞལ་བཞེས་
པའི། །དམ་བཅས་དོན་དེ་དེ་རིང་དགོངས་སུ་གསོལ། །འཕགས་མཆོག་ཁྱེད་ལ་ཐུགས་རྗེའི་སྟོབས་མངའ་ན། །ཡལ་ཡོལ་ལེ་ལོ་བཏང་སྙོམས་མ་མཛད་པར། །སྙིང་ནས་གཟིགས་ཤིག་ཐུགས་རྗེ་རྒྱལ་བའི་ལྷ། །རེ་ས་གཞན་ན་མེད་དོ་ཐུགས་རྗེས་ཟུང་། །བྱང་ཆུབ་སེམས་དཔའ་སྤྱན་རས་གཟིགས་
དབང་ཕྱུག་ལ་སྨྲེ་སྔགས་ཀྱི་སྒོ་ནས་བསྟོད་པ་བྱིན་རླབས་ཅན་འདི་ཉིད་ལྔ་བརྒྱ་པ་རྣམས་ཀྱི་གཙུག་གི་ནོར་བུ་ལྟ་བུར་གྱུར་པ། མཐོང་ལམ་རྒྱུད་ལ་སྐྱེས་པའི་གང་ཟག །སློབ་དཔོན་ཆེན་པོ་ཟླ་བ་གྲགས་པའི་ཞལ་སྔ་ནས་མཛད་པ་རྫོགས་སོ།།      །།༄༅༅། །ཐུགས་རྗེ་ཆེན་པོ་འཕགས་པ་སྤྱན་

73-1-112b

རས་གཟིགས། །འགྲོ་ལ་ཉེ་རིང་མེད་པས་ཁྱད་དུ་འཕགས། །སེམས་ཅན་རྣམས་ལ་སྤྱན་རས་གཟིགས་མཛད་ལ། །ཀུན་གྱིས་རང་ངོ་ཤེས་པར་བྱིན་གྱིས་རློབས། །རང་དོན་དུ་ཆོས་སྐུ་རྟོགས་པ། གཞན་དོན་དུ་གཟུགས་སྐུ་རྣམ་པ་གཉིས་ཀྱིས། མཐོང་ཐོས་དྲན་རེག་གི་སྒོ་ནས། འགྲོ་བ་ཡོངས་
ལ་ཕན་ཐོགས་པ། འགྲོ་བ་ཡོངས་ཀྱི་དོན་རླབས་པོ་ཆེ་འགྲུབ་པར་བྱིན་གྱིས་བརླབ་ཏུ་གསོལ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཙཀྲ་བརྟྟི། ཙིནྟཱ་མ་ཎི། མ་ཧཱ་པདྨ་རུ་རུ་ཏིཥྛ། ཛྭ་ལ་ཨཱ་ཀཱཪྵ་ཡ། ཧཱུཾ་ཕཊ་སྭཱ་ཧཱ། 
རྩ་བའི་གསང་སྔགས་སོ། །ཨོཾ་པདྨ་ཙིནྟཱ་མ་ཎི་ཛྭ་ལ་ཧཱུཾ། སྙིང་པོའོ། །ཨོཾ་བྷ་ར་ཏ་པདྨེ་ཧཱུཾ། ཉེ་བའི་སྙིང་པོའོ།།      །།༄༅༅། །རྒྱ་གར་སྐད་དུ། ཀཱ་རུ་ཎ་སྟོ་ཏྲ། བོད་སྐད་དུ། སྙིང་རྗེ་ལ་བསྟོད་པ། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །པདྨས་བརྒྱན་པ་
ལྷུན་པོ་ལས་བྱུང་བ། །པདྨ་དྲི་མེད་ཕྱག་གི་དབུས་ན་བསྣམས། །ཐོར་ཚུགས་ཅན་ལ་གཟུགས་ལྡན་ཅོད་པན་ཐོགས། །སྤྱི་བོ་འོད་དཔག་མེད་བརྒྱན་ཕྱག་འཚལ་ལོ། །ཐུགས་རྗེ་བྱམས་པས་གཟིགས་པའི་བཅོམ་ལྡན་འདས། །ཕོངས་གྱུར་འགྲོ་བ་ལ་ནི་ཁྱོད་ལྟ་བུ། །གཟིགས་པ་ཙམ་གྱིས་ཞི་བར་
མཛད་པ་པོ། །སྤྱན་རས་གཟིགས་ཀྱིས་བདག་ལ་གཟིགས་སུ་གསོལ། །མཆོག་སྦྱིན་བདག་ནི་རབ་ཏུ་སྡུག་བསྔལ་ཏེ། །མུན་ནག་གཏིབས་པ་སྣང་བ་མེད་པ་བཞིན། །རི་བོ་གཡང་སའི་ཁ་ན་གནས་འདྲ་ཡི། །དུས་འདིར་ཐུགས་རྗེ་ལྡན་པས་གཟིགས་སུ་གསོལ། །ཕོངས་པ་གང་གིས་ད་ནི་དྲན་
བྱས་ན། །དེ་ཡི་སྡུག་བསྔལ་བསལ་བར་བྱའོ་ཞེས། །དང་པོའི་སྨོན་ལམ་མི་འགྱུར་དེ་ལགས་ན། །བདག་ལ་དེ་འདྲའི་འབྲས་བུ་མཆིས་པར་མཛོད། །ད་ནི་མཐོང་ཐོས་རེག་པའམ་དྲན་ཡང་རུང་། །ནད་རྣམས་ཀུན་གྱི་གསོས་སུ་གྱུར་ཅིག་ཅེས། །བདག་ནི་མི་བཟད་ནད་ཀྱིས་ཐེབས་ལགས་ཀྱིས། །
མཆོག་སྦྱིན་དམ་བཅས་དེ་དག་དགོངས་སུ་གསོལ། །གང་ཞིག་སྡུག་བསྔལ་གང་གིས་ཉམ་ཐག་པ། །དེ་དང་དེ་ཡི་སྡུག་བསྔལ་བསལ་ལོ་ཞེས། །འགྲོ་ལ་དགོངས་པ་ཁྱོད་ཀྱིས་རྒྱུན་འབྱུང་ན། །མགོན་པོ་ཅི་སླད་སྡུག་བསྔལ་བདག་མ་གཟིགས། །གང་གིས་ཁྱོད་ནི་རྗེས་དྲན་ཙམ་གྱིས་ཀྱང་། །

73-1-113a

དེ་ཡི་མོད་ལ་མགོན་པོས་གནོད་བསལ་ན། །བདག་ནི་རྟག་ཏུ་འདི་ན་བྲོ་འཚལ་ཀྱང་། །ཐུགས་དཔག་མ་མཛད་པ་ནི་བདག་བྱུར་ངན། །མཐུ་ལྡན་སྒྱུ་མེད་ཕན་མཛད་བློ་གྲོས་ཅན། །ཐུགས་རྗེ་ལྡན་པ་ཁྱོད་ལ་བསྟེན་ཀྱང་ནི། །ཅི་སྟེ་འདི་དག་ཞི་བར་མ་གྱུར་ན། །བདག་ནི་སྡུག་བསྔལ་གྱུར་ཏེ་
ཀྱི་ཧུད་ཀྱིས། །གང་དང་གང་དག་སྡུག་བསྔལ་ཉམ་ཐག་ཅིང་། །གང་དང་གང་དག་མགོན་མེད་གྱུར་རྣམས་ལ། །དེ་དང་དེར་ནི་ཁྱོད་ཀྱི་ཐུགས་རྗེ་སྟེ། །མངོན་པར་འཕེལ་བར་འགྱུར་ཞེས་དེ་སྐད་གདའ། །དེ་ནི་ལས་ངན་ཉོན་མོངས་བདག་ལགས་ཤིང་། །སྡུག་བསྔལ་བཟོད་དཀས་ལུས་གཟིར་སྐྱབས་
མ་མཆིས། །སྐྱབས་མེད་བདག་ལ་ཅི་སླད་ཐུགས་མི་རྗེ། །ཉི་ཚེར་གྱུར་ན་ཐུགས་རྗེ་མ་ལགས་མོད། །གང་ཚེ་སྔོན་ཆད་རྨོངས་པ་འཇིག་རྟེན་ན། །ཁྱོད་ཉིད་རྗེས་སུ་དྲན་པར་མ་བགྱིས་པ། །བདག་ནི་ཉོན་མོངས་སྟོབས་ཀྱིས་ཤིན་ཏུ་གཟིར། །མགོན་པོ་འགུམ་དུ་ཉེ་ན་ཐུགས་རྗེས་གཟིགས། །
ཐུགས་རྗེའི་འབྱུང་གནས་ཐུགས་རྗེ་ཆེ་རྒྱས་པ། །སྡུག་བསྔལ་མ་ལུས་ཟད་པར་མཛད་ཁྱོད་ཀྱིས། །ཅི་སྟེ་བདག་ནི་སྤངས་པར་གྱུར་ན་ཡང་། །བདག་གི་མགོན་བགྱིད་གཞན་ནི་སུ་ལགས་གསུངས། །ཁྱོད་ལ་སྐྱབས་སུ་མཆིས་པ་ཙམ་གྱིས་ཀྱང་། །དེ་ཡི་མོད་ལ་སྡུག་བསྔལ་སེལ་མཛད་པས། །
མགོན་པོ་ཁྱོད་ནི་བདག་གི་སྐྱབས་ལགས་ཀྱིས། །ཐུགས་རྗེས་མི་བཟད་འདི་ལས་བསྐྱབ་ཏུ་གསོལ། །མཚན་ནས་བརྗོད་པ་ཙམ་གྱིས་ཉམ་ཐག་པ། །ཞི་བར་མཛད་པ་ཁྱོད་དང་མཇལ་གྱུར་ལ། །བདག་གིས་འབད་ཀྱང་འབྲས་བུ་མ་མཆིས་ན། །ཁྱོད་ནི་ཐུགས་རྗེ་ཅན་དུ་རུང་ལགས་སམ། །ཁྱོད་
ཀྱིས་སེམས་ཅན་བསྐྱབ་ཕྱིར་སྨོན་ལམ་གང་། །བཏབ་པར་གྱུར་དེའང་འགྲུབ་པར་འགྱུར་ལགས་ན། །བདག་ཀྱང་སེམས་ཅན་གྲངས་སུ་གཏོགས་པས་ན། །མཆོག་སྦྱིན་བདག་གི་དུཿཁ་བསལ་དུ་གསོལ། །ཁྱོད་ལ་བདག་ནི་སྐྱབས་སུ་མཆིས་ཀྱང་ནི། །ཅི་སྟེ་དེ་ནི་ཉམ་ཐག་གྱུར་ན་ཀོ། །ཉི་མ་མུན་
པའི་ཚོགས་སུ་གྱུར་པ་བཞིན། །ཟླ་བའི་འོད་ཟེར་སྲེག་པར་བྱེད་འདྲ་གང་། །ཁྱོད་ནི་འཇིག་རྟེན་དག་ལ་གསོལ་འདེབས་ན། །བདག་ནི་ཁྱོད་ལ་གསོལ་བ་བགྱིད་གྱུར་པ། །བདག་ནི་སྐྱེ་བོ་ངན་པ་སྐལ་བ་ཆུང་། །བསོད་ནམས་མིན་པའི་དྲི་མ་ངན་པ་ཅན། །མགོན་པོ་ཐུགས་རྗེ་ཆེ་དང་མ་བྲལ་

73-1-113b

བས། །སེམས་ཅན་དོན་ལ་བསྐུལ་ལྟ་མི་འཚལ་ཀྱང་། །སྡུག་བསྔལ་རང་བཞིན་དུ་ནི་བདག་གྱུར་པས། །སྐྱོབ་པའི་སྤྱན་སྔར་ཡང་ནི་གསོལ་བ་འདེབས། །ཕ་དང་མ་ལ་གང་ཞིག་སློང་ན་ཡང་། །ཤིན་ཏུ་སྐྱོ་བ་མེད་པ་ཇི་བཞིན་དུ། །སེམས་ཅན་དོན་བརྩོན་དེ་ནི་ཁྱོད་ལགས་པས། །ཚེ་རབས་
ཀུན་དུ་བདག་གི་སྐྱབས་མཛད་ཅིག །སྡུག་བསྔལ་མི་བཟད་པས་ནི་བདག་གདུངས་པས། །བཅོམ་ལྡན་འདས་ལ་རྟག་ཏུ་འབོད་སྒྲོགས་ཀྱིས། །ཉིན་གཅིག་བཞིན་དུ་སྡིག་པའི་ལས་ཀྱིས་ནི། །ཟིལ་ནོན་འདི་ལས་བདག་ལ་སྲུང་དུ་གསོལ། །དེ་ལྟར་བདག་གིས་ཤིན་ཏུ་སྨྲེས་གསོལ་བས། །
ཁྱོད་ཀྱི་ཐུགས་ནི་ཐུགས་རྗེས་བརླན་པ་ལྟར། །འགྲོ་བ་སྡུག་བསྔལ་བརྒྱ་ཡིས་གཟིར་བ་ལ། །སྲིད་ལས་གྲོལ་བས་དེ་བཞིན་གཟིགས་སུ་གསོལ། །ཐུགས་རྗེའི་དབང་དུ་གྱུར་ཅིང་སེམས་བརྟན་ལ། །གཞན་དོན་བརྩོན་ཞིང་ཡོན་ཏན་མཆོག་གི་གནས། །ཁྱོད་བཞིན་བདག་ཀྱང་སྡུག་བསྔལ་
ཐམས་ཅད་ཀྱི། །གདུང་བ་སེལ་བའི་མཐུ་དང་ལྡན་པར་ཤོག །དེ་ལྟར་སྲིད་པ་མཐར་ཕྱིན་སྤྱན་རས་གཟིགས་དབང་ལ། །བདག་གིས་བསྟོད་པ་བགྱིས་པའི་བསོད་ནམས་གང་ཐོབ་པ། །དེས་ནི་འགྲོ་བའི་སྡུག་བསྔལ་སྤངས་ཤིང་བཅོམ་པ་ཡི། །རང་བཞིན་བདེ་ལྡན་བདེ་བ་ཅན་དུ་འགྲོ་བར་
ཤོག །སྙིང་རྗེ་ལ་བསྟོད་པ་དགེ་བསྙེན་ཀུན་སྦྱིན་གྱིས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། ཤྲཱི་ཨཱརྱཱ་བ་ལོ་ཀེ་ཏེ་ཤྭ་ར་སྱ་སྟུ་ཏི་ནཱ་མ། བོད་སྐད་དུ། དཔལ་འཕགས་པ་སྤྱན་རས་གཟིགས་དབང་ཕྱུག་ལ་བསྟོད་པ་ཞེས་བྱ་བ། འཇིག་རྟེན་མགོན་པོ་ལ་ཕྱག་འཚལ་ལོ། །འཇིག་
རྟེན་བླ་མ་སྲིད་པ་གསུམ་གྱིས་ཕྱག་བྱས་པ། །ཚངས་པ་མཆོག་དང་འཆི་མེད་བདག་པོས་བསྔགས་པ་སྟེ། །བསྟོད་པས་གྲུབ་པར་མཛད་པ་ཐུབ་པའི་རྒྱལ་པོ་མཆོག །སྤྱན་རས་གཟིགས་པའི་དབང་ཕྱུག་མགོན་པོ་མཆོག་གྱུར་པ། །གཟུགས་མཛེས་བདེ་བར་གཤེགས་པའི་སྲས་པོའི་ཚུལ་འཛིན་
ཅིང་། །སྐུ་ཡི་མཆོག་ནི་མཚན་གྱིས་མེ་ཏོག་གིས་བརྒྱན་པ། །བདེ་བར་གཤེགས་པ་འོད་དཔག་མེད་པའི་དབུ་རྒྱན་འཛིན། །གཡོན་པའི་ཕྱག་ནི་གསེར་གྱི་པདྨས་རྣམ་པར་བརྒྱན། །གཡས་པས་ཡི་དགས་བཀྲེས་པའི་གདུང་བ་སེལ་བར་མཛད། །དྲི་མེད་དམར་སེར་རལ་པ་གྱ་གྱུ་དུ་བ་འདྲ། །

73-1-114a

ཟླ་བའི་གཟུགས་བརྙན་ཡང་དག་རྒྱས་ཤིང་གང་འདྲའི་ཞལ། །མཆོག་ཏུ་མཛེས་པའི་སྤྱན་ནི་པདྨ་ལྟ་བུར་ཡངས། །ཁ་བ་དུང་ལྟར་རྣམ་པར་དཀར་བའི་འགྲམ་དོགས་ཅན། །ལྟེ་བའི་གནས་ནི་ཆུ་སྐྱེས་དཀར་པོ་དང་མཚུངས་ཤིང་། །སྐུ་དང་ཕྱག་མཐིལ་པདྨའི་འདབ་ལྟར་ཤིན་ཏུ་མཉེན། །
གཞོན་ནུའི་ན་ཚོད་ཆགས་པའི་ཚོན་གྱིས་མ་གོས་པ། །མེ་ཏོག་ཕྲེང་བ་མང་པོའི་སྦྱོར་བས་རྣམ་པར་བརྒྱན། །ཞལ་གྱི་སྦུབས་ནས་རི་དགས་རྒྱལ་པོའི་ང་རོ་དང་། །སྟོན་ཀའི་ཆུ་འཛིན་འབྲུག་གི་སྤྲིན་སྒྲ་སྒྲོགས་པ་བཞིན། །ནུ་མ་གཡོན་དུ་རི་དགས་པགས་པས་ངེས་པར་བཀབ། །ནོར་བུས་སྤྲས་པའི་སྐ་
རགས་སྐུ་ལ་འཆང་བ་སྟེ། །སྟ་ཟུར་རྣམ་པར་དཀྲིས་པའི་རས་ཀྱི་གོས་བཟངས་འཛིན། །ནོར་བུའི་རྐང་གདུབ་མཛེས་པར་བརྒྱུས་པ་ཟུང་གི་ཞབས། །གླང་པོ་རྣམ་པར་རྩེན་པ་དག་དང་ངང་པའི་འགྲོས། །ཡིད་བཞིན་ནོར་བུ་དཔག་བསམ་ཤིང་འདྲ་ངོ་མཚར་གཟུགས། །དཔལ་ལྡན་པོ་ཏ་ལ་ཡི་གནས་སུ་
ངེས་བཞུགས་ཏེ། །བསམ་གཏན་བཞི་ལ་མཉམ་པར་གཞག་པའི་སྤྱན་མངའ་ཞིང་། །དགའ་དང་སྙིང་རྗེའི་རང་བཞིན་གཡོ་ཞིང་མཛེས་པར་གཟིགས། །དེར་གནས་དོན་གྱི་ཕྱག་གིས་རིམས་དང་ནད་འཕྲོག་བྱེད། །དགེ་ཞིང་ཞི་བྱེད་བདེ་བ་མང་པོར་མཛད་པའི་ཕྱག །བསོད་ནམས་མང་པོ་ཉེ་བར་བསགས་
པའི་ཕྱག་མཐིལ་ཅན། །སྲིད་གསུམ་མཐར་བྱེད་ས་དང་ནམ་མཁར་སྤྱོད་རྣམས་ཀྱིས། །བསྔགས་པའི་སྐུ་ནི་རྣམ་པ་སྣ་ཚོགས་མི་འཁྲུགས་ཤིང་། །འོ་མའི་ཆུ་གཏེར་རྒྱ་མཚོ་ལྟ་བུར་རྟག་ཏུ་གནས། །རྒྱལ་བའི་ཡེ་ཤེས་རྒྱ་མཚོ་ཆེན་པོའི་ཕ་མཐར་སོན། །ཕ་རོལ་ཕྱིན་བཅུ་བདུད་ཀྱི་སྟོབས་ལས་
ངེས་པར་རྒྱལ། །ཚངས་པའི་གནས་བཞིས་དབེན་པར་སྤྱོད་མཛད་དམ་པའི་དོན། །གཉིས་མེད་ཡེ་ཤེས་དེ་བཞིན་ཉིད་དུ་རྣམ་སངས་རྒྱས། །བཅོམ་ལྡན་འཕགས་པ་སྤྱན་རས་གཟིགས་དབང་བསྟོད་ཕྱག་འཚལ། །དགེ་སློང་མ་ཟླ་མཛེས་ཀྱིས་བསྟོད་པ་མཛད་པ་རྫོགས་སོ།།      །།
འདི་ནི་རྒྱ་གར་ཤར་ཕྱོགས་ཀྱི་བཙུན་པ་ཙནྡྲ་ཤྲཱིའི་ངག་ལ་འབྱུང་བ་དང་རྒྱ་དཔེ་ལ་བསྟུན་ནས། དགེ་སློང་བསོད་ནམས་རྣམ་རྒྱལ་གྱིས་བསྒྱུར་བའོ།།      །།༄༅༅། །སྤྱན་རས་གཟིགས་དབང་མགོན་པོ་མཆོག་ལ་བསྟོད་པ་ཡི། །བསོད་ནམས་གང་ཞིང་ཟླ་བ་དུང་ལྟར་དཀར་བ་དེས། །

73-1-114b

རྒྱལ་བ་ཀུན་གྱི་སྲས་ཀྱི་ཐུ་བོ་དེ་ལྟ་བུར། །སྡུག་བསྔལ་འགྲོ་ལ་མི་འཇིགས་སྩོལ་བ་ཉིད་གྱུར་ཅིག །རལ་པ་འཆང་ཞིང་ཤིན་ཏུ་ཞི་བ་ཡངས་པའི་སྤྱན། །རྟག་པར་རབ་ཏུ་དང་བ་ཟླ་བའི་དཀྱིལ་འཁོར་ཞལ། །ལྷ་དང་ལྷ་མིན་རྣམས་ཀྱིས་ཞབས་ཀྱི་འདམ་སྐྱེས་ལ། །ཕྱག་བྱས་ནོར་བུ་པདྨ་ལས་བྱུང་
མགོན་པོར་འདུད། །འཕགས་པ་འཇིག་རྟེན་དབང་ཕྱུག་ལ། ཀླུའི་རྒྱལ་པོ་ནོར་རྒྱས་ཀྱི་བུས་བསྟོད་པ། དཔལ་ནགས་ཀྱི་རིན་ཆེན་གྱི་ཞལ་སྔར་བསོད་ནམས་རྣམ་པར་རྒྱལ་བས་བསྒྱུར་བའོ།    །༄༅༅། །རྒྱ་གར་སྐད་དུ། ཨཱརྱཱ་བ་ལོ་ཀེ་ཏེ་ཤྭ་ར་ས་ཧ་སྲ་བྷུ་ཛ་སཱ་དྷ་ནཾ། བོད་སྐད་
དུ། འཕགས་པ་སྤྱན་རས་གཟིགས་དབང་ཕྱུག་ཕྱག་སྟོང་པའི་སྒྲུབ་ཐབས། འཇིག་རྟེན་དབང་ཕྱུག་ལ་ཕྱག་འཚལ་ལོ། །སྤྱན་རས་གཟིགས་དབང་འཇིག་རྟེན་གསུམ་གྱི་མགོན། །འདས་པའི་དུས་སུ་མངོན་པར་སངས་རྒྱས་ཀྱང་། །ཐུགས་རྗེའི་དབང་གིས་ས་བཅུའི་ཚུལ་སྟོན་པ། །ཐབས་
ཚལ་དཔག་མེད་རིག་ལ་ཕྱག་འཚལ་ལོ། །དེ་ལ་དང་པོ་རེ་ཞིག་འཇིག་རྟེན་དབང་ཕྱུག་སྒྲུབ་པར་འདོད་པའི་རྣལ་འབྱོར་པས། འཇིག་རྟེན་གྱི་བྱ་བ་ཐམས་ཅད་སྤངས་ལ་འཇིག་རྟེན་གྱི་ཆོས་བརྒྱད་ཀྱིས་མི་བསྐྱོད་པ་རི་ལྟ་བུའི་རྣལ་འབྱོར་པས་ས་ཕྱོགས་ཤིན་ཏུ་ཉམས་དགའ་བ་མེ་ཏོག་དང་
འབབ་ཆུ་དང་ལྗོན་ཤིང་དང་འབྲས་བུ་སྣ་ཚོགས་ཡོད་པའི་སར་གནས་ཁང་ཤིན་ཏུ་ཉམས་དགའ་བར་སྐུ་གསུང་ཐུགས་ཀྱི་རྟེན་ཅི་རིགས་པར་བཀོད་པའི་སར་སྟན་ནང་ཚངས་ཅན་ལ་ཁ་ནུབ་ཕྱོགས་སུ་བལྟས་ནས་ཁྲུས་ཀྱི་རྣལ་འབྱོར་རྣམས་བྱས་ལ། ཨོཾ་ཨཱཿབིགྷྣཱན་ཏ་ཀྲྀཏ་ཧཱུཾ་ཕཊ། 
ཅེས་བརྗོད་པས་ཕྱོགས་བཅུའི་བགེགས་རྣམས་བསལ་བར་བྱའོ། །དེ་ནས་རང་གི་དོན་ཡོངས་སུ་དོར་བའི་བསམ་པས་གསུམ་ལ་སྐྱབས་སུ་འགྲོ་བར་བྱའོ། །ཚངས་པའི་གནས་བཞི་བསྒོམ་པར་བྱའོ། །དེ་ལ་སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་འཛིན་པ་ནི་བྱམས་
པའོ། །ཀྱེ་མའོ་སེམས་ཅན་འདི་དག་ནི་འཁོར་བའི་རྒྱ་མཚོར་ནུབ་ཅིང་ཡུན་རིང་དུ་སྡུག་བསྔལ་ཉམས་སུ་མྱོང་བར་གྱུར་ཏེ་ཞེས་བསམས་ལ། འདི་ནས་ལག་ཚར་དུང་ཡིས་འཁོར་བ་སྡུག་བསྔལ་གྱི་རྒྱ་མཚོ་ལས་གདོན་པར་བྱའོ་སྙམ་པ་ནི་སྙིང་རྗེ་ཆེན་པོའོ། །སེམས་ཅན་ཐམས་ཅད་

73-1-115a

ཟག་པ་མེད་པའི་བདེ་བ་རྒྱུན་མི་འཆད་པ་ལ་འཇོག་པར་འདོད་པ་ནི་དགའ་བའོ། །བདེ་བ་དང་། སྡུག་བསྔལ་བ་དང་། གྲགས་པ་དང་། མ་གྲགས་པ་དང་། རྙེད་པ་དང་། མ་རྙེད་པ་དང་། བསྟོད་པ་དང་། སྨད་པ་སྟེ། འཇིག་རྟེན་གྱི་ཆོས་བརྒྱད་པོ་དེ་དག་ཐམས་ཅད་མགོ་མཉམ་པར་
རྟོགས་པ་ནི་བཏང་སྙོམས་སོ། །དེ་ནས་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་སྤྱན་རས་གཟིགས་ཀྱི་དབང་པོའི་གོ་འཕང་ཐོབ་པར་བྱས་ལ། མངལ་ནས་སྐྱེས་པ་དང་། སྒོ་ང་ལས་སྐྱེས་པ་དང་། དྲོད་གཤེར་ལས་སྐྱེས་པ་དང་། རྫུས་ཏེ་སྐྱེས་པའི་སེམས་ཅན་འདི་དག་ཐམས་ཅད་
སངས་རྒྱས་ཀྱི་ས་ལ་གཞག་པར་བྱའོ་ཞེས་པ་བསམ་པ་བརྟན་པོ་བསྐྱེད་ལ། དེ་ནས་རང་གི་སྙིང་གར་ཆོས་ཀྱི་དབྱིངས་སྐྱེ་མེད་སྟོན་པར་བྱེད་པའི་ཡི་གེ་ལས་ཟླ་བའི་དཀྱིལ་འཁོར་བསམས་ལ་དེའི་སྟེང་དུ་ཧྲཱིཿདཀར་པོ་ཚེག་དྲག་དང་བཅས་པ་ལས་འོད་ཟེར་འཕྲོས་པས་ལུས་ཁྱབ་སྡིག་སྒྲིབ་སྦྱངས་
ནས་འཕགས་པ་སྤྱན་རས་གཟིགས་ཀྱི་དབང་པོ་ཕྱག་སྟོང་པར་བསྐྱེད། དེའི་སྙིང་ག་ནས་ཧྲཱིཿལས་འོད་ཟེར་འཕྲོས་པས་མདུན་གྱི་ནམ་མཁའ་ལ་འཕགས་པ་སྤྱན་རས་གཟིགས་ཀྱི་དབང་ཕྱུག་ཕྱག་སྟོང་པ་འཁོར་དང་བཅས་པ་བླ་མ་དང་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་བསམས་
ལ། དེ་རྣམས་ལ་ཕྱག་འཚལ་བའི་སྔགས། ཨོཾ་སརྦ་ཏ་ཐཱ་ག་ཏ་ཀཱ་ཡ་བཱཀ་ཙིཏྟ་པྲ་ཎ་མེ་ན་བཛྲ་བནྡ་ནཾ་ཀ་རོ་མི་ཞེས་བརྗོད་དོ། །དེ་ནས་གདན་དབུལ་བའི་སྔགས། ཨོཾ་སརྦ་ཏ་ཐཱ་ག་ཏ་པཱུ་ཛ་སྭསྠཱ་ནཱ་ཡ་ཨཱཏྨ་ནཱཾ་ནིརྱཱ་ཏ་ཡཱ་མི། ཞེས་བརྗོད་དོ། །དེ་ནས་ཧྲཱིཿལས་འོད་ཟེར་འཕྲོས་པས་མེ་ཏོག་ཐོགས་
པའི་ལྷ་མོ་དཀར་མོ་དཔག་ཏུ་མེད་པས་མཆོད་པར་བསམས་ལ། ཨོཾ་བཛྲ་པུཥྤེ་ཨཱཿཧཱུཾ་སྭཱ་ཧཱ། དེའི་རྗེས་ལ་ཨོཾ་བཛྲ་དྷཱུ་པེ་ཨཱཿཧཱུཾ་སྭཱ་ཧཱ། ཞེས་བརྗོད་པས་བདུག་སྤོས་ཐོགས་པའི་ལྷ་མོ་གཟུགས་དང་ལང་ཚོར་ལྡན་པ་ནམ་མཁའ་ཁེངས་པས་མཆོད་པར་བྱའོ། །དེའི་རྗེས་ལ་ཨོཾ་བཛྲ་དཱི་པེ་ཨཱཿཧཱུཾ་སྭཱ་ཧཱ། 
ཞེས་བརྗོད་པས་རིན་པོ་ཆེའི་སྒྲོན་མ་ཐོགས་པའི་ལྷ་མོ་དཔག་ཏུ་མེད་པས་མཆོད་པར་བྱའོ། །དེའི་རྗེས་ལ་ཨོཾ་བཛྲ་གནྡྷེ་ཨཱཿཧཱུཾ་སྭཱ་ཧཱ། ཞེས་བརྗོད་པས་དྲི་མཆོག་ཐོགས་པའི་ལྷ་མོ་སེར་མོ་དཔག་ཏུ་མེད་པས་མཆོད་པར་བྱའོ། །དེ་ནས་ཨོཾ་བཛྲ་ནཻ་བི་ཏྱེ་ཨཱཿཧཱུཾ་སྭཱ་ཧཱ། ཞེས་བརྗོད་པས་ཞལ་ཟས་

73-1-115b

ཐོགས་པའི་ལྷ་མོ་སེར་སྐྱ་མ་སྤྲིན་གཏིབས་པ་ཙམ་གྱིས་མཆོད་པར་བྱའོ། །དེ་ནས་ཨོཾ་སརྦ་བི་ཤིསྠཱ་པཱུ་ཛ་མེ་གྷ་པྲ་ས་ར་ས་མུ་དྲ་ཨཱཿཧཱུཾ། ཞེས་བརྗོད་ཅིང་སྙིང་གའི་ས་བོན་ལས་འོད་ཟེར་འཕྲོས་པའི་གདུགས་དང་། རྒྱལ་མཚན་དང་། བ་དན་དང་། བླ་རེ་དང་། འཁོར་ལོས་སྒྱུར་བའི་རིན་པོ་ཆེ་སྣ་བདུན་ལ་
སོགས་པས་མཆོད་པར་བྱའོ། །དེ་ནས་སྡིག་པ་བཤགས་པར་བྱ་སྟེ། ཐོག་མེད་འཁོར་བའི་འགྲོ་བར་གཏོགས་པ་ཡིས། །བྱས་པའི་ཉེས་བྱས་མ་ལུས་མི་བཟད་འདི། །གང་ཞིག་ཕྱོགས་བཅུའི་འཇིག་རྟེན་ཁམས་རྣམས་ན། །བཞུགས་པའི་རྒྱལ་བའི་སྤྱན་སྔར་བཤགས་པར་བགྱི། །ཨོཾ་སརྦ་པཱ་
པཾ་ཤོ་དྷ་ད་ཧ་ན་བཛྲ་སྭཱ་ཧཱ། སྡིག་པ་བཤགས་པའོ། །སངས་རྒྱས་རྣམས་དང་བྱང་ཆུབ་སེམས་དཔའ་ནི། །སྣ་ཚོགས་ཐབས་མཁས་པ་ཡིས་ཕན་མཛད་དང་། །ཕྱོགས་བཅུའི་ལོ་ཀ་དག་ལ་གང་དག་གཞན། །བསོད་ནམས་བྱེད་པ་དེ་ལ་ཡི་རང་ངོ་། །ཨོཾ་སརྦ་ཏ་ཐཱ་ག་ཏ་ཤཱུ་ནྱ་ཏཱ་ཛྙཱ་ན་ཨ་ནུ་མོ་ད་ན་པཱུ་ཛ་མེ་གྷ་ས་མུ་
དྲ་སྥ་ར་ཎ་ས་མ་ཡེ་ཧཱུཾ། རྗེས་སུ་ཡི་རང་བའོ། །སངས་རྒྱས་ཀུན་དང་བྱང་ཆུབ་སེམས་དཔའ་ནི། །འགྲོ་བའི་སྐྱབས་གྱུར་པ་ལ་གསོལ་བ་ནི། །ཕྱོགས་བཅུའི་སེམས་ཅན་ཇི་སྙེད་ཐམས་ཅད་ལ། །ཆོས་ཀྱི་སྤྲིན་ལས་ཆར་ཆེན་དབབ་ཏུ་གསོལ། །ཨོཾ་སརྦ་ཏ་ཐཱ་ག་ཏ་ཨ་དྷིཥྛཱ་ན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་
ཧཱུཾ། བསྐུལ་བའོ། །སོ་སོའི་སྐྱེ་བོའི་ས་དང་ཉེས་བྱས་རྣམས། །མ་ལུས་པར་ནི་མྱུར་དུ་སྤངས་ནས་ནི། །སྐྱོན་མེད་ཆོས་ཀྱི་སྐུ་ནི་རྣམ་དག་པར། །བཤད་པ་མྱུར་དུ་རྟོགས་པ་ཉིད་མཛོད་ཅིག །ཨོཾ་སརྦ་ཏ་ཐཱ་ག་ཏ་ན་ཡ་དྷེ་ས་མ་ཡེ། སརྦ་སཏྭ་ཧི་དཱཪྠ་ཡ་དྷརྨ་དྷཱ་ཏུ་སྠི་ཏིརྦྷ་བ་ཏུ། གསོལ་བ་གདབ་པའོ། །
སེམས་ཅན་ཐམས་ཅད་ལ་ནི་ཕན་པའི་ཕྱིར། །བདག་གིས་དགེ་བ་གང་དག་ཅི་བསགས་པ། །སྐྱེ་བ་ལ་སོགས་སྡུག་བསྔལ་ཐམས་ཅད་ནི། །ཉེ་བར་ཞི་ཕྱིར་བདག་གིས་བསྔོ་བར་བགྱི། །ཨོཾ་སརྦ་ཏ་ཐཱ་ག་ཏ་པུ་ཎྱ་རྱཱ་ཏན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བསྔོ་བའོ། །སྐྱེ་སོགས་སྡུག་བསྔལ་
རྣམས་ཀྱིས་ཉེར་གཙེས་ཤིང་། །མི་ཤེས་ལོག་པས་ཉེར་བཅོམ་བདག་ཉིད་ཅན། །སྲོག་ཆགས་རྣམས་ལ་ཕན་ཕྱིར་བྱང་ཆུབ་སེམས། །རིན་ཆེན་མཆོག་གྱུར་བདག་གིས་བསྐྱེད་པར་བགྱི། །རྟག་ཏུ་སྲོག་ཆགས་རྣམས་ཀྱི་སྐྱབས་དང་ནི། །གནས་དང་དཔུང་གཉེན་སྐྱོབ་པ་ཉིད་གྱུར་ཅིག །ཨོཾ་བོ

73-1-116a

ངྷི་ཙིཏྟཾ་ཨུཏྤཱ་ད་ཡཱ་མི། བོ་དྷི་ཙིཏྟཾ་མུ་ཏྤཱི་ཏ་ཏཾ་ཏ་ཐཱ་ཧ་ས་མ་པི་ཏ་བོ་དྷི་ཙིཏྟ་ཨུཏྤཱ་ད་ཡཱ་མི། བྱང་ཆུབ་མཆོག་ཏུ་སེམས་བསྐྱེད་པའོ། །དེ་ནས་རང་གི་དགོས་པའི་དོན་ཐམས་ཅད་ལ་གསོལ་བ་གདབ་པར་བྱའོ། །དེ་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རིགས་ཀྱི་བུ་ལེགས་
སོ་ཞེས་གསུངས་ནས་རང་རང་གི་གནས་སུ་གཤེགས་པར་བསམ་མོ། །དེ་ནས་ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་བི་ཤུདྡྷོ྅ཧཾ་ཞེས་བརྗོད་པས་ཆོས་ཐམས་ཅད་རང་བཞིན་དེ་བཞིན་ཉིད་ལས་མི་འདའ་བར་སྟོང་པ་ཉིད་དུ་བསྒོམ་པར་བྱའོ། །དེ་ནས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། 
ཞེས་བརྗོད་པས་ཆོས་ཐམས་ཅད་སྤྲོས་བྲལ་ནམ་མཁའི་ངོ་བོ་ལྟ་བུར་བསམ་མོ། །དེ་ནས་སྟོང་པ་ཉིད་དུ་གནས་པས་སེམས་ཅན་ཐམས་ཅད་ཀྱི་དོན་མི་འགྲུབ་པས་སྙིང་རྗེ་ཆེན་པོས་ཀུན་ནས་བསླང་བས་པཾ་ལས་པདྨ་འདབ་མ་བརྒྱད་པ་ཡངས་ཤིང་རྒྱ་ཆེ་བའི་སྟེང་དུ་ཆོས་དབྱིངས་མཐའ་དང་དབུས་
མེད་པ་སྟོན་པར་བྱེད་པའི་ཡི་གེ་ཨ་དཀར་པོ་འོད་དུ་ཞུ་བས་ཟླ་བའི་དཀྱིལ་འཁོར་ཡངས་ཤིང་རྒྱ་ཆེ་བ་བསམ། དེའི་སྟེང་དུ་ཧྲཱིཿདཀར་པོ་ལས་འོད་ཟེར་འཕྲོས་པས། ཕྱི་སྣོད་ཀྱི་འཇིག་རྟེན་ཐམས་ཅད་འཇའ་ཚོན་ལྟ་བུར་གྱུར། ནང་བཅུད་ཀྱི་སེམས་ཅན་ཐམས་ཅད་སྤྱན་རས་གཟིགས་ཀྱི་དབང་
པོར་གྱུར་ནས། ཧྲཱིཿལ་ཐིམ་པས་གསེར་གྱི་པདྨ་འདབ་མ་སྟོང་དང་ལྡན་པ་ཅིག་ཏུ་བསམ། དེ་ལས་འོད་ཟེར་འཕྲོས་པས་སེམས་ཅན་ཐམས་ཅད་འཕགས་པ་སྤྱན་རས་གཟིགས་སུ་བསྒྲུབས་ནས་ཐིམ་པས་བདག་ཉིད་འཕགས་པ་སྤྱན་རས་གཟིགས་ཕྱག་སྟོང་སྐུ་མདོག་དཀར་ལ་འཚེར་བ། རྒྱན་
ཐམས་ཅད་ཀྱིས་བརྒྱན་པ་ལྷའི་པཉྩ་ལི་ཀའི་དར་དམར་པོས་ཤམ་ཐབས་བྱས་པ་རི་དགས་ནག་པོའི་པགས་པས་ནུ་མ་གཡོན་པ་བཀབ་པ་རིན་པོ་ཆེའི་རྒྱན་རྣམ་པ་སྣ་ཚོགས་དུ་མས་བརྒྱན་པ་ཁྱད་པར་དུ་ཡང་ལྷའི་རིན་པོ་ཆེ་རྣམ་པ་བདུན་གྱིས་བརྒྱན་པ། རྩ་བའི་ཞལ་ཀུན་ནས་དཀར་བ་སྤྱན་
གསུམ་མངའ་བ་གཡས་པ་ལྗང་གུ། གཡོན་པ་དམར་བ། ཞལ་ཐམས་ཅད་ཀུན་ནས་འཛུམ་པའི་ཉམས་ཅན་དེའི་སྟེང་མ་ལྗང་གུ། དེའི་གཡས་དཀར་བ། གཡོན་པ་དམར་བ། དེའི་སྟེང་མ་དམར་པོ། དེའི་གཡས་ལྗང་གུ། གཡོན་དཀར་པོ། དེའི་སྟེང་ན་ཁྲོ་བོའི་ཞལ་

73-1-116b

མཐིང་ནག་མཆེ་བ་གཙིགས་པ། དབུ་སྐྲ་སེར་པོ་ཞལ་བཅུ་པོ་ནི་ཕ་རོལ་ཏུ་ཕྱིན་པ་བཅུའོ། །དེའི་སྟེང་མ་བནྡུ་ཀའི་མེ་ཏོག་ལྟར་དམར་བ་མགྲིན་པ་ཡན་ཆོད་འཐོན་པ་ཚངས་པར་སྤྱོད་པའི་ཆ་ལུགས་རྒྱན་སྤངས་པ་དབུའི་ཐོར་ཚུགས་དང་ལྡན་པའོ། །དེ་ནི་སྐྱེ་བ་རྣམ་པ་བཞིས་སངས་རྒྱས་སྒྲུབ་པར་བྱེད་
པའོ། །རྩ་བའི་ཕྱག་གཉིས་ཐུགས་ཀར་ཐལ་མོ་སྦྱར་བ། དེའི་འོག་མ་གཡོན་པས་གསེར་གྱི་པདྨ་རྩ་བ་དང་བཅས་པ་འཛིན་པ། གཡས་ཀྱི་འོག་མས་བགྲང་ཕྲེང་འཛིན་པ། གཡོན་གྱི་གསུམ་པ་ན་རིལ་བ་སྤྱི་བླུགས་འཛིན་པ། གཡས་ཀྱི་གསུམ་པ་ན་ཡི་དགས་བཀྲེས་སྐོམ་གྱི་གདུང་
བ་སེལ་བའི་མཆོག་སྦྱིན་པ། གཡས་ཀྱི་བཞི་པ་ན་འཁོར་ལོ་འཛིན་པ། གཡོན་གྱི་བཞི་པ་ན་མདའ་གཞུ་འཛིན་པའོ། །དེ་ནས་གཡས་ཀྱི་ཕྱག་རྣམས་སུ་གོ་རིམས་ཇི་ལྟ་བ་བཞིན་དུ་ཡིད་བཞིན་གྱི་ནོར་བུ་རིན་པོ་ཆེ་དང་། སྤྲུལ་པའི་སྐུ་རྒྱལ་བ་ཤཱཀྱ་ཐུབ་པ་དང་། མེ་ལོང་དང་། ཤེལ་གྱི་གདུ་བུ་
དང་། དགྲ་སྟ་དང་། ཕུབ་དང་། རིལ་བ་བྷྲྀངྒ་ར་དང་། རྔ་ཡབ་དཀར་པོ་དང་། རིན་པོ་ཆེ་མེ་ཤེལ་དང་། རིན་པོ་ཆེ་ཆུ་ཤེལ་དང་། སྐྱབས་སྦྱིན་པ་དང་། རིན་པོ་ཆེའི་ཁ་ཊྭཱཾ་ག་དང་། རྡོ་རྗེ་དང་། རལ་གྲི་དང་། ལྷུང་བཟེད་དང་། རྡོ་རྗེའི་ཞགས་པ་དང་། རིན་པོ་ཆེ་བསྣམས་པའོ། །
གཡོན་པའི་ཕྱག་རྣམས་སུ་གོ་རིམས་ཇི་ལྟ་བ་བཞིན་དུ་རྒུན་འབྲུམ་གྱི་སྣོད་ཐོགས་པའི་ཕྱག་དང་། པདྨོའི་སྟེང་དུ་འོད་དཔག་ཏུ་མེད་པ་དང་། རིན་པོ་ཆེའི་ཟ་མ་ཏོག་དང་། རིན་པོ་ཆེའི་ཤིང་དང་། རིན་པོ་ཆེའི་གཞལ་མེད་ཁང་དང་། རིན་པོ་ཆེའི་དུང་གཡས་སུ་འཁྱིལ་པ་དང་། ཁར་གསིལ་
དང་། རིན་པོ་ཆེའི་མདའ་དང་། རིན་པོ་ཆེའི་དྲིལ་བུ་དང་། ཐོད་པའི་ཁར་བ་དང་། རིན་པོ་ཆེའི་ལྕགས་ཀྱུ་དང་། རིན་པོ་ཆེའི་མདུང་དང་། པདྨ་ལེ་བརྒན་དང་། སྤྲིན་རྣམ་པ་ལྔ་དང་། རིན་པོ་ཆེའི་ཕྱག་རྒྱ་དང་། རིན་པོ་ཆེའི་གླེགས་བམ་དང་། པདྨ་སྔོན་པོ་བསྣམས་པའོ། །ཕྱག་སྟོང་གིས་
ཉེ་བར་མཛེས་པ་དེ་ལས་གཞན་པའི་ཕྱག་ཐམས་ཅད་མཆོག་སྦྱིན་པ་ཕྱག་གི་མཐིལ་ན་སྤྱན་རེ་རེ་མངའ་བའོ། །འཇིགས་པ་ཐམས་ཅད་སྐྱོབ་པའི་སྤྱན་རས་གཟིགས་དཔག་ཏུ་མེད་པ་འཕྲོས་པས་གཡས་སུ་དོན་ཡོད་ཞགས་པ་དང་། ཚོང་དཔོན་གྱི་བུ་ནོར་བཟངས་འདུད་པའོ། །གཡོན་དུ་རྟ་མགྲིན་

73-1-117a

དང་སྒྲོལ་མ་འདུད་པའོ། །ཕྱོགས་བཞིར་རྒྱལ་པོ་ཆེན་པོ་བཞི་རང་རང་གི་འཁོར་དཔག་ཏུ་མེད་པ་དང་བཅས་པའོ། །སྟེང་གི་ཕྱོགས་སུ་ལྷའི་བུ་དང་དྲང་སྲོང་མཆོད་པ་ཐོགས་པ་དཔག་ཏུ་མེད་པ་ལྷགས་པའོ། །དེ་ནས་ཐུགས་ཀའི་ཧྲཱིཿལས་འོད་ཟེར་འཕྲོས་པས་ཡེ་ཤེས་པ་སྤྱན་དྲངས་ལ་
ཕྱག་དང་མཆོད་པས་མཉེས་པར་བྱས་ལ། ཛཿཧཱུཾ་བཾ་ཧོཿཞེས་བརྗོད་པས། དགུག་པ་དང་། གཞུག་པ་དང་། བཅིང་བ་དང་མཉེས་པར་བྱའོ། །དེ་ནས་ཐལ་མོ་སྦྱར་ལ་པདྨ་ཁ་ཕྱེ་བའི་ཚུལ་དུ་བྱས་ཏེ་སྙིང་གར་གཞག་པ་འདི་ནི་པདྨ་རིགས་ཀྱི་དམ་ཚིག་གི་ཕྱག་རྒྱའོ། །ཨ་པདྨོ་བྷ་བཱ་ཡ་སྭཱ་ཧཱ། 
དེ་ནས་ཧྲཱིཿལས་འོད་ཟེར་འཕྲོས་པས། རིགས་ལྔ་སྤྱན་དྲངས་ལ་སྔ་མ་བཞིན་དུ་མཆོད་དེ། བྱང་ཆུབ་རྡོ་རྗེས་སངས་རྒྱས་ལ། །ཇི་ལྟར་མཆོད་ཆེན་སྩོལ་མཛད་པ། །བདག་ཀྱང་རབ་ཏུ་བསྐྱབ་པའི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་བརྗོད་པས་དེ་བཞིན་གཤེགས་པ་ལྔ་ཡུམ་དང་
བཅས་པས་དབང་བསྐུར་བར་བསམ་ཞིང་ཚིག་ཏུ། དབང་བསྐུར་བ་ནི་རྡོ་རྗེ་ཆེ། །གསང་བ་གསུམ་གྱི་གནས་ལས་བྱུང་། །ཁམས་གསུམ་པོ་ཡིས་ཕྱག་བྱས་པ། །དི་རིང་ཁྱོད་ལ་སྦྱིན་པར་བྱ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩནྟུ་མཱཾ་ཞེས་བརྗོད་པས། དེ་བཞིན་གཤེགས་པ་འོད་དཔག་ཏུ་མེད་པ་སྤྱི་བོའི་
སྟེང་དུ་གསལ། དེ་ནས་ང་རྒྱལ་བརྟན་པར་བྱ་བའི་ཆེད་དུ། ཨོཾ་ཡོ་ག་དྷརྨ་དྷཱ་ཏུ་སྭ་བྷཱ་བ་སརྦྦ་ཨཱཏྨ་ཀོ྅ཧཾ། ཞེས་བརྗོད་པས། ང་རྒྱལ་བརྟན་པར་བྱའོ། །དེ་ནས་སེམས་ཅན་ཐམས་ཅད་ལ་སྙིང་རྗེ་ཆེན་པོ་བསྐྱེད་ནས་གསང་སྔགས་འདི་འབུམ་ཕྲག་གཅིག་བཟླས་པར་བྱའོ། །ན་མོ་རཏྣ་ཏྲ་ཡཱ་ཡ། ན་
མཿཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། སརྦ་བནྡྷ་ན་ཙྪེ་ད་ན་ཀ་རཱ་ཡ། སརྦ་བྷ་བ་ས་མུ་དྲོཙྪ་ཥ་ཎ་ཡ་ཀ་རཱ་ཡ། སརྦྦ་བྱཱ་དྷི་པྲ་ཤཱ་མ་ན་ཀ་རཱ་ཡ། སརྦྦེ་ཏྱུ་བ་དྲ་བ་བི་ནཱ་ཤ་ཀ་རཱ་ཡ། སརྦྦ་བྷ་ཡེ་ཥྱ་ཏྲ་ཎཱ་ཡ། ཏ་སྱ་ན་མཿཀྲྀ་ཏྭཾ་ཨི་མཾ། ཨཱ་བ་ལོ་ཀི་ཏེ་ཤྭ་ར་ཏ་བ་ནཱི་
ལ་ཀཎྛ་ནཱ་མ་ཧཱ་ཧྲྀ་ད་ཡཾ་ཨ་བརྟ་ཡིཥྱཱ་མི། སརྦྦ་ཨརྠ་སཱ་དྷ་ནཾ། ཤུ་བྷ་ཙེ་ཏཱ་ནཱཾ། སརྦྦ་སཏྭཱ་ནཱཾ། པཱ་པ་མཱརྒ་བི་ཤོ་དྷ་ཀཾ། ཏདྱ་ཐཱ། ཨ་བ་ལོ་ཀེ། ལོ་ཀ་མ་ཏི། ལོ་ཀ་ག་ཏི། ཨཱ་ཏི་བ་ཏི་ལོ་ཀཱ་ཏི་ཀྲནྟེ། ཨེ་ཧྱེ་ཧི། མ་ཧཱ་བོ་དྷི་སཏྭ། ཧེ་བོ་དྷི་སཏྭ། ཧེ་མ་ཧཱ་བོ་དྷི་སཏྭ། ཧེ་པྲཱི་ཡ་བོ་དྷི་སཏྭ། ཧེ་

73-1-117b

མ་ཧཱ་ཀཱ་རུ་ཎཱི་ཀ་སྨ་ར་ཧྲྀ་ད་ཡ། ཨེ་ཧྱེ་ཧི། ཨཱརྱཱ་བ་ལོ་ཀི་ཏེ་ཤྭ་ར། པ་ར་མ་མཻ་ཏྭཱི་ཙིཏྟ་ཀཱ་རུ་ཎཱི་ཀཱ་ཡ། ཀུ་རུ་ཀུ་རུ་ཀརྨ། སཱ་དྷ་ཡ་བིདྡྷྱཾ། དེ་ཧི་དེ་ཧི་མེ་ཝ་རཾ། ཀཱ་མཾ་གཱ་མ། བི་ཧཾ་གཱ་མ། སིདྡྷ་སིདྡྷ་ཡོ་གཱི་ཤྭ་ར། དྷུ་ཧུ་དྷུ་ཧུ་བཱིཪྻནྟེ། མ་ཧཱ་བཱིཪྻནྟེ། དྷ་ར་དྷ་ར་དྷ་རེནྡྲ་ཤྭ་ར། ཛྭ་ལ་ཛྭ་ལ་བི་མ་ལཱ་མཱུརྟེ། 
ཨཱརྱཱ་ལོ་ཀི་ཏེ་ཤྭ་ར། ཀྲྀཥྞཱ་ཛི་ན་ཛ་ཊཱ་མུ་ཀུ་ཊཱ་ལཾ་བ། ཨ་ལཾ་ཀྲྀ་ཏ་ཤཱ་རཱི་ར་ལམྦ་པྲ་ལཾ་བ་བི་ལཾ་བ། མ་ཧཱ་སིདྡྷ། ཤུདྡྷེ་དྷ་ར། བི་དྱཱཾ་དྷ་ར་བ་ལ་བ་ལ། མ་ཧཱ་བ་ལ། མ་ལ་མ་ལ་མ་ཧཱ་མ་ལ། ཙ་ལ་ཙ་ལ། མ་ཧཱ་ཙ་ལ། ཀྲྀཥྞ་བརྞྞ་ཀྲྀཥྞ་པཱ་ཤ་ནིརྒྷཱ་ཏ་ན། ཧེ་པདྨ་ཧསྟ། ཙ་ར་ཙ་ར་ནི་ཤཱ་ཙ་རེ་ཤྭ་ར། 
ཀྲྀཥྞ་སརྦྦ་ཀྲྀ་ཏ་ཡ་ཛྙོ་པ་བཱི་ཏ། ཨེ་ཧྱེ་ཧི་བཱ་རཱ་ཧཱ་མུ་ཁ། ཏྲི་བུ་ར་ད་ཧ་ནེ་ཤྭ་ར། ནཱ་རཱ་ཡ་ནཱ། བ་ལ་རུ་བ་བེ་ཥ་རཱི། ཧེ་ནཱི་ལ་ཀཎྛ། ཧེ་མ་ཧཱ་ཧ་ལ་ཧ་ལ་བི་ཥ་ནི་ར་ཛི་ཏཱ། ལོ་ཀ་སྱ་རཱ་བ་བི་ཥ་ནཱ་ཤ་ནཾ། དྭེ་ཥ་བི་ཥ་ནཱ་ཤ་ན། མོ་ཧ་བི་ཥ་ནི་ར་མོཀྵ་ནཾ་ཧུ་ལུ་ཧུ་ལུ་མ་ལ། ཕ་ལ་ཕ་ལ་ཧ་རེ། མ་ཧཱ་པདྨ་ནཱ་བྷ། ས་
ར་ས་ར། སི་རི་སི་རི། སུ་རུ་སུ་རུ། བུདྡྷྱ་བུདྡྷྱ། བོ་དྷྱ་བོ་དྷྱ། བོ་དྷ་ཡཱ་མི། མི་ཏི་ནཱི་ལ་ཀཎྠ་ཨེ་ཧྱེ་ཧི། བཱམ་སྠི་ཏི། སིཾ་ཧ་མུ་ཁ་ཧ་ས་ཧ་ས། མུཉྩ་མུཉྩ་མ་ཧཱ་ཊྚ་ཊྚ་ཧཱ་ཧེ་ཧི་རྣཱ་དི་ནི། ཨེ་ཧྱེ་ཧི་བྷོཿབྷོཿམ་ཧཱ་སིདྡྷ་ཡོ་གཱི་ཤྭ་ར། བནྡྷ་བནྡྷ། བ་ཙཾ། སཱ་དྷ་ཡ་སཱ་དྷ་ཡ། བི་དྱཱཾ། སྨ་ར་སྨ་ར་ཏྭཾ། 
བྷ་ག་བཱནྟི། ལོ་ཀ་བི་ལོ་ཀི་ཏྭཾ། ཏ་ཐཱ་ག་ཏ། ད་དཱ་ཧི་མེ་དཪྴ་ནཾ། ཀ་མ་སྱ་དཪྴ་ནཾ། པྲཧླཱ་ད་ཡ་མ་ན་སྭཱ་ཧཱ། སིདྡྷཱ་ཡ་སྭཱ་ཧཱ། མ་ཧཱ་སིདྡྷཱ་ཡ་སྭཱ་ཧཱ། སིདྡྷི་ཡོ་གཱི་ཤྭ་རཱ་ཡ་སྭཱ་ཧཱ། ནི་ལ་ཀཎྠཱ་ཡ་སྭཱ་ཧཱ། བཱ་རཱ་ཧཱ་མུ་ཁཱ་ཡ་སྭཱ་ཧྭ། སིཾ་ཧ་མུ་ཁཱ་ཡ་སྭཱ་ཏཱ། མ་ཧཱ་ནཱ་རི་སིཾ་ཧ་མུ་ཁཱ་ཡ་སྭཱ་ཧྭཱ། སིདྡྷ་བིདྱཱ་
ངྷ་རཱ་ཡ་སྭཱ་ཧཱ། པདྨ་ཧསྟཱ་ཡ་སྭཱ་ཧཱ། མཧཱ་པདྨ་ཧསྟཱ་ཡ་སྭཱ་ཧཱ། བཛྲ་ཧསྟཱ་ཡ་སྭཱ་ཧཱ། ཀྲྀཥྞ་སརྦྦ་ཀྲི་ཏ་ཡ་ཛྙོ་པ་བཱི་ཏཱ་ཡ་སྭཱ་ཧཱ། མ་ཧཱ་ཀཱ་ལ་མུ་ཀུ་ཊ་དྷ་རཱ་ཡ་སྭཱ་ཧཱ། ཙཀྲ་ཨ་ཡུ་དྷ་དྷ་རཱ་ཡ་སྭཱ་ཧཱ། ཤཾ་ཁ་ཤབྡ་ནིརྣཱ་ད་ན་ཀ་རཱ་ཡ་སྭཱ་ཧཱ། ནི་བོ་དྷ་ན་ཀ་རཱ་ཡ་སྭཱ་ཧཱ། བཱ་མ་སྐནྡྷ་དེ་ཤསྠི་ཏ་ཀྲྀཥྞ་ཛ་ནཱ་ཡ་སྭཱ་ཧཱ། 
བཱ་མ་ཧསྟ་བྱཱ་གྷྲ་ཙརྨ་ནི་བ་ས་ནཱ་ཡ་སྭཱ་ཧཱ། ལོ་ཀེ་ཤྭ་རཱ་ཡ་སྭཱ་ཧཱ། མ་ཧཱ་ལོ་ཀ་ཤྭ་རཱ་ཡ་སྭཱ་ཧཱ། སརྦ་སིདྡྷེ་ཤྭ་རཱ་ཡ་སྭཱ་ཧཱ། ན་མོ་བྷ་ག་བ་ཏེ། ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། སིདྡྷྱནྟུ་མེ་མནྟྲ་པ་དཻཿསྭཱ་ཧཱ། བཱ་ཨོཾ་ཧྲཱིཿཏྲཻ་ལོཀྱ་བི་ཙ་མ་ཨ་མོ་གྷ་

73-1-118a

པཱ་ཤ་ཨ་པྲ་ཏི་ཧ་ཏ་ཧྲཱིཿཧ་ཧཱུཾ་ཕཊ་སྭཱ་ཧཱ། ཨོཾ་པདྨོ་ཥྞཱི་ཥ་བི་མ་ལེ་ཧཱུཾ་སྭཱ་ཧཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། གཟུངས་འདི་ལན་ཅིག་བརྗོད་པས་རྩ་བའི་ལྟུང་བ་བཞི་བྱུང་བ་ཡང་མ་ལུས་པར་འབྱང་བར་འགྱུར་རོ། །འདི་འཛིན་པའི་གང་ཟག་དེ་ལ་འཕགས་པ་སྤྱན་རས་གཟིགས་ཀྱི་དབང་པོ་
རྒྱུན་མི་འཆད་པར་མིག་སྟོང་དང་ལྡན་པའི་ཐུགས་རྗེས་གཟིགས་པར་འགྱུར་རོ། །ཕྱག་སྟོང་གིས་སྐྱོབ་པར་འགྱུར་རོ། །མཚམས་མེད་པ་ལྔ་དང་། དེ་དང་ཉེ་བ་ལྔ་དང་དགེ་འདུན་གྱི་དཀོར་རྐུ་འཕྲོག་བྱས་པ་རྣམས་ཀྱང་ལན་ཅིག་བརྗོད་པས་མ་ལུས་པར་ཟད་པར་འགྱུར་རོ། །ཐེ་ཚོམ་ཟ་བ་
ནི་མ་གཏོགས་སོ། །གཤིས་ངན་དུ་འཆི་བའི་འཆི་ལྟས་བཅོ་ལྔ་འབྱུང་བར་མི་འགྱུར་རོ། །སྐྱེ་བ་བཟང་པོ་བཅོ་ལྔ་ཡོངས་སུ་འཛིན་པར་འགྱུར་རོ། །སུས་སྙིང་པོ་འདིའི་མིང་ཐོས་པ་དེ་ནི་བསྐལ་པ་དུ་མའི་སྐྱེ་བ་དང་འཆི་བའི་བསགས་པའི་ལས་ལྕི་བ་རྣམས་ཀྱང་བྱང་བར་འགྱུར་ན་བརྗོད་ཅིང་འཛིན་པ་
ལྟ་ཅི་སྨོས། རྒྱུན་མི་འཆད་པར་བཟུང་ནས་བཅུའི་འབྲས་བུ་ཐོབ་པ་ལ་དཀའ་བ་མེད་ན། འཇིག་རྟེན་པའི་བསོད་ནམས་ཀྱི་འབྲས་བུ་ཐོབ་པ་ལྟ་ཅི་སྨོས། ཡུལ་གང་དུ་ཡམས་ཀྱི་ནད་བྱུང་ལ་ཡུལ་དེར་རྒྱལ་པོས་ཆོས་ཀྱི་ཡུལ་སྲུང་ཞིང་རྒྱ་ཆེ་བ་དང་གཙང་མར་བྱ། སེམས་ཅན་ཐམས་ཅད་གཏམས་
ལས་མི་བཅད་དོ། །ཉེས་པ་བྱུང་བ་རྣམས་ལ་བཟོད་པར་བྱའོ། །ཞག་བདུན་སྙིང་རྗེ་ཆེན་པོའི་རང་བཞིན་གྱི་སྙིང་པོ་འདི་བཟླས་བརྗོད་བྱས་ན་ཡུལ་དེར་ཡམས་ཀྱི་ནད་ཐམས་ཅད་ཞི་བར་འགྱུར་རོ། །ཡུལ་དེར་གནས་པའི་མི་མ་ཡིན་པ་རྣམས་ལ་གཏོར་མ་བྱིན་ལ། འཕགས་པ་སྤྱན་རས་
གཟིགས་དབང་ཕྱུག་ལག་པ་སྟོང་དང་ལྡན་པའི་སྐུ་གཟུགས་ལ་མཆོད་པ་རྒྱ་ཆེན་པོ་བྱས་ལ། རིག་པ་ལན་ཉི་ཤུ་རྩ་གཅིག་བརྗོད་ནས་རོལ་མོ་སྣ་ཚོགས་ཀྱིས་ལན་གསུམ་དུ་བསྐོར་བ་བྱས་ན་རིམས་ནད་ཐམས་ཅད་ཞི་བར་འགྱུར་རོ། །ཚོན་སྐུད་སྣ་ལྔ་ལ་ལན་ཉི་ཤུ་རྩ་གཅིག་བཟླས་
བརྗོད་བྱས་ལ་མགུལ་དུ་བཏགས་སོ། །གལ་ཏེ་ས་རིས་སོ་སོར་དགྲ་རྒྱུན་ཏུ་འོང་ཞིང་ཡུལ་དུ་གནས་པའི་སེམས་ཅན་རྣམས་ལ་གནོད་པར་བྱེད་པ་དང་ཡུལ་དེར་ནད་བྱུང་བ་དང་། ཆར་ཆུ་དུས་སུ་མི་འབབ་པ་དང་། ཟླ་བ་དང་ཉི་མ་དྲང་པོར་མི་འགྲོ་བ་དང་། ལྟས་ངན་པ་དེ་སྙེད་བྱུང་

73-1-118b

ན་རྒྱལ་པོ་དེས་སྤྱན་རས་གཟིགས་དབང་ཕྱུག་ལག་པ་སྟོང་དང་ལྡན་པའི་གཟུགས་བྱས་ལ་གང་དུ་ཡམས་ཀྱི་ནད་བྱུང་བ་དེའི་ངོས་སུ་བཞིན་བསྟན་ལ་གཞག་གོ། །ཤིན་ཏུ་དུད་པ་བདུག་པ་དང་མེ་ཏོག་དང་གདུགས་དང་། རྒྱལ་མཚན་ལ་སོགས་པ་ཅི་འབྱོར་པས་མཆོད་པར་བྱའོ། །
དེ་ནས་སྒྲུབ་པ་པོས་ཞག་བདུན་དུ་བརྩོན་འགྲུས་བརྟན་པོར་བྱས་ནས་རིས་སོ་སོའི་དགྲ་ཐམས་ཅད་ཕྱག་འཚལ་བར་འགྱུར་རོ། །སེམས་མཐུན་པར་འགྱུར། ཕན་ཚུན་གྲོགས་པོར་འགྱུར་རོ། །སྐྱེ་བོ་ཡོངས་དང་རྒྱལ་བུ་རྣམས་ཀྱང་བྱས་པ་གཟོ་ཞིང་ལེགས་པ་བྱེད་པར་འགྱུར་རོ། །རྒྱལ་
པོའི་བཙུན་མོའི་འཁོར་རྣམས་ཀྱང་དེ་ལ་དགའ་བ་བསྐྱེད་པར་འགྱུར་རོ། །ནད་དང་གནོད་པ་གང་བྱུང་ཡང་འཕགས་པ་སྤྱན་རས་གཟིགས་དབང་ཕྱུག་ལག་པ་སྟོང་དང་མིག་སྟོང་དང་ལྡན་པའི་མདུན་དུ་མཆོད་པ་བྱས་ལ་གཟུངས་སྔགས་སྟོང་རྩ་བརྒྱད་བཟླས་བརྗོད་བྱས་ན་སྡུག་བསྔལ་
ཐམས་ཅད་ཞི་བར་འགྱུར་རོ། །སུ་ཞིག་ཧ་ལ་ཧ་ལའི་དུག་ཟོས་ན་དེ་གུ་གུལ་གྱི་བདུག་པ་དང་། ག་པུར་ཆ་བསྙམས་ཏེ། བྲོན་པ་ཆུ་ལྷག་མར་མ་གྱུར་པ་བསྐོལ་ལ་ཁྱོར་གང་ལུས་པ་དང་། བྱང་ཆུབ་སེམས་དཔའ་མིག་སྟོང་ལྡན་གྱི་མདུན་དུ་བརྒྱ་རྩ་བརྒྱད་བཟླས་བརྗོད་བྱས་ཏེ་འཐུངས་ན་དུག་
ཞི་བར་འགྱུར་རོ། །སུ་ཞིག་མིག་ཉམས་ཏེ་ལོང་བར་གྱུར་པ་དང་། མིག་གི་འབྲས་བའི་སྟེང་དུ་ལིང་ཏོག་བྱུང་བ་དང་། མིག་ཏུ་རུ་སྐྱེས་ཏེ་མི་མཐོང་བར་གྱུར་པ་དེས་ཨ་རུ་ར་དང་། བ་རུ་ར་གཅིག་དང་། སྐྱུ་རུ་ར་གཅིག་ཞིབ་ཏུ་བཏགས་ལ་སྦྲང་རྩི་དཀར་པོ་དང་། ཁྱེའུའི་ནུ་མའི་འོ་མ་དང་
སྦྱར་བར་བྱ་སྟེ། སྦྱོར་བའི་ཚེ་སངས་རྒྱས་ཀྱི་མཚན་ནས་བརྗོད་ཅིང་བྱིས་པ་གསར་པ་བཙས་པའི་བུད་མེད་དང་། ཁྱི་དང་ཕག་གིས་མི་མཐོང་བར་རིལ་བུ་བྱས་ཏེ། བྱང་ཆུབ་སེམས་དཔའ་མིག་སྟོང་ལྡན་གྱི་མདུན་དུ་ལན་སྟོང་རྩ་བརྒྱད་བཟླས་བརྗོད་བྱས་ལ། དབེན་པ་རླུང་མི་འོང་བར་
འདུག་སྟེ། ཉི་མ་བདུན་གྱི་བར་དུ་སྨན་འདི་མིའི་འོ་མ་དང་སྦྲང་རྩི་དཀར་པོ་དང་སྦྱར་ཏེ་མིག་གི་ནང་དུ་བླུགས་ན་མིག་གི་འབྲས་བུ་སྐྱེ་བར་འགྱུར་རོ། །ལིང་ཐོག་མེད་ཅིང་ལེགས་པར་མཐོང་བར་འགྱུར་རོ། །སུ་ཞིག་འབྱུང་པོའི་གདོན་ནས་མི་མ་ཡིན་པའི་ནད་ཀྱིས་བཏབ་པར་

73-1-119a

གྱུར་ན་གུ་གུལ་གྱི་དུད་པ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ལ་སྣར་བདུག་གོ། །ཡང་ན་རི་བོང་གི་རྟུག་པ་ཙམ་གྱི་རིལ་བུ་བྱས་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ལ་བཟའོ། །ཤ་དང་ཆང་དང་སྒོག་པ་དང་འཐབ་མོ་སྤང་ངོ་། །འོན་ཀྱང་སོས་པར་འགྱུར་རོ། །ཤུ་དག་
དཀར་པོ་ལ་ལན་བརྒྱ་རྩ་བརྒྱད་བཟླས་བརྗོད་བྱས་ཏེ། དཔུང་པ་གཡས་པར་བཏགས་ན་འཐབ་མོ་ལས་རྒྱལ་བར་འགྱུར་རོ། །བ་ལང་དཀར་པོའི་གི་ཝང་ལག་མཐིལ་དུ་བཅུག་ལ་བྱང་ཆུབ་སེམས་དཔའི་དྲུང་དུ་ལན་སྟོང་རྩ་བརྒྱད་བཟླས་བརྗོད་བྱས་ཏེ་ཡན་ལག་རྣམས་ལ་བསྐུས་ཏེ་དཔྲལ་
བར་ཐིག་ལེ་བྱས་ན། ལྷ་དང་ཀླུ་དང་འབྱུང་པོ་དང་། མི་ཐམས་ཅད་དགའ་བར་འགྱུར་རོ། །ཁྱོ་ཤུག་མེ་དང་ཆུ་ལྟར་མི་མཐུན་པར་གྱུར་ན་བྱང་ཆུབ་སེམས་དཔའི་མདུན་དུ་ངུར་པའི་མཇུག་སྒྲོ་ལ་ལན་སྟོང་རྩ་བརྒྱད་བཟླས་བརྗོད་བྱས་ནས་ལུས་ལ་བཏགས་ན་མཛའ་བར་འགྱུར་རོ། །རིན་པོ་ཆེ་སྣ་
ཚོགས་ཕུན་སུམ་ཚོགས་ཤིང་ཕྱུག་པར་འདོད་ན་ཡིད་བཞིན་གྱི་ནོར་བུ་རིན་པོ་ཆེ་ཐོགས་པའི་ཕྱག་ལ་མཆོད་པར་བྱའོ། །མི་བདེ་བ་རྣམ་པ་སྣ་ཚོགས་ཀྱིས་གཙེས་པར་གྱུར་ན་ཞགས་པ་ཐོགས་པའི་ཕྱག་ལ་མཆོད་དོ། །ཁོང་པར་ནད་རྣམས་ཡོད་པར་གྱུར་ན་རིན་པོ་ཆེའི་ལྷུང་བཟེད་ཐོགས་པའི་
ཕྱག་ལ་མཆོད་དོ། །འདྲེ་གདོན་ཐམས་ཅད་གདུལ་བར་འདོད་ན་རིན་པོ་ཆེའི་རལ་གྲི་ཐོགས་པའི་ཕྱག་ལ་མཆོད་དོ། །ལྷའི་བུའི་བདུད་ཐམས་ཅད་གདུལ་བར་འདོད་ན་རྡོ་རྗེ་ཐོགས་པའི་ཕྱག་ལ་མཆོད་དོ། །ཕས་ཀྱི་རྒོལ་བའི་དགྲ་གཞོམ་པར་འདོད་ན་རྡོ་རྗེའི་ཐོ་བ་ཐོགས་པའི་ཕྱག་ལ་མཆོད་དོ། །
འཇིགས་ཤིང་བག་ཚ་བའི་གནས་ཐམས་ཅད་ལ་ཐར་བར་འདོད་ན་འཇིགས་པ་མེད་པའི་སྦྱིན་པའི་ཕྱག་ལ་མཆོད་དོ། །མིག་མི་གསལ་ཏེ་འོད་དང་མི་ལྡན་པར་གྱུར་ན་མེ་ཤེལ་གྱི་ནོར་བུ་ཐོགས་པའི་ཕྱག་ལ་མཆོད་དོ། །ཚ་བའི་རིམས་ཀྱིས་ཐེབས་ཏེ་བསིལ་བར་འདོད་ན་ཆུ་ཤེལ་གྱི་ནོར་བུ་ཐོགས་
པའི་ཕྱག་ལ་མཆོད་དོ། །བློན་ཐབས་མཐོན་པོར་འདོད་ན་རིན་པོ་ཆེའི་གཞུ་ཐོགས་པའི་ཕྱག་ལ་མཆོད་དོ། །གྲོགས་པོ་མཛའ་བཤེས་དང་མྱུར་དུ་ཕྲད་པར་འདོད་ན་རིན་པོ་ཆེའི་མདའ་ཐོགས་པའི་ཕྱག་ལ་མཆོད་དོ། །ལུས་ལ་ནད་སྣ་ཚོགས་ཀྱིས་ཐེབས་པར་གྱུར་ན་ལྕུག་མ་ཐོགས་པའི་ཕྱག་

73-1-119b

ལ་མཆོད་དོ། །ལུས་ཀྱི་བགེགས་མ་ལུས་པ་བསལ་བར་འདོད་ན་རྔ་ཡབ་དཀར་པོ་ཐོགས་པའི་ཕྱག་ལ་མཆོད་དོ། །ཐམས་ཅད་མཐུན་པའི་འཁོར་དུ་འགྱུར་བར་འདོད་ན་བུམ་པ་ཐོགས་པའི་ཕྱག་ལ་མཆོད་དོ། །སྟག་དང་འཕར་སྤྱང་དང་དོམ་དྲེད་དང་གཅན་གཟན་མ་རུངས་པ་ཐམས་ཅད་
སྤོང་བར་འདོད་ན་ཕུབ་ཐོགས་པའི་ཕྱག་ལ་མཆོད་དོ། །གནས་དང་དུས་ཐམས་ཅད་དུ་རྒྱལ་པོའི་བགེགས་ལས་ཐར་བར་འདོད་ན་དགྲ་སྟ་ཐོགས་པའི་ཕྱག་ལ་མཆོད་དོ། །བུ་དང་བུ་མོ་དང་གཡོག་འཁོར་གྱི་ཕྱིར་ཤེལ་གྱི་གདུབ་འཁོར་ཐོགས་པའི་ཕྱག་ལ་མཆོད་དོ། །ཡོན་ཏན་རྣམ་པ་སྣ་
ཚོགས་ཀྱི་ཕྱིར་ནི་པདྨ་དཀར་པོ་ཐོགས་པའི་ཕྱག་ལ་མཆོད་དོ། །ཕྱོགས་བཅུའི་ཞིང་ཡོངས་སུ་དག་པར་འདོད་ན། པདྨ་སྔོན་པོ་ཐོགས་པའི་ཕྱག་ལ་མཆོད་དོ། །ཤེས་རབ་ཆེན་པོ་དང་ལྡན་པར་འདོད་ན་རིན་པོ་ཆེའི་མེ་ལོང་ཐོགས་པའི་ཕྱག་ལ་མཆོད་དོ། །ཕྱོགས་བཅུའི་དེ་བཞིན་གཤེགས་
པ་རྣམས་མངོན་སུམ་དུ་མཐོང་བར་འདོད་ན། པདྨ་ཐོགས་པའི་ཕྱག་ལ་མཆོད་དོ། །སའི་གཏེར་འབྱིན་པར་འདོད་ན་རིན་པོ་ཆེའི་ཟ་མ་ཏོག་ཐོགས་པའི་ཕྱག་ལ་མཆོད་དོ། །དྲང་སྲོང་གི་ལམ་མངོན་པར་བསྒྲུབ་པར་འདོད་ན་སྤྲིན་རྣམ་པ་ལྔ་ཐོགས་པའི་ཕྱག་ལ་མཆོད་དོ། །ཚངས་པར་སྐྱེ་
བར་འདོད་ན་རིལ་བ་ཐོགས་པའི་ཕྱག་ལ་མཆོད་དོ། །ལྷའི་གཞལ་མེད་ཁང་དུ་སྐྱེ་བར་འདོད་ན། པདྨ་ལེ་བརྒན་ཐོགས་པའི་ཕྱག་ལ་མཆོད་དོ། །ཕྱོགས་གཞན་གྱི་ཕྱིར་རྒོལ་བ་བསལ་བར་འདོད་ན། རལ་གྲི་དང་མདུང་ཐོགས་པའི་ཕྱག་ལ་མཆོད་དོ། །དགེ་བའི་ལྷ་འདྲེ་ཐམས་ཅད་
དགུག་པར་འདོད་ན་རིན་པོ་ཆེའི་དུང་ཐོགས་པའི་ཕྱག་ལ་མཆོད་དོ། །ལྷ་འདྲེ་ཐམས་ཅད་འཁོལ་བར་འདོད་ན་ཐོད་པའི་ཁར་བ་ཐོགས་པའི་ཕྱག་ལ་མཆོད་དོ། །ཕྱོགས་བཅུའི་སངས་རྒྱས་མྱུར་དུ་གཤེགས་ནས་ཕྱག་གིས་བྱུག་པར་འདོད་ན་བགྲང་ཕྲེང་འཛིན་པའི་ཕྱག་ལ་མཆོད་དོ། །ཚངས་
པའི་སྒྲ་དབྱངས་མཆོག་ཐམས་ཅད་མངོན་པར་འགྲུབ་པར་འདོད་ན་རིན་པོ་ཆེའི་དྲིལ་བུ་ཐོགས་པའི་ཕྱག་ལ་མཆོད་དོ། །ཚིག་གི་སྤོབས་པ་གྱ་ནོམ་པ་དང་ལྡན་པར་འདོད་ན་རིན་པོ་ཆེའི་ཕྱག་རྒྱ་ཐོགས་པའི་ཕྱག་ལ་མཆོད་དོ། །དགེ་བའི་ལྷ་རྣམས་དང་ཀླུ་རྣམས་རྟག་པར་འོངས་ཏེ་བསྲུང་

73-1-120a

ཞིང་ཡོངས་སུ་སྐྱོབ་པར་འདོད་ན་ལྕགས་ཀྱུ་ཐོགས་པའི་ཕྱག་ལ་མཆོད་དོ། །བྱམས་དང་སྙིང་རྗེས་སེམས་ཅན་ཐམས་ཅད་སྐྱོབ་པར་འདོད་ན་འཁར་གསིལ་ཐོགས་པའི་ཕྱག་ལ་མཆོད་དོ། །སེམས་ཅན་ཐམས་ཅད་ཀྱིས་རྟག་པར་ཕན་ཚུན་གུས་པའི་བསྙེན་བཀུར་བརྩེ་བར་སེམས་
པར་འདོད་ན་ཐལ་མོ་སྦྱོར་བའི་ཕྱག་ལ་མཆོད་དོ། །སྐྱེ་བའི་སྐྱེ་གནས་ཐམས་ཅད་དུ་དེ་བཞིན་གཤེགས་པ་རྣམས་དང་མི་འབྲལ་བར་འདོད་ན་སྤྲུལ་པའི་སངས་རྒྱས་ཐོགས་པའི་ཕྱག་ལ་མཆོད་དོ། །སྐྱེ་བའི་ཚེ་རབས་ཐམས་ཅད་དུ་རྟག་པར་དེ་བཞིན་གཤེགས་པའི་ཕོ་བྲང་དུ་གནས་ནས་མངལ་གྱི་
སྙིང་པོར་སྐྱེ་བར་མི་འདོད་པར་གྱུར་ན་གཞལ་མེད་ཁང་ཐོགས་པའི་ཕྱག་ལ་མཆོད་དོ། །མང་དུ་ཐོས་པའི་ཤེས་རབ་རྒྱ་ཆེན་པོ་དང་ལྡན་པར་འདོད་ན་རིན་པོ་ཆེའི་མདོ་སྡེའི་གླེགས་བམ་ཐོགས་པའི་ཕྱག་ལ་མཆོད་དོ། །ད་ལྟར་གྱི་ལུས་འདི་ནས་སངས་རྒྱས་ཀྱི་སྐུ་ལ་ཐུག་པའི་བར་དུ་རྟག་
ཏུ་བྱང་ཆུབ་ཀྱི་སེམས་ལས་ལྡོག་པར་མི་འགྱུར་བར་འདོད་ན་ཕྱིར་མི་ལྡོག་པའི་གསེར་གྱི་འཁོར་ལོ་ཐོགས་པའི་ཕྱག་ལ་མཆོད་དོ། །མི་འཇིགས་པ་ལ་སོགས་པའི་སྦྱིན་པ་རྣམ་པ་བཞིས་འགྲོ་བ་ཚིམ་པར་འདོད་ན་མཆོག་སྦྱིན་པའི་ཕྱག་ལ་མཆོད་དོ། །ཕྱོགས་བཅུའི་དེ་བཞིན་
གཤེགས་པ་རྣམས་མྱུར་དུ་གཤེགས་ནས་སྤྱི་བོ་ནས་ཕྱག་གིས་བྱུགས་ཏེ་ལུང་བསྟན་པར་འདོད་ན་སྤྱི་བོ་ན་སྤྲུལ་པའི་སངས་རྒྱས་ཐོགས་པའི་ཕྱག་ལ་མཆོད་དོ། །ཤིང་ཏོག་དང་འབྲས་བུ་རྣམས་འགྲུབ་པར་འདོད་ན་རྒུན་འབྲུམ་ཐོགས་པའི་ཕྱག་ལ་མཆོད་དོ། །དེ་ལྟར་མངོན་པར་སྒྲུབ་པའི་
མཆོག་རྣམས་སྟོང་ཡོད་ཀྱང་། དེ་མདོར་བསྡུས་ནས་བསྟན་པ་ཡིན་ནོ། །ལུས་དྲང་པོར་བསྲང་སྟེ་སྙིང་གར་ཐལ་མོ་སྦྱར་ནས་གོར་མོ་ཐམས་ཅད་ཕན་ཚུན་ཐད་ཀར་བསྣོལ་ལ་གཡོན་པའི་སོར་མོ་རྣམས་ཀྱིས་གཡས་པའི་སོར་མོ་རྣམས་ལ་འཁྱུད་དེ་མཛུབ་མོ་གྱེན་དུ་བསྒྲེངས་ལ་རྩེ་མོ་
གཉིས་སྤྲད་དོ། །མཐེ་བོ་གཉིས་མཛུབ་མོ་གཉིས་ཀྱི་ཚིགས་དང་པོར་རེག་པར་བགྱི། ལག་མཐིལ་ལམ་འབྱར་བར་བགྱིའོ། །འདི་ནི་གཟུངས་སྔགས་ཐམས་ཅད་ཀྱི་ཕྱག་རྒྱ་ཡིན་ནོ། །བསྐལ་པ་དུ་མར་ཚེ་རབས་སུ་བསགས་པའི་ལས་ཀྱི་སྒྲིབ་པ་མི་དགེ་བ་རྣམས་བྱང་བར་འགྱུར་

73-1-120b

རོ། །ཚེ་ཕྱི་མ་ལ་སངས་རྒྱས་ཀྱི་ཞིང་རྣམས་སུ་སྐྱེ་བར་འགྱུར་རོ། །སངས་རྒྱས་བཅོམ་ལྡན་འདས་ཤཱཀྱ་ཐུབ་པས་བྱང་ཆུབ་བརྙེས་པར་མཛད་པའི་ཚེ་བདུད་ཐམས་ཅད་ཀྱིས་མཐོ་བཙམས་པ་ན་ཕྱག་རྒྱ་འདིས་བཏུལ་ཏེ། དེའི་ཚེ་ཞི་བ་དང་བདེ་བ་དང་བསམ་གཏན་དང་སྙོམས་པར་འཇུག་པ་ཡང་
བརྙེས་པར་གྱུར་ཏོ། །དེའི་གསང་སྔགས་ནི་འདི་ཡིན་ནོ། །ཏདྱ་ཐཱ། སརྦ་དྷརྨཱ་མཎྜ་ལཱ་ཡེ་ཨེ་ཧྱེ་ཧི་སརྦ་ཤུདྡྷ་སཏྭཱ་ཡ་སྭཱ་ཧཱ། འཕགས་པ་སྤྱན་རས་གཟིགས་ཕྱག་སྟོང་པའི་དཀྱིལ་འཁོར་གྱི་ཆོ་ག་བརྗོད་པར་བྱ་སྟེ། ཐོག་མར་རི་རྣམས་དང་ཉེ་བ་མ་གཞི་ས་གཙང་ཞིང་བཀྲ་ཤིས་
པའི་ས་ཕྱོགས་བཙལ་བར་བགྱིའོ། །དེར་ས་བརྐོས་ཏེ་གསེག་མ་དང་གྱོ་མོ་དང་རུས་པ་དང་མི་གཙང་བ་རྣམས་བསལ་ལ་དྲི་ཞིམ་པོ་དག་དང་བའི་ལྕི་བ་དང་འཇིམ་པ་བསྲེས་ཏེ་བྱུག་པར་བྱ། དཀྱིལ་འཁོར་དཔངས་མཐོ་གང་གི་ཚད་དུ་སྒོ་བཞི་གདོད་དོ། །རིན་པོ་ཆེ་དུ་མས་སྤྲས་
པའི་རྟ་བབས་དང་སྒོ་ཁྱུད་དང་བཅས་པ་ཚང་བར་བགྱིའོ། །ཤར་གྱི་སྒོར་ནི་ཡུལ་འཁོར་སྲུང་། ལྷོའི་སྒོར་ནི་འཕགས་སྐྱེས་པོ། ནུབ་ཀྱི་སྒོར་ནི་སྤྱན་མི་བཟང་། བྱང་གི་སྒོར་ནི་རྣམ་ཐོས་སྲས། དེ་དག་གི་གཡས་གཡོན་དུ་རང་རང་གི་འཁོར་ཐམས་ཅད་དྲིའོ། །དཀྱིལ་འཁོར་གྱི་དབུས་
སུ་འཕགས་པ་སྤྱན་རས་གཟིགས་དབང་ཕྱུག་ཕྱག་སྟོང་པ་གཞག་པར་བགྱིའོ། །དེའི་མདུན་དུ་སྒྲོལ་མ་དང་ཁྲིའུའི་གཞག་སྟེ་ཁྲིའུའི་སྟེང་དུ་གཟུགས་སྔགས་འདི་གཞག་པར་བགྱིའོ། །གཡས་ཕྱོགས་སུ་ནི་དོན་ཡོད་པའི་ཞགས་པའོ། །རྒྱབ་ཏུ་ནི་ནོར་བཟངས་སོ། །གཡོན་དུ་ནི་རྟ་མགྲིན་ནོ། །མཚམས་
བཞིར་གོ་རིམས་ཇི་ལྟ་བ་བཞིན་དུ་གཟུངས་ཀྱི་དབང་ཕྱུག་རྒྱལ་པོ་དང་། བྱམས་པ་དང་། འཇམ་དཔལ་དང་། ཕྱག་ན་རྡོ་རྗེའོ། །དཀྱིལ་འཁོར་དེ་ལ་བདུག་པ་སྣ་ཚོགས་ཀྱིས་བདུག་གོ། །མེ་ཏོག་སྣ་ཚོགས་དགྲམ། མཆོད་པ་རྣམ་པ་སྣ་ཚོགས་གཞག་པར་བྱའོ། །སྒོག་པ་རྣམ་དགུ་
དང་ཤ་ཆང་མི་དབང་ངོ་། །ཞག་ཉི་ཤུ་རྩ་གཅིག་ཏུ་རྒྱུན་མི་འཆད་པར་མཆོད་པ་གསར་པ་རྣམས་བརྗེའོ། །བསྟོད་པའི་དབྱངས་དང་རོལ་མོ་སྣ་ཚོགས་ཀྱིས་མཆོད་པར་བྱའོ། །དཀྱིལ་འཁོར་གྱི་མཐའ་མར་ནི་མཆོད་རྟེན་བདུན་བདུན་ལ་ཚོན་སྣ་ལྔའི་བ་དན་བཙུགས་ལ་གཞག་

73-1-121a

པར་བྱའོ། །དེའི་ཚེ་རྩ་བའི་སྔགས་སྟོང་བརྒྱ་རྩ་བརྒྱད་བཟླས་བརྗོད་བགྱིའོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་གི་གཟུགས་དང་ཀུན་དགའ་བོའི་གཟུགས་ཀྱིས་དེར་འོངས་ནས་སྒྲུབ་པ་པོ་དེ་ལ་ཅི་འདོད་ཅེས་གཏམ་སྨྲ་བར་འགྱུར་རོ། །སྒྲུབ་པ་པོ་དེས་མཆོད་
པ་སྣ་ཚོགས་ཀྱིས་མཆོད་ལ་ལན་གདབ་པར་བགྱི་སྟེ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་དོན་དུ་གཟུགས་སྔགས་ཀྱི་རང་བཞིན་འཚལ་ལོ་ཞེས་བརྗོད་པར་བགྱིའོ། །ཡང་འདི་སྐད་དུ་འདི་ནི་ལུང་བསྟན་པའི་དུས་ལགས་པ་སྙམ་བགྱིད་ན་ཐུགས་རྗེ་དང་ལྡན་པས་བདག་
ལ་ངེས་པར་ཐུགས་རྗེ་ཆེན་པོ་བསྐྱེད་དུ་གསོལ། བདག་ནི་རྙེད་པ་དང་བཀུར་སྟི་དང་གྲགས་པ་མི་འཚལ་གྱི་ནམ་ཞིག་ན་སེམས་ཅན་ཐམས་ཅད་ལ་བུ་གཅིག་པ་བཞིན་དུ་ལྟ་བ་དང་ཡོངས་སུ་སྐྱོབ་པར་འགྱུར་སྙམ་དུ་སེམས་སོ། །ཡང་འབྱུང་པོ་གཉུག་མར་གནས་པ་ཐམས་ཅད་བདག་
གིས་བསྒོ་བ་བཞིན་དུ་གནས་པར་གྱུར་ཅིག་སྙམ་དུ་སེམས་སོ་ཞེས་བརྗོད་པར་བགྱིའོ། །གལ་ཏེ་ཡིད་ལ་བསམས་པ་འདི་ཐོབ་ཅིང་དངོས་གྲུབ་དེ་ཐོབ་ན་གཞན་ལ་མ་བརྗོད་པར་བདག་ཉིད་ཀྱིས་འཚལ་བར་བགྱིའོ། །གལ་ཏེ་ཆོས་འདི་གྲུབ་ན་བཟླས་པར་བགྱི་གཅིག་ཏུ་གཟུང་བར་བགྱིའོ། །
འདི་ནི་བསླབ་པ་གཅིག་ཏུ་གསང་བའོ། །སུ་ཞིག་སྣ་ཚོགས་འཚལ་བ་དེས་ཨ་ཀ་རུ་ནག་པོའི་ཆབ་ཀྱིས་དཀྱིལ་འཁོར་གྲུ་བཞི་པ་བགྱིས་ལ་རྩ་བའི་སྔགས་ལན་བརྒྱ་རྩ་བརྒྱད་བཟླས་བརྗོད་བགྱིའོ། །ཡིད་ལ་བསམ་པ་ཡོངས་སུ་རྫོགས་པར་བགྱིད་པ་ཕྱག་རྒྱ་བཅིང་བར་བགྱིའོ། །འོན་ཀྱང་
འཚལ་བ་ཡོངས་སུ་རྫོགས་པ་རྙེད་པར་འགྱུར་རོ། །དེའི་ཚེ་གླེགས་བམ་འདི་བཞིན་དུ་སེམས་ཤིང་སུ་ཞིག་འདི་བཞིན་དུ་མཆོད་པར་བགྱིས་ན་གཞན་དུ་མི་འགྱུར་རོ། །འཕགས་པ་སྤྱན་རས་གཟིགས་ཀྱི་དབང་པོས་སངས་རྒྱས་རྣམ་པར་གཟིགས་འཇིག་རྟེན་དུ་བྱོན་པའི་ཚེ་འཕགས་པ་སྤྱན་རས་
གཟིགས་ཀྱིས་བདུད་བཏུལ་བའི་ཚེ་ལུས་ལས་མིག་སྟོང་སྤྲུལ་ཏེ་མིག་རེ་རེ་ལས་སངས་རྒྱས་རེ་རེ་སྤྲུལ་ཏེ། དེ་དག་ལས་བསྐལ་པ་བཟང་པོའི་སངས་རྒྱས་སྟོང་འབྱུང་ངོ་། །ལག་པ་སྟོང་ལས་ལག་པ་རེ་རེ་ལས་འཁོར་ལོས་སྒྱུར་བའི་རྒྱལ་པོ་རེ་རེ་སྤྲུལ་ཏེ་དེ་དག་ལ་ནི་འཁོར་ལོས་

73-1-121b

སྒྱུར་བའི་རྒྱལ་པོ་སྟོང་འབྱུང་ངོ་། །བདུད་བཏུལ་བའི་ནང་ན་བྱང་ཆུབ་སེམས་དཔའི་ལུས་ནི་མཆོག་གོ། །དེ་ནས་རྫོགས་པའི་རིམ་པ་བསྒོམ་པར་བྱ་སྟེ། ཟབ་པ་དང་ཕྲ་བའི་རྫོགས་རིམ་ནི་བླ་མའི་མན་ངག་ལས་ཤེས་པར་བྱའོ། །དེ་ནས་ཛ་ཧི་ཞེས་བརྗོད་པས་མདུན་གྱི་ནམ་མཁའ་ལ་གཤེགས་
ལ་བསྟོད་པ་དང་མཆོད་པས་མཆོད་ལ། མགོན་པོ་ཐུགས་རྗེ་ཆེན་པོ་དང་ལྡན་པ་འཁོར་དང་བཅས་པ་དགོངས་སུ་གསོལ། བདག་ཉིད་གཅིག་པུ་སྡུག་བསྔལ་ལས་ཐར་ནས་བདེ་བ་ལ་གནས་པར་འདོད་པ་མ་ལགས་ཀྱིས་ཕྱོགས་བཅུའི་སེམས་ཅན་ཐམས་ཅད་ཕྱག་རྒྱ་ཆེན་པོའི་དངོས་གྲུབ་
ཐོབ་པའི་ཆེད་དུ་འཕགས་པ་སྒྲུབ་པ་ལ་སྐུ་གསུང་ཐུགས་ཀྱི་དངོས་གྲུབ་ཐམས་ཅད་ཐོབ་པར་བྱིན་གྱིས་བརླབ་པ་དམ་པ་མཛད་དུ་གསོལ་ཞེས་བརྗོད་ལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །
སླར་ཡང་འབྱོན་པར་མཛད་དུ་གསོལ། །ཞེས་བརྗོད་ལ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་
བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿ། ཞེས་པ་ལན་བདུན་བརྗོད་ལ་གཤེགས་སུ་གསོལ། གཞན་ཡང་དམ་པའི་ཆོས་པདྨ་དཀར་པོ་ནས་གསུངས་པ། སྤྱན་རས་གཟིགས་ཀྱི་དབང་པོ་དྲན་ན་ནི། །ངན་སོང་སྡུག་བསྔལ་དབུལ་བའི་སྡུག་བསྔལ་དང་། །ན་
བའི་སྡུག་བསྔལ་འཚེ་བའི་སྡུག་བསྔལ་བ། །ཀུན་ནས་ཐར་བར་སྤྱན་རས་གཟིགས་ཀྱིས་གསུངས། །གལ་ཏེ་གསོད་པས་མེ་ཡི་དོང་དུ་ཡང་། །གསད་པར་བྱ་བའི་ཕྱིར་ནི་བོར་བ་ཡིས། །སྤྱན་རས་གཟིགས་ཀྱི་དབང་པོ་དྲན་ན་ནི། །ཆུ་བཏབ་བཞིན་དུ་མེ་དག་ཞི་བར་འགྱུར། །རྒྱ་མཚོ་དང་ནི་མྱ་
ངན་རྒལ་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །ཆུ་ཡི་ནང་དུ་ནམ་ཡང་མི་འཆིའོ། །རབ་ཏུ་སྡང་བའི་ཡིད་ཀྱིས་གསད་པའི་ཕྱིར། །རི་རབ་ལྷུན་པོའི་རྩེ་ནས་བོར་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །ཉི་མ་ལྟ་བུར་བར་སྣང་གནས་པར་འགྱུར། །

73-1-122a

གལ་ཏེ་རྡོ་རྗེ་ཡི་ནི་རི་དག་དང་། །བསད་པའི་ཕྱིར་ནི་སྤྱི་བོར་འོངས་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །བ་སྤུའི་ཁུང་ཙམ་གཙེས་པར་མི་ནུས་སོ། །གསད་པའི་སེམས་ཀྱིས་ལག་ན་མཚོན་ཐོགས་ཏེ། །དགྲ་ཚོགས་མང་པོས་རབ་ཏུ་བསྐོར་ན་ཡང་། །སྤྱན་
རས་གཟིགས་ཀྱི་དབང་པོ་དྲན་ན་ནི། །དེ་མ་ཐག་ཏུ་བྱམས་པའི་སེམས་སུ་འགྱུར། །གལ་ཏེ་གསོད་པ་ཉེ་བར་འོངས་ནས་སུ། །གཤེད་མའི་མི་ཡི་དབང་དུ་གྱུར་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་ཡི་མཚོན་ཆ་དུམ་བུ་དུམ་བུར་འགྱུར། །སྔགས་དང་སྟོབས་དང་
སྨན་དང་རིག་སྔགས་དང་། །རོ་ལངས་པ་དང་འབྱུང་པོ་ལུས་འཇིགས་པ། །སྤྱན་རས་གཟིགས་ཀྱི་དབང་པོ་དྲན་ན་ནི། །གང་ནས་རབ་ཏུ་བཏང་བ་དེ་སླར་འགྲོ། །དྲི་མ་མེད་པ་དྲི་བྲལ་བ་ཡི་འོད། །འོད་དཔག་མེད་པ་ཡེ་ཤེས་ཉི་མའི་འོད། །སྤྲིན་གྱིས་ཆོད་པ་མེད་པར་གྱུར་པའི་
འོད། །འཇིག་རྟེན་དག་ན་ལྷང་ངེ་ལྷག་གེར་མཛེས། །འཕགས་པ་ལྷ་ཡིས་གསོལ་བ་ལེགས་བཏབ་ནས། །འཕགས་པ་འཇིག་རྟེན་མགོན་པོའི་སྒྲུབ་ཐབས་བྱས། །མི་དབང་རྒྱལ་པོ་བདེ་སྤྱོད་འཁོར་བཅས་རྣམས། །ཚེ་འདིར་འཇིག་རྟེན་མགོན་པོ་མཐོང་བར་ཤོག །སློབ་དཔོན་འཕགས་
པ་ཀླུ་སྒྲུབ་བདག་ཉིད་ཆེན་པོ་མི་འཕྲོགས་པའི་མཁྱེན་རབ་དང་ཐུགས་རྗེར་ལྡན་པ་ས་དྲུག་པའི་བྱང་ཆུབ་སེམས་དཔའ་ཡིན་ཡང་ས་དང་པོའི་བྱང་ཆུབ་སེམས་དཔར་བྱིན་གྱིས་བརླབས་པ། དཔེར་ན་ངའི་ཉེ་གནས་ཀུན་དགའ་བོ་ས་བཅུའི་བྱང་ཆུབ་སེམས་དཔའ་ཡིན་ཡང་སོ་སོའི་སྐྱེ་
བོར་བྱིན་གྱིས་བརླབས་པ་ལྟ་བུའོ་ཞེས་བཅོམ་ལྡན་འདས་ཀྱིས་གསུངས་པ་ལ་འཇིག་རྟེན་གྱི་ཁམས་བདེ་བ་ཅན་དུ་གཤེགས་ཏེ། ས་བརྒྱད་པ་ལ་གནས་ནས་ལུས་གཉིས་སུ་བྱས་ཏེ། གཅིག་ནི་དེ་བཞིན་གཤེགས་པ་འོད་དཔག་ཏུ་མེད་པ་ལ་མཆོད་པ་བྱེད། གཅིག་ནི་
དགའ་ལྡན་དུ་བྱམས་པ་ལ་མདོ་འདི་ཉིད་ཀྱི་དོན་འདྲིའོ་ཞེས་གསུངས་པ། འཇིག་རྟེན་གྱི་ཁམས་དང་བའི་འོད་ཅེས་བྱ་བར་དེ་བཞིན་གཤེགས་པ་ཡེ་ཤེས་འབྱུང་གནས་འོད་ཅེས་བྱ་བར་ལུང་བསྟན་པས་མཛད་པ་རྫོགས་སོ།།      །།རྒྱ་གར་གྱི་མཁན་པོ་པཎྜི་ཏ་ཆེན་

73-1-122b

པོ་དཱི་པཾ་ཀ་ར་ཤྲཱི་ཛྙཱ་ན་དང་། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་བའོ།།      །།༄༅༅། །རྒྱ་གར་སྐད་དུ། ཨཱརྱཱ་བ་ལོ་ཀེ་ཏེ་ཤྭ་ར་ཥ་ཊ་ཀྵ་ར་སཱ་དྷ་ནཾ། བོད་སྐད་དུ། འཕགས་པ་འཇིག་རྟེན་དབང་ཕྱུག་ཡི་གེ་དྲུག་པའི་སྒྲུབ་ཐབས། སངས་རྒྱས་དང་བྱང་ཆུབ་
སེམས་དཔའ་ཐམས་ཅད་ལ་ཕྱག་འཚལ་ལོ། །གང་ཞིག་དོན་དམ་ཐུགས་ཆུང་སྙིང་རྗེའི་དབང་གིས་ཡེ་ཤེས་སྐུར། །གནས་མཛད་འགྲོ་ལ་བུ་བཞིན་མཉམ་གཟིགས་ནས། །སྡུག་བསྔལ་རྒྱ་མཚོའི་འཇིགས་ལས་སྒྲོལ་མཛད་པའི། །སྐྱོབ་པའི་དབང་པོ་འཇིག་རྟེན་མགོན་ལ་རབ་བཏུད་དེ། །
ཡེ་ནས་རྣམ་དག་སེམས་ཉིད་མ་རིག་པའི། །གློ་བུར་དྲི་མས་བསྒྲིབས་པའི་འགྲོ་ལ་ཕན་དོན་དུ། །བསྟན་པ་རྒྱ་མཚོའི་ནང་ནས་ཐེག་མཆོག་རྡོ་རྗེའི་ལམ། །སྒྲིབ་པ་མྱུར་སེལ་བདུད་རྩི་ལྟ་བུ་བྲི་བར་བྱ། །བླ་མ་དཀོན་མཆོག་གསུམ་གུས་ཤིང་། །སྙིང་རྗེ་བྱང་ཆུབ་སེམས་སྦྱངས་ཏེ། །དབང་
ཐོབ་དམ་ཚིག་ལྡན་པ་ཡི། །སྒྲུབ་ལ་བརྩོན་པའི་རྣལ་འབྱོར་གྱིས། །བཀྲ་ཤིས་ཡིད་འོང་བྱིན་ཆགས་པའི། །དབེན་པའི་གནས་སུ་ཕྱིན་ནས་ནི། །མཆོད་སྦྱིན་ལ་སོགས་སྔོན་སོང་བས། །རྟེན་དང་མཆོད་པ་རིམ་བཞིན་བཤམས། །དེ་ནས་འཚེ་དོགས་ཀུན་སྤངས་ནས། །ཁྲུས་བྱས་བདེ་
བའི་སྟན་འདུག་སྟེ། །རང་ཉིད་སྙིང་གར་ཧྲཱིཿབལྟས་ལ། །འོད་ཀྱིས་འཕགས་པ་སྤྱན་དྲང་ཞིང་། །ཕྱག་འཚལ་མཆོད་འབུལ་ལ་སོགས་པས། །བསོད་ནམས་ཚོགས་ནི་བསགས་པར་བྱ། །འགྲོ་ལ་སྙིང་རྗེ་ཆེན་པོ་དང་། །བྱང་ཆུབ་སེམས་ཀྱང་བསྒོམ་པར་བྱ། །ཨོཾ་མ་ཧཱ་
ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། དངོས་རྣམས་ཐམས་ཅད་རབ་སྦྱངས་ཏེ། །སྟོང་པ་ཉིད་ཀྱི་ངང་ཉིད་ལས། །རླུང་དང་བདུད་རྩི་རི་རབ་སྟེ། །བྷྲཱུཾ་ལས་རིན་ཆེན་གཞལ་ཡས་ཁང་། །གྲུ་བཞི་པ་ལ་སྒོ་བཞི་པ། །རྟ་བབས་ལ་སོགས་རྣམ་པར་མཛེས། །ཕོ་བྲང་ཆུ་སྐྱེས་འདབ་དྲུག་
ལ། །སྐུ་གསུང་ཐུགས་ཀྱི་དཀྱིལ་འཁོར་བསྒོམ། །དེ་དབུས་པདྨ་ཟླ་བའི་སྟེང་། །ཧྲཱིཿལས་འོད་འཕྲོས་དོན་བྱས་ནས། །སླར་འདུས་ཡོངས་སུ་གྱུར་པ་ལས། །འཇིག་རྟེན་དབང་ཕྱུག་སྐུར་བསྐྱེད་དེ། །ཞལ་གཅིག་པ་ལ་ཕྱག་བཞི་པ། །དང་པོ་ཐུགས་ཀར་ཐལ་མོ་སྦྱར། །གཡས་

73-1-123a

ན་མུ་ཏིག་ཕྲེང་བ་འཛིན། །གཡོན་པ་པདྨ་དཀར་པོ་བསྣམས། །སྐུ་མདོག་དུང་དང་ཀུན་དའམ། །ཁ་བའི་རི་ལྟར་དཀར་བ་ལ། །ཐུགས་རྗེས་ཡིད་ཙམ་དམར་བའི་སྤྱན། །ཞལ་ནི་འཛུམ་པའི་མདངས་དང་ལྡན། །སྐུ་ནི་མི་འགྱུར་དྲང་པོ་སྟེ། །ཞབས་གཉིས་མཉམ་པའི་སྐྱིལ་
ཀྲུང་བཞུགས། །དབུ་སྐྲ་མཐོན་མཐིང་ལྕང་ལོ་འཁྱིལ། །ཨ་མི་ཏཱ་བྷས་སྤྱི་གཙུག་བརྒྱན། །མཚན་བཟང་སུམ་ཅུ་རྩ་གཉིས་དང་། །དཔེ་བྱད་བཟང་པོ་བརྒྱད་ཅུར་ལྡན། །རིན་ཆེན་སྣ་ཚོགས་རྒྱན་གྱིས་སྤྲས། །ལེ་བརྒན་དར་གྱི་ན་བཟའ་འཆང་། །འཇིག་རྟེན་གསུམ་གྱི་མགོན་པོ་ནི། །
ཡུམ་དང་སྲས་བཅས་བསྐྱེད་པར་བྱ། །དེ་ནས་གནས་གསུམ་བྱིན་བརླབས་ཏེ། །སྤྱི་བོ་མགྲིན་པ་ཐུགས་ཀ་རུ། །རྡོ་རྗེ་གསུམ་མཆོག་སྙིང་པོ་འདི། །ཁ་དོག་གསུམ་ལྡན་ཡི་གེ་དགོད། །ཕྱོགས་བཅུའི་བདེ་གཤེགས་སྤྱན་དྲངས་ནས། །མཆོད་དེ་གསོལ་བ་བཏབ་པ་ཡིས། །ཡེ་ཤེས་
བདུད་རྩིའི་ཆུ་རྒྱུན་གྱིས། །དབང་བསྐུར་རིགས་ཀྱི་བདག་པོས་བརྒྱན། །དེ་ནས་ཐུགས་ཀའི་ས་བོན་ལས། །འོད་ཟེར་སྤྲོས་ཏེ་འོག་མིན་ནས། །ཡེ་ཤེས་སེམས་དཔའ་སྤྱན་དྲངས་ལ། །མཆོད་ཅིང་གཉིས་མེད་བསྲེ་བར་བྱ། །རང་སེམས་རྣམ་དག་ལྷར་གསལ་བ། །སྣང་བ་རང་བཞིན་མེད་པ་
ཡི། །ཆུ་ཟླ་མེ་ལོང་གཟུགས་བརྙན་ནམ། །ནམ་མཁའ་ཡི་ནི་འཇའ་ཚོན་ལྟར། །མཐའ་གཉིས་ལས་གྲོལ་ལྷ་ཡི་སྐུ། །སྐུ་བཅས་སྐུ་ནི་མེད་པ་ཡི། །ཟུང་འཇུག་སྒྱུ་མ་ལྟ་བུར་ནི། །རྣལ་འབྱོར་པ་ཡིས་རྟག་ཏུ་བསྒོམ། །དེ་ལྟར་གསལ་བར་གྱུར་པ་དང་། །དུས་གསུམ་བདེ་གཤེགས་
ཐམས་ཅད་ཀྱིས། །བྱིན་གྱིས་བརླབས་པའི་གསང་སྔགས་འདི། །རྒྱུན་མི་འཆད་དུ་བཟླས་པར་བྱ། །ཨོཾ་མ་ཎི་པདྨེ་ཧཱུཾ། འདི་ནི་མཚན་གྱི་རྒྱལ་པོ་སྟེ། །མི་མཐུན་དྲི་མ་སྤང་བྱེད་ཅིང་། །འདོད་པའི་འབྲས་བུ་ཀུན་སྟེར་བས། །ཡིད་བཞིན་ནོར་བུ་ལྟ་བུའོ། །དེ་ནས་ཐུགས་ཀའི་འོད་ཟེར་གྱིས། །
སྣོད་བཅུད་སྦྱངས་ཏེ་སྐུ་ལ་བསྡུ། །སྐུ་ཡང་གསུང་ཡིག་རིམ་གྱིས་ནི། །ཐིག་ལེ་མི་དམིགས་གཟུགས་སུ་བསྡུ། །མཚན་མའི་རྟོག་པ་རབ་ཞི་བ། །ཆོས་དབྱངས་དག་པའི་ངོ་བོ་ཉིད། །རང་བཞིན་ཀུན་ཏུ་འོད་གསལ་བའི། །དེ་བཞིན་ཉིད་ཀྱི་ངང་དུ་གཞག །དེ་ལས་ཅུང་ཟད་ལྷ་ཡི་སྐུར། །

73-1-123b

ལངས་ཏེ་སྤྱོད་ལམ་རྣམ་བཞི་རུ། །མ་ཡེངས་ཆུ་བོའི་རྒྱུན་ལྟར་བསྒོམ། །སྣང་གྲག་སྐུ་གསུང་ཐུགས་སུ་ཁྱེར། །གཞན་ཡང་བསོད་ནམས་ཚོགས་བསགས་ཕྱིར། །མདུན་གྱི་མཎྜལ་དབུས་ཉིད་དུ། །རྟེན་ལས་དམ་ཚིག་དཀྱིལ་འཁོར་བསྐྱེད། །ཡེ་ཤེས་དཀྱིལ་འཁོར་དབྱིངས་ནས་ནི། །
སྤྱན་དྲངས་ཁྲུས་གསོལ་བསྟིམ་བཞུགས་ཤིང་། །ཕྱག་འཚལ་མཆོད་ཅིང་བསྟོད་བྱ་སྟེ། །ཐུགས་ཉི་པདྨའི་དཀྱིལ་འཁོར་དུ། །གསང་སྔགས་དམིགས་ཤིང་བཟླས་པར་བྱ། །དེ་ནས་བཟོད་གསོལ་ཡེ་ཤེས་གཤེགས། །དམ་ཚིག་དཀྱིལ་འཁོར་རང་ལ་བསྡུ། །རང་ཡང་མི་དམིགས་
རྒྱས་བཏབ་སྟེ། །ལྷ་ཡི་རྣམ་པར་ལངས་ཏེ་གནས། །ཐུན་བཞི་ལ་སོགས་ཐུན་བར་དུ། །ཆོས་ཀྱི་སྤྱོད་པ་རྒྱ་ཆེར་བྱ། །དེ་ལས་བྱུང་བའི་བསོད་ནམས་ཀྱང་། །འགྲོ་དོན་བྱང་ཆུབ་ཆེན་པོར་བསྔོ། །ཟླ་དྲུག་བསྒོམ་པས་འགྲུབ་འགྱུར་གྱི། །མཚན་བཟང་མཐོང་ན་དོན་ཆེན་བརྙེས། །སུམ་
བྱེད་དྲུག་འབུམ་ཐོན་ནས་ནི། །སྣ་ཚོགས་ལས་ཀྱི་རིམ་པར་སྦྱར། །ལྔ་བརྒྱའི་ཐ་མར་འཇིག་རྟེན་དུ། །ཐུབ་པའི་བསྟན་པ་རྒྱས་འགྱུར་ཏེ། །འཇིག་རྟེན་དབང་ཕྱུག་རྣལ་འབྱོར་གྱི། །མྱུར་དུ་བདག་གཞན་དོན་འགྲུབ་འགྱུར། །ཐུགས་རྗེ་པདྨོ་རྒྱས་པའི་གེ་སར་ལས་བྱུང་བའི། །རྒྱས་
བྱེད་བཅུད་ལྡན་སྦྲང་རྩི་ཅུང་ཟད་བདག་གིས་འཐུངས། །འདི་ནི་གཞན་ཕན་བསམ་པས་མན་ངག་ཟུར་ཙམ་བཀོད། །ཉེས་གྱུར་ཐུགས་རྗེའི་དང་དུ་བཟོད་པ་མཛད་པར་རིགས། །འདབ་ཆགས་རྒྱལ་པོས་ཆུ་ལས་འོ་མ་བླངས་པ་ལྟར། །གྲུབ་པའི་རྒྱུད་ལས་སྙིང་པོ་འདི་བསྡུས་དགེ་བ་
ཡིས། །མུ་མཐའ་ཡས་པའི་སེམས་ཅན་མ་ལུས་ཐམས་ཅད་ཀུན། །རྣམ་དག་པདྨོའི་ཞིང་དུ་རྒྱལ་བའི་ཞལ་མཐོང་ཤོག །ཐུགས་རྗེ་ཆེན་པོའི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།།      །།རྒྱ་གར་གྱི་མཁན་པོ་སློབ་དཔོན་
པདྨའི་ཞལ་སྔ་ནས་དང་། བོད་ཀྱི་ལོ་ཙཱ་བ་བཙུན་པ་རྒྱལ་བ་མཆོག་དབྱངས་ཀྱིས་བསྒྱུར་བའོ།།      །།༄༅༅། །རྒྱ་གར་སྐད་དུ། བྷཊྚཱ་རཱ་ཀ་ཨཱརྱཱ་བ་ལོ་ཀེ་ཏེ་ཤྭ་རེ་ཀ་ད་ཤ་མུ་ཁ་སྱ་སཱ་དྷ་ནཾ། བོད་སྐད་དུ། རྗེ་བཙུན་འཕགས་པ་སྤྱན་རས་གཟིགས་དབང་ཕྱུག་

73-1-124a

ཞལ་བཅུ་གཅིག་པའི་སྒྲུབ་ཐབས། བཙུན་པ་སྤྱན་རས་གཟིགས་ལ་ཕྱག་འཚལ་ལོ། །ལྟེ་བ་ཟླ་བས་རྣམ་བརྒྱན་པདྨ་ལ། །འབར་བའི་རྒྱན་མངའ་ཀུན་ནས་མུན་སེལ་ཅིང་། །ཁ་བའི་རི་འདྲ་རི་དགས་ལྤགས་འཛིན་པ། །འཛུམ་བཅས་བཞུགས་ལ་སྤྱི་བོས་བཏུད་བྱས་ཏེ། །
འགྲོ་བ་དེ་ཡི་གནས་ཐོབ་འདོད་པས་འདིར། །སྒྲུབ་ཐབས་ཆོ་ག་བདག་གིས་དྲན་པར་བྱ། །དང་པོར་རེ་ཞིག་གང་ཡང་རུང་བའི་ཡིད་དང་རྗེས་སུ་མཐུན་པའི་གནས་ལེགས་པར་བྱུགས་ལ་དྲི་ཞིམ་པོའི་མེ་ཏོག་ཀུན་ཏུ་གཏོར་ལ། དེའི་དབུས་སུ་སྟན་བདེ་བ་ལ་ཉེ་བར་འདུག་སྟེ། རང་གི་
སྙིང་གར་ཨ་ལས་ཟླ་བའི་དཀྱིལ་འཁོར་རྣམ་པར་བསམ་ཞིང་། དེའི་སྟེང་དུ་དྲོ་བ་རྣམས་ཀྱི་བཞི་པ་མེའི་བུ་ལ་བརྟེན་པ་ང་རོ་བཞི་པས་ཀུན་ནས་མནན་ཞིང་གཞོན་ནུ་མའི་ནུ་མས་བརྒྱན་པར་བལྟའོ། །དེ་ནས་ས་བོན་གྱི་ཡི་གེ་ལས་འོད་ཟེར་རྣམས་བྱུང་བས་བླ་མ་དང་སངས་རྒྱས་དང་བྱང་ཆུབ་སེམས་དཔའ་
དང་། རྗེ་བཙུན་སྤྱན་རས་གཟིགས་དབང་ཕྱུག་སྤྱན་དྲངས་ཏེ། དེ་དག་གི་མདུན་ཉིད་དུ་ཕྱག་འཚལ་བ་སྔོན་དུ་སོང་བས། ཨོཾ་བཛྲ་ཨརྒྷཾ་ཨཱཿཧཱུཾ་སྭཱ་ཧཱ། ཨོཾ་བཛྲ་དྷུ་པེ་ཨཱཿཧཱུཾ་སྭཱ་ཧཱ། ཨོཾ་བཛྲ་པུཥྤེ་ཨཱཿཧཱུཾ་སྭཱ་ཧཱ། ཨོཾ་བཛྲ་ཨཱ་ལོ་ཀེ་ཨཱཿཧཱུཾ་སྭཱ་ཧཱ། ཨོཾ་བཛྲ་གནྡྷེ་ཨཱཿཧཱུཾ་སྭཱ་ཧཱ། ཨོཾ་བཛྲ་ནཻ་ཝི་དྱེ་
ཨཱཿཧཱུཾ་སྭཱ་ཧཱ། ཨོཾ་བཛྲ་གཱི་ཏི་ཨཱཿཧཱུཾ་སྭཱ་ཧཱ། ཞེས་བྱིན་གྱིས་བརླབས་པའི་མཆོད་པའི་ཚོགས་ཕུལ་ལ། གང་ཡང་བདག་གིས་དུས་ཀུན་དུ། །སྡིག་པར་བགྱིས་པ་གང་གྱུར་པ། །སྐྲག་པས་རྨི་འདྲར་འཆགས་བགྱིད་ཅིང་། །དེང་ནས་བརྩམས་ཏེ་འབྱུང་མི་བགྱིད། །དགེ་བ་
རྣམས་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཐམས་ཅད་བྱང་ཆུབ་མཆོག་ཏུ་བསྔོ། །དེ་ཐོབ་ལམ་ལ་གནས་བགྱིད་ཅིང་། །དམ་པའི་སྐྱབས་ལ་སྐྱབས་སུ་མཆི། །དེ་ནས་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཏེ་ཚངས་པའི་གནས་བཞི་
རིམ་གྱིས་མངོན་དུ་བྱས་ལ། ཨོཾ་སྭ་བྷཱ་བ་བི་ཤུདྡྷཿསརྦ་དྷརྨྨཱཿསྭ་བྷཱ་བ་ཤུདྡྷོ྅ཧཾ་ཞེས་བརྗོད་དོ། །རྒྱུ་བ་དང་མི་རྒྱུ་བ་ཐམས་ཅད་རང་རང་གི་དེ་བཞིན་ཉིད་ལས་མི་འདའ་བས་རྣམ་པར་དག་པར་བསམས་ཏེ། བདག་ཀྱང་རྣམ་པར་དག་པར་བསམས་ལ། ཡང་ཨོཾ་ཤཱུ་ནྱ་ཏཱ་ཛྙཱ་ན་བཛྲ་

73-1-124b

སྭ་བྷཱ་བ་ཨཱཏྨ་ཀོ྅ཧཾ་ཞེས་བརྗོད་དོ། །ཀུན་ནས་སྟོང་པ་ཉིད་དུ་བདག་ཉིད་ཀྱང་བསམ་མོ། །དེའི་རྗེས་ལ་མདུན་དུ་པཾ་ལས་པདྨ་འདབ་མ་སྣ་ཚོགས་པ་བསམ་ཞིང་། དེའི་སྟེང་དུ་ཨ་ལས་ཟླ་བའི་དཀྱིལ་འཁོར་རོ། །དེའི་དབུས་སུ་ཡང་ས་བོན་གྱི་ཡི་གེ་དེ་ཉིད་དོ། །དེ་ནས་ཡང་དེ་ལས་འོད་ཟེར་བྱུང་བ་
རྣམས་ཀྱིས་འགྲོ་བ་རྣམས་རྣམ་པར་དག་པར་བྱས་ནས་འོངས་པ་དང་། དེ་ཉིད་ལ་ཞུགས་པས་པདྨ་འདབ་མ་བརྒྱད་པ་གསེར་བཙོ་མ་ལྟ་བུར་གྱུར་པར་བསམ་པར་བྱའོ། །དེའི་དབུས་སུ་ཡང་ས་བོན་གྱི་ཡི་གེ་དེ་ཉིད་དོ། །དེ་ནས་ཡང་དེ་ལས་འོད་ཟེར་ལྕགས་ཀྱུ་ལྟ་བུ་དང་། 
ཞགས་པ་ལྟ་བུ་བྱུང་བས་སངས་རྒྱས་དང་བྱང་ཆུབ་སེམས་དཔའ་རྣམས་བཀུག་སྟེ། བདག་ཉིད་དང་གཅིག་པས་དེ་ལ་ཐིམ་པར་བལྟའོ། །དེ་མ་ཐག་ཏུ་པདྨ་ས་བོན་དང་བཅས་པ་ཡོངས་སུ་གྱུར་པ་ལས་བདག་ཉིད་འཕགས་པ་སྤྱན་རས་གཟིགས་ཞལ་བཅུ་གཅིག་པ་གངས་
རིའི་རྩེ་མོ་ལ་ཉི་མས་བརྒྱན་པ་ལྟར་དཀར་བ་སྐུའི་ཡན་ལག་རྒྱན་ཐམས་ཅད་ཀྱིས་སྤྲས་པ་ནོར་བུས་སྤྲས་པའི་གསེར་མདོག་འོག་པག་ཅན། རས་བཟང་པོས་སྐུའི་སྨད་གཡོགས་པ། རི་དགས་ཀྱི་པགས་པས་ནུ་མ་གཡོན་པ་བཀབ་པ། རལ་པ་དམར་སེར་འཁྱུགས་པས་མཛེས་པ། 
ཕྱག་གདུབ་དང་། ཞབས་གདུབ་དང་། རྣ་ཆ་གདུབ་ཀོར་དང་། མགུལ་གདུབ་དང་། ཅོད་པན་དང་། དཔུང་རྒྱན་དང་། དབུ་རྒྱན་རྩེ་བྲན་གྱིས་གསལ་བར་བྱས་པ། འོད་ཟེར་དཀར་པོས་ཀུན་ནས་བསྐོར་བ། ལང་ཚོ་ལ་བབ་པ། སྤྱན་དཀྱུས་རིང་ཞིང་དཔྲལ་བ་ཡངས་པ། 
ཞལ་བཅུ་གཅིག་པ། རྩ་བའི་ཞལ་ཀུན་ནས་དཀར་བ། གཡས་པ་ལྗང་གུ། གཡོན་པ་དམར་བ། ཞལ་ཐམས་ཅད་ཀུན་ནས་འཛུམ་པའི་ཉམས་ཅན། དེའི་དབུས་ལྗང་གུ། གཡས་དམར་པོ། གཡོན་དཀར་པོ་དེའི་དབུས་དམར་པོ། གཡས་དཀར་པོ། གཡོན་ལྗང་
གུས་བྱེ་བྲག་རྣམས་སོ། །དེའི་སྟེང་དུ་ཞལ་རྣམ་པར་གཙིགས་ཤིང་འཇིགས་པ། ནག་པོ་མཆེ་བ་སྣང་བ། ཀུན་དུ་ཁྲོས་པ། སྤྱན་གསུམ་པ་རལ་པ་བསྒྲེང་བའོ། །དེའི་སྤྱི་བོར་བན་དུ་ཀའི་མེ་ཏོག་དང་། བྱུ་རུ་བཅག་པའི་མཚམས་ལྟར་གསལ་བ། གཙུག་ཏོར་དང་བཅས་པ། 

73-1-125a

རྒྱན་སྤངས་པ་ཚངས་པར་སྤྱོད་པའི་ཆ་ལུགས་ཅན། མགུལ་པ་དང་བཅས་པར་བྱུང་བ། ཞི་བའི་གཟིགས་པས་འཛུམ་པའོ། །ཕྱག་གཉིས་ཐུགས་ཀར་ཐལ་མོ་སྦྱར་བ། གཡས་དང་པོ་ཕྲེང་བ་འཛིན་པ། གཡོན་པ་ན་གསེར་གྱི་པདྨ་རྩ་བ་དང་བཅས་པ་འཛིན་པ། གཡས་
གསུམ་པས་ཡི་དགས་སྐོམ་པ་སེལ་བ། གཡོན་གསུམ་པས་རིལ་བ་སྤྱི་བླུགས་འཛིན་པ། གཡས་བཞི་པས་འཁོར་ལོ་འཛིན་པ། གཡོན་བཞི་པས་མདའ་དང་གཞུ་འཛིན་པ། ལྷག་མ་དགུ་བརྒྱ་དགུ་བཅུ་རྩ་གཉིས་པོ་རྣམས་ཀྱིས་མཆོག་སྦྱིན་པ་ཕྱག་པདྨའི་འདབ་མ་ལྟར་འཇམ་
པ་འདི་ལྟ་བུ་རྣམ་པར་བསམ་མོ། །དེ་ནས་རང་གི་སྙིང་གའི་པདྨ་དང་ཟླ་བ་ལ་གནས་པའི་ས་བོན་གྱི་ཡི་གེ་གནས་པ་ལས་བྱུང་བའི་འོད་ཀྱིས་བཙུན་པ་སྤྱན་རས་གཟིགས་དབང་ཕྱུག་སྤྱན་དྲངས་ཏེ། ཡང་དག་པར་མཆོད་ལ་བདག་གི་ནང་དུ་ཞུགས་པར་བསམ་མོ། །དེ་ནས་སྐུ་གསུང་
ཐུགས་ལེགས་པར་གནས་པས་དབང་བསྐུར་བའི་མཐར་ཐུག་པར་བསྒྲུབ་པོ། །དེའི་རྗེས་ལ་རང་གི་སྙིང་གར་པདྨ་དང་ཟླ་བ་ལ་གནས་པའི་ས་བོན་ཀུན་ནས་དཀར་པོ་འོད་དང་བཅས་པ་མགོ་གྱེན་དུ་འགྲེང་བ་བསམས་ཏེ། དེ་ལས་བྱུང་བའི་སྐུ་རྣམས་འཕྲོས་པས་འཁོར་ལོའི་རྣམ་པར་བྱུང་
བར་བསམ་ཞིང་བསྒོམ་མོ། །གང་གི་ཚེ་སྐྱོ་བ་ན་ས་བོན་གྱི་ཡི་གེ་ཡིད་ལ་འཛིན་པས་ནོར་བུའི་མཚམས་སུ་ཕྱག་འཚལ་བ་དང་བཅས་པའི་མངོན་དུ་གྱུར་པའི་ཚིག་སྤངས་ཏེ། ཨོཾ་དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། ཨིཊྚེ་བཊྚེ། ཙ་ལེ་ཙ་ལེ། པྲ་ཙ་ལེ་པྲ་ཙ་ལེ་ཀུ་སུ་མེ་ཀུ་སུ་མེ། བ་རེ་
ཨི་ལི་མི་ལི་ཙི་ཏི་ཛྭ་ལཾ་ཨ་པ་ན་ཡེ་སྭཱ་ཧཱ། ཞེས་བྱ་བ་འདོད་པ་བཞིན་བཟླས་སོ། །སྐྱོ་བར་གྱུར་ན་ཡེ་ཤེས་སེམས་དཔའ་མདུན་དུ་བཞུགས་པ་ལ་མཆོད་དོ། །གསོལ་བ་གདབ་པ་དང་། བཟོད་པར་གསོལ་བ་དང་། གཤེགས་པར་མཁྱེན་པར་བྱ་བའི་ཕྱིར་ཛ་ཧི་ཞེས་ལན་གསུམ་
བརྗོད་དོ། །ལངས་ནས་མཆོད་སྟོན་ལ་སོགས་པ་བྱའོ། །འདིར་གང་དག་དེ་སྙེད་ཀྱི་ཕྱག་རྒྱ་དག་དམིགས་པར་མི་ནུས་པས་ཕྱག་བརྒྱད་པའམ། ཞལ་གཅིག་ཕྱག་བཞི་པའམ། ཞལ་གཅིག་ཕྱག་གཉིས་པ་ཡང་བསམ་ཞིང་ཕྱག་གཉིས་པ་པདྨ་དང་མཆོག་སྦྱིན་པར་བལྟའོ། །

73-1-125b

སྒྲུབ་ཐབས་ཆོ་ག་བཀོད་པ་ཡིས། །དགེ་བ་གང་ཞིག་དྲི་མེད་ནི། །བདག་གིས་བསགས་དེས་འགྲོ་བ་ཀུན། །སྲིད་མཚོའི་ཕ་རོལ་འགྲོ་བར་ཤོག །འཕགས་པ་སྤྱན་རས་གཟིགས་དབང་ཕྱུག་ཞལ་བཅུ་གཅིག་པའི་སྒྲུབ་ཐབས། དགེ་སློང་མ་དཔལ་མོས་མཛད་པ་རྫོགས་སོ།།      །།རྒྱ་
གར་གྱི་མཁན་པོ་དཱི་པཾ་ཀ་ར་ཤྲཱི་ཛྙཱ་ན་དང་། ལོ་ཙཱ་བ་རིན་ཆེན་བཟང་པོས་བསྒྱུར་བའོ།།      །།༄༅༅། །རྒྱ་གར་སྐད་དུ། ཨཱརྱཱ་བ་ལོ་ཀེ་ཏེ་ཤྭ་ར་སྟོ་ཏྲ། བོད་སྐད་དུ། འཕགས་པ་སྤྱན་རས་གཟིགས་དབང་ཕྱུག་ལ་བསྟོད་པ། འཇིག་རྟེན་མགོན་པོ་ལ་ཕྱག་འཚལ་ལོ། །འཇིག་
རྟེན་བླ་མ་སྲིད་པ་གསུམ་གྱིས་བསྡོད་པ་པོ། །ལྷ་ཡི་གཙོ་བོ་བདུད་དང་ཚངས་པས་བསྟོད་པ་པོ། །ཐུབ་པའི་རྒྱལ་མཆོག་བསྟོད་པས་གྲུབ་པར་མཛད་པ་པོ། །འཇིག་རྟེན་གསུམ་གྱི་མགོན་པོ་མཆོག་ལ་ཕྱག་འཚལ་ལོ། །བདེ་གཤེགས་དཔག་མེད་སྐུ་མཆོག་སྐུ་བཟང་འཛིན་པ་པོ། །
བདེ་གཤེགས་སྣང་མཐའ་ཡས་ཀྱི་དབུ་རྒྱན་འཛིན་པ་པོ། །ཕྱག་གཡས་མཆོག་སྦྱིན་ཡི་དགས་བཀྲེས་སྐོམ་སེལ་བ་པོ། །གཡོན་པའི་ཕྱག་ནི་གསེར་གྱི་པདྨོས་བརྒྱན་པ་པོ། །དྲི་ཞིམ་རལ་པའི་ཕྲེང་བ་དམར་སེར་འཁྱུག་པ་པོ། །ཞལ་རས་རྒྱས་པ་ཟླ་བ་ལྟ་བུར་མཛེས་པ་པོ། །སྤྱན་
གྱི་པདྨོ་མཆོག་ཏུ་བཟང་ཞིང་ཡངས་པ་པོ། །ཁ་བ་དུང་ལྟར་རྣམ་དཀར་དྲི་ངད་ལྡང་བ་པོ། །དྲི་མེད་འོད་ཆགས་མུ་ཏིག་ཚོམ་བུ་འཛིན་པ་པོ། །མཛེས་པའི་འོད་ཟེར་སྐྱ་རེངས་དམར་པོས་བརྒྱན་པ་པོ། །པདྨའི་མཚོ་ལྟར་ཕྱག་ནི་དངར་བར་བྱས་པ་པོ། །སྟོན་ཀའི་སྤྲིན་གྱི་མདོག་དང་
ལྡན་ཞིང་གཞོན་པ་པོ། །རིན་ཆེན་མང་པོས་དཔུང་པ་གཉིས་ནི་བརྒྱན་པ་པོ། །ལོ་མའི་མཆོག་ལྟར་ཕྱག་མཐིལ་གཞོན་ཞིང་འཇམ་པ་པོ། །རི་དགས་པགས་པས་ནུ་མ་གཡོན་པ་བཀབ་པ་པོ། །སྙན་ཆ་གདུ་བུས་སྒེག་ཅིང་རྒྱན་རྣམས་འཆང་བ་པོ། །དྲི་མ་མེད་པའི་པདྨོའི་མཆོག་ལ་གནས་
པ་པོ། །ལྟེ་བའི་ངོས་ནི་པདྨའི་འདབ་ལྟར་འཇམ་པ་པོ། །གསེར་གྱི་རྐང་གདུབ་སྒྲ་ཡིས་ཞབས་ཡིད་འོང་བ་པོ། །གསེར་གྱི་སྐ་རགས་མཆོག་ལ་ནོར་བུས་སྤྲས་པ་པོ། །སྟ་ཟུར་དཀྲིས་པའི་རས་བཟང་ཤམ་ཐབས་འཛིན་པ་པོ། །ཐུབ་པའི་མཁྱེན་མཆོག་མཚོ་ཆེན་ཕ་རོལ་ཕྱིན་

73-1-126a

པ་པོ། །མཆོག་བརྙེས་བསོད་ནམས་མང་པོ་ཉེ་བར་བསགས་པ་པོ། །རྟག་ཏུ་བདེ་བའི་འབྱུང་གནས་རྒ་ནད་སེལ་བ་པོ། །གསུམ་ཐར་མཛད་ཅིང་མཁས་སྤྱོད་སྤྱོད་པ་སྟོན་པ་པོ། །ལུས་ཅན་མཆོག་སྟེ་བདུད་དཔུང་འཁྲུགས་ལས་རྒྱལ་བ་པོ། །ཚངས་པའི་གནས་པ་བཞི་
ཡིས་དབེན་པར་མཛད་པ་པོ། །ངང་པའི་འགྲོས་དང་གླང་ཆེན་དྲེགས་འདྲར་གཤེགས་པ་པོ། །ཚོགས་ཀུན་ཉེ་བར་བསགས་ནས་ཆོས་ཀུན་སྟོན་པ་པོ། །སྡུག་བསྔལ་མཚོ་དང་ཉོན་མོངས་མཚོ་ལས་སྒྲོལ་བ་པོ། །གང་ཞིག་རྟག་ཏུ་ཐོ་རངས་ལངས་ནས་གུས་པ་ཡིས། །སྤྱན་རས་
གཟིགས་ཀྱི་དབང་པོ་ཡིད་ལ་སེམས་བྱེད་ཅིང་། །བསྟོད་པའི་མཆོག་འདི་དག་ཅིང་གསལ་བར་འདོན་བྱེད་ན། །དེ་ནི་སྐྱེས་པའམ་ཡང་ན་བུད་མེད་ཡིན་ཡང་རུང་། །སྐྱེ་བ་འདི་དང་མ་འོངས་སྐྱེ་བ་ཐམས་ཅད་དུ། །འཇིག་རྟེན་འཇིག་རྟེན་ལས་འདས་དགོས་པ་ཀུན་འགྲུབ་འགྱུར། །
འཕགས་པ་སྤྱན་རས་གཟིགས་དབང་ཕྱུག་ལ་བསྟོད་པ། དགེ་སློང་མ་དཔལ་མོས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། ཨཱརྱཱ་བ་ལོ་ཀི་ཏེ་ཤྭ་ར་སྟོ་ཏྲ། བོད་སྐད་དུ། འཕགས་པ་སྤྱན་རས་གཟིགས་དབང་ཕྱུག་གི་བསྟོད་པ། རྗེ་བཙུན་ཐུགས་རྗེ་
ཆེན་པོ་ལ་ཕྱག་འཚལ་ལོ། །སྤྱན་རས་གཟིགས་དབང་འཇིག་རྟེན་མགོན། །འཁོར་བའི་འདམ་གྱིས་མ་གོས་པས། །པདྨ་ཟླ་བའི་གདན་དང་ལྡན། །ཐུགས་རྗེ་ཆེ་ལ་ཕྱག་འཚལ་ལོ། །སྐྱོན་གྱིས་མ་གོས་སྐུ་མདོག་དཀར། །རྫོགས་སངས་རྒྱས་ཀྱི་དབུ་རྒྱན་ཅན། །ཐུགས་རྗེའི་
སྤྱན་གྱིས་འགྲོ་ལ་གཟིགས། །སྤྱན་རས་གཟིགས་ལ་ཕྱག་འཚལ་ལོ། །སངས་རྒྱས་བྱེ་བྲག་བཅུ་གཅིག་ཞལ། །རྩ་བའི་ཞལ་ནི་དཀར་པོ་མཛེས། །ལྗང་དང་དམར་པོ་གཡས་དང་གཡོན། །ཞི་བའི་ཞལ་ལ་ཕྱག་འཚལ་ལོ། །དབུས་ལྗང་གཡས་དཀར་གཡོན་དམར་ཞལ། །
དབུས་དམར་གཡས་ལྗང་གཡོན་དཀར་ཞལ། །སྤྱན་དཀྱུས་རིང་ཞིང་ཞལ་ཕྲ་བ། །འཛུམ་བཅས་བཞུགས་ལ་ཕྱག་འཚལ་ལོ། །ཁྲོ་ཞལ་ནག་པོ་སྤྱན་གསུམ་པ། །མཆེ་གཙིགས་སྐྲ་བརྫེས་སྨ་ར་སེར། །སྟེང་ཞལ་དམར་པོ་གཙུག་ཏོར་ལྡན། །བཅུ་གཅིག་ཞལ་ལ་ཕྱག་

73-1-126b

འཚལ་ལོ། །ཆོས་ཉིད་ཐུགས་ཆུད་ཐུགས་ཀར་ཐལ་མོ་སྦྱར། །ཐུགས་རྗེ་རྒྱུན་ཆད་མེད་པས་ཕྲེང་བ་འཛིན། །ཡི་དགས་བཀྲེས་སྐོམ་སེལ་བའི་མཆོག་སྦྱིན་ཕྱག །ཕྱག་གཡས་འཁོར་ལོ་བསྣམས་ལ་ཕྱག་འཚལ་ལོ། །འཁོར་བའི་འདམ་གྱིས་མ་གོས་པདྨ་བསྣམས། །རིལ་པ་སྤྱི་
བླུགས་ཉོན་མོངས་དྲི་མ་འཁྲུ། །ཐབས་དང་ཤེས་རབ་གཉིས་མེད་མདའ་གཞུ་བསྣམས། །རྣམ་ཐར་བརྒྱད་ལྡན་ཁྱེད་ལ་ཕྱག་འཚལ་ལོ། །རིན་ཆེན་རྒྱན་མངའ་ཀུན་ནས་མུན་སེལ་ཞིང་། །སྐུ་མདོག་དཀར་གསལ་རི་དགས་པགས་པ་འཛིན། །གཞོན་ནུ་ལང་ཚོ་ལྡན་པའི་འཛུམ་བཅས་
ཞལ། །འགྲོ་བའི་སྡུག་བསྔལ་སེལ་ལ་ཕྱག་འཚལ་ལོ། །བཅོམ་ལྡན་བལྟ་བས་མི་ངོམས་སྣ་ཚོགས་སྐུ། །ཐུགས་རྗེ་མཐར་ཕྱིན་ཕྱག་སྟོང་འགྲོ་རྣམས་སྐྱོབ། །ཤེས་རབ་མཐར་ཕྱིན་དྲི་མེད་སྤྱན་སྟོང་གཟིགས། །འཇིགས་པ་ཀུན་ལས་སྐྱོབ་ལ་སྐྱབས་སུ་མཆི། །ཐུགས་རྗེ་བསིལ་
མཛད་ཟླ་བ་དྲི་མ་མེད། །ཞལ་གཅིག་ཕྱག་བཞི་སྐུ་མདོག་ཟླ་བའི་འོད། །སྐྱབས་སྦྱིན་རྔ་ཡབ་པདྨ་ཆུ་ཤེལ་འཛིན། །མེ་ཡི་འཇིགས་པ་སྐྱོབ་ལ་སྐྱབས་སུ་མཆི། །སེམས་ཅན་རེ་སྐོང་ཡིད་བཞིན་འཁོར་ལོས་སྒྱུར། །ཞལ་གཅིག་ཕྱག་བཞི་སྐུ་མདོག་གངས་རིའི་མདོག །
སྐྱབས་སྦྱིན་རིན་ཆེན་པདྨ་འཁོར་ལོ་འཛིན། །ཆུ་ཡི་འཇིགས་པ་སྐྱོབ་ལ་སྐྱབས་སུ་མཆི། །ཡོན་ཏན་རབ་རྒྱས་ནོར་བུ་འཛིན་པ་པོ། །ཞལ་གཅིག་ཕྱག་གཞི་སྐུ་མདོག་གསེར་དང་མཚུངས། །སྐྱབས་སྦྱིན་ནོར་བུ་པདྨ་པུསྟི་འཛིན། །སེང་གེའི་འཇིགས་པ་སྐྱོབ་ལ་སྐྱབས་སུ་མཆི། །འགྲོ་
རྣམས་སྨིན་མཛད་ཉི་མ་རབ་ཏུ་སྣང་། །ཞལ་གཅིག་ཕྱག་བཞི་སྐུ་མདོག་བཙོ་མ་འདྲ། །སྐྱབས་སྦྱིན་ཨུཏྤལ་པདྨ་མེ་ཤེལ་འཛིན། །གླང་པོའི་འཇིགས་པ་སྐྱོབ་ལ་སྐྱབས་སུ་མཆི། །སེམས་ཅན་ཡོངས་སྒྲོལ་ཐུགས་རྗེ་དོན་ཡོད་ཞགས། །ཞལ་གཅིག་ཕྱག་བཞི་པདྨ་རཱ་གའི་མདོག །སྐྱབས་
སྦྱིན་ལྕགས་ཀྱུ་པདྨ་ཞགས་པ་འཛིན། །རྒྱལ་པོའི་འཇིགས་པ་སྐྱོབ་ལ་སྐྱབས་སུ་མཆི། །དབང་སྡུད་ཆེན་པོ་ཆུ་སྲིན་འཛིན་ཁྲི་དཔལ། །ཞལ་གཅིག་ཕྱག་བཞི་ཀུ་ཤའི་མདོག་འདྲ་བའི། །སྐྱབས་སྦྱིན་རྒྱལ་མཚན་པདྨ་གཎྜཱི་འཛིན། །ཀླུ་ཡི་འཇིགས་པ་སྐྱོབ་ལ་སྐྱབས་སུ་མཆི། །དུག་

73-1-127a

གསུམ་འཇོམས་མཛད་ཧ་ལ་ཧ་ལ་ཆེ། །ཞལ་གཅིག་ཕྱག་བཞི་བཻ་ཌཱུརྱ་འདྲ་བ། །སྐྱབས་སྦྱིན་རྩེ་གསུམ་པདྨ་བ་དན་འཛིན། །མཁའ་འགྲོའི་འཇིགས་པ་སྐྱོབ་ལ་སྐྱབས་སུ་མཆི། །དངོས་པོའི་སྟོབས་འཇོམས་མཐུ་ཆེན་རབ་ཐོབ་པ། །ཞལ་གཅིག་ཕྱག་བཞི་ཨིནྡྲ་ནཱི་ལའི་
མདོག །སྐྱབས་སྦྱིན་རྡོ་རྗེ་པདྨ་དྲིལ་དུ་འཛིན། །མི་རྒོད་འཇིགས་པ་འཇོམས་ལ་སྐྱབས་སུ་མཆི། །མེ་ཆུ་སེང་གེ་གླང་ཆེན་ལྕགས་སྒྲོག་སྦྲུལ། །མཁའ་འགྲོ་མི་རྒོད་འཇིགས་པ་བརྒྱད་ལས་ནི། །གང་ལ་གང་འདུལ་ཕྲིན་ལས་རྣམ་པ་བཞིས། །སྨིན་མཛད་སྤྱན་རས་གཟིགས་
ལ་སྐྱབས་སུ་མཆི། །གཙོ་བོ་འཇིགས་པ་ཀུན་ལས་སྐྱོབ་མཛད་ཅིང་། །སྤྲུལ་པའི་འཁོར་གྱི་གདུལ་བྱའི་སྣང་བ་ལ། །ཞི་བ་རྒྱས་པ་དབང་དང་དྲག་ཚུལ་དུ། །སྐྱོབ་མཛད་སྤྱན་རས་གཟིགས་ལ་སྐྱབས་སུ་མཆི། །ཡོན་ཏན་རབ་རྒྱས་རྒྱན་རྣམས་ཀུན་གྱིས་བརྒྱན། །བྱམས་པའི་
ན་བཟའ་ཐུགས་རྗེའི་འོད་ཟེར་འཕྲོ། །བྱང་ཆུབ་སེམས་ཀྱི་དཔའ་རྟགས་སྟག་ལྤགས་ཅན། །འཇིགས་གཟུགས་སྤྱན་རས་གཟིགས་ལ་སྐྱབས་སུ་མཆི། །མགོན་པོ་ཁྱོད་ཀྱི་ཡོན་ཏན་བརྗོད་པས་ནི། །གང་གཱའི་ཀླུང་གི་བྱེ་སྙེད་སངས་རྒྱས་ལ། །དེ་སྙེད་ཕྱག་དང་མཆོད་བྱས་གྱུར་
པ་ཡི། །དོན་ལྡན་སྤྱན་རས་གཟིགས་ལ་སྐྱབས་སུ་མཆི། །འཕགས་པ་སྤྱན་རས་གཟིགས་དབང་ཕྱུག་གི་བསྟོད་པ། དགེ་སློང་མ་དཔལ་མོས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། བྷཊྚཱ་རཱ་ཀ་མ་ཧཱ་ཀཱ་རུ་ཎི་ཀ་སྟོ་ཏྲ། བོད་སྐད་དུ། རྗེ་བཙུན་ཐུགས་རྗེ་ཆེན་པོ་ལ་བསྟོད་པ། ཐུགས་རྗེ་
ཆེན་པོ་ལ་ཕྱག་འཚལ་ལོ། །སྤྱན་རས་གཟིགས་དབང་ཐུགས་རྗེ་ཅན། །སྐྱོན་གྱིས་མ་གོས་སྐུ་མདོག་དཀར། །རྫོགས་སངས་རྒྱས་ཀྱི་དབུ་རྒྱན་ཅན། །ཐུགས་རྗེའི་སྤྱན་གྱིས་འགྲོ་ལ་གཟིགས། །སྤྱན་རས་གཟིགས་ལ་ཕྱག་འཚལ་ལོ། །ཐུགས་རྗེ་དང་ནི་ཤེས་རབ་གཉིས། །མཉམ་པར་སྦྱོར་བའི་ཐུགས་
མངའ་ཞིང་། །ཕྱག་གཉིས་ཐུགས་ཀར་མཉམ་སྦྱར་བ། །དཔལ་ལྡན་མཉམ་སྦྱོར་ལ་ཕྱག་འཚལ། །སངས་རྒྱས་ཀུན་གྱི་སྙིང་པོ་གཙོ། །གསང་སྔགས་རྒྱལ་པོའི་བགྲང་ཕྲེང་མཆོག །མུ་ཏིག་ལྟར་དཀར་གཡས་ན་འཛིན། །རིག་སྔགས་འཆང་ལ་ཕྱག་འཚལ་ལོ། །འཁོར་བའི་འདམ་

73-1-127b

གྱིས་མ་གོས་པས། །དག་པའི་ཤེལ་ལྟར་འོད་གསལ་བ། །པདྨ་དཀར་པོ་གཡོན་ན་འཛིན། །ཕྱག་ན་པདྨ་ཕྱག་འཚལ་ལོ། །ཆོས་དབྱིངས་རྣམ་དག་དྲི་མ་དག །ཟླ་བའི་འོད་ལྟར་རྒྱལ་བའི་ཡུམ། །གཟུགས་ཀྱི་ལྷ་མོ་ཡིད་འོང་སྐུ། །ཡིག་དྲུག་མ་ལ་ཕྱག་འཚལ་ལོ། མཐའ་ཡས་འོད་ལྡན་
གསེར་མདོག་ཅན། ཡིད་གཞེན་ནོར་བུ་ཆེན་པོ་ལྟར། །སེམས་ཅན་རེ་འདོད་སྐོང་མཛད་པ། །ནོར་བུ་འཛིན་ལ་ཕྱག་འཆལ་ལོ། །རང་བཞིན་མི་དམིགས་སྟོང་པའི་ངང་། །བུད་མེད་གཟུགས་ཀྱིས་འགྲོ་བ་འདུལ། །གསང་སྔགས་ངོ་བོ་ཤེས་རབ་བསྐྱེད། །རིག་སྔགས་ཆེ་ལ་ཕྱག་འཚལ་
ལོ། །རྗེས་བཙུན་ཐུགས་རྗེ་ཆེན་པོ་ལ་བསྟོད་པ་དགེ་སློང་མ་དཔལ་མོས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། ཨཥྚོཏྟ་རཱ་ས་ཏ་ཨཱརྱཱ་བ་ལོ་ཀི་ཏེ་ཤྭ་ར་སཱ་དྷ་ནཾ། བོད་སྐད་དུ། འཕགས་པ་སྤྱན་རས་གཟིགས་དབང་ཕྱུག་གི་སྒྲུབ་ཐབས་བརྒྱ་རྩ་བརྒྱད་པ། 
རྗེ་བཙུན་ཐུགས་རྗེ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །གང་གིས་ཚོགས་གཉིས་རབ་བསགས་པས། །དེ་ཉིད་ཟབ་མོ་མངོན་གཟིགས་ཏེ། །བརྩེ་བས་འགྲོ་ལ་སྣ་ཚོགས་ཐབས། །སྟོན་མཛད་འཇིག་རྟེན་གསུམ་མགོན་འདུད། །སྟོང་ཉིད་སྙིང་རྗེ་ལས་བྱུང་
བ། །རྣམ་ལྔ་བྱང་ཆུབ་ཆེ་བདག་ཉིད། །སྐུ་གསུང་ཐུགས་ཀྱི་ཐུགས་དག་པ། །འཇིག་རྟེན་མགོན་པོ་མཁས་པས་སྒྲུབ། །པདྨོ་ཟླ་དབུས་གཞོན་ནུའི་སྐུ། །སྐྱིལ་ཀྲུང་ཕྱེད་བརྐྱང་འགྱིང་བག་བརྟན། །ཟླ་བ་རྒྱས་པའི་ཞལ་མཛེས་ལས། །ས་གསུམ་བདག་གིར་མཛད་གཟིགས་པའོ། །
མཆོག་སྦྱིན་པདྨོའི་གཡས་དང་གཡོན། །རྒྱལ་བའི་ཅོད་པན་རིན་ཆེན་བརྒྱན། །འོད་དཔག་མེད་ཀྱིས་སྤྱི་གཙུག་མཛེས། །དེ་ཡི་ཐུགས་ནི་པདྨར་རྒྱས། །ཧྲཱིཿཡིག་རང་སེམས་འོད་གསལ་བ། །ས་གསུམ་སྦྱོང་མཛད་ཡི་གེ་བཞི། །འཁོར་ལོ་རྣམ་གསུམ་དམ་ཚིག་བཞི། །སྒྱུ་མ་
བྲག་ཅ་མཁའ་འདྲའོ། །ཐུགས་རྗེ་ཆེན་པོ་ཁཪྶ་པཱ་ཎའི་སྒྲུབ་ཐབས་ཚིགས་སུ་བཅད་པ་བཞི་པ་རྫོགས་སོ།།      །།༄༅། །ཐུགས་རྗེ་ཆེན་པོ་ལ་ཕྱག་འཚལ་ལོ། །སྲིད་གསུམ་གཙོ་བོ་ཞི་བའི་ལྷ། །ཐུགས་རྗེས་མི་བསྙེལ་ཤེས་རབ་ཀྱིས། །ཆགས་བྲལ་འཇིག་རྟེན་དབང་

73-1-128a

ཕྱུག་གི། །ཞབས་ཀྱི་པདྨོར་སྤྱི་བོས་འདུད། །གསུམ་ལ་སྐྱབས་སོང་སེམས་བསྐྱེད་པས། །བྱམས་སོགས་ཚད་མེད་ལེགས་སྦྱངས་ཤིང་། །བརྩེ་ཆེན་ཡེ་ཤེས་སྙིང་གི་མེས། །ལུས་ཅན་སྒྲིབ་པའི་བུད་ཤིང་བསྲེག །རྣམ་ལྔ་བྱང་ཆུབ་ལས་འཁྲུངས་སྐུ། །གཞོན་ནུ་
དཀར་མཛེས་ཕུན་ཚོགས་ཚུལ། །མཆོག་སྦྱིན་པདྨོ་གཡས་དང་གཡོན། །འོད་དཔག་མེད་པའི་དབུ་བརྒྱན་བསྒོམ། །དེ་སྙིང་པདྨ་འདབ་བཞིས་ཏེ། །ལྟེ་བར་རང་སེམས་ཧཱུཾ་ཡིག་ནི། །ཨོཾ་དང་ཨཱཿདང་ཧྲཱིཿཧཱུཾ་བཞིས། །བསྐོར་བའི་དག་གིས་ས་གསུམ་སྦྱང་། །མེ་ལོང་གཟུགས་
དང་བྲག་ཅའི་སྒྲ། །མཁའ་འདྲ་དག་དང་དྲི་མེད་དང་། །ཡེ་ཤེས་ཕྲིན་ལས་སྦྱར་བ་ཡི། །སེམས་འདི་ལྷ་ཡི་བདག་ཉིད་འགྱུར། །རྗེ་འཇིག་རྟེན་དབང་ཕྱུག་གི་སྒྲུབ་ཐབས་རྫོགས་སོ།།      །།༄༅། །ཐུགས་རྗེ་ཆེན་པོ་ཡེ་ཤེས་སེམས་དཔའ་ལ་ཕྱག་འཚལ་ལོ། །རྣལ་འབྱོར་དབང་
ཕྱུག་བྱམས་པ་དང་། །སྙིང་རྗེ་དགའ་བ་བཏང་སྙོམས་ལས། །བྱུང་བའི་བྱང་ཆུབ་སེམས་ཀྱི་བདག །འཇིག་རྟེན་མགོན་པོ་ལ་ཕྱག་འཚལ། །དེ་ཞབས་པདྨོ་ལ་རེག་པས། །འཇིག་རྟེན་སྡུག་བསྔལ་བསྒྲལ་བའི་ཕྱིར། །ཇི་བཞིན་ཇི་ལྟར་སྒྲུབ་པའི་ཐབས། །མདོར་བསྡུས་བདག་གིས་
བསྟན་པར་བྱ། །མཁའ་ལྟར་དྲི་མེད་སྟོང་ཉིད་དབྱིངས། །དབང་པོའི་གཞུ་ལྟར་གསལ་བའི་དངོས། །པདྨོ་ཟླ་བ་རྒྱས་ལ་གསུང་ཐུགས་འོད་འཕྲོ་སྒྱུ་མའི་རྣམ་ཐར་སྤྲུལ་པའི་སྐུ། །རབ་མཛེས་སྐུ་ནི་གཟི་བརྗིད་བརྟན་མཛེས་འབར་བའི་འོད་ཟེར་དཀར་འཁྲིགས་པ། །སྐྱིལ་ཀྲུང་ཕྱེད་བརྐྱང་དུལ་
བའི་ཕྱག་གཡས་མཆོག་སྦྱིན་པདྨོ་གཡོན་གྱི་ཕྱག །པདྨོ་སྡོང་མཛེས་དྲི་མེད་འདབ་རྒྱས་གཞོན་ནུ་སྒེག་མོའི་ཐུགས་ཀར་འཛིན། །ཤེལ་ལྟར་དྲི་མེད་ཨུཏྤལ་སྤྱན་རིང་ཀུན་ནས་ཡིད་འཕྲོག་འོད་འབར་ཞལ། །བརྟན་པོ་དཀར་གསལ་ཟླ་རྒྱས་སྟོང་ལྷག་རལ་པའི་ཅོད་པན་ཐུབ་པའི་གདན། །
འབར་བའི་རིན་ཆེན་དྲི་མེད་སྣ་ཚོགས་ཤིན་ཏུ་འོད་སྦྱངས་ལེགས་སྤྲས་མཛེས། །མཁའ་ལ་ཉི་ལྟར་ལྷམ་མེ་ལྷང་ངེ་ནམ་མཁའི་མཐའ་གཏུགས་འོད་འགྱེད་པ། །དཔེ་བྱད་མཚན་རྫོགས་གཅིག་པུ་སྐྱོབ་པ་སྐྱབས་ཀྱི་དམ་པ་བླ་མེད་ནི། །ཤིན་ཏུ་རྟོགས་དཀའ་དེ་ཉིད་བཞིར་གྱུར་སྙིང་གི་

73-1-128b

པད་འདབ་ཧྲཱིཿཡིག་གིས། །གང་བའི་ཕྱོགས་རྣམས་དེ་བཞིན་དེ་གཟུགས་ཨོཾ་དང་ཨཱཿདང་ཧྲཱིཿཧཱུཾ་བསམ། །དཀར་སོགས་ཁ་དོག་དག་གི་ཕྲེང་བ་ཡིད་ནི་ཡེ་ཤེས་ཡིག་འབྲུའི་དངོས། །བརྩེ་བའི་རླུང་བསྐྱོད་ཡེ་ཤེས་མེ་འབར་འགྲོ་བའི་སྡིག་ཚོགས་བུད་ཤིང་བསྲེག །ཞི་བའི་ངང་ལ་
གཉིས་མེད་མི་དམིགས་མཁའ་ལྟར་སྤྲོས་བྲལ་རོ་གཅིག་རོ། །བདེ་ཆེན་འབྱུང་གནས་ཡེ་ཤེས་དྲི་མེད་མཉམ་གཞག་ཆེན་པོར་བསྒོམ་པར་བྱ། །དེ་རྗེས་མཆོད་སོགས་དག་པའི་ཡན་ལག་ཆོ་ག་ཇི་བཞིན་ཡེ་ཤེས་སེམས་དཔའ་ལེགས་བཅུག་སྟེ། །རྣམ་གསུམ་འཁོར་བ་དཀར་དམར་སྔོ་ཚུལ་
གོ་རིམས་ཇི་བཞིན་སྐུ་གསུང་ཐུགས། །མཐོ་རིས་སྟེང་ངན་འགྲོའི་སར་གནས་སྐྱེ་དགུའི་སྙིང་རབ་སིམ་བྱེད་པས། །བརྟན་གཡོའི་མཚན་ཉིད་དམ་པའི་ཞལ་བཞིན་མཁས་པས་རབ་ཏུ་ཤེས་པར་བྱ། །ཐུགས་རྗེ་ཆེན་པོ་ཡེ་ཤེས་སེམས་དཔའི་སྒྲུབ་ཐབས་རྫོགས་སོ།།      །།
༄༅། །འཕགས་པ་སྤྱན་རས་གཟིགས་འཁོར་ལོ་གསུམ་ལ་ཕྱག་འཚལ་ལོ། །ས་བླ་དང་ནི་ས་སྟེངས་ས་འོག་དུད་འགྲོ་ལ་སོགས་སྦྱོང་བ་ཡི། །འཁོར་ལོ་དྲི་མེད་དཀར་དང་དམར་པོ་རྣམ་པར་སྔོ། །སྤྱི་བོ་སྙིང་ག་ལྟེ་བའི་དབུས་བཞུགས་ཟླ་བ་དང་། །པདྨོ་ཉི་མ་ཧཾ་དང་ཧཱུཾ་དང་ཨཱཿས་མཚན་
པའོ། །དེ་ལ་སྤྱི་བོ་བདེ་བ་ཆེན་པོའི་བདག་ཉིད་ཀྱི་རྩིབས་སུམ་ཅུ་རྩ་གཉིས་པའི་འཁོར་ལོ་ཟླ་བའི་ཁ་དོག་ཅན་ནོ། །དེའི་སྙིང་པོ་ལ་ནི་གསལ་ཕྱེད་དམར་པོས་བརྒྱན་ཏོ། །སྙིང་གར་ནི་ཆོས་ཀྱི་བདག་ཉིད་ཀྱི་འདབ་མ་བཅུ་དྲུག་པའི་པདྨ་འབུར་པ་བྱི་རུའི་ཁ་དོག་ཅན་ནོ། །དེའི་སྙིང་པོ་ལ་ནི་
དབྱངས་ཡིག་དཀར་པོས་བརྒྱན་ཏོ། །ལྟེ་བར་ནི་སྤྲུལ་པའི་བདག་ཉིད་ཀྱི་རྩིབས་དྲུག་ཅུ་རྩ་བཞི་རལ་གྲིའི་ཁ་དོག་ཅན་ནོ། །དེའི་སྙིང་པོ་ལ་ནི་འབེབ་སྔོན་པོས་བརྒྱན་ཏོ།  །གསུམ་ཀའི་སྲོག་ཤིང་ནི་རྩ་མཆོག་གོ། །ལྕགས་ཀྱུ་ཞེས་བྱ་བའི་རླུང་གིས་བསྐོར་བར་བྱའོ། །འོག་
མས་ནི་སྡུད་པར་བྱའོ། །ཐོག་མས་ནི་དབབ་པར་བྱའོ། །བར་མས་ནི་བསྲེ་བར་བྱའོ། །ཐམས་ཅད་ལས་ནི་ཡེ་ཤེས་རང་བྱུང་ངོ་། །འཛག་པ་ལ་སོགས་པའི་རིམ་པ་ཡང་ཕྲེང་བའི་འཁོར་ལོ་ལའོ། །རབ་ཏུ་གསལ་བ་དང་བདེ་བ་ཆེན་པོ་དང་རྣམ་པར་མི་རྟོག་པ་འབྱུང་བར་

73-1-129a

འགྱུར་རོ་ཞེས་བྱ་བའི་དོན་ཏོ། །རྩ་དང་རླུང་དང་ཐིག་ལེ་ཉིད་སྦྱོར་བར་བཤད་དོ། །ཕ་དང་མ་དང་བདེ་བར་གཤེགས་པའི་སྙིང་པོའི་ས་བོན་ནོ། །ཐོག་མ་དང་ཐ་མ་དང་བར་རོ། །སྐུ་གསུང་ཐུགས་རྣམ་པར་སྦྱོང་བ་ཉིད་དོ། །འདུས་བྱས་འདུས་མ་བྱས་གཉིས་མེད། །
ཟབ་མོ་མངོན་པར་འབྱུང་བའི་ལམ། །རྟོག་པའི་རྒྱལ་པོ་ལས་བསྡུས་པ། །རྣལ་འབྱོར་ལ་ཕན་བྱེད་པ་ཡིན། །སྤྱན་རས་གཟིགས་འཁོར་ལོ་གསུམ་བསྒོམ་པ་རྫོགས་སོ།།      །།ཐུགས་རྗེ་ཆེན་པོ་རྒྱལ་བ་ལྔ་ལ་ཕྱག་འཚལ་ལོ། །ཤིན་ཏུ་རྣམ་དག་དང་བའི་མཚོར། །རབ་མཛེས་སྡོང་
བུ་ལྔ་ལྡན་སྟེང་། །རྣམ་སྣང་རྡོ་རྗེ་སེམས་དཔའ་དང་། །རིན་འབྱུང་འོད་དཔག་མེད་དོན་གྲུབ། །ལྔ་རིག་རྣམ་དག་སྣ་ཚོགས་གཟུགས། །དངོས་གཅིག་རྒྱལ་བ་ལྔ་ལ་འདུད། །བྱང་ཆུབ་སེམས་དཔའི་སྤྱོད་པ་ཁྱད་པར་ཅན་ལ་གནས་པས་སྙིང་རྗེ་ཆེན་པོ་མདུན་དུ་བྱས་ལ། ཐོག་མ་
ཁོ་ནར་ཆོས་ཐམས་ཅད་སྟོང་པ་ཉིད་དུ་རབ་ཏུ་བསྒོམ་པར་བྱའོ། །གདོད་ནས་མ་སྐྱེས་འོད་གསལ་བ། །གང་ཤར་ཉིད་ན་ངོ་བོ་མེད། །ཆོས་རྣམས་ཀུན་གྱི་མཚན་ཉིད་དེ། །བླ་མའི་དྲིན་གྱིས་རྟོགས་པར་འགྱུར། །གང་འདི་ལྟར་ངོ་བོ་མེད་པའི་ཆོས་འདི་དག་ནི་ཟབ་པའི་ཕྱིར་རྟོགས་
དཀའ་བས་མི་ཤེས་པའི་འགྲོ་བ་ལྔ་པོ་ནི་ངེས་པར་སྡུག་བསྔལ་བའོ་ཞེས་བརྟགས་ནས་དམིགས་པ་མེད་པའི་ཐུགས་རྗེ་ཆེན་པོས་རླུང་གི་དཀྱིལ་འཁོར་མངོན་པར་བསྐྱོད་པས། སྐྱེ་བོ་ཉོན་མོངས་སྒྲིབ་ཚོགས་སྤྲིན་གྱི་ཕུང་པོ་ཤིན་ཏུ་མཐུག་པོ་གཏིབས་གྱུར་ལ། །ཚམ་
ཚོམ་མེད་པར་དྲག་པའི་ཤུགས་ཀྱིས་ཀུན་དུ་རབ་ཏུ་དྲལ་ཞིང་ཡོངས་སུ་གཏོར། །དེ་ཡི་ཐབས་གྱུར་ཐུགས་རྗེའི་དབྱིངས་ཀྱི་སྣ་ཚོགས་མཛད་པས་དབྱེར་མེད་ཅིག་ཅར་བསྒྲུབ་པ་ཡི། །མགོན་པོ་དམ་པ་རིགས་ཀྱི་ལྷ་ལྔ་བསྒྲུབ་ཅིང་སྟོབས་ལྔ་སོགས། །དེ་ལ་དབུས་
སོགས་སྡོང་འདབ་བཅས། །ཟླ་བའི་འཁོར་ལོ་གསལ་བ་ལ། །མེ་ལོང་གཟུགས་ལྟར་འབྲུ་ལྔ་བསམ། །ཕྲིན་ལས་ལ་སྦྱར་སྐུར་བསྐྱེད་དོ། །རྣམ་པར་སྣང་མཛད་ནི་ཁ་བའི་མདོག་ཅན་ཇི་སྐད་འབྱུང་བའི་ཕྱག་རྒྱ་ཅན་ཧྲཱིཿའི་སྙིང་པོ་ཅན་འཁོར་ལོས་མཚན་

73-1-129b

པའོ། །རྡོ་རྗེ་སེམས་དཔའ་ནི་ནམ་མཁའི་མདོག་ཅན་ཇི་སྐད་འབྱུང་བའི་ཕྱག་རྒྱ་ཅན་ཧཱུཾ་གི་སྙིང་པོ་ཅན་རྡོ་རྗེས་མཚན་པའོ། །རིན་ཆེན་འབྱུང་ལྡན་ནི་གསེར་བཙོ་མའི་མདོག་ཅན་ཇི་སྐད་འབྱུང་བའི་ཕྱག་རྒྱ་ཅན་ཏྲཱཾ་གི་སྙིང་པོ་ཅན་རིན་པོ་ཆེས་མཚན་པའོ། །འོད་དཔག་མེད་ནི་མེ་ལྕེ་འབར་བའི་
མདོག་ཅན་ཇི་སྐད་འབྱུང་བའི་ཕྱག་རྒྱ་ཅན་ཧྲཱིཿའི་སྙིང་པོ་ཅན་པདྨོས་མཚན་པའོ། །དོན་ཡོད་གྲུབ་པ་སཱ་ལུ་ལྗང་བའི་མདོག་ཅན་ཇི་སྐད་འབྱུང་བའི་ཕྱག་རྒྱ་ཅན་ཨཿའི་སྙིང་པོ་ཅན་རལ་གྲིས་མཚན་པའོ། །འདི་དག་དབུས་བཅས་ཕྱོགས་རྣམས་སུ། །རིམ་བཞིན་ལས་ལྔ་མཛད་པ་ལ། །
བརྩོན་པས་ཏིང་ངེ་འཛིན་བཞེངས་པ། །བདག་སྦྱང་བ་དང་གཞན་སྦྱང་བ་གཉིས། ཨོཾ་ཨཱ་སྭ་པཱ་རཱརྠ་ཛྙཱ་ན་སྭ་བྷཱ་བ་ཤུདྡྷ་པྲ་ཀཱ་སྭཱ་ཧཱ། འཁོར་ལོ་ལྟ་བུའི་སྔགས་སོ། །ཐུགས་རྗེ་ཆེན་པོ་ལྷ་ལྔའི་སྒྲུབ་ཐབས་རྫོགས་སོ།།      །།༄༅། །འཕགས་པ་སྤྱན་རས་གཟིགས་དབང་
ཕྱུག་སྟོང་ཉིད་ཚད་མེད་བཞིའི་བདག་ཉིད་ལ་ཕྱག་འཚལ་ལོ། །རྣམ་ལྔ་མངོན་པར་བྱང་ཆུབ་རིམ། །ཚངས་པའི་གནས་པས་ལེགས་པར་གནས། །རྣམ་དག་སྟོང་པ་ཉིད་དག་ལ། །རྒྱལ་བ་ལྔ་ནི་བསྒོམ་པར་བྱ། །བཅུ་དྲུག་རྒྱང་གྲགས་པདྨོས་ཁེབས་པའི་མཚོ་ནང་ནས། །ཀླུ་
ཤིང་སྡོང་པོ་དྲི་མེད་མཛེས་ལྕུག་ལེགས་འཁྲུངས་རྩེར། །པདྨ་ཟླ་བ་ཧྲཱིཿཡིག་གིས་མཚན་ཡོངས་གྱུར་པ། །དཔལ་ལྡན་སྟོང་ཉིད་སྤྱན་རས་གཟིགས་ནི་དང་པོར་བསྒོམ། །དེ་ནི་དཀར་གསལ་གཟི་བརྗིད་མཛེས། །སྣ་ཚོགས་རིན་ཆེན་རྒྱན་གྱིས་སྤུད། །ཧྲཱིཿཡིག་དུང་མདོག་
སྙིང་པོར་བཅས། །འགྲོ་ལ་སྟོང་པ་ཉིད་སྟོན་བཞེངས། །དེ་རྗེས་ཡང་དག་རྗེས་འགྲོ་མ་ཡིན་དང་། །དམིགས་བཅས་དམིགས་བྲལ་མངོན་པར་འདུ་བྱེད་དང་དེ་ཡི། །ངེས་པའི་སར་ཆུད་མཚན་མེད་ཤིན་ཏུ་ཞི་བ་ཡིས། །ཡིད་བརྟན་བྱས་ལ་ལྷ་བཞི་རྣམ་པར་སྤྲུལ་བར་བྱ། །བྱམས་
པ་ཚད་མེད་ལ་སྐྱེས་ཤིང་། །ཧྲཱིཿཡིག་སྔོས་མཚན་སྔོན་པོའི་མདོག །འོད་ཀྱི་དཀྱིལ་འཁོར་སྔོ་ལྡན་པ། །བྱམས་པས་འགྲོ་སྐྱོབ་ཤར་དུའོ། །སྙིང་རྗེ་ཚད་མེད་ལས་སྐྱེས་པ། །ཧྲཱིཿཡིག་སེར་ལྡན་སེར་པོའི་མདོག །འོད་ཀྱི་དཀྱིལ་འཁོར་སེར་མངའ་བ། །སྙིང་རྗེས་འགྲོ་སྐྱོབ་ལྷོ་རུའོ། །

73-1-130a

དགའ་བ་ཚད་མེད་ལས་སྐྱེས་པ། །ཧྲཱིཿཡིག་དམར་མངའ་དམར་པོའི་མདོག །འོད་ཀྱི་དཀྱིལ་འཁོར་དམར་འཁྱིལ་བ། །དགའ་བས་འགྲོ་སྐྱོབ་ནུབ་ཏུའོ། །བཏང་སྙོམས་ཚད་མེད་ལས་སྐྱེས་པ། །ཧྲཱིཿཡིག་ལྗང་མཚན་ལྗང་གུའི་མདོག །འོད་ཀྱི་དཀྱིལ་འཁོར་ལྗང་གསལ་བ། །བཏང་
སྙོམས་འགྲོ་སྐྱོབ་བྱང་དུའོ། །དཀྱིལ་འཁོར་བཟང་ལྔ་ཇི་ལྟར་གཞུག་པའི་ཆོ་ག་ཡིས། །ལེགས་བཅུག་ལུས་ཅན་ནམ་མཁའི་མཐའ་མཉམ་གཉེན་ཚོགས་ལ། །རིམ་དང་རིམ་མིན་སྟོང་ཉིད་ཚད་མེད་དྲག་བསྒོམས་ནས། །མཁས་པས་དོན་བསྒྲུབ་ལྷ་ལྔའི་ཕྲིན་ལས་རབ་འབྱམས་སྤྲོ། །དཔལ་
འཇིག་རྟེན་མགོན་པོ་ཚད་མེད་བཞིའི་སྒྲུབ་ཐབས་རྫོགས་སོ།།      །།༄༅། །ཇོ་བོ་ཐུགས་རྗེ་ཆེན་པོ་ཡི་གེ་དྲུག་པ་ལ་ཕྱག་འཚལ་ལོ། །དེ་ནས། བདེ་ཆེན་ཤེས་རབ་སྙིང་རྗེ་མཆོག །ཅེས་འབྱུང་བའི་སྒྲུབ་ཐབས་བཤད་པར་བྱའོ། །བདེ་ཆེན་སྟོང་པ་ཉིད་བདག་ལྷ། །མགོན་པོ་ཉིད་
དང་ཤེས་རབ་མཆོག །བརྩེ་ཆེན་རང་བཞིན་ནོར་བུ་དང་། །པདྨོ་འཛིན་ལ་ཕྱག་འཚལ་བཤད། །རྣལ་འབྱོར་རྒྱལ་པོ་ཤེས་རབ་ཐབས། །རིགས་འཛིན་དཀྱིལ་འཁོར་བླ་ན་མེད། །དཔལ་ལྡན་ཕ་རོལ་ཕྱིན་དྲུག་དངོས། །ཆོ་གའི་དམ་པ་འདི་གསུངས་སོ། །ཨོཾ་མ་ཎི་པདྨེ་ཧཱུཾ། གསང་སྔགས་
རྒྱལ་པོ་ཡི་གེ་དྲུག །ལུགས་འབྱུང་བ་དང་ལུགས་བཟློག་ལས། །རྒྱུད་དྲུག་འགོག་དང་ལམ་དྲུག་སྦྱོང་། །འབྲས་བུ་དྲུག་ལ་རབ་སྦྱོར་ཉིད། །དེ་བཞིན་རྒྱུད་དྲུག་བསྐྱེད་པ་དང་། །ལམ་དྲུག་ལ་ནི་སྦྱོར་བ་དང་། །འབྲས་བུ་དྲུག་ནི་མངོན་དུ་བྱ། །གཟི་བརྗིད་དྲུག་པ་ཞེས་བཤད་དོ། །ཨོཾ་ཨཱཿ
ཧྲཱིཿཧཱུཾ་ཕཊ། རང་བཞིན་གཉིས་མེད་སྟོང་པ་ཉིད། །ཆོས་རྣམས་ཀུན་གྱི་མཚན་ཉིད་དེ། །འགག་པ་མེད་དང་གསལ་མེད་དང་། །མ་བསྒྲིབས་འགྲོ་འོང་མེད་མཚན་ཉིད། །ཨོཾ་ཨཱཿཧྲཱིཿམ་ཎི་ཧཱུཾ། ཤེས་རབ་ཆེན་པོ་དྲི་མ་མེད། །རྣམ་པར་ཤེས་ཀུན་མཚན་ཉིད་དེ། །མ་སྐྱེས་མི་གནས་འགག་པ་
མེད། །གདོད་ནས་རྣམ་གྲོལ་མངོན་སུམ་པ། །ཨོཾ་ཨཱཿཔདྨེ་ཧཱུཾ། སྙིང་རྗེ་ཆེན་པོ་ལྷུན་གྱིས་གྲུབ། །དམིགས་པ་ཀུན་གྱི་མཚན་ཉིད་དེ། །མི་ཕྱེད་མི་འགྱུར་འབྲལ་བ་མེད། །སྐྱོ་མེད་རེ་བ་རྣམ་སྤངས་པའོ། །ཆོས་ཀུན་མཚན་མེད་མཁའ་འདྲའི་རྣལ་འབྱོར་དག་པ་ལ། །ཐུགས་རྗེའི་སྤྱན་

73-1-130b

བསྐྱོད་པདྨོ་ཟླ་དབུས་གཞོན་ནུའི་སྐུ། །ཞལ་གཅིག་ཕྱག་བཞི་ཇི་བཞིན་ཕྱག་རྒྱས་མཚན་པ་དང་། །དེ་བཞིན་གཡས་གཡོན་ནོར་བུ་པདྨོ་འཛིན་པའོ། །དམ་ཚིག་རྡོ་རྗེ་ལྷ་གསུམ་ལ། །ཡེ་ཤེས་མཁའ་སྤྱོད་གསུམ་བཅུག་ལ། །ཐུན་མོང་ཐུན་མོང་མ་ཡིན་པའི། །རྣལ་འབྱོར་རིམ་པས་བཟླས་པར་
བྱ། །ལྷ་ཡི་རིམ་པས་སྔགས་རིམ་བཞིན། །རྣམ་གསུམ་རྫོགས་པའི་རིམ་པ་ཡང་། །མཁས་པས་འབད་དེ་བསྒོམ་པར་བྱ། །དཔལ་འཇིག་རྟེན་མགོན་པོ་ཡི་གེ་དྲུག་པའི་སྒྲུབ་ཐབས་རྫོགས་སོ།།      །།བཅོམ་ལྡན་འདས་ཐུགས་རྗེ་ཆེན་པོ་ཡིད་རྙོག་པ་མེད་པར་མཛད་པ་ལ་ཕྱག་
འཚལ་ལོ། །ས་གསུམ་དབང་ཕྱུག་ལྷ་གསུམ་འཇིག་རྟེན་འོད་མཛད་ནི། །གངས་རི་ལྟར་དཀར་སྐལ་ལྡན་ཡིད་ཀྱི་ངལ་སོའི་རྒྱུ། བདེ་གནས་མཆོག་སྦྱིན་གཅིག་པུ་རྟག་ཏུ་དབུགས་འབྱིན་བརྩོན་གྱུར་གང་། །དཔལ་ལྡན་མགོན་པོ་སྤྱན་རས་གཟིགས་དབང་ཉིད་རྟག་འདུད། །རིང་ནས་
དུབ་པ་སྐྱབས་མེད་པ། །རྣམ་གཡེང་རྣམ་པར་གཟིངས་པ་ཡིས། །རྟག་ཏུ་ཉོན་མོངས་གྱུར་པ་གང་། །དེ་དག་དལ་བའི་ཐབས་འདི་བརྗོད། །ཡིད་དང་རྗེས་མཐུན་གནས་སུ་ནི། །བློ་ལྡན་རྙོག་པ་མེད་ཡིད་ཀྱིས། །ལྟོས་པ་ཐམས་ཅན་དོར་ནས་སུ། །ལྷ་གསུམ་རྣལ་འབྱོར་བསྒོམ་པར་བྱ། །
སྟོང་པ་ཉིད་སྐྱེས་པདྨ་དང་། །བདེ་ཆེན་ལས་གྲུབ་ཟླ་དཀྱིལ་དུ། །ལུས་ངག་སེམས་ཀྱི་རང་བཞིན་རིམ། །ཧྲཱིཿདང་ཨཱཿདང་ཧཱུཾ་ཞེས་པ། །དཀར་དང་དམར་པོ་སྔོན་པོ་དག །སྐུ་གསུང་ཐུགས་དག་སྦྱོར་བ་ཡིས། །བསམས་ལ་འོད་སྤྲོ་བསྡུ་བ་ཡིས། །ཕྱག་འཚལ་ཉིད་དང་སྐུ་བལྟའོ། །
དེ་ལ་དབུས་སུ་འཇིག་རྟེན་མགོན། །གཞོན་ནུ་དཀར་སྒེག་མཛེས་པའི་གཟུགས། །གཡས་སུ་ཁྲོ་གཉེར་དམར་མཛེས་ཁྲོ། །གཡོན་དུ་སྒྲོལ་མ་ལྗང་ངུལ་མའོ། །རང་རང་འདབ་སྐྱེས་འདབ་བཞིའི་ཐུགས། །རྩ་བའི་ཡི་གེ་བཞིས་མཚན་པ། །རང་གི་སྙིང་པོས་ས་བོན་བཅས། །གསལ་
བྱས་ཡེ་ཤེས་གཞུག་པར་བྱ། །དེ་ནས་དུབ་པ་ངལ་སོའི་ཕྱིར། །ཆོ་གའི་སྦྱོར་བས་འགྲོ་བ་ཡི། །སེམས་དུལ་དལ་བ་རྙེད་པ་ལ། །བརྩོན་པས་གསང་སྔགས་བཟླས་པར་བྱ། །རང་དང་རྗེས་མཐུན་འོད་ཟེར་གྱིས། །འགྲོ་བའི་དུབ་པ་གང་གི་རྒྱུ། །ཆགས་སྡང་མ་རིག་ལས་བཅས་འཕྲོས། །

73-1-131a

སྡུག་བསྔལ་དྲི་མ་བསལ་བར་འགྱུར། །དེ་རྗེས་མཁས་པ་དམིགས་བཅས་དང་། །དམིགས་བྲལ་རྣམ་པར་མི་རྟོག་ལ། །རྣལ་འབྱོར་གཉུག་མར་གནས་ན་ནི། །མ་ལུས་མཚན་མ་རྣམ་གྲོལ་བསྒོམ། །གང་ཕྱིར་གང་དུ་གང་གིས་གང་། །ཇི་ལྟར་བཅིང་བས་བདག་དུབ་པ། །དེ་ཕྱིར་
དེ་ཡིས་དེར་དེ་ཉིད། །དེ་ལྟར་གྲོལ་བས་བདག་དལ་བའོ། །ཨེ་མའོ་རྣལ་འབྱོར་ཟབ་མོ་ཆེ། །ཨེ་མའོ་འཆིང་བ་འཆི་བ་མེད། །ཨེ་མའོ་རྟག་ཏུ་བདེ་བ་ཆེ། །ཨེ་མའོ་ཨེ་མ་ངོ་མཚར་རྨད། །ཡང་ནི་དམིགས་བྲལ་ཉིད་ཡིད་ཀྱིས། །ལུས་ཅན་དམིགས་མེད་དམིགས་བྱས་ལ། །སྟོང་ཉིད་
འོད་ཟེར་དབུགས་འབྱིན་པའི། །སྦྱོར་བས་དུབ་པ་ངལ་སོ་བྱ། །ནམ་མཁའི་མཐའ་གཏུགས་སྲིད་ན་འདི་དག་མི་ངལ་སེམས་དུབ་རྣམ་པ་ཀུན་ཏུ་ཉོན་མོངས་དབང་གྱུར་སྡུག་བསྔལ་ནི། །སྣ་ཚོགས་ཀུན་རྟོག་བག་ཆགས་ལས་བཅས་འཛིན་པའི་བློས་བསླད་མངོན་ཞེན་འཆིང་བ་དམ་པའི་
མདུད་པས་ཉེར་བཅིངས་པ། །ཆོ་ག་གང་གིས་དེ་ཤེས་གྱུར་ན་སྐད་ཅིག་དེ་ལ་དཔག་མེད་རྒྱལ་བའི་ཕྱག་གིས་རྗེས་སྐྱབས་དྲི་རྡུལ་མེད། །སྙིང་གི་དབུས་སུ་བདེ་བ་ཆེ་ཐོབ་གཞའ་ལུས་འདི་དང་ཚངས་པའི་ངག་ཐོབ་འགྲོ་བའི་གཉེན་གཅིག་བླ་མར་གྱུར། གང་ཚེ་སྐྱོ་བས་ལྡང་འདོད་ན། །དྲན་
པས་བརྟན་པར་བྱེད་པ་ཡི། །ཏིང་ངེ་འཛིན་ལ་མཉམ་གཞག་ནས། །བརྩེ་ལྡན་དལ་བུས་ལྡང་བར་བྱ། །ཁ་ན་མ་ཐོ་མེད་དྲན་བཅས། །རྣལ་འབྱོར་རྣམ་པར་མི་རྟོག་དང་། །བྱམས་ལྡན་ཀུན་ཏུ་ཡིད་གཞུངས་པ། །རྗེས་སྤྱོད་དགེ་ཚོགས་བརྩམ་པར་བྱ། །སེམས་ངལ་སོ་བའི་ཐུགས་རྗེ་ཆེན་
པོའི་སྒྲུབ་ཐབས་རྫོགས་སོ།།      །།༄༅། །སྤྱན་རས་གཟིགས་ཡི་གེ་མེད་པ་ལ་ཕྱག་འཚལ་ལོ། །དེ་ནས་ཁྱོད་ལ་ཡི་གེ་མེད། །ཅེས་འབྱུང་བའི་སྒྲུབ་ཐབས་བཤད་པར་བྱའོ། །ལུས་གནས་ཨ་ཧཾ་ཧཱུཾ་ཡིག་ལ། །ཀ་དང་ཨ་ཕྲེང་ཕྱོགས་བདག་བཞི། །ཡེ་ཤེས་མེ་ལྕེ་ལྷན་ཅིག་འཇུག །
ཞུ་བ་སྟོང་ཉིད་རྣམ་དག་གོ། །དེ་ལྟར་ལྷའི་ཏིང་ངེ་འཛིན་དང་ལྡན་པས། ཡི་གེ་ཅན་གྱི་རིམ་པ་གཉིས་སོ། །འདི་ལྟ་སྟེ། འབར་བ་དང་འབད་པའོ། །བབ་པས་ཟད་པར་གྱུར་པ་ན་རྩ་བ་ཆད་པས་འཁོར་ལོ་དང་འཁོར་ལོ་ཆེན་པོ་ཐམས་ཅད་འཚིག་པར་འགྱུར་རོ། །ཚིག་པ་རྣམ་པར་རྟོག་

73-1-131b

པའི་ཡི་གེ་གསུམ་ཡང་ནུབ་པར་འགྱུར་ཏེ། བདེ་ལྡན་ཟད་པས་ཆགས་པ་དང་། །འབར་བྱེད་ཟད་པས་སྡང་བ་ཉིད། །ས་བོན་ཟད་ཕྱིར་གཏི་མུག་ཀྱང་། །བརླག་འགྱུར་ཡི་གེ་ལས་ཡིག་མེད། །ལུས་མེད་སེམས་ནི་མི་འགྲོ་མི་འོང་གནས་པ་མེད། །སྒྱུ་མའི་སྐྱེས་བུ་དགའ་དང་གདུང་བ་གང་ཐོབ་པ། །
འདི་ཉིད་ཆོས་ཀུན་ནམ་མཁའ་ལྟ་བུར་སྒྲུབ་པོ་ལ། །ཡི་གེ་མེད་པའི་རྣལ་འབྱོར་ཟབ་མོ་སྟོན་པ་ཡིན། །གང་ཞིག་ཡིད་ལ་བྱེད་ན་ཡང་། །དེ་ཚེ་དེ་ནི་དེ་ཉིད་ཡང་། །དངོས་པོ་འགའ་ཡང་མི་བྱེད་ཕྱིར། །བདག་ཉིད་ཡི་གེ་མེད་པར་བརྗོད། །གང་དུ་སྣང་བའི་ཡི་གེ་ནི། །དེ་གནས་པར་ནི་མི་འགྱུར་
ཏེ། །གནས་མེད་གནས་པར་རབ་སྣང་བ། །སྣང་བ་ཕྱི་ནང་མེད་ཡི་གེ། །ཆོས་ཀུན་ཡི་གེ་མེད་མཚན་ཉིད། །དེ་ནི་གདོད་ནས་ཡོད་མིན་ཞིང་། །སླར་ཡང་ཡོད་པར་མི་འགྱུར་བས། །ཡི་གེ་ཐོག་མཐའ་མེད་ཅེས་བཤད། །ངོ་བོ་གནས་དང་དུས་ཡིག་མེད། །ནམ་མཁའ་ལ་ནི་སྒྲ་བློ་བཞིན། །
བསམ་སོགས་རེག་པར་མི་ནུས་པ། །དེ་བཞིན་ཉིད་ཡིག་མེད་པའོ། །ཇི་ལྟ་ཇི་ལྟར་རྟོག་པ་ནུབ། །མཉམ་པར་གཞག་པ་འོད་གསལ་བརྗོད། །དེ་ལྟ་དེ་ལྟར་རྣམ་ཀུན་ཏོག །ཐམས་ཅད་དེ་ཉིད་མཚན་ཉིད་དོ། །ཟབ་མོ་ལྐོག་ཏུ་མ་གྱུར་དང་། །བྱེད་བཅས་བྱེད་པ་མེད་ཉིད་དང་། །ཅི་
ཙམ་སྣང་བ་དེ་ཙམ་དུ། །དམིགས་པ་ཆད་ཕྱིར་ཡི་གེ་བྲལ། །དེ་ནས་ཐུན་གྱི་དུས་ལ་བབ་པ་ན་སླར་ཡང་གདུལ་བྱ་དང་རང་གི་བསོད་ནམས་དང་སྨོན་ལམ་གྱི་མཐུས། འཕགས་པ་སྤྱན་རས་གཟིགས་བཙུན་པའི་ཆ་ལུགས་ཅན་རྒྱན་སྤངས་པར་བལྟས་ནས། མཚན་མ་གཡེང་
བར་མི་འགྱུར་བའི་ཕྱིར། མཆོད་རྟེན་ལ་སོགས་པའི་ལས་བསྒྲུབ་པར་བྱའོ། །ཐུགས་རྗེ་ཆེན་པོ་ཡི་གེ་མེད་པའི་སྒྲུབ་ཐབས་རྫོགས་སོ།།      །།༄༅། །འཕགས་པ་སྤྱན་རས་གཟིགས་ཕྱག་སྟོང་པ་བྱང་ཆུབ་པ་ལ་ཕྱག་འཚལ་ལོ། །ཁྱོད་ནི་སྟོང་པ་ཉིད་རང་བཞིན། །ཞེས་འབྱུང་
བའི་སྒྲུབ་ཐབས་བཤད་པའོ། །གང་ཞིག་དབང་པོའི་གཞུ་ལྟར་དྲི་མེད་མངོན་པར་གསལ་བའི་སྐུ་གཟུགས་མཆོག །སྟོན་ཀའི་ཟླ་ལྟར་རབ་ཏུ་དཀར་ཞིང་ཕྱོགས་བཅུར་འོད་མཛད་ཁྱབ་པ་པོ། །ཕྲ་བའི་ཨ་དཀར་ཤིན་ཏུ་མི་རྟོག་ཡེ་ཤེས་མ་ལུས་བསྐྱེད་པའི་གཞི། །གང་གིས་ཡོངས་

73-1-132a

ཤེས་དེ་ཉིད་གཞན་མིན་འཆི་བ་མེད་ཐོབ་གྲོལ་བྱེད་རྒྱལ། །ཏཱ་ལ་བདུན་སྲིད་སྟེང་གི་མཁར། །པདྨོ་ཟླ་རྒྱས་གདན་སྟེང་ན། །དཔལ་ལྡན་སྟོང་ཉིད་སྤྱན་རས་གཟིགས། །ལུས་ཅན་ལུས་མེད་སྟོན་བསྒོམ་བྱ། །དཀྱིལ་འཁོར་འོད་གསལ་དྲི་མེད་ཀྱིས། །སྐུ་བརྒྱན་པདྨོས་ཕྱག་
མཚན་པ། །ཟླ་བའི་ཞལ་མངའ་སྡིག་འཇོམས་ཕྱིར། །བརྩོན་པས་བཞེངས་པའི་དབང་པོའོ། །འདི་ཡི་ཐུགས་ཀྱི་པད་འདབ་བརྒྱད། །སྣང་དང་འཛིན་པ་ཞེན་པ་དང་། །དེ་རྒྱུན་ཡོངས་སུ་སྦྱོང་བ་དང་། །དྲི་གསུམ་སྦྱོང་ཕྱིར་ཡིག་འབྲུ་བརྒྱད། །ཨོཾ་ཨཾ་ཧྲཱིཿདྷི་ཏྲཾ་ཏྭཾ་ཁཾ་ཧཱུཾ། དཀར་སེར་
དམར་ལྗང་སྔོན་པོ་དང་། །དུང་མདོག་མངོན་པར་སྐབས་ཡོད་དང་། །སྣ་ཚོགས་ཁ་དོག་རིམ་བཞིན་དུ། །ཕྲེང་བ་དྲི་མེད་འཁོར་ལོ་བསམ། །བསམ་གཏན་མཆོག་གི་ཕྱག་རྒྱ་ལ། །གནས་ནས་ངེས་པའི་སྦྱོར་བ་དང་། །ཡང་དག་རྫོགས་པའི་རིམ་གྱིས་སུ། །སྤྲོས་བྲལ་ལ་ནི་སྤྲོས་བྲལ་
གཞག །སོར་གཞག་བལྟ་དང་རང་གྲོལ་དང་། །གཉུག་མ་ཉིད་དང་འོད་གསལ་དང་། །ལྷུན་གྱིས་གྲུབ་དང་དེ་སྦྱང་བ། །ཡོངས་སུ་དག་པ་ཉིད་ཀྱིས་སོ། །འདི་དག་བསྒོམ་དང་བསྒོམ་པ་ཡི། །ལམ་གཟུང་བ་དང་སྐྱོན་བསལ་དང་། །དེ་ལ་མཐུན་པ་བསྒྲུབ་རྣམ་གསུམ། །རིམ་པ་
བཞིན་དུ་བསྟན་པ་ཡིན། །སྟོང་པ་ཉིད་བསྒོམ་པའི་མན་ངག་རྫོགས་སོ།།      །།༄༅། །འཕགས་པ་སྤྱན་རས་གཟིགས་མར་མེ་སྦར་བ་ལ་ཕྱག་འཚལ་ལོ། །དེ་ནས། འཇིག་རྟེན་སྒྲོན་མ་སྒྲོན་མའི་དབུས། །ཞེས་འབྱུང་བའི་སྒྲུབ་ཐབས་བཤད་པའོ། །སྔགས་ལས་སྐྱེས་པའི་འཇིག་
རྟེན་མགོན། །རྣམ་དག་སྒྲོན་མ་འབར་བ་ལ། །དགེས་དགུས་རོལ་པར་བཞུགས་པ་ནི། །མར་མེས་མུན་པ་སེལ་བ་བཞིན། །ཉི་མའི་འོད་ཟེར་ནུབ་གྱུར་ཅིང་། །ཟླ་བ་ཉ་བར་མ་གྱུར་པའི། །མཚན་མོ་མུན་པ་ཐིབས་པོ་ལ། །བསོད་ནམས་བསྡུས་པའི་མར་མེ་འབར། །རྡོ་རྗེ་ཐལ་སྦྱོར་གསང་
སྔགས་ཀྱིས། །བཏབ་པའི་རྩི་མར་སྣ་ཚོགས་པ། །སྒྲོན་ཤིང་མེ་ལྕེས་བཞུ་བྱས་ལ། །སྣོད་བཟངས་པདྨོས་མཚན་པ་ཡི། །ཀོང་བུ་ཤིན་ཏུ་བྱི་དོར་བྱས། །སྨད་འཚོང་ཆང་འཚོང་གསོ་རས་མའི། །ཁྱིམ་བླངས་རས་ཀྱི་སྡོང་བུ་ལ། །མགར་གྱི་སོ་མལ་མེས་བསྲེགས་བྱ། །སྒྲོན་

73-1-132b

མའི་དབུས་བཞུགས་ཧྲཱིཿས་མཚན་པ། །སྒེག་པོ་གཞོན་ནུ་རོལ་པའི་ཚུལ། །ཟླ་བའི་འོད་འབྱིན་ཡིད་དུ་འོང་། །རོལ་བཞི་པ་ནི་རྣམ་པར་བསྒོམ། །དེ་ལ་མེ་ཏོག་སྤོས་མཆོག་སོགས། །སྣ་ཚོགས་མཆོད་པ་ཀུན་གྱིས་མཆོད། །འཇུངས་པ་རྣམས་དང་དབུལ་ཕོངས་དང་། །སྡིག་ལྡན་རྒྱལ་པོའི་
མར་དཀར་སྦྱིན། །ཚངས་པའི་གནས་བཞི་ཉེར་བརྩམས་པའི། །ཆོས་སྦྱིན་རྗེས་སུ་ཡིད་བྱེད་དང་། །སྙིང་པོའི་རྣལ་འབྱོར་མཆོག་སྔོར་བཅས། །ཐུན་གསུམ་དུ་ནི་རྟག་ཏུ་བྱ། །བདུན་ཕྲག་བདུན་གྱི་ཆོ་ག་ཡིས། །ཐོ་རངས་མཚན་མ་གསུམ་མཐོང་བ། །དེ་ཚེ་གཞོན་ནུ་གཞོན་ནུ་མའི། །སྟོན་
མོ་བྱིན་ལ་མེ་ཏོག་གི། །ཕྲེང་བས་མགུལ་བརྒྱན་མེ་ལོང་དང་། །མར་མེའི་འཁོར་ཡུག་དྲི་བྱུག་དང་། །མཎྜལ་རོལ་མོ་ཕུལ་ནས་ནི། །མར་མེའི་དུ་བའི་ཐིག་ལེ་སྦྱིན། །དེ་ལ་སྔགས་ནི་འདི་ཡིན་ཏེ། །ཨ་ཀ་རུ་ཡི་བདུག་པས་བདུགས། ཨོཾ་ཨཱཿཧྲཱིཿཨཱརྱཱ་བ་ལོ་ཀེ་ཏེ་ཨཱ་ལོ་ཀ་ཛྙཱ་ན་ཛྭ་ལ་ཛྭ་ལ་པྲ་ཀསྤ་
མ་མ་ཙིཏྟེ་སྠཱིར་ཧཱུཾ་ཧཱུཾ་ཧཱུཾ། རང་ལུས་མར་མེ་འབར་བ་དང་། །མཁའ་ལ་ལྷ་མཐོང་ལུང་བསྟན་པའོ། །དཔལ་ཁཪྶ་པཱ་ཎ་མར་མེ་འབར་བའི་སྒྲུབ་ཐབས་རྫོགས་སོ།།      །།༄༅། །འཕགས་པ་སྤྱན་རས་གཟིགས་སྐུ་གསུམ་དང་ལྡན་པ་ལ་ཕྱག་འཚལ་ལོ། །དེ་ནས། མཆོད་རྫོགས་སྤྲུལ་
པའི་སྐུ་འཆང་བ། །ཞེས་བྱ་བ་འབྱུང་བའི་སྒྲུབ་ཐབས་བཤད་པར་བྱའོ། །ལུས་ཅན་ཀུན་གྱི་སེམས་དབུས་ལ་གནས་བདེ་ཆེན་འོད་གསལ་དྲི་མེད་སྐུ། །དེ་སྟོབས་ཀྱིས་སྣང་དཔེ་བྱད་བརྒྱད་ཅུ་དེ་བཞིན་མཚན་མཆོག་སུམ་ཅུ་གཉིས། །བཅུ་གཉིས་མཛད་སོགས་ཇི་ལྟ་ཇི་ལྟར་གདུལ་བྱའི་རིམ་
བཞིན་དེ་ལྟ་དེ། །སྟོན་མཛད་སྐུ་གསུམ་རྟག་ཏུ་ལྷུན་གྲུབ་འཇིག་རྟེན་མགོན་ལ་ཕྱག་འཚལ་འདུད། །དྲང་སྲོང་མཆོག་གི་ཕོ་བྲང་མཆོག །པོ་ཏ་ལ་ཡི་རི་བོ་ཡི། །རྩེ་ནས་སྐྱོབ་པ་སྤྱན་རས་གཟིགས། །སྐུ་གསུམ་ཞེས་པ་འདི་བསྐྱོད་བྱ། །དེ་ནི་ཟླ་བའི་ཁ་དོག་གོ། །ཞལ་གསུམ་གཡས་
སྔོ་གཡོན་དམར། །དབུས་དཀར་ཞི་བའི་སྤྱན་གསུམ། །རབ་ཏུ་གཡོ་བའི་ཚུལ་ཡིན། །ཕྱག་དྲུག་དང་པོ་གཉིས་ཀྱི། །ལྟེ་བ་ལ་གཞག་མཆོག་མཛད། །གཡས་ཀྱི་གཉིས་པར་ཆོས་འཆད། །གཡོན་ན་པདྨ་འདབ་རྒྱས། །གཡས་ཀྱི་གསུམ་པ་མཆོག་སྦྱིན། །གཡོན་པ་བགྲང་

73-1-133a

ཕྲེང་འཛིན་པ། །ཞབས་གཉིས་སྐྱིལ་ཀྲུང་བརྟན་བཅས། །མི་གཡོ་འཛུམ་ཞལ་དང་པོའོ། །དེ་ཡི་ཐུགས་ནི་པད་རྒྱས། །དྲི་མེད་མཛེས་དབུས་ཧྲཱིཿཡིག །ཀུན་ད་ལྟར་དཀར་འོད་འཕྲོ། །མི་བརྗེད་དྲན་པས་བསྒོམ་བྱ། །ཨོཾ་ཨཱཿཧྲཱིཿཏྲི་ཀཱ་ཡ་ལོ་ཀ་ནཱ་ཐཱ་སྭཱ་པ་རཱཪྠཱ་སིདྡྷ་ཀར་ཧཱུཾ་
ཧཱུཾ་ཧཱུཾ། ཉི་ཤུ་གཅིག་བཅས་སྔགས་འདི་སྔགས་པ་ཡིས། །ནམ་ལངས་ཐོག་ཐག་ཉི་མ་འཆར་ཀ་དང་། །ཟླ་བ་ཚེས་དང་ཚེས་བརྒྱད་ཉ་བའི་ཚེ། །སྟོང་ཉིད་བདེ་ཆེན་སྙིང་རྗེའི་ཡིད་ཀྱིས་བཟླས། །གང་ཚེ་མི་རྟོག་བསྐྱེད་པའི་རིམ་པ་གསལ་གྱུར་ཅིང་། །སྣ་ཚོགས་ཕྲིན་ལས་སེམས་ལ་
དབང་གྱུར་ཐོབ་པའི་ཚེ། །ཅི་རིགས་རྣམ་བཞི་ཕྲིན་ལས་མཐུ་ལ་སྦྱར་བ་ཡིས། །འགྲོ་བ་འདི་དག་མྱུར་དུ་དེ་ཡི་དབང་དུ་འགྱུར། །དེ་ལས་སེམས་ནི་དྲི་མེད་སྤྲོས་བྲལ་མི་གཡོ་སྟེ། །འདི་ལྟར་དེ་ནི་གཟུང་དང་འཛིན་པའི་གཡེང་བ་ཟད། །དེ་ཐོབ་བྱེད་པའི་རྡོ་རྗེ་འཛིན་པའི་བཀའ་དྲིན་
ལས། །སེམས་ནི་ས་བོན་ཧྲཱིཿཡིག་ལ་གནས་བརྟན་པས་འགྲུབ། །གང་ཞིག་ངེས་པས་སྐད་ཅིག་དེ་ལ་ཕྱོགས་བཅུ་ཡི། །རྒྱལ་དང་དེ་སྲས་ཉན་ཐོས་ལ་སོགས་འཁོར་མང་པོ། །སྣང་དང་མི་སྣང་བདེ་ཆེན་ཕུན་ཚོགས་སྟོན་པའི་སྐུ། །དངོས་གསུམ་དྲི་མེད་དག་པའི་སྐུ་གསུང་
ཐུགས་འགྲུབ་འགྱུར། །རྟོགས་པས་མི་ཟད་སྟོང་ཉིད་སྙིང་རྗེ་ཟུང་འཇུག་གང་། །མཐོང་བའི་མཐུ་ལས་དེ་ཉིད་མ་རྟོགས་སེམས་ཅན་ལ། །ཇི་ལྟར་གང་འདུལ་དེ་ལྟ་དེ་ལ་དེ་སྟོན་པའི། །མཛད་པ་དཔག་མེད་འོད་ཟེར་ཕུང་པོ་ལས་སྤྲུལ་བྱ། །ཇི་ལྟར་སྐུ་གསུམ་མཛད་དང་འདི་དག་ཉིད་ཀྱི་
ལས། །ཐུབ་པ་རྣམས་ཀྱིས་བསྟན་པ་འཛིན་པའི་སྔགས་པ་དེ་ཉིད་ཡིན། །དེ་ལས་ཉིན་རེའང་བསོད་ནམས་ཕུང་པོ་མཐའ་ཡས་འགྱུར། །ཟླ་བ་བརྒྱད་དམ་གསུམ་མམ་གཅིག་ན་རྟགས་མཐོང་བློ་མཆོག་འགྱུར། །ཚངས་དང་བརྒྱ་བྱིན་འཁོར་ལོས་སྒྱུར་སོགས་མགོས་གཏུགས་ཕྱག་
འཚལ་དང་། །སྨིན་མཚམས་ནས་འཐོན་ཉི་ཟླ་སྐར་ཚོགས་རྣམ་པར་འཕྲོ་བ་དང་། །སེང་གེ་གླང་ཆེན་ཤ་ར་ཎ་གཞོན་ཕྱོགས་བཅུར་རྒྱུག་པ་ཉིད། །འོད་ཀྱིས་ལུས་ཐོབ་བདུད་རྩིའི་ཆུ་རྒྱུན་སྲིན་ལག་རྩེ་ནས་འབབ་པའོ། །ཡང་ན་རྐང་གཉིས་ལྷ་དང་ཀླུ་དབང་གིས་བཏེག་མཁའ་ལ་

73-1-133b

འགྲོ། །པོ་ཏ་ལ་དང་དགའ་ལྡན་བདེ་ལྡན་གནས་སོགས་ཕྱིན་པ་དང་། །རིན་ཆེན་གཞལ་མེད་སྒོ་སྟོང་བྱེ་བ་ནས་ཞུགས་ཏེ་སྟོང་གནས། །མགོན་པོ་ཉིད་ཕྱག་གླང་ཆེན་སྣ་ལྟས་བདག་གི་སྤྱི་བོར་རེག་པའོ། །འདི་དག་འཐོང་ནས་བློ་ལྡན་སྙེམས་མེད་ཐེ་ཚོམ་མེད་པ་དང་། །བརྩོན་འགྲུས་ལྷག་
བསྐྱེད་སླར་ཡང་ཇི་སྐད་བཤད་པའི་རྣལ་འབྱོར་ལ། །སྦྱོར་བ་ལྷག་མོས་ཉིན་རེ་ལན་གསུམ་སྒོམ་པར་བྱེད་ན་ནི། །མི་དེ་མྱུར་དུ་སྤྱན་རས་གཟིགས་ཀྱི་བློ་གྲོས་དམ་པ་ཐོབ་པར་འགྱུར། །དཔལ་ཁཪྶ་པཱ་ཎའི་སྐུ་གསུམ་གྱི་གདམས་པ་རྫོགས་སོ།།      །།༄༅། །འཕགས་པ་སྤྱན་
རས་གཟིགས་དབང་ཕྱུག་མཁའ་སྤྱོད་ལ་ཕྱག་འཚལ་ལོ། །དེ་ནས། འཕགས་པ་ནམ་མཁའི་སྤྱོད་ཡུལ་ཏེ། །ཞེས་འབྱུང་བའི་སྒྲུབ་ཐབས་བཤད་པར་བྱའོ། །སྲིད་ལས་རིང་གྱུར་ཤིན་ཏུ་འཕགས་པའི་སྐུར་བསྟན་པ། །ཟླ་བ་ལྟར་དཀར་ཡེ་ཤེས་ཐུགས་ཀྱི་པདྨོ་ལས། །ལེགས་འཁྲུངས་
ཕྱོགས་ཆར་དབྱངས་ཅན་ནོར་རྒྱུན་རྡོ་རྗེ་ཕག །སྒྲོལ་མ་རྣམ་བཞིའི་ཅོད་པན་རིན་ཆེན་གྱིས་བཏུད་རྒྱལ། །མཐའ་དང་སྟོང་ཉིད་ཆེན་པོ་ཡི། རྣལ་འབྱོར་སྙིང་རྗེ་མཆོག་གི་ངང་། །སྐྱེ་བ་མེད་ལས་སྐྱེབའི་དངོས། །འཕགས་པ་ཐུགས་རྗེ་ཆེ་བསྒོམ་བྱ། །ཏཱ་ལ་བདུན་སྲིད་ནམ་མཁའ་ཡི། །ངོས་
ལ་སྣ་ཚོགས་པད་ཟླའི་སྟེང་། །བདག་ཉིད་རྣམ་པར་ཤེས་ཀྱི་ཧྲཱིཿ། །འགྲོ་བའི་དོན་སྒྲུབ་བྱེད་བལྟའོ། །རིམ་གྱིས་པདྨོ་དཀར་ཉིད་དང་། །དེ་གྱུར་པས་ནི་མགོན་པོ་ཉིད། །གཡོན་ཞབས་འཁོར་ལོས་ཟླ་དབུས་མནན། །གཡས་ཞབས་གྱེན་དུ་ཆེར་བསྐྱོད་པའོ། །ཕྱག་གཡས་པདྨོ་མཛེས་ལྕུག་
སྡུག །འདབ་སྟོང་རྣམ་པར་བྱེ་བ་ཡི། །སྡོང་བུའི་ལྕུག་མ་འཁྱུད་སྐྱོགས་ཀྱིས། །ཞབས་གཡས་མཁྲིག་མ་བཏེག་བསྣམས་ལ། །འབར་བའི་རིན་ཆེན་ལྷག་གེ་བའི། །རྒྱན་རྣམས་ཀུན་གྱིས་རབ་ཏུ་བརྒྱན། །བདེ་ཆེན་རྣམ་པར་མི་རྟོག་དང་། །སྦྱིན་དང་མི་འཇིགས་རྒྱུར་བཅས་པའོ། །ཛཿཧཱུཾ་
བཾ་ཧོཿཧྲཱིཿ། འདི་དག་རང་དང་རྗེས་སུ་མཐུན་པའོ། །དོན་བསྒྲུབས་འོད་ཟེར་བསྡུ་བ་ཡི། །སྦྱོར་བས་ཤར་ལ་སོགས་པ་ཡི། །ཕྱོགས་བཞི་པོར་ནི་ལྷ་མོ་བཞི། །གངས་རི་ལྟར་དཀར་བློ་བཟངས་འོད་མཛད་རལ་གྲི་པུསྟི་གཡས་དང་གཡོན། །གསེར་བཟངས་ལྟར་སེར་ནོར་མང་ཡིད་འོང་ནོར་བུ་

73-1-134a

སྙེ་མ་འཛིན་པ་དང་། །བྱི་རུ་ལྟར་དམར་འོད་མཛད་གྲི་གུག་མི་མགོ་ཕྱེད་ཁྲག་བཀང་། །ཨིནྡྲའི་མདོག་ལྗང་གཞོན་ནུ་སྒེག་མོ་སྐྱབས་སྦྱིན་ཨུཏྤལ་ལེགས་བསྣམས་པའོ། །དེ་རྗེས་ཡེ་ཤེས་དགུག་པ་ཡི། །ཆོ་ག་མཆོད་རྒྱས་ཁྱད་པར་བཞིས། །མཆོད་བྱས་གུས་པ་གསོལ་བ་ཡི། །
སྔགས་བརྗོད་དེ་ནས་སྔགས་བཟླའོ། །རྗེས་མཐུན་ཕྲིན་ལས་ལྔ་པོ་ཡིས། །མཁའ་ཁྱབ་དོན་ཀུན་བསྒྲུབས་ནས་ནི། །འོད་ཟེར་ལྕགས་ཀྱུས་འཇིག་རྟེན་ཀུན། །གྱེན་དུ་སྤར་བའི་རྣལ་འབྱོར་བྱ། །ཡང་ནི་ཕྱོགས་བསྡུ་དངོས་གྲུབ་བསླང་། །ཐེ་ཚོམ་མེད་བཅས་ཕྲིན་ལས་བཞི། །ལྷ་བཞི་རང་གི་རིགས་
བཞིན་དུ། །མཁས་པས་རྗེས་སུ་གཞུག་པར་བྱ། །ཐུགས་རྗེ་ཆེན་པོ་མཁའ་སྤྱོད་ཀྱི་སྒྲུབ་ཐབས་རྫོགས་སོ།།      །།༄༅། །ཐུགས་རྗེ་ཆེན་པོ་མཁའ་སྤྱོད་ཡུལ་ཅན་ལ་ཕྱག་འཚལ་ལོ། །དེ་ནས། ནམ་མཁའི་མཚན་ཉིད་དྲི་མ་མེད། །ཅེས་འབྱུང་བའི་སྒྲུབ་ཐབས་བཤད་པར་བྱའོ། །ངོ་མཚར་
བསོད་ནམས་བརྒྱ་ཡི་ཕ་རོལ་ཕྱིན། །སྣང་དང་མི་སྣང་དམིགས་པ་ཐམས་ཅད་ཀྱི། །སྤྱོད་ཡུལ་ལས་དབེན་གཅིག་མིན་དུ་མའི་ཚུལ། །བདེ་ཆེན་ནམ་མཁའ་དྲི་མེད་ཐུབ་ལ་འདུད། །དམིགས་པ་བྱེ་བ་སྟོང་ཕྲག་མང་པོ་དང་། །གང་ཞིག་བདག་ཏུ་ལྟ་བ་མི་བཟད་པས། །བློ་གྲོས་འཆལ་བ་དོན་མ་
མཐོང་བ་རྣམས། །གནས་འདིར་ནམ་མཁའ་དྲི་མེད་བསྒོམ་པར་བྱ། །ཡུལ་དང་དུས་དང་རང་བཞིན་གང་། །ཇི་ལྟ་ཇི་ཙམ་ཅི་ཞིག་ནི། །དེ་ན་དེ་ཚེ་དེ་ཉིད་དེས། །དེ་ལྟར་དེ་ཙམ་དེ་མེད་ཉིད། །བློ་གྲོས་སྦྱངས་པ་རྣམ་ཀུན་དུ། །ཆོས་ཀུན་དམིགས་པ་མེད་ཤེས་པ། །དེ་ནི་ཡང་དག་ལྷ་
མཆོག་མཐོང་། །ཤེས་རབ་ཕ་རོལ་ཕྱིན་པའོ། །ཧྲཱིཿ གཞན་ནི་ཅིག་ཤོས་བློ་ཅན་དེ། །སྤྲིན་བྲལ་གསལ་བའི་མཁའ་དབྱིངས་སུ། །ཟླ་བའི་མདོག་ཅན་པདྨའི་ཕྱག །རྗེས་སུ་སྐྱེ་དང་གཞིག་པར་བྱ། །དག་པའི་ནམ་མཁའ་ངོ་བོ་ཉིད། །བསྐྱེད་པའི་རིམ་པས་གཞན་གྱུར་ཏེ། །རྗེས་སུ་གཞིག་
པས་དེ་སྟོང་འགྱུར། །བླ་མའི་དྲིན་ཐོབ་རྡོ་རྗེའི་བློ། །མཐོང་བས་གྲུབ་དང་གཞིག་པ་ན། །མེད་ཅེས་རྣམ་པར་རྟོག་པར་ཟད། །རྟོག་པ་དེ་ཡང་དམིགས་སུ་མེད། །བྱས་པས་བརྟགས་ཏེ་གསུམ་སྤྱད་པ། །མཁས་པས་དེ་ཉིད་གཅིག་མི་དམིགས། །གདོད་ནས་མ་སྐྱེས་བསྐྱེད་

73-1-134b

པའི་རིམ། །ནམ་ཡང་མི་འཇིག་རྗེས་སུ་གཞིག །དེ་ལྟར་འཁོར་གསུམ་བཞི་གསུམ་གྱིས། །དམིགས་བྲལ་གྲུབ་པར་མི་འགྱུར་ན། །དེ་ཚེ་མེད་དང་ཡོད་པ་དང་། །བྱུང་བ་ཞིག་པའང་གང་ཞིག་ཡིན། །རྣལ་འབྱོར་ཟབ་མོ་ནམ་མཁའ་ཡི། །སྤྱོད་ཡུལ་ནམ་མཁའི་སྦྱོར་བ་ཡིས། །དམིགས་
པས་ཕུང་བར་གྱུར་རྣམས་ལ། །དམིགས་མེད་སྟོན་པ་ངོ་མཚར་ཡིན། །ནམ་མཁའ་དྲི་མེད་ཀྱི་སྒྲུབ་ཐབས་རྫོགས་སོ།།      །།༄༅། །བཅོམ་ལྡན་འདས་ཐུགས་རྗེ་ཆེན་པོ་ནམ་མཁའི་མཛོད་ལ་ཕྱག་འཚལ་ལོ། །དེ་ནས། ནམ་མཁའི་མཛོད་ནི་བརྙེས་པས་ཏེ། །ཞེས་འབྱུང་བའི་སྒྲུབ་
ཐབས་བཤད་པར་བྱའོ། །ས་བཅུའི་དབང་ཕྱུག་ལྷ་དང་མི་ཡི་གཙོ། །བསོད་ནམས་ཡེ་ཤེས་ཡོན་ཏན་རྒྱ་མཚོ་ཡི། །མཐར་ཕྱིན་གཏེར་ཕྱིན་ནམ་མཁའ་མཛོད་བརྙེས་པ། །འཇིག་རྟེན་མགོན་ལ་བཏུད་དེ་དེ་བསྙེན་བརྗོད། །སྔགས་འཆང་བདག་དོན་གཞན་དོན་ཐམས་ཅད་དུ། །མེ་འོབས་
འབར་བ་བསིལ་ཁང་ཉམས་དགའ་ལྟར། །ཤེས་ནས་མི་ཆགས་ཆགས་ཆེན་རྣལ་འབྱོར་སྤྱོད། །མཐའ་ཡས་ནམ་མཁའི་མཛོད་གཏེར་རྒྱལ་བས་གསུངས། །ཕུན་ཚོགས་ཚལ་ལམ་ཡང་ན་དབུལ་པོའམ། །ཡང་ན་དགོན་དབེན་ཡིད་དགའི་གནས་རྣམས་སུ། །ཤིན་ཏུ་གོས་གྱོན་
མེ་ཏོག་མཎྜལ་བྱས། །གདུང་བ་སྤངས་པས་མགོན་པོ་དྲན་པར་བྱ། །པདྨོ་ཟླ་སྟེང་རིན་ཆེན་བུམ་བཟང་དང་། །འདབ་སྟོང་ཨུ་དུམ་བཱ་རའི་གེ་སར་རྩེ། །མཉམ་མེད་ས་གསུམ་ཁ་ལོ་བསྒྱུར་མཛད་པ། །ཆོས་རྒྱས་གསེར་མདོག་འབར་བར་བསྒོམ་པར་བྱ། །ཧྲཱིཿལས་སྐྱེས་པའི་གཞོན་
ནུ་བལྟ་ན་སྡུག་པ་ཡིད་བཞིན་གྱི་ཤིང་ལ་སྐུ་བརྟེན་པ། གཡོན་ན་པདྨོ་འཛིན་ཅིང་གཡས་ཀྱིས་ནོར་རྣམས་ཐམས་ཅད་སྦྱིན་པར་མཛད་པ་དང་། ཕྱོགས་གཅིག་ན་འཕགས་པ་ནོར་འཕེལ་རྔ་ཡབ་ཐོགས་ནས་ནོར་གྱི་རྒྱུན་འབེབས་པ་དང་། ཕྱོགས་གཅིག་ན་ལྷ་མོ་ནོར་སྦྱིན་མ་རིལ་
བ་འཛིན་པ་ནོར་བུ་དམར་པོའི་ཕྲེང་བས་བརྒྱན་པ་སྟེ། འདི་དག་ནི་བཙུན་པ་སྤྱན་རས་གཟིགས་ནམ་མཁའི་མཛོད་བརྙེས་པའི་བདེན་པའི་བྱིན་རླབས་ཀྱི་རྣམ་པར་འཕྲུལ་པ་ཡིན་པར་རིག་པར་བྱའོ། །འདི་ནི་བསྒོམ་པར་བྱ་བའི་གནས། །འགྲོ་བའི་གདུང་བ་སེལ་བྱེད་པ། །བསོད་

73-1-135a

ནམས་སྤྲིན་ཆེན་གསལ་བའི་རྒྱུ། །གསང་སྔགས་ཆར་ཆེན་ནོར་སྦྱིན་གཞན། །སྙིང་བརྩེ་དགའ་དང་ཡིད་གཞུངས་པས། །དོན་ཆེན་བྱེད་པ་རིག་སྔགས་ཆེ། །ནམ་མཁའ་མཐའ་ཡས་གཟུངས་དང་ནི། །སྤྲིན་ཆེན་མཛོད་ཀྱི་རྟོག་པའོ། །ཇི་སྐད་བསྟན་པའི་སྙིང་པོ་བཞི། །ནུས་གཉིས་
ལྡན་པ་སྔོན་འགྲོ་བས། །འབུམ་ཕྲག་ལྔར་ནི་བཟླས་ནས་སུ། །ཅི་ཡོད་ལམ་ཆེན་གནས་སུ་སྦྱིན། །ཤིན་ཏུ་ཕན་འདོད་གདུང་བ་ཡིས། །མགོན་པོ་ལ་ནི་མཆོད་པ་དང་། །རང་གི་འཚོ་བ་མ་གཏོགས་པར། །ཐམས་ཅད་ཡོངས་སུ་མི་གཟུང་ངོ་། །དེ་ལྟར་ཆོག་ཤེས་གཞན་དབང་གཡོ། །
སོམ་ཉི་སྤངས་དང་ཡང་མེད་དེ། །དེ་ནི་ཉིན་རེ་སྦྱིན་ན་ཡང་། །འབྱོར་པས་གཏུགས་པར་མི་འགྱུར་རོ། །ཐུགས་རྗེ་ཆེན་པོ་ནམ་མཁའ་མཛོད་ཀྱི་སྒྲུབ་ཐབས་རྫོགས་སོ།།      །།༄༅། །འཕགས་པ་སྤྱན་རས་གཟིགས་དབང་ཕྱུག་ཞལ་བཅུ་གཅིག་པ་ལ་ཕྱག་འཚལ་ལོ། །དེ་ནས། 
ནམ་མཁའ་ཀུན་ཁྱབ་བཅུ་གཅིག་ཞལ། །ཞེས་འབྱུང་བའི་སྒྲུབ་ཐབས་བཤད་པར་བྱའོ། །ཟླ་བ་འབྲུག་སྒྲ་ནམ་མཁའ་ལྟར་རྨད་པ། །སྐུ་གསུང་ཐུགས་ཟབ་སྟོབས་བཅུའི་ཕ་རོལ་ཕྱིན། །སྣ་ཚོགས་སྤྲུལ་པས་དཔག་མེད་དོན་སྒྲུབ་པའི། །མགོན་ལ་བཏུད་དེ་བསྙེན་པ་བདག་གིས་བཤད། །
རེ་ཞིག་རྗེས་སུ་མཐུན་པའི་གནས་སུ་གནས་དང་ཡོ་བྱད་དང་གོས་དང་རྒྱན་ཉེ་བར་བསགས་པ་ཨ་ལས་ཟླ་བའི་དཀྱིལ་འཁོར་བསམས་ལ། རང་གི་སེམས་དྲོ་བ་རྣམས་ཀྱི་བཞི་པ་མེའི་བུ་ལ་བརྟེན་པ་ང་རོ་བཞི་པས་མནན་ཅིང་གཞོན་ནུ་མའི་ནུ་མས་བརྒྱན་པ་ཅན་བལྟ་བར་བྱའོ། །དེ་ལས་
འོད་ཕྱུང་རོལ་མོའི་སྒྲས། །བློ་གྲོས་མི་ཟད་བཅུ་གཅིག་ཞལ། །སྤྱན་བྲངས་ལུས་བཏུད་ཕྱག་འཚལ་ཞིང་། །མཆོད་པ་ལྔས་ནི་ཡང་དག་མཆོད། །ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་དྷཱུ་པེ་ཨཱཿཧཱུཾ། ཨོཾ་བཛྲ་དཱི་པེ་ཨཱཿཧཱུཾ། ཨོཾ་བཛྲ་གནྡྷེ་ཨཱཿཧཱུཾ། ཨོཾ་བཛྲ་ནཻ་བི་དྱེ་ཨཱཿཧཱུཾ། དེ་ནས་སྡིག་པ་བསལ་
ལ་སོགས། །ཡན་ལག་བཟང་པོ་སྤྱོད་ཀུན་གྱིས། །དྲི་མ་དག་པར་བྱས་ནས་སུ། །གནས་བཞི་ལས་ནི་སེམས་མཆོག་བསྐྱེད། །ཆོས་ཀུན་རང་བཞིན་མཚན་མ་མེད། །གདོད་ནས་མ་སྐྱེས་མི་འགྲོ་བ། །བདེ་ཆེན་འོད་གསལ་རྣམ་མི་རྟོག །མཁས་པས་ཁོང་ན་མངོན་དུ་བྱ། །ཨོཾ་སྭ་བྷཱ་བ་

73-1-135b

ཤུདྡྷཿསརྦ་དྷརྨཱཿསྭ་བྷཱ་བ་བི་ཤུདྡྷོ྅ཧཾ། གང་ཞིག་ཀུན་རྟོག་མཚན་ཉིད་མེད། །དེ་ནི་བདག་སེམས་འོད་གསལ་ཉིད། །འགྲོ་འོང་གནས་དང་རྟེན་བྲལ་བ། །ད་ནི་སྒྱུ་མའི་སྐྱེས་བུ་བཞིན། །ཨོཾ་སྭ་ཙིཏྟ་ཤཱུ་ནྱ་ཏཱ་བཛྲ་སྭ་བྷཱ་བ་ཨཱཏྨ་ཀོ྅ཧཾ། སྟོང་པ་ཉིད་སེམས་སྒྱུ་མའི་ཚུལ། །སྤྲུལ་པའི་མཛད་པ་ཀུན་སྒྲུབ་
ཕྱིར། །སྐྱེ་བ་མེད་ལས་སྐྱེ་བའི་དངོས། །པདྨོ་ཟླ་དབུས་འཕགས་མཆོག་བསྐྱེད། །ཐུགས་རྗེའི་སྙིང་པོ་ལས་བྱུང་བ། །སྤྲོ་དང་བསྡུ་དང་སྡིག་སེལ་བའི། །མཚན་མ་རྒྱལ་བ་སྡུག་བསྔལ་གཅོད། །བཅུ་གཅིག་ཞལ་མངའ་རྣམ་པར་བསྒོམ། །ཕྱག་གཉིས་ཐུགས་ཀར་ཐལ་སྦྱར་ཞིང་། །བགྲང་
ཕྲེང་པདྨོ་གཡས་གཡོན་གཉིས། །རིལ་པ་མཆོག་སྦྱིན་འཁོར་ལོ་དང་། །རྡོ་རྗེ་མདའ་གཞུ་འཛིན་པར་བརྟག །ཏི་སེའི་གངས་དང་སྟོན་ཟླ་སོས་ཀའི་ཉི་འོད་ཅན། །མུ་ཏིག་གསེར་སོགས་ཇི་སྙེད་རྒྱན་མང་ཀུན་མངའ་བ། །ཞལ་ནི་བཅུ་གཅིག་ནོར་བུ་མེ་མདོག་སྐེ་རགས་ཅན། །རི་དགས་ལྤགས་འཛིན་
འཛུམ་ཞལ་གཟི་བརྗིད་འབར་བའོ། །དེ་ནས་སྙིང་པོའི་ས་བོན་གྱིས་སྤྱན་དྲངས་ནས་སྐུ་གསུང་ཐུགས་ལེགས་པར་གནས་པས་དབང་བསྐུར་བའི་མཐར་ཐུག་པའི་སྒྲུབ་པའོ། །སྐྱོ་བར་གྱུར་ན་སྔགས་བཟླས་པས་འཁོར་ལོ་དགྱེ་བའི་སྦྱོར་བ་བརྩམ་པར་བྱ་སྟེ། ཨོཾ་དྷ་ར་དྷ་ར། དྷི་རི་དྷི་རི། དྷུ་རུ་
དྷུ་རུ། ཨིཊྚེ་བིཊྚེ། ཙ་ལེ་ཙ་ལེ། པྲ་ཙ་ལེ་པྲ་ཙ་ལེ། ཀུ་སུ་མེ་ཀུ་སུ་མ་བ་རེ། ཨི་ལི་མི་ལི། ཙི་ཏེ་ཛྭ་ལ་མ་པ་ན་ཡེ་སྭཱ་ཧཱ། ཞེས་བྱ་བས་སོ། །གལ་ཏེ་བློ་ཞན་རྟུལ་མི་ཕོད། །ཞལ་ལྔ་ཕྱག་བརྒྱད་ཞལ་གསུམ་དང་། །ཕྱག་དྲུག་དེ་བཞིན་ཞལ་གཅིག་དང་། །ཕྱག་གཉིས་པ་ཡང་བསྒོམ་པར་
བྱ། །སྤྱན་རས་གཟིགས་བཅུ་གཅིག་པའི་ཞལ་ཅན་གྱི་སྒྲུབ་ཐབས་རྫོགས་སོ།།     །།༄༅།   །བཅོམ་ལྡན་འདས་སྤྱན་རས་གཟིགས་ཡེ་ཤེས་འཁོར་ལོ་ལ་ཕྱག་འཚལ་ལོ། །དེ་ནས། དཔལ་ལྡན་ཡེ་ཤེས་དཀྱིལ་འཁོར་བ་དག །ཅེས་འབྱུང་བའི་སྒྲུབ་ཐབས་བཤད་པར་བྱའོ། །
འཛུམ་བཅས་དབུས་བཞུགས་ཟླ་བའི་ཞལ་མངའ་དཔལ་ཆེན་དོན་ཡོད་ཞགས་པ་འཆར་ཀའི་མདོག །བདུད་འཇོམས་རྟ་མཆོག་མེ་ལྕེའི་ཁ་དོག་ཁྲོས་མ་དུང་མདོག་སྐར་མའི་འོད་ལྡན་བྷྲྀ་ཀུ་ཊཱི། །ལྕགས་ཀྱུ་ཞགས་པ་ལྕགས་སྒྲོག་དྲིལ་འཛིན་ཉི་ཤུ་དང་ནི་བཅུ་དྲུག་མཆོད་པའི་ལྷ་མོས་བརྒྱན། །

73-1-136a

མཉམ་མེད་ཡེ་ཤེས་འཁོར་ལོ་ཆེ་ལ་སྤྱི་བོས་གཏུགས་བཏུད་ས་འདི་དེ་རིང་བཀྲ་ཤིས་གྱུར། །དུས་གསུམ་གྱི་བདེ་བར་གཤེགས་པ་ཐམས་ཅད་ཀྱི་ཐུགས་རྗེ་རྣམ་པར་འཕྲུལ་པ་ལས་སྐུ་གསུང་ཐུགས་ཉེ་བར་བཀོད་པའི་བཅོམ་ལྡན་འདས་སྤྱན་རས་གཟིགས་འཁོར་ལོ་དང་བཅས་
པ་བསྒྲུབ་པར་འདོད་པས། ཐོག་མར་སྙིང་རྗེ་ཆེན་པོ་གོམས་པར་བྱའོ། །ཡིད་དང་རྗེས་མཐུན་ལ་སོགས་གནས། །བྱང་ཆུབ་མཆོག་ཞུགས་སེམས་བཟུང་བས། །སྙིང་གི་འོད་ཀྱིས་རྟེན་བཀུག་ལ། །བསོད་ནམས་ཕུང་པོ་ཡོངས་རྫོགས་བྱ། །ཨོཾ་སྭ་བྷཱ་བ་ཤུདྡྷཱཿསརྦ་དྷརྨཱཿསྭ་བྷཱ་བ་
ཤུདྡྷོ྅ཧཾ། ཆོས་རྣམས་རང་གི་མཚན་ཉིད་ཀྱིས། །རང་གི་རང་བཞིན་སྟོང་པ་ཉིད། །མཁའ་ལྟར་མཉམ་པར་བཞག་ནས་ནི། །དེ་ནས་བདག་ལུས་དཀྱིལ་འཁོར་བསྒོམ། །ལུས་གང་ཡིན་དེ་གཞལ་མེད་ཁང་། །སེམས་འདིར་ལྷ་ཡི་བདག་ཉིད་དེ། །སྔགས་པའི་ངག་ནི་སྔགས་ཡིན་ལ། །ཀུན་
ནི་དྲི་མ་མེད་རྟོག་སྤངས། །ཧྲཱིཿ པདྨོ་བཞི་དབུས་འཇིག་རྟེན་མགོན། །ཞལ་གཅིག་ཕྱག་གཉིས་གཡས་དང་གཡོན། །མཆོག་སྦྱིན་པདྨོ་འཛིན་དཀར་ཞིང་། །ཆོས་དབྱིངས་ཡེ་ཤེས་རང་བཞིན་ནོ། །ཧཿ། ཤར་གྱི་འདབ་མར་དོན་ཡོད་ཞགས། །ཕྱག་བཞི་ཞགས་པ་ལྕགས་ཀྱུ་དང་། །རྡོ་རྗེ་
ཕྲེང་ཐོགས་རབ་ཞི་དམར། །མེ་ལོང་ཡེ་ཤེས་བདག་ཉིད་དོ། །ཧཱུཾ། ལྷོ་ཡི་འདབ་མར་རྟ་མཆོག་ཞལ། །ཕྱག་བཞི་དབྱིག་པ་འཁོར་ལོ་དང་། །སྡིགས་མཛུབ་པདྨ་འཆང་ཁྲོས་པ། །མཉམ་ཉིད་ཡེ་ཤེས་བདག་ཉིད་དོ། །ཕ། ནུབ་ཀྱི་འདབ་མར་རལ་པ་གཅིག །ཕྱག་བཞི་གྲི་གུག་ཐོད་པ་
དང་། །རལ་གྲི་ཨུཏྤལ་བསྣམས་རྔམ་ནག །ཀུན་རྟོག་ཡེ་ཤེས་ངོ་བོའོ། །ཊ། བྱང་གི་འདབ་མར་ཁྲོ་གཉེར་ཅན། །ཕྱག་བཞི་དབྱིག་པ་ཕྲེང་བ་དང་། །པདྨ་རིལ་བ་ལྡན་ཁྲོ་སྐྱ། །དོན་གྲུབ་ཡེ་ཤེས་དངོས་ཉིད་དོ། །ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཿ པི་ཝང་གླིང་བུ་རྫ་
རྔ་རྔ་ཟླུམ་བཞད་མ་དང་། །སྒེག་མོ་གླུ་མ་གར་མ་མེ་ཏོག་བདུག་སྤོས་མ། །མར་མེ་དྲི་དང་གཟུགས་མ་རོ་མ་རེག་མ་དང་། །ཆོས་ལྡན་ལྷ་མོ་བཅུ་དྲུག་རྒྱན་སྤུད་ཁྱམས་བཞིར་དགོད། །ཀ་ཁ་ག་གྷ་ང་། ཙ་ཚ་ཛ་ཛྙ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། ཕ་ཕ་བ་བྷ་མ། ཡ་ར་ལ་ཝ། ཤ་ཥ་

73-1-136b

ས་ཧ། ཀྵཿ། གཏོར་མ་ལ་སོགས་སྤྲིན་འཛིན་པར། །སུམ་ཅུ་ཉེ་བའི་མཆོད་པ་ཡི། །ལྷ་མོའང་དེ་བཞིན་ཁྱམས་ཀྱི་མཐར། །མཁས་པས་དེ་བཞིན་དགོད་པར་བྱ། །ཛཿཧཱུཾ་བཾ་ཧོཿ། ལྕགས་ཀྱུ་དཀར་དང་ཞགས་པ་སེར། ལྕགས་སྒྲོག་དམར་པོ་དྲིལ་བུ་ལྗང་། །ཤར་ལ་སོགས་པའི་
སྒོ་བཞི་ནི། །གཙོ་བོ་ལས་ཕྱུང་རིམ་བཞིན་བཞུགས། །དེའི་འོག་ཏུ་དམ་ཚིག་གི་དཀྱིལ་འཁོར་གསལ་བར་བཀོད་པ་ལ། ཡེ་ཤེས་པ་བཅུག་ནས་ནམ་མཁའ་ཇི་སྙེད་པའི་སེམས་ཅན་ལ་ཕན་པར་འདོད་པས། རང་རང་དང་རྗེས་སུ་མཐུན་པའི་འོད་ཀྱི་ཕྲེང་བ་སྤྲོ་ཞིང་དོན་གཉིས་ཅིག་ཅར་སྒྲུབ་
པའི་སེམས་ཀྱིས་སྔགས་བརྗོད་པར་བྱའོ། །ཨོཾ་ཨཱཿཧྲཱིཿན་མཿས་མནྟ་བུདྡྷཱ་ནཱཾ་སརྦ་ཏ་ཐཱ་ག་ཏ་ཨ་བ་ལོ་ཀི་ཏེ་མ་ཧཱ་ཀཱ་རུ་ཎི་མཱུརྟ་ཡེ་ཧཱུཾ་ཛཿསྭཱ་ཧཱ། བཅོམ་ལྡན་འདས་ཀྱི་སྙིང་པོའོ། །ཨོཾ་ཧྲཱིཿཏྲཻ་ལོ་ཀྱ་བི་ཛ་ཡ། ཨ་མོ་གྷ་པཱ་ཤ་ཡ། ཨ་པྲ་ཏི་ཧ་ཏ་ཧྲཱིཿཧ་ཧཱུཾ་ཕཊ་སྭཱ་ཧཱ། དོན་ཡོད་ཞགས་པའི་སྙིང་
པོའོ། །ན་མཿས་མནྟ་བུདྡྷཱ་ནཱཾ་ཧཾ་ཁཱ་ད་བྷྲཱུཾ་ཛཾ་སཱ་དཱ་ཡ་སྭཱ་ཧཱ། རྟ་མགྲིན་གྱི་སྙིང་པོའོ། །ཨོཾ་ཨེ་ཀ་ཛ་ཊི་མ་ཧཱ་རོ་ཥ་ཎི་ཏྲཱ་ས་མ་ཡེ་པྲ་ས་མ་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། རལ་གཅིག་མའི་སྙིང་པོའོ། །ནམཿས་མནྟ་བུདྡྷཱ་ནཱཾ། སརྦ་བྷ་བ་སནྟྲ་ར་ན་ཧཱུཾ་ཕཊ་པ་ཏཱ་ཡ་སྭཱ་ཧཱ། ཁྲོ་གཉེར་ཅན་གྱི་སྙིང་པོའོ། །སྤྲོས་པས་
ཏིང་འཛིན་ངལ་བ་ནི། །དཀྱིལ་འཁོར་མཆོག་གཅིག་དྲི་མ་མེད། །ལྷ་དང་སྔགས་སོགས་རྣམ་གྲོལ་བ། །ཡེ་ཤེས་མཆོག་ལ་མཉམ་གནས་བྱ། །རྩེ་གཅིག་པ་ཡིས་རྣམ་པར་འབྱེད། །བཀྲམ་པ་དང་ནི་སྡུད་པ་དང་། །རྗེས་འགྲོ་ལྷན་ཅིག་སྤྱོད་པ་ཡི། །རིམ་པས་རྫོགས་པར་ཤེས་པར་བྱ། །
དེ་ལྟར་བསམ་གཏན་ལ་སེམས་རྟོན་པའི་རྣལ་འབྱོར་པ་སྟོང་པ་ཉིད་དང་སྙིང་རྗེ་ཆེན་པོས་ཡོངས་སུ་ཟིན་པའི་ཆོ་ག་ཇི་སྲིད་སྐྱོ་བར་མ་གྱུར་གྱི་བར་དེ་སྲིད་དུ་ཡོངས་སུ་བསྒོམས་ནས་ལྡང་བར་འདོད་པ་ན། བཀུག་པ་དང་བསྐྱེད་པའི་འཁོར་ལོ་གཤེགས་པར་བྱ་བ་དང་། དམིགས་པ་ཐིམ་པའི་མན་ངག་
གིས་བཟོད་པར་གསོལ་བ་དང་། དགེ་བའི་རྩ་བ་ཐམས་ཅད་གཞན་དུ་མ་གྱུར་པར་ཡོངས་སུ་བསྔོ་བར་བྱའོ། །དཔལ་ལྡན་ཡེ་ཤེས་འཁོར་ལོ་མཆོག་གི་ནི། །གནས་མཐོང་བླ་མའི་ཞལ་གྱི་དྲིན་ཐོབ་ནས། །ཇི་བཞིན་མདོར་བསྡུས་སྒྲུབ་ཐབས་འདི་བྲིས་པས། །སྐྱེས་ཀུན་ཐུགས་རྗེ་ཆེ་

73-1-137a

མངའི་ཞལ་མཐོང་ཤོག །དཔལ་ཁཪྶ་པཱ་ཎ་ཡེ་ཤེས་ཀྱི་འཁོར་ལོའི་སྒྲུབ་ཐབས་རྫོགས་སོ།།       །།༄༅།  །འཕགས་པ་སྤྱན་རས་གཟིགས་དབང་ཕྱུག་ཡིད་བཞིན་ནོར་བུ་ལ་ཕྱག་འཚལ་ལོ། །དེ་ནས། ཡིད་བཞིན་ནོར་བུ་དཀྱིལ་འཁོར་འཁོར་ལོ་ཆེ། །ཞེས་འབྱུང་བའི་སྒྲུབ་
ཐབས་བཤད་པར་བྱའོ། །ཁོ་ན་ཉིད་ཐུགས་གསུང་དང་སྐུ། །ཡོན་ཏན་ཕྲིན་ལས་དམ་ཚིག་བཅས། །དཔལ་ལྡན་དཀྱིལ་འཁོར་ཆེར་བཏུད་དེ། །ཡིད་བཞིན་ནོར་བུའི་སྒྲུབ་ཐབས་བཤད། །བདག་ཉིད་ཆེན་པོས་ཕུན་ཚོགས་བཞིར། །ཆོས་ཀུན་རང་བཞིན་ཉིད་དྲན་པས། །སྙིང་རྗེ་ལས་གྲུབ་
དྲང་སྲོང་བསྐྱེད། །ཧྲཱིཿཡིག་ལ་གནས་ཏིང་འཛིན་སྒྲུབ། །ཡེ་ཤེས་རྒྱལ་བ་བཅུ་གནས་སུ། །ཉིད་ཀྱི་སྙིང་པོ་ལས་སྤྲོས་པས། །ལྷར་བཅས་གཞལ་ཡས་ཁང་བསམས་ཏེ། །མར་མེ་ལས་ནི་མར་མེ་ལྟར། །ཧ་ཧྲཱིཿཧཱུཾ་ཕཊ། འདབ་བརྒྱད་ཤར་སོགས་ཕྱོགས་བཞི་ལ། །དོན་ཡོད་ཞགས་
སོགས་བཞི་ཡིན་ཏེ། །མཚམས་བཞིར་བུམ་པ་བཟང་བཞི་གནས། །འདི་ནི་ཡེ་ཤེས་འཁོར་ལོའོ། །དྷཱིཿམཻ་ཧཱུཾ་ཧྲཱིཿ། དེ་ལས་འཁོར་ལོ་གཞན་འབྱུང་བ། །འཇམ་དབྱངས་བྱམས་པ་རྡོ་རྗེ་འཛིན། །གནོད་མཛེས་ཕྱོགས་རྩིབས་བཞི་ལས་ཏེ། །ཛཿཧཱུཾ་བཾ་ཧོཿ། དབྱངས་ཅན་ལ་སོགས་ཡུམ་
མཚམས་བཞིར། །ཨ་ཨི་ཨུ་རྀ་ལྀ་ཨེ་ཨོ་ཨཾ། །དེ་མཐར་རྩིབས་བརྒྱད་སེམས་མ་བརྒྱད། །ཨཱ་ཨཱི་ཨཱུ་རཱྀ་ལཱྀ་ཨཻ་ཨཽ་ཨཿ། དེ་བཞིན་དེ་མཐར་སེམས་དཔའ་བརྒྱད། །རྩིབས་བརྒྱད་ལ་གནས་ཐུགས་གསུང་སྐུ། །བརྒྱད་གསུམ་འཁོར་ལོ་རིམ་གྱིས་མཛེས། །ཨཿརྣམ་དག་ཡོན་ཏན་
རྩིབས་སྟོང་ལྡན། །འཁོར་ལོ་འབར་བ་གཞན་འབྱུང་བའང་། །བསྐལ་བཟང་སངས་རྒྱས་སྟོང་གིས་བརྒྱན། །ཨ་སྟོང་ལས་སྐྱེས་རིམ་བཞིན་དགོད། །ཧཱུཾ། དེ་དག་ལས་ཀྱང་འཁོར་ལོ་གཞན། །རྩིབས་སྟོང་ལས་ཧཱུཾ་སྟོང་ལས་སྐྱེས། །ལྔ་བརྒྱ་ལྔ་བརྒྱ་རྒྱལ་སྲས་མཛད། །ཕྲིན་ལས་
འཁོར་ལོ་ཞེས་བཤད་དོ། ཛཿཧཱུཾ་བཾ་ཧོཿ། སྒོ་བཞིར་ལྕགས་ཀྱུ་ཞགས་སོགས་བཞི། །ཁྱམས་རྣམས་སུ་ནི་མཆོད་པའི་ལྷ། །ཁོར་ཡུག་དུར་ཁྲོད་ཀུན་རྫོགས་ལྡན། །དམ་ཚིག་འཁོར་ལོ་ཞེས་བྱར་གྲགས། །དེ་རྗེས་དཀྱིལ་འཁོར་ཆེན་པོ་ཡི། །ཡེ་ཤེས་རི་མཆོག་ལས་བཀུག་

73-1-137b

གཞུག །མེ་ལོང་གཉིས་གཟུགས་བྲག་ཅ་དང་། །མཁའ་འདྲར་དག་པ་རྟོགས་པར་བྱ། །ཇི་སྲིད་གཉིས་མེད་མཉམ་འཇོག་པ། །དེ་སྲིད་དེ་ཡོད་མི་འགལ་བའམ། །ཡང་ན་རོ་གཅིག་བསམ་གཏན་གནས། །སྐྱོ་བར་གྱུར་ན་གསང་སྔགས་བཟླས། །ཨོཾ་ཨཱཿཧྲཱིཿབཛྲ་ཛྙཱ་ན་ཙིནྟ་མ་ཎི་རཏྣ་
མཎྜལ་ཙཀྲ་པྲི་ཏི་སྠི་ཏི་ཧཱུཾ་སརྦ་བུདྡྷ་ཏ་ཏྭཱ་གརྦྷེ་ཀཱ་ཡ་ཝ་ཀཱ་ཙིཏྟ་གུ་ཎ་ཀརྨ་ས་མ་ཡ་པྲ་སིདྡྷཾ་ཧཱུཾ། སརྦ་ཏ་ཐཱ་ག་ཏོ་ཛྙཱ་ན་གརྦྷེ་བི་ཤུདྡྷ་བཛྲ་ཏ་ཏྭཱ་ཨ་དྷི་ཥྛཱ་ན། ཛྭ་ལ་ཛྭ་ལ། སྥ་ར་སྥ་ར། སརྦ་པཱ་པ་བྷིཀྐ་ནཾ། ད་ཧ་ད་ཧ། ཧ་ར་ཧ་ར། ཤཱནྟ་ཀ་ར་ཡེ་ཧཱུཾ་ཕཊ་སྭཱ་ཧཱ། དེ་བཞིན་གཤེགས་ཀུན་སྙིང་པོ་འདིས། །དཀྱིལ་འཁོར་
བདག་པོ་ཀུན་མཉེས་བྱེད། །དད་དང་སྙིང་བརྩེ་བདེན་སྟོབས་མཐུས། །མ་ལུས་ཐུགས་བསྐུལ་འོད་འཕྲོ་འགྱུར། །རང་རང་རྗེས་མཐུན་དོན་བསྒྲུབས་ནས། །ས་གསུམ་མགོན་པོའི་སྲས་གྱུར་ཏེ། །བསམ་གཏན་རྒྱུན་གཅིག་ལ་གནས་མཐར། །དངོས་པོ་ཀུན་མཆོད་བཟོད་པར་གསོལ། །
དེ་རྗེས་བྱང་ཆུབ་སེམས་ལྡན་པས། །ཐལ་སྦྱར་ཡི་དམ་གསུམ་བླངས་ལ། །དངོས་གྲུབ་དོན་དུ་གསོལ་བཏབ་སྟེ། །བདེ་བར་སྤྱོད་ཡུལ་གཤེགས་པར་བྱ། །ཡིད་བཞིན་ནོར་བུའི་དཀྱིལ་འཁོར་ཆེ། །བརྟག་པའི་རྒྱལ་པོ་བླ་ན་མེད། །མ་ལུས་ཀུན་དོན་སྒྲུབ་བྱེད་པ། །འདིར་བསྡུས་
མྱུར་བདག་གཏེར་ཆེན་གྱུར། །སྤྱན་རས་གཟིགས་ཡིད་བཞིན་ནོར་བུའི་སྒྲུབ་ཐབས་རྫོགས་སོ།།      །།༄༅།  །འཕགས་པ་སྤྱན་རས་གཟིགས་པོ་ཏ་ལ་ཀེ་རིའི་རྩེ་མོ་པ་ལ་ཕྱག་འཚལ་ལོ། །དེ་ནས། རི་མཆོག་དཀྱིལ་འཁོར་རྒྱལ་པོ་ཁྱོད། །ཅེས་འབྱུང་བའི་སྒྲུབ་པའི་ཐབས་བཤད་
པར་བྱའོ། །ཐུགས་རྗེ་ཡི་སྟོབས་རི་མཆོག་རྩེར། །ཉི་ཤུ་རྩ་ལྔའི་བདག་ཉིད་སྟོན། །འཇིག་རྟེན་གསུམ་མགོན་ལ་བཏུད་དེ། །དེ་ཡི་སྒྲུབ་ཐབས་མདོར་བསྡུས་བྲི། །དང་པོར་རེ་ཞིག་རྣལ་འབྱོར་གྱི་དབང་ཕྱུག་ཚངས་པའི་གནས་བཞིས་ཡིད་ཉེ་བར་བརླན་པར་བྱས་ལ། བསམ་གཏན་གྱི་ཁང་
བུ་ལ་སོགས་པའི་གནས་མལ་གང་ཡིན་པ་པོ་ཏ་ལ་ཀེ་རིའི་རྒྱལ་པོར་བྱིན་གྱིས་བརླབས་ཏེ། དེར་གཞལ་མེད་ཁང་རིན་ཆེན་སྣ་བདུན་གྱི་རང་བཞིན་བཀོད་པ་ཕུན་སུམ་ཚོགས་པར་བཀོད་པ། འཕགས་པ་སྤྱན་རས་གཟིགས་དབང་ཕྱུག་འཁོར་གྱི་དཀྱིལ་འཁོར་དང་བཅས་པ་མངོན་པར་

73-1-138a

བལྟ་བར་བྱའོ། །ཧྲཱིཿ། འདམ་སྐྱེས་སྡོང་བུ་འདབ་བརྒྱད་དབུས། །བདག་ཉིད་འཇིག་རྟེན་དབང་ཕྱུག་བསྐྱེད། །དེ་ནི་ཟླ་མདོག་སྐྱིལ་ཀྲུང་ཕྱེད། །མཆོག་སྦྱིན་པདྨ་འཛིན་པའོ། །ཨ་ཨི་ཨུ་ཨེ། ཤར་སོགས་ཕྱོགས་དང་མཚམས་རིམ་བཞིན། །འཁོར་ལོ་རིན་ཆེན་པདྨོ་ལས། །
ཕྱོགས་ཀྱི་ཁ་དོག་གཞོན་ནུའི་ཚུལ། །གཏེར་ཆེན་བུམ་པ་བཞིས་གང་བའོ། །ཨཱ་ཨཱི་ཨཱུ་ཨཻ། དེ་མཐར་འཁོར་ལོ་རྩིབས་བརྒྱད་ལ། །ཕྱོགས་མི་ཕྱོགས་ཀྱི་ཁ་དོག་ཅན། །གཏི་མུག་རྡོ་རྗེ་སྒྲོལ་མ་ཅན། །བག་ཆགས་རྡོ་རྗེ་རྡོ་རྗེ་འཛིན། །འདོད་ཆགས་རྡོ་རྗེ་ཞགས་པ་ཐོགས། །ཞེ་སྡང་རྡོ་རྗེ་
རལ་གྲི་བསྣམས། །ཨོ་ཨཽ་ཨཾ་ཨཿ། བྱང་ཤར་ལ་སོགས་མཚམས་བཞི་ཡུམ། །བརྟན་པའི་རྡོ་རྗེ་རི་རབ་འཛིན། །སྦྱོར་བའི་རྡོ་རྗེ་ཟླ་བ་དང་། །འབར་བའི་རྡོ་རྗེ་ཉི་མ་ཅན། །སྟོབས་ཀྱི་རྡོ་རྗེ་བ་དན་ཐོགས། །ཁ་དོག་ཕྱེད་གཟུགས་སྒེག་མོའི་ཚུལ། །ཀ་ཙ་ཊ་ཏ། ཁྱམས་ཀྱི་ཤར་སོགས་
ཕྱོགས་བཞིར་ཡང་། །ཕྱོགས་མདོག་གར་གྱིས་རོལ་པ་མོ། །རྡོ་རྗེ་གཟུགས་མཛེས་མེ་ལོང་ཅན། །རྡོ་རྗེ་སྒྲ་སྙན་པི་ཝང་བསྒྲེང་། །རྡོ་རྗེ་དྲི་མཆོག་བྱུག་པ་ཐོགས། །རྡོ་རྗེ་རོ་བཟངས་ཞལ་ཟས་འཛིན། །པ་ཡ་ཤཀྵཿ། དེ་བཞིན་བྱང་ཤར་སོགས་གྲྭ་བཞིར། །རྡོ་རྗེ་རེག་མ་གོས་མཆོག་ཐོགས། །
རྡོ་རྗེ་ཆོས་མ་ཆོས་འབྱུང་ཅན། །རྡོ་རྗེ་ཞིང་མ་མཎྜལ་འཛིན། །རྡོ་རྗེ་སྣང་མ་སྒྲོན་མ་ཐོགས། །ཡིད་འོང་ཕྱོགས་ཕྱེད་མདོག་ཅན་ལའོ། །རྀ་རཱྀ་ལྀ་ལཱྀ། དེ་ནས་ཤར་སོགས་སྒོ་བཞིར་ཡང་། །ལྕགས་ཀྱུ་ཞགས་པ་ལྕགས་སྒྲོག་དྲིལ། །ཕྱོགས་མདོག་ཅུང་ཟད་ཁྲོ་བའི་ཚུལ། །དེ་ལྟར་ཀུན་ཕྱག་གཡོན་
པདྨོ། །བརྩོན་པའི་ཆ་བྱད་པད་ཟླ་ལ། །རང་གི་ས་བོན་ལས་གྱུར་མཚུངས། །དེ་རྗེས་སྒྱུ་མ་ཏིང་འཛིན་ལ། །གནས་ནས་དག་པ་རྟོགས་པར་བྱ། །གནས་དང་ལུས་རབ་རྣམ་པར་དག །དཀྱིལ་འཁོར་འཁོར་ལོ་ཞེས་བྱར་བརྗོད། །དེ་བཞིན་ལུས་དང་སེམས་རབ་དག །ཉི་ཤུ་ལྔ་ཡི་
བདག་ཉིད་དོ། །ཕེཾ་ཕེཾ་ཕེཾ་ཕེཾ། དེ་ནས་ཡེ་ཤེས་དཀྱིལ་འཁོར་ལྷ། །ཇི་བཞིན་བཀུག་ལ་མཆོད་སོགས་བཅས། །གསོལ་བཏབ་དམ་ཚིག་མཐུ་བསྐྱེད་དེ། །རིག་པའི་ཏིང་འཛིན་ལྡན་པས་བཟླས། །ཨོཾ་ཨཱཿཧྲཱིཿཔོ་ཏ་ལ་ཀེ་རུ་ཏུ་མ་ཧཱ་ཀཱ་རུ་ཎཱི་ཀ་ཧཱུཾ་ཧཱུཾ་ཕཊ་སྭཱ་ཧཱ། ཨ་ཨི་ཨུ་ཨེ། ཨཱ་ཨཱི་

73-1-138b

ཨཱུ་ཨཻ། ཨོ་ཨཽ་ཨཾ་ཨཿཀ་ཙ་ཊ་ཏ། པ་ཡ་ཤཀྵཿ། རྀ་རཱྀ་ལྀ་ལཱྀ། ཧཱུཾ་ཕཊ་སྭཱ་ཧཱ། གལ་ཏེ་དམིགས་པའི་སྦྱོར་བ་ཡིས། །སྐྱོ་བར་གྱུར་ན་སྦྱོར་བྲལ་བ། །ཤིན་ཏུ་དམིགས་མེད་ཞི་བའི་རྒྱུ། །མཁས་པས་རྫོགས་པའི་རིམ་པ་བསྒོམ། །ནམ་ཞིག་དེ་ལས་ལྡང་འདོད་ཚེ། །སྙིང་རྗེ་ཆེན་པོས་བློ་བསྐྱེད་
ལ། །དཔལ་ལྡན་ཉི་ཤུ་རྩ་ལྔའི་བདག །དཀྱིལ་འཁོར་མཆོད་སོགས་བྱ་ཕྱིར་འབད། །བདུན་ཕྲག་གཅིག་གམ་གཉིས་སམ་གསུམ། །ཇི་སྟེ་བརྒྱའམ་བདུན་ཕྲག་བཅུས། །དམ་ཚིག་བསམ་གཏན་ལྡན་སྤྱོད་ལ། །དངོས་གྲུབ་ཐེ་ཚོམ་མི་བྱའོ། །རྡོ་རྗེ་འཛིན་པས་རྒྱུད་དང་ནི། །བླ་མ་
སངས་རྒྱས་འདྲར་བཤད་དེ། །རྒྱུད་བྲལ་བླ་མ་སྤངས་པ་ལ། །དངོས་གྲུབ་ཡོད་པར་མ་གསུངས་ཕྱིར། །མཚན་མ་ཙམ་མཐོང་བདག་གིས་འདིར། །བླ་མའི་གསུང་གི་རྒྱུད་དོན་བསྡུས། །དགེ་འདིས་འགྲོ་ཀུན་པོ་ཏ་ལའི། །རི་མཆོག་ནམ་ཞིག་བགྲོད་པར་འགྱུར། །དཔལ་ཐུགས་རྗེ་
ཆེན་པོ་པོ་ཏ་ལ་ཀེ་རིའི་རྩེ་མོའི་སྒྲུབ་ཐབས་རྫོགས་སོ།།      །།༄༅། །འཕགས་པ་ཐུགས་རྗེ་ཆེན་པོ་འཁོར་ལོས་སྒྱུར་བའི་རྒྱལ་པོ་ལ་ཕྱག་འཚལ་ལོ། །དེ་ནས། འཁོར་ལོས་སྒྱུར་རྒྱལ་དཀྱིལ་འཁོར་སྟོན། །ཞེས་འབྱུང་བའི་སྒྲུབ་ཐབས་བཤད་པར་བྱའོ། །དེ་ནས་གཞན་ཡང་བཤད་
བྱ་བ། །འཁོར་ལོས་སྒྱུར་རྒྱལ་འཇིག་རྟེན་མགོན། །དཔལ་ལྡན་ཡེ་ཤེས་དཀྱིལ་འཁོར་ཆེ། །དོན་ཀུན་གྲུབ་བྱེད་བརྟག་པའོ། །རྒྱུ་སྐར་རྒྱལ་པོ་རྒྱལ་ལ་བབ་པའམ། །ཡང་ན་ཟླ་བ་ཚེས་དང་ཟླ་བ་ཉ། །སྣ་ཚོགས་མེ་ཏོག་འབྲས་བུ་རྒྱས་པའི་ཚེ། །སྐལ་བཟང་རྣམས་ཀྱིས་མགོན་
མཆོད་སྡིག་པ་བསལ། །དཀྱིལ་འཁོར་ཆེན་པོ་རྒྱན་གྱིས་སྤྲས། །སྣ་ཚོགས་དྲི་བསུང་ངད་ལྡན་པའི། །མེ་ཏོག་གཅལ་བཀྲམ་ལྷབ་ལྷུབ་ཅན། །མཆོད་རྫས་ཡོ་བྱད་སྤྲིན་གཏིབས་ནས། །སྟོབས་ཆེན་སྔོན་འགྲོ་ཉི་མ་དང་པོ་བུམ་པ་དང་ནི་ལྷ། །ལྷག་པར་གནས་བྱས་གཉིས་པ་ཏིང་
འཛིན་རྒྱལ་པོ་ལ་གནས་བཟླས། །གསུམ་པ་མཆོད་བྱིན་གོ་རིམས་ནུས་སྦྱར་བཟོད་པར་གསོལ། །དེ་མཐར་བཀྲ་ཤིས་རྡོ་རྗེ་ཆུས་བཀྲུས་དངོས་གྲུབ་བླང་བར་བྱ། །བླ་མའི་མན་ངག་ཇི་བཞིན་དུ། །མཁས་པས་དཀྱིལ་འཁོར་བྲིས་ནས་སུ། །རྡོ་རྗེ་འཁོར་ལོ་ཕྱག་རྒྱ་ཡིས། །ལྷ་

73-1-139a

དགུ་འཁོར་ལོས་སྒྱུར་བར་བསམ། །ལྟེ་བ་འདམ་སྐྱེས་གེ་སར་འཁྲུངས། །རྡོ་རྗེས་མཚོན་པ་དཔལ་ཆེན་ཉིད། །ཤར་སོགས་རིན་ཆེན་རྩིབས་བརྒྱད་འཁོར་ལོ་རྣམ་བདུན་གཏེར་ཆེན་བཅས་ལྷ་མོ། །ཁྱམས་བཟང་རབ་མཉམ་བཻ་ཌཱུརྱ་ཡི་ངོས་ལ་ཉི་ཤུ་རྩ་བཞིས་མཆོད་པ་ཡི། །ལྷ་མོ་
རྣམས་དང་དེ་བཞིན་སྒོ་བཞིར་ལྕགས་ཀྱུ་ཞགས་པ་སོགས་དགེས་རོལ་པའོ། །མུ་ཁྱུད་ཁོར་ཡུག་བཀྲ་ཤིས་ཀྱི། །རྫས་བཅུ་གྲུབ་པ་ཉི་ཤུས་བསྐོར། །དཔལ་མེད་ལྷ་རྫས་ཡོ་བྱད་ཀྱིས། །ཤིན་ཏུ་ཕུན་ཚོགས་བརྩེ་བ་ཡིན། །ཨོཾ་ཨཱཿཧྲཱིཿཙཀྲ་ཝརྟི་མཎྜ་ལ་སིདྡྷི་ཕཊ་སྭཱ་ཧཱ། ཤེས་རབ་ཐབས་
བྱུང་སྐད་ཅིག་སྦྱོར་བས་བདག་ཉིད་འཁོར་ལོས་སྒྱུར་རྒྱལ་གསལ་བསྐྱེད་ལ། །སྙིང་པོ་ལས་འཕྲོས་ལྕགས་ཀྱུའི་ཟེར་གྱིས་ཇི་བཞིན་ཉིད་བཀུག་མཉེས་བྱས་དབྱེར་མེད་གཞུག །བདག་དང་དཀྱིལ་འཁོར་ལྷ་ཚོགས་བཅས་བཟླས་རྡོ་རྗེ་ཕྲེང་རྒྱུན་ཡི་གེར་བཞུགས་པས། །བུམ་པ་བཟང་བཀང་
ཐུན་མཚམས་ཀུན་རྟག་མཉམ་གཞག་ཆེ་གནས་དངོས་ཀུན་མཆོད་བརྩོན་བྱ། །ཐུགས་རྗེ་ཆེན་པོ་ཅན་དཔལ་འཁོར་ལོས་སྒྱུར་བའི་སྒྲུབ་ཐབས་རྫོགས་སོ།།      །།༄༅། །དཔལ་ཐུགས་རྗེ་ཆེན་པོ་ལུས་ཀྱི་འཁོར་ལོ་ཆེན་པོ་ལ་ཕྱག་འཚལ་ལོ། །འཇིག་རྟེན་མགོན་གྱི་མན་ངག་གིས། །སྔགས་
འཆང་རྒྱལ་པོ་རང་གི་ལུས། །པདྨ་འཁོར་ལོས་བརྒྱན་གཞལ་མེད། །སེམས་ཀྱིས་ལྷ་བཅུ་གཅིག་བཅས་བསྒོམ། །རྩི་ཡིས་ལྕགས་གོང་གསེར་བཞིན་དུ། །ཕུང་པོ་ཡེ་ཤེས་སྤྱོད་ཡུལ་བསྒྱུར། །དེ་དབུས་སྙིང་གི་འདབ་བཞི་དང་། །ཡན་ལག་དྲུག་རྩིབས་མཁས་པས་བསྒོམ། །ཧྲཱི། ཀུན་
གཞི་རྣམ་དག་ལྷུན་གྱིས་གྲུབ། །འཇིག་རྟེན་དབང་ཕྱུག་གངས་རིའི་མདོག །ཏིང་འཛིན་མཆོག་གིས་མཉམ་གཞག་པ། །བག་ཆགས་མ་ལུས་བཅོམ་པའོ། །ཧཱུཾ། གཏི་མུག་རྣམ་དག་རྣམ་མི་རྟོག །གཏི་མུག་རྡོ་རྗེ་ནམ་མཁའི་མདོག །དུས་གསུམ་བདེ་གཤེགས་ཆོས་སྟོན་པ། །ཐབས་
པོ་མ་ལུས་གཏན་བཅོམ་པའོ། །ཨོཾ། འདོད་ཆགས་རྣམ་དག་བདེ་བ་ཆེ། །འདོད་ཆགས་རྡོ་རྗེ་ཟླ་བའི་མདོག །རྡོ་རྗེ་དྲིལ་བུ་བསྣོལ་འཛིན་པ། །གདུང་བ་མ་ལུས་གཏན་བཅོམ་པའོ། །དྷཱི། ཞེ་སྡང་རྣམ་དག་འོད་གསལ་བ། །ཞེ་སྡང་རྡོ་རྗེ་མེ་ལྕེའི་མདོག །འབར་བའི་ཕྱག་རྒྱ་སྡིགས་མཛུབ་བསྒྱིངས། །

73-1-139b

འཁྲུག་པ་མ་ལུས་གཏན་བཅོམ་པའོ། །ཨཿ ཀུན་རྟོག་རྣམ་དག་གྱ་གྱུ་མེད། །ཀུན་རྟོག་རྡོ་རྗེ་ཨིནྡྲའི་མདོག །འབར་བའི་གར་གྱིས་རྣམ་པར་རོལ། །འདུ་བྱེད་མ་ལུས་གཏན་བཅོམ་པའོ། །འདི་དག་ནི་དབུས་ནས་བརྩམས་ཏེ་ཤར་ལ་སོགས་པའི་འདབ་མ་བཞིའི་གེ་སར་ལ་བསྒོམ་པར་
བྱའོ། །དེ་ནས་འགྲོ་བ་དྲུག་གི་རྣམ་པར་དག་པ་དགོད་པར་བྱ་སྟེ། ལྷ་རིགས་རྣམ་དག་འཆི་འཕོ་མེད། །དབང་པོ་རྡོ་རྗེ་གུར་གུམ་མདོག །མེ་ཏོག་ཕྲེང་བའི་ཆུན་པོ་འཛིན། །དྲེགས་པ་མ་ལུས་སྤངས་པའོ། །ཨ། ལྷ་མིན་རྣམ་དག་འཁྲུག་པ་མེད། །དྲག་པོ་རྡོ་རྗེ་རྒྱ་སྐྱེགས་མདོག །རལ་
གྲི་དང་ནི་འཁོར་ལོ་འཛིན། །ཕྲག་དོག་མ་ལུས་ཀུན་སྤངས་པའོ། །ཨི། མི་དབང་རྣམ་དག་བྲེལ་ཕོངས་མེད། །དབང་ཕྱུག་རྡོ་རྗེ་རྫ་གསར་མདོག །རྡོ་རྗེ་དང་ནི་དྲིལ་བུ་འཛིན། །རྣམ་པར་གཡེངས་པ་ཀུན་སྤངས་པའོ། །ཨུ། དུད་འགྲོ་རྣམ་དག་བླུན་རྨོངས་མེད། །སེང་གེ་རྡོ་རྗེ་དུ་
བའི་མདོག །དགྲ་སྟ་དང་ནི་དབྱིག་པ་འཛིན། །བག་མེད་བཏུལ་བ་ཀུན་སྤངས་པའོ། །ཨེ། ཡི་དགས་རྣམ་དག་སེར་སྣ་མེད། །གཤིན་རྗེ་རྡོ་རྗེ་ཆར་སྤྲིན་མདོག །ཐོད་པ་དང་ནི་ཞགས་པ་འཛིན། །འཇུངས་པའི་སྲིད་པ་ཀུན་སྤངས་པའོ། །ཨོ། དམྱལ་བ་རྣམ་དག་ཚ་གྲང་མེད། །འཇིགས་
སྐྱོབ་རྡོ་རྗེ་བྱི་རུའི་མདོག །བུམ་པ་དང་ནི་ལྷུང་བཟེད་འཛིན། །མི་བཟད་ཡང་ཀུན་སྤངས་པའོ། །ཨཾ། འདི་དག་ནི་མགོ་ནས་བརྩམས་ཏེ་གཡས་ལ་སོགས་པའི་རྩིབས་དྲུག་གི་ལྟེ་བར་བསྒོམ་པར་བྱའོ། །དམ་ཚིག་ལུས་དང་སེམས་ལ་ནི། །ཡེ་ཤེས་སྐུ་དང་ཐུགས་བཅུག་ནས། །ས་བོན་གསུང་
གི་ཡི་གེ་བཟླས། །ཚེ་འདི་ཉིད་ལ་མཆོག་འགྲུབ་འགྱུར། །ཐུགས་རྗེ་ཆེན་པོ་ལུས་ཀྱི་འཁོར་ལོ་འབར་བ་རྫོགས་སོ།།     །།༄༅། །འཕགས་པ་ཐུགས་རྗེ་ཆེན་པོ་དཀའ་ཐུབ་ཅན་ལ་ཕྱག་འཚལ་ལོ། །དེ་ནས། དཀའ་ཐུབ་ཆེན་པོ་དཀའ་ཐུབ་མཉེས། །ཞེས་འབྱུང་བའི་སྒྲུབ་ཐབས་བཤད་
པར་བྱའོ། །འདིར་འཕགས་པ་སྤྱན་རས་གཟིགས་དབང་ཕྱུག་ལ་དད་པ་ཐོབ་པའི་སྐྱེ་བོ་སྲན་ཐུབ་པ་རྣམས་ཀྱིས། དུས་དང་ཆོ་གའི་ཁྱད་པར་ལ་མ་ལྟོས་པར་ཤིན་ཏུ་མྱུར་དུ་འགྲོ་བ་བསྐྱབ་པར་འདོད་པས། ཞག་གཅིག་གམ་གཉིས་སམ་གསུམ་མམ་བདུན་གྱི་བར་དུ་བཅོམ་ལྡན་འདས་དྲང་

73-1-140a

སྲོང་ཆེན་པོ་དཀའ་ཐུབ་ཡིད་ལ་བྱེད་པ་དང་མི་འབྲལ་བས་བསྒྲུབ་པར་བྱའོ། །འཇིག་རྟེན་དབང་ཕྱུག་དྲང་སྲོང་ཆེ། །མྱ་ངན་མེད་པའི་སྡོང་བུའི་འགྲམ། །རི་དགས་སྟན་ཅན་དཀའ་ཐུབ་ཚལ། །རྒྱན་སྤངས་སྙིང་རྗེས་གདུངས་པ་བསྒོམ། །མགོན་པོའི་རྟེན་ནི་གང་ཡང་རུང་། །ཡེ་
ཤེས་ལྡན་དེ་དེར་བཅུག་མདུན། །ཕོངས་པ་དག་ནི་མྱ་ངན་གྱི། །ཆ་བྱད་ཀྱིས་སྨད་ཁས་ཕུབ་འདུག །ལག་པ་གཉིས་ནི་འགྲམ་བརྟེན་ཅིང་། །མི་རོ་བཞིན་དུ་རྐང་བརྐྱང་བ། །བཟའ་བཏུང་སྤངས་དང་གོས་བྲལ་དང་། །མཆི་མས་གདོང་ཁེབས་སྨྲེ་སྔགས་བརྗོད། །སྤྱོད་ལམ་གཉིས་ཏེ་འགྲེ་
ལྡོག་དང་། །རིང་དུ་ཟག་པ་དོར་བའོ། །དེ་བཞིན་ངག་གཉིས་སྨྲེ་སྔགས་བསྔགས། །སེམས་པ་ཡང་ནི་གཉིས་ཉིད་དེ། །སྙིང་རྗེས་སྐྱེ་བོ་བསྒྲལ་བ་དང་། །ཐབས་སུ་འཕགས་པ་མཐོང་འདོད་པའོ། །ཇི་སྟེ་སྨྲ་བ་ལ་མངོན་པར་དགའ་བ་ཞིག་ན་སྔགས་ཀྱི་དམ་ཚིག་ཀྱང་བརྗོད་པར་བྱའོ། །
ན་མཿཤྲཱི་ལོ་ཀྱ་ནཱ་ཐཱ་ཡ། བོ་དྷི་སཏྭ་མ་ཧཱ་སཏྭ་མ་ཧཱ་ཀཱ་རུ་ཎི་ཀཱ་ཡ། མཱ་མ་ཏ་མུ་ཀེ་མ་ཧཱ་དུཿཿཁ་ཀླེ་ཤ་སརྦ་ཨཱ་བ་ར་ཎ་ཁ་སེ་ཁ་སེ་མེ་ཁ་སེ་མེ་ཕཊ་ཕཊ། མ་མ་ཤཱི་གྷྲཾ་ཨ་ནུ་གྲ་ཧ་ཨ་ནུ་གྲ་ཧ་ཧཱུཾ་ཧཱུཾ། ཡིད་ལ་བྱེད་པ་གཞན་བཏང་སྟེ། །ལྷ་མཆོག་སེམས་པ་གཅིག་པུ་ཡིས། །སྐྱེ་བོ་ཉོན་མོངས་
གཟིར་འདི་དག །ཞི་བར་བྱ་ཕྱིར་སྨྱུང་བར་གནས། །ཡུན་རིང་ཕན་པའི་དོན་མཐོང་ནས། །ཅུང་ཟད་བདེ་བ་ཅི་དགར་རུང་། །སེམས་ཅན་ཚོགས་མང་དོན་དུ་ནི། །བདག་གིས་དཀའ་ཐུབ་བཟོད་པར་བྱོས། །བག་མེད་ལུས་དང་སེམས་འདི་ནི། །གནོད་པར་བྱེད་ཀྱིས་ཕན་མི་བྱེད། །དེ་
རིང་དཀའ་ཐུབ་སྤྱད་པ་ཡིས། །ལུས་ཅན་ཀུན་གྱི་དོན་སྒྲུབ་བོ། །ཇི་ལྟར་དགྲ་བོ་ཁྲོས་པ་ལའང་། །ཐལ་སྦྱར་སྙིང་རྗེ་སྐྱེ་འགྱུར་ན། །ཐུགས་རྗེ་ཆེ་མངའ་འགྲོ་དོན་སྡོད། །བདག་ལ་ཇི་ལྟར་གཟིགས་མི་འགྱུར། །དེ་ལྟར་བསྟན་པ་བཟོད་ལྡན་པས། །ཉིན་འགའ་སྨྱུང་བར་སྤྱོད་ན་དེ། །དངོས་དང་
གཟུགས་བརྙན་རྨི་ལམ་དུ། །འཕགས་པས་ངེས་པར་རྗེས་སུ་འཛིན། །ཐུགས་རྗེ་ཆེན་པོ་དཀའ་ཐུབ་ཅན་གྱི་སྒྲུབ་ཐབས་རྫོགས་སོ།།      །།༄༅། །འཕགས་པ་སྤྱན་རས་གཟིགས་རྟག་པའི་རྣལ་འབྱོར་ལ་ཕྱག་འཚལ་ལོ། །དེ་ནས། སྤྱི་གཙུག་ཅོད་པན་རྟག་ཏུ་འཛིན། །ཞེས་

73-1-140b

འབྱུང་བའི་སྒྲུབ་ཐབས་བཤད་པར་བྱའོ། །འཇིག་རྟེན་མགོན་པོ་འཇིག་རྟེན་གྱི། །རྩ་ལག་གཅིག་པུ་ལ་བཏུད་དེ། །དེ་སྙིང་ཅོད་པན་གཙུག་ཏོར་གྱི། །རྣལ་འབྱོར་ཆོ་ག་བདག་གིས་བཤད། །དབེན་པའི་གནས་འདུག་འཁོར་བའི་མེ་འོབས་འབར་བ་དང་། །བདེ་བའི་རྐྱེན་ཚོགས་ཡིད་སྐྱོ་
མངོན་དགའ་དྲག་པོ་ཡིས། །ཐར་པའི་གྲོང་ཁྱེར་རྡུལ་བྲལ་སྐྱེད་མོས་ཚལ་བཟངས་སུ། །ཞུགས་ནས་རྗེས་འཇུག་དང་བ་དམ་པས་སེམས་དུལ་བྱ། །དེ་ནས་རྣལ་འབྱོར་ཞི་བ་འདིས། །བློ་ལྡན་རྒྱུད་རབ་བརླན་གྱུར་པ། །དེ་ཉིད་རྗེས་ཐོགས་དཔལ་གསུམ་གྱི། །ཆོ་ག་དམ་པ་བསྒོམ་པར་
བྱ། །ཨེ་མའོ་སྤྱི་གཙུག་རིན་ཆེན་ཁང་། །བཀྲ་ཤིས་མཆོད་རྟེན་དྲི་མ་མེད། །ཐུབ་པ་སྟོང་གིས་སྤྲས་པའི་སྒོ། །མགོན་པོ་ཉིད་ཀྱིས་དབུས་མཛེས་པའོ། །འདམ་སྐྱེས་དམར་འདབ་སྟོང་གི་སྙིང་། །ཨ་སྟོང་དེ་དབུས་སེམས་ཡིག་ཧཱུཾ། །འོད་གསལ་དཀར་འཁྱིལ་རྣམ་པར་འཕྲོ། །བུམ་
པའི་མར་མེ་འབར་བ་བཞིན། །དེ་བཞིན་ལྟེ་བའི་དཀྱིལ་འཁོར་དབུས། །ཉི་མའམ་ཟླ་བ་ལ་གནས་པའི། །རླུང་གི་རྒྱལ་པོ་མེ་ཡི་དབུས། །བདེ་བའི་ཆུས་བརླན་མཁྲེགས་པའི་ས། །རྣམ་དག་རྣམ་པར་འཕྲུལ་པའི་རྒྱུ། །འབྱུང་བཞིའི་རང་བཞིན་རཾ་ཡིག་བསམ། །དེ་ལས་འོད་འཕྲོས་
ཚ་རེག་འདིས། །རྩ་མཆོག་འདིས་བརྒྱུད་སྐྱོབ་པ་ཡིས། །ཐུགས་རེག་ཐུགས་བསྐུལ་ཐུགས་བྱུང་བའི། །བྱིན་བརླབས་ཞི་བྱེད་དག་བྱེད་དང་། །དྲི་མ་མེད་བྱེད་འོད་འཕྲོ་བྱེད། །རྣམ་བཞི་བདུད་རྩིའི་རྒྱུན་དབབ་བྱ། །གང་ཚེ་ཡེ་ཤེས་མཆོག་འདི་བབས་གྱུར་པ། །དེ་ཚེ་མི་གཡོ་འོད་
གསལ་རྣམ་པར་དག །ཀུན་འབྱུང་མཚོ་ཆེན་ཉི་འོད་སྒྲོན་མཆོག་དང་། །ནམ་མཁའི་ཡིད་བཞིན་ནོར་བུ་ཇི་བཞིན་ནོ། །བདེ་ཆེན་གཉིས་སུ་མེད་ཉིད་ལ། །ཇི་སྲིད་བཟོད་པར་ནུས་རེ་སྲིད། །མཉམ་པར་གཞག་བྱ་མི་གནས་ན། །དེ་ཚེ་དགེ་ཚོགས་དཔག་མེད་བསྒྲུབ། །དཔལ་ཐུགས་
རྗེ་ཆེན་པོ་རྟག་ཏུ་བྱ་བའི་རྣལ་འབྱོར་རྫོགས་སོ།།      །།༄༅། །དཔལ་སྤྱན་རས་གཟིགས་དབང་ཕྱུག་བླ་མའི་རྣམ་པར་སྣང་བ་ལ་ཕྱག་འཚལ་ལོ། །དེ་ནས་བླ་མ་འགྲོ་བའི་དགེས། །ཞེས་འབྱུང་བའི་སྒྲུབ་ཐབས་བཤད་པར་བྱའོ། །སྲིད་དང་ཞི་བ་འདི་དང་དེ་བཞིན་ཚེ་རབས་

73-1-141a

གཞན་པའི་བདེ་ལེགས་དང་། །དངོས་གྲུབ་མཆོག་བསྒྲུབ་ཡིད་བཞིན་ནོར་འདྲ་ཕྱོགས་བཅུ་དུས་གསུམ་གཤེགས་པ་ཡི། །བླ་མ་རྣམས་ཀྱིས་བསྒྲུབ་པའི་སྙིང་དབུས་དྲི་མེད་ཡེ་ཤེས་མཆོག་གཞུག་ཕྱིར། །སྤྱི་གཙུག་གདན་ལ་ཉིན་མཚན་རྒྱུན་དུ་བརྟན་བཞུགས་བྱིན་
རླབས་མཛད། །སྡུག་བསྔལ་རྒྱ་མཚོ་རབ་སྐེམས་ཤིང་། །བདེ་ཆེན་སྙིང་དཀྱིལ་སད་མཛད་པ། །སྐལ་ལྡན་སྟོན་པ་རྡོ་རྗེ་ཅན། །བླ་མར་བཏུད་དེ་དེ་བསྙེན་བཤད། །རེ་ཞིག་སྒྲུབ་པ་པོས་སྐྱབས་སུ་འགྲོ་བ་དང་། སེམས་བསྐྱེད་པ་རབ་ཏུ་ངེས་པར་བྱས་ནས། དུས་གསུམ་གྱི་
བདེ་བར་གཤེགས་པ་ཐམས་ཅད་ཀྱི་རྩ་བ་བླ་མ་དམ་པ་ཁོ་ན་ཡིན་ནོ་ཞེས་རྩེ་གཅིག་ཏུ་རྟོགས་པའི་རྒྱུ་མཚན་གྱིས། ཀུན་ནས་དད་པའི་རླན་ཕུན་སུམ་ཚོགས་པ་ལས་བྱང་ཆུབ་ཀྱི་སེམས་རིན་པོ་ཆེའི་ལྗོན་པ་ལེགས་པར་བསྐྱེད་དེ། ཡིད་དང་རྗེས་མཐུན་ལ་སོགས་སམ། །ཅི་རིགས་པ་ཡི་
གནས་སུ་ནི། །དད་ལྡན་རྣམས་ཀྱིས་དངོས་གྲུབ་རྩ། །དཔལ་ལྡན་བླ་མ་བསྒྲུབ་པར་བྱ། །ཐ་མལ་ལུས་ཀྱི་ཅོད་པན་རྩེར། །རྒྱལ་པོ་རྡོ་རྗེ་འཛིན་དབང་པོ། །ལོངས་སྤྱོད་རྫོགས་སྐུ་གསལ་བར་བལྟ། །དེ་ཡི་ཐུགས་ནི་ཡེ་ཤེས་ཧཱུཾ། །སྙིང་གི་པདྨོ་འདབ་སྟོང་དབུས། །བདག་གི་སྐྱོབ་པ་མི་དབང་
པོས། །གཅེར་བུ་རུས་པའི་རྒྱན་ལྡན་པ། །སྐྱིལ་ཀྲུང་འཛུམ་ཞལ་བསྒོམ་པར་བྱ། །འདབ་སྟོང་ལྕེ་ལ་སངས་རྒྱས་སྟོང་། །ཟེ་འབྲུ་ཁྱུད་སྐོར་ཉན་ཐོས་དང་། །རང་སངས་རྒྱས་རྣམས་ཀྱིས་བསྐོར་བ། །མཁའ་ལ་ཟླ་དཀར་ལྟར་གསལ་སྤྲུལ། །དེའི་རྗེས་ལ་སྤྱི་བོའི་གཙུག་གི་རྡོ་རྗེ་འཛིན་པའི་
ཐུགས་ཀའི་ཐད་སོ་ནས་མདུན་དུ་འདོམ་གང་མངོན་པར་གཞལ་བའི་ནམ་མཁའ་ལ་རང་གི་རྗེས་སུ་འཛིན་པའི་ཡི་དམ་གྱི་ལྷ་བསྒོམ་པར་བྱའོ། །དེའི་ཐུགས་ནི་རང་གི་ས་བོན་ནོ། །ཨོཾ་གྱིས་སྣ་དྲངས་པའི་ཨཱ་ལི་དང་། ཨཱཿས་སྣ་དྲངས་པའི་ཀཱ་ལི་དང་། ཧཱུཾ་གིས་སྣ་དྲངས་པའི་ལྷའི་སྔགས་
རྣམས་ཕྲེང་བའི་ཚུལ་དུ་གཤིབས་པས་མཐའ་བསྐོར་བའོ། །དེ་ནས་བདུན་རྣམ་པར་དག་པས་མཆོད་ལ། ལུས་དང་ངག་དང་ཡིད་ཀྱིས་ལྟོས་པ་ཉེ་བར་དོར་བའི་སྒོ་ནས་སྐྱབས་སུ་གཟུང་ཞིང་འདི་ལྟར་མཐོང་བའི་འཁོར་ལོའི་འཇིགས་པས་སྐྲག་པ་ལ་སོགས་པས་རྟེན་ལ་མི་ཕྱེད་པའི་དད་

73-1-141b

པ་དྲག་པོ་དང་། འདུན་པ་དང་། མངོན་པར་དགའ་བ་དང་། ཡང་དག་པར་མི་གཏོང་བའི་བློས་གསོལ་བ་གདབ་པར་བྱའོ། །ཇི་སྙེད་མཆོད་པ་རབ་འབྱམས་ནམ་མཁའི་མཐས་ཀླས་ས་གསུམ་གང་བར་གྱུར་པ་དང་། །བསྟོད་དབྱངས་སྙན་པ་སྣ་ཚོགས་རྒྱལ་བ་མཉེས་འགྱུར་འགྲོ་བའི་དོན་བསྒྲུབ་དངོས་
གང་ཡིན། །འདི་དག་བྱས་ལ་མི་བཟད་གདུང་བ་ཡང་ནི་རྡོ་རྗེ་འཛིན་དང་ཡིད་ཀྱི་ལྷ། །སྐྱབས་མཆོག་ངེས་བྱ་དེ་ཡིས་མི་གཏོང་ཐུགས་རྗེའི་ལྕགས་ཀྱུས་ཚམ་ཚོམ་མེད་པར་འཛིན་པར་བསམ། །དེ་ནས་ལྷ་ཡི་ས་བོན་དང་། །ཡི་གེའི་ཕྲེང་བ་ལས་བྱུང་བ། །གསལ་ཞིང་དྲི་མེད་རྣོན་པོ་ཡི། །
འོད་ཟེར་གྱིས་ནི་སྤྱི་བོར་དགྱེ། །བྱིན་གྱིས་བརླབས་པ་འདི་ཡི་མཐུས། །རྡོ་རྗེ་འཛིན་པའི་ཐུགས་བསྐུལ་ཞིང་། །དེ་ལས་ཐུར་དུ་ལྷུང་བའི་འོད། །བདག་སྙིང་བླ་མ་ལ་རེག་འགྱུར། །དེ་རྗེས་སྐྱོབ་པ་ལས་སྤྲོས་ཟེར། །ལྷ་ཡི་ཐུགས་ཀར་དང་བ་ཡི། །ཚ་ཟེར་ཡང་ནི་རབ་ཏུ་སྤྲོ། །དེ་ནས་བྱིན་བརླབས་
ཐག་གུ་ཡི། །བརྒྱུས་པའི་ཡེ་ཤེས་ཡིག་ཕྲེང་དག །ལྷ་ཡི་སྨིན་མཚམས་ནས་བྱུང་བ། །སྤྱི་བོའི་སྐྱོབ་པའི་ཚངས་བུག་ནས། །ཞུགས་གྱུར་ཐུགས་གཏམས་བདག་གི་བར། །དེ་ལྟར་ཡེ་ཤེས་ཀྱི་འོད་ཀྱི་རྒྱུན་བབས་པས་བདག་གི་རྒྱུད་ལ་དེ་ཁོ་ན་ཉིད་རྣམ་པར་ངེས་པ་འདི་ལྟ་སྟེ། གཉུག་མ་
ཉིད་དང་། རང་གྲོལ་བ་ཉིད་དང་། ལྷུན་གྱིས་གྲུབ་པ་ཞེས་བྱ་བའི་དོན་གསུམ་གྱི་ལུས་དང་སེམས་རབ་ཏུ་གང་བའི་ཡེ་ཤེས་དམ་པ་གང་ཡིན་པ་མངོན་དུ་བལྟས་ལ། ཡི་གེ་དེ་དང་དེ་དག་ཉིད་གསལ་བར་བཀླག་པ་མ་ཡེངས་པར་བྱ་བ་ནི་ཐབས་ཡིན་ནོ། །དེ་ཡིས་སློབ་དཔོན་སྐུ་གང་བ། །
ལྷག་གྱུར་རྫོགས་པའི་སངས་རྒྱས་སྤྲོ། །དེ་ལས་དེ་བཞིན་ཉན་ཐོས་སོགས། །ཕྱི་རོལ་སྲིད་མཐར་སྤྲོ་བར་བྱ། །སྣ་ཚོགས་མཛད་པ་མ་ལུས་པ། །ཕྲིན་ལས་བྱེ་བ་ཕྲག་བརྒྱ་ཡིས། །འགྲོ་བའི་དོན་བསྒྲུབ་བརྩེར་བཅས་པ། །སྐལ་ལྡན་རྣམས་ཀྱི་བློ་གྲོས་ལས། །མདུན་གྱི་སྤྱི་བོའི་ལྷ་ལ་བསྡུས་
པ་ལས། །རྟག་ཏུ་དྲན་པའི་རྒྱ་མི་བརྗེད་པའི་གཟུངས་ཉེ་བར་གཞག་པ་ཡོངས་སུ་བསམ་ཞིང་། །དེ་ལས་བྱུང་བའི་དགེ་བའི་རྩ་བ་བླ་མ་ལྷ་དང་བཅས་པའི་གྲུབ་པའི་རྒྱུར་རྣམ་པར་འཕང་བར་བྱའོ། །དཔལ་འཇིག་རྟེན་མགོན་པོ་བསྒྲུབ་པའི་མན་ངག་རྫོགས་སོ།།      །།༄༅། །ཐུགས་

73-1-142a

རྗེ་ཆེན་པོ་མཆོད་སྦྱིན་གྱི་དབང་པོ་ལ་ཕྱག་འཚལ་ལོ། །དེ་ནས། གཙོ་བོ་མཆོད་བྱ་མཆོད་སྦྱིན་བཞེས། །ཞེས་འབྱུང་བའི་སྒྲུབ་ཐབས་བཤད་པར་བྱའོ། །འཕགས་པ་སྤྱན་རས་གཟིགས་དཔལ་ཉིད། །གཙོར་བཅས་སངས་རྒྱས་སྲས་བཅས་ལ། །དང་བས་སྐྱབས་སུ་སོང་
ནས་ནི། །སྙིང་རྗེ་ཆེན་པོས་གཏོར་མ་སྦྱིན། །བདག་ཉིད་ལྷ་ཡི་རྣལ་འབྱོར་པས། །ལྕེ་དང་ལག་པ་སྣོད་དང་བཅུད། །གསང་སྔགས་རྒྱལ་པོས་བྱིན་བརླབས་ལ། །གཟི་བསྐྱེད་ཟབ་ཅིང་རྒྱ་ཆེས་མཆོད། །ཧྲཱིཿཨཱཿཧཱུཾ། ཨ་ཨཱ་ཨི་ཨཱི་ཨུ་ཨཱུ། རྀ་རཱྀ་ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ
ལྕེ་བྱིན་གྱིས་བརླབ་པའོ། །ཨ་ཨ་ཧཱུཾ་ཧཱུཾ། ཀ་ཁ་ག་གྷ་ང་། ཙ་ཚ་ཛ་རྡྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧཀྵཿལག་པ་བྱིན་གྱིས་བརླབ་པའོ། །ཧཱུཾ་ཀ་ཙ་ཊ་ཏ་པ་ཡ་ཥཀྵཿ། བཅུད་བྱིན་གྱིས་བརླབ་པའོ། །ཨོཾ་ཨཱཿཧཱུཾ་བཾ་ཧོཿགཟི་བྱིན་བསྐྱེད་པའོ། །
ཨོཾ་ཨ་ཀཱ་རོ་མུ་ཁཾ་སརྦྦ་དྷརྨཱ་ཎཱཾ། ཨཱདྱ་ནུཏྤནྣ་ཏྭཱཏ་བི་ཤུདྡྷ་སྭཱ་ཧཱ། ཟབ་པར་བསྒྲུབ་པའོ། །ཨོཾ་ཨཱཿཧྲཱིཿསརྦ་ཏ་ཐཱ་ག་ཏོ་ཨ་དྷིཥྛཱ་ན་སརྦ་པཱུ་ཛ་མེ་གྷ་ས་མུ་དྲ་སྥ་ར་ཎ་མུ་ཏྲ་དྲྀཌྷ་ཧཱུཾ། རྒྱ་ཆེ་བར་བསྒྲུབ་པའོ། །ཨོཾ་ཨཱཿཧྲཱིཿཤྲཱི་ལོ་ཀ་ནཱ་ཐ་སརྦ་བུདྡྷ་བོ་དྷི་སཏྭ་ས་ཀ་ལ་ཨིཥྚ་དེ་བ་ཏ་སརྦ་དྷརྨཱ་པཱ་ལ་
པུཥྤཾ། དྷཱུ་པཾ། དཱི་པཾ། གནྡྷཾ། ནཻ་བི་དྱཾ། ཤབྟ། མཎྜ་ལ། བ་ལིཾ་ཏ། ཁ་ཁ། ཁཱ་ཧི་ཁཱ་ཧི། སརྦ་གརྫ་པ་རི་པུ་དྱཾ། མ་མ་རཀྵ་ཧཱུཾ་ཧཱུ་ཕཊ་སྭཱ་ཧཱ། དབུལ་བ་དང་ལས་བཅོལ་བའི་སྔགས་སོ། །དཔག་མེད་འཇིག་རྟེན་མགོན་འཁོར་ལོ། །འཇིག་རྟེན་འདས་དང་འཇིག་རྟེན་པས། །
ལེགས་བསྐོར་འོད་ཟེར་ལྗགས་སྦུབས་ཀྱིས །བདུད་རྩིའི་གཏོར་མ་བཞེས་པར་འགྱུར། །ཐུགས་རྗེ་ཆེན་པོའི་གཏོར་མའི་ཆོ་ག་རྫོགས་སོ།།      །།༄༅། །ཐུགས་རྗེ་ཆེན་པོ་རྣམ་པར་སྐྱོབ་ལ་ཕྱག་འཚལ་ལོ། །དེ་ནས། དཀྱིལ་འཁོར་བཟང་པོ་དགོས་པ་པོ། །ཞེས་འབྱུང་བའི་སྒྲུབ་
ཐབས་བཤད་པར་བྱའོ། །དཀྱིལ་འཁོར་བཟང་པོ་ས་ཉིད་དང་། །རིན་ཆེན་རང་བཞིན་ངོས་མཉམ་ལ། །དྲི་ཞིམ་པ་ཡི་བྱུག་པས་བྱུགས། །མུ་ཏིག་མེ་ཏོག་ནོར་བུ་དགོད། །དབུས་སུ་འདབ་བརྒྱད་འདབ་བཞི་ཡི། །མེ་ཏོག་དམར་པོ་ས་བོན་ཅན། །གཞག་ལ་དེ་སྟེང་ཐུབ་པ་བཞུགས། །

