203-1-1a



203-1-1b

༄༅༅། །རྒྱ་གར་སྐད་དུ། ར་ས་ཤཱསྟྲ་སིདྡྷི་ནཱ་མ། བོད་སྐད་དུ། དངུལ་ཆུ་གྲུབ་པའི་བསྟན་བཅོས་ཞེས་བྱ་བ། སངས་རྒྱས་ལ་ཕྱག་འཚལ་ལོ། །ཐམས་ཅད་མཁྱེན་པ་ཐམས་ཅད་སྦྱིན། །
ཞི་བ་དཔལ་དང་ལྡན་པའི་གཟུགས། །ཕ་རོལ་གཅེས་པར་བྱེད་པའི་མཆོག །ལོངས་སྤྱོད་རྣམ་པར་གྲོལ་ལ་འདུད། །དཔལ་ལྡན་མགོན་པོའི་དབང་ཕྱུག་ལའོ། །དངོས་པོ་དངོས་པོ་མེད་པར་གྲོལ། །
མཐོང་དང་མ་མཐོང་མེད་པ་ཡི། །ལོངས་སྤྱོད་གྲོལ་བ་རྣམ་པར་སྟེར། །དཔལ་གྱི་དབང་ཕྱུག་ཕྱག་འཚལ་བསྟོད། །དྲི་མེད་རང་བྱུང་དངུལ་ཆུ་མཆོག །ལས་ཀྱིས་བསླད་པ་ངན་པར་བཤད། །སྦྱོར་བ་གཞན་
ལ་ཡོན་ཏན་སྐྱེད། །ཤི་རུ་ཆ་བས་ནད་རྣམས་འཇོམས། །མཁས་ཀྱིས་བསྒྲུབ་པས་བཀྲེས་པ་འཇོམས། །བརྐམས་པས་མཁའ་སྤྱོད་འགྲུབ་པར་འགྱུར། །ལྷང་ཚེར་བྱིན་པའི་སྟོབས་ཀྱིས་ནི། །ཡོན་ཏན་བརྒྱད་
འགྱུར་ཐོབ་པར་འགྱུར། །མུ་ཟི་དང་ནི་སྦྱར་བ་ཡིས། །ཡོན་ཏན་དྲུག་འགྱུར་ཐོབ་པར་འགྱུར། །གསེར་དང་མཉམ་པོར་སྦྱར་བ་ལ། །མ་འགགས་ནམ་མཁའི་ལམ་ལ་འགྲོ། །གཤའ་ཚེ་དཀར་པོས་མཉམ་པ་

203-1-2a

གསོད། །ལས་འདི་ཉིས་འགྱུར་དངུལ་དང་སྦྱོར། །དངུལ་ཆུའི་ཉིས་འགྱུར་ཆུ་དང་སྦྱོར། །དེ་བཞིན་གསེར་དང་སྦྱར་བར་བྱ། །ཟངས་ནི་དྲུག་ཅུ་རྩ་བཞི་འབིགས། །དངུལ་ཆུ་སེར་སྐྱས་ལས་རྣམས་བྱེད། །མེ་དང་
སྤྲད་པར་འགྱུར་བའི་ཚེ། །ཆུ་བུར་ལྟར་དུ་འགྱུར་བ་དང་། །མི་གཡོ་བ་རུ་བསྟན་པ་ནི། །ལྷང་ཚེར་དང་ནི་སྦྱར་བས་སོ། །གསེར་དང་དངུལ་ནི་མཉམ་པ་ཡིས། །ལས་རྣམས་བྱེད་པར་འགྱུར་བ་ཡིན། །དེ་ནས་མཉམ་པའི་མཚན་ཉིད་ནི། །
ལྷང་ཚེར་ཞུ་བར་གྱུར་པ་ལས། །དངུལ་ཆུ་དབང་དུ་བྱས་པར་འགྱུར། །ལུས་ངན་པོ་ཡི་གསེར་མཛོད་ཀྱི། །སྒོ་རྣམས་དབྱེ་བར་འགྱུར་བ་ཡིན། །དྲི་མེད་གདོང་ཅན་ལྷང་ཚེར་ནི། །མེ་ཡིས་འཆིང་བར་བྱེད་པར་འགྱུར། །མུ་ཟི་ལས་ནི་དྲང་བར་
འགྱུར། །གསེར་གྱི་ནང་དུ་ཆུ་སོང་ཞིང་། །གཅིག་ཏུ་འདྲེས་ཤིང་གང་བ་ནི། །ས་སྟེང་འདི་ན་རབ་ཏུ་དཀོན། །མ་སྦྱངས་པ་ཡིས་མི་འགྲུབ་སྟེ། །དམར་པོར་བཙོས་པ་མ་ཡིན་པས། །རྫས་རྣམས་གསེར་དུ་མི་བྱེད་དེ། །བཙོས་ཤིང་སྦྱངས་
པས་འགྲུབ་པ་ཡིན། །བྱེ་བའང་འགྲུབ་པར་འགྱུར་བ་ཡིན། །དེ་ནས་རྫས་རྣམས་དཔག་མེད་བརྗོད། །མཆོག་ཏུ་འགྱུར་བ་རྣོ་ལྕགས་ཡིན། །མ་རྙེད་རྣོ་ལྕགས་གཞན་ཡང་ཡིན། །ཟངས་དང་གཤའ་ཚེ་ར་གན་ཀླུ། །སྦྱངས་པའི་ཟངས་དང་

203-1-2b

གསེར་དང་དངུལ། །རྡོ་ལྟར་ལྕགས་ནི་བརྒྱད་པོ་ལ། །དངུལ་ཆུ་གཞུག་པར་བྱ་བ་ཡིན། །སྦྱངས་ནས་ལས་རྣམས་བྱ་བ་ཡིན། །དག་ཅིང་སྦྱངས་པས་བཅུད་དུ་བྱེད། །མུ་ཟི་དང་ནི་བི་མ་ལ། །མ་ཀྵི་ཀ་དང་དེ་བཞིན་མཚལ། །ལྡོང་རོས་དེ་བཞིན་ཞ་ཉེ་དྲུག །མདུང་རྩེ་དང་ནི་བ་བླ་དང་། །ཤེས་རབ་
ཅན་གྱིས་སྦྱང་བར་བྱ། །ཤེས་ནས་ལས་རྣམས་བྱ་བ་ཡིན། །གསེར་གྱི་ལས་རྣམས་བ་བླས་བྱེད། །སེར་པོས་དཀར་པོའི་ལས་རྣམས་བྱེད། །ལྷང་ཚེར་དང་ནི་ཏི་ཚ་ཡིས། །ཀ་ཀུ་ཤྲི་ཡི་ལས་རྣམས་བྱེད། །དེ་རྣམས་མཚན་མ་བརྗོད་བྱ་བ། །སྦྱང་ཞིང་དུག་དང་བྲལ་བར་བྱ། །རྣོ་ལྕགས་བཟང་
ཞིང་དཀར་བ་ལ། །རྣོ་ཞིང་མཆོག་ཏུ་དྲོ་བར་བྱེད། །ཟངས་ནི་མཆོག་ཏུ་དམར་བ་བཟང་། །དེ་ལ་རིགས་ནི་གསུམ་དུ་གནས། །བལ་པོར་སྐྱེས་པའི་རང་བཞིན་བཟང་། །ངན་པ་ལ་སྦྱངས་མཆོག་ཏུ་འགྱུར། །ཀན་དྷ་འུར་དུ་སྐྱེས་པ་ངན། །བཟང་ངན་འདྲེས་མས་ལས་རྣམས་བྱེད། །སྦྱངས་ཤིང་རྗེས་
སུ་སྦྱངས་པ་ལས། །དངུལ་ཆུ་རབ་ཏུ་དམར་བར་བྱེད། །ཀླུ་ནི་གནག་དང་དཀར་བ་གཉིས། །རང་བཞིན་མགྱོགས་པར་ཆུ་ལྟར་འཇུ། །ར་གན་དྲི་མ་ཆེ་བ་མཆོག །རང་བཞིན་ཆུ་ལྟར་མྱུར་དུ་འཇུ། །རང་བཞིན་གཉིས་པ་མྱུར་དུ་འཇུ། །དཀར་པོ་ཕ་རོལ་མཆོག་ཏུ་གྲགས། །སེར་པོ་གསེར་
ལྟར་མདངས་བཟང་བ། །བསྲེགས་ན་དྲི་ཅན་ནག་པོར་འགྱུར། །དྲག་ཏུ་བསྐོལ་བས་འཇུ་བར་བྱེད། །རགས་པ་ཟངས་ཀྱི་ཁམས་ལས་བྱུང་། །བསྲེགས་ན་ནག་པོར་འགྱུར་བ་ཡིས། །དེ་ནི་རིང་པོར་འཇུ་བར་བྱེད། །གཤའ་ཚེ་དང་ནི་འདྲེས་པ་ལས། །འཁར་བའི་ཁམས་སུ་བྱེད་པར་འགྱུར། །ཟངས་
མའི་རང་བཞིན་འཇུ་བར་དཀའ། །འཁར་བ་ར་གན་མྱུར་དུ་འཇུ། །གསེར་ནི་བདར་ན་སེར་བ་ལ། །བཅད་ན་དཀར་པོར་འགྱུར་བ་ཡིན། །བསྲེགས་ན་གུར་ཀུམ་མདངས་ལྟར་བྱེད། །ཉུང་བ་ལྕི་ཞིང་སྣུམ་པར་བྱེད། །དྲུག་ནི་གསེར་གྱི་མཚན་ཉིད་ཡིན། །དངུལ་ནི་ཀུནྡ་ལྟར་དཀར་ཞིང་། །སྣུམ་
ལ་འོད་ཅན་རབ་ཏུ་གསལ། །དྲུག་ཅུ་རྩ་བཞི་ཡོན་ཏན་ནི། །ཁམས་རྣམས་ཀུན་ལ་རབ་ཏུ་ལྡན། །དེ་རྣམས་མདོ་རུ་བསྡུས་ཏེ་བཤད། །སྔོན་དུ་བཤད་པའི་རྗེས་སུ་ནི། །དང་པོ་རྣོ་ལྕགས་བཤད་པ་ལ། །སྦྱང་བ་ལན་བདུན་བར་དུའོ། །རྣོ་ལྕགས་རྣོན་པོ་གཉིས་ལ་ཡང་། །གསེར་ནི་དབུགས་བཅིང་

203-1-3a

བརྟག་པར་བྱ། །བ་ཚ་བཅུག་ཅིང་སྦྱང་བར་བྱ། །གཞན་ཡང་དྲི་ཆུ་ལྔ་ཡིས་སྦྱངས། །བ་ཚ་དྲི་ཆུ་གཅིག་ཏུ་བསྲེས། །དག་ཅིང་སྦྱངས་པར་བྱས་པ་ཡིས། །སྐྱུར་པོས་སྦྱངས་ཤིང་རབ་ཏུ་བསྲེག །དེ་ལྟར་མང་དུ་བྱས་པ་ལས། །དེ་ཡི་རྩ་བ་བཟུང་ཞིང་བསྲེག །ཡང་ནི་སྐྱུར་པོ་
བཅུག་ཅིང་སྦྱང་། །དེ་ལྟ་བུ་ཡི་རིམ་པ་ཡིས། །ལྕགས་དང་རྣོ་ལྕགས་སྦྱར་བར་བྱ། །གླང་པོ་ཆེ་ཡི་རུས་པ་བཏབ། །མཐིང་ཤིང་ཕྱེ་མ་རྣམ་པར་བླང་། །ར་ཡི་གཅིན་གྱིས་རྣམ་པར་བསྲེས། །ལན་བདུན་བར་དུ་སྦྱང་བར་བྱ། །དེ་ལྟར་ཟངས་ནི་སྦྱངས་པ་ཡིས། །བློ་ལྡན་གསེར་འགྱུར་མཁན་པོ་རྣམས། །
དེ་ལྟར་ཟངས་ནི་སྦྱོར་བ་ཡིན། །ལྕགས་བརྒྱད་ནང་དུ་ཟངས་ནི་མཆོག །ལས་རྣམས་ཐམས་ཅད་བྱེད་པར་འགྱུར། །དེ་ནས་ཡང་དག་བཤད་བྱ་བ། །ར་གན་སྦྱང་བའི་ཆོ་ག་བཤད། །སེག་བདར་གྱིས་ནི་ཕྱེ་མར་བརྡར། །དེ་ནས་ཕྱེ་མ་ཞིབ་ཏུ་བཏགས། །བ་ཚ་དང་ནི་དྲི་ཆུ་བསྲེ། །ལན་བདུན་བར་དུ་
སྐམ་ཞིང་བསྲེག །ཡང་ནི་སྐྱུར་པོའི་ཁུ་བ་སྦྱིན། །ལན་གསུམ་བར་དུ་བསྲེག་པར་བྱ། །དེ་ལྟར་དག་པར་བྱས་པ་ཡིས། །ར་གན་རྣམ་པར་སྦྱངས་པ་ཡིན། །དེ་ནས་འཁར་བ་སྦྱང་བར་བྱ། །སྔར་བཞིན་ཞིབ་ཏུ་བཏགས་པ་ལ། །དེ་ལ་བ་ཚ་དྲི་ཆུ་སྦྱིན། །ཡང་དང་ཡང་དུ་བླུགས་ཤིང་བསྐོལ། །ལན་བདུན་
བར་དུ་སྦྱངས་པ་ཡིན། །ཡང་ནི་སྐྱར་པོའི་ཁུ་བ་གཞུག །ཅུང་ཟད་ཞ་ཉེ་བྱིན་ལ་བཞུ། །བསྲེགས་པས་ཟངས་སུ་འགྱུར་བ་ཡིན། །སྔར་བཤད་རིམ་པས་ཟངས་ཀྱང་སྦྱང་། །དེ་ལྟར་འཁར་བ་སྦྱངས་པ་ཡིས། །མཆོག་གི་ལྕགས་ནི་སྦྱང་བའི་ཐབས། །ཞ་ཉེ་སྦྱང་བར་བྱ་བ་ནི། །དེ་ཡི་བྱེད་པ་རྣམ་
བཤད་ན། །ཡུང་བ་ཕྱེ་མར་བཏགས་པའམ། །ཤྲཱྀ་ཁཎྜ་རྣམ་པར་བསྲེ། །མང་པོ་གཞུག་ཅིང་བསྐམ་པར་བྱ། །དེ་ནས་ཞ་ཉེ་སྦྱིན་ལ་བཏགས། །ལན་བདུན་བར་དུ་སྦྱངས་པས་འདག །ཞ་ཉེ་ཞུ་བར་གྱུར་པ་ན། །འབྲས་བུ་གསུམ་གྱི་ཁུ་བ་སྦྱིན། །ཞ་ཉེ་སྦྱངས་པའི་ཆོ་ག་ཡིས། །གཤའ་ཚེ་
དཀར་པོའང་དེ་བཞིན་སྦྱང་། །ལྡོང་རོས་ཀྱི་ནི་རང་བཞིན་ལ། །མ་ལ་ཏ་ཡི་ཁུ་བས་སྦངས། །གཤའ་ཚེ་བཏགས་པའི་ནང་དུ་བླུགས། །ཡང་དང་ཡང་དུ་སྐམ་ཞིང་བཏགས། །འཛོ་ཏི་སྨ་ཏིའི་མར་ཁུ་བླུགས། །མེད་ན་མེ་ཏོག་ན་ར་ཛའི། །མར་ཁུ་ཡི་ནི་རྣམ་པར་བསྲེ། །གཞན་ཡང་སྦྱར་ཐབས་

203-1-3b

མང་པོ་ཡིས། །ཉེས་པ་ཐམས་ཅད་འཇོམས་པར་བྱེད། །ཞ་ཉེ་ནག་པོ་ཅུང་ཟད་བསྲེ། །དངུལ་གྱི་རང་བཞིན་དག་པའོ། །འདི་ལྟར་དྲི་ཆུ་ལན་གསུམ་སྦྱང་། །བཏགས་ཤིང་བཏགས་ཤིང་ལན་བདུན་བཀྲུ། །འདིས་ནི་དག་ཅིང་རྒྱལ་བར་བྱེད། །གསེར་གྱི་སྦྱང་བ་བརྗོད་པར་བྱ། །མཆོག་ཏུ་བ་ཚ་
སྦྱང་བ་གཅེས། །སྐྱུར་པོ་ཡིས་ཀྱང་དེ་བཞིན་དུ། །མར་དང་སྦྲང་རྩི་རྣམ་པར་བསྲེ། །གསེར་དང་སྦྱར་ཞིང་བཏགས་པར་བྱ། །ལས་རྣམས་གཞན་གྱི་དྲུག་འགྱུར་སྦྱང་། །དེས་ནི་ངེས་པར་འགྲུབ་པར་འགྱུར། །ཇི་ལྟར་གསེར་གྱི་ལས་རྣམས་ཡིན། །དེ་ནས་ལྕགས་ཀྱི་བྱ་བ་བརྗོད། །ཇི་ལྟར་དབྱེ་
བའི་སྦྱོར་བ་ཡིས། །པཎྜི་ཧན་དུ་སྐྱེས་པ་མཆོག །གསེར་དང་དངུལ་ཡང་དེ་ན་མཆོག །རྣོ་ལྕགས་ཇི་ལྟར་རྙེད་པ་གཟུང་། །དང་པོ་སྦྱང་བའི་ཆོ་ག་ནི། །ཕྱི་ནས་ལས་རྣམས་བརྗོད་པར་བྱ། །འདི་ལྟར་གསེར་ཟིལ་རྡོ་ལ་ནི། །བ་ཚ་དང་ནི་སྐྱུར་པོས་སྦྱང་། །ལྕགས་ཀྱི་སྣོད་དུ་ལེགས་པར་བཏགས། །ལྕགས་
ཀྱི་སྟེང་དུ་ག་འུས་དགབ། །མཐའ་ནི་རས་དང་འཇིམ་པས་གཏུམས། །བསྲེགས་པས་དག་པར་འགྱུར་བ་ཡིན། །ཕྱེ་མར་གྱུར་གྱི་བར་དུ་བསྲེག །དེ་ལྟར་དག་པའི་ཆོ་ག་ནི། །ལས་རྣམས་ཀུན་ལ་བྱ་བ་ཡིན། །མུ་ཟི་མར་གྱི་མདོག་ཅན་བཟང་། །འབྲིང་ནི་མང་དུ་རྙེད་པ་བླང་། །ངན་པ་བ་གླང་སོ་དང་མཚུངས། །
དེ་ལྟར་མུ་ཟི་རིགས་གསུམ་ཡིན། །བི་མ་ལ་ནི་སེར་མོ་བཟང་། །གསེར་དང་དངུལ་གྱི་ཁ་དོག་གིས། །རབ་དང་འབྲིང་ནི་ཤེས་པར་བྱ། །ཤེས་ནས་ལས་རྣམས་བྱ་བ་ཡིན། །གསེར་ཟིལ་རྡོ་ནི་སེར་བ་ལ། །རང་བཞིན་ཟངས་ཀྱི་ཁམས་ཡིན་ཏེ། །རག་རྡོ་དང་ནི་གསེར་ཟིལ་རྡོ། །ཁམས་དང་རང་བཞིན་
གཅིག་པ་ཡིན། །སྤྲིན་གྱི་ཁ་དོག་ཇི་བཞིན་སེར། །མེ་ཏོག་ཀར་བིར་འབྲས་བུ་འདྲ། །དེ་ནི་མཆོག་ཏུ་གྱུར་པ་ཡིན། །རིགས་རྣམས་དག་པར་ཤེས་པས་སྦྱང་། །མཆོག་དང་བར་དང་ཐ་མ་སྟེ། །མཀྵི་ཀ་ནི་གསུམ་དུ་སྣང་། །མཚལ་ལ་རིགས་ནི་གཉིས་ཡིན་ཏེ། །མཆོག་ནི་ཉི་མའི་འོད་ལྟར་གསལ། །
གསེར་མཚལ་རབ་ཏུ་དམར་བ་མཆོག །གཉིས་ཀ་དངུལ་ཆུའི་ཁམས་ཡིན་ཏེ། །ལྡོང་རོས་དབྱེ་བའི་དྲི་ཅན་མཆོག །མཚུར་གྱི་མཚན་ཉིད་བརྗོད་བྱ་བ། །སྨིན་ཅིང་སེར་བ་མཆོག་ཏུ་བཟང་། །གསེར་གྱི་སྦལ་རྒྱབ་ལྟར་དུ་སེར། །མ་རྙེད་དམར་པོ་གཟུང་བར་བྱ། །དག་པས་ལས་རྣམས་བྱ་བ་ཡིན། །སྨིན་

203-1-4a

པ་སེར་པོའི་ཁམས་ཡིན་ཏེ། །བ་བླ་མཆོག་ཏུ་དཀར་བ་བཟང་། །འབྲིང་ནི་རྣམ་པར་སེར་བ་ཡིན། །ཤེས་ནས་ལས་ལ་སྦྱར་བར་བྱ། །ལས་གཞན་སེར་པོ་ཕལ་པའང་གཟུང་། །ལྷང་ཚེར་ནམ་མཁའི་མིང་གིས་བརྗོད། །སེར་པོ་ནག་པོ་དཀར་པོ་ལས། །ལྷང་ཚེར་ཞུ་བས་
ལས་རྣམས་བྱེད། །རྣམ་པར་སྤྱད་པས་ལས་རྣམས་བྱེད། །མཆོག་ནི་གསེར་གྱི་མདོག་ལྟར་སེར། །ནག་པོ་བར་པའི་ཁམས་ཡིན་ཏེ། །གཉིས་ནི་གསེར་འགྱུར་ལས་ལ་བཟུང་། །དཀར་པོ་དག་པར་བྱས་པ་ཡིས། །དངུལ་གྱི་ལས་ཀྱང་འགྲུབ་པ་ཡིན། །ཙི་ཏ་དམར་པོ་མཆོག་ཡིན་ཏེ། །དམར་
པོའི་ཁམས་ནི་སྦྱིན་པ་མིན། །ཀམ་ཀུས་ཏྲ་ནི་ཅུང་ཟད་སེར། །ཐམས་ཅད་སྔོན་དུ་བཤད་ཟིན་ཏེ། །ལྕགས་བརྒྱད་པོས་ཀྱང་གོང་དུ་བཤད། །འདི་ནི་ལས་ཀྱིས་སྦྱར་བ་ལས། །ལྕགས་རྣམས་སྦྱར་ཞིང་བཏགས་པ་ལས། །བསད་ཅིང་རྗེས་སུ་འབིགས་པར་བྱེད། །པཎ་ཏྲེའི་ཡུལ་ནས་རྡོ་རྗེ་སྐྱེས། །
རང་བྱུང་ལྕགས་དང་རྡོ་ལྕགས་དང་། །ཞ་ཉེ་ཟངས་དང་ར་གན་དང་། །འཁར་བ་གསེར་དང་དེ་བཞིན་དངུལ། །གཤའ་ཚེ་དཀར་པོ་ཐམས་ཅད་ལ། །བཀྲུས་ཤིང་གསང་བར་བྱ་བ་ཡིན། །གསེར་ཟིལ་རྡོ་ཡིས་ལྕགས་འཇོམས་ཤིང་། །དངུལ་དང་གཤའ་ཚེ་ཉམས་པ་ཡིན། །གསེར་གྱི་ལས་ནི་དག་པ་
ཡིན། །ལྕགས་དྲུག་རྣམ་པར་སྦྱངས་པ་ལས། །གསེར་གྱི་ལས་ནི་འགྲུབ་པར་བྱེད། །དངུལ་གྱི་ལས་ནི་འགྲུབ་པར་འགྱུར། །ཟི་མའི་ཁུ་བ་རྣམ་པར་སྦྱིན། །སྐྱུར་པོའི་ཁུ་བས་དག་པར་བྱེད། །གཤའ་ཚེ་རྣམ་པར་བཏགས་པ་ལས། །ཡང་ནི་ཟི་མའི་ཁུ་བ་བླུགས། །སྐྱུ་རུ་ར་ཡི་ཤུན་པ་བསྲེ། །དེ་ལྟར་
བསྲེས་ཤིང་བཏགས་པ་ལ། །ཡང་ནི་ག་འུའི་ནང་དུ་བསྲེག །དེ་ནི་གཤའ་ཚེ་ཕྱེ་མར་འགྱུར། །ཕྱེ་མ་དང་ནི་བ་བླ་བསྲེ། །མཀྵི་ཀ་ནི་རྣམ་པར་བཏགས། །བཏགས་པ་རས་ཀྱིས་ཕྱེ་མ་གཏུམས། །བལ་སྲན་ནག་པོའི་ཁུ་བ་གཞུག །མེ་ཡི་དུགས་ཀྱིས་རྣམ་པར་སྐམ། །བ་ལྕི་སྐམས་པའི་ཕྱེ་མ་ཡིས། །ཆུ་
ལ་བཅུག་ཅིང་ཁུ་བས་བདུག །བ་ཚ་དང་ནི་དྲི་ཆུ་བསྲེ། །རང་བཞིན་ལན་བདུན་བར་དུ་སྦྱང་། །སྐྱུར་པོའི་ཁུ་བས་ཕྱི་ནས་སྦྱང་། །དེ་ནས་ལས་རྣམས་བྱ་བ་ཡིན། །དེ་བཞིན་བི་མ་ལ་ཡང་སྦྱང་། །སྔར་བཞིན་ཆོ་ག་དེ་ཉིད་ཀྱིས། །སྦྱང་ཞིང་ལས་རྣམས་བྱ་བ་ཡིན། །མུ་ཟིའི་ལས་རྣམས་བཤད་བྱ་བ། །སྔར་

203-1-4b

བཤད་རིམ་པ་ཅི་བཞིན་དུ། །དང་པོ་རྣམ་པར་བཏགས་པར་བྱ། །ལྕགས་ཀྱི་སྣོད་ཀྱི་ནང་དུ་ནི། །མར་ཁུ་དང་ནི་རྣམ་པར་བསྲེ། །རང་བཞིན་མེ་ལ་སྦྱང་བར་བྱ། །དྷ་དུ་ར་ཡི་ཁུ་བ་ཡིས། །ལན་གསུམ་བསྲེས་ཤིང་བསྐམ་པར་བྱ། །མཚལ་ནི་བཏགས་པར་གྱུར་པ་ལ། །རྨ་བྱའི་མཁྲིས་པས་རྣམ་པར་
སྦྱངས། །མ་རྙེད་རོ་ཇུའི་མཁྲིས་པ་ཡིས། །ཇི་ལྟར་མཚལ་ནི་སྦྱངས་པ་བཞིན། །གསེར་ལྡན་སྲལ་རྒྱབ་ལྡོང་རོས་དང་། །བ་བླ་དང་ནི་སྐྱུར་པོའི་རྡོ། །རིམ་པས་མཚལ་ཤིང་སྦྱང་བར་བྱ། །སྦལ་རྒྱབ་དང་ནི་ཀམ་བུ་ཏྲི། །ལྷང་ཚེར་དང་ནི་སོ་ཁྲི་ཉའི། །མཁྲིས་པ་ཡིས་ནི་བྱ་བ་ཡིན། །ཐམས་ཅད་
ལན་བདུན་བར་དུ་སྦྱང་། །རིམ་པ་དེ་བཞིན་བཀྲུ་བར་བྱ། །ལྷང་ཚེར་སྦྱང་བ་བརྗོད་བྱ་བ། །སྔོན་བཤད་པ་ཡི་རྗེས་བཞིན་དུ། །མཆོག་ནི་ལྷང་ཚེར་ནག་པོ་ཡིན། །གསེར་གྱི་ལས་རྣམས་འགྲུབ་པར་བྱེད། །དཀར་པོས་དངུལ་གྱི་ལས་རྣམས་བྱེད། །དངུལ་ཆུས་སྦྱོར་ཞིང་འབིགས་པར་བྱེད། །ལྷང་
ཚེར་འདབ་མ་རེ་རེ་དབྱེ། །ལྕགས་ཀྱི་སྣོད་ཀྱི་ནང་དུ་གཞུག །ཏང་ཀྲུ་ལུ་ཡི་རྩ་བ་བསྲེ། །དེ་ཡི་ཁུ་བས་རྣམ་པར་གཞུག །རས་བལ་གྱི་ནི་འདབ་མ་ཡི། །ཁུ་བ་ཡིས་ཀྱང་རྣམ་པར་སྦངས། །ཉི་མ་ལ་ནི་བདུག་ཅིང་སྐམ། །བཏགས་ཤིང་སྔོན་གྱི་ཁུ་བས་གཞུག །དེ་ཚེ་ལྷང་ཚེར་ཕྱེ་མར་འགྱུར། །ལེགས་པར་
བཏགས་པར་གྱུར་པ་ཡིས། །ཞབས་སུ་རྣམ་པར་བཏགས་པར་བྱ། །ཡང་ནི་བཀྲུ་ཞིང་བཏགས་པར་བྱ། །ཏིག་ཏིག་ཁུ་བས་རྣམ་པར་བསྲེ། །བཅུག་ཅིང་ལན་གསུམ་བར་དུ་བསྲེག །དེ་ལྟར་སྦྱངས་པའི་ཆོ་ག་ཡིས། །ལྷང་ཚེར་གནག་དང་དཀར་བ་ལ། །ལྷང་ཚེར་སེར་པོ་མཆོག་ཡིན་ཏེ། །གསེར་གྱི་
ལས་ལ་མཆོག་ཏུ་བཤད། །དག་ཅིང་སྦྱང་བ་བྱས་པ་ཡིས། །དངུལ་ཆུ་དང་ནི་ལྷང་ཚེར་སྦྱར། །མུ་ཟི་གསེར་ཟིལ་བ་བླ་དང་། །དེ་ལྟར་མཚལ་དང་བཞི་པོ་ལ། །རང་བཞིན་དབང་དུ་བྱ་བ་བརྗོད། །ལས་རྣམས་ཐམས་ཅད་བྱེད་པར་འགྱུར། །ལྷང་ཚེར་དམར་པོ་ནག་པོ་ཡང་། །འདབ་མ་རེ་རེར་དབྱེ་བར་བྱ། །
སྔོན་གྱི་ཆོ་གས་དག་པར་བྱ། །སོ་ཁྲི་ཉ་ཡི་མཁྲིས་པ་སྦྱིན། །ཚ་ལ་ཅུང་ཟད་བསྲེ་བར་བྱ། །གའུའི་ནང་དུ་བཅུག་ལ་གཏུམས། །སོལ་བའི་མེ་ལ་རབ་ཏུ་བསྲེག །གའུ་མེ་ཡི་རང་བཞིན་ལྟར། །གྱུར་གྱི་བར་དུ་བསྲེག་པར་བྱ། །གའུ་ཁ་དང་ལྡན་པ་རུ། །ཚ་ལ་བྱིན་ལ་བསྲེགས་པ་ནི། །གའུའི་ཁ་ནི་མ་བཅད་པར། །