73-1-142b

གདུགས་དཀར་གྱིས་ནི་སྟེང་ནས་དབུབ། །སྒྲུབ་པོ་པདྨའི་ཕྲེང་བ་ཡི། །ང་རྒྱལ་འཛིན་པས་རྡོ་རྗེ་ལག །གཉིས་གཤིབས་གྱེན་དུ་བསྐྱོད་པའི་རྒྱས། །ས་གསུམ་གཙོ་བོ་སྤར་བར་བྱ། །རབ་ཏུ་དབྱིབས་ལེགས་ཁ་དོག་མཛེས། །དྲི་བསུང་རོ་མཆོག་རེག་བཟང་བའི། །མེ་ཏོག་སྤུངས་
པས་གོ་རིམས་བཞིན། །གླིང་སོགས་བཀོད་པ་ཇི་བཞིན་བརྟག །ཨོཾ་ཨཱཿབཛྲ་ཙ་ཏུར་དཱི་པ་ཧཱུཾ། ཨོཾ་ཨཱཿབཛྲཽ་པ་ཡཥྚ་དཱི་པ་ཧཱུཾ། ཨོཾ་ཨཱཿབཛྲཱཥྚ་རཏྣ་ཧཱུཾ། ཨོཾ་ཨཱཿབཛྲཱཥྚ་མཾ་གཱ་ལ་ཧཱུཾ། ཨོཾ་ཨཱཿབཛྲ་སིདྡྷཾ་བི་ཤ་ཏི་ཧཱུཾ། ཨོཾ་ཨཱཿསཱུརྱ་ཙནྡྲ་ཧཱུཾ། རྣམ་དག་ཞིང་དུ་ཕུན་ཚོགས་གླིང་དང་རིན་ཆེན་
དང་། །བཀྲ་ཤིས་གྲུབ་པ་རིམ་གསུམ་ཕྲེང་བ་ལེགས་བཀོད་ལ། །གསལ་བྱེད་སྒྲོན་མ་འབར་བ་གཉིས་ཀྱིས་བརྒྱན་གྱུར་པ། །སྔགས་འཆང་རྡོ་རྗེ་རོལ་པའི་གར་གྱིས་བསྟབས་པས་དབུལ། །དེ་ནས་ལུས་ཅན་ཐམས་ཅད་ལ། །འཇིག་རྟེན་མགོན་པོ་ཉེར་འཁོར་གཟུགས། དཔག་མེད་རྣམ་
པར་འཕྲུལ་པ་ཡིས། །ཞིང་རྣམས་ཀུན་ཏུ་ཡོག་དོན་སྤྱོད། །ཇི་སྲིད་སྙིང་པོ་བྱང་ཆུབ་པར། །དེ་དག་ནམ་ཡང་འདྲེན་པའི་མཐུས། །ངན་འགྲོའི་སྒྲ་ཡང་མི་གྲག་ཅིང་། །རྟག་ཏུ་དགའ་སྐྱིད་འཚོ་བར་བྱེད། །གལ་ཏེ་བློ་གསལ་སྤོབས་སྤྱོད་ན། །སྐུ་གསུམ་ལ་སོགས་གང་བཤད་པ། ཆོ་ག་དེ་
དག་བཟླས་པ་ཡང་། །གདོན་མི་ཟ་བར་བྱ་བ་ཉིད། །གང་ཚེ་བསྡུ་བར་འདོད་པ་ན། །སེ་གོལ་བརྡབས་པས་སྤར་བྱས་ལ། །བཟོད་པར་གསོལ་དང་སྨོན་ལམ་གདབ། །དྲན་པའི་རྒྱ་ཡིས་གཟུང་བྱའོ། །ཐུགས་རྗེ་ཆེན་པོའི་མཎྜལ་གྱི་ཆོ་ག་རྫོགས་སོ།།      །།༄༅། །དཔལ་ཐུགས་རྗེ་ཆེན་
པོའི་མཆོད་པའི་སྤྲིན་གྱི་རྒྱལ་མཚན་གྱི་རྩེ་མོ་ལ་ཕྱག་འཚལ་ལོ། །དངོས་གྲུབ་ཀུན་གྱི་རྒྱུར་གྱུར་པ། །སྒྲུབ་པ་པོ་ལ་ཕན་བྱེད་ཐབས། །མཆོད་སྤྲིན་རྒྱལ་མཚན་རྩེ་མོ་ཡིས། །བསམ་མི་ཁྱབ་བྱེད་མཆོད་པ་བྲི། །མེ་ཏོག་འདུག་པ་མར་མེ་དྲི། །ཞལ་ཟས་རོལ་མོ་མཎྜལ་རྫས། །འབྱོར་པའི་ཁྱད་
པར་གྱིས་བཀོད་དེ། །ཉིད་ཀྱི་ང་རྒྱལ་གྱིས་བྱིན་བརླབ། །ཨོཾ་བཛྲ་པུ་ཥྤེ་ཨཱཿཧཱུཾ། ཨོཾ་བཛྲ་དྷཱུ་པེ་ཨཱཿཧཱུཾ། ཨོཾ་བཛྲ་དཱི་པེ་ཨཱཿཧཱུཾ། ཨོཾ་བཛྲ་གནྡྷེ་ཨཱཿཧཱུཾ། ཨོཾ་བཛྲ་ནཻ་བི་དྱེ་ཨཱཿཧཱུཾ། ཨོཾ་བཛྲ་ཤབྡ་ཨཱཿཧཱུཾ། ཨོཾ་བཛྲ་མཎྜལ་ལ་ཨཱཿཧཱུཾ། རང་བཞིན་སྟོང་པ་ཉིད་ཅན་གྱི། །སྣ་ཚོགས་མཆོད་

73-1-143a

རྫས་བསམ་མི་ཁྱབ། །རྒྱལ་མཚན་རྩེ་མོའི་རིག་པ་ཡིས། །སྤྲུལ་ནས་འཕགས་ཚོགས་མཆོད་པར་བྱ། །ཨོཾ་ན་མོ་བྷ་ག་ཝ་ཏེ། མ་ཧཱ་ཀཱ་རུ་ཎཱི་ཀ་པུཥྤ་པཱུ་ཛ་མེ་གྷ་ས་མུ་དྲ་ཀེ་ཏུ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་པུཥྤེ། པུཥྤེ། པུཥྤེ། པུཥྤ། ཨུདྦྷ་པེ། 
པུཥྤ། ཨ་ཝ་ཀཱི་ར་ཎེ་སྭཱ་ཧཱ། མེ་ཏོག་དབུལ་བའི་སྔགས་སོ། །དེ་བཞིན་དུ། དྷཱུ་པ་དང་། དཱི་པ་དང་། གནྡྷ་དང་། ནཻ་བི་དྱེ་དང་། ཤབྡ་དང་། མཎྜལ་ཞེས་བྱ་བ་ལ་སྦྱར་བའི་རིམ་གྱིས་བདུག་པ་དང་། མར་མེ་དང་། དྲི་ཆབ་དང་། ཞལ་ཟས་དང་། རོལ་མོ་དང་། མཎྜལ་དབུལ་བར་
བྱའོ། །གོས་བཟང་གྱོན་ཞིང་རྒྱན་བཟང་བཏགས། །ཡི་གེ་གསུམ་དང་ལྡན་པ་ཡི། །རྡོ་རྗེའི་གླུ་གར་སྔོན་སོང་བས། །སངས་རྒྱས་ལ་སོགས་མཆོད་པར་བྱ། །བདག་ཉིད་མཆོད་སྤྲིན་རྒྱ་མཚོ་ཡི། །དབུས་བཞུགས་མཆོད་ཀུན་ལ་མངའ་བརྙེས། །མགོན་པོ་འཁོར་ལོས་སྒྱུར་རྒྱལ་ཚུལ། །རྒྱལ་
མཚན་རྩེ་མོ་གསེར་མདོག་བསྐྱེད། །ཡེ་ཤེས་སྙིང་པོ་ལས་བྱུང་བའི། །སྣ་ཚོགས་ལྷ་མོ་མཛེས་རྣམས་ཀྱིས། །རེ་རེ་ལས་ཀྱང་དཔག་ཏུ་མེད། །སྤྲུལ་པས་རིམ་གྲོ་རྫོགས་པར་བལྟ། །མི་ཕྱེད་གུས་པས་མང་ཡོད་པས། །གཟུངས་འདི་ལན་གསུམ་ཆོ་ག་འདིས། །ཉིན་རེ་དུས་གསུམ་མཆོད་བྱེད་ན། །
བྱེ་བ་བསམ་མི་ཁྱབ་མཆོད་འགྱུར། །བསམ་གྱིས་མི་ཁྱབ་པའི་མཆོད་པའི་ཆོ་ག་རྫོགས་སོ།།      །།༄༅། །དེ་བཞིན་གཤེགས་པ་སྤྱན་རས་གཟིགས་སྨོན་ལམ་གྱི་དབང་པོ་ལ་ཕྱག་འཚལ་ལོ། །རྒྱལ་སྲས་རྣམས་ཀྱིས་བསྒྲུབ་པ་ནི། །སེམས་ཅན་རྣམས་ལ་ཕན་བརྩོན་པས། །སྨོན་
ལམ་རྒྱ་མཚོ་སྤྱོད་པའི་ཕྱིར། །དེ་ཡི་དབང་གྱུར་འདི་བཤད་བྱ། །སྔོན་ནས་བསྙེན་པའི་རིམ་པ་ལ། །འདྲིས་གྱུར་སྙིང་རྗེས་ཡིད་གདུངས་པ། །མིག་དང་སྨིན་མཚམས་སྙིང་དཀྱིལ་དུ། །བྱམས་སོགས་ཐིག་ལེ་གསུམ་བསྒོམ་བྱ། །ཉི་མའི་འོད་དང་ཟླ་བའི་འོད། །དེ་ནི་ཐུགས་རྗེ་མི་ཕྱེད་འོད། །
ལུས་ཅན་རྣམས་ཀྱི་སྙིང་དང་ནི། །ཉོན་མོངས་མེ་ལྕེ་དེ་ནང་གནས། །དེ་བཞིན་སྤྱི་གཙུག་གྲངས་བཞིན་དུ། །པདྨ་ཟླུམ་དང་རཾ་རྡོ་རྗེ། །གང་ཚེ་སྐྱེ་བོ་དོན་ཚོལ་བ་དང་དོན་མི་ཚོལ་བ་གཅིག་དང་མང་པོ་ཡང་རུང་སྟེ། བདག་གི་དབང་པོའི་སྤྱོད་ཡུལ་དུ་འབབ་པས་ལས་ལ་སྦྱར་དུ་རུང་

73-1-143b

བར་གྱུར་པ་དང་། ཆོ་ག་འདིས་རྣལ་འབྱོར་དུ་བྱས་ལ་འཕགས་པ་སྤྱན་རས་གཟིགས་ལ་གསོལ་བ་བཏབ་སྟེ། མ་འོངས་པའི་དུས་སུ་མྱུར་བ་ཁོ་ནར་སེམས་ཅན་ཁྱེད་ཅག་བདག་གིས་སྨིན་པའི་གདུལ་བྱར་གྱུར་ཅིག་ཅེས་སྨོན་ལམ་བཏབ་ལ། ཉི་འོད་ཐིག་ལེས་དེ་དག་པདྨོ་ཁ་ཕྱེད་ནས། །
ཟླ་འོད་ཅན་གྱིས་གདུང་བ་འབར་བ་ཞི་བར་བྱ། །མི་ཕྱེད་ཟེར་གྱིས་ལུས་བཀང་རྡོ་རྗེའི་རྒྱས་བཏབ་ལ། །ཅི་དགར་ཁྱེད་སྤྱོད་མ་ལུས་མྱུར་དུ་བདག་གིས་བསྒྲལ། །དེ་རྗེས་ཆོས་དང་ཟང་ཟིང་སྦྱིན། །མགུ་བྱ་ཀུན་གྱིས་སེམས་བཀུག་ནས། །གླང་ཆེན་མྱོས་ལ་ལྕགས་ཀྱུ་བཞིན། །མཁས་
པས་འགྲོ་བ་དབང་དུ་བྱ། །མེ་ཏོག་ལ་སོགས་བརྡས་གཏོད་པའམ། །ཡང་ན་ལག་པ་རྐང་པ་མེད། །ཡུན་རིང་དམིགས་ལྟས་མདའ་བསྣུན་པའམ། །བདག་ཉིད་ཆེན་པོ་ཐབས་ལ་མཁས། །ཁབ་རྣམས་ཀྱིས་ནི་ཁབ་ལེན་དང་། །བུང་བ་རྣམས་ཀྱིས་མེ་ཏོག་བཞིན། །དེ་ནི་
མི་འདོད་ཉིན་གཅིག་ཀྱང་། །དབང་མེད་སྐྱེ་བོ་འདུ་བར་འགྱུར། །སྨོན་ལམ་དུ་བྱ་བ་རྫོགས་སོ།།      །།༄༅། །དཔལ་བདུད་རྩིའི་སྦྱོར་བ་བརྙེས་པ་ལ་ཕྱག་འཚལ་ལོ། །སྤྱན་རས་གཟིགས་དཔལ་བདུད་རྩི་བརྙེས། །བཟའ་དང་བཅའ་དང་མྱང་བ་སྨན། །བཏུང་བ་སྣ་ཚོགས་
ཉིད་མཆོད་བཞེས། །སྐལ་ལྡན་བྱིན་གྱིས་རློབ་པར་བཤད། །དུས་དང་དུས་མཚམས་དགའ་སྟོན་དུས། །བཟའ་དང་བཟའ་མིན་བཟའ་ཡིན་ཏེ། །རྣལ་འབྱོར་རྒྱལ་པོ་དམ་ཚིག་སྤྱོད། །རབ་གུས་མཆོད་བྱེད་སྦྱིན་ལ་བརྩོན། །སྐད་ཅིག་དྲན་པས་ལྷར་བསྐྱེད་ནས། །བཞི་པའི་
ཡི་གེ་སྦྱོར་བ་ཡིས། །མགྲིན་པ་ལྕེ་སྟེང་བྱིན་བརླབས་ལ། །ཨ་དང་ཀ་ཕྲེང་གཉིས་མེད་ཞུ། །སྒྲོན་མ་གཉིས་སྟེང་རྡོ་རྗེ་འཆང་། །དེ་བཞིན་སེང་གེ་རྣམ་བསྒྱིངས་གཉིས། །རྒྱུར་བྱས་ཐབས་དང་ཤེས་རབ་བསྐྱེད། །ཕྲེང་བ་གཉིས་ཀྱང་དགོད་པར་བྱ། །ཀ་པཱ་ལ་སོགས་པདྨ་ཅན། །
སྣ་ཚོགས་བཟའ་བས་བཀད་བྱས་ལ། །སྣོད་བཅུད་སྦྱང་དང་གཟི་བསྐྱེད་པས། །གྱ་ནོམ་གྱུར་པ་རྣལ་འབྱོར་ཚོགས། །ཨོཾ་ཨཱཿཧྲཱིཿབཾ་ཧོཿ། དྲི་བསལ་སྦྱོང་བྱེད་བདུད་རྩིར་བྱེད། །ཕུན་སུམ་ཚོགས་དང་དགེས་བྱེད་པ། །དམ་ཚིག་ཕྱག་རྒྱ་རྣམ་པ་ལྔ། །འོད་ཀྱི་སྦྱོར་བས་རྣམ་པར་

73-1-144a

རྩེན། །དཔག་མེད་བདག་ལུས་སངས་རྒྱས་ལ། །བསམ་མི་ཁྱབ་སྤྲུལ་རྩི་ཡི་མཚོས། །ལུས་ལྔ་དག་ནི་བསྒྲུབ་པའི་ཕྱིར། །སྒྲུབ་པ་པོས་ནི་མཆོད་པར་བྱ། །ཨོཾ་ཨཱཿཧྲཱིཿཤྲཱི་ལོ་ཀ་ནཱ་ཐ་སརྦ་བུདྡྷ་བོ་དྷི་ས་བྷཱུ་པདྨ་བི་ཤུདྡྷ་ཨ་མྲྀཏ་ཏེ་ཛ་ར་བྷཀྵ་ཏ་ཁ་ཁ་ཁཱ་ཧི་ཁཱ་ཧི། ཨ་ནེ་ཀ་སཏྭ་ཙ་ས་མ་
ཡ་སིདྡྷི་སྨ་ར་སྨ་ར་ཧཱུཾ་ཧཱུཾ་ཧཱུཾ་སྭཱ་ཧཱ། ཞེས་བྱ་བ་ལན་གསུམ་བརྗོད་པས་སོ། །དེ་ནས་ལྷག་མ་བསྡུས་ལ་གཏོར་མ་བྱའོ། །བདག་ལུས་རྡོ་རྗེ་སྤྱན་རས་གཟིགས། །ཕུང་པོ་སངས་རྒྱས་རྣམ་པ་ལྔ། །བདེ་ཆེན་གཉིས་མེད་ཕྱག་རྒྱ་ཆེ། །དཔའ་བོ་རྣམ་པར་རོལ་པ་ཡིན། །ཨོཾ་ཨཱཿཧྲཱིཿཨ་ཨི་ཨུ་ཨེ་ཨོ་ཨཾ། 
མ་ཧཱ་སུ་ཁ་བཛྲ་ཏ་ཏཱ་སརྦ་ཛྙཱ་ན་སྭ་བྷཱ་ཝ་བི་ཤུདྡྷ་ཧོ་ཧོ་ཧོཿཞེས་གླུ་བླང་བར་བྱའོ། །དཔལ་སྤྱན་རས་གཟིགས་བདུད་རྩི་བརྙེས་པའི་ཟས་ཀྱི་ཆོ་ག་རྫོགས་སོ།།      །།༄༅། །འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །བདག་གི་ལུས་ལ་ལྷག་པར་ཆགས། །ནད་ནི་རྣམ་པ་
མང་ལྡན་པའམ། །ཡང་ན་བསོད་ནམས་ཚོགས་དོན་གཉེར། །དེས་ནི་ལུས་སྦྱིན་ཆོ་ག་བརྩམ། །རེ་ཞིག་ལོངས་སྤྱོད་དང་ལུས་ལ་རྨི་ལམ་དང་སྒྱུ་མ་ལྟ་བུར་རྟོགས་ཤིང་འདུ་བྱེད་ཐམས་ཅད་དྲི་ཟའི་གྲོང་ཁྱེར་རམ། མཚོན་ཆའི་སྦྱོར་བ་ལྟ་བུར་ཡོངས་སུ་ཤེས་པས། ཐོག་མ་ཁོ་ནར་མཆོད་པ་རྣམས་
ཀྱི་མཆོག་ཏུ་གྱུར་པ་ནི། རྣལ་འབྱོར་གྱི་ལུས་ཉེ་བར་སྦྱིན་པ་འདིའོ། །དེ་ནས་ཡང་རང་ཉིད་བཅོམ་ལྡན་འདས་འཕགས་པ་སྤྱན་རས་གཟིགས་རྣམ་པར་དཀར་བ་འོད་ཟེར་བཅུ་དྲུག་གི་རྣམ་པ་ཅན་དུ་བསྒོམ་པར་བྱའོ། །དེའི་ཐུགས་ནི་ཧྲཱིཿཀུན་ད་ལྟ་བུའོ། །དེ་ལས་བྱུང་བའི་འོད་ཟེར་འབར་བའི་
གཟི་བརྗིད་ཀྱིས་གདུག་པ་ཅན་འདུལ་བའོ། །ལྟེ་བར་རཾ་དམར་པོ་ལས་སྐྱེས་པའི་མེའི་ཕྲེང་བ་གསལ་བྱེད་ཀྱི་འཁོར་ལོ་ཅན་ནོ། །དེ་བཞིན་དུ་ཐུགས་ཀར་ཡང་ཨ་དཀར་པོ་ལས་སྐྱེས་པའི་དབྱངས་ཀྱི་འཁོར་ལོ་ཡང་ངོ་། །མི་དང་ལྷ་དབང་ཀླུ་རྒྱལ་གྱི། །མགོ་གསུམ་སྒྱེད་པུའི་སྟེང་དུ་ནི། །
ལྷ་ཡི་སྨིན་མཚམས་ལས་བྱུང་བའི། །ཕ་ཏི་ཀ་ཡི་གྲི་གུག་གིས། །བདག་གི་ཐོད་ཕྱེད་བཅད་ནས་ནི། །ཕྲུ་བའི་ཚུལ་དུ་དགབ་པར་བྱ། །ལྷ་ཡི་ལྟེ་དབུས་རཾ་ཡིག་ལས། །མེ་ལྕེ་བསྐྱོད་པ་སྦར་བར་བྱ། །དེ་ཡི་ནང་དུ་བདག་ཉིད་ལུས། །གཅེར་བུ་ཙོག་གྲུང་འདུག་པ་ཡིན། །གནས་

73-1-144b

གསུམ་ཡི་གེ་གསུམ་བསམས་ལ། །ཁུ་བ་དམར་པོས་བཞུ་བར་བྱ། །འབྲུ་གསུམ་ལན་གསུམ་བརྗོད་པ་ཡིས། །དག་པར་བྱས་དང་བདུད་རྩིར་བྱ། །ཕུན་ཚོགས་དགྱེས་པའི་རྒྱུ་བསམས་ཏེ། །ཐུགས་ཀའི་ཧྲཱིཿལས་བདུད་རྩི་དགུག །དམ་ཚིག་ཡེ་ཤེས་འདྲེས་གྱུར་པ། །རྡོ་རྗེ་ཁ་ཕྱེའི་ཕྱག་རྒྱ་དང་། །
ཨོཾ་ཨཱཿབཛྲ་ཀཱ་ཡ་ཤུདྡྷཱ་བི་ཤུདྡྷཱ་ཀཱ་རོ་མུ་ཁཾ་ཨ་མྲྀ་ཏ་སྭ་བྷཱ་ཝ་མ་ཧཱ་བ་ལི་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ་ཁ་ཁ་ཁཱ་ཧི་ཁཱ་ཧཱི། སརྦ་སཏྭཱརྠ་ཧོཿ། སྔགས་འདིས་ལན་གསུམ་བར་དུ་དབུལ། །མགྲོན་གསུམ་རྣལ་འབྱོར་ཆོ་གས་སོ། །རྣལ་འབྱོར་གྱི་དབང་ཕྱུག་ཆེན་པོ་ཤྲཱི་མཻ་ཏྲིའི་གདམས་པ། ལུས་
སྦྱིན་པའི་ཆོ་ག་རྫོགས་སོ།།       །།༄༅། །ཐུགས་རྗེ་ཆེན་པོ་རྒྱུན་གྱི་ཕྲེང་བ་ཅན་ལ་ཕྱག་འཚལ་ལོ། །སྙིང་རྗེ་ཆེན་པོ་ཅན་གྱི་རྣལ་འབྱོར་པས། ཡི་དགས་ལ་སོགས་པ་ཕོངས་པ་རྣམས་ལ་ཆུའི་སྦྱིན་པ་སྦྱིན་པ་ལ་བརྩོན་པར་བྱ་སྟེ། རྒྱུ་གཅིག་སྔོན་དུ་སོང་བ་ཡིས། །འཕགས་པ་ཉིད་
ནི་དྲན་བྱས་ལ། །མགྲིན་པ་ལག་པ་འཁོར་ལོར་བཅས། །རྫོགས་པའི་སྦྱོར་བས་རྫོགས་པར་བྱས། །ཕྱག་གཡས་ཟླ་དབུས་ཡེ་ཤེས་ཅན། །ཨ་ཕྲེང་གིས་བསྐོར་གསལ་བ་ཡི། །མིང་མེད་རྩེ་ནས་མི་འགྱུར་བདུན། །འབབ་པ་བདུད་རྩིའི་རྒྱུན་རབ་འཛག །པདྨོ་རྒྱས་བཏབ་རིན་
ཆེན་སྣོད། །བསིལ་ཞིམ་དངས་པས་བཀང་བའི་ཆུ། །པདྨོའི་མཚོ་ལ་ཆར་རྒྱུན་བཞིན། །ཡེ་ཤེས་བདུད་རྩིར་འབབ་པས་བསྲེ། །འཇུངས་པའི་མྱ་ངན་རྒུད་པ་ཡི། །གཟུགས་ཅན་ཇི་སྙེད་འཇིག་རྟེན་རྒྱུ། །དེ་སྙེད་ཕྱག་མཐིལ་འོད་ཟེར་གྱི། །མདུན་བདར་ས་གཞི་གང་བར་བྱ། །ཨོཾ་
ཨཱཿཧྲཱིཿམ་ཧཱ་ཀཱ་རུ་ཎི་ཀ་པྲ་སཱ་ད་སརྦ་པྲེ་ཏ་པྲ་ཏྱུད་ཏ་སཱི་གྷྲཾ་ཛ་ཛ་ཛཿ། དེ་རྗེས་འོད་ཟེར་སྐར་མདའ་ཡི། །སྔགས་དང་ཕྱག་རྒྱ་གསལ་བ་ཡིས། །མ་ལུས་ལྕེ་ལ་འབར་བ་ཡི། །སྦུབས་བསམས་ཡི་གེ་བཞི་བརྗོད་སྦྱིན། །ཨོཾ་ཨཱཿཧྲཱིཿཧཱུཾ། ཟས་ཀྱི་བདུད་རྩིས་ཚིམ་བྱས་
ནས། །གནས་གྱུར་ལྷ་ལུས་ཐོབ་པ་ན། །བདེ་གཤེགས་བཀའ་ཡི་ཚིག་སྦྱིན་པས། །དུབ་པའི་སེམས་ཀྱང་ཚིམ་པར་བྱ། །མཐར་ནི་སྨོན་ལམ་གྱིས་སྨིན་པའི་གདུལ་བྱར་བྱས་པ་ལ་ལམ་བསྟེན་པའི་ཕྱག་རྒྱས་བཀའ་བསྒོ་ལ་ཅི་བདེ་བར་དེངས་སུ་གཞུག་གོ། །ཆུ་སྦྱིན་གྱི་

73-1-145a

ཆོ་ག་རྫོགས་སོ།།      །།༄༅། །འཕགས་པ་སྤྱན་རས་གཟིགས་མཆོད་སྦྱིན་མང་པོ་དང་ལྡན་པ་ལ་ཕྱག་འཚལ་ལོ། །དེ་ནས་སྙིང་རྗེ་ཆེན་པོ་ཅན་ཆུ་གཏོར་གྱི་མཆོད་སྦྱིན་ལ་མངོན་པར་དགའ་བས་གང་ན་རི་དང་ཐད་དང་འབབ་ཆུ་དང་ནེའུ་གསིང་དང་། ལྷ་ཁང་དང་ཕུག་ལ་སོགས་པ་
ཅི་རིགས་པའི་གནས་སུ་ཡོ་བྱད་ཕུན་སུམ་ཚོགས་པར་བྱས་ནས་བདེ་བའི་ཡིད་དང་ལྡན་པས་འདུག་སྟེ། གསུམ་ལ་སྐྱབས་སུ་སོང་ནས་བརྩམས་ཏེ། །བྱང་ཆུབ་མཆོག་ཏུ་སེམས་གཟུང་བར། །བྱམས་སོགས་ཚངས་པའི་གནས་བཅས་པས། །ངེས་པར་བྱས་ཏེ་ཆོ་ག་བརྩམ། །ཐམས་ཅད་སྟོང་
པ་ཉིད་དབྱིངས་ལས། །པདྨ་ཟླ་དབུས་ས་བོན་མཚན། །ཡོངས་གྱུར་སྦྱོར་བས་ལྷ་མཆོག་བསྐྱེད། །ཕྱག་རྒྱ་སྔགས་ཀྱིས་ཡོངས་སུ་བཅིང་། །རྡོ་རྗེ་བསྡམས་པ་ལས་བྱུང་བ། །གཉིས་བརྐྱང་གུང་མོ་མཛུབ་གཉིས་མདུད། །མཐེ་བོང་རྡོ་རྗེ་བསྟེན་སྦྱར་ལ། །སྤྱི་གཙུག་ལྟར་དུ་གསལ་གཞག་སྟེ། །
ན་མཿས་མནྟ་བུདྡྷ་ནཱཾ་བཛྲ་ཨུཥྞཱྀ་ཥ་ཧཱུཾ་ཧཱུཾ། ཞེས་བྱ་བས་གཙུག་ཏོར་གསལ་བར་བྱའོ། །རྡོ་རྗེ་ཐལ་མོ་གཉིས་སྦྱར་ལས། །གུང་མོ་གཉིས་བརྐྱང་སྲིན་ལག་མཛུབ། །རྩེ་སྦྱར་ཕན་ཚུན་ཁྱུད་བསྐོར་ནས། །གཙུག་ཏོར་སྟེང་དུ་གསལ་བྱས་ནས། །ཨོཾ་ཨཱཿཧྲཱིཿབཛྲ་ཨ་མྲྀ་ཏེ་པསྠཱི་ཏི་ཧཱུཾ་ཧཱུཾ། ཞེས་བྱ་བས་
འོད་དཔག་མེད་ཀྱི་ཅོད་པན་བསྒྲུབ་པར་བྱའོ། །ཀླུ་མཆོག་ཆོས་འཆད་ལས་སྐྱེས་པ། །གུང་མོ་དང་ནི་མཐེ་བོང་གཉིས། །གཤིབས་བརྐྱང་རྩེ་མོ་ལྷན་ཅིག་པ། །དམིགས་ལ་ཉེ་བར་བཏུད་ནས་ནི། །ཨོཾ་ཨཱཿཧྲཱིཿབཛྲ་ཛྙཱ་ན་ཙཀྵུ་པྲ་ས་ཀ་ས་ཧཱུཾ། ཞེས་བྱ་བས་ཡེ་ཤེས་ཀྱི་སྤྱན་དང་ལྡན་པས་གསལ་
བར་བྱའོ། །ལག་གཉིས་མཉམ་པའི་ཐལ་སྦྱར་བས། །མཛུབ་གཉིས་གུང་མོ་ལ་མདུད་ཅིང་། །མཐེབ་གཉིས་གུང་མོ་ལ་བཏུད་ནས། །ལུས་ཀུན་ཀུན་ཏུ་བསྐོར་ཉུལ་བས། །ཨོཾ་ཨཱཿཧྲཱིཿབཛྲ་ནཾ་བཛྲ་ཙཀྲ་བྷ་བ་ཝ་ཀ་པ་ཊ་ཧཱུཾ། ཞེས་བྱ་བས་རྡོ་རྗེ་ཞུབ་ཀྱི་གོ་བགོ་བར་བྱའོ། །དེ་རྗེས། རྣམ་
དག་ཆོས་ཉིད་རྒྱ་ཆེན་ནམ་མཁའ་མཛོད་དང་བདུད་རྩི་ཐབ་སྦྱོར་དང་། །ཤུགས་ཆེན་སྐར་མདའ་དབང་དུ་བྱེད་བཤད་རྒྱལ་བ་སྤྱན་རས་གཟིགས་དབང་རྒྱ། །སྔགས་བཅས་གྲངས་ཀྱི་དྲི་དྲལ་བསམ་ཡས་བདུད་རྩིའི་མཚོ་ཆེན་སྤྲིན་འཁྲིགས་དང་། །དཔག་མེད་ལུས་ཀྱིས་ཕུན་

73-1-145b

ཚོགས་མཆོད་སྤྲུལ་མ་ལུས་ཅི་རིགས་དགོས་དགུར་མཆོད། །ཨོཾ་སྭ་བྷཱ་ཝ་བི་ཤུདྡྷཿསརྦ་དྷརྨཱཿསྭ་བྷཱ་བ་བི་ཤུདྡྷོ྅ཧཾ། ན་མཿསརྦ་ཏ་ཐཱ་ག་ཏེ་བྷྱོ། བི་ཤྭ་མུ་ཁེ་བྷྱཿསརྦ་ཏཏ་ཁཾ་ཨུཏྒ་ཏེ་སྥ་ར་ཎ་ཧི་མ་ག་ག་ན་ཁཾ་སྭཱ་ཧཱ། ཨོཾ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ། ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ། ཨོཾ་སཾ་བྷ་ར་སཾ་བྷ་ར་
ཧཱུཾ། ཨོཾ་ཛྙཱ་ན་ཨ་བ་ལོ་ཀི་ཏེ་ས་མནྟ་སྥ་ར་ཎ་རསྨི་བྷ་བཱ་ས་མ་ཡ་མ་ཧཱ་མ་ཎི་དུ་རུ་ཧྲྀ་ད་ཡ་ཛ་ལ་ནི་ཧཱུཾ། ན་མཿས་མནྟ་བུདྡྷཱ་ནཱཾ་གྲ་ཧེ་ཤྭ་རི་པྲབྷཱ་བ་ཛོ་ཏི་མ་ཧཱ་ས་མ་ཡ་སྭཱ་ཧཱ། ན་མཿསརྦ་ཏ་ཐཱ་ག་ཏེ་མ་ཧཱ་ཀཱ་རུ་ཎི་ཀཱ་ཡ་སྭ་ར་ཤྲཱི་ཨ་བ་ལོ་ཀི་ཏེ་མ་ཧཱ་ཨ་དྷིཥྛཱ་ན་ཛྭ་ལ་ཛྭ་ལ་ནཱ་ནཱ་པུ་ཛ་མེ་གྷ་སྥ་ར་ཎ་ཧཱུཾ། པཾ་ལས་པད་སྣོད་རྒྱ་
ཆེན་ནི། །འབྲུ་གསུམ་ལས་གྱུར་སྣ་ཚོགས་བཅུད། །ཟབ་ཅིང་རྒྱ་ཆེའི་སྔགས་ཕྱག་རྒྱས། །བྱིན་བརླབས་དེ་སྟེང་སྨན་ཤིང་བསྐྱེད། །ཨ་དང་ཀ་སོགས་ལས་གྲུབ་པ། །གྲུབ་པ་ཉི་ཤུ་སོགས་རྫས་ཀྱིས། །ལེགས་སྤྲས་དམ་ཚིག་གཏོར་མ་ལ། །ཡེ་ཤེས་བསྟིམས་ལ་ཇི་བཞིན་མཆོད། །དཔལ་
ལྡན་ཐུགས་རྗེ་ཆེ་སྟོབས་མཐུས། །སྲི་ཞུ་ཡོན་ཏན་ཕན་འདོགས་དང་། །སྙིང་རྗེའི་གནས་གྱུར་ལྟོས་ཆགས་མགྲོན། །ཚིམ་བྱེད་མཆོད་སྦྱིན་འདི་རབ་བསྔགས། །དཔལ་ཐུགས་རྗེ་ཆེན་པོའི་ཆབ་གཏོར་གྱི་ཆོ་ག་རྫོགས་སོ།།      །།༄༅། །འཕགས་པ་སྤྱན་རས་གཟིགས་དབང་ཕྱུག་མེ་དཔུང་
འབར་བ་ལ་ཕྱག་འཚལ་ལོ། །བསོད་ནམས་ཡེ་ཤེས་ཚོགས་མྱུར་དུ། །དངོས་གྲུབ་བྱེད་དང་ཟང་ཟིང་རྙེད། །གཟི་བརྗིད་བསྐྱེད་དང་མཐུ་བསྐྱེད་དང་། །སྡིག་འཇོམས་བྱ་ཕྱིར་མེ་དཔུང་མཆོད། །དམ་ཚིག་ཅན་གྱིས་སྔོན་དུ་ལྷ་འདྲིས་པར་བྱས་ནས་ནགས་དབེན་པར་སོང་སྟེ། ཁྲུ་བཞི་པ་དང་། 
ཁྲུ་གང་པ་དང་མཐོ་གང་བའི་ཚད་ཀྱི་ཤིང་བུ་བཟང་པོ་བསྲུང་བ་བླངས་ཏེ། སེམས་ཅན་ཐམས་ཅད་ལ་བྱམས་པ་དང་ལྷན་ཅིག་པའི་དད་པ་དྲག་པོས་མཆོད་པའི་ཡིད་མ་བརྗེད་པར་བྱས་ལ། ཇི་ཙམ་རིགས་པར་མཆོད་རྟེན་གྱི་གཟུགས་ལྟ་བུར་བརྩིག་གོ། །ཇི་སྐད་ཞི་བའི་སྦྱིན་སྲེག་ཏུ། །
གང་བསྲུང་སྲེག་རྫས་མཆོད་པའི་རྐྱེན། །དེ་དག་ཐམས་ཅད་འདི་ཤེས་བྱ། །ཁྱད་པར་དུ་ནི་རབ་བསྔགས་བརྒྱད། །ས་ཡི་བདག་པོའི་ཡོ་བྱད་རུང་བ་སྣ་ཚོགས་ཕྱེ་མར་བྱས་པ་དང་། །དབང་ཕྱུག་རྣམས་ཀྱི་འབྲུ་ནོར་དང་ནི་དེ་བཞིན་ཚོང་དུས་ཆེན་པོའི་ས། །གཟི་ལྡན་མཐུ་ཆེན་སྐྲ་དང་སེན་མོའི་

73-1-146a

འཚོ་བའི་དང་པོར་བྱས་པའི་ཕུད། །རང་ཉིད་ལུས་སྐྱེས་དྲི་མ་སྣ་ཚོགས་ཕུན་སུམ་ཚོགས་མིན་ལིང་གའོ། །དེ་ལ་ཐོག་མ་ཁོ་ནར་མེ་སྦར་བ་དང་ཆོ་ག་ཇི་ལྟ་བ་བཞིན་བྱས་ཏེ། འབར་བའི་དབུས་སུ་ཡེ་ཤེས་ཀྱི་ལྷ་སྤྱན་དྲངས་ཏེ། མཆོད་པ་དང་བསྟོད་པ་སྔོན་དུ་འགྲོ་བས་སྲེག་རྫས་དབུལ་
ཞིང་རབ་ཏུ་བསྔགས་པའི་ཆུས་ཡང་དང་ཡང་དུ་ཁྲུས་གསོལ་བ་དང་བསང་གཏོར་བྱའོ། །དེ་ནས་ཡང་མཆོད་པ་ལ་སོགས་པ་ཐམས་ཅད་བྱས་ཏེ་གླུ་དང་གར་དང་རོལ་མོ་ལ་སོགས་པ་བཏབ་ཅིང་པི་ཝང་བསྒྲེང་བ་དང་ལྷན་ཅིག་ཏུ་མན་ངག་དང་ལྡན་པས་ཕུན་སུམ་ཚོགས་པ་མ་ཡིན་པའི་
ལིང་ག་བསྲེགས་ལ་བཟླའོ། །ཨོཾ་ཨཱཿཧྲཱིཿཨ་ཀི་ནི་ཛྭ་ལ་ཛྭ་ལ་མ་ཧཱ་ཛྭ་གཱ་ཏྲོ། མ་མ་ཏ་མུ་གེ་ལས་ཆེ་གེ་མོ་ཐམས་ཅད་སིདྡྷ་སིདྡྷ་མ་ཧཱ་ཀཱ་རུ་ཎི་ཀ་ཧོཿ ཅེས་བྱ་བས་སོ། །མེ་དཔུང་འབར་བ་སྤྱན་རས་གཟིགས་དབང་མེ་ཡི་ལས། །མཆོད་པ་གང་བརྙེས་ཞལ་གཅིག་ཕྱག་གཉིས་ཛ་ཀའི་མདོག །
ཤིན་ཏུ་གཟི་བརྗིད་སྒྲུབ་པོའི་བསོད་ནམས་སྒྲུབ་བརྩོན་པ། །ཡིད་བཞིན་ནོར་བུ་མེ་ཐབ་གཡས་གཡོན་འཛིན་པ་ཡིན། །དེ་ཡི་ལས་སྒྲུབ་མེ་ཡི་བུ་ཞེས་བྱ་བའི་ལྷ། །རྐང་པ་གཉིས་བཏེག་དགའ་བའི་གཟི་མདངས་དཀར་དམར་མདོག །རིན་ཆེན་ཕྲེང་ཐོགས་ཉིད་ཀྱི་ཐུགས་ཀ་ལས་འོངས་
ནས། །སྦྱིན་བདག་མདུན་སྡོད་དོན་ཀུན་ངེས་པར་བསྒྲུབ་པའོ། །དེ་ཡིས་སྲས་བཅས་ལྷ་མཆོག་གཉིས། །མཉེས་གྱུར་རྨི་ལམ་ནང་དུ་སྟོན། །དེ་ནས་གཤེགས་གསོལ་ཐལ་བ་བསྡུས། །དཔུང་པ་གཡས་སུ་གདགས་པར་བྱ། །ཐུགས་རྗེ་ཆེན་པོ་མེ་ཡི་ལྷ། །དེ་ཡི་ཉིན་མོ་ཚུར་བཅད་ལ། །རྟག་ཏུ་
བུ་སྡུག་ལྟ་བུར་ནི། །དགོངས་གྱུར་འདོད་པ་ཐམས་ཅད་སྒྲུབ། །མེའི་མཆོད་པའི་ཆོ་ག་རྫོགས་སོ།།      །།༄༅། །ཐུགས་རྗེ་ཆེན་པོ་སྐུ་གསུང་ཐུགས་ཡེ་ཤེས་རྣམ་པར་འཕྲུལ་པ་ལ་ཕྱག་འཚལ་ལོ། །དེ་ནས་སྐུ་གཟུགས་ཀྱི་ཆོ་ག་བཤད་པར་བྱ་སྟེ། མཚན་མ་མཐོང་བའི་སྒྲུབ་པ་པོས་དམ་
ཚིག་སྦྱངས་ཏེ། བྱིན་གྱིས་བརླབས་པའི་སྐུ་ལ་བདར་བའི་ཆུས་ལུས་བཀྲུས་ལ། གནས་ཕུན་སུམ་ཚོགས་པར་བདག་གི་ལྟོས་པ་དོར་བས་བརྩམ་མོ། །རྒྱུ་དང་ངོ་བོ་ཁ་དོག་དང་། །རབ་ཏུ་གནས་པ་རྣམ་པར་དག །ཡོན་ཏན་དང་ནི་ཕྲིན་ལས་རྒྱུན། །བརྒྱད་པོ་ལ་ནི་ཆོ་ག་བརྒྱད། །ཐུགས་དང་

73-1-146b

སྐུ་དང་གསུང་ཉིད་དང་། །ཡེ་ཤེས་དང་ནི་དེ་ཁོ་ན། །ལྔ་ནི་ཡི་གེ་ལྔར་བཅས་ལ། །གཞན་གསུམ་རང་བཞིན་ཡི་གེ་གསུམ། །ཧཱུཾ་ཨོཾ་ཨཱཿཧྲཱིཿཧེ་ཧོཿཕཊ་སྭཱ་ཧཱ། འཇིམ་པ་དང་རྡོ་དང་ཤིང་དང་རས་དང་རུས་པ་དང་རྩིག་ངོས་དང་རིན་པོ་ཆེ་ལ་སོགས་པའི་རྒྱུ་རྣམས་ནི་རྡོ་རྗེ་འཆང་དབང་ཕྱུག་གི་ང་རྒྱལ་གྱིས་
སྙིང་གི་པདྨོའི་དབུས་ཀྱི་ཧཱུཾ་རྡོ་རྗེ་སེམས་དཔའ་ལས་འཕྲོས་པའི་ཐུགས་རྡོ་རྗེའི་རྡུལ་ཕྲ་རབ་ཀྱིས་གང་ཞིང་གཏམས་པར་བྱའོ། །ཞི་བ་དང་ཁྲོ་བ་དང་ཚུལ་གཉིས་པ་ལ་སོགས་པའི་སྐུ་གཟུགས་ཀྱི་ངོ་བོ་རྣམས་ནི་འཁོར་ལོ་ཅན་དབང་ཕྱུག་གི་ང་རྒྱལ་གྱིས་སྙིང་གི་འདབ་མའི་དབུས་ཀྱི་ཨོཾ་འཁོར་
ལོ་སེམས་དཔའ་ལས་འཕྲོས་པའི་སྐུ་ཐུགས་རྗེ་རྣམ་པར་རོལ་པས་རབ་ཏུ་བརྗིད་པའི་བདག་ཉིད་དུ་བྱའོ། །དཀར་བ་དང་དམར་བ་དང་སེར་བ་དང་ལྗང་གུ་ལ་སོགས་པའི་ཁ་དོག་རྣམས་ནི་པདྨ་ཅན་དབང་ཕྱུག་གི་ང་རྒྱལ་གྱིས་སྙིང་གི་འདབ་མའི་དབུས་ཀྱི་ཨཱཿཔདྨོའི་སེམས་དཔའ་ལས་འཕྲོས་པའི་གསུང་
ཉེ་བར་བཀོད་པས་ཤིན་ཏུ་ཁྱབ་པར་བྱའོ། །ཇི་ལྟ་བ་དང་ཇི་སྙེད་པ་མཁྱེན་པ་མེ་ལོང་ལྟ་བུ་ལ་སོགས་པའི་ཡེ་ཤེས་རྣམས་ནི་རིན་ཆེན་འཛིན་དབང་ཕྱུག་གི་ང་རྒྱལ་གྱིས་སྙིང་གི་པདྨོའི་དབུས་ཀྱི་ཧྲཱི་རིན་ཆེན་སེམས་དཔའ་ལས་འཕྲོས་པའི་ཡེ་ཤེས་ཆེན་པོ་བསམ་གྱིས་མི་ཁྱབ་པར་མངོན་པར་བྱང་ཆུབ་
པར་བྱའོ། །དག་པ་དང་དྲི་མ་མེད་པ་དང་ཡེ་ཤེས་ཆེན་པོའི་མཚན་ཉིད་ལ་སོགས་པའི་རྣམ་པར་དག་པ་རྣམས་ནི་སྣ་ཚོགས་སྤྱོད་དབང་དབང་ཕྱུག་གི་ང་རྒྱལ་གྱིས་སྙིང་གི་པདྨོའི་དབུས་ཀྱི་ཧེ། སྣ་ཚོགས་སེམས་དཔའ་ལས་འཕྲོས་པའི་རྣམ་པར་དག་པ་མཐར་སོན་པར་བྱའོ། །དེའི་འོག་ཏུ་བྲལ་བ་
དང་ཕུན་སུམ་ཚོགས་པ་ལ་སོགས་པའི་ཡོན་ཏན་རྣམས་ནི་སྐུ་གསུང་ཐུགས་ཡེ་ཤེས་ཁོ་ན་ལྔ་པོ་ཉིད་གཉིས་མེད་དབང་ཕྱུག་གི་ང་རྒྱལ་གྱིས་སྙིང་གི་པདྨོའི་དབུས་ཀྱི་ཧོཿགཉིས་མེད་སེམས་དཔའ་ལས་འཕྲོས་པའི་ཡོན་ཏན་དཔག་ཏུ་མེད་པ་ཡོངས་སུ་རྫོགས་པར་བྱའོ། །ལྷུན་གྱིས་གྲུབ་པ་
དང་རྒྱུན་མི་འཆད་པ་ལ་སོགས་པའི་ཕྲིན་ལས་རྣམས་ནི་སྐུ་གསུང་ཐུགས་ཡེ་ཤེས་དེ་ཁོ་ན་ལྔ་པོ་ཉིད་རང་བྱུང་བའི་དབང་ཕྱུག་གི་ང་རྒྱལ་གྱིས་སྙིང་གི་པདྨོའི་དབུས་ཀྱི་ཕཊ་རང་བྱུང་སེམས་དཔའ་ལས་འཕྲོས་པའི་ཕྲིན་ལས་རྟག་ཏུ་རྩོལ་བ་མི་མངའ་བར་འཇུག་པ་རྣམ་པར་འཕྲུལ་པར་བྱའོ། །

73-1-147a

སྒྲུབ་པ་པོ་དང་རྗེས་སུ་འཇུག་པ་ལ་སོགས་པའི་རྒྱུན་རྣམས་ནི་སྐུ་གསུང་ཐུགས་ཡེ་ཤེས་དེ་ཁོ་ན་ལྔ་པོ་ཉིད་ཉེ་བར་སྦྱོར་བའི་དབང་ཕྱུག་གི་ང་རྒྱལ་གྱིས་སྙིང་གི་པདྨོའི་དབུས་ཀྱི་སྭཱ་ཧཱ་ཉེ་བར་སྦྱོར་བའི་སེམས་དཔའ་ལས་འཕྲོས་པའི་རྒྱུན་ནམ་མཁའ་ཇི་སྲིད་པར་སྦྱོར་བ་དབང་དུ་འགྱུར་
བར་བྱའོ། །རང་རང་ཆོ་ག་རྗེས་མཐུན་པས། །ཇི་ལྟར་བསྒྲུབ་པ་དགའ་བཞིན་དུ། དཀའ་ཡང་སྐྱོ་བ་མེད་སྤྱོད་ན། །མི་དེ་མྱུར་དུ་དངོས་གྲུབ་བྱེད། །གང་ཞིག་གང་གི་དོན་འདོད་པས། །ལྷག་མ་རབ་ཏུ་སྙིང་བརྩེས་འཇུག །དེ་དག་རང་བཞིན་སྟོང་ཉིད་ཤེས། །རྟུལ་ཕོད་འཕགས་སྲས་
ཕྱིར་མི་ལྡོག །སྐུ་གཟུགས་ཀྱི་ཆོ་ག་རྫོགས་སོ།།      །།༄༅། །སྤྱན་རས་གཟིགས་དབང་ཕྱུག་གཟི་བརྗིད་རྒྱལ་པོ་ལ་ཕྱག་འཚལ་ལོ། །འཇིག་རྟེན་མགོན་པོ་མཉེས་བྱ་དང་། །མཉེས་འདོད་དད་པ་ཐོབ་པས་ཀྱང་། །མང་པོའི་སྤྱོད་ཡུལ་འགྱུར་བར་ནི། །མཆོད་རྟེན་ལ་སོགས་བརྩམ་
པར་བྱ། །གཟི་བརྗིད་རྒྱལ་པོ་ཞལ་གཅིག་པའམ། །ཡང་ན་དཔག་ཏུ་མེད་ཞལ་ཕྱག །བསམ་གྱིས་མི་ཁྱབ་སྤྱན་མངའ་བ། །བསོད་ནམས་བསྒྲུབ་ཕྱིར་སྤྱན་དྲངས་མཆོད། །བདག་ཉིད་ཧྲཱིཿཡིག་ལས་སྐྱེས་པའི། །རྩ་བའི་རྒྱལ་བ་གང་བསྒོམས་པ། །དེ་ཡིས་བྱིན་བརླབས་དབང་བསྐུར་
ནས། །རྒྱ་མཚོ་ལ་ནི་ཆར་རྒྱུན་བཞིན། །འཇིམ་པ་ལ་སོགས་ཡོ་བྱད་ལ། །རྡོ་རྗེ་འབར་བས་བགེགས་བསལ་ཏེ། །རིག་པའི་རྒྱལ་པོས་གཟི་བསྐྱེད་ལ། །རྣལ་འབྱོར་ལྡན་པར་བྱིན་གྱིས་བརླབ། །ཨོཾ་ཨཱཿཧྲཱིཿསརྦ་ཨ་བྷི་ཀ་ན་ན་ཧ་ར་ཧ་ར་པྲ་ཧ་ར་ཧཱུཾ་ཧཱུཾ་ཕཊ། ཨོཾ་ཨཱཿཧྲཱིཿསརྦ་དྷརྨྨ་ནིརྨ་ལ་བི་ཤུདྡྷོ་
སྭ་བྷཱ་ཝ་སརྦ་མ་ཧཱ་གྷུ་ན་ཨ་ནུ་བརྟི་ཏ་ཡེ་སྭཱ་ཧཱ། ཨོཾ་ཨཱཿཧཱུཾ་ཧོཿདེ་ནས་རྟེན་ལ་ཚོགས་བསགས་ཏེ། །སྟོང་པ་ཉིད་དང་བསམ་མི་ཁྱབ། །ཕྱོགས་བཅུའི་སངས་རྒྱས་དགོངས་མཛད་པར། །སྔགས་དང་མཆོད་རྟེན་བཞེངས་པར་བྱ། །ཨོཾ་ན་མོ་བྷ་ག་ཝ་ཏེ། ལོ་ཀེ་ཤྭ་རཱ་ཡ། པྲ་བྷ་རཱ་ཛཱ་ཡ། ཏ་
ཐཱ་ག་ཏཱ་ཡ། ཨརྷ་ཏེ། སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་སུ་ཀྵྨེ་སུ་ཀྵྨེ་ས་མེ་ས་མ་ཡ། ཤཱནྟེ་དཱནྟེ། ས་མ་རོ་བེ། ཨ་ནཱ་ལཾ། ཏ་རཾ་བེ། ཡ་ཤོ་ཝ་ཏི། མ་ཧཱ་ཏེ་ཛ། ནིར་ཀུ་ལེ། ནིར་བཱ་ན། སརྦ་བུདྡྷ་། ཨ་དྷིཥྛཱ་ན། ཨ་དྷིཥྛཱི་ཏེ་སྭཱ་ཧཱ། གཟི་བརྗིད་ཀྱི་རྒྱལ་པོའི་གཟུངས་འདི་བརྒྱ་རྩ་བརྒྱད་

73-1-147b

བཟླས་ཤིང་ལས་ལ་འཇུག་པས་བཅོམ་ལྡན་འདས་འཇིག་རྟེན་དབང་ཕྱུག་དྲན་པ་དང་མི་འབྲལ་བར་བྱེད་ན། དེས་ཇི་སྲིད་ཡོ་བྱད་ལ་གནས་པའི་རྡུལ་ཕྲ་རབ་ཇི་སྙེད་ཡོད་པ་དེ་སྙེད་ཀྱི་མཆོད་རྟེན་སྐུ་གཟུགས་བྱས་པར་འགྱུར་རོ། །དེ་རྗེས་གཟི་བརྗིད་ཉིད་དཔལ་གྱིས། །ཡེ་ཤེས་སྤྲོས་ལ་རབ་
གནས་བྱ། །ནམ་མཁའ་ཇི་སྲིད་བཞུགས་གསོལ་ནས། །བཟོད་པར་གསོལ་ཏེ་མཆོད་པས་མཆོད། །སྐུ་གཟུགས་དང་མཆོད་རྟེན་གྱི་ཆོ་ག་རྫོགས་སོ།།      །།༄༅། །བཅོམ་ལྡན་འདས་ཡེ་ཤེས་འབར་བ་ལ་ཕྱག་འཚལ་ལོ། །ཐེག་པ་མཆོག་ཞུགས་དེ་ཉིད་ཡེ་ཤེས་མ་མཐོང་དང་། །མཐོང་
བ་ཇི་སྲིད་རྣལ་དུ་མི་གནས་རེས་འགའ་ཉིད། །དེ་བཞིན་རྣམ་གཡེངས་ཐིབས་པོར་གྱུར་དང་མཐར་མི་འགྲོ། །བློ་གྲོས་ལམ་ལྟོས་དེ་དག་ལས་འཕགས་འདིར་བཤད་བྱ། །བདག་ལུས་སྤྱི་གཙུག་ཅོད་པན་ལ། །དཔལ་ལྡན་བླ་མ་བརྒྱུད་པའི་རིམ། །ཡེ་ཤེས་ཤིང་རྟའི་རྩ་མཆོག་ལམ། །དྲང་
དང་བར་མ་ཆད་དང་དངོས། །དེ་མཐའ་སློབ་དཔོན་རྡོ་རྗེ་རྩེ། །བདག་གི་ཚངས་གནས་ནམ་མཁའི་སྒོར། །ཨཱཿཧཱུཾ་གཉིས་མཚན་རེག་བསྒོམས་ལ། །སྟེང་རིམ་ནས་ནི་གསོལ་བ་གདབ། །མ་ལུས་ཡེ་ཤེས་ཅན་རྣམས་ཀྱིས། །ཡང་དག་རིམ་མཛད་ས་བོན་ཧཱུཾ། །པདྨ་ལ་ནི་གེ་སར་བཞིན། །མཁས་
པས་རབ་དང་ཐུགས་ཀར་བསྒོམས། །ཟླ་བ་ལ་ཡང་སྐར་མ་ལྟར། །རྡོ་རྗེ་འཆང་ཆེན་འོད་མཐར་ནི། །བཅུ་དང་གཉིས་བཅས་ཨ་ཕྲེང་གིས། །བསྐོར་བལྟས་གསང་སྔགས་བཟླས་པར་བྱ། །ཨོཾ་རཏྣ་གུ་རུ་ཤྲཱི་ཨ་བ་ལོ་ཀི་ཏེ་ཤྭ་ར་སརྦ་ཨིཥྚ་དེ་བཏ་མ་ཧཱ་ཏིཥྛ་ནེ་མ་མ་ཙི་ཏ་ཏ་ཏ་ཏ་ཛྙཱ་ན་ཛྭ་ལ་ཛྭ་ལ། པྲ་ཏི་
ཛྭ་ལ་པྲ་ཏི་ཛྭ་ལ། པྲ་ཏྱུད་ད་པནྣ་ཧྲྀ་ད་ཡ་ཛྭ་ལ་ཛྭ་ལ་སྥ་ར་ཎ་ས་ཧཱུཾ་ཧཱུཾ་ཧཱུཾ། གསང་སྔགས་རྒྱལ་པོ་རིག་པ་ཆེ། །རྡོ་རྗེ་འབེབས་པ་གདོན་མི་ཟ། །རྣལ་འབྱོར་ཕྱག་རྒྱ་ངེས་པ་འདིས། །ཐུགས་བསྐུལ་ཡེ་ཤེས་འབབ་པར་འགྱུར། །རྡོ་རྗེ་དབང་ཕྱུག་ས་བཅུའི་སྙིང་། །བུམ་པ་ལས་ནི་རྒྱུན་བཞིན་དུ། །རིམ་
གྱིས་བདག་སྙིང་ས་བོན་ལ། །བབ་གྱུར་དེ་ཡི་གཟི་བརྗིད་བསྐྱེད། །འཆར་ཀའི་འོད་ལྟར་དམར་བ་དང་། །ཟླ་རྒྱས་དཀྱིལ་འཁོར་ལྟར་དཀར་ཉིད། །དབང་པོའི་གཞུ་མདོག་ལྟ་བུ་ཡི། །འོད་ཀྱིས་བདག་ལུས་གང་བར་བྱ། །གང་ཕྱིར་བསྐལ་པ་བྱེ་བར་ཡང་། །འབད་བྱས་དལ་བས་ཡང་མིན་ལ། །

73-1-148a

བདེ་ཆེན་འོད་གསལ་རྣམ་མི་རྟོག །བླ་མའི་དྲིན་ཐོབ་ཐོབ་པར་འགྱུར། །ཆུ་གཏེར་ཆེ་ལས་བརླན་པའི་རླངས་བསྐྱོད་དྲི་མེད་མཁའ་ལ་མི་ཟད་སྤྲིན་འཁྲིགས་དཀའ་བ་མེད། །རྟ་བདུན་ཤར་ཚེ་ཐིབས་པོས་མ་རུངས་གླིང་རྣམས་མི་གསལ་སྣང་བར་བྱས་ལ་དཀའ་བ་མེད། །
ནམ་མཁའི་ངོས་ལ་ཤུགས་དྲག་དྲག་འཁྲུགས་གློ་བུར་སྤྲིན་བསྒྲིབས་དངས་པར་བྱས་ལ་དཀའ་བ་མེད། །དེ་བཞིན་བདག་གི་ཆོས་ཀྱི་རྗེར་གྱུར་དམ་པའི་མཐུས་ཀྱང་ཡེ་ཤེས་འབར་བར་དཀའ་བ་མེད། །ཡེ་ཤེས་སྦར་བའི་གདམས་པ་རྫོགས་སོ།།      །།༄༅། །བཅོམ་ལྡན་
འདས་ཐུགས་རྗེ་ཆེན་པོ་ལ་ཕྱག་འཚལ་ལོ། །གང་ཞིག་བྱང་ཆུབ་སེམས་བསྐྱེད་ན། །བདག་གམ་གཞན་གྱི་དོན་འཇུག་པ། །དེ་ཚེ་ཤེས་དང་མི་ཤེས་པས། །དྲི་མ་རབ་ཏུ་མང་སྐྱེ་འགྱུར། །དེ་ལ་མགོན་པོ་སྤྱན་རས་གཟིགས། །ཐུགས་རྗེ་ཆེན་པོས་བྱིན་བརླབས་པ། །ཡེ་ཤེས་
བདུད་རྩིའི་ཆུ་རྒྱུན་གྱིས། །བཀྲུ་བ་དམ་པ་འདིར་བཤད་དོ། །རབ་ཏུ་གནས་པ་མཆོག་གནས་པའི། །རྟེན་གང་བྱིན་གྱིས་བརླབས་པ་ཞིག །མདུན་བདར་མེ་ཏོག་བདུག་སྤོས་སོགས། །མཆོད་པ་དུ་མས་ལེགས་མཆོད་བྱ། །ཕྱོགས་བཅུ་དུས་གསུམ་གཤེགས་པ་ཡི། །རྒྱལ་བ་
སྲས་བཅས་རིན་ཆེན་གསུམ། །སྤྲིན་གྱི་ཕུང་པོ་ལྟར་དཀྲིགས་པས། །ནམ་མཁའི་ངོས་ལ་གང་བར་བལྟ། །ཉེས་དམིགས་རྣམ་པ་མེད་དྲན་པས། །གདུང་བའི་ཡིད་ཀྱི་འགྱོད་པས་ནི། །ཐོག་མེད་ནས་བསགས་སྡིག་པའི་ཚོགས། །མ་ལུས་སོ་སོར་བཤགས་ཤིང་བསྡམ། །འགྲོ་བ་དགེ་
བའི་རྩ་རྣམས་ལ། །རྗེས་སུ་ཡིད་བྱེད་ཡི་རང་བ། །འདི་ནི་བསམ་མི་ཁྱབ་པའི་ལས། །མིང་ལས་ཕུན་ཚོགས་ཁྱད་པར་འདོད། །དེ་ནས་འཕགས་ཚོགས་སྤྱན་སྔར་བདག །གུས་པས་ཕྱག་འཚལ་རབ་དང་བས། །སྡིག་ལྡན་བདག་ལ་སྐྱབས་པའི་ཕྱིར། །ཐུགས་རྗེ་ཆེན་པོས་དགོངས་སུ་གསོལ། །
གཏི་མུག་ཐིབས་པོས་ནོན་པ་བདག །མི་བཟད་སྡིག་པའི་དབང་གྱུར་ཏེ། །འགྲོ་བ་ངན་སོང་ངེས་པའི་སར། །གནོན་མི་ཟ་བར་མྱུར་ལྟུང་འགྱུར། །དེ་བས་སྐྱོབ་པ་རྣམས་ཀྱི་མཐུས། །མགོན་མེད་བདག་གི་གནས་སྐབས་འདི། །གཟིགས་ནས་མྱུར་དུ་བསྐྱབ་ཏུ་གསོལ། །ཁྱེད་ལས་སྐྱབས་གཞན་

73-1-148b

བདག་མ་མཆིས། །དེ་ལྟར་སྣ་ཚོགས་གདུངས་པ་ཡིས། །སྨྲེ་སྔགས་དུ་མས་སྨྲེ་བརྗོད་ལ། །རྩེ་གཅིག་མ་ཡེངས་ཐལ་སྦྱར་ནས། །རེ་བའི་ཡིད་ཀྱིས་མདུན་དུ་འདུག །དེ་ཚེ་ལྷ་མཆོག་འདུས་པ་ཡི། །ཚོགས་རྣམས་ཐུགས་རྗེའི་ཐུགས་བསྐྱོད་དེ། །དེ་དག་ལས་སྤྲུལ་འཇིག་རྟེན་མགོན། །དཀར་བཟང་
བུམ་པ་འཛིན་འོངས་བསམ། །ཡང་ནི་མི་ཕྱེད་དད་དང་དང་།  མཆོད་བྱས་གསོལ་བ་གདབ་པར་བྱ། །དེ་རྗེས་མགོན་པོའི་ཐུགས་ཀ་ནས། །འོད་ཕྱུང་མི་འཇིགས་སྦྱིན་པའི་སྒྲས། །དབྱིངས་འབྱིན་དྲི་མ་བསལ་བ་དང་། །བཀྲུས་དང་ཡོངས་སུ་སྦྱང་བ་བྱ། །དེ་ལས་འོད་ཟེར་རྣོན་པོ་ཡིས། །དྲི་མ་
བསྲེགས་པ་དང་པོས་ཏེ། །བདུད་རྩིའི་ཆུ་རྒྱུན་ཕྲེང་བ་ཡིས། །བཀྲུ་བ་གང་ཡིན་གཉིས་པའོ། །ཡང་དག་ཡེ་ཤེས་མཉམ་གཞག་ལ། །མཉམ་འཇོག་ཡོངས་སུ་སྦྱོང་བ་བཤད། །དག་དང་དྲི་མེད་འོད་གསལ་དང་། །སྒྲུབ་པ་ལས་ལ་སྦྱར་བ་ཡིས། །དོན་བསྒྲུབས་ནས་ནི་དཀྱིལ་འཁོར་གཉིས། །
སླར་བདག་སྙིང་གར་བསྡུ་བར་བྱ། །དྲི་མ་རྣམ་དག་གི་ཆོ་ག་རྫོགས་སོ།།      །།༄༅། །བཅོམ་ལྡན་འདས་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །སྔགས་པ་གང་ཞིག་ཡུལ་ལམ་དབང་པོ་དང་ལས་ཀྱི་སྟོབས་ཀྱིས་གལ་ཏེ་ཕྱི་དང་ནང་གི་དམ་ཚིག་ཉམས་པ་འགའ་ཞིག་ལྟ་བུ་བྱུང་
བར་གྱུར་ན། དེས་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་དང་ལྡན་པ་དྲན་པར་བྱས་ལ། ལུས་དང་ལོངས་སྤྱོད་དང་། གདམས་ངག་ལ་ལྷག་པར་ཆགས་པ་ཡང་སྤངས་ཏེ། ཆོ་ག་རྣམས་ལས་ཇི་སྙེད་འབྱུང་བའི་བཤགས་པ་དང་། སྦྱང་བ་རྣམས་ཀྱིས་ཤིན་ཏུ་གུས་པར་རབ་
ཏུ་དག་པར་བྱའོ། །དེའི་ཡང་ཆོ་ག་རྣམས་ཀྱི་གཙོ། །དཔལ་ལྡན་འཇིག་རྟེན་གསུམ་རྒྱལ་པོ། །དྲི་མ་སྦྱོང་བའི་བརྟག་པ་ལས། །གང་བཤད་བདུད་རྩིའི་ཆུ་རྒྱུན་འདི། །པདྨོ་དཀར་རྒྱས་འདབ་སྟོང་རྣམ་པར་བྱེ་བ་ཡི། །ལྟེ་བར་རང་སེམས་དྲི་མེད་ཧཱུཾ་གི་སྙིང་པོ་ཅན། །སྒྲིབ་ཚོགས་ཆགས་ཉམས་དུ་བ་
ཁུག་རྣ་དངུལ་གྱི་ཚུལ། །མེ་ལོང་ངོས་ལ་གཡའ་དག་ཇི་བཞིན་ཁེབས་པར་བསམ། །དེ་ཡི་གཙུག་ཏོར་ནས་བརྒྱུད་པ། །དྷཱུ་ཏཱི་རིན་ཆེན་སྤངས་པ་ཡི། །སྦུ་གུ་དཀར་པོ་གྱེན་འགྲེང་བ། །སྤྱི་གཙུག་བར་དུ་གསལ་བར་བྱ། །བདག་ཉིད་ཅོད་པན་ཉི་ཟླའི་གདན་སྟེང་འབར་བ་ལ། །བླ་མ་མགོན་

73-1-149a

དང་ཨ་ཧཾ་ཡབ་ཡུམ་ཕྱི་ནང་རིམ། །ཇི་བཞིན་སྙོམས་འཇུག་བདེ་ཆེན་སྟོང་ཉིད་བསམ་གཏན་ལ། །རྟག་ཏུ་དགེས་བཞུགས་བདག་གི་ཉམས་པ་གསོ་མཛད་བསྒོམ། །ཕྱི་ནང་གསང་གསུམ་མཆོད་པ་དང་། །བསྟོད་སོགས་རྒྱས་པར་བྱས་ནས་ནི། །འགྱོད་དང་སྡོམ་དང་དང་བར་
བཅས། །རྩེ་གཅིག་བློ་ཡིས་གསོལ་བར་བྱ། །ཐོག་མ་ཁོ་ནར་བླ་མ་སྙོམས་ཞུགས་བྱང་ཆུབ་སེམས་ཀྱི་རྒྱུ་རབ་དམར། །སྦྱོར་མཚམས་ནས་སམ་ཉིད་ཀྱི་རྡོ་རྗེ་རྡོ་རྗེ་རྣམ་དག་རྩེ་ལྔ་ལས། །བྱུང་བའི་མེ་ལྕེས་བདག་ལུས་ཀུན་ཁྱབ་རླུང་གི་ཤུགས་བཅས་དཀྲུགས་པ་དང་། །འབར་བའི་ཤུགས་ཀྱིས་ཇི་
སྙེད་ཆགས་ཉམས་དྲི་མ་མ་ལུས་བསྲེག་པར་བྱ། །རྡོ་རྗེས་ལྷ་ཡང་སྙོམས་པར་ཞུགས། །ཐིག་ལེ་དཀར་ཧཱུཾ་བཀྲུ་བ་དང་། །དེ་བཞིན་ཐབས་དང་ཤེས་རབ་ཀྱང་། །སྙོམས་འཇུག་ཐིག་ལེ་སྔོན་པོས་གསོ། །ཆོ་ག་དམ་པ་འདི་ཡིས་ནི། །མི་གང་ཤེས་དང་མི་ཤེས་དང་། །མ་དད་ང་རྒྱལ་མང་བ་དང་། །
བསྙེན་སོགས་རྒྱུ་ཡིས་ལམ་ཉམས་པ། །དེ་དག་མྱུར་དུ་གཟའ་ལས་ཐར་བའི་ཟླ་བ་བཞིན། །ཟླ་བ་གཅིག་གམ་ཡང་ན་གཉིས་ཉིད་དེ་སྟེ་གསུམ། །བརྩོན་དང་གུས་དྲག་ཐེ་ཚོམ་ཡིད་གཉིས་བསལ་ནས་ནི། །རིག་མ་མཆོག་བཅས་སྙོམས་པར་ཞུགས་ན་ངེས་པར་གྲོལ། །ཆགས་ཉམས་གསོ་བ་
རྫོགས་སོ།།      །།༄༅། །འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །རབ་ཏུ་སྔ་བར་ལངས་ནས་ནི། །དྲི་ཞིམ་ཆུ་ཡིས་བཀང་བ་ཡི། །བུམ་པར་བརྩོན་མཛད་སྤྱན་རས་གཟིགས། །བཞུ་བའི་རྒྱུན་གྱིས་ལུས་བཀྲུ་བྱ། །དགེ་བའི་ཁང་བུ་དམ་པར་ནི། །བརྩེ་ལྡན་
སྐྱེས་བུ་ཆེ་རྣམས་ཀྱིས། །དུལ་བའི་བློ་གྲོས་དྲན་པ་དང་། །བག་ཡོད་དབང་པོ་རབ་བསྡམས་པས། །ཞུགས་ལ་སྣ་ཚོགས་མཆོད་པ་ཡི། །རྫས་རྣམས་ཆལ་པར་བཀྲམ་བྱ་ཞིང་། །དྲི་བསུང་བདུག་པ་མཆོག་གིས་བདུགས། ཁྲོ་བོའི་རྒྱལ་པོའི་སྔགས་བཟླས་བྱ། །ཨཱོཾཿཨ་བིགྷྣཱན་སརྦ་ཏོ་ཥ་པྲ་
ཧ་ན་ཧཱུཾ་ཕཊ། དེ་ནས་ལྷ་ཡི་རྣལ་འབྱོར་གྱིས། །ཇི་བཞིན་བསྐྱེད་དང་རྫོགས་པ་ཡི། །ཆོ་ག་རིམ་པས་སྔོན་བཏང་ལ། །པ་ཊི་ཀ་ཡི་སྦྱོར་བ་བརྩམ། །རྡོ་རྗེ་ལྕགས་ཀྱུའི་ཕྱག་རྒྱ་དང་། །སྨིན་མཚམས་འཕྲོ་བའི་འོད་ཟེར་གྱིས། །བརྩོན་པའི་འཇིག་རྟེན་གསུམ་དབང་པོ། །སྐད་ཅིག་ཙམ་གྱིས་

73-1-149b

མདུན་དུ་དྲང་། །ཤེལ་ལྟར་དྲི་མེད་ཡངས་པ་ཡི། །ཕོ་བྲང་རིན་ཆེན་སྒྲོན་མ་ཅན། །རབ་ཏུ་ཉམས་དགའ་ལྷམ་མེ་བ། །རྒྱན་རྣམས་ཀུན་གྱིས་ཕུན་ཚོགས་ལྷ། །རླུང་གིས་བསྐྱོད་པའི་གཡེར་ཁ་རབ་སྙན་བདེ་བར་གཤེགས་པའི་གསུང་རབ་ལས། །བསྟན་པ་གང་དག་ཤིན་ཏུ་རྣམ་ངེས་རྟག་དང་བདེ་
དང་གཙང་བ་དང་། །བདག་ཏུ་ཆགས་པའི་ལྟ་བའི་ཀུན་སེལ་མི་རྟག་སྡུག་བསྔལ་མི་གཙང་དང་། །བདག་མེད་ཆོས་སྟོན་ནམ་མཁའི་མཐར་ཐུག་སྐྱེ་དགུའི་སྙིང་རབ་སིམ་བྱེད་བསམ། །དགུ་བརྒྱ་དགུ་བཅུ་རྩ་དགུ་ཡི། །གཞལ་མེད་ཁང་བརྩེགས་དམ་པ་དག །ཀུན་ཏུ་འོད་འཚེར་རྒྱལ་བ་ཡི། །
སྐུ་མཛེས་མང་པོས་རབ་བརྒྱན་པའོ། །ཁང་བཟངས་རེ་ཡང་མཆོད་པ་ཡིན། །ལྷ་མོ་བཅུ་དྲུག་བཅུ་དྲུག་གིས། །མངོན་པར་རོལ་བྱས་རྟག་ཏུ་རྩེན། །ཐམས་ཅད་ཏིང་འཛིན་བསྐྱེད་བརྩོན་པའོ། །དེ་ཡི་ཕྱི་རོལ་ཉེ་འཁོར་དུ། །ཕྱོགས་སྐྱོང་བཅུ་ཡི་བུ་རྣམས་ཀྱིས། །བརྩོན་བྱས་མཆོད་པའི་སྤྲིན་ཕུང་
ལས། །ལུས་ཕྱེད་མངོན་ཕུང་བཏུད་པའོ། །ཕྱོགས་བཅུའི་རྒྱལ་བ་ཐམས་ཅད་ཀྱི། །སྨིན་མཚམས་མཛོད་སྤུར་བྱུང་བ་ཡི། །སྐར་མདའ་ལྟར་དཀར་འོད་འཕྲོས་པས། །ཁང་བཟངས་རྒྱལ་བའི་ཐུགས་བསྐུལ་བྱ། །འདི་ལྟར་རྣམ་པར་གཡེངས་ཀུན་གྱི། །རྩ་བ་འཛིན་པ་ཡིན་པའི་ཕྱིར། །མཁས་པ་ཏིང་
འཛིན་མྱུར་འདོད་པས། །འཛིན་པ་མཐའ་དག་སྤང་བར་བྱ། །དེ་འཛིན་པ་ནི་རྣམ་བཞི་སྟེ། །ལོངས་སྤྱོད་བཤེས་དང་ལུས་ཉིད་དང་། །དགེ་བའི་ཚོགས་ལ་མངོན་ཞེན་པའོ། །འདི་དག་གཞན་གྱི་དོན་དུ་བསྔོ། །དེ་ནས་མེ་ལོང་ཟླ་རྒྱས་དང་། །དབང་པོའི་གཞུ་དང་འོད་ཀྱི་ཁྱིམ། །སྟོན་གྱི་ནམ་མཁའི་གུང་
རྣམས་ཀྱིས། །སྦྱོར་བ་བརྟན་པས་རྣམ་པར་བསྒོམ། །འཇིག་རྟེན་མགོན་པོའི་ཏིང་ངེ་འཛིན། །ཐོགས་མེད་འོད་དཔག་མེད་ཉིད་ཀྱིས། །དབུ་བརྒྱན་ཧྲཱིཿཡིག་སྙིང་པོ་ཅན། །སྨིན་མཚམས་ཉི་མས་མཚན་གྱུར་བལྟ། ཨོཾ་ཨཱཿཧྲཱིཿམ་མ་ཙི་ཏྲ་ས་མ་ཡ་དྷི་བཛྲ་མུ་ཏྲ་པྲ་ཏྱུད་ཏ་ཕེཾ་ཕེཾ་ཕེཾ་ཛྭ་ལ་ཛྭ་ལ་ཛྭ་ལ་ཧཱུཾ་ཧཱུཾ་ཧཱུཾ། 
སྔགས་འདི་རྒྱལ་བའི་སྐུ་གསུང་ཐུགས། །ཏིང་འཛིན་དབབ་པའི་ཕྱག་རྒྱས་ཏེ། །རང་བཞིན་པདྨོ་འདབ་སྟོང་དབུས། །ཐིག་ལེ་དཀར་འཚེར་རྡོ་རྗེའི་རྒྱུ། །ཉི་མའི་ཟེར་གྱིས་པདྨོ་དབྱེ། །ཐིག་ལེ་ལས་ནི་འོད་ཚོགས་སྤྲོ། །དེ་ཡིས་མུན་པ་ཀུན་བསྲེགས་པས། །ཐོགས་མེད་བསམ་གཏན་རང་བྱུང་

73-1-150a

འགྱུར། །ཏིང་ངེ་འཛིན་མྱུར་དུ་བསྐྱེད་པའི་གདམས་ངག་རྫོགས་སོ།།       །།༄༅། །སྤྱན་རས་གཟིགས་ཏིང་ངེ་འཛིན་རབ་ཏུ་བརྟན་པ་ལ་ཕྱག་འཚལ་ལོ། །གང་ཞིག་ཏིང་འཛིན་རི་དབང་པོ་ལྟར་གཡེང་བའི་རླུང་གིས་མི་བསྐྱོད་ཅིང་། །ཤིན་ཏུ་འོད་གསལ་སྟོན་ཀའི་མཁའ་ལ་ཉི་འོད་དྲ་བ་
བཀྲམ་འདྲ་བ། །གཉིས་མེད་བདེ་ཆེན་རྟོགས་དཀའི་རྟོག་པས་རྟོག་ཏུ་དགེས་བཞུགས་འཚམ་པའི་ཞལ། །བསམ་གཏན་མཆོག་གི་ཕྱག་རྒྱས་མཉམ་གཞག་མཉམ་མེད་མགོན་པོ་ཉིད་རྟག་འདུད། །སྒྲུབ་པོ་གང་ཞིག་སྒྲུབ་པའམ། །ངོ་བོ་ཉིད་ཀྱིས་རྙེད་པ་ཡི། །ཏིང་འཛིན་རབ་ཏུ་མི་བརྟན་པ། །དེ་དག་བརྟན་
པའི་ཐབས་འདིར་བཤད། །ཤིན་ཏུ་དབེན་པའི་གནས་ཉིད་དུ། །ལུས་དང་སེམས་ནི་རབ་དལ་བས། །རྒྱ་ཆེན་མཆོད་སྦྱིན་བྱས་ནས་སུ། །མན་ངག་གསུམ་གྱི་དང་པོ་བསྒོམ། །མ་ལུས་འགྲོ་ལ་བྱམས་སོགས་ཚད་མེད་ཚངས་པའི་གནས་པས་ལེགས་གནས་ལ། །ཇི་སྐད་བཤད་པའི་ཏིང་འཛིན་ཕྱག་རྒྱས་
དཔའ་བོ་ཆེན་པོ་མཉམ་གཞག་བྱ། །དེ་རྗེས་མཚན་བཅས་མཚན་མེད་ཆོ་གས་མགོན་པོ་ལ་གུས་གསོལ་བཏབ་ལ། །སྦྱོར་བ་གསུམ་པའི་རྣལ་འབྱོར་རྒྱལ་པོས་རྩེ་གཅིག་བརྟན་པར་ཡང་དག་བསྒོམ། །ཐ་མལ་རང་ལུས་དཀྱིལ་འཁོར་དབུས། །སྙིང་དཀྱིལ་པདྨོ་དབྱེ་བའི་ནང་། །རྡོ་རྗེ་འཛིན་པ་ལེགས་བསྒོམས་ལ། །
དེ་ཡི་ནང་ནའང་མགོན་པོ་ཉིད། །དེ་བཞིན་དེ་ཡི་སྙིང་པོ་ནི། །དུས་གསུམ་རྒྱལ་བས་བྱིན་བརླབས་པ། །སྒྲུབ་པོའི་ཏིང་འཛིན་བརྟན་པའི་རྒྱུ། །ཡེ་ཤེས་ཆེན་པོ་ཧྲཱིཿཡིག་གོ། །དེ་ནི་གཉིས་སུ་མེད་སེམས་རྒྱུ། །དེ་ལ་ས་བོན་ཡང་དག་བརྟན། །སྐུ་གསུང་ཐུགས་དང་ཡེ་ཤེས་དངོས། །འབྲུ་བཞི་
ཕྱོགས་བཞིར་རྣམ་པར་བསམ། །མགོན་པོ་ཉིད་མཐར་ཨཱ་ལི་སྟེ། །བླ་མའི་མཐར་ཡང་ཀཱ་ལིའོ། །དབུས་ནས་བརྩམས་ཏེ་སྔགས་བཟླས་ཤིང་། །འོད་ཟེར་སྦྱོར་བས་དོན་གཉིས་བསྒྲུབ། །སྐྱེ་བ་ལས་ནི་ཕྱོགས་བཅུའི་མཐར་ཐུག་གང་དག་བསམ་གཏན་མ་ཐོབ་པའམ། །ཐོབ་ཀྱང་གང་ཞིག་རྣལ་
དུ་མི་གནས་རི་ཡི་རྩ་རྩེ་ལྟར་གཡོ་བ། །དེ་དག་དེ་ལྟར་སྐད་ཅིག་ཡུད་ལ་རི་རབ་སྲ་ལྟར་བརྟན་པ་ཡི། །ཏིང་འཛིན་ལ་བཀོད་བདེ་ཆེན་རོ་མྱང་འཆི་མེད་མཉམ་གཞག་ཆེར་གཞག་བྱ། །བསྡུས་པས་ཕྱི་མ་ཕྱི་མའི་རིམ། །ཐིམ་གྱུར་ནང་མ་ནང་མ་ལ། །ངག་དང་དྲི་མེད་བརྟན་པ་ཞེས། །བྱ་བའི་

73-1-150b

མིང་ཅན་ཏིང་འཛིན་གསུམ། །གོ་རིམས་ཇི་བཞིན་བསྒོམས་ནས་ནི། །གཅིག་ཏུ་འགྲོ་བ་སྙིང་བརྩེ་བས། །ཐུན་གསུམ་ཞག་བདུན་ཡིད་བྱེད་ན། །དེ་ཡི་ཏིང་འཛིན་རི་ལྟར་འགྱུར། །ཏིང་ངེ་འཛིན་བརྟན་པར་བྱེད་པའི་གདམས་ངག་རྫོགས་སོ།།      །།༄༅། །འཕགས་པ་མི་གཡོ་བའི་ཏིང་ངེ་འཛིན་ཅན་
ལ་ཕྱག་འཚལ་ལོ། །མི་གང་སེམས་གཡོ་འགོག་འདོད་པས། །སྐད་ཅིག་སྦྱོར་བ་སྤྱན་རས་གཟིགས། །ཏིང་འཛིན་རྒྱ་མཚོ་དུས་དྲུག་ཏུ། །མཚན་མ་དྲུག་ནི་བསྒོམ་པར་བྱ། །དེ་ལ་གཡོ་བ་བརྟན་པར་བྱེད་པ་ནི། ཕྱིའི་མཚན་མ་རི་མོ་དང་རི་མོ་མེད་པ་ལ་རྩེ་གཅིག་ཏུ་འཇུག་པའོ། །ནང་གི་མཚན་
མ་ཡི་གེ་མེད་པ་ལ་རྩེ་གཅིག་ཏུ་འཇུག་པའོ། །གསང་བའི་མཚན་མ་སྐྱེ་བ་དང་སྐྱེ་བ་མེད་པ་ལ་རྩེ་གཅིག་ཏུ་འཇུག་པའོ། །མི་གཡོ་བ་བརྟན་པར་བྱེད་པ་ནི་ཕྱིའི་མཚན་མ་རྒྱ་མཚོ་དང་ནམ་མཁའི་སྦྱོར་བའོ། །ནང་གི་མཚན་མ་བུམ་པ་ལྟ་བུ་དང་རི་མོ་ལྟ་བུའི་སྦྱོར་བའོ། །གསང་བའི་མཚན་མ་ནི་
ཐིག་ལེ་སྙོམས་པའི་སྦྱོར་བའོ། །ཕྱི་ནང་གསང་གཡོ་མི་གཡོ་བས། །དབང་གྱུར་དམིགས་པར་རང་གནས་ན། །དེ་ཡང་དེ་ཚེ་བྱེད་བྲལ་དུ། །དུབ་པ་ངལ་བསོ་མཁས་པས་ཤེས། །སེམས་བརྟན་པར་བྱེད་པ་རྫོགས་སོ།།      །།༄༅། །དཔལ་ཏིང་འཛིན་གྱི་རྒྱལ་པོ་བྱིན་གྱིས་བརླབས་པའི་
གཏེར་ལ་ཕྱག་འཚལ་ལོ། །དཔལ་ལྡན་པདྨོ་འཛིན་དབང་གིས། །སྔགས་མཐུ་མ་གྲུབ་གྲུབ་པ་དང་། །ཉམས་ཆགས་གསོ་བའི་ཆོ་ག་ནི། །མཁས་པས་འབད་དེ་བསྒོམ་པར་བྱ། །ཐ་མལ་ལུས་ཀྱི་སྙིང་འདབ་དབུས། །ཕྱོགས་ཀྱི་ཁ་དོག་ཅན་ཧཱུཾ་ཡིག །རྣལ་འབྱོར་རྒྱལ་པོ་རང་སེམས་གཞི། །
དཀར་འཁྱིལ་གཟི་བརྗིད་འོད་མཛད་བསྒོམ། །ཁ་དང་རྣ་བ་སྣ་གཉིས་དང་། །མིག་གཉིས་བཤང་དང་གཅི་བའི་སྒོ། །དེ་བཞིན་རྐང་པ་ལག་གཉིས་ནི། །གཙོ་བོ་ལས་སྤྲོས་རྡོ་རྗེ་བདག །གསང་བའི་དཀྱིལ་འཁོར་ཆོ་ག་བཞིན། །པདྨ་ཨུཏྤལ་རྡོ་རྗེ་ཕྲ། །ཉི་ཟླ་རྡོ་རྗེ་ཧོམ་ཁུང་ཟླུམ། །རྒྱ་གྲམ་རྡོ་རྗེ་
རྩེ་མང་ཉིད། །ཨ་ཕྲེང་ཀ་ཕྲེང་དཀར་དམར་གྱིས། །བསྐོར་བས་ཁྲག་འཐུང་འཇིགས་པའི་སྔགས། །ཐུགས་རྗེ་འཕྲོས་པའི་འོད་ཟེར་ལས། །སྐྱེས་པའི་སྦྱོར་བ་ཡི་དགས་བྱ། །དམ་ཚིག་རྡོ་རྗེ་ཧཱུཾ་ཡིག་ལས། །ཡེ་ཤེས་དཔལ་འཛིན་བཅུག་ནས་ནི། །མཆོད་སོགས་ཆོ་ག་བཞིན་བཏུད་ནས། །

73-1-151a

ཏིང་འཛིན་སེམས་དཔའ་རྩེ་གཅིག་བྱ། །རྣམ་པར་རྟོག་པ་ཀུན་ཤིགས་དང་། །ཡེ་ཤེས་ཕྱག་རྒྱ་མཆོག་སྦྱོར་ལ། །མཉམ་གཞག་ཕྲིན་ལས་བཅུ་ལྷག་སྤྱོད། །མཁས་པས་སོམ་ཉི་མེད་པར་སྤྱོད། །རྟག་ཏུ་སེམས་ཅན་ལ་ཕན་དང་། །ལྷག་པའི་ལྷས་དེ་དེ་ཉིད་ཤེས། །རྣལ་འབྱོར་ཆོ་ག་
ལ་བརྩོན་པས། །ཟླ་བ་དྲུག་ན་རྟགས་མཐོང་འགྱུར། །ལུས་ནང་མེ་ལྕེ་འབར་བ་ལྟར་ཚ་མེ་འོད་རྣམ་པར་འཁྲུགས་པ་དང་། །རྡོ་རྗེའི་སྤུ་སྐྱེས་ཁ་ནས་མེ་འབར་སྐྱེ་བོ་མང་པོའི་མགོ་བཏུད་བསྟོད། །ལག་ན་རྡོ་རྗེ་རལ་གྲི་འབར་ཐོགས་ཧ་ལའི་སྒྲ་སྒྲོགས་ཕྱོགས་བཅུར་རྒྱུག །མིག་འབྲས་རབ་གསལ་
སྒྲོན་མའི་འོད་འཆར་བློ་གྲོས་ཉེ་བར་ཞི་བའོ། །བྱིན་རླབས་མི་ཟད་པའི་ཆོ་ག་རྫོགས་སོ།།      །།༄༅། །བཙུན་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །རེ་ཞིག་སྔགས་པ་བློ་གྲོས་དམ་པ་ཕུལ་དུ་སྦྱངས་པ་དག་གིས་ཟླ་བ་རྒྱས་པའི་ཚེ་ཁ་ཤར་དུ་བལྟས་ལ་བཙུན་པ་སྤྱན་རས་
གཟིགས་དབང་ཕྱུག་ཡིད་ལ་བྱེད་པ་དང་མི་འབྲལ་བས། ཐོག་མར་སྐྱབས་སུ་འགྲོ་བ་དང་སེམས་བསྐྱེད་པ་ལ་མངོན་པར་བརྩོན་པར་བྱའོ། །དེའི་འོག་ཏུ་ཚངས་པའི་གནས་པདྨ་ལ་ལེགས་པར་གནས་པའི་ཤེས་རབ་ཤིན་ཏུ་སྦྱངས་པ་ཡིད་ལ་བྱའོ། །མེ་ཏོག་ལ་སོགས་པའི་མཆོད་པ་དང་། འཕགས་པ་
དགྱེས་པའི་ཚིགས་སུ་བཅད་པས་བསྟོད་པ་དང་། སྔར་བྱས་པ་ལ་འགྱོད་པས་སྡིག་པ་བཤགས་པ་ལ་སོགས་པ་ཇི་སྐད་བཤད་པ་དེ་དག་ཉིད་ཀྱང་ངོ་། །དེ་ནས་རང་ལུས་རྒྱལ་བ་ཡི། །ཕོ་བྲང་འཁོར་ལོ་དཀར་མཛེས་སུ། །སྐད་ཅིག་ཙམ་གྱིས་མངོན་བལྟས་ལ། །རྣམ་དག་གསུམ་པོ་བསྒོམ་པར་བྱ། །
དེ་ལ་མགོ་བོ་གཡས་གཡོན་ལག །གསང་བའི་རྡོ་རྗེ་གཡས་གཡོན་རྐང་། །འདི་དག་རྩིབས་དྲུག་གསལ་བ་སྟེ། །ལྟེ་བ་ལྟེ་བ་ཡིན་པར་བཤད། །ཧཱུཾ་དང་ཨོཾ་དང་ཏྲཱཾ་ཧྲཱིཿཨཿ །ཕཊ་ཅེས་བྱ་བ་སྔོན་པོ་དང་། །དཀར་སེར་དམར་ལྗང་དུང་མདོག་རྣམས། །རིམ་བཞིན་མེ་ལོང་གཟུགས་ལྟར་དགོད། །
སྒྱུ་མ་སྨོན་ལམ་རྣམ་ཐར་གྱིས། །དོན་དུ་གྲུབ་པ་མེད་པ་ཡང་། །སྣང་བ་མི་དམིགས་རྒྱུད་དུ་འབྲེལ། །རྟོག་པ་མཐའ་གཉིས་ལས་གྲོལ་བའོ། །དེ་རྗེས་ལྟེ་དབུས་སེམས་ཀྱི་གཞི། །བརྟེན་པའི་ཧྲཱིཿཡིག་དཀར་བསམས་ཏེ། །དེ་སྟེང་བདེ་ཆེན་ཐིག་ལེ་བསྒོམ། །སྦྱོར་བ་གསུམ་པའི་རྣལ་འབྱོར་

73-1-151b

གྱིས། །བསྡུ་དང་དབང་དུ་བྱ་བ་དང་། །ངེས་པར་རྟོགས་པའི་རིམ་གསུམ་གྱི། །མཁས་པས་བདེ་ཆེན་འབར་བ་ཡི། །ཁུ་བ་ཞུ་བ་བསྒོམ་པར་བྱ། །འགྲོ་བའི་དོན་བསྒྲུབ་རྡོ་རྗེ་ཡི། །འཁོར་ལོ་མགལ་མེ་བསྐོར་བ་ཞེས། །བྱ་བ་འདི་ཡང་བླ་མ་ཡི། །མན་ངག་གིས་ནི་དེ་རྗེས་བརྩམ། །བརྩེ་ཆེན་
བྱང་ཆུབ་སེམས་བཟང་གི། །རླུང་བསྐྱོད་ཡེ་ཤེས་འབྲུ་ལྔ་ཡི། །ཕྲེང་བ་འཁོར་ལོ་བསྐོར་བ་ལས། །ཆོས་ཀྱི་སྒྲ་དབྱངས་སྙན་བསྒྲག་བྱ། །མི་རྟག་སྡུག་བསྔལ་བདག་མེད་སྟོང་། །མཚན་མེད་སྨོན་པ་ཟད་པ་ཡི། །གསུང་རབ་དྲང་དང་དྲང་བ་མིན། །ཕྱོགས་བཅུར་མཁའ་ཁྱབ་བསྟན་
པར་བྱ། །ལྷན་ཅིག་དོན་གཉིས་བྱེད་པ་འདིས། །ཅིག་ཅར་བདག་གཞན་དོན་བསྒྲུབས་ནས། །མཐར་ནི་བརྟན་དང་གཡོ་བ་ཡི། །འཁོར་ལོ་སྤར་བའང་ཤེས་པར་བྱ། །དེ་བཞིན་འགྲོ་དང་འདུག་དང་སྨྲ། །གཉིད་ལོག་ལ་སོགས་དུས་ཀུན་ཏུའང་། །བརྟན་པ་མི་ཕྱེད་དྲན་ལྡན་པས། །རྟག་
ཏུ་སྤྱོད་པ་སྤྱད་པར་བཤད། །འཁོར་ལོ་འབར་བ་རྫོགས་སོ།།      །།༄༅། །དཔལ་སྤྱན་རས་གཟིགས་དབང་ཕྱུག་གསུང་དབང་གི་རྒྱལ་པོ་རྣམ་པར་རོལ་པ་ལ་ཕྱག་འཚལ་ལོ། །གསུང་གི་དབང་ཕྱུག་ངག་གི་བདག །རྟག་ཏུ་སྤྲོ་བས་མཆོག་བསྐྱེད་མཛད། །སོ་སོ་རང་རིག་མགྲིན་པར་
གནས། །དཔལ་ལྡན་སྤྱན་རས་གཟིགས་ཕྱག་འཚལ། །བློ་ལྡན་རབ་དང་སྙིང་རྗེའི་ཆབ་ཀྱིས་རྟོག་པའི་མྱུ་གུ་རྣམ་བརླན་དང་། །གང་ཞིག་སྐལ་ངན་དག་གི་དཔའ་ཉམས་སྐྱེ་བོས་རབ་བརྙས་མ་རུངས་ཉིད། །གཞན་དག་སྔགས་རིག་མཐུ་བསྐྱེད་འདོད་དང་དེ་བཞིན་ཕ་རོལ་བྱེད་བཟློག་
འདོད། །དེ་དག་གུས་པས་ཤིན་ཏུ་ཡིད་དགའ་ངག་གི་མཐུ་བསྐྱེད་གསུང་གི་རོལ་པ་འདི་བསྒོམ་བྱ། །རེ་ཞིག་སྔགས་པས་སྐྱབས་སུ་འགྲོ་བ་དང་སེམས་བསྐྱེད་པ་དང་དབང་བསྐུར་བ་ཡང་དག་པར་རྗེས་སུ་དྲན་པས་ལྷའི་རྣལ་འབྱོར་ཆེན་པོ་ཡུད་ཙམ་གྱིས་མངོན་དུ་བྱས་ལ། ཧྲཱིཿཡིག་
ལས་ཡོངས་སུ་གྱུར་པའི་པདྨོ་སྡོང་བུ་ཅན་གྱི་འདབ་མའི་ལྕེ་དང་སྟེང་དུ་ཨ་དང་ཧཱུཾ་ལས་ཟླ་བ་དང་རྡོ་རྗེར་བསྐྱེད་པ་ནས་དེའི་མཐར་ཨཱ་ལི་དང་ཀཱ་ལི་དང་ཕྲང་བ་འབར་བ་དཀར་དམར་གཡས་དང་གཡོན་དུ་བསྐོར་བའི་བར་དུ་སྟེ། ཇི་སྐད་འཕགས་པའི་ལྕེ་བྱིན་གྱིས་བརླབས་པའི་མདོ་ལས་འབྱུང་བ་ལྟར་

73-1-152a

བསམ་པར་བྱའོ། །དེ་ནས་ལྷག་བསམ་རྣམ་དག་པས། །འགྲོ་བའི་ངག་གི་དྲི་བསལ་ཞིང་། །མཐུ་བཅུ་སྤོབས་པ་བསྐྱེད་འདོད་པས། །ཐོག་མར་ཨ་ལ་སོགས་པ་ཟླ། །དེའི་ཕྱིར་དེ་དག་ལས་འོད་ཀྱི་ཕྲེང་བ་དཀར་པོ་དྲ་བ་དང་དྲ་བ་ཕྱེད་པ་དང་གུར་ཕུབ་པ་དང་། གཞའ་རིས་ཀྱི་རྣམ་
པ་ལྟ་བུར་ཤར་བས་སེམས་ཅན་མ་ལུས་པའི་ངག་གི་དྲི་མ་བསལ་ཞིང་། བྱང་ཆུབ་སེམས་དཔའ་གསུང་གི་དབང་པོའི་རྒྱལ་པོ་རྣམ་པར་རོལ་པ་ཞེས་བྱ་བའི་ངག་གི་མཐུ་རྣམ་པ་བཅུ་པོ་དག་ཡོངས་སུ་བསྐྱེད་པ་དང་། ཚུར་འདུས་པས་དེ་དག་གི་ངག་གི་ནུས་པ་གང་ཡོད་པ་དེ་དག་ཀྱང་མར་མེ་ལྟར་
བླངས་ཤིང་། ཡི་གེ་ཉིད་ལས་མངོན་པར་ཐིམ་པ་དང་། ཨ་སོགས་རྡོ་རྗེ་དཀར་པོ་དང་། །དེ་བཞིན་ལྷག་བསམ་སྔོན་འགྲོ་བས། །ཀ་སོགས་རལ་གྲིའི་བར་བསམས་ཏེ། །རལ་གྲི་རྡོ་རྗེ་རྣམ་པར་སེལ། །དེ་ལ་རལ་གྲི་ནི་གཉིས་གཉིས་སོ། །རྡོ་རྗེ་ནི་རེ་རེའོ། །མཐར་ཕྲེང་བ་ཕྲེང་རྒྱུད་གཅིག་ལ་དགོད་
པར་བྱའོ། །རྡོ་རྗེའི་ལས་ནི་ངག་གི་སྐྱོན་འཇིག་པར་བྱེད་དོ། །རལ་གྲིའི་ལས་ནི་ངག་གི་མཐུ་རྣོན་པོ་ཡང་དག་པར་འབྱིན་པར་བྱེད་པའོ། །རྡོ་རྗེ་ཡི་གེ་དེ་དག་གིས་མཚན་རྡོ་རྗེའི་མཆོག་དང་རྣོ་བ་ཡི། །རལ་གྲི་འབར་བ་སྤུ་གྲིའི་སོ་འདྲ་འོད་ཟེར་དཀར་དམར་ལྷག་གེ་བ། །མཁས་པས་དེ་ཚེ་སྐད་ཅིག་མངོན་
བལྟས་ཚིགས་བཅད་བཀླག་ཅིང་མ་ཡེངས་པས། །རང་གཞན་དོན་ཕྱིར་བྲོ་གར་འགྱུ་བྱས་སྤྲོ་དང་བསྡུ་བའི་འོད་དབྱུང་བྱ། །དེ་ལྟར་སྦྱོར་བ་དམ་པ་འདི་ཉིད་དང་ལྡན་པས་ནམ་ལངས་པའམ། ཉི་མ་འཆར་ཀའམ་སྲོད་ཐོག་ཐག་གམ་མཚན་ཕྱེད་དམ་རྟག་ཏུ་ཡང་རུང་སྟེ། གཞན་ལ་བརྩེ་བ་དྲག་པོ་དང་
བཅས་པས་གང་གྲུབ་པའི་དགེ་བ་ཉིད་ཀྱང་བདག་ཉིད་ལྷག་པར་ཆགས་པ་མེད་པར་གཞན་ལ་ཡང་དག་པར་ཕན་པར་འདོད་ན། འདིའི་ངག་གི་ནུས་པ་ནི་དྲང་སྲོང་དང་མཚུངས་པར་འགྱུར་རོ། །གང་ཚེ་བཟླས་པས་ཡིད་སྐྱོ་ཞིང་། །འགྲོ་དོན་ལྡན་པར་འདོད་པ་ན། །སྔགས་གསུམ་བཟླས་པས་ཕྲེང་
བ་ཡི། །འཁོར་ལོ་བསྐོར་བ་འོད་དུ་ཞུ། །དཔལ་ངག་གི་མཐུ་བསྐྱེད་པའི་མན་ངག་རྫོགས་སོ།།      །།༄༅། །དཔལ་འཇིག་རྟེན་དབང་ཕྱུག་རླུང་གི་འཁོར་ལོ་འཛིན་པ་ལ་ཕྱག་འཚལ་ལོ། །སྔགས་པས་ཤིན་ཏུ་ཉམས་དགའ་བའི། །གནས་སུ་རབ་ཏུ་མཐོ་བའི་ཚལ། །བསིལ་ཁང་རླུང་རྒྱུན་

73-1-152b

རྟག་འབབ་པར། །གསང་སྔགས་འཁོར་ལོ་བསྐོར་བར་བྱ། །ཧྲཱིཿཨོཾ་ཨཱཿཧྲཱིཿཧཱུཾ། པླཀྵ་འམ་བྱང་ཆུབ་ཤིང་ལོ་འམ། །དེ་བཞིན་རྟག་ཏུ་རླུང་གིས་བསྐྱོད། །ཁ་དོག་དྲི་བཟང་ཚལ་པའང་རུང་། །བསྲུང་བ་བྱས་ནས་འཁོར་ལོ་བཅའ། །ཅི་ཙམ་གཡོ་བར་སླ་བ་ཡི། །བཟོ་བཅོས་ལྟེ་བ་པདྨོས་མཚན། །བརྒྱ་
ཕྱེད་ལ་ནི་རྡོ་རྗེ་ཡི། །རལ་གྲི་མི་བཟད་གཟུགས་བྱའོ། །ཕོ་བྲང་གནས་སུ་ས་བོན་ལས། །མགོན་པོ་རླུང་གི་འཁོར་ལོ་ཅན། །རྩིབས་རྣམས་ལ་ནི་ཤེས་རབ་ཐབས། །ཡོངས་གྱུར་སྔགས་གྲུབ་ལྷ་མོ་བསམ། །དངོས་དང་བྱིན་རླབས་གཞུག་པ་ཡིས། །གཟི་བྱིན་བསྐྱེད་ལ་མཆོད་པས་མཆོད། །
རང་ཉིད་འཁོར་ལོ་འཛིན་བསྒོམས་ནས། །འོད་བཀྱེ་སྔགས་བཟླས་འཁོར་ལོ་བསྐོར། །ཐུན་གསུམ་ཐོག་མར་བརྒྱ་རྩ་བརྒྱད། །གསང་སྔགས་མྱུར་དུ་གྲུབ་འདོད་པས། །གསོལ་བཏབ་རླུང་ལ་བཀའ་བསྒོ་སྟེ། །རང་ཉིད་ཅི་བདེ་སྤྱད་པར་བྱ། །གང་དུ་འཁོར་ལོ་རབ་འཁྱིལ་བ། །ཐུགས་རྗེ་
ཆེ་མཆོག་རིག་པའི་མཐུས། །སྒྲུབ་པོའི་ངལ་བ་འཇིག་བྱེད་པ། །དེར་ནི་སྡིག་ལྡན་མི་བརྟེན་ནོ། །དེ་ལྟར་འཁོར་ལོ་ཆེན་པོ་རང་ཉིད་འཕགས་པ་སྤྱན་རས་གཟིགས་ཀྱི་མཐུས་རིགས་ལྔ་བཅུ་རྩ་ལྔ་ཟློས་པར་མཛད་པ་ནི་དམ་ཚིག་ཅན་རྣམས་ཀྱིས་ཐབས་ཡིན་པར་བལྟ་བར་བྱའོ། །མེ་ཏོག་ལ་སོགས་པའི་
མཆོད་པ་ཇི་སྙེད་པ་ལ་གང་ཟག་མེད་པའི་ཞེས་ལེ་ལོ་དང་བརྙས་པ་མི་བྱའོ། །ཁ་ན་མ་ཐོ་བ་ཕྲ་རབ་དང་། དགེ་བའི་རྩ་བ་ཆུང་ངུ་ཐམས་ཅད་ལ་བག་ཡོད་པ་དང་། བརྩོན་པ་ལྷུར་བྱའོ། །དཀར་པོའི་ཕྱོགས་གཅིག་གིས་བསྙེན་པ་ཐམས་ཅད་ཡོངས་སུ་རྫོགས་པར་འགྱུར་ཏེ། འདི་ལ་ཐེ་ཚོམ་
མི་བྱའོ། །དཔལ་ལྡན་བླ་མའི་མན་ངག་ཟབ་མོའི་དྲིན། །གང་ཐོབ་སྐལ་ལྡན་ངལ་བ་མེད་པར་ནི། །གསང་སྔགས་སྒྲུབ་བྱེད་ལུས་མེད་ཤུགས་ཅན་གྱི། །འཁྲུལ་འཁོར་འཇིག་རྟེན་མགོན་ཉིད་ལས་གཞན་མིན། །གསང་སྔགས་མྱུར་དུ་གྲུབ་པའི་ཆོ་ག་རྫོགས་སོ།།      །།༄༅། །འཕགས་
པ་ཐུགས་རྗེ་ཆེན་པོ་དང་ལྡན་པ་ལ་ཕྱག་འཚལ་ལོ། །གསུམ་ལ་སྐྱབས་སོང་སེམས་བསྐྱེད་ལྡན། །འགྲོ་ལ་ཕན་འདོད་བདག་དུལ་བའི། །སྐྱེས་བུ་དམ་པ་བསམ་གཏན་གྱི། །ཁང་བུར་ཞུགས་ལ་རྨི་ལམ་བསྒོམ། །བཙུན་པ་སྤྱན་རས་གཟིགས་ཀྱི་སྐུ། །བཙོ་མ་གསེར་གྱི་མདོག་ལྡན་པ། །

73-1-153a

ཞལ་གཅིག་ཕྱག་བཞི་གཡས་དང་པོ། །འཇིགས་སྐྱོབ་དེ་བཞིན་གཡོན་དུ་ནི། །པདྨ་དམར་པོ་གཉིས་པ་གཉིས། །ཏིང་འཛིན་མཆོག་གི་ཕྱག་རྒྱའོ། །ཐུགས་ཀྱི་པདྨོ་ཁ་ཟུམ་པའི། །དབུས་སུ་སེམས་དངོས་ཧྲཱིཿབསམ་བྱ། །འདི་འདྲའི་འཕགས་པ་ཉིད་དུ་བདག །སྐད་ཅིག་ཙམ་
གྱིས་བསྒོམས་ནས་ནི། །དགེ་དང་བརྩེ་དང་དད་པ་ཡིས། །རྣལ་འབྱོར་རྒྱལ་པོ་གཉིད་ལོག་བྱ། །གང་ཚེ་གཉིད་དུ་ཉེ་བ་ན། །ཧྲཱིཿཡང་ཐིག་ལེ་གཉིས་ལ་བསྡུ། །རིམ་གྱིས་ཐིག་ལེ་འོག་མ་ཡང་། །དེ་བཞིན་ཐིག་ལེ་གོང་མ་ལའོ། །དེ་ལས་སྣ་ཚོགས་སྣང་བ་ཀུན། །རང་གི་ལུས་ལ་བསྡུས་ནས་
དེ། །པད་དབུས་ཐིག་ལེ་ཉག་གཅིག་ལ། །ཆུ་ལ་ཆུ་བཞིན་ཇི་བཞིན་བཞག །སེམས་ནི་དྲི་མེད་ཟུང་འཇུག་བདག །དངོས་མེད་དངོས་བྲལ་རྣམ་པར་དག །འོད་གསལ་ཆེན་པོ་ཉིད་ལ་ཉིད། །མངོན་སུམ་མི་གཡོ་བརྟན་པར་གཟུང་། །ཚུལ་འདི་རང་བཞིན་མཁའ་འདྲ་སྟེ། །རྣམ་པ་ཐིག་ལེ་
བདེ་བ་ཆེ། །ངོ་བོ་ཀུན་ཏུ་མ་འགགས་པའོ། །སྦྱངས་སྡོམ་ཅན་གྱི་ཆོས་གཅིག་བཞེད། །དེ་ལྟར་སྒྱུ་འདྲ་ཆོས་ཀྱི་རང་བཞིན་མེད། །གཞན་ལ་མ་རིག་བདག་ཉིད་སྙིང་དཀྱིལ་བརྟན་པར་གནས། །རྒྱལ་བ་རྣམས་ཀྱི་གཤེགས་ཤུལ་གཅིག་ཡིན་མ་ནོར་བ། །བསྒོམས་ན་དེ་རྗེས་རྨི་ལམ་ཉིད་
དུའང་དེ་མཐོང་འགྱུར། །གལ་ཏེ་སྒྲིབ་ཚོགས་བུད་ཤིང་ཚང་ཚིང་གིས་བསྒྲིབས་པས། །ཡང་དག་ཇི་བཞིན་དེ་ཚེ་མངོན་དུ་མ་གྱུར་ནའང་། །རྣལ་འབྱོར་རྒྱལ་པོས་རེ་བ་ཆད་པར་མི་བྱ་སྟེ། །གོམས་པ་ཅུང་ཟད་ཅིག་ཏུ་བརྩོན་འགྲུས་གཡེལ་མི་བྱ། །མདུན་གྱི་མཁའ་ལ་སངས་རྒྱས་བྱང་
ཆུབ་སེམས་དཔའ་དང་། །ཉན་ཐོས་རང་རྒྱལ་ལྷ་ཡི་ཚོགས་ཀྱིས་ཡོངས་བསྐོར་བའི། །རྒྱལ་བའི་དཀྱིལ་འཁོར་སྤྲིན་གྱི་ཕུང་པོ་ལྟར་མཐོང་འགྱུར། །དེ་ཚེ་དེ་ནས་རིང་པོ་མི་ཐོགས་འོད་གསལ་འཐོབ། །རྣམ་དག་འཁོར་ལོ་པདྨོ་འདམ་ནས་སྐྱེས་པ་བཞིན། །གཉིད་ཀྱིས་མྱོས་
འགྱུར་མ་རིག་གིས་བསླད་བློ་གྲོས་འདི། །རང་གིས་རང་དབེན་མཁའ་ལ་ཉི་ལྟར་སྤྲོས་བྲལ་དུ། །རྩོལ་བ་མེད་ཉིད་རང་དབང་མངོན་སུམ་འཆར་བར་བྱེད། །རྨི་ལམ་སྐྱེས་བུས་རྨི་ལམ་གྱི། །གྲོང་དུ་དགའ་དང་མྱ་ངན་ལ། །བཟུང་བ་རློམ་སེམས་ཅན་ཡིན་ལ། །དེ་ཚེ་དེ་ཡིས་ཤེས་

73-1-153b

པར་འགྱུར། །མེ་ལོང་གཟུགས་བརྙན་གསལ་བ་ནི། །ཡོད་དང་མེད་དང་གཉི་ག་དང་། །གཉིས་པ་མ་ཡིན་བརྗོད་མིན་པ། །དེ་ཚེ་ཡིད་ཆེས་མཐོང་བར་འགྱུར། །ནམ་མཁའི་ངོས་ལ་དབང་པོའི་གཞུ། །དེ་བཞིན་སེར་སྤྲིན་འབྲུག་སྒྲ་ཅན། །ཐོག་མར་སྐྱེས་དང་འགག་མི་དམིགས། །འོད་
གསལ་ལ་གནས་སྐྱེས་བུས་ཤེས། །ཇི་ལྟར་སྨིག་རྒྱུའི་རྒྱུན་འབབ་པ། །ཤར་སོགས་ནས་ནི་གང་ཞིག་ནས། །མ་འོངས་གར་ཡང་མི་འགྲོ་བ། །རྨི་ལམ་མཐོང་བ་དེ་ཡིས་ཤེས། །དྲིལ་བུ་དང་ནི་པི་ཝང་སྒྲ། །བྲག་ཅ་ལ་སོགས་འདུ་བྱེད་ནི། །རྣམ་པར་ཐར་པ་གསུམ་གྱི་སྒོས། །ཟབ་མོ་རྣམ་པར་
དབེན་པ་ཡང་། །སྣང་དང་མུན་པ་ཐིབས་པོ་དང་། །འོད་གསལ་བྱེ་བྲག་མེད་གྱུར་པ། །ཤིན་ཏུ་སྦྱངས་པའི་གསེར་བཞིན་དུ། །དྲི་བྲལ་རྣམ་པར་དག་པ་རྨད། །ཇི་སྲིད་འཛིན་པ་མང་པོ་ལ། །ཟད་དང་མི་སྐྱེ་བསྲེ་བ་ཡིན། །རོ་གཅིག་ཉིད་དུ་སྦྱོར་ཤེས་པ། །རྨི་ལམ་ལས་གཞན་རྣལ་འབྱོར་རྨི། །དེ་
ནི་སད་པ་ཉིད་ནའང་། །ཡིད་ཀྱི་དབང་པོ་ཚིམ་པ་དང་། །འདོད་པའི་སྲིད་པ་ལས་བློ་ལྡོག །ཆོས་འདི་བརྗོད་པ་ཙམ་རྟོགས་སོ། །དེ་ལྟར་གཟུང་དང་འཛིན་པ་ཡི། །དྲི་མ་དྲི་མ་བྲལ་བ་དང་། །བྲལ་བ་རང་བཞིན་མེད་པ་ཡང་། །ཡིད་ཀྱིས་མངོན་པར་འདུ་མི་བྱེད། །འཕགས་པའི་མིག་ཅེས་བཤད་པ་སྟེ། །
སྤྱན་རས་གཟིགས་ཀྱི་མཐུ་ཡིས་སོ། །རྨི་ལམ་དྲི་མ་མེད་པའི་བསྒོམ་པ་རྫོགས་སོ།།      །།༄༅། །བཅོམ་ལྡན་འདས་སྤྱན་རས་གཟིགས་རལ་གྲི་འབར་བ་ལ་ཕྱག་འཚལ་ལོ། །མི་གང་གཉིད་ཀྱིས་ལོག་པ་ན། །མ་འོངས་བཀྲ་ཤིས་མིན་པ་ཡི། །ལྟས་གང་བྱུང་བར་གྱུར་པ་དེ། །དགའ་བའི་ལྟས་
བསྟན་མཐོང་བར་འགྱུར། །འདི་ལ་བཙུན་པ་སྤྱན་རས་གཟིགས། །དད་པ་ཐོབ་པ་དཀའ་ཐུབ་ཅན། །བརྩེ་ལྡན་དབང་པོ་དུལ་བ་ཡིས། །བཟློག་པའི་ཆོ་ག་གསུངས་པ་ཡིན། །ཉི་མ་འཆར་ཀའི་འོད་འཕྲོ་ཚེ། །གསོ་སྦྱོང་ཡན་ལག་ལ་གནས་པས། །ཤར་དུ་ཁ་བལྟས་གོས་བཟང་གྱོན། །གདོང་བཀྲུས་
མེ་ཏོག་ཕྲེང་བས་བརྒྱན། །གསུམ་ལ་སྐྱབས་སོང་བརྩེ་ཆེན་གྱིས། །སྣ་ཚོགས་མཆོད་རྫས་ལེགས་བཤམས་ལ། །སྤྱན་རས་གཟིགས་ཀྱི་སྐུ་གཟུགས་ཤིག །མདུན་དུ་བདར་ཏེ་སྡིག་པ་བསལ། །སྐད་ཅིག་ཆོ་གས་ལྷ་མཆོག་གི། །རྣལ་འབྱོར་བྱས་ལ་དེ་ཡི་སྐུ། །ཞལ་བརྒྱ་ཕྱག་སྤྱན་སྟོང་ལྡན་དང་། །

73-1-154a

འོད་ཕྲེང་དཀར་པོ་ལས་གྲུབ་པའི། །རྡོ་རྗེ་རལ་གྲི་བེ་ཅོན་དང་། །དགྲ་སྟ་ལྕགས་ཀྱུ་ཁ་ཊྭཱཾ་ག །རྡོ་རྗེ་དབྱིག་པ་རྡོ་རྗེ་ཞགས། །འདི་བརྒྱད་རེ་རེ་ལས་ཀྱང་སྟོང་། །སྤྲུལ་པས་ཁོར་ཡུག་བསྐོར་བར་བལྟ། །འཁོར་ལོ་རྣམ་གསུམ་བཟླས་པ་ཡིས། །བཅད་དང་གཏུབ་དང་བསྲེག་པ་ནི། །
ལྟས་ངན་རྣམ་པར་བཤིག་པར་བྱེད། །སྣ་ཚོགས་མཆོད་པ་སྔོན་འགྲོ་བས། །གཏོར་མ་སྟོང་ནི་རབ་ཏུ་སྦྱིན། །དེ་ལ་སྔགས་ནི་འདི་ཡིན་ཏེ། །ངག་བསྡམས་པ་ཡི་རྒྱུན་ཆགས་སོ། །ཨོཾ་ཨཱཿམ་ཧཱ་ཏ་ཐཱ་ག་ཏ་ཨཥྚ་ས་ཧ་མ་ཧཱ་ལོ་ཀེ་ཤྭ་ར་ས་པ་རི་ར་བ་ལིཾ་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ཧཱུཾ་ཧཱུཾ་ལན་
གསུམ་གསུམ་གྱིས་སོ། །མཐར་ནི་འདིའོ། །མ་མ་ཀུ་ཊེཥྚི་ཀུ་ཀརྨྨ་སརྦ་རྦད་ཏྲ་སརྦ་ཐ་ཤ་ན་ཀ་རཱ་ཕཊ། ཨ་ཀ་རུ་ཡིས་ལེགས་བདུག་ཅིང་། །ལྷ་མཆོག་མདུན་དུ་རྣམ་བསམས་པས། །མི་འཇིགས་སྦྱིན་པའི་སྒྲ་ཕྱུང་སྟེ། །མཁའ་ལ་གཞའ་ལྟར་ཞི་བར་བསམས། །སྡིག་པ་དང་ནི་
བཀྲ་ཤིས་མིན། །དགྲ་དང་གདོན་ཀུན་རབ་འཇིག་པ། །ཆོ་གའི་རྒྱལ་པོ་ཡེ་ཤེས་མཆོག །སྤྱན་རས་གཟིགས་ཀྱི་བརྟག་པའོ། །རྨི་ལམ་གྱི་ལྟ་བ་ངན་པ་རྣམ་པར་བཟློག་པ་རྫོགས་སོ།།      །།༄༅། །འཕགས་པ་ཐུགས་རྗེ་ཆེན་པོ་ལ་ཕྱག་འཚལ་ལོ། །ལྟེ་དབུས་ལས་སྐྱེས་བྱི་རུ་པདྨ་རཱ་གའི་
མདོག་ཅན་རཾ། །སྙིང་གནས་འོངས་ཁ་བདུད་ལྟར་དཀར་བའི་བདུད་རྩི་ཧྲཱིཿ། །སྨིན་མཚམས་ལས་བརྒྱུད་ཨིནྡྲ་མཁའ་འདྲའི་ཐིག་ལེའི་རྒྱལ་པོ་ཨ། །གཏུམ་མོ་རྣམས་ཀྱིས་ཀ་བསྲེག་ནྲྀ་སྦྱོང་ཐིག་ལེ་མཆོག་གསོ་རྒྱལ། །རེ་ཞིག་བྱང་ཆུབ་སེམས་དཔའ་བྱང་ཆུབ་མཆོག་ལ་རབ་གཞོལ་བས། །
སེམས་ནི་གཅིག་ཏུ་རྣམ་པར་ངེས་ཤིང་གཡེངས་པར་མ་གྱུར་པ། །འགྲོ་བ་ལྔ་པོ་རྣམས་ལ་བྱམས་དང་སྙིང་རྗེ་དགའ་བ་དང་། །བཏང་སྙོམས་བྱང་ཆུབ་ཀྱི་སེམས་ཡང་དག་པར་བསྒོམས་པ་དག་གིས་སྐྱེ་བོ་གདུལ་བར་དཀའ་བ་མ་རུངས་པ་ཐ་དད་པ་དམུ་རྒོད་དུ་གྱུར་པས། རྒྱུད་མ་རུངས་པར་བྱས་པ་
རྣམས་ཀྱི་ཁྲོ་བ་བསལ་བར་བྱའོ། །གང་ཕྱིར་སྲིད་པའི་སྡུག་བསྔལ་རྩ། །ཉོན་མོངས་དེ་ཡི་རྩེ་ཕྱིར་དང་། །བསོད་ནམས་མང་པོ་གཞིག་ཕྱིར་དང་། །བདག་ལ་བརྟེན་ནས་གཞན་བརླག་ཕྱིར། །དེ་ལ་བདག་ཉིད་བསྒོམ་པར་བྱ་བའི་གནས་ནི། འཕགས་པ་སྤྱན་རས་གཟིགས་དབང་ཕྱུག་རྣམ་

73-1-154b

པར་དཀར་བ་ཞེས་བྱའོ། །དེའི་ཞལ་ནི་བརྒྱ་པའོ། །ཕྱག་ནི་སྟོང་ངོ་། །སྤྱན་ནི་རབ་ཏུ་མང་བའོ། །སྤུ་རེ་རེ་ཞིང་ཡང་འོད་ཀྱི་ཟེར་གློག་གི་མེ་ལྟ་བུ་རྣམ་པར་འཕྲོ་བའོ། །སྒྲོན་ཤིང་དང་ཚིལ་ཆེན་པོའི་མར་མེ་ལ་དགྱེས་པའོ། །ཨ་ཀ་རུ་དང་ཏུ་རུ་སྐ་དང་། གླ་རྩིའི་བདུག་པས་ཡང་དག་པར་བདུག་
པའོ། །ཚེས་གཅིག་དང་གསུམ་དང་བདུན་ལ་སོགས་པའི་སྦྱོར་བ་ལ་ཞུགས་པའོ། །ཚེས་བརྒྱད་དང་བཞི་དང་བཅོ་ལྔ་ལ་རྒྱུན་གྱི་སྦྱོར་བ་ལ་གནས་པའོ། །བཅུ་དྲུག་དང་བཅོ་བརྒྱད་དང་གནམ་སྟོང་ལ་སྲེག་པའི་སྦྱོར་བ་མཛད་པའོ། །གཅིག་དང་གསུམ་དང་བདུན་དང་ནི། །བརྒྱད་དང་བཅུ་
བཞི་བཅོ་ལྔ་དང་། །བཅུ་དྲུག་བཅོ་བརྒྱད་གནམ་སྟོང་ལ། །བྱིས་པའི་སྟོན་མོ་གྲངས་རིམ་བཞིན། །འདི་ནི་ཟླ་བ་དང་པོ་ལའོ། །དེ་ནས་རིམ་བཞིན་ཡང་ཕྱི་མར། །མས་བཟློག་གྲངས་ཀྱི་བུད་མེད་སྟོན། །དེ་བཞིན་དེ་ཕྱིར་ཅི་འབྱོར་མཆོད། །ཚུལ་འདིས་སྦྲུལ་གདུག་ནག་པོ་ཡང་། །ལྕགས་བསྲེགས་
སྣོད་དུ་མར་གསར་བཞིན། །རིང་པོར་མི་ཐོགས་སྙིང་བརྩེ་ཅན། །ཞུ་བར་འགྱུར་བར་གདོན་མི་ཟ། །ཁྲོ་བ་བསལ་བ་རྫོགས་སོ།།      །།༄༅། །དཔལ་ཐུགས་རྗེ་ཆེན་པོ་གདུག་པ་འདུལ་བ་ལ་ཕྱག་འཚལ་ལོ། །སྙིང་རྗེ་ཆེ་ལྡན་སྔགས་པ་ཡིས། །ཤིན་ཏུ་གདུག་པ་ཅན་གནས་སམ། །མི་སྲུན་སྐྱེ་
བོས་གང་བའི་གཞིར། །དཔལ་ལྡན་གདུག་པ་འདུལ་མཛད་བསྒོམ། །ཇི་སྐད་འབྱུང་བ་ཉིད་དཔལ་ཆེ། །སྣ་ཚོགས་རིན་ཆེན་རྒྱན་ལྡན་པ། །སྤྱི་བོ་འོད་དཔག་མེད་ཀྱིས་སྤྲས། །ཧྲཱིཿཡིག་ཡེ་ཤེས་སྙིང་པོ་ཅན། །གསལ་བྱས་དེ་ཐུགས་ཉི་མ་ཡི། །འཁོར་ལོ་རྩིབས་སྟོང་ལྷ་མཆོག་སྟོང་། །གདུག་པ་
འདུལ་ཕྱིར་མཉམ་གཞག་པ། །རྣལ་འབྱོར་ཅན་གྱིས་སྐད་ཅིག་བསྐྱེད། །སྤྱི་གཙུག་བཤང་སྒོ་རྡོ་རྗེའི་རྩེ། །སྦུ་གུ་དཀར་པོ་ཏལ་ཕྱིན་དང་། །ལྟེ་བ་ལྟེ་བ་ཉིད་ཡིན་ཏེ། །དེ་སྟེང་མགོན་པོ་ཉེར་མཚན་པའོ། །དེ་དབུས་སུ་ནི་རང་སེམས་ཧྲཱིཿ། །ཁྲོས་པ་དྲག་པོ་རབ་གནས་བསམ། །བརྩེ་བས་རྩལ་
བསྐྱེད་ཆེར་འཕེལ་བས། །འོད་འཕྲོས་གདུག་པ་བཀུག་མདུན་བདར། །ཆོ་གས་གཏོར་མ་སྦྱིན་བྱས་ལ། །དེ་སྙིང་པདྨོ་གཅིག་དབུས་ཧཱུཾ། །གདུག་པའི་སེམས་གང་ཡིན་པ་བསྐྱེད། །ཆོ་ག་གསུམ་གྱིས་དེ་བསྲེག་གོ། །ཀུན་དུ་སྡང་བ་མེད་ཉིད་དང་། །ལྟོས་བྲལ་གཅིག་ཏུ་སྙིང་བརྩེ་ཅན། །དཔལ་ལྡན་

73-1-155a

མགོན་པོ་ཚེ་ཉིད་ལ། །དྲིན་སྡོད་དེ་ཡིས་དགྲ་རྣམས་འཇིག །གང་ཚེ་རྨི་ལམ་ནང་དུ་ཡང་། །བྱམས་སེམས་ཞུགས་པས་སྙིང་གཡོ་ཞིང་། །གཞན་དོན་མཆི་མ་འཁྲུག་འགྱུར་བ། །དེ་ཚེ་གདུག་པ་ཐུལ་བར་འགྱུར། །རློམ་སེམས་དྲེགས་པ་ཞི་བ་དང་། །རྟག་ཏུ་བྱམས་ལྡན་སྙིང་སྟོན་པ། །མི་
དེའི་དམ་ཚིག་ཟབ་མོ་ནི། །མཆོད་སྦྱིན་བྱང་ཆུབ་སེམས་བསྣུན་བཤད། །འཕགས་པ་ཐུགས་རྗེ་ཆེན་པོ་གདུག་པ་འདུལ་བའི་ཆོ་ག་རྫོགས་སོ།།      །།༄༅། །འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཡང་དེ་ནས་སྐྱེ་བོ་གདུལ་བར་དཀའ་བ་རྣམས་ཀྱི་སྙིང་དྲེགས་པ་ཞི་བར་
བྱེད་པའི་ཆོ་ག་བཤད་པར་བྱ་སྟེ། བདག་ཉིད་འཕགས་པ་ཞལ་བརྒྱ་པ། །ཕྱག་སྟོང་སྤྱན་དཔག་མེད་ལྡན་སྐུ། །དཀར་ཞིང་དྲི་མེད་འོད་འབར་བ། །མི་འཇིགས་སྒྲ་སྒྲོགས་བསྒོམ་པར་བྱ། །ཤར་དུ་ཧ་ལ་ཞལ་གསུམ་ཁྲོས། །ཕྱག་དྲུག་མདའ་གཞུ་རྡོ་རྗེ་དྲིལ། །ལྕགས་ཀྱུ་ཞགས་པ་འཛིན་དུང་མདོག །
སྦྲུལ་དཀར་གྱིས་བརྒྱན་བཞད་པའོ། །ལྷོར་ནི་ཁྲོ་བོ་ཧ་ཧ་ཆེ། །ཞལ་གསུམ་ཕྱག་དྲུག་རྡོ་རྗེ་དྲིལ། །དགྲ་སྟ་ཁ་ཊྭཱཾ་ཐལ་མོ་བསྡམས། །ནམ་མཁའི་མདོག་ཅན་སྦྲུལ་སེར་བརྒྱན། །ནུབ་ཏུ་གཏུམ་ཆེན་དམར་ནག་དཔལ། །ཞལ་གསུམ་ཕྱག་དྲུག་ལྕགས་ཀྱུ་ཞགས། །ཉི་ཟླ་སྡིགས་མཛུབ་ཚངས་པའི་
མགོ། །སྦྲུལ་དམར་གྱིས་བརྒྱན་རྔམ་པ་ཡིན། །བྱང་དུ་ཟ་བྱེད་ཐལ་མདོག་ཅན། །ཞལ་གསུམ་ཕྱག་དྲུག་གླང་ཆེན་ལྤགས། །མདུང་ཐུང་བེ་ཅོན་རལ་གྲི་ཕུབ། །སྦྲུལ་ནག་གིས་བརྒྱན་རྒྱུ་མ་གསོལ། །འདི་དག་དཔའ་བོ་ཁྲོས་པ་ཡི། །ཆ་ལུགས་སྟང་སྟབས་དྲག་བཅས་པ། །སྤྱན་མངས་ཀྱིས་སྤྲས་
སྤུ་སྒོ་ནས། །ཀུན་ནས་མེ་འབར་འཁྱིལ་བའོ། །དེ་ནས་དཀྱིལ་འཁོར་ཆེན་པོའི་ཆོ་ག་ལས་ཇི་སྐད་བཤད་པའི་ཆོ་གས་མཆོད་པ་ལ་སོགས་པ་བྱས་ལ། བདེ་བ་ཆེན་པོའི་ཕོ་བྲང་གི་རྣམ་པར་ཐར་པ་ཟབ་མོ་དང་བཅས་པས་ཡེ་ཤེས་སེམས་དཔའ་སྤྱན་དྲངས་ཏེ། ཡང་མཆོད་པ་ལ་སོགས་པ་བྱའོ། །དེའི་
འོག་ཏུ་གང་དག་ཀུན་ནས་ཉོན་མོངས་པ་གང་དག་གང་གི་དབང་ལས་སྐྱེས་པའི་ང་རྒྱལ་གྱིས་སེམས་རབ་ཏུ་དྲེགས་ཤིང་མངོན་པར་མཐོ་བར་འགྱུར་བ། ལྟ་བ་ཕྱིན་ཅི་ལོག་དང་སེམས་ཕྱིན་ཅི་ལོག་གིས་ཀུན་ནས་དཀྲིས་པའི། འཆིང་བ་དམ་པོའི་དབང་དུ་གྱུར་པ་དེ་དག་ཉིད་བློས་མདུན་དུ་བྱའོ། །དེ་ལ་

73-1-155b

མཁས་པ་སྡང་བ་དང་། །བརྙས་བྲལ་ཞི་བའི་སེམས་ལྡན་པས། །བྱམས་དང་སྙིང་རྗེ་དགའ་བ་དང་། །བཏང་སྙོམས་ལས་བྱུང་བྱང་ཆུབ་སེམས། །ཡང་དང་ཡང་དུ་བརྟན་བསྒོམས་ཏེ། །དེ་ཡི་སེམས་ནི་རླུང་གི་རྟ། །ཐིག་ལེ་རྩ་ཡི་སྦྱོར་བ་ཅན། །རྣམ་པར་ཤེས་དང་གཅིག་གྱུར་ནི། །དེ་གདན་པདྨ་
དམར་འདབ་བཞི། །ཕྱོགས་བཞིའི་ཆར་གནས་བྷུ་བཾ་རཾ། །ཡཾ་ཞེས་དཀར་སྔོ་དམར་ལྗང་མདོག །གོ་རིམས་བཞིན་དུ་དགོད་པར་བྱ། །ཕྱོགས་ཀྱི་ལྷ་དབང་རྣམ་བཞི་ཡི། །ཐུགས་ལས་དབྱངས་དཀར་གསལ་བྱེད་དམར། །ཕྲེང་བའི་ཡི་གེ་འབྲུ་གསུམ་གྱིས། །མཚམས་སྤེལ་ཁབ་ལ་ཁབ་ལེན་
བཞིན། །བདག་ཉིད་སྙིང་ག་པད་འདབ་བཞིའི། །ལྟེ་དབུས་རྣམ་པར་ཤེས་བདག་ཧཱུཾ། །བསམས་ལ་དབྱངས་དང་གསལ་བྱེད་ཀྱི། །འཁོར་ལོ་གཡོན་དུ་བསྐོར་བ་ཡིས། །མཐུ་བསྒྲུབས་ནས་ནི་གྲུབ་པ་དང་། །རྨི་ལྟས་དཀར་པོ་བཞི་མཐོང་བ། །དེ་ཚེ་ཆོས་སྦྱིན་གཏོར་མ་སྦྱིན། །དེ་འོག་བསྟན་པས་
ལས་སྦྱར་བྱ། །ཆེ་གེ་མོའི་དུཥྚ་ཙིཏྟཱ་ཤཱནྟིཾ་ཀུ་རུ་ཡེ་སྭཱ་ཧཱ། རྗེས་སུ་གདགས་པའི་སྔགས་སོ། །ལས་ནི་འོད་ཟེར་མདའ་གཞུ་དང་། །མེ་དང་མར་གྱི་གོང་བུ་དང་། །འཁྲུལ་འཁོར་བསྐོར་དང་ཉི་མུན་གྱི། །སྦྱོར་བ་བླ་མའི་མན་ངག་བཞི། །ཨི་ཏི།།      །།བཅོམ་ལྡན་འདས་ཡེ་ཤེས་ཀྱི་འཁོར་ལོའི་བདག་པོ་ལ་
ཕྱག་འཚལ་ལོ། །སྔགས་པ་ཡན་ལག་དྲུག་རྩིབས་དྲུག །འཁོར་ལོ་འབར་བ་དྲི་མ་མེད། །དེ་ནང་པདྨོ་སྟོང་འདབ་ལ། །བསྐལ་བཟངས་སངས་རྒྱས་བརྒྱ་ཕྲག་བཅུ། །ལྟེ་བ་པདྨོ་ཅན་ཉིད་དེ། །དེ་སྙིང་རྡོ་རྗེ་འཛིན་པ་ཡིན། །དེ་ཡི་ཐུགས་ནི་ཡེ་ཤེས་ཆེ། །གཉིས་མེད་ཐིག་ལེ་དཀར་འཚེར་རོ། །ཨོཾ་ཨཱཿ
ཧྲཱིཿཧཱུཾ་ཕཊ་སྭཱ་ཧཱ། གཡས་དང་གཡོན་ལག་མགོ་བོ་དང་ནི་དེ་བཞིན་རྐང་། །གཡས་གཡོན་རྡོ་རྗེ་ཡན་ལག་བཞི་ལ་གོ་རིམས་བཞིན། །ཟླ་མདོག་མེ་དང་ནམ་མཁའ་ཨིནྡྲ་དང་། །མར་མེའི་དུད་མདོག་གནས་དྲུག་དག་གི་བདག་ཉིད་བསམ། །ཛཿཧཱུཾ་བཾ་ཧོཿ། ཇི་བཞིན་ཡེ་ཤེས་གཞུག་པ་ཡི། །མན་
ངག་གིས་ནི་ལྷ་བཅིངས་ལ། །རྣལ་འབྱོར་མུ་ཁྱུད་བཟླས་པ་ཡིས། །དཔལ་ཕྲེང་གསུམ་གྱི་སྔགས་རིང་བརྗོད། །སྣ་ཚོགས་ཁ་དོག་ཅན་འོད་ཟེར། །དེ་བཞིན་དཀར་དང་དམར་བ་ཉིད། །སྤྲོ་དང་བསྡུ་བའི་སྦྱོར་བ་ཡིས། །དོན་གསུམ་རྟག་ཏུ་བསྒྲུབ་པར་བྱའོ། །ཨོཾ་ཨཱཿཧྲཱིཿཧཱུཾ་ཕཊ་སྭཱ་ཧཱ། ཨ་ཨཱ། ཨི་ཨཱི། 

73-1-156a

ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ། རྣམ་དག་ཡེ་ཤེས་ཐིག་ལེ་ལས་བྱུང་བདེ་བའི་རྒྱུན་གྱིས་བླ་མ་དང་། །དེ་ལས་ཀྱང་འཕྲོས་པདྨ་འཛིན་སྐུ་ཤེལ་ལྟར་རབ་དང་རབ་ཏུ་
གང་། །ཡང་དེས་རྫོགས་སངས་རྒྱས་དང་ཉན་ཐོས་སྲས་བཅས་དེ་བཞིན་འཁོར་ལོ་ཡིག་འབྲུ་ཉིད། །མུ་ཁྱུད་འཁོར་ལོ་ཟག་མེད་རོ་མྱང་བྱང་ཆུབ་སེམས་རྒྱུན་གྱིས་ཁྱབ་སྤྲོ། །དེ་རྗེས་དེ་ཉིད་རིམ་པ་ཡིས། །ཡེ་ཤེས་འོད་གསལ་ཕྱུང་བས་ཀྱང་། །ཡིད་ཀྱི་མུན་པ་ཀུན་བསལ་ཞིང་། །ལུས་ཅན་ལ་ཡང་
བདར་བར་བྱ། །ཇི་སྐད་བསྟན་པའི་ཆོ་ག་ཡིས། །རྣལ་འབྱོར་རྒྱུད་དག་གྱུར་པ་ནི། །དམིགས་བྱ་དམིགས་བྱེད་དམིགས་བྲལ་བའི། །རྣམ་པར་མི་རྟོག་རང་སྐྱེ་འགྱུར། །དཔལ་འཁོར་ལོ་རྣམ་དག་གི་སྒྲུབ་ཐབས་རྫོགས་སོ།།      །།༄༅། །དཔལ་འཇིག་རྟེན་མགོན་པོ་དུག་ཐམས་ཅད་འཇོམས་པ་
ལ་ཕྱག་འཚལ་ལོ། །དཔལ་ལྡན་རྡོ་རྗེ་ཅན་གྱིས་སློབ་མའི་སྙིང་གི་དུག་སྦྱོང་བ། །འཇིག་རྟེན་གསུམ་མགོན་རྟག་པ་མཆོག །རྟག་ཏུ་མཉམ་པར་གཞག་པར་བྱ། །ལྔ་ཕུང་རྒྱལ་བ་རྣམ་ལྔ་བདག །སྤྱན་རས་གཟིགས་དཔལ་སྔར་བྱས་ན། །རྡོ་རྗེ་སློབ་དཔོན་རྡོ་རྗེ་ཆེ། །རྣམ་དག་རྡོ་རྗེ་འབར་བའི་དབུས། །ལེགས་
གཞག་ཤིན་ཏུ་དངས་པ་ཡིས། །མཆོད་པ་ཀུན་གྱིས་རབ་ཏུ་མཆོད། །དེའི་མཐར་ཡི་གེ་བཞིས་བརྒྱན་པ། །ཐབས་དང་ཤེས་རབ་འོད་ཟེར་འཕྲོས། །སྙིང་གི་མུན་པ་སེལ་མཛད་ནི། །དྲན་པའི་རྒྱས་གདབ་མཁས་པས་བསྒོམ། །སྐྱེ་བོ་ཐིབས་པོ་ཐམས་ཅད་ལ། །བརྩེ་ཆེན་རླུང་བསྐྱོད་ཡེ་ཤེས་མེ། །
ཨ་ཕྲེང་སོགས་བཅས་ཕྱོགས་ཀུན་དུ། །སྤྲོ་ཞིང་བསྡུ་བས་དོན་གཉིས་བསྒྲུབ། །དེ་འོག་རྡོ་རྗེ་འཛིན་པ་ཡི། །ཐུགས་ཀར་འོད་ཟེར་གསུམ་རིམ་གྱིས། །ཡེ་ཤེས་མཁའ་འགྲོ་བཀུག་ནས་ནི། །གསང་སྔགས་འགོག་པས་བཟླས་པར་བྱ། །སྔགས་ལས་སྐྱེས་དང་སྐུ་ལས་སྐྱེས། །འོད་ཟེར་ལས་སྐྱེས་
ཨ་ཕྲེང་གིས། །ཇི་སྲིད་སློབ་དཔོན་སྐུ་གང་བ། །དེ་སྲིད་མ་ཡེངས་བརྩོན་པར་བྱ། །ནམ་ཞིག་སྙིང་ལ་དགའ་བས་ཁྱབ། །བ་སྤུ་གྱེན་འགྲོ་མཆི་མ་གཡོ། །སེམས་ལ་ཏིང་འཛིན་རང་བྱུང་བ། །དེ་ནས་བདག་ལུས་ཀུན་ཁྱབ་བྱ། །སྙིང་གི་དུག་སྦྱོང་བ་རྫོགས་སོ།།      །།༄༅། །མགོན་པོ་སྤྱན་རས་

73-1-156b

གཟིགས་ལ་ཕྱག་འཚལ་ལོ། །སྐྱེ་དགུ་ཀུན་གྱིས་མཆོད་པའི་གཞི། །ལུས་ཡིན་གྲོལ་བའང་དེ་བཞིན་ནོ། །དེ་བས་འཆིང་དང་གྲོལ་འདོད་པས། །མགོན་པོའི་མན་ངག་འདིར་བསྒོམ་བྱ། །རྟ་བདུན་བསྐལ་པའི་མེ་འོད་ཅན། །ལྟེ་བར་ཧཱུཾ་ལས་ཡོངས་གྱུར་པའི། །ཡེ་ཤེས་རྡོ་རྗེ་འབར་བ་ནི། །ཚངས་
པའི་འཇིག་རྟེན་ལ་རེག་བསམ། །ཧཱུཾ་བརྗོད་རྡོ་རྗེ་སྤེལ་བར་བྱ། །ལྷག་པའི་མེ་ལྕེ་ཆེར་འབར་བས། །གདུག་པ་ཐམས་ཅད་རྣམ་པར་བསྲེག །མཐའ་དག་བར་ཆོད་མ་ལུས་བསྲུང་། །ཨོཾ་བཛྲ་རཀྵ་རཀྵ་ཧཱུཾ་ཧཱུཾ། སྔགས་འདི་བརྒྱ་རྩ་བརྒྱད་བཟླས་ནས། །གསུམ་པ་རྣམ་གསུམ་རིམ་པ་བཞིན། །རྡོ་རྗེ་མེ་རི་
རླུང་དམར་རྣམས། །རྒྱུད་འབྲེལ་བར་མ་ཆད་བསྒོམ་བྱ། །དེ་ནས་དེ་དབུས་ལྟེ་བར་ནི། །ཐུགས་རྗེ་ཆེ་ཁྲོས་བཞད་པའི་སྐུ། །རྡོ་རྗེའི་ཁྱུང་གཤོག་མཐིང་ག་ཅན། །རྡོ་རྗེ་དྲིལ་འཛིན་ལྷས་མཚན་བསྒོམ། །སེར་སྤྲིན་ལྟར་གནག་ཁྲོ་བོའི་ཞལ། །རབ་ཏུ་བགྲད་ཅིང་མཆེ་བ་གཙིགས། །བརྐྱང་བསྐུམ་ཞབས་གཉིས་
སྟང་སྟབས་ཚུལ། །དབུ་སྐྲ་སྨིན་མ་སྨར་སེར་འཁྱིལ། །ཁྲོ་བོའི་རྒྱལ་པོ་བཞད་པ་འདི། །སྤྱན་རས་གཟིགས་དབང་ཐུགས་རྗེ་ཡི། །ཁྲོས་པས་གདུག་པ་ཀུན་འདུལ་བ། །འབར་བའི་ཕྱག་རྒྱ་གཉིས་པ་ཡིན། །དེ་ནས་བསྲུང་བ་འདི་ཡི་རྗེས། །རྣམ་པར་གཞིག་པའི་རིམ་པ་ཡིས། །སྟོང་པར་རྣམ་པར་
བསྒོམས་ནས་ནི། །སྐད་ཅིག་ཙམ་གྱིས་རྒྱལ་གཟུངས་བསྒོམ། །རྡོ་རྗེ་སྐྱིལ་ཀྲུང་བཅས་སྐྱེད་སྐུ། །རྡོ་རྗེ་མདུད་པ་བསྡམས་པ་དང་། །རྡོ་རྗེ་ཐོས་སོར་ཞེས་པས་བསྡམ། །དེ་བཞིན་རྡོ་རྗེའི་འཁོར་ལོ་བསྐོར། །སྤྱི་བོ་མགྲིན་པ་སྙིང་ག་ལྟེ། །བདེ་ཆེན་ལོངས་སྤྱོད་ཆོས་སྤྲུལ་གྱི། །འཁོར་ལོ་མཛེས་པ་དཀར་དམར་
སྔོ། །ཁ་དོག་སྣ་ཚོགས་གོ་རིམས་བཞིན། །སུམ་ཅུ་གཉིས་དང་བཅུ་དྲུག་དང་། །བཞི་དང་དྲུག་ཅུ་བཞི་པའི་རྩིབས། །ཁ་སྦྱར་ཀུན་ནས་སྦུག་སྦུག་པོ། །རྩ་མཆོག་སྲོག་ཤིང་དང་བཅས་བསམ། །གཡས་གཡོན་ལ་ལ་ར་ས་ནཱ། །འཁོར་ལོ་རྣམས་ཀྱི་ལྟེ་བར་ཁྱུད། །གཞན་དུ་ངོས་གཉིས་འཁྱོག་འཁྱོག་
པོ། །འདིར་རྒྱུད་ཡེ་ཤེས་རླུང་གིས་གཞུག །ལྕགས་ཀྱུ་ཞེས་པའི་རླུང་བཟུང་ལ། །འོག་རླུང་སྟེང་རླུང་འཐེན་པར་གྱིས། །གནམ་ལྕགས་ཞེས་པའི་རླུང་ཉིད་ཀྱང་། །གཟུང་ལ་སྟེང་ཡང་འོག་ཏུ་མནན། །གཉིས་འདུས་ལྟེ་བའི་དཀྱིལ་འཁོར་ལ། །དབང་དུ་བྱ་བའི་རླུང་སྦྱངས་ལ། །གོམས་པས་རབ་ཏུ་འདྲིས་

73-1-157a

པར་བྱ། །ལྷག་པར་བསྙེན་པ་ཤིན་ཏུ་གཅེས། །གང་ཚེ་དྲོད་སྟོབས་ཁ་དོག་ཤུགས། །ཐོབ་ནས་རྩ་མཆོག་རྡོ་རྗེ་རྩེ། །ནོར་བུ་ལྕགས་ཀྱུའི་རླུང་གིས་དྲངས། །ཧཱུཾ་གསུམ་བརྗོད་པས་ལྟེ་བའི་དབུས། །ཨ་གསུམ་བརྗོད་པས་མགྲིན་པ་དང་། །དེ་བཞིན་ཧ་གསུམ་གྱིས་སྤྱི་བོར། །རིམ་པ་བཞིན་
དུ་དྲང་བར་བྱ། །རྡོ་རྗེའི་མདུད་རྩེ་གྱེན་ཕྱོགས་ལ། །གནས་བཞིན་མདུད་པ་བཞི་བཏབ་ནས། །དབུ་ཡི་གཙུག་ཏོར་ཅོད་པན་གྱི། །ཐིག་ལེ་རོ་མྱང་བསམ་གཏན་བྱ། །ནམ་མཁའ་ཡིད་ཀྱིས་ལྷ་ཡི་དབང་། །སྙོམས་པར་འཇུག་པའི་བདུད་རྩི་ཡི། །རྒྱུན་གྱིས་ཤིན་ཏུ་དྲི་མེད་པ། །བདེ་ཆེན་ཟུང་འཇུག་དག་
པ་ཡི། །ཐིག་ལེ་ལྷུང་བས་འཁོར་ལོ་དགྲོལ། །ཇི་ལྟར་སྔར་ནི་བཅིངས་པའི་རིམ། །དེ་བཞིན་བྱང་ཆུབ་སེམས་གང་བས། །མདུད་པ་མ་ལུས་རྣམ་པར་བཤིག །ཚུལ་འདིས་ལུས་ཀུན་བདེ་བ་ཡིས། །མངོན་པར་གང་བར་གྱུར་པ་ན། །གསལ་དང་མི་རྟོག་ཞེས་པ་གང་། །རྡོ་རྗེ་འཛིན་པས་གསལ་བའི་སྐུར། །
གང་བཤད་གདོན་མི་ཟ་བར་རྙེད། །དེ་དང་དེ་ནི་རོ་མཉམ་དུ། །འཇུག་པའི་བློ་ལ་མི་ལྟོས་པར། །ཡིད་ཀྱི་བྱེད་པ་གཅིག་གིས་སོ། །ཨེ་མ་རྣལ་འབྱོར་རྒྱལ་པོ་ཆེ། །འཁོར་དང་མྱ་ངན་འདས་པའི་རོ། །གང་གིས་སྐད་ཅིག་གཅིག་ཉིད་ལ། །མངོན་དུ་འགྱུར་བ་ཟབ་མོའི་ཐབས། །ལུས་ཀྱི་འཁོར་ལོ་བཅིང་
བ་དང་། །དགྲོལ་བའི་མན་ངག་རྫོགས་སོ།།      །།༄༅། །དཔལ་སྤྱན་རས་གཟིགས་རྡོ་རྗེ་ཐོད་པ་ཅན་ལ་ཕྱག་འཚལ་ལོ། །དཔལ་ལྡན་ཡེ་ཤེས་རྡོ་རྗེ་འཛིན་དང་བདེ་བ་ཆེ། །མགོ་ཕྱེད་ཁྲག་བཀང་ཉམས་དགུའི་གར་གྱིས་རོལ་པར་བཞུགས། །མེ་ཏོག་འདབ་དབུས་གེ་སར་རང་གི་སྙིང་པོ་བཞིན། །
ལྷ་མཆོག་གིས་མཚན་ཡེ་ཤེས་ལྷ་མོ་བཞིས་བཏུད་འདུད། །བློ་ལྡན་ཆོ་ག་བཟང་ཤེས་པས། །བདེ་ཆེན་དངོས་གྲུབ་ཉེ་བའི་ཕྱིར། །ཀ་པཱ་ལ་འདྲའི་གནས་སུ་ནི། །ཀ་པཱ་ལ་ཡི་དངོས་གྲུབ་བསྒྲུབ། །མཚན་བཟང་རིན་ཆེན་མགོ་ཕྱེད་ལ། །ག་པུར་གླ་རྩི་ཙནྡན་སོགས། །སྣ་ཚོགས་དྲི་ཞིམ་བྱུགས་བྱས་ཏེ། །
གསོ་སྦྱོང་ཅན་གྱིས་དཀྱིལ་འཁོར་བྲི། །སེང་ཁྲི་ཉི་ཟླ་པདྨོ་དང་། །དབུགས་བྲལ་གདན་ལ་བཞག་ནས་ནི། །ལྔ་མཚན་ལྔ་ཕྲག་ལྔ་རབ་དགང་། །བདེ་གཤེགས་རིང་བསྲེལ་སྙིང་པོར་གཞུག །འདབ་བརྒྱད་རྩིབས་བརྒྱད་མུ་ཁྱུད་ཕྲེང་། །བཀྲ་ཤིས་བརྒྱད་དང་རིན་ཆེན་བརྒྱད། །བརྒྱ་ཕྲག་གྲུབ་པའི་རྫས་འཛིན་

73-1-157b

པ། །སྒེག་མོ་མཛེས་ལྷ་མོས་བསྐོར་དབུས། །འདབ་བཞི་རྡོ་རྗེས་མཚན་པའི་རྩེར། །རྒྱལ་པོའི་ཕོ་བྲང་ཁྲི་བཟངས་ཅན། །ལེགས་བསྐྱེད་དེ་མཐའ་ཕྱོགས་བཞིའི་ཆར། །ལྷ་མོ་བཞི་ཡི་ཐོད་པ་དགོད། །གླང་ཆེན་མྱོས་པའི་མཆེ་བ་རྣོ་དང་སྨད་འཚོང་ཆང་འཚོང་མེ་ལོང་དང་། །ས་དབང་མངའ་བདག་ཅོད་པན་དཔའ་བོ་
སེན་མོ་དེ་བཞིན་དཀའ་ཐུབ་འཛིན་ཁ་སྤུ། །བདེ་གཤེགས་སྐུ་ཁྲུས་ཚིལ་ཆེན་དང་ནི་གཡས་སུ་འཁྱིལ་བའི་དུང་དཀར་རྣམས། །ཕྱོགས་མཚམས་རིན་ཆེན་བུམ་པ་བཟང་ལ་བརྒྱད་པར་བྱ། །དེ་ནས་སྔགས་པ་ཁ་ཤར་བལྟས། །གོས་མཆོག་ཕྱི་དང་དཀར་དམར་ལྷུབ། །མེ་ཏོག་ཕྲེང་བས་སྤྲས་གོན་ཏེ། །གཡས་
གཡོན་རྡོ་རྗེའི་ཐོད་གཟུང་འདུག །འཇིག་རྟེན་མགོན་པོ་བདེ་ཆེན་སྐུ། །དཀར་ལ་དམར་གསལ་མདངས་མངའ་བ། །རྡོ་རྗེ་རིན་ཆེན་རུས་པས་སྤུད། །རྡོ་རྗེ་ཐོད་འཛིན་ང་རྒྱལ་བྱ། །དེ་མདུན་རྡོ་རྗེ་ཕྲེང་ལྡན་མ། །དམར་ལ་དཀར་གསལ་ཤིན་ཏུ་མཛེས། །རྡོ་རྗེ་གྲི་གུག་མགོ་ཕྱེད་ཅན། །བཅིང་བའི་ཕྱག་རྒྱས་
འཁྱུད་པའོ། །ཕྱི་ནང་གསང་བཅས་རྣལ་འབྱོར་གྱིས། །ཆོ་ག་བླ་མའི་མན་ངག་བཞིན། །མཆོད་བྱས་ཡེ་ཤེས་པ་བཀུག་ལ། །འདོད་པ་དྲག་པོས་གསོལ་བ་གདབ། །བདེ་ཆེན་འཇིག་རྟེན་གསུམ་མགོན་ནི། །ཤེས་རབ་རྡོ་རྗེ་འབར་བ་དང་། །སྙིང་རྗེ་ཆེན་པོ་ཀ་པཱ་ལ། །གཉིས་མེད་ཡེ་ཤེས་ཧྲཱིཿཡིག་
འཛིན། །རྡོ་རྗེ་མཁའ་འགྲོ་རྡོ་རྗེ་ཅན། །དཀར་མོ་སྒེག་མོ་བདེ་སྟེར་མ། །གྲི་གུག་དང་ནི་ཐོད་པ་ཐོགས། །གཙོ་ཆེན་གཙོ་མོ་ཉིད་ཕྱག་འཚལ། །ཨེ་མའོ་སྟོབས་བདག་བརྩེ་སླད་དུ། །ཀ་པཱ་ལ་ནི་བདེ་ཆེན་སྣོད། །དངོས་གྲུབ་ཕྱིར་ནི་ཤེས་རབ་ཐབས། །སྙོམས་པར་འཇུག་པ་མཛད་དུ་གསོལ། །དེ་ལྟར་
བསྟོད་དང་གསོལ་བ་ཡིས། །གཙོ་བོའི་ཐུགས་ཀར་བསྐུལ་བ་ན། །འདབ་བཞི་ལྷ་མོ་ཕྱོགས་ཀྱི་ལྷས། །རང་རང་རྗེས་མཐུན་མཆོད་པར་བྱ། །དེ་ནས་ཤེས་རབ་ཐབས་སྙོམས་ཞུགས། །དཀར་དམར་ཨ་ཕྲེང་ཀ་ཕྲེང་རྒྱུན། །བདེ་ཆེན་ཕྱི་ནང་སྐྱུག་སྦྱངས་ནས། །རིང་བསྲེལ་ལ་ནི་ལྷ་བསྟིམ་བྱ། །འཚེག་དང་
འགུལ་དང་འཕར་བ་དང་། །འོད་འབྱིན་པ་དང་སྒྲ་གྲག་དང་། །རྫས་རྣམས་འཕྱུར་བ་མཐོང་ནས་ནི། །མཆོད་པ་ཆེན་པོ་བརྩམ་པར་བྱ། །དཔལ་རྡོ་རྗེ་ཐོད་པའི་དངོས་གྲུབ་སྒྲུབ་པའི་ཐབས་རྫོགས་སོ།།      །།༄༅། །སྤྱན་རས་གཟིགས་མི་འཇིགས་པ་སྦྱིན་པ་ལ་ཕྱག་འཚལ་ལོ། །འཕགས་པ་སྤྱན་རས་

73-1-158a

གཟིགས་དབང་གི། །མི་འཇིགས་སྦྱིན་པ་བརྟན་པ་ཡིས། །སྔགས་ལ་ཕྱི་ནང་གསང་དག་གི། །བར་དུ་གཅོད་པ་ལས་སེམས་བསྲུང་། །རང་ལུས་ཇི་སྲིད་རྡོ་རྗེ་ཡི། །རང་བཞིན་རིན་ཆེན་ཤེལ་འོད་མཛེས། །བཀྲ་ཤིས་སྒོ་སྟོང་མཆོད་རྟེན་དབྱིབས། །བཅུ་དྲུག་ཕྲག་བརྒྱ་རྡོ་རྗེ་འཛིན། །དེ་ནས་སེམས་
ནི་སྙིང་གི་པདྨོ་གསར་པའི་འདབ། །དམར་བའི་འོད་ཆགས་གེ་སར་བྱེ་བ་སྟོང་གི་རྩེར། །ཨ་སྟོང་ཡེ་ཤེས་སེམས་དཔའ་སྤྱན་རས་གཟིགས། །ཆུ་དང་མེ་ལོང་ཟླ་བ་བྱད་ཀྱི་གཟུགས་བརྙན་བཞིན། །དབུས་སུ་དཔལ་ཆེན་ཐུགས་ཆ་ཆེ། །སོར་རྩེ་བཅུ་དྲུག་གཟི་བརྗིད་བརྟན། །བཅུ་བདུན་སུམ་ཅུ་བརྒྱད་ཞལ་
ཕྱག །ཧྲཱིཿཡིག་གཉིས་ཕྲེང་གིས་བརྒྱན་པའོ། །ཕོ་བྲང་མཆོག་ལ་རབ་ཏུ་གསལ་བའི་འོད་ཟེར་སྔགས་བཅས་གཟི་ཆེན་ཀུན་བཀྲམ་འབར་བ་ཡི། །རྡོ་རྗེའི་རྡུལ་དང་རལ་གྲི་བེ་ཅོན་དགྲ་སྟ་མདུང་ཞགས་ཁ་ཊྭཱཾ་གྲི་གུག་མདའ་ཆེན་དང་། །ཚ་ཟེར་གློག་འཁྱུག་གྱ་གྱུ་འཕྲོས་ལས་རྣོ་བའི་ལྕེ་ཕྱུང་འཇིགས་པའི་རྒྱུ་གང་འདི་
དང་གཞན། །མ་ལུས་ད་ལྟར་བྱམས་པས་ཉེར་བརླན་སྙིང་རྗེའི་སྟོབས་ཡིད་གཅིག་པུས་ཉེར་ཞི་བརླག་པར་བྱ། །མགོན་པོ་ཡི་ནི་སྔགས་བརྗོད་ཅིང་། །བདུག་པ་མཆོག་གིས་བདུག་བྱས་ལ། །འགྲོ་བའི་འཇིགས་པ་འཇིགས་མེད་བྱེད། །མཁས་པས་སྟོང་ཉིད་བསྒོམ་པར་བྱ། །མཚོ་ཆེན་ནང་དུ་རི་རབ་གཟུགས་
ཤར་དེ་ནང་མེ་ལོང་དྲི་མེད་ལ། །འདམ་སྐྱེས་མཛེས་འཁྲུངས་སྣ་ཚོགས་བུང་བ་དར་དིར་སྒྲ་སྒྲོགས་ཁྱུ་མང་འཁྲིགས། །མཁའ་ལ་འོད་འགྱེད་གློག་རྒྱུན་འབབ་པས་རྨི་ལམ་ཡུལ་གྱི་དགྲ་འཇོམས་པ། །དཔལ་ཆེན་རྣམས་ཀྱི་རིག་སྔགས་བླ་མེད་མ་ལུས་འཇིགས་པ་ཀུན་སྐྱོབ་ཡིན། །དུས་དང་དུས་མིན་འཆི་ལྟས་དང་། །
མྱ་ངན་ཕོངས་པ་ལྟས་ངན་དང་། །ཕུན་སུམ་ཚོགས་མིན་དགྲ་རྣམས་ལས། །ལེགས་སྐྱོབ་འཇིག་རྟེན་གསུམ་མགོན་རྟོག །དཔལ་མི་འཇིགས་པ་སྦྱིན་པའི་སྒྲུབ་ཐབས་རྫོགས་སོ།།      །།༄༅། །འཕགས་པ་སྤྱན་རས་གཟིགས་ལ་ཕྱག་འཚལ་ལོ། །ཟླ་བ་དུང་དང་ཀུནྡ་གངས་རི་ལྟར་འཚེར་བ། །གཞོན་ནུ་
རབ་མཛེས་རིན་ཆེན་ཕྲེང་བས་རྣམ་བརྒྱན་ཅིང་། །མཆོག་སྦྱིན་པདྨོ་འོད་དཔག་མེད་ཀྱི་གཡས་གཡོན་ཕྱག །སྤྱི་གཙུག་ལེགས་སྤྲས་འཇིག་རྟེན་གསུམ་མགོན་ལ་ཕྱག་འཚལ། །རང་ལུས་དཀྱིལ་འཁོར་ཕོ་བྲང་འདབ་སྟོང་གསལ་བའི་དབུས། །ཟླ་རྒྱས་མདོག་ལྟའི་སེམས་ཉིད་ངོ་བོ་ཡེ་ཤེས་ཧྲཱིཿཡིག་འོད་

73-1-158b

འབར་གྱིས། །ཐིག་ལེ་རྣམ་དག་བདེ་ཆེན་རང་བཞིན་རླུང་སེམས་བཅུད་གང་ཡིན་པ་དེ། །ལེགས་བསྡུས་ནས་ནི་བློ་ལྡན་དཔའ་རྣམས་གཉུག་མ་མཆོག་ལ་བརྟན་གནས་བྱ། །དེ་ཡི་སྙིང་པོ་ལས་སྤྲོས་པའི། །འོད་ཟེར་ལྕགས་ཀྱུ་རྣོན་པོ་ཡིས། །རྒྱལ་བའི་ཕོ་བྲང་པོ་ཏ་ལའི། །དབུས་ཉིད་ནས་ནི་འཕགས་པ་བསྐྱོད། །
ཤིན་ཏུ་དཀར་གསལ་སྟོན་གྱི་ཟླ་བ་བྱེ་བ་བརྒྱ་ཡི་འོད་འཁྲིགས་པ། །བདག་གི་བློ་གྲོས་པདྨོ་རྒྱས་པའི་ཁ་དབྱེའི་ཕྱིར་ནི་བདེ་གཤེགས་འབུམ་གྱི་འཁོར་དང་བཅས། །སྐད་ཅིག་ཡུད་ལ་རྟ་བདུན་ལམ་གང་མགོན་པོ་ཉིད་མཆོད་སྤྲིན་རུམ་འཁྲིགས་པའི་དཔུང་བཀོད་པ། །ཤེས་རབ་སྣང་བས་གསལ་བར་བལྟས་
ལ་མཆོད་སྤྲིན་རྒྱ་མཚོས་རབ་ཏུ་མཆོད། །ལྷ་ཡི་དབང་ཕྱུག་པདྨོའི་རིགས། །པདྨ་སྟོང་ལྡན་སྡོང་བུ་འཛིན། །ཕྱོགས་བཅུ་ནས་འོངས་ཕྱོགས་བཅུའི་ཆར། །བཞུགས་བལྟས་དེ་དག་མགོན་མཆོད་བསམ། །ཚངས་དབྱངས་སྣ་ཚོགས་སྐུ་གསུང་ཐུགས་བསྟོད་མཉམ་མེད་ངག་གི་སྐྱོན་བྲལ་བས། །ཡོན་ཏན་
ཀུན་བརྗོད་འདོད་པ་དྲག་པོས་ཤིན་ཏུ་གསོལ་བཏབ་གུས་བྱས་ལ། །ཛཿཧཱུཾ་བཾ་ཧོཿས་བདེ་གཤེགས་ས་བོན་ཟླ་འོད་འབར་བ་ལ་བསྟིམ་བྱ། །ཐིམ་གྱུར་རྗེས་ཐོགས་ཐང་ཅིག་དེ་ཉིད་བཅུ་དྲུག་ཕྱེད་ཕྱེད་ཐིག་ལེར་གྱུར། །དེ་ཡང་ཡུད་ཀྱིས་དེ་བཞིན་དུ། །སྤྱན་རས་གཟིགས་དབང་གཞོན་ནུར་གྱུར། །དེ་བཞིན་
དེ་ཡི་ཐུགས་ཀར་ཡང་། །རྒྱལ་བའི་སྙིང་པོ་ཧྲཱིཿབསམ་མོ། །དེ་ལས་ཟེར་བསྐྱོད་དད་པའི་ཞགས་སྲ་རྡོ་རྗེའི་ཐིག་གུ་བཞུས་པ་ཡིས། །ཐུབ་དབང་ཐུགས་སྟབས་སྐད་ཅིག་དེ་ལ་ཐུགས་རྗེ་ཆེ་མངའ་ཐུགས་བསྐུལ་གྱུར། །དུས་གསུམ་གཤེགས་པའི་འདྲེན་པས་བྱིན་རླབས་ཕུན་ཚོགས་འོད་ཟེར་དམར་མཛེས་
ཞིང་། །གྱེན་དུ་འགྲེང་ལྟས་སྨིན་མཚམས་མཛོད་སྤུའི་སྒོ་ནས་ཐོགས་མེད་ཏལ་ཕྱིན་ཕྱུང་། །ཟླ་ཟེར་འདི་ནི་ཉི་མ་ཡི། །ཟེར་ཡིན་དེ་ཡི་ལྕེས་རེག་པས། །སྙིང་གི་འདབ་སྟོང་ཁ་དབྱེ་ཞིང་། །ཕྱེ་བའི་དབུས་ནི་བསྐྱབ་པའི་སྐུ། །འོད་དཔུང་རྒྱ་མཚོ་གང་བ་འདིས། །ཞག་བཅུ་ཕྲག་གསུམ་ཉིད་ན་དེ། །བློ་ལྡན་ཡིད་
ཀྱི་མུན་སེལ་ཞིང་། །དྲི་མ་མ་ལུས་རྣམ་པར་འཁྲུད། །རྗེས་ལ་དྲང་སྲོང་ཉིད་ཀྱི་སྐུ། །སྡུད་བྱེད་རླུང་གི་ཤུགས་ཅན་གྱིས། །འདབ་སྟོང་བདུད་རྩིའི་བུམ་འཐུང་བ། །ཏིང་ངེ་འཛིན་ཡིན་འཁྲུལ་འཁོར་མཆོག །ཁཪྶ་པཱ་ཎ་པདྨེ་ཁ་འབྱེད་ཀྱི་མན་ངག་རྫོགས་སོ།།      །།༄༅། །བཅོམ་ལྡན་འདས་ཐུགས་རྗེ་

73-1-159a

ཆེན་པོ་གཟུགས་བརྙན་གྱི་རྣམ་པར་སྣང་བ་ལ་ཕྱག་འཚལ་ལོ། །ཏིང་འཛིན་གོམས་པའི་གང་ཟག་གིས། །བདེན་རྟོག་མ་ལུས་བཟློག་ཕྱིར་དང་། །ལྷ་ཡི་དྲི་མའང་སྤངས་པའི་ཕྱིར། །གཟུགས་བརྙན་གཟུགས་ཅན་མན་ངག་བྲི། །སྐྱེ་བོས་རབ་དབེན་ཉམས་དགའི་གཞིར། །འདབ་བརྒྱད་པདྨོ་ཕྱེ་བ་ཡིས། །
མཎྜལ་ཡིད་འོང་ལེགས་བྲིས་ལ། །དེ་དབུས་འདྲེན་པ་སྣང་བར་བྱ། །ཤར་གྱི་འདབ་མར་ཁྲི་བཙུགས་ལ། །དེ་སྟེང་ཤིན་ཏུ་དྲི་མེད་གཟུགས། བརྩོན་པའི་ཆ་བྱད་རྒྱན་མང་མངའ། །དཀར་དམར་ལ་སོགས་བདག་ཡིད་ལྟར། །ཆུ་ནང་རབ་དང་ཟླ་བ་དང་། །གཟུགས་ལྟར་དེ་ཡི་སྤྲུལ་པ་གསལ། །ཤེལ་དང་མེ་ལོང་
ལ་སོགས་ངོས། །དཀྱིལ་འཁོར་ལྟེ་བར་མངོན་པར་བཞུགས། །དྲང་སྲོང་གཙོ་བོ་སྒྱུ་མའི་རྣམ་ཐར་ནི། །གདུལ་དཀའ་འདུལ་ཕྱིར་སྣ་ཚོགས་སྐུར་སྟོན་ཡང་། །དེ་ཚེ་དེ་དོན་དེ་ཉིད་གཟུགས་མི་མངའ། །དེ་ཉིད་འདིར་ནི་སྟོང་ཉིད་གཟུགས་ཞེས་བརྗོད། །མ་དག་ལུས་ཀྱི་དྲི་མ་ཐམས་ཅད་ལས། །ཤིན་ཏུ་རིང་གྱུར་ཕུན་
ཚོགས་སྐུར་སྣང་ལ། །དེ་ཉིད་མཁའ་ལྟར་དམིགས་པ་རབ་བཞི་བ། །དུས་གསུམ་རྒྱལ་བའི་ཡེ་ཤེས་སྐུ་ཡིན་ནོ། །བྱིས་པ་རྣམས་ནི་ཁ་དོག་དབྱིབས་དབྱེ་བས། །སྣང་བ་ཇི་བཞིན་དོན་དེ་བཞིན་ཞེས་རྟོགས། །མཁས་རྣམས་ཇི་ལྟར་སྣང་བ་སྣ་ཚོགས་ཉིད། །གང་སྣང་དེ་ལྟར་དེ་ཙམ་ཞི་བར་ཤེས། །ཇི་ལྟར་ལྷ་ཡི་སྦྱོར་བ་
འདིར་མཚན་མེད། །དེ་ལྟར་གཟུགས་སོགས་དངོས་ཀུན་ཡང་དབེན་ན། །ཤེས་རབ་ཀྱིས་བརྟགས་བློ་གྲོས་རིམ་གཉིས་ལ། །མཁས་པས་མཚན་མར་མི་བྱ་སྨོས་ཅི་དགོས། །དེ་ལྟར་ལྷ་དང་ལྷའི་རང་བཞིན་དང་ཆོས་ཐམས་ཅད་ཀྱི་དག་པ་རྟོགས་པར་བྱས་ནས་རྟེན་ཅིང་འབྲེལ་བར་འབྱུང་བས་མངོན་པར་
སྤྲུལ་པའི་ལྷའི་སྐུ་ཕྱག་རྒྱ་ཆེན་པོ་དམིགས་ཏེ། བདག་ཉིད་རིམ་པ་གཉིས་དང་ལྡན་པའི་སྐུ་གསུང་ཐུགས་མཚན་མ་ཉེ་བར་ཞི་བའི་མཐར་ཐུག་པར་གྱུར་པ་དང་བསྲེ་བར་བྱའོ། །དེ་ནས་ཁྲུས་དང་བྱུག་པ་ལ་སོགས་པ་སྔོན་དུ་སོང་བས། ཕྱག་འཚལ་བ་དང་བསྐོར་བ་ལ་སོགས་པའི་སྒོ་ནས་སྡིག་པ་སྤང་བ་དང་
ཚོགས་བསྒྲུབས་ཏེ། དངོས་སུ་འབྱོར་པ་དང་ཡིད་ལས་བྱུང་བའི་ཡོ་བྱད་དཔག་ཏུ་མེད་པས་ཡང་དག་པར་མཆོད་དེ། དྲི་མ་སྦྱང་བའི་ཕྱིར་སྔགས་འདི་བཟླའོ། །ཨོཾ་ཨཱཿཧྲཱིཿམ་ཧཱ་ཀ་པྲ་ཏི་བི་པ་རུ་པ་བི་ཤུདྡྷ་ཏ་ཏཱ་ཛྙཱ་ནཱ་མ་མ་ཙིཏྟཱ་མ་དྱེ་པྲ་ཏིསྠཱ་ར་ཧཱུཾ། རྣམ་དག་ཡེ་ཤེས་མཆོག་སྤྲུལ་པས། །སྐུ་བསྟན་ཉིད་

73-1-159b

ཀྱི་ཐུགས་ཧྲཱིཿཡིག །འོད་མཛད་མེ་ཡིས་འགྲོ་ཀུན་གྱི། །འཛིན་པ་གཉིས་བསྲེགས་གཟུགས་བརྙན་གྱུར། །དྲི་མ་མེད་དང་རྣམ་མི་རྟོག །གདུལ་བྱ་དང་ནི་ཡང་དག་ལ། །སྣང་དང་མི་སྣང་དབྱེར་མེད་གཟུགས། བསྒྲུབ་པ་རྒྱུན་མི་འཆད་པའོ། །ཐུགས་རྗེ་ཆེན་པོ་གཟུགས་བརྙན་ལ་བརྟེན་པའི་སྒྲུབ་ཐབས་རྫོགས་
སོ།།      །།༄༅། །འཕགས་པ་མེ་ཏོག་གི་སྙིང་པོའི་གེ་སར་ལ་ཕྱག་འཚལ་ལོ། །དད་ལྡན་མང་དུ་ཐོས་བློ་སྦྱངས། །གཡེང་བྲལ་རྩེ་གཅིག་ཡིད་བྱེད་པ། །དེ་ཡིས་འཕགས་པ་མེ་ཏོག་གདན། །དངོས་གྲུབ་ཉེ་ཕྱིར་བསྒྲུབ་པའོ། །ཡུལ་གང་མེ་ཏོག་ཀུན་གསལ་རྒྱས། །འབྲས་བུ་བཟང་རྣམས་སྨིན་
པ་དང་། །ཉམས་དགའ་བྱི་དོར་རྒྱས་ལྡན་པར། །སྡིག་པ་སྤངས་ནས་བརྩོན་འགྲུས་བརྩམ། །དཀར་དང་དམར་དང་སེར་དང་སྔོ། །ཁ་དོག་གནག་དང་ཁ་དོག་གཅིག །སྣ་ཚོགས་ཁ་དོག་ཅན་མེ་ཏོག །བསུང་ཞིམ་དྲི་ཡིས་བསངས་བྱུག་བྱ། །གསེར་སོགས་ནོར་མང་བཀོད་པ་དང་། །མུ་ཏིག་ལ་སོགས་
རྒྱན་དེ་བཞིན། །གདུགས་སོགས་ཡོ་བྱད་ལྷབ་ལྷུབ་བཅས། །མཁས་པས་དཀྱིལ་འཁོར་བརྒྱན་ཕྱིར་དགོད། །གང་ཚེ་རང་ཡིད་དགའ་བས་ཁེངས། །སྤྲོ་བས་དོན་ཀུན་བསྒྲུབ་བརྩོན་པ། །དཔལ་ཆེན་དངོས་གྲུབ་ཉེར་སྤྱོད་པ། །དེ་ཡི་དུས་ནི་དེ་ཡིན་ནོ། །གཅལ་བཀྲམ་པ་དང་ཕུང་པོ་དང་། །ཚོམ་བུ་སྟེགས་
བརྩེགས་ཆུན་འཕྱང་ལྡིང་། །དྲ་བ་དྲ་བ་ཕྱེད་ཁེངས་བརྩེགས། །ཇི་སྲིད་མཆོད་འོས་དེ་སྙེད་དོ། །སྔོན་དུ་བསྙེན་པ་མཐར་ཕྱིན་པས། །དྲི་ཞིམ་ཁང་པར་དད་པ་ཡིས། །གཡས་བསྐྱོད་ཞུགས་ལ་རྣལ་འབྱོར་གསུམ། །དྲན་བྱས་ཁྲི་བཟང་ལ་མཉམ་གཞག །ཤིན་ཏུ་བྱིན་བརླབས་ལྷག་པའི་ལྷས། །དངོས་
གྲུབ་ཕྱིར་བསྟེན་མགོན་པོའི་སྐུ། །མེ་ཏོག་ཀུན་བཀོད་མདུན་བདར་ལ། །རིམ་གཉིས་ལས་བྱུང་བཟླས་པར་བྱ། །རེར་འཇོག་སྐྱེས་དང་སྐྱེས་ལམ་གྱི། །ཧྲཱིཿཡིག་བདུད་རྩིའི་བུམ་གང་བཟང་། །ཅིག་ཅར་རྟག་ཏུ་པདྨོའི་དབུས། །དམ་ཚིག་ལ་ནི་ཡེ་ཤེས་འཇུག །ཐུན་མཚམས་རྟག་ཏུ་བྱ་བ་དང་། །ཁྲུས་གསོལ་མེ་
ཏོག་ཕྲེང་སོགས་གདགས། །བསམ་མི་ཁྱབ་དང་མཆོག་རབ་ཞི། །སངས་རྒྱས་སྲས་བཅས་འདབ་སྟོང་མཆོད། །ཁྱུད་ཀོར་ཀུན་དུ་དགའ་བ་ཡི། །ལྷ་བུ་ལྷ་མོ་དད་པས་ཡིད། །མྱོས་འདུང་རེ་རེའང་དཔག་མེད་རྫས། །མཆོད་ཕྱིར་ཐོགས་པས་བརྩོན་བསྐོར་བྱ། །ཐུབ་སོགས་དངོས་གྲུབ་མ་ལུས་དབང་

73-1-160a

ཅན་ཡང་། །མཆོད་བསྙན་བསྒྲུབ་བྱ་དོན་ཕྱིར་ཐུགས་གཡོས་པས། །དུ་མ་གཅིག་གྱུར་མེ་ཏོག་རྡོ་རྗེས་མཚན། །ཕྲེང་རྒྱུན་ཚངས་དབང་ལྟེ་བའི་སྦུགས་སུ་འཇུག །ཨོ་ཨཱཿཧྲཱིཿཨ་ཨ་ཨ་ཨ་ཨ་ཨ་ཨ། ཧྲི་ཧྲི་ཧྲི་ཧྲི་ཧྲི་ཧྲི་ཧྲི། ཧོ་ཧོ་ཧོ་ཧོ་ཧོ་ཧོ་ཧོ། ཧཱུཾ་ཧཱུཾ་ཧཱུཾ་སྭཱ་ཧཱ། དཔལ་མེ་ཏོག་གི་གདན་ཅན་གྱི་སྒྲུབ་ཐབས་
རྫོགས་སོ།།      །།༄༅། །འཇིག་རྟེན་གསུམ་ལས་རྒྱལ་བའི་མཚན་མ་ཅན་ལ་ཕྱག་འཚལ་ལོ། །ཐུབ་དབང་མཚན་ལྟས་བདེ་གཤེགས་མེ་ཏོག་འདབ་སྟོང་དང་། །བདག་ཉིད་ཆེན་པོའི་པདྨ་འདབ་བརྒྱ་ཕྲག་མཚོན་པ། །སྐལ་བཟང་རྒྱལ་བ་བྱང་ཆུབ་ཕྱོགས་བརྒྱའི་ལྷ་ཚོགས་ཅན། །ཆོས་འཆད་ཕྱག་དབུས་
གཡས་གཡོན་སྡོང་བུ་མཛེས་རྒྱས་མདུད། །སྐལ་བ་བཟང་པོས་སྔ་དྲོའི་དུས། །དབེན་པའི་གནས་སུ་མཎྜལ་བྲི། །རིན་ཆེན་ཁྲི་བཀོད་པདྨོའི་སྟེང་། །རྒྱལ་དང་དེ་སྲས་རིན་ཆེན་བཞུགས། །བསྟོད་དབྱངས་སྔོན་དུ་འགྲོ་བས་མཆོད། །རྐང་པས་བྲོ་བརྡུང་ལག་གར་བསྒྱུར། །སེ་གོལ་གཏོགས་པས་སྤྱི་གཙུག་
གཞག །ཁྲུས་གསོལ་དེ་ནས་རྒྱན་སོགས་དབུལ། །མཆོད་པ་ལྔ་དང་ལྡན་པ་ཡི། །གཏོར་མ་ཆེན་པོ་དབུལ་བྱས་ལ། །རོལ་མོ་དང་ནི་བདུག་པར་བཅས། །ལན་གྲངས་ཉི་ཤུ་གཅིག་བསྐོར་བྱ། །མེ་ཏོག་དུ་མས་བཀང་བ་ཡི། །བུམ་པ་བཟང་པོ་བཞི་བཅས་ཏེ། །བ་དན་དམར་པོ་བཞི་མཚན་ལ། །མེ་ཏོག་སྣོད་
བཞིས་ཁ་རབ་བརྒྱན། །ཕྲེང་བ་སྤེལ་ལེགས་མཛེས་པ་ལ། །ཡིད་བཞིན་ནོར་བུའི་སྔགས་བཏབ་ནས། །གཡས་སུ་འཁྱིལ་པ་ལ་སོགས་དུང་། །སྣོད་བཟུང་དལ་བུས་དོར་བར་བྱ། །འཇིག་རྟེན་གསུམ་ལས་རྣམ་རྒྱལ་མཚན། །རི་དབང་རྩེ་ནས་སྤྱན་དྲངས་ཏེ། །བདག་ལུས་མཆོད་སྦྱིན་བྱས་ནས་སུ། །
སེམས་ནི་སྐུ་ལ་བསྟིམ་པར་བྱ། །རྡོ་རྗེའི་སྐུ་མདོག་འོད་བཟང་མཁྲེགས། །ཐུབ་དབང་རིང་བསྲེལ་དོ་ཤལ་ཐོགས། །གཞོན་ནུའི་ཆ་ལུགས་གར་མཁན་ཚུལ། །པི་ཝང་ལྷན་ཅིག་དགྱེས་པའོ། །ཡེ་ཤེས་ཅན་ལས་ཡེ་ཤེས་སྐུ། །གཞན་སྤྲུལ་བུམ་བཟང་དཔག་ཏུ་མེད། །ཐོགས་ནས་དྲི་མཆོག་ཁྲུས་
གསོལ་ཞིང་། །མེ་ཏོག་སྙིང་པོས་མཆོད་ཆར་དབབ། །ཕྱོགས་བཞི་ནས་ནི་དམ་ཚིག་ཅན། །སྔགས་པ་ལྷུབ་ལྷུབ་གོས་གྱོན་ནས། །རོལ་མོ་དབྱངས་དང་ལྷན་ཅིག་པས། །མེ་ཏོག་སྣ་ཚོགས་ཆར་དབབ་བོ། །ཨོཾ་ཨཱཿཧྲཱིཿབཛྲ་ཛྙཱ་ནཱ་བི་ཤུདྡྷ་མ་ཧཱ་བི་ན་བི་ཕུལླ་དྷ་ར། སརྦ་ཏྭཱརྠཱ་མ་མ་སརྦ་ཀཱ་ཡ་ཝཱཀ་ཙིཏྟཱ་

73-1-160b

པཱ་པཾ་ཨཱ་བ་ར་ཎ་ཤོ་དྷ་ཡ། ཤོ་དྷ་ཡ། བྷ་ར་བྷ་ར། སཾ་བྷ་ར་སཾ་བྷ་ར། སཾ་ཧ་ར། ཨཱ་ཀཱཪྵ་ཡ། ཨཱ་ཀཱཪྵ་ཡ། སརྦ་ཏ་ཐཱ་ག་ཏ་ཧྲྀ་ད་ཡ་གརྦྷེ་ཛཱ་ལ་ཧཱུཾ་ཕཊ་སྭཱ་ཧཱ། དེ་ནས་གང་བདོག་འབྱོར་པ་རྣམས་ཀྱིས་བསྟི་སྟང་བྱ་བ་དང་། །གུས་པས་མེ་ཏོག་བླངས་ནས་སྤྱོད་ཡུལ་ཀུན་ལ་ཁྱབ་པར་གཏོར། །སྙིང་པོ་མཆོག་ཉིད་
ཤིང་ལོའི་ག་པུར་གཞུག་ཅིང་དྲི་བཟང་བྱུག །དེ་ཡི་ཁྲུས་ཆབ་བདག་གདོང་བཀྲུ་བགོ་ཐམས་ཅད་བསྒྲུབ། །མེ་ཏོག་ལ་བརྟེན་པའི་སྒྲུབ་ཐབས་རྫོགས་སོ།།      །།༄༅། །ཐུགས་རྗེ་ཆེན་པོ་རི་ཁྲོད་པ་ལ་ཕྱག་འཚལ་ལོ། །རབ་ཏུ་ཡིད་དགའ་ནགས་ཀྱི་དབུས། །མེ་ཏོག་འབྲས་བུ་འདུད་པ་ཡི། །ཤིང་དྲུང་རྩྭ་
ཡི་སྤྱིལ་བུ་ཉིད། །ཆགས་བྲལ་རྙོག་པ་མེད་བཞུགས་འདུད། །དེ་ནས་སྒྲུབ་པོ་སྤྲོས་པས་འཇིགས་པ་དང་། །རྣམ་པར་གཡེང་བས་དལ་བ་མ་ཐོབ་པ་ཡང་རུང་སྟེ། གཅིག་པུ་དག་དབེན་པ་དང་ཡིད་བྱུང་བའི་བློ་ཅན་གྱིས། དུས་བཟང་པོའི་ཚེ་ནགས་སུ་སོང་ལ་གང་ན་ལྗོན་ཤིང་བཟང་བ་ལ་ཡལ་ག་དང་
ལོ་འབྲས་གྱ་ནོམ་པ་དང་ལྡན་པ། གྲིབ་མ་བསིལ་བས་ལུས་སྐྱོབ་ཅིང་དྲུང་ན་འདུག་ན་སྐྱིད་སྐྱིད་ལྟར་སྣང་བ་ཡོད་པ་ཞིག་བཙལ་ཏེ། དེའི་འགྲམ་དུ་གཏོར་མ་སྦྱིན་པ་སྔོན་དུ་བཏང་ནས་རྩྭའི་སྤྱིལ་བུ་མཛེས་པ་བཅོས་པར་བྱའོ། །དེའི་ནང་གི་སྟེང་གི་གཞིར་རྗེ་བཙུན་སྤྱན་རས་གཟིགས་སྤྱིལ་བུ་ཅན་གྱི་རྟེན་
བྱིན་གྱིས་བརླབས་པ་དང་ལྡན་པ་ཞིག་བཞུགས་ལ། མཆོད་པ་ཐམས་ཅད་ཀྱིས་མཆོད་ནས། མེ་ཏོག་གིས་སྙིམ་པ་བཀང་སྟེ། ཙོག་བུར་འདུག་ལ་སྔགས་འདི་བརྗོད། །ཨོཾ་ཨཱཿཧྲཱིཿབ་ན་ལོ་ཀ་ནཱ་ཐ། མ་ཧཱ་ཀཱ་རུ་ཎི་ཀ །སརྦ་བུདྡྷ་ཛྙཱ་ནཱ་གརྦྷ་མ་མ་ཙིཏྟེ་ཀནྟཱ་ཧཱུཾ་ཧཱུཾ་སྭཱ་ཧཱ། དེ་ནས་སྤྱིལ་བུ་དེ་དང་རྟེན། །ཕོ་བྲང་
མཆོག་དང་ལྷ་ཉིད་དུ། །བྱིན་གྱིས་བརླབས་ལ་མེ་ཏོག་གཏོར། །སྐད་ཅིག་དེ་ལ་བསམ་གཏན་བྱ། །སྙོམ་མེད་མི་གཡེངས་བརྟན་པ་ཡིས། །ཟླ་བ་དྲུག་གམ་གསུམ་མམ་གཅིག །ངེས་པར་བྱས་ན་ནགས་ཀྱི་ནང་། །མགོན་པོ་གང་རུང་གཟུགས་སུ་སྟོན། །དེ་ཡི་སྨིན་མཚམས་པདྨོ་འདྲའི། །རི་མོའམ་ཐིག་
ལེ་གསལ་བར་འགྱུར། །བརྩོན་པས་མ་འཁྲུགས་དཀྱིལ་འཁོར་བྱ། །མགོ་བཏུད་ཞབས་ལ་གཏུགས་ཏེ་གསོལ། །ཨོཾ་ཨཱཿཧྲཱིཿཔཱུ་ར་པེ་པྲ་ཏཱིཙྪ་སུརྨར་ཧོ། ཐལ་སྦྱར་མིག་མི་འཛུམས་པ་ཡིས། །མེ་ཏོག་བསྟབས་ལ་སྔགས་འདི་བརྗོད། །དེ་ཚེ་བདག་ནི་ཅི་འདྲ་ཡང་། །སྐྱོབ་པས་རྗེས་སུ་འཛིན་པར་
73-1-161a

འགྱུར། །སྤྱིལ་བུ་ཅན་གྱི་སྒྲུབ་ཐབས་རྫོགས་སོ།།      །།༄༅། །ཐུགས་རྗེ་ཆེན་པོ་རྔ་བོ་ཆེ་སྒྲ་དབྱངས་རྣམ་པར་རོལ་པ་ལ་ཕྱག་འཚལ་ལོ། །རྔ་ཆེན་གང་ཞིག་ཙནྡན་སོགས་ཤིང་གླ་རྩི་ག་པུར་གུར་གུམ་བྱུགས། །ཕྱོགས་གཉིས་དྲང་སྲོང་རི་དགས་མོ་པགས་འབྲུག་སྒྲ་གྲག་དང་ལྷན་ཅིག་གཡོགས། །
པདྨོ་དམར་དང་འཁོར་ལོ་དཀར་དབུས་ང་རོ་ཆེ་བཅིབས་རྔ་ཆེན་བརྡུང་། །གྲགས་ཆེན་དབང་ཕྱུག་སྒྲ་དབྱངས་རོལ་པས་ས་སྟེངས་མ་ལུས་རྒྱལ་གྱུར་ཅིག །དང་པོ་རེ་ཞིག་རིག་པ་གོམས་པས་མཐུ་ཐོབ་པའམ། །གང་ཡང་བསྟན་ལ་དགྲ་བོ་རྣམ་པར་གནོན་པ་ཉིད། །དེ་བཞིན་སྔགས་མྱུར་གྲགས་པས་གྲོང་ཁྱེར་འཁྲུག་
འདོད་པ། །དེ་དག་ཀུན་ཡིད་སྙིང་རྗེ་ལྡན་སྦྱར་ཆོ་ག་བརྩམ། །འདབ་ཆགས་ང་རོ་ཆེན་པོའི་ལོ། །སྐར་མ་རྒྱལ་ལ་བབ་པའམ། །ཡང་ན་དབྱར་གྱི་སྒྲ་སྒྲོགས་དུས། །མཁས་པས་རྔ་ཆེན་བཅོས་པར་བྱ། །ཙནྡན་སྡོང་བུ་དཀར་དམར་རམ། །སྒྲ་སྒྲོགས་ཤིང་དང་སྙན་པའི་འདབ། །སེང་ལྡེང་གླང་སྣ་བ་འབོད་དང་། ། 
ཏི་ཏི་ར་སོགས་རྒྱུ་ཡིན་བརྟག །ཉི་མ་ཤར་དང་ཟླ་བ་ཤར། །སྲོད་ཀྱི་དུས་ལ་བབ་པ་ན། །གླ་རྩི་ག་བུར་གུར་གུམ་བྱུག །རྡོ་རྗེ་ཁྲོས་པས་བགེགས་ཚར་བཅད། །བྱམས་པའི་ཉི་མ་གང་ལ་བབ། །ཁྲི་སྙན་མོ་ཡི་པགས་པ་སྦྱངས། །ནམ་མཁའི་སྒྲ་གསང་སྒྲོགས་པ་ན། །ལྷོ་རུ་ཁ་བལྟས་གཡོགས་པར་བྱ། །དེ་ནས་དྲི་
མཆོག་དམ་ཚིག་ཅན། །བདུད་རྩི་འཛག་པས་ལེགས་བྱུགས་ལ། །དབང་ཐོབ་ལྷ་བཟོ་སྐད་མཐོན་པོས། །སྒྲ་དབྱངས་མགོན་པོ་བྲི་བར་བྱ། །དབུས་སུ་པདྨོ་དམར་བཞིའི་སྟེང་། །གཞོན་ནུའི་མདངས་རྒོད་ང་རོ་བཅིངས། །ཕྱག་གཉིས་རིན་ཆེན་རྔ་ཆེན་བརྡུང་། །ཟླ་བའི་མདོག་ཅན་བརྗིད་པའོ། །ཤར་སོགས་འདབ་
བཞིར་གྲགས་ཆེན་དང་། །འབྲུག་སྒྲ་སྙན་པའི་དབྱངས་ཅན་དང་། །ང་རོ་མི་བཟད་གནོད་སྦྱིན་བཞི། །ཕྱོགས་ཀྱི་ཁ་དོག་ཇི་བཞིན་གནས། །བརྩོན་པའི་ཆ་བྱད་རྒྱན་གྱིས་སྤུད། །ཕྱག་བཞི་དུང་དཀར་ཀཱ་ལ་ཧཱ། །དྲིལ་བུ་དང་ནི་གཎྜཱི་ཐོགས། །མིག་དམར་དགའ་བ་ཁྲོས་པའི་ཚུལ། །དེ་མཐར་འཁོར་
ལོ་བརྒྱད་རྩིབས་རིམ། །བཀྲ་ཤིས་བརྒྱད་འཛིན་ལྷ་མོ་བརྒྱད། །ཤིན་ཏུ་སྒེག་མཛད་དུལ་བའི་ཚུལ། །འཛུམ་པའི་མདངས་དཀར་སྣ་ཚོགས་མདོག །མུ་ཁྱུད་རྡོ་རྗེའི་སྤྲིན་འཁྲེགས་པ། །འུར་འུར་སྐད་འབྱིན་འཇིགས་པ་དང་། །གློག་རྒྱུན་ཕྲེང་བས་མཛེས་པ་ནི། །མཁས་པ་ཏིང་འཛིན་ལྡན་པས་བྲིས། །

73-1-161b

དེའི་འོག་ཏུ་ཇི་སྐད་བསྔགས་པའི་གནས་ནས་ཡེ་ཤེས་ཀྱི་འཁོར་ལོ་ཅན་གྱི་རྔ་བཀུག་ནས་རོལ་མོ་ལ་སོགས་པའི་མཆོད་པས་མཉེས་པར་བྱས་ཏེ་རྗེས་སུ་གཞུག་པར་བྱའོ། །དེ་ནས་ལྟེ་བ་མུ་ཁྱུད་ཀྱི་ནང་གི་ཁྱུད་ཀོར་དུ་ཡི་གེ་ཆེན་པོ་ལྔ་དང་ཉེ་བའི་ཡི་གེ་ལྔ་བཅུ་བྱང་ཆུབ་ཀྱི་སེམས་གཉིས་འདྲེས་པས་བྲི་ཞིང་། སྔགས་
དེ་དག་ཉིད་སྒྲ་ཆེན་པོ་ལན་བདུན་བཀླགས་ལ་རོལ་མོ་གསིལ་བ་དང་བྲོ་བརྡུང་བར་བྱའོ། །དེ་རྗེས་མཁས་པས་བརྒྱ་བྱིན་གྱི། །ལག་པ་འདྲ་བའི་འཁྲུལ་འཁོར་གྱིས། །རྩོལ་བ་སྤངས་ནས་རྔ་བརྡུང་ཞིང་། །བདག་ཉིད་རྣལ་འབྱོར་བརྩོན་པས་བྱ། །སྒྲུབ་པ་པོ་ཡི་ངག་མེད་ཀྱང་། །ཇི་ཙམ་བསྙེན་པའི་མཚན་
བཤད་སྔགས། །དེ་ཡི་ཕྱེད་ཀྱིས་འགྲུབ་པར་ནི། །ངེས་པར་ཐེ་ཚོམ་མི་བྱའོ། །དེ་ཡི་འོག་ཏུ་གཡུལ་བཟློག་པའམ། །གྲགས་པ་མཐོ་འདོད་དེ་བཞིན་གཞན། །ཐམས་ཅད་སྙིང་རྗེ་མ་བྲལ་བར། །རྔ་འདི་བརྡུངས་པ་ཙམ་གྱིས་འགྲུབ། །འཇིག་རྟེན་གསུམ་གྲགས་མཐའ་ཡས་པ། །ཐུགས་རྗེ་ཆེན་པོས་
ཉིད་སྤྲུལ་པ། །རྔ་ཆེན་རྒྱལ་པོ་བརྟག་པའི་ལས། །དོན་ཀུན་སྒྲུབ་པར་བྱེད་པ་ཡིན། །ཐུགས་རྗེ་ཆེན་པོ་རྔ་སྒྲའི་སྒྲུབ་ཐབས་རྫོགས་སོ།།      །།༄༅། །རྒྱལ་བ་ཉི་མ་དང་ཟླ་བའི་ཕྱག་མཚན་ཅན་ལ་ཕྱག་འཚལ་ལོ། །དབང་པོ་རྟུལ་པོ་ཉིད་དང་གང་། །དེ་བཞིན་འཇིག་རྟེན་དོན་བསྒྲུབ་འདོད། །གཞན་
དག་བསོད་ནམས་ནོར་འདོད་པ། །དེ་ནི་ཉི་ཟླའི་མཚན་ཅན་བསྒྲུབ། །སྤྲིན་ཚོགས་རྡུལ་དང་ཁུག་རྣ་དུ་བ་དང་། །རླངས་བྲལ་དྲི་མེད་བཻ་ཌཱུརྱ་བཅག་འདྲའི། །མཁའ་ལ་དཔལ་བཟང་ཉི་ཟླ་འཆར་བར་བྱེད། །དེ་ཚེ་དད་ལྡན་སྨྲ་བ་བཅད་ནགས་འཇུག །དྲང་སྲོང་དབུ་དང་ལྷན་ཅིག་ནགས་བཟུང་དུ། །སྲིད་པའི་
སྡུག་བསྔལ་སྐྱོན་ནི་དྲན་བྱས་ལ། །བདུད་འདུལ་ཐུབ་པའི་དམ་ཚིག་ཕྱག་རྒྱ་ཆེ། །མངོན་སུམ་བཅས་ཏེ་པདྨའི་མིག་གཉིས་བསྐྱོད། །དེའི་འོག་ཏུ་མཆོད་པ་ཐམས་ཅད་སྟ་གོན་བྱས་ནས། བདུག་པ་དྲི་ཞིམ་པོ་ཐམས་ཅད་ཀྱིས་བདུག་ཅིང་། རྒྱལ་བར་གྱུར་ཅིག་རྒྱལ་བར་གྱུར་ཅིག །སྟོབས་
བཅུའི་འོད་ཟེར་ཆེན་པོས་འགྲོ་བ་གསུམ་གྱི་མུན་པ་སེལ་བ་དུས་ཚད་མེད་པར་བརྩོན་པའི་ཆོས་ཀྱི་རྒྱལ་པོ་ཉི་མ་དང་ཟླ་བའི་མཚན་མ་ཅན་དེ་རིང་རྒྱལ་བར་གྱུར་ཅིག །བདག་ཅག་ལ་སོགས་པའི་དབང་པོ་རྟུལ་པོ་དང་། དོན་བསྒྲུབ་པ་དང་། བསོད་ནམས་གཉེར་བ་རྣམས་ཀྱི་ཕྲིན་ལས་ཐོགས་པ་

73-1-162a

མི་མངའ་བར་མཛོད་ཅིག །ཅེས་ལན་གཉིས་ལན་གསུམ་ཆེད་དུ་བརྗོད་པས་ཆེད་དུ་བརྗོད་དོ། །ཉི་མ་ཟླ་བ་ལས་ཀུན་ལ་སྔགས་བདུན་འདོན་རྣམ་ལས་བརྗོད་པ་གང་ཡིན་དང་། །ཐུགས་རྗེའི་ལྷས་བསྟན་དྲང་སྲོང་ཨ་བྷིས་ཤར་དུ་ཁ་བལྟས་ཆགས་བྲལ་རྙེད་ཚེ་མངོན་བསྟོད་གང་། །དེ་བཞིན་གང་གཞན་
གླང་པོ་སྐྱོང་དང་གཏེར་བདག་གསེར་སྲུང་འོད་མའི་ཚལ་དུ་སྔོན་བྱུང་དབྱངས། །དེ་དག་མ་ལུས་མགྲིན་བཟང་རྣམས་བསྡེབས་མགྲིན་གཅིག་མཆོད་བཅས་དད་པ་དྲག་པོས་དངོས་གྲུབ་སྩོལ། །དེ་རྗེས་རྟ་བདུན་ཆུ་ཡི་སྙིང་པོ་འོད་ཀྱི་དྲ་བ་ཅན། །སྙིང་བརྩེས་ཐུགས་བརྟུལ་གློ་བུར་ལྷག་གེ་བྱོན་པས་གདོང་
བསལ་གྱུར། །དེ་ཚེ་རིང་པར་མ་འཁྲུགས་མཆོད་བྱ་གསང་སྔགས་བཟླས། །དཀྱིལ་འཁོར་གཉིས་དབུས་པད་ཕྱག་ཉི་ཟླའི་རྒྱན་ཅན་འབར་བའོ། །འཁོར་ལོ་དང་རྗེས་སུ་མཐུན་པའི་ཁ་དོག་ཅན་བརྩོན་པའི་ཆ་བྱད་གཏི་མུག་དང་ཆགས་པ་དང་། སྡིག་པ་གསུམ་སེལ་བ་དང་། སྦྱང་བའི་ཕྱིར་བསྲེག་པ་དང་། 
བསིལ་བའི་མཚན་ཉིད་ཅན་ནོ། །རྒྱུན་གྱི་མཐར་དྲན་པའི་རྒྱས་བཏབ་པ་ཞེས་བྱ་བ་དང་། སྦྱོར་བའི་རྒྱས་བཏབ་པ་ཞེས་པ་གཉིས་ཅི་རིགས་སུ་དྲན་པར་བྱའོ། །ཨོཾ་ཨཱཿཧྲཱིཿབཛྲ་སཱུརྱ་ཙནྡྲ་ཀཱ་ཛ་སིདྡྷ་ས་མ་ཡ་ས་མ་ཡ་སྨ་ར་སྨ་ར་ཨ་ནུ་སྨྲྀ་ཏི་ཀ་ར་ཧཱུཾ། ཉི་ཟླ་སྒྲོན་མའི་ཆོ་ག་རྫོགས་སོ།།      །།༄༅། །བཅོམ་ལྡན་འདས་ཐུགས་
རྗེ་ཆེན་པོ་གྲགས་པའི་རྒྱལ་མཚན་ཅན་ལ་ཕྱག་འཚལ་ལོ། །འདིར་འཇིག་རྟེན་པ་མང་པོ་ཆོས་དང་ལྡན་པའི་དོན་བྱ་བ་ལ་སྦྱར་བའི་ཕྱིར། རེ་ཞིག་དམ་ཚིག་ཅན་ཡོན་ཏན་ཚུལ་ན་གནས་པའི་ཆེ་བ་བསྒྲགས་པས་གནས་གང་དུ་སྐྱེ་བོ་འདུ་བའམ། མང་པོས་མཐོང་བ་དང་ཐོས་པའི་སྤྱོད་ཡུལ་དུ་གྱུར་པ་ཞིག་བཅོས་ལ། 
རྡོ་རྗེ་ཐབ་སྦྱོར་ལ་སོགས་པས་བགེགས་བསལ་ཞིང་དེར་ཁང་བུ་བརྩེགས་པའི་དཀྱིལ་འཁོར་རིམ་པ་གཉིས་པ་གྲོང་ཁྱེར་པ་དང་ཕོ་བྲང་པ་མན་ངག་དང་ལྡན་པས་བརྩིག་ཅིང་བྲི་བར་བྱའོ། །དེའི་ཁོར་ཡུག་ལ་སོགས་པར་མཆོད་པ་ཐམས་ཅད་ཀྱིས་བརྒྱན་ཅིང་། བཀྲ་ཤིས་ཀྱི་ཚིགས་སུ་བཅད་པ་ཀློག་པས་
ཕྱོགས་བཞིར་སྒྲ་སྒྲོགས་པར་བྱས་ལ། རྣལ་འབྱོར་ཅན་བདག་དང་སྐལ་བ་ལྷག་པ་དང་མཉམ་པ་ཐམས་ཅད་ལ་རྣམ་པ་ཐམས་ཅད་གུས་པའི་ཆེད་དུ་བརྗོད་པས་ཆེད་དུ་བརྗོད་པ་དང་། སྐལ་པ་དམན་པ་རྣམས་ལ་སྙིང་རྗེའི་ལྕགས་ཀྱུས་ཟིན་པས་ཇི་ཙམ་དོན་བྱ་བར་བཟོད་པ་དེ་སྲིད་འབད་པར་བྱའོ། །

73-1-162b

གང་ཕྱིར་གྲགས་པ་མ་ཡིན་རྒྱུན། །མི་སྙན་བརྗོད་སོགས་དོན་མིན་ཕྱིར། །མཁས་པ་གྲགས་པ་བཟང་སྐྱོང་འདོད། །དེས་ནི་སྡིག་པ་བསལ་ཕྱིར་འབད། །གདུག་པའི་ངག་གི་མཚོན་རྣོན་པོས། །གཞན་གྱི་གྲགས་པ་གཅོད་བྱེད་ཅིང་། །ཚེ་རབས་ཀུན་ཏུ་བདག་གི་ཡང་། །སྙན་པ་མ་ཡིན་ཀུན་སྐྱེད་པའོ། །
མི་གང་བདག་ཉིད་སྐྱོན་བརྗོད་ཀྱི། །གཞན་གྱི་ཡོན་ཏན་མི་འཕྱར་ལ། །ནམ་ཡང་ཉེས་པར་སྨྲ་མི་བྱེད། །དེ་ནི་གྲགས་པ་བཟང་ལྡན་འགྱུར། །སྟོན་པ་ལ་སོགས་གུད་སྟོན་བྱེད། །ཕ་རོལ་གྲགས་པ་ངན་སེལ་བརྩོན། །བདག་ཉིད་སྡིག་པ་སྤང་ལ་མཁས། །གྲགས་པའི་རྒྱལ་མཚན་ཆོ་ག་བཞི། །སྡིག་པ་ཉུང་ངུ་
དང་བསོད་ནམས་མང་པོ་ཅན་ནི་འཕགས་པ་དགྱེས་པའི་གང་ཟག་སྟེ། གྲགས་པའི་རྒྱལ་མཚན་གྱི་ཚོགས་སྙན་པ་མང་པོ་རྙེད་པར་རུང་ངོ་། །དེས་ནམ་དུ་ཡང་ཁོང་ཁྲོ་བས་གཞན་སྤྱོ་བར་མི་བྱའོ། །སློབ་མ་ལོག་པར་ཞུགས་པ་ལ་སོགས་པ་འཁྲུག་པས་མི་སྙན་པར་བརྗོད་པས་སླར་བཟློག་པ་ནི་མ་ཡིན། དཀྱིལ་འཁོར་
བྲིས་ནས་རྩོད་པ་ཅན་གྱི་སྐྱེས་བུ་བསྟེན་པར་མི་བྱའོ། །རྟག་ཏུ་བྱམས་པས་ནོན་པའི་ཡིད། །འཇམ་ཞིང་ཡིད་འབབ་སྙན་སྨྲ་དང་། །ཁ་ན་མ་ཐོ་མེད་ཀུན་སྤྱོད། །རྣམ་ཞི་ལ་གྲགས་པ་འགྲུབ་སྟེ། །དེ་ལ་འདིར་རྩ་བའི་རིག་པ་སྔོན་དུ་བསྙེན་པས་དབང་གྱུར་པ་ཐོབ་པར་བྱས་ནས་གྲོང་ཁྱེར་བའི་དཀྱིལ་འཁོར་ནི་རང་ཉིད་
ཅི་ཙམ་དུ་གྲགས་པ་བསྒྲགས་པར་འདོད་པ་དེ་ཙམ་ཉེ་བར་དགོད་དོ། །ཕོ་བྲང་བའི་དཀྱིལ་འཁོར་ནི་འཁོར་ལོའི་རྩིབས་བརྒྱད་པ་པདྨ་འདབ་མ་བརྒྱད་དང་ལྡན་པ་སྤྲིན་གྱི་ཕུང་པོའི་རུམ་ཕྲག་ན་གནས་པ་རྒྱུན་མ་ཆད་པར་འབྲུག་གི་སྒྲ་ཟབ་མོ་སྒྲོགས་པས་མཛེས་པའོ། །གྲགས་པའི་རྒྱལ་མཚན་དབུས་
བཞུགས་ལ། །སྒྲ་ལྡན་བརྒྱད་ཀྱིས་དུང་འབུད་བསྐོར། །ཕྱོགས་གཟུགས་མཚམས་ནི་ཕྱེད་གཟུགས་མདོག །འདབ་བརྒྱད་ལ་གནས་ལས་སྒྲུབ་བརྩོན། །དེ་བཞིན་རྩིབས་རིམ་དགའ་བ་དང་། །མི་ཕབ་དབྱངས་བཟང་ང་རོ་ཆེ། །སྙན་པའི་ཏོག་དང་ཀུན་ཁྱབ་བྱེད། །ཡིད་གཞུངས་དོན་བསྒྲུབ་ཅེས་བྱ་
བརྒྱད། །དཀར་དང་དམར་སེར་ལྗང་དང་དམར། །དཀར་དང་ལྗང་དང་སེར་བས་ཏེ། །ལྷ་ཡི་རྔ་ཆེན་བརྡུང་བ་དང་། །སྒྲུབ་པ་པོ་ཡི་བསྔགས་པ་བརྗོད། །གཡེར་ཁ་ལ་སོགས་སྙན་པའི་སྒྲས། །གྲོང་ཁྱེར་ལ་ནི་སེམས་བྱེད་ཅིང་། །ཕོ་བྲང་ལྷན་ཅིག་འབྲུག་སྒྲ་ཡིས། །མ་ལུས་གྲགས་པ་སྒྲོགས་པར་བྱེད། །

73-1-163a

དེ་ལྟར་དཀྱིལ་འཁོར་ས་བསྐྱེད་ནས། བདག་གི་སྨིན་མཚམས་ཀྱི་ཧྲཱིཿལས་འོད་ཕྱུང་བས་པོ་ཏ་ལ་ནས་གྲགས་པའི་དཀྱིལ་འཁོར་སྤྱན་དྲངས་ཏེ། དེ་ཉིད་བཞུགས་པས་བྱིན་གྱིས་བརླབ་པར་བྱའོ། །དེ་ནས་ཕྲིན་ལས་ལ་སྦྱར་བར་བྱ་བའི་ཕྱིར་སྔགས་བཟླ་བར་བྱ་སྟེ། ཨོཾ་ཨཱཿཧྲཱིཿསརྦ་ལོ་ཀ་མ་མ་ཀཱིརྟི་
སྥ་ར་སྥ་ར། གརྫ་གརྫ། པྲ་ཀཱ་ས་པྲ་ཀཱ་ས་ས་མ་ཡ་ཧཱུཾ། ཇི་སྲིད་ངལ་བར་མ་གྱུར་པར། །དཀྱིལ་འཁོར་རྗེས་མཐུན་དོན་གྲུབ་བྱེད། །རྣལ་འབྱོར་ལྡན་པས་འབད་བྱས་མཐར། །མཆོད་པས་མཉེས་བྱས་གཤེགས་སུ་གསོལ། །གྲགས་པ་བསྐྱེད་པའི་ཆོ་ག་རྫོགས་སོ།།      །།  ༄༅། །ཐུགས་རྗེ་ཆེན་པོ་གཟི་བརྗིད་འབར་
བ་ལ་ཕྱག་འཚལ་ལོ། །སྔགས་པ་གང་ཞིག་ལུས་རིད་ཉམ་ཆུང་དང་། །བཞིན་བཟང་མཐོང་བས་འགྲོ་བ་དང་འགྱུར་ཉིད། །སྤྲོ་བ་ལྷུར་ལེན་སྐྱེ་བོ་སྡུད་བྱེད་པ། །དེ་དག་ཕྱིར་ནི་གཟི་བརྗིད་བསྐྱེད་པ་བྲི། །གཟི་བརྗིད་འབར་བ་བརྗིད་པའི་སྐུ། །རས་རིས་ལ་སོགས་མདུན་བཞུགས་ལ། །བརྒྱ་རྩ་བརྒྱད་མཚན་བསྟོད་པ་
ཡིས། །གུས་བསྟོད་མེ་ཏོག་ཕྲེང་བ་གདགས། །གཞོན་ནུ་མ་བརྟུལ་མེ་ལོང་ངམ། །རིན་ཆེན་སོགས་འོད་བརྡར་བ་ཡིས། །སྐུ་བཀྲམ་མེ་ཏོག་སྤོས་སོགས་དབུལ། །མེ་ཡི་ལས་ཀྱིས་དངོས་གྲུབ་བླང་། །སྤྲིན་བྲལ་ཉི་མ་ཟླ་བ་དང་། །མར་མེ་འབར་བའི་འོད་རེག་པས། །སྐུ་གཟུགས་གསལ་བར་བྱས་ནས་སུ། །ཧྲཱིཿ
ཡིག་གཟི་བརྗིད་སྙིང་པོ་བསྐྱེད། །དེ་ལ་སྐུ་མཆོག་བསྟིམས་ལ་སྐུ། །རང་འདྲ་དཔག་ཏུ་མེད་འཕྲོས་པས། །རྫོགས་སངས་རྒྱས་སོགས་གཟི་བརྗིད་བསྡུས། །འགྲོ་བ་གཟི་བརྗིད་བསྐྱེད་བདག་དོན་བསྒྲུབས་པས། །ཕྱི་ནང་ལུས་དང་སྙིང་གི་དབུས། །འཁོར་ལོ་པདྨ་པདྨོ་ཅན། །གཟི་བརྗིད་རྒྱལ་པོ་འོད་འབར་བ། །
སྡིག་འཇོམས་རྟག་ཏུ་བསྒོམ་པར་བྱ། །གཟུགས་སྒྲ་དྲི་རོ་རེག་དང་ཆོས། །སངས་རྒྱས་སྲས་པོ་གཟི་བསྐྱེད་ལ། །གཟི་ཆེན་འབར་བའི་གསང་སྔགས་ཀྱིས། །སྟོབས་བསྐྱེད་བྱ་ཕྱིར་རྟག་ཏུ་དབུལ། །སེམས་ཅན་གཟི་བྱིན་ཆུང་ངུ་གང་། །དེ་དག་ལ་ཡང་ཆོ་ག་བཞིན། །བཟང་དང་འགྲན་ཟླ་མ་རབས་རིམ། །དགའ་དང་འདུན་
པ་སྙིང་རྗེས་སྤྱོད། །ལྷག་པའི་སེམས་དང་ལྷན་ཅིག་ཏུ། །རླུང་དང་འོད་དང་འོད་འབྱུང་ཞིང་། །སྤྲོ་བས་སྐྱེ་བོ་ཐམས་ཅད་ཀྱི། །ཡིད་འོང་རློམ་པ་ཞུ་བར་བྱེད། །མི་གང་འཇིག་རྟེན་མགོན་ལ་དད། །འབར་བའི་མཚན་མས་རྟག་ལུས་མཚན། །དེ་ནི་དུད་འགྲོ་འདྲ་ན་ཡང་། །འགྲོ་བའི་མིག་སྔར་ལྷ་ལྟར་སྡུག །ཨོཾ་

73-1-163b

ཨཱ་ཧྲཱིཿམ་ཧཱ་ཛྙཱ་ན་སྭཱ་ཧཱ། ཨོཾ་ཨཱཿཧྲཱིཿམ་ཧཱ་ཀཱ་རུ་ཎི་ཀ་སྭཱ་ཧཱ། ཨོཾ་ཨཱཿཧྲཱིཿམ་ཧཱ་ཛྭ་ལ་ག་ཏོ་སྭཱ་ཧཱ། ལུས་ལས་མེ་འབར་འོད་འབྱུང་དང་། །ཉི་མ་ལ་སོགས་སྣང་བར་རེག །རིན་ཆེན་སྒྲོན་མ་ལག་ན་ཐོགས། །འདི་དག་གཟི་བརྗིད་སྒྲུབ་པའི་ལྟས། །དེ་ནས་བློ་ལྡན་གྲོང་ཁྱེར་སོགས་འཇུག་རང་གི་ཁྱིམ་དུ་དེ་བརྟེན་ལ། །འོད་
འབར་མདོག་བཟངས་མར་མེ་དྲི་ཞིམ་བདུག་པ་ཅན་སྐོར་སྙན་པའི་སྒྲས། །ལེགས་མཆོད་སུ་ཡང་ཇི་སྲིད་བདག་སོང་དེ་སྲིད་མཐོང་བ་འབབ་བཀག་ལ། །སླར་ལོག་དོན་བསྒྲུབ་གཏོར་མས་མཉེས་བྱ་སློབ་མ་བཟང་ལ་རྒྱུ་མཆོད་བསྒོམས། །གཟི་བརྗིད་བསྐྱེད་པའི་ཆོ་ག་རྫོགས་སོ།།      །།༄༅། །འཕགས་པ་
ཐུགས་རྗེ་ཆེན་པོ་ཡིད་དུ་འོང་བའི་གཟུགས་ཅན་ལ་ཕྱག་འཚལ་ལོ། །གཟི་བརྗིད་ཕུང་པོ་མཐོང་ཙམ་གྱིས། །སྐྱེ་བོ་ཀུན་གྱི་ཡིད་འཕྲོག་ཅིང་། །རྒྱལ་པོའི་ངག་བཞིན་ཐམས་ཅད་ལ། །བསྒོས་པ་དོན་ཡོད་བྱེད་རིག་བཤད། །ཐོག་མར་བརྟན་གཡོ་ནམ་མཁའི་སྦྱོར་བ་ཡིས། །ངག་བཅད་དེ་ལས་པདྨ་ཟླ་བ་བསྐྱེད། །དེ་
སྟེང་ཨ་དང་ཀ་ཕྲེང་ཟེའུ་འབྲུ་ཅན། །འདྲེས་གྱུར་མགོན་པོ་ཡིད་འོང་གཟུགས་ཅན་བསྒོམ། །ཤེལ་ལྟར་རབ་དངས་རྡོ་རྗེ་ལྟ་བུར་མཁྲེགས་པའི་སྐུ། །དཀར་ལ་དམར་དངས་ཤིན་ཏུ་འོད་གསལ་རྣམ་པར་དག །བལྟས་པས་མི་ངོམས་དཔེ་བྱད་མཚན་རབ་ཀུན་རྫོགས་པ། །སྐྱབས་སྦྱིན་ཆུ་སྐྱེས་གཡས་གཡོན་
ཕྱག་རྒྱས་བཏབ་པའོ། །བརྒྱ་ཕྲག་འོད་འབར་རྒྱན་རྣམས་ལས་བྱུང་ཕན་ཚུན་འོད་ཟེར་རྣམས་འཁྲུགས་པས། །ཉིད་ཀྱི་སྐུ་བཀབ་དྲ་བ་དང་ནི་དྲ་བ་ཕྱེད་དང་རྡོ་རྗེ་གཡུང་དྲུང་འཁྱིལ། །ཟེར་ཕོག་པ་དང་གཟུགས་བརྙན་རབ་འདྲེས་ཏིག་ཏིག་གོང་བུ་འཁྱིལ་འགྱུར་ཏེ། །སྤུ་སྒོ་ཀུན་ལ་རིན་ཆེན་འོད་འཛག་མཁའ་ལ་
ཉི་ལྟར་མཛེས་བདག་གྱུར། །དེའི་སྙིང་པོར་ཡི་གེ་གསུམ་པ་འདུས་པ་ལ་ནུ་མ་གཉིས་ཀྱིས་བརྒྱན་པ་བལྟས་ལ། དད་པ་དང་ལྷན་ཅིག་པའི་འོད་ཀྱི་ཞགས་པས་པོ་ཏ་ལ་ནས་གཞོན་ནུ་འབར་བ་ཉིད་བཀུག་ལ། བཅུ་དྲུག་དང་བརྒྱད་དང་། ཉི་ཤུ་དང་བཅུ་དང་། བདུན་དང་ལྔ་ལ་སོགས་པའི་ལྷ་མོ་ལྟེ་བའི་སྒོ་ལས་
མངོན་པར་འཕྲོ་བའི་མཆོད་པ་ཐམས་ཅད་ཀྱིས་ཡང་དག་པར་མཆོད་ནས། ཕྱོགས་ཀྱི་གཞོན་ནུ་མ་བཞིས་ཡིད་འོང་མཚུངས་མེད་ལ་སོགས་པས་བསྟོད་ནས་ལྕགས་ཀྱུ་དང་ཞགས་པ་དང་། ལྕགས་སྒྲོག་དང་། དྲིལ་བུའི་རང་བཞིན་གྱིས་བཀུག་ཅིང་བཅུག་སྟེ་བཅིངས་ལ་དགྱེས་པར་བྱའོ། །དེ་ནས་

73-1-164a

ཐུགས་ཀ་དང་ལྗགས་ལ་ཡི་གེ་བཞི་དང་བཅུ་དྲུག་གི་པདྨོ་དང་འཁོར་ལོ་ཉེ་བར་བཀོད་དེ། བྱམས་པ་ཆེན་པོའི་ཡིད་ཀྱིས་བཟླས་ལ། ནམ་ཀྱི་ཚེ་སྐྱེ་བོ་བདག་གི་མིང་ཐོས་པ་དང་། གཟུགས་མཐོང་བས་དབང་པོ་མངོན་པར་གཡོ་བའི་ཚེ། དེ་དག་གི་སྙིང་ལ་ཧྲཱིཿདམར་པོ་བསམས་ནས། སྣ་
བུག་གཡས་ནས་སྤྲོས་པའི་ས་བོན་ལས་འོད་ཀྱི་མདའ་བཀྱེ་བ་བསྣུན་ཏེ། དེ་ལས་བདུད་རྩི་རྒྱུན་ཟགས་པས་ལུས་ཐམས་ཅད་ལ་ཁྱབ་པར་བྱའོ། །བྱམས་པའི་ལྟ་བས་རྣམ་བལྟ་ཞིང་། །རྟག་ཏུ་ཀུན་ལ་སྙིང་རྗེ་འཇུག །ཆགས་བྲལ་སྡང་བ་ཡང་མེད་པ། །སྒྲུབ་པོ་འགྲོ་བ་ཀུན་ཡིད་འཕྲོག །དབང་པོ་རབ་ཏུ་དུལ་
བ་དང་། །དྲེགས་མེད་བཀའ་བློ་རབ་ཏུ་བདེ། །འཇིག་རྟེན་མགོན་ལ་ལྷག་པར་དང་། །ཡིད་གཞུངས་གང་ཡིན་སྐལ་ལྡན་མཚན། །ཅི་སྟེ་འདི་བརྩམས་ཀྱིས་མ་སྤོབས། །དེ་ནས་སྦྲང་རྩི་རྨ་བྱའི་མདོངས། །མེ་ཏོག་བཟང་པོ་ཀུན་འདབ་ཆེ། །སྤོས་ཆུས་ སྦྱར་བ་སྨིན་མཚམས་བྱུག །བྱང་ཆུབ་སེམས་དཀར་
དམར་ཐིག་ལེ། །རྒྱ་མཚོའི་ལྦུ་བ་སེང་ལྡེང་སྤགས། །ཙནྡན་དམར་པོ་ག་པུར་བཅས། །དཔྲལ་བར་བྱུགས་ལ་གསང་སྔགས་བརྗོད། །སྤྱན་རས་གཟིགས་དཔལ་ཡིད་འོང་མཐུས། །དམ་བཅས་དམ་ཚིག་རྗེས་དྲན་ཕྱིར། །རྟག་པའི་རྒྱལ་པོ་ལས་བྱེད་འདིས། །སྐྱེ་བོ་ཀུན་ཡིད་མངོན་སུམ་འཕྲོག །སེམས་
ཅན་མགུ་བར་བྱེད་པ་རྫོགས་སོ།།      །།༄༅། །འཕགས་པ་ཐུགས་རྗེ་ཆེན་པོ་རབ་ཏུ་སྣང་མཛད་ལ་ཕྱག་འཚལ་ལོ། །མ་འོངས་པ་ན་འབྱུང་བར་འགྱུར་བ་ངེས་པར་མི་ཤེས་པས་ཅི་བྱ་གཏོལ་མེད་པར་གྱུར་ཏེ་ལྟོངས་པ་རྣམས་ཀྱིས་འདིར་བཅོམ་ལྡན་འདས་འཕགས་པ་ཐུགས་རྗེ་ཆེན་པོ་རབ་ཏུ་སྣང་
མཛད་ལ་རེ་བ་བསྐྱེད་ལ། ཞག་གསུམ་མམ་གཉིས་སམ་གཅིག་གི་བར་དུ་ཡིད་ལ་བྱེད་པ་གཅིག་དང་མི་འབྲལ་བས་རིག་པ་བཟླ་ཞིང་སྨྱུང་བར་གནས་པར་བྱའོ། །ཏདྱ་ཐཱ། ན་མཿཤྲཱི་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡེ། མ་ཧཱ་ཀཱ་རུ་ཎི་ཀཱ་ཡ། དཪྴ་དཪྴ། པྲ་དཪྴ་པྲ་དཪྴ། སརྦ་བུདྡྷ་ཛྙཱ་ན་གརྦྷེ་
ཏིཥྛ་ཏིཥྛ་མ་མ་ས་པ་ཎ་ཏྭོཥྛ་པྲ་དཪྴ་ཧཱུཾ་ཧཱུཾ་སྭཱ་ཧཱ། འཇིག་རྟེན་མགོན་པོའི་མཆོད་རྟེན་ལ། །མེ་ཏོག་དཀར་པོ་སོགས་བདུག་བཅས། །མཆོད་པ་མང་པོས་ཉེར་མཆོད་ཅིང་། །ཕྱག་འཚལ་ཀུན་ཏུ་བསྐོར་བར་བྱ། །ལུས་ཀྱི་འདབ་སྐྱེས་འདབ་བཞི་ལ། །ཇི་ལྟར་འདོད་པའི་དངོས་པོ་བཞི། །མན་ངག་བཞིན་

73-1-164b

དུ་རི་མོར་དགོད། །གེ་སར་རང་སེམས་མེ་ལོང་ངོ་། །དེ་ནས་ལྷག་པའི་ལྷ་དྲན་པས། །སྡིག་ལ་སོགས་པ་བསལ་ནས་ནི། །འཕགས་པའི་ཞབས་ལ་མགོ་གཏུགས་ལ། །སྣང་བ་གསལ་པོས་སྙོམས་པར་འཇུག །སངས་རྒྱས་སྲས་པོ་ཐུགས་རྗེ་ཅན། །ཀུན་མཁྱེན་ལུས་ཅན་ཀུན་དོན་བསྒྲུབ། །འོད་ལྡན་ཡུལ་ལ་རྟགས་
སྐུགས་ལྟར། །དུས་དྲུག་གཟིགས་དེས་མཁྱེན་པ་འཇུག །ཐོ་རངས་དགེ་སློང་དཀར་པོ་དང་། །པདྨོའི་རྟགས་ཅན་བུད་མེད་ཀྱིས། །འདོད་པའི་དོན་གང་ཡོད་པ་དེ། །མེ་ལོང་ནང་གི་གཟུགས་ལྟར་སྟོན། །རྨི་ལམ་སྟོན་པ་རྫོགས་སོ།།      །།༄༅། །མགོན་པོ་མྱ་ངན་མེད་པའི་དཔལ་ལ་ཕྱག་འཚལ་ལོ། །བརྩེ་ཆེན་རིང་
ནས་གདུག་པ་སྤངས་པའི་རྒྱུས། །རྣམ་ཀུན་སྐྱེ་བོ་མྱ་ངན་སེལ་མཛད་པ། །དཔལ་ལྡན་མགོན་པོ་མྱ་ངན་མེད་པའི་དཔལ། །ཇི་བཞིན་སྒྲུབ་ཐབས་བདག་གིས་འདིར་བསྡུ་བྱ། །རྐང་གཉིས་སྐྱིལ་ཀྲུང་ལག་པ་མཉམ་པར་བསྣོལ། །མིག་ཕབ་རྡོ་རྗེ་སྐྱིལ་ཀྲུང་བརྩེགས་ནས་ནི། །རྟ་མཆོག་རྒྱལ་པོ་དལ་བུས་རྗེས་འགྲོ་དང་། །འོང་
བས་རྒྱུད་རབ་རྩེ་གཅིག་གྱུར་པ་ན། །བདེ་བར་གཤེགས་པ་སྲས་དང་བཅས་པའི་སྐུ་གསུང་ཐུགས་ཀྱི་ཡོན་ཏན་དྲན་པར་བྱས་པ་མཆོད་པ་རྒྱ་ཆེན་པོ་སྔོན་དུ་འགྲོ་བས་བཅོམ་ལྡན་འདས་སྤྱན་དྲང་བར་བྱའོ། །རིམ་པ་གང་དང་ལྡན་པས་གསོལ་བ་བཏབ་ལ། དེའི་སྙིང་པོ་རི་བོང་ཅན་ལས་འོད་དང་བདུད་རྩི་དང་ཡི་གེ་ཧྲཱིཿའི་
རྒྱུན་གྱིས་བསྟར་བའི་ཕྲེང་བ་ཕྱུང་སྟེ། བསྒྲུབ་བྱའི་སྙིང་གི་ཟེའུ་འབྲུའི་རྩེ་མོ་ནས་བརླན་པར་བྱའོ། །བདེ་གཤེགས་ཟླ་བ་དཀར་མདོག་མུན་སེལ་བ། །རྣམ་པར་མི་རྟོག་འོད་མཛད་མྱ་ངན་མེད། །ཅིག་ཅར་ཏིང་འཛིན་ཆོས་སྒོ་བརྒྱ་ཕྲག་ལ། །མཉམ་གཞག་ཆོས་སྟོན་ཏིལ་གྱི་གང་བུ་བཞིན། །རྡུལ་བྲལ་དགྲ་བཅོམ་
དབང་པོ་རབ་ཞི་དང་། །ཀུན་སྤྱོད་བརྟུལ་ཞུགས་ཐོགས་མེད་རྣལ་འབྱོར་ཅན། །མཁའ་རྒྱུ་སྟོབས་ཆེན་ས་ཡི་ལྷ་མོ་སོགས། །སྐད་ཅིག་གིས་ལྷགས་མེ་ཏོག་གཏོར་མ་སྦྱིན། །སྙིང་དབུས་དཀར་འཚེར་ཨ་དང་དྲག་པོའི་མིག་གཉིས་ལ། །ཡི་གེ་བདུད་རྩི་འོད་གསལ་ཕྲེང་བ་མས་རིམ་བཞིན། །མྱ་ངན་མེད་ཅིང་མྱ་ངན་
དེ་བདེ་དང་། །མྱ་ངན་རྣམ་དག་བླ་མའི་གདམས་ངག་བཞིན། །ཀུན་མཐོང་རི་བོའི་རྩེར་གནས་རྩྭ་ཟིལ་ལ། །བྲག་ངོས་མེ་ཏོག་སྙིང་པོ་བཞག་ནས་ནི། །རྗེས་མཐུན་སྐྱེ་བོ་ཡིད་རབ་ཞི་བ་ཡིས། །དབྱངས་བརྗོད་མྱ་ངན་མེད་མགོན་དྲན་པས་སྦྱིན། །གནས་གང་ན་འབབ་ཆུ་དང་ནེའུ་གསིང་དང་མེ་ཏོག་སྔོན་པོའམ། དཀར་

73-1-165a

པོས་བརྒྱན་པས། དུས་དང་ཉེ་བར་སྦྱར་བའི་གཏམ་གྲགས་པས་སེམས་ཚིམ་པར་བྱེད་ཅིང་། སྙིང་རྗེ་ཆེན་པོས་བསྟེན་པའི་གཞིར་ལྷའི་རྣལ་འབྱོར་ལ་སྙིང་པོར་བྱེད་པའི་གྲོགས་དང་ལྷན་ཅིག་པས་ཉི་མ་བདུན་ནམ། དགུ་འམ་བཅུ་གཅིག་ལ་སོགས་པའི་བར་དུ་གནས་པར་བྱའོ། །རྟག་ཏུ་ལྷ་ཡིས་
དབུགས་འབྱིན་དང་། །ཕ་རོལ་སེམས་དང་ཡོན་ཏན་དྲན། །འཇིག་རྟེན་མགོན་ལ་ཡིད་རྟོན་པས། །སྐྱེ་བོའི་མྱ་ངན་མྱ་ངན་སེལ། །ཨོཾ་ཨཱཿཧྲཱིཿཀ་ར་ཀ་ར་ཨ། ཙ་ར་ཙ་ར་ཨི། ཊ་ར་ཊ་ར་ཨུ། ཏ་ར་ཏ་ར་ཨེ། པ་ར་པ་ར་ཨོ། ཡ་ར་ཡ་ར་ཨཾ། ཧཱུཾ་ཧཱུཾ་ཧཱུཾ། ཤོ་ཀ་ཤན་ཏཱ་པ་ཧ་ར་ཧ་ར། ཨ་ཤོ་ཀ་པྲཱ་ཧ་ར་པྲཱ་ཧ་ར་ཨ་ཤོ་ཀ་ནི། 
སྭ་བྷཱ་བ་ཤཱུ་ནྱ་ཏཱ་ཨ་ཕཊ་སྭཱ་ཧཱ། ཡིད་འགྱོད་པ་བསལ་བ་རྫོགས་སོ།།      །།༄༅། །འཕགས་པ་ཐུགས་རྗེ་ཆེན་པོ་ལོངས་སྤྱོད་མི་ཟད་པ་ལ་ཕྱག་འཚལ་ལོ། །རེ་ཞིག་སྒྲུབ་པ་པོ་འབྱོར་པ་དམན་པ་དང་། ཕུན་སུམ་ཚོགས་པ་རྒུད་པས་ཟིལ་གྱིས་ནོན་ཏེ་བག་ཞུམ་པ་དང་། ཡོད་ཀྱང་མྱུར་དུ་འཛད་པས་མ་རུངས་
པར་བྱེད་པ་དེ་དག་ཐམས་ཅད། ཆགས་པ་དང་བརྣབ་སེམས་ཀྱིས་རང་དང་གཞན་གྱིས་ཡོངས་སུ་བཟུང་བ་ལ་མངོན་པར་གདུང་བ་སྤངས་ཏེ། འཕགས་པ་སྤྱན་རས་གཟིགས་རྒྱ་མཚོའི་གཏེར་གྱི་བདག་པོ་ལ་སྐྱབས་སུ་དོང་བར་བྱའོ། །ཤེལ་དང་བཻ་ཌཱུརྱ་དག་དང་། །ནཱི་ལ་རིན་ཆེན་ལས་གྲུབ་པའི། །གཞལ་མེད་
ཁང་མཆོག་དབུས་སུ་ནི། །མགོན་པོ་ལོངས་སྤྱོད་མི་ཟད་བསྒོམ། །གསེར་གྱི་བུམ་པ་བཟང་བཀང་བ། །ནོར་བུ་ཚོམ་ཚོམ་སྐྱུག་པའི་ཁ། །དཔག་བསམ་ཤིང་ཆེན་རྒྱས་པའི་གསེབ། །སྤྲིན་གྲིབ་ལ་ནི་ཡོངས་སུ་རྩེན། །གཡས་དམར་གཡོན་སྔོ་དབུས་དཀར་ཞལ། །སྣང་མཐའ་རྡོ་རྗེ་ཐིག་ལེའི་བརྒྱན། །ནོར་སྦྱིན་
བྱིན་རློབ་སྐྱབས་མཛད་དང་། །གཏེར་དང་ལྕགས་ཀྱུ་པདྨོའི་ཕྱག །སྐྱིལ་ཀྲུང་ཕྱེད་བརྟེན་ཀུན་དའི་མདོག །འདོམ་གང་འོད་གསལ་འཁོར་ལོ་སོགས། །རིན་ཆེན་བདུན་འཛག་མུ་ཏིག་འབྲུའི། །ཆར་འབེབས་གཡོ་བ་མི་མངའ་བའོ། །དེའི་ཕྱག་རྒྱ་ནོར་སྦྱིན་པར་མཛད་པའི་བདུད་རྩི་ཅན་གྱི་མཐོང་ཐོས་ལས། ནོར་
བུ་དང་འབྲུ་དང་སྨན་གྱི་ཆར་དོང་ཚེ་བརྩེགས་པ་ལྟ་བུ་རྒྱུན་མ་ཆད་པར་འོངས་བས་བདག་གི་ལོངས་སྤྱོད་ཐམས་ཅད་ཀྱི་སྦུབས་སུ་འཇུག་པར་བྱའོ། །ཨོཾ་ཨཱཿཧྲཱིཿཤྲཱི་ཨཱརྱཱ་ཝ་ལོ་ཀི་ཏེ་ཤྭ་ར་མ་མ་སརྦ་སཾ་བྷོ་ག་རཏྣ་རཏྣེ། མ་ཧཱ་ཙིནྟ་མ་ཎི་དྷ་ར་དྷ་ར་ཨ་ཀྵ་ཡ་ཨ་ཀྵྨཽ་པ་ཏིསྠ་ཏི་ཧཱུཾ། བདག་ཉིད་བཙུན་མོ་པདྨོ་ཅན་

73-1-165b

གྱི་ཏིང་ངེ་འཛིན་གྱིས་མེ་ཏོག་དམར་པོ་དང་དཀར་པོ་སིལ་མ་ཐོགས་ལ། པོག་ཕོར་བདུག་ཅིང་ཐལ་མོ་སྦྱར་བའམ། འདུད་པ་སྔོན་དུ་སོང་བས་མཆོད་པར་བྱའོ། །དེ་ནས་ཇི་ཙམ་ལོངས་སྤྱོད་པས་ཟད་པ་དེ་ཙམ་འཕགས་པའི་ཕྱག་ནས་བླང་ངོ་། །བླ་མ་དང་ལྷ་མཆོད་པ་དང་ཕན་པའི་གནས་དང་། མགོན་མེད་པ་ལ་
སྦྱིན་པའི་རིམ་པ་ལྷག་པའི་བསམ་པ་དང་མ་བྲལ་བ་ནི་དམ་ཚིག་གོ། །གྲུབ་པའི་འབྲས་བུས་ལུས་ཅན་ལ། །བསྔོ་དང་ང་རྒྱལ་མེད་ཉིད་དང་། །བྱིན་པས་དབུལ་དང་ཕོངས་འགྱུར་ཞེས། །དོགས་བྲལ་དེ་ཡིས་སྤྱད་མི་བྱ། །ལོངས་སྤྱོད་མི་ཟད་པའི་སྒྲུབ་ཐབས་རྫོགས་སོ།།      །།༄༅། །ཐུགས་རྗེ་ཆེན་པོ་
དཔག་བསམ་གྱི་ཤིང་ཅན་ལ་ཕྱག་འཚལ་ལོ། །དཔག་མེད་བསོད་ནམས་ཡེ་ཤེས་ཚོགས་རབ་སྨིན་པའི་རྒྱུས། །གང་སྐུ་མི་གཏོང་དཔག་བསམ་ཤིང་ཆེན་བསིལ་གྲིབ་ཅན། །འགྲོ་བའི་དོན་དུ་ཤིན་ཏུ་རྨད་བྱུང་སྐུ་སྟོན་པ། །སྤྱན་རས་གཟིགས་དབང་ཐུགས་རྗེ་ཆེ་མངའ་འདིར་མཉེས་བརྗོད། །ཐོག་མར་རྣལ་
འབྱོར་གྱི་དབང་ཕྱུག་ཆེན་པོས་ཚངས་པའི་གནས་བཞི་བསྒོམ་པར་བྱའོ། །ཕྱི་དང་ནང་ལ་སོགས་པའི་རྣམ་པར་དག་པ་སྒྱུར་བའི་རིམ་པས་རྒྱས་བཏབ་ལ། བདག་ཏིང་ངེ་འཛིན་རྒྱལ་པོའི་ངང་ལ་གནས་པས། རིན་པོ་ཆེའི་ས་གཞི་ལས་མངོན་པར་བྱུང་བའི་དཔག་བསམ་གྱི་ཤིང་གི་ཡལ་ག་དང་། མེ་ཏོག་དང་
འབྲས་བུ་བསམ་གྱིས་མི་ཁྱབ་པ་རྒྱས་པ། སྤོས་ཀྱི་ངད་ཞིམ་པོས་བསྲུང་ཞིང་དེ་ལས་གྲུབ་པའི་སིལ་སྙན་གྱི་སྒྲས་ཆོས་ཀྱི་སྒོ་ཐམས་ཅད་ཡང་དག་པར་སྟོན་པ། ལྷའི་བུ་དང་བུ་མོ་ལ་སོགས་པ་བྱེ་བ་ཁྲག་ཁྲིག་བརྒྱ་སྟོང་གིས་བསྟོད་ཅིང་ཕུ་དུད་བྱས་པའི་སྡོང་བུ་ཆེན་པོ་ལ་བཞུགས་པ་ནི། འཕགས་པ་སྤྱན་
རས་གཟིགས་ཀུན་ནས་འོད་ཟེར་བཀོད་པའི་རྒྱལ་པོ། ཀུན་དུ་ཞལ་ཁ་དོག་བཞི་པ་ཕྱག་བརྒྱད་ཀྱིས་རབ་ཏུ་མཛེས་པ་རྡོ་རྗེ་སྐྱིལ་མོ་ཀྲུང་གིས་མི་གཡོ་བར་བཞུགས་ཤིང་། འོད་དཔག་ཚད་གཅིག་པས་བཙུན་མོ་དང་བཅས་པའི་འཁོར་གྱི་དཀྱིལ་འཁོར་ལྷམ་མེ་ལྷང་ངེར་གསལ་བར་མཛད་པའོ། །ཆགས་
བྲལ་ཆགས་པའི་ཁ་དོག་ཅན། །ནོར་བུ་འབར་བས་བརྒྱན་པའི་སྐུ། །བལྟ་བས་མི་ངོམས་བཙུན་མོ་དང་། །ལྷན་ཅིག་འཇིགས་སྐྱོབ་ལ་སོགས་འཁྱུད། །གཞན་དག་སྡོང་བུ་ལས་ཕྱེ་བ། །དགུ་བརྒྱ་དགུ་བཅུ་དགུ་ཡལ་ག །ཟླ་བ་ཉི་མ་སོགས་སྟེང་དུ། །སྐལ་བཟང་སངས་རྒྱས་འཛུམ་པ་མཛད། །

73-1-166a

ཤཱཀྱའི་རྒྱལ་པོ་ཐུགས་ཀ་དང་། །འོད་དཔག་མེད་དཔལ་ཅོད་པན་དང་། །སྨིན་མཚམས་ན་ནི་མི་བསྐྱོད་པ། །ཕྱག་མཐིལ་རྡོ་རྗེ་མགྲིན་སྔོན་ཉིད། །གང་དག་འཇིག་རྟེན་འདི་དང་གཞན། །བཀྲ་ཤིས་རྫས་དང་ནོར་དང་འབྲུ། །མེ་ཏོག་རྒྱན་དང་མཆོད་རྫས་སྨན། །གང་ཡོད་མ་ལུས་འདིར་སྤྲུལ་བྱ། །བཻ་ཌཱུརྱ་
རང་བཞིན་སྡོང་བུ་རབ་ཏུ་ཀུན་ནས་བརྗིད་ཆགས་འཁྲུངས་པ་ཡི། །ཡལ་ག་བཟང་གྱེས་ཕྱོགས་བཅུར་འདུད་རྣམས་རྫོགས་པའི་སངས་རྒྱས་ཁུར་ཁྱེར་ཞིང་། །འབྲས་བུ་གཡུར་ཟ་མེ་ཏོག་ཁ་ཕྱེ་ཕན་ཚུན་འགྲན་པ་བཞིན་སྟོན་པ། །མཁའ་ཁྱབ་དྲི་ལྡང་འཇིག་རྟེན་གསུམ་སྐྱབས་དགའ་བ་སྐྱེད་པར་བྱེད་པ་ཡིན། །ཡེ་ཤེས་པ་
སྤྱན་དྲངས་ནས་གུས་པས་རྫས་དང་བཅས་པས་རིམ་གྲོ་རྫོགས་པར་བྱས་ལ། སྡིག་པ་བསལ་བ་དང་། འགྲོ་བའི་དོན་དུ་གསོལ་བ་བཏབ་སྟེ། རང་གི་སྤྱོད་ཡུལ་དུ་གནས་པར་བསམ་མོ། །དེའི་འོག་ཏུ་དཔག་བསམ་གྱི་མཆོད་པ་དབུལ་བ་དང་། ལྷན་ཅིག་ཏུ་རིག་སྔགས་བཟླ་ཞིང་གར་མཁན་དང་རོལ་མོ་མཁན་དང་། གླུ་
མཁན་ལ་སོགས་པས་དགྱེས་པ་བསྐྱེད་པར་བྱའོ། །ཨོཾ་ཨཱཿཧྲཱིཿཀལྤ་བྲྀཀྵ་ཧཱུཾ། ནམ་ཞིག་སྐྱོ་བར་གྱུར་ན་ཡང་། །ཡེ་ཤེས་རྟེན་ལ་བསྡུས་ནས་སུ། །དམ་ཚིག་དྲན་པའི་རྒྱས་བཏབ་སྟེ། །ཚོགས་བརྡར་བ་ནི་མཁས་པའི་ལུགས། །དཔག་བསམ་གྱི་ཤིང་ཅན་གྱི་སྒྲུབ་ཐབས་རྫོགས་སོ།།      །།
༄༅། །ཐུགས་རྗེ་ཆེན་པོ་བུམ་པ་བཟང་པོ་ཅན་ལ་ཕྱག་འཚལ་ལོ། །གཏེར་ཆེན་བུམ་པ་གསེར་གྱི་མཆོག །དཔག་བསམ་ཤིང་ལྟར་འགྲོ་བ་ཡི། །རེ་བཞིན་ཡལ་ག་བཟད་དགྱེད་པ། །དེ་ཡི་དབུས་བཞུགས་ཉིད་དཔལ་འདུད། །གང་ཡང་སྒྲུབ་པོ་བློ་གྲོས་ཆེ། །དད་དང་ལྡན་ཡང་དབུལ་གྱུར་པ། །དེ་དག་གིས་ནི་འབྱོར་པ་
དང་། །དངོས་གྲུབ་ལྷན་ཅིག་འཕགས་པ་བསྒྲུབ། །རེ་ཞིག་ཕུན་སུམ་ཚོགས་པའི་གནས་སམ་བུམ་པ་བཟང་པོ་ལྟ་བུའི་དབྱིབས་ཀྱི་གཞིར་དེ་དང་འདྲ་བའི་བསམ་གཏན་གྱི་ཁང་བུ་བཅོས་ལ། གང་དུ་འཇུག་པའི་མལ་དུ་མཚན་ཉིད་ཕུན་སུམ་ཚོགས་པའི་བུམ་པ་བྲིས་ཏེ། རབ་ཏུ་གནས་པའི་བཀྲ་ཤིས་གསོལ་བར་བྱའོ། །དེ་ནས་
ཟླ་བ་ཉ་ལ་བབ་པ་ན་སྤྱན་རས་གཟིགས་དབང་ཕྱུག་སྙན་གསན་ཕབ་ལ། ཟླ་བ་གཅིག་གི་བར་ཚངས་པར་སྤྱོད་པས་བཙུན་པ་དཀའ་ཐུབ་ཆེན་པོ་ཅན་མཉེས་པར་བྱའོ། །སླད་ཀྱིས་ཡང་ཟླ་བ་རྒྱས་པའི་ཉིན་མོར་གྱུར་པ་ན། གོས་བཟང་པོ་གྱོན། སྐྲ་དང་ཁ་སྤུ་ནི་བཅོས། རྒྱན་དུ་མས་ནི་བརྒྱན། རོལ་མོ་མང་པོ་ནི་དཀྲོལ་ཏེ། 

73-1-166b

འཕགས་པའི་རྟེན་ལ་ཕྱག་དང་བསྐོར་བ་ལ་སོགས་པ་བྱ་ཞིང་། སྙིང་གར་ཧྲཱིཿབསམས་ནས་དེའི་འོད་ཀྱིས་འཕགས་པ་སྤྱན་རས་གཟིགས་བུམ་པ་ལ་བསྟིམ་མོ། །གཞལ་མེད་ཁང་མཆོག་རིན་ཆེན་བུམ་པ་བཟང་འཁྱིལ་ལ། །ལྷ་རྫས་མགུལ་བཅིངས་ཡིད་བཞིན་ཡལ་ག་འབྲས་བུས་བརྒྱན། །དེ་དབུས་སྡོང་བུ་
མེ་ཏོག་ཨུ་དུམ་བཱ་རའི་རྩེར། །འཇིག་རྟེན་གསུམ་སྐྱོབ་དམར་མཛེས་ནོར་གྱི་རྒྱུན་ཅན་བསྒོམ། །དཔག་མེད་ལོ་འདབ་མེ་ཏོག་ཚོགས་འཁྲུངས་པདྨའི་ཡང་། །གེ་སར་རྩེ་ལ་རྒྱལ་སྲས་ཆོས་མང་སྟོན་པ་དང་། །རྩེ་དགའ་མཆོད་པའི་ལྷ་ཚོགས་རྣམ་པར་འཕྲོ་བ་ཡིས། །ས་འདི་མ་ལུས་ཅིག་གཅར་ཆོ་འཕྲུལ་རྣམ་པར་
འཕྲུལ། །མིག་གི་རྫི་བསྐྱོད་རྐང་པ་ཡ་གཅིག་བཏེག་པ་དང་། །ལག་པ་དཀུར་བརྟེན་འཛུམ་པའི་མདངས་ལེགས་འགྱིང་བ་སོགས། །མི་ཡི་བུ་མོ་བཞིན་བཟངས་རྣམས་ཀྱང་བཀའ་བསྒོ་ལ། །བུ་བཟངས་མདུན་བྱས་འཕགས་པ་མཆོད་ལ་བརྩོན་པར་བྱ། །ཨོཾ་ཨཱཿཧྲཱིཿསརྦ་བུདྡྷ་ནི་མ་རིདྡྷི་རཏྣ་དྷ་ར་དྷ་ར་དྷི་རི་དྷི་རི་དྷཱ་རུ་དྷུ་
རུ་བཛྲ་ཛྙཱ་ན་ཀཱ་རུ་ཎ་ཡེ། རཏྣ་གྷ་ཊ་བྷ་དྲ་སཾ་པཱུརྦ། སུ་སཾ་པཱུརྞ་ཀུ་རུ་སྭཱ་ཧཱ། སྲུང་སྐུད་དྲི་ལྡན་ལག་ཏུ་ཐོགས། །མེ་ཏོག་ཕྲེང་བས་མགོ་བཅིངས་ལ། །རྣལ་འབྱོར་ལྡན་པས་སྔགས་བཟླ་ཞིང་། །བུམ་བཟངས་ལས་ནི་དངོས་གྲུབ་བླང་། །དཀར་ནག་ཕྱེད་ཕྱེད་ཕྱོགས་ཀུན་ལ། །དབུལ་པོ་ཚིམ་པར་བྱ་བ་དང་། །རྙེད་
པའི་དང་པོས་བླ་མ་མཆོད། །ཀུན་ལ་ཆགས་མེད་མཆོད་སྦྱིན་སྤྱད། །བུམ་པ་བཟང་པོ་ཅན་གྱི་སྒྲུབ་ཐབས་རྫོགས་སོ།།      །།༄༅། །ཐུགས་རྗེ་ཆེན་པོ་ལམ་གྱི་བཞི་མདོ་ཅན་ལ་ཕྱག་འཚལ་ལོ། །རྒྱུ་དང་མི་རྒྱུའི་འཇིག་རྟེན་ལ། །ཐུགས་བརྩེས་དབེན་པ་སྤངས་ནས་ནི། །ལམ་གྱི་བཞི་མདོར་ཀུན་དོན་སྤྱོད། །སྐྱོ་
བ་མེད་སྐྱོབ་སྒྲུབ་ཐབས་བྲི། །བྱང་ཆུབ་སེམས་དཔའ་ཆེན་པོ་སྙིང་རྗེ་ཆེན་པོ་ཅན་གྱིས་བདག་ཉིད་གྲགས་པ་ལ་སོགས་པའི་ཕྱིར་མ་ཡིན་པར་ལམ་གྱི་བཞི་མདོ་དང་ཚོང་འདུས་ཆེན་པོ་ལ་སོགས་པར་འཕགས་པ་སྤྱན་རས་གཟིགས་དབང་ཕྱུག་བསྒྲུབ་པར་བྱའོ། །དེ་ནི་ཐུགས་རྗེ་ཤེས་རབ་ཀྱིས། །དབེན་པ་
སྤངས་ཕྱིར་ཆགས་མེད་ཕྱིར། །ལམ་ཆེན་ཞུགས་དང་ལྟོས་མེད་ཕྱིར། །འདུ་འཛིར་འདུ་འཛི་མེད་པས་གྲུབ། །རེ་ཞིག་སྐྱེ་བོ་མང་པོའི་སྤྱོད་ཡུལ་དུ་བྱེད་པའི་གནས་ནི་འཕགས་པ་དགྱེས་པའི་གནས་ཡིན་པས་དེར་སྤྱིལ་བུའམ་ཁང་བུ་ལ་སོགས་པ་གནས་མལ་ཁ་དོག་དཀར་པོ་པདྨོའི་ཏོག་

73-1-167a

ཅན་ལེགས་པར་བཅོས་ལ། ཇི་སྙེད་འབྱོར་པའི་ཡོ་བྱད་ཐམས་ཅད་ཀྱིས་འཕགས་པ་ཉིད་མཆོད་པའི་ཕྱིར་བརྩོན་པར་བྱའོ། །སྐྱོབ་པ་སྐྱོབ་པ་མེད་གཅིག་པུ། །ལྗོན་ཤིང་བཟང་ལ་སྐུ་བརྟེན་ཏེ། །པདྨོ་དང་ནི་འབྲས་བུ་སྟེར། །བཅུ་དྲུག་ན་ཚོད་མཛེས་པའོ། །ཆོ་ག་བཟང་ཤེས་བདག་དང་
ལྷ། །ཐ་དད་རིམ་གྲོ་བྱ་བྱེད་དུ། །བལྟས་ཏེ་དུས་གསུམ་མཆོད་པས་མཆོད། །དེ་མཉེས་བྱ་ཕྱིར་རིག་པ་བཟླས། །ཨོཾ་ཨཱཿཧྲཱིཿསརྦ་ལོ་ཀཱརྠཱ་སརྦ་སིདྡྷི་སིདྡྷི་ཧཱུཾ་ཧཱུཾ་ཧཱུཾ། སརྦ་སཏྭཱརྠཱ་པ་རི་པཱུ་རུ་པཱུརྦ་ས་མ་ཡ་སྨ་ར་ཧཱུཾ་ཧཱུཾ་ཧཱུཾ་སརྦ་ཙིཏྟ་སཾ་དུཥྚཱན་བྷ་ར་བྷ་ར། སཾ་བྷ་ར་སཾ་བྷ་ར། པྲ་ཏྱཏྤནྣ་སུ་སཾ་བྷ་བ་ཀ་ར་ཧཱུཾ་ཧཱུཾ་ཧཱུཾ་ཞེས་བྱ་
བའི་འབུམ་ཕྲག་གཅིག་བཟླས་ལ། དེའི་ཕྲིན་ལས་ཡོངས་སུ་རྫོགས་པར་བྱ་བའི་ཕྱིར། ལམ་གྱི་བཞི་མདོ་ལ་སོགས་པར་མཆོད་རྟེན་བཞེངས་པར་བྱའོ། །དེའི་ནང་དུ་པདྨོའི་སྡོང་བུ་དབུས་མ་ལ་བཞུགས་པའི་སྤྱན་རས་གཟིགས་སྐྱོ་བ་རྣམ་པར་སྤངས་པ་དང་། ཤར་ལ་སོགས་པའི་སྡོང་བུ་བཞི་ལ་ལྕགས་
ཀྱུ་དང་ཞགས་པ་དང་ལྕགས་སྒྲོག་དང་དྲིལ་བུ་ཅན་གྱི་ཐུགས་རྗེ་ཆེན་པོ། དཀར་པོ་དང་། སེར་པོ་དང་། དམར་པོ་དང་། ལྗང་གུའི་ཁ་དོག་ཅན་རྣམས་བཅོས་ལ། རབ་ཏུ་གནས་པ་ཆོ་ག་ཇི་ལྟ་བ་བཞིན་བྱིན་གྱིས་བརླབ་པར་བྱའོ། །སྐྱེ་བོ་མང་པོ་དོན་གཉེར་ལ། །སྐྱེ་མེད་དཀྱིལ་འཁོར་སྤྲིན་གྱི་ཚུལ། །མཁའ་
ལ་ལྡིང་བས་སྟེང་བརྒྱན་པ། །མགོན་པོ་རྣམས་ཀྱི་ཡིད་བཞིན་ནོར། །སྲོག་ཆགས་གང་གང་དད་ཡོད་དང་། །དད་མེད་ཤེས་དང་མི་ཤེས་པའང་། །ཀུན་ཏུ་ལམ་ཆེན་འདིར་རྒྱུ་ན། །དེ་དག་ངན་འགྲོར་འགྲོ་མི་སྲིད། །རང་གིས་མཐོང་དང་ཐོས་དར་དྲན། །གྲིབ་མས་རེག་དང་སོ་སོར་ཏོག །དེ་དག་རྣམས་ཀྱང་
མ་ཐོགས་པར། །འཇིག་རྟེན་མགོན་གྱི་ཞིང་དུ་སྐྱེ། །ལམ་ཆེན་པོའི་སྒྲུབ་ཐབས་རྫོགས་སོ།།      །།༄༅། །ཝ་ཏིའི་རྒྱུད་ཅན་གྱི་ཐུགས་རྗེ་ཆེན་པོ་ལ་ཕྱག་འཚལ་ལོ། །དཀར་བསིལ་རོ་བརྒྱ་བདུད་རྩིའི་རྒྱུན་འབབ་ཉིད་ཀྱི་ཕྱག །གླང་ཆེན་སྣ་ཕུབ་ལྷ་བརྒྱའི་ཅོད་པན་གྱིས་གཏུགས་པ། །མ་ལུས་ས་སྟེངས་
ཞི་བ་བསྒྲུབ་མཛད་མཆོག་གི་བུ། །དཔལ་ལྡན་དཔལ་ཆེན་སྤྱན་རས་གཟིགས་དབང་ཉིད་རྟག་འདུད། །དགར་དང་མྱ་ངན་ཧ་ཅང་སྡིག་མང་དགེ་བ་སོགས། །འགྱུར་བའི་ལས་ཀྱི་དབང་པོ་གང་ཡིན་དེ་གཞན་འགྱུར། །དེ་ཚེ་ལྷ་མཆོག་ཝ་ཏིའི་རྒྱུན་འབེབས་དུས་གསུམ་དུ། །ཉིན་དང་མཚན་མོ་རྣམ་པ་

73-1-167b

ཀུན་དུ་མི་གཡེང་བསྒོམ། །དེ་ལ་རྒྱུན་འབབ་པ་ནི་གཉིས་ཏེ། ཡིད་ཀྱི་ལས་ཅན་དང་། དངོས་པོའི་ལས་ཅན་ནོ། །ཡིད་ཀྱི་ལས་ཅན་ནི་མཚན་མོ་ལའོ། །དངོས་པོའི་ལས་ནི་ཉིན་པར་རོ། །གང་ན་འཇུག་ངོགས་བདེ་ཞིང་དྲི་ངད་ལྡང་བ་མེ་ཏོག་ལྗོན་ཤིང་གཡུར་ཟ་བས་མཛེས་པར། ཉིད་ཀྱི་ཕྱག་དཔུང་པ་ཚུན་ཆད་
ཡོངས་སུ་རྫོགས་པའམ། །མཁྲིག་མའི་བར་དུ་ཡང་རུང་སྟེ། དེ་ལྟ་བུའི་གཟུགས་གདུ་བུ་དང་སོར་གདུབ་ལ་སོགས་པ་རྒྱན་ཐམས་ཅད་ཀྱིས་བརྒྱན་པ་དང་བཅས་ཏེ། མདོག་བཟང་པོས་བསྒྱུར་ལ། ཟླ་བ་ཉ་བ་དང་ཉི་མ་ཤར་བའི་དུས་གང་རུང་ལ་རབ་ཏུ་གནས་པར་བྱའོ། །མེ་ཏོག་ཆར་དང་བདུག་པའི་སྤྲིན་
གཏིབས་རོལ་མོ་འབྲུག་སྒྲ་ཆེར་བསྒྲགས་ཤིང་། །བ་དན་རྔ་ཡབ་གློག་གི་རྒྱུན་འཁྲིགས་རོ་བཟངས་ཞལ་ཟས་ཀྱིས་མཆོད་དེ། །བར་སྣང་འགྲོ་བས་ཕྲིན་ལས་རྗེས་བསྟོད་ཚངས་དབྱངས་ང་རོས་དྲིལ་བསྒྲགས་ལ། །རྡོ་རྗེ་དྲིལ་སྒྲོགས་དགྱེས་པའི་གར་བསྐྱོད་རྡོ་རྗེ་དགའ་བས་བྲོ་གར་དབུལ། །དེ་ནས་ཡི་གེ་གསུམ་
སྔགས་ཀྱིས། །བྱིན་གྱིས་བརླབ་པའི་རྒྱུན་ཕབ་པའི། །པདྨོའི་ཕྱག་གིས་མིང་མེད་ཀྱི། །རྩེ་ནས་ལེགས་བསྟར་སྙིང་པོ་བཏུང་། །རྡོ་རྗེ་སེམས་དཔའི་དང་པོ་དབང་། །དག་བྱེད་དྲི་མེད་བདེ་བ་ཆེ། །དེ་འདིར་པདྨོ་སེམས་དཔའ་ཆེ། །རྣམ་དག་འོད་གསལ་རྨད་ཡིན་ནོ། །ཇི་ལྟ་ཇི་ལྟར་སྤྱི་གཙུག་ནས། །རྒྱུན་
འབབ་དེ་ལ་དེ་ལྟར་ནི། །སྐལ་བ་བཟང་པོའི་ལུས་ངག་ཡིད། །དྲི་བྲལ་མི་མཉམ་མཉམ་པར་འགྱུར། །གཞན་དག་ཕོངས་པ་སྣ་ཚོགས་དང་། །ཕུན་སུམ་ཚོགས་མིན་གང་གྱུར་པ། །དེ་དག་ཀྱང་ནི་སྐད་ཅིག་གིས། །སྤང་གྱུར་འཐུངས་པ་ཙམ་གྱིས་སོ། །དཔལ་འཇིག་རྟེན་དབང་ཕྱུག་ཝ་ཏི་ཅན་གྱི་སྒྲུབ་ཐབས་
རྫོགས་སོ།།      །།༄༅།  ཐུགས་རྗེ་ཆེན་པོ་གཙུག་ཏོར་ནས་བྱུང་བའི་རྒྱལ་པོ་ལ་ཕྱག་འཚལ་ལོ། །མཚན་མར་འཛིན་པའི་སྐྱེ་བོ་ལྡོངས་པ་ཡང་། །གང་གིས་ཤེས་རབ་ཐུགས་རྗེ་འབར་བ་ཡིས། །མི་གཏོང་རྟག་ཏུ་སྤྱི་གཙུག་རྩ་མཆོག་རྩེར། །བརྟན་བཞུགས་བདག་གིར་མཛད་པ་དགོངས་གྲུབ་ཤོག །
མི་ནི་རིང་ནས་དད་དང་མངོན་འདོད་ཡོད། །དེ་ལ་དྲང་སྲོང་ནམ་ཡང་མི་རིང་སྟེ། །ཐག་རིང་མཚོ་ནང་པདྨ་སྐྱེས་པ་ཡང་། །བུང་བ་ནགས་ན་གནས་པ་ཉིན་རེར་བརྟུལ། །འདི་ན་ཚངས་སོགས་གྲགས་ཆེན་མཐུ་ཅན་ཡང་། །ན་རྒས་སྐྱེ་འཆི་སྲིད་པའི་དགྲ་ཚོགས་ལས། །རྒྱལ་བར་མ་གྱུར་ཡ་ང་མ་སྤངས་

73-1-168a

ན། །ནུས་པ་བདག་ལ་ཅི་ཞིག་བདེ་བ་ཡིས། །ས་གསུམ་དབང་ཕྱུག་འཇིག་རྟེན་སྐྱོབ་ཉིད་འདིར། །མཆོག་དམན་བར་མའི་ཡིད་ཅན་སྐལ་རིམ་བཞིན། །སྙིང་དབུས་སྤྱི་གཙུག་རིང་ནས་སྐྱོབ་དམ་བཅས། །དེ་བཞིན་སྐྱབས་འདོད་གཙུག་ཏོར་ཆོ་ག་བསམ། །དཀྱིལ་འཁོར་བསྟན་བཅས་མིག་ཕབ་
སྟེ། །སྨྱུག་མ་ལྟ་བུའི་ཚིགས་རྒྱུན་གྱིས། །སྒོ་གཉིས་ནས་ནི་དབུགས་བཟློག་ལ། །རྩ་མཆོག་རྩེར་ནི་ཐུགས་དབང་ལྷ། །རྟ་མཆོག་ལམ་ནི་སྡོང་བུས་ཏེ། །དཀྱིལ་འཁོར་གང་ཡིན་རྒྱ་མཚོའོ། །སྤྱི་གཙུག་འདབ་མ་བྱེ་བས་ཏེ། །དེ་སྟེང་མཐོ་གང་འཕགས་པ་ལྷ། །ལྔ་ལྡན་ཡལ་ག་དབུས་འདབ་ལ། །མི་གཡོའི་
ཕྱག་རྒྱ་པདྨོ་འཛིན། །རྩ་སྐྱོབ་རླུང་སྐྱོབ་ཐིག་ལེ་སྐྱོབ། །ཏིང་འཛིན་སྐྱོབ་རྣམས་ཕྱོགས་བཞིའོ། །ཧྲཱིཿཡིག་སྙིང་ག་ལས་འོངས་ས་བོན་དང་། །རི་དབང་ནས་བསྐྱོད་ཡེ་ཤེས་ལྷ། །འདུས་གྱུར་བདེ་གཤེགས་བཞིར་བཅས་ཡུམ། །སྒྲུབ་པ་པོས་ནི་རྣམ་པར་བསྒོམ། །འོད་དང་ཐིག་ལེ་མཉམ་པར་གཞག །
རང་གནས་སྙོམས་པར་འཇུག་པ་དང་། །འདུ་འབྲལ་འདུ་བྱེད་པ་དང་དེ། །ཞི་བ་ཉིད་དང་འོད་གསལ་རྟག །ཐོག་མ་བར་དང་མཐར་རིམ་བཞིན། །སྨིན་མཚམས་ཚངས་སྒོ་ནམ་མཁའ་ཡི། །ལམ་ནས་འཇུག་ཅིང་འབབ་དང་གནས། །ཉིད་ཀྱི་སྔོན་དུ་དམ་བཅས་པའོ། །གང་དག་རྣམ་པར་མི་གཡེང་བས། །ཐུན་གསུམ་
དུ་ནི་རྟག་ཏུ་དྲན། །སྙིང་རྗེ་ཆེན་པོས་ཀུན་སྤྱོད་པ། །ཁ་ན་མ་ཐོ་མེད་འགྲུབ་རྒྱུ། །པདྨོའི་སྡོང་བུ་ཅན་གྱི་སྒྲུབ་ཐབས་རྫོགས་སོ།།      །།༄༅། །དཔལ་ཐུགས་རྗེ་ཆེན་པོ་དྲི་མ་འཇིག་པ་ལ་ཕྱག་འཚལ་ལོ། །ཡང་འདིར་བཤད་པར་བྱ་བའི་དུས། །སྔ་དྲོ་འདབ་ཆགས་སྒྲ་སྒྲོགས་ཚེ། །དཔལ་ལྡན་པོ་ཏ་ལ་རྒྱལ་བ། །
དད་པ་དྲག་པོས་དམིགས་ནས་ནི། །མེ་ཏོག་དམར་པོ་དྲི་ངད་བཟང་པོ་གསུངས་པ་ཇི་སྙེད་ཚོགས་པ་བཏུས་ལ། གསེར་གྱི་སྣོད་དམ་ཁམ་པའི་སྣོད་ཡོལ་མོར་སྤུངས་ཏེ། ཟངས་སམ་མཚལ་གྱིས་བྱུགས་པའི་བུམ་པ་རྒྱན་དང་བཅས་པ་ལྔ་ཚན་ལྔས་གང་བ་དཀར་པོའི་ཆུ་དང་སྦྱར་བས་ཡོག་པ་ལྷག་མའི་རྒྱུན་
མཆུ་གཏིགས་ནས་འབབ་པ་སྟེང་དུ་གཞག་པར་བྱའོ། །ལྡོང་རོས་དང་གླ་རྩི་དང་ག་བུར་ལ་སོགས་པ་དྲི་དམ་པས་བྱུགས་པའི་སྐུ་གཙུག་ཏོར་དུ་བཞུགས་སོ། །ཤར་དང་ལྷོ་དང་ནུབ་བྱང་རིམ། །མེ་ལོང་བྱུག་པ་རྔ་ཡབ་རྒྱན། །བཏགས་ལ་ཐུན་མཚམས་ཕྲིན་ལས་དབུལ། །ཐལ་སྦྱར་མི་གཡེང་གུས་བསྟོད་

73-1-168b

མཆོད། །དེ་ནས་གཏོར་མ་དང་མཆོད་པའི་ཁྱད་པར་རྣམ་པ་ཐམས་ཅད་ཀྱིས་རྒྱ་ཆེར་ཕུ་དུད་དུ་བྱས་ཏེ། སྙན་པའི་དབྱངས་དང་ལྷན་ཅིག་པའི་རོལ་མོ་ཕུལ་ལ་བསྟོད་ནས། ལག་པ་རྡོ་རྗེའི་ཁུ་ཚུར་བཅངས་པས་རྡོ་རྗེ་བྱིན་གྱིས་བརླབ་ཅིང་། རྡོ་རྗེ་དང་པདྨ་མཚོན་པའི་པི་ཝང་བསྒྲེང་ཞིང་སྙན་པའི་ང་རོ་གསངས་བསྟོད་
པས་སྔགས་ནི་བཟླའོ། །ཨོཾ་ཨ་ཨི་ཨུ་ཨེ་ཨོ་ཨཾ་ཧྲཱིཿབཛྲ་ཨ་མྲྀ་ཏ་ཛ་ར་ཛ་ར་ཕེཾ་ཕེཾ་ཕེཾ་ཕཊ་སྭཱ་ཧཱ། འོད་ཟེར་དམར་པོ་རྒྱུས་པ་ཡི། །སྔགས་ཕྲེང་དམར་པོ་འཁོར་ལོ་ཅན། །ཅིག་ཅར་རྟག་ཏུ་བར་མ་ཆད། །རྒྱ་མཚོ་ལ་ནི་ཆར་རྒྱུན་བཞིན། །བདག་ཉིད་དྲི་མ་འཇིག་པ་ཡི། །སྤྱན་རས་གཟིགས་ཀྱི་ང་རྒྱལ་གྱིས། །ཡེ་
ཤེས་བསྟིམས་པའི་རྗེས་ལ་བུམ་པ་སྟེང་གི་ལྷ་བདག་ཉིད་ཇི་བཞིན་དུ་བསྐྱེད་དེ། བདག་དང་དེའི་སྲིན་ལག་ནས་འབབ་པར་རིག་པར་བྱའོ། །དངོས་སམ་ཉམས་སམ་རྨི་ལམ་ན། །ལྷ་མཐོང་བ་དང་ལུས་བཀྲུས་དང་། །བུམ་ནང་པི་ཝང་སྒྲ་སྒྲོགས་པ། །གྲུབ་པའི་ལྟས་ཡིན་དེ་ནས་སྤྱད། །སྤྱན་རས་གཟིགས་དྲི་མ་
འཇིག་པའི་བུམ་པའི་ཆོ་ག་རྫོགས་སོ།།      །།༄༅། །འཕགས་པ་ཐུགས་རྗེ་ཆེན་པོ་ཀུན་ནས་འབར་བའི་མཚན་མ་ཅན་ལ་ཕྱག་འཚལ་ལོ། །ཏདྱ་ཐཱ་ཨོཾ་ཨཱཿཧྲཱིཿབཛྲ་བཛྲོདྦྷ་ཝ་སརྦ་དྷརྨྨ་ནི། སྭ་བྷཱ་བ་རཱུ་པེ་ཏ་གརྦྷ་ཌིཎྜྷ་ཛྭ་ལ་ཛྭ་ལ། པྲ་ཏི་ཛྭ་ལ་པྲ་ཏི་ཛྭ་ལ་ཧ་ན་ཧ་ན་པྲ་ཧ་ན་པྲ་ཧ་ན། སརྦ་ཏ་ཐཱ་ག་ཏོ་ཙིཏྟ་སྠཱི་ར་ཧཱུཾ་ཕཊ། ལྟེ་
དབུས་རྟ་བདུན་འབར་བ་ཉིད། །ཧྲཱིཿཡིག་འཕྲོས་པས་མཚམས་བསྒོམས་ལ། །སྤྲོ་དང་བསྡུ་བའི་སྦྱོར་བ་ཡིས། །ཚོགས་རྫོགས་རྡོ་རྗེ་སྒེག་པར་བལྟ། །ཧཱུཾ་བརྗོད་རིམ་གྱིས་འཕེལ་འགྱུར་ཏེ། །ཨ་བརྗོད་བདག་ལུས་བཞུ་བ་ནི། །རྡོ་རྗེ་ལ་བཅུག་ཧོཿབརྗོད་པས། །ཀུན་དུ་བསྐོར་ཞིང་སྤང་བར་བྱ། །ལྟེ་བར་ཧཱུཾ་མཚན་རྩ་
བ་ཨ་དང་དེ་བཞིན་ཧོ། །ཨ་སོགས་ཀ་སོགས་བདེ་ཆེན་བདུན་པའི་ཡི་གེའང་དེ་མཐར་ཕྲེང་བའི་ཚུལ། །སྔགས་བརྗོད་རབ་ཞི་གདུག་པའི་སེམས་སྐྲག་ཡེ་ཤེས་མེ་ལྕེ་འབར། །མི་བཟད་སྒྲ་གྲག་ནམ་མཁའི་ངོས་ལ་སེར་སྤྲིན་འབྲུག་གི་ང་རོ་བཞིན། །རྣལ་འབྱོར་རྒྱལ་པོ་གཟི་བརྗིད་ཆེ། །ཐུགས་རྗེ་ཁྲོས་པས་
དྲག་པའི་ཐུགས། །དཔལ་ལྡན་རྣམ་པར་རྒྱལ་ཕྱག་འཚལ། །དགྲ་གདོན་སྡིག་པ་ཀུན་སེལ་བའོ། །དཔལ་རྡོ་རྗེ་འབར་བའི་བསྲུང་བ་ཆེན་པོའི་མན་ངག་རྫོགས་སོ།།      །།༄༅། །ཐུགས་རྗེ་ཆེན་པོ་སྤྱན་འཁོར་ལོ་རབ་ཏུ་འབར་བ་ལ་ཕྱག་འཚལ་ལོ། །ཐུགས་རྗེ་ཆེན་པོ་གདུལ་བྱ་ཡི། །དོན་དུ་ལྷོར་བལྟས་

73-1-169a

འཁོར་ལོ་བྲི། །ཉི་ཤར་ཟླ་རྒྱས་སྐར་མདའ་འཕྲོ། །འབྲུག་སྒྲ་གྲག་དང་ཆར་དྲག་འབབ། །སྤྲིན་མེད་པ་དང་རྙེད་པ་ཐོབ། །དེ་ཚེ་སྔགས་གསུམ་རིམ་བཞིན་ནོ། །ག་བུར་ཙནྡན་དཀར་ཐིག་ལེ། །སྐུ་གདུང་ཁྲུས་ཆབ་སྦྱོར་བ་ཡིས། །མུ་ཁྱུད་ཨ་ཕྲེང་དཀར་ལྡན་པའི། །འཁོར་ལོ་རྩིབས་བརྒྱད་རབ་
དཀར་བྲི། །ཨོཾ་ཨཱཿཧྲཱིཿཧཱུཾ་ཧོཿཕཊ་སྭཱ་ཧཱ། གླ་རྩི་ཙནྡན་དམར་ཟླ་མཚན། །སྙིང་རྗེ་ཆེན་པོའི་མེ་ཏོག་ཆུས། །ཟེའུ་འབྲུ་དཀར་ཕྲེང་དམར་ལྡན་པའི། །པདྨོ་འདབ་བརྒྱད་རབ་དམར་བྲི། །ཧྲཱིཿཤྲཱིཿདྷི་གྷི་ཛཿཧཱུཾ་བཾ་ཧོཿ། གུ་གུལ་སྦྲང་དང་མྱོས་བྱེད་ཆུ། །སྙིང་རྗེས་ཟགས་པའི་མཆི་མས་སྦྱར། །ཐབས་ཤེས་ཐིག་ལེ་
གཉིས་ལྡན་པའི། །ལྟེ་བར་བདེ་གཤེགས་སྙིང་པོ་བྲི། །སྔགས་གསུམ་རྫས་གསུམ་གོ་རིམས་བཞིན། །མིང་དང་རུས་དང་ས་བོན་དགོད། །རཀྵཿགཉིས་ཀྱིས་མཐའ་རྟེན་ལ། །མི་འགྱུར་ཐིག་ལེས་མཚན་པར་བྱ། །དེ་ནས་དཀར་ཕྱོགས་གཟའ་སྐར་ཤིས། །ཡེ་ཤེས་བཀུག་ནས་རབ་གནས་བྱ། །མེ་ཏོག་དཀར་
དམར་སྔོ་གཏོར་ལ། །མཆོད་པ་ཀུན་གྱིས་མངོན་མཆོད་གདགས། །སྲུང་བའི་འཁོར་ལོ་རྫོགས་སོ།།      །།༄༅། །བཅོམ་ལྡན་འདས་རྡོ་རྗེ་འབར་བ་ལ་ཕྱག་འཚལ་ལོ། །གཉིས་མེད་རྣམ་པར་མི་རྟོག་དག །ཞི་བའི་དབྱིངས་སུ་བསྲུང་རྫོགས་ནས། །ཐུགས་རྗེའི་སྟོབས་ཀྱིས་གཞན་སྐྱོབ་དཔལ། །
འཇིག་རྟེན་མགོན་པོ་ལ་བཏུད་བརྗོད། །ཡ་ང་མྱ་ངན་ཕོངས་པ་ཡི། །གནས་སུ་བདག་ཉིད་དེ་ཉིད་ཚེ། །པདྨོ་ཅན་གྱི་ལྕགས་ཀྱུ་ཡིས། །རྡོ་རྗེ་ཆེན་པོའི་བསྲུང་བ་བརྩམ། །བདེ་གཤེགས་མཛད་པའི་ལྷག་མ་ཅན། །ལྟེ་བ་རྭ་རྩེ་པདྨ་ལྷས། །མཚན་པ་ལྷག་པར་གནས་ལེགས་བྱས། །སོར་བཞི་སོར་གཅིག་ཚོན་
གང་ཚད། །རིན་ཆེན་མཎྜལ་བཀོད་དབུས་སུ། །སྒྲོན་ཆེན་བཞིས་བསྐོར་པདྨོའི་སྟེང་། །གྲགས་ཆེན་ཕྱག་རྩེ་ནས་འབབ་པའི། །འོ་མས་ཁྲུས་གསོལ་མཆོད་པས་མཆོད། །པདྨ་རྡོ་རྗེ་དམ་ཚིག་ཆེ། །གསང་སྔགས་རྒྱལ་པོ་རྗེས་དྲན་པས། །བདུན་ཕྲག་གཅིག་ཏུ་བཟླས་བསྙེན་ཏེ། །ཡེ་ཤེས་རྒྱལ་པོ་མངོན་
བཞུགས་བསྟོད། །ཨོཾ་ཨཱཿཨཱཿཨཱཿཧྲཱིཿཧྲཱིཿཧྲཱིཿཧཱུཾ་ཧཱུཾ་ཧཱུཾ་ཕཊ། ཐ་མལ་ལུས་དབུལ་རྡོ་རྗེ་བརྟུལ། །རྡོ་རྗེའི་ཡི་གེས་རྣམ་བརྒྱན་པ། །རང་མིང་བཟླས་པས་སྤེལ་བ་དང་། །ལུས་བཞུ་རྡོ་རྗེའི་གཟུགས་སུ་འགྱུར། །རྩེ་གཉིས་རྭ་དགུ་གོ་རིམས་བཞིན། །ཨོཾ་ཕཊ་འབྲུ་དགུས་དབུས་བརྒྱན་པ། །དེ་ཉིད་སྔགས་པས་

73-1-169b

མེ་དཔུང་འཁྲུག །ཐུགས་རྗེ་ཁྲོས་པས་རྔམ་པར་བྱེད། །ལྟ་སྟངས་བསྲེག་དང་བསྐྲད་པ་དང་། །གཞིག་དང་བསྣུན་དང་གསོད་པའི་ལས། །བརྟན་པ་རྣམས་ཀྱིས་ཀུན་སྤྱོད་ལ། །ནམ་ཡང་འཇིགས་པར་མི་བྱའོ། །གཉིད་དང་མྱོས་དང་རྣམ་པར་གཡེང་། །ནད་དང་མྱ་ངན་གློ་བུར་དགྲ། །དྲུག་པོ་ལས་ནི་རྡོ་རྗེ་
ཡི། །ཐོད་པར་ལུས་བཅུག་རྡོ་རྗེས་བཅིང་། །ཞུ་ལུབ་བ་སྤུ་གླང་ཆེན་གོས། །མགལ་དུམ་གའུ་གཞལ་མེད་ཁང་། །རྣལ་འབྱོར་ཆེན་པོ་བདག་དང་གནས། །བཅིང་བས་བཅིངས་པར་ཤེས་པར་བྱ། །ར་བ་བསྲུང་བའི་ཆོ་ག་རྫོགས་སོ།།      །།༄༅། །འཕགས་པ་ཐུགས་རྗེ་ཆེན་པོ་ཐུགས་རྗེ་ཁྲོས་པ་ལ་
ཕྱག་འཚལ་ལོ། །མ་ལུས་ཡོན་ཏན་རྒྱ་མཚོའི་མཐས་ཀླས་པས། །འགྲོ་བའི་དོན་དུ་རྨད་བྱུང་ཤིན་ཏུ་གྲགས། །སྟོབས་བཅུ་ལྷ་དང་མི་ལུས་རྣམ་རྒྱལ་བ། །གཙོ་བོ་ཉིད་གཅིག་ཐུགས་རྗེས་ཁྲོས་ལ་འདུད། །སྙིང་རྗེ་ཤེས་རབ་འོད་གསལ་ཤེས་རབ་དག །གཉིས་མེད་གཉིས་སུ་རབ་སྟོན་པ། །དེ་མིང་ཐུགས་
རྗེ་ཆེན་པོའོ། །གདུལ་བྱའི་དོན་མཐོང་རང་བཞིན་དང་། །ཅིག་ཤོས་ཞི་དང་ཞི་བྲལ་དང་། །གདུལ་བྱ་རྣམས་ཀྱི་དོན་ཕྱིར་ནི། །དཔལ་ལྡན་བཟང་ཁྲོས་པར་སྣང་བ། །ཉིན་མཚན་ཟླ་བ་དཀར་དང་ནག །དུལ་བ་དང་ནི་གདུག་པ་དང་། །གཉིས་ལ་གཉིས་མཛད་མགོན་པོ་མཆོག །ཆ་ལུགས་གཉིས་ཀྱིས་གཉིས་
བྱའོ། །བདག་ཉིད་རྡོ་རྗེ་ཆེན་པོ་ཡི། །བསྲུང་བས་གཟི་བྱིན་བསྐྱེད་པའི་རྗེས། །དེ་ཡི་གནས་དང་ལུས་བསྐྱབ་པའང་། །ཇི་བཞིན་ཅིག་ཅར་ཐོག་ཐག་བརྟག །ཨོཾ་ཨཱཿཧྲཱིཿཧཱུཾ། ཨོཾ་ཨཱཿཧྲཱིཿཧོ། ཨོཾ་ཨཱཿཧྲཱིཿཧཿ། ཨོཾ་ཨཱཿཧྲཱིཿཕཊ། རྒྱ་གྲམ་གཟུགས་ཀྱིས་བཞད་པའི་ཞལ། །གནམ་ལྕགས་རྒྱུན་སྒྲ་སྔགས་ཀྱི་
ལྕེས། །བསྲུང་བ་བྱ་དང་བརླག་བྱ་བ། །མཚན་མའི་རྣལ་འབྱོར་ལས་གཞན་མིན། །གཞན་བསྐྱབ་པའི་ཆོ་ག་རྫོགས་སོ།།      །།༄༅། །འཕགས་པ་སྤྱན་རས་གཟིགས་རྡོ་རྗེའི་རྒྱས་བཏབ་པ་ལ་ཕྱག་འཚལ་ལོ། །འཕགས་པ་སྤྱན་རས་གཟིགས་ལ་དད་པ་ཐོབ་པས། ཚོར་བས་གཟིར་བ་དང་། 
གདོན་གྱིས་གླགས་བཙལ་བ་དང་། རྐུན་པོ་དང་དགྲས་འཇིགས་པའི་ནུས་པའི་དབང་བ་བསྲུང་བ་ལ་སོགས་པའི་དོན་དུ་སྙིང་རྗེ་ཆེན་པོས་སྲུང་སྐུད་བཅིང་བར་བྱའོ། །འཁོར་ལོ་རྡོ་རྗེ་རིན་ཆེན་དང་། །པདྨོ་སྣ་ཚོགས་ཁ་དོག་ཅན། །རས་དང་དར་དང་བལ་དང་བཅས། །པདྨའི་སྐུད་པ་ཤིན་ཏུ་

73-1-170a

བསྔགས། །གཞོན་ནུ་གོས་དམར་གོས་དཀར་གྱོན། །རྒྱན་དམར་རྒྱན་དཀར་དེ་བཞིན་དུ། །ཅོད་པན་ཐབས་དང་ཤེས་རབ་འཛིན། །རྡོ་རྗེ་དྲིལ་འཛིན་གཡས་གཡོན་འཛིན། །མཆོད་པ་ཀུན་སྔོན་འགྲོ་བ་ཡིས། །འདབ་བརྒྱད་པདྨོ་བྲིས་དབུས་སུ། །གཉིས་ཀྱིས་སྲད་བུ་བཞག་ནས་ནི། །བགེགས་
བསལ་གཏོར་མ་སྔོན་སོང་སྦྱར། །དེ་རྗེས་ལྷག་པའི་ལྷར་བསྐྱེད་ནས། །འཇིག་རྟེན་དབང་ཕྱུག་པདྨོ་དང་། །སྲད་བུ་བསྣམས་པས་དགྱེས་བཞུགས་ལ། །འོད་འཕྲོས་མདུད་པ་དོར་བར་བྱ། །ལུས་ངག་སེམས་གསུམ་བཅིངས་པ་ཡི། །རྒྱ་གསུམ་ཕྱག་རྒྱ་བསམ་པ་སྟེ། །ཏིང་ངེ་འཛིན་གསུམ་སྔགས་གསུམ་
རིམ། །སློབ་དཔོན་མི་གཡེང་ལ་གནས་པས། །རྡོ་རྗེ་ཁུ་ཚུར་གཉིས་བཅིངས་དང་། །སྡིགས་མཛུབ་རྡོ་རྗེ་རྩེ་གཅིག་ཉིད། །སྐུ་གསུང་ཐུགས་ཀྱི་རང་བཞིན་གྱིས། །འོད་ཕྱུང་རྡོ་རྗའི་རྒྱས་བཏབ་པའོ། །ཨོཾ་ཨཱཿཧྲཱིཿཀཱ་ཡ་བཛྲ་ཀཱ་ཡ་ཀཎྛ་ཧཱུཾ། ཨོཾ་ཨཱཿཧྲཱིཿཝཱཀ་བཛྲ་ཝཱཀ་ཀཎྛ་ཧཱུཾ། ཨོཾ་ཨཱཿཧྲཱིཿཙིཏྟ་བཛྲ་ཙིཏྟ་ཀཎྛ་ཧཱུཾ། དམ་ཚིག་སྲད་བུ་དུང་
དང་བྱི་རུ་གསེར་འོད་བཻ་ཌཱུར་ཨིནྡྲའི་མདོག་གསལ་བ། །རྒྱ་གསུམ་འབར་བའི་རྡོ་རྗེ་སྐུ་གསུང་ཐུགས་དག་སྐལ་ལྡན་ལུས་ངག་ཡིད་བཏབ་པ། །སློབ་དཔོན་མཐུ་ཆེན་པོ་ཏ་ལ་ཡི་འཕགས་པ་སྲས་མཆོག་སྙིང་རྗེས་ཤིན་ཏུ་ནོན་པའི་ཡིད། །ཏིང་འཛིན་ལྕགས་ཀྱུས་དེ་ཉིད་བཅུག་ལ་གུས་པ་བཟང་ལྡན་མགུལ་དང་དཔུང་པ་
བཅིང་། །སྲུང་སྐུད་ཀྱི་ཆོ་ག་རྫོགས་སོ།།      །།༄༅། །དཔལ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །མགོན་པོ་གཞོན་ནུ་སྒེག་ཁྲོས་ཚུལ། །གཞོན་ནུ་གདོན་ལས་རྣམ་རྒྱལ་བ། །གཞོན་ནུ་སྐྱོབ་ལ་ཕྱག་འཚལ་ནས། །གཞོན་ནུ་བསྲུང་ཕྱིར་འདིར་བཤད་བྱ། །རེ་ཞིག་ནམ་ལངས་མ་
ཐག་ཏུ་ཁ་ཤར་དུ་བལྟས་ཏེ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་དང་ལྡན་པར་བྱས་ལ། དེའི་དཀྱིལ་འཁོར་གཞོན་ནུ་ཁྲོས་པ་ཞེས་བྱ་བའི་སྔགས་འདི་བཟླས་པར་བྱའོ། །ཨོཾ་ཨཱཿཧྲཱིཿཀུ་མཱ་ར་ཀྲོ་དྷ་སརྦྦ་དུཥྚཱ་ན་ཧ་ར་ཧ་ར་ཀུ་མཱ་ར་རཀྵ་རཀྵ་ཧཱུཾ་ཕཊ། ཁྲི་སྙན་ནག་པོའི་སྟན་འདུག་ལ། །གཞོན་
ནུ་ཁྲོས་པའི་ང་རྒྱལ་གྱིས། །ཤར་སོགས་ཕྱོགས་བཞིར་གཏུམ་མོ་བཞི། །རང་བཞིན་མ་ཡེངས་བལྟ་བར་བྱ། །དེ་ལ་ལུས་བསྲུང་དཔའ་བོ་གནག །ཞལ་གསུམ་ཕྱག་དྲུག་དཀར་དམར་སྔོ། །རྡོ་རྗེ་དྲིལ་བུ་དགྲ་སྟ་ཞགས། །རལ་གྲི་ཨུཏྤལ་བསྣམས་པའོ། །སྲོག་བསྲུང་དཔའ་བོ་དམར་པོ་སྟེ། །ཞལ་གསུམ་

73-1-170b

ཕྱག་དྲུག་སྔོ་སེར་དམར། །གྲི་གུག་ཐོད་པ་འཁོར་ལོ་དབྱིག །རྒྱལ་མཚན་མགོ་བོ་འཛིན་པ་ཉིད། །སྟོབས་བསྲུང་དཔའ་བོ་སྔོ་ལྗང་སེར། །ཞལ་གསུམ་ཕྱག་དྲུག་སེར་དམར་ལྗང་། །བེ་ཅོན་སྡིགས་མཛུབ་མདུང་ཐོ་བ། །རྡོ་རྗེ་མདའ་གཞུ་ཐོགས་པའོ། །དཔལ་བསྲུང་དཔའ་བོ་དཀར་པོས་ཏེ། །ཞལ་གསུམ་
ཕྱག་དྲུག་སྔོ་དམར་དཀར། །གནམ་ལྕགས་ཁ་ཊྭཱཾ་སྐྱབས་སྦྱིན་སྒྲོམ། །མཉམ་པར་གཞག་པས་ཞི་ཞིང་ཁྲོ། །གཞོན་ནུའི་སྔོན་མོ་སྔོན་སོང་བས། །ལག་ཏུ་རྡོ་རྗེ་དྲིལ་ཐོགས་ཤིང་། །རྐང་པ་རྡོ་རྗེའི་འགྲོས་བསྐོར་བས། །གཞོན་ནུ་རབ་ཏུ་བསྲུང་བར་བྱ། །ལྷ་ལ་སྐྱབས་སུ་འགྲོ་བ་དང་། །གཞན་ལ་ལྟོས་པ་མེད་ཉིད་ཀྱིས། །འོད་ཟེར་རྡོ་
རྗེའི་གུར་ཕུབ་ཅིང་། །ཀ་པཱ་ལ་ཡི་སྦྱོར་བ་བརྩམ། །རང་ཉིད་རྡོ་རྗེ་སྤར་པ་ཡིས། །རྣལ་འབྱོར་གཞོན་ནུ་ཁྲོས་པ་ཡི། །ཏིང་ངེ་འཛིན་ལ་བརྟེན་པ་དང་། །གཞོན་ནུ་དྲན་པའི་རྒྱས་བསྐྱབ་བྱ། །གཞོན་ནུ་བསྲུང་བའི་ཆོ་ག་རྫོགས་སོ།།      །།༄༅། །ཇོ་བོ་ཐུགས་རྗེ་ཆེན་པོ་ནད་ཐམས་ཅད་ལས་རྣམ་པར་རྒྱལ་བ་གཟི་བརྗིད་ཀྱི་རྒྱལ་
པོ་ལ་ཕྱག་འཚལ་ལོ། །འཇིག་རྟེན་གསུམ་དབང་རྣམ་པར་རྒྱལ། །འགྲོ་བའི་ནད་ནི་སྣ་ཚོགས་དང་། །དེ་རྒྱུ་ཉེ་དང་རིང་བ་བསྩལ། །མ་ལུས་ཕ་རོལ་ཕྱིན་ཕྱག་འཚལ། །བློ་ལྡན་བདག་གམ་གཞན་གྱི་དོན། །རྩོལ་བ་ཆེ་ལ་ཞུགས་པ་ན། །དགྲ་དང་གདོན་ཉིད་དང་ལས་དང་། །དེ་བཞིན་རྐྱེན་གཞན་ནད་སྐྱེད་བྱེད། །དེ་
ལ་དཔལ་ལྡན་སྤྱན་རས་གཟིགས། །སྡུག་བསྔལ་ཅན་ལ་ཐུགས་བརྩེ་བས། །སྲུང་དང་སྐྱོབ་དང་སྦེད་རིམ་བཞིན། །སྙིང་དབུས་སྤྱི་བོ་ཕྱག་མཚན་བཤད། །རླུང་མཁྲིས་བད་ཀན་འདུས་པ་ཉིད། །འོག་མའི་རིམས་དྲག་སྣ་ཚོགས་རིགས། །མཛེ་ཅན་དང་ནི་སྐྲན་དམུ་ཆུ། །ཐིབས་ནོན་ལ་སོགས་ཀུན་དེས་སྐྱོབ། །
སྒྲུབ་བ་དང་ལྡན་བྱམས་ཡིད་བརླན། །ཕོ་བྲང་མཆོག་ཏུ་བལྟས་པ་དེ། །ཁྲུས་བྱས་གོས་དཀར་བཟང་གྱོན་ལ། །ཚངས་པའི་གནས་པས་ལེགས་གནས་བྱ། །སྣ་ཚོགས་མཆོད་མཛེས་དཔག་མེད་དང་། །འབྱུང་པོ་རྣམས་ཀྱིས་དོན་གྲུབ་རྫས། །སྟོབས་ཅན་དཀར་དམར་མང་དང་ལྡན། །བདུག་པ་མཆོག་གིས་
བདག་གུས་མཆོད། །ཨོཾ་ཨཱཿཧྲཱིཿསརྦ་བྱཱ་དྷི་པྲ་ཏི་པྲ་ཧ་ན་ཧཱུཾ་ཕཊ་སྭཱ་ཧཱ། བདག་ཉིད་འདབ་སྐྱེས་སྟོང་དབུས་སུ། །ཇི་སྐད་འབྱུང་བའི་རྒྱལ་བ་ཉིད། །འོད་དཔག་མེད་ཀྱི་སྙིང་པོར་བཅས། །དཀར་གསལ་རྣམ་པར་མི་གཡེང་བའོ། །དེ་ནས་དད་པ་དྲག་གདུང་བཅས། །འགྲོ་ལ་བརྩེ་དང་གཞན་ལྟོས་མེད། །གཅིག་

73-1-171a

ཏུ་རྣམ་པར་ངེས་ཡིད་ཀྱིས། །སྐྱབས་གསོལ་མགོན་པོ་སྤྱན་དྲང་བྱ། །དཔག་མེད་སྤྲིན་ཚོགས་མཆོད་པའི་ལྷས། །ལྷ་མཆོག་མདུན་དུ་བདར་ནས་ནི། །རིང་བར་ཐུབ་ཆེན་འཁོར་མང་བཅས། །བརྩེ་ཕྱིར་སྟེང་གི་མཁར་བཞུགས་བལྟ། །མེ་ཏོག་སྤོས་དང་མར་མེ་དྲི་བཟང་རོ་བརྒྱའི་བཟའ་དང་ལྷབ་ལྷུབ་
གོས་མང་རྒྱན་མཆོག་དང་། །པི་ཝང་དུང་དང་རྔ་ཆེན་གླིང་བུ་དབྱངས་སྙན་འཚེར་བ་སྣ་ཚོགས་མཆོད་པའི་ལྷ་མོར་བཅས། །ཇི་ལྟར་སངས་རྒྱས་ཀུན་དུ་བཟང་སོགས་ཇི་སྙེད་མཆོད་མཛད་བདག་གིའང་ཟབ་ཅིང་རྒྱ་ཆེ་སྤྲུལ། །དེ་རྗེས་གཞན་ཡང་བསྟོད་དབྱངས་ཀུན་བརྗོད་མི་བཟད་ཡིད་ཀྱི་ནོངས་པ་མ་ལུས་ཡང་དག་
བཤགས། །དེ་ནས་དད་པ་མང་ལྡན་དང་། །སྐྱེ་དགུ་རྣམས་ལ་སྙིང་བརྩེ་བས། །ཡིད་བཞིན་ནོར་ལ་ཉེར་མཁོ་བཞིན། །སྣ་ཚོགས་ནད་པས་བསྲུང་གསོལ་བྱ། །བདག་གི་ལུས་དང་ལྷག་བསམ་ཉིད། །དྲང་སྲོང་གི་ནི་ཐུགས་རྗེ་དང་། །སྨོན་ལམ་སྟོབས་ཀྱིས་མཛད་པ་ཡི། །བྱིན་རླབས་བདུད་རྩིའི་རྒྱུན་འབབ་གྱུར། །
རྔ་ཡབ་དཀར་བརྒྱ་སེར་བའི་ངད་བསྐྱོད་བརྟན་པར་མི་ནུས་གཡོ་བར་བྱེད། །མཚོ་ཆེན་གཏིང་ཟབ་དྲག་པོ་རྫིས་འཁྲུག་ལྷ་དབང་ཐུགས་ཀྱང་བཙུན་མོས་བཞུ། །ཚ་བསིལ་ཟེར་ཅན་ཉི་ཟླ་འབར་བའང་རྟ་བདུན་རླུང་གཡོས་གནས་གཅིག་མིན། །དེ་བཞིན་ཉིད་ཐུགས་རྙོག་མེད་ཞི་བའང་གདུལ་བྱའི་དོན་མཐོང་
རྣམ་པ་ཀུན་དུ་མི་བཟད་འགྱུར། །དེ་ཚེ་དབང་ཕྱུག་ཐུགས་དཀྱིལ་དུ། །བདག་གི་ལྷ་མོས་བདེ་བསྣུན་པས། །ཐུགས་རྗེའི་ཐུགས་བསྐྱོད་བྱིན་རླབས་རྒྱུན། །བདུད་རྩིའི་རྒྱུན་ལྟར་དཀར་ཕྲེང་དབབ། །གཡས་ཕྱག་མིང་མེད་རྩེ་ནས་སུ། །ཟླ་བ་ཁ་བ་ཀུནྡ་དུང་། །པདྨ་དཀར་མདོག་ལས་ལྷག་པ། །ཡུལ་དུས་རྣམ་
ཀུན་བར་མ་ཆད། །རྒྱུན་བཟང་སྤྱི་གཙུག་རྩ་མཆོག་ནས་བརྒྱུད་ནས། །སྙིང་དཀྱིལ་ལྷ་མཆོག་ཉིད་སྐུ་གང་བྱས་ལ། །ཆེས་ལྷག་ཟེར་ཀུན་ལུས་ཀུན་རྒྱས་གྱུར་དང་། །དེ་ལས་འོད་ཕྱུང་འདོམ་གང་དཀྱིལ་འཁོར་བསྐོར། །གང་ཚེ་གཉིད་ལོག་འདུ་བྱེད་གཡེངས་གྱུར་ན། །གཡོན་ཕྱག་ཉིད་ཀྱི་པདྨོ་བདག་འབྱིན་
ལ། །དེ་དབུས་བདག་བཞུགས་འདབ་སྟོང་ལྡན། །སླར་ཟུམ་སྤྱི་བོའི་ཕྲག་ནས་བདུད་རྩི་བླང་། །དཔལ་སྤྱན་རས་གཟིགས་ཀྱིས་ནད་བསྲུང་བའི་ཆོ་ག་རྫོགས་སོ།།      །།༄༅། །འཕགས་པ་ཐུགས་རྗེ་ཆེན་པོ་ལ་ཕྱག་འཚལ་ལོ། །མ་ལུས་ནད་རྣམས་ཀུན་གྱི་གཞི། །ཆགས་སྡང་གཏི་མུག་ཕྲག་དོག་

73-1-171b

དང་། །སེར་སྣའི་དུག་འཇོམས་སྤྱན་རས་གཟིགས། །བདུད་རྩིའི་བུམ་འཛིན་ལ་ཕྱག་འཚལ། །ནད་མེད་ནད་ཀྱིས་འཇིགས་པ་དང་། །ནད་བཅས་སྡུག་བསྔལ་གྱིས་གཟིར་བ། །དེ་དག་འཕགས་པ་ནད་འཇོམས་ཀྱི། །སྦྱོར་བས་འཇིགས་པ་བསྐྱབ་པར་བྱ། །རིན་ཆེན་སྦྱངས་པའི་སྣོད་དག་པར། །ནམ་མཁའི་ཆུ་ཡིས་གང་
བྱས་པ། །བདེ་གཤེགས་རིང་བསྲེལ་སྙིང་པོ་ཅན། །མདུན་གཞག་ཡིད་ཀྱིས་དཀྱིལ་འཁོར་བསམ། །དེ་ལ་དཀྱིལ་འཁོར་རྣམ་གསུམ་སྟེ། །མ་དག་དག་པར་བྱེད་པ་ནི། །ཟླ་བའི་དཀྱིལ་འཁོར་ལ་གནས་པ། །ནད་འཇོམས་མགོན་པོ་དཀར་མཛེས་སོ། །དེ་ནི་མཚན་མོ་ཟླ་ཤར་དུས། །ཤེལ་མདོག་ཧྲཱིཿཡིག་ལས་སྐྱེས་པ། །བདུད་རྩི་
བུམ་པ་དཀར་བསྣམས་ཤིང་། །ཕྱག་སྟོང་བཅུ་གཅིག་ཞལ་མངའ་བའོ། །དག་པ་དྲི་མེད་འཁོར་ལོ་ལ། །ཉི་མའི་དཀྱིལ་འཁོར་ལ་གནས་པ། །ནད་སེལ་མགོན་པོ་དམར་མཛེས་ཏེ། །ཉིན་མོ་རྟ་བདུན་འཆར་ཚེ་ཡིན། །དྲི་མེད་ཕྱིར་མི་ལྡོག་པ་ཡི། །འཁོར་ལོ་དེ་ནི་ཕྱེད་གསུམ་དུས། །སྣ་ཚོགས་པདྨོ་ལ་གནས་པ། །
ནད་བྲལ་མགོན་པོ་ཨིནྡྲའི་མདོག །བུད་མེད་བྱིས་པ་བདེ་སྟེར་ཏེ། །ཟླ་ཚེས་ཟླ་རྒྱས་ནད་འཇིག་དུས། །ཉི་ཤར་ཉི་ཟེར་ནད་མེད་པ། །དེ་བཞིན་ཕྱེད་གསུམ་ནད་སྤངས་སོ། །དེ་ཕྱིར་མཁས་པ་ནད་མེད་ལུས། །དོན་གཉེར་འདོད་པ་ས་འདི་དག་དུས། །སྟོན་མོ་ཉེ་བའི་སྟོན་མོ་དང་། །དགའ་སྟོན་ཆེན་པོ་སྦྱིན་པར་བྱ། །
གང་ཡང་རྣལ་འབྱོར་ལུས་སྦྱིན་གྱི། །གཏོར་མ་རྒྱ་ཆེན་བྱ་བ་དང་། །མི་འཇིགས་སྦྱིན་པ་ཞེས་བྱ་བའི། །མཆོད་པ་རིམ་བཞིན་བརྩམ་པར་བྱ། །སྤྱན་རས་གཟིགས་ཀྱིས་ནད་བསལ་བའི་ཆོ་ག་རྫོགས་སོ།།      །།༄༅། །འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །མཐུ་ཆེན་གདུག་པ་
ཀླུ་ཡི་ནད། །མྱུར་དུ་བདེ་བླག་གསོ་བྱེད་པ། །སྤྱན་རས་གཟིགས་ཀྱི་བདུད་རྩིའི་རྒྱུན། །སྙིང་རྗེ་ལྡན་པ་རྣམས་ཀྱིས་བསྒྲུབ། །དེ་ལ་མི་གང་ཞིག་སྔོན་གྱི་ལས་ཀྱི་རྣམ་པར་སྨིན་པའམ། གློ་བུར་གྱི་རྐྱེན་གང་གི་སྟོབས་ཀྱིས་ལུས་སམ་སེམས་ལ་ཉེ་བར་གནོད་པའི་མཚན་མ་འགའ་ཞིག་མཐོང་ན་དེའི་སྒྲིབ་པ་བསལ་བར་
བྱ་བའི་དོན་དུ་འཕགས་པ་སྤྱན་རས་གཟིགས་ཀྱི་བདུད་རྩིའི་རྒྱུན་གྱི་ཆོ་ག་འདི་ལ་རབ་ཏུ་བརྩོན་པར་བྱའོ། །བ་དམར་གྱི་འོ་མ་དང་། ཀླུ་ཤིང་གི་ལོ་འབྲས་དང་། དར་སྐུད་དམར་པོ་དང་། མཁལ་མ་དང་། སྙིང་དང་། མཚེར་བ་དང་ཞོ་ཤ་ལ་སོགས་པ་དང་། རྩི་སྨན་སྣ་ཚོགས་དང་། ཀླུ་སྨན་ཐམས་ཅད་དང་། རིན་

73-1-172a

པོ་ཆེ་དམར་པོ་དང་། གདུགས་དང་རྒྱལ་མཚན་ལ་སོགས་པའི་མཆོད་པའི་རྫས་དང་། སྤོས་དང་མེ་ཏོག་ལ་སོགས་པ་དང་། འབྲས་ཡོས་དང་སྣུམ་ཁུར་ལ་སོགས་པ་ཇི་སྙེད་འབྱོར་པའི་ཡོ་བྱད་བཤམ་པར་བྱའོ། །མདོར་ན་ཀླུ་གསོ་བའི་ཆོ་ག་རྣམས་ལས་ཇི་སྙེད་བཤད་པ་ཐམས་ཅད་དོ། །ཀླུ་སྐྱོབ་མགོན་
པོ་དཀར་བཟང་ཞི་བ་ཞལ་མངའ་བ། །སྤྱན་གསུམ་བརྩེ་བའི་མཆེ་བས་རབ་བསྐྱོད་སྨིན་མ་གཡོ། །ལྟོས་འགྲོ་རྒྱལ་པོ་ཕུཿཡིས་འགྲམ་གོང་མགོ་རྒྱན་ཅན། །བ་སྤུ་རེ་རེའང་བདུད་རྩིའི་བུམ་པའི་ཁུར་ཁྱེར་བའོ། །གཡས་ཕྱག་མཆོག་སྦྱིན་ཐལ་མོ་པདྨོ་མཛེས་བཅུག་ཁ་ཕྱེ་གླང་ཆེན་སྣ་འདྲའི་སོར་མོ་བཀྲམ། །མིང་མེད་རྩེ་
ནས་ཀླུ་རྣམས་རབ་དགའ་སྨན་མཆོག་རོ་བརྒྱ་ཕན་མཛད་ཉིད་ཀྱི་ས་བོན་ཅན། །རབ་ཏུ་དང་ཞིང་གཡོ་བའི་འོད་འཛག་དྲི་ངད་ཕྱོགས་བཅུར་ལྡང་བའི་ཐིགས་པ་བདུན་བརྩེགས་འབབ། །ཕྱག་མཐིལ་ཨ་ལས་ཡེ་ཤེས་འོད་འཕྲོས་དབྱངས་དང་གསལ་བྱེད་བདུད་རྩི་ཡིག་འབྲུ་རྣམ་བཅུས་བརྒྱན། །ཨོཾ་ཨཱཿཧྲཱིཿམཾ་ནཱ་ག་
བོ་ཥཱ་ཧཱུཾ་སྭཱ་ཧཱ། ཟླ་བ་ལ་ནི་སྐར་མ་བཞིན། །ཀླུ་སྦྱང་འཁོར་ལོ་དཀར་པོ་འདི། །མེ་ལོང་ནང་གི་གཟུགས་བརྙན་ལྟར། །སྣང་བ་དྲི་མེད་བསྒོམ་པར་བྱ། །བྱམས་པའི་གཞུ་བཀང་སྙིང་རྗེ་ཡི། །མདའ་བཟུང་གསང་སྔགས་བདེ་བསྣུན་པས། །རྫས་རྣམས་དྲི་མ་གཞོམ་པ་དང་། །བྱིན་གྱིས་བརླབ་པ་མཆོག་ཏུ་བྱ། །བདུད་
རྩི་ཐིགས་པ་བདུན་པ་ལས། །པདྨའི་རྩ་བའི་སྐུད་པ་ལྟར། །ཕྲ་ཞིང་གྲིམས་པའི་རྒྱུན་ཕབ་ལ། །མཆོད་རྫས་རྣམ་དག་རྒྱ་མཚོར་བསྐྱེད། །ཕྱག་མཐིལ་ཨ་ལས་ཟེར་སྤྲོས་པས། །གདུག་པ་དེ་དག་སྤྱན་དྲང་ངོ་། །ཨོཾ་ནཱ་ག་ས་པ་རི་ཝཱ་ར་ས་མ་ཡ་ཧཱུཾ་ཛཿཛཿ། རྡོ་རྗེ་བསྡམས་པ་བྱས་ནས་ནི། །མཛུབ་གཉིས་ལྕགས་ཀྱུའི་ཚུལ་
གྱིས་སོ། །མཚོ་ཆེན་རབ་དང་དཔག་མེད་རིན་ཆེན་ཆལ་པར་བཀྲམ་པའི་ནང་། །ཁང་བཟངས་མང་བརྩེགས་ཀླུ་ཚོགས་སྣ་ཚོགས་ཞི་བས་གནས་པ་དང་། །གཏུམ་པའི་ཚུལ་ཅན་ལོངས་སྤྱོད་རྒྱ་ཆེར་འབྱོར་པ་ལ་སོགས་དང་། །དེ་བཞིན་ས་དང་རིར་གནས་རྩེ་ཤིང་རྟེན་སོགས་མ་ལུས་བལྟ། །ཐམས་ཅད་ལྕེ་ལ་ཐུབ་པ་ཡི། །འཁོར་
ལོའི་སྔགས་ལས་འོད་འཕྲོས་པས། །འོད་ཀྱི་སྦུ་གུ་དམ་པ་དག །རེ་རེ་ལས་ཀྱང་སྐར་མདའ་བཞིན། །དེ་ནས་སྦྱིན་པའི་སྔགས་འདི་དག །བརྗོད་པས་བདུད་ཙིའི་རྒྱུན་འཛག་དང་། །བཅས་ཏེ་ཀླུ་རྣམས་ཚིམ་པར་བྱ། །སྙིང་རྗེ་ཆེན་པོ་དམ་ཚིག་ཡིན། །ཨོཾ་ཨཱཿཧྲཱིཿམ་ཧཱ་ཀཱ་རུ་ཎ་ཤྲཱི་ལོ་ཀ་ནཱ་ཐ་སརྦ་ནཱ་གེ་སྟྭ་ཡི་ས་ཏྱཻ་

73-1-172b

མ་ཧཱ་ས་ཏྱཻ་ཨ་དྷིཥྛ་ནཻ་སརྦ་ལོ་ཀཱ་སརྦ་ན་གཱ་དོ་ཥ་པྲ་ཧ་ན་ཧ་ན་ཧ་ན་ཧཱུཾ་ཕཊ། བོ་ཥཱ་པྲ་ཏྱཏ་པོ་ཥ་ཨ་ཏྱནྟ་པྲ་ཏི་པྲ་དྱུཏ་པོ་ཥ་སྭཱ་ཧཱ། ཚད་མེད་བདུད་རྩིའི་ཐིག་ལེ་བཞིས། །ཉེར་བཙས་འཕགས་པ་ཉིད་བཞུགས་པའི། །ཁུ་བའི་ཆུ་རྒྱུན་དག་པས་ཀྱང་། །ཀླུ་རྣམས་ལན་མང་བཀྲུ་བར་བྱ། །བྱད་མ་དག་གིས་རིག་སྔགས་བཞིན། །
དེ་དག་གནོད་པས་སོས་གྱུར་ན། །བདག་གི་གང་གང་གནོད་ཡོད་པ། །དེ་ཡང་རིང་པོར་མི་ཐོགས་འཛད། །འཕགས་པ་སྤྱན་རས་གཟིགས་ཀྱིས་ཀླུ་གསོ་བའི་ཆོ་ག་རྫོགས་སོ།།      །།༄༅། །དཔལ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །སྔོན་ནམ་ཚེ་འདིའམ་གློ་བུར་གྱི། །ལས་
དབང་གིས་ཁེབས་ཀླུ་ཡི་ནད། །རིགས་བཞི་གང་གིས་ཐེབས་གྱུར་པ། །དེ་དག་གསོ་བ་འདིར་བཤད་བྱ། །བྲག་རི་ནགས་ཚལ་ཕུག་གམ་ལྗོངས། །མེ་ཏོག་དཀར་པོས་རབ་བརྒྱན་པར། །ཐུབ་པ་འོད་དཔག་མེད་ཀྱི་སྲས། །ནད་བྲལ་འཇིག་རྟེན་མགོན་པོ་བསྒྲུབ། །གང་ན་ཀླུ་གཉན་ས་བདག་དང་། །ལྷ་དང་ལྷ་
མིན་གྱིས་བསྟོད་པའི། །རྟེན་ལ་མཆོད་པ་བྱས་ནས་ནི། །མཛེ་ཅན་རྣམས་ལ་བཀུར་སྟི་བྱ། །དེ་ནས་ལྷོར་ནི་མངོན་བལྟས་ལ། །བདག་ལུས་འཁོར་ལོ་འབར་བ་ཡིས། །སྤྱི་བོ་སྙིང་གར་མགོན་པོ་ཧཱུཾ། །དཀར་དམར་གསལ་བར་བསྒོམས་ནས་ནི། །འབར་དང་འཛག་དང་དབང་དུ་བྱ། །ལུས་ཅན་གདུག་པ་གདུལ་
བྱའི་ཕྱིར། །དེའི་རྟེན་དཔལ་ལྡན་ཐུགས་རྗེ་གཙོ། །ཀླུ་མགོན་བརྒྱད་ཀྱི་གདེངས་ཀ་ཅན། །དུག་སེལ་བདུད་རྩིའི་རིལ་འཛིན་པ། །སྤྱན་མང་འོད་དཔག་མེད་པས་མཚན། །དེ་ཡི་ཐུགས་རྗེའི་མི་བཟད་ཐུགས། །སྣང་མཐའ་ཡེ་ཤེས་སྙིང་པོའི་བདག །ལུས་ཅན་གདུག་པ་འདུལ་བྱའི་ཕྱིར། །དཔག་མེད་དུག་འཇོམས་
ཏིང་འཛིན་ཞེས། །བྱ་བས་ཧྲཱིཿཡིག་མཉམ་གཞག་པའོ། །ལྷ་འདི་ཀླུ་འདུལ་ཅོད་པན་ཞེས། །མདོ་ལས་རབ་གྲགས་དེ་བཞིན་སེམས། །སྟོབས་མཐུ་དཔལ་དང་བཅས་པ་ཡིས། །ངོ་བོ་ཡི་གེ་རྒྱལ་པོའི་སྙིང་། །ཨོཾ་ཨཱཿཧྲཱིཿསརྦ་བུདྡྷ་གརྦྷ་ཤྲཱི་ལོ་ཀ་ནཱ་ཐམ་མ་ས་ཀ་ལ་བྱཱ་དྷི་པྲ་ཏི་པྲ་ཧ་ན་ཀ་ར་ཀ་ར་ཧཱུཾ་ཧ་ར་ཧ་ར་ཧཱུཾ། བཱ་རཙྪ་
པཱ་རཙྪ། བཱི་བཱི་རཙྪ་བཱི་པཱ་རཙྪ་ཧཱུཾ་ཧཱུཾ་ཕཊ་ཕཊ། སྔགས་འདི་རྟག་ཏུ་བཟླས་ནས་ནི། །བདག་གི་དད་དང་མགོན་པོའི་མཐུས། །ཉིད་ཀྱི་ཐུགས་བསྐུལ་འོད་དཔག་མེད། །དུག་འཇོམས་རྒྱལ་པོ་དུག་སེལ་དང་། །དུག་གསོད་ངེས་པར་འབྱིན་པ་དང་། །དུག་མཐར་མཛད་དང་དུག་མེད་དང་། །དུག་བྲལ་སླར་མི་

73-1-173a

ལྡོག་པ་ཡིས། །འོད་ཟེར་ཕྱུང་བས་སྙིང་དབུས་སྤྲོ། །ཨོཾ་ཨཱཿཧྲཱིཿཧཱུཾ། ཨོཾ་ཨཱཿཧྲཱིཿརཾ་ཧཱུཾ། ཨོཾ་ཨཱཿཧྲཱིཿཁཾ་ཧཱུཾ། ཨོཾ་ཨཱཿཧྲཱིཿཤ་བཾ་ཧཱུཾ། ཨོཾ་ཨཱཿཧྲཱིཿཕཾ་ཧཱུཾ། ཨོཾ་ཨཱཿཧྲཱིཿཔཾ་ཧཱུཾ། ཨོཾ་ཨཱཿཧྲཱིཿབཾཾ་ཧཱུཾ། ཨོཾ་ཨཱཿཧྲཱིཿཏཾ་ཧཱུཾ། ཨོཾ་ཨཱཿཧྲཱིཿམཾ་ཧཱུཾ། མཐར་བྱེད་བདུད་རྩི་འཛག་པ་ཡི། །རྒྱུན་གྱིས་གསོ་དང་བྱམས་པ་ཡི། །
འོད་ཀྱི་བྱུག་པས་སྦྱང་བར་བྱ། །དེ་རྗེས་འགྲོ་བའི་དུག་སྦྱང་ངོ་། །ཡང་ན་མཐོ་རིས་ས་སྟེང་གི། །སྦྱོར་བ་གཉིས་ཀྱིས་གསད་དང་གསོ། །སྦྱང་བའི་ཆོ་ག་རྣམ་པ་གསུམ། །དཔལ་ལྡན་དུག་སེལ་རྒྱུད་ལས་བཤད། །མཛེ་ནད་གསོ་བ་རྫོགས་སོ།།      །།༄༅། །འཕགས་པ་སྤྱན་རས་གཟིགས་གཞན་གྱིས་
མི་ཐུབ་པ་ལ་ཕྱག་འཚལ་ལོ། །པདྨ་རཱ་ག་བྱི་རུ་མེ་ལྟར་ཀུན་ནས་རབ་འབར་འོད་འཕྲོའི་སྐུ། །པདྨོ་ཉི་ཟླ་བགེགས་རྣམས་མགོ་མནན་མི་བཟད་རྔམ་པའི་སྐུ་ཆེན་པོ། །ཞལ་གསུམ་ཕྱག་དྲུག་སྤྱན་སྟོང་མངའ་བའི་རྒྱལ་བ་དཔའ་བོ་འཇིགས་ཤིང་རབ་འཇིགས་བཞད་པ་པོ། །གཡས་དཀར་གཡོན་སྔོ་དབུས་དམར་
དམར་བའི་ཞལ་ལྡན་དེ་བཞིན་རལ་གྲི་མཆོག་དང་དགྲ་སྟ་དང་། །སྡིགས་མཛུབ་དང་ནི་དྲིལ་བུ་ཞགས་བཅས་ཚངས་པའི་མགོ་བསྣམས་སྟག་གི་པགས་པས་སྨད་གཡོགས་པ། །བསྐལ་པའི་མེ་ལྟར་ཡེ་ཤེས་འབར་བའི་རླབས་འཁྲུགས་རབ་ཏུ་འཇིགས་པའི་འུར་སྒྲ་ཅན། །ཁྲག་གིས་ཞལ་བཀང་ང་རོ་
མི་བཟད་སྒྲ་སྒྲོགས་སྦྲུལ་གདུག་ཁྲོས་པས་སྐུ་རབ་བརྒྱན། །དབང་བདག་བརྒྱད་ཅུའི་མགོ་བོ་རློན་པས་དོ་ཤལ་ཕྲེང་ཐོགས་བརྡབས་པའི་གད་རྒྱངས་འབྱིན་པའོ། །ལྷ་འདི་དཔའ་བོ་དཔའ་ཆེན་པོ། །བདུད་ཀྱི་དགྲ་ལས་རྣམ་རྒྱལ་ཞིང་། །གཞན་གྱིས་མི་ཐུབ་མཐུ་བོ་ཆེ། །ཕ་རོལ་དཔུང་རྣམས་འཇོམས་པ་ཡིན། །
སྔགས་པ་གང་ཞིག་ནད་དང་དགྲ། །སྔོན་བསགས་བསོད་ནམས་མ་ཡིན་དང་། །སྣ་ཚོགས་མྱ་ངན་འཇིགས་རྣམས་ལས། །སྒྲོལ་བ་མི་ཕམ་སྦྱོར་བ་འདི། །རྣལ་འབྱོར་བརྩོན་པར་བྱེད་པ་དེས། །ཟླ་བ་དྲུག་ནི་ལོན་པ་དང་། །སྟག་དང་སེང་གེ་གླང་ཆེན་དང་། །མཁའ་ལྡིང་ནོར་བུ་སྒྲོན་མཐོང་འགྱུར། །དེ་ཚེ་སྙིང་དཀྱིལ་པད་དམར་གྱི། །
འདབ་དྲུག་ཡི་གེ་དྲུག་དགོད་བྱ། །ཨོཾ་ཨཱཿཧྲཱིཿཧཱུཾ་ཕཊ་སྭཱ་ཧཱ། དེ་ཡིས་དེ་དབུས་སྙིང་པོ་ཡི། །སྙིང་པོ་ས་བོན་ཧྲཱིཿའཕྲོས་པའོ། །སྔགས་འདི་འཁོར་ལོ་བསྐོར་བ་ཡི། །ཚུལ་གྱིས་ཞག་བདུན་བཟླས་ནས་ནི། །གང་གང་བཟློག་པ་དེ་བསྒྲུབ་པས། །ལས་དེ་ལ་ནི་སྦྱར་བར་བྱ། །ལས་གང་ཡང་དག་གྲུབ་འགྲུབ་པ། །དེ་ཉིད་སྐྱེ་བོ་

73-1-173b

གཞན་ལ་ཡང་། །སྔགས་དང་ཏིང་འཛིན་ཕྱག་རྒྱ་དང་། །ཁྲུས་ཀྱི་ཆོ་ག་སྦྱིན་པ་ཡི། །གློ་བུར་རིང་པོར་མི་ཐོགས་པར། །མ་ལུས་དབང་དུ་འགྱུར་བར་བཤད། །གཞན་ལས་རྣམ་པར་རྒྱལ་བའི་གདམས་ངག་རྫོགས་སོ།།      །།༄༅། །འཕགས་པ་སྤྱན་རས་གཟིགས་དབང་ཕྱུག་ཕ་རོལ་རྣམ་པར་གནོན་པ་ལ་ཕྱག་འཚལ་ལོ། །
རེ་ཞིག་སྒྲུབ་པ་པོ་བརྩོན་འགྲུས་ཅན་ཐེ་ཚོམ་མི་ཟ་བས། དགྲ་དང་གདོན་དང་ནད་ལ་སོགས་པ་ཕ་རོལ་གྱི་འཇིགས་པ་ཐམས་ཅད་བསྲུང་བའི་ཕྱིར། དང་པོ་ཁོ་ནར་བྱང་ཆུབ་ཏུ་སེམས་བརྟན་པར་བྱའོ། །དེ་ནས་སེམས་ཅན་ཐམས་ཅད་ལ། །སྙིང་རྗེ་ཆེན་པོ་མདུན་གཞག་སྟེ། །བསྒྲུབ་པའི་བར་ཆད་བསལ་བའི་ཕྱིར། །སྲུང་
བའི་འཁོར་ལོ་བསྒོམ་པར་བྱ། །རང་ལུས་པདྨོ་འཛིན་ཁྲོས་སྐུ། །རྡོ་རྗེ་སྡིགས་མཛུབ་འཁོར་ལོ་འཛིན། །འབར་བའི་ལྟེ་བ་རྣམ་པར་གནོན། །བརྒྱ་ཕྱེད་རལ་གྲིའི་རྩིབས་འཕོ་བའོ། །མི་ཕམ་སྙིང་པོ་ཧྲཱིཿཡིན་ཏེ། །གཅོད་བྱེད་བརྒྱ་ཕྱེད་ཨ་ཀས་མཚན། །ཡེ་ཤེས་མེ་དཔུང་འབར་བའི་དབུས། །དཔའ་བོ་རྫ་མཁན་འཁོར་ལོ་
བཞིན། །ཕ་རོལ་བྱད་མ་ལ་སོགས་བགེགས། །རྣམ་པར་གནོན་མཛད་ཐུགས་རྗེ་ཆེ། །ཉིད་ཀྱི་ཐུགས་སྐྱོད་ཁྲོས་པ་ཡིས། །ཡེ་ཤེས་སྤྱན་དྲངས་གསང་སྔགས་གསུངས། །ཨོཾ་ཨཱཿཧྲཱིཿཔ་རེ་ཨ་ཛི་ཏ་མ་ཧཱ་ཀཱ་རུ་ཎཱི་ཀ་ཀྲོ་དྷ་ས་མ་ཡ་སྨ་ར་ཧཱུཾ། ཁཌྒེ་སཾ་ཤོ་དྷ་ཡ་མ་ན་སརྦ་པཱ་པཾ་བིགྷྣཱཾ་ས་ཏྲཱུཾ་བྱཱ་དྷི་ཨདྣི་སྥུ་ཊ་སྥོ་ཊ་ཡ་སྥོ་ཊ་ཡ། མཱ་ར་
མཱ་ར། མཱ་ར་ཡ་མཱ་ར་ཡ། ཧ་ར་ཧ་ར། པྲ་ཧ་ར་པྲ་ཧ་ར། སརྦ་པ་རཽ་པྲ་ཏྲཱ་རཀྵ་རཀྵ་ཧཱུཾ་ཕཊ་ཕཊ། བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ལ་འཇུག་པ་བཅོམ་ལྡན་འདས་ཕ་རོལ་རྣམ་པར་གནོན་པའི་དེ་ཁོ་ན་ཉིད་ཏིང་ངེ་འཛིན་བྱེད་པ་དང་མ་བྲལ་བས་གསང་སྔགས་ཀྱི་རྒྱལ་པོ་ཆེན་པོ་བར་མ་ཆད་པར་རྗེས་སུ་
བཟླ་ཞིང་གནོད་པ་ཐམས་ཅད་བསྲེག་པར་བྱའོ། །རིག་པ་འདི་བཟླས་པ་ཙམ་གྱིས་སྔོན་གྱི་དམ་ཚིག་རྗེས་སུ་དྲན་པས་འཕགས་པ་ཉིད་སྙིང་ལ་འཇུག་ཅིང་ཡིད་ལ་སྣང་བའི་རྣམ་པས་བགེགས་ལ་སོགས་པ་ཐམས་ཅད་རྣམ་པར་ཟློག་པར་བྱེད་དོ། །སྒྲིབ་པ་དང་སྡིག་པ་ཐམས་ཅད་ཀྱང་ཡོངས་སུ་གཏོང་བར་བྱེད་དོ། །
ཡ་ང་བ་དང་འཇིགས་པ་གཞན་དག་ཀྱང་རྣམ་པ་ཐམས་ཅད་ཀྱི་ཐམས་ཅད་དུ་མི་འབྱུང་ངོ་། །དེ་ལ་ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་ཐམས་ཅད་ཀྱང་རྟག་ཏུ་དགོངས་པ་མཛད་པར་འགྱུར་རོ། །ཏིང་འཛིན་ལྡན་པས་སྔགས་བཟླས་བརྩོན་འགྲུས་ཅན། །འབར་བའི་རལ་གྲི་མེ་ལྕེས་བཞུས་པའི་ཞུན། །

73-1-174a

དམར་འཁྲུག་རྡོ་རྗེའི་ཚ་ཚ་འཕྲོ་བར་བྱེད། །སྐད་ཅིག་དེ་ལ་དགྲ་རྣམས་ཐལ་བར་འགྱུར། །སྐྱོ་བས་ཐུན་གྱི་མཐའ་ལ་བབ་པ་ན། །སྙིང་རྗེས་ཡིད་བརྟུལ་ང་རྒྱལ་སྤངས་པ་ཡིས། །བརྟན་པའི་དྲན་པས་གཡོ་བ་རྒྱུན་བཅད་ལ། །རྒྱ་ཆེན་ཕྱི་ནང་མཆོད་པས་འཁོར་ལོ་མཆོད། །ཕ་རོལ་གྱི་གནོད་པ་བསྲུང་
བ་རྫོགས་སོ།།      །།༄༅། །བཅོམ་ལྡན་འདས་ཕ་རོལ་གྱི་དཔུང་ལས་རྣམ་པར་རྒྱལ་བ་ལ་ཕྱག་འཚལ་ལོ། །བརྟན་པ་རྣམས་ཀྱིས་ཆོས་ཀྱི་སྲིད། །ཕ་རོལ་འཇིགས་ལས་བསྲུང་བའི་ཕྱིར། །རྡོ་རྗེ་འཇིགས་བྱེད་ཐུགས་རྗེ་ཁྲོས། །གཞན་གྱིས་མི་ཐུབ་ཆོ་ག་བརྗོད། །དེ་ལ་ཕ་རོལ་གྱི་དཔུང་བཟློག་པ་ནི། 
རྣམ་པ་གཉིས་ཏེ། ངེས་པར་རྟོགས་པའི་ཏིང་ངེ་འཛིན་དང་། འཇིགས་པར་བྱེད་པའི་སྦྱོར་བའོ། །འདིར་འཇིགས་པར་བྱེད་པའི་སྦྱོར་བ་ནི། ཐོག་མར་མཚན་མ་གྲུབ་པ་སྔོན་དུ་འགྲོ་བས། རིང་བསྲེལ་གྱི་སྙིང་པོ་ཅན་གྱི་མཆོད་རྟེན་ནམ། ཐུན་མོང་མ་ཡིན་པའི་རབ་ཏུ་གནས་པས་གནས་པར་བྱས་
པའི་རྟེན་གྱི་མདུན་དུ་སོང་སྟེ། རང་བཞིན་མ་ལུས་ཀྱིས་གསོལ་བ་བཏབ་ལ། འདོད་པ་དྲག་པོས་ཐལ་མོ་སྦྱར་ཏེ་ཤིན་ཏུ་རབ་ཏུ་གུས་པས་རེ་བར་བྱའོ། །རྟེན་གང་ཐུགས་དཀྱིལ་ཐུགས་རྗེ་ཁྲོས། །རྡོ་རྗེ་འཇིགས་བྱེད་བཅུ་དྲུག་སོར། །མི་བཟད་རྔམ་ཞིང་རྣམ་འགྱུར་བ། །བསྒོམས་ལ་ཡེ་ཤེས་བསྟིམ་པར་
བྱ། །རང་སྙིང་ཉིད་དབུས་ཧཱུཾ་ངམ་ཧྲཱིཿ །འབར་བ་ཡོངས་གྱུར་རྡོ་རྗེ་བལྟ། །དེ་ཉིད་བརྗོད་པས་འཇིགས་བྱེད་ཉིད། །ཀུན་དུ་མེ་འོད་འཁྲིགས་པའོ། །གཡས་དཀར་གཡོན་དམར་མ་ཧེའི་ཞལ། །དེ་གཡས་འབར་བ་སྔགས་ཕྱག་རྒྱ། །གནམ་ལྕགས་མེ་དཔུང་རླུང་དམར་དང་། །ཉི་མ་དང་ནི་མཁའ་
ལྡིང་ངོ་། །གཡོན་དུ་སྡིགས་མཛུབ་རྡོ་རྗེ་ཞགས། །ཟླ་བ་དང་ནི་དགྲ་སྟའོ། །ཉི་ཤུ་གཅིག་དང་བརྒྱ་རྩ་བརྒྱད། །ཡང་ན་སྟོང་ཕྲག་གཅིག་པར་དུ། །རྡོ་རྗེ་འབར་བ་ཡི་གེ་གཅིག །དཔའ་བོས་རྔམ་པར་རྣམ་པར་བཟླ། །དེ་ནས་ལྷ་ལ་ལུས་བསྟིམས་ལ། །སྐུ་ཆེན་རི་རབ་མཉམ་པ་ཡིས། །ཡི་གེ་གཅིག་བརྗོད་འོད་
ཕྱུང་ལ། །ཕ་རོལ་རྗེས་སྐྱོབ་ཟིལ་མནན་བྱ། །རྐང་པ་གཡས་ནི་བཏེག་ནས་སུ། །ཞགས་པས་དྲངས་ཏེ་མགོ་བོ་བརྫི། །གཡོན་བརྐྱང་ང་རོ་འབར་བ་ཡིས། །གསུས་པ་དྲལ་ནས་རྒྱུ་མ་མནན། །ཕ་རོལ་དམག་དང་གཡུལ་འཁོར་བཅས། །ཕྱག་རྒྱ་ལྔ་ཡི་ལས་རིམ་གྱིས། །ཐལ་བ་ཙམ་དུའང་མ་ལུས་

73-1-174b

དང་། །ཡང་ན་རྡོ་རྗེ་ཞགས་པས་བཅིངས། །ཨོཾ་ཨཱཿཧྲཱིཿཕེཾ་ཕེཾ་ཕེཾ། ཨོཾ་ཨཱཿཧྲཱིཿརཾ་རཾ་རཾ། ཨོཾ་ཨཱཿཧྲཱིཿཛཿཛཿ། ཨོཾ་ཨཱཿཧྲཱིཿཧྲཱིཿཧྲཱིཿཧྲཱཱིཿ། ཨོཾ་ཨཱཿཧྲཱིཿཛཿཛཿཛ། ཕྱག་རྒྱ་འཕང་བའི་སྔགས་སོ། །ཨོཾ་ཨཱཿཧྲཱིཿབཛྲ་བནྡྷ་བནྡྷ་མཱ་ར་ཡ་རྦད། རྡོ་རྗེ་ཞགས་པས་བཅིང་བའི་སྔགས་སོ། །རྡོ་རྗེ་རྩེ་དང་ཐབས་ཆེན་
ཤིང་། །རི་གཟར་རྩྭ་དང་གཙུབ་ཤིང་མེ། །བྱ་རྒོད་ཀྱི་ནི་དང་རུ་གཡས། །ཡུངས་ཀར་ཕྱེ་མ་ཐལ་ཆེན་བསྲེས། །གསང་སྔགས་རྒྱལ་པོ་འབུམ་བཟླས་ལ། །དམག་ཚོགས་མྱོས་པ་འོངས་པ་ཡི། །གདོང་དུ་ཁྲོས་པས་གཏོར་བྱས་ཏེ། །ཕཊ་ཅེས་དྲག་པོས་སྐྲག་པར་བྱའོ། །ཝ་རྣམས་ལ་ནི་སེང་གེ་བཞིན། །
མཐོང་བ་ཙམ་གྱིས་དངང་འབྲོས་པའམ། །རོ་ལངས་ལ་ནི་གསང་སྔགས་བཞིན། །རེངས་འགྱུར་གཡོ་བའང་མི་འཐོབ་པོ། །ཇི་སྟེ་སྤོགས་པའི་ཆོ་ག་ནི། །མྱོས་བྱེད་རྫས་བདུན་སྦྱར་བ་དང་། །འཇིགས་བྱེད་ཆེན་པོ་སྐུ་ཕྱར་ལ། །བདུག་པ་ལྔ་བསྲེགས་རྔ་ཆེན་བརྡུང་། །དཔལ་ལྡན་རྡོ་རྗེ་འཇིགས་དཔལ་
ཆེ། །རབ་ཏུ་གསད་པའི་རྟོག་པ་ལས། །ལེགས་ཕུང་ཕ་རོལ་དཔུང་བཟློག་པ། །སྙིགས་དུས་བསྟན་པ་བསྲུང་བ་ཡིན། །ཕ་རོལ་གྱི་སྡེ་གཞོམ་པ་རྫོགས་སོ།།      །།༄༅། །འཕགས་པ་ཐུགས་རྗེ་ཆེན་པོ་དང་ལྡན་པ་ལ་ཕྱག་འཚལ་ལོ། །ཤིན་ཏུ་སྙིང་རྗེས་ནོན་པའི་ཡིད། །ལུས་ཅན་མྱ་ངན་འདས་པ་ལས། །
བསམ་པ་ཐག་པས་མགྲོན་གཉེར་བ། །དེ་ཡིས་ཕ་རོལ་བསྡུ་བར་བཤད། །ནམ་ལངས་མུན་པས་སླེབ་པ་དང་། །གཉིད་དུ་ཉེ་བས་སད་པའི་དུས། །དགའ་དང་གདུང་བ་སྐྱེས་པ་ནི། །དེ་ནི་ཆོ་ག་སྤྱན་རས་གཟིགས། །བདག་གི་ལུས་གང་ལྷ་ཡིན་ཏེ། །ངག་ནི་ཡི་གེ་བཞི་ཉིད་དོ། །རྣམ་པར་ཏོག་དང་མི་རྟོག་
སེམས། །སྙིང་རྗེ་ཆེ་དང་སྟོང་པ་ཉིད། །མིག་གཉིས་ཉི་མ་འབར་བ་དང་། །ལྕེ་སྟེང་ཨཱ་ཀཱའི་ཕྲེང་བས་བརྒྱན། །ལྟེ་བ་མེ་ཐབ་འཁྱིལ་པའི་དབུས། །དཔལ་ལྡན་འདོད་པའི་ལྷ་མོའོ། །མི་གང་དབང་དུ་བྱ་བ་དེའི། །སྨིན་ཕྲག་གཉིས་དང་ལྟེ་བའི་དབུས། །དགའ་དང་དད་དང་གདུང་བ་ཉིད། །ཐིག་ལེ་པདྨོ་ཨ་ཡི་
གཟུགས། །བྱམས་པ་ཡི་ནི་ཨ་ཡི་རྒྱུན། །བདག་གི་སྤྲུལ་པ་ལ་སྐྱེས་རེག །རབ་ཏུ་མི་བཟད་སྙིང་རྗེ་ཅན། །དགའ་བའི་ལྟ་བས་རྣམ་པར་བཞུ། །བཏང་སྙོམས་ཚད་མེད་བློ་གྲོས་ཆེ། །ཡི་གེ་ལྔ་བརྗོད་པདྨོ་འབྱེད། །ཨོཾ་ཨཱཿཧྲཱིཿཛཿཧཱུཾ། འབུམ་ཕྲག་ལྔར་བ་མ་ཡེངས་དང་། །ལྷག་བསམ་བར་ཆད་སྤངས་བསྙེན་

73-1-175a

བསྒྲུབ། །བདེ་གཤེགས་རིང་བསྲེལ་སྐུ་ཁྲུས་སོགས། །བརྩེ་ལྡན་རྣམས་ཀྱིས་སྔགས་ཆུར་བཅས། །མེ་ཏོག་དམར་ཁུས་གདོང་བཀྲུས་ལ། །ལྕེ་དཀྱིལ་སྦྲང་རྩི་ལྡན་སྔགས་བརྗོད། །ཨོཾ་ཨཱཿཧྲཱིཿཤྲཱི་ལོ་ཀ་ནཱ་ཐ་མ་ཧཱ་ཀཱ་རུ་ཎི་ཀ་ཧོ། ས་མ་ཡ་ཧཾ། ཆེ་གེ་མོ་ཙིཏྟ་མ་ཧཱ་པཱ་ར་དྷ་ཙ་ལ་ཙ་ལ་པྲ་ཙ་ལ་པྲ་ལ་ཛཿ
ཛཿཛཿ། བློ་གྲོས་བཟང་པོ་སྙིང་རྗེས་མྱོས་གྱུར་པ། །སྐྱེ་བོ་འདི་དག་ཐབས་གང་ཕྲིན་ལས་ཀྱིས། །བདེ་བར་རུང་ན་བདག་ཅིར་འགྱུར་བློའོ་ཞེས། །ཉིན་མཚན་རྟག་ཏུ་ཡིད་བྱེད་མི་འབྲལ་ན། །རྣལ་འབྱོར་རྒྱལ་པོ་བརྟག་པ་འདིས། །ཞག་གསུམ་དྲུག་གམ་དགུ་ཉིད་ན། །ལྕགས་ཀྱུས་བཞུས་པའི་ཡལ་
ག་ལྟར། །གདོན་མི་ཟ་བར་དེ་དབང་འགྱུར། །ཕ་རོལ་དབང་དུ་བྱ་བ་རྫོགས་སོ།།      །།༄༅། །འཕགས་པ་སྤྱན་རས་གཟིགས་ཕ་རོལ་རྣམ་པར་གནོན་པ་ལ་ཕྱག་འཚལ་ལོ། །གླང་ཆེན་ལྤགས་བསྣམས་བཅུ་དྲུག་ཕྱེད་ཕྱེད་གདོང་པ་ཅན། །རྡོ་རྗེ་རལ་གྲི་འཁོར་ལོ་མདའ་ཐོགས་དེ་བཞིན་
གཡོན། །དྲིལ་བུ་སྡིགས་མཛུབ་ཁ་ཊྭཱཾ་གཞུ་འཛིན་རྔམ་པའི་སྐུ། །གཏུམ་ཆེན་ཞབས་བརྒྱད་བགེགས་བརྒྱད་མགོ་མནན་རྒྱལ་གྱུར་ཅིག །འཇིག་རྟེན་ཐམས་ཅད་བསྲུང་བའི་ཕྱིར། །ཕ་རོལ་རྣམ་གནོན་མཐིང་ག་དྲག །གདུག་པ་ཀུན་གྱིས་སྐུ་བརྒྱན་པ། །མེ་དཔུང་རབ་འབར་དཔའ་བོ་བསྒོམས། །
སྙིང་རྗེ་ཁྲོས་པས་སྐུ་བསྒྱུར་ལ། །དུས་གསུམ་སངས་རྒྱས་ཅོད་པན་འཆང་། །རུས་པའི་གདུགས་ཕུབ་འབྲུག་སྒྲ་སྒྲོགས། །འཁོར་གཉིས་ཀྱིས་ནི་ལས་བྱེད་པའོ། །ཨོཾ་ཨཱཿཧྲཱིཿམ་ཧཱ་ཀཱ་རུ་ཎི་ཀ་ཙཎྜ་མ་ཧཱ་རོ་ཥ་ཎི་བྷ་ཡ་ཧ་ར་ཎེ་རཀྵ་བ་ར་ཎཾ་གུ་པ་ཏི་པ་རེ་བི་ཛེ་སྭཱ་ཧཱ། གཅན་གཟན་དྲག་པོ་རྣམས་ཀྱི་མཆེ་བ་དང་
སྡེར་མོའི་རྩེ་མོ་ལ་ནི་རྒོད་དང་རྒྱལ་པོའི་ཁྲག་གམ་སོན་མོའི་ཆུས་བྱུགས་ལ་རིག་པ་བརྒྱ་བཟླས་ལ་དཔུང་པར་བཅིང་ངོ་། །འཇིགས་སྐྱོབ་ཁྲོ་བོ་དྲག་ཤུལ་ཆེ། །མདུན་ནས་འགྲོ་ཞིང་ཆོམ་རྐུན་གསོད། །དགའ་བྱེད་དྲག་པོ་ཕག་ཁྲིད་པ། །ཕྱི་བཞིན་རྗེས་འབྲང་མི་འཇིགས་སྦྱིན། །ཇི་སྲིད་ཡ་ངའི་ལམ་བསྐྱབ་
ནས། །སྤྱོད་ཡུལ་ཕྱིན་པར་གྱུར་པ་ན། །གཉིས་འདུས་མགོན་པོ་རྒྱན་མེད་ཞི། །སྐུ་གཟུགས་རྣམ་པས་མཆོད་པས་མཉེས། །སྣ་ཚོགས་འཇིགས་པས་ཡ་ང་ཉམ་ཐག་དང་། །གང་ཡང་ཕ་རོལ་དྲེགས་པས་བཏུལ་བྱས་ནས། །གོ་འཕང་མཆོག་འདིར་དངོས་གྲུབ་སྦྱིན་འདོད་པ། །རྒྱལ་རས་བཟང་ལ་

73-1-175b

གྲོགས་མཆོག་འདིར་འགྱུར་རོ། །ཁྲོ་དང་ང་རྒྱལ་མང་བ་དང་། །སྲེད་པས་ཟང་ཟིང་དོན་གཉེར་བ། །ད་ནི་གུས་པར་གྱུར་ན་ཡང་། །ཆོ་ག་འདི་ལས་རིང་བར་བྱེད། །ཆོམ་རྐུན་བཅིང་བ་རྫོགས་སོ།།      །།༄༅། །བདེ་བར་གཤེགས་པ་པདྨོ་ཅན་ལ་ཕྱག་འཚལ་ལོ། །དེ་ལ་རྡོ་རྗེ་འཛིན་པ་གང་ཞིག་སློབ་མ་
ཕན་གདགས་འདོད་པས་བློ་དང་ལྡན་པའི་གང་ཟག་དོན་དུ་གཉེར་བ་དང་བཅས་པ་གང་གློ་བུར་དུ་ལྷགས་པའམ་གཉུག་མར་གནས་པ་ཡིན་ཀྱང་རུང་སྟེ། དུལ་བས་མདུན་དུ་བདར་བར་གྱུར་པ་དེ་དག་ལ། འཕགས་པ་སྤྱན་རས་གཟིགས་པདྨོ་དམ་པ་ཅན་གྱི་བྱིན་གྱི་རླབས་ཀྱིས་སྙིང་གི་པདྨོ་ཁ་ཕྱེ་བས་
ཤེས་རབ་གསལ་པོ་བསྐྱེད་པའི་ཆོ་ག་འདི་དྲན་པར་བྱ་བ་ཡིན་ནོ། །སྐལ་ལྡན་སྐྱེ་བོ་ལྷགས་པ་ན། །དེར་ནི་དེ་མ་ཐག་ཏུ་དེ། །པཾ་བརྗོད་པས་ནི་པདྨར་བསྐྱེད། །དེ་ཡི་སྙིང་ཡང་དེ་བཞིན་ནོ། །དེ་ལ་སྙིང་གི་པདྨོ་ནི། །འདབ་བརྒྱད་དཀར་པོ་ཟླུམ་པོས་ཏེ། །དབུས་སུ་ཧྲཱིཿཡིག་གིས་མཚན་པ། །སྤྱི་བོར་ཐིག་ལེ་
སུམ་བརྩེགས་པའོ། །དཀར་དམར་བདུད་རྩི་ནམ་མཁའི་མདོག །རིམ་བཞིན་རབ་ཏུ་དང་བར་བསམ། །སྨིན་མཚམས་ནས་ཟུག་སྙིང་གི་དཀྱིལ། །རྩ་མཆོག་སྦུ་གུ་དཀར་ཟངས་སོ། །མཁས་པ་རྡོ་རྗེ་འཛིན་རྒྱལ་བདག །བྱམས་སོགས་ཚད་མེད་ལས་སྐྱེས་པའི། །ཐུབ་དབང་ཤེས་རབ་འོད་ཟེར་
འཆང་། །སྤྱན་རས་གཟིགས་སུ་མྱུར་བར་བསྐྱེད། །སྤྱན་གསུམ་འཚམ་པའི་མདངས་དཀར་ལྡན། །རྣམ་དག་འོད་བཟངས་དཀྱིལ་འཁོར་ཅན། །བཙུན་མོ་གཉིས་ཀྱིས་སྐུ་བརྟེན་ཅིང་། །རྔ་ཡབ་དཀར་གཡོབ་དགྱེས་བཞུགས་པའོ། །དེ་རྗེས་གཞན་ལ་ཕན་བརྩོན་པའི། །ཡིད་ཀྱིས་དེ་ཡི་དོན་བསྒྲུབ་
ཕྱིར། རྣམ་གུས་པ་ཡི་སྦྱོར་བ་ཡིས། །བདག་གི་དགོས་པ་ལྷ་མཆོག་རེག །དེ་བས་དེ་ལ་གསོལ་བཏབ་པས། །སྤྱན་དྲངས་བདག་ཉིད་ལ་བསྟིམ་བྱ། །དེ་ནས་ཕྱག་གཡས་ཆོས་འཆད་ཀྱི། །མཐིལ་སྐྱེས་མ་ལས་ཡོངས་གྱུར་པ། །ཉི་མ་རྡོ་རྗེ་སྙིང་པོ་ཅན། །དབྱངས་དང་གསལ་བྱེད་ཀྱིས་བརྒྱན་བསམ། །
ཧྲཱིཿབཅས་སྔགས་ཕྲེང་གཉིས་བརྗོད་པས། །ཉི་འོད་ཚ་ཞིང་རབ་རྣོ་ཡི། །ཟེར་འཕྲོས་པས་ནི་པདྨོ་དབྱེ། །ཧྲཱིཿལས་དེ་བཞིན་ཐིག་ལེའོ། །དེ་ལས་ཐོག་མར་དཀར་ཐིག་ལེ། །ཕ་ཡི་ས་བོན་ཞུ་བར་བཤད། །དམར་པོ་མ་ཡི་ས་བོན་ཏེ། །དེ་བཞིན་མཁའ་འདྲ་ཀུན་གཞིར་བཞེད། །དེ་མཐར་ཞུ་བའི་ཐིག་ལེའི་

73-1-176a

རྒྱུན། །དབྱེར་མེད་ཕན་ཚུན་རྣམ་འདྲེན་པ། །བདེ་ཆེན་འོད་གསལ་རྣམ་མི་རྟོག །བློ་གྲོས་པདྨོ་རབ་རྒྱས་གསུངས། །ཆོ་གའི་རྒྱལ་པོ་དམ་པ་འདི། །གང་གང་སྐལ་བར་ལྡན་པའི་མཐུས། །བརྩེ་ལྡན་གུས་པས་སྔོན་སོང་བ། །དེ་ཡི་ཐོས་སོགས་རྣམ་དག་འཕེལ། །སློབ་མ་ལ་ཤེས་རབ་
བསྐྱེད་པ་རྫོགས་སོ།།      །།༄༅། །བཅོམ་ལྡན་འདས་སྤྱན་རས་གཟིགས་མགོན་པོ་ལ་ཕྱག་འཚལ་ལོ། །དཔལ་ལྡན་འོད་ཟེར་གཟི་བརྗིད་འབར་བའི་རྒྱལ་པོ་སེར་སྤྲིན་རབ་མཐུག་སྲེག་པར་མཛད། །ཡིག་གཉིས་གདུག་པའི་སྟོབས་འཇོམས་ང་རོ་མི་བཟད་ནམ་མཁའི་ངོས་ལ་གད་རྒྱངས་
སྒྲོགས། །ཞལ་གསུམ་ཕྱག་དྲུག་དཀར་དམར་མཐིང་ག་ཨིནྡྲའི་མདོག་ལྡན་རྡོ་རྗེ་མདའ་གཞུ་ཐལ་མོ་བརྡེབས། །མེ་དཔུང་སྡིགས་མཛུབ་རལ་གྲིའི་གཤོག་བསྣམས་དབང་པོའི་རྒྱལ་པོ་སྤྱན་རས་གཟིགས་དབང་ལ་ཕྱག་འཚལ། །དེ་ནས་སེར་བ་བཟློག་པ་བཤད་པར་བྱ་སྟེ། ལྷ་དང་ཀླུ་ལ་སོགས་
པ་ཁྲོས་པ་དང་། འབྱུང་བ་ཉིད་ཀྱི་དབང་ངམ། གྲོང་ཁྱེར་པ་རྣམས་ཀྱི་དོན་མ་ཡིན་པའི་ལས་ཀྱི་སྟོབས་ལས་ཀྱང་རུང་སྟེ། དུས་དང་དུས་མ་ཡིན་པའི་གནོད་པ་ནི་འདི་ལྟ་སྟེ། དུ་བའི་མདོག་དང་། རྒྱ་མཚོ་རླུང་གིས་བསྐྱོད་པའི་རླབས་ལྟ་བུའི་སྤྲིན་གྱི་ཕུང་པོ་འཁྲིགས་ཤིང་། འབྲུག་གི་སྒྲ་ཀུན་དུ་མི་བཟད་
པས་ཀླད་པ་འགེམས་པ་ལྟ་བུ་དང་། གནམ་ལྕགས་དང་སེར་བ་དྲག་པོ་འབབ་པའི་ལྟས་ངན་མངོན་དུ་གྱུར་པ་ན། བྱང་ཆུབ་སེམས་དཔའ་གྲོང་ཁྱེར་པ་རྣམས་དང་། སྐྱེ་བོ་མང་པོ་ལ་སྙིང་བརྩེ་བས་གདུང་བའི་ཡིད་ཅན། བདག་གི་དོན་བཏང་ནས་གཞན་གྱི་ཉེ་བར་མཁོ་བ་ལ་ལྷག་པར་ཆགས་པས་ཟིལ་
གྱིས་མནན་པ་དག །འབྱུང་པོ་དཔག་ཏུ་མེད་པ་ལ་ཕན་པ་དང་བདེ་བའི་ཕྱིར། འཕགས་པ་སྤྱན་རས་གཟིགས་དབང་ཕྱུག་དྲག་པོ་ཆེན་པོ་འོད་ཟེར་འབར་བའི་གཟི་བརྗིད་ཀྱི་རྒྱལ་པོ་ལྟས་ངན་པ་ཐམས་ཅད་རྣམ་པར་འཇིག་པར་མཛད་པའི་རིགས་ཀྱི་རྒྱལ་པོ་འདི་ཡང་དག་པར་དྲན་པར་བྱའོ། །དེ་ཞལ་གཡས་
དཀར་ལྷ་བསྲུང་བ། །གཡོན་པ་དམར་པོ་མི་ཡི་རྗེ། །དབུས་གནས་མཐིང་ག་ཀླུ་འདུལ་གྲགས། །སྤྱན་གསུམ་མཆེ་གཙིགས་ཁྲོས་པའོ། །གཡས་གཡོན་དང་པོ་མདའ་གཞུའི་ཕྱག །གཉིས་པ་གཉིས་ནི་ཐལ་མོ་བརྡེབས། །གསུམ་པའི་ཕྱག་ན་མེ་དཔུང་སྟེ། །གཡོན་པ་སྡིགས་མཛུབ་བསྒྲེང་

73-1-176b

བ་ཉིད། །སྒྲོན་ཤིང་དུད་མདོག་སྐུ་ཆེན་འགྱིང་། །རལ་གྲིའི་གཤོག་བརྒྱངས་སྤུ་འཐུལ་པ། །ཤིན་ཏུ་ཟ་བྱེད་རྔམ་པ་ཆེ། །འཇིགས་པའི་ཞབས་བགྲད་འཇིགས་པའོ། །ཐུགས་ཀ་ལྟེ་བར་པད་ཉིར་ནི། །ཧཱུཾ་ཕཊ་སྔོ་དང་དམར་བ་ཡི། །ཡི་གེ་གཉིས་བསམ་སྔགས་ཀྱིས་བསྐོར། །དེ་གསང་སྔགས་ཀྱི་རྒྱལ་པོ་འདི། །
ཨོཾ་ཧྲཱིཿཨཱརྱཱ་བ་ལོ་ཀི་ཏེ་ཤྭ་རཱ་ཡ་ཨ་ཏི་ཀྲོ་དྷ་མ་ཧཱ་ཛ་ལ་སརྦ་ཏུ་ས་ར་ཧ་ར་ཧ་ར། ད་ཧ་ད་ཧ། ཤཱིགྷྲཾ་ལུ་དྷི་མཱ་ར་ཡ་ཕཊ། ཐལ་མོ་གཡས་ལ་ཕ་དཀར་དང་། །གཡོན་ལ་ཊ་ནག་བཀོད་ནས་ནི། །བརྡབས་པས་མེ་ལྕེ་འབར་བ་ཡིས། །དཔའ་བོས་སེར་བ་རྣམ་པར་བཟློག །མིག་གཉིས་ཉི་མའི་དཀྱིལ་འཁོར་དང་། །སྨིན་མ་
ཁྲོ་གཉེར་གློག་རྒྱུན་དང་། །ཤངས་ལས་མེ་སྟག་ཞལ་ལས་ཀྱང་། །ལྕེ་འབར་ཕུཿཡིས་བཏབ་པས་ཀྱང་། །དེ་ལས་རང་ཉིད་འདོད་ཐག་གྲུ། །མཁས་པས་ཡིད་ཀྱིས་མཚམས་བཅད་དེ། །སྤྲིན་ཚོགས་འོ་མ་ཅན་གྱི་ཁྲི། །བསྣོལ་བས་ཆུ་གཞག་གིས་བྱུག་བྱ། །གང་ཚེ་དུས་ལ་བབ་གྱུར་པ། །དེ་ཚེ་
རྔམ་པའི་སྟང་སྟབས་ཀྱིས། །རྔམ་པར་བྱས་ལ་མེ་དཔུང་འབར། །བསྐལ་པའི་མེ་ལྟར་མཁའ་གཡོགས་འགྱུར། །སྔགས་ཕྲེང་གསུམ་མམ་བདུན་ནམ་དགུ། །ཡང་ན་ཉི་ཤུ་རྩ་གཅིག་བརྗོད། །སྐད་ཅིག་དེ་ལ་རྡོ་རྗེ་ཡི། །ཕ་བོང་ཉིད་ཀྱང་ཞུ་བར་འགྱུར། །དཔལ་སྤྱན་རས་གཟིགས་ཁྲོས་པས་སེར་བ་
བཟློག་པའི་ཆོ་ག་རྫོགས་སོ།།      །།༄༅། །འཕགས་པ་ཐུགས་རྗེ་ཆེན་པོ་དང་ལྡན་པ་ལ་ཕྱག་འཚལ་ལོ། །གསུམ་ལ་སྐྱབས་སོང་སེམས་བསྐྱེད་ལྡན། །འགྲོ་ལ་ཕན་འདོད་བདག་དུལ་བའི། །སྐྱེས་བུ་དམ་པ་བསམ་གཏན་གྱི། །ཁང་བུར་ཞུགས་ལ་རྨི་ལམ་བསྒོམ། །བཙུན་པ་སྤྱན་རས་
གཟིགས་ཀྱི་སྐུ། །བཙོ་མ་གསེར་གྱི་མདོག་ལྡན་པ། །ཞལ་གཅིག་ཕྱག་བཞི་གཡས་དང་པོ། །འཇིགས་སྐྱོབ་དེ་བཞིན་གཡོན་དུ་ནི། །པདྨ་དམར་པོ་གཉིས་པ་གཉིས། །ཏིང་འཛིན་མཆོག་གི་ཕྱག་རྒྱའོ། །ཐུགས་ཀྱི་པདྨོ་ཁ་ཟུམ་པའི། །དབུས་སུ་སེམས་དངོས་ཧྲཱིཿབསམ་བྱ། །འདི་འདྲའི་འཕགས་པ་
ཉིད་དུ་བདག །སྐད་ཅིག་ཙམ་གྱིས་བསྒོམས་ནས་ནི། །དགེ་དང་བརྩེ་དང་དད་པ་ཡིས། །རྣལ་འབྱོར་རྒྱལ་པོ་གཉིད་ལོག་བྱ། །གང་ཚེ་གཉིད་དུ་ཉེ་བ་ན། །ཧྲཱིཿཡང་ཐིག་ལེ་གཉིས་ལ་བསྡུ། །རིམ་གྱིས་ཐིག་ལེ་འོག་མ་ཡང་། །དེ་བཞིན་ཐིག་ལེ་གོང་མ་ལའོ། །དེ་ནས་སྣ་ཚོགས་སྣང་བ་ཀུན། །རང་གི་

73-1-177a

ལུས་ལ་བསྡུས་ནས་དེ། །པད་དབུས་ཐིག་ལེ་ཉག་གཅིག་ལ། །ཆུ་ལ་ཆུ་བཞག་དེ་བཞིན་བཞག །སེམས་ནི་དྲི་མེད་ཟུང་འཇུག་བདག །དངོས་མེད་དངོས་བྲལ་རྣམ་པར་དག །འོད་གསལ་ཆེན་པོ་ཉིད་ལ་ཉིད། །མངོན་སུམ་མི་གཡོ་བརྟན་པར་བཟུང་། །ཚུལ་འདི་རང་བཞིན་མཁའ་འདྲ་སྟེ། །
རྣམ་པ་ཐིག་ལེ་བདེ་བ་ཆེ། །ངོ་བོ་ཀུན་དུ་མ་འགགས་པའོ། །སྦྱངས་སྡོམ་ཅན་གྱི་ཆོས་གཅིག་བཞེད། །དེ་ལྟར་རྒྱུ་འདྲ་ཆོས་ཀུན་རང་བཞིན་རང་བཞིན་མེད། །གཞན་ལ་མི་རག་བདག་ཉིད་སྙིང་དཀྱིལ་བརྟན་པར་གནས། །རྒྱལ་བ་རྣམས་ཀྱི་གཤེགས་ཤུལ་གཅིག་ཡིན་མ་ནོར་བ། །བསྒོམས་ན་དེ་རྗེས་རྨི་
ལམ་ཉིད་དུའང་དེ་མཐོང་འགྱུར། །གལ་ཏེ་སྒྲིབ་ཚོགས་བུད་ཤིང་ཚང་ཚིང་གིས་བསྒྲིབས་པས། །ཡང་དག་ཇི་བཞིན་དེ་ཚེ་མངོན་དུ་མ་གྱུར་ནའང་། །རྣལ་འབྱོར་རྒྱལ་པོས་རེ་བ་ཆད་པར་མི་བྱ་སྟེ། །གོམས་པ་མ་ཟད་གཅིག་ཏུ་བརྩོན་འགྲུས་གཡེལ་མི་བྱ། །མདུན་གྱི་མཁའ་ལ་སངས་རྒྱས་བྱང་ཆུབ་སེམས་
དཔའ་དང་། །ཉན་ཐོས་རང་རྒྱལ་ལྷ་ཡི་ཚོགས་ཀྱིས་ཡོངས་བསྐོར་བའི། །རྒྱལ་བའི་དཀྱིལ་འཁོར་སྤྲིན་གྱི་ཕུང་པོ་ལྟར་མཐོང་འགྱུར། །དེ་ཚེ་དེ་ནས་རིང་པོ་མི་ཐོགས་འོད་གསལ་འཐོབ། །རྣམ་དག་འཁོར་ལོ་པདྨོ་འདམ་ནས་སྐྱེས་པ་བཞིན། །གཉིད་ཀྱིས་མྱོས་འགྱུར་མ་རིག་གིས་བསླད་བློ་གྲོས་
འདི། །རང་གིས་རང་དབེན་མཁའ་ལ་ཉི་ལྟར་སྤྲོས་བྲལ་དུ། །རྩོལ་བྲལ་མེད་ཉིད་རང་དབང་མངོན་སུམ་འཆར་བར་བྱེད། །རྨི་ལམ་སྐྱེས་བུས་རྨི་ལམ་གྱི། །གྲོང་དུ་དགའ་དང་མྱ་ངན་ལ། །བཟུང་བ་རློམ་སེམས་ཙམ་ཡིན་པ། །དེ་ཚེ་དེ་ཡིས་ཤེས་པར་འགྱུར། །མེ་ལོང་གཟུགས་བརྙན་གསལ་བ་ཡིས། །
ཡོད་དང་མེད་དང་གཉིས་ཀ་དང་། །གཉིས་ཀ་མ་ཡིན་བརྗོད་མིན་པ། །དེ་ཚེ་ཡིད་ཆེས་མཐོང་བར་འགྱུར། །ནམ་མཁའི་ངོས་ལ་དབང་པོའི་གཞུ། །དེ་བཞིན་སེར་སྤྲིན་འབྲུག་སྒྲ་ཅན། །ཐོག་མཐར་སྐྱེ་དང་འགགས་མི་དམིགས། །འོད་གསལ་ལ་གནས་སྐྱེས་བུས་ཤེས། །ཇི་ལྟར་སྨིག་རྒྱུའི་ཆུ་འབབ་པ། །
ཤར་སོགས་ཕྱོགས་ནི་གང་ཞིག་ནས། །མ་འོངས་གར་ཡང་མི་འགྲོ་བ། །རྨི་ལམ་མཐོང་བ་དེ་ཡིས་ཤེས། །དྲིལ་བུ་དང་ནི་པི་ཝང་སྒྲ། །བྲག་ཅ་ལ་སོགས་འདུ་བྱེད་ནི། །རྣམ་པར་ཐར་པ་གསུམ་གྱིས་བསྒོས། །ཟབ་མོ་རྣམ་པར་དབེན་པ་ཡང་། །སྣང་བ་མུན་པ་ཐིབས་པོ་དང་། །འོད་གསལ་བྱེ་བྲག་

73-1-177b

མེད་འགྱུར་བ། །ཤིན་ཏུ་སྦྱངས་པའི་གསེར་བཞིན་དུ། །དྲི་བྲལ་རྣམ་པར་དག་པ་རྨད། །ཇི་སྲིད་འཛིན་པ་མང་པོ་ལ། །ཟད་དང་མི་སྐྱེ་བསྲེ་བ་ཡིས། །རོ་གཅིག་ཉིད་དུ་སྦྱོར་ཤེས་པ། །རྨི་ལམ་ལས་གཞན་རྣལ་འབྱོར་མིན། །དེ་ནི་སད་པ་ཉིད་ན་ཡང་། །ཡིད་ཀྱི་དབང་པོ་ཚིམ་པ་དང་། །འདོད་པའི་
སྲེད་པ་ལས་བློ་ཟློག །ཆོས་འདི་བརྗོད་པ་ཙམ་རྟོགས་སོ། །དེ་ལྟར་གཟུང་དང་འཛིན་པ་ཡི། །དྲི་མ་དྲི་མ་བྲལ་བ་དང་། །བྲལ་བ་རང་བཞིན་མེད་པ་ཡང་། །ཡིད་ཀྱིས་མངོན་པར་འདུ་མི་བྱེད། །འཕགས་པའི་མིག་ཅེས་བཤད་པ་སྟེ། །སྤྱན་རས་གཟིགས་ཀྱི་མཐུ་ཡིས་སོ། །རྨི་ལམ་དྲི་མ་མེད་པ་བསྒོམ་པ་
རྫོགས་སོ།།      །།༄༅། །འཕགས་པ་སྤྱན་རས་གཟིགས་དབང་ཕྱུག་སློབ་མ་ལ་ཕན་པར་མཛད་པ་ལ་ཕྱག་འཚལ་ལོ། །མཁས་གང་དཔའ་བོ་རྡོ་རྗེ་འཛིན། །འཛིན་པའི་རི་བོ་བརྟན་འཇིག་བྱེད། །བླ་མ་མཆོག་གི་དྲིན་ཐོབ་པས། །སློབ་མ་ལ་ཕན་བྱིན་རླབས་གྱུར། །ཕྱི་དང་ནང་དང་གསང་བ་ཡི། །
མཆོད་རྫས་མ་ལུས་ཀུན་བཤམས་ལ། །ཞི་བའི་ཡིད་ཀྱིས་སྐྱིལ་ཀྲུང་བྱ། །བདེ་ཆེན་དཀྱིལ་འཁོར་བློས་བལྟའོ། །བདག་གི་གཙུག་ཏོར་ནས་བརྒྱུད་པའི། །སྐྱོབ་པ་རྡོ་རྗེ་འཛིན་པའི་ཕྲེང་། །ཡེ་ཤེས་ས་བོན་ཧཱུཾ་ཡིག་གི། །མཚན་མ་རྡོ་རྗེ་སྦུ་གུའི་རྒྱུན། །སྨིན་མཚམས་ནས་འཕྲོས་སློབ་མ་ཡི། །དྷཱུ་ཏཱིའི་རིན་ཆེན་ཕོ་
བྲང་དུ། །ཞུགས་གྱུར་དེ་སྙིང་པདྨོའི་བར། །བར་ཆད་མེད་འབྲེལ་བརྟན་པས་བསྒོམ། །དེ་ནས་བླ་མའི་མན་ངག་གིས། །ཡེ་ཤེས་དབབ་པའི་སྦྱོར་བ་བྱ། །བྱང་ཆུབ་སེམས་ཁེངས་ཡེ་ཤེས་ཀྱི། །མེ་ལྕེ་དལ་བུས་སྦར་བར་བྱ། །བབས་པར་གྱུར་ན་ལུས་གཅིག་ངེས། །སྔོན་ཆད་མ་མྱང་རོ་མྱང་མེད། །སྤུ་
གཡོ་བ་ཡིས་འདྲེན་པ་གསུངས། །བདུག་པ་མཆོག་གིས་བདུག་བྱ་ཞིང་། །སྒྲ་ཆེན་གླུ་དབྱངས་རོལ་མོ་ཡིས། །དཔའ་བོའི་གར་བྱ་བརྟུལ་ཞུགས་ཅན། །རྩེ་གཅིག་མཉམ་པར་གཞག་པས་མཆོད། །དེ་རྗེས་རྒྱ་མཚོ་དང་བ་ལ། །རི་རབ་སྟོན་ཀའི་མཁའ་འདྲ་དང་། །ཉི་ཤར་ཟླ་ཚེས་སྐར་མདའ་ཡི། །རིམ་
ཅན་ཉམས་མྱོང་སྐྱེ་བར་བྱེད། །ཏིང་འཛིན་མཆོག་གིས་བཏུལ་བྱས་པས། །གླང་ཆེན་ལྕགས་ཀྱུས་དུལ་བ་ལྟར། །ཞི་གྱུར་སེམས་རབ་དང་བ་ལ། །སེམས་ཀྱི་གཟུགས་བརྙན་མཐོང་བར་འགྱུར། །དེ་ལ་སྙིང་པོའི་ཆོས་རྣམ་བཞི། །སྟོང་པའི་མཚན་ཉིད་སེམས་གནས་ལུགས། །དེ་ཡི་སྣང་བ་གློ་བུར་བ། །

73-1-178a

དབྱེར་མེད་མཚན་མེད་རྣལ་འབྱོར་རོ། །སོར་བཞག་དེ་ཡི་མཚན་ཉིད་གསུམ། །རབ་ཏུ་གསལ་ཞིང་རྣམ་མི་རྟོག །བདེ་ཆེན་བློ་སྒྲ་དཔེ་བྲལ་བ། །བསམ་གཏན་ཕྱག་རྒྱ་ལ་བརྟེན་བསྒོམ། །ངོས་བཟུང་བ་ནི་བལྟ་བ་དང་། །བསྲེ་དང་མཉམ་པར་གཞག་པའོ། །སྒོ་གསུམ་རིམ་དང་རིམ་མིན་པས། །དྲན་
རྟོགས་གློ་བུར་ཉིད་རྟོག་འགྱུར། །ཇི་ལྟར་གང་ཞིག་གང་དུ་གང་། །དྲན་རྣམས་དགའ་གདུང་དེར་ཤར་བ། །དེ་ཉིད་དེ་ལྟར་དེ་དེར་མེད། །འདི་ནི་གཉིས་མེད་མཚན་ཉིད་དོ། །འགྲོ་འོང་གནས་དང་མི་གནས་དང་། །སྐྱེ་དང་འགག་དང་རྟེན་བྲལ་སོགས། །རྗེས་སུ་འགྲོགས་དང་གཞིག་པ་ཡི། །གདམས་ངག་
གིས་ནི་མཚན་མེད་འགྱུར། །ཨེ་ཨཱཿབཛྲ་གུ་རུ་སརྦ་ཛྙཱ་ན་ཊཱ་ཀི་ནཱི་མ་མ་ཀཱ་ཡ་ཝཱཀ་ཙིཏྟ་མ་ཧཱ་སུ་ཁ་ཛྙཱ་ན་ཛྭཱ་ལ་ཛྭཱ་ལ་སྥ་ར་སྥ་ར་ས་ཕེཾ་ཕེཾ། ཡེ་ཤེས་དབབ་པའི་སྔགས་སོ། །རྡོ་རྗེ་དྲིལ་བུ་མེ་ལོང་ཐོད། །སྦྱིན་པ་རྡོ་རྗེ་མཁའ་འགྲོ་ཡི། །བརྟུལ་ཞུགས་སྔོན་དུ་སོང་བ་ཡི། །ཚིལ་ཆེན་མར་མེ་སྦར་བར་བྱ། །ཨོཾ་ཨཱཿབཛྲ་
བཛྲ་མ་ཧཱ་བཛྲ་བཛྲ་ཛྭ་ལ་ཧཱུཾ་ཧཱུཾ་ཧཱུཾ་ཨོཾ་ཨ་གཎྜ་གཎྜ་མ་ཧཱ་གཎྜ་ཛྭ་ལ་ཨཱཿཨཱཿཨཱཿཨོཾ་ཨ་དརྦ་ན་མ་ཧཱ་དརྦ་ན་ཛྭ་ལ། ཧྲཱིཿཧྲཱིཿཧྲཱིཿཨ་ཨ་ཀ་པཱ་ལ་ཀ་པཱ་ལ་མ་ཧཱ་ཀ་པཱ་ལ་ཛྭ་ལ་ཧོ་ཧོ་ཧོ། བྱིན་གྱིས་བརླབས་ནས་སྦྱིན་པའི་སྔགས་སོ། །མཐར་ནི་སྤྱན་རས་གཟིགས་དབང་གི། །བསྲུང་བས་བསྲུང་བ་བྱ་བ་ནི། །ཐུགས་རྗེ་ཁྲོས་
པས་མརྒད་ཀྱི། །བདེ་ཆེན་འཁོར་ལོ་ཞེས་པས་བཤད། །སློབ་མ་བྱིན་གྱིས་བརླབ་པའི་མན་ངག་རྫོགས་སོ།།      །།༄༅། །འཕགས་པ་ཐུགས་རྗེ་ཆེན་པོ་ཡེ་ཤེས་འབེབས་པ་ལ་ཕྱག་འཚལ་ལོ། །ཨེ་མའོ། མགོན་པོ་མི་རྟོག་བདེ་ཆེན་སྟེར་མཛད་སྐུ། །དུས་གསུམ་རྒྱལ་བའི་རྡོ་རྗེ་འཛིན་བཅས་བརྒྱུད་
དང་བལྟས། །སྤྱི་བོ་ནས་བརྩིགས་ཡེ་ཤེས་ཕྲེང་བ་དང་། །གཞུ་ཉིད་པད་ཟླས་ཡེ་ཤེས་འཁོར་ལོ་འབར་བར་འགྱུར། །ཤིན་ཏུ་གུས་བཅས་གཏོང་བ་ཆེ། །བཟོད་ལྡན་ཐེ་ཚོམ་མེད་རྟོག་བྲལ། །གཡེང་བ་སྤངས་ཤིང་དབང་པོ་དུལ། །སློབ་མ་དེ་ནི་རྗེས་སུ་བཟུང་། །སྣ་ཚོགས་པདྨ་གེ་སར་ལྡན། །ཟེའུ་འབྲུ་རྡོ་རྗེ་
མེ་ཕྲེང་གིས། །ལེགས་སྤྲས་བྱིན་གྱིས་བརླབས་པའི་དབུས། །སྐལ་ལྡན་བཞག་ལ་བགེགས་བསྐྲད་བྱ། །ཨོཾ་ཨཱ་བིགྷྣཱནྟ་ཀྲྀཏ་ཧཱུཾ་ཕཊ། བདུག་པ་མཆོག་གིས་རབ་བདུག་ཅིང་། །མེ་ཏོག་དམར་པོ་གཅལ་བཀྲམ་ལ། །མར་མེ་འབར་བ་དུ་མ་ཡིས། །ཀུན་ནས་ཁོར་ཡུག་བསྐོར་བར་བྱ། །བདག་

73-1-178b

ཉིད་ལྷག་པའི་ལྷའི་ང་རྒྱལ་དུ་བྱས་ལ། རྡོ་རྗེ་ལ་ནི་ཡཾ་རླུང་གི་ཤུགས་ཅན་ནོ། །དེ་ནི་རྒྱལ་བ་རྣམས་ཀྱི་རང་བཞིན་ནོ། །གཙུག་ཏོར་དུ་ཧཾ་ཐིག་ལེའི་སྙིང་པོ་ཅན་ནོ། །དེ་ནི་འཇིག་རྟེན་མགོན་པོའི་རང་བཞིན་ནོ། །སྟེང་ན་འཛག་པས་ནི་མི་འགྲིབ་བོ། །སྨིན་མཚམས་ནས་གྲི་འཕྲོས་པས་ནི་སློབ་མ་ལ་འབབ་པར་
འགྱུར་རོ། །སློབ་མའི་འོག་ཏུ་ནི་རླུང་གི་དཀྱིལ་འཁོར་རོ། །དེ་ནི་སྦྱོར་བ་འོག་མས་བསྐྱོད་པར་བྱེད་དོ། །སྤྲུལ་པ་ནི་ཡང་ལྷ་མོ་ཉིད་དོ། །དེ་ནི་སྦྱོར་བ་བར་མས་སྦྱོར་བར་བྱེད་དོ། །སྙིང་གར་ནི་ཡང་བདེ་གཤེགས་སྙིང་པོ་ཉིད་དོ། །དེ་ནི་སྦྱོར་བ་གོང་མས་འབེབས་པར་བྱེད་དོ། །སྤྱི་བོར་ནི་ཡང་མགོན་པོའོ། །
དེ་ནི་སྦྱོར་བ་ཐོག་མས་འབེབས་པར་བྱེད་དོ། །མ་ཕེབས་ན་སྤོགས་པའི་ཆོ་ག་ནི། རྡོ་རྗེ་སྣ་བུག་གི་སྦྱོར་བས་སོ། །ཤིན་ཏུ་སྤོགས་པ་ནི་རྡོ་རྗེ་སྤྱི་གཙུག་གི་སྦྱོར་བས་སོ། །བབས་པར་གྱུར་ན་སྤུ་འགྲེང་ཞིང་། །གདོང་བསྒྱུར་འོད་གསལ་པ་ཉིད་དང་། །བརྗོད་པར་མི་ནུས་ཡང་ན་གཙོ། །མི་རྟོག་བདེ་བས་མྱོས་
པར་འགྱུར། །ཡེ་ཤེས་གཞུག་པའི་ཆོ་ག་རྫོགས་སོ།།      །།༄༅། །འཕགས་པ་སྤྱན་རས་གཟིགས་སྐུ་གསུང་ཐུགས་ཡོན་ཏན་ཕྲིན་ལས་ལྷུན་གྱིས་གྲུབ་པ་ལ་ཕྱག་འཚལ་ལོ། །དང་པོར་རེ་ཞིག་བྱང་ཆུབ་སེམས་དཔའི་བློ་གྲོས་སྦྱངས་པ་དག །ཆོས་ཐམས་ཅད་ངོ་བོ་ཉིད་མེད་པ་དང་། བདག་
གིར་འཛིན་པས་ཆགས་པ་སྡུག་བསྔལ་བ་དང་། ཕོངས་པ་རྣམས་ཀྱིས་འགྱུར་བ་མཐོང་བས་མི་བཟད་པ་སྐྱེས་ནས། ཐོག་མར་གང་ཡང་རུང་བའི་རྣལ་འབྱོར་འཇུག་པ་ན་བདག་གི་ལྟོས་པ་རིང་དུ་སྤངས་ནས་སྙིང་རྗེ་ཆེན་པོས་གཞན་གྱིས་མ་བསྐུལ་བར་བདག་འཇུག་པར་ཏིང་ངེ་འཛིན་གྱིས་བྱིན་གྱིས་བརླབ་
པར་བྱའོ། །བརྟན་པའི་གནས་དང་གཡོ་བ་ལུས་དང་ངག་དང་ཡིད། །རྣམ་ཀུན་ཉེར་སྤྱོད་གཞལ་མེད་ཁང་བཟངས་རྡོ་རྗེའི་སྐུ། །གསང་སྔགས་དམ་ཚིག་ང་རོ་བཅུ་དྲུག་མཐར་གནས་དང་། །ཕ་རོལ་ཕྱིན་བཅུ་ལྷ་ཡི་སྦྱོར་བ་རྣམ་དག་བསྒོམ། །འདི་ན་གང་དག་དོན་མིན་སྤྱོད། །སྨད་པའི་གནས་ལ་བློ་རབ་
ཆགས། །ལྡོངས་པས་སྡིག་པ་མང་ལྡན་པ། །དེ་དག་རང་བཞིན་ཞི་བའོ། །ཆོས་གང་ལ་ནི་རྣམ་པར་ཤེས། །དེ་ཤེས་ཉིད་ནི་ཕ་རོལ་འགྲོ། །འདི་ལྟར་གང་ལ་དོན་གསལ་འཐོབ། །སིམ་འགྱུར་འོད་གསལ་བདེ་ཆེན་བསྲུངས། །ཨེ་མའོ་འགྲོ་བ་ཡང་དག་སྤྱོད། །གང་སྤྱོད་དེ་ཡིན་གཞན་མི་འགྱུར། །གནས་

73-1-179a

མིན་གནས་སོགས་གང་བརྟགས་པ། །ནམ་ཡང་སྐྱེ་སོགས་མི་དམིགས་པའོ། །འོན་ཀྱང་ལོག་པས་ཅིག་ཤོས་སུ། །བསྒྲིབས་ནས་དྲི་མར་ཁྲིད་པ་ཡང་། །བདག་གི་ལས་གསུམ་ཡན་ལག་ལྔས། །དག་བཅས་ལྷག་མར་མི་བྱའོ། །སྤྱན་རས་གཟིགས་མགོན་ཉིད་དམ་བཅས། །སྤྱད་པ་སྤྱོད་
པའི་རིམ་ཇི་བཞིན། །སངས་རྒྱས་སྲས་པོ་བརྩེ་ཆེན་ཡང་། །ཕ་རོལ་ལྟོས་པ་མི་འཆིའོ། །འདི་ནི་ཇི་ལྟར་བདག་ཉིད་དང་། །སྡུག་བསྔལ་མངོན་འདོད་མི་འདོད་པ། །དེ་བཞིན་ལུས་ཅན་ཐམས་ཅད་ཀྱང་། །མཚུངས་ན་བདག་གཅིག་བདེ་བ་བརྩོན། །ཡོན་ཏན་ཕྲིན་ལས་ཐམས་ཅད་ལ། །རྒྱས་བཏབ་རྒྱལ་
སྲས་འབད་པར་བྱའོ། །གང་ཞིག་ཕན་བཏགས་དྲིན་ཤེས་པ། །དེ་ཡང་ཀུན་གྱིས་བསྔགས་འོས་ན། །མ་བཅོལ་རང་དགའ་བྱིན་རློབ་པའི། །བདག་ཉིད་ཆེན་པོ་ཅིས་མི་བསྔགས། །ཏིང་ངེ་འཛིན་གྱི་བྱིན་རླབས་རྫོགས་སོ།།      །།༄༅། །དཔལ་འཇིག་རྟེན་དབང་ཕྱུག་འཁོར་ལོས་སྒྱུར་བ་ལ་ཕྱག་
འཚལ་ལོ། །གང་ཞིག་དཔལ་ལྡན་བདུད་བཞིའི་དགྲ་བཅོམ་བྱང་ཆུབ་མཆོག་དབང་ཉིད་བརྙེས་ནས། །ཐུགས་རྗེས་མི་བསྙེལ་ལུས་ཅན་གཞན་ཡང་ཞི་བ་བླ་མེད་ལམ་བཟང་དུ། །སྨིན་མཛད་དབང་སྩོལ་ས་གསུམ་བདག་པོ་སྤྱན་རས་གཟིགས་དབང་ལ་བཏུད་དེ། །སྐལ་ལྡན་ཏིང་འཇིན་ཡེ་ཤེས་
སེམས་སྐྱོད་རྣམ་དག་དབང་བསྐུར་ཆོ་ག་བཤད། །ཡིད་འོང་གནས་སུ་བདེ་བ་ཡི། །རྐྱེན་སོགས་དམ་ཚིག་ཀུན་ལྡན་པས། །སྙིང་རྗེ་ཆེན་པོ་མདུན་གཞག་ལ། །གུས་པས་སྔོན་དུ་གསོལ་གདབ་བོ། །འདོམ་གང་སྲིད་འཕགས་ནམ་མཁར་ནི། །ཐུབ་པ་ཆེན་པོ་འཁོར་ལོས་སྒྱུར། །བདེ་ཆེན་ཡུམ་དང་ལྷན་
ཅིག་སྐྱེས། །དཔག་མེད་སྲས་བཅས་བསྒོམ་པར་བྱ། །སྣ་ཚོགས་དངོས་ཀུན་མཆོད་པའི་སྤྲིན། །ཀུན་དུ་བཟང་སྤྱོད་ཇི་བཞིན་དུ། །མཆོད་བྱས་སྡིག་པ་བསལ་ནས་སུ། །རྣམ་དག་དབང་བསྐུར་དེ་རྗེས་ནོད། །ལྷ་དང་བདག་ལུས་གནས་གསུམ་དུ། །རྡོ་རྗེ་འབྲུ་གསུམ་མངོན་བསམས་ལ། །དད་དང་ཐུགས་རྗེ་དམ་ཚིག་
གིས། །ཁ་དོག་རིམ་གསུམ་འོད་ཟེར་དབྱུང་། །སྐུ་མཆོག་སྙིང་པོ་ཨོཾ་ལས་འོད་ཟེར་དཀར་པོ་དང་། །གསུང་རྒྱུན་དྲི་མེད་ཨཱཿལས་དེ་བཞིན་དམར་པོའི་འོད། །རྣམ་དག་ཐུགས་བདག་ཧཱུཾ་ལས་རྣམ་འཕྲོས་རབ་སྔོ་ཟེར། །བདག་ལུས་ངག་ཡིད་གནས་གསུམ་ལ་རེག་དྲི་གསུམ་སེལ། །དེ་རྗེས་བདུད་རྩི་དཀར་དམར་སྔོ། །

73-1-179b

དག་བྱེད་རྣམ་གསུམ་མན་ངག་བཞིན། །དེ་འོག་ཡེ་ཤེས་རྣམ་གསུམ་གཞུག །མཐར་ནི་གཉིས་མེད་བཞི་པའོ། །ཐིག་ལེ་གསུམ་རྒྱུན་སྦྱོར་བ་ནི། །དེ་རྗེས་བློ་གྲོས་ཆེན་པོས་བསྒོམ། །དབང་བསྐུར་ནས་ནི་གཤེགས་སུ་གསོལ། །ཏིང་ངེ་འཛིན་གྱི་དབང་བསྐུར་རྫོགས་སོ།།      །།༄༅། །འཕགས་པ་
པདྨའི་ཕྱག་ལ་ཕྱག་འཚལ་ལོ། །གང་གི་སྙིང་ལ་རྡོ་རྗེ་འཛིན་པའི་ཐུགས་རྗེའི་གཞུས་བསྐྱོད་བྱིན་རླབས་ཀྱི། །མདའ་རྩེ་རྣོས་བསྣུན་ཡུད་ཙམ་གང་ལ་ནག་པོའི་ཕྱོགས་ཀྱི་རྩ་ལག་དང་། །བདུད་ཀྱི་བུ་མོ་གཡོ་བའི་མིག་གིས་རྣམ་ཀུན་བལྟ་བར་མི་ནུས་པའི། །དཔལ་གང་བདེ་ཆེན་རབ་ཏུ་འབར་བྱེད་འཁྲུལ་འཁོར་
རྒྱལ་པོ་ལ་ཕྱག་འཚལ། །དེ་ནས་འཕགས་པ་ཐུགས་རྗེ་ཆེ། །ཡེ་ཤེས་འཁྲུལ་འཁོར་འབར་བ་ཞེས། །བྱ་བ་རང་ལུས་རྩ་མཆོག་གི། །བུ་ག་ཐོག་མར་བསམ་པར་བྱ། །རབ་དམར་རྡོ་རྗེ་རྣོན་པོའི་འོད། །ཁྲོ་ཞིང་ཧ་ཧར་བཞད་པའི་ཉམས། །ཐུགས་ཀ་ལས་བརྒྱུད་ཡེ་ཤེས་མེས། །ཞལ་བཀང་བདག་དོན་
བརྩོན་པ་པོ། །ལྕགས་ཀྱུ་པདྨོ་གཡས་དང་གཡོན། །བརྟུལ་ཞུགས་དྲག་པོ་རྩལ་འགྱེད་པ། །གཞན་གྱིས་མི་ཐུབ་སྟོབས་པོ་ཆེ། །ཚོན་གང་བར་ནི་བསྒོམ་པར་བྱ། །ལྟེ་བར་ཡེ་ཤེས་སྦར་བའི་རླུང་། །རྩིབས་བརྒྱད་གཤོག་པ་རྣོ་ལྡན་དང་། །དེ་དབུས་རི་ཡིག་གིས་མཚན་བཅས། །དྷཱུ་ཏཱི་ཡངས་པའི་རྐང་
ཟུག་པའོ། །དེ་དབུས་ནས་ཞུགས་ཡེ་ཤེས་རླུང་། །རབ་ཏུ་རྡོ་རྗེའི་རྐང་སོགས་ཅན། །སྙིང་དཀྱིལ་པདྨོ་འདབ་བརྒྱད་རྩ། །བསྡུས་ཤིང་གྲིམས་པར་བཟུང་བ་ཡིན། །དེ་ལྟེ་བདེ་གཤེགས་སྙིང་པོ་ཡི། །ས་བོན་ཡི་གེ་ཧཱུཾ་དཀར་འཁྲིགས། །བལྟས་ཏེ་དགང་བའི་རྣལ་འབྱོར་བརྩམ། །སྤྲུལ་པའི་
གནས་ཀྱི་འཁོར་ལོ་ནི། །རྩོལ་བའི་རླུང་ཤུགས་འདིས་བསྐྱོད་པས། །མགལ་མེ་བསྐོར་བ་ཇི་བཞིན་དུ། །སྒྲ་གྲག་འོད་ཟེར་འཁྲུག་པ་ཡི། །མི་བཟད་རབ་ཏུ་འཁོར་བར་འགྱུར། །དེ་ཕྱིར་ཡེ་ཤེས་ཤུགས་ལས་ཀྱང་། །མེ་ལྕེ་གཡོ་བ་དེ་བཞིན་དུ། །དེ་འབར་སྲོག་ཤིང་རླུང་གིས་ཀྱང་། །ཐོག་མེད་སྲོག་
གཡོ་སྙིང་གར་འགྱུར། །དེ་ཚེ་ཕེཾ་སྒྲ་དང་བཅས་པས། །སྟེང་ནས་ལྷ་ཡི་བདུད་རྩི་དབབ། །བདེ་ཆེན་རབ་ཏུ་གསལ་བའི་དངོས། །འབར་བ་རབ་འབར་ཆེར་འབར་འགྱུར། །གང་ཚེ་ཡེ་ཤེས་བཏུང་བ་ཡི། །ཆང་གིས་མྱོས་པར་མི་འགྱུར་བ། །དེ་ཚེ་རང་དབང་མེད་པར་ནི། །ལུས་སེམས་སྤྲོ་བས་ནོན་པར་

73-1-180a

འགྱུར། །དཔལ་ཡེ་ཤེས་འབར་བའི་འཁྲུལ་འཁོར་རྫོགས་སོ།།      །།༄༅། །ཐུགས་རྗེ་ཆེན་པོ་ཚེ་རབས་དབང་དུ་གྱུར་པ་ལ་ཕྱག་འཚལ་ལོ། །དལ་བ་འདིས་ལམ་དབང་དུ་མ་གྱུར་པའི་སྒྲུབ་པ་པོ་རྣམས་ཀྱིས་བཅོམ་ལྡན་འདས་ཚེ་རབས་དབང་དུ་གྱུར་པའི་བརྟགས་པ་
བསྒོམ་པར་བྱ་སྟེ། ཇི་ལྟར་སྤྱོད་པའི་གནས་ཉིད་དུ། །འཇིག་རྟེན་ཕ་རོལ་དྲན་བྱས་ནས། །ཇི་སྐད་བཤད་པའི་མན་ངག་གིས། །དབང་གྱུར་འཕགས་པ་མཉེས་པར་བྱ། །དལ་བ་རིང་དུ་མི་གནས་དང་། །རྒྱུ་དང་འབྲས་བུས་རྗེས་འབྲེལ་ལ། །སོམ་ཉི་སྤངས་ནས་སྲིད་པ་ལས། །ཡིད་བྱུང་ཞི་ལ་དགའ་བ་
བསྐྱེད། །བདག་གིས་ཡོངས་སུ་གཟུང་བ་གང་། །ཇི་ཙམ་ཆགས་པས་རྗེས་བསྲུངས་པ། །དེ་དག་དེ་ཙམ་སྐྱོ་བ་ཡིས། །མཆོད་སྦྱིན་བྱས་ཏེ་གཅིག་པུར་གནས། །ཞིང་འདིར་གདུག་པ་དྲག་པོ་དང་། །མི་གཡོ་ལ་སོགས་འདུན་པ་ཆེ། །ལྟོས་བྲལ་ལྷག་པར་མོས་བཅས་པ། །རྣལ་འབྱོར་རྒྱལ་པོ་ངེས་པར་བྱ། །
དེའི་འོག་ཏུ་བདག་ཉིད་ཀྱི་སྙིང་པོ་གསུམ་ལྷའི་མཚན་མ་གསུམ་དུ་བསྒྱུར་ཏེ། ཐ་མལ་ལུས་ལས་འདས་ནས་ཏིང་ངེ་འཛིན་སེམས་དཔའི་མངོན་པར་འདུ་བྱེད་པས་བཅོམ་ལྡན་འདས་ཚེ་རབས་དབང་དུ་གྱུར་པའི་གཟུགས་ཀྱི་འདུ་བྱས་པ་ལ་ཞུགས་ཏེ་བླ་མ་དང་ལྷ་རྗེས་སུ་དྲན་པ་དང་མ་བྲལ་བ་བཞིན་དུ་རིག་
པ་མཆོག་གི་སྔགས་འདི་བརྗོད་པར་བྱའོ། །ཨོཾ་ཨཱཿཧྲཱིཿམ་མ་པ་ར་ཛཱརྨྨ་རཀྵ་བ་ར་ཎེ་གུབྷི་བིརྱ་བྱ་མ་ཧེ་སྭཱ་ཧཱ། ཨོཾ་ཨཱཿཧྲཱིཿསརྦ་དུཥྚཱ་ན་མ་མ་ཀྲྀ་ཏེ་ཛཾ་བྷ་ཡ། སྟཾ་བྷ་ཡ། མོ་ཧ་ཡ། བནྡྷ་ཡ། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་སྭཱ་ཧཱ། ཨོཾ་ཨཱཿཧྲཱིཿམ་ཧཱ་ཀཱ་རུ་ཎི་ཀཱ་ཡ། མ་མ་པ་ར་ཛཱརྨྨ་ཛཱརྨྨ་ཏ་ར་སརྦ་པྲ་སྠེ་བེ་རཱཀྵ་བ་ར་ཎཾ་
གུབྷི་སྨ་ར་སྨ་ར་པྲ་ཏི་ཛྙཱ་མ་ཧཱ་ས་མ་ཡ་སུ་སྨ་ར་སྭཱ་ཧཱ། བརྩོན་པའི་ཆ་ལུགས་གནས་ཞབས་གཉིས། །གང་དུ་འདོད་པའི་ཞིང་དེར་བསྐྱོད། །ཆུ་སྐྱེས་ལ་སོགས་སྡོང་བུའམ། །རིན་ཆེན་ཕོ་བྲང་མཆོག་བདག་འཇུག །རྨི་ལམ་རྨིས་པས་བར་ཆོད་པ། །དོ་མོད་མཚན་མོའི་བར་སྐབས་འབྲས། །མཁས་
པས་དོགས་པ་མེད་བྱས་ཏེ། །ལྷ་བསྙེན་ཇི་ལྟར་འདོད་བཞིན་སྐྱེ། །སྐྱེ་བོ་ཀུན་གྱི་མངལ་སྒོར་ནི། །སྙིང་རྗེ་ཆེན་པོ་སྤངས་པའི་རྟེན། །ས་བོན་སྡིག་པ་བསམས་ནས་ནི། །རྟག་ཏུ་འཇིགས་པས་གོམས་པར་བྱ། །དཔལ་ལྡན་ཤར་སོགས་ཡོངས་དག་ཞིང་། །མངོན་དགའ་དྲག་པོས་རྟག་གོམས་པ། །

73-1-180b

སྨོན་ལམ་ལྷན་ཅིག་དྲང་སྲོང་མཐུས། །སྐར་མདའ་ལྟ་བུར་ཐོགས་པ་མེད། །སྐྱེ་བ་བསྡམས་པའི་ཆོ་ག་རྫོགས་སོ།།      །།༄༅། །འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །སྒྲུབ་པོ་གང་ཞིག་འཆི་བ་དང་། །འཆི་བ་མ་ཡིན་ལྟས་གང་དག །གང་ཚེ་མངོན་དུ་གྱུར་པ་ན། །མགོན་
པོའི་སླུ་བ་འདིར་བཤད་དོ། །འཇིག་རྟེན་གཡེང་བ་མ་ལུས་ལས། །རྣམ་དབེན་དལ་བ་བསྒྲུབས་ནས་ནི། །མཆོག་གསུམ་སྐྱབས་འགྲོ་ནས་བརྩམས་ཏེ། །ཅི་རིགས་ཆོས་སྤྱོད་བརྩམ་པར་བྱ། །ལོངས་སྤྱོད་བཤེས་དང་ལུས་ཉིད་དང་། །བྱང་ཆུབ་ཕྱོགས་ཀྱི་མངོན་པར་ཞེན། །རྣམ་བཅུ་རྣམ་གསུམ་
སྤངས་ནས་ནི། །ལྟོས་པ་ཐམས་ཅད་རྣམ་པར་དོར། །མི་རྟག་སྡུག་བསྔལ་བདག་མེད་དང་། །སྟོང་པ་ཉིད་ཀྱི་རྣམ་ཐར་གྱིས། །འཁོར་བའི་གནས་ལ་ཡིད་ཕྱུང་ཞིང་། །མྱ་ངན་འདས་ལ་མངོན་པར་དགའ། །དེ་ནས་བསྐྱེད་པའི་རིམ་པའི་རྣལ་འབྱོར་ལ་བརྩོན་པར་བྱ་སྟེ། ཁ་ལྷོ་ཕྱོགས་སུ་བལྟས་
ལ། འཕགས་པ་སྤྱན་རས་གཟིགས་དབང་ཕྱུག་ཡིད་ལ་བྱེད་པ་དང་མ་བྲལ་བས་མིག་མི་འཛུམས་པར་མདུན་གྱི་ནམ་མཁའ་ལ་རྒྱལ་བ་ལྷ་ཉི་ཤུ་རྩ་ལྔའི་དཀྱིལ་འཁོར་མངོན་པར་གསལ་བར་བྱའོ། །གལ་ཏེ་སྤྲོས་པར་ནུས་ན་ནི་སྐུ་གསུང་ཐུགས་ཡེ་ཤེས་ཕྲིན་ལས་མཛད་པ་དམ་ཚིག་རྣམ་པ་བདུན་
གྱི་དཀྱིལ་འཁོར་བདག་ཉིད་ཀྱི་སྙིང་ག་རླུང་སེམས་ཀྱི་ངོ་བོ་ཧྲཱིཿགསལ་པོ་བསིལ་བའི་འོད་ཟེར་ཅན་ལ་ཤེས་པ་གཏད་ནས་ཇི་བཞིན་དགུག་པའི་སྦྱོར་བས་གཞུག་པར་བྱའོ། །དེའི་འོག་ཏུ་རང་གི་ཉེར་བསྡོགས་ཀྱི་དངོས་པོ་གང་ཡིན་པ་འདི་དག་ཉིད་ལྷའི་རྣམ་པར་དག་པར་དམིགས། མངོན་པར་
ཆགས་དང་ཡོངས་སུ་སྡང་། །རབ་ཏུ་མི་ཤེས་གཞི་གསུམ་གྱི། །དབང་གིས་ལས་གང་མངོན་གྱུར་གང་། །དེ་འདིར་མགོན་པོ་གསུམ་དུ་མོས། །དབུས་སུ་མཐིང་ག་རྡོ་རྗེ་ཅན། །གཡས་སུ་དམར་མཛེས་རལ་གྲི་འཛིན། །གཡོན་དུ་དཀར་གསལ་ཞགས་བསྣམས་པ། །ཐམས་ཅད་གཡོན་
དུ་པདྨོ་མཚན། །རྒྱ་ཆེན་ཕོ་བྲང་ལྷར་བཅས་པ། །སྐད་ཅིག་གིས་ནི་ལྷ་གསུམ་འདིར། །བསྡུས་ལ་རིམ་པ་ཇི་བཞིན་དུ། །འགྲོ་བའི་འཆི་བདག་སྔར་བསྡུ་བྱ། །གང་ཕྱིར་འཆི་བར་བྱེད་པའི་རྒྱུ། །ཉོན་མོངས་གསུམ་ཡིན་དེ་ཡི་རྐྱེན། །ལས་ཕྱིར་དེ་ཡི་མི་མཐུན་ཕྱོགས། །སྟོབས་ཆེན་སྤྱན་རས་

73-1-181a

གཟིགས་དབང་བརྟེན། །དེ་བས་འཆི་བ་བཟློག་འདོད་པས། །སྐུ་དང་དེ་ཡི་ཉེར་བསྟན་དང་། །བསམ་པའི་ཐུགས་རྗེ་ཆེ་ཞེས་པ། །རྣམ་གསུམ་རིམ་གྱིས་བསྒོམ་པར་བྱ། །ཆོ་ག་འདི་ཡིས་འགྲོ་རྣམས་ཀྱི། །སྙིང་གི་བུམ་པ་ཆགས་སྡང་བཅས། །བཅས་ཤིང་དེ་ཡི་སྦྱོར་བ་དང་། །ཡན་
ལག་རྣམ་པར་གཞིག་པའང་འབད། །འདི་ཡི་འགྲུབ་པ་རྣམ་པ་བཞི། །མ་ལུས་འཆི་བ་བདག་ལེན་དང་། །དེ་དག་འཆི་བ་བཟློག་ཉིད་དང་། །སྨན་མཆོག་སྦྱོར་བ་ཉིད་དང་ནི། །འཆི་བ་མེད་དང་བརྩེ་ཆེན་གྱི། །ལྟོས་འདོར་ཁྱད་པར་ངེས་པའོ། །གལ་ཏེ་འབྱོར་ལྡན་སྐྱེ་བོ་འགའ། །ནུས་ན་དཀྱིལ་འཁོར་
ཆེན་པོ་ཡི། །སྒྲུབ་པའི་ཆོ་ག་ཇི་བཞིན་དུ། །མཁས་པས་འབད་དེ་བསྒྲུབ་པར་བྱ། །ཇི་སྲིད་འཆི་བདག་སྒྲ་གཅན་ལ། །རྣལ་འབྱོར་ཚེ་ཡི་ཟླ་བ་ཉ། །གྲོལ་འགྱུར་དེ་ཚེ་རྨི་ལམ་དུ། །གསུང་གི་དབུགས་འབྱིན་ཐོབ་པར་འགྱུར། །དེ་ནས་དགའ་སྟོན་ཚོགས་བསགས་ཕྱིར། །དཔག་མེད་མཆོད་པའི་
རྒྱ་མཚོ་ཡིས། །ཕྱི་ནང་གསང་དང་ཡང་དག་གིས། །སྤྱན་རས་གཟིགས་དབང་མཆོད་པར་བྱ། །འཆི་བ་སླུ་བའི་གདམས་པ་རྫོགས་སོ།།      །།༄༅། །དཔལ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །སྔགས་པ་བདེ་ཆེན་གྲོང་འཇུག་པས། །བཅོ་བརྒྱད་ཨེ་དབྱིངས་ཕྱག་རྒྱ་བཅའ། །
གཡོ་བ་མི་གཡོ་བཟུང་ནས་ནི། །ལྷག་པའི་ལྷ་ཡི་རྣལ་འབྱོར་བྱ། །སྤྲུལ་པའི་གནས་སུ་རི་བོང་འཛིན། །མ་ལུས་བྱང་ཆུབ་སེམས་བསྡུས་གཟུགས། །ཟླ་བ་བཟང་བ་བདེ་བ་ཆེ། །འོད་མཛད་དྲོད་རླུང་སྲོག་བདག་བསམ། །ཧྲཱིཿ། ལྷ་དབང་ལྷན་ཅིག་སྐྱེས་པའི་སྐུ། །ཞལ་སྦྱོར་སྤྱི་གཙུག་གཟི་བརྗིད་
བཟང་། །སོར་བཞི་པས་ནི་བར་ཆོད་བཅས། །བསམས་ནས་འོད་ཀྱི་སྙོམས་འཇུག་བསྐུལ། །སྦྱོར་མཚམས་དཀར་དམར་རྒྱུན་ལྷུང་བས། །བདག་ལུས་དྲི་མེད་བྱས་ནས་སུ། །ཐོག་མར་གང་བསྐྱེད་ཕྱིས་དེ་བཞིན། །བདེ་མཆོག་ཟླ་བ་བཟང་སྟོབས་བསྐྱེད། །དེ་ནས་ཀུན་སྡུད་རྡོ་རྗེ་ཡི། །རླུང་བཟུང་
ནས་ནི་འདུས་པའི་འོད། །ཤིང་རྟ་ལམ་ཆེན་སྦྱང་བྱས་ནས། །ལྕགས་ཀྱུ་ལྟ་བུས་དྲང་བྱས་ལ། །གཏུམ་མོ་ཡེ་ཤེས་སྦར་བའི་མེས། །ལྟེ་བའི་དཀྱིལ་འཁོར་སྤྲོས་པས་ནི། །མེ་དཔུང་ལ་ནི་ལན་ཚྭ་བཞིན། །མི་བཟད་སྐྲར་བཅས་གྱེན་དུ་འཕར། །དེ་ཚེ་སྤྱི་གཙུག་རྡོ་རྗེ་འཛིན། །ཤེས་རབ་ཉིད་ལ་

73-1-181b

བསྡུས་བྱས་ལ། །དེ་ཡི་པདྨོ་ཁ་ཕྱེ་བར། །རྣམ་ཤེས་བུང་བ་གཞུག་པར་བྱ། །སྐལ་ལྡན་ངོ་བོ་ཉིད་དབང་དུ། །བདེ་བ་མཆོག་གིས་རྒྱུད་ཚིམ་ཞིང་། །ཆོས་ཀུན་རྨི་ལམ་འདྲར་ཤེས་དང་། །གང་བསྒྱུར་སེམས་སྟོན་གྲུབ་པའི་རྫས། །དེ་ནས་འོག་གི་ཕོ་བྲང་ལྷ། །འོད་ཟེར་དཀྲུགས་པའི་སྦྱོར་བ་ཡིས། །ཞུ་བྱས་
དེ་ནི་གོང་མར་བསྟིམ། །ཐིམ་གྱུར་རང་གནས་བརྟན་པར་འདོད། །དཔལ་ལྷའི་གྲོང་ཁྱེར་དུ་འཇུག་པ་རྫོགས་སོ།།      །།༄༅། །བཅོམ་ལྡན་འདས་འཇིག་རྟེན་མགོན་པོ་ལ་ཕྱག་འཚལ་ལོ། །དཔལ་ལྡན་འཇིག་རྟེན་མགོན་ཞབས་ཀྱི། །ཆོ་ག་ཏིང་འཛིན་རྒྱལ་པོ་ཡི། །ཡོངས་དག་ཞིང་དུ་རྣམ་པར་
ཤེས། །འཕྲོ་བ་རྡོ་རྗེའི་སྐར་མདའ་བརྩམ། །ཤིན་ཏུ་ཡིད་དགའ་གྲུབ་པས་བྱིན་བརླབས་སམ། །ལྷ་མཆོག་ལེགས་གནས་ཏིང་འཛིན་གྲུབ་པའི་གཞི། །ཡང་ན་དུར་ཁྲོད་ཆུ་བོ་ཤིང་གཅིག་འགྲམ། །སྐལ་ལྡན་ཆགས་བྲལ་ཐེ་ཚོམ་མེད་པར་ཞུགས། །རྒྱ་ཆེན་མཆོད་སྦྱིན་རེ་བ་མེད་ཡིད་དག་པ་དང་། །
བཅས་ལ་རྒྱལ་བ་ལྷ་ཡི་ཕོ་བྲང་དགའ་ལྡན་དུ། །རྩེ་གཅིག་ཡིད་བྱེད་གང་ལ་ཆགས་པའི་གནས། །མེ་འོབས་དོང་ལྟར་མི་དགའ་སྐྱོ་བ་དྲག་བསྐྱེད་བྱ། །སྐྱིལ་ཀྲུང་རྒྱལ་པོ་རྡོ་རྗེའི་མདུད་པ་བརྟན་པ་ལ་གནས་ལ། །སྤྱི་བོ་སྙིང་ག་ལྟེ་དབུས་ཧཾ་དང་ཧཱུཾ་དང་ཨཾ་རིམ་བཞིན། །དཀར་དང་སྔོ་དང་དམར་པོ་འོད་
འཕྲོ་རྩ་ཆེན་སྦུབས་ནང་གཞུག །ཕ་མ་སེམས་དབྱིངས་ལུས་རླུང་སྲོག་བསྡུས་ཡི་གེ་གསུམ་ལ་བསྡུ། །སྐྱེ་མེད་ལས་སྐྱེས་མེ་ཡིས་རབ་བཞུས་རྒྱལ་སྲས་འོད་འཛག་སྤྲུལ་པ་བསྐྱོད། །ལྕགས་ཀྱུ་ཞགས་པ་རྡོ་རྗེ་རླུང་གིས་ཧཾ་ཨཾ་ཧཱུཾ་གསུམ་གཅིག་གྱུར་ཅིང་། །ཡེ་ཤེས་འོད་ཕྱུང་དྷཱུ་ཏཱིའི་ལམ་བྱུང་
ཤིན་ཏུ་དམར་གསལ་དག་བྱས་ལ། །རྗེ་བཙུན་ཕྱག་མཐིལ་པད་དབུས་ཨ་ལས་འོད་སྦུབས་དམར་པོ་ཡང་དྲང་བྱ། །དེ་ལ་རྗེ་བཙུན་སྤྱན་རས་གཟིགས་ཉིད་གདུལ་བྱའི་དོན་ལ་གཅིག་ཏུ་ཐུགས་རྣམ་པར་བརྩེ་བས་བདག་གི་ལྟོས་པ་ཐམས་ཅད་ཉེ་བར་དོར་བ་ཐུགས་བསྐྱོད་པ་ནི། རིགས་ཀྱི་བུ་
ཁྱོད་གང་གི་ཚེ་ཚེའི་དུས་བྱེད་པས་ཉིང་མཚམས་སྦྱོར་བའི་འཇིགས་པས་རབ་ཏུ་འཇིགས་པར་གྱུར་པ་དེའི་ཚེ། ཁོ་བོའི་ཐུགས་རྗེ་དང་བྱིན་གྱི་རླབས་ཀྱིས་ཅི་ནས་ཀྱང་། ཁྱོད་ཇི་ལྟར་འཇིགས་པ་མེད་པ་དེ་ལྟར་ཡང་དག་པར་སྐྱོབ་པར་འགྱུར་གྱིས་ཐམས་ཅད་ཀྱི་ཐམས་ཅད་དུ་རྣམ་པ་ཐམས་ཅད་

73-1-182a

འཁོར་བའམ་ངན་སོང་དུ་ཡ་ང་བ་དང་འཇིགས་པར་མ་བྱེད་ཅིག །རིགས་ཀྱི་བུ་ཆེ་གེ་མོ་ཞེས་བྱ་བ་ཁྱོད་རྗེས་སུ་འཛིན་པའི་ལྷ་ནི་ང་ཡིན་ནོ་ཞེས་གསུངས་པས་དབུགས་ཕྱུང་སྟེ། ཇི་སྐད་བརྗོད་པ་དང་། སྐྱེ་བ་དྲག་པོ་གཉིས་ཀྱིས་གནས་གཉིས་ལ་མངོན་པར་དགའ་བ་དང་། གདུང་བ་
ཉིད་དང་ལྷག་པའི་ལྷ་ལ་གུས་པ་མི་བཟད་པས་སྐྱབས་སུ་གསོལ་བ་ནི་ཐབས་ཡིན་ནོ། །དེ་ནས་སྟོབས་ལྡན་སྤྲུལ་པའི་དབུས། །ལེགས་བཅུག་དྷཱུ་ཏཱིའི་དབུས་ནས་སུ། །སྦུབས་དག་ནས་ནི་སྲན་འབྲུམ་བཞིན། །མཁས་པས་རྣམ་ཤེས་འཕྲོ་བར་བྱ། །ཚངས་དབང་ཟ་དང་འགུལ་དང་འཕྲིག །དམིགས་
པ་རང་དབང་གྱུར་ཉིད་དང་། །གསོལ་བཏབ་ངལ་བསོས་གདོན་མི་ཟ། །བརྟན་པའི་འཕྲོ་བ་གྲུབ་པའི་ལྟས། །རྡོ་རྗེ་སྐར་མདའི་མན་ངག་རྫོགས་སོ།།      །།༄༅། །འཕགས་པ་སྤྱན་རས་གཟིགས་ངན་སོང་སྦྱོང་བ་ལ་ཕྱག་འཚལ་ལོ། །སྙིང་རྗེ་ཆེན་པོ་ཡིད་གཞུངས་པས། །སྤྱན་རས་གཟིགས་
དཔལ་བསྙེན་བྱས་ཏེ། །ལུས་ཅན་མི་འདོད་བཞིན་དུ་ལྷུང་། །དེ་དག་ངན་འགྲོ་བཟློག་པར་བྱ། །སྔོན་ནས་སྦྱངས་པ་ཉིད་དང་ནི། །གཞན་དག་གློ་བུར་བྱ་བ་ཉིད། །དེ་བཞིན་ཕྱི་ནས་གཞན་གྱིས་ཏེ། །མཆོག་དང་བར་མཐའ་གྲངས་བཞིན་འདོད། །བདག་ཉིད་གང་ལ་ལྷག་པར་དད། །མེ་ཏོག་ལྷུང་
བ་ཉིད་དམ་སྔ། །གོམས་པར་བསྙེན་པར་བྱས་པས་ལྷ། །འཇིག་རྟེན་དབང་ཕྱུག་ཐུགས་ཀར་དགོད། །དེ་ཉིད་ལྷག་པའི་ལྷ་ཡིན་ན། །ས་བོན་ནམ་ནི་ལྷ་ཡི་སྐུ། །ཡང་ཡང་གོམས་པར་རང་གི་སེམས། །དེ་ཡི་ཐུགས་བཅུག་ཏིང་འཛིན་བྱ། །མི་གཡོ་བ་དང་རྩེ་གཅིག་དང་། །ཀུན་དུ་སྡུད་
པ་ཞེས་བྱ་བའི། །མིང་ཅན་འོད་ཟེར་འདུ་སྔོན་འགྲོས། །གཡེང་བ་སྤངས་ལ་བརྟན་པར་གནས། །སྤྱི་བོ་སྙིང་ག་ལྟེ་བ་ནི། །ཧཾ་དང་ཧཱུཾ་དང་ཨཾ་བསམས་ནས། །བླ་མའི་མན་ངག་གིས་གཅིག་ཏུ། །བསྡུས་ནས་འཕེན་པ་ཐབས་ཡིན་ནོ། །དེ་ནས་རྟེན་ལ་ཡིད་འཕྲོག་ཅིང་། །དམིགས་པ་བརྟན་
པར་གྱུར་པ་ན། །འོད་ཀྱི་སྦུ་གུའི་སྦྱོར་བ་ཡིས། །རྟེན་དེ་ཉིད་དང་དེ་ཡི་ཞིང་། །མཁས་པས་བདག་དང་བདག་གིར་བྱ། །ཆོ་གའི་རྒྱལ་པོ་འདི་ཡིས་ནི། །རྣལ་འབྱོར་བར་དོར་འཇུག་པ་ན། །དྲན་པ་ཙམ་གྱིས་གོམས་པ་ཡིས། །རྟེན་ལ་བློས་འཇུག་འཇིགས་མེད་འགྱུར། །དེ་ལྟར་རིང་ནས་

73-1-182b

ལམ་གོམས་པའི། །བློ་ལྡན་དུས་ལས་འདས་གྱུར་ཚེ། །འཕགས་པ་ངན་སོང་སྤྱོད་དཔལ་གྱི། །ཆོ་ག་བདུན་ཕྲག་བདུན་དུ་སྦྱངས། །རོ་འམ་རུས་པའམ་གོས་སམ་མིང་། །རྟེན་དེའི་མདུན་དུ་བཞག་ནས་སུ། །མ་དག་པ་དང་དག་པ་ཡི། །དཀྱིལ་འཁོར་གཉིས་ལ་རྟེན་གཉིས་གཞག །བརྡེག་
དང་བསྲེག་དང་བཀྲུ་བ་ཡིས། །དྲི་མ་གཞིག་གཞོམ་དད་པ་དག །དཀྱིལ་འཁོར་ནག་པོ་བྱ་བས་ཏེ། །བརྟན་དང་དབང་བསྐུར་བྱ་བ་ལའོ། །ཡུངས་ཀར་བྱེ་མ་ཐལ་ཆེན་ལ། །རིག་པ་བཟླས་ནས་བསྣུན་བྱ་ཞིང་། །སྦྱིན་སྲེག་ཆོ་གའི་བྱ་བ་ཡིས། །རྟེན་བཅས་བག་ཆགས་འབད་དེ་བསྲེག །ངན་སོང་
སྦྱོང་བའི་སྐུ་གསུང་ཐུགས། །བཞུ་བའི་ཆུས་བཀང་བུམ་པ་བླུགས། །རྡོ་རྗེའི་གླུ་བླང་རིག་པ་བཟླ། །མ་ལུས་དྲི་མ་བཀྲུ་བར་བྱ། །ཨོཾ་ཨཱཿཧྲཱིཿསརྦ་དུརྒ་ཏི་བ་རི་ཤོ་དྷ་ནེ་རཱ་ཛཱ་ཡ། ཨ་མུ་ཀེ་ཀཱ་ཡ་ཝཱཀ་ཙིཏྟ་སརྦ་པཱ་པཾ་ཏོ་ཥ་ཝ་ར་ཎ་བྷཾ་ག་བྷཾ། ཌ་ཧ་ཌ་ཧ། བཱར་ཙྪ་བཱར་ཙྪ། ཤོ་དྷ་ཡ་ཤོ་དྷ་ཡ་ཕཊ་ཕཊ་
སྭཱ་ཧཱ། དེ་རྗེས་དྲི་མ་དག་པའི་སེམས། །ལྷག་པའི་ལྷ་ལ་བཅུག་ནས་ནི། །ཇི་བཞིན་དབང་བསྐུར་བྱས་ཏེ་མཆོད། །དགའ་སྟོན་ཆེན་པོ་སྦྱིན་པར་བྱ། །ཚེ་འདས་པ་ལ་བྱ་བའི་ཆོ་ག་རྫོགས་སོ།།      །།༄༅། །བཅོམ་ལྡན་འདས་ཐུགས་རྗེ་ཆེན་པོ་གཟི་བརྗིད་ཀུན་ནས་འབར་བ་ལ་ཕྱག་འཚལ་ལོ། །
དལ་བ་དོན་ཡོད་དུས་ལས་འདས་པ་དང་། །སྡིག་མང་ངན་འགྲོའི་སྒོར་ཞུགས་དེ་བཞིན་དུ། །ཡ་ང་བར་མ་ཉིང་མཚམས་སྦྱར་བའི་ཚེ། །དེ་རྟེན་ཆོ་ག་རྒྱལ་པོས་རྣམ་པར་སྦྱང་། །སློབ་དཔོན་ཤིན་ཏུ་སྙིང་བརྩེ་ཅན། །རིག་པ་རྒྱ་མཚོ་ཕ་རོལ་སོན། །བརྟན་ཞིང་མི་འཕྲོགས་མཁས་པ་ཡིས། །དབུགས་
བྲལ་སློབ་མ་མདུན་དུ་གཞག །ཆུས་བཀྲུས་དྲིས་བྱུགས་རྒྱན་བཏགས་ཏེ། །བརྡེག་དང་བཀྲུ་སོགས་ཆོ་ག་བཞིན། །དེ་ནས་སྔགས་བཅས་བདུག་པ་ཡིས། །བགེགས་བསྐྲད་འཁོར་ལོ་བཅིངས་ནས་ནི། །སྤྱི་གཙུག་བླ་མ་ཡབ་དང་ཡུམ། །སྙོམས་ཞུགས་ཐིག་ལེ་མ་ལྷུང་བ། །གོམས་པའི་ལྷ་
རྟེན་མདུན་གནས་ཀྱི། །ཤངས་བུག་ནས་ནི་མྱུར་བསྡུས་ཞེས། །དེ་ཡི་ཐུགས་དཀྱིལ་པདྨོ་བསྒོམ། །རྡོ་རྗེའི་རྒྱས་བཏབ་ཟུམ་པའི་ནང་། །མི་འགྱུར་ཡོངས་འགྱུར་ལྷ་གཟུགས་བསྐྱེད། །སླར་བྱུང་ཞིང་མཆོག་དེ་སྲས་གྱུར། །དོགས་སུ་མཐར་ཕྱིན་གྲུ་འདྲ་ཡིས། །ཕུང་པོ་མ་དག་དག་པ་དང་། །དག་

73-1-183a

པ་དྲི་མེད་བསྲེག་རྫས་སུ། བྱིན་གྱིས་བརླབས་ལ་རྟོག་བྲལ་མཆོད། །སྔགས་ཆུ་དྲི་ལྡན་ཡུངས་ཀར་དང་། །རལ་གྲི་ལ་སོགས་མཚོན་པར་ཕྱེ། །མར་དང་ཏིལ་སྦྱར་བླུག་ཅིང་བསྲེག །མེ་ལྕེ་འབར་བའི་ལྟས་རྣམས་བརྟག །གསོན་ཚེ་གོམས་པར་བྱས་པ་ཡིས། །འབྲས་བུ་དེ་རིང་དུས་
ཡིན་གྱི། །བུ་ཁྱོད་འཁྲུག་པར་མ་བྱེད་པར། །བརྟན་པར་རྣལ་འབྱོར་དྲན་པར་གྱིས། །ཁྱོད་ཀྱི་ལུས་ཀྱི་གྲོང་ཁྱེར་ནི། །རྟེན་འདི་ཡིན་ཏེ་དེ་ཡི་ཐུགས། །བུ་ཁྱོད་སེམས་དང་གཉིས་མེད་ཉིད། །ཁྱོད་ཀྱི་རྟག་གནས་འདི་ཡིན་ཏེ། །ཡོངས་དག་ཞིང་ནི་རྟག་པའི་ཡུལ། །རྗེས་འཛིན་བཤེས་གཉེན་འདི་
ཡིན་ཏེ། །འདི་དག་གནས་སྐབས་འབྲེལ་པའོ། །གང་ཡང་གནས་དང་ལུས་འདི་དང་། །སྤྱོད་ཡུལ་འདི་ལ་ཉེས་དམིགས་དང་། །ཡོངས་དག་ཞིང་དང་རྟེན་དང་ནི། །སྤྱོད་ཡུལ་མཆོག་བརྗོད་ངེས་པར་བྱ། །གཞན་ཡང་འཁོར་དང་མྱ་ངན་འདས། །སྡིག་དང་དགེ་ལེགས་སྐྱོན་ཡོན་མང་། །སྔགས་
མཚམས་དལ་བུས་རྙེད་ནས་སུ། །སྐྱོ་དང་སྤྲོ་བས་དབུགས་དབྱུང་ངོ་། །དེ་རྗེས་གཏོར་མ་བཟང་བྱིན་ལ། །བཟང་པོ་སྤྱོད་པའི་སྨོན་ལམ་བཏབ། །དམ་ཚིག་འཛིན་པའི་སྔགས་བཟླ་ཞིང་། །རུས་པ་བསྡུས་ལ་མཆོད་རྟེན་བསྒྲུབ། །རོ་བསྲེག་གི་ཆོ་ག་རྫོགས་སོ།།      །།༄༅། །སྤྱན་རས་
གཟིགས་མེའི་ལྷ་ལ་ཕྱག་འཚལ་ལོ། །དེ་ནས་མེ་ལྷའི་གཙོ་བོ་སྦྱིན་སྲེག་མཉེས། །ཞེས་འབྱུང་བའི་སྒྲུབ་ཐབས་བཤད་པར་བྱའོ། །འབར་བའི་དབུས་ན་བརྗིད་པའི་སྐུ། །མེ་ཐབ་དང་ནི་པདྨོ་འཛིན། །དམར་བའི་འོད་ཀྱིས་གདུག་པ་བསྲེག །སྒྲུབ་པོའི་དོན་མཛད་རྒྱལ་གྱུར་ཅིག །སྡིག་པ་
གཞིག་དང་དཔལ་བསྐྱེད་ཕྱིར། །ལས་ཀུན་སྒྲུབ་པར་བྱེད་པའི་རྒྱུ། །མེ་ཡི་ལས་ནི་ཕྱོགས་གཉིས་ལ། །མཁས་པས་འབད་དེ་རྣམ་པར་བརྟག །པདྨོ་ལྟ་བུའི་ཐབ་དཀར་མཛེས། །ཁྲུ་བཞི་ཁྲུ་གསུམ་ཁྲུ་གང་ཚད། །ཟླུམ་པོ་རྒྱ་ཕྱེད་སླར་བྲུས་པ། །སོར་བཞི་ཕྱིར་བསྐྱོད་བྱི་དོར་བྱུག །ཁ་ཁྱེར་སྟེགས་
ངོས་པདྨ་དང་། །རིན་ཆེན་དྲ་བ་དྲ་བ་ཕྱེད། །ཕྱི་རོལ་དཀྱིལ་འཁོར་འདབ་བརྒྱད་པ། །སྒོ་བཞིར་བཅས་དང་ཕོ་བྲང་ཉིད། །འོ་མ་འཛག་དང་དྲི་འབྱིན་དང་། །བཀྲ་ཤིས་བྱེད་པའི་ཡམ་ཤིང་ཚད། །ཅི་རིགས་དྲི་ཞིམ་སྔགས་བྱུགས་ལ། །བསངས་ནས་གཏོར་མ་སྔོན་འགྲོ་བས། །རོལ་མོ་

73-1-183b

མཁན་དང་མེ་ཏོག་བརྒྱུད། །བྲམ་ཟེའི་ཁྱིམ་ནས་བླངས་པའམ། །ཡང་ན་རྡོ་རྗེ་ཡམ་ཤིང་ལ་སྩལ་མེ། །བསིལ་ཡབ་ཀྱིས་ནི་གཡབས་ཏེ་སྦར། །མར་དང་ཏིལ་དང་འབྲས་དང་ནས། །མེ་ཏོག་སྨན་དང་འབྲས་བུ་སྦྲང་། །ཞོ་ཟན་ཡུངས་ཀར་དཱུར་བ་ཤིང་། །མཐར་བྱེད་སྔགས་ཀྱིས་བསང་བར་བྱ། །ཨརྒ་
ལ་སོགས་བྱིན་བརླབས་ལ། །ལྷ་ཡི་སྦྱོར་བས་མེ་ལྷ་བསྐྱེད། །མེ་དང་ཡོ་བྱད་ཡམ་ཤིང་སྦྱངས། །ཡེ་ཤེས་བཀུག་པ་དབུལ་བར་བྱ། །ཨོཾ་བཛྲ་ཨགྣ་ཡེ་སྭཱ་ཧཱ། མར་དབུལ་བའོ། །ཨོཾ་བཛྲ་སརྦ་པཱ་པཾ་ད་ཧ་ན་བཛྲ་སྭཱ་ཧཱ། ཏིལ་དབུལ་བའོ། །ཨོཾ་བཛྲ་པུཥྚ་ཡེ་སྭཱ་ཧཱ། འབྲས་དབུལ་བའོ། །
ཨོཾ་བཛྲ་སན་ཏུཥྚ་ན་ཡེ་སྭཱ་ཧཱ། མེ་ཏོག་དབུལ་བའོ། །ཨོཾ་བཛྲ་ནིར་བྱཱ་དི་སྭཱ་ཧཱ། སྨན་དབུལ་བའོ། །ཨོཾ་བཛྲ་སརྦ་ཕ་ལ་ཡེ་སྭཱ་ཧཱ། འབྲས་བུ་དབུལ་བའོ། །ཨོཾ་བཛྲ་ཨ་ནུ་སྨྲྀ་ཏེ་སྭཱ་ཧཱ། སྦྲང་དབུལ་བའོ། །ཨོཾ་བཛྲ་སཾ་བ་དེ་སྭཱ་ཧཱ། ཞོ་ཟན་དབུལ་བའོ། །ཨོཾ་བཛྲ་ཨཱཿབིགྷྣཱན་སྭཱ་ཧཱ། བགེགས་བསལ་
བའོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ། དཱུར་བ་དབུལ་བའོ། །ཨོཾ་བཛྲ་བོ་དྷི་བྲྀཀྵ་ཡེ་སྭཱ་ཧཱ། ཡམ་ཤིང་དབུལ་བའོ། །ཨོཾ་ཨཱཿཧྲཱིཿན་མཿས་མནྟ་བུདྡྷཱ་ནཱཾ་ཨོཾ་ཨགྣ་ཡེ་ཨ་མུ་ཀ་སྱ་སརྦ་ཀརྨ་སིདྡྷི་ཀུ་རུ་སྭཱ་ཧཱ། བསྲེག་རྫས་ཐམས་ཅད་ཀྱི་མགོའམ་མཇུག་དུ་དགང་བླུགས་དབུལ་བའོ། །གཞན་ཡང་
མཆོད་པ་ཐམས་ཅད་ཀྱང་། །ཅི་རིགས་མཁས་པས་ཤེས་བྱས་ཏེ། །དགང་དང་བླུགས་པའི་ཕྱག་རྒྱ་ཡིས། །མཉེས་བྱས་ཁྲུས་དང་བཅས་པས་མཆོད། །མཐར་བཟོད་པར་གསོལ་བ་དངོས་གྲུབ་བླངས་ལ་གཤེགས་སུ་གསོལ་ནས་བདེ་བ་ལ་རེག་པར་གནས་པ་བྱའོ། །སྦྱིན་སྲེག་གི་ཆོ་ག་
རྫོགས་སོ།།      །།༄༅། །ཐུགས་རྗེ་ཆེན་པོ་བཀྲ་ཤིས་ཀུན་དུ་སྣང་བ་ལ་ཕྱག་འཚལ་ལོ། །དེ་ནས་ཀུན་དུ་སྣང་བ་བཀྲ་ཤིས་བྱེད། །ཅེས་འབྱུང་བའི་སྒྲུབ་ཐབས་བཤད་པར་བྱའོ། །སློབ་དཔོན་གང་ཞིག་གདུལ་བྱའི་དོན་མཐོང་བས་བློ་རབ་ཏུ་ཕྱོགས་ཏེ། བསིལ་ཁང་གི་རྔ་ཡབ་ལྟ་བུར་
གཞན་གྱི་དབང་གིས་གཡོ་ཞིང་མི་བརྟན་པ་ཐོབ་པ་ན། དེས་བདག་ལ་དད་ཅིང་ལྟོས་པ་དོར་བ་རྣམས་ཀྱི་དོན་དུ་འཕགས་པ་ཟླ་བའི་ཁ་དོག་ཅན་ཡིད་ལ་བྱས་ལ། དཀར་པོའི་ཚེས་བརྒྱད་དང་བཅུ་དང་བཅོ་ལྔ་ལ་ཇི་སྙེད་འབྱོར་པའི་ཡོ་བྱད་དང་ལྡན་པས་ཡིད་དང་མཐུན་པའི་གནས་བྱིན་གྱིས་

73-1-184a

བརླབ་པར་བྱའོ། །བཀྲ་ཤིས་བཟང་དང་བཀྲ་ཤིས་ནོར་འབྲུ་སྨན། །བཀྲ་ཤིས་མཆོད་རྫས་དང་ནི་བཀྲ་ཤིས་རྒྱན། །དཔལ་ལྡན་བཀྲ་ཤིས་དཀྱིལ་འཁོར་ཆེར་བྲི་ལ། །བཀྲ་ཤིས་རྒྱལ་པོ་སྤྱན་རས་གཟིགས་དབང་དགུག །གང་དག་གང་གི་ཕྱིར་དང་གང་དུ་ཇི་ལྟར་བྱ་
བའི་རང་བཞིན་ཐམས་ཅད་ལ་བཀྲ་ཤིས་ཞེས་སྦྱར་རོ། །ཤིས་པ་བརྗོད་པའི་དབྱངས་དང་སེམས་དང་རྗེས་སུ་མཐུན་པའི་རོལ་མོ་དང་གླུས་མཆོད་དོ། །མེ་ཏོག་དཀར་དམར་དང་ཙནྡན་དཀར་དམར་དང་རྒྱན་དང་དྲིའི་ཁྱད་པར་ངེས་པའོ། །ཡོ་བྱད་གློ་བུར་བ་དང་གསར་དུ་སྐྱེས་པ་མཐའ་དག་
ལ་རྒྱལ་བར་གྱུར་པའི་ཚིག་སྔོན་དུ་སོང་བས་སོ། །སྦྱིན་བདག་གམ་སློབ་མའི་ལུས་བཀྲུས་ལ་བཀྲ་ཤིས་ཀུན་དུ་སྣང་བའི་རྒྱས་གདབ་བོ། །དགེ་བའི་དཀྱིལ་འཁོར་ཟླུམ་པོ་དཀར། །ཀུན་དུ་འོད་མཛད་ཐུགས་རྗེ་ཆེ། །བཀྲ་ཤིས་བརྒྱད་ལྡན་པདྨོ་འཛིན། །ས་གནོན་ཏིང་འཛིན་མཆོག་གིས་
བརྗིད། །དེ་ནས་འཁོར་ལོའི་རྩིབས་བརྒྱད་ལ་གདུགས་ལ་སོགས་པ་བརྒྱད་དོ། །མུ་ཁྱུད་ལ་གྲུབ་པ་ཉི་ཤུའོ། །སྟེང་ནས་བཀྲ་ཤིས་ཀྱི་རྫས་སྣ་ཚོགས་པའི་ཆར་འབེབས་པ་ལྷའི་སྐུ་བརྒྱ་སྟོང་ཕྲག་མང་པོའོ། །མཆོད་པའི་སྤྲིན་དུ་མ་ལས་འབྲུག་སྒྲ་དལ་བུས་སྒྲོགས་པ་དང་། གློག་
འབྱིན་པ་ཡང་འགོད་པར་བྱའོ། །འོག་ནས་ཀླུའི་རྒྱལ་པོ་རྒྱ་མཚོ་ལ་སོགས་པས་བུམ་པ་ནོར་བུས་གང་བ་འབུལ་བའི་ཚུལ་ལོ། །རྡོ་རྗེ་སློབ་དཔོན་ཀུན་དུ་སྣང་། །བཀྲ་ཤིས་རྣམ་པར་སྣང་མཛད་ཀྱི། །ཏིང་ངེ་འཛིན་ལ་སྙོམས་ཞུགས་ཏེ། །སྔགས་བརྗོད་བུམ་པ་དགུ་གང་བྱ། །བུམ་པ་གང་
བ་དགུ་ལ་སྔགས་ཀྱི་ཕྲེང་བ་དགུ་དགུ་བཞུ་བས་བྱིན་གྱིས་བརླབ་པོ། །རྫས་སྣོད་དང་བཅུད་མ་ལུས་པ་ལ་ནི་ལྷ་རྫས་ཀྱི་ནོར་བུ་རྡོ་རྗེས་མཚན་པ་རེ་རེས་བརྒྱན་པར་རོ། །ཕྱག་དང་བསྐོར་བ་བྱས་ནས་བགེགས་བསལ་ཏེ་བཀྲ་ཤིས་སྦྱིན་པར་བྱའོ། །རྡོ་རྗེ་དྲིལ་བུ་དཔའ་ཐོགས་ལ། །སྙིང་རྗེས་ཀུན་
དུ་བསྐོར་ཞིང་རྒྱུག །གནས་དང་གང་ཟག་རྣལ་འབྱོར་རྣམས། །མ་ལུས་བསྲུང་བའི་བཀྲ་ཤིས་སྩོལ། །ཨོཾ་ཨཱཿཧྲཱིཿཨ་ཨི་ཨུ་ཨེ་ཨོ་ཨཾ་ཨཿཤྲཱི་ཨཱརྱཱ་ཝ་ལོ་ཀི་ཏེ་ཤྭ་ར་མཾ་གཱ་ལ་སིདྡྷི་ཨ་དྷིཥྛཱ་ནེ་ན་དཱ་ན་པ་ཏི་ཆེ་གེ་མོའི་སརྦ་པ་རི་གྲ་ཧཱ་སྭསྟི་མ་ཧཱ་མཾ་ག་ལ་སུ་མཾ་ག་ལ་པྲ་ཏི་མཾ་ག་ལ་སིདྡྷི་སིདྡྷི་

73-1-184b

ཧཱུཾ་ཧཱུཾ་སྭཱ་ཧཱ། བཀྲ་ཤིས་ཀྱི་ཆོ་ག་རྫོགས་སོ།།      །།༄༅། །དཔལ་སྤྱན་རས་གཟིགས་སྐུ་གདུང་རྣམ་པར་སྣང་བ་ལ་ཕྱག་འཚལ་ལོ། །དེ་ནས་གཞན་ཡང་བཤད་བྱ་བ། །མཆོད་རྟེན་གྱི་ནི་ཆོ་ག་བརྗོད། །ཇི་བཞིན་བརྟགས་ཤིང་སྦྱངས་པའི་ས། །དྲི་ཞིམ་ཆུས་བྲན་གསང་སྔགས་བརྗོད། །
མགོན་པོ་སྙིང་རྗེ་ཆེ་རྣལ་འབྱོར། །སངས་རྒྱས་བསྟན་ལ་རབ་གུས་པས། །ཡོངས་དག་དཀྱིལ་འཁོར་མདུན་བྱས་ཏེ། །མཆོད་སོགས་ཆོ་ག་ཇི་བཞིན་བརྟག །དེའི་རྗེས་ལ་བསྲུང་བའི་དཀྱིལ་འཁོར་སྔོན་དུ་སོང་བས་མཚམས་བཅད་དེ། ཨོཾ་ཨཱཿབིགྷྣཱཾ་ཏ་ཀྲྀ་ཏ་ཧཱུཾ་ཞེས་བརྗོད་དོ། །ཨོཾ་ཧྲཱིཿབཛྲ་ཁ་ན་ཁ་ན་ཧཱུཾ། 
ས་རྐོ་བའོ། །ཨོཾ་ཧྲཱིཿབཛྲ་ཨཱ་ཡུ་ཥེ་ཧཱུཾ། ས་བླང་བའོ། །ཨོཾ་ཧྲཱིཿབཛྲ་ཨ་མྲྀ་ཏེ་ཧཱུཾ་ཕཊ། ཆུ་སྦྱང་བའོ། །ཨོཾ་ཧྲཱིཿཨ་བཛྲ་བྷཱུ་མི་བྷུ་ལི་པཉྩ་རཏྣ་ཧཱུཾ། ས་དག་པར་བྱ་བའོ། །ཨོཾ་ཧྲཱིཿབཛྲ་བྷ་བ་ནི་སྭ་བྷཱ་བ་བི་ཤུདྡྷ་ཨ་དྷོ་ཡེ་ཧཱུཾ། བསྲེས་ནས་བརྫི་བའོ། །ཨོཾ་ཧྲཱིཿབཛྲ་མུངྒ་ར་ཨཱ་ཀོ་ཊ་ཡ་ཧཱུཾ་ཕཊ། བརྡུང་ཞིང་
མནལ་བའོ། །ཨོཾ་ཧྲཱིཿབཛྲ་ཨུདྦྷ་བ་ཡ་སྭཱ་ཧཱ། འབི་འབི་བྱ་བའོ། །ཨོཾ་ཧྲཱིཿབཛྲ་ཨ་ར་ཛེ་སྭཱ་ཧཱ། ཏིལ་བྱུག་པའོ། །ཨོཾ་ཧྲཱིཿདྷརྨ་དྷཱ་ཏུ་གརྦྷེ་སྭཱ་ཧཱ། འབི་འབི་གཞུག་པའོ། །ཨོཾ་ཧྲཱིཿདྷརྨ་དྷཱ་ཏུ་གརྦྷེ་བཛྲ་རཱུ་བེ་ནིརྨ་ན་ཡ་སྭཱ་ཧཱ། ཕྱག་རྒྱས་འདེབས་པའོ། །ཨོཾ་ཧྲཱིཿབཛྲ་མུངྒ་ར་ཨཱ་ཀོ་ཊ་ཀརྫ་སིདྡྷི་ཧོ་
སྭཱ་ཧཱ། ཐོ་བས་བསྐྱོད་པའོ། །ཨོཾ་ཧྲཱིཿབཛྲ་ལོ་ཀ་ནཱ་ཐ་ནིརྨ་ན་པྲ་ཀ་སེ་སྭཱ་ཧཱ། དབྱུང་བའོ། །ཨོཾ་ཧྲཱིཿབཛྲ་སུ་པྲ་ཏིཥྛི་ཏ་བཛྲེ་སྭཱ་ཧཱ། བཞུགས་སུ་གསོལ་བའོ། །ཨོཾ་ཧྲཱིཿབཛྲ་ཙཀྲ་པྲ་བརྟ་ན་སྭཱ་ཧཱ། འཁོར་ལོ་གཟུགས་པའོ། །ཨོཾ་ཧྲཱིཿམ་ཧཱ་ཚྩ་ཏྲོ་ལ་ཧཱུཾ་སྭཱ་ཧཱ། གདུགས་དབུལ་བའོ། །ཨོཾ་
ཧྲཱིཿཔཉྩ་ལི་ཀ་བཱསྟྲ་ཧཱུཾ་སྭཱ་ཧཱ། ན་བཟའ་གསོལ་བའོ། །ཨོཾ་ཧྲཱིཿསརྦ་དེ་ཤ་ཡ་ཨ་བི་དི་ཀྵཱ་མ་ཀ་ར་ཧཱུཾ་སྭཱ་ཧཱ། བཟོད་པར་གསོལ་བའོ། །ཨོཾ་ཧྲཱིཿཨཱ་ཀ་ས་དྷརྨ་སྭ་བྷཱ་བ་བི་ཤུདྡྷ་ཧཱུཾ་སྭཱ་ཧཱ། ལྷ་མཆོག་ང་རྒྱལ་བརྟན་ལས་དད་པ་ཡི། །གཡོ་བ་འོད་ཀྱི་ཕྲེང་བ་དཀར་བསྐྱེད་དེ། །ཡེ་ཤེས་སྤྱན་
དྲངས་སྐུ་གསུམ་རང་བཞིན་ལ། །དེ་ཉིད་རྡོ་རྗེ་བརྟན་པའི་སྔགས་བརྗོད་གཞུག །ཨོཾ་ཨཱཿཧྲཱིཿབཛྲ་ཏྲི་ཀཱ་ཡ་པྲ་ཏིཥྛི་ཏི་ཧཱུཾ་སྭཱ་ཧཱ། རབ་ཏུ་གནས་པའོ། །ཨོཾ་ན་མོ་བྷ་ག་ཝ་ཏྱཻ་རཏྣ་ཀེ་ཏུ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱསྐཾ་བུདྡྷཱ་ཡ། ཏདྱ་ཐཱ། ཨོཾ་རཏྣེ་རཏྣེ་རཏྣ་བི་ཛ་ཡེ་སྭཱ་ཧཱ། ཨོཾ་ཨཱཿཧྲཱིཿ

73-1-185a

ཧཱུཾ་ཕཊ་སྭཱ་ཧཱ། རྟེན་ཡོངས་སུ་དག་པར་བྱ་བ་དང་། ཆོ་ག་ཕུན་སུམ་ཚོགས་པར་བྱའོ། །ཚ་ཚ་འདེབས་པའི་ཆོ་ག་རྫོགས་སོ།།      །།༄༅། །འཕགས་པ་སྤྱན་རས་གཟིགས་གསེར་མདོག་ཅན་ལ་ཕྱག་འཚལ་ལོ། །ཡོན་ཏན་མ་ལུས་རྒྱ་མཚོ་ཡི། །མཐར་ཕྱིན་གསེར་འོད་
ཁ་དོག་ཅན། །མཛད་པ་གཅིག་གིས་གདུལ་བྱ་ཡི། །དཔག་མེད་དོན་གྲུབ་ཉིད་ཞབས་འདུད། །སྔོན་དུ་གོམས་པ་ཐོབ་པ་ཡིས། །ཚོགས་པ་ཚང་བར་བྱས་ནས་ནི། །སྙིང་རྗེ་ཅན་གྱི་པགས་པ་ལ། །མི་གཡོ་རྡོ་རྗེའི་ཕྱག་རྒྱས་འདུག །མེ་ཡི་ལས་སམ་གཏོར་མར་བཅས། །གུས་པ་དྲག་པོས་
མཆོད་སྔོན་འགྲོ། །རིམ་དང་ཅིག་ཅར་བསྐྱོད་པའི་རིམ། །མཁས་པས་རྫོགས་པའི་རིམ་པ་བསྒོམ། །ཇི་སྙེད་སྐུ་གསུང་ཐུགས་རྟེན་ཡོད། །དེ་སྙེད་སྟོན་པ་ཉིད་ཡིན་ཏེ། །རབ་ཏུ་གནས་པ་མི་འཐད་མོད། །ལྷག་པར་གནས་ཕྱིར་རབ་གནས་བརྗོད། །དེ་ལ་སྐུ་ཁྲུས་བྱུག་པ་སོགས། །ཕུ་དུད་
བྱས་ལ་མཛེས་ཞུགས་ཏེ། །སློབ་དཔོན་ལྷ་ཡི་ང་རྒྱལ་གྱིས། །ཡེ་ཤེས་བསྡུས་ལ་གཉིས་པ་གཞུག །ཨོཾ་ཨཱཿཧྲཱིཿཛཿ། ཨོཾ་ཨཱཿཧྲཱིཿཧཱུཾ། ཨོཾ་ཨཱཿཧྲཱིཿབཾཾ། ཨོཾ་ཨཱཿཧྲཱིཿཧོཿ། རྡོ་རྗེ་ཁུ་ཚུར་གཉིས་བཅིངས་ལ། །མཐེའུ་ཆུང་ལུ་གུ་རྒྱུད་དུ་སྦྲེལ། །མཛུབ་མོ་གཉིས་ནི་ལྕགས་ཀྱུའི་ཚུལ། །རྒྱུ་འདི་
ཡེ་ཤེས་དགུག་པའོ། །དེ་ལས་མཛུབ་མོ་གཉིས་བཀུག་དང་། །རྡོ་རྗེ་བསྡམས་དང་གར་བསྒྱུར་བ། །དགུག་པ་བཅིང་དང་དགྱེས་བྱ་བ། །རིམ་པ་བཞིན་དུ་ཤེས་པར་བྱ། །ཇི་ལྟར་བདག་ཉིད་ལ་བཅིངས་པ། །དེ་བཞིན་རྟེན་ལ་ཡང་ཡིན་ཏེ། །བཅིངས་ནས་དབང་བསྐུར་རྒྱས་གདབ་དང་། །མཆོད་པ་
ལ་སོགས་བདག་འཇུག་བཞིན། །ཨོཾ་ཨཱཿཧྲཱིཿབཛྲ་ཀཱ་ཡ་ཝཱཀ་ཙིཏྟཱ་པྲ་ཏིསྠི་རཱ་ཧཱུཾ་ཧཱུཾ་བཛྲ་ཛྙཱ་ན་ཨ་དྷིཥྛཱ་ནི་སརྦ་ལཀྵ་ཎ་པ་རི་པཱུ་ར་ཧཱུཾ་ཧཱུཾ་ཧཱུཾ་སརྦ་དྷརྨཱཿསྭ་བྷཱ་བ་བི་ཤུདྡྷཱ་བི་མ་ལ་ད་མ་ཧཱུཾ་ཧཱུཾ་ཧཱུཾ། རྡོ་རྗེའི་ལུས་ཀྱི་པདྨའི་ལག །རིན་ཆེན་མེ་ཏོག་སྙིམ་པར་བཟུང་། །འཁོར་ལོའི་གར་བསྒྱུར་རྒྱ་གྲམ་གྱི། །ཕྱག་རྒྱ་ལྡན་
པས་གཏོར་བར་བྱ། །དེ་ནས་མེ་ཏོག་རྩི་ཐོག་བཅུད། །དྲི་བཟང་མང་དང་ལྡན་པ་ཡི། །གསེར་གྱི་ཐུར་མ་རྡོ་རྗེས་མཚན། །ཐོགས་ལ་མཁས་པས་སྤྱན་དབྱེའོ། །ཨོཾ་ཨཱཿཧྲཱིཿཙཀྵུ་ཙཀྵུ་བཛྲ་ཙཀྵུ་ས་མནྟ་ཙཀྵུ་བི་ཤོ་དྷ་ཡ་ཙཀྵུ་ཡེ་སྭཱ་ཧཱ། ཅི་འབྱོར་པའི་ཡོན་ཕུལ་ཏེ་བཟོད་པར་གསོལ་ནས་འཁོར་བ་ཇི་

73-1-185b

སྲིད་བར་བཞུགས་སུ་གསོལ་བ་དང་། ཕྲིན་ལས་ལ་ཐོགས་པ་མེད་པར་གསོལ་བ་བཏབ་ལ། དགའ་སྟོན་དང་མཆོད་སྦྱིན་ཆེན་པོས་ཐམས་ཅད་ཡོངས་སུ་ཚིམ་པར་བྱའོ། །ཨོཾ་ཨཱཿཧྲཱིཿཧོཿ། རབ་ཏུ་གནས་པའི་ཆོ་ག་གྲུབ་པ་བརྙེས་པའི་པཎྜི་ཏ་ཆེན་པོ་ཨ་ཛི་ཏ་མི་ཏྲ་གུཔྟས་མཛད་པ་རྫོགས་
སོ།།      །།རྣལ་འབྱོར་གྱི་དབང་ཕྱུག་ཆེན་པོ་ཤྲཱི་ཛ་ག་ཏ་མི་ཏྲཱ་ནནྟའི་ཞལ་སྔ་དང་། ཁ་ཆེའི་པཎྜི་ཏ་ཆེན་པོ་བུདྡྷ་ཤྲཱི་ཛྙཱ་ནས་གཏན་ལ་ཕབ་ནས། བོད་ཀྱི་ལོ་ཙཱ་བ་གནུབས་བྱམས་པའི་དཔལ་བཟང་པོ་ཞེས་བྱ་བས་བསྒྱུར་བའོ།།      །།༄༅༅། །རྒྱ་གར་སྐད་དུ། ས་ཧ་སྲ་བྷཱུ་ཛ་
ནཻ་ཏྲ་སཱ་དྷ་ནཾ། བོད་སྐད་དུ། ཕྱག་སྟོང་སྤྱན་སྟོང་གི་སྒྲུབ་ཐབས། འཕགས་པ་ཕྱག་ན་རྡོ་རྗེ་ལ་ཕྱག་འཚལ་ལོ། །འཇིག་རྟེན་རྣམས་ཀྱི་མགོན་པོ་མཆོག །དཀར་པོ་ཐུགས་རྗེ་རྟགས་འཆང་བའི། །བྱམས་པའི་སྟོབས་ཀྱིས་འགྲོ་འདུལ་བ། །དམ་པ་དེ་ལ་ཕྱག་འཚལ་ནས། །བདག་ཉིད་དྲན་
ཕྱིར་སྒྲུབ་ཐབས་གང་། །ངེས་པའི་ཤེས་པས་བྲི་བར་བྱ། །འགྲོ་བ་རྣམས་ཀྱིས་དབེན་པ་ཡི། །ཡིད་དུ་འོང་བའི་ས་ཕྱོགས་སུ། །ས་གཞི་ལེགས་པར་བྱུགས་བྱས་ལ། །མེ་ཏོག་དྲི་ཞིམ་བཀྲམ་བྱས་ཏེ། །གཅིག་དང་སྦྱར་བས་འདུག་པའི་སྟན། །བདེ་བ་ལ་འདུག་བྱས་ནས་ནི། །འགྲོ་བའི་དོན་
དུ་སེམས་བསྐྱེད་ལ། །སྙིང་གར་རཾ་ལས་གྱུར་པ་ཡི། །འོད་འབྱུང་དམར་པོ་བསམ་བྱས་ནས། །དེ་སྟེང་ཐུགས་ཡིད་ལས་གྱུར་པའི། །གནོད་མཛེས་རྒྱལ་པོར་བདག་བསམས་ཏེ། །ཆུ་ཤིང་རམ་ཤིང་སྦྱར་བའི་སྒྲས། །ཕྱོགས་བཅུ་དག་ཏུ་སྡིགས་མཛུབ་དང་། །སྔགས་ཀྱིས་ཡང་དག་བསྐྲད་
པར་བྱ། །ཨོཾ་སརྦ་བིགྷྣཱན་ཧ་ན་ཧ་ན་ཧཱུཾ་ཕཊ་རཀྵ་རཀྵ་སྭཱ་ཧཱ། དེ་ནས་བདག་ཉིད་སྙིང་ག་ལས། །ཨ་ལས་རི་བོང་ཅན་བསམས་ནས། །དེ་ནི་ཐུགས་མཆོག་བསྒོམ་པར་བྱའོ། །དེ་ལས་འོད་ཟེར་ནག་པོ་དག །ས་གཞི་དག་ལ་སྤྲོས་བྱས་པས། །ས་གཞི་ལ་སོགས་རྡོ་རྗེར་གྱུར། །དེ་ལས་འོད་
འཕྲོས་ར་བ་དང་། །གུར་དང་བླ་རེ་དྲ་བ་དང་། །ཤིན་ཏུ་མངོན་པར་བསྒོམ་པར་བྱ། །དེ་ནས་ནམ་མཁར་བླ་མ་དང་། །སངས་རྒྱས་བྱང་ཆུབ་སེམས་དཔའ་དག །སྔོན་དུ་མངོན་སུམ་དམིགས་པ་ལ། །ཕྱག་འཚལ་བ་དང་མཆོད་པ་དང་། །སྡིག་པ་བཤགས་དང་ཡི་རང་དང་། །བསོད་

73-1-186a

ནམས་བསྔོ་དང་སྐྱབས་འགྲོ་དང་། །སེམས་བསྐྱེད་པ་དང་གནས་བཞི་དང་། །མཐར་ནི་སྟོང་ཉིད་བསྒོམ་པའོ། །དོན་གྱིས་དངོས་པོར་བསམས་ནས་ནི། །སྔགས་འདི་མྱུར་དུ་བཀླག་པར་བྱ། །ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་
ཀོ྅ཧཾ། དེ་དག་ནང་དུ་བསམ་བྱ་བ། །ཡ་ཝ་ར་ལ་རྣམ་བཞི་པ། །སྟེང་དུ་སྣ་ལྡན་གཞག་པ་ལས། །དབང་ཆེན་ཆུ་བདག་འབར་བ་དང་། །སྐྱེད་པར་བྱེད་པ་རྣམ་བཞི་ཡི། །དཀྱིལ་འཁོར་ཁ་དོག་རྣམ་བཞི་རྣམས། །རིམ་པ་བཞིན་དུ་རྣམ་པར་བསྒོམ། །དེ་སྟེང་སུཾ་ལས་རི་རབ་ནི། །རིན་
ཆེན་སྣ་བཞིས་ཡང་དག་གནས། །དེ་དག་ཡོངས་སུ་གྱུར་པ་ལས། །ཁང་པ་བརྩེགས་པ་བསམ་བྱ་བ། །གྲུ་བཞི་པ་ལ་སྒོ་བཞི་པ། །ཀ་བ་བརྒྱད་ཀྱིས་ཉེ་བར་བརྒྱན། །ཡེ་ཤེས་སྣ་ལྔའི་རྩིག་པ་དག །ཕྱོགས་བཞི་དག་ཏུ་བརྒྱན་ནས་ཀྱང་། །དྲ་བ་དྲ་ཕྱེད་དག་དང་ནི། །རིན་ཆེན་ཕ་བུ་དག་དང་
ནི། །གྲུ་བཞི་པར་ནི་བརྒྱན་པ་ཡིན། །ཏྭ་ར་ན་ནི་བཞིས་བརྒྱན་ཅིང་། །མཛེས་པའི་པདྨའི་ཕྲེང་བ་དང་། །རྡོ་རྗེ་ཐིག་སྐུད་འོད་འབར་བའོ། །གྲ་བཞི་དག་ཏུ་དཔག་བསམ་ཤིང་། །ཆེན་པོ་བཞི་དང་ཀླུ་རྒྱལ་དང་། །སྤྲིན་དང་ཕྱོགས་སྐྱོང་ཞིང་སྲུང་རྣམས། །ཡང་དག་པར་ནི་དགོད་པར་བྱ། །དེ་དཀྱིལ་
ཐིག་ནི་བཞི་བཏབ་པས། །དཀྱིལ་འཁོར་དགུ་རུ་གྱུར་པ་ལ། །དཀྱིལ་དུ་བཅོམ་ལྡན་ཕྱག་སྟོང་པ། །ཁ་དོག་དཀར་པོ་ལྡེམ་བག་ཅན། །ཞལ་གདོང་བཅུ་གཅིག་ཕྱག་བཅོ་བརྒྱད། །དབུ་མའི་ཞལ་གསུམ་དཀར་ལ་མཛེས། །ལྷག་མ་ཁྲོ་ཞལ་འཇིགས་པའི་གཟུགས། །ཀུན་གྱི་སྟེང་ན་འོད་
དཔག་མེད། །པདྨའི་རིགས་ཀྱི་ཕྱག་རྒྱས་བཏབ། །དང་པོ་ཕྱག་གཉིས་སྙིང་ག་ན། །ཐལ་མོ་ངེས་པར་སྦྱར་བ་ཡིན། །དེ་འོག་གཡས་ན་དགྲ་སྟ་དང་། །དེ་འོག་གྲ་གུག་རྣོན་པོ་ཡིན། །པདྨ་རལ་གྲི་ཞགས་པ་དང་། །ལྗོན་ཤིང་མེ་ལོང་བསིལ་ཡབ་དག །རིམ་པ་བཞིན་དུ་གནས་པ་ཡིན། །གཡོན་པའི་
ཕྱག་ནི་དེ་འོག་དག །རྡོ་རྗེ་དྲིལ་བུ་མདའ་གཞུ་དང་། །ལྕགས་ཀྱི་བུམ་པ་འཁོར་ལོ་དང་། །གདུགས་དང་རིན་ཆེན་འབར་བ་རྣམས། །རིམ་པ་བཞིན་དུ་བསྣམས་པར་མཛད། །རྡོ་རྗེ་བསྣམས་པའི་ཕྱག་གིས་ནི། །ལྷ་མོ་པདྨའི་སྒྲོལ་མ་ལ། །གཉིས་སུ་མེད་པས་འཁྱུད་པར་མཛད། །ལྷ་མོ་

73-1-186b

དེ་ནི་ཞལ་གཅིག་སྟེ། །ཕྱག་ནི་དྲུག་ཏུ་ངེས་པ་སྟེ། །དང་པོའི་གཡས་པས་ཨུཏྤལ་གྱི། །སྟེང་ན་པདྨ་བརྒྱད་བསྣམས་པས། །ཐུགས་རྗེ་ཆེ་བ་འཁྱུད་པར་མཛད། །དེ་འོག་གྲི་གུག་པདྨ་བསྣམས། །གཡོན་པའི་དང་པོས་མེ་ལོང་དང་། །བསིལ་ཡབ་བུམ་པ་བསྣམས་པར་མཛད། །ཧཱུཾ་དང་པཾ་
ལས་གྱུར་པ་ཡི། །ཕྱག་སྟོང་ཡུམ་བཅས་དེ་ལྟར་བསྒོམ། །དེ་ཡི་ཤར་གྱི་དཀྱིལ་འཁོར་ལ། །ཡི་གེ་བཾ་ལས་གྱུར་པ་ཡི། །རྡོ་རྗེ་པདྨ་ཞེས་བྱ་བ། །ཞལ་གཅིག་ཁ་དོག་དཀར་པོ་ཅན། །ཕྱག་གཡས་དང་པོ་ཨུཏྤལ་གྱི། །སྟེང་ན་པདྨ་འདབ་མ་བརྒྱད། །དེ་སྟེང་རྡོ་རྗེ་རྩེ་དགུ་པ། །སྔོན་པོ་ཉིད་
ཀྱིས་བསྣམས་པརམཛད། །དེ་འོག་འཁོར་ལོ་ཞགས་པ་དང་། །གཡོན་གྱི་དང་པོས་དྲིལ་བུ་འཛིན། །དེ་འོག་ལྕགས་ཀྱི་དགྲ་སྟ་དག །ཕྱར་བ་ཉིད་ཀྱིས་བསྣམས་པར་མཛད། །ལྷོ་ཕྱོགས་དཀྱིལ་འཁོར་སྔོན་པོ་ལ། །ཡི་གེ་རཾ་ལས་གྱུར་པ་ཡི། །རིན་ཆེན་པདྨ་བསམ་བྱ་བ། །གཡས་ཀྱི་དང་
པོ་ཨུཏྤལ་གྱི། །སྟེང་ན་པདྨ་འདབ་མ་བརྒྱད། །དེ་སྟེང་རིན་ཆེན་ཟུར་བརྒྱད་པ། །འབར་བ་ཉིད་ཀྱིས་ཡང་དག་འཛིན། །ལྷག་མ་ཤར་གྱི་བཅོམ་ལྡན་ལྟར། །ཕྱག་མཚན་རྣམས་ནི་བསྣམས་པར་མཛད། །ནུབ་ཀྱི་དཀྱིལ་འཁོར་དམར་པོ་ལ། །མུཾ་ཡིག་འབར་བ་ལས་གྱུར་པའི། །ཐུབ་པའི་པདྨ་
བསྒོམ་བྱ་བ། །གཡས་ཀྱི་དང་པོ་རང་ཉིད་ཀྱི། །མཚན་མ་རྣམས་ནི་བསྣམས་པར་མཛད། །ལྷག་མ་ཤར་གྱི་བཅོམ་ལྡན་ལྟར། །ཕྱག་མཚན་རྣམས་ནི་བསྣམས་པར་མཛད། །བྱང་གི་དཀྱིལ་འཁོར་ལྗང་གུ་ལ། །བཅོམ་ལྡན་ལས་ཀྱི་པདྨ་ནི། །ཡི་གེ་ཀཾ་ལས་གྱུར་པ་སྟེ། །གཡས་ཀྱི་དང་པོར་
རང་ཉིད་རྟགས། །ཕྱག་གཞན་གོང་མ་རྣམས་བཞིན་ནོ། །ཤར་ལྷོར་རྡོ་རྗེ་སྒྲོལ་མ་ནི། །ལྷ་མོ་སྐུ་མདོག་སྔོ་སྐྱ་ལ། །ཞལ་གཅིག་ཕྱག་ནི་དྲུག་པའི་དབྱིབས། །གཡས་ཀྱི་དང་པོ་ཨུཏྤལ་ཏེ། །ཆུ་སྐྱེས་འདབ་མ་བརྒྱད་པ་ལ། །རྡོ་རྗེ་རྩེ་ལྔ་བསྣམས་པར་མཛད། །ཕྱག་གཞན་གྲི་གུག་པདྨ་དང་། །མེ་
ལོང་བསིལ་ཡབ་བུམ་པ་བསྣམས། །བཾ་ཡིག་ལས་གྱུར་དེ་ལྟར་བསམ། །ལྷོ་ནུབ་རིན་ཆེན་སྒྲོལ་མ་ནི། །རཾ་ཡིག་ལས་གྱུར་དམར་སེར་མདོག །ཕྱག་གཡས་དང་པོ་རང་ཉིད་རྟགས། །ལྷ་མོ་རྡོ་རྗེ་སྒྲོལ་མ་བཞིན། །ནུབ་བྱང་ཐུབ་པའི་སྒྲོལ་མ་ནི། །མུཾ་ཡིག་ལས་གྱུར་ལྗང་དམར་མདོག །

73-1-187a

དང་པོ་རང་གི་རྟགས་འཆང་བའོ། །བྱང་ཤར་ལས་ཀྱི་སྒྲོལ་མ་ནི། །གཾ་ཡིག་ལས་གྱུར་ལྗང་སྐྱའི་མདོག །ཕྱག་གཡས་རང་གི་རྟགས་འཆང་ཞིང་། །ཕྱག་གཞན་གོང་མ་རྣམས་དང་མཚུངས། །གྲ་བཞིར་རིན་ཆེན་བུམ་པ་བཞི། །ཁ་དོག་རྣམ་བཞིས་རྣམ་པར་གནས། །དེ་ཡི་ཕྱི་རོལ་
སྣམ་བུ་ལ། །ལིང་ཚེ་བཅུ་དྲུག་བྲི་བྱ་སྟེ། །ཕྱག་ན་རྡོ་རྗེ་འཇམ་དབྱངས་དང་། །ཀུན་གཟིགས་སྒྲིབ་པ་རྣམ་སེལ་དག །ཞལ་གཅིག་ཕྱག་ནི་གཉིས་པ་ལ། །ཁ་དོག་རྣམ་བཞིས་རྣམ་པར་གནས། །གཡས་ན་རྡོ་རྗེ་ཨུཏྤལ་དང་། །པདྨ་སྣ་ཚོགས་རྡོ་རྗེ་བསྣམས། །འགྱིང་བག་ཚུལ་དུ་གནས་པར་
མཛད། །གཡོན་པ་དང་བའི་ཕྱག་རྒྱའོ། །དེ་དག་ཀུན་གྱི་གཡོན་རོལ་དུ། །སྒེག་མོ་རིན་ཆེན་ཕྲེང་བ་དང་། །དབྱངས་དང་གར་གྱིས་མཉེས་མཛད་རྣམས། །རང་རང་ཕྱག་རྒྱས་ཡང་དག་གནས། །བྱམས་པ་ནམ་མཁའི་སྙིང་པོ་དང་། །ཀུན་བཟང་ས་ཡི་སྙིང་པོ་དག །རང་རང་ཁ་དོག་ཕྱག་རྒྱ་ཡིས། །དེ་ཡི་ཆ་ལ་རྣམ་པར་གནས། །
དེ་གཡོན་མེ་ཏོག་བདུག་སྤོས་དང་། །མར་མེ་དྲི་ཆབ་ལྷ་མོ་རྣམས། །རང་ཉིད་ཁ་དོག་ཕྱག་མཚན་གྱིས། །ཡང་དག་པར་ནི་གནས་པའོ། །ལྷ་རྣམས་དེ་དག་ཐམས་ཅད་ནི། །ཕྱག་རྒྱ་ལྔ་ཡིས་རྣམ་པར་བརྒྱན། །པདྨའི་སྟེང་ན་ཉི་ཟླ་ཡི། །སྟེང་ན་རབ་ཏུ་གནས་པའོ། །ཤར་དང་ལྷོ་དང་ནུབ་དང་བྱང་། །སྒོ་
རྣམས་ན་ནི་སྒོ་སྐྱོང་དག །ཤེས་རབ་མཐར་བྱེད་གཤིན་མཐར་བྱེད། །པདྨ་མཐར་བྱེད་བགེགས་མཐར་རྣམས། །དབུ་གསུམ་ཕྱག་ནི་དྲུག་པ་ལ། །འཇིགས་པའི་གཟུགས་ཀྱི་ཆ་ལུགས་ཅན། །ཕྱག་གཡས་དང་པོ་རལ་གྲི་དང་། །ཐོད་དབྱུག་པདྨ་རྒྱ་གྲམ་འཛིན། །ལྷག་མ་ལྕགས་ཀྱུ་ཞགས་
པ་དང་། །རྩེ་གསུམ་ལྕགས་སྒྲོག་དམ་པའི་བདག །རྡོ་རྗེ་བྲག་གི་སྟེང་གནས་པའོ། །དེ་ནས་དམ་ཚིག་སེམས་དཔའ་ཡི། །ཐུགས་ལས་འོད་ཟེར་སྤྲོས་ནས་ཀྱང་། །ཡེ་ཤེས་འཁོར་ལོ་སྤྱན་དྲངས་ནས། །མདུན་དུ་ཡང་དག་མཆོད་པར་བྱ། །སྔགས་དང་ཕྱག་རྒྱས་སྦྱོར་ཤེས་པས། །དམ་ཚིག་
འཁོར་ལོ་མྱུར་དུ་གཞུག །དེ་ནས་རང་གི་ས་བོན་ལས། །འོད་ཟེར་ནམ་མཁའི་ཕྱོགས་སྤྲོས་ནས། །པདྨའི་སྒྲོལ་སོགས་ལྷ་མོ་ལྔས། །ཡེ་ཤེས་ལྔ་ཡི་བུམ་པ་ཡིས། །ཆུ་ཡིས་བདག་ལ་དབང་བསྐུར་བའོ། །ཨོཾ་ཨ་བྷི་ཥིཉྩ་ཏུ་མཱཾ་ལོ་ཀ་ནཱ་ཐཱ་ཡ་ཧཱུཾ། དེ་ནས་བདག་ཉིད་སྙིང་ག་ལ། །རི་བོང་ཅན་

73-1-187b

དང་ཤིང་རྟ་བཅུ། །ཁ་སྦྱོར་ཕུར་མར་གནས་པ་ཡི། །ནང་དུ་ཆུ་སྐྱེས་འདབ་མ་བརྒྱད། །དེ་སྟེང་དུག་གསུམ་ཡི་གེ་ནི། །ཁ་དོག་དཀར་པོ་རྣམ་པར་གནས། །དེ་ལ་བསྟོད་ནས་དཀར་པོ་ནི། །རྒྱན་རྣམས་ཀུན་གྱིས་བརྒྱན་པའོ། །འཕྲོག་དང་ནང་དང་ཀུན་གྱི་སྟེང་། །དུག་གསུམ་ཡི་གེས་རྣམ་པར་བརྒྱན། །
དེ་ནས་དཀྱིལ་འཁོར་འཁོར་ལོ་ནི། །ཕྱོགས་བཅུ་དག་ཏུ་སྤྲོས་པ་ལས། །འགྲོ་བ་སེམས་ཅན་ཐམས་ཅད་ནི། །ཉོན་མོངས་ཐམས་ཅད་སྦྱངས་བྱས་ནས། །དཀྱིལ་འཁོར་འཁོར་ལོ་ངོ་བོས་གནས། །དེ་དག་རིམ་པར་བསྡུས་པ་ལས། །སྐུ་གསུང་ཐུགས་ཀྱི་རྡོ་རྗེ་ཅན། །ལྷ་ཡི་སྐུ་ནི་བསྒོམ་པར་བྱ། །
དེ་ནི་རང་བཞིན་འོད་གསལ་བའོ། །བསྒོམས་པས་སྐྱོ་ན་སྔགས་བཟླས་པ། །མུ་ཏིག་ཕྲེང་བའི་ཚུལ་གྱིས་སུ། །སྟེང་ནས་སྟེང་དུ་འབར་བ་ནི། །རང་བཞིན་འཁོར་བར་རྣམ་པར་བསམ། །དང་པོ་དག་དང་བར་གནས་པའི། །ཐ་མ་དག་གིས་བསྡུས་པ་ཡི། །སྔགས་ཀྱིས་ཡང་དག་བཟླས་པར་བྱ། །ཨོཾ་
པདྨ་ཧསྟཱ་ཡ། ས་ཧ་སྲ་བཛྲ་བྷུ་ཛ་ནཻ་ཏྲ། ནཱི་ལ་ཀཎྛ་ལོ་ཀེ་ཤྭ་རཱ་ཡ་ཧཱུཾ་ཧཱུཾ་ཕཊ། ཨོཾ་པདྨ་ཏཱ་རེ་ཧཱུཾ། ཨོཾ་བཛྲ་པདྨེ་ཧཱུཾ། ཨོཾ་རཏྣ་པདྨེ་ཧཱུཾ། ཨོཾ་མུ་ནི་པདྨེ་ཧཱུཾ། ཨོཾ་ཀརྨ་པདྨེ་ཧཱུཾ། ཨོཾ་བཛྲ་ཏཱ་རེ་ཧཱུཾ། ཨོཾ་མུ་ནི་ཏཱ་རེ་ཧཱུཾ། ཨོཾ་རཏྣ་ཏཱ་རེ་ཧཱུཾ། ཨོཾ་ཀརྨ་ཏཱ་རེ་ཧཱུཾ། ཨོཾ་བཛྲ་པཱ་ཎི་ཧཱུཾ། ཨོཾ་མཉྫུ་ཤྲཱི་ཧཱུཾ། ཨོཾ་ས་མནྟ་
ཀ་ཀ་ཧཱུཾ། ཨོཾ་ནི་བ་ར་ཎ་བི་སྐམྦྷི་ཧཱུཾ། ཨོཾ་བཛྲ་ལཱ་སྱེ་ཧཱུཾ། ཨོཾ་རཏྣ་མཱ་ལེ་ཧཱུཾ། ཨོཾ་པདྨ་གཱི་ཏི་ཧཱུཾ། ཨོཾ་ཀརྨ་ནི་རྟི་ཧཱུཾ། ཨོཾ་མཻ་ཏྲི་ཡ་ཧཱུཾ། ཨོཾ་ཨ་གང་སཾ་གུ་ར་བེ་ཧཱུཾ། ཨོཾ་ས་མནྟ་བྷ་དྲེ་ཧཱུཾ། ཨོཾ་ཀྵི་ཏི་གརྦྷེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་རཏྣ་པུཥྤེ་ཧཱུཾ། ཨོཾ་པདྨ་ཨཱ་ལོ་ཀེ་ཧཱུཾ། ཨོཾ་ཀརྨ་གནྡྷེ་ཧཱུཾ། ཨོཾ་པྲ་ཛྙཱ་ནྟ་
ཀ་ཧཱུཾ། ཨོཾ་ཡ་མཱནྟ་ཀ་ཧཱུཾ། ཨོཾ་པདྨཱ་ནྟ་ཀ་ཧཱུཾ། ཨོཾ་བིགྷྣཱན་ཏ་ཀ་ཧཱུ། མཆོད་པ་དག་ནི་ཉི་ཤུ་ཡི། །སྔགས་དང་ཕྱག་རྒྱས་ཡང་དག་མཆོད། །ཡི་གེ་བརྒྱ་པའི་གསང་སྔགས་ནི། །རྟག་ཏུ་འདོན་པ་ཉིད་དུ་བྱ། །ལམ་དུ་ཞུགས་དང་འཆགས་པའི་ཚེ། །སྤྱོད་ལམ་ལ་ནི་སྤྲོས་པ་ན། །
རྡོ་རྗེ་རྩེ་གཅིག་ཕྱག་རྒྱས་ནི། །འོད་བྱུང་སྟེང་ལ་སྙིང་པོ་ཡི། །སྔགས་དེ་ཡོངས་སུ་གྱུར་པ་དང་། །ཆོ་ག་གསུམ་ལས་རྟོགས་པ་ཡི། །རིམ་པ་བཞིན་དུ་ལྷ་བསམས་ནས། །ཡན་ལག་བཞི་ལ་རབ་ཏུ་བསྟིམ། །ཆོ་གའི་ཕྱག་རྒྱ་དཔའ་བོ་ལྔ། །ཕྱག་རྒྱ་འདི་ཡིས་ལུས་མཛེས་པའོ། །དེ་ནས་

73-1-188a

སྦྱིན་སྲེག་ཆོ་ག་ནི། །བདག་ཉིད་ཕྲིན་ལས་རྣམ་བཞི་ཡི། རྣལ་འབྱོར་ཡང་དག་བསམ་བྱས་ལ། །ལས་ཀྱི་དང་པོ་ཞི་བ་མཆོད། །དཀྱིལ་འཁོར་ཁྲུ་གང་ཟླུམ་པོ་ལ། །པདྨའི་ཕྲེང་བས་ནང་བསྐོར་ཞིང་། །རྡོ་རྗེ་འབར་བའི་ཕྲེང་བ་དག །དེ་ཡི་ཕྱི་རིམ་བྲི་བྱས་ལ། །དྲི་ཞིམ་དཀར་པོ་
ཞོར་ལྡན་པའི། །བསྲེག་ཅིང་ཀུ་ཤས་བཅིངས་ཏེ་གཟུགས། །གུ་གུལ་མེ་ཏོག་ཀུ་ཤ་དང་། །མར་དང་འབྲས་ཐུག་ཏིལ་དང་ནི། །འོ་ཐུག་ལུང་ཐང་སྔོན་པོ་དག །ལས་ཀྱི་སྔགས་ནི་མཐར་སྦྱར་ལ། །མེ་ལྷ་དེ་ཡི་སྙིང་ག་ཡི། །མཁའ་ལ་འཁོར་ལོ་བསམ་བྱས་ཏེ། །བདག་ཉིད་དམ་ཚིག་
སེམས་དཔའ་ཡི། །རིམ་པ་བཞིན་དུ་མཆོད་པའོ། །བྱ་བ་རྣམས་ནི་ཐམས་ཅད་ལ། །དེ་ཡི་ངོ་བོས་མཉམ་པར་གཞག །དེ་ནས་བསྟོད་པ་བྱ་བ་ནི། །སངས་རྒྱས་ཀུན་གྱི་གཟུགས་ཀྱི་སྐུ། །ཆོས་ཀྱི་སྐུ་སྟེ་གཞན་གྱི་མཆོག །སྔགས་ཀྱི་མགོན་པོ་མཆོག་གི་ལྷ། །སྙིང་རྗེའི་བདག་ཉིད་
ཕྱག་འཚལ་བསྟོད། །ཡེ་ཤེས་རྡོ་རྗེ་སྟོབས་པོ་ཆེ། །ཤིན་ཏུ་ངེས་པས་ཞི་བའི་ཚུལ། །ཐེག་པ་ཆེན་པོའི་གོ་འཕང་ཐོབ། །རྡོ་རྗེ་ཆོས་ལ་ཕྱག་འཚལ་བསྟོད། །ཤིན་ཏུ་དག་པའི་དཔའ་བོ་ཆེ། །མཆོག་གི་དབང་ཕྱུག་ཀུན་གྱི་མགོན། །དམ་ཆོས་མཆོག་ཏུ་མི་འགྱུར་བའི། །ཇི་བཞིན་འདུལ་
ལ་ཕྱག་འཚལ་བསྟོད། །ཅིར་ཡང་མི་དམིགས་སྟོང་པའི་ངང་། །ལྷན་ཅིག་སྐྱེས་པའི་རལ་གྲི་བསྣམས། །མི་རྟོག་ཡེ་ཤེས་གོ་ཆ་ཅན། །རྒྱུ་དང་འབྲས་བུ་ཕྱག་འཚལ་བསྟོད། །དེ་ནས་ཟས་ཀྱི་རྣལ་འབྱོར་ནི། །ཆུ་ཡི་དཀྱིལ་འཁོར་དེ་ལ་ཡང་། །རཾ་ལས་མེ་ཡི་དཀྱིལ་འཁོར་ནི། །གྲུ་
གསུམ་འབར་བ་བསམ་བྱས་ནས། །དེ་དཀྱིལ་ཚོགས་ཀྱི་འཁོར་ལོ་ཡང་། །གསལ་བར་རབ་ཏུ་བསམ་བྱས་ནས། །སྣོད་ནི་རབ་ལས་རིན་ཆེན་ནི། །རང་བཞིན་འབར་བར་བསྒོམ་བྱས་ནས། །དེར་ནི་ཁ་ཟས་སྣ་ཚོགས་རྣམས། །བསམས་ནས་དེ་དཀྱིལ་རྡོ་རྗེ་ནི། །རྩེ་ལྔ་རབ་ཏུ་འབར་བ་
ལས། །བདུད་རྩིར་གྱུར་པར་རབ་ཏུ་བསམ། །དེ་ནས་རང་གི་ས་བོན་ལས། །འོད་ཟེར་ཁ་དོག་སྣ་ལྔ་དག །ནམ་མཁའི་ཕྱོགས་སུ་འཕྲོས་པ་ལས། །ཕྱོགས་དུས་ཀུན་ན་བཞུགས་པ་ཡི། །དེ་བཞིན་གཤེགས་པ་ཐམས་ཅད་ཀྱི། །མཛོད་སྤུར་ཞུགས་ནས་ཐུགས་ཀྱི་ནི། །བདུད་རྩི་བླངས་

73-1-188b

ནས་དེ་ཉིད་དུ། །འདྲེས་པར་བསམས་ནས་སྔགས་འདི་ཡིས། །བྱིན་གྱིས་བརླབས་ནས་བཟའ་བར་བྱ། །ཨོཾ་ཨཱཿཧཱུཾ། བདག་གི་འཇིག་རྟེན་མགོན་པོ་ཡི། །སྒྲུབ་པའི་ཐབས་འདི་བྱས་པ་ཡིས། །སེམས་ཅན་འགྲོ་བ་མཐའ་དག་ལ། །ཉོན་མོངས་སྒྲུབ་པ་ཀུན་བསལ་ནས། །སྐུ་གསུང་ཐུགས་
ཀྱི་རྡོ་རྗེ་ཅན། །ལྷ་ཡི་སྐུ་ནི་ཐོབ་པར་ཤོག །སློབ་དཔོན་ཆེན་པོ་དངོས་གྲུབ་བརྙེས་པ། ཏ་ཐཱ་ག་ཏ་བཛྲའི་ཞལ་སྔ་ནས་མཛད་པ། བཅོམ་ལྡན་འདས་ཕྱག་སྟོང་སྤྱན་སྟོང་གི་སྒྲུབ་ཐབས་རྫོགས་སོ།།      །།མཁས་པའི་འབྱུང་གནས་ཤར་ཕྱོགས་བྷཾ་ག་ལའི། །ཉི་མ་འབྱུང་གནས་ཟླ་བ་
ཞེས་བྱ་བ། །མཁས་པ་ཆེན་པོ་དེ་ཡི་ཞལ་སྔ་ནས། །བོད་ཀྱི་ལོ་ཙཱ་དགེ་ཚུལ་ཁྱུང་གྲགས་ཀྱིས། །འདུལ་བའི་བསྟན་པ་སྙིང་པོར་གནས་པའི་ས། །དཔལ་ལྡན་རྒྱན་གོང་གཙུག་ལག་ཁང་དེ་རུ། །བདེར་གཤེགས་བསྟན་ལ་ཕན་ཕྱིར་བསྒྱུར་ལགས་ཀྱི། །རྣལ་འབྱོར་སྤྱོད་རྣམས་
ངེས་པར་བརྩོན་པར་མཛོད། །༄༅༅། །རྒྱ་གར་སྐད་དུ། ཨཱརྱཱ་བ་ལོ་ཀི་ཏེ་ཤྭ་ར་ཙིནྟ་མ་ཎི་ཙཀྲ་ཝརྟྟི་སཱ་དྷ་ནཾ། བོད་སྐད་དུ། འཕགས་པ་འཇིག་རྟེན་དབང་ཕྱུག་གི་ཡིད་བཞིན་གྱི་ནོར་བུ་འཁོར་ལོས་སྒྱུར་བའི་སྒྲུབ་ཐབས། ཐུགས་རྗེ་ཆེན་པོ་ལ་ཕྱག་འཚལ་ལོ། །འགྲོ་བ་
སྐྱོབ་མཛད་ཐུགས་རྗེ་ཆེན་པོའི་གཙོ། །ཟླ་བའི་ནོར་ལྟའི་སྐུ་མངའི་ཐུགས་རྗེ་དང་། །མཆོག་སྦྱིན་དེ་ལ་གསུམ་གྱིས་ཕྱག་འཚལ་ནས། །ཉི་མའི་ཟེར་གྱིས་མུན་བསལ་ཆུ་སྐྱེས་ཁ་འབྱེད་ལྟར། །ཐུགས་རྗེའི་འོད་ཀྱིས་མ་རིག་མུན་སེལ་སྙིང་གི་པདྨ་འབྱེད་མཛད་པའི། །སྒྲུབ་ཐབས་དམ་པ་བཀའ་
དྲིན་དྲན་ཕྱིར་བྲི་བར་བྱ། །མེ་ཏོག་ར་བ་ལ་སོགས་གཙང་མ་ཡིད་དགའི་གནས་སུ་ནི། །རྣམ་ལྔ་ཧྲཱིཿཡིས་བསྔགས་པའི་མཎྜལ་ལེགས་པར་བྱ། །ཁ་དོག་དཀར་པོའི་མེ་ཏོག་ལ་སོགས་མཆོད་པ་ལྡན་བྱས་ལ། །ཡི་གེ་གསུམ་ལྡན་ཁྲུས་ཀྱིས་དྲི་མ་གཉིས་བཀྲུས་ཏེ། །ཉོན་མོངས་མཐའ་
དག་གཞིག་ཕྱིར་བདེ་བའི་སྟན་ལ་འདུག །ཡི་གེ་གསུམ་ལྡན་ཧྲཱིཿཡིས་གནས་བདག་རྣལ་འབྱོར་བསྲུང་། །སྙིང་གར་ཟླ་བའི་དཀྱིལ་འཁོར་སྟེང་དུ་ཧྲཱིཿཡིག་དཀར་པོ་བསམ། །འོད་ཀྱིས་འགྲོ་བའི་དོན་བྱས་འཇིག་རྟེན་དབང་ཕྱུག་སྤྱན་དྲངས་ཏེ། །ཡི་གེ་གསུམ་ལྡན་ཧྲཱིཿཡིས་མེ་ཏོག་

73-1-189a

ལ་སོགས་མཆོད་པ་འབུལ། །དེ་ནས་སྡིག་པ་བཤགས་ཤིང་མི་བགྱིད་སྡོམ་པ་བླང་། །རྗེས་སུ་ཡི་རང་སྐྱབས་སུ་འགྲོ་བ་དང་། །བྱང་ཆུབ་མཆོག་ཏུ་སེམས་བསྐྱེད་དགེ་བའི་རྩ་བ་བསྔོ། །འཁོར་བའི་རྒྱ་མཚོ་སྒྲོལ་མཛད་ཐུགས་རྗེའི་འོད་ཀྱིས་བལྟ། །བྱམས་པའི་འོད་ཀྱིས་
སེམས་ཅན་འཇིག་རྟེན་མགོན་གྱི་གཟུགས་སུ་མཐོང་། །དགའ་བའི་འོད་ཀྱིས་སེམས་ཅན་བདེ་ལྡན་རྒྱུན་མི་འཆད་པར་བསམ། །བཏང་སྙོམས་འོད་ཀྱིས་གཟུང་འཛིན་ཆ་སྤངས་ཆོས་ཉིད་མཐོང་བར་བལྟ། །གཟུང་བ་དག་ཕྱིར་སྔགས་འདིས་བྱིན་གྱིས་བརླབ་པར་བྱ། །ཨོཾ་སྭ་བྷཱ་བ་བི་ཤུདྡྷཿ
སརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། འཛིན་པ་དག་ཕྱིར་སྔགས་འདིས་བྱིན་གྱིས་བརླབས། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། དྲི་མེད་ནམ་མཁའ་ལྟ་བུར་ཀུན་བལྟས་ཏེ། །དབུས་སུ་པཾ་སྐྱེས་པདྨ་དཀར་པོ་སྡོང་པོར་བཅས། །ལྟེ་བར་ཧྲཱིཿལས་བྱུང་བ་ཆུ་ཤེལ་འོད་དང་ལྡན། །དེ་དབུས་ཧྲཱིཿ
ཡིག་ལས་བྱུང་ཡིད་བཞིན་ནོར་བུ་འབར། །ཧྲཱིཿལྡན་འོད་ཀྱིས་འགྲོ་བའི་དོན་བྱས་ཏེ། །ཕྱོགས་བཅུའི་རྒྱལ་སྲས་བཀུག་སྟེ་ནོར་བུ་བྱིན་བརླབས་པས། །དེ་ཡོངས་གྱུར་ཏེ་འཇིག་རྟེན་དབང་ཕྱུག་བཞེངས། །ཞལ་གཅིག་ཕྱག་གཉིས་འགྱིང་བག་འོད་ཟེར་དཀར་པོ་འབར། །གུ་ལང་
དཀར་པོའི་མདོག་བཞིན་གཞོན་ནུ་རྒྱན་ཆ་ཅན། །ཕྱག་གཡས་སྦྱིན་པ་བཞི་ཡི་གཏེར་སྦྱིན་ཡིད་བཞིན་ནོར་བུ་འབར། །ཕྱག་གཡོན་འཁོར་བ་སྒྲོལ་ཕྱིར་འཁོར་ལོ་རིན་ཆེན་ལྡན། །སྤྱི་གཙུག་ཐོར་ཚུགས་སྟེང་ན་གསུང་གི་དབང་ཕྱུག་བཞུགས། །ཐུགས་རྗེའི་འོད་ཀྱིས་འགྲོ་བ་ཀུན་ཁྱབ་བྱེད། །རང་
སྙིང་པད་སྟེང་ཟླ་བའི་དཀྱིལ་འཁོར་ལ། །ནོར་བུའི་དབུས་ན་ཧྲཱིཿཡིག་དཀར་པོ་གསལ། །དེ་འོད་ལས་བྱུང་སྒྲོལ་མ་ཁྲོ་གཉེར་ཅན་སོགས་ཕྱོགས་བཞིའི་ལྷ། །པདྨ་ཟླ་བའི་སྟེང་ན་འགྱིང་བག་ལྡན་པར་བཞུགས། །ཕྱི་རོལ་རྒྱལ་ཆེན་བཞི་དང་མཆོད་པའི་ལྷ་མོ་སྤྲུལ། །དེ་དག་སྐུ་མདོག་སོ་
སོའི་ཕྱག་མཚན་གཙོ་བོར་མཚུངས་པར་བལྟ། །ཀུན་ཀྱང་ཐུགས་ཀར་ཟླ་བ་ལ་གནས་ནོར་བུ་ས་བོན་བསམ། །འོད་ཟེར་ལྕགས་ཀྱུ་དང་མཚུངས་ནམ་མཁའ་ཁྱབ་སྤྲོས་ཏེ། །ཡེ་ཤེས་འཁོར་ལོ་སྤྱན་དྲངས་མེ་ཏོག་ལ་སོགས་པས། །ཡོངས་སུ་མཆོད་ནས་ལེགས་པར་སྔགས་འདིས་གཞུག ། 

73-1-189b

ཛཿཧཱུཾ་བཾ་ཧོཿས་འོ་མ་ཆུ་ལྟར་ཐ་དད་མེད་པའི་འཁོར་ལོ་ལ། །སྐྱེ་མཆེད་གནས་སུ་ཟླ་བ་ཧྲཱིཿཡིག་བསམ། །སྐུ་གསུང་ཐུགས་ལ་ཡི་གེ་གསུམ་ལྟས་ལ། །ཐུགས་ཀའི་འོད་ཀྱིས་དེ་བཞིན་གཤེགས་པ་བསྐུལ། །མཆོད་བསྟོད་བྱས་ནས་གསོལ་བ་གདབ་པར་བྱ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། 
དེ་ནས་དེ་བཞིན་གཤེགས་རྣམས་ཀྱིས། །ལྷ་ཡི་ཆུ་ལྡན་བུམ་པས་ནི། །འཁོར་ལོ་ལ་ནི་དབང་བསྐུར་ཏེ། །སྤྱི་བོ་འོད་དཔག་མེད་པས་བརྒྱན། །གཟུགས་སོགས་རྣལ་འབྱོར་མ་རྣམས་ཀྱིས། །འཁོར་ལོ་ལ་ནི་ལེགས་པར་མཆོད། །སངས་རྒྱས་བྱང་ཆུབ་སེམས་དཔའ་ལ། །དེ་དག་གིས་ནི་བསྟོད་
པར་བྱ། །དེ་ནས་ཐུགས་ཀྱི་ས་བོན་ལས། །ཡི་གེ་སྔགས་ཀྱི་ཕྲེང་བ་ནི། །མར་མེ་ལྟ་བུར་རབ་བལྟས་ལ། །འོད་ཀྱིས་སེམས་ཅན་ཐམས་ཅད་ནི། །འཇིག་རྟེན་མགོན་པོར་བསྒྲུབ་བྱས་ཏེ། །ཡི་གེའི་ཕྲེང་བ་རྣམས་ལ་བསྟིམ། །ཞལ་དང་ལྟེ་བའི་བར་དུ་ནི། །རྒྱུན་མི་འཆད་པའི་ཕྲེང་བར་བསྒོམ། །ཨོཾ་
ཙིནྟ་མ་ཎི་ཙཀྲ་བརྟི་མ་ཎི་པདྨེ་ཨཱཿཧྲཱིཿཧཱུཾ་ཕཊ་སྭཱ་ཧཱ། སྙིང་པོའི་སྔགས་སོ། །ཨོཾ་པདྨ་བྷ་ར་ཏ་ཀེ་ཨཱ་ཧྲཱིཿཧཱུཾ་ཕཊ་སྭཱ་ཧཱ། ཉེ་བའི་སྙིང་པོའི་སྔགས་སོ། །རྩ་བའི་སྔགས་ལ་སོགས་པ་རྣམས། །ས་བོན་ཡི་གེ་གསུམ་དང་ལྡན། །སྭཱ་ཧཱ་ཕཊ་ཅེས་བཟླས་པར་བྱ། །འོད་ཟེར་ལ་ནི་ཡིག་འབྲུ་དགུས། །རྡོ་རྗེ་སྐུད་པ་
ལྟ་བུ་ཡི། །འཁོར་བར་བཟླས་པས་ལུས་ཁྱབ་ནས། །སྒྲིབ་པ་གཉིས་སྤངས་ཡེ་ཤེས་ཀྱི། །འཁོར་ལོ་གསལ་བར་སྟོན་པར་བྱེད། །འཇིག་རྟེན་འཇིག་རྟེན་འདས་པ་ཡི། །ལྷ་རྣམས་ཀྱིས་ནི་བསྙེན་འགྱུར་ཏེ། །ཐུན་མོང་ཐུན་མོང་མ་ཡིན་པའི། །འདོད་པའི་དངོས་གྲུབ་སྟེར་བར་བྱེད། །བྱེ་བ་
གསུམ་རྫོགས་སྔགས་པ་ཡིས། །རབ་དགའ་ལ་སོགས་ས་ཐོབ་ནས། །ས་བཅུའི་དབང་ཕྱུག་མཐོང་བར་འགྱུར། །སྔགས་བཟླས་དུས་སུ་ཆོ་ག་ནི། །གཙང་མར་བྱས་པའི་ས་ཕྱོགས་སུ། །གུ་གུལ་ཙནྡན་ཨ་ཀ་རུ། །པུ་སྐ་ས་དུས་ཙོ་རི་ཀ །གོ་རོ་ཙ་ན་ཤིང་གི་བཅུད། །ལེགས་སྦྱར་དུང་
ངམ་ཉ་ཕྱིས་སུ། །བཞག་སྟེ་བརྩེ་བ་ལ་སོགས་པའི། །གཟུངས་སྔགས་སྟོང་ཕྲག་བཟླས་ནས་ནི། །ཕྱག་གཡས་ཟླ་བ་དྲི་བཅས་པས། །དཀྱིལ་འཁོར་ཁྲུ་དོ་ལ་སོགས་བྱུག །པདྨ་དཀར་པོ་ལ་སོགས་པའི། །མེ་ཏོག་ལྷ་ཡི་གནས་སུ་བཀོད། །དེར་ནི་པཾ་སྐྱེས་པདྨ་ནི། །དཀར་པོ་འདབ་

73-1-190a

མ་བརྒྱད་པ་ནི། །རིམ་པ་གསུམ་དུ་གནས་པར་བསམ། །ལྷ་རྣམས་ཐུགས་ཀྱི་ས་བོན་ལས། །ལྷ་ཡི་འཁོར་ལོ་སྤྲུལ་བྱས་ཏེ། །པདྨ་རིམ་པ་གསུམ་དག་ལ། །རིམ་པས་ལྷ་རྣམས་བཞུགས་པར་བསམ། །ཡེ་ཤེས་འཁོར་ལོ་སྤྱན་དྲངས་བསྟིམ། །དབང་བསྐུར་ཆོ་ག་རྫོགས་
པ་དང་། །སྐྱེ་མཆེད་གནས་གསུམ་བྱིན་བརླབས་ཏེ། །ཨ་ཀ་རུ་དང་ཤེལ་སྤང་ཀ །བྲ་མ་ཙ་རི་ལ་སོགས་པའི། །དྲི་ཞིམ་སྤོས་ཀྱིས་མཆོད་པར་བྱ། །པདྨ་དཀར་པོ་ཙམ་པ་ཀ །ཛཱ་ཡ་ཀུནྡས་མཆོད་པར་བྱ། །ག་པུར་གོ་རོ་ཙ་ན་དང་། །ཙནྡན་དཀར་པོར་ལྡན་པ་ཡི། །དྲི་ཞིམ་མར་གྱི་མར་མེ་
དབུལ། །སཱ་ལུ་དཀར་པོ་ཞོ་ཟན་དང་། །སྦྲང་བཅས་འོ་མ་དབུལ་བར་བྱ། །དྲི་ཞིམ་དཀར་པོ་ཆུ་ཡིས་ནི། །སྐུ་ལ་བྱུག་པ་དབུལ་བར་བྱ། །ན་བཟའ་རྒྱན་དང་མེ་ཏོག་ཕྲེང་། །གདུགས་དང་བ་དན་རྒྱལ་མཚན་དང་། །རླུང་ཡབ་ལ་སོགས་རྒྱན་རྣམས་དབུལ། །དྲིལ་བུ་པི་ཝང་རྫ་རྔ་དང་། །གླིང་
བུ་རྔ་རིངས་པ་ཊ་ཧ། །སྒྲ་མཆོག་རྣམས་ཀྱིས་མཆོད་པར་བྱ། །སངས་རྒྱས་བྱང་ཆུབ་སེམས་དཔའ་དང་། །བླ་མ་འཁོར་ལོར་བཅས་པ་ལ། །བསྟོད་ནས་གསོལ་བ་གདབ་པར་བྱ། །འཁོར་ལོའི་ལྷ་རྣམས་ཐམས་ཅད་ཀྱི། །ཐུགས་ཀར་པད་སྟེང་ཟླ་བ་ལ། །ཧྲཱིཿཡིག་སྔགས་ཀྱིས་བསྐོར་
བར་བལྟ། །འོད་ཟེར་སྔགས་ཀྱི་ཕྲེང་བ་ནི། །ཞལ་ནས་བྱུང་སྟེ་རྗེས་གནང་ཚུལ། །བདག་གི་ཞལ་ཞུགས་ཐུགས་ཀར་ཐིམ། །དེ་དག་ཁྲི་ཕྲག་སྔགས་བཟླས་ནས། །ཞི་དང་རྒྱས་དང་དབང་དྲག་པོ། །སྔགས་ཕྲེང་ཁ་དོག་བཞིར་ཤེས་ནས། །མདུན་གྱི་དཀྱིལ་འཁོར་ལྷ་རྣམས་ལ། །རྗེས་
སུ་མཐུན་པའི་གསོལ་བ་གདབ། །འཇིག་རྟེན་འཇིག་རྟེན་འདས་པ་ཡི། །འཁོར་ལོར་བཅས་པའི་ལྷ་རྣམས་ཀྱིས། །གང་འདོད་དངོས་གྲུབ་སྦྱིན་པར་བསམ། །དེ་ནས་ལྷ་རྣམས་ཐུགས་ཀར་བསྡུ། །དེ་ལྟར་ཆོ་ག་བྱས་ནས་ནི། །མཆོད་བསྟོད་གསོལ་གདབ་སྔོན་འགྲོ་བས། །གཟུངས་
སྔགས་བཟླས་པ་བརྩོན་པར་བྱ། །བསྙེན་པ་རྫོགས་པར་གྱུར་ན་ནི། །གང་ཞིག་བདག་གམ་ནད་པའམ། །གདོན་ཆེན་ཉེན་དང་ཚེ་ཉམས་དང་། །འཇིགས་པ་བརྒྱད་ཀྱིས་ཉེན་པ་ལ། །བསྲུང་བའི་ཆོ་ག་བརྩམ་པར་བྱ། །ཤིས་པར་གྱུར་པའི་ཉི་མ་ལ། །རས་སམ་ཤིང་ལོ་གྲོ་ག་ནི། །དྲི་ཞིམ་སྤོས་

73-1-190b

ཀྱིས་བདུགས་པ་དང་། །ཉེ་བའི་སྙིང་པོ་སྟོང་ཕྲག་གཅིག །ཧྲཱིཿབཅས་སྔགས་ཀྱིས་བྱིན་བརླབས་ཏེ། །གུར་གུམ་གོ་རོ་ཙ་ན་དང་། །ཀོར་སི་ཤ་ལྡན་ཁུ་བ་ཡིས། །འཁོར་ལོ་ལེགས་པར་བྲི་བར་བྱ། །མེ་ཏོག་དཀར་པོའི་ཡུ་བ་ཡིས། །པདྨ་དཀར་པོ་འདབ་བརྒྱད་བྲི། །དབུས་སུ་ཧྲཱིཿཆེན་བྲིས་པའི་ནང་། །
སྒྲུབ་པོས་ལེགས་པར་བྲི་བར་བྱ། །ཕྱི་རོལ་པདྨའི་ལྟེ་བ་ལ། །ཡི་གེ་གསུམ་ལྡན་ཉེ་སྙིང་པོ། །ཧྲཱིཿཡིག་བར་དུ་སྒྲུབ་པ་པོ། །རཀྵ་ཀུ་རུ་ལྡན་པར་བྲི། །པདྨའི་འདབ་མ་བརྒྱད་ལ་ནི། །སྙིང་པོ་སྤེལ་སྔགས་ལྡན་པར་བྲི། །པདྨའི་མུ་ཁྱུད་ཐ་མ་ལ། །རྩ་བའི་གཟུངས་སྔགས་གོང་དང་མཚུངས། །གཙང་
སྦྲ་ལྡན་པས་བྲིས་ནས་ནི། །དཀྱིལ་འཁོར་དྲི་ཡིས་ལེགས་བྱུགས་ལ། །མེ་ཏོག་དཀར་པོ་དྲི་ཞིམ་པོ། །སིལ་མ་ལེགས་པར་བཀྲམ་པ་ཡི། །སྟེང་དུ་འཁོར་ལོ་ལེགས་པར་གཞག །ལྷ་རྣམས་ཐུགས་ཀའི་འོད་ཟེར་གྱིས། །འཁོར་ལོའི་འོད་ཀྱིས་སེམས་སྦྱངས་ཏེ། །པཾ་བསྐྱེད་པདྨའི་གནས་རྣམས་
སུ། །གཟུངས་སྔགས་མར་མེའི་ཕྲེང་བ་བཞིན། །འོད་ལྡན་གསལ་བར་བསྒོམ་པར་བྱ། །དེ་ནས་ཐུགས་ཀའི་འོད་ཟེར་གྱིས། །ལྷ་ཡི་འཁོར་ལོ་སྤྱན་དྲངས་ཏེ། །མཆོད་དང་བསྟོད་པ་བྱས་ནས་ནི། །འཁོར་ལོ་ལ་ནི་བསྟིམ་པར་བྱ། །ལྷ་རྣམས་ཐུགས་ཀ་ནས་སྤྲོས་པའི། །རྩ་བའི་གཟུངས་སྔགས་
ལ་སོགས་པའི། །ཁྲི་ཕྲག་བཟླས་པ་འཁོར་ལོར་བསྟིམ། །དེས་ནི་སྲུང་བའི་སྒྲུབ་པ་རྫོགས། །མཆོག་གི་དངོས་གྲུབ་སྒྲུབ་འདོད་པས། །གོང་གི་དཀྱིལ་འཁོར་ལེགས་བྱས་ཏེ། །དབུས་སུ་གཙོ་བོ་ལ་སོགས་པ། །ལྷ་རྣམས་ཆོ་ག་གསུམ་གྱིས་བསྐྱེད། །ཡེ་ཤེས་སྤྱན་འདྲེན་ལ་སོགས་པ། །ཆོ་
གའི་ཡན་ལག་ཐམས་ཅད་ཀྱང་། །གོང་གི་མཆོད་པའི་རྫས་རྣམས་ཀྱིས། །དུས་གསུམ་ལེགས་པར་མཆོད་བྱས་ལ། །ཡི་གེ་གྲངས་ཀྱི་འབུམ་ཕྲག་བཟླ། །ཐུན་མཚམས་གསོལ་གདབ་བསྐོར་བ་ནི། །བརྒྱ་འམ་སྟོང་ཕྲག་རེ་རེ་བྱ། །དེ་ཚེ་ཐུགས་རྗེ་བྱིན་རླབས་ཀྱིས། །འཁོར་ལོ་ཞལ་སྟོང་ཡང་ན་
ནི། །དངོས་གྲུབ་རྗེས་སུ་གནང་བ་སྦྱིན། །ལུས་ལ་འོད་ཟེར་འབྱུང་བ་དང་། །དྲི་ཞིམ་ཤེལ་གྱི་མདོག་དང་མཚུངས། །སེམས་ཅན་ཐམས་ཅད་དད་གྱུར་ཅིང་། །གཅན་གཟན་རི་དགས་འབྲོས་མི་འགྱུར། །ནམ་མཁར་འཕུར་དང་ཤིང་རྟ་ཞོན། །རྒྱ་མཚོ་སྒྲོལ་དང་རི་རྒྱལ་འཛེག །ནོར་བུ་འཁོར་

73-1-191a

ལོ་རྙེད་པ་དང་། །པདྨ་དཀར་པོ་ཟླ་བ་མཐོང་། །ཧྲཱིཿབཅས་ཡི་གེ་ཞལ་ཞུགས་མཐོང་། །རང་མདོག་དཀར་པོ་ཁྲུས་བྱེད་ན། །དེ་དག་འགྲུབ་པའི་རྟགས་སུ་བཤད། །དེ་ནས་སྨན་མཆོག་རི་ལུ་བསྒྲུབ། །བུམ་པ་བཟང་པོའི་ནང་དུ་ནི། །ཡུངས་ཀར་བ་ཡི་རྣམ་ལྔ་དང་། །རུ་རྟ་ཙནྡན་
དཀར་པོ་དང་། །ཤི་རི་ཁཎྜ་ག་པུར་དང་། །རྣམ་པར་རྒྱལ་བའི་ཨ་རུ་ར། །སྨན་ལྔ་འབྲུ་ལྔ་རིན་ཆེན་ལྔ། །དྲི་ལྔ་སྙིང་པོ་ལྔ་བཅས་ཏེ། །རྒྱུ་སྐར་རྒྱལ་གྱི་ཉི་མ་ལ། །བུམ་པར་སྩལ་ཏེ་དཀྱིལ་འཁོར་གྱི། །དབུས་སུ་ལེགས་པར་གཞག་པར་བྱ། །དེ་སྟེང་གདུགས་དང་བ་དན་དང་། །ཕྱོགས་
བཞིར་རྒྱལ་མཚན་གདགས་པར་བྱ། །དེར་ནི་ལྷ་ཡི་འཁོར་ལོ་ནི། །ཆོ་ག་གསུམ་གྱིས་བསྐྱེད་པར་བྱ། །ཡེ་ཤེས་སྤྱན་དྲངས་ལ་སོགས་པ། །ཆོ་ག་རྫོགས་པར་བྱས་ནས་ནི། །དུས་གསུམ་མཆོད་དང་བསྟོད་པར་བྱ། །འཇིག་རྟེན་མགོན་པོའི་ཐུགས་ཀར་ནི། །པཾ་བསྐྱེད་པདྨ་ཟླ་བའི་སྟེང་། །
ཨ་ལས་བུམ་པ་བཟང་པོར་གྱུར། །ནང་དུ་ཧྲཱིཿས་མཚན་རི་ལུ་བསམ། །གཙོ་བོ་ལ་སོགས་ལྷ་རྣམས་ཀྱི། །ཐུགས་ལས་རྩ་བའི་སྙིང་པོ་དང་། །ཉེ་སྙིང་སྤྲོས་ནས་རི་ལུར་བསྟིམ། །ཐུན་མཚམས་བསྐོར་བ་བརྒྱ་ཕྲག་བྱས། །དེ་ཚེ་རི་ལུ་ལྷར་མཐོང་ན། །འཇིག་རྟེན་མགོན་པོ་འགྲུབ་པར་འགྱུར། །
རི་ལུ་རྒྱལ་ཆེན་བཞིར་མཐོང་ན། །ཞི་སོགས་ཕྲིན་ལས་འགྲུབ་པར་འགྱུར། །རི་ལུ་ཉི་མ་ཟླ་བར་མཐོང་། །མཁའ་ལ་འགྲོ་འགྱུར་ཐེ་ཚོམ་མེད། །རི་ལུ་འཁོར་ལོ་ནོར་བུར་མཐོང་། །ཡིད་བཞིན་དངོས་གྲུབ་འགྲུབ་པར་འགྱུར། །དེ་ཚེ་བུམ་པའི་གཟུགས་མཐོང་ན། །ས་འོག་དངོས་གྲུབ་འགྲུབ་
པར་འགྱུར། །འོད་མཐོང་ལྷ་ཡི་སྤྱན་དང་འདྲ། །སྒྲ་བྱུང་ལྷ་ཡི་སྙན་དང་ལྡན། །རལ་གྲིས་ཤེས་རབ་འཕེལ་བར་འགྱུར། །དུ་བ་བྱུང་བས་ཚེ་འཕེལ་འགྱུར། །དྲི་ཡིས་ནད་རྣམས་ཞི་བྱེད་འགྱུར། གཞན་ཡང་བཟླས་པ་ལ་སོགས་པའི། །སྒྲུབ་པ་གཟུངས་ཀྱི་ཆོ་གར་ཤེས། །བདག་གིས་སྒྲུབ་
ཐབས་འདི་བརྩམས་པས། །དེ་ཡིས་བསོད་ནམས་གང་ཐོབ་པ། །འཁོར་བའི་སེམས་ཅན་ཐམས་ཅད་ཀུན། །འཇིག་རྟེན་མགོན་པོ་ཐོབ་པར་ཤོག །འཕགས་པ་འཇིག་རྟེན་དབང་ཕྱུག་ཡིད་བཞིན་གྱི་ནོར་བུ་འཁོར་ལོས་སྒྱུར་བའི་སྒྲུབ་ཐབས། སློབ་དཔོན་ཛེ་ཏཱ་རིས་མཛད་པ་རྫོགས་སོ།།      །།

73-1-191b

པཎྜི་ཏ་པུརྞ་ཀཱིརྟི་དང་། སྣ་ནམ་རྡོ་རྗེ་བླ་མས་བསྒྱུར་བའོ། །༄༅༅། །རྒྱ་གར་སྐད་དུ། ལོ་ཀེ་ཤྭ་ར་སཱ་དྷ་ནཾ། བོད་སྐད་དུ། འཇིག་རྟེན་དབང་ཕྱུག་གི་སྒྲུབ་ཐབས། འཇིག་རྟེན་དབང་ཕྱུག་ལ་ཕྱག་འཚལ་ལོ། །རྗེ་བཙུན་འཇིག་རྟེན་དབང་ཕྱུག་བསྒོམ་པར་འདོད་པས། དང་པོར་
སྐྱབས་འགྲོ་དང་སེམས་བསྐྱེད་བྱས་ནས་རང་གི་སྙིང་གར་ཡི་གེ་ཨ་དཀར་པོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་དང་། དེའི་སྟེང་དུ་ཡི་གེ་ཧྲཱིཿདཀར་པོ་གཅིག་བསྒོམ་པར་བྱའོ། །དེ་ལས་འོད་ཟེར་འཕྲོས་པས་རི་པོ་ཏ་ལ་ན་རྗེ་བཙུན་འཇིག་རྟེན་དབང་ཕྱུག་བཞུགས་པ་དེ་མདུན་གྱི་ནམ་མཁར་
སྤྱན་དྲངས་ཏེ་དེ་ལ་རང་གི་ལུས་དཔག་ཏུ་མེད་པར་སྤྲུལ་ནས་ཡིད་ཀྱིས་ཕྱག་བྱས་པར་བསམ་ཞིང་སྙིང་གའི་ཧྲཱིཿའི་འོད་ཟེར་གྱིས་མཆོད་པ་ལྔས་མཆོད་དེ། སྡིག་པ་ཐམས་ཅད་ནི་སོ་སོར་བཤགས་སོ། །བསོད་ནམས་ཐམས་ཅད་ལ་རྗེས་སུ་ཡི་རང་ངོ་། །སངས་རྒྱས་ཐམས་ཅད་ལ་གསོལ་བ་འདེབས་སོ། །
བདག་གིས་བླ་ན་མེད་པའི་ཡེ་ཤེས་ཐོབ་པར་གྱུར་ཅིག་ཅེས་བརྗོད་དོ། །དེ་ནས་ཡེ་ཤེས་པ་དེའི་ཐུགས་ཀའི་ཡི་གེ་ཧྲཱིཿལས་འོད་ཟེར་བྱུང་སྟེ། རང་གི་སྙིང་གའི་ཡི་གེ་ཧྲཱིཿལ་ཐིམ་དེ་ལས་འོད་ཟེར་འཕྲོས་པས་རང་གི་སྒྲིབ་པ་གཉིས་དག་པར་བྱས་ཏེ་རང་རྗེ་བཙུན་འཇིག་རྟེན་དབང་ཕྱུག་སྐུ་མདོག་
དཀར་པོ་ཞལ་གཅིག་ཕྱག་བཞི་པ། ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་ཀྱི་གཉིས་པ་ན་ནོར་བུའི་བགྲང་ཕྲེང་། གཡོན་གྱི་གཉིས་པ་ནི་པདྨ་དཀར་པོ་འཛིན་པ། རལ་པའི་ཐོར་ཚུགས་ཅན་སངས་རྒྱས་འོད་དཔག་མེད་ཀྱིས་དབུ་བརྒྱན་པ། རིན་པོ་ཆེའི་རྒྱན་ཀུན་གྱིས་སྤྲས་
ཤིང་། ལྷ་རྫས་ཀྱི་ན་བཟའ་དང་ལྡན་པ་ཅིག་ཏུ་གྱུར་པར་བསམ། དེ་ནས་ཡེ་ཤེས་པ་དེ་རང་དམ་ཚིག་པ་ལ་ཐིམ་པས་དབྱེར་མེད་དུ་གྱུར་པར་བསྒོམ། ཡང་རང་གི་སྙིང་གའི་ཡི་གེ་ཧྲཱིཿལས་འོད་ཟེར་འཕྲོས་པས་སེམས་ཅན་ཐམས་ཅད་ལ་ཕོག་སྟེ་དེ་རྣམས་ཀྱི་སྒྲིབ་པ་གཉིས་དག་པར་བྱས་
ནས་ཐམས་ཅད་རྗེ་བཙུན་འཇིག་རྟེན་དབང་ཕྱུག་ཏུ་གྱུར་པར་བསྒོམ་ཞིང་། དེ་རྣམས་ཀྱི་ངག་ཏུ་སྒྲ་ཅི་གྲག་པ་ཐམས་ཅད་ཀྱང་ཡི་གེ་དྲུག་པ་ཟློས་པར་བསམ། རང་གིས་ཟློས་པའི་ཚེ་དེ་ཐམས་ཅད་ཀྱིས་ཡི་གེ་དྲུག་པ་དི་རི་རི་ཟློས་པར་བསྒོམ་ཞིང་དག་པར་བཟླས་སོ། །མཐར་ཡོངས་སུ་དག་པའི་

73-1-192a

བསྔོ་བ་བྱའོ། །འཇིག་རྟེན་དབང་ཕྱུག་ཞལ་གཅིག་ཕྱག་བཞི་པའི་སྒྲུབ་ཐབས་རྫོགས་སོ།།      །།སློབ་དཔོན་ཀླུ་སྒྲུབ་ཀྱིས་མཛད་པ། ཆག་ལོ་ཙཱ་བ་ཆོས་རྗེ་དཔལ་གྱིས་ཉུང་ངུར་བསྡུས་ཏེ་བསྒྱུར་བའོ། །༄༅༅། །རྒྱ་གར་སྐད་དུ། ཥཱ་ཊ་ཨཀྵར་ཏནྟྲ་ཀྲ་མ་མཎྜལ་ཙཀྲ་ཨུ་པ་དེ་ཤ་སཱ་དྷ་ནཾ། 
བོད་སྐད་དུ། ཡི་གེ་དྲུག་པའི་རྒྱུད་ཀྱི་རིམ་པའི་དཀྱིལ་འཁོར་བསྟན་པའི་སྒྲུབ་པའི་ཐབས། མགོན་པོ་ཐུགས་རྗེ་ཆེན་པོ་དང་ལྡན་པ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །རེ་ཞིག་དང་པོར་ཏིང་ངེ་འཛིན་དང་རྗེས་སུ་མཐུན་པའི་ས་ཕྱོགས་སུ་ཞུགས་ནས། ཐལ་མོ་སྦྱར་ལ་སྤྱི་
བོར་བཞག་ནས་ཤར་ཕྱོགས་སུ། ཨོཾ་སརྦ་ཏ་ཐཱ་ག་ཏ་བཛྲ་བནྡ་ནཾ་ཀ་རོ་མི་ཞེས་ཕྱག་བྱའོ། །དེ་བཞིན་དུ་ལྷོ་ཕྱོགས་ནས། ཨོཾ་སརྦ་ཏ་ཐཱ་ག་ཏ་རཏྣ་བནྡ་ནཾ་ཀ་རོ་མི། ཞེས་བྱ་བ་དང་། དེ་བཞིན་དུ་ནུབ་ཕྱོགས་སུ། ཨོཾ་སརྦ་ཏ་ཐཱ་ག་ཏ་པདྨ་བནྡ་ནཾ་ཀ་རོ་མི། ཞེས་བྱ་བ་དང་། དེ་བཞིན་དུ་བྱང་ཕྱོགས་སུ། ཨོཾ་སརྦ་
ཏ་ཐཱ་ག་ཏ་ཀརྨ་བནྡ་ནཾ་ཀ་རོ་མི། ཞེས་བྱ་བས་ཕྱག་བཞི་བྱས་ལ། གཡས་པའི་ཁུ་ཚུར་སྤྱི་བོར་བཞག་ནས། ཨོཾ་སརྦ་ཏ་ཐཱ་ག་ཏ་ཨུདྦྷ་བ་ཡ་སྭཱ་ཧཱ། ཞེས་བྱ་བས་ལུས་དང་ངག་དང་སེམས་བྱིན་གྱིས་བརླབ་པར་བྱའོ། །ཁུ་ཚུར་དེ་ཉིད་ཀྱིས་ཁ་ལ། ཨོཾ་པདྨོད་བྷ་བཱ་ཡ་སྭཱ་ཧཱ། ཞེས་བྱ་བས་ངག་བྱིན་གྱིས་བརླབ་པར་བྱའོ། །གཡོན་
པའི་ཁུ་ཚུར་སྙིང་གར་བཞག་ནས། ཨོཾ་བཛྲོད་བྷ་བཱ་ཡ་སྭཱ་ཧཱ། ཞེས་བྱ་བས་སེམས་བྱིན་གྱིས་བརླབ་པར་བྱའོ། །དེའི་རྗེས་ལ་ཆོ་ག་འདིས་བགེགས་བསལ་བར་བྱ་སྟེ། ཨོཾ་ཨ་མྲྀ་ཏ་ཧ་ན་ཧ་ནས་རྦ་བིགྷྣཱཾ་ད་ཧ་ད་ཧ། སརྦ་པཱ་པཾ་ཧཱུཾ་ཕཊ། ཅེས་བྱ་བ་བརྗོད་ལ་ཐལ་མོ་སྦྱར་ནས། མཐེ་བོང་བར་དུ་བཞག་པ་དེ་ལ་བཛྲ་ཧཱུཾ་ཕཊ་ཅེས་བྱ་
བའི་ཡི་གེ་འབར་བའི་རྣམ་པར་བཀོད་ལ། ཐལ་མོ་དེ་ལས་ཕྱོགས་བཅུར་འབར་བའི་རྡོ་རྗེ་འཕྲོ་བར་བསམས་ནས། ཨོཾ་ཨ་མྲྀ་ཏ་ཧ་ན་ཧ་ན་སརྦ་བིགྷྣཱན་ད་ཧ་ད་ཧ། སརྦ་པཱ་པཾ་ཧཱུཾ་ཕཊ། ཅེས་བྱ་བ་འདི་ལན་བདུན་བརྗོད་ལ་ཐལ་མོ་ལན་གསུམ་བརྡབས་ནས་སེ་གོལ་ཡང་ལན་གསུམ་བརྡབ་པར་བྱའོ། །དེའི་རྗེས་ལ་
སྔར་བཤད་པའི་འབར་བའི་རྡོ་རྗེ་ལས་རྡོ་རྗེ་དྲ་བས་བགེགས་ཐམས་ཅད་བསལ་བར་བྱའོ། །དེའི་རྗེས་ལ་རང་གི་སྙིང་གར་ཨ་ལས་ཟླ་བའི་དཀྱིལ་འཁོར་རོ། །དེའི་སྟེང་དུ་རེ་ཕ་ལས་མེ་འབར་བའི་རྣམ་པ་བསམས་ལ། རྡོ་རྗེའི་ཕྱག་རྒྱ་བཅིངས་ནས། རྗེ་བཙུན་གྱི་ཡི་གེ་བརྒྱ་པ་བརྗོད་པར་བྱ་སྟེ། 

73-1-192b

ཨོཾ་པདྨ་སཏྭ་ས་མ་ཡ། མ་ནུ་པཱ་ལ་ཡ། པདྨ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོ་ཥྱོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿ། བྷ་ག་བཱན་སརྦ་ཏ་ཐཱ་ག་ཏ་པདྨ་མཱ་མེ་མུཉྩ་པདྨ་བཛྲཱི་བྷ་བ་མ་ཧཱ་ས་མ་ཡ་ས་
ཏྭ་ཨཱཿཞེས་ལན་བདུན་བརྗོད་དོ། །སྤྱི་བོར་ཨ་ལས་ཟླ་བའི་དཀྱིལ་འཁོར་ཆ་བཅུ་དྲུག་པ་བདུད་རྩིའི་བདག་ཉིད་ལ་ཡི་གེ་ཨོཾ་གྱིས་བརླབས་ལ་བསྒོམ་པར་བྱའོ། །སྔགས་བརྗོད་པའི་རྗེས་ཉིད་ལ་སྙིང་གའི་གནས་སུ་རེ་ཕ་ལས་མེ་སྦར་ལ་ལུས་ཐམས་ཅད་བསྲེགས་ལ་ཡང་སྤྱི་བོའི་ཟླ་བའི་བདུད་རྩི་འབབ་
པར་བསམ་མོ། །དེའི་རྗེས་ལ་རྡོ་རྗེ་ཐལ་མོ་བཅིངས་ལ། ཨོཾ་སརྦ་ཏ་ཐཱ་ག་ཏ་པཱུ་ཛོ་པསྠ་ནཱ་ཡ་ཨཱཏྨ་ནཾ་ནིརྱ་ཏ་ཡཱ་མི། ཨོཾ་སརྦ་ཏ་ཐཱ་ག་ཏ་ཨ་ཤ་མ་སེ་ཏ་སརྦ་སཏྭ་ནཾ་སརྦ་སིདྡྷ་ཡ་སཾ་པ་རྱན་ཏཾ། སརྦ་ཏ་ཐཱ་ག་ཏ་ཥྩ་ཨ་དྷི་ཏིཥྛ་ཏྭཾ། ཞེས་བྱ་བ་འདི་ཉིད་ལན་གསུམ་བརྗོད་ལ། སངས་རྒྱས་དང་བྱང་ཆུབ་སེམས་
དཔའ་དང་། དེ་བཞིན་གཤེགས་པ་རྣམས་ཀྱིས་ནམ་མཁའ་ཡོངས་སུ་གང་བར་ལྷག་པར་མོས་ལ་དེ་རྣམས་ཡིད་ཀྱིས་མཆོད་ནས་གསུམ་ལ་སྐྱབས་སུ་འགྲོ་བ་ལ་སོགས་པ་བྱའོ། །ཨོཾ་དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་བསོད་ནམས་
རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་བྱ་བས་སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། བྱང་ཆུབ་ཏུ་སེམས་བསྐྱེད་པ་ལ་སོགས་པ་བྱའོ། །དེའི་རྗེས་ལ། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཞེས་བརྗོད་ལ། བྱང་ཆུབ་ཀྱི་སེམས་
ཙམ་ལ་ལྷག་པར་གནས་པ་སེམས་ཀྱིས་མཐོང་ནས། ཨོཾ་དྷརྨཱ་དྷཱ་ཏུ་སྭ་བྷཱ་པ་ཨཱཏྨ་ཀོ྅ཧཾ། ཞེས་མངོན་པར་བརྗོད་ནས། བྱང་ཆུབ་ཀྱི་སེམས་དེ་ཡི་གེ་པཾ་གྱི་རྣམ་པར་ཡོངས་སུ་གྱུར་པར་མཐོང་ནས། དེ་ནས་སྣ་ཚོགས་པདྨ་ཆེན་པོར་བསྐྱེད་ལ། དེའི་སྟེང་དུ་ཡི་གེ་ཨ་ལས་ཉི་མའི་དཀྱིལ་འཁོར། དེའི་
སྟེང་དུ་ཡང་ཡི་གེ་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་བྷྲཱུཾ་དཀར་པོ། དེ་ལས་མཆོད་རྟེན་དཀར་པོ། དེ་ལས་ཡང་། རྣམ་པ་གསུམ་དུ་སྤྲོས་པ་ཉིད་ཀྱིས་བུམ་པ་དང་། ཁ་ཁྱེར་ཐམས་ཅད་ཀྱི་སྟེང་དུ་ཡང་ཡི་གེ་ཧཱུཾ་བསམས་ལ། བུམ་པ་དེའི་ནང་དུ་ཡང་ཨ་ལས་ཉི་མའི་དཀྱིལ་འཁོར། དེའི་

73-1-193a

སྟེང་དུ་ཡང་ཨ་ལས་ཟླ་བའི་དཀྱིལ་འཁོར། དེ་ལ་ཡི་གེ་དྲུག་ལས་འདབ་མ་བརྒྱད་པའི་པདྨ་དམར་པོ། མཚམས་ཀྱི་འདབ་མ་བཅུ་གཉིས་པ། དེའི་སྟེང་དུ་ཡི་གེ་ཧྲཱིཿལས་འདབ་མ་དྲུག་པའི་པདྨ་དཀར་པོ། དེའི་སྟེང་དུ་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་ཨོཾ་
མ་ཎི་པདྨེ་ཧཱུཾ། ཞེས་བྱ་བ་ཡི་གེ་དྲུག་པ་གོང་ནས་གོང་དུ་ནང་དུ་ཞུགས་པར་རྣམ་པར་བསྒོམས་ལ། དེ་གྱུར་པ་ལས་བཅོམ་ལྡན་འདས་སྐུ་མདོག་དཀར་པོ་འཕགས་པ་སྤྱན་རས་གཟིགས་དབང་ཕྱུག་ཞལ་གཅིག་པ་ཕྱག་དྲུག་པ་སྣང་བ་མཐའ་ཡས་ཀྱི་དབུ་རྒྱན་ཅན་བསྒོམ་མོ། །བཅོམ་ལྡན་འདས་
ཀྱི་ཕྱག་གཡས་པའི་དང་པོ་ནི་བ་དན་གསུམ་པའི་ཕྱག་རྒྱ་དེའི་རྩེ་མོ་ལ་ཅུང་ཟད་དབུ་འདུད་པའོ། །གཉིས་པ་ལ་ཕྲེང་བ། གསུམ་པའི་ཕྱག་སྐྱབས་སྦྱིན་ལ་རིན་པོ་ཆེ་ཟུར་དྲུག་པ་བསྣམས་པའོ། །ཕྱག་གཡོན་གྱི་དང་པོས་པདྨའི་སྟེང་དུ་རིན་པོ་ཆེ་ཟུར་དྲུག་པ་གནས་པ་ལ་པདྨ་འདབ་མ་དྲུག་པའོ། །
གཉིས་པ་ལ་དབྱུག་པ། གསུམ་པ་ལ་རིལ་བ་སྤྱི་བླུགས་བསྣམས་པའོ། །དེའི་གཡོན་གྱི་པདྨ་ལ་བཅོམ་ལྡན་འདས་པདྨ་སྒྲོལ་མ་ཨོཾ་པདྨ་ཏཱ་རི་ཧཱུཾ་ཞེས་བྱ་བ་འདིས་དེའི་རྣམ་པར་བསམ་མོ། །ཁྱད་པར་ནི་པདྨ་དོར་ལ་ཨུཏྤ་ལའི་སྟེང་དུ་རིན་པོ་ཆེ་ཟུར་དྲུག་པའི་སྟེང་དུ་པདྨ་འདབ་མ་དྲུག་པ་བསྣམས་
པའོ། །ཤར་དུ་ཨོཾ་བཛྲ་པདྨ་ཧཱུཾ། ལྷོར་ཨོཾ་རཏྣ་པདྨ་ཧཱུཾ། ནུབ་ཏུ་ཨོཾ་མུ་ནེ་པདྨ་ཧཱུཾ། བྱང་དུ་ཨོཾ་ཀརྨ་པདྨ་ཧཱུཾ། ཞེས་བྱ་བའི་སྔགས་ཀྱི་རིམ་པ་འདིས། རྡོ་རྗེ་པདྨ་དང་། རིན་ཆེན་པདྨ་དང་། ཐུབ་པའི་པདྨ་དང་། ལས་ཀྱི་པདྨ་རྣམས་བཅོམ་ལྡན་འདས་ཉིད་ཀྱི་རྣམ་པར་བལྟའོ། །ཁྱད་པར་ནི་པདྨའི་
སྟེང་དུ་རིན་པོ་ཆེ་ཟུར་དྲུག་པའི་སྟེང་དུ་རྡོ་རྗེ་དང་། རིན་པོ་ཆེ་དང་། འཁོར་ལོ་དང་། སྣ་ཚོགས་རྡོ་རྗེའོ། །མེའི་ཕྱོགས་སུ་ཨོཾ་བཛྲ་ཏཱ་རེ་ཧཱུཾ། བདེན་བྲལ་གྱི་ཕྱོགས་སུ་ཨོཾ་རཏྣ་ཏཱ་རེ་ཧཱུཾ། རླུང་གི་ཕྱོགས་སུ་ཨོཾ་མུ་ནེ་ཏཱ་རེ་ཧཱུཾ། དབང་ལྡན་དུ་ཨོཾ་ཀརྨ་ཏཱ་རེ་ཧཱུཾ། ཞེས་བྱ་བའི་སྔགས་འདིས་གོ་རིམས་
བཞིན་དུ་བཅོམ་ལྡན་འདས་ཉིད་ཀྱི་རྣམ་པར་རྡོ་རྗེ་སྒྲོལ་མ་དང་། རིན་ཆེན་སྒྲོལ་མ་དང་། ཐུབ་པའི་སྒྲོལ་མ་དང་། ལས་ཀྱི་སྒྲོལ་མ་དག་བཅོམ་ལྡན་འདས་ལ་མངོན་དུ་བལྟས་པའོ། །ཁྱད་པར་ནི་ཨུཏྤ་ལའི་སྟེང་བཞིན་དུ། རིན་པོ་ཆེ་ཟུར་དྲུག་པའི་གནས་སུ་རྡོ་རྗེ་དང་། རིན་པོ་ཆེ་དང་། འཁོར་

73-1-193b

ལོ་དང་། སྣ་ཚོགས་རྡོ་རྗེའོ། །བརྒྱད་པོ་འདི་དག་སེམས་དཔའི་སྐྱིལ་མོ་ཀྲུང་གིས་ཟླ་བའི་དཀྱིལ་འཁོར་ལ་བཞུགས་པར་བསམ་མོ། །ཕྱོགས་མཚམས་ཀྱི་འདབ་མ་ལ་ཤར་ཕྱོགས་སུ་ཨོཾ་ཡ་མཱནྟ་ཀ་ཧཱུཾ། ལྷོ་རུ་ཨོཾ་པྲཛྙཱན་ཏ་ཀ་ཧཱུཾ། ནུབ་ཏུ་ཨོཾ་པདྨཱནྟ་ཀ་ཧཱུཾ། བྱང་དུ་ཨོཾ་བི་གྷྣཱནྟ་ཀ་ཧཱུཾ་ཞེས་བྱ་
བའི་སྔགས་ཀྱིས་བཅོམ་ལྡན་འདས་ཉིད་ཀྱི་ངོ་བོར་ཁྲོ་བོ་བཞི་བལྟ་བར་བྱའོ། །ཁྱད་པར་ནི་གཡས་བརྐྱང་བ། མིའུ་ཐུང་གི་རྣམ་པ་ལ་ཞལ་རྣམ་པར་འགྱུར་བ། སྣ་གོང་ཉག་པ་སིན་མ་སེར་སྐྱ་ཉི་མའི་དཀྱིལ་འཁོར་ལ་བཞུགས་པ། འོད་འབར་བའི་དབུས་སུ་གནས་པར་བསྒོམ་མོ། །ཐམས་
ཅད་ཀྱི་གཡོན་པའི་རྩ་བའི་ཕྱག་དག་ནི་སྡིགས་མཛུབ་མཛད་པའོ། །གཡས་པའི་ཕྱག་དག་ལ་ཐོ་བའོ། །གཉིས་པ་ལ་རལ་གྲིའོ། །གསུམ་པ་ལ་ཞགས་པའོ། །ལྷག་མའི་ཕྱག་གཉིས་ལ་པདྨ་དང་སྣ་ཚོགས་རྡོ་རྗེའོ། །དེ་ལྟར་དཀྱིལ་འཁོར་གྱི་འཁོར་ལོ་བསྐྱེད་ལ་སྙིང་གར་པཾ་ལས་
པདྨ་དཀར་པོ། དེའི་སྟེང་དུ་ཨ་ལས་ཟླ་བའི་དཀྱིལ་འཁོར་དེའི་སྟེང་དུ་ཨོཾ་མ་ཎི་པདྨེ་ཧཱུཾ་ཞེས་སྔ་མ་བཞིན་དུ་ཡི་གེ་རྣམས་བསམས་ལ། དེ་ལས་འོད་ཟེར་སྤྲོས་ནས་སེམས་ཅན་ཐམས་ཅད་ཡང་དག་པར་སྦྱངས་ནས། བཅོམ་ལྡན་འདས་ཀྱི་ངོ་བོར་བསྒྲུབས་ནས། ཡང་བསྡུས་ཏེ་དེ་ཉིད་དུ་ཞུགས་སོ། །
དེའི་རྗེས་ལ་སྔགས་ཁ་ནས་བྱུང་ནས་རྡོ་རྗེའི་ལམ་ནས་རྗེས་སུ་ཞུགས་ནས་མུ་ཏིག་གི་ཕྲེང་བ་ལྟར་བསམས་ནས་བཟླས་པ་བྱའོ། །བཟླས་པ་བྱས་ནས་སྙིང་གའི་སྔགས་ལས་ཅིག་ཅར་དཀྱིལ་འཁོར་གྱི་འཁོར་ལོ་ཕྱི་རོལ་དུ་སྤྲོས་ནས་མཆོད་པར་བྱའོ། །འདི་དག་གི་སྔགས་ནི། ཨོཾ་སརྦ་ཏ་ཐཱ་ག་ཏ་ཨརྒྷཾ་
པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཨརྒྷཾ་གྱི་སྔགས་སོ། །ཨོཾ་སརྦ་ཏ་ཐཱ་ག་ཏ་བཛྲ་པུཥྤ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། མེ་ཏོག་གི་སྔགས་སོ། །ཨོཾ་སརྦ་ཏ་ཐཱ་ག་ཏ་རཏྣ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། མར་མེའི་སྔགས་སོ། །ཨོཾ་སརྦ་ཏ་ཐཱ་ག་ཏ་གནྡྷ་པཱུ་ཛ་མེ་གྷ་ས་མུ་དྲ་སྥ་ར་ཎ་བྱུ་
ཧ་ཧཱུཾ། བྱུག་པའི་སྔགས་སོ། །ཨོཾ་སརྦ་ཏ་ཐཱ་ག་ཏ་རཱ་ས་ཨེ་གྲོ་བི་ཏ་ནི་ཨ་ཧ་རི་ན་སནྟ་ར་པ་ཡ་མེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ལྷ་བཤོས་ཀྱི་སྔགས་སོ། །དེ་ལྟར་མཆོད་པ་བྱས་ནས། དཀྱིལ་འཁོར་གྱི་འཁོར་ལོ་རང་གི་སྙིང་གའི་སྔགས་ཀྱི་ཡི་གེ་ལ་གཞུག་པར་བྱའོ། །དེའི་རྗེས་

73-1-194a

ལ་བསྟོད་པ་དང་། སྨོན་ལམ་ཡང་བཏབ་ནས། ལངས་ལ་རང་གི་ལྷའི་ང་རྒྱལ་གྱིས་གནས་པར་བྱའོ། །ཡི་གེ་དྲུག་པའི་རྒྱུད་ཀྱི་རིམ་པས་དཀྱིལ་འཁོར་གྱི་འཁོར་ལོ་བསྟན་པའི་སྒྲུབ་ཐབས་རྫོགས་སོ།།      །།རྒྱ་གར་གྱི་མཁན་པོ་མ་ཧཱ་ཛ་ན་དང་། ལོ་ཙཱ་བ་གཞོན་ནུ་འོད་ཀྱིས་
བསྒྱུར་བའོ། །༄༅༅། །རྒྱ་གར་སྐད་དུ། ཨཱརྱཱ་བ་ལོ་ཀི་ཏེ་ཤྭ་ར་ཁརྶ་པ་ཎ་སཱ་དྷ་ནཾ། བོད་སྐད་དུ། འཕགས་པ་སྤྱན་རས་གཟིགས་དབང་ཕྱུག་ཁརྶ་པཱ་ཎིའི་སྒྲུབ་ཐབས། མགོན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཡིད་དང་མཐུན་པའི་
ཕྱོགས་གང་ཡང་རུང་བར་ཇི་ལྟར་བདེ་བའི་སྟན་ལ་འདུག་སྟེ། རས་རིས་ལ་སོགས་པའི་འཇིག་རྟེན་དབང་ཕྱུག་གི་སྐུ་མདུན་དུ་བཞུགས་པར་དམིགས་ལ། ཕྱི་ནང་གི་མཆོད་པས་ལེགས་པར་མཆོད་དེ། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། གསུམ་
ལ་སྐྱབས་སུ་འགྲོ་བ་དང་། བདག་ཉིད་དབུལ་བ་དང་། བྱང་ཆུབ་ཏུ་སེམས་བསྐྱེད་པ་ནི། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་བྱ་བའི་ཚིགས་སུ་བཅད་པ་
འདིས་བྱའོ། །དེའི་འོག་ཏུ་རང་གི་སྙིང་གར་ཡི་གེ་ཨ་ལས་བྱུང་བའི་ཟླ་བའི་དཀྱིལ་འཁོར་འོད་ཟེར་དང་བཅས་པ་དེའི་སྟེང་དུ་ཡི་གེ་ཧྲཱིཿའོད་ཟེར་འཕྲོ་བའི་འོད་ཟེར་གྱི་ཚོགས་དེ་དག་གིས་ཆོས་ཐམས་ཅད་དྲངས་ནས་འོད་ཟེར་གྱི་ཚོགས་རྣམས་ཧྲཱིཿདེ་ཉིད་ཀྱི་ནང་དུ་ཞུགས་པ་དང་། ཐལ་མོ་
ལན་གསུམ་བརྡབས་ལ་ཚིག་འདི་ལན་གསུམ་བརྗོད་དོ། །ཨོཾ་སྭ་བྷཱ་བ་ཤུདྡྷཱཿསརྦྦ་དྷརྨཱཿསྭ་བྷཱ་བ་ཤུདྡྷོ྅ཧཾ། དེའི་འོག་ཏུ་ཆོས་ཐམས་ཅད་བདག་མེད་པར་བསྒོམ་པར་བྱའོ། །ཚིག་གི་དོན་དང་བཅས་པར་བསམས་ནས། ཟླ་བ་བྱེ་བ་དང་མཉམ་པའི་འོད་ཟེར་ཡོངས་སུ་གྱུར་པ་ལས་
རལ་བའི་ཅོད་པན་གྱི་དབུས་ན་གནས་པའི་རྒྱལ་བའི་སྐུ་འཛིན་པ། རིན་པོ་ཆེའི་ཕུག་གི་ནང་ན་པདྨ་ཆེན་པོ་དང་ཟླ་བའི་གདན་ལ་བཞུགས་ཤིང་ཟླ་བའི་འོད་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། ཞབས་གཡོན་པ་སེམས་དཔའི་སྐྱིལ་མོ་ཀྲུང་ལ་གཡས་པ་ཅུང་ཟད་བརྐྱང་བ། །

73-1-194b

ཕྱག་གཡོན་པ་ན་པདྨ་དཀར་པོ་བསྣམས་པ། གཡས་ཀྱིས་མཆོག་སྦྱིན་པ་ཞི་བའོ། །བཅོམ་ལྡན་འདས་ཀྱི་གཡས་ལོགས་ན་བཅོམ་ལྡན་འདས་མ་སྒྲོལ་མ་རྒྱན་ཐམས་ཅད་ཀྱིས་བརྒྱན་པ་ཨུཏྤ་ལའི་སྙིང་པོ་ཁ་འབྱེད་པར་བསམ་མོ། །དེ་བཞིན་དུ་བཅོམ་ལྡན་འདས་ཀྱི་གཡོན་ལོགས་སུ་ཁྲོ་
གཉེར་ཅན་ཅོད་པན་འཆང་བ། ཕྱག་བཞི་པ། གཡོན་གཉིས་ན་དབྱུག་པ་དང་། སྤྱི་བླུགས་བསྣམས་པ་གཡས་གཉིས་ཀྱིས་ཕྱག་བྱེད་པ་དང་། མཆོག་སྦྱིན་པའོ། །སྤྱི་གཙུག་ལས་སྐྱེས་པའི་མཆོད་རྟེན་གྱིས་བརྒྱན་པ་དང་། བཅོམ་ལྡན་འདས་ཀྱི་གཡོན་ན་ཁྲོ་བོ་ཆེན་པོ་རྟ་མགྲིན་
ཕྱག་གཡས་པ་ཕྱག་འཚལ་བ་དང་། གཡོན་པས་དབྱུག་པ་འཛིན་པའོ། །བཅོམ་ལྡན་འདས་ཀྱི་གཡས་ན་ནོར་བཟངས་ཐལ་མོ་སྦྱར་ནས་བཞུགས་པ་དེ་ལྟར་བསམ་མོ། །སངས་རྒྱས་སྤྲིན་ནི་འཕྲོ་བ་ཡིས། །རྣལ་འབྱོར་འདི་འདྲ་བསྒོམས་ན་ནི། །འཇིག་རྟེན་མགོན་པོ་འོད་ཆེན་པོ། །ཚེ་འདི་
ཉིད་ལ་ཐོབ་པར་འགྱུར། །བསྒོམས་པས་དུབ་པར་གྱུར་ན། རང་གི་སྙིང་གའི་ཟླ་བའི་དཀྱིལ་འཁོར་གྱི་སྟེང་དུ་སྔགས་མུ་ཏིག་གི་ཕྲེང་བ་དང་འདྲ་བ་བསམས་ཏེ་བཟླས་པར་བྱའོ། །བཟླས་པའི་སྔགས་ནི་འདི་ཡིན་ཏེ། ཨོཾ་མ་ཎི་པདྨེ་ཧཱུཾ། བརྒྱའམ་སྟོང་དུ་བཟླས་པར་བྱ་སྟེ། བཅོམ་ལྡན་འདས་
ལ་བདག་ཉིད་ཀྱིས་མཆོད་པ་ལེགས་པར་བྱའོ། །ཨོཾ་ཁྱོད་ཀྱིས་འགྲོ་བའི་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་སུ་གསོལ། །སླར་ཡང་འབྱོན་པར་མཛད་དུ་གསོལ། །ཚིགས་སུ་བཅད་པ་འདིས་གཤེགས་པ་དང་སླར་བྱོན་པར་བསྐུལ་
ནས་བཟོད་པར་གསོལ་བར་བྱ་སྟེ། གང་ཡང་བདག་བློ་གཏི་མུག་པས། །འདིར་ནི་ཉེས་པ་གང་བྱས་པ། །གང་ཡང་ལུས་ཅན་སྐྱབས་གྱུར་པས། །མགོན་པོ་ཁྱོད་ནི་བཟོད་པ་བཞེས། །གཙོ་བོ་ནུས་པ་མ་མཆིས་པས། །མ་ཚང་བ་དང་མ་རྙེད་པའི། །འདིར་ནི་བྱ་བ་གང་བྱེས་པ། །མགོན་ཁྱེད་
དེ་ནི་བཟོད་པར་མཛོད། །བདག་གི་དགེ་བའི་རྩ་བ་འདིས། །སངས་རྒྱས་ཉིད་ནི་ཐོབ་ནས་ཀྱང་། །སྲིད་པའི་རྒྱ་མཚོ་བརྒལ་དཀའ་ལས། །འགྲོ་བ་མ་ལུས་སྒྲོལ་བར་ཤོག །འཕགས་པ་སྤྱན་རས་གཟིགས་དབང་ཕྱུག་ཁརྶ་པ་ཎའི་སྒྲུབ་ཐབས་རྫོགས་སོ།།      །།རྒྱ་གར་གྱི་མཁན་

73-1-195a

པོ་དཱི་པཾ་ཀ་ར་ཤྲཱི་ཛྙཱ་ན་དང་། ལོ་ཙཱ་བ་དགེ་སློང་ཤཱཀྱ་བློ་གྲོས་ཀྱིས་བསྒྱུར་བ་རྫོགས་སོ།།      །།༄༅༅། །རྒྱ་གར་སྐད་དུ། ཨཱརྱ་ཥ་ཊཱ་ཀྵ་ར་སཱ་དྷ་ནཾ། བོད་སྐད་དུ། འཕགས་པ་ཡི་གེ་དྲུག་པའི་སྒྲུབ་ཐབས། འཇིག་རྟེན་མགོན་པོ་ལ་ཕྱག་འཚལ་ལོ། །དང་པོར་
རེ་ཞིག་སྔགས་པས་གདོང་བཀྲུས་ནས་སྟན་བདེ་བ་ལ་འདུག་སྟེ། སངས་རྒྱས་ལ་སོགས་པར་བསམས་ལ་སྐྱབས་སུ་འགྲོ་བ་ལ་སོགས་པ་བྱའོ། །བདག་ནི་དཀོན་མཆོག་གསུམ་ལ་སྐྱབས་སུ་སོང་བ་ཡིན་ནོ་ཞེས་མོས་པར་བྱས་ནས། སེམས་ཅན་ཇི་སྙེད་སེམས་ཅན་དུ་བསྡུ་བས་ཡང་དག་
པར་བསྡུས་པ། སྒོ་ང་ལས་སྐྱེས་པའམ། མངལ་ལས་སྐྱེས་པ་འམ། དྲོད་གཤེར་ལས་སྐྱེས་པའམ། རྫུས་ཏེ་སྐྱེས་པ་འམ། གཟུགས་ཅན་ནམ། གཟུགས་ཅན་མ་ཡིན་པའམ། འདུ་ཤེས་ཅན་ནམ། འདུ་ཤེས་མེད་པ་འམ། འདུ་ཤེས་མེད་འདུ་ཤེས་མེད་མིན་ཏེ། ཇི་སྲིད་
དུ་སེམས་ཅན་ནི་ཁམས་གསུམ་དུ་གདགས་པས། བཏགས་པ་དེ་དག་ཐམས་ཅད་བདག་ཉིད་ཀྱིས་ཕུང་པོ་ལྷག་མ་མེད་པའི་དབྱིངས་སུ་དགོད་པར་བྱའོ་ཞེས་བསམ། དེ་ནས་ཨོཾ་སྭ་བྷཱ་བ་བི་ཤུདྡྷཿསརྦྦ་དྷརྨཱཿསྭ་བྷཱ་བ་བི་ཤུདྡྷོ྅ཧཾ། དེ་ནས་སྟོང་པ་ཉིད་དུ་བསྡུ་བས་བསྡུས་པ་ཙམ་གྱིས་
བསྒོམས་ལ། དེའི་འོག་ཏུ་རང་གི་སྙིང་གར་ཟླ་བའི་དཀྱིལ་འཁོར་དེའི་སྟེང་དུ་ཡི་གེ་ཧྲཱིཿལས་འོད་ཟེར་བརྒྱ་སྟོང་འབྱུང་བར་བསྒོམས་ཏེ། ཡང་དེ་ཉིད་ཀྱིས་ཐོག་མ་མེད་པ་ནས་བསགས་པའི་འདོད་ཆགས་ལ་སོགས་པའི་ཉོན་མོངས་པ་མ་ལུས་པ་མཐའ་དག་རྣམ་པར་དག་པར་བྱས་ནས་
བདག་ཉིད་ཀྱི་སྙིང་གར་ཞུགས་པ་ལས། བདག་ཉིད་འཇིག་རྟེན་དབང་ཕྱུག་གི་སྐུ་རྒྱན་ཐམས་ཅད་ཀྱིས་བརྒྱན་པ། སྐུ་མདོག་དཀར་པོ་ཕྱག་བཞི་པ་གཡས་ན་བགྲང་ཕྲེང་གཡོན་ན་པདྨ་བསྣམས་པ། གཞན་གཉིས་ཀྱིས་ཐུགས་ཀར་ཐལ་མོ་སྦྱར་བའོ། །གཡས་སུ་ནོར་བུ་འཛིན་པ་སྐུ་
མདོག་དང་ཕྱག་ལ་སོགས་པ་ཡང་དེ་དང་འདྲའོ། །གཡོན་དུ་འབྲུ་དྲུག་པའི་རིག་པ་ཆེན་མོ་ཕྱག་བཞི་པ་སྟོན་ཀའི་སྤྲིན་ལྟ་བུའོ། །དེ་ནས་ཨོཾ་མ་ཧཱ་སུ་ཁ་བཛྲ་སཏྭ། ཛཿཧཱུཾ་བཾ་ཧོཿསུ་ར་ཏ་སྟྭཾ། ཨ་ལ་ལ་ལ་ལ་ཧོ། ཨ་ཨ་ཨ་ཨ་ཞེས་བྱ་བས་བྱིན་གྱིས་བརླབས་པའི་སྔགས་ཀྱི་རྒྱལ་པོ་བརྗོད་

73-1-195b

པར་བྱའོ། །དེ་ལྟར་བསྒོམས་ནས་དེའི་འོག་ཏུ་འཇིག་རྟེན་དབང་ཕྱུག་གི་ཐུགས་ཀར་ཟླ་བའི་དཀྱིལ་འཁོར་ལ་ཕྲེང་བ་འདྲ་བ་དཀར་པོ་ཞལ་ནས་བྱུང་ཞིང་ལྟེ་བར་བྱུགས་ཏེ་འཁོར་ལོ་འཁོར་བའི་ཚུལ་གྱིས་སངས་རྒྱས་ཐམས་ཅད་ཀྱི་ཡིད་བཞིན་གྱི་ནོར་བུའི་རྟོག་པའི་སྔགས་ཀྱི་རྒྱལ་པོ་འདི་
མཚན་མ་མེད་པའི་ཚུལ་གྱིས་བཟླས་པར་བྱའོ། །དེ་ནས་ལུས་གཡོ་བ་དང་བཅས་པ་ལ་སོགས་པར་གྱུར་པའི་རྣལ་འབྱོར་པ་དད་པ་དང་སྙིང་རྗེ་དང་། བླ་མ་ལ་གུས་པ་དང་ལྡན་པས་ནི་རིང་པོ་མི་ཐོགས་པར་འགྲུབ་པར་འགྱུར་རོ། །ཨོཾ་མ་ཎི་པདྨེ་ཧཱུཾ་ཞེས་དེ་ལྟར་བཟླའོ། །དེ་ནས་ལྡང་བའི་
དུས་སུ་སྔགས་འདི་བརྗོད་པར་བྱའོ། །ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོ་ཥྱོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿ། བྷ་ག་ཝཱ་ན་སརྦ་ཏ་ཐཱ་ག་ཏ་
བཛྲ་མཱ་མེ་མུ་ཉྩ། བཛྲཱི་བྷ་བ། མ་ཧཱ་ས་མ་ཡ་སཏྭ་ཨཱཿ དེ་ལྟར་བཟླས་ནས་ཅི་བདེ་བར་གནས་པར་བྱའོ། །ཡི་གེ་དྲུག་པའི་སྒྲུབ་ཐབས་རྫོགས་སོ།།      །།སློབ་དཔོན་ཆེན་པོ་པཱུ་ཛ་བཛྲས་མཛད་པའོ།།      །།རྒྱ་གར་གྱི་མཁན་པོ་ཆེན་པོ་དཱི་པཾ་ཀ་ར་ཤྲཱི་ཛྙཱ་ན་དང་། ལོ་ཙཱ་བ་དགེ་སློང་
ཤཱཀྱ་བློ་གྲོས་ཀྱིས་བསྒྱུར་བའོ། །༄༅༅། །རྒྱ་གར་སྐད་དུ། ཨཱརྱཱ་ཝ་ལོ་ཀི་ཏེ་ཤྭ་ར་སཱ་དྷ་ནཾ། བོད་སྐད་དུ། འཕགས་པ་སྤྱན་རས་གཟིགས་དབང་ཕྱུག་གི་སྒྲུབ་ཐབས། རྗེ་བཙུན་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །སྟོང་ཉིད་སྙིང་རྗེ་ལས་བྱུང་བ། །
རྣམ་ལྔ་བྱང་ཆུབ་ཆེ་བདག་ཉིད། །སྐུ་གསུང་ཐུགས་ཀྱིས་ཐུགས་དག་པ། །འཇིག་རྟེན་མགོན་པོ་མཁས་པས་བསྒྲུབ། །པདྨ་ཟླ་དབུས་གཞོན་ནུའི་སྐུ། །སྐྱིལ་ཀྲུང་ཕྱེད་བརྐྱང་འགྱིང་བག་བརྟན། །ཟླ་བ་རྒྱས་པའི་ཞལ་མཛེས་པས། །ས་གསུམ་བདག་གིར་གཟིགས་མཛད་པའོ། །མཆོག་སྦྱིན་པདྨོ་
གཡས་དང་གཡོན། །རྒྱལ་བའི་ཅོད་པན་རིན་ཆེན་རྒྱན། །འོད་དཔག་མེད་ཀྱིས་སྤྱི་གཙུག་མཛེས། །དེ་ཡི་ཐུགས་ནི་པདྨར་རྒྱས། །ཧྲཱིཿཡིག་རང་སེམས་འོད་གསལ་བ། །ས་གསུམ་སྦྱོང་མཛད་ཡི་གེ་བཞི། །འཁོར་ལོ་རྣམ་གསུམ་དམ་ཚིག་བཞི། །སྒྱུ་མ་བྲག་ཅ་མཁའ་འདྲའོ། །

73-1-196a

ཐུགས་རྗེ་ཆེན་པོ་ཁརྶ་པཱ་ཎའི་སྒྲུབ་ཐབས་ཚིགས་སུ་བཅད་པ་བཞི་པ་རྫོགས་སོ།།      །།༄༅༅། །རྒྱ་གར་སྐད་དུ། ཡོ་ག་སཱ་རཿ། བོད་སྐད་དུ། རྣལ་འབྱོར་སྙིང་པོ། དཔལ་འཇིག་རྟེན་དབང་ཕྱུག་ལ་ཕྱག་འཚལ་ལོ། །མི་རྟག་སྡུག་བསྔལ་དྲན་བྱས་ནས། །སྙིང་རྗེ་ཆེན་པོ་
རབ་བསྐྱེད་དེ། །སྤྱི་བོར་བླ་མ་སྙིང་གར་ལྷ། །རང་སེམས་མ་ཡེངས་བསྒོམ་པར་བྱ། །གང་ཤར་ཐམས་ཅད་དེ་ཡིན་ཏེ། །དེ་ནི་གང་དུའང་མ་ཤར་བའོ། །དེ་ཕྱིར་གང་སྐྱེས་དེ་མ་སྐྱེས། །མ་སྐྱེས་པ་ཉིད་སྐྱེ་བའི་ཚུལ། །གང་སྐྱེས་གཉུག་མ་ཉིད་ཡིན་ཕྱིར། །དེ་ཤར་དྲན་པས་མ་བརྗེད་ན། །གང་
སྣང་སྟོང་པ་ཉིད་བདག་ཏུ། །རྣལ་འབྱོར་རྒྱལ་པོར་གདོན་མི་ཟ། །མ་རྟོགས་འགྲོ་ལ་རང་དབང་དུ། །རྣམ་ཀུན་དམིགས་པ་མེད་ཡིད་ཀྱིས། །སྙིང་རྗེ་ཆེན་པོ་ངང་གིས་འགྲུབ། །དེ་ཡི་ཐབས་སྦྱངས་བྱང་ཆུབ་བཞེད། །རྣལ་འབྱོར་སྙིང་པོ་རྣལ་འབྱོར་གྱི་དབང་ཕྱུག་ཆེན་པོ་ཤྲཱི་ཛ་ག་ཏ་མི་ཏྲའི་
གདམས་པ་ཨི་ཐི།།      །།༄༅༅། །རྒྱ་གར་སྐད་དུ། ཤྲཱི་ཁརྶ་པ་ཎ་ལོ་ཀི་ཤྭ་ར་སཱ་དྷ་ནཾ། བོད་སྐད་དུ། དཔལ་ཁརྶ་པ་ཎ་འཇིག་རྟེན་དབང་ཕྱུག་གི་སྒྲུབ་ཐབས། ཐུགས་རྗེ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །རྣལ་འབྱོར་དབང་ཕྱུག་བྱམས་པ་
དང་། །སྙིང་རྗེ་དགའ་བ་བཏང་སྙོམས་ལས། །བྱུང་བའི་བྱང་ཆུབ་སེམས་ཀྱི་བདག །འཇིག་རྟེན་མགོན་པོ་ལ་ཕྱག་འཚལ། །དེ་ཞབས་པདྨོ་ལ་རེག་པས། །འཇིག་རྟེན་སྡུག་བསྔལ་བསྒྲལ་བའི་ཕྱིར། །ཇི་བཞིན་ཇི་ལྟར་སྒྲུབ་པའི་ཐབས། །མདོར་བསྡུས་བདག་གིས་བསྟན་པར་བྱ། །
མཁའ་ལྟར་དྲི་མེད་སྟོང་ཉིད་དབྱིངས་ལས་དབང་པོ་གཞུ་ལྟར་གསལ་བའི་དངོས། །པདྨོ་ཟླ་རྒྱས་ཐུགས་གསུང་འོད་འཕྲོ་སྒྱུ་མའི་རྣམ་ཐར་སྤྲུལ་པའི་སྐུ། །རབ་མཛེས་སྐུ་ནི་གཟི་བརྗིད་བརྟན་མཛེས་འབར་བའི་འོད་ཟེར་དཀར་འཁྲིགས་པ། །སྐྱིལ་ཀྲུང་ཕྱེད་བརྐྱང་དུལ་བའི་ཕྱག་གཡས་
མཆོད་སྦྱིན་གསལ་པོ་གཡོན་གྱི་ཕྱག །པདྨའི་སྡོང་མཛེས་དྲི་མེད་འདབ་རྒྱས་གཞོན་ནུ་སྒེག་པོའི་ཐུགས་ཀར་འཛིན། །ཤེལ་ལྟར་དྲི་མེད་ཨུཏྤལ་སྤྱན་རིང་ཀུན་ནས་ཡིད་འཕྲོག་འོད་འབར་ཞལ། །བརྟན་པོ་དཀར་གསལ་ཟླ་རྒྱས་སྟོང་ལྷག་རལ་པའི་ཅོད་པན་ཐུབ་པའི་གདན། །འབར་བའི་

73-1-196b

རིན་ཆེན་དྲི་མེད་སྣ་ཚོགས་ཤིན་ཏུ་འོད་སྦྱངས་ལེགས་སྤྲས་ཤིང་། །མཁའ་ལ་ཉི་ཤར་ལྷམ་མེ་ལྷན་ནེ་ནམ་མཁའི་མཐར་གཏུགས་འོད་འགྱེད་པ། །དཔེ་བྱད་མཚན་རྫོགས་གཅིག་པུ་སྐྱོབ་པ་སྐྱབས་ཀྱི་དམ་པ་སླུ་མེད་དེ། །ཤིན་ཏུ་རྟོགས་དཀར་དེ་ཉིད་གཞིར་གྱུར་སྙིང་གི་པད་འདབ་ཧྲཱིཿཡིག་གིས། །
གང་བའི་ཕྱོགས་རྣམས་དེ་བཞིན་དེ་གཟུགས་ཨོཾ་དང་ཨཱཿདང་ཧྲཱིཿདང་ཧཱུཾ། །དཀར་སོགས་ཁ་དོག་དག་གི་ཕྲེང་བ་ཡིད་ནི་ཡེ་ཤེས་ཡིག་འབྲུའི་དངོས། །བརྩེ་བའི་རླུང་བསྐྱོད་ཡེ་ཤེས་མེ་འབར་འགྲོ་བའི་སྡིག་ཚོགས་བུད་ཤིང་བསྲེགས། །ཞི་བའི་ངང་ནི་གཉིས་མེད་མི་གཡོ་མཁའ་ལྟར་
སྤྲོས་བྲལ་རོ་གཅིག་རོ། །བདེ་ཆེན་འབྱུང་གནས་ཡེ་ཤེས་དྲི་མེད་མཉམ་གཞག་ཆེན་པོ་བསྒོམ་པར་བྱ། །དེ་རྗེས་མཆོད་སོགས་དག་པའི་ཡན་ལག་ཆོ་ག་ཇི་བཞིན་ཡེ་ཤེས་སེམས་དཔའ་ལེགས་བཅུག་སྟེ། །རྣམ་གསུམ་འཁོར་ལོ་དཀར་དམར་སྔོ་ཚུལ་གོ་རིམས་བཞིན་དུ་སྐུ་གསུང་
ཐུགས། །བརྟན་པོའི་མཚན་ཉིད་དམ་པའི་ཞལ་བཞིན་མཁས་པས་རབ་ཏུ་ཤེས་པར་བྱ། །ཐུགས་རྗེ་ཆེན་པོ་ཁརྶ་པ་ཎའི་སྒྲུབ་ཐབས། གྲུབ་པ་བརྙེས་པའི་སྐྱེས་བུ་ཆེན་པོ་ཤྲཱི་ཤཱནྟ་ཀ་རས་མཛད་པ་རྫོགས་སོ།།      །།བོད་ཀྱི་ལོ་ཙཱ་བ་གནུབས་བྱམས་པའི་དཔལ་གྱིས་བསྒྱུར་
བའོ། །༄༅༅། །རྒྱ་གར་སྐད་དུ། པཉྩ་དེ་ཝ་ཏ་ཐཱ་ག་ཏོ་ལོ་ཀ་ཤྭ་ར་སཱ་དྷ་ནཾ། བོད་སྐད་དུ། དེ་བཞིན་གཤེགས་པ་འཇིག་རྟེན་དབང་ཕྱུག་ལྷ་ལྔའི་སྒྲུབ་ཐབས། རྒྱལ་བ་ལྔ་ལ་ཕྱག་འཚལ་ལོ། །ཤིན་ཏུ་རྣམ་དག་དང་བའི་མཚོར། །རབ་མཛེས་སྡོང་བུ་ལྔ་ལྡན་སྟེང་། །རྣམ་སྣང་
རྡོ་རྗེ་སེམས་དཔའ་དང་། །རིན་འབྱུང་འོད་དཔག་མེད་དོན་གྲུབ། །ས་རིགས་རྣམ་དག་སྣ་ཚོགས་གཟུགས། །དངོས་གཅིག་རྒྱལ་བ་ལྔ་ལ་འདུད། །བྱང་ཆུབ་སེམས་དཔའི་སྤྱོད་པ་ཁྱད་པར་ཅན་ལ་གནས་པས། སྙིང་རྗེ་ཆེན་པོ་མདུན་དུ་བྱས་ལ། ཐོག་མ་ཁོ་ནར་ཆོས་ཐམས་ཅད་སྟོང་པ་
ཉིད་དུ་རབ་ཏུ་བསྒོམ་པར་བྱའོ། །གདོད་ནས་མ་སྐྱེས་འོད་གསལ་བ། །གང་ཤར་ཉིད་ན་ངོ་བོ་མེད། །ཆོས་རྣམས་ཀུན་གྱི་མཚན་ཉིད་དེ། །བླ་མའི་དྲིན་གྱིས་རྟོགས་པར་འགྱུར། །གང་འདི་ལྟར་ངོ་བོ་ཉིད་མེད་པའི་ཆོས་འདི་དག་ནི་ཟབ་པའི་ཕྱིར་རྟོགས་པར་དཀའ་བས་མི་ཤེས་པའི་འགྲོ་བ་ལྔ་

73-1-197a

པོ་ནི་ངེས་པར་སྡུག་བསྔལ་བའོ་ཞེས་བརྟགས་ནས། དམིགས་པ་མེད་པའི་ཐུགས་རྗེ་ཆེན་པོ་རླུང་གི་དཀྱིལ་འཁོར་མངོན་པར་བསྐྱོད་གྱུར་པས། །སྐྱེ་བོ་ཉོན་མོངས་སྒྲིབ་ཚོགས་སྤྲིན་གྱི་ཕུང་པོ་ཤིན་ཏུ་མཐུག་པོས་གཏུམས་གྱུར་པ། །ཚམ་ཚོམ་མེད་པར་དྲག་པོའི་ཤུགས་ཀྱིས་ཀུན་དུ་དྲལ་ཞིང་
ཡོངས་སུ་གཏོར། །དེ་ཡི་ཐབས་གྱུར་ཐུགས་རྗེའི་དབྱིངས་སྐྱེས་སྣ་ཚོགས་མཛད་པ་དབྱེར་མེད་ཅིག་ཅར་བསྒྲུབ་པ་ཡི། །མགོན་པོ་དམ་པ་རིགས་ཀྱི་ལྷ་ལྔ་དྲི་མ་ལྔ་སྦྱོང་ལས་ལྔ་བསྒྲུབ་ཅིང་སྟོབས་ལ་སོགས། །དེ་ལ་དབུས་སྡོགས་སྡོང་འདབ་བཅས། །ཟླ་བའི་འཁོར་ལ་གསལ་བ་ལ། །མེ་
ལོང་གཟུགས་ལྟར་འབྲུ་ལྔ་བསམ། །ཕྲིན་ལས་ལ་སྦྱར་སྐུར་བསྐྱེད་དོ། །རྣམ་པར་སྣང་མཛད་ནི་ཁ་བའི་མདོག་ཅན་ཇི་སྐད་འབྱུང་བའི་ཕྱག་རྒྱ་ཅན་ཧྲཱིཿའི་སྙིང་པོ་ཅན་འཁོར་ལོས་མཚན་པའོ། །རྡོ་རྗེ་སེམས་དཔའ་ནི་ནམ་མཁའི་མདོག་ཅན་ཇི་སྐད་འབྱུང་བའི་ཕྱག་རྒྱ་ཅན། ཧཱུཾ་གི་སྙིང་པོ་ཅན་རྡོ་རྗེས་
མཚན་པའོ། །རིན་ཆེན་འབྱུང་ལྡན་ནི་གསེར་བཙོ་མའི་མདོག་ཅན་ཇི་སྐད་འབྱུང་བའི་ཕྱག་རྒྱ་ཅན། ཏྲཱཾ་གི་སྙིང་པོ་ཅན་རིན་པོ་ཆེས་མཚན་པའོ། །འོད་དཔག་མེད་ནི་མེ་ལྕེ་འབར་བའི་མདོག་ཅན་ཇི་སྐད་འབྱུང་བའི་ཕྱག་རྒྱ་ཅན། ཧྲཱིཿའི་སྙིང་པོ་ཅན་པདྨས་མཚན་པའོ། །དོན་ཡོད་གྲུབ་པ་ནི་སཱ་ལུ་ལྗང་
བའི་མདོག་ཅན་ཇི་སྐད་འབྱུང་བའི་ཕྱག་རྒྱ་ཅན། ཨཿའི་སྙིང་པོ་ཅན་རལ་གྲིས་མཚན་པའོ། །འདི་དག་དབུས་བཅས་ཕྱོགས་རྣམས་སུ། །རིམ་བཞིན་ལས་ལ་མཛད་པ་ལ། །བརྩོན་པས་ཏིང་ངེ་འཛིན་བཞུགས་པ། །བདག་སྦྱང་བ་དང་གཞན་སྦྱང་གཉིས། །ཨོཾ་ཨ་སྭ་པ་ར་ཛྙཱ་ན་བི་ཤུདྡྷ་ཀྲ་ས་ཧཱུཾ། 
འཁོར་ལོ་ལྟ་བུའི་སྔགས་སོ། །ཐུགས་རྗེ་ཆེན་པོ་ལྷ་ལྔའི་སྒྲུབ་ཐབས། རྣལ་འབྱོར་གྱི་དབང་ཕྱུག་ཆེན་པོ་ཤྲཱི་མི་ཏྲ་ཨཱ་ནནྡའི་གདམས་པ་རྫོགས་སོ།།      །།གནུབས་ལོ་ཙཱ་བས་བསྒྱུར་བའོ། །༄༅༅ །རྒྱ་གར་སྐད་དུ། སིཾ་ཧ་ནཱ་ད་སཱ་དྷ་ནཾ། བོད་སྐད་དུ། སེང་གེ་སྒྲའི་སྒྲུབ་
ཐབས། འཇིག་རྟེན་དབང་ཕྱུག་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་ཁ་བཤལ་བ་ལ་སོགས་པ་བྱས་ཏེ། སྟན་བདེ་བ་ལ་འདུག་ནས། རང་གི་སྙིང་གར་ཟླ་བའི་དཀྱིལ་འཁོར་དུ་ཡི་གེ་ཧྲཱིཿདཀར་པོ་བལྟས་ཏེ། དེའི་འོད་ཀྱིས་བླ་མ་དང་སངས་རྒྱས་དང་བྱང་ཆུབ་སེམས་དཔའ་

73-1-197b

རྣམས་སྤྱན་དྲངས་ཏེ་མདུན་དུ་བསམས་ལ། དེའི་རྗེས་ལ་མཆོད་པ་དང་སྡིག་པ་བཤགས་པ་ལ་སོགས་བྱས་ཏེ། སྟོང་པ་ཉིད་རྣམ་པར་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་པ་འདིས་བྱིན་གྱིས་བརླབ་པོ། །དེ་ནས་སྐད་ཅིག་གིས་པཾ་གྱུར་པ་ལས་པདྨ་དཀར་པོ་དེའི་
སྟེང་དུ་ཡི་གེ་སིཾ་ཡོངས་སུ་གྱུར་པ་ལས་སེང་གེ་དཀར་པོ་དེའི་སྟེང་དུ་ཟླ་བ་ལ་གནས་པའི་ཡི་གེ་ཧྲཱིཿལས་ཡང་དག་པར་བྱུང་བའི་འཇིག་རྟེན་དབང་ཕྱུག་སེང་གེ་སྒྲར་བདག་ཉིད་བསམ་པར་བྱ། དཀར་པོ་འོད་དཔག་ཏུ་མེད་པའི་དབུ་རྒྱན་དང་རལ་པའི་ཐོར་ཅོག་ཅན་སྤྱན་གསུམ་པ་ཕྱག་གཉིས་པ་
དཀའ་ཐུབ་པའི་ཆ་ལུགས་འཛིན་པ། རྒྱལ་པོ་ཆེན་པོའི་འགྱིང་བག་གིས་བཞུགས་པ། ཕྱག་གཉིས་པའི་གཡོན་པ་ན་པདྨ་གྱེན་དུ་ལངས་པའི་ཐོག་ན་རལ་གྲི་འབར་བ། གཡས་ན་རྩེ་གསུམ་དཀར་པོ་སྦྲུལ་གྱིས་བཅིངས་པ། ཡང་གཡོན་ངོས་སུ་དྲི་བཟངས་སྣ་ཚོགས་ཀྱིས་བཀང་བའི་ཐོད་
པ་དཀར་པོ། དེ་བཞིན་གཤེགས་པ་ལྔ་འཕྲོ་བ་སྤྲུལ་པའི་སྐུ་ཆེན་པོར་བསམ་པར་བྱའོ། །བཟླས་པའི་སྔགས་ནི། ཨོཾ་ཨཱཿཧྲཱིཿསིཾ་ཧ་ནཱ་ད་ཧཱུཾ་ཕཊ། དེའི་རྗེས་སུ་གཟུངས་འབྱུང་བར་འགྱུར་རོ། །ན་མོ་རཏཱ་ཏྲ་ཡཱ་ཡ། ན་མཿཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་
ཎི་ཀཱ་ཡ། ཏདྱ་ཐཱ། ཨོཾ་ཨ་ཀ་ཊེ། བི་ཀ་ཊེ། ནི་ཀ་ཊེ། ཀ་ཊཾ་ཀ་ཊེ། ཀ་རོ་ཊེ། ཀ་རོ་ཊཾ། རྱཱ་སྭཱ་ཧཱ། འདི་ནི་བཅོམ་ལྡན་འདས་འཕགས་པ་འཇིག་རྟེན་དབང་ཕྱུག་གི་སྤྱན་སྔར་སྔ་དྲོའི་དུས་སུ་བའི་ལྕི་བ་ས་ལ་མ་ལྷུང་བས་མཎྜལ་བརྒྱད་བྱས་ལ་མཎྜལ་རེ་རེ་ལ་ཡང་ལན་བཅུ་གསུམ་བརྗོད་
པར་བྱའོ། །དེ་ནས་ལྕི་བ་ལྷག་མ་ལ་སྔགས་ལན་བདུན་བཟླས་ལ་བྱིན་གྱིས་བརླབས་ཏེ། གང་དུ་བྱུང་བའི་སར་བསྐུས་ན་ནད་ཐམས་ཅད་ཞི་བར་འགྱུར་རོ། །ཉི་མ་བདུན་ནམ་བཅུ་གསུམ་མམ་ཉི་ཤུ་རྩ་གཅིག་བྱས་ན་མཚམས་མེད་པ་ལྔ་བྱས་པ་ཡིན་དུ་ཟིན་ཀྱང་གྲུབ་པར་མ་གྱུར་
ན་ངས་མཚམས་མེད་པ་ལྔ་བྱས་པར་འགྱུར་རོ། །རྗེ་བཙུན་སེང་གེ་སྒྲའི་སྒྲུབ་ཐབས། སློབ་དཔོན་ཙནྡྲ་གོ་མིས་མཛད་པ་རྫོགས་སོ།།      །།དཔྱལ་ཆོས་ཀྱི་བཟང་པོས་བསྒྱུར་བའོ། །༄༅༅། །རྒྱ་གར་སྐད་དུ། ལོ་ཀི་ཤྭ་ར་སིཾ་ཧ་ནཱ་ད་སྟོ་ཏྲ་ནཱ་མ། བོད་སྐད་དུ། 

73-1-198a

འཇིག་རྟེན་དབང་ཕྱུག་སེང་གེ་སྒྲ་ཞེས་བྱ་བའི་བསྟོད་པ། འཇིག་རྟེན་དབང་ཕྱུག་སེང་གེ་སྒྲ་ལ་ཕྱག་འཚལ་ལོ། །གང་གིས་འཇིག་རྟེན་ཉེས་པ་མ་ལུས་དབང་གྱུར་ཇི་སྲིད་ལེགས་པའི་ལམ་ལ་མ་བཀོད་པ། །དེ་སྲིད་དེ་དག་ཡང་དག་གདོན་ཕྱིར་བདག་ནི་བྱང་ཆུབ་མཆོག་ཏུ་བགྲོད་
པར་བྱེད་མ་གྱུར། །གང་གིས་ཁམས་གསུམ་འདི་དག་སེང་གེའི་སྒྲ་ཆེན་མཆོག་གིས་གསལ་བར་གང་གྱུར་པས། །སྡུག་བསྔལ་ཅན་དག་བསྐྱབ་ཕྱིར་ཐུགས་རྗེའི་སྤྱན་དང་སེང་གེ་སྒྲ་ལྡན་ཁྱོད་ལ་བསྟོད། །རལ་པ་རྒྱ་ཆེའི་དབྱིབས་ཅན་དྲི་མེད་ཟླ་འདྲ་ཤིན་ཏུ་དཀར་བའི་ཞལ་མངའ་བ། །བསྐལ་
པ་དུ་མར་ཚོགས་བསགས་བརྟུལ་ཞུགས་ཆེན་པོ་ཤིན་ཏུ་དག་བྱེད་དང་ལྡན་པ། །འགྲོ་བ་མ་ལུས་ཕན་མཛད་ལྷ་དང་ལྷ་མིན་གྲུབ་པ་རྣམས་ཀྱིས་རབ་བཏུད་པ། །ཤིན་ཏུ་རྒྱ་ཆེ་བ་ཡི་སྐུ་མངའ་ཁྱོད་ལ་རྟག་ཏུ་གུས་པས་ཕྱག་འཚལ་ལོ། །པདྨ་དམར་པོ་རྒྱས་པ་ཟླ་བའི་གཟུགས་དང་ལྡན་པའི་
གདན། །སེང་གེའི་གདན་གྱི་སྟེང་ན་རྒྱལ་པོའི་རོལ་པས་རྣམ་པར་མཛེས། །ཆོས་ཀྱི་མངའ་བདག་འབྱོར་པས་དྲི་མེད་གསུང་ནི་བཀའ་སྩལ་པ། །འཇིག་རྟེན་མགོན་པོ་འོད་དཔག་མེད་པའི་དཔལ་གྱིས་དབུ་ལ་མཚན་ལ་འདུད། །གཡས་ཀྱི་ཕྱག་ནི་པདྨ་གསལ་བ་ལྟ་བུར་འཇམ་པ་ཡིས། །
ཁམས་གསུམ་ཉེས་པ་གསུམ་པོ་ཞི་བར་བྱ་ཕྱིར་རྩེ་གསུམ་པ། །འོད་ཟེར་འབར་འཁྲིགས་སྦྲུལ་དང་ལྡན་པས་རྟག་ཏུ་གང་འཛིན་པ། །བདག་གི་ཐུབ་པ་སེང་གེ་སྒྲ་དེ་ལ་ནི་རྟག་ཏུ་ཕྱག་བགྱིའོ། །ཁམས་གསུམ་པོ་ལ་ཐུགས་རྗེ་ཆེན་པོས་གནས་ཀྱང་སྐྱོན་གྱིས་ནི། །ཁྱོད་ལ་གོས་པ་མེད་ཀྱང་དེ་
དག་སྤང་ཕྱིར་ཁྱེད་ཀྱིས་ནི། །གཡོན་པའི་ཕྱག་གིས་རལ་གྲི་དམ་རྫས་དང་བཅས་པདྨ་བསྣམས། །རྒྱལ་བའི་སྲས་པོ་ཁྱོད་ལ་རྟག་ཏུ་བདག་ཉིད་སྐྱབས་སུ་མཆི། །ང་རྒྱལ་ལ་སོགས་ཚོགས་ཀྱིས་གཡེངས་པའི་སེམས་ཅན་རྣམས་ལ་ནི། །དམིགས་ནས་རྒྱལ་བ་ལྔ་པོ་ཡང་དག་སྤྲོས་
ནས་དེ་རྣམས་ལ། །ཇི་ལྟ་ཇི་ལྟར་དག་པའི་ཐབས་ལ་མཁས་པ་དག་གིས་མཛད་པ་རྣམས། །གང་ལ་དགོངས་པ་དེ་མངའ་ཕྱག་ན་པདྨ་དེ་ལ་ཕྱག་འཚལ་ལོ། །མཁས་པ་རྣམས་ཀྱིས་གང་ལ་ཚིག་གི་གོ་སྐབས་མེད་པ་ནི། །ཐོས་པ་ལ་སོགས་བྲལ་བས་ཁྱོད་ལ་མོས་དང་གུས་པ་མེད། །དེ་

73-1-198b

དག་རྣམས་ཀྱིས་མཁས་པའི་མཆོག་ཉིད་དག་ནི་ཐོབ་པ་ཡི། །མཉམ་མེད་དཔལ་ལྡན་སེང་གེ་སྒྲ་ལ་བདག་ནི་སྐྱབས་སུ་མཆི། །སྐྱེ་བ་གཞན་གྱི་མི་དགེ་མཛེ་ཡི་རྣམ་པར་གྱུར་པ་རུས་པ་དང་། །སྣ་ནས་རྐང་ལག་སྲིན་བུས་སྐད་འགགས་ལྡན་པ་དག །ཁྱོད་བསྟོད་པས་ནི་སྐད་ཅིག་གིས་ནི་གསེར་མདོག་
ལྟ་བུའི་ལུས་སུ་གྱུར། །ཐུབ་པ་སེང་གེ་སྒྲ་ཁྱོད་ལ་ནི་དེ་ཉིད་དེ་ལ་སྐྱབས་སུ་མཆི། །ཀླུ་ཡི་མངའ་བདག་གྱུར་པ་ཆུ་ལྷ་དབང་དུ་མཛད་ནས་ནི། །དུས་མིན་ཆར་དང་ཆར་མེད་མཛེ་དང་སྐྱོན་དག་ཞི་དོན་དང་། །འགྲོ་བའི་དོན་དང་དོན་མེད་ཚོགས་དག་རབ་ཏུ་སེལ་བར་མཛད་པ་ཡི། །བརྩོན་འགྲུས་བརྟན་
པར་རབ་བརྩམས་ཁྱོད་ལ་ཀུན་ནས་འདུད། །མང་དུ་བརྗོད་པས་ཅི་ཞིག་ཁྱོད་ཀྱི་མཚན་དང་སྐུ་དག་དང་། །གང་ཞིག་ལ་ལ་གུས་པས་འཛིན་པ་དང་ནི་སེམས་དགའ་དག །སྐྱེ་བོ་དེ་ནི་ལོངས་སྤྱོད་རྒྱ་ཆེ་བ་དག་ཐོབ་པར་གྱུར་ནས་ཀྱང་། །སྲིད་པའི་རྒྱ་མཚོ་བརྒལ་དཀར་བརྒལ་ནས་མྱ་ངན་འདས་
པ་ཐོབ་པར་འགྱུར། །ངག་གི་དབང་ཕྱུག་ལ་སོགས་གང་གིས་ཀྱང་ནི་རྗེ་བཙུན་གྱི། །ཡོན་ཏན་ཕྱོགས་གཅིག་ཆ་ཙམ་བསྐལ་པ་དུ་མ་རུ། །འབད་པས་ཀྱང་ནི་བརྗོད་པར་ནུས་པ་མ་ཡིན་ན། །ཇི་ལྟར་བདག་འདྲས་འཁྲུལ་ཀྱང་གུས་བྱས་འདི་དག་བཟོད་པར་གསོལ། །འཇིག་རྟེན་གསུམ་པོའི་
སྡུག་བསྔལ་འཕྲོག་བྱེད་མཆོག་གི་དགེས་བྱེད་ཅན། །དཔལ་ལྡན་སེང་གེ་སྒྲ་ཡི་བསྟོད་པ་ལས་ཐོབ་བསོད་ནམས་གང་། །དཔག་མེད་ཀུནྡ་དོ་ཤལ་དགོད་པ་དཀར་པོ་དང་འདྲ་བ། །དེ་ཡིས་སྐྱེ་བོ་བྱང་ཆུབ་འགྱུར་མེད་གོ་འཕང་མྱུར་ཐོབ་ཤོག །བཅོམ་ལྡན་འདས་འཇིག་རྟེན་དབང་
ཕྱུག་སེང་གེ་སྒྲའི་བསྟོད་པ། རྒྱ་གར་གྱི་སློབ་དཔོན་ཆེན་པོ་ཏི་ལ་ཀས་མཛད་པ་རྫོགས་སོ།།      །།པཎྜི་ཏ་དེ་ཉིད་དང་ལོ་ཙཱ་བ་མལ་གྱིས་བསྒྱུར་ཅིང་གཏན་ལ་ཕབ་པའོ།    །༄༅༅། །རྒྱ་གར་སྐད་དུ། སིཾ་ཧ་ནཱ་ད་རཀྵ་ཙཀྲ་ནཱ་མ། བོད་སྐད་དུ། སེང་གེ་སྒྲའི་སྲུང་བའི་
འཁོར་ལོ་ཞེས་བྱ་བ། འཕགས་པ་སེང་གེ་སྒྲ་ལ་ཕྱག་འཚལ་ལོ། །ཐུགས་རྗེ་མཆོག་དང་ལྡན་པ་ཡི། །སེང་གེ་སྒྲ་ལ་ཕྱག་འཚལ་ཏེ། །སེམས་ཅན་ཀུན་གྱི་ནད་དང་གདོན། །བསྲུང་བའི་ཆོ་ག་བཤད་པར་བྱ། །དུས་དང་ཚེས་གྲངས་བཟང་པོ་ལ། །མཆོད་རྟེན་མཎྜལ་

73-1-199a

བཤམས་ནས་ནི། །ལྷ་ཡི་ང་རྒྱལ་ལྡན་པ་ཡིས། །རས་སམ་ཤིང་ལོ་གྲོ་ག་ལ། །ཁྲག་གམ་རྒྱ་སྐྱེགས་གུར་གུམ་གྱིས། །རིམ་པ་ལྔ་རུ་བསྐོར་བར་བྱ། །དང་པོ་པདྨའི་ལྟེ་བ་ཡིན། །གཉིས་པ་མུ་ཁྱུད་ཕྲ་བར་བསྐོར། །གསུམ་པ་ཅུང་ཆེ་པད་འདབ་བརྒྱད། །བཞི་པ་ལྔ་
པའི་རིམ་པ་ནི། །པདྨའི་ཕྱིར་ལ་ཕྲ་བ་བྱ། །ཡི་གེ་དགོད་པའི་སྦྱོར་བ་ནི། །དབུས་སུ་ཨོཾ་གྱི་སྦྱོར་ཡིག་དང་། །དེ་མཐར་མིང་དང་བསྲུང་ཚིག་བྲི། །དེ་ཡི་ཕྱི་རིམ་མུ་ཁྱུད་ལ། །དབྱངས་ཀྱི་ཡི་གེ་བཅུ་དྲུག་བྲི། །གསུམ་པ་པད་འདབ་བརྒྱད་པ་ལ། །ཨོཾ་སྤངས་ཡི་གེ་བརྒྱད་པོ་བྲི། །རིམ་
པ་བཞི་པའི་མུ་ཁྱུད་ལ། །གཟུངས་སྔགས་བསྲུང་ཚིག་བཅས་པ་བྲི། །རིམ་པ་ལྔ་པའི་མུ་ཁྱུད་ལ། །གསལ་བྱེད་སུམ་ཅུ་བཞི་པ་ལ། །བསྲུང་བྱ་ལས་སྔགས་ལྡན་པ་དགོད། །དེ་ལྟར་བྲི་བ་རྫོགས་ནས་ནི། །རབ་ཏུ་གནས་པའི་ཆོ་ག་ནི། །མཎྜལ་སྟེང་དུ་འཁོར་ལོ་བཞག །མཆོད་
དང་གཏོར་མ་གཅིག་བཏང་སྟེ། །འཁོར་ལོའི་ཨོཾ་ཡིག་ལས་སྤྲོས་ཏེ། །རྗེ་བཙུན་འཁོར་ལོའི་སྟེང་དུ་དྲང་། །རང་གི་ཐུགས་ཀའི་ས་བོན་ལས། །ལྷ་མོ་ལྔ་ལ་མཆོད་པ་དང་། །རྫས་ཀྱི་མཆོད་པ་རྣམ་ལྔས་མཆོད། །བསྟོད་ཅིང་བསྲུང་བར་གསོལ་བ་གདབ། །དེ་ཞུ་ཡིག་འབྲུའི་
རྣམ་པར་གྱུར། །དེ་ལ་བྱིན་རླབས་བྱ་ཕྱིར་སྔགས་བཟླས་པ། །ཨོཾ་ཨཱཿཧྲཱིཿསིཾ་ཧ་ནཱ་ད་ཧཱུཾ་ཕཊ། ཆེ་གེ་མོ་སརྦ་ཀ་ཏེ་རཀྵ་ཀུ་རུ་ཤཱནྟིཾ་པུཥྚིཾ་ཀུ་རུ་སྭཱ་ཧཱ། ཨོཾ་ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལི་ལཱྀ། ཨེ་ཨཻ། ཨོ་ཨཽ། ཨཾ་ཨཿཆེ་གེ་མོ་ལ་རཀྵ་ཀུ་རུ་ཤཱནྟིཾ་ཀུ་རུ། 
པུཥྚིཾ་ཀུ་རུ་སྭཱ་ཧཱ། ན་མོ་རཏྣ་ཏྲ་ཡཱ་ཡ་ཞེས་པའི་གཟུངས་དང་། ཀ་ཁ་ག་གྷ་ང་། ཞེས་པའི་གསལ་བྱེད་ལ་ཡང་མིང་དང་ལས་སྔགས་སྦྱར་ཏེ་སྔགས་དེ་རྣམས་བརྒྱ་རྩ་བརྒྱད་དམ། ཉི་ཤུ་རྩ་གཅིག་གམ་ཐེབས་བདུན་བཟླས་ལ་གཏོར་མ་བཏང་བསྲུང་བར་གསོལ་བ་གདབ། དེ་
ནས་དྲིལ་ཏེ་གདགས་པར་བྱའོ། །དེ་ཡི་རྗེས་ལ་བྱ་བ་ནི། །རང་གི་ཡེ་ཤེས་བཅུག་གྱུར་ནས། །མཆོད་དེ་བཟོད་གསོལ་གཤེགས་པར་བྱ། །རང་ལ་བྱེད་དམ་གཞན་ལའང་། །བསྲུང་བ་བཏགས་པའི་ཕན་ཡོན་ནི། །ཚེ་རིང་བསོད་ནམས་ཆེ་བ་དང་། །སྡིག་པ་ཐམས་ཅད་བྱང་བ་

73-1-199b

དང་། །བགེགས་དང་ལོག་འདྲེན་འཚོ་སྐྱོབ་དང་། །རྗེ་བཙུན་སྲུང་འཁོར་བྱས་པ་ཡིས། །དགེ་དེས་སེམས་ཅན་བར་ཆད་ཞི། །རྗེ་བཙུན་སེང་གེ་སྒྲའི་སྲུང་འཁོར་བླ་མའི་ཞལ་ནས་འོངས་པ་རྫོགས་སོ།།      །།༄༅༅། །རྒྱ་གར་སྐད་དུ། སཾ་ཀྵིཔྟ་ཨ་མོ་གྷ་པཱ་ཤ་སཱ་དྷ་ནཾ། བོད་
སྐད་དུ། དོན་ཡོད་ཞགས་པའི་སྒྲུབ་ཐབས་མདོར་བསྡུས་པ། འཕགས་པ་དོན་ཡོད་ཞགས་པ་ལ་ཕྱག་འཚལ་ལོ། །མགོན་པོ་ཧྲཱིཿཡིག་ལས་བྱུང་ཞིང་། །ཐུགས་ནི་ཐུགས་རྗེ་ཡིས་བརླན་པ། །དོན་ཡོད་ཞགས་པ་ཞེས་བྱ་བའི། །འཇིག་རྟེན་མགོན་ལ་བདག་ཕྱག་འཚལ། །སྡིག་པ་
བཤགས་སོགས་བྱས་ནས་ནི། །སྟོང་པ་ཉིད་སོགས་མཐར་ཐུག་པས། །སྐད་ཅིག་རྣམ་པས་རྗེ་བཙུན་ནི། །ཇི་ལྟའི་གཟུགས་སུ་རྣམ་པར་བསྒོམ། །སྣ་ཚོགས་ཆུ་སྐྱེས་སྟེང་བཞེངས་ནས། །ཞལ་གཅིག་པ་ལ་ཕྱག་བརྒྱད་པ། །མི་འཇིགས་པ་དང་མཆོག་སྦྱིན་དང་། །ཞགས་པ་བགྲང་ཕྲེང་
རབ་མཛེས་གཡས། །དབྱུག་པ་རྩེ་གསུམ་གླེགས་བམ་དང་། །པདྨའི་སྤྱི་བླུགས་འཛིན་པ་གཡོན། །དཀའ་ཐུབ་ཆས་འཛིན་མཛད་པ་ཡིས། །སྟག་གི་པགས་པས་སྨད་དཀྲིས་པ། །གཡས་གཡོན་ནོར་བཟངས་རྟ་མགྲིན་དང་། །སྒྲོལ་མ་ཁྲོ་གཉེར་ཅན་ཡང་ངོ་། །མགོན་པོ་ཡན་ལག་ཀུན་
དཀར་པོ། །རབ་དཀར་ན་བཟས་རྣམ་པར་སྤྲས། །འོད་ཟེར་དཀར་པོ་མཉམ་པར་འཁྲིགས། །དེ་བཞིན་གཤེགས་པ་ལྔ་འཕྲོ་བ། །འོད་དཔག་མེད་དམར་ཅོད་པན་ཅན། །སེམས་ཅན་དོན་མཛད་པ་ལ་བརྩོན། །དེ་ལྟར་བསྒོམ་པར་བྱས་ནས་ནི། །གསང་སྔགས་བཟླས་པས་བདུད་འབྱེར་རོ། །
ཨོཾ་ཨ་མོ་གྷ་པཱ་ཤ་ཧྲཱིཿསྭཱ་ཧཱ། དོན་ཡོད་ཞགས་པའི་སྒྲུབ་ཐབས་མདོར་བསྡུས་པ། ཁ་ཆེའི་པཎྜི་ཏ་ཆེན་པོ་ཤཱཀྱ་ཤྲཱི་བྷ་དྲས་མཛད་པ་རྫོགས་སོ།།      །།བོད་ཀྱི་ལོ་ཙཱ་བ་དགེ་སློང་རབ་མཆོག་དཔལ་བཟང་པོས་བསྒྱུར་བ། དྲང་སྲོང་སྲིན་པོ་རི་ར་བསྒྱུར་རོ། །གཏོར་མ་ནི། རང་ཉིད་ལྷའི་
རྣལ་འབྱོར་དང་ལྡན་པས། སྣོད་གཙང་མར་ཤ་ཁྲག་དང་བྲལ་བའི་གཏོར་མ་ལེགས་པར་བཤམས་ལ། སྟོང་པའི་ངང་ལས་ཡི་གེ་པཾ་ལས་བྱུང་བའི་རིན་པོ་ཆེ་པདྨའི་སྣོད་དུ། གཏོར་མའི་རྫས་རྣམས་ཡི་གེ་ཨ་དཀར་པོ་ལས་ལྷ་རྫས་ཀྱི་བདུད་རྩིར་གྱུར་པར་བསམས་ལ། ཨོཾ་ཨཱཿ

73-1-200a

ཧཱུཾ་ཞེས་བརྗོད་ཅིང་ཇི་ལྟར་འདོད་པར་བྱིན་གྱིས་བརླབ་པར་བྱའོ། །དེ་ནས་རང་གི་སྙིང་གའི་ས་བོན་གྱི་འོད་ཟེར་གྱིས་འཕགས་པ་དོན་ཡོད་ཞགས་པའི་ལྷ་རྣམས་མདུན་གྱི་ནམ་མཁའ་ལ་སྤྱན་དྲངས་ལ། ཕྱག་བཙལ་ཞིང་མཆོད་པ་སྔོན་དུ་འགྲོ་བས། ལྷ་རྣམས་ཀྱི་སྟོང་པའི་
རང་བཞིན་ལས་ནི་ཡི་གེ་ཧཱུཾ་ལས་དེ་ཉིད་ཀྱིས་མཚན་པའི་རྡོ་རྗེ་རྩེ་གཅིག་པ་འོད་ཟེར་གྱི་སྦུ་གུ་དང་ལྡན་པས་བདུད་རྩིའི་གཏོར་མ་འདྲེན་པར་བསམ་ཞིང་། ཨོཾ་ཨ་མོ་གྷ་པཱ་ཤ་ཧྲཱིཿཨི་མཾ་བ་ལིཾ་གྲྀཧྞ་གྲྀཧྞ་མ་མ་སརྦ་པཱ་པཾ་ཤཱནྟིཾ་ཀུ་རུ་སྭཱ་ཧཱ། ཞེས་ལན་ལྔའི་བར་དུ་བརྗོད་དེ། སེ་གོལ་གྱི་སྒྲ་བྱ་ཞིང་
གཏོར་མ་དབུལ་བར་བྱའོ། །དེ་ནས་ཡང་དག་པར་མཆོད་ཅིང་དྲིལ་བུའི་སྒྲ་དང་ལྡན་པས་མཚན་བརྒྱ་རྩ་བརྒྱད་ཀྱིས་བསྟོད་དེ། མངོན་པར་འདོད་པའི་དོན་དུ་གསོལ་བ་གདབ་ལ། ཡི་གེ་བརྒྱ་པའི་སྔགས་བརྗོད་ཅིང་དགེ་བའི་རྩ་བ་ཡོངས་སུ་བསྔོ་སྟེ། ཨོཾ་ཁྱེད་ཀྱིས་ཞེས་བྱ་བ་ལ་
སོགས་པའི་ཚིགས་སུ་བཅད་པས་གཤེགས་སུ་གསོལ་བར་བྱའོ། །དོན་ཡོད་ཞགས་པའི་གཏོར་མའི་ཆོ་ག །ཁ་ཆེའི་པཎྜི་ཏ་ཆེན་པོ་ཤཱཀྱ་ཤྲཱི་བྷ་དྲས་མཛད་པ་རྫོགས་སོ།།      །།ལོ་ཙཱ་བ་དགེ་སློང་རབ་མཆོག་དཔལ་བཟང་པོས་བསྒྱུར་བའོ། །༄༅༅། །རྒྱ་གར་
སྐད་དུ། པོ་ཤ་དྷ་ཀ་རི་ཎཱི་ཡ། བོད་སྐད་དུ། གསོ་སྦྱོང་བླང་བ། འཕགས་པ་དོན་ཡོད་ཞགས་པ་ལ་ཕྱག་འཚལ་ལོ། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །བདག་དང་གཞན་དོན་རབ་བསྒྲུབ་ཕྱིར། །བྱང་ཆུབ་སེམས་འདི་བསྐྱེད་པར་
བགྱི། །སྡིག་པ་ཐམས་ཅད་བཤགས་བགྱིད་ཅིང་། །བསོད་ནམས་ལ་ཡང་རྗེས་ཡི་རང་། །འཕགས་པའི་གསོ་སྦྱོང་ཡན་ལག་བརྒྱད། །བསྙེན་པ་ལ་ནི་སྤྱད་པར་བགྱིའོ། །བཅོམ་ལྡན་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་ནི། །དུས་འདི་ནས་བཟུང་ཇི་སྲིད་
ནས། །ཉི་མའི་འོད་ནི་མ་ཤར་བར། །སྲོག་ཆགས་གསོད་དང་གཞན་ནོར་འཕྲོག །མི་ཚངས་སྤྱོད་དང་བདེན་མིན་སྨྲ། །མྱོས་པ་བསྐྱེད་དང་བཞོན་པ་དང་། །དུས་ནི་མ་ཡིན་པ་ཡི་ཟས། །ཕྲེང་བ་ཁ་དོག་གླུ་དང་གར། །ཁྲི་སྟན་མཐོན་པོ་ལ་སོགས་པ། །ཐམས་ཅད་བདག་གིས་