203-1-5a

ལྕགས་ཀྱི་རང་བཞིན་ལྟར་དུ་འཇུ། །གསེར་གྱི་ལས་ཀྱི་མཚན་མ་ལ། །འདི་ལྟར་དུ་ནི་བྱ་བར་བཤད། །ལྷང་ཚེར་དཀར་པོས་བདེན་པར་འགྲོ། །འདི་ཡིས་བྱེད་པས་ཐམས་ཅད་ཤེས། །དངུལ་གྱི་ལས་ལའང་འདི་བཞིན་དུ། །གསེར་ཟིལ་རྡོ་ནི་དག་པ་ལ། །ཡང་ནི་སྐྱུར་པོས་དག་
པར་སྦྱང་། །ལྕགས་སམ་རྫ་ཡི་སྣོད་དུ་ནི། །སྐྱུར་པོའི་ཕྱེ་མས་དགང་བར་བྱ། །ལྕགས་ཀྱི་བེར་གས་གསད་པར་བྱ། །སྐྱུར་པོའི་ཁུ་བས་རྣམ་པར་གཞུག །དངུལ་ཆུ་ཡང་ནི་དེ་བཞིན་ཏེ། །དེ་ཡི་ལས་ཀྱི་བྱ་བ་ཡིས། །དངུལ་ཆུ་རི་ལུ་བྱ་བར་འགྱུར། །ཡང་ནི་སྐྱུར་པོ་གཞུག་པར་བྱ། །རྫ་ཡི་སྣོད་ཀྱི་ནང་དུ་
ནི། །སྟེང་ནས་རྫ་ཡི་སྣོད་ཀྱིས་དགབ། །ཕྱི་ནས་འཇིམ་པས་བྱུག་པར་བྱ། །འཇིམ་པས་བྱུགས་པ་རས་ཀྱིས་དཀྲི། །ཅུང་ཟད་ཆུ་ཡང་སྦྱིན་པར་བྱ། །དེ་རྗེས་འོག་ནས་མེ་ཡིས་སྦར། །སྟེང་དུ་དངུལ་ཆུ་ཆགས་པར་འགྱུར། །སྟེང་གི་དངུལ་ཆུ་རྣམ་པར་བཟུང་། །ལྷག་མའི་དངུལ་ཆུ་སྐམ་པར་འགྱུར། །འཁྲུལ་
འཁོར་འདི་ནི་པ་ཏང་གི། །མཁས་པས་འདི་དག་བཏགས་པ་ལས། །གསེར་ཟིལ་རྡོ་ནི་འོག་ན་གནས། །ཚ་ལ་དང་ནི་སྐྱུར་པོས་བསྲེ། །ཇི་ལྟར་སྦྱོར་བ་གཞན་ལ་ནི། །ག་འུ་ཁ་མེད་རིམ་པས་སོ། །གསེར་ཟིལ་རྡོ་ཡི་གཏན་ལ་ནི། །བསྲེགས་པས་འོག་ཏུ་འཐོབ་པར་འགྱུར། །ཞག་གཅིག་
བདེན་པར་གྲུབ་པ་ལས། །གསེར་གྱི་ལས་ཀྱི་མཚན་མ་ཡི། །མཚལ་གྱི་ལས་རྣམས་བརྗོད་བྱ་བ། །བདེན་པར་བྱ་བའི་ཆོ་ག་ལ། །ཐོག་མར་ཞིབ་ཏུ་བཏགས་པར་བྱ། །སྐྱུར་པོའི་ཁུ་བས་རྣམ་པར་བསྲེ། །པ་ཏ་ཀ་ཡི་སྦྱོར་བ་ཡིས། །བདེན་པར་དགུག་ཅིང་དབང་དུ་བྱ། །ཇི་ལྟར་དངུལ་ཆུ་དངུལ་བཞིན་
དུ། །གསེར་གྱི་ལས་ལ་འབིགས་པར་འགྱུར། །བ་བླའི་རང་བཞིན་བརྗོད་བྱ་བ། །བདེན་ཅིང་དགུག་པའི་ལས་རྣམས་བརྗོད། །ཐམས་ཅད་འདབ་མའི་རིམ་པས་དབྱེ། །བ་བླ་བཟང་པོ་ཕྱེ་མར་བཏགས། །སོ་ཁྲི་ཉ་ཡི་མཁྲིས་པས་བསྲེ། །མཁས་པས་འདི་འདྲར་ཤེས་པར་འགྱུར། །ཕྱི་ནས་ཚ་ལའི་ཕྱེ་མས་
བསྲེ། །ཐམས་ཅད་གཅིག་ཏུ་བཏགས་པར་བྱ། །ལྕགས་ཀྱི་སྟེང་དུ་ལྕགས་ཁེབས་དགབ། །འདབ་མ་ཆུང་ངུ་དག་ཅིང་བདེན། །དེ་ཡང་ཕྱེ་མར་བཏགས་པར་བྱ། །ག་འུ་ཁ་མེད་ནང་དུ་གཞུག །སྐམས་ནས་རབ་ཏུ་བསྲེག་པར་བྱ། །ཐེ་ཚོམ་མེད་པར་བདེན་པར་འགྲུབ། །ཁ་དོག་དཀར་པོར་མཐོང་བར་འགྱུར། །

203-1-5b

དངུལ་གྱི་ལས་ཀྱི་མཚན་མ་ལ། །དག་པའི་ཆོ་ག་བརྗོད་བྱ་བ། །དངུལ་ཆུ་དག་ཅིང་འབིགས་པ་ལ། །མི་ཡི་ཡིད་ཀྱི་དོན་རྣམས་ནི། །ཆོས་དང་ལས་དང་དོན་རྣམས་འགྲུབ། །ཇི་ལྟར་རང་གི་ལུས་ཀྱི་དོན། །དངུལ་ཆུ་ཡིས་ནི་འགྲུབ་པར་འགྱུར། །མི་གཡོ་བ་ཡི་དངུལ་ཆུ་མཆོག །ཕལ་པ་རྣམས་ལ་མི་སྦྱིན་ནོ། །
སོ་ཕག་ཕྱེ་མ་སྦྱར་ཞིང་བཏགས། །ཀ་ར་དུག་དང་སྐེ་ཚེ་དང་། །ཚ་བ་གསུམ་དང་སྦྱར་བ་ཡིས། །དེ་བཞིན་ཆང་གི་ས་བོན་དང་། །ཁམ་པའི་སྟེང་གི་དུ་ངད་དང་། །དེ་ལྟར་རྣམ་པ་བཅུ་གཅིག་པོ། །སྟོབས་ཅན་མིང་ནི་ར་གན་ཡིན། །ཐམས་ཅད་གཅིག་ཏུ་བསྲེ་བར་བྱ། །དེ་རྣམས་ཀུན་དང་དངུལ་ཆུ་བསྲེ། །བཀྲུས་
ཤིང་དངུལ་ཆུ་བཏགས་པར་བྱ། །ཡང་དང་ཡང་དུ་རྣམ་པར་བཏགས། །ཞག་གསུམ་གྱིས་ནི་དག་པར་འགྱུར། །སྲང་བརྒྱ་ཙམ་དུ་གང་བར་བྱ། །དེ་ལ་སྲང་ནི་ལྔ་བཅུ་གཟུང་། །དེ་ཕྱེད་ཉི་ཤུ་རྩ་ལྔའི་སྲང་། །དེ་ཙམ་སྒྲུབ་པར་མི་ནུས་ན། །སྲང་གཉིས་ལ་ཡང་བྱ་བ་ཡིན། །དངུལ་ཆུ་བཅིང་པའི་ཆོ་ག་ལ། །
སྟོབས་ཅན་སྨན་རྣམས་བརྗོད་བྱ་བ། །ཚངས་པ་ཡི་ནི་དབྱུག་པ་དང་། །དེ་བཞིན་ཚངས་པའི་ཟླ་བ་དང་། །སྦྲུལ་གྱི་མིག་གི་མིང་ཅན་དང་། །དེ་བཞིན་སེར་པོ་ཉི་ཡི་མིག །དེ་བཞིན་ཁུ་བྱུག་རྩ་བ་དང་། །དེ་བཞིན་མན་དྷུ་པརྣི་དང་། །གཞན་ཡང་འདབ་མ་ཤ་ལིན་ཚི། །སྟོབས་པོ་ཆེ་ཡི་སྨན་དང་ནི། །མེ་ཏོག་
ངོ་ཚ་ཅན་དང་ནི། །དེ་རྣམས་མཆོག་ཏུ་གཅེས་པའི་སྨན། །ཆུ་ནི་སྐེམས་པར་བྱེད་པའི་སྨན། །ཟླ་བའི་ཁྲི་ཤིང་བརྗོད་པར་བྱ། །དེས་ནི་ལས་རྣམས་ཐམས་ཅད་བྱ། །འབྱུང་པོ་རལ་པ་འདབ་མ་ཆེ། །འཛོ་ཏི་སྨ་ཏི་སྨ་བོ་གཅིག །ཧ་ཏྲ་ཀུ་བྷི་འོ་མ་དང་། །དེ་བཞིན་རྔ་མོའམ་ཚེར་མ་དང་། །རྨ་བྱའི་གཙུག་
ཕུད་འོད་དང་ལྡན། །དེ་བཞིན་སྐྲོད་བྱེད་དམར་པོ་དང་། །ཀླུ་ཡི་སྟོབས་ཞེས་བརྗོད་པ་ཡིན། །དེ་རྣམས་དངུལ་གྱི་ལས་རྣམས་བྱེད། །ལུས་ངན་པོ་ནི་མཆོག་ཏུ་བརྗོད། །དེ་རྣམས་ཆུ་ནི་འཆིང་བར་བྱེད། །དེ་ལྟར་བརྗོད་པའི་རྣམ་གྲངས་ནི། །ཆུ་ནི་འཆིང་བར་བྱེད་པ་ཡིན། །དེ་ལྟར་བརྗོད་པའི་སྨན་རྣམས་
ལས། །ཇི་ལྟར་འབྱོར་པ་སོགས་པར་བྱ། །མཁས་པ་བློ་དང་ལྡན་པས་གཟུང་། །དག་བྱེད་གང་ཡང་སྐྱུར་པོ་ཡིན། །རག་རྡོ་དང་ནི་རྣམ་པར་སྦྱང་། །ཅུང་ཟད་ཙམ་གྱི་མེ་ལ་བདུག །དུགས་ཀྱིས་སྨིན་པར་འགྱུར་བ་ཡིན། །རྟག་ཏུ་བཏགས་ཤིང་བདུག་པར་བྱ། །ཉི་མ་བདུན་གྱི་བར་དུའོ། །དེ་ནས་སྨན་དང་སྦྱར་

203-1-6a

ཞིང་བཏགས། །ཇི་ལྟར་རྙེད་པའི་སྨན་གྱི་ལས། །སྨན་རྣམས་ཀུན་གྱི་ཁུ་བ་བཟུང་། །ཇི་ལྟར་བརྗོད་པའི་མན་ངག་གིས། །སྐྱུར་པོའི་ཆོ་ག་བྱ་བ་ཡིན། །མར་ཁུ་ཡིས་ཀྱང་དེ་བཞིན་བསྒྲུབ། །མར་ཁུ་སྐྱུར་པོའི་སྦྱོར་བ་ཡི། །ནང་དུ་དངུལ་ཆུ་གཞུག་པར་བྱ། །དེ་ཡང་མེ་ལ་ཅུང་ཟད་
བདུག །ཡང་དང་ཡང་དུ་གཞུག་ཅིང་བསྐམ། །དེ་ཡི་སྟེང་དུ་བརྗོད་བྱ་བ། །བརྗོད་པས་བདེ་བ་གྲུབ་པར་འགྱུར། །འདི་ལྟར་དལ་གྱིས་བསྒྲུབ་བྱ་བའི། །སྔོན་གྱི་ཆོ་གས་བསྐམ་པར་འགྱུར། །མ་ནིའི་འདབ་མ་ཆུ་ལྷའི་ཤིང་། །ནིར་ཀུན་དྲི་དང་མ་ཧཱར་ས་ཏྲི། །དུག་དང་དེ་བཞིན་ཤ་ཏྲི་དང་། །གྷ་ནི་ཧ་རི་དེ་
བཞིན་དུ། །ཚངས་པའི་དབྱུག་པ་དྷ་དུ་ར། །དུག་དང་ཡུངས་ནག་ཙི་ཏྲ་ཀ །ལྕེ་འབིགས་ལ་སོགས་སྨན་རྣམས་ལས། །ཇི་ལྟར་རྙེད་པ་གཟུང་བར་བྱ། །སྐྱུར་པོའི་ཆོ་གས་དལ་གྱིས་གཟུང་། །མྱོས་བྱེད་དེ་བཞིན་ལང་ཀ་ལི། །གཞན་ཡང་ཀར་བིར་དཀར་པོ་དང་། །མྱོས་བྱེད་དང་ནི་ཤི་ཀྲུ་དང་། །དེ་རྣམས་ཉེ་བའི་དུག་
ཏུ་འདོད། །དུག་ཆེན་ལྔ་ཡང་བརྗོད་བྱ་བ། །སཱ་ཐུ་བ་དང་སྲིན་གི་བ། །ཀ་ལ་ཀུབ་ཏ་སེར་སྐྱ་དང་། །སྦྲང་རྩི་སེར་པོ་ལྟ་བུའི་དུག །རྒྱ་མཚོའི་ཚ་དང་སེ་དྷ་བ། །བཙོ་ཚ་དང་ནི་རྒྱ་ཚ་དང་། །དྲི་ཆེན་ཚ་དང་རྣམ་པ་ལྔ། །ཚ་ལ་མཚུར་དང་ཟེ་ཚ་དང་། །དེ་རྣམས་འགྱུར་བྱེད་རྣམ་གསུམ་ཡིན། །གསེར་ཟིལ་རྡོ་དང་དྲི་
མེད་རྡོ། །ཐུ་ཐུ་ཀ་དང་དངུལ་ཆུ་དང་། །གཡོ་བྱེད་དང་ནི་མཚལ་དང་ནི། །མས་ས་ཀ་དང་བཅུད་ལེན་བདུན། །བ་བླ་དང་ནི་ལྡོང་རོས་དང་། །སྐྱུར་པོ་དང་ནི་མུ་ཟི་དང་། །སྦལ་རྒྱབ་རྡོ་དང་ཀ་ཤི་ཀ །འདབ་མས་དེ་རྣམས་ཉེར་བཅུད་བདུན། །པཱ་ལ་ཤ་དང་ཀ་ཏ་ཡི། །ཨ་པ་མར་ཀ་ཧི་ཚ་ལ། །པི་པི་ལིང་
གི་སྡོང་བུ་དང་། །བ་ཚ་ཅན་གྱི་ཤིང་སྟེ་དང་། །གཞན་ཡང་འགྱུར་བྱེད་རྣམ་གསུམ་དང་། །བ་དང་གླང་ཆེན་རྔ་མོ་སྟེ། །དེ་ལྟར་དྲི་ཆུ་རྣམ་གསུམ་དང་། །སྒ་དང་དེ་བཞིན་ཀ་སྦུ་ཀ །ཙི་ཏྲ་ཀ་ནི་དམར་པོ་དང་། །ཡུང་བ་དང་ནི་དེ་བཞིན་བཙོད། །ཙནྡན་དམར་པོ་པ་ཏམ་ཀ །ཀུ་སུམ་བྷ་དང་འདབ་མའི་དངུལ། །
དེ་རྣམས་དངུལ་འཚེད་པ་ཡི་སྨན། །དམར་པོའི་སྡེ་ཚན་བསྡུས་པ་ཡིན། །འཛོ་ཏི་སྨ་ཏིའི་མར་ཁུ་དང་། །ཀ་རཉྫ་དང་ཨ་ཏ་ཤི། །དེ་ལྟར་ཁུ་བའི་སྡེ་ཚན་གསུམ། །དངུལ་ཆུ་འཚེད་པར་བྱེད་པ་ཡིན། །དེ་བཞིན་བྷེ་ཤའི་ཤིང་དང་ནི། །ཉི་མ་ལ་ནི་བསྐམ་པར་བྱ། །པདྨའི་འདབ་མའི་ཁུ་བ་སྦྱིན། །བྷོ་ག་ན་ཡི་