73-1-200b

སྤང་བགྱིད་ཅིང་། །འཕགས་པའི་ཡོན་ཏན་བརྒྱད་སྤྱད་དང་། །གསོ་སྦྱོང་ཁྲིམས་སྡོམ་ཡི་དམ་འདི། །སེམས་ཀྱི་རྒྱན་སེམས་ཀྱི་ཡོ་བྱད་རྣལ་འབྱོར་གྱི་ཚོགས་མཆོག་ཏུ་དོན་དམ་པའི་སངས་རྒྱས་ཉིད། ཐོབ་པ་ལ་ནི་འོད་འདིས་རེག་གྱུར་ཅིག །བྱང་ཆུབ་མཆོག་གི་སེམས་འདི་
བསྐྱེད་བགྱིས་ལ། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་ནས་ནི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཁ་ཆེའི་པཎྜི་ཏ་ཆེན་པོ་ཤཱཀྱ་ཤྲཱི་བྷ་དྲས་མཛད་པ་རྫོགས་སོ།།      །།ལོ་ཙཱ་བ་དགེ་སློང་རབ་མཆོག་དཔལ་
བཟང་པོས་བསྒྱུར་བའོ།    །༄༅༅། །རྒྱ་གར་སྐད་དུ། ཨཱརྱ་ཨ་མོ་གྷ་པཱ་ཤ་བོ་ཥ་ཏ་བི་དྷི་ཨཾ་ནཱ་ཡ། བོད་སྐད་དུ། འཕགས་པ་དོན་ཡོད་ཞགས་པའི་གསོ་སྦྱོང་གི་ཆོ་གའི་མན་ངག །འཕགས་པ་དོན་ཡོད་ཞགས་པ་ལ་ཕྱག་འཚལ་ལོ། །ན་མཿཨཱརྱཱ་བ་ལོ་ཀི་ཏེ་ཤྭ་རཱ་
ཡ། བོ་དྷི་སཏྭཱ་ཡ། མཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཨ་མོ་གྷ་ཤཱི་ལ་མ་ཧཱ་ཤུདྡྷ་སཏྭ། བྷ་ར་བྷ་ར། སཾ་བྷ་ར་སཾ་བྷ་ར། པདྨ་བི་བྷཱུ་ཥི་ཏ་བྷུ་ཛ་དྷ་ར། ས་མནྟ་ཨ་བ་ལོ་ཀི་ཏེ་ཤྭ་ར་ཨོཾ་ཨཱཿཧཱུཾ་ཕཊ་སྭཱ་ཧཱ། གཟུངས་འདི་འཕགས་པ་དོན་ཡོད་ཞགས་པའི་གསོ་སྦྱོང་གི་
དུས་སུ་ཉི་ཤུ་རྩ་གཅིག་བརྗོད་པར་བྱའོ། །དེའི་ཆོ་ག་ནི་དཀར་པོའི་ཕྱོགས་ཀྱི་ཚེས་བརྒྱད་ལ་བརྟུལ་ཞུགས་ཀྱིས་བསྡམས་པར་གྱུར་པས་ཁྱད་པར་དུ་བཀླག་པར་བྱ་སྟེ། བཅོམ་ལྡན་འདས་དོན་ཡོད་ཞགས་པ་ལ་ཡང་དག་པར་མཆོད་ཅིང་གསོལ་བ་གདབ་པར་བྱའོ། །ཆུ་ཚོད་ལ་སོགས་
ཀྱི་ཁོངས་སུ་འོ་མ་དང་། ཀ་ར་དང་དཀར་གསུམ་གྱི་ཟས་བཟའ་བར་བྱའོ། །ཉལ་བའི་དུས་སུ་ཀུ་ཤ་བཏིང་བ་ལ་སེང་གེའི་ཉལ་ཐབས་ཀྱིས་མགོ་ལ་བཅོམ་ལྡན་འདས་ལྷག་པར་མོས་པར་བྱ་སྟེ། ཕྱག་བྱས། མཆོད་པར་བྱའོ། །ཚེས་བརྒྱད་ཀྱི་ཐོ་རངས་ཁ་ཤིན་ཏུ་གཙང་མར་བཀྲུས་ཤིང་སྔགས་
ཀྱིས་དག་པར་གྱུར་པ་དང་། རང་གི་སྙིང་གར་ཟླ་བའི་དཀྱིལ་འཁོར་ལ་གནས་པའི་ཧྲཱིཿཡིག་དཀར་པོའི་འོད་ཟེར་གྱི་དྲ་བས་རང་གི་ལུས་ལ་སོགས་པ་སྣ་ཚོགས་གསལ་བར་བྱས་ནས། བཅོམ་ལྡན་འདས་འཁོར་དང་བཅས་པ་སྤྱན་དྲང་བར་བྱའོ། །ཨོཾ་ཨཱ་གཙྪ་ཨཱ་གཙྪ་བྷ་ག་ཝན་ཨ་

73-1-201a

མོ་གྷ་བཱ་ཤ་ལོ་ཀི་ཤྭ་ར་ཨཱཿསྔགས་འདིས་ཕྱི་རོལ་དུ་བ་ལྕི་ལ་སོགས་པས་ཁྱུགས་པའི་དཀྱིལ་འཁོར་བདུན་པོ་རྣམས་སུ་ལྷག་པར་མོས་པས་བཞུགས་པར་བྱ་སྟེ། རེ་རེ་ལ་གཟུངས་ལན་རེ་བཀླག་ཅིང་མཆོད་པར་བྱའོ། །མདུན་དུ་ཆུའི་བུམ་པ་བདུན་དང་། འབྲས་ཟན་གྱི་ཁམ་
ཕོར་བདུན་གཞག་པར་བྱའོ། །དེའི་རྗེས་ལ་ངག་ཀུན་བསྡམས་པར་གྱུར་ཅིང་། དད་པ་བརྟན་པའི་སེམས་ཀྱིས་རན་པོར་བཀླག་པར་བྱའོ། །དེའི་རྗེས་ལ་གཟུངས་ཙམ་པོ་ལན་ལྔའོ། །བདུན་པ་ལ་སྔར་རང་བཞིན་དུ་ཡོངས་སུ་རྫོགས་པ་ཉིད་དོ། །ཆུ་ཚོད་བདུན་གྱི་ཁོངས་སུ་དཀར་གསུམ་གྱི་ཟས་
བཟའ་བར་བྱའོ། །དེ་ལྟར་གཉིས་པ་གུང་གི་ཐུན་ལ་ཡང་ངོ་། །དེ་ནས་དེ་བཞིན་དུ་ཐུན་གསུམ་པ་ལའོ། །དེའི་རྗེས་ལ་མཆོད་པ་བདུན་པོ་རྣམས་ཀྱིས་ཡང་དག་པར་མཆོད་ལ། བསྐོར་བར་བྱ་ཞིང་ཡན་ལག་སྨད་ལྔས་ཕྱག་བྱས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསོད་
ནམས་ཡོངས་སུ་བསྔོ་བར་བྱའོ། །ཚེས་དགུ་ལ་ཡང་ཚེས་བདུན་པ་བཞིན་དུ་ཐམས་ཅད་བྱས་ལ། གསོ་སྦྱོང་གི་བརྟུལ་ཞུགས་ལ་རྗེས་སུ་ཡི་རང་བ་དང་བསོད་ནམས་ཡོངས་སུ་བསྔོ་བར་བྱའོ། །ཚིག་འདི་ཡིན་ཏེ། འདི་བདག་གིས་དོན་ཡོད་ཞགས་པའི་གསོ་སྦྱོང་གི་བརྟུལ་ཞུགས་ཚུལ་
ཁྲིམས་ཀྱི་སྡོམ་པའི་ཡི་དམ་གྱིས་སེམས་ཀྱི་རྒྱན་དང་། སེམས་ཀྱི་ཡོ་བྱད་དང་། རྣལ་འབྱོར་གྱི་ཚོགས་དང་། སེམས་ཅན་ཐམས་ཅད་ཀྱི་དོན་དུ་བླ་ན་མེད་པའི་སངས་རྒྱས་ཉིད་ཐོབ་པར་གྱུར་ཅིག་ཅེས་བྱ་བས་མཆོད་པ་གཤེགས་སུ་གསོལ་ཏེ། ཆུ་ཚོད་བདུན་གྱི་ནང་ཁོངས་སུ་དཀར་
གསུམ་གྱི་ཟས་བཟའ་བར་བྱའོ། །ཁྱད་པར་ནི་ཚེས་བདུན་པ་བཞིན་ནོ། །འཕགས་པ་དོན་ཡོད་ཞགས་པའི་གསོ་སྦྱོང་གི་ཆོ་གའི་མན་ངག །ཁ་ཆེའི་པཎྜི་ཏ་ཆེན་པོ་ཤཱཀྱ་ཤྲཱི་བྷ་དྲས་མཛད་པ་རྫོགས་སོ།།      །།བོད་ཀྱི་ལོ་ཙཱ་བ་དགེ་སློང་རབ་མཆོག་དཔལ་བཟང་པོས་བསྒྱུར་
བའོ། །༄༅༅། །རྒྱ་གར་སྐད་དུ། ཤྲཱི་བཛྲ་པཱ་ཎི་སཱ་དྷ་ནཾ། བོད་སྐད་དུ། དཔལ་ཕྱག་ན་རྡོ་རྗེའི་སྒྲུབ་པའི་ཐབས། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་པོ་དཔལ་ཕྱག་ན་རྡོ་རྗེ་ཡེ་ཤེས་ཀྱི་སྐུ་ཅན་ལ་ཕྱག་འཚལ་ལོ། །

73-1-201b

དེ་ནས་གསང་བའི་བདག་པོ་དཔལ་ཕྱག་ན་རྡོ་རྗེ་མཉེས་པར་འདོད་པས། དང་པོར་གསང་སྔགས་དང་། རིག་སྔགས་ཐམས་ཅད་གྲུབ་པའི་རྒྱུད་དམ་ཚིག་གི་གནས་རྣམས་སྲོག་གི་ཕྱིར་ཡང་མི་གཏང་བར་བསྲུང་བར་བྱ་སྟེ། དེ་ལ་དམ་ཚིག་ནི་འདི་དག་གོ། །དཀོན་མཆོག་གསུམ་དང་བྱང་ཆུབ་སེམས། །
སྔགས་དང་ཕྱག་རྒྱ་སློབ་དཔོན་དག །སྲོག་གི་ཕྱིར་ཡང་མི་གཏང་སྟེ། །དེ་དག་མཆོད་ཅིང་རིམ་གྲོར་བྱ། །སངས་རྒྱས་བསྟན་ལ་ཞུགས་པ་ཡིས། །དགེ་སློང་རྣམས་ལ་གུས་བྱ་ཞིང་། །ལྷ་དང་བླ་མ་ལ་མི་ཁྲོ། །འཇིག་རྟེན་ལྷ་སོགས་མི་སྨད་དོ། །སེམས་ཅན་རྣམས་ལ་བྱམས་པ་དང་། །སྙིང་
རྗེ་ཆེན་པོ་བསྐྱེད་ནས་ཀྱང་། །དེ་ཡི་གནོད་པ་བསལ་བྱ་ཞིང་། །བདག་ལ་གནོད་བྱས་བཟོད་པར་བྱ། །སེར་སྣ་རིང་དུ་བསལ་ནས་ནི། །སྦྱིན་པས་སེམས་ཅན་ཕན་གདགས་སོ། །དམ་ཚིག་མེད་པར་གྱུར་པ་ལ། །སྔགས་དང་ཕྱག་རྒྱ་སྦྱིན་མི་བྱ། །ཆང་ནི་བཏུང་བར་མི་བྱ་ཞིང་། །མདོར་ན་བདག་
དང་གཞན་རྣམས་ལ། །ཕན་པ་འབའ་ཞིག་ལྷུར་བྱ་ཞིང་། །ཁྲི་ལ་ཉལ་བར་མི་བྱའོ། །དེ་ལྟར་དམ་ཚིག་བསྲུང་བ་ལ་འབད་པས་དང་པོར་མལ་ནས་ཙོག་པུར་འདུག་ལ་ཆོས་ཉིད་རྣམ་པར་དག་པའི་སྔགས་ལན་གསུམ་མམ། བདུན་བཟླས་སོ། །ཨོཾ་སྭ་བྷཱ་བ་བི་ཤུདྡྷེ་སརྦ་དྷརྨྨ་ཏེ་བཛྲ་སཏྭ་ཧཱུཾ། དེ་ནས་
མདུན་གྱི་ནམ་མཁའ་ལ་རིགས་གསུམ་འཁོར་དང་བཅས་པ་དང་། དཔལ་ཕྱག་ན་རྡོ་རྗེ་མདུན་དུ་དམིགས་ལ་ཕྱག་བྱ་སྟེ། འདི་སྐད་གསོལ་བ་གདབ་བོ། །འཕགས་པ་ཐམས་ཅད་ཀྱིས་ཐུགས་རྗེས་གཟིགས་ཏེ། མགོན་མ་མཆིས་པ་དག་མྱུར་དུ་སངས་རྒྱས་གྲུབ་པར་མཛད་དུ་གསོལ་ཞེས་བརྗོད་
པར་བྱའོ། །དེ་ནས་ཁྲོ་བོ་མནོལ་བ་མེད་པའི་སྔགས་དང་ཕྱག་རྒྱ་དང་བཅས་པས་སྙིང་ག་དང་། ལྐོག་མ་དང་སྨིན་མཚམས་དང་སྤྱི་བོ་དང་། གནས་བཞིར་བཞག་སྟེ་བསྲུང་བར་བྱའོ། །དེ་ནས་ཕྱི་རོལ་ས་ལ་སོགས་པར་འགྲོ་བར་བྱའོ། །ལག་པ་གཡས་པ་ཁུ་ཚུར་བཅས་ལ་མཐེ་བོང་བསྒྲེང་བ་
ནི་ཁྲོ་བོ་མནོལ་བ་མེད་པའི་ཕྱག་རྒྱ་སྟེ་སྔགས་ཨོཾ་བཛྲ་ཀྲོ་དྷཱ་ན་ཧཱུཾ་ཛཿཕྱི་རོལ་ས་ལ་སོགས་པར་འགྲོ་བའི་ཚེ་བདུད་རྩི་ཐབ་སྦྱོར་གྱི་སྔགས་འདི་བར་ཆད་མེད་པར་ལན་བདུན་བཟླས་ན་དེའི་ཚེ་བག་མེད་པར་སྤྱད་ཀྱང་བགེགས་རྣམས་ཀྱིས་མི་བརྫིའོ་ཞེས་ལུང་ནས་འབྱུང་ངོ་། །དེའི་སྔགས་

73-1-202a

ལ། ན་མོ་རཏྣ་ཏྲ་ཡཱ་ཡ། ན་མ་ཤྩ་ཎྚ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷཱ་ཡ། དཾཥྚྲོ་ཏ་ཀ་ཊ་བྷཻ་རཱ་ཡ། ཨ་སི་མུ་ས་ལ་དྷ་རཱ་ཡ། པཱ་ར་ཤུ་པཱ་ཤ་ཧསྟཱ་ཡ། ཏདྱ་ཐཱ། ཨོཾ་ཨ་མྲྀ་ཏ་ཀུཎྜ་ལི། ཁ་ཁ། ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། གྲྀཧྞ་
གྲྀཧྞ། གརྫ་གརྫ། བི་སྥོ་ཊ་ཡ་བི་སྥོ་ཊ་ཡ། སརྦ་བི་གྷྣཱཾ་བི་ནཱ་ཡ་ཀཱ་ནཱཾ། མ་ཧཱ་ག་ན་པ་ཏི་ཛཱི་བི་ཏཱཾ་ཏ་ཀ་རཱ་ཡ་ཧཱུཾ་སྭཱ་ཧཱ། ཕྱི་རོལ་ནས་སླར་ལོག་པ་དང་ཁ་ལག་བཀྲུས་ཏེ་ཉེ་རེག་བྱའོ། །ལག་པ་གཡས་པའི་ཐལ་མོ་བཀན་ལ་གུང་མོ་དང་སྲིན་ལག་ཡིད་ཙམ་བཀུག་པའི་བར་དུ་ཆུ་བླུགས་ལ་
སྔགས་འདིས་བཏབ་ལ་མགོ་དང་ལུས་ཀུན་ལ་གཏོར་ལ་ལྷག་མ་རྣམས་བཏུང་ངོ་། །ཨོཾ་ཤུདྡྷེ་ན་ཏུ་ཤོ་དྷ་ན་སྭཱ་ཧཱ། དེ་ནས་རྒྱུད་དང་མཐུན་པའི་གནས་ཡིད་དུ་འོང་བར་ཁྲུས་བྱས་ཀྱང་རུང་མ་བྱས་ཀྱང་རུང་སྟེ། ཉེས་པ་མེད་དེ་ཚད་མེད་པ་བཞི་བསྒོམས་པས་སེམས་ཀྱི་རྒྱུད་སྦྱངས་ལ། འགྲོ་བ་མཐའ་དག་གདོན་
པར་ཡིད་ལ་འདུས་པས་སྐུ་གཟུགས་ལ་སོགས་པའི་སྤྱན་སྔའམ། གཞན་ཡང་རུང་སྟེ། ཕྱག་བཙལ་བ་དང་མཆོད་པ་བཤམས་པ་དང་བྱང་ཆུབ་ཏུ་སེམས་བསྐྱེད་པ་ལ་སོགས་ཏེ་རིམ་བཞིན་བྱས་ནས། ཐེག་པ་མཆོག་ལས་མི་ཉམས་པར་བྱ་བའི་ཕྱིར་སྐྱིལ་མོ་ཀྲུང་བཅས་ཏེ། དམ་
ཚིག་ཉམས་པ་བསྐང་བའི་ཕྱིར་དམ་ཚིག་གསུམ་གྱི་ཕྱག་རྒྱ་ལ་སོགས་པས་བྱིན་གྱིས་བརླབ་པ་ཆོ་ག་འདི་བཞིན་དུ་བྱའོ། །དེ་ལ་དམ་ཚིག་གསུམ་གྱི་ཕྱག་རྒྱ་ཐལ་མོ་སྦྱར་ལ་མཐེ་བོང་གཉིས་བསྒྲེང་བའོ། །ཕྱག་རྒྱ་འདི་ནི་རྒྱ་ཆེན་ཏེ། །སངས་རྒྱས་སྐྱོབ་པ་རྣམས་ཀྱི་ཡིན། །སངས་རྒྱས་
ཀུན་གྱི་དམ་ཚིག་ནི། །ཕྱག་རྒྱ་འདི་ལ་རབ་ཏུ་གནས། །དེའི་སྔགས་ལ། ན་མཿས་མནྟ་བུདྡྷཱ་ནཱཾ། ཨ་ས་མེ་ཏྲི་ས་མེ་མ་ཧཱ་ས་མ་ཡེ་སྭཱ་ཧཱ། དེ་ནས་ཆོས་ཀྱི་དབྱིངས་ཀྱི་ཕྱག་རྒྱས་བདག་རྣམ་པར་དག་པར་བྱ་བ་ནི་ལག་པ་གཉིས་ཀྱི་ཁུ་ཚུར་བཅངས་ལ་མཐེ་བོང་གཉིས་ནང་དུ་བཅུག་ལ། 
མཛུབ་མོ་གཉིས་བསྒྲེང་ངོ་། །ཕྱག་རྒྱ་འདི་ཕྱག་རྒྱ་ཆེན་པོ་སྟེ། ཆོས་དབྱིངས་རྣམ་པར་སྦྱོང་བའོ། །དེའི་སྔགས་ལ། ན་མཿས་མནྟ་བུདྡྷ་ནཱཾ། དྷརྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧཾ། རྡོ་རྗེ་སེམས་དཔར་བྱིན་གྱིས་བརླབ་པ་ནི་ལག་པ་གཉིས་སོར་མོ་རྒྱབ་ཏུ་བསྣོལ་ལ། མཐེ་བོང་གཉིས་

73-1-202b

ལག་པ་གཡས་པའི་མཐིལ་དུ་གཞུག་གོ། །རྒྱལ་མཆོག་དཔལ་དང་ལྡན་པ་ཡི། །ཆོས་ཀྱི་འཁོར་ལོས་སྒྱུར་བ་ཡི། །འཇིག་རྟེན་མགོན་པོ་སྐྱོབ་པ་ཡིས། །འཁོར་ལོ་རབ་ཏུ་འདི་སྒྱུར་རོ། །དེའི་སྔགས་ལ། ན་མཿས་མནྟ་བཛྲཱ་ཎཱཾ་བཛྲ་ཨཱཏྨ་ཀོ྅ཧཾ། ཡི་གེ་རཾ་དཀར་པོ་ཡང་སྤྱི་བོར་བསམ་མོ། །དེ་
ནས་རྡོ་རྗེ་གོ་ཆའི་ཕྱག་རྒྱ་དང་སྔགས་ཀྱིས་གནས་ལྔར་གཏུགས་ན་གོ་གྱོན་པར་འགྱུར་རོ། །དེའི་ཕྱག་རྒྱ་ལ་ཐལ་མོ་སྦྱར་ལ་མཛུབ་མོ་གཉིས་གུང་མོའི་རྒྱབ་ཏུ་སྦྱར་མཐེ་བོང་གཉིས་གུང་མོ་ལ་སྦྱར་རོ། །སྔགས་ནི། ན་མཿས་མནྟ་བཛྲཱ་ཎཱཾ། བཛྲ་ཀ་བ་ཙེ་ཧཱུཾ། དེ་ནས་བགེགས་ཐམས་ཅད་རྣམ་པར་
སེལ་བ་མི་བཟད་པའི་རིག་སྔགས་ཆེན་མོ་རྗེས་སུ་འབྲང་བར་བྱ་བའི་ཕྱག་རྒྱ་ནི་ཐལ་མོ་སྦྱར་ལ་མཛུབ་མོ་གཉིས་བཀུག་སྟེ་ནང་དུ་གཞུག་གུང་མོ་གཉིས་རྩེ་སྤྲད་སྲིན་ལག་གཉིས་བརྐྱང་མཐེའུ་ཆུང་གཉིས་ཅུང་ཟད་དགུག་པ་ནི་སྲུང་བ་ཆེན་མོའི་ཕྱག་རྒྱ་སྟེ། སྔགས་ལ། ན་མཿསརྦ་ཏ་ཐཱ་ག་ཏེ་བྷྱོཿ
སརྦ་བྷ་ཡ་བི་ག་ཏེ་བྷྱོ་བི་ཤྭ་མུ་ཁེ་བྷྱོཿསརྦ་ཐཱ་ཧཾ་ཁཾ་རཀྵ་མ་ཧཱ་བ་ལེ། སརྦ་ཏ་ཐཱ་ག་ཏ་པུ་ནེ་ནིར་ཛ་ཏེ། ཧཱུཾ་ཧཱུཾ་ཏྲ་ཊ་ཏྲ་ཊ། ཨ་པྲ་ཏི་ཧ་ཏེ་སྭཱ་ཧཱ། བགེགས་དང་མི་བཟད་ནད་ཐམས་ཅད། །སྲིན་པོ་འཇིགས་པའི་གཟུགས་ཅན་རྣམས། །འདི་ནི་དྲན་པ་ཙམ་གྱིས་ཀྱང་། །དེ་དག་ཐམས་ཅད་འབྱེར་བར་བྱེད། །
དེ་ནས་ཡོན་ཆབ་ཀྱི་སྣོད་ཆུ་གཙང་མ་དང་དྲི་ཆུ་དང་མེ་ཏོག་བཟང་པོས་བཀང་ལ་ཆོས་ཀྱི་དབྱིངས་ཀྱི་ཡི་གེ་དང་། རིགས་ཀྱི་སྙིང་པོ་དང་འཕགས་པ་མི་གཡོ་བའི་སྔགས་ཀྱིས་བཏབ་སྟེ། གཡོན་ཕྱོགས་སུ་གཞག་གོ། །བསང་གཏོར་དང་མཆོད་པའི་ཡོ་བྱད་གཞག་གོ། །དེ་དག་ཀུན་ཡང་བསང་བ་
དང་སྦྱང་བའི་ཕྱིར་མི་གཡོ་མགོན་ནམ། བདུད་རྩི་ཐབ་སྦྱོར་གྱི་སྔགས་ཀྱིས་གདབ་པོ། །དེ་ནས་བསྐྲད་པ་དང་མཚམས་བཅད་པ་དག་བྱས་ཏེ་བསྒོམ་པར་བྱའོ། །བསྐྲད་པ་དང་མཚམས་བཅད་པ་ཡང་དེ་དག་ཉིད་ཀྱིས་བྱའོ། །ཆོས་ཀྱི་དབྱིངས་ཀྱི་ཡི་གེ་རཾ། །རིགས་ཀྱི་སྙིང་པོ་བཛྲ་དྷྀཀ །མི་
གཡོ་བའི་ཕྱག་རྒྱ་ནི་ལག་པ་གཡོན་པའི་ཁུ་ཚུར་བཅངས་ལ་མཛུབ་མོ་དང་གུང་མོ་གཉིས་བརྐྱང་ལ། སྲིན་ལག་དང་མཐེའུ་ཆུང་གཉིས་ཀྱི་རྩེ་མོ་མཐེ་བོས་མནན་ལ་ལག་པ་གཡས་པ་ཡང་དེ་བཞིན་དུ་བྱས་ཏེ་མཛུབ་མོ་དང་གུང་མོ་གཉིས་གཡོན་པའི་མཐིལ་དུ་གཞག་གོ། །མི་གཡོ་

73-1-203a

མགོན་པོའི་རལ་གྲི་ཤུབས་སུ་བཅུག་པ་སྟེ། བསྐྲད་པའི་ཚེ་རལ་གྲི་ཤུབས་ནས་ཕྱུང་ནས་གཡོན་ནས་བསྐོར། མཚམས་བཅད་པའི་ཚེ་གཡས་ནས་བསྐོར་སྔགས་ལ། ན་མཿས་མནྟ་བཛྲཱ་ཎཱཾ་ཨ་ཙ་ལ་ཀཱ་ཎ་ཙཎྜ་མ་ཧཱ་རོ་ཥ་ཎ་སྥོ་ཊ་སྥོ་ཊ་ཡ་ཧཱུཾ། ཏྲ་ཌ་ཧཾ་མཾ་ལན་གསུམ་བྱའོ། །བདུད་
རྩི་ཐབ་སྦྱོར་གྱི་སྔགས་དང་ཕྱག་རྒྱ་ཐལ་མོ་སྦྱར་ནས་གུང་མོ་གཉིས་རྩེ་སྤྲད་དེ་བརྐྱང་མཐེའུ་ཆུང་བསྣོལ་ཏེ་ནང་དུ་བཅུག་པའི་ནང་དུ་སྲིན་ལག་གཉིས་བཞག་པའི་རྩེ་མོ་མཐེ་བོང་གཉིས་ཀྱིས་མནན་ལ་མཛུབ་མོ་གཉིས་གུང་མོའི་ཕྱི་རོལ་ནས་རྒུར་པོར་བྱས་ཏེ་ནས་གང་ཙམ་མ་རེག་པར་བྱའོ། །
བདུད་རྩི་ཐབ་སྦྱོར་ཕྱག་རྒྱ་རྩེ་གསུམ་པ་ལས་ཐམས་ཅད་པ་སྟེ་ལས་ཀུན་ལ་འདི་སྦྱར་རོ། །སྔགས་ནི་ཨོཾ་ཨ་མྲྀ་ཏེ་ཧཱུཾ་ཕཊ། ཡང་ན་སྔར་གྱི་སྔགས་མང་པོས་སྦྱར་རོ། །དེ་ནས་རྡོ་རྗེ་སེམས་དཔའི་སྐྱིལ་མོ་ཀྲུང་དུ་འདུག་ལ་སྙིང་གར་ཟླ་བའི་དཀྱིལ་འཁོར་ལ་ཡི་གེ་བསམས་ཏེ། དེ་
ལས་ཆོས་ཐམས་ཅད་ཚིག་གི་ལམ་དང་བྲལ་ལོ་ཞེས་སྒྲ་བྱུང་ནས་དངོས་པོ་ཐམས་ཅད་སྟོང་པར་བསྒོམ། དེ་ལས་འོད་ཟེར་སྤྲོ་བ་དང་བསྡུ་བའི་རིམ་གྱིས་བདག་ཉིད་བཅོམ་ལྡན་འདས་ཕྱག་ན་རྡོ་རྗེའི་སྐུ་རེ་བ་ཐམས་ཅད་ཡོངས་སུ་སྐོང་བར་བྱེད་པ། མདོག་མེ་ཏོག་པྲི་ཡང་ཀུ་ལྟར་ལྗང་སེར་རམ། 
ཡང་ན་རིན་པོ་ཆེ་མརྐཏ་ལྟར་ལྗང་སྔོན་ཕྱག་གཉིས་པ་དབུ་རྒྱན་ཅན་རྒྱན་ཐམས་ཅད་ཀྱིས་བརྒྱན་པ་སྟོད་གཡོགས་དར་ལ། སྨད་གཡོགས་དར་བ་ཏི་འམ། དར་ཚིག་གུ་བསྣམས་པ་འོད་ཟེར་གྱིས་བསྐོར་བ་གཟི་བརྗིད་དང་ལྡན་པ་ཕྱག་ན་ཡེ་ཤེས་ཀྱི་རྡོ་རྗེ་རྩེ་ལྔ་པ་བསྣམས་པར་བསྒོམ་མོ། །
ཆོས་ཀྱི་དབྱིངས་ཀྱི་ཡི་གེ་རཾ་དཀར་པོ་ཡང་སྤྱི་བོར་བསམ་མོ། །མིག་གཉིས་སུ་ཏྲཱཾ་དམར་པོ་གཞག་སྟེ། བྱམས་པའི་ལྟ་བས་བལྟ་བར་བྱའོ། །དེ་ནས་བརྟན་པར་བྱ་བའི་ཕྱིར་དེ་ཉིད་ཀྱི་ཕྱག་རྒྱ་བཅིངས་ཏེ་གནས་ལྔར་གཏུག་གོ། །ལག་པ་གཉིས་ཁུ་ཚུར་བཅངས་ལ་གུང་མོ་གཉིས་
གཤིབས་ཏེ་བསྒྲེང་། མཛུབ་མོ་གཉིས་བཀུག་ལ་ངོས་གཉིས་སུ་བཞག་ལ་རྡོ་རྗེ་ལྟར་བྱའོ། །མཐེ་བོང་གཉིས་དང་མཐེའུ་ཆུང་གཉིས་གཞིབས་ཏེ་བསྒྲེངས་ལ་བཞག་སྲིན་ལག་གཉིས་ལག་པའི་ནང་དུ་གཞུག་གོ། །ཕྱག་རྒྱ་ཆེན་པོ་རྡོ་རྗེའི་རྒྱ། །མི་ཤེས་གྲོང་ཁྱེར་འཇིག་པ་སྟེ། །སངས་རྒྱས་

73-1-203b

རྣམས་ཀྱི་ཡེ་ཤེས་འདི། །ཉིད་ཀྱི་བྱིན་གྱིས་བརླབས་ཏེ་བསྟན། །ཕྱག་ན་རྡོ་རྗེའི་ཕྱག་རྒྱ་སྟེ། །རྡོ་རྗེ་ལའོ། །སྔགས་ལ། ན་མཿས་མནྟ་བཛྲཱ་ཎཱཾ་ཙཎྜ་མ་ཧཱ་རོ་ཥ་ཎ་ཧཱུཾ། དེ་ནས་ཡན་ལག་རྫོགས་པར་བྱ་བའི་ཕྱིར་གཙུག་ཏོར་གྱི་ཕྱག་རྒྱ་བཅིངས་ལ་སྤྱི་གཙུག་ཏུ་གཞག་གོ། །ལག་པ་གཉིས་
ཁུ་ཚུར་བཅིངས་ལ་གུང་མོ་གཞིབས་ཏེ་བསྒྲེང་མཛུབ་མོ་གཉིས་ངོས་ནས་བཀུག་སྟེ་སྦྱར་རོ། །གཙུག་ཏོར་ཕྱག་རྒྱ་རྒྱ་ཆེན་ཏེ། །གཙུག་ཏོར་ཞེས་ནི་གྲགས་པ་ཡིན། །འདི་ནི་བཅིངས་པ་ཙམ་གྱིས་ཀྱང་། །རྒྱལ་བའི་མཆོག་ཏུ་གྱུར་པ་ཡིན། །དེའི་སྔགས་ལ། ན་མཿས་མནྟ་བཛྲཱ་ནཱི་ཧཱུཾ་ཧཱུཾ། དེ་
ནས་ཡེ་ཤེས་ཀྱི་སྤྱན་བསྒྲུབ་པོ། །ལག་པ་གཡས་པ་ཁུ་ཚུར་བཅངས་ལ་གུང་མོ་སྲིན་ལག་བརྐྱང་མཐེ་བོང་གི་དྲུང་དུ་བཞག་གོ། །འདི་ནི་སངས་རྒྱས་མགོན་རྣམས་ཀྱི། །ཡེ་ཤེས་ལས་བྱུང་སྤྱན་ཡིན་ཏེ། །མིག་གི་སྟེང་དུ་མཁས་པས་གཞག །དེ་ལས་ཡེ་ཤེས་སྤྱན་དུ་གྱུར། །དེའི་སྔགས་
ལ། ན་མཿས་མནྟ་བུདྡྷཱ་ནཱཾ། ག་ག་ན་སྥ་ར་ཎ་ཀྵ་ཎ། ཀ་རུ་མ་ཧཱ་ཏ་ཐཱ་ག་ཏ་ཙཀྵ་སྭཱ་ཧཱ། དེ་ནས་ཡུམ་གྱི་ཕྱག་རྒྱ་བཅིངས་ལ་གནས་ལྔར་གཏུག་གོ། །ལག་པ་གཉིས་ཁུ་ཚུར་བཅངས་ལ་གུང་མོ་གཉིས་གཞིབས་ཏེ་བསྒྲེང་མཛུབ་མོ་གུང་མོའི་ཕྱི་རོལ་ནས་བཀུག་ལ་བར་ནས་གང་ཙམ་གྱིས་མ་
རེག་པར་བྱ། མཐེ་བོང་གཉིས་སྲིན་ལག་གཉིས་དང་མཐེའུ་ཆུང་གཉིས་ནང་དུ་གཞུག་གོ། །འདི་ནི་ཡུམ་མཱ་མ་ཀཱིའི་ཕྱག་རྒྱ་སྟེ་རྡོ་རྗེ་རྩེ་གསུམ་པའོ། །དེའི་སྔགས་ལ། ན་མཿས་མནྟ་བཛྲཱ་ཎཱཾ་དྲྀ་ཌྷ་དྲྀ་ཌྷ་ཏིཥྛ་ཏིཥྛ་ཛ་ཡན་ཏ་སྭཱ་ཧཱ། དེའི་འོག་ཏུ་རྡོ་རྗེ་གོ་ཆའི་ཕྱག་རྒྱ་བཅིངས་ལ་གོ་བགོ་སྟེ་ཕྱག་
རྒྱ་དང་སྔགས་གོང་དུ་བསྟན་ནོ། །དེ་ནས་མདུན་དུ་གཞལ་མེད་ཁང་བསམས་ཏེ། དེའི་རིམ་པ་ཡང་དང་པོར་ཆོས་ཀྱི་དབྱིངས་ཀྱི་ཡི་གེ་རཾ་གྱིས་གནས་ཀུན་སྟོང་པའི་རང་བཞིན་གྱིས་རྣམ་པར་དག་པར་བསམས་ལ་དེའི་འོག་ཏུ་ནམ་མཁའི་དཀྱིལ་འཁོར་དུ་ཡི་གེ་ཨ་གསེར་གྱི་མདོག་ཅན་ལས་གསེར་
གྱི་ས་གཞི་གྲུ་བཞི་རྡོ་རྗེའི་རང་བཞིན་ཅན་རྡོ་རྗེས་མཚན་པ་རྒྱ་དང་ཁྱོན་དཔག་ཏུ་མེད་པར་བསམ་མོ། །དེའི་སྟེང་དུ་པདྨ་དཀར་པོ་འདབ་མ་བརྒྱད་པའི་སྟེང་དུ་ཡི་གེ་བཾ་མདོག་དཀར་པོ་གངས་དང་ཤེལ་ལྟ་བུར་དངས་ཤིང་གསལ་བ་ལས་ཆུའི་རྒྱུན་འོ་མ་དང་མུ་ཏིག་གི་འབྲུ་ལྟ་བུ་ཡན་ལག་བརྒྱད་

73-1-204a

དང་ལྡན་པ་འབྱུང་བ། གསེར་གྱི་ས་གཞི་བཀང་སྟེ་དཔག་ཏུ་མེད་པའི་རྒྱ་མཚོ་ཆེན་པོར་གྱུར་པར་བསམ་མོ། །དེའི་ནང་ནས་ཡི་གེ་ལཾ་ལས་རི་རབ་ཆེན་པོ་སྣ་བཞི་ལས་གྲུབ་པ་གྲུ་བཞི་པ་རྒྱ་དང་ཁྱོན་དཔག་ཏུ་མེད་པར་བྱུང་བའི་སྟེང་དུ་རིན་པོ་ཆེ་སྣ་བདུན་གྱི་གཞལ་མེད་ཁང་བརྩེགས་
མའི་ནང་ན་པདྨ་དང་སེང་གེའི་གདན་ཆེན་པོ་པདྨའི་གདན་མང་པོས་བསྐོར་བར་བསམས་ཏེ། དེ་དག་ཇི་ལྟར་བསམས་པ་བཞིན་དུ་གྱུར་པར་སྔགས་འདིས་བྱིན་གྱིས་བརླབ་པོ། །ན་མཿས་མནྟ་བུདྡྷཱ་ནཱཾ། ཨོཾ་ཨ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུངྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། 
འདི་ལྟར་དེ་དག་ཐམས་ཅད་དེ་བཞིན་དུ་གནས་པར་འགྱུར་རོ། །ཡང་ན་ནམ་མཁའ་མཛོད་ཀྱིས་ཀྱང་དེ་བཞིན་དུ་གནས་པར་འགྱུར་རོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་སྤྱན་དྲང་བར་བྱ་སྟེ། ཉིད་ཀྱི་དམ་ཚིག་གི་ཕྱག་རྒྱ་བཅིངས་ནས་མཐེ་བོ་གཉིས་ནང་དུ་གཡབ་ཅིང་སྔགས་འདིས་
རང་གི་ཕོ་བྲང་ནས་སྤྱན་དྲང་བར་བྱའོ། །ན་མཿས་མནྟ་བཛྲཱ་ཎཱཾ། ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎཱི་ཀ་བཛྲ་པཱ་ཎི་ས་པ་རི་ཝཱ་ར་ས་མ་ཡ་སྟྭཾ། དེ་ནས་གཤེགས་ཏེ་མདུན་གྱི་ནམ་མཁའ་ལ་དམིགས་ལ་སྔར་བསྟན་པའི་དམ་ཚིག་གསུམ་གྱི་སྔགས་དང་ཕྱག་རྒྱ་དང་། རང་གི་ཕྱག་རྒྱ་དང་ཡུམ་གྱི་ཕྱག་
རྒྱ་རྣམས་བསྟན་ཏེ་སོ་སོའི་སྔགས་བརྗོད་དོ། །དེ་ནས་དམ་ཚིག་ཅན་དུ་གཟིགས་པས་མཉེས་པར་བྱ་སྟེ། གཞན་ལ་ཕན་འདོགས་པར་བཞེད་པས་སྔགས་པ་ཇི་སྲིད་འདོད་པ་དེ་སྲིད་དུ་བྱིན་གྱིས་བརླབ་པོ། །དེ་ནས་འཕགས་པ་མི་གཡོ་མགོན་ནམ་བདུད་རྩི་ཐབ་སྦྱོར་གྱི་སྔགས་དང་ཕྱག་རྒྱས་
སྔ་ན་གནས་པ་དང་། ཕྱི་ནས་འབྲང་བའི་བགེགས་རྣམས་བསྐྲད་པར་བྱའོ། །དེ་ནས་གཞལ་མེད་ཁང་གི་ནང་དུ་གཤེགས་པར་བྱ་བའི་ཕྱིར་མཆོད་ཡོན་སྔགས་ཀྱིས་བཏབ་པ་བླངས་ལ་ཚིགས་སུ་བཅད་པ་འདིས་མཆོད་ཡོན་སྦྲེང་ཞིང་ནང་དུ་བྱོན་པར་བསམ་མོ། །བདག་གི་དད་དང་དམ་ཚིག་གིས། །
ཚུར་གཤེགས་ཚུར་གཤེགས་བཅོམ་ལྡན་འདས། །བདག་གི་མཆོད་ཡོན་བཞེས་ནས་ཀྱང་། །འདི་ཉིད་དུ་ནི་བཞུགས་སུ་གསོལ། །དེ་ནས་བྱོན་ཏེ་དབུས་ཀྱི་པདྨ་དང་སེང་གེའི་གདན་ལ་དཔལ་ཕྱག་ན་རྡོ་རྗེ་དང་འཁོར་གྱི་པདྨའི་གདན་རྣམས་ལ་གསང་སྔགས་དང་ཁྲོ་བོ་ལ་སོགས་པ་དཔལ་ཕྱག་ན་

73-1-204b

རྡོ་རྗེའི་ཞབས་འབྲིང་གི་འཕགས་པ་རྣམས་བཞུགས་སུ་གསོལ་ལོ། །དེ་ནས་མཆོད་ཡོན་གྱི་སྣོད་དུ་སྤོས་གཙང་མ་བླུགས་ལ་ཞལ་དང་ཞབས་བསིལ་དབུལ་བར་བྱའོ། །དེའི་སྔགས་ལ། ཨོཾ་པྲ་ཝ་ར་སཏྐཱ་ར་པྲ་ཏཱིཙྪ་སྭཱ་ཧཱ། བདག་ཀྱང་འཕགས་པའི་འཁོར་གྱི་ནང་ན་འདུག་པར་བྱའོ། །འཕགས་པའི་
ཕོ་བྲང་གི་ཕྱི་རོལ་དུ་འཕགས་པ་མི་གཡོ་བའི་འམ། བདུད་རྩི་ཐབ་སྦྱོར་གྱི་སྔགས་དང་ཕྱག་རྒྱས་མཚམས་བཅད་དོ། །དེ་ནས་འཕགས་པའི་ཚོགས་ལ་ཕྱག་བྱ་སྟེ། ཚིགས་སུ་བཅད་པ་འདི་བརྗོད་དོ། །མཆོད་པ་རྣམས་རིམ་པ་བཞིན་དུ་དབུལ། བཅོམ་ལྡན་ཐུགས་རྗེས་བྱོན་པ་ལེགས། །བདག་
ནི་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་ནས་ཀྱང་། །ཐུགས་རྗེས་ཐུགས་དཔག་མཛད་དུ་གསོལ། །ཞེས་དང་པོར་མཆོད་ཡོན་དབུལ་བར་བྱའོ། །དེའི་སྔགས་ནི། ཨོཾ་སརྦ་དེ་བ་ཏ་ཐཱ་ཨ་ཙིཏ་ཨ་མྲྀ་ཏ་ད་རཱ་ཡ་སྭཱ་ཧཱ། དེ་ནས་དྲི་དབུལ་ཏེ། གཙང་ཞིང་གཙང་མར་
སྦྱར་བ་ཡི། །ལྷ་རྫས་དམ་པའི་དྲི་མཆོག་དག །བདག་གིས་དད་པས་འབུལ་ལགས་ཀྱི། །བཞེས་ནས་བདག་ལ་དགེས་པར་མཛོད། །ཨཱ་ཧ་ར་ཨཱ་ཧ་ར་བྷ་ག་བཱན་སརྦ་བིདྱཱ་དྷ་ར་པཱུ་ཛི་ཏེ་སྭཱ་ཧཱ། ཞེས་སྔགས་འདི་ཚིགས་བཅད་ཀུན་གྱི་མཇུག་ལ་བརྗོད། དེ་ནས་མེ་ཏོག་དབུལ་ཏེ། གཙང་ཞིང་
གཙང་མར་སྐྱེས་པ་ཡི། །ལྟ་རྫས་དམ་པའི་མེ་ཏོག་འདི། །བདག་གིས་དད་པས་འབུལ་ལགས་ཀྱི། །བཞེས་ནས་བདག་ལ་དགེས་པར་མཛད། །དེ་ནས་བདུག་སྤོས་དབུལ་ཏེ། ནགས་ཚལ་བཅུད་ལྡན་ཡི་གར་འོང་། །དྲི་ཞིམ་རྒྱས་པའི་བདུག་པའི་མཆོག །བདག་གིས་དད་པས་འབུལ་
ལགས་ཀྱི། །བཞེས་ནས་བདག་ལ་དགེས་པར་མཛད། །ལྷ་བཤོས་དབུལ་ཏེ། སྨན་རྣམས་བཅུད་གཙང་ཡི་གར་འོང་། །སྔགས་ཀྱི་ཞལ་ཟས་བཤོས་འདི་དག །བདག་གིས་དད་པས་འབུལ་ལགས་ཀྱི། །བཞེས་ནས་བདག་ལ་དགེས་པར་མཛོད། །མར་མེ་དབུལ་ཏེ། གདོན་
རྣམས་འཇོམས་ཤིང་བཀྲ་ཤིས་པ། །དགེ་ཞིང་མུན་པ་རྣམ་སེལ་བ། །བདག་གིས་དད་པས་འབུལ་ལགས་ཀྱི། །བཞེས་ནས་བདག་ལ་དགེས་པར་མཛོད། །ཨཱ་ལོ་ཀེ་སརྦ་བིདྱཱ་དྷ་ར་བུ་ཛི་ཏེ་ཧཱུཾ་སྭཱ་ཧཱ། དྲི་ལ་སོགས་པ་དངོས་སུ་མ་འབྱོར་ན་ཡང་། དེ་དག་གི་ཕྱག་རྒྱ་བཅིངས་ལ་ཡིད་ཀྱིས་

73-1-205a

འཇིག་རྟེན་གྱི་ཁམས་ཐམས་ཅད་ཁྱབ་པའི་མཆོད་པ་བྱའོ། །དེ་ལ་མཆོད་ཡོན་གྱི་ཕྱག་རྒྱ་ནི་ཐལ་མོ་བཀན་ལ་མཛུབ་མོ་གཉིས་གུང་མོའི་ཚིགས་གསུམ་པར་སྦྱར་ལ་སྲིན་ལག་གཉིས་དབུས་སུ་བཀུག་ལ་མཐེ་བོང་གཉིས་གློར་སྒྱུར་བ་འདི་ནི་བདུད་རྩི་རྒྱུན་གྱི་ཕྱག་རྒྱ་སྟེ་མཆོད་ཡོན་གྱིས་སྦྱར་རོ། །
དྲིའི་ཕྱག་རྒྱ་ནི་ལག་པ་གཡས་པ་མི་འཇིགས་པའི་ཕྱག་རྒྱ་བྱ་སྟེ། ལག་པ་གཡོན་པས་གཡས་པའི་མཁྲིག་མ་ནས་བཟུང་བའོ། །མེ་ཏོག་གི་ཕྱག་རྒྱ་ནི་ལག་པ་གཉིས་སོར་མོ་ཕན་ཚུན་བསྣོལ་ལ་ལག་པའི་ནང་དུ་བཅུག་ལ་མཛུབ་མོ་གཉིས་རྩེ་མོ་གཅིག་ཏུ་སྦྱར་ལ་གདུ་བུའི་ཚུལ་དུ་བྱས་ལ་
མཐེ་བོང་གློར་གཞག་སྟེ་ཐལ་མོ་ལྟར་བྱའོ། །བདུག་སྤོས་ཀྱི་ཕྱག་རྒྱ་ནི་ལག་པ་གཉིས་ཀྱི་མཐེའུ་ཆུང་དང་སྲིན་ལག་དང་གུང་མོའི་སོར་མོ་རྣམས་ཕན་ཚུན་དུ་རྒྱབ་ཏུ་སྦྱར་ཏེ་སོ་སོའི་སོར་མོའི་དྲུང་དུ་བཀུག་ནས་མཛུབ་མོ་གཉིས་གཞིབས་ཏེ་བསྒྲེང་། མཐེ་བོ་གཉིས་གློར་གཞག་གོ། །ལྷ་བཤོས་
ཀྱི་ཕྱག་རྒྱ་ནི་བཟེད་པའི་ཐལ་མོ་ལས་མཛུབ་མོ་ཅུང་ཟད་བཀུག་པའོ། །མར་མེའི་ཕྱག་རྒྱ་ནི་མཐེ་བོང་དང་གུང་མོའི་སོར་མོ་གཉིས་གཅིག་ཏུ་སྦྱར་ཏེ་གཏོད་ལ་ལྷག་མ་རྣམས་ཁུ་ཚུར་དུ་བྱའོ། །མཆོད་ཡོན་གྱི་སྔགས་ནི། ན་མཿས་མནྟ་བུདྡྷཱ་ནཱཾ་ག་ག་ན་ས་མ་ཡེ་སྭཱ་ཧཱ། དྲིའི་སྔགས་ནི། 
ན་མཿས་ནྟ་བུདྡྷཱ་ནཱཾ། བི་ཤུདྡྷཱ་གན་དྷོ་ཏྦྷ་བཱ་ཡ་སྭཱ་ཧཱ། མེ་ཏོག་གི་སྔགས་ནི། ན་མཿས་མནྟ་བུདྡྷཱ་ནཱཾ། མ་ཧཱ་མུ་ཏྲ་མུངྒ་ཏེ་སྭཱ་ཧཱ། བདུག་པའི་སྔགས་ནི། ན་མཿས་མནྟ་བུདྡྷཱ་ནཱཾ། དྷརྨ་དྷཱ་ཏུ་མུངྒ་ཏེ་སྭཱ་ཧཱ། ལྷ་བཤོས་ཀྱི་སྔགས་ནི། ན་མཿས་མནྟ་ག་ཏེ་པཱུ་ཛ་ན་ས་མ་ཡེ་ཧཱུཾ། མར་མེའི་སྔགས་
ནི། ན་མཿས་མནྟ་བུདྡྷཱ་ནཱཾ། ཏ་ཐཱ་ག་ཏ་ཨ་ཙི་སྥ་ར་ཎ་ཨ་བ་བྷ་ས་ག་ག་མེ་ད་ར་ཡེ་སྭཱ་ཧཱ། འདི་དག་ཀྱང་མཆོད་པ་ཙམ་དུ་ཟད་དེ། བདག་གི་ནུས་པ་དང་འཇིག་རྟེན་ན་བསྔགས་པའི་མཆོད་པ་རྒྱ་ཆེན་པོ་གཞན་དག་ཀྱང་ཅི་འབྱོར་བ་དབུལ་ལོ། །དེ་ནས་མཆོད་པ་སྤྱིའི་ཕྱག་རྒྱ་བཅིངས་ཏེ། སེམས་རབ་
ཏུ་དང་བའི་སྒོ་ནས་ཡིད་ཀྱིས་མཆོད་པ་རྒྱ་ཆེན་པོ་བྱས་ཏེ། དེའི་ཐབས་ཀྱང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་མཐུ་དང་། ཆོས་ཀྱི་དབྱིངས་ཀྱི་མཐུ་དང་། བདག་གི་བསོད་ནམས་དང་ཡེ་ཤེས་དང་སྨོན་ལམ་གྱི་མཐུ་དང་དམ་པའི་ཆོས་ཀྱི་དབྱིངས་ཀྱིས་ཁྱབ་པའི་

73-1-205b

མཆོད་པ་ཆེན་པོའི་སྤྲིན་ཆེན་པོ་དང་། རྒྱན་དམ་པ་དང་། བསྟོད་པ་སྣ་ཚོགས་པ་རྣམས་འཕགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་འབྱུང་ཞིང་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པར་གྱུར་ཅིག་ཅེས་བསམ་ཞིང་ཚིག་ཏུ་བརྗོད་ལ། མཆོད་པའི་སྤྲིན་ཆེན་པོ་འབྱུང་
བར་བྱེད་པའི་རིག་སྔགས་འདི་ལན་གསུམ་བརྗོད་དོ། །མཆོད་པ་སྤྱིའི་ཕྱག་རྒྱ་ནི་ལག་པ་ཐལ་མོ་ཁོང་སྟོང་དུ་སྦྱར་ལ་སྤྱི་བོར་གཞག་གོ། །འདིའི་སྔགས་ལ། ན་མཿས་མནྟ་བུདྡྷཱ་ནཱཾ། ཨ་བྷི་ས་མ་ཡེ་སྥ་ར་ཎ་ཧི་མཾ་ག་ག་ན་ཁཾ། དྷརྨ་དྷཱ་ཏུ་ཨཱ་ཀཱ་ཤ་ས་མནྟ་མཾ། སརྦ་ཏ་ཐཱ་ག་ཏཱ་པ་རི་ཤུདྡྷ་མཎྜལ་ལ། 
མ་མ་པྲ་ཎི་དྷི་པུཎྱ་ཛྙཱ་ན་བ་ལེན་དྷ། སརྦ་ཏ་ཐཱ་ག་ཏ་ཨ་དྷིཥྛཱ་ན་བ་ལེན་ཙ་སྭཱ་ཧཱ། དེ་ལྟར་མཆོད་པའི་སྤྲིན་ཆེན་པོ་འཕགས་པ་ཐམས་ཅད་ཀྱི་དཀྱིལ་འཁོར་དུ་དེ་བཞིན་དུ་གནས་པར་འགྱུར་བར་ཡིད་ཆེས་པར་བྱའོ། །ཞེས་བཅོམ་ལྡན་འདས་ཀྱིས་གསུངས་སོ། །དེ་ནས་རྡོ་རྗེ་དྲིལ་བུ་ལག་ཏུ་
བླངས་ལ་དྲིལ་བུ་དཀྲོལ་ཞིང་བསྟོད་པ་འདིས་བསྟོད་དོ། །དཔའ་བོ་ཆེན་པོ་ཐབས་བརྙེས་པ། །སྐུ་གསུང་ཐུགས་ནི་རྡོ་རྗེ་ཡིས། །རྡོ་རྗེ་མཆོག་གི་ལམ་སྟོན་པ། །རྡོ་རྗེ་རྒྱལ་པོ་ཕྱག་འཚལ་བསྟོད། །ཡེ་ཤེས་གཉིས་མེད་ཚུལ་འཆང་ཞིང་། །ཐེག་མཆོག་རྟོགས་པར་ཐུགས་སུ་ཆུད། །
གསང་སྔགས་རྒྱལ་པོ་གསང་འཛིན་པ། །གསང་བའི་བདག་པོ་ཕྱག་འཚལ་བསྟོད། །སྟོབས་པོ་ཆེ་ལ་དྲག་ཤུལ་ཆེ། །རིག་སྔགས་རྒྱལ་པོ་དགེ་བ་པོ། །གདུལ་དཀའ་བ་དག་འདུལ་མཛད་པ། །རྡོ་རྗེ་བསྣམས་ལ་ཕྱག་འཚལ་བསྟོད། །དེ་ནས་བྱང་ཆུབ་ཏུ་སེམས་བསྐྱེད་པ་དང་། 
སྡོམ་པ་གཟུང་བ་ལ་སོགས་པ་བྱ་སྟེ། འདི་སྐད་དུ་འདོད་པའི་དོན་ལ་གསོལ་བ་གདབ་པོ། །བཅོམ་ལྡན་འདས་བདག་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་སྐྱབས་སུ་མཆིས་ཀྱིས་བདག་ལ་ཐུགས་བརྩེ་བར་གཟིགས་ཏེ། འགྲོ་བ་མ་ལུས་པ་བསྐྱབ་པའི་མཐུ་བདག་ལ་སྩོལ་
ཅིག་ཅེས་བརྗོད་དོ། །དེ་ནས་འཇིག་རྟེན་གྱི་ཁམས་མ་ལུས་པར་སེམས་ཅན་གྱི་དོན་དུ་འགྱུར་བར་བྱ་སྟེ། འཇིག་རྟེན་གྱི་ཁམས་ཕྱོགས་བཅུའི་ཞིང་རབ་འབྱམས་ཐམས་ཅད་དུ་སེམས་ཅན་གྱི་དོན་མཛད་པ་ཁ་དོག་དང་ཚུལ་དང་། སྤྱོད་ལམ་རྣམ་པ་སྣ་ཚོགས་སུ་ལྡན་པ་ཀུན་དུ་བཟང་པོའི་སྤྲུལ་

73-1-206a

པ་མང་པོ་རབ་ཏུ་འབྱུང་བར་གྱུར་ཅིག །དེས་ཀྱང་སེམས་ཅན་ཐམས་ཅད་ཀྱི་ཕྱི་ནང་གི་གདོན་ཐམས་ཅད་རབ་ཏུ་ཞི་ཞིང་དེ་བཞིན་གཤེགས་པ་ཐམས་ཅད་ཀྱིས་རབ་ཏུ་བསྔགས་ལ་འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་ཀྱང་དེ་དག་གིས་ཐོབ་པར་
གྱུར་ཅིག་པར་བསམས་ནས་བྱིན་གྱིས་བརླབ་པ་གསུམ་གྱིས་བྱིན་གྱིས་བརླབ་བོ། །སེམས་ཅན་གྱི་དོན་བྱིན་གྱིས་རློབ་པའི་རིག་སྔགས་ནམ་མཁའ་མཛོད་དུ་བྱུང་བར་མཛད་པ་འདི་ལན་གསུམ་བརྗོད་དོ། །ན་མཿསརྦ་ཏ་ཐཱ་ག་ཏེ་བྷྱོ། བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུངྒ་དེ་སྥར་ཎ་ཧི་མཾ་ག་ག་ན་ཁཾ་སྭཱ་ཧཱ། འདིས་
ལན་གསུམ་བཟླས་པས་ཇི་ལྟར་བསམས་པའི་དོན་རྣམས་སེམས་ཅན་གྱི་ཁམས་རྣམས་སུ་དེ་བཞིན་དུ་འགྱུར་བས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་མཁྱེན་གྱི་གཞན་ཤེས་རབ་ཆུང་བ་རྣམས་ཀྱིས་མི་ཤེས་སོ་ཞེས་བཅོམ་ལྡན་འདས་ཀྱིས་གསུངས་སོ། །དེ་བས་ན་བྱང་
ཆུབ་སེམས་དཔའི་ཐེག་པ་པ་རྣམས་ཀྱིས་ཡིད་ཆེས་པར་བྱའོ། །དེ་ལྟར་དེ་བཞིན་གཤེགས་པ་རྣམས་མཉེས་པར་བྱ་ཞིང་འགྲོ་བ་མ་ལུས་པའི་དོན་བྱས་པ་དེས་བདག་གི་ལྷའི་ཕྱག་རྒྱ་དང་སྔགས་ཀྱི་ཡི་གེ་བཀོད་པ་ལ་སོགས་པས་བདག་ཉིད་ལྷའི་སྐུར་བསྒྱུར་ལ་ཡི་གེ་ཁཾ་དཀར་པོ་དེའི་སྤྱི་བོར་གཞག་སྟེ་
མདུན་དུ་ལྷ་བཞུགས་པའི་ཐུགས་ཀར་བཟླས་པ་བྱ་བའི་ཡི་གེ་ཕྲེང་བ་བཀོད་ལ་དབུགས་དང་དྲན་པ་རབ་ཏུ་བསྡམས་ནས་སླར་སྡུད་པའི་ཚིག་གིས་ནོན་པར་ཡིད་ལ་ཤིབ་བུར་མི་དྲག་མི་དལ་ཞིང་མི་སྐྱོ་བར་ཇི་ཙམ་འདོད་པའི་བར་དུ་བཟླས་པར་བྱའོ། །བཟླས་ཀར་ཉིད་ཀྱི་དམ་ཚིག་གི་ཕྱག་
རྒྱ་བཅིངས་ཏེ་བདག་དང་ལྷའི་ཐུགས་ཀར་བཟུང་ལ་དེ་ནས་ནོར་བུ་ལག་པ་གཡས་པས་བླངས་ནས་སྙིམ་པར་བཅུག་ལ་བདུད་རྩི་ཐབ་སྦྱོར་གྱི་སྔགས་བཟླས་ཏེ། དེའི་འོག་ཏུ་ཡང་ཡུམ་བཟླས་སྙིང་གའི་ཐད་ཀར་བཟུང་ལ་བཟླས་པ་རེ་ལ་ནོར་བུ་རེ་རེ་བགྲང་ཞིང་མགོ་མཇུག་ཏུ་ཕྱག་བྱའོ། །
ན་མཿས་མནྟ་བཛྲཱ་ཎཱཾ་ཙཎྜ་མ་ཧཱ་རོ་ཥ་ཎ་ཧཱུཾ། ཇི་སྐད་བསྟན་པ་བཞིན་མ་ནུས་ན་ཡང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་བར་དམིགས་ཏེ་སེམས་ཅན་གྱི་དོན་ཕུན་སུམ་ཚོགས་པར་འགྱུར་བར་དམིགས་ཤིང་བཟླས་སོ། །དེ་ནས་ངལ་ལམ་གཏོང་བར་

73-1-206b

འདོད་ན་བཟླས་པ་གཏད་དེ་བཟླས་པ་རྣམས་ཡིད་ཀྱིས་དཔལ་ཕྱག་ན་རྡོ་རྗེ་ལ་གཏམས་པའི་ཚུལ་གྱིས་ཕུལ་ལས་ཀྱི་རྡོ་རྗེ་སེམས་དཔར་བསྒྱུར་ཏེ་འཕགས་པ་རྣམས་ལ་མཆོད་པ་ཇི་སྐད་བསྟན་པ་བཞིན་དུ་བྱ་ཞིང་དགེ་བའི་རྩ་བ་ཡང་རྒྱ་ཆེར་བསྔོའོ། །འཕགས་པ་རྣམས་ལ་མཆོད་པའི་ཕྱིར་བདག་
ལས་ཀྱི་རྡོ་རྗེ་སེམས་དཔར་བྱིན་གྱིས་བརླབ་པ་ནི། ན་མཿས་མནྟ་བཛྲཱ་ཎཱཾ་ཞེས་བྱའོ། །དེ་ནས་མཆོད་ཡོན་དབུལ་ཏེ་འདི་སྐད་བརྗོད་པས་དཔལ་ཕྱག་ན་རྡོ་རྗེ་འཁོར་དང་བཅས་པ་སླར་གཤེགས་སུ་གསོལ་ལོ། །གདོན་མི་ཟ་བར་བདག་ལ་ཡང་། །རྗེས་སུ་བརྩེ་བར་དགོངས་ནས་ནི། །རྒྱལ་བ་སྲས་
དང་བཅས་པ་རྣམས། །ཅི་བདེ་བར་ཡང་གཤེགས་སུ་གསོལ། །དེ་ནས་དམ་ཚིག་གསུམ་གྱི་ཕྱག་རྒྱ་སྤྱི་བོར་གྱེན་དུ་བཀྲོལ་སྔར་དམ་ཚིག་གི་ཕྱག་རྒྱས་བཞུགས་པ་རྣམས་གཤེགས་པར་བྱའོ། །མཚམས་བཅད་པ་ཡང་ཡིད་ཀྱིས་དགྲོལ་ལོ། །དེ་ནས་ཆོས་ཀྱི་དབྱིངས་ཀྱི་ཕྱག་རྒྱས་ཆོས་
ཀྱི་དབྱིངས་སུ་བྱིན་གྱིས་བརླབས་ལ་རྡོ་རྗེ་སེམས་དཔའི་སྔགས་དང་ཕྱག་རྒྱས་ལས་ཀྱི་རྡོ་རྗེ་སེམས་དཔར་བྱིན་གྱིས་བརླབ་བོ། །སྤྱི་བོར་ཆོས་ཀྱི་དབྱིངས་ཀྱི་ཡི་གེ་ར་ཡིག་བསམ་མོ། །རྡོ་རྗེ་གོ་ཆའི་ཕྱག་རྒྱས་ཀྱང་གོ་བགོས་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་
བྱས་ནས་དགེ་བའི་ལས་བྱ་བར་རབ་ཏུ་བསམ་ཞིང་ལྡང་ངོ་། །ལངས་ནས་ཀྱང་མདོ་སྡེ་ཟབ་མོ་བཀླག་པ་ལ་སོགས་པ་དགེ་བའི་ལས་ཅི་ནུས་པ་བྱའོ། །དེ་ནས་ཟས་ཟ་བའི་ཚེ་ན་བདག་ཉིད་རིགས་ཀྱི་སྙིང་པོས་བསྲུངས་ལ་སྔགས་འདི་བཟླས་ལ་ལན་གསུམ་བཏབ་སྟེ། ཆོས་ཀྱི་དབྱིངས་ཀྱི་ཡི་
གེས་སྦྱངས་ལ་ཟས་ཀྱི་རོལ་མ་ཆགས་པར་རིགས་པ་དང་ལྡན་པར་རན་པར་བཟའོ། །ན་མཿས་མནྟ་བུདྡྷཱ་ནཱཾ། ཨོཾ་ཨ་མྲྀ་ཏོདྦྷ་བཱ་ཡ་སྭཱཧཱ། ཉལ་བའི་ཚེ་ན་ཡང་རིགས་ཀྱི་ཡུམ་གྱི་སྙིང་པོས་བསྲུངས་ནས་གློ་གཡས་པས་ཉལ་ལོ། །ཇི་སྐད་བསྟན་པ་བཞིན་དུ་མ་ནུས་པས་མཉེས་པར་བྱ་མི་ནུས་
སོ་སྙམ་པའི་བསམ་པ་མི་བསྐྱེད་དོ། །དཔལ་དང་ལྡན་པའི་སྐལ་ལྡན་པས། །ཞབས་ལ་གཏུགས་ནས་བསྡུས་པ་ཡིན། །རྣམ་དག་ལམ་ཆེན་མཛད་ཡིན་པས། །སྐལ་ལྡན་བྱང་ཆུབ་མཆོག་གིས་སྤྱད། །དཔལ་ཕྱག་ན་རྡོ་རྗེ་སྒྲུབ་པའི་ཐབས་སློབ་དཔོན་སངས་རྒྱས་གསང་བས་མཛད་

73-1-207a

པ་རྫོགས་སོ།།      །།པཎྜི་ཏ་ཆེན་པོ་དེ་ཉིད་དང་། ལོ་ཙཱ་བ་འཇམ་དཔལ་གོ་ཆས་བསྒྱུར་ཅིང་གཏན་ལ་ཕབ་པའོ།    །༄༅༅། །རྒྱ་གར་སྐད་དུ། ནཱི་ལཱམྦ་ར་དྷ་ར་ཨུ་པ་སིདྡྷི་ནཱ་མ། བོད་སྐད་དུ། གོས་སྔོན་པོ་ཅན་གྱི་དངོས་གྲུབ་ཉེ་བ་ཞེས་བྱ་བ། བཅོམ་ལྡན་འདས་གོས་
སྔོན་པོ་ཅན་ལ་ཕྱག་འཚལ་ལོ། །བླ་མ་དང་ནི་རྡོ་རྗེ་འཛིན། །ཐུགས་རྗེའི་ཆུ་རྒྱུན་བདག་པོ་ལ། །རྟག་ཏུ་བརྗེད་མེད་ཡིད་ཀྱིས་མོས། །མཆོད་རྟེན་སྔོན་པོའི་གདམས་ངག་བཤད། །རྣལ་འབྱོར་བརྩོན་འགྲུས་དྲག་པོ་ཡིས། །དབང་དང་གདམས་ངག་ཐོབ་ནས་ཀྱང་། །མྱུར་དུ་ནུས་པ་འབྱུང་བ་དང་། །
དངོས་གྲུབ་རྣམ་གཉིས་ཉེ་བའི་ཕྱིར། །ཉེ་བྱེད་སྐུ་གདུང་མཆོད་རྟེན་བསྒྲུབ། །རྣལ་འབྱོར་དམ་ཚིག་ལ་གནས་པ། །བླ་མའི་མན་ངག་བྱིན་རླབས་ཀྱིས། །འགྲུབ་སྟེ་ཐེ་ཚོམ་མི་བྱའོ། །རྒྱུ་དང་བྱིན་གྱིས་བརླབ་པ་དང་། །དབང་བསྐུར་བ་དང་མཆོད་པ་དང་། །བསྐོར་བ་བྱ་དང་ཡོན་ཏན་ནོ། །
གསེར་དངུལ་ཟངས་ལྕགས་དུང་ཡང་རུང་། །རྭ་ཤིང་འདག་པ་ལ་སོགས་པ། །ཧཱུཾ་གི་བསྐྱེད་རིམ་ལྡན་པ་ཡིས། །དྲག་པོའི་གཏོར་ཚོགས་མདུན་དུ་ནི། །དབང་བསྐུར་ཆས་བསྒྱུར་བཟོ་བོ་ཡིས། །བཻ་ཌཱུརྱ་འདྲ་ལེགས་པར་བྱུག །བུམ་པའི་ནང་དུ་རྒྱ་ཤོག་ལ། །སྐུ་གསུང་ཐུགས་དང་
ཡོན་ཏན་ལ། །སྙིང་པོ་ཐམས་ཅད་བྲིས་ཏེ་གཞུག །བླ་མ་གྲུབ་ཐོབ་བརྒྱུད་པ་དང་། །རྩ་བའི་ལྷ་ཡི་མཚན་དག་དང་། །མིང་དང་གསང་མཚན་གཞུག་པ་ནི། །སྐུ་གདུང་བྱིན་རླབས་སྙིང་པོ་གཞུག །སྲོག་ཤིང་ལ་སོགས་མེ་ཏོག་ཕྲེང་། །མཛེས་པའི་རྒྱན་གྱིས་སྤྲས་པར་བྱ། །དབང་བསྐུར་
དུ་མ་གཞུང་བཞིན་བྱ། །མཆོད་པ་ཕྱི་ནང་རྟག་ཏུ་དབུལ། །གསལ་ཞིང་མ་འདྲེས་ཐིག་ལེ་སྟེ། །དེ་ལས་ས་བོན་ཀཱ་ཡ་ལྔ། །དེ་ཉིད་མཆོད་རྟེན་དག་ཏུ་བསྟིམ། །བརྒྱུད་པའི་བླ་མའང་དེ་བཞིན་ནོ། །གཙོ་བོ་འཁོར་གྱིས་བསྐོར་བ་སྟེ། །ཤིན་ཏུ་གསལ་བར་དེ་བཞིན་བསྒོམ། །བརྒྱ་སྟོང་ནུས་ཚད་
བཟླས་ཤིང་བསྐོར། །ལྷ་ཚོགས་བླ་མའི་ཐུགས་ཀ་ནས། །འོད་ཟེར་བྱུང་བ་ཀུན་དུ་འཕྲོས། །མཐའ་ཡས་སྒྲིབ་བསྲེགས་དག་པར་སྤྲུལ། །སླར་འདུས་རང་གི་ལུས་ལ་ཐིམ། །རྟོག་སྒྲིབ་རགས་པ་ཇི་སྙེད་པ། །སྐད་ཅིག་གིས་བསྲེགས་སྦྱངས་ནས་ནི། །རང་ལུས་ཤེལ་གྱི་ནོར་བུ་

73-1-207b

བཞིན། །གསང་བ་ཉི་ཤར་རྡོ་རྗེ་བགོ། །ཕྱག་དང་གསོལ་བསྟོད་མེ་ཏོག་མཆོད། །ཐོག་མེད་སྒྲིབ་བསྲེག་དངོས་གྲུབ་ཉེ། །ཁྱད་པར་དུ་ནི་ཡི་དམ་མྱུར། །སྒྲིབ་པ་སྦྱངས་པས་མི་འདོད་ཡལ། །རྟག་ཏུ་བཟླས་པ་བསྐོར་ལྡན་པས། །བསྐོར་བས་ལུས་ཀྱི་སྡིག་པ་འདག །བཟླས་པས་ངག་གི་སྡིག་
པ་འདག །བླ་མ་ལྷར་བསམ་ཡིད་སྡིག་དག །དག་པས་འདོད་པ་ཕྱོགས་མེད་འཕེལ། །མདོར་བསྡུས་ཕྲིན་ལས་རྣམ་བཞི་འགྲུབ། །རང་སེམས་ཆོས་སྐུ་ལྷར་ལྡན་ན། །མཆོག་དང་ཐུན་མོང་འདི་ལ་སྦྱོར། །སྣོད་ཀྱི་བྱེ་བྲག་ལྡན་པར་སྦྱིན། །ལེགས་ཉེས་རིན་ཆེན་དུག་དང་མཚུངས། །དེ་བས་
གསང་སྔགས་ལེགས་པར་སྦ། །སྣོད་ལྡན་རྣམས་ཀྱིས་འགྲུབ་པར་ཤོག །སློབ་དཔོན་ཀླུ་སྒྲུབ་ཀྱིས་མཛད་པའི་དངོས་གྲུབ་ཉེ་བར་བྱེད་པའི་མཆོད་རྟེན་གྱི་མན་ངག་རྫོགས་སོ།།      །།རྒྱ་གར་གྱི་པཎྜི་ཏ་དཱི་པཾ་ཀ་ར་ཤྲཱི་ཛྙཱ་ན་དང་། བོད་ཀྱི་ལོ་ཙཱ་བ་རྒྱ་བརྩོན་འགྲུས་སེང་གེས་བསྒྱུར་ཅིང་ཞུས་ཏེ་གཏན་
ལ་ཕབ་པའོ།།     །།༄༅༅། །མཐུ་སྟོབས་ཀྱི་བདག་པོ་དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །གང་གི་སྟོབས་ཀྱིས་གདུག་པ་འཇོམས་བྱེད་པ། །མཐུ་སྟོབས་དབང་ཕྱུག་རྡོ་རྗེ་ཅན་ལ་འདུད། །འགྲོ་བ་འདི་ཀུན་ཕལ་ཆེར་གནོད་མང་བ། །དེ་སེལ་བདུད་རྩི་འདི་ནི་བརྗོད་པར་བྱ། །རིག་
པ་འཛིན་པ་ཉམས་དགའི་ཕྱོགས་འདུག་ནས། །རྣམ་པར་སྦྱངས་པའི་ས་གཞི་དག་པ་ལ། །རབ་སྔོ་མཆོད་པའི་རྟེན་སོགས་མདུན་བྱས་ནས། །ཐུབ་དབང་རྡོ་རྗེའི་བདག་པོའི་གོ་འཆང་བ། །བསོད་ནམས་ཚོགས་བདུན་རབ་ཏུ་རྫོགས་བྱས་ནས། །དེ་རྗེས་སུ་ནི་སྔར་ཉིད་པདྨའི་རང་བཞིན་སྙིང་
གར་པཾ་ལས་དེར་བསམ་བྱ། །དེ་དཀྱིལ་རཾ་ལས་བྱུང་བའི་ཚ་ཟེར་ཅན་ནི་དམར་པོ་བལྟས་བྱས་ནས། །དེར་ནི་སྲོག་གི་རང་བཞིན་ཡེ་ཤེས་ལྔ་ཡི་དངོས་ཉིད་ཡི་གེ་ཧཱུཾ་དུ་བལྟ། །འོག་ཏུ་དབུགས་ཉིད་ཡཾ་ཡིག་ལས་སྐྱེས་རབ་སྔོ་གཞུ་འདྲ་བ། །གཡོ་བའི་བ་དན་གྱིས་མཚན་དེ་གཡོས་པས་
ནི་རབ་དཀྲུགས་ནས། །མེ་ཡི་རང་བཞིན་ཉི་མ་ཡང་ནི་སྦར་བྱས་ཧཱུཾ་ཡིག་གིས་ནི་འབར་གྱུར་པས། །མཐོང་དང་རེག་པའི་དུག་སོགས་རྒྱུ་ཅན་ནད་ཀྱི་དངོས་བསྲེགས་ནས། །རབ་ཏུ་ཚ་བའི་མེ་ལྕེའི་སྒྲ་ལས་རིགས་པའི་སྒྲ་བསྒྲགས་ལ། །མ་ཡེངས་སེམས་ཀྱི་སྐྱོན་སྤངས་སྔགས་ནི་

73-1-208a

རབ་ཏུ་བཟླས་བྱས་ནས། །དབུགས་ནི་འབྱུང་དང་རྔུབ་པའི་རླུང་གིས་ལུས་ཀྱི་སྟེང་འོག་ཆ་ནི་རིམ་བཞིན་བསྲེག །ཟླ་དྲུག་གོམས་པས་ལུས་ལ་དྲོད་ཐོབ་ལ་སོགས་མཚན་མ་བཟང་པོ་རྙེད། །གསོ་བར་དཀའ་བའི་ནད་རྣམས་འཇོམས་འགྱུར་ས་མཆོག་རྣམས་ཀྱང་རིམ་གྱིས་འཐོབ། །
ལངས་ནས་བཟའ་ཚེ་ཁ་ཟས་ཚོགས་ན་གང་གནོད་ཤར་བསམ་བསྲེག་པར་བྱ། །འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།།      །།རྡོ་རྗེ་འཛིན་ལ་ཕྱག་འཚལ་ལོ། །ལག་པ་བརྡབས་པའི་སྒྲས་འཐིག་པའི། །རྡོ་རྗེ་བྱ་བ་པའི་ལས་ཚོགས་ནི། །རྡོ་རྗེ་འཛིན་པར་བསྒོམས་ནས་ཀྱང་། །
བསམ་རྒྱུ་རང་གི་ལག་མཐིལ་ལ། །ཨ་དང་མ་ལས་དཀྱིལ་འཁོར་བསྐྱེད། །མ་ལས་སྣ་ཚོགས་རྡོ་རྗེར་བསམ། །མུ་ཁྱུད་རྡོ་རྗེའི་བུམ་དཀྱིལ་ལ། །ཐུན་མོང་ཁྱད་པར་གསང་སྔགས་བསམ། །སོར་མོ་ཧཱུཾ་ལས་བདེ་གཤེགས་སྐུ། །མཚན་རྣམས་དག་དང་ཡང་དག་ལྡན། །དཔེ་བྱད་
བཟང་པོ་བརྒྱད་ཅུས་སྤྲས། །མེ་ཡི་མཁའ་ལ་རྣམ་པར་བཞུགས། །མེ་དཔུང་ཆེན་པོའི་ཏིང་འཛིན་གྱིས། །ནད་དང་གདོན་དང་དུག་སོགས་ལ། །ལྕགས་ཀྱུའི་ཏིང་འཛིན་སྦྱོར་བ་ཡིས། །དབྱུང་བའི་ཚུལ་དུ་ཕྱུང་ནས་ཀྱང་། །ཞི་བའི་གཟུགས་བརྙན་དག་ལ་བསྟིམ། །དཀར་གསུམ་ཀླུ་
སྨན་དག་དང་བཅས། །གང་གནོད་ཕྱོགས་སུ་བསྐྱལ་བར་བྱ། །མངོན་སྤྱོད་དྲག་པོའི་ཕྲིན་ལས་ནི། །རྫུས་སྐྱེས་ཚུལ་དུ་བསྐྱེད་བྱས་ལ། །གང་དམིགས་གཟུགས་དང་རྟེན་དུ་བཅས། །ཕྱུང་སྟེ་ཁྱད་པར་གསང་སྔགས་བཟླས། །བསྲེག་དང་སྦྱང་དང་བརྡུང་བྱས་ལ། །ལག་པ་བརྡབས་
པའི་སྒྲས་འཇིག་འགྱུར། །རྡོ་རྗེ་བྱབ་པའི་ལས་ཚོགས། རྗེ་བཙུན་ཀླུ་སྒྲུབ་ཀྱིས་མཛད་པ་རྫོགས་སོ།།      །།༄༅༅། །བཅོམ་ལྡན་འདས་དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དེ་ཡོངས་སུ་བསྙེན་པར་འདོད་པའི་རིག་པ་འཛིན་པས། བསམ་གཏན་གྱི་ཁང་པར་མཎྜལ་སྔོན་པོ་བྱ་སྟེ། མཆོད་རྟེན་
སྔོན་པོ་དང་། གཏའ་གཏོར་དང་། བུམ་པ་དང་། མཆོད་རྫས་དང་། རྟེན་ཁྱད་པར་ཅན་བཞག་ལ། དང་པོ་ཁྲུས་བྱས་ལ། དེ་ནས་སྐྱབས་སུ་འགྲོ། རྒྱུ་བྱང་ཆུབ་མཆོག་ཏུ་སེམས་བསྐྱེད། རྐྱེན་བྱམས་པ་དང་སྙིང་རྗེ་བསྒོམ། ཐབས་ཕ་རོལ་ཏུ་ཕྱིན་པ་དྲུག་ལ་གནས་པ་དེ་ནི་ཐབས་ཀྱི་བསྲུང་

73-1-208b

བའོ། །ཤེས་རབ་ཀྱི་བསྲུང་བ་ནི་སྟོང་པ་རང་གསལ་བར་སྒོམ་པའོ། །དེ་གཉིས་སུ་མེད་པའི་བསྲུང་བ་ནི་རྒྱུད་རྐྱང་ལམ་དུ་ཁྱེར་ལ་ཉམས་སུ་བླངས་པའི་མན་ངག་ནི། ཡེ་ཤེས་ལྔ་ལྡན་ཡིག་འབྲུ་ལས། །ཁ་དོག་ལྔ་ཡི་འོད་ཟེར་འཕྲོ། །ཉོན་མོངས་ལྔ་དང་ཀླུ་དུག་ལྔ། །རྣམ་སྨིན་ལུས་ཀྱི་ནད་ལྔ་བསྲེག །
དེ་ཡིས་དེ་དག་བསྲེགས་ནས་ཀྱང་། །ལྷག་མ་ལུས་པར་གྱུར་པ་རྣམས། །སྤོགས་པ་ཡི་ནི་སྦྱོར་བས་བསྲེག །བཅོམ་ལྡན་འདས་ཀྱིས་གསུངས་པ་ཡི། །གསང་སྔགས་སྐྱོན་སྤངས་བཟླས་པར་བྱ། །དེ་ལ་མན་ངག་རྣམ་གསུམ་སྟེ། །བསམ་གཏན་ཏིང་འཛིན་རྩེ་གཅིག་ལ། །གཉིད་ཀྱི་བར་ཆད་
རབ་ཏུ་སྤང་། །གཞན་གྱི་གཏམ་གྱིས་བར་མི་བཅད། །བདུད་དང་རྡོ་རྗེ་འཛིན་པའི་ལམ། །བླ་མའི་ཞལ་ལས་ཤེས་པར་བྱ། །རྒྱུན་དུའམ་ཐུན་བཞིའི་རྣལ་འབྱོར་བྱ། །དེ་ནས་སྤྱོད་ལམ་དུས་དག་ཏུ། །བསྐྱེད་བསྡུ་མི་དམིགས་རྒྱས་བཏབ་ལ། །བརྒྱ་པས་བཤགས་ཤིང་དགེ་བ་བསྔོ། །རྟགས་
རྣམས་སྒྱུ་མ་ལྟ་བུར་གཟུང་། །དད་ལྡན་བརྩོན་བྱས་ཡིད་ཆེས་ན། །གདོན་མི་ཟ་བར་འགྲུབ་འགྱུར་ཏེ། །དེ་བས་ཐེ་ཚོམ་མེད་པར་ནི། །ཤིན་ཏུ་དད་པས་འབད་དེ་བསྒྲུབ། །ཟླ་དྲུག་བསྙེན་པ་དེ་ལྡན་ན། །ཐུན་མོང་མཆོག་གི་དངོས་གྲུབ་འགྲུབ། །དེས་ན་བསྒྲུབ་བྱ་འདྲེན་པའི་ལྷ། །དགེ་སློང་དཔལ་
དང་ལྡན་པ་ཡི། །ཀླུ་ཞེས་བྱ་བས་དེ་སྐད་གསུངས། །སྐྱབས་འགྲོ་སེམས་བསྐྱེད་བྱམས་སྙིང་རྗེ། །བསྒོམས་ཏེ་ཕ་རོལ་ཕྱིན་དྲུག་ལམ། །དེ་དག་ཐབས་ཀྱི་བསྲུང་བའོ། །ཤེས་རབ་ཟུང་འཇུག་ལམ་བསྒོམས་ཏེ། །སྐྱོན་སྤངས་སྔགས་བཟླས་དགེ་བ་བསྔོ། །ཡན་ལག་བདུན་ལྡན་སྒྲུབ་
ཐབས་འདི། །འབད་པས་ཚོགས་གཉིས་བསགས་ནས་ནི། །དངོས་གྲུབ་རྣམ་གཉིས་ཐོབ་ནས་ཀྱང་། །གདུག་པའི་ནད་ལས་གྲོལ་བར་ཤོག །སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། མ་ཧཱ་ཡཀྵ་སེ་ནཱ་པ་ཏི་བཛྲ་པཱ་ཎི་སཱ་དྷ་ན་ནཱ་མ། 
བོད་སྐད་དུ། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ཞེས་བྱ་བའི་སྒྲུབ་པའི་ཐབས། དཀོན་མཆོག་གསུམ་ལ་ཕྱག་འཚལ་ལོ། །སངས་རྒྱས་གང་གཱའི་བྱེ་སྙེད་རྗེས་གནང་བའི། །མཆེ་གཙིགས་སྤྱན་དམར་དབུགས་རྒྱུ་མེ་ལྟར་འབར། །འཇིགས་པའི་ང་རོས་ཀླུ་རྣམས་རྒྱན་དུ་བརྒྱན། །

73-1-209a

གཤིན་རྗེའི་གཟུགས་ཅན་ཁམས་གསུམ་འཇིགས་པར་མཛད། །ཀླུ་རྣམས་འཆིང་མཛད་དེ་ལ་ཕྱག་འཚལ་ནས། །དེ་ཡི་གཟུངས་ལ་བརྟེན་ནས་སྒྲུབ་ཐབས་འདི། །ཇི་ལྟ་བ་ནི་བདག་ཉིད་དྲན་ཕྱིར་བྲི། །དང་པོར་ས་ཕྱོགས་བཟང་བའོ། །དུར་ཁྲོད་དམ་ནི་ཤིང་གཅིག་གམ། །དབེན་
པའི་གནས་སུ་འདུག་ནས་ནི། །བ་ཡི་རྣམ་ལྔ་དྲི་ལྔ་ཡིས། །མཎྜལ་སྔོན་པོ་ལེགས་པར་བྱུག །དྲི་ཡི་ཐིག་ལེ་དགུ་བཀོད་ལ། །དབུས་སུ་མཆོད་རྟེན་སྔོན་པོ་གཞག །བུམ་པ་གཏའ་གཏོར་མཆོད་རྫས་བཤམ། །ཕྱི་ནང་དག་པའི་ཁྲུས་བྱས་ཏེ། །དེ་ནས་རིག་པ་འཛིན་པ་ཉིད། །བདེ་བའི་སྟན་
ལ་རབ་འདུག་སྟེ། །དང་པོར་བྱང་ཆུབ་སེམས་བསྐྱེད་ལ། །སྙིང་གར་ཟླ་བའི་དཀྱིལ་འཁོར་བསམ། །དེ་ཡི་སྟེང་དུ་ཧཱུཾ་བསམས་ཏེ། །དེ་ལས་འོད་འཕྲོས་སྣོད་བཅུད་སྦྱངས། །སྔར་གྱི་གནས་སུ་ཐིམ་པ་ལས། །ཕྱི་ནང་ཐམས་ཅད་དག་པར་བསྒོམ། །སྭ་བྷཱ་བ་བི་ཤུདྡྷཿསརྦ་དྷརྨཱ་ནཱཾ་བཛྲ་སིདྡྷི་ཧཱུཾ། 
སྙིང་གའི་ཡི་གེ་མཚན་མ་ལས། །ལས་ཀྱི་རྡོ་རྗེ་སེམས་དཔར་གྱུར། །དེ་ལས་འོད་ཟེར་རྣམ་ལྔ་འཕྲོས། །བླ་མ་ལ་སོགས་ལྷག་པའི་ལྷ། །སངས་རྒྱས་བྱང་ཆུབ་སེམས་དཔའ་དང་། །དཀོན་མཆོག་གསུམ་པོ་སྤྱན་དྲངས་ཏེ། །ཕྱག་འཚལ་མཆོད་ཅིང་བཤགས་པ་དང་། །ཡི་རང་བསྐུལ་
ཞིང་གསོལ་བ་གདབ། །སྐྱབས་འགྲོ་ལུས་དབུལ་དགེ་རྩ་བསྔོའོ། །དེ་ནས་བགེགས་དགྲའི་ཏིང་འཛིན་གྱིས། །ལས་རྣམས་ཐམས་ཅད་པ་ཡི་སྔགས། །བཟླས་ཤིང་ཁྲོ་བའི་སྤྲུལ་པ་འཕྲོ། །བཏུལ་ཞིང་སྦྱངས་ཏེ་མཁའ་གང་གྱུར། །དེ་ནས་ཚངས་པའི་གནས་བཞི་བསྒོམ། །ཨོཾ་མ་ཧཱ་ཤཱུ་ནྱ་ཏཱ་
ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཆོས་རྣམས་ཐམས་ཅད་སྟོང་པར་བསྒོམ། །ཨེ་ཡཾ་རཾ་བཾ་ཁཾ་ལཾ་སཾ། །ཨེ་ལས་ཆོས་ཀྱི་འབྱུང་གནས་ཏེ། །དེ་བཞིན་འབྱུང་བ་རིམ་བཞིན་བསྒོམ། །ལཾ་ལས་རི་རབ་ལྷུན་པོའི་སྟེང་། །སཾ་ལས་སྣ་ཚོགས་རྡོ་རྗེ་བསྐྱེད། །དེ་ལས་འོད་ཟེར་སྣ་ལྔ་འཕྲོས། །རྡོ་རྗེ་གུར་དང་
ར་བ་དང་། །མཚོན་ཆའི་འཁོར་ལོ་རྫོགས་པར་བསྐྱེད། །དབུས་སུ་བྷྲཱུཾ་ལས་གཞལ་ཡས་ཁང་། །བཻ་ཌཱུརྱ་ལྟར་ཐམས་ཅད་བསྐྱེད། །ཙ་ལས་འཁོར་ལོ་རྩིབས་བཞིའི་སྟེང་། །ཆུ་སྐྱེས་ཉི་ཟླའི་གདན་སྟེངས་སུ། །ཁ་དོག་མཐིང་གའི་ཡི་གེ་ཧཱུཾ། །དེ་ཉིད་ལས་ནི་འོད་འཕྲོས་པས། །སྣོད་བཅུད་

73-1-209b

དག་ནི་སྦྱང་བྱས་ནས། །རང་གི་ལྷག་པའི་ལྷར་གྱུར་ཏེ། །ཚུར་འདུས་ཁྲོ་བོའི་རྡོ་རྗེར་གྱུར། །དེ་ཡི་བུམ་དཀྱིལ་ཧཱུཾ་སྔོན་ལས། །འོད་འཕྲོ་ཁྲོ་བོའི་རིགས་བཀུག་ནས། །དེ་དག་ཡོངས་སུ་གྱུར་པ་ལས། །ཐམས་ཅད་འཇོམས་པའི་སྟོབས་ལྡན་པ། །གནོད་སྦྱིན་སྡེ་དཔོན་ཆེན་པོ་ནི། །མདོ་
ནས་ཇི་ལྟར་གསུངས་བཞིན་བསྒོམས། །ཞལ་གཅིག་ཕྱག་གཉིས་སྐུ་མདོག་མཐིང་། །གཡས་པ་རྡོ་རྗེ་གཡོན་སྡིགས་མཛུབ། །འོད་ཟེར་ཉི་མ་འབུམ་གྱི་གཟི། །གོས་སྔོན་ན་རའི་རྒྱན་གྱིས་བརྒྱན། །སྟག་གི་སྨད་དཀྲིས་སེང་སྟོད་གཡོགས། །ཀླུ་ཆེན་རྣམས་ནི་རྒྱན་དུ་བརྒྱན། །དབུ་སྐྲ་
སྨ་ར་སེར་ལ་འཇིགས། །སྨིན་མཚམས་དཔྲལ་བསྡུས་མཆེ་གཙིགས་མཚམས། །ཧ་ཧ་ཨ་ལ་ལ་ཞེས་བཞད། །བརྐྱང་བསྐུམ་ཀླུ་བརྒྱད་ཞབས་ཀྱིས་མནན། །རྡོ་རྗེ་མཆུ་ཡིས་ཀླུ་བརྒྱད་གཟིར། །ཉི་ཟླ་དང་ནི་པདྨར་བཅས། །དབུས་ཀྱི་ཆ་ལ་རྣམ་པར་བཞུགས། །དེ་ནས་རང་གི་སྙིང་གར་ནི། །
རང་དང་འདྲ་བའི་གོས་སྔོན་བསྐྱེད། །དབང་པོ་དྲུག་ལའང་དེ་བཞིན་བསྒོམ། །དེ་ནས་ཐུགས་ཀའི་ས་བོན་ལས། །ཧཱུཾ་འཕྲོས་འཁོར་ལོ་རྩིབས་བཞིའི་སྟེང་། །འཕྲོ་འདུས་ཕྱག་མཚན་ཡིག་འབྲུས་མཚན། །དེ་དག་ཡོངས་གྱུར་སྡེ་དཔོན་བཞི། །ཤར་དུ་རྡོ་རྗེ་གནོད་སྦྱིན་ཏེ། །ལྷོ་རུ་སྲིན་པོ་
ཟ་བ་པོ། །ནུབ་ཏུ་རྡོ་རྗེ་གདོན་ཆེན་བདག །བྱང་དུ་རྡོ་རྗེ་རོ་ལངས་ཏེ། །སྡེ་དཔོན་ཆེན་པོ་བཞི་རྣམས་ཀྱང་། །ཞལ་གཅིག་ཕྱག་གཉིས་མཐིང་ནག་ལ། །གཡས་པ་རྡོ་རྗེ་རྩེ་ལྔ་འཛིན། །གཡོན་རྣམས་སྡིགས་མཛུབ་ཏྲི་ཤཱུ་ལ། །རལ་གྲི་དབྱུག་ཏོ་འཁོར་ལོ་འོ། །ཀླུ་ཆེན་བརྒྱད་ནི་རྒྱན་དུ་
བྱས། །སྨད་དཀྲིས་ན་བཟའ་སྔོ་བཀྲ་དང་། །ར་ག་ཟ་ཧོར་ཙན་དམར་བརྒྱན། །པ་ཏི་ཁྲ་བོའི་ཤམ་ཐབས་ཅན། །སྟོད་གཡོགས་སྔོན་པོའི་ཆོས་གོས་འཆར། །དབུ་སྐྲ་སྨ་ར་གྱེན་སེར་འགྲེང་། །ཨ་ལ་ལ་ཡི་གད་རྒྱངས་སྒྲོགས། །བརྐྱང་བསྐུམ་རིགས་བཞིའི་ཀླུ་རྣམས་མནན། །བརྒྱ་བྱིན་མཛེས་
དང་ཉི་མར་བཅས། །མེ་འབར་དབུས་སུ་བསྐྱེད་པར་བྱ། །བགོ་བ་དག་ཀྱང་ཡིག་འབྲུ་ལས། །ཇི་བཞིན་དུ་ནི་བསྐྱེད་བྱས་ཏེ། །རྡོ་རྗེ་གོ་ཆའི་ཕྱག་རྒྱ་ཡིས། །གནས་ལྔར་གཏུག་ཅིང་ལུས་བསྲུང་བྱ། །ན་མཿས་མནྟ་བཛྲཱ་ཎཱཾ་བཛྲ་ཀ་པ་ཙ་ཧཱུཾ། རྡོ་རྗེ་ལྔ་ཡི་ཕྱག་རྒྱ་ཡིས། །བརྟན་པར་བྱས་ཏེ་ལུས་

73-1-210a

བྱིན་བརླབ། །ཐུགས་ཀའི་ཧཱུཾ་ལས་འོད་འཕྲོས་ནས། །ཡེ་ཤེས་སེམས་དཔའ་སྤྱན་དྲངས་ལ། །ཕྱག་འཚལ་མཆོད་བསྟོད་སྡིག་བཤགས་ཏེ། །སྐུ་གསུང་ཐུགས་སུ་བྱིན་བརླབས་ནས། །མཆོད་རྟེན་སྔོན་པོ་དག་ལ་བསྟིམ། །འོད་ཟེར་འདུ་འཕྲོའི་བྱིན་གྱིས་བརླབ། །ཐུགས་
ལས་འོད་འཕྲོས་བདེ་གཤེགས་བསྐུལ། །མི་བསྐྱོད་སངས་རྒྱས་བྱེ་སྙེད་རྣམས། །སྤྱན་དྲངས་མཆོད་བསྟོད་སྡིག་བཤགས་ཏེ། །གཟུངས་ལྟར་རྗེས་སུ་གནང་མཛད་ནས། །དབང་བསྐུར་བྱིན་རླབས་དེ་ཉིད་ཐིམ། །དབུ་ལ་མི་བསྐྱོད་རྡོ་རྗེས་མཚན། །ཐུགས་མཚན་ལ་སོགས་བསྒོམས་ནས་ནི། །
སྔགས་ཀྱི་ཕྲེང་བ་འཁོར་བ་ལས། །སྤྲོ་བསྡུའི་རིམ་པ་གསལ་བར་བསྒོམ། །སངས་རྒྱས་གང་གཱའི་བྱེ་སྙེད་ཀྱིས། །གསུངས་པའི་གསང་སྔགས་སྐྱོན་སྤངས་བཟླས། །ཕར་འཕྲོས་པ་ནི་མཆོད་པའི་ཚུལ། །དེ་ལས་འོད་བྱུང་གདོན་སྡིག་སྦྱངས། །དངོས་གྲུབ་རྣམ་གཉིས་ཐོབ་པར་བསམ། །
ཇི་ལྟར་ཉེ་བར་མ་གྱུར་པར། །གཤེགས་སུ་གསོལ་དང་ཐུན་མཚམས་མེད། །མཆོད་རྟེན་སྔོན་པོ་དག་ལའོ། །ཡང་ན་རིག་པ་འཛིན་པ་ཡིས། །ཐུན་མཚམས་མཆོད་བསྟོད་གཏོར་མ་བཏང་། །ཐ་མའི་ཐུན་ལ་གཤེགས་སུ་གསོལ། །དཀྱིལ་འཁོར་ལྷ་རྣམས་ཐུགས་ཀར་བསྡུ། །དེ་ཉིད་
མི་དམིགས་སྟོང་པར་བསྒོམ། །སྒྱུ་མ་ལྟ་བུའི་སྤྱོད་ལམ་བྱ། །བསྙེན་དུས་རིག་པ་འཛིན་པ་ཡི། །རྩ་སྔགས་ཡིག་འབྲུ་བཅུ་བདུན་བཟླས། །ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་རཱ་ཛྙཱ་བ་ཡ་ཏི་སྭཱ་ཧཱ། འདི་ཡིས་ལས་རྣམས་ཐམས་ཅད་འགྲུབ། །གྲངས་དང་དུས་དང་མཚན་མ་ཡི། །བསྙེན་པ་རབ་འབྲིང་
ཐ་མའི་ཚད། །དབང་པོ་རབ་འབྲིང་དག་དང་སྦྱར། །བསྙེན་པ་རྟགས་དང་ལྡན་གྱུར་ན། །དངོས་གྲུབ་བླང་ཕྱིར་བསྒྲུབ་པ་བྱ། །སྔོན་དུ་བསྙེན་པའི་ཆོ་གའོ། །དེ་ནས་བསྒྲུབ་པ་བྱ་བ་ནི། །ལྷོ་ཕྱོགས་རྒྱ་མཚོའི་གནས་དག་ཏུ། །གཙང་བའི་ས་བླང་སྟེགས་བུ་བརྩིག །བ་ཡི་རྣམ་ལྔ་བླངས་པ་དང་། །འོ་མའི་
དྲི་ཆུ་ཙནྡན་དང་། །གུར་གུམ་ག་བུར་ལ་སོགས་བྱུག །གྲུ་བཞི་རབ་ཏུ་གནས་པ་དང་། །ཐིག་ལ་སོགས་པའི་རིམ་པ་ཡང་། །གཞན་ནས་འབྱུང་བ་བཞིན་དུ་གདབ། །དབུས་སུ་འཁོར་ལོ་རྩིབས་བཞི་བྲི། །ལྷ་རྣམས་ལ་སོགས་ཆ་རྣམས་ཀྱང་། །མཚན་ཉིད་རྒྱས་པར་གཞན་བཞིན་ནོ། །མཆོད་

73-1-210b

རྫས་ལ་སོགས་གོང་བཞིན་བཤམས། །ཁྱད་པར་དག་གི་རྫས་རྣམས་ནི། །བུམ་པ་སྒྲུབ་པའི་རྫས་ཀྱིས་དགང་། །དངོས་གྲུབ་རྫས་ཀྱིས་ཁ་བཅད་ལ། །མགུལ་ཆིངས་སྔོན་པོའི་དར་གྱིས་བཅིང་། །དཀྱིལ་འཁོར་དབུས་སུ་གཞག་པར་བྱ། །རག་ཤ་རུས་པའི་རྒྱན་ཆ་དང་། །སེང་ལྡེང་ཕུར་པ་རྡོ་རྗེ་རྣམས། །
བླ་རེ་རྒྱལ་མཚན་བ་དན་གདུགས། །གཞན་ཡང་སྒྲུབ་རྫས་ཐམས་ཅད་བསོགས། །དེ་ནས་རིག་པ་འཛིན་པ་ཉིད། །རྩ་བའི་སྡོམ་པ་ལ་སོགས་བསྲུང་། །གཙང་མའི་ཟས་ཟོས་སྨྱུང་བར་གནས། །ཤར་བལྟས་ཆོས་གོས་སྔོན་པོ་གྱོན། །བདེ་བའི་སྟན་ལ་རབ་འདུག་སྟེ། །སྔ་དྲོ་དང་པོ་སྙིང་རྗེའི་བདག །
བསྐྱེད་རིམ་བསྙེན་པའི་དུས་བཞིན་བྱ། །ཁྱད་པར་བུམ་པའི་ལྷ་རྣམས་བསྐྱེད། །ཚོགས་བསགས་སྔོན་འགྲོ་རྗེས་འཇུག་རྣམས། །བསྙེན་པའི་དུས་དང་མཐུན་པར་གསུང་། །ཁྱད་པར་ཡེ་ཤེས་སེམས་དཔའ་བསྟིམ། །སྐུ་གསུང་ཐུགས་སུ་བྱིན་གྱིས་བརླབ། །རིགས་ཀྱི་བདག་པོ་སྤྱན་
དྲངས་ཏེ། །བྱིན་བརླབས་དབང་བསྐུར་བུམ་ནང་ཐིམ། །ཐུན་མོང་སྔགས་སམ་ཁྱད་པར་སྔགས། །བཟླས་ཤིང་སྤྲོ་བསྡུའི་རིམ་པ་ནི། །སྣོད་བཅུད་ཡེ་ཤེས་བཅུད་བསྡུས་ནས། །བུམ་ནང་ལྷ་དང་རྫས་ལ་ཐིམ། །སྔགས་ལ་གཏད་དེ་བཟླས་པ་ནི། །ལྕེ་ནི་ཧཱུཾ་གི་རྡོ་རྗེར་གྱུར། །སྙིང་གའི་མཚན་
མ་ལ་སོགས་ལས། །སྔགས་ཀྱི་ཕྲེང་བ་བརྒྱུད་མར་འཁོར། །དེ་ལས་ཁྲོ་ཆུང་གྲངས་མེད་སྤྲོས། བསྲེག་གཟིར་བཅོམ་བཏགས་ཚར་བཅད་བསྐྲད། །ཚུར་འདུས་ནད་དང་གདོན་རྣམས་ཕྱུང་། །དངོས་གྲུབ་རྣམ་གཉིས་ཐོབ་ནས་ཀྱང་། །རྡོ་རྗེ་ལྟ་བུའི་ཏིང་འཛིན་བསྒོམ། །ཐུན་མཚམས་
མཆོད་བསྟོད་གཏོར་མ་བཏང་། །སྒྲུབ་པ་ཐོན་ནས་བུམ་པ་ཡིས། །བདག་གམ་གཞན་ལ་དབང་བསྐུར་ཏེ། །དངོས་གྲུབ་རྫས་རྣམས་ལྷ་ལ་དབུལ། །ལྷག་མ་བདུད་རྩིར་བསམ་སྟེ་བཟའ། །དེ་ནས་ཡི་གེ་བརྒྱ་པས་བཤགས། །ཡེ་ཤེས་འཁོར་ལོ་གཤེགས་སུ་གསོལ། །དམ་ཚིག་
དཀྱིལ་འཁོར་རང་ལ་བསྡུ། །ཐམས་ཅད་སྒྱུ་མ་ལྟ་བུར་བསྒོམ། །སྒྱུ་མ་ལྟ་བུའི་ང་རྒྱལ་ལས། །ཇི་ལྟར་ཞི་བའི་ལས་རྣམས་བྱ། །པཾ་ལས་ཆུ་སྐྱེས་འདབ་བརྒྱད་བསྐྱེད། །གཙོ་བོ་ཀླུ་ཆེན་བརྒྱད་བསམས་ཏེ། །རིན་ཆེན་སྣོད་དུ་གཏོར་མ་བཤམ། །དཀར་གསུམ་མངར་གསུམ་ཀླུ་སྨན་

73-1-211a

བླུགས། །སྦྱངས་ཤིང་བྱིན་གྱིས་བརླབས་བྱས་ཏེ། །ཀླུ་ལ་བྱིན་པས་གདུག་རྩུབ་ཞི། །སྔགས་བཟླས་འོད་ཟེར་འཕྲོ་འདུ་ཡིས། །བྱབ་པའི་རྫས་ཀྱིས་དུག་ཕྱུང་སྟེ། །ཆོས་བཤད་ཁྲོ་བོའི་ཆེ་བརྗོད་པས། །སྔོན་གྱི་དམ་ཚིག་རྗེས་དྲན་ཏེ། །དེས་ན་ཞི་བར་འགྱུར་བ་ཡིན། །ཡང་ན་
མཚན་མ་བཟང་པོ་འབྱུང་། །ངན་ན་སྤོགས་པའི་ཆོ་ག་བྱ། དེ་རྗེས་ཞི་བའི་སྦྱིན་སྲེག་བྱ། །གདོན་དང་སྡིག་པ་ཞི་བར་འགྱུར། །ཞི་བར་མ་གྱུར་གདོན་བགེགས་ལ། །སྨྱག་ཤད་བལ་པོ་སེའུ་ཡི། །སྔགས་བཟླས་ལྕུག་མས་བྱབས་སམ་བྲབས། །འཇིགས་པ་བརྒྱད་ཀྱི་རྫས་ཀྱིས་
གཟིར། །གླ་རྩི་གུ་གུལ་མུ་ཟི་དང་། །དྲི་ཆེན་མི་ཤ་སྤྱང་ཀིའི་བྲུན། །བསྲེགས་པའི་དུད་པས་སྐྲག་ཅིང་འབྲོས། །དེ་ནི་ཁྱད་པར་ཀླུ་ལ་ཤིས། །དེ་བཞིན་གཟུངས་ཀྱི་ལས་ཚོགས་རྣམས། །ཇི་ལྟ་བར་ནི་འགྲུབ་པར་འགྱུར། །དེ་ཡིས་མ་བཟློག་བགེགས་རྣམས་ལ། །མངོན་སྤྱོད་དག་གི་ལས་བྱས་ཏེ། །
གནས་ནི་གདུག་ཅིང་རྩུབ་པ་ཡི། །གནོད་སྦྱིན་ཕོ་མོ་འདུ་བའི་སར། །སྡེ་དཔོན་ཆེན་པོའི་འཁྲུལ་འཁོར་བཅའ། །རིག་པ་འཛིན་པས་ལྷོར་བལྟས་ཏེ། །གནག་ཅིང་རྩུབ་པའི་སྟན་ལ་འདུག །གཅེར་བུ་ཁྲོས་པའི་སེམས་ལྡན་པས། །དུར་ཁྲོད་རོ་རས་ཆེན་པོ་ལ། །ཁྲག་དང་དུག་གིས་ཞལ་
ཞལ་བྱ། །སྨྱོ་བྱེད་ཚ་བ་གསུམ་གྱིས་བྱུག །ནིམ་པ་ག་བུར་སྣག་ཚ་ལ། །རུས་ཆེན་དག་གི་སྨྱུ་གུ་ཡིས། །འཁྲུལ་འཁོར་རིམ་གྱིས་བཅའ་བ་ནི། །འཁོར་ལོ་རྩིབས་བརྒྱད་མུ་ཁྱུད་བཅས། །རེའུ་མིག་ཕྱིར་བསྟན་རྩེ་མོ་ནང་། །སྡེ་དཔོན་ལྟོ་བར་འཁྲུལ་འཁོར་བྲི། །ཁྲོས་པས་མཆེ་
གཙིགས་གནོད་སྦྱིན་འཇིགས། །སྦྲུལ་གཉིས་ཟ་ཞིང་འཁོར་ལོ་འཛིན། །དེ་བཞིན་སྟེང་འོག་འཁོར་ལོ་བྲི། །མུ་ཁྱུད་དག་ལ་མཐའ་རྟེན་སྔགས། །རྩིབས་ལ་ཡ་ཚོགས་བཅུ་དྲུག་བྲི། །དབུས་སུ་ལྷ་སྦྱིན་གཟུགས་བྲིས་ཏེ། །མགོ་དང་དབང་པོ་ཡན་ལག་རྣམས། །རྩིབས་མཆན་
དག་ལ་བརྒྱན་ཞིང་དགོད། །སྙིང་གར་ནྲྀ་དང་ལྟེ་བར་ཛཿ། །མིང་རྣམས་གོ་རིམས་བཞིན་དུ་བྲི། །འཁྲུལ་འཁོར་ལྕགས་ཀྱི་བུམ་པར་གཞུག །བསྐྱེད་པའི་རིམ་པ་ཚུལ་བཞིན་བསྒོམ། །བཟླས་པ་སྔགས་ཀྱི་རིམ་པ་ཡིས། །བཀུག་སྟེ་གྲུ་གསུམ་ཁ་བཅད་གཟིར། །སྔགས་བཟླས་

73-1-211b

འཁྲུལ་འཁོར་དགོངས་པ་ཡང་། །སྟེང་གཅོད་མེ་ཡི་འཁོར་ལོ་སྟེ། །མེ་རླུང་དྲག་པོ་གཡོན་དུ་འཁོར། །འོག་གཅོད་རླུང་གི་འཁོར་ལོ་སྟེ། །དྲང་ཞིང་མྱུར་བར་གཡས་སུ་འཁོར། །འཁོར་ལོ་སྤུ་གྲི་ཆེན་པོ་ཡིས། །ལྷས་བྱིན་ལུས་སེམས་སོ་སོར་དབྲལ། །ཕུང་པོ་མཚོན་ཆའི་འཁོར་
ལོས་གཏུབ། །འཁོར་ལོ་ཚ་གྲང་འཐབ་པའི་སྒྲ། །འུར་འུར་འབྲུག་ལྟར་སྔགས་བཟླས་ཤིང་། །ཁྲོས་པས་རྒྱུན་དུ་བསྐོར་ན་ནི། །ཀླུ་ཆེན་བརྒྱད་ནི་འཆི་བར་འགྱུར། །ངེས་པར་གསོད་ན་མནན་དང་བསྲེག །ཡང་ན་ནག་པོའི་ཚེས་བརྒྱད་ནས། །བརྩམས་ཏེ་མཐིང་ནག་འབྲུབ་ཁུང་དུ། །ལིང་ག་
འཁྲུལ་འཁོར་ནང་བཅུག་ལ། །རྫུས་སྐྱེས་ཚུལ་དུ་བསྐྱེད་བྱ་སྟེ། །སྔགས་བཟླས་བཀུག་སྟེ་རྟགས་ལྡན་ན། །སྡེ་དཔོན་བཞི་ཡི་འཁྲུལ་འཁོར་དུ། །བཅུག་སྟེ་རྡོ་རྗེའམ་ཕུར་བུ་ཡིས། །དུས་དྲུག་འཁྲུལ་འཁོར་ནང་དུ་བརྡུང་། །མངོན་སྤྱོད་ལས་རྣམས་གང་བྱེད་ཀྱང་། །མཆོད་རྟེན་
ནག་པོར་བྱུག་བྱ་སྟེ། །གདུག་པའི་མཆོད་ཡོན་ལ་སོགས་བཤམ། །ཉི་ཤུ་རྩ་གཅིག་ཏུ་མཆོད་ཅིང་། །མཚན་དང་ལྡན་པའི་ཀ་པཱ་ལར། །བདུད་རྩི་ཤ་ཁྲག་སྣ་ཚོགས་བཀང་། །གཏོར་མ་སྡེ་དཔོན་རྣམས་ལ་སྦྱིན། །ཐོད་ཆེན་རྔ་བརྡུང་ཕྲིན་ལས་བཅོལ། །ལིང་ག་དྲག་པོའི་སྦྱིན་སྲེག་བྱ། །
ཡང་ན་མནན་པའི་ལས་བྱའོ། །བཅོམ་ལྡན་འདས་ཀྱིས་གསུངས་པ་ཡི། །གཟུངས་ཀྱི་ལས་ཚོགས་གང་བྱེད་ཀྱང་། །མཆོད་རྟེན་སྐུ་གདུང་དང་ལྡན་པར། །རྟག་ཏུ་མེ་ཏོག་སྔོན་པོས་མཆོད། །བདུན་ནམ་བཅུ་བཞི་ཉི་ཤུ་གཅིག །གཟུངས་སྔགས་སྟོང་རྩ་བརྒྱད་བཟླས་ན། །དེས་ནི་ལས་རྣམས་
ཐམས་ཅད་འགྲུབ། །གྲུབ་ནས་རྟག་ཏུ་མཆོད་པར་བྱ། གནོད་སྦྱིན་སྡེ་དཔོན་ཆེན་པོ་ཡི། །གཟུངས་སྒྲུབ་འདི་ལ་ཉེས་པ་གང་། །གོང་མ་རྣམས་ལ་བཟོད་པར་གསོལ། །བསོད་ནམས་སེམས་ཅན་ཀུན་ལ་བསྔོ། །བདག་གིས་སྒྲུབ་ཐབས་འདི་བྱས་པས། །འབད་པས་ཚོགས་གཉིས་བསགས་
ནས་ནི། །རིག་སྔགས་འཆང་འདྲར་གྱུར་ནས་ཀྱང་། །གདུག་པའི་ནད་ལས་གྲོལ་བར་ཤོག །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེའི་གཟུངས་ཀྱི་སྒྲུབ་པའི་ཐབས། སློབ་དཔོན་ཆེན་པོ་སུ་ཝཱ་གཱི་ཤྭ་ར་ཀཱིརྟིས་མཛད་པ་རྫོགས་སོ།།      །།རྒྱ་གར་གྱི་པཎྜི་ཏ་དཱི་པཾ་ཀ་ར་ཤྲཱི་ཛྙཱ་ན་དང་། ལོ་ཙཱ་

73-1-212a

བ་རྒྱ་བརྩོན་འགྲུས་སེང་གེས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །༄༅༅། །རྒྱ་གར་སྐད་དུ། བཛྲ་པཱ་ཎི་སཱ་དྷ་ནཾ་ནཱ་མ། བོད་སྐད་དུ། ཕྱག་ན་རྡོ་རྗེ་སྒྲུབ་པའི་ཐབས་ཞེས་བྱ་བ། བཅོམ་ལྡན་འདས་རྡོ་རྗེ་ཧཱུཾ་ལ་ཕྱག་འཚལ་ལོ། །དཔལ་ལྡན་སངས་རྒྱས་
འདུས་པའི་སྐུ། །གདུག་པ་འདུལ་མཛད་སྦྲུལ་སོགས་བརྒྱན། །རྡོ་རྗེ་འཛིན་ལ་ཕྱག་འཚལ་ཏེ། །དེ་ཡི་སྒྲུབ་ཐབས་བྲི་བར་བྱ། །བཅོམ་ལྡན་རྡོ་རྗེ་འཛིན་པ་ཡི། །སྒྲུབ་ཐབས་ཀྱི་ནི་གོ་རིམས་རྣམས། །བླ་མ་ཇི་ལྟར་གསུངས་པ་ལྟར། །མན་ངག་བརྗེད་བྱང་དུ་བཀོལ་ལ། །ཁྲོ་བོའི་རྒྱལ་པོ་
བསྙེན་འདོད་པས། །གནས་ནི་དུར་ཁྲོད་ཤིང་གཅིག་གམ། །ཡང་ན་རྡོ་རྗེ་འཛིན་པའི་ཁྱིམ། །བཀྲ་ཤིས་ཉམས་དགའི་གནས་དག་ཏུ། །མཎྜལ་སྔོན་པོ་ལེགས་བྱས་ལ། །མེ་ཏོག་ལ་སོགས་མཆོད་རྫས་དགྲམ། །བདེ་བའི་སྟན་ལ་རབ་འདུག་སྟེ། །གདོང་ལ་སོགས་པ་ཁྲུས་བྱས་ལ། །སྐད་
ཅིག་མ་ཡི་ཏིང་འཛིན་གྱིས། །ཧཱུཾ་ཡིག་ལས་ནི་མདོག་ནག་པ། །ཁྲོ་བོའི་རྒྱལ་པོ་རབ་བསྒོམས་ཏེ། །དཔའ་བའི་ཉམས་ཀྱིས་ཡུངས་ཀར་ལ། །སྐད་ཅིག་མ་ཡི་ཏིང་འཛིན་གྱིས། །སྔགས་བཟླས་ཁྲོ་བོའི་སྤྲུལ་པ་སྤྲོ། །གདུག་པ་ཚར་བཅད་ཚུར་འདུས་པས། །རྡོ་རྗེ་གུར་དང་ར་བར་
གྱུར། །དེ་ནས་རང་གི་སྙིང་གར་ནི། །ཨ་དཀར་ཞུ་བས་ཟླ་བ་ཡི། །དཀྱིལ་འཁོར་ཉ་གང་ལྟ་བུར་བསམ། །དེ་སྟེང་ཧཱུཾ་སྔོན་ཞུ་བ་ལས། །རྡོ་རྗེ་སྔོན་པོ་རྩེ་ལྔ་བསམ། །དེ་ཡི་བུམ་པར་ཧཱུཾ་སྔོན་པོ། །དེ་ལས་འོད་ཟེར་ཕྱོགས་བཅུར་འཕྲོས། །སངས་རྒྱས་བྱང་ཆུབ་སེམས་དཔའ་དང་། །
ལྷག་པའི་ལྷ་དང་བླ་མ་རྣམས། །སྤྱན་དྲངས་མདུན་གྱི་མཁའ་ལ་བཞུགས། །བསོད་ནམས་ཚོགས་ནི་བསགས་པའི་ཕྱིར། །ཕྱག་འཚལ་མཆོད་སྦྱིན་སྡིག་བཤགས་རྣམས། །བདུན་པོ་ཡོངས་སུ་དག་པ་ཡི། །ཚིག་ཏུ་བརྗོད་དེ་ཚོགས་བསགས་བྱ། །སྤྱན་དྲངས་རྣམས་ནི་
གཤེགས་སུ་གསོལ། །དེ་ནས་ཡེ་ཤེས་ཚོགས་བསགས་ཕྱིར། །ཕྱི་ནང་སྣོད་བཅུད་འོད་ཞུ་ནས། །བདག་ཉིད་ཀྱི་ནི་ཐུགས་ཀར་ཐིམ། །དེ་ཉིད་འོད་ཞུ་ཧཱུཾ་ལ་འདུས། །ཧཱུཾ་ཞུ་ཟླ་ཚེས་ཐིག་ལེར་ཐིམ། །ཆོས་རྣམས་རང་བཞིན་རྣམ་དག་པའི། །ངོ་བོ་ཉིད་ལས་བྱུང་བ་ཡི། །སྔགས་

73-1-212b

འདི་ཡང་དག་བརྗོད་པར་བྱ། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཚིག་གི་དོན་དང་བཅས་པར་བསྒོམ། །ཆུ་ལས་ཆུ་བུར་རྡོལ་བའི་ཚུལ། །ཡཾ་ལས་རླུང་གི་དཀྱིལ་འཁོར་དེ། །རཾ་ལས་མེ་ཡི་ཁ་དོག་ལྔ། །དབུས་སུ་པཾ་ལས་པདྨ་བསམ། །ཨ་ལས་ཟླ་བའི་དཀྱིལ་འཁོར་
རོ། །དེ་ཡི་སྟེང་དུ་ཧཱུཾ་སྔོན་ལས། །དེ་ཞུ་རྡོ་རྗེ་སྔོན་པོ་ནི། །འོད་ཟེར་སྔོན་པོ་འཕྲོ་བར་བསམ། །དེ་ཡི་བུམ་པར་ཧཱུཾ་སྔོན་བསམ། །དེ་ལས་འོད་ཟེར་ཧཱུཾ་ཕྲ་མོ། །འཕྲོས་ནས་ཕྱི་ནང་སྣོད་བཅུད་སྦྱངས། །ཚུར་འདུས་རྡོ་རྗེ་ཕྲ་མོར་གྱུར། །སྔར་གྱི་གནས་སུ་ཐིམ་པ་ལས། །དེ་ཞུ་རྡོ་རྗེ་སྔོན་པོ་ནི། །ནམ་
མཁའི་མཐའ་དང་མཉམ་པར་བསམ། །དེ་ཡི་བུམ་དཀྱིལ་ཧཱུཾ་སྔོན་ལས། །སྐུ་མདོག་ནམ་མཁའི་མདོག་ཅན་ལ། །དེ་ལས་འོད་བྱུང་བཅུད་སྦྱངས་ཏེ། །ཚུར་འདུས་ཕྱག་ན་རྡོ་རྗེ་ཡི། །སྐུ་ནི་ཕྲ་མོའི་ཚུལ་དུ་འདུས། །དེ་ལས་ཕྱག་ན་རྡོ་རྗེའི་སྐུ། །མདོ་ནས་ཇི་ལྟར་གསུངས་བཞིན་བསྒོམས། །
དེ་ནས་དམ་ཚིག་སེམས་དཔའི་སྐུ། །བསྙེན་པའི་དུས་སུ་བསྒོམ་པ་ནི། །སྐུ་མདོག་ནམ་མཁའི་འོད་ཅན་ལ། །ཞལ་གཅིག་ཕྱག་ཀྱང་གཉིས་པ་སྟེ། །སྤྱན་དམར་མཆེ་བ་གཙིགས་པ་ལ། །ཕྱག་གཡས་རྡོ་རྗེ་གཡོན་སྡིགས་མཛུབ། །ཤིན་ཏུ་གདུག་ཅིང་ཁྲོས་པ་སྟེ། །ཀླུ་ཆེན་བརྒྱད་ཀྱིས་
རྣམ་པར་བརྒྱན། །སྟོད་གཡོགས་སྔོན་པོ་ལེགས་བསྣམས་ཤིང་། །ན་བཟའ་ཆོས་གོས་སྔོན་པོ་འཆང་། །སྨད་གཡོགས་བ་ཏི་ཁྲ་བོ་དང་། །སྟག་གི་སྨད་གཡོགས་སེང་སྟོད་གཡོགས། །ཉི་ཟླའི་སྟེང་ན་གར་བྱེད་དགྱེས། །བདག་ཉིད་དང་ནི་སྦྲུལ་རྒྱན་གྱི། །ཁ་ནས་ཧ་ཧའི་སྒྲ་སྒྲོགས་པས། །
ལོག་འདྲེན་ཚོགས་རྣམས་འཇོམས་པར་བྱེད། །དེ་ལྟར་ཁྲོ་བོའི་རྒྱལ་པོར་ནི། །བདག་ཉིད་རྣམ་པར་བསམ་པར་བྱ། །བདག་ཉིད་དམ་ཚིག་སེམས་དཔའ་ཡི། །ཐུགས་ཀར་ཟླ་བ་རྡོ་རྗེ་ཧཱུཾ། །འཕྲོ་འདུས་ཡེ་ཤེས་སེམས་དཔའ་བསྒོམ། །ཐུགས་ཀར་ཉི་མ་རྡོ་རྗེ་ཧཱུཾ། །སྲན་མ་ནས་ཚད་ཡུངས་འབྲུ་ལ། །
རྩ་བའི་སྔགས་ཀྱིས་བསྐོར་བར་བསམ། །རྡོ་རྗེ་གོ་ཆའི་ཕྱག་རྒྱ་ཡིས། །གནས་ལྔར་གཏུག་ཅིང་ལུས་བསྲུང་བྱ། །ན་མཿས་མནྟ་བཛྲཱ་ཎཱཾ་ཀ་བ་ཙ་ཧཱུཾ། རྡོ་རྗེ་རྩ་ལྔའི་ཕྱག་རྒྱ་ཡིས། །སྔགས་འདི་བརྗོད་དེ་བརྟན་པར་བསམ། །ན་མཿས་མནྟ་བཛྲཱ་ཎཱཾ་བཛྲ་ཙཎྜ་མ་ཧཱ་རོ་ཥ་ཎཱ་ཡ་ཧཱུཾ། ལྕགས་ཀྱུའི་ཕྱག་

73-1-213a

རྒྱ་བཅས་ནས་ནི། །ཐུགས་ཀའི་ཧཱུཾ་ལས་འོད་འཕྲོས་པས། །འོད་ཟེར་ལྕགས་ཀྱུའི་དབྱིབས་བྱུང་ནས། །ཡེ་ཤེས་སེམས་དཔའ་སྤྱན་དྲངས་ཏེ། །འོག་མིན་གནས་མཆོག་དམ་པ་ཡི། །ལྕང་ལོ་ཅན་གྱི་ཕོ་བྲང་ནས། །སངས་རྒྱས་ཀུན་གྱིས་རྗེས་གནང་བའི། །གསང་བདག་འཕགས་
པ་གོས་སྔོན་ཅན། །འཁོར་བཅས་མ་ལུས་སྤྱན་འདྲེན་གྱིས། །འདིར་གཤེགས་མཆོད་པ་དམ་པ་བཞེས། །ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་ས་མ་ཡ་མཎྜ་ལ་མ་དྷེ་ཨཱ་གཙྪ་ཡ། ཨཱ་གཙྪ་ཡ། པྲ་བེ་ཤ་ཡ། པྲ་བེ་ཤ་ཡ། ཏི་ཥྛ་ཡ་ཏིཥྛ་ཡ། ཨ་བ་ལོ་ཀཱ་ཡ་ཧཱུཾ་ཛཿམདུན་གྱི་ནམ་མཁར་བཞུགས་པར་
བསམ། །སྙིང་གའི་ལྷ་མོའི་ཚོགས་ཀྱིས་མཆོད། །ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི། བཛྲ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བཛྲ་དྷཱུ་པེ་ཧཱུཾ། བཛྲ་ཨཱ་ལོ་ཀེ་ཧཱུཾ། བཛྲ་གནྡྷེ་ཧཱུཾ། བཛྲ་ནེ་ཝི་དྱེ་ཧཱུཾ། བཛྲ་གཱི་ཏི་ག་ཏ་ག་ཏ་ཧཱུཾ་སྭཱ་ཧཱ། སྔགས་དང་ཚིགས་བཅད་རབ་བརྗོད་པས། །དངོས་སམ་
ཡིད་ཀྱིས་མཆོད་པ་དབུལ། །དེ་ནས་བསྟོད་དང་ཕྲིན་ལས་བཅོལ། །མདུན་དུ་གཏའ་ཡི་གཏོར་མ་ལ། །ཨ་ལས་བནྡྷ་གཞལ་ཡས་ཁང་། །ཐུན་མོང་གདན་དང་ཉི་མའི་སྟེང་། །ཧཱུཾ་ཡིག་ལས་ནི་མདོག་གནག་པ། །ལས་ཀྱི་སེམས་དཔར་བསྐྱེད་པར་བྱ། །རི་རབ་ཆེན་པོའི་ལྷོ་ཤར་ནས། །ལྕང་ལོ་ཅན་
གྱི་བསྐུལ་ཚིག་དང་། །སྔགས་དང་ཕྱག་རྒྱས་སྤྱན་དྲངས་བསྟིམ། །མཆོད་དང་སྡིག་བཤགས་ལ་སོགས་བྱ། །ཛཿཧཱུཾ་བཾ་ཧོཿཞེས་པ་ཡིས། །ཡེ་ཤེས་སེམས་དཔའ་བསྟིམ་པར་བྱ། །སྤྱི་བོ་མགྲིན་པ་སྙིང་ག་རུ། །ཨོཾ་ཨཱཿཧཱུཾ་གསུམ་རབ་བཀོད་དེ། །ཡི་གེ་བཅུ་གསུམ་འཁོར་ལོ་
བསྒོམ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བཱཀ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧཾ། སྐུ་གསུང་ཐུགས་སུ་བྱིན་བརླབས་ནས། །མི་བསྐྱོད་སངས་རྒྱས་བྱེ་སྙེད་རྣམས། །སྤྱན་དྲངས་མཆོད་དང་སྡིག་བཤགས་ཏེ། །རྗེས་སུ་གནང་བ་གསུམ་ལྡན་གྱིས། །དབང་བསྐུར་བྱིན་བརླབས་གཉིས་མེད་ཐིམ། །
ཨོཾ་ཤྲཱི་བཛྲ་པཱ་ཎི་ཧཱུཾ་མ་ཧཱ་ཙཎྜ་སརྦ་དུཥྚཱན། སརྦ་བུདྡྷ་ས་པ་རི་ཝཱ་ར་བཛྲ་ས་མ་ཡ་ཧཱུཾ། ཆོས་ཀྱི་རྒྱལ་པོར་དབང་བསྐུར་རོ། །ཐུགས་ཀའི་ཏིང་འཛིན་སེམས་དཔའ་ལ། །གཏད་དེ་སྔགས་ཀྱི་ཕྲེང་བས་བསྐོར། །བདག་དང་ལས་ཀྱི་སེམས་དཔའ་ལ། །སྤྲོ་དང་བསྡུ་བའི་རིམ་པ་

73-1-213b

རྣམས། །ཇི་ལྟ་བར་ནི་གསལ་བར་བསྒོམ། །བཅོམ་ལྡན་འདས་ཀྱིས་གསུངས་པ་ཡི། །གསང་སྔགས་སྐྱོན་སྤངས་བཟླས་པར་བྱ། །བསྙེན་དུས་ལྷ་ལ་གཏད་དེ་བཟླས། །སྒྲུབ་པའི་དུས་སུ་སྔགས་ལ་གཏད། །བཟླས་དུས་གཟས་པ་པོ་རྣམས་ལ། །གཏད་དེ་སྔགས་ཀྱི་འཕྲོ་འདུ་
བྱ། །དེ་ནས་བདག་དང་རྒྱན་ཆ་ཡི། །སྦྲུལ་གྱི་ཁ་ནས་སྔགས་བཟླས་པས། །མེ་ཡི་འཚུབས་མ་དམར་ནག་དང་། །ཁྲོ་བོ་གྲངས་མེད་འཕྲོས་པ་ལས། །དེ་ཡིས་དེ་དག་བསྲེགས་ནས་ཀྱང་། །ལྷག་མ་ལུས་པར་གྱུར་པ་རྣམས། །སྤོགས་པ་ཡི་ནི་སྦྱོར་བས་བསྲེག །དེ་ལྟར་བྱས་ནས་
བསྒོམ་ཞིང་བཟླས། །དེ་ནས་དང་པོའི་ཐུན་ཐོན་ནས། །སྐྱོ་འམ་དུབ་ན་མཆོད་བྱས་ཏེ། །གཏོར་མ་བྱིན་གྱིས་བརླབས་ཏེ་དབུལ། །བསྟོད་དང་ཕྲིན་ལས་བཅོལ་བར་བྱ། །ཇི་ལྟར་ཉེ་བར་མ་གྱུར་པར། །ཡེ་ཤེས་སེམས་དཔའ་གཤེགས་མི་གསོལ། །མཆོད་རྟེན་སྔོན་པོ་དག་ལའོ། །ཐུན་ནི་གཉིས་
དང་གསུམ་པ་ལ། །ཡེ་ཤེས་སེམས་དཔའ་མཆོད་པ་དང་། །ཐུན་ནི་ཐ་མ་བསྒོམ་པའི་ཚེ། །དང་པོའི་ཐུན་ནི་མཐུན་པར་གསུངས། །ཡི་གེ་བརྒྱ་པས་བརྟན་པར་བྱ། །དེ་ནས་ལྡང་བའི་དུས་དག་ཏུ། །རིག་སྔགས་ལས་ཀྱི་ལྷ་ལ་གཏད། །དེ་ལྟར་མ་ནོར་བསྒོམས་བྱས་ན། །དངོས་གྲུབ་དམ་
པ་ཅི་འདོད་པ། གང་ལ་དམིགས་པ་དེ་འགྲུབ་འགྱུར། །བསྙེན་རྫོགས་མཚན་མ་བཟང་བ་དང་། །ཡེ་ཤེས་སེམས་དཔའ་གཤེགས་མི་གསོལ། །གཤེགས་ན་དངོས་གྲུབ་ཡལ་འགྱུར་བས། །ལྷ་ནི་རྒྱུན་དུ་འཁོར་བ་ཡི། །མན་ངག་ཞལ་ལས་ཤེས་པར་བྱ། །གཏོར་མ་བཀའ་ལས་ཕབ་
ནས་ནི། །གཏའ་ཡི་བདག་པོ་མཆོད་བྱས་ནས། །གཏའ་གཏོར་བསྐུལ་ཚིག་བཅས་ལ་གཏད། །བསྒྲུབ་བྱའི་ཕྱོགས་སུ་དམར་ལམ་བསྟན། །གཏའ་ཡི་བདག་པོ་གཤེགས་སུ་གསོལ། །ལས་ཀྱི་སེམས་དཔའ་བདག་ལ་བསྡུ། །ཧཱུཾ་ཧཱུཾ་ཞེས་བསྡུ་མི་དམིགས་བསྒོམ། །སྐད་
ཅིག་མ་ཡི་ང་རྒྱལ་གྱིས། །སྤྱོད་ལམ་ཅི་བདེར་གནས་པར་བྱ། །བསྙེན་རྫོགས་མཚན་མ་བཟང་གྱུར་ནས། །དྲག་པོ་ལས་ལ་སྦྱར་བྱས་ཏེ། །མཆོད་རྟེན་སྔོན་པོ་སྐུ་གདུང་ལྡན། །མེ་ཏོག་སྔོན་པོ་དྲིར་བསྙུགས་ཀྱིས། །ཉི་ཤུ་རྩ་གཅིག་ཏུ་མཆོད་ཅིང་། །བདག་ཉིད་གོས་སྔོན་ཆས་

73-1-214a

གོན་ལ། །རཀྵ་རུས་པའི་ཕྲེང་བ་བགྲང་། །སྔགས་ནི་བརྒྱ་དང་བརྒྱ་ལྔ་བཅུས། །ཐུན་བདུན་གྱིས་ནི་རྣལ་འབྱོར་བྱ། །རྡོ་རྗེའམ་སེང་ལྡེང་ཕུར་པ་ལ། །གཟུངས་སྔགས་སྟོང་རྩ་བརྒྱད་བཟླས་ཏེ། །བསམ་གཏན་རྡོ་རྗེ་ཐོགས་པ་ཡི། །དྲག་སྔགས་ལྔ་བཅུ་རྩ་གཅིག་བཟླས། །
གཟས་པ་པོ་ལ་བསྣུན་གྱུར་ན། །དེས་ནི་ལས་རྣམས་ཐམས་ཅད་འགྲུབ། །བདག་གིས་འདི་བྱས་དགེ་བ་ཡིས། །བློ་ཆུང་རྣམས་ཀྱིས་དོན་རྟོགས་ཏེ། །འབད་པས་ཚོགས་གཉིས་བསགས་ནས་ནི། །ཕྱག་ན་རྡོ་རྗེ་ཐོབ་པར་ཤོག །ཕྱག་ན་རྡོ་རྗེ་མདོ་ལུགས་ཀྱི་མན་ངག །སློབ་དཔོན་སུ་ཝཱ་
གཱི་ཤྭ་ར་ཀཱིརྟིས་གཟུངས་ཀྱི་འགྲེལ་པ་ལྟར་མཛད་པ་འགྲེལ་པ་ལས་གཟུངས་སྒྲུབ་ཐབས་སུ་མཛད་པ་རྫོགས་སོ།།      །།རྒྱ་གར་གྱི་པཎྜི་ཏ་དཱི་པཾ་ཀ་ར་ཤྲཱི་ཛྙཱ་ན་དང་། ལོ་ཙཱ་བ་རྒྱ་བརྩོན་འགྲུས་སེང་གེས་བསྒྱུར་བའོ། །༄༅༅། །རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ཎི་སཱ་དྷ་
ནཾ་ནཱ་མ། བོད་སྐད་དུ། ཕྱག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་ཐབས་ཞེས་བྱ་བ། གནོད་སྦྱིན་གྱི་སྡེ་དཔོན་ཆེན་པོ་ཁྲོ་བོ་གཏུམ་པོ་ལ་ཕྱག་འཚལ་ལོ། །གདུག་པ་འདུལ་མཛད་ཀླུ་རྣམས་རྒྱན་དུ་མཛད། །གཏུམ་ཞིང་རྔམ་པས་གཤིན་རྗེའི་ཆ་ལུགས་འཛིན། །ཁྲོ་རྒྱལ་གོས་སྔོན་ཅན་ལ་ཕྱག་འཚལ་ཏེ། །
དེ་ཡི་སྒྲུབ་ཐབས་བདག་ཉིད་དྲན་ཕྱིར་བྲི། །གནོད་སྦྱིན་གྱི་སྡེ་དཔོན་ཆེན་པོ་ཉེ་བར་བསྒྲུབ་པར་འདོད་པའི་རྣལ་འབྱོར་པས། གནས་དབེན་ཞིང་ཉམས་དགའ་བའི་སར་མཎྜལ་བྱ་བ་ནི་བུ་མོ་ལོ་བཅུ་དྲུག་ལོན་པ་ལུས་སྔོ་བ། སྣ་ཉག་པ་ཁྲོ་གཉེར་དང་ལྡན་པ། ཤིན་ཏུ་ཁྲོས་པའི་ངང་ཚུལ་དང་ལྡན་པ་
ས་ལེན་དུ་བཅུག་སྟེ། ལྷོ་ནུབ་མཚམས་ནས་སྔོན་པོའམ་ནག་པོ་ལེན་དུ་བཅུག་པ། དྲི་ཞིམ་པོའི་ཆུ་ལ་སྲུང་བའི་སྔགས་བཟླས་ཏེ། ཨོཾ་བཛྲ་པཱ་ཎི་སཏྭ་ཨརྠ་སིདྡྷི་ཀུ་རུ་རཀྵ་ཞེས་བཏབ་ལ། མཎྜལ་སྔོན་པོ་རྒྱར་ཁྲུ་གང་བ་ལ། དཔངས་སུ་མཐོ་གང་བ་བརྩིགས་ཏེ། ཙནྡན་དང་། ཨ་ཀ་རུ་
དང་། ཛཱ་ཏི་དང་། ཨེ་ལ་དང་། རམས་དང་། སོ་བ་ཤིང་གི་ལོ་མ་དྲི་ཆུས་བྱུགས་ལ། མེ་ཏོག་སྔོན་པོའམ་དྲིའི་ཐིག་ལེ་དགུ་བྱས་ལ། མཆོད་རྫས་རྣམས་དགྲམ་པར་བྱའོ། །དེ་ནས་སྒྲུབ་ཐབས་ལྟར་ལྷ་དགུའི་རང་བཞིན་བསྒོམ་མོ། །དེའང་སྒྲུབ་ཐབས་ལས་གཏའ་བཅས་ལ་མཆོད་དོ་ཞེས་པ་ནི་

73-1-214b

གནོད་སྦྱིན་ལག་ན་རྡོ་རྗེའི་སྒྲུབ་ཐབས་འདིའོ། །དཔལ་ཕྱག་ན་རྡོ་རྗེ་གནོད་སྦྱིན་གྱི་གཏའ་གཏོར་འདི་ལ་བརྟེན་ལ་རྟག་ཏུ་སྒྲུབ་པ་ནི་གཏོར་མའི་སྣོད་རིན་པོ་ཆེའི་རྒྱུ་ལས་བྱས་ཏེ། དེའི་ནང་དུ་འབྲས་ཆན་དང་། ནས་དང་། གྲོ་ལ་སོགས་པ་ལས་གཏོར་མ་བྱས་ཏེ། སྤྱན་གཟིགས་དང་། ཤ་དང་མར་དང་། མངར་
ལ་སོགས་པས་བརྒྱན་པར་བྱའོ། །དེའི་ནང་དུ་ཐུན་མོང་དང་ཐུན་མོང་མ་ཡིན་པའི་གདན་བཤམ་པའམ། བསྐྱེད་པར་བྱའོ། །ལཾ་ལས་རི་རབ་བསམས་ཏེ། དེའི་སྟེང་དུ་ཨ་ལས་ཐོད་པའི་སྐུ་མཁར། སྟེང་དུ་མ་ལས་ཉི་མ། པཾ་ལས་པདྨ། བདག་ཉིད་ཀྱི་ཐུགས་ཀའི་ཧཱུཾ་ལས་འོད་འཕྲོས་ཏེ། བསྒྲུབ་
བྱ་བཀུག་སྟེ་ཐུན་མོང་མ་ཡིན་པའི་གདན་ལ་བསྟིམ། ཡང་འོད་ཟེར་ལྕགས་ཀྱུ་ལྟ་བུའི་ཚ་ཚ་འཕྲོས་པས་ལྷ་དང་ཕྲལ་ལ་གཅེར་བུ་བྱང་ཐང་ལ་བོར་བ་ལྟར་བསམ། སྟེང་དུ་ཧཱུཾ་ལས་གནོད་སྦྱིན་གྱི་སྡེ་དཔོན་བསྐྱེད་དོ། །སྐུ་མདོག་མཐིང་ནག་ཞལ་གཅིག་ཕྱག་གཉིས་གཡས་རྡོ་རྗེ། གཡོན་
རྩེ་གསུམ་འཕན་ཅན་འཕྱར་བ། བཞིན་ཁྲོས་པ། སྨིན་མ་གློག་སྟོང་འོད་དུ་འགྱུ་བ། དབུ་སྐྲ་དམར་སེར་གྱེན་དུ་བཅིངས་པ་སྟེ། རིན་པོ་ཆེ་དང་སྦྲུལ་གྱིས་བརྒྱན་པ། མིག་འབྲས་ཧཱུཾ་ལས་མེའི་ཕུང་པོ་འདྲ་བ། ཞལ་ནས་ཧ་ཧ་དང་ཧཱུཾ་ཧཱུཾ་གི་སྒྲ་སྒྲོགས་པས་ཁམས་གསུམ་པ་བརྒྱལ་བར་བྱེད་
པ། ཀླུ་ཆེན་པོ་བརྒྱད་ཀྱིས་སྐུ་ལ་རྣམ་པར་བརྒྱན་པ། སྐུ་ཆེ་ལ་ཡན་ལག་རགས་པ། རི་རབ་ལ་རྣམ་པར་བཞུགས་པ་སྟེ། ཞབས་གཉིས་རྒྱ་མཚོའི་གཏིང་དུ་བརྐྱང་ལ། དབུ་བར་སྣང་གི་ཁམས་ན་འཕྱོ་བ། འཁོར་གནོད་སྦྱིན་དང་སྲིན་པོའི་ཚོགས་ཀྱིས་བསྐོར་བ་ཅིག་བསྐྱེད་དོ། །དེ་ཅི་འདྲ་
བ་ཅིག་རི་རབ་རྩེ་ནས་སྤྱན་དྲངས་ལ་ཕྱག་བཙལ། མཆོད་པ་དབུལ། བདུན་རྣམ་དག་བྱ་སྟེ། བསྟོད་པ་དང་འདོད་པའི་དོན་ལ་གསོལ་བ་བཏབ་སྟེ། ཛཿཧཱུཾ་བཾ་ཧོཿས་གཉིས་སུ་མེད་པར་བསྟིམས་ལ། གཏའ་བདག་ལས་ཀྱི་གནོད་སྦྱིན་ཕྱག་ན་རྡོ་རྗེ་དྲག་པོའི་སྒོ་ནས་ཐུགས་རྗེས་བཞུགས་
པས་གཟས་པ་པོའི་ཉོན་མོངས་པ་དང་། རིག་སྔགས་དང་། གསང་སྔགས་དང་། སྙིང་པོ་དང་། ཕྱག་རྒྱ་དང་། ཕྲིན་ལས་རྣམ་པ་བཞིའི་སྒོ་ནས་བཞུགས་ཏེ། དྲག་པོས་དྲག་པོ་སྒྲོལ་བར་བསམ་མོ། །དེ་ནས་སྔགས་བཟླས་པར་བྱ་སྟེ། ཨོཾ་བཛྲ་པཱ་ཎི་ཧྲྀ་ད་ཡ་ཎ་ཧཱུཾ་ཕཊ་སྭཱ་ཧཱ། དཔལ་

73-1-215a

གནོད་སྦྱིན་གྱི་ཡང་སྙིང་ཡིན་པས་བསྙེན་པའི་དུས་སུ་བདུན་འབུམ་ཉི་ཁྲི་གདོན་ནོ། །མཚན་མ་བཟང་བ་དང་སྒྲུབ་པ་ལ་འཇུག་སྟེ། བདག་ཉིད་ཕྱག་ན་རྡོ་རྗེའི་ང་རྒྱལ་གྱིས་ཐུགས་ཀའི་ཧཱུཾ་ལས་འོད་ཟེར་འཕྲོས་པས་ལས་ཀྱི་གནོད་སྦྱིན་གྱི་ཐུགས་དམ་བསྐུལ་ཏེ་འོད་ཟེར་དམར་
པོ་མེའི་འོད་ལྟ་བུ་བྱུང་སྟེ། གཟས་པ་པོ་བསྲེག་པ་དང་སྡིག་པ་ལ་སོགས་པ་སྦྱངས་ཏེ། སླར་བདག་ཉིད་ཀྱི་ཐུགས་ཀར་ཐིམ་པར་བསམ། ཨོཾ་ཡཀྵ་ནཱི་ལཱཾ་བ་ར་དྷ་ར་བཛྲ་པཱ་ཎི་ཧཱུཾ། མ་ཧཱ་ཡཀྵ་སེ་ནཱ་པ་ཏ་ཡེ། ཆེ་གེ་མོ་ཨ་མུ་ཀ་སྱ་མཱ་ར་ཡ་ཧཱུཾ་ཕཊ་ཅེས་སྔགས་བཟླས་པས་ཞལ་ནས་སྔགས་ཀྱི་ཕྲེང་
བ་མེའི་འོད་དང་བཅས་ཏེ་ལས་ཀྱི་ལྷའི་ཞལ་དུ་ཐིམ། ཐུགས་ཀ་ནས་འཐོན་ཏེ། སླར་བདག་ཉིད་ཀྱི་སྙིང་གར་ཐིམ་སྟེ། སྔགས་ཀྱི་ཕྲེང་བས་བསྐོར་བས་གཟས་པ་པོ་སྔགས་ཀྱི་ཕྲེང་བས་བསྲེགས་ཤིང་འདུལ་བར་བྱའོ། །སྒྲུབ་པ་རྟགས་བཟང་བ་དང་ལས་ལ་སྦྱར་ཏེ། རྒྱུད་ལས་ཀྱང་། འོག་
ཏུ་མེ་ཡི་དཀྱིལ་འཁོར་བསམ། །མེ་འབར་ཀློང་ཆེན་དཀྱིལ་དུ་གཟིར། །བསམ་གཏན་རྡོ་རྗེ་ཐོགས་པ་ཡིས། །གདུལ་བྱའི་སྟེང་དུ་དབབ་པར་བྱ། །ཞེས་གསུངས་པས་བསྲེགས་བསྐྲད་བཅོམ་བཏགས་པར་བསམ། དམར་ལམ་བསྟན་པ་ལྟར་ཏིང་ངེ་འཛིན་གྱི་དགོངས་པ་བྱ་ཞིང་དྲག་སྔགས་
བཟླས་ཏེ། ཏདྱ་ཐཱ་བུདྡྷ་བུདྡྷ། བི་བུདྡྷ་མ་ཧཱ་པྲཱ་བྷ། ཧ་ར་ཧ་ར་ནཱ་ག་ནཱཾ། པྲ་ཧ་ར་པྲ་ཧ་ར་ནཱ་ག་ནཱཾ། ཙྪིནྡ་ཙྪིནྡ་ནཱ་ག་ཧྲྀ་ད་ཡ་ནཾ། བྷིནྡ་བྷིནྡ་ནཱ་ག་ད་མཱ་ནི། པི་སི་མན་དྷ་ནཱ་ག་ཤ་རཱི་ར་ནི། བི་སྥོ་ཊ་ཡ། ནཱ་ག་ཡ་ནཱ་ནི། ཏདྱ་ཐཱ་ཧཱུཾ་ཕཊ། ནཱ་ག་བི་ད་ར་ན་ཡ་ཧཱུཾ་ཕཊ། ནཱ་ག་ཨུཙྪ་ཊ་ནཱ་ཡ་ཧཱུཾ་ཕཊ། 
ནཱ་ག་མཱ་ར་ན་སོད་སོད། ནཱ་ག་མཱ་ར་ན་བྱིང་བྱིང་། ནཱ་ག་མཱ་ར་ན་མུགས་མུགས། ནཱ་ག་མཱ་ར་ན་ཧ་ལ་ཧ་ལ། ནཱ་ག་མཱ་ར་ན་ཤིག་ཤིག །ནཱ་ག་མཱ་ར་ན་དུ་ན་དུ་ན། ནཱ་ག་མཱ་ར་ན་མྱོས་མྱོས། བྱིང་བྱིང་ཐུམ་རི་ལི་ལི་ཛཿཞག་ཉི་ཤུ་རྩ་གཅིག་ཏུ་མི་ཡེངས་མི་མྱུར་བར་སྨྲ་བ་གཅད་དོ། །ཏིང་
ངེ་འཛིན་གྱི་དགོངས་པ་གསལ་ལ་དྲག་པོར་བྱའོ། །ཁ་ཟས་ཀྱི་དུས་ལ་བབ་པ་འམ་ལྡང་བར་འདོད་ན་ཡེ་ཤེས་སེམས་དཔའ་ཆེ་ལ་མཆོད་པ་དབུལ། གཏོར་མ་བསྔོ། བསྟོད་པ་བྱ། ལས་ཀྱི་ལྷ་ལ་གཏོར་མ་དབུལ་བ་ནི་ཕྱག་ན་རྡོ་རྗེའི་ཐུགས་ཀའི་ཧཱུཾ་ལས་ཨ་ལས་བནྡྷའི་

73-1-215b

འོག་ཏུ་ཡཾ་ལས་རླུང་གི་དཀྱིལ་འཁོར་དེའི་སྟེང་དུ་རཾ་ལས་མེ་གྲུ་གསུམ། དེའི་སྟེང་དུ་ཧཱུཾ་གསུམ། དེའི་སྟེང་དུ་བནྡྷའི་གཞལ་ཡས་ཁང་། དེའི་ནང་དུ་ཤ་ལྔ་བདུད་རྩི་ལྔ། ཡཾ་ལས་རླུང་བྱུང་། མེ་འབར། མེས་ཐོད་པ་བསྐོལ། ཤ་ལྔ་བདུད་རྩི་ལྔར་གྱུར་པས་མཆོད། རྩ་སྔགས་ལ་བ་ལིཾ་ཏ་ཁཱ་ཧི་
ཞེས་བཏགས་ལ་དབུལ། ལས་ཀྱི་དུས་སུ་གཏོར་མ་ཤ་ཁྲག་ཏུ་དམིགས་ལ་དབུལ། རྩ་སྔགས་ལ་མ་མ་སརྦ་ཤ་ཏྲཱུཾ་བཏགས་ལ་དབུལ། སྐབས་སུ་གཏོར་མ་བསྐུལ། བདག་ཉིད་གཉིད་ལོག་གམ། ཁ་ཟས་དུས་ལ་བབ་ན་ལུས་ཀྱི་ལྷ་ལ་ཐུགས་དམ་གཏད། རིག་སྔགས་དབུལ། གཏའི་
གཏོར་མ་གཏོང་ན་གཏོར་མ་བཀའ་ལས་ཕབ་ལ་ནོ་བི་ཀ་ལྟར་བསྐུལ་ཚིག་དང་བཅས་ལ་གཏང་ངོ་། །གཏའ་བདག་གཤེགས་སུ་གསོལ། བསྐྱེད་པ་དག་ལ་བསྡུ། གནོད་སྦྱིན་ལག་ན་རྡོ་རྗེའི་སྒྲུབ་པའི་ཐབས། གཏའི་གཏོར་མའི་གདམས་ངག་སློབ་དཔོན་སུ་ཝཱ་གཱི་ཤྭ་ར་ཀཱིརྟིས་
མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། ཙཀྲ་ཨུ་པ་དེ་ཤ་ནཱ་མ། བོད་སྐད་དུ། འཁོར་ལོའི་མན་ངག་ཅེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །རྣལ་འབྱོར་སྔོན་དུ་བསྙེན་བྱས་པས། །དྲག་པོའི་ལས་ལ་སྦྱར་བྱ་སྟེ། །ལས་སྦྱོར་ཅིས་ཀྱང་མ་ཐུལ་ན། །
འཁོར་ལོའི་ལས་ལ་འཇུག་པར་བྱ། །སྦྱོར་བ་འདི་ལ་ཞུགས་གྱུར་ན། །བརླག་པར་འགྱུར་ཏེ་ཐེ་ཚོམ་མེད། །དྲག་པོའི་ལས་ཀྱི་འཁྲུལ་འཁོར་འདི། །ཏིང་ངེ་འཛིན་གྱི་མཚོན་ཡིན་ཏེ། །རྩེ་གཅིག་བསྒོམས་པས་འགྲུབ་པ་ལས། །ཀུན་གྱིས་འགྲུབ་པར་མི་ནུས་སོ། །འདི་ནི་ཞེ་སྡང་འཁོར་ལོ་
སྟེ། །དྲག་པོ་འཁྲུགས་པའི་རྫུ་འཕྲུལ་གྱིས། །དམིགས་ན་ལྷའང་བརླག་པར་འགྱུར། །འདས་དང་མ་བྱོན་ད་ལྟར་གྱི། །སངས་རྒྱས་རྣམས་ཀྱི་ཐུགས་བརྟོལ་ནས། །གཟུངས་སྔགས་དྲག་པོའི་འཁྲུལ་འཁོར་འདིས། །མྱུར་དུ་བསྒྲིམས་ཏེ་བསྒྲལ་བ་ན། །ནམ་མཁའ་ཉིད་ཀྱང་འཇིག་འགྱུར་
ན། །བསྒྲུབ་བྱའི་རྣམ་ཤེས་སྨོས་ཅི་དགོས། །འདི་ནི་དགུག་པའི་འཁོར་ལོ་སྟེ། །སྒ་ཚ་ཐལ་ཆེན་གྲོག་མོའི་ཞིང་། །བོང་བུའི་སྦངས་དང་ས་གཉན་ལས། །ཀླུ་རིགས་རྣམས་ཀྱི་གཟུགས་བྱ་སྟེ། །སྙིང་པོ་ཏི་དང་མིང་བཅུག་ལ། །དགུག་པའི་དགོངས་པ་འདི་ལྟར་བྱ། །ཐ་མའི་ཕཊ་ལས་

73-1-216a

ཛཿའཕྲོས་ཏེ། །ཛཿལས་ལྕགས་ཀྱུའི་དབྱིབས་བྱུང་ནས། །བསྒྲུབ་བྱའི་རྣམ་ཤེས་བཀུག་པར་བསམ། །ཁུགས་ནས་སྒྲུབ་པའི་ལས་ལ་འཇུག །དེ་ནས་གསད་པའི་འཁོར་ལོ་བརྩམས། །སྟོང་ཉིད་ངང་ལས་ཨེ་ལས་ནི། །མཐིང་ག་གྲུ་གསུམ་ཆོས་འབྱུང་དབུས། །ཡཾ་ལས་རླུང་གི་
དཀྱིལ་འཁོར་ཏེ། །རཾ་ལས་མེ་རི་ལྔ་ཡི་དབུས། །འབར་བའི་འཁོར་ལོ་བསྐྱེད་པར་བྱ། །བྷྲཱུཾ་བཛྲ་ཙཀྲ་རཀྵ་ཧཱུཾ། བྷྲཱུཾ་ལས་སྲིད་པའི་འཁོར་ལོ་ནི། །སྤུ་གྲི་གཅོད་པའི་འཁོར་ལོ་བསྐྱེད། །བཛྲ་རྡོ་རྗེའི་འཁོར་ལོ་ནི། །མེ་འབར་དཔལ་དང་བཅས་པར་བསམ། །ཙཀྲ་ཕྱོགས་མཚམས་འཁོར་ལོ་ནི། །
རྡོ་རྗེར་བའི་འཁོར་ལོ་བསྒོམ། །རཀྵ་ཞེས་པས་སྟེང་སྲུང་བའི། །བྱིན་གྱིས་བརླབས་པའི་འཁོར་ལོ་བསྐྱེད། །ཧཱུཾ་རྣམས་ལས་ནི་བདེ་གཤེགས་སྐུ། །ཆོ་ག་ཡན་ལག་གསུམ་གྱིས་བསྐྱེད། །ཐུགས་ཀར་ཡེ་ཤེས་འཁོར་ལོ་བསྒོམ། །ཡེ་ཤེས་སེམས་དཔའི་ཐུགས་ཀ་རུ། །ཉི་སྟེངས་
དཔའ་བོ་འབྲུ་ལྔ་དགོད། །མུ་ཁྱུད་རྩ་བའི་སྔགས་ཀྱིས་བསྐོར། །བདེ་གཤེགས་བཀའ་དང་དམ་ཚིག་ལས། །མི་འདའ་བ་ཡི་འཁོར་ལོ་ལ། །ཟིལ་གྱིས་མནན་པའི་སྔགས་རྣམས་དགོད། །ཕྱོགས་མཚམས་མཚོན་ཆའི་འཁོར་ལོ་ལ། །གནད་ལ་དབབ་པའི་སྔགས་རྣམས་དགོད། །
རྡོ་རྗེ་སྲིད་པའི་འཁོར་ལོ་ལ། །ཚར་བཅད་པ་ཡི་སྔགས་རྣམས་བསམ། །བྱིན་རླབས་སྲུང་བའི་འཁོར་ལོའི་དབུས། །མི་བསྐྱོད་ཞེ་སྡང་རྡོ་རྗེ་སྟེ། །མཐིང་ནག་སྡིགས་མཛུབ་རྡོ་རྗེ་བཅས། །སེམས་དཔའི་སྐྱིལ་ཀྲུང་ཉི་ཟླའི་གདན། །འཁོར་ལོ་ཡི་ནི་རྩིབས་དག་ལ། །བཅོམ་ལྡན་གཏུམ་པོ་
ཁྲོས་པའི་སྐུ། །རྡོ་རྗེ་དང་ནི་སྡིགས་མཛུབ་བཅས། །ཞལ་ནས་སྔགས་ཀྱི་སྒྲ་སྒྲོགས་པས། །ལོག་འདྲེན་ཚོགས་རྣམས་འཇོམས་པར་བྱེད། །དེ་ལྟར་འཁོར་ལོ་ཆེན་པོ་བསྒོམས། །ཡེ་ཤེས་འཁོར་ལོ་སྤྱན་དྲངས་ཏེ། །མཆོད་བསྟོད་སྡིག་བཤགས་ལ་སོགས་བྱ། །ཕྱག་རྒྱ་བཞི་ཡིས་དེ་
ལ་བསྟིམ། །སྐུ་གསུང་ཐུགས་སུ་བྱིན་གྱིས་བརླབས། །རྗེས་སུ་གནང་བ་གསུམ་ལྡན་གྱིས། །ཆོས་ཀྱི་རྒྱལ་པོར་དབང་བསྐུར་ཏེ། །དེ་ནས་འཁོར་ལོ་བསྐོར་འདོད་ན། །ཐུགས་ཀའི་ཧཱུཾ་ལས་འོད་འཕྲོས་པས། །ཡེ་ཤེས་སེམས་དཔའི་ཐུགས་དམ་བསྐུལ། །དེ་ལས་འོད་འཕྲོས་

73-1-216b

སྔགས་ལ་ཕོག །སྔགས་ལས་འོད་འཕྲོས་འཁོར་ལོ་བསྐུལ། །འཁོར་ལོ་འོད་ཟེར་འབར་བ་ཡིས། །སྟེང་འོག་ཕྱོགས་མཚམས་འཁོར་ལོ་བསྐོར། །ཐུབ་ཅིང་རབ་ཏུ་བསྲེག་པར་བསམ། །བདག་ཉིད་ཀྱིས་ནི་སྔགས་བཟླས་པས། །སྔགས་ཀྱི་འཁོར་ལོ་རིམ་པར་བསྐོར། །གཟས་པ་
པོ་ཡི་སྙིང་ག་རུ། །ཡ་ཡིས་བསྐྱོད་དེ་ཧཱུ་གིས་བསྡུ། །ཕཊ་ཀྱིས་རྣམ་པར་འཐོར་ཞིང་བསྲེགས། །སྲིད་པ་རྡོ་རྗེའི་འཁོར་ལོས་གཏུབ། །ཕྱོགས་མཚམས་མཚོན་ཆའི་འཁོར་ལོ་ཡིས། །ཕོག་ན་ཐམས་ཅད་བརླག་པར་འགྱུར། །ཙིཏྟ་ཐུགས་ཀྱི་སྒྲུབ་པ་སྟེ། །ཤིན་ཏུ་གནོད་ན་ཁོང་དུ་བསྐོར། །
འཕྲལ་དུ་གསོད་ན་རྟེན་ལ་བསྐོར། །སྐབས་སུ་གནོད་ན་དགུག་ཅིང་བསྐོར། །བསྐོར་ནས་བརླག་པར་གདོན་མི་ཟ། །འཁྲུལ་འཁོར་འདི་ཡི་སྦྱོར་བ་ཡིས། །གཞན་གྱིས་བྱས་པའི་རིག་སྔགས་དང་། །བྱད་དང་བཀའ་ཉན་ཕོ་ཉ་དང་། །འཁོར་ལོའི་ཏིང་འཛིན་ལ་སོགས་རྣམས། །གནོད་སྦྱོར་
ཐམས་ཅད་འཇིག་བྱེད་ཅིང་། །གཞན་གྱིས་བྱས་པའི་རིག་སྔགས་གཅོད། །རིག་སྔགས་དྲག་པོའི་གཟངས་སྔགས་ཀྱི་འཁྲུལ་འཁོར་ཞེས་བྱ་བ། སློབ་དཔོན་སུ་བཱ་གི་ཤྭ་ར་ཀཱིརྟིས་མཛད་པ་རྫོགས་སོ།།      །།རྒྱ་བོད་གཉིས་ལ་གྲགས་པར་གྱུར་པ་ཡི། །མདོ་སྔགས་དོན་ལ་
མཁས་པའི་དཱི་པཾ་ཀ་ར་ལ། །སྒྲ་སྒྱུར་བོད་ན་མཁས་པའི་རྒྱལ་པོ་བརྩོན་སེང་གིས། །དཀའ་བས་ཉམས་སུ་བླངས་ནས་རིན་ཆེན་གསེར་གྱིས་ཞུས། །༄༅༅། །རྒྱ་གར་སྐད་དུ། ཤྲཱི་བཛྲ་པཱ་ཎི་ནཱི་ལཱཾ་བ་ར་དྷ་ར་དྷཱ་ར་ཎི་ཀ་ལ་པཾ་བ་ལ་ཏི་བི་དྷི་ནཱ་མ། བོད་སྐད་དུ། དཔལ་
ཕྱག་ན་རྡོ་རྗེ་གོས་སྔོན་པོ་ཅན་གྱི་གཟུངས་ཀྱི་གཏོར་མའི་ཆོ་ག་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །སློབ་དཔོན་དང་ནི་སྒྲུབ་པ་པོས། །བསྙེན་པ་དང་ནི་སྒྲུབ་པ་དང་། །དཀྱིལ་འཁོར་དང་ནི་སྦྱིན་སྲེག་དང་། །གཞན་ཡང་ལྷ་རྣམས་མཉེས་པ་དང་། །བགེགས་ཞི་བ་དང་
ཉམས་པ་བསྐང་། །འཁྲུལ་འཁོར་ཚོགས་ཀྱི་འཁོར་ལོ་དང་། །ཕན་གདགས་པ་དང་ཚར་བཅད་དང་། །དགར་དང་གསད་དང་དགུག་པ་དང་། །གཟིར་དང་བཅིངས་དང་མནན་པ་དང་། །རྒྱས་དང་བསྡུས་དང་ཤིན་ཏུ་བསྡུས། །ཞི་དང་ལོངས་སྤྱོད་འཕེལ་བ་དང་། །རྒྱས་དང་དབང་

73-1-217a

དང་མངོན་སྤྱོད་ཀྱི། །ལས་རྣམས་ཉེ་བར་འགྲུབ་པ་དང་། །ཐུན་མོང་མཆོག་དང་དངོས་གྲུབ་དང་། །བསོད་ནམས་ཆེན་པོ་ཐོབ་བྱའི་ཕྱིར། །ཡར་ངོ་མར་ངོའི་ཚེས་བཅུ་དང་། །བརྒྱད་དང་བཅུ་བཞི་ཉ་སྟོང་ངམ། །ཡང་ན་རྒྱུན་ནམ་དུས་དྲུག་ཏུ། །རྟག་ཏུ་གཏོར་མའི་ལས་རྣམས་བྱ། །རྩ་
བ་ལྔ་དང་ཡན་ལག་ལྔ། །འབྲུ་དང་ཤིང་ཐོག་སྨན་རྣམས་དང་། །ཆན་ཐུག་ཁུར་བ་དཀར་གསུམ་མངར། །ཤ་ཁྲག་རུས་པ་སྙིང་སྣ་རྣམས། །དགྲའམ་འབྱུང་པོ་བགེགས་ཀྱི་གཟུགས། །སྦྲུལ་དང་སྦལ་ལྕོང་ཉ་ཤ་རྣམས། །དེ་སོགས་དྲག་པོའི་ཐུན་རྫས་སོ། །ཆོ་ག་གསུམ་མམ་སྐད་ཅིག་
མས། །འདོད་པའི་ལྷ་རྣམས་བསྐྱེད་བྱས་ལ། །ཚོགས་བསགས་སྔོན་འགྲོ་རྗེས་འཇུག་རྣམས། །བསྙེན་སྒྲུབ་དུས་དང་མཐུན་པར་བྱ། །བདག་མཆོད་ལྷ་རྣམས་མཉེས་བྱའི་ཕྱིར། །མཚན་ལྡན་རྡོ་རྗེ་ཀ་པཱ་ལར། །རྫས་རྣམས་ཀུན་གྱིས་བཀང་བྱས་ཏེ། །ཡཾ་ལས་རླུང་སྟེ་རཾ་མེ་སྦར། །དེ་སྟེང་
ཨ་ལས་ཀ་པཱ་ལར། །དེ་འོག་ཡེ་ཤེས་ལྔ་ལྡན་གསུམ། །གོ་ཀུ་ད་ཧ་ན་ལས་ནི། །ལྕགས་ཀྱུ་ལྔ་པོ་བསྐྱེད་པར་བྱ། །བི་མུ་མ་ར་ཤུ་ལས་ནི། །བདུད་རྩི་ལྔ་ཡི་རང་བཞིན་བསྐྱེད། །དཔའ་བོ་ལྔ་ཡིས་རབ་སྦྱངས་ཏེ། །ཟླ་སྟེངས་ཨོཾ་ལས་རྡོ་རྗེ་ཧཱུཾ། །དེ་གྱུར་རྩེ་ལྔ་དེ་ཉིད་ཅན། །སྔོ་བསྐྱོད་མེ་སྦར་རྫས་རྣམས་
བསྐོལ། །འོད་ཀྱིས་རི་བོང་རྩེ་ལྔ་ཞུ། །ཐིམ་པས་བདུད་རྩིའི་ངོ་བོར་གནས། །ཡེ་ཤེས་ལྔ་ཡི་ཡིག་འབྲུ་ལས། །འོད་ཀྱིས་གང་གཱའི་ཀླུང་སོགས་ཀྱི། །བདུད་རྩི་དྲངས་ཏེ་གཉིས་མེད་བསྟིམ། །འབྲུ་གསུམ་སྔགས་ཀྱི་བྱིན་གྱིས་བརླབ། །ལྷག་པའི་ལྷ་དང་བླ་མ་དང་། །དཀོན་མཆོག་གསུམ་དང་
ཆོས་སྐྱོང་རྣམས། །ལྕེ་ཡི་རྡོ་རྗེས་བདུད་རྩི་ལེན། །ཨོཾ་ནཱི་ལཾཱ་བ་ར་དྷ་ར་བཛྲ་པཱ་ཎི་བ་ལིཾ་ཨི་དཾ་གྲྀཧྞ་གྲྀཧྞ་ཁཱ་ཧི་ཁཱ་ཧི་བྷུཾ་ཛ་ཧོ་བ་ལིདྟ་ཁཱ་ཧི། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱ་ནུཏྤནྣ་ཏྭཱཏ་ཨོཾ་ཨཱཿཧཱུཾ་ཞེས་བསྙེན་པའི་དུས་སུ་དབུལ་ལོ། །དེ་རྗེས་སྒྲུབ་པའི་དུས་དག་ཏུ། །གཏོར་མ་བྱིན་གྱིས་བརླབ་པ་ནི། །
ཨ་ལས་བནྡྷའི་ནང་དག་ཏུ། །མཾ་ལས་ཤ་ཡི་ཕུང་པོ་བསྐྱེད། །ཀེཾ་ལས་རུས་པའི་ཕོ་བྲང་ལས། །ར་ལས་རཀྷའི་རྒྱ་མཚོ་བསྐྱིལ། །ཤ་ཁྲག་རུས་པར་བྱིན་བརླབས་ལ། །དུག་གསུམ་དམར་གྱི་མཆོད་པ་འདི། །དྲག་པོའི་སྔགས་ཀྱིས་དབུལ་བར་བྱ། །ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི། མ་མ་སརྦ་ཤ་

73-1-217b

ཏུཾ་ཨ་མུ་ཀའི་མཛྫ་མེ་དཱ་བཱ་ས་མཱཾ་ས་ཛཱི་བཾ་བུ་གཾ་རུ་དྷི་ར་པྲཱི་ཡ་ཀུ་རུ་བྷཀྵ་ནི་ཨི་དཾ་བ་ལིཾ་གྲྀ་ཧྞ་གྲྀཧྞ་ཁཱ་ཧི་ཁཱ་ཧི་བྷུཉྫ་ཧོ། རཀྟ་པཱི་པ་ཏ་ཨ་ཏི་ཀྲ་མ་ས་མ་ཡེ་སྭཱ་ཧཱ། ཞེས་སྒྲུབ་པའི་དུས་སུའོ། །ལས་སྦྱོར་དྲག་པོའི་དུས་དག་ཏུ། །གཏའ་ཡི་གཏོར་མ་དབུལ་བ་ནི། །སྦལ་ལྕོང་ཉ་ཤའི་གཏོར་མ་བཤམ། །གཟས་
པ་པོ་ཡི་ལིང་ག་ལ། །སྔགས་དང་ཕྱག་རྒྱའི་ཏིང་འཛིན་གྱིས། །རྫུས་སྐྱེས་ཚུལ་དུ་བསྐྱེད་བྱ་སྟེ། །བཀུག་སྟེ་གྲུ་གསུམ་ཁ་བཅད་གཟིར། །འཇིག་རྟེན་འདས་དང་མ་འདས་པའི། །ལས་ཀྱི་གནོད་སྦྱིན་ཚོགས་ལ་དབུལ། །ཡཀྵ་ནཱི་ལཾ་པ་ར་དྷ་ར་བཛྲ་པཱ་ཎི་ཧཱུཾ། མ་ཧཱ་ཡཀྵ་སེ་ནཱ་པ་ཏ་ཡེ་ཆེ་གེ་མོའི་སྲོག་
ལ་ཤག་ཤག་མ་མ་སརྦ་ཤ་ཏྲཱུཾ་ཨ་མུ་ཀ་ཞེས་དབུལ་ལོ། །དེ་ནས་བསྟོད་ཅིང་སྨོན་ལམ་བཏབ། །ཐོད་ཆེན་རྔ་བརྡུང་འཕྲིན་ལས་བཅོམ། །རྡོ་རྗེ་སེམས་དཔའི་སྙིང་པོ་ཡིས། །རང་རང་གནས་སུ་གཤེགས་སུ་གསོལ། །གོ་བགོ་ལུས་བསྲུང་བརྟན་པར་བྱ། །རང་ཉིད་ང་རྒྱལ་ཅི་བདེར་གནས། །ཕྱག་ན་
རྡོ་རྗེ་གོས་སྔོན་པོ་ཅན་གྱི་གཟུངས་ཀྱི་གཏོར་མའི་ཆོ་ག་ཞེས་བྱ་བ། སློབ་དཔོན་སུ་ཝཱ་གཱི་ཤྭ་ར་ཀཱིརྟིས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། བཛྲ་པཱ་ཎི་ནོ་པི་ཀ་སཱ་དྷ་ནཾ་ནཱ་མ། བོད་སྐད་དུ། ཕྱག་ན་རྡོ་རྗེའི་སྒྲུབ་པའི་ཐབས་མདོར་བསྡུས་པ་ཞེས་བྱ་བ། ཁྲོ་བོ་གཏུམ་པོ་ལ་
ཕྱག་འཚལ་ལོ། །གདུག་པ་མ་ལུས་འཇོམས་མཛད་པ། །རྡོ་རྗེ་འཛིན་ལ་ཕྱག་འཚལ་ཏེ། །དེ་ཡི་གསང་སྔགས་དབྱེ་བ་བཤད། །ཨོཾ་ནས་སྭཱ་ཧཱ་བཅུ་བདུན་པར། །གཙོ་ལ་བསྙེན་པ་དབུལ་བའོ། །དེ་ནས་སྒྲུབ་པའི་ཐབས་དག་ལ། །འབུམ་དུ་བསྙེན་པ་རྫོགས་བྱས་ནས། །མྱུར་དུ་གསད་པའི་
ལས་ལ་འཇུག །ཀླུ་དང་གཉན་དང་ས་བདག་སོགས། །གཞན་ཡང་གནོད་སྦྱོར་མཐའ་དག་རྣམས། །བཟློག་ཅིང་མི་ཚུགས་བྱ་བའི་ཕྱིར། །ལས་ཀྱི་གནོད་སྦྱིན་སྒྲུབ་ཐབས་བརྩམ། །སྔགས་བདག་ནག་པོའི་སྒྲུབ་པ་ལ། །སྔགས་ཀྱང་དུ་མ་རྣམ་པ་བཞི། །བོད་པ་རྦད་པ་གསད་དང་
མཆོད། །གདམས་ངག་ཅན་གྱིས་ནན་ཏན་བྱ། །ཨོཾ་བཛྲ་པཱ་ཎི་ཡཀྵ་ཀྲོ་དྷ། བཛྲ་དྷ་ར་བཛྲ་ཁ་དྷ་ར། བཛྲ་ཁ་ལ་རུ་པཱ་ཤ་དྷ་ར། བཛྲ་ཙཀྲ་དྷ་ར། ནཱ་ག་མཱ་ར་ཡ་ཧཱུཾ་ཕཊ། ཨོཾ་བཛྲ་པཱ་ཎི་ཡཀྵ་ཀྲོ་དྷ། བཛྲ་དྷ་ར་ནཱ་ག་རུ་ཡ་ཧཱུཾ་ཕཊ། ཨོཾ་བཛྲ་པཱ་ཎི་ཡཀྵ་ཀྲོ་དྷ་ཁཌྒ་དྷ་ར་ནཱ་ག་མཱ་ར་ཡ་ཧཱུྃ་ཕཊ། ཨོཾ་

73-1-218a

བཛྲ་པཱ་ཎི་ཡཀྵ་ཀྲོ་དྷ་ཁ་ལ་རུ་པཱ་ཤ་དྷ་ར་ནཱ་ག་མཱ་ར་ཡ་ཧཱུཾ་ཕཊ། ཨོ་བཛྲ་པཱ་ཎི་ཡཀྵ་ཀྲོ་དྷ་ཙཀྲ་དྷ་ར་ནཱ་ག་མཱ་ར་ཡ་ཧཱུཾ་ཕཊ། ཨོཾ་བཛྲ་པཱ་ཎི་ཡཀྵ་ཀྲོ་དྷ་ཧཱུཾ། ཧ་ར་ཧ་ར་ནཱ་ག་ནཾ། པྲ་ཧ་ར་པྲ་ཧ་ར་ནཱ་ག་ནཾ། ཆེ་གེ་མོ་མཱ་ར་ཡ་སོད་སོད། ནཱ་ག་མཱ་ར་ཡ་བྱིང་བྱིང་། ནཱ་ག་མཱ་ར་ཡ་མུགས་མུགས། ནཱ་ག་
མཱ་ར་ཡ་ཤིག་ཤིག །ནཱ་ག་མཱ་ར་ཡ་མྱོག་མྱོག །ནཱ་ག་མཱ་ར་ཡ་དུན་དུན། ནཱ་ག་མཱ་ར་ཡ་ཐུམ་རིལ་ཛཿཨོཾ་བཛྲ་པཱ་ཎི་ཡཀྵ་ཀྲོ་དྷ་བཛྲ་དྷ་ར་བཛྲ་ཁཌྒ་དྷ་ར་ཁ་ལ་རུ་པཱ་ཤ་དྷ་ར་ཙཀྲ་དྷ་ར། ཡཀྵ་ཀྲོ་དྷ་ཆེ་གེ་མོའི་སྲོག་ལ་ཤག་ཤག་མ་མ་སརྦ་ཤ་ཏྲཱུཾ་ཨ་མུ་ཀི་ཡི་མ་ཛྫ་མ་དྷ་བྷ་ས་མཱཾ་ས་ཛཱི་བཾ་བུ་ག་རུ་དྷི་ར་པྲཱི་ཡཾ་
བྷཀྵ་ནི་བ་ལིཾ་ཨི་དཾ་གྲིཧྞ་གྲིཧྞ་ཁཱ་ཧི་ཁཱ་ཧི་བྷུཉྫ་ཧོ། རཀྟ་པཱི་པ་ཧོ། མཱ་ཏི་ཀྲ་མ་ས་མ་ཡེ་སྭཱ་ཧཱ། གནོད་སྦྱིན་གྱི་སྡེ་དཔོན་བཞིའི་སྒྲུབ་ཐབས་ཐུན་མོང་མ་ཡིན་པའི་གུ་རུ་སུ་ཝཱ་གཱི་ཤྭ་ར་ཀཱིརྟིས་མཛད་པ། པཎྜི་ཏ་དཱི་པཾ་ཀ་ར་ཤྲཱི་ཛྙཱ་ན་དང་། ལོ་ཙཱ་བ་རྒྱ་བརྩོན་འགྲུས་སེང་གེས་བསྒྱུར་བའོ།།      །།དཔལ་
ཕྱག་ན་རྡོ་རྗེ་ལ་ཕྱག་འཚལ་ལོ། །སངས་རྒྱས་བྱེ་བ་ཕྲག་འབུམ་ཇི་སྙེད་ཀྱིས། །རྗེས་གནང་ལས་ཀྱི་ཁྲོ་བོར་དབང་བསྐུར་བའི། །མཐུ་སྟོབས་བདག་པོ་གདུག་པའི་གཉེན་པོ་ལ། །དང་བས་ཕྱག་འཚལ་སྒྲུབ་པའི་གོ་རིམས་བྲི། །དང་པོར་གནས་དང་དཀྱིལ་འཁོར་བཤམས། །མཆོད་རྟེན་སྔོན་པོ་བུམ་
པ་བཅས། །གཏའ་བཅས་མཆོད་རྫས་ཁྲུས་བྱས་ལ། །མཆོད་རྟེན་སྔོན་པོ་བུམ་པ་དང་། །གཏའ་གཏོར་མཆོད་ཡོན་བྱིན་གྱིས་བརླབ། །སེམས་བསྐྱེད་སྣོད་བཅུད་སྔགས་ཀྱིས་སྦྱངས། །ཚོགས་བསགས་མགྲོན་གྱི་ལྷ་རྣམས་གཤེགས། །བགེགས་བསྐྲད་མཚམས་བཅད་ཚད་མེད་བསྒོམས། །
སྟོང་ཉིད་བསྒོམས་ལ་འབྱུང་རྣམས་བསྐྱེད། །རི་རབ་སྟེང་དུ་སྲུང་འཁོར་བསྒོམ། །དེ་དཀྱིལ་གཞལ་ཡས་ཁང་དང་གདན། །ཡིག་འབྲུ་རྣམས་ལས་ལྷ་རྣམས་བསྐྱེད། །ཐུགས་ཀར་ཡེ་ཤེས་འཁོར་ལོ་བསྒོམས། །བྱིན་རླབས་ལུས་བསྲུང་བརྟན་པར་བྱ། །ཡེ་ཤེས་འཁོར་ལོ་
དགུག་གདན་དབུལ། །ཕྱག་འཚལ་མཆོད་བསྟོད་སྡིག་བཤགས་བསྟིམ། །བྱིན་རླབས་འོད་ཟེར་གསུམ་འཕྲོ་འདུ། །དབང་བསྐུར་ལྷ་རྣམས་སྤྱན་དྲངས་མཆོད། །སྡིག་བཤགས་གཟུངས་ལྟར་རྗེས་གནང་བྱ། །དབང་བསྐུར་བྱིན་རླབས་དེ་ཉིད་བསྟིམ། །ལྕེ་ནི་བྱིན་

73-1-218b

རླབས་སྐྱོན་སྤངས་འདས། །བསྙེན་དུས་ལྷར་གཏད་སྤྲོ་བསྡུ་བྱ། །ཐུན་མཚམས་ཕྱེ་ལ་མཆོད་གཏོར་གཏང་། །གཤེགས་གསོལ་བསྐྱེད་བསྡུ་མི་དམིགས་བསམ། །བསྙེན་པ་རྟགས་ལྡན་དངོས་གྲུབ་བླང་། །གཏའ་གཏོར་ནམ་གུང་ཐོ་རངས་དུས། །དབང་བསྐུར་རྒྱས་གདབ་བུམ་ལྷ་གཤེགས། །
ལུས་བསྲུང་སྤྱོད་ལམ་རྣལ་འབྱོར་བྱ། །རྟགས་རྣམས་སྒྱུ་མ་ལྟ་བུར་གཟུང་། །དེ་དོན་གཞན་ལ་སྨྲ་མི་བྱ། །སྒྲུབ་ཐབས་གསལ་བར་བྱེད་པའི་མན་ངག་འདི། །ཚིག་རྐང་སུམ་ཅུས་དེ་ཉིད་དོན་བསྡུས་ནས། །ཤེས་པར་བྱེད་པའི་དོན་འགྲེལ་སྒྲོན་མ་འདི། །བྱས་པའི་དགེ་བ་སེམས་ཅན་ཀུན་ལ་བསྔོ། །
ནོངས་པ་མཆིས་ན་འཕགས་པས་བཟོད་པར་གསོལ། །སློབ་དཔོན་གསུང་གི་དབང་ཕྱུག་གྲགས་པས་མཛད་པ་རྫོགས་སོ།།      །།བཅོམ་ལྡན་འདས་དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དུས་གསུམ་བདེ་གཤེགས་སྐུ་གསུང་སྲས་བཅས་ཀྱིས། །རྗེས་གནང་ལས་ཀྱི་ཁྲོ་བོར་
དབང་བསྐུར་བའི། །ཁྲོ་བོའི་རྒྱལ་པོ་དུག་དགྲ་དྲེགས་འཇོམས་ལ། །དང་བས་ཕྱག་འཚལ་སྒྲུབ་ཐབས་གོ་རིམས་བྲི། །གྲངས་དང་དུས་དང་མཚན་མ་ཡི། །བསྙེན་རྫོགས་དངོས་གྲུབ་བླང་བའི་ཕྱིར། །གནས་དང་ཕྱོགས་དང་སྔོན་འགྲོ་བྱ། །ཐིག་གདབ་ཚོན་དགྱེ་ཕྱག་མཚན་དགོད། །ཁྱད་
པར་རྫས་བསོག་བུམ་པ་བཅའ། །དངོས་གྲུབ་རྟེན་དང་མཆོད་རྫས་བཤམ། །སྡོམ་བསྲུང་སྨྱུང་གནས་ཆོས་གོས་བརྒྱན། །ཚོགས་བསགས་སྔོན་འགྲོ་རྗེས་འཇུག་དང་། །བསྐྱེད་རིམ་མཆོད་པ་བསྙེན་དུས་བཞིན། །བུམ་ནང་ལྷ་བསྐྱེད་སྤྱན་དྲངས་མཆོད། །དབང་བསྐུར་བྱིན་རླབས་བུམ་ནང་
ཐིམ། །གཟུངས་ཐག་བཏགས་ཏེ་རིག་སྔགས་བཟླས། །སྟེང་དང་འོག་གི་ལམ་གཉིས་ལས། །ཐུན་མོང་ཁྱད་པར་སྤྲོ་བསྡུ་བྱ། །ཁྲི་ཕྲག་བདུན་དུ་དངོས་གྲུབ་བླང་། །དབང་བསྐུར་མཆོད་བསྟོད་གཤེགས་སུ་གསོལ། །བསྐྱེད་བསྡུ་སྤྱོད་ལམ་རྣལ་འབྱོར་བྱ། །དེ་རྗེས་སྒྲུབ་པ་ཐོན་པ་དང་། །
ཞི་དང་བསྐྲད་དང་འཁྲུལ་འཁོར་དང་། །སྦྱོར་བ་བདུན་གསལ་ལས་ལ་སྦྱར། །སྒྲུབ་པའི་གོ་རིམས་སློབ་དཔོན་སུ་ཝཱ་གཱི་ཤྭ་ར་ཀཱིརྟིས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། ཀ་ལ་ཤ་སཱ་དྷ་ནཾ་ནཱ་མ། བོད་སྐད་དུ། བུམ་པའི་སྒྲུབ་ཐབས་ཞེས་བྱ་བ། དཔལ་ཕྱག་

73-1-219a

ན་རྡོ་རྗེ་ལ་ཕྱག་འཚལ་ལོ། །གདུག་པའི་དགྲར་གྱུར་མི་ཤིགས་འཛིན། །ཁྲོ་རྒྱལ་སྤྱི་བོས་རབ་བཏུད་ནས། །བདག་དང་གཞན་ལ་ཕན་བྱའི་ཕྱིར། །བུམ་པའི་སྒྲུབ་པ་བྲི་བར་བྱ། །མཎྜལ་སྔོན་པོའི་སྟེང་དག་ཏུ། །རྫས་རྣམས་མངོན་པར་འདུས་བྱས་ལ། །བདག་ཉིད་ཡི་དམ་ལྷར་བསྐྱེད་དེ། །བུམ་
པ་ཡེ་ཤེས་གཞལ་ཡས་སུ། །སྨན་ལྔ་འབྲུ་ལྔ་སྙིང་པོ་ལྔ། །རིན་ཆེན་ལྔ་དང་དྲི་ཆུ་ལྔ། །བདུད་རྩིའི་རྒྱ་མཚོར་བྱིན་བརླབས་ལ། །ཆོ་ག་བཞིན་དུ་ལྷར་བསྐྱེད་དེ། །དེ་ནས་སྒྲུབ་པོའི་གནས་མལ་བཅས། །གཞོན་ནུས་བཀལ་བའི་སྐུད་པ་ཡིས། །བདག་དང་ལྷ་རུ་འབྲེལ་བར་བྱ། །སྤྲོ་བ་གསུང་གི་
རང་བཞིན་ལ། །བསྡུ་བ་སྔགས་ཀྱི་ཡན་ལག་ཡིན། །སྐྱོ་བར་གྱུར་ན་གཟུངས་ཐག་གཟུང་། །སྟེང་དང་འོག་གི་ལམ་གཉིས་ལ། །བརྟེན་པས་མཚན་མ་འབྱུང་བར་འགྱུར། །མེད་ན་ལས་ཀྱི་སྦྱིན་སྲེག་བྱ། །དེ་ཡིས་འབྲས་བུ་འབྱིན་པར་བྱེད། །འདི་ནི་བུམ་པའི་སྒྲུབ་པ་སྟེ། །ལམ་བརྟེན་བཟླས་
པའི་སྒོར་འཇུག་ཡིན། །དབང་བསྐུར་བ་དང་ཁྲུས་ལ་སོགས། །གང་བྱས་དངོས་གྲུབ་འབྱུང་བར་བྱེད། །སྣོད་ལྡན་རྣམས་ཀྱིས་འདི་ཡི་དོན། །རྟོགས་ནས་ཐུན་མོང་མཆོག་ཐོབ་ཤོག །བུམ་པའི་སྒྲུབ་ཐབས་ཞེས་བྱ་བ། །སློབ་དཔོན་སུ་ཝཱ་གཱི་ཤྭ་ར་ཀཱིརྟིས་མཛད་པ་རྫོགས་སོ།།      །།
༄༅༅། །རྒྱ་གར་སྐད་དུ། ཏཏ་ཏྭ་པྲ་དཱི་པ་ནཱ་མ། བོད་སྐད་དུ། དེ་ཁོ་ན་ཉིད་སྒྲོན་མ་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །མཐུ་སྟོབས་ཀུན་གྱི་བདག་པོ་ནི། །རྡོ་རྗེ་འཛིན་ལ་ཕྱག་འཚལ་ནས། །བསྙེན་སྒྲུབ་ལས་སྦྱོར་ལ་སོགས་པའི། །རྟགས་ཀྱི་རིམ་པ་བྲི་བར་བྱ། །དེ་ལ་རྟགས་
ནི་བཞི་ཡིན་ཏེ། །ལྷ་གྲུབ་གདོན་རྣམས་ཐུབ་པ་དང་། །ནང་ཕྱིར་བྱུང་དང་མི་ལྡོག་པའོ། །ལྷ་ནི་ཉེ་བར་འགྲུབ་གྱུར་ན། །ཡང་དག་རྟགས་དང་བདུད་ཀྱི་རྟགས། །རྣམ་པ་གཉིས་སུ་ཤེས་པར་བྱ། །དང་པོ་རྣམ་པ་གསུམ་ཡིན་ཏེ། །མངོན་སུམ་རྨི་ལམ་ཉམས་མྱོང་ངོ་། །དབང་པོའི་
མངོན་སུམ་དག་ཏུ་ཡང་། །ལྷ་ཡི་སྐུ་མདོག་ཕྱག་མཚན་གཟུགས། རྟེན་དང་ལུས་ལས་འོད་བྱུང་བ། །མིག་གིས་མཐོང་ངམ་ཉམས་སུ་འབྱུང་། །རྣ་བས་དག་པའི་གསང་སྔགས་ཐོས། །དེས་ནི་དངོས་གྲུབ་གཉིས་ཀ་འབྱུང་། །འབྲིང་ནི་རྨི་ལམ་གསལ་པོ་ལ། །དངོས་དང་ཕྱག་མཚན་

73-1-219b

མཆོད་རྟེན་དང་། །མེ་ཏོག་སྔོ་དང་ཁྱེ་ཆུང་སྔོ། །བླ་མ་སངས་རྒྱས་མཐོང་བ་དང་། །རི་བོར་འཛེག་དང་ལྷ་ཡུལ་མཐོང་། །དངོས་གྲུབ་འགྲུབ་ཏུ་ཉེ་བ་སྟེ། །བསྙེན་པའི་རྟགས་སུ་ཤེས་པར་བྱ། །རང་གི་ཉམས་སུ་འབྱུང་བ་ནི། །ལུས་ལ་སྲོག་ཆགས་སྡར་པས་ནི། །ཕྱི་དང་ནང་དུ་ཉུང་བ་དང་། །རིག་པ་
ཤིན་ཏུ་བདེ་བ་དང་། །ཉོན་མོངས་རྣམ་རྟོག་ཤས་ཆུང་བའོ། །གོང་དུ་བསྟན་པ་དེ་རྣམས་ཀྱང་། །ཡ་ང་འཇིགས་དང་བཅས་པ་དང་། །ཁ་དོག་སྐྱ་ལ་མདངས་མེད་དང་། །འོད་ཀྱང་སྔོ་ཞིང་མི་རྟག་དང་། །ནམ་གུང་མན་ཆད་རྨི་ལམ་ན། །སད་ནས་འཇིགས་ཤིང་སྐྱི་གཡའ་བ། །བདུད་ཀྱི་རྟགས་
སུ་ཤེས་པར་བྱ། །འབྱུང་པོ་བསད་དང་ཡན་ལག་བཅད། །བརྡུང་བཏགས་སྐད་ངན་འདོན་པ་དང་། །ཕྱུགས་རྫི་བྱས་དང་མེར་བསྲེག་སོགས། །གདོན་རྣམས་ཐུབ་པའི་རྟགས་ཡིན་ནོ། །བཤང་གཅི་དོར་དང་བཤལ་བཏང་དང་། །སྲོག་ཆགས་ལུས་ལ་ཕྱིར་འཐོན་དང་། །སྔར་གྱི་
རྟོག་པ་སྤངས་པ་ནི། །ནད་རྣམས་ཕྱིར་ལ་ཐོན་པའི་རྟགས། །གཟུགས་བརྙན་བསྲེགས་པར་ཐལ་བར་འགྱུར། །དགྲ་བོ་ཡུལ་ནས་ཐོན་གྱི་རྨི། །འོག་ཏུ་བཅུག་པས་དངོས་པོ་བརླག །ཕྱིར་མི་ལྡོག་པའི་རྟགས་ཡིན་ཏེ། །དེ་རྣམས་ལས་བཟློག་ངན་པ་ཡི། །རྟགས་སུ་ངེས་པར་ཤེས་
པར་བྱ། །འདི་ལ་བརྟེན་ནས་འདིར་ཞུགས་རྣམས། །འདི་ཡི་དངོས་གྲུབ་ཐོབ་པར་ཤོག།      །།དེ་ཁོ་ན་ཉིད་སྒྲོན་མ་ཞེས་བྱ་བ། སློབ་དཔོན་སུ་བཱ་གཱི་ཤྭ་ར་ཀཱིརྟིས་མཛད་པ་རྫོགས་སོ།།      །།༄༅༅། །བཅོམ་ལྡན་འདས་དཔལ་
ཕྱག་ན་རྡོ་རྗེ་ལ་ཕྱག་འཚལ་ལོ། །བསྙེན་སྒྲུབ་རྟགས་དང་ལྡན་གྱུར་ནས། །སྤུར་ཞིང་བསད་པའི་ལས་དག་བརྩམ། །དེ་ཡང་ལས་ཚོགས་བསྡུས་པ་ལས། །ཞི་བར་མ་གྱུར་གདོན་བགེགས་ལ། །སྨྱག་ཤད་བལ་པོ་སེའུ་ཡི། །སྔགས་བཟླས་ལྕུག་མས་བྱབས་སམ་བྲབས། །འཇིགས་
པ་བརྒྱད་ཀྱི་རྫས་ཀྱིས་གཟིར། །ཞེས་པ་ནི་སྤུར་བསད་ཀྱི་སྦྱོར་བའོ། །དེའང་སྤུར་པ་ནི་བསྐྲད་པའི་ལས་ཏེ། ཐོག་མར་རིག་པ་འཛིན་པ་ཉིད་ཀྱིས་ཞུགས་པ་བཞིའི་མཚན་ཉིད་བརྟགས་ལ། ནད་རྣམས་དབྱུང་ཞིང་གནོད་པ་གདོན་པར་བྱ་བའི་ཐབས་ནི། རྒྱལ་པོ་བྲམ་ཟེ་རྗེ་རིགས་ཀྱི། །

73-1-220a

གཞོན་ནུ་གཙང་མ་ཤར་བལྟས་ཏེ། །དཀོན་མཆོག་གསུམ་དང་གོས་སྔོན་ལ། །ཕྱག་འཚལ་སེམས་བསྐྱེད་སྨྱག་ཤད་བླང་། །དག་བྱེད་སྔགས་བཟླས་ཆུས་བསངས་ལ། །ཡུངས་ཀར་རྨ་བྱ་ཚོན་སྐུད་བཅིངས། །བྱབ་པའི་རྫས་དེ་རྟག་ཏུ་བཅང་། །དེ་ནས་རིན་ཆེན་སྣོད་དག་
ཏུ། །གཙོ་བོ་ཀླུ་ཆེན་བརྒྱད་པོ་དང་། །རིགས་དྲུག་རིགས་བཞིའི་ས་བདག་གཉེན། །གཟུགས་བརྙན་བྱས་ཏེ་ཀླུ་སྨན་དང་། །དཀར་གསུམ་རིན་ཆེན་དར་ཟབ་བཅས། །ཤིང་སྣས་མཐའ་བསྐོར་ཚོན་ལྔས་བརྒྱན། །གཞན་ཡང་མཆོད་རྫས་ཐམས་ཅད་བསོགས། །རིག་པ་འཛིན་པས་སྒྲུབ་
ཐབས་ལྟར། །སྔོན་དུ་འགྲོ་བའི་ལས་རྫོགས་བྱ། །གཙོ་བོ་གདན་གྱི་ཀླུ་བརྒྱད་ལས། །པཾ་ལས་འདབ་བརྒྱད་ནཾ་གྱིས་མཚན། །དེ་གྱུར་སྦྲུལ་ལམ་ཀླུ་ཆེན་བརྒྱད། །བཙུན་མོ་སྲས་བཅས་བློན་པོ་དང་། །སྤྲུལ་པ་ཡང་སྤྲུལ་རྣམས་བསྐྱེད་ལ། །དེ་དང་འདྲ་བ་བཀུག་བསྟིམ་མཆོད། །དབང་བསྐུར་
གཏོར་མ་བྱིན་རླབས་སྦྱིན། །ཨོཾ་ནཱ་ག་རཱ་ཛ་བ་སུ་ཏཀྵ་ཀ་ཀརྐོ་ཊ་པདྨ་མ་ཧཱ་པདྨ་ཤཾ་ཁ་པཱ་ལ་གྷེ་ལ་གྷེ་འུ་ཧུ་ལུ་ཧུ་ལུ་ཏ་གེ་ནི་བ་ལིཾ་ཨི་དཾ། གྲྀཧྞ་གྲྀཧྞ་ཁཱ་ཧི་ཁཱ་ཧི། གཏོར་མ་བྱིན་པས་གདུག་རྩུབ་ཞི། །དེ་ནས་བདག་ཉིད་ཁྲོ་བོར་བསྒོམ། །གཟུངས་སྔགས་བཟླས་ཤིང་ལྕུག་མས་བྱབ། །ནཱ་ག་རཱ་ཛ་བ་སུ་ཀི་
ཧྲྀ་ད་ཡ་དྷ་ར་ཡ་ཕུད་ཕུད། ཛ་ཡེ་ཕུཿབི་ཛ་ཡེ་ཕུཿ། ཛི་ཏི་ཛི་ཏི་ཕུཿ། ཛི་ཏི་ཨཾ་གེ་ཕུཿ། ས་མ་ཡ་ཕུཿ། ཤཾ་ཀཾ་རུ་ཏེ་ཕུཿ། ཨ་ལ་ཨུགྟེ་ཕུཿ། གྲ་ཧེ་ཀ་ར་ཕུཿ། ས་མ་ཡ་ཕུཿ། ནཱ་ག་སརྦ་ནི་ཕུཿ། ཧྲྀ་ད་ཡ་དྷ་ར་ཡ་ཕུད་ཕུད། ནད་པ་ལ་བྱབ་གཟུགས་ལ་དབབ། །དུག་ཕྱུང་ཁྲོ་བོའི་ཆེ་བརྗོད་ལ། །
ཟླ་དཀྱིལ་སྟེང་བཞག་ཡཾ་ལས་བསྐྱོད། །ནཱ་ག་སྥ་ར་ཎ་ཕཊ་ཅེས། །ཀླུ་བྲོ་བསྒགས་ཅིང་དམ་ཚིག་བསྒྲགས། །གཟུངས་བརྒྱ་བཟླས་ལ་ཕུར་ཞིང་བསྐྲད། །དེ་ལྟར་བརྒྱའམ་སྟོང་བྱས་ན། །ཀླུ་ཡི་ནད་ལས་གྲོལ་བར་འགྱུར། །གཟུགས་བརྙན་ས་འམ་ཆུ་བོར་དོར། །རྡོ་རྗེ་འཛིན་ལ་ཕྱག་འཚལ་ཏེ། །
ཞི་དང་སྤུར་བས་མི་ཐུལ་ཞིང་། །རིག་སྔགས་འཆང་གི་བཀའ་འདས་ན། །དེ་ལ་འཇིགས་པའི་ལས་བརྒྱད་བརྩམ། །གྲོག་མཁར་བདུད་འཆང་ཚུབ་མ་ཡི། །ས་ལས་མཐིང་ནག་གྲུ་གསུམ་བརྩིག །ཟུར་གསུམ་ལྕགས་ཀྱུ་བརྩེགས་མས་མཚན། །དབུས་སུ་ལིང་ག་སྔོན་དམར་

73-1-220b

གྱིས། །བཅིངས་ཏེ་བྱད་བཅུག་ཕུར་ལ་བཏོད། །མགྱོགས་ཕུར་རྩང་དང་ཕུར་པས་བསྐོར། །བྱེ་ཚན་གཟེ་མ་ཡུངས་ཀར་དང་། །ཚ་ལ་ཟངས་ལྕགས་དུར་བླུགས་བཅས། །དམར་གཏོར་དུག་གཏོར་དུག་ཐུན་བཤམ། །གྲུ་གསུམ་དུར་ཁྲོད་གཡམ་པས་བཅད། །དུར་ཁྲོད་རས་ལ་ནམ་མཁའ་ལྡིང་། །
གསེར་མདོག་ཞལ་གསུམ་ཕྱག་དྲུག་གིས། །བ་སུ་ཏ་ཡི་ཀླུ་རྣམས་འཛིན། །སྤྱན་མིག་ཉི་ཟེར་རྡོ་རྗེའི་མཆུ། །འཁོར་ལོའི་གཞུག་སྒྲོ་རལ་གྲིའི་གཤོག །ལུས་རྣམས་རྡོ་རྗེའི་སྤུ་ཡིས་གཏམས། །དེ་འདྲ་རྒྱལ་རིགས་ཁ་བསྟན་གཞག །ཁྲ་སྤྱང་ཉ་ཁྲ་གཅན་གཟན་གྱི། །མཆེ་སྡེར་ལ་
སོགས་ཁྱུ་རྣམས་བསོག །དྲག་པོའི་མཆོད་ཡོན་བཤམ་བྱས་ལ། །དེ་ནས་རིག་པ་འཛིན་པ་རྣམས། །ན་རའི་གོས་གྱོན་གོས་སྔོན་གྱི། །སོ་སོའི་བསམ་གཏན་ལ་ཞུགས་ནས། །བསྙེན་སྒྲུབ་སྤུར་དང་གསང་སྔགས་བཟླས། །ཞི་བས་དུག་ཕྱུང་གསད་པ་ཡི། །རྩེ་གཅིག་བསྒོམས་ཏེ་བརྩོན་
འགྲུས་ཀྱིས། །བར་ཆད་མེད་པར་ལས་ལ་སྦྱར། །ནག་པོའི་ཚེས་བརྒྱད་ནས་བརྩམས་ཏེ། །ཞི་བ་བྱམས་པ་སྙིང་རྗེ་བསྒོམ། །གཟུངས་ཀྱི་སྔགས་དང་ཤཱནྟིཾ་བཟླས། །ནད་དང་གདུག་རྩུབ་ཞི་བར་བསམ། །སྤུར་བ་གོང་དུ་བསྟན་པ་བཞིན། །གསང་བའི་སྦྱོར་བའི་དྲག་སྔགས་ནི། །རིག་
པ་འཛིན་པ་ཧཱུཾ་ཡིག་ལས། །གྱུར་ཏེ་ནག་པོ་ཆར་སྤྲིན་མདོག །སྨིན་མཚམས་དཔྲལ་བསྡུས་ཧ་ཧ་བཞད། །རྡོ་རྗེ་ཚར་གཅོད་སྡིགས་མཛུབ་བཅས། །དེ་འདྲར་བསྒོམས་ཏེ་ཡུངས་ཀར་ལ། །སྔགས་བཟླས་ཚངས་པའི་གནས་སུ་ཐབ། །ཤི་ས་དྲག་པོ་འདི་ཡིས་གདབ། །ཡཀྵ་ནཱི་ལཱམྦ་ར་དྷ་ར་བཛྲ་པཱ་ཎི་
ཧཱུཾ། མ་ཧཱ་ཡཀྵ་སེ་ནཱ་པ་ཏ་ཡེ་དེ་བ་ཀུ་རུ་ཤ་ན་དྷ་ར། ཐོག་ཐོག་ཐོག་རིལ་ཐོག་ཐོག་དར་བྱམས་སང་། ཆེ་གེ་མོའི་ལུས་ལ་རུམ་རུམ། སྙིང་ལ་ཤག་ཤག་མ་མ་ཤཱནྟི་རྦད་པུ་ནནྟིཏ་སྲི་རྦད་པུ་ནན། ནཱ་གས་ཁྲག་པུ་མ་མཱ་ར་ཡ་ཕཊ། ཡུངས་ཀར་ཡུངས་ནག་སྐེ་ཚེ་དང་། །ཚ་ལ་ཟངས་ལྕགས་
བྱེ་ཚན་ཆར། །གནམ་ལྕགས་དྲག་པོའི་སྔགས་དེས་བརྡེག །གཅན་གཟན་མཆེ་སྡེར་བྱ་ཁྲའི་མཆུ། །མཁའ་ལྡིང་རྒྱལ་པོའི་སྔགས་བཟླས་བྲབ། །ཀཱི་ལ་ཡ་དང་བཅས་པའི་སྔགས། །དུས་དྲུག་ཕུར་པས་གཟིར་བར་བྱ། །འོག་ནས་དྲག་པོའི་རྫས་ཀྱིས་བདུག །སྨྱག་ཤད་བལ་

73-1-221a

པོ་སེའུ་ཡི། །ལྕུག་མས་བརྡེག་ཅིང་རིག་སྔགས་བཟླས། །གཡས་ནས་གསད་ཅིང་གཡོན་ནས་སྤུར། །མི་བཟད་རྫས་ཀྱིས་དེ་ལ་བྱུག །གག་པ་ལྷོག་པ་བྱུང་བ་བཞིན། །དྲག་པོའི་སྔགས་ཀྱིས་དེ་ལ་གདབ། །བདུན་ནམ་རྩ་གཅིག་བདུན་ཚོ་བདུན། །དེ་ལ་སོགས་ཏེ་བསྒྲུབས་གྱུར་
ན། །ནཱ་ག་རཱ་ཛ་ཀརྐོ་ཊ། །དེས་ཟིན་པ་ཡང་གྲོལ་འགྱུར་ངེས། །ཕྱག་ན་རྡོ་རྗེའི་ལས་བསྡུས་འདི། །པཎྜི་ཏ་རྣམས་ཀྱིས་མཛད་པས། །མི་མ་ཡིན་རྣམས་སྐྲག་ཅིང་བརྒྱལ། །དེས་ན་རྣམ་སྨིན་སྡིག་པའི་རྒྱུ། །དེ་ཕྱིར་ཤིན་ཏུ་གསང་བར་གསུངས། །དཔལ་ཕྱག་ན་རྡོ་རྗེའི་སྤུར་གསད་ལས་
ཚོགས་བསྡུས་པ་ཞེས་བྱ་བ། སློབ་དཔོན་སུ་བཱ་གཱི་ཤྭ་ར་ཀཱིརྟིས་མཛད་པ་རྫོགས་སོ།།      །།ཨ་ཀྲ་མ། ཏདྱ་ཐཱ། ཨོཾ་བི་པུ་ལེ་པྲ་བ་ར་ནཱ་ག །མ་ཧཱ་ནཱ་ག་ཧྲྀ་ད་ཡ། ཨ་པ་ར་ཏེ། ཛྭ་ལ་ཛྭ་ལ། སརྦ་ནཱ་ཌཱི་ཏ་ཡ་ནི། ཀི་མཱི་ཀི་མཱི། ནཱ་ག་ཀུ་ལ་བིདྷྭཱཾ་ས་ནི། ཧ་ན་ཧ་ན། སརྦ་ནཱ་ག་དུཥྚ་ཌཱི་ཏ་ཡ་
ནི། ད་ཧ་ད་ཧ་སརྦ་དུཥྚཱཾ། ནཱ་ག་བྷ་བ་ན་ནི། པ་ཙ་པ་ཙ་ཡ་སརྦ་དུཥྚཱཾ། ནཱ་ག་ནཱཾ། ཨ་ཀྲ་མ་ས་མུ་དྲ་སཱ་ག་ར་ཙ་ལེ་མེ་ལེ། པཱི་ཀི་མཱ་མ་ཧཱ་ནཱ་ག་ཏེ་ཛ་པ་རེ་སྭཱ་ཧཱ། ཞེས་ནམ་མཁའ་ལྡིང་གི་རྒྱལ་པོའི་དྲག་སྔགས་ཀྱིས་གསད་པའོ། །ཨོཾ་ན་མོ་བུདྡྷཱ་ཡ། ནཱ་ག་དུ་ཙུནྡེ་མི་ལི་མི་ལི། བནྡྷ་བནྡྷ་ནཱ་ག་ནི་སྭཱ་ཧཱ་
ཞེས་ཕུར་པ་གདབ་པའི་སྔགས་སོ། །ཨོཾ་ཙ་ཏ་ཙ་ཏ། བི་ཙི་ཏི་བི་ཙི་ཏ། ཤ་ཏ་ཤ་ཏ། བི་ཤ་ད། ནཱ་ག་བི་ཤ་ད་སྭཱ་ཧཱ། ཀླུ་འབྲོས་པའི་སྔགས་ཨི་ཐི།    ༄༅༅། །ཕྱག་ན་རྡོ་རྗེ་མདོ་ལུགས་ཀྱི་མན་ངག་ལག་ཏུ་བླང་བའི་སྒྲུབ་ཐབས་བཞུགས། བཅོམ་ལྡན་འདས་དཔལ་ཕྱག་ན་རྡོ་རྗེ་
ལ་ཕྱག་འཚལ་ལོ། །དེ་ཡོངས་སུ་བསྙེན་པར་འདོད་པའི་རིག་པ་འཛིན་པས་དབེན་ཞིང་ཉམས་དགའ་བའི་སར་ས་བསླང་བ་དང་། གནས་བརྩིག་པ་དང་། དགོས་པའི་ཡོ་བྱད་དང་། མཐུན་པའི་སྦྱོར་བ་དང་། མཆོད་པའི་རྫས་རྣམས་བསོགས་ལ་སྔོན་དུ་འགྲོ་བའི་ལས་བྱ་སྟེ། དང་
པོར་དཀོན་མཆོག་མཆོད། དེ་ནས་ཆོས་སྐྱོང་དང་རིགས་དྲུག་ལ་སྦྱིན། གཏོར་མ་རྒྱ་ཆེན་པོ་བཏང་། དེ་ནས་བསམ་གཏན་ཁང་པ་བྱི་དོར་བྱས་ཏེ། མེ་ཏོག་གཅལ་དུ་བཀྲམ་ལ་རྒྱན་རྣམས་ཀྱིས་བརྒྱན་ཏེ། དེའི་དབུས་སུ་མཎྜལ་སྔོན་པོ་གྲུ་བཞི་པ་ཅིག་གི་སྟེང་དུ། མཆོད་

73-1-221b

རྟེན་སྔོན་པོ་སྐུ་གདུང་དང་ལྡན་པའི་དྲུང་དུ་མེ་ཏོག་སྔོན་པོ་ལ་སོགས་ཏེ། མཆོད་པ་རྣམ་པ་ལྔ་དང་། གཏའ་གཏོར་དང་། བུམ་པ་བཅའ་ཐབས་རྫོགས་པར་བྱས་ལ་དང་པོར་ཁྲུས་བྱ་སྟེ། དེ་ནས་རིག་པ་འཛིན་པ་ཉིད་སྟན་བདེ་བ་ལ་འདུག་སྟེ། དང་པོར་བྱང་ཆུབ་མཆོག་ཏུ་སེམས་བསྐྱེད་ལ། 
དེ་ནས་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་སྔོན་པོ་བསམས་ཏེ་སྔགས་འདི་བརྗོད་པར་བྱའོ། །ཨོཾ་སརྦ་དྷརྨ་ཏཱ་བཛྲ་སིདྡྷི་ཧཱུཾ་ཞེས་པས་སྣོད་བཅུད་དང་རྫས་ཐམས་ཅད་དག་པ་ཆེན་པོར་བསམ་མོ། །ཧཱུཾ་དེ་ཉིད་ལས་སྐད་ཅིག་ཏུ་ལྷའི་ང་རྒྱལ་དུ་གནས་པའི་ཧཱུཾ་ལས་འོད་ཟེར་ཕྱོགས་བཅུར་
འཕྲོས་པས། བླ་མ་དང་། ལྷག་པའི་ལྷ་དང་། དཀོན་མཆོག་སྤྱན་དྲངས་ཏེ། ཨེ་ཧྱེ་ཧི་བྷ་ག་བཱན་སརྦ་ཏ་ཐཱ་ག་ཏ་བུདྡྷ་དྷརྨ་སཾ་གྷ་བཛྲ་པཱ་ཎི། མ་ཧཱ་གུ་རུ། བཛྲ་ས་མ་ཡ་ཧཱུཾ་ཧཱུཾ་ཛཿཞེས་བརྗོད་པས་ནམ་མཁའི་མཐའ་དང་མཉམ་པ་མདུན་དུ་བྱོན་པར་བསམ་མོ། །པདྨ་ཀཱ་མ་ལ་ཡ་སྟྭཾ་
ཞེས་གདན་དབུལ་ལོ། །ཕྱག་བཙལ་བ་དང་། མཆོད་པ་འབུལ་བ་དང་། སྡིག་པ་བཤགས་པ་དང་། རྗེས་སུ་ཡི་རང་བ་དང་། ཆོས་ཀྱི་འཁོར་ལོ་བསྐོར་བ་དང་། གསོལ་བ་གདབ་ཅིང་སྐྱབས་སུ་འགྲོ་བ་དང་། ལུས་དབུལ་ཞིང་དགེ་བའི་རྩ་བ་བསྔོ་བའོ། །དེ་ནས་ཡི་གེ་བརྒྱ་པས་
ཚོགས་སོགས་ལྷ་རྣམས་གཤེགས་སུ་གསོལ། ཨ་ཨཱཿབིགྷྣཱནྟ་ཀྲྀ་ཏ་ཧཱུཾ་ཞེས་པས་བདག་ཉིད་བགེགས་དགྲའི་ཏིང་ངེ་འཛིན་གིས་ཡུངས་ཀར་ལ་སྔགས་བཟླས་ཏེ། ཁྲོ་བོའི་སྤྲུལ་པར་སྤྲོ་སྟེ། ཨོཾ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ། སརྦ་བིགྷྣཱནྟ་ཀྲྀ་ཏ་ཧཱུཾ་ཕཊ་ཅེས་ཕྱོགས་བཞི་མཚམས་
བརྒྱད་སྟེང་འོག་བཅུར་སྔགས་བདུན་བདུན་དང་བཅས་ཏེ་མཚམས་གཅད་པར་བྱའོ། །ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷཱ་ཡ། མ་ཧཱ་དཾཥྚཱོཏྐ་ཊ་བྷཻ་ར་བཱ་ཡ། ཨ་སི་མུ་ས་ལ་དྷ་རཱ་ཡ། པ་ར་ཤུ་པཱ་ཤ་ཧསྟཱ་ཡ། ཏདྱ་ཐཱ། ཨོཾ་ཨ་མྲྀ་ཏ་
ཀུཎྜ་ལི་ཁ་ཁ། ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། གྲྀཧྞ་གྲྀཧྞ། གརྫ་གརྫ། བི་སྥོ་ཊ་ཡ་བི་སྥོ་ཊ་ཡ། སརྦ་གྷྣཱཾ་བི་ནཱ་ཡ་ཀཱཾ། མ་ཧཱ་ག་ན་པ་ཏི། ཛཱི་བི་ཏཱནྟ་ཀ་རཱ་ཡེ་སྭཱ་ཧཱ་ཞེས་མཚོན་ཆའི་ཆར་ཕབ་ལ་བཏུལ་ཞིང་སྦྱང་བར་བྱའོ། །དེ་ནས་ཁམས་གསུམ་གྱི་

73-1-222a

སེམས་ཅན་ཐམས་ཅད་སྡུག་བསྔལ་དང་དབྲལ་བར་བྱའོ་སྙམ་པ་ནི་སྙིང་རྗེ་ཚད་མེད་པའོ། །བདེ་བ་ལ་དགོད་པར་བྱའོ་སྙམ་པ་ནི་བྱམས་པ་ཚད་མེད་པའོ། །བདེ་བ་དང་ནམ་དུའང་མི་འབྲལ་བར་བྱའོ་སྙམ་པ་ནི་དགའ་བ་ཚད་མེད་པའོ། །དེའང་སེམས་ཅན་ཐམས་ཅད་དང་ཐུན་མོང་དུ་བྱེད་
པ་ནི་བཏང་སྙོམས་ཚད་མེད་པའོ། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་པ་སྟོང་པ་ཉིད་དུ་བསམས་ལ། དེའི་ངང་ལས་ཨེ་ལས་ཆོས་འབྱུང་གྲུ་གསུམ་པའི་དབུས་སུ་ཡཾ་ལས་རླུང་གི་དཀྱིལ་འཁོར། བཾ་ལས་ཆུའི་དཀྱིལ་འཁོར། ཁཾ་ལས་གསེར་གྱི་ས་གཞི། རཾ་ལས་མེ་རི་ལྔའི་
དབུས་སུ། ལཾ་ལས་རི་རབ་ཀྱི་སྟེང་དུ། སཾ་ཡོངས་སུ་གྱུར་པ་ལས་སྣ་ཚོགས་རྡོ་རྗེ། དེ་ཡོངས་སུ་གྱུར་པ་ལས་རྡོ་རྗེའི་གུར་དང་། རབ་དང་མཚོན་ཆའི་འཁོར་ལོ་རྫོགས་པར་བསྒོམས་པའི་དབུས་སུ། བྷྲཱུཾ་སྔོན་པོ་འཕྲོ་འདུས་པ་ལས་གཞལ་ཡས་ཁང་སྔོན་པོ་གྲུ་བཞི་སྒོ་བཞི། སྒོ་ཁྱུད་དང་ལྡན་
པར་བསྒོམ་པར་བྱའོ། །ཙ་སེར་པོ་ལས་འཁོར་ལོ་སྔོན་པོ་རྩིབས་བཞིའི་དབུས་སུ་པཾ་ལས་པདྨ། རཾ་ལས་ཉི་མ། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་མཐིང་ནག་བསམས་ཏེ། འོད་འཕྲོས་པ་ལས་འཕགས་པ་མཆོད། སེམས་ཅན་གྱི་དོན་བྱས་ནས་སྣང་བ་ཐམས་ཅད་རང་གི་ལྷག་པའི་
ལྷར་གྱུར་ཏེ། དེ་དག་ཡོངས་སུ་གྱུར་པ་ལས་ཁྲོ་བོའི་རྡོ་རྗེ་རྩེ་ལྔ་པ་ཁ་དོག་སྔོན་པོ་འོད་ཟེར་གྱི་ཕྲེང་བ་རྣམ་པར་འཁྲུགས་པ་ལྟེ་བ་ཧཱུཾ་གིས་མཚན་པར་བསམ་མོ། །དེའི་འོད་ཟེར་གྱིས་ཁྲོ་བོའི་རིགས་རྣམས་བཀུག་ནས་དེ་དག་ཡོངས་སུ་གྱུར་པ་ལས། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་
ཅན་སངས་རྒྱས་གང་གཱའི་ཀླུང་ཕྲག་འབུམ་བྱེ་མ་སྙེད་ཀྱིས་རྗེས་སུ་གནང་བ། མཆེ་བ་གཙིགས་པ་དང་འཚམ་པའམ། སྐུ་མདོག་སྔོན་པོ་གཡས་རྡོ་རྗེ། གཡོན་སྡིགས་མཛུབ་ཀླུ་ཆེན་པོ་བརྒྱད་ཀྱིས་གཟུངས་ནས་འབྱུང་བ་ལྟར་བརྒྱན་པ། སྟག་གི་ཤམ་ཐབས་དང་། ན་བཟའ་ཆོས་གོས་སྔོན་པོ་
དང་། སེང་གེའི་སྟོད་གཡོགས་དང་། གདན་དབང་པོ་དང་། ཉི་མ་དང་པདྨའི་སྟེང་ན་ཀླུ་ཆེན་པོ་བརྒྱད་ནམ་མཁའ་ལྡིང་གི་རྒྱལ་པོ་དང་བཅས་པར་ཡང་དག་པར་བསྐྱེད་དེ། དེ་ཉིད་ཀྱི་སྙིང་གར་ཡེ་ཤེས་སེམས་དཔའི་འཁོར་ལོ་གོས་སྔོན་པོ་ཅན་རྣམས་བསྒོམ་པར་བྱའོ། །དབང་པོ་དྲུག་ལའང་དེ་

73-1-222b

དང་འདྲ་བའི་གོས་སྔོན་པོ་ཅན་རེ་བསམ་པར་བྱའོ། །དེ་ནས་ཡེ་ཤེས་ཀྱི་འཁོར་ལོའི་ཧཱུཾ་ལས་ཧཱུཾ་རེ་འཁོར་ལོའི་སྟེང་དུ་གནས་པ་ལས་ཕྱག་མཚན་ཏྲི་ཤཱུ་ལ་དང་། རལ་གྲི་དང་། དབྱུག་ཐོ་དང་། འཁོར་ལོ་ཧཱུཾ་གིས་མཚན་པར་གྱུར་ཏེ། དེ་དག་ཡོངས་སུ་གྱུར་པ་ལས་ཤར་གྱི་འཁོར་ལོའི་སྟེང་དུ་ལས་ཀྱི་གནོད་
སྦྱིན་ལག་ན་རྡོ་རྗེ་གཡས་རྡོ་རྗེ། གཡོན་ཏྲི་ཤཱུ་ལ་རྩེ་གསུམ་འཕན་ཅན་འཕྱར་བ། ན་བཟའ་མི་བཟད་སྔོ་བཀྲ་གསོལ་བ། གདན་ཀླུ་རྒྱལ་རིགས་མནན་པའོ། །ལྷོར་རྡོ་རྗེ་སྲིན་པོ་གཡས་རྡོ་རྗེ་གཡོན་རལ་གྲི། ན་བཟའ་པདྨ་རཱ་ག །གདན་བྲམ་ཟེའི་རིགས་ཅན་མནན་པའོ། །ནུབ་ཏུ་རྡོ་རྗེ་གདོན་
ཆེན་གཡས་རྡོ་རྗེ་གཡོན་དབྱུག་ཏོ། །གདན་རྗེ་རིགས་མནན་པ། ན་བཟའ་ཟ་ཧོར་བཙོ་དམར་གསོལ་བའོ། །བྱང་གི་འཁོར་ལོའི་སྟེང་དུ་རྡོ་རྗེ་རོ་ལངས་གཡས་རྡོ་རྗེ། གཡོན་འཁོར་རོ། །ན་བཟའ་བ་ཏི་ཁྲ་བོ་གདན་ཀླུ་དམངས་རིགས་མནན་པའོ། །སྡེ་དཔོན་དེ་དག་ཀྱང་སྐུ་མདོག་གཙོ་
བོ་དང་མཐུན་པ། ཀླུ་རྣམས་ཀྱིས་རྒྱན་མཛད་པ། བསྐལ་པའི་མེ་རབ་ཏུ་འབར་བའི་དབུས་ན་བསྒོམ་མོ། །ཛཿཧཱུཾ་བཾ་ཧོཿབཞི་ལས་སྒོ་བཞིར་ལྕགས་ཀྱུ་མ་དང་། ཞགས་པ་མ་དང་། ལྕགས་སྒྲོག་མ་དང་། དྲིལ་བུ་མ་དང་། ཁྲོ་མོ་དེ་དག་ཀྱང་སྟག་གི་ཤམ་ཐབས་དང་། སྦྲུལ་གྱི་
རྒྱན་ཆ་དང་། ཉི་ཟླའི་གདན་དང་བཅས་པའོ། །དེ་ནས་རྡོ་རྗེ་གོ་ཆའི་ཕྱག་རྒྱས་གནས་ལྔར་གཏུགས་ཏེ། ན་མཿས་མནྟ་བཛྲཱ་ཎཱཾ་ཀ་བ་ཙ་ཧཱུཾ་ཞེས་བརྗོད་པས་ལུས་ཐམས་ཅད་རྡོ་རྗེ་ར་བར་བསྒོམ་མོ། །དེ་ནས་རྡོ་རྗེ་རྩེ་ལྔའི་ཕྱག་རྒྱ་བཅས་ཏེ། ན་མཿས་མནྟ་བཛྲཱ་ཎཱཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུཾ་ཞེས་བརྗོད་
ནས་གནས་ལྔར་རྒྱས་བཏབ་པས་ལུས་ཐམས་ཅད་རྡོ་རྗེའི་དྲ་མིག་རྣམས་ཁྲོ་ཆུང་ཚོན་གང་བས་གཏམས་པར་བསམས་ཏེ་བྱིན་གྱིས་བརླབ་པོ། །དེ་ནས་དེ་ལྟར་དམ་ཚིག་གི་དཀྱིལ་འཁོར་བསྐྱེད་ནས། རང་བཞིན་གྱི་དཀྱིལ་འཁོར་སྤྱན་དྲངས་པ་ནི། འོག་མིན་གནས་མཆོག་དམ་པ་ཡི། །
ལྕང་ལོ་ཅན་གྱི་ཕོ་བྲང་ནས། །སངས་རྒྱས་ཀུན་གྱིས་རྗེས་གནང་བའི། །གསང་བའི་བདག་པོ་གོས་སྔོན་ཅན། །མཎྜལ་སྔོན་པོའི་གཞལ་ཡས་འདིར། །འཁོར་བཅས་མ་ལུས་སྤྱན་འདྲེན་གྱིས། །པདྨའི་གདན་ལ་བཞུགས་སུ་གསོལ། །ཕྱག་ན་རྡོ་རྗེ་དབང་གི་མཐུ། །གནོད་སྦྱིན་རྒྱལ་པོ་

73-1-223a

གོས་སྔོན་ཅན། །རི་རབ་ཆེན་པོའི་ལྕོག་བཞི་ཡི། །ལྕགས་རི་ནག་པོའི་གཞལ་ཡས་ནས། །སྤྱན་འདྲེན་མཆོད་ཀྱིས་གཤེགས་སུ་གསོལ། །ཡཀྵ་ནཱི་ལཱཾ་བ་ར་དྷ་ར་བཛྲ་པཱ་ཎི་ཧཱུཾ། མ་ཧཱ་ཡཀྵ་སེ་ན་པ་ཏ་ཡེ། བཛྲ་དྷ་ར། བཛྲ་ཁཌྒ་དྷ་ར། བཛྲ་ནཱི་ལ་དྷ་ར། བཛྲ་ཙཀྲ་དྷ་ར། ས་
མ་ཨ་མཎྜ་ལ་མ་དྷྱེ། ཨཱ་གཙྪ་ཡ་ཨཱ་གཙྪ་ཡ། པྲ་བེ་ཤ་ཡ་པྲ་ཝེ་ཤ་ཡ། ཏིཥྛ་ཡ་ཏིཥྛ་ཡ། ཨ་བ་ལོ་ཀཱ་ཡ། ཨ་བ་ལོ་ཀཱ་ཡ་ཧཱུཾ་ཕཊ་སྭཱ་ཧཱ། བཞུགས་སུ་གསོལ་བ་ནི། གདུག་པ་འདུལ་བའི་གཉེན་པོ་ནི། །ཕྱག་ན་རྡོ་རྗེ་གོས་སྔོན་ཅན། །མཆོད་རྟེན་སྔོན་པོའི་གཞལ་ཡས་འདིར། །
དགྱེས་ཤིང་བརྟན་པར་བཞུགས་སུ་གསོལ། །ཕྱག་ན་རྡོ་རྗེ་གོས་སྔོན་གྱིས། །ལས་ཀྱི་ཁྲོ་བོར་དབང་བསྐུར་བའི། །གནོད་སྦྱིན་སྡེ་དཔོན་འཁོར་དང་བཅས། །ཕྱག་དང་ཞབས་གཉིས་བསིལ་ནས་ཀྱང་། །འཚམ་པའི་གདན་ལ་གཞུགས་སུ་གསོལ། །ཡཀྵ་ནཱི་ལཾ་བ་ར་དྷ་ར་བཛྲ་པཱ་
ཎི་ཧཱུཾ་མ་ཧཱ་ཡཀྵ་སེ་ན་པ་ཏ་ཡེ། བཛྲ་ས་མ་ཡ་ཏིཥྛ་ལྷན། སངས་རྒྱས་མང་པོས་དབང་བསྐུར་བའི། །གནོད་སྦྱིན་ཀུན་པས་ཁྱད་པར་འཕགས། །མཐུ་སྟོབས་ཀུན་གྱི་བདག་པོ་སྟེ། །སྟོབས་ཆེན་ཁྱོད་ལ་ཕྱག་འཚལ་ལོ། །ལས་ཀྱི་གནོད་སྦྱིན་ཆེན་པོ་རྣམས། །འཇིགས་སུ་རུང་བའི་
ཆ་ལུགས་ཅན། །ཐམས་ཅད་མ་ལུས་འཇིགས་པར་བྱེད། །རིགས་བཞི་ཀླུ་ཡི་གཉེན་པོ་སྟེ། །འཇིགས་བྱེད་ཁྱོད་ལ་ཕྱག་འཚལ་ལོ། །དེ་ནས་མཆོད་པ་འབུལ་བ་ནི། །ཤེལ་ལྟར་དག་པའི་སྣོད་མཆོག་ཏུ། །བཀྲ་ཤིས་འོ་མའི་ཆབ་ཀྱིས་གཏམས། །བཅོམ་ལྡན་ཕྱག་ན་རྡོ་རྗེ་ཡི། །
དཀྱིལ་འཁོར་ལྷ་ཚོགས་རྣམས་ལ་འབུལ། །ཡཀྵ་ནཱི་ལཱཾ་བ་ར་དྷ་ར་བཛྲ་པཱ་ཎི་ཧཱུཾ། མ་ཧཱ་ཡཀྵ་སེ་ན་པ་ཏ་ཡེ། བཛྲ་པ་ཎི་ཙཎྜ་མ་ཧཱ་ཡཀྵ་ཀྲོ་དྷ། རོ་ཥ་ཎཱ་ཡ། བཛྲ་དྷ་ར། བཛྲ་ཁཌྒ་དྷ་ར། བཛྲ་ནཱི་ལ་དྷ་ར། བཛྲ་ཙཀྲ་དྷ་ར། བཛྲ་ཡཀྵ་རཀྵ་ཧེ། ཨཱ་ཧ་ར་པཱུ་ཛ་མེ་གྷ་ས་མུ་དྲ་སྥར་ཎ་
ས་མ་ཡེ་སྭཱ་ཧཱ། མེ་ཏོག་དམ་པ་འདི་དག་དང་། །དེ་བཞིན་ལྷ་རྫས་མེ་ཏོག་རྣམས། །བཅོམ་ལྡན་ཕྱག་ན་རྡོ་རྗེ་ཡི། །དཀྱིལ་འཁོར་ལྷ་ཚོགས་རྣམས་ལ་འབུལ། །བཛྲ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་སྭཱ་ཧཱ། ཨ་ཀ་རུ་དང་ཏུ་རུཥྐ། །ལྷན་ཅིག་སྐྱེས་དང་སྦྱར་བའི་དྲི། །ལྷ་

73-1-223b

རྫས་དམ་པའི་བདུག་སྤོས་འདི། །གསང་བདག་འཕགས་པ་གོས་སྔོན་གྱི། །དཀྱིལ་འཁོར་ལྷ་ཚོགས་རྣམས་ལ་འབུལ། །བཛྲ་དྷཱུ་པེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་སྭཱ་ཧཱ། ཙནྡན་ག་པུར་ཛཱ་ཏི་དང་། །གུར་གུམ་ཆུ་གཙང་སྨན་སྦྱར་འདི། །བཅོམ་ལྡན་ཕྱག་ན་རྡོ་རྗེ་ཡི། །དཀྱིལ་འཁོར་
ལྷ་ཚོགས་རྣམས་ལ་འབུལ། །བཛྲ་གནྡྷེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་སྭཱ་ཧཱ། མུན་པའི་ཚོགས་ནི་འཇོམས་བྱེད་ཅིང་། །ཕྱོགས་བཅུ་གསལ་བའི་མར་མེ་འདི། །བཅོམ་ལྡན་ཕྱག་ན་རྡོ་རྗེ་ཡི། །དཀྱིལ་འཁོར་ལྷ་ཚོགས་རྣམས་ལ་འབུལ། །བཛྲ་ཨཱ་ལོ་ཀེ་དཱི་བཾ་པཱུ་ཛ་མེ་གྷ་ས་མུ་དྲ་སྥ་ར་
ཎ་ས་མ་ཡེ་སྭཱ་ཧཱ། ཁ་དོག་དྲི་དང་རོ་ལྡན་པའི། །ལྷ་རྫས་དམ་པའི་ཞལ་ཟས་འདི། །བཅོམ་ལྡན་ཕྱག་ན་རྡོ་རྗེ་ཡི། །དཀྱིལ་འཁོར་ལྷ་ཚོགས་རྣམས་ལ་འབུལ། །བཛྲ་ནཻ་བི་དྱེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་སྭཱ་ཧཱ། བླ་མེད་རྡོ་རྗེ་ཐེག་པའི་དོན་སྟོན་པའི། །ཤེས་རབ་མཆོག་གི་རྗེས་
འགྲོ་རོལ་མོའི་སྒྲ། །བཅོམ་ལྡན་ཕྱག་ན་རྡོ་རྗེ་ཡི། །དཀྱིལ་འཁོར་ལྷ་ཚོགས་རྣམས་ལ་འབུལ། །བདུད་ཀྱི་འཁོར་ལོ་གཞོམ་ཕྱིར་བཞེས་སུ་གསོལ། །བཛྲ་གཱི་ཏི་ག་ཏ་ག་ཏ་ཧཱུཾ། སྥ་ར་ཎ་ས་མ་ཡེ་སྭཱ་ཧཱ། བླ་རེ་རྒྱལ་མཚན་བ་དན་གདུགས། །དཔུང་རྒྱན་དོ་ཤལ་སེ་མོ་དོ། །ན་བཟའ་ཆོས་གོས་
སྔོན་པོར་བཅས། །དཀྱིལ་འཁོར་ལྷ་ཚོགས་རྣམས་ལ་འབུལ། །ཨོཾ་ཝསྟྲ་ཨ་ལཾ་ཀ་ར་བི་བྷཱུ་ཥ་ཎ་པཱུ་ཛ་སྥ་ར་ཎ་ས་མ་ཡ་ཧཱུཾ་སྭཱ་ཧཱ། དེ་ནས་བཅོམ་ལྡན་འདས་ལ་ཁྲོ་བོའི་མཚན་བརྒྱ་རྩ་བརྒྱད་པས་བསྟོད་ལ། བཅོམ་ལྡན་ཕྱག་ན་རྡོ་རྗེ་ཡིས། །ལས་ཀྱི་ཁྲོ་བོར་དབང་བསྐུར་བའི། །སྐུ་
གསུང་ཐུགས་དང་ཕྲིན་ལས་ལས། །གནོད་སྦྱིན་སྡེ་དཔོན་བཞི་སྤྲུལ་པ། །རི་རབ་ཆེན་པོའི་ལྕོག་ལ་གནས། །ཀུན་ཀྱང་སྐུ་མདོག་མཐིང་ནག་ལ། །གཡས་པ་རྡོ་རྗེ་རྩེ་ལྔ་བསྣམས། །གཡོན་པ་སོ་སོའི་ཕྱག་མཚན་འཛིན། །ན་བཟའ་ལ་བ་སྔོན་པོ་གསོལ། །མི་བཟང་སྔོ་བཀྲ་སྟག་ཤམ་
ཅན། །ཀླུ་ཆེན་བརྒྱད་ཀྱིས་སྐུ་ལ་བརྒྱན། །དུས་མཐའི་མེ་དཔུང་འབར་བ་ཡི། །དཀྱིལ་ནས་འོད་ཟེར་མཚོན་ཆ་འཕྱར། །ཀླུ་རིགས་བཞི་ལ་འབེབས་མཛད་པ། །སྡེ་དཔོན་རྣམས་ལ་ཕྱག་འཚལ་ལོ། །དེ་ནས་ཡན་ལག་བདུན་པས་སྡིག་པ་བཤགས་ལ། འདོད་པའི་དོན་ལ་གསོལ་བ་གདབ་

73-1-224a

ཅིང་ཕྲིན་ལས་བཅོལ་ཏེ། ཛཿཧཱུཾ་བཾ་ཧོཿཞེས་ཡེ་ཤེས་ཀྱི་འཁོར་ལོའི་ལྷ་རྣམས་བསྟིམ་པར་བྱའོ། །ཨོཾ་ཨཱཿཧཱུཾ་ཞེས་སྤྱི་བོ་དང་། མགྲིན་པ་དང་སྙིང་གར་དཀར་པོ་དང་དམར་པོ་དང་། མཐིང་ག་དང་། སྐུ་གསུང་ཐུགས་ཀྱི་འཁོར་ལོ་ལ་ཡི་གེ་བཅུ་གསུམ་པ་བཀོད་དེ། རྒྱས་གདབ་
པར་བྱའོ། །དེ་ཉིད་ལས་སྤྲོ་བསྡུའི་རིམ་པ་ནི། ཨོཾ་སརྦ་ཏ་ཐཱ་ག་ཏ་ཀཱ་ཡ་བཱཀ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་ཕྱོགས་བཅུའི་འཇིག་རྟེན་གྱི་ཁམས་ན་སངས་རྒྱས་ཀྱི་ཞིང་ཁམས་བྱེ་བ་ཕྲག་བརྗོད་ཀྱིས་མི་ལང་བར་འདོད་ཡོན་གྱི་ལྷ་མོ་རྣམས་ཀྱིས་འཕགས་པ་རྣམས་ལ་ཡང་དག་པར་མཆོད་
ཅིང་གཉིས་སུ་མེད་པར་ཐིམ་ནས་དེ་དག་གི་གསུང་རྣམ་པར་དག་པ་དང་། སངས་རྒྱས་ཀྱི་ཆེ་བའི་ཡོན་ཏན་རྣམས་ཀྱི་འོད་ཟེར་བདག་ཉིད་ལ་ཐིམ་པས་སྒྲིབ་པ་སྦྱངས་ཏེ། ཐུགས་ཀའི་འོད་ཟེར་འགྲོ་དྲུག་ལ་ཕོག་པས་རང་གི་ལྷག་པའི་ལྷར་གྱུར་ནས། སེམས་ཅན་གྱི་དོན་བྱས་ཏེ། སླར་བདག་ཉིད་
ལ་བསྟིམ་པ་དང་། སྤྲོ་བསྡུའི་རིམ་པ་ཡང་ནས་ཡང་དུ་བྱའོ། །དེ་ནས་དབང་བསྐུར་བར་བྱ་སྟེ། རིགས་ཀྱི་བདག་པོ་མི་བསྐྱོད་པ་དང་། སངས་རྒྱས་གང་གཱའི་ཀླུང་གི་བྱེ་མ་སྙེད་དང་། དེའི་སྲས་ཁྲོ་བོ་རྣམས་སྤྱན་དྲངས་པ་དང་། མཆོད་ཅིང་སྡིག་པ་བཤགས་པ། འདོད་པའི་དོན་ལ་
གསོལ་བ་གདབ་པ་ནི། བཅོམ་ལྡན་འདས་ཀྱིས་གསུངས་པའི་གཟུངས་ལས་ཇི་ལྟར་འབྱུང་བ་ལྟར་སངས་རྒྱས་ཐམས་ཅད་ཀྱི་ཐུགས་མི་བསྐྱོད་པ། རིགས་བཞིའི་འཁོར་དང་སངས་རྒྱས་གང་གཱའི་ཀླུང་གི་བྱེ་མ་སྙེད་དང་། རིགས་ཀྱི་ཡུམ་རྣམས་ཀྱིས་བུམ་པས་དབང་བསྐུར་ཞིང་། རྡོ་རྗེ་སེམས་
དཔའི་སྔགས་ཡི་གེ་བརྒྱ་པས་སྐུ་ཁྲུས་གསོལ་བ་ནི། ལྷའི་རྗེས་སུ་གནང་བ་སྟེ། སྐུ་རྡོ་རྗེར་བྱིན་གྱིས་བརླབ་པའོ། །མདོ་ནས་ཇི་ལྟར་འབྱུང་བ་ལྟར་སྔགས་ཀྱི་གནང་བ་ཐོབ་པ་ནི་གསུང་རྡོ་རྗེར་བྱིན་གྱིས་བརླབ་པའོ། །ཨོཾ་ཤྲཱི་བཛྲ་པཱ་ཎི་ཧཱུཾ། མ་ཧཱ་ཙཎྜ་སརྦ་དུཥྚཱན་སརྦ་བུདྡྷ་ས་པ་རི་ཝཱ་ར་བཛྲ་ས་མ་ཡ་ཛཿཧཱུཾ་བཾ་ཧོཿ
ཞེས་དགུག་པ་དང་གཞུག་པ་དང་། བཅིང་བ་དང་། དབང་དུ་བྱ་བ་དང་། ཐ་མི་དད་པར་བྱས་ཏེ། སྐུ་གསུང་ཐུགས་རྡོ་རྗེའི་བདག་ཉིད་ཁམས་གསུམ་ཆོས་ཀྱི་རྒྱལ་པོ་ཐུགས་གསང་བའི་བདག་པོ་རྡོ་རྗེ་འཛིན་པར་གྱུར་ཏེ། ཇི་ལྟར་སྐྱོ་བར་མ་གྱུར་གྱི་བར་དུ་བསྒོམ་པར་བྱའོ། །སྐྱོ་བར་གྱུར་ན་

73-1-224b

བཅོམ་ལྡན་འདས་ཀྱིས་གསུངས་པའི་གཟུངས་ཀྱི་ཕྲེང་བ་ཁོ་ན་ལ་སྦྲུལ་འཁྲིལ་བ་ལྟར་བཟླས་ཤིང་རྡོ་རྗེ་གསུམ་གྱི་དགོངས་པས་བདག་ཉིད་ཀྱི་ལུས་ཀྱི་ནད་དང་། སྡིག་སྒྲིབ་དང་། ཀླུའི་དུག་དང་གདུག་རྩུབ་རྣམས་ཞི་བར་བསྒོམ་མོ། །ཐུན་མཚམས་སུ་བཟླས་པ་གཏོང་བར་འདོད་པ་དང་། ཡེ་ཤེས་
སེམས་དཔའ་མཆོད་རྟེན་སྔོན་པོར་བཞུགས་སུ་གསོལ་ཏེ། མེ་ཏོག་ལ་སོགས་པས་ཀྱང་མཆོད་ཅིང་བསྟོད་ལ་གཏོར་མ་བཏང་བའི་ལས་བྱའོ། །ཐ་མའི་ཐུན་ལ། གང་ཡང་བདག་བློ་གཏི་མུག་པས། །ཞེས་བཟོད་པར་གསོལ་ལ། ཁྱེད་ཀྱིས་སེམས་ཅན་དོན་ཀུན་མཛད། །ཅེས་གཤེགས་སུ་གསོལ་ལོ། །
བསྐྱེད་པ་ཐུགས་ཀར་བསྡུ། མི་དམིགས་པར་བསམ། ཡི་གེ་བརྒྱ་པ་བརྗོད། སྤྱོད་ལམ་གྱི་དུས་སུ་སྐད་ཅིག་མས་ལྷར་བསྐྱེད། ལུས་བསྲུང་། གོ་བགོ། ནང་ཡེ་ཤེས་ཀྱི་འཁོར་ལོ་དང་། ཕྱི་དམ་ཚིག་གི་འཁོར་ལོ་གསལ་གདབ། འཁོར་ལོ་ཁ་སྦྱོར་བསྡམ། རྟག་ཏུ་ལྷའི་ང་རྒྱལ་གྱིས་སྤྱོད་ལམ་ལ་
གནས་པར་བྱའོ། །སྒྱུ་མ་ལྟ་བུའི་བློས་དགེ་བའི་ལས་འབའ་ཞིག་ལ་འབད་པར་བྱའོ། །བསྙེན་པའི་དུས་སུ་བཅོམ་ལྡན་འདས་ཀྱིས་གསུངས་པའི་རྩ་བའི་སྔགས་ཡི་གེ་འབྲུ་བཅུ་བདུན་པ་དང་། ལས་ཀྱི་ཕྱག་ན་རྡོ་རྗེའི་ཡི་གེ་བཅུ་པ་ལ་རྟག་ཏུ་བཟླས་ཤིང་ནང་ནུབ་བུམ་པ་ལ་གཟུངས་སྔགས་བརྒྱ་རྩ་
བརྒྱད་ཀྱི་བསྙེན་པ་དབུལ་ལོ། །གཏའ་གཏོར་ལའང་དེ་བཞིན་བྱའོ། །བསྙེན་པའི་གྲངས་ཀྱི་ཚད་ནི་བྱེ་བའམ་བདུན་འབུམ་མོ། །རྟགས་ཀྱི་མཚན་མ་ཐོབ་ནས་བསྙེན་པ་ཐོན་ནས། ནམ་གུང་ལ་གཏའ་གཏོར་བཏང་། ཐོ་རངས་བུམ་པས་རང་ངམ་སློབ་མ་ལ་དབང་བསྐུར། གཏའ་བདག་ལས་ཀྱི་
གནོད་སྦྱིན་རི་རབ་ཀྱི་ལྕོག་ལ་གཤེགས་སུ་གསོལ། བུམ་པའི་ལྷས་བདག་ལ་རྒྱས་གདབ། ཁྲུས་བྱས། དངོས་གྲུབ་ཀྱི་རྟེན་ཕུད་ལྷ་ལ་དབུལ། ལྷག་མ་དངོས་གྲུབ་ཏུ་དམིགས་ལ་རང་ཟ། བསྐྱེད་པ་བསྡུ། མི་དམིགས་པར་བསམ། ལྷ་རྒྱུན་དུ་འཁོར་བའི་མན་ངག་ལ་གནས་པར་བྱའོ། །
དཔལ་ཕྱག་ན་རྡོ་རྗེ་མདོ་ལུགས་ཀྱི་མན་ངག་ལག་ཏུ་བླང་བའི་སྒྲུབ་ཐབས་སློབ་དཔོན་ཆེན་པོ་བཱིརྱ་ཙནྡྲས་མཛད་པ་རྫོགས་སོ།།      །།༄༅༅། །གསང་སྔགས་ཀྱི་བཟླས་བརྗོད་བཞུགས། འཕགས་པ་ལག་ན་རྡོ་རྗེ་གོས་སྔོན་པོ་ཅན་ལ་ཕྱག་འཚལ་ལོ། །དབེན་ཞིང་ཉམས་དགའི་གནས་

73-1-225a

དག་ཏུ། །རྣལ་འབྱོར་སྔགས་ཀྱི་སྐྱོན་གྱུར་པ། །སྒྲ་ཆེས་སྐྱོན་གྱུར་འབྱུང་པོ་དག །སྣོད་མེད་གྱུར་པས་ཐོས་གྱུར་ན། །སྒྲ་ཆེས་བར་ཆད་མཐུ་མེད་གྱུར། །སྒྲ་ཆུང་གྱུར་ན་དངོས་གྲུབ་མེད། །སྐྱེན་གྱུར་ལུས་ཀྱི་ཕྲད་པ་ཉམས། །དེས་ན་སྔགས་ཀྱི་མཐུ་མེད་འགྱུར། །བུལ་ན་བཟླས་པའི་གྲངས་
མེད་པས། །དུས་འདས་བར་གཅོད་སྦྱོར་བ་འབྱུང་། །གློ་དང་གཡལ་དང་སྦྲིད་པ་དང་། །གཉིད་ལ་སོགས་པས་བར་ཆོད་ན། །དེས་ནི་ཡི་དགས་བདུད་ལ་སོགས། །སྤྲོ་ནས་མྱུར་དུ་བར་གཅོད་འབྱུང་། །སྔགས་ཀྱི་བསྙེན་པ་བྱེད་དུས་སུ། །མེ་དང་འདྲ་བའི་ཞེ་སྡང་གིས། །སྔགས་ཀྱི་འབྲས་བུ་སྲེག་པར་བྱེད། །
ཀུན་ནས་དཀྲིས་པའི་འདོད་ཆགས་ཀྱིས། །ཡོན་ཏན་རྒྱུ་རྣམས་འཆིང་བར་བྱེད། །མུན་པ་ལྟ་བུའི་གཏི་མུག་གིས། །དངོས་གྲུབ་སྟེར་བ་རྙེད་མི་འགྱུར། །སྒང་བུ་ལྟ་བུའི་ང་རྒྱལ་གྱིས། །དངོས་གྲུབ་ཆུ་འདྲ་རྩེ་ལ་མིན། །སྔགས་ཀྱི་ཡོན་ཏན་སྤྲིན་འདྲ་ལ། །ཕྲག་དོག་རླུང་གིས་འཐོར་བར་བྱེད། །དངོས་
གྲུབ་བྱེ་མའི་རྒྱུན་འདུས་པའང་། །བརྩོན་འགྲུས་རྡོ་རྗེའི་བྲག་མེད་ན། །ལེ་ལོའི་དབའ་རླབས་ཆེན་པོ་འཁྲུག །དངོས་གྲུབ་བར་དུ་གཅོད་པ་བཅུ། །ལྔ་ལས་འབྱུང་བས་ལྔ་བཅུ་སྟེ། །མི་དགེ་བཅུ་ཞེས་གསུངས་པ་ཡིན། །མ་བྱིན་ལེན་དང་སྲོག་གཅོད་གཡེམ། །ཚིག་འཁྱལ་ངག་རྩུབ་ཕྲ་མ་རྫུན། །བརྣབ་
སེམས་གནོད་སེམས་ལོག་པར་ལྟ། །དགེ་བཅུའི་བར་དུག་གཅོད་པ་སྟེ། །ཡང་དག་དོན་གྱི་སྒྲ་ཞེས་བཤད། །འདི་ལྟར་དངོས་གྲུབ་ཀུན་བྲལ་བས། །སྔགས་ཀྱི་འབྲས་བུ་འདོད་པས་སྤང་། །དེ་སྤངས་འབྲས་བུ་མྱུར་དུ་འཐོབ། །རྟག་ཏུ་བཟླས་བརྗོད་མེ་དཔུང་ལ། །བསམ་གཏན་རླུང་གིས་སྦར་
གྱུར་ན། །སྡིག་པ་སྟོབས་ཅན་མི་བཟད་པའི། །ལྗན་ལྗིན་ཐམས་ཅད་སྲེག་པར་བྱེད། །བཟླས་བརྗོད་མེ་ཡི་རྒྱུན་འདྲ་ཡང་། །བསམ་གཏན་བྲལ་བས་མི་འགྲུབ་སྟེ། །སྡིག་པ་ཆུ་དང་འདྲ་བས་གསོད། །དེ་བས་བསམ་གཏན་ལྡན་པར་བྱ། །རྡོ་རྗེའི་བཟླས་པ་ཞེས་གསུངས་པས། །རྡོ་རྗེ་གསུམ་གྱི་
སྐུར་བསྒོམས་ཏེ། །ཕྱི་དང་ཤིན་ཏུ་ནང་དག་དང་། །དགུག་དང་གདོན་དང་ཡང་དག་དང་། །ཨོཾ་གྱི་དོན་དང་ལ་སོགས་པ། །དེ་ལ་དམིགས་ནས་བཟླས་པར་བྱ། །གང་ཞིག་དོན་འདི་མེད་གྱུར་པས། །གསང་སྔགས་བཟླས་བརྗོད་བྱས་གྱུར་པ། །མུན་ལ་བྱེ་མའི་གསེར་ཕྱེ་ཚོལ། །མི་འདོད་འདུ་

73-1-225b

ཡི་འདོད་པ་མིན། །སློབ་དཔོན་ཆེན་པོ་བཱིརྱ་ཙནྡྲས་མཛད་པ་གསང་སྔགས་ཀྱི་བཟླས་བརྗོད་རྫོགས་སོ།།      །།༄༅༅། །རྒྱ་གར་སྐད་དུ། བཛྲ་བ་ཏི་རཱ་ཛ་ཏུཎྜེ་སཱ་དྷ་ནཾ་ནཱ་མ། བོད་སྐད་དུ། ནམ་མཁའ་ལྡིང་གི་རྒྱལ་པོ་རྡོ་རྗེ་སྒྲུབ་པའི་ཐབས་ཞེས་བྱ་བ། གནོད་སྦྱིན་གྱི་སྡེ་དཔོན་ཆེན་པོ་ལག་
ན་རྡོ་རྗེ་དྲག་པོ་ལ་ཕྱག་འཚལ་ལོ། །རེ་ཞིག་དང་པོར་དབེན་པའི་གནས་སུ། རིག་པ་འཛིན་པ་དེས་ཁྲུས་བགྱིས་ཏེ་གཙང་མར་བགྱིས་ལ། གོས་གསར་པ་བགོས། དམ་ཚིག་དང་སྡོམ་པ་ལ་གནས་ཤིང་། གཙང་སྦྲའི་སྤྱོད་པ་དང་བཅས་པས་མཎྜལ་བའི་རྣམ་ལྔས་བྱུགས་ལ་སྤོས་ཀྱི་དཀྱིལ་
འཁོར་བགྱིས་ཏེ། བཅོམ་ལྡན་འདས་ཤཱཀྱ་ཐུབ་པའི་གཟུགས་སམ། མཆོད་རྟེན་སྐུ་གདུང་དང་བཅས་པ་དཀྱིལ་འཁོར་དེའི་དབུས་སུ་བཞག་སྟེ། སྤོས་ཆབ་ཀྱིས་བཀྲུ་བར་བྱའོ། །མེ་ཏོག་དང་བདུག་པ་ལ་སོགས་ཏེ། མཆོད་རྫས་རྣམས་བཤམས་ལ་སྟན་བདེ་བ་ལ་འདུག་སྟེ། དང་པོར་
བྱང་ཆུབ་མཆོག་ཏུ་སེམས་བསྐྱེད་ལ་དེའི་རང་བཞིན་ཨ་ལས་ཟླ་བའི་སྟེང་དུ་ཧཱུཾ་ཡོངས་སུ་བསམ་པར་བྱའོ། །དེའི་འོད་ཟེར་གྱིས་བླ་མ་དང་ལྷག་པའི་ལྷ་དང་སངས་རྒྱས་དང་བྱང་ཆུབ་སེམས་དཔའ་རྣམས་མདུན་དུ་བཀུག་སྟེ། ཕྱག་བཙལ་བ་དང་། མཆོད་ཅིང་བཤགས་པ་དང་། རྗེས་སུ་ཡི་རང་
ཞིང་ཆོས་ཀྱི་འཁོར་ལོ་བསྐོར་བ་དང་། མྱ་ངན་ལས་མི་འདའ་བར་གསོལ་བ་གདབ་པ་དང་། དེ་དག་དགེ་བའི་རྩ་བ་བསྔོས་ཏེ་གཤེགས་སུ་གསོལ། ཚངས་པའི་གནས་བཞི་བསྒོམ་པར་བྱའོ། །དེ་ནས་བཅོམ་ལྡན་འདས་ཀྱི་སྐུ་མཚན་དང་དཔེ་བྱད་ལྡན་པར་བསྐྱེད་ལ། སྙིང་རྗེ་དང་བྱམས་པ་
དང་། བཏང་སྙོམས་ཆེན་པོའི་ངང་གིས་སྔགས་འདི་བརྗོད་པར་བྱའོ། །ན་མོ་བྷ་ག་བ་ཏེ། ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཏདྱ་ཐཱ། བྷུ་ཛ་ས་མ་ཡེ། བྷུ་ཛེ་ཏ་ཐཱ་བྷུ་ཛེ། པྲ་བ་ར་བྷུ་ཛེ། ས་མནྟ་ཨ་ཀ་བྷུ་ཛ། ཏུ་རུ་ཏུ་རུ་སྭཱ་ཧཱ། ས་མ་ཡ་པཱ་ལཱ་ཡ་སྭཱ་ཧཱ། ཀླུ་མི་བགྲུངས་པ་དམ་ཚིག་མི་འཚལ་
བ་རྣམས་སླར་བཟློག་ཅིང་བསྐྲད་པའི་ཕྱིར་ལན་བདུན་བརྗོད་དོ། །སྭ་བྷཱ་བ་བི་ཤུདྡྷཱཿསརྦ་དྷརྨྨཿསྭ་བྷཱ་བ་བི་ཤུདྡྷོ྅ཧཾ་ཞེས་བརྗོད་པས་དེ་ཉིད་ཀྱི་ངང་ལས་བཛྲ་བ་ཏི་ག་རུ་ཌ་ཞེས་རྣམ་པ་དང་བཅས་ཏེ་ཧཱུཾ་ངོ་བོར་གནས་པ་ལས་དེ་ཉིད་ཡོངས་སུ་གྱུར་པ་ལས། རིན་པོ་ཆེ་འབར་བ་ཧཱུཾ་གིས་མཚན་པ། 

73-1-226a

འོད་ཟེར་གྱི་ཕྲེང་བ་རྣམ་པར་འཁྲུགས་པར་གྱུར། དེ་དག་ཡོངས་སུ་གྱུར་པ་ལས་ར་ཛི་སྲི་ཛ་ཧཱུཾ་ཞེས་པས་ནམ་མཁའ་ལྡིང་གི་རྒྱལ་པོ་གསེར་གྱི་འདབ་མ་ཅན། རྡོ་རྗེའི་མཆུ་ཅན་བདག་ཉིད་ཆེན་པོའི་ལུས་འབར་བ་རྡོ་རྗེའི་རང་བཞིན། ཁྲོ་བོ་འཇིགས་སུ་རུང་བ་རྩལ་ཅན། 
རིན་པོ་ཆེ་ཐ་དད་པ་སྣ་ཚོགས་དང་། མུ་ཏིག་དང་། མན་ཤེལ་དང་། གསེར་གྱིས་སྤྲས་པའི་རྒྱན་མགོ་ལ་ཐོགས་པ། གསེར་གྱིས་བཀླུབས་པ། དྲེགས་པའི་གཟུགས་འགྱིང་བས་བལྟ་བ། ཀླུ་ཆེན་པོ་བརྒྱད་གདན་དུ་བཅས་པ། ཀླུ་མགོ་དགུ་པ་རྒྱན་དུ་བྱས་པ། ཀླུ་མགོ་གསུམ་
པ་གཡས་ན་ཐོགས་པ། ནོར་བུ་རིན་པོ་ཆེའི་དབྱིག་པ་གཡོན་ན་ཐོགས་པ། ལུས་ཐམས་ཅད་རྡོ་རྗེ་འབར་བ་གསེར་གྱི་རང་བཞིན་གཤོག་པའི་འདབ་མ་བརྐྱང་བས་ཀླུ་རིགས་དབང་དུ་སྡུད་པ། གཡོག་འཁོར་ནམ་མཁའ་ལྡིང་གི་ཚོགས་ཀྱིས་བསྐོར་བ་ཅིག་ཏུ་བསམ་པར་བྱའོ། །དེ་ནས་
ནམ་མཁའ་ལྡིང་གི་རྒྱལ་པོའི་ཕྱག་རྒྱ་བཅས་ཏེ། ཨོཾ་སུ་པྲ་ཏིཥྛ་བཛྲ་དུན་ཏི་མི་ལི་མི་ལི་སྭཱ་ཧཱ། དེ་ནས་བརྟན་པར་བྱས་ཏེ་ལུས་བསྲུང་བར་བྱའོ། །དེ་དང་འདྲ་བའི་ནམ་མཁའ་ལྡིང་གི་རྒྱལ་པོ་འཁོར་དང་བཅས་པ་སྤྱན་དྲངས་ལ། ཡང་དག་པར་མཆོད་ཅིང་བསྟོད་ལ་དེ་ཉིད་ཀྱི་རྟེན་ལ་
བསྟིམ་པར་བྱའོ། །དེ་ནས་ཇི་ལྟར་སྐྱོ་བར་མ་གྱུར་གྱི་བར་དུ་སྤྲོ་བ་དང་། བསྡུ་བའི་རིམ་པ་བྱའོ། །དེ་ཉིད་གསལ་བར་མ་གྱུར་ན་སྐྱོན་སྤངས་པའི་བཟླས་པ་བྱའོ། །ཨོཾ་བཛྲ་བ་ཏི་ག་རུ་ཌ་བེ་གེ་ཏ་ཧཱུཾ་ཧཱུཾ་ཛ་ཛ་རཱ་སྲི་ཛ་ཧཱུཾ་ཕཊ་ཅེས་ཉིན་གཅིག་བཞིན་སྔགས་སྟོང་ངམ་ཁྲི་བརྗོད་དོ། །ནམ་ལུས་
ཀྱིས་མི་ཐུབ་པར་སྐྱོ་བར་གྱུར་པའི་ཚེ་ཁ་ཟས་དཀར་པོ་བཟའ་བར་བྱ་སྟེ། ཡང་ཁྲུས་བྱས་ལ་བསྒྲུབ་པར་བྱའོ། །གུ་གུལ་གྱི་དུད་པས་བདུག་གོ། །མེ་ཏོག་དང་། བདུག་པ་དང་། ཡོན་ཆབ་དང་། མར་མེ་དང་། བཤོས་གཙང་ལ་སོགས་ཏེ། གཏོར་མའི་རྫས་ཅི་འབྱོར་པས་མཆོད་
ཅིང་། ཡང་དག་པར་བསྟོད་ནས་ཉན་ལ། དགེ་བ་དང་མི་དགེ་བ་སྟོན་པར་འགྱུར་ཞིང་ལས་ཐམས་ཅད་འགྲུབ་པར་འགྱུར་ལ། མཆོག་དང་ཐུན་མོང་ཐམས་ཅད་སྦྱིན་པར་འགྱུར་རོ། །ཅི་བསྒོ་བ་དེས་བྱེད་པར་འགྱུར་རོ། །གྲུབ་ནས་ཀྱང་རྟག་ཏུ་མཆོད་པར་བྱའོ། །ནམ་མཁའ་ལྡིང་གི་

73-1-226b

རྒྱལ་པོ་སྔོན་དུ་བསྙེན་པའི་ཆོ་ག་སློབ་དཔོན་བཱིརྱ་ཙནྡྲས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། བཛྲ་པཱ་ཎི་སཱ་དྷ་ནཾ་ནཱ་མ། བོད་སྐད་དུ། ཕྱག་ན་རྡོ་རྗེའི་སྒྲུབ་པའི་ཐབས་ཞེས་བྱ་བ། ཕྱག་ན་རྡོ་རྗེ་ལ་ཕྱག་འཚལ་ལོ། །དྲག་པོའི་སྟོབས་ཀྱིས་འདུལ་དཀའ་འདུལ། །
བདེ་གཤེགས་ཀུན་གྱི་ཐུགས་ངོ་བོ། །རྡོ་རྗེ་འཆང་ལ་ཕྱག་འཚལ་ནས། །དེ་ཡི་སྒྲུབ་ཐབས་བྲི་བར་བྱ། །བསླབ་པ་གསུམ་ལྡན་དགེ་སློང་ངམ། །དགེ་ཚུལ་དགེ་བསྙེན་བསྙེན་གནས་པ། །བྱ་བའི་རྒྱུད་མོས་དེ་ཡིས་བསྒྲུབ། །གཞན་གྱིས་དེ་ལྟ་མ་ཡིན་ནོ། །དང་པོར་ས་ཕྱོགས་
གཙང་མར་རང་ཉམས་དགའ་བའི་ཕྱོགས་སུ། སྟན་བདེ་བ་ལ་སེམས་དཔའི་སྐྱིལ་མོ་ཀྲུང་གིས་གནས་ལ། དྲི་དང་མེ་ཏོག་ལ་སོགས་པས་དཀྱིལ་འཁོར་མཛེས་པར་བྱས་ལ། མདུན་དུ་རིག་སྔགས་ཀྱི་བདག་པོ་དང་། བླ་མ་བསམས་ལ། ཇི་སྐད་གསུངས་པའི་མཆོད་པས་
མཆོད། སྡིག་པ་བཤགས་པ་དང་། བྱེད་པ་བསྡམ་པ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པར་བྱ། །དེ་ནས་སྭ་བྷཱ་བ་ཤུདྡྷཱཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་ལན་གསུམ་བརྗོད་པ་ཐམས་ཅད་སྟོང་པར་བསམ་མོ། །རང་སེམས་དག་པས་པཾ་
པདྨ། །དཀར་པོ་འདབ་བརྒྱད་དབུས་ཟླ་བ། །དབུས་སུ་ཧཱུཾ་ལས་རྡོ་རྗེར་གྱུར། །ལྟེ་བའི་དབུས་སུ་ཧཱུཾ་མཐིང་ག །གྱུར་པ་བཞི་པ་རྡོ་རྗེ་འཆང་། །བརྐྱང་བསྐུམ་སེམས་དཔའ་ཁྲོས་པ་སྟེ། །མཐིང་ག་ན་རའི་རྒྱན་གྱིས་སྤུད། །འཇིགས་བྱེད་མགོ་སྐྱེས་གྱེན་དུ་བརྫེས། །རྡོ་རྗེ་དྲིལ་འཛིན་
མེ་དཔུང་བཞུགས། །རྩེ་གཅིག་པ་ཡི་སེམས་ཀྱིས་བསམ། །རང་སྙིང་ཟླ་བར་སྙིང་པོ་དགོད། །སྔོན་དུ་བསྙེན་པ་སུམ་འབུམ་བྱ། །གསང་སྔགས་རྒྱལ་པོ་འདི་ལན་ཅིག་བཟླས་པས་སྡིག་པ་ཐམས་ཅད་སྲེག་པ་དང་། ཐམས་ཅད་སྲུང་བར་བྱེད་དོ། །འབྱུང་པོའི་གདོན་གྱིས་ཟིན་པ་ལ་
སོགས་པ་ལ་བསྣུན་ན་འབྱེར་བར་བྱེད་དོ། །ཁ་ཏི་ཁས་ཁམ་ཕོར་ལ་བྲིས་ཏེ་སྒོ་ལ་དབྱངས་ན་སྲིའུ་གྲུང་བར་བྱེད་དོ། །སྤྲ་ཚིལ་ལ་གཟུགས་སོར་བཞི་པ་བྱས་ལ། དེའི་སྙིང་གར་དགྲའི་མིང་དང་སྔགས་སྦྲེལ་ནས་ཚེར་མས་ཁ་ལ་བཙུགས་ན་ཕྱིར་རྒོལ་བའི་ངག་རེངས་པར་བྱེད་དོ། །སྙིང་ལ་

73-1-227a

བཙུགས་ན་ཁྲོས་པ་ཞི་བ་དང་། གསད་པའི་སེམས་ཀྱིས་གསད་པར་འགྱུར་བ་དང་། རྐང་ལག་གང་ལ་བཙུགས་ན་ཞ་བར་འགྱུར་བ་དང་། རྟགས་ལ་བཙུགས་ན་ནུས་པ་མེད་པར་འགྱུར་རོ། །མིའི་རྗེ་ངར་གྱི་ཕུར་བུའམ་ལྕགས་ཕུར་ལ་བསྔགས་ཏེ་གང་ལ་བསྣུན་པ་རེངས་
པར་འགྱུར་རོ། །མི་ཐོད་ལ་སྔགས་བྲིས་ལ། དེའི་ནང་དུ་མི་ཁྲག་གིས་བཀང་བ་དུར་དུ་སྦས་ན་རིགས་རྒྱུད་འཆད་དོ། །དུག་བླུགས་ཏེ་ཀླུ་ཡོད་པའི་གནས་སུ་སྦས་ན་མཛེ་ནད་ཀྱིས་འཛིན་ཏོ། །དགྲའི་སྒོར་སྦས་ན་འབྱེར་བར་བྱེད་པ་དང་། ཞིང་དཀྱིལ་དུ་སྦས་ན་ཞིང་ལ་མི་སྐྱེ་བ་དང་། ཕྱུགས་
ལྷས་སུ་སྦས་ན་མི་འཕེལ་བ་དང་། ཆུར་སྦས་ན་ཆུ་སྐེམས་སོ། །སྐྱེས་བུ་མཚོན་གྱིས་བསད་པའི་ཐོད་པ་ལ་སྔགས་དང་། ཡུལ་ལྷའི་མིང་སྤེལ་ལ་བྲིས་ནས་ཡུལ་ལྷའི་གནས་སུ་སྦས་ལ། དེའི་ཐོག་ཏུ་ཕུར་པ་ལ་སྔགས་མང་དུ་བཟླས་ལ་ཡུལ་ལྷའི་སྙིང་གར་དམ་དུ་གདབ། དེའི་སྟེང་དུ་ཚེར་
མ་ཅན་གྱི་ཤིང་ལ་གདུག་པའི་མེ་བཏང་ལ། རྟ་དང་། མི་དང་། བ་ལང་དང་། ཁྱི་དང་མ་ཧེ་ལ་སོགས་པའི་ཤ་ཁྲག་བསྲེགས་ལ། ལྷ་ཁྱོད་ཀྱི་ཡུལ་འདིར་ཐོག་སེར་ཕོབ་ཤིག །མ་ཕེབས་ན་བསྐལ་པར་མི་གཏོང་ངོ་ཞེས་བརྗོད་ལ། ཕེབས་ན་རྫས་རྣམས་འོ་མས་བཀྲུས་ལ་བཏང་། མ་
ཕེབས་ན་གཞག །ལས་དེ་དག་ཐམས་ཅད་ནི་སྔགས་དང་མིང་སྤེལ་བའི་དབྱེ་བས་ཤེས་པར་བྱའོ། །གསང་སྔགས་ནི་ཨོཾ་ཙཎྜ་མ་ཧཱ་རོ་ཥ་ཎ་ཆེ་གེ་མོ་ཧཱུཾ་ཕཊ། གཞན་ཡང་གོང་གི་གཟུགས་བརྙན་གྱི་སྙིང་གར་མིང་འབའ་ཞིག་བྲིས་ལ། མཆོད་རྟེན་ནག་པོ་མཐོ་གང་བའི་ནང་དུ་བཅུག་ལ། 
ལྷུང་བཟེད་ཀྱི་འོག་ཏུ་མཎྜལ་བྱས་ལ་གཞག །དེ་ནས་དགེ་སློང་ངམ། དགེ་ཚུལ་ལམ། དགེ་བསྙེན་ཕྱག་ན་རྡོ་རྗེའི་རྣལ་འབྱོར་དང་ལྡན་པ་སྔགས་བཟླས་པ་པོ་བཞི་ཡན་ཆད་ཀྱིས་དབེན་པར་ནུབ་བཅོ་ལྔར་ནམ་གུང་ལ་སྔགས་བརྒྱ་རྩ་བརྒྱད་བཟླ་ཞིང་བསྐོར་བར་བྱ། བཅུ་དྲུག་པ་ལ་བསྐོར་བར་
བཟློག་ལ་གཟུགས་བསྲེགས་ན། ཇི་སྐད་སྔགས་དང་སྤེལ་བ་བཞིན་ལོ་ལས་མི་འདའོ། །སེར་བ་ལ་སོགས་པ་བཟློག་པ་ལ་འཁོར་ལོ་ལ་བྲི་བའམ་རྔ་ལའོ། །གཡུལ་དུ་འཇུག་ན་རལ་གྲི་ལ་སོགས་པའོ། །ནད་ཐམས་ཅད་ལ་ཆུ་དང་ཡུངས་ཀར་ལ་སོགས་པའོ། །གཞན་ཡང་འདིའི་

73-1-227b

ཡོན་ཏན་ནི་བརྗོད་པར་མི་ནུས་སོ། །ཕྱག་ན་རྡོ་རྗེ་སྒྲུབ་པའི་ཐབས་སློབ་དཔོན་ཆེན་པོ་ཤྲདྡྷ་ཀ་ར་ཝརྨས་མཛད་པ་རྫོགས་སོ།།      །།༄། །རྟེན་འབྲེལ་གྱི་སྲུང་བ་བཞུགས། ༄༅༅། །དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ཀླུ་རིགས་ལྔ་ལ་དུག་ལྔ་
སྟེ། །འགྲོ་བ་གཞན་ལ་གནོད་པ་བྱེད། །གནོད་པའི་མཚན་ཉིད་འདི་ལྟ་སྟེ། །བྲག་བར་གྲོག་པོ་གཏིང་རིངས་དང་། །རི་ཕུག་དོག་དང་སྒོ་དོག་མོར། །མི་ཤོང་བཞིན་དུ་འཚང་བ་དང་། །ལྷ་ཁང་ཁང་ཧྲུལ་ཉམས་མི་དགའ། །ཆུ་དང་འདམ་རྫབ་ཟག་པ་ངན། །གཡག་དང་བ་གླང་ར་ལུག་དང་། །རི་
དགས་གཅན་གཟན་ཁྱི་ཡིས་འཚེ། །གཟར་བའི་རི་ལ་འཛེག་འབབ་རྨི། །ལུས་དང་ཤེས་པ་ལྕི་བ་དང་། །གཉིད་ཆེ་སེམས་སྐྱོ་སྣང་གླུ་ལེན། །སྤྲོ་ཐུང་སྙིང་མི་དགའ་བ་འོང་། །བཅོམ་ལྡན་འདས་ཀྱིས་བཀའ་སྩལ་པ། །དེ་དག་བསྲུང་དང་གསོ་བྱའི་ཕྱིར། །རྫས་ཀྱི་སྦྱོར་བ་བསྟན་པར་བྱ། །ཐུན་མོང་
སྦྱོར་བ་བཤད་བྱ་བ། །རི་དགས་ལྟེ་དྲི་འདྲེ་གསོད་ཆུ། །ནགས་ཀྱི་རྩི་དང་རྩི་བོ་ཆེ། །དྲི་ཆེན་ཉ་ཡི་མཁྲིས་པ་དང་། །བྱི་སྐུ་བདུན་དུ་སྦྱར་བ་ཡིས། །ཀླུ་གཉན་ས་བདག་ནག་མོ་དཀོར། །འབྱུང་པོ་རྣམས་ཀྱིས་མི་ཚུགས་ཤིང་། །མཛེ་འབྲས་ཤུ་བ་ཟ་ཀོང་དང་། །བས་ལྡག་གཡན་པ་མེ་དབལ་
དང་། །གག་པ་ལྷོག་པ་རྨ་རིམས་དང་། །ཚད་རིམས་རྒྱུ་གཟེར་འབྱུང་པོའི་ནད། །བཟའ་དང་གདགས་དང་བྱུགས་དང་བདུགས། །ཐམས་ཅད་འཇོམས་པར་བྱེད་པའི་མཆོག །ཁྱད་པར་སྦྱོར་བ་རྣམ་པ་བཞི། །ལྟེ་དྲི་ཤིང་ཀུན་ཨ་རུ་ར། །དྲི་ཆུས་སྦྱངས་ཤིང་ཁོང་དུ་བཏུང་། །སྐད་
སྙན་ཚེ་རིང་ནད་སྐེམས་སྲུང་། །ལྟེ་དྲི་འདྲེ་གསོད་ཐང་ཆུ་དང་། །ནགས་ཀྱི་རྩི་དང་རྩི་བོ་ཆེ། །བྱི་སྐུ་ཧ་ལ་ཛཱ་ཏི་དང་། །ཨ་མྲྀཏ་སྦྱར་བ་བཅང་བའོ། །ལྟེ་དྲི་འདྲེ་གསོད་རུ་རྟ་ནག །བདུད་རྩི་རྒྱ་ཚིལ་ས་ཚིལ་དང་། །བྱི་སྐུ་ཧ་ལ་མི་ཕག་བཅུད། །བྱུག་པའི་རྫས་སུ་བཤད་པ་ཡིན། །རུས་ཆེན་
མནན་ལ་བདུག་པ་བྱ། །ཉི་མའི་འོད་ལ་མུན་པ་བཞིན། །ཇོ་བོ་རྗེ་དང་། རྒྱ་བརྩོན་འགྲུས་སེང་གེའི་འགྱུར།།      །།༄༅༅། །རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ཎི་སཱ་དྷ་ནཾ། བོད་སྐད་དུ། ཕྱག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་པའི་ཐབས། བཅོམ་ལྡན་འདས་ཕྱག་ན་

73-1-228a

རྡོ་རྗེ་ལ་ཕྱག་འཚལ་ལོ། །ལྷག་པའི་ཁྲོ་རྒྱལ་སྐྱོན་ཀུན་ལས་རྒྱལ་བ། །རྣམ་དག་བྱང་ཆུབ་སེམས་ཅན་དོན་མཛད་པ། །གོས་སྔོན་ཕྱག་ན་རྡོ་རྗེ་ལ་བཏུད་དེ། །དེ་ཡི་སྒྲུབ་ཐབས་སེམས་ཅན་ཕན་ཕྱིར་བཤད། །འདི་ལ་ལྷག་པར་དབང་བའི་སྔགས་པ་ནི། །སྙིང་རྗེ་ཡིས་ནི་ཡིད་ནི་གཅུགས་
གྱུར་ཅིང་། །ལྷག་པར་མོས་པ་བརྟན་པོའི་ཡིད་ཅན་ནི། །བྱང་ཆུབ་སེམས་ཀྱི་རྣམ་པས་རབ་ཏུ་བརྒྱན། །དཀོན་མཆོག་གསུམ་ལ་གཅིག་ཏུ་སྐྱབས་སུ་སོང་། །བླ་མའི་རྗེས་གནང་ཐོབ་ཅིང་ཡོན་ཏན་ལྡན། །རང་འདོད་ལྷ་དང་བླ་མ་དབྱེར་མེད་ལྷ། །ཤིན་ཏུ་བརྩོན་ལྡན་དབང་དུ་གྱུར་པ་ཡིས། །སྔ་བར་
ལངས་ཏེ་སྙིང་གར་ཉི་མ་ལ། །ཧཱུཾ་ཡིག་སྔོན་པོ་བུང་བ་ལྟ་བུའི་འོད། །འོད་གསལ་བ་ནི་བློ་ལྡན་གྱིས་བལྟས་ནས། །ཁ་ལ་སོགས་པ་རབ་ཏུ་དག་པར་བྱ། །ཙནྡན་ཨ་ཀར་ཛཱ་ཏི་ཨེ་ལ་དང་། །རམས་དང་སོ་བ་ཤིང་གི་ལོ་མ་ཡིས། །བསྲེས་པའི་དྲི་ཞིམ་ཆུ་ཡིས་བྱུགས་པ་ལ། །མེ་ཏོག་སྔོན་པོས་ཉེ་བར་
བརྒྱན་བྱས་ཏེ། །ཤ་ཁར་དྲི་སོགས་བདུག་པ་དག་གིས་ནི། །བདུག་ཅིང་ཡིད་དུ་འོང་བར་གྱུར་པ་ཡིས། །ཉེ་བར་འཚེ་བའི་འཇིགས་པ་རྣམ་སྤོངས་ཏེ། །ཡངས་ཤིང་འཇམ་པའི་སྟན་ལ་རབ་འདུག་ནས། །དེ་ནས་ཁམས་གསུམ་རྣམ་པར་རྒྱལ་བ་ཡི། །བདག་ཉིད་ཁྲོ་རྒྱལ་གཙོ་བོ་དག་ཏུ་ནི། །
རྣམ་པར་བསྒོམས་ནས་གཡས་ཀྱི་སྡིགས་མཛུབ་ལ། །རཾ་ཡིག་དམར་པོ་རྣམ་པར་བསྒོམ་པར་བྱ། །དེ་ནས་དེ་ལས་བྱུང་བའི་ཉི་མ་ལ། །ཧཱུཾ་ཡིག་སྔོན་པོ་ལས་ནི་བྱུང་བ་ཡི། །མི་བཟད་པ་ཡི་རྡོ་རྗེ་རྩེ་དགུ་པ། །འོད་ཟེར་རབ་ཏུ་འཕྲོས་པ་བསམ་པར་བྱ། །དེ་ནས་ཕྱོགས་བཅུ་དག་ཏུ་ནི། །ཁྲོས་
པས་སྔགས་ནི་བརྗོད་བྱ་ཞིང་། །གོ་རིམས་ཇི་བཞིན་སེ་གོལ་གྱིས། །གནས་བདག་རྣལ་འབྱོར་བསྲུང་བར་བྱ། །དེ་ལ་གནས་ལ་སོགས་པ་བསྲུང་བའི་སྔགས་ནི། ཨོཾ་བཛྲ་ཀྲོ་དྷ་སརྦ་བིགྷྣཱཾ་ཧ་ན་ཧ་ན་ཧཱུཾ་ཕཊ་རཀྵ་རཀྵ་སྭཱ་ཧཱ་ཞེས་བྱའོ། །དེ་ནས་སྔོན་གསུངས་ཉིད་ཀྱིས་ནི། །དྲི་ཞིམ་ཆུ་ཡིས་
དཀྱིལ་འཁོར་ཡང་། །བྱས་ནས་མེ་ཏོག་དགྲམ་པར་བྱ། །ཨརྒྷཾ་ལ་སོགས་ཧཱུཾ་བཟླས་བྱ། །དེ་ནས་རང་གི་སྙིང་གར་འོད་ཟེར་གྱི་ཕྲེང་བའི་ལྕགས་ཀྱུས་བཀུག་པའི་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའི་དགེ་འདུན་གྱིས་ནམ་མཁའི་ཕྱོགས་སུ་ཉེ་བར་གནས་པར་

73-1-228b

ལྷག་པར་མོས་ཏེ། དེ་རྣམས་ལ་ཡང་དག་པའི་དད་པ་ཉེ་བར་བསྐྱེད་དེ། དེ་ཀུན་བླ་ན་མེད་པའི་མཆོད་པ་རྣམ་པ་བདུན་བྱའོ། །དུས་གསུམ་བཞུགས་པའི་སངས་རྒྱས་ལ། །ལུས་ངག་ཡིད་ཀྱིས་ཕྱག་འཚལ་ལོ། །རབ་གུས་རྒྱ་ཆེའི་མཆོད་པ་ཡིས། །བདེ་གཤེགས་རྣམས་ལ་ཉེ་བར་མཆོད། །
འཇིགས་པས་དེ་མདུན་མ་ལུས་པའི། །སྡིག་པ་བྱས་པ་བཤགས་པར་བགྱི། །སངས་རྒྱས་སོགས་བགྱིས་བསོད་ནམས་ལ། །དེང་འདིར་རྗེས་སུ་ཡི་རང་ངོ་། །ཆོས་ཀྱི་འཁོར་ལོ་བསྐོར་སླད་དུ། །བདེ་གཤེགས་རྣམས་ལ་བསྐུལ་བར་བགྱི། །བདེ་གཤེགས་མྱ་ངན་འདའ་བཞེད་ལ། །དེ་
རྣམས་ཡུན་རིང་གནས་གསོལ་འདེབས། །གསུང་མཆོག་རང་བཞིན་བསོད་ནམས་དང་། །དགེ་བ་གཞན་ཡང་བདག་གིས་ནི། །གང་དེ་ཐམས་ཅད་བྱང་ཆུབ་དག །གཅིག་ཏུ་བསྡུས་ནས་བསྔོ་བར་བགྱི། །དེ་ནས་སྐྱབས་སུ་འགྲོ་བྱ་སྟེ། །དུས་གསུམ་འབྱུང་བའི་སངས་རྒྱས་དང་། །ཐེག་
ཆེན་དམ་ཆོས་འདི་དང་ནི། །དགེ་འདུན་སངས་རྒྱས་སྲས་ཚོགས་ལ། །བྱང་ཆུབ་བར་དུ་སྐྱབས་སུ་མཆི། །དེ་ནས་བདག་ཉིད་དབུལ་བྱ་སྟེ། །བདག་ཉིད་ཐལ་མོ་སྦྱར་ནས་ནི། །སངས་རྒྱས་རྣམས་ལ་འབུལ་བར་བགྱི། །བདག་ཀྱང་རབ་ཏུ་བཞེས་མཛོད་ལ། །ཇི་ལྟར་དགྱེས་པ་བཞིན་དུ་སྦྱོར། །དེ་
ནས་བྱང་ཆུབ་ཏུ་སེམས་བསྐྱེད་པར་བྱ་སྟེ། ངོ་མཚར་ཆེ་མཆོག་བྱང་ཆུབ་ནི། །བླ་མེད་དག་ནི་ཐོབ་ནས་སུ། །ཤིན་ཏུ་མཐར་ཐུག་མྱ་ངན་འདས། །འགྲོ་བ་མྱུར་དུ་དགོད་པར་བགྱི། །དེ་ནས་ལམ་ནི་བསྟན་བྱ་སྟེ། །གོང་འདིར་རྒྱལ་དང་རྒྱལ་བའི་སྲས། །སྙིང་རྗེ་མཆོག་གི་བསྟན་བྱ་བ། །རྡོ་རྗེ་
ཐེག་པ་བླ་ན་མེད། །མཆོག་གྱུར་སྙིང་པོ་བསྟེན་པར་བགྱི། །དེ་ནས་སྙིང་རྗེ་བསྒོམ་བྱས་ཏེ། །འཁོར་བའི་རྒྱ་མཚོ་མ་བརྒལ་བའི། །འགྲོ་བ་མ་ལུས་རྣམས་བལྟས་ནས། །སྡུག་བསྔལ་སེལ་བར་བྱེད་པ་ཡི། །སྙིང་རྗེ་མཐར་ཐུག་བསྒོམ་པར་བྱ། །དེ་ནས་སྟོང་ཉིད་བསྒོམ་བྱ་སྟེ། །གཟུང་དང་
འཛིན་པ་མི་ལྡན་པའི། །མ་དཔྱད་དངོས་པོ་ཡོད་མ་ཡིན། །དེ་ཕྱིར་འགྲོ་ཀུན་སྟོང་པ་ཉིད། །གཉིས་སུ་མེད་པ་བསྒོམ་པར་བྱ། །དེ་ནས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བྱ་བ་འདིས་བྱིན་གྱིས་བརླབ་པར་བྱའོ། །དེ་ནས་རྒྱུ་མཐུན་པ་ལས་ཡོངས་སུ་རྫོགས་པའི་འབྱུང་བ་བཞི་སྟེ། 

73-1-229a

དཀྱིལ་འཁོར་བཞིའི་རྣམ་པའི་འབྱུང་བ་ཆེན་པོ་བཞི་བསྒོམ་པར་བྱའོ། །དེ་ལ་ལཾ་སྐྱེས་སེར་པོ་སྟེ། །མཐར་ནི་མ་ལུས་རྡོ་རྗེས་མཚན། །གྲུ་བཞི་པ་ལ་རབ་རྒྱས་པའི། །དབང་ཆེན་དཀྱིལ་འཁོར་བསྒོམ་པར་བྱ། །དེ་ནས་བྃ་སྐྱེས་དཀར་པོ་ནི། །ཟླུམ་པོ་བུམ་པས་མཚན་པ་སྟེ། །
ཆུ་ཡི་དཀྱིལ་འཁོར་ཟླུམ་པོ་དེ། །སྟེང་དུ་གནས་པ་ཡང་དག་བསམ། །དེ་ནས་རྃ་སྐྱེས་དམར་པོ་ནི། །གྲུ་གསུམ་རྃ་གྱིས་རྩེ་མཚན་པ། །འབར་ཞིང་འཕྲོ་བ་སྟེང་དུ་ནི། །མེ་ཡི་དཀྱིལ་འཁོར་བསམ་པར་བྱ། །དེ་ནས་ཡྃ་སྐྱེས་སྔོན་པོ་ནི། །སྦྱར་གཞུ་ལྟ་བུ་འོད་འབར་བ། །བ་དན་དང་བཅས་
མཉམ་གཞག་པས། །རླུང་གི་དཀྱིལ་འཁོར་བལྟ་བར་བྱ། །འབྱུང་བ་བཞི་ནི་ཡང་དག་གྱུར། །རྒྱས་འཕྲོ་གཞལ་ཡས་ཁང་པ་སྟེ། །རྣམ་སྣང་མཛད་ཀྱི་རང་བཞིན་ནི། །ཐར་པའི་གྲོང་མཆོག་བསྒོམ་པར་བྱ། །གྲུབ་བཞི་པ་ལ་སྒོ་བཞི་པ། །རྟ་བབས་བཞི་དང་ཡང་དག་ལྡན། །མཆོད་སྣམ་བཞི་ཡིས་
ཡོངས་སུ་བསྐོར། །ཀ་བ་བརྒྱད་ཀྱིས་ཉེ་བར་མཛེས། །རྡོ་རྗེ་ཐིག་གིས་རབ་ཏུ་བསྐོར། །དྲ་བ་དྲ་བ་ཕྱེད་པས་བརྒྱན། །བླ་རེ་རྔ་ཡབ་མེ་ལོང་དང་། །གོས་དང་མེ་ཏོག་ཕྲེང་གིས་བརྒྱན། །མཆོད་པ་ལྔ་ཡིས་ཡང་དག་བརྒྱན། །འདོད་ཡོན་ལྔ་དང་ཡང་དག་ལྡན། །གླུ་དང་གར་སོགས་མཆོད་
པ་ནི། །ལྷ་རྫས་བསྣམས་པའི་ལྷ་མོའི་ཚོགས། །བ་དན་རྩེ་མོ་རླུང་བསྐྱོད་པའི། །དྲིལ་བུ་དག་ནི་ཕྱོགས་སྒོར་འཁྲོལ། །ཁ་དོག་ལྔ་ཡི་འོད་ཚོགས་ཀྱིས། །མ་ལུས་པ་ཡི་ཁམས་ནི་གསལ། །དེ་ཡི་ལྟེ་བར་པདྨ་ནི། །སྣ་ཚོགས་འདབ་མ་གེ་སར་བཅས། །དགའ་བོ་ལ་སོགས་ཀླུ་བརྒྱད་ནི། །
གདན་དུ་རྣམ་པར་བསམ་པར་བྱ། །ཤར་ལ་སོགས་པའི་ཕྱོགས་བཞི་རུ། །དེ་བཞིན་གདན་ནི་བསྒོམ་བྱ་སྟེ། །པདྨ་འཇིགས་བྱེད་སྟག་དང་ནི། །ཆུ་སྲིན་མ་ནི་རིམ་བཞིན་ནོ། །དེ་ནས་ཕྱི་འཕར་བཞི་པོ་ལ། །རོ་ལངས་སྔོན་པོ་བྲིས་པ་ཡིས། །དཀར་དང་ནག་དང་སྔོ་སྐྱ་དང་། །དེ་བཞིན་སེར་སྐྱ་བསྒོམ་པར་
བྱ། །དེ་ནས་དབུས་གདན་ཤེས་རབ་ནི། །དབྱངས་ཡིག་བཅུ་དྲུག་ངོ་བོ་ཉིད། །རབ་རྒྱས་ཟླ་བ་བསྒོམ་བྱ་བ། །མེ་ལོང་ཡེ་ཤེས་ངོ་བོ་ཉིད། །དེ་སྟེང་སུམ་ཅུ་རྩ་བཞི་ཡི། །གསལ་བྱེད་སྙིང་རྗེའི་བདག་ཉིད་ནི། །ཉི་མའི་འོད་གསལ་རྣམ་བསམས་པ། །མཉམ་ཉིད་ཡེ་ཤེས་ངོ་བོ་ཉིད། །དེ་སྟེང་བྃ་གྱིས་ཧཱུཾ་

73-1-229b

བྱས་པ། །ཡང་དག་སྐྱེས་ལས་རྩེ་ལྔ་པའི། །རྡོ་རྗེ་ལྟེ་བར་ཧཱུཾ་གིས་མཚན། །སོ་སོར་ཀུན་རྟོག་ཡེ་ཤེས་བསྒོམ། །ཧཱུཾ་ལས་སངས་རྒྱས་སྤྲོ་བྱ་སྟེ། །བསྡུས་ཏེ་དེ་ལ་དེ་རྣམས་བཞུགས། །ཡང་དག་འདུས་ནས་དབྱེར་མེད་པ། །དེ་ནི་བྱ་བ་གྲུབ་པར་བསྒོམ། །ཟླ་བ་ཉིས་མཚན་ཧཱུཾ་ཡིག་ལས། །སྐྱེས་པའི་རང་
ཉིད་གོས་སྔོན་ཅན། རྣམ་དག་ཡེ་ཤེས་ངོ་བོ་ཉིད། །ཡུན་རིང་ཕྱག་ན་རྡོ་རྗེ་བསམ། །དབུ་སྐྲ་ཁམ་སེར་གྱེན་དུ་འགྲེང་། །ཁྲོ་གཉེར་སྤྱན་ནི་དམར་བ་སྟེ། །མཆེ་བ་གཙིགས་པ་ཡི་ནི་ཞལ། །གློག་གི་ལྗགས་ཀྱིས་འཇིགས་བྱེད་པ། །འཇིག་དུས་རླུང་གི་དབུགས་དང་ནི། །ཧཱུཾ་ཡིག་འདོན་པ་ཡི་ནི་ཞལ། །
ཧ་ཧར་དགོད་པ་རྩུབ་ཅིང་དྲག །རྒྱ་མཚོ་ཆེན་པོ་ལྟོ་ཆེ་བ། །པདྨ་དབུ་ལ་རྒྱས་པར་རོ། །དགའ་བོ་ཉེར་དགའ་རྣ་ཆ་སྟེ། །པདྨ་ཆེན་པོ་ཚངས་སྐུད་དོ། །དུང་སྐྱོང་ཏཀྵ་ལག་གདུབ་བོ། །རིགས་ལྡན་ཀརྐོ་དབུ་རྒྱན་ཏེ། །ལྷག་ཅན་ནོར་རྒྱས་རྐང་གདུབ་བོ། །ཕྲག་པ་ཟླ་བ་ཉི་མས་བརྒྱན། །སེང་གེ་རྐང་བརྒྱད་
པགས་པའི་གོས། །རྡོ་རྗེ་ལྕགས་སྒྲོག་རྐེད་པར་དཀྲིས། །བྲང་འགྲོ་ཆེན་པོ་གསོལ་བས་སོ། །རང་མདོག་རྡོ་རྗེ་རྩེ་གསུམ་ནི། །གཡས་ཀྱི་ཕྱག་ན་བསྣམས་པ་སྟེ། །རྡོ་རྗེ་དབྱུག་ཆེན་མི་བཟད་པ། །གཡོན་གྱི་ཕྱག་ན་བསྣམས་པའོ། །ཉི་མའི་གདན་དང་རྒྱབ་རྟེན་བྲག །གཡོན་བརྐྱང་པ་ཡི་ཞབས་ཀྱིས་
གནས། །དེ་ནས་དབྱུག་པའི་སྟེང་བསམ་པ། །མཁའ་ལ་འགྲོ་བདག་བྱ་ཁྱུང་སྟེ། །ཁྲོས་ཞིང་ལུས་ནི་ཆེ་ལ་དཔའ། །ཁ་གདངས་སྣ་ཚོགས་མདོག་ཅན་ནོ། །རྐང་པ་གཉིས་ཀྱིས་སྦྲུལ་རྒྱལ་པོ། །ཟ་བཞིན་པ་ནི་ཉིད་དུ་བྱེད། །ཟླུམ་ཞིང་དམར་ལ་འབར་བའི་སྤྱན། །འཇིགས་ཤིང་ཀུན་ཏུ་སེང་
སེང་ལྟ། །དེ་ནས་སྙིང་གར་ཉིས་མཚན་ཧཱུཾ། །དེ་ཉིད་འོད་ཟེར་འཕྲོ་བའོ། །དེ་བཞིན་སྤྱི་བོ་མགྲིན་པ་སྙིང་། །ཨོཾ་ཨཱཿཧཱུཾ་ཡོངས་བསྒོམ་པར་བྱ། །ཞེས་བྱ་བ་ནི་སྦྱོར་བ་དང་པོ་ཞེས་བྱ་བའི་ཏིང་ངེ་འཛིན་ཏོ། །དེ་ནས་སྙིང་གར་ཉིས་གནས་པའི། །ས་བོན་ལས་བྱུང་ཟླ་བ་ནི། །འཇིགས་བྱེད་ལ་སོགས་
བརྒྱད་ལ་དགོད། །དེ་རྣམས་ཉི་གནས་དེ་བཞིན་ནོ། །དེ་ལ་ཟླ་ཉི་སྦྱོར་བ་ལས། །དེ་བཞིན་ས་བོན་བརྒྱད་དུ་གྱུར། །ཧཱུཾ་ཧཱུཾ་ཕུཾ་ཀུཉྫ་ཤཾ་རཾ་མཾ། །ཐིག་ལེ་ནཱ་ད་ལྡན་རིམ་བཞིན། །དེ་རྣམས་ཡོངས་སུ་གྱུར་པ་ལས། །མཚན་མ་བརྒྱད་ནི་གོ་རིམས་བཞིན། །འོག་ནས་འབྱུང་ཞིང་སྒྲུབ་པ་པོས། །རང་

73-1-230a

རང་ས་བོན་ཡང་དག་ལྡན། །དེ་ནས་ཟླ་བ་ཉི་མ་དང་། །མཚན་མ་ས་བོན་ལས་བྱུང་བའི། །དཀྱིལ་འཁོར་བ་ནི་གོ་རིམས་བཞིན། །རང་རང་གདན་གནས་བསམ་པར་བྱ། །དེ་ལ་ཁམས་གསུམ་རྣམ་རྒྱལ་ནི། །ཀུན་དུ་སྔོ་བ་འབར་བའི་སྐུ། །རྩ་ཞལ་གནག་ཅིང་དཀར་བ་ནི། །གཡས་པའི་
ཞལ་ཏེ་སྤྱན་མིག་དམར། །གཡོན་ཞལ་དམར་ཞིང་ཤ་རྒྱས་ལ། །ཅུང་ཞིག་མཆེ་བ་གཙིགས་པའི་ཞལ། །སྟག་ལྤགས་གོས་གྱོན་ཁྲོས་པ་སྟེ། །ཉི་གནས་རྣམ་པར་འཕྲོ་བའི་འོད། །རྡོ་རྗེ་རལ་གྲི་ལྕགས་ཀྱུ་རྣོ། །གཡས་ཀྱི་ཕྱག་ན་བསྣམས་པའོ། །དྲིལ་བུ་ཞགས་པ་མི་མགོ་ནི། །གཡས་
ལས་ཅིག་ཤོས་ཕྱག་ན་བསྣམས། །གཡོན་བརྐྱང་བ་ཡི་ཞབས་གནས་པ། །ཤར་གྱི་གདན་ལ་བསམ་པར་བྱ། །སྒེག་ཅིང་ལང་ཚོ་དང་ལྡན་ཞིང་། །རྒྱན་རྣམས་ཀུན་གྱིས་རྣམ་པར་བསམ། །ལྷོ་ཕྱོགས་གདན་གྱི་ཉི་མ་ལ། །ནག་པོ་ཆེན་པོ་དེ་ནས་བལྟ། །སྤྱན་གསུམ་པོ་ནི་དམར་བ་སྟེ། །གནག་ཅིང་
ཁྲོས་པ་མཆེ་བ་གཙིགས། །སྐྲ་ནི་ཁམ་པ་གྱེན་དུ་འགྲེང་། །གང་ཡང་རུང་བའི་རྒྱན་གྱིས་མཛེས། །སྦྲུལ་མཆོག་མཆོད་ཕྱིར་ཐོགས་པ་སྟེ། །གཡོན་བརྐྱང་བ་ཡི་ཞབས་ཀྱིས་གནས། །རྩེ་མོ་རྣོ་ཞིང་འཇིགས་པ་ཡི། །ཙནྡན་ཕུར་ཤིང་གཡས་ན་བསྣམས། །གཡོན་པའི་ཕྱག་ན་ཞགས་པ་ནི། །
བསྣམས་ཤིང་མི་བཟད་པ་ཡི་གཟུགས། །ནུབ་ཀྱི་གདན་གྱི་ཟླ་བ་ལ། །ཀླུ་ཡི་རྒྱལ་པོ་བ་རུ་ཎ། །དཀར་པོ་གདེངས་ཀ་བདུན་གྱིས་སྒེག །མཉམ་པའི་ཞབས་ཀྱིས་ཡང་དག་གནས། །སྡོང་པོ་དང་བཅས་པདྨ་ཕྱེ། །གཡས་པའི་ཕྱག་ན་བསྣམས་པའོ། །དེ་ནས་གཡོན་པའི་ཕྱག་གིས་ནི། །ཕྱག་
བྱེད་ཚུལ་དུ་བསྒོམ་པར་བྱ། །བྱང་གི་གདན་གྱི་ཉི་མ་ལ། །གསང་བའི་དབང་ཕྱུག་རྣམ་ཐོས་སྲས། །སེར་ཞིང་བཟང་ལ་མཆོག་ཏུ་དགའ། །ལྷ་རྫས་རྒྱན་གྱིས་རྣམ་པར་བརྒྱན། །ཡིད་བཞིན་ནོར་བུ་འོད་འཕྲོ་བ། །གཡས་པ་ཡི་ནི་ཕྱག་ན་བསྣམས། །གསེར་གྱི་ནེའུ་ལེ་ཁ་འོག་བལྟས། །གཡོན་པ་
ཡི་ནི་ཕྱག་ན་བསྣམས། །རྟག་ཏུ་བསམ་པ་ཡོངས་རྫོགས་བྱེད། །གཡོན་བརྐྱང་བ་ཡི་ཞབས་ཀྱིས་གནས། །སྤྱན་ནི་ཀུན་དུ་དམར་ཞིང་ཆེ། །ལྟོ་བ་ཆེ་ཞིང་སྦོམ་པ་བསམ། །དེ་ནས་ཕྱི་འཕར་བསམ་བྱ་སྟེ། །ཤར་གྱི་གདན་གྱི་ཉི་མ་ལ། །སྲོག་ཟ་དག་ནི་ཆེ་ཞིང་གནག །གྲི་དང་སྡིགས་མཛུབ་ཀྱི་ནི་ཕྱག །ལྷོ་ཕྱོགས་

73-1-230b

གདན་གྱི་ཉི་མ་ལ། །དེ་ནས་དབུགས་འཕྲོག་པ་ནི་བལྟ། །དཱུར་བ་ལྟ་བུ་ལྗང་ཞིང་རིང་། །པགས་པ་དང་ནི་སྡིགས་མཛུབ་ཕྱག །ནུབ་ཀྱི་གདན་གྱི་ཉི་མ་ལ། །དམར་པོ་ཁྲག་ཟ་བསྒོམ་པར་བྱ། །སྦལ་བའི་ཁྲག་གིས་གང་བ་ཡི། །ཐོད་པ་དག་ནི་ཕྱག་ན་བསྣམས། །བྱང་གི་གདན་གྱི་ཉི་མ་ལ། །ཤ་ཟ་བ་ནི་
རྣམ་པར་བསམ། །ཐལ་བའི་མདོག་ཅན་དྲི་དང་ཞག །ཕྱག་བསྣམས་འཇིགས་པར་བྱེད་པའོ། །བཞི་པོ་འདི་ནི་སྟོབས་དང་ལྡན། །བང་མཐོ་གྲིམས་པ་ཡི་ནི་ལུས། །མཆེ་བ་གཅིགས་ཤིང་མི་སྡུག་པ། །སྨ་ར་སྨིན་མ་མགོ་སྐྱེས་ལྡན། །ཧ་ཧར་བཞད་བཅས་ལྗགས་འདྲིལ་བ། །ཟླུམ་ཞིང་དམར་བ་ཡི་ནི་
སྤྱན། །སྨིན་མ་འཁྱོག་ཅིང་གསུས་པོ་ཆེ། །འཇིག་དུས་ཀྱི་ནི་མེ་ཡི་འོད། །དྲག་པོ་སྟག་ལྤགས་ཀྱི་ནི་གོས། །ཐོད་པའི་རུས་པས་རྣམ་པར་བརྒྱན། །ཞལ་གཅིག་ཕྱག་གཉིས་ཁྲོས་པ་སྟེ། །གཡོན་བརྐྱང་བ་ཡི་ཞབས་ཀྱིས་གནས། །ཁམས་གསུམ་རྣམ་རྒྱལ་ཞེས་སོགས་ནས། །མདངས་
འཕྲོག་མ་ཡི་མཐར་ཐུག་པར། །སྙིང་གར་ས་བོན་གདན་མཚན་མ། །དེ་ཉིད་གསུམ་དང་ལྡན་པ་བསམ། །གཞན་ཡང་ཡོངས་རྫོགས་དཀྱིལ་འཁོར་ནི། །སྔགས་རིག་པ་ཡིས་བལྟས་ནས་སུ། །རང་སྙིང་ས་བོན་འོད་ཟེར་གྱིས། །ཡེ་ཤེས་འཁོར་ལོ་ཡོངས་སུ་དགུག །དེ་ནས་མདུན་གྱི་ནམ་
མཁའ་ལ། །དེ་བཞིན་གཤེགས་པ་ཡང་དག་བཞུགས། །ཧཱུཾ་གིས་བགེགས་ནི་བསྐྲད་བྱ་སྟེ། །བསང་གཏོར་ལ་སོགས་སྦྱར་བར་བྱ། །ཛཿཧཱུཾ་བཾ་ཧོཿས་དགུག་པ་དང་། །གཞུག་དང་བཅིང་དང་དགྱེས་པར་ནི། །ཆོ་གས་དམ་ཚིག་ཡེ་ཤེས་ནི། །གཅིག་ཏུ་གྱུར་པར་རྣམ་པར་བསམ། །དེ་ནས་
སྙིང་སྔགས་འོད་ཟེར་གྱིས། །ནམ་མཁའི་རྒྱལ་བ་བཀུག་ནས་སུ། །བཞུགས་གསོལ་མེ་ཏོག་ལ་སོགས་མཆོད། །བརྟུལ་ཞུགས་དབང་བསྐུར་གསོལ་བ་གདབ། །དེ་ནས་ཡེ་ཤེས་ཆུས་གང་བའི། །རྒྱལ་བདག་རིན་ཆེན་བུམ་པ་ཡིས། །བདག་དང་དཀྱིལ་འཁོར་བཅས་པ་ལ། །
སངས་རྒྱས་རྣམས་ཀྱིས་དབང་བསྐུར་བསྒོམ། །དེ་ནས་དབང་བསྐུར་ཆུར་གྱུར་པས། །ཀུན་གྱི་དབུ་ལ་མི་བསྐྱོད་དེ། །རལ་པའི་དབུ་རྒྱན་གྱིས་བརྒྱན་པའི། །མིག་སྨན་ལྟ་བུར་བསྒོམ་པར་བྱ། །དེ་ནས་སྙིང་གའི་ས་བོན་འོད། །བྱུང་བའི་ལྷ་མོའི་ཚོགས་རྣམས་ཀྱིས། །ཡང་དག་མཆོད་

73-1-231a

བཞིན་བདག་ཉིད་ཀྱིས། །དཀྱིལ་འཁོར་ཡང་དག་ལྡན་པར་བསམ། །དེའི་རྗེས་སུ་དཀྱིལ་འཁོར་པ་ཀུན་གྱི་གླུ་གསུམ་གྱིས་དཀྱིལ་འཁོར་གྱི་དབང་ཕྱུག་གི་བདག་ཉིད་ལ་བསྟོད་བཞིན་པར་བལྟའོ། །གསང་བའི་བདག་པོ་གཙོ་ཆེན་པོ། །སངས་རྒྱས་སྐུ་དང་འདྲ་བའི་འོད། །
གཏི་མུག་རྡོ་རྗེའི་རང་བཞིན་བདག །རྡོ་རྗེའི་སྐུ་ལ་ཕྱག་འཚལ་བསྟོད། །གསང་བའི་བདག་པོ་གཙོ་ཆེན་པོ། །སངས་རྒྱས་གཟུངས་དང་འདྲ་བའི་ངག །འདོད་ཆགས་རྡོ་རྗེའི་རང་བཞིན་བདག །རྡོ་རྗེའི་གསུང་ལ་ཕྱག་འཚལ་བསྟོད། །གསང་བའི་བདག་པོ་གཙོ་ཆེན་པོ། །སངས་རྒྱས་ཐུགས་དང་
མཚུངས་པའི་ཡིད། །ཞེ་སྡང་རྡོ་རྗེའི་རང་བཞིན་བདག །རྡོ་རྗེའི་ཐུགས་ལ་ཕྱག་འཚལ་བསྟོད། །ཅེས་པ་ནི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པའོ། །དེ་ནས་རྗེས་སུ་མཐུན་པའི་གཟུགས་ཀྱིས་འགྲོ་བའི་དོན་བྱེད་པ་ལ་རྗེས་སུ་གནས་པར་བྱ་སྟེ། སྙིང་གའི་འོད་ཀྱིས་བསྐུལ་ཏེ་དཀྱིལ་
འཁོར་པ་ཀུན་གྱིས་འོད་སྤྲོ་ཞིང་རང་གི་ལུས་ལ་སྡུད་པར་བསམ་པར་བྱའོ། །རང་ཉིད་དཀྱིལ་འཁོར་གྱི་གཙོ་བོ་ལས་རང་གི་འོད་ཡོངས་སུ་སྤྲོས་ཏེ། སེམས་ཅན་གྱི་དོན་བྱས་ཤིང་རང་ཉིད་ལ་རང་ཉིད་ཀྱི་འོད་མ་ལུས་པར་བསྡུ་བར་བྱའོ། །ཞེས་པ་ནི་ལས་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་
པའོ། །གཞན་ཡང་བསྒོམས་པས་སྐྱོ་ན་ངལ་བསོ་ཞིང་ཡོངས་སུ་བཟླས་པར་བྱ་སྟེ། སྔགས་ཀྱི་ཡི་གེ་ཕྲེང་བ་ཉིང་ཀའི་ཉི་མ་ལ་དཀྱིལ་འཁོར་གྱི་རྣམ་པར་གོ་རིམས་བཞིན་དུ་རྣམ་པར་བལྟས་ནས། སྒྲ་ཁྲོ་བོའི་ངག་གིས་རབ་ཏུ་བཟླས་སོ། །རྡོ་རྗེའི་བཟླས་པ་མགལ་མེའི་འཁོར་ལོའི་རིམ་པས་གཞན་
ཉིད་ཀྱང་ངོ་། །ཇི་སྲིད་མི་སྐྱོ་བའི་བར་དུ་བླ་མའི་མན་ངག་གིས་བཟླས་སོ། །སྔགས་ནི་ཏདྱ་ཐཱ། བྷོ་བྷོ་པན་ནཱ་ག་ཨ་དྷི་པ་ཏ་ཡེ། ཨི་དཾ་ནཱི་ལཱཾ་བ་ར་དྷ་ར་ཤ་རཱི་རཾ། བཛྲ་པཱ་ཎི་ཧྲྀ་ད་ཡཾ། ཡཿས་མ་ཏི་ཀྲ་མ་ཐ། ཨུཏྶཱ་ད་ནཱཾ། བྷ་བི་ཥྱ་ཏི། ཏདྱ་ཐཱ། བུདྡྷ་བུདྡྷ། བི་བུདྡྷ་བི་བུདྡྷ། མ་ཏི་ཀྲ་མ་ཐཱ། ཧ་ར་ཧ་ར་ནཱ་ག་ནཱཾ། པྲ་ཧ་ར་པྲ་ཧ་ར། ནཱ་ག་ནཱཾ། 
ཙྪིནྡ་ཙྪིནྡ་ནཱ་ག་ཧྲྀ་ད་ཡཱ་ནི། བྷིནྡ་བྷིནྡ་ནཱ་ག་མརྨ་ཎི། བི་ས་མ་ད་ནཱ་ག་ཤ་རཱི་རཾ། བི་སྥོ་ཊ་ཡ་ནཱ་ག་ཡ་ནཱ་ག་ཡ་ཏདྱ་ཐཱ། ཧཱུཾ་ཕཊ། ནཱ་ག་བི་དཱ་ར་ཎ་ཡ་ཧཱུཾ་ཕཊ། ནཱ་གཱ་ཨུཏྶཱ་དཱ་ཡ་ཕཊ། ནཱི་ལཱཾ་བཱ་ས་ནཱ་ཡ་ཕཊ། ཨ་པྲ་ཏི་ཧ་ཏ་བ་ལ། པ་ར་ཀྲ་མཱ་ཡ་ཕཊ། ཀྲི་ཏཱནྟཱ་ཡ་ཕཊ། ཀྲི་ཏཱནྟཱ་རུ་པཱ་ཡ་ཕཊ། རོ་ཥ་ཎཱ་ཡ་

73-1-231b

ཕཊ། ཏྲཱ་སཱ་ནཱ་ཡ་ཕཊ། ཀུཥྨ་ཎྜོཏྶཱ་ཡ་ཕཊ། པྲེ་ཏ་བི་ཤཱ་ཙི་བི་ནཱ་ཤ་ཀ་རཱ་ཡ་ཕཊ། ཡཀྵ་ཨ་པསྨཱ་ར་བི་ནཱ་ཤ་ཀ་རཱ་ཡ་ཕཊ། ཧ་ས་ཧ་ས། དྷ་ར་དྷ་ར། མཱ་ར་ཡ་མཱ་ར་ཡ། ན་ཤ་ཡ་ན་ཤ་ཡ། སརྦ་བིགྷྣཱཾ། བི་ནཱ་ཤ་ཀ་རཱ་ཡ་ཕཊ། སརྦ་ཤ་ཏྲཱུཾ་སཾ་གྷ་བི་ནཱ་ཤ་ཀ་རཱ་ཡ་ཕཊ། ནཱི་ལཱཾ་བ་ར་དྷ་ར་བཛྲ་པཱ་ཎི་རཱ་
ཛྙཱ་པ་ཡ་ཏི་སྭཱ་ཧཱ་ཞེས་བྱའོ། །བཟླས་པ་དང་བསྒོམས་པས་སྐྱོ་ན་སྔགས་པས་སྐྱོ་བ་ཡོངས་སུ་སྤང་བའི་ཕྱིར་ལུས་གསོ་བའི་ཆོ་ག་བྱ་སྟེ། བདུད་རྩི་ལྔ་ཞུ་གང་བ་ཡི། །སྤྱི་བོའི་སྟེང་དུ་ཟླ་དཀྱིལ་འཁོར། །ཨོཾ་ཡིག་བྱིན་རླབས་བསྒོམ་པར་བྱ། །དེ་ཡི་འོད་ཟེར་དཀར་སྤྲོས་ཏེ། །ཡེ་ཤེས་བདུད་རྩི་སངས་
རྒྱས་ལ། །འབད་པས་ཡང་དག་དགུག་པར་བྱ། །དེ་དག་ཉིད་ལས་བསྒྲུབ་བྱ་སྟེ། །རོ་གཅིག་གཉིས་མེད་དག་ཏུ་བྱ། །སྲོག་དང་རྩོལ་བ་བསྡམས་པ་ལས། །དེ་ནས་ལེགས་རྒྱུན་ལ་བབས་པས། །བདག་ཉིད་ལུས་ལ་སོགས་པ་སྟེ། །གསོ་བཞིན་པར་ནི་བལྟ་བར་བྱ། །དེ་ནས་ལངས་
པར་འདོད་ན་ནི། །སྨོན་ལམ་དག་ཀྱང་གདབ་པར་བྱ། །ཕྱག་ན་རྡོ་རྗེ་གོས་སྔོན་ཅན། །གོ་འཕང་མྱུར་དུ་ཐོབ་པར་ཤོག །བསོད་ནམས་འདི་ཡིས་འགྲོ་བ་ནི། །མ་ལུས་པ་ཡིས་ཐོབ་པར་ཤོག །དེ་ནས་དེ་ཉིད་གསུམ་བརྗོད་པས། །རང་སྙིང་ས་བོན་རང་དཀྱིལ་འཁོར། །བསྡུས་ཏེ་ལྷ་ཡི་
རྣམ་པ་ཡི། །ང་རྒྱལ་དག་གིས་གནས་པར་བྱ། །ཉིན་མོ་ཐུན་གཉིས་རྣལ་འབྱོར་པས། །རང་ཉིད་ས་བོན་ལས་བྱུང་བའི། །ཡོངས་སུ་རྫོགས་པའི་དཀྱིལ་འཁོར་ཀུན། །སྔོན་བཞིན་དུ་ནི་རབ་ཏུ་བྱ། །དེ་ལྟར་ནུབ་ཀྱི་ཐུན་མཚམས་སུ། །འོན་ཀྱང་ཁྱད་པར་ཡོངས་གྱུར་ཏེ། །ཡེ་ཤེས་འཁོར་ལོ་
གཤེགས་སུ་གསོལ། །འཁོར་ལོ་རང་གི་གཉུག་མར་བསྡུ། །ཡེ་ཤེས་འཁོར་ལོ་གཤེགས་སུ་གསོལ་བའི་སྔགས་ནི། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འདི་རུ་བྱོན་པར་མཛད། །
མུཿཞེས་བྱའོ། །ཡེ་ཤེས་འཁོར་ལོ་གཤེགས་སུ་གསོལ། །གཉུག་མར་དཀྱིལ་འཁོར་བསྡུ་བྱ་སྟེ། །མལ་སྟན་ཀླུ་རུ་བསྒོམ་བྱ་ཞིང་། །བློ་ལྡན་སེང་གེ་བཞིན་དུ་ཉལ། །སྔོན་གསུངས་ཀླུ་ནི་གསུམ་པོ་ཡིས། །ཐོ་རངས་བདག་ལ་བསྐུལ་བཞིན་པར། །ཀླུ་དབང་རང་ཉིད་བསམ་པར་བྱ། །ལངས་ནས་

73-1-232a

སྔོན་གྱི་ཞག་བཞིན་དུ། །བསྒོམ་པའི་རིམ་པ་རབ་ཏུ་བྱ། །དངོས་སུ་ཐུན་ནི་སོ་སོ་ལ། །ཇི་སྲིད་དངོས་གྲུབ་གྱུར་དེ་བཞིན། །བགེགས་རྣམས་ཉེ་བར་ཞི་དོན་དུ། །སྔགས་རིག་པ་ཡིས་ཐུན་ལ་ནི། །ཇི་ལྟའི་གདམས་ངག་གིས་སྦྱངས་ཏེ། །ཆོ་ག་བཞིན་དུ་གཏོར་མ་སྦྱིན། །རྒྱལ་
བས་དབང་བསྐུར་བར་བསམས་ནས། །རང་ཉིད་རྣམ་པར་དག་འདོད་བྱ། །རྩ་སྔགས་ལན་གསུམ་བརྗོད་ནས་སུ། །བློ་ལྡན་བྱམས་པས་གསོལ་བར་བསམ། །རྐང་འོག་སྣ་ཚོགས་རྡོ་རྗེ་ནི། །ཧཱུཾ་ཡིག་ལས་ནི་བྱུང་བར་བསམ། །དེ་ཡི་སྟེང་དུ་ཧཱུཾ་སྐྱེས་པའི། །རྡོ་རྗེ་རྩེ་མོ་ལྔ་པ་བསམ། །
དེ་སྟེང་འབར་བའི་རྡོ་རྗེ་ཡི། །གུར་ནི་ཧཱུཾ་ལས་བྱུང་བ་སྟེ། །བགེགས་ཀུན་ཞི་བར་བྱ་བའི་ཕྱིར། །བསྒོམ་པ་རྣལ་འབྱོར་པ་ཡིས་བྱ། །སྒྲུབ་པོའི་བསྒོམ་དང་རྨི་ལམ་དང་། །མཚན་མ་རྙེད་གྱུར་དེ་ནས་ནི། །སྟེགས་བུ་རབ་ཏུ་བསྒྲུབ་པའི་ཕྱིར། །ལྷ་རྣམས་ཀུན་ལ་མཆོད་པར་བྱ། །རི་བོ་
དབེན་པ་སྐྱེད་ཚལ་དང་། །རྒྱ་མཚོའི་འགྲམ་དང་ཆུ་བོའི་ངོགས། །ཡིད་འོང་བྱང་ཆུབ་སེམས་དཔའི་གཞི། །མ་མོའི་ཁང་པ་གཉུག་གཞི་འམ། །གཞན་ཡང་ས་ཡི་ཆ་ལ་ནི། །ཉེ་བར་འཚེ་བ་བྲལ་བ་རུ། །དངོས་གྲུབ་སྒྲུབ་པའི་ཆོ་གའི་ཕྱིར། །སྔོན་གསུངས་དྲི་ཡི་ཆག་ཆག་གདབ། །བཅུ་དྲུག་
ལོ་ལོན་མིག་ཡངས་མ། །ལུས་རྒྱས་མགོ་སྐྱེས་གནག་པ་ཡི། །ཁྲོ་ཞིང་སྣ་ནི་ཉག་གྱུར་པའི། །བུ་མོ་བློ་ལྡན་གྱིས་བསྒྲུབ་བྱ། །བླངས་ཏེ་ཆུ་དང་འོ་མ་དང་། །དྲི་ཞིམ་ཆུ་དང་ལྡན་པ་ཡིས། །ཁྲུས་བྱས་གོས་སྔོན་སར་པ་ནི། །དེ་ལ་ཡོངས་སུ་བསྐོན་པར་བྱ། །མེ་ཏོག་སྔོན་པོའི་ཕྲེང་བ་དང་། །
སྐྲ་ཡི་ཞགས་པས་དཀྲི་བར་བྱ། །དབྲལ་བར་ཐིག་ལེ་བྱས་ནས་སུ། །དེ་ལ་ལྕགས་ཀྱུས་བྲི་བར་བྱ། །ལྕགས་ཀྱུ་རྩེ་མོ་རྣོན་པོ་ནི། །དེ་ནས་ལག་པ་གཡས་སུ་སྦྱིན། །མཁྲང་ཞིང་གསར་དུ་བྱས་པ་ཡིས། །སྣོད་ནི་དེ་ཡི་གཡོན་དུ་སྦྱིན། །བསྲུང་བའི་སྔགས་ཀྱི་བཟླས་པ་ཡིས། །དེ་ལ་
ཡུངས་ཀར་བརྡེག་པར་བྱ། །འཁོར་ལོས་སྒྱུར་བའི་སྔགས་འདི་ནི། །བརྒྱ་རྩ་བརྒྱད་དུ་བརྗོད་པར་བྱ། །དེ་ལ་འཁོར་ལོས་སྒྱུར་བའི་སྔགས་ནི་འདི་ཡིན་ཏེ། ཨོཾ་བཛྲ་པཱ་ཎི་ཡེ་སརྦ་ཨརྠ་སིདྡྷི་ཀུ་རུ་སྭཱ་ཧཱ། ཞེས་བྱའོ། །དེ་ནས་སྔགས་པས་རྔན་བྱིན་ཏེ། །ཐུན་མོང་སྦྱིན་པས་འདི་མཉེས་བྱ། །བདེན་

73-1-232b

བྲལ་མཚམས་གནས་བཟང་པོ་ཡི། །ས་ནི་འདི་ཡིས་བླང་བར་བྱ། །ཞི་བའི་སྔགས་ནི་བརྗོད་པར་བྱ། །ས་ནི་ནག་པོ་བརྐོ་བར་བྱ། །ཕྱུང་སྟེ་སྣོད་དུ་བླུགས་ནས་སུ། །རུང་བའི་གནས་སུ་བླངས་ལ་བཞག །དེ་ནས་ས་ནི་བླངས་པ་ལ། །དྲི་ཞིམ་ཆུ་བཟླས་དེར་གདབ་བྱ། །མཐོ་གང་དང་བཅས་སྲ་བ་
ཡི། །ཁྲུ་གང་མཐོ་བའི་སྟེགས་སུ་དགེ། །ས་ནི་ནག་པོ་དང་བཅས་པའི། །སྔོན་གསུངས་དྲི་ཡིས་བྱུག་པར་བྱ། །སྟེགས་བུ་མེ་ཏོག་སྔོན་པོ་ཡིས། །དུས་གསུམ་དུ་ནི་ཉེ་བར་བརྒྱན། །སྟེགས་བུའི་འོག་གི་ས་ལ་ནི། །དེ་ནས་གོས་སྔོན་རྣལ་འབྱོར་གྱིས། །ཏིང་འཛིན་གསུམ་ནི་རབ་བྱས་ཏེ། །
བུམ་པར་ལྷག་པར་གནས་པར་བྱ། །ནག་ནོག་རྩ་བ་མེད་མཆུ་འཕྱང་། །མགྲིན་རིང་ལྟོ་བ་ཆེ་བ་ལ། །འབྲས་དང་འབྲས་བུ་གསུམ་འོ་མ། །རིན་ཆེན་སྨན་དང་ཡང་དག་ལྡན། །མེ་ཏོག་འབྲས་བུ་ལྡན་གྱུར་པའི། །ཡལ་ག་དག་གིས་ཁ་བརྒྱན་ཏེ། །སྔོན་པོ་མགུལ་བར་གོས་ནི་སྔོ། །སྣ་
ཚོགས་མེ་ཏོག་དག་གིས་བརྒྱན། །བསམ་གཏན་དཀྱིལ་འཁོར་ཡང་དག་ལྡན། །རྗེས་སུ་མཐུན་པའི་གདན་ལ་གནས། །ཇི་སྲིད་བརྒྱ་རྩ་བརྒྱད་དུ་གནས། །རྩ་བའི་སྔགས་ནི་བཟླས་པར་བྱ། །མཎྜལ་དགུ་ཡི་རིམ་པ་ནི། །དེ་ནས་སྟེགས་བུ་ངག་ལ་བྱ། །ལྷ་ཡི་གནས་སུ་ཡང་དག་
གནས། །དཀྱིལ་འཁོར་རྣོན་པོ་འཕྲོ་ཞུ་ལས། །ལྷ་ཡི་དཀྱིལ་འཁོར་དགེ་བ་ནི། །དཀྱིལ་འཁོར་སྟེང་དུ་ཡང་དག་བལྟ། །ཡེ་ཤེས་དཀྱིལ་འཁོར་བཀུག་ནས་སུ། །ཡང་དག་མཆོད་དེ་རབ་ཏུ་གཞུག །བཅིང་དང་དགྱེས་བྱའི་ཆོ་ག་ཡིས། །ཡང་ནི་ཨརྒྷཾ་ལ་སོགས་སྦྱིན། །སྣ་ཚོགས་མཆོད་
པས་མཆོད་ནས་ནི། །བསྟོད་དང་སྔགས་ནི་རབ་ཏུ་བཟླ། །ཞག་ནི་ཉི་ཤུ་རྩ་གཅིག་ཏུ། །དེ་ལྟར་ཉིན་རེ་བཞིན་དུ་བྱ། །སྔགས་པས་བཟླས་པ་ཁྲི་ཕྲག་གཅིག །ཉི་མ་རེ་རེ་ཡོངས་སུ་བཀང་། །དེ་ལྟར་བྱེད་པའི་རྣལ་འབྱོར་པས། །ཞི་དང་རྒྱས་དང་དབང་དང་ནི། །མངོན་སྤྱོད་ལས་ནི་ཐམས་ཅད་དུ། །
དེས་ནི་ངེས་པར་འགྲུབ་པར་འགྱུར། །སྐྱོན་རྣམས་ཐམས་ཅད་ཟད་འགྱུར་ཏེ། །ཡོན་ཏན་ཐམས་ཅད་ཐོབ་པར་འགྱུར། །དུག་དང་ཉེ་བའི་དུག་དང་ནི། །ཀླུ་ཡི་དུག་ནི་མེད་པར་འགྱུར། །འཇིགས་པ་བརྒྱད་ནི་ཉམས་འགྱུར་ཞིང་། །རིམས་དང་ནད་རྣམས་དེ་བཞིན་ནོ། །མི་མ་ཡིན་ནི་འབྲོས་འགྱུར་

73-1-233a

ཞིང་། །རྒྱལ་པོ་རྐུན་པོ་དབང་དུ་འགྱུར། །སྡུག་བསྔལ་སྐལ་ངན་དབུལ་བ་དང་། །རྩོད་པས་སྡིག་པ་བསགས་པ་རྣམས། །མི་འདོད་པ་ཡི་སྦྱོར་བ་ཡང་། །རིམ་གྱིས་ཟད་ཅིང་ཟིལ་གནོན་འགྱུར། །གཡང་དང་ཚེ་དང་ལེགས་སྟོབས་དང་། །རིག་པ་དག་དང་འཁོར་གྱི་
རིགས། །ཕྱུགས་དང་ནོར་ནི་ཐམས་ཅད་དང་། །ནོར་དང་འབྲུ་ཡང་འཕེལ་བར་འགྱུར། །གཞན་ཡང་སྦྱོར་བ་ནི་ཡང་དག་པར་བསྐུལ་བ་རྩ་བའི་སྔགས་ནི་ཆུ་ལ་ལན་གསུམ་བཟླས་ཏེ། ཤར་ཕྱོགས་སུ་ཁ་བལྟས་པས་གཡོན་པའི་ལག་པ་ཕྱག་བྱེད་པ་ལྟར་བྱས་ཏེ་སྔགས་པས་ཁྱོར་བ་
གསུམ་བཏུང་བར་བྱའོ། །ཟླ་བ་དྲུག་གི་ནང་དུ་ཤེས་རབ་དང་ལྡན་པར་འགྱུར་རོ། །སོར་ལྔ་བརྐོས་པའི་འོག་གིས་དཀར་པོ་དང་། འབྲས་ཟན་ལ་རྩ་བའི་སྔགས་ཀྱིས་ལན་བརྒྱ་རྩ་བརྒྱད་བཟླས་ཏེ། རྐུན་པོ་ལ་མངོན་པར་ཕྱོགས་ཏེ་གཏོར་ན་རྐུན་པོ་རེངས་པར་བྱེད་དོ། །མི་མ་ཡིན་པས་
བཟུང་བ་ལ་དེ་བཞིན་དུ་དེའི་དཔུང་པ་ལ་ཡོངས་སུ་བཟླས་ཏེ་སྐུད་པ་སྔོན་པོས་བཅིངས་ན་གྲོལ་བར་འགྱུར་རོ། །བྱི་ལ་འདུག་པའི་ས་ལ་དེ་བཞིན་དུ་ཡོངས་སུ་བཟླས་ཏེ་དྲི་ཆུ་རྨ་བྱའི་སྒྲོའི་ཆུན་པོས་གཏོར་ཏེ། གྲུབ་པའི་དོན་དུ་ཆག་ཆག་བྱས་ན་བྱི་ལ་རབ་ཏུ་ཞི་བར་འགྱུར་རོ། །བ་གླང་གི་སྐེ་འམ་
རཱ་ལ་དེ་བཞིན་དུ་བཟླས་ཏེ། སྐུད་པ་སྔོན་པོ་ལ་མདུད་པ་བརྒྱ་བྱས་ན་ཕྱུགས་ཀྱི་ནད་ཞི་བར་འགྱུར་རོ། །མི་མང་པོ་འཆི་བའི་སར་སྔར་བཞིན་དུ་བཟླས་པའི་དྲི་ཆུ་ལ་འབུ་ཀའི་གཤོག་པས་གཏོར་ཞིང་ཡུངས་ཀར་སེར་པོ་གཏོར་ན་ཞི་བར་འགྱུར་རོ། །ཁྲག་དང་ཉ་དང་། ཤ་དང་འབྲས་དང་། 
མོན་སྲན་གྲེའུ་བསྲེས་པའི་ཟན་དང་། ཁ་དོག་ཀུན་དང་ཏིལ་དང་། སྤོས་དང་། མོན་སྲན་གྲེའུ་བཅོས་པ་ལ་སོགས་པ་སའི་ཁམ་སྐྱོང་ཕོར་གང་བ་ལ་དེ་བཞིན་དུ་བཟླས་ཏེ། གཏོར་མ་དེ་གང་གི་ཁྱིམ་དུ་གཏོར་བ་དེ་རྩ་རྒྱུད་འཆད་དོ། །རང་གི་སྙིང་གའི་ཉི་མ་ལས་སྤྲོས་པའི་རབ་ཏུ་གཏུམ་
པའི་འོད་ཟེར་གྱི་ཚོགས་ཀྱིས་ཁམས་གསུམ་དུ་གཏོགས་པའི་དུག་བསྲེགས་བཞིན་པར་རྣམ་པར་བལྟས་ལ་རང་གི་སྙིང་གའི་ས་བོན་ལས་སྤྲོས་པའི་རབ་ཏུ་དཀར་བའི་འོད་ཟེར་གྱི་བདུད་རྩིས་རྒྱས་པར་སྣང་བཞིན་པར་བལྟ་བར་བྱའོ། །ཁམས་གསུམ་གྱི་དུག་ཉམས་པར་བྱེད་པའི་

73-1-233b

སྦྱོར་བའོ། །ནམ་མཁའ་ལ་བསྐྱོད་པའི་ཉི་མའི་དཀྱིལ་འཁོར་ལ་ཁཾ་སེར་པོ་རྣམ་པར་བསམས་ལ། དེ་ཡོངས་སུ་གྱུར་པ་ལས་མདོག་སེར་བའི་དུག་གི་ཕུང་པོར་ཉི་མའི་དཀྱིལ་འཁོར་རྣམ་པར་བསྒོམ་པར་བྱའོ། །དེ་ནས་ཉི་མ་ལས་བྱུང་བའི་དུག་གི་འོད་ཟེར་གྱི་ཚོགས་ཀྱི་ཟེག་མའི་རྣམ་པ་
རྨུགས་པ་ལྟ་བུ་ལྷུང་སྟེ། སེམས་ཅན་གྱི་འཇིག་རྟེན་དང་སྣོད་ཀྱི་འཇིག་རྟེན་གཉིས་ཁྱབ་པར་བྱའོ། །བརྟན་པ་དང་གཡོ་བ་དུག་ཏུ་བྱ་བའི་སྦྱོར་བའོ། །གལ་ཏེ་ཡང་དུག་དེ་མེད་པར་བྱེད་འདོད་ན། གོང་དུ་བསྟན་པའི་སྦྱོར་བས་བྱའོ། །དུག་བསླང་བའོ། །ཀླུ་རྣམས་ཚར་བཅད་པར་
འདོད་ན། ཀླུའི་གནས་སུ་སྔགས་དེ་ཉིད་ཁྲོ་བོའི་ཚིག་གིས་བཟླས་པར་བྱའོ། །ཀླུ་འབྲོས་པར་འགྱུར་རོ། །གལ་ཏེ་མི་འབྲོས་ན་དེ་རྣམས་སྤྱི་བོ་དང་མིག་འགགས་སོ། །མཚོ་ཡང་སྐམ་མོ། །གཞན་ཡང་ཆུའི་སྐྱེ་བོ་འཆི་བར་འགྱུར་རོ། །ཀླུ་ལ་སོགས་པ་ཚར་བཅད་པའོ། །དེ་ནས་ཕྱག་ན་
རྡོ་རྗེ་གཏུམ་པོའི་སྔགས་ཀྱི་སྦྱོར་བ་བརྗོད་པར་བྱ་སྟེ། ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཨ་ན་ལེ། པ་ར་ལེ། ཧཱུཾ་རུ་ར་སྭཱ་ཧཱ་ཞེས་པ་འདིས་སྐེ་ཚེའི་མར་ཁུ་ལ་བརྒྱ་རྩ་བརྒྱད་བཟླས་ཏེ། དེའི་རྐང་པ་ལ་བྱུགས་ན་དཔག་ཚད་བཅུ་རུ་འགྲོ་ཞིང་སོང་ཡང་
མི་འཆད་དོ། །རྐང་པའི་ཉེ་བར་སྤྱོད་པའོ། །ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཨོཾ་ཀཱ་མེ་ཀ་མ་ཡ་ཀ་བཛྲི་ནི་ཀ་མ་ལ་ཡ། ཀཱ་མ་བཱ་སི་ནི་ཀ་མེ་ཤྭ་རི་ནི་མིང་ཏི་ཀ་མ་བཛྲི་ནི། ཨཱ་ནཱ་ཡ་ལ་གྷུ་ཆེ་གེ་མོ། མེ་བ་ཤ་མ་ནཱ་ཡ་སྭཱ་ཧཱ་ཞེས་བྱ་བའི་སྔགས་བཟླས་
པར་བྱའོ། །དེ་ནས་གྲོག་ལ་ཚོན་སྣ་མ་ལུས་པས་སོར་བརྒྱད་ཀྱི་ཚད་ཕྱག་གཡས་པ་དང་གཡོན་པ་གཉིས་ན་ས་བོན་གྱིས་གང་བའི་ཤིང་ཐོག་དང་། རྡོ་རྗེ་བསྣམས་པའི་རྡོ་རྗེ་འདོད་མ་བྲིས་ལ་སྙིང་གར་དྲི་ཞིམ་པོའི་མེ་ཏོག་ལ་བརྒྱ་རྩ་བརྒྱད་བཟླས་ཤིང་སྙིང་གར་དུས་གསུམ་དུ་
བརྡེག་པར་བྱའོ། །ཞག་བདུན་ཕྲག་གསུམ་ན་ཕྱག་རྒྱའི་སྦྱོར་བས་བརྒྱ་བྱིན་གྱི་བུ་མོ་ཡང་འགུགས་པར་འགྱུར་རོ། །དེ་ལ་ཕྱག་རྒྱ་ནི་ལག་པ་གཉིས་ཕན་ཚུན་སྦྱར་ཏེ། སོར་མོའི་རྩེ་མོ་ཁ་བལྟ་བུར་བྱས་ཏེ། རྡོ་རྗེའི་རྣམ་པར་མཐེབ་ཆེན་གཉིས་སྡིགས་མཛུབ་གཉིས་ལ་སྦྱར་

73-1-234a

བར་བྱའོ། །དབང་དང་དགུག་པའོ། །ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ན་པ་ཏ་ཡེ། ཏདྱ་ཐཱ། ན་མཿཙཎྜེ་ཡཀྵི་ནི། ཨི་སྠི་ནི། ཙཱ་པི་ཤ་ཧི་ས་ད་ཛཱ་མེ་ད་མ་ཧཱ་སྭཱ་ཧཱ་ཞེས་བྱ་བས་ཤར་གྱི་གྲྭར་ཕྱག་ན་རྡོ་རྗེའི་སྐུ་གཟུགས་ཀྱི་མདུན་དུ་སྟོང་ཕྲག་གཅིག་
བཟླས་པར་བྱའོ། །དེ་ནས་ཕྱག་ན་རྡོ་རྗེ་ལ་ཅི་འབྱོར་པས་མཆོད་པ་བྱས་ལ། སྔགས་བརྒྱ་བརྒྱའི་བར་དུ་བཟླས་པ་བྱས་ལ་ཉལ་བར་བྱའོ། །དེའི་ཚེ་གང་བསམས་པ་དེ་འགྲུབ་པའམ་མི་འགྲུབ་པ་དེ་ཉིད་རྗོད་པར་བྱེད་དོ། །རྨི་ལམ་བརྟག་པའོ། །ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎི་ཡེ། མ་
ཧཱ་ཡཀྵ་སེ་ནཱ་པ་ཏ་ཡེ། ཨོཾ་བཱ་རཱ་ཧཱི། མ་ཧཱ་བཱ་རཱ་ཧཱི། བཛྲ་བཱ་རཱ་ཧཱི། མ་ཧཱ་བཛྲི། མ་ནུ་ཥ་བཛྲ། ཨཱ་བེ་ཤ་ཡ། དེ་བ་ཧྲྀ་ད་ཡ། ཨཱ་བེ་ཤ་ཡ། ཡཀྵ་ཧྲྀ་ད་ཡ། ཨཱ་བེ་ཤ་ཡ། གནྡྷརྦ་ཧྲྀ་ད་ཡ། ཨཱ་བེ་ཤ་ཡ། དཾཥྚྲ་མ་དཾ་ཥྚྲ། ཨཱ་བེ་ཤ་ཡ། ཨཱ་བེ་ཤ་ཡ། ཧཱུཾ་ཧཱུཾ་ཧཱུཾ། གརྫ་གརྫ། གྷུརྞ་གྷུརྞ ། ནརྡ་ནརྡ། ཀཾ་པ་ཀཾ་པ། 
ཨཱ་བེ་ཤ་ཡ། ཨཱ་བེ་ཤ་ཡ། བྷཱུ་མཽ་པ་ཏ་ཡ། སིདྡྷ་ཙཎྜ་བཛྲ་པཱ་ཎི་རཱ་ཛྙཱ་པ་ཡ་ཏི་སྭཱ་ཧཱ། ཞེས་བྱ་བས་ཨརྐ་དཀར་པོའི་ཤིང་ལ་སོར་བརྒྱད་ཀྱི་ཚད་ལ་མིའི་པགས་པ་བསྣམས་པའི་རྡོ་རྗེ་ཕག་མོ་མདུན་དུ་བཞག་སྟེ། འབུམ་ཕྲག་གཅིག་བཟླས་པ་བྱའོ། །དེ་ནས་ནག་པོའི་ཕྱོགས་ཀྱི་ཚེས་བརྒྱད་
ནས་ནུབ་གསུམ་དུ་སྨྱུང་བར་གནས་པས། ལྷ་མོའི་མདུན་དུ་བུམ་པའི་ཆུ་ལ་བརྒྱ་ཕྲག་བརྒྱད་མངོན་པར་བསྔགས་པ་བྱས་ལ། མེ་ཏོག་གི་ཕྲེང་བ་ཡང་དག་པར་བཞག་སྟེ། ཇི་སྲིད་རང་ཉིད་ལ་མ་བབས་ཀྱི་བར་དེ་སྲིད་དུ་བཟླས་པ་བྱའོ། །དེ་ནས་དགོས་དགུ་བྱེད་པའི་གཡོག་པོས་
བུམ་པའི་ཆུས་ཁྲུས་བྱས་ལ། མེ་ཏོག་གི་ཕྲེང་བ་རྐེད་པ་ལ་དཀྲིས་ན་དེ་ནས་བབ་པས་ལེགས་པར་གནས་པར་འགྱུར་རོ། །དེ་ནས་བཟུང་སྟེ་མཐོང་བ་ཙམ་གྱིས་ཐམས་ཅད་ལ་ཕེབས་པར་འགྱུར་རོ། །སྤྲ་ཚིལ་དང་མྱོས་བྱེད་ཀྱི་རང་བཞིན་གྱི་སྦྲུལ་ལ་བརྒྱ་ཕྲག་བརྒྱད་མངོན་པར་
བཟླས་ཏེ། ལྷ་ཆེ་གེ་མོ་ཤིག་ཅེས་ཀྱང་བརྗོད་པར་བྱའོ། །དེ་ནས་སྦྲུལ་གྱིས་འཛིན་པར་འགྱུར་རོ། །ཆུ་བོས་བར་དུ་ཆོད་པའི་གྲོང་ཡང་འཛིན་ཏོ། །དེ་ཡང་གཞན་གྱིས་འཚོ་བའི་ནུས་པ་མེད་དོ། །གཞན་ཡང་འཚོ་བར་འདོད་ན་བཟུང་བའི་མི་ལྷ་མོའི་མདུན་དུ་ཁྲུས་བྱས་ལ། ལྷ་

73-1-234b

མོ་འོ་མས་ཁྲུས་བྱས་ན་དེ་ནས་སོས་པར་འགྱུར་རོ། །ཚ་བ་གསུམ་གྱིས་ལྟོ་བ་བཀང་བའི་སྤྲ་ཚིལ་གྱི་རང་བཞིན་གྱི་གཟུགས་བྱས་ཏེ། མྱོས་བྱེད་ཀྱི་ཚེར་མས་ཕུག་ལ་སེང་ལྡེང་གི་མེ་ལ་ཉིན་ཞག་བདུན་དུ་དུས་གསུམ་གདུངས་ན་གང་གི་མིང་ནས་གཟུང་བ་དེ་དབང་དུ་འགྱུར་རོ། །དེ་ལྟར་ཕོ་བ་
རིས་དཀར་པོའི་སྦྱིན་སྲེག་ཞག་བདུན་དུ་བྱས་ན་དེ་དབང་དུ་འགྱུར་རོ། །དེ་ཡང་ལྷ་མོ་གཡོན་པའི་ཕྱག་གིས་རྡོ་རྗེ་བཟུང་བ། གཡས་པའི་ཕྱག་གིས་མདུང་འཕྱར་བ། མི་བཟད་ཅིང་བོང་ཐུང་ལ་ཁྲོ་བོའི་ལྟ་སྟངས་ཅན་གཡས་བརྐྱང་བའི་ཞབས་ཀྱིས་གནས་པའོ། །ལས་ཀྱི་སྦྱོར་བ་གཞན་དང་གཞན་
ནི་གཞུང་མངས་པས་འཇིགས་པས་ན་འདིར་མ་བརྗོད་དོ། །སྔོན་གྱི་སློབ་དཔོན་བྱས་པའི་གཞུང་། །བལྟས་ནས་མ་རྒྱས་འཁྲུགས་པ་ལས། །དེ་དག་རྒྱས་ཕྱིར་འདི་བྱས་ལ། །བདག་ལ་མཁས་རྣམས་བཟོད་པར་མཛོད། །གོས་སྔོན་ཕྱག་ན་རྡོ་རྗེའི་སྒྲུབ་ཐབས་ནི། །རབ་རྒྱས་སྦྱོར་བ་དང་ལྡན་བྱས་
པ་ལས། །བདག་གིས་བསོད་ནམས་བསགས་པ་འདི་ཡིས་ནི། །གོས་སྔོན་རྡོ་རྗེ་འཛིན་པ་དགྲ་རྒྱལ་ཤོག །ཀླུའི་བདག་པོ་ཐམས་ཅད་ཀྱིས་ཕྱག་བྱས་པའི་ཕྱག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་པའི་ཐབས། སློབ་དཔོན་མཁས་པ་ཆེན་པོ་དཔལ་སྟོང་ཉིད་ཏིང་ངེ་འཛིན་རྡོ་རྗེའི་ཞལ་སྔ་ནས་
མཛད་པ་རྫོགས་སོ།།      །།རང་གི་བླ་མ་ཉིད་ལས་ཐོས་ནས་ཁམས་པ་དགེ་སློང་བ་རི་ལོ་ཙཱ་བ་ཆེན་པོ་རིན་ཆེན་གྲགས་པས་བསྒྱུར་ཅིང་། སླད་ཀྱིས་རྒྱ་གར་གྱི་མཁན་པོ་ཨ་བྷི་ཡུག་ཏ་དང་ཞུ་དག་བྱས་ནས་གཏན་ལ་ཕབ་པའོ། །༄༅༅། །རྒྱ་གར་སྐད་དུ། བཛྲ་པཱ་ཎི་
སཱ་དྷ་ནཾ། བོད་སྐད་དུ། ཕྱག་ན་རྡོ་རྗེའི་སྒྲུབ་ཐབས། ལག་ན་རྡོ་རྗེ་ལ་ཕྱག་འཚལ་ལོ། །གཉིས་མེད་ཡེ་ཤེས་བཅུ་དྲུག་ལོན། །ཡེ་ཤེས་མངའ་བདག་གཞན་སྣང་མཛད། །ལྕང་ལོར་གསང་བ་བཏུལ་ནས་བཞུགས། །དཔལ་ལྡན་དེ་ལ་ཕྱག་འཚལ་ཏེ། །འགྲོ་བ་བསྒྲལ་བར་བྱ་བའི་
ཕྱིར། །བདག་གིས་སྒྲུབ་ཐབས་འདི་བརྩམ་མོ། །དེ་ལ་དང་པོར་དབང་ཐོབ་པའི། །དམ་གནས་རིགས་ལྡན་རྣལ་འབྱོར་དེས། །ཉམས་དགའི་གནས་སུ་བསམ་གཏན་བྱ། །ཁྲུས་བྱས་བདེ་བའི་སྟན་འདུག་ནས། །སེམས་ཅན་དོན་ཕྱིར་དྲན་བྱའོ། །རང་ཉིད་ཟླ་སྟེང་ཧཱུཾ་ལས་ནི། །འོད་སྤྲོས་

73-1-235a

བླ་མ་སངས་རྒྱས་སོགས། །ནམ་མཁར་དམིགས་ལ་ཕྱག་འཚལ་མཆོད། །སྡིག་པ་བཤགས་སོགས་བདུན་པ་བསམ། །དེ་ནས་བྱམས་སོགས་བསྒོམས་ནས་ནི། །བརྟན་གཡོ་སྲིད་གསུམ་སྟོང་པར་བསམ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ནས་ཧྲཱིཿདང་ཨཾ་ཡིག་
ལས། །སྣ་ཚོགས་པདྨ་ཉི་དཀྱིལ་འཁོར། །དེ་སྟེང་ཧཱུཾ་བསམ་དེ་ལས་འོད། །འོད་འཕྲོས་གུར་དང་ས་གཞི་སོགས། །དྲ་བར་ར་བ་རྡོ་རྗེ་འབར། །ཧཱུཾ་ལས་འོད་འཕྲོས་རྡོ་རྗེར་གྱུར། །དེ་ལས་སྐུར་གྱུར་སྤྲིན་དཀར་མདོག །རྡོ་རྗེ་གཏུམ་པོ་འཇིགས་པ་ཆེ། །གཡས་པ་རྡོ་རྗེ་ཐུགས་ཀར་གསོར། །གཡོན་
པས་ཁུ་ཚུར་དཀུ་རུ་བརྟེན། །མཚན་དང་དཔེ་བྱད་འབར་བས་མཛེས། །ཕྱག་རྒྱ་ལྔ་སོགས་རྒྱན་ལྡན་ཞིང་། །ཡེ་ཤེས་སྐུ་ལ་དྲི་མས་སྟོང་། །གནས་གསུམ་ཨོཾ་སོགས་བྱིན་གྱིས་བརླབས། །དེ་ནས་ཐུགས་ཀའི་ཧཱུཾ་ལས་ནི། །འོད་འཕྲོས་ཡེ་ཤེས་སེམས་དཔའ་དགུག །མཆོད་བསྟོད་བྱས་ལ་
དགུག་གཞུག་བྱ། །དེ་ནས་ཧཱུཾ་ལས་འོད་འཕྲོས་པས། །ཕྱོགས་བཅུ་རྒྱལ་བའི་ཐུགས་ཀར་ཕོག །ཕྱོགས་བཅུ་རྒྱལ་བའི་ཐུགས་ཀ་ནས། །བུམ་ཆུ་ཐོགས་པའི་ལྷ་མོ་ཡིས། །དབང་བསྐུར་དག་བྱས་རིགས་བདག་པོ། །མི་བསྐྱོད་རྡོ་རྗེ་སྤྱི་བོར་འཛིན། །དེ་ནས་ཧཱུཾ་ལས་ལྷ་མོ་སྤྲུལ། །མཆོད་པ་
ཀུན་གྱིས་རབ་ཏུ་མཆོད། །ཡོན་ཆབ་མེ་ཏོག་བདུག་སྤོས་སྣང་། །དྲི་དང་ལྷ་བཤོས་སྒྲ་ཡིས་མཆོད། །བསྟོད་ལ་ཐུགས་ཀར་ཉི་གདན་ལ། །ཧཱུཾ་བསམས་སྔགས་ཀྱི་འོད་ཟེར་ཚུལ། །བསྐོར་བའི་ཚུལ་གྱིས་བཟླས་པ་བྱ། །ཨོཾ་བཛྲ་ཙཎྜ་སརྦ་དུཥྚཱནྟ་ཀ་ཧ་ན་ད་ཧ་པ་ཙ་ཧཱུཾ་ཕཊ། དེ་ནས་ཧཱུཾ་ལས་
འོད་འཕྲོས་པས། །འབྱུང་པོའི་ཚོགས་རྣམས་རབ་བཀུག་ནས། །གཏོར་མ་བདུད་རྩིར་བསམས་ལ་བསྔོ། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ནཱཾ། ཨཱདྱ་ནུད་པནྣ་ཏྭཱཏ་ཨོཾ་ཨཱཿཧཱུཾ་ཕཊ་སྭཱ་ཧཱ། ཚིམ་པར་བྱས་ལ་གནས་སུ་གཏང་། །ཨོཾ་ཨཱཿཧཱུཾ་མུཿ དེ་ནས་ཡེ་ཤེས་སེམས་དཔའ་དབྱེ། །མཆོད་བསྟོད་
བཟོད་གསོལ་སྨོན་ལམ་གདབ། །གཤེགས་པའི་སྔགས་ཀྱིས་གཤེགས་སུ་གསོལ། །དམ་ཚིག་སེམས་དཔའི་ང་རྒྱལ་གྱིས། །སྤྱོད་ལམ་ཀུན་དུ་གནས་པར་བྱའོ། །གཟུངས་སྔགས་ཕན་ཡོན་ཇི་ལྟར་གསུངས་པ་ཀུན། །འདི་ལ་མི་གནས་དེ་དག་འབྱུང་བ་མིན། །བདག་གིས་བསྒྲུབ་

73-1-235b

པའི་ནུས་པ་དེ་མེད་ཀྱང་། །སྙིང་རྗེའི་དབང་གིས་འགྲོ་ལ་ཕན་གདགས་ཕྱིར། །སྒྲུབ་ཐབས་རིན་ཆེན་འདུས་པ་འདི་བཤད་པས། །སྐུ་གསུམ་ཡིད་བཞིན་རིན་ཆེན་ཐོབ་པར་ཤོག །ཕྱག་ན་རྡོ་རྗེ་གོས་དཀར་པོ་ཅན་གྱི་སྒྲུབ་པའི་ཐབས། སློབ་དཔོན་ངག་གི་དབང་ཕྱུག་གྲགས་པས་མཛད་པ་རྫོགས་སོ།།      །།
ལོ་ཙཱ་བ་རིན་ཆེན་བཟང་པོས་བསྒྱུར་བའོ། །༄༅༅། །རྒྱ་གར་སྐད་དུ། བཛྲ་པཱ་ཎི་མཎྜལ་བི་དྷིཿ། བོད་སྐད་དུ། ཕྱག་ན་རྡོ་རྗེའི་དཀྱིལ་འཁོར་གྱི་ཆོ་ག །དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དཔལ་ལྡན་ཕྱག་ན་རྡོ་རྗེ་དང་། །བླ་མ་ལ་གུས་ཕྱག་འཚལ་ཏེ། །སྒྲུབ་པ་པོ་ལ་
ཕན་པའི་ཕྱིར། །དེ་ཡི་དཀྱིལ་འཁོར་ཆོ་ག་བརྩམ། །དཔལ་ཕྱག་ན་རྡོ་རྗེ་བསྒྲུབ་པར་འདོད་པའི་རྣལ་འབྱོར་པའི་དོན་དུ་དཀྱིལ་འཁོར་ཆོ་ག་འདི་བསྡུ་བར་བྱའོ། །དེ་ལ་སྔོན་དུ་བསྙེན་པ་བྱ་བ་ནི་སྒྲུབ་པའི་ཐབས་ལས་འབྱུང་བ་བཞིན་དུ་བདག་ཉིད་ལྷར་བསྐྱེད་ལ་སྙིང་པོ་འབུམ་བཟླས་པ་བྱ་
བའམ། ཡང་ན་ཇི་སྲིད་མཚན་མ་ཐོབ་པར་མ་གྱུར་གྱི་བར་དེ་སྲིད་དུ་བསྒོམ་པ་དང་བཟླས་པ་ནི་སྔོན་དུ་བསྙེན་པའི་ཆོ་གའོ། །དེ་ལྟར་བསྙེན་པ་རྫོགས་ནས་སའི་ཆོ་ག་བྱ་སྟེ། གཙུག་ལག་ཁང་ངམ། ཀུན་དགའ་ར་བའམ། ནགས་ཚལ་ལ་སོགས་པ་ཡིད་དུ་འོང་བའི་གནས་སུ་ས་བསླང་བ་དང་། 
ས་སྦྱང་བ་དང་། ས་གཟུང་བ་དང་། ས་བྱིན་གྱིས་བརླབ་པར་བྱས་ཏེ། དེ་ལ་བསླང་བ་ནི་གནས་ཀྱི་བདག་པོ་ལ་བསླང་བ་དང་། མཎྜལ་དང་དྲིའི་ཐིག་ལེ་དང་། མེ་ཏོག་གི་ཚོམ་བུ་བྱ་སྟེ། མཆོད་པ་དང་གཏོར་མ་བཤམས་ནས་ཨོཾ་ཨ་པྲ་ཏི་བི་ཀ་ར་ཤ་ཧཱུཾ་ཛཿཞེས་བྱ་བ་དང་། རྡོ་རྗེ་བསྡམས་པའི་
མཛུབ་མོ་གཉིས་བརྐྱང་ལ་ས་ལ་རེག་པར་བྱས་པས་སའི་ལྷ་མོ་འཁོར་དང་བཅས་པ་སྤྱན་དྲངས་ལ། སའི་ལྷ་མོ་མཆོད་པ་དང་། དེའི་འཁོར་ལོ་གཏོར་མ་བྱིན་ནས་གསོལ་བ་གདབ་པར་བྱ་སྟེ། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་
པ་ལ། །ལྷ་མོ་ཁྱོད་ནི་དཔང་དུ་གྱུར། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་ཀྱི་སྡེ། །ཕམ་པར་བྱ་སྟེ་དཀྱིལ་འཁོར་བྲི། །ཞེས་ལན་གསུམ་གྱི་བར་དུ་བརྗོད་ལ། ས་བྱིན་པར་བསམས་ཏེ་མཆོད་ལ་གཤེགས་སུ་གསོལ། དེ་ནས་སྦྱང་བ་ནི་

73-1-236a

དྲག་པོ་དང་ཞི་བའི་སྦྱིན་སྲེག་བྱའོ། །འདོམ་གང་ཉེ་འཁོར་དུ་ལྟེ་བ་ནུབ་ཙམ་མམ་པུས་མོ་ནུབ་ཙམ་བརྐོས་ལ་གསེག་མ་དང་། གྱོ་མོ་དང་། རུས་པ་ལ་སོགས་པ་བསལ་ལ་སྤོས་ཆུས་བྲན་ལ། ས་དེ་ཉིད་ཀྱིས་བཀང་ནས་སའི་ལྟས་བརྟག་པར་བྱ་སྟེ། ས་སྦྱང་བའི་ཆོ་གའོ། །དེའི་རྗེས་ལས་
བཟུང་བ་ནི་གདུགས་དང་། རྒྱལ་མཚན་དང་། བླ་རེ་ལ་སོགས་པ་བྲེས་ལ་སྐུ་གཟུགས་བཀྲམ་ནས་ཕྱོགས་བཞིར་སྤོས་རྒྱུན་མི་འཆད་པར་བཏུལ་བར་བྱའོ། །དེ་ནས་ལག་པ་གཡས་པ་དེར་གཏུགས་ཏེ། ཡི་གེ་བརྒྱ་པ་བདུན་ནམ་ཉི་ཤུ་རྩ་གཅིག་བཟླས་པར་བྱ་སྟེ། ས་གཞི་རྡོ་རྗེའི་
རང་བཞིན་དུ་བྱིན་གྱིས་བརླབས་པ་ནི་ས་གཟུང་བ་དང་བྱིན་གྱིས་བརླབ་པ་སྟེ་སའི་ཆོ་གའོ།།      །།དེ་ནས་བདག་ཉིད་ཁྲུས་བྱ་ཞིང་དྲིས་བྱུགས་ལ། གོས་སྔོན་པོའི་སྟོད་གཡོགས་དང་། སྨད་གཡོགས་བགོ་ཞིང་། རྒྱན་གདགས་ཤིང་རྡོ་རྗེ་དྲིལ་བུར་ལྡན་པས་གལ་ཏེ་ནུས་ན་སྨྱུང་བར་གནས་པ་འམ། 
མ་ནུས་ན་ཟས་དཀར་གསུམ་བཟའ་བར་བྱའོ། །དེ་ལ་རེ་ཞིག་སའི་དཀྱིལ་འཁོར་གྱི་དབུས་སུ་འདུག་ལ་ཚོགས་བསགས་པ་དང་། སྲུང་བའི་འཁོར་ལོ་བསྒོམ་པ་དང་། གཞལ་ཡས་ཁང་གདན་དང་བཅས་པ་བསྒོམ་པར་བྱ་སྟེ། དེའང་ཡི་གེ་ཧཱུཾ་ཡོངས་སུ་གྱུར་པ་ལས་རྡོ་རྗེ་ཆེན་པོ་ནམ་མཁའི་ཚད་
དང་མཉམ་པ་ཁོང་སྟོང་བསམ་པ་ནི་སྲུང་བའི་འཁོར་ལོའོ། །དེའི་ནང་དུ་བྷྲཱུཾ་ལས་གཞལ་ཡས་ཁང་གྲུ་བཞི་སྒོ་བཞི་པ། རྟ་བབས་དང་བཅས་པ་བསྐྱེད་ལ། དབུས་སུ་ཨ་ལས་ཟླ་བའི་དཀྱིལ་འཁོར་བསྒོམ་པར་བྱའོ། །དེ་ནས་བདག་ཉིད་ལྷར་བསྐྱེད་ལ་ཡེ་ཤེས་སེམས་དཔའ་གཞུག་པ་དང་། དབང་
བསྐུར་བ་དང་། ཡི་གེ་གསུམ་གྱིས་གནས་གསུམ་དུ་བྱིན་གྱིས་བརླབས་པའི་བར་དུ་བྱས་ལ་སའི་ལྷ་མོ་མཆོད་ནས་གསོལ་བ་གདབ་པའི་བར་དུ་བྱའོ། །དེ་ནས་སྒྲུབ་པའི་གྲོགས་པོས་མཚན་བརྒྱ་རྩ་བརྒྱད་པས་བསྟོད་ནས་གསོལ་བ་གདབ་པར་བྱ་སྟེ། མཎྜལ་དབུས་དང་ཕྱོགས་བཞིར་ནི། 
གོས་སྔོན་ཅན་རིགས་ལྔ་སྐད་ཅིག་གིས་བསྒོམས་ལ། ལྷ་ལ་གསོལ་བ་གདབ་པའི་ཆོ་ག །རྡོ་རྗེའི་དཀྱིལ་འཁོར་བྲི་བའི་ཕྱིར། །བདག་གིས་དཀྱིལ་འཁོར་ས་བཟུང་བས། །སངས་རྒྱས་བྱང་ཆུབ་སེམས་དཔའ་ཡིས། །བདག་ལ་བྱིན་གྱིས་བརླབ་ཏུ་གསོལ། །ཞེས་སོ། །སློབ་མ་བཞི་

73-1-236b

ཡིས་ཕྱོགས་བཞི་ནས་གསོལ་བ་གདབ་པའི་ཚིག་འདི་དག་གོ། །རྡོ་རྗེ་གོས་སྔོན་རིགས་ཀྱི་གཙོ། །མཉམ་པའི་ངང་ལས་འབར་བའི་སྐུ། །ཞེ་སྡང་ཆེན་པོ་ཚར་གཅོད་ཕྱིར། །རྡོ་རྗེ་རིགས་ཀྱི་ས་བཟུང་མཛོད། །རིན་ཆེན་གོས་སྔོན་རིགས་ཀྱི་གཙོ། །མཉམ་པའི་ངང་ལས་འབར་བའི་སྐུ། །ང་རྒྱལ་ཅན་རྣམས་
གཞོམ་པའི་ཕྱིར། །རིན་ཆེན་རིགས་ཀྱི་ས་བཟུང་མཛོད། །པདྨའི་གོས་སྔོན་རིགས་ཀྱི་གཙོ། །མཉམ་པའི་ངང་ལས་འབར་བའི་སྐུ། །འདོད་ཆགས་ཅན་རྣམས་གདུལ་བའི་ཕྱིར། །པདྨ་རིགས་ཀྱི་ས་བཟུང་མཛོད། །ལས་ཀྱི་གོས་སྔོན་རིགས་ཀྱི་གཙོ། །མཉམ་པའི་ངང་ལས་འབར་བའི་སྐུ། །ཕྲག་
དོག་ཅན་རྣམས་གདུལ་བའི་ཕྱིར། །ལས་ཀྱི་རིགས་ཀྱི་ས་བཟུང་མཛོད། །ཅེས་སོ། །དེ་ནས་མིག་གཡས་པར་མ་ལས་ཉི་མའི་དཀྱིལ་འཁོར། གཡོན་པར་ཊ་ལས་ཟླ་བ། རྐང་མཐིལ་དུ་སྣ་ཚོགས་རྡོ་རྗེ་བསྐྱེད་ནས་ལངས་ཏེ་སངས་རྒྱས་ཐམས་ཅད་ལ་ཕྱག་བྱས་བདག་ལྷའི་སྐུ་གསལ་བར་
དམིགས་ཏེ། དབུས་ཀྱི་གཙོ་བོ་ནམ་མཁར་བཏེག་ལ་ཁྲོ་བོའི་བསྟོད་པ་བྱའོ། །དེ་ལ་བསྟོད་པ་ནི། ཆོས་དབྱིངས་སྟོང་པ་གཉིས་མེད་ངང་ཉིད་ལས། །འཇིག་རྟེན་སྤྱོད་པའི་ཚུལ་ཡང་མི་སྤོང་ཞིང་། །ཐབས་ལ་མཁས་པས་འཇིགས་བྱེད་སྐུར་སྟོན་པའི། །ཁྲོ་ཆེན་འབར་བའི་ཚོགས་ལ་ཕྱག་
འཚལ་བསྟོད། །བསྐལ་པའི་མེ་དཔུང་འབར་བའི་ཀློང་དཀྱིལ་ནས། །དཔའ་བོ་སྟང་སྟབས་བརྐྱང་བསྐུམ་ཚུལ་དུ་བཞུགས། །ཉི་ཟླ་འབར་བའི་སྤྱན་གྱི་སྡང་མིག་གིས། །བགེགས་དཔུང་སྲེག་པར་མཛད་ལ་ཕྱག་འཚལ་བསྟོད། །ཅེས་བརྗོད་ལ་བཀའ་བསྒོ་བར་བྱ་སྟེ། དཀྱིལ་འཁོར་
ཆེན་པོའི་ས་གཞི་ལ་གནས་པའི། །ལྷ་ལ་སོགས་པའི་བགེགས་ཚོགས་ཀུན་ཉོན་ཅིག །ང་ནི་གནས་འདིར་དཀྱིལ་འཁོར་ཆེན་པོ་འབྲི། །བགེགས་ཀྱི་རིགས་ཚོགས་གང་ཡིན་འབྱེར་བར་གྱིས། །ཅི་སྟེ་ང་ཡི་བཀའ་ལས་འདས་གྱུར་ན། །ཡེ་ཤེས་ཅན་གྱི་རྡོ་རྗེ་འབར་བ་འདིས། །སྤྱི་བོ་ཚལ་
པ་བརྒྱར་ནི་འགས་འགྱུར་ཞིང་། །རྣམ་པར་འཇིག་པར་འགྱུར་བར་གདོན་མི་ཟ། །ཞེས་བྱ་བ་དང་། དེང་རྣལ་འབྱོར་གྱི་དབང་ཕྱུག་ཆེ་གེ་མོ་ཞེས་བྱ་བས་རྫོགས་པའི་སློབ་མ་ཆེ་གེ་མོ་ཞེས་བྱ་བ་བྱང་ཆུབ་ཏུ་རྫོགས་པར་བྱ་བའི་ཕྱིར་དང་། སེམས་ཅན་ཐམས་ཅད་བླ་ན་མེད་པའི་བྱང་ཆུབ་ཐོབ་

73-1-237a

པའི་ཕྱིར་དང་། དཔལ་ཕྱག་ན་རྡོ་རྗེ་ཞེས་བྱ་བའི་དཀྱིལ་འཁོར་ཆེན་པོ་ཞིག་རྩོམ་གྱིས་གང་སུ་རུང་བ་ས་ཕྱོགས་འདི་ན་གནས་པའི་ལྷ་དང་ལྷ་མ་ཡིན་དང་། གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་དང་། འབྱུང་པོ་དང་། གནོན་པོ་དང་། ནམ་མཁའ་
ལྡིང་དང་། མི་འམ་ཅི་དང་། རིག་འཛིན་ལ་སོགས་པ་རྒན་པོ་དང་། རྒན་མོ་དང་། འཁོར་དང་། གཡོག་ཏུ་བཅས་པ་འདིར་མ་གནས་པར་གཞན་དུ་དེངས་ཤིག །དེ་ལྟར་ཕྱག་ན་རྡོ་རྗེའི་བཀའ་ཐོས་པས་མྱུར་བ་ཉིད་དུ་དེངས་ཤིག །གང་དག་མི་འགྲོ་བ་དེ་དག་ནི་ངའི་ཡེ་ཤེས་ཀྱི་རྡོ་རྗེ་
ཆེན་པོ་ཀུན་དུ་འབར་བ་འདིས་མགོ་བོ་ཚལ་པ་བརྒྱར་འགས་པར་གྱུར་ཏ་རེ་ཞེས་ལན་གསུམ་བརྗོད་དེ། རྡོ་རྗེ་ཆེན་པོའི་གར་དང་། རྡོ་རྗེ་ཆེན་པོའི་འགྲོས་ཀྱིས་ས་གཞི་ལན་གསུམ་བསྐོར་ཞིང་། རང་གི་ལུས་ལས་ཁྲོ་བོའི་ཚོགས་ཕྱུང་ལ་སྡང་བ་ཐམས་ཅད་བསྐྲད་པར་བསམ་མོ། །དེ་ནས་ཡི་
གེ་ཧཱུཾ་གིས་སྲུང་བའི་འཁོར་ལོ་བྱས་ལ། ཕུར་བུ་ལྔ་སྟོད་ཕྱག་ན་རྡོ་རྗེ་སྨད་རྡོ་རྗེ་རྩེ་གཅིག་པ་ལྟ་བུར་བསྐྱེད་ནས། ཨོཾ་བཛྲ་ཀཱི་ལི་ཀཱི་ལཱ་ཡ་སརྦ་བིགྷྣཱན་བནྡྷ་ཧཱུཾ་ཕཊ་ཅེས་བྱ་བ་བརྒྱ་རྩ་བརྒྱད་བཟླས་ལ། དབུས་དང་གྲྭ་བཞིར་ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྚཱན་ཧཱུཾ་ཕཊ། ཀཱི་ལཱ་ཡ་ཀཱི་ལ་ཡ་
སརྦ་པཱ་པཾ་ཧཱུཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལི་ཀཱི་ལཱ་ཡ་བཛྲ་དྷ་ར་ཨཱ་ཛྙཱ་པ་ཡ་ཏི། ཀཱ་ཡ་ཝཱཀ་ཙིཏྟ་བཛྲ་ཀཱི་ལཱ་ཡ་ཧཱུཾ་ཕཊ་ཅེས་བྱ་བས་བཏབ་ལ། ཨོཾ་བཛྲ་མུངྒ་ར་ཨཱ་ཀོ་ཊ་ཡ་ཧཱུཾ་ཕཊ་ཅེས་བྱ་བས་བརྡུང་བར་བྱའོ། །དེ་ནས་སྲུང་སྐུད་བཅིང་བ་དང་། གུ་གུལ་གྱིས་བདུགས་པ་དང་། མེ་ཏོག་ཕྲེང་བ་བཏགས་ཤིང་
དྲིའི་ཐིག་ལེ་བྱས་ནས་བྱམས་པའི་གོ་ཆ་བསྐོན་པར་བྱའོ། །དེ་ནས་དཀྱིལ་འཁོར་བའི་རྣམ་ལྔ་དང་། སྙིང་པོ་བཟླས་པའི་དྲི་ཆུས་བྱུགས་ལ། དབུས་སུ་དྲིའི་ཐིག་ལེ་བྱས་ཏེ་མེ་ཏོག་གི་ཚོམ་བུ་བཀྲམ་ནས་ཛཿཧཱུཾ་བཾ་ཧོཿའི་སྔགས་ཀྱིས་བཏེག་པའི་ལྷ་བཞུགས་སུ་གསོལ་ལོ། །ཡེ་ཤེས་སེམས་དཔའ་
གཞུག་པ་དང་། དབང་བསྐུར་བ་དང་། ཡི་གེ་གསུམ་གྱིས་གནས་གསུམ་དུ་བྱིན་གྱིས་བརླབས། མཆོད་པ་ལྔ་དང་། མཆོད་པ་རྒྱས་པ་དང་། བསྟོད་པ་བྱས་ནས་སྙན་གསན་དབབ་པར་བྱ་སྟེ། ཕྱག་ན་རྡོ་རྗེ་བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་ལོ། །སློབ་མ་ཀུན་ལ་

73-1-237b

བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །སང་ནི་དཀྱིལ་འཁོར་བྲི་བར་འཚལ། །བཅོམ་ལྡན་བདག་ནི་གུས་པ་ལ། །དེ་བས་གནང་བ་མཛད་པར་རིགས། །ཞེས་ལན་གསུམ་བརྗོད་པར་བྱ་སྟེ། ལྷ་ལྷག་པར་གནས་པར་བྱའོ། །དེ་ནས་བུམ་པ་གཉིས་ལེགས་པར་བཀྲུས་ནས་རས་གཙང་
མས་གུལ་པ་བཅིངས་ཏེ། ལྡུམ་བཅས་ལྕུག་མས་ཁ་བརྒྱན་ལ། རིན་པོ་ཆེ་ལྔ་དང་། སྨན་ལྔ་དང་། འབྲུ་ལྔ་བཅུ་གནས་ལྷག་པར་གནས་པར་བྱ་སྟེ། དེ་ནས་བུམ་པ་བདུད་རྩི་འཁྱིལ་པས་བསངས་ནས། བྷྲཱུཾ་ལས་གཞལ་ཡས་ཁང་དང་། བྃ་ལས་འོ་མ་ཅན་གྱི་རྒྱ་མཚོ་དང་། ཧྲཱིཿལས་སྣ་
ཚོགས་པདྨ་དང་། ཨ་ལས་ཟླ་བའི་དཀྱིལ་འཁོར་བསྐྱེད་ནས་དེའི་སྟེང་དུ་ཧཱུྃ་ལས་ཕྱག་ན་རྡོ་རྗེ་བསྐྱེད་དེ། ཡེ་ཤེས་སེམས་དཔའ་དགུག་པ་དང་། གཞུག་པ་དང་། དབང་བསྐུར་བ་དང་། བྱིན་གྱིས་བརླབ་པ་དང་། མཆོད་པ་དང་། བསྟོད་པ་བྱས་ནས་སྔགས་བརྒྱ་རྩ་བརྒྱད་བཟླས་ཏེ་
གོས་གཙང་མས་བཀབ་ལ་བཞག་སྟེ། ཕྱི་དེ་ཞག་གསུམ་དུ་བཟླས་པ་བྱ་སྟེ་བུམ་པ་ལྷག་པར་གནས་པའོ། །དེ་ནས་འབྱོར་པ་ཡོད་ན་སྦྱིན་སྲེག་གི་མཆོད་པ་བྱའོ། །དེ་ནས་གཏོར་མའི་ཆོ་ག་ལས་འབྱུང་བ་བཞིན་དུ་གཏོར་མ་བཏང་ནས། སློབ་མ་ལྷག་པར་གནས་པ་བྱ་སྟེ། ཁྲུས་བྱས་ལ་མེ་
ཏོག་ལག་ཏུ་ཐོགས་ཏེ་སློབ་དཔོན་གྱི་ཞབས་གཉིས་ལ་ཕྱག་འཚལ་ནས་གསོལ་བ་བཏབ་སྟེ་རྒྱུན་བཤགས་བྱའོ། །དགའ་ཆེན་ཁྱོད་ལ་བདག་དགའོ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པའི། །མགོན་པོ་ཆེན་པོ་བདག་ལ་སྩོལ། །དམ་ཚིག་ཆེན་པོ་
སྩལ་དུ་གསོལ། །བྱང་ཆུབ་སེམས་ནི་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ནི་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་གཞུག་ཏུ་གསོལ། །བུ་ཚུར་ཐེག་པ་ཆེན་པོ་ཡི། །གསང་སྔགས་ཚུལ་ཆེན་སྤྱོད་པ་དག །ཁྱོད་ལ་ཡང་
དག་བསྟན་པར་བྱ། །ཁྱོད་ནི་ཚུལ་ཆེན་སྣོད་ཡིན་ཏེ། །དུས་གསུམ་འབྱུང་བའི་སངས་རྒྱས་རྣམས། །སྐུ་གསུང་ཐུགས་ཀྱི་རྡོ་རྗེ་ཅན། །རྡོ་རྗེ་གསང་སྔགས་འདི་བསྒོམས་པས། །དཔའ་བོ་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པའི་མཚན་མ་བརྙེས། །གསང་སྔགས་སྦྱོར་བ་མཉམ་

73-1-238a

མེད་དེ། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་ཏུ་མི་བཟད་པའི། །དཔུང་ཆེན་དག་ཀྱང་དེ་ཡིས་བཅོམ། །འཇིག་རྟེན་རྗེས་འཇུག་པར་རྟོགས་ནས། །འཁོར་ལོ་བསྐོར་ནས་མྱ་ངན་འདས། །དེས་ན་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །དེ་ནས་ལྷར་
བསྐྱེད་ནས་མཆོད་པ་བྱ་སྟེ། སོ་ཤིང་དོར་བ་དང་། ཀུ་ཤ་སྦྱིན་པ་དང་། སྲུང་སྐུད་གདགས་པ་དང་། ཟབ་ཅིང་རྒྱ་ཆེ་བའི་ཆོས་བཤད་པར་བྱ་སྟེ། འཇིག་རྟེན་དུ་ནི་ཀུན་མཁྱེན་རྣམས། །ཨུ་དུམྺཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །
གསང་སྔགས་སྤྱོད་པའི་ཆོ་ག་ནི། །དེ་བས་ཀྱང་ནི་དཀོན་པ་སྟེ། །གང་གིས་མཉམ་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །བསྐལ་པ་བྱེ་བ་དུ་མ་རུ། །ཆོས་ཀྱི་འཁོར་ལོ་བསྐོར་བ་དང་། །འགྲོ་དོན་མཉམ་མེད་བྱེད་པར་འགྱུར། །གཞན་ཡང་ཐེག་པ་ཆེན་པོ་ཡི། །ལམ་
མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོད་པས་ན། །ཐམས་ཅད་མཁྱེན་པའི་འབྲས་བུ་ཐོབ། །རྫོགས་པའི་སངས་རྒྱས་ཉིད་དུ་འགྱུར། །དེས་ན་བུ་ཡིས་བརྩོན་པར་གྱིས། །སློབ་མ་ལྷག་པར་གནས་པའོ། །དེ་ལྟར་ལྷག་པར་གནས་པར་བྱས་ནས། །ནང་པར་ཉི་མ་ཤར་བ་དང་མཆོད་
པ་བཤམས་ལ། དཀྱིལ་འཁོར་ནམ་མཁར་བཏེག་སྟེ། ས་གཞི་བའི་རྣམ་པ་ལྔ་དང་དྲི་ཆེན་པོས་བྱུགས་ནས་ཐིག་སྐུད་བྱིན་གྱིས་བརླབས་ལ་ཆོ་ག་བཞིན་ཐིག་གདབ་པར་བྱའོ། །དེ་ནས་ཚོན་དགྱེ་བར་བྱ་སྟེ། ཚོན་བྱིན་གྱིས་བརླབས་ལ་དབུས་སུ་པདྨ་དང་ཟླ་བའི་གདན་ལ་རྡོ་རྗེ་རྩེ་ལྔ་པ་བྲིས་པ་
དང་། ཕྱོགས་ཀྱི་རིམ་པར་ཚོན་དགྱེ་བ་དང་། རྩིག་པ་ལ་ཕྱི་རིམ་དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། ནག་པོ་དང་། ཁ་ཁྱེར་དམར་པོ་དང་། རིན་པོ་ཆེའི་ཕ་གུ་སེར་པོ་དང་། དྲ་བ་དྲ་ཕྱེད་ནག་པོ། མདའ་ཡབ་ལྗང་གུ། རྟ་བབས་ཅི་མཛེས་པ། རྡོ་རྗེ་མེ་རི་དང་
བཅས་པར་བྲི་བར་བྱའོ། །དེ་ལྟར་དཀྱིལ་འཁོར་བྲིས་ནས་དགོངས་ཀའི་དུས་སུ་མཆོད་རྫས་རྣམས་བསགས་ནས་བདག་ཉིད་སྟན་བདེ་བ་ལ་འདུག་སྟེ། ལྷའི་ང་རྒྱལ་གྱིས་དཀྱིལ་འཁོར་བཏེག་ལ་ཡིད་ཀྱིས་ནང་དུ་ཞུགས་ཏེ། ལྷག་པ་དང་མ་ཚང་བའི་ཉེས་པ་ཞི་བར་བྱ་བའི་ཕྱིར་ལན་བདུན་

73-1-238b

བསྐོར་བར་བྱའོ། །དེ་ནས་མེ་ཏོག་གི་ཕྲེང་བ་དོར་ལ་སླར་རང་གི་མགོ་ལ་བཅིང་བར་བྱའོ། །དེ་ནས་བདག་ཉིད་ལྷར་བསྐྱེད་ལ་མདུན་གྱི་ལྷ་ཡང་ས་བོན་གྱི་ཡི་གེ་ཡོངས་སུ་གྱུར་པ་ལས་རྡོ་རྗེ་ལས་འོད་ཟེར་སྤྲོ་བསྡུ་བྱས་ནས། ལྷར་བསྐྱེད་ལ་ཡེ་ཤེས་སེམས་དཔའ་གཞུག་པ་ལ་སོགས་པ་བྱས་ནས། 
མཆོད་པ་རྒྱས་པར་ཕུལ་བསྟོད་པ་བྱས་ནས་བུམ་པར་བཅུག་སྟེ། བཟླས་པ་བྱས་ནས་ཆུར་ཞུ་བ་ལས་སྐུ་ཁྲུས་གསོལ་བར་བྱའོ། །དེ་ནས་སྦྱིན་སྲེག་བྱ་བ་དང་། གཏོར་མ་བཏང་ནས་སློབ་མ་ལ་དབང་བསྐུར་བར་བྱ་སྟེ། དེ་ནས་བདག་ཉིད་འཇུག་པའི་ཆོ་ག་དང་། སློབ་མ་འཇུག་པའི་ཆོ་ག་ཡང་ཚུལ་
བཞིན་དུ་བྱའོ། །དེ་ནས་དཀྱིལ་འཁོར་གྱི་ལྷ་ལ་ཕྱག་བྱས་ལ། གནང་བ་ནོད་པར་བྱ་སྟེ། བདག་མིང་འདི་ཞེས་བགྱི་བས་ནི། །རྡོ་རྗེ་སློབ་དཔོན་དཀའ་ཐུབ་ཆེ། །སེམས་ཅན་རྣམས་ལ་ཕན་པའི་ཕྱིར། །སློབ་མ་རྣམས་ནི་འཇུག་པར་འཚལ། །དེ་ནས་རྡོ་རྗེ་སློབ་མ་ཡི། །སྤྱོད་ལམ་ལེགས་པར་གསུངས་པ་ཡི། །
བླ་མ་ཆེན་པོ་ཁྱེད་ཀྱིས་ནི། །བྱང་ཆུབ་ཆེན་པོའི་ལམ་སྟོན་པའི། །བསམ་གྱིས་མི་ཁྱབ་དམ་ཆོས་སྣོད། །དབང་བསྐུར་དམ་པ་མཛད་དུ་གསོལ། །གདོང་གཡོགས་བཅིང་བ་དང་། རྒྱུན་བཤགས་བྱ་བ་དང་། སྡོམ་པ་གཟུང་བ་དང་། ལྷར་བསྐྱེད་ཅིང་ལས་ཐམས་ཅད་པའི་བུམ་པས་ཁྲུས་བྱ་བ་དང་། དཀྱིལ་
འཁོར་དུ་འཇུག་པ་དང་། ལྷའི་དམ་ཚིག་བསྒྲག་པ་ནི། མཐུ་སྟོབས་ཕྱག་ན་རྡོ་རྗེ་ནི། །ཁྱོད་ཀྱི་སྙིང་ལ་ཡང་དག་ཞུགས། །རྟག་ཏུ་ཡི་དམ་ལྷ་ཡིན་གྱི། །ཚུལ་འདི་སྨྲ་བར་མ་བྱེད་ཅིག །གལ་ཏེ་ཚུལ་འདི་སྨྲས་ན་ཡང་། །དེ་མ་ཐག་ཏུ་དྲལ་ཏེ་གཤེགས། །ཞེས་པའོ། །དེ་ནས་ཙནྡན་གུར་གུམ་ལ་སོགས་པའི་ཆུ་ཁྱོར་བར་བླུགས་ལ། 
འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་ཚིག་པར་བྱེད། །གལ་ཏེ་གསང་སྔགས་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ཅེས་བརྗོད་དོ། །དེ་ནས་སློབ་དཔོན་གྱིས་དམ་ཚིག་བསྒྲགས་ཏེ། ང་ནི་ཕྱག་ན་རྡོ་རྗེ་སྟེ། །ང་ཡིས་བསྒོ་བའི་ལས་ཉོན་ཅིག །མ་མོས་བརྙས་པར་མ་བྱེད་
ཅིག །གལ་ཏེ་ཁྱོད་ཀྱིས་བརྙས་ན་ནི། །དམ་ཚིག་འདི་ཡིས་སྲེག་པར་བྱེད། །ཚབ་ཆེན་པོའི་གནས་སུ་བསྲེག །ཅེས་པའོ། །ཡེ་ཤེས་དབབ་པ་ནི། དེ་ནས་རྫས་ཀྱི་དུད་པ་བཏང་། རྡོ་རྗེ་སློབ་དཔོན་ཐུགས་ཀ་ནས། །ཁ་དོག་དམར་བའི་ཨ་བཏོན་ནས། །སློབ་མའི་སྙིང་གར་གཞུག་པར་བྱ། །

73-1-239a

སློབ་མ་རྣམས་ཀྱིས་བདེ་བ་བསྒོམ། །འཕར་དང་ལྡེག་པའི་རྟགས་བྱུང་ན། །དེ་ཉིད་བརྟན་པའི་ཡན་ལག་བྱ། །ཡེ་ཤེས་དབབ་པའོ། །ཕྲེང་བ་དོར་བ་དང་། གདོང་གཡོགས་དགྲོལ་བ་དང་། དཀྱིལ་འཁོར་ལྟ་བ་བྱས་ནས་ལྷར་བསྐྱེད་ལ། རང་བཞིན་རྣམ་དག་བདག་ཉིད་ལས། །
དཔའ་བོ་དབང་ཕྱུག་མ་ཡི་གནས། །དྲི་མེད་རང་བཞིན་དཀྱིལ་འཁོར་ནི། །བུ་ཁྱོད་ཀྱིས་ནི་བལྟ་བར་གྱིས། །གདོང་གཡོགས་བཀྲོལ་ཏེ་འཁོར་ལོའི་ལྷ། །དེ་བཞིན་ཉིད་ནི་བསྟན་པར་བྱ། །གཙོ་བོ་སྒོ་མར་བཅས་པ་བསྟན། །ཆུ་དང་། ཅོད་པན་དང་། རྡོ་རྗེ་དང་། དྲིལ་བུ་དང་། མིང་གི་དབང་
བསྐུར་བར་བྱའོ། །དེ་ནས་སྐུ་གསུང་ཐུགས་ཀྱི་བཏུལ་ཞུགས་ལ་སོགས་པ་བསྐུར་རོ། །དེ་ཡང་དང་པོ། ཡོན་ཕུལ་ནས་ནི་གསོལ་གདབ་བྱ། །བུམ་པའི་ཆུ་ཀུན་བསྡུས་ནས་བྱ། །སློབ་མ་ལ་ནི་དབང་བསྐུར་བྱ། །བྱང་ཆུབ་རྡོ་རྗེ་སངས་རྒྱས་པས། །ཇི་ལྟར་ཕུལ་བས་མཆོད་པ་ཆེ། །བདག་ཀྱང་བསྒྲལ་
བའི་དོན་དུ་ནི། །ནམ་མཁའི་རྡོ་རྗེ་བདག་ལ་སྩོལ། །ཞེས་བརྗོད་ལ། དེ་ནས་བམ་པའི་དབང་བསྐུར་ཏེ། རྡོ་རྗེ་དབང་བསྐུར་ཆེན་པོ་ནི། །ཁམས་གསུམ་ཀུན་གྱིས་ཕྱག་བྱས་པས། །གསང་གསུམ་གཞི་ལས་བྱུང་བ་ཡི། །རྡོ་རྗེ་གོས་སྔོན་ཆུ་དབང་སྦྱིན། །ཨོཾ་བཛྲ་ནཱི་ལཱཾ་བ་ར་དྷ་ར་ཨ་བྷི་ཥིཉྩ་མི། དེ་ནས་དབུ་
རྒྱན་གྱི་དབང་བསྐུར་ཏེ། སངས་རྒྱས་ཡོན་ཏན་ལས་བྱུང་བའི། །ཡིད་བཞིན་ནོར་བ་འབར་བ་ཆེ། །བསམས་པ་ཐམས་ཅད་འབྱུང་བའི་གནས། །རིན་ཆེན་གོས་སྔོན་དབང་བསྐུར་རོ། །ཨོཾ་རཏྣ་མུ་ཀུ་ཊ་ཨ་བྷི་ཥིཉྩ་མི། དེ་ནས་རྡོ་རྗེའི་དབང་བསྐུར་ཏེ། །སངས་རྒྱས་ཀུན་གྱི་རྡོ་རྗེའི་དབང་། །དེ་རིང་
ཁྱོད་ལ་བསྐུར་བྱས་པས། །སངས་རྒྱས་ཐམས་ཅད་རབ་བསྒྲུབ་ཕྱིར། །པདྨའི་གོས་སྔོན་རྡོ་རྗེ་ཟུང་། །ཨོཾ་པདྨ་ནཱི་ལཱཾ་བ་ར་དྷ་ར་བཛྲ་པཱ་ཎི་ཨ་བྷི་ཥིཉྩ་མི། དེ་ནས་དྲིལ་བུའི་དབང་བསྐུར་ཏེ། །ཆོས་ཀུན་སྒྱུ་མའི་སྒྲ་སྒྲོགས་ཏེ། །སྟོང་པའི་དོན་ལས་སད་པར་བྱེད། །ཤེས་རབ་དྲིལ་བུའི་དབང་བསྐུར་བས། །ལས་ཀྱི་
གོས་དབང་ཐོབ་པར་ཤོག །ཨོཾ་ཀརྨ་ནཱི་ལཱཾ་བ་ར་དྷ་ར་དྷི་པ་ཏི་སྟྭཾ་ཨ་བྷི་ཥིཉྩཱ་མི། དེ་ནས་མིང་གི་དབང་བསྐུར་ཏེ། །རྡོ་རྗེའི་མིང་ནི་བླ་མེད་པས། །ཅིས་ཀྱང་མི་ཚུགས་མི་ཤིགས་པས། །བླ་མེད་བྱང་ཆུབ་ངེས་ཐོབ་པས། །བདེ་གཤེགས་གོས་སྔོན་དབང་ཐོབ་ཤོག །ཨོཾ་བུདྡྷ་ནཱི་ལཱཾ་བ་ར་དྷ་ར་ནཱ་མ་ཨ་བྷི་

73-1-239b

ཥཉྩ་མི། དེ་ནས་ཕྱིར་མི་ལྡོག་པ་རྡོ་རྗེ་སློབ་དཔོན་གྱི་དབང་བསྐུར་ཏེ། དབང་སྟེགས་པདྨ་འདབ་བརྒྱད་བྲི། །དེ་སྟེང་སློབ་མ་བཞག་ནས་ནི། །ཚིག་གིས་གསོལ་བ་གདབ་པར་བྱ། །མི་ལྡོག་འཁོར་ལོའི་དབང་སྩོལ་ཅིག །དཀྱིལ་འཁོར་ལྷ་ཡི་དེ་ཉིད་དང་། །སྔགས་དང་ཕྱག་རྒྱའི་དེ་ཉིད་རྣམས། །
བདག་ཉིད་སློབ་དཔོན་བགྱིད་པར་འཚལ། །དེ་ནས་བུམ་ཆུས་དབང་བསྐུར་ཏེ། །གསང་བ་བྱང་ཆུབ་སེམས་ཀྱི་ཆུ། །ལྷ་ཡི་ཆུ་ནི་དག་པ་སྟེ། །དྲི་མེད་རྡོ་རྗེ་ཆུ་ཡི་དབང་། །རྡོ་རྗེ་རིགས་མཆོག་ཆུ་དབང་སྦྱིན། །རྡོ་རྗེ་དམ་ཚིག་སྦྱིན་ཏེ། ཧཱུཾ་ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་
དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་དང་པོའི་བདག་པོའི་གཙོ། །ཡང་དག་ཐོག་མ་མེད་པ་ཡི། །སྐྱེས་བུ་ཆེན་པོ་བཅོམ་ལྡན་འདས། །ཨོཾ་བཛྲ་ཨ་བྷི་ཥི་མི། དྲིལ་བུའི་དམ་ཚིག་སྦྱིན་ཏེ། འདི་དེ་སངས་རྒྱས་ཐམས་ཅད་ཀྱི། །ཤེས་རབ་དབྱིངས་ཞེས་འགྲོ་བར་འདོད། །རྟག་ཏུ་
ཁྱེད་ཀྱིས་ཀྱང་ཟུངས་ཏེ། །རྒྱལ་བའི་བྱང་ཆུབ་མཆོག་ཏུ་བཞེད། །ཨོཾ་བཛྲ་དཱིཔྟ་དྲྀཥྚི་ཨ་བྷི་ཥིཉྩཱ་མི། ཕྱག་རྒྱའི་དམ་ཚིག་སྦྱིན་ཏེ། ཐབས་དང་ཤེས་རབ་གཉིས་མེད་རྒྱ། །མི་ཕྱེད་རྡོ་རྗེའི་ངོ་བོ་ཉིད། །འཁྱུད་པའི་དམ་ཚིག་ཕྱག་རྒྱ་སྟེ། །ཁྱོད་ཀྱིས་ཀྱང་ནི་རྟག་ཏུ་བཅང་། །ཨོཾ་ཀཱ་ཡ་མུ་ཏྲ་ཨ་
བྷི་ཥིཉྩཱ་མི། དཀྱིལ་འཁོར་གྱི་ནི་དེ་ཉིད་དང་། །སློབ་དཔོན་དེ་ཉིད་རབ་ཏུ་སྦྱིན། །དེ་བ་མཎྜལ་གུ་རུ་ཨ་བྷི་ཥིཉྩཱ་མི། དེ་ལ་ལྷའི་གནང་བ་སྦྱིན་པའོ། །སེམས་ཅན་རྣམས་ལ་ཕན་དོན་ཕྱིར། །འཇིག་རྟེན་ཁམས་ནི་ཐམས་ཅད་དུ། །ཇི་ལྟ་ཇི་ལྟར་འདུལ་འགྱུར་བ། །དེ་ལྟར་ཆོས་ཀྱི་འཁོར་ལོ་
བསྐོར། །རྗེས་སུ་ནང་བ་སྦྱིན་པའོ། །འདི་ནི་སངས་རྒྱས་ཐམས་ཅད་ཀྱི། །རྡོ་རྗེ་སེམས་དཔའི་ཕྱག་ན་གནས། །རྟག་ཏུ་ཁྱོད་ཀྱིས་ཀྱིས་ཀྱང་བཟུང་སྟེ། །ལག་ན་རྡོ་རྗེའི་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་ཏིཥྛ་ས་མ་ཡ། ཨ་ཏི་ཏེ་ཤ་སྟྭཾ་དྷ་ར་ཡ་མི་བཛྲ་སཏྭ་ཧི་ཧི་ཧི་ཧི་ཧཱུཾ་ཞེས་བརྟུལ་ཞུགས་
སྦྱིན་ནོ། །དེ་ནས་སློབ་དཔོན་གཙོ་བོར་བསྒོམས་ཏེ། ཆོས་གོས་གྱོན་པའི་ཐ་མ་ལག་པ་གཡོན་པའི་ཁུ་ཚུར་གྱིས་སྙིང་གར་བཟུང་ལ། ལག་པ་གཡས་པས་མཆོག་སྦྱིན་དུ་བྱས། །ཀྱེ་འདོད་ཆགས་རྡོ་རྗེ་རྫོགས་སངས་རྒྱས། །ཞེས་བོས་ལ། སྔགས་འདི་བརྗོད་པར་བྱའོ། །སིདྡྷི་ས་མ་ཡ་སྟྭཾ་

73-1-240a

བྷུར་བྷུ་བ་སྭཿ། དེ་ནས་ལུང་བསྟན་ཏེ། སངས་རྒྱས་དང་བྱང་ཆུབ་སེམས་དཔའ་དང་། འཕགས་པ་ཐམས་ཅད་ཀྱིས་མགྲིན་གཅིག་ཏུ་ཡང་དག་པའི་བྱང་ཆུབ་ཏུ་ལུང་བསྟན་པའོ། །མཆོད་སྦྱིན་གྱི་ཕྱག་རྒྱ་ཆེན་པོའི་མཐུ་དང་། སྔགས་ཀྱི་མཐུ་ངེས་པར་འོང་གིས་དད་པར་གྱིས་
ཤིག་ཅེས་ལུང་བསྟན་པར་བྱའོ། །དཀྱིལ་འཁོར་ཆོ་ག་སྦྱར་བ་ཡིས། །དགེ་བ་གང་དེས་འགྲོ་བ་ཀུན། །ཕྱག་ན་རྡོ་རྗེ་ཐོབ་ནས་ནི། །འགྲོ་དོན་མ་ལུས་བྱེད་པར་ཤོག །དཔལ་ཕྱག་ན་རྡོ་རྗེའི་དཀྱིལ་འཁོར་གྱི་ཆོ་ག །སློབ་དཔོན་ཀླུ་སྒྲུབ་དང་། འགྲོ་བཟངས་སྙིང་པོས་དོན་གཅིག་ཏུ་བསྡེབས་པ་
རྫོགས་སོ།།      །།༄༅༅། །རྒྱ་གར་སྐད་དུ། ཤྲཱི་བཛྲ་པཱ་ཎི་སྟོ་ཏྲ། བོད་སྐད་དུ། དཔལ་ཕྱག་ན་རྡོ་རྗེ་ལ་བསྟོད་པ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །ཧཱུཾ་བསྐལ་པ་མེ་ལྟར་འབར་བའི་ཀློང་དཀྱིལ་ནས། །བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས། །
ཆོས་སྐུ་ནམ་མཁའ་ལྟ་བུའི་ངང་ཉིད་ལས། །གཟུགས་སྐུ་འཇའ་ཚོན་ལྟ་བུའི་སྐུར་སྣང་བ། །བཅོམ་ལྡན་རྡོ་རྗེ་གཏུམ་པོ་ཁྲོས་པའི་སྐུ། །ཞལ་གཅིག་ཕྱག་གཉིས་སྐུ་མདོག་མཐིང་ནག་ལ། །གཡས་པ་རྡོ་རྗེ་རྩེ་ལྔ་བསྣུན་པའི་ཚུལ། །གཡོན་པ་སྡིགས་མཛུབ་འཆང་བ་ཐུགས་ཀར་འཛིན། །དབུ་
སྐྲ་དམར་སེར་གྱེན་བརྫེས་ཅོད་པན་ཅན། །དབང་བསྐུར་སངས་རྒྱས་མི་བསྐྱོད་པ་ཡིས་མཛེས། །སྨིན་བསྡུས་སྨིན་མ་གློག་སྟོང་འོད་དུ་འཕྲོ། །སྤྱན་གསུམ་འབར་བ་ཁྲོ་བོའི་ལྟ་བས་མཛེས། །མཆེ་བ་གཙིགས་ཤིང་དབུགས་རྒྱུ་མེ་ལྟར་འབར། །ཨ་ལ་ལ་ཡི་གད་རྒྱངས་ཆེན་པོ་སྒྲོགས། །ཧ་ཧའི་གད་
མོས་སྟོང་གསུམ་བརྒྱལ་བར་བྱེད། །ཧཱུཾ་གི་ང་རོ་འབྲུག་སྟོང་ལྡིར་བའི་སྒྲ། །ཕཊ་ཀྱིས་ཐོག་འབེབས་རྡོ་རྗེ་སེར་ཆེན་འབེབས། །གཤིན་རྗེའི་གཟུགས་ཅན་རྒྱན་དང་ཆ་ལུགས་ལྡན། །སྐུ་སྟོད་སེང་གེའི་པགས་པས་རྣམ་པར་བརྒྱན། །ན་བཟའ་ཆོས་གོས་སྔོན་པོ་འཆང་བ་བསྣམས། །སྟག་གི་སྨད་
གཡོགས་བ་ཏི་ཁྲ་བོས་བརྒྱན། །རིན་ཆེན་འབར་བའི་སྦྲུལ་གྱིས་དབུ་བརྒྱན་ཅིང་། །དགའ་བོ་ཉེ་དགའི་སྙན་ཆས་རབ་ཏུ་མཛེས། །གདུག་པ་འབར་བ་ཟས་སུ་གསོལ་བར་མཛད། །ཀླུ་ནག་སེ་རལ་ཁ་རུ་བརྒྱན་པ་སྟེ། །འདབ་བཟང་དཀར་པོས་སྐ་རགས་རྣམ་པར་བཅིངས། །ནོར་རྒྱས་བུས་ནི་ཕྱག་

73-1-240b

དང་ཞབས་བརྒྱན་ཏེ། །ཉི་ཟླའི་སྟེང་ན་ཁྲོ་རྒྱལ་གར་བྱེད་དགྱེས། །སྣ་ཚོགས་པདྨའི་གདན་ལ་རྣམ་པར་བཞུགས། །རྡོ་རྗེའི་རིགས་མཆོག་བཅོམ་ལྡན་གཏུམ་པོ་སྟེ། །སངས་རྒྱས་འདུས་པའི་སྐུ་ལ་ཕྱག་འཚལ་བསྟོད། །ཧཱུཾ་བསྐལ་པའི་མེ་འབར་ཀློང་ན་བཞུགས་པ་ནི། །ཉོན་མོངས་འཁོར་བ་རྩད་ནས་
གཅོད་པའི་རྟགས། །ཞལ་གཅིག་ཕྱག་གཉིས་སྐུ་མདོག་མཐིང་ནག་ནི། །ཐབས་དང་ཤེས་རབ་ཟུང་དུ་འབྲེལ་པའི་རྟགས། །རྡོ་རྗེ་རྩེ་ལྔ་གཡས་ན་བསྣམས་པ་ནི། །ཡེ་ཤེས་ལྔ་ལྡན་དུག་ལྔ་འཇོམས་པའི་རྟགས། །གཡོན་པས་སྡིགས་མཛུབ་ཐུགས་ཀར་འཆང་བ་ནི། །ཆོས་ཀྱི་དབྱིངས་ལས་
འགྱུར་བ་མེད་པའི་རྟགས། །དབུ་སྐྲ་དམར་སེར་གྱེན་དུ་བརྫེས་པ་ནི། །ཁམས་གསུམ་འཁོར་བའི་སེམས་ཅན་འདྲེན་པའི་རྟགས། །སངས་རྒྱས་མི་བསྐྱོད་པ་ཡིས་བརྒྱན་པ་ནི། །དེ་བཞིན་གཤེགས་པའི་རིགས་ལ་དགོངས་པའི་རྟགས། །སྨིན་བསྡུས་སྨིན་མ་གློག་སྟོང་འཕྲོ་བ་ནི། །ཐུགས་རྗེའི་
ཐབས་ཀྱིས་གདུག་པ་འདུལ་བའི་རྟགས། །མཆེ་གཙིགས་དབུགས་རྒྱ་མེ་ལྟར་འབར་བ་ནི། །ཐབས་ཀྱི་སྤྱོད་པས་ཉོན་མོངས་སྲེག་པའི་རྟགས། །སྤྱན་གསུམ་དམར་བ་ཁྲོ་བོས་བལྟ་བ་ནི། །སྐུ་གསུང་ཐུགས་ཀྱི་དོན་དང་ལྡན་པའི་རྟགས། །ཨ་ལ་ལ་ཡི་གད་རྒྱངས་སྒྲོགས་པ་ནི། །འཇིག་རྟེན་
གསུམ་ན་འགྲན་ཟླ་མེད་པའི་རྟགས། །ཧ་ཧའི་གད་རྒྱངས་སྟོང་གསུམ་བརྒྱལ་བ་ནི། །ཐབས་མཁས་ཐུགས་རྗེས་གདུག་པ་འདུལ་བའི་རྟགས། །ཧཱུཾ་གི་ང་རོ་འབྲུག་སྟོང་ལྡིར་བ་ནི། །ཁྲོ་བོའི་རིགས་རྣམས་དབང་དུ་སྡུད་པའི་རྟགས། །ཕཊ་ཀྱིས་རྡོ་རྗེའི་ཐོག་སེར་འབེབས་པ་ནི། །མ་མོ་མཁའ་འགྲོ་
དབང་དུ་སྡུད་པའི་རྟགས། །གཤིན་རྗེའི་གཟུགས་ཅན་རྒྱན་དང་ཆ་ལུགས་ནི། །སྐུ་ཆེ་ཡན་ལག་རགས་ཏེ་ཆེ་བའི་རྟགས། །སྐུ་སྟོད་སེང་གེའི་པགས་པས་བརྒྱན་པ་ནི། །ཆོས་ཉིད་དོན་ལྡན་སྤྲོས་དང་བྲལ་བའི་རྟགས། །ན་བཟའ་ཆོས་གོས་སྔོན་པོ་འཆང་བ་ནི། །ཚུལ་ཁྲིམས་དོན་ལྡན་དྲི་མ་
མེད་པའི་རྟགས། །སྟག་ཤམ་བ་ཏི་ཁྲ་བོས་བརྒྱན་པ་ནི། །ཞེ་སྡང་འདུལ་མཛད་སྒྲུབ་མཆོག་སྐྱོང་བའི་རྟགས། །རིན་ཆེན་འབར་བའི་སྦྲུལ་གྱིས་དབུ་བརྒྱན་པ། །འདོད་དགུ་བསམ་པ་རེ་བ་སྐོང་བའི་རྟགས། །དགའ་བོ་ཉེ་དགའི་སྙན་ཆས་བརྒྱན་པ་ནི། །བྲམ་ཟེའི་ཀླུ་རྣམས་དབང་དུ་སྡུད་པའི་
73-1-241a

རྟགས། །གདུག་པ་འབར་བ་ཟས་སུ་གསོལ་བ་ནི། །གདོལ་པའི་རིགས་རྣམས་དབང་དུ་སྡུད་པའི་རྟགས། །ཀླུ་ནག་སེ་རལ་ཁ་རུ་བརྒྱན་པ་ནི། །དམངས་རིགས་ཀླུ་རྣམས་དབང་དུ་སྡུད་པའི་རྟགས། །འདབ་བཟང་དཀར་པོ་སྐ་རགས་བཅིངས་པ་ནི། །རྒྱལ་རིགས་ཀླུ་རྣམས་
དབང་དུ་སྡུད་པའི་རྟགས། །ནོར་རྒྱས་བུ་ཡིས་ཕྱག་ཞབས་བརྒྱན་པ་ནི། །རྗེ་རིགས་ཀླུ་རྣམས་དབང་དུ་སྡུད་པའི་རྟགས། །ཉི་ཟླའི་སྟེང་ན་གར་བྱེད་དགྱེས་པ་ནི། །ཐབས་དང་ཤེས་རབ་ཟུང་དུ་འབྲེལ་པའི་རྟགས། །སྣ་ཚོགས་པདྨའི་གདན་ལ་བཞུགས་པ་ནི། །ཉོན་མོངས་འཁོར་བའི་སྐྱོན་
གྱིས་མ་གོས་རྟགས། །རྡོ་རྗེའི་རིགས་མཆོག་བཅོམ་ལྡན་གཏུམ་པོ་ནི། །ཐབས་ཀྱི་སྤྱོད་པས་འགྲོ་དོན་བྱེད་པའི་རྟགས། །སངས་རྒྱས་ཐམས་ཅད་འདུས་པའི་སྐུ་བསྟན་པ། །སངས་རྒྱས་ཀུན་གྱི་ཕྲིན་ལས་མཛད་པའི་རྟགས། །སྐུ་ཡི་ཡན་ལག་རགས་ཏེ་དཔའ་དཔའ་འདྲ། །རྒྱན་དང་ཆ་
ལུགས་ལྡན་ཏེ་སྒེག་སྒེག་འདྲ། །ཞེ་སྡང་འཇོམས་མཛད་སྟག་གི་ཤམ་ཐབས་ཅན། །གདུག་པ་འདུལ་མཛད་སྦྲུལ་གྱི་ཆུན་པོས་བརྒྱན། །ཉོན་མོངས་འཇོམས་འཛད་མེ་དཔུང་ཀློང་ན་བཞུགས། །སངས་རྒྱས་ཀུན་གྱི་བདག་ཉིད་རྡོ་རྗེ་འཆང་། །བཅོམ་ལྡན་གཏུམ་པོའི་སྐུ་ལ་ཕྱག་འཚལ་
བསྟོད། །དཔལ་ཕྱག་ན་རྡོ་རྗེ་ལ་དོན་རྟགས་ཀྱི་སྒོ་ནས་བསྟོད་པ་སློབ་དཔོན་དཱི་པཾ་ཀ་ར་ཤྲཱི་ཛྙཱ་ནས་མཛད་པ་རྫོགས་སོ།།      །།པཎྜི་ཏ་དེ་ཉིད་དང་། ལོ་ཙཱ་བ་རྒྱ་བརྩོན་འགྲུས་སེང་གེས་བསྒྱུར་བའོ། །༄༅༅། །རྒྱ་གར་སྐད་དུ། བྷ་ག་བཱན་བཛྲ་པཱ་ཎི་སྟོ་ཏྲ། བོད་སྐད་དུ། བཅོམ་ལྡན་འདས་
ཕྱག་ན་རྡོ་རྗེ་ལ་བསྟོད་པ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །ཧཱུཾ་བཅོམ་ལྡན་ཕྱག་ན་རྡོ་རྗེ་ནི། །སྐུ་མཆོག་འབར་བའི་འོད་ཟེར་ཅན། །གདུགས་པ་མ་ལུས་འདུལ་མཛད་པ། །སྟོབས་པོ་ཆེ་ལ་ཕྱག་འཚལ་ལོ། །བཅོམ་ལྡན་ཕྱག་ན་རྡོ་རྗེ་ནི། །གསུང་མཆོག་འབར་བའི་འོད་ཟེར་ཅན། །ངག་གི་
ཉེས་པ་འཇོམས་མཛད་པ། །སྔགས་རྣམས་གསུང་ལ་ཕྱག་འཚལ་ལོ། །བཅོམ་ལྡན་ཕྱག་ན་རྡོ་རྗེ་ནི། །ཐུགས་མཆོག་འབར་བའི་འོད་ཟེར་ཅན། །རྣམ་རྟོག་མ་ལུས་འཇོམས་མཛད་པ། །རྡོ་རྗེ་བསྣམས་ལ་ཕྱག་འཚལ་ལོ། །བཅོམ་ལྡན་ཕྱག་ན་རྡོ་རྗེ་ནི། །སྐུ་མདོག་སྔོན་པོ་འོད་ཟེར་

73-1-241b

འབར། །རྡོ་རྗེའི་སྟོབས་ཀྱིས་འབྱུང་པོ་འདུལ། །རྡོ་རྗེ་བསྣམས་ལ་ཕྱག་འཚལ་ལོ། །ལས་ཀྱི་གནོད་སྦྱིན་ཆེན་པོ་རྣམས། །འཇིགས་སུ་རུང་བའི་ཆ་བྱད་ཅན། །མ་ལུས་ཐམས་ཅད་འཇིགས་པར་བྱེད། །འཇིགས་བྱེད་ཁྱོད་ལ་ཕྱག་འཚལ་ལོ། །ལྕང་ལོ་ཅན་གྱི་གནས་མཆོག་དམ་པ་ན། །
གསང་སྔགས་རིག་སྔགས་ཀུན་གྱི་བདག་པོ་སྟེ། །ལོག་འདྲེན་བགེགས་ཀྱི་ཚོགས་རྣམས་འཇོམས་མཛད་པ། །བཅོམ་ལྡན་རྡོ་རྗེ་བསྣམས་ལ་ཕྱག་འཚལ་ལོ། །བཅོམ་ལྡན་འདས་ཕྱག་ན་རྡོ་རྗེ་ལ་བསྟོད་པ་རྫོགས་སོ།།      །།༄༅། །རྡོ་རྗེ་སྔོན་པོ་ཅན་གྱི་ཆུ་གཏོར་བཞུགས། 	༄༅༅། །སྐྱབས་འགྲོ་
སེམས་བསྐྱེད་བྱས་ལ། བདག་ཉིད་ཕྱག་ན་རྡོ་རྗེ་ཝལ་གྱིས་བསྒོམས་ལ་ལུས་ངག་ཡིད་གསུམ་བྱིན་གྱིས་བརླབ་པར་བྱའོ། །དེ་ནས་ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་བརྗོད་པས་ཆུ་གཏོར་གྱི་སྣོད་དེ་སྟོང་པར་བསམས་ལ། སྟོང་པའི་ངང་ལས་བྷྲཱུཾ་སེར་པོ་ལས་གཏོར་མའི་སྣོད་
རིན་པོ་ཆེའི་ཁང་བུ་བརྩེགས་པ། རིའི་རྒྱལ་པོ་རི་རབ་ཀྱི་ཚད་ཙམ་དུ་བསམས་ཏེ། དེའི་ནང་དུ་གཏོར་མ་ཡི་གེ་ཁཾ་ལྗང་གུ་ལས་ཁ་ཟས་རོ་བརྒྱ་པ། ནམ་མཁའི་ཚད་དང་མཉམ་པ་བསམས་ཏེ། དེའི་ནང་དུ། ཨོཾ་ཨ་ཀཱ་རོ་མུ་ཁཾ་སརྦ་དྷ་མཱ་ནཱཾ་ཨཱདྱ་ནུཏྤནྣ་ཏྭཱཏ་ཨོཾ་ཨཱཿཧཱུཾ་ཞེས་འཇིག་རྟེན་པའི་བདུད་རྩིར་བྱིན་གྱིས་བརླབས་ཏེ། ཨོཾ་ཨཱཿ
ཧཱུཾ་གསུམ་གྱིས་བྱིན་གྱིས་བརླབ། ཡེ་ཤེས་ཀྱི་བདུད་རྩིར་བྱིན་གྱིས་བརླབ་པ་ནི། ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ན་སརྦ་ཨརྠ་སཱ་དྷ་ན་ཡེ་སྭཱ་ཧཱ། ཞེས་བྱ་བ་སངས་རྒྱས་སྤྱན་གྱི་སྔགས་དང་། ནམ་མཁའ་མཛོད་ཀྱི་སྔགས་ཀྱིས་སྤེལ་བ་ནི། ཨོཾ་ན་མཿསརྦ་ཏ་ཐཱ་ག་ཏེ་བྷྱོ། བི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུཏྒ་ཏེ་སྥ་ར་
ཎ་ཧི་མཾ་ག་ག་ན་ཁཾ་སྭཱ་ཧཱ། ཞེས་ལན་གསུམ་བརྗོད་དོ། །རང་གི་ས་བོན་ལ་འོད་འཕྲོས་པས་ནམ་མཁའི་ཁམས་སུ་ཧྲཱིཿལས་པདྨ་དཔག་ཏུ་མེད་པ་བསམས་ཏེ། དེའི་སྟེང་དུ་ཡི་དམ་ལྷ་ལ་སོགས་པ་འགྲོ་དྲུག་ཐམས་ཅད་སྤྱན་དྲངས་ལ། དེ་རྣམས་ལ་ཡང་འོད་ཕོག་པས་སྡིག་སྒྲིབ་དག་ནས་ཡི་དམ་གྱི་
ལྷར་བྱས་ལ། བདུན་རྣམ་དག་བྱས་ལ་བགེགས་བསྐྲད་པ་ནི་ཨོཾ་བཛྲ་པཱ་ཎི་ཨ་མྲྀ་ཏེ་ཀུཎྜ་ལི་ཧ་ན་ཧ་ན་ཧཱུཾ་ཕཊ་ཅེས་བྱའོ། །ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་ཨཱ་ཛྙཱ་པ་ཡ་ཏི་ཨི་དཾ་བ་ལིཾ་གྲྀཧྞཾ་ཏུ་ས་མ་ཡ། རཀྵཾ་ཏུ་མ་མ་སརྦ་སིདྡྷཾ་མེ་པྲ་ཡ་ཙྪནྟུ་མ་མ་སརྦ་ཀརྨ་སཱ་དུ་སྭཱ་ཧཱ། ཞེས་པས་ཡི་དམ་རྣམས་ལ་དབུལ། 

73-1-242a

མགྲོན་གཞན་རྣམས་ལ་ཡང་སྦྱིན་པ་ན། ན་མ་སརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཨོཾ་སཾ་བྷ་ར་སཾ་བྷ་ར་ཧཱུཾ་ཞེས་བརྗོད་པས་བྱིན་གྱིས་རླབས་ཀྱིས་ཕན་ཚུན་ཞེ་འགྲས་པ་མེད་པ་དང་། འབྱོར་པ་ཕུན་སུམ་ཚོགས་པར་བྱས་ནས་སྔགས་འདིས་ཡིད་ལ་ཅི་འདོད་པ་དང་། མིག་སྔར་ཅི་མཛེས་པ་མངོན་པར་དགའ་
བ་དང་། མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་རོ། །ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷེ་ལོ་ཙ་ན་སརྦ་ཨརྠ་སཱ་དྷ་ན་ཡ་སྭཱ་ཧཱ། སྔགས་འདི་གཉིས་ལན་བདུན་བདུན་དུ་བརྗོད་དོ། །དེ་ནི་ཟང་ཟིང་གི་སྦྱིན་པའོ། །ཆོས་ཀྱི་སྦྱིན་པ་ནི་རྟེན་འབྲེལ་སྙིང་པོ་དང་། དེ་ནས། ཆོས་རྣམས་ཐམས་ཅད་རྒྱུ་ལས་
བྱུང་། །དེ་རྒྱུ་དེ་བཞིན་གཤེགས་པས་གསུངས། །དེ་ལ་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །སྡིག་པ་ཅི་ཡང་མི་བགྱི་སྟེ། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་དུལ། །འདི་ནི་སངས་རྒྱས་བསྟན་པ་ཡིན། །ཞེས་པ་དང་། དེ་ནས་
སྨོན་ལམ་གདབ་པ་ནི། དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་བསགས་ཏེ། །བསོད་ནམས་ཡེ་གེས་ལས་བྱུང་བའི། །དམ་པ་ཉིད་ནི་ཐོབ་པར་ཤོག །ཅེས་པའོ། །དེ་ནས་བདེན་པ་བདར་བ་ནི། སངས་རྒྱས་ཀྱི་བདེན་པ་དང་། ཆོས་ཀྱི་བདེན་པ་དང་། གསང་སྔགས་
དང་། རིག་སྔགས་དང་། ཕྱག་རྒྱ་དང་། ཏིང་ངེ་འཛིན་དང་། བདག་གི་བསམ་པ་རྣམ་པར་དག་པའི་སྟོབས་ཀྱིས་སེམས་ཅན་ཐམས་ཅད་ཀྱི་གནོད་པ་ཐམས་ཅད་ཞི་ནས་བར་ཆད་དང་གནོད་པ་ཐམས་ཅད་སྤངས་ཏེ་བྱམས་པའི་སེམས་དང་ལྡན་པར་གྱུར་ཅིག །བདག་གི་དགེ་བའི་རྩ་བ་
འདི་དག་གིས། །ཀླུ་རྣམས་གནོད་པ་མྱུར་དུ་ཞི་བ་དང་། །བགེགས་དང་ལོག་འདྲེན་འཚེ་བ་མེད་པ་དང་། །བདག་གི་ལས་རྣམས་ཐམས་ཅད་འགྲུབ་པར་མཛོད། །དེ་ནས་རྡོ་རྗེ་སེམས་དཔའི་ཡི་གེ་བརྒྱ་པ་བརྗོད་ལ། བཛྲ་མུཿཞེས་པས་སོ་སོར་རང་གི་གནས་སུ་གཤེགས་པར་བྱའོ། །རྡོ་རྗེ་
གོས་སྔོན་པོ་ཅན་གྱི་ཆུ་གཏོར་གྱི་ཆོ་ག་སློབ་དཔོན་འགྲོ་བཟངས་སྙིང་པོས་མཛད་པ་རྫོགས་སོ།།      །།རྒྱ་གར་གྱི་མཁན་པོ་པཎྜི་ཏ་ཏེ་ཛ་དེ་བ་དང་། བོད་ཀྱི་སྒྲ་བསྒྱུར་གྱི་ལོ་ཙཱ་བ་དགེ་སློང་ཤེས་རབ་ཀྱིས་ཞུས་ཤིང་གཏན་ལ་ཕབ་པའོ། །༄༅༅། །རྒྱ་གར་སྐད་དུ། བཛྲ་པཱ་ཎི་

73-1-242b

ནཱི་ལཱཾ་བ་ར་དྷ་ར་ནཱ་ག་བ་ལིཾ་བི་དྷི། བོད་སྐད་དུ། ཕྱག་ན་རྡོ་རྗེ་གོས་སྔོན་པོ་ཅན་གྱི་ཀླུ་གཏོར་གྱི་ཆོ་ག །བཅོམ་ལྡན་འདས་ཁྲོ་བོའི་རྒྱལ་པོ་ཕྱག་ན་རྡོ་རྗེ་གོས་སྔོན་པོ་ཅན་ལ་ཕྱག་འཚལ་ལོ། །རང་ཉིད་ལྷ་ཡི་ང་རྒྱལ་གྱིས། །བྱམས་དང་སྙིང་རྗེ་བྱང་ཆུབ་སེམས། །ཡང་ནས་ཡང་དུ་བསྒོམ་བྱས་ནས། །མདུན་
དུ་པཾ་ལས་པདྨ་ནི། །ཁ་དོག་དམར་པོ་འདབ་བརྒྱད་དེ། །ཕུཿབརྒྱད་ལས་ནི་ཀླུ་བརྒྱད་བསྐྱེད། །དེ་ནས་སྙིང་གའི་འོད་ཟེར་དང་། །ཨོཾ་ཕཻཾ་ཕུཿཞེས་པས་ཀླུ་ཆེན་བརྒྱད། །འཁོར་དང་བཅས་པ་བཀུག་ལ་བསྟིམ། །དཀར་གསུམ་མངར་གསུམ་བདུད་རྩིར་བཅས། །དམ་ཚིག་ཡེ་ཤེས་ཀླུ་རྣམས་
མཆོད། །དེ་ནས་གཏོར་མ་བྱིན་བརླབ་སྟེ། །སྣོད་ནི་ཁཾ་ལས་རིན་པོ་ཆེ། །ཤིན་ཏུ་མཛེས་ཤིང་བལྟ་ན་སྡུག །ཡངས་ལ་རྒྱ་ནི་ཆེ་བར་བསྒོམ། །རིན་ཆེན་སྣོད་མཆོག་དེ་ནང་དུ། །དཀར་གསུམ་མངར་གསུམ་བདུད་རྩིར་བཅས། །སྣོད་ནི་ཤིན་ཏུ་གང་བར་བསམ། །དེ་ཡི་སྟེང་དུ་ཡི་གེ་གསུམ། །
ཁ་དོག་དྲི་དང་རོ་སྦྱངས་དང་། །བདུད་རྩི་རོ་མཆོག་བརྒྱད་དང་ལྡན། །གཡས་པ་མཆོག་སྦྱིན་ཕྱག་རྒྱ་ལ། །ཧ་ཧོཿཧྲཱིཿབཾཾ་དག་ལས་ནི། །དཔག་བསམ་ཤིང་ཆེན་བསམ་བྱས་ལ། །ལོ་མ་ཡལ་ག་ཐམས་ཅད་ལ། །རིན་ཆེན་བུམ་པ་བདུད་རྩིས་གང་། །དཔག་ཏུ་མེད་པ་བསམས་ནས་ནི། །
བྲུཾ་ལས་བདུད་རྩིའི་ཆར་བབས་པས། །གཏོར་མ་ཡོངས་སུ་གང་བར་བསམ། །ཨོཾ་ཨཱཿཧཱུཾ་ཞེས་ལན་གསུམ་བརྗོད། །མགྲོན་རྣམས་ཐམས་ཅད་ལྕེ་ལས་ནི། །ཧཱུཾ་ལས་རྡོ་རྗེ་སྦུ་གུས་རྔུབ། །ཨོཾ་བ་སུ་ཀི་ཨི་མཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཏཀྵ་ཀ་ཨི་མཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཀརྐོཊ། 
ཨོཾ་ཧུ་ལུ་ཏ་ཀ །ཨོཾ་པདྨ། ཨོཾ་མ་ཧཱ་པདྨ། ཨོཾ་ཤཾ་ཁ་པཱ་ལ། ཨོཾ་ཀུ་ལི་ཀ་ཡ། ཨོཾ་ནཱ་ག་པ་ན་སཾ་ཁྲུ་ཧ་ར་ཧ་ར་ཨི་མཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨི་མཾ་བ་ལིཾ་ཙཾ་ལ་གདགས། ཨོཾ་ཕཻཾཀླུའི་རྒྱལ་པོ་སོག་མ་མེད། །ཨི་མཾ་བ་ལིཾ་ཁ་ཁ་ཁཱ་ཧི་ཁཱ་ཧི། ཨོཾ་མཐའ་ཡས་དང་ནི་ནོར་རྒྱས་བུ། །འཇོག་པོ་དང་
ནི་སྟོབས་ཀྱི་རྒྱུ། །པདྨ་པདྨ་ཆེན་པོ་དང་། །དུང་སྐྱོང་དང་ནི་རིགས་ལྡན་དང་། །ལྷ་མོ་ལྷ་མོ་ཆེན་མོ་དང་། །ཟླ་བ་ཟླ་བ་སྤྱི་གཙུག་ཆེ། །སྙིང་པོ་མེད་དང་ཧུ་ལུནྟ། །དགའ་བོ་དང་ནི་ཉེར་དགའ་དང་། །རྒྱ་མཚོ་དང་ནི་རྒྱ་མཚོ་ཆེ། །གདུང་བ་དང་ནི་གདུང་བ་ཆེ། །དཔལ་གྱི་འོད་དང་འོད་པོ་ཆེ། །

73-1-243a

རིན་ཆེན་འོད་དང་གཟུགས་བཟང་དང་། །གཟུགས་ཆེན་འོད་དང་སྦྲུལ་བཟང་ལྟོ་འཕྱེ་ཆེ། །སྨིག་རྒྱུ་དང་ནི་སྨིག་རྒྱུ་ཆེ། །ཀླུ་ཆེན་བརྒྱད་པོ་འཁོར་དང་བཅས། །འདིར་གཤེགས་མཆོད་སྦྱིན་གཏོར་མ་བཞེས། །མཛེས་པའི་དཀར་གསུམ་གཏོར་མ་འདི། །མངར་གསུམ་
འོ་མའི་རྒྱ་མཚོར་བཅས། །རིན་ཆེན་ཕྲེང་བའི་ཐེམ་སྐས་ཅན། །ཀླུ་ཡི་གནོད་པ་སྐྱོབ་བྱེད་པ། །མཐུན་པའི་རྫས་སུ་འདི་གྱུར་ཅིག །མཆོད་སྦྱིན་གཏོར་མ་འདི་བཞེས་ལ། །བདག་ཅག་འཁོར་དང་བཅས་རྣམས་ལ། །ཀླུ་ལས་གྱུར་པའི་ནད་རྣམས་ནི། །མཐོང་བའི་དུག་དང་ཁ་རླངས་
དུག །བསམ་པའི་དུག་ལ་སོགས་པ་ཀུན། །དེ་དག་ཐམས་ཅད་ཞི་གྱུར་ཅིག །བདག་པས་གཅེས་པའི་རྫས་ཁྱེར་ལ། །བདག་ལ་གནོད་པ་མ་བྱེད་པར། །རྟག་ཏུ་བྱམས་པའི་སེམས་དང་ནི། །ཕ་མ་ལྟ་བུའི་སེམས་ཀྱིས་ལྟོས། །གཞན་ཡང་ལས་ལས་སྐྱེས་པ་ཡི། །བཀའ་དང་དམ་ལས་
ཐོགས་པ་ཡི། །གདུག་པ་ཅན་གྱི་ཚོགས་རྣམས་ཀུན། །བཀའ་ཡི་ཕམ་འབབ་འདི་སྣོམས་ལ། །སོ་སོ་རང་རེའི་གནས་སུ་དེངས། །ཉོན་ཅིག་ཉོན་ཅིག་རིགས་ཀྱི་བུ། །ཇི་ལྟར་ས་བོན་ཚ་བ་ལ། །མྱུ་གུ་ཚ་བ་འབྱུང་བ་ལྟར། །སོ་སོ་རང་རེའི་གནས་ལ་སྤྱོན། །འབྱུང་བཞི་སོ་སོར་གྱུར་ཡང་སྲིད། །
བདེ་གཤེགས་བཀའ་ལས་འགྱུར་བ་མེད། །ལས་འབྲས་འགྱུར་ཞིང་སླུ་མི་སྲིད། །དེ་ལས་ཁྱོད་སྡིག་མི་བྱེད་པར། །དགེ་བའི་བསམ་པས་གནས་པར་གྱིས། །བདེན་པ་བདར་ལ་ཆོས་བཤད་བྱ། །དེ་རྗེས་ཡི་གེ་བརྒྱ་པ་བརྗོད། །ཡེ་ཤེས་ཀླུ་རྣམས་གཤེགས་སུ་གསོལ། །དམ་ཚིག་
པ་ནི་མི་དམིགས་བསམ། །གཏོར་མ་རྒྱ་མཚོ་ཆེན་པོའམ། །ཡང་ན་གནོད་པའི་ཕྱོགས་སུ་གཏོང་། །རྡོ་རྗེ་གོས་སྔོན་གྱི་ཀླུ་གཏོར་ཆོ་ག་སློབ་དཔོན་འགྲོ་བཟངས་སྙིང་པོས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། ག་ཎ་ཙཀྲ་ནཱ་མ། བོད་སྐད་དུ། ཚོགས་ཀྱི་འཁོར་
ལོ་ཞེས་བྱ་བ། གོས་སྔོན་ཅན་ལ་ཕྱག་འཚལ་ལོ། །གདུག་པ་འདུལ་བྱེད་རྡོ་རྗེ་ཅན། །དེ་ལ་རྟག་ཏུ་ཕྱག་འཚལ་ཏེ། །ཚོགས་གཉིས་ཡོངས་སུ་རྫོགས་བྱའི་ཕྱིར། །ཚོགས་ཀྱི་ཆོ་ག་བཤད་པར་བྱ། །གནས་ཁང་དབེན་ཞིང་ཉམས་དགའ་བར། །ཕྱག་དར་ཆག་ཆག་བྱས་ནས་ནི། །དཀྱིལ་

73-1-243b

འཁོར་ཡང་ནི་རབ་བཞེངས་ལ། །ཡང་ན་མཎྜལ་སྔོན་པོར་བྱ། །གདུགས་དང་བ་དན་ལ་སོགས་དབུལ། །རྡོ་རྗེ་ཅན་གྱི་རྟེན་རྣམས་དགྲམ། །མཆོད་པ་ལྔ་དང་ལྡན་པར་བྱ། །གཏོར་ཚོགས་རྣམས་ཀྱང་བཟང་དུ་བཤམ། །བདག་ཉིད་ཡི་དམ་ལྷར་ནི་བསྐྱེད། །མིག་གཉིས་དག་ཏུ་ཉི་ཟླ་བསྒོམ། །
དེ་སྟེང་ཧཱུཾ་ནི་བསམ་པར་བྱ། །ཕྱོགས་རྣམས་ཀུན་ཏུ་བལྟས་པས་བསྲེག །དེ་ནས་གནས་ནི་བསྲུང་བྱའི་ཕྱིར། །ཨོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ཤར་གྱི་ཕྱོགས་སུ་རབ་འཕྲོས་པས། །རྡོ་རྗེ་རིགས་ཀྱི་ཁྲོ་བོ་སྟེ། །སྐུ་མདོག་དཀར་ལ་འཇིགས་པའི་གཟུགས། །ཕྱག་ན་མཚོན་ཆ་སྣ་ཚོགས་ཐོགས། །
དཔག་ཏུ་མེད་པས་གང་བ་བསྐྱེད། །ཨོཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། རིན་ཆེན་རིགས་ཀྱི་ཁྲོ་བོ་སྟེ། །སྐུ་མདོག་སེར་ལ་འཇིགས་པའི་གཟུགས། །ཕྱག་ན་མཚོན་ཆ་སྣ་ཚོགས་ཐོགས། །དཔག་ཏུ་མེད་པས་གང་བར་བསྐྱེད། །ཨོཾ་གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ་ཧཱུཾ་ཕཊ། པདྨ་རིགས་ཀྱི་ཁྲོ་བོ་སྟེ། །
སྐུ་མདོག་དམར་ལ་འཇིགས་པའི་གཟུགས། ཕྱག་ན་མཚོན་ཆ་སྣ་ཚོགས་ཐོགས། །དཔག་ཏུ་མེད་པས་གང་བར་བསྐྱེད། །ཨོཾ་ཨཱ་ན་ཡ་ཧོ་བྷྲ་ག་ཝཱ་ན་བིདྱཱ་རཱ་ཛ་ཧཱུཾ་ཧཱུཾ་ཕཊ། ལས་ཀྱི་རིགས་ཀྱི་ཁྲོ་བོ་སྟེ། །སྐུ་མདོག་སྔོ་ལ་འཇིགས་པའི་གཟུགས། །ཕྱག་ན་མཚོན་ཆ་སྣ་ཚོགས་
ཐོགས། །དཔག་ཏུ་མེད་པས་གང་བར་བསྐྱེད། །ཕྱོགས་གསུམ་སྤྲོས་པ་ཤེས་པར་བྱ། །རྡོ་རྗེ་གུར་དང་ར་བ་གསུམ། །དེ་ལ་མེ་དཔུང་འབར་བ་བསྐྱེད། །དེ་ནས་མགྲོན་རྣམས་སྤྱན་དྲངས་ལ། །བདུན་པོ་ཡོངས་སུ་དག་པར་བྱ། །དེ་ནས་གཏོར་མ་གཏོར་ཆོག་བཞིན། །རྒྱས་པར་རབ་ཏུ་
དབུལ་བར་བྱ། །དེ་ནས་ཚོགས་ལ་བགེགས་བསྐྲད་ལ། །གཏོར་མ་བྱིན་གྱིས་བརླབ་པ་ནི། །དེ་ནས་ཚོགས་བདག་བཀོད་པ་ནི། །ཚོགས་རྗེ་ཚོགས་ཀྱི་བདག་པོ་ནི། །བཅོམ་ལྡན་རྡོ་རྗེ་གོས་སྔོན་ཅན། །ཚོགས་ཀྱི་བདག་པོ་བཞུགས་སུ་གསོལ། །དུས་གསུམ་བླ་མ་རྣམས་དང་ནི། །ཇོ་བོ་
དཀོན་མཆོག་གསུམ་པོ་དང་། །བསྟན་པ་སྲུང་བའི་ཆོས་སྐྱོང་དང་། །དཔལ་མགོན་བདུན་ཅུ་རྩ་གཉིས་སོགས། །ཚོགས་ཀྱི་བདག་པོར་བཞུགས་སུ་གསོལ། །དེ་ནས་ཚོགས་ནི་དབུལ་བ་ནི། །དུས་གསུམ་བླ་མ་རྣམས་དང་ནི། །ཡི་དམ་ལྷ་ཚོགས་འཁོར་བཅས་ལ། །ཚོགས་ཀྱི་

73-1-244a

མཆོད་པ་དབུལ་ལགས་ན། །ཐུགས་རྗེ་ཆེར་དགོངས་དངོས་གྲུབ་སྩོལ། །ཨ་ལ་ལ་སྟེ་མཆོད་པ་བཞེས། །ལྷ་རྣམས་འདུལ་ཕྱིར་གོས་དཀར་ཅན། །སྐུ་ཡི་དཀྱིལ་འཁོར་འཁོར་བཅས་ལ། །ལྷ་སྲིན་འདུལ་ཕྱིར་གོས་དམར་ཅན། །གསུང་གི་དཀྱིལ་འཁོར་འཁོར་བཅས་ལ། །
ཀླུ་རྣམས་འདུལ་ཕྱིར་གོས་སྔོན་ཅན། །ཐུགས་ཀྱི་དཀྱིལ་འཁོར་འཁོར་བཅས་ལ། །བླ་མེད་དཀོན་མཆོག་གསུམ་པོ་ལ། །བསྟན་པ་སྲུང་བའི་ཆོས་སྐྱོང་ལ། །ལྷག་མ་ཡུལ་བདག་རྣམས་ལ་སྦྱིན། །དེ་ནས་ཚོགས་ལ་ལོངས་སྤྱོད་པ། །ལྷག་མ་འབྱུང་པོའི་གཏོར་མ་གཏོང་། །གླུ་དང་
གར་དང་བསྐོར་བ་སོགས། །མཆོད་པ་རྣམ་པ་སྣ་ཚོགས་དབུལ། །དེ་ནས་མཇུག་གི་ལས་རྣམས་སུ། །མཆོད་བསྟོད་ཡི་གེ་བརྒྱ་པས་བཤགས། །བཟོད་པར་གསོལ་ཞེས་གཤེགས་པ་ནི། །གང་ཡང་བདག་བློ་གཏི་མུག་པས། །ལེགས་སྤྱད་འདི་ལ་ཉེས་པ་གང་། །དེ་ཀུན་མགོན་
པོས་བཟོད་པར་མཛོད། །གཙོ་བོ་ནུས་པ་མ་མཆིས་ཤིང་། །མ་ཚང་བ་དང་མ་ཆོག་པ། །དེ་ཀུན་མགོན་པོས་བཟོད་པར་མཛོད། །ཧཱུཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །ཉིད་ཀྱི་ཡུལ་དུ་གཤེགས་སུ་གསོལ། །ཉིད་ཀྱི་ཡུལ་དུ་གཤེགས་ནས་
ཀྱང་། །ཐུགས་ཀྱིས་བརྩེ་བར་སླར་དགོངས་ལ། །སླར་ཡང་བྱོན་པར་མཛད་དུ་གསོལ། །བཛྲ་མུཿཡིས་གཤེགས་སུ་གསོལ། །ཚོགས་ཀྱི་འཁོར་ལོའི་ཆོ་ག་གྲུབ་པ་ཐོབ་པའི་སློབ་དཔོན་འགྲོ་བཟངས་སྙིང་པོས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། 
བཛྲ་པཱ་ཎི་མཎྜ་ལ་བི་དྷི། བོད་སྐད་དུ། ཕྱག་ན་རྡོ་རྗེའི་དཀྱིལ་འཁོར་གྱི་ཆོ་ག །དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དཔལ་ལྡན་ཕྱག་ན་རྡོ་རྗེ་དང་། །བླ་མ་ལ་གུས་ཕྱག་འཚལ་ནས། །སྒྲུབ་པ་པོ་ལ་ཕན་པའི་ཕྱིར། །དེ་ཡི་དཀྱིལ་འཁོར་ཆོ་ག་བརྩམ། །དཔལ་ཕྱག་ན་རྡོ་རྗེ་བསྒྲུབ་
པར་འདོད་པའི་དོན་དུ། དཀྱིལ་འཁོར་ཆོ་ག་འདི་བསྡུ་བར་བྱའོ། །དེ་ལ་སྔོན་དུ་བསྙེན་པ་བྱ་བ་ནི། སྒྲུབ་པའི་ཐབས་ལས་འབྱུང་བ་བཞིན་དུ། བདག་ཉིད་ལྷར་བསྐྱེད་ནས། སྙིང་པོ་འབུམ་བཟླས་པར་བྱ་བའམ། ཡང་ན་ཇི་སྲིད་མཚན་མ་མ་བྱུང་གི་བར་དེ་སྲིད་ཀྱི་བར་དུ་བསྒོམ་པ་དང་

73-1-244b

བཟླས་པ་བྱའོ། །དེ་ནི་སྔོན་དུ་བསྙེན་པ་བྱེད་པའི་ཆོ་གའོ། །དེ་ལྟར་སྔོན་དུ་བསྙེན་པའི་ཆོ་ག་རྫོགས་ནས། སའི་ཆོ་ག་བྱ་སྟེ། གཙུག་ལག་ཁང་ངམ། ཀུན་དགའ་ར་བའམ། ནགས་ཚལ་ལ་སོགས་པ་ཡིད་དུ་འོང་བའི་གནས་སུ་ས་བསླང་བ་དང་། ས་སྦྱང་པ་དང་། ས་གཟུང་བ་དང་། 
ས་བྱིན་གྱིས་བརླབ་པར་བྱ་སྟེ། ཚད་བརྟག་པ་དང་། དབྱིབས་བརྟག་པ་དང་། ཁ་དོག་བརྟག་པའོ། །དེ་ལ་ས་བསླང་བ་ནི། གནས་ཀྱི་བདག་པོ་ལ་བསླང་བ་ནི། མཎྜལ་དང་དྲིའི་ཐིག་ལེ་དང་མེ་ཏོག་གི་ཚོམ་བུ་བྱས་ཏེ། མཆོད་པ་དང་། གཏོར་མ་བཤམས་ནས། ཨོཾ་བི་ཏི་བཾ་ས་ཨཱ་
ཀཱཪྵ་ཡ་ཛཿབྱ་བ་དང་། རྡོ་རྗེ་བསྡམས་པའི་མཛུབ་མོ་གཉིས་བརྐྱང་བ་ས་ལ་རེག་པར་བྱས་པས། སའི་ལྷ་མོ་འཁོར་དང་བཅས་པ་སྤྱན་དྲངས་ལ། སའི་ལྷ་མོ་ལ་མཆོད་པ་དང་། དེའི་འཁོར་ལ་གཏོར་མ་བྱིན་ལ། གསོལ་བ་གདབ་པར་བྱ་སྟེ། སྐྱོབ་པ་སངས་རྒྱས་ཐམས་ཅད་
ཀྱི། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་སྡེ་བཅོམ་པ་ལྟར། །དེ་བཞིན་བདག་གིས་བདུད་ཀྱི་སྡེ། །ཕམ་པར་བྱས་ཏེ་དཀྱིལ་འཁོར་འབྲི། །ཞེས་ལན་གསུམ་གྱི་བར་དུ་བརྗོད་ལ། 
བྱོན་པར་བསམས་ཏེ་མཆོད་ལ་གཤེགས་སུ་གསོལ། དེ་ནས་སྦྱང་བའི་ཕྱིར་དྲག་པོ་དང་ཞི་བའི་སྦྱིན་སྲེག་དང་། འདོམ་གང་ཉེ་འཁོར་དུ་ལྟེ་བ་ནུབ་ཙམ་མམ། པུས་མོ་ནུབ་ཙམ་བརྐོས་ལ་གསེག་མ་དང་གྱོ་མོ་དང་། རུས་པ་ལ་སོགས་པ་བསལ་ཏེ། སྤོས་ཆུས་བྲན་ཏེ། ས་དེ་ཉིད་ཀྱིས་བཀང་
ནས་སའི་ལྟས་བརྟག་པར་བྱ་སྟེ། ས་བསླང་བའི་ཆོ་གའོ། །དེའི་རྗེས་ལ་ས་གཟུང་བ་ནི། གདུགས་དང་རྒྱལ་མཚན་དང་། བླ་རེ་ལ་སོགས་པ་བྲེས་ལ། སྐུ་གཟུགས་བཀྲམ་ནས། ཕྱོགས་བཞིར་སྤོས་རྒྱུན་མི་འཆད་པར་བཏུལ་བར་བྱའོ། །དེ་ནས་ལག་པ་གཡས་པ་དེར་
གཏུགས་ཏེ། ཡི་གེ་བརྒྱ་པ་ལན་བདུན་ནམ་ཉི་ཤུ་རྩ་གཅིག་བཟླས་པར་བྱའོ། །ས་གཞི་རྡོ་རྗེའི་རང་བཞིན་དུ་བྱིན་གྱིས་བརླབ་པ་ནི། ས་གཟུང་བ་དང་བྱིན་གྱིས་བརླབ་པ་སྟེ། སའི་ཆོ་གའོ། །དེ་ནས་ཁྲུས་བྱ་ཞིང་དྲིས་བྱུགས་ལ་གོས་སྔོན་པོའི་སྟོད་གཡོགས་བགོས་ལ་རྒྱན་གདགས་

73-1-245a

ཤིང་དང་རྡོ་རྗེ་དང་དྲིལ་བུར་ལྡན་པས། གལ་ཏེ་ནུས་ན་སྨྱུང་བར་གནས་པ་དང་། མ་ནུས་ན་ཟས་དཀར་གསུམ་བཟའ་བར་བྱའོ། །དེ་ལ་རེ་ཞིག་དཀྱིལ་འཁོར་གྱི་དབུས་སུ་འདུག་ལ། ཚོགས་བསགས་པ་དང་། སྲུང་བའི་འཁོར་ལོ་དང་། གཞལ་ཡས་ཁང་གདན་དང་བཅས་
པ་བསྒོམ་པར་བྱའོ། །དེ་ལ་ཡི་གེ་ཧཱུཾ་ཡོངས་སུ་གྱུར་པ་ལས། རྡོ་རྗེ་ཆེན་པོ་ནམ་མཁའི་ཚད་དང་མཉམ་པའི་ཁོང་སྟོང་བསམ་པ་ནི་སྲུང་བའི་འཁོར་ལོའོ། །དེའི་སྟེང་དུ་བྷྲཱུཾ་ལས་གཞལ་ཡས་ཁང་གྲུ་བཞི་པ་རྟ་བབས་དང་བཅས་པ་བསྐྱེད་ལ། དབུས་སུ་ཨ་ལས་ཟླ་བའི་དཀྱིལ་འཁོར་བསྒོམ་
པར་བྱའོ། །དེ་ནས་བདག་ཉིད་ལྷར་བསྐྱེད་ལ། ཡེ་ཤེས་སེམས་དཔའ་གཞུག་པ་དང་། དབང་བསྐུར་བ་དང་། ཡི་གེ་གསུམ་གྱིས་གནས་གསུམ་དུ་བྱིན་གྱིས་བརླབས་པའི་བར་དུ་བྱས་ལ་ལྷ་མོ་མཆོད་ནས། གསོལ་བ་གདབ་པར་བྱའོ། །དེ་ནས་སྒྲུབ་པའི་གྲོགས་པོས་མཚན་བརྒྱ་རྩ་
བརྒྱད་པས་བསྟོད་ལ་གསོལ་བ་གདབ་སྟེ། མིག་གཡས་པར་མ་ལས་ཉི་མ། གཡོན་པར་ཊ་དང་ཨ་ལས་ཟླ་བ། རྐང་མཐིལ་དུ་ཨ་ལས་སྣ་ཚོགས་རྡོ་རྗེ་བསྐྱེད་ནས་ལངས་ཏེ། སངས་རྒྱས་ཐམས་ཅད་ལ་ཕྱག་བྱས་ནས། བདག་ཉིད་ལྷའི་ང་རྒྱལ་གསལ་བར་བྱས་ནས། དབུས་ཀྱི་གཙོ་
བོ་ནམ་མཁར་བཏེག་ལ་ཁྲོ་བོའི་བསྟོད་པ་བྱའོ། །དེ་ལ་བསྟོད་པ་ནི། ཆོས་དབྱིངས་སྟོང་པ་གཉིས་མེད་ངང་ཉིད་ལས། །འཇིག་རྟེན་སྤྱོད་པའི་ཚུལ་ཡང་མི་སྤོང་ཞིང་། །ཐབས་ལ་མཁས་པས་འཇིགས་བྱེད་སྐུར་སྟོན་པ། །ཁྲོ་ཆེན་འབར་བའི་ཚོགས་ལ་ཕྱག་འཚལ་བསྟོད། །བསྐལ་
པ་མེ་ལྟར་འབར་བའི་ཀློང་དཀྱིལ་ནས། །དཔའ་བོའི་སྟང་སྟབས་བརྐྱང་བསྐུམ་ཚུལ་དུ་བཞུགས། །ཉི་ཟླ་འབར་བའི་སྤྱན་གྱི་སྡང་མིག་གིས། །བགེགས་དཔུང་སྲེག་པར་མཛད་ལ་ཕྱག་འཚལ་བསྟོད། །ཅེས་བརྗོད་ནས་བཀའ་བསྒོ་བར་བྱ་སྟེ། དཀྱིལ་འཁོར་ཆེན་པོའི་ས་གཞི་ལ་གནས་པའི། །
ལྷ་ལ་སོགས་པའི་བགེགས་ཚོགས་ཀུན་ཉོན་ཅིག །ད་ནི་གནས་འདིར་དཀྱིལ་འཁོར་ཆེན་པོ་འབྲི། །བགེགས་ཀྱི་རིགས་ཚོགས་གང་ཡིན་འབྱེར་བར་གྱིས། །ཅི་སྟེ་ང་ཡི་བཀའ་ལས་འདས་གྱུར་ན། །ཡེ་ཤེས་ཅན་གྱི་རྡོ་རྗེ་འབར་བ་འདིས། །སྤྱི་བོ་ཚལ་པ་བརྒྱར་ནི་རབ་འགེམས་ཤིང་། །རྣམ་

73-1-245b

པར་འཇིག་པར་འགྱུར་བར་གདོན་མི་ཟ། །ཞེས་བྱ་བ་དང་། དེང་རྣལ་འབྱོར་གྱི་དབང་ཕྱུག་ཆེ་གེ་མོ་ཞེས་བྱ་བས། སློབ་མ་ཆེ་གེ་མོ་ཞེས་བྱ་བ། རྫོགས་པའི་བྱང་ཆུབ་ཐོབ་པར་བྱ་བའི་ཕྱིར་དང་། སེམས་ཅན་ཐམས་ཅད་བླ་ན་མེད་པའི་བྱང་ཆུབ་ཐོབ་པར་བྱ་བའི་ཕྱིར་དཔལ་ཕྱག་ན་རྡོ་རྗེ་ཞེས་བྱ་བའི་
དཀྱིལ་འཁོར་ཆེན་པོ་ཞིག་རྩོམ་གྱིས། གང་སུ་ཡང་རུང་བ་ས་ཕྱོགས་འདི་ན་གནས་པའི་ལྷ་དང་ལྷ་མ་ཡིན་དང་གནོད་སྦྱིན་དང་སྲིན་པོ་དང་། ཡི་དགས་དང་། ཤ་ཟ་དང་བརྗེད་བྱེད་དང་འབྱུང་པོ་དང་། ནམ་མཁའ་ལྡིང་དང་མི་འམ་ཅི་དང་། རིག་འཛིན་ལ་སོགས་པ་རྒན་པོ་དང་། རྒན་མོ་གཡོག་
དང་འཁོར་དུ་བཅས་པ་རྣམས། འདིར་མ་གནས་པར་གཞན་དུ་དེངས་ཤིག །དེ་ལྟར་ཕྱག་ན་རྡོ་རྗེའི་བཀའ་ཐོས་པས་མྱུར་བ་ཉིད་དུ་དེངས་ཤིག །གང་དག་མི་འགྲོ་བ་དེ་དག་ནི། ངའི་ཡེ་ཤེས་ཀྱི་རྡོ་རྗེ་ཆེན་པོ་ཀུན་དུ་འབར་བ་འདིས་མགོ་བོ་ཚལ་པ་བརྒྱར་འགས་པར་འགྱུར་རོ། །ཧཱུཾ་ཞེས་ལན་གསུམ་
བརྗོད་དེ། རྡོ་རྗེ་ཆེན་པོའི་གར་དང་། རྡོ་རྗེའི་འགྲོས་ཀྱིས་ས་གཞི་ལན་གསུམ་བསྐོར་ཞིང་། རང་གི་ལུས་ལ་ཁྲོ་བོའི་ཚོགས་ཕྱུང་ལ། སྡང་བ་ཐམས་ཅད་བསྐྲད་པར་བསམ་མོ། །དེ་ནས་ཡི་གེ་ཧཱུཾ་གིས་སྲུང་བའི་འཁོར་ལོ་བྱས་ལ། ཕུར་བུ་ལྔ་སྟོད་ཕྱག་ན་རྡོ་རྗེ་སྨད་རྡོ་རྗེ་རྩེ་གཅིག་པ་ལྟ་བུར་བསྐྱེད་ནས། ཨོཾ་
བཛྲ་ཀཱི་ལི་ཀཱི་ལཱ་ཡ་སརྦ་བིགྷྣཱཾ་བནྡྷ་ཧཱུཾ་ཕཊ། ཅེས་བྱ་བ་བརྒྱ་རྩ་བརྒྱད་བཟླས་ལ། དབུས་དང་གྲ་བཞིར། ཨོཾ་གྷ་གྷ་གྷཱ་ཏ་ཡ་བྷཱ་ཏ་ཡ་སརྦ་དུཥྚཱན་ཕཊ། ཀཱི་ལཱ་ཡ་ཀཱི་ལཱ་ཡ་སརྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལི་ཀཱི་ལཱ་ཡ་བཛྲ་དྷ་ར་ཨཱ་ཛྙཱ་པ་ཡ་ཏི་ཀཱ་ཡ་ཝཱཀ་ཙིཏྟ་བཛྲ་ཀཱི་ལཱ་ཡ་ཧཱུཾ་ཕཊ། ཅེས་བྱ་བས་བཏབ་ལ། ཨོཾ་
བཛྲ་མུངྒ་ར་ཨཱ་ཀོ་ཊ་ཡ་ཧཱུཾ་ཕཊ། ཅེས་བྱ་བས་བརྡུང་བར་བྱའོ། །དེ་ནས་སྲུང་སྐུད་བཅིང་བ་དང་། གུ་གུལ་གྱིས་བདུགས་པ་དང་། མེ་ཏོག་གི་ཕྲེང་བ་གདགས་ཤིང་དྲིའི་ཐིག་ལེ་བྱས་ནས། བྱམས་པའི་གོ་ཆ་བསྐོན་པར་བྱའོ། །དེ་ནས་དཀྱིལ་འཁོར་བའི་རྣམ་ལྔ་དང་། སྙིང་པོ་བཟླས་པའི་
དྲིའི་ཆུས་བྱུགས་ལ། དབུས་སུ་དྲིའི་ཐིག་ལེ་བྱའོ། །མེ་ཏོག་གི་ཚོམ་བུ་བཀྲམ་ནས། ཛཿཧཱུཾ་བཾ་ཧོཿའི་སྔགས་ཀྱིས་བཏེག་པའི་ལྷ་བཞུགས་སུ་གསོལ་ལ། ཡེ་ཤེས་སེམས་དཔའ་གཞུག་པ་དང་། དབང་བསྐུར་བ་དང་། ཡི་གེ་གསུམ་གྱིས་གནས་གསུམ་དུ་བྱིན་གྱིས་བརླབས་ལ་

73-1-246a

མཆོད་པ་ལྔ་དང་། མཆོད་པ་རྒྱས་པ་དང་། བསྟོད་པ་བྱས་ནས་སྙན་གསན་དབབ་པར་བྱའོ། །ཕྱག་ན་རྡོ་རྗེ་བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་ལོ། །སློབ་མ་ཀུན་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །སང་ནི་དཀྱིལ་འཁོར་འབྲི་བར་འཚལ། །
བཅོམ་ལྡན་བདག་ནི་གུས་པ་ལ། །དེ་བས་གནང་བ་མཛད་པར་རིགས། །ཞེས་ལན་གསུམ་བརྗོད་པར་བྱ་སྟེ། ལྷ་ལྷག་པར་གནས་པའོ། །དེ་ནས་འབྱོར་པ་ཡོད་ན་སྦྱིན་སྲེག་གི་མཆོད་པ་བྱའོ། །དེ་ནས་གཏོར་མའི་ཆོ་ག་ནས་འབྱུང་བ་བཞིན་དུ་གཏོར་མ་བཏང་ནས། སློབ་མ་ལྷག་པར་གནས་
པར་བྱ་སྟེ། ཁྲུས་བྱས་ལ། མེ་ཏོག་ལག་ན་ཐོགས་ཏེ། སློབ་དཔོན་གྱི་ཞབས་གཉིས་ལ་ཕྱག་བྱས་ནས། གསོལ་བ་བཏབ་སྟེ་རྒྱུན་བཤགས་བྱས་ཏེ། དེ་ནས་ལྷར་བསྐྱེད་ནས་མཆོད་པ་བྱས་ཏེ། སོ་ཤིང་དོར་བ་དང་། ཀུ་ཤ་སྦྱིན་པ་དང་། སྲུང་སྐུད་གདགས་པ་དང་། ཟབ་ཅིང་རྒྱ་ཆེ་བའི་
ཆོས་བཤད་པར་བྱ་སྟེ། རྒྱས་པར་ནི་བཞི་བརྒྱ་ལྔ་བཅུ་པའི་ཆོ་ག་ལས་ཤེས་པར་བྱའོ། །སློབ་མ་ལྷག་པར་གནས་པའོ།།      །།དེ་ལྟར་ལྷག་པར་གནས་པ་བྱས་ནས། ནང་པར་ཉི་མ་ཤར་བ་དང་། མཆོད་པ་བཤམས་ལ་དཀྱིལ་འཁོར་ནམ་མཁར་བཏེག་སྟེ། ས་གཞི་བའི་རྣམ་ལྔ་དང་། 
དྲིས་བྱུགས་ནས། ཐིག་བྱིན་གྱིས་བརླབས་ལ་ཆོ་ག་བཞིན་དུ་ཐིག་གདབ་པར་བྱའོ། །དེ་ནས་ཚོན་དགྱེ་བར་བྱ་སྟེ། ཚོན་བྱིན་གྱིས་བརླབས་ལ་དབུས་སུ་པདྨ་དང་ཟླ་བའི་གདན་ལ་རྡོ་རྗེ་རྩེ་ལྔ་པ་བྲི་བ་དང་། ཕྱོགས་ཀྱི་རིམ་པར་ཚོན་དགྱེ་བ་དང་། རྩིག་པ་ལ་ཕྱི་རོལ་དཀར་པོ་དང་། སེར་པོ་དང་། 
དམར་པོ་དང་། ལྗང་གུ་དང་། ནག་པོ་དང་། ཁ་ཁྱེར་དམར་པོ་རིན་པོ་ཆེ་ཕ་གུ་སེར་པོ་དང་། དྲ་བ་དྲ་ཕྱེད་ནག་པོ། རྟ་བབས་ཅི་མཛེས་པར་བྲི་བར་བྱའོ། །དེ་ལྟར་དཀྱིལ་འཁོར་བྲིས་ནས། དགོངས་ཀའི་དུས་སུ་མཆོད་པའི་རྫས་རྣམས་བསགས་ནས་སྟན་བདེ་བ་ལ་འདུག་སྟེ། ལྷའི་ང་རྒྱལ་གྱིས་
དཀྱིལ་འཁོར་བཏེག་ལ་ཡིད་ཀྱིས་དཀྱིལ་འཁོར་ནང་དུ་ཞུགས་ཏེ། ལྷག་པ་དང་མ་ཚང་བའི་ཉེས་པ་ཞི་བར་བྱ་བའི་ཕྱིར། ལན་བདུན་བསྐོར་བར་བྱའོ། །དེ་ནས་མེ་ཏོག་གི་ཕྲེང་བ་དོར་ལ་སླར་རང་གི་མགོ་ལ་བཅིང་བར་བྱའོ། །དེ་ནས་བདག་ཉིད་ལྷར་བསྐྱེད་ལ། མདུན་གྱི་ལྷ་ཡང་ཡི་གེ་

73-1-246b

ཡོངས་སུ་གྱུར་པ་ལས་རྡོ་རྗེ། དེ་ལ་འོད་ཟེར་སྤྲོ་བསྡུ་བྱས་ནས། ལྷར་བསྐྱེད་ལ་ཡེ་ཤེས་སེམས་དཔའ་གཞུག་པ་ལ་སོགས་པ་རྫོགས་པར་བྱས་ནས་མཆོད་པ་རྒྱས་པ་དབུལ་བར་བྱའོ། །བསྟོད་པ་བྱས་ནས་བུམ་པ་བཅུག་སྟེ། བཟླས་པ་བྱས་ནས་ཆུར་བཞུ་ལ་སྐུ་ཁྲུས་གསོལ་བར་བྱའོ། །དེ་ནས་སྦྱིན་
སྲེག་བྱ་བ་དང་། གཏོར་མ་བཏང་ནས་སློབ་མ་ལ་དབང་བསྐུར་བའོ། །དེ་ལ་དང་པོར་གསོལ་བ་བཏབ་པ་དང་། གདོང་གཡོགས་བཅིང་བ་དང་། རྒྱུན་བཤགས་བྱ་བ་དང་། སྡོམ་པ་གཟུང་བ་དང་། ལྷར་བསྐྱེད་ཅིང་ལས་ཐམས་ཅད་པའི་བུམ་པས་སྐུ་ཁྲུས་གསོལ་བར་བྱའོ། །དཀྱིལ་འཁོར་དུ་གཞུག་
པ་དང་། ལྷའི་དམ་ཚིག་བསྒྲགས་པ་དང་། སློབ་དཔོན་གྱི་དམ་ཚིག་བསྒྲགས་པ་དང་། ཡེ་ཤེས་དབབ་པ་དང་། ཕྲེང་བ་དོར་བ་དང་། གདོང་གཡོགས་དགྲོལ་བ་དང་། དཀྱིལ་འཁོར་བལྟ་བ་བྱས་ནས། ལྷར་བསྐྱེད་ནས། ཆུ་དང་ཅོད་པན་དང་། བདག་པོ་དང་། མིང་གི་དབང་བསྐུར་བར་བྱའོ། །
དེ་ནས་སྐུ་གསུང་ཐུགས་ཀྱི་བརྟུལ་ཞུགས་དང་། སྤངས་པ་དང་། ཡེ་ཤེས་ལ་སོགས་པའི་དབང་དང་། རྗེས་སུ་གནང་བ་དང་། བརྟུལ་ཞུགས་ཀྱི་དབང་ལ་སོགས་པ་བྱའོ།།      །།དཀྱིལ་འཁོར་ཆོ་ག་སྦྱར་བ་འདིའི། །དགེ་བ་གང་དེས་ཐོབ་པ་ཀུན། །ཕྱག་ན་རྡོ་རྗེ་ཐོབ་པ་ནས་ནི། །འགྲོ་དོན་དུ་མ་བྱེད་
པར་ཤོག །ཕྱག་ན་རྡོ་རྗེའི་དཀྱིལ་འཁོར་གྱི་ཆོ་ག །སློབ་དཔོན་འགྲོ་བཟངས་སྙིང་པོས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། ཨཱརྱ་བཛྲ་པཱ་ཎི་ནཱི་ལཱཾ་བ་ར་དྷ་ར་སཱ་དྷ་ན་ཙིནྟ་མ་ཎི་ནཱ་མ། བོད་སྐད་དུ། འཕགས་པ་ལག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་པའི་ཐབས་ཡིད་
བཞིན་གྱི་ནོར་བུ་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །རེ་ཞིག་དང་པོ་རྣལ་འབྱོར་པས་ཤིང་གཅིག་ལ་སོགས་པའི་ས་ཕྱོགས་སུ་སྟན་འཇམ་པ་ལ་འདུག་སྟེ། རང་གི་སྙིང་གའི་ཉི་མའི་དཀྱིལ་འཁོར་ལ་གནས་པའི་ཧཱུཾ་ནག་པོ་བསམས་ནས་དེའི་འོད་ཟེར་གྱིས་ནམ་མཁའ་ལ་གནས་
པའི་དེ་བཞིན་གཤེགས་པ་དང་བྱང་ཆུབ་སེམས་དཔའ་རྣམས་བལྟས་ཏེ། མཆོད་པ་རྣམ་པ་ལྔས་མཆོད་ཅིང་སྡིག་པ་བཤགས་པ་ལ་སོགས་པ་བྱའོ། །དེ་ནས་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཞེས་བྱ་བ་ཚད་མེད་པ་ཚངས་པའི་གནས་བཞི་བསམས་ལ། གཅིག་

73-1-247a

དང་དུ་མ་དང་བྲལ་བས་སེམས་ཅན་གྱི་ཁམས་མ་ལུས་པ་དང་། བདག་ཉིད་ཀྱང་སྟོང་པར་བསམས་ལ་ཐོ་རངས་ཀྱི་སྐར་མ་དང་འདྲ་བར་བདག་ཉིད་མི་དམིགས་ཤིང་། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བྱ་བས་ནི་བརྟན་པར་བྱའོ། །དེ་ནས་ཡི་གེ་པྃ་ལས་བྱུང་བའི་པདྨ་ནག་པོའི་
ལྟེ་བར་ཡི་གེ་ཧཱུྃ་ལས་བྱུང་བའི་པདྨ་ཉི་མའི་དཀྱིལ་འཁོར་གྱི་དབུས་སུ་ཧཱུྃ་ཁ་དོག་ནག་པོ་དང་རིང་བའི་སྤྲིན་སྒྲའི་ཡི་གེ་ཧཱུྃ་བསམས་ལ། དེ་ཡོངས་སུ་གྱུར་པ་ལས་ཁྲོ་བོའི་རྡོ་རྗེ་རྩེ་ལྔ་པ་བསམ་ཞིང་དེའི་འོད་ཟེར་གྱིས་ནམ་མཁའ་ལ་ཁྲོ་བོའི་རིགས་ཀུན་བཀུག་ལ་དེ་ཉིད་གཞུག་སྟེ། དེ་ཡོངས་སུ་གྱུར་པ་ལས་
བཅོམ་ལྡན་འདས་ཕྱག་ན་རྡོ་རྗེ་གོས་སྔོན་པོ་ཅན་སྐུ་མདོག་ནག་པོ་སྤྲིན་ལྟ་བུ། ཞལ་གཅིག་པ། ཕྱག་གཉིས་པ། སྤྱན་གསུམ་དམར་བ། མཆེ་བ་གཙིགས་པ། ཞལ་ཁྲོ་གཉེར་ཅན། དབུ་སྐྲ་གྱེ་དུ་བརྫེས་པ། རལ་པའི་ཅོད་པན་གྱི་དབུས་ན་མི་བསྐྱོད་པ་སྐུ་མདོག་སྔོན་པོས་བརྒྱན་པ། གཡོན་བརྐྱང་
བས་གནས་པ། ཕྱག་གཡས་པས་རྡོ་རྗེ་ཕྱར་ཏེ་གནས་པ། ཕྱག་གཡོན་པ་ཁྲོ་བོའི་ཁུ་ཚུར་གྱིས་གདུག་པ་གནོན་པའི་སྡིགས་མཛུབ་འཆང་བ། རང་གི་སྙིང་གར་ཉི་མའི་དཀྱིལ་འཁོར་ལ་གནས་པའི་ཡི་གེ་ཧཱུཾ་ནག་པོ་དང་ལྡན་པ། གོས་སྔོན་པོའི་ག་ཤ་དང་། ཤམ་ཐབས་བསྣམས་པ། རིགས་ཀྱི་ཀླུ་
བརྒྱད་ཀྱིས་བརྒྱན་པ། ཕྱག་གཉིས་ལ་འཇོག་པོ་དང་རིགས་ལྡན་དམར་པོ། ཞབས་གཉིས་ལ་མཐའ་ཡས་དང་ནོར་རྒྱས་ཀྱི་བུ་ནག་པོ། སྙན་གཉིས་ལ་པདྨ་དང་པདྨ་ཆེན་པོ་སེར་པོ། སྐ་རགས་སུ་བཅིངས་པ་ནི་དུང་སྐྱོང་དཀར་པོ། རལ་པ་གཅིག་པའི་སྲད་བུ་ནི་ཧུ་ལུནྟ་ལྗང་གུ་འཛིན་པ། བདུད་
ཐམས་ཅད་དང་། དབང་ཕྱུག་ཆེན་པོ་དང་། ཁྱབ་འཇུག་ལ་སོགས་པ་མུ་སྟེགས་པའི་ལྷའི་གཞུང་དང་གཟུགས་འཇོམས་པར་མཛད་པར་བསམས་ལ། དེ་དང་འདྲ་བའི་གོས་སྔོན་པོ་ཅན་མདུན་དུ་ཉི་མའི་དཀྱིལ་འཁོར་གྱི་སྟེང་དུ་བཞུགས་པར་བསམས་ལ་རང་གི་སྙིང་ག་ནས་སྤྲོས་པའི་
མཆོད་པའི་ལྷ་མོའི་ཚོགས་ཀྱིས་མཆོད་ལ། ཛཿཧཱུཾ་བཾ་ཧོཿཞེས་པའི་སྔགས་ཀྱིས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་བ་དང་། ཐ་མི་དད་པར་བྱ་བའོ། །དེ་ནས་ལྕེ་ལ་ཡི་གེ་ཧཱུཾ་ལས་རྡོ་རྗེ་རྩེ་ལྔ་པ་དེ་ཉིད་ཀྱིས་མཚན་པར་བསམས་ལ་ཡེ་ཤེས་སེམས་དཔའི་ཐུགས་

73-1-247b

ཀ་ན་ཡང་རྡོ་རྗེ་རྩེ་ལྔ་པ་ཧཱུཾ་གིས་མཚན་པ་བསམས་ཏེ། མིག་ལ་སོགས་པའི་དབང་པོ་དྲུག་ལ་ཡང་ཡི་གེ་ཧཱུཾ་དྲུག་ཡོངས་སུ་གྱུར་པ་ལས་དེ་དང་འདྲ་བའི་གོས་སྔོན་པོ་ཅན་དྲུག་བཀོད་དེ། ཡི་གེ་གསུམ་གྱིས་སྐུ་ལ་སོགས་པ་བྱིན་གྱིས་བརླབས་ཏེ། རུ་དྲཱ་ཀྵའི་ཕྲེང་བ་ལ་བཟླ་བར་བྱའོ། །ཨོཾ་ནཱི་ལཱཾ་བ་ར་
དྷ་ར་བཛྲ་པཱ་ཎི་ཧཱུཾ་ཧཱུཾ་ཕཊ། སྙིང་པོའི་སྔགས་འདི་ཡི་གེ་བཅུ་གསུམ་པའོ། །ཨོཾ་བཛྲ་པཱ་ཎི་ཧཱུཾ་ཧཱུཾ་ཕཊ། ཉེ་བའི་སྙིང་པོ་ཡི་གེ་བདུན་པའོ། །དེ་དག་ལ་ཡང་སྔོན་དུ་བསྙེན་པ་འབུམ་ཕྲག་གཅིག་བཟླས་ན་དྲག་པོའི་ལས་འགྲུབ་པར་འགྱུར་རོ། །དེ་ནས་གསད་པའི་ལས་ནི་དུར་ཁྲོད་དུ་ཕྱིན་ལ། མེ་ཐབ་
གྲུ་གསུམ་བཅས་ལ་བསྒྲུབ་བྱའི་རྐང་རྗེས་ཀྱི་ས་དང་། དུར་ཁྲོད་ཀྱི་ཐལ་བ་དང་། སྐེ་ཚེ་དང་། དྷ་དུ་ར་དང་། ཁྲག་དང་། དུག་ལ་བསྒྲུབ་བྱའི་གཟུགས་བརྙན་བྱས་ལ། བཅད་ཅིང་བསྲེགས་ན་ཞག་བདུན་ན་འཆི་བར་འགྱུར་རོ། །ཧཱུཾ་དང་ཕཊ་སྤངས་པའི་སྦྱོར་བ་དེ་ཉིད་ཀྱིས་མངར་གསུམ་
སྭཱ་ཧཱའི་མཐའ་ཅན་གྱིས་བསྲེགས་ན་ཞི་བར་འགྱུར་རོ། །རྒྱས་པ་ལ་ནི་ཨོཾ་གྱི་མཐའ་ཅན་གྱིས་སོ། །དབང་ལ་ཧོཿའི་མཐའ་ཅན་གྱིས་སོ། །དགུག་པ་ལ་ནི་ཛཿའི་མཐའ་ཅན་གྱིས་སོ། །བདུད་རྩི་ལྔས་ནི་ལས་ཐམས་ཅད་འགྲུབ་པར་འགྱུར་རོ། །དེ་ནས་ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱཏ་
ཅེས་པའམ། སྙིང་པོའམ་ཉེ་བའི་སྙིང་པོས་གཏོར་མ་གཏང་བར་བྱའོ། །གཏོར་མ་གཏང་བའི་རྫས་ནི་བཟའ་བ་དང་། བཅའ་བ་དང་། བཏུང་བ་དང་། བཞིབ་པ་དང་། བལྡག་པ་དང་། མྱོས་པ་དང་ལྡན་པ་སྦྱིན་པར་བྱའོ། །ལྡང་བའི་དུས་སུ་ཡེ་ཤེས་སེམས་དཔའ་ཀྲྀ་ཏོ་ཨཱཿམུཿཞེས་བྱ་བས་
གཤེགས་སུ་གསོལ་བ་དང་། སྤྱོད་ལམ་བཞི་དེའི་ངང་གིས་གནས་པར་བྱའོ། །ཕྱག་ན་རྡོ་རྗེ་ཁྲོ་བོ་ཆེ། །སྒྲུབ་ཐབས་གསལ་བ་འདི་བྱས་པས། །བསོད་ནམས་གང་ཞིག་བསགས་པ་དེས། །སྒྲུབ་པའི་ལས་ཀུན་བྱེད་པར་ཤོག །འཕགས་པ་ཕྱག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་པའི་ཐབས། ཡིད་
བཞིན་གྱི་ནོར་བུ་ཞེས་བྱ་བ། སློབ་དཔོན་ཆེན་པོ་དངོས་གྲུབ་བརྙེས་པའི་མཁས་པ་ཆེན་པོ་ཉིན་མཛད་རྡོ་རྗེའི་ཞལ་སྔ་ནས་མཛད་པའི་ཕྱག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་པའི་ཐབས་རྫོགས་སོ།།      །།རྒྱ་གར་གྱི་མཁན་པོ་ཤྲཱི་ཀུ་མ་ར་ཀླ་ཤུའི་ཞལ་སྔ་ནས་བསྒྱུར་ཅིང་ཞུས་པའོ།།      །།

73-1-248a

༄༅༅། །རྒྱ་གར་སྐད་དུ། ཤྲཱི་བཛྲ་པཱ་ཎི་ཙཎྜ་མ་ཧཱ་རོ་ཥ་ཎ་ཧོ་མ་ཏ་བི་དྷི་ནཱ་མ། བོད་སྐད་དུ། དཔལ་ཕྱག་ན་རྡོ་རྗེ་གཏུམ་པོ་ཆེན་པོའི་སྦྱིན་སྲེག་གི་ཆོ་ག་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །བཅོམ་ལྡན་རྡོ་རྗེ་གཏུམ་པོ་ལ། །གུས་པའི་སྤྱི་བོས་ཕྱག་འཚལ་ནས། །བགེགས་དང་གནོད་
རིམས་ཞི་བའི་ཕྱིར། །དེ་ཡི་སྦྱིན་སྲེག་ཆོ་ག་བཤད། །བཅོམ་ལྡན་འདས་གོས་སྔོན་པོ་ཅན་སྒྲུབ་པའི་རྣལ་འབྱོར་པས། དུར་ཁྲོད་དམ་ཆུ་ངོགས་ལ་སོགས་པའི་གནས་ཡིད་དུ་འོང་བར། སྦྱིན་སྲེག་གི་ཆོ་གས་སྦྱིན་སྲེག་བྱའོ། །དེ་ལ་ཆོ་ག་འདི་ཡིན་ཏེ། ཞི་བ་འབའ་ཞིག་གི་ལས་ལ། ཐབ་ཁུང་རྒྱར་
ཁྲུ་གང་པ། ཟབས་སུ་དེའི་ཕྱེད་ལ་ཁ་ཁྱེར་སོར་བཞི་ཕྱིར་དོར་བ་དང་། སོར་བཞི་དཔངས་སུ་བརྩིགས་པ་དང་། སོར་བཞི་ཕྱིར་དོར་ལ། ཐ་མར་གྲུ་བཞིར་བྱས་ཏེ། སྒོ་བཞིར་སྒོ་ཁྱུད་དང་ལྡན་པར་བྱས་ལ། ས་གཞི་ལ་ཁ་དོག་དཀར་པོ་བྱུགས་ཏེ། དབུས་སུ་ཞི་བའི་རྡོ་རྗེ་རྩེ་ལྔ་པ་དཀར་པོ་བྲིའོ། །དེའི་
ཕྱི་རོལ་རིམ་པ་གསུམ་ལ། དང་པོ་ལ་ཞི་བའི་རྡོ་རྗེ་ཕྲེང་བ་དང་། གཉིས་པ་ལ་ཁྲོ་བོའི་རྡོ་རྗེ་བྲིའོ། །གསུམ་པ་ལ་མེ་འོད་དང་བཅས་པ་བྲིས་ནས། མཚམས་སུ་ཟླ་བའི་རྡོ་རྗེ་བྲིའོ། །དེ་ནས་དེའི་ཕྱི་རོལ་དུ་བའི་རྣམ་ལྔས་བྱུགས་ལ། མེ་ཏོག་སིལ་མས་མཛེས་པར་བྱའོ། །དེ་ནས་རྫས་བསགས་ཏེ། ཡམ་
ཤིང་དང་། མར་དང་། ཏིལ་དང་། ནས་དང་། གྲོ་དང་། འབྲས་སོ་བ་དང་། སྲན་མ་དང་། སྲན་མ་ཤ་དང་། མེ་ཏོག་དང་། བདུག་པ་དང་། མར་མེ་དང་། དྲི་དང་། ཞལ་ཟས་དང་། ཛཱ་ཏི་ཕ་ལ་དང་། འབྲས་བུ་གསུམ་དང་། བིལ་བ་དང་། ཏར་ག་དང་། ཨུ་དུམྺཱ་ར་ལ་སོགས་པ་ཤིང་ལོ་མ་ཅན་
གྱི་ཡམ་ཤིང་དང་། གསེར་དང་། དངུལ་དང་། དར་དཀར་པོ་དང་། གདུགས་དང་། རྒྱལ་མཚན་ལ་སོགས་པ་དང་། འོ་མ་དང་། ཞོ་དང་། འབྲས་ཆན་དང་། ཀུ་ཤ་དང་། དཱུར་བ་ལ་སོགས་པ་བསགས་ལ། དགོངས་མོའི་དུས་སུ་སྦྱིན་སྲེག་བྱ་སྟེ། བདག་ཉིད་ཇི་ལྟ་བ་བཞིན་དུ་ལྷར་
བསྐྱེད་ནས། ཨོཾ་སྭ་བྷཱ་བ་ཤུདྡྷཱཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་བརྗོད་པས་སྣོད་ཀྱི་འཇིག་རྟེན་སྟོང་པ་ཉིད་དུ་བསྐྱེད་ལ། ཡཾ་ལས་རླུང་། རཾ་ལས་མེ། བཾ་ལས་ཆུ། ལཾ་ལས་སའི་དཀྱིལ་འཁོར་བསྐྱེད་ལ། སུཾ་ལས་རི་རབ། དེའི་སྟེང་དུ་ཧཱུཾ་ལས་སྣ་ཚོགས་རྡོ་རྗེ་དེར་ཧཱུཾ་ལས་ཐབ་ཁུང་གཞལ་

73-1-248b

ཡས་ཁང་དུ་བསྐྱེད་དེ་སྣོད་བཅུད་ཐམས་ཅད་ཕྱག་ན་རྡོ་རྗེ་ཞི་བའི་སེམས་དང་ལྡན་པར་བསམས་ལ། དེའི་ནང་དུ་རཾ་ལས་མེ་གྲུ་གསུམ་རཾ་གྱིས་མཚན་པ། ཟུར་གསུམ་ལ་ཨོཾ་ཨཱཿཧཱུཾ་ཡོངས་སུ་གྱུར་པ་ལས་མེ་ལྷ་ཞལ་གཅིག་ཕྱག་བཞི་པ་སྐུ་མདོག་དཀར་པོ་ཕྱག་གཉིས་རྡོ་རྗེ་རྩེ་གསུམ་དང་ཕྲེང་བ། གཡོན་
གཉིས་ན་དབྱུག་པ་དང་གུནྡྷེ་བསྣམས་པར་བསྐྱེད་ལ་ར་ལ་བཅིབས་པར་བསམས་ལ། ཡེ་ཤེས་སེམས་དཔའ་སྤྱན་དྲང་བར་བྱའོ། །ལག་པ་གཡས་པ་སྲིན་ལག་གི་རྩ་བར་མཐེ་བོང་བཙུགས་ལ་སྤོས་སྣོད་བཟུང་སྟེ། ཚུར་སྤྱོན་ཚུར་སྤྱོན་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །སྲེག་བླུགས་
ཞལ་ཟས་འདི་སྣོམས་ལ། །འབར་བའི་གདན་ལ་བཞུགས་སུ་གསོལ། །ཞེས་བྱ་བ་དང་། ཨེ་ཧྱེ་ཧི་མ་ཧཱ་བྷཱུ་ཏ་དེ་བ་རྀ་ཥི་དྭི་ཛ་ཡ་སཏྭ་མ་ཀྲི་ཡུ་ཏཾ་ཧཱུཾ་མ་ཧཱ་རསྨི་ཨསྨིན་སནྣི་ཧི་ཏོ་བྷ་བ་ཨོཾ་བ་བཱ་ཨགྣ་ཡེ་སྭཱ་ཧཱ། ཞེས་པས་སྤྱན་དྲང་བར་བྱའོ། །དེ་ནས་བསང་གཏོར་བྱ་སྟེ་འཐོར་འཐུང་དང་ཉེ་རེག་བྱས་ནས། 
ཛཿཧཱུཾ་བཾ་ཧོཿཞེས་བྱ་བ་དང་། དགུག་གཞུག་བྱ་སྟེ་དམ་ཚིག་གི་ཕྱག་རྒྱས་བསྒྲུབས་ནས། ཆོས་ཀྱི་ཕྱག་རྒྱ་ལྕེ་ལ་རཾ་བསྒོམས་ནས། ལས་ཀྱི་ཕྱག་རྒྱ་གར་ལས་བྱུང་བ་དང་། ཕྱག་རྒྱ་ཆེན་པོ་ཕྱག་མཚན་དང་བཅས་པ་བསྒོམ་མོ། །དེ་ནས་ཕྱིར་བྱུང་ལ་དབང་བསྐུར་བ་དང་། རྟགས་སུ་རྡོ་རྗེ་རྩེ་ལྔ་པ་བསྒོམ་
མོ། །དེ་ནས་མཆོད་པ་ལྔ་བྱས་ནས་བསྟོད་པ་བྱ་སྟེ། འཇིག་རྟེན་དབང་ཕྱུག་ཚངས་དབང་མཆོག་གི་སྲས། །མེ་ལྷའི་རྒྱལ་པོ་ཡོངས་ཀྱིས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་བསྲེག །འཇིགས་བྱེད་མེ་ལྷ་ཉིད་ལ་མངོན་པར་བསྟོད། །ཅེས་པས་བསྟོད། མེ་སྤར་ཏེ། 
མེ་གསོ་བའི་ཕྱིར་མར་གྱི་དགང་བླུགས་གསུམ་མམ་བདུན་དབུལ་བར་བྱའོ། །མར་གྱི་དགང་བླུགས་དབུལ་བའི་དུས་སུ་དགང་གཟར་བླུགས་གཟར་གྱི་ཁ་ལ་ཡི་གེ་གསུམ་དགོད་པ་དང་མེ་ལྷའི་ཞལ་དུ་རཾ་བསམ་པར་བྱའོ། །དེ་ནས་མེའི་པྲ་བརྟགས་ཏེ། བགེགས་ཡོད་ན་ཡུངས་ཀར་ལ་ཨོཾ་
ཙཎྜ་མ་ཧཱ་རོ་ཥ་ཎ་མཱ་ར་ཡ་ཧཱུཾ་ཕཊ་ཅེས་བྱ་བས་བསལ་བར་བྱའོ། །དེ་ནས་མཆོད་པར་བྱ་སྟེ། དང་པོ་མར་ལ་དེ་ནས་ཏིལ། །དེ་ནས་ཡམ་ཤིང་འོ་མ་ཞོ། །ནས་དང་སོ་བ་འབྲས་དང་ནི། །སྲན་མ་མ་ཤ་གྲོ་དག་དང་། །སྨན་དང་དུར་བ་ཀུ་ཤ་སོགས། །ཅི་འབྱོར་པས་ནི་མཆོད་པར་བྱ། །ཞེས་འབྱུང་

73-1-249a

བ་ལྟར་མཆོད་པར་བྱའོ། །དེ་ལ་དབུལ་བའི་སྔགས་ནི་ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭ་ལ་སརྦ་བྷསྨི་ཀུ་རུ་སརྦ་དུཥྚཱན་ཧཱུཾ། ཞེས་པས་མར་གྱི་དགང་བླུགས་ཀྱིའོ། །ཨོཾ་ཨགྣ་ཡེ་སྭཱ་ཧཱ་མར་གྱིའོ། །ཨོཾ་སརྦ་པཱ་པཾ་ད་ཧ་ནཱ་ཡ་སྭཱ་ཧཱ་ཏིལ་གྱིའོ། །ཨོཾ་བཛྲ་ཨགྣ་ཡེ་སྭཱ་ཧཱ་ཡམ་ཤིང་གིའོ། །
ཨོཾ་སརྦ་སཾ་པ་དེ་སྭཱ་ཧཱ། ཞོ་དང་འོ་མའོ། །ཨོཾ་མ་ཧཱ་བེ་གཱ་ཡེ་སྭཱ་ཧཱ་ནས་ཀྱིའོ། །ཨོཾ་བི་ཛཱ་ལ་སྭཱ་ཧཱ། ནས་སོ་བའི་འོ། །ཨོཾ་བཛྲ་པུཥྚ་ཡེ་སྭཱ་ཧཱ། འབྲས་སོ་བའིའོ། །ཨོཾ་མ་ཧཱ་བ་ལཱ་ཡ་སྭཱ་ཧཱ། སྲན་མའི་འོ། །ཨོཾ་བཛྲ་མུཉྫ་ཡེ་སྭཱ་ཧཱ། སྲན་མ་མ་ཤའི་འོ། །ཨོཾ་བཛྲ་གྷསྨ་ར་ཡེ་སྭཱ་ཧཱ། གྲོའི་འོ། །
ཨོཾ་བཛྲ་ཤོ་ས་ཡེ་སྭཱ་ཧཱ། སྨན་གྱིའོ། །ཨོཾ་བཛྲ་ཨ་པྲ་ཧི་ཧ་ཏ་པ་ལཱ་ཡ་སྭཱ་ཧཱ། ཀུ་ཤའི་འོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ། དཱུར་བའི་འོ། །གཞན་དག་ནི་རང་རང་གི་མིང་དང་མེ་ཉིད་ཀྱི་སྔགས་ཀྱིས་དབུལ་ལོ། །དེ་ལ་ཡམ་ཤིང་ནི་འབར་བའི་འོད་ལའོ། །ཞུ་བའི་རྫས་རྣམས་ཞལ་ལའོ། །མེ་ཏོག་
དབུ་ལའོ། །བདུག་པ་ཤངས་ལའོ། །མར་མེ་སྤྱན་ལའོ། །དྲི་ཐུགས་ཀར་རོ། །ལྷ་བཤོས་ཞལ་དུའོ། །རྫས་གཞན་ཕྱག་ཏུའོ། །དེ་ལྟར་ཉི་ཤུ་རྩ་གཅིག་གམ་ལྔ་བཅུ་རྩ་བཞིའམ་བརྒྱ་རྩ་བརྒྱད་དབུལ་བར་བྱའོ། །དེ་ནས་རྡོ་རྗེ་གཏུམ་པོའི་སྔགས་ཀྱིས་མེ་བསངས་ལ་འོད་དུ་
བཞུའོ། །རཾ་ལས་མེའི་དཀྱིལ་འཁོར། དེའི་སྟེང་དུ་ཧཱུཾ་དང་རྡོ་རྗེ་ལས་ཕྱག་ན་རྡོ་རྗེར་བསྐྱེད་ལ། ཡེ་ཤེས་སེམས་དཔའ་གཞུག་པ་དང་། དབང་བསྐུར་བ་དང་། ཡི་གེ་གསུམ་གྱིས་བྱིན་གྱིས་བརླབས་ལ། །མཆོད་པ་ལྔས་མཆོད་པ་དང་། བསྟོད་པ་བྱ་སྟེ། ཧཱུཾ་གཏུམ་ཆེན་དུས་མཐའི་མེ་ལྟར་
བརྗིད། །འོད་ཟེར་ཉི་མ་འབུམ་གྱི་གཟི། །གདུག་པའི་མཚོན་ཆ་སྣ་ཚོགས་བསྣམས། །བདུད་དགྲ་ཁྱོད་ལ་ཕྱག་འཚལ་བསྟོད། །ཅེས་བྱ་བ་ལ་སོགས་པས་བསྟོད་པ་བྱའོ། །དེ་ནས་དགང་བླུགས་དབུལ་ཏེ། བཅོམ་ལྡན་འདས་ཀྱི་སྔགས་ཀྱིས་ཅི་ནུས་པར་སྦྱིན་སྲེག་བྱའོ། །དེ་ནས་
བསྟོད་པ་བྱས་ལ་དང་པོར་གསོལ་བ་བཏབ་པར་བྱ་སྟེ། དཀོན་མཆོག་གསུམ་ལ་ཕྱག་འཚལ་ལོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དཔལ་ལྡན་ཕྱག་ན་རྡོ་རྗེ་གོས་སྔོན་པོ་ཅན་ལ་ཕྱག་འཚལ་ལོ་ཞེས་བྱ་བ་ལ་སོགས་པ་བརྗོད་དོ། །དེ་ནས་བགེགས་

73-1-249b

ཞི་བ་ལ་སོགས་པ་ལས་ཐམས་ཅད་པའི་སྦྱིན་སྲེག་བྱེད་ན། ཨོཾ་མ་མ་ཤཱནྟིངྐུ་རུ་སྭཱ་ཧཱ། ཨོཾ་དེ་བ་ཤཱནྟིངྐུ་རུ་སྭཱ་ཧཱ། ཨོཾ་ནཱ་ག་ཤཱནྟིངྐུ་རུ་སྭཱ་ཧཱ། ཨོཾ་པི་ཤཱ་ཙ་ཤཱནྟིངྐུ་རུ་སྭཱ་ཧཱ། ཨོཾ་ཀི་ར་ཎ་ཤཱནྟིངྐུ་རུ་སྭཱ་ཧཱ། ཨོཾ་མ་ཧོ་ར་ག་ན་ཤཱནྟིངྐ་རུ་སྭཱ་ཧཱ། ཨོཾ་ཨུ་པ་དྲ་བ་ནཱ་ཤ་ཡ་སྭཱ་ཧཱ། ཨོཾ་ཨ་ཀཱ་ལ་མྲྀ་ཏྱུ་ནཱ་ཤ་ཡ་སྭཱ་ཧྲཱ། ཨོཾ་
རོ་ག་ཤཱནྟིངྐུ་རུ་སྭཱ་ཧཱ། ཨོཾ་རཱཀྵ་ས་ཤཱནྟིངྐུ་རུ་སྭཱ་ཧཱ། ཨོཾ་བྷཱུ་ཏ་ཤཱནྟིངྐུ་རུ་སྭཱ་ཧཱ།  ཞེས་བྱ་བ་ལ་སོགས་པ་དང་། ཐོག་མ་དང་ཐ་མར་བསྒྲུབ་བྱའི་མིང་དང་བཅོམ་ལྡན་འདས་ཀྱི་སྔགས་དང་སྤེལ་ལ། ཡུངས་ཀར་རམ་ཏིལ་ཅི་ནུས་པར་བསྲེག་པར་བྱའོ། །དེའི་གདུག་པ་ཅན་ཀུན་ཡེ་ཤེས་ཀྱི་མེས་ཞི་
བར་བསམ་མོ། །གལ་ཏེ་སྡིག་པ་བསྲེག་པར་འདོད་ན། སྡིག་པའི་གཟུགས་སྙིང་གནས་དྲངས་ལ་བསྲེག་པར་བྱའོ། །ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། ཞེས་བརྗོད་ཅིང་དམིགས་པ་རྩེ་གཅིག་པས་བསྲེག་གོ། །ཀླུ་གདོན་ཅན་ལ་སྦྱིན་སྲེག་བྱེད་ན་ཡེ་ཤེས་ཀྱི་ཐུགས་ཀ་
ནས་བྱེ་ཚན་གྱི་ཆར་བབས་པས་བསྒྲུབ་བྱའི་ལུས་ལ་བྱུག་པར་བསམ། མངར་གསུམ་གྱི་དགང་བླུགས་བྱིན་ཏེ། ཨོཾ་ནཱ་ག་ཤཱནྟིངྐུ་རུ་སྭཱ་ཧཱ་ཞེས་བརྗོད་ཅིང་སྦྱིན་སྲེག་མངར་གསུམ་གྱིས་བྱའོ། །དེ་ནས་རྒྱ་མཚོ་ཆེན་པོར་གཤེགས་པར་བསམ་སྟེ། གཟུགས་བརྙན་མངར་གསུམ་དང་བཅས་ཏེ་ཆུ་
བོ་ཆེན་པོར་དོར་རོ། །དེ་ཡང་དང་པོར་ས་གཙང་མ་ལ་སྦྲུལ་གྱི་གཟུགས་བྱས་ལ། ཚོན་གྱིས་ཁྲ་བོར་བྱས་ཏེ། ལུས་བོར་ལ་དེར་ཕྱུང་སྟེ། མངར་གསུམ་གཞུག་གོ། །དེ་ནས་ཆུ་བོར་འདོར་བའི་ཚེ་དམ་བསྒྲག་པར་བྱ་སྟེ། ཀླུ་རྣམས་ཁྱེད་ཀྱིས་བདག་གི་ངག་མཉན་ན། །ཡིད་བཞིན་ནོར་ལྟར་
བསམ་པ་འགྲུབ་པ་དང་། །མཁའ་ལྡིང་རིགས་དང་བྱེ་ཚན་གནོད་ཞི་སྟེ། །འདོད་ཡོན་ལྔ་ལ་བདེ་བར་ལོངས་སྤྱོད་ཤོག །ཅི་སྟེ་ང་ཡི་བཀའ་ལས་འདས་གྱུར་ན། །མཁའ་ལྡིང་བྱེ་ཚན་རིམས་ཀྱི་ཆར་ཕབ་ནས། །དུས་རྣམས་རྟག་ཏུ་ནད་ཀུན་ལྡང་བ་དང་། །ཕྱག་ན་རྡོ་རྗེས་མགོ་བོ་བཀས་གྱུར་ཅིག །
ཅེས་བརྗོད་ཀླུ་ལ་གཏོར་མ་གཏང་བ་དང་། རྣམ་ཐོས་སྲས་ཀྱང་སྤྱན་དྲངས་ཏེ་གཏོར་མ་རྒྱ་ཆེན་པོ་བཏང་ངོ་། །བསྒྲུབ་བྱ་བསྲུང་བ་ནི། བཅོམ་ལྡན་དྲང་སྲོང་ཆེན་པོ་ཁྱོད། །སུམ་མདོའི་རིགས་མཚན་ལྡན་པ་ལ། །ཇི་ལྟར་བསྲུངས་བར་དམ་བཅས་པ། །དེ་ལྟར་འདི་ལ་བསྲུང་བར་མཛོད། །ཅེས་བརྗོད་

73-1-250a

ལ། དེ་ནས་མར་གྱི་དགང་བླུགས་ཕུལ་ཏེ། མཆོད་པ་དང་བསྟོད་པ་བྱས་ལ། བཟོད་པར་གསོལ་ཏེ། གང་ཡང་བདག་བློ་གཏི་མུག་པས། །ལེགས་བཤད་འདི་ལ་ཉེས་པ་གང་། །ལུས་ཅན་ཀུན་གྱི་སྐྱབས་གྱུར་པའི། །དེ་ཀུན་མགོན་པོས་བཟོད་པར་མཛད། །གཙོ་བོ་ནུས་པ་མ་མཆིས་ཤིང་། །
མ་འཚལ་བ་དང་མ་རྙེད་པས། །བདག་གིས་བགྱིས་པ་གང་བགྱིས་པ། །དེ་ཀུན་མགོན་པོས་བཟོད་པར་མཛོད། །ཅེས་བརྗོད་དོ། །ཨོཾ་ཁྱོད་ཀྱིས་སེམས་ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་སུ་གསོལ། །སངས་རྒྱས་ཡུལ་དུ་གཤེགས་
ནས་ཀྱང་། །སླར་ཡང་བྱོན་པར་མཛད་དུ་གསོལ། །ཞེས་བརྗོད་ལ་གཤེགས་པར་བསམ། དེ་ནས་དམ་ཚིག་སེམས་དཔའ་རང་ལ་བསྡུ། དེ་ནས་བྱིན་ཟ་ལ་མཆོད་བསྟོད་བྱས་ནས་མེ་ལྷའི་ཞབས་དྲུང་གི་ཐལ་བས་བདག་དང་ཡོན་བདག་བསྲུངས་ཏེ། སྨོན་ལམ་གདབ་པོ། །རང་གི་དོན་དང་གཞན་གྱི་དོན། །
བྱིན་ཟ་ཁྱོད་ཀྱིས་མཛད་ལགས་ཀྱིས། །རང་གི་ཡུལ་དུ་གཤེགས་ནས་ཀྱང་། །སླར་ཡང་བྱོན་པར་མཛད་དུ་གསོལ། །ཨེ་ཧྱེ་ཧི་གཙྪཿཞེས་བྱ་བས་གཤེགས་སུ་གསོལ། དེ་ནས་དམ་ཚིག་གི་མེ་ལྷ་རིམ་གྱིས་ཐ་མལ་པའི་མེ་ལ་ཐིམ་པར་བྱའོ། །དེ་ནས་ཐལ་བ་སློང་བ་ལ་སྦྱིན་ནོ། །འབྱུང་པོ་ཐམས་ཅད་
འདུལ་བའི་རྒྱུད་ཆེན་ལས། །བཏུས་ཏེ་སྦྱིན་སྲེག་ཆོ་ག་མདོར་དྲན་བྱས། །དེས་ནི་འགྲོ་བའི་གདོན་དང་སྡིག་ཞི་ནས། །ཀླུ་རྣམས་ཀུན་གྱི་གནོད་པ་བྲལ་གྱུར་ཅིག །རྗེ་བཙུན་ཕྱག་ན་རྡོ་རྗེ་གོས་སྔོན་པོ་ཅན་གྱི་སྦྱིན་སྲེག་གི་ཆོ་ག་ཞེས་བྱ་བ། སློབ་དཔོན་བྲམ་ཟེ་ཉིན་མཛད་རྡོ་རྗེས་མཛད་པ་རྫོགས་སོ།།      །།
སྦྱིན་སྲེག་གི་དུས་སུ་བསྟོད་པ་ནི། ཧཱུཾ་གཏུམ་ཆེན་དུས་མཐའི་མེ་ལྟར་འབར། །འོད་ཟེར་ཉི་མ་འབུམ་གྱི་གཟི། །གདུག་པའི་མཚོན་ཆ་སྣ་ཚོགས་བསྣམས། །བདུད་དགྲ་ཁྱོད་ལ་ཕྱག་འཚལ་བསྟོད། །ཅེས་པ་ལ་སོགས་པའོ། །བགེགས་འགུགས་པ་ནི། ཧཱུཾ་དུས་གསུམ་སངས་རྒྱས་ཐམས་ཅད་ཀྱི། །
ཐམས་ཅད་འདུས་པའི་ངོ་བོ་ཉིད། །ཏ་ཀྲྀཏ་བྱ་བའི་ཁྲོ་རྒྱལ་གྱིས། །དེང་གི་དགུག་བྱ་འདིར་ཁུག་ཅིག །ནམ་མཁའ་སྟོང་པ་འགུགས་བྱེད་ན། །གཟུགས་དང་ལྡན་པ་སྨོས་ཅི་དགོས། །སེམས་མེད་རི་བོའང་འགུགས་བྱེད་ན། །སེམས་དང་ལྡན་པ་སྨོས་ཅི་དགོས། །རྡོ་རྗེ་འཛིན་པའི་བཀའ་དང་ནི། །

73-1-250b

རང་བཞིན་དག་པའི་སྦྱོར་བ་ཡིས། །བར་དུ་གཅོད་པའི་བགེགས་ཆེན་རྣམས། །ཆེད་དང་དོན་དུ་འདིར་ཁུག་ཅིག །རྣམ་ཐོས་སྲས་ཀླུ་བརྒྱད་དང་བཅས་པ་འགུགས་ན། ཨོཾ་བཻ་ཤྲ་བ་ཎཱ་ཡ་ཨཱ་ཀཱཪྵ་ཡ་ཧཱུཾ་ཛཿ། ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་ཨཱ་ཀཱཪྵ་ཡ་ཧཱུཾ་ཛཿཞེས་པའོ།།      །།   ༄༅། །ཕྱག་ན་རྡོ་རྗེ་རྡོ་རྗེ་
སྙིང་པོའི་མན་ངག་ཅེས་བྱ་བའི་སྒྲུབ་ཐབས་བཞུགས། བཅོམ་ལྡན་འདས་རྡོ་རྗེ་སྙིང་པོ་ལ་ཕྱག་འཚལ་ལོ། །ཐོག་མར་རྣལ་འབྱོར་པས་ཡིད་དང་མཐུན་པའི་གནས་སུ་བྱི་དོར་བྱ་བ་དང་། བའི་རྣམ་ལྔས་བྱུག་པ་ལ་སོགས་པ་རྒྱུད་ནས་ཇི་ལྟར་འབྱུང་བ་བཞིན་བྱས་ལ། ཡོ་བྱད་ཚོགས་པ་དང་། སྟན་བདེ་
བ་ལ་འདུག་སྟེ། རང་གི་སྙིང་གའི་ས་བོན་ལས་འོད་འཕྲོས་པས་བླ་མ་དང་བཅོམ་ལྡན་འདས་ཕྱག་ན་རྡོ་རྗེ་དང་། སངས་རྒྱས་དང་བྱང་ཆུབ་སེམས་དཔའ་ལ་སོགས་པ་མདུན་གྱི་ནམ་མཁའ་ལ་སྤྱན་དྲངས་ཏེ། ཕྱག་འཚལ་བ་དང་མཆོད་པ་དབུལ་བ་དང་། ཡན་ལག་བདུན་པ་བྱས་ལ་དེའི་
རྗེས་སུ་ཚད་མེད་པ་བཞི་བསྒོམ་པར་བྱའོ། །དེ་ནས་ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་བྱ་བས་རྒྱུ་བ་དང་མི་རྒྱུ་བ་ཐམས་ཅད་རྣམ་པར་དག་པར་བྱའོ། །དེའི་རྗེས་ལ་མདུན་དུ་པཾ་ལས་པདྨའི་སྟེང་དུ་ཨ་ལས་ཟླ་བའི་དཀྱིལ་འཁོར་བསམ། དེའི་སྟེང་དུ་ཧཱུཾ། དེ་འཕྲོས་འདུས་པས་སེམས་
ཅན་གྱི་སྡིག་པ་དང་སྡུག་བསྔལ་བསལ་ནས་སླར་འདུས་པ་ལས་རྡོ་རྗེའོ། །དེ་ཡོངས་སུ་གྱུར་པ་ལས་རང་ཉིད་བཅོམ་ལྡན་འདས་རྡོ་རྗེ་སྙིང་པོ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ། གཡས་པ་རྡོ་རྗེ་འཕྱར་བ། གཡོན་སྡིགས་མཛུབ་བསྟན་པ། ཞབས་གཡས་བསྐུམ། གཡོན་བརྐྱང་བ། 
གདུག་པའི་ཚོགས་ཀྱིས་སྐུ་ལ་བརྒྱན་པར་བསྒོམ། དེ་ནས་རང་གི་སྙིང་གའི་ས་བོན་ལས་འོད་འཕྲོས་པས་ཡེ་ཤེས་སེམས་དཔའ་སྤྱན་དྲངས་ལ་མཆོད་ནས་རང་ལ་བསྟིམ་པར་བྱའོ། །དེ་ནས་དབང་བསྐུར་བར་བྱ་སྟེ། རང་གི་སྤྱི་བོར་མི་བསྐྱོད་པ་བསྒོམ་པར་བྱའོ། །དེའི་རྗེས་ལ་སྐུ་གསུང་ཐུགས་བྱིན་གྱིས་
བརླབས་ཏེ་ཇི་སྲིད་དུ་སེམས་མི་འཕྲོ་བར་གཞག་པར་བྱའོ། །མི་རྟོག་པ་བསྒོམ་པར་བྱའོ། །དྲག་པོའི་ལས་བྱེད་པར་འདོད་ན་རྫས་ལ་སོགས་པ་ནི་གོང་དུ་བཤད་པ་བཞིན་ནོ། །རཾ་ལས་ཉི་མའི་སྟེང་དུ་ཧཱུཾ། དེ་ལས་འོད་འཕྲོས་པས་རྡུལ་ཕྲ་རབ་ཐམས་ཅད་རྡོ་རྗེའི་སྙིང་པོར་བྱས་ཏེ་འདུས་པ་ལས་རྡོ་རྗེའོ། །

73-1-251a

དེ་ལས་རང་ཉིད་ཕྱག་ན་རྡོ་རྗེར་བསྒོམ་པར་བྱའོ། །ཡང་ན་སྐད་ཅིག་གིས་སྟོང་པར་བསམས་ཏེ། ཆོ་ག་གསུམ་གྱིས་ཕྱག་ན་རྡོ་རྗེར་ལྡང་བར་བྱའོ། །ཡང་ན་བཛྲ་བཛྲ་ཧཱུཾ་ཞེས་བརྗོད་པ་ཙམ་གྱིས་སྐད་ཅིག་གི་ཚེ་ཆུ་ལས་ཉ་ལྡང་བ་ལྟར་རྡོ་རྗེ་སྙིང་པོར་ལྡང་བར་བྱའོ། །དེ་ལྟར་བསྒོམས་ནས་ལྡང་
བར་འདོད་ན། རང་གི་སྙིང་གར་ས་བོན་གྱི་མཐར། བཛྲ་བཛྲ་ཧཱུཾ་ཞེས་བརྗོད་པས་རང་བརྟན་པར་བྱས་ལ། བཅོམ་ལྡན་འདས་ཀྱིས་དུག་འཇིག་པར་བྱེད་པའི་སྔགས་བརྒྱའམ་ལྔ་བཅུ་ལ་སོགས་པ་ཐོག་མ་ཉིད་དུ་ཟློས་པར་བྱ་སྟེ། དེས་ཀླུའི་དུག་འཇིལ་བར་བྱེད་པའོ། །དེ་ནས་མཐའ་ཡས་བསྐྱེད་པར་
བྱ་སྟེ། མདུན་དུ་འོ་མ་ཅན་གྱི་རྒྱ་མཚོའམ། དེའི་སྟེང་དུ་པཾ་ལས་པདྨའི་སྟེང་དུ་ཕུཿལས། ཀླུ་མཐའ་ཡས་སྐུ་མདོག་ལྗང་གུ། ཞལ་གཅིག་ཕྱག་གཉིས་པ་སྟོད་མི། སྨད་སྦྲུལ། མགོ་ལ་སྦྲུལ་མགོ་དགུ་ཡོད་པ། སྦྲུལ་རིགས་ལྔའི་གདན་ལ་བཞུགས་པ། རང་དང་འདྲ་བའི་བཙུན་མོས་འཁྱུད་པར་
བསམ་མོ། །དེ་ནས་རང་གི་སྙིང་གའི་ས་བོན་ལས་འོད་འཕྲོས་པས། ཀླུའི་གནས་ནས་མཐའ་ཡས་རང་རྒྱུད་ལ་བཀུག་ལ་བསྟིམ་པར་བྱའོ། །དེ་ནས་བདག་ལ་བཀའ་ནོད་པར་བྱས་ལ། ཀླུའི་སྲོག་སྙིང་དང་བཅས་པ་བཟླས་ཏེ། འདི་ནི་བསྙེན་པའི་སྔགས་སོ། །དེ་ཡང་ཚོགས་སོགས་པ་ལ་ནི། 
རང་དང་ཀླུ་གཉིས་ཀའི་ས་བོན་ལས་འོད་ཟེར་དཀར་པོ་འཕྲོས། འདུས་པས་སྡིག་པ་ཐམས་ཅད་དག་པར་བསམ་མོ། །དྲག་པོ་ལ་ནི་འོད་ཟེར་ནག་པོ་དང་དམར་པོ་དང་མེ་ལྟ་བུའམ། ཡང་ན་རང་དང་འདྲ་བའི་ཁྲོ་བོའམ་རླུང་གྲངས་མེད་པ་འཕྲོས་ཏེ། དེ་དག་གིས་གནོད་པ་དཔག་ཏུ་མེད་པ་བྱེད་པར་
བསམ་མོ། །དེ་ཡང་རྒྱུན་དུ་ནི་བསྙེན་པ་ཉིད་དོ། །གདོན་ཐམས་ཅད་ལ་ནི་སྔགས་ཐམས་ཅད་དོ། །ཡང་ན་གང་ཡིན་པ་དེ་ཉིད་དོ། །འཇོག་པར་འདོད་ན་གཏོར་མ་བཏང་ལ་བསྟོད་ནས་ཕྲིན་ལས་བཅོལ་ཞིང་གཤེགས་པར་མཁྱེན་པར་བྱས་ནས། དམ་ཚིག་སེམས་དཔའ་རང་གི་ས་བོན་ལ་བསྡུ་བར་
བྱའོ། །དེ་ནས་སྨོན་ལམ་གདབ་པ་དང་། འདོད་དོན་ལ་སོགས་པ་ཅི་བདེ་བར་གནས་པར་བྱའོ། །བླ་མའི་བཀའ་དྲིན་མནོས་པ་ལ་བརྟེན་ཏེ། །སྒྲུབ་ཐབས་མན་ངག་སྦྲང་རྩི་རབ་ཏུ་བཏུང་། །འཐུང་བྱེད་རབ་ཏུ་དང་བས་དེ་དག་ལ། །རྡོ་རྗེ་འཛིན་པ་ཉིད་ཀྱིས་སྐྱོབ་བྱེད་ཤོག །རྡོ་རྗེ་སྙིང་པོའི་མན་ངག་སྒྲུབ་པའི་

73-1-251b

ཐབས་ཞེས་བྱ་བ་པཎྜི་ཏ་ཛྙཱ་ན་ཤྲཱིས་མཛད་པ་རྫོགས་སོ།།      །།༄༅༅། །རིགས་སྔགས་གཏད་པའི་ཆོ་ག་བཞུགས། འཕགས་པ་གོས་སྔོན་པོ་ཅན་ལ་ཕྱག་འཚལ་ལོ། །གོས་སྔོན་ཅན་ལ་ཕྱག་འཚལ་ནས། །རིག་སྔགས་གཏད་པའི་ཆོ་ག་ནི། །རྒྱུད་ཆེན་མདོ་དང་མི་འགལ་བར། །བདག་གིས་དྲན་
ཕྱིར་བྲི་བར་བྱ། །དམ་ཚིག་ལྡན་པའི་སློབ་དཔོན་གྱིས། །དང་པོར་བསྙེན་པར་བྱ་བ་ནི། །མཎྜལ་མཆོད་ཡོན་མཆོད་པ་དང་། །ཚུལ་བཞིན་གཏོར་མ་བཤམས་ནས་ནི། །དམ་ཚིག་དཀྱིལ་འཁོར་གསལ་བསྐྱེད་ལ། །ཡེ་ཤེས་ལྷ་ནི་སྤྱན་དྲངས་ལ། །མཆོད་པ་ལྔ་ཡིས་མཆོད་དེ་བསྟོད། །མཎྜལ་སྟེང་དུ་སྐུ་
གཟུགས་གཞག །དམ་ཚིག་ལྷ་རུ་བྱིན་བརླབས་ནས། །སྒོ་བཞིའི་སྔགས་དང་ཕྱག་རྒྱ་ཡིས། །གཉིས་མེད་གོས་སྔོན་བསྟིམ་བྱས་ལ། །མཆོད་དང་བསྟོད་པ་གོང་བཞིན་བྱ། །མེད་ན་མཎྜལ་དཀྱིལ་འཁོར་ལ། །པདྨ་འདབ་བརྒྱད་ལེགས་བྲིས་ལ། །དེ་དབུས་ཧཱུཾ་གི་འཕྲོ་འདུ་ལས། །དམ་ཚིག་ལྷ་རུ་
བསྐྱེད་བྱས་ནས། །རང་བཞིན་དཀྱིལ་འཁོར་བསྟིམ་ཞིང་མཆོད། །དེ་ནས་བཟླས་པ་བྱ་བ་ནི། །འབུམ་མམ་ཁྲི་ཡི་བར་དུ་བཟླས། །མཚན་མ་བྱུང་ན་དཀྱིལ་འཁོར་བརྩམ། །དང་པོར་ས་གཞི་བརྟག་བྱས་ལ། །ཁྲུ་གང་ཡང་ན་ཁྲུ་དོ་རུ། །བྲུས་ནས་སྐྱོན་རྣམས་བསལ་བར་བྱ། །ནང་དུ་ནོར་བུ་རིན་ཆེན་གཞུག །
འཐས་པར་བཅག་ལ་དྲི་ཡིས་བྱུག །ལྷ་ཡི་དཀྱིལ་འཁོར་བསྐྱེད་བྱས་ལ། །ས་ཡི་ལྷ་མོ་བརྟན་མ་ལ། །མཆོད་བསྟོད་གསོལ་བཏབ་བཀའ་ཡང་བསྒོ། །དམ་ཚིག་ཅན་གྱི་སྲུང་མ་ལ། །གཏོར་མ་སྦྱིན་ལ་ཕྲིན་ལས་གཞོལ། །པུས་བཙུགས་ལག་ཏུ་སྤོས་ཐོགས་ལ། །ཡེ་ཤེས་ལྷ་ལ་གསོལ་བ་གདབ། །
དེ་ནས་ས་ཡི་བགེགས་རྣམས་ཀྱང་། །དྲག་པོའི་སྔགས་ཀྱིས་བསྐྲད་པར་བྱ། །སྐྱོན་བྲལ་དངུལ་གྱི་བུམ་པ་ནི། །ལྟོ་བ་ཆེ་ལ་མགྲིན་པ་རིང་། །རྒྱན་དང་མཆུ་ནི་རྫོགས་བྱས་ལ། །བྱིན་བརླབས་གོས་སྔོན་ལྷར་བསྐྱེད་ཅིང་། །སྤྱན་དྲངས་མཆོད་ཡོན་མཆོད་པས་མཆོད། །བཟླས་པ་བརྒྱ་ནི་རྩ་བརྒྱད་བྱ། །དེ་ནས་
དཀྱིལ་འཁོར་སྟ་གོན་ནི། །མེ་ཏོག་བཀྲམ་ཞིང་གསང་སྔགས་བཟླས། །གདན་དང་ལྷ་རུ་བསྐྱེད་བྱས་ལ། །དེ་ལ་མཆོད་ཅིང་གསོལ་བ་གདབ། །ལན་གསུམ་རབ་ཏུ་བརྗོད་པར་བྱ། །དེ་ནས་བློ་ལྡན་སློབ་མ་ལ། །ཁྲུས་བྱས་ལུས་ནི་དྲིས་བྱུགས་ལ། །མེ་ཏོག་ཐོགས་ལ་ཕྱག་འཚལ་གཞུག །གསོལ་

73-1-252a

གདབ་གནང་བ་སྦྱིན་པ་དང་། །སྐྱབས་འགྲོ་སྡིག་བཤགས་ལ་སོགས་ཀུན། །ཡན་ལག་བདུན་པ་ཉིད་ཀྱང་བརྗོད། །སློབ་དཔོན་གྱིས་བརྗོད་སློབ་མས་ཉན། །དེ་ནས་སེམས་བསྐྱེད་ཆོ་ག་ནི། །སློབ་དཔོན་སློབ་མ་གཉིས་ཀས་བཟླས། །དེ་ལྟར་སློབ་མ་སྣོད་ལྡན་ལ། །དཔྲལ་བ་མགྲིན་
པ་སྙིང་ག་རུ། །དྲི་ཡི་ཐིག་ལེ་གསུམ་བྱས་ལ། །ཉི་མ་ཟླ་བ་པདྨ་གསུམ། །སྙིང་ག་ལ་སོགས་དགོད་པར་བྱ། །ཨོཾ་ཨཱཿཧཱུཾ་གི་ཡི་གེ་ལས། །འབྲས་བུ་སྐུ་གསུང་ཐུགས་ལྷར་བསྒོམ། །མེ་ཏོག་སྤོས་ལ་སོགས་པས་མཆོད། །སྲུང་སྐུད་ལ་སོགས་སྦྱིན་བྱས་ལ། །ཆོས་བཤད་རྨི་ལམ་བརྟག་པར་བྱ། །
ནང་པར་སྔར་ལངས་དཀྱིལ་འཁོར་བྲི། །འདབ་མ་བརྒྱད་པའི་དཀྱིལ་འཁོར་ལ། །དབུས་སུ་གོས་སྔོན་དགོད་པར་བྱ། །དྷཱུ་པེ་ལ་སོགས་ལྷ་མོ་དང་། །སྒོ་བ་བཞི་ཡང་དགོད་པར་བྱ། །བ་དན་ལ་སོགས་རྒྱན་རྣམས་དང་། །མཆོད་པ་གཏོར་མ་དགྲམ་པར་བྱ། །དེ་ནས་ཏིང་འཛིན་ཚུལ་བསྐྱེད་ལ། །
གཞུག་པའི་ཆོ་ག་བྱ་བ་ནི། །གཏོར་མ་བཏང་ལ་འཐོར་འཐུང་བྱ། །གསོལ་བཏབ་གདོང་གཡོགས་བཅིངས་པ་དང་། །བཀའ་བསྒོ་མེ་ཏོག་དོར་བྱས་ལ། །མིག་ཕྱེ་ལྷ་ཡི་ངོ་ཡང་བསྟན། །དེ་ནས་རིག་པའི་དབང་བསྐུར་ཏེ། །དང་པོར་བུམ་པ་ལག་ཐོགས་ལ། །བཀྲ་ཤིས་གླུར་བླངས་བུམ་
དབང་བསྐུར། །ཨོཾ་སིདྡྷི་སིདྡྷི་ཞེས་བཟླས། དེ་ནས་སྔགས་རིང་གི་མཇུག་ལ། །ཨ་བྷི་ཥིཉྩཱ་ཞེས་བཏགས་ལ། །ཆུ་ཡི་དེ་ནི་དབང་བསྐུར་རོ། །དེ་ནས་དབུ་རྒྱན་ལ་སོགས་པ། །བྱ་བའི་རྒྱུད་དང་མཐུན་པ་ཡི། །བྱས་ལ་རྗེས་སུ་གནང་བ་སྦྱིན། །དེ་ནས་བསྐྱེད་པའི་རིམ་པ་ལ་སོགས་པ་ཐམས་
ཅད་བསླབ་ལ། དེ་ནས་ལྷ་ལ་མཆོད་བསྟོད་བྱ། །དེ་ནས་ཞི་བའི་སྦྱིན་སྲེག་བྱ། །དེ་ནས་གོས་སྔོན་ཅན་བསྒྲུབ་ཅིང་། །བྱེ་བྲག་གི་ནི་ལས་ཐམས་ཅད་སྒྲུབ་ཏུ་རུང་ངོ་། །དེ་ནས་ཡི་གེ་བརྒྱ་པ་བཟླས་ཤིང་དཀྱིལ་འཁོར་བསྡུ་བ་ལ་སོགས་པ་བྱའོ། །རིག་སྔགས་གཏད་པའི་ཆོ་ག་རྫོགས་
སོ།།      །།རྒྱ་གར་གྱི་མཁན་པོ་ནག་པོ་པ་དང་། ཚུལ་ཁྲིམས་རྒྱལ་བས་བསྒྱུར་ཅིང་གཏན་ལ་ཕབ་པའོ།    །༄༅༅། །རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ཎི་མཎྜ་ལ་བི་དྷི་ནཱ་མ། བོད་སྐད་དུ། ཕྱག་ན་རྡོ་རྗེ་གོས་སྔོན་པོ་ཅན་གྱི་དཀྱིལ་འཁོར་གྱི་ཆོ་ག་ཞེས་བྱ་བ། 

73-1-252b

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བཅོམ་ལྡན་འདས་ཕྱག་ན་རྡོ་རྗེ་གོས་སྔོན་ཅན་ལ་ཕྱག་འཚལ་ལོ། །ཉེས་པ་ཀུན་བཅོམ་དེ་ཉིད་རྟོགས་གྱུར་ཀྱང་། །ཐུགས་རྗེའི་རྒྱུན་གྱིས་འཇིགས་པའི་སྐུ་སྤྲུལ་པ། །ཀླུ་དབང་ལ་སོགས་གདུག་པས་ཕྱག་བྱས་པའི། །གོས་
སྔོན་ཕྱག་ན་རྡོ་རྗེ་ཁྱོད་ཕྱག་འཚལ། །གང་ཞིག་མཐོང་བས་སྡུག་བསྔལ་སེལ་འགྱུར་ཞིང་། །གང་དུ་སྨིན་པས་དངོས་གྲུབ་སྐལ་གྱུར་ཕྱིར། །དྲི་མེད་རྒྱུད་མང་མཐོང་དང་བླ་མ་ཡི། །དྲིན་ཐོབ་གྱུར་པས་དཀྱིལ་འཁོར་ཆོ་ག་བཤད། །གང་ཞིག་དབང་རྣམས་རིམ་ཐོབ་དམ་ཚིག་ལྡན། །བརྟན་ཞིང་དུལ་བ་
བཟོད་ལྡན་བློ་གྲོས་ཆེ། །དཔའ་ཞིང་བརྩོན་ལྡན་དྲང་ལ་གཡོ་སྒྱུ་མེད། །སྔགས་དང་རྒྱུད་ཀྱི་སྦྱོར་བ་རབ་ཤེས་དང་། །དེ་ཉིད་བཅུ་ཤེས་དཀྱིལ་འཁོར་བྲི་བར་མཁས། །མཚན་ཉིད་དང་ལྡན་གྱུར་པའི་བླ་མ་ལ། །སྐལ་ལྡན་སློབ་མས་གསོལ་བ་ལན་གསུམ་གདབ། །སྣོད་ལྡན་གྱུར་ན་བླ་མས་གནང་བ་སྦྱིན། །
སློབ་མའི་ལྟེ་བར་ཧཱུཾ་གི་ཡི་གེ་ནི། །དུ་བའི་མདོག་ཅན་འོད་ཟེར་འབར་བ་བསམ། །སྙིང་ཀར་ཀཾ་ཡིག་ནག་པོ་སྡིག་པ་ཡི། །རང་བཞིན་བལྟས་ཏེ་ཧཱུཾ་གི་འོད་ཟེར་གྱིས། །སྣ་རྩེར་བཏོན་ཏེ་ལྟུང་བས་སྡིག་པ་ནི། །མི་སྡུག་གཅེར་བུ་སྐྲ་གྲོལ་ཉམ་ཐག་ཅིང་། །ཏིལ་མར་གྱིས་བསྒོས་གནག་ལ་རིད་པ་བསམ། །
ཧཱུཾ་ལས་བྱུང་བའི་རྡོ་རྗེ་གནོད་སྦྱིན་ལ། །བཛྲ་ཡཀྵ་སོགས་སྔགས་ཀྱིས་ཟོས་པའམ། །ཧཱུཾ་ལས་བྱུང་བའི་ཕུར་བུས་གདབ་པར་བྱ། །སཾ་ལས་ཀུན་ཏུ་བཟང་པོ་བསྐྱེད་ནས་ནི། །སྙིང་གར་ཧཱུཾ་ལས་སྣ་ཚོགས་རྡོ་རྗེ་བསམ། །སྤྱི་བོར་གཏུགས་ཏེ་རྩ་སྔགས་ལན་གསུམ་གྱིས། །བཟླས་ཏེ་སློབ་མ་ཡོངས་སུ་བསྲུང་
བར་བྱ། །དབེན་ཞིང་ཉམས་དགའི་གནས་སུ་བདག་ཉིད་ནི། །ཏིང་འཛིན་གསུམ་ལྡན་མཚན་མ་ཐོབ་པའམ། །བཟླས་པ་འབུམ་རྫོགས་ཡང་ན་ཟླ་གཅིག་དང་། །ཟླ་དྲུག་ལ་སོགས་བསྙེན་པ་རྫོགས་པར་བྱ། །དེ་ལྟར་བསྙེན་པ་ཡོངས་རྫོགས་ནས། །ཁང་སྟོང་དག་གམ་དུར་ཁྲོད་དང་། །སྦྲུམ་མེད་
དྲག་པོའི་ལས་ཅན་དང་། །དེ་བཞིན་ཚང་ཚིང་མི་བཟད་འཇིགས། །དེ་ལ་སོགས་པའི་གནས་རྣམས་སུ། །དྲག་པོའི་ལས་ཀྱི་དཀྱིལ་འཁོར་བྲི། །ཡང་ན་ཡིད་ནི་གང་དག་ཏུ། །ངེས་པར་དགའ་བ་སྐྱེ་འགྱུར་བ། །མདོར་ན་ས་གཞི་ཉམས་དགའ་དང་། །མདངས་གསལ་ཤར་དུ་གཞོལ་བར་

73-1-253a

བཤད། །ཡུལ་དེར་དཀྱིལ་འཁོར་བྲི་བ་ཡི། །ལས་ནི་ལེགས་པར་སྦྱར་བར་བྱ། །ཙནྡན་ཨ་ཀ་རུ་སོགས་ལ། །དྲི་ཞིམ་ཆུ་དང་བ་སོགས་ཀྱིས། །ཆག་ཆག་ལེགས་པར་གདབ་པར་བྱ། །ཕྱོགས་སྐྱོང་རྣམས་ལ་གཏོར་མ་ནི། །སྦྱིན་པར་བྱས་ཏེ་གསོལ་བ་གདབ། །ས་ཡི་ལྷ་མོ་སྐུ་
མདོག་སེར། །ཕྱག་གཉིས་བུམ་པ་བསྣམས་པ་ནི། །བློས་བཀུག་མཆོད་དེ་གསོལ་བ་གདབ། །སྐྱོབ་པ་སངས་རྒྱས་ཐམས་ཅད་ལ། །ལྷ་མོ་ཁྱོད་ནི་དབང་དུ་གྱུར། །རིན་ཆེན་སྣ་ཚོགས་འཛིན་པ་ཡིས། །ས་འདིར་དཀྱིལ་འཁོར་བྲི་བར་བྱ། །ཞེས་བརྗོད་ནམ་མཁར་འདེགས་པར་བྱ། །བདག་དང་སློབ་
མ་ས་བདག་སོགས། །ཞི་བར་བྱ་བའི་ཕྱིར་དང་ནི། །བགེགས་རྣམས་བཟློག་པར་བྱ་བའི་ཕྱིར། །ཞི་དང་དྲག་པོའི་སྦྱིན་སྲེག་བྱ། །དེ་ནས་པུས་ནུབ་འདོམ་གང་བར། །བྲུས་ཏེ་རྡོ་དང་རུས་སོགས་བསལ། །སླར་ཡང་ས་ཡིས་དེ་ཉིད་དགང་། །གལ་ཏེ་ལྷག་པར་གྱུར་ན་ནི། །དངོས་གྲུབ་ཡོད་པར་སྟོན་
པ་ཡིན། །དེ་ལྟར་སྦྱང་བ་བྱས་པ་དང་། །དྲི་ཞིམ་ཆུ་དང་སྦྱར་བའི་སས། །གྲུ་བཞི་ཤིན་ཏུ་འཐས་བྱས་ཏེ། །དྲི་ཞིམ་ཆུ་དང་བ་ཡི་ལྔས། །ཤར་ནས་བརྩམས་ཏེ་ལེགས་བྱུགས་ལ། །གྲུ་བཞི་སྒོ་བཞི་ཁང་བརྩེགས་མ། །རྟ་བབས་སྐར་ཁུང་དྲ་བ་ཅན། །མེ་ཏོག་ཆུན་འཕྱང་སོགས་ལྡན་པའི། །ཁང་པའི་
ནང་ཆུད་རྒྱན་སོགས་དགྲམ། །དེ་ནས་ཧཱུཾ་ཁ་ཧཱུཾ་ཞེས་པས། །རྣམ་པར་དག་པའི་ནམ་མཁར་བསམ། །ཧཱུཾ་སུཾ་ཧཱུཾ་ལས་བྱུང་བ་ཡི། །རིན་ཆེན་སྣ་བཞིའི་རི་རབ་བསྐྱེད། །དེ་སྟེང་ཧཱུཾ་ལཾ་ཧཱུཾ་བྱུང་བའི། །གསེར་གྱི་ས་གཞི་གྲུ་བཞི་པ། །བསྐྱེད་དེ་ཐལ་བཅིངས་ཁ་སྦུབ་ལ། །སྔགས་ཀྱི་བྱིན་གྱིས་བརླབ་པར་བྱ། །
ཨོཾ་མེ་དཱི་ནི་བཛྲཱི་བྷ་བ་བནྡྷ་ཧཱུཾ། །དེ་ནས་ཁམས་གསུམ་རྣམ་རྒྱལ་ནི། །བསྲུང་བའི་སྔགས་ཀྱིས་བསྲུང་བྱ་བ། །ས་ཡི་ཆོ་གར་གསུངས་པ་ཡིན། །དེ་ནས་བདག་ཉིད་ཁྲུས་བྱས་ཤིང་། །ཤིན་ཏུ་སྔོ་བའི་གོས་བགོས་ཏེ། །ཇི་སྙེད་རྒྱན་གདགས་དྲི་ཞིམ་བྱ། །དཀྱིལ་འཁོར་དབུས་ནས་ཤར་དུ་བལྟས། །ཇི་ལྟར་
སྒྲུབ་ཐབས་ལས་བཤད་པའི། །ཏིང་འཛིན་གསུམ་ནི་བསྒོམ་པ་དང་། །བཟླས་པ་དག་ལ་བརྩོན་པ་ལ། །གྲོག་མཆོག་རྣམས་ཀྱིས་བསྟོད་གསོལ་གདབ། །གསང་བའི་བདག་པོ་བརྩོན་ཆེན་པོ། །སངས་རྒྱས་སྐུ་དང་འདྲ་བའི་ལུས། །གཏི་མུག་རྡོ་རྗེའི་རང་བཞིན་ཅན། །རྡོ་རྗེ་སྐུ་ལ་ཕྱག་འཚལ་ལོ། །

73-1-253b

གསང་བའི་བདག་པོ་བརྩོན་ཆེན་པོ། །སངས་རྒྱས་གསུང་དང་འདྲ་བའི་ངག །འདོད་ཆགས་རྡོ་རྗེའི་རང་བཞིན་བདག །རྡོ་རྗེ་གསུང་ལ་ཕྱག་འཚལ་ལོ། །གསང་བའི་བདག་པོ་བརྩོན་ཆེན་པོ། །སངས་རྒྱས་ཐུགས་དང་འདྲ་བའི་ཡིད། །ཞེ་སྡང་རྡོ་རྗེའི་རང་བཞིན་བདག །རྡོ་རྗེ་ཐུགས་ལ་ཕྱག་
འཚལ་ལོ། །མགོན་པོ་ཁྱོད་ལ་གསོལ་བ་ནི། །སེམས་ཅན་ཀུན་ལ་སྨན་སླད་དུ། །གདུག་པ་ཐམས་ཅད་འདུལ་བྱེད་པའི། །དཀྱིལ་འཁོར་དམ་པ་བཤད་དུ་གསོལ། །དེ་ལྟར་གསོལ་གདབ་བདག་པོ་ཡི། །ང་རྒྱལ་བརྟན་པས་ལངས་ནས་ནི། །བདག་ཉིད་རང་བཞིན་རྡོ་རྗེ་ཅན། །ཕྱག་ན་རྡོ་
རྗེའང་བདག་རང་ཡིན། །བདག་ནི་སངས་རྒྱས་རྒྱལ་པོ་ཆེ། །སྟོབས་ཆེན་རྣལ་འབྱོར་ཅན་བདག་ཡིན། །རྣལ་འབྱོར་དབང་ཕྱུག་རྒྱལ་པོའི་བདག །ཕྱག་ན་རྡོ་རྗེ་བརྟན་བདག་སྟེ། །བྱིན་གྱིས་བརླབ་པ་མི་འདོར་རོ། །ཞེས་བརྗོད་བཛྲོད་ཏིཥྛ་ཡིས། །དཀྱིལ་འཁོར་མཁར་བཏེག་མ་ཊ་ཡིས། །
ཉི་མ་ཟླ་བ་ཧཱུཾ་མཚན་ཉིད། །རྐང་འོག་ཧཱུཾ་ལས་བྱུང་བ་ཡི། །སྣ་ཚོགས་རྡོ་རྗེ་བསམ་བྱས་ནས། །བསྒྱིངས་པའི་ཚུལ་གྱིས་ཡོངས་བསྐོར་བས། །བགེགས་བསྐྲད་ར་བ་ས་གཞི་ཀུན། །རྡོ་རྗེའི་རང་བཞིན་ཅན་དུ་བསམ། །དེ་ནས་དབུས་སུ་གནས་ནས་ནི། །སྐུ་གསུང་ཐུགས་ཀྱི་རྡོ་རྗེ་ཅན། །
སངས་རྒྱས་ཐམས་ཅད་བདག་ལ་གསོན། །བདག་ནི་དཔལ་ལྡན་རྡོ་རྗེ་འཛིན། །བཀའ་ཡི་འཁོར་ལོ་རབ་སྦྱོར་གྱིས། །ལྷ་དང་ལྷ་མིན་གསང་བ་པོ། །བརྗེད་བྱེད་ལ་སོགས་བགེགས་ཀྱི་ཚོགས། །ས་འདིར་མ་གནས་གཞན་དུ་དེངས། །གལ་ཏེ་དམ་ཚིག་ལ་འདས་ན། །རྡོ་རྗེ་
ཁྲོ་བོ་བཞིན་འབར་བའི། །རྡོ་རྗེ་རབ་ཏུ་འབར་བ་ཡིས། །མགོ་ནི་ཚལ་པ་བརྒྱར་འགས་ཞིང་། །ཞིག་པར་འགྱུར་བར་གདོན་མི་ཟ། །ཞེས་བརྗོད་བྱང་ཤར་ནས་བརྩམས་ཏེ། །ཁྲོ་བོའི་གར་གྱི་འདོར་སྟངས་ཀྱིས། །དྲག་ཏུ་ལན་གསུམ་བསྐོར་བྱས་ལ། །དབུས་འདུག་བདེན་པའི་བྱིན་རླབས་
བརྗོད། །བདག་སློབ་དཔོན་མིང་འདི་ཞེས་བྱ་བས། སློབ་མ་ཆེ་གེ་མོ་ཞིག་རྫོགས་པའི་བྱང་ཆུབ་ཐོབ་པར་བྱ་བ་དང་། སེམས་ཅན་ཐམས་ཅད་ཀྱིས་ཀྱང་བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར། ས་ཕྱོགས་འདིར་བཅོམ་ལྡན་འདས་གོས་སྔོན་པོ་ཅན་ཞེས་བྱ་བའི་དཀྱིལ་འཁོར་གྱི་རྒྱལ་པོ་འདྲི་

73-1-254a

བས་ལྷ་དང་ལྷ་མ་ཡིན་དང་། གནོད་སྦྱིན་དང་སྲིན་པོ་དང་། ཡི་དགས་དང་། ཤ་ཟ་དང་། བརྗེད་བྱེད་དང་། འབྱུང་པོ་དང་། མཁའ་འགྲོ་མ་དང་། མི་འམ་ཅི་དང་། རིག་སྔགས་གྲུབ་པ་རྒན་པོ་དང་། རྒན་མོ་འཁོར་དང་གཡོག་ཏུ་བཅས་པ་གང་དག་འཁོད་པ་རྣམས་དེངས་ཤིག །
འདི་ལྟར་རྡོ་རྗེ་འཆང་བའི་བཀའ་ཐོས་ནས་མྱུར་དུ་དེངས་ཤིག །གང་དག་མི་འགྲོ་བ་དེ་དག་ནི། ཕྱག་ན་རྡོ་རྗེ་ཧཱུཾ་ཞེས་བྱ་བ་རབ་ཏུ་འབར་བ་ཁྲོ་བཞིན་འབར་བའི་ཡེ་ཤེས་ཀྱི་རྡོ་རྗེ་ཆེན་པོ་འདིས་མགོ་ཚལ་པ་བརྒྱར་འགས་པར་བྱེད་དོ། །དེ་ལྟར་བརྗོད་ནས་དབུས་སུ་ནི། །མཐུན་པའི་སྟང་སྟབས་ཤར་ལ་སོགས། །
ཕྱོགས་བཞིར་སྟང་སྟབས་བཞི་ཡིས་ནི། །བགེགས་རྣམས་ཚར་གཅད་སྲུང་འཁོར་བྱ། །དེ་ནས་ཕུར་བུ་ལྔ་ལ་ནི། །དྲི་བྱུགས་མེ་ཏོག་སྲད་བུ་དམར། །བཏགས་ཏེ་ཞལ་གསུམ་ཕྱག་དྲུག་པ། །སྨད་ནི་མདུང་ལྟར་བྱིན་བརླབས་ཏེ། །ཕུར་པའི་གསང་སྔགས་ལེགས་བརྗོད་ལ། །གྷ་གྷ་ལ་སོགས་
ཀྱིས་གདབ་བྱ། །དེ་ནས་དབུས་སུ་དྲིས་བྱུགས་ལ། །བཾ་ལས་ས་ཡི་ལྷ་མོ་བསྐྱེད། །བཀུག་སྟེ་མཆོད་ལ་གསོལ་བ་གདབ། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་གྱི་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་
བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་ཀྱི་སྡེ། །ཕམ་པར་བྱས་ཏེ་དཀྱིལ་འཁོར་བྲི། །ཞེས་ནི་ལན་གསུམ་བརྗོད་དེ་བསྟིམ། །དེ་ནས་དྲི་ཡིས་ལེགས་བྱུགས་ལ། །དྲི་ཡི་ཐིག་ལེ་དགུ་བྱས་ཏེ། །མེ་ཏོག་ཚོམ་བུ་ལྷར་བསྐྱེད་ལ། །ནམ་མཁའི་དཀྱིལ་འཁོར་ཕབ་མཆོད་བསྟོད། །རྡོ་རྗེ་འཆང་བ་
བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་ལོ། །ཐུགས་ཀྱི་བདག་ཉིད་ཅན་རྣམས་ཀྱིས། །དཀྱིལ་འཁོར་བདག་ནི་འདྲི་བར་འཚལ། །སློབ་མ་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །བཅོམ་ལྡན་བདག་ནི་གུས་པ་ལ། །དེ་ནི་གནང་བ་མཛད་པའི་རིགས། །
སངས་རྒྱས་འགྲོ་འཁོར་བྱ་དོན་སྩོལ། །བྱང་ཆུབ་སེམས་དཔའ་འབྲས་གནས་དང་། །གང་གཞན་གསང་སྔགས་ལྷ་རྣམས་དང་། །འཇིག་རྟེན་སྐྱོང་བའི་ལྷ་རྣམས་དང་། །གང་ཡང་འབྱུང་པོ་མཐུ་ཆེན་དང་། །གང་ཡང་རྡོ་རྗེ་སྤྱན་མངའ་བའི། །སེམས་ཅན་བསྟན་ལ་དགའ་བ་རྣམས། །བདག་

73-1-254b

མིང་འདི་ཞེས་བགྱི་བ་ཡིས། །ཕྱག་ན་རྡོ་རྗེའི་དཀྱིལ་འཁོར་ནི། །ཡོ་བྱད་ཅི་འབྱོར་པས་འབྲི་ན། །དེང་བདག་སློབ་མར་བཅས་པ་ལ། །ཐུགས་བརྩེ་བས་ནི་དགོངས་ནས་སུ། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབ་པ་མཛད་དུ་གསོལ། །ཞེས་ནི་ལན་གསུམ་གསོལ་བཏབ་ལ། །
མཆོད་དང་བསྟོད་པ་རྒྱས་པར་བྱ། །དེ་ནས་བུམ་པ་དགུ་འམ་བཅུ། །མཚན་ཉིད་དང་ལྡན་བཀྲུ་བྱས་ཏེ། །རིགས་ཀྱི་མཚན་མས་མཚན་བྱས་ལ། །སྨན་འབྲུ་རིན་ཆེན་ལྔ་དྲི་ཆུ། །སྩལ་ཏེ་མགུལ་བཅིངས་ཁ་བརྒྱན་ལ། །རྣམ་རྒྱལ་བུམ་པ་གཙོ་བོའི་མདུན། །ལྷག་མ་ཕྱི་རོལ་དག་ལ་དགོད། །ལས་བྱེད་
བུམ་པ་སྒོ་འགྲམ་འགོད། །བཾ་ལས་བུམ་བསྐྱེད་དེའི་ནང་དུ། །ལྷ་རྣམས་སྐད་ཅིག་གིས་བསྐྱེད་ལ། །ཡེ་ཤེས་སེམས་དཔའ་དགུག་སོགས་བྱ། །མཆོད་བསྟོད་བྱས་ཏེ་གཙོ་བོ་ལ། །རྩ་བའི་སྔགས་ནི་བརྒྱ་རྩ་བརྒྱད། །ས་བོན་དེ་ཉིད་གསུམ་ལྡན་ནི། །ལྷག་མ་རྣམས་ནི་བཟླ་བར་བྱ། །དེ་ནས་མཚན་
ཉིད་དང་ལྡན་པའི། །སློབ་མ་ནང་དུ་བོས་བྱས་ལ། །སྔགས་ཀྱི་དངོས་གྲུབ་དོན་གཉེར་གང་། །དཀྱིལ་འཁོར་འདིར་ནི་འཇུག་པར་བྱེད། །བསོད་ནམས་འདོད་པས་དེ་ལས་གཞན། །གཞན་དག་འཇིག་རྟེན་ཕ་རོལ་གཉེར། །འཇིག་རྟེན་ཕ་རོལ་དོན་གཉེར་བའི། །དད་པ་མང་དུ་བྱེད་པ་ཡིས། །བློ་
ལྡན་དཀྱིལ་འཁོར་འཇུག་པར་བྱ། །ཚེ་འདིའི་འབྲས་བུ་གཉེར་མི་བྱ། །གལ་ཏེ་འདི་འབྲས་དོན་གཉེར་ན། །འཇིག་རྟེན་ཕ་རོལ་འགྲུབ་མི་འགྱུར། །འཇིག་རྟེན་ཕ་རོལ་ལ་དམིགས་ན། །འབད་པ་མེད་པར་འདི་འབྲས་འགྲུབ། །ཅེས་བརྗོད་སློབ་མས་གསོལ་བ་གདབ། །དགའ་ཆེན་ཁྱོད་བདག་
སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ནི་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་
བདག་ནི་འཇུག་པར་འཚལ། །དེ་ལྟར་ལན་གསུམ་བརྗོད་ནས་ནི། །ཁྱོད་ནི་ཚུལ་ཆེན་སྣོད་ཡིན་ཏེ། །བུ་ཚུར་ཐེག་པ་ཆེན་པོ་ཡི། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་

73-1-255a

བའི་མགོན་པོ་རྣམས། །འགྲོ་ལ་ཕན་ཕྱིར་བཞུགས་པ་དག །དེ་དག་ཀུན་གྱིས་གསང་སྔགས་ཀྱི། །ཆོ་ག་བཟང་པོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། །གསང་སྔགས་སྦྱོར་བ་མཉམ་མེད་དེ། །ཤཱཀྱ་སེང་གེ་སྐྱོབ་པ་ཡིས། །
བདུད་སྡེ་ཤིན་ཏུ་མི་བཟད་པ། །དཔུང་ཆེན་དགྲ་ཡང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་བརྗོད་སློབ་མས་བཤགས་སོགས་བྱ། །དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་བཤགས་པར་བགྱི། །འགྲོ་བའི་དགེ་ལ་
རྗེས་སུ་རང་། །སངས་རྒྱས་བྱང་ཆུབ་ཏུ་སེམས་བསྐྱེད། །དེ་ནས་སློབ་མའི་གནས་གསུམ་དུ། །ཁུ་ཚུར་སྤོས་ཆུར་ལྡན་པ་ཡིས། །ཐིག་ལེ་བྱས་ཏེ་ཟླ་བ་དང་། །པདྨ་ཉི་སྟེངས་ཡིག་གསུམ་དགོད། །སྐུ་གསུང་ཐུགས་སུ་བྱིན་བརླབས་ནས། །དུས་འདི་ནས་ནི་བཟུང་ནས་ནི། །འཁོར་ལོའི་ཉེས་པས་
མ་གོས་པར། །མཆོད་པ་ཀུན་དང་ལྡན་པར་ནི། །དུས་ཀུན་དུ་ནི་བདེ་བར་མནོས། །ཞེས་བརྗོད་མེ་ཏོག་སོགས་ཀྱིས་མཆོད། །ཨ་ཤྭཏྠཱ་སོགས་སོ་ཤིང་ནི། །སོར་བཅུ་གཉིས་དང་སྲོག་ཆགས་མེད། །རྩེ་མོ་མེ་ཏོག་གིས་བཏགས་སྦྱིན། །དཀྱིལ་འཁོར་འདོམ་གང་གྲུ་བཞི་ལ། །ཤར་རམ་བྱང་དུ་
བལྟས་ཏེ་དོར། །བྱང་ཤར་ལྷོ་ནུབ་སྟེང་འོག་ཏུ། །ཞི་རྒྱས་མངོན་སྤྱོད་དབང་རིག་འཛིན། །ས་འོག་དངོས་གྲུབ་ཕྱིར་ལྷུང་མེད། །ཨོཾ་ཧྲཱིཿསོགས་སྔགས་སྐྱོར་ཆུ་བླུད། །ཁམས་གསུམ་རྣམ་རྒྱལ་བཟླས་པ་ཡི། །ཀུ་ཤ་སྟན་དང་སྔས་སུ་སྦྱིན། །སྔགས་དེ་བཟླས་པའི་སྲུང་སྐུད་ནི། །མདུད་པ་གསུམ་
ལྡན་དཔུང་གཡས་བཅིང་། །དེ་ནས་བཟེངས་བསྟོད་ཕྱིར་འཆོས་པ། །འཇིག་རྟེན་དུ་ནི་ཀུན་མཁྱེན་རྣམས། །ཨུ་དུམྺཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ན་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་
མཉམ་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །བསྐལ་པ་བྱེ་བ་དུ་མ་རུ། །སྡིག་པ་བགྱིས་པར་འགྱུར་བ་གང་། །དེ་ཀུན་དཀྱིལ་འཁོར་འདི་འདྲ་བ། །མཐོང་བས་འབྱུང་བར་འགྱུར་ལགས་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་པ་སྨོས་ཅི་

73-1-255b

དགོས། །སྐྱོབ་པ་གསང་སྔགས་བཟླས་ནས་ནི། །གོ་འཕང་བླ་མེད་ཐོབ་པར་འགྱུར། །གང་དག་སྤྱོད་པ་མཆོག་འདི་ལ། །བློ་གྲོས་རྟག་ཏུ་མི་གཡོ་བ། །དེ་དག་གིས་ནི་ངན་འགྲོའི་རྒྱུ། །སྡུག་བསྔལ་ཀུན་འབྱུང་རབ་ཏུ་བཅད། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དི་རིང་རྙེད། །
གང་ཕྱིར་རྒྱལ་བ་སྲས་བཅས་ལ། །བདག་ཉིད་ཆེན་པོ་ཀུན་གྱིས་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་ལ། །སང་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་
འདིར་ནི་དོང་བས་ན། །རང་འབྱུང་སྐལ་བ་ཆེན་པོ་པ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་རྣམས་སུ་འགྱུར། །དེ་ལྟར་ཆོས་བཤད་སྤྲོ་བསྐྱེད་ལ། །བཞིན་བཟངས་ལོངས་ལ་སོང་ཤིག་དང་། །སང་ནི་ཐར་པ་ཆེན་པོ་ཡི། །གྲོང་ཁྱེར་མཆོག་ནི་མཐོང་འགྱུར་ཞེས། །བརྗོད་
ལ་ཉལ་དུ་གཏང་བར་བྱ། །སློབ་དཔོན་བདག་ཉིད་དཀྱིལ་འཁོར་གྱི། །མཐའ་ལོགས་དག་ཏུ་ཉལ་བར་བྱ། །དེ་ལྟར་ལྷག་གནས་རྫོགས་བྱས་ནས། །ནང་པར་སྐྱ་རེངས་ཤར་བ་དང་། །ལྷ་ཡི་རྣལ་འབྱོར་ལྡན་བྱས་ཏེ། །སློབ་མའི་རྨི་ལམ་བརྟག་བྱས་ལ། །ངན་ན་སྦྱིན་སྲེག་གིས་བཟློག་བྱ། །ཉི་མ་
ཤར་ཀར་གྱུར་པ་དང་། །དཀྱིལ་འཁོར་ནམ་མཁར་བཏེག་བྱས་ལ། །ཐིག་གདབ་པ་ནི་བརྩམ་པར་བྱ། །སར་པ་ལེགས་པར་བཀལ་ནས་ཀྱང་། །ཚད་དང་ལྡན་པའི་མཛེས་པ་ནི། །ཁ་དོག་སོ་སོར་བསྒྱུར་བྱས་ལ། །ཨོཾ་ཏྲཱཾ་ཧྲཱིཿཨཱཿཧཱུཾ་བཀོད་དེ། །འབར་བའི་ལྷ་རྣམས་བཀུག་ནས་ནི། །གཅིག་ཏུ་
བསྒྲིལ་བར་བྱ་བ་ཡིན། །ཨ་ནྱོ་ནྱ་ཨ་ནུ་ག་ཏ་སརྦ་དྷརྨཱ་སྥ་ར་སྥ་ར་སརྦ་དྷརྨཱ་ཨཏྱན་ཏ་ཨ་ནུ་ག་ཏ་སརྦ་དྷརྨཱ། ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུཾ། གྲོགས་མཆོག་ཁམས་གསུམ་རྣམ་རྒྱལ་དུ། །དམིགས་ཏེ་ཛཿགསུམ་གྱིས་ཐིག་དྲང་། །ཤར་དང་བྱང་ལྟར་ཚངས་ཐིག་གདབ། །མེར་གནས་
བྱང་དུ་བལྟས་པ་དང་། །རླུང་ནས་ལྷོ་རུ་བལྟས་པ་དང་། །དེ་ཉིད་ནས་ནི་ཤར་བལྟས་དང་། །མེ་གནས་ནུབ་ཏུ་བལྟས་པ་ཡིས། །ཕྱི་ཡི་ཐིག་བཞི་གདབ་པར་བྱ། །མེ་དང་བདེན་བྲལ་དུ་གནས་ཏེ། །མཚམས་ཀྱི་ཐིག་གཉིས་གདབ་པར་བྱ། །དེ་བཞིན་ཚངས་པའི་ཐིག་ནས་ནི། །ཕྱི་ཡི་

73-1-256a

ཐིག་གི་བར་དུ་ནི། །ངོས་རེར་བདུན་བདུན་གདབ་པར་བྱ། །དེ་བཞིན་སྒོ་ཁྱུད་ལོགས་དང་ངོས། །འགྲམ་དང་ཡ་ཕུབས་ཀྱང་གདབ་བྱ། །སྒོ་ནི་འཁོར་ལོ་བརྒྱད་ཀྱི་ཆ། །སྒོ་ཁྱུད་ལྷ་རྣམས་སྒོ་ཡི་ཚད། །ཁ་ཁྱེར་དྲ་ཕྱེད་དེ་ཡི་ཕྱེད། །ཚོན་སྣ་ལྔ་ནི་ཁ་ཁྱེར་ཕྱེད། །རྟ་བབས་སྒོ་ཡི་སུམ་
འགྱུར་རོ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་དང་ཡང་དག་ལྡན། །མཆོད་སྣམ་བཞི་ཡིས་ཡོངས་སུ་བསྐོར། །ཀ་བ་བརྒྱད་ཀྱིས་ཉེ་བར་མཛེས། །རྡོ་རྗེ་ཐིག་གིས་ཡོངས་སུ་བསྐོར། །དྲ་བ་དྲ་བ་ཕྱེད་པས་བརྒྱན། །བླ་རེ་རྔ་ཡབ་མེ་ལོང་དང་། །གོས་དང་མེ་ཏོག་ཕྲེང་གིས་བརྒྱན། །ལྷ་
རྫས་བསྣམས་པའི་ལྷ་མོའི་ཚོགས། །བ་དན་རྩེ་མོ་རླུང་བསྐྱོད་ལྡན། །དེ་ལྟར་ལེགས་པར་ཐིག་བཏབ་ནས། །ཚོན་དགྱེ་བ་ནི་བརྩམ་པར་བྱ། །རིན་ཆེན་ལྔ་ཡི་ཕྱེ་མའམ། །ཡང་ན་ས་ཡི་ཕྱེ་མ་ནི། །ཁ་དོག་ལྔ་དང་ལྡན་པ་ལ། །ས་བོན་ལྔ་དང་ལྡན་བྱས་ཏེ། །འབར་བའི་ལྟ་བས་སངས་རྒྱས་
ལྔ། །སྤྱན་དྲངས་ཚོན་ལ་བསྟིམ་པར་བྱ། །ཨོཾ་བཛྲ་ཙི་ཏྲ་ས་མ་ཡ་ཧཱུཾ། ཕུར་བུའི་བུ་ག་བཀང་ནས་ནི། །དབང་ལྡན་ནས་བརྩམས་བྲི་བྱ་སྟེ། །མ་ཆད་ཡ་ཡོ་མེད་པར་བྲི། །དཀར་པོ་སེར་པོ་དམར་དང་ལྗང་། །སྔོན་པོ་ནང་དུ་བྲི་བར་བྱ། །ཤར་ཕྱོགས་སུ་ནི་དཀར་བ་སྟེ། །ལྷོ་དང་ནུབ་དང་བྱང་དང་
དབུས། །སེར་པོ་དམར་པོ་ལྗང་དང་ནག །ལེགས་པར་བྲིས་ནས་མཚན་མ་དགོད། །དབུས་སུ་སྣ་ཚོགས་པདྨ་དང་། །སྦྲུལ་བརྒྱད་མཇུག་མ་བསྣོལ་བ་ལ། །ཉི་མའི་སྟེང་དུ་རྡོ་རྗེ་ཆེ། །སྔོན་པོ་རྩེ་ལྔ་འོད་ཟེར་ཅན། །ཤར་སོགས་ལེ་ཚེ་བཞི་ལ་ནི། །སྣ་ཚོགས་པདྨ་སྟེང་འཇིགས་བྱེད་དང་། །
སྟག་དང་ཆུ་སྲིན་མི་རྣམས་ལ། །ཉི་མའི་དཀྱིལ་འཁོར་ལྡན་པར་བྱ། །ཆུ་སྲིན་སྟེང་དུ་ཟླ་བ་བྲི། །དེ་རྣམས་སྟེང་དུ་རྡོ་རྗེ་ཆེ། །རྩེ་མོ་དགུ་པ་ཉིད་དང་ནི། །ཙནྡན་བུད་ཤིང་པདྨ་དང་། །རིན་པོ་ཆེ་རྣམས་བྲི་བར་བྱ། །ཤར་ལ་སོགས་པའི་ཕྱོགས་རྣམས་སུ། །པདྨ་ཉི་མའི་གདན་རྣམས་ལ། །གྲི་གུག་
སྦྲུལ་གྱི་པགས་པ་དང་། །སྦལ་པའི་ཁྲག་ལྡན་ཐོད་པ་དང་། །གྲི་སྟེ་མཚན་མ་བཞི་བྲི་བྱ། །དེ་ལྟར་ལེགས་པར་བྲི་བྱས་ལ། །མེ་ཏོག་ཆལ་པ་བཀྲམ་ནས་ནི། །གཞན་ཡང་རྒྱན་རྣམས་ལེགས་པར་དགོད། །དེ་ནས་དགོངས་ཀའི་དུས་སུ་ནི། །ཁྲུས་བྱས་ནང་དུ་ཞུགས་

73-1-256b

བྱས་ལ། །གཞལ་ཡས་ཁང་བསླང་ཤུགས་འཇུག་བྱ། །ཨོཾ་བཛྲ་ཨུ་ཏིཥྛ། ཨོཾ་བཛྲ་བེ་གཱ་ཀྲ་མ་ཧཱུཾ། ལྷག་ཆད་བསྐངས་ཏེ་མེ་ཏོག་ནི། །བཅོམ་ལྡན་འདས་ལ་དབུལ་བར་བྱ། །དེ་ནས་སྒོ་ཕྱེ་ཕྱིར་བྱུང་བ། །དང་པོ་སྦྱོར་བའི་ཏིང་འཛིན་ལ། །གནས་ནས་ལྷ་རྣམས་སྤྲོ་
བར་བྱ། །སོ་སོར་གནས་སུ་གདན་བསྐྱེད་ལ། །བདག་གི་ཐུགས་ཀའི་ས་བོན་ལས། །ཟླ་ཉི་ས་བོན་ལྡན་སྤྲོས་པས། །དེ་ལས་སོ་སོས་མཚན་པར་གྱུར། །དེ་ལས་ལྷ་རྣམས་ཀུན་རྫོགས་བསྒོམ། །ནམ་མཁའི་དཀྱིལ་འཁོར་བཀུག་ནས་ནི། །དཀྱིལ་འཁོར་གཅིག་ཏུ་
བསྒོམ་པར་བྱ། །བདག་གི་ཐུགས་ཀའི་ས་བོན་ལས། །ནམ་མཁར་རྒྱལ་བ་སྤྱན་དྲངས་ལ། །མཆོད་བསྟོད་གསོལ་བཏབ་དབང་བསྐུར་བ། །ཀུན་གྱི་དབུ་ལ་མི་བསྐྱོད་པ། །ལྷ་རྣམས་ཀུན་གྱི་གནས་གསུམ་དུ། །དེ་ཉིད་གསུམ་གྱིས་བྱིན་བརླབ་བྱ། །དེ་ནས་མེ་ཏོག་ལ་སོགས་པའི། །མཆོད་
པ་རྣམས་ཀྱིས་མཆོད་བསྟོད་བྱ། །ཕྱོགས་སྐྱོང་ལ་སོགས་གདོན་ཚོགས་ལ། །གཏོར་མ་རྒྱ་ཆེན་སྦྱིན་པར་བྱ། །དེ་ནས་ཞི་བའི་ཐབ་ཁུང་དུ། །ལྷ་རྣམས་སྦྱིན་སྲེག་གིས་ཚིམ་བྱ། །དེ་ནས་བུམ་པ་སོ་སོ་ལ། །སྔར་བཞིན་བཟླས་པས་མཉེས་པར་བྱས། །དེ་ནས་སློབ་དཔོན་བདག་ཉིད་ནི། །
འཇུག་དང་དབང་བསྐུར་བ་ཡི་རིམ། །སློབ་མའི་རང་བཞིན་འདིར་སྤྱད་བྱ། །དེ་ནས་སློབ་མ་གཞུག་དོན་དུ། །བདེན་པའི་བྱིན་རླབས་བརྗོད་པར་བྱ། །ནམ་མཁའ་སྐྱེ་བ་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །སེམས་དཔའི་རྡོ་རྗེ་ཆེ་རང་བཞིན། །རྡོ་རྗེ་སེམས་དཔར་བདག་འགྲུབ་
མཛོད། །ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་གྲུབ་མཛོད། །ཉེས་པ་མི་མངའ་རྟག་པ་ཁྱོད། །འདོད་ཆགས་ཀུན་གྱི་རྗེས་ཆགས་པ། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་
ཀྱིས་གྲུབ་མཛོད། །ཤིན་ཏུ་དགའ་བ་ཀུན་གྱི་མཆོག །གདོད་ནས་གྲོལ་བ་དེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །བྱང་ཆུབ་སེམས་དཔའ་བདག་གྲུབ་མཛོད། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་ཕྱག་རྒྱའི་མཆོག །གྲུབ་པའི་རྡོ་རྗེ་ཆེར་བསྟོད་པ། །རྡོ་རྗེ་

73-1-257a

སྙེམས་བདག་བདག་མཛོད་ཅིག །སེམས་ཅན་ཀུན་གྱི་ཡིད་ཁྱབ་ཅིང་། །སེམས་ཅན་ཀུན་གྱི་སྙིང་ལ་ཞུགས། །སེམས་ཅན་ཀུན་གྱི་ཡབ་གྱུར་ཞིང་། །འདོད་ཆགས་དམ་ཚིག་གྱུར་པའོ། །བདེན་པ་གང་གིས་ཡེ་ཤེས་མཆོག །ཤེས་རབ་ཐབས་བདག་དཀྱིལ་འཁོར་ཡིན། །
བདེན་པ་དེ་ཡིས་མགོན་བདག་ལ། །ཁྱོད་ཀྱིས་འདོད་པ་རབ་རྫོགས་མཛོད། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་འབྱུང་། །དེ་བཞིན་ཉིད་ལས་ངེས་པར་བསྐྱེད། །བདེན་པ་འདི་ཡིས་དཀྱིལ་
འཁོར་དུ། །གཟུགས་བརྙན་གསལ་བར་སློབ་མ་ནི། །ཀུན་གྱིས་དྲི་མ་མེད་མཐོང་ཤོག །དེ་ལྟར་སློབ་དཔོན་བདག་ཞུགས་ལ། །སློབ་མ་འཇུག་པ་བརྩམ་པར་བྱ། །ལས་བྱེད་བུམ་པས་ཁྲུས་བྱས་ལ། །རས་སྔོན་གདོང་གཡོགས་ཕྱི་རོལ་དགུག །འདོད་པ་དག་པ་གང་ཡིན་སྨྲོས། །བདག་
ནི་སྐལ་བཟངས་ཞེས་བརྗོད་དེ། །དེ་ནས་སློབ་དཔོན་ཕྱག་བྱས་ལ། །དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་སེམས་དཔའི་ཚུལ་བསྟན་པ། །མགོན་པོ་ཆེན་པོ་བདག་ལ་སྩོལ། །དམ་ཚིག་དེ་ཉིད་བདག་ལ་སྩོལ། །དེ་ལྟར་ལན་གསུམ་
གསོལ་བཏབ་ལ། །མེ་ཏོག་ཐོབ་པའི་སློབ་མ་ཡིས། །སྡིག་པ་བཤགས་ལ་སོགས་པ་བྱ། །སླར་ཡང་གསོལ་བ་གདབ་བྱ་སྟེ། །གཙོ་བོ་བདག་ལ་སྡོམ་པ་སྩོལ། །ཐུབ་པའི་ཉི་མ་མ་ལུས་པ། །སངས་རྒྱས་རྣམས་ནི་བདག་ལ་དགོངས། །བདག་མིང་འདི་ཞེས་བགྱི་བ་ཡིས། །སློབ་དཔོན་
དཔང་དུ་གནས་པ་ལ། །སངས་རྒྱས་རོལ་མོ་ལས་བྱུང་བའི། །མི་ལྡོག་པ་ཡི་འཁོར་ལོ་སྦྱོར། །ཐར་པ་ཆེན་པོའི་གྲོང་ཁྱེར་མཆོག །གསང་བ་ཆེན་པོ་འཇུག་པར་བགྱི། །གསང་བ་ཐམས་ཅད་བསྡུས་པས་ནི། །སློབ་དཔོན་ཆེན་པོ་བདག་འཇུག་མཛོད། །མི་ལྡོག་པ་ཡི་དབང་བསྐུར་བ། །
སྐལ་བ་ཆེན་པོ་བདག་ལ་སྩོལ། །མཚན་རྣམས་ཀུན་གྱིས་རྒྱས་བཏབ་ཅིང་། །དཔེ་བྱད་རྣམས་དང་ཡང་དག་ལྡན། །སངས་རྒྱས་སྐུ་ནི་ཡིད་འོང་བའི། །སློབ་དཔོན་ཆེན་པོ་བདག་ལ་སྩོལ། །དབང་བསྐུར་ཆེན་པོ་རྨད་བྱུང་བའི། །སེམས་ཅན་ཀུན་གྱི་དོན་གྱི་ཕྱིར། །བདག་ནི་རྟག་ཏུ་སློབ་

73-1-257b

དཔོན་བགྱི། །སློབ་དཔོན་ཆེན་པོ་བདག་ལ་སྩོལ། །དེ་ནས་རྡོ་རྗེ་སློབ་དཔོན་གྱིས། །ཆེ་གེ་ཞེས་བྱ་འདི་ཉིད་ནི། །བྱང་ཆུབ་སེམས་ནི་ཡོངས་འཛིན་པའི། །དམ་ཚིག་མཆོག་དང་གསང་བ་ཡི། །འཁོར་ལོ་འདི་ནི་འཇུག་པར་འཚལ། །དེ་ལྟར་གསོལ་བཏབ་འདོད་དོན་དྲི། །གསང་ཆེན་པོ་ཡི་
རིགས་དག་པའི། །གསང་བ་ཆེན་པོ་ཡོངས་འཛིན་པར། །བདག་ཉིད་ཆེན་པོ་འདོད་དམ་ཅི། །དེས་ཀྱང་འཚལ་ཞེས་བརྗོད་པར་བྱ། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང་། །འདི་ནི་སངས་རྒྱས་རིགས་དག་པའི། །དམ་ཚིག་བརྟན་པར་འགྱུར་
བའོ། །རྡོ་རྗེ་དྲིལ་བུ་ཕྱག་རྒྱ་དག །བློ་ཆེན་ཁྱོད་ཀྱིས་གཟུང་བར་བྱ། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བཤད་དོ། །སློབ་དཔོན་དག་ཀྱང་གཟུང་བར་བྱ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེའི་རིགས་དག་པའི། །སྡོམ་པ་དམ་ཚིག་ཡིན་པར་གསུངས། །
རིན་ཆེན་རིགས་མཆོག་ཆེན་པོ་ལ། །ཉིན་དང་མཚན་མོ་ལན་གསུམ་དུ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །ཕྱི་ནང་གསང་བ་ཐེག་པ་གསུམ། །དམ་ཆོས་ཁྱོད་ཀྱིས་གཟུང་བར་བྱ། །འདི་ནི་པདྨའི་རིགས་དག་པའི། །དམ་ཚིག་སྡོམ་པ་ཡིན་
པར་གསུངས། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བྱ། །མཆོད་པའི་ལས་ཀྱང་ཅི་ནུས་བྱ། །གཞན་ཡང་བཅུ་བཞི་འདི་དག་ནི། །ཕས་ཕམ་པར་ནི་རབ་ཏུ་བཤད། །སྤངས་ཤིང་དོར་བར་མི་བྱ་སྟེ། །རྩ་བའི་ལྟུང་བར་ཤེས་པར་བྱ། །
ཉིན་དང་མཚན་མོ་ལན་གསུམ་དུ། །ཉིན་རེ་ཞིང་ནི་བཟླ་བར་བྱ། །གང་ཚེ་ཉམས་གྱུར་རྣལ་འབྱོར་པ། །ཁ་ན་མ་ཐོ་སྦོམ་པོར་འགྱུར། །ཁྱོད་ཀྱིས་སྲོག་ཆགས་གསད་མི་བྱ། །མ་བྱིན་པར་ཡང་མི་བླང་ངོ་། །འདོད་པ་ལོག་པར་མི་སྤྱོད་ཅིང་། །རྫུན་དུ་སྨྲ་བར་མི་བྱའོ། །ཕུང་ཁྲོལ་ཀུན་
གྱི་རྩ་བ་སྟེ། །ཆང་ནི་རྣམ་པར་སྤང་བར་བྱ། །སེམས་ཅན་འདུལ་ཕྱིར་མ་གཏོགས་པ། །བྱ་བ་མ་ཡིན་ཐམས་ཅད་སྤང་། །དམ་པ་ཉེ་བར་བསྟེན་བྱ་ཞིང་། །རྣལ་འབྱོར་པ་ལ་བསྙེན་བཀུར་བྱ། །ལུས་ཀྱི་ལས་ནི་རྣམ་གསུམ་དང་། །ངག་གི་རྣམ་པ་བཞི་རྣམས་དང་། །ཡིད་ཀྱི་

73-1-258a

རྣམ་པ་གསུམ་དག་ནི། །ཅི་ནུས་པར་ནི་རྗེས་སུ་སྤོངས། །ཐེག་པ་དམན་ལ་འདོད་མི་བྱ། །སེམས་ཅན་རྣམས་ལ་རྒྱབ་ཕྱོགས་མིན། །འཁོར་བ་དག་ཀྱང་ཡོད་མི་སྤོང་། །རྟག་ཏུ་མྱ་ངན་འདའ་མི་ཆགས། །ལྷ་དང་ལྷ་མིན་གསང་བ་པ། །ཁྱོད་ཀྱིས་བརྙས་པར་མི་བྱ་ཞིང་། །ཕྱག་
རྒྱ་བཞོན་པ་མཚོན་ཆ་དང་། །མཚན་མ་འགོམ་པར་མི་བྱ་ཞིང་། །འདི་དག་དམ་ཚིག་ཡིན་པར་བཤད། །ཁྱོད་ཀྱིས་རྟག་ཏུ་བསྲུང་བར་བྱ། །དེས་ཀྱང་འདི་སྐད་བརྗོད་བྱ་སྟེ། །སློབ་དཔོན་འདི་ནི་བདག་ལ་གསོན། །གཙོ་བོས་ཇི་ལྟར་བཀའ་སྩལ་པ། །དེ་ལྟར་བདག་ནི་བགྱིད་འཚལ་ཞེས། །
ཇི་ལྟར་གསུངས་བཞིན་ཁས་བླང་བྱ། །དེ་ནས་སློབ་མ་སེམས་བསྐྱེད་དེ། ཨོཾ་སརྦ་ཡོ་ག་ཙིཏྟ་ཨུཏྤཱ་ད་ཡཱ་མི། དེ་ནས་སྙིང་གར་རྡོ་རྗེ་ནི། །སྔགས་འདིས་རབ་ཏུ་གཞག་པར་བྱ། །སུ་ར་ཏ་ས་མ་ཡ་སྟྭཾ་ཧོ་བཛྲ་སིདྡྷི་ཡ་ཐཱ་སུ་ཁཾ། དེ་ནས་སློབ་མ་ལྷར་བསྐྱེད་ལ། །དྲི་ལ་སོགས་པ་ལྔས་མཆོད་བྱ། །
མེ་ཏོག་ཐོགས་པའི་སློབ་མ་ཡིས། །བླ་མ་ཡོན་གྱིས་མཉེས་བྱས་ལ། །ལས་བྱེད་བུམ་པས་དབང་བསྐུར་ཏེ། །གུང་མོས་མེ་ཏོག་བཟུང་བྱས་ལ། །སྒོ་བཞི་ནས་བཅུག་ཤར་དུ་གནས། །དེང་ཁྱེད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས། ངས་ཁྱོད་ལ་ཡེ་ཤེས་གང་
གི་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་འཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། དེ་ལྟ་བུའི་ཡེ་ཤེས་བསྐྱེད་པར་བྱ་ཡིས། ཁྱོད་དཀྱིལ་འཁོར་ཆེན་པོ་མ་མཐོང་བ་རྣམས་ལ་སྨྲ་བར་མ་བྱེད་ཅིག །དམ་ཚིག་ཉམས་པར་གྱུར་ཏ་རེ། དེ་ནས་སྔགས་འདིས་
ཆུ་འཐུང་གཞུག །རྡོ་རྗེ་སེམས་དཔའ་དེང་ཁྱོད་ཀྱིས། །སྙིང་ལ་ཡང་དག་ཞུགས་པར་མཛད། །གལ་ཏེ་ཚུལ་འདི་སྨྲ་ན་ནི། །དེ་མ་ཐག་ཏུ་དྲལ་ཏེ་གཤེགས། །ཨོཾ་བཛྲོད་ཀ་ཋཿ། དེང་ནས་བརྩམས་ཏེ་ཁྱོད་ཀྱིས་ཕྱག་ན་རྡོ་རྗེ་ང་ཡིན་གྱིས་ང་ལ་བརྙས་པར་མ་བྱེད་ཅིག །ཡིད་མི་བདེ་བ་མ་སྤངས་པས་
ཁྱོད་དུས་བྱས་ནས་དམྱལ་བར་ལྟུང་བར་གྱུར་ཏ་རེ། དེ་ནས་གདམས་ངག་ཇི་ལྟ་བས། །སློབ་མའི་རྒྱུད་ལ་དབབ་པར་བྱ། །ལེགས་པར་བབས་པར་ཤེས་པ་དང་། །འདི་ལྟར་བདག་གིས་སློབ་མ་ནི། །དཀྱིལ་འཁོར་དུ་ནི་ལེགས་བཅུག་ནས། །འདི་ཡི་བསོད་ནམས་ཅི་འདྲ་ལས། །ལྷ་ཡིས་

73-1-258b

རིམ་བཞིན་འབབ་པར་ཤོག །འདི་ནི་དངོས་གྲུབ་གང་གྱུར་དང་། །རིགས་ནི་གང་གི་སྣོད་གྱུར་དང་། །བསོད་ནམས་མཐུ་ནི་ཅི་ཡོད་དང་། །དཀྱིལ་འཁོར་འདིར་ནི་དེ་བཞིན་འགྱུར། །དེ་ནས་མེ་ཏོག་བཅོམ་ལྡན་གྱི། །དབུ་ལ་བརྟན་པས་དོར་བར་བྱ། །པྲ་ཏཱིཙྪ་བཛྲ་ཧོ། དེང་མེ་ཏོག་སླར་བཅིངས་
ནས། །པྲ་ཏི་གྲྀཧྞ་ལ་སོགས་བརྗོད། །དངོས་གྲུབ་གང་འགྲུབ་མཚན་མ་ནི། །ཅི་ཞིག་མཐོང་ཞེས་དྲི་བར་བྱ། །སྔགས་འདིས་གདོང་གཡོགས་བཀྲོལ་བྱས་ཏེ། །ཨོཾ་རྡོ་རྗེ་སེམས་དཔའ་ཁྱོད་ལ་དེང་། །མིག་འབྱེད་པ་ལ་བརྩོན་པར་མཛད། །མིག་ནི་ཐམས་ཅད་འབྱེད་འཚལ་ཏེ། །རྡོ་རྗེའི་མིག་ནི་
བླ་ན་མེད། །ཧེ་བཛྲ་པཱ་ཤྱ། དེ་ནས་ལྷ་རྣམས་ལེགས་བསྟན་ལ། །དབང་བསྐུར་བ་ནི་བརྩམ་པར་བྱ། །སློབ་མ་བཞག་སྟེ་ལྷག་བྱས་ལ། །གནས་གསུམ་དེ་ཉིད་གསུམ་འགོད་དེ། །དྲི་ལ་སོགས་པ་ལྔས་མཆོད་བྱ། །བཀྲ་ཤིས་བརྗོད་ཅིང་བུམ་པ་ཡིས། །ཆུ་ཡི་དབང་བསྐུར་སྦྱིན་པར་བྱ། །ཨོཾ་བཛྲ་ཨ་
བྷི་ཥིཉྩཱ། ས་བོན་ལྔ་ལས་སྐྱེས་པ་ཡི། །ཅོད་པན་མགོ་བོར་བཅིང་བྱས་ལ། །སངས་རྒྱས་རྣམས་ཀྱི་རྡོ་རྗེའི་དབང་། །དི་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་གྱི་རབ་གྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང་། །ཨོཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི་ཏིཥྛ་བཛྲ་ས་མ་ཡ་སྟྭཾ། རྡོ་རྗེ་དང་
ནི་དྲིལ་བུ་གཉིས། །འཁྱུད་པའི་ཚུལ་དུ་འཛིན་དུ་གཞུག །དེ་ནས་རྡོ་རྗེ་དྲིལ་བུ་གཉིས། །སློབ་དཔོན་སྤྱི་བོར་གཟུང་བྱ་ལ། །བཛྲ་སཏྭ་སྟྭཾ། ཨ་བྷི་ཥིཉྩཱ་མི་ཏིཥྛ་བཛྲ་ནཱ་མ་ཨ་བྷི་ཥེ་ཀ་ཏ། ཀྱེ་དཔལ་ཕྱག་ན་རྡོ་རྗེ་ཞེས་བྱ་བའི་དེ་བཞིན་གཤེགས་པ་ཞེས་མིང་འདིས་དབང་བསྐུར་བར་བྱ། དེ་ནས་རྡོ་རྗེ་
སློབ་དཔོན་གྱིས། །དབང་བསྐུར་ཕྱིར་ནི་གསོལ་བ་གདབ། །བདག་དང་གཞན་གྱི་དོན་གྱི་ཕྱིར། །རྡོ་རྗེ་སློབ་དཔོན་དབང་བསྐུར་བ། །ཐུགས་རྗེ་ཅན་ཁྱོད་བཀའ་དྲིན་གྱིས། །བདག་ལ་དི་རིང་སྩལ་དུ་གསོལ། །དེ་ལྟར་གསོལ་བཏབ་ཧཱུཾ་ལས་ནི། །རྡོ་རྗེ་རབ་ཏུ་བསྐྱེད་བྱས་ལ། །ཐོག་མཐའ་མེད་
པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སྙེམས་མ་བདག་པོའི་གཙོ། །བཅོམ་ལྡན་འདས་དཔལ་མཆོག་དང་པོའི་སྐྱེས་བུའོ། །ཨཱཿལས་དྲིལ་བུ་བསྐྱེད་བྱ་སྟེ། །འདི་ནི་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོར་

73-1-259a

བརྗོད། །ཁྱོད་ཀྱིས་ཀྱང་ནི་རབ་ཏུ་བཅང་། །བྱང་ཆུབ་མཆོག་ཏུ་རྒྱལ་བ་བཞེད། །སློབ་མའི་ལག་ཏུ་སྦྱིན་བྱ་ལ། །སྲིད་པའི་རང་བཞིན་དག་པའི་ཕྱིར། །རང་བཞིན་གྱིས་ནི་དངོས་མེད་བྱས། །རང་བཞིན་དག་པའི་སེམས་ལྡན་པས། །སྲིད་པ་དག་པའི་མཆོག་ཏུ་བྱེད། །དེ་ལྟར་བརྗོད་ལ་
དཀྲོལ་བར་བྱ། །ཡིད་ཀྱི་ལུས་ནི་བརྟན་པའི་ཕྱིར། །དམ་ཚིག་ཕྱག་རྒྱ་ཞེས་བྱར་བརྗོད། །གང་གིས་ལུས་ཀུན་བརྟན་བྱེད་པ། །དེ་ནས་ཕྱག་རྒྱར་རབ་ཏུ་གྲགས། །དེ་རྗེས་དཀྱིལ་འཁོར་དག་པ་དང་། །ལྷ་ཡི་རྣམ་དག་སློབ་དཔོན་གྱི། །བྱ་བའི་རིམ་པ་ལེགས་པར་བསླབ། །དེ་ནས་གསེར་གྱི་ཐུར་
ཐོགས་ཏེ། །ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་ལིང་ཏོག་བསལ་བ་ལྟར། །བུ་ཁྱོད་ཀྱི་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནཻ་ཏྲ་ཨ་པ་ཧ་ར་པ་ཊ་ལཾ་ཧྲཱིཿ། དེ་ནས་མེ་ལོང་རབ་བསྟན་ལ། །ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་
དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་འབྱུང་། །རང་བཞིན་དག་ཕྱིར་བདག་མེད་པ། །དེ་ལྟར་ཆོས་རྣམས་ཤེས་བྱས་ནས། །སེམས་ཅན་དོན་ནི་མཉམ་མེད་བྱོས། །འོན་ཀྱང་སངས་རྒྱས་སྲས་སུ་སྐྱེས། །ཨཱཿཡིས་དྲིལ་བུ་རབ་བྱིན་ལ། །
ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ནི་མཚན་ཉིད་མེད། །ནམ་མཁའ་དང་མཉམ་སྦྱོར་བ་ཡིས། །ཀུན་མཆོག་མཉམ་པ་ཉིད་དུ་གསལ། །ཧོཿཡིས་མདའ་དྲུག་གཞུ་བྱིན་ལ། །དེ་བཞིན་གཤེགས་རྣམས་མཉེས་གྱིས་ཤིག །བརྗོད་ལ་མདའ་དྲུག་འཕེན་དུ་གཞུག །
བཛྲ་སཏྭས་མེ་ལོང་བསྟན། །རྡོ་རྗེ་སེམས་དཔའ་མེ་ལོང་བཞིན། །གསལ་ཞིང་དག་ལ་རྙོག་པ་མེད། །བུ་ཁྱོད་ཀྱི་ནི་སྙིང་ལ་གནས། །རྡོ་རྗེ་སེམས་དཔའ་རང་ཉིད་གཙོ། །རྐང་པའི་བར་དུ་འཁོར་ལོ་ནི། །བཛྲ་ཧེ་ཏུས་བཅུག་བྱས་ལ། །ཨོཾ་བཛྲ་བྷ་ཥ་རཾ་གྱིས་ནི། །ལག་པ་གཡས་པར་དུང་
བྱིན་ལ། །གཡོན་པར་པོ་ཏི་ལེགས་སྦྱིན་ལ། །དེང་ནས་བརྩམས་ཏེ་སེམས་བསྐྱེད་པ། །ཙམ་གྱིས་ཆོས་ཀྱི་འཁོར་ལོ་བསྐོར། །ཁྱོད་ཀྱིས་ཐེ་ཚོམ་དོགས་མེད་པར། །ཡིད་གཉིས་མེད་པའི་སེམས་ཀྱིས་སུ། །ཆོས་ཀྱི་དུང་ནི་བླ་མེད་པ། །དྲི་མེད་ཀུན་དུ་གང་བར་གྱིས། །སྔགས་མཆོག་ཚུལ་

73-1-259b

གྱིས་གདུག་པ་རྣམས། །སྐྱེ་བོ་རྣམས་ཀྱི་དོན་དུ་ཆོམ། །དེ་ལྟར་བྱས་ན་སངས་རྒྱས་ལ། །ཕན་འདོགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཀྱང་། །ཁྱོད་ལ་རྟག་ཏུ་སྐུལ་བར་བྱེད། །སེམས་ཅན་ཀུན་ལ་ཕན་པའི་ཕྱིར། །སེམས་ཅན་མ་ལུས་ཐམས་ཅད་ལ། །ཇི་ལྟར་འདུལ་གྱུར་སྣ་ཚོགས་པ། །
ཆོས་ཀྱི་འཁོར་ལོ་རབ་ཏུ་བསྐོར། །དེ་བཞིན་རྡོ་རྗེ་རིན་ཆེན་པད། །ལས་ཀྱི་འཁོར་ལོའི་རྗེས་གནང་སྦྱིན། །དེ་ནས་ལུང་བསྟན་དབུགས་དབྱུང་སོགས། །ཇི་སྐད་གསུང་བཞིན་སྦྱིན་པར་བྱ། །འདི་ནི་སངས་རྒྱས་ཐམས་ཅད་ཀྱི། །ཕྱག་ན་རྡོ་རྗེའི་ལག་ན་འདུག །རྟག་ཏུ་ཁྱོད་ཀྱིས་གཟུང་བར་བྱ། །
ཕྱག་ན་རྡོ་རྗེའི་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་ཏྭཾ་དྷ་ར་ཡཱ་མི་ཧི་ཧི་ཧི་ཧི་ཧཱུཾ། ཞེས་པས་བརྟུལ་ཞུགས་སྦྱིན་པར་བྱ། །དེ་ནས་འབྱོར་པའི་ཡོན་བདག་གིས། །བླ་མ་རྗེས་སུ་མཉེས་པར་བྱ། །ཞི་བ་ཡི་ནི་ཐབ་ཁུང་དུ། །སྦྱིན་སྲེག་གིས་ནི་ཚིམ་པར་བྱ། །དེ་
ནས་རྡུལ་ཚོན་ལ་སོགས་ནི། །འདོད་པའི་མི་ལ་སྦྱིན་པའམ། །ཆུ་བོ་ཆེན་པོར་དོར་བར་བྱ། །ཀླུ་རིགས་ཀུན་གྱི་དགྲར་གྱུར་པའི། །གོས་སྔོན་དཀྱིལ་འཁོར་ཆོ་ག་བྱས། །འདི་ལ་འཁྲུལ་པ་མཐོང་ན་ཡང་། །མཁས་པ་རྣམས་ཀྱིས་བཟོད་པར་མཛོད། །འདི་བྱས་དགེ་བ་གང་ཐོབ་པ། །
དེས་ནི་འགྲོ་བ་མ་ལུས་པ། །རྡོ་རྗེ་ཅན་གྱི་ཞལ་མཐོང་ནས། །སྡུག་བསྔལ་མཚོ་ལས་སྒྲོལ་བར་ཤོག །ཕྱག་ན་རྡོ་རྗེ་གོས་སྔོན་པོ་ཅན་གྱི་དཀྱིལ་འཁོར་གྱི་ཆོ་ག །སློབ་དཔོན་ཆེན་པོ་སྟོང་པ་ཉིད་ཀྱི་ཏིང་ངེ་འཛིན་སྙིང་རྗེའི་ཞལ་སྔ་ནས་མཛད་པ་རྫོགས་སོ།།      །།རྒྱ་གར་གྱི་
མཁན་པོ་པཎྜི་ཏ་དོན་ཡོད་པའི་རྡོ་རྗེ་དང་། བོད་ཀྱི་ལོ་ཙཱ་བ་ཁམས་པ་བ་རི་དགེ་སློང་རིན་ཆེན་གྲགས་པས་བསྒྱུར་ཅིང་ཞུས་པའོ།    །༄༅༅། །རྒྱ་གར་སྐད་དུ། བཛྲ་ཀྲོ་དྷ་དྷ་ར་སཱ་དྷ་ན་ནཱ་མ། བོད་སྐད་དུ། ཁྲོ་བོ་རྡོ་རྗེ་འཛིན་པའི་སྒྲུབ་པའི་ཐབས་ཞེས་བྱ་བ། བླ་མ་རྗེ་བཙུན་
པའི་ཞབས་ལ་ཕྱག་འཚལ་ལོ། །རྣལ་འབྱོར་པ་ལ་གནོད་པ་ཡི། །འབྱུང་པོའི་ཚོགས་རྣམས་བསྲུང་བའི་ཕྱིར། །རྡོ་རྗེ་འཛིན་མཆོག་སྒྲུབ་པའི་ཐབས། །འབད་པའི་བློ་ཡིས་བསྒྲུབ་པར་བྱ། །དང་པོར་སྟན་བདེ་ལ་འདུག་སྟེ། །སྐད་ཅིག་གཅིག་གིས་རྡོ་རྗེ་འཛིན། །ཁྲོ་བོའི་རྒྱལ་པོར་

73-1-260a

བསྐྱེད་པ་ཡི། །སྙིང་ཀའི་ས་བོན་འཕྲོས་པ་ལས། །འགྲོ་བ་སྦྱངས་པ་རྣམ་གསུམ་བྱ། །མཆོད་པའི་ལྷ་རྣམས་སྤྱན་དྲངས་ཏེ། །མཉེས་པའི་དོན་དུ་ལུས་སྤྲུལ་བྱ། །སྙིང་གའི་ས་བོན་ལས་བྱུང་བའི། །མཆོད་པ་རྣམ་པ་ལྔ་དག་ཀྱང་། །སྤྲོ་བསྡུའི་ཚུལ་གྱིས་བརྒྱན་པར་བྱ། །ཨོཾ་བཛྲ་
ས་མནྟ་ཨ་གརྦྷ་བཛྲ་པུཥྤེ་ཧཱུཾ། བཛྲ་དྷཱུ་པེ་ཧཱུཾ། བཛྲ་དཱི་པེ་ཧཱུཾ། བཛྲ་གནྡྷེ་ཧཱུཾ། བཛྲ་ནེ་ཝི་དྱེ་ཧཱུཾ། དེ་ནས་པུས་མོ་སར་བཙུགས་ཏེ། །རྡོ་རྗེ་ཐལ་མོ་སྦྱར་ནས་ཀྱང་། །རབ་ཏུ་གུས་པས་འདི་བརྗོད་བྱ། །བསགས་སྡིག་ཇི་སྙེད་བཤགས་པར་བགྱི། །ཚོགས་རྣམས་ཀུན་ལ་རྗེས་ཡི་རང་། །ཟབ་
མོའི་འཁོར་ལོ་བསྐོར་བར་བསྐུལ། །མྱ་ངན་མི་འདའ་བཞུགས་སུ་གསོལ། །དགེ་བ་ཐམས་ཅད་མཆོག་ཏུ་བསྔོ། །ལུས་ཉིད་ཀྱང་ནི་རྣམ་པར་དབུལ། །བྱང་ཆུབ་སེམས་ནི་རབ་བསྐྱེད་བྱ། །བདག་གིས་རྫོགས་སངས་རྒྱས་ཐོབ་ཤོག །དེ་ནས་བྱམས་དང་སྙིང་རྗེ་དང་། །དགའ་བ་
བཏང་སྙོམས་བསྒོམ་པར་བྱ། །དེ་ནས་སྣོད་བཅུད་རྣམ་པར་སྦྱངས། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱ་ནུཏྤནྣ་ཏྭཱཏ། ཅེས་བརྗོད་པས་ཆོས་ཐམས་ཅད་སྟོང་པ་ཉིད་དུ་བསྒོམ་མོ། །ཧཱུཾ་ལས་རྒྱ་གྲམ་དྲ་བའི་མཆོག །པདྨ་ཟླ་བའི་སྟེང་དག་ཏུ། །ཧཱུཾ་ལས་ཁྲོ་བོའི་སྐུར་བསྐྱེད་བྱ། །བཛྲ་ཧཱུཾ་ཀ་ར་ཞེས་
པས། །རབ་ཏུ་འཇིགས་པའི་ཁྲོ་བོ་ནི། །ཨིནྡྲ་ནཱི་ལའི་ཁ་དོག་ཅན། །ཞལ་གཅིག་སྤྱན་གསུམ་འཇིགས་པ་བཞིན། །སྨ་ར་མགོ་སྐྱེས་སེར་ལ་མཛེས། །སྦྲུལ་སྔོན་ཟ་ཞིང་མཆེ་བ་གཙིགས། །གཡས་ན་རྡོ་རྗེ་གདེངས་པའི་ཚུལ། །གཡོན་པ་བསྡིགས་པའི་མཛུབ་མོ་སྟེ། །སྦྲུལ་ནག་སེ་རལ་
ཁ་རུ་བཟུང་། །ཨ་ལ་ལ་ཡི་གད་མོ་སྒྲོགས། །ཀླུ་བརྒྱད་དག་གིས་བརྒྱན་པའི་སྐུ། །པདྨའི་གདན་ལ་བརྐྱང་བསྐུམ་བཞུགས། །སྟག་གི་པགས་པས་སྨད་དཀྲིས་པ། །བརྒྱན་ལ་ཡེ་ཤེས་སེམས་བསྒོམ་བྱ། །ས་བོན་འོད་ཀྱིས་མཆོག་བཀུག་ནས། །གོང་གི་མཆོད་པས་མཉེས་བྱས་
ཏེ། །བསྟོད་པའི་རྒྱལ་པོ་འདི་ཡང་བརྗོད། །ཨོཾ་ན་མཿསྭཱ་ཧཱ་རི་ཤྲུཥྚོ་པ་ཡཾ་ན་མཿཤྲུད་ཀྲི་བཛྲ་པཱ་ཎི་ན་མཿས་རོ་ན་པཾ་སརྦ་ཝ་ཤཱུཥྞཱི་ཥ་ཀ་རི་ཧེ་ཧེ་ཧེ། ཛཿཧཱུཾ་བཾ་ཧོཿས་གཉིས་མེད་ནས། །ལྷ་མོ་བཞི་ལས་དབང་བླངས་པའི། །རྟགས་ནི་མི་བསྐྱོད་ཅོད་པན་རྩེར། །ཡི་གེ་གསུམ་གྱིས་བྱིན་

73-1-260b

གྱིས་བརླབས། །ཡིད་བཞིན་འཁོར་ལོའི་བཟླས་པ་ནི། །ཏདྱ་ཐཱ་བྷོ་བྷོ་ཞེས་བྱ་བ་ནས། རཱ་ཛྙཱ་པ་ཡ་ཏི་སྭཱ་ཧཱ་ཞེས་བྱ་བའི་བར་དུའོ། །སྒྲ་ཆེ་མ་ཡིན་ཆུང་མ་ཡིན། །རང་བཞིན་གསལ་བའི་བཟླས་པ་ནི། །མི་སྐྱོ་བར་དུ་ཅི་བདེར་བྱ། །དེ་ནས་སྤྲོ་བསྡུ་ཇི་སྙེད་པའི། །མཐའ་ལ་བསྡུ་བ་བྱས་ནས་ཀྱང་། །སྟོང་པ་ཉིད་དུ་
བསྒོམ་པར་བྱ། །སླར་ལ་བསྐྱེད་ལ་ཕྱག་རྒྱ་དཀྲོལ། །ཨོཾ་ཨཱཿཧཱུཾ་མུཿདེ་ནས་སྤྱོད་པ་ཅི་བདེར་སྤྱད། །དམ་ཚིག་ང་རྒྱལ་གཏང་མི་བྱ། །དེ་ཐུན་བཞི་ཡི་སྦྱོར་བ་ཡིས། །བརྩོན་པར་བྱས་ན་ངེས་པར་འགྲུབ། །དད་ལྡན་བླ་མ་ལྡན་པ་དང་། །དབང་དང་དམ་ཚིག་ལྡན་པ་ལ། །བཅོམ་ལྡན་རྡོ་རྗེ་འཛིན་
མཆོག་གི། །མཆོག་གི་དངོས་གྲུབ་ཉེར་རྙེད་འགྱུར། །ཁྲོ་རྒྱལ་རྡོ་རྗེ་འཛིན་མཆོག་གི། །སྒྲུབ་ཐབས་དམ་པ་འདི་དག་ཉིད། །བདག་གིས་བརྩམ་པར་མི་རིགས་ཀྱང་། །རྒྱུད་འགྲེལ་དགོངས་པ་ལས་བཏུས་བྱས། །འདི་ལས་བྱུང་བའི་དགེ་བ་ཡིས། །འགྲོ་རྣམས་རྡོ་རྗེ་འཛིན་པར་ཤོག །ཁྲོ་
བོ་རྡོ་རྗེ་འཛིན་པའི་སྒྲུབ་ཐབས་ཞེས་བྱ་བ་རྫོགས་སོ།།      །།སློབ་དཔོན་བ་སུ་དྷ་བཛྲས་མཛད་པའོ། །༄༅། །དེའི་སྦྱིན་སྲེག་གི་ཆོ་ག་བཞུགས། །དེ་ནས་ཡང་དག་བཤད་བྱ་བ། །ས་གཞི་ཤིན་ཏུ་ལེགས་པ་ལ། །ཐབ་ཁུང་རྒྱར་ནི་ཁྲུ་གང་ཞིང་། །ཟབས་སུ་ཁྲུ་ཕྱེད་བརྐོས་
པ་དག །ཁ་ཁྱེར་སོར་བཞི་གཉིས་དོར་བྱ། །བ་ཡི་རྣམ་པ་ལྔ་ཡིས་བྱུགས། །ཁ་དོག་དཀར་པོ་བྱས་ནས་ཀྱང་། །དྲི་དཀར་འོ་མ་མེ་ཏོག་དོར། །དཀྱིལ་དུ་རྡོ་རྗེ་སོར་བརྒྱད་པ། །ནང་དུ་རྡོ་རྗེས་བསྐོར་ནས་ཀྱང་། །ཐ་མ་མེ་ཡི་འོད་ཟེར་ཅན། །བྱ་བ་ཐབ་ཁུང་རིམ་པའོ། །ཙནྡན་པཱ་ལ་
ཤ་དག་དང་། །བྱང་ཆུབ་ཤིང་དང་ནྱ་གྲོ་དྷ། །དྲི་བཟངས་དྲི་ཞིམ་པ་ཡི་ཤིང་། །སྲོག་ཆགས་མེད་ཅིང་མ་རུལ་བ། །གསར་པ་ཁྲུ་གང་ཚད་ལ་ནི། །འོ་མ་སྦྲང་རྩི་བྲན་ནས་ཀྱང་། །དྲི་ཞིམ་པ་ཡི་ཆུ་ཡིས་གཏོར། །ཐབ་ཀྱི་ཁོ་ར་ཁོར་ཡུག་ཏུ། །ཀུ་ཤ་རྩེ་མོ་ཕྱིར་བསྟན་པ། །བཀྲམ་ལ་
བུད་ཤིང་བརྩིག་པར་བྱ། །ཐབ་བས་མཐོ་ན་ཉེས་པར་འགྱུར། །དེ་ནི་བུད་ཤིང་རིམ་པའོ། །རྩེ་མོའི་ཆ་ལས་བྱུང་བ་ཡི། །ཡམ་ཤིང་སོར་ནི་བཅུ་གཉིས་ལ། །གསར་ཞིང་འདབ་མ་བཅས་པ་དང་། །དྲང་ཞིང་བླ་སྐམས་མེད་པ་སྟེ། །སྐྱོན་དང་བྲལ་བའི་ཡམ་ཤིང་ལ། །མངར་གསུམ་