203-1-6b

ཤིང་ཀུན་དང་། །དེ་བཞིན་དུང་གི་ཕྱེ་མ་དང་། །བ་ཚ་དང་ནི་དྲི་ཆུའི་སྡེ། །ཚ་དང་དེ་བཞིན་ཉེ་བའི་ཚ། །མཆོག་ཏུ་གྱུར་པའི་སྨན་སྡེ་དང་། །སེ་འདུའི་ཚ་དང་སྐྱུར་པོ་ལས། །སྐྱུར་པོའི་ནང་དུ་བར་སྣང་ལས། །དངུལ་ཆུ་བཙོ་བར་བྱ་བ་ཡིན། །མན་དྷུ་ཀ་ཡི་འདབ་མ་ལ། །ཁུ་བ་བཅུག་ལ་བཙོ་བར་བྱ། །དྲི་མ་དབྲོག་
པར་བྱེད་པ་ཡིན། །འཁྲུལ་འཁོར་འདི་ནི་འབར་བའི་མེ། །ངང་པས་སྨན་པའི་འཁྲུལ་འཁོར་ལ། །ལྷང་ཚེར་བླུགས་པར་བྱ་བ་ཡིན། །སིན་དྷུ་ཚ་དང་མཚལ་ཡང་སྦྱིན། །ཟངས་ཀྱི་སྣོད་དུ་བླུགས་པར་བྱ། །བུག་པ་མེད་པའི་འཁྲུལ་འཁོར་ལའོ། །ཤིན་ཏུ་འཇམ་པའི་འཁྲུལ་འཁོར་གྱིས། །ཉིན་རེ་ཉིན་རེ་ཇི་
བཞིན་དུ། །སེར་སྐྱའི་དུག་དང་སྐྱུར་པོ་སྦྱིན། །བྱ་རོག་གདུག་པ་ཇི་བཞིན་བསྐམ། །སྔོན་བཤད་སྐམ་པའི་ཆོ་གས་སྨན། །དངུལ་ཆུ་ཡི་ནི་བཅུ་དྲུག་འགྱུར། །བཏུལ་བའི་ལྕགས་རྣམས་གཞུག་པར་བྱ། །ཐམས་ཅད་དངུལ་ཆུ་ཟ་བར་འགྱུར། །ཕྱི་ནས་དངུལ་ཆུ་དཀར་པོ་བཏགས། །ཐམས་ཅད་གཅིག་ཏུ་བྱ་བ་
ཡིན། །རྣོ་ལྕགས་དེ་བཞིན་རྣོན་པོ་གཞན། །ཞ་ཉེ་དང་ནི་ར་གན་སྦྱིན། །ཕྱི་ནས་དངུལ་ཆུ་གཞུག་པར་བྱ། །ཟངས་དང་ཞ་ཉེ་རྣམ་པར་བསྲེ། །འཁར་བ་དང་ནི་ར་གན་རྣམས། །དངུལ་ཆུ་འཆིང་བའི་དོན་དུའོ། །རྣོ་ལྕགས་གསད་པས་དངུལ་ཆུ་འཆིང་། །སུམ་འགྱུར་གསེར་གྱིས་དངུལ་ཆུ་ཟ། །དེ་ནི་དྲི་མ་སྤོང་བར་
འགྱུར། །གསེར་ཟིལ་རྡོ་དང་རྣོ་ལྕགས་གཉིས། །དངུལ་ཆུ་བསྐམ་པར་འགྱུར་བ་ཡིན། །དངུལ་ཆུའི་ལས་ཀྱི་སྦྱོར་བ་འགྲུབ། །ཕལ་པའི་མདངས་ཀྱང་དེ་བཞིན་དུ། །ཐམས་ཅད་མཉམ་པར་བསྲེས་པ་ལས། །དེ་ཡི་ལས་ཀྱི་སྦྱོར་བ་ཡིས། །ལྕགས་དྲུག་ལས་རྣམས་སྦྱོར་བར་འགྱུར། །གསེར་ཟིལ་རྡོ་ཡིས་ལས་
རྣམས་འགྲུབ། །དེས་ནི་མཆོག་གི་ལས་རྣམས་འགྲུབ། །རིན་ཆེན་ས་བོན་སྦྱིན་པར་བྱ། །དེས་ནི་ཕྱེད་པའི་གསེར་དུ་འགྱུར། །ལན་གཉིས་ཀྱིས་ནི་དཀར་པོར་འགྲོ། །ཡང་ནི་རྣོ་ལྕགས་བསད་པ་ལ། །ཉིས་འགྱུར་དངུལ་དང་སྦྱར་བ་ཡིས། །དངུལ་ཆུ་འགྲུབ་པར་འགྱུར་བ་ཡིན། །གསེར་ལྟར་བསྐམས་པར་
གྱུར་པ་ལས། །ཀུན་གྱི་དོན་རྣམས་འགྲུབ་པར་འགྱུར། །སུམ་ཅུ་རྩ་གཉིས་འབིགས་པ་དང་། །ལྔ་བཅུ་བརྒྱ་དང་ལྔ་བརྒྱ་སྟོང་། །ཁྲི་དང་འབུམ་གྱི་བར་དུ་འབིགས། །ལས་འདི་ཤེས་པས་བཅུད་དང་ནི། །བཅུད་ཀྱིས་ལེན་རྣམས་འགྲུབ་པར་བྱེད། །ཟླ་བ་གཅིག་ཏུ་མང་པོའི་ཚད། །ཡུན་རིང་གསོན་དང་

203-1-7a

སྟོབས་ཆེན་སྟེར། །འབུམ་ཕྲག་བར་དུ་འཚོ་བར་འགྱུར། །དེ་ཡི་ཉིས་འགྱུར་ཟོས་པ་ཡིས། །ལོ་ནི་བཅུ་དྲུག་ལོན་ལྟར་འགྱུར། །མཛེ་ལ་སོགས་པའི་ནད་བརྒྱད་འཇོམས། །དེ་ལྟར་མང་དུ་ཟོས་པ་ལས། །ཉི་ཟླ་སྐར་མ་གནས་པར་འཚོ། །སྐྲ་དཀར་གཉེར་མ་ཐམས་ཅད་སྤོང་། །ཡོན་ཏན་
རང་བཞིན་ཐམས་ཅད་པ། །འདིར་ནི་དངུལ་ཆུའི་བསྟན་བཅོས་ལས། །དོན་རྣམས་རྟོགས་ནས་བྲིས་པ་འདི། །བྷ་ལི་པ་ཡིས་བྱས་པ་ཡིན། །ཀུན་གྱི་དོན་རྣམས་འགྲུབ་པར་ཤོག །དངུལ་ཆུ་རབ་ཏུ་གྲུབ་པའི་བསྟན་བཅོས་སློབ་དཔོན་ཆེན་པོ་བྷ་ལི་པ་ཡིས་མཛད་པ་རྫོགས་སོ།།      །།རྒྱ་གར་གྱི་པཎྜི་ཏ་ཤྲཱི་ན་
རེནྡྲ་བྷ་དྲ་དང་། བོད་ཀྱི་ལོ་ཙཱ་བ་ཨུ་རྒྱན་པ་རིན་ཆེན་དཔལ་གྱིས་རི་བོ་ཆེན་པོ་སྦུད་ཏྲའི་མགུལ་གྱི་ཕོ་བྲང་ཆེན་པོར་བསྒྱུར་བའོ།།      །།༄༅༅། །རྒྱ་གར་སྐད་དུ། ར་ས་ཡཱ་ཎ་ཤཱསྟྲ་ཨུད་བྲྀ་ཏི། བོད་སྐད་དུ། གསེར་འགྱུར་གྱི་བསྟན་བཅོས་བསྡུས་པ། ཐམས་ཅད་མཁྱེན་པ་ལ་
ཕྱག་འཚལ་ལོ། །ཀུན་མཁྱེན་ཞི་བ་ཀུན་སྟེར་བ། །དཔལ་མགོན་མཆོག་ཏུ་ཞི་བར་མཛད། །ལོངས་སྤྱོད་གྲོལ་བ་རབ་སྟེར་བའི། །དབང་ཕྱུག་དམ་པ་ཕྱག་འཚལ་ལོ། །ཕྲ་དང་སྦོམ་ལས་རྣམ་པར་གྲོལ། །གསལ་དང་མི་གསལ་མཆོག་ཏུ་ཞི། །དཔལ་དང་ལོངས་སྤྱོད་གྲོལ་སྟེར་མ། །མཆོག་གི་དབང་ཕྱུག་ལ་ཕྱག་
འཚལ། །མཆོག་ཏུ་སྲ་བའི་དངུལ་ཆུ་ཡི། །ལས་ཀྱི་སྦྱོར་བ་ངེས་པར་སྦྱར། །དེ་ཉིད་རབ་སྦྱོར་མཐའ་ལ་ནི། །ཡོན་ཏན་སྐྱེ་བར་འགྱུར་བ་སྟེ། །བརྒྱལ་བ་ཡིས་ནི་ནད་འཇོམས་ཤིང་། །སྨན་པ་ཡིས་ནི་དབུལ་པོ་སྤོང་། །བཅིངས་པ་ཡིས་ནི་མཁའ་ལ་འགྲོ། །དངུལ་ཆུའི་ཡོན་ཏན་རྣམ་གསུམ་མོ། །གལ་ཏེ་
ལྷང་ཚེར་སྨན་ནི་ཡོན་ཏན་བརྒྱད། །མུ་ཟི་ཞུ་གྱུར་འདི་ལ་ཡོན་ཏན་དྲུག །དངུལ་ཆུ་མཉམ་དུ་གསེར་གྱིས་ངེས་བཅིངས་ནས། །ཁྱོད་ཀྱིས་མཁའ་ལ་འགྲོ་བ་གང་གིས་འགོག །གཤའ་ཚེ་དངུལ་ཆུའི་རོ་ཡིས་མཉམ་དུ་བསྣུན། །དེ་ཕྱེད་ཟླ་བ་གཉིས་པའི་རིམ་པ་ཡིས། །གཤའ་ཚེ་ཟླ་བའི་ཕྱོགས་གསུངས་གསེར་
སྦྱོར་ལས། །ཟངས་མ་དྲུག་ཅུ་རྩ་བཞི་འབིགས་པར་བྱེད། །དེ་ཉིད་ཐིག་ལེ་མི་གཏོང་ཞིང་། །དམར་སྐྱའི་མདོག་ནི་ནོར་སྟེར་རོ། །མེ་ལ་གནས་ཤིང་མི་གཡོ་བ། །ནམ་མཁའ་སྨིན་པའི་མཚན་ཉིད་དོ། །གང་ལ་དངུལ་ཆུ་མཉམ་དུ་ཞུ། །དངུལ་དང་ཡང་ན་གསེར་དག་གམ། །གཅིག་ཏུ་གྱུར་ཅིང་མི་ཟད་པ། །དེ་

203-1-7b

ནི་བཅིངས་པའི་མཚན་ཉིད་དོ། །ལྷང་ཚེར་ཞུ་བ་གང་ཞིག་གིས། །དངུལ་ཆུ་དབང་དུ་བྱས་གྱུར་ན། །དེ་ཡིས་ཆོས་དང་ནོར་དག་གི། །སྒོ་དག་ཉེ་བར་ཕྱེ་བ་ཡིན། །ཁ་ཡངས་ནམ་མཁའ་ཟ་བ་དང་། །སེར་པོ་ཟ་བས་མུ་ཟི་དང་། །གསེར་གྱི་མངལ་གྱི་ཁུ་བ་ཉིད། །ནོར་འཛིན་སྟེང་ན་ཤིན་ཏུ་དཀོན། །སྙིག་
མིན་མ་ཡིན་ཁྱབ་པ་ཡི། །དམར་མིན་མ་ཡིན་གཞན་མའི་ཚེ། །སྨིན་དང་རྙིངས་པ་ཉིད་ཀྱིས་ནི། །བྱེ་བ་རྣམས་ནི་འབིགས་པར་འགྱུར། །དེ་ནས་དངོས་པོའི་གྲངས་བརྗོད་དོ། །འོད་ལྡན་ལྕགས་ནི་མཆོག་ཏུ་འགྱུར། །དེ་དངོས་མེད་ན་ལྕགས་རྣོན་པོ། །ར་གན་ཞོ་ཕྱེད་གཤའ་ཚེ་ཟངས། །སྒྲ་གཅན་གསེར་དང་
དཀར་པོ་རྣམས། །ལྕགས་རྣམས་བརྒྱད་དུ་གསུངས་པ་སྟེ། །དངུལ་ཆུའི་སྨིན་པ་སོ་སོ་ལ། །སྦྱང་བ་ཉིད་དུ་བྱ་བ་སྟེ། །གསེར་གྱུར་ལས་ལ་དངུལ་ཆུ་རྣམས། །མུ་ཟི་དེ་བཞིན་དྲི་མེད་དང་། །མ་ཀྵི་ཀ་དང་དེ་བཞིན་མཚལ། །ཀུཎ་ཌཱི་ཀཱ་ཤྲྀ་ཀ་མ་དྲུག །གསེར་གྱི་མཆོག་དང་བ་བླ་རྣམས། །ཤེས་རབ་ལྡན་པས་
འབད་པས་སྦྱངས། །མཁས་པ་ལས་རྣམས་ཤེས་པར་བྱ། །གསེར་གྱིས་ལས་རྣམས་བ་བླ་ཡི། །ཁ་དོག་སེར་དང་དཀར་པོའི་ཁམས། །ལྷང་ཚེར་དེ་བཞིན་སཽ་བཱི་ར། །ཀཱཾ་གུཥྛ་རྣམས་སོ་སོར་སྨིན། །དེ་རྣམས་རྟགས་ནི་བཤད་པར་བྱ། །སྦྱངས་པས་ཁུ་བ་རྣམས་ནི་ལྟུང་། །འོད་ལྡན་ཡང་ཤིང་ཁུ་བ་དཀར། །རྣོན་པོ་
མཆོག་ཏུ་རྣོན་པོར་འགྱུར། །ཟངས་མ་དམར་དང་སྲ་བ་སྟེ། །རིགས་ནི་གསུམ་དུ་དབྱེ་བ་ལས། །བལ་ཡུལ་ལས་བྱུང་མཆོག་ཡིན་ཏེ། །འདབ་མར་གྱུར་པ་འབྲིང་དུ་རིག །ཐ་མ་འོད་ཀྱི་དྲི་མར་ཤེས། །ལས་ནི་ལེགས་པར་སྦྱར་བར་བྱ། །སྦྱངས་པས་ཁྱབ་བྱེད་ཉིད་དང་ནི། །དངུལ་ཆུའི་སྨིན་པ་ཉིད་ལ་ཕན། །ཞ་ཉེ་ནག་
པོ་དཀར་བར་ཤེས། །རང་བཞིན་ཡང་ཤིང་ཁུ་བ་ཅན། །གཤའ་ཚེ་དྲི་དང་ལྡན་པ་མཆོག །ཚོགས་པ་ནག་ཅིང་མྱུར་དུ་འཇུ། །མྱུར་དུ་འཇུ་བའི་རང་བཞིན་གྱིས། །དཀར་པོར་ཤིན་ཏུ་ཡོངས་སུ་གྲགས། །ར་གན་ཁ་དོག་གསེར་འདྲ་ཞིང་། །དྲི་མ་ལེན་ཅིང་དྲི་དང་ལྡན། །དྲག་ཅིང་བརྟན་པའི་ཁུ་བ་ཉིད། །ཟངས་ཀྱི་
ཁམས་ནི་མཐུག་པའོ། །སྒྲ་ལྡན་དྲི་མ་ཡང་དག་ལྡན། །སྲ་ཞིང་མཆོག་ཏུ་བརྟན་གྱུར་པ། །ཟངས་དང་གཤའ་ཚེ་དག་བསྲེས་པ། །མཐུག་ཅིང་མྱུར་དུ་འཇུ་བའོ། །བཅད་ན་དཀར་ཞིང་བདར་ན་སེར། །བསྲེགས་ན་གུར་ཀུམ་ལྟ་བུ་དང་། །སྣུམ་དང་ཉུང་ངུས་ལྕི་བ་སྟེ། །གསེར་གྱི་མཚན་ཉིད་རྣམ་པ་དྲུག །