73-1-261a

དཀར་གསུམ་དག་གིས་བྲན། །དྲི་ཡི་ཚོགས་ཀྱིས་བསངས་ནས་ཀྱང་། །མཆོད་པའི་དོན་དུ་གཡས་སུ་གཞག །དེ་ནི་ཡམ་ཤིང་རིམ་པའོ། །དཀར་གསུམ་མངར་གསུམ་འབྲས་ཆན་དང་། །འབྲས་ཐུག་ལག་པན་ལ་དུ་དང་། །སྨན་སྣ་ཚོགས་དང་བཟའ་བའི་རྫས། །ཏིལ་ལ་སོགས་
པ་ཇི་སྙེད་ཀུན། །བསྲེག་པའི་དོན་དུ་གཡས་སུ་གཞག །མར་ཁུ་རྡོ་རྗེ་དྲིལ་བུ་དང་། །དགང་གཟར་བླུགས་གཟར་མདུན་དུའོ། །མེ་ཏོག་སྤོས་དང་མར་མེ་དྲི། །བཤོས་གཙང་རོལ་མོ་ཇི་སྙེད་པ། །མཆོད་པའི་དོན་དུ་གཡོན་དུ་གཞག །མཆོད་ཡོན་ལས་ཀྱི་བུམ་པ་ནི། །མཉེས་དང་བསང་
ཕྱིར་གཡས་སུ་གཞག །མཆོད་རྫས་བསྲེག་རྫས་རིམ་པའོ། །དེ་ནས་སྐད་ཅིག་ལྷར་བསྐྱེད་ལ། །དུས་ནས་བརྩམས་ཏེ་མངོན་རྟོགས་ཀྱི། །ཆོ་གའི་རིམ་པ་ཇི་སྙེད་པ། །སྒྲུབ་ཐབས་བཞིན་དུ་བསྒོམ་པར་བྱ། །དེ་ནི་ནོལ་འབྱོར་བདག་ཉིད་ཀྱི། །མངོན་པར་རྟོགས་པའི་རིམ་པའོ། །དེ་ནས་ཐབ་
ནི་བསང་བྱས་ལ། །ཨ་ལས་པདྨའི་གཞལ་ཡས་ཁང་། །དཀར་ཞིང་ཟླུམ་པ་མཛེས་པ་བསྐྱེད། །བཾ་ལས་ཆུ་ཡི་དཀྱིལ་འཁོར་ཏེ། །དེ་སྟེང་པཾ་ལས་པདྨའོ། །ཨ་དང་མ་ལས་ཉི་མའི་གདན། །ཧཱུཾ་ལས་རྡོ་རྗེ་དཀར་པོ་སྟེ། །དེར་བསྐྱེད་པ་ནི་རྡོ་རྗེ་འཛིན། །ཞུ་བར་རཾ་ལས་གྲུ་གསུམ་མེ། །དེ་ནས་
མེ་ལྷའི་རྒྱལ་པོ་ནི། །དཀར་ཞིང་ཞི་ལ་སྒེག་པ་སྟེ། །ཞལ་གཅིག་ཕྱག་བཞི་སྐྱིལ་ཀྲུང་ཕྱེད། །ཆུ་ཡི་དཀྱིལ་འཁོར་ལ་གནས་ཤིང་། །ཚངས་པའི་སྐུད་པ་སེ་རལ་གཟར། །གཡས་ན་དབྱུག་པ་སྤྱི་བླུགས་ཏེ། །གཡོན་ན་ཕྲེང་བ་ཀུ་མུ་ཏ། །དབུ་རྒྱན་ལ་སོགས་རྒྱན་རབ་མཛེས། །བསྐྱེད་
ལ་ཡེ་ཤེས་མེ་ལྟ་དགུག །གོང་ལྟར་མཆོད་པས་མཉེས་བྱས་ལ། །ཛཿཧཱུཾ་བཾ་ཧོཿས་དགུག་གཞུག་བྱ། །དབང་བསྐུར་བ་དང་བྱིན་བརླབ་པ། །མཆོད་པས་རབ་ཏུ་མཉེས་བྱས་ནས། །བསྟོད་པའི་རྒྱལ་པོ་འདི་དག་ཀྱང་། །རྡོ་རྗེ་དྲིལ་བུ་ལྡན་པས་ཀྱང་། །ཀླུ་དང་ལྡན་པས་བསྟོད་པ་བྱ། །
ཧཱུཾ་མེ་ལྷའི་རྒྱལ་པོ་ཚངས་པ་མཆོག་གི་སྲས། །མེ་ལྷའི་རྒྱལ་པོ་དག་གིས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་སྲེག །འཛིན་བྱེད་མེ་ལྷ་ཉིད་ལ་ཕྱག་འཚལ་བསྟོད། །དེ་ནས་དགང་གཟར་བླུགས་གཟར་ནི། །ལག་པ་གཡས་གཡོན་ཐོགས་ནས་ཀྱང་། །

73-1-261b

མེ་ལྷ་བདུད་རྩིའི་ཞལ་ཉིད་དུ། །སྔགས་འདི་དག་གིས་བསྲེག་པར་བྱ། །ཨོཾ་བཛྲ་ཨགྣ་ཡེ་མ་ཧཱ་བྷཱུ་ཏཱ་ཛྭཱ་ལ་ཡ་སརྦ་བྷསྨིཾ་ཀུ་རུ་སརྦ་དུཥྚཱན་ཧཱུཾ་ཕཊ། ན་མཿཆེ་གེ་མོ་ཞེས་བྱ་བ་འདི། ཤཱནྟིངྐུ་རུ་ཡེ་སྭཱ་ཧཱ། བརྒྱ་རྩ་བརྒྱད་དམ་ལྔ་བཅུ་སྟེ། །ཉི་ཤུ་ལྔའམ་བདུན་དུ་དབུལ། །དེ་ནི་མེ་ལྷའི་རིམ་པའོ། །
དེ་ནས་མེ་ལྷའི་ཐུགས་ཀའི་ནང་། །པདྨ་ཉི་ཟླའི་གདན་སྟེངས་སུ། །ཧཱུཾ་ལས་རྡོ་རྗེ་སྔོན་པོ་སྟེ། །དེ་ལས་རྡོ་རྗེ་འཛིན་པ་ནི། །མངོན་པར་རྟོགས་པའི་ཆོ་ག་བཞིན། །གསལ་བ་ཉིད་དུ་བསྐྱེད་པར་བྱ། །དེ་ནས་མཆོད་པས་མཉེས་བྱས་ནས། །བསྟོད་པ་དག་ཀྱང་རབ་ཏུ་བརྗོད། །དེ་ནས་བསྲེག་རྫས་
དབུལ་བ་ནི། །རྩ་བའི་སྔགས་ནི་འབའ་ཞིག་ལ། །སྲེག་སྔགས་འདི་དག་བཏགས་ལ་དབུལ། །ཨོཾ་སརྦ་པཱུ་ཛ་མེ་གྷ་རཏྣ་ཨ་གརྦྷ་ན་མཿཆེ་གེ་མོ་ཞེས་བྱ་བ་འདི་ཤཱནྟིངྐུ་རུ་སྭཱ་ཧཱ། ཇི་སྙེད་སྤྲོས་པ་ཕུལ་ནས་ཀྱང་། །དེ་ནས་མཆོད་བསྟོད་ཡང་བྱས་ཏེ། །གཤེགས་དང་བཟོད་པ་གསོལ་ནས་ཀྱང་། །
བསྔོ་དང་སྨོན་ལམ་གདབ་པར་བྱ། །ཨོཾ་ཨཱཿཧཱུཾ་མུཿ ཡེ་ཤེས་སེམས་དཔའ་གཤེགས་སུ་གསོལ། །དམ་ཚིག་རང་གི་སྙིང་གར་བསྡུ། །མཆོད་དང་བསྲེག་པའི་རྫས་རྣམས་ནི། །ལྷག་མ་ཇི་སྙེད་ཡོད་པ་ཡིས། །མེ་ལྷ་མཉེས་པར་ཡང་བྱས་ཏེ། །མཆོད་པ་ལ་སོགས་གོང་བཞིན་ནོ། །
ཡེ་ཤེས་མེ་ལྷ་གཤེགས་སུ་གསོལ། །དམ་ཚིག་འབར་བའི་རྣམ་པར་བསྟིམ། །བདག་གིས་སྦྱིན་སྲེག་སྦྱར་བ་ཡིས། །དངོས་གྲུབ་མྱུར་དུ་འགྲུབ་གྱུར་ཅིག །རྡོ་རྗེ་འཛིན་པའི་སྦྱིན་སྲེག་གི་ཆོ་ག་རྫོགས་སོ།།      །།སློབ་དཔོན་ཆེན་པོ་བ་སུ་དྷ་བཛྲས་མཛད་པའོ།།      །།
༄༅༅། །རྒྱ་གར་སྐད་དུ། བཛྲ་དྷ་ར་བ་ལིཾ་བི་དྷི་ནཱ་མ། བོད་སྐད་དུ། རྡོ་རྗེ་འཛིན་པའི་གཏོར་མའི་ཆོ་ག་ཞེས་བྱ་བ། བླ་མ་རྗེ་བཙུན་པ་རྣམས་ལ་ཕྱག་འཚལ་ལོ། །ལས་རྣམས་ཀུན་གྱི་སྔོན་འགྲོ་བ། །བཤད་ཕྱིར་བླ་མ་ལ་བཏུད་དེ། །ཐམས་ཅད་ཚིམ་པར་བྱེད་པ་ཡི། །གཏོར་
མའི་ཆོ་ག་དེ་བཤད་བྱ། །དེ་ལ་དང་པོར་རྡོ་རྗེ་འཛིན། སྒྲུབ་པར་འདོད་པའི་རྣལ་འབྱོར་པ་དག་གིས། རིན་པོ་ཆེ་ལས་སྣོད་རྒྱ་ཆེ་བ་བཟང་ལ་མཉམ་པ་དེ་དག་གི་ནང་དུ། འབྲས་ཆན་ལ་སོགས་པ་ཆན་གྱི་ཚོགས་དང་། ཁུར་བ་ལ་སོགས་པ་བཟའ་བའི་ཚོགས་དང་། ཉ་ཤ་ལ་སོགས་པ་

73-1-262a

ཤའི་ཚོགས་དང་། འོ་མ་ལ་སོགས་པ་བཏུང་བའི་ཚོགས་དང་། བུ་རམ་ལ་སོགས་ཏེ་མྱང་བའི་ཚོགས་དང་། བིལ་བ་ལ་སོགས་ཏེ་ཤིང་ཐོག་གི་ཚོགས་དང་། ཏིལ་ལ་སོགས་ཏེ་འབྲུའི་ཚོགས་དང་། ཨུཏྤལ་ལ་སོགས་ཏེ་མེ་ཏོག་གི་ཚོགས་དང་། ཨ་ག་རུ་ལ་སོགས་ཏེ་བདུག་པའི་ཚོགས་དང་། 
རིན་པོ་ཆེ་ལ་སོགས་ཏེ་སྣང་བའི་ཚོགས་དང་དུ་རུ་ཀ་དང་དྲི་ཞིམ་སྦྱར་བ་ལ་སོགས་ཏེ་དྲིའི་ཚོགས་དང་། ག་བུར་ལ་སོགས་ཏེ་སྨན་གྱི་ཚོགས་དང་། རོལ་མོ་དང་། གདུགས་དང་། རྒྱལ་མཚན་དང་། བ་དན་དང་། རས་བཟང་པོ་ལ་སོགས་པ་ཅི་འབྱོར་པའི་ཡོ་བྱད་བཤམས་ཏེ། མཎྜལ་སྔོན་པོ་དག་གི་
སྟེང་དུ་མེ་ཏོག་ཆལ་པར་བཀྲམ་ལ་དེའི་སྟེང་དུ་གཞག་པར་བྱའོ། །དེ་ནས་རྣལ་འབྱོར་པ་བདག་ཉིད་མངོན་པར་རྟོགས་པའི་ཆོ་ག་ལྟར་བསྐྱེད་ལ། ལག་པ་གཡོན་པའི་མཐིལ་དུ་དྲི་སྦྱར་བའི་ཆུ་བླུགས་ལ། ཨོཾ་སརྦ་བིགྷྣཱན་ནཱ་ཤ་ཡ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཞེས་ལན་ཉི་ཤུ་རྩ་གཅིག་ཏུ་བརྗོད་དོ། །ཨོཾ་
ཨཱཿབིགྷྣཱནྟ་ཀྲྀཏ་ཧཱུཾ་ཕཊ་ཅེས་པས་གཏོར་མ་ལན་གསུམ་དུ་བྱའོ། །དེ་ནས་ཡི་གེ་ཏྲཱཾ་སེར་པོ་ལས་བསྐྱེད་པའི་སྣོད་ཀྱི་དཀྱིལ་འཁོར་གྱི་ནང་དུ། རྫས་ཀྱི་དངོས་པོ་དཔག་ཏུ་མེད་པ་བསམས་ཏེ། དེའི་སྟེང་དུ་ཟླ་བའི་ཧཱུཾ་གིས་མཚན་པ་དག་གི་འོད་ཀྱིས་བསྲེགས་ཤིང་སྦྱངས་པའི་བདུད་རྩིའི་དངོས་པོར་
གྱུར་པར་བསམ་མོ། །དེ་ནས་ཐུགས་ཀའི་ས་བོན་གྱི་འོད་ཀྱིས་དེ་བཞིན་གཤེགས་པ་ཐམས་ཅད་ཀྱི་སྨིན་མཚམས་ཀྱི་མཛོད་སྤུ་ནས། བདུད་རྩི་འོ་མའི་རྒྱུན་ལྟ་བུ་འབབ་པས་སྣོད་གང་བར་བསམས་ལ། ཨོཾ་བཛྲ་པཱ་ཎི་རཏྣ་དྷ་རཱ་ཡ། ཨོཾ་ཨཱཿཞེས་ལན་བདུན་བརྗོད་པས་བྱིན་གྱིས་བརླབ་པར་བྱའོ། །དེ་
ནས་སྙིང་གའི་ས་བོན་གྱི་འོད་ཀྱིས་བཅོམ་ལྡན་འདས་རྡོ་རྗེ་འཛིན་པ་སྤྱན་དྲངས་ལ་བཛྲ་ཛི་ཧྭ་ཞེས་ལྕེ་བྱིན་གྱིས་བརླབས་ལ་སྔགས་འདི་ལན་བདུན་བརྗོད་ལ་དབུལ་བར་བྱའོ། །ཨོཾ་བཛྲ་པྲ་ཎི་དྷ་རཱ་ཡ། ཀཱ་ཡ་བཱཀ་ཙིཏྟ་དྷཱུ་པ། པུཤྤེ། དཱི་པ། གནྡྷེ་བ་ལིཾ། ཨརྒྷ་ཏ་བ་ལིཾ་མ་ད་མཱཾ་ས་ཨི་དཾ་གྲྀཧྞ་ཁཱ་ཧི་ཁཱ་ཧི་
བྷུཉྫ་ཧོ། པི་པ་ཧོ། ཨ་ཏི་ཀྲ་མ་ཡེ་སྭཱ་ཧཱ། དེ་ནས་ཐུགས་ཀའི་ས་བོན་གྱི་འོད་ཀྱིས་ཁམས་གསུམ་གྱི་འབྱུང་པོའི་ཚོགས་མ་ལུས་པ་བཀུག་སྟེ། ཨོཾ་བཛྲ་ཧཱུཾ་ཀ་ར་ཀ་ཊ་ཀ་ཊ་ཕཊ། ཅེས་བྱ་བས་སྦྱར་རོ། །དེ་ཐམས་ཅད་རྡོ་རྗེ་འཛིན་གྱི་ངོ་བོར་གྱུར་པར་བསམས་ཏེ། ཡི་གེ་གསུམ་བཀོད་ལ་ལྕེ་

73-1-262b

བྱིན་གྱིས་བརླབ་པར་བྱའོ། །དེ་ནས་ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱཏ། ཨོཾ་ཨཱཿཧཱུཾ་ཕཊ་སྭཱ་ཧཱ། ཞེས་ལན་གསུམ་བརྗོད་དོ། །དེ་ནས་འབྱུང་པོའི་ཚོགས་དེ་དག་མཉེས་པར་གྱུར་ནས། རྒྱལ་བར་གྱུར་ཅིག་ཅེས་བརྗོད་པར་བསམ་མོ། །དེ་ནས་ལག་ཏུ་མེ་ཏོག་ཐོགས་ཏེ། འདོད་པའི་
དོན་ལ་གསོལ་བ་བཏབ་ལ། བཟོད་པ་གསོལ་བ་ནི། ཧཱུཾ་ལྷག་པ་དང་ནི་ཆད་པས་ཀྱང་། །བདག་གིས་བརྗེད་ངས་གང་བགྱིས་པ། །མགོན་པོ་ཁྱོད་ཀྱིས་བཟོད་མཛད་ནས། །ཐུན་མོང་མཆོག་གི་དངོས་གྲུབ་སྩོལ། །ཞེས་བརྗོད་ལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་
དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླང་ཡང་འབྱོན་པར་མཛད་དུ་གསོལ། །ཨོཾ་ཨཱཿཧཱུཾ་མུཿཞེས་པས་གཤེགས་སུ་གསོལ། དེ་ནས་ཕྱག་རྒྱ་བཀྲོལ་ཏེ། གཏོར་མ་གཙང་མའི་ས་ཕྱོགས་སུ་བསྐྱལ་ལ། ཅི་བདེར་གནས་པར་བྱའོ། །རྡོ་རྗེ་འཛིན་པ་མཆོད་པའི་ཕྱིར། །
མཆོད་སྦྱིན་འདི་བརྩམས་བསོད་ནམས་ཀྱིས། །འགྲོ་བ་ཐམས་ཅད་རྒྱས་གྱུར་ཏེ། །རྡོ་རྗེ་འཛིན་པའི་ས་ཐོབ་ཤོག །རྡོ་རྗེ་འཛིན་པའི་གཏོར་མའི་ཆོ་ག་རྫོགས་སོ།།      །།སློབ་དཔོན་བ་སུ་དྷ་བཛྲས་མཛད་པའོ། །༄༅༅། །རྒྱ་གར་སྐད་དུ། ཀརྨ་སརྦ་རཀྵ་བི་དྷི་ནཱ་མ། བོད་སྐད་དུ། 
བསྲུང་བའི་ཆོ་ག་ལས་ཐམས་ཅད་པ་ཞེས་བྱ་བ། བླ་མ་རྗེ་བཙུན་པ་རྣམས་ལ་ཕྱག་འཚལ་ལོ། །ནད་དང་གནོད་པ་ཞི་བ་དང་། །མི་མཐུན་ཐམས་ཅད་བཟློག་པའི་ཕྱིར། །བསྲུང་བའི་དམ་པའི་རིམ་པ་འདི། །ཕན་ཕྱིར་བདག་གིས་བཤད་པར་བྱ། །དེ་ལ་རྡོ་རྗེ་འཛིན་པ་སྒྲུབ་པའི་རྣལ་འབྱོར་པ་དག་
གིས། དབེན་པའི་ས་ཕྱོགས་སུ་མཎྜལ་ལོགས་རེ་ལ་ཁྲུ་རེ་ཡོད་པ། གྲུ་བཞི་པ་འཕངས་སུ་སོར་བརྒྱད་པ། ངོས་ཤིན་ཏུ་མཉམ་པ་བརྩིགས་ལ། དེ་ལ་བའི་རྣམ་པ་ལྔས་བྱུག་པ་བྱའོ། །དེའི་སྟེང་དུ་ཙནྡན་དང་གུར་གུམ་ལ་སོགས་པའི་དྲི་བཟང་པོ་རྣམས་ཀྱིས་སྙོམས་པར་བྱུག་པར་བྱའོ། །
དེའི་སྟེང་དུ་མེ་ཏོག་དྲི་དང་ཁ་དོག་དང་ལྡན་པས་ལེགས་པར་སྤུངས་ཏེ། དེའི་སྟེང་དུ་སྲུང་བའི་འཁོར་ལོ་བཞུགས་སུ་གསོལ་བ་ནི། རས་སམ་གོས་བཟང་བྲི་བ་ནི། །གུར་གུམ་ཆུ་ཡིས་འཁོར་ལོ་ནི། །རྩིབས་བརྒྱད་མུ་ཁྱུད་གཉིས་བཅས་ལ། །རྒྱ་གྲམ་ནང་དུ་ཆུད་པ་བྲི། །ཨོཾ་དང་སྭཱ་ཧཱའི་

73-1-263a

བར་དག་ཏུ། །ན་མོ་མིང་དང་སྤེལ་བ་ནི། །དྲི་སྣ་ཚོགས་ཀྱིས་ཐིག་ལེ་བྱས། །ལྟེ་བ་དག་ཏུ་དགོད་པར་བྱ། །ཙནྡན་ལ་སོགས་རྣམ་པ་བརྒྱད། །ཨོཾ་ཧཱུཾ་ཕཊ་མཐར་བསྲེས་པ་ནི། །རྩིབས་བརྒྱད་དག་ལ་རིམ་བཞིན་ནོ། །མུ་ཁྱུད་ནང་གི་རིམ་པ་ལ། ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། ཆེ་གེ་མོ་
ཞེས་བྱ་བ་འདི་ཀཱ་ཡ་བཱཀ་ཙིཏྟཱ་ཨཱ་ཡུ་ཥེ་ཛཱི་བཾ་ཤྲཱི་ཏེ་ཛ་སརྦ་རཀྵ་རཀྵ་སྭཱ་ཧཱ། ནང་དུ་ལྟ་བའི་ཚུལ་གྱིས་བྲི། །ཕྱི་རོལ་མུ་ཁྱུད་ཡང་དེ་བཞིན། །མཚལ་དང་དངུལ་གྱི་ཁུ་བ་ཡིས། །གཡས་གཡོན་དག་ཏུ་བྲི་བར་བྱ། །ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། 
ཡ་ར་ལ་ཝ། ཤ་ཥ་ས་ཧཀྵ་ཧ་ཧ་ཊཊྚ། ཨ་ཨཱ། ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་། ཨེ་ཨཻ་ཨོ་ཨཽ་ཨཾ་ཨཿདེ་ནས་འཁོར་ལོ་དེ་དག་ཉིད། །རྡོ་རྗེ་འཛིན་པར་བསྐྱེད་བྱ་སྟེ། །དགུག་གཞུག་མཆོད་བསྟོད་བྱས་ནས་ཀྱང་། །འཁོར་ལོའི་ངོ་བོར་གྱུར་པར་བསམ། །རྩ་བ་མིང་དང་བསྲུང་བའི་སྔགས། །
སྤེལ་བའི་བཟླས་པ་སྟོང་དུ་བྱ། །ཞེས་འབྱུང་བའི་ཕྱིར། ཆོ་གའི་རིམ་པ་འདི་དག་ལས་ཉམས་པར་མི་བྱའོ། །འདི་དག་གིས་ནི་བརྒྱ་བྱིན་ལ་སོགས་པ་གནོད་པ་ཆེས་ཆེ་བ་དག་ཀྱང་མ་ལུས་པ་བསྲུང་བར་འགྱུར་རོ། །དུས་མ་ཡིན་པར་འཆི་བ་དག་ཀྱང་མ་ལུས་པ་བསྲུང་ཞིང་། །དུས་མ་ཡིན་
པར་འཆི་བ་དག་ཀྱང་ངེས་པར་བཟློག་པར་འགྱུར་རོ། །སྔགས་མཁན་འདི་དག་ནི་ཚངས་སྤྱོད་ཀྱི་དཀའ་ཐུབ་ཀྱིས་གནས་པར་བྱའོ། །ཚེས་བརྒྱད་ནས་བརྩམས་ཏེ་བཅོ་ལྔའི་བར་གྱིས་ཆོ་གའི་རིམ་པ་ཇི་ལྟ་བར་བྱའོ། །བཅུ་དྲུག་ལ་འགྲོ་བ་མཉེས་པའི་མཆོད་རྟེན་བྱའོ། །སྒོ་གསུམ་གནོད་པ་བསྲུང་
བའི་ཕྱིར། །བདག་གིས་བསྲུང་མཆོག་ལ་ལེགས་སྦྱངས། །འདི་ལ་ཉེ་བར་གཞོལ་བ་རྣམས། །མི་མཐུན་ཐམས་ཅད་ཞི་བར་ཤོག །ལས་ཐམས་ཅད་པའི་བསྲུང་བའི་ཆོ་ག་ཞེས་བྱ་བ་རྫོགས་སོ།།      །།སློབ་དཔོན་བ་སུ་དྷ་བཛྲས་མཛད་པའོ། །རྣལ་འབྱོར་པ་བསོད་སྙོམས་པ་པྲཛྙཱ་ཤྲཱི་ཛྙཱ་ན་ཀཱིརྟིས་
རང་འགྱུར་དུ་མཛད་པའོ། །༄༅༅། །རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ཎི་ཀྲོ་དྷ་རཱ་ཛ་སཱ་དྷ་ནཾ། བོད་སྐད་དུ། ཁྲོ་བོའི་རྒྱལ་པོ་ཕྱག་ན་རྡོ་རྗེ་གོས་སྔོན་པོ་ཅན་སྒྲུབ་པའི་ཐབས། ཕྱག་ན་རྡོ་རྗེ་གཏུམ་པོ་ལ་ཕྱག་འཚལ་ལོ། །གཡོན་བརྐྱང་གར་གྱིས་རི་བོང་འཛིན་པ་ལ། །ལེགས་

73-1-263b

བཞུགས་ཁྲོ་རྒྱལ་ཀླུ་དགྲ་དེ་བཏུད་ནས། །དེ་བསྙེན་ཆོ་ག་བླ་མ་བཟང་པོ་ལས། །ཇི་ལྟར་འོངས་པ་བདག་ཉིད་དྲན་པར་བྲི། །དེ་ལ་ཁྲོ་བོའི་བདག་པོ་ཡང་དག་པར་བསྙེན་པར་འདོད་པའི་རྣལ་འབྱོར་པས་ཐོ་རངས་ཉིད་དུ་གདོང་བཀྲུ་བ་ལ་སོགས་པ་བྱས་ནས་བསམ་གཏན་གྱི་ས་ལ་མེ་ཏོག་གཅལ་དུ་བཀྲམ་པས་
དགའ་བར་བྱས་པའི་དབུས་སུ་སྟན་བདེ་བ་ལ་འདུག་སྟེ། རང་གི་སྙིང་གར་ཡི་གེ་ཧཱུཾ་སྔོན་པོ་བསམས་ལ། དེའི་འོད་ཀྱིས་རྗེ་བཙུན་བླ་མ་དང་། སངས་རྒྱས་དང་རྒྱལ་བའི་སྲས་ཐམས་ཅད་བསྐུལ་ཏེ། དེ་དག་གི་མདུན་དུ་ཡང་དག་པར་མཆོད་པ་དང་། སྡིག་པ་བཤགས་པ་ལ་སོགས་པ་བྱའོ། །དེའི་
འོག་ཏུ་ཨོཾ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཚིག་གི་དོན་དང་བཅས་པར་སྟོང་པ་ཉིད་དུ་རྣམ་པར་བསམ་མོ། །དེ་ནས་རང་གི་སྙིང་གར་ཨ་ལས་བྱུང་བའི་ཟླ་བའི་དཀྱིལ་འཁོར། དེའི་སྟེང་དུ་ཡི་གེ་ཧཱུཾ་མཐིང་ག་འོད་དང་བཅས་པར་བསམས་ཏེ། དེའི་འོད་ཀྱིས་འགྲོ་བ་མ་ལུས་པར་སྦྱངས་ཤིང་། རང་གི་ལྷག་
པའི་སྐུར་གྱུར་ཏེ། དེ་དག་ཐམས་ཅད་འདུས་ནས་ས་བོན་གྱི་ཡི་གེ་ལ་བཞུགས་པ་དང་། རྡོ་རྗེ་སྔོན་པོ་རྩ་ལྔ་པ་འོད་ཟེར་གྱི་ཕྲེང་བ་འཁྲུགས་པར་གྱུར་པ་བལྟ་སྟེ། དེ་ནས་ཡང་དེ་ལས་འོད་ཟེར་འཕྲོས་པས་སེམས་ཅན་མ་ལུས་པར་རབ་ཏུ་དྲངས་ཏེ། རྡོ་རྗེ་ལ་ཞུགས་པ་དང་། དེ་ནས་དེ་ཡོངས་སུ་གྱུར་པ་ལས་
ཁ་དོག་སྔོན་པོ་ཆེར་འབར་བ། །རབ་ཏུ་ཁྲོས་ཤིང་འདུག་པ་སྟེ། །གཡོན་བརྐྱང་པ་ཡིས་ལེགས་བརྟེན་པ། །བཅུ་དྲུག་ལོ་ལོན་ལྟ་བུ་ལ། །རབ་ཏུ་ཁྲོས་པའི་ལྟ་སྟངས་ཅན། །ལྟོ་འཕྱེ་བརྒྱད་ཀྱིས་རྣམ་བརྒྱན་ཅིང་། །ཟླ་བའི་གདན་ལ་ལེགས་བཞུགས་པ། །ཞལ་གཅིག་ཕྱག་ནི་གཉིས་པ་སྟེ། །གཡས་
ན་རྡོ་རྗེ་རྩེ་ལྔ་པ། །བསྣུན་པའི་ཚུལ་གྱིས་ལེགས་བཟུང་ཞིང་། །གཡོན་པ་སྡིགས་མཛུབ་འཛིན་མཛད་པ། །སྨད་གཡོགས་སྔོན་པོ་ལེགས་བསྣམས་ཤིང་། །སྤྱན་དམར་མཆེ་བ་རྣམ་གཙིགས་པ། །ཉི་མའི་འོད་ཅན་མགོ་སྐྱེས་ནི། །དམར་སེར་གྱེན་ཕྱོགས་ཅོད་པན་ཅན། །ཧ་ཧ་འོ་དོད་ཆེན་པོ་ཡིས། །
ལོག་འདྲེན་ལ་སོགས་སྐྲག་བྱེད་པ། །འཇིགས་བྱེད་ཁྲོ་བོའི་བདག་པོར་ནི། །བདག་ཉིད་རྣམ་པར་བསམ་པར་བྱ། །དེའི་རྗེས་སུ་ཉིད་ཀྱི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་ཡེ་ཤེས་སེམས་དཔའ་སྤྱན་དྲངས་ཏེ། ཡང་དག་པར་མཆོད་ལ་ཛཿཧཱུཾ་བཾ་ཧོཿཞེས་པས། དེ་དགུག་པ་དང་གཞུག་པ་

73-1-264a

དང་། བཅིང་བ་དང་། དགྱེས་པར་བྱའོ། །དེ་ནས་སྐུ་གསུང་ཐུགས་བྱིན་གྱིས་བརླབ་པའི་ཕྱིར་སྤྱི་བོ་དང་མགྲིན་པ་དང་སྙིང་གའི་ཟླ་བའི་དཀྱིལ་འཁོར་རྣམས་ལ་རིམ་པ་ཇི་ལྟ་བ་བཞིན་དུ་དཀར་པོ་དང་ནག་པོ་དང་དམར་པོའི་ཨོཾ་ཨཱཿཧཱུཾ་རྣམས་རྣམ་པར་བསམ་མོ། །དེའི་འོག་ཏུ་སྤྲོ་བ་དང་
བསྡུ་བའི་རིམ་པས་ཇི་སྲིད་སྐྱོ་བར་མ་གྱུར་གྱི་བར་དུ་བསྒོམ་པར་བྱ་ཞིང་སྐྱོ་བར་གྱུར་ན་སྔགས་བཟླས་པར་བྱ་སྟེ། སྐྱེན་པ་དང་བལ་བ་དང་ཤིན་ཏུ་གསལ་བ་དང་མི་གསལ་བ་ཡང་མ་ཡིན་པའི་རྣམ་པར་རྟོག་པ་སྤངས་པས་སོ། །དེ་ནས་བཟླས་པས་སྐྱོ་ན། ཨོཾ་ཨ་ཀཱ་རོ་མུ་ཁཾ་ཞེས་བྱ་བ་ལ་སོགས་
པས་གཏོར་མ་ཉེ་བར་ཕུལ་ཏེ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། །བཛྲ་སཏྭ་ཏཱེ་ནོ་བ་ཏིཥྛ། དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོ་ཥྱོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུཾ་ཧ་ཧ་ཧ་ཧ་ཧོཿབྷ་ག་བཱན། སརྦ་ཏ་ཐཱ་ག་ཏ། བཛྲ་མཱ་མེ་མུཉྩ་བཛྲཱི་བྷ་བ་མ་
ཧཱ་ས་མ་ཡ་སཏྭ་ཨཱཿཞེས་བྱ་བས་ལྷག་པ་དང་མ་ཚང་བ་དག་ཡོངས་སུ་རྫོགས་པར་བྱའོ། །དེའི་རྗེས་སུ་ཡེ་ཤེས་སེམས་དཔའ་ཡང་དག་པར་མཆོད་པས། ཨོཾ་ཀྲོ་དྷ་བྷ་བ་སརྦ་སཏྭཱ་རྠ། སིདྷཱ་ཏཏྟྭ་ཡ་ཐ་མུ་གཙྪ་དྷ། བུདྡྷ་བི་ཤྭ་ཡ་མ། པུ་ནར་ག་མ་ནཱ་ཡ་མུཿཞེས་བྱ་བ་འདིས་གཤེགས་པར་བྱའོ། །
དེ་ལ་འདིར་ཡང་དག་པར་བསྙེན་པའི་སྔགས་ནི། ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་ཧཱུཾ་ཕཊ་ཅེས་བྱའོ། །དེ་ལྟར་སྒྲུབ་ལ་མངོན་བརྩོན་སྐལ་ལྡན་རྣམས་ཀྱིས་ནི། །བསྒྲིམ་ཏེ་རང་གི་བླ་མའི་མན་ངག་བདུད་རྩི་གང་། །འཐུངས་པས་ལུས་སོགས་རབ་རྒྱས་སྔགས་རྩ་སྐྱེས་པ་ཡིས། །རྟོགས་པས་
བསྟན་པའི་ལས་ལ་རབ་སྦྱར་བདེ་བ་ནི། །དེ་ཡིས་གནོད་པ་མ་ལུས་བསལ་བར་ཕོད་པ་སྟེ། །གང་དག་སྐལ་ལྡན་སྔོན་གྱི་སྐྱེ་བར་བསྙེན་བྱས་པ། །དེ་དག་བླ་མ་བཟང་པོས་ཉེར་བསྟན་ཐོབ་ཙམ་གྱིས། །སྔོན་དུ་བསྙེན་པ་མ་བྱས་རྟོག་པར་སྦྱར་བས་ཀྱང་། །དགོས་པ་ལུས་མེད་མི་རིང་ཉིད་
ཀྱིས་འབྱུང་བར་འགྱུར། །དེ་ལྟར་བླ་མས་གང་བཤད་ཕན་བྱུང་བདུད་རྩི་ཡི། །ཐིགས་པས་སྡུག་བསྔལ་ཞི་བྱེད་འདི་ནི་འདིར་གཏོར་བས། །སྐྱེ་བོ་རྟོག་པའི་དུག་ནི་ནད་མེད་ཉམས་གྱུར་པ། །དེ་རྟོགས་རྟོག་སྐྱེས་ནད་དང་ཉེར་འཚེ་ཞི་བར་ཤོག །བདག་གིས་འདི་དང་གཞན་དག་ཏུ། །

73-1-264b

བསོད་ནམས་གང་དང་གང་བགྱིས་པ། །བསོད་ནམས་དེ་ཡིས་མགོན་པོ་རྣམས། །རྟག་ཏུ་བདག་གིས་མཐོང་བར་ཤོག །ཁྲོ་བོའི་རྒྱལ་པོ་ཕྱག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་ཐབས། སློབ་དཔོན་སུ་ཙནྡྲ་བྷ་དྲའི་ཞལ་སྔ་ནས་མཛད་པ་རྫོགས་སོ།།      །།རྒྱ་གར་གྱི་མཁན་པོ་བི་ན་ཡ་
ཙནྡྲ་དང་། ལོ་ཙཱ་བ་དགེ་སློང་ཆོས་ཀྱི་ཤེས་རབ་ཀྱིས་བསྒྱུར་བའོ། །༄༅༅། །རྒྱ་གར་སྐད་དུ། ཤྲཱི་བྷཱུ་ཏ་ཌཱ་མ་ར་མཎྜ་ལ་བི་དྷི་ནཱ་མ། བོད་སྐད་དུ། དཔལ་འབྱུང་པོ་འདུལ་བྱེད་ཀྱི་དཀྱིལ་འཁོར་གྱི་ཆོ་ག་ཞེས་བྱ་བ། དཔལ་འབྱུང་པོ་འདུལ་བྱེད་ལ་ཕྱག་འཚལ་ལོ། །ཆོ་གའི་དབྱེ་
བའི་རང་བཞིན་དྲི་མེད་གྲུབ་པ་སྟེར་བ་མི་རྣམས་བསྒྲལ་བའི་དོན་དུ་སྟོང་ཉིད་དོན་རྟོགས་བློ་བཟང་སྐྱོང་བ་བདག་གིས་བཤད། འདི་ལྟར་སྔོན་དུ་བསྙེན་པའི་བྱ་བ་བྱས་པས་སམ། རྟག་ཏུ་བཟླས་པའམ། ལོའི་ནང་དུའམ། ཟླ་བ་གཅིག་གི་ནང་དུ་བསྙེན་པ་བྱས་པས་དཀྱིལ་འཁོར་བྲི་བར་བྱའོ། །དེ་ཡང་
ཇི་ལྟར་འཆད་པའི་རིམ་པས་སོ། །དེ་ཡང་མིའི་རུས་པ་བཏགས་པས་བགེགས་བསལ་བའི་སྦྱིན་སྲེག་བྱ་སྟེ། སློབ་མའི་དོན་དུ་ཞི་བའི་སྦྱིན་སྲེག་བྱ་བ། ཉེས་པ་འཇོམས་པའི་སྔགས་བརྗོད་ལ། ཕྱོགས་བཅུའི་བགེགས་ལ་ཕུར་པས་བཏབ་སྟེ། གནས་བསྲུང་བར་བྱས་ལ། པུས་མོའི་བར་དུ་
བརྐོས་ལ། ཡང་ན་བརླ་འམ་རྐེད་པའི་བར་དུ་བརྐོས་པ་ནི། མཆོག་དང་བར་དང་ཐ་མའི་གྲུབ་པ་སྟེར་རོ། །སྐྲ་ལ་སོགས་པའི་ཉེས་པ་ཐམས་ཅད་བསལ་ལ། དྲི་བཟང་པོའི་ཆུས་གཏོར་ཏེ་དག་པར་བྱའོ། །ཉེས་པ་འཇོམས་པར་བྱེད་པའི་སྔགས་བརྗོད་ཅིང་། ཡང་ན་ས་གཞན་གྱིས་དགང་
བར་བྱའོ། །རིན་པོ་ཆེ་ལྔ་དང་། སྨན་ལྔ་དང་། འབྲུ་ལྔ་ཡང་གཞུག་ཅིང་མཉམ་པར་བྱས་ལ། དྲི་ཞིམ་པོའི་ཆུས་བྱུག་གོ། །དེ་ལྟར་ས་ལ་བ་རྟག་པ་ལ་ནི། ཞལ་དང་བཅས་པའི་གཙུག་ལག་ཁང་རྙིང་པ་མཆོག་ཡིན་ལ། བྱེ་མ་དང་ཡུངས་ཀར་དང་ཆུ་དང་བཅས་པ་ལ་ལན་བདུན་
བསྔགས་ཏེ་དཀྱིལ་འཁོར་གྱི་ས་གཞི་ལ་གཏོར་བར་བྱའོ། །རིན་པོ་ཆེ་དང་། བའི་རྣམ་པ་ལྔ་དང་། སྔོན་གྱི་སྨན་རྣམས་ཀྱིས་ཀྱང་བྱུག་པར་བྱ་སྟེ། ས་དག་པར་བྱ་བའི་ཆོ་གའོ། །དེ་ནས་ཡི་གེ་བཾ་ཡོངས་སུ་རྫོགས་པ་ལས། གཏེར་གྱི་བུམ་པ་ཐོགས་པའི་སའི་ལྷ་མོ་དེ་ཡང་

73-1-265a

སྐུ་ཕྱེད་འཐོན་པ་ལ་བསྟོད་ཅིང་མཆོད་པ་བྱ་སྟེ། སྐྱོབ་པ་སངས་རྒྱས་ཐམས་ཅད་ཀྱི། །དབང་དུ་གྱུར་པའི་ལྷ་མོ་ཁྱོད། །ས་དང་ཕ་རོལ་ཕྱིན་པ་དང་། །སྤྱོད་པའི་ཚུལ་གྱི་ཁྱད་པར་གྱི། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་ཚེ་ཁྱོད་ནི་དཔང་དུ་
གྱུར། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ལ་དཀྱིལ་འཁོར་བྲི། །འདིར་ནི་མི་བསྐྱོད་པའི་ཕྱག་རྒྱས་བསྟོད་པ་བྱས་ལ། མེ་ཏོག་ལ་སོགས་ལྔས་མཆོད་དེ། མཆོད་ཡོན་ལ་སོགས་པ་ཡང་བྱིན་ལ། དེའི་རྗེས་སུ་ལྷ་མོ་ཡང་དཀྱིལ་འཁོར་ལ་ཐིམ་པར་བསམ་ཞིང་། 
དེ་ནས་མེ་ཏོག་ལ་སོགས་པ་དང་ལྡན་པའི་དཀྱིལ་འཁོར་ལ་ལག་པ་རེག་ལ། ཧཱུཾ་ཉི་ཤུ་རྩ་གཅིག་བརྗོད་པས་བསྲུང་བར་འགྱུར་རོ། །དེ་ནས་དཀྱིལ་འཁོར་གྱི་དབུས་སུ། སློབ་དཔོན་འདུག་ལ། བདག་ཉིད་དགའ་བ་བསྐྱེད་པར་བྱ་སྟེ། དེང་དུ་བདག་ཚེ་འབྲས་བུ་ཡོད། །དེ་རིང་སངས་རྒྱས་
རིགས་སུ་སྐྱེས། །བྱང་ཆུབ་སེམས་དང་བདག་ལྡན་ནོ། །བྱང་ཆུབ་སེམས་དཔའི་ཡེ་ཤེས་དང་། །བདག་ཀྱང་ད་ནི་ལྡན་པར་འགྱུར། །དེ་རིང་རྡོ་རྗེའི་རིགས་སུ་སྐྱེས། །དེ་རིང་བདག་ནི་གཅེས་པའི་མཆོག །མཆོད་སྦྱིན་མཆོག་གི་འབྲས་བུ་བདག །ལུས་ཀྱི་མཆོག་ཏུ་བདག་གྱུར་ཏོ། །
དེ་ནས་རང་གི་ལག་ཏུ་སྤོས་ཐོགས་ཏེ། དེ་བཞིན་གཤེགས་པ་ཐམས་ཅད་ལ་ཕྱག་བྱས་ལ། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་རྗེས་སུ་དགོངས་པར་བསམས་ཏེ། ཕྱོགས་བཅུའི་རྒྱལ་བ་མ་ལུས་པ། །དིང་དུ་བདག་ལ་དགོངས་སུ་གསོལ། །ཆེ་གེ་ཞེས་བྱའི་རྡོར་འཛིན་
བདག །དཀྱིལ་འཁོར་ཆེན་པོ་བྲི་བར་འཚལ། །སངས་རྒྱས་ཐམས་ཅད་འདིར་བྱོན་ཅིག །རྗེས་སུ་བརྩེ་བར་ཉེར་དགོངས་ཏེ། །དངོས་གྲུབ་དམ་པ་སྩལ་དུ་གསོལ། །དེ་སྐད་ཅེས་བརྗོད་ལ་དཀྱིལ་འཁོར་གྱི་དབུས་སུ་འདུག་སྟེ། འོད་ཟེར་འཕྲོས་ཤིང་བསྡུས་པ་ལས་བདག་ཉིད་རྡོ་རྗེ་འཛིན་
པའི་སྐུར་བལྟ་བར་བྱའོ། །དེ་ནས་ཁྲོ་བོའི་རྒྱལ་པོའི་སྔགས་བརྗོད་ཅིང་། ཕྱག་རྒྱ་ཆེན་པོ་བསྒོམ་པར་བྱའོ། །དེ་ནས་ལས་ཀྱི་རྡོ་རྗེ་སློབ་དཔོན་ཤར་ཕྱོགས་སུ་འདུག་ལ། ལྷོ་ཕྱོགས་ཀྱིས་དང་པོར་བྱས་པའི་ལན་གསུམ་བསྐོར་ཏེ། མཆོད་པ་རྣམ་པ་ལྔ་ཡིས་མཆོད་ལ། དབང་ཕྱུག་ཆེན་

73-1-265b

པོའི་གཟུགས་ཀྱིས་ཤར་ཕྱོགས་ནས་དཀྱིལ་འཁོར་ཞུ་བར་བྱའོ། །ཕྱོགས་གཞན་ནས་ཀྱང་དེ་བཞིན་ནོ། །དེ་ནས་སློབ་མ་བྱང་ཆུབ་སེམས་དཔས་བརྗོད་པར་བྱ། འཇིག་རྟེན་གསུམ་གྱིས་ཕྱག་བྱས་པ། །ཆོས་ཀྱི་རྒྱལ་པོ་ཆེན་པོ་ཁྱོད། །འབྱུང་པོ་ཀུན་དང་ཀླུ་རྣམས་དང་། །གནོད་སྦྱིན་རིག་པ་
འཛིན་རྣམས་འཇིགས། །བགེགས་རྣམས་ཐམས་ཅད་འཇོམས་མཛད་པ། །སྡུག་བསྔལ་ཉོན་མོངས་ཐམས་ཅད་འཇོམས། །གཟའ་རྣམས་ཀུན་དང་རོ་ལངས་དང་། །ཡི་དགས་དང་ནི་བདུད་རྣམས་འཇོམས། །གྲུབ་པ་ཐམས་ཅད་སྟེར་མཛད་པའི། །དཀྱིལ་འཁོར་དམ་པ་བཤད་དུ་
གསོལ། །དེ་ནས་ལས་ཀྱི་རྡོ་རྗེ་སློབ་དཔོན་ལངས་ལ། དེ་བཞིན་གཤེགས་པ་ཐམས་ཅད་ཀྱིས་ནམ་མཁའི་ཁམས་གང་བར་བསམས་ལ། ཕྱག་བྱས་ལ། བདག་ནི་ལེགས་མཛད་རྡོ་རྗེ་ཆེ། །བདག་ནི་རྡོ་རྗེ་སྟོབས་པོ་ཆེ། །བདག་ནི་རྣལ་འབྱོར་དབང་ཕྱུག་རྒྱལ། །ལག་ན་རྡོ་རྗེ་བརྟན་
པར་གནས། །བདག་ནི་དམ་ཚིག་རྡོ་རྗེ་སྟེ། །བྱིན་གྱིས་བརླབས་པ་མི་གཏོང་ངོ་། །དེ་ནས་རྡོ་རྗེ་སློབ་དཔོན་དམ་ཚིག་གསུམ་གྱི་རྙེད་པ་དང་ལྡན་པས། རང་ཉིད་ཀྱི་ཕྱག་རྒྱ་རྡོ་རྗེ་དང་དྲིལ་བུ་བཟུང་ལ། རྡོ་རྗེ་དྲིལ་བུ་གཟུང་བར་བྱ། །དཀྱིལ་འཁོར་ལས་རྣམས་ཐམས་ཅད་ལ། །འདི་ཉིད་
བཟུང་ནས་བྱ་བ་ཡིན། །བཅོམ་ལྡན་འདས་ཀྱི་ཕྱག་རྒྱའོ། །ཨོཾ་བཛྲ་ཨུ་ཏིཥྛ། དཀྱིལ་འཁོར་ནམ་མཁའ་ལ་བལྟས་ལ། རང་ཉིད་ལངས་ལ་ཁྲོ་བོའི་ལྟ་བས་ཡི་གེ་ཧིཿལས་སྐྱེས་པའི་མིག་གཉིས་བལྟ་བས་བགེགས་ཐམས་ཅད་བསྲེགས་ཏེ། དེ་ནས་ཁྲོ་བོའི་ཕྱག་རྒྱ་བཅས་ལ། 
ཕྱོགས་ཐམས་ཅད་དུ་བལྟ་ཞིང་འགྲོ་བར་བྱའོ། །རང་ཉིད་ལྷའི་ང་རྒྱལ་དང་ལྡན་པས་སྔགས་བརྗོད་པར་བྱ་སྟེ། ཡི་གེ་ཨ་ཡོངས་སུ་གྱུར་པ་ལས། སྣ་ཚོགས་རྡོ་རྗེས་བྱིན་གྱིས་བརླབས་པའི་འོད་ཟེར་གྱིས་ས་གཞི་ཐམས་ཅད་ཁེངས་པར་བསམ་ཞིང་རྡོ་རྗེའི་འགྲོས་ཀྱིས་
བཅགས་པར་བྱའོ། །ཤར་ལ་སོགས་པའི་བགེགས་རྣམས་དང་། ཕྱོགས་ཀྱི་ཡང་ཕུར་བུས་བཏབ་ལ། རྡོ་རྗེའི་ར་བ་དང་གུར་བསམས་ཏེ། དཔལ་རྡོ་རྗེ་སེམས་དཔའ་དང་སྦྱོར་བས། །ཀོ་སྐོ་ཨོལ་མདུད་པ་མནན་ལ། །གཡོན་ང་རྒྱལ་དུ་བལྟ་བས་དཔའ། །ཕྱོགས་བརྒྱད་

73-1-266a

འཁོར་ལོར་གནས་པ་དང་། །སྟེང་དང་འོག་ཀྱང་བྱིན་གྱིས་བརླབ། །བྷུར་བྷུ་བ་པ་ཙཾ་བནྡྷ་ཡ་ཏ། སྔགས་ཀྱི་རྒྱལ་པོ་ཧཱུཾ་བརྗོད་པས། །ཉེས་པ་ཀུན་གྱིས་ཚུགས་མ་ཡིན། །དེ་ནས་ཨོཾ་བཛྲ་མཎྜ་ལ་ཧཱུཾ་ཛཿ། འདི་ཡིས་རྡོ་རྗེ་ཁུ་ཚུར་གཉིས་བརྐྱང་ལ། གསང་བའི་དཀྱིལ་འཁོར་
དགུག་པར་བྱ་སྟེ། ཞལ་བཞི་པ། རྡོ་རྗེ་དབྱིངས་ཀྱི་རང་བཞིན་གྱིས་གསལ་བའི་དཀྱིལ་འཁོར་དགུག་པར་བྱའོ། །ཨོཾ་བཛྲ་བཛྲེ་ཨ་དྷི་ཏིཥྛ་སིདྡྷི་ཧཱུཾ། དེ་ནས་རྡོ་རྗེ་བསྐོར་བའི་ཕྱག་རྒྱ་བྱས་ཏེ་བརྟན་པར་བྱའོ། །དེ་ནས་སེང་ལྡེང་གི་ཕུར་པ་ལ་བཟླས་པ་བྱས་ཏེ། ཀུན་དགའ་བ་དང་། རྣམ་པར་
རྒྱལ་བ་དང་། སྤྲིན་གྱི་དབང་ཕྱུག་དང་། གསུས་པོ་ཆེ་དང་། རྣམ་པར་རྒྱལ་བ་དང་། ཇི་ལྟ་བའི་རིམ་པས། འཇིག་རྟེན་གསུམ་ལས་རྒྱལ་བ་དང་། གཤིན་རྗེ་གཤེད་དང་། སྟོབས་པོ་ཆེ་དང་། རྟ་མགྲིན་དང་། བདུད་རྩི་འཁྱིལ་པ་དང་། དེ་དག་ཀྱང་སྐུ་སྨད་ཕུར་པའི་དཔལ་དང་
ལྡན་པ། ཙནྡན་དམར་པོའི་རང་བཞིན་དང་། སྐུད་པ་དམར་པོས་དཀྲིས་ཏེ། མེ་ཏོག་དམར་པོས་བརྒྱན་ཏེ། དཀྱིལ་འཁོར་གྱི་ཕྱི་རོལ་གྱི་ཟུར་དང་། ཕྱོགས་རྣམས་སུ་ལག་པ་གཡོན་པས་བཟུང་སྟེ། གཡས་པ་རྡོ་རྗེ་དང་བཅས་པས་བརྟན་པར་བྱའོ། །ལོག་འདྲེན་གྱི་མཚམས་ལ་སོགས་
པ་རུ། སྔགས་འདིས་ཕུར་བུ་བརྡེག་པར་བྱའོ། །ཨོཾ་བཛྲ་ཀཱི་ལི་ཀཱི་ལཱ་ཡ་སརྦ་བི་གྷྣཱཾ་བནྡྷ་བནྡྷ་ཧཱུཾ་ཕཊ། འདིར་དེ་ནས་རྡོ་རྗེ་རྣལ་འབྱོར་གྱི་ཁུ་ཚུར་གྱིས་གོ་བགོ་སྟེ། བཅིང་བར་བྱས་པས། དཀྱིལ་འཁོར་གྱི་སྒོར་ཉེས་པ་ཐམས་ཅད་འཇོམས་པར་བྱེད་པའི་སྔགས་བརྗོད་ལ། བུམ་པ་ལྷག་པར་གནས་
པར་བྱ་སྟེ། དྲི་བཟང་པོ་དང་བཅས་པའི་ཆུ་བླུགས་ཏེ། ལྷ་ཐམས་ཅད་ཀྱི་མིང་དང་བཅས་པ་ནམ་མཁའ་ལ་གནས་པ། སྙིང་པོའི་འོད་ཟེར་གྱིས་བཀུག་སྟེ། ཡང་དག་པར་མཆོད་ནས། གཏོར་མ་ཡང་ཕུལ་ལ། བུམ་པར་གཞུག་པར་བྱའོ། །བུམ་པ་ཡང་ནག་པོ་སྤངས་པ་མགྲིན་པ་རིང་བ། 
མཆུ་འཕྱང་བ། ལྟོ་བ་རྒྱས་པ། མེ་ཏོག་གི་ཕྲེང་བ་དང་བཅས་པའི་རས་ཟུང་གིས་མགུལ་དཀྲིས། འབྲས་བུ་དང་བཅས་པའི་ཤིང་གིས་བརྒྱན་པ། དཀྱིལ་འཁོར་གྱི་གཙོ་བོ་དང་། རིགས་ཀྱི་ལྷའི་མཚན་མ་དང་བཅས་པ། རིན་པོ་ཆེ་བདུན་ནམ་རྫ་ལས་བྱས་པའི་རྣམ་པར་རྒྱལ་བའི་

73-1-266b

བུམ་པའོ། །དེ་ཡང་ནང་དུ་བྱི་རུ་དང་། གསེར་དང་དངུལ་དང་མུ་ཏིག་དང་། པདྨ་རཱ་གའི་རིན་པོ་ཆེ་རྣམས་ནང་དུ་བཅུག་ལ། གཞན་ཡང་སྨན་བྲྀ་ཧ་ཏི་དང་། ཀཎྜ་ཀ་རི་དང་། མ་ཧཱ་དཎྜ་ཨུཏྤ་ལ་དང་། ཨ་པ་རཱ་ཛི་ཏ་དཀར་པོ་དང་། འབྲས་ཁར་མ་དང་། གྲོ་དང་། སྲན་མ་དང་། ཏིལ་དང་། འབྲུ་
རྣམས་ཀྱིས་ཀྱང་ངོ་། །ནང་བརྒྱན་ལ། བཅོམ་ལྡན་འདས་ཀྱི་སྔགས་བརྒྱ་རྩ་བརྒྱད་བཟླས་ལ། མཆོད་ཡོན་དང་། ཞབས་བསིལ་དང་བཅས་མཆོད་ཅིང་བསྟོད་དེ། ཡི་གེ་ཧཱུཾ་བརྗོད་པ་ལས། བཅོམ་ལྡན་འདས་ཡོངས་སུ་རྫོགས་པའི་སྐུར་བལྟས་ལ་རབ་ཏུ་མཆོད་དེ། བགེགས་རྣམས་འཇོམས་
པར་བྱེདཔའི་སྔགས་བརྗོད་ཅིང་། ཕྲེང་བའམ་མ་བརྒྱུས་པའི་མེ་ཏོག་གམ། སྤོས་ཀྱིས་ཀྱང་མཆོད་ལ། དེ་ནས་ཡི་གེ་བཞི་པའི་སྔགས་ཀྱིས་ཡང་དག་པར་བསྲུངས་ལ། ལས་ཐམས་ཅད་བྱ་སྟེ། དེ་ནས་དཀྱིལ་འཁོར་གྱི་བྱ་བ་ལ་འཇུག་པར་བྱ་སྟེ། ཐུན་གསུམ་དུ་ཡང་དག་པར་མཆོད་
ཅིང་། དེ་ནས་བཅོམ་ལྡན་འདས་ཀྱི་དྲུང་དུ་བུམ་པ་གཞག་པར་བྱ་སྟེ། འདི་ནི་བུམ་པ་རབ་ཏུ་གནས་པར་བྱ་བའི་ཆོ་གའོ། །དེ་ནས་བརྒྱ་བྱིན་ལ་སོགས་པ་ཤར་ལ་སོགས་པའི་ཕྱོགས་ནས་རང་རང་གི་སྔགས་དང་ཕྱག་རྒྱས་སྤྱན་དྲངས་ལ། མཆོད་ཡོན་ལ་སོགས་པ་ཕུལ་ཏེ། མེ་ཏོག་དང་བདུག་པ་
ལ་སོགས་པས་ཡང་དག་པར་མཆོད་དེ། ཨོཾ་ས་ར་ས་ར་གཙྪ་གཙྪ། དེ་ལ་སོགས་པས་གཤེགས་སུ་གསོལ་ཏེ། སྟེང་ནས་ཀྱང་ཟླ་བ་དང་ཉི་མ་དང་། ཚངས་པ་དང་། མིག་གྱེན་དུ་བལྟས་ཏེ་གཤེགས། འོག་ཏུ་ཡང་ཨ་སུ་རེ་བྷྱཿསྭཱ་ཧཱ། ནཱ་གེ་བྷྱཿསྭཱ་ཧཱ། སོ་སོར་ཡང་རྡོ་རྗེའི་སོར་མོ་
གྱེན་དུ་ཕྱེ་ནས། རྡོ་རྗེ་འབར་བའི་ཕྱག་རྒྱས་གཏོར་མ་བྱིན་ལ། དེ་ནས་ཡང་། གཞན་གཏོར་མ་དམར་པོ། མེ་ཏོག་དང་བདུག་སྤོས་ལ་སོགས་པས་བརྒྱན་པའི་གཏོར་མ་བྱིན་ཞིང་ལྷ་རྣམས་སྤྱན་དྲང་བར་བྱའོ། །དེ་ནས་རས་དཀར་པོས་བུམ་པ་རྣམས་གཡོགས་ཏེ། ལྷ་རྣམས་ཁ་སྦྱོར་དང་
ལྡན་པ་འབྱུང་པོ་དང་བཅས་པ་ལ། ཡེ་ཏ་ཡ་ཏེ་མ་ཧཱ་བྷཱུ་ཏོ་རོ་ཏྲསྠཱ་ན་པྲ་མུཉྩནྟུ་སྭཱ་ཧཱ། དེ་ནས་སྔགས་དེ་ཉིད་ཀྱིས་ལྷ་བཤོས་ལ་སོགས་པ་དབུལ་ཏེ། སོ་སོར་འབྱུང་པོ་ཆེན་པོ་རྣམས། རང་རང་གནས་སུ་ཅི་བདེར་གཤེགས་པར་བྱའོ། །དུར་ཁྲོད་ཆེན་པོ་ལྷ་ཡི་གནས་རྣམས་དང་། །ཤིང་གཅིག་

73-1-267a

དང་ནི་ཆུ་བོའི་གནས་རྣམས་དང་། །ལམ་གྱི་བཞི་མདོ་ལིངྒ་གཅིག་པ་དང་། །ལྷའི་གནས་རྣམས་སུ་མྱུར་དུ་གཤེགས་བྱས་ལ། །དམ་ཚིག་གནས་ལ་རབ་ཏུ་གནས་པར་མཛོད། །ཇི་ལྟར་ཁྱོད་ནི་མི་འགྲོ་ན། །ཁྱེད་ཀྱི་མགོ་ནི་རྡོ་རྗེས་འགེམས། །ཡུད་ཙམ་གྱིས་ནི་ཉམས་པར་འགྱུར། །
དམྱལ་བ་ཆེན་པོར་འཇུག་པར་བྱེད། །ཇི་ལྟ་ཇི་ལྟར་ཅི་བདེ་བར། །རང་གི་གནས་སུ་བདེ་བར་སོང་། །ཡང་མཆོད་ཡོན་ལ་སོགས་པ་བྱིན་ལ། མཆོད་དེ་ཅི་བདེ་བར་གཤེགས་པར་བྱའོ། །དེ་ནས་དུར་ཁྲོད་དང་། ལྷའི་གནས་དང་། རིའི་རྩེ་མོ་དང་། ལམ་གྱི་བཞི་མདོ་དང་། དེ་དག་ཏུ་མྱུར་དུ་འགྲོ་
བར་འགྱུར་ཏེ། གཏོར་མ་བྱིན་པས་སོ། །དམ་ཚིག་ལ་རབ་ཏུ་བརྟན་པར་དམ་ཚིག་རྣམས་རབ་ཏུ་སྐྱོང་ཞིང་། ཁྲོ་བོ་ཆེན་པོའི་བཀའ་སྩལ་ཇི་ལྟར་མནོས་པས། རང་རང་གི་ལས་རྣམས་བྱེད་པར་འགྱུར་ཏེ། རུ་ཏྲསྠཱ་ན་པྲ་མུཉྩནྟུ་སྭཱ་ཧཱ། དེ་ནས་ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨདྱཱ་ནུཏྤནྣ་ཏྭཱཏ། འདི་ནི་
དབྱངས་ཆེན་པོས་འབྱུང་པོ་ཐམས་ཅད་ལ་གཏོར་མ་སྦྱིན་པར་བྱའོ། །མཆོད་ཡོན་ལ་སོགས་པ་སྦྱིན་པ་འདི་ནི་གཏོར་མའི་ཆོ་གའོ། །ཞི་བའི་རང་བཞིན་ནམ། རྒྱས་པ་ལ་ཉེས་པ་རྣམས་འཇོམས་པར་བྱ་བའི་ཕྱིར། རྣམ་པར་གྲོལ་གདོང་གིས། སྔགས་བརྒྱ་ཕྲག་བརྒྱད་བཟླས་ལ། འཁོར་ལོའི་
ལྷ་རྣམས་མཆོད་དེ། མཆོད་ཡོན་ཡང་ཕུལ་ལ། སློབ་མ་ལྷག་པར་གནས་པར་བྱ་སྟེ། དེ་ནས་སློབ་དཔོན་གྱིས་སློབ་མའི་མགོ་ལ་མེ་ཏོག་བཞག་སྟེ། སློབ་མས་ལག་པར་མེ་ཏོག་ཐོགས་ཏེ། འདི་སྐད་ཅེས་བརྗོད་པར་བྱའོ། །བདག་གི་སྟོན་པ་དགའ་ཆེན་པོ། །མགོན་པོ་ཆེན་པོ་བདག་འཚལ་
ལོ། །བྱང་ཆུབ་སེམས་མགོན་བརྟན་པ་པོ། །དམ་ཚིག་དེ་ཉིད་བདག་ལ་སྩོལ། །བདག་ལ་བྱང་ཆུབ་སེམས་ཀྱང་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་འཚལ། །དེ་ནས་
དཀྱིལ་འཁོར་གྱི་ཤར་སྒོར་སློབ་མ་བཞག་ལ། སྙིང་གར་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་ཡི་གེ་ཧཱུཾ་ལས་ཌཾ་ལས་བསྐྱེད་པའི་རྡོ་རྗེ་བསམས་ལ་གཡས་པའི་རྡོ་རྗེ་ཁུ་ཚུར་གྱིས་རྡོ་རྗེ་བཟུང་ལ། སློབ་མའི་སྙིང་གར་རེག་ཅིང་། སུ་ར་ཏེ་ས་མ་ཡ་སྟྭཾ་ཧོ་བཛྲ་སིདྷྱ་ཡ་ཐཱ་སུ་ཁཾ། ས་

73-1-267b

འདིར་སློབ་དཔོན་གྱིས་སྡིག་པ་བཤགས་པར་བྱ་བའི་དོན་དུ། ཕྱག་འཚལ་བདེ་གཤེགས་ཐམས་ཅད་ལ། །ཇི་ལྟར་ཐམས་ཅད་མཁྱེན་པ་པོ། །འཁོར་བ་ཀུན་གྱི་སྐྱབས་མཛོད་ཅིག །བདག་ནི་ཉེ་བར་སྐྱབས་སུ་མཆི། །གཙོ་བོ་ཀུན་དུ་བསྒོམ་པར་བགྱི། །སྡུག་བསྔལ་གསུམ་ལས་གྲོལ་
བའི་ཕྱིར། །འཇིག་རྟེན་སྡུག་བསྔལ་བདག་གིས་མཐོང་། །ཐམས་ཅད་བྱེད་པར་གནས་པ་ཡི། །སྡུག་བསྔལ་གསུམ་གྱིས་ཐམས་ཅད་གདུངས། །བདག་ནི་ཁྱེད་ལ་དབུལ་བར་བགྱི། །བདག་ནི་ཁྱེད་ཀྱིས་བཞེས་སུ་གསོལ། །སྡིག་པ་ཐམས་ཅད་བཤགས་པར་བགྱི། །ཕྱིན་ཆད་སྡིག་པ་
བདག་མི་བགྱི། །བསོད་ནམས་ཀུན་ལ་རྗེས་ཡི་རངས། །བྱས་དང་བྱེད་བཅུག་དགེ་བ་ལ། །བདག་ནི་དེ་བཞིན་མངོན་པར་དགའ། །ཆོས་གསུང་མཛད་པའི་སངས་རྒྱས་རྣམས། །མྱ་ངན་མི་འདའ་བཞུགས་སུ་གསོལ། །སེམས་ཅན་ཀུན་གྱི་དོན་གྱི་ཕྱིར། །མཆོག་ཏུ་རྩོལ་བ་ཆེན་པོ་ཡིས། །བདག་
ནི་སངས་རྒྱས་འགྱུར་བར་ཤོག །སངས་རྒྱས་དབང་ཕྱུག་གནས་པ་ཡིས། །འཁོར་བ་ཐམས་ཅད་བསྒྲལ་དོན་དུ། །འཁོར་བའི་རྒྱ་མཚོ་མཐར་ཕྱིན་ཏེ། །སངས་རྒྱས་རྒྱུ་ལ་བཀོད་པའི་ཕྱིར། །ཇི་ལྟར་བཟོད་པའི་སྟོབས་རྣམས་ཀྱིས། །སྨོན་ལམ་ཆེན་པོ་གདབ་པར་བགྱི། །དེ་ལྟར་གྱུར་པའི་
སྟོབས་ཀྱིས་སུ། །འདི་ལྟར་རིགས་དང་རིགས་སྐྱེས་ཀྱང་། །ཐབས་ཀྱིས་འགྲོ་བ་བསྒྲལ་བར་བགྱི། །ཐམས་ཅད་མཉམ་པའི་གོ་འཕང་པ། །དྲི་མེད་སྟོང་པའི་ཡོན་ཏན་ཅན། །རིགས་ལས་བྱས་པའི་བསོད་ནམས་ཀྱིས། །བྱས་དང་བྱེད་དུ་བཅུག་པ་ཡི། །བདག་གི་བསོད་ནམས་ཅི་མཆིས་
པས། །གྲུབ་ཅིང་བདེ་བའི་གནས་ཕྱིན་ཤོག །དེ་ནས་རིན་ཆེན་དཔལ་མོས་ལག་པ་ན་དྲི་ཐོགས་པ། དཔལ་མོས་མེ་ཏོག་དང་། ཐིག་ལེ་མཆོག་མས་བདུག་སྤོས་དང་། རི་བོང་འཛིན་མས་མར་མེ་ཐོགས་པ་རྣམས་ཀྱིས་མཆོད་ལ། ཨོཾ་བཛྲ་ཧཱ་སྱེ་ཧཱུཾ། ཞེས་པའི་སྔགས་ཀྱིས། ཨུ་དུམྦཱ་ར་
དང་། བྱང་ཆུབ་ཀྱི་ཤིང་ལས་བྱས་པའི་སོ་ཤིང་དྲི་དང་མེ་ཏོག་གི་ཕྲེང་བས་བརྒྱན་པ། སོ་འབྲུད་པའི་ཚུལ་གྱིས་གཟུང་ལ་དོར་བར་བྱའོ། །རྡོ་རྗེ་ཆོས་ཀྱིས་བཟླས་པའི་དྲི་བཟང་པོའི་མཆོད་ཡོན་གྱི་ཆུས་ཁ་བཤལ་བྱིན་ལ། ཨོཾ་ཧྲཱིཿབི་ཤུདྡྷཿསརྦ་དྷརྨ་སརྦ་པཱ་པ་ནཾ་ཙ་སྱ་སརྦ་བི་ཀལྤཱན་ཨ་པ་ན་

73-1-268a

ཡ་ཧཱུཾ། རྡོ་རྗེ་རྣོན་པོ་ཆེན་པོ་འདི། །ཡོངས་སུ་རྫོགས་ཤིང་མ་ཉམས་པ། །གཅིག་ནི་མགོ་བོ་གཞན་ནི་བསྟན། །ཨོཾ་བཛྲ་རཀྵ་ཧཱུཾ། བཟླས་པ་སྦྱིན་པར་བྱ་སྟེ། སྔས་དང་སྟན་དུ་ཕྱིད་ལ། རྡོ་རྗེའི་གོ་བསྐོན་ཏེ། སྐུད་པ་སུམ་སྒྲིལ་རང་གིས་སློབ་མའི་དཔུང་པ་གཡོན་པ་ལ་བཅིང་
བར་བྱའོ། །དེ་ཡང་ཡི་གེ་དྲུག་པའི་སྔགས་དང་ཕྱག་རྒྱས་སོ། །བསྲུང་བ་བྱས་ལ། སློབ་མ་ལ་ཆོས་བཤད་པར་བྱ་སྟེ། དེ་རིང་ཁྱོད་ནི་དགའ་བ་ཡི། །རྙེད་པ་ཆེན་པོ་ཁྱེད་ཀྱིས་རྙེད། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་པོ་དམ་པ་ཁྱོད། །སངས་རྒྱས་ཀུན་གྱིས་རྗེས་སུ་
བཟུང་། །བདག་ཉིད་ཆེན་པོ་རྒྱལ་བའི་སྲས། །ཁྱོད་ནི་ཐེག་པ་ཆེན་པོ་ལ། །དགའ་བའི་རིགས་ཅན་ཐོབ་པར་འགྱུར། །འདི་ནི་ལམ་གྱི་མཆོག་ཡིན་ཏེ། །དཔལ་དང་ལྡན་པའི་ཐེག་པ་ཆེ། །ལམ་འདི་ལ་ནི་ཁྱོད་ཕྱིན་ན། །དེ་བཞིན་གཤེགས་པར་ཁྱོད་འགྱུར་རོ། །རང་བྱུང་སྐལ་བ་ཆེ་དང་ལྡན། །འཇིག་
རྟེན་ཀུན་གྱིས་མཆོད་པར་འགྱུར། །ཡོད་དང་མེད་པའི་དེ་ཉིད་སྤངས། །ནམ་མཁའ་ལྟ་བུར་དྲི་མ་མེད། །ཟབ་མོ་རྟོག་གེའི་ཡུལ་ལས་འདས། །རྟོག་དཔྱོད་ཡུལ་ལས་འདས་པ་པོ། །ཐམས་ཅད་ལྔ་རུ་གནས་པས་ཏེ། །ལྔ་པ་ཀུན་ཀྱང་དེ་བཞིན་ནོ། །ལས་དང་སྤྱོད་པར་གནས་པ་ཀུན། །གཉིས་མེད་
བདེན་པའི་དཔལ་དང་ལྡན། །འདི་ནི་ཐེག་པ་ཆེན་པོའི་མཆོག །འདི་འདྲ་ཁྱོད་ཀྱིས་ཐོབ་པར་འགྱུར། །དེ་སྐད་ཅེས་སློབ་མ་ལ་བརྗོད་པར་བྱས་ལ་སློབ་མ་རྣམས་བསྟན་པར་བྱ་སྟེ། རྡོ་རྗེ་སློབ་དཔོན་གྱི་བཀའ་དྲིན་གྱིས་ཁྱེད་ཀྱིས་ནང་པར་གྲོལ་བའི་གྲོང་ཁྱེར་ཆེན་པོ་མཐོང་བར་འགྱུར་རོ། །བདུག་པ་ལ་
སོགས་པ་ཅི་འབྱོར་པའི་མཆོད་པ་རྣམས་ཤོམས་ཤིག །བཅོམ་ལྡན་འདས་འཁོར་དང་བཅས་པ། བཅོམ་ལྡན་འདས་ཆེ་གེ་མོ་རིག་པ་འཛིན་པའི་རྒྱལ་པོ་འཁོར་དང་བཅས་པ་ལ་ཕྱག་འཚལ་ཏེ། དཀྱིལ་འཁོར་སྙིང་རྗེ་ཆེན་པོ་བདག །ནང་པར་བདག་ནི་འདྲི་བར་འདོད། །སློབ་མ་རྗེས་སུ་གཟུང་ཕྱིར་དང་། །
ཁྱེད་རྣམས་ཅིས་ཀྱང་མཆོད་པའི་ཕྱིར། །འདི་ལྟར་བདག་ནི་གུས་པ་ལ། །བཅོམ་ལྡན་འདས་ཀྱིས་བཀའ་དྲིན་མཛོད། །བདག་མིང་འདི་ཞེས་བགྱི་བ་ལ། །ཆེ་གེ་དཀྱིལ་འཁོར་ཞེས་པའི་མཆོག །ནང་པར་སངས་རྒྱས་དཀྱིལ་འཁོར་བྲི། །ཇི་ལྟར་འབྱོར་པའི་སྟོབས་ཀྱིས་སོ། །རྗེས་སུ་གཟུང་བའི་

73-1-268b

ཐབས་ཀྱིས་ནི། །བདག་གི་སློབ་མ་གང་ཡིན་ལ། །དཀྱིལ་འཁོར་ལྷ་ཚོགས་དགོངས་སུ་གསོལ། །དེ་སྐད་ཅེས་ལན་གསུམ་བརྗོད་དོ། །དེ་ནས་དཀྱིལ་འཁོར་ལེགས་པར་མཆོད་ལ། མཆོད་ཡོན་ལ་སོགས་པ་ཡང་ཕུལ་ཏེ། ལས་ཀྱི་རྡོ་རྗེས་སློབ་མ་དཀྱིལ་འཁོར་གྱི་གནས་སུ་ཉལ་ལ་འདུག་པར་
བྱའོ། །གཞན་ཉི་མ་ལ་ལྷའི་རྣལ་འབྱོར་བྱས་ལ། དཀྱིལ་འཁོར་ནམ་མཁའ་ལ་བལྟས་ཏེ། དཀར་པོ་དང་། དམར་པོ་དང་། ལྗང་གུ་དང་། སྔོན་པོ་དང་། དྲི་བཟང་པོས་བྱུགས་ལ། དོན་གྲུབ་བཏགས་པས་ཀྱང་བྱུགས་ཏེ། དེ་ལྟར་སྐུད་པ་ལྔ་རྣམས་སོ་སོར་བཞག་སྟེ། ཨོཾ་ཏྲཱཾ་ཧྲཱིཿཨཿ
ཧཱུཾ། རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་རྣམས་སུ་བསམས་ལ། དེ་དག་ཀྱང་རང་རང་གི་གནས་སུ་བྱིན་གྱིས་བརླབ་ཅིང་ས་བོན་ལས་འོད་ཟེར་འཕྲོས་པ་དང་། རང་གི་སྙིང་ག་ལས་ཀྱང་འོད་ཟེར་འཕྲོས་ཏེ། དེ་བཞིན་གཤེགས་པ་ལྔའི་བདག་ཉིད་དུ་བྱིན་གྱིས་བརླབ་པར་བྱའོ། །
ཨོཾ་དཱིཔྟ་དྲྀཥྚི་ཨཾ་ཀུ་ཤ་ཛཿ། འདི་ནི་མིག་ལྷག་པར་གནས་པའོ། །མིག་ཕྱོགས་ཐམས་ཅད་དུ་བལྟ་བར་བྱའོ། །རྫི་མ་བརྡབས་ཏེ་མིག་རབ་ཏུ་བགྲད་པས། སྲད་བུ་ནམ་མཁའ་ལ་བརྐྱང་བ་ལ་བལྟ་བར་བྱའོ། །ཆོས་རྣམས་ཐམས་ཅད་རྗེས་སུ་གཅིག་པ་ལ། །སྤྲོ་ཞིང་བསྡུས་པས་རྗེས་སུ་བརྟན་
པར་བྱས། ཆོས་རྣམས་ཐམས་ཅད་དེ་ཉིད་གཅིག་པ་ཡིན། །ཧཱུཾ་ཞེས་བརྗོད་ལ་གཅིག་ཏུ་བསྒྲིལ་ལོ། །དེ་ནས་གསེར་ལ་སོགས་པའི་སྣོད་དུ་བཞག་ཅིང་མཆོད་ལ། རྡོ་རྗེ་བསྡམས་པའི་ཕྱག་རྒྱ་བཅས་ལ། སྔགས་འདི་བརྗོད་པར་བྱའོ། །ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུཾ། འདི་ནི་ལན་བརྒྱ་རྩ་བརྒྱད་དུ་
བརྗོད་ལ། དེ་ནས་དཀྱིལ་འཁོར་གྱི་ས་གཞི་ལ། ནམ་མཁའ་ལ་གནས་པ་རྣམས་རབ་ཏུ་བརྟན་པ་ལ། མེ་ཏོག་ལ་སོགས་པས་ཡང་དག་པར་མཆོད་དེ། མིག་གཉིས་སུ་ཡི་གེ་ཛཿཡོངས་སུ་གྱུར་པ་ལས། ཟླ་བ་དང་ཉི་མའི་དཀྱིལ་འཁོར་དུ་བལྟས་ལ། བྱང་ཕྱོགས་ཀྱི་སྒྲུབ་པ་པོ་བདུད་རྩི་འཁྱིལ་
པའི་གཟུགས་ཀྱིས། གཡོན་པའི་ཁུ་ཚུར་གྱིས་སྐུད་པ་ལྟེ་བར་བཟུང་སྟེ། ཨོཾ་ཛཿཛཿཛཿདེ་སྐད་ཅེས་བརྗོད་པས། བྱང་ཕྱོགས་ཀྱི་སྒྲུབ་པ་པོས་ཀྱང་། ཡང་ཨོཾ་ཛཿཛཿཛཿཞེས་བརྗོད་ཅིང་སློབ་དཔོན་གྱི་ལག་ཏུ་གཏད་དོ། །དེ་ལྟར་སློབ་དཔོན་དང་སློབ་མ་གདོང་ཕྱོགས་པས། ནུབ་

73-1-269a

དང་ལྷོ་ཡང་སློབ་དཔོན་གྱི་གནས་ཡིན། ཤར་དང་བྱང་ན་སློབ་དཔོན་གྱི་གནས་སོ། །དེ་སྐད་ཅེས་ནམ་མཁའ་ལ་ཐིག་བཏབ་ལ། སེམས་ཀྱིས་ཕྱོགས་དང་མཚམས་ཐམས་ཅད་ཀྱི་ཕྱོགས་མཉམ་པར་བགོས་ཏེ། དེ་ཉིད་ཀྱི་རིམ་པས་ས་གཞི་ལ་ཚངས་པའི་ཐིག་ལ་སོགས་པ་གདབ་
སྟེ། ཐིག་སྐུད་སྦོམས་སུ་དཀྱིལ་འཁོར་གྱི་སྒོའི་ཉི་ཤུ་ཆ། དཀྱིལ་འཁོར་ཉིས་འགྱུར་གྱི་ཚད་དོ། །དེ་ཡང་རྡོ་རྗེ་ཁུ་ཚུར་གྱིས་སྐུད་པ་ཤར་ཕྱོགས་སུ་བཟུང་ལ། ནུབ་ཏུ་འང་དེ་བཞིན་ནོ། །གནོད་སྦྱིན་དང་ཡི་དགས་དང་ལྷ་དང་། ཀླུ་དང་དབང་ཕྱུག་དང་བདེན་བྲལ་གྱི་ཕྱོགས་སུ་གདོང་བལྟ་
ཞིང་། མེ་དང་རླུང་དུ་ནི་སློབ་དཔོན་གྱི་གནས་ཡིན་ལ། ཤར་དང་ནུབ་དང་བྱང་དང་ཕྱོགས་བཞིར་མཉམ་པར་ཐིག་བཏབ་ལ། དེ་ཡང་ཆ་བརྒྱད་དུ་མཉམ་པར་བྱ་སྟེ། དེ་ཡང་སྐུད་པའི་སྒྲས་དེ་བཞིན་གཤེགས་པ་ཐམས་ཅད་སྤྱན་དྲངས་ཞིང་དགོངས་པར་བསམ་མོ། །དེ་ཡང་སློབ་དཔོན་སློབ་མའི་
གཡས་སུ་བསྐོར་ཞིང་འགྲོ་བར་བྱ་སྟེ། མེ་དང་རླུང་ནི་རྟག་ཏུ་སློབ་དཔོན་གྱི་གནས་ཡིན། སྲིན་པོ་དང་དབང་ལྡན་རྣམས་སུ་ཡང་ཟུར་གྱི་ཐིག་རྣམས་གདབ་པོ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་དང་ཡང་དག་ལྡན། །ཆ་རྣམས་བཅུ་དྲུག་དང་ལྡན་ཞིང་། །རྡོ་རྗེའི་ར་བས་ཀུན་ནས་བསྐོར། །
དེ་ལྟར་དུ་ནི་བཤད་པ་ཡིན། །ཕྱི་རོལ་གྱི་དཀྱིལ་འཁོར་ལ་གནས་བཞི་སྟེ། སྙིང་པོའི་ལྟེ་བ་དང་རེའུ་མིག་བརྒྱད་དང་ལྡན་པ། ཕྱི་རོལ་ནས་རྡོ་རྗེའི་ར་བས་ཀུན་ནས་བསྐོར་བ། གཉིས་གཉིས་དང་ལྡན་པའི་ཆ་གསུམ་དང་། ཐམས་ཅད་ཀྱི་དབུས་སུ་བརྒྱད་ཆའི་སྒོ་ཚད་དང་། སྒོའི་ཕྱེད་ཀྱིས་སྒོ་ཁྱུད་
དང་། འགྲམ་དང་། ལོགས་ཀྱང་ངོ་། །འགྲམ་པའི་ཕྱེད་ཀྱིས་རྡུལ་ཚོན་གྱིས་དང་། དེ་ནས་འགྲམ་པའི་ཚད་ཀྱིས་དང་། མཆོད་པའི་སྣམ་བུའི་ཚད་ཀྱིས་དྲ་བ་དང་དྲ་བ་ཕྱེད་པའི་སའོ། །རྡོ་རྗེའི་ཀ་བ་བརྒྱད་ཀྱིས་ནི་རྡུལ་ཚོན་གྱི་ས་ཡིན་ལ། སྒོའི་སུམ་འགྱུར་གྱིས་རྟ་བབས་སོ། །ཕྱོགས་ཀྱི་
གནས་དང་སྙིང་པོའི་གནས་དེ་བཞིན་དུ་ཤེས་པར་བྱའོ། །འཁོར་ལོ་དང་། ཟུར་ལ་རྒྱལ་མཚན་དང་། དྲིལ་བུ་དང་། རྔ་ཡབ་དང་། དཔག་བསམ་གྱི་ཤིང་དང་། དེ་ནས་དཀྱིལ་འཁོར་ལྟེ་བར་ཕུར་པ་བཏབ་ལ། ཕྱི་རོལ་ནས་ཀུན་ནས་བསྐོར་བར་བྱ་སྟེ། རྡོ་རྗེའི་ཕྲེང་བ་དང་། དེ་བཞིན་རི་མོ་

73-1-269b

གཉིས་ཀྱིས་བསྐོར། གསུམ་ཡང་བསྐོར་ལ། ཁ་དོག་ལྔ་པའི་བཞི་ཡང་། རིང་པོ་བཞི་པའི་ཡང་། འཁོར་ལོ་གྲུ་བཞི་མཉམ་པ་ལ་བསྐོར་བར་བྱ། རི་མོ་བཅུ་བདུན། ཆ་བཅུ་དྲུག་དང་ལྡན་པ། གནས་བརྒྱད་ཟླུམ་པོར་བསྐོར་ཏེ། རྡོ་རྗེ་ཕྲེང་བས་ཀུན་ནས་བསྐོར་བ། ཐམས་ཅད་ཀྱང་སྔོན་དུ་བཤད་
པའི་མདོག་དང་ལྡན་པའོ། །དེ་ནས་ཡི་གེ་ཧི་ལས་མིག་གཡས་པ་དང་། གཡོན་པ་གཉིས་ཟླ་བ་དང་ཉི་མའི་དཀྱིལ་འཁོར་དུ་བྱས་ལ། དཀྱིལ་འཁོར་ལ་བལྟས་ལ། ཡེ་ཤེས་ཀྱི་ཐིག་གཤེགས་སུ་གསོལ་ཏེ། དེ་ནས་བྃ་ལྃ་རྃ་ཧྃ་ཛྃ་གི་ས་བོན་ལས། རིམ་པ་བཞིན་ཡོངས་སུ་རྫོགས་པར་བྱས་ལ། 
སྐུད་པའི་ཁ་དོག་བཞིན་དུ་དཀར་པོ་ལ་སོགས་པ་རྣམས་ཀྱང་བྱིན་གྱིས་བརླབ་པར་བྱ་སྟེ། རིན་པོ་ཆེ་ལྔ་དང་། ལྕགས་ལྔའམ། བ་བླ་ལ་སོགས་པའི་ཁམས་གཞན་ནམ། འབྲས་ཁར་བ་ལ་སོགས་པའི་འབྲུ་རྣམས་ཀྱིས་ཀྱང་རུང་སྟེ། ཡང་ན་སོ་ཕག་ལ་སོགས་པའི་ས་རྣམས་ཀྱིས་ཀྱང་བྱའོ། །ཨོཾ་
ཨཱཿཏྲཱཾཿཧྲཱིཿཨཿཧཱུཾ། ས་བོན་འདི་དག་ཡོངས་སུ་རྫོགས་པ་ལས། རང་རང་གི་ཁ་དོག་གི་རིགས་བཞིན་དུ་བྱིན་གྱིས་བརླབ་པར་བྱ་སྟེ། ཨོཾ་བཛྲ་ཙི་ཏྲ་ས་མ་ཡ་ཧཱུཾ། དེ་བཞིན་དུ་རྡུལ་ཚོན་རྣམས་ལ། ས་བོན་གྱི་འོད་ཟེར་ལས་དེ་བཞིན་གཤེགས་པ་ཐམས་ཅད་སྤྱན་དྲངས་ཏེ་བསྟིམས་ལ། ཡི་གེ་
ཧྲཱིཿལས་གཟི་བརྗིད་དང་ལྡན་ཞིང་། རྡོ་རྗེ་ཁྲོ་བོ་ཉི་མའི་ལྟ་བས་བལྟས་ལ། ཨོཾ་བརྗོད་དོ། །ཡི་གེ་ཨཱཿབརྗོད་ཅིང་སྔགས་དང་ཕྱག་རྒྱ་བཅས་ཏེ། རྡུལ་ཚོན་རྣམས་རབ་ཏུ་འབར་བར་བསམ་མོ། །རྡོ་རྗེ་ཁུ་ཚུར་བཅས་ལ། སྙིང་གའི་ཧཱུྃ་ལས་འོད་ཟེར་དྲི་མ་མེད་པ་འཕྲོས་ཏེ་འབར་བར་བསམ་ཞིང་། 
སཱུརྱ་ཛྭ་ལ་མཎྜ་ལ་ཧཱུཾ་ཕཊ། དེ་ནས་དཀྱིལ་འཁོར་གྱི་ལྟེ་བ་ལ་བཏབ་པའི་ཕུར་པ་ཡི་གེ་ཧཱུཾ་བརྗོད་ཅིང་། རང་གི་རྡོ་རྗེ་དང་བཅས་པའི་ལག་པར་བཟུང་ངོ་། །ཕུར་པའི་ཁུང་བུ་ཡང་རྡུལ་ཚོན་ལྔས་དགོད་དོ། །རྡོ་རྗེ་དང་དྲིལ་བུ་བཟུང་ལ། རྡོ་རྗེའི་གླུ་བླང་ཞིང་དགའ་བ་དང་ལྡན་པས་བྲི་བར་བྱའོ། །འདི་ནི་ཆོས་
དབྱིངས་དག་པ་སྟེ། །སེམས་ཅན་ཁམས་ནི་གྲོལ་བར་བྱེད། །བདག་ནི་རྡོ་རྗེ་འཛིན་པའི་རྒྱལ། །རྡུལ་ཚོན་ས་གཞིར་བཀོད་པར་བྱ། །དེ་ནས་རྡོ་རྗེ་ཁུ་ཚུར་གྱིས་ལོག་འདྲེན་གྱི་ཕྱོགས་ནས། ཇི་ལྟར་བདེ་བར་རྡུལ་ཚོན་དགོད་པར་བྱའོ། །དེ་ཡང་མཉམ་པར་སྲབ་མཐུག་མེད་པར་གཡས་སུ་བསྐོར་

73-1-270a

ཅིང་། དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། སྔོན་པོ་རྣམས་རིམ་པས་སྦྱིན་པར་བྱའོ། །གནས་གཉིས་པ་ལ་དཀར་པོ་དང་། དམར་པོ་དང་། ནག་པོ་དང་། ཁ་དོག་གསུམ་སྦྱིན་པར་བྱའོ། །ནང་གི་གནས་གཉིས་ལ་ནག་པོ་འབའ་ཞིག་གིས་བྲི་བར་བྱའོ། །དེ་དག་ཀྱང་
སྦོམ་ཕྲ་སྒོའི་ཚད་ཙམ་གྱི་རི་མོ་བཅད་ཅིང་ནས་ཀྱི་ཚད་ཙམ་དུ་སྦོམ་པར་བྱའོ། །དེ་ཡང་ཤར་ཕྱོགས་དཀར་པོ། གཤིན་རྗེ་སེར་པོ། ཆུ་ལྷའི་ཕྱོགས་དམར་པོ། ལུས་ངན་པོའི་ཕྱོགས་ལྗང་གུ། དབུས་ནག་པོ། དཀྱིལ་འཁོར་བྲི་བའི་དུས་སུ། བགེགས་ཀྱི་མཚན་མ་དང་ལྡན་ན་བགེགས་འཇོམས་པར་བྱེད་
པའི་སྔགས་དང་ཕྱག་རྒྱ་བཅས་ལ། བྱང་ཆུབ་ཀྱི་སེམས་དང་ལྡན་པས་བགེགས་བསྐྲད་པར་བྱའོ། །དེའི་དུས་སུ་ཡི་གེ་ཧཾ་ལས་གླང་པོ་ཆེའི་གདན་དེའི་སྟེང་དུ་ཡི་གེ་ཨོཾ་ལས་པདྨ་དང་ཉི་མའི་གདན། དེའི་དབུས་སུ་བཅོམ་ལྡན་འདས་རང་གི་བཞུགས་སྟངས་དང་ཁ་དོག་གིས་གནས་པ་ལ། ཛཿཧཱུཾ་བཾ་ཧོཿ
ཞེས་བརྗོད་པས། ཡི་གེ་ཧཱུཾ་བརྗོད་ཅིང་དམ་ཚིག་གི་ཕྱག་རྒྱ་བཅས་ལ་བསྟིམ་པར་བྱའོ། །དེ་ནས་དམ་ཚིག་གི་ཕྱག་རྒྱ་བཅས་ལ། དབང་ཕྱུག་ཆེན་པོ་རང་གི་ཁ་དོག་དང་གདན་དང་བཞུགས་ཐབས་མངོན་རྟོགས་སྒྲུབ་ཐབས་ལས་བཤད་པ་བཞིན་དུ། ཛཿཧཱུཾ་བཾ་ཧོཿཞེས་བརྗོད་ལ། བཅོམ་ལྡན་འདས་ཀྱི་
ཤར་ཕྱོགས་སུ་གཞག་པར་བྱའོ། །འཁོར་ལོ་ཐམས་ཅད་དགུག་པ་དང་། གཞུག་པ་དང་། བསྟིམ་ཞིང་ཡི་གེ་ཧཱུཾ་གིས་གཤེགས་སུ་གསོལ་ལོ། །ཇི་ལྟར་གཤེགས་སུ་གསོལ་བའི་ཚེ། ལག་པ་རྡོ་རྗེ་དང་ལྡན་པས་ཐིག་རྣམས་སྟེང་དུ་བཏེག་སྟེ་གཤེགས་སུ་གསོལ་ལོ། །དེ་ནས་སྔོན་དུ་བཤད་པའི་
བུམ་པ་དྲི་བཟང་པོའི་ཆུས་བཀང་བ་མེ་ཏོག་གིས་བརྒྱན་པ་བརྒྱད་དབང་ལྡན་ལ་སོགས་པ་དཀྱིལ་འཁོར་གྱི་ཕྱོགས་དང་མཚམས་སུ་དགོད་པར་བྱའོ། །དེ་ནས་རྡོ་རྗེ་སློབ་དཔོན་ཁྲོ་བོའི་ཏིང་ངེ་འཛིན་དང་ལྡན་པས། གོས་སྔོན་པོ་བགོས་ཏེ་མེ་ཏོག་སྔོན་པོའི་ཕྲེང་བ་བཅིངས་ལ། དྲིལ་བུ་དཀྲོལ་ཞིང་བསྐོར་
བ་ལན་གསུམ་བྱ་སྟེ། མེ་ཏོག་སྔོན་པོས་མཆོད་ལ་དཀྱིལ་འཁོར་གྱི་གནས་སུ་སོང་ལ་གར་བྱ་ཞིང་། མེ་ཏོག་གི་ཕྲེང་བ་བླངས་ལ། གར་བྱ་ཞིང་མཆོད་ཡོན་ཕུལ་ལ། སྔགས་འདི་བརྗོད་པར་བྱའོ། །བཛྲོད་གྷ་ཊ་ཡ་ས་མ་ཡ་པྲ་བེ་ཤ་ཡ་ཧཱུཾ། རང་ཉིད་ཁྲོ་བོ་ཆེན་པོའི་ང་རྒྱལ་གྱིས་ཤར་སྒོ་ནས་སོང་སྟེ། 

73-1-270b

ནུབ་ཀྱི་སྒོར་གནས་ལ། ལྷོ་དང་བྱང་གི་ཡང་སྒོར་ཕྱིན་ཏེ། དེ་ནས་རོལ་པའི་གར་གྱིས། དེ་ནས་ཤར་གྱི་སྒོར་བུམ་པའི་ཕྱི་རོལ་ཏུ་ཕྱིན་ལ། མེ་ཏོག་གི་གཅལ་བཀྲམ་སྟེ། སྔོན་དུ་བཟླས་པ་ལ། ཨོཾ་ཏིཥྛ་སིདྡྷི་ཧཱུཾ། སྔགས་འདི་བརྗོད་ཅིང་དམ་ཚིག་གི་ཕྱག་རྒྱ་བཅའོ། །མེ་ཏོག་གི་ཕྲེང་བ་བླངས་ལ། 
ཡི་གེ་བཞི་པའི་སྔགས་སྟོང་ཕྲག་བརྒྱད་བཟླས་པར་བྱའོ། །དེ་ནས་དཀྱིལ་འཁོར་ལ་ལན་གསུམ་བསྐོར་ཏེ། བསྐོར་བ་གསུམ་བྱས་ལ་དཀྱིལ་འཁོར་གྱི་བདག་པོའི་མདུན་དུ་གཞག་པར་བྱའོ། །ཡང་བུམ་པ་གཉིས་པ་བླངས་ལ་བརྒྱ་ཕྲག་བརྒྱད་བཟླས་པར་བྱའོ། །བུམ་པ་གཉིས་པའི་ཆུས་བདག་ཉིད་དང་
སློབ་མའི་མགོ་ལ་གཏོར་བར་བྱའོ། །ཁྲོ་བོ་ཆེན་པོའི་སྔགས་དང་ཕྱག་རྒྱ་བཅིང་ཞིང་བསྟིམས་ལ། དབང་ཕྱུག་ཆེན་པོའི་མཚན་མ་ཅན་གྱི་བུམ་པ་ལ་སོགས་པ་བླངས་ཏེ། རང་རང་གི་སྔགས་ཀྱིས་བརྒྱ་ཕྲག་བརྒྱད་བཟླས་ཏེ། དཀྱིལ་འཁོར་གྱི་ཕྱི་རོལ་རང་རང་གི་གནས་སུ་གཞག་པར་བྱའོ། །ཆུ་ཡིས་
གང་བས་དེ་ནས་རྣམ་པར་རྒྱལ་བའི་བུམ་པ་དང་། གཞན་ལ་འབྱོར་ན། དབང་ཕྱུག་ཆེན་པོ་དང་། བརྒྱ་བྱིན་དང་། ཉི་མ་དང་། མེ་ལྷ་རྣམས་ལ་བུམ་པ་གཅིག་གོ། །པདྨའི་དཔལ་མོ་དང་། རིན་ཆེན་དཔལ་མོ་དང་། རིན་ཆེན་དཔལ་མོ་ཆེན་མོ་དང་། དེའི་རིམ་པས་དབང་བསྐུར་བར་འགྱུར་རོ། །བུམ་
པ་བཅུ་ལས་ཉུང་བ་ནི་མ་ཡིན་ལ། བུམ་པ་བཅུ་རྣམ་པར་གང་བས་དབང་བསྐུར་བར་འགྱུར་རོ། །དེ་ལྟར་དཀྱིལ་འཁོར་དེ་མངོན་སུམ་དུ་གནས་པ་ལ་མཆོད་ཅིང་། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་པྲ་ཎ་མེ་ན་བཛྲ་བནྡྷ་ནཱཾ་ཀ་རོ་མཱི་ཏི་པྲ་ཎ་མྱ། སྔོན་དུ་བཤད་པའི་སྐྱབས་དཀོན་མཆོག་གསུམ་ལ་སྐྱབས་སུ་
འགྲོ་བ་བྱ་ཞིང་སྡོམ་པ་ཡང་གཟུང་བར་བྱའོ། །བྱང་ཆུབ་སེམས་ནི་བསྐྱེད་པར་བགྱི། །སེམས་ཅན་མ་ལུས་བསྒྲལ་བའི་ཕྱིར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །ཚུལ་ཁྲིམས་སྡོམ་པ་རྣམ་པ་གསུམ། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་
ཚུལ་ཁྲིམས་གསུམ། །བདག་གིས་ཀྱང་ནི་བརྟན་པར་གཟུང་། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །མཆོག་ཏུ་གུས་པས་གཟུང་བར་བགྱི། །སྡོམ་པ་སངས་རྒྱས་རྣལ་འབྱོར་ཅན། །རྡོ་རྗེ་དྲིལ་བུའི་ཕྱག་རྒྱ་ཡང་། །བདག་གིས་དེ་ཉིད་གཟུང་བར་བགྱི། །

73-1-271a

རྡོ་རྗེ་ཆེན་པོའི་རིགས་དག་ལ། །སྦྱིན་པ་རྣམ་བཞི་སོ་སོར་སྦྱིན། །ཉིན་རེ་བཞིན་ལའང་དུས་དྲུག་ཏུ། །རིན་ཆེན་ཆེན་པོའི་རིགས་མཆོག་སྦྱོར། །ཏིང་འཛིན་རབ་ཏུ་དགའ་བ་ཡིས། །ཆོས་རྣམས་ཐམས་ཅད་གཟུང་བར་བགྱི། །ཕྱི་ནང་གསང་བའི་ཐེག་པ་གསུམ། །པདྨ་ཆེན་པོའི་རིགས་དག་པ། །
བྱང་ཆུབ་ཆེན་པོའི་རིགས་བྱུང་བ། །སྡོམ་པ་ཐམས་ཅད་ལྡན་པར་ནི། །དེ་ཉིད་བདག་གིས་གཟུང་བར་བགྱི། །མཆོད་པའི་ལས་རྣམས་ཅི་འབྱོར་པ། །ལས་ཀྱི་རིགས་ནི་ཆེན་པོ་ལ། །མཆོག་ཏུ་བསྐྱེད་པར་བགྱི་བ་ནི། །བྱང་ཆུབ་སེམས་ནི་རྗེས་བསྒྲལ་བ། །སྡོམ་པ་གཟུང་བར་བགྱི་བ་ནི། །སེམས་ཅན་ཀུན་
གྱི་དོན་གྱི་ཕྱིར། །མ་བསྒྲལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་གྲོལ་བར་བགྱི། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་དགོད། །དེ་ནས་ཉེས་པ་འཇོམས་པར་བྱེད་པའི་སྔགས་བརྗོད་ཅིང་གོ་ཆ་བགོས་ཏེ། ཧཱུཾ་བཟླས་ཤིང་གོས་སྔོན་པོ་གྱོན་ཏེ། ཕྲག་
པ་ཕུད་དེ་གཙུག་ཏོར་དང་ལྡན་པས། མེ་ཏོག་གི་ཕྲེང་བའི་དོ་ཤལ་བྱས་ལ། དྲི་བཟང་པོས་བྱུགས་ཤིང་། རྒྱན་ཐམས་ཅད་ཀྱིས་བརྒྱན་ཏེ། སྒོ་སྲུང་གི་སྔགས་བཟླས་ཤིང་། གོས་སྔོན་པོས་སྟོད་བཅིངས་ལ། ཕྱི་རོལ་དུ་གནས་པ་ལ་བུམ་པའི་ཆུས་གདབ་པར་བྱའོ། །ཁྲོ་བོའི་ཕྱག་རྒྱ་བཅིངས་ལ། 
སློབ་མ་ལ་གོ་ཆ་བསྐོན་ཅིང་བསྲུང་བ་བྱས་ལ། སློབ་དཔོན་གྱིས་འདི་སྐད་ཅེས་བརྗོད་པར་བྱ་སྟེ། སེམས་ཅན་ཀུན་གྱི་དོན་གྱི་ཕྱིར། །དེ་མ་ཐག་ཏུ་དངོས་གྲུབ་ཐོབ། །ཁྲོ་བོའི་རྒྱལ་པོ་གྲུབ་པའི་བདག །དམ་ཚིག་ལྷ་རྣམས་བརྟན་པར་བྱེད། །དེ་ནས་ཁྲོ་བོའི་ཕྱག་རྒྱ་བཅིངས་ལ། བཛྲ་ཀྲོ་དྷ་ཧཱུཾ་ཧཱུཾ་ཕཊ་ཕཊ། 
དེ་སྐད་ཅེས་བརྗོད་ལ། ནང་དུ་གཞུག་ཅིང་བརྗོད་པར་བྱ་བ་ནི། རྡོ་རྗེ་ཁྲོ་བོ་རང་གིས་དབབ་པ་བྱ་སྟེ། ཏིཥྛ་བཛྲ། དེ་ལ་སོགས་པའི་སྔགས་ཀྱིས་རྣམ་པར་གྲོལ་བའི་ཕྱག་རྒྱ་བསྟན་པར་བྱ་སྟེ། ཕྲེང་བ་བཞག་ཅིང་གདོང་པ་དཀྲོལ་ལ། དེ་ནས་ཆུའི་དབང་དམ་ཚིག་གསུམ་སྦྱིན་ཞིང་། བཅོམ་ལྡན་
འདས་ཐམས་ཅད་སློབ་དཔོན་གྱི་གཟུགས་ཀྱི་གནས་པར་སྔོན་དུ་བརྗོད་པའི་རིམ་པས་བསམ་པར་བྱའོ། །དེ་ནས་དམ་ཚིག་གསུམ་གྱི་དོན་དུ་དབང་རྫས་སྦྱིན་ཞིང་། ཚིགས་སུ་བཅད་པ་ལྔ་ཡིས་བསྟོད་ལ་ཡི་གེ་བཞི་པའི་སྔགས་བརྗོད་ཅིང་ཕྱག་རྒྱ་བཅས་ཏེ། ལུང་བསྟན་པ་བཟུང་ཞིང་ཡང་རྡོ་རྗེའི་

73-1-271b

མཆོག་སྦྱིན་པར་བྱེད་པ་རྡོ་རྗེ་ཆེ་གེ་མོ་ཞེས་བྱ་བ་ཁྱོད། ཆེ་གེ་མོ་ཞེས་བྱ་བའི་མིང་གིས་དཀྱིལ་འཁོར་བསྒོས་ན་རིམ་པ་འདིས། བཅོམ་ལྡན་འདས་ཀྱི་ཕྱག་རྒྱ་དང་སྔགས་བཟླས་པས། ཨའི་དབང་ཕྱུག་དེའི་གནས་སུ་ཁྲོ་བོའི་རྡོ་རྗེ་རང་གིས་བཟུང་ཞིང་། ཁྲོ་བོའི་ང་རྒྱལ་བྱས་ལ། དེ་ནས་རྡོ་རྗེ་ཆེན་པོ་བཟུང་
ངོ་། །ཁྲོ་བོའི་བདག་པོ་ཆེན་པོའི་ང་རྒྱལ་དུ་གནས་པས། དེ་ནས་སྔོན་ཁྲོ་བོའི་དབང་པོ་འགུགས་པའི་ཕྱག་རྒྱ་བཤད་པ། བཅོམ་ལྡན་འདས་ཀྱི་དཀྱིལ་འཁོར་ལ་རབ་ཏུ་བསྟོད་ཅིང་། སྔོན་གྱི་ཉེས་པ་འཇོམས་པར་བྱེད་པའི་སྔགས་བཟླས་ཏེ། ཕྱོགས་བཅིང་བ་དང་། རྩིག་པ་དང་། ར་བ་དང་
གུར་བསམས་ལ། མཆོད་ཡོན་དང་ཞབས་བསིལ་དབུལ་ཞིང་། དམ་ཚིག་ལ་གནས་པས། ཛཿཧཱུཾ་བཾ་ཧོཿས་མ་ཡ་སྟྭཾ། དེ་སྐད་ཅེས་སྒྲུབ་པ་པོས་བརྗོད་ལ། དེ་ལྷ་ཆེན་པོ་ལ་སོགས་པ་རྣམས་རང་རང་གི་དམ་ཚིག་ལ་གནས་པའི་ལྷའི་དཀྱིལ་འཁོར་བསྒོམ་པར་བྱའོ། །སྒྲུབ་ཐབས་དང་ཕྱག་
རྒྱ་དང་དབང་ཡོངས་སུ་རྫོགས་པར་བྱས་ལ། ཉེས་པ་འཇོམས་པར་བྱེད་པའི་སྔགས་བརྗོད་ཅིང་། བདུག་པ་ལ་སོགས་པས་ཡང་དག་པར་མཆོད་ཅིང་། མཆོད་ཡོན་ཡང་སྦྱིན་ལ། གོས་ལ་སོགས་པས་ཡང་དག་པར་མཆོད་ལ། དཔག་ཏུ་མེད་པའི་པི་ཝང་དང་། རྒྱལ་མཚན་མང་པོས་མཆོད་ཅིང་། 
ཨོཾ་དང་ཧཱུཾ་བརྗོད་ཅིང་། སྤྲོས་ཤིང་བསྡུས་པས། དེ་ནས་མེ་ཏོག་དང་སྤོས་དང་བདུག་པ་དང་མར་མེ་དང་། ཞལ་ཟས་རྣམས་ཀྱིས་མཆོད་པར་བྱ་སྟེ། ཨོཾ་བཛྲ་གནྡྷེ་ཧཱུཾ། དྲིའི་ཕྱག་རྒྱ་བཅས་ལ། ཇི་ལྟར་འབྱོར་པའི་དྲི་ཡིས་མཆོད་པར་བྱའོ། །དེ་བཞིན་དུ། ཨོཾ་བཛྲ་པུཥྤེ་ཧཱུཾ། མེ་ཏོག་གི་ཕྱག་རྒྱའོ། །
ཨོཾ་བཛྲ་དྷཱུ་པེ་ཧཱུཾ། འདི་ནི་བདུག་སྤོས་ཀྱི་ཕྱག་རྒྱས་སོ། །ཨོཾ་བཛྲ་ཨཱ་ལོ་ཀེ་ཧཱུཾ། མར་མེའི་ཕྱག་རྒྱས་སོ། །དེ་དག་གིས་དཔག་ཏུ་མེད་པའི་མཆོད་པའི་སྤྲིན་རྣམས་སྤྲོས་ཤིང་། བཟའ་བ་དང་། བཅའ་བ་དང་། ལོངས་སྤྱད་པ་དང་། བལྡག་པ་དང་། གཞིབ་པ་དང་། བཏུང་བ་རྣམས་ཀྱིས་ཀྱང་མཆོད་པར་
བྱའོ། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨདྱཱ་ནུཏྤན་ན་ཏྭཱཏ། འདིས་རྡོ་རྗེ་དྲི་དང་། རལ་གྲིའི་ཕྱག་རྒྱས་དབུལ་བར་བྱའོ། །རྡོ་རྗེ་ཁུ་ཚུར་གྱིས་སོར་མོ་རྣམས་བསྒུལ་ཞིང་རོལ་མོའི་ཕྱག་རྒྱས་ཡི་གེ་ཧཱུཾ་བརྗོད་ཅིང་དབུལ་བར་བྱའོ། །རོལ་མོ་དང་། གར་དང་། རྒྱན་དང་། ལག་གདུབ་དང་། 

73-1-272a

སོར་གདུབ་དང་། རྣ་རྒྱན་དང་། ཅོད་པན་ལ་སོགས་པ། ཨོཾ་བརྗོད་ཅིང་དབུལ་བར་བྱའོ། །གླང་པོ་ཆེ་དང་། བ་ལང་དང་། དེ་བཞིན་དུ་རྟ་བབས་དང་། གོས་བཟང་པོ་དང་། དྲིལ་བུ་དང་། རྔ་ཡབ་དབུལ་བར་བྱའོ། །ཨོཾ་སརྦ་བིད་པཱུ་ར་པཱུ་ར་ཨཱ་བརྟ་ཨཱ་བརྟ་ཧོ། དེ་ནས་རྡོ་
རྗེ་སོར་མོ་རྣམས་སྤྱི་བོར་བཞག་ལ། སྔོན་གྱི་ཨོཾ་བརྗོད་ཅིང་དབུལ་བར་བྱའོ། །བྱང་ཕྱོགས་སུ་ལས་ཀྱི་རྡོ་རྗེ་སློབ་དཔོན་གནས་ནས། དེ་ནས་ཁ་བཤལ་ལ། དཀྱིལ་འཁོར་གྱི་སྔོན་དུ་འདུག་སྟེ། ཡི་གེ་བཞི་པའི་སྔགས་སྟོང་ཕྲག་གཅིག་བཟླས་ཤིང་། དེ་བཞིན་དུ་དཀྱིལ་འཁོར་གྱི་ལྷ་རྣམས་
ཀྱིས་ཀྱང་བཟླས་པར་བྱའོ། །དཀྱིལ་འཁོར་གྱི་ཤར་ཕྱོགས་སུ་གདོང་ཕྱོགས་ནས། ལས་ཐམས་ཅད་པའི་ཐབ་ཏུ་དཀྱིལ་འཁོར་གྱི་ལྷའི་རྣལ་འབྱོར་དང་ལྡན་པས། མེ་ཏོག་དང་མར་མེ་རྣམས་ཡི་གེ་བཞི་པའི་སྔགས་ཀྱིས་བརྒྱ་རྩ་བརྒྱད་སྦྱིན་སྲེག་བྱ་སྟེ། དབང་ཕྱུག་ཆེན་པོས་གཙོ་བྱས་པའི་དཀྱིལ་འཁོར་
གྱི་ལྷ་ཐམས་ཅད་ལ་སྔགས་བདུན་བདུན་གྱིས་དབུལ་ལོ། །དེ་ནས་མེའི་ཐབ་ཏུ། རྡོ་རྗེ་འཛིན་པ་ཆེན་པོས་མེ་ཏོག་དང་སྤོས་ལ་སོགས་པ་དཀྱིལ་འཁོར་གྱི་ལྷ་ལ་དབུལ་ཞིང་། དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ། འདི་སྐད་ཅེས་བརྗོད་པར་བྱའོ། །བདག་ནི་སྡོམ་པ་ཀུན་དང་ལྡན། །དམ་
ཚིག་མགོན་པོས་རྗེས་སུ་བཟུང་། །ཕྱོགས་རྣམས་ཀུན་ན་བཞུགས་པ་རྣམས། །བདག་མིང་འདི་ཞེས་བགྱི་བ་ལ། །དཔང་པོར་གནས་པར་མཛད་དུ་གསོལ། །གསང་བའི་དཀྱིལ་འཁོར་ཆེན་པོ་འདིར། །སངས་རྒྱས་གར་མཛད་སྡོམ་པ་ལ། །འཁོར་ལོ་རབ་ཏུ་བསྐོར་བར་མཛོད། །རྣམ་པར་གྲོལ་བའི་
གྲོང་ཁྱེར་དུ། །མགོན་པོ་བདག་ནི་འཇུག་པར་འཚལ། །སློབ་དཔོན་ཆེན་པོ་ཁྱེད་ཀྱིས་ནི། །གསང་བ་ཆེན་པོའི་དཀྱིལ་འཁོར་དུ། །བདག་ནི་སྐལ་བར་ལྡན་པར་མཛོད། །དབང་བསྐུར་ཆེན་པོ་སྩལ་དུ་གསོལ། སློབ་དཔོན་བདག་ལ་སྦྱིན་པར་མཛོད། །མཚན་རྣམས་ཀུན་དང་ལྡན་པ་པོ། །
བདག་ནི་རྗེས་སུ་གཟུང་དུ་གསོལ། །སངས་རྒྱས་སྐུ་བདག་ཡིད་དགའ་བ། །གཏེར་མཛོད་སློབ་དཔོན་ཆེན་པོ་ཁྱོད། །དབང་བསྐུར་ཆེན་པོ་སྩལ་དུ་གསོལ། །སེམས་ཅན་ཀུན་གྱི་དོན་གྱི་ཕྱིར། །བདག་ཀྱང་སློབ་དཔོན་འགྱུར་བར་མཛད། །དེ་སྐད་དུ་སློབ་དཔོན་ལ་མཎྜལ་ཕུལ་ཏེ་ཞུ་བར་བྱའོ། །

73-1-272b

བདག་ནི་སློབ་དཔོན་འདི་ཞེས་པས། །བྱང་ཆུབ་སེམས་ཀྱིས་གཟུང་བར་བྱ། །གསང་བའི་དཀྱིལ་འཁོར་འདོད་པ་ལ། །དཀྱིལ་འཁོར་འདི་ནི་བསྟན་པར་བྱ། །དེ་ནས་སློབ་དཔོན་གྱིས་དྲི་བ། །སྐྱེས་བུ་ཆེན་པོ་ཁྱོད་འདོད་པ། །གསང་བའི་རིགས་ནི་དག་པས་ཏེ། །དག་པ་བཞད་མཛད་ཟབ་མོ་གཟུང་། །དེ་
ནས་འདི་སྐད་ཅེས་བརྗོད་པར་བྱའོ། །སློབ་མ་བདག་ནི་འདོད་དོ་ཞེས་བརྗོད་ལ། དེ་ནས་སློབ་དཔོན་དམ་ཚིག་དང་སྡོམ་པ་དང་ལྡན་པས། ཇི་ལྟར་བཀའ་སྩལ་པ་བཞིན་དུ་བདག་གིས་བགྱིས་ཏེ། དེ་ནས་བྱང་ཆུབ་ཀྱི་སེམས་བསྐྱེད་པ་དང་། འགྲོ་བ་དང་བསྟན་པ་ཐམས་ཅད་དུ། ཡང་དབང་
བསྐུར་བར་འདོད་ཀྱིས་སྡོམ་པ་མི་གཟུང་ངོ་ཞེ་ན། དེ་ལ་དཀྱིལ་འཁོར་ཀྱང་བསྟན་པར་མི་བྱ་ཞིང་དབབ་པར་མི་བྱའོ། །འགའ་ཞིག་སྡོམ་པ་དང་དམ་ཚིག་གཟུང་བར་འདོད་པ་ལ་ནི། སློབ་དཔོན་གྱིས་རྗེས་སུ་བཟུང་ཞིང་། དབང་སྦྱིན་པར་བྱའོ། །དེ་ནས་ཉེས་པ་འཇོམས་པར་བྱེད་པའི་སྔགས་
བརྗོད་དེ། ཨོཾ་སརྦ་ཡོ་ག་ཙིཏྟ་ཨུཏྤཱ་ད་ཡཱ་མི། སྔགས་འདི་བརྗོད་ལ་བྱང་ཆུབ་ཀྱི་སེམས་དང་ལྡན་པར་བྱའོ། །སློབ་མའི་སྙིང་གར་རྡོ་རྗེ་རབ་ཏུ་གནས་པར་བྱས་ལ། ཨོཾ་སུ་ར་ཏེ་ས་མ་ཡ་སྟྭཾ་ཧོ་བཛྲ་སིདྷྱ་ཡ་ཐཱ་སུ་ཁཾ། དེ་རིང་ཁྱོད་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབ་པར་
འགྱུར་ཏེ། དེ་རིང་ཁྱོད་དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་མཐོང་བར་འགྱུར་གྱིས། ཁྱོད་ཀྱིས་དཀྱིལ་འཁོར་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ། གུས་པ་དང་བྲལ་བ་རྣམས་ལ་ཡང་མ་ཡིན་ནོ། །དེ་ནས་སློབ་མས་ཡོན་ཕུལ་ལ། ཁྲོ་བོའི་རྒྱལ་
པོས་བྱིན་གྱིས་བརླབ་པར་བྱའོ། །དེའི་རྗེས་སུ་བརྟན་པར་གནས་པ་ལ། བུམ་པའི་ནང་ནས་ཆུ་བླངས་པས་གཏོར་ཞིང་མགོ་ཐོག་ཏུ་བཞག་པས་བསྲུང་སྟེ། ཁྲོ་བོའི་རྒྱལ་པོ་ཕྱག་རྒྱས་གོ་ཆ་བསྐོན་ལ། མེ་ཏོག་སྔོན་པོའི་ཐོད་བཅིང་ཞིང་། དཀྱིལ་འཁོར་བསྟན་པར་བྱའོ། །ཨོཾ་བཛྲ་དྷ་
རེ། དེ་ལས་གསང་བའི་སྔགས་ཀྱིས་དགུག་པར་བྱ་སྟེ། འདི་སྐད་ཅེས་བརྗོད་པར་བྱའོ། །མ་ཧཱ་སུ་ར་ཏ་སུ་དྲྀ་ཌྷ་སུ་ཏོ་ཤ་སྭཱ་ཧཱ། བཛྲ་སཏྭ་ཨརྠ་སི་དྷྱ་མཱཾ། ཡང་འདི་སྐད་ཅེས་བརྗོད་པར་བྱ་སྟེ། དེ་རིང་སངས་རྒྱས་རིགས་སུ་སྐྱེས། །དེ་རིང་རྡོ་རྗེའི་ཡེ་ཤེས་ཐོབ། །ཡེ་ཤེས་དེ་ཡིས་དེ་རིང་

73-1-273a

ཁྱོད། །དེ་བཞིན་གཤེགས་པ་ཐམས་ཅད་ཀྱི། །དངོས་གྲུབ་ཀྱང་ནི་ཐོབ་འགྱུར་ན། །གྲུབ་པ་གཞན་ལྟ་སྨོས་ཅི་དགོས། །དཀྱིལ་འཁོར་དམ་པ་ཁྱེད་ཀྱིས་མཐོང་། །མ་མཐོང་བ་ལ་སྨྲ་མི་བྱ། །གལ་ཏེ་ཁྱོད་ཀྱིས་འདི་སྨྲས་ན། །དམ་ཚིག་རྣམ་པར་འགྱུར་བ་ཡིན། །དབབ་པའི་
ཕྱག་རྒྱ་བཅས་ལ། དེ་སྐད་ཅེས་སློབ་མའི་མགོ་ཐོག་ཏུ་རྡོ་རྗེ་བཞག་ལ་སྨྲ་བར་བྱའོ། །འདི་ནི་དམ་ཚིག་རྡོ་རྗེ་སྟེ། །ཁྱོད་ཀྱིས་གལ་ཏེ་འདི་སྨྲས་ན། །ངེས་པར་མགོ་བོ་འགས་པར་འགྱུར། །དེ་ནས་དམ་ཚིག་གི་ཆུ་སྦྱིན་པར་བྱས་ཏེ། སྙིང་པོའི་སྔགས་བཟླས་སོ། །སློབ་མས་འཐུང་བའི་དུས་སུ་འདི་
སྐད་བརྗོད་པར་བྱ་སྟེ། དེ་རིང་རྡོ་རྗེ་སེམས་དཔའ་ནི། །ཁྱོད་ཀྱི་སྙིང་ལ་ཡང་དག་གནས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཨོཾ་ཏིཥྛ་སིདྡྷི་ཧཱུཾ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་རླག་པར་བྱེད། །དམ་ཚིག་བསྲུངས་ན་གྲུབ་པར་གྱུར། །རྡོ་རྗེ་
བདུད་རྩིའི་ཆུ་འཐུངས་ཤིག །རྡོ་རྗེ་དྲིལ་བུའི་ཕྱག་རྒྱ་སྤྱི་བོར་བཞག་ལ། གུས་པ་དང་ལྡན་པ་དང་མི་ལྡན་པའི་བསམ་པ་བརྟགས་ལ། སློབ་མ་ལ་འདི་སྐད་ཅེས་བརྗོད་པར་བྱ་སྟེ། དེ་རིང་ཕྱག་ཆོད་ཁྱོད་ཀྱི་རྡོ་རྗེ་འཛིན་པ་ང་ཡིན་ཏེ། ངས་ཇི་སྐད་བསྟན་པ་དེ་ཁྱོད་ཀྱིས་བྱ་དགོས་སོ། །དེ་ལྟ་མ་ཡིན་ན་ཁྱོད་ཡིད་
མི་བདེ་བ་ཆེན་པོ་དང་བཅས་ནས་ཚེའི་དུས་བྱས་ཏེ། དམྱལ་བར་འཇུག་པར་གྱུར་ཏ་རེ། དེ་ནས་རང་གི་སྙིང་གར་ཡི་གེ་ཨ་ལས་འོད་ཟེར་དམར་པོ་འཕྲོས་པས། སྒོ་དབྱེ་བའི་ཕྱག་རྒྱ་བཅས་ཏེ་སློབ་མའི་སྙིང་གའི་རྡོ་རྗེ་ལ་ཞུགས་ནས། ལུས་ཐམས་ཅད་ཁེངས་པར་བསམ་ཞིང་། དེ་ནས་འདི་སྐད་
བརྗོད་པར་བྱ་སྟེ། དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས། རྡོ་རྗེ་ཁྲོ་བོ་བདག་ལ་དབབ་པར་མཛད་དུ་གསོལ། དེ་ནས་དབབ་པའི་ཕྱག་རྒྱ་སྙིང་གར་བཅས་ལ། འདི་སྐད་ཅེས་བརྗོད་པར་བྱ་སྟེ། འདི་ལྟར་དམ་ཚིག་རྡོ་རྗེ་འདི། །རྡོ་རྗེ་སེམས་དཔའ་དྲན་པར་བྱ། །ངེས་པར་
ཁྱོད་ལ་འབབ་པར་འགྱུར། །རྡོ་རྗེ་ཡེ་ཤེས་རྗེས་སུ་སྒྲོལ། །ཨོཾ་པྲ་བེ་ཤ་བཛྲ་ཀྲོ་དྷ་ཧཱུཾ་ཧཱུཾ་ཧཱུཾ་ཨ། ཇི་ལྟར་ནམ་མཁའ་ལས་ཁྲོ་བོའི་དབང་པོས་འབེབས་པར་བསམ་ཞིང་སྔགས་དེ་བརྗོད་པར་བྱའོ། །དེས་ཀྱང་འབབ་པར་མ་གྱུར་ན། །དེ་ནས་ཁྲོ་བོ་དབབ་པའི་ཕྱག་རྒྱ་བཅས་ལ། སློབ་དཔོན་གཡོན་

73-1-273b

བརྐྱང་བས་གནས་ལ། རྡོ་རྗེ་འཛིན་པ་རྣམ་པར་སྣང་མཛད་ཀྱི་གཟུགས་སུ་བལྟས་ལ། སློབ་མའི་སྤྱི་བོར་གནས་པར་བསམས་ལ། འོད་ཟེར་གྱིས་ལུས་གང་བར་བསམ་ཞིང་། རླུང་གིས་རབ་ཏུ་གཡོས་པ་ལ་དམིགས་པ་གཏད་དེ། ཧཱུཾ་གིས་བྱིན་གྱིས་བརླབ་པར་བྱའོ། །རྡོ་རྗེ་སློབ་དཔོན་རང་ཉིད་མི་བསྐྱོད་
པའི་གཟུགས་སུ་གནས་པས། ཧཱུཾ་ཏྲཱཾཿཧྲཱིཿཨཿ། ས་བོན་འདི་རྣམས་འོད་ཟེར་འཕྲོས་པ། སློབ་མའི་ཁར་འཇུག་པར་བསམ་པར་བྱའོ། །ཨོཾ་པྲ་བེ་ཤ་ཀྲོ་དྷ་ཧཱུཾ་ཧཱུཾ་ཧཱུཾ་ཨཿཛྭ་ལཱ་མ་ལ་ཀུ་ལ་བ་ཁ་ན་བཛྲ་ཨ། དེས་ཀྱང་མི་འབབ་ན། སློབ་མ་སྡིག་པ་མང་པོ་བྱས་པས། སྡིག་པ་དྲལ་བའི་ཕྱག་རྒྱ་བཅས་ལ། 
སྡིག་པ་གཞོམ་པར་བྱས་ཏེ། བཅོམ་ལྡན་འདས་རྡོ་རྗེ་འཛིན་པ་སྐུ་མདོག་དམར་པོ། འོད་ཟེར་དམར་པོ་ཀུན་ནས་འབར་བའི་ཕྲེང་བས་བསྐོར་བ་བསམ་པར་བྱས་ལ། ཧཱུཾ་ཨཱཿསྔགས་འདི་མང་དུ་བཟླས་པར་བྱའོ། །དེས་ཀྱང་འབབ་པར་མ་གྱུར་ཀྱང་། དབང་བསྐུར་བ་ནི་སྦྱིན་པར་བྱའོ། །དེའི་ཚེ་འབབ་
པར་གྱུར་ན་མངོན་པར་ཤེས་པ་ལྔ་དང་ལྡན་པར་འགྱུར་རོ། །དེའི་བབས་པར་གྱུར་ན། ལྕེ་ལ་རྡོ་རྗེ་བསམས་ལ་འདི་སྐད་ཅེས་བརྗོད་པར་བྱ་སྟེ། འདས་པ་དང་། མ་འོངས་པ་དང་། ད་ལྟར་བྱུང་བ་ཐམས་ཅད་སྨོས་ཤིག་ཅེས་བརྗོད་པས་སྨྲ་བར་འགྱུར་རོ། །དེ་ནས་སྙིང་གར་རྣམ་པར་གྲོལ་བའི་ཕྱག་
རྒྱ་བཅས་ལ། ཏིཥྛ་བཛྲ་དྲྀ་ཌྷོ་མེ་བྷ་བ་ཤ་ཤྭ་ཏོ་མེ་བྷ་བ། ཧྲྀ་ད་ཡ་མེ་ཨ་དྷི་ཏིཥྛ་སརྦ་སིདྡྷི་མྨེ་པྲ་ཡཙྪ་ཧཱུཾ་ཧ་ཧ་ཧ་ཧ་ཧོཿའདིས་ཡེ་ཤེས་བརྟན་པར་བྱས་ལ། དེ་ནས་ཡི་གེ་ཏྲཱཾ་གིས་བྱིན་གྱིས་བརླབས་ལ། དཀྱིལ་འཁོར་བསྟན་པར་བྱ་སྟེ། པྲ་ཏཱིཙྪ་བཛྲ་ཧོ། དེ་ནས་སློབ་མའི་མགོ་བོ་ལ་མེ་ཏོག་ཕྲེང་བ་བཅིངས་
ཤིང་། སེམས་ཅན་སྟོབས་ཆེན་ཁྱོད་ཀྱིས་ནི། །འདི་ཉིད་ཡང་དག་གཟུང་བར་བྱ། །དེ་ནས་གདོང་གཡོགས་བཀྲོལ་ཞིང་། དེ་རིང་རྡོ་རྗེ་སེམས་དཔའ་རང་། །ཁྱོད་ཀྱི་མིག་ནི་འབྱེད་པར་བརྩོན། །རྡོ་རྗེའི་མིག་ནི་བླ་ན་མེད། །ཕྱེ་བས་མཆོག་ཏུ་གྱུར་པ་ཡིན། ཧ་བཛྲ་པཱ་ཤྱ། དེ་ནས་ཡི་གེ་ཨཾ་དང་ཧཱུཾ་
གིས་མིག་གཉིས་བྱིན་གྱིས་བརླབས་ལ། པདྨ་ཝ་ཏིའི་ཏིང་ངེ་འཛིན་གྱིས་དཀྱིལ་འཁོར་གྱི་འཁོར་ལོ་བརྟན་པར་བྱ་སྟེ། དེ་ནས་གསུང་གི་དཀྱིལ་འཁོར་གྱི་ཕྱེད་ཀྱི་ཚད་ཀྱིས་སྙིང་པོའི་དཀྱིལ་འཁོར་གྲུ་བཞི་པ་སྒོ་རྩིག་པ་ཁ་དོག་ལྔ་དང་ལྡན་པ། ལྟེ་བ་ལ་པདྨ་འདབ་མ་བརྒྱད་པ་འོད་ཟེར་གྱི་ཕྲེང་བས་

73-1-274a

ཀུན་ནས་བསྐོར་བ། རྩ་བའི་དཀྱིལ་འཁོར་གྱི་ལྟེ་བ་ལ་གླང་པོ་ཆེའི་རྒྱལ་པོའི་སྟེང་དུ་འབྱུང་པོ་གཞན་གྱིས་མི་ཐུབ་པའི་སྟེང་ན་ཉེས་པ་ཐམས་ཅད་འཇོམས་པར་བྱེད་པའི་ཁྲོ་བོའི་རྒྱལ་པོ་ལག་པ་དཀྱིལ་འཁོར་གྱི་ལྷ་བལྟས་ལ། དེ་ནས་སློབ་དཔོན་གྱི་དབང་བསྐུར་བའི་དོན་དུ་སློབ་མ་བཀྲ་ཤིས་
ལ་བསྐོར་བ་གསུམ་སྟེ། བཀྲ་ཤིས་ལ་སོགས་པ་ཡང་རྡོ་རྗེ་འཛིན་པས་བྱ་སྟེ། དམ་ཚིག་གི་ཕྱག་རྒྱ་དང་། སྔགས་ཀྱིས་གནས་དྲུག་ཏུ་བྱིན་གྱིས་བརླབས་པར་བྱས་ཏེ། རོལ་པའི་འདུག་སྟངས་ཀྱིས་གནས་པ་ལ། གཞན་གྱིས་མི་ཐུབ་པའི་འབྱུང་པོ་གཞན་རྣམས་ཀྱིས་ཀྱང་ཡི་གེ་ཧཱུཾ་གི་སྒྲ་སྒྲོགས་
ཤིང་། གདུགས་དང་རྒྱལ་མཚན་དཀར་པོ་དང་། གླིང་བུ་དང་། ཨོཾ་བཟླས་ཤིང་ཁ་དོག་སྣ་ཚོགས་པའི་རྒྱན་དང་། རྔ་ཡབ་དང་། དེ་དག་ལ་སོགས་པ་དཔག་ཏུ་མེད་པའི་ཚོགས་པ་དང་། མེ་ཏོག་ལ་སོགས་པས་ཀྱང་མཆོད་དེ། དུང་དང་རྔ་རིངས་དང་། རྔ་ཟླུམ་དང་། རྔ་ཆུང་དང་། དེ་དག་ལ་
སོགས་པའི་རོལ་མོ་དཔག་ཏུ་མེད་པ་དང་། གར་དང་། གླུ་དང་། བཀྲ་ཤིས་ཀྱི་ཚིགས་སུ་བཅད་པ་བརྗོད་ཅིང་། བསྟོད་པའི་ཚོགས་ཀྱིས་ཀྱང་བསྟོད་ལ། སྒོ་སྐྱོང་གི་འགྲམ་ནས་བུམ་པ་བླངས་ལ། བཅོམ་ལྡན་འདས་ཀྱི་བུམ་པས། སྤྱི་བོར་དབང་བསྐུར་ཞིང་ཆུའི་
ཀྱང་གཏོར་ལ་དབང་བསྐུར་བར་བྱའོ། །ཨོཾ་བྷཱུཿཤྲཱི་སིདྡྷ་དྷྭ་ཛ་ཤོ་དྷ་ནི་ནི་ཧྲཱིཿབཛྲ་ཨ་བྷི་ཥིཉྩ། དེ་ནས་འགྲོ་བ་ལ། ཧཱུཾ་བཛྲ་ཕཊ། བཛྲ་ཨ་བྷི་ཥིཉྩ་ཨཱཿ། བཅོམ་ལྡན་འདས་ཀྱིས་རྣམ་པར་རྒྱལ་བའི་ཆུས་ཀྱང་དབང་བསྐུར་བར་བྱའོ། །ཧཱུཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་མི་དྲྀ་ཌྷོ་མེ་བྷ་བ་ཛཿཧཱུཾ་བཾ་
ཧོཿཧཱུཾ་ཕཊ། འདིར་ཇི་ལྟར་དབང་བསྐུར་བས། ཆུས་བཏུང་བར་འགྱུར་རོ། །བུམ་པའི་དབང་བསྐུར་བ་འདིའོ། །དེ་ནས་རིན་པོ་ཆེ་ལ་སོགས་པའི་རྒྱན་གྱིས་བརྒྱན་ལ། ཕྱག་རྒྱ་དང་། ཅོད་པན་དང་། དར་དཔྱངས་དང་། རྡོ་རྗེ་དང་། ཡི་གེས་དབང་བསྐུར་བ་དང་རྡོ་རྗེ་བདག་པོའི་དབང་བསྐུར་
བ་དང་། དྲིལ་བུ་ལ་སོགས་པ་རྣམས་མཆོད་པར་བྱ་སྟེ། སློབ་མས་ཀྱང་སྟོབས་ཀྱིས་ཅི་འབྱོར་པའི་ཡོན་འབུལ་བ་དང་ཕྱག་བྱས་ལ་དབང་གི་དོན་དུ་མེ་ཏོག་དབུལ་ཞིང་། དེ་ནས་གྲུབ་པའི་རྡོ་རྗེའི་བཀའ་དྲིན་སྦྱིན་པར་བྱ་སྟེ། ཁྲོ་བོའི་གཟུགས་ཀྱིས་གསང་བའི་གནས་སུ་བསྟན་ཅིང་། དེ་ནས་དྲག་པོའི་

73-1-274b

ཉེས་པ་འཇོམས་པར་བྱེད་པའི་ཤེས་རབ་དང་ཐབས་ཀྱིས། རྡོ་རྗེ་དབྱིངས་ཀྱི་དེ་ཉིད་ལས། རྡོ་རྗེའི་རིགས་ཀྱིས་སེམས་ཅན་ཐམས་ཅད་ཀྱི་དོན་དུ། ཐམས་ཅད་གྲུབ་པ་ལ་དགོད་པའི་ཕྱིར། ཐབས་དང་ཤེས་རབ་ལས་རྫོགས་པའི་ཁྲོ་བོ་ཆེན་པོའི་གཟུགས་སུ་གྱུར་ཏེ། དེ་ནས་གསེར་གྱི་བདག་ཉིད་ཀྱི་ཐུར་མ་
ལ་བཟླས་པར་བྱ་སྟེ། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་བསལ་བ་ལྟར། །དེ་བཞིན་བུ་ཁྱོད་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནེ་ཏྲ་ཨ་པ་ཧཱ་ར་པ་ཊ་ལཾ་ཧྲཱིཿ སློབ་མའི་མིག་ཐུར་མ་དང་བཅས་པས་བསལ་བར་བྱའོ། །དེ་ནས་མེ་ལོང་བསྟན་ལ། ཨཱཿབཛྲ་
སཏྭ། ཞེས་བྱ་བའི་སྔགས་བརྗོད་ཅིང་། མེ་ལོང་ནང་གི་གཟུགས་བརྙན་འདི། །རྡོ་རྗེ་སེམས་དཔའི་རང་བཞིན་ཏེ། །བྱང་ཆུབ་སེམས་འདི་དྲི་མ་མེད། །ཁྱོད་ཀྱི་སྙིང་ལ་བརྟན་པར་གནས། །སངས་རྒྱས་ཀུན་གྱི་རང་བཞིན་ཅན། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་དྲི་མ་
མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལ་ཀུན་དུ་འབྱུང་། །ཆོས་རྣམས་དེ་ལྟར་ཤེས་པར་གྱིས། །རང་བཞིན་དྲི་མས་མ་གོས་པ། །སེམས་ཅན་དོན་ནི་ཁྱོད་ཀྱིས་གྱིས། །ཞེས་བརྗོད་ལ། དེ་ནས་ཨཱཿལས་སྐྱེས་པའི་དྲིལ་བུ་ཆོས་ཀྱི་སྒྲ་དང་ལྡན་པར་དཀྲོལ་ལ། དེ་ནས། རང་བཞིན་དག་པའི་ངོ་
བོ་ཉིད། །ཡོད་དང་མེད་པའི་ངོ་བོ་སྤངས། །རང་བཞིན་དག་པའི་སེམས་དཔའ་ཆེ། །རང་བཞིན་མཆོག་གི་སྤྱོད་པ་ཅན། །དེ་ནས་ཧོཿཞེས་བརྗོད་ལ་དྲིལ་བུ་སྦྱིན་པར་བྱའོ། །དེའི་རྗེས་སུ་མདའ་དང་གཞུ་བྱིན་ལ། དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པ། ཕྱོགས་བཞིར་འབིགས་པའི་ཚུལ་དུ་
བྱའོ། །སྟེང་དང་འོག་ཏུའང་དེ་བཞིན་ནོ། །དེ་ནས་རྡོ་རྗེ་དང་། ཆོས་ཀྱི་འཁོར་ལོ་རྣམས་རྐང་པའི་འོག་ཏུ་བྱིན་ལ། རཾ་ཡཾ་ཁཾ་རལ་གྲི་ཡང་ལག་པར་བྱིན་ལ། འདི་སྐད་ཅེས་བརྗོད་པར་བྱའོ། །དེ་རིང་བྱང་ཆུབ་སེམས་བསྐྱེད་ནས། །ཆོས་ཀྱི་འཁོར་ལོ་བསྐོར་བར་བྱོས། །ཆོས་ཀྱི་དུང་ནི་རྗེས་སུ་བུས། །དོན་
ལ་འཇིགས་པར་མི་བྱ་ཞིང་། །སེམས་ནི་རྟོག་པ་མེད་པར་བྱོས། །འཇིག་རྟེན་ཐམས་ཅད་གསལ་བའི་ཕྱིར། །སྔགས་ཀྱི་སྤྱོད་པ་རྗེས་སུ་སྤྱོད། །དེ་ལྟར་བྱས་ན་དེ་དག་ཀྱང་། །སངས་རྒྱས་ཀྱི་བཀའ་སྩལ་པ་དང་ལྡན་པས་སོ། །དེ་ནས་རྡོ་རྗེ་འཛིན་པས་བསྲུང་བ་བྱ། འདིར་དེ་ཁོ་ན་ཉིད་དེ་བཞིན་གཤེགས་པ་རྡོ་

73-1-275a

རྗེ་སེམས་དཔའ་ཧཱུཾ་གི་ཡི་གེ་འཇིག་རྟེན་དབང་ཕྱུག་དང་། ནམ་མཁའི་སྙིང་པོའི་ང་རྒྱལ་དུ་རིམ་པར་བྱ་སྟེ། སྐད་ལྔས་བརྗོད་པར་རྗེས་སུ་བྱིན་ལ། སེམས་ཅན་ཀུན་གྱི་དོན་གྱི་ཕྱིར། །སེམས་ཅན་ཐམས་ཅད་ཀུན་ལ་ཡང་། །ཇི་ལྟ་རྣམ་པར་རྗེས་སུ་དག །ཆོས་ཀྱི་འཁོར་ལོ་རབ་ཏུ་བསྐོར། །དེ་ནས་འདི་
ལྟར་ཁྲོ་བོ་ཡི། ནོར་བུ་དང་འཁོར་ལོ་འདིར་ཚིགས་སུ་བཅད་པ་བཞིས་བརྗོད་པར་བྱ་ཞིང་། དེ་ནས་སྙིང་པོའི་སྔགས་བརྗོད་ལ་བྱིན་ཞིང་། སྒྲུབ་ཐབས་དང་། ཆོ་ག་ཕྱག་རྒྱ་བཞིའི་ཡེ་ཤེས་སློབ་མ་ལ་བསླབ་ཅིང་། རྡོ་རྗེ་ལག་པར་སྦྱིན་ཞིང་། ཕྱག་རྒྱ་བཅས་ལ་སློབ་མ་ལུང་བསྟན་པར་བྱ་སྟེ། འདི་ལྟར་ཁྱོད་ལ་ལུང་
བསྟན་པ། །རྡོ་རྗེ་སེམས་དཔའ་དེ་བཞིན་གཤེགས། །ངན་སོང་ལས་ནི་སྒྲོལ་བར་བྱོས། །གྲུབ་པའི་གནས་ལ་ཐམས་ཅད་འཁོད་དེ། ཧེ་བཛྲ་ནཱ་མ་ཏ་ཐཱ་ག་ཏ་སིདྡྷ་ས་མ་ཡ་བྷུརྦྷཱུ་ཝ་སྭཿ དེ་བཞིན་གཤེགས་པའི་གཟུགས་སུ་བལྟས་ལ། ལག་པ་གཡོན་པས་སྣམ་སྦྱར་རྣ་མཆོག་ལྟར་བྱས་ལ། གཡས་པ་མི་
འཇིགས་པ་སྦྱིན་པའི་ཕྱག་རྒྱ་བྱས་ཏེ། དེ་བཞིན་གཤེགས་པའི་རིགས་ཀྱི་དམ་ཚིག་ལ་གནས་པས། །བལྟ་བ་བསྟན་པ་མཆོག་ཏུ་བཞེད་མཛད་དཀྱིལ་འཁོར་འདིར། །སྡིག་པ་ཐམས་ཅད་གྲོལ་ཞིང་དྲི་མ་མེད་པ་ཁྱོད་ནི་བསྒོམ་པ་ཀུན་ལ་བསྟན་པར་མཛོད། །ཁྱོད་ལ་འཆི་མེད་བདེ་ཆེན་ཐེག་པའི་མཆོག །འཇིགས་
མེད་རྩོད་བྲལ་དགའ་བའི་གྲོང་ཁྱེར་འདི། །སྡུག་བསྔལ་ཀུན་ལས་ངེས་པར་གྲོལ། །རང་བཞིན་གྲུབ་པ་དམ་པ་ནི། །ཁྱོད་ཀྱིས་ངེས་པར་བསྲུང་བར་བྱོས། །དམ་ཚིག་ལྡན་ན་གྲུབ་པར་འགྱུར། །སངས་རྒྱས་ཀུན་གྱི་དམ་ཚིག་ནི། །ཡེ་ཤེས་བདེན་པའི་དོན་ལ་གནས། །བྱང་ཆུབ་སེམས་ནི་དེ་རིང་བསྐྱེད། །
དེ་རིང་རྡོ་རྗེའི་དམ་ཚིག་ནི། །ཇི་ལྟར་བསྐྱེད་པ་དེ་མ་ཐག །འདི་ལྟར་ཐམས་ཅད་སངས་རྒྱས་འགྱུར། །ཆོས་ལ་བསྐོར་ཞིང་བཟོད་པ་ཡི། །བཟོད་པ་དང་ནི་མི་ལྡན་ན། །མི་ཤེས་རྨོངས་པའི་རང་བཞིན་འགྱུར། །བརྟགས་ཤིང་དཔྱད་པར་མི་འགྱུར་རོ། །བདག་དང་བྲལ་བར་མ་གྱུར་པར། །ནམ་དུའང་བདེ་བ་མི་རྙེད་
དེ། །འཛིན་པའི་བདེ་བ་བདེ་བ་མིན། །ཡང་དག་ཡིད་དུ་འོང་བ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ནམ་དུ་ཡང་ནི་མི་གཏོང་ངོ་། །སློབ་དཔོན་མིང་གིས་རྗེས་བཟུང་བ། །སངས་རྒྱས་ཀུན་དང་མཉམ་པ་ཡིན། །ཇི་ལྟར་རྡོ་རྗེ་སློབ་དཔོན་ནི། །སངས་རྒྱས་ཐམས་ཅད་དམ་ཚིག་བླ། །སངས་རྒྱས་ཀུན་གྱི་ཐུགས་དང་ནི། །

73-1-275b

སློབ་དཔོན་ལ་ཁྲོས་འགལ་བར་འགྱུར། །རིམས་དང་དེ་བཞིན་དུག་དང་ནི། །གདོན་དང་མཁའ་འགྲོ་མ་རྣམས་ཀྱིས། །འཇིགས་པ་ཉེ་བར་སྐྱེད་པ་ཡིན། །དུག་དང་ལོག་པར་འདྲེན་པ་དང་། །འཆི་བའི་འཇིགས་པ་ཉེ་བར་བསྐྱེད། །ཤི་ནས་དམྱལ་བར་སྦྱར་བར་འགྱུར། །དེ་ནས་རྩོལ་བ་ཆེན་པོ་ཡིས། །རྡོ་རྗེ་
སློབ་དཔོན་བླ་མ་ཆེ། །མཆོག་ཏུ་གུས་པས་མཉེས་པར་བྱ། །ནམ་དུའང་ཁྲོ་བར་མི་བྱ་སྟེ། །ཇི་ལྟར་འབྱོར་པའི་སྟོབས་ཀྱིས་སུ། །བླ་མ་མཉེས་ཤིང་མཆོད་པར་བྱ། །ཇི་ལྟར་རྒས་པ་ལ་སོགས་པས། །ཉེས་པ་གང་ཡང་མི་འབྱུང་བ། །དེ་ལྟར་བླ་མ་མཉེས་པར་བྱ། རྟག་ཏུ་དམ་ཚིག་སློབ་དཔོན་ལ། །གུས་
པས་ལུས་ཀྱིས་བསྙེན་བཀུར་བྱ། །ཇི་ལྟར་བུ་དང་ཆུང་མ་དང་། །མ་ལུས་ཕུལ་ནས་མཉེས་བྱ་ན། །ལོངས་སྤྱོད་གཡོ་བ་སྨོས་ཅི་དགོས། །བསྐལ་པ་བྱེ་བས་རྙེད་དཀའ་བའི། །སངས་རྒྱས་སྟེར་བའི་བླ་མ་ལ། །གུས་པས་བསྙེན་བཀུར་བསྒྲུབ་པར་བྱ། །བླ་མ་མཆོག་ལ་ཕུལ་བ་ནི། །སངས་རྒྱས་ཀུན་ལ་
ཕུལ་དང་མཉམ། །དེ་ལྟའི་བསོད་ནམས་སྡོམ་པ་ནི། །སྡོམ་པ་བསོད་ནམས་ཀུན་གྱི་མཆོག །རྟག་ཏུ་དམ་ཚིག་ལ་གནས་ཤིང་། །རྟག་ཏུ་དེ་བཞིན་གཤེགས་པ་མཆོད། །རྟག་ཏུ་བླ་མ་ལ་ཕུལ་ཞིང་། །སངས་རྒྱས་ཀུན་དང་མཉམ་པ་ཡི། །འབྲས་བུ་ཚེ་འདིར་སྟེར་བར་འགྱུར། །ཇི་ལྟར་བསྟན་པའི་དམ་ཚིག་
ནི། །རྟག་ཏུ་ལྷ་དང་དམ་ཚིག་བརྟན། །དེ་རིང་སངས་རྒྱས་རིགས་སུ་སྐྱེས། །ཚེ་འདིའི་འབྲས་བུ་ཁྱོད་ཀྱིས་ཐོབ། །སངས་རྒྱས་ཀུན་གྱི་རྡོ་རྗེའི་བདག །འཇིག་རྟེན་གསུམ་གྱི་རྒྱལ་པོ་སྟེ། །རྒྱལ་པོ་ཆེན་པོར་འགྱུར་བ་ཡིན། །དེ་རིང་བདུད་རྣམས་ཀུན་ལས་རྒྱལ། །མཆོག་གི་གྲོང་ཁྱེར་ཆེན་པོར་ཞུགས། །སངས་རྒྱས་
མཆོག་ཏུ་ཁྱེད་གྱུར་ཏོ། །དེ་ནས་སློབ་མས་བསྐོར་བ་བྱ་སྟེ། སློབ་མའི་ལག་པ་གཡས་པའི་མཐེ་བོང་སློབ་དཔོན་གྱིས་བཟུང་ལ། གཡོན་པར་ཆུ་བླུགས་ཏེ། མར་གྱི་སྦྱིན་སྲེག་སྦྱིན་ཞིང་། སྦྲང་རྩི་དང་། མར་དང་། ཞོ་དང་། ཏིལ་དང་། ཐམས་ཅད་བསྲེས་པའི་སྦྱིན་སྲེག་དབུལ་ཞིང་། བསྐོར་བ་ཡང་བྱས་ལ། 
ཕྱག་བཙལ་ཞིང་། ཤར་སྒོར་ཕྱིན་ལ་འདི་སྐད་ཅེས་བརྗོད་པར་བྱ་སྟེ། བདག་གི་སློབ་མ་འདི་རུ་ནི། །རྒྱུད་རྣམས་ཀྱི་ནི་འཛིན་པའོ། །སངས་རྒྱས་བྱང་ཆུབ་སེམས་དཔའ་རྣམས། །ལྷ་ལ་དམ་ཚིག་ལྡན་པ་ནི། །དེ་ལ་འདི་སྐད་བརྗོད་པ་འདི། །སེམས་ཅན་རྗེས་སུ་གཟུང་བའི་ཕྱིར། །རྩོལ་བས་དཀྱིལ་འཁོར་

73-1-276a

ཆེན་པོ་འདི། །འབད་པ་དང་བཅས་བྲིས་པ་འདི། །སྒྲུབ་པ་པོ་རྣམས་གྲུབ་དོན་དུ། །དེ་ནས་ཕྱི་རོལ་ཏུ་གཏོར་མ་བྱིན་ལ། མཆོད་ཡོན་དང་ཞབས་བསིལ་ཡང་ཕུལ་ཏེ། ཇི་ལྟར་འབྱོར་པའི་སྟོབས་ཀྱིས་མཆོད་པ་རྒྱ་ཆེན་པོ་ཕུལ་ལ། ཇི་ལྟར་འབྱོར་པའི་བཟའ་རྒྱུ་ལ་ལོངས་སྤྱད་དེ། ཕུལ་ནས་དཀྱིལ་
འཁོར་གྱི་ལྷ་རྣམས་ལ་མཆོད་ལ། བཅོམ་ལྡན་འདས་ལ་མཆོད་ཡོན་ཡང་ཕུལ་ཏེ། སྒྲུབ་ཐབས་ལས་བྱུང་བ་ལྟར་བསྒོམ་ལ། དཀྱིལ་འཁོར་ལ་བསྐོར་བ་ཡང་བྱས་ཏེ་ཕྱག་འཚལ་ལོ། །ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་
བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་ཝཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ། མ་ཧཱ་ས་མ་ཡ་སཏྭ་ཨཱཿའདི་ལན་གསུམ་བརྗོད་ལ། ཨོཾ་ཧཱུཾ་ཀཱ་ར་ཇི་ལྟར་འདོད་ན་འདི་ཡང་བདེན་པར་བྱའོ། །ཡི་གེ་ཧཱུཾ་བརྗོད་ཅིང་གཤེགས་སུ་གསོལ་ཏེ། རྡུལ་
ཚོན་དྲི་མ་མེད་པ་ཆུ་བོའི་གཞུང་དུ་དོར་བར་བྱ་ཞིང་། ཡི་གེ་ཧཱུཾ་བརྗོད་ཅིང་ཕུར་པ་ཡང་བསྡུ་བར་བྱ་ཞིང་འོ་མ་དང་དྲི་བཟང་པོ་དང་ལྡན་པའི་ཆུས་བཀྲུ་བར་བྱའོ། །ཕུར་པའི་ཁུང་བུ་ཡང་དྲི་བཟང་པོ་དང་འོ་མས་བཀང་ལ། སློབ་མ་དང་ས་སྐྱོང་བའི་དོན་དུ་ཞི་བའི་སྦྱིན་སྲེག་བྱའོ། །ལྷ་མཉེས་པར་བྱ་བའི་དོན་དུ་སྦྱིན་སྲེག་
གི་ཐབ་ཟླུམ་པོ་ཁྲུ་གང་པ། ཐུར་དུ་ཡང་སོར་ཉི་ཤུ་བརྐོས་ཏེ། ལྟེ་བ་ལ་སོར་མོ་བརྒྱད་ལ་རྡོ་རྗེ་རྩེ་མོ་ལྔ་པས་མཚན་པ། ཐབ་ཀྱི་ཕྱི་རོལ་དུ་སོར་མོ་བཞི་དོར་བའི་དེ་དང་མཉམ་པའི་ཁ་ཁྱེར་སོར་བཞི་པ། ལས་བཞིན་དུ་བྱུགས་ཏེ། མེ་ཏོག་སིལ་མ་དང་ཕྲེང་བས་ཀྱང་གཏོར་ལ། དགང་བླུགས་གསེར་རམ་ཟངས་ལས་ཀྱང་
རུང་སྟེ། གཞན་ནིམ་པའི་ཤིང་ངམ། མཆོད་སྦྱིན་གྱི་ཤིང་ལས་ཀྱང་རུང་སྟེ། དབྱུག་པ་སོར་བཅུ་པ་དེའི་སྔོན་དུ་གྲུ་བཞི་པ་དམའ་བ་སོར་གཉིས་པ་རྡོ་རྗེ་རྩེ་ལྔ་པས་མཚན་པ། བཅུད་འཛག་པའི་ལམ་མཐེའུ་ཆུང་གི་ཚད་ཙམ། རྡོ་རྗེ་རྩེ་མོ་གསུམ་པ་སོར་བཞིའི་ཚད་ཙམ་མོ། །བླུགས་གཟར་པདྨའི་འདབ་
མ་དང་ལྡན་པ། རྒྱར་སོར་གཉིས་པ། ཞབས་སུ་སོར་མོ་གཅིག་པ། རྡོ་རྗེ་རྩེ་མོ་གསུམ་པས་མཚན་པ། ཐབས་ཀྱི་རང་བཞིན་རྡོ་རྗེ་ཁུ་ཚུར་གྱིས་མཚན་པའི་ཡུ་བ་དང་བཅས་པ་དབྱུག་པའི་རྩེ་མོར་སོར་དྲུག་པའི་རྡོ་རྗེའམ་རིན་པོ་ཆེ་ཁྲུ་གང་གིས་དགང་གཟར་དང་བླུགས་གཟར་གྱི་ཚད་དོ། །དེ་ཡང་ཤིང་

73-1-276b

པཱ་ལ་ཤའམ། སེང་ལྡེང་ངམ། ཤིང་ཨརྐའམ། ཤིང་ནྱ་གྲོ་དྷའམ། ཤིང་བྷི་ཀ་ཏའམ། ཤིང་ཨ་མྲའམ། ཤིང་ས་མིའམ། ཤིང་གོང་སྲུང་ངམ། ཤིང་ཨ་པ་མརྒའམ། བྱང་ཆུབ་ཀྱི་ཤིང་ངམ། ཤིང་ཨུ་དུམྺཱ་རའམ། དེ་དག་སོ་སོར་བྱས་ལ། གསར་པ་དང་། འདབ་མ་དང་ལྡན་པ་སྔོན་བླངས་
ལ། སོར་བཅུ་གཉིས་པ། རྩེ་མོ་གཉིས་ལ་དྲི་ཞིམ་པོའི་ཆུས་བསངས་ལ། ལས་ཐམས་ཅད་པའི་དོན་དུའོ། །ཇི་ལྟར་ཞི་བ་དང་རྒྱས་པའི་དོན་དུ་དབུལ་བར་བྱའོ། །ཇི་ལྟར་རང་གི་འབྱོར་པའི་ལོངས་སྤྱོད་ཐམས་ཅད་ཀྱང་དབུལ་ཞིང་། སྭཱ་ཧཱའི་སྔགས་ཀྱི་མཐའ་དང་བཅས་པས། རྟག་ཏུ་མར་དང་། གུ་གུལ་
དང་འབྲས་ཁར་མ་དང་བཅས་པ་སྔགས་ཀྱིས་དབུལ་བར་བྱའོ། །དྲི་དང་མེ་ཏོག་ལ་སོགས་པ་ཅི་འབྱོར་པ་ཇི་ལྟར་སྔགས་བཟླས་པ་བཞིན་དུ། མཆོད་སྦྱིན་གྱི་ཤིང་ལ་སོགས་པ་འབུས་མ་ཟོས་ཤིང་དྲི་མ་མེད་ཅིང་གཙང་བས་སོ། །ཇི་ལྟར་བུད་ཤིང་མ་འབྱོར་ན་ནགས་ཀྱི་དགོན་པའི་ལྕི་བ་ལ་བྱའོ། །བ་ལང་གི་ལྕི་
བ་མ་གཏོགས་པ་ཐམས་ཅད་ནི་རྒྱས་པའི་ལས་ལ་རུང་ངོ་། །རོ་ཚ་བ་དང་། ཚེར་མ་ཅན་དང་། དྲི་མི་ཞིམ་པ་དང་། དུར་ཁྲོད་དུ་སྐྱེས་པའི་ནིམ་པའི་ཤིང་དང་། བོང་བུ་དང་རྔ་མོའི་རྟུག་པ་དང་། དེ་དག་གི་བུད་ཤིང་ནི་བསད་པ་དང་། བསྐྲད་པ་ལའོ། །ནིམ་པ་དང་། ཨ་བྷཱའི་མེ་ཏོག་དང་གཞན་མེ་ཏོག་
ནི་ལས་ཐམས་ཅད་པའི་དོན་དུའོ། །དེ་ནས་ཁྲུས་བྱས་ལ་ལས་དང་མཐུན་པའི་རྒྱན་གྱིས་བརྒྱན་ཏེ། ལས་དང་མཐུན་པའི་ལྷའི་ང་རྒྱལ་བྱས་ལ། པདྨ་ལ་སོགས་པའི་འདུག་སྟངས་ཀྱིས་འདུག་སྟེ། སྔོན་དུ་བརྗོད་པའི་སྔགས་སྭཱ་ཧཱ་ལ་སོགས་པའི་མཐའ་དང་ལྡན་པས། ཞི་བ་ལ་སོགས་པ་ལ་བརྗོད་དོ། །
ཉེས་པ་འཇོམས་པར་བྱེད་པའི་སྔགས་བརྗོད་ཅིང་ལས་གང་ཡང་རུང་བའི་སྔགས་བཟླས་པར་བྱ་སྟེ། མཆོད་ཡོན་གྱི་སྔགས་གཡོན་དུ་གཞག་པར་བྱའོ། །སྦྱིན་སྲེག་གི་རྫས་ཐམས་ཅད་སྔགས་བདུན་གྱིས་བྱིན་གྱིས་བརླབས་ཏེ་གཡས་སུ་གཞག་པར་བྱའོ། །དྲག་པོའི་ལས་ལ་གོ་བཟློག་པས་
སོ། །དེ་ཡང་འོ་མ་ཅན་གྱི་ཤིང་ལ་མེ་གཙུབ་པའི་མེ་བཏོན་པ་སྤང་བར་བྱ་སྟེ། ཞི་བའི་དོན་དུའོ། །གཞན་ཡང་བྲམ་ཟེའི་ཁྱིམ་ནས་བླངས་པའི་མེ་ལས་ཀྱང་རུང་ངོ་། །གཞན་དགེ་འདུན་ལས་ཀྱང་རུང་ངོ་། །རྒྱལ་པོ་དང་། རྗེ་རིགས་དང་། ནགས་ཀྱི་མེ་འམ། དགེ་འདུན་གྱི་མེ་ཡིས་ནི་རྒྱས་པའོ། །

73-1-277a

པའོ། །དུར་ཁྲོད་ཀྱི་མེའི་རུས་པའམ། རོ་བསྲེགས་པའི་མེའམ། གདོལ་པའི་ཁྱིམ་གྱི་མེ་ཡིས་ནི་དྲག་པོའི་ལས་ལའོ། །སྨད་འཚོང་མའི་ཁྱིམ་ནས་བླངས་པའི་མེ་ཡིས་ནི་དགུག་པའོ། །གར་མཁན་དང་། སློང་མོ་པའི་མེས་ནི་དེ་བཞིན་དགུག་པའོ། །དེ་ནས་ཉེས་པ་འཇོམས་པར་བྱེད་པའི་
སྔགས་ལན་གསུམ་བརྗོད་དེ། ཀུ་ཤའི་ཆུས་ལན་གསུམ་བསངས་ལ། ཤིང་སྐམ་པོས་མེ་སྦར་བར་བྱའོ། །རླུང་ཡབ་ཀྱིས་གཡོབ་པར་བྱ་ཡིས། ཁའི་དབུགས་ཀྱིས་ནི་མ་ཡིན་ནོ། །ཨོཾ་ཛྭ་ལ་ཛྭ་ལ་ཧཱུཾ་ཧཱུཾ་ལན་བདུན་བཟླས་ཏེ་མར་དབུལ་བར་བྱའོ། །ཨོཾ་བཛྲ་སཏྭ་ཨཱཿཞེས་བརྗོད་ལ། ཀུ་ཤ་ཕྱོགས་ཐམས་ཅད་དུ་
དགྲམ་པར་བྱའོ། །རྩ་བ་གཙང་བ་དྲི་མ་མེད་པ། མ་གྲུགས་པ། མ་གས་པ། རློན་པ། རིང་ཐུང་སྙོམས་པ་ཐམས་ཅད་རྩེ་མོ་ཤར་དུ་བསྟན་ལ་དགྲམ་པར་བྱའོ། །ཐབ་ཀྱི་མཐའ་ཡོངས་སུ་རྫོགས་པར་བཀང་ལ། དེ་ནས་ཐབ་ཀྱི་དབུས་སུ་མེའི་ལྷ་ཡོངས་སུ་རྫོགས་པར་བསྒོམས་ལ། རྡོ་རྗེ་འཛིན་པས་
སྔགས་དང་ཕྱག་རྒྱ་བཅས་ལ། བགེགས་བསྐྲད་ཅིང་གོ་བསྐོན་ཞིང་ཕྱོགས་བཅིང་བར་བྱའོ། །ཡེ་ཤེས་པ་སྤྱན་དྲང་ཞིང་དགུག་པ་དང་། གཞུག་པ་དང་བཅིང་བ་དང་། དབང་དུ་བྱས་ལ། མཆོད་ཡོན་དང་། ཞལ་བསིལ་དང་། ཞབས་བསིལ་ཕུལ་ལ། མེའི་ལྷ་དམ་ཚིག་ལ་གནས་པར་བྱ་སྟེ། ཛཿ
ཧཱུཾ་བཾ་ཧོཿས་མ་ཡ་སྟྭཾ། ས་མ་ཡ་སྟྭཾ། ཞེས་བརྗོད་ལ། ཨོཾ་ཨགྣ་ཡེ་སྭཱ་ཧཱ། ལན་གསུམ་བརྗོད་པར་བྱའོ། །སྔོན་གྱི་དམ་ཚིག་གི་ཕྱག་རྒྱ་བྱས་ལ། གོ་ཆ་བགོ་ཞིང་གོ་ཆའི་ཕྱག་རྒྱ་བྱའོ། །བདག་གིས་ཇི་ལྟར་འདོད་པའི་ལས་རྣམས་མཛོད་ཅིག་ཅེས་བརྗོད་ལ། ལས་དང་རྗེས་སུ་མཐུན་པའི་
གཟུགས་སུ་བསྒོམ་པར་བྱའོ། །ཨུ་མ་ལ་སོགས་པའི་ལྷ་མོ་བཞིས་ཡང་དག་པར་མཆོད་ཅིང་། ཉེས་པ་འཇོམས་པར་བྱེད་པའི་སྔགས་བརྗོད་ཅིང་བསྐོར་བ་གསུམ་བྱ་སྟེ། གཡས་པའི་མཐེ་བོའི་ཁུ་ཚུར་གྱིས་འཇིགས་པར་བྱས་ཏེ། མེ་ལྷའི་ལྕེ་ལ་ཧཱུཾ་བཀོད་པ་ལ། པུས་མོ་གཉིས་ཀྱི་སྟེང་ན་
དགང་བླུགས་ཀྱིས་གསུམ་སྦྱིན་པར་བྱའོ། །མར་གསུམ་སྦྱིན་པར་བྱའོ། །དྲག་པོའི་ལས་ཁང་པར་ཏའི་སྦྱིན་པར་བྱའོ། །མེ་འབར་བའི་མཚན་མ་བརྟགས་པ། མེ་བསྐོར་ཞིང་དགང་བླུགས་སྦྱིན་པར་བྱའོ། །ཡང་བགེགས་ཀྱི་མཚན་མ་དང་ལྡན་ན། བསྐྲད་ཅིང་མར་གྱི་དགང་བླུགས་

73-1-277b

གསུམ་སྦྱིན་ཞིང་། གཞན་ཡང་གཅིག་ནས་བདུན་གྱི་བར་གང་ཡང་རུང་བས་སོ། །དེ་ནས་མར་གྱི་རྗེས་སུ་ཏིལ་དབུལ་ཞིང་། དེ་ནས་འབྲུ་གཞན་རྣམས་ཀྱང་རིམ་གྱིས་དབུལ་བར་བྱའོ། །དྲག་པོའི་ལས་ལ་ནི་མིའི་རུས་པ་བཏགས་པའི་ཕྱེ་མ་དང་ལྡན་པའི་མར་དབུལ་ཞིང་། ཞོ་ལ་སོགས་པའི་རྫས་
རྣམས་ནི་ཞལ་དུའོ། །མཆོད་ཡོན་ནི་ཕྱག་ཏུའོ། །དྲི་ནི་ཐུགས་ཀར་རོ། །མེ་ཏོག་ནི་དབུ་ལའོ། །བདུག་སྤོས་ནི་ཤངས་ལའོ། །ཞབས་བསིལ་ནི་ཞབས་ལའོ། །མཆོད་ཡོན་དང་མར་མེ་ནི་མདུན་དུའོ། །ཞལ་བསིལ་ནི་ཞལ་དུའོ། །ཡམ་ཤིང་ནི་འོད་ཀྱི་དཀྱིལ་འཁོར་ལའོ། །དེ་ནས་ལས་དང་རྗེས་སུ་མཐུན་པའི་
རིམ་པས་བྱ་སྟེ། དེ་ནས་སྔགས་དྲུག་དང་། བྷ་ཁ་ཏྲ་བྷོ་ལ་ཏྲ་ཧཱུཾ་ཧོ་ཛ། ཞི་བ་དང་། རྒྱས་པ་དང་། དགུག་པ་དང་། དབང་དུ་བྱ་བ་ལ་དྲི་དང་མར་མེ་ལ་སོགས་པ། ཞི་བ་ལ་སོགས་པའི་གཟུགས་ཀྱིས་ཨུ་མ་ལ་སོགས་པའི་ལྷ་མོ་རྣམས་ཀྱིས་མེ་ཏོག་ལ་སོགས་པའི་མཆོད་པ་རྣམས་ཀྱིས་ཡང་དག་པར་མཆོད་དོ། །
ལྕེ་རྡོ་རྗེའི་སྦུ་གུ་ཅན་ཡི་གེ་ཧཱུཾ་གིས་མཚན་པས་ཡང་དག་པར་མཆོད་དེ་བསྲེག་རྫས་ཐམས་ཅད་ཀྱང་སྔགས་གསུམ་གསུམ་གྱིས་དབུལ་བར་བྱའོ། །རྡོ་རྗེ་ཁུ་ཚུར་གྱིས་དགང་བླུགས་བཟུང་ལ། ཆེ་གེ་མོ་ཞི་བའི་དོན་དུ་ཞེས་བྱ་བ་ལ་སོགས་པ་མཐའ་བསྒྱུར་གྱི་སྔགས་དང་ལྡན་པའོ། །དེའང་རྒྱུད་གཞན་གྱི་ཆོ་གའི་
རྗེས་སུ་འཇུག་པར་བྱའོ། །དེ་ནས་ཡི་གེ་ཧཱུཾ་བརྗོད་ཅིང་། དེ་ནས་དགང་བླུགས་ལ་སོགས་པ་ཡང་བྱིན་ལ། མཆོད་ཡོན་དང་ཞབས་བསིལ་ལ་སོགས་པ་ཕུལ་ཏེ། ཡང་དག་པར་བསྟོད་ནས། དེ་ནས་དངོས་གྲུབ་ཀྱི་དོན་དུ་མེ་ལ་གསོལ་བ་གདབ་པར་བྱ་སྟེ། ཡང་མཆོད་ཡོན་དང་ཞབས་བསིལ་ཕུལ་ལ། དེ་ལྟར་
ལན་གསུམ་མམ་བཞི་ལ་སོགས་པས་དབུལ་ཞིང་སྔགས་བཟླས་པར་བྱའོ། །ཇི་ལྟར་སེམས་ཅན་ཀུན་གྱི་དོན། །སངས་རྒྱས་ཀུན་གྱིས་གསལ་བར་གསུངས། །སྦྱིན་སྲེག་ལ་སོགས་པ་རྣམས་དང་། །སྔགས་ཀྱི་བཟླས་པ་དག་པ་རྣམས། །ཇི་ལྟར་སེམས་ཅན་ཀུན་དོན་ལ། །ཇི་ལྟར་བྲིས་པའི་བསོད་ནམས་
ཀྱིས། །སེམས་ཅན་ཀུན་གྱི་དོན་གྱི་ཕྱིར། །མྱུར་དུ་མྱ་ངན་འདས་མཆོག་ཤོག །དཔལ་འབྱུང་པོ་འདུལ་བྱེད་ཀྱི་དཀྱིལ་འཁོར་གྱི་ཆོ་ག་རྫོགས་སོ།།      །།སློབ་དཔོན་ཆེན་པོ་བློ་བཟངས་སྐྱོང་གིས་མཛད་པའོ། །འདིའི་ཤྭ་ལོ་ཀའི་གྲངས་ནི་ཚིགས་སུ་བཅད་པ་བདུན་བརྒྱའོ། །རྒྱ་གར་གྱི་པཎྜི་ཏ་སྒྲ་པཱ་ཎཱི་ནི་

73-1-278a

ཡོངས་སུ་རྫོགས་པའི་སྙན་དངགས་དང་ཚིག་གི་སྡེབ་ལ་མཁས་པ་ནོན་ནི་པཎྜི་ཏ་དང་། བོད་ཀྱི་ལོ་ཙཱ་བ་ཨུ་རྒྱན་པ་རིན་ཆེན་དཔལ་གྱིས་རི་བོ་ཆེན་པོ་སྤུ་ཏྲའི་མགུལ་དུ་བསྒྱུར་བའོ། །༄༅༅། །རྒྱ་གར་སྐད་དུ། ཥ་ཊ་མཎྜ་ལ་བི་དྷི་ནཱ་མ། བོད་སྐད་དུ། དཀྱིལ་འཁོར་དྲུག་གི་ཆོ་ག་
ཞེས་བྱ་བ། བཅོམ་ལྡན་འདས་རྡོ་རྗེས་རྣམ་པར་འཇོམས་པ་ལ་ཕྱག་འཚལ་ལོ། །ཆུ་ཀླུང་ངམ་ནགས་ཚལ་ལམ་ཆུ་བོའི་འགྲམ་མམ་རི་སུལ་ལམ་ཕུག་གམ་ཡིད་དང་མཐུན་པ་ཡུལ་དབེན་པ་བས་མཐའི་དགོན་པར་སློབ་དཔོན་གཙུག་ལག་ལ་མཁས་པ་ཆོས་ལ་དགའ་བ་བསླབ་པ་བསྲུང་བ་འགྲོགས་ན་བདེ་བ་སྙིང་རྗེ་ཅན། དཀྱིལ་
འཁོར་དུ་དབང་བསྐུར་བ་ཐོབ་པ། དཀྱིལ་འཁོར་ལ་སོགས་པའི་ལས་ལ་དགའ་བ་བྱ་བ་ཉུང་ཞིང་འདོད་ཞེན་ཆུང་བ། རིག་སྔགས་ཀྱི་འབྲས་བུ་རྨི་ལམ་གྱི་རྟགས་དང་དངོས་གྲུབ་ཐོབ་པ་དང་། སྒྲུབ་པའི་གྲོགས་པོ་རིགས་བཙུན་པ། ཆོས་སྤྱོད་པ་དད་པ་ཅན། སེམས་སྟོབས་ཆེ་ཞིང་བརྩོན་འགྲུས་ཅན། བདེན་པར་
སྨྲ་ཞིང་རིམ་གྲོ་ཅན། གཟུགས་ཧ་ཅང་མི་རིང་མི་ཐུང་བ། མི་སྦོམ་ཞིང་མི་སྐམ་པ། སྔོ་བསངས་སྡུག་བསྔལ་བཟོད་ཅིང་བརྟན་པ། གསང་སྔགས་ཟློས་ཤིང་དམ་ཚིག་ཤེས་པ། བསམ་པ་བཟང་ཞིང་མི་སྐྱོ་བ་གཞན་གྱིས་བྲིད་ཀྱང་འཕགས་པའི་ཚུལ་མི་གཏོང་བའི་གྲོགས་དང་ལྷན་ཅིག་ཏུ་མཎྜལ་བྱས་ནས་
སྟན་བདེ་བ་ལ་འདུག་སྟེ། རབ་ཏུ་དྲི་ཞིམ་པོའི་མེ་ཏོག་དང་། རྩ་བ་དང་སྡོང་བུ་ལ་སོགས་པ་སྦྱར་བའི་སྤོས་དང་། གུར་གུམ་ལ་སོགས་པའི་དྲི་དང་། སྨན་གྱི་རྡོག་གུ་ཐམས་ཅད་དང་། ཁ་བ་དང་ཚ་བ་དང་། བྲོ་བ་དག་ཐམས་ཅད་ཀྱང་འབྲས་ཆན་དང་ལྡན་པ་རྡོ་རྗེའི་རིགས་ལ་དབུལ་བར་གསུངས་སོ། །དེ་ལྟར་སྒྲུབ་པའི་
ཡན་ལག་གི་རྫས་བསྟན་ནས། སྒྲུབ་པའི་ལུས་ངག་ཡིད་གསུམ་གྱི་མཚན་ཉིད་བསྟན་པ་ནི། སངས་རྒྱས་ཀྱི་གཟུགས་བརྙན་དང་ཕྱག་རྒྱ་དང་དམན་མ་ལ་མི་བགོམ། འབྲུ་མར་གྱིས་ལུས་མི་བསྐུ། ལ་ཕུག་དང་སྒོག་པ་དང་། ཚྭ་དང་སྐྱུར་པོ་དྲི་མི་ཞིམ་པ་རྣམས་མི་བཟའ། རྫུན་དང་ཕྲ་མ་དང་། ངག་
འཁྱལ་པ་རྣམས་མི་སྨྲ། གླུ་དང་གད་མོ་དང་རྩེད་མོ་དང་རྟ་གད་རྣམས་མི་བྱ། དོན་མེད་པའི་གཏམ་དང་མུ་སྟེགས་ཅན་དང་རྩོད་པ་མི་བྱ། གདོལ་པ་དང་མ་རབས་དང་ཁ་ཤགས་མི་བྱ། ལྷ་དང་དྲང་སྲོང་རྣམས་ལ་ཞེ་སྡང་གི་སེམས་མི་བསྐྱེད། སྔགས་རང་བཟོར་མི་བྱ། ངན་པ་རྣམས་ལ་མི་བརྙས་

73-1-278b

བླ་མ་དང་རྡོ་རྗེ་སྤུན་ལ་ཞེ་སྡང་གིས་མི་སྨད། མཐུ་རྒྱས་མི་བྱའོ། །དེ་ལྟར་སྒྲུབ་པའི་ཡན་ལག་བསྟེན་ནས། ལུས་ཀྱི་ཀུན་དུ་སྤྱོད་པ་ནི་ཐུན་གསུམ་དུ་ཁྲུས་བྱས་ཏེ། ཨོཾ་ཧཱུཾ་ཧ་ན་བཛྲ་ཎི་ཧ་ས་ལན་འགའ་བཟླས་ནས་རོ་སྟོད་དང་རོ་སྨད་ལ་བསྐུ་བ་དང་། ཨོཾ་བཛྲ་ཧ་ར་ཧཱུཾ་ཞེས་བྱ་བའི་སྔགས་ཀྱིས་ཆུའི་བགེགས་བསལ་
ལ། ན་མོ་བཛྲཱ་ཡ་ཨོཾ་ཧཱུཾ་དྷཱུ་ན་དྷཱུ་ན་མ་ཐ་མ་ཐ་བིདྷྭཱ་ན་སྭཱ་ཧཱ། ཞེས་པས་འཁྲུད་ཅིང་བདུད་རྩི་འཁྱིལ་པའི་སྔགས་རིངས་ཀྱིས་བགེགས་བསྐྲད་ལ་ཁྲུས་བྱས་ནས། ཨོཾ་ཨ་མྲྀ་ཏེ་ཧཱུཾ་ཕཊ་ཅེས་པས་ཁྲུས་ཟིན་པའི་རྟིང་ལ་ཆུ་སྙིམ་པ་གསུམ་སྤྱི་བོར་བླུགས་སོ། །ཨོཾ་སུ་སི་ཏི་ཀ་རི་སྭཱ་ཧཱ། ཞེས་ཟློས་ཤིང་། ཁྱིམ་པ་ཡིན་
ན་སྤྱི་གཙུག་བཅིང་། རབ་བྱུང་ཡིན་ན་ཞྭ་དང་གོས་གྱོན། དེ་ནས་ཉེ་བའི་དབང་པོ་ལྔ་ཁ་དང་ལག་པ་དང་རྐང་པ་དང་བཤང་བ་དང་གཅི་བའི་ལམ་དང་ཉེ་བའི་དབང་པོ་ལྔ་ཆུས་གཏོར་ལ། ཨོཾ་ཀི་ལི་ཀི་ལི་རཀྵ་རཀྵ་བཛྲ་ཧཱུཾ་ཕཊ་ཅེས་བྱ་བ་ཟློས་ཤིང་བསྙེན་པའི་ཁང་པར་འགྲོ་བར་བྱའོ། །རྡོ་རྗེའི་རིགས་ལ་སྟོད་
གཡོགས་སྨད་གཡོགས་སྔོན་པོའམ། དཀར་པོ་ལ་ཁྲོ་བོ་བདུད་ཙི་ཐབ་སྦྱོར་བཟླས་ཏེ་བགོ་བ་དང་། སངས་རྒྱས་སྤྱན་བཟླས་ཏེ་ཟེ་ཁ་བཅིང་བ་དང་། ཨོཾ་བཛྲ་ཀྲོ་དྷ་མ་ཧཱ་བ་ལ་ཧ་ན་ད་ཧ་པ་ཙ་བིདྷྭན་ས་ཡ་ཨུཙྪཥྨ་ཀྲོ་དྷ་ཧཱུཾ་ཕཊ་ཅེས་པས་རབ་བྱུང་ཡིན་ན་ཤམ་ཐབས་བགོའོ། །ཁྱིམ་པ་ཡིན་ན་རྐང་སྣམ་བགོའོ། །རྡོ་
རྗེ་དབྱིངས་ཀྱི་དབང་ཕྱུག་མའི་ཕྱག་རྒྱ་དང་། ནམཿས་མནྟ་བུདྡྷཱ་ནཱཾ་ཧཱུཾ་དྲུཾ་ཞེས་པས་ཅོད་པན་བཅིང་ངོ་། །ན་མཿས་མནྟ་བུདྡྷཱ་ནཱཾ་དྷིཾ་དྷིཾ་རིཾ་རིཾ་བཛྲི་ཛ་སྭཱ་ཧཱ། ཞེས་པས་རྡོ་རྗེ་དྲིལ་བུ་བཟུང་ངོ་། །དེ་སྐད་དུ་ཡང་། གོས་དང་ཁྲུས་དང་རྒྱན་དག་གིས། །བདག་ཉིད་བརྒྱན་པར་མཐོང་ནས་ནི། །དེ་ཚེ་བསྙེན་པའི་སྒྲུབ་པོ་
ཡིས། །ལས་རྣམས་རབ་ཏུ་བརྩམ་པར་བྱ། །ཞེས་གསུངས་སོ། །དེ་ནས་བདག་ཉིད་ལས་ཐམས་ཅད་པ་བདུད་རྩི་ཐབ་སྦྱོར་དུ་བསམ་པར་བྱ་སྟེ། ན་མོ་རཏྣ་ཏྲ་ཡཱ་ཡ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷ་ཡ་ཏདྱ་ཐཱ་ཧུ་ལུ་ཧུ་ལུ་ཏིཥྛ་ཏིཥྛ་བནྡྷ་བནྡྷ་ཧ་ན་ཧ་ན་ཨ་མྲྀ་ཏེ་ཧཱུཾ་ཕཊ་ཅེས་བྱ་བ་དང་མཐེ་བོང་གཉིས་
ཀྱིས་མཐེའུ་ཆུང་མནན་ཏེ། བསྣོལ་བ་དཔུང་བར་གཞག་སྟེ། སྙིང་གའི་ཟླ་བའི་དཀྱིལ་འཁོར་ལ་ཧཱུཾ་བསྒོམས་ཏེ་སྥ་ར་ཎ་ཧཱུཾ་ཞེས་པས་རང་དང་འདྲ་བའི་ཁྲོ་བོ་དུ་མ་སྤྲོས་ཏེ་སེམས་ཅན་གྱི་དོན་བྱས་ནས། སཾ་ཧ་ར་ཎ་ཧཱུཾ་ཞེས་པས་བསྡུས་ནས་སྤྱན་གསུམ་པ་སྟག་གི་པགས་པའི་ཤམ་ཐབས་ཅན་ཀླུ་བརྒྱད་ཀྱིས་

73-1-279a

བརྒྱན་པ། གཡོན་བརྐྱང་བའི་གནས་པས་བཞུགས་པར་བསམས་ལ་གནས་ལྔར་བསྲུང་བར་བྱ་སྟེ། རྡོ་རྗེ་ཐལ་མོ་ལས་མཐེ་ཆུང་གཉིས་བསྣོལ་སྲིན་ལག་གཉིས་འཁྱུད་གུང་མོ་གཉིས་ཀྱི་རྩེ་མོ་སྦྱར་མཛུབ་མོ་གཉིས་རྒྱབ་ཏུ་སྦྱར་མཐེ་བོང་གཉིས་སྦྱར་ལ་སྙིང་གར་བཞག་པས་དཔལ་བེའུ་དང་། དཔྲལ་བར་བཞག་པས་མཛོད་
སྤུ་དང་། ལྐོག་མར་པདྨ་དང་། མགོར་དབུའི་གཙུག་ཏོར་དང་། རྐང་ལག་ལ་འཁོར་ལོ་རྩིབས་སྟོང་དང་ལྡན་པ་བསྐྱེད་པར་བྱའོ། །དེ་ནས་མིག་གཡས་པ་མ་ལས་ཉི་མ་དང་གཡོན་པ་ཊ་ལས་ཟླ་བ། དབུས་མ་དུས་མཚམས་ཀྱི་མེ་འདྲ་བར་བསྐྱེད་ལ། མཛུབ་མོ་གཉིས་མཐེ་བོའི་རྩ་བར་བཀུག་མཐེ་བོང་དང་
གུང་མོ་སྦྱར་ལ། ཨོཾ་རུ་རུ་སྥུ་རུ་ཛྭ་ལ་ཏིཤྛ་སིདྡྷ་ཨརྠ་སཱ་དྷ་ནེ་སྭཱ་ཧཱ་ཞེས་པས་མིག་བྱིན་གྱིས་བརླབ་པར་བྱའོ། །དེ་སྐད་དུ་ཡང་། ཨི་ལས་གྱུར་པའི་མིག་ཏུ་བྱ། །མིག་འབྲས་ཧཱུཾ་ལས་བསྐལ་པའི་མེ། །དེ་ལས་ཁྲོ་བོའི་མེ་བྱུང་བས། །སྔགས་པས་སྤྲིན་དང་རླུང་རྣམས་བསྲེག །ཅེས་གསུངས་སོ། །
གཡོན་པའི་སྲིན་ལག་ལ་ཀུ་ཤའི་དག་བྱེད་བཏགས། བཛྲ་དྷྲྀཀ་ཅེས་བརྗོད་པར་བྱའོ། །དཔྲལ་པར་ཙནྡན་གྱི་ཐིག་ལེ་བྱས་ཛི་ན་ཛིཀ་ཅེས་བརྗོད་པར་བྱའོ། །བུ་མོ་གཙང་མས་བཀལ་བའི་སྐུད་པ་ལ་མདུད་པ་གསུམ་རྒྱབ་ལ་རུ་དྲཱཀྵ་རྡོག་གཅིག་པ་དང་བཅས་པས་ཨ་རོ་ལྀ་ཀ་ཅེས་པའི་
སྔགས་བཟླས་ཤིང་དགེ་བསྙེན་གྱི་མགུལ་བ་དང་བཙུན་པའི་དཔུང་པར་བཅིང་བར་བྱའོ། །སྐུད་པ་དམར་པོ་གུར་གུམ་ལས་བཙོས་པ་ལ་མདུད་པ་བོར་ལ་བསྔགས་ཏེ། ཨོཾ་ཧ་ར་ཧ་ར་བནྡྷ་ནི་ཤུ་ཀྲ་དྷ་ར་ནི་སིདྡྷ་ཨརྠ་སཱ་དྷ་ནི་སྭཱ་ཧཱ། ཞེས་བྱ་བ་སྟོང་བཟླས་པ་རྐེད་པར་བཅིངས་ན་རྟག་ཏུ་ཁུ་བ་འགག་
པར་འགྱུར་རོ། །དེ་ལྟར་ལུས་བསྲུངས་ནས་གནས་བསྲུང་བ་ནི་ཁྲོ་བོ་བདུད་རྩི་འཁྱིལ་པའི་སྔགས་རིངས་དང་སྤོས་ཆུས་བསང་གཏོར་བྱས་པ་དང་། ཨོཾ་ཀཱི་ལི་ཀཱི་ལཱ་ཡ་བཛྲ་བྷུ་ར་བནྡྷ་ཧཱུཾ་ཕཊ་ཅེས་བྱ་བ་ཁྲོ་བོ་ཕུར་བུས་ཕྱོགས་བཅུར་བཏབ་ནས་ཐལ་བ་དང་ཡུངས་ཀར་གྱིས་ཀྱང་བསྲུང་བར་བྱའོ། །དེ་
ནས་སྟེང་བཅིང་བར་བྱ་སྟེ། ཨོཾ་སུ་སིདྡྷ་ཀི་ར་ཛ་ལ་ན་ཨ་ནནྡ་མུརྟ་ཡེ་ཛྭ་ལ་ཛྭ་ལ་བནྡྷ་བནྡྷ་ཧ་ན་ཧ་ན་ཧཱུཾ་ཕཊ་ཅེས་བྱ་བས་རྡོ་རྗེ་བསྡམས་པ་ལས་མཐེ་བོ་དང་མཛུབ་མོ་དང་མཐེ་ཆུང་གསུམ་བསྒྲེངས་ཏེ། རྡོ་རྗེའི་བླ་རེ་བསམ་པར་བྱའོ། །དེ་ལྟར་བླ་རེ་བྱས་ནས་ར་བ་ནི། ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་

73-1-279b

པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཨོཾ་སུམྦྷ་ནི་སུམྦྷ་ཧཱུཾ་ཕཊ། ཨོཾ་གྲྀཧྞ་གྲྀཧྞ་ཧཱུཾ་ཕཊ། ཨོཾ་གྲྀཧྣཱ་པ་ཡ་གྲྀཧྣཱ་པ་ཡ་ཧཱུཾ་ཕཊ། ཨོཾ་ཨཱ་ན་ཡ་ཧོ། བྷ་ག་བཱན་བིདྱཱ་རཱ་ཛཱ་ཡ་ཧཱུཾ་ཕཊ་ཅེས་བྱ་བས་ར་བ་བྱའོ། །དེ་སྐད་དུ་ཡང་། སྣ་ཚོགས་རབ་ཏུ་གྲུབ་པར་བྱེད་པའི་རྒྱུད་ལས། བདག་ཉིད་སྔགས་དང་ཕྱག་རྒྱས་བསྲུང་། །
གཙུག་ཕུད་གོས་དང་གཙང་བྱེད་དང་། །མདུད་པ་བོར་ཏེ་བདུན་གསུམ་བཟླས། །བདག་ཉིད་བསྲུང་བའི་ཕྱིར་བཟླའོ། །ཁང་པ་ཁོ་ར་ཁོར་ཡུག་དང་། །ཕུར་བུ་ར་བ་བླ་རེ་དང་། །ཕུར་བུ་བདུད་རྩི་ཐབ་སྦྱོར་དང་། །ཁྲོ་བོ་གཉིས་ཀྱིས་རྟག་ཏུ་སྦྱར། །ཡང་ན་དཔའ་བོ་གཅིག་སྔགས་ཀྱིས། །ཐམས་
ཅད་སྔགས་ཀྱིས་བསྲུང་བར་བྱ། །ཡང་ན་ཐལ་བ་ཉུང་ཀར་ཆུས། །བདག་དང་གཞན་དག་བསྲུང་བར་བྱ། །གསང་སྔགས་གསུམ་པོ་ཞི་བ་ལའང་། །སྒྲུབ་པ་པོ་ཡིས་ནན་ཏན་བྱ། །ཕྱི་རོལ་ས་ཕྱོགས་མི་གཙང་ན། །རྡོ་རྗེ་འཆོལ་བའི་སྔགས་ཀྱིས་བསྲུང་། །བདུད་རྩི་ཐབ་སྦྱོར་ཁྲུས་ཀྱི་ཚེ། །ཟན་ཟའི་ཚེ་
ན་བཛྲ་དྷྲིཀ །ཁྲོ་བོ་འཆོལ་བའི་སྔགས་ནི། ན་མོ་བཛྲ་ཀྲོ་ངྷ་མ་ཧཱ་བ་ལ་ཧ་ན་ད་ཧ་པ་ཙ་བི་དྷྭན་ས་ཡ། ཨུ་ཙྪུསྨ་ཀྲོ་དྷ་ཧཱུཾ་ཕཊ། བདུད་རྩི་ཐབ་སྦྱོར་གྱི་ནི་བཤད་ཟིན་ཏོ། །ཉལ་བའི་ཚེ། ཨོཾ་ཨེ་ཀ་ཏ་ཛ་ལ་བཛྲ། ཨོཾ་ས་མ་ཡ་མ་ནུ་སྨ་ར་ཧཱུཾ་ཕཊ་ཅེས་གསུངས་སོ། །རང་གི་ལས་ལ་བྱེ་བྲག་ཏུ། །བསྲུང་དང་སྤྱན་
དྲང་སྦྱང་བ་དང་། །ཕྱག་རྒྱ་བཅིང་དང་བཟློག་གནོན་དང་། །བསྐང་དང་ཚིམ་པར་བྱ་བ་དང་། །ཚར་བཅད་པ་དང་བསྐུལ་བ་དང་། །འཁྲུལ་འཁོར་སྦྱིན་སྲེག་ཁྲུས་བྱ་བ། །དངོས་གྲུབ་ཀུན་ལ་ཐམས་ཅད་དུ། །སྒྲུབ་པ་པོ་ཡིས་དེ་དག་བྱ། །ཞེས་གསུངས་པ་ལས་བསྲུང་བའི་ཆོ་ག་རིམ་པར་ཕྱེ་བ་སྟེ་དང་
པོའོ།།      །།གཉིས་པ་སྤྱན་དྲང་བའི་ཆོ་ག་ནི་རིག་པ་མཆོག་ལས་གསུངས་པ་བཞིན་རི་རབ་ཀྱི་རྩེ་མོར་བསམས་ལ་དཀྱིལ་འཁོར་དྲུག་གང་ལ་མོས་པའི་ལྷའི་ཚོགས་རི་རབ་ཀྱི་སྟེང་དུ་བསམས་ལ་མཆོད་པ་རྣམས་དང་མཆོད་ཡོན་མདུན་དུ་བཞག་ལ་མེ་ཏོག་ལ་རྡོ་རྗེ་ཐལ་མོ་ཁ་ཕྱེ་བ་དང་། ཨོཾ་མ་ཧཱ་མཻ་ཏྲི་
བྷྱུངྒ་ཏེ་སྭཱ་ཧཱ། མེ་ཏོག་མ་སེར་མོ་བསྐྱེད་པ་དང་། རྡོ་རྗེ་ཐལ་མོ་བརྐྱང་ལ་མཛུབ་མོ་གཉིས་སྦྱར་ཏེ། ཨོཾ་ཀ་ལི་ཏ་དྷརྨ་དྷཱ་ཏུ་ཨ་ནུ་ག་ཏེ་སྭཱ་ཧཱ། ཞེས་པས་བདུག་པ་མ་དཀར་མོ་བསྐྱེད་དོ། །རྡོ་རྗེ་ཐལ་མོ་བརྐྱང་བ་དང་། ཨོཾ་བི་ཤུདྡྷ་གན་དྷོདྦྷ་བ་ཡེ་སྭཱ་ཧཱ། ཞེས་པས་དྲི་ཆབ་མ་ལྗང་གུ་བསྐྱེད་དོ། །རྡོ་རྗེ་ཐལ་མོ་ལས་

73-1-280a

གཡོན་པའི་མཐེ་བོ་དང་མཛུབ་མོ་སྦྱར་ལ་ཨོཾ་ཙ་ལེ་ཙུ་ལེ་ཙུནྡེ་སྭཱ་ཧཱ། ཞེས་པས་ལྷ་བཤོས་མ་མཐིང་ག་བསྐྱེད་དོ། །རྡོ་རྗེ་ཐལ་མོ་ལས་མཐེ་བོ་གཉིས་དང་མཛུབ་མོ་གཉིས་ཀྱི་རྩེ་མོ་སྤྲད་ལ། ཨོཾ་དཱིཔྟ་ཏ་ཐཱ་ག་ཏ་ཨ་པ་ར་ཙ་ཡ་ར་ན་ཨ་བྷ་བ་ས་གྷ་ནོད་ཨ་ར་ཛེ་སྭཱ་ཧཱ། ཞེས་པས་མར་མེ་མ་དམར་
མོ་བསྐྱེད་དོ། །རྡོ་རྗེ་ཐལ་མོ་ཉིད་དང་ཨོཾ་ཙ་ལེ་ཙུ་ལེ་ཙུཾ་དེ་ག་ག་ན་ས་མ་ཡེ་སྭཱ་ཧཱ། ཞེས་བྱ་བས་ཡོན་ཆབ་མ་དཀར་མོ་བསྐྱེད་དོ། །དེ་ནས་བདག་ཉིད་བྱིན་གྱིས་བརླབ་པར་བྱ་སྟེ་བདག་ཉིད་རིགས་དྲུག་གི་སྐུར་བསྐྱེད་པ་ལ་མཚོག་མར་ནི། ཨོཾ་ལས་གསེར་མདོག་བསྒྱིངས་པའི་སངས་རྒྱས་བསྒོམ་མོ། །
མིག་གཉིས་ལ་ཙ་ལས་གཙུག་ཏོར་འཁོར་ལོས་སྒྱུར་བ་སེར་པོ་བསྒོམ་མོ། །ལྐོག་མར་ལེ་ལས་མི་གཡོ་བ་ནག་པོ་རལ་གྲི་དང་ཞགས་པ་ཐོགས་པ་བསྒོམ་མོ། །ལྟེ་བར་ཙུ་ལས་གཙུག་གི་ནོར་བུ་མདོག་དམར་པོ་ལ་ཕྱག་གཉིས་པ་དང་པོའི་སངས་རྒྱས་བསྒོམ་མོ། །དཔུང་པ་གཉིས་སུ་ལེ་ལས་དོན་
ཡོད་ཞགས་པ་སེར་པོ་བསྒོམ་མོ། །སྙིང་གར་ཙུ་ལས་ལྷ་མོ་ཙུནྡ་ཕྱག་བཅོ་བརྒྱད་པ་དམར་མོ་བསྒོམ་མོ། །བརླ་གཉིས་ལ་སྭཱ་ལས་ཕྱག་ན་རྡོ་རྗེ་ནག་པོ་བསྒོམ་མོ། །རྐང་པ་གཉིས་ཀྱི་ཧཱ་ལས་རལ་གཅིག་མ་མཆེ་བ་གཙིགས་པ་ནག་མོ་བསྒོམ་པར་བྱའོ། །དེ་ལྟར་བདག་ཉིད་བྱིན་གྱིས་བརླབས་ནས་མཆོད་པ་འབུལ་
བ་དང་ཕྱག་འཚལ་བའོ། །ལག་པ་བྱིན་གྱིས་བརླབ་པར་བྱ་སྟེ། ལག་པ་གཡས་པ་ནི་འཁོར་བ། གཡོན་པ་ནི་མྱ་ངན་ལས་འདས་པ། མཐེའུ་ཆུང་སའི་དཀྱིལ་འཁོར། སྲིན་ལག་ཆུའི་དཀྱིལ་འཁོར། གུང་མོ་མེའི་དཀྱིལ་འཁོར། མཛུབ་མོ་རླུང་གི་དཀྱིལ་འཁོར། མཐེ་བོང་ནམ་མཁའི་དཀྱིལ་འཁོར། 
དྲི་མེད་ནམ་མཁའ་ལྟ་བུའི་ལྷ་མོ་ལྔ་བསམས་ལ་ཕྱག་འཚལ་ཞིང་ཐལ་མོ་སྦྱར་ཏེ། དང་པོ་རིགས་དྲུག་གི་འཁོར་ལོ་གང་རུང་སྤྱན་དྲང་བའི་ཕྱིར། གཡོན་བརྐྱང་བ་བདུད་རྩི་ཐབ་སྦྱོར་གྱི་ཕྱག་རྒྱ་ལས་གུང་མོ་གཡབ་ཅིང་སྤྱན་དྲང་བའི་སྔགས་ནི། ན་མོ་ཙུ་རུ་ཀུནྡྷ་ཙུ་རུ་ཀུནྡྷ། བཛྲ་པཱ་ཎི་ན་མོ་བྷཱུ་ཏ་སྱེ་སྭཱ་ཧཱ། 
ཞེས་པས་སྤྱན་དྲངས་ལ་དབྱངས་ནི། བདེ་བར་གཤེགས་སོ་བཅོམ་ལྡན་འདས། །ཚུར་གཤེགས་འདིར་ནི་བཞུགས་སུ་གསོལ། །བདག་ལ་མཆོད་པ་བཞེས་ནས་ཀྱང་། །ཐུགས་རྗེས་དགོངས་ཤིང་གནང་བར་མཛོད། །ཐལ་མོ་སྦྱར་བ་བཀན་པ་ལས་མཛུབ་མོ་གཉིས་ཅུང་ཟད་བཀུག་ནས་

73-1-280b

དཔྲལ་བར་གཞག་སྟེ། ཨོཾ་ཏ་ཐཱ་ག་ཏོདྦྷ་བ་ཡེ་སྭཱ་ཧཱ་ཐལ་མོ་ལེགས་པར་སྦྱར་བ་ལ་སོར་མོ་དབུས་མ་གསུམ་བསྐྱེད་ལ་པདྨ་ཁ་ཕྱེ་བ་འདྲ་བ་ལྐོག་མར་བཞག་ལ། ཨོཾ་པདྨོད་བྷ་བ་ཡེ་སྭཱ་ཧཱ། ལག་པ་གཉིས་ནི་རྒྱབ་བསྣོལ་ཏེ། མཐེའུ་ཆུང་དང་མཐེ་བོ་གཉིས་དཀྲིས་ཏེ་རྡོ་རྗེ་འཛིན་པའི་ཕྱག་རྒྱ་ལྟེ་བར་བཞག་སྟེ། 
བཛྲོད་བྷ་བ་ཡ་སྭཱ་ཧཱ། ཞེས་བྱ་བས་ཕྱག་བྱའོ། །མེ་ཏོག་དབུལ་བའི་དབྱངས་ནི། ཡེ་ཤེས་རྒྱ་མཚོ་རླབས་ཆེན་གྱི། །སེམས་ཅན་ཀུན་ལ་བྱམས་པ་ཡི། །སྟོབས་ཆེན་ཡེ་ཤེས་མེ་ཏོག་གིས། །སངས་རྒྱས་བཞིན་དུ་མཆོད་པར་ཤོག །སྦྱར་བའི་དྲི་ཡི་བསྒོས་པ་ཡིས། །ལུས་ལ་ལྷག་པར་ཁྱབ་གྱུར་པ། །
ཡེ་ཤེས་སྤོས་ཀྱི་བྱུག་པ་ནི། །དྲི་བཟངས་རྟག་ཏུ་འབྱུང་བར་ཤོག །མཁས་པ་གང་གིས་དངོས་པོ་རྣམས། །ཆོས་ཀྱི་དབྱིངས་དང་མཚུངས་མཐོང་ཞིང་། །དེ་ཡི་རྗེས་སུ་ཞུགས་པ་ཡི། །བདུག་སྤོས་ཀྱིས་ནི་ཚིམ་པར་ཤོག །དངོས་པོ་ཐམས་ཅད་སྣང་བྱེད་པ། །མི་ཤེས་མུན་ནག་ལ་སོགས་པ། །བཅོམ་
ནས་མར་མེ་རབ་ཏུ་གསལ། །ཆོས་ཀྱི་འོད་ཟེར་ཀུན་འབྱུང་ཤོག །ལུས་ཅན་ཀུན་གྱི་ཇི་ཙམ་དུ། །ཡིད་ལ་རེ་བ་ཡོངས་རྫོགས་པ། །བྱང་ཆུབ་སྙིང་པོར་འདུག་ནས་སུ། །བདུད་བཅོམ་སངས་རྒྱས་རོལ་གྱུར་ཅིག །ཅེས་བྱ་བས་མཆོད་པ་དབུལ་ལོ། །དེ་སྐད་དུ་ཡང་། ཐོག་མར་བྱུག་པ་མེ་ཏོག་དང་། །བདུག་
སྤོས་ལྷ་བཤོས་རྗེས་མཐུན་པ། །ཐ་མར་མར་མེ་རབ་སྦྱར་ནས། །ཁྲོ་བོའི་རྒྱལ་པོས་བསངས་ནས་དབུལ། །ཞེས་གསུངས་པས་ནའོ། །དེ་ལྟར་ཕྱག་འཚལ་ཞིང་མཆོད་ནས་སྡིག་པ་བཤགས་པ་ནི། སངས་རྒྱས་ཆོས་དང་དགེ་འདུན་དང་། །བྱང་ཆུབ་སེམས་དཔའ་རྣམས་དང་ནི། །རིག་སྔགས་
གསང་སྔགས་ཚོགས་རྣམས་ལ། །བདག་གིས་སྡིག་པ་མ་ལུས་བཤགས། །ཨོཾ་སརྦྦ་པཱ་པ་དི་ཤ་ན་ཡེ་སྭཱ་ཧཱ། སངས་རྒྱས་ཆོས་དང་དགེ་འདུན་དང་། །བྱང་ཆུབ་སེམས་དཔའ་རྣམས་དང་ནི། །རིག་སྔགས་གསང་སྔགས་ཚོགས་རྣམས་ལ། །དད་པས་རྗེས་སུ་ཡི་རང་ངོ་། །ཨོཾ་ཨ་ནུ་མོ་ཏ་ཡེ་སྭཱ་ཧཱ། བདེ་
གཤེགས་པདྨོ་རྡོ་རྗེ་རིགས། །རྡོ་རྗེ་ཁྲོ་བོ་ཕོ་ཉ་དང་། །བཀའ་ཉན་ལ་སོགས་ཕོ་ཉ་ལ། །ཆོས་ཀྱི་འཁོར་ལོ་བསྐོར་བར་བསྐུལ། །ཨོཾ་དྷརྨ་ཙཀྲ་པྲ་བརྟ་ནཱ་ཡ་སྭཱ་ཧཱ། བདེ་གཤེགས་རྡོ་རྗེ་པདྨའི་རིགས། །རྡོ་རྗེ་ཁྲོ་བོ་ཕོ་ཉ་དང་། །བཀའ་ཉན་ལ་སོགས་ཕོ་ཉ་ལ། །མྱ་ངན་མི་འདའ་གསོལ་བ་འདེབས། །ཨོཾ་ཨ་པ་ར་ནི་ར་བ་ནི་ཡེ་

73-1-281a

སྭཱ་ཧཱ། སེམས་ཅན་ཕོངས་པ་བསྐྱབ་པ་དང་། །ངན་སོང་གསུམ་གྱི་མགོན་བྱས་དང་། །དཀོན་མཆོག་གསུམ་གྱི་རྟེན་བྱིན་དང་། །འཁོར་བའི་སྐྱབས་བགྱི་བྱང་ཆུབ་བསྔོ། །ཨོཾ་ཀུ་ཤ་ལ་བ་རི་ན་ཡེ་སྭཱ་ཧཱ། སེམས་ཅན་ཕོངས་པ་བསྐྱབ་པ་དང་། །ངན་སོང་གསུམ་གྱི་མགོན་བྱས་དང་། །དཀོན་
མཆོག་གསུམ་གྱི་རྟེན་བྱིན་དང་། །འཁོར་བའི་སྐྱབས་བགྱིས་བདག་ལུས་དབུལ། །ཨོཾ་ཨཱཏྨ་ནཾ་ནིརྱ་ཏ་ཡཱ་མི་སྭཱ་ཧཱ། ངན་འགྲོ་རྣམས་ལས་བསྒྲལ་བ་དང་། །ཉོན་མོངས་རྣམས་ལས་སྒྲོལ་བ་དང་། །སྲིད་པའི་མི་བདེ་དབུགས་བྱིན་དང་། །མྱ་ངན་འདས་པའི་སེམས་བསྐྱེད་དོ། །ཨོཾ་བོ་དྷི་ཙིཏྟ་ཨུཏྤཱ་ད་ཡཱ་
མི་སྭཱ་ཧཱ། ངན་འགྲོ་རྣམས་ལས་བསྒྲལ་བ་དང་། །ཉོན་མོངས་རྣམས་ལས་སྒྲོལ་བ་དང་། །སྲིད་པའི་མི་བདེ་དབུགས་འབྱིན་དང་། །མྱ་ངན་འདས་པར་སྐྱབས་སུ་མཆི། །ཨོཾ་ཏྲི་ཤ་ར་ཎཾ་གཙྪ་ཡཱ་མི་སྭཱཧཱ། སྔོན་གྱི་རྒྱལ་བའི་སྲས་རྣམས་ཀྱིས། །སྨོན་ལམ་ཇི་ལྟར་མཛད་པ་བཞིན། །སྦྱིན་དང་ཚུལ་
ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་བདག་བསྐྱེད་ཤོག །ཨོཾ་པྲ་ནེ་ཏ་ན་ཡེ་སྭཱ་ཧཱ། དེ་ལྟར་འཁོར་ལོ་དྲུག་སྤྱན་དྲང་ཞིང་ཚོགས་བསགས་ནས་སྦྱང་བ་བཤད་པ་ནི། དང་པོ་མཆོད་པའི་ཡན་ལག་རྫས་སྦྱང་བ་བཤད་པ་ནི་སྔར་བསྟན་པའི་བདུད་རྩི་ཐབ་སྦྱོར་གྱི་སྔགས་དང་ཕྱག་རྒྱས་
མཆོད་པའི་བགེགས་བསྐྲད་ལ། བདུད་རྩི་ཐབ་སྦྱོར་གྱི་སྔགས་བཟླས་པའི་སྤོས་ཆུ་ལག་མཐིལ་དུ་བླུགས་ལ་རྫས་རྣམས་ལ་བལྟ་ཞིང་ཀུ་ཤའི་པིར་ཐོགས་ལ་ཨོཾ་ཛྭ་ལ་ཛྭ་ལ་བན་དུ་རི་ཧཱུཾ་ཕཊ་ཅེས་བྱ་བའི་ཆུས་བསང་བ་དང་། ཡུངས་ཀར་གྱིས་བྲབ་པར་བྱའོ། །དེའི་རྗེས་ལ་གནས་སྦྱང་བ་ནི། ས་གཞིའི་
དབུས་སུ་ཡི་གེ་རཾ་བསམས་ལ་འོད་ཟེར་གྱི་སྤྲོ་བསྡུ་བྱས་པས་ལས་དང་ཉོན་མོངས་པའི་ས་གཞི་སྦྱངས་ལ། དེ་ནས་སྟོང་པ་སྒྱུ་མ་ལྟ་བུ་ལས། ཡི་གེ་ཨ་གསེར་གྱི་མདོག་ཅན་བསམས་ལ་དེའི་འོད་ཟེར་འཕྲོ་འདུ་ལས་གསེར་གྱི་ས་གཞི་རྡོ་རྗེ་རྩེ་གསུམ་པས་མཚན་པ་དཔངས་སུ་དཔག་ཚད་འབུམ་
ཕྲག་བརྒྱད་ཡོད་པ། རྒྱར་སྟོང་གསུམ་གྱི་ཚད་ཡོད་པ་བསམས་ལ། བདུད་རྩི་འཁྱིལ་པའི་ཕྱག་རྒྱས་ལ་བཞག་ནས་ཨོཾ་ཨ་ཙ་ལེ་བི་ར་སྭཱ་ཧཱ། ཞེས་བྱ་བས་ས་གཞི་རྡོ་རྗེར་བྱིན་གྱིས་བརླབ་བོ། །དེ་ནས་སའི་ལྷ་མོའི་སྔགས་དང་ཕྱག་རྒྱས་ཕྱིས་འཆད་པར་འགྱུར་བས་ཀྱང་བྱིན་གྱིས་བརླབ་

73-1-281b

པར་བྱའོ། །དེའི་སྟེང་དུ་པཾ་ལས་པདྨ་དཀར་པོ་འདབ་མ་བརྒྱད་པ་དེའི་ལྟེ་བ་ལ་ཡི་གེ་བ་ཤེལ་དང་བ་ལྟ་བུ་ལས་ཡན་ལག་བརྒྱད་དང་ལྡན་པའི་ཆུ་འོ་མ་ཅན་གྱི་རྒྱ་མཚོ་ཆེན་པོ་བསམ་པར་བྱའོ། །ཕྱིས་འཆད་པར་འགྱུར་བའི་སངས་རྒྱས་སྤྱན་གྱི་ཕྱག་རྒྱ་དང་སྔགས་ཀྱིས་བྱིན་གྱིས་བརླབས་ལ། ཨོཾ་
བི་མ་ལ་ཨུ་ད་ག་དྷ་དི་ཧཱུཾ་ཞེས་བྱ་བས་ཀྱང་བྱིན་གྱིས་བརླབ་པར་བྱའོ། །དེ་ནས་ཡི་གེ་ལཾ་ལས་རི་རབ་རིན་པོ་ཆེ་སྣ་བཞིའི་རང་བཞིན་ཅན། གསེར་གྱི་རི་བདུན་དང་གླིང་བཞི་གླིང་ཕྲན་བརྒྱད་ཀྱིས་བསྐོར་བ། དེའི་སྟེང་དུ་བྷྲཱུཾ་ལས་གཞལ་ཡས་ཁང་སྒོ་བཞི་སྒོ་ཁྱུད་དང་བཅས་པའི་དཀྱིལ་འཁོར་
དྲུག་གང་ཡང་རུང་བ་རྣལ་འབྱོར་པས་གང་མོས་པ་བསྒོམས་ལ། ཨོཾ་ན་མཿསརྦ་ཏ་ཐཱ་ག་ཏཱ་ནཱཾ་སརྦ་ཐཱ་ཨུངྒ་ཏེ་སྥ་ར་ཎ་ཧི་མཾ་ག་ག་ན་ཁཾ་ཞེས་བྱ་བ་དང་། ཐལ་མོ་ཁོང་སྟོང་དུ་སྦྱར་བས་གཞལ་ཡས་ཁང་བྱིན་གྱིས་བརླབ་པར་བྱའོ། །དེ་ནས་ཨོཾ་ལས་སེང་གེའི་ཁྲི་གདན་བསྐྱེད་ལ། དེའི་སྟེང་དུ་པཾ་ལས་
པདྨ་འདབ་མ་བརྒྱད་པ་བསྐྱེད་དེ། ཨོཾ་ཀི་ལི་ཀི་ལི་སརྦ་བཛྲི་བྷཱུ་ར་བནྡྷ་ཧཱུཾ་ཕཊ་ཅེས་བྱ་བས་གཞལ་ཡས་ཁང་གདན་དང་བཅས་པ་ལ། སྤོས་ཆུས་ལན་གསུམ་གྱི་བར་དུ་བསང་གཏོར་བྱས་པས་གནས་དང་སྟན་སྦྱངས་པར་འགྱུར་རོ། །དེ་ནས་ལྷ་སྦྱང་བ་ནི། དཀྱིལ་འཁོར་དྲུག་གང་ལ་མོས་པའི་ལྷ་དཀྱིལ་
འཁོར་དང་གདན་ལ་བཞུགས་སུ་གསོལ་ལོ། །དེ་ནས་གུ་གུལ་གྱི་དུད་པས་བདུག་ཅིང་། ཨོཾ་སུ་སིདྡྷི་ཀ་ར་ཛྭ་ལི་ཏ་ཨ་ནནྡ་མུརྟ་ཡེ། ཛྭ་ལ་ཛྭ་ལ་བནྡྷ་བནྡྷ། ཧ་ན་ཧ་ན་ཧཱུཾ་ཕཊ་ཅེས་བྱ་བས་ལྷ་རྣམས་བསང་བ་དང་། སྟེང་དུ་རྡོ་རྗེ་ཕུར་བ་བཅུས་བགེགས་བཅིང་བ་དང་། ལྷ་རྣམས་སྦྱངས་པར་ཡང་
འགྱུར་རོ། །སྔར་བཤད་པའི་སུ་སིདྡྷི་ཀ་རའི་སྔགས་དང་། གནོད་མཛེས་ཀྱི་སྔགས་ཀྱིས་རྡོ་རྗེ་བླ་རེ་དང་རྡོ་རྗེ་ར་བ་བྱས་པས་ཀྱང་གནས་དང་ལྷ་རྣམས་སྦྱངས་པར་འགྱུར་རོ། །དེ་ནས་རྡོ་རྗེ་ཁུ་ཚུར་གཉིས་བཅིངས་ནས་མཛུབ་མོ་གཉིས་བརྐྱང་པ་ས་ལ་བཙུགས་ལ། ན་མཿས་མནྟ་བུདྡྷཱ་ནཱཾ། ཨོཾ་ཏ་ར་ཏ་ར། 
ཏུ་རུ་ཏུ་རུ། མ་ཊ་མ་ཊ། བནྡྷ་བནྡྷ། སརྦ་ཏྲ་ཨ་པྲ་ཏི་ཧ་ཏེ། ས་སི་མི། ས་སི་མི་སཾ་བནྡྷ། ཀུ་རུ་ཀུ་རུ་ཏ་ར་ཏ་ར། ས་མནྟ་བཛྲེ་ས་མནྟ་བཛྲེ། ཀུ་རུ་ཨ་མ་ལེ། ཀུ་རུ་མ་ཡེ་ཏུ་ཏ་ཡེ་ཏུ་ཏ་ཡེ། བ་ར་བ་ར། ཀ་ར་ཀ་ར། སུ་སི་ས་མནྟ་བི་དྷྭན་ས་ཡ་ཛྭ་ལཱ་ཡ་སྭཱ་ཧཱ། ཞེས་བྱ་བས་ལན་བདུན་

73-1-282a

བཟླས་ལ་སའི་རི་མོ་བདུན་དང་། ཐལ་བའི་རི་མོ་བདུན་བྱས་ལ་མེ་འོད་ཀྱི་ཕྲེང་བ་བསམས་ལ་མཚམས་གཅད་པར་བྱའོ། །དེ་ལྟར་སྦྱང་བའི་ཆོ་ག་གསུམ་པ་བསྟན་ནས། བཞི་པ་བཅིང་བའི་ཆོ་ག་བསྟན་པ་ནི་དང་པོར་རྐང་པ་རྡོ་རྗེའི་སྐྱིལ་ཀྲུང་ངམ། སེམས་དཔའི་སྐྱིལ་ཀྲུང་བཅས་ལ། 
དཀྱིལ་འཁོར་དྲུག་ལས་གང་ཡང་རུང་བའི་མདུན་དུ་འདུག་སྟེ། ཐལ་མོ་སྦྱར་ལ་བསྟོད་པ་བྱ་སྟེ། མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པའི་སྟོན་པ་པོ། །བསོད་ནམས་རྒྱ་མཚོ་ཡོན་ཏན་ཞིང་། །དེ་བཞིན་གཤེགས་ལ་ཕྱག་འཚལ་ལོ། །དག་པ་འདོད་ཆགས་བྲལ་བའི་རྒྱུ། །
དགེ་བས་ངན་སོང་ལས་གྲོལ་བ། །གཅིག་ཏུ་དོན་དམ་མཆོག་གྱུར་པའི། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཐོབ་པ། །བསླབ་པ་དག་ལ་རབ་ཏུ་གནས། །ཞིང་གི་དམ་པ་ཡོན་ཏན་གནས། །དགེ་འདུན་ལ་ཡང་ཕྱག་འཚལ་ལོ། །སྟོབས་པོ་ཆེ་ལ་དྲག་ཤུལ་ཆེ། །
རིག་སྔགས་རྒྱལ་པོ་དགེ་བ་ཅན། །གདུལ་དཀའ་བ་དག་འདུལ་བ་པོ། །རྡོ་རྗེ་འཛིན་ལ་ཕྱག་འཚལ་ལོ། །དེ་ལྟར་ཕྱག་འཚལ་ནས་ཁྲོ་བོ་ཉི་ཤུ་རྩ་གཅིག་པའམ། བཅུ་གསུམ་པའམ། ལྷ་ལྔ་པའམ། འཁྲུལ་འཁོར་གྱི་ལྷའམ། ཕོ་ཉ་མོ་བཅུས་བསྐོར་བའམ། ཕོ་ཉ་མོ་དྲུག་ཅུ་རྩ་བཞིས་བསྐོར་བར་
བསམས་ལ། རྡོ་རྗེའི་རིགས་ཀྱི་རུ་དྲཱ་ཀྵའམ། རུས་པའི་ཕྲེང་བ་ལ། ཨོཾ་བཛྲི་ཨ་ཛི་ཏ་ཡེ་སྭཱ་ཧཱ། ཞེས་པའི་སྔགས་བཟླས་ཤིང་ཕྲེང་བ་བཟུང་ནས་དཀྱིལ་འཁོར་གྱི་ལྷའམ། བུམ་པའི་ལྷའམ། སྦྱིན་སྲེག་གི་ལྷ་གང་ཡང་རུང་བའི་ཕྱག་རྒྱ་བཅིངས་ནས་བསྙེན་པའི་བཟླས་པ་བྱའོ། །དེ་ལ་དང་པོར་
ཁྲོ་བོ་ཉི་ཤུ་རྩ་གཅིག་པའི་ལྷའི་ཕྱག་རྒྱ་བཅིངས་པ་བསྟན་པ་ནི་དབུས་སུ་རིག་པ་མཆོག་ནས་འབྱུང་བ་བཞིན་དུ་དབང་ཕྱུག་ཆེན་པོ་དང་། ཨུ་མའི་སྟེང་དུ་གཡས་བརྐྱང་བའི་གནས་པས་བཞུགས་པ། ཁམས་གསུམ་རྣམ་པར་རྒྱལ་བའི་ཕྱག་རྒྱས་རྡོ་རྗེ་དང་དྲིལ་བུ་བསྣམས་པ་སྟེ། སྦྲུལ་གྱི་རྒྱན་
གྱིས་བརྒྱན་པ་སྟག་གི་པགས་པའི་ཤམ་ཐབས་མནབས་པ། དེའི་གཡས་སུ་ལྷ་མོ་མཱ་མ་ཀཱི་ལག་ཏུ་རྡོ་རྗེ་དང་སྡིགས་མཛུབ་འཆང་བ། སྐུ་མདོག་སྔོན་པོར་བསམ་པའོ། །གཡོན་དུ་བདུད་རྩི་ཐབ་སྦྱོར་སྐུ་མདོག་དམར་པོ་གཡས་ན་རལ་གྲི་དང་དགྲ་སྟ། གཡོན་ན་ཞགས་པ་དང་སྡིགས་

73-1-282b

མཛུབ་བསམ་པར་བྱའོ། །གཙོ་བོའི་སྙིང་པོ་དང་ཕྱག་རྒྱ་ནི་ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཨོཾ་སུམྦྷ་ནི་སུམྦྷ་ཧཱུཾ། ཨོཾ་གྲྀཧྣ་གྲྀཧྞ་ཧཱུཾ། ཨོཾ་གྲྀཧྞཱ་པ་ཡ་གྲྀ་ཧྞཱ་པ་ཡ་ཧཱུཾ་ཨོཾ་ཨཱ་ན་ཡ་ཧོཿབྷ་ག་ཝཱན་བིདྱཱ་རཱ་ཛཱ་ཡ་ཧཱུཾ་ཕཊ། ཕྱག་རྒྱ་ནི་ཁམས་གསུམ་རྣམ་པར་རྒྱལ་བའི་
ཕྱག་རྒྱས་སོ། །མཱ་མ་ཀཱིའི་ཕྱག་རྒྱ་ནི་རྡོ་རྗེ་ཐལ་མོ་ལས་མཐེ་བོ་དང་སྲིན་ལག་གཉིས་དང་མཐེའུ་ཆུང་ནང་དུ་གཞུག་གོ། །སྔགས་ནི་ན་མཿས་མནྟ་བཛྲཱ་ནཱཾ། ཏྲི་ཏ་ཏྲི་ཏ་ཛ་ཡནྟི་སྭཱ་ཧཱ། བདུད་རྩི་ཐབ་སྦྱོར་གྱི་ཕྱག་རྒྱ་ནི་རྡོ་རྗེ་ཐལ་མོ་ལས་གུང་མོ་གཉིས་བརྐྱང་ལ་མཛུབ་མོ་གཉིས་རྒྱབ་ཏུ་ལྕགས་ཀྱུར་བྱས་
པའོ། །སྔགས་ནི་ཨོཾ་ཨ་མྲྀ་ཏེ་ཧ་ན་ཧ་ན། བི་དུ་ན་བི་དུ་ན། གོ་པ་ཡ་གོ་པ་ཡ། ཁཱ་དྷ་ཁཱ་དྷ། ཨ་མྲྀ་ཏི་ཨཱཏྨ་ཀ་སྭཱ་ཧཱ། ན་མོ་བཛྲ་པཱ་ཎི་སྱ། ཨོཾ་ཛ་ཡེ་ཛ་ཡེ་བ་ཧེ་སྭཱ་ཧཱ། རྒྱལ་བའི་གསང་སྔགས་སོ། །ཨོཾ་བཛྲ་པཱ་ཎི་སྱ། ཨོཾ་བི་ཛ་ཡེ་བི་ཀྲ་མེ་ཏྲཻ་ལོཀྱ་བི་ཀྲ་མེ་སྭཱ་ཧཱ། རྣམ་པར་རྒྱལ་བའི་གསང་སྔགས་སོ། །
ན་མོ་བཛྲ་པཱ་ཎི་སྱ། ཨོཾ་བཛྲོད་ཀེ་སྭཱ་ཧཱ། རྡོ་རྗེ་མཆོག་གི་སྔགས་སོ། །ན་མོ་བཛྲ་པཱ་ཎི་སྱ། ཨོཾ་བཛྲ་ཙྪིནྡ་སྭཱ་ཧཱ། རྡོ་རྗེ་རྟགས་ཀྱི་སྔགས་སོ། །ན་མོ་བཛྲ་པཱ་ཎི་སྱ། ཨོཾ་སྭ་ར་བི་ཀ་བི་ཤུདྡྷེ་རཏྣ་སྭཱ་ཧཱ། བཀྲ་ཤིས་ཀྱི་གསང་སྔགས་སོ། །ན་མོ་བཛྲ་པཱ་ཎི་སྱ། ཨོཾ་ཏྲི་ཏང་ཀུ་སྭཱ་ཧཱ། ཤིན་ཏུ་བཀྲ་ཤིས་ཀྱི་
གསང་སྔགས་སོ། །ན་མོ་བཛྲ་པཱ་ཎི་སྱ། ཨོཾ་ཤྲཱི་བ་ཡེ་སྭཱ་ཧཱ། པདྨ་མཚན་གྱི་གསང་སྔགས་སོ། །ན་མོ་བཛྲ་པཱ་ཎི་སྱ། ཨོཾ་བི་ཤུདྡྷེ་སྭཱ་ཧཱ། པདྨའི་ཕྲེང་བའི་སྔགས་སོ། །ན་མོ་བཛྲ་པཱ་ཎི་སྱ་ཨོཾ་པྲ་མརྡ་ནི་སྭཱ་ཧཱ། གཡུང་དྲུང་གི་གསང་སྔགས་སོ། །ན་མོ་བཛྲ་པཱ་ཎི་སྱ་ཨོཾ་བིདྷྭ་ས་ན་པྲ་མརྡ་ནི་ཙྪིནྡ་ཙྪིནྡ་
སྭཱ་ཧཱ་མདུང་རྩེ་གསུམ་པའི་གསང་སྔགས་སོ། །ན་མོ་བཛྲ་པཱ་ཎི་སྱ་ཨོཾ་བི་ནཱ་ཡ་ཀ་ནཱ་ཤ་ནི་སྭཱ་ཧཱ། རྡོ་རྗེ་གསང་སྔགས་སོ། །ན་མོ་བཛྲ་པཱ་ཎི་སྱ་སརྦ་ཤ་ཏྲཱུཾ་པྲ་མརྡ་ནི་སྭཱ་ཧཱ། མཆེ་བའི་སྔགས་སོ། །ན་མོ་བཛྲ་པཱ་ཎི་སྱ་ཨོཾ་ཨ་དི་ཤ་ཡ་བི་ཀྲ་མེ་སྭཱ་ཧཱ། མདུང་ཐུང་གི་གསང་སྔགས་སོ། །ན་མོ་བཛྲ་པཱ་ཎི་སྱ་
ཨོཾ་ཧཱུཾ་ཕཊ་སྭཱ་ཧཱ། ཀླུ་ལག་གི་གསང་སྔགས་སོ། །ན་མོ་བཛྲ་པཱ་ཎི་སྱ་ཨོཾ་པཱ་ཤ་ཡེ་སྭཱ་ཧཱ། ཞགས་པའི་གསང་སྔགས་སོ། །ན་མོ་བཛྲ་པཱ་ཎི་སྱ་ཨོཾ་ཁངྒ་སྭཱ་ཧཱ་རལ་གྲིའི་གསང་སྔགས་སོ། །ན་མོ་བཛྲ་པཱ་ཎི་སྱ་ཨོཾ་མ་ཧཱ་དཎྜི་སྭཱ་ཧཱ། དབྱུག་པའི་གསང་སྔགས་སོ། །ན་མོ་བཛྲ་པཱ་ཎི་སྱ། ཨོཾ་ཙཀྲཱ་ཡུ་དྷ་ཀེ་སྭཱ་ཧཱ། 

73-1-283a

འཁོར་ལོའི་གསང་སྔགས་སོ། །རྡོ་རྗེ་འཛིན་པའི་ཕྱག་རྒྱ་ལས་གཡས་པའི་ཁུ་ཚུར་བཅངས་པ་ནི་རྒྱལ་བའི་འོ། །གུང་མོ་གཉིས་གཞིབས་ནས་བརྐྱང་པ་ནི་རྣམ་པར་རྒྱལ་བའི་འོ། །སྲིན་ལག་དང་གུང་མོ་གཉིས་ཀ་བརྐྱང་བ་ནི་རྡོ་རྗེ་མཚན་གྱིའོ། །རྡོ་རྗེ་འཛིན་མའི་ཕྱག་རྒྱ་ཕྲལ་ནས་
བྲང་དཀྱིལ་དུ་བཞག་པ་ནི་རྡོ་རྗེ་རྟགས་ཀྱིའོ། །རྡོ་རྗེ་འཛིན་མའི་ཕྱག་རྒྱ་ཉིད་བྲང་དཀྱིལ་དུ་བཞག་པ་ནི་བཀྲ་ཤིས་ཀྱིའོ། །ལྟེ་བར་གཞག་པ་ནི་ཤིན་ཏུ་བཀྲ་ཤིས་ཀྱིའོ། །ཐལ་མོ་ཁ་ཕྱེ་བ་འདྲ་བ་ནི་པདྨའི་ཕྱག་རྒྱའོ། །ཐལ་མོ་ཁ་ཕྱེ་བ་པདྨའི་ཕྲེང་གི་ཕྱག་རྒྱའོ། །ཁམས་གསུམ་རྣམ་པར་རྒྱལ་བའི་
ཕྱག་རྒྱ་ལས་མཐེ་བོ་དང་སྲིན་ལག་གཉིས་བསྣོལ་བ་ནི་གཡུང་དྲུང་གིའོ། །རྡོ་རྗེ་བསྡམས་པ་ལས་གུང་མོ་གཉིས་བརྐྱང་ནས་མཛུབ་མོ་གཉིས་རྒྱབ་ཏུ་གཞག་པ་ནི་མདུང་རྩེ་གསུམ་པའི་འོ། །རྡོ་རྗེ་ཐལ་མོ་ལས་སྲིན་ལག་ནང་དུ་མཐེ་བོས་མནན་པ་ནི་རྡོ་རྗེའི་འོ། །གཡོན་པའི་ཁུ་ཚུར་གྱི་སྟེང་དུ་གཡས་
པའི་ཁུ་ཚུར་གྱི་མཛུབ་མོ་བསྒྲེང་བ་ནི་མཆེ་བའི་འོ། །ཁམས་གསུམ་རྣམ་པར་རྒྱལ་བའི་ཕྱག་རྒྱ་ལྟར་ལག་ངར་གཉིས་རྒྱབ་ཏུ་སྤྲད་ལ་གུང་མོ་གཉིས་གཤིབས་པ་ནི་མདུང་ཐུང་གིའོ། །ལག་ངར་གཉིས་རྒྱབ་སྤྲད་ལ། མཐེ་བོ་དང་མཐེའུ་ཆུང་གཉིས་ལུ་གུ་རྒྱུད་དུ་སྦྲེལ་ལ་སོར་མོ་དྲུག་སྦྲུལ་མགོའི་
གདེངས་ཀ་ལྟར་བརྐྱང་བ་ནི་ཀླུ་ལག་གིའོ། །ལག་པ་གཉིས་རྒྱབ་སྤྲད་ལ་མཐེའུ་ཆུང་མནན་པ་ནི་ཞགས་པའི་ཕྱག་རྒྱའོ། །ལག་ངར་གཉིས་གཤིབས་ནས་མཐེ་བོས་མཛུབ་མོ་མནན་ལ་གོར་མོ་གསུམ་བརྐྱང་བ་ནི་རལ་གྲིའི་ཕྱག་རྒྱའོ། །ལག་པ་གཉིས་རྡོ་རྗེ་ཁུ་ཚུར་གྱེན་དུ་བསྒྲེང་བའི་གུང་མོ་གཉིས་བརྐྱང་
པ་ནི་དབྱུག་པའི་ཕྱག་རྒྱའོ། །གཡོན་པ་ཁ་བུབ་པའི་སྟེང་དུ་གཡས་བརྐྱང་ལ་ཁ་བུབ་ནས་གཞག་པ་ནི་འཁོར་ལོའི་ཕྱག་རྒྱའོ། །དེ་ལྟར་ཕྱག་རྒྱ་བཅོ་བརྒྱད་བཅིངས་ནས་བཟླས་པར་བྱ་སྟེ། དཀྱིལ་འཁོར་ལ་དགོད་པའི་ཐབས་བཤད་པ་ནི་རྒྱལ་བ་དང་། རྣམ་པར་རྒྱལ་བ་དང་། རྡོ་རྗེ་མཚན་ནི་ཤར་དུའོ། །
རྡོ་རྗེ་རྟགས་དང་། བཀྲ་ཤིས་དང་ཤིན་ཏུ་བཀྲ་ཤིས་ནི་བྱང་དུའོ། །པདྨའི་མཚན་དང་པད་ཕྲེང་དང་། གཡུང་དྲུང་རིས་ནི་ལྷོ་ཕྱོགས་སུའོ། །མདུང་རྩེ་གསུམ་པ་དང་། རྡོ་རྗེ་དང་མཆེ་བ་ནི་ནུབ་ཕྱོགས་སུའོ། །དཀྱིལ་འཁོར་གྱི་ནང་གི་ཤར་དུ་མདུང་ཐུང་། ལྷོར་ཀླུ་ལག །ནུབ་ཏུ་རལ་གྲི། བྱང་དུ་

73-1-283b

ཞགས་པ། དབྱིག་པ་དང་འཁོར་ལོ་གཉིས་ནི་གཙོ་བོའི་མདུན་དང་རྒྱབ་ཏུའོ། །གཡས་དང་གཡོན་དུ་ནི་མཱ་མ་ཀཱིའི་རྡོ་རྗེ་ལྕགས་ཀྱུ་བསྣམས་པ་དང་བདུད་རྩི་ཐབ་སྦྱོར་རོ། །རིག་པ་མཆོག་ལས་མཱ་མ་ཀཱི་དེར་བཞག་ན་རིག་སྔགས་འགྲུབ་པར་ཐེ་ཚོམ་མི་བྱའོ་ཞེས་གསུངས་སོ། །སྔགས་ཟློས་པའི་ཚེ་
རིག་སྔགས་འདི་རྣམས་གདོན་གང་ལ་བྱ་ཞེ་ན། རྒྱལ་བས་ལྷའི་གདོན་རྣམས་སོ། །རྣམ་པར་རྒྱལ་བས་སྙིང་ནད་སྐྱེ་བའི་དྲི་ཟའོ། །རྡོ་རྗེ་མཚན་གྱིས་འབྱུང་པོ་ལའོ། །རྡོ་རྗེ་རྟགས་ནི་ལྷ་མ་ཡིན་ལའོ། །བཀྲ་ཤིས་ཀྱིས་ཚངས་པའི་སྲིན་པོ་ལའོ། །ཤིན་ཏུ་བཀྲ་ཤིས་ཀྱིས་གནོད་སྦྱིན་ལའོ། །པདྨའི་མཚན་
གྱིས་སྲིན་པོ་ལའོ། །པདྨ་ཕྲེང་གིས་གཟུ་ལུམས་ཅན་ཡུགས་ས་མའི་གདོན་ལའོ། །གཡུང་དྲུང་རིས་ཀྱིས་བི་ས་ར་ལ་བོང་བུའི་གདོང་ཅན་ལའོ། །རྩེ་གསུམ་པས་ནི་སྨྱོ་བྱེད་ལའོ། །རྡོ་རྗེས་ནི་ལོག་འདྲེན་ལའོ། །མཆེ་བས་ཤ་ཟ་ལའོ། །མདུང་ཐུང་གིས་བརྗེད་བྱེད་ལའོ། །ཀླུ་ལག་ནི་དུག་སྐྱེད་པའི་ཀླུ་
ལའོ། །ཞགས་པ་ནི་ནམ་གྲུ་ལའོ། །རལ་གྲི་ནི་བྱ་ལ་བསྟན་པར་བྱའོ། །དབྱུག་པ་ནི་སྐེམ་བྱེད་ལའོ། །འཁོར་ལོ་ནི་གཞོན་ནུ་ལའོ། །མཱ་མ་ཀཱིའི་ཕྱག་རྒྱ་ནི་ཐམས་ཅད་ལའོ། །རྡོ་རྗེ་ལྕགས་ཀྱུ་བསྟན་བྱ་ཞིང་། །རྡོ་རྗེ་འཛིན་བཀའ་བཟླས་བརྗོད་བྱ། །ལག་ན་རྡོ་རྗེས་སྔགས་བསྟན་པས། །གདོན་རྣམས་
ཐམས་ཅད་འཇིག་པར་བྱེད། །ཅེས་གསུངས་པས་རང་ཕྱག་ན་རྡོ་རྗེར་བསྒོམ་པར་ངེས་སོ། །རྒྱལ་བ་སྟེགས་བུའི་སྟེང་དུ་རྡོ་རྗེ་རྩེ་གསུམ་པ་ཆང་ཟུངས་ཅན་བྲིའོ། །དེ་བསམས་ལ་བཟླས་པས་སའི་གདོན་གྱི་ཕོ་ཉ་ཐམས་ཅད་ཀྱིས་མི་ཚུགས་སོ། རྣམ་པར་རྒྱལ་བ་རྡོ་རྗེ་རྩེ་གསུམ་པ་དབྱུག་པ་ལ་
བཙུགས་པ་མེ་འོད་འབར་བ་བསམས་ལ་སྔགས་དང་ཕྱག་རྒྱ་བཟླས་པས་ཚངས་པའི་ཆུའི་གདོན་གྱིས་མི་ཚུགས་སོ། །རྡོ་རྗེ་མཚན་གྱི་རྡོ་རྗེ་རྩེ་གསུམ་པ་བསམས་ནས་ཕྱག་རྒྱ་བཅིངས་ཤིང་བཟླས་པས་ལྷ་ཆེན་པོ་མེའི་གདོན་གྱིས་མི་ཚུགས་པར་བདེན་པའོ། །རྡོ་རྗེ་རྟགས་ཀྱི་སྔགས་དང་ཕྱག་རྒྱ་
བཅིངས་པ་ལོག་འདྲེན་རྣམས་ཀྱིས་མི་ཚུགས་པས་སྲ་བའོ། །བཀྲ་ཤིས་ཀྱི་སྔགས་དང་ཕྱག་རྒྱ་བཅིངས་པས་རྡོ་རྗེ་སྡེའི་རིགས་ཀྱི་དམྱལ་བས་མི་ཚུགས་པས་བརྟན་པའོ། །ཤིན་ཏུ་བཀྲ་ཤིས་ཀྱི་སྔགས་དང་ཕྱག་རྒྱ་བཅིངས་པས་ཕུར་བུ་གསུམ་པ་སྟེ་ཡི་དགས་ཀྱིས་མི་ཚུགས་པས་ཐོགས་པ་

73-1-284a

མེད་པའོ། །པདྨའི་མཚན་ནི་སྤྱན་རས་གཟིགས་དབང་ཕྱུག་སྟེ། བྱོལ་སོང་གི་སེམས་ཀྱིས་མི་ཚུགས་པས་མ་ཕམ་པའོ། །པདྨ་ཕྲེང་ནི་དཔལ་ཆེན་མོ་སྟེ་མིའི་སེམས་སྐྲག་པར་བྱེད་པའོ། །གཡུང་དྲུང་ནི་ཚོགས་ཀྱི་ལྷ་རྣམས་ཏེ། ལྷ་དང་ལྷ་མ་ཡིན་གྱི་སེམས་འཇིལ་བར་བྱེད་པའོ། །མདུང་རྩེ་
གསུམ་པས་ནི་རྫིང་གི་ལྷ་མོ་སྟེ། གནོད་སྦྱིན་གྱི་རིགས་རྣམས་གཅོད་པར་བྱེད་པའོ། །རྡོ་རྗེ་ནི་ཁྲོ་བོ་བདུད་རྩི་ཐབ་སྦྱོར་ཏེ། སྲིན་པོ་རྣམས་གནོན་པར་བྱེད་པའོ། །མཆེ་བ་ནི་མ་མོ་རྣམས་ཀྱི་སྟེ་རང་གི་ལས་དང་ཉོན་མོངས་པ་འཇིག་པར་བྱེད་པའོ། །མདུང་ཐུང་ནི་སྨིན་དྲུག་གི་བུ་ཀརྟི་ཀ་སྟེ་གཞན་གྱི་ལས་འཇིག་
པར་བྱེད་པའོ། །ཀླུ་ལག་ནི་ཀླུའི་རྒྱལ་པོ་རྒྱ་མཚོ་སྟེ། བདག་གི་གདོན་གཟའ་ཆེན་པོ་རྣམས་རླག་པར་བྱེད་པའོ། །ཞགས་པ་ནི་འཇིག་རྟེན་སྐྱོང་བའི་སྟེ། གཞན་ནི་གདོན་མ་རུངས་པའི་འཁོར་ལོ་ལས་ཐར་བར་བྱེད་པའོ། །རལ་གྲི་ནི་མིའི་སྟེ། འབྱུང་པོ་རྣམས་འགུགས་པར་བྱེད་པའོ། །དབྱུག་པ་ནི་སའི་
ལྷ་མོ་སྟེ། ཕྲིན་ལས་རྣམ་བཞི་བྱེད་དུ་འཇུག་པའོ། །འཁོར་ལོ་ནི་ནོར་ལྷ་སྟེ་མ་གྲུབ་པ་རྣམས་གྲུབ་པར་བྱེད་པའོ། །བདུད་རྩི་ཐབ་སྦྱོར་གྱིས་ནི་གྲུབ་པ་རྣམས་ཆུད་མི་ཟ་བར་བྱེད་པའོ། །རྡོ་རྗེ་མཱ་མ་ཀཱིས་ནི་འདོད་པ་ཐམས་ཅད་རབ་ཏུ་སྦྱིན་པར་བྱེད་པའོ། །དེ་ལྟར་ན་ལྷ་ཉི་ཤུ་རྩ་གཅིག་གི་ཕྱག་རྒྱ་བཅིང་བ་བཤད་
པ་ཡིན་ནོ། །དཀྱིལ་འཁོར་དང་པོའི་སྔགས་དང་ཕྱག་རྒྱ་བཅིང་བ་རྫོགས་སོ།།      །།དཀྱིལ་འཁོར་གཉིས་པ་ལ་མོས་པའི་སྔགས་དང་ཕྱག་རྒྱ་བཅིང་བ་བཤད་པ་ནི་བདག་ཉིད་ཆོ་ག་དྲུག་གིས་ལྷར་བསྐྱེད་ནས། མདུན་དུ་སྔ་མ་ལྟ་བུའི་གཞལ་ཡས་ཁང་གི་ནང་དུ་རྡོ་རྗེ་རིགས་ཀྱི་ཁྲོ་བོ་བཞག་པས། ཤར་
ཕྱོགས་སུ་ཁམས་གསུམ་རྣམ་པར་རྒྱལ་བའི་ཕྱག་རྒྱ་བཅིངས་ནས། སྔགས་ནི་ཏྲ་ཊ་ཏྲ་ཊ་ཏྲོ་ཊ་ཡ་ཏྲོ་ཊ་ཡ་ཨཥྚ་ཧ་ས་ནཱི་ལ་བཛྲ་སུ་བཛྲཱ་ཡ་སྭཱ་ཧཱ། ལྷོ་ཕྱོགས་སུ་རིན་ཆེན་རིགས་ཀྱི་རྣམ་པར་རྒྱལ་བའི་རིན་ཆེན་ཧཱུཾ་མཛད་ཀྱི་ཕྱག་རྒྱ་བཅིངས་ལ། ཨོཾ་སྥུ་ཊ་སྥུ་ཊ་སྥོ་ཊ་ཡ་སྥོ་ཊ་ཡ་ཧེ་ཕུལླུ་ནི་རུ་ཕུལླུ་གྲྀཧྞ་ཀུ་ལུ་
མི་ལི་ཙུ་ལུ་ཀུ་རུ་ཀུ་ལུ་བཛྲ་བི་ཛ་ཡཱ་ཡ་སྭཱ་ཧཱ། ནུབ་ཕྱོགས་སུ་པདྨའི་རིགས་ཀྱི་ཁྲོ་བོ་རྡོ་རྗེ་ཕུར་བུ་ཆོས་ཀྱི་ཧཱུཾ་མཛད་ཀྱི་ཕྱག་རྒྱ་བཅིངས་ལ། གྷུརྞ་གྷུརྞ་གྷུརྞཱ་པ་ཡ་གྷུརྞཱ་པ་ཡ་ཀཱི་ལི་ཀཱི་ལཱ་ཡ་སྭཱ་ཧཱ། བྱང་ཕྱོགས་སུ་ལས་ཀྱི་རིགས་ཀྱི་ཁྲོ་བོ་རྡོ་རྗེ་སྨྱོས་པ་ནི་ལས་ཀྱི་ཧཱུཾ་མཛད་ཀྱི་ཕྱག་རྒྱ་བཅིངས་ལ། 

73-1-284b

སརྦ་སཏྭ་ནི་བོ་དྷ་ཡ་བོ་དྷ་ཡ་སཾ་བོ་དྷ་ཡ་སཾ་བོ་དྷ་ཡ་ག་ཊ་ཀ་ཊ་མ་ཊ་མ་ཊ་ར་ཊ་ར་ཊ་མོ་ཊ་པྲ་མོ་ཊ་ནཱ་ཡ་སྭཱ་ཧཱ། ཤར་ལྷོ་མཚམས་ཀྱི་ཕུར་བུ་ཆེན་པོ་ནི་བྷྲ་མ་བྷྲ་མ་སཾ་བྷྲ་མ་ཡ་སཾ་བྷྲ་མ་ཡ་ཙྪིནྡ་ཙྪིནྡ་བྷིནྡ་བྷིནྡ་མ་ཧཱ་ཀཱི་ལི་ཀཱི་ལཱ་ཡ་སྭཱ་ཧཱ། ལྷོ་ནུབ་མཚམས་ཀྱི་ཁྲོ་བོ་ཕུར་བུའི་སྔགས་ནི། ཨོཾ་སརྦ་བྷཱུ་ཏ་ནི་ཀུཊྚ་ཀུཊྚ་སཾ་ཀུ་ཊ་ཡ་སཾ་
ཀུ་ཊ་ཡ་བནྡྷ་བནྡྷ་ཀྲོ་དྷ་ཀྲོ་དྷ་ཀཱི་ལི་ཀཱི་ལཱ་ཡ་སྭཱ་ཧཱ། ནུབ་བྱང་མཚམས་ཀྱི་ཕུར་བུ་གཏུམ་པོའི་སྔགས་ནི། ཨོཾ་སརྦ་ཤ་ཏྲཱུཾ་གྷ་ཊ་ནཱན། གྷ་ཊ་གྷ་ཊ། སངྒྷ་ཊ་ཡ་སངྒྷ་ཊ་ཡ། ཙུ་རུ་ཙུ་རུ་ཙཎྜ་ཀཱི་ལི་ཀཱི་ལཱ་ཡ་སྭཱ་ཧཱ། བྱང་ཤར་མཚམས་ཀྱི་ཁྲོ་བོ་རྡོ་རྗེ་ཕུར་བུའི་སྔགས་ནི། ཨོཾ་སརྦ་བིདྱཱ་བཛྲ་བཛྲ། ཏྲཱ་
ས་ཡ་ཏྲཱ་ས་ཡ། བཛྲ་ཀཱི་ལི་ཀཱི་ལཱ་ཡ་སྭཱ་ཧཱ། དེ་བཞིའི་ཕྱག་རྒྱ་ནི་རྡོ་རྗེ་བསྡམས་པ་ལས་གུང་མོ་གཉིས་རྡོ་རྗེ་ཕུར་པ་གཞིབས་པ་ནི་ཕུར་བུའི་ཕྱག་རྒྱའོ། །ཤར་ཕྱོགས་ཀྱི་སྒོ་བ་རྡོ་རྗེ་འཛིན་པའི་སྔགས་ནི། ཨོཾ་སྥུ་ཊ་སྥུ་ཊ་བཛྲ་བཛྲ། ཧ་ར་ཧ་ར་བཛྲ་དྷཱ་རཱ་ཡ་སྭཱ་ཧཱ། ལྷོའི་སྒོ་བ་རྡོ་རྗེ་རབ་ཏུ་འཇིགས་
པའི་སྙིང་པོ་ནི། ཨོཾ་ཀ་ཊ་ནི་བཛྲ་བཛྲ་པྲ་ཧ་ར་པྲ་ཧ་ར། བཛྲ་པྲ་བྷཉྫ་ནཱ་ཡ་སྭཱ་ཧཱ། ནུབ་ཀྱི་སྒོ་བ་རྡོ་རྗེ་མགྱོགས་པའི་སྙིང་པོ་ནི། ཨོཾ་མ་ཊ་བཛྲ་བཛྲ་མ་ཏི་སྠིར་བཛྲ་སུ་ཏི་སྠིར་བཛྲ་པྲ་ཏི་སྠིར་བཛྲ་མ་ཧཱ་བཛྲ་ཨ་པྲ་ཏི་ཧ་ཏ་བཛྲ། ཨ་མོ་གྷ་བཛྲ། ཨེ་ཧི་བཛྲ་ཤཱི་གྷཾ་བཛྲཱ་ཡ་སྭཱ་ཧཱ། བྱང་ཕྱོགས་ཀྱི་སྒོ་བ་རྡོ་རྗེ་བསྒྱུར་
བའི་སྙིང་པོ་ནི། ཨོཾ་མ་ཐ་བཛྲ་བཛྲ་དྷི་རི་དྷི་རི་དྷུ་རུ་དྷུ་རུ། སརྦ་བཛྲ་ཀུ་ལཾ་ཨ་བརྟཱ་ཡ་སྭཱ་ཧཱ། དེ་རྣམས་ཀྱི་ཕྱག་རྒྱ་ནི་རྡོ་རྗེ་ལྕགས་ཀྱུ་དང་ཞགས་པ་དང་ལྕགས་སྒྲོག་དང་། དྲིལ་བུའི་ཕྱག་རྒྱ་ཉིད་ཀྱིས་སོ། །དེ་ལྟར་སྔགས་དང་ཕྱག་རྒྱ་བཅིངས་ནས། བསྒྲུབ་པའི་ལྷ་ནི་ཡི་གེ་ཧཱུཾ་ལས་གཙོ་བོ་རྡོ་རྗེ་རྣམ་པར་
འཇོམས་པ་རྡོ་རྗེ་དང་སྡིགས་མཛུབ་བསྣམས་པ་བསྐྱེད་ལ་དེའི་ཐུགས་ཀའི་ཧཱུཾ་ལས་ཁྲོ་བོ་བཅུ་གཉིས་སྤྲུལ་ནས། དེ་དང་ཡེ་ཤེས་སེམས་དཔའ་ཐ་མི་དད་པར་གྱུར་པ་ལས། སྔགས་དང་ཕྱག་རྒྱ་བཅིངས་ནས་སྒྲུབ་པོ་ཞེས་ཕྱག་ན་རྡོ་རྗེ་དབང་བསྐུར་བ་ལས་གསུངས་སོ། །ཡང་ན་སྔ་མའི་གནས་དེའི་སྟེང་དུ་
ཏྲ་བ་ཏིའི་ཁྲོ་བོ་ལྔ་དང་། ཕྱོགས་སྐྱོང་བ་བཅུ་དང་བཅས་པ་སྤྱན་དྲངས་ལ། དབུས་ཀྱི་གཙོ་བོ་རྡོ་རྗེ་རྣམ་པར་འཇོམས་པ་སྐུ་མདོག་ལྗང་སྔོན་གཡས་པ་ན་རྡོ་རྗེ་རྩེ་ལྔ་པ་རྒྱ་གྲམ་ཕྱོགས་གཅིག་མེད་པ་བསྣམས་པ། དེའི་ཕྱག་རྒྱ་ནི་ཐལ་མོ་སྦྱར་ལ། རྡོ་རྗེ་དབྱིངས་ཀྱི་དབང་ཕྱུག་མའི་ཕྱག་རྒྱ་ལས་སྲིན་ལག་

73-1-285a

གཉིས་ནང་དུ་བསྣོལ་ལ། ན་མོ་རཏྣ་ཏྲ་ཡཱ་ཡ། ན་མོ་ཤྩཎྜ་བཛྲ་པཱ་ཎ་ཡེ། ཨོཾ་བཛྲ་བི་དཱ་ར་བཛྲ་ཧཱུཾ་ཕཊ། བཛྲ་ཡ་ན་སྭཱ་ཧཱ། བྱང་ཤར་མཚམས་ཀྱི་རྡོ་རྗེ་གཏུམ་པོ་དམར་ནག་རྡོ་རྗེ་རྩེ་གཅིག་པ་འཕྱར་ཏེ་བསྣམས་པའོ། །ཕྱག་རྒྱ་ནི་གཡོན་པ་སྡིགས་མཛུབ་སྙིང་གར་གཞག་ལ་གཡས་པ་བ་
དན་གསུམ་པ་འཕྱར་བ་དང་། སྔགས་ནི་ཨོཾ་མ་ཧཱ་ཙཎྜ་ཧཱུཾ་ཕཊ། སྟོབས་པོ་ཆེ་ནི་རྡོ་རྗེ་ཀ་ན་ཡ་ཞེས་བྱ་བ་རྡོ་རྗེ་ནས་འབྲས་འདྲ་བ་བསྣམས་པ་སྐུ་མདོག་ནག་པོའོ། །དེའི་ཕྱག་རྒྱ་ནི་ལག་པ་གཉིས་སྙིམ་པ་ཁོང་སྟོང་དུ་སྦྱར་ལ། སྔགས་ནི་ཨོཾ་མ་ཧཱ་བ་ལ་ཧཱུཾ་ཕཊ། གཞན་གྱིས་མི་ཐུབ་པ་ནི་རྡོ་རྗེ་རྩེ་གསུམ་པ་བསྣམས་
པ་སྐུ་མདོག་ལྗང་སེར། ཕྱག་རྒྱ་ནི་ཛམྦྷ་ལའི་ཆུ་སྦྱིན་པའི་ཕྱག་རྒྱ་ཉིད་གཞན་གྱིས་མི་ཐུབ་པའི་ཕྱག་རྒྱ་སྟེ། སྔགས་ནི་ཨོཾ་ཨ་ཛི་ཏ་ཧཱུཾ་ཕཊ། ཤར་དུ་བརྒྱ་བྱིན། ལྷོར་གཤིན་རྗེ། ནུབ་ཏུ་ཆུ་ལྷ། བྱང་དུ་གནོད་སྦྱིན། བྱང་ཤར་དུ་དབང་ལྡན། ཤར་ལྷོར་མེ་ལྷ། ལྷོ་ནུབ་ཏུ་བདེན་བྲལ། ནུབ་བྱང་དུ་སྲིན་པོ། 
སྟེང་དུ་ཚངས་པ་དང་ཉི་ཟླ། འོག་གི་སའི་ལྷ་རྣམས་ཀྱི་འཆད་པར་གྱུར་ཅིང་སྔགས་དང་ཕྱག་རྒྱས་བསྐུལ་བ་ལ་བཞུགས་སུ་གསོལ་བར་བྱའོ། །འཁྲུལ་འཁོར་བྱེད་པར་འདོད་ན་ཕྱིས་འཆད་པའི་ཁྲོ་བོ་བཅུ་གསུམ་བསམས་ལ། ཞི་བ་ནི་གྲོ་གའམ་རས་ལ་འཁྲུལ་འཁོར་བཅུ་གསུམ་པ་བྲིས་ལ་སྔགས་དང་
ཕྱག་རྒྱས་བསྐུལ་བའམ། རྒྱས་པ་རས་སེར་པོ་ལ་བྲི་བའམ། དབང་ལ་བུད་མེད་ཀྱི་སྨད་ཤམ་ལ་བྲི་བའོ། །མངོན་སྤྱོད་ཀྱི་དུར་ཁྲོད་ཀྱི་རས་ལ་བྲི་བ་དང་། གི་ཝང་ངམ་གུར་གུམ་མམ་མཚལ་ལམ་དུག་གིས་བྲིས་ལ། ཁྲོ་བོ་བཅུ་གསུམ་པའི་སྔགས་དང་། ཕྱག་རྒྱ་བཅིང་བར་བྱའོ། །འཁྲུལ་འཁོར་བྲི་བ་ནི་
འགྲེལ་པ་ལས་ཤེས་པར་བྱའོ། །ཡང་ན་དཀྱིལ་འཁོར་ལྔ་པ་ཕོ་ཉ་བཅུས་བསྐོར་བའི་ཕྱག་ན་རྡོ་རྗེ་གཞལ་ཡས་ཁང་གི་དབུས་སུ་གཞག་ལ། ཕྱིས་འཆད་པར་འགྱུར་བའི་སྔགས་དང་ཕྱག་རྒྱ་བཅིང་ཞིང་བསྒྲུབ་པར་བྱའོ། །ཡང་ན་ཕོ་ཉ་མོ་དྲུག་ཅུ་རྩ་བཞིས་བསྐོར་བའི་དཀྱིལ་འཁོར་ཕྱིས་འཆད་པར་
འགྱུར་བའི་སྔགས་དང་ཕྱག་རྒྱས་བཅིང་ཞིང་བསྒྲུབ་པར་བྱའོ། །དེ་ལྟར་དཀྱིལ་འཁོར་དྲུག་གི་ཕྱག་རྒྱ་བཅིང་བའི་ཆོ་ག་རྫོགས་སོ།།      །།ལྔ་པ་དཀྱིལ་འཁོར་དྲུག་གི་ཕྱིར་བཟློག་པའི་ཆོ་ག་བཤད་པ་ནི་ཕྱིར་བཟློག་པ་ལུས་ཀྱི་ཉེས་པ་ནི་ལྕེས་སྔགས་ཟློས་མི་ནུས་པ་དང་། ལག་པས་ཕྱག་རྒྱ་བཅིང་མི་ནུས་

73-1-285b

པ་དང་། རྐང་པས་སྐྱིལ་ཀྲུང་དང་སྟང་སྟབས་མི་ནུས་པ་དང་། མིག་གིས་སྐུ་གཟུགས་དང་མཆོད་རྟེན་དང་ལྷ་ལ་བལྟ་བར་མི་ནུས་པ་དང་། ངག་གི་ཉེས་པ་རྫུན་དང་ཕྲ་མ་དང་། ངག་འཁྱལ་བ་དང་ཚིག་རྩུབ་མོ་ལ་དགའ་བ་དང་། སེམས་ཀྱི་ཉེས་པ་བཟླས་བརྗོད་བྱེད་པའི་ཚེ་ཁྲོ་བ་དང་། འདོད་ཡོན་
ལྔ་ལ་ཆགས་པ་ཆེ་བ་དང་། ཞུམ་པ་དང་མི་དགའ་བ་དང་། འཇིགས་པ་དང་འཇུངས་པ་དང་། རིག་སྔགས་ཟློས་པའི་ཚེ་སྦྲིད་པ་དང་ལུད་པ་དང་། གཏམ་གྱིས་བར་ཆོད་པའི་ཚེ་ཉེ་རེག་བྱས་ནས་ཕྱག་འཚལ་ཏེ། གཞི་ནས་བཟླས་བརྗོད་བརྩམས་ན། བཟླས་བརྗོད་ཀྱི་བགེགས་དང་བར་གཅོད་
ཐམས་ཅད་བཟློག་ཅིང་ཟིལ་གྱིས་མནན་པར་འགྱུར་རོ། །བཟླས་པའི་ཕྱིར་བཟློག་པ་བཤད་ནས། མཆོད་པའི་ཕྱིར་བཟློག་པ་ནི། མཆོད་པ་དུས་གསུམ་དུ་བྱས་ན་བར་ཆོད་ཕྱིར་བཟློག་གོ། །རྫས་ཀྱིས་ཕྱིར་བཟློག་པ་ནི་ལྷ་ལ་བསྔོས་པའི་སྣོད་རྣམས་ཀྱང་ཉིན་རེ་བཞིན་ལན་རེ་རེ་བཀྲུ་བར་བྱའོ། །
མེ་ཏོག་ལ་སོགས་པའི་རྙིང་པ་རྣམས་དུས་གསུམ་དུ་ཕྱག་པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པའི་གླེགས་བམ་བཀླག་པ་དང་། མཆོད་རྟེན་དང་དཀྱིལ་འཁོར་དུས་གསུམ་དུ་བྱས་ན་བར་ཆད་རྣམས་ཕྱིར་བཟློག་པར་འགྱུར་རོ། །སློབ་མ་གདུལ་བྱའི་ཕྱིར་བཟློག་པ་ནི་བགེགས་
ཀྱིས་བརླམས་པའམ། ནད་ཀྱིས་གཟིར་བའམ། ལྷོད་པ་དང་བག་མེད་པ་དང་། ལུས་དང་སེམས་སྐྱོ་བའམ། མ་བསྡམས་པའམ་མི་གཙང་བས་བཟླས་བརྗོད་བྱས་ན་བཟླས་པ་གྲངས་སུ་མི་གཏོགས་ཏེ། མཉམ་པར་མ་གཞག་པའི་བཟླས་བརྗོད་དང་། སྦྱིན་སྲེག་བྱས་པ་དང་། སྤྱན་
དྲང་བའི་ཆོ་ག་བཟླས་པ་མ་རྫོགས་ན་གྲངས་སུ་མི་བརྩི་བས་ཟླ་བ་ཉི་མ་གཟས་ཟིན་པའི་ཚེ། སྔགས་སྟོང་བཟླས་ན་ཕྱིར་བཟློག་གི་བསྙེན་པར་ཐེ་ཚོམ་མེད་དོ། །སངས་རྒྱས་ཞབས་ཀྱིས་བཅགས་པའི་གཙུག་ལག་ཁང་ངམ་མཆོད་རྟེན་ནམ་ཆོ་འཕྲུལ་གྱི་ཟླ་བ་ལ་བཟླས་ན་བསྙེན་པར་འགྱུར་རོ། །
བླ་མ་ལ་སྔགས་ཀྱི་གནང་བ་མནོས་ན་ཡང་མྱུར་དུ་འགྲུབ་པར་འགྱུར་རོ། །བུམ་པ་སྤོས་ཆུས་བཀང་བ་ཏྲ་བ་ཏིའི་དཀྱིལ་འཁོར་ལྷ་ལྔ་པའམ། བཅུ་གསུམ་པའི་སྔགས་ཟློས་པའི་བུམ་པས་དབང་བསྐུར་ན་ཡང་ཕྱིར་བཟློག་པར་འགྱུར་རོ། །བུམ་པ་མ་རྙེད་ན་མཆོད་ཡོན་གྱི་སྣོད་མེ་

73-1-286a

ཏོག་དང་ཆུས་བཀང་ལ། བགེགས་བསལ་ཞིང་ཕྱིར་བཟློག་པའི་ཕྱིར་དབང་བསྐུར་བར་བྱའོ། །ཚེས་བརྒྱད་དམ་བཅོ་ལྔའམ། གནམ་སྟོང་གི་ཚེ། ལྷ་བཤོས་ཆེ་བ་དང་། མར་མེ་ཆེས་ཆེ་བ་དང་། སྦྱིན་སྲེག་ཆེས་ཆེ་བ་དང་། ས་གཞི་བྱི་དོར་ཆེས་ཁྱད་པར་གྱུར་པ་བྱས་པས་ཀྱང་
ཕྱིར་བཟློག་པར་འགྱུར་རོ། །བར་ཆད་ཀྱི་བགེགས་དང་བྲལ་ན་སྐུ་གཟུགས་དང་མཆོད་རྟེན་ལས་འོད་འབྱུང་བར་འགྱུར་རོ། །བཀྲེས་པ་ཆུང་བ་དང་ནད་ལས་ཐར་བ་དང་། ཤེས་རབ་འཕེལ་བ་དང་། གཟིམ་དངས་ཆེ་བ་དང་། རྨི་ལམ་བདེན་པ་མཐོང་བ་དང་། བཟླས་བརྗོད་ལ་དགའ་བ་དང་། ངལ་བ་
ཆུང་བ་དང་། དྲི་ཞིམ་པ་དང་། གཏོང་ཕོད་པ་དང་། ཡོན་ཏན་ལྷུར་ལེན་པར་འགྱུར་རོ། །བསྙེན་པའི་ཕྱིར་བཟློག་པའི་ཆོ་ག་རྫོགས་སོ།།      །།སྟ་གོན་དང་དཀྱིལ་འཁོར་ཆེན་པོའི་ཚེ། མཆོད་པ་མེད་པ་དང་། མི་གཙང་བ་དང་། བཟླས་བརྗོད་ཀྱི་ཡི་གེ་ལ་ལྷག་ཆད་བྱུང་བ་དང་། ལེ་ལོ་དང་
འདོད་ཆགས་དང་གཡེང་བ་དང་བཅས་པའི་ཚེ་ཏིལ་ནག་དང་ཡུངས་ཀར་གྱིས་སྦྱིན་སྲེག་བྱས་ན་ཕྱིར་བཟློག་པར་འགྱུར་རོ། །དཀྱིལ་འཁོར་ཆེན་པོའི་ཚེ་དབང་བསྐུར་བྱ་བའི་སློབ་མ་མཚམས་མེད་པ་ལྔ་དང་། དེ་དང་ཉེ་བ་ལྔ་དང་། མི་དགེ་བ་བཅུ་བྱས་པའང་ཐོག་མར་བཟླས་པ་འབུམ་བྱས་པ་ཡང་ཐ་མར་
སྦྱིན་སྲེག་བྱས་ན་ཕྱིར་བཟློག་པར་འགྱུར་རོ། །ལྔ་པ་ཕྱིར་བཟློག་པ་བཤད་ནས། གསང་སྔགས་ཀྱིས་ཡོངས་སུ་བསྐང་བ་བཤད་པ་ནི་ཡི་གེ་ལྷག་ཆད་བྱུང་བ་དང་། རྨི་ལམ་དུ་བྱུང་ངམ་ལྷས་བསྟན་ན་དེ་བསྐང་བའི་ཆོ་ག་ནི་ཤོག་ཤོག་གམ་གྲོ་ག་ལ་གི་ཝང་གིས་སྔགས་ཀྱི་ཡི་གེ་ཡངས་མོར་བྲིས་ལ་ལྷ་
ལ་མཆོད་པ་ཆེན་པོ་བྱས་ཤིང་། སྦྱིན་སྲེག་བྱས་ནས། རིག་སྔགས་ཁྲིའི་སྟེང་དུ་བཞག་སྟེ། མངོན་པར་མཆོད་ནས་གསོལ་བ་བཏབ་ནས། བདག་ཉིད་ཀུ་ཤའི་སྟན་ལ་མགོ་ཤར་ཕྱོགས་སུ་བསྟན་ནས་ཉལ་ནས་རིག་སྔགས་ཀྱི་དབང་ཕྱུག་མ་དང་། བདེ་བར་གཤེགས་པ་སྲས་དང་བཅས་པ་རྣམས་
ཀྱི་ཤོག་ཤོག་ལ་སྔགས་ཚང་བར་བྲིས་པའམ། རྨི་ལམ་དུ་ཚང་བར་སྟོན་པར་འགྱུར་རོ། །ས་བོན་དང་དཀྱིལ་འཁོར་ཆེན་པོའི་ཚེ་རྫས་ཀྱི་ལྷག་མ་དང་མ་ཚང་བ་དང་། དཀྱིལ་འཁོར་ལྷའི་ལྷག་པ་དང་། མ་ཚང་བ་བསྐང་བར་བྱའོ། །དྲུག་པ་བསྐང་བའི་ཆོ་ག་རྫོགས་ནས། ལྷ་ཚིམ་པར་བྱ་བའི་

73-1-286b

ཆོ་ག་བཤད་པ་ནི་མཆོད་པ་བྱེད་པའི་ཐོག་མར་ཁྲུས་དང་ཆས་བྱས་པས་ལྷ་མཉེས་པ་དང་། ཨ་ཀ་རུ་ནག་པོ་ལ་སོགས་པའི་མཆོད་པའི་རྫས་ཁྱད་པར་ཅན་ཕུལ་བས་ལྷ་མཉེས་པ་དང་། ཏིལ་དང་ཞོ་དང་མར་དང་སྦྲང་རྩི་བསྲེས་པའི་སྦྱིན་སྲེག་འབུམ་ཕྲག་བརྒྱ་ཕུལ་ན་ལྷ་མཉེས་པ་དང་། ཉིན་ཞག་གསུམ་མམ་
ལྔའམ་བདུན་ནམ་ཉི་ཤུ་རྩ་གཅིག་གི་བར་དུ་བའི་འོ་མ་དང་ཟས་མཆོག་དང་མར་དང་བཅས་པས་སྦྱིན་སྲེག་བརྒྱ་ཕུལ་ན་མཉེས་པར་འགྱུར་རོ། །ལྷའི་མཆོད་པའི་བར་དུ་གཅོད་པའམ་ལྷ་དང་འབྲལ་དུ་འཇུག་པ་ལྷའི་བགེགས་བྱེད་པ་ལ་མངོན་སྤྱོད་ཀྱི་ཕུར་པས་གདབ་པ་དང་། ཡུངས་ཀར་གྱིས་གཟིར་བ་
དང་། འཁྲུལ་འཁོར་བྲིས་ནས་སྙིང་གར་གཞུག་པ་དང་། ཉིས་ལྡབ་བམ་སུམ་ལྡབ་ཏུ་བསྐྱར་ན་ལྷ་མཉེས་པར་འགྱུར་རོ། །བསྙེན་པའི་ལྷ་ཚིམ་པར་བྱེད་པ་བསྟན་ནས་དཀྱིལ་འཁོར་གྱི་ཚེ་བཟླས་བརྗོད་དང་། སྦྱིན་སྲེག་དང་དབང་བསྐུར་གྱིས་ཀྱང་ལྷ་རྣམས་མཉེས་པར་འགྱུར་རོ། །དེ་ལྟར་མཉེས་པ་
བདུན་པ་བསྟན་ནས། བརྒྱད་པ་ཚར་བཅད་པ་ནི་དཀྱིལ་འཁོར་བྲི་བ་དང་། སྟ་གོན་གྱི་ཚེ་རི་བོའམ་མཚོའམ། དུར་ཁྲོད་དམ། ཁང་སྟོང་ངམ། ཤིང་གཅིག་གམ། འབབ་ཆུའི་འགྲམ་མམ། སྐྱེད་མོས་ཚལ་ལམ། ཕུག་ལ་སོགས་པའི་གནས་སུ་བགེགས་ཉེ་བར་ཞི་བར་བྱ་བའི་ཕྱིར་དང་པོར་
ས་སྦྱང་བའི་ཆོ་ག་བྱའོ། །ཙནྡན་དམར་པོས་བྱུགས་པའི་སེང་ལྡེང་གི་ཕུར་པ་བཞི་ལ་སྐུད་དམར་དཀྲི་ཞིང་ཕུར་བུའི་སྔགས་བརྒྱ་བཟླ་ཞིང་གདབ་པ་དང་། བདུད་རྩི་འཁྱིལ་པའི་སྔགས་བཟླས་ལ་ཡུངས་ཀར་གྱིས་བྲབ་པ་དང་། བ་དན་དཀར་པོ་ཅིག་ལ་རིག་སྔགས་ཀྱི་རྒྱལ་པོ་བཟླས་ལ་སྨྱུག་མ་རིང་པོའི་རྩེ་
མོ་ལ་བཏགས་ཏེ་ཤར་ཕྱོགས་སུ་གཟུགས་པ་དང་། རྡོ་རྗེ་ར་བ་བསྔགས་པའི་ལྕགས་ཀྱི་ཕྱེ་མས་ར་བ་བྱ་བ་དང་། རྡོ་རྗེ་དྲ་བའི་སྔགས་ཀྱིས་ལྕགས་ཀྱི་ཕྱེ་མ་ལ་བརྒྱ་བཟླས་པས་རི་མོ་བྲིས་ནས་རྡོ་རྗེ་དྲ་བར་འགྱུར་རོ། །དཀྱིལ་འཁོར་དང་པོའི་སྒོར་བདུད་རྩི་འཁྱིལ་པའི་རལ་གྲིས་བསྲུང་བ་དང་། གཞན་
གྱིས་མི་ཐུབ་པའི་རྩེ་གསུམ་པས་བསྲུང་བ་དང་། འཕྲོག་མ་ལ་སོགས་པ་གནོད་སྦྱིན་གྱི་སྡེ་དཔོན་ཉི་ཤུ་རྩ་བརྒྱད་བྲིས་པས་བསྲུང་བར་བྱའོ། །ནམཿསརྦ་ཏ་ཐཱ་ག་ཏེ་བྷྱཿསརྦྦ་མུ་ཁེ་བྷྱཿ། སརྦ་ཏ་ཐཱ་ག་ཏེ་བྷྱཿཀམྦྷ། བཛྲ་ཀཱི་ལི་ཀཱི་ལཱ་ཡ་སྭཱ་ཧཱ། ཨ་གརྦྷ་སྭཱ་ཧཱ། རྡོ་རྗེ་ཕུར་བུའི་སྔགས་སོ། །ན་མཿསརྦྦ་

73-1-287a

ཏ་ཐཱ་ག་ཏ་བྷྱཿསརྦྦ་མུ་ཁེ་བྷྱཿསརྦྦ་བཛྲ་པྲ་ཀ་ར། ཏ་ཐཱ་ག་ཏ་གྷ་ཏ་ཛ་ན་ཀ་ཀུ་རུ་ཀུ་རུ་ཙཀྲ་ན་སྭཱ་ཧཱ། རྡོ་རྗེ་ར་བའི་སྔགས་སོ། །ན་མ་སརྦྦ་ཏ་ཐཱ་ག་ཏེ་བྷྱཿསརྦྦ་མུ་ཁེ་བྷྱཿསརྦྦ་ཐཱ་བཛྲ་པཉྫ་ར་ནི་ཀྵི་པ་ཀ་ག་ན་ཀཾ་སྭཱ་ཧཱ། རྡོ་རྗེ་དྲ་བའི་སྔགས་སོ། །བརྒྱད་པ་ཚར་གཅད་པ་རྫོགས་སོ། །དགུ་པ་བསྐུལ་
བ་ནི་དཀྱིལ་འཁོར་ཆེན་པོའི་ཚེ་ལུགས་སུ་བླུགས་པའམ་བྲིས་པའམ། བརྐོས་པའམ་བརྡུངས་པ་ལ་སོགས་པ་མདུན་དུ་བཞག་ལ་བདག་ཉིད་ཆོ་ག་དྲུག་གིས་ལྷར་བསྐྱེད་ལ། སྙིང་པོ་དང་བསྐུལ་བའི་སྔགས་སྦྱར་ལ་ལྷ་ལ་བསྐུལ་བར་བྱའོ། །དེ་ལ་ལྷ་དྲུག་ནི་འདིར་རྡོ་རྗེ་རིགས་ཀྱི་དབང་དུ་བྱས་ནས་དང་
པོ་སྟོང་པ་ཉིད་དུ་བསྒོམས་ནས། ནམཿསརྦྦ་ཏ་ཐཱ་ག་ཏ་ནཾ་ཨོཾ་སརྦྦ་བི་ཤུདྡྷ་བཛྲ་ཧཱུཾ་ཞེས་བྱ་བས་སྣོད་བཅུད་ཐམས་ཅད་སྟོང་པ་ཉིད་དུ་བསམ་པར་བྱའོ། །དོན་དམ་པའི་ལྷ་སྟེ་དང་པོའོ། །སྟོང་པ་ཉིད་ཀྱི་ཡེ་ཤེས་ལས་ཀུན་རྫོབ་ཀྱི་སྣང་བ། ནམཿས་མནྟ་བུདྡྷཱ་ནཱཾ། ཙཎྜ་མ་ཧཱ་རོ་ཥ་ཎ་ཧཱུཾ་ཙནྡྲ་ཨ་ས་ན་ཞེས་བྱ་བས་རིག་བྱེད་
ཀྱི་སྒྲའི་ཚུལ་དུ་རྟོག་བྲལ་གྱི་ཤེས་པས་སྒྲ་བརྙན་གྱི་ཚུལ་དུ་སྣང་བ་གདན་བསྐྱེད་པ་སྟེ་གཉིས་པའོ། །དེ་ནས་རྟོག་པ་དང་བཅས་པའི་ཤེས་པས་ཡི་གེ་ཧཱུཾ་ཀྵྨཱི་བསམས་པ་ནི་ཡིག་འབྲུའི་ལྷ་སྟེ་གསུམ་པའོ། །ཧཱུཾ་ལས་འོད་ཟེར་ཕྲེང་བ་དང་བཅས་པས་སྤྲོ་བསྡུ་བྱས་བ་ལས་རྡོ་རྗེ་རྩེ་ལྔ་པའི་ཕྱག་རྒྱ་བསམ་པ་སྟེ་ཕྱག་རྒྱའི་
ལྷ་སྟེ་བཞི་པའོ། །ཕྱག་མཚན་ནས་འོད་ཟེར་འཕྲོ་འདུ་བྱས་པ་ལས་སྐུ་ཕྱག་རྒྱ་ཆེན་པོའི་ལྷ་ནམཿས་མནྟ་བུདྡྷཱ་ནཱཾ་ཙཎྜ་མ་ཧཱ་རོ་ཥེ་ཎ་ཧཱུཾ། ཏྲཻ་ལོ་ཀྱ་བི་ཛ་ཡ་ཧཱུཾ་ཞེས་བྱ་བ་ཁྲོ་བོ་ཁམས་གསུམ་རྣམ་པར་རྒྱལ་བ་ཞལ་གཅིག་པ་ཕྱག་གཉིས་པ་གནོད་མཛེས་ཀྱི་ཕྱག་རྒྱས་རྡོ་རྗེ་དྲིལ་བུ་བསྣམས་པ། གཡས་པ་བརྐྱང་
བའི་གནས་པས་དབང་ཕྱུག་ཆེན་པོ་དང་ཨུ་མ་མནན་པ། རིག་སྔགས་ཀྱི་རྒྱལ་པོ་ཆེན་པོ་སྟོབས་པོ་ཆེ་ཞེས་གྲགས་པ་འོད་ཟེར་གྱི་ཕྲེང་བ་ཅན་བསམས་ལ་མཱ་མ་ཀཱིའི་ཕྱག་རྒྱ་བཅིངས་ཏེ། སྙིང་གར་ན་མཿས་མནྟ་བཛྲཱ་ཎཱཾ་ཀྲི་ཏ་ཀྲི་ཏ་ཛ་ཡནྟི་སྭཱ་ཧཱ། ཞེས་པས་སྙིང་གར་དཔལ་བེའུ་བསྐྱེད་པར་བྱའོ། །དཔྲལ་བར་སྔགས་དང་
ཕྱག་རྒྱས་སྨིན་མཚམས་ཀྱི་མཛོད་སྤུ་བསྐྱེད་པར་བྱའོ། །ལྐོག་མར་སྔགས་དང་ཕྱག་རྒྱས་ཚངས་པའི་གསུང་དབྱངས་བསྐྱེད་པར་བྱའོ། །སྤྱི་གཙུག་ཏུ་བཞག་ནས་དབུའི་གཙུག་ཏོར་བསྐྱེད་པར་བྱའོ། །རྐང་པ་དང་ལག་པའི་མཐིལ་དུ་འཁོར་ལོ་རྩིབས་སྟོང་དང་ལྡན་པ་བསྐྱེད་པར་བྱའོ། །སྐུ་ཕྱག་རྒྱ་ཆེན་

73-1-287b

པོའི་ལྷ་སྟེ་ལྔ་པའོ། །དེ་ནས་ལྷ་ཉི་ཤུ་རྩ་གཅིག་གམ་བཅུ་གསུམ་པའམ་ཏྲ་བ་ཏི་ལྷ་ལྔ་པའམ། འཁྲུལ་འཁོར་གྱི་ལྷའམ། རྡོ་རྗེ་ཕོ་ཉ་མོ་བཅུས་བསྐོར་བའམ། ཕོ་ཉ་མོ་དྲུག་ཅུ་རྩ་བཞིས་བསྐོར་བའི་ཕྱག་རྒྱ་དང་སྔགས་རིག་པ་མཆོག་གི་རྒྱུད་དམ། སྣ་ཚོགས་རབ་ཏུ་གྲུབ་པའི་རྒྱུད་ལས་གསུངས་
པ་རྣམས་ཀྱིས་བསྐུལ་བའི་སྔགས་དང་སྤེལ་ནས་བཟླས་པ་བྱ་སྟེ་བསྙེན་པ་དང་པོའོ། །བསྙེན་པའི་ཚེ་བུམ་པ་བསྐྱེད་ནས་བུམ་པ་ལ་བཟླས་པ་བསྙེན་པ་གཉིས་པའོ། །སྦྱིན་སྲེག་བྱ་ཞིང་སྔགས་དང་ཕྱག་རྒྱ་བཅིངས་པ་བསྙེན་པ་གསུམ་པའོ། །རས་རིས་སམ་སྐུ་གཟུགས་བཞག་ནས་སྔགས་དང་
ཕྱག་རྒྱ་ཟློས་པ་སྟེ་བསྙེན་པ་བཞི་པའོ། །ཞི་བའི་རྫས་མར་རམ་འོ་མ་མདུན་དུ་བཞག་ལ། རྒྱས་པའི་རྫས་གི་ཝང་ངམ་སྲེ་ཏ་ཨཉྫ་ན་ལ་སོགས་པ་གཞག་པའམ། དབང་ལ་མཚལ་དང་ཙནྡན་དང་གུར་གུམ་ལ་སོགས་པ་གཞག་པ་དང་། མངོན་སྤྱོད་ལ་ཁྲག་གམ་ཞག་གམ་དུག་ལ་སོགས་པ་མདུན་དུ་གཞག་ལ་དྲོ་
བའམ་འབར་བའམ། འཕར་བའམ་དུ་བར་འཐུལ་བའམ་རུལ་བ་ལ་སོགས་པའི་རྟགས་བྱུང་བའི་བར་དུ་སྔགས་དང་ཕྱག་རྒྱ་བཅིང་བ་ནི་བསྙེན་པ་ལྔ་པའོ། །ནད་པ་ལ་སོགས་པ་ཐག་རིང་ན་ཡང་རིམས་དང་དུག་དང་ནད་ཞི་བར་བྱ་བའི་ཕྱིར་ནད་པ་དེའི་གཟུགས་བརྙན་བྱས་ལ་སྔགས་དང་ཕྱག་རྒྱ་བཅིང་བ་དང་། 
རྒྱས་པ་ལ་ཚེ་འཕེལ་བ་དང་། རིགས་རྒྱུད་འཕེལ་བ་དང་། ནོར་འཕེལ་བར་བྱ་བའི་ཕྱིར་དེའི་གཟུགས་བརྙན་བྱས་ལ་སྔགས་དང་ཕྱག་རྒྱ་བཅིང་བ་དང་། དབང་ལ་མི་རིགས་བཞི་དབང་དུ་བྱ་བ་དང་། ལྷ་དང་དྲི་ཟ་དང་གནོད་སྦྱིན་དང་སྲིན་པོ་དང་། ཀླུ་དང་ལྷ་མ་ཡིན་གྱི་གཟུགས་བརྙན་བྱས་ལ་སྔགས་
དང་། ཕྱག་རྒྱ་བཅིང་བ་དང་། མངོན་སྤྱོད་ལ་བསད་པ་དང་། བསྐྲད་པ་དང་རྨུགས་པ་དང་། རེངས་པར་བྱ་བའི་ཕྱིར་དེའི་གཟུགས་བརྙན་བྱས་ལ་སྔགས་དང་ཕྱག་རྒྱ་བཅིང་བ་ནི་བསྙེན་པ་དྲུག་པའོ། །དེ་ལྟར་བསྙེན་པ་རྫོགས་ནས་ལྡང་བར་འདོད་པའི་ཆོ་ག་བཅུ་གཅིག་བྱ་སྟེ། དང་པོར་ཕྱག་འཚལ་
བ་དང་། མཆོད་པ་དང་། བསྟོད་པ་དང་། རང་དང་སྒྲུབ་པའི་གྲོགས་པོ་དང་། བྱིས་པ་ཆུང་བ་ལ་འདི་ལྟར་བསྲུང་བར་བྱ་སྟེ། གསེར་དང་། ལུང་ཐང་དང་། པུན་ཛ་རི་དང་། གི་ཝང་དང་། མར་དང་། སྦྲང་རྩི་དང་། ཤུ་དག་རྣམས་ལ་ན་མོ་བཛྲ་པཱ་ཎི་སྱ་ཙི་ལི་ཙི་ལི། བིནྡྷི་བིནྡྷི། མུཉྩ་མུཉྩ། དི་བི་ལ་ཀ་

73-1-288a

ན་སྭཱ་ཧཱ། བཛྲ་པཱ་ཎི་ཀ་ན་སྭཱ་ཧཱ། བཛྲ་པཱ་ཎི་རཱ་ཛྙཱ་པ་ཡ་ཏི་སྭཱ་ཧཱ། དེ་བ་ས་ན་དྷ་རཱ་ཛྙཱ་པ་ཡ་ཏི་སྭཱ་ཧཱ། རི་ཡ་སཱ་རཱ་ཛྙཱ་པ་ཡ་ཏི་སྭཱ་ཧཱ། ཞེས་བྱ་བའི་སྔགས་དང་སྨན་གྱིས་བསྲུང་བར་བྱའོ། །ཤིས་པར་བརྗོད་པ་དང་། སྨོན་ལམ་གདབ་པ་དང་། བཟོད་པར་གསོལ་བ་དང་། ལྷའི་བུམ་པ་གོས་ཀྱིས་དགབ་པ་དང་། གོ་ཆ་བསྐོན་
ནས་རུ་དྲཱ་ཀྵ་གདོང་གཅིག་པའམ། རྡོ་རྗེ་འབྲུ་ཡང་ལག་པ་གཡོན་པར་བཅངས་ལ་བསྲུང་བར་བྱའོ། །དེ་བཞིན་གཤེགས་པའི་ཡི་གེ་བརྒྱ་པའམ། རྡོ་རྗེའི་རིགས་ཀྱི་ཡི་གེ་བརྒྱ་པ་བཟླས་པས་ལྷག་པ་དང་མ་ཚང་བ་བསྐང་བར་བྱའོ། །ལྡང་བའི་ཚེ་མཚན་ཐོག་ཐག་བསྡུ་བ་དང་ལིངྒ་དང་སྨན་ཡང་གོས་
ཀྱིས་དགབ་པར་བྱའོ། །ཕྲེང་བ་དང་སྔགས་དང་ལྷ་ལ་བཅོལ་བར་བྱའོ། །གཟུངས་འདོན་ཅིང་བདག་དང་། ལྷ་མི་བརྗེད་པས་ལྡང་བར་བྱའོ། །བསྙེན་པའི་ཆོ་ག་རྫོགས་སོ།    །དེ་ལྟར་བསྙེན་པ་ཞག་བདུན་ནམ། ཟླ་བ་གཅིག་གམ་ཟླ་བ་དྲུག་གམ་ལོ་གཅིག་གི་བར་དུ་བསྙེན་པ་བྱས་ལ་ས་སྦྱང་བའི་དཀྱིལ་
འཁོར་གྱི་ཐིག་གམ། རས་རིས་སམ་སྐུ་གཟུགས་མདུན་དུ་བཞག་ལ་ཉེ་བའི་བསྙེན་པ་ཞག་བདུན་ནམ་གསུམ་བྱའོ་ཞེས་གསུངས་སོ། །རྡུལ་ཚོན་གྱི་དཀྱིལ་འཁོར་བྱེད་པའི་ཚེ་སྔོན་དུ་སའི་ཆོ་ག་བྱ་བ་ནི་སྐར་མ་རྒྱལ་དང་གཟའ་ཕུར་བུ་དང་། ཁྱིམ་ཁྱུ་མཆོག་ལ་བབ་པའི་དུས་སུ་ས་སྦྱང་བར་བྱ་སྟེ། 
ཐོག་མར་བདག་ཉིད་བདུད་རྩི་ཐབ་སྦྱོར་རམ་ཧཱུཾ་མཛད་ཀྱི་སྐུར་བསྐྱེད་ལ་མཎྜལ་བྱ། དྲིའི་ཐིག་ལེ་བྱ། མེ་ཏོག་དགྲམ། མཆོད་པ་བཤམས། གཏོར་མ་བཤམས་ལ་སའི་ལྷ་མོ་སྤྱན་དྲང་བ་དང་། འཁོར་ལ་གཏོར་མ་སྦྱིན་པར་བྱའོ། །དེ་ནས་སྦྱིན་སྲེག་དང་། བདུད་རྩི་འཁྱིལ་པའི་སྔགས་
རིངས་ཀྱིས་བགེགས་བསྐྲད་པར་བྱའོ། །ལྐོག་མའམ་རྐེད་པའམ། པུས་མོ་ནུབ་ཙམ་དུ་བརྐོས་ལ། སྤོས་ཆུས་སྦྲུས་པའི་སས་བཀང་སྟེ། རྡོ་རྗེ་མཱ་མ་ཀཱིའི་སྔགས་དང་། ཕྱག་རྒྱས་སྨན་ལྔ་དང་རིན་པོ་ཆེ་ལྔ་གཞུག་པར་བྱའོ། །སའི་མཚན་ཉིད་བསྟན་ནས་མཐོན་དམན་ཅན་དང་། ཚེར་མ་ཅན་
དང་། གྱོ་མོ་ཅན་དང་། ངམ་གྲོག་དང་རུས་པ་དང་སྡོང་དུམ་དང་ཐལ་བ་དང་། གསེག་མ་དང་། རྡོ་དང་། སྐྲ་དང་། སྲིན་བུ་དང་། གྲོག་སྦུར་ལ་སོགས་པ་དེ་རྣམས་ཀྱི་ཉེ་བར་འཚེ་བ་སྤངས་ཏེ། ཤར་དང་བྱང་དུ་གཞོལ་བ་ཉེ་འཁོར་ན་ཆུ་མོད་པ། ཁོ་ར་ཁོར་ཡུག་ཏུ་མེ་ཏོག་དང་འབྲས་བུར་ལྡན་པ། 

73-1-288b

འོ་མ་ཅན་གྱི་ཤིང་སྐྱེས་པ་ཞི་བ་ལ་ས་དཀར་པོ། རྒྱས་པ་ལ་སེར་པོ། དབང་ལ་དམར་པོ། མངོན་སྤྱོད་ལ་ས་གཞི་ནག་པོ་དེར་ས་སྦྱང་བར་བྱའོ། །ས་གཞི་འཐས་པ་དང་ཁང་ཐོག་དང་རྡོ་ལེབ་དང་། མཆོད་རྟེན་དྲུང་དང་། འབབ་ཆུ་དང་མཚོའི་དྲུང་དང་། མངོན་སྤྱོད་ཀྱི་སྦྱིན་སྲེག་གམ་ཕུར་བུས་གདབ་པའི་
གནས་སུ་ས་གཞི་སྦྱང་མི་དགོས་སོ། །ས་གཟུང་བ་ནི་དང་པོར་བའི་རྣམ་ལྔ་དང་། ཙནྡན་དང་གླ་ཙིས་བྱུགས་ནས་མེ་ཏོག་སིལ་མ་ལ་སོགས་པ་བཀྲམ་སྟེ། ཁྲོ་བོ་ཀཱི་ལི་ཀཱི་ལཱ་ཡ་བཟླས་པས་བསང་གཏོར་བྱའོ། །གཞན་གྱིས་མི་ཐུབ་པ་དང་རྒྱལ་བའི་གཙུག་ཏོར་གྱི་སྔགས་ཀྱིས་ས་སྦྱང་བ་དང་། རྡོ་
རྫེའི་རིགས་ལ་ཁྱད་པར་དུ་བདུད་རྩི་ཐབ་སྦྱོར་གྱིས་ས་གཟུང་ངོ་། །ས་བརྟག་པ་ནི་རི་བོ་མཆོག་གི་དངོས་གྲུབ་འཐོབ་བོ། །མཚོ་འགྲམ་དུ་འཇིག་རྟེན་པའི་དངོས་གྲུབ་འཐོབ་པོ། །དུར་ཁྲོད་ལ་སོགས་པར་འཇིག་རྟེན་པའི་དངོས་གྲུབ་འཐོབ་པོ། །རིང་བསྲེལ་ཅན་གྱི་མཆོད་རྟེན་ཀྱི་དྲུང་དུ་སྔགས་ཀྱི་དངོས་
གྲུབ་འཐོབ་བོ། །འབབ་ཆུའི་འགྲམ་དུ་རིག་སྔགས་འགྲུབ་པོ། །ནགས་ཚལ་དུ་གནོད་སྦྱིན་མོ་འགྲུབ་པོ། །ཕུག་ཏུ་མངག་གཞུག་པ་རྣམས་འགྲུབ་པོ། །བསྙེན་པའི་ཚེ་ཚར་གཅད་པའི་ཆོ་ག་སྔར་བཤད་པ་བཞིན་དུ་བྱས་པས་ནི་ས་བསྲུང་བར་འགྱུར་རོ། །དེ་ནས་རྡོ་རྗེ་སློབ་དཔོན་དང་། སྒྲུབ་པའི་གྲོགས་
པོས་སྔར་བཤད་པ་བཞིན་དུ་ཁྲུས་དང་གོས་དང་རྒྱན་བཏགས་པ་དང་། མཆོད་པ་རྣམས་བྱིན་གྱིས་བརླབ་ཅིང་སྔ་མ་བཞིན་དུ་བདག་ཉིད་ཆོ་ག་དྲུག་གིས་ལྷར་བསྐྱེད་ལ། སྔ་མ་བཞིན་དུ་རི་རབ་ཀྱི་རྩེ་མོར་བསམས་ནས། རྡོ་རྗེ་ལྕགས་ཀྱུ་མའི་ཕྱག་རྒྱས་སའི་ལྷ་མོ་སྤྱན་དྲང་བར་བྱ་སྟེ། བ་དན་གསུམ་
པའི་ཕྱག་རྒྱ་ལས་གུང་མོ་ལྕགས་ཀྱུས་གཡབ་པ་དང་། ན་མོ་ཙུ་རུ་ཀུནྡ། ཙུ་རུ་ཀུནྡ་བཛྲ་པཱ་ཎི། ན་མོ་བུདྡྷཱ་ཡ་སྭཱ་ཧཱ། ཨོཾ་པྲ་ཏི་ས་ས་པི་པ་མ་ཏྲ་སནྣི་ཧི་ཏོ་བྷ་བ་ཞེས་བརྗོད་ཅིང་བཞུགས་སུ་གསོལ་ལོ། །དེ་ནས་མཆོད་ཡོན་དང་བཅས་པའི་མཆོད་པ་ལྔས་མཆོད་ལ། སྐྱོབ་པ་སངས་རྒྱས་ཐམས་ཅད་
ཀྱི། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་སྡེ་བཅོམ་ལྟར། །དེ་བཞིན་བདག་གིས་བདུད་ཀྱི་སྡེ། །ཕམ་པར་བྱས་ཏེ་དཀྱིལ་འཁོར་བྲི། །ཞེས་བྱ་བས་དཔང་དུ་གསོལ་ལོ། །མི་བསྐྱོད་པའི་

73-1-289a

ཕྱག་རྒྱས་ས་ལ་ལན་གསུམ་རེག་པར་བྱའོ། །དེ་ནས་འཁོར་ལ་གཏོར་མ་བྱིན་གྱིས་བརླབ་ཅིང་བསྔོས་ནས། སའི་ལྷ་མོ་དང་བཅས་པ་གཤེགས་སུ་གསོལ་ལོ། །དེ་ནས་སྟ་གོན་གྱི་བགེགས་ཉེ་བར་ཞི་བའི་ཆོ་ག་བྱས་ཏེ་མ་དང་ཊ་ལས་མིག་གཉིས་སུ་ཉི་མ་དང་ཟླ་བ་བསྐྱེད་ལ། མིག་འབྲས་
ཧཱུཾ་ལས་རྡོ་རྗེ་བསྐྱེད་པར་བྱའོ། །རྐང་མཐིལ་དུ་ཧཱུཾ་ལས་སྣ་ཚོགས་རྡོ་རྗེ་བསྐྱེད་ལ་ཁྲོ་བོའི་སྐུར་བསྒོམས་ལ། སྒྲུབ་པའི་གྲོགས་མཆོག་གིས་ངན་སོང་སྦྱོང་བ་ནས་འབྱུང་བའི་མེ་ལྟར་འབར་བའི་མཚན་བརྒྱ་རྩ་བརྒྱད་པས་བསྟོད་ལ་དེའི་རྗེས་ལ་སློབ་དཔོན་གྱིས་ཁྲོ་བོའི་བསྟོད་པ་བྱ་སྟེ། ཆོས་དབྱིངས་སྟོང་
པ་གཉིས་མེད་ངང་ཉིད་ལས། །འཇིག་རྟེན་སྤྱོད་པའི་ཚུལ་ཡང་མི་སྤང་སྟེ། །ཐབས་ལ་མཁས་པས་འཇིགས་བྱེད་སྐུར་སྟོན་པ། །ཁྲོ་ཆེན་འབར་བའི་ཚོགས་ལ་ཕྱག་འཚལ་ལོ། །དེ་ནས། དཀྱིལ་འཁོར་ཆེན་པོའི་ས་གཞི་ལ་གནས་པ། །ཞེས་པས་ཀྱང་བཀའ་བསྒོ་སྟེ། དེ་རྣལ་འབྱོར་གྱི་དབང་ཕྱུག་ཆེ་གེ་
མོ་ཞེས་བྱ་བ་དང་། རིག་སྔགས་འཆང་གྲུབ་པ་རྒན་པོ་དང་། རྒན་མོ་རྣམས་དེངས་ཤིག་ཅེས་བྱ་བས་བགེགས་བསྐྲད་པ་དང་། ཧཱུཾ་ཧཱུཾ་འགྲོ་བ་འཛིན་པ་ཡིས་ནི་བྱས་ཟིན་གྱི། །ཧཱུཾ་ཧཱུཾ་གདུག་པའི་ཡིད་ཅན་གང་ཡིན་ཕ་ཟད་སོང་། །ཧཱུཾ་ཧཱུཾ་ཁྲོ་བོའི་རྒྱལ་པོ་སྡང་མིག་འབར་བ་ཡིས། །ཧཱུཾ་ཧཱུཾ་བསྲེགས་ནས་ཐལ་
བ་བཞིན་དུ་བྱས་ས་རེ། །ཤར་ཕྱོགས་ནས་ནི་ཆར་ཆེན་འབབ། །མེ་ཕྱོགས་གློ་བུར་སྣང་བ་འབྱུང་། །གཤིན་རྗེ་འཆི་བདག་གཟུགས་སུ་འབྱུང་། །བདེན་བྲལ་སེམས་ཅན་ལ་འཇིགས་བྱེད། །ཆུ་ཕྱོགས་གཤིན་རྗེ་འབྲུག་སྒྲ་སྒྲོགས། །རླུང་གི་ཕྱོགས་ནས་འཚུབ་མ་འབྱུང་། །གནོད་སྦྱིན་ཕོ་མོ་
བྱང་ཕྱོགས་གནས། །དབང་ལྡན་ཕྱོགས་ནས་སྣ་ཚོགས་གཟུགས། །སྟེང་ནས་མཐུ་ཆེན་ལྷ་རྣམས་དང་། །འོག་ནས་ས་འགས་གཡོ་བྱེད་པ། །གང་དག་མཚན་མོ་རྒྱུ་བ་ཡི། །བགེགས་རྣམས་ཐམས་ཅད་འགྲོ་བར་གྱིས། །ཞེས་བྱ་བ་བརྗོད་ལ་བདུད་རྩི་ཐབ་སྦྱོར་གྱི་སྔགས་རིང་གིས་བགེགས་བསྐྲད་
པར་བྱའོ། །དེ་ནས་རྡོ་རྗེའི་འགྲོས་ཀྱིས་བསྐོར་བ་ལན་གསུམ་བྱས་ལ་འགྲེང་ལ་ཐལ་མོ་མཚོག་མར་གཞག་ལ་དེ་བཞིན་གཤེགས་པ་རྣམས་ལ་ཕྱག་འཚལ་ལོ། །སྔགས་ནི་སྔར་བཤད་པས་བྱའོ། །དེ་ནས་སྟང་སྟབས་བྱ་སྟེ། གཡས་བརྐྱང་དང་གཡོན་བརྐྱང་གིས་ཕྱོགས་བཞིར་བྱ་བ་དང་། ཐལ་མོ་

73-1-289b

སྦྱར་ཏེ་རྐེད་པའི་གནས་སུ་གཞག་ལ། རྟིང་པ་ཕྲད་དེ་མིག་ཐུར་ལ་བལྟས་ལ། རྡོ་རྗེ་ཕུར་བུ་སྲེད་མེད་ཀྱི་བུས་ས་འོག་རིམ་པ་བདུན་གཡོ་བར་བྱའོ། །ཧཱུཾ་འབྲུག་གི་སྒྲ་ལྟ་བུ་དང་། རྡོ་རྗེ་གྱེན་དུ་གསོར་ཞིང་རྡོ་རྗེ་གར་བསྐོར་ནས་ལེགས་པར་བླངས་པའི་རྡོ་རྗེ་འཕེན་པ་དང་བསྡུ་བ་བྱའོ། །དེ་ནས་ཁྲོ་བོ་དང་ཕྱག་བརྙན་དང་
བྲན་མོ་དང་ཕོ་ཉ་མོ་རྣམས་སྤྲོ་ཞིང་། རྡོ་རྗེ་བེ་ཅོན་ཐོགས་པའི་གཡས་བརྐྱང་དང་། དབྱུག་པ་དང་མདུང་ཐུང་དང་། མདའ་བོ་ཆེ་དང་། འཁོར་ལོ་དང་། རྡོ་རྗེ་རྩེ་གཅིག་པ་དང་། གཏུན་ཤིང་ལ་སོགས་པ་ཐོགས་པའི་ཁྲོ་བོ་བགེགས་གཞོམ་པའི་སྟང་སྟབས་བྱའོ། །ཚངས་པའི་གནས་མན་ཆད་གསེར་
གྱི་ས་གཞི་ཡན་ཆད་ཀྱི་ལྷ་དང་ལྷ་མ་ཡིན་དང་། གནོད་སྦྱིན་རྣམས་གཅིག་ཏུ་བསྡུས་ནས། རྡོ་རྗེ་མེ་དང་རླུང་གི་ཁྲོ་བོས་བསྐྲད་པར་བྱའོ། །དཀྱིལ་འཁོར་གྱི་དབུས་སུ་སེང་གེའི་ཚུལ་དུ་མཆོངས་ནས་གཡས་བརྐྱང་དང་གཡོན་བརྐྱང་བྱ་བ་དང་རྡོ་རྗེ་ཁུ་ཚུར་གཉིས་རྐེད་པར་བཞག་ནས་ལུས་པོ་འགུལ་ཞིང་གར་
བྱ་བ་དང་། རྡོ་རྗེ་གསོར་ཞིང་རྐང་པ་གཡས་གཡོན་ས་ལ་གདབ་པ་དང་། བུང་བའི་འཕུར་སྟངས་བྱ་སྟེ། རྐང་པ་བརླར་གཞག་ལ་ལུས་པོ་བསྐོར་བར་བྱའོ། །གཡོན་པའི་རྡོ་རྗེའི་ཁུ་ཚུར་གྱི་ནང་དུ་གཡས་པའི་སོར་མོ་གསུམ་བཙུགས་པ་བཏོན་ལ་རལ་གྲི་ཤུབས་ནས་འབྱིན་པ་བཞིན་དུ་རལ་གྲིའི་ཕྱག་
རྒྱས་བགེགས་བསྐྲད་པ་དང་། རྐང་པ་གཉིས་གཤིབས་ལ་རྡོ་རྗེ་སྤྱི་བོ་ལ་བསྐོར་ཞིང་འཁོར་ལོ་འཕང་བའི་ཚུལ་དུ་བྱའོ། །རྒྱས་པར་ནི་ཕྱག་ན་རྡོ་རྗེ་དབང་བསྐུར་བའི་རྒྱུད་དང་། མངོན་པར་བྱང་ཆུབ་པའི་རྒྱུད་ཕྱི་མ་ལས་བལྟ་བར་བྱའོ། །དེ་ལྟར་སྟང་སྟབས་རྫོགས་ནས། སྔར་བཤད་པའི་ཚར་བཅད་པའི་ཆོ་གས་
ཀྱང་འདིར་ར་བ་དང་དྲ་བས་བསྲུང་བར་བྱའོ། །དེ་ནས་སེང་ལྡེང་ངམ་ལྕགས་ལས་བྱས་པའི་ཕུར་བུ་སྟོད་ཁྲོ་བོ་སྨད་རྡོ་རྗེ་རྩེ་གཅིག་པ་ལྟ་བུ་བསྐྱེད་ལ་ཕུར་བུའི་སྔགས་བརྒྱ་རྩ་བརྒྱད་བཟླས་པར་བྱ་ཞིང་དབུས་དང་། ཟུར་བཞིར་བཙུགས་ལ། སྐུད་པ་དམར་པོ་བཏགས་པ་དང་། མེ་ཏོག་གི་ཕྲེང་བ་དང་། 
དྲི་དང་གུ་གུལ་གྱི་དུད་པ་དང་། གོ་ཆ་བསྐོན་པའི་བར་དུ་ཕུར་བུའི་ཆོ་ག་རྫོགས་པར་བྱའོ། །དེ་ནས་དཀྱིལ་འཁོར་དྲུག་གང་ཡང་རུང་བར་བྱེད་པར་འདོད་པས་བྷྲཱུཾ་ལས་གཞལ་ཡས་ཁང་བསྐྱེད་ལ་བའི་རྣམ་པ་ལྔ་དང་། ཙནྡན་ལ་སོགས་པའི་དྲིས་བྱུགས་ཏེ། དཀྱིལ་འཁོར་དྲུག་གི་ལྷ་དང་མཐུན་པའི་

73-1-290a

སོ་སོའི་སྔགས་ཟློས་ཤིང་དྲིའི་ཐིག་ལེ་དང་། མེ་ཏོག་གི་ཚོམ་བུ་བྱའོ། །དེ་ནས་དཀྱིལ་འཁོར་དྲུག་གང་བྱེད་འདོད་པའི་ལྷར་བསྐྱེད་ལ། མེ་ཏོག་གི་སིལ་མ་གཏོར་ཏེ། སྔགས་དང་ཕྱག་རྒྱས་སྒོ་ཕྱེ་ལ། སྔར་གྱི་བསྙེན་པ་བཞིན་དུ་སྤྱན་དྲང་བ་དང་། སྦྱང་བ་དང་བཅིང་བ་དང་། ཕྱིར་
བཟློག་པ་དང་། ལྷག་པ་དང་མ་ཚང་བ་བསྐང་བ་དང་། ལྷ་ཚིམ་པར་བྱ་བའི་ཕྱིར་མཆོད་པ་རྒྱས་པ་སྔ་མ་བཞིན་དུ་དབུལ་བར་བྱའོ། །དེ་ནས་བུམ་པ་ལྷག་པར་གནས་པ་བྱ་སྟེ། རྩ་བ་ནག་ནོག་མེད་པ། ཁ་གྱེད་པ། མཆུ་འཕྱང་བ། གསུས་པ་ཆེ་བ། མགྲིན་པ་རིང་བ། རས་དང་། དར་གྱིས་
མགུལ་པ་བཅིངས་པ་འབྲས་བུ་ཅན་གྱི་ཤིང་གིས་ཁ་བརྒྱན་པའི་ནང་དུ་སྨན་ལྔ་དང་། འབྲུ་ལྔ་དང་། རིན་པོ་ཆེ་ལྔ་དང་། སྤོས་ལྔ་དང་། སྙིང་པོ་ལྔ་སྤོས་ཆུ་དང་བཅས་པ་བཅུག་ལ་རཾ་ལས་བུམ་པ་སྔ་མའི་སྔགས་དང་ཕྱག་རྒྱས་སྟོང་པར་བསམས་ལ་བྷྲཱུཾ་ལས་གཞལ་ཡས་ཁང་དུ་བསམས་ལ། བཾ་
ལས་འོ་མའི་རྒྱ་མཚོའི་སྟེང་དུ་ཨ་ལས་བྱུང་བའི་ཟླ་བ་དང་པདྨ་བསམས་ལ་དེའི་སྟེང་དུ་ལྷ་སོ་སོའི་སྔགས་ཀྱིས་ལྷར་བསྐྱེད་པར་བྱའོ། །ཡོད་ཅིང་འབྱོར་ན་དཀྱིལ་འཁོར་དྲུག་གི་སོ་སོའི་ལྷ་དང་མཉམ་པའི་བུམ་པའི་སྟེང་དུ་ལས་ཐམས་ཅད་པའི་བུམ་པ་བྱ་བའམ། །མི་འབྱོར་ན་ལྔའམ་
ལས་ཐམས་ཅད་པ་དང་གཉིས་བྱའོ། །དེ་ནས་སྔགས་དང་ཕྱག་རྒྱས་སྒོ་ཕྱེ་སྟེ་ལྷ་སྤྱན་དྲང་བར་བྱའོ། །ཧཱུཾ་ཡེ་ཤེས་བསྐལ་པ་མེ་ལྟར་འབར་བའི་འོད། །མ་རིག་འདོད་ཁམས་བདུད་རྣམས་ཐམས་ཅད་བསྲེག །ཞེ་སྡང་གཤིན་རྗེའི་འཇིག་རྟེན་ཐམས་ཅད་འཇོམས། །ལོག་འདྲེན་
སྲིན་པོ་ཡང་དག་འདུལ་བའོ། །དཔའ་བོ་ཆེན་པོ་དཔའ་མཚན་སྟག་ལྤགས་ཅན། །རིག་པའི་རྒྱལ་པོ་ཁྲོ་བོ་བཞུགས་སུ་གསོལ། །ལོག་འདྲེན་འཇོམས་པའི་སླད་དུ་སྤྱན་འདྲེན་གྱིས། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །བ་དན་གསུམ་པའི་ཕྱག་རྒྱས་གཡབ་
ཅིང་། ན་མོ་ཙུར་ཀུནྡྷ། ཙུར་ཀུནྡྷ། བཛྲ་པཱ་ཎི་བུདྡྷ་ས་སྱ། བཛྲ་ཨཾ་ཀུ་ཤ་ཛཿཞེས་བྱ་བས་སྤྱན་དྲང་ངོ་། །ཨོཾ་པྲ་བ་ར་སཏྐཱ་ར་པྲ་ཏཱིཙྪ་སྭཱ་ཧཱ། ཞེས་བྱ་བས་ཞབས་བསིལ་དང་། པུཤྤ་མཱ་ལ་ཡེ་སྭཱ་ཧཱ། ཞེས་བྱ་བས་མེ་ཏོག་གི་གདན་དབུལ་བར་བྱའོ། །དེ་ནས་བདུད་རྩི་འཁྱིལ་པས་ལྷའི་

73-1-290b

ཕྱི་ནས་འོངས་པའི་བགེགས་བསྐྲད་ལ། ཕཊ་མ་ཧཱ་ཀཱ་ལ་ཧཱུཾ་ཞེས་བྱ་བས་སྒོ་བཅད་དེ། རྡོ་རྗེ་རིགས་ཀྱི་ཕྱག་རྒྱ་དང་། བཛྲ་དྷྲྀ་ཀ་ཅེས་བྱ་བའི་སྤྱིའི་སྙིང་པོ་ཡང་བརྗོད་པར་བྱའོ། །དེ་ནས་དཀྱིལ་འཁོར་དྲུག་གང་བྱེད་པའི་སྔགས་དང་ཕྱག་རྒྱ་བསྟན་ཏེ། སྐུ་མདོག་དང་ཕྱག་མཚན་ཡང་བུམ་པའི་ནང་དུ་
གསལ་བར་དམིགས་ནས་སྐུ་ཕྱག་རྒྱ་ཆེན་པོ་བསྒོམས་ཏེ། མཆོད་ཡོན་སྔོན་དུ་འགྲོ་བའི་མཆོད་པ་དང་། བསྟོད་པ་དང་མཚན་བརྒྱ་རྩ་བརྒྱད་འདོན་པ་དང་། རྡོ་རྗེ་རྣམ་པར་འཇོམས་པའི་གཟུངས་ཀྱང་ཚར་གཅིག་གདོན་པར་བྱའོ། །བདག་གི་དགེ་བའི་རྩ་བ་འདི་དག་གིས་འཇིག་རྟེན་དང་འཇིག་
རྟེན་ལས་འདས་པའི་རྒུད་པ་དང་བྲལ་བར་གྱུར་ཅིག །འཇིག་རྟེན་དང་འཇིག་རྟེན་ལས་འདས་པའི་འབྱོར་པ་ཕུན་སུམ་ཚོགས་པ་ཐོབ་པར་གྱུར་ཅིག་ཅེས་བྱ་བའི་སྨོན་ལམ་གདབ་པར་བྱའོ། །བཅོམ་ལྡན་འདས་རྡོ་རྗེ་འཆང་བ་འཁོར་དང་བཅས་པ་ཡང་བདག་དང་སློབ་མར་བཅས་པ་ལ་དབང
བསྐུར་བ་དང་ཁྲུས་བྱ་བར་ཡང་གནང་བར་མཛད་དུ་གསོལ། བུམ་པ་ལྷག་པར་གནས་པའི་ཆོ་གའོ། །དེ་ནས་སྦྱིན་སྲེག་ལྷག་པར་གནས་པར་བྱ་སྟེ། ཞི་བ་བྱེད་ན་དཀྱིལ་འཁོར་གྱི་བྱང་ཤར་གྱི་མཚམས་སུ་ཐབ་ཁུང་ཟླུམ་པོ་སོར་བཞི་ཕྱིར་དོར་བའི་ཁ་ཁྱེར་ཟླུམ་པོ་དང་། སོར་བཞི་
སྟེང་དུ་བརྩེགས་པའི་ཁ་ཁྱེར་གྱིས་བསྐོར་བ་དང་། གོར་བཞི་ཕྱི་རོལ་དུ་བསྐོར་བ་ཁ་ཁྱེར་ལ་རིག་པ་མཆོག་དང་ངན་སོང་སྦྱོང་བའི་རྒྱུད་ནས་འབྱུང་བ་བཞིན་དུ་ཕྱག་མཚན་བཀོད་དེ། ཚོན་རྩི་དཀར་པོས་བྱུགས་ཏེ་འོ་མ་ཅན་གྱི་ཤིང་ལ་མར་དང་འོ་མ་དང་། སྦྲང་རྩིར་བཅས་པས་སྦྱིན་སྲེག་
བྱའོ། །བྱང་ཕྱོགས་སུ་རྒྱས་པའི་ཐབ་ཁུང་གྲུ་བཞི་པ་ཁ་ཁྱེར་སོར་བརྒྱད་པ་རིམ་པ་གསུམ་དང་བཅས་པ་སྔ་མའི་རྒྱུད་ལས་འབྱུང་བ་བཞིན་དུ་ཕྱག་མཚན་བཀོད་དེ་ས་སེར་བྱུགས་ཏེ། ཞོ་དང་འབྲས་ཆན་དང་བཅས་པ་སྦྱིན་སྲེག་བྱའོ། །ནུབ་ཕྱོགས་སུ་གཞུ་ལྟ་བུའི་ཐབ་ཁུང་ལ། རྒྱར་ཁྲུ་
གང་ཟབས་སུ་ཁྲུ་ཕྱེད། ཞེང་དུ་ཡང་ཁྲུ་ཕྱེད་ཡོད་པ། ཁ་ཁྱེར་ནི་སོར་བཞི་པ་རིམ་པ་གསུམ་གྱིས་བསྐོར་བ། རྒྱུད་ལས་འབྱུང་བ་བཞིན་དུ་ཕྱག་མཚན་བཀོད་ལ། བཙག་གིས་བྱུགས་ཏེ། མར་དང་། སྦྲང་རྩི་དང་། མེ་ཏོག་ལ་སོགས་པས་དབང་གི་སྦྱིན་སྲེག་བྱའོ། །ལྷོ་ཕྱོགས་སུ་

73-1-291a

དཀྱིལ་འཁོར་གྲུ་གསུམ་ཁ་ཁྱེར་སུམ་བརྩེགས་དང་བཅས་པ། སོར་གསུམ་པའི་ཚད་ལ། རྒྱུད་ལས་འབྱུང་བ་བཞིན་དུ་ཁྲོ་བོའི་ཕྱག་མཚན་བཀོད་ལ་ཚོན་རྩི་སྔོ་ནག་གིས་བྱུགས་ལ་དུག་དང་ཁྲག་དང་སྐེ་ཚེ་དང་། ལན་ཚྭ་ལ་སོགས་པས་སྦྱིན་སྲེག་བྱའོ། །ཡང་ན་གྲུ་གསུམ་སྒོ་
ནུབ་ཏུ་བཏོད་པའི་དཀྱིལ་འཁོར་བྲིས་ལ་དེའི་དབུས་སུ་གནོད་སྦྱིན་གྱི་སྡེ་དཔོན་མཐུ་ཆེན་ལེགས་པར་གྲུབ་པ་ཞེས་བྱ་བ་དང་། ཕྱོགས་གཅིག་ཏུ་དབྱིག་པ་ཁུ་ཚུར་རྡོ་རྗེ་ལྕགས་ཀྱུ་ཀཱི་ལི་ཀཱི་ལ་འཇིགས་བྱེད། སེར་སྐྱ་དང་། ཐོག་ཐོག་དང་། ལུ་གུ་རྒྱུད་དང་། རྣམ་རྒྱལ་དང་། ནག་པོ་དགོད་དོ། །
སྐོར་ནི་དགའ་བྱེད་གདོང་དང་རྡོ་རྗེ་སྡེ་དང་། ལག་བཟངས་གསུམ་དགོད་དོ། །གྲུ་གསུམ་ཁ་རན་ཅན་ལ། ཡམ་ཤིང་སེང་ལྡེང་དང་ནིམ་པ་དང་དུར་ཁྲོད་ལས་སྐྱེས་པ་དང་། དུག་དང་ཁྲག་དང་སྐེ་ཚེ་དང་ཡུངས་ཀར་དང་གཟུགས་བརྙན་གྱི་སྟེང་དུ་གནས་ནས་བསྲེག་པའམ། མཇུག་ཏུ་གཟུགས་
བརྙན་གཏུབ་ཅིང་བསྲེག་པར་བྱའོ། །རྡོ་རྗེ་རྣམ་འཇོམས་ལ་མ་མོ་བཅུས་བསྐོར་བའི་སྙིང་པོ་མ་དྷི་ཞེས་བྱ་བ་ཡིན་པར་ལེགས་པར་འགྲུབ་པ་ལས་གསུངས་སོ། །ཡང་ན་ལས་ཐམས་ཅད་པའི་ཐབ་ཁུང་ཞི་བ་དང་མཚུངས་པ་ལས། ཅུང་ཟད་ཁ་ཕྱིར་གྱེད་པ་ལ། དཀྱིལ་འཁོར་དྲུག་གང་བྱེད་པའི་ལྷ་
བཀོད་ལ། འོ་མ་ཅན་གྱི་ཤིང་ལ་མེ་སྦར་ལ། ཨ་ལས་པདྨའི་སྟེང་དུ་མེ་ལྷ་སེར་པོ་ཞལ་གཅིག་སྤྱན་གསུམ་པ་ཚངས་པའི་གཟུགས་ཅན་རིལ་པ་སྤྱི་བླུགས་དང་། ཕྲེང་བ་ཐོགས་པ་མཆོད་ཕྱིར་ཐོགས་དང་། ཐལ་རིས་གསུམ་པས་མཚན་པ། ར་སྐྱེས་ལ་ཞོན་པའི་མེ་ལྷ་བསྐྱེད་དེ་མེ་སྦར་ནས། མེ་ལྷ་ཡེ་ཤེས་སེམས་དཔའ་
སྤྱན་དྲངས་ཏེ། ཚུར་གཤེགས་ཚུར་སྤྱོན་འབྱུང་པོ་ཆེ། །མེ་ཡི་རྒྱལ་པོ་དྲང་སྲོང་ཆེ། །སྲེག་བླུགས་ཞལ་ཟས་འདི་བཞེས་ལ། །འབར་བའི་ནང་དུ་བཞུགས་སུ་གསོལ། །ཞེས་བརྗོད་ལ། སྐྱབས་སྦྱིན་གྱི་ཕྱག་རྒྱ་ལས་མཐེ་བོ་སྲིན་ལག་གི་དྲུང་དུ་གཞག་ལ། ཨགྣེ་ཨེ་ཧྱེ་ཧི་མ་ཧཱ་བྷཱུ་ཏ། དེ་བ་རྀ་ཥྀ་དྭི་ཛ་སརྦོཏྟ་མ་གྲྀ་ཧི་
ཏོ྅་ཧུ་ཏི་མ་ཧཱ་རསྨ་སནྣི་ཧི་ཏོ་བྷ་བ་ཞེས་པའི་སྔགས་ཀྱིས་བཞུགས་སུ་གསོལ་ལོ། །མཆོད་ཡོན་དང་ཞབས་བཀྲུ་བ་དང་། གདན་དང་སྐུ་ཁྲུས་གསོལ་བ་དང་། དྲིས་བྱུག་པ་དང་། མེ་ཏོག་དང་སྤོས་ལ་སོགས་པས་མཆོད་པ་དང་འོ་མ་དང་ནས་དང་འབྲས་ཡོས་ལ་སོགས་པས་མཆོད་ལ་

73-1-291b

དགང་གཟར་མར་གྱིས་བཀང་བ་དང་། ཨགྣེ་ཧ་བྱ་ཀ་བྱ་བ་ཧ་ནཱ་ཡ་ཨཱ་དི་བྱ་ཨཱ་དི་བྱ་བ་ཧ་ནཱ་ཡ་སྭཱ་ཧཱ་ཞེས་བྱ་བས་དགང་བླུགས་དབུལ་ལོ། །དེ་ནས་མེ་བརྟག་པར་བྱ་སྟེ། དུ་བ་མེད་ཅིང་གསེར་གྱི་མདོག་ལྟར་གདངས། །རབ་ཏུ་ཆེ་ལ་མེ་ལྕེ་གཡས་སུ་འཁྱིལ། །ཁ་དོག་འཇའ་འདྲ་ཡང་ན་དཀར་ཡང་རུང་། །
ཡང་ན་བྱི་རུ་བཅག་པའི་ཁ་དོག་འདྲ། །ཤིན་ཏུ་སྣུམ་ལ་མེ་ལྕེ་འགབ་ནས་འཕྲོ། །རབ་ཏུ་འབར་བ་ཉི་མའི་འོད་དང་འདྲ། །དབྱིབས་ནི་བུམ་པ་རྒྱལ་མཚན་གདུགས་དང་འདྲ། །དཔལ་བེའུ་དུང་དང་པདྨ་བླུགས་གཟར་འདྲ། །མེ་ལྕེ་ཏྲི་ཤཱུལ་རྡོ་རྗེ་རལ་གྲི་འདྲ། །ཡང་ན་ཤིང་རྟ་མཆོག་དང་རྔ་ཡབ་འདྲ། །
སྒྲ་དང་ག་ད་རྫ་རྔ་གླིང་བུའི་སྒྲ། །དུ་བ་མེ་ལྕེ་དྲི་ཞིམ་མེ་སྟག་བཟང་། །ཡང་ན་མི་སྦར་བར་ཡང་འབར་བར་འགྱུར། །དེ་ཚེ་དངོས་གྲུབ་རྒྱ་ཆེན་ཐོབ་པར་འགྱུར། །དུ་བ་ཆེ་ཞིང་མེ་སྟག་རྒོད་པ་དང་། །འབར་བ་དཀའ་ཞིང་ཅུང་ཟད་ཅུང་ཟད་འབར། །མེ་ལྕེ་རྣམ་པར་འཆད་ཅིང་གཟི་མདངས་མེད། །རྩུབ་
ནག་སྤྲིན་དང་པཱ་ལ་ཤ་ཡི་མདོག །གསལ་ཤིང་དང་འདྲ་ཞིབ་མའི་གཟུགས་ཀྱང་འདྲ། །ཕྱུགས་ཀྱི་མགོ་འདྲ་སྒྲ་ཡང་རབ་ཏུ་རྩུབ། །མེ་ལྕེ་འཕྲོ་བས་སྦྱིན་སྲེག་བྱེད་པའི་མཆོག །མི་རོའི་དྲི་ང་དངོས་གྲུབ་མེད་པར་སྟོན། །མེ་ཡི་མཚན་མ་འདི་དག་མཐོང་ནས་ནི། །སྟོབས་པོ་ཆེ་ཡི་མར་གྱིས་
སྦྱིན་སྲེག་བྱ། །དེ་ནས་ཏིལ་དང་ནས་དང་ཞོ་དང་འོ་མའི་སྦྱིན་སྲེག་བྱས་ལ་མེ་ལྷ་ལ་བསྟོད་དོ། །མེ་ལྷའི་ཐུགས་ཀར་དཀྱིལ་འཁོར་དྲུག་གང་ཡང་རུང་བའི་ལྷ་བཀོད་དོ། །མཆོད་པ་དང་བསྟོད་པ་དང་བསྲེག་རྫས་དབུལ་བར་བྱའོ། །དེ་ནས་མེ་ལྷའི་ཐུགས་ཀའི་ཡེ་ཤེས་སེམས་དཔའི་དཀྱིལ་འཁོར་
དུ་ཕྱིར་བཞུགས་སུ་གསོལ་ལ། མེ་ལྷ་གཤེགས་སུ་གསོལ་ཅིང་། མེ་ལྷའི་དམ་ཚིག་སེམས་དཔའ་མེ་ཐ་མལ་པ་ལ་ཐིམ་པར་བསམ་མོ། །སྦྱིན་སྲེག་སྟ་གོན་དུ་གནས་པའོ། །གཏོར་མ་སྟ་གོན་དུ་གནས་པ་ནི་བདུད་རྩི་འཁྱིལ་པའི་སྔགས་ཀྱིས་གཏོར་མ་བསངས་ལ། ཁྲོ་བོ་འཆོལ་བའི་སྔགས་
ཀྱིས་བསྲུངས་ནས། སངས་རྒྱས་སྤྱན་དང་ནམ་མཁའ་མཛོད་ཀྱིས་སྤེལ་ཏེ། ཁ་འབར་མའི་སྔགས་ཀྱིས་བསྔོས་ལ། དཔུང་བཟངས་ཀྱིས་ཞུས་པའི་རྒྱུད་ནས་འབྱུང་བ་བཞིན་དུ་གདོན་རྣམས་ལ་སྔོན་དུ་མཆོད་པ་ཕྱོགས་སྐྱོང་བ་རྣམས་ལ་ཕྱིས་མཆོད་པར་བྱའོ། །ཕྱོགས་སྐྱོང་གི་སྔགས་

73-1-292a

ནི་དབང་ལྡན་ལ་རུ་དྭཱ་ཡ་སྭཱ་ཧཱ། དབང་པོ་ལ་ཤ་ཀྲཱ་ཡ་སྭཱ་ཧཱ། མེ་ལྷ་ལ་ཨགྣེ་ཡེ་སྭཱ་ཧཱ། གཤིན་རྗེ་ལ་བེ་བ་སཱ་དྷ་ཡེ་སྭཱ་ཧཱ། བདེན་བྲལ་ལ་རཱཀྵ་སཱ་དྷི་པ་ཏ་ཡ་སྭཱ་ཧཱ། ཆུ་ལྷ་ལ་བ་རུ་ཎཱ་ཡེ་སྭཱ་ཧཱ། རླུང་ལྷ་ལ་བཱ་ཡ་བེ་སྭཱ་ཧཱ། ཀུ་བེ་ར་ལ་ཡཀྵ་སིདྡྷ་རེ་སྭཱ་ཧཱ། སྲིན་པོ་ལ་ཀྲད་ཀེ་རི་སྭཱ་ཧཱ། ཤ་ཟ་
ལ་མི་ཅི་མི་ཅི། འབྱུང་པོ་ལ་གུང་གུང་། གདོན་རྣམས་ཀྱི་ནི་སརྦྦ་དེ་བ་ནཱ་ག་ཡཀྵ་རཀྵ་སཱ་ཨ་སུ་ར་ཀིནྣ་ར་མ་ཧོ་ར་ག་མ་ཏྲྀ་ག་ཎ་པི་ཤཱ་ཙི། ཨུནྨཱ་ཏ། ཨ་པ་སྨ་ར་ཀ་ཏ་པཱུ་ཏ་ན། རུ་རུ་སྥུ་རུ། ཛྭ་ལ་ཏིཥྛ་སིདྡྷི་ལོ་ཙ་ན་སརྦྦ་ཨརྠ་སཱ་དྷ་ནི་སྭཱ་ཧཱ། ཞེས་པས་བསྔོས་ལ་གཏང་བར་བྱའོ། །ཁྱད་པར་གྱི་འབྱུང་
པོ་ལ་གཅིག་སྦྱིན་པར་བྱའོ། །གཏོར་མ་ལྷག་པར་གནས་པའོ། །དེ་ནས་སྔར་བསྟན་པའི་སློབ་མ་མཚན་ཉིད་དང་ལྡན་པ་ལྷག་པར་གནས་པར་འདོད་ན། དེ་ནས་གཤེགས་པ་ལ་མཆོད་ཡོན་དང་། མཆོད་པ་ཕུལ་ལ། ན་བཟའ་རེ་རེ་འམ། སྤྱིར་ཟུང་གཅིག་ཕུལ་ལ། བདེ་གཤེགས་རྡོ་
རྗེའི་རིགས་བདག་པོ། །རྡོ་རྗེ་འཆང་བ་ཐུགས་རྗེའི་བདག །བདག་ལ་མཉེས་ཤིང་དགྱེས་པ་དང་། །བྱིན་གྱིས་བརླབ་ཅིང་དངོས་གྲུབ་སྩོལ། །ཞེས་གསོལ་བ་བཏབ་ལ་རྡོ་རྗེ་ལྕགས་ཀྱུའི་ཕྱག་རྒྱས་སློབ་མ་དགུག་པ་དང་། ལྕགས་སྒྲོག་གིས་བཅིང་བ་དང་། རྡོ་རྗེ་སེར་བའི་ཕྱག་རྒྱས་བསྡིགས་པ་
དང་། ཁྲོ་བོ་བེ་ཅོན་དང་སྟོབས་པོ་ཆེས་དམ་ཚིག་འཛིན་དུ་གཞུག་གོ། །དེ་ནས་སྔ་མ་བཞིན་དུ་བདུན་རྣམ་དག་བྱས་ལ། སློབ་མ་ཁྲོ་བོ་ཕྱག་ན་རྡོ་རྗེའམ་བདུད་རྩི་འཁྱིལ་པར་བསྐྱེད་དེ། ཡི་གེ་ཧཱུཾ་དང་རང་གི་སྔགས་ཀྱི་ལྷའི་ཕྱག་རྒྱ་ཆེན་པོ་བསམས་ལ། མཱ་མ་ཀཱིའི་ཕྱག་རྒྱས་གནས་ལྔར་བྱིན་གྱིས་
བརླབས་ཏེ། སོ་ཤིང་དོར་བ་དང་། ཁ་ལན་གསུམ་དུ་བཀྲུ་བ་དང་། སྲུང་སྐུད་མདུད་པ་གསུམ་པ་བཅིང་བ་དང་། ཀུ་ཤ་བྱིན་ནས་རྨི་ལམ་བརྟག་པ་དང་། སེམས་དཔའ་གཙུག་ཏོར་དང་། གཟི་བརྗིད་ཕུང་པོ་བསྐྱེད་པ་དང་། བྱམས་པའི་སྔགས་ཀྱིས་གོ་ཆ་བསྐོན་པ་དང་། ཧཱུཾ་བཞི་པའི་
སྔགས་དང་བདུད་རྩི་ཐབ་སྦྱོར་གྱིས་བསྲུང་བ་དང་། སྤོས་ཆུས་བརླན་པའི་ལག་པ་མགོ་ལ་གཞག་ལ་རིག་སྔགས་ཀྱི་རྒྱལ་པོ་ལན་བདུན་བཟླས་པ་དང་། དེ་ནས་སློབ་མ་ལ་ཟབ་ཅིང་རྒྱ་ཆེ་བའི་ཆོས་བཤད་པར་བྱའོ། །སློབ་མ་ལྷག་པར་གནས་པའོ། །དེ་ནས་སྙན་གསན་དབབ་པར་བྱ་སྟེ། ལྷ་རྣམས་

73-1-292b

ཀུན་ལ་གསན་པར་གསོལ། །འདི་ཞེས་བགྱི་བའི་བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་ལོ། །བདག་ནི་བརྩེ་བར་གྱུར་ནས་སུ། །སློབ་མ་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །སང་ནི་དཀྱིལ་འཁོར་འབྲི་བར་འཚལ། །བཅོམ་ལྡན་བདག་ནི་གུས་པ་
ལགས། །དེ་བས་གནང་བར་མཛད་པར་རིགས། །སངས་རྒྱས་མགོན་པོ་བརྩེར་ལྡན་དང་། །བྱང་ཆུབ་སེམས་དཔའ་དགྲ་བཅོམ་དང་། །གང་ཡང་གསང་སྔགས་ལྷ་རྣམས་དང་། །འཇིག་རྟེན་སྐྱོང་བའི་ལྷ་རྣམས་དང་། །གང་ཡང་འབྱུང་པོ་མཐུ་ཆེན་དང་། །གང་ཡང་ལྷ་ཡི་སྤྱན་མངའ་བའི། །སངས་
རྒྱས་བསྟན་ལ་དགའ་བ་རྣམས། །བདག་ལ་དགོངས་པར་མཛད་དུ་གསོལ། །བདག་གི་མིང་ནི་འདི་ཞེས་བགྱི། །སང་ནི་གདུགས་ལ་དཀྱིལ་འཁོར་ནི། །བཟང་པོ་མིང་ནི་འདི་ཞེས་བགྱི། །ཡོ་བྱད་ཅི་འབྱོར་པས་འབྲི་ན། །བདག་དང་སློབ་མར་བཅས་པ་ལ། །ཐུགས་ནི་བརྩེ་བར་དགོངས་སུ་
གསོལ། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབ་པར་མཛད་དུ་གསོལ། །ཞེས་སྙན་གསན་ཕབ་ནས། ཕྱག་འཚལ་ནས་བསྟོད་དོ། །སྟ་གོན་གྱི་ལྷ་གཤེགས་སུ་གསོལ་ལོ། །སྟ་གོན་གྱི་ཆོ་ག་བསྒྲུབ་པ་རྫོགས་སོ།།      །།སྒྲུབ་པ་ཆེན་པོ་དཀྱིལ་འཁོར་གྱི་ཆོ་ག་བྱེད་
པར་འདོད་པས། སློབ་དཔོན་དང་སློབ་མ་ཀུ་ཤའི་སྟན་དང་སྔས་ལ་ཉལ་ནས། ནང་པར་སློབ་མ་ལ་སྙིང་བརྩེ་བའི་ཕྱིར་དཀྱིལ་འཁོར་བྱས་ཏེ། སློབ་མ་ལ་རྨི་ལམ་ཅི་མཐོང་ཞེས་ཀྱང་དྲི་བར་བྱའོ། །སངས་རྒྱས་དང་མཆོད་རྟེན་དང་སྐུ་གཟུགས་ལ་སོགས་པ་མཐོང་ན་དགེའོ། །ཕྱག་ན་རྡོ་རྗེ་ཀུན་
ནས་བཏུས་པ་ལས་འབྱུང་བ་བཞིན་དུ་རྨི་ལམ་བརྟགས་ནས། རྨི་ལམ་མི་ཤིས་ན་གཏོར་མ་དང་སྦྱིན་སྲེག་ལ་སོགས་པ་བྱའོ། །ནང་པར་སྔར་བཤད་པའི་སྔགས་དང་ཕྱག་རྒྱས་གོས་དཀར་པོ་གོན་ནས། བདུད་རྩི་འཁྱིལ་པའི་སྔགས་ཟློས་ཤིང་། ཚོན་སྣ་ལྔའི་སྲད་བུ་སར་པ་གཙང་མ་མཛེས་པ། ཤིན་
ཏུ་རན་པ་དྲི་ཞིམ་པ་རེག་ན་བདེ་བ། ལེགས་པར་བཀལ་བ་སྲ་བ་སྦོམ་ཕྲ་མེད་པ། འཇུར་མདུད་མེད་པའི་ཐིག་སྐུད་ལ། དཀར་པོ་ལ་རཾ་ཆོས་ཀྱི་དབྱིངས་ཀྱི་རང་བཞིན། དམར་པོ་ལ་ཀཾ་གསེར་ཐུབ་ཀྱི་རང་བཞིན། སེར་པོ་ལ་ཨཾ་ཐུབ་པ་བྱང་ཆུབ་སྙིང་པོའི་རང་བཞིན། ལྗང་གུ་ལ་པཾ་ཕྱག་ན་རྡོ་རྗེའི་

73-1-293a

རང་བཞིན། སྔོན་པོ་ལ་ཧཱུཾ་ཁམས་གསུམ་རྣམ་པར་རྒྱལ་བའི་རང་བཞིན་དུ་བསྐྱེད་ལ། ཨོཾ་བཛྲ་ས་མ་ཡ་མཱ་ཏི་ཀྲ་མ་ཧཱུཾ་ཞེས་བྱ་བས་བཟླས་ལ། མཆོད་པ་ལྔས་མཆོད་ནས་ཐིག་གདབ་པར་བྱའོ། །ཐིག་གི་ཆོ་ག་ནི་ཐུན་མོང་གི་ཆོ་ག་ལས་ཤེས་པར་བྱའོ། །སྲད་བུ་ཆད་ན་བླ་མ་འཆི། །རིང་
ཐུང་ཁྱེར་ན་ན་བར་འགྱུར། །ཕྱོགས་འཁྲུལ་སློབ་མ་མྱོས་པར་འགྱུར། །ལྟས་ངན་བྱུང་ན་དངོས་མི་འགྲུབ། །ཅེས་གསུངས་སོ། །དེ་ནས་བའི་རྣམ་ལྔས་ས་གཞི་ཁོ་ར་ཁོར་ཡུག་ཏུ་ཆག་ཆག་བཏབ་ལ་བྱུགས་ཏེ། བྱུང་ན་རིན་པོ་ཆེའི་ཕྱེ་མའམ། སཱ་ལུའི་ཕྱེ་མའམ་སའི་ཕྱེ་མས་བྱའོ། །དེ་ནས་ཚོན་རྩི་ལ་ཨོཾ་
བཛྲ་ཙི་ཏྲ་ས་མ་ཡ་ཧཱུཾ་ཞེས་བྱ་བ་དང་། རིག་སྔགས་ཀྱི་རྒྱལ་པོ་ཕྱག་ན་རྡོ་རྗེའི་སྔགས་ཀྱིས་བསང་གཏོར་བྱ། མཆོད་པ་ཕུལ་ལ། དང་པོ་གཟུགས་སུ་བྲི་བར་བཤད། །གཉིས་པ་དག་ནི་ཕྱག་རྒྱར་བཤད། །གསུམ་པ་སྟན་དང་གནས་དག་དང་། །ཡིག་འབྲུ་བྲི་བར་རབ་ཏུ་བསྔགས། །དེ་ལ་དཀྱིལ་འཁོར་དང་པོ་ལྷ་ཉི་ཤུ་རྩ་གཅིག་
པ་དགོད་དོ། །དབུས་ཀྱི་ལྟེ་བ་རྩིབས་ལྔ་པ་ལ་དབུས་སུ་བཅོམ་ལྡན་འདས་ཕྱག་ན་རྡོ་རྗེ་སྔར་བཤད་པ་བཞིན་དུ་བྲི་བ་དང་། འཁོར་ལོའི་རྩིབས་བཞི་ལ། གཡས་སུ་མཱ་མ་ཀཱི། གཡོན་དུ་བདུད་རྩི་འཁྱིལ་པ་སྟེ། མཱ་མ་ཀཱིའི་རྟགས་རྡོ་རྗེ་རྩེ་གསུམ་པ། བྱང་དུ་རྡོ་རྗེ་རྩེ་གསུམ་པ་དབྱུག་པ་ལ་བཙུགས་པ། 
དབུས་སུ་རྡོ་རྗེ་རྩེ་གསུམ་པ་གཉིས་ཆང་ཟུངས་དྲང་པོར་འདུག་ལ། ཆང་ཟུངས་ཀྱི་ལྟེ་བ་ལ་དགྲ་སྟ་སྲབ་མོ་ཁ་ཕྱིར་བལྟས་པ་བྲི་བར་བྱའོ། །མདུན་དུ་སྐེམ་བྱེད་ཀྱི་དབྱིག་པ། རྒྱབ་ཏུ་གཞོན་ནུའི་འཁོར་རོ། །རྡོ་རྗེ་རྩེ་གསུམ་པས་བསྐོར་བ། དེའི་ཕྱི་རོལ་གྱི་རྩིབས་བཅུ་གཉིས་ལ། ཤར་དུ་རྒྱལ་
བའི་རྡོ་རྗེ་རྩེ་གསུམ་པ། རྣམ་པར་རྒྱལ་བའི་རྡོ་རྗེ་རྩེ་གསུམ་པ་མེ་ལྕེ་འཕྲོ་བ། རྡོ་རྗེ་མཚན་གྱི་རྡོ་རྗེ་རྩེ་གསུམ་པ་ཤར་དུ་དགོད་དོ། །བྱང་དུ་རྡོ་རྗེ་རྟགས་ཀྱི་རྡོ་རྗེ་རྩེ་གསུམ་པ། བཀྲ་ཤིས་ཀྱི་རྡོ་རྗེ་རྩེ་གཅིག་པ། ཤིན་ཏུ་བཀྲ་ཤིས་ཀྱི་རྡོ་རྗེ་རྩེ་གསུམ་པ་པདྨས་མཚན་པའོ། །ལྷོར་པདྨའི་མཚན་
གྱི་པདྨའི་སྡོང་བུ་ཁ་ཅུང་ཟད་བྱེ་བ་རྡོ་རྗེ་རྩེ་གསུམ་པ་དང་བཅས་པའོ། །པདྨ་ཕྲེང་གི་པདྨའི་སྡོང་བུ་ཁ་བྱེ་བ་དབུས་ན་རྡོ་རྗེ་རྩེ་གསུམ་པས་མཚན་པའོ། །ནུབ་ཏུ་གཡུང་དྲུང་རིས་ཀྱི་ནི་གྲུ་བཞི་བསྣོལ་བའི་དབུས་སུ་གཡུང་དྲུང་འཁྱིལ་པའི་རྩེ་མོར་ཤིང་ཐོག་སྐྱུ་རུ་རའི་འབྲས་བུ་རིན་པོ་ཆེས་མཚན་པའོ། །

73-1-293b

མདུང་རྩེ་གསུམ་པ་དང་། རྡོ་རྗེ་ནི་ཁ་གཉིས་པ་རྡོ་རྗེའི་དབུས་མ་ནས་འབྲས་ཀྱི་དབྱིབས་ལྟར་འདུག་པའོ། །མཆེ་བ་ནི་པདྨའི་སྡོང་བུ་ལ་མཆེ་བ་གཉིས་རྡོ་རྗེ་རྩེ་གསུམ་པས་མཚན་པའོ། །ནང་གི་སྒོ་བཞིར་མདུང་རྩེ་གཅིག་པ་དང་། སྦྲུལ་གྱི་ཞགས་པ་མེ་ལྕེ་དང་བཅས་པ་རྡོ་རྗེ་རྩེ་གསུམ་པས་མཚན་པ་དང་། མདུང་
རྩེ་གསུམ་པ་སྦྲུལ་གྱི་ཞགས་པ་དང་བཅས་པ་དང་། རལ་གྲི་བྲིས་ལ། པཉྩ་རཱ་གའི་རྩིག་པ་དང་། འདོད་ཡོན་གྱི་སྣམ་བུ་དང་། རིན་པོ་ཆེའི་མདའ་ཡབ་དང་། དྲ་བ་དྲ་ཕྱེད་དང་། དར་ཡོལ་དང་། རྟ་བབས་དང་། རྡོ་རྗེ་ར་བ་མེ་འོད་དང་བཅས་པ་བྲིའོ། །དགོད་པའི་སྔགས་དང་ཕྱག་རྒྱ་ནི་སྔར་བཤད་
ཟིན་ཏོ། །དཀྱིལ་འཁོར་གཉིས་པ་ནི་སྔར་བཤད་པའི་སྔགས་དང་ཕྱག་རྒྱས་དབུས་སུ་རྡོ་རྗེ་རྣམ་པར་འཇོམས་པ་སྐུ་མདོག་སྔོན་པོ་ཁམས་གསུམ་རྣམ་པར་རྒྱལ་བའི་ཕྱག་རྒྱས་རྡོ་རྗེ་དང་དྲིལ་བུ་བསྣམས་པ། སྟག་གི་པགས་པའི་ཤམ་ཐབས་ཅན། རིག་པ་མཆོག་ལས་གསུངས་པ་བཞིན་བསམ་པར་བྱའོ། །
ཤར་གྱི་ཁྲོ་བོ་དཀར་པོ་རྡོ་རྗེ་དང་སྡིགས་མཛུབ། ལྷོའི་ཁྲོ་བོ་སེར་པོ་རིན་པོ་ཆེ་དང་སྡིགས་མཛུབ། ནུབ་ཀྱི་ཁྲོ་བོ་དམར་པོ་པདྨ་དང་སྡིགས་མཛུབ། བྱང་གི་ཁྲོ་བོ་ལྗང་གུ་སྣ་ཚོགས་རྡོ་རྗེ་དང་སྡིགས་མཛུབ་མཛད་པའོ། །མཚམས་བཞིའི་སྐུ་མདོག་ནག་པོའོ། །ཤར་ལྷོར་རྡོ་རྗེའི་ཕུར་བུ་བསྣམས་པའོ། །
ལྷོ་ནུབ་ཏུ་རིན་པོ་ཆེའི་ཕུར་བུ་བསྣམས་པའོ། །ནུབ་བྱང་དུ་པདྨའི་ཕུར་བུ་བསྣམས་པའོ། །བྱང་ཤར་དུ་སྣ་ཚོགས་རྡོ་རྗེའི་ཕུར་བུ་བསྣམས་པའོ། །སྒོ་བཞིར་ལྕགས་ཀྱུ་དང་། ཞགས་པ་དང་། ལྕགས་སྒྲོག་དང་། དྲིལ་བུ་བསྣམས་པའོ། །ལྷག་མ་ནི་སྔ་མ་བཞིན་ནོ། །ལྔ་ལྔ་པ་ནི་སྐུ་མདོག་དང་ཕྱག་
མཚན་སྔ་མ་བཞིན་དུ་བཀོད་ལ། ཕྱོགས་སྐྱོང་བ་བཅུ་ཡང་སྟ་གོན་གྱི་གཏོར་མའི་སྔགས་དང་། རྡོ་རྗེ་བསྣམས་པ་ལས་གུང་མོ་མྱུ་གུ་ལྟར་གཤིབས་ཏེ། བསྒྲེང་ལ་མཐེ་བོང་དང་། མཐེའུ་ཆུང་སོ་སོར་བསྒྲེང་ལ་སྤྱིའི་ཕྱག་རྒྱས་དགོད་པར་བྱའོ། །དཀྱིལ་འཁོར་བཞི་པ་འཁྲུལ་འཁོར་ཡང་ཁྲོ་
བོར་བསྐྱེད་པའི་ཚེ་དབུས་ཀྱི་གཙོ་བོ་རྡོ་རྗེ་འཛིན་པ་སྐུ་མདོག་སྔོན་པོ། གཡས་རྡོ་རྗེ་གཡོན་པ་སྡིགས་མཛུབ། སྟག་གི་པགས་པའི་ཤམ་ཐབས་བསྣམས་པ། དབང་ཕྱུག་ཆེན་པོ་ཁྱོ་ཤུག་མནན་པའོ། །ཐམས་ཅད་ཀྱང་སྐུ་མདོག་ནག་པོའོ། །སྟག་གི་པགས་པའི་ཤམ་ཐབས་མནབས་པ། 

73-1-294a

ཤར་རྡོ་རྗེ་བེ་ཅོན། ལྷོར་རྡོ་རྗེ་འཆོལ་པ་རྡོ་རྗེ་བསྣམས་པ། ནུབ་ཏུ་རྡོ་རྗེ་ཐོ་བ། བྱང་དུ་རྡོ་རྗེ་ལྕགས་ཀྱུ། ཤར་ལྷོར་རྡོ་རྗེ་ལྕགས་སྒྲོག །ལྷོ་ནུབ་ཏུ་རྡོ་རྗེ་སེར་བ། ནུབ་བྱང་དུ་རྡོ་རྗེ་གནོད་མཛེས། བྱང་ཤར་དུ་རྡོ་རྗེ་རྨོངས་བྱེད། ཤར་སྒོར་རྡོ་རྗེ་སྟོབས་པོ་ཆེ། ལྷོ་སྒོར་རྡོ་རྗེ་བཞད་པ། 
ནུབ་སྒོར་རྡོ་རྗེ་སེང་གེའི་གདན། བྱང་སྒོར་རྡོ་རྗེ་གཏུམ་པོ། ཡ་སོས་མ་མཆུ་མནན་པ། སྐྲ་དང་སྨ་ར་འབར་བ་བྲི་བར་བྱའོ། །ལྷག་མ་ནི་སྔ་མ་བཞིན་ནོ། །ཡང་རྡོ་རྗེ་ཕོ་ཉ་མོ་བཅུས་བསྐོར་བའི་དཀྱིལ་འཁོར་ནི་དབུས་སུ་རྡོ་རྗེ་རྣམ་པར་འཇོམས་པ་སྔ་མ་བཞིན་དུ་བྲིས་ལ། འཁོར་ལོ་རྩིབས་བཅུ་པའི་
རྩིབས་དང་པོ་བློ་གྲོས་རྡོ་རྗེ་མ་རྡོ་རྗེ་བསྣམས་པ། གཉིས་པ་རྡོ་རྗེ་དྲིལ་བུ་བསྣམས་པ། གསུམ་པ་རྡོ་རྗེ་ནག་མོ་རྡོ་རྗེ་རྩེ་གསུམ་པ་བསྣམས་པ། བཞི་པ་གཞན་གྱིས་མི་ཐུབ་པ་བེ་ཅོན་བསྣམས་པ། ལྔ་པ་རྡོ་རྗེ་རོལ་པ་རྡོ་རྗེ་རྩེ་གཅིག་པ་བསྣམས་པ། དྲུག་པ་རྡོ་རྗེ་སྐ་རགས་རྡོ་རྗེ་རྩེ་གསུམ་པ་བསྣམས་པ། བདུན་པ་རྡོ་རྗེ་ཤུགས་མདའ་གཞུ་
བསྣམས་པ། བརྒྱད་པ་རྡོ་རྗེ་ཉི་མ་རྡོ་རྗེ་འབར་བ་བསྣམས་པ། དགུ་པ་རྡོ་རྗེ་དབྱིག་པ་རྡོ་རྗེ་དབྱུག་ཐོ་བསྣམས་པ། བཅུ་པ་རྡོ་རྗེ་བདེན་པ་སྣ་ཚོགས་རྡོ་རྗེ་བསྣམས་པ་བྲི་བར་བྱ་སྟེ། དེ་སྒྲུབ་པའི་སྔགས་དང་ཕྱག་རྒྱ་ནི་རྡོ་རྗེ་དབྱིངས་ཀྱི་དབང་ཕྱུག་མའི་ཕྱག་རྒྱ་ལས་སྲིན་ལག་ནང་དུ་བཅུག་ལ། ན་མཿ ས་
མནྟ་བུདྡྷ་བཛྲ་ཎཱཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། ཅེས་བྱ་བར་བྲི་བར་བྱའོ། །ཡང་ན་རྡོ་རྗེ་ཉིད་བསྟོད་དེ། བསྟན་པ་ནི་ཕོ་ཉ་མོ་རྣམས་ཀྱི་སྟེ། ན་མོ་རཏྣ་ཏྲ་ཡཱ་ཡ། ན་མོ་བཛྲ་དྷ་ར་པྲ་ན་མ་བིདྱཱ་ག་ཎ་སྱེ་སྭཱ་ཧཱ། ཞེས་བྱའོ། །རྡོ་རྗེ་ཕོ་ཉ་མོ་དྲུག་ཅུ་རྩ་བཞིས་བསྐོར་བའི་དཀྱིལ་འཁོར་ལ་ཤར་ཕྱོགས་སུ་རྡོ་རྗེ་རིགས་
ཀྱི་དང་པོ་རྡོ་རྗེ་འཛིན་པ། གཉིས་པ་མདངས་དཀར་མ། གསུམ་པ་རྡོ་རྗེ་རྒྱལ་བ། རྡོ་རྗེ་རྣམ་པར་རྒྱལ་བ། རྡོ་རྗེ་ཁུ་ཚུར། རྡོ་རྗེ་རྩེ་གཅིག་པ། རྡོ་རྗེ་གདོང་དམར། རྡོ་རྗེ་འོད་ཟེར་ཕྲེང་། རྡོ་རྗེ་རྣ་ཆའི་གདོང་། རྡོ་རྗེ་དགའ་བྱེད་གདོང་། རྡོ་རྗེ་སྡེ། རྡོ་རྗེ་ལག་བཟང་། རྡོ་རྗེ་ཁྲོ་བོ། རྡོ་རྗེ་རྩེ་གཅིག་
པ། རྡོ་རྗེ་སྙིང་པོའི་རྒྱལ་པོ། རྡོ་རྗེ་འཇིགས་བྱེད་རྣམས་གཞག་པར་བྱའོ། །ལྷོར་རིན་པོ་ཆེའི་རིགས་རྡོ་རྗེའི་སྐེ་རགས། རྡོ་རྗེ་ཀླུ་མགོ་ཅན། རྡོ་རྗེ་ཀླུ་འཛིན། རྡོ་རྗེ་ཡངས་པ་ཆེན་མོ། རྡོ་རྗེ་ཀླུ་ཆེན་མོ། རྡོ་རྗེ་འཕྲོག་པ། རྡོ་རྗེ་དགའ་བ་ཉེ་དགའ། རྡོ་རྗེ་ཁ་འབར་མ། རྡོ་རྗེ་དཀའ་ཐུབ་ཟློག །རྡོ་རྗེ་

73-1-294b

དབྱིག་པ། རྡོ་རྗེ་འོད་ཟེར་ཕྲེང་། རྡོ་རྗེ་ལྕགས་ཀྱུ་མ། དཔལ་གྱི་བློ་གྲོས། ཁྲོ་བོ་ཀཱི་ལི་ཀཱི་ལཱ་ཡ། ཁྲོ་བོ་སུ་རུ་སུ་རུ། དཔལ་ལྷ་མོ། ནུབ་ཕྱོགས་པདྨའི་རིགས་ལ། མ་ཏངྒི། མིག་སྣ་མའི་གདོང་། རྡོ་རྗེ་རྩེ་མོ། སྐྲག་བྱེད་ཆེན་མོ། བྷྲྀངྒི་རི་ཏི། རྡོ་རྗེ་སེར་སྐྱ། རྡོ་རྗེ་གཙུག་འཆང་། རྡོ་རྗེ་
ལྕགས་སྒྲོག །རྡོ་རྗེ་སེལ་བྱེད། རྡོ་རྗེ་གདོང་། ནམ་མཁའི་གདོང་། རྡོ་རྗེ་གནོད་འཇོམས། རྡོ་རྗེ་མི་བཟད་པ། རྡོ་རྗེ་འཇིགས་པ། རྡོ་རྗེ་ལུ་གུ་རྒྱུད། རྡོ་རྗེ་ཐོག་ཐོག་རྣམས་བྲི་བར་བྱའོ། །བྱང་ཕྱོགས་སུ་ལས་ཀྱི་རིགས་རྡོ་རྗེ་དབྱིག་པ། འཇིགས་བྱེད་ཆེན་པོ། བདུད་རྩི་ཐབ་སྦྱོར། པདྨ་
ཡངས་པ། རྡོ་རྗེ་ལེགས་པ། རྡོ་རྗེ་དགྲ་སྟ། རྡོ་རྗེ་སེང་གེའི་ཁྲི། རྡོ་རྗེ་ལྕགས་མདའ། རྡོ་རྗེ་མཚོན་ཆ་མཆོག །རྡོ་རྗེ་མཚོན་ཆའི་ཤུགས། རྡོ་རྗེ་མཚོན་ཆའི་སྙིང་པོ། དམ་ཚིག་ཆེན་པོ། རྡོ་རྗེ་དབྱུག་པ། རྡོ་རྗེ་གཙུག་ཏོར། རྡོ་རྗེ་འདོད་པ། རྡོ་རྗེ་འཇིགས་བྱེད་རྣམས་བྲི་བར་བྱའོ། །རྡོ་རྗེ་
ཕོ་ཉ་མོ་དེ་རྣམས་བྲི་བའི་སྔགས་དང་ཕྱག་རྒྱ་ནི་སྔར་བསྟན་པའི་སྤྱིའི་དེ་ཉིད་ཀྱིས་བྱའོ། །དེ་ལྟར་དཀྱིལ་འཁོར་དྲུག་བྲིས་ནས། གདུགས་བཞི་དང་། བ་དན་བཞི་གུར་གུམ་དང་རྒྱ་སྐྱེགས་ལས་བཙོས་པ་ཤིང་རིང་བཞིའི་རྩེ་མོ་ལ་བཏགས་པ་ལ་སོགས་པའི་དཀྱིལ་འཁོར་གྱི་རྫས་དང་། ཕྱག་
ན་རྡོ་རྗེ་དབང་བསྐུར་བའི་རྒྱུད་ནས་འབྱུང་བ་བཞིན་དུ་བསྲུང་བའི་ཡན་ལག་ཕྱོགས་བཞིར་མདོ་བཞི་བཀླག་པ་དང་། མདའ་བཅུ་དང་ཕུར་བུ་གདབ་པ་དང་། རལ་གྲི་བཅུ་དང་། མཚོན་ཐག་བཏགས་པ་དང་། སྔར་བཤད་པ་བཞིན་དུ་བསྲུང་བའི་ཡན་ལག་རྣམས་དང་། མཆོད་པའི་རྫས་ཐམས་
ཅད་དང་། བུམ་པ་དང་སྦྱིན་སྲེག་དང་། གཏོར་མའི་རྫས་ཐམས་ཅད་བསགས་ལ་རྣལ་འབྱོར་པ་བདག་ཉིད་སྔར་བཤད་པ་བཞིན་དུ་ཁྲུས་དང་གོས་བགོ་བ་བྱས་ནས། ཆོ་ག་དྲུག་གིས་ལྷར་བསྐྱེད་དེ། །སྲུང་བ་དང་སྤྱན་དྲང་སྦྱང་བ་དང་། །ཕྱག་རྒྱ་བཅིང་དང་ཕྱིར་བཟློག་གནོན། །བསྐང་
དང་ཚིམ་པར་བྱ་བ་དང་། །ཚར་གཅོད་པ་དང་བསྐུལ་བ་དང་། །འཁྲུལ་འཁོར་སྦྱིན་སྲེག་ཁྲུས་བྱ་བ། །ཞེས་བཤད་པའི་ཆོ་ག་བཅུ་གཉིས་འདིར་ཡང་ཐམས་ཅད་རྫོགས་པར་བྱས་ལ། བདག་ཉིད་དངོས་གྲུབ་བསྒྲུབ་པའམ་སློབ་མ་དབང་བསྐུར་བའི་ཕྱིར་ཆོ་ག་ཐམས་ཅད་སྤྱད་

73-1-295a

པར་བྱའོ། །དེ་ལྟར་བསྙེན་པའི་ཚེ་དོན་བཅུ་གཉིས་ཇི་ལྟར་བྱས་པ་བཞིན་དུ་ཉེ་བའི་བསྙེན་པ་ལ་ཡང་དེ་བཞིན་དུ་བྱའོ། །སྒྲུབ་པ་སྟ་གོན་ལ་ཡང་དེ་བཞིན་དུ་བྱའོ། །སྒྲུབ་པ་ཆེན་པོ་དཀྱིལ་འཁོར་ཞིག་ཀྱང་བཅུ་གཉིས་སྔ་མ་བཞིན་དུ་བྱའོ།    །དེ་ནས་དཀྱིལ་འཁོར་དྲུག་གང་ཡང་རུང་
བ་ལ། སློབ་མ་དབང་བསྐུར་བའི་ཆོ་ག་བཤད་པར་བྱ་སྟེ། དེ་ལ་དང་པོར་ཕྱིའི་འཇུག་པ་ནི་སེམས་རབ་ཏུ་དང་བའི་སློབ་མ་སྔ་མ་བཞིན་དུ་ཕྱག་འཚལ་བ་དང་། མཆོད་པ་དང་། སྡིག་པ་བཤགས་པ་དང་། རྗེས་སུ་ཡི་རང་བ་དང་། ཆོས་ཀྱི་འཁོར་ལོ་བསྐོར་བ་ལ་སོགས་པ་བདུན་རྣམ་དག་བྱས་
ལ། སྔར་བཤད་པའི་སྔགས་ཀྱིས་བཏབ་པའི་སྟོད་གཡོགས་དང་། སྨད་གཡོགས་དང་གདོང་གཡོགས་བསྐོན་ལ་དཀྱིལ་འཁོར་གྱི་བདག་པོའི་སྔགས་དང་ཕྱག་རྒྱ་སྤྱི་བོར་བཞག་ནས་སྔགས་ལན་གསུམ་བཟླས་ནས། ལྷའི་རིགས་ཀྱི་བསོད་ནམས་ཅི་འདྲ་བ་དེ་བཞིན་དུ་འབབ་པར་
འགྱུར་རོ། །དེས་དཀྱིལ་འཁོར་དུ་དབང་དུ་འགྱུར་རོ། །དེ་ནས་རྡོ་རྗེ་རིགས་ཀྱི་སྔགས་བཟླས་ལ་མེ་ཏོག་འཕངས་ལ་གང་ལ་ཕོག་པའི་ལྷ་དེ་ནི་དེའི་རིགས་ཀྱི་ལྷར་འགྱུར་རོ། །དེ་ནས་གདོང་གཡོགས་བཀྲོལ་ནས་དཀྱིལ་འཁོར་བསྟན་ཏེ། དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་
པ་རབ་ཏུ་བསྐྱེད། །ཁྱོད་ནི་སངས་རྒྱས་རིགས་སུ་སྐྱེས། །སྔགས་དང་རིག་པས་བྱིན་གྱིས་བརླབས། །འབྱོར་པ་ཐམས་ཅད་མངོན་དུ་གྱུར། །རྟེན་དང་དངོས་གྲུབ་ཐམས་ཅད་ཀྱང་། །ཁྱོད་ལ་མངོན་དུ་ཕྱོགས་འགྱུར་གྱི། །དངོས་གྲུབ་ཐོབ་ཕྱིར་དམ་ཚིག་སྲུངས། །ཞེས་བརྗོད་པར་
བྱའོ། །དེའི་ཚེ་མེ་ཏོག་དབུ་ལ་ཕོག་ན་མཆོག་གི་དངོས་གྲུབ་འཐོབ། མེ་ཏོག་རྐེད་པ་ལ་ཕོག་ན་ཐུན་མོང་གི་དངོས་གྲུབ་འཐོབ། མེ་ཏོག་རྐང་པ་ལ་ཕོག་ན་འཇིག་རྟེན་པའི་དངོས་གྲུབ་འཐོབ་པར་འགྱུར་རོ། །ནང་གི་འཇུག་པ་རྫོགས་ནས། ནས་དང་སྦྲང་རྩི་དང་འོ་མ་ལ་སོགས་པ་ཞི་བའམ། 
ཡང་ན་རྒྱས་པ། མངོན་སྤྱོད་ཀྱིས་བགེགས་བཟློག་པས་དབང་བསྐུར་བའི་འོས་སུ་འགྱུར་རོ། །དེ་ནས་བདུད་རྩི་འཁྱིལ་པའི་སྔགས་ཀྱིས་བཏབ་པའི་རྟེན་སར་པ་ལ་བཞག་ནས། སྒྲུབ་པའི་གྲོགས་པོས་བཀྲ་ཤིས་ཀྱི་ཚིགས་སུ་བཅད་པ་འདི་སྐད་གདོན་པར་བྱ་སྟེ། གང་ལ་སེར་སྣ་རྣམ་

73-1-295b

ཆགས་པ། །རྣམ་བཅོམ་དྲི་མ་སེལ་མཛད་ཅིང་། །ཐུགས་ཞི་གནོད་པ་མི་མངའ་དེས། །ཁྱེད་ལ་བདེ་ལེགས་མཛད་པར་ཤོག །འདྲེན་པ་གང་ཞིག་འགྲོ་བ་རྣམས། །ཐར་པའི་ལམ་དུ་འཛུད་མཛད་ཅིང་། །ཆོས་རྣམས་ཐམས་ཅད་སྟོན་པ་དེས། །ཁྱེད་ལ་བདེ་ལེགས་མཛད་པར་ཤོག །སྟོན་པ་
བཞུགས་པ་རྣམས་ཀྱི་རྟེན། །སེམས་ཅན་ཀུན་གྱི་དོན་གྱི་ཕྱིར། །གང་གི་བདེ་བ་མངའ་མཛད་དེས། །ཁྱེད་ལ་བདེ་ལེགས་མཛད་པར་ཤོག །སྐྱོབ་པ་གང་གིས་བྱམས་པ་ཡི། །ཐུགས་ཀྱིས་འགྲོ་བ་འདི་དག་ཀུན། །བུ་གཅིག་བཞིན་དུ་རྟག་བསྐྱངས་དེས། །ཁྱེད་ལ་བདེ་ལེགས་མཛད་པར་ཤོག །
གང་ཞིག་འཁོར་བར་འཁོར་བ་ཡི། །སེམས་ཅན་ཀུན་གྱི་རྟེན་གྱུར་ཅིང་། །གླིང་དང་དཔུང་གཉེན་གྱུར་པ་སྟེ། །ཁྱེད་ལ་བདེ་ལེགས་མཛད་པར་ཤོག །གང་ཞིག་ཆོས་ཀུན་མངོན་སུམ་གྱུར། །གཙང་ཞིང་སླུ་བ་མི་མངའ་ལ། །གསུང་གཙང་གཙང་བར་མཛད་པ་སྟེ། །ཁྱེད་ལ་བདེ་ལེགས་མཛད་པར་
ཤོག །དཔའ་བོ་ཆེན་པོ་གར་སྐྱེས་པར། །ཕུན་སུམ་ཚོགས་དོན་འབྱོར་གྱུར་ཅིང་། །དོན་གྲུབ་ཚོགས་ཀྱང་གྲུབ་པ་སྟེ། ཁྱེད་ལ་བདེ་ལེགས་མཛད་པར་ཤོག །གང་ཞིག་སྐྱེས་པས་ས་རྣམས་ནི། །ནགས་ཚལ་བཅས་པར་རབ་གཡོས་ཤིང་། །སེམས་ཅན་ཐམས་ཅད་རབ་དགའ་བྱེད། །ཁྱེད་
ལ་བདེ་ལེགས་མཛད་པར་ཤོག །བྱང་ཆུབ་སྙིང་པོར་གང་ཞིག་གིས། །ས་དག་རྣམ་དྲུག་གཡོས་གྱུར་ཅིང་། །བདུད་ཡིད་མི་བདེར་གྱུར་པ་སྟེ། །ཁྱེད་ལ་བདེ་ལེགས་མཛད་པར་ཤོག །ཆོས་ཀྱི་འཁོར་ལོ་བསྐོར་བ་ན། །འཕགས་པའི་བདེན་པ་རྣམ་གསུང་བ། །ཐུབ་པའི་བསྟན་པ་གང་བྱུང་
སྟེ། །ཁྱེད་ལ་བདེ་ལེགས་མཛད་པར་ཤོག །སངས་རྒྱས་ཁྱེད་ལ་བདེ་ལེགས་མཛད། །བརྒྱ་བྱིན་བཅས་པའི་ལྷ་རྣམས་དང་། །འབྱུང་པོ་ཀུན་གྱི་བདེ་ལེགས་ནི། །ཁྱེད་ལ་རྟག་ཏུ་སྦྱིན་གྱུར་ཅིག །སངས་རྒྱས་བསོད་ནམས་མཐུ་དག་དང་། །ལྷ་རྣམས་ཀྱི་ནི་བསམས་པ་ཡིས། །ཁྱོད་ཀྱི་
འདོད་དོན་གང་ཡིན་པ། །དོན་དེ་དེ་རིང་འགྲུབ་འགྱུར་ཤོག །རྐང་གཉིས་ཁྱེད་ཅག་བདེ་ལེགས་ཤོག །རྐང་བཞི་ཁྱེད་ཅག་བདེ་ལེགས་ཤོག །ཁྱེད་ཅག་ལམ་འགྲོ་བདེ་ལེགས་གྱུར། །ཕྱིར་འོང་དག་ཀྱང་བདེ་ལེགས་གྱུར། །ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ལའང་

73-1-296a

བདེ་ལེགས་ཤོག །ཁྱེད་ཅག་ཀུན་ཏུ་བདེ་ལེགས་འགྱུར། །ཁྱེད་ཅག་སྡིག་པར་མ་གྱུར་ཅིག །ཅེས་བཀྲ་ཤིས་བརྗོད་ནས། ཆོ་ག་དྲུག་གིས་ལྷར་བསྐྱེད་ནས་གནས་ལྔར་བྱིན་གྱིས་བརླབས་ནས་དཀྱིལ་འཁོར་གྱི་སྔགས་བཟླས་པའི་གདུགས་བཏེག་ལ་ཁྲོ་བོ་གནོད་མཛེས་
ཀྱི་སྔགས་བཟླས་པའི་བདུག་པས་བདུག་ཅིང་རྔ་ཡབ་ཀྱིས་གཡབ་ལ་གླུ་དང་སིལ་སྙན་དང་། རྔ་བརྡུངས་ནས། དཀྱིལ་འཁོར་གྱི་ལྷ་ཀུན་ལ་གསོལ་བ་བཏབ་ལ། དཀྱིལ་འཁོར་གྱི་ལྷའི་སྔགས་བཏབ་པའི་བུམ་པས་ལན་གསུམ་བསྐོར་བ་བྱེད་དུ་བཅུག་ལ་ཆུའི་དབང་བསྐུར་བར་བྱའོ། །དེ་ནས་
ཕྱག་རྒྱ་བཅིང་བ་དང་། སྔགས་བཟླས་པས་སྤྱི་བོར་གཏུག་པར་བྱའོ། །དེ་ནས་གོས་སར་པ་བསྐོན་ནས་ཅོད་པན་དང་རྒྱན་བཏགས་པ་དང་། དཀྱིལ་འཁོར་གྱི་ལྷ་ཐམས་ཅད་ཀྱི་ཕྱག་མཚན་གཡས་པ་གཡས་པར་སྦྱིན། གཡོན་པ་གཡོན་པར་བྱིན་ལ། དེ་ནས་སློབ་དཔོན་གྱིས་མེ་ཏོག་
གི་ཕྲེང་བ་སྤྱི་བོར་བཞག་ལ་མིང་གདགས་པར་བྱའོ། །དེ་ནས་སེང་གེའི་ཁྲི་ལ་བཞག་ལ། གདུགས་དང་རྒྱལ་མཚན་བསྒྲེངས་ནས། རིན་པོ་ཆེ་སྣ་བདུན་དང་བཀྲ་ཤིས་རྫས་བརྒྱད་དང་ལྷ་རྣམས་ཀྱི་ཕྱག་མཚན་དང་བཅས་པ་བྱིན་ལ། རང་རང་གི་མིང་དང་ལུང་བསྟན་པ་དང་། 
གཟེངས་བསྟོད་པ་དང་། དབུགས་དབྱུང་བར་བྱའོ། །དེ་ནས་སྔགས་ཀྱི་གནང་བ་གི་ཝང་ངམ་གུར་གུམ་གྱིས་ཡི་གེ་བྲིས་ལ་སློབ་མ་དང་སློབ་དཔོན་མཉམ་དུ་ལན་བདུན་གྱི་བར་དུ་བཀླག་པར་བྱའོ། །དེས་སྔགས་ཀྱི་གནང་བ་ཐོབ་པར་འགྱུར་རོ། །དཀྱིལ་འཁོར་མཐོང་ནས་དབང་བསྐུར་
བ་ནི་རྣམ་པ་བཞིར་འགྱུར་ཏེ། སློབ་དཔོན་གོ་འཕང་ཐོབ་པའི་ཕྱིར། །དང་པོའི་དབང་དུ་བསྒྲགས་པ་ཡིན། །རིག་སྔགས་ཐམས་ཅད་གྲུབ་པའི་ཕྱིར། །གཉིས་པའི་དབང་དུ་བཤད་པ་ཡིན། །བགེགས་ནི་རབ་ཏུ་གཞོམ་པའི་ཕྱིར། །གསུམ་པ་རབ་ཏུ་བསྒྲགས་པ་ཡིན། །བཞི་པ་སྦྱོར་བ་
ཐོབ་པའི་ཕྱིར། །ཆོ་ག་བཟང་པོ་དེ་བཤད་དོ། །ཞེས་གསུངས་སོ། །བུམ་པའི་དབང་བསྐུར་བ་དང་པོའོ། །རིག་སྔགས་བཟླས་པ་གཉིས་པའོ། །བགེགས་རྣམས་ཞི་བ་གསུམ་པའོ། །དཔལ་འཕེལ་བ་ནི་བཞི་པའོ། །ཞེས་གསུངས་པའོ། །ངན་སོང་གསུམ་དུ་མི་ལྷུང་བ་དང་། །མི་

73-1-296b

ཁོམ་པ་བརྒྱད་སྤངས་པ་དང་། །ཚེ་རབས་དྲན་ཞིང་ལོངས་སྤྱོད་ཆེ། །ཚུལ་ཁྲིམས་ལྡན་ཞིང་གཟུགས་ཀྱང་བཟང་། །རྟག་ཏུ་མི་དང་ལྷ་རྣམས་ཀྱི། །མཐོ་རིས་གནས་སུ་སྐྱེ་བར་ཤོག །ཅེས་སྨོན་ལམ་ཡང་གདབ་པར་བྱའོ། །གལ་ཏེ་སྡོམ་པ་འཛིན་པར་མི་ནུས་པའམ། ནད་པའམ་བར་
ཆད་མང་དུ་འབྱུང་བའམ། འབྱུང་པོའི་ལོག་འདྲེན་གྱིས་ཟིན་པའམ། རིག་པ་མཆོག་ལས་གསུངས་པའི་གདོན་རྣམས་ཀྱིས་གཙེས་པ་ལ་ཁྲུས་ཀྱི་ཆོ་ག་བྱ་སྟེ། བདུད་རྩི་འཁྱིལ་པར་བསྐྱེད་ལ་གནས་ལྔར་བྱིན་གྱིས་བརླབས་ཏེ། ལྷ་རྣམས་ཀྱི་སྔགས་ཟློས་ཤིང་ཡུངས་ཀར་གྱིས་བྲབ་པ་དང་། རྨ་
བྱའི་སྒྲོའི་དབུས་སུ་ཕྱག་རྒྱ་བཅིངས་པ་ནི་བིན་དུ་པ་ལ་ཞེས་བྱ་བས་དཀྱིལ་འཁོར་གྱི་སྔགས་ཟློས་ཤིང་བྱབ་པ་དང་། རུ་དྲཱཀྵ་གདོང་གཅིག་པའི་རིན་པོ་ཆེ་རྨ་མེད་པ་ལུས་ལ་བཏགས་ནས་བསྲུང་བ་བྱ་སྟེ། དཀྱིལ་འཁོར་གྱི་ལྷ་རྣམས་ལ་གསོལ་བ་གདབ་པར་བྱའོ། །མགོན་པོ་ཐུགས་རྗེ་འཆང་བའི་
ལྷ། །རིག་སྔགས་རྒྱལ་པོ་དགེ་བ་ཅན། །གནོད་པ་ཐམས་ཅད་ཞི་བའི་ཕྱིར། །མགོན་པོ་ཁྱོད་ཀྱིས་བྱིན་རླབས་མཛོད། །ཅེས་བརྗོད་ལ། དགེ་བའི་རྩ་བ་བསྔོ་བར་བྱ་སྟེ། བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་དུ་ནི་སངས་རྒྱས་མྱུར་བར་ཤོག །འགྲོ་ལ་ཕན་ཕྱིར་ཆོས་
རྣམས་སྟོན་བྱེད་ཅིང་། །སེམས་ཅན་སྡུག་བསྔལ་མང་པོས་གཟིར་ལས་གྲོལ། །ཞེས་དགེ་བའི་རྩ་བ་བསྔོ་བ་དང་། བཟོད་པར་གསོལ་བར་བྱ་སྟེ། གང་ཡང་བདག་བློ་གཏི་མུག་པས། །ཞེས་བྱ་བ་ལ་སོགས་པ་བརྗོད་པར་བྱའོ། །དེ་ནས་རྡོ་རྗེ་ལྕགས་ཀྱུ་མའི་སྔགས་དང་ཕྱག་རྒྱས་དཀྱིལ་
འཁོར་གྱི་ལྷ་བུམ་པའི་ལྷ་དང་གཅིག་ཏུ་བསྲེས་ལ། རྨ་བྱའི་སྒྲོས་དཀྱིལ་འཁོར་གྱི་ཕྱག་རྒྱ་རྣམས་ཕྱིས་ནས་ཁྲུས་ཀྱི་གཞོང་པ་བཞག་སྟེ། ཨེ་མ་སངས་རྒྱས་ཐམས་ཅད་ཀྱི། །ཐུགས་རྗེ་ཅན་གྱི་ཐབས་ཆེན་གྱི། །ཞི་ཡང་སེམས་ཅན་དོན་དུ་ནི། །དྲི་མ་མེད་པའི་ཁྲོ་བོར་གྱུར། །ཞེས་བསྟོད་ལ་
བདུད་རྩི་འཁྱིལ་པའི་སྔགས་རིངས་ཀྱིས་ཀྱང་མཚམས་བཅད་གནས་ལྔར་རྡོ་རྗེས་གཏུག་ཅིང་བྱིན་གྱིས་བརླབ། སེམས་དཔའ་གཙུག་ཏོར་དང་། གཟི་བརྗིད་ཕུང་པོ་བསྐྱེད་པར་བྱ་སྟེ། ལག་པ་གཡས་པ་ཁུ་ཚུར་བཅངས་ལ་མཛོད་སྤུར་བཞག་སྟེ། ནམཿས་མནྟ་བུདྡྷཱ་ནཱཾ་

73-1-297a

ཨ་བུ་ཛུ་ཞེས་བྱ་བས་མཛོད་སྤུ་བསྐྱེད་པར་བྱའོ། །རྡོ་རྗེ་དབྱིངས་ཀྱི་དབང་ཕྱུག་མའི་ཕྱག་རྒྱ་སྤྱི་བོར་བཅིངས་ཏེ། ཨོཾ་ཛྭ་ལ་ཛྭ་ལ། དིབྷ་ཨོད་ཀ་དེ་ཨུ་པི་ཤ་དུ་ན་དུ་ན་ཧཱུཾ་ཞེས་བྱ་བས་གཙུག་ཏོར་བསྐྱེད་པར་བྱའོ། །རྡོ་རྗེ་འཆོལ་པའི་སྔགས་དང་ཕྱག་རྒྱ་དང་། གུ་གུལ་གྱི་དུད་པས་ཀྱང་
བདུག་པར་བྱའོ། །ཁམས་གསུམ་རྣམ་པར་རྒྱལ་བའི་ཕྱག་རྒྱ་དང་། ཨོཾ་བཛྲ་ཨ་ཤ་ནི་ཧཱུཾ་ཕཊ་ཅེས་བྱ་བས་སྲན་ཕྱེ་དང་བག་ཕྱེ་དེའི་ལུས་ལ་བཏབ་ལ། སྒྲུབ་པའི་གྲོགས་པོས་སྔར་བཤད་པའི་བཀྲ་ཤིས་ཀྱི་ཚིགས་སུ་བཅད་པ་གདོན་ཞིང་བུམ་པ་ཐམས་ཅད་ཀྱི་ལྷ་ཞུ་བར་བསམས་ལ། དེ་བཞིན་
གཤེགས་པ་ཤཱཀྱ་ཐུབ་པ་ལ་ཕྱག་འཚལ་ལོ། །ཕྱག་ན་རྡོ་རྗེ་ལ་ཕྱག་འཚལ་ལོ། །བདུད་རྩི་ཐབ་སྦྱོར་ལ་ཕྱག་འཚལ་ལོ། །དེ་ཐམས་ཅད་ཀྱི་མཐུ་དང་། བྱིན་གྱི་རླབས་ཀྱིས་ཆེ་གེ་མོ་ཞེས་བྱ་བའི་གནོད་པ་དང་། གདོན་ཐམས་ཅད་ཞི་བར་གྱུར་ཅིག་ཅེས་བརྗོད་ལ། སྤྱི་བོ་ནས་རྐང་པའི་བར་དུ་ལུས་ཐམས་ཅད་ཁྲུས་བྱའོ། །
དཀྱིལ་འཁོར་གྱི་ལྷའི་སྔགས་ལན་བདུན་བཟླས་པས་སྤྱི་བོར་བླུགས་པ་དང་། ལན་བདུན་བཟླས་ཤིང་སྙིང་གར་བླུགས་པ་དང་། ལན་བདུན་བཟླས་པས་ལྟེ་བར་བླུགས་པར་བྱའོ། །དེ་ནས་རྨ་བྱའི་སྒྲོས་བྱབ་ཅིང་། རྫོགས་སངས་རྒྱས་ཀྱིས་བསྔགས་པ་ཡི། །གོ་འཕང་འདི་ནི་ཐོབ་བྱའི་ཕྱིར། །
འཁོར་བའི་རྒྱ་མཚོ་མ་རུངས་པའི། །དགྲ་དང་བགེགས་ཀྱང་མེད་པར་ཤོག །རྐུན་པོ་ལ་སོགས་མེད་པར་ཤོག །མུ་སྟེགས་ཅན་ལས་རྒྱལ་གྱུར་ཅིག །བྱང་ཆུབ་སྙིང་པོ་ཐོབ་པར་དུ། །བདུད་སྡེ་བཞི་ཡིས་མི་ཐུབ་ཅིང་། །ཁྲོ་བོ་མངག་གཞུག་ཕོ་ཉ་མོ། །བྲན་ལ་སོགས་པས་བསྲུང་བར་
ཤོག །གཅོང་རོང་གཡང་ས་ལ་སོགས་དང་། །གདོན་དང་རིམས་ནད་མེད་པར་ཤོག །ཅེས་བྱས་ལ་རྨ་བྱའི་སྒྲོས་བྱབ་པར་བྱའོ། །དེ་ནས་རྡོ་རྗེ་རྣམ་པར་འཇོམས་པའི་གཟུངས་ལན་གཉིས་གསུམ་བཏོན་ལ་ཁྲུས་ལན་གསུམ་བྱའོ། །དེ་ནས་སྔར་བཤད་པ་བཞིན་དུ། དེ་ལ་བསྲུང་
བ་བྱས་གོས་བསྐོན་ནས་མེ་ཏོག་གི་ཕྲེང་བ་དང་། ཁྲོ་བོ་རྣམས་ཀྱི་ཕྱག་མཚན་བྲིས་པའམ། ལུགས་མ་སྤྱི་བོར་གདགས་པར་བྱའོ། །དེ་ནས་བདག་ཉིད་ཀྱང་སྔར་བཤད་པ་བཞིན་དུ་བསྲུང་བ་བྱས་ལ་ལྡང་བར་བྱའོ། །སྤྱན་དྲངས་པའི་ལྷ་ཡང་། ཁྱོད་ཀྱིས་སེམས་ཅན་དོན་ཀུན་

73-1-297b

མཛད། །ཅེས་བྱ་བ་ལ་སོགས་པས་གཤེགས་སུ་གསོལ་བར་བྱའོ། །དམ་ཚིག་སེམས་དཔའ་ཡང་སྟོང་པ་ཉིད་དུ་ཞུ་བ་དང་རྡུལ་ཚོན་གྱི་ལྷའི་དམན་མ་ཡང་ཆུ་བོ་ལ་སོགས་པར་དོར་བར་བྱའོ། །དེ་ནས་གནས་དེ་ན་གནས་པའི་འབྱུང་པོ་དང་། གདོན་རྣམས་དང་། ཕྱོགས་སྐྱོང་ལ་གཏོར་མ་
བྱིན་ལ། ནུས་ན་སྦྱིན་བདག་དང་སློབ་མ་བསྲུང་བའི་ཕྱིར་སྦྱིན་སྲེག་བྱའོ། །སངས་རྒྱས་བྱང་ཆུབ་སེམས་དཔའ་དང་། །རིག་འཛིན་སྔོན་གྱི་མཁས་པ་ཡིས། །ཅི་གསུངས་ལྷག་ཆད་མེད་པར་ནི། །རང་བཟོར་མ་བྱས་བཟོད་གསོལ་མེད། །ལེགས་གྲུབ་རིག་པ་མཆོག་དག་དང་། །རབ་གྲུབ་
གསང་བ་སྤྱི་རྒྱུད་དང་། །ཕྱག་ན་རྡོ་རྗེའི་དབང་བསྐུར་ལས། །ཡོན་བླངས་དགེ་རྩ་བསྔོ་རྒྱུ་མེད། །རྡོ་རྗེ་རྣམ་པར་འཇོམས་པའི་ཆོ་ག་རིན་པོ་ཆེ་མིག་ཐུར་ཞེས་བྱ་བ། སློབ་དཔོན་ཤཱུ་རངྒ་ཝརྨས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། བཛྲ་བི་དཱ་ར་ཎ་མཎྜ་ལ་བི་དྷི་ནཱ་མ། བོད་
སྐད་དུ། རྡོ་རྗེ་རྣམ་པར་འཇོམས་པའི་དཀྱིལ་འཁོར་གྱི་ཆོ་ག་ཞེས་བྱ་བ། བཅོམ་ལྡན་འདས་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །རྡོ་རྗེ་ཀུན་དགེ་འཇོམས་མཛད་པའི། །དཀྱིལ་འཁོར་ཆོ་ག་བཤད་པར་བྱ། །དང་པོར་བདག་སྟན་བདེ་བ་ལ་འདུག་སྟེ། ཨོཾ་ཤོ་དན་ཏེ་ཤོ་དན་ཡེ་སྭཱ་ཧཱ། 
ཞེས་དབང་པོའི་སྒོ་དག་པའི་ཁྲུས་བྱས་ཏེ། ཆོས་ཐམས་ཅད་སྟོང་པ་ཉིད་ནང་གི་བདག་ཉིད་ཅན་གྱི་ཁྲུས་བྱས་ལ། བདག་ཉིད་སྐད་ཅིག་མས་ལྷར་བསྐྱེད་ལ། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ། གྲྀཧྞ་པ་ཡ་གྲྀཧྞཱ་པ་ཡ་ཧཱུཾ་ཨཱ་ན་ཡ་ཧོཿབྷ་ག་བཱན་བིདྱཱ་རཱ་ཛཱ་ཡ་ཧཱུཾ་ཕཊ། མི་འགྲོ་བ་རྣམས་ལ་
མཚོན་ཆའི་ཆར་དབབ་པ་སྟེ། ཨོཾ་ཙཀྲ། ཧཱུཾ་བྷྲུཾ་ཏྲཱཾ་བྷྲུཾ་ཧྲཱིཿབྷྲུཾ། ཧ་བྷྲཱུཾ། དེ་ནས་མཚོན་ཆ་ལྔའི་གུར་དང་ས་གཞིར་གྱུར་ཏོ། །མཚམས་ཀྱི་ཁང་པའི་ནང་དུ། ཙཀྲ་ག་ཙ་ལ་མཎྜ་ལ་མ་ཡེ་ཞེས། ཚོགས་བསགས་པ་རྟེན་གྱི་དཀྱིལ་འཁོར་མདུན་དུ་སྤྲུལ་ལ། ཕྱི་དང་ནང་གི་མཆོད་པས་མཆོད། །
རྡོ་རྗེ་མེའི་ཕྱག་རྒྱས་མཆོད་པའི་རྫས་རྣམས་བསྲེགས་ལ། བཛྲ་དྷྭ་ཏི་ཛྭ་ལ་རཾ་ཧཱུཾ་ཞེས་པའོ། །དམ་ཚིག་ཕྱག་རྒྱས་སྤྲུལ་ཏེ། བཛྲ་སཏྭ་ཧཱུཾ། པྲ་བར་སཏྐཱ་པྲ་ཏཱིཙྪ་ཧཱུཾ། དྷཱུ་པེ་ཧཱུཾ། པུཥྤེ་ཏྲཱཾ་ཨཱ་ལོ་ཀེ་ཧྲཱིཿགནྡྷེ་ཨཿནཻ་བེ་དྱེ་ཧཱུཾ། དབུལ་བ་ལས་ཀྱི་ཕྱག་རྒྱས་དབུལ། ཧཱུཾ་ཡན་ལག་བརྒྱད་

73-1-298a

དང་ལྡན་པ་ཡི། །ཁྲུས་ཀྱི་དམ་པ་ཡོན་ཆབ་འདི། །བཅོམ་ལྡན་རྣམ་འཇོམས་ཉིད་ལ་དབུལ། །འགྲོ་བའི་དོན་དུ་བཞེས་སུ་གསོལ། །ཨོཾ་ག་ག་ན་ས་མ་ཡེ་ཧཱུཾ། དག་ཅིང་གཙང་མར་སྦྱར་བ་ཡི། །ལྷ་རྫས་དམ་པའི་ཁྲུས་ཆབ་འདི། །རྣམ་འཇོམས་འཁོར་དང་བཅས་ལ་འབུལ། །
འགྲོ་བའི་དོན་དུ་བཞེས་སུ་གསོལ། །ཨོཾ་པྲ་བ་ར་སཏྐཱ་ར་པྲ་ཏཱིཙྪ་ཧོ། ཧཱུཾ་ནགས་ཚལ་བཅུད་ནི་ཡི་གར་འོང་། །དྲི་མཆོག་རྒྱས་པའི་སྤོས་མེ་འདི། །བཅོམ་ལྡན་རྣམ་འཇོམས་འཁོར་བཅས་ལ། །དད་པས་དབུལ་ལོ་བཞེས་སུ་གསོལ། །ཨོཾ་ན་མཿབཛྲ་བི་དཱ་ར་ཎ་དྷཱུ་པ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་
ཡེ་ཧཱུཾ། ཆུ་འམ་ཐང་ལས་སྐྱེས་པ་ཡི། །ཁ་དོག་དབྱིབས་ལེགས་མེ་ཏོག་འདི། །བཅོམ་ལྡན་རྣམ་འཇོམས་འཁོར་བཅས་ལ། །དད་པས་དབུལ་ལོ་བཞེས་སུ་གསོལ། །ཨོཾ་ན་མཿབཛྲ་བི་དཱ་ར་ཎ་པུཤྤ། གདོན་རྣམས་འཇོམས་ཤིང་བཀྲ་ཤིས་པའི། །དགེ་ཞིང་མུན་སེལ་སྣང་གསལ་འདི། །བཅོམ་
ལྡན་རྣམ་འཇོམས་འཁོར་བཅས་ལ། །དད་པས་དབུལ་ལོ་བཞེས་སུ་གསོལ། །ཨཱ་ལོ་ཀེ། འཆལ་པའི་དྲི་མ་སེལ་མཛད་པའི། །ཡིད་བཞིན་བདུད་རྩི་མཚོ་ལྟར་བསྐྱིལ། །བཅོམ་ལྡན་རྣམ་འཇོམས་འཁོར་བཅས་ལ། །དད་པས་དབུལ་ལོ་བཞེས་སུ་གསོལ། །གནྡྷེ། དག་ཅིང་གཙང་མར་སྦྱར་བ་ཡི། །
ལྷ་རྫས་དམ་པའི་ཞལ་ཟས་འདི། །བཅོམ་ལྡན་རྣམ་འཇོམས་འཁོར་བཅས་ལ། །དད་པས་དབུལ་ལོ་བཞེས་སུ་གསོལ། །ནཻ་བི་དྱེ། དེ་ལས་གཞན་ཡང་མཆོད་པའི་ཚོགས། །རོལ་མོ་སྒྲ་སྙན་ཡིད་འོང་བ། །སེམས་ཅན་སྡུག་བསྔལ་ཚིམ་མཛད་པའི། །དུས་རྣམས་ཀུན་དུ་རྒྱས་གྱུར་ཅིག །ཨོཾ་ན་མཿ
བི་དཱ་ར་ཎ་བཛྲ་གྷཎྜེ་ར་ཎི་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ནང་གི་མཆོད་པ་འབུལ་བ་ཡང་། །བདུན་ནི་རྣམ་དག་བྱང་ཆུབ་སེམས། །བསོད་ནམས་ཚོགས་ཆེན་བསགས་པར་བྱ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ། བདག་ཉིད་ལུས་འབུལ་གྱིས། ཐུགས་རྗེ་ཆེན་པོ་དང་
ལྡན་པའི་མགོན་པོ་ཁྱེད་རྣམས་ཀྱིས། བདག་དུས་ཐམས་ཅད་དུ་བཞེས་སུ་གསོལ་ལོ། །ཇི་ལྟར་དུས་གསུམ་མགོན་པོ་ཡི། །དགེ་བའི་རྩ་བ་ཅི་བསགས་པ། །ཐམས་ཅད་མ་ལུས་བསྡུས་ནས་ནི། །དགེ་རྩ་བྱང་ཆུབ་ཆེན་པོར་བསྔོ། །ཇི་ལྟར་དུས་གསུམ་མགོན་པོ་ཡི། །བྱང་ཆུབ་ཏུ་ནི་ངེས་

73-1-298b

མཛད་པའི། །བྱང་ཆུབ་སེམས་ནི་བླ་མེད་པའི། །དམ་པ་བདག་གིས་བསྐྱེད་པར་བགྱི། །དཀོན་མཆོག་བླ་མ་དམ་པའི་ཆོས། །ཕྱི་ནང་གསང་བའི་མཆོད་པ་དང་། །སེམས་བསྐྱེད་སྡོམ་པ་ལྔ་རྣམས་ནི། །རིགས་ལྔའི་དམ་ཚིག་སྡོམ་པ་བཟུང་། །མ་གྲོལ་བ་རྣམས་གྲོལ་བར་བགྱི། །མ་བརྒལ་བ་ནི་བསྒྲལ་བར་བགྱི། །
དབུགས་མ་ཕྱིན་པ་དབུགས་ཕྱུང་སྟེ། །སེམས་ཅན་མྱ་ངན་འདས་ལ་དགོད། །དེས་ནི་བླ་ན་མེད་པ་སེམས་ཀྱི་མཆོད་པའོ། །བཛྲ་ཨཉྫ་ལི་སར་སྡོམ་པ། བཛྲ་བནྡྷ་ཏྲ་ཊ་ཅེས་སྡིག་པ་དྲལ། བཛྲ་ཨཱ་བེ་ཤ་ཨཿཨཿཞེས་ཡེ་ཤེས་དབབ་པ་བརྟན་པ་བཛྲ་མུཥྚི་བཾ་ཞེས་པ། སྡིག་སྒྲིབ་དྲལ་
ཞིང་ཡེ་ཤེས་དབབ་པ་ནི། ཡེ་ཤེས་ཀྱི་ཚོགས་བསགས་པ་སྟེ། དེ་ཁོ་ན་ཉིད་ཀྱི་མཆོད་པའོ། །མཆོད་པ་ལྔ་ཡིས་ཚོགས་གཉིས་རྫོགས། །སྲུང་འཁོར་བསྡུས་ལ་ནམ་མཁར་གནས། །སརྦ་བིདྱཱ་བཛྲ་ཞེས་བརྗོད་པས། །རྒྱུད་དང་མི་རྒྱུ་ཐམས་ཅད་ཀུན། །སྟོང་པ་ཉིད་དུ་བསྒོམ་པར་བྱ། །སེམས་
ཉིད་ཨ་ཡི་རང་བཞིན་ལས། །སྐྱེ་བའི་ཆོ་འཕྲུལ་ཡཾ་དུ་ཤར། །སྔོན་པོ་གཞུ་ཡི་དབྱིབས་ལྟ་བུ། །དེ་སྟེང་བཾ་ལས་ཆུ་ཆེན་ནི། །ཟླུམ་ལ་དཀར་པོ་བསིལ་བ་སྟེ། །སུཾ་ལས་ས་གཞི་རི་རབ་བསྐྱེད། །བྷྲཱུཾ་ལས་རིན་ཆེན་གཞལ་ཡས་ཁང་། །གདན་གསུམ་ལྡན་པའི་སྟེང་དག་ཏུ། །ཨ་ནི་ཧཱུཾ་དུ་གྱུར་པ་
ལས། །འོད་ཟེར་སྤྲོ་བསྡུས་ལན་གཉིས་བྱས། །རྡོ་རྗེ་རྩེ་ལྔ་པདྨའི་དབུས། །དེ་ལས་སྤྲོས་དང་བསྡུས་པ་ཡིས། །སྥོ་ཊ་བཛྲའི་སྔགས་བརྗོད་པས། །རྣམ་འཇོམས་སྐུ་ནི་བཻ་ཌཱུརྱ། །སྔོན་པོ་སྤུག་གི་ཁ་དོག་ལ། །གཡས་པ་རྒྱ་གྲམ་འཛིན་པ་སྟེ། །གཡོན་ནི་སྡིགས་མཛུབ་ཐུགས་ཀར་བསྒྲེང་། །ཁྲོ་ལས་
བྱང་ཆུབ་སེམས་དཔའི་རྒྱན། །ཆ་ལུགས་བརྒྱད་དང་ལྡན་པ་ལ། །ཐུགས་ལས་ཧཱུཾ་བཞི་ཕྱོགས་བཞིར་ཆད། །གྲི་གུག་ཉི་ཟླའི་རྩིབས་སྟེངས་སུ། །འཇིགས་པའི་ཁྲོ་བོ་ཆེན་པོ་བཞི། །མ་ནོར་རྩ་བའི་སྔགས་ཀྱིས་བསྐྱེད། །ཤར་དུ་རྡོ་རྗེ་གཏུམ་པོ་ནི། །སྨུག་ན་རྡོ་རྗེ་རྩེ་ལྔ་བསྣམས། །ལྷོ་རུ་རྡོ་རྗེ་ཕུར་བུ་ནི། །
ལྗང་ནག་རྡོ་རྗེ་ཕུར་པ་བསྣམས། །ནུབ་ཏུ་རྡོ་རྗེ་བེ་ཅོན་ནི། །དམར་ནག་ཕྱག་ན་བེ་ཅོན་བསྣམས། །བྱང་དུ་རྡོ་རྗེ་ཐོ་བ་ནི། །ལྗང་ནག་ཕྱག་ན་ཐོ་བ་བསྣམས། །གཡོན་པ་ཀུན་ནི་སྡིགས་མཛུབ་སྟེ། །ཁྲོ་ལས་བྱང་ཆུབ་སེམས་དཔའ་བརྒྱན། །འཁོར་ལོའི་གོང་རས་བཞི་ལ་ནི། །ཕྱག་མཚན་

73-1-299a

རྡོ་རྗེ་རིན་པོ་ཆེ། །པདྨ་སྣ་ཚོགས་རྡོ་རྗེ་ལས། །སྥོ་ཊ་བཛྲ་བཛྲ་ལཱ་སྱེ་ཧཱུཾ་ཞེས་བརྗོད་པས། ལཱ་སྱེ་དཀར་མོ་ཕྱག་ན་མེ་ལོང་བསྣམས། །བཛྲ་མཱ་ལེ་ཏྲཱཾ། མཱ་ལེ་སྔོན་མོ་ཕྱག་ན་ཕྲེང་བ་བསྣམས། །བཛྲ་གཱིརྟི་ཧྲཱིཿགཱིརྟི་དམར་མོ་ཕྱག་ན་པི་ཝང་བསྣམས། །བཛྲ་ནྱི་ཏྱེ་ཨཿནྲི་ཏྱེ་ལྗང་གུ་གར་བསྒྱུར་
ཐལ་སྦྱར་སྤྱི། །ཕྱི་རིམ་རྒྱས་པའི་གྲུ་ཆད་ལ། །ཕྱག་རྒྱ་གསེར་དངུལ་ཟངས་ལྕགས་གཞོང་པ་བཞི། །མཆོད་པའི་ལྷ་མོ་བཞི་པོ་བསྐྱེད། །དྷཱུ་པེ་དཀར་མོ་སྤོས་གཞོང་སེར་མོ་བསྣམས། །བཛྲ་དྷཱུ་པེ་ཧཱུཾ། པུཥྤེ་སེར་མོ་མེ་ཏོག་གཞོང་པ་བསྣམས། །བཛྲ་པུཥྤེ་ཧྲཱཾ། མར་མེ་དམར་སྐྱ་མེ་གཞོང་
དམར་པོ་བསྣམས། །བཛྲ་ཨཱ་ལོ་ཀེ་ཧྲཱིཿདྲི་ཆབ་ལྗང་གུ་ལྕགས་ཀྱི་གཞོང་པ་བསྣམས། །བཛྲ་གནྡྷེ་ཨཿཁྱམས་ལ་ཕྱོགས་སྐྱོང་བཅུ་པོ་བསྐྱེད། །རྡོ་རྗེ་མེ་ཐབ་གྲུ་གསུམ་དང་། །བེ་ཅོན་རལ་གྲི་སྦྲུལ་ཞགས་དང་། །བ་དན་དབྱུག་པ་ཁ་ཊྭཱཾ་ག །ཤར་དུ་ཉི་ཟླ་ནུབ་ཏུ་བུམ་པ་ལས། །སྔགས་འདི་བརྗོད་ལ་སྐུ་
རུ་གསལ་བར་བསྐྱེད། །ཨིནྡྲ་ཡེ་སྭཱ་ཧཱ། བརྒྱ་བྱིན་དཀར་པོ་ཕྱག་ན་རྡོ་རྗེ་བསྣམས། །ཨགྣེ་ཡེ་སྭཱ་ཧཱ། ཨགྣེ་དམར་སེར་ཕྱག་ན་མེ་ཐབ་བསྣམས། །ཡཱ་མ་ཡེ་སྭཱ་ཧཱ། གཤིན་རྗེ་ནག་པོ་ཕྱག་ན་བེ་ཅོན་བསྣམས། །ནཻ་རྲྀཏྱི་སྭཱ་ཧཱ། བདེན་བྲལ་དམར་སེར་ཕྱག་ན་རལ་གྲི་བསྣམས། །བ་རུ་ཎ་ཡེ་སྭཱ་ཧཱ། 
ཆུ་ལྷ་དམར་པོ་ཕྱག་ན་སྦྲུལ་ཞགས་བསྣམས། །བཱ་ཡ་བེ་སྭཱ་ཧཱ། རླུང་ལྷ་དམར་ལྗང་ཕྱག་ན་བ་དན་བསྣམས། །ཀུ་བེ་ར་ཡ་སྭཱ་ཧཱ། གནོད་སྦྱིན་ལྗང་གུ་ཕྱག་ན་དབྱུག་ཏོ་ཐོགས། །ཨི་ཤྭ་ན་ཡེ་སྭཱ་ཧཱ། དབང་ལྡན་ལྗང་སྐྱ་ཕྱག་ན་ཁ་ཊྭཱཾ་ག །སཱུརྱ་ཙནྡྲ་ཡེ་སྭཱ་ཧཱ། ཚངས་པ་སྔོ་སྐྱ་ཕྱག་ན་ཉི་ཟླ་
བསྣམས། །པྲ་ཏི་བྷྱ་ཡེ་སྭཱ་ཧཱ། ས་བདག་མཐིང་ནག་ཕྱག་ན་བུམ་པ་བསྣམས། །དྲེགས་པ་སེམས་ཅན་ཀུན་གྱི་གདན་ལ་བཞུགས། །སྒོ་བཞིར་ཕྱག་རྒྱ་ལྕགས་ཀྱུ་དང་། །ཞགས་པ་ལྕགས་སྒྲོག་དྲིལ་བུ་ལས། །ཤར་དུ་ཨང་ཀུ་ཤ་ཛཿ། རྟ་གདོང་དཀར་མོ་ཕྱག་ན་ལྕགས་ཀྱུ་བསྣམས། །
ལྷོར་པཱ་ཤ་ཧཱུཾ་ལས། ཕག་གདོང་ནག་མོ་མཆེ་ཞགས་ཐོགས་པའོ། །ནུབ་སྒོར་སྥོ་ཊ་བཾ་ལས། ཉི་ཟླ་དམར་མོ་ལྕགས་སྒྲོག་བསྣམས་པར་བསྒོམ་མོ། །བྱང་སྒོར་ཨཱ་བེ་ཤ་ཨཿལས། ཐལ་བྱེད་ལྗང་ནག་དྲིལ་བུ་འཁྲོལ་བར་བསྐྱེད་དོ། །ཡང་ན་ཁྱམས་སུ་བཀྲ་ཤིས་ཀྱི་ལྷ་མོ་བརྒྱད་

73-1-299b

ཕྱག་མཚན་བརྒྱད་ལས་སྐུ་མདོག་སེར་མོ་ཕྱག་ན་བཀྲ་ཤིས་ཀྱི་རྫས་བརྒྱད་བསྣམས་པ་བསྐྱེད་དོ། །བཛྲ་སིན་དམ། བཛྲ་ཏྲ་མ་ཡེ། བཛྲ་ཛི་བ་ཡ། བཛྲ་ཤ་ལོ་ཡེ། བཛྲ་གུ་ཤ་ཧཱུཾ། ཡཀྵ་ཧཱུཾ། བ་ལ་ཧཱུཾ། ད་ལ་ཧཱུཾ། ཞེས་བསྐྱེད་ལ། འོད་དཀར་གསུམ་ལ། དང་པོ་རྡོ་རྗེ་རབ་ལ་ཕྱོགས་སྐྱོང་
བསྐྱེད། པདྨ་ལ་ལྷ་སྲིན་སྡེ་བརྒྱད་བསྐྱེད། མེ་འོད་ལ་བགེགས་རིགས་སྟོང་ཕྲག་བརྒྱད་ཅུ་བསྐྱེད་དོ། །དོན་གྱི་ལྷ་དགུ། རྩ་བའི་ལྷ་ལྔ། བསྐྱེད་པའི་ལྷ་ཉི་ཤུ་རྩ་ལྔ། མཆོད་པའི་ལྷ་སྟོང་ཕྲག་བརྒྱད་ཅུ་རྩ་ལྔའོ། །རྩ་བའི་སྔགས་བརྗོད་ལ་ཕྱག་རྒྱ་བསྟན། སྙིང་པོ་ཏི་ལྔ་དབུ་སྟེངས་སུ། །སངས་རྒྱས་
ལྔ་ཡིས་དབང་བསྐུར་བ། །ཀ་ཊ་བཛྲ་ཞེས་བརྗོད་པས། །སྤྱི་བོར་དབང་བསྐུར་བྱིན་གྱིས་བརླབས། །བསྐྱེད་པའི་ལྷ་རྣམས་ཀུན་ལ་ནི། །རིགས་ཀྱི་བདག་པོ་རེ་རེ་བསྒོམ། །དབང་བསྐུར་ལྷ་རྣམས་ཐམས་ཅད་ལ། །མ་ཊ་བཛྲ་ཞེས་བརྗོད་པས། །ལུས་ལ་རྡོ་རྗེ་གོས་གྱོན་ནོ། །མ་ཐ་མི་འགྱུར་ཀ་ནན་བཏང་། །
ཨ་ཐ་ཞེས་ནི་བགེགས་ཀྱང་བསྐྲད། །སུ་ལས་རྡོ་རྗེ་ཁང་པ་ནི། །རབ་ཏུ་བརྟན་པར་འགྱུར་བ་དང་། །གཞི་ཡི་རྣལ་འབྱོར་ལུས་རྣམས་ནི། །བཛྲ་བདུན་གྱིས་བྱིན་གྱིས་བརླབ། །རང་བཞིན་གནས་ནས་བསྐུལ་བ་ནི། །ཧ་ར་ཧ་ར་བཛྲ་བི་དཱར། །སེ་གོལ་དྲག་ཏུ་བརྡབས་པ་ཡིས། །ཛཿཡི་སྤྲུལ་པས་སྙན་
གསན་དབབ། །པྲ་ཧ་ར་པྲ་ཧ་ར་བཛྲ་པྲ་བྷཉྫ་ཛཿཧཱུཾ་བཾ་ཧོཿ། འོད་ཟེར་ལྔ་ཡི་མདུན་དུ་བྱོན། །མ་ཏི་སྠིར་བཛྲ། དེ་ཡིས་ལྷ་རྣམས་ཆ་གཉིས་དབྱེ། །སུ་ཏི་སྠིར་བཛྲ། གདན་གཅིག་མི་གཉིས་ཚུལ་དུ་གཅོད། །པྲ་ཏི་སྠིར་བཛྲ། དེ་རྣམས་གཉིས་མེད་འདྲེས་པར་བསྟིམ། །མ་ཧཱ་བཛྲ་སྐུ་བརྟན། ཨ་པྲ་ཏི་
ཧ་ཏ་བཛྲ་གསུང་བརྟན། ཨ་མོ་གྷ་བཛྲ་ཐུགས་བརྟན། ཨེ་ཧྱེ་ཧི་བཛྲ་དགྱེས་པ་བསྐྱེད། ཤཱི་གྷཾ་བཛྲ་དངོས་གྲུབ་མ་ཐོབ་བར་དུ་བཞུགས། དམ་ཚིག་ལྷ་དང་ཡེ་ཤེས་ལྷ། །གཉིས་མེད་བསྒྲུབས་ལ་མཆོད་པས་མཆོད། །བསྒོམ་ཞིང་བཟླས་པས་བསྒྲུབ་པར་བྱ། །སྔགས་རིངས་ཉེ་བའི་སྙིང་པོ་གཉིས། །
བསྡུས་རྒྱས་ལྷ་ཡི་བསྙེན་པ་བསྐྱལ། །མཚན་མ་དུས་དང་གྲངས་ལ་སོགས། །དམ་དུ་བཅས་པའི་བསྙེན་པ་ནི། །ཐུན་བཞི་རིམ་གྱིས་ཉིན་དང་མཚན། །བསྙེན་པ་རྫོགས་པའི་ཆོ་ག་བྱ།    །དཀྱིལ་འཁོར་ཞག་གི་ཆོ་ག་ལ། །ས་དང་སྟ་གོན་རྡུལ་ཚོན་རྣམས། །མཁས་པས་རིམ་པར་བརྩམ་པར་བྱ། །

73-1-300a

དང་པོ་ས་ཡི་ཆོ་ག་ནི། །ས་བརྟག་བསླང་ཞིང་སྦྱང་བ་དང་། །བྱིན་གྱིས་བརླབ་ཅིང་གཟུང་བ་ལྔ། །ས་བརྟག་པ་ལ་བཞི་རུ་གྲངས། །ནམ་མཁའི་ཕྱོགས་དང་ས་གཞི་དང་། །བདག་པོ་ཡོད་མེད་བརྟག་པ་བཞི། །ས་སྦྱངས་པ་ལ་གཉིས་ཡིན་ཏེ། །མངོན་པ་མི་ལ་ཉོ་བསླང་དང་། །མི་མངོན་
བགེགས་ལ་བསླང་བའོ། །བདེན་པ་བདར་ཏེ་ཆོས་བཤད་བསླང་བ་དང་། མཆོད་ཅིང་གསོལ་བ་གདབ་སྟེ་བསླང་བའོ། །སྐྱོབ་པ་སངས་རྒྱས་བཅོམ་ལྡན་འདས། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་པ་ཡི། །ལྷ་མོ་ཁྱོད་ནི་དཔང་དུ་གྱུར། །ཇི་ལྟར་ཤཱཀྱ་སེང་གེ་ཡིས། །
བདུད་སྡེ་དཔུང་བཅས་བཅོམ་པ་བཞིན། །དེ་བཞིན་བདག་གིས་བདུད་ལས་ནི། །རྒྱལ་བར་བྱས་ཏེ་དཀྱིལ་འཁོར་བྲི། །ཞེས་རྡོ་རྗེ་བརྡབས་པས་སའི་སེར་ཀ་ནས། སའི་ལྷ་མོ་བྱོན་ཏེ་ས་གནང་ངོ་། །སའི་ལྷ་མོ་དང་ས་བདག་གནས་ཀྱི་བདག་པོ་ལ་མཆོད་པ་དང་གཏོར་མས་མཆོད་ནས། ཧཱུཾ་
གང་ཡང་ས་ལ་གནས་པ་དང་། །ས་ལ་རྒྱུ་བའི་ལྷ་ཀླུ་རྣམས། །མཆོད་དང་གཏོར་མ་འདི་ལོང་ལ། །སེམས་ཅན་ཀུན་ལ་དགེ་དོན་དུ། །བྱམས་པའི་སེམས་ཀྱིས་གནང་བར་མཛད། །པྲ་ཏི་བྱ་དྷཱུ་པཾ་པུཥྤཾ། ཨཱ་ལོ་ཀེ་གནྡྷེ་ནཻ་བི་དྱེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། པྲ་ཏི་བྱ་ནཾ་སརྦ་ཏ་ཐཱ་
ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཏཏྑཾ་ཨུཏ་ཁཾ་བ་ལིཾ་ཏ་ཁཱ་ཧི། ས་སྦྱང་བ་ནི། ལས་དང་བྱ་བས་སྦྱང་བ་དང་། །སྔགས་དང་ཕྱག་རྒྱས་སྦྱང་བའོ། །ཆོས་ཉིད་སྟོང་པའི་སྔགས་དང་ཕྱག་རྒྱས་སྟོང་པར་སྦྱང་བའོ། །ལས་དང་བྱ་བས་བརྐོས་ཏེ་རོ་ལྔ་བསལ། །འཐས་ཤིང་ཚད་དང་ལྡན་པར་བྱ། །ཚངས་
ཐིག་ཟུར་ཐིག་བཞི་ཡང་གདབ། །ཆ་ཆེན་བཅུ་དྲུག་བགོ་བྱས་ལ། །ལྷ་སྣམ་མིན་པ་བཞི་བཞིར་བགོ། །ཟླུམ་སྐོར་རིམ་པ་བརྒྱད་དུ་བསྐོར། །ཕོ་བྲང་འཁོར་ལོའི་གོང་རས་ལ། །རིམ་པ་གཉིས་གཉིས་བཞི་རུ་བསྐོར། །རྡོ་རྗེ་པདྨ་མེ་འོད་ལ། །ཆ་བྲན་གཉིས་གཉིས་མཉམ་པོ་རུ། །རིམ་པ་
བཞིན་དུ་བསྐོར་ཏེ་གཞག །མཐིང་ཀ་དཀར་པོ་སེར་ལེ་བརྒན། །ལྗང་གུ་ལ་སོགས་པཉྩ་བཏང་། །ཡང་ན་མཐིང་ག་དཀར་པོ་དང་། །དམར་པོ་སྐུ་གསུམ་ཏྲི་རཱ་ག །གོང་རས་ལྗང་གུ་གྲུ་ཆད་སེར། །སྒོ་དང་ལྷ་སྣམ་ཕྱོགས་ཚོན་ལ། །ལྔ་རྩེ་དམར་པོ་ཕ་གུ་སེར། །དྲ་བ་དཀར་ལ་

73-1-300b

ཆུན་འཕྱང་ལྕགས། །དཀྱིལ་འཁོར་སྟེང་དུ་སྐུ་གཟུགས་བཞག །ས་དེ་སངས་རྒྱས་བྱང་ཆུབ་སེམས་དཔའི་སྐུ་གཟུགས་ཀྱིས་གཟུང་བའོ། །བདུད་རྩི་འཁྱིལ་པའི་བུམ་པ་གཞག་པ་ནི། ཁྲོ་བོ་ལས་ཐམས་ཅད་པས་ས་གཟུང་བའོ། །གཉིས་པ་སྟ་གོན་གནས་པར་བྱ། །ལྷ་དང་བུམ་པ་སློབ་མ་དང་། །
སྟ་གོན་དུས་ཀྱི་སྦྱིན་སྲེག་གོ། །དཀྱིལ་འཁོར་ལྷ་ཡི་གནས་རྣམས་སུ། །ཙནྡན་གུར་གུམ་དྲི་ཡི་ཐིག་ལེ་བྱ། །རང་རང་སྔགས་ཀྱིས་སྐད་ཅིག་བསྐྱེད། །དེ་ལས་མཆོད་དང་གཏོར་མ་དང་། །གསང་བ་སྡེར་བཟངས་མཆོད་པ་དབུལ། །མཆོད་དེ་གསོལ་བ་གདབ་པ་ནི། །བཅོམ་ལྡན་རྡོ་རྗེ་རྣམ་
འཇོམས་ནི། །རིག་པའི་རྒྱལ་པོ་ཕྱག་འཚལ་བསྟོད། །ཁྱེད་རྣམས་ལ་ཡང་མཆོད་པ་དང་། །སེམས་ཅན་ཀུན་ལ་བརྩེ་དོན་དུ། །སང་ནི་དཀྱིལ་འཁོར་བྲི་བར་འཚལ། །ཡོ་བྱད་ཅི་འབྱོར་པ་ཡིས་ནི། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབ་པ་མཛད་དུ་གསོལ། །ཞེས་པ་
ལན་གསུམ་དུ་གསོལ་བ་གདབ་བོ། །བུམ་པ་སྟ་གོན་དུ་གནས་པ་ནི། བུམ་པའི་རྒྱུ་བསྟན་པ་དང་། བུམ་པའི་བཅུད་བསྟན་པ་དང་། མགུལ་ཆིངས་བསྟན་པ་དང་། ཁ་རྒྱན་བསྟན་པ་དང་། བཅའ་བའི་ཐབས་བསྟན་པ་དང་། བཟླས་པའི་གྲངས་བསྟན་པ་དང་། བུམ་པའི་གྲངས་བསྟན་
པའོ། །བཅའ་བའི་ཐབས་དང་། བུམ་པའི་གྲངས་ནི་བསྡུས་པ་དྲུག་སྟེ། དབང་བསྐུར་བའི་བུམ་པ་ལྔ། བདུད་རྩི་འཁྱིལ་པའི་བུམ་པ་དང་དྲུག་གོ། །རིགས་ཀྱི་མཚན་མ་ནི་གུར་གུམ་གྱིས་ཏི་ལྔ་བྲི། བདུད་རྩི་འཁྱིལ་པ་ལ་ཧཱུཾ་བྲི། ཁ་དོག་མཐིང་སེར་དམར་ལྗང་ངོ་། །བདུད་རྩི་སྤུག་གི་ཁ་དོག་
ཅན་དུ་བྱའོ། །བཾ་ལས་བུམ་པ་གཞལ་ཡས་ཁང་། །བཾ་ལས་བདུད་རྩིའི་གཞལ་ཡས་བསྐྱེད། །རྒྱ་མཚོ་པདྨའི་གདན་སྟེངས་སུ། །ཏི་དང་ཡཾ་ཡིག་ཧཱུཾ་ལས་ནི། །ལྷ་བསྐྱེད་སྤྱན་དྲངས་མཆོད་པ་འབུལ། །ཉི་ཤུ་རྩ་གཅིག་བཟླས་པ་ནི། །བུམ་པ་རེ་ལ་རྫོགས་པར་བྱ། །ཡུངས་ཀར་རེ་ལ་སྔགས་
རེ་བཏབ། །དེས་ནི་བུམ་པའི་སྟ་གོན་ནོ། །དེ་ནས་སློབ་མ་ལྷག་པར་གནས་པ་ནི། དེ་ལ་དང་པོ་ཁྲུས་བྱས་ལ་གོས་གཙང་མ་གྱོན་ཞིང་། ལག་ན་མེ་ཏོག་ཐོགས་ལ། སློབ་དཔོན་ལྷ་ལ་ཕྱག་བྱས་ལ་འདི་སྐད་ཞུའོ། །དགའ་ཆེན་ཁྱོད་བདག་སྟོན་པ་པས། །སློབ་དཔོན་ཁྱོད་ནི་དགོངས་སུ་

73-1-301a

གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ནི་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་བགྱི། །
དེ་ནས་སློབ་དཔོན་གྱིས་སྤྲོ་བ་བསྐྱེད་ལ། ཧོ་རྟོག་པ་རྣམས་ནི་ལེགས་པར་བསྡུས་ནས་སུ། །ཤིན་ཏུ་བསམ་པ་བཟང་དང་ལྡན་པས་ཉོན། །བརྗེད་ངས་བློ་ལ་རྡོ་རྗེ་རྣམ་འཇོམས་པའི། །བདེ་བར་གཤེགས་པ་རྣམས་ཀྱིས་བྱིན་མི་རློབ། །དེ་ནས་སློབ་མས་སྡིག་པ་བཤགས་པ། དབང་མེད་
བདག་གིས་མི་དགེ་བགྱིས་པ་དང་། །རྗེས་སུ་ཡི་རང་ཡང་ན་བགྱིད་སྩལ་གང་། །དེ་དག་ཐམས་ཅད་བྱང་ཆུབ་མཆོག་ཆེན་གྱི། །སྤྱན་སྔར་སྡིག་པ་མ་ལུས་སོ་སོར་བཤགས། །ཞེས་ལན་གསུམ་དུ་བརྗོད་དོ། །བདག་གིས་སེམས་ཅན་དོན་དུ་ནི། །བྱང་ཆུབ་སེམས་ནི་བསྐྱེད་པར་བྱ། །
སྡུག་བསྔལ་གྲུ་ལས་ཐར་པའི་ཕྱིར། །བྱང་ཆུབ་མཆོག་ཏུ་སེམས་བསྐྱེད་དོ། །སློབ་མའི་སྙིང་གར་རྡོ་རྗེ་རྒྱ་གྲམ་བཅུག་ལ། ན་མཿཙཎྜ་བཛྲ་ཀྲོ་དྷ་ཀཱི་ལི་ཀཱི་ལཱ་ཡ། ཞེས་བརྗོད་ལ་སློབ་མ་རྡོ་རྗེ་རྣམ་པར་འཇོམས་པར་བསྐྱེད་ལ། ཧཱུཾ་ཏྲཱཾ་ཧྲཱིཿཨཿཞེས་པས་གནས་བཞི་བྱིན་གྱིས་བརླབས་ཏེ། རྡོ་རྗེ་
བསྡམས་པའི་ཕྱག་རྒྱས་སྙིང་གར་ཧཱུཾ་ལས་རྡོ་རྗེ། དཔྲལ་བར་ཏྲཱཾ་ལས་རིན་པོ་ཆེ། མགྲིན་པར་ཧྲཱིཿལས་པདྨ། སྤྱི་བོར་ཨཿལས་སྣ་ཚོགས་རྡོ་རྗེ་བསྐྱེད་དོ། །དེ་ལྟར་གནས་བཞིར་ཡེ་ཤེས་བཞི་རྟགས་དང་ལྡན་པར་བྱིན་གྱིས་བརླབས་ནས་མཆོད་པ་དབུལ་ཞིང་སྣང་བར་བྱས་ཏེ། བདུག་སྤོས་ལག་ཏུ་
གཏད། མེ་ཏོག་ལུས་ལ་གཏོར། དྲི་ཐུགས་ཀར་བྱུག །མར་མེ་སྣང་བར་བསྟན། ལྷ་བཤོས་ཞལ་དུ་བཅུག །སིལ་སྙན་རྣ་བར་བསྒྲགས། སྔགས་དང་ཕྱག་རྒྱས་ཚིག་རྣམས་གོ་བར་བརྗོད་དོ། །ཨ་ཤྭཏྠ་ལ་སོགས་པའི་སོ་ཤིང་སོར་བཅུ་གཉིས་པ་རྩེ་མོ་མེ་ཏོག་བཅིངས་པ་དེ་བཛྲ་ཧཱ་ས་ཧ་ཞེས་
སྦྱིན་པར་བྱའོ། །ཀུ་ཤ་སྔོན་པོ་བཛྲ་ཏཱིཀྵྞ་ཞེས་གཏད་ལ། ལ་ལ་སྔས་སུ་གཞུག་ལ་ལ་སྟན་དུ་བཏིང་ལ་ཉོལ་ཅིག་བསྒོའོ། །དེ་ནས་རྡོ་རྗེ་རྣམ་འཇོམས་བཟླས་པའི་སྲུང་སྐུད་མགུལ་དུ་གདགས་སོ། །གསོལ་བ་གདབ་པར་བྱའོ། །ནང་པར་བཞིན་བཟངས་ལོངས་ཤིག །དཀྱིལ་འཁོར་

73-1-301b

ཆེན་པོ་མཐོང་བར་འགྱུར་རོ་ཞེས་བརྗོད་དོ། །ལྷ་གནས་སློབ་མ་སྟ་གོན་གྱི་ཆོ་གའོ།    །སྟ་གོན་གྱི་དཀྱིལ་འཁོར་ཏེ། བཛྲ་དྲྀཥྚི་མཊ་ཅེས་ནམ་མཁའ་ལ་བཏེག་ལ་ཐིག་གདབ་པར་བྱའོ། །གཞུང་དང་མཐུན་པར་བྲིས་ནས་ནི། དཀྱིལ་འཁོར་ཞག་གི་ཆོ་ག་བྱས་ཏེ། དཀྱིལ་འཁོར་དེ་ནམ་མཁར་བསླང་
བར་བྱ་སྟེ། རྡོ་རྗེ་རྒྱ་གྲམ་ཕྱག་རྒྱས། བཛྲ་བེ་ག་ཀྲ་མ་ཧཱུཾ་ཞེས་གདེག་པར་བྱའོ། །ཕྱག་མཚན་ལ་སྟ་གོན་གྱི་ཡེ་ཤེས་དབབ་སྟེ། བཛྲ་ཙཎྜ་ཨ། བཛྲ་ཧུ་ལུ་ཨ། བཛྲ་ཏིཥྛ་ཨ། བཛྲ་བནྡྷ་ཨ། བཛྲ་ཧ་ན་ཨ། བཛྲ་ལཱ་སྱེ་ཨ། ཞེས་སྒོ་བ་འབེབས་པའི་བར་དུ་དབབ་པར་བྱའོ། །དཀྱིལ་
འཁོར་བྱིན་དང་ལྡན་པའི་ཕྱིར། རྡོ་རྗེ་གཟུངས་ཀྱིས་བསྒྲུབ་པར་བྱ་སྟེ། བདག་རྡོ་རྗེ་རྣམ་པར་འཇོམས་པར་བསྒོམས་ལ། གཟུངས་ཚར་ཉི་ཤུ་རྩ་གཅིག་བཏོན་པས། ཀུན་ཀྱང་རྡོ་རྗེའི་གུར་དང་ས་གཞིར་གྱུར་ཏེ། མཚམས་བཅད་ཅིང་བར་ཆད་མེད་པར་བསྒྲུབ་པར་བྱའོ། །ལྷག་ཆད་ཀྱི་ཉེས་པ་ཁ་
བསྐང་བར་བྱ་བའི་ཕྱིར། རྡོ་རྗེ་ཤུགས་ཀྱིས་བསྒྲུབ་པར་བྱ་སྟེ། རྡོ་རྗེ་སེམས་དཔའི་ཡི་གེ་བརྒྱ་པ་བཟླས་ཤིང་། དྲིལ་བུ་དཀྲོལ་ཞིང་ལན་བདུན་དུ་དཀྱིལ་འཁོར་ལ་བསྐོར་བ་བྱའོ། །རྡོ་རྗེ་ཤུགས་ནི་དཀྱིལ་འཁོར་ནམ་མཁའ་ལ་བཏེག་སྟེ་བསྐོར་བ་བྱས་པས། ཆོ་ག་ལྷག་པ་དང་མ་ཚང་བའི་ཉེས་
པ་དང་། མ་འབྱོར་བའི་ཆོ་ག་ཉམས་པ་ཐམས་ཅད་སོར་ཆུད་པར་འགྱུར་རོ། །རྩ་བའི་སྔགས་བརྗོད་པ་ཐམས་ཅད་གསུང་ཡིན། ལྷ་ཐམས་ཅད་ཀྱི་ཕྱག་མཚན་གསལ་བ་ཐུགས། དེ་ལས་སྐུ་གསལ་བ་དབྱེར་མེད་དུ་གྱུར་པར་བསྒོམ་མོ། །དཀྱིལ་འཁོར་གྱི་གདན་ཐོག་ཏུ་ཕྱག་མཚན་ཕབ་
པ་དེ་རྣམས་ལ། ན་མཿཙཎྜ་བཛྲ་ཀྲོ་དྷ་ཀཱི་ལི་ཀཱི་ལཱ་ཡ་ཞེས་བརྗོད་པ་གསུང་། རྡོ་རྗེ་རྒྱ་གྲམ་དུ་གསལ་བ་དེ་ཐུགས། དེ་ལས་འོད་ཟེར་འཕྲོ་འདུ་བྱས་ཏེ་སྐུར་དཀྲོངས་ཙེར་སོང་བ་དེ་གསུམ་དབྱེར་མེད་པ་དེ་ག་སྐུ་གསུང་ཐུགས་ཐ་མི་དད་པར་བསྒྲུབ་པའོ། །དཀྱིལ་འཁོར་གྱི་ལྷ་ཡེ་ཤེས་
ལྷའི་བདག་ཉིད་ཅན་དུ་བསྒྲུབ་པའི་ཆོས་བརྒྱད་དེ། རྡོ་རྗེ་སློབ་དཔོན་གྱིས་སེ་གོལ་བརྡབ་ཅིང་། བཛྲ་ས་མ་ཡ་ཛཿཧཱུཾ་བཾ་ཧོཿཞེས་རང་བཞིན་གནས་ནས་སྤྱན་དྲང་ངོ་། །བཛྲ་གནྡྷེ་པྲ་བེ་ཤ་ཕཊ། ཅེས་སྒོ་དབྱེ། བཛྲ་ཨཾ་ཀུ་ཤ་ཛཿཕྱི་ནས་ནང་དུ་སྤྱན་དྲང་། བཛྲ་པཱ་ཤ་ཧོཿགདན་

73-1-302a

གཅིག་ལ་གཞུག །བཛྲ་སྥོ་ཊ་བཾ་གཉིས་མེད་བསྟིམ། ཨཱ་བེ་ཤ་ཨཿཞེས་དགྱེས་པ་བསྐྱེད། བཛྲ་ཨ་མྲྀ་ཏ་ཀུཎྜ་ལི་སརྦ་བིགྷ་ནཱཾ་ནཱ་ཤ་ཡ་ཧཱུཾ་ཕཊ། བཛྲ་ཀརྨས་ར་བ་བྱ། བཛྲ་སནྡྷི་བཾ་གྱིས་སྒོ་བཅད་དོ། །ཡི་གེ་གཉིས་ཀྱིས་ལྷ་ཐམས་ཅད་ལ་རྡོ་རྗེ་ཀ་ནན་གཏང་། ཕྱག་རྒྱ་བཞིས་རྒྱས་
གདབ་པར་བྱ་སྟེ། དམ་ཚིག་གི་ཕྱག་རྒྱ་བཅས་ཏེ། ཨོཾ་བཛྲ་ཙཎྜ་དྲྀ་ཤྱ་ཛཿཧཱུཾ་བཾ་ཧོཿས་མ་ཡ་སྟྭཾ། ས་མ་ཡ་སྟྭཾ། ཨ་ཧཾ། ཨ་ཧཾ། ཨོཾ་བཛྲ་ཙཎྜ་བཛྲ་ཙཎྜ་ཏི། རྩ་བའི་ལྷའི་སྙིང་པོ་མཐུན་ཏེ་ལྔའོ། །ཨོཾ་བཛྲ་ལཱ་སྱེ་ཧཱུཾ། མཱ་ལེ་ཏྲཱཾ། གཱི་ཏི་ཧྲཱིཿནྲྀ་ཏྱེ་ཨཿཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་པུཥྤེ་ཏྲཱཾ། ཨཱ་ལོ་ཀེ་ཧྲཱིཿ
གནྡྷེ་ཨཿཨོཾ་བཛྲ་སིདྡྷཾ། ཨོཾ་བཛྲ་པྲ་མ་ཡེ། ཨོཾ་བཛྲ་ཛི་བ་ཡེ། ཨོཾ་བཛྲ་ཤ་ལོ་ཡེ། ཨོཾ་བཛྲ་གུ་ཤ་ཧཱུཾ། ཨོཾ་བཛྲ་ཡཀྵ་ཧཱུཾ། ཨོཾ་བཛྲ་བ་ལ་ཧཱུཾ། ཨོཾ་བཛྲ་ད་ལ་ཧཱུཾ། བཀྲ་ཤིས་ལྷ་མོ་བརྒྱད་ནི་ཕྱག་ཐལ་མོ་གཟིངས་པའོ། །ཨོཾ་བཛྲ་ཨཾ་ཀུ་ཤ་ཛཿ ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་བཛྲ་ཨཱ་བེ་
ཤ་ཨཿཞེས་དམ་ཚིག་ཕྱག་རྒྱའོ། །ཆོས་ཀྱི་ཕྱག་རྒྱ་ནི། ལྷ་ཐམས་ཅད་ཀྱི་ལྗགས་ལ་བཛྲ་དྷརྨ་ཛྙཱ་ན་ཞེས་བསྒོམ་མོ། །ལས་ཀྱི་ཕྱག་རྒྱ་ནི། རིགས་ལྔ་ལ། གཡས་གདེངས་ཤིང་། གཡོན་སྡིགས་མཛུབ་ཐུགས་ཀར་བསྒྲེང་བའོ། །རྡོ་རྗེ་རྣམ་པར་འཇོམས་པས། སེམས་ཅན་ཐམས་ཅད་
བསྲུང་བའི་ལས་མཛད་དུ་གསོལ། རྡོ་རྗེ་གཏུམ་པོས་ཞི་བའི་ལས་མཛད་དུ་གསོལ། རྡོ་རྗེ་ཕུར་བུས་རྒྱས་པའི་ལས་མཛད་དུ་གསོལ། རྡོ་རྗེ་བེ་ཅོན་གྱིས་དབང་གི་ལས་མཛད་དུ་གསོལ། རྡོ་རྗེ་ཐོ་བས་སེམས་ཅན་ཐམས་ཅད་རེངས་པའི་ལས་མཛད་དུ་གསོལ། གསང་བའི་ལྷ་མོ་བཞིས་དེ་
བཞིན་གཤེགས་པ་ཐམས་ཅད་མཉེས་པའི་ལས་མཛད་དུ་གསོལ། མཆོད་པའི་ལྷ་མོ་བཞིས་མཆོད་པའི་ལས་མཛད་དུ་གསོལ། བཀྲ་ཤིས་ལྷ་མོ་བརྒྱད་ཀྱིས་སེམས་ཅན་ཐམས་ཅད་རེ་བ་བསྐང་བའི་ལས་མཛད་དུ་གསོལ། སྒོ་བ་བཞིས་དེ་བཞིན་གཤེགས་པ་དགུག་གཞུག་གི་
ལས་མཛད་དུ་གསོལ་ལོ། །ཕྱག་རྒྱ་ཆེན་པོ་རྡོ་རྗེ་དྲིལ་བུ་ཐོགས་ལ། ལས་ཀྱི་ཕྱག་རྒྱ་བཞིན་བཅའ་ཞིང་། ཧཱུཾ་མུ་དྲ་མ་ཧཱ་ས་ལྷ་ཐམས་ཅད་ཞི་བའི་ལས་མཛད་དུ་གསོལ་ལོ། །ཀུན་གྱི་ཕྲིན་ལས་གཅིག་ཡིན་པས། །དེ་ནས་རེ་རེ་མ་བཤད་དོ། །མཆོད་པ་རྒྱས་པར་བར་འདིར་མཆོད་

73-1-302b

པར་བྱའོ། །མཆོད་ཡོན་སྔོན་དུ་འགྲོ་བའི་མཆོད་པ་རྣམ་པ་ལྔས་མཆོད། བཅོམ་ལྡན་ཁྲོ་བོ་གོས་སྔོན་ཅན། །ཡོན་ཏན་ཐམས་ཅད་འདུས་པའི་སྐུ། །རྡོ་རྗེ་རྒྱ་གྲམ་ལས་རྣམས་རྫོགས། །རྡོ་རྗེའི་སྐུ་ལ་ཕྱག་འཚལ་བསྟོད། །བཅོམ་ལྡན་རྡོ་རྗེ་གཏུམ་པོ་ནི། །མཐིང་ནག་བརྗིད་པའི་ཆ་ལུགས་ཅན། །རྡོ་རྗེ་
རྩེ་ལྔ་སྡིགས་མཛུབ་འགྱེད། །རྡོ་རྗེ་ཐུགས་ལ་ཕྱག་འཚལ་བསྟོད། །བཅོམ་ལྡན་རྡོ་རྗེ་ཕུར་བུ་ནི། །སེར་ནག་འཇིགས་པའི་ཆ་ལུགས་ཅན། །རྡོ་རྗེ་ཕུར་བུས་ལས་རྣམས་མཛད། །ཡོན་ཏན་རྫོགས་ལ་ཕྱག་འཚལ་བསྟོད། །བཅོམ་ལྡན་རྡོ་རྗེ་བེ་ཅོན་ནི། །དམར་ནག་འཇིགས་པའི་ཆ་ལུགས་ཅན། །
བེ་ཅོན་འབར་བས་གདུག་པ་འདུལ། །དབང་སྡུད་སྐུ་ལ་ཕྱག་འཚལ་བསྟོད། །བཅོམ་ལྡན་རྡོ་རྗེ་ཐོ་བ་ནི། །ལྗང་ནག་འཇིགས་པའི་ཆ་ལུགས་ཅན། །ཐོད་སྦྲུལ་དར་གྱི་རྒྱན་ཆ་ཅན། །ཕྲིན་ལས་རྫོགས་ལ་ཕྱག་འཚལ་བསྟོད། །སྒེག་མོ་ཕྲེང་བ་གར་དང་དབྱངས། །མཛེས་པའི་མེ་ལོང་
ཕྲེང་བས་བརྒྱན། །སྙན་པའི་པི་ཝང་གར་སྒྱུར་ཞིང་། །གསང་བའི་ལྷ་མོ་བཞི་ལ་ཕྱག་འཚལ་བསྟོད། །བདུག་པ་མེ་ཏོག་མར་མེ་དྲི། །རིན་ཆེན་མཛེས་པའི་གཞོང་པ་བསྣམས། །ཤངས་སྤྱན་ཐུགས་འོད་མཆོད་པ་འབུལ། །མཆོད་པའི་ལྷ་མོ་བཞི་ལ་ཕྱག་འཚལ་བསྟོད། །བཀྲ་ཤིས་ལྷ་མོ་
ལས་ཀྱི་སྐུ། །བཙོ་མ་གསེར་མདོག་རྒྱས་པའི་སྐུ། །ཕྱག་ན་བཀྲ་ཤིས་རྫས་བརྒྱད་བསྣམས། །རེ་སྐོང་རྣམས་ལ་ཕྱག་འཚལ་བསྟོད། །ལྕགས་ཀྱུ་ཞགས་པ་ལྕགས་སྒྲོག་དྲིལ། །དགུག་གཞུག་དགྱེས་པའི་ལས་མཛད་མ། །སྒོ་བ་རྣམས་ལ་ཕྱག་འཚལ་བསྟོད། །ཚངས་པ་བརྒྱ་བྱིན་མེ་ཡི་ལྷ། །
གཤིན་རྗེ་སྲིན་པོ་ཆུ་ཡི་ལྷ། །རླུང་ལྷ་གནོད་སྦྱིན་བགེགས་ཀྱི་རྒྱལ། །ས་བདག་ལ་སོགས་ཕྱོགས་སྐྱོང་བཅུ། །ལྷ་ཀླུ་གནོད་སྦྱིན་དྲི་ཟ་དང་། །མཁའ་ལྡིང་འདབ་བཟངས་ལུས་སྲུལ་པོ། །མི་འམ་ཅི་དང་ལྟོ་འཕྱེ་ཆེ། །སྡེ་བརྒྱད་ཚོགས་ལ་ཕྱག་འཚལ་བསྟོད། །ས་ཆུ་མེ་རླུང་ནམ་མཁའ་ལ། །གནས་
པའི་བགེགས་རིགས་སྟོང་ཕྲག་ཚོགས། །སོ་སོ་རང་གིས་འཁོར་འདུལ་ཞིང་། །ས་གནས་རྣམས་ལ་ཕྱག་འཚལ་བསྟོད། །དེ་ནས་བསྒོམ་ཞིང་བཟླས་པས་བསྒྲུབ་པར་བྱ་སྟེ། ལྷ་རྣམས་རང་གི་སྙིང་གར་ཟླ་བའི་དཀྱིལ་འཁོར་བསམས་ལ། རྡོ་རྗེའི་ལྟེ་བའི་ཧཱུཾ་ལ་རང་རང་གི་སྔགས་

73-1-303a

ཀྱིས་བསྐོར་བ་ལ་བཟླས་པ་བྱས་པས། སྔགས་ཀྱིས་ལྷ་མོ་མཆོད་པ་དང་། སྒྲིབ་པ་སྦྱང་བ་དང་། བགེགས་ཐོན་པ་དང་། དངོས་གྲུབ་བསྡུ་བའི་ལས་བཞིའི་འཕྲོ་འདུ་བྱའོ། །དེ་ནས་ཐུན་མཚམས་སུ་སྡེར་བཟངས་ཀྱི་མཆོད་པ་དབུལ་ཏེ། ཚེ་འཛིན་ཟས་ཀྱི་སྟེང་དུ་ནི། །སྦྲང་གི་སེང་
གེ་སྐྱོང་བཞི་གཞག །མར་གྱི་ཐ་མ་ཟས་ཀྱི་བཅུད། །བུ་རམ་དཔག་བསམ་རྫིང་གི་ཤིང་། །ལན་ཚྭ་སྤོད་མཆོག་གངས་རི་སྤུངས། །ཨོཾ་ཨཱཿཧཱུཾ། བཅོམ་ལྡན་རྡོ་རྗེ་རྣམ་འཇོམས་ལ། །སྙིང་པོ་ལྔ་ཡི་མཆོད་པ་འབུལ། །ཚོགས་བསགས་བྱང་ཆུབ་ལམ་སྦྱང་ཕྱིར། །ཐུགས་རྗེས་དགོངས་ནས་
བཞེས་སུ་གསོལ། །ཨོཾ་ཨཱཿཧཱུཾ་པ་ན་པེཾ་པེན་ཀུ་རཀྵ་ཁཱ་ཧི། ཞེས་ལན་གསུམ་བར་དུ་བཏབ་པར་བྱའོ། །བཅོམ་ལྡན་རྡོ་རྗེ་གཏུམ་པོ་ལ། །སྙིང་པོ་ལྔ་ཡི་མཆོད་པ་འབུལ། །ཚོགས་བསགས་བྱང་ཆུབ་ལམ་སྦྱང་ཕྱིར། །ཐུགས་རྗེས་དགོངས་ནས་བཞེས་སུ་གསོལ། །ཨོཾ་ཨཱཿཧཱུཾ་པ་ན་པེཾ་པེན་ཀུ་རཀྵ་
ཁཱ་ཧི། བཅོམ་ལྡན་རྡོ་རྗེ་ཐུགས་ཁྱོད་ལ། །སྙིང་པོ་ལྔ་ཡི་མཆོད་པ་འབུལ། །ཚོགས་བསགས་བྱང་ཆུབ་ལམ་སྦྱང་ཕྱིར། །ཐུགས་རྗེས་དགོངས་ནས་བཞེས་སུ་གསོལ། །ཨོཾ་ཨཱཿཧཱུཾ་པ་ན་པེཾ་པེན་ཀུ་རཀྵ་ཁཱ་ཧི། བཅོམ་ལྡན་རྡོ་རྗེ་ཕུར་བུ་ལ། །སྙིང་པོ་ལྔ་ཡི་མཆོད་པ་འབུལ། །ཚོགས་
བསགས་བྱང་ཆུབ་ལམ་སྦྱང་ཕྱིར། །ཐུགས་རྗེས་དགོངས་ནས་བཞེས་སུ་གསོལ། །ཨོཾ་ཨཱཿཧཱུཾ་པ་ན་པེཾ་པེན་ཀུ་རཀྵ་ཁཱ་ཧི། བཅོམ་ལྡན་རྡོ་རྗེ་བེ་ཅོན་ལ། །སྙིང་པོ་ལྔ་ཡི་མཆོད་པ་འབུལ། །ཚོགས་བསགས་བྱང་ཆུབ་ལམ་སྦྱང་ཕྱིར། །ཐུགས་རྗེས་དགོངས་ནས་བཞེས་སུ་གསོལ། །
ཨོཾ་ཨཱཿཧཱུཾ་པ་ན་པེཾ་པེན་ཀུ་རཀྵ་ཁཱ་ཧི། བཅོམ་ལྡན་རྡོ་རྗེ་ཐོ་བ་ལ། །སྙིང་པོ་ལྔ་ཡི་མཆོད་པ་འབུལ། །ཚོགས་བསགས་བྱང་ཆུབ་ལམ་སྦྱང་ཕྱིར། །ཐུགས་རྗེས་དགོངས་ནས་བཞེས་སུ་གསོལ། །ཨོཾ་ཨཱཿཧཱུཾ་པ་ན་པེཾ་པེན་ཀུ་རཀྵ་ཁཱ་ཧི། དཀྱིལ་འཁོར་གོང་རས་འཁོར་ལོའི་མཚམས། །
གསང་བའི་ལྷ་མོ་བཞི་པོ་ལ། །སྙིང་པོ་ལྔ་ཡི་མཆོད་པ་འབུལ། །ཚོགས་བསགས་བྱང་ཆུབ་ལམ་སྦྱང་ཕྱིར། །ཐུགས་རྗེས་དགོངས་ནས་བཞེས་སུ་གསོལ། །ཨོཾ་ཨཱཿཧཱུཾ་པ་ན་པེཾ་པེན་ཀུ་རཀྵ་ཁཱ་ཧི། རྒྱས་པའི་གྲུ་ཆད་སེར་པོ་ལ། །ལས་མཛད་མཆོད་པའི་ལྷ་མོ་བཞི། །སྙིང་པོ་ལྔ་

73-1-303b

ཡི་མཆོད་པ་འབུལ། །ཚོགས་བསགས་བྱང་ཆུབ་ལམ་སྦྱང་ཕྱིར། །ཐུགས་རྗེས་དགོངས་ནས་བཞེས་སུ་གསོལ། །ཨོཾ་ཨཱཿཧཱུཾ་པ་ན་པེཾ་པེན་ཀུ་རཀྵ་ཁཱ་ཧི། འབར་བའི་བར་ཁྱམས་ཕྱོགས་མཚམས་བརྒྱད། །ཡིད་འོང་བཀྲ་ཤིས་ལྷ་མོ་བརྒྱད། །སྙིང་པོ་ལྔ་ཡི་མཆོད་པ་འབུལ། །ཚོགས་
བསགས་བྱང་ཆུབ་ལམ་སྦྱང་ཕྱིར། །ཐུགས་རྗེས་དགོངས་ནས་བཞེས་སུ་གསོལ། །ཨོཾ་ཨཱཿཧཱུཾ་པ་ན་པེཾ་པེན་ཀུ་རཀྵ་ཁཱ་ཧི། ཡེ་ཤེས་ལས་ཀྱི་སྒོ་བཞི་ནས། །སྒོ་མ་དགུག་གཞུག་ལས་མཛད་ཅིང་། །སྙིང་པོ་ལྔ་ཡི་མཆོད་པ་འབུལ། །ཚོགས་བསགས་བྱང་ཆུབ་ལམ་སྦྱང་ཕྱིར། །
ཐུགས་རྗེས་དགོངས་ནས་བཞེས་སུ་གསོལ། །ཨོཾ་ཨཱཿཧཱུཾ་པ་ན་པེཾ་པེན་ཀུ་རཀྵ་ཁཱ་ཧི། རྡོ་རྗེ་པདྨ་མེ་འོད་ལས། །ཕྱོགས་སྐྱོང་སྡེ་བརྒྱད་འབྱུང་པོའི་ཚོགས། །སྙིང་པོ་ལྔ་ཡི་མཆོད་པ་འབུལ། །ཚོགས་བསགས་བྱང་ཆུབ་ལམ་སྦྱང་ཕྱིར། །ཐུགས་རྗེས་དགོངས་ནས་བཞེས་སུ་གསོལ། །
ཨོཾ་གྱིས་ཉེས་པའི་སྐྱོན་རྣམས་དག །ཨཱཿཡིས་བདུད་རྩི་ཆེན་པོར་གྱུར། །ཧཱུཾ་གིས་སྤྲོས་ཏེ་མཆོད་པ་འབུལ། །པ་ན་པེཾ་པེན་ཀུ་རཀྵ་ཁཱ་ཧི། ཕུད་ཚོ་བཅུའི་མཆོད་པ་འབུལ་ལོ། །དེ་ནས་ནང་དུ་འཇིག་རྟེན་ལས་འདས་པ་རྣམས་ལ་ཞི་བའི་སྦྱིན་སྲེག་གིས་མཆོད། དེ་ནས་སྒོའི་ཕྱི་རོལ་འོད་
ཀོར་ལ། འཇིག་རྟེན་པ་རྣམས་གཏོར་མ་ཆ་གསུམ་གྱིས་མཆོད། དཀྱིལ་འཁོར་བྲིས་པའི་རྗེས་ལ་དཀྱིལ་འཁོར་བསླང་ཞིང་ཡེ་ཤེས་ཕབ་ལ། བུམ་པ་རྣམས་དགྲམ་སྟེ། རིགས་ཀྱི་བུམ་པ་ལྔ་ཕྱོགས་བཞི་དབུས་དང་ལྔར་དགོད། བདུད་རྩི་འཁྱིལ་པའི་བུམ་པ་འཇུག་པ་སྒོའི་
གཡོན་ལོགས་སུ་དགོད། དེ་རྣམས་ལྷར་བསྐྱེད་ལ་མཆོད་པ་རྣམ་པ་ལྔས་མཆོད། བསྒོམ་ཞིང་བཟླས་པའི་སྐབས་སུ། བུམ་པ་རེ་ལ་སྙིང་པོ་བརྒྱ་རྩ་བརྒྱད་སྔགས་ཀྱིས་བསྐྱལ་ལོ། །དང་པོ་དཀྱིལ་འཁོར་བསླང་ཞིང་ཡེ་ཤེས་དབབ་པའི་བསྒྲུབ་པ་བྱས་ལ། བུམ་པ་དགྲམ་པ་སྔོན་དུ་འགྲོ་
བ་མཆོད་པ་རྣམ་པ་ལྔས་མཆོད། དཀྱིལ་འཁོར་དེ་བྱིན་དང་ལྡན་པར་བྱ་བའི་ཕྱིར། རྡོ་རྗེ་གཟུངས་ཀྱི་སྒྲུབ་པ་བྱས་ལ། ལྷག་ཆད་ཀྱི་ཉེས་པ་བསྐང་བ་རྡོ་རྗེ་ཤུགས་ཀྱི་བསྒྲུབ་པ་བྱ། སྐུ་གསུང་ཐུགས་ཐ་མི་དད་པའི་བསྒྲུབ་པ་བྱ། དཀྱིལ་འཁོར་གྱི་ལྷ་ཡེ་ཤེས་ཀྱི་ལྷའི་

73-1-304a

བདག་ཉིད་བསྒྲུབས་ལ། ཕྱག་རྒྱ་བཞིས་རྒྱས་བཏབ་སྟེ། མཆོད་པ་རྒྱས་པས་མཆོད། རྩ་བའི་ལྷ་བསྒོམ་ཞིང་སྒྲུབ་པ་བྱས་ཏེ། སྡེར་བཟངས་ཚོགས་ཀྱི་མཆོད་པ་འབུལ། ནང་དུ་འཇིག་རྟེན་ལས་འདས་པ་ལ་སྦྱིན་སྲེག་གིས་མཆོད། ཕྱི་རོལ་དུ་འཇིག་རྟེན་པ་ལ་གཏོར་མ་ཆ་
གསུམ་གྱིས་མཆོད་ལ་དེ་ལྟར་མཆོད་ཅིང་བསྒྲུབ་པའི་ཆོས་བཅུ་གཅིག་ལ་གནས་ནས་དབང་བསྐུར་བར་བྱ་སྟེ། དེ་ཡང་དང་པོ་ལ་སློབ་མ་ལྷག་གནས་ཀྱི་དུས་ཀྱི། དབང་བསྐུར་བ་སྨིན་པའི་ཆོས་བཅུ་པོ་བྱ། སློབ་མ་དང་པོ་ལུས་ཁྲུས་བྱས་ལ་སློབ་དཔོན་ལ་གསོལ་བ་གདབ། དེ་ནས་
སློབ་དཔོན་གྱིས་སྤྲོ་བ་བསྐྱེད། སློབ་མས་རང་གི་སྡིག་པ་ཤགས་ནས་སེམས་བསྐྱེད། སེམས་ཀྱི་འབྲས་བུ་ལྷར་བསྐྱེད། ལྷའི་གནས་གཞི་བྱིན་གྱིས་བརླབ་སློབ་མའི་ལུས་ལྷའི་དཀྱིལ་འཁོར་དུ་བྱིན་གྱིས་བརླབས་ལ། སློབ་དཔོན་གྱིས་དེ་ལ་མཆོད་པ་འབུལ། ལྷ་གང་
ལ་དབང་ཐོབ་པའི་དཀྱིལ་འཁོར་དུ་སྤྱན་བཀབ་ལ་སོ་ཤིང་བསྐྱུར། དབང་ལ་བར་ཆད་བསྐྱབ་ཕྱིར་སྲུང་སྐུད་གདགས་སོ། །ཧཱུཾ་སྲུང་སྐུད་སྔགས་ཀྱི་བྱིན་རླབས་ཀྱིས། །ལྷ་ཡི་མགུལ་དུ་དབང་བསྐུར་བས། །ཅིས་ཀྱང་མི་ཚུགས་མི་ཤིགས་པའི། །རྡོ་རྗེའི་དབང་མཆོག་ཐོབ་པར་ཤོག །
ཨོཾ་བཛྲ་རཀྵ་རཀྵ་བསྲུང་དུ་གསོལ་ལོ། །བར་ཆད་ཅིས་ཀྱང་མི་ཚུགས་པའི་རྡོ་རྗེའི་གོ་ཆ་གྱོན་པར་བསམ་མོ། །དེ་ནས་སློབ་མ་དཀྱིལ་འཁོར་དུ་བཅུག་ལ་དབང་བསྐུར་བར་བྱའོ། །དང་པོ་བུམ་པ་ཐོགས་ཏེ་འདི་སྐད་དུ། བུམ་པ་དག་བྱེད་ཆོས་ཉིད་སྤྲོས་བྲལ་སྐུ། །ཀུན་གཞི་ཉོན་མོངས་གནས་
གྱུར་ལུས་དག་སྟེ། །མེ་ལོང་ལྟ་བུའི་ཡེ་ཤེས་མཐར་རྟོགས་ནས། །རྡོ་རྗེ་རྣམ་འཇོམས་སྐུ་རུ་སངས་རྒྱས་ཤོག །ན་མཿཙཎྜ་བཛྲ་ཨ་བྷི་ཥིཉྩ་ཧཱུཾ། ཨོཾ་ཧཱུཾ་ཏྲཱཾ་ཧྲཱིཿཨཿལན་ལྔ་བརྗོད་པ་གོང་མས་འགྲེ། བུམ་པ་ཆུ་ཡི་དབང་བསྐུར་བས། །ལུས་ཀྱི་སྒྲིབ་པ་དག་པ་སྟེ། །མེ་ལོང་ལྟ་བུའི་
དོན་མཆོག་ནི། །སྣང་ལ་རང་བཞིན་མེད་པའི་དོན་རྟོགས་པར་གྱུར་ཅིག །དེ་ནས་དབུ་རྒྱན་ཐོགས་ལ་འདི་སྐད་དོ། །དབུ་རྒྱན་རིགས་ལྔ་ཡེ་ཤེས་ལྔ་ཡི་སྐུ། །ཉོན་མོངས་ལྔ་ཡི་གནས་ནི་དག་འགྱུར་ཏེ། །ལུས་ཀྱི་སྒྲིབ་པ་དག་སྟེ་མཉམ་ཉིད་རྟོགས། །རིན་ཆེན་འབྱུང་ལྡན་སྐུ་རུ་

73-1-304b

སངས་རྒྱས་ཤོག །རྡོ་རྗེ་དབྱིངས་ཀྱི་དབང་མོའི་ཕྱག་རྒྱ་བཅས་ཏེ། ཨོཾ་བཛྲ་དྷཱ་ཏྭི་ཤྭ་རི་ནི་ཧཱུཾ། བཛྲ་ཎི་ཨ་བྷི་ཥིཉྩ་མཱཾ། བཛྲ་བཛྲི་ཎི་ཧཱུཾ། རཏྞ་བཛྲི་ཎི་ཏྲཱཾ། དྷརྨ་བཛྲི་ཎི་ཧཱུཾ། ཨོཾ་ཀརྨ་བཛྲ་ཎི་ཧཱུཾ་ཨ་བྷི་ཥིཉྩ་མཱཾ། རིགས་ཀྱི་བུ་ཁྱོད་ལ་དབུ་རྒྱན་གྱི་དབང་བསྐུར་བས། ཉོན་མོངས་པ་ཅན་གྱི་ཡིད་
གནས་གྱུར་པས་མཉམ་པ་ཉིད་ཀྱི་ཡེ་ཤེས་རྟོགས་ཏེ། རིན་ཆེན་འབྱུང་ལྡན་སྐུར་སངས་རྒྱས་པར་གྱུར་ཅིག །དེ་ནས་རྡོ་རྗེ་ཐོགས་ལ་འདི་སྐད་དོ། །ཧཱུཾ་སངས་རྒྱས་རྣམས་ཀྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་དུ་རབ་གྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང་། །
ཨོཾ་བཛྲ་ཨ་དྷི་པ་ཏི་ཨ་བྷི་ཥིཉྩ་བཛྲ་ས་མ་ཡ་སྟྭཾ། རིགས་ཀྱི་བུ་ལ་རྡོ་རྗེའི་དབང་བསྐུར་བས། །ཡིད་ཀྱི་རྣམ་པར་ཤེས་པ་གནས་གྱུར་ཅིང་། །སོ་སོར་རྟོག་པའི་ཡེ་ཤེས་ཐོབ་གྱུར་ཅིག །དེ་ནས་མིང་གི་དབང་བསྐུར་ཏེ། ཀྱེ་རྡོ་རྗེ་ཀུན་དུ་བཟང་པོ་ཞེས་མིང་བཏགས་པས། རྣམ་རྟོག་སྒོ་ལྔའི་དྲི་མ་
གནས་གྱུར་པས། །བྱ་བ་གྲུབ་པའི་ཡེ་ཤེས་དེར་རྟོགས་ནས། །ཡེ་ཤེས་རང་གནས་ཀྱི་དབང་ཐོབ་པར་གྱུར་ཅིག །ཨོཾ་བཛྲ་སཏྭ་སྟྭཾ་ཨ་བྷི་ཥིཉྩ་བཛྲ་ནཱ་མ་ཨ་བྷི་ཥེ་ཀ་ཏ། རྡོ་རྗེ་མིང་གི་དབང་ཐོབ་པ་ཁོ་ནར་གྱུར་ཅིག །དེ་ནས་རྡོ་རྗེ་དྲིལ་བུ་གཉིས་ཀ་ཐོགས་ལ། རྡོ་རྗེ་བརྟུལ་ཞུགས་ཀྱི་དབང་
བསྐུར་བ། འདི་ནི་སངས་རྒྱས་ཐམས་ཅད་ཀྱི། །ཕྱག་ན་རྡོ་རྗེའི་ལག་ན་འདུག །ཁྱོད་ཀྱིས་ཀྱང་ནི་རྟག་ཏུ་བཅང་། །ཕྱག་ན་རྡོ་རྗེའི་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་སྟྭཾ་དྷ་ར་ཡཱ་མི་བཛྲ་སཏྭ་ཧི་ཧི་ཧཱུཾ། རིགས་ཀྱི་བུ་ཁྱོད་ལ་རྡོ་རྗེ་བརྟུལ་ཞུགས་ཀྱི་དབང་
བསྐུར་བས། ཁྱད་པར་བྱང་ཆུབ་སེམས་དང་ལྡན་ཏེ། གཏི་མུག་གནས་གྱུར་ཏེ། ཆོས་ཀྱི་དབྱིངས་ཀྱི་ཡེ་ཤེས་རྟོགས་པ་ཁོ་ནར་གྱུར་ཅིག །དེ་ལས་སློབ་མ་ལ་བཀྲ་ཤིས་གསོལ་ལོ། །དཀྱིལ་འཁོར་ཞལ་གསུམ་མོ། །སྐར་མ་རབ་རིབ་མར་མེ་དང་། །སྒྱུ་མ་ཟིལ་པ་ཆུ་བུར་དང་། །རྨི་ལམ་
གློག་དང་སྤྲིན་ལྟ་བུ། །འདུས་བྱས་ཆོས་ཀྱང་དེ་དང་འདྲ། །མནྡྲ་མུ་དྲ། ས་མ་ཡ་ཏྲ་ཊ་ཅེས། དབུས་ནས་ནུབ་ཏུ་ཁ་བལྟས་ཏེ་ཞལ་གསུམ་མོ། །རིམ་པར་བརྩམས་པས་བདག་ཉིད་དགའ། །ཤེས་པར་བྱས་པས་མུན་ལ་སྒྲོན། །དགའ་སྒྲོན་དཀྱིལ་འཁོར་ཆོ་ག་འདི། །བདག་གིས་

73-1-305a

བརྩམ་པར་མི་རིགས་ཀྱང་། །བདག་པས་དམན་ལ་ཕན་ཕྱིར་བརྩམས། །འདི་ཡིས་བསོད་ནམས་གང་ཐོབ་པ། །རྣམ་འཇོམས་སྐུ་ཡི་ཞལ་མཐོང་ཤོག །དཀྱིལ་འཁོར་གྱི་ཆོ་ག་དགའ་བའི་སྒྲོན་མ་ཞེས་བྱ་བ་རྒྱ་གར་གྱི་སློབ་དཔོན་ཆེན་པོ་རྡོ་རྗེ་གོ་ཆས་མཛད་པ་རྫོགས་སོ།།      །།
བོད་ཀྱི་ལོ་ཙཱ་བ་སྤུ་རངས་བསོད་ནམས་བློ་གྲོས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །༄༅༅། །རྒྱ་གར་སྐད་དུ། བཛྲ་བི་དཱ་ར་ཎ་ནཱ་མ་སྣཱ་ཏ་བི་དྷི་བྲྀ་ཏྟི། བོད་སྐད་དུ། རྡོ་རྗེ་རྣམ་པར་འཇོམས་པ་ཞེས་བྱ་བའི་ཁྲུས་ཀྱི་ཆོ་གའི་འགྲེལ་པ། དཔལ་རྡོ་རྗེ་འཛིན་པ་ལ་ཕྱག་
འཚལ་ལོ། །རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དག་དང་རྒྱལ་པོའི་བློན་པོ་དང་། རྗེའུ་རིགས་དག་དང་དམངས་རིགས་དག་དང་། དགེ་སྦྱོང་དང་བྲམ་ཟེ་གང་དག་སྲིད་པའི་རྒྱ་མཚོ་ལས་མ་བརྒལ་བ་དག་ལ། ནད་དང་གནོད་པ་དང་། བྱད་ལ་སོགས་པ་གཞན་གྱི་གནོད་པས་སྡུག་
བསྔལ་བར་གྱུར་པ་དེ་དག་ལ། དཔལ་རྡོ་རྗེ་རྣམ་པར་འཇོམས་པའི་ཁྲུས་ཀྱི་ཆོ་གས་གྲོལ་བར་འགྱུར་ཏེ། དེའི་ཕྱིར་དེ་དག་རྣམ་པར་དབྱེ་བའི་རིམ་པ་བརྩམ་པར་བྱའོ། །མདོ་སྡེ་འདིའི་དོན་གྱི་མཚན་རྡོ་རྗེ་རྣམ་པར་འཇོམས་པ་ཞེས་བྱ་བའི་མིང་གི་སྒོ་ནས་ངེས་པར་བསྟན་ཏེ། ཇི་ལྟ་ཞེ་ན། 
རྡོ་རྗེ་ཞེས་པ་ནི་འཕགས་པ་རྣམས་ཀྱི་ཡང་དག་པའི་ཡེ་ཤེས་ཀྱི་ཚིག་བླ་དགས་ཏེ། ཡེ་ཤེས་དེ་ནི་བསོད་ནམས་དང་ཡེ་ཤེས་ཚད་མེད་པ་རྣམས་ཀྱི་ཚོགས་ཅན། རང་དང་གཞན་གྱི་དོན་ཕུན་སུམ་ཚོགས་པའི་ཡོན་ཏན་དང་ལྡན་པས། དེའི་ཕྱིར་ལག་ན་རྡོ་རྗེའི་ལུས་ཐམས་ཅད་རྡོ་རྗེར་
བྱིན་གྱིས་བརླབས་ནས་ཞེས་བྱ་བས། འབྱུང་བ་ཆེན་པོ་བཞི་ལས་གྲུབ་པ་ལྟ་བུ་ནི་མ་ཡིན་གྱི་ཡེ་ཤེས་ཀྱི་ལུས་ཅན་དུ་བསྟན་པའོ། །དེའི་ཕྱིར་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་པ་ཞེས་པ་ཡང་ཡེ་ཤེས་དེས་ཆོས་ཀྱི་དེ་ཁོ་ན་ཉིད་ཤིན་ཏུ་རྟོགས་པའི་ངོ་བོ་རྡོ་རྗེ་ལྟར་ཐོགས་པ་མེད་པས་
རྩེ་གཅིག་ཏུ་མཉམ་པར་གཞག་པའི་གནས་སྐབས་ལ་བྱ་བར་མངོན་ནོ། །ཅིའི་ཕྱིར་ཡེ་ཤེས་འདི་ལས་རྡོ་རྗེ་ཞེས་བྱ་ཞེ་ན། ཕྱི་རོལ་གྱི་རྡོ་རྗེ་རིན་པོ་ཆེ་དང་ཆོས་མཐུན་པ་རྣམ་པ་བདུན་ཡོད་པའི་ཕྱིར་དཔེའི་སྒོ་ནས་ཉེ་བར་མཚོན་པ་ཡིན་ཏེ། དེ་དག་ཀྱང་འདི་ལྟ་སྟེ། མི་ཆོད་པ། མི་ཤིགས་

73-1-305b

པ། བདེན་པ། སྲ་བ། བརྟན་པ། ཐམས་ཅད་དུ་ཐོགས་པ་མེད་པ། ཐམས་ཅད་དུ་མ་ཕམ་པ་ཞེས་བྱ་བ་རྣམས་ཏེ། དེ་ནི་ཡེ་ཤེས་དེ་ཉིད་ཀྱིས་རང་གི་ཡོན་ཏན་ཕུན་སུམ་ཚོགས་པ་ཡང་བསྟན་ཏོ། །དེ་གཞན་གྱི་དོན་བསྟན་པ་ནི། ཐབས་ལ་མཁས་པའི་བྱང་ཆུབ་སེམས་དཔའི་སྒོ་སྣ་ཚོགས་ནས་
སེམས་ཅན་གྱི་དོན་མཛད་པ་སྟེ། ཁམས་གསུམ་པ་འཇིག་ཚོགས་ལ་ལྟ་བ། ཕྱིན་ཅི་ལོག་གི་ལྟ་བ་ཅན། ཕྱི་དང་ནང་ནས་བགེགས་དང་ལོག་འདྲེན་རྣམ་པར་ལྡང་བའི་རྒྱུ། ལས་ཀྱི་བག་ལ་ཉལ་བ་དང་། ཀུན་ནས་ལྡང་བ་དང་བཅས་པ་དེ་དག་འདུལ་བར་བྱ་བའི་ཕྱིར་སེམས་ཅན་ཐམས་ཅད་སྐྲག་
པར་བྱེད་པ། སེམས་ཅན་ཐམས་ཅད་འཇིལ་བར་བྱེད་པ་ཞེས་བྱ་བ་ནས། སེམས་ཅན་ཐམས་ཅད་བསྲུང་བ་ཞེས་བྱ་བ་དང་། སེམས་ཅན་ཐམས་ཅད་རེངས་པར་བྱེད་པ། རྨུགས་པར་བྱེད་པ་ཞེས་བྱ་བའི་བར་དུ་ཆོ་གའི་དོན་རྣམ་པ་བཅོ་ལྔས་བསྟན་ཏེ། དེ་དག་རྣམ་པ་བཞིའི་སྒོ་ནས་
གཞན་གྱི་དོན་མཛད་པ་བསྟན་ཏེ། ཞི་དང་རྒྱས་དང་དྲག་སྤྱོད་དང་། །དབང་སོགས་ལས་རྣམ་བཞི་པོ་དག །ཐབས་ཀྱིས་འདུལ་བའི་དོན་མཛད་པ། །ཅི་རིགས་པར་ནི་སྦྱར་བར་བྱའོ། །དེ་ལྟར་དེ་དག་གི་ཡེ་ཤེས་ཀྱི་རྡོ་རྗེ་དེས་འདུལ་བར་མཛད། སེལ་བར་མཛད་འཇོམས་པར་མཛད་
པའི་ཕྱིར། རྡོ་རྗེ་རྣམ་པར་འཇོམས་པ་ཞེས་བྱའོ། །དེ་ནས་གསང་སྔགས་ཀྱི་ཚིག་གང་དག་གསུངས་པ་དེ་དག་ཀྱང་ཡེ་ཤེས་ཀྱི་རྒྱུ་ལས་བྱུང་བའི་ཕྱིར། ཐོགས་པ་མེད་པའི་རྡོ་རྗེའི་ཚིག་ཏུ་རིག་པར་བྱའོ། །དེ་ནས་དེ་དག་གི་ཆོ་ག་བཤད་པར་བྱ་སྟེ། ཆོ་གར་བྱ་བ་ཐམས་ཅད་ལ། གཙོར་སློབ་
དཔོན་ལ་བརྟེན་པར་བྱ་བ་ཡིན་པས་དེའི་ཕྱིར་སློབ་དཔོན་སློབ་མ་གཉིས་སྟ་གོན་ལ་གནས་པའི་ཆོ་ག་བཤད་ཅིང་བསྟན་པར་བྱ་བ་ནི། དེས་ནི་རབ་ཁྲུས་གཙང་མ་ཡིན། །མདོ་སྡེ་དམ་པར་མཉན་པར་བྱ། །གང་དག་ཡིད་དགེ་སེམས་དང་ཞིང་། །གཙང་མའི་གོས་ཀྱིས་རབ་བརྒྱན་ཏེ། །ཟབ་མོ་
སངས་རྒྱས་སྤྱོད་ཡུལ་བ། །ཞེས་བྱ་བ་ལ། ཤིན་ཏུ་ཁྲུས་བྱ་བ་དང་། གོས་གཙང་མ་བགོ་བ་ནི་ཕྱིའི་གཙང་སྦྲའོ། །སྒོ་གསུམ་ནས་སྡིག་པ་མི་བྱེད་པ་ནི་ཡིད་དགེ་བའོ། །བྱང་ཆུབ་ཏུ་སྨོན་པ་ནི་སེམས་དང་བ་སྟེ། དེ་དག་ནི་ཕྱི་ནང་གི་གཙང་སྦྲའོ། །མདོ་སྡེ་དམ་པ་མཉན་པར་བྱ། །ཞེས་པའི་དོན་ནོ། །

73-1-306a

རིག་སྔགས་དེ་རྣམས་ཡེ་ཤེས་ལས་བྱུང་བར་རིག་པར་བྱའོ། །ཟབ་མོ་སངས་རྒྱས་སྤྱོད་ཡུལ་བ། །ཞེས་པ་ཡང་ཡེ་ཤེས་ཀྱི་རང་བཞིན་དུ་རྟོགས་པ་ཉིད་དོ། །དེ་ནས་སློབ་དཔོན་གྱི་ཆོ་གར་བྱ་བ་ནི་མདོ་སྡེ་འདི་ཉིད་ལས་དབང་བསྐུར་བའི་བུམ་པ་ཡན་ལག་བསྟན་པ་ཙམ་དུ་ཟད་དེ། དཀྱིལ་འཁོར་
ལ་སོགས་པའི་ཆོ་ག་གསུངས་པ་དེ་ཉིད་གསུངས་པ་ལས་མི་མངོན་པར་འགྱུར་བའམ་ཡང་ན་སྤྱི་རྒྱུད་དག་ལས་གསལ་བའི་ཕྱིར་རོ། །དེ་དག་དུ་མ་བསྟན་པ་དེ་གཉིས་ཀ་ལྟར་ན་ཡང་དེ་དག་དང་སྦྱར་བ་ཉིད་དོ། །དེ་ལས་ནི། ཕྱུགས་ལྷས་ཤིང་གཅིག་ལྷ་ཡི་ཁང་པ་དང་། །ལམ་གྱི་བཞི་མདོ་ཁང་སྟོང་
ནགས་ཚལ་དུ། །དཀྱིལ་འཁོར་གྲུ་བཞི་ལྷམ་པ་ཁྲུ་བཞིའི་ཚད། །ཚོན་རྩི་རྣམ་པ་སྣ་ཚོགས་རྣམས་ཀྱིས་བྲི། །ཕྱོགས་ཀྱི་ལྷ་རྣམས་གནས་ནི་ཡོངས་སུ་བསྲུང་། །སྒོ་བཞིའི་ས་ལ་ཀུ་ཤའི་རྩྭ་རྣམས་དགྲམ། །ཞེས་གསུངས་པ་ལ་རིག་པར་བྱའོ། །དེ་ལྟར་དཀྱིལ་འཁོར་བྱ་བ་ཡང་སློབ་དཔོན་གྱིས་ས་
དང་པོ་བརྟག་པ་དང་སྦྱོར་བ་ལ་སོགས་པའི་ཆོ་ག་ཚུལ་བཞིན་དུ་བྱ་སྟེ། འཐས་པར་བཅག་སྟེ་བའི་རྣམ་པ་ལྔ་དང་སྤོས་ཆུ་གཙང་མས་བྱུགས་ཏེ་སྟེང་ཡང་བླ་རེ་བྲི་ཞིང་། དར་གྱི་ལྡ་ལྡི་དང་། མེ་ཏོག་གི་ཕྲེང་བ་དང་། མེ་ལོང་དག་གིས་ཀྱང་བརྒྱན་པར་བྱའོ། །གཞན་ཡང་དབང་བསྐུར་བའི་
ཆོ་ག་ལ་བཀྲ་ཤིས་ཀྱི་བུམ་པ་ཚུལ་དང་མཐུན་པའི་ཡོན་ཏན་འགྲུབ་པའི་ཕྱིར་འདི་ཉིད་ལས་དེའི་རྒྱུ་བསྟན་པ་ནི། གསེར་རམ་ཡང་ན་ནི། །དངུལ་གྱི་བུམ་པ་དག་ཀྱང་རུང་། །ཞེས་བྱ་བས་སྟོན་ཏོ། །དེའི་ནང་དུ་དགང་པ་ནི་ཆུ་ཡིས་ཞེས་པ་སྨོས་ཏེ། ཙནྡན་དང་གུར་གུམ་ལ་སོགས་པའི་སྤོས་ཆུས་བཀང་
སྟེ། དེའི་ལྷན་ཅིག་ལྡན་པའི་རིན་པོ་ཆེ་ནི་ཤེལ་དང་རྡོ་རྗེ་ཞེས་པ་ནི་དངོས་སུ་ཟད་ནོར་བུ་ཞེས་བྱ་བ་སྤྱིའི་ཚིག་ཏུ་སྨོས་ཏེ། རྣམ་པར་མ་ཕྱེ་བའི་པདྨ་རཱ་ག་དང་། ཨིནྡྲ་ནཱི་ལ་ལ་སོགས་པ་ནི་རིན་པོ་ཆེའི་རིགས་སུ་གཏོགས་པ་དང་མུ་ཏིག་དང་ས་ལེ་སྦྲམ་ལ་སོགས་པ་སྟེ། དེ་དག་གས་ཆག་
མེད་པ་རྒྱན་གྱི་བྱ་བ་བྱེད་ནུས་པ་སྟེ་རིན་ཆེན་རྨ་མེད་ཅེས་བྱའོ། །གཞན་ཡང་དེའི་ཟླ་ལ་ཡུངས་ཀར་དང་། རྩྭ་དཱུར་བ་དང་། མེ་ཏོག་རྣམས་གཞུག་པར་བྱའོ། །ཚུལ་དེ་བཞིན་དུ་སྤྱི་རྒྱུད་ལས་ཀྱང་། བུམ་པ་པདྨ་དམར་པོའི་མདོག་འདྲ་ཞིང་། །ནག་པོ་ར་རི་མེད་ཅིང་རིན་ཆེན་བཅས། །

73-1-306b

སྨན་དང་འབྲུ་དང་སྤོས་ཆུས་བཀང་བ་དང་། །ཁ་རྒྱན་རས་ཀྱིས་མགུལ་པ་དཀྲི་བར་བྱ། །ཞེས་བསྟན་ཏོ། །དེ་དག་གི་ལྟོ་བར་ཆུ་བྲེ་གང་ཤོང་བ་ལ་སོགས་པ་བསྟན་ཏོ། །མཚན་ཉིད་གཞན་རྒྱུད་དག་ལས་རིག་པར་བྱའོ། །ཡང་གོང་མའི་འབྲུ་དང་སྨན་ཞེས་བྱ་བ་ལ། བྱ་ཀྲི་སེང་ཀྲི་ལ་སོགས་པའི་སྨན་རྣམ་པ་
ལྔ་དང་། ཏིལ་དང་སྲན་མ་ཤ་ཀ་ལ་སོགས་པའི་འབྲུ་སྣ་ཚོགས་རྣམས་རྒྱུད་ལས་གྲགས་པ་བཞིན་ནོ། །མགུལ་ཆིངས་གཙང་མའི་གོས་ཞེས་བྱ་བ་མ་སྤྱད་པ་མ་ཉམས་པའི་རས་དཀར་པོ་ཁ་ཚར་དང་བཅས་པའོ། །དཀྲི་ཞིང་དགང་བ་ནི་གོང་དུ་བསྟན་པའི་རྫས་རྣམས་ཀྱི་མདོར་བསྡུས་ཏེ་བསྟན་པའོ། །
བུམ་པ་དེ་ལྟར་བྱས་པ་ཡང་རྟོག་པ་གཞན་ཆོ་ག་ལས་འབྱུང་བ་ཇི་བཞིན་དུ་གྲངས་བཞི་འམ་ལྔའམ་གུ་གུལ་གྱི་དུད་པ་ལ་སོགས་པས་བདུག་ལ་དབུས་དང་གྲྭ་བཞིར་གཞག་པའོ། །དེ་ནས་སློབ་དཔོན་བདག་ཉིད་ལས་ཀྱི་ཁྲོ་བོར་བསྒྱུར་ནས། ལག་པས་རྡོ་རྗེ་དང་ཡུངས་ཀར་བླངས་ཏེ། 
བསྐྲད་ཅིང་བསྲུང་བ་དང་། མཚམས་བཅད་པ་དག་བྱས་ནས། ཐིག་སྐུད་ལག་ཏུ་བླངས་ཏེ། ཕྱོགས་མ་འཁྲུལ་བར་ས་བཅད་དེ། རིམ་པ་གསུམ་པར་ཐིག་གདབ་པར་བྱའོ། །དེ་ནས་རི་མོ་བྲི་སྟེ། དཀྱིལ་འཁོར་གྱི་གཙོ་བོའི་ཕྱག་རྒྱ་རྡོ་རྗེ་རྒྱ་གྲམ་ལས་ཕྱོགས་གཅིག་མེད་པ་པདྨ་འམ་སེང་གེའི་
ཁྲིའི་སྟེང་དུ་གཞག་གོ། །དེའི་གྲྭ་བཞིར་འཁོར་རྣམས་ཀྱི་ཕྱག་མཚན་བྱང་ཤར་མཚམས་ནས་བརྩམས་ཏེ། ཁྲོ་བོ་རྡོ་རྗེ་གདེངས་པ་དང་། རྡོ་རྗེ་རྩེ་གཅིག་པ་དང་། བེ་ཅོན་རྡོ་རྗེས་མཚན་པ་དང་། རྡོ་རྗེ་ཐོ་བ་རྣམས་བྲིའོ། །དེ་ནས་རིམ་པ་གཉིས་པར་དབང་ལྡན་ལ་སོགས་པ་ཕྱོགས་སྐྱོང་
བཅུ་དང་། དེའི་བཀྲ་ཤིས་ཀྱི་ལྷ་མོ་བརྒྱད་ཀྱི་ཕྱག་མཚན་ཡང་བྲིའོ། །རིམ་པ་གསུམ་པར་ནི་རིན་པོ་ཆེའི་ཆུན་འཕྱང་དང་མུ་ཏིག་གི་ཕྲེང་བ་དག་དགོད་ཅིང་ཕྱོགས་བཞིར་སྒོ་ཁྱུད་དང་རྟ་བབས་ཀྱིས་མཛེས་པར་བྱའོ། །དེའི་ཕྱི་རོལ་སྟེགས་བུའི་མཐའ་སྐོར་དུ་རྩྭ་ཀུ་ཤས་བསྐོར་ཅིང་། མེ་ཏོག་
གི་སིལ་མ་དག་ཀྱང་དགྲམ་མོ། །དེ་ནས་ཕྱི་རོལ་དུ་བྱུང་སྟེ། འབྱུང་པོ་ཐམས་ཅད་ལ་སྙིང་བརྩེ་བའི་ཕྱིར། བཟའ་བ་ཤ་ཆང་ལ་ཕུག་ལ་སོགས་བཅས། །འབྲས་ཆན་འབྲས་བུ་མང་པོའི་གཏོར་མ་སྦྱིན། །ཞེས་བྱ་བ་དག་ཁྱེར་ནས། ལྷ་དང་ལྷ་མིན་གནོད་སྦྱིན་ལྟོ་འཕྱེ་གྲུལ། །ཞེས་པ་

73-1-307a

ལ་སོགས་པའི་བསྟོད་པ་དང་བཅས་པའོ། །བདེན་པ་བདར་བར་བྱས་ནས་ལག་པ་གཉིས་ཀྱིས་ཐལ་མོ་ཁོང་སྟོང་དུ་སྦྱར་བ་ལས་ཁ་ཕྱེ་སྟེ། བཀན་ནས་བསྟན་པའི་ཚུལ་དུ་བྱ་བ་ནི་གཏོར་མ་སྦྱིན་པའི་ཕྱག་རྒྱ་སྟེ། འབྱུང་པོ་དེ་དག་ལ་སོ་སོའི་རིག་སྔགས་དག་བརྗོད་ཅིང་ནམ་མཁའ་
མཛོད་ཀྱི་རིག་པས་བྱིན་གྱིས་བརླབས་ཏེ་བསྔོའོ། །དེ་ནས་སླར་ཡང་ལོག་སྟེ་ལྷའི་གནས་སུ་སོང་ལ་ཚོན་གྱི་དཀྱིལ་འཁོར་དེ་དག་མདུན་གྱི་བར་སྣང་ལ་གྱེན་དུ་སྤག་ཅིང་རིན་པོ་ཆེའི་གཞལ་ཡས་ཁང་གདན་སེང་གེ་དང་པདྨར་བཅས་པའི་གདན་ཁྲི་བསམས་ནས་དེར་རིག་སྔགས་ཀྱི་ལྷ་
འཁོར་དང་བཅས་པ་སྤྱན་དྲང་བ་ནི་ཕོ་བྲང་ལྕང་ལོ་ཅན་གྱི་དཔལ་ཕྱག་ན་རྡོ་རྗེ་ཡེ་ཤེས་ཀྱི་སྣང་བའི་ཁྱད་པར་ལས་བྱུང་བའི། དཔལ་རྡོ་རྗེ་རྣམ་པར་འཇོམས་པ་ཞེས་བྱ་བ་སྐུ་མདོག་ལྗང་སྔོན་ཞལ་གྱི་སྨིན་མ་ཁྲོ་གཉེར་ཅན་ཕྱག་གཡས་རྡོ་རྗེ་རྩེ་ལྔ་པ་ཐུགས་ཀར་འཛིན་པ། ཕྱག་གཡོན་པད་ཀུར་
བརྟེན་ཅིང་འགྱིང་བག་ཅན། སྟོད་གཡོགས་དང་སྨད་གཡོགས་དར་ལྗང་གུའི་ཚིག་གུ་གསོལ་བ། རྒྱན་ཐམས་ཅད་ཀྱིས་བརྒྱན་པ་འཁོར་ལོ་རིག་སྔགས་ཀྱི་ལྷ་དང་། ཁྲོ་བོ་ཕྱག་བརྙན་གྲངས་མེད་པའི་ཚོགས་ཅན་བདག་ཉིད་ཀྱི་ཕྱག་རྒྱས་སྤྱན་དྲང་སྟེ། ལག་པ་གཉིས་ཐལ་མོ་ཁོང་སྟོང་
དུ་སྦྱར་ལ་སྲིན་ལག་གཉིས་ནང་དུ་བཅུག་ལ་ཕན་ཚུན་བསྣོལ་བའི་རྩེ་མོ་མཛུབ་མོའི་དྲུང་དུ་ཅུང་ཟད་བཀུག་པར་བྱས་ལ། གུང་མོ་གཉིས་གཞིབས་པའི་ཕྱི་རོལ་ནས་མཛུབ་མོ་གཉིས་བཀུག་ལ། བར་ནས་གང་ཙམ་གྱིས་མ་རེག་པར་བྱས་ནས་མཐེ་བོང་གཉིས་མཐེའུ་ཆུང་གཉིས་གཞིབས་ལ་དེའི་སྔགས་
ནི། ཨོཾ་བཛྲ་ཛྭ་ལ་ནཱ་ཡ་སྭཱ་ཧཱ། ཞེས་བྱའོ། །ཡང་ན་རྡོ་རྗེ་ལྕགས་ཀྱུ་མའི་སྔགས་དང་ཕྱག་རྒྱས་སྤྱན་དྲང་ངོ་། །དེ་ནས་ཐོག་མར་དམ་ཚིག་གི་སྔགས་དང་ཕྱག་རྒྱ་བསྟན་པར་བྱ་སྟེ། ལག་པ་གཡས་པའི་མཐེའུ་ཆུང་གི་སེན་མོ་མཐེ་བོས་མནན་ལ། ལྷག་མ་རྣམས་རྡོ་རྗེ་རྩེ་གསུམ་པའི་ཚུལ་དུ་
བྱས་ཏེ། དེའི་སྔགས་ནི་ཨོཾ་ཤཾ་ཀ་རེ་མ་ཧཱ་ས་མ་ཡེ་སྭཱ་ཧཱ། ཞེས་བརྗོད་དོ། །དེ་ནས་ཡང་དཀྱིལ་འཁོར་ནང་གི་གྲྭ་བཞིར་ཁྲོ་བོ་བཞི་གཞག་སྟེ། བྱང་ཤར་མཚམས་ནས་བཟུང་སྟེ་ཁྲོ་བོའི་རྒྱལ་པོ་རྡོ་རྗེ་གཏུམ་པོ་ཞེས་བྱ་བ་སྐུ་མདོག་སྨུག་ནག །བཞིན་ཁྲོ་གཉེར་ཅན་ཕྱག་གཡས་ན་རྡོ་རྗེ་རྩེ་ལྔ་གདེངས་

73-1-307b

པར་བྱས་པ་ཐོགས་པར་བསམས་ཏེ། དེའི་ཕྱག་རྒྱ་ནི་ལག་པ་གཡོན་པའི་མཛུབ་མོ་སྙིང་གའི་ཕྱོགས་སུ་གཞག །གཡས་པའི་སོར་མོ་གསུམ་རྡོ་རྗེ་ལྟར་བྱ་སྟེ། དེ་ཉིད་ཀྱི་སྔགས་ཀྱང་འདི་ཉིད་ལས། ཙྪིནྡ་ཙྪིནྡ་མ་ཧཱ་ཀཱི་ལི་ཀཱི་ལཱ་ཡ་སྭཱ་ཧཱ། ཞེས་སྦྱར་བར་བྱའོ། །དེ་ནས་ཤར་ལྷོ་མཚམས་སུ་རྡོ་རྗེ་ཀཱི་ལཱ་ཡ་
ཞེས་བྱ་བ། མདོག་ལྗང་ནག་དཔྲལ་བ་ཁྲོ་གཉེར་ཅན་ཕྱག་གཡས་པ་རྡོ་རྗེ་རྩེ་གཅིག་པ་ཀ་ན་ཡའི་དབྱིབས་འདྲ་བ་ཐོགས་པར་བསམས་ཏེ། དེའི་ཕྱག་རྒྱ་ནི་ལག་པ་གཉིས་ཁུ་ཚུར་ནང་དུ་བཅངས་ཏེ། ཅུང་ཟད་བསྣོལ་བའི་ཚུལ་དུ་བཅུག་སྟེ་མཐེ་བོང་གཉིས་གྱེན་དུ་གཞིབས་ཏེ་བསྒྲེང་ལ། དེའི་
སྔགས་ནི། བནྡྷ་བནྡྷ་ཀྲོ་དྷ་ཀྲོ་དྷ་ཀཱི་ལི་ཀཱི་ལཱ་ཡ་སྭཱ་ཧཱ་ཞེས་བྱ་བར་སྦྱར་རོ། །དེ་ནས་ཡང་ལྷོ་ནུབ་མཚམས་སུ་རྡོ་རྗེ་བེ་ཅོན་ཞེས་བྱ་བ་སྐུ་མདོག་མཐིང་ནག་སྨ་ར་སེར་པོ་གྱེན་དུ་འཁྱིལ་བ། གཡས་ན་བེ་ཅོན་གྱི་རྩེ་མོ་རྡོ་རྗེས་མཚན་པ་བསམས་ཏེ་དེའི་ཕྱག་རྒྱ་ནི་ཕྱག་འཚལ་བ་ཐལ་མོ་སྦྱར་བ་ལས་མཐེ་
བོང་གཉིས་བསྒྲེང་ཏེ། ཚིགས་བཀུག་ནས་སྲིན་ལག་གི་དྲུང་དུ་གཟུགས་པར་བྱའོ། །དེའི་སྔགས་ནི་ཙུ་རུ་ཙུ་རུ་ཙཎྜ་ཀཱི་ལི་ཀཱི་ལཱ་ཡ་སྭཱ་ཧཱ་ཞེས་སྦྱར་རོ། །དེ་ནས་ནུབ་བྱང་མཚམས་སུ་རྡོ་རྗེ་ཁྲོ་བོ་ཞེས་བྱ་བ་མདོག་ནག་པོ་ཤིན་ཏུ་ཁྲོས་པ་མཆེ་བ་གཙིགས་པ་བསམས་ཏེ། དེའི་ཕྱག་རྒྱ་ནི་ལག་པ་གཉིས་
ཁུ་ཚུར་བཅངས་ཏེ་མཐེ་བོང་གཉིས་བསྒྲེང་སྟེ་མཐེའུ་ཆུང་གཉིས་ནང་དུ་གཞུག་གོ། །དེའི་སྔགས་ནི་ཏྲཱ་ས་ཡ་ཏྲཱ་ས་ཡ་བཛྲ་ཀཱི་ལི་ཀཱི་ལཱ་ཡ་སྭཱ་ཧཱ་ཞེས་བྱ་བར་སྦྱར་བར་བྱའོ། །དེ་ནས་དེའི་ཕྱི་རོལ་གྱི་དཀྱིལ་འཁོར་རིམ་པ་གསུམ་པར་དབང་ལྡན་ལ་སོགས་པ་འཇིག་རྟེན་སྐྱོང་བ་བཅུ་དང་། རྣམ་རྒྱལ་
ལ་སོགས་པ་བཀྲ་ཤིས་ཀྱི་ལྷ་བརྒྱད་ཀྱི་ཕྱག་མཚན་རྣམས་དགོད་པར་བྱ་བའི་ཕྱིར། དེ་དག་སོ་སོའི་སྔགས་དང་ཕྱག་རྒྱ་བཅིངས་ལ་སྤྱན་དྲངས་ཤིང་རང་རང་གནས་སུ་བཀོད་ནས་གཙོ་བོ་འཁོར་དང་བཅས་པ་རྣམས་ལ་གུས་པ་ཁྱད་པར་ཅན་བྱས་ཏེ། མཆོད་ཡོན་དང་མེ་ཏོག་དང་བདུག་སྤོས་ལ་སོགས་པ་དང་ཞལ་
ཟས་དང་མར་མེའི་མཆོག་རྣམས་རིམ་བཞིན་དུ་དབུལ་ལོ། །དེ་ནས་ཕྱོགས་བཅུ་དག་ན་ཇི་ལྟར་སྲིད་པའི་ལྷ་རྫས་དང་། ཀུན་དུ་བཟང་པོའི་མཆོད་པ་དག་གིས་ཀྱང་མཆོད་ལ། ནམ་མཁའ་མཛོད་ཀྱི་རིག་པས་ཀྱང་བྱིན་གྱིས་བརླབ་སྟེ། འདི་ལྟར་ནམཿསརྦྦ་ཏ་ཐཱ་ག་ཏེ་བྷྱོ། བི་ཤྭ་མུ་ཁེ་བྷྱོཿསརྦྦ་ཏད་ཁཾ་

73-1-308a

ཨུངྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། དེ་ནས་བསྟོད་པ་གང་ཡང་རུང་བས་བསྟོད། དེ་ནས་རིག་སྔགས་གདོན་པ་ནི། ལན་གྲངས་ཉི་ཤུ་རྩ་གཅིག་གམ། །ཡང་ན་ལན་གྲངས་བརྒྱ་རྩ་བརྒྱད། །ཅེས་བྱ་བས་གྲངས་ངེས་པར་གསུངས་པ་ལ། རྩ་བའི་རིག་སྔགས་དང་མཇུག་ནས་ཡང་
སྙིང་གི་སྔགས་རྣམས་དང་གཉིས་བསྐུལ་བ་དང་བཅས་པར་ཟློ་ན་ནི་ལན་གྲངས་ཉི་ཤུ་རྩ་གཅིག་ཟློས་པར་འགྱུར་རོ། །ཡང་ན་དེ་རྣམ་པ་གཉིས་ཀ་ཟློས་པར་མི་ནུས་ན་ན་མཿཙཎྜ་བཛྲ་ཞེས་པ་ནས་ཨ་མྲྀ་ཏེ་ཧཱུཾ་ཕཊ་ཅེས་པའི་བར་ནི་རིག་སྔགས་འདིའི་ཡང་སྙིང་སྟེ་བསྐུལ་ཚིག་དང་བཅས་པ་ལན་གྲངས་བརྒྱ་རྩ་
བརྒྱད་བཟླས་པར་བྱའོ། །དེ་ལྟར་བཟླས་བརྗོད་ཟིན་ནས་ཡོན་བདག་དང་སློབ་མ་གཉིས་ཀ་ཡང་དཀོན་མཆོག་ལ་སྐྱབས་སུ་འགྲོ་བར་བྱའོ། །དཀྱིལ་འཁོར་དབུས་སུ་ཁྲི་ལྟ་བུ་གཞག་པའི་སར་ཡང་ན་རི་མོ་ཡིད་ཀྱིས་གདེག་པ་དང་། ཡང་ན་ཕྱག་རྒྱ་ཉི་ཚེ་བྱའོ། །དེ་ནས་དེར་བུམ་པ་རྣམས་ཀྱི་
ཆུས་བླུགས་ཤིང་དབང་བསྐུར་ཏེ། ཤུ་ཏི་དང་ཉེ་ཤིང་ལ་སོགས་པས་ཀྱང་བཀྲུ། རོལ་མོ་དང་བཀྲ་ཤིས་ལ་སོགས་པ་ཡང་གདོན་ནོ། །ཁྲུས་ཟིན་ནས་སྒོར་འབྱུང་བའི་དུས་སུ་ཞོ་དང་མར་དང་སྨན་དང་འབྲས་བུ་ལ་སོགས་པ་བཀྲ་ཤིས་ཀྱི་རྫས་རྣམས་ལ་ཆོ་གར་བསྟན་པ་རྣམས་མཐོང་བ་དང་
རེག་པ་དག་བཀག་པ་མེད་དོ། །དེ་ནས་རིག་སྔགས་ཀྱི་རྒྱལ་པོ་འདིའི་ཆོ་གའི་ཕན་ཡོན་འབྱུང་བ་མདོར་བསྡུས་ན་གཉིས་སུ་འདུས་ཏེ། སྡུག་བསྔལ་སེལ་བར་བྱེད་པ་དང་བདེ་བ་སྐྱེད་པར་བྱེད་པའོ། །དེ་ལ་སྡུག་བསྔལ་སེལ་བ་ནི། སེམས་ཅན་དབང་པོ་ཉམས་པ་དང་། །ཚེ་ཟད་པ་དང་ཚེ་ཉམས་
དང་། །ཞེས་བྱ་བ་ནས། དེ་དག་ཐམས་ཅད་ཞི་བར་བལྟ། །ཞེས་བྱ་བ་དང་། སྡིག་པ་ཐམས་ཅད་བྱང་བྱས་ནས། །སྡུག་བསྔལ་ཐམས་ཅད་མེད་པར་བྱེད། །ཅེས་བྱ་བ་ལ་སོགས་པ་ཚིགས་སུ་བཅད་པ་བཞིས་བསྟན་ཏོ། །བདེ་བ་སྐྱེད་པར་བྱེད་པ་ནི། རྒྱུད་དོ་ཅོག་གི་རྩ་བ་སྟེ། །དཔལ་ཀུན་གྱིས་
ནི་ལེགས་པར་བརྒྱན། །ཞེས་བྱ་བ་ནས། ཚེ་དང་བསོད་ནམས་འཕེལ་བར་འགྱུར། །སྡིག་པ་ཀུན་ལས་རྣམ་པར་ཐར། །ཞེས་བྱ་བ་རྣམས་ཀྱིས་བསྟན་ཏེ། དེ་དག་གིས་ཕན་ཡོན་མདོར་བསྡུས་པ་ཙམ་དུ་ཟད་ཀྱི། གཞན་ཡང་རྒྱལ་པོའི་ཆད་པས་འཇིགས་པ་དང་། ཆོམ་རྐུན་དང་། མེ་

73-1-308b

དང་། ཆུ་དང་། དུག་དང་མཚོན་ལ་སོགས་པའི་འཇིགས་པ་ཐམས་ཅད་ལས་སྒྲོལ་བར་རིག་པར་བྱའོ། །རྡོ་རྗེ་རྣམ་པར་འཇོམས་པའི་ཁྲུས་ཀྱི་ཆོ་གའི་འགྲེལ་པ་སློབ་དཔོན་རྡོ་རྗེ་གོ་ཆས་མཛད་པ་རྫོགས་སོ།།      །།༄༅། །ལས་ཀྱི་མཐའ་བཅོ་བརྒྱད་པའི་མན་ངག་བཞུགས། ༄༅། །དཔལ་རྡོ་རྗེ་རྣམ་
པར་འཇོམས་པ་ལ་ཕྱག་འཚལ་ལོ། །ལས་ཀྱི་མཐའ་བཅོ་བརྒྱད་པའི་སྒྲུབ་ཐབས་སིལ་མར་བཤད་པ་ལ་སྤྱི་དོན་བཞིར་ཤེས་པར་བྱ་སྟེ། སྔོན་དུ་བསྙེན་པའི་ཆོ་ག་དང་ལྷ་ལྷག་པར་གནས་པ་སྟ་གོན་གྱི་ཆོ་ག་དང་། ལས་སུ་བྱ་བ་དཀྱིལ་འཁོར་གྱི་ཆོ་ག་དང་། མཇུག་བསྡུ་བའི་ཆོ་གའོ། །བསྙེན་
པའི་ཆོ་ག་སྤྱིར་མཐུན་ནོ། །ལྷག་པར་གནས་པ་སྟ་གོན་གྱི་ཆོ་ག་ལ་ལྔ་སྟེ། སོ་སོའི་ལིངྒ་བཅའ་བ་དང་། བདུག་པའི་རྫས། གདབ་པའི་རྫས། བྲབ་པའི་རྫས། བྱུག་པའི་རྫས་སོ། །ལས་ཀྱི་མཐའ་བཅོ་བརྒྱད་ཀྱང་ལས་བཞིར་བསྡུ་ན་ཞི་བ་ལ་ལྕེ་པོག་དཀར་པོ། རྒྱས་པ་ལ་གླ་རྩི་དང་ག་བུར། 
དབང་ལ་ཙནྡན་དང་གུར་གུམ། དྲག་པོ་ལ་གུ་གུལ་ནགཔོའོ། །ཞི་བ་ལ་འོ་མ་ཅན་གྱི་ཤིང་། རྒྱས་པ་ལ་གསེར་ཅན་གྱི་ཤིང་། དབང་ལ་ཁྲག་ཅན་གྱི་ཤིང་། དྲག་པོ་ལ་དུག་ཅན་གྱི་ཤིང་ངོ་། །སོར་བཞི་དང་། སོར་དྲུག་དང་། སོར་བརྒྱད་དང་། སོར་བཅུ་གཉིས་པ་བྱ་ཞིང་། རྩེ་མཆན་ཟླུམ་པོ་དང་། 
གྲུ་བཞི། ཟླ་གམ། ཟུར་གསུམ་མོ། །དེ་དག་ལྟེ་བ་དང་། དཔུང་པ་དང་། གསང་བ་དང་། སྙིང་གར་སོ་སོར་གདབ་བོ། །གཞན་ཡང་། ཡུངས་ཀར་ཀུན་གྱི་གཙོར་བྱས་ཏེ། །ཏིལ་དང་སྐེ་ཚེ་ཤང་ཚེ་དང་། །ཡུངས་ཀར་བྲབ་པའི་ལས་དང་སྦྱར་རོ། །ལུས་སུ་བྱ་བ་དཀྱིལ་འཁོར་ཆེན་པོ་དང་མཐུན་
པ་ལས། གྲོ་གའམ་རས་སམ་ཤིང་ཤུན་ལས་གང་འདོད་པའི་གཟུགས་དང་མིང་བྲིས་ཏེ། དཀྱིལ་འཁོར་ཆེན་པོའི་དབུས་སུ་གང་ཡང་རུང་བའི་ཕུར་བུས་འཛེར་ཏེ་བཞག །བཟླས་པ་ལ་བབ་པ་དང་། ཏྲ་ཊ་ནས་སཾ་གྷའི་བར་དུ་ཡང་སྙིང་རྩ་སྔགས་སོ་སོར་སྦྱར་རོ། །གཏོར་མའི་ཆོ་ག་ཡན་
ཆད་རྫོགས་ནས་མཇུག་བསྡུ་བའི་ཆོ་ག་ཤེས་པར་བྱ་སྟེ། སེམས་ཅན་གང་ཞིག་སྐྲག་པར་བྱ་བའི་ཆོ་ག་ནི། ཏྲ་ཊ་དང་སྦྱར་ཏེ་རི་མོ་བདུན་དུ་བླངས་ཏེ། རྡོ་རྗེ་ཁྲོ་བོའི་སྔགས་བཟླས་ཤིང་ལན་བརྒྱ་རྩ་བརྒྱད་དུ་གུ་གུལ་ནག་པོའི་དུད་པས་བདུག་ཅིང་ཕུར་པ་སྙིང་གར་བཏབ་སྟེ། བྲབས་ནས་ཡུལ་

73-1-309a

བཱ་རཱ་ཎ་སཱིའི་སས་བྱུགས་ནས། རི་མོ་རླུང་ཆེན་པོ་ལ་ཕྱར་ན་གང་ལ་བྱ་བ་དེ་ཁོ་ན་སྐྲག་པར་འགྱུར་རོ། །དམག་གི་དཔུང་གཞིལ་བ་ནི་ཏྲོ་ཊ་དང་སྦྱར་ཏེ། སྦྱོར་བ་ཐམས་ཅད་གོང་དང་མཐུན་པ་ལས་མཇུག་བསྡུ་བའི་ཆོ་གའི་དུས་སུ་རི་མོ་བདུན་དུ་བླངས་ཏེ་ལྕེ་པོག་དཀར་པོས་བདུག །
ཕུར་པས་བཏབ་སྟེ་བྲབས་ནས་མི་རུས་ཀྱི་ཕྱེ་མས་བྱུགས་ནས་འབི་འབིའི་ནང་དུ་བཅུག་ལ་མཆོད་རྟེན་བྱས་ཏེ་མཆོད་ནས་སྐྲ་མཚམས་སུ་སྤྱི་གཙུག་ཏུ་སྦས་ན། དགྲ་བགེགས་ཀྱི་དཔུང་ཉེ་བར་ཞི་བར་འགྱུར་རོ། །རིག་སྔགས་ཐམས་ཅད་གཅོད་པ་སྥོ་ཊ་དང་སྦྱར་ཏེ། རི་མོ་ལ་བདུག་པ་དང་བྲལ་བའི་
ལས་བྱས་ནས་ཐལ་ཆེན་གྱིས་བྱུགས་ལ། མཚོན་རྣོན་པོས་གཏུབས་ལ་དུག་ཤིང་གི་མེ་ལ་བྱད་ཀྱི་རྫས་གཉིས་དང་མར་ནག་ཏུ་བྱས་པས་སྦྱིན་སྲེག་ཏུ་བྱས་ཏེ། ཐལ་བ་ཆུ་ཆེན་པོར་གཏོར་ན་ངེས་པར་གཞན་གྱི་དམོད་པ་ཞི་བའོ། །རིག་སྔགས་ཐམས་ཅད་གནོན་པ་ནི། སྥོ་ཊ་དང་སྦྱར་ཏེ། ཐལ་ཆེན་གྱིས་བྱུགས་
པ་ཡན་ཆད་མཐུན་པ་ལས་རྫས་དང་བཅས་ཏེ་མཆོད་རྟེན་ཆེན་པོའི་འོག་ཏུ་སྦས་ན། གཞན་གྱི་རིག་སྔགས་ཐམས་ཅད་ཀྱི་མགོ་གནོན་པར་འགྱུར་རོ། །ལས་ཐམས་ཅད་འཇོམས་པ་ནི་གྷུརྞྞ་དང་སྦྱར་ཏེ། དེ་ནི་ལྷོ་ཕྱོགས་ཀྱི་རྒྱལ་པོ་སྟོབས་ལྡན་གྱི་རྣམ་སྨིན་མི་བཟད་པ་སྟེ། བྲམ་ཟེ་ཕུར་བུ་རིག་པ་འཛིན་
པ་དང་། མདོ་སྡེ་དང་གཟུངས་སྔགས་ལྟར་བཟླས་པའི་རྗེས་ལ་རྒྱལ་པོའི་ནད་མི་བཟད་པ་དེ་ཐམས་ཅད། སརྦྦ་བིདྱཱ་གྷུརྞྞ་མཱ་ར་ཡ་ཀུ་རུ་ཡེ་སྭཱ་ཧཱ། བྲམ་ཟེ་ཆེན་པོ། བཟླས་པའི་ཡོན་ཏན་དེ་ཙམ་ན། །བསྒྲུབས་པའི་ཡོན་ཏན་བསམ་ལས་འདས། །རིག་སྔགས་རྒྱལ་པོ་དགེ་བར་གསུངས། །ཞེས་པ་དང་། 
སྒྲུབ་པའི་དུས་སུ་དཀྱིལ་འཁོར་ཆེན་པོའི་ཆོ་ག་གཞུང་ལྟར་བྱས་ལ་བཟླས་པའི་དུས་སུ་ཡང་སྙིང་དང་རྩ་སྔགས་ལ་སརྦྦ་བིདྱཱ་དང་གྷུརྞྞ་སྦྱར་རོ། །འཇུག་པ་དབང་བསྐུར་བ་དང་། མཇུག་གི་དོན་བྱ་བ་དང་། བྱབ་པ་དང་བསྲུང་བ་བྱས་ནས་ཏིལ་ནག་པོའི་སྡིག་པ་བྱས་ཏེ་མཚོན་རྣོན་པོས་གཏུབས་ཏེ། ཤིང་
གསར་པ་ལ་སྦྱིན་སྲེག་བྱས་པས་ངེས་པ་ཁོ་ནར་སྔོན་གྱི་ལས་བཅོམ་མོ། །གཞན་གྱི་ལས་ཐམས་ཅད་འཇིག་པར་བྱེད་པ་ནི། གྷུརྞྞཱ་པ་ཡ་དང་སྦྱར་ཏེ། གཞན་དག་ལས་འགྲན་སེམས་ཅན་གྱི་མིང་གང་ཡིན་པའི་རི་མོ་བྲིས་ལ། དཀྱིལ་འཁོར་ཆེན་པོའི་དབུས་སུ་གཞག་སྟེ། ཆོ་ག་ཡོངས་

73-1-309b

སུ་རྫོགས་པར་བྱས་ཏེ། རི་མོ་མདུན་དུ་བླངས་ཏེ་བདུག་པ་དང་བྲབ་པ་བྱས་ཏེ། རོའི་སོལ་བས་བྱུགས་ནས་ཚེར་མ་ཅན་གྱི་མེ་བླངས་ཏེ་སྦྱིན་སྲེག་བྱ་སྟེ། ཐལ་བ་རླུང་ཆེན་པོ་ལ་ཕྱར་ནའོ། །དགྲ་བགེགས་བརླག་པར་བྱེད་ན་ནི། སརྦྦ་སཏྭ་ནི་ལ་སོགས་པ་ནི་གསང་བ་ཐུན་མོང་མ་ཡིན་པའོ། །གདོན་ཐམས་
ཅད་ལས་ཐར་བར་བྱེད་པ་ནི་བོ་དྷི་དང་སྦྱར་ཏེ། འདི་ནི་ཐར་པར་བྱེད་པ་ཡིན་གྱི་བརླག་པར་མི་བྱེད་དེ་བཙོན་ར་ནས་ཐར་པ་དང་འདྲ་ཞེས་པའི་ཐ་ཚིག་གོ། །ཐར་པར་འདོད་པའི་རི་མོ་དཀྱིལ་འཁོར་ཆེན་པོའི་དབུས་བུ་གཞག་སྟེ། ལས་ཐམས་ཅད་གོང་མ་དང་འདྲ་བ་ལས་ཕུར་པ་དང་བཅས་པ་ལ་ཆས་དྲིལ་
བ་ལ། གསེར་དང་གཡུ་རྒོད་དང་། རྡོ་རྒོད་ཆེ་བ་གཡས་རྡོ་རྗེ་དང་བཅས་པ་ལུས་སམ་མགུལ་དུ་བཏགས་ན། གདོན་ལ་སོགས་པ་ལས་ཐར་བར་འགྱུར་རོ། །འབྱུང་པོ་ཐམས་ཅད་འགུགས་པ་ནི་པ་ཤྱཾ་དབང་དུ་བྱ་བ་དངོས་སོ། །རིག་སྔགས་ཀྱི་ལས་ཐམས་ཅད་བྱེད་དུ་འཇུག་པ་ནི་སཾ་བོ་དྷ་དང་སྦྱར་ཏེ། 
གྲོ་གའམ་རས་སམ་ཤོག་བུ་ལ་གང་འདོད་ཀྱི་མིང་བྱང་བྲིས་ཏེ། དཀྱིལ་འཁོར་ཆེན་པོའི་དབུས་སུ་བཞག་སྟེ། ཆོ་ག་རྣམས་ཡོངས་སུ་རྫོགས་པ་དང་། བདུག་པ་དང་གདབ་པ་དང་། བྲབ་པའི་སྦྱོར་བ་བྱས་ཏེ་སྦྱར་སྤོས་དང་དྲི་སྣ་ཚོགས་པས་བྱུགས་ཏེ། ཙནྡན་ལ་སོགས་པའི་ཤིང་དྲི་
བསུང་ཅན་གྱི་མེ་ལྷ་སྦྱིན་སྲེག་བྱས་ནས་སོལ་བ་དང་དེ་ཉིད་མར་དཀར་དང་བསྲེས་ཏེ། བཟའ་བ་དང་བྱུག་པ་བྱས་ན་ངེས་པར་འགྲུབ་པོ། །མ་གྲུབ་པ་གྲུབ་པར་བྱེད་པ་ནི་ཕྲ་མ་དང་སྦྱར་ཏེ། གང་གྲུབ་པར་འདོད་པའི་རི་མོ་བྲིས་ལ། ཆོ་ག་གོང་མ་ཉིད་དང་མཐུན་ནོ། །ཡང་ནི་མིང་མགུལ་ཁུག་
དུ་གཞུག་གོ། །གྲུབ་པ་ཆུད་མི་ཟ་བར་བྱེད་པ་ནི། སཾ་བྷྲ་མ་དང་སྦྱར་ཏེ། གང་མངོན་དུ་གྱུར་པའི་ནོར་རྫས་ཀྱི་མིང་བྲིས་ཏེ། དཀྱིལ་འཁོར་ཆེན་པོའི་དབུས་སུ་གཞག་ལ་བདུག་པ་དང་གདབ་པ་དང་བྲབ་པ་རྫོགས་པ་དང་ཨ་ཤྭ་ཤྲཱཏྠཱ་ཁུ་བས་བྱུགས་ནས་ཟ་མ་ཏོག་ཏུ་བཅུག་ལ་རས་གཙང་མས་དཀྲིས་
ནས་ཕུར་པ་དང་བཅས་ཏེ་རྒྱས་བཏབ་ལ། སྐུ་གཟུགས་སམ་མཆོད་རྟེན་གྱིས་མནན་ཏེ། ཤིན་ཏུ་དབེན་པའི་སར་བཞག་ན་ངེས་པར་ཆུད་མི་ཟའོ། །འདོད་པ་ཐམས་ཅད་རབ་ཏུ་སྦྱིན་པ་ནི་ཀུ་ཊ་དང་སྦྱར་ཏེ། དེ་ལ་ལྔ་སྟེ། བུ་སྦྱིན་པ་དང་ནོར་སྦྱིན་པ་དང་། འབྲུ་སྦྱིན་པ་དང་། རྐང་མགྱོགས་

73-1-310a

སྦྱིན་པ་དང་། ཚེ་དང་བསོད་ནམས་སྦྱིན་པའོ། །བུ་སྦྱིན་པ་ནི་བུ་འདོད་པའི་མིང་བྱང་བདུག་གདབ་བྲབ་པར་བྱ་སྟེ། ག་བུར་ལ་སོགས་པའི་དྲིས་བྱུགས་ཏེ་ལུང་ཐང་དང་བོ་དེ་ཙེ་དང་བཅས་ཏེ། སེར་པོ་ཤིང་ལ་མེ་གཏང་ལ་སྦྱིན་སྲེག་བྱ་སྟེ། སོལ་བ་འབྲུ་མར་དང་སྦྱར་ཏེ་བྱིན་ན་
བུ་མེད་པ་བུ་ཡོད་པར་གྱུར་ཏེ། ནོར་དང་འབྲུ་འདོད་པ་ལ་ནོར་དང་འབྲུའི་མིང་བྲིས་ལ་བདུག་གདབ་པ་བྱ་སྟེ། ཕྱུག་པོའི་བང་མཛོད་དང་། རྒྱལ་པོའི་དཀོར་མཛོད་ཆ་ཚང་གི་ནོར་སྣ་ཚོགས་པ་ཚགས་བྱས་ན་འགྲུབ་བོ། །དུད་འགྲོའི་མིང་བྲིས་ཏེ་ལྕགས་ལ་བཟླས་ལ་བྱིན་ན་འགྲུབ་པོ། །ཚེ་དང་བསོད་ནམས་
སྦྱིན་པར་ནི་བཀྲ་ཤིས་ཀྱི་ཞལ་ཟས་ལ་བརྟེན་ཏེ། ཨཱ་ཡུ་ཝརྡྷ་ནེ་པུཥྚིཾ་ཀུ་རུ་ཡེ་སྭཱ་ཧཱ་དང་སྦྱར་རོ། །དེ་དག་ཐམས་ཅད་ལ་འཇུག་ཅིང་དབང་བསྐུར་བ་ལ་སོགས་པ་ནི་དཀྱིལ་འཁོར་ཆེན་པོ་དང་མཐུན་ནོ། །སེམས་ཅན་ཐམས་ཅད་བསྲུང་བ་ནི་སཾ་ཀུཊྚ་ཡ་དང་སྦྱར་ཏེ། དེ་ལ་ཡང་ལྔ་སྟེ། རིམས་བསྲུང་བ་དང་། གདོན་
བསྲུང་བ་དང་། འཁོར་དང་ནོར་ཕྱུགས་བསྲུང་བ་དང་། ལོ་ཏོག་བསྲུང་བ་དང་། སྲིའུ་བསྲུང་བའོ། །དེ་དག་ནི་གདམས་ངག་ལས་ཤེས་པར་བྱའོ། །སེར་བ་བསྲུང་བ་ལ་སྤྱིའི་འཁོར་ལོ་ལུས་ལ་བཅིངས་ཏེ། སོ་སོའི་འཁོར་ལོའི་ཐོག་ཏུ་གཟུགས་པ་དང་། ཡང་སྙིང་རྩ་སྔགས་དྲིལ་ཏེ་གདོང་བཟློག་བྱའོ། །
རེངས་པར་བྱེད་པ་ནི་གྷ་ཊ་དང་སྦྱར་ཏེ། གང་རེངས་པར་འདོད་པ་དེའི་མིང་བྲིས་ཏེ། བདུག་གདབ་བྲབ་པ་ཡན་ཆོད་སོ་སོའི་ལས་ཀྱི་བྱེ་བྲག་སྤྱིར་མཐུན་པ་ལས་ཐལ་ཆེན་བྱུགས་ཏེ་ཤིང་བསྲུང་བའི་སྣ་མའི་ཤིང་དག་ལ་མེ་སྦར་ཏེ་མེ་ཏོག་ཀེར་བཙུགས་དང་། རླུང་གི་རྟ་མོ་དང་། རིལ་མ་ལ་སྦྱིན་སྲེག་
བྱས་ནས་ཐལ་བ་བྱི་བའི་རླུང་བུར་བླུགས་ཏེ་ཡུངས་ཀར་དང་ཡུངས་ནག་ཏུ་སྦྱར་ནས་གར་གཏོར་བ་དེ་རེངས་པར་བྱེད་དོ། །རྨུགས་པར་བྱེད་པ་ནི་སཾ་གྷ་ཊཱ་ཡ་དང་སྦྱར་ཏེ། གང་རྨུགས་པར་འདོད་པའི་མིང་བྱང་བདུག་གདབ་བྲབ་པ་བྱས་ནས་ལ་ཆས་དྲིལ་ལ། རྐང་འོག་དང་ལྕེ་འོག་ཏུ་བཅུག་ན་ངེས་པ་
ཁོ་ནར་རྨུགས་པར་འགྱུར་རོ། །ལས་ཀྱི་མཐའ་བཅོ་བརྒྱད་པའི་མན་ངག་སློབ་དཔོན་རྡོ་རྗེ་གོ་ཆས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། བཛྲ་བི་དཱ་ར་ཎ་ནཱ་མ་དྷཱ་ར་ཎཱི་བི་དྷིཿ། བོད་སྐད་དུ། རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་ཆོ་ག །རྡོ་རྗེ་རྣམ་པར་

73-1-310b

འཇོམས་པ་ལ་ཕྱག་འཚལ་ལོ། །ཞི་ཡང་གདུག་འདུལ་ཁྲོ་མཆོག་སྐུ་འདུད་དེ་ཡི་ཆོ་ག་བཤད། རང་སྐད་ཅིག་གིས་ལྷའི་ང་རྒྱལ་དང་ལྡན་པའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་གཟུངས་ཀྱི་སྔགས་བསམས་ལ་དེའི་འོད་ཀྱིས་སངས་རྒྱས་དང་བྱང་ཆུབ་སེམས་དཔའ་དང་། བཅོམ་ལྡན་འདས་
ཕྱག་ན་རྡོ་རྗེ་དང་བཅས་པ་སྤྱན་དྲངས་ལ། མཆོད་པ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། དཀོན་མཆོག་གསུམ་ལ་སྐྱབས་སུ་གསོལ་བ་དང་། བྱང་ཆུབ་ཏུ་སེམས་བསྐྱེད་པ་དང་། ལམ་ལ་གནས་པ་དང་། ལུས་དབུལ་བ་དང་། དགེ་བའི་རྩ་བ་བསྔོ་བ་
བྱས་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་པས་ཆོས་ཐམས་ཅད་སྟོང་པ་ཉིད་དུ་ལྷག་པར་མོས་པར་བྱའོ། །དེའི་རྗེས་ལ་གཟུངས་ཀྱི་ཡི་གེ་སྒྲ་ཙམ་ལ་དམིགས་པ་དང་། དེ་ཡོངས་སུ་གྱུར་པ་ལས། གཟུངས་ཀྱི་ཡིག་འབྲུ་རྣམ་པར་བསམ་པ་དང་། དེ་ཡོངས་སུ་གྱུར་པ་ལས་ཟླ་བའི་དཀྱིལ་
འཁོར་ཆེན་པོ་གཟུངས་ཀྱི་ཡི་གེ་རྣམས་གཟུངས་ཀྱི་ཚུལ་དུ་ནང་ན་གནས་པར་བསམས་ལ། དེ་ལས་ཕྱག་ན་རྡོ་རྗེའི་སྐུ་དཔག་ཏུ་མེད་པ་འཕྲོས་པས་སེམས་ཅན་ཐམས་ཅད་ཀྱི་སྡིག་པ་དང་སྡུག་བསྔལ་སྦྱངས་ཏེ། བླ་ན་མེད་པའི་བྱང་ཆུབ་ལ་བཀོད་དེ། སླར་འདུས་ནས་ཟླ་བ་ལ་ཐིམ། དེ་ཡོངས་སུ་གྱུར་
པ་ལས་བཅོམ་ལྡན་འདས་ཕྱག་ན་རྡོ་རྗེའི་ཐུགས་ཀྱི་སྤྲུལ་པ་རྡོ་རྗེ་རྣམ་པར་འཇོམས་པ་སྐུ་མདོག་ལྗང་གུ་ཕྱག་གཡས་ན་སྣ་ཚོགས་རྡོ་རྗེ་ངོས་གཅིག་མེད་པ་བསྣམས་པ་གཡོན་པ་དྲིལ་བུ་དཀུར་བརྟེན་པ། རྒྱན་ཐམས་ཅད་ཀྱིས་བརྒྱན་པ། སེམས་དཔའི་སྐྱིལ་མོ་ཀྲུང་དུ་བཞུགས་པ། དེའི་ཐུགས་ཀའི་ཟླ་
བའི་དཀྱིལ་འཁོར་གྱི་སྟེང་དུ་གཟུངས་ཀྱི་ཡི་གེ་རྣམས་བསམ་མོ། །དེའི་སྔགས་ཀྱི་འོད་ཀྱིས་མདུན་དུ་ཡེ་ཤེས་སེམས་དཔའ་རང་དང་འདྲ་བ་ལྕང་ལོ་ཅན་གྱི་ཕོ་བྲང་ནས་སྤྱན་དྲངས་ནས། མེ་ཏོག་ལ་སོགས་པས་མཆོད་ནས་བསྟོད་དེ། དེ་གཉིས་ཀྱི་ཟླ་བའི་དཀྱིལ་འཁོར་གྱི་སྟེང་གི་སྔགས་ལས་འོད་
འཕྲོས་པས་སྔགས་ཀྱི་ཡི་གེ་རབ་འོད་བསྐལ་པའི་མེ་འདྲ་བར་བསམ། ཡེ་ཤེས་སེམས་དཔའི་སྐུ་དང་དེའི་ཐུགས་ཀའི་ཟླ་བ་དང་། དེའི་སྟེང་གི་གཟུངས་ཀྱི་ཡི་གེ་ལ་དམིགས་ཏེ་གཟུངས་གདོན་ནོ། །ཡང་དམ་ཚིག་སེམས་དཔའི་གསུང་ལ་དམིགས་ཏེ་གཟུངས་གདོན་ནོ། །

73-1-311a

དེ་བཞིན་དུ་རིམ་གྱིས་ཐུན་བཞི་རུ་གཟུངས་འབུམ་བཟླས་པ་ནི་སྔོན་དུ་བསྙེན་པའོ། །དེ་ནས་ནད་པ་ལ་སོགས་པའི་དོན་དུ་ས་ཕྱོགས་གཙང་མ་རུ་བའི་རྣམ་པ་ལྔས་བྱུགས་ཏེ། མེ་ཏོག་གི་སིལ་མ་དགྲམ་པར་བྱའོ། །ཕྱོགས་སྐྱོང་བཅུ་དང་བཅས་པའི་དཀྱིལ་འཁོར་བྲི་བའམ། མཎྜལ་གང་
ཡང་རུང་བ་བྱས་ལ། རིན་པོ་ཆེ་འམ་ས་ལས་བྱས་པའི་བུམ་པ་རྩ་བ་མི་གནག་པ་ནག་པོ་ར་རི་མེད་པར་རིན་པོ་ཆེ་སྣ་ལྔ་དང་། འབྲུ་ལྔ་དང་། སྨན་ལྔ་དང་། སྙིང་པོ་ལྔ་དང་། སྤོས་དྲི་ཞིམ་པོ་བླུགས་ཏེ། ལྡུམ་བུས་ཁ་བརྒྱན་ལ་མགྲིན་པར་རས་ཀྱིས་དཀྲིའོ། །བྷྲཱུཾ་ལས་རིན་པོ་ཆེའི་བུམ་པར་བསྐྱེད་དེ་བཾ་
ལས་བདུད་རྩིའི་རྒྱ་མཚོ། པཾ་ལས་པདྨ་དེའི་སྟེང་དུ་གོང་བཞིན་དུ་བཅོམ་ལྡན་འདས་བསྐྱེད་ལ། ཡེ་ཤེས་སེམས་དཔའ་སྤྱན་དྲངས་ཏེ་མཆོད་བསྟོད་བྱས་ལ་གཏོར་མ་བཏང་སྟེ། གོང་བཞིན་བཟླས་པར་བྱའོ། །དེ་ནས་ནད་པ་སྡོམ་པ་འཛིན་དུ་བཅུག་ལ། བུམ་པའི་ཆུས་ཁྲུས་བྱས་ན་ནད་པ་ནད་
ལས་ཐར་བར་འགྱུར་རོ། །རྡོ་རྗེ་རྣམ་པར་འཇོམས་པའི་ཁྲུས་ཀྱི་ཆོ་ག་སློབ་དཔོན་བྱང་ཆུབ་སྙིང་པོས་མཛད་པ་རྫོགས་སོ།།      །།༄༅༅། །རྣམ་པར་འཇོམས་པ་ཡེ་ཤེས་སྐུ། །རབ་ཏུ་བཏུད་ནས་མདོར་བསྡུས་བཤད། །དབེན་གནས་འདུག་ལ་མཎྜལ་བཅའ། །ཁྲུས་བྱས་གོས་
བགོས་མཆོད་པ་བཤམ། །སྤྱན་དྲངས་ལ་སོགས་སྔོན་འགྲོ་བས། །ཚད་མེད་བཞི་པོ་བསྒོམ་པར་བྱ། །དེ་ནས་སྟོང་པ་ཉིད་བསྒོམས་ཏེ། །རང་སེམས་ཟླ་བར་ཧཱུཾ་བསམ་བྱ། །ཧཱུཾ་ལས་འོད་ཟེར་འཕྲོས་པ་ཡིས། །རྡོ་རྗེ་ར་བ་དྲ་བ་དང་། །འགྲོ་བའི་དོན་མཛད་ཚུར་འདུས་ཏེ། །ཧཱུཾ་ལས་རྡོ་རྗེ་རྩེ་ལྔར་གྱུར། །
གནག་ཅིང་འབར་བའི་མེ་འོད་བཅས། །དེ་ལས་འོད་ཟེར་འཕྲོས་པ་ཡིས། །སྔར་བཞིན་སེམས་ཅན་དོན་བྱས་ཏེ། །སླར་ཡང་རྡོ་རྗེ་ཉིད་ལ་འདུས། །རྡོ་རྗེ་ཡོངས་གྱུར་སྐུ་རུ་གསལ། །སྐུ་མདོག་མཐིང་ནག་སྤྱན་གསུམ་པ། །ཉི་མའི་དཀྱིལ་འཁོར་རྣམ་པར་གནོན། །ཕྱག་གཉིས་ཐབས་དང་ཤེས་
རབ་བརྡ། །ཞབས་གཉིས་སྟག་གི་པགས་པ་བསྣམས། །ཀླུ་ལྔས་ལུས་བརྒྱན་མེ་དཔུང་འབར། །དེ་ལྟར་རྣམ་པར་བསྒོམས་ནས་ཀྱང་། །ཡེ་ཤེས་ཁྲོ་བོ་སྤྱན་དྲངས་ཏེ། །མཆོད་ནས་རང་ལ་གཞུག་པར་བྱ། །ནམ་མཁར་སངས་རྒྱས་སྤྱན་དྲངས་ཏེ། །སྤྲུལ་པའི་ལྷ་མོས་དབང་བསྐུར་རོ། །

73-1-311b

སྤྱི་བོར་སྣ་ཚོགས་རྡོ་རྗེ་བསམ། །སྤྱན་དྲངས་ལྷ་རྣམས་གཤེགས་པར་གྱུར། །དེ་ནས་རྣལ་འབྱོར་བདག་ཉིད་ཀྱིས། །སྤྱི་བོ་ལ་སོགས་གནས་གསུམ་དུ། །ཟླ་བའི་སྟེང་དུ་ཡི་གེ་གསུམ། །ཡོངས་གྱུར་མཚན་མ་གསུམ་དུ་གནས། །དེ་ལས་བཟླས་པ་བྱས་པ་ནི། །ཕྱོགས་བཅུའི་སངས་རྒྱས་སྤྱན་
དྲངས་ལ། །སྔགས་དང་འོད་ཟེར་བཅས་པ་ལས། །ཕྱག་ན་རྡོ་རྗེའི་སྐུ་རུ་གསལ། །ཐམས་ཅད་འདུས་པའི་དབུས་དག་ན། །བདག་ཉིད་ཁྲོ་བོ་ཆེན་པོར་གནས། །ཀུན་གྱི་ཐུགས་ཀར་ཉི་སྟེང་དུ། །རྣམ་པར་འཇོམས་པའི་ཡི་གེ་དགོད། །ཕར་སྤྲོས་དོན་ནི་རྫོགས་པ་དང་། །ཚུར་འདུས་སྒྲུབ་
པ་ནུས་པར་ལྡན། །སྔགས་ཀྱི་འབྲུག་སྒྲ་ལྟ་བུ་སྟེ། །སྐྱོ་ན་གཏོར་མ་གཏང་བར་བྱ། །མཆོད་པ་བྱས་ཏེ་ཡེ་ཤེས་གཤེགས། །དམ་ཚིག་ང་རྒྱལ་ཀུན་སྤྱོད་བྱ། །འདིས་ནི་སྒྲུབ་པ་མདོར་བསྡུས་ཏེ། །བསོད་ནམས་མཆོག་ནི་གང་ཐོབ་པ། །བདག་དང་སེམས་ཅན་ཐམས་ཅད་ཀྱིས། །རྣམ་པར་
འཇོམས་པ་ཐོབ་པར་ཤོག །འཕགས་པ་རྡོ་རྗེ་རྣམ་པར་འཇོམས་པའི་སྒྲུབ་ཐབས་མདོར་བསྡུས་པ་སློབ་དཔོན་ཙནྡྲ་གོ་མིས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། བཛྲ་བི་དཱ་ར་ཎ་མཎྜལ་བི་དྷིཿ། བོད་སྐད་དུ། རྡོ་རྗེ་རྣམ་པར་འཇོམས་པའི་དཀྱིལ་འཁོར་གྱི་ཆོ་ག །
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །གདུག་པ་འདུལ་མཛད་ཁྲོ་བོ་ཆེ། །རྡོ་རྗེ་ཅན་ལ་ཕྱག་འཚལ་ལོ། །གང་གིས་ལེགས་པར་སྨིན་བྱེད་པའི། །འཁོར་ལོའི་ཆོ་ག་བཤད་པར་བྱ། །སློབ་དཔོན་མཚན་ཉིད་བཟང་ལྡན་པས། །ལེགས་པར་བརྟགས་པའི་སློབ་མ་ལ། །
ཚུལ་བཞིན་བསྙེན་པ་སྔོན་སོང་ནས། །རི་བོ་བཟང་སོགས་ཤིས་པའི་སར། །བསླང་དང་སྦྱང་དང་གཟུང་བ་དང་། །བསྲུང་བའི་ཆོ་ག་ལེགས་བྱས་པས། །ཐོག་མར་བུམ་པའི་བྱ་བ་ལས། །གསེར་རམ་དངུལ་ལམ་ཡང་ན་ཟངས། །ཁམ་ལས་གཉིས་ལྔ་ཉི་ཤུ་ལྔ། །དཀར་པོའི་
རྫས་ཀྱིས་ལེགས་བྱུགས་ལ། །རང་ལྷའི་མཚན་མ་ལྡན་པར་བྱ། །མ་ཉམས་རས་ཀྱིས་མགུལ་དཀྲིས་པ། །དྲི་ཞིམ་ཆུ་ཡིས་བཀང་བ་དང་། །འབྲུ་སྨན་རིན་ཆེན་ལྔར་ལྡན་པ། །བཟང་པོའི་ཤིང་གིས་ཁ་བརྒྱན་ནས། །ཀུ་ཤའི་སྟན་ལ་ཡང་དག་གཞག །ལྷ་ཡི་འཁོར་ལོ་བསྒོམ་པ་དང་། །

73-1-312a

བཟླས་མཐར་མཆོད་ཞུ་བདུད་རྩིར་བྱ། །སློབ་མ་གསུམ་ལ་སྐྱབས་འགྲོ་དང་། །བྱང་ཆུབ་ཏུ་ནི་སེམས་བསྐྱེད་པས། །སྒོ་གསུམ་མི་དགེ་ལས་བཟློག་ཅིང་། །ཀུན་དུ་སྤྱོད་པ་གཙང་ལྡན་པས། །རང་ལྷའི་རྣལ་འབྱོར་བརྩོན་བྱེད་པའི། །དམ་ཚིག་རྗེས་སུ་འཛིན་པ་ལ། །གནས་གསུམ་ཡི་གེ་གསུམ་
གྱུར་པའི། །མཚན་མ་གསུམ་གྱིས་བྱིན་བརླབས་ཏེ། །རྡོ་རྗེ་དང་བཅས་དྲིས་རེག་དང་། །མཆོད་པ་ལྔ་ཡིས་ལེགས་མཆོད་བྱ། །དཀྱིལ་འཁོར་བྱི་དོར་ལེགས་བྱས་པར། །དྲི་དང་མེ་ཏོག་ཚོམ་བུར་བཅས། །བསྐྱེད་དང་གཉིས་མེད་མཆོད་པ་ལ། །བསྟོད་དེ་ནམ་མཁར་གཤེགས་གསོལ་བྱ། །
དྲི་དང་བ་ཡི་ལྕི་བ་ཡིས། །ལེགས་པར་བྱུགས་པའི་སྟེགས་བུ་ལ། །གཙང་མའི་རས་ཀྱི་སྲད་བུ་དང་། །མན་ངག་རིག་པས་ཐིག་བཏབ་སྟེ། །དེར་ནི་ཁ་དོག་ལྔ་ལྡན་པའི། །ཚོན་གྱིས་ཁྲོ་བོའི་འཁོར་ལོ་བྲི། །གྲུ་བཞི་ཀུན་ནས་སྒོ་བཞི་པ། །ཏཱ་ར་ན་བཞིས་རྣམ་པར་བརྒྱན། །ཕྱི་རོལ་རྡོ་རྗེའི་ཕྲེང་བ་དང་། །
འབར་བའི་ཕྲེང་བས་ཡོངས་སུ་བསྐོར། །ནང་དབུས་རྡོ་རྗེ་ཁ་བཞི་པ། །འབར་ལ་རྩིབས་བཅུའི་འཁོར་ལོར་ལྡན། །དེར་ནི་རང་ལྷ་མཚན་མ་རྣམས། །ཇི་ལྟར་མཐོང་བའི་རྗེས་འབྲང་བྲི། །དེར་ཡང་བུམ་པ་དགོད་པ་དང་། །བླ་རེ་མེ་ཏོག་ཕྲེང་མཛེས་པས། །སྣ་ཚོགས་མཆོད་པའི་བཀོད་པར་ལྡན། །དྲི་ཞིམ་བུམ་
པ་གཏོར་མ་བཅས། །སློབ་དཔོན་ཀུན་སྤྱོད་གཙང་ལྡན་པས། །གཙང་མ་ཆུ་ཡིས་ཁྲུས་བྱས་ཏེ། །སར་བའི་གོས་དང་རབ་ལྡན་པས། །བདེ་བའི་སྟན་ལ་ལེགས་འདུག་སྟེ། །མདུན་གནས་འཁོར་ལོ་གཏོད་པ་ཡིས། རྣམ་སྦྱང་དམ་ཚིག་བསྐྱེད་པ་དང་། །ཡེ་ཤེས་གཉིས་མེད་བྱིན་རླབས་དང་། །དབང་
བསྐུར་མཆོད་དང་བསྟོད་བཟླས་བྱ། །དྲི་ཞིམ་ཆུ་ཡིས་ལེགས་བཀྲུས་ཏེ། །བཟང་པོའི་དྲི་ཡིས་ལེགས་བྱུགས་ཤིང་། །སར་བའི་གོས་དང་རྒྱན་ལྡན་པའི། །སློབ་མ་དཀྱིལ་འཁོར་ནང་བཅུག་སྟེ། །ཀུ་ཤའི་སྟན་ལ་ལེགས་བཞག་ནས། །ཐོག་མར་བུམ་པའི་ཆུས་དབང་བསྐུར། །རྡོ་རྗེས་དྲི་ཡི་ཐིག་ལེ་དང་། །
མངོན་པར་བསྔགས་པའི་མེ་ཏོག་ཕྲེང་། །བཀྲ་ཤིས་ཚིགས་བཅད་མགོ་ལ་སྦྱིན། །བསྒོམ་དང་བཟླས་དང་གཏད་པ་དང་། །སྦྱིན་བྱ་བསྒྲུབ་བྱ་སྐུ་དང་གསུང་། །ཐུགས་དང་ཡོན་ཏན་ཕྲིན་ལས་ལ། །འཁྲུལ་འཁོར་སྦྱིན་སྲེག་ཕུར་བུ་དང་། །མནན་པའི་ལས་ལ་དབང་བར་བྱ། །དེ་ནས་མཆོད་དང་

73-1-312b

གཏོར་མ་དང་། །གཤེགས་དང་དཀྱིལ་འཁོར་བསྡུ་བའོ། །ཚུལ་འདིས་སྨིན་བྱས་སློབ་མ་ནི། །ལས་དང་དངོས་གྲུབ་ཀུན་དབང་ཕྱུག །གཞན་ལ་ཕན་བྱེད་བདག་ཉིད་ཆེ། །ལྷ་རིགས་སྔགས་རྣམས་ཀུན་ནོང་འགྱུར། །རྡོ་རྗེ་ཁྲོ་བོའི་དཀྱིལ་འཁོར་དུ། །སློབ་མ་ཡོངས་སུ་སྨིན་བྱེད་པའི། །ཆོ་ག་ལེགས་བཀོད་
བསོད་ནམས་དེས། །ཀུན་གྱིས་བླ་མེད་མཆོག་ཐོབ་ཤོག །རྡོ་རྗེ་རྣམ་པར་འཇོམས་པའི་དཀྱིལ་འཁོར་གྱི་ཆོ་ག་བྲམ་ཟེ་ཛཱ་ཡ་ཝརྨས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། བཛྲ་བི་དཱ་ར་ཎ་སཱ་དྷ་ནཾ་ནཱ་མ། བོད་སྐད་དུ། རྡོ་རྗེ་རྣམ་པར་འཇོམས་པ་ཞེས་བྱ་བའི་སྒྲུབ་
ཐབས། དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །ཆོས་དབྱིངས་ཡེ་ཤེས་རང་བཞིན་གྱིས། །འགྲོ་བའི་གདུག་པ་ཀུན་འདུལ་བའི། །རྡོ་རྗེ་ཅན་ལ་ཕྱག་འཚལ་ཏེ། །དེ་ཡི་སྒྲུབ་ཐབས་བྲི་བར་བྱ། །དཀོན་མཆོག་གསུམ་ལ་སྐྱབས་སོང་ཞིང་། །བྱང་ཆུབ་སེམས་དང་རབ་ལྡན་པས། །དཀྱིལ་
འཁོར་ཞུགས་ཤིང་དབང་བླངས་ཏེ། །རྗེས་སུ་གནང་བ་ཐོབ་པ་དང་། །རི་བོ་བཟང་ཞིང་འཇུག་ངོགས་སོགས། །རྣམ་པར་དབེན་ཞིང་ཉམས་དགའ་བར། །ཀུན་ནས་གཙང་བའི་ཀུན་སྤྱོད་ཀྱིས། །བདེ་བའི་སྟན་ལ་འདུག་པ་དང་། །རང་སྙིང་པད་ཟླར་གནས་པ་ཡི། །ཧཱུཾ་ཡིག་མཐིང་ཤུན་མདོག་ལྟ་བུ། །འོད་
ཟེར་ཕྲེང་བ་འཁྲིགས་པ་ཡིས། །ཕྱོགས་རྣམས་ཀུན་དུ་ཁྱབ་པ་དང་། །རྡོ་རྗེ་ཁྲོ་བོ་འཇིགས་ཆེན་པོ། །སངས་རྒྱས་བྱང་ཆུབ་སེམས་དཔར་བཅས། །ནམ་མཁའ་གང་བར་གསལ་དམིགས་ཏེ། །ཕྱག་འཚལ་ལ་སོགས་བཅུ་གཅིག་བྱ། །དེ་རྗེས་ཕུང་པོ་ལ་སོགས་པའི། །ཆོས་ཀུན་རྣམ་པར་དབེན་
པ་ཡི། །སྟོང་པའི་རང་བཞིན་ལ་གནས་པས། །གསང་སྔགས་བརྗོད་དེ་བརྟན་པར་བྱ། །ནམ་མཁར་གནས་པའི་པཾ་ཡིག་དང་། །ཨ་ལས་པདྨ་ཟླ་བར་གནས། །ཧཱུཾ་ཡིག་འོད་ཟེར་ཕྲེང་འཕྲོས་པས། །ར་བ་ས་གཞི་བླ་རེ་གུར། །དྲ་བ་མེ་ཡིས་ཡོངས་སུ་བསྐོར། །དེ་ནས་ཧཱུཾ་ལས་སྤྲོས་བསྡུས་པས། །
ཁྲོ་བོ་རྡོ་རྗེ་རྩེ་ལྔ་པ། །དེ་ཡོངས་གྱུར་ལས་རང་ལྷའི་གཟུགས། །ཞལ་གཅིག་ཕྱག་གཉིས་ཆར་སྤྲིན་མདོག །གཡས་དང་གཡོན་གྱི་ཕྱག་གཉིས་ཀྱིས། །རབ་འབར་རྡོ་རྗེ་རྩེ་ལྔ་དང་། །དྲིལ་བུ་བསྒྱིངས་བཅས་སྡིགས་མཛུབ་བཅས། །རྡོ་རྗེ་ཕྲེང་བ་རིན་ཆེན་སྦྲུལ། །སྟག་གི་པགས་པས་

73-1-313a

རྣམ་བརྒྱན་པ། །གཡོན་བརྐྱང་པ་ཡི་གོམ་པས་བཞུགས། །ཀུན་ནས་འོད་ཀྱི་ཚོགས་འཕྲོས་པས། །གདུག་པ་མ་ལུས་སྲེག་པར་བསྒོམ། །ལུས་ངག་ཡིད་ཀྱི་གནས་གསུམ་དུ། །པདྨ་ཉི་མ་ཟླ་བ་ལ། །རྡོ་རྗེ་རྩེ་གསུམ་རང་ཡིག་གསུམ། །དཀར་དང་དམར་དང་ནག་པོར་བསྒོམ། །ཧཱུཾ་
ཡིག་ལས་འཕྲོས་འོད་ཟེར་གྱིས། །མདུན་དུ་ཡེ་ཤེས་སྤྱན་དྲངས་ཏེ། །མཆོད་དང་བསྟོད་པ་སྔོན་སོང་བས། །དབང་བསྐུར་དེ་ནས་བཟླས་པ་བརྩམ། །ཨོཾ་ན་མཿཙཎྜ་བཛྲ་ཀྲོ་དྷ་ཡ། ཧུ་ལུ་ཧུ་ལུ་། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུཾ་ཕཊ། དམ་ཚིག་ཡེ་ཤེས་སྙིང་གར་གནས། །
སྤྲོ་དང་བསྡུ་བའི་བསམ་གཏན་ཅན། །ཁྲོ་བོའི་སྐད་གསང་མཐོན་པོ་ཡིས། །སྔགས་མཆོག་ཡང་དག་བཟླས་པར་བྱ། །བཟླས་པའི་མཐར་ནི་མཆོད་པ་དང་། །བསྟོད་དང་ཡི་གེ་བརྒྱ་པ་གདོན། །མདུན་དུ་ཡེ་ཤེས་གཤེགས་གསོལ་ལ། །ཁྲོ་བོའི་ངར་འཛིན་བརྟན་པོས་གནས། །བླ་མའི་མན་ངག་ཇི་
བཞིན་དུ། །སྒྲུབ་ཐབས་ཡང་དག་བཀོད་པ་ལས། །དགེ་བ་ཐོབ་པ་གང་ཡིན་དེས། །འགྲོ་ཀུན་སངས་རྒྱས་ཐོབ་པར་ཤོག །རྡོ་རྗེ་རྣམ་པར་འཇོམས་པ་ཞེས་བྱ་བའི་སྒྲུབ་ཐབས་དཔལ་གཾ་གཱ་དྷ་རས་མཛད་པ་རྫོགས་སོ།།      །།པཎྜི་ཏ་ཆེན་པོ་ཛྙཱ་ན་ཤྲཱི་དང་། ལོ་ཙཱ་བ་ཅོག་གྲུ་རབ་ཞིས་བསྒྱུར་
བའོ། །༄༅༅། །རྒྱ་གར་སྐད་དུ། བཛྲ་བི་དཱ་ར་ཎ་ནཱ་མ་དྷཱ་ར་ཎཱི་སཱ་དྷ་ནཾ། བོད་སྐད་དུ། རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་སྒྲུབ་ཐབས། རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །རང་གི་རང་བཞིན་ཞི་བ་ལས། །གདུག་པ་འདུལ་ཕྱིར་ཁྲོ་བོའི་སྐུ། །མ་རུངས་ཚར་
གཅོད་རྡོ་རྗེ་ཅན། །རྡོ་རྗེ་ཆེ་ལ་མགོས་ཕྱག་འཚལ། །ཇི་ལྟར་བླ་མའི་ཞལ་སྔ་ནས། །ལེགས་རྟོགས་གང་དེ་བྲི་བར་བྱ། །རྡོ་རྗེ་རྣམ་པར་འཇོམས་པ་སྒྲུབ་པར་འདོད་པས་དབེན་ཞིང་ཡིད་དང་མཐུན་པའི་ས་ཕྱོགས་སུ་ཀུན་དུ་སྤྱོད་པའི་གཙང་ཞིང་གཙང་བ་དང་ལྡན་པ་སྟན་བདེ་བར་འདུག་སྟེ། སེམས་ཅན་
ཐམས་ཅད་སྲིད་པའི་སྡུག་བསྔལ་ལས་བསྒྲལ་ལ་རྫོགས་པའི་བྱང་ཆུབ་ཀྱི་བདེ་བ་ལ་འགོད་པའི་བློ་སྔོན་དུ་བཏང་སྟེ་རང་གི་སྙིང་གར་པཾ་ལས་པདྨ་དང་། དེར་ཨ་ལས་བསིལ་བའི་འོད་ཟེར་གྱི་དཀྱིལ་འཁོར་ལ་གནས་པ། ཧཱུཾ་ཡིག་མཐིང་ཤུན་གྱི་མདོག་ལྟ་བུ་བསམ་པར་བྱའོ། །དེ་ལས་རྣམ་

73-1-313b

པར་འཕྲོས་པའི་འོད་ཟེར་གྱིས་སངས་རྒྱས་དང་བྱང་ཆུབ་སེམས་དཔའ་དང་། རྡོ་རྗེ་ཁྲོ་བོའི་དཀྱིལ་འཁོར་མདུན་དུ་དམིགས་ལ། ཡིད་ལས་བྱུང་བའི་མཆོད་པ་རྣམས་ཀྱིས་ཡང་དག་པར་མཆོད་དེ། ཕྱག་འཚལ་བ་ལ་སོགས་པ་བྱའོ། །སངས་རྒྱས་ཀུན་གྱི་སྐུ་གསུང་ཐུགས། །གདུག་པ་ཚར་
གཅོད་ཁྲོ་བོའི་སྐུ། །རྡོ་རྗེ་ཆེན་པོ་འཇིགས་ཆེན་པོ། །རྡོ་རྗེ་འཇོམས་ལ་ཕྱག་འཚལ་ལོ། །ཐོག་མེད་འཁོར་བར་ལོག་པ་ཡི། །རྣམ་རྟོག་དབང་གྱུར་སྒོ་གསུམ་གྱིས། །སྡིག་པ་བགྱིད་ལ་བདག་འགྱོད་ཅིང་། །མགོན་པོའི་སྤྱན་སྔར་རབ་ཏུ་བཤགས། །ཉན་ཐོས་སངས་རྒྱས་རང་སངས་རྒྱས། །སོ་
སོའི་སྐྱེ་བོ་བྱང་ཆུབ་སེམས། །ཀུན་གྱི་དགེ་ལ་དགའ་བ་ཡིས། །བདག་ནི་རྗེས་སུ་ཡི་རང་བགྱིད། །སེམས་ཅན་ཁམས་ནི་མ་ལུས་རྣམས། །སངས་རྒྱས་བདེ་ལ་དགོད་པའི་ཕྱིར། །བདག་ནི་དགེ་ཀུན་ལྟོས་མེད་པར། །བྱང་ཆུབ་ཆེན་པོར་བསྔོ་བར་བགྱི། །འགྲོ་བའི་སྐྱབས་ཆེན་གཅིག་པུ་པ། །སངས་
རྒྱས་ཐེག་པ་མཆོག་གི་མཆོག །ཚོགས་མཆོག་ཕྱིར་མི་ལྡོག་པ་ལ། །བདག་ནི་སྐྱབས་སུ་ཉེ་བར་མཆི། །སྲིད་པའི་རྒྱ་མཚོ་སྡུག་བསྔལ་གྱི། །ཉམ་ཐག་མགོན་མེད་གྱུར་པ་རྣམས། །བླ་མེད་བདེ་ལ་གཞག་པའི་ཕྱིར། །སེམས་མཆོག་ཡང་དག་བསྐྱེད་པར་བགྱི། །ལམ་གང་གིས་ནི་དེར་འགྲོ་བ། །
སྔགས་ཀྱི་ཐེག་པའི་ལམ་འདི་ལ། །དེང་ནས་བྱང་ཆུབ་སྙིང་པོའི་བར། །བདག་ནི་ཚུལ་བཞིན་གནས་པར་བགྱི། །ཞེས་བརྗོད་ལ་དེ་ནས་བྱམས་པ་དང་། སྙིང་རྗེ་དང་། རབ་ཏུ་དགའ་བ་དང་། ཀུན་ལ་བཏང་སྙོམས་བསྒོམ་པར་བྱའོ། །དེའི་རྗེས་ལ་བརྟན་པ་དང་གཡོ་བར་སྣང་བའི་ཆོས་ཐམས་ཅད་
རང་བཞིན་གྱིས་རྣམ་པར་དབེན་པའི་དོན་ཅན་དུ་རིག་པར་བྱ་སྟེ། ཨོཾ་སྭ་བྷཱ་བ་ཤུདྡྷཿསརྦ་དྡྷརྨཿསྭ་བྷཱ་བ་ཤུདྡྷོ྅ཧཾ་ཞེས་པའི་སྔགས་ཀྱིས་བྱིན་གྱིས་བརླབ་པོ། །སྟོང་པར་གནས་པའི་པཾ་ཡིག་དང་། །རཾ་ལས་པདྨ་ཉི་མ་ལ། །ཧཱུཾ་བྱུང་བ་ལས་རྒྱ་གྲམ་གྱི། །རྡོ་རྗེ་ཆེན་པོ་རྣམ་པར་བསྒོམ། །དེར་གནས་
ཧཱུཾ་ལས་འོད་འཕྲོས་པས། །ར་བ་ས་གཞི་གུར་ཡང་བསྒོམ། །དེ་ནས་བྷྲཱུཾ་ལས་གཞལ་ཡས་ཁང་། །ཀུན་ནས་གྲུ་བཞི་སྒོ་བཞི་པ། །རྩིབས་བརྒྱད་འཁོར་ལོའི་ལྟེ་བ་ལ། །རྒྱ་གྲམ་རྡོ་རྗེ་དང་བཅས་བསྒོམ། །དེར་ཡང་ཟླ་བ་ཉི་མ་དང་། །ཧཱུཾ་བྱུང་རྡོ་རྗེ་ཆེ་ལས་འོད། །སྤྲོས་ཤིང་བསྡུས་ལས་ཁྲོ་བོ་ཆེ། །

73-1-314a

ཁྲོ་བོའི་འཁོར་ལོ་རྫོགས་པར་བསྐྱེད། །དབུས་གནས་རྡོ་རྗེའི་ལྟེ་དབུས་སུ། །ཁྲོ་བོ་རྡོ་རྗེ་འཇོམས་ཆེན་པོ། །ཆར་སྤྲིན་སྔོན་པོའི་མདོག་འདྲ་བ། །རྡོ་རྗེ་དྲིལ་བུ་འགྱིང་བཅས་འཛིན། །ཤར་ཕྱོགས་རྡོ་རྗེའི་རྭ་དབུས་སུ། །རྡོ་རྗེ་ཁྲོ་བོ་ཕུར་བུ་ཆེ། །ཨུཏྤལ་སྔོན་པོའི་མདོག་མཚུངས་པ། །ཕྱག་གཡས་
རྡོ་རྗེ་ཕུར་བུ་འཛིན། །ལྷོ་ཡི་ཕྱོགས་སུ་ཁྲོ་བོ་ཆེ། །རྡོ་རྗེ་བེ་ཅོན་སྟང་ཟིལ་མདོག །གཡས་ན་རྡོ་རྗེ་བེ་ཅོན་ཏེ། །རྡོ་རྗེའི་རྭ་དབུས་ལ་གནས་པའོ། །ནུབ་གནས་རྡོ་རྗེའི་རྭ་དབུས་སུ། །རྡོ་རྗེ་ཐོ་བ་ཁྲོ་བོ་ཆེ། །ནམ་མཁའི་མདོག་ཅན་ཕྱག་གཡས་ན། །རྡོ་རྗེ་ཐོ་བ་ཕྱར་བའོ། །བྱང་གནས་རྡོ་རྗེ་ཁྲོ་བོ་ཆེ། །གཏུམ་པོ་
བུང་པའི་མདོག་ལྟ་བུ། །རྡོ་རྗེ་རྒྱ་གྲམ་ཕྱག་གཡས་འཛིན། །རྡོ་རྗེའི་རྭ་དབུས་གནས་པར་བསྒོམ། །ཕྱི་རོལ་རྡོ་རྗེའི་རྩིབས་རྣམས་ལ། །གཞན་གྱིས་མི་ཐུབ་གཤིན་རྗེ་གཤེད། །རྟ་མགྲིན་རྡོ་རྗེ་བདུད་རྩི་འཁྱིལ། །ཨུཏྤལ་ཀུནྡ་ཛ་བ་དང་། །མར་གད་མདོག་ཅན་གཡས་པ་ན། །ཐོད་པ་དབྱིག་པ་པདྨ་དང་། །
རྒྱ་གྲམ་རྡོ་རྗེ་འཕྱར་བ་འཛིན། །ཤར་ནས་གཡས་སྐོར་རིམ་པས་བསྒོམ། །འདོད་པའི་རྒྱལ་པོ་དབྱིག་པ་སྔོ། །མི་གཡོ་སྟོབས་ཆེན་སྐུ་མདོག་གནག །གཡས་རྣམས་རིམ་བཞིན་ལྕགས་ཀྱུ་དང་། །དབྱིག་པ་རལ་གྲི་རྩེ་གསུམ་འཛིན། །བྱང་ཤར་ནས་ནི་ནུབ་བྱང་མཐར། །འདི་ཡང་གཡས་སྐོར་རིམ་པས་
བསྒོམ། །མཁར་གནས་རྡོ་རྗེ་ཧཱུཾ་མཛད་དང་། །ས་འོག་གནོད་མཛེས་རྡོ་རྗེ་ཆེ། །མདོག་ནག་གཡས་ན་རྡོ་རྗེ་འཛིན། །ཁྲོ་བོ་འདི་དག་ཐམས་ཅད་ཀྱང་། །ཕྱག་གཡོན་སྡིགས་མཛུབ་ཞགས་པར་ལྡན། །ཀུན་ཀྱང་གཡོན་བརྐྱང་གོམ་པ་ཡིས། །ཉི་མའི་དཀྱིལ་འཁོར་ལ་གནས་པའོ། །ཤར་སྒོར་རྡོ་རྗེ་
ལྕགས་ཀྱུ་དཀར། །ལྷོར་གནས་རྡོ་རྗེ་ཞགས་པ་སེར། །ནུབ་ཏུ་རྡོ་རྗེ་ལྕགས་སྒྲོག་དམར། །རྡོ་རྗེ་དྲིལ་ལྗང་བྱང་སྒོར་ཏེ། །ལྕགས་ཀྱུ་ཞགས་པ་ལྕགས་སྒྲོག་དང་། །དྲིལ་བུ་འཛིན་ཅིང་གཡོན་བརྐྱང་བས། །ཉི་མའི་སྟེང་ན་གནས་པའོ། །ཐམས་ཅད་མཆེ་གཙིགས་སྤྱན་གསུམ་ཞལ། །དམར་སེར་དབུ་སྐྲ་
གྱེན་བརྫེས་དང་། །སྟག་གི་པགས་པས་སྨད་དཀྲིས་ཤིང་། །སྦྲུལ་དང་རིན་ཆེན་རྒྱན་མཛེས་པ། །རང་སྙིང་ཟླ་བར་ས་བོན་དང་། །གནས་གསུམ་རྡོ་རྗེ་གསུམ་བསྒོམས་ཏེ། །ས་བོན་འོད་ཀྱི་སྦྱོར་བ་ཡིས། །ཡེ་ཤེས་བཀུག་མཆོད་གཉིས་མེད་བྱ། །སྙིང་གར་སྔགས་ཀྱི་ཕྲེང་བཀོད་དེ། །འཁོར་

73-1-314b

ལོར་གནས་པ་ཐམས་ཅད་དང་། །མགྲིན་གཅིག་སྐད་གསང་མཐོན་པོ་ཡིས། །སྔགས་མཆོག་ཡང་དག་བཟླས་པར་བྱ། །ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་ས་ནཱ་པ་ཏ་ཡེ། ཨོཾ་ཧ་ར་ཧ་ར་བཛྲ། མ་ཐ་མ་ཐ་བཛྲ། དྷུ་ན་དྷུ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། དྷ་ར་
དྷ་ར་བཛྲ། དྷཱ་ར་ཡ་དྷཱ་ར་ཡ་བཛྲ། དཱ་རུ་ཎ་དཱ་རུ་ཎ་བཛྲ། ཙྪིནྡ་ཙྪིནྡ་བཛྲ། བྷིནྡ་བྷིནྡ་བཛྲ་ཧཱུཾ་ཕཊ། ན་མ་ཤྩཎ་ཌ་བཛྲ་ཀྲོ་དྷཱ་ཡ་ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུཾ་ཕཊ། འདི་ནི་རྡོ་རྗེ་ཁྲོ་བོ་རྣམས་ཀྱི་ཐུགས་བསྐུལ་ནས། །སྒྲུབ་ལ་བགེགས་མེད་བྱེད་ཅིང་དངོས་
གྲུབ་སྟེར་བའོ། །ཇི་སྲིད་མི་སྐྱོའི་བར་དུ་མངོན་པར་བཟླས་པའི་མཐར། །ཡེ་ཤེས་འཁོར་ལོ་ཕྱུང་ནས་མདུན་གཞག་མཆོད་པ་དང་། །ཡི་གེ་བརྒྱ་པའི་མཐར་ནི་རྡོ་རྗེའི་སྔགས་བརྗོད་དེ། །རང་གནས་གཤེགས་ལ་འཁོར་ལོ་སྙིང་གར་བསྡུ་བར་བྱ། །རྡོ་རྗེ་རྣམ་པར་འཇོམས་པའི་གཟུངས་ཀྱི་སྒྲུབ་
ཐབས་བྲམ་ཟེ་མ་ཎི་བཛྲས་མཛད་པ་རྫོགས་སོ།།      །།པཎྜི་ཏ་ཆེན་པོ་ཛྙཱ་ན་ཤྲཱི་དང་། ལོ་ཙཱ་བ་རབ་ཞི་བཤེས་གཉེན་གྱིས་བསྒྱུར་བའོ། །༄༅༅། །རྒྱ་གར་སྐད་དུ། ཤྲཱི་བཛྲ་བི་དཱ་ར་ཎ་སྟོ་ཏྲ། བོད་སྐད་དུ། དཔལ་རྡོ་རྗེ་རྣམ་པར་འཇོམས་པ་ལ་བསྟོད་པ། དཔལ་རྡོ་རྗེ་རྣམ་
པར་འཇོམས་པ་ལ་ཕྱག་འཚལ་ལོ། །དུས་གསུམ་རྒྱལ་བའི་ཡོན་ཏན་ངང་ཉིད་ལས། །ཐབས་མཁས་ཐུགས་རྗེས་འགྲོ་དོན་མཛད་སྤྲུལ་པ། །གདུག་པ་འདུལ་ཕྱིར་འཇིགས་པའི་ཆ་ལུགས་ཅན། །བཅོམ་ལྡན་རྡོ་རྗེས་འཇོམས་ལ་ཕྱག་འཚལ་ལོ། །གང་གི་རང་བཞིན་ཆགས་སྡང་རྣམ་བྲལ་
ཡང་། །གདུལ་བྱའི་དབང་གིས་ཁྲོ་ལ་ཁྲོ་བ་དང་། །འདོད་ཆགས་ཅན་ལ་ཆགས་ཅན་ལྟར་སྨོས་པ། །བྱང་ཆུབ་མཆོག་གནས་དེ་ལ་ཕྱག་འཚལ་ལོ། །གང་ཞིག་ལས་དང་རྣམ་སྨིན་མཁྱེན་པ་ཡིས། །འགྲོ་བ་ཀུན་དང་ཇི་ལྟར་མཐུན་པ་ཡི། །གསང་སྔགས་རོལ་པ་རབ་ཏུ་སྟོན་མཛད་པ། །བསམ་ཡས་སྤྲུལ་
པ་མངའ་ལ་ཕྱག་འཚལ་ལོ། །གང་ཞིག་སྡང་དང་གདུག་པ་ཚར་གཅད་ཅིང་། །སྡིག་པའི་མཚོན་ཆ་སྣ་ཚོགས་འཛིན་པའི་སྐུ། །ཉོན་མོངས་དུག་ཆེན་རྩད་ནས་གཅོད་མཛད་པའི། །སྦྲུལ་གདུག་རྒྱན་གྱིས་བརྒྱན་ལ་ཕྱག་འཚལ་ལོ། །བསྐལ་པའི་མེ་ལྟར་འབར་བའི་འོད་དབུས་ན། །དཔའ་བོའི་

73-1-315a

སྟང་སྟབས་བརྐྱང་བསྐུམ་ཚུལ་བཞུགས་པ། །སྤྱན་གྱི་སྡང་མིག་ཉི་ཟླ་འབར་བ་ཡིས། །བགེགས་དཔུང་བསྲེག་པར་མཛད་ལ་ཕྱག་འཚལ་ལོ། །དུས་མཐའི་མེ་ལྟར་གཟི་བརྗིད་འབར་བའི་སྐུ། །གློག་སྟོང་འགྱུ་འདྲ་ཁྲོ་གཉེར་མཆེ་བ་གཙིགས། །གསུང་གི་ང་རོ་འབྲུག་སྟོང་བཞིན་
སྒྲོགས་པས། །བགེགས་འདུལ་ཁྲོ་རྒྱལ་གཙོ་ལ་ཕྱག་འཚལ་ལོ། །དཔལ་རྡོ་རྗེ་རྣམ་པར་འཇོམས་པ་ལ་བསྟོད་པ་སློབ་དཔོན་བྲམ་ཟེ་མ་ཎི་བཛྲས་མཛད་པ་རྫོགས་སོ།།      །།པཎྜི་ཏ་བཛྲ་ཤྲཱི་དང་ལོ་ཙཱ་བ་རབ་ཞི་བཤེས་གཉེན་གྱིས་བསྒྱུར་བའོ། །༄༅༅། །རྒྱ་གར་སྐད་
དུ། བཛྲ་བི་དཱ་ར་ཎ་ཀ་ལ་ཤ་བི་དྷིཿ། བོད་སྐད་དུ། རྡོ་རྗེ་རྣམ་པར་འཇོམས་པའི་བུམ་པའི་ཆོ་ག །རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །ཡིད་དུ་འོང་བའི་ས་ཡི་ཆར། །ཀུན་དུ་སྤྱོད་པ་གཙང་ལྡན་པས། །གསེར་རམ་དངུལ་ལམ་ཁམས་གཞན་གྱིས། །བུམ་པ་མཚན་ཉིད་བཟང་ལྡན་པ། །
ལེགས་བཀྲུས་དཀར་པོའི་རྫས་ཀྱིས་བྱུགས། །དྲིས་བདུག་རས་ཀྱིས་མགུལ་པ་དཀྲིས། །མེ་ཏོག་སྲད་བུས་མཛེས་བྱས་པར། །རིན་ཆེན་རྨ་མེད་ཙནྡན་དྲི། །རྒྱུན་འབབ་ཆུ་ཡིས་ལེགས་བཀང་བ། །བཟང་པོའི་ཤིང་གིས་ཁ་བརྒྱན་ཏེ། །ས་དང་ལྕི་བར་བསྲེས་པ་ཡི། །དཀྱིལ་འཁོར་འདབ་བརྒྱད་
པད་དབུས་སུ། །དུར་བའི་སྟན་ལ་ཡང་དག་གཞག །དྲི་ཞིམ་ཆུ་ཡིས་བཀང་བའི་སྣོད། །རྡོ་རྗེ་མེ་ཏོག་ཕྲེང་བར་ལྡན། །རང་ལྷའི་བསམ་གཏན་ལ་གཞོལ་བས། །སྟོང་པའི་སྔགས་ཀྱིས་རྣམ་སྦྱངས་ཏེ། །བྷྲཱུཾ་ལས་རིན་ཆེན་གཞལ་ཡས་ཁང་། །བཾ་བྱུང་འོ་མའི་རྒྱ་མཚོར་ལྡན། །པཾ་པད་ཨ་ལས་ཟླ་
དཀྱིལ་འཁོར། །དེར་གནས་ཧཱུཾ་ཡིག་སྤྲོ་བསྡུ་ལས། །ཁྲོ་བོ་ཁྲོ་མོའི་འཁོར་ལོ་བསྐྱེད། །ཡེ་ཤེས་སྤྱན་དྲངས་མཆོད་པ་དང་། །བསྟོད་དང་གཉིས་སུ་མེད་པར་བྱ། །དབང་བསྐུར་ལར་ཡང་མཆོད་བསྟོད་ནས། །རང་སྙིང་སྔགས་ཀྱི་ཕྲེང་བཀོད་དེ། །བཟླས་དང་བུམ་པར་སྤྲོ་བྱ་བར། །ལན་གྲངས་ཉི་ཤུ་
རྩ་གཅིག་གམ། །ཡང་ན་བརྒྱ་རྩ་བརྒྱད་ལ་སོགས། །ཇི་སྲིད་མངོན་པར་འདོད་པའི་མཐར། །མཆོད་བསྟོད་འདོད་དོན་གསོལ་བ་དང་། །ལྷ་རྣམས་ཡེ་ཤེས་བདུད་རྩི་ཡིས། །རབ་བཀྲུས་གཙང་མར་གྱུར་པ་དང་། །ནད་མེད་བགེགས་རྣམས་འཇོམས་པ་དང་། །དཔལ་དུ་བྱེད་ཅིང་བཀྲ་ཤིས་དང་། །ཕུན་

73-1-315b

སུམ་ཚོགས་མིན་འཇོམས་པར་བྱེད། །རྡོ་རྗེ་རྣམ་པར་འཇོམས་པའི་བུམ་པའི་ཆོ་ག་རྫོགས་སོ།།      །།༄༅༅། །རྒྱ་གར་སྐད་དུ། ཤཱནྟིཾ་ཧོ་མ་བི་དྷིཿ། བོད་སྐད་དུ། ཞི་བའི་སྦྱིན་སྲེག་གི་ཆོ་ག །དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །ཟུག་རྔུའི་ཉེས་པ་དང་བྲལ་བ། །མི་
ཤེས་མཚན་མ་སྤངས་པ་དང་། །མ་རུངས་གདོན་བགེགས་མི་གནས་པར། །དཀར་ཞིང་གཙང་ལ་སྣུམ་པའི་སར། །ཁྲུ་གང་ཀུན་ནས་ཟླུམ་པའི་དབྱིབས། །ཁྲུ་ཕྱེད་ཐུར་དུ་བྲུས་པའི་ཁུང་། །ཁ་ཁྱེར་གྱིས་མཛེས་ཞི་བ་ཡི། །མཚན་མ་དཀར་པོའི་རྫས་ཀྱིས་བྱུག །དཀར་ཞིང་དྲི་ཞིམ་འོ་མ་ཅན། །རེག་ན་
ཟུག་རྔུ་དང་བྲལ་བ། །ཟླ་མདོག་མེ་ཏོག་འབྱུང་བའི་ཤིང་། །ཁུང་དང་རྗེས་མཐུན་དབྱིབས་སུ་བརྩིགས། །མཆོད་པ་བསྲེག་པའི་ཡོ་བྱད་རྣམས། །ལས་དང་རྗེས་མཐུན་ཉེར་བསགས་ཏེ། །མེ་སྦར་མེ་དབུས་རཾ་ལས་ལྷ། །མདོག་དཀར་བགྲང་ཕྲེང་དབྱུ་གུ་དང་། །མི་འཇིགས་སྤྱི་བླུགས་འཛིན་པ་བསྐྱེད། །
ཡེ་ཤེས་མེ་བཀུག་གཉིས་མེད་བསྟིམ། །མཆོད་དང་བསྟོད་དང་བསྲེགས་པའི་མཐར། །སླར་ཡང་མཆོད་བསྟོད་མཉེས་པ་ཡི། །མེ་ལྷ་འབར་བའི་མེ་དབུས་སུ། །རང་ལྷག་ལྷར་བསྐྱེད་ཡེ་ཤེས་བསྟིམ། །དེར་ཡང་མཆོད་དང་བསྟོད་པ་དང་། །བསྲེག་པའི་རྫས་ཀྱིས་མཉེས་པ་དང་། །མཆོད་བསྟོད་
འདོད་དོན་གསོལ་བ་གདབ། །ཡི་གེ་བརྒྱ་པས་ཡོངས་བསྐང་ནས། །གཤེགས་བསྡུ་སླར་ཡང་མེ་ལྷ་ཡི། །མཆོད་བསྲེག་རྫས་ཀྱིས་ཚིམ་བྱས་ལ། །འདོད་དོན་ལས་ཀྱི་གསོལ་གདབ་སྟེ། །གཤེགས་གསོལ་ཉེ་བར་བསྡུ་བར་བྱ། །ཞི་བའི་སྦྱིན་སྲེག་གི་ཆོ་ག་རྫོགས་སོ།།      །།
༄༅༅། །རྒྱ་གར་སྐད་དུ། བ་ལིཾ་བི་དྷི་ནཱ་མ། བོད་སྐད་དུ། གཏོར་མའི་ཆོ་ག་ཞེས་བྱ་བ། དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །ཤ་ཆང་སྒོག་བཙོང་འབྱུང་པོའི་ཟས། །རྣམ་པར་སྤངས་པའི་ཁ་ཟས་ནི། །རིན་ཆེན་སྣོད་དུ་ལེགས་བཤམས་ཏེ། །ཁྲོ་བོའི་སྔགས་ཀྱིས་བགེགས་མེད་
བསང་། །སྟོང་པའི་སྔགས་ཀྱིས་རྣམ་སྦྱང་བ། །བྷྲཱུཾ་གྱུར་ས་ལས་རིན་ཆེན་སྣོད། །དེ་ཉིད་གསུམ་གྱི་ས་ཁ་དོག་དང་། །དྲི་རོ་ཕུན་སུམ་ཚོགས་པ་ལ། །ནམ་མཁའ་མཛོད་ཀྱིས་མངོན་སྤྲུལ་ལ། །བསམ་ཡས་མཆོད་པའི་སྤྲིན་དང་ལྡན། །རང་སྙིང་ས་བོན་འོད་ཟེར་གྱིས། །ཁྲོ་བོ་ཁྲོ་མོའི་འཁོར་ལོ་བསྐོར། །

73-1-316a

སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་རང་རྒྱལ་མཁའ་སྤྱོད་དང་། །ས་སྤྱོད་ས་འོག་སྤྱོད་པ་ཡི། །འགྲོ་བ་རྣམས་བཅས་མདུན་བལྟས་ཏེ། །མཆོད་བསྟོད་འབྱུང་པོ་ཀུན་སྔགས་དང་། །ཚིག་བརྗོད་ནས་ནི་ཚིམ་བྱས་ནས། །འདོད་དོན་སློང་དང་བསྐང་བ་དང་། །མུཿཡིག་སྔགས་
བཅས་གཤེགས་གསོལ་བྱ། །གཏོར་མའི་ཆོ་ག་རྫོགས་སོ།།      །།༄༅༅། །རྒྱ་གར་སྐད་དུ། བཛྲ་བི་དཱ་ར་ཎ་ཀརྨ་ཙ་ཏུཿསཱ་དྷ་ན་བི་དྷིཿ། བོད་སྐད་དུ། རྡོ་རྗེ་རྣམ་པར་འཇོམས་པའི་ལས་བཞི་སྒྲུབ་པའི་ཆོ་ག །རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །གཉིས་མེད་ཡེ་ཤེས་རྡོ་རྗེ་ཅན། །མ་
རུངས་འདུལ་ལ་ཕྱག་འཚལ་ནས། །འབྱུང་བ་བཞི་ལ་བརྟེན་པའི་ལས། །ཚར་གཅད་རྗེས་སུ་གཟུང་བ་བཤད། །ས་ཕྱོགས་གང་དུ་གནོད་པའི་ལས། །སྒྲུབ་པར་འོས་པ་དེར་གནས་ཏེ། །ཚྭ་སྒོ་ཅན་ནས་ས་བླངས་ལ། །ཐབ་ཁུང་མེ་དབྱིབས་ནག་པོས་བྱུག །གནག་དང་འཁྱོལ་དང་དྲི་ང་དང་། །སྲིན་གྱིས་
རྣམ་པར་ཟོས་པ་དང་། །རེ་གནས་ཟུག་རྔུ་བསྐྱེད་པའི་ཤིང་། །ཁུང་དང་རྗེས་མཐུན་དབྱིབས་སུ་བརྩིག །གུ་གུལ་ནག་པོ་ནཱ་རིའི་ཤ །ཁྭ་ཡི་གཤོག་པ་བོང་བུའི་སྦངས། །མཆེ་བ་ཅན་གྱི་རྟུག་པ་དང་། །ཡུངས་ཀར་གདོན་རྣམས་ཚར་གཅོད་བྱེད། །ཏིལ་དང་མེ་ཏོག་ནག་པོ་དང་། །མ་ཤ་ལ་སོགས་འབྲུ་ནག་བཅས། །
དུག་ཁྲག་ཚ་བའི་མར་ཁུ་རྣམས། །སྐྱེས་པའི་ཡན་ལག་ལས་བྱུང་བའི། །སྣོད་དམ་ཡང་ན་ལྕགས་ཀྱི་སྣོད། །ནིམ་པའི་ཤིང་ལོའི་སྣོད་བཞག་ནས། །རྡོ་གཉིས་གཙུབས་ལས་བྱུང་བའམ། །རྔོན་པའི་ཁྱིམ་བླངས་མེ་སྦར་ཏེ། །དེའི་དབུས་རཾ་ལས་དྲག་པོའི་མེ། །ཁྲོ་གཟུགས་འཇིགས་པར་བྱེད་པ་པོ། །མདོག་
ནག་རྣམ་པར་གཙིགས་པའི་ཞལ། །བགྲང་ཕྲེང་མི་འཇིགས་སྦྱིན་པ་དང་། །དབྱུ་གུ་རྩེ་གསུམ་སྤྱི་བླུགས་འཛིན། །ཕྱག་བཞི་འཇིགས་ཆེན་འཇིགས་མཛད་པ། །ར་ཡི་གདན་ལ་གནས་པ་བསྐྱེད། །ཡེ་ཤེས་མེ་ནི་སྤྱན་དྲངས་ཏེ། །དེ་དང་གཉིས་སུ་མེད་བྱས་ལ། །མཆོད་དང་བསྟོད་པས་མཉེས་པར་བྱས། །
ཨོཾ་ཨགྣེ་དེ་ཝ། ཀཱ་ལ་རུ་ཏྲ། མ་ཧཱ་རུ་ཏྲ། སརྦྦ་ཀརྨ་མ་ཧེ་ཤྭ་ར་སརྦ་དུཥྚཱ་ན་མཱ་ར་ཡ་ཧཱུཾ་ཕཊ། སྔགས་བཅས་རྫས་རྣམས་ཚ་བ་ཡི། །མར་ལ་སྦགས་ཏེ་མེ་ལ་དབུལ། །སླར་ཡང་མཆོད་དང་བསྟོད་པ་ཡིས། །མཉེས་པར་བྱས་ལ་མེ་དབུས་སུ། །རང་ལྷ་བསྐྱེད་དང་ཡེ་ཤེས་གཞུག །དེར་ཡང་མཆོད་དང་བསྟོད་བྱས་ཏེ། །

73-1-316b

ཚ་བའི་མར་གྱིས་སྦགས་པའི་རྫས། །སྔགས་བཅས་བསྲེགས་པས་ལྷ་མཉེས་བྱས། །འདིར་ཡང་དེ་བཞིན་མཆོད་པ་དང་། །བསྟོད་པས་མཉེས་བྱས་སྒྲུབ་གསོལ་དང་། །ཡི་གེ་བརྒྱ་པའི་གསང་སྔགས་ཀྱིས། །ཡོངས་སུ་དག་པས་མཉེས་པར་བྱ། །རྡོ་རྗེའི་སྔགས་ཀྱིས་ལྷ་གཤེགས་ཏེ། །སླར་ཡང་མི་དམིགས་
མཆོད་པ་དང་། །བསྲེག་དང་མཆོད་དང་ལས་སྒྲུབ་པར། །གསོལ་བཏབ་ནས་ནི་གཤེགས་གསོལ་བྱ། །འདིས་ནི་སྒྲུབ་ལ་བར་གཅོད་པའི། །བགེགས་མེད་དངོས་གྲུབ་སྦྱིན་པར་བྱེད། །དཔལ་རྡོ་རྗེ་རྣམ་པར་འཇོམས་པའི་ལས་སུ་བྱ་བ་མེ་དང་འབྲེལ་བའོ།།      །།ཐལ་བ་མཚན་ངན་སྣོད་གཞག་པ། །
དེར་ནི་བགེགས་ཀྱི་གཟུགས་བྲིས་ལ། །དཀྱིལ་འཁོར་དུར་ཁྲོད་སོ་ཕག་གིས། །མེ་གཟུགས་བྲིས་པའི་སྟེང་དུ་གཞག །རང་ལྷར་བསྒོམས་པའི་སྙིང་ག་ཡི། །ཡེ་ཤེས་ཡི་གེའི་འོད་ཟེར་གྱིས། །བགེགས་ཀུན་མདུན་གྱི་སྔགས་ལ་བསྟིམ། །སྔགས་འོད་མེ་བཞིན་ཚ་བ་ཡིས། །བསྲེག་པར་བསམ་
ཞིང་བཟླས་པའི་མཐར། །ཡུངས་ཀར་ཡུངས་ནག་སྐེ་ཚེ་དུག །གསང་སྔགས་བཟླས་དང་བཅས་པས་བྲབ། །སྐྱེས་པའི་རྐང་ངམ་སེང་ལྡེང་གི། །ཕུར་བུ་སྔགས་བཅས་སྙིང་གར་བསྣུན། །དེ་མཐར་གཟུགས་བཅས་ཐལ་བ་ལ། །རྣམ་པར་འཐོར་བའི་སྦྱོར་བ་ཡིས། །ཚར་གཅོད་བགེགས་མེད་གྲུབ་
སྦྱིན་བྱེད། །དཔལ་རྡོ་རྗེ་རྣམ་པར་འཇོམས་པའི་ལས་སུ་བྱ་བ་རླུང་དང་འབྲེལ་པས་འཐོར་བའོ།    །བསྲེགས་པའི་ཐལ་བ་ཚྭ་སྒོ་ཅན། །ཤིང་གཅིག་རྩ་བ་འཇུག་ངོགས་ས། །ནིམ་པའི་ཁུ་བས་སྦྲུས་པ་ལས། །བགེགས་གཟུགས་སྙིང་གར་སྔགས་བྲིས་གཞུག །རང་ལྷ་ཡེ་ཤེས་ཡི་གེ་ཡི། །འོད་ཀྱིས་
བགེགས་བཀུག་གཟུགས་ལ་བསྟིམ། །སྔགས་འོད་ཞགས་པས་འཆིང་བ་ཡི། །བསམ་གཏན་ལྡན་པས་རིག་སྔགས་བཟླས། །འཛེག་དང་འཕར་དང་སྙིང་རྗེ་བའི། །ང་རོ་འདོན་པའི་རྟགས་ཐོབ་ནས། །མཆོད་རྟེན་མཚན་མ་གཅིག་པ་ལ། །དུར་ཁྲོད་མ་མོའི་ཁྱིམ་དུ་སྦ། །སྦྱོར་འདིས་སྒྲུབ་ལ་བར་
གཅོད་པ། །བཅིངས་ནས་བགེགས་མེད་དངོས་གྲུབ་སྟེར། །དཔལ་རྡོ་རྗེ་རྣམ་པར་འཇོམས་པའི་ལས་སུ་བྱ་བ་ས་དང་འབྲེལ་པ་མནན་པའོ།    །དབེན་པར་ཚྭ་སྒོ་ཅན་ས་ལ། །དུག་དང་ཁྲག་སྦྱར་ཆུས་སྦགས་པས། །དཀྱིལ་འཁོར་གྲུ་གསུམ་དུག་དང་ཁྲག །རོ་བསྲེགས་སོལ་བས་ནག་པོར་བྱུག །

73-1-317a

དེར་ནི་བུམ་པ་ཁ་དོག་གནག །སྔོན་པོའི་རས་ཀྱིས་མགུལ་དཀྲིས་ཏེ། །གདུག་པའི་ཤིང་གིས་ཁ་བརྒྱན་ངས། །རྒྱུན་བྲལ་ཆུ་ཡིས་ལེགས་བཀང་སྟེ། །དེར་ཡང་མིང་རུས་ཡུངས་ཀར་དང་། །དུག་ཁྲག་གུ་གུལ་སྐེ་ཚེ་གཞུག །རང་ལྷའི་རྣལ་འབྱོར་ལྡན་པ་ཡིས། །བུམ་ནང་ཡཾ་རཾ་བཾ་བྷྲཱུཾ་ལས། །
རླུང་གནས་མེ་སྟེང་ཆུ་དཀྱིལ་འཁོར། །བསྒོམས་ཏེ་རང་སྙིང་ས་བོན་ལས། །བགེགས་བཀུག་འཁོར་ལོའི་ལྟེ་བར་གཞུག །སྔགས་ཀྱི་འོད་ཀྱིས་བསྐུལ་བའི་རླུང་། །རྣམ་པར་གཡོས་པས་མེ་སྦར་ཏེ། །རབ་ཏུ་ཁོལ་བའི་ཆུ་རླབས་དང་། །བསྲེགས་པའི་འཁོར་ལོས་བགེགས་ཀྱི་ལུས། །ཉམ་
ཐག་བྱེད་བསྒོམ་གསང་སྔགས་བཟླས། །སྦྱོར་བ་འདི་ཡིས་ཇི་སྲིད་དུ། །མངོན་པར་འདོད་པ་རྫོགས་པ་དང་། །གང་གི་ལུས་ལ་ཆུས་རེག་པ། །བགེགས་ཀྱི་གནོད་པ་ལས་གྲོལ་འགྱུར། །དཔལ་རྡོ་རྗེ་རྣམ་པར་འཇོམས་པའི་ལས་སུ་བྱ་བ་ཆུ་དང་འབྲེལ་པས་བཀྲུ་བའོ། །རྡོ་རྗེ་ཅན་གྱི་ལས་
གང་གིས། །མ་རུངས་གདོན་བགེགས་ཚར་བཅད་ནས། །འགྲོ་རྣམས་རྗེས་སུ་འཛིན་པའི་ལས། །འདི་ནི་གཞན་ཕན་བྱེད་པའོ། །རྡོ་རྗེ་རྣམ་པར་འཇོམས་པའི་ལས་བཞི་སྒྲུབ་པའི་ཆོ་ག །བྲམ་ཟེ་མ་ཎི་བཛྲས་མཛད་པ་རྫོགས་སོ།།      །།པཎྜི་ཏ་ཆེན་པོ་ཛྙཱ་ན་ཤྲཱི་དང་། ལོ་ཙཱ་བ་རབ་ཞི་བཤེས་
གཉེན་གྱིས་བསྒྱུར་བའོ། །༄༅༅། །རྒྱ་གར་སྐད་དུ། བཛྲ་བི་དཱ་ར་ཎ་ཀརྨྨ་ཙ་ཏུ་སཱ་དྷ་ན་ཧོ་མ་བི་དྷིཿ། བོད་སྐད་དུ། རྡོ་རྗེ་རྣམ་པར་འཇོམས་པའི་ལས་བཞི་སྒྲུབ་པའི་སྦྱིན་སྲེག་གི་ཆོ་ག །རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །ཞེ་སྡང་ཆེན་པོ་ཁྲོ་བོའི་སྐུས། །འགྲོ་
བའི་ཞེ་སྡང་གདུག་པ་འཇོམས། །རྡོ་རྗེ་ཅན་ལ་ཕྱག་འཚལ་ཏེ། །སྦྱིན་སྲེག་ལས་ཀྱི་རིམ་པ་བཤད། །བསྙེན་པས་ལྷ་རྣམས་ཉེ་བར་བྱེད། །སྦྱིན་སྲེག་འདོད་པའི་འབྲས་བུ་སྟེར། །དེ་བས་གང་བསྒྲུབ་འབྲས་ཡོད་པར། །འདོད་པའི་སྦྱིན་སྲེག་ལས་ལ་འབད། །ཞི་བས་ནད་དང་གདོན་
བགེགས་ཞི། །རྒྱས་པས་ཚེ་སྟོབས་ལོངས་སྤྱད་སྤེལ། །དབང་གིས་བདག་གཞན་དབང་དུ་བྱེད། །དྲག་པོས་གདུག་པ་ཚར་གཅོད་པའོ། །བགེགས་མེད་དངོས་གྲུབ་འབྱུང་བ་ཡི། །གནས་སུ་ཞི་སོགས་བརྩམས་པ་དང་། །གང་ན་མ་རུངས་བགེགས་གནས་པ། །དེར་ནི་དྲག་པོ་བྱ་བ་ཉིད། །

73-1-317b

དཀར་བའི་ས་ལས་ཁྲུ་གང་ཚད། །ཟླུམ་པོ་ཐུར་དུ་ཁྲུ་ཕྱེད་པ། །ཞི་བའི་ལས་ལ་ཡང་དག་བསྔགས། །ས་སེར་ས་ལས་གྲུ་བཞིའི་དབྱིབས། །ཁྲུ་དོ་ཟབས་སུ་དེ་ཡི་ཕྱེད། །རྒྱས་པའི་ཐབ་ཏུ་ཤེས་པར་བྱ། །དབང་ལ་དམར་པོའི་ས་ལས་ནི། །ཟླ་གམ་ཁྲུ་གང་ཁྲུ་ཕྱེད་ཐབས། །གནག་པའི་ས་ལ་སོར་ཉི་ཤུ། །ཐབས་
སུ་དེ་ཕྱེད་མངོན་སྤྱོད་ལའོ། །བུད་ཤིང་དྲི་ཞིམ་མེ་ཏོག་མཛེས། །འབྲས་བུ་བཟང་འབྱུང་འོ་མར་ལྡན། །མདོག་དཀར་སེར་དང་དམར་བ་ནི། །རིམ་བཞིན་ཞི་རྒྱས་དབང་ལའོ། །ཤིང་གང་དེ་ལས་བཟློག་པ་སྟེ། །ཁ་དོག་གནག་འཁྱོག་དྲི་ང་བ། །རེག་ན་ཟུག་རྔུ་བསྐྱེད་པ་ནི། །དྲག་ཤུལ་སྤྱོད་ལ་རབ་བསྔགས་
པའོ། །ལས་དང་རྗེས་མཐུན་བུད་ཤིང་རྣམས། །རང་ཐབ་དབྱིབས་དང་མཐུན་པར་བརྩིག །གང་ལ་བུད་ཤིང་བྱ་བའི་ཤིང་། །དེ་ཉིད་ལ་ནི་ཡམ་ཤིང་སྟེ། །རྩེ་མོའི་ཆ་ལས་བྱུང་བ་སྟེ། །སོར་ནི་བཅུ་གཉིས་མཁས་པས་བརྟག །སྔགས་འཆང་ལས་དང་རྗེས་མཐུན་པའི། །གོས་དང་རྒྱན་ལྡན་ཅོད་པན་ལྡན། །
ལས་མཐུན་མཆོད་པར་ལྡན་པ་དང་། །རྫས་དང་ཡོ་བྱད་བཀོད་པར་ལྡན། །བྲམ་ཟེ་ཁྱིམ་བདག་སྨད་འཚོང་དང་། །དུར་ཁྲོད་ཡང་ན་རྔོན་པའི་ཁྱིམ། །གང་སྒྲུབ་ལས་དང་མཐུན་པ་ཡི། །མེ་ནི་མཁས་པས་བླང་བར་བྱ། །ཨོཾ་ཨགྣེ་ཛྭ་ལ་ཛྭ་ལ་ཧཱུཾ། གསང་སྔགས་འདི་ཡིས་མེ་སྦར་ཏེ། །ལས་མཐུན་རིགས་ཀྱི་ས་
བོན་གྱིས། །མར་གྱི་དགང་བླུགས་གསུམ་བྱིན་ལ། །དགེ་དང་མི་དགེའི་མཚན་མ་བརྟག །དབྱིབས་དང་ཁ་དོག་དྲི་དང་སྒྲ། །མི་ཤིས་མཚན་མ་མཐོང་བ་ན། །ཨོཾ་ཨཱཿབིགྷྣཱཾ་ཏ་ཀྲྀཏ་ཧཱུཾ། སྔགས་འདིས་སྲེག་བླུགས་བདུན་བྱིན་པས། །བགེགས་ནི་རྣམ་པར་ཟློག་པར་བྱེད། །བགེགས་མེད་ཤེས་ནས་མ་
ཉམས་པའི། །ཀུ་ཤ་ཁ་ཁྱེར་ཀུན་དུ་དགྲམ། །མེ་དབུས་པཾ་ལས་པདྨ་དང་། །ཨ་ལས་ཉི་མར་རཾ་ཡིག་ལས། །མེ་ལྷ་ལས་མཐུན་ཁ་དོག་ཅན། །ཞལ་གཅིག་ཕྱག་བཞི་བགྲང་ཕྲེང་དང་། །མི་འཇིགས་དབྱིག་གུ་སྤྱི་བླུགས་འཛིན། །ར་ཡི་སྟན་ལ་གནས་པ་བསྐྱེད། །རང་ཉིད་ཡི་གེའི་འོད་ཟེར་གྱིས། །
ཡེ་ཤེས་མེ་ནི་ཉེར་བཀུག་སྟེ། །མདུན་གནས་མཆོད་དང་བསྟོད་མཉེས་པ། །དམ་ཚིག་མེ་དང་གཉིས་མེད་བྱ། །སླར་ཡང་མཆོད་དེ་བསྟོད་པ་ཡིས། །མཉེས་བྱ་དེ་ནས་སྦྱིན་སྲེག་ནི། །འབར་བའི་མེ་ལས་ཡམ་སྲེག་ཤིང་། །ཐོག་མར་མེ་ཡི་སྔགས་ཀྱིས་སྦྱིན། །མར་སྦྱིན་པ་ཡང་དེ་ཉིད་དོ། །དེ་འོག་ཏིལ་

73-1-318a

ལ་སོགས་པ་ཀུན། །རང་རང་སྔགས་དང་འབྲེལ་བས་སོ། །ཨོཾ་ཨེ་གྣེ་ད་བ་ཏ་ཡེ་སྭཱ་ཧཱ། ཨོཾ་སརྦྦ་བཱ་པཾ་ད་ཧ་ན་སརྦྦ་པཱ་པཾ་སྭཱ་ཧཱ། ཨོཾ་བཛྲ་པུཥྚ་ཡེ་སྭཱ་ཧཱ། ཨོཾ་བཛྲ་གྷསྨ་རཱི་ཡ་སྭཱ་ཧཱ། ཨོཾ་མ་ཧཱ་བིརྱཱ་ཡ་སྭཱ་ཧཱ། ཨོཾ་མ་ཧཱ་བ་ལཱ་ཡ་སྭཱ་ཧཱ། རིམ་བཞིན་མེ་དང་ཏིལ་དང་འབྲས། །གྲོ་དང་ནས་དང་སྲན་མ་
སྟེ། ཐུན་མོང་ཐུན་མོང་མ་ཡིན་པའི། །དབྱེ་སྐྱོན་མན་ངག་རིམ་པས་བསྲེག །རྫས་རྣམས་ཇི་ལྟར་འབྱོར་ཕུལ་བས། །སླར་ཡང་མཆོད་དེ་བསྟོད་པར་བྱ། །མེ་ཡི་ལྷ་ནི་གཟི་བརྗིད་ཆེ། །འདོད་དོན་ཐམས་ཅད་སྟེར་བ་པོ། །བདག་དང་གཞན་དོན་མཛད་པ་ཡི། །དྲང་སྲོང་ཆེ་ལ་ཕྱག་འཚལ་བསྟོད། །
འཇིག་རྟེན་མགོན་མཛད་ཚངས་པའི་སྲས། །མེ་ལྷའི་རྒྱལ་པོ་དག་བྱེད་མཆོག །བགེགས་རྣམས་མ་ལུས་སྲེག་མཛད་པ། །འཇིགས་བྱེད་ཆེ་ལ་ཕྱག་འཚལ་བསྟོད། །ཡེ་ཤེས་འོད་ཀྱིས་ཉོན་མོངས་བསྲེག །མངོན་ཤེས་རྫུ་འཕྲུལ་མཐུ་དང་ལྡན། །ཉེས་པའི་སྐྱོན་རྣམས་ཚངས་པར་མཛད། །ཐུགས་རྗེ་ཆེ་ལ་
ཕྱག་འཚལ་བསྟོད། །བདེན་པའི་ཚིག་གིས་མི་སླུ་བ། །འཇིག་རྟེན་སྐྱོང་རྣམས་ཀུན་གྱི་གཙོ། །ཚངས་པར་གྱུར་པའི་ངག་ལྡན་པ། །རྣམ་འདྲེན་ཁྱོད་ལ་ཕྱག་འཚལ་བསྟོད། །དེ་ནས་ཞི་ལ་ཏིལ་དང་མར། །དཱུར་བ་མེ་ཏོག་དཀར་པོ་བསྲེག །རྒྱས་ལ་འབྲུ་གཞན་མེ་ཏོག་སེར། །མངར་བའི་རྫས་ལ་རྣམ་པར་
སྤགས། །དབང་ལ་འབྲུ་དང་མེ་ཏོག་དམར། །ལན་ཚྭར་བཅས་པ་བསྲེག་པར་བྱ། །དྲག་པོ་ཡུངས་ནག་སྐེ་ཚེ་དང་། །མེ་ཏོག་ནག་པོ་ཁྲག་བཅས་བསྲེག །ཞི་ལ་ཤཱནྟིཾ་ཨོཾ་སྭཱ་ཧཱ། །རྒྱས་ལ་པུཥྚིཾ་ཏྲཾ་སྭཱ་ཧཱ། །དབང་ལ་ཧྲཱིཿབཅས་པ་ཤཾ་ལྡན། །དྲག་པོ་ཧཱུཾ་ཕཊ་མཱ་ར་ཡ། །སྔར་བསྟན་མེ་ཡི་སྔགས་ཉིད་ལ། །
རྣམ་པར་སྦྱར་བ་ཇི་སྲིད་དུ། །མངོན་པར་འདོད་པ་དེ་བསྲེགས་པས། །ལས་དེ་ཉེ་བར་འགྲུབ་པར་བྱེད། །དེ་ནས་མེ་ལྷ་འབར་བའི་མེར། །བལྟས་ཏེ་དེ་དབུས་རང་གི་ལྷ། །མངོན་པར་བརྗོད་པའི་རིམ་པ་ཡིས། །བསྐྱེད་པ་ཡེ་ཤེས་གཉིས་མེད་པ། །སྔོན་དུ་མཆོད་དང་བསྟོད་པ་ཡིས། །མཉེས་བྱ་རང་ལྷག་ལྷ་
སྔགས་ཀྱིས། །ཡམ་ཤིང་མར་དབུལ་རྫས་གཞན་རྣམས། །སྔར་བསྟན་སྔགས་ཀྱིས་ཇི་ལྟ་བའོ། །དེ་འོག་མཆོད་དང་བསྟོད་བྱས་ཏེ། །ཁྱད་པར་ལས་ཀྱི་སྦྱིན་སྲེག་ཀྱང་། །སྔར་བཞིན་རང་ལྷའི་སྔགས་ཀྱིས་བྱ། །དེ་ཡང་མཆོད་དང་བསྟོད་པ་དང་། །འདོད་དོན་ལས་ཀྱི་གསོལ་བཏབ་སྟེ། །གཤེགས་