203-1-8a

སྐར་མ་ཀུན་དའི་མདོག་དང་མཚུངས། །སྣུམ་དང་སྐར་མ་རབ་ཏུ་སྟེ། །ཡོན་ཏན་དྲུག་ཅུ་རྩ་བཞི་ནི། །རིགས་ཀྱི་མཚན་ཉིད་དག་ཏུ་བཤད། །སྔོན་རྗེས་ཇི་ལྟར་དེ་བཞིན་དུ། །བསྡུས་ནས་བདག་གིས་རབ་བཤད་བྱ། །འོད་ལྡན་ལ་སོགས་ལྕགས་རྣམས་ཀྱིས། །སྦྱངས་ནས་སྙིང་
སྟོབས་དགུག་པ་སྟེ། །འོད་ལྡན་ལྕགས་སམ་ཡང་ན་རྣོ། །གསེར་ནི་དགུག་ཅིང་ཕྱེ་མར་བྱ། །ཚ་ཡི་སྡེ་ཚན་ཇི་སྙེད་དང་། །དྲི་ཆུའི་སྡེ་ཚན་སྦྱར་བར་བྱ། །ཚ་དང་དྲི་ཆུ་དེ་ཉིད་ཀྱིས། །བློ་དང་ལྡན་པས་ཕྱེ་མར་བྱ། །གོང་བུ་གསུམ་དུ་བླངས་ཡང་ནི། །སྐྱུར་རྩི་རྣམ་པ་མང་པོས་གདུལ། །དེ་ནི་རྩ་བ་ཉིད་དུ་བྱ། །སླར་
ཡང་སྐྱུར་རྩིས་སྦྱང་བར་བྱ། །འདི་ཡིས་ཟངས་དང་འོད་ལྡན་ནམ། །ཡང་ན་རྣོན་པོ་འདི་ཡིས་སྦྱངས། །གླང་ཆེན་རུས་ཕྱེ་ཡང་དག་སྦྱོར། །མཆིང་བུའི་ཕྱེ་མ་ངེས་སྦྱར་བྱ། །ལན་ནི་བདུན་གྱི་བར་དུ་ནི། །ར་ཡི་དྲི་ཆུས་གཏོར་བར་བྱ། །དེ་འདིར་ཟངས་ནི་སྦྱར་བར་བྱ། །བློ་དང་ལྡན་པ་རྣམས་ཀྱིས་བཤད། །
འདི་ཡིས་ཟངས་ནི་རབ་མཆོག་ཏུ། །སྦྱང་བྱ་ལས་རྣམས་ཐམས་ཅད་ལ། །དེ་ནས་ར་གན་དེ་བཞིན་དུ། །སྦྱང་བ་བདག་གིས་རབ་བཤད་བྱ། །འབད་པ་ཡིས་ནི་བདར་བར་བྱ། །ཕྱེ་མ་ཞིབ་མོ་ཉིད་དུ་བྱ། །ཚ་བཅུག་དྲི་ཡི་ཆུ་ཡིས་ནི། །མཁས་པས་ཉི་མ་བདུན་དུ་མཉེ། །སླར་ཡང་སྐྱུར་མོ་དང་བཅས་པས། །ཀོང་
བུ་གསུམ་དུ་སྦྱིན་པར་བྱ། །འདི་ཡི་སྦྱང་བར་བཤད་པ་ནི། །ར་གན་ཆོ་ག་ཇི་བཞིན་ནོ། །འཁར་བ་འབད་པས་བདར་བྱ་སྟེ། །ཕྱེ་མ་ཞིབ་མོ་ཉིད་དུ་བྱ། །ཚ་བཅུག་དྲི་ཡི་ཆུ་ཡིས་ནི། །ཕྱེ་མ་ཉིད་ནི་སླར་ཡང་སྦྱང་། །ལན་བདུན་གྱི་ནི་བར་དུ་སྦྱང་། །སླར་ཡང་སྐྱུར་མོས་སྦྱང་བར་བྱ། །ཞ་ཉེ་བྱིན་ནས་མེ་ལ་བསྲེག །ཇི་སྲིད་
ཟངས་སུ་མ་གྱུར་པར། །ཟངས་ཀྱི་གཟུགས་གྱུར་གང་ལ་ནི། །སླར་ཡང་ཟངས་སྦྱིན་སྦྱང་བར་བྱ། །སྒྲ་ལྡན་བྱས་པར་བཤད་པ་ཡི། །གཙོ་བོ་དག་ནི་བདག་གིས་བཤད། །ཞ་ཉེ་སྦྱང་བར་བཤད་པ་ཡང་། །ཇི་ལྟར་རིགས་པར་བདག་གིས་བཤད། །བ་བླའི་ཕྱེ་མས་འབར་བཞིན་དུ། །ཤྲཱྀ་ཁཎྜའི་འོ་མས་སྦྱང་། །མང་
པོར་སྦྱང་ཞིང་ཕྱེ་མ་དག །ཉི་མ་ལ་ནི་སྦྱང་བར་བྱ། །མེ་གནས་ཞུ་དང་ཕྱེ་མ་ལ། །ཞ་ཉེ་ཡིས་ནི་ངེས་པར་སྦྱང་། །ལན་བདུན་གྱིས་ནི་དག་པར་འགྱུར། །འབྲས་བུ་གསུམ་གྱི་ཁུ་བས་བཀྲུ། །འདི་ཡི་སྦྱང་བ་བཤད་པ་ནི། །ཞ་ཉེ་གཤའ་ཚེ་དག་བཞིན་བཤད། །ཀུ་ཎའི་ཌཱི་ཡི་དངོས་པོ་དང་། །ཆང་གི་མེ་ཏོག་ཁུ་བ་ཡིས། །

203-1-8b

དེ་ཡི་ཕྱེ་མ་སྦྱར་བར་བྱ། །གཤའ་ཚེ་རེས་ཀྱི་ཡང་ཡང་དུ། །འོད་ཀྱི་བློ་གྲོས་མར་ཁུ་དང་། །ཡང་ན་ཀ་རཉྫ་མར་ཁུས། །བཀྲུ་ཞིང་གཏོར་བ་ཉིད་དུ་བྱ། །སྦྱང་བ་མང་དུ་གསུངས་པ་ཡིས། །ཉེས་པ་མང་པོ་རྣམ་པར་སྤོང་། །ཞ་ཉེ་ཅུང་ཟད་བྱིན་ནས་ནི། །སྐར་མ་མཁས་པས་མེ་ལ་བསྲེག །དེ་བཞིན་གྱུར་པ་དྲི་ཆུ་ཡིས། །བློ་
དང་ལྡན་པས་ལན་གསུམ་བཀྲུ། །དེ་ནས་མཐའ་དང་བར་དག་ཏུ། །ལན་བདུན་དུ་ནི་བཀྲུ་བར་བྱ། །དེ་ཡིས་དག་པར་འགྱུར་བ་སྟེ། །འདི་ལ་རྣམ་པར་དཔྱད་མི་བྱ། །གསེར་མི་སྦྱང་བར་བཤད་པ་ཡི། །ཡོན་ཏན་རྣམས་ནི་དྲུག་དེ་ཡི། །དང་པོར་ཚ་དང་དྲི་ཆུ་ཡིས། །ཇི་སྙེད་སྐྱུར་རྩིས་བཀྲུ་བར་བྱ། །མར་དང་སྦྲང་དག་བསྲེས་
པ་ཡིས། །བྱུགས་པས་སླར་ཡང་འཛད་མི་འགྱུར། །འདི་ཡིས་དངོས་གྲུབ་འགྲུབ་པར་བྱེད། །གསེར་གྱི་རིམ་པ་ཇི་བཞིན་ནོ། །ལྕགས་རྣམས་གདུལ་བར་གསུངས་པ་ཡི། །ཇི་ལྟར་མི་འགྱུར་སྦྱོང་བ་ལས། །གསེར་དངུལ་ཇི་ལྟ་དེ་བཞིན་དུ། །འོད་ལྡན་ལྕགས་དག་ཇི་སྙེད་དང་། །དེ་ཡི་དངོས་པོ་རྣོན་པོ་ལ། །དང་པོ་
སྦྱང་བར་བྱས་ནས་ནི། །ཕྱི་ནས་ལས་ཀྱིས་མཉམ་དུ་བརྩམ། །མདོག་བཟང་མས་ཀྵི་ཀ་ཉིད་དང་། །ཚྭ་དང་སྐྱུར་མོ་དག་གིས་སྦྱང་། །འདི་གྲུབ་ཆེན་ཨུ་རྒྱན་པའི་འགྱུར་ཡིན།།      །།༄༅༅། །རྒྱ་གར་སྐད་དུ། སམྦུདྡྷ་བྷཱ་ཥི་ཏ་པྲ་ཏི་བིམྦ་ལཀྵ་ཎ་བི་བརྞ་ནཱ་མ། བོད་སྐད་དུ། རྫོགས་པའི་སངས་རྒྱས་
ཀྱིས་གསུངས་པའི་སྐུ་གཟུགས་ཀྱི་མཚན་ཉིད་ཀྱི་རྣམ་འགྲེལ་ཞེས་བྱ་བ། ཐམས་ཅད་མཁྱེན་པ་ལ་ཕྱག་འཚལ་ལོ། །སྐུ་གཉིས་རྗེས་སྐྱེས་རྒྱལ་བ་ཡི། །སྐུ་ལ་ཕྱག་འཚལ་དེ་ནས་ནི། །བདག་གིས་ངེས་པས་མཚན་ཉིད་དེ། །ཇི་ལྟར་ནུས་བཞིན་རྣམ་འགྲེལ་བྲེ། །ཇི་ལྟར་བསྙེན་བཀུར་བར་བགྱི་ཞེས་བྱ་བ་ནི་ཉེ་བར་
སྤྱད་པ་སྟེ། བཅོམ་ལྡན་འདས་ཀྱི་སྐུའི་ཆ་ཤས་ཀྱི་མཚན་ཉིད་ནྱ་གྲོ་དྷ་ལྟར་ཆུ་ཞེང་ཡོངས་སུ་གབ་པ་ཞེས་བྱ་བ་ནི་ནྱ་གྲོ་དྷ་ནི་ཤིང་ལྗོན་པ་སྟེ། དེའི་ཡལ་ག་ཆུ་ཞེང་གབ་པ་ལྟ་བུའོ། །འདི་འོད་ཀྱི་དཀྱིལ་འཁོར་ལ་རབ་ཏུ་གསུངས་སོ་ཞེས་བྱ་བ་ཁ་ཅིག་གོ། །གཞན་ལ་ནི་འདི་སྐུ་ཁྱད་པར་ལ་གསུངས་པའི་ཕྱིར་ན་ཕྱག་གཉིས་
ལོགས་སུ་བརྐྱང་བ་ནི་འདོམ་གང་སྟེ། ཇི་སྲིད་སྐུའི་ཚད་དེ་སྲིད་འདོམ་གྱི་སྲིད་དུ་ཡང་གསུངས་སོ། །ཇི་སྲིད་ཅེས་པ་ལ་སོགས་པའི་འཇམ་པ་ནི་སྣུམ་པའི་ཆོས་ཉིད་དོ། །མཛེས་པ་ནི་ཡིད་འཕྲོག་པའོ། །འགྱིང་བག་དང་ལྡན་པ་ནི་གསུམ་དགུ་ལ་སོགས་པའི་ཡོན་ཏན་ནོ། །བདུན་མཐོ་བ་ཞེས་པ་ནི་ཆ་ཤས་བདུན་སྟེངས་སུ་

203-1-9a

མཐོ་བ་སྟེ། གང་ལས་ན་ཞབས་གཉིས་དང་ཕྱག་གཉིས་དང་མགྲིན་པ་ཞེས་སོ། །དེ་ལ་ཞེས་པ་ལ་སོགས་པས་ནི་སྲིད་ལ་སོགས་པ་ལྔ་པོ་རྣམས་ཀྱི་ཚད་གསུངས་པ་བཤད་པར་བྱའོ། །བྱང་ཆུབ་སེམས་དཔའ་ཞེས་བྱ་བ་ལ་སོགས་པ་ནི་ཇི་ལྟར་འཆད་པར་འགྱུར་བ་ནུས་པ་ཉོན་ཅིག་ཅེས་པའོ། །དབུ་སྐྲའི་
གནས་དང་དེ་གཉིས་ལ་ཞེས་པ་ནི་དཔྲལ་བའི་སྟེང་དང་གཙུག་གཏོར་འོག་ལ་སོར་མོ་བཞིའོ། །གཙུག་ལ་ཡང་སོར་མོ་བཞིའོ། །དེ་གཉིས་ནི་སོར་མོ་བཞིར་གསུངས་སོ། །སོར་མོ་ཕྱེད་དང་བཅུ་གསུམ་ཞལ་གྱི་དཀྱིལ་འཁོར་ལའོ། །དེའི་སུམ་ཆ་དཔྲལ་བ་ལ་སོགས་པའི་དབྱེ་བ་ལས་སོ། །ཀོས་ཀོའི་མཐའ་གང་གི་དེའི་ཀོས་ཀོའི་
མཐའ་དང་། ཤངས་ཀྱི་འོག་གི་མཐར་ཐུག་པའི་གནས་ལའོ། །ཀོས་ཀོའི་མཐའ་ནི་ལྷག་བཅས་པ་ནི་སོར་ཕྱེད་ཀྱིས་ལྷག་པ་ཉིད་དོ། །ཀོས་ཀོ་ལ་ནི་སོར་གཉིས་ནི་ལོགས་ཀྱི་རྒྱ་རུ་སྟེ། སྟེང་གི་སྲིད་པ་ཡིན་པ་ཞེས་སོ། །སོར་མོ་གསུམ་པོ་འདི་སྲིད་དུ་སྟེ། སྟེ་ཅུང་ཟད་མཐོ་བ་ཞེས་ཁྱད་པར་གྱི་བསྡུ་བའོ། །ལྟག་
དང་བཅས་པ་ནི་བྱང་ཆུབ་སེམས་དཔའ་ལ་སོགས་པ་རྣམས་ལ་མཐོང་ངོ་། །འབྱུང་ས་སྟེང་དུ་ཆ་ཡིས་ཞེས་པའི་ཆའི་སྒྲ་ཡིས་སོར་མོ་གསུམ་གྱི་སུམ་ཆར་བཤད་དེ། འབྱུང་ས་མཐོ་བ་འདིའི་ཆ་ལ་བིམ་པའི་རི་མོ་ཞེས་ཏེ། བིམ་པའི་འབྲས་བུའི་རྣམ་པའི་རི་མོ་ཞེས་པའི་དོན་ཏོ། །ཞལ་གྱི་གྲྭ་ནི་ཆ་གཅིག་སྟེ་སོར་མོ་
གཅིག་གོ། །ཇི་ལྟར་བྱུང་བ་སྟེ་ཇི་ལྟར་འཁྲུངས་པ་བཞིན་ཚེམས་ཀྱི་རྒྱལ་པོ་ལ་སོགས་པ་རིམ་པས་གང་བ་རྣམས་ཀྱི་རྣམ་པར་བཀོད་པ་གསུངས་པ་དེ་བཞིན་དུའོ། །སོར་མོའི་སུམ་ཆ་ཞེས་པ་ནི་སོར་མོའི་སུམ་ཆས་པད་སྒྲོས་ཏེ་དེ་བཞིན་དུ་སྣའི་རྩེ་མོའི་འོག་ཏུའོ། །མཆུའི་སྟེང་དུ་ཆུ་འབབ་པའི་རྣམ་པ་ལྟ་བུའི་པད་སྒྲོས་
སོ། །སྨ་རའི་གནས་ཀྱི་དབུས་སུ་མཚམས་འདྲ་བའོ། །སོར་མོ་ཕྱེད་མཉམ་པ་ཞེས་ཁྱད་པར་གྱི་བསྡུ་བ་སྟེ། ཤངས་ཀྱི་བུ་ག་ཞེས་པ་ནི་ཤངས་ཀྱི་སྦུབས་ཟླུམ་པོར་འཁྱིལ་བའོ། །ཤངས་ཀྱི་རྒྱུད་དང་ཤངས་ཀྱི་རྩེ་མོ་ཞལ་དང་མཉམ་པའོ། །ཆ་ཕྱེད་ནི་སོར་མོ་ཕྱེད་དོ། །སྤྱན་གྱི་བར་ལ་ཞེས་པ་ནི་སྤྱན་དག་གི་དབུས་ལ་
སོར་མོ་སྟེ་སོར་གཅིག་གི་ཚད་དོ། །དཔྲལ་བའི་འོག་ཅན་གཉིས་ཀྱི་ཉེ་བ་ཤངས་ཀྱི་ལོགས་ལ་རེ་རེ་ཇི་སྲིད་པ་ཞེས་སོ། །སྤྱན་གྱི་འབྲས་བུའི་དབུས་ཀྱི་སྙིང་པོ་དེ་ལ་སོར་གཉིས་ཀྱི་ལྔ་ཆས་ཤེས་པར་བྱའོ་ཞེས་པ་ནི་ཁ་ཅིག་གོ། །དེ་བཞིན་དུ་སོར་གཅིག་གི་ལྔ་ཆ་ལ་བྱེད་དོ་ཞེས་ཏེ། འདི་ནི་རིགས་པའི་རང་བཞིན་དུ་རྟོགས་

203-1-9b

སོ། །སོར་གཉིས་སོར་གསུམ་དག་ཅེས་པ་ནི་སོར་གཉིས་ནི་སྤྱན་གྱི་ནོར་བུའི་ཆའོ། །སོར་གསུམ་ནི་སྤྱན་གྱི་ཟུར་དང་ཉེ་བ་སྟེ། ཤའི་ཟླུམ་དང་ལྷན་ཅིག་གོ། །སྤྱན་ལ་སོར་མོ་བཞི་ནི་རང་གི་མཚམས་སོ། །རྣམ་པར་འབྱུང་བ་ནས་སྤྱན་གྱི་དབྱིབས་སུ་གསལ་བའོ། །རྟོག་པོ་ནི་ལེགས་པར་མཐོ་བའོ། །སྤྱན་གྱི་སྦུབས་ལ་
སོར་མོ་གསུམ་ཞེས་པ་ནི་སྨིན་མའི་འོག་ཏུ་སྤྱན་འབྲས་ནས་བརྩམས་ཏེ། སྟེང་དང་ལོགས་སོར་མོ་གསུམ་མོ། །སྤྱན་གྱི་ཟུར་དང་ཤངས་ཀྱི་ལོགས་དང་སྤྱན་དག་གི་བར་མཉམ་དུ་བྱའོ། །ཀོས་ཀོའི་ཞེས་པ་ནི་ཀོས་ཀོའི་མཐའ་དང་སྟེང་དུ་སྤྱན་འབྲས་ཀྱི་ལོགས་ངེས་པར་སྦྱར་བར་བྱའོ། །དེ་མ་ཡིན་པ་ཞལ་གྱི་ཟུར་གཉིས་ཀྱང་དེ་
བཞིན་བྱའོ། །སྨིན་དབུས་ནི་སྨིན་མའི་བར་དུ་སོར་མོ་ཕྱེད་དང་གཉིས་སོ། །རྒྱར་ནི་ཞེང་དུ་བྱའོ། །དབུས་སུ་ཞེས་པ་ནི་སྨིན་མའི་དབུས་མཛོད་སྤུར་ཤེས་པར་བྱའོ། །ཟླ་བ་གང་ཞིག་མཛེས་པ་ལྟར། །ཤངས་ཀྱི་རྒྱུད་དང་མཛོད་སྤུའི་ཐིག །དེ་བཞིན་གཙུག་ཏོར་དབྱིབས་ལེགས་པ། །གཙུག་གི་ནོར་བུ་དེ་ཤེས་བྱ། །ཞེས་པའི་
གཙུག་གི་ནོར བུའི་འདི་དཀྱིལ་གྱི་རྣམ་པའོ། །གཙུག་ཏོར་ཡང་དེ་བཞིན་དུའོ། །སྙན་གྱི་རྩེར་ཡང་ཞེས་བྱའོ། །བུ་གའི་སྟེང་དུ་སྙན་ནི་སོར་མོ་བཞིའོ། །ཞེང་དུ་ནི་རྒྱ་རུ་སྟེ་འདབ་མའི་ཞེང་ཆ་གཅིག་གོ་ཞེས་སོ། །སྙན་གྱི་རྩེ་མོ་དག་སོར་མོ་ཕྱེད་ཀྱི་ཚད་ནི་འདབ་མར་བརྗོད་དོ། །སྟེང་མཐོ་ཞེས་པ་ནི་སོར་མོ་གཅིག །སྙན་གྱི་
སྦུབས་ནི་ཕྱེད་ཆ་སྟེ། སོར་ཕྱེད་སྙན་གྱི་ཁུང་དུ་འཇུག་པ་ལའོ། །འགྲམ་པ་ནས་སྙན་དག་གི་དབུས་མེ་ཏོག་ཁ་ན་བྱེ་བའི་རྣམ་པར་སྟེང་དུ་འཁྱིལ་པའོ། །སོར་ཕྱེད་དང་གསུམ་གྱིས་སྙན་དུ་འགྱུར་ཏེ། འདབ་མ་དང་ལྷན་ཅིག་ཕྱེད་དང་བཅས་པའི་སོར་མོ་གཉིས་ཏེ། ནང་གི་ཆ་ཞེས་པ་ནི་ཞེང་དུ་ཤར་དང་ནུབ་ཀྱི་
མཐའོ། །སྙན་གྱི་ལོགས་ཀྱི་འདབ་མ་ལའོ། །སྤྱན་མཐའ་ལས་མཐའ་སོར་མོ་ཕྱེད་དང་ལྔ་སྙན་གྱི་འདབ་མ་སྟེ། སྙན་གྱི་ངོས་འདབ་མ་དང་བཅས་པའོ། །སྙན་ནས་བརྩམས་ཏེ་སྙན་གྱི་བར་བདུན་གྱི་ཆའི་དབུ་ལ་སོར་བཅོ་བརྒྱད་དོ། །རྒྱབ་དུ་སོར་མོ་བཅུ་བཞི་སྟེ། ནུབ་ཀྱི་ཆའི་དབུ་ལའོ། །དེ་དག་བར་དུ་ནི་ནུབ་ཀྱི་ཆའི་
ཁྱད་པར་དང་ངོ་། །སོར་མོ་སུམ་ཅུ་རྩ་གཉིས་ནི་ཞེས་པ་ལ་སོགས་པ་ནི་གཅིག་ཏུ་བྱ་བར་གསུངས་སོ། །ཟླུམ་པོ་ནི་བསྐོར་བའོ། །མགུལ་ནི་ཆ་བཞི་སྟེ་སོར་བཞིའོ། །མགུལ་ནས་བརྩམས་ཏེ་སྙན་ལ་སྟེང་དུ་སོར་མོ་དགུའོ། །ཤར་དང་ནུབ་ཀྱི་ཆ་ལ་བསྐོར་བའི་ཕྱིར་སོར་མོ་ཉི་ཤུ་རྩ་བཞི་མགུལ་ལའོ། །མགུལ་པ་ལས་

203-1-10a

མགུལ་པའི་ལྷག་མ་ལ་སོར་མོ་བརྒྱད་དེ། ལོགས་སུ་སྙན་གྱི་ཉེ་བར་སོར་བཞི་འཛིན་པས་སོ། །ཐལ་གོང་སོར་མོ་བཅུ་གཉིས་སོ། །སྙིང་གའི་བར་ཞེས་པ་ནི་སྙིང་གའི་ཉེ་བའི་བར་གྱི་ཆ་ཤས་ཉིད་དང་བྲལ་བ་ཞེས་པའི་དོན་ཏོ། །གདོང་པ་བཞི་ཡི་ཚད་ཀྱིས་ནི། །ཕྱག་གི་སྲིད་དུ་ཞེས་ཏེ་རིང་དུའོ། །
ཕྱག་གི་སྲིད་ཅེས་པ་ནི་འདིར་ཕྲག་པ་ནས་བརྩམས་ཏེ་ཕྱག་གི་རྩེ་མོ་ཇི་སྲིད་པ་ཕྱག་ཏུ་གསུངས་སོ། །འདིར་ཕྲག་པ་ནས་གྲུ་མོའི་སྟེང་ཡན་ཆོད་སོར་མོ་ཉི་ཤུ་དཔུང་པ་ལ་བལྟ་བར་བྱའོ། །གྲུ་མོའང་འོག་ནས་སྐུ་མཁྲིག་མ་ཡན་ཆོད་ཕྱག་ངར་ཏེ་སོར་མོ་བཅུ་དྲུག་གོ། །མཁྲིག་མའི་འོག་ནས་ཕྱག་གི་རྩེ་མོ་ཡན་ཆད་གྲུ་མོའི་
ཟུར་གྱི་བར་ཕྱག་ངར་དུ་བལྟ་བར་བྱའོ་ཞེས་གསུངས་སོ། །མཆན་འོག་ནས་བརྩམས་ཏེ་བར་ལྷུའི་ཆ་དང་པོའི་ཚིགས་ཀྱི་མཐའ་ཡོངས་སུ་བལྟ་བ་ནི་སོར་མོ་ཉི་ཤུའོ། །ཕྲག་པའི་མདུན་གྱི་མཐའ་ནས་བརྩམས་ཏེ་རྒྱབ་དུ་གསུངས་པ་ནི་འདི་གཉིས་མཉམ་དུ་བཅུ་གཉིས་ཀྱི་ཚིགས་སོ་ཞེས་སོ། །ཚིགས་ཀྱི་ཕྱོགས་ཟླུམ་པོ་
ལ་སོར་མོ་བཅུ་གཉིས་སོ། །ཕྱག་དག་གི་ཕྱག་གི་སྲིད་དུ་སོར་མོ་བདུན་གྱི་ཚད་དོ། །ཕྱག་གི་མཐིལ་ལ་དབུས་སུ་རྒྱར་སོར་ལྔའི་ཚད། གྲངས་ཞེས་བྱ་བ་ལ་སོགས་པས་བཅོམ་ལྡན་འདས་ཀྱི་ཕྱག་ལ་མཚན་རྣམས་གསུངས་པ་ནི་མཚན་ཐམས་ཅད་པ་སྟེ། འཁོར་ལོ་རྩིབས་སྟོང་པ་ལ་སོགས་པས་ལྷན་ཅིག་པའི་གཟུགས་
ཞེས་པ་ནི་མཚན་ཐམས་ཅད་ཀྱི་གཟུགས་སོ། །གང་ཡང་ཇི་ལྟ་བའི་རི་མོའི་རྣམ་པ་དང་། གང་ཡང་བཀྲ་ཤིས་ཀྱི་རྣམ་པ་དང་། གང་ཡང་རིག་པའི་རྣམ་པ་དང་། གང་ཡང་སའི་རྣམ་པ་དང་། གང་ཡང་གཡུང་དྲུང་འཁྱིལ་པའི་རྣམ་པ་ཞེས བྱ་བ་ལ་སོགས་པའོ། །ཤིས་པའི་ཡོན་ཏན་མེད་པ་དང་མི་ལྡན་པའོ། །ཀུན་གྱི་
མཚན་གྱི་གཟུགས་སུ་གྱུར་པའོ། །རྣམ་པ་ཕན་ཚུན་སོ་སོར་མ་འབྱར་བའོ། །ཕྱག་སོར་གུང་མོ་སོར་ལྔའི་སྲིད་དུ་རིང་བའོ། །གུང་མོ་ལས་ཚིགས་ཕྱེད་ཀྱིས་དམན་པ་མཛུབ་མོ་སྟེ་སྡིགས་མཛུབ་བོ། །སོར་མོ་ཕྱེད་ཀྱིས་དམན་པ་ནི་མིང་མེད་དོ། །མཐེབ་ཆུང་ནི་ཉེ་བ་སྟེ་མིང་མེད་ལས་ཞེས་ཏེ། མིང་མེད་ལས་
ཚིགས་གཅིག་གིས་དམན་པ་ནི་མཐེབ་ཆུང་ངོ་། །དེ་རྣམས་ཚིགས་ཕྱེད་སེན་མོས་མཛེས་པ་ནི་ཡིད་འཕྲོག་པའོ། །མཁྲིག་མའི་སྟེང་དུ་ཇི་སྲིད་སེན་མོའི་བར་དུ་མཐེབ་ཆེན་གྱི་སྲིད་དུ་སོར་མོ་བཞིའོ། །ལྟེ་བ་ཡང་དེ་བཞིན་དུ་དེ་སྲིད་སོར་མོ་བཞི་པ་ཉིད་དོ། །མཐེབ་ཆེན་ཚིགས་གཉིས་སོ། །ཚིགས་ཕྱེད་དུ་སེན་