73-1-318b

གསོལ་ཉེ་བར་བསྡུ་བའོ། །དེ་ནས་སླར་ཡང་མེ་དབུས་སུ། །ལྷ་གཟུགས་མངོན་པར་བལྟས་པ་ལ། །གང་དུ་བརྗོད་པ་ཇི་ལྟ་བར། །མཆོད་དང་སྲེག་དབུལ་རྫོགས་པའི་མཐར། །གང་འདོད་ལས་ཀྱི་བསྒྲུབ་གསོལ་ཏེ། །གཤེགས་དང་མི་དམིགས་བལྟ་བར་བྱ། །གང་ཞིག་དེ་བརྟེན་ཐེ་ཚོམ་བྲལ། །
རང་ལྷག་ལྷ་ལ་ལེགས་བསྙེན་པས། །ཚུལ་འདི་ལ་ནི་མངོན་གཞོལ་པ། །འདོད་བྲལ་ཡིད་བཞིན་ནོར་བུར་མཚུངས། །སྒྲུབ་ལ་ཕན་པ་མཆོག་སྟེར་བའི། །ཆོ་ག་ལེགས་བཀོད་བསོད་ནམས་དེས། །མ་ལུས་འགྲོ་བའི་དོན་འབྱུང་བའི། །བླ་མེད་གོ་འཕང་ཐོབ་པར་ཤོག །དཔལ་རྡོ་རྗེ་རྣམ་པར་
འཇོམས་པའི་ལས་བཞི་སྒྲུབ་པའི་སྦྱིན་སྲེག་གི་ཆོ་ག །པཎྜི་ཏ་ཆེན་པོ་ཛྙཱ་ན་ཤྲཱིས་མཛད་པ་རྫོགས་སོ།།      །།པཎྜི་ཏ་ཛྙཱ་ན་ཤྲཱི་དང་། ལོ་ཙཱ་བ་རབ་ཞིས་བསྒྱུར་བའོ། །༄༅༅། །རྒྱ་གར་སྐད་དུ། བཛྲ་བི་དཱ་ར་ཎ་ཀརྨ་ཙ་ཏུཿསཱ་དྷ་ན་ཀ་ལ་ཤ་བི་དྷིཿ། བོད་སྐད་དུ། རྡོ་རྗེ་རྣམ་
པར་འཇོམས་པའི་ལས་བཞི་སྒྲུབ་པའི་བུམ་པའི་ཆོ་ག །དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །གང་ཞིག་རང་ལྷ་ལེགས་བསྙེན་པས། །བུམ་པའི་ཆོ་ག་ཞི་ལ་སོགས། །ལས་བཞི་མངོན་པར་བསྒྲུབ་འདོད་པས། །ལས་མཐུན་གནས་སུ་བརྩམ་པར་བྱ། །ཞི་ལ་དངུལ་དང་
རྒྱས་ལ་གསེར། །དབང་ལ་ཟངས་ཏེ་དྲག་པོ་ལྕགས། །ཡང་ན་ཁམ་པའམ་ཤིང་ཡང་རུང་། །ལས་མཐུན་ཁ་དོག་ཅན་དུ་བྱ། །ལས་མཐུན་རས་ཀྱིས་མགུལ་པ་དཀྲི། །དགེ་བའི་ཤིང་ངམ་གདུག་པ་ཅན། །ལས་དང་མཐུན་པས་ཁ་བརྒྱན་ཏེ། །སུ་རུ་བྷ་ཏི་ཙནྡན་དཀར། །དམར་དང་འབྲུ་སྨན་
རིན་ཆེན་ལྔ། །རྒྱུན་འབབ་ཆུས་བཀང་ལས་གསུམ་ལའོ། །དྲག་པོ་ཨ་གར་ནག་པོ་དང་། །གུ་གུལ་རྒྱུན་བྲལ་ཆུ་ཡིས་དགང་། །རང་ལྷའི་བསམ་གཏན་ལྡན་པ་ཡིས། །བུམ་པར་ལས་མཐུན་ལྷ་བསྐྱེད་དེ། །ཡེ་ཤེས་མཆོད་པ་གཉིས་མེད་བསྟིམ། །སླར་ཡང་མཆོད་དེ་བསྟོད་མཉེས་བྱ། །
སྔགས་བཟླས་ཞི་ལ་དཀར་བ་ཡིས། །འོད་ཟེར་བསིལ་བ་རྣམ་པར་སྤྲོ། །རྒྱས་ལ་བཙོ་མའི་གསེར་འོད་དང་། །དབང་ལ་པདྨ་རཱ་གའི་མདོག །དྲག་པོ་ལ་འོད་ཁ་དོག་ནག །དྲི་ང་གདུང་བ་བསྐྱེད་པ་ཡིས། །གང་རེག་ནད་དང་གདོན་སྡིག་ཞི། །ཚེ་དང་སྟོབས་འཕེལ་ལོངས་སྤྱོད་རྒྱས། །

73-1-319a

དབང་དུ་བྱེད་དང་ཚར་གཅོད་པར། །བསྒོམ་དང་བཟླས་ལ་ཤཱནྟིཾ་དང་། །པུཥྚིཾ་ཝ་ཤཾ་མཱ་ར་ཡ། །སྤེལ་བ་གང་འདོད་ལས་འགྲུབ་བྱེད། །ཇི་སྲིད་མངོན་པར་འདོད་པ་ཡིས། །བཟླས་པ་རྫོགས་མཐར་ལྷ་འོད་ཞུ། །སྔགས་ཀྱི་ཆུ་ཡིས་གང་བཀྲུས་པ། །དེ་ལ་ཞི་སོགས་འདོད་འབྲས་སྟེར། །
དཔལ་རྡོ་རྗེ་རྣམ་པར་འཇོམས་པའི་ལས་བཞི་སྒྲུབ་པའི་བུམ་པའི་ཆོ་ག །པཎྜི་ཏ་ཆེན་པོ་ཛྙཱ་ན་ཤྲཱིས་མཛད་པ་རྫོགས་སོ།།      །།པཎྜི་ཏ་ཛྙཱ་ན་ཤྲཱི་དང་། ལོ་ཙཱ་བ་རབ་ཞིས་བསྒྱུར་བའོ། །༄༅༅། །རྒྱ་གར་སྐད་དུ། བཛྲ་བི་དཱ་ར་ཎ་ཀརྨ་ཙ་ཏུཿསཱ་དྷ་ན་ཙཀྲ་བི་དྷིཿ། བོད་སྐད་དུ། 
རྡོ་རྗེ་རྣམ་པར་འཇོམས་པའི་ལས་བཞི་སྒྲུབ་པའི་འཁོར་ལོའི་ཆོ་ག །དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །རང་ལྷ་ཉེ་བར་བསྙེན་པ་ཡིས། །འཁོར་ལོས་ལས་ཀུན་འགྲུབ་པའི་ཕྱིར། །ཕྱི་རབས་སྒྲུབ་ལ་ཕན་བྱེད་པའི། །འཁོར་ལོའི་མན་ངག་བཤད་པར་བྱ། །ཐོག་མར་ལས་ཀུན་འགྲུབ་
བྱེད་པའི། །འཁོར་ལོའི་མཚན་ཉིད་བརྗོད་བྱ་སྟེ། །རེ་ཁཱ་བཅུ་ཡིས་ཡོངས་བསྐོར་བའི། །རྩིབས་བརྒྱད་འཁོར་ལོ་པད་འདབ་བརྒྱད། །སླར་ཡང་རྩིབས་བརྒྱད་གཉིས་པར་ལྡན། །རྩེ་གསུམ་ཁ་དྲུག་རྡོ་རྗེ་མཛེས། །དེར་སྔགས་དགོད་པའི་རིམ་པ་ནི། །ནང་གི་འཁོར་ལོ་རྩིབས་བརྒྱད་པར། །ན་མཿཙཎྜ་
བཛྲ་ཀྲོ་དྷ་ཡ། ཞེས་པའི་ཡི་གེ་བརྒྱད་ཉིད་དང་། །ཕྱི་རོལ་པདྨའི་འདབ་རྣམས་ལ། །ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཞེས་པའི་སྔགས་ཚིག་བརྒྱད་པོ་དང་། །དེའི་ཕྱི་རོལ་མུ་ཁྱུད་ལ་ཨ་མཱྀ་ཏེ་ཧཱུ་ཕཊ། ཅེས་སྔགས་ཡི་གེ་ལྔ་ཡིས་བསྐོར། །འཁོར་ལོ་གཉིས་པའི་རྩིབས་རྣམས་ལ། །
ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཨོཾ་ཧ་ར་ཧ་ར་བཛྲ། མ་ཐ་མ་ཐ་བཛྲ། བྷུ་ན་བྷུ་ན་བཛྲ། ད་ཧ་ད་ཧ་བཛྲ། ཧ་ན་ཧ་ན་བཛྲ། ཞེས་པའི་སྔགས་རྐང་བརྒྱད་པོ་དང་། ཁ་དྲུག་རྡོ་རྗེའི་རྭ་དབུས་ལ། །པ་ཙ་པ་ཙ་བཛྲ། དྷ་ར་དྷ་ར་བཛྲ། དྷཱ་རཱ་ཡ་དྷཱ་རཱ་ཡ་བཛྲ། 
དཱ་རུ་ཎ་དཱ་རུ་ཎ་བཛྲ། ཙྪིནྡ་ཙྪིནྡ་བཛྲ། བྷིནྡ་བྷིནྡ་བཛྲ་ཧཱུཾ་ཕཊ། སྔགས་ཀྱི་རྐང་པ་དྲུག་ཉིད་དང་། །མུ་ཁྱུད་བཞི་ལ་རིམ་བཞིན་དུ། །ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། སྔགས་རྐང་གསུམ་རིམ་དང་པོ་ལའོ། །ཏདྱ་ཐཱ། ཨོཾ་ཏྲུ་ཊ་ཏྲུ་ཊ། ཏྲོ་ཊ་ཡ་ཏྲོ་ཊ་ཡ། སྥུ་ཊ་སྥུ་ཊ། སྥོ་ཊ་ཡ་

73-1-319b

སྥོ་ཊ་ཡ། གྷུརྞྞ་གྷུརྞྞ། གྷུརྞྞཱ་པ་ཡ་གྷུརྞྞཱ་པ་ཡ། སརྦྦ་སཏྭཱ་ནཾ། བོ་དྷ་ཡ་བོ་དྷ་ཡ། སཾ་བོ་དྷ་ཡ་སཾ་བོ་དྷ་ཡ། བྷྲ་མ་བྷྲ་མ། སཾ་བྷྲ་མ་ཡ་སཾ་བྷྲ་མ་ཡ། སརྦ་བྷཱུ་ཏ་ནཱཾ་ཀུ་ཊ་ཀུ་ཊ། སཾ་ཀུ་ཊ་ཡ་སཾ་ཀུ་ཊ་ཡ། སརྦྦ་ཤ་ཏྲཱུཾ་གྷ་ཊ་གྷ་ཊ། སཾ་གྷ་ཊ་ཡ་སཾ་གྷ་ཊ་ཡ། སརྦ་བིདྱཱ་བཛྲ་བཛྲ། སྥོ་ཊ་བཛྲ་བཛྲ། ཀ་ཊ་
བཛྲ་བཛྲ། མ་ཊ་བཛྲ་བཛྲ། མ་ཐ་བཛྲ་བཛྲ། བཛྲ་ཨཊྚ་ཧཱ་ས་བཛྲ་བཛྲ། ནཱི་ལ་བཛྲ། སུ་བཛྲཱ་ཡ་སྭཱ་ཧཱ། རིམ་གཉིས་ལ་དགོད་གསང་སྔགས་སོ། །ཧེ་ཕུ་ལུ་ནི་རུ་ཕུ་ལུ། གྲ་ཧྞ་ཀུ་ལུ་མི་ལི་ཙུ་ལུ། ཀུ་རུ་ཀུ་ལུ། བཛྲ་བི་ཛཱ་ཡཱ་ཡ་སྭཱ་ཧཱ། ཀཱི་ལི་ཀཱི་ལཱ་ཡ་སྭཱ་ཧཱ། ཀ་ཊ་ཀ་ཊ། མ་ཊ་མ་ཊ། 
ར་ཊ་ར་ཊ། མོ་ཊ་ན་པྲ་མོ་ཊ་ནཱ་ཡ་སྭཱ་ཧཱ། ཙ་ར་ནི་ཙ་ར། ཧ་ར་ཧ་ར། ས་ར་ས་ར། མཱ་ར་ཡ་མཱ་ར་ཡ། བཛྲ་བི་དཱ་ར་ཎཱ་ཡ་སྭཱ་ཧཱ། ཙྪིནྡ་ཙྪིནྡ་བྷིནྡ་བྷིནྡ་མ་ཧཱ་ཀཱི་ལི་ཀཱི་ལཱ་ཡ་སྭཱ་ཧཱ། བནྡྷ་བནྡྷ་ཀྲོ་དྷ་ཀྲོ་དྷ་ཀཱི་ལི་ཀཱི་ལཱ་ཡ་སྭཱ་ཧཱ། ཙུ་རུ་ཙུ་རུ་ཙཎྜ་ཀཱི་ལི་ཀཱི་ལཱ་ཡ་སྭཱ་ཧཱ། ཏྲཱ་ས་ཡ་ཏྲཱ་ས་ཡ་བཛྲ་ཀཱི་ལི་ཀཱི་ལཱ་ཡ་
སྭཱ་ཧཱ། ཧ་ར་ཧ་ར་བཛྲ་དྷ་རཱ་ཡ་སྭཱ་ཧཱ། པྲ་ཧ་ར་པྲ་ཧ་ར་བཛྲ་པྲ་བྷཉྫ་ནཱ་ཡ་སྭཱ་ཧཱ། མ་ཏི་སྠིར་བཛྲ་སུ་ཏི་སྠིར་བཛྲ། པྲ་ཏི་སྠིར་བཛྲ། མ་ཧཱ་བཛྲ། ཨ་པྲ་ཏི་ཧ་ཏ་བཛྲ། ཨ་མོ་གྷ་བཛྲ། རིམ་པ་གསུམ་པ་ལ་དགོད་པའོ། །ཨེ་ཧི་བཛྲ། ཤཱི་གྷཾ་བཛྲ་དྷཱ་རཱ་ཡ་སྭཱ་ཧཱ། དྷ་ར་དྷ་ར། དྷི་རི་དྷི་རི། 
དྷུ་རུ་དྷུ་རུ། སརྦྦ་བཛྲ་ཀུ་ལཾ་ཨཱ་བརྟ་ནཱ་ཡ་སྭཱ་ཧཱ། ཨ་མུ་ཀཾ་མཱ་ར་ཡ་ཕཊ། ན་མཿས་མནྟ་བཛྲ་ཎཱཾ། སརྦྦ་བ་ལཾ་ཨཱ་བརྟ་ཡ་མ་ཧཱ་བ་ལེ་ཀ་ཏ་བེ་ཏ་ཏ་ལ། ཨ་ཙ་ལེ་མཎྜལ་མ་ཡེ། ཨ་ཏི་བཛྲ། མ་ཧཱ་བ་ལེ། བེ་ག་ར་ཎ། ཨ་ཛི་ཏེ་ཛྭ་ལ་ཛྭ་ལ། ཏི་ཊི་ཏི་ཊི་པིངྒ་ལེ། ད་ཧ་ད་ཧ་ཏེ་ཛོ་བ་ཏི། ཏི་ལི་ཏི་ལི་བྷནྡ་
བྷནྡ། མ་ཧཱ་བ་ལེ། བཛྲ་ཨཾ་ཀུ་ཤ་ཛྭ་ལ་ཡེ་སྭཱ་ཧཱ། རིམ་པ་བཞི་པར་བྲི་བའི་སྔགས་རྣམས་སོ། །སྔགས་རྣམས་ཐམས་ཅད་གཡས་སྐོར་ཏེ། །ཞི་རྒྱས་བསྲུང་དང་དབང་བྱས་ལ། །ཡིག་མགོ་ཕྱིར་བསྟན་མངོན་སྤྱོད་ལ། །དེ་ལས་བཟློག་པར་ཤེས་པར་བྱ། །ཞི་ལ་གཙང་མའི་རས་དཀར་
རམ། །དགེ་བའི་ཤིང་གི་ལོ་མ་ལ། །རྒྱས་ལ་རས་གང་སེར་པོ་དང་། །གྲོ་ག་བཟང་པོའི་ཤིང་འདབ་ལ། །དམར་པོའི་རས་སམ་ཤིང་གང་ལ། །མེ་ཏོག་དམར་འབྱུང་འདབ་ཤུན་དབང་། །དེ་ལས་བཟློག་པར་ཤེས་པར་བྱ། །འདབ་ཤུན་རོ་རས་དྲག་པོ་ལའོ། །ཞི་ལ་ཙནྡན་དཀར་འོ་མ། །རྒྱས་

73-1-320a

ལ་གི་ཝང་གུར་གུམ་བཟང་། །དབང་ལ་རྒྱ་སྐྱེགས་དྲག་པོ་ལ། །རོ་སོལ་དུག་དང་ཁྲག་གིས་བྲི། །ལས་མཐུན་རང་ལྷའི་རྣལ་འབྱོར་ལྡན། །འཁོར་ལོ་མཎྜལ་སྟེང་མདུན་གཞག །ལྷ་བསྐྱེད་ཡེ་ཤེས་སྤྱན་དྲངས་བསྟིམ། །མཆོད་བསྟོད་སྔགས་ཡིག་གཉིས་མེད་བལྟ། །སྔགས་བཟླས་
འཁོར་ལོ་ལས་འཕྲོས་འོད། །དཀར་པོས་ནད་སོགས་ཞི་བ་དང་། །སེར་པོས་ཚེ་སྟོབས་ལོངས་སྤྱོད་སྤེལ། །དམར་པོས་གང་རེག་དབང་དུ་བྱེད། །ནག་པོ་རྣམ་པར་ཚར་གཅོད་པའོ། །ཤཱནྟིཾ་ཀུ་རུ་སྭཱ་ཧཱ་ཞི། །རྒྱས་ལ་པུཥྚིང་ཀུ་རུ་ཨོཾ། །ཝ་ཤཾ་མཱ་ན་ཡ་ཧོཿདབང་། །བསད་ལ་མཱ་ར་ཡ་ཧཱུཾ་ཕཊ། །
སྔགས་ཀྱི་མཐར་སྦྱར་བཟླས་པ་དང་། །བྲི་ལ་འཁོར་ལོའི་ལྟ་བར་རོ། །གང་སྒྲུབ་ལས་ཀྱི་འབྲས་སྦྱིན་བྱེད། །དཔལ་རྡོ་རྗེ་རྣམ་པར་འཇོམས་པའི་ལས་བཞིའི་འཁོར་ལོའི་ཆོ་ག །པཎྜི་ཏ་ཆེན་པོ་ཛྙཱ་ན་ཤྲཱིས་མཛད་པ་རྫོགས་སོ།།      །།པཎྜི་ཏ་ཆེན་པོ་ཛྙཱ་ན་ཤྲཱི་དང་། ལོ་ཙཱ་བ་རབ་ཞིས་བསྒྱུར་
བའོ། །༄༅༅། །རྒྱ་གར་སྐད་དུ། བཛྲ་བི་དཱ་ར་ཎ་ཀརྨྨ་བི་དྷི་སཱ་དྷ་ནཾ། བོད་སྐད་དུ། རྡོ་རྗེ་རྣམ་པར་འཇོམས་པའི་ལས་སྒྲུབ་པའི་ཐབས་ཀྱི་ཆོ་ག །རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །རང་ལྷའི་དམིགས་པ་གསལ་བ་དང་། །སྔགས་ཀྱི་བཟླས་པ་མཐར་ཕྱིན་
པས། །རིག་སྔགས་ཐོགས་པ་མེད་པ་དང་། །ཕ་རོལ་སྡེ་ལས་རྒྱལ་བ་དང་། །སྐྲག་དང་མཐུ་སྟོབས་གཞིག་པ་དང་། །རིག་སྔགས་གཅད་དང་མནན་པ་དང་། །ལས་གཞོལ་ཕ་རོལ་ལས་གཞིག་དང་། །གདོན་བརླག་གདོན་ལས་གྲོལ་བ་དང་། །འབྱུང་པོ་དགུག་དང་མནན་པ་དང་། །ལས་
རྣམས་མ་གྲུབ་སྤོགས་པ་དང་། །གྲུབ་པའི་འབྲས་བུ་མཐར་དབྱུང་དང་། །འདོད་འབྲས་དངོས་གྲུབ་བསྒྲུབ་པ་དང་། །བསྲུང་དང་ཞི་དང་རྒྱས་པ་དང་། །རེངས་དང་རྨུགས་པར་བྱེད་པ་ཡི། །ཐུན་མོང་ཁྱད་པར་བདག་ཉིད་ཀྱི། །ཆོ་ག་ཉི་ཤུའི་སྦྱོར་བ་རྣམས། །ཇི་ལྟར་བླ་མའི་མན་ངག་ལས། །
རྟོགས་པའི་རིམ་པ་གསལ་བར་བྱ། །དེ་ལ་ལས་གང་སྒྲུབ་ཀྱང་ཐོག་མ་ཉིད་དུ་རང་གི་རིག་སྔགས་ཀྱི་མཐུ་ཐོགས་པ་མེད་པར་བྱ་བ་ལས། དེའི་རིམ་པ་ནི་འདི་ཡིན་ཏེ། དབེན་ཞིང་རབ་ཏུ་ཤིས་པའི་གནས་སུ་མཎྜལ་གྱི་དབུས་སུ་ཐབ་ཁུང་བྲུས་ཏེ། དེར་དྲི་བཟང་པོ་དང་ལྡན་པའི་བུད་ཤིང་

73-1-320b

བརྩིག་ལ། སྒྲུབ་པ་པོའི་ཁྱིམ་ནས་མེ་བླངས་ཏེ་སྦར་བའི་དབུས་སུ་སྒྲུབ་ཐབས་ནས་འབྱུང་བའི་རིམ་པས་རང་གི་ལྷ་གསལ་བར་དམིགས་ལ། དེ་ལ་མཆོད་པ་དང་བསྟོད་པ་སྔོན་དུ་སོང་བའི་མར་གྱི་སྲེག་བླུགས་ཕུལ་ཏེ། དེ་ནས་གཞན་དུ་ལོངས་མ་སྤྱད་པའི་མེ་ཏོག་སྔོན་པོ་དཀར་གསུམ་དང་མངར་
གསུམ་གྱིས་རྣམ་པར་སྦགས་ལ། གང་ལ་བསྙེན་པ་བྱས་པའི་སྔགས་ཀྱིས་ཐབ་ཏུ་དབུལ་ཞིང་བསྲེག་པར་བྱའོ། །ཇི་སྲིད་མངོན་པར་འདོད་པའི་སྦྱིན་སྲེག་གི་མཐར་རིག་སྔགས་ཀྱི་མཐུ་ཐོགས་པ་མེད་པའི་དོན་གསོལ་ནས། ཡི་གེ་བརྒྱ་པ་མུཿའི་མཐའ་ཅན་གྱིས་གཤེགས་ཤིང་བསྡུའོ། །རིམ་པ་འདིས་
བསྙེན་པ་ཇི་ཙམ་དུ་བྱས་པའི་གྲངས་ཀྱི་བཅུའི་ཆའི་སྦྱིན་སྲེག་ཡོངས་སུ་རྫོགས་པར་བྱས་ན་རིག་སྔགས་ཀྱི་ལས་གང་སྒྲུབ་ཀྱང་མཐུ་ཐོགས་པ་མེད་པར་འགྱུར་རོ། །གཞན་ཡང་དེའི་སྦྱོར་བ་ལ། །མེ་དབུས་བདག་གི་ལྷ་དམིགས་ཏེ། །སྔགས་བཅས་མར་ལ་བསྙུགས་པ་ཡི། །དཱུར་བ་བསྲེགས་པ་ཁྲི་
ཕྲག་གིས། །གང་ལ་བསྙེན་པའི་སྔགས་ཀྱི་ལས། །ཐོགས་པ་མེད་པར་བྱེད་པའོ། །འཇུག་དོགས་བྱེ་མའི་མཆོད་རྟེན་འབུམ། །སྔགས་བཅས་བགེགས་སྒྲིབ་ཞི་བ་ཡིས། །སྒྲུབ་པོས་གང་གི་ལས་སྒྲུབ་པའི། །རིག་སྔགས་ཐོགས་པ་མེད་པར་བྱེད། །ཕ་རོལ་གྱི་དམག་དཔུང་ལས་རྒྱལ་བར་འདོད་
ན་ལྷ་ཆེན་པོ་ལ་ཕུལ་བའི་རྒྱལ་མཚན་གྱི་རས་སམ། འགེགས་ནས་ཤི་བའི་རོ་ལས་བཤུས་པའི་རས་ལ་དུག་དང་ཁྲག་དང་དུར་ཁྲོད་ཀྱི་སོལ་བས་རེ་ཁཱ་བཅུ་ཡོངས་སུ་བསྐོར་བའི་འཁོར་ལོ་རྩིབས་བརྒྱད་པ་ཕྱི་རོལ་དུ་པདྨ་འདབ་མ་བརྒྱད་པ་དང་ལྡན་པ། དེའི་ཕྱི་རོལ་དུ་སླར་ཡང་འཁོར་ལོ་རྩིབས་
བརྒྱད་པ་ཁ་དྲུག་པ་རྡོ་རྗེ་དང་བཅས་པ་ལ་བླ་མའི་མན་ངག་རྣམ་པར་རིག་པས་སྔགས་ཀྱི་ཡི་གེ་རྣམས་ཡང་དག་པར་བཀོད་པའི་ལྟེ་བར་ཆེ་གེ་མོའི་དམག་དཔུང་སྟམྦྷ་ཡ་ནན། ཞེས་པའི་བསྐུལ་ཚིག་དང་བཅས་པ་བྲིས་ཏེ། རང་གི་ལྷའི་རྣལ་འབྱོར་བྱས་པའི་མདུན་དུ་ལྷག་པའི་ལྷ་གསལ་བར་དམིགས་ནས་
དེ་ལས་རྣམ་པར་སྤྲོས་པའི་སྤྲུལ་པའི་ཕོ་ཉས་ཕ་རོལ་གྱི་དམག་དཔུང་སྟོང་གྲོགས་ཀྱི་ལྷ་དང་བཅས་པ་བཀུག་ཅིང་འཁོར་ལོའི་ལྟེ་བར་བསྟིམས་ལ། དམིགས་པས་སྔགས་ཀྱི་བཟླས་པ་རྫོགས་པ་དང་། འཁོར་ལོ་ཐོད་པ་ཁ་སྦྱར་དུ་བཅུག་སྟེ། དབང་ཆེན་དང་རི་བོ་ལ་གནས་པའི་སྣ་ཚོགས་རྡོ་

73-1-321a

རྗེས་རྒྱས་བཏབ་ནས་གང་དུ་གཡུལ་འགྱེད་པའི་གནས་དེར་སྦས་པས་ཐམས་ཅད་དུ་རང་གི་སྡེ་རྣམས་ཕ་རོལ་ལས་རྒྱལ་བར་བྱེད་དོ།    །ཡང་ཕ་རོལ་དང་རྩོད་པ་ལས་རྒྱལ་བར་འདོད་པས་སྔར་བསྟན་པའི་འཁོར་ལོའི་ལྟེ་བར་ཆེ་གེ་མོའི་ངག་སྟམྦྷ་ཡ་ནན་ཞེས་པ་དང་བཅས་པ་བྲིས་ནས་རང་
ལྷའི་རྣལ་འབྱོར་དང་མདུན་དུ་ལྷག་པའི་ལྷ་གསལ་བར་དམིགས་ཏེ། དེ་ལས་སྤྲུལ་པའི་ཕོ་ཉའི་ཚོགས་ཀྱིས་ཕ་རོལ་གྱི་ངག་གི་སྟོབས་ཐམས་ཅད་བཀུག་ཅིང་འཁོར་ལོའི་ལྟེ་བར་བསྟིམ་པ་དང་། གྲོག་མཁར་གྱི་ས་ལ་གཟུགས་བརྙན་བྱས་པའི་སྙིང་གར་བཅུག་ནས་དེ་ལའང་བསྒྲུབ་བྱའི་རྣམ་པར་
ཤེས་པ་བཅུག་སྟེ། དེ་ནས་སྔགས་དང་བཅས་པའི་སེང་ལྡེང་གི་ཚེར་མ་དུག་གི་ཆུ་ལ་སྦགས་པ་ལྕེ་ལ་བསྣུན་པ་དང་། མཐར་ཐོད་པ་ཁ་སྦྱར་དུ་བཅུག་ནས་རིག་སྔགས་མནན་པའི་སྦྱོར་བ་བྱས་ན་ཕ་རོལ་དང་རྩོད་པ་ལས་རྒྱལ་བར་བྱེད་དོ།    །འབྱུང་པོའི་གདོན་སྐྲག་པར་བྱ་བར་འདོད་པས་སྔར་བསྟན་པའི་
འཁོར་ལོའི་ལྟེ་བར་སྐྲག་ཅིང་ཚར་གཅོད་པའི་འབྱུང་པོའི་མིང་བྲིས་ནས་གྲོག་མཁར་གྱི་ས་ལས་བྱས་པའི་གཟུགས་བརྙན་གྱི་སྙིང་གར་བཅུག་སྟེ་རང་ལྷའི་རྣལ་འབྱོར་ལ་གནས་པའི་མདུན་དུ་ལྷག་པའི་ལྷ་གསལ་བར་དམིགས་ཤིང་། དེ་ལས་རྣམ་པར་སྤྲོས་པའི་ཕོ་ཉའི་ཚོགས་ཀྱིས་བཀུག་ཅིང་
བསྟིམ་པ་དང་། དེ་ནས་སྔགས་བརྗོད་པ་དང་བཅས་པའི་ཡུངས་ཀར་གྱིས་བྲབ་པའི་མཐར་དུག་དང་ཁྲག་དང་གུ་གུལ་དང་བྱི་ལའི་རིལ་མ་དང་ཁྱིའི་རྟུག་པ་སྦྱར་བའི་བདུག་པས་བདུགས་ན་རྣམ་པར་སྐྲག་ཅིང་ཚར་གཅོད་པར་བྱེད་དོ།    །ཕ་རོལ་གྱི་མཐུ་སྟོབས་གཞིལ་བར་འདོད་ན་སྔར་བསྟན་པའི་
འཁོར་ལོའི་ལྟེ་བར་གང་གི་མཐུ་སྟོབས་གཞིལ་བར་འདོད་པ་དེའི་མིང་བསྐུལ་ཚིག་དང་བཅས་པ་བྲིས་ནས་རང་ལྷའི་རྣལ་འབྱོར་ལ་གནས་པའི་མདུན་དུ་ལྷག་པའི་ལྷར་དམིགས་པ་དེ་ལས་སྤྲོས་པའི་ཕོ་ཉ་རྣམས་ཀྱིས་ཕ་རོལ་གྱི་སྦྱོར་བ་ལས་བྱུང་བའི་མཐུ་སྟོབས་བཀུག་ནས་འཁོར་ལོའི་ལྟེ་བར་བསྟིམས་
ལ་དམིགས་ཏེ། སྔགས་ཀྱི་བཟླས་པ་བྱས་པའི་མཐར་ཐོད་པ་ཁ་སྦྱར་དུ་བཅུག་ནས། དབང་ཆེན་རི་རབ་ལ་གནས་པའི་སྣ་ཚོགས་རྡོ་རྗེས་རྒྱས་བཏབ་པ་སྦྱོར་བ་པོའི་ཐེམ་འོག་ཏུ་སྦས་ན་ཕ་རོལ་གྱི་སྦྱོར་བ་ལས་བྱུང་བའི་མཐུ་སྟོབས་ཐམས་ཅད་འཇིལ་བར་བྱེད་དོ།    །གཞན་གྱི་རིག་སྔགས་གཅད་

73-1-321b

པོར་འདོད་པས་སྔར་བསྟན་པའི་འཁོར་ལོའི་ལྟེ་བར་ཆེ་གེ་མོའི་རིག་སྔགས་ཙྪིནྡ་ཙྪིནྡ་ཞེས་པའི་སྤེལ་ཚིག་དང་བཅས་པ་བྲིས་ལ་རང་ལྷའི་རྣལ་འབྱོར་དང་། མདུན་དུ་ལྷག་པའི་ལྷ་དམིགས་ཏེ། དེ་ལས་སྤྲོས་པའི་ཕོ་ཉའི་ཚོགས་ཀྱིས་ཕ་རོལ་གྱི་རིག་སྔགས་ཀྱི་སྦྱོར་བ་ལས་བྱུང་བའི་མཐུ་
ཐམས་ཅད་འཁོར་ལོའི་ལྟེ་བར་བསྡུས་པ་དང་། རང་གི་རིག་པའི་མཐུ་ལས་བྱུང་བའི་མཚོན་ཆ་དང་མེའི་ཚོགས་ཀྱིས་དུམ་བུར་བྱས་ཤིང་བསྲེག་པ་ལ་དམིགས་ནས་སྔགས་བཟླས་སོ། །དེ་ནས་འཁོར་ལོ་དུམ་བུར་གཏུབས་ནས་སྦྱིན་སྲེག་བྱས་པའི་ཐལ་བ་རླུང་ལ་བསྐུར་ན་གཞན་གྱི་རིག་
སྔགས་ཀྱི་ལས་ཐམས་ཅད་གཅོད་པར་བྱེད་དོ།    །ཕ་རོལ་གྱི་རིག་སྔགས་མནན་པར་འདོད་ན་སྔར་བསྟན་པའི་འཁོར་ལོའི་ལྟེ་བར་ཆེ་གེ་མོའི་རིག་སྔགས་སྟམྦྷ་ཡ་ནན་ཞེས་པའི་སྤེལ་ཚིག་བཀོད་པ་བྲིས་ལ། རང་ལྷའི་རྣལ་འབྱོར་ལ་གནས་པའི་མདུན་དུ་ལྷག་པའི་ལྷར་དམིགས་ཤིང་དེ་ལས་སྤྲོས་
པའི་ཕོ་ཉའི་ཚོགས་ཀྱིས་ཕ་རོལ་གྱི་རིག་སྔགས་ཀྱི་མཐུ་ཐམས་ཅད་འཁོར་ལོའི་ལྟེ་བར་བསྡུས་པ་དང་། རང་གི་སྔགས་ལས་བྱུང་བའི་དབང་ཆེན་ལ་གནས་པའི་རི་བོ་རྡོ་རྗེ་དང་བཅས་པས་མནན་པར་བསྒོམ་ཞིང་སྔགས་བཟླས་ལ། མཐར་ཐོད་པ་ཁ་སྦྱར་དུ་བཅུག་སྟེ་དབང་ཆེན་ལ་སོགས་པའི་
རྒྱས་བཏབ་ནས་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་གྱི་མཆོད་རྟེན་གྱི་འོག་ཏུ་མནན་ན་ཕ་རོལ་གྱི་རིག་སྔགས་མནན་པར་འགྱུར་རོ།    །གལ་ཏེ་རང་གི་མི་དགེ་བའི་ལས་ཐམས་ཅད་འཇོམས་པར་འདོད་ན་རིན་པོ་ཆེའི་སྣོད་དུ་ཙནྡན་གྱི་སོལ་བ་ལ་མེ་བུས་ཏེ། རང་ལྷའི་རྣལ་འབྱོར་ལ་
གནས་པའི་མདུན་དུ་ཏིལ་གྱི་སྣོད་གཞག་ལ་སྙིང་གནས་སྤྲོས་པའི་འོད་ཀྱིས་ལྷག་པའི་ལྷ་མདུན་དུ་སྤྱན་དྲངས་ནས། དེ་ལས་སྤྲོས་པའི་འོད་ཟེར་གྱིས་བདག་གི་ལུས་ཁྱབ་པར་མི་དགེ་བའི་ལས་ཀྱིས་བསགས་པའི་དྲི་མ་རྣམས་སྙིང་གར་འདུས་ནས་མི་སྡུག་པའི་གཟུགས་ཅན་དུ་གྱུར་པ་སྣའི་བུ་གནས་
འཐོན་ཏེ། ཏིལ་ལ་ཐིམ་པར་བསམས་ལ་སྔགས་བརྗོད་པ་དང་བཅས་པ་བསྲེགས་པའི་མཐར་མདུན་གྱི་ལྷའི་ལུས་ལས་ཡེ་ཤེས་ཀྱི་བདུད་རྩི་བབས་པས་བདག་ཉིད་ཀྱི་ལུས་ཀུན་དུ་གང་བར་བསྒོམས་ལ། ཡི་གེ་བརྒྱ་པ་ཅི་ནུས་བརྗོད་ནས་གཤེགས་པའོ། །འདིས་ནི་མི་དགེ་བའི་ལས་ཐམས་

73-1-322a

ཅད་བཅོམ་སྟེ་འབྲས་བུ་མི་འབྱིན་པར་བྱེད་དོ།    །ཡང་གཞན་གྱི་མི་དགེ་བའི་ལས་འཇིག་པར་འདོད་ན་དེའི་རིམ་པ་འདི་ཡིན་ཏེ། དབེན་ཞིང་ཉམས་དགའ་བའི་ས་ཕྱོགས་སུ་ཞི་བའི་ལས་དང་མཐུན་པའི་ཐབ་ཁུང་དུ་བུད་ཤིང་བརྩིག་སྟེ། རང་ལྷའི་རྣལ་འབྱོར་ལ་གནས་པས་དེར་མེ་
སྦར་བའི་དབུས་སུ་ལྷག་པའི་ལྷ་ལ་ཀུན་ནས་དཀར་བའི་ཁ་དོག་ཅན་དུ་དམིགས་ལ། དེའི་ལུས་ལ་དཀར་ཞིང་བསིལ་བའི་འོད་ཟེར་བྱུང་བས་ཕ་རོལ་པོའི་སྡིག་པ་ཐམས་ཅད་འཇིག་པར་དམིགས་ནས་སྔགས་དང་བཅས་པའི་ཏིལ་གྱི་སྦྱིན་སྲེག་བྱས་པའི་མཐར་མཆོད་བསྟོད་དང་ཡི་གེ་བརྒྱ་པ་བརྗོད་ལ་
གཤེགས་སུ་གསོལ་དེ་ལྟར་ཕ་རོལ་པོ་ལ་དམིགས་ནས་ཡང་དང་ཡང་དུ་བྱས་ན་དེའི་ལས་ཐམས་ཅད་ངེས་པར་འཇིག་པར་བྱེད་དོ།    །ཡང་ལྷ་ལ་སོགས་པའི་གདོན་ཐམས་ཅད་རླག་པར་བྱེད་འདོད་པས་སྔར་བསྟན་པའི་འཁོར་ལོའི་ལྟེ་བར་གང་དག་བརླག་པར་བྱ་བའི་གདོན་གྱི་མིང་སྤེལ་ཚིག་
དང་བཅས་པ་བྲིས་ནས་གྲོག་མཁར་དང་ཚྭ་སྒོ་ཅན་དང་འཇུག་ངོགས་དང་ཤིང་རྐང་གཅིག་གི་ས་དུར་ཁྲོད་ཀྱི་ཐལ་བ་དང་ལྷན་ཅིག་སྦྲུས་པ་ལས་གཟུགས་བརྙན་བྱས་པའི་སྙིང་གར་བཅུག་སྟེ། རང་ལྷའི་རྣལ་འབྱོར་དང་མདུན་དུ་ལྷག་པའི་ལྷ་གསལ་བར་དམིགས་ནས། རྣམ་པར་སྤྲོས་པའི་ཕོ་
ཉའི་ཚོགས་ཀྱིས་བཀུག་ཅིང་བཅུག་སྟེ། འཚེ་ཞིང་དུམ་བུར་གཏུབ་པ་དང་བསྲེག་ཅིང་ཐལ་བར་བྱེད་པ་ལ་དམིགས་ནས་སྔགས་བརྗོད་པ་དང་བཅས་པའི་ཡུངས་ཀར་གྱིས་བྲབས་པའི་མཐར་སྦྱིན་སྲེག་བྱས་ཏེ། ཐལ་བ་རླུང་ལ་ཕྱར་ན་གང་ལ་དམིགས་པའི་གདོན་དེ་རླག་པར་བྱེད་པ་ལ་ཐེ་ཚོམ་མེད་དོ།    །
གལ་ཏེ་གཟའ་ལ་སོགས་པའི་གདོན་གྱིས་བཟུང་བའི་གནོད་པ་ཐམས་ཅད་ལས་ཐར་བར་འདོད་ན་གཙང་ཞིང་ཉམས་དགའ་བའི་ས་ཕྱོགས་སུ་མཎྜལ་བྱས་ཏེ། དེར་བུམ་པ་གཙང་མའི་དྲིའི་ཆུ་ལ་སོགས་པ་ཉེ་བར་མཁོ་བའི་ཡོ་བྱད་དང་བཅས་པ་གཞག་སྟེ། རང་ལྷའི་རྣལ་འབྱོར་བྱས་པས་བུམ་པའི་
ནང་དུའང་ལྷག་པའི་ལྷ་གསལ་བར་དམིགས་ལ་གཟུངས་ཀྱི་བཟླས་པ་རྫོགས་པའི་མཐར་ཆུའི་ངོ་བོར་བསམས་པས་ལུས་བཀྲུས་ཏེ། སྔགས་ཀྱིས་མངོན་པར་བསྔགས་པའི་ས་རྫ་ནའི་བདུག་པ་བྱིན་ན་གདོན་གྱིས་བཟུང་བ་ལས་ཐར་བར་འགྱུར་རོ།    །འབྱུང་པོ་དགུག་པར་འདོད་ན་སྨད་འཚོང་

73-1-322b

གི་རས་ལ་རྒྱ་སྐྱེགས་ཀྱི་ཁུ་བས་སྔར་བསྟན་པའི་འཁོར་ལོའི་ལྟེ་བར་ནུ་ཏཱ་ཨཱ་ཀཱཪྵ་ཡ་ཛཿཞེས་པའི་སྤེལ་ཚིག་དང་བཅས་པ་བྲིས་ནས་གྲོག་མཁར་ལ་སོགས་པའི་ས་ལས་བྱས་པའི་གཟུགས་བརྙན་གྱི་སྙིང་གར་བཅུག་སྟེ། མཎྜལ་གྱི་སྟེང་དུ་བྲམ་ཟེའི་ཐོད་པར་གཞག་ལ། རང་ལྷའི་རྣལ་འབྱོར་དུ་
གནས་པའི་མདུན་དུ་ལྷག་པའི་ལྷ་གསལ་བར་དམིགས་ཏེ། དེ་ལས་སྤྲོས་པའི་ཕོ་ཉས་བཀུག་ཅིང་གཞུག་པའང་བྱས་ཏེ། སྔགས་ཀྱི་མཐར་འབྱུང་པོ་ཨཱ་ཀཱཪྵ་ཡ་ཛཿཞེས་པ་བཟླས་ཤིང་། འབྲས་ཆན་དང་འབྲུའི་ཐུག་པ་དང་ལ་ཕུག་ལ་སོགས་པ་འབྱུང་པོའི་གཏོར་མའི་ཉེ་བར་སྦྱོར་བ་བྱས་ན་འབྱུང་
པོ་ཞུགས་ནས་བདག་གིས་ལས་ཅི་བྱ་ཟེར་བ་འབྱུང་སྟེ། འབྱུང་པོ་དགུག་པའི་ཆོ་གའོ།    །དེ་ནས་རིག་སྔགས་ཀྱི་ལས་ཐམས་ཅད་བྱེད་དུ་འཇུག་པར་མངག་པ་ནི། སྔར་བསྟན་པའི་གཏོར་མ་དུས་གསུམ་དུ་སྦྱིན་ཞིང་། བྷཱུ་ཏ་ཝ་ཤཾ་མཱ་ན་ཡ་ཞེས་པའི་སྤེལ་ཚིག་དང་བཅས་པའི་སྔགས་བཟླས་
ཏེ། བྲམ་ཟེ་མོ་གཙང་མའི་ཟླ་མཚན་གྱིས་བསྒོས་པའི་རས་དང་ས་རྫ་ནའི་བདུག་པ་བྱིན་ནས། མངོན་པར་བསྔགས་པའི་ཙནྡན་དམར་པོའི་ཐིག་ལེ་དཔྲལ་བར་བྱས་ན་ཅི་བསྒོ་བ་ཉན་ཅིང་མངག་གཞུག་གི་ལས་བྱེད་པར་འགྱུར་རོ། །དེ་ལྟར་དབང་དུ་གྱུར་པ་དེ་རིག་སྔགས་ཀྱི་ལས་གང་
བསྔགས་ཀྱང་མྱུར་དུ་གྲུབ་པའི་གྲོགས་བྱེད་དོ།    །གལ་ཏེ་ལས་མ་གྲུབ་ན་སྤོགས་པའི་ཆོ་གས་གྲུབ་པར་བྱེད་པ་ནི་རང་གི་མདུན་དུ་མཎྜལ་བྱས་ཏེ། དེར་འདོད་པའི་ལྷའི་སྐུ་གཟུགས་བཞུགས་ལ། རང་ལྷའི་རྣལ་འབྱོར་དང་ལྡན་པས་ལྷག་པའི་ལྷ་མདུན་དུ་གསལ་བར་དམིགས་ནས། 
དེ་ལས་སྔགས་བརྗོད་པ་དང་བཅས་པའི་མེ་ཏོག་ཁྲི་ཕྲག་གཅིག་ཕུལ་ལ། དེ་ནས་མེ་ཏོག་དེ་རྣམས་བསྡུས་ཏེ། དེ་ཉིད་ཀྱིས་བསྲེག་རྫས་བྱས་པའི་སྦྱིན་སྲེག་དེ་ཉིད་དུ་བྱས་ན་ལས་མ་གྲུབ་པ་རྣམས་གྲུབ་པར་བྱེད་པར་འགྱུར་རོ།    །གྲུབ་པ་ཆུད་མི་ཟ་བར་བྱ་བའི་ཕྱིར་ལས་ཀྱི་འབྲས་བུ་དབྱུང་བ་ནི། 
ལས་དང་མཐུན་པའི་ཐབ་ཁུང་དུ་བུད་ཤིང་བརྩིགས་ནས་མེ་སྦར་བའི་དབུས་སུ་ལྷག་པའི་ལྷ་གསལ་བར་དམིགས་ལ། དེ་ནས་ལས་གང་སྒྲུབ་ཀྱི་སྤེལ་ཚིག་དང་བཅས་པའི་སྔགས་ཀྱིས་དེ་དང་མཐུན་པའི་སྦྱིན་སྲེག་བྱས་ན་བསྒྲུབས་པའི་ལས་རྣམས་ཆུད་མི་ཟ་བར་གང་མངོན་པར་འདོད་པའི་

73-1-323a

འབྲས་བུ་དེས་འབྱིན་པར་བྱེད་དོ།    །མངོན་པར་འདོད་པའི་འབྲས་བུ་སྒྲུབ་པར་འདོད་ན་གནས་དབེན་པར་མཎྜལ་གྱི་སྟེང་དུ་ལྷག་པའི་ལྷའི་སྐུ་གཟུགས་བཞུགས་ལ། དེའི་དྲུང་དུ་རིན་པོ་ཆེའི་སྣོད་དུ་དངོས་གྲུབ་ཀྱི་རྫས་བཞག་ནས་རང་ལྷའི་རྣལ་འབྱོར་དང་ལྡན་པས། མདུན་དུ་
ལྷག་པའི་ལྷ་གསལ་བར་དམིགས་ཏེ། དེ་ལ་མཆོད་པ་དང་བསྟོད་པ་སྔོན་དུ་སོང་བས་སྔགས་ཀྱི་བཟླས་པ་བྱ་ཞིང་། ཕོ་ཉའི་ཚོགས་སྤྲོ་བ་དང་བསྡུ་བའི་སྦྱོར་བས་དངོས་གྲུབ་སྒྲུབ་པར་དམིགས་ཏེ། དྲོ་བ་དང་དུ་བ་འཐུལ་བ་དང་འབར་བ་ལས་མཁའ་སྤྱོད་དང་ས་སྤྱོད་དང་ས་འོག་གི་དངོས་གྲུབ་
སྦྱིན་པར་བྱེད་དོ།    །སེམས་ཅན་ཐམས་ཅད་བསྲུང་བར་འདོད་ན་ཚེས་གྲངས་དང་དུས་ཚོད་བཟང་པོ་ལ་སྒྲུབ་པ་པོ་ཤར་དུ་མངོན་པར་ཕྱོགས་པས་གྲོ་གའམ་རས་ལ་གུར་གུམ་མམ་གི་ཝང་གིས་སྔར་བསྟན་པའི་འཁོར་ལོའི་ལྟེ་བར་མིང་སྤེལ་ཚིག་དང་བཅས་པ་བྲིས་ལ། རང་ལྷའི་རྣལ་འབྱོར་དུ་གནས་
པའི་མདུན་དུ་ལྷག་པའི་ལྷ་སྤྱན་དྲངས་ནས་མཆོད་བསྟོད་བྱས་ཏེ། འཁོར་ལོའི་སྔགས་དང་དབྱེར་མེད་དུ་བསྟིམས་ནས་བཟླས་པ་ཅི་རིགས་བྱས་ན་མགོའམ་མགུལ་པའམ་དཔུང་པ་ལ་བཏགས་ན་གང་ལ་བཏགས་པའི་སེམས་ཅན་ཐམས་ཅད་ནད་དང་གདོན་ལ་སོགས་པའི་མི་མཐུན་པའི་ཕྱོགས་
ཐམས་ཅད་སྲུང་བར་བྱེད་དོ།    །གལ་ཏེ་རང་བཞིན་གྱི་ནད་དང་གདོན་ལ་སོགས་པ་ཞི་བར་འདོད་ན། དགེ་བའི་ཤིང་གི་ལོ་མ་ལ་ཙནྡན་དཀར་པོའི་ཁུ་བས་སྔར་བསྟན་པའི་འཁོར་ལོའི་ལྟེ་བར་ཞི་བའི་སྤེལ་ཚིག་དང་བཅས་པ་བྲིས་ལ། རང་ལྷའི་རྣལ་འབྱོར་དང་མདུན་དུ་ལྷག་པའི་ལྷ་
དམིགས་ནས་དེའི་ལུས་ཀྱི་འོད་ཟེར་གྱིས་འཁོར་ལོ་དང་། འཁོར་ལོ་ལས་འཕྲོས་པའི་འོད་ཟེར་གྱིས་བསྒྲུབ་བྱའི་ལུས་ཀུན་ནས་འགེངས་པར་བསྒོམ་ཞིང་སྔགས་བཟླས་པའི་མཐར་འཁོར་ལོའོ་མས་བཀྲུས་ནས། དེས་གང་ལ་ཁྲུས་བྱས་པ་དེའི་ནད་གདོན་ཞི་བར་འགྱུར་རོ།    །ཡང་ཚེ་དང་ལོངས་
སྤྱོད་ལ་སོགས་པ་རྒྱས་པར་འདོད་ན་རང་ལྷའི་རྣལ་འབྱོར་བྱས་པའི་མདུན་དུ་ལྷག་པའི་ལྷ་གསལ་བར་བལྟས་ལ། པུཥྚིཾ་ཀུ་རུ་ཨོཾ་ཞེས་པའི་སྤེལ་ཚིག་དང་བཅས་པའི་སྔགས་བཟླས་ཤིང་མདུན་གྱི་ལྷ་ལས་གསེར་བཙོ་མ་ལྟ་བུའི་འོད་ཟེར་གྱི་ཕྲེང་བ་སྤྲོས་པས་གང་ལ་དམིགས་ནས་ལས་སྒྲུབ་

73-1-323b

པ་དེའི་ལུས་ཀུན་དུ་ཁྱབ་ཅིང་ཡོངས་སུ་རྒྱས་པར་བསྒོམས་པས་ཚེ་དང་ལོངས་སྤྱོད་ལ་སོགས་པ་རྒྱས་པར་བྱེད་དོ།    །གལ་ཏེ་རེངས་པའི་ལས་སྒྲུབ་པར་འདོད་ན་དུར་ཁྲོད་ཀྱི་རས་ལ་ཡུང་བའི་ཁུ་བས་སྔར་བསྟན་པའི་འཁོར་ལོ་ཆེ་གེ་མོའི་ཀཱ་ཡ་ཝཱཀ་ཙིཏྟ་སྟཾ་བྷ་ཡ་ལཾ་ཞེས་པའི་སྤེལ་ཚིག་དང་བཅས་པ་བྲིས་ལ། གྲོག་
མཁར་ལ་སོགས་པའི་ས་ལས་བྱས་པའི་གཟུགས་བརྙན་གྱི་སྙིང་གར་བཅུག་སྟེ། རང་ལྷའི་རྣལ་འབྱོར་ལ་གནས་པའི་མདུན་དུ་ལྷག་པའི་ལྷ་དམིགས་ནས། དེ་ལ་རྣམ་པར་སྤྲོས་པའི་ཕོ་ཉའི་ཚོགས་ཀྱིས་བསྒྲུབ་བྱ་བཀུག་ཅིང་བསྟིམས་ལ། དེ་ནས་སྔགས་བཟླས་པ་དང་། རིག་པའི་མཐུ་ལས་
བྱུང་བའི་དབང་ཆེན་དང་། རི་བོ་ལ་གནས་པའི་རྡོ་རྗེའི་ཚོགས་ཀྱིས་ལུས་དང་ཡན་ལག་ཐམས་ཅད་རྣམ་པར་གཏམས་ཤིང་མི་གཡོ་བར་བསམས་ན་རེངས་པ་ལ་ཐེ་ཚོམ་མེད་དོ།    །གཞན་ཡང་རྨུགས་པར་བྱ་བར་འདོད་ན། དུར་ཁྲོད་ཀྱི་རས་ལ་མྱོས་བྱེད་ཀྱི་ཁུ་བ་དང་ནིམ་པའི་འདབ་མས་སྔར་
བསྟན་པའི་འཁོར་ལོའི་ལྟེ་བར་ཆེ་གེ་མོ་མོ་ཧ་ཡ་ཞེས་པའི་སྤེལ་ཚིག་དང་བཅས་པ་བྲིས་ནས། གྲོག་མཁར་གྱིས་ལས་བྱས་པའི་གཟུགས་ཀྱི་སྙིང་གར་བཅུག་སྟེ། རང་ལྷའི་རྣལ་འབྱོར་དང་མདུན་དུ་ལྷག་པའི་ལྷ་དམིགས་ལ། དེ་ལས་སྤྲོས་པའི་ཕོ་ཉས་བསྒྲུབ་བྱ་བཀུག་ཅིང་བསྟིམས་ཏེ། དེ་ནས་གསང་
སྔགས་བཟླས་པའི་རིག་པའི་མཐུ་ལས་བྱུང་བའི་དབང་ཆེན་དང་རི་བོ་ལ་གནས་པའི་རྡོ་རྗེ་སྙིང་གར་མནན་ཏེ། དྲན་པ་དང་བྲལ་བར་བསམས་ན་རྨུགས་པར་བྱེད་པ་ལ་ཐེ་ཚོམ་མེད་དོ། །གང་ལ་བསྙེན་པ་བྱས་པའི་སྔགས། །ལས་སྒྲུབ་པ་འང་དེ་ཉིད་དེ། །དད་བརྟན་ཐེ་ཚོམ་མེད་པ་ལ། །སྔགས་ནི་
ཡིད་བཞིན་ནོར་ལྟར་འགྲུབ། །རྡོ་རྗེ་རྣམ་པར་འཇོམས་པའི་ལས་སྒྲུབ་པའི་ཐབས་ཀྱི་ཆོ་ག་བྱང་ཆུབ་སེམས་དཔའ་བྱམས་པའི་ཞབས་ཀྱི་རྡུལ་ལ་རེག་པ། དཔལ་གཾ་གཱ་དྷ་རའི་སྲས་ཀྱི་ཐུ་བོ་བྲམ་ཟེ་མ་ཎི་བཛྲས་མཛད་པ་རྫོགས་སོ།།      །།པཎྜི་ཏ་ཛྙཱ་ན་ཤྲཱི་དང་། ལོ་ཙཱ་བ་རབ་ཞི་བཤེས་གཉེན་
གྱིས་བསྒྱུར་བའོ། །༄། །རྡོ་རྗེ་རྣམ་པར་འཇོམས་པའི་ལས་སྣ་ཚོགས་སྒྲུབ་པའི་ཆོ་གས་བཞུགས། ༄༅། །དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །དཀར་ཞིང་སྲོག་ཆགས་ཉུང་བ་དང་། །ཟུག་རྔུ་མེད་ཅིང་སྣུམ་པའི་སལ། །ཞི་བའི་ཐབ་ཁུང་ཤིང་བརྩིགས་ཏེ། །

73-1-324a

མེ་དབུས་རང་ལྷག་ལྷ་བསྐྱེད་ལ། །ཡེ་ཤེས་གཞུག་མཆོད་བསྟོད་བྱས་ཏེ། །སྔགས་མཐར་པཱ་པཾ་ཤཱནྟིཾ་སྦྱར། །ཏིལ་དང་མེ་ཏོག་དཀར་བསྲེགས་ལ། །འབད་བཅས་ཐུན་བཞིའི་སྦྱོར་བ་ཡི། །ཆུ་བོར་འཇུག་དང་གོས་དཀར་གྱོན། །འཁྲུ་དང་སྐྱུགས་དང་ཁྲག་འཛག་
སོགས། །རྨིས་ལྟས་མཚན་མ་མཐོང་བ་ཡི། །སྡིག་པ་ཐམས་ཅད་བྱང་བར་བྱེད། །བུམ་པ་དཀར་པོ་མཚན་ཉིད་བཟང་། །དཀར་པོའི་རས་ཀྱིས་མགུལ་པ་དཀྲིས། །དགེ་བའི་ཤིང་གིས་ཁ་བརྒྱན་པར། །རྒྱུན་འབབ་ཆུ་དང་དཀར་པོའི་དྲིས། །བཀང་བར་རང་གི་ལྷ་བསྐྱེད་ལ། །
ཡེ་ཤེས་གཞུག་དང་མཆོད་བསྟོད་བྱ། །སྔགས་མཐར་སྡུག་བསྔལ་ཤཱནྟིཾ་སྦྱར། །དཀར་འོད་སྤྲོ་དང་བསྡུ་བའི་མཐར། །ལྷ་གཞུག་བདུད་རྩི་ཆུས་བཀྲུས་པས། །སྡུག་བསྔལ་ཐམས་ཅད་མེད་པར་བྱེད། །སེར་བའི་ས་ལས་བྱས་པའི་ཐབ། །མེ་ཏོག་འབྲས་བུ་བཟང་འབྱུང་ཞིང་། །མེ་དབུས་
ལྷ་བསྐྱེད་ཡེ་ཤེས་བཅུག །མཆོད་དང་བསྟོད་པས་མཉེས་བྱས་ལ། །སྔགས་མཐར་པུཥྚིཾ་ཀུ་རུ་སྦྱར། །འབྲས་བུ་བཟང་དང་མེ་ཏོག་སེར། །མངར་བའི་རྫས་རྣམས་བསྲེགས་པ་ཡིས། །དཔལ་ནི་རྣམ་པར་འཕེལ་བར་བྱེད། །རིན་ཆེན་བུམ་པ་དྲི་ཞིམ་ཆུ། །གཙང་མའི་རས་ཀྱིས་མགུལ་པ་
དཀྲིས། །བཟང་པོའི་ཤིང་གིས་ཁ་བརྒྱན་པ། །ལྷ་བསྐྱེད་ཡེ་ཤེས་གཉིས་མེད་ལ། །མཆོད་དང་བསྟོད་པས་མཉེས་བྱས་ཏེ། །ཨིནྡྲ་བི་ཤོ་དྷ་ན་ཡ། །སྔགས་མཐར་སྦྱར་བ་བཟླས་པའི་ཆུས། །ལེགས་བཀྲུས་དབང་པོ་རྣམ་པར་སྦྱོར། །རྒྱས་པའི་ཐབ་ཏུ་དྲི་བཟང་ཤིང་། །མེ་དབུས་རང་ལྷག་ལྷ་
བསྐྱེད་དེ། །ཡེ་ཤེས་གཉིས་མེད་མཆོད་དང་བསྟོད། །སྔགས་མཐར་ཨཱ་ཡུ་དྷཱ་ར་སྦྱར། །དཱུར་བ་མེ་ཏོག་སེར་བསྲེགས་པས། །ཚེ་ཟད་པ་དང་ཚེ་ཉམས་སྐྱོབ། །སྔར་བསྟན་ཐབ་ཏུ་བཟང་པོའི་ཤིང་། །མེ་དབུས་ལྷ་བསྐྱེད་ཡེ་ཤེས་བསྟིམས། །མཆོད་དང་བསྟོད་པས་ལེགས་མཉེས་བྱས། །
སྔགས་མཐར་རྒྱས་པའི་སྤེལ་ཚིག་དང་། །འབྲུ་སེར་མེ་ཏོག་སེར་བསྲེགས་པས། །ཕུན་སུམ་ཚོགས་པ་འཕེལ་བར་བྱེད། །བུམ་བཟང་གཙང་མའི་ཆུས་བཀང་སྟེ། །འབྲུ་སྨན་རིན་ཆེན་སྙིང་པོ་དྲི། །མ་ཉམས་རས་ཀྱིས་མགུལ་དཀྲིས་ཤིང་། །བཟང་པོའི་ཤིང་གིས་ཁ་བརྒྱན་པར། །ལྷ་

73-1-324b

བསྐྱེད་ཡེ་ཤེས་གཞུག་མཆོད་བསྟོད། །ཤོ་དྷ་ཡ་བི་ཤོ་དྷ་ཡ། མཐར་སྦྱར་སྔགས་བཟླས་ལེགས་བཀྲུས་པས། །ལྷ་རྣམས་མདུན་གྱི་ཉེ་བར་གནས། །དམར་བའི་ས་ལ་དབང་བྱེད་ཐབ། །མེ་ཏོག་དམར་འབྱུང་ཤིང་བརྩིགས་པའི། །མེ་དབུས་ལྷ་བསྐྱེད་ཡེ་ཤེས་བཅུག །མཆོད་བསྟོད་
ཝ་ཤཾ་མཱ་ན་ཡ། །སྔགས་ཀྱི་མཐར་སྦྱར་མེ་ཏོག་དམར། །བསྲེགས་པས་མཛའ་སྡུག་དབང་དུ་བྱེད། །ཚེ་རའི་ཚིལ་བུ་གུ་གུལ་དང་། །ཡུངས་ཀར་ཅེ་སྤྱང་གླད་པར་སྦྱར། །བརྒྱ་རྩ་བརྒྱད་དུ་མངོན་བསྔགས་པ། །དུར་ཁྲོད་སོལ་བའི་མེ་ལ་བསྲེགས། །བཏུགས་པས་བྲན་བཟའ་སོགས་ལུས་
བདུགས། །གདོན་གྱིས་གཙེས་ལས་ཐར་བར་བྱེད། །པདྨའི་རྩ་བ་ཙནྡན་དམར། །མངོན་པར་བསྔགས་པའི་མེ་སྦར་ཏེ། །རིག་སྔགས་བརྒྱ་རྩ་བརྒྱད་བཟླས་པའི། །དཱུར་བས་རང་གི་མིག་བསྐུས་ན། །ཕན་ཚུན་མི་མཐུན་གནས་པ་ཡང་། །བལྟས་པ་ཙམ་གྱིས་མཛའ་བོར་འགྱུར། །རྒྱས་པའི་
ཐབ་ཏུ་ཤིང་བརྩིགས་ནས། །མེ་དབུས་ལྷ་བསྐྱེད་ཡེ་ཤེས་བསྟིམ། །མཆོད་དང་བསྟོད་པས་ལེགས་མཉེས་བྱ། །པུཥྚིཾ་ཀུ་རུ་མཐར་སྦྱར་བའི། །སྔགས་བཅས་འབྲུ་རྣམས་བསྲེགས་པ་ཡིས། །ནོར་འཕེལ་ནོར་འགྲིབ་འཇོམས་པར་བྱེད། །བཟང་པོའི་བུམ་པར་གཙང་མའི་ཆུ། །འབྲུ་སྨན་རིན་ཆེན་
དྲི་བཟང་ལྡན། །མངོན་པར་བསྔགས་པས་ལེགས་བཀྲུས་པས། །མྱ་ངན་ངལ་དང་གནོད་པ་འཇོམས། །བླ་གོས་མཐའ་ལ་བརྒྱ་རྩ་བརྒྱད། །མངོན་བསྔགས་མདུད་པ་བདུན་བོར་ནས། །ལམ་དུ་ཞུགས་ན་མི་བཟད་པའི། །འཇིགས་དང་ཉམ་ང་ལས་སྒྲོལ་བྱེད། །ཐོ་རངས་ལྷ་ཡི་བསམ་གཏན་ལྡན། །
སྔགས་ཀྱིས་མངོན་པར་བསྔགས་པ་ཡི། །ཆུ་དང་ཐལ་བ་ཡུངས་ཀར་གྱིས། །ཕྱོགས་མཚམས་བཅིངས་པས་ཕོངས་པ་འཇོམས། །རིག་སྔགས་ཀྱིས་བསྔགས་ས་རྫ་ནའི། །བདུགས་པས་གཟའ་ལས་ཐར་བ་དང་། །གུ་གུལ་བདུག་པས་ལུས་བདུགས་པས། །རྒྱུ་སྐར་གནོད་པ་འཇོམས་པར་
བྱེད། །ཁ་དོག་ལྔ་ཡི་སྐུད་པ་ལ། །རིག་སྔགས་སྟོང་ཕྲག་བདུན་བཟླས་ནས། །གང་གི་མགུལ་ལམ་དཔུང་པ་ལས། །བཅིངས་པས་བྱད་སྟེམས་ལས་གྲོལ་བྱེད། །མི་བཟད་གདོན་གྱིས་ཉེན་པ་ལ། །སྔགས་ཀྱི་ཆུ་ཡིས་ལུས་བཀྲུས་ནས། །གུ་གུལ་ཡུངས་ནག་ཡི་དགས་སྐྲ། །ཁྭ་ཡི་

73-1-325a

གཤོག་པ་རྨ་བྱའི་ཤ །ཅེ་སྤྱང་རྟུག་པ་སྔགས་བཅས་པའི། །བདུགས་པས་ངེས་པར་ཐར་བར་བྱེད། །རྨི་ལམ་སྡིག་པའི་མཚན་མ་མཐོང་། །གཙང་མའི་གོས་གྱོན་དྲིས་བདུགས་ཏེ། །ཤར་དུ་མངོན་པར་ཕྱོགས་པ་ཡིས། །རིག་སྔགས་བརྒྱ་རྩ་བརྒྱད་བཟླས་པའི། །ཆུ་ཡིས་ཁྲུས་བྱས་དགེ་
བ་དང་། །སྡིག་མེད་དཔལ་དང་ལྡན་པར་བྱེད། །དཔལ་རྡོ་རྗེ་རྣམ་པར་འཇོམས་པའི་ལས་སྣ་ཚོགས་སྒྲུབ་པའི་ཆོ་ག་རྫོགས་སོ།།      །།པཎྜི་ཏ་ཆེན་པོ་ཛྙཱ་ན་ཤྲཱི་དང་། ལོ་ཙཱ་བ་རབ་ཞིས་བསྒྱུར་བའོ། །༄༅༅། །རྒྱ་གར་སྐད་དུ། ཨཱརྱ་བཛྲ་བི་དཱ་ར་ཎ་ནཱ་མ་དྷཱ་ར་ཎཱི་སཱ་དྷ་ནཾ་ས་ཀལྤཾ། 
བོད་སྐད་དུ། འཕགས་པ་རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་སྒྲུབ་ཐབས་ཆོ་ག་ཞིབ་མོ་དང་བཅས་པ། འཕགས་པ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །རིན་ཆེན་ལྟ་བུ་དོན་བདུན་ལྡན་པས་རང་དོན་སྐུ་གཅིག་མི་ཤིགས་རྡོ་རྗེར་ལྡན། །གཞན་དོན་རྡོ་རྗེས་འཇོམས་
པས་གཉིས་མེད་རྡོ་རྗེའི་སྐུ་གཉིས་སྣང་། །ཐམས་ཅད་རྣམ་པ་ཀུན་མཆོག་ལྡན་ཞིང་མི་ཕྱེད་མི་ཤེགས་པ། །གདུག་པ་འདུལ་ཕྱིར་རྡོ་རྗེའི་སྐུ་སྟེ་འཇིགས་བྱེད་ཟུང་ལ་འདུད། །བྱ་བའི་རྒྱུད་མཆོག་རྟོག་པ་བྱེ་བྲག་རྡོ་རྗེ་རིགས་ཀྱི་དོན། །བདག་གཞན་དོན་རྣམས་རྫོགས་བྱེད་སངས་རྒྱས་ཀྱིས་
གསུངས་ཏེ། །བླ་མ་རྒྱལ་དེ་གྲུབ་བརྙེས་བྱིན་རླབས་དེ་ཐོབ་འདི་ཡི་ཞལ་མཐོང་སྟེ། །གནང་བ་བྱིན་དང་ལྡན་པས་བདག་ཉིད་བྲམ་ཟེ་གཞོན་ནུ་སྟེ། །རིག་སྔགས་མ་ལུས་འཆད་འགྱུར་འདི་བསྒོམས་ནུས་ཐོབ་ལ། །སློབ་མ་སངས་རྒྱས་གསང་བས་བསྐུལ་ཕྱིར་འདི་བཤད་བྱ། །གང་ཞིག་འདི་
ལ་དད་མོས་ནས། །བསྒྲུབས་ནས་ཡོན་ཏན་རྡོ་རྗེ་འབྱུང་། །འདི་ཡི་དགོངས་པའི་བསམ་ཡས་ཀྱང་། །ལྷུན་པོ་རི་རབ་ཟོམ་རྒྱུད་དུ། །དེ་བཞིན་གཤེགས་པས་འདི་སྐད་གསུངས། །སྔོན་གྱི་འཕྲུལ་པ་ལ་བརྟེན་ནས། །མ་འོངས་མན་ངག་རྣམ་གཉིས་ཏེ། །བདག་དོན་རྡོ་རྗེའི་བསྙེན་པ་དང་། །
གཞན་དོན་རྡོ་རྗེའི་ལས་སྦྱོར་བཅས། །དེ་ཙམ་མ་བཤད་དོ་ཞེ་ན། གང་དག་ཏུ་ནི་རང་ཉིད་ཀྱི། །ལས་ཀྱི་ཆོ་ག་མེད་པ་ལས། །དེ་བཞིན་ཕྱི་ཡི་རྒྱུད་ཆེན་ལས། །གསུངས་པའི་ཆོ་ག་འདིར་བསྟན་བྱ། །དེ་ཡི་དུས་ནི་བཟང་ཞིང་ཤིས་པ་ལ། །རྡོ་རྗེའི་གནས་ཏེ་བཀྲ་ཤིས་ཞི་གནས་སུ། །བར་ཆད་ཞི་

73-1-325b

སོགས་ཀུན་བྱས་རྡོ་རྗེའི་གཡོག་དམ་དང་། །རྡོ་རྗེ་སྒྲུབ་པོ་ཤེས་རབ་ལ་སོགས་ལུང་ལས་བསྔགས་པ་ནི། །བྱ་བའི་དབང་དང་དམ་ཚིག་མན་ངག་རབ་ཤེས་དེས། །ལུས་དང་ངག་སེམས་གཙང་ཞིང་ཡིད་དགེ་བས། །རྡོ་རྗེའི་སྦྱོར་བ་ཀུན་དང་ལྡན་པས་བསྒྲུབ། །ས་ཕྱོགས་རབ་ཏུ་ཉམས་དགའ་བར། །
ས་ཡི་ཆོ་ག་ཀུན་ཤེས་ནས། །བ་ཡི་རྣམ་ལྔ་དྲི་བཅས་པས། །མཎྜལ་སྔོན་པོ་མེ་ཏོག་བཅས། །དེར་ནི་རྟེན་རྣམས་ལྡན་པ་དང་། །མཆོད་པ་ལྔ་དང་མཆོད་ཡོན་བཅས། །ཁྲུས་ཀྱི་བུམ་པ་བཟང་པོ་དང་། །ལྷ་ཡི་བུམ་པ་བཟང་པོར་བྱ། །དེ་ཡང་གསེར་སོགས་དག་ལས་འབྱུང་། །མཚན་
ཉིད་ལྡན་དེར་ཆུ་ཀླུང་ཆུ། །འོ་མ་དྲི་ལྔ་སྨན་དང་འབྲུ། །རིན་ཆེན་སྙིང་པོ་མེ་ཏོག་བཅས། །ཤེལ་དང་ཕ་ལམ་མུ་ཏིག་དང་། །ཁ་རྒྱན་མགུལ་གསུམ་པ་ཡིས་བཅང་། །དཱུར་བ་བདུན་དང་ཀུ་ཤ་དང་། །རྨ་བྱའི་སྒྲོ་དང་རྡོ་རྗེར་ལྡན། །ལས་ཀྱི་ཆོ་ག་མཐོང་བ་ཡིས། །ལེགས་བྱས་བསྐྲད་ལ་
སྒྲུབ་རྫས་ནི། །རིན་ཆེན་སྣོད་ཀྱི་སྟེང་དུ་གནས། །མཎྜལ་སྟེང་དུ་དེ་གཞག་ལ། །རས་སོགས་གཙང་མ་གོན་པ་ཡིས། །ཕྱི་རོལ་ཁྲུས་ཀྱི་རྫིང་བུ་ནི། །ཉམས་དགའ་དེར་ནི་ཉིན་ཕྱེད་ན། །ཁྲུས་བྱ་དེར་ཡང་ས་རབ་བསྔགས། །སྟོང་པས་དྲི་མ་རྣམ་པར་སྦྱང་། །དེར་སོང་ཁྲོ་བོས་ཁྲོ་བོ་སྤྲུལ། །
སེ་གོལ་སྔགས་ཀྱིས་བགེགས་བསྐྲད་ལ། །ཆུ་དེ་ལག་གཡོན་གསུམ་དུ་གཏོར། །སྤྱི་བོར་གཅིག་གཞག་ཁ་བཤལ་ཏེ། །ཁྲུས་བྱས་ཉེ་རེག་འཐོར་འཐུང་བསྔགས། །དེ་བཞིན་བུམ་པས་སྔ་བར་བྱ། །བུད་མེད་ཤ་ཆང་ལ་སོགས་ནི། །ཀུ་བའི་ཟས་ནི་རྣམ་ལྔ་སྤང་། །བཤང་སོགས་མི་
གཙང་སྦྱོར་བ་ལ། །མནོལ་བ་མེད་པར་སྤྲུལ་ནས་ནི། །དེ་ཡི་སྔགས་དང་ཕྱག་རྒྱས་གདབ། །ཐམས་ཅད་ཉེས་པར་མི་འགྱུར་རོ། །གཙང་ཁང་ཉམས་དགར་ལོག་ནས་ནི། །སེ་གོལ་འཆི་མེད་ཁྲོ་བོས་བསྐྲད། །རྡོ་རྗེས་སྒོ་གཅོད་སྟན་ཡང་ནི། །འཇམ་བདེར་ཀུ་ཤར་ལྡན་པ་ལ། །ནུབ་ཏུ་
ཁ་བལྟས་བརྟན་པར་གནས། །སྐད་ཅིག་མི་ཕྱེད་ཕྱག་རྡོར་གྱིས། །རྣམ་འཇོམས་དཔག་མེད་རབ་བསྟན་ནས། །སྐྲོད་པའི་ཕྱག་རྒྱས་སྔགས་རྡོ་རྗེ། །ཕྱག་འཚལ་ནས་ནི་གཏོར་བྱེད་པར། །རྣམ་སྣང་ཁྲོ་བོ་གཉིས་ལྡན་པས། །ཚངས་ལ་སོགས་པའི་གདོན་སོགས་བསྐྲད། །འོད་ཟེར་

73-1-326a

རྡོ་རྗེའི་རྭ་སོགས་བསམ། །བར་ཆད་བགེགས་ཀྱིས་མི་ཚུགས་སོ། །རྣམ་འཇོམས་ཡང་སྙིང་དྲི་ཆབ་ཀྱིས། །འབྱོར་པ་བསངས་ཏེ་སྐད་ཅིག་གིས། །མཆོད་པ་དག་པར་བྱ་ཕྱིར་བརླབ། །དེ་ནས་མདུན་གྱི་ནམ་མཁའ་ལ། །སངས་རྒྱས་གཉིས་དང་འཇིགས་བྱེད་དྲུག །དེ་ལ་ཡིད་ཀྱི་ལས་
ཀུན་བྱ། །རང་བཞིན་རྣམ་དག་སྔགས་ཀྱིས་ནི། །ཉམས་དང་སྟོང་པའི་ཡེ་ཤེས་བྱ། །རིན་ཆེན་ཁང་པ་ཡིད་འོང་སྟེ། །རྡོ་རྗེའི་བྲག་ཏུ་རྣམ་པར་བསམ། །དེར་ནི་ལྷ་ཆེན་དྲག་པོར་བྱ། །བདག་ཉིད་འཇིགས་པའི་ང་རྒྱལ་གྱིས། །ཤཱཀྱ་སེང་གེ་འཁོར་བཅས་ལ། །གསོལ་གདབ་རྡོ་རྗེའི་
བསམ་གཏན་གཉིས། །འདྲེས་བྱས་འདྲེས་པ་སྟོང་པ་ན། །རྡོ་རྗེའི་རྣམ་པར་བསམ་སྔགས་བརྗོད། །བདག་དོན་རྡོ་རྗེ་སྟོང་པའི་ལྷ། །དེ་ནས་གཞན་དོན་ཡི་གེ་སྟེ། །ཐོག་མེད་ལས་ནི་གསལ་བ་སྟེ། །དེ་ལ་ཡིག་གཉིས་སྔོ་སྤྲས་པ། །ནུས་ལྡན་ཡི་གེའི་ལྷ་ཡིན་ནོ། །དེ་ལ་རྡོ་རྗེ་
སྔགས་ཀྱི་སྒྲ། །སྟོང་པ་མཚོན་བྱེད་ཁམས་རྣམས་སུ། །དམ་པ་གཉིས་བྱས་དེ་ལ་བསྟིམ། །དེ་ནི་སྒྲའི་ལྷ་ཞེས་བྱ་སྟེ། །དེ་གྱུར་དམ་པ་ཀུན་ཐིམ་པས། །རྡོ་རྗེ་ཉི་མ་ལ་གནས་པའི། །ཕྱག་ན་རྡོ་རྗེ་གསང་བའི་བདག །སྟོབས་ཆེན་ཁྲོ་བོ་འཇིགས་ཆ་བྱད། །སྔོ་ནག་རྡོ་རྗེ་སྡིགས་མཛུབ་
ཅན། །རལ་པ་ལ་སོགས་ཀུན་ལྡན་པས། །འབྱུང་པོ་བསྡིགས་པ་གཟུགས་བརྙན་ཚུལ། །འདི་ནི་གཟུགས་ཀྱི་ལྷ་ཞེས་གྲགས། །དེ་ནས་དེ་ནི་གསལ་བརྟན་ཕྱིར། །རོ་བོ་འབིགས་པའི་ཕྱག་རྒྱ་དང་། །རྡོ་རྗེ་ཡན་ལག་འབར་བ་ཡི། །སྔགས་ཀྱིས་སྤྱི་བོ་སོགས་བཞག་པས། །
གཙུག་ཏོར་ལ་སོགས་གྲུབ་ཅིང་བསྲུང་། །དེ་ཡང་ཕྱག་རྒྱའི་ལྷ་རུ་བསྟན། །དེ་ནས་དུས་ནི་ཐམས་ཅད་དུ། །དེ་དང་མི་འབྲལ་ཀུན་བྱེད་པ། །མཚན་མའམ་རྣམ་རྟོག་ལྷ་ཞེས་གསུངས། །ཡེ་ཤེས་ལྔ་དང་སྐུ་གསུམ་དང་། །དོན་གཉིས་གྲུབ་ཅིང་འོད་དང་ནི། །རྫུ་འཕྲུལ་ནུས་པ་
སྟོན་བྱེད་པས། །ལྷ་ཞེས་ཤཱཀྱ་མཆོག་གིས་གསུངས། །དེ་ནས་བུམ་པ་མི་དམིགས་ལས། །རིན་ཆེན་ཁང་པར་འདམ་སྐྱེས་བཞི། །གེ་སར་སོགས་ལ་བསིལ་རྡོ་རྗེ། །རྡོ་རྗེ་མན་ངག་ལྡན་པར་བསམ། །དབུས་སུ་སྤྲིན་སྒྲ་གྱུར་པ་ལས། །ཕྱག་ན་རྡོ་རྗེ་ཐུགས་ཀྱི་མཆོག །རྡོ་རྗེ་རྣམ་

73-1-326b

འཇོམས་ཁྲོ་བོ་ནི། །བདག་མཚུངས་ལས་ཀྱི་རྡོ་རྗེ་ལ། །ཟླ་བ་མེད་པ་བསྣམས་པའོ། །དེ་ཡི་མདུན་དུ་མཱ་མ་ཀཱི། །སྔོ་ཞིང་དགའ་ལྡན་ཨུཏྤལ་སྔོ། །དམ་ཚིག་རྒྱས་འདེབས་བསྣམས་པའོ། །དྲན་པ་བཞི་ལས་བྱུང་བ་ནི། །ཀུན་ཀྱང་རིམ་མིན་ཅིག་ཅར་རོ། །ཤར་ལྷོ་རྡོ་རྗེ་ཀཱི་ལ་ནི །སྔོ་དམར་
འཇིགས་པ་ཀུན་ལྡན་ལ། །རྡོ་རྗེ་ཕུར་བུ་གཡས་ན་སྟེ། །གཡོན་པ་ཀུན་ནི་བསྡིགས་པར་མཛད། །ལྷོ་ནུབ་རྡོ་རྗེ་བེ་ཅོན་ཏེ། །སྔོ་ནག་རྡོ་རྗེ་བེ་ཅོན་ནོ། །ནུབ་བྱང་རྡོ་རྗེ་ཐོ་བ་སྟེ། །སྔོ་སྐྱ་དེ་བཞིན་འཇིགས་པ་ལ། །རྡོ་རྗེས་མཚན་པའི་ཐོ་བ་སྟེ། །བྱང་ཤར་རྡོ་རྗེ་གཏུམ་པོ་ནི། །མིག་སྨན་མདོག་
འདྲ་རྡོ་རྗེ་ནི། །རྩེ་གཅིག་བསྣམས་པ་རབ་ཏུ་བསྒོམ། །ཀུན་ཀྱང་ཚམ་ངམ་བདུད་བཞི་འཇོམས། །དེ་རྣམས་ཡེ་ཤེས་ལྔ་ལྡན་རིགས། །དབུ་ལ་མི་བསྐྱོད་མགོན་པོ་ནི། །རལ་པའི་ཐོར་ཚུགས་བཞད་ཁྲོ་བ། །དཔའ་བོ་དག་ལ་རྣམ་པར་གསུངས། །དེ་ནས་འོད་ཟེར་འགུགས་བྱེད་ཀྱིས། །
འོག་ནས་འཁོར་བཅས་སྤྱན་དྲངས་ནས། །རིག་པ་རིག་མ་དམ་ཚིག་ཅན། །དཔག་མེད་བྱོན་གྱུར་མི་འཆི་བ། །ཐུགས་ཀ་ནས་བཏོན་དེས་བསྐྲད་བཅད། །དེ་ལ་རང་སྔགས་བསྐུལ་བཅས་ཀྱིས། །མཆོད་ཡོན་བཟང་པོ་ཉེར་བསྟན་པ། །མི་ཤིགས་ཕྱག་རྒྱ་རང་སྔགས་ལྔས། །སོ་སོ་ལ་ནི་
གཉིས་མེད་ཞུགས། །ཕྱོགས་སྐྱོང་འཁོར་གྱི་ཕྱི་རིམ་དུའོ། །དེ་ནས་དམ་ཚིག་བསྟན་བྱའི་ཕྱིར། །དེ་བཞིན་མི་ཕྱེད་ཁྲོས་པ་ཡིས། །རིགས་ཀྱི་ཡུམ་གྱིས་རྒྱས་བཏབ་པས། །དེ་ཡང་རིག་པ་རྣམ་པ་གཉིས། །མཐའ་མེད་བར་དུ་ཞུགས་ཕྱིར་རོ། །བདག་ནི་དམ་ཚིག་ལྡན་པ་ལས། །ཡེ་
ཤེས་མི་འཇུག་མཐོ་དམན་ཚུལ། །དེ་ཡང་བྱ་བ་ཀུན་ནས་གསུངས། །དེ་ནས་མཆོད་པ་རྣམ་པ་ལྔ། །ཀུན་གྱི་རིགས་ལ་དེ་རིགས་དབུལ། །སྒྲ་དང་བཟང་པོ་དེ་བཞིན་ནོ། །ཐལ་མོ་སྦྱར་ནས་གུས་པ་ཡིས། རྡོ་རྗེ་བསྣམས་ལ་བསྟོད་པ་ཡིན། །གང་གི་རང་བཞིན་ཆགས་སྡང་རྣམ་བྲལ་ཡང་། །
གདུལ་བྱ་གདུལ་ཕྱིར་ཁྲོ་ལ་ཁྲོ་བ་དང་། །འདོད་ཆགས་ཅན་ལ་ཆགས་ཅན་ལྟར་སྟོན་པ། །བྱང་ཆུབ་མཆོག་གནས་དེ་ལ་ཕྱག་འཚལ་བསྟོད། །གང་ཞིག་ལས་དང་རྣམ་སྨིན་མཁྱེན་པ་ཡིས། །འགྲོ་བ་ཀུན་དང་ཇི་ལྟར་མཐུན་པ་ཡི། །གསང་སྔགས་གཟུགས་ཀྱིས་རྗེས་སུ་འཇུག་

73-1-327a

མཛད་པ། །སྔགས་ཀྱི་རྣམ་འདྲེན་དེ་ལ་ཕྱག་འཚལ་བསྟོད། །ནད་གཅོད་བདུད་འཇོམས་མི་རྟོག་བཞི་ལས་བྱུང་། །ལས་རྣམས་འཇོམས་མཛད་ཁྲོ་བོ་འབར་བར་སྣང་། །ནོར་བུ་རིན་ཆེན་ལྟ་བུར་གདུལ་བྱ་གདུལ། །ཁྲོ་བོ་ཁྱེད་རྣམས་ལ་ནི་བསྟོད་ཕྱག་འཚལ། །རིག་པ་སྐྱོང་བའི་
ལྷ་རྣམས་ལ། །ཚིགས་བཅད་བཅུ་ཡིས་བསྟོད་པ་ཡིན། །དེ་ནས་འདོད་པའི་དོན་གསོལ་གདབ། །དེ་ལྟར་བྱ་བ་རབ་རྫོགས་པས། །དོན་དང་ཚིག་གི་ལྷར་གནས་ཤིང་། །བྱ་བ་རིགས་དང་གདུལ་བྱའི་ཕྱིར། །བྱ་རྒྱུད་རིག་པ་འཛིན་སྡེ་སྟེ། །དེར་གནས་སྔགས་ཀྱི་བཟླས་བྱ་བ། །ནོར་བུའི་ཕྲེང་
བའི་བསྐུལ་སྔགས་ཀྱིས། །བྱིན་རླབས་ལག་པས་ལེགས་གཟུང་སྟེ། །མིག་གི་ལྷ་ཐུགས་ཟླ་བ་ལ། །རྡོ་རྗེ་གྱེས་པ་ཧཱུཾ་གནས་བསམ། །ལྕེ་རྩེ་མི་གཡོ་གཞན་མི་ཐོས། །ཡིད་ཀྱིས་སྔགས་ཀྱི་སྒྲར་གནས་པ། །རྡོ་རྗེའི་སྔགས་ནི་རྒྱས་བསྡུས་གསུམ། །མོས་པ་གཅིག་ནི་བཟླས་པར་བྱ། །
ཐུགས་བསྐུལ་བདག་གཞན་དོན་རྫོགས་ནས། །སེམས་ཅན་ཁམས་སྦྱངས་སེམས་ཅན་ཆེ། །བྱིན་རླབས་རྣམ་གཉིས་དེ་གནས་བསྡུ། །དོན་རྣམས་རབ་ཏུ་རྫོགས་བྱེད་པས། །ཟབ་མོ་བདག་གི་སྤྱོད་ཡུལ་ཏེ། །སྒྲ་ལ་གནས་པའི་བཟླས་པ་དེ། །མི་ཚིག་གཡལ་དང་དྲི་ངན་སོགས། །
བར་ཆད་ངན་པ་སྤངས་ལ་བསྒྲུབ། །དེ་ཡང་དམ་བཅས་བར་དུའོ། །དེ་དག་འབྱུང་བར་འགྱུར་བ་ན། །ཁྲུས་བྱས་ཁ་བཤལ་ཕྱག་རྡོར་གྱི། །ཡི་གེ་བརྒྱ་པས་གསོལ་གདབ་འཇུག །ཐུན་དྲུག་སྦྱོར་བ་དེ་ལྟར་བྱ། །ཁྲུས་གསུམ་བྱ་དང་གོས་བརྗེ་སོགས། །བྱ་བ་ལས་གསུངས་རྒྱས་པར་བྱ། །
ཐ་མར་ནོར་བུ་བུམ་པ་དབུལ། །བསྲུང་ལ་ངོ་མཚར་ཚུལ་དུ་གང་། །བཤང་སོགས་སྤྱོད་ལམ་དེ་བཞིན་བྱ། །ཟས་ལ་བདུད་རྩིར་བྱིན་བརླབས་ཏེ། །དབུལ་དང་བཟའ་བས་ཚིམ་པའོ། །འཁོར་ལ་གཏོར་མ་གཏང་བ་ལྟར། །བདག་བྱས་ཆོ་ག་བཞིན་དུའོ། །དེ་ལྟར་ཡོན་ཏན་ཚང་བ་ཡིས། །
མཐོང་དང་རིག་པའི་མཚན་མ་འབྱུང་། །ལྷ་ཡི་རྟེན་བཞད་མཐོང་སོགས་དང་། །ལུས་བདེ་མངོན་སུམ་ལ་སོགས་སོ། །དེ་ལྟར་གྲུབ་པས་གང་བྱས་ཀྱང་། །གྲུབ་སྟེ་གཞན་དུ་ཉམས་པར་འགྱུར། །རྟག་ཏུ་དེ་བྱེད་རྣལ་འབྱོར་པ། །རྡོ་རྗེའི་སྐུ་ནི་ངེས་པར་འགྲུབ། །རྡོ་རྗེའི་ལས་ཀུན་སྨོས་

73-1-327b

ཅི་དགོས། །དེ་ནས་དཀྱིལ་འཁོར་གཤེགས་མཆོད་དང་། །བཟོད་གསོལ་དམ་ཚིག་བསྡུ་བྱས་ལ། །མཎྜལ་ལེགས་པར་བྱི་དོར་བྱ། །ལྷག་གཉིས་དཔའ་བོ་གཅིག་པ་ནི། །འབྱོར་པ་ཆུང་བར་ཤེས་པར་བྱ། །དེ་ནས་སྒྲུབ་པའི་ལས་སྦྱར་ཏེ། །ནད་ལ་སོགས་པ་ཞི་བྱ་དང་། །ལས་ཀྱི་ཚོགས་
རྣམས་སྒྲུབ་པའོ། །རྡོ་རྗེ་ཁྲུས་ཀྱིས་དག་བྱ་བ། །རྒྱས་པར་དག་བྱས་ཁྲུས་ལས་ཤེས། །བདག་གམ་གཞན་དག་སྡུག་བསྔལ་སོགས། །ལྡན་པ་བསལ་ཕྱིར་འདི་དག་བརྩམ། །རྡོ་རྗེ་སློབ་དཔོན་སློབ་མ་ནི། །གོས་གཙང་ཁྲུས་བྱ་དཀར་གསུམ་བཟའ། །ཤིན་ཏུ་སྤྱོད་ལམ་གཙང་བ་ཡིས། །
ནང་གི་སྡོམ་པ་བསྙེན་གནས་སོགས། །རྟེན་གྱིས་བླངས་ཏེ་བདག་གཞི་ཅན། །དེ་དག་སྟ་གོན་གནས་པ་སྟེ། །ཞག་གཅིག་ཉི་མ་ལ་སོགས་བྱ། །དེ་ནས་ས་ཡི་ལས་བྱས་ཏེ། །གཏོར་མ་རྒྱས་པ་གསུངས་པ་བཞིན། །བསླང་ལ་སོགས་ནི་སྔགས་དག་དང་། །བསམ་གཏན་དག་གིས་ཅུང་ཟད་ཡིན། །
མ་འབྱོར་འབྲུ་དང་བྱེ་གཙང་དང་། །རྟེན་གྱི་དཀྱིལ་འཁོར་ཚུལ་དུ་བྱ། །འབྱོར་པ་ལྡན་ན་འདི་ལྟ་སྟེ། །བྱུག་པས་ལེགས་བྱུགས་ཁྲུ་བཞི་པ། །དགེ་བའི་རས་ཀྱིས་ཐིག་བཏབ་ནས། །བཀྲ་ཤིས་ཚོན་གྱི་འཁོར་ལོ་ནི། །ལྟེ་བ་རྩིབས་བཞི་ལ་སོགས་བྲི། །མཚན་མ་ཀུན་ནི་ངེས་པར་དགོད། །
སྒོ་ལ་ཕྱག་རྒྱ་བཞི་ཡང་ངོ་། །ལས་ཀྱི་ཆོ་ག་ཤེས་པར་བྱ། །ལེགས་པར་ནུབ་ཏུ་སྒོ་དབྱེའོ། །ལྷག་ཆད་གསོ་ཞིང་དེ་རྒྱན་དུ། །མདའ་སོགས་འཕེན་དང་རྒྱལ་མཚན་གདུགས། །ལྡ་ལྡི་ཕྲེང་བས་ཉམས་དགར་མཛེས། །གོང་དུ་གསུངས་པའི་བུམ་པ་གཅིག །ཁྲི་ལ་དབུས་སུ་གནས་
པར་བྱ། །མཚམས་བཞི་དེ་བཞིན་བུམ་པ་བཞི། །བདག་ཁྲུས་བུམ་པ་ནུབ་ཏུའོ། །དེ་ནས་རྒྱས་པར་སྔོན་བཞིན་དུ། །ཁྲུས་བྱས་གསོལ་གདབ་པར་བྱའོ། །བུམ་པའི་རྡོ་རྗེ་ཐག་བཟུང་ནས། །བསམ་གཏན་སྔོན་བཞིན་ལྡན་པ་ཡིས། །ཁྲོ་བོའི་ངག་ཏུ་རིང་ཐུང་གཉིས། །བརྒྱ་རྩ་བརྒྱད་
དམ་རྩ་གཅིག་བཟླས། །ལས་ལ་དེ་ལས་མང་མི་དགོས། །བདག་དང་ལྷ་སོགས་འོད་ཟེར་གྱིས། །བསྒྲུབ་བྱའི་འདོད་སྒྲུབ་བྱས་པར་བསམ། །དེ་ཡང་ལྷ་ནི་རྡོ་རྗེ་ཆུ། །དེ་ནས་ལས་ཀྱི་ཆོ་ག་ནི། །ལྷ་ཡི་མཚན་མ་དུག་འཇོམས་ཀྱིས། །ཕྱི་སྟེ་ནུབ་ཀྱི་སྒོ་ནས་ནི། །ཤར་སྒོར་སྟོན་པ་ཐར་པར་

73-1-328a

བསམ། །དབུས་སུ་ཁྲི་སྟེང་དེ་ནས་ནི། །རྣམ་པར་འཇོམས་པས་ང་རྒྱལ་བྱ། །དྲི་མ་དག་དང་ལྡན་བསམས་ཏེ། །བདེན་པ་བདར་ཞིང་བཀའ་བསྒོ་ནས། །སྔགས་རྣམས་ཀུན་དུ་དྲིལ་བ་ཡིས། །དང་པོར་དེ་ལ་ཡུངས་ཀར་གྱིས། །བསྐྲད་དེ་དེ་ནས་རྨ་བྱ་དང་། །དཱུར་བ་
ཀུ་ཤས་བྱབས་པ་ལ། །ནད་སོགས་མ་ལུས་གདོན་པར་བྱ། །དེ་ནས་སྔགས་བཟླས་གྲོགས་ཀྱིས་ནི། །བཀྲ་ཤིས་བསྒྲགས་ལ་ཆུ་དབང་བསྐུར། །ཐམས་ཅད་དག་པར་བསམ་པར་བྱ། །དུང་ལ་སོགས་པ་བཀྲ་ཤིས་སྦྱིན། །དེ་ནས་དེ་ལ་ལྷ་བཀོད་དེ། །སྔགས་ཀྱི་གནས་སུ་བསྲུང་
བར་བྱ། །དགེ་བའི་ལས་ལ་སྲུང་འཁོར་ནི། །རྩིབས་བཞི་རྒྱན་སྔགས་སྤྲས་པ་ཡང་། །རིན་པོ་ཆེས་བྲིས་རབ་གནས་ལ། །བྱིན་རླབས་བཟླས་ཏེ་གདགས་པར་བྱ། །དེ་ནས་དེ་ལ་ཤེལ་སྒོ་ནས། །ནུབ་ནས་བཏོན་ལ་རྡོ་རྗེ་སྦྱིན། །རྣམ་འཇོམས་ལས་ཀྱང་བརླབ་པར་བྱ། །དེ་ནས་དབང་
བསྐུར་ཐོབ་པ་སྟེ། །ནད་ལ་སོགས་པ་ལས་ཐར་བ། །ཟླ་བ་སྒྲ་གཅན་ལས་ཐར་བཞིན །ཕུན་སུམ་ཚོགས་པའི་རྒྱུད་ཀུན་ལྡན། །ཡོན་ཏན་མ་ལུས་རྩ་བར་འགྱུར། །བདེ་བ་ཀུན་དང་ལྡན་པ་དང་། །སྡུག་བསྔལ་ཐམས་ཅད་སེལ་མདོ་བཞིན། །སྡིག་ལས་གྲོལ་ཏེ་བྱང་ཆུབ་མཆོག །
ཐུན་མོང་ལས་ནི་ངེས་པར་འགྲུབ། །ལན་ཅིག་བརྩམས་པས་དེ་སྒྲུབ་ན། །རྟག་ཏུ་ཁྲུས་བྱས་སྨོས་ཅི་དགོས། །དེ་ནས་དཀྱིལ་འཁོར་གཤེགས་མཆོད་ལ། །བཟོད་གསོལ་དམ་ཚིག་བསྡུ་བྱས་ལ། །མཎྜལ་ལེགས་པར་བྱི་དོར་བྱ། །ལྷ་གཅིག་བུམ་པ་གཅིག་པ་ནི། །འབྱོར་པ་ཆུང་བས་
ཤེས་པར་བྱ། །དེ་ལྟར་ཤེས་པའི་སྒྲུབ་པ་པོས། །བདག་གཞན་འདོད་པ་རྫོགས་དོན་དུ། །རྡོ་རྗེ་ལས་སྔགས་ཏིང་འཛིན་གྱིས། །ལས་རྣམས་བསྒྲུབ་པར་བྱ་བ་ཡིན། །བཤད་རྒྱུད་རྡོ་རྗེའི་ཟོམ་ལས་ནི། །རྡོ་རྗེའི་རྩ་བ་འདི་ལྟར་བཀྲོལ། །བསྐྲད་པ་ལ་སོགས་བཅོ་ལྔ་ལ། །ལས་ཀྱི་མཐའ་
བསྒྱུར་སྔགས་འཁོར་ལས། །བསམ་གཏན་མཁས་པས་ཤེས་པར་བྱ། །བསྡུ་ན་རྣམ་པ་བཞི་རུ་འགྱུར། །རིག་སྔགས་མནན་དང་རིག་སྔགས་གཅད། །ལས་གསུམ་རྨོངས་དང་རེངས་པའོ། །ཞི་བ་ལ་སོགས་ལས་རྣམས་ནི། །དུས་དང་ཕྱོགས་དང་རྫས་རྣམས་དང་། །བསམ་པ་

73-1-328b

ཐབས་དང་ལྷ་དང་སྔགས། །འཁོར་ལོ་མིང་གིས་བསྒྱུར་བའོ། །ཞི་བར་བྱ་བ་ལ་སོགས་རྣམས། །ལྷ་ཡི་རྣམ་པ་གསུམ་འགྱུར་ཏེ། །གཙོ་འཁོར་གཉིས་སུ་བསྡེབས་པ་དང་། །གཙོ་དང་འཁོར་ནི་སོ་སོ་སྟེ། །ཀུན་ལ་ལས་ཀུན་རྫོགས་པའོ། །སྔགས་དང་ལྷ་དང་འཁོར་ལོས་ཤེས། །ཀུན་གྱི་ལས་
ནི་འདི་ལྟར་བྱ། །ཞི་བའི་དུས་ནི་སྔ་དྲོ་སྟེ། །ཤར་དུ་ཁ་བལྟས་དཀྱིལ་འཁོར་ལ། །བརྟེན་པའམ་ཡང་ན་བུམ་པ་ལའོ། །ཤིན་ཏུ་དགེ་བའི་ལས་དག་ལས། །ཙནྡན་དཀར་པོས་འཁོར་ལོ་བྲི། །རབ་གནས་བུམ་པའི་སྟེང་བཞག་སྟེ། །ལྷ་རྣམས་དཀར་པོ་རྣམ་པར་བསམ། །མཆོད་པ་དེ་བཞིན་
སྔགས་མཆོག་ནི། །ཕྱག་འཚལ་ཐམས་ཅད་རིག་པ་གནས། །ཞི་བ་གཙོ་སྟེ་འཁོར་གྱི་ཡང་། །བཞི་ལ་བོད་པ་རབ་བརྟགས་ཏེ། །ཀྱེ་ནས་བློ་གྲོས་བཟླས་པ་ཡིས། །ཐམས་ཅད་ཞི་བར་བལྟས་ནས་ནི། །འཁོར་ལོ་ལུས་ལ་གདགས་པ་ཡིས། །ནད་སོགས་ཐམས་ཅད་ཞི་བར་འགྱུར། །རྒྱས་
ལ་སེར་པོའི་རས་ལ་ནི། །གུར་གུམ་གྱིས་ནི་འཁོར་ལོ་བྲི། །དེ་བཞིན་བྱ་སྟེ་ལྷ་རྣམས་སེར། །སྔགས་ནི་དེ་བཞིན་གཙོ་བོ་ཡི། །གཅོད་བྱེད་འཁོར་ལོའི་འཛིན་བསྐུལ་ལོ། །དེ་ཡིས་རྒྱས་བསམས་མཆོད་ན་ནི། །ཚེ་སོགས་ཐམས་ཅད་རྒྱས་པར་འགྱུར། །དབང་ལ་སྨད་འཚོང་ཞབས་མ་ལ། །
རྒྱ་སྐྱེགས་ཁུ་བས་འཁོར་ལོ་བྲི། །དེ་བཞིན་བསམ་གཏན་དམར་པོ་ལ། །སྔགས་ནི་དེ་མཚུངས་ཕུར་བུ་ནས། །ཕྱག་འཚལ་བཟླས་པས་དབང་བྱས་བསམ། །ལམ་ཆེན་སྦས་ན་ཀུན་དབང་འགྱུར། །གསད་ལ་གྲུ་གསུམ་ཆོས་འབྱུང་དང་། །ཐམས་ཅད་ནག་བྱས་རོ་རས་ལ། །དུག་ལ་
སོགས་པས་འཁོར་ལོ་བྲི། །ཁ་སྦྱར་ཕྱེ་ལ་བཀུག་བསྟིམས་ནས། །ལྷ་རྣམས་དྲག་པོས་བསད་པར་བསམ། །སྔགས་ནི་གསོད་པ་གསད་པར་བཟླས། །ཐ་མ་བསྲེགས་ན་ཐམས་ཅད་འཆི། །གཞན་གྱི་རིག་སྔགས་གཅད་པ་ནི། །གི་ཝང་གིས་ནི་འཁོར་ལོ་བྲི། །ལྷ་ཀུན་དྲག་པོར་ཤེས་
པར་བྱ། །དེ་བཞིན་གཅད་ས་མིང་བཅས་དང་། །སྟོབས་ཆེན་བཟླས་ངག་བཅད་པར་བསམ། །དེ་ཉིད་དེ་ཡིས་རབ་གཏུགས་ན། །དེས་ནི་བྱད་སྟེམས་རིག་སྔགས་ཀུན། །གཅོད་བྱེད་དེ་ལ་ཐེ་ཚོམ་མེད། །རིག་སྔགས་མནན་ལ་དེ་བཞིན་དུ། །མཚོན་གྱི་རེག་པས་བྲིས་ནས་ནི། །ལས་ཀྱི་རྡོ་

73-1-329a

རྗེས་མནན་པར་བྱ། །སྔགས་ནི་མིང་བཅིང་བཟླས་བསྡོམས་བསྲེག །དེ་ཡི་སྔགས་རྣམས་མནན་བསམས་ཤིང་། །ལམ་ཆེན་རྒྱ་གྲམ་དག་མནན་ན། །ངེས་པར་རིག་སྔགས་ཀུན་གཞོམ་འགྱུར། །རེངས་ལ་དེ་བཞིན་ཀཱ་ཡ་སྟྭཾ། །རྨོངས་ལ་བི་དྷི་མོ་ཧའོ། །ངག་རེངས་ཝཱ་ཀ་སྟྭཾ་
ཞེས་བརྗོད། །སྐྲག་ལ་བྷཻ་ར་ཡ་ཧཱུཾ་ངོ་། །འཇིལ་བ་ལ་བྷ་ཡ་ཀ་རའོ། །འཇོམས་ལ་མ་ཏ་ཞེས་པ་ཡིན། །ལས་འཇིལ་ཀརྨ་བྷནྫའོ། །གདོན་མི་ཟ་ལ་ཨ་མྲི་སོད། །བརླག་ལ་ཏ་ཐཱ་ཡ་ཞེས་ཏེ། །ཐར་ལ་བི་མོ་ཀྵ་ཡའོ། །དགུག་ལ་ཨཱ་ཀཱཪྵ་ཡའོ། །ལས་བྱེད་ཀརྨ་ཀཱ་ར་ཡ། །མ་གྲུབ་གྲུབ་
བྱེད་ཀརྨ་སིདྷྱ། །འདོད་ལ་ཀརྨ་དྷ་ཡའོ། །སྲུང་ལ་རཀྵ་ཀུ་རུ་སྟེ། །གཟའ་སྐར་བཟློག་པ་ལ་སོགས་པ། །མན་ངག་ལྡན་པའི་མཁས་པས་སྦྱར། །འདིས་ནི་ལས་རྣམས་འགྲུབ་པར་བྱེད། །བྱ་བ་བཞི་ནི་ངེས་ཤེས་བྱ། །རྡོ་རྗེ་ལྟ་བུར་ཐོགས་མེད་པ། །ནན་ཏན་གྱིས་ནི་བསྒྲུབ་པར་བྱ། །ནན་ཏན་གྱིས་ནི་བསྒྲུབ་བྱས་
པས། །བདག་དང་གཞན་དོན་ངེས་པར་འགྲུབ། །ངེས་པར་དོན་མཐོང་བྱ་བའི་ཆོ་ག་ནི། །བརྒྱ་རྩ་བརྒྱད་བྱས་དེ་ནི་འདི་ཆེས་ཏེ། །རྡོ་རྗེ་རྣམ་འཇོམས་ཆོ་ག་འདི་སྦྱར་བས། །ཁམས་གསུམ་མ་ལུས་དོན་རྣམས་ཐོབ་པར་ཤོག །འཕགས་པ་རྡོ་རྗེ་རྣམ་པར་འཇོམས་པའི་སྒྲུབ་ཐབས་ཆོ་ག་ཞིབ་མོ་
དང་བཅས་པ། བྲམ་ཟེ་རིག་སྔགས་འཆང་བ་མཁས་པ་ཆེན་པོ་ཀུ་མཱ་ར་སེ་ནས་མཛད་པ་རྫོགས་སོ།།      །།རྒྱ་གར་གྱི་མཁན་པོ་བུདྡྷ་གུཔྟ་དང་། བོད་ཀྱི་ལོ་ཙཱ་བ་དཔའ་མཉྫུ་ཤྲཱི་ཝརྨས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །།ཕྱིས་པཎྜི་ཏ་ཛྙོན་ཏེང་ཧ་དུ་དང་། ལོ་ཙཱ་བ་
ད་འོག་བསོད་ནམས་མོས་པ་ཤེས་རབ་ཀྱིས་གསན་ནས་ཞུས་པའོ། །༄༅༅། །རྒྱ་གར་སྐད་དུ། བཛྲ་བི་དཱ་ར་ཎ་ནཱ་མ་དྷཱ་ར་ཎཱི་ཨེ་ཀ་བཱི་ར་སཱ་དྷ་ན་ནཱ་མ། བོད་སྐད་དུ། རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་སྒྲུབ་ཐབས་དཔའ་བོ་གཅིག་ཏུ་སྒྲུབ་པ་ཞེས་བྱ་
བ། འཕགས་པ་འཇམ་དཔལ་ལ་ཕྱག་འཚལ་ལོ། །གང་ཞིག་རྡོ་རྗེ་བདག་གཞན་དོན། །རྫོགས་ནས་མཐར་ཕྱིན་སྐུར་གནས་པ། །རྡོ་རྗེ་རྣམ་འཇོམས་ཕྱག་འཚལ་ཏེ། །བྱ་བ་ཉུང་བའི་སྒྲུབ་ཐབས་བྲི། །གང་ཞིག་ཤེས་རབ་ཆུང་གྱུར་ལ། །སྤྲོས་ལ་མི་དགའ་རྣལ་འབྱོར་པ། །དམ་ཚིག་

73-1-329b

དབང་ཐོབ་རྗེས་གནང་ཅན། །དེས་ནི་དོན་གཉིས་ཕྱིར་འདི་སྒྲུབ། །རྒྱས་པར་ཡན་ལག་བྱ་བ་ཀུན། །སྒྲུབ་ཐབས་ཆེ་ལས་འབྱུང་བཞིན་བྱ། །ཁྱད་པར་མན་ངག་འདི་ལྟ་སྟེ། །རབ་ཏུ་དབེན་པའི་གནས་དག་ཏུ། །རྣལ་འབྱོར་འཁོར་དང་བཅས་པ་ཡི། །དུས་ངན་བར་ཆད་བསལ་བྱས་ཏེ། །མཎྜལ་
ལ་བརྟེན་མཆོད་པ་དང་། །བུམ་པ་གཉིས་དག་ལེགས་བྱས་ཏེ། །སྔོན་དུ་རྡོ་རྗེ་ནུས་པས་མཉེས། །ཐོ་རངས་དུས་སུ་ཁྲུས་གཉིས་བྱ། །ཤ་སོགས་སྤངས་ཏེ་སྟན་བདེ་ལ། །གནས་པས་ཡང་སྙིང་གིས་བགེགས་བསྐྲད། །ལྷ་གཉིས་བླ་མ་མདུན་བལྟས་ཏེ། །བདུན་པོ་དག་བྱས་
སྟོང་པར་བསམས། །དེ་ལ་རྡོ་རྗེའི་ཁང་པ་སྟེ། །གདན་བཅས་སྟེང་དུ་ལྷ་དྲུག་གི། །བདག་ཉིད་ཕྱག་ན་རྡོ་རྗེར་བསམ། །བུམ་པ་སྟོང་སོགས་གདན་དག་ལ། །ཧཱུཾ་ལས་རྡོ་རྗེ་རྣམ་འཇོམས་ཏེ། །ཡུམ་དང་ཁྲོ་བོ་བཅས་པར་བསམ། །སྤྱན་དྲངས་བགེགས་བསྐྲད་ཡོན་ཕུལ་ནས། །ཕྱག་རྒྱ་
སྔགས་ཀྱིས་བསྟིམ་པར་བྱ། །མཆོད་དེ་བསྟོད་ལ་གསོལ་བ་གདབ། །ཕྲེང་བ་བྱིན་བརླབ་ཐུགས་ཟླ་ལ། །རྡོ་རྗེ་ལྟེ་བར་སྔགས་བསམས་ཏེ། །ངག་གསང་གསུམ་བཟླས་དོན་གཉིས་བྱས། །བར་ཆད་བྱུང་ན་བསལ་ལ་བསྐྱར། །སྤྱོད་ལམ་ལེགས་བྱས་འབད་པ་ཡིས། །རྟགས་བྱུང་
ནུས་པ་ཐོབ་པའོ། །དེ་ནས་གཞན་དོན་སྒྲུབ་པ་ནི། །ནད་སོགས་ཞི་བར་བྱ་བའི་ཕྱིར། །སྟ་གོན་གནས་ལས་ཆོ་ག་བྱ། །དཀྱིལ་འཁོར་བྲི་ཞིང་རྫས་དགོད་པ། །ཐིག་གདབ་ཕོ་བྲང་ཟླུམ་པོ་ལ། །རིན་ཆེན་ཕྲེང་བ་ལྷ་གནས་གཉིས། །སྒོ་ལྡན་བྲིས་ཏེ་རྒྱན་བཀྲམ་ནས། །བུམ་པ་དབུས་
ནས་ནུབ་སྒོར་ཏེ། །ཁྲུས་སོགས་སྔར་བཞིན་ཤེས་པར་བྱ། །སྔགས་གཉིས་གྲངས་ལྡན་གྲག་པའི་སྒྲས། །རྡོ་རྗེ་ནད་སོགས་འཇོམས་པར་བསམ། །དེ་ནས་ཁྲུས་ཀྱི་ལས་ལ་སྦྱར། །མཚན་མ་ཕྱི་ནས་ནུབ་སྒོ་ནས། །དབུས་སུ་བཞག་ནས་བགེགས་བསྐྲད་ནས། །བྱབ་དང་བསྲུང་
བ་ཀུན་བྱ་སྟེ། །བུམ་ཆུ་སྔགས་དང་བཀྲ་ཤིས་སྒྲས། །དབང་བསྐུར་ཁྲུས་བྱ་ནད་སོགས་ཞི། །བསམས་ཏེ་རྫས་བརྒྱད་བྱིན་བྱ་སྟེ། །ནུབ་ནས་བཏོན་ཏེ་ལས་ཀྱང་བསླབ། །ཡོན་ཕུལ་ལན་གསུམ་གྱིས་རྫོགས་འབར། །སྔོན་གྱི་ལས་ཀྱང་ངེས་པར་འཇིག །འཕྲལ་གྱི་རྐྱེན་

73-1-330a

དག་སྨོས་ཅི་དགོས། །གཤེགས་བསྡུ་ཕྱི་ལ་ལེགས་པར་གནས། །འདི་ནི་བསྡུས་པར་གྱུར་པ་སྟེ། །ལྷ་གཉིས་བུམ་པ་གཅིག་པ་ནི། །འབྱོར་པ་ཅུང་ཟད་ཤེས་བྱ་ཞེས། །བླ་མས་གསུངས་ཏེ་དེ་བསྟེན་བྱས། །བདག་གིས་འདི་བྱས་དགེ་རྩ་ཡིས། །ཁམས་གསུམ་
སེམས་ཅན་ནད་གཉིས་ཅན། །དེ་ལས་གྲོལ་ཏེ་གསང་བདག་གི། །གོ་འཕང་རྣམ་གཉིས་ཐོབ་པར་ཤོག །འཕགས་པ་རྡོ་རྗེ་རྣམ་པར་འཇོམས་པའི་གཟུངས་ཀྱི་སྒྲུབ་པའི་ཐབས་དཔའ་བོ་གཅིག་པ་ཞེས་བྱ་བ་མཁས་པ་ཆེན་པོ་སངས་རྒྱས་གསང་བས་རི་གངས་ཅན་དུ་མཛད་པ་རྫོགས་
སོ།།      །།མཁན་པོ་དེ་ཉིད་དང་། ལོ་ཙཱ་བ་དཔའ་མཉྫ་ཤྲཱི་ཝརྨས་བསྒྱུར་བའོ། །༄༅༅། །རྒྱ་གར་སྐད་དུ། ཨཱརྱ་བཛྲ་བི་དཱ་ར་ཎ་ནཱ་མ་དྷཱ་ར་ཎི་བ་ལིཾ་བི་དྷི་ཀྲ་མ་ནཱ་མ། བོད་སྐད་དུ། འཕགས་པ་རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་གཏོར་མའི་ཆོ་གའི་
རིམ་པ་ཞེས་བྱ་བ། འཕགས་པ་འཇམ་དཔལ་ལ་ཕྱག་འཚལ་ལོ། །དོན་རྣམས་མ་ལུས་རབ་མཛད་པའི། །རྡོ་རྗེ་རྣམ་འཇོམས་ཕྱག་འཚལ་ཏེ། །རྣལ་འབྱོར་ཀུན་ལ་ཕན་བསྐྱེད་པའི། །གཏོར་མའི་ཆོ་ག་མདོར་བསྡུས་བཤད། །བར་ཆད་ཞི་དང་ཚོགས་བསགས་དང་། །འདོད་པ་ཐམས་ཅད་རབ་
བསྒྲུབ་ཕྱིར། །ཟླ་བ་ཞག་དང་ཐུན་མཚམས་ལ། །ཡོ་བྱད་ཅི་འབྱོར་གཏོར་མ་གཏང་། །གཏོར་མའི་ཆོ་ག་རྒྱས་པ་ནི། །བླང་བྱས་གཡོ་ཡིག་གསུམ་ལྟར་བྱས། རྣལ་འབྱོར་དོན་ཕྱིར་བསྡུས་པ་འདི། །བདག་བྱས་ཆོ་གས་ཀུན་ལ་འགྲོ། །དེ་བས་སོ་སོའི་ལྷ་ཚོགས་དང་། །ཞི་སོགས་གང་
འདོད་ལྷ་ཚོགས་བསྒྱུར། །མདུན་དུ་མཎྜལ་ལེགས་བྱས་ཏེ། །ཕྱོགས་སྐྱོང་བགེགས་ལ་མེ་ཏོག་དབུལ། །རྒྱལ་ལ་སོགས་པ་དེ་བཞིན་ཏེ། །ཁྲི་སྟེངས་རིན་ཆེན་སྣོད་གཙང་མ། །འབྲས་ཆན་ཁུར་བ་ཤ་སོགས་པའི། །གཏོར་མ་གསུམ་མམ་གཅིག་དག་སྟེ། །མཆོད་ཡོན་མཆོད་ལྔ་
བཅས་པའོ། །སྔགས་པ་ཁྲུས་བྱས་གོས་གཙང་གྱོན། །ཡི་དམ་ལྷར་གནས་བགེགས་བསལ་ནས། །ཡང་སྙིང་གིས་སམ་ཡིག་གསུམ་གྱིས། །བདུད་རྩིར་བྱིན་རླབས་ནམ་མཁའ་མཛོད། །དེ་ཡི་སྔགས་དང་ཕྱག་རྒྱ་སྤེལ། །དེ་ནས་དགུག་བྱེད་ཕྱག་རྒྱ་དང་། །ཛཿཞེས་པ་ཡིས་

73-1-330b

ཕྱོགས་སྐྱོང་བགེགས། །བཀྲ་ཤིས་ལྷ་མོ་བཅས་ཏེ་དགུག །མེ་ཏོག་སྟན་ལ་རབ་བཞག་ནས། །ཡུམ་གྱི་རྒྱས་གདབ་དམ་ཚིག་བསྟན། །བསང་གཏོར་མཆོད་ཡོན་མཆོད་ལྔ་དབུལ། །དེ་ལས་ལག་གཡས་སྙིང་གར་གཏད། །གཡོན་པ་རྩེ་གསུམ་གཏོར་མར་བསྟན། །སེ་གོལ་
བརྡབ་ཅིང་སྔགས་འདིས་དབུལ། །ཨོཾ་བཛྲ་ཨཱཿཧཱུཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱཏ་ད་ཤ་དི་ཀ་ལོ་ཀ་པཱ་ལ་དྷྲིཀ །སརྦ་བིགྷྣཱཾ། མཾ་ག་ལ་དེ་ཝཱི་ཨཥྚ་ས་པ་རི་བཱ་ར་བ་ལིཾ་པཱུ་ཛ་ཁཱ་ཧི། མ་མ་སརྦ་ཀརྨྨ་སཱ་དྷ་ཡ་ཧཱུཾ་ཧཱུཾ་ཧཱུཾ། ལན་གསུམ་བརྗོད་ལ་གཏོར་མ་དེ། །བདུད་རྩི་འདོད་ཡོན་
ལྔ་ལྡན་པར། །རྡོ་རྗེ་ཞལ་དུ་རང་སྔགས་ཀྱིས། །དྲངས་པས་སྦྱིན་པ་གཉིས་རྫོགས་བསམ། །སྦྱིན་པ་གཉིས་རྫོགས་ཚིགས་བཅད་བརྗོད། །དབང་པོ་རྡོ་རྗེ་འཆང་སོགས་ཀྱིས། །ཕྱོགས་སྐྱོང་དག་ལ་བསྟོད་པ་བྱ། །བགེགས་ལ་བཀའ་བསྒོ་ལྷ་མོ་ལ། །བཀྲ་ཤིས་གསོལ་
གདབ་ཀུན་ལ་ཡང་། །ཞི་བ་ལ་སོགས་གང་འདོད་ཞུ། །མཆོད་པས་མཆོད་དེ་སེ་གོལ་སྒྲ། །ཡི་གེ་བརྒྱ་པ་མུཿབཅས་པས། །བཟོད་གསོལ་རང་གནས་གཤེགས་སུ་གསོལ། །གཏོར་མ་ཐག་རིང་གནས་བཅས་བཞག །དྲི་མ་མ་ཡལ་འབྱུང་པོ་མཉེས། །དེ་བས་ཁྱི་བྱ་དག་ལ་མིན། །
འདི་ནི་གང་འདོད་ལས་འགྲུབ་སྟེ། །རང་གི་ལས་ཞེས་གསུངས་པས་ན། །འབད་དེ་སྒྲུབ་པ་ཀུན་ཞུགས་པའི། །རྣལ་འབྱོར་པ་ཡིས་གུས་བྱས་ན། །དངོས་གྲུབ་རྣམ་གཉིས་གྲོགས་སུ་འགྱུར། །སངས་རྒྱས་གསང་བ་བདག་གིས་ནི། །འཇམ་དཔལ་གོ་ཆས་གསོལ་བཏབ་ནས། །
གཏོར་མའི་རིམ་པ་བསྡུས་པ་ཡིས། །དགེ་བས་ཀུན་ཀྱང་གྲོལ་བར་ཤོག །འཕགས་པ་རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་གཏོར་མའི་ཆོ་གའི་རིམ་པ་སློབ་དཔོན་ཆེན་པོ་སངས་རྒྱས་གསང་བས་མཛད་པ་རྫོགས་སོ།།      །།རྒྱ་གར་གྱི་མཁན་པོ་དེ་ཉིད་དང་། ལོ་ཙཱ་བ་དཔའ་
མཉྫ་ཤྲཱི་ཝརྨས་བསྒྱུར་བའོ། །༄༅༅། །རྒྱ་གར་སྐད་དུ། ཨུ་པཱ་ཡ་ཀརྨ་ནཱ་མ། བོད་སྐད་དུ། ལས་ཀྱི་ཐབས་ཞེས་བྱ་བ། དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །རྡོ་རྗེ་ཅན་རྣམས་རྒྱལ་འགྱུར་བའི། །རྡོ་རྗེ་ཅན་རྣམ་འཇོམས་ཕྱག་འཚལ་ཏེ། རྡོ་རྗེ་རྣམ་པར་

73-1-331a

འཇོམས་པ་ཡི། །གཟའ་སྐར་བྱད་སྟེམས་བཟློག་པ་བཤད། །བྱད་ནི་མཁའ་འགྲོ་ལ་སོགས་པའི། །རིག་སྔགས་གང་ཡིན་དེ་ཡི་མཐུས། རྣལ་འབྱོར་གསང་བ་བསྟན་པ་སྟེ། །དེ་བཟློག་རིག་སྔགས་བཅས་མནན་བཞིན། །གང་དག་གཟའ་སྐར་བཙས་པའམ། །དེ་ལ་བབས་
ནས་ལས་ངན་ལ། །འདི་བྱས་གནོད་པ་མེད་པར་འགྱུར། །དཀྱིལ་འཁོར་བརྒྱད་དམ་བཞི་པ་ལ། །ཡང་ན་གཅོད་བྱེད་མེད་པ་ལ། །གཟའ་བརྒྱད་རྒྱུ་སྐར་གཟུགས་རྣམས་ནི། །ལྷ་ཡི་སྣམ་བུར་དགོད་པར་བྱ། །གཏོར་མ་མཆོད་པ་དེ་དག་མཚུངས། །བུམ་པ་ལྔའམ་བཅུ་གསུམ་མམ། །གཅིག་
པ་ཐམས་ཅད་བཤམས་ཏེ་གཞག །དེ་ནས་ཁྲུས་བྱས་བསྲུང་ལྡན་པས། །བཅུ་གསུམ་ལྔའམ་དཔའ་བོ་གཅིག །བསྐྱེད་རྫོགས་དེ་དག་འདྲ་ཤེས་བྱ། །གཟའ་རྣམས་གྲྭ་ལས་ནག་པོ་ཆེ། །བུམ་པ་རྩེ་གསུམ་ཐོགས་པའོ། །རྒྱུ་སྐར་འོད་གཞོན་བུམ་པ་དང་། །གློག་ཕྲེང་ཐོག་སྐྱེས་སྤྱན་
དྲངས་ནས། །བསྟིམས་ཏེ་མཆོད་པ་བྱས་ནས་ནི། །རྡོ་རྗེའི་གཟུངས་སྔགས་དག་ལ་ནི། །ཨོཾ་ཨསྟ་ན་གྲ་གྲ་ཧ་ཧེ་ནཾ་ན་གྲ་ཨསྟ་དྷ་དྷ་ར་རཱ་ཛྙཱ་པ་ཡ་ཏི་སྭཱ་ཧཱ། དེ་དང་ལྡན་པས་བཟླས་པ་ཡིས། །ནུས་པ་ཀུན་དུ་བྱས་བསམས་ཤིང་། །བཀའ་ཡི་བདེན་པ་བསྒྲགས་བྱས་ཏེ། །མཆོད་ནས་དེ་དག་མཁའ་ལ་
གཤེགས། །བུམ་པས་ཕྱི་བཞིན་ཁྲུས་བྱས་ན། །དེ་དག་ལས་ནི་ཐར་བར་འགྱུར། །དེ་ནས་གཞན་ཡང་ལས་རྣམས་ནི། །རྒྱས་པར་འགྲེལ་དང་སྒྲུབ་ཐབས་ཏེ། །སོ་སོར་སྦྱར་ན་འདི་དག་ནི། །དཀྱིལ་འཁོར་རྫས་དང་ཡོ་བྱད་དང་། །ལྷ་དང་སྔགས་ནི་སོ་སོ་ལ། །མཁས་པས་དེ་བཞིན་སྦྱར་བར་བྱ། །
ཕྱག་འཚལ་ལ་སོགས་ཀུན་ལ་སྦྱར། །དང་པོར་བདག་ལ་དོན་མཆོད་སོགས། །བདུན་གྲུབ་འདོད་ནས་སརྦ་བིད། །དེ་ལ་སོགས་པ་བདུན་སྦྱར་རོ། །གཞན་དོན་ལས་དག་བཤད་པ་ཡིན། །སེམས་ཅན་ཐམས་ཅད་སྐྲག་པ་ལ། །ཏྲ་ཊ་ལ་སོགས་རྣམ་པར་ཤེས། །འཇིལ་ལ་སརྦ་ཏ་ཐཱ་སོགས། །
རིག་སྔགས་གཅོད་ལ་ཙྪིནྡ་སོགས། །གནོན་ལ་བནྡྷ་ཡ་སོགས་ཡིན། །ལས་རྣམས་འཇོམས་ལ་ཧེ་སོགས་སྦྱར། །ལས་འཇིག་པ་ལ་ཀི་ལི་སོགས། །གདོན་བརླག་པ་ལ་སཱ་ད་ནི། །བྷཱུ་ཏ་ལ་སོགས་དེ་བཞིན་ནོ། །དེ་ལས་ཐར་ལ་ཙ་ར་སོགས། །དགུག་ལ་གྷུརྞ་ལ་སོགས་ཡིན། །ལས་

73-1-331b

བྱེད་པ་ལ་ཙུ་རུ་སོགས། །མ་གྲུབ་གྲུབ་བྱེད་ཨེ་ཧི་སོགས། །གྲུབ་པ་བརྟན་ལ་མ་ཏི་སོགས། །ངེས་པར་སྦྱར་བས་འགྲུབ་པར་འགྱུར། །གནོད་སྦྱིན་ནམཿལ་སོགས་ཡིན། །སྲུང་ལ་མན་སོགས་ངེས་པར་བྱ། །ཞི་ལ་ཏི་ཏི་ལ་སོགས་སོ། །རྒྱས་ལ་ཏེ་ཛ་ལ་སོགས་ཏེ། །རེངས་ཤིང་བསད་
ལ་ཨ་མུ་སོགས། །རྨུགས་ལ་བནྡྷ་སོགས་སྦྱར་ཏེ། །ཏིང་འཛིན་ལ་སོགས་ངེས་པར་སྦྱར། །དེ་དག་འགྲུབ་པར་རྒྱལ་བས་གསུངས། །ཡང་ན་བསྡུས་པ་འདི་ལྟ་སྟེ། །སེམས་ཅན་སྐྲག་པར་བྱ་བས་ན། །རྨུགས་པའི་བར་དུ་བཅོ་ལྔ་ལ། །ཧ་ར་ནས་ནི་ཧཱུཾ་ཕཊ་བར། །བཅོ་ལྔ་མཁས་
པས་རིམ་བཞིན་སྦྱར། །གཞན་ཡང་ལས་རྣམས་དག་ནི་འདི་ལྟ་སྟེ། །སྡིག་སྦྱོང་བ་ལ་སརྦ་པཱ་བའོ། །བཤགས་དང་དག་པ་བསམས་ལ་དེ་བཞིན་བྱ། །དུཿཁ་ཙྪེ་ད་སྡུག་བསྔལ་མེད་ལ་སྟེ། །ཐམས་ཅད་ཙི་ལ་ཏནྟྲ་མཱུ་ལའོ། །དཔལ་ལྡན་ཤྲཱི་མཾ་དེ་བཞིན་ངེས་པར་སྦྱར། །དབང་པོ་ཉམས་
ཕྱིར་ཨིནྡྲ་པུ་ཥ་ཡེ། །ཚེ་ཟད་བསྲིད་པ་ཨཱ་ཡུརྡ་དེ་སྟེ། །ཚེ་ཉམས་རྒྱས་ལ་ཨཱ་ཡུ་པུཥྚ་ལའོ། །བྱུར་ལ་སམྤ་ཏི་ཡང་ངེས་པར་བྱ། །ལྷ་རེངས་པ་ལ་དེ་བ་ཨུ་ཡའོ། །མཛའ་སྡང་བ་ལ་པྲེ་དག་པྲེ་ཡ་བྱ། །རིགས་བཞིས་གཙེས་ལ་ཅ་ཏུར་ཀུ་ལ་དང་། །ཤཱནྟིཾ་ཀུ་རུ་བྲི་ཡ་ངེས་ཞེས་བྱ། །འཁྲུག་
ལ་མ་ན་ཨ་ཤ་ཨ་ཀད་དོ། །ནོར་ཟད་ཨ་རྭ་ས་ར་ན་དྷེའོ། །མྱ་ངན་ལས་བྱུང་ཨ་ཤོད་པ་ཡའོ། །འཇིགས་ལ་ཨ་ཤརྡྷ་ཡཾ་ཤནྟིཾ་སྟེ། །ཕོངས་ལ་ཨ་ཤ་ར་ཡང་སྦྱར་བར་བྱ། །གཟའ་ལ་སོགས་པ་གོང་བཞིན་འདིར་ཤེས་ཏེ། །གདོན་ལ་ད་ཤ་ཨུ་ཙ་ཏ་ཡའོ། །མྱ་ངན་དེ་བཞིན་ཨ་ཤོ་སུ་དྷ་ཡ། །རྨི་
ལམ་ངན་ལ་དྷུར་བན་ཀ་ར་སྟེ། །མཛེ་ལ་ཀོ་ར་པྲི་མོ་ཀ་ཡའོ། །བསོད་ནམས་འཕེལ་ཕྱིར་ཕུ་ཕྱར་དྷ་ཡ་བཟླས། །འབྱོར་ལ་མཁས་པས་མི་འགྲུབ་གང་ཡང་མེད། །ཀུན་ལ་ཁྲུས་སོགས་རབ་ཏུ་བསྔགས་པ་ཡིན། །རྣལ་འབྱོར་གཙང་སྦྲ་ལྡན་པས་བསྒྲུབས་ན་འགྲུབ། །དེ་མིན་བྱས་ན་ལྷ་ནི་མི་
འགྲུབ་པས། །དེ་ཕྱིར་ལུས་ངག་བྱ་བ་དག་ལ་འབད་པར་བྱ། །འདི་བྱས་བསོད་ནམས་སེམས་ཅན་ཀུན་ལའོ། །རྡོ་རྗེ་རྣམ་པར་འཇོམས་པའི་མན་ངག་ལས་ཀྱི་ཐབས་ཞེས་བྱ་བ། སློབ་དཔོན་གྲུབ་པ་པ་ཆེན་པོ་བུདྡྷ་གུ་ཧྱས་མཛད་པ་རྫོགས་སོ།།      །།༄༅༅། །རྒྱ་གར་སྐད་དུ། 

73-1-332a

ཨཱརྱ་བཛྲ་བི་དཱ་ར་ཎ་ནཱ་མ་ཨ་བྷི་སེ་ཀ་བི་དྷིཿ། བོད་སྐད་དུ། འཕགས་པ་རྡོ་རྗེ་རྣམ་པར་འཇོམས་པ་ཞེས་བྱ་བའི་ཁྲུས་ཀྱི་ཆོ་ག །དཔལ་རྡོ་རྗེ་འཛིན་པ་ལ་ཕྱག་འཚལ་ལོ། །རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དག་དང་། རྒྱལ་པོའི་བློན་པོ་དང་། རྗེའུ་རིགས་དང་། དམངས་
རིགས་དང་། དགེ་སྦྱོང་དང་། བྲམ་ཟེ་གང་དག་སྲིད་པའི་རྒྱ་མཚོ་ལས་མ་རྒལ་བ་དག་ལ་ནད་ཐམས་ཅད་དང་གདོན་དང་། བྱད་ལ་སོགས་པ་གཞན་གྱི་གནོད་པས་སྡུག་བསྔལ་བར་གྱུར་པ་དེ་དག་ལ། རྡོ་རྗེ་རྣམ་པར་འཇོམས་པའི་རིག་སྔགས་ཀྱི་ཆོ་གས་གྲོལ་བར་གྱུར་ཅིག །དེའི་
ཕྱིར་དེ་དག་རྣམ་པར་དབྱེ་བའི་རིམ་པ་བརྩམ་པར་བྱའོ། །མདོ་འདིའི་མཚན་རྡོ་རྗེ་རྣམ་པར་འཇོམས་པ་ཞེས་བྱ་བའི་མིང་གི་ངེས་པ་བསྟན་ཏེ། ཇི་ལྟར་ཞེ་ན། རྡོ་རྗེ་ཞེས་བྱ་བ་ནི་འཕགས་པ་རྣམས་ཀྱི་ཡང་དག་པའི་ཡེ་ཤེས་ཀྱི་ཚིག་བླ་དགས་ཏེ། ཡེ་ཤེས་དེ་ནི་བསོད་ནམས་དང་ཡེ་ཤེས་
ཚད་མེད་པའི་ཚོགས་ཅན། རང་དང་གཞན་གྱི་དོན་ཕུན་སུམ་ཚོགས་པའི་ཡོན་ཏན་དང་ལྡན་པས་དེའི་ཕྱིར་ལག་ན་རྡོ་རྗེས་ལུས་ཐམས་ཅད་རྡོ་རྗེར་བྱིན་གྱིས་བརླབས་ནས་ཞེས་བྱ་བས། འབྱུང་བ་ཆེན་པོ་བཞི་ལས་གྲུབ་པ་ལྟ་བུ་ནི་མ་ཡིན་གྱི་ཡེ་ཤེས་ཀྱི་ལུས་ཅན་དུ་བསྟན་ཏོ། །དེའི་ཕྱིར་
རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་བྱ་བ་ཡང་། ཡེ་ཤེས་དེ་ཆོས་རྣམས་ཀྱི་དེ་ཁོ་ན་ཉིད་ཤིན་ཏུ་རྟོགས་པའི་ངོ་བོ་རྡོ་རྗེ་ལྟར་ཐོགས་པ་མེད་པས། རྩེ་གཅིག་ཏུ་མཉམ་པར་གཞག་པའི་གནས་སྐབས་ལ་བྱ་བར་མངོན་ནོ། །ཅིའི་ཕྱིར་ཡེ་ཤེས་འདི་ལ་རྡོ་རྗེ་ཞེས་བྱ་ཞེ་ན། ཕྱི་རོལ་གྱི་རྡོ་རྗེ་རིན་
པོ་ཆེ་དང་ཆོས་མཐུན་པ་རྣམ་པ་བདུན་ཡོད་པའི་ཕྱིར་དཔེའི་སྒོ་ནས་དོན་ཉེ་བར་མཚོན་པ་ཡིན་ཏེ། འདི་དག་ཀྱང་འདི་ལྟར། མི་ཆོད་པ། མི་ཤིགས་པ། བདེན་པ། སྲ་བ། བརྟན་པ། ཐམས་ཅད་དུ་ཐོགས་པ་མེད་པ། ཐམས་ཅད་དུ་མ་ཕམ་པ་ཞེས་བྱ་བ་རྣམས་ཏེ། དེས་ནི་ཡེ་ཤེས་དེ་
ཉིད་ཀྱི་རང་གི་ཡོན་ཏན་ཕུན་སུམ་ཚོགས་པ་བསྟན་ཏོ། །དེ་ནས་གཞན་གྱི་དོན་བསྟན་པ་ནི། ཐབས་ལ་མཁས་པའི་བྱང་ཆུབ་སེམས་དཔའ་སྒོ་སྣ་ཚོགས་ནས་སེམས་ཅན་གྱི་དོན་མཛད་པ་སྟེ། ཁམས་གསུམ་པའི་འཇིག་ཚོགས་ལ་ལྟ་བ་ཕྱིན་ཅི་ལོག་གི་བསམ་པ་ཅན། ཕྱི་དང་ནང་

73-1-332b

ནས་བགེགས་དང་ལོག་འདྲེན་རྣམ་པར་ལྟ་བའི་རྒྱུ་ལས་ཀྱི་བག་ལ་ཉལ་དང་། ཀུན་ནས་ལྡང་བར་བཅས་པ་དེ་དག་འདུལ་བའི་ཕྱིར། སེམས་ཅན་ཐམས་ཅད་སྐྲག་པར་བྱེད་པ། སེམས་ཅན་ཐམས་ཅད་འཇིལ་བར་བྱེད་པ་ཞེས་བྱ་བ་ནས་སེམས་ཅན་ཐམས་ཅད་རེངས་པར་བྱེད་པ། རྨུགས་པར་བྱེད་པའི་
ཞེས་བྱ་བའི་བར་དུ་ཚིག་དོན་བཅོ་ལྔས་བསྟན་ཏེ། དེ་དག་ཀྱང་མདོར་བསྡུ་ན་ལས་རྣམ་པ་བཞིའི་སྒོ་ནས་གཞན་གྱི་དོན་མཛད་པར་བསྟན་ཏེ། ཞི་དང་རྒྱས་དང་དྲག་སྤྱོད་དང་། །དབང་སོགས་ལས་རྣམ་བཞི་པོ་དག །ཐབས་ཀྱིས་འདུལ་བའི་དོན་མཛད་པ། །ཅི་རིགས་པར་ནི་སྦྱར་བར་བྱ། །དེ་
ལྟར་དེ་དག་ཡེ་ཤེས་ཀྱི་རྡོ་རྗེ་དེས་འདུལ་བར་མཛད། སེལ་བར་མཛད། འཇོམས་པར་མཛད་པའི་ཕྱིར་རྡོ་རྗེ་རྣམ་པར་འཇོམས་པ་ཞེས་བྱའོ། །དེ་ནས་གསང་སྔགས་ཀྱི་ཚིག་གང་དག་གསུངས་པ་དེ་དག་ཀྱང་ཡེ་ཤེས་དེའི་རྒྱུ་ལས་བྱུང་བའི་ཕྱིར་ཐོགས་པ་མེད་པ་རྡོ་རྗེའི་ཚིག་ཏུ་རིག་པར་བྱའོ། །
དེ་ནས་དེ་དག་གི་ཆོ་ག་བཤད་པར་བྱ་སྟེ། ཆོ་གར་བྱ་བ་ཐམས་ཅད་ཀྱང་གཙོ་བོར་སློབ་དཔོན་ལ་བརྟེན་པ་ཡིན་པས། དེའི་ཕྱིར་སློབ་དཔོན་དང་སློབ་མ་གཉིས་ཀ་སྟ་གོན་དུ་གནས་པའི་ཆོ་ག་ནི། དེས་ནི་རབ་བཀྲུས་གཙང་མ་ཡིན། །མདོ་སྡེ་དམ་པ་མཉན་པར་བྱ། གང་དག་ཡིད་དགེ་སེམས་དང་ཞིང་། །
གཙང་མའི་གོས་ཀྱིས་རབ་བརྒྱན་ཏེ། །ཟབ་མོ་སངས་རྒྱས་སྤྱོད་ཡུལ་བ། །ཞེས་བྱ་བ་ལ་ཤིན་ཏུ་ཁྲུས་བྱ་བ་དང་གོས་གཙང་མ་གྱོན་པ་ནི་ཕྱིའི་གཙང་སྦྲའོ། །སྒོ་གསུམ་ནས་སྡིག་པ་མི་དགེ་བ་མི་བྱེད་པ་ནི་ཡིད་དགེ་བའོ། །བྱང་ཆུབ་ཏུ་སྨོན་པ་ནི་སེམས་དང་བ་སྟེ་དེ་དག་ནི་ནང་གི་གཙང་སྦྲའོ། །མདོ་སྡེ་དམ་
པ་མཉན་པར་བྱ། །ཞེས་པའི་དོན་ནི་རིག་སྔགས་དེ་དག་ཡེ་ཤེས་ལས་བྱུང་བར་ཁོང་དུ་ཆུད་པར་བྱའོ། །ཟབ་མོ་སངས་རྒྱས་སྤྱོད་ཡུལ་བ། །ཞེས་བྱ་བ་ཡང་ཡེ་ཤེས་དེའི་རང་བཞིན་དུ་རྟོགས་པ་ཉིད་དོ། །དེ་ནས་སློབ་དཔོན་གྱི་ཆོ་གར་བྱ་བ་ནི་མདོ་འདི་ཉིད་ལས་དབང་བསྐུར་བའི་ཡན་ལག་ཏུ་བུམ་པ་
བསྟན་པ་ཙམ་དུ་ཟད་དོ། །དཀྱིལ་འཁོར་ལ་སོགས་པའི་ཆོ་ག་མ་གསུངས་པ་དེ་དག་འདི་ཉིད་དུ་གསུངས་པ་ལ་མི་མངོན་པར་འགྱུར་བའམ། ཡང་ན་སྤྱི་རྒྱུད་ལས་གསལ་བའི་ཕྱིར་རམ་དེ་དག་ཏུ་མ་བསྟན་པ་ནི་གཉིས་ཀ་ལྟར་ན་ཡང་དེ་ལྟར་སྦྱར་བ་ཉིད་དེ། དེ་ལས་ནི། ཕྱུགས་

73-1-333a

ལྷས་ཤིང་གཅིག་ལྷ་ཡི་ཁང་པའམ། །ལམ་གྱི་བཞི་མདོའམ་ཁང་སྟོང་ནགས་ཚལ་དུ། །དཀྱིལ་འཁོར་གྲུ་བཞི་ལྷམ་པ་གྲུ་བཞིའི་ཚད། །ཚོན་རྩི་རྣམ་པ་སྣ་ཚོགས་རྣམས་ཀྱིས་བྲི། །ཕྱོགས་ཀྱི་ལྷ་རྣམས་གནས་ནི་ཡོངས་སུ་གཟུང་། །སྒོ་བཞིའི་ས་ལ་ཀུ་ཤའི་རྩྭ་ཡང་དགྲམ། །ཞེས་
གསུངས་པ་ལས་རིག་པར་བྱའོ། །དེ་ནས་དཀྱིལ་འཁོར་བྱ་བ་ཡང་སློབ་དཔོན་གྱིས་དང་པོ་ས་བསླང་བར་བྱ་བ་དང་སྦྱང་བ་ལ་སོགས་པའི་ཆོ་ག་ཚུལ་བཞིན་དུ་བྱས་པ་སྟེ། འཐས་པར་བཅགས་ལ་བའི་རྣམ་པ་ལྔ་དང་སྤོས་ཆུ་གཙང་མས་བྱུག་གོ། །སྟེང་དུ་ཡང་བླ་རེ་བྲེ་ཞིང་དར་གྱི་ལྡ་ལྡི་དང་
མེ་ཏོག་གི་ཕྲེང་བ་དང་མེ་ལོང་དག་གིས་ཀྱང་བརྒྱན་པར་བྱའོ། །གཞན་ཡང་དབང་བསྐུར་བའི་ཆོ་ག་ལ་བཀྲ་ཤིས་ཀྱི་བུམ་པ་ཚུལ་དང་ལྡན་པས་ཡོན་ཏན་འགྲུབ་པའི་ཕྱིར། འདི་ཉིད་ལས་དེའི་རྒྱུ་བསྟན་པ་ནི། གསེར་རམ་ཡང་ན་ནི། །དངུལ་གྱི་བུམ་པ་དག་ཀྱང་རུང་། །ཞེས་བྱ་བས་
བསྟན་ཏོ། །དེ་དག་གི་ནང་དགང་བ་ནི་ཆུའོ་ཞེས་བྱ་བ་སྨོས་ཏེ། ཙནྡན་དང་ག་པུར་དང་གུར་གུམ་ལ་སོགས་པའི་ཆུས་ནང་བཀང་ལ། དེ་དང་ལྷན་ཅིག་དང་ལྡན་པའི་རིན་པོ་ཆེ་དང་ཤེལ་དང་ཞེས་བྱ་བ་ནི་དངོས་སུ་ཟད་དོ། །ནོར་བུ་ཞེས་བྱ་བ་ནི་སྤྱི་ཚིག་ཏུ་སྨོས་པ་སྟེ། རྣམ་པར་ཕྱེ་ན་པདྨ་རཱ་ག་དང་
ཨིནྡྲ་ནཱི་ལ་ལ་སོགས་པ་རིན་པོ་ཆེའི་རིགས་སུ་གཏོགས་པ་མུ་ཏིག་དང་ས་ལེ་སྦྲམ་ལ་སོགས་པ་དག་སྟེ་དེ་དག་ཀྱང་གས་ཆག་མེད་པ་རྒྱན་གྱི་བྱ་བ་བྱེད་ནུས་པ་དག་ནི་རྨ་མེད་ཅེས་བྱའོ། །ཞན་ཡང་དེའི་ཟླ་ལ་ཡུངས་ཀར་དང་། རྩྭ་དཱུར་བ་དང་མེ་ཏོག་རྣམས་གཞུག་པར་བྱའོ། །ཚུལ་བཞིན་དུ་
སྤྱིའི་རྒྱུད་ལས་ཀྱང་། བུམ་པ་པདྨ་དམར་པོའི་མདོག་འདྲ་ཞིང་། །ནག་པོ་ར་རི་མེད་པ་རིན་ཆེན་བཅས། །སྨན་དང་འབྲུ་དང་སྤོས་ཆུས་བཀང་བ་དག །ལྡུམ་བུས་ཁ་བརྒྱན་རས་ཀྱིས་མགུལ་པ་དཀྲི། །ཞེས་བསྟན་ཏེ། དེ་དག་གི་ལྟོར་ནི་ཆུ་བྲེ་གང་ཤོང་བ་ལས་བྱ་བར་བསྟན་ཏོ། །མཚན་ཉིད་
གཞན་ནི་རྒྱུད་གཞན་དག་ལས་རིག་པར་བྱའོ། །ཡང་གོང་མ་འབྲུ་དང་སྨན་དང་ཞེས་བྱ་བ་ལ། བྱ་ཀྲྀ་དང་སེང་ཀྲི་ལ་སོགས་པའི་སྨན་རྣམ་པ་ལྔ་དང་། ཏིལ་དང་སྲན་མ་ལ་སོགས་པ་འབྲུ་སྣ་ལྔ་རྣམས་རྒྱུད་ལས་གྲགས་པ་བཞིན་དུ་སྦྱར་རོ། །མགུལ་ཆིངས་ནི་གཙང་མའི་གོས་ཞེས་

73-1-333b

བྱ་བ་མ་སྤྱད་པ་མ་བབ་པའི་རས་དཀར་པོ་ཁ་ཚར་མ་ཉམས་པ་དང་བཅས་པའོ། །དཀྲི་ཞིང་དགང་བ་ནི་གོང་དུ་བསྟན་པའི་རྫས་རྣམས་ཀྱི་དོན་མདོར་བསྡུས་ཏེ་བསྟན་པའོ། །བུམ་པ་དེ་ལྟར་བཅའ་བ་དེ་ཡང་རྟོག་པ་གཞན་གྱི་ཆོ་ག་ལས་འབྱུང་བ་བཞིན་དུ་གྲངས་བཞིའམ་ལྔ་དག་གུ་གུལ་ལ་སོགས་
པ་ལ་རྡོ་རྗེ་ཁྲོ་བོའི་སྔགས་ཀྱིས་བཏབ་སྟེ་བདུགས་ལ་དབུས་དང་གྲྭ་བཞི་རུ་གཞག་པར་བྱའོ། །དེ་ནས་སློབ་དཔོན་བདག་ཉིད་ལས་ཀྱི་ཁྲོ་བོར་བསྒྱུར་ལ་ལག་ཏུ་རྡོ་རྗེ་དང་ཡུངས་ཀར་བླངས་ཏེ། བསྐྲད་ཅིང་བསྲུང་བ་དང་། མཚམས་བཅད་པ་དག་བྱས་ནས། ཐིག་སྐུད་ལག་ཏུ་བླངས་ཏེ་ཕྱོགས་
མ་འཁྲུལ་བར་བཅད་ལ་རིམ་པ་གསུམ་པར་ཐིག་གདབ་པོ། །དེ་ནས་ལྷའི་རི་མོ་བྲིས་ཏེ། དབུས་ཀྱི་དཀྱིལ་འཁོར་དུ་གཙོ་བོ་ཕྱག་ན་རྡོ་རྗེ་རྒྱ་གྲམ་ཕྱོགས་གཅིག་མེད་པ་པདྨ་དང་སེང་གེའི་ཁྲི་སྟེངས་སུ་གཞག་གོ། །དེའི་གྲྭ་བཞིར་འཁོར་རྣམས་ཀྱི་ཕྱག་རྒྱ་བྱང་ཤར་མཚམས་ནས་བཟུང་
སྟེ་ཁྲོ་བོའི་རྡོ་རྗེ་རྩེ་ལྔ་པ་གདེངས་པ་དང་། རྡོ་རྗེ་རྩེ་གཅིག་པ་དང་། བེ་ཅོན་རྡོ་རྗེས་མཚན་པ་དང་། རྡོ་རྗེ་ཐོ་བ་རྣམས་བྲིའོ། །དེ་ནས་རིམ་པ་གཉིས་པར་དབང་ལྡན་ལ་སོགས་པར་འཇིག་རྟེན་སྐྱོང་བ་བཅུ་དང་། བཀྲ་ཤིས་ཀྱི་ལྷ་མོ་བརྒྱད་ཀྱི་མཚན་མ་དག་བྲིའོ། །རིམ་པ་གསུམ་པར་རིན་
པོ་ཆེའི་ཆུན་འཕྱང་དང་། མུ་ཏིག་གི་ཕྲེང་བ་དག་དགོད་དོ། །ཕྱོགས་བཞིར་སྒོ་ཁྱུད་དང་རྟ་བབས་དག་གིས་མཛེས་པར་བྱའོ། །དེའི་ཕྱི་རོལ་སྟེགས་བུའི་མཐའ་སྐོར་དུ་ཡང་རྩྭ་ཀུ་ཤས་བསྐོར་ཅིང་མེ་ཏོག་གི་སིལ་མ་དག་ཀྱང་བཀྲམ་མོ། །དེ་ནས་ཕྱི་རོལ་དུ་བྱུང་སྟེ་འབྱུང་པོ་རྣམས་ལ་
སྙིང་བརྩེ་བའི་ཕྱིར། བཟའ་དང་ཤ་ཆང་ལ་ཕུག་ལ་སོགས་བཅས། །འབྲས་ཆན་འབྲས་བུ་མང་པོའི་གཏོར་མ་སྦྱིན། །ཞེས་བྱ་བ་དག་ཁྱེར་ནས། ལྷ་དང་ལྷ་མིན་གནོད་སྦྱིན་ལྟོ་འཕྱེ་གྲུལ། །ཞེས་བྱ་བ་ལ་སོགས་པའི་བསྟོད་པའི་བདེན་པ་བདར་ལ། ལག་པ་གཉིས་ཐལ་མོ་ཁོང་སྟོང་
དུ་སྦྱར་བ་ལས་ཁ་ཕྱེ་སྟེ་བཀན་ནས་བསྟན་པའི་ཚུལ་དུ་བྱས་པ་ནི་གཏོར་མ་སྦྱིན་པའི་ཕྱག་རྒྱ་སྟེ། འབྱུང་པོ་དེ་དག་ལ་སོ་སོའི་རིག་སྔགས་དག་བརྗོད་ཅིང་ནམ་མཁའ་མཛོད་ཀྱི་རིག་པས་ཀྱང་བྱིན་གྱིས་བརླབས་ལ་བསྔོའོ། །དེ་ནས་སླར་ལོག་སྟེ་ལྷའི་གནས་སུ་སོང་ལ་ཚོན་

73-1-334a

གྱི་དཀྱིལ་འཁོར་དེ་དག་མདུན་གྱི་ནམ་མཁའ་ལ་གྱེན་དུ་དཔག་ཅིང་། རིན་པོ་ཆེའི་གཞལ་ཡས་ཁང་པདྨ་དང་སེང་གེའི་གདན་ཁྲིར་བཅས་པ་བསམས་ནས། དེར་རིགས་ཀྱི་སྔགས་ཀྱི་ལྷ་འཁོར་དང་བཅས་པ་སྤྱན་དྲང་བ་ནི་ཕོ་བྲང་ལྕང་ལོ་ཅན་ནས་དཔལ་ཕྱག་ན་རྡོ་
རྗེ་ཡེ་ཤེས་ཀྱི་ཁྱད་པར་ལས་བྱུང་བ་དཔལ་རྡོ་རྗེ་རྣམ་པར་འཇོམས་པ་ཞེས་བྱ་བ་སྐུ་མདོག་ལྗང་སྔོན་ཞལ་གྱི་སྨིན་མ་ཁྲོ་གཉེར་ཅན། ཕྱག་གཡས་པ་ན་རྡོ་རྗེ་རྩེ་ལྔ་པ་ཐུགས་ཀར་བསྣམས་པ། གཡོན་པ་དཀུར་བརྟེན་ཅིང་འགྱིང་བ། སྟོད་གཡོགས་དང་སྨད་གཡོགས་དང་དར་
པ་ཏིའམ་ཚི་གུ་གསོལ་བ། རྒྱན་ཐམས་ཅད་ཀྱིས་བརྒྱན་པ། འཁོར་གསང་སྔགས་དང་རིག་སྔགས་ཀྱི་ཁྲོ་བོ་དང་། ཁྲོ་མོ་ཕྱག་བརྙན་གྲངས་མེད་པའི་ཚོགས་ཅན་དག་རང་ཉིད་ཀྱི་རྩ་བའི་ཕྱག་རྒྱས་སྤྱན་དྲངས་ཏེ། ལག་པ་གཉིས་ཐལ་མོ་ཁོང་སྟོང་དུ་སྦྱར་ལ་སྲིན་ལག་གཉིས་ནང་དུ་བཀུག་སྟེ་ཕན་ཚུན་
བསྣོལ་བའི་རྩེ་མོ་མཛུབ་མོའི་དྲུང་དུ་ཅུང་ཟད་དབྱུང་བར་བྱས་ལ། གུང་མོ་གཉིས་གཞིབས་པའི་ཕྱི་རོལ་ནས་མཛུབ་མོ་གཉིས་བཀུག་སྟེ། བར་ནས་གང་ཙམ་གྱིས་མ་རེག་པར་བྱས་ལ་མཐེ་བོང་གཉིས་དང་མཐེའུ་ཆུང་གཉིས་གཞིབས་པར་བྱའོ། །དེའི་སྔགས་ལ། ཨོཾ་བཛྲ་ཛྭ་ལ་ན་ཡེ་སྭཱ་ཧཱ། 
ཞེས་བྱའོ། །ཡང་ན་རྡོ་རྗེ་ལྕགས་ཀྱུ་ལ་སོགས་པའི་སྔགས་དང་ཕྱག་རྒྱས་སྤྱན་དྲང་ངོ་། །དེ་ནས་ཐོག་མར་དམ་ཚིག་གི་ཕྱག་རྒྱ་བསྟན་ཏེ། ལག་པ་གཡས་པའི་མཐེའུ་ཆུང་གི་སེན་མོ་མཐེ་བོས་མནན་ལ་ལྷག་མ་རྣམས་རྡོ་རྗེ་རྩེ་གསུམ་གྱི་ཚུལ་དུ་བྱས་ལ། དེའི་སྔགས་ནི། ཨོཾ་ཤཾ་ཀ་ར་མ་ཧཱ་
ས་མ་ཡེ་སྭཱ་ཧཱ། ཞེས་སོ། །དེ་ནས་དཀྱིལ་འཁོར་གྱི་གྲྭ་བཞིར་ཁྲོ་བོ་བཞི་གཞག་སྟེ། བྱང་ཤར་མཚམས་ནས་བཟུང་སྟེ་ཁྲོ་བོའི་རྒྱལ་པོ་རྡོ་རྗེ་གཏུམ་པོ་ཞེས་བྱ་བ་མདོག་སྨུག་ནག་བཞིན་ཁྲོ་གཉེར་ཅན་ཕྱག་གཡས་པ་ན་ཁྲོ་བོའི་རྡོ་རྗེ་རྩེ་ལྔ་པ་གདེངས་པ་ཕྱར་ཏེ་ཐོགས་པར་བསམ་མོ། །དེའི་ཕྱག་རྒྱ་ནི་
ལག་པ་གཡོན་པའི་མཛུབ་མོ་སྙིང་གའི་ལོགས་སུ་གཞག །གཡས་པའི་སོར་མོ་གསུམ་རྡོ་རྗེ་ལྟར་བྱས་ཏེ། དེའི་སྔགས་ཀྱང་འདི་ཉིད་ལས། ཨོཾ་ཙུ་རུ་ཙུ་རུ་ཙཎྜ་བཛྲ་ཀཱི་ལི་ཀཱི་ལཱ་ཡ་སྭཱ་ཧཱ། ཞེས་བྱ་བ་དང་སྦྱར་རོ། །དེ་ནས་ཤར་ལྷོའི་མཚམས་སུ་རྡོ་རྗེ་ཀཱི་ལི་ཀཱི་ལཱ་ཡ་ཞེས་བྱ་བ་མདོག་ལྗང་ནག་

73-1-334b

དཔྲལ་བ་ཁྲོ་གཉེར་ཅན། ཕྱག་གཡས་པ་ན་རྡོ་རྗེ་རྩེ་གཅིག་པ་ཀ་ན་ཡའི་དབྱིབས་འདྲ་བ་ཐོགས་པ་བསམ་སྟེ། དེའི་ཕྱག་རྒྱ་ནི་ལག་པ་གཉིས་ཁུ་ཚུར་བཅངས་ལ་ཅུང་ཟད་བསྣོལ་བའི་ཚུལ་དུ་བྱས་ལ། མཐེ་བོང་གཉིས་གྱེན་དུ་གཞིབས་ལ་བསྒྲེང་ངོ་། །དེའི་སྔགས་ནི། ཨོཾ་ཏྲ་ས་ཡ་ཏྲ་ས་ཡ་བཛྲ་
ཀཱི་ལི་ཀཱི་ལཱ་ཡ་སྭཱ་ཧཱ། ཞེས་བྱ་བ་དང་སྦྱར་རོ། །དེ་ནས་ལྷོ་ནུབ་ཀྱི་མཚམས་སུ་རྡོ་རྗེ་བེ་ཅོན་ཞེས་བྱ་བ་མདོག་མཐིང་ནག་སྨ་ར་སེར་པོ་འཁྱིལ་པ། ཕྱག་གཡས་ན་བེ་ཅོན་གྱི་རྩེ་མོ་རྡོ་རྗེས་མཚན་པ་བསྣམས་པ་སྟེ། དེའི་ཕྱག་རྒྱ་ནི་ལག་པ་གཉིས་ཕྱག་འཚལ་བའི་ཐལ་མོ་ལས་མཐེ་བོ་གཉིས་བསྒྲེང་སྟེ་
ཚིགས་བཀུག་ནས་སྲིན་ལག་དྲུང་དུ་གཟུགས་པར་བྱ་སྟེ། དེའི་སྔགས་ལ། ཨོཾ་ཧ་ར་ཧ་ར་བཛྲ་དྷ་རཱ་ཡ་སྭཱ་ཧཱ། ཞེས་བྱ་བ་དང་སྦྱར་རོ། །དེ་ནས་ནུབ་བྱང་གི་མཚམས་སུ་རྡོ་རྗེ་ཐོ་བ་ཞེས་བྱ་བ་མདོག་ནག་པོ་ཤིན་ཏུ་ཁྲོས་པ་མཆེ་བ་གཙིགས་པ་བསམས་ཏེ། དེའི་ཕྱག་རྒྱ་ནི་ལག་པ་གཉིས་ཁུ་ཚུར་བཅངས་
ཏེ་མཐེ་བོང་གཉིས་བསྒྲེང་མཐེའུ་ཆུང་གཉིས་ནང་དུ་གཞུག་གོ། །དེའི་སྔགས་ནི། ཨོཾ་པྲ་ཧ་ར་པྲ་ཧ་ར་བཛྲ་པྲ་བྷ་ཉྫ་ནཱ་ཡ་སྭཱ་ཧཱ། ཞེས་བྱ་བ་དང་སྦྱར་རོ། །དེ་ནས་ཕྱི་རོལ་གྱི་རིམ་པ་གཉིས་པར་དབང་བདག་ལ་སོགས་པ་འཇིག་རྟེན་སྐྱོང་བ་བཅུ་དང་། རྒྱལ་མ་ལ་སོགས་པ་བཀྲ་ཤིས་ཀྱི་ལྷ་མོ་བརྒྱད་ཀྱི་ཕྱག་རྒྱ་
བསྒོམ་སྟེ། དེ་དག་སོ་སོའི་སྔགས་དང་ཕྱག་རྒྱ་བཅིངས་ཏེ་སྤྱན་དྲང་ཞིང་རང་རང་གི་གནས་སུ་བཀོད་ལ། གཙོ་བོ་འཁོར་དང་བཅས་པ་དེ་རྣམས་ལ་གུས་པའི་མཆོད་པས་ཁྱབ་པར་བྱ་སྟེ། མཆོད་ཡོན་བྱུག་སྤོས་མེ་ཏོག་བདུག་པ་དང་། །ཞལ་ཟས་མར་མེའི་ཚོགས་རྣམས་རིམ་བཞིན་དབུལ། །
དེ་ནས་ཕྱོགས་བཅུ་དག་ན་ཇི་ལྟར་སྲིད་པའི་ལྷ་རྫས་དག་ཀུན་དུ་བཟང་པོའི་མཆོད་སྤྲིན་དག་གིས་མཆོད་ལ། ནམ་མཁའ་མཛོད་ཀྱི་རིག་པས་ཀྱང་བྱིན་གྱིས་བརླབས་ཏེ། འདི་ལྟར་རོ། །ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ། སརྦ་ཏངྒཾ་ཨུངྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། དེ་ནས་བསྟོད་
པ་ཅི་ཤེས་པས་ཀྱང་བསྟོད་དོ། །དེ་ནས་བཟླས་པ་བྱ་བ་ནི། ལན་གྲངས་ཉི་ཤུ་རྩ་གཅིག་གམ། །ཡང་ན་ལན་གྲངས་བརྒྱ་རྩ་བརྒྱད། །ཅེས་པ་གྲངས་མ་ངེས་པར་གསུངས་པ་ལ་རྩ་བའི་རིག་སྔགས་མཇུག་སྙིང་པོའི་རིག་སྔགས་རྣམ་པ་གཉིས་བསྐུལ་ཚིག་དང་བཅས་པར་ཟློས་པ་ནི་

73-1-335a

ཉི་ཤུ་རྩ་གཅིག་བཟླས་པར་བྱའོ། །ཡང་ན་དེ་རྣམ་པ་གཉིས་ཀ་གདོན་པར་མི་ནུས་ན་མཇུག་ན། ན་མ་ཤྩཎྜ་བཛྲ་ཞེས་བྱ་བ་ནས་ཨ་མྲྀ་ཏེ་ཧཱུཾ་ཕཊ་ཅེས་བྱ་བའི་བར་ནི་རིག་སྔགས་འདིའི་སྙིང་པོ་ཡིན་ཏེ་བསྐུལ་ཚིག་དང་བཅས་པར་ལན་གྲངས་བརྒྱ་རྩ་བརྒྱད་གདོན་པར་བྱའོ། །དེ་ལྟར་
བཟླས་བརྗོད་ཟིན་ནས་ཡོན་བདག་གསུམ་ལ་སྐྱབས་སུ་འགྲོ་བ་ལ་སོགས་པ་བྱས་ཏེ། དཀྱིལ་འཁོར་གྱི་དབུས་སུ་ཁྲིའུ་ལྟ་བུ་བཞག་པའི་སར་རི་མོ་ཡིད་ཀྱིས་བཏེག་པ་དང་། ཡང་ན་ཕྱག་རྒྱ་ཉི་ཚེ་དབྱི་བར་བྱའོ། །དེ་ནས་བུམ་པ་རྣམས་ཀྱི་ཆུ་བླུགས་ཤིང་དབང་བསྐུར་ཏེ། ཤུ་ཏི་དང་ཉེ་ཤིང་ལ་
སོགས་པས་ཁྲུས་བྱའོ། །རོལ་མོ་དང་བཀྲ་ཤིས་ཀྱང་གདོན་ནོ། །ཁྲུས་ཟིན་ནས་སྒོར་འབྱུང་བའི་དུས་སུ་ཞོ་དང་སྨན་དང་འབྲས་ལ་སོགས་པ་བཀྲ་ཤིས་ཀྱི་རྫས་ལ་སོགས་པ་ཆོ་གར་བསྟན་པ་རྣམས་མཐོང་བའམ་རིག་པར་བྱ་བ་དག་ནི་བཀག་པ་མེད་དོ། །དེ་ནས་རིག་སྔགས་ཀྱི་རྒྱལ་པོ་
འདིའི་ཆོ་གའི་ཕན་ཡོན་འབྱུང་བ་ཡང་མདོར་བསྡུ་ན་གཉིས་ཏེ། སྡུག་བསྔལ་སེལ་བར་བྱེད་པ་དང་། བདེ་བ་སྐྱེད་པར་བྱེད་པའོ། །སྡུག་བསྔལ་སེལ་བར་བྱེད་པ་ནི། སེམས་ཅན་དབང་པོ་ཉམས་པ་དང་། །ཚེ་ཟད་པ་དང་ཚེ་ཉམས་དང་། །ཞེས་བྱ་བ་ནས། དེ་དག་ཐམས་
ཅད་ཞི་བར་ལྟ། །ཞེས་བྱ་བའི་བར་དང་། ཕན་ཡོན་ནི། སྡིག་པ་ཐམས་ཅད་བྱང་བྱས་ནས། །སྡུག་བསྔལ་ཐམས་ཅད་མེད་པར་བྱེད། །ཅེས་པའི་ཚིགས་སུ་བཅད་པ་བཞིས་བསྟན་ཏོ། །བདེ་བ་སྐྱེད་པར་བྱེད་པ་ནི། རྒྱུད་དོ་ཅོག་གི་རྩ་བ་སྟེ། །
དཔལ་ཀུན་གྱིས་ནི་ལེགས་པར་བརྒྱན། །ཞེས་བྱ་བ་དང་། ཚེ་དང་བསོད་ནམས་འཕེལ་བར་འགྱུར། །སྡིག་པ་ཀུན་ལས་རྣམ་པར་ཐར། །ཞེས་བྱ་བ་རྣམས་ཀྱིས་བསྟན་ཏོ། །དེ་དག་ཀྱང་ཕན་ཡོན་མདོར་བསྡུས་པ་ཙམ་དུ་ཟད་ཀྱི། གཞན་ཡང་རྒྱལ་པོའི་ཆད་པ་དང་། ཆོམ་རྐུན་དང་། མེ་
དང་། ཆུ་དང་། དུག་དང་། མཚོན་ལ་སོགས་པའི་འཇིགས་པ་ཐམས་ཅད་ལས་སྒྲོལ་བར་རིག་པར་བྱའོ། །འཕགས་པ་རྡོ་རྗེ་རྣམ་པར་འཇོམས་པའི་ཁྲུས་ཀྱི་ཆོ་ག །སློབ་དཔོན་སངས་རྒྱས་གསང་བས་མཛད་པ་རྫོགས་སོ།།      །།

73-1-335b

༄། །ཁྲུས་ཀྱི་ཆོ་གའི་རིམ་པ་བཞུགས། ༄༅༅། །སྔོན་ཚེ་བདེ་གཤེགས་ཕོ་བྲང་སྤྱན་སྔ་རུ། །གདུག་པ་འདུལ་ཕྱིར་རྡོ་རྗེ་ཅན་གྱིས་ནི། །རྗེས་མཐུན་ཕྲིན་ལས་ཁྱད་པར་གང་བསྒོ་བ། །དམ་བཅས་ཕྲིན་ལས་དེ་ནི་རྗེས་དགོངས་ལ། །དེ་ཕྱིར་བགེགས་དང་ལོག་འདྲེན་ཚར་གཅད་
ཅིང་། །འགྲོ་བ་འདི་ལ་རྗེས་སུ་གཟུང་བའི་ཕྱིར། །སྡུག་བསྔལ་ངེས་བསལ་བདེ་མཆོག་འབྱོར་པ་པོ། །ཁྲོ་རྒྱལ་ཁྱོད་ཀྱིས་དེ་རིང་བྱིན་བརླབ་མཛད། །ཁྲུས་ཀྱི་སྐྱེས་བུ་ལ་དང་པོར་བདུད་རྩི་ཐབ་སྦྱོར་གྱི་སྔགས་ལན་གསུམ་བརྗོད་པས་བསྐྲད། དེ་ནས་རྡོ་རྗེ་ཁུ་ཚུར་གྱི་སྔགས་ལན་བདུན་
ནམ། གསུམ་བརྗོད་པས་བདུག །དེ་ནས་ཡུངས་ཀར་ལ་པྲ་ཙ་ཏ་ཞེས་པ་དང་། དྷ་ར་དྷ་ར་ཞེས་བྱ་བའི་སྔགས་ལན་གསུམ་བཟླས་ལ་གཏོར་རོ། །དེ་ནས་ཆུའི་ཁྲུས་དང་། བྱབ་པ་དང་བསྲུང་བ་རིམ་པ་བཞིན་དུ་བྱའོ། །དེའི་རྗེས་ལ་རྡོ་རྗེ་གོ་ཆ་དང་། བསྲུང་བ་ཆེན་པོའི་སྔགས་དང་ཕྱག་རྒྱས་
ཀྱང་རིམ་པ་བཞིན་དུ་བསྲུང་ངོ་། །དེའི་རྗེས་ལ་སྙིང་ག་དང་སྤྱི་བོར་ཕྱག་རྒྱ་བསམས་ལ་རྡོ་རྗེ་གཏུག་གོ། །ཨོཾ་པྲ་ཙ་ཏ་ཀུ་པི་ཏ་ས་ས་ཏི། ཨུ་ཀྵི་པི་དྷ་ན་དྷ་ར་ནི། དྷ་ར་དྷ་ར་ཧཱུཾ་ཧཱུཾ་ཕཊ། ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་ཀྲོ་དྷཱ་ཡ། མ་ཧཱ་བིད་དྷ་སྱ། མ་ཧཱ་བིད་དྷ་ར་ཙ་ཡ་། ཏདྱ་ཐཱ། དྷ་ར་
དྷ་ར་མ་ཧཱ་ཀྲོ་དྷ། མུ་རུ་མུ་རུ། སརྦ་བི་གྷྣཱཾ་བི་ནཱ་ཡ་ཀཱན། མ་ཐ་མ་ཐ། པྲ་ཧ་ར་པྲ་ཧ་ར། སརྦ་དུཥྚཱན་ཡནྟྲ་ཀ་བ་ཏ་ན། བི་ནཱ་ཤ་ཡ་བྷསྨི་ཀུ་རུ་ད་ཧ་ད་ཧཱུཾ་ཧཱུཾ་ཕཊ་ཕཊ། ནིརྨ་ཐ་ནིརྨ་ཐ་མ་ཧཱ་ཀྲོ་དྷ་ཛ་ཡ་ཛ་ཡ། སརྦ་དུཥྚཱན་པ་རི་ཀ་ཛྭ་ལ་ཛྭ་ལ་སྭཱ་ཧཱ། ཨོཾ་བཛྲ་ཛྭ་ལ་ནཱ་ཡ་སྭཱ་ཧཱ། ཆེ་གེ་མོ་སརྦ་བིགྷྣཱཾ། 
ཤཱནྟིཾ་ཀུ་རུ་སྭཱ་ཧཱ། སརྦ་བྱཱ་དྷི་བྷྱ། སརྦ་ཨུ་པ་དྲ་བེ་བྷྱཿ། སརྦ་ཨ་ཀཱ་ལ་མྲྀ་ཏྱུ་བྷྱཿ། སརྦ་གྲ་ཧེ་བྷྱཿ། སརྦ་ཛྭ་རེ་བྷྱཿ། སརྦ་དུར་སྭབྣེ་བྷྱཿ། སརྦ་དུརྣི་མི་ཏེ་བྷྱཿ། སརྦ་ཙིཏ་བྱཱ་ཀུ་ལེ་བྷྱཿ། དེ་བཞིན་དུ། ཨོཾ་བཛྲ་ཛྭ་ལ་ནཱ་ཡེ་སྭཱ་ཧཱ། ཆེ་གེ་མོ་སརྦ་བིགྷྣཱཾ་ཪཀྵ་ཪཀྵ་སྭཱ་ཧཱ། སརྦ་བྱཱ་དྷི་བྷྱཿ། སརྦ་
ཨུ་པ་དྲ་བེ་བྷྱཿ། སརྦ་ཨ་ཀཱ་ལ་མྲྀ་ཏྱུ་བྷྱཿ། སརྦ་གྲ་ཧེ་བྷྱཿ། སརྦ་ཛྭ་རེ་བྷྱཿ། སརྦ་དུར་སྭབྣེ་བྷྱཿ། སརྦ་དུརྣི་མི་ཏེ་བྷྱཿ། སརྦ་ཙིཏ་བྱཱ་ཀུ་ལེ་བྷྱཿ། ཨོཾ་བཛྲ་ཛྭ་ལ་ན་ཡེ་སྭཱ་ཧཱ། ཆེ་གེ་མོ་སརྦ་བིགྷྣཱཾ་རཀྵ་རཀྵ་སྭཱ་ཧཱ། སརྦ་བྱཱ་དྷི་བྷུཿ། སརྦ་ཨུ་པ་དྲ་བེ་བྷྱཿ། སརྦ་ཨ་ཀཱ་ལ་མྲྀ་ཏྱུ་བྷྱཿ། སརྦ་ཛ་ཧེ་བྷྱཿ། 

73-1-336a

སརྦ་དུ་རེ་སྭབྣེ་བྷྱ།ཿ སརྦ་དུརྣི་མི་ཏེ་བྷྱཿ། སརྦ་དུརྣི་མི་ཏེ་བྷྱཿ། སརྦ་ཙི་ཏ་བྱཱ་ཀུ་ལེ་བྷྱཿ། ཆུའི་ཁྲུས་དང་། བྱབ་པ་དང་། བསྲུང་བའོ། །བསྲུང་བ་ཆེན་པོ་རྣམས་ནི་མི་འཇིགས་པ་གསེར་གྱི་མདོག་ཅན། གོས་དཀར་པོ་གྱོན་པ་དབྱིག་པ་ཐོགས་པའོ། །འཇིགས་པ་ཐམས་ཅད་མེད་པ་ཁ་དོག་དཀར་མོ་
རལ་གྲི་ཐོགས་པའོ། །གདུལ་དཀའ་མ་ནི་གོས་དམར་པོ་གྱོན་པ་དཀྱིལ་འཁོར་ལ་ལྟ་བའོ། །མཐུལ་མ་ནི་ཁ་དོག་ནག་མོ་ཁྲོ་གཉེར་བསྙེར་བ་སྨད་གཡོགས་ནག་པོ་གྱོན་པ་འཇིག་རྟེན་གྱི་ཁམས་རང་གི་འོད་ཀྱི་སྣང་བས་འབར་བར་བྱེད་པ་དབྱུག་པ་ཐོགས་པའོ། །ཙ་བས་ཀྴ། ཕྱག་རྒྱ་ནི་ཐལ་མོ་ཁོང་
སྟོང་དུ་སྦྱར་བ་ལས། མཛུབ་མོ་གཉིས་དང་གུང་མོ་གཉིས་ནང་དུ་བཀུག་སྟེ་མཐེ་བོ་གཉིས་དང་སྲིན་ལག་གཉིས་མཐེའུ་ཆུང་གཉིས་བསྒྲེང་བའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་བྷ་ཡ་བི་ག་ཏེ་བྷྱཿ། བི་ཤྭ་མུ་ཁེ་བྷྱཿ། སརྦ་ཐཱ་ཧཾ་ཁཾ་རཀྵ་རཀྵ་མ་ཧཱ་བ་ལེ། སརྦ་ཏ་ཐཱ་ག་ཏེ་སྤུ་ཎ་ནི་རྫ་ས་ཏེ་ཧཱུཾ་ཧཱུཾ། ཏྲ་ཊ་
ཏྲ་ཊ་ཨ་པྲ་ཏི་ཧ་ཏེ་སྭཱ་ཧཱ། རྡོ་རྗེ་ཁུ་ཚུར་གྱི་སྔགས་ལ། ཨོཾ་བཛྲ་ད་མ་ད་མ་ཧཱུཾ་སྥོ་ཊ་ཡ་བྷསྨི་ཀུ་རུ་ཧཱུཾ་ཕཊ་སྭཱ་ཧཱ། བསྐྲད་པ་དང་། བདུག་པ་དང་། ཆུའི་ཁྲུས་དང་། བྱབ་པ་དང་། བསྲུང་བ་རིམ་པ་བཞིན་དུ་བྱའོ། །ཁྲུས་ཀྱི་ཆོ་གའི་རིམ་པ་རྫོགས་སོ།།      །།༄༅༅། །རྒྱ་གར་སྐད་དུ། 
བཛྲ་བི་དཱ་ར་ཎ་ནཱ་མ་དྷཱ་ར་ཎཱི་ཨུ་པ་དེ་ཤ །བོད་སྐད་དུ། རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་མན་ངག །བཅོམ་ལྡན་འདས་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །འདིར་བླ་མ་དམ་པའི་མན་ངག་གི་ལས་ཀྱི་ཚོགས་ཅུང་ཟད་དྲན་པ་རྣམས་དགོད་པར་བྱའོ། །དེ་ལ་ལས་ཀྱི་རྣམ་
པར་དབྱེ་བ་མང་མོད་ཀྱང་། འདིར་ནི་ཕྲིན་ལས་བཅོ་བརྒྱད་ལས་མ་གསུངས་པས་དེ་དག་གི་དོན་ཡང་བསྡུ་ན་གཉིས་ཉིད་དེ། ཕན་གདགས་པས་རྗེས་སུ་གཟུང་བ་དང་། ཆང་གཅད་པས་རྗེས་སུ་གཟུང་བའོ། །དེ་དག་ཀྱང་ཞི་བ་ལ་སོགས་པ་ཕྲིན་ལས་བཞིས་འགྲུབ་པར་འགྱུར་ལ་ཕྲིན་ལས་ཀྱང་
སྒྲུབ་པ་པོ་ཚད་དང་ལྡན་པས་ཡིན་གྱི་གཞན་དུ་ན་དོན་མེད་པར་འགྱུར་རོ། །ཐོག་མར་སྔགས་པ་སྙིང་རྗེ་ཆེན་པོས་བསྐུལ་བའི་བསྙེན་པ་ཡོངས་སུ་རྫོགས་པར་བྱས་ལ་དེའི་འོག་ཏུ་ལས་དང་མཐུན་པའི་འཁྲུལ་འཁོར་བྲི་བར་བྱའོ། །དེ་ཡང་ཞི་བའི་འཁྲུལ་འཁོར་ནི་དཀར་པོའི་ཕྱོགས་

73-1-336b

ཀྱི་ཚེས་གང་ཡང་རུང་བ་ལ་རས་སམ་ཤིང་ཤུན་ལ་སོགས་པ་རས་གཞི་དཀར་པོ་ལ་པདྨ་རྒྱས་པ་ལྟ་བུའི་རྩིབས་བརྒྱད་པའི་འཁོར་ལོ་གུར་གུམ་ལ་སོགས་པས་གཙང་སྦྲ་ལ་གནས་པར་བྲིའོ། །དེའི་ལྟ་བ་ལ་ན་མོ་ར་ཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ་མ་ཧཱ་ཡཀྵ་སེ་ནཱ་པ་ཏ་ཡེ་ཆེ་གེ་མོ་ལ་རཀྵ་རཀྵ་
ཞེས་སྤེལ་ལ་བྲིའོ། །རྩིབས་རྣམས་ལ་རིམ་པ་བཞིན་དུ་གནོད་པར་བྱེད་པ་རྣམས་ཏྲ་ཊ་ཏྲ་ཊ་ཏྲོ་ཊ་ཡ་ཏྲོ་ཊ་ཡ་ཆེ་གེ་མོ་ལ་རཀྵ་རཀྵ་ཞེས་བྲིའོ། །དེའི་མུ་ཁྱུད་ཕྱི་མ་ལ་ཡང་སྙིང་པོ་བྲི་བར་བྱས་ཏེ། སྔགས་དེ་ཐམས་ཅད་མགོ་ཕྱིར་བསྟན་པའོ། །དེ་ལྟར་བྲིས་པའི་འཁྲུལ་འཁོར་དེ་ལ་སྔགས་
པས་འདི་ལྟར་ལས་ལ་སྦྱར་བར་བྱ་སྟེ། རང་ཉིད་ཡུད་ཙམ་གྱིས་ལྷར་བསམས་ལ་མདུན་གྱི་ནམ་མཁའ་ལ་བཅོམ་ལྡན་འདས་རྣམ་པར་འཇོམས་པ་བསྐྱེད་ལ་གསོལ་བ་བཏབ་པ་ནི་བཅོམ་ལྡན་འདས་ཐུགས་རྗེ་ཆེན་པོ་ཁྱོད་ནི་ཐམས་ཅད་ལ་ཕན་པ་དང་བདེ་བའི་ཕྱིར་ཞུགས་པ་ཡིན་ན་དེ་ཡང་ཆེ་གེ་
མོ་འདིའི་གནོད་པ་འདི་དག་ཉེ་བར་ཞི་བར་བྱིན་གྱིས་བརླབ་ཏུ་གསོལ་ཞེས་ངག་གམ་ཡིད་ཀྱིས་ལན་གསུམ་གསོལ་བ་གདབ་པར་བྱ་སྟེ་བར་གྱི་ཚིག་སྤེལ་ལ་ཕྲིན་ལས་གཞན་ལ་ཡང་སྦྱར་བར་བྱའོ། །དེ་ལྟར་གསོལ་བ་བཏབ་པས་བདག་དང་བསྒྲུབ་བྱ་ལ་བྱིན་གྱིས་བརླབས་ནས་འདི་
ལྟར་འདོད་པ་གྲུབ་པར་བསམས་ཏེ། སླར་ཡང་བཅོམ་ལྡན་འདས་འཁྱུལ་འཁོར་གྱི་ལྟེ་བ་བཞུགས་ཏེ་རྒྱུན་མི་མཆད་པར་བྱིན་གྱིས་བརླབ་པ་མཛད་པར་བསམས་ལ་སྤེལ་བ་དང་བཅས་པའི་བཟླས་པ་བྱའོ། །ཟིན་པ་དང་མཆོད་དེ་བསྟོད་པ་ཡང་བྱས་ལ་ཐམས་ཅད་ཞུ་བ་དང་བཅོམ་
ལྡན་འདས་ཀྱི་ཐུགས་པདྨ་རྒྱས་པ་ལྟ་བུའི་ཐུགས་ཀར་བསྒྲུབ་བྱ་ཚུད་པས་མཆོག་ཏུ་བདེ་ཞིང་གནས་པར་བསམས་ལ་དེ་བཞིན་ཉིད་ཀྱི་བློས་མེ་ཏོག་ལ་ཡང་སྙིང་པོ་ཅི་ནུས་པར་བཟླས་ལ་འཁོར་ལོ་ལ་གཏོར་བར་བྱའོ། །དེ་ནི་རབ་ཏུ་གནས་པ་ཞེས་བྱ་སྟེ་འཁོར་ལོ་དྲིལ་ལ་བསྒྲུབ་བྱ་ལ་
བཏགས་ཏེ། དེ་ལ་འགོམ་པར་མི་བྱ་བ་ནི་དམ་ཚིག་གོ། །སེམས་ཅན་ཐམས་ཅད་གཞིལ་བར་བྱེད་པ་དང་། ཞི་བ་དང་བསྲུང་བ་སྟེ། ལས་གསུམ་དང་འབྲེལ་པའི་ཞི་བའི་འཁྲུལ་འཁོར་གྱི་རྣམ་པར་དབྱེ་བ་རྫོགས་སོ།།      །།ཇི་ལྟར་སྔར་བསྟན་པའི་ཚུལ་གྱིས་བར་གྱི་ཚིག་འདིས་

73-1-337a

སྤེལ་ལ་འདིར་ཡང་སྦྱར་ཏེ་རྒྱས་པའི་འཁྲུལ་འཁོར་ནི་གཞི་སེར་པོ་ལ་རིན་པོ་ཆེའི་ཕུང་པོ་ལྟ་བུའི་དབྱིབས་ཅན་བྲིས་ལ་མིང་འདི་ཞེས་བྱ་བའི་ཆེ་གེ་མོ་རབ་ཏུ་གནས་པར་རྒྱས་པར་མཛོད་ཅིག་ཅེས་སྤེལ་བར་བྲི་ཞིང་མུ་ཁྱུད་ཕྱི་མ་ལ་ནི་ཡང་སྙིང་བྲིའོ། །དེ་ནས་གསོལ་བ་གདབ་པ་ལ་སོགས་
སྔར་བཞིན་ནོ། །དེ་ལ་འདིར་ཁྱད་པར་གྱི་གདམས་ངག་ནི་འདི་ཡིན་ཏེ། འདོད་པ་ཐམས་ཅད་རབ་ཏུ་སྦྱིན་པ་ཞེས་གསུངས་པའི་ཕྱིར་ན་ཡོ་བྱད་དོན་དུ་གཉེར་བས་ནོར་གྱི་བདག་པོ་ལ་བསྐུལ་བར་བྱའོ། །དེ་ཡང་འཁྲུལ་འཁོར་གྱི་སྦྱོར་བ་སྤངས་ནས་ཡན་ལག་བརྒྱད་དང་ལྡན་པའི་ཆུ་ལ་སྤོས་
ལ་སོགས་པའི་དྲི་སྩལ་ཏེ་དངོས་སུ་འམ་བསམས་པས་རྣལ་འབྱོར་པས་ཡུད་ཙམ་གྱིས་རྣམ་པར་སྣང་མཛད་དུ་བསམས་ལ་མདུན་གྱི་ནམ་མཁའ་ལ་དེ་བཞིན་གཤེགས་པ་བསམ་ཞིང་དེ་བས་དམའ་བར་ཇི་ལྟར་འདོད་པའི་ནོར་གྱི་ལྷ་བསམས་ཏེ། བདག་ནི་དབུལ་ཏེ་དེ་བཞིན་གཤེགས་
པ་མཆོད་པ་དང་དབུལ་པོ་རྣམས་ལ་ཕན་པའི་ནུས་པ་མེད་པ་ལ་ཇི་ལྟར་བྱ་སྙམ་དུ་འདུན་པ་དྲག་པོ་བྱས་ལ། ཡང་འདི་སྙམ་དུ་དཀོན་མཆོག་མཆོད་པ་ལ་སོགས་པའི་ཡོ་བྱད་ཀྱི་དོན་དུ་ཛམྦྷ་ལ་ཁྱོད་ལ་ནོར་གྱི་དངོས་གྲུབ་འབྱུང་གིས་བདག་ལ་མྱུར་དུ་ལོངས་སྤྱོད་རྒྱ་ཆེན་པོ་སྩལ་དུ་གསོལ་ཞེས་
དངོས་སམ་ཡིད་ཀྱིས་བརྗོད་ལ། དེའི་ངང་ལ་ཡང་སྙིང་པོ་བརྒྱ་རྩ་བརྒྱད་པའི་ཆུ་ལག་པ་གཡས་པས་ཛམྦྷ་ལའི་སྤྱི་བོར་བླུགས་པར་བསམས་ཏེ་དེ་ལ་ཆུ་སྦྱིན་ནོ། །དེའི་ཚེ་ཛམྦྷ་ལས་སྔོན་བཅོམ་ལྡན་འདས་ཀྱི་སྤྱན་སྔར་ཇི་ལྟར་ཁས་བླངས་པ་དང་། དེ་ལྟར་ཆུ་སྟེར་བའི་དུས་སུ་ཡང་བཅོམ་ལྡན་
འདས་དཔང་པོའི་ཚུལ་དུ་བཞུགས་པ་དང་། བདག་ནི་བཅོམ་ལྡན་འདས་རྣམ་པར་འཇོམས་པའི་སྐུ་ཡིན་ལ་དེ་ནི་སངས་རྒྱས་ཀུན་གྱི་གསང་བའི་བདག་ཉིད་ཀྱང་ཡིན་ཏེ་ལག་ན་རྡོ་རྗེའོ། །ལག་ན་རྡོ་རྗེ་ནི་གནོད་སྦྱིན་གྱི་སྡེ་དཔོན་ཡིན་ལ་ཛམྦྷ་ལ་ཡང་གནོད་སྦྱིན་ཡིན་པས་ན། དཔོན་ལག་ན་རྡོ་རྗེ་
ཡིན་པས་འབངས་སམ་འཁོར་ཛམྦྷ་ལ་ལ་བཀའ་སྩལ་པ་ནི་མི་སླུ་བས་ན་སྔགས་པའི་འདོད་པ་ཐམས་ཅད་ཛམྦྷ་ལས་རབ་ཏུ་སྦྱིན་པར་འགྱུར་ཏེ་འདི་ནི་ངེས་པའི་འཁྲུལ་འཁོར་རྒྱས་པ་འདི་ནི་གནས་དབེན་པར་མཆོད་ཅིང་གཞག་པར་བྱའོ། །འདི་ནི་རྒྱས་པའི་ལས་དང་འདོད་པ་ཐམས་

73-1-337b

ཅད་རབ་ཏུ་སྦྱིན་པ་དང་། མ་གྲུབ་པ་རྣམས་གྲུབ་པར་བྱེད་པ་དང་། གྲུབ་པ་རྣམས་ཆུད་མི་ཟ་བ་སྟེ་ཕྲིན་ལས་རྣམ་པ་བཞི་པོ་དེ་ནི་རྒྱས་པའི་འཁྲུལ་འཁོར་གྱི་ལས་སུ་རིག་པར་བྱ་བ་རྫོགས་སོ།།      །།དབང་གི་འཁྲུལ་འཁོར་དམར་པོ་ཟླ་གམ་བྲིས་ལ་དབུས་སུ་ཧཱུཾ་ནག་པོ་བྲི་ཞིང་དེའི་གཡས་དང་གཡོན་དུ་
ཧྲཱིཿདམར་པོ་རེ་རེ་བྲིས་ཏེ། མུ་ཁྱུད་ཟླུམ་པོས་བསྐོར་བ་ལ་ཡང་སྙིང་བྲིས་ལ་སྟེགས་བུ་ལ་བཞག་གོ། །དེ་ནས་སྔགས་པས་གོས་དམར་པོ་བགོས་ལ་ནུབ་ཕྱོགས་སུ་ཁ་བལྟས་ཏེ། དེ་ནས་བརྩམས་ཏེ་ཆེ་གེ་མོ་དབང་དུ་བསྡུའོ་སྙམ་པའི་བློ་དང་གསོལ་བ་ལ་སོགས་པ་བྱས་ལ་དེའི་རྗེས་ལ་རང་གི་ལུས་
འཁྲུལ་འཁོར་གྱི་ལྟེ་བའི་ཧཱུཾ་ལ་ཐིམ་ནས། དེ་ཡོངས་སུ་གྱུར་པ་ལས་རྣམ་པར་འཇོམས་མཛད་དུ་རང་ཉིད་བསམ་མོ། །ལས་མྱུར་བར་བསྒྲུབ་པ་ནི་ལག་པ་ཉིད་མྱུར་བས་ན་རང་གི་སྲིན་ལག་གཡས་པ་ལས་ཧྲཱིཿདམར་པོ་ཅིག་བྱུང་ནས་རང་གི་གཡས་ན་འདུག་པར་བསམས་ལ། གཡོན་པ་ལས་
ཀྱང་དེ་བཞིན་ཏེ་ཧྲཱིཿདེ་ལས་འོད་ཟེར་དམར་པོ་འཕྲོ་ཞིང་རང་འདོད་པའི་ལས་བྱས་ཏེ་སླར་ཡང་དེ་ཉིད་ལ་འདུས་པས་སྔགས་ཀྱང་རང་གི་སྤེལ་བས་བཟླའོ། །དེའི་ཚེ་ན་ཡང་སྔར་གྱི་མདུན་གྱི་ནམ་མཁའི་བཅོམ་ལྡན་འདས་ནི་ཇི་སྲིད་འདོད་ཀྱི་བར་དུ་བྱིན་གྱིས་རློབ་ཅིང་བཞུགས་པར་བསམ་མོ། །འདོད་པའི་དོན་
གྲུབ་ནས་ཧྲཱིཿནི་རང་ལ་བསྡུས་ལ་རང་ཡང་ཞུ་ནས་ཇི་ལྟར་འདོད་པའི་ཚུལ་དུ་གནས་པར་བྱའོ། །འདིའི་འཁྲུལ་འཁོར་ནི་ཏིང་ངེ་འཛིན་ཉིད་ཀྱང་རུང་ངོ་། །འདིས་ནི་འབྱུང་པོ་ཐམས་ཅད་འགུགས་པ་དང་། གདོན་ཐམས་ཅད་ལས་ཐར་བར་བྱེད་པ་ལ་སོགས་པ་ཕྲིན་ལས་གཉིས་གཙོ་བོར་བྱེད་དོ། །
དབང་གི་ཕྲིན་ལས་ཀྱི་རིམ་པ་རྫོགས་སོ།།      །།བཅོམ་ལྡན་འདས་དཔལ་རྡོ་རྗེ་རྣམ་པར་འཇོམས་པ་གཏུམ་པོ་ལ་ཕྱག་འཚལ་ལོ། །མངོན་སྤྱོད་ལ་གཉིས་ཏེ། མི་དང་མི་མ་ཡིན་པའི་དབྱེ་བས་སོ། །འཁོར་ལོ་བྲིས་ལ་ལྟེ་བའི་གྲུ་གསུམ་ལ་བསྒྲུབ་བྱའི་མིང་དང་མཱ་ར་ཡ་སོད་ནན་ཞེས་བྱ་བ་
ལ་སོགས་པའི་སྤེལ་ཚིག་དང་བཅས་པ་བྲིའོ། །ཤར་གྱི་རྩིབས་ལ་སརྦ་ཤ་ཏྲུཾ་ནཱཾ། གྷ་ཊ་གྷ་ཊ་ཆེ་གེ་མོ་མཱ་ར་ཡ་རྦད་ཅེས་བྲིའོ། །གཡོན་དུ་བསྐོར་བའི་རྩིབས་ལ་སཾ་གྷ་ཊ་ཡ་ཆེ་གེ་མོ་མཱ་ར་ཡ་རྦད་ཅེས་སོ། །རྩིབས་གཅིག་ལ་ཨ་མུ་ཀཾ་མཱ་ར་ཡ་ཕཊ། ན་མ་སནྟ་བཛྲཱ་ཎཱཾ་སརྦ་བ་ལཾ་ཨཱ་

73-1-338a

བརྟ་ཡ་མ་ཧཱ་བ་ལེ་ཆེ་གེ་མོ་མཱ་ར་ཡ་རྦད་ཅེས་བྲི་ཞིང་མུ་ཁྱུད་ལ་ཡང་སྔགས་དེ་དག་ཉིད་དོ། །སྔགས་དེ་དག་ནི་མགོ་ནང་དུ་བསྟན་པས་སོ། །དེ་ནས་ཡང་གསོལ་བ་ལ་སོགས་པ་སྔར་བཞིན་བྱ་སྟེ། བཅོམ་ལྡན་འདས་ནི་ཤིན་ཏུ་ཁྲོ་བར་བཞུགས་པ་ལ་གསོལ་བ་གདབ་བོ། །རང་ཉིད་རྣམ་
པར་འཇོམས་མཛད་དུ་བསམས་པའི་ཞལ་ནས་སྔགས་བརྗོད་པས་སྔགས་ཀྱི་ཕྲེང་བ་འཕྲོས་ནས་གང་ལ་བྱ་བའི་ལུས་ལ་ཕོག་པས་དེ་ཡོངས་སུ་ཞུ་ནས་རྣམ་ཤེས་ཡིག་འབྲུ་གཅིག་ཏུ་གྱུར་པ་འཕེན་པའི་རླུང་གིས་བཏེག་སྟེ། ཡི་གེ་ཡཾ་གི་སྟེང་ན་ནྲྀ་སྔོ་ནག་ཏུ་གནས་པ་བཀུག་ནས་འཁོར་ལོའི་ལྟེ་
བར་ཚུད་པར་བསམས་ལ། དེ་ཡང་འདར་ཞིང་འཕར་ལ་མི་བཟོད་བཞིན་དུ་གནས་པར་བསམ་མོ། །འཁོར་ལོའི་རྩིབས་ཀྱི་རྩེ་མོ་ལ་ཡང་གཟུགས་བརྙན་བྲི་བའམ་བསམ་པར་བྱའོ། །རབ་ཏུ་བསྒྲིམ་པར་བྱའི་གཞན་དུ་ན་རང་གི་སྲོག་ཀྱང་གཡོ་བར་འགྱུར་ན་དགྲ་བགེགས་ལྟ་ཅི་སྨོས། 
ཟིན་པ་དང་ལས་ཀྱི་མཐའ་བསྲེག་པའམ་མནན་པ་གང་ཡང་རུང་བ་བྱའོ། །འདིར་ཡང་མན་ངག་ནི་འདི་ཡིན་ཏེ། རིག་སྔགས་གཅོད་པར་བྱེད་པ་ཞེས་བྱ་བའི་སྐབས་སུ་སྐུད་པ་སྔོན་པོ་ལ་སུམ་བསྒྲིལ་བྱས་ནས་སྔགས་བརྒྱ་རྩ་བརྒྱད་བཟླས་ཏེ་རྡོ་རྗེ་ལྟ་བུའི་མདུད་པའམ། ལྕགས་སྒྲོག་གམ་ཞགས་པ་
ལྟ་བུའི་མདུད་པ་དོར་ཞིང་། མདུད་པ་རེ་རེའི་ནང་དུ་ཕ་རོལ་གྱིས་རྦད་པའི་མི་མ་ཡིན་པ་དང་དེ་རྦོད་པར་བྱེད་པ་པོའི་དངོས་པོ་རྣམས་ཆུད་ཅིང་རབ་ཏུ་བསྡམས་ནས་སྔགས་བཟླས་པས་དེ་ལྟར་གྱུར་ཏེ་དེ་མགུལ་དུ་གདགས་སོ། །གང་གི་ཚེ་མི་དགོས་པའི་ཚེ་མདུད་པ་དགྲོལ་བར་བྱའོ། །གཞན་དུ་བསོད་
ནམས་མ་ཡིན་པ་སོག་པར་འགྱུར་རོ། །དེ་བཞིན་དུ་རིག་སྔགས་ཐམས་ཅད་གནོན་པར་བྱེད་པ་ཞེས་པ་དེ་ལ་ཡང་མན་ངག་གི་གནད་འདི་ལྟ་བུ་བརྩམ་པར་བྱའོ། །འཁྲུལ་འཁོར་གཞུང་ལྟར་བྲིས་ལ་འཁྲུལ་འཁོར་གྱི་ལྟེ་བར་བསྒྲུབ་བྱའི་གཟུགས་ལྕེ་ཤིན་ཏུ་ཆེ་བ་བྲིས་ལ། ལྕེ་ལ་རྩིབས་ཀྱི་སྔགས་
རྣམས་དང་། ཆེ་གེ་མོ་འདི་ཞེས་བྱ་བའི་ངག་རེངས་པར་གྱིས་ཤིག་ཅེས་སྤེལ་ཏེ་བྲིའོ། །དེ་ལ་སྒྲུབ་པ་བྱས་ལ་རི་རབ་ས་ནག་པོ་ལས་བྱས་པའི་སྟོད་དུ་རྣམ་པར་འཇོམས་མཛད་ཀྱི་སྔགས་ཤོག་བུ་ལ་སོགས་པ་ལ་བྲིས་པ་སྩལ། སྨད་དུ་བུག་པ་གྲུ་གསུམ་བྲུས་ལ་དེའི་ནང་དུ་འཁྲུལ་འཁོར་བྲིས་པ་དེ་

73-1-338b

བཅུག་ལ་མནན་པར་བྱའོ། །འདི་ནི་སྔགས་ཀྱི་ནུས་པའམ་རྦོད་གཏོར་ཉེ་བར་ཞི་བར་བྱེད་པ་སྟེ་མངོན་སྤྱོད་ཀྱི་ཁྱད་པར་རོ།།      །།ཡང་སེམས་ཅན་ཐམས་ཅད་སྐྲག་པར་བྱེད་པ་ཞེས་བྱ་བ་ལ་འཁྲུལ་འཁོར་སྤངས་ལ་རྟ་ནག་པོའི་རྔ་མ་ལ་བཤང་བའི་སྲིན་བུ་བརྒྱུས་ཏེ་ཕྲེང་བ་བྱས་ནས་གང་ལ་བྱ་བ་ལ་དམིགས་ཏེ་ཁྲོས་པས་
སྔགས་བཟླས་ན། གྲོང་ཁྱེར་ལ་སོགས་པ་འཇིགས་ཤིང་སྐྲག་པར་འགྱུར་ཏེ་སྔགས་ལས་སུ་རུང་ན་ལས་དེ་དག་ལ་ཐེ་ཚོམ་མི་ཟའོ། །མངོན་སྤྱོད་ཀྱི་འཁྲུལ་འཁོར་ནི་སྐྲག་པ་དང་རིག་སྔགས་གཅོད་པ་དང་རིག་སྔགས་གནོན་པ་དང་། ལས་འཇོམས་པ་དང་རིག་སྔགས་ཀྱི་ལས་བྱེད་དུ་འཇུག་པ་དང་། རེངས་
པར་བྱེད་པ་སྟེ་ལས་དྲུག་བྱེད་པའོ། །དགྲའི་མངོན་སྤྱོད་ཀྱི་འཁྲུལ་འཁོར་རྣམ་པར་ཕྱེ་བའི་རིམ་པ་རྫོགས་སོ།།      །།ད་ནི་བགེགས་ཀྱི་མངོན་སྤྱོད་ཀྱི་འཁྲུལ་འཁོར་བརྩམ་པར་བྱ་སྟེ། རོ་རས་ལ་སོགས་པ་ལ་འཁྲུལ་འཁོར་གྲུ་གསུམ་སུམ་བརྩེགས་སུ་བྱས་ལ་གྲྭ་རྣམས་ལ། ཨོཾ་ཙྪིནྡ་ཆེ་གེ་མོ་ཙྪིནྡ་བྷིནྡ་ཆེ་གེ་མོ་
བྷིནྡ་མ་ཧཱ་ཀཱི་ལི་ཀཱི་ལཱ་ཡ་ཆེ་གེ་མོ་མཱ་ར་ཡ་ཕཊ་ཅེས་བྲིའོ། །དབུས་སུ་བགེགས་ཀྱི་གཟུགས་དང་མཱ་ར་ཡ་ཞེས་སྤེལ་ལ་བྲིའོ། །ཡང་གསོལ་བ་བཏབ་པ་ལ་སོགས་པ་བྱས་ལ་རང་ཉིད་ཆུའི་ཟླ་བ་ལྟ་བུའི་རྣམ་པར་འཇོམས་མཛད་དུ་སྐུ་ཆེ་ལ་ཡན་ལག་རགས་པར་བསྒོམ་མོ། །དེ་ནས་རབ་ཏུ་
བསྒྲིམས་ནས་སྔགས་རིང་པོ་འབའ་ཞིག་བཟླས་པར་བྱ་སྟེ། སྔགས་ཀྱི་འོད་ཀྱིས་གང་ལ་བྱ་བའི་ལུས་ལ་ཕོག་པས་རབ་ཏུ་གཟིར་ཞིང་མི་བཟོད་པར་བསམས་ཏེ། དཔེར་ན་ལོ་ཐོག་ལ་སེར་བ་བབ་པ་ལྟ་བུར་དམིགས་ཤིང་ཁྲོས་པས་བཟླའོ། །ཟིན་པ་དང་ལས་ཀྱི་ཞབས་བསྲེག་པ་དང་། 
མནན་པ་གང་འདོད་པ་བྱའོ། །འཁྲུལ་འཁོར་འདི་ནི་ཕལ་ཆེར་བགེགས་ལ་བཤད་ཀྱིས་འོན་ཀྱང་རྣལ་འབྱོར་ལས་སུ་རུང་བའི་སྔགས་པས་འཁྲུལ་འཁོར་གཅིག་གིས་ཀྱང་ལས་ཐམས་ཅད་ལ་སྦྱར་བར་ནུས་སོ། །འདིས་གདོན་རླག་པར་བྱེད་པ་དང་། རྨུགས་པར་བྱེད་པའི་ལས་
གཉིས་འགྲུབ་བོ། །དེ་ལྟར་ཕྲིན་ལས་བཅུ་བདུན་ནོ། །གཞན་གྱི་ལས་འཇིག་པ་ནི་སྡིག་པ་སྟེ་དེ་དག་པར་བྱེད་པ་ནི་བུམ་པ་ལ་སོགས་པའི་ཁྲུས་དང་འབྲེལ་ཕྱིར་འདིར་མ་སྨོས་སོ། །ཐམས་ཅད་ལ་ནི་སྤེལ་བའི་ཚིག་ནི་སོ་སོའི་སྐབས་དང་སྦྱར་རོ། །རྡོ་རྗེ་རྣམ་པར་འཇོམས་པའི་

73-1-339a

མན་ངག་པཎྜི་ཏ་སྨྲྀ་ཏི་ཛྙཱ་ན་ཀཱིརྟིས་མཛད་པ་རྫོགས་སོ།།      །།པཎྜི་ཏ་ཆེན་པོ་དེ་ཉིད་ཀྱིས་བསྒྱུར་བའོ། །༄༅༅ །རྒྱ་གར་སྐད་དུ། བཛྲ་བི་དཱ་ར་ཎ་ན་མ་དྷཱ་ར་ཎི་རཏྣ་དྱུ་ཏི་མཎྜ་ལ་བི་དྷི་ནཱ་མ། བོད་སྐད་དུ། རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་དཀྱིལ་འཁོར་གྱི་ཆོ་ག་རིན་ཆེན་
སྣང་བ་ཞེས་བྱ་བ། བཅོམ་ལྡན་འདས་འཇམ་པའི་རྡོ་རྗེ་ལ་ཕྱག་འཚལ་ལོ། །མ་རིག་ལོག་པར་ལྟ་བ་འཇོམས་མཛད་པའི། །ཡེ་ཤེས་ཐུགས་རྗེ་ཉི་མ་ལྟ་བུ་ཡིས། །མི་ཤེས་སྒྲིབ་པ་མ་ལུས་སེལ་མཛད་པའི། །རྡོ་རྗེ་རྣམ་པར་འཇོམས་ལ་ཕྱག་འཚལ་ནས། །གཏི་མུག་དྲ་བ་བསལ་བ་དང་། །འདོད་
ཆགས་དྲི་མ་བཀྲུ་བ་དང་། །ཞེ་སྡང་ཞི་བར་བྱ་བའི་ཕྱིར། །རྒྱུད་ལ་བརྟེན་ནས་འདི་བཤད་དོ། །བྱམས་དང་སྙིང་རྗེར་ལྡན་པ་ཡིས། །ཐེག་ཆེན་དོན་ལ་རབ་ཏུ་ཞུགས། །སྔོན་དུ་བསྙེན་པ་རབ་རྫོགས་ཤིང་། །བརྟུལ་ཞུགས་ཅན་གྱིས་རབ་ཏུ་བརྩམ། །དད་དང་ལྡན་ཞིང་སྙིང་བརྩེར་བཅས། །རི་བོ་ནགས་ཚལ་
ཡིད་འོང་བའི། །དབེན་པའི་གནས་སུ་ཡོངས་འདུག་སྟེ། །སྔོན་དུ་བསྙེན་པ་བྱ་བ་ནི། །རྩ་བའི་དཀྱིལ་འཁོར་བདུན་བསམས་ཏེ། །རང་ཉིད་གཏུམ་པོའི་སྐུར་གསལ་བས། །རྩ་བའི་སྔགས་ནི་བརྗོད་པར་བྱ། །ཨོཾ་ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ་ཧཱུཾ་ཧཱུཾ། 
ཕྱོགས་སྐྱོང་དག་ལ་གཏོར་མ་དག །རྡོ་རྗེ་གླུ་དང་བཅས་པས་དབུལ། །སྡིག་པ་ཆེ་དང་བཅས་པའི་མ་རུངས་པ། །ས་བདག་དག་ལ་བཀའ་བསྒོ་བསྐྲད་བྱས་ནས། །གཟུར་བ་སྦྱང་ཞིང་མཎྜལ་ལེགས་བྱས་ཏེ། །ས་ཡི་ལྷ་མོ་དག་ལ་རབ་ཏུ་མཆོད། །གསེར་དངུལ་ལ་སོགས་བུམ་པར་ནི། །བཀྲ་ཤིས་
བརྒྱད་དང་སྙིང་པོ་སོགས། །གཞན་རྣམས་དྲི་ཞིམ་ཆུས་དགང་བའོ། །ཕྱོགས་བཞིར་དཀར་དང་མཐིང་དང་དམར། །ལྗང་གུ་གཙང་གོས་གདུ་བུའོ། །ཅོད་པན་ཕུར་བུ་བཅུ་རྣམས་དང་། །གཏོར་མ་མཆོད་རྫས་བཀྲ་ཤིས་རྫས། །ཡོ་བྱད་རྫས་རྣམས་ཚོགས་པ་དང་། །ཐིག་དང་ཚོན་གྱི་ལས་བྱས་ཏེ། །
བརྟན་པའི་སྔགས་ཀྱིས་ཐིག་བྱིན་བརླབས། །ཐིག་གི་བྱ་བ་རྫོགས་པ་ཡིས། །བསྲུང་བའི་སྔགས་ཚོན་བྱིན་གྱིས་བརླབ། །འདབ་བཞི་འཁོར་ལོ་བཅུར་འདུག་པའི། །སྒོ་བཞི་རྟ་བབས་བཅས་པ་བྲི། །བུམ་པ་པདྨ་དག་ལ་དགོད། །ཕུར་པ་འཁོར་ལོ་རྩིབས་བཅུ་ལའོ། །ལྷ་སྣམ་དག་ལ་

73-1-339b

གཏོར་མ་སྟེ། །འདོད་ཡོན་བཀྲ་ཤིས་རྫས་དག་དགོད། །གྲུ་ཆད་མཆོད་པ་རྫོགས་པར་བཤམས། །དེ་ལྟར་རྫས་རྣམས་དགོད་པར་བྱ། །རྒྱན་རྣམས་ཀུན་གྱིས་ལེགས་བགོས་ཏེ། །ཀུ་ཤའི་སྟེང་འདུག་ཤར་དུ་བལྟ། །མཆོད་ཅིང་སྡིག་བཤགས་སོགས་བྱས་ནས། །ཚད་མེད་བཞི་ལྡན་སེམས་བསྐྱེད་དོ། །ཨོཾ་
དྷརྨ་དྷཱ་ཏུ་སརྦ་དྷརྨ་ཨཿཧཱུཾ་གི་ས་བོན་ལས་བྱུང་བའི། །གུར་དང་དྲ་བའི་རྣམ་པར་བསྒོམ། །ཆོས་འབྱུང་དཀར་པོའི་ནང་དུ་བྷྲཱུཾ། །རིན་ཆེན་ཁང་པར་མཛེས་པར་བསྐྱེད། །དབུས་སུ་པད་སྟེང་བུམ་པའི་ནང་། །ཟླ་སྟེང་ཧཱུཾ་བྱུང་རྡོ་རྗེའི་སྐུ། །མདོག་དཀར་རྡོ་རྗེ་དྲིལ་བུ་ཅན། །ཐུགས་ཀར་ཟླ་སྟེང་རྡོ་རྗེ་ཧཱུཾ། །
ཤར་དུ་པད་སྟེང་བུམ་པའི་ནང་། །ཟླ་སྟེང་དྷཱིཿའབྱུང་སངས་རྒྱས་སྤྱན། །མདོག་དཀར་བུམ་པ་རྡོ་རྗེས་མཚན། །ཐུགས་ཀར་ཟླ་སྟེང་དྷཱིཿཡིག་བསམ། །ལྷོ་རུ་པད་སྟེང་བུམ་པའི་ནང་། །ཏྲཱཾ་བྱུང་ཟླ་སྟེང་མཱ་མ་ཀཱི། །མདོག་མཐིང་བུམ་པ་རིན་ཆེན་ནང་། །ཐུགས་ཀར་ཟླ་སྟེང་སྣ་ཚོགས་ཏྲཱཾ། །
ནུབ་ཏུ་པད་སྟེང་བུམ་པའི་ནང་། །ཟླ་སྟེང་རཾ་བྱུང་གོས་དཀར་མོ། །མདོག་དཀར་བུམ་པ་པདྨས་མཚན། །ཐུགས་ཀར་ཟླ་སྟེང་རཾ་ཡིག་བསམ། །བྱང་དུ་པད་སྟེང་བུམ་པའི་ནང་། །ཟླ་སྟེང་ཏཱཾ་བྱུང་སྒྲོལ་མའི་སྐུ། །མདོག་ལྗང་བུམ་པ་སྣ་ཚོགས་མཚན། །ཐུགས་ཀར་ཟླ་སྟེང་ཏཱཾ་བསམ་མོ། །
རྡོ་རྗེ་སྐྱིལ་ཀྲུང་གཙོ་བོ་སྟེ། །རྒྱན་རྣམས་ཀྱིས་ནི་རབ་བརྒྱན་ཏེ། །མཆོད་དང་མཆོད་པའི་ཚུལ་གྱིས་ནི། །ཡུམ་རྣམས་རྣམ་པར་བཞེངས་པའོ། །འཁོར་ལོ་དག་ལ་ཉི་མ་བཅུ། །ཧཱུཾ་གི་ས་བོན་ལས་བྱུང་བའི། །རྣམ་རྒྱལ་དཀར་པོ་རྡོ་རྗེ་བསྣམས། །གཤིན་རྗེ་དམར་ནག་བེ་ཅོན་ཏེ། །རྟ་མགྲིན་
དམར་པོ་པདྨས་མཚན། །བདུད་རྩི་འཁྱིལ་པ་ལྗང་གུའོ། །དབྱུག་པ་སྔོན་པོ་སྔོན་པོ་སྟེ། །དོན་ཡོད་ཞགས་པ་མཐིང་གའོ། །ཁྲོ་གཉེར་ཅན་ནི་དམར་ནག་སྟེ། །རྡོ་རྗེ་འཁོར་ལོ་ལྗང་གུའོ། །སྟེང་ཕྱོགས་མཐིང་ག་ཆེན་པོ་སྟེ། །འོག་ནི་ནམ་མཁའི་མདོག་ཅན་ནོ། །ཕྱག་ན་ཕུར་བུ་སོ་སོ་སྟེ། །སྟག་
དང་སྦྲུལ་དང་མེ་དཔུང་ནང་། །དེ་ལྟར་དཀྱིལ་འཁོར་རབ་རྫོགས་ནས། །ཡེ་ཤེས་སྤྱན་དྲངས་མཆོད་ནས་བསྟིམ། །སྐུ་གསུང་ཐུགས་བྱིན་བརླབ་པ་ནི། །ཨོཾ་ཨཱཿཧཱུཾ། དེ་ནས་དབང་བསྐུར་ཞིང་བསྒོམ་མོ། །དེའི་རྩ་བའི་སྔགས་ནི། ཨོཾ་སརྦྦ་བིདྱཱ་བཛྲ་བཛྲ་ཧཱུཾ་ཧཱུཾ། གཙོ་བོའི་སྔགས་སོ། །

73-1-340a

སྥོ་ཊ་བཛྲ་བཛྲ། ཀ་ཊ་བཛྲ་བཛྲ། མ་ཊ་བཛྲ་བཛྲ། མ་ཐ་བཛྲ་བཛྲ། ཧཱུཾ་དྷཱིཿཏྲཱཾ་རཱཾ་ཏཱཾ་ཞེས་བྱ་བའོ། །ལན་དང་ལན་གྱི་ཚུལ་དུ་མཆོད། །དེ་ནས་ལས་ཀྱི་སྒྲུབ་པ་ནི། །ཨོཾ་ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཏདྱ་ཐཱ། ཨོཾ་ཏྲ་ཊ་ཏྲ་ཊ། ཏྲོ་ཊ་ཡ་ཏྲོ་ཊ་ཡ། སྥུ་ཊ་སྥུ་ཊ། སྥོ་
ཊ་ཡ་སྥ་ཊ་ཡ། གྷུརྞྞ་གྷུརྞྞ་གྷུརྞྞ་པ་ཡ་གྷུརྞྞ་པ་ཡ། སརྦ་སཏྭཱ་ནི། བོ་དྷ་བོ་དྷ། སཾ་བོ་དྷ་ཡ། སཾ་བོ་དྷ་ཡ། བྷྲ་མ་བྷྲ་མ། སཾ་བྷྲ་མ་ཡ། སཾ་བྷྲ་མ་ཡ། སརྦ་བུདྡྷ་ནི། ཀུ་ཊ་ཀུ་ཊ། སཾ་ཀུ་ཊ་ཡ་སཾ་ཀུ་ཊ་ཡ། སརྦ་ཤ་ཏྲཱུཾ། གྷ་ཊ་གྷ་ཊ། སཾ་གྷ་ཊ་ཡ་སཾ་གྷ་ཊ་ཡ། ཨཊྚ་ཧ་ས་ནཱི་ལ་བཛྲ་སུ་བཛྲ་ཡ་སྭཱ་ཧཱ། ཧཱུཾ་དྷཱིཿཏྲཱཾ་རཱཾ་ཏཱཾ་ཧཱུཾ་ཕཊ་
སྭཱ་ཧཱ། སྤྲོ་དང་བསྡུ་བས་གཙོ་བོ་ཞུ། །གཙོ་བོས་འཁོར་དང་དེ་བཞིན་ནོ། །གཙོ་བོའི་བདུད་རྩི་ཆུ་ནང་ནས། །རྣམ་ཤེས་ཤར་དུ་ཉི་སྟེང་ཧཱུཾ། །བདག་ཉིད་གཏུམ་པོར་བསམ་བྱས་ནས། །སྐུ་གསུང་སྐྱེ་མཆེད་བྱིན་བརླབ་བྱ། །མ་ཏི་སྠིར་བཛྲ་ཨོཾ། པྲ་ཏི་སྠིར་བཛྲ་ཨཱཾ། པྲ་ཏི་སྠིར་བཛྲ་ཨཱཿ གུང་མོ་ཐལ་སྦྱར་རྡོ་རྗེ་སྟེ། །
སེར་མོ་བསྣོལ་བ་འཁོར་ལོའོ། །མཛུབ་མོ་རྩེ་སྦྱར་པདྨ་ཡིས། །ལན་གསུམ་བཅིངས་ནས་གསང་སྔགས་གསུམ། །ཟླ་སྟེང་རྡོ་རྗེ་འཁོར་ལོ་སྟེ། །པདྨ་སྐུ་གསུང་ཐུགས་ལའོ། །སྐྱེ་མཆེད་ཟླ་སྟེང་རྡོ་རྗེ་ནི། །སོ་སོ་དག་ལ་བསམ་པར་བྱའོ། །མ་ཧཱ་བཛྲ། ཨ་པྲ་ཏི་ཧ་ཏ་བཛྲ། ཨ་མོ་གྷ་བཛྲ། ཨེ་ཧི་
བཛྲ། ཤཱི་གྷཾ་བཛྲཱ་ཡ་སྭཱ་ཧཱ། དེ་ནས་ཕྱོགས་སྐྱོང་བཅུ་རྣམས་དགུག །ཁྲོ་བོ་བཅུ་ཡི་ཕུར་བུས་གདབ། །ཧེ་ཕུ་ལུ་ནི་རུ་ཕུ་ལུ་གྲྀཧྞ་ཀུ་ལུ་མི་ལི་ཙུ་ལུ་ཀུ་རུ་ཀུ་ལུ་བཛྲ་ཀཱི་ལི་ཀཱི་ལཱ་ཡ་སྭཱ་ཧཱ། ཀ་ཊ་ཀ་ཊ། མ་ཊ་མ་ཊ། ར་ཊ་ར་ཊ། མོ་ཊ་ན་པྲ་མོ་ཊ་ན་ཡེ་ཀཱི་ལི་ཀཱི་ལཱ་ཡ་སྭཱ་ཧཱ། ཙ་ར་ནི་ཙ་ར། ཧ་ར་ཧ་ར། ས་ར་
ས་ར། མཱ་ར་ཡ་ཀཱི་ལི་ཀཱི་ལཱ་ཡ་སྭཱ་ཧཱ། ཧ་ན་ཧ་ན། ཙུ་རུ་ཙུ་རུ་མ་ཧཱ་ཀྲོ་དྷ་ཙཎྜ་ཀཱི་ལི་ཀཱི་ལཱ་ཡ་སྭཱ་ཧཱ། ཙྪིནྡ་ཙྪིནྡ། བྷིནྡ་བྷིནྡ། མ་ཧཱ་ཀཱི་ལི་ཀཱི་ལཱ་ཡ་སྭཱ་ཧཱ། བནྡྷ་བནྡྷ་ཀྲོ་དྷ་ཀྲོ་དྷ་ཀཱི་ལི་ཀཱི་ལཱ་ཡ་སྭཱ་ཧཱ། ཧ་ར་ཧ་ར་བཛྲ་དྷ་རཱ་ཡ་སྭཱ་ཧཱ། པྲ་ཧ་ར་པྲ་ཧ་ར་བཛྲ་པྲ་བྷཉྫ་ནཱ་ཡ་སྭཱ་ཧཱ། ཏྲཱ་ས་ཡ་ཏྲཱ་ས་ཡ་བཛྲ་ཀཱི་ལི་ཀཱི་ལཱ་
ཡ་སྭཱ་ཧཱ། བརྒྱའམ་ཉི་ཤུ་རྩ་གཅིག་གིས། །གོ་རིམས་བཞིན་དུ་ཕྱོགས་རྣམས་བཅིང་། །སློབ་དཔོན་ཆོས་གོས་ཡོངས་གྱོན་ནས། །རྡོ་རྗེ་དྲིལ་བུ་རབ་ཐོགས་ནས། །གཞན་དག་མཆོད་རྫས་ཐོགས་བྱས་ཏེ། །ཁ་ཟས་དྲི་ཞིམ་སྨན་དང་ནི། །བཀྲ་ཤིས་རྫས་ཐོགས་སློབ་མ་དག །བསྐོར་

73-1-340b

ཞིང་གླུ་འདི་ལང་བར་བྱའོ། །ན་མཿས་མནྟ་བཛྲཱ་ཎཱཾ། སརྦ་བ་ལེ་ཨཱ་བརྟ་ཡ། མ་ཧཱ་བ་ལེ་ཀ་ཏ་བེ། ཏ་ཏ་ལེ། ཨ་ཙ་ལེ། མཎྜ་ལ་མཱ་ཡེ་ཨ་ཏི་བཛྲ། མ་ཧཱ་བ་ལེ་བེ་ག་ར་ཎ་ར་ཎ་ཨ་ཛི་ཏེ་ཛྭ་ལ་ཛྭ་ལ། ཏི་ཊི་ཏི་ཊི་པིངྒ་ལེ། ད་ཧ་ད་ཧ་ཏེ་ཛོ་བ་ཏི་ལི། ཏི་ལི་ཏི་ལི། བནྡྷ་བནྡྷ་མ་ཧཱ་བ་ལ། བཛྲ་ཀྲོ་དྷ་ཛྭཱ་ལཱ་ཡ་སྭཱ་ཧཱ། 
ཞེས་པས་བླང་ཞིང་བསྐོར་བར་བྱའོ། །གྲུབ་པ་ཆུད་མི་ཟ་བར་བྱ། །བཀྲ་ཤིས་སྟོན་མོ་བཟའ་བར་བྱ། །སློབ་མའི་འདོད་པ་སྒྲུབ་པའི་ཕྱིར། །གཙང་གོས་སེར་པོ་རྒྱན་བཏགས་ནས། །ཀུ་ཤའི་སྟེང་དུ་ལེགས་འདུག་སྟེ། །འཁོར་ལོའི་སྟེང་དུ་གཞག་པར་བྱ། །གང་དག་ཡིད་དགེ་སེམས་དང་བའི། །
སྡིག་བཤགས་སེམས་བསྐྱེད་སྡོམ་པ་སྦྱིན། །སྤྱི་བོར་གཙོ་བོ་མགྲིན་པར་བདག །ཐུགས་ཀར་ཡུམ་ནི་བསམ་པར་བྱ། །སངས་རྒྱས་བསྟིམས་ནས་ཁྲུས་གསོལ་བྱ། །བདག་ཉིད་ཁྲོ་བོའི་ཐུགས་ཀ་ནས། །ལྷ་མོའི་གླུ་དང་བཅས་པས་བཀྲུ། །སྤྱི་བོར་བདག་པོ་བསམ་པར་བྱ། །བརྟན་པར་བྱ་ཕྱིར་
སྔགས་འདི་བཟླས། །ཨོཾ་མ་ཏི་སྠིར་བཛྲ། སུ་ཏི་སྠིར་བཛྲ། པྲ་ཏི་སྠིར་བཛྲ། བཛྲ་ཀཱ་ཡ་ཨཱ་བརྟ་ཡ་སྭཱ་ཧཱ། མཆོད་པ་དག་གིས་ཡང་དག་མཆོད། །དེང་ནས་བཟུང་སྟེ་ལྷ་ཡི་སྐུ། །རྟག་ཏུ་བྲལ་བར་མི་བྱའོ། །ལུས་ཀྱི་ལས་དག་བྱ་བ་ནི། །མི་དགེ་བཅུ་དག་མི་བྱའོ། །དེ་ལྟར་རྫོགས་ནས་གཏོར་མ་གཏང་། །སྦྱང་
སྤེལ་སྦྱར་བ་བྱས་ནས་ནི། །དཀྱིལ་འཁོར་ལྷ་དང་མགྲོན་རྣམས་མཆོད། །ཨོཾ་ན་མཿས་མནྟ་བཛྲཱ་ཎཱཾ། སརྦ་བ་ལེ་ཨཱ་བརྟ་ཡ། མ་ཧཱ་བ་ལེ། ཀ་ཏ་བེ། ཏ་ཏ་ལེ། ཨ་ཙ་ལེ། མཎྜ་ལ་མཱ་ཡེ། སྒྲུབ་པའི་དཀྱིལ་འཁོར་མཆོད་པའོ། །ཨ་ཏི་བཛྲ་མ་ཧཱ་བ་ལེ་བེ་ག་ར་ཎ་ར་ཎ་ཨ་ཛི་ཏེ་ཛྭ་ལ་ཛྭ་ལ། ཏི་ཊི་ཏི་ཊི་པིངྒ་ལེ། ད་ཧ་
ད་ཧ་ཏེ་ཛོ་བ་ཏི། ཏི་ལི་ཏི་ལི། བནྡྷ་བནྡྷ། མ་ཧཱ་བ་ལེ། བཛྲ་ཀྲོ་དྷ་ཛྭ་ལ་ཡེ་སྭཱ་ཧཱ། བར་དུ་གཅོད་པ་སེལ་བའི་ཁྲོ་བོ་བཅུ་མཆོད་པའོ། །ཧ་ར་ཧ་ར་བཛྲཱ་དྷ་རཱ་ཡ་སྭཱ་ཧཱ། ཕྱོགས་སྐྱོང་མཆོད་པའོ། །པྲ་ཧ་ར་པྲ་ཧ་ར་བཛྲ་པྲ་བྷཉྫ་ནཱ་ཡ་སྭཱ་ཧཱ། ཨོཾ་ཨ་ཀཱ་རོ་མུ་ཁཾ་ཞེས་བྱ་བས་འབྱུང་པོ་ཐམས་ཅད་པའི་མཆོད་པའོ། །དེ་
ལྟར་མཆོད་ནས་བསྟོད་པ་ནི། །བདེ་གཤེགས་དྲི་མེད་ཁྲོ་བོའི་སྐུ། །སྐྱོན་གྱིས་མ་གོས་སྐྲ་མདོག་དཀར། །རྡོ་རྗེ་དྲིལ་བུ་མི་གཡོ་བརྟེན། རྣམ་པར་འཇོམས་ལ་ཕྱག་འཚལ་བསྟོད། །དུས་གསུམ་སངས་རྒྱས་བསྐྱེད་པའི་ཡུམ། །སྐྱོན་གྱིས་མ་གོས་སྐུ་མདོག་དཀར། །སེམས་ཅན་བདེ་ལ་སྦྱར་མཛད་

73-1-341a

པའི། །སྤེལ་བའི་རྡོ་རྗེ་མ་ལ་བསྟོད། །ཡོན་ཏན་ཐམས་ཅད་བསྐྱེད་པའི་ཡུམ། །མི་འགྱུར་རིན་ཆེན་བཻ་ཌཱུར་མདོག །སེམས་ཅན་ཀུན་གྱི་སྐྱབས་མཛད་པའི། །སྐུ་ཡི་རྡོ་རྗེ་མ་ལ་བསྟོད། །དྲི་མ་མེད་ཅིང་འོད་གསལ་བའི། །འདོད་ཆགས་དྲི་མ་སྤངས་པའི་ཡུམ། །སེམས་ཅན་
རྣམས་ལ་སྤྲོ་བ་མཛད། །བློ་ལྡན་རྣམས་ལ་ཕྱག་འཚལ་བསྟོད། །བྱ་བ་ཐམས་ཅད་ཡོངས་སུ་བསྒྲུབ། །ཤེས་རབ་སྒྲོལ་མ་ཡུམ་གྱི་མཆོག །ལྗང་གུའི་མདོག་ཅན་འགྱིང་བག་ཅན། །དོན་དང་ལྡན་ལ་ཕྱག་འཚལ་བསྟོད། །ཁྲོ་བོ་ཆེན་པོ་བརྗིད་པའི་སྐུ། །ཞེ་སྡང་རྣམ་དག་བདག་ཉིད་ཅན། །
དྲི་ཟ་འདུལ་མཛད་རྡོ་རྗེ་བསྣམས། །རྣམ་པར་རྒྱལ་ལ་ཕྱག་འཚལ་བསྟོད། །ཁྲོ་བོ་ཆེན་པོ་བརྗིད་པའི་སྐུ། །ང་རྒྱལ་རྣམ་དག་བདག་ཉིད་ཅན། །གཤིན་རྗེ་འཇོམས་བྱེད་བེ་ཅོན་བསྣམས། །གཤིན་རྗེ་གཤེད་ལ་ཕྱག་འཚལ་བསྟོད། །ཁྲོ་བོ་ཆེན་པོ་བརྗིད་པའི་སྐུ། །འདོད་ཆགས་རྣམ་དག་
བདག་ཉིད་ཅན། །ཆུ་ལྷ་འདུལ་མཛད་པདྨ་བསྣམས། །རྟ་མཆོག་དཔལ་ལ་ཕྱག་འཚལ་བསྟོད། །ཁྲོ་བོ་ཆེན་པོ་བརྗིད་པའི་སྐུ། །ཕྲག་དོག་རྣམ་དག་བདག་ཉིད་ཅན། །གནོད་སྦྱིན་འདུལ་མཛད་འཁོར་ལོ་འཛིན། །གནོད་སྦྱིན་འདུལ་ལ་ཕྱག་འཚལ་བསྟོད། །མེ་དཔུང་འབར་
བ་བརྗིད་པའི་སྐུ། །སྔོན་པོའི་མདོག་ཅན་དབྱུག་པ་སྔོ། །མེ་ལྷ་གདུག་པ་འདུལ་མཛད་པའི། །དབྱུག་སྔོན་ཅན་ལ་ཕྱག་འཚལ་བསྟོད། །མེ་དཔུང་འབར་བ་བརྗིད་པའི་སྐུ། །དོན་ཡོད་ཞགས་པ་མཐིང་གའི་མདོག །རླུང་ལྷ་གདུག་པ་འདུལ་མཛད་པའི། །དོན་ཡོད་ཞགས་ལ་ཕྱག་
འཚལ་བསྟོད། །མེ་དཔུང་འབར་བ་བརྗིད་པའི་སྐུ། །ཁྲོ་གཉེར་ཅན་ནི་དམར་ནག་སྟེ། །སྲིན་པོའི་གདུག་པ་འདུལ་མཛད་པའི། །ཁྲོ་གཉེར་ཅན་ལ་ཕྱག་འཚལ་བསྟོད། །མེ་དཔུང་འབར་བ་བརྗིད་པའི་སྐུ། །རྡོ་རྗེ་འཁོར་ལོ་ལྗང་གུའི་མདོག །འབྱུང་པོའི་དྲེགས་པ་འཇོམས་མཛད་པའི། །
རྡོ་རྗེ་འཁོར་ལོ་ཕྱག་འཚལ་བསྟོད། །རྡོ་རྗེ་ཧཱུཾ་སྒྲ་སྒྲོགས་པ་ཆེ། །སྟེང་ཕྱོགས་དྲེགས་པ་འཇོམས་མཛད་པའི། །མཐིང་གའི་མདོག་ཅན་རབ་འཇིགས་པ། །ཧཱུཾ་སྒྲ་སྒྲོགས་ལ་ཕྱག་འཚལ་བསྟོད། །སྟོབས་ཆེན་རབ་ཏུ་གནོན་མཛད་པའི། །འོག་གི་བགེགས་ཆེན་གནོན་པའི་བདག །ནམ་

73-1-341b

མཁའི་མདོག་ཅན་འཇིགས་པའི་སྐུ། །སྟོབས་ཆེན་གནོན་ལ་ཕྱག་འཚལ་བསྟོད། །དེ་ལྟར་བསྟོད་ནས་གཤེགས་སུ་གསོལ། །རྡོ་རྗེ་རྣམ་པར་འཇོམས་པའི་སྐུའི་དཀྱིལ་འཁོར་བསྟན་པ་སྟེ་དང་པོ་ལས་ཀྱི་རིམ་པའོ།།      །།ཐུགས་ཀྱི་དཀྱིལ་འཁོར་བསྟན་པ་ནི། བདག་ཉིད་ལྷ་ཡི་སྐུར་བསྒོམས་
ལ། །མཎྜལ་མེ་ཏོག་བཅས་པའི་སྟེང་། །གཙོ་བོའི་བུམ་པ་སྟེང་བཞག་སྟེ། །ཡང་སྙིང་ཉེ་བའི་སྙིང་པོ་བཟླས། །སྙིང་པོ་ཐེམ་ནས་བསྒྲུབ་པ་བརྩམ། །དང་པོ་ས་ཡི་ཆོ་ག་བྱ། །མཎྜལ་མདའ་གང་གྲུ་བཞི་སྟེ། །པདྨ་འདབ་བཞི་འཁོར་ལོ་བཅུ། །སོ་སོར་རིགས་དང་མཐུན་པར་བྲི། །གསེར་
དངུལ་ལ་སོགས་བུམ་པར་ནི། །ནོར་བུ་ཡུངས་ཀར་དཱུར་བ་དང་། །ཤེལ་དང་པདྨ་ཙནྡན་དང་། །གསེར་དང་རིན་ཆེན་ཆུས་དགང་བྱ། །དྲི་ཞིམ་བཀང་བའི་བུམ་པ་བཞི། །འདབ་མ་བཞི་པོར་གཞག་པར་བྱ། །འཁོར་ལོའི་སྟེང་དུ་དེ་བཞིན་ཏེ། །མཆོད་པའི་རྫས་དང་གཏོར་མ་
བཤམས། །དེ་ལྟར་རྫོགས་ནས་ཀུ་ཤའི་སྟེང་། །རྒྱན་དང་བཅས་པས་ལེགས་འདུག་སྟེ། །མཆོད་ཅིང་སྡིག་བཤགས་ལ་སོགས་བྱ། །ཨོཾ་སརྦ་དྷརྨ་དྷཱ་ཏུ་ཨཱཿ དེ་ནས་སྟོང་པའི་ཏིང་འཛིན་ལས། །ཡི་གེ་ཧཱུཾ་དུ་རབ་བསམས་ཏེ། །རྡོ་རྗེའི་ཁང་པ་རབ་ཏུ་བསྐྱེད། །བྷཱུཾ་ལས་རིན་ཆེན་ཁང་
པར་ནི། །དག་ཅིང་གསལ་བ་རྒྱན་དང་བཅས། །པཾ་ལས་བྱུང་བའི་པདྨའི་གདན། །སྟེང་དུ་རིན་ཆེན་བུམ་པ་ནི། །ཟླ་སྟེང་རྡོ་རྗེས་མཚན་པའོ། །སརྦ་བིདྱཱ་བཛྲ་བཛྲ། སྥོ་ཊ་བཛྲ་བཛྲ། ཀ་ཊ་བཛྲ་བཛྲ། མ་ཊ་བཛྲ་བཛྲ། མ་ཐ་བཛྲ་བཛྲ་ཧཱུཾ། ཡང་སྙིང་ཟླ་སྟེང་ཧཱུཾ་ལ་སྟེ། སྙིང་པོ་ཟླ་སྟེང་
རྡོ་རྗེ་ལའོ། །ཧ་ར་ཧ་ར་བཛྲ། མ་ཊ་མ་ཊ་བཛྲ། དྷུ་ན་དྷུ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། དྷ་ར་དྷ་ར་བཛྲ། དྷ་རཱ་ཡ་དྷ་རཱ་ཡ་བཛྲ། དཱ་རུ་ཎ་དཱ་རུ་ཎ་བཛྲ། ཙྪིནྡ་ཙྪིནྡ་བཛྲ། བྷིནྡ་བྷིནྡ་བཛྲ་ཧཱུཾ་ཧཱུཾ། གཙོ་བོའི་བུམ་པ་དེ་བཞིན་དུ། །ཕྱོགས་བཞིའི་བུམ་པའི་རྡོ་རྗེ་ལ། །ཡང་སྙིང་བཞི་པོ་
གོ་རིམས་བཞིན། །དེ་བཞིན་ཁྲོ་བོའི་བུམ་པ་ལ། །ཉི་མ་ཁྲོ་བོའི་རྡོ་རྗེ་ལ། །སྙིང་པོའི་སྔགས་ཀྱིས་སོ་སོ་སྟེ། །གོ་རིམས་བཞིན་དུ་བསྒོམ་པར་བྱའོ། །དེ་ལྟར་རྫོགས་ནས་སངས་རྒྱས་བསྟིམ། །བདག་ཉིད་ཤར་དུ་གནས་པ་ཡིས། །མཆོད་དང་མཆོད་པའི་ཚུལ་དུ་བཟླས། །ཨོཾ་ན་མོ་རཏྣ་

73-1-342a

ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཨོཾ་སརྦ་བི་དྱཱ་བཛྲ་བཛྲ། སྥོ་ཊ་བཛྲ་བཛྲ། ཀ་ཊ་བཛྲ་བཛྲ། མ་ཊ་བཛྲ་བཛྲ། མ་ཐ་བཛྲ་བཛྲ། ཨཊྚ་ཧ་ས་ནཱི་ལ་བཛྲ་སུ་བཛྲཱ་ཡ་སྭཱ་ཧཱ། སྙིང་པོ་ནི། ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། 
ཧ་ར་ཧ་ར་བཛྲ། མ་ཊ་མ་ཊ་བཛྲ། དྷུ་ན་དྷུ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། དྷ་ར་དྷ་ར་བཛྲ། དྷ་རཱ་ཡ་དྷ་རཱ་ཡ་བཛྲ། དཱ་རུ་ཎ་དཱ་རུ་ཎ་བཛྲ། ཙྪིནྡ་ཙྪིནྡ་བཛྲ། བྷིནྡ་བྷིནྡ་བཛྲ་ཨ་མྲྀ་ཏེ་ཧཱུཾ་ཧཱུཾ་ཕཊ། དེ་ནི་གཙོ་བོའི་བཟླས་པ་སྟེ། །ཡང་སྙིང་མཆོད་པའི་བུམ་པ་ལའོ། །སྙིང་པོས་བར་ཆད་སེལ་བའི་ཕྱིར། །ཕྱོགས་
སྐྱོང་བཅུ་པོ་བསྡུ་བར་བྱ། །དེ་ལྟར་བྱས་ན་བདག་ཉིད་དང་། །སློབ་མས་བསྒོ་བ་བཀྲ་ཤིས་རྫས། །མཆོད་རྫས་ཐོགས་ནས་བསྐོར་བ་དང་། །བསྟོད་པའི་སྔགས་ནི་བརྗོད་པ་དང་། །དེ་ནས་བཀྲ་ཤིས་སྟོན་མོ་བྱ། །བདག་གིས་ད་ནི་ཁྲུས་བྱ་སྟེ། །ལྟ་མོ་དཔག་མེད་སྤྲུལ་ནས་ནི། །སློབ་མ་དག་ལ་
ཁྲུས་གསོལ་ཕྱིར། །གསང་སྔགས་བསྟོད་པས་ཁྲུས་གསོལ་བྱའོ། །ན་མཿས་མནྟ་བཛྲཱ་ཎཱཾ། སརྦ་བ་ལེ་ཨཱ་བརྟ་ཡ། མ་ཧཱ་བ་ལེ་ཀ་ཏ་བེ་ཏ་ཏ་ལེ། ཨ་ཙ་ལེ། མཎྜལ་མཱ་ཡེ། ཨ་ཏི་བཛྲ། མ་ཧཱ་བ་ལེ། བེ་ག་ར་ཎ་ར་ཎ་ཨ་ཛི་ཏེ་ཛྭ་ལ་ཛྭ་ལ། ཏི་ཊི་ཏི་ཊི་པིངྒ་ལེ། ད་ཧ་ད་ཧ། ཏེ་ཛོ་བ་ཏི། ཏི་ལི་ཏི་ལི། བནྡྷ་བནྡྷ་
མ་ཧཱ་བ་ལེ་བཛྲ་ཀྲོ་དྷ་ཛྭ་ལཱ་ཡ་སྭཱ་ཧཱ། མ་ཏི་སྠིར་བཛྲ། སུ་ཏི་སྠིར་བཛྲ། པྲ་ཏི་སྠིར་བཛྲ། མ་ཧཱ་བཛྲ། ཨ་པྲ་ཏི་ཧ་ཏ་བཛྲ། ཨ་མོ་གྷ་བཛྲ། ཨེ་ཧི་བཛྲ། ཤཱི་གྷཾ་བཛྲཱ་ཡ་སྭཱ་ཧཱ། དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། སརྦ་བཛྲ་ཀུ་ལཾ་ཨཱ་བརྟ་ཡེ་སྭཱ་ཧཱ། ཞེས་ཁྲུས་བྱས་ནས། གཏོར་མ་ཕུལ་ཏེ་གཤེགས་སུ་གསོལ། །རྡོ་རྗེ་རྣམ་
པར་འཇོམས་པའི་ཐུགས་ཀྱི་དཀྱིལ་འཁོར་བསྟན་པའོ།།      །།གསུང་གི་དཀྱིལ་འཁོར་བསྟན་པ་ནི། །བདག་ཉིད་ཁྲོ་བོའི་སྐུར་བསྒོམས་ནས། །མཎྜལ་སྟེང་དུ་གཙོ་བོའི་བུམ། །ས་བོན་ལ་བརྟེན་བསྙེན་པ་བྱ། །དང་པོ་ས་ཡི་ཆོ་ག་བྱ། །མཎྜལ་ཤིན་ཏུ་ལེགས་བྱས་ཏེ། །པདྨ་འདབ་བཞི་བྲི་བར་བྱའོ། །དེ་
དེ་ལྟར་དཀྱིལ་འཁོར་རྫོགས་ནས་ནི། །རིན་ཆེན་རྒྱུ་ལས་བྱས་པ་ཡི། །བུམ་པ་ལྔ་པོ་པད་སྟེང་དགྲམ། །ལས་ཀྱི་བུམ་པ་ཤར་དུ་སྟེ། །གཙོ་བོའི་སྙིང་པོ་རྫས་ཀྱིས་དགང་། །གཞན་དག་དྲི་ཞིམ་ཆུས་དགང་ངོ་། །མཆོད་དང་གཏོར་མ་ཞལ་ཟས་བཤམ། །ཀུ་ཤའི་སྟེང་དུ་ལེགས་འདུག་སྟེ། །བྱང་ཆུབ་

73-1-342b

མཆོག་ཏུ་སེམས་བསྐྱེད་དོ། །དེ་ནས་སྟོང་པའི་ཏིང་འཛིན་ལས། །བདག་ཉིད་ཁྲོ་བོའི་སྐུར་བསྐྱེད་ནས། །སྤྱན་དྲངས་བྱིན་རླབས་རྫོགས་པ་ཡིས། །མདུན་དུ་མཎྜལ་རིན་ཆེན་གནས། །པདྨ་འདབ་བཞིར་བཅས་པ་ཡི། །སྟེང་དུ་བུམ་པ་ལྔ་བསྐྱེད་ནས། །ནང་དུ་ཟླ་སྟེང་ས་བོན་ནི། །ཧཱུཾ་དྷཱིཿཏྲཱཾ་རཱཾ་ཏཱཾ་ངོ་། །ན་
མ་ཤྩཎྜ་བཛྲ་ཀྲོ་དྷཱ་ཡ་ཧཱུཾ། ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུཾ་ཕཊ། བུམ་པ་བཞི་ལ་སོ་སོ་སྟེ། །དེ་ལྟར་བསྐྱེད་ནས་སངས་རྒྱས་བསྟིམ། །བསྒྲུབ་པའི་རིག་སྔགས་འདི་བཟླས་སོ། །ན་མ་ཤྩཎྜ་བཛྲ་ཀྲོ་དྷཱ་ཡ། ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ་ན། ཧ་ན་ཧ་ན ཨ་མྲྀ་ཏེ་ཧཱུཾ་
ཕཊ། མཆོད་དང་མཆོད་པའི་ཚུལ་གྱིས་ནི། །བདུད་རྩི་ཆུ་ཡི་རང་བཞིན་བསམ། །ལས་ཀྱི་བུམ་པ་བྱིན་གྱིས་བརླབས། །བུམ་ནང་ཟླ་སྟེང་བདུད་རྩི་འཁྱིལ། །སྔོན་པོ་བྲང་དུ་བསྣོལ་བའི་ཕྱག །ཤིན་ཏུ་འཇིགས་པ་བསྐྱེད་པར་བྱ། །ཨོཾ་ན་མཿཙཎྜ་བཛྲ་ཀྲོ་དྷ་ཡ། ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། 
ཧ་ན་ཧ་ན། ཨ་མྲྀ་ཏ་ཀུཎྜ་ལི་ཧཱུཾ་ཕཊ། ཅེས་པས་བགེགས་བསྐྲད་བསྐོར་བར་བྱ། །བཀྲ་ཤིས་གསོལ་ནས་ཁྲུས་བྱའོ། །གཏོར་མའི་ཆོ་ག་རྫོགས་པ་ཡིས། །དམ་ཚིག་བསྡུས་ནས་གཤེགས་སུ་གསོལ། །རིག་པའི་ལས་དག་གཏད་པའི་ཕྱིར། །གང་དག་ཡིད་དགེ་སེམས་དང་བས། །
དཀྱིལ་འཁོར་ལ་ནི་འཇུག་པའི་ཕྱིར། །ལུས་ནི་བྱིན་གྱིས་བརླབ་པར་བྱའོ། །མ་ཏི་སྠིར་བཛྲ། སུ་ཏི་སྠིར་བཛྲ། ཨོཾ་ཨཱཿཧཱུཾ། མ་ཧཱ་བཛྲ། ཨ་པྲ་ཏི་ཧ་ཏ་བཛྲ། ཨ་མོ་གྷ་བཛྲ། ཨེ་ཧི་བཛྲ། ཤཱི་གྷྲཾ་བཛྲ། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། རྡོ་རྗེ་འཁོར་ལོ་པདྨའི་སྟེང་། །འདུག་སྟེ་ཕྲེང་བ་དོར་བར་བྱའོ། །དྷ་ར་དྷ་ར། དྷི་རི་
དྷི་རི། དྷུ་རུ་དྷུ་རུ། ཧཱུཾ་པཱུ་ཛ་ཧོ་ཞེས་བྱ་བས་དོར་བར་བྱའོ། །དེ་ནས་རྡོ་རྗེ་ཕྱག་བྱེད་དུ་བཅུག་ལ། རྡོ་རྗེའི་གླུ་དང་བཅས་པས་བསྐོར་བར་བྱ་སྟེ། གོང་དུ་ཡང་དེ་བཞིན་ནོ། །བླ་མ་རྡོ་རྗེ་འཛིན་པ་ཀྱེ། །གཙོ་བོ་འཁོར་བཅས་དགོངས་སུ་གསོལ། །མི་ཤེས་མུན་གྱིས་བསྒྲིབས་པ་ལ། །དཀྱིལ་འཁོར་དམ་པ་བསྟན་
དུ་གསོལ། །ལམ་ཆེན་འདི་ནི་བསྟན་པར་བྱ། །ཁྱོད་ནི་ལམ་ཉིད་སྒྲུབ་པར་གྱིས། །ལམ་མཆོག་སྒྲུབ་པར་རབ་ཏུ་དཀའ། །ཉེས་པ་དག་གིས་མ་གོས་པར། །འབྲས་བུ་མྱུར་དུ་འབྱིན་པར་བྱེད། །དམ་ཚིག་འདས་ན་དམྱལ་བར་ལྟུང་། །ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་ཀྲོ་དྷ་ཡ་ན་ར་

73-1-343a

ཀན་ཧཱུཾ། མི་ཤེས་མུན་གྱིས་བསྒྲིབས་པ་ལ། །དཀྱིལ་འཁོར་འདི་ནི་བསྟན་པར་བྱ། །མཎྜལ་ལ་ཕཊ། བཀྲ་ཤིས་རྫས་ཀྱིས་མཆོད་པར་བྱ། །དེ་ནས་ལྷ་མོས་ཁྲུས་གསོལ་ནས། །འཁོར་ལོའི་སྟེང་དུ་བཞག་ནས་ནི། །སློབ་མ་ལྷ་ཡི་སྐུར་བསྐྱེད་ལ། །མཆོད་པ་དག་གིས་ཡང་དག་མཆོད། །
དུས་གསུམ་གཤེགས་པའི་སྐུ་ཡི་མཆོག །སྐུ་དང་ཡོངས་སུ་རྒྱས་པའི་སྐུ། །སྐུ་མཆོག་འདི་ནི་ཁྱོད་ཀྱིས་ཟུང་། །ལུས་ཀྱི་མི་དགེ་སྤང་བར་བྱའོ། །སརྦ་ཏ་ཐཱ་ག་ཏ་སུ་ཏི་སྠིར་བཛྲ་ཨོཾ། དེ་ནས་མཆོད་པ་དབུལ་བར་བྱའོ། །དུས་གསུམ་གཤེགས་པ་ཐུགས་ཀྱི་མཆོག །ཐུགས་དང་ཕྲིན་ལས་ལྡན་
པའི་ཐུགས། །ཡེ་ཤེས་འདི་ནི་ཁྱོད་ཀྱིས་ཟུང་། །ཡིད་ཀྱི་ལས་དག་མི་བྱའོ། །ཨོཾ་སརྦ་ཏ་ཐཱ་ག་ཏ་མ་ཏི་སྠིར་བཛྲ་ཧཱུཾ། མི་འབྲལ་གཟུངས་ཀྱི་བདག་ཉིད་ཆེ། །མུ་ཏིག་རིན་ཆེན་ཕྲེང་བ་འདི། །སྐུ་དང་ཡེ་ཤེས་མི་འབྲལ་བའི། །ངག་གི་ཉེས་སྤོང་ཕྲེང་བ་གཟུང་། །ཨོཾ་སརྦྦ་ཏ་ཐཱ་ག་ཏ་པྲ་ཏི་སྠིར་བཛྲ་ཨཱཿ
དེ་ནས་བཀྲ་ཤིས་བརྒྱད་དང་རྒྱལ་མཚན་དང་། གདུགས་ཀྱིས་ཀྱང་དབང་བསྐུར་བར་བྱའོ། །དེའི་རྗེས་ལ། ཚིགས་སུ་བཅད་པ་འདི་ལན་གསུམ་བརྗོད་པར་བྱའོ། །ཡོན་ཏན་རྒྱས་པ་སྐུ་མདོག་གསེར་དང་མཚུངས། །ཤེས་རབ་རྟགས་སུ་པུསྟི་རལ་གྲི་བསྣམས། །འཕགས་པ་འཇམ་
དཔལ་བཀྲ་ཤིས་གང་ཡིན་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ཐུགས་རྗེའི་རྟགས་སུ་སྐུ་མདོག་ཟླ་བའི་འོད། །མ་ཆགས་སྐྱོན་གྱིས་མ་གོས་ཕྱག་ན་པདྨ་བསྣམས། །འཕགས་པ་སྤྱན་རས་གཟིགས་ཀྱི་བཀྲ་ཤིས་གང་ཡིན་པ། །བཀྲ་ཤིས་དམ་པ་དེས་
ཀྱང་དེང་འདིར་བདེ་ལེགས་ཤོག །ཆོས་ཉིད་མི་འགྱུར་རྟགས་སུ་སྐུ་མདོག་མཐིང་ནག་སྟེ། །ཐབས་དང་ཤེས་རབ་དབྱེར་མེད་རྟགས་སུ་རྡོ་རྗེ་འཛིན། །དཔལ་ལྡན་ཕྱག་ན་རྡོ་རྗེའི་བཀྲ་ཤིས་གང་ཡིན་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །དེ་ནས་
གཏོར་མ་བཏང་ནས་ཡེ་ཤེས་སེམས་དཔའི་མདུན་དུ་ཡི་གེ་བརྒྱ་པ་བརྗོད་དེ་གཤེགས་སུ་གསོལ། དད་པས་བླ་མ་བཟང་བཙལ་དེས། །དམ་པའི་དྲིན་གྱིས་ཡང་དག་ཐོབ། །དགེ་བ་གང་གིས་ཡེ་ཤེས་འདི། །འདིར་བཞུགས་རྣམས་ཀྱིས་ཐོབ་པར་ཤོག །རྡོ་རྗེ་རྣམ་པར་

73-1-343b

འཇོམས་པའི་དཀྱིལ་འཁོར་གྱི་ཆོ་ག་རིན་ཆེན་སྣང་བ་ཞེས་བྱ་བ་སློབ་དཔོན་ཆེན་པོ་ས་ཝ་རི་པས་མཛད་པ་རྫོགས་སོ།།      །།བལ་པོའི་བླ་མ་དེ་བ་པུརྞ་མ་ཏི་དང་། ལོ་ཙཱ་བ་དགེ་སློང་ཆོས་ཀྱི་བཟང་པོས་བསྒྱུར་བའོ། །༄༅༅། །རྒྱ་གར་སྐད་དུ། བཛྲ་ཀྲོ་དྷ་ཀརྨ་མཱ་ར་ཡ་སཱ་དྷ་ན་ནཱ་མ། 
བོད་སྐད་དུ། རྡོ་རྗེ་ཁྲོ་བོས་གསད་པའི་ལས་ཞེས་བྱ་བའི་སྒྲུབ་པའི་ཐབས། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །ཐབས་དང་ཤེས་རབ་དབྱེར་མེད་པའི། །མི་འགྱུར་དབྱེར་མེད་རྟགས་དང་ལྡན། །དྲག་པོ་དེ་ལ་ཕྱག་འཚལ་ནས། །གདུག་པ་མ་ལུས་ཞི་མཛད་པའི། །དྲག་པོའི་སྒྲུབ་ཐབས་
བརྩམ་པར་བྱ། །དུར་ཁྲོད་ལ་སོགས་པའི་གནས་སུ་མཎྜལ་མེ་ཏོག་དང་བཅས་པ་སྔོན་པོའི་སྟེང་དུ་མཆོད་རྟེན་སྐུ་གདུང་དང་ལྡན་པ་བཞག་ལ། མཆོད་ཅིང་སྐྱབས་སུ་འགྲོ་བ་ལ་སོགས་པ་བྱའོ། །དེ་ནས་སྟོང་པ་ཉིད་དུ་བསྒོམ་པ་ནི། ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ནས་ས་བོན་ཧཱུཾ་ལས་
བྱུང་བའི་པཾ་ལས་པདྨ་འདབ་མ་བཞི་པ་བསྐྱེད་ལ། དེའི་དབུས་སུ་ལག་ན་རྡོ་རྗེ་རྣམ་པར་འཇོམས་པ་མདོག་མཐིང་གཞལ་གཅིག་ཕྱག་གཉིས་པ། གཡས་ན་བེ་ཅོན་བསྣམས་པ། གཡོན་རྡོ་རྗེ་ཐོགས་པ། ཞབས་བརྐྱང་བསྐུམ་དུ་བཞུགས་པར་བསྒོམས་ཏེ། དེའི་ཐུགས་ཀ་ནས་ཧཱུཾ་
ལས་འོད་འཕྲོས་ནས་ཀླུའི་རྒྱན་ཆ་བཅིང་བ་ནི། ཨོཾ་ཙི་ལི་ཙི་ལི་ཙི་ལི། ཕུ་རུ་ཕུ་རུ་ཕུ་རུ། ཕུ་ཕུ་ཕུ་ཞེས་པས་ཀླུའི་རྒྱན་ཆ་བཅིང་བར་བྱའོ། །དེས་ནི་རྒྱལ་རིགས་ཀྱིས་ནི་དབུ་ལ། ཆུ་ལྷས་ནི་མགུལ་དུ། གཟི་ཅན་སེ་རལ་ཁར་དཀྲིས་པའོ། །ཨོཾ་ཛྭ་ལ་ཛྭ་ལ། དྷུ་ན་དྷུ་ན་དྷུ་ན། བནྡྷ་བནྡྷ་བནྡྷ། 
ནཱི་ལཾ་ནཱི་ལམ་ནཱི་ལམ། བཛྲ་དྷ་ར་ཞེས་པ་སྐུ་ཁྲོ་བོ་འཆོལ་བའི་མེ་དཔུང་དང་ལྡན་པར་བྱིན་གྱིས་བརླབས་པའོ། །ཨོཾ་ཀི་ཏི་ཀི་ཏི་ནི། སརྦ་བྷཱུ་ཏ་ནི། བཛྲ་མ་ལི། བཛྲ་དྷ་ར། བཛྲ་ཨཊྚ་ཧཱ་ས། ཙར་ཏུ་མར་ཏུ། ཀུ་རུ་ཀུ་རུ་ཀུ་རུ། ཧུ་རུ་ཧུ་རུ་ཧུ་རུ། ཧུ་འུཾ་ཧུ་འུཾ་ཧུ་འུཾ། ཧེ་ཧེ་ཧེ། ཕཊ་ཕཊ་ཕཊ། ཙནྡྷ་ཙནྡྷ་ཙནྡྷ། 
མ་ཧཱ་ཙཎྜ་ཧུ་རུ་ཏུ་ཧུ་རུ་ཏུ་ཧུ་རུ་ཏུ། མུ་རུ་མུ་རུ་མུ་རུ། གྲྀཧྞ་གྲྀཧྞ་གྲྀཧྞ། བཛྲ་པཱ་ཎི་ཧ་ན་ཧ་ན་མཱཾ་སརྦ་ཤ་ཏྲཱུཾ་མུར་ནི་ཧ་ད་ལ་ཕཊ། ཀུ་ཏུ་ཀུ་ཏུ་ཀུ་ཏུ་ཀུ་ཏུ། འདིས་ནི་བར་དུ་གཅོད་པ་སེལ་ཞིང་། དམ་ཚིག་གི་སྐུ་གཟི་བྱིན་དང་ལྡན་པར་བྱིན་གྱིས་བརླབས་པའོ། །དེ་ནས་པདྨ་འདབ་མ་བཞི་ལ་དྷཱིཿལས་

73-1-344a

བསྐྱེད་པའི་ཡུམ་སངས་རྒྱས་སྤྱན་ནོ། །ཏྲཱཾ་ལས་བསྐྱེད་པའི་མཱ་མ་ཀཱིའོ། །རཱཾ་ལས་བསྐྱེད་པའི་གོས་དཀར་མོ། །ཏཱཾ་ལས་བསྐྱེད་པའི་སྒྲོལ་མ་རྣམས་བསྐྱེད་དོ། །དེ་ནས་སྤྱན་དྲང་ཞིང་གཉིས་སུ་མེད་པར་བསྟིམས་ནས་དབང་བསྐུར་བ་ནི། ཏདྱ་ཐཱ་ཨོཾ་མོ་ཧ་ནི་མོ་ཧ་ནི། ན་མོ་རཏྣ་ཏྲ་ཡཱ་ཡ། 
ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཏདྱ་ཐཱ། ཏ་ཐཱ་ག་ཏ་ས་མ་ཏཱི་དྷི་དེ་ནི། མ་ཨཱ་བརྟ་ཨི་ཤྱཱ་མི། ཨེ་ཧི་བཛྲ་ཀུ་ཏི་ལི། ཏི་པ་ལ་ཀ་ཀུ་ལ། ཤི་ཁོ་ཀི་པ་ལ་ཀེ་ཤི། ཏི་ཊ་ཙི་ཏི་ཙི་ཏི། མ་ཧཱ་ནི། ཀརྒ་ཏི་མུ་ཏི་བ་ཏི་བཛྲེ། མ་ཧཱ་བི་དུ་དུ་ལློ་ལེ་བུ་གུ་གུ། སུ་མུ་སུ་མུ། ས་ར་ས་ར་སྭཱ་ཧཱ། སྱ་ཧཱ། ཨུ་ཏོ་
ཏེ་བི་ག་གེ་ཙི་ཏེ། བི་ཙ་བི་ཛ་ལ་སིང་ག་ལེ། སརྦྦ་དེ་བཱ་ག་ཎ་པྲ་ཧ་ར། ན་མ་ཡ་སིདྡྷི་ད་ཡི་གེ། སུ་རུ་ཀེ། བཛྲ་གྲི་ནེ། བཛྲ་དྷི་དྷ་ས་པྲ་ཧ་ར་ཎེ། རཏྣ་ཏྲ་ཡཱ་དྷི་ག་ལ་བུདྡྷེ། བཛྲ་བེ་ཤ་ས་ནི་ཀ །ཨ་པྲ་ཏི་ཧ་ཏ་པྲ་མ་ཏ་ནི་སྭཱ་ཧཱ། ཁྲོ་བོ་མེ་ལྟར་འབར་བ་རྡོ་རྗེའི་གླུས་མཆོད་ཅིང་གསོལ་བ་བཏབ་
པའོ། །ཏདྱ་ཐཱ། ཨོཾ་མུ་ནི་མུ་ནི་མ་ཧཱ་མུ་ཎི། ཏདྱ་ཐཱ། ཛ་ཡེ་ཛ་ཡེ། མ་ཧཱ་ཛ་ཡ་བ་ཏི་ཡེ། བུདྡྷེ་ཨ་བི་ཤི་ཏེ། དྷརྨྨཱ་ཨ་པཱ་བྷ་སཾ་ནི་བུདྡྷཱི་ཨི་དྷ་ཨི་དྷ་ག་མྱེ། ཛྙཱ་ན་ཨ་བ་བྷ་སེ་སྭཱ་ཧཱ། དབང་བསྐུར་ཞིང་སྤྱི་བོ་ན་བཅོམ་ལྡན་འདས་བསམ་ཞིང་བསྒོམ་མོ། །སྙིང་པོ་ནི་འདིའོ། །ཨོཾ་ཙཎྜ་བཛྲ་ཀྲོ་དྷཱ་ཡ་ཧུ་ལུ་ཧུ་ལུ། 
ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨོཾ་ཨ་མྲྀ་ཏེ་ཧུ་འུཾ་སྭཱ་ཧཱ། ཉེ་བའི་སྙིང་པོ་ནི། ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཨོཾ་དྷཱིཿཨྃ། ཨོཾ་ཏྲཱཾ་ཨཾ། ཨོཾ་རཱཾ་ཨཾ། ཨོཾ་ཏཱཾ་ཨཾ་སྭཱ་ཧཱ། སྒྲུབ་པའི་སྙིང་པོ་འདི་ལས་དང་འབྲེལ་ཏེ་འདིའོ། །ཨོཾ་མ་ཧཱ་ཀྲོ་དྷ་མ་ཧཱ་བ་ལ་ཧ་ན་ད་ཧ་པ་
ཙ་བི་དྷྭཾ་ས་ཡ། ཛཱ་ཊི་ལཾ་བོ་དཱ་རཱ་ཡ། ཨུཙྪུཥྨ་ཀྲོ་དྷ་ཧུ་འུཾ་ཕཊ། ཀླུའི་གཟུགས་བྱས་ཏེ་ཚོན་སྣ་ལྔས་བཅིངས་ལ། ཁམ་པའི་གའུར་བཅུག་ལ་ཡུངས་ཀར་སྔགས་ལ་གདབ་པོ། །དགུག་ཅིང་མནན་པའི་སྔགས་ནི་འདིའོ། །ཨོཾ་སརྦྦ་ཨཏྨ་ཛ། མ་ཧཱ་དེ་ཙ་བཛྲ་ཨཾ་ཀུ་ཤ་ནི། བཛྲ་པྲ་ཤ་ཨ་ནུ་
པྲ་བི་ཤ་སརྦྦ་དུཥྚཱན་སྟཾ་བྷ་ཡ་སྟཾ་བྷ་ཡ་ཧུ་འུཾ་ཕཊ། མཚོན་གྱིས་གཏུབ་པ་ནི། བཛྲ་ཀྲོ་དྷ་བཛྲ་ཀཱརྟ་རི་ཀ་ར་ཀ་ར། ཙིནྡ་ཚིནྡ་ཧུ་འུཾ་ཕཊ། བསྲེག་པ་ནི། ཨོཾ་བཛྲ་ཀྲོ་དྷ་མ་ཧཱ་བ་ལ་ཛྭ་ལ་ཛྭ་ལ། པྲ་ཛྭ་ལ་པྲ་ཛྭ་ལ། དི་བྱ་དི་བྱ། དི་བྱ་ཡ་དི་བྱ་ཡ་ཧུ་འུཾ་ཕཊ། དབྱེ་བ་ནི། ཨོཾ་བཛྲ་ཀྲོ་དྷ་

73-1-344b

ས་ཧཱ་བ་ལ། ཏ་ད་ཏ་ད། ཏ་ད་ཡ། ཏདྱ་ཐཱ་ཧུ་འུཾ་ཕཊ་ཞེས་བྱའོ། །དེ་ནས་གཏོར་མ་བཏང་བ་ནི། སྤྱོད་ལམ་གྱིས་གནས་པར་བྱའོ། །མ་ལུས་གདུག་པའི་དུག་སེལ་བའི། །དམ་པ་ལ་བརྟེན་འདི་བརྩམས་པས། །ཉོན་མོངས་དུག་གིས་ཟིན་པ་རྣམས། །གྲོལ་ནས་བདེ་དང་ལྡན་གྱུར་ཤོག །རྡོ་རྗེ་ཁྲོ་བོས་
གསད་པའི་ཕྲིན་ལས་སློབ་དཔོན་ཆེན་པོ་ས་བ་རི་པས་མཛད་པ་རྫོགས་སོ།།      །།ལོ་ཙཱ་བ་དགེ་སློང་ཆོས་ཀྱི་བཟང་པོས་བསྒྱུར་བའོ། །༄༅༅། །རྒྱ་གར་སྐད་དུ། ནཱི་ལཱམྦ་ར་བཛྲ་དྷ་ར་བཛྲ་པཱ་ཎི་རོ་ཥ་སཱ་དྷ་ནཾ། བོད་སྐད་དུ། ཕྱག་ན་རྡོ་རྗེ་གོས་སྔོ་པོ་ཅན་གཏུམ་པོ་ཞེས་བྱ་བའི་སྒྲུབ་
ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །གཡོན་བརྐྱང་པ་ཡི་གདན་ལ་བཞུགས། །རྡོ་རྗེ་བསྣམས་ཤིང་ཀླུ་རྣམས་འདུལ། །རྒྱན་ལྡན་ཁྲོ་བོའི་རྒྱལ་ལ་འདུད། །ཇི་ལྟར་རྟོག་པ་རྒྱུད་ནས་བྲི། །སྙིང་བརྩེ་ཤེས་རབ་དད་དང་ལྡན། །དབང་དང་རྗེས་གནང་སྒྲུབ་པ་པོས། །གནས་
ཁང་མེ་ཏོག་གཅལ་བཀྲམ་ནས། །བདེ་བའི་སྟན་ལ་ཉེར་འདུག་སྟེ། །རྗེ་བཙུན་ལ་སོགས་སྤྱན་དྲངས་ནས། །མཆོད་ཅིང་བཤགས་པ་ལ་སོགས་བྱ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ནས་རང་སེམས་ཧཱུཾ་དུ་བསམས། །འོད་འཕྲོས་གྱུར་དང་ས་གཞིར་བསམས། །དེ་
ནས་བྷྲཱུཾ་ལས་གཞལ་ཡས་ནི། །རྡོ་རྗེ་སྔོན་པོ་ལྟེ་བར་བཅས། །གྲུ་བཞི་སྒོ་བཞི་ཟླ་བའི་གདན། །ཧཱུཾ་ལས་རྡོ་རྗེ་སྐུ་བསྐྱེད་དོ། །བརྐྱང་བསྐུམ་ལྗང་ནག་རྡོ་རྗེ་གཡས། །སྦྲུལ་དང་སྟག་ལྤགས་སྡིག་པ་གཡོན། །ཁྲོ་བོའི་ཞལ་མདོག་ཐུགས་ཀར་ཧཱུཾ། །དེ་ལས་ཁྲོ་བོ་བཞི་པོ་འཕྲོས། །
ཁམས་གསུམ་རྒྱལ་དང་ཤིན་ཏུ་ཁྲོས། །རྡོ་རྗེ་ཁྲོ་བོ་བདུད་རྩི་འཁྱིལ། །སྒོ་བཞི་དག་ཏུ་བསམ་པར་བྱ། །སྐུ་མདོག་ལྗང་ནག་ཕུར་བུ་བསྣམས། །ཟླ་བའི་གདན་ལ་བརྐྱང་བསྐུམ་བཞུགས། །ཡེ་ཤེས་ལ་སོགས་སྤྱན་དྲངས་བསྟིམ། །སྐུ་གསུང་བྱིན་བརླབ་གནས་དྲུག་བསྲུང་། །ཨོཾ་ཙཎྜ་
མ་ཧཱ་རོ་ཥ་ཎ་ཧཱུཾ་ཕཊ། པྲཛྙཱནྟ་ཀྲྀ་ཏ་ཀཱི་ལི་ཀཱི་ལཱ་ཡ་ཧཱུཾ་ཕཊ། ཙུ་རུ་ཙུ་རུ་ཙཎྜ་ཀཱི་ལཱི་ཀཱི་ལཱ་ཡ་ཕཊ། ཏྲཱ་ས་ཡ་ཏྲཱ་ས་ཡ་བཛྲ་ཀཱི་ལི་ཀཱི་ལཱ་ཡ་ཕཊ། ན་མཿཙཎྜ་ཨ་མོ་གྷ་ཀཱི་ལཱ་ཡ་ཕཊ་ཅེས་བཟླས་པར་བྱའོ། །གཏོར་མ་ནི་ཨོཾ་ཧཱུཾ་ཧྲཱིཿཞེས་པས་བྱིན་གྱིས་བརླབ་བོ། །རྩ་བའི་སྔགས་ཀྱིས་

73-1-345a

དབུལ་བར་བྱའོ། །དམ་པའི་བྱིན་རླབས་ཕན་པ་ཆེན་པོ་ཐོབ། །འབྲས་བུ་ཉེ་བ་ཉིད་དུ་འགྲུབ་འགྱུར་ཏེ། །དཔལ་ལྡན་བླ་མའི་ཞལ་གྱི་བདུད་རྩི་འདི། །བདག་གིས་འཐུངས་ནས་གཞན་ལ་ཕན་ཕྱིར་བརྩམས། །བདག་གིས་སྒྲུབ་ཐབས་འདི་བྱས་པས། །བདག་དང་མཐའ་ཡས་
སེམས་ཅན་རྣམས། །བར་ཆད་ཐམས་ཅད་རབ་ཞི་སྟེ། །ཕྱག་ན་རྡོ་རྗེ་འདྲ་བར་ཤོག །ཕྱག་ན་རྡོ་རྗེ་གཏུམ་པོའི་སྒྲུབ་ཐབས་ཨོ་ཌྱན་གྱི་སློབ་དཔོན་ཨ་མོ་པ་ན་དྷ་ཞེས་བྱ་བས་མཛད་པ་རྫོགས་སོ།།      །།པཎྜི་ཏ་དེ་བ་པུརྞ་མཱ་ཏི་དང་། ལོ་ཙཱ་བ་ཆོས་ཀྱི་བཟང་པོས་བསྒྱུར་བའོ། །༄༅༅། །རྒྱ་གར་
སྐད་དུ། ཧོ་མ་བི་དྷིཿ། བོད་སྐད་དུ། སྦྱིན་སྲེག་གི་ཆོ་ག །འཕགས་པ་འཇམ་དཔལ་ལ་ཕྱག་འཚལ་ལོ། །མི་གཡོ་གཏུམ་པོའི་གཟུགས་སུ་སྣང་། །སྡུག་བསྔལ་བསྐྱབ་ལ་ཕྱག་འཚལ་འདུད། །རྣལ་འབྱོར་པ་ལ་ཕན་བྱའི་ཕྱིར། །སྦྱིན་སྲེག་རིམ་པ་བཤད་པར་བྱ། །བཀྲ་ཤིས་གནས་སུ་ས་བརྟག་
སོགས། །ཕྱག་ན་རྡོ་རྗེས་བྱིན་བརླབ་བྱ། །ཐབ་ནི་ཟླུམ་པོ་ཁྲུ་གང་ཚད། །དབུས་སུ་རྡོ་རྗེ་སྔོན་པོས་མཚན། །བུད་ཤིང་ཁྲུ་གང་ཡམ་ཤིང་ནི། །མཛུབ་གང་མདོག་དཀར་ལོ་འདབ་རྒྱས། །དཀར་གསུམ་ལ་སོགས་མཆོད་རྫས་བསགས། །དྲི་ཞིམ་ཆུ་དང་མེ་ཏོག་བཅས། །དགང་བླུགས་ཚད་
དབྱིབས་རྒྱུ་རྣམས་མཐུན། །རྒྱན་ལ་སོགས་པ་དགོད་བྱས་ནས། །ལྷ་ཡི་རྣལ་འབྱོར་ལྡན་པ་ཡིས། །མེ་ལྷ་བསྐྱེད་ནས་མཆོད་པ་དང་། །དེ་རྗེས་ཐུགས་ཀའི་དཀྱིལ་འཁོར་མཆོད། །རྗེས་ལ་ཕྱོགས་སྐྱོང་མཆོད་པར་བྱ། །ཐམས་ཅད་རྩ་སྔགས་ཉིད་ཀྱིས་མཆོད། །གཏོར་མའི་མགྲོན་རྣམས་ཚིམ་པར་བྱ། །བདག་གི་
སྦྱིན་སྲེག་རིམ་བརྩམས་པས། །ལས་དང་ཉོན་མོངས་དག་གྱུར་ནས། །དམ་པའི་དམ་པ་ཉེར་ཐོབ་ཅིང་། །འབྲས་བུ་སྐུ་གསུམ་ཐོབ་པར་ཤོག །སློབ་དཔོན་ཆེན་པོ་བྲམ་ཟེ་བ་ར་མ་ཏིས་མཛད་པ་འཕགས་པ་རྡོ་རྗེ་རྣམ་པར་འཇོམས་པའི་སྦྱིན་སྲེག་རྫོགས་སོ།།      །།བལ་པོའི་པཎྜི་ཏ་དེ་བ་པུརྞ་མ་ཏི་དང་། ལོ་
ཙཱ་བ་དགེ་སློང་ཆོས་ཀྱི་བཟང་པོས་བསྒྱུར་བའོ། །༄༅༅། །རྒྱ་གར་སྐད་དུ། བཛྲ་བི་དཱ་ར་ཎ་ནཱ་མ་དྷཱ་ར་ཎི་ཙཎྜ་མ་ཧཱ་རོ་ཥ་ཎ་སཱ་དྷ་ན་ནཱ་མ། བོད་སྐད་དུ། རྡོ་རྗེ་རྣམ་པར་མཇོམས་པ་གཏུམ་པོའི་སྒྲུབ་ཐབས་ཞེས་བྱ་བ། འཕགས་པ་རྣམ་པར་འཇོམས་པ་ལ་ཕྱག་འཚལ་ལོ། །ཐབས་དང་ཤེས་

73-1-345b

རབ་རང་བཞིན་གྱིས། །གདུག་པ་ཅན་རྣམས་འཇོམས་པ་ཡི། །ཤིན་ཏུ་ཁྲོ་ཞིང་འཇིགས་པའི་སྐུ། །རྣམ་པར་འཇོམས་ལ་ཕྱག་འཚལ་ནས། །རྩ་བའི་རྒྱུད་དོན་ལ་བརྟེན་ནས། །བདག་གིས་སྒྲུབ་ཐབས་འདི་བཤད་བྱ། །རེ་ཞིག་ཡིད་དུ་འོང་བའི་གནས་སུ་སྟན་བདེ་བ་ལ་འདུག་སྟེ། བྱམས་པ་དང་ལྡན་པའི་ཁྲུས་བྱས་
ནས། དུར་ཁྲོད་ཀྱི་ས་ལ་སོགས་པས་དཀྱིལ་འཁོར་འདོམ་གང་གྲུ་བཞི་པ་བྱས་ཏེ། དབུས་སུ་གྲུ་གསུམ་བརྩེགས་མའོ། །ཐ་མ་རྡོ་རྗེ་རྒྱ་གྲམ་དང་། འཁོར་ལོ་རྩིབས་བཅུ་པའི་གྲུ་ཆད་བཞི་དང་། སྒོ་བཞི་རྟ་བབས་དང་བཅས་པ། རྡོ་རྗེ་མེ་རི་དང་བཅས་པ་བྲིའོ། །དེ་ལྟར་བྲིས་ནས་ཕུར་བུ་བཅོ་ལྔ་དགོད་
དོ། །ཕྱོགས་སྐྱོང་ལ་གཏོར་མ་དང་ལྷ་བཤོས་གཞག་པར་བྱའོ། །དེ་ལྟར་རྫོགས་ནས་བསྒོམ་པ་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པ་བྱས་ལ། དེ་ནས་ཨོཾ་སྭ་བྷཱ་བ་ཤུདྡྷཿསརྦྦ་དྷརྨྨ་ནི་ཧཱུཾ། དེའི་རྗེས་ལ་རང་ཉིད་ས་བོན་ཧཱུཾ་གི་རྣམ་པར་གནས་ཏེ། འོད་ཟེར་གྱིས་རྡོ་རྗེ་ར་བ་མེ་རི་དང་བཅས་
པ་བསྒོམ་པར་བྱའོ། །དེ་ནས་བྷྲཱུཾ་ལས་དཀྱིལ་འཁོར་གྱི་ཁང་པ་བསྐྱེད་ནས། དབུས་སུ་ཉི་མ་ཟླ་བའི་གདན་ནོ། །རྒྱ་གྲམ་བཞི་དང་འཁོར་ལོ་རྩིབས་བཅུ་ལ་ཉི་མའི་དཀྱིལ་འཁོར་བཅུ་བསམས་ནས། བདག་ཉིད་ཉི་ཟླའི་སྟེང་དུ་བསམས་ཏེ། ཡོངས་སུ་གྱུར་པ་ལས་རྡོ་རྗེ། དེ་ལས་འོད་འཕྲོས་
སེམས་ཅན་སྦྱངས་སངས་རྒྱས་ཐམས་ཅད་རྡོ་རྗེ་དེ་ཉིད་ལ་ཐིམ་པས། རྡོ་རྗེ་རྣམ་པར་འཇོམས་པ་སྐུ་མདོག་མཐིང་ནག་ཏུ་འདུག་པ། དབུ་སྐྲ་དམར་སེར་གྱེན་དུ་འཁྱིལ་བ། ཆུ་ལྷ་དཀར་པོ་མགུལ་དུ་བཅིངས་པ། གཟི་ཅན་ནག་པོ་སེ་རལ་ཁར་བཅིངས་པ། མཆེ་བ་གཙིགས་པ། 
སྟོད་གཡོགས་སྔོན་པོ། སྨད་སྟག་གི་ཤམ་ཐབས་བཅིངས་པ། ཞབས་བརྐྱང་བསྐུམ་དུ་བཞུགས་པའོ། །ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་པཱ་ཎ་ཡེ་མ་ཧཱ་ཡཀྵ་སེ་ནཱ་པ་ཏ་ཡེ། ཧཱུཾ་བཅུ་ལས་འཁོར་ལོ་བཅུའི་སྟེང་དུ་ཁྲོ་བོ་བཅུ་དང་། ཧཱུཾ་བཞི་ལས་རྡོ་རྗེ་རྒྱ་གྲམ་གྱི་སྟེང་དུ་ཁྲོ་བོ་བཞིའོ། །
ཁྲོ་བོ་བཞི་ནི་མཆེ་བ་གཙིགས་པའོ། །ཞེ་སྡང་ཞི་ཞིང་བརྗིད་པའི་སྐུ་མདོག་དཀར་པོའོ། །ལྷོའི་རྡོ་རྗེ་བེ་ཅོན་ནི་རྟོག་པ་ཐམས་ཅད་གཞིག་པའི་སྐུ་ང་རྒྱལ་ཞི་བའི་བདག་ཉིད་དམར་ནག་གོ། །ནུབ་ཀྱི་རྡོ་རྗེ་བརྟན་པ་ནི་འདོད་ཆགས་དྲི་མ་སྤངས་པ་དམར་པོའོ། །བྱང་དུ་རྡོ་རྗེ་དོན་ཡོད་བརྟན་

73-1-346a

པ་ཕྲག་དོག་འཇོམས་པ་ལྗང་གུའོ། །ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་བསྣམས་པའོ། །སརྦྦ་བིདྱཱ་བཛྲ་བཛྲ། སྥོ་ཊ་བཛྲ་བཛྲ། ཀ་ཊ་བཛྲ་བཛྲ། མ་ཊ་བཛྲ་བཛྲ། མ་ཐ་བཛྲ་བཛྲ། ཨཊྚ་ཧཱ་ས་ནཱི་ལ་བཛྲ་སུ་བཛྲཱ་ཡ་སྭཱ་ཧཱ། འཁོར་ལོའི་རྩིབས་བཅུ་ལ་ཁྲོ་བོ་ཆེན་པོ་བཅུ་ནི་ཁམས་གསུམ་
རྣམ་པར་རྒྱལ་བ་དཀར་པོའོ། །གཤིན་རྗེ་གཤེད་ནི་དམར་ནག་སྟེ། །རྟ་མགྲིན་དམར་པོ་རྟ་མགོ་ལྗང་གུ་ཅན། །བདུད་རྩི་འཁྱིལ་པ་ལྗང་གུའོ། །སྒོ་བཞིར་རོ། །དབྱུག་པ་སྔོན་པོ་ལ་སོགས་པ་མཚམས་སུའོ། །དེ་ལྟར་སྟེང་འོག་གཉིས་ཏེ། ཁྲོ་བོ་བཅུ་ནི་སྟག་ཤམ་ཅན། སྦྲུལ་གྱིས་བརྒྱན་ཅིང་ཐམས་
ཅད་ཕུར་བུ་བསྣམས་པ། ཞབས་བརྐྱང་བསྐུམ་དུ་བཞུགས་པར་བསྒོམ་མོ། །དེ་ལྟར་དམ་ཚིག་རྫོགས་ནས་སྤྱན་དྲང་བ་དང་། མཆོད་པ་དང་བསྟིམ་པ་བྱས་ནས། ཨོཾ་ཨཱཿཧཱུཾ་ས་བོན་གསུམ་བྱིན་གྱིས་བརླབ་པ་བྱས་ལ་ཐུགས་ཕྱག་མཚན་དང་བཅས་པས་སྐྱེ་མཆེད་བྱིན་གྱིས་བརླབས་ནས་དབང་
བསྐུར་ཞིང་གཙོ་བོས་མཚོན་པར་བྱའོ། །དེ་ནས་བསྒོམས་པས་སྐྱོ་ན་བསྙེན་པ་དང་། སྒྲུབ་པའི་བཟླས་པ་བྱའོ། །དེ་ནས་ལྷ་མོའི་གླུས་གཏོར་མ་ཉེ་བར་ཕུལ་ཏེ། སྤྱོད་པས་གནས་པར་བྱའོ། །ལས་བྱ་བར་འདོད་པས་རབས་ཆད་ནག་པོའི་རུས་པའི་ཕྱེ་མ་དང་། ཡུངས་ཀར་དང་། སྐེ་ཚེ་དང་། 
ཤང་ཚེ་དང་། ཏིལ་ནག་པོ་དག་གིས་ཐོད་པར་ནི་དུག་ཆུ་དག་གིས་གདབ་པར་བྱའོ། །ཏདྱ་ཐཱ། ཨོཾ་ཏྲ་ཊ་ཏྲ་ཊ། ཏྲོ་ཊ་ཡ་ཏྲོ་ཊ་ཡ། སྥུ་ཊ་སྥུ་ཊ། སྥོ་ཊ་ཡ་སྥོ་ཊ་ཡ། གྷུརྞྞ་གྷུརྞྞ། གྷུརྞྞཱ་པ་ཡ་གྷུརྞྞཱ་པ་ཡ། སརྦྦ་སཏྭ་ནི་བོ་དྷ་བོ་དྷ། སཾ་བོ་དྷ་ཡ་སཾ་བོ་དྷ་ཡ། བྷྲ་མ་བྷྲ་མ་སཾ་བྷྲ་མ་ཡ་སཾ་བྷྲ་མ་ཡ། སརྦ་བྷཱུ་ཏ་
ནི། ཀུ་ཊ་ཀུ་ཊ། སཾ་ཀུ་ཊ་ཡ་སཾ་ཀུ་ཊ་ཡ། སརྦ་ཤ་ཏྲུཾ་ནཱན། གྷ་ཊ་གྷ་ཊ། སཾ་གྷ་ཊ་ཡ་སཾ་གྷ་ཊ་ཡ། ཨ་མུ་ཀཾ་མཱ་ར་ཡ་ཕཊ། ལྕགས་ཕྱེ་ཟངས་ཕྱེ་རྡོ་ཕྱེ་གདབ། ཨོཾ་སརྦྦ་བིདྱཱ་བཛྲ་བཛྲ། སྥོ་ཊ་བཛྲ་བཛྲ། ཀ་ཊ་བཛྲ་བཛྲ། མ་ཊ་བཛྲ་བཛྲ། མ་ཐ་བཛྲ་བཛྲ། ཨཊྚ་ཧཱ་ས་ནཱི་ལ་བཛྲ་སུ་བཛྲཱ་ཡ་སྭཱ་ཧཱ། དེ་ནས་ཁྲོ་བོ་
ཆེན་པོ་བཅུའི་ཕུར་པས་གདབ་པར་བྱའོ། །ཧེ་ཕུ་ལུ་ནི་རུ་ཕུ་ལུ་གྲྀཧྞ་ཀུ་ལུ་མི་ལི་ཙུ་ལུ་ཀུ་རུ་ཀུ་ལུ་བཛྲ་བི་ཛཱ་ཡ་ཀཱི་ལི་ཀཱི་ལཱ་ཡ་སྭཱ་ཧཱ། ཀ་ཊ་ཀ་ཊ་མ་ཊ་མ་ཊ། ར་ཊ་ར་ཊ། མོ་ཊ་ན་པྲ་མོ་ཊ་ནཱ་ཡ། བཛྲ་ཀཱི་ལི་ཀཱི་ལཱ་ཡ་སྭཱ་ཧཱ། ཙ་ར་ནི་ཙ་ར། ཧ་ར་ཧ་ར། ས་ར་ས་ར། མཱ་ར་ཡ་བཛྲ་ཀཱི་ལི་ཀཱི་ལཱ་ཡ་སྭཱ་ཧཱ། 

73-1-346b

ཙྪིནྡ་ཙྪིནྡ་མ་ཧཱ་ཀཱི་ལི་ཀཱི་ལཱ་ཡ་སྭཱ་ཧཱ། བྷིནྡ་བྷིནྡ་མ་ཧཱ་ཀཱི་ལི་ཀཱི་ལཱ་ཡ་སྭཱ་ཧཱ། བནྡྷ་བནྡྷ་ཀཱི་ལི་ཀཱི་ལཱ་ཡ་སྭཱ་ཧཱ། ཀྲོ་དྷ་ཀྲོ་དྷ་ཀཱི་ལི་ཀཱི་ལཱ་ཡ་སྭཱ་ཧཱ། ཙུ་རུ་ཙུ་རུ་ཙཎྜ་ཀཱི་ཀཱི་ལཱ་ཡ་སྭཱ་ཧཱ། ཧ་ར་ཧ་ར་བཛྲ་དྷ་རཱ་ཡ་སྭཱ་ཧཱ། ཏྲཱ་ས་ཡ་ཏྲཱ་ས་ཡ་བཛྲ་ཀཱི་ལི་ཀཱི་ལཱ་ཡ་སྭཱ་ཧཱ། པྲ་ཧ་ར་པྲ་ཧར། བཛྲ་པྲ་བྷཉྫ་ནཱ་ཡ་ཏྲཱ་ས་ཡ་ཏྲཱ་ས་ཡ་བཛྲ་ཀཱི་ལི་
ཀཱི་ལཱ་ཡ་སྭཱ་ཧཱ། དེ་ནས་གཏོར་མ་བྱས་ནས་དབུལ་བར་བྱའོ། །དེ་ནས་དྲག་པོའི་སྦྱིན་སྲེག་ནི། གྲུ་གསུམ་ཁྲུ་གང་བ་ལ་སུམ་བརྩེགས་སུ་བྱའོ། །དུར་ཁྲོད་ཀྱི་སོལ་བས་བྱུགས་ལ། དབུས་སུ་རྡོ་རྗེ་ནག་པོ་བྲི་བར་བྱའོ། །རུས་པའི་ཕྱེ་མ་དང་། ཡུངས་ཀར་དང་། ཡུངས་ནག་དང་། སྐེ་ཚེ་དང་ཤང་ཚེ་ལ་
སོགས་པ་གོང་དུ་བསྟན་པའི་རྫས་ནི་བསྲེག་རྫས་སོ། །དེ་ནས་བདག་ཉིད་ཁྲོ་བོ་གཏུམ་པོ་ཁྲོས་པའི་སྐུར་བསྒོམ་མོ། །མདུན་དུ་མེ་ཐབ་ནག་པོའི་ནང་དུ། འཁོར་ལོའི་སྟེང་དུ་ལྷ་བཅོ་ལྔ་པོ་སོ་སོར་མེ་དཔུང་དང་བཅས་པ་བསྐྱེད་ལ། ཐུགས་ཀར་རཾ་བསམས་ལ་བསྲེག་པར་བྱ་བ་ནི། མཱ་
ར་ཡ་དགུག་པ་དང་། གཞུག་པ་དང་། བཅིང་བ་དང་། མྱོས་སུ་གཞུག་པ་ནི། སྤྲུལ་པའི་ཁྲོ་བོས་བྱས་ལ་སྔགས་འདིས་བསྲེག་གོ། །ན་མོ་རཏྣ་ཏྲ་ཡཱ་ཡ་ནས་སཾ་གྷ་ཊའི་བར་དང་། སརྦྦ་ཤ་ཏྲཱུཾ་ཧཱུཾ། ཨ་མུ་ཀཾ་མཱ་ར་ཡ་ཕཊ་ཅེས་པས་བསྲེག་རྫས་དབུལ་བར་བྱའོ། །ཡང་སྙིང་སྔགས་ལ་མཱ་ར་ཡ་བཏགས་
པས་བསྲེག་པར་བྱའོ། །ཕྲིན་ལས་རྣམ་པ་བཞིའི་སྔགས་ཀྱིས་ཡུངས་ཀར་ལ་སོགས་པ་བསྲེག་པར་བྱའོ། །ཡང་སྙིང་གིས་ནི་བྱེ་མ་རྣམས་ཀྱིས་གདབ་པར་བྱའོ། །ཡམ་ཤིང་ནི་གདུག་པའི་ཤིང་ལ་བྱ་སྟེ། ཁྲོ་བོའི་སྔགས་ཀྱིས་བསྲེག་པར་བྱའོ། །དེ་ལྟར་ཕུལ་ནས་གཏོར་མ་གཏང་སྟེ། ཐལ་བས་
མནན་པར་བྱའོ། །དེ་ལྟར་སྦྱིན་སྲེག་རྫོགས་ནས་མནན་པར་བྱའོ། །ནག་པོའི་ཐོད་པར་ཆེ་གེ་མོའི་གཟུགས་གཅེར་བུ་དབྱངས་ཡིག་དང་། གསལ་བྱེད་ཕྱིན་ཅི་ལོག་གིས་གནས་བརྒྱད་དུ་ཛཿབརྒྱད་ཀྱིས་བསྐོར་བའི་གཟུགས། མི་གཙང་བའི་སྐུད་པས་བྱད་དུ་བཅུག་ལ་ཐོད་པར་གཞུག་གོ། །ཕུར་བུ་བཅུས་
གདབ་པར་བྱའོ། །ཐུན་ལ་སོགས་པས་གདབ་པར་བྱའོ། །དེ་ལྟར་བྱས་ནས་མཆོད་རྟེན་ཀུན་ནས་ཟླུམ་པའམ། ཁྲུ་གསུམ་གང་ཡང་རུང་བ་སུམ་བརྩེགས་བྱས་ལ། འོག་རྣམས་ལ་རྡོ་རྗེ་གསུམ་བྲི་བར་བྱའོ། །བུམ་པའི་ནང་དུ་སངས་རྒྱས་གང་གཱའི་ཀླུང་གི་བྱིན་གྱིས་བརླབས་པའི་སྔགས་དང་། 

73-1-347a

ཡང་སྙིང་འཁོར་ལོ་རྩིབས་བཞི་པ་ལ་བྲིས་པ་གཞུག་གོ། །རབ་ཏུ་གནས་པར་བྱ་བའི་ཕྱིར་སྔོན་དུ་བསྙེན་པ་བྱ་བ་ནི། བདག་ཉིད་རྡོ་རྗེ་རྣམ་པར་འཇོམས་པ་སྐུ་མདོག་མཐིང་ནག །སྦྲུལ་གསུམ་གྱིས་བརྒྱན་ཅིང་རྡོ་རྗེ་དྲིལ་བུ་བསྣམས་པ། ཤིན་ཏུ་ཁྲོ་བ་ཅིག་བསྒོམས་
ལ། ཐུགས་ཀར་ཉི་མའི་སྟེང་དུ་ཧཱུཾ་བསྒོམས་ནས། ཡེ་ཤེས་སེམས་དཔའ་སྤྱན་དྲང་བ་ལ་སོགས་པ་བྱས་ལ་བསྒོམ་པ་ནི། ཨོཾ་ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ་ཧཱུཾ་ཞེས་འབུམ་མམ་ས་ཡ་བཟླས་པར་བྱའོ། །དེ་ལྟར་རྫོགས་ནས་རབ་ཏུ་གནས་པར་བྱ་བ་ནི། མཎྜལ་སྔོན་པོར་
མེ་ཏོག་སྔོན་པོ་གཅལ་དུ་བཀྲམ་སྟེ། པཱུ་ཛ་ཅི་འབྱོར་པ་ཡང་བཤམས་ལ། སྐུའི་དཀྱིལ་འཁོར་ལ་སོགས་པ་ལ་བརྟེན་ནས་བསྒྲུབ་པར་བྱའོ། །དེ་ལྟར་རྫོགས་ནས་མཆོད་རྟེན་ཧཱུཾ་ནག་པོ་ལས་རྡོ་རྗེ་རྒྱ་གྲམ་གྱི་སྟེང་དུ་མཆོད་རྟེན་འཁོར་ལོ་སུམ་བརྩེགས་པའི་རྣམ་པ་ཅན་
བསྐྱེད་ལ། འཁོར་ལོ་དང་པོ་ལ་རྡོ་རྗེ་རྣམ་པར་འཇོམས་པ་ལ་ཁྲོ་བོ་བཞི་དང་བཅས་པ། བར་དུ་ཧཱུྃ་ཀ་ར་ལ་ཕྱོགས་ཀྱི་ཁྲོ་བོ་བཞི། འོག་གི་སྟོབས་པོ་ཆེ་ལ་མཚམས་ཀྱི་ཁྲོ་བོ་བཞི་སྟེ། ལྷ་བཅོ་ལྔའི་རྣམ་པར་བསམ་པའོ། །དེ་ནས་བདག་ཉིད་རྡོ་རྗེ་གཏུམ་པོར་བསམས་ལ། 
དེས་ཡེ་ཤེས་སེམས་དཔའ་སྤྱན་དྲངས་ཏེ་བསྟིམས་པ་ལ་སོགས་པ་བྱའོ། །འཁོར་ལོའི་རྩིབས་རྣམས་ལ་དེ་བསྒོམས་ནས། སྐུའི་གསང་སྔགས་ཕྲིན་ལས་བཞི་དང་། དེ་ལས་སྣ་ཚོགས་ཏེ་སྤྲུལ་པའི་ལས་བྱའོ། །ཐུགས་ཀྱི་སྔགས་ནི་སྐུ་གདུང་བྱིན་གྱིས་བརླབ་པའི་ཆེད་དུ་བཟླས་
སོ། །གསུང་གི་སྔགས་ནི་བདག་ཉིད་དོ། །དེ་ལྟར་དང་པོ་གཅད་མནན་བཟློག་པའི་ལས་བྱའོ། །ཐོད་པ་དང་བཅས་པ་མནན་ཅིང་བསྐོར་བར་བྱའོ། །དམ་པའི་གདམས་ངག་ལ་བརྟེན་ནས། །རྒྱུད་དོན་ཟབ་མོའི་ལམ་འདི་སྦྱར། །ཉེས་པ་ཁྱེད་ལ་བཟོད་པར་འབུལ། །འདི་བརྩམས་
སེམས་ཅན་བདེ་ཐོབ་ཤོག །རྡོ་རྗེ་རྣམ་པར་འཇོམས་པའི་སྒྲུབ་ཐབས། སློབ་དཔོན་ཆེན་པོ་དངོས་གྲུབ་བརྙེས་པའི་ས་བ་རི་པས་མཛད་པ་རྫོགས་སོ།།      །།བལ་པོའི་པཎྜི་ཏ་དེ་བ་པཱུརྞ་མ་ཏི་དང་། ལོ་ཙཱ་བ་དགེ་སློང་ཆོས་ཀྱི་བཟང་པོས་བསྒྱུར་བའོ།།      །།

73-1-347b