203-1-10b

མོའོ། །མཐེབ་ཆེན་གྱི་རྩ་བ་དང་། མཛུབ་མོའི་རྩ་བའི་བར་ལ་སོར་མོ་གསུམ་མོ། །མཐེབ་ཆུང་དང་མཁྲིག་མ་དག་གི་དབུས་ཀྱི་ཆ་ཕྱག་གི་ཆ་ལ་སྲིད་དུ་སྟེ་རིང་དུ་སོར་མོ་ལྔའོ། །འདིར་དོན་གྱིས་གོ་བར་བྱ་བའི་ཕྱིར་མཐེབ་ཆུང་སྤངས་ནས་ཕྱག་གཉིས་ཀྱི་དབུས་མའི་ཉེ་བར་རིང་དུ་ཚིགས་གསུམ་གྱི་ཆ་ཡིས་མཐོ་བའོ། །
དེ་སྟེང་ཞེས་པ་ནི་མཆན་འོག་གི་སྟེང་དུ་ཕྲག་པའི་མཚམས་སུ་ཆ་དགུར་བྱའོ། །སོར་མོ་དགུ་པོ་རྣམས་ཀྱི་ཚད་དོ། །བྲང་དང་སྐུ་རྒྱབ་ཅེས་པ་ནི་སྐུ་བྲང་དང་སྐུ་རྒྱབ་དག་རེ་རེ་ཉིད་ལ་བསྐོར་བ་སྟེ་ཡོངས་སུ་ཟླུམ་དུ་སོར་མོ་ལྔ་བཅུ་རྩ་དྲུག་གོ། །ནུ་མ་ལྟེ་བའི་བར་དེ་བཞིན་ཞེས་པ་ནི་ནུ་མ་དང་ལྟེ་བའི་བར་ལ་སོར་མོ་བཅུ་དྲུག་གོ། །
ཀུན་འབིགས་ཞེས་པ་སྟེ་ཁུང་དང་། ཚིགས་དག་ཅེས་པ་སྟེ་ཚིགས་ཀྱི་མདུད་པ་དག་དང་། ལྟེ་བ་གཉིས་ཀྱི་ཆ་ཤས་པ་གས་པ་འདུས་པ་དེ་དག་ལྷན་ཅིག་ལྟེ་བའི་ཁུང་ནི་སོར་མོ་གཅིག་གོ། །ལྟེ་བའི་དབུས་སུ་ཡོངས་སུ་བརྟག་པ་ནི་ལྟེ་བ་ནས་བརྩམས་ཏེ་རྒྱབ་དང་ལྷན་ཅིག་ཇི་སྲིད་ལྟེ་བ་ཚུན་ཆད་ཟླུམ་པོ་ལ་སོར་མོ་
བཞི་བཅུ་རྩ་དྲུག་གོ། །སྲིད་ཀྱི་རྒྱ་རུ་ཟླུམ་པོ་དག་ལ་པགས་པའི་འོག་ཏུ་སོར་མོ་བཞི་འཆད་པའོ། །སྒང་གཉིས་ཀྱི་སྟེང་དུ་སོར་གཅིག་གོ། །བརླ་ཞེས་པ་ནི་བརླའི་སྟེང་དུ་མཉམ་གཞག་ཡང་དག་པའི་གཟུགས་བྱའོ། །དེ་དག་སྟེང་གི་དབུས་ཀྱི་བར་ལ་སོར་བཅུ་གཉིས་སོ། །བརླའི་རྩ་བའི་ཟླུམ་ལ་སོར་མོ་སུམ་ཅུ་
རྩ་དྲུག་གོ། །བརླའི་འོག་གི་དབུས་ཀྱི་ཟླུམ་པོ་ལ་སོར་མོ་སུམ་ཅུ་རྩ་གཉིས་སོ། །པུས་མོ་ཞེས་པ་ནི་པུས་མོའི་རྩར་ཡོངས་སུ་བསྐོར་བའི་ཟླུམ་ལ་སོར་མོ་ཉི་ཤུ་རྩ་བརྒྱད་དོ། །ཚིགས་བཅིངས་པ་སྔོན་མ་གཉིས་སོར་མོ་བཞིའོ། །པུས་མོ་འོག་ཏུ་པུས་མོ་ལས་སོར་མོ་སྟེ་ལོང་བུ་སོར་མོ་གཉིས་སོ། །ལོང་བུ་མི་མངོན་པ་
ལ་སོགས་པ་ནི་སོར་མོའི་ཚིགས་གཉིས་ནི་མངོན་པ་དང་། ཤ་ཡིས་འཁྱིལ་བའོ། །དེའི་ཕྱིར་རྩ་ནི་གནས་པར་འགྱུར་རོ། །རྗེ་ངར་དག་ནི་དབུས་ཀྱི་འཁྱིལ་པ་སོར་མོ་ཉི་ཤུ་རྩ་གཅིག་གིས་ཡོངས་སུ་ཟླུམ་པོ་ཉིད་དོ། །དབུས་ཀྱི་འོག་ཏུ་སོར་མོ་བཅུ་བཞིས་ཡོངས་སུ་ཟླུམ་པའོ། །ལོང་བུའི་འོག་ཏུ་ཞེས་པ་ནི་ཞབས་ཀྱི་ལོང་
བུ་མན་ཆོད་ལ་སོར་བཞིའོ། །ལོང་བུའི་ཕྱི་རོལ་ནས་ཇི་སྲིད་སེན་མོའི་རྩེ་མོའི་བར་དུ་ཞབས་ཀྱི་སྲིད་དུ་སོར་བཅུ་གཉིས་སོ། །ཞབས་ཀྱི་ཕྱེད་ཀྱི་ཞེང་དུ་འོ་ཞེས་པ་ནི་སོར་མོ་དྲུག་གོ། །སྟེང་དང་འོག་གི་རྒྱར་སོར་མོ་གཉིས་སོ། །ཞབས་གཉིས་ཀྱི་ལོགས་ཞབས་ཀྱི་ལོང་བུའི་འོག་རྟིང་པ་ལ་སྟེང་དང་འོག་ཏུ་སོར་

203-1-11a

བཞིའོ། །སོར་མོ་དྲུག་གི་རྒྱ་ལས་ནི་ཞེས་པ་ལ་སོགས་པས་ནི་རྒྱ་སྟེ། འཕྲེད་ལ་སུམ་འགྱུར་གྱིས་ཟླུམ་པོ་སྟེ་ཞེས་པ་ནི་རྟིང་པའི་ཟུར་གཅིག་ནས་གཅིག་གི་རྟིང་བར་དུ་ཞབས་དང་ལྷན་ཅིག་དུ་ཟླུམ་པོ་ལ་སུམ་འགྱུར་ནི་སོར་མོ་བཅོ་བརྒྱད་ཅེས་པའི་དོན་ཏོ། །ཞབས་ཀྱི་སོར་མོ་ལྔ་པོ་རྣམས་ནི་ཚིགས་
གཉིས་པ་རྩེ་མོའི་ཕྱེད་དུ་སེན་མོས་མཛེས་པ་ནི་མཐེབ་ཆེན་ནོ། །སོར་མོ་ལྔ་པོ་རྣམས་ནི་ཡོངས་སུ་ཟླུམ་པའོ། །སྲིད་དུ་སོར་མོ་གསུམ་ཞེས་པ་ནི་རིང་དུ་སོར་མོ་གསུམ་མོ། །ཞབས་ཀྱི་མཛུབ་མོ་ནི་སྲིད་དུ་མཐེབ་ཆེན་དང་མཉམ་པ་ཉིད་དོ། །དེའི་ཕྱིར་མཐེབ་ཆེན་གྱི་སྲིད་དུ་འཛུབ་མོའོ། །ཆ་བཅུ་དྲུག་གི་དབུས་མ་དམན་ཞིང་ཐུང་
བའོ། །གུང་མོ་ལས་བརྒྱད་ཆས་དམན་པ་ནི་མིང་མེད་དོ། །མིང་མེད་ལས་བརྒྱད་ཆས་དམན་པ་ནི་མཐེབ་ཆུང་ངོ་། །སོར་མོ་རྣམས་ནི་སོར་གཅིག་གི་དཔངས་སུའོ། །མཐེབ་ཆེན་ནི་ཕྱེད་དང་བཅས་པའི་སོར་མོའི་དཔངས་སུའོ། །ཞབས་ཀྱི་ཕྱེད་རྒྱབ་རུས་སྦལ་གྱི་རྒྱབ་ལྟ་བུའོ། །ཞབས་ཀྱི་མཐིལ་འཁོར་ལོ་ལ་སོགས་པས་རྣམ་
པར་བརྒྱན་པའོ། །མཉམ་དུ་འབྲེལ་པ་ནི་ངང་པའི་རྐང་པ་ལྟར་མ་ཆད་པར་འབྲེལ་པའོ། །བྱའི་སྒོ་ང་ཞེས་བྱ་བ་ལ་སོགས་པས་ནི་ཞལ་རྣམ་པ་བཞི་རུ་གསུངས་སོ། །སྐྱེས་བུ་ཆེན་པོའི་ཞལ་ནི་བྱའི་སྒོ་ངའི་རྣམ་པའོ། །མཎྜལ་གྱི་རྣམ་པའོ་ནི་ཁྲོ་བོ་རྣམས་ཀྱི་ཡིན་ནོ། །གྲུ་བཞི་པ་ཡང་ངོ་། །རྫོགས་པའི་སངས་རྒྱས་རྣམས་ཀྱི་
རབ་ཏུ་ཞི་བར་བྱའོ། །སྤྱན་ནི་དྭངས་པར་གྱུར་པ་སྟེ། ཐམས་ཅད་ལ་གཟིགས་པར་བྱེད་པ་ཐམས་ཅད་མཁྱེན་པའི་སྤྱན་ནོ། །སྟེང་དུ་ལྟ་བར་བྱེད་པ་དང་། དམན་པ་ལ་བརྟེན་པ་དང་། འོག་ཏུ་ལྟ་བ་ཡང་མ་ཡིན་པར་རོ། །བདག་གིས་རྣམ་འགྲེལ་འདི་བྱས་བསོད་ནམས་དེས། །སངས་རྒྱས་ལ་སོགས་ཚད་ནི་རྫོགས་
བྱས་ཏེ། །རྣམ་པར་མི་རྟོག་བྱང་ཆུབ་ཚོགས་ཐོབ་ཅིང་། །སྐྱེ་དགུ་རྣམས་ཀྱིས་རྒྱལ་བ་ཉིད་ཐོབ་ཤོག །ཡང་དག་པར་རྫོགས་པའི་སངས་རྒྱས་ཀྱིས་གསུངས་པའི་སྐུ་གཟུགས་ཀྱི་ཚད་ཀྱི་མཚན་ཉིད་ཀྱི་རྣམ་འགྲེལ་རྫོགས་སོ།།      །།རྒྱ་གར་གྱི་མཁན་པོ་དྷརྨ་དྷ་ར་དང་། ལོ་ཙཱ་བ་ཡར་ཀླུངས་པ་གྲགས་པ་རྒྱལ་མཚན་གྱིས་མང་ཡུལ་
གུང་ཐང་གི་རྒྱལ་སར་བསྒྱུར་བའོ། །གྲུབ་པ་ཀུན་མཁྱེན་ཆོས་རྒྱལ་གྱི། །གསུང་གི་འོད་ཟེར་སྣང་བ་བརྟེན། །མཁས་ཆེན་བྷོ་ཊ་པཎྜི་ཏ། །དམ་ཆོས་འཛིན་དག་གསུང་བརྟེན་ནས། །ཡར་ཀླུངས་གྲགས་པ་རྒྱལ་མཚན་གྱིས། །གུང་ཐང་རྒྱལ་སར་ལེགས་པར་བསྒྱུར།།      ༄༅༅། །རྒྱ་གར་སྐད་དུ། པྲ་ཏི་

203-1-11b

བིམྦ་ལཀྵ་ཎཾ་ནཱ་མ། བོད་སྐད་དུ། སྐུ་གཟུགས་ཀྱི་ཚད་ཀྱི་མཚན་ཉིད་ཅེས་བྱ་བ། ཐམས་ཅད་མཁྱེན་པ་ལ་ཕྱག་འཚལ་ལོ། །ཨ་ཏེའི་རི་ལ་སངས་རྒྱས་པའི། །སྔོན་གྱི་རྒྱུད་དང་བསྟན་བཅོས་སུ། །སྐུ་གཟུགས་ཚད་ཀྱི་མཚན་ཉིད་རྣམས། །ཐུབ་པ་རྣམས་ཀྱིས་སྔོན་གསུངས་གང་། །གོ་རིམས་ཇི་བཞིན་
ལྷན་ཅིག་ཏུ། །དེ་འདིར་ཡང་དག་བསྡུ་བའི་ཕྱིར། །ཐམས་ཅད་མཁྱེན་ལ་ཕྱག་འཚལ་ནས། །ལྷ་སྐུའི་མཚན་ཉིད་བརྗོད་པར་བྱ། །སོར་མོ་བཅུ་གཉིས་ལག་མཐིལ་དང་། །གདོང་དང་མཐོ་ཡང་དེ་བཞིན་དུ། །དོན་གཅིག་མིང་དུའང་འདི་ཞེས་བྱ། །ཀཱ་ལམ་སོར་གཉིས་གོ་ལ་ཀཱཾ། །ལག་པའི་པདྨའི་བཞི་ཆ་ལ། །
སོར་མོའི་ཚད་དུ་ཤེས་པར་བྱ། །དེ་ནས་སོར་མོ་བརྒྱད་ཆ་ཡིས། །ནས་སུ་མཁས་པས་རིག་པར་བྱ། །སྐུ་ཡི་ཡན་ལག་ཉིང་ལག་གི། །ཆག་ཚད་དོན་ངེས་གསུངས་པས་ན། །རྣམ་པ་འདི་ཡིས་དེ་བཞིན་དུ། །མཁས་པས་ཆག་ཚད་གཞལ་བར་བྱ། །གང་ཞིག་ཅུང་ཟད་ལུས་སྲིད་ཀྱི། །ཆ་དགུ་ཡི་ནི་ཆ་གཅིག་དང་། །མཐོ་
གང་གདོང་དུ་བྱས་ནས་ནི། །དེ་བཞིན་དུ་ནི་རྒྱར་ཡང་སྟེ། །བ་ཡིག་རྣམ་པ་ཨ་འབྲས་དང་། །མཁའ་འགྲོའི་སྒོ་ང་ཏིལ་འབྲས་བཞིན། །དེ་ནས་དབྱིབས་ཀྱི་མཚན་ཉིད་ནི། །རྣམ་པ་བཞི་ཞེས་གསུངས་པ་ལ། །སོར་མོ་གཅིག་གིས་དམན་པ་ནི། །བ་ཡིག་རྣམ་པའི་ཚད་ཡིན་ནོ། །གང་ཞིག་སོར་མོ་གཉིས་དམན་པ། །ཨ་
འབྲས་ལྟ་བུའི་ཞེས་བྱའི་གདོང་། །གང་ཞིག་ཕྱེད་བཅས་སོར་གཅིག་དམན། །མཁའ་འགྲོའི་སྒོ་ང་འདྲ་བར་བརྗོད། །གང་ཞིག་སོར་མོ་གསུམ་སྤངས་པ། །ཏིལ་གྱི་འབྲས་བུ་འདྲ་བར་བརྗོད། །གདོང་ནི་བཞི་པོ་རྣམས་ལ་ཡང་། །རྣམ་པར་སྤང་བྱ་འགྲམ་པ་ལ། །ཏིལ་འབྲས་དབྱིབས་ཀྱི་ངེས་པ་ནི། །ལྷ་མོ་
རྣམས་ཀྱི་བཞིན་ལ་འདོད། །བསྟན་བཅོས་མི་མཐུན་བཞིན་བྱས་ནས། །སྦྱིན་བདག་རྣམ་པར་ཉམས་པར་འགྱུར། །བསྟན་བཅོས་མཐུན་པ་བཞིན་མཛད་ན། །ཕུན་ཚོགས་དང་ལྡན་མཉེན་དང་བཅས། །གཙུག་ཏོར་ཆ་ལ་སོར་བཞི་སྟེ། །གདུགས་ཀྱི་རྣམ་པ་འདྲ་བར་བྱ། །སོར་མོ་ཕྱེད་དང་སོར་མོ་བཞི། །དཔྲལ་བ་རུ་ནི་
ཡོངས་སུ་གྲགས། །དཔྲལ་བའི་ཕྱེད་ཀྱི་ངེས་པ་ནི། །སོར་མོ་བཅུ་དང་ལྡན་པར་བྱ། །སོར་གཉིས་མིག་བར་དེ་བཞིན་དུ། །སྣ་གོང་ཕྱེད་བཅས་སོར་མོ་དང་། །སོར་གཉིས་ལོགས་དང་སྟེང་དུ་སྟེ། །སྣ་ཡི་རྒྱུད་ལ་ནས་གསུམ་མོ། །སྣ་རྡོག་ཟླུམ་པོ་སོར་མོ་སྟེ། །རྒྱུད་ཀྱི་རྩ་བ་ནས་གཉིས་སོ། །རྣ་བ་སྙན་གྱི་བུ་ག་

203-1-12a

ནི། །ནས་གསུམ་ཡིན་ཏེ་ཤིན་ཏུ་མཛེས། །དུང་བཞིན་འདི་ནི་འཁྱིལ་པ་སྟེ། །མཁས་པ་ཡིས་ནི་ཚད་ལྡན་བྱ། །འདི་ཚད་ཡང་དག་རིག་པ་ཡིས། །ལྕེ་ཡི་ཁྱིམ་དུ་རབ་གསུངས་པ། །ཏིལ་གྱི་མེ་ཏོག་སྣ་མ་དང་། །ནེ་ཙོ་ཁྲ་ཡི་གདོང་པ་བཞིན། །སོར་གཅིག་དང་ནི་ནས་གཉིས་
ཏེ། །དེ་ཡི་འོག་གི་ཆ་རུ་གསུངས། །མ་མཆུ་ལ་ནི་ནས་དྲུག་སྟེ། །ཡ་མཆུ་ལ་ནི་ནས་བཞིར་བྱ། །པད་སྒྲོས་སྟེང་དུ་གནས་པ་ནི། །སོར་མོ་ཡི་ནི་སུམ་ཆར་བྱ། །ཞལ་གྱི་མ་མཆུ་མཚུངས་པ་ལ། །རྒྱ་རུ་སོར་མོ་གཉིས་སུ་བྱ། །གྱེས་མཚམས་ནས་དྲུག་དབུས་སུ་ནི། །སྣ་ཚོགས་རེ་ཁཱ་བྲི་བར་བྱ། །ཞལ་གྱི་
གྲྭ་ཡང་སོར་མོ་ཕྱེད། །ཅུང་ཟད་ཙམ་ཞིག་དམའ་བར་བྱེད། །ཀོས་ཀོའི་ཞེང་དུ་སོར་གཉིས་ཏེ། །སྲིད་ཀྱི་ཚད་དུ་ནས་བཅུའོ། །སོར་ཕྱེད་སྨིན་མའི་དབུས་སུ་སྟེ། །སོར་མོ་ལྔ་ནི་རིང་དུ་བྱ། །ནས་ཕྱེད་སྨིན་མའི་རེ་ཁཱའི་ཚད། །མ་ཉེས་གཞུ་ཡི་དབྱིབས་འདྲའོ། །སོར་གཉིས་ནས་གཉིས་སྤྱན་ལ་སྟེ། །རྒྱ་ཡི་སུམ་
ཆ་སྤྱན་གྱི་ནི། །སུམ་ཆ་ནག་པོར་ཡང་དག་གསུངས། །དེ་ཡི་སུམ་ཆ་སྤྱན་འབྲས་ཡིན། །ནས་ཕྱེད་རྫི་མའི་ཚད་དུ་གནས། །ཀུ་མུད་ཨུཏྤལ་འདབ་འདྲ་དང་། །པདྨའི་འདབ་འདྲ་ཉ་ལྟོ་འདྲ། །མིག་མཐར་སོར་བཞི་ཤེས་པར་བྱ། །མྱོས་འབབ་ལ་ནི་སོར་མོ་གཅིག །སྙན་གྱི་ཞེང་དུ་སོར་མོ་གཉིས། །སྲིད་དུ་སོར་
མོ་བཞི་ཡིན་ནོ། །སྙན་གྱི་རྒྱབ་ཀྱི་འབྱུང་ས་ནས། །སོར་མོ་གཉིས་སུ་ཡོངས་སུ་གྲགས། །མདུན་ཁྱུད་ཡང་དག་སོར་མོ་ཕྱེད། །དེ་ཕྱེད་སྟེང་གི་སྒུར་པོར་བྱ། །སོར་མོ་ཡི་ནི་བཞི་ཆ་ཡིས། །སྙན་ཤལ་གྱི་ནི་ཞེང་ཡིན་ནོ། །སྙན་གྱི་གསང་གནས་ནས་གཉིས་ཏེ། །ཇི་ལྟར་མཛེས་པ་མུ་ཁྱུད་ནང་། །སྙན་གྱི་མུ་ཁྱུད་
རྩ་བ་ནས། །གྲི་གུག་དབྱིབས་སུ་རབ་ཏུ་གྲགས། །སྙན་གཉིས་དག་གི་དབུས་ཀྱི་ནི། །དབུ་ལ་སོར་མོ་བཅོ་བརྒྱད་དོ། །ཡང་ན་མཐོ་དོ་ཉིད་དུ་གསུངས། [།སོར་བཅུ་གཉིས་བཅུ་གཅིག་ཐེ་ཚོམ་མེད།] །སྨིན་མཚམས་སྤྱན་དབུས་དག་ལ་ནི། །སོར་མོ་གཉིས་སུ་ཡོངས་སུ་གྲགས། །སྙན་གྱི་རྩ་དང་ཀོས་ཀོའི་བར། །
སོར་མོ་རྣམས་ནི་བརྒྱད་དུ་འགྱུར། །དེ་བཞིན་ཀོས་ཀོ་དཔྲལ་བ་དང་། །སྤྱན་དག་ཀྱང་ནི་མཚུངས་པར་བྱ། །ཞལ་གྱི་གྲུ་སོགས་མིག་འབྲས་དག །ཐིག་ནི་མཉམ་པོས་གཞལ་བར་བྱ། །སྨིན་མའི་རེ་ཁཱ་སྙན་རྩེའི་ཐིག །ཐིག་གིས་མཉམ་དུ་ཚད་པར་བྱ། །སྙན་གྱི་མདུན་ཁྱུད་སྤྱན་དབུས་ཀྱང་། །དེ་བཞིན་དུ་ནི་མཉམ་པར་

203-1-12b

གཞལ། །ལྐོག་མའི་སྟེང་ནི་སོར་མོ་བཞི། །མགུལ་པའི་སྲིད་ཀྱང་དེ་བཞིན་ནོ། །ཕྲག་རྩ་དང་ནི་སྙན་རྩའི་བར། །ཇི་སྲིད་སོར་མོ་དྲུག་ཡིན་ནོ། །ཀོས་ཀོའི་ཤ་ནི་ཟླུམ་པོ་སྟེ། །ཇི་ལྟར་མཛེས་པར་བྱས་ནས་ནི། །དེ་ཡི་ཚད་དུ་འཕྱང་བའོ། །ཀོས་ཀོའི་ཁུང་དང་སྙན་ཁུང་གི། །དབུས་ཀྱི་ཁུང་ནི་ཐུང་ཞིང་
དམའ། །ཅོད་པན་དང་ནི་རལ་པ་བཅིངས། །འཁྱིལ་བ་སྐྲ་ཡི་ལྷག་མ་དང་། །གཙུག་ཕུད་དང་ནི་རྩེ་མོ་གསུམ། །དབུ་རྒྱན་དང་ནི་ཐོར་ཚུགས་བཅིངས། །དེ་རྣམས་སོར་མོ་བརྒྱད་དུ་རིང་། །དེ་བས་ལྷག་པར་མི་བྱའོ། །དགེ་དང་མི་དགེ་འཆད་འགྱུར་བའི། །ཞལ་གྱི་རྣམ་པ་ཅུང་ཟད་ནི། །འཛུམ་ཞིང་
མཉེན་པར་བྱས་ནས་ནི། །མཚན་ཉིད་དང་ནི་ལྡན་པར་བྱ། །བསྐ་དང་ཚ་བ་དང་ནི་དྲོ། །དེ་བཞིན་དུ་ནི་སྐྱུར་དང་ཁ། །གདོང་གི་དབྱིབས་ནི་རིག་བྱས་ནས། །རིང་དུ་ཡོངས་སུ་སྤང་བར་བྱ། །དེ་ནས་གཞན་ཡང་བཤད་བྱ་བ། །ལུས་ཀྱི་ཚད་ཀྱི་མཚན་ཉིད་ནི། །མགྲིན་པའི་མཚམས་ནས་ལྟེ་བའི་བར། །གཉིས་
ཀྱིས་གདོང་བ་གཉིས་སུ་བྱ། །ལྟེ་བ་མདོམས་ཀྱི་སྦ་བ་དང་། །རྩ་ནས་འཕྲེད་ལ་ལོགས་དག་དང་། །ཕང་ཚོས་དག་དང་དེ་བཞིན་དུ། །མགྲིན་མཚམས་ནུ་མའི་དབུས་དག་དང་། །ནུ་མའི་མཐར་ཡང་དེ་བཞིན་དུ། །མགྲིན་ལོགས་དཔུང་པའི་རྩེ་མོ་ནས། །མཐོ་རེའི་ཚད་དུ་རབ་ཏུ་གསུངས། །ལྟེ་བ་ནུ་མའི་བར་
ཆ་ནི། །སོར་མོ་རྣམས་ནི་བཅུ་བཞི་སྟེ། །ཐིག་ནི་མཉམ་དུ་གདབ་པར་བྱ། །དེ་བཞིན་མགྲིན་མཚམས་བྲང་གི་གཞོལ། །ལུས་ཀྱི་རྐེད་པའི་རྒྱ་ལ་ནི། །མཐོ་ནི་གསུམ་གྱི་ཚད་དུ་གསུངས། །རྒྱབ་ལ་སོར་མོ་དྲུག་དག་བྱ། །དེ་བཞིན་བྲང་གི་ནུ་མའི་མཐར། །ནུ་མའི་དཀྱིལ་འཁོར་ལོགས་སུ་ནི། །སོར་མོ་གཉིས་ཀྱི་
ཚད་ཀྱིས་སོ། །ནུ་མའི་རྩེ་མོ་ནས་གཉིས་ཟླུམ། །ནས་གསུམ་ལྟེ་བའི་དཀྱིལ་འཁོར་ལ། །ལྟེ་བའི་ཟབས་ནི་མཛེས་བྱས་ལ། །གཡས་སུ་འཁྱིལ་བས་མཚན་པའོ། །སོར་གཉིས་གསང་བའི་གནས་ལ་སྟེ། །སོར་གཉིས་བཅུ་ནི་ལག་ངར་ལ། །སོར་གཉིས་གསུམ་ནི་ལག་པའི་སྲིད། །དེ་ཡི་སྲིད་དུ་གུང་མོའོ། །
མཐེ་བོང་ལ་ནི་སོར་བཞི་བྱ། །དེ་དང་མཚུངས་པ་མཐེའུ་ཆུང་། །གུང་མོའི་སྲིད་ལས་སེན་གང་དམན། །མཛུབ་མོ་རུ་ནི་ཤེས་པར་བྱ། །མཐེ་བོ་ཆེ་ཡི་རྒྱ་རུ་ནི། །ཞེང་ལ་ནས་རྡོག་དགུ་ཡིན་ཏེ། །ཕྱེད་དང་བཅས་པའི་གནས་བརྒྱད་ཀྱིས། །གུང་མོའི་ཞེང་ནི་མཛེས་པར་བྱ། །གཉིས་པོ་ནས་རྡོག་བརྒྱད་དུ་རིག །

203-1-13a

མཐེའུ་ཆུང་ནི་ནས་བདུན་ཤེས། །མཐེབ་ཆུང་རྩ་ནས་མཁྲིག་མ་ལ། །སོར་མོ་རྣམས་ནི་ལྔ་རུ་འདོད། །ལག་མཐིལ་དབུས་ཀྱི་ཞིང་ལ་ཡང་། །དེ་ཡི་ཚད་ཀྱིས་ཤེས་པར་བྱ། །མཐེ་བོའི་ཚིགས་ནས་མཁྲིག་མའི་བར། །ཇི་སྲིད་སོར་མོ་བཞི་ཡིན་ནོ། །མཐེ་བོའི་རྩ་ནས་མཛུབ་མོའི་བར། །ཇི་
སྲིད་སོར་མོ་གཉིས་སུ་འགྱུར། །སོར་མོ་རྣམས་ནི་ཚིགས་པ་གསུམ། །མཐེ་བོང་ལ་ནི་ཚིགས་གཉིས་འགྱུར། །སོར་མོ་སོ་སོ་རྣམས་ཀྱི་ནི། །ཚིགས་པ་རྣམས་ནི་མཉམ་དུ་བརྗོད། །རྩེ་མོ་ཟླུམ་ཞིང་ཕྲ་བར་རིག །ཚིགས་སུ་རྣམས་ནི་བདེ་བར་སྦྱར། །སོ་ལ་སོར་ཕྱེད་རྩེ་མོ་སྟེ། །འཕྲེད་ལ་ཚིགས་ཕྱེད་དེ་བཞིན་
དུ། །སེན་མོའི་རྩ་བ་ཟླ་ཕྱེད་ཀྱི། །རྣམ་པ་ཅན་དུ་མཁས་པས་བྱ། །ཕྱག་གི་མཐིལ་ནི་གང་བར་བྱ། །དགེ་བའི་རེ་ཁཱས་ཉེ་བར་མཛེས། །ཕྱག་གི་རེ་ཁཱ་འཆད་འགྱུར་བ། །ལྷ་རྣམས་ཀྱི་ནི་དགེ་བའི་མཚན། །དུང་དང་པདྨ་རྒྱལ་མཚན་དང་། །འཁོར་ལོ་རྡོ་རྗེ་ཤག་ཏི་དང་། །འཁྱིལ་པ་བུམ་པ་ཟླ་བ་གདུགས། །
དེ་བཞིན་དཔལ་བེའུ་ལྕགས་ཀྱུ་གདུགས། །རྩེ་གསུམ་ནས་ནི་ཕྲེང་བ་དང་། །ནོར་གསུམ་གྱི་ནི་དེ་ཉིད་བྱ། །ལྟེ་བ་གསང་བའི་དབུས་དག་ནི། །བརླ་ཡི་རྩ་བ་མཚུངས་པར་བྱ། །བརླ་ནི་མཐོ་དོར་རིང་བ་ཉིད། །རྗེ་ངར་རིངས་སུ་གདོང་གཉིས་བྱ། །པུས་མོ་ལ་ནི་སོར་གཉིས་གཉིས། །ལོང་བུ་སོར་གཉིས་གཅིག་ཏུ་
ཤེས། །རྟིང་པ་སོར་གཉིས་གཉིས་སུ་ཤེས། །བིམ་པའི་འབྲས་བུ་སྨིན་པ་བཞིན། །ཞབས་ཀྱི་ཕྱེད་དུ་སོར་མོ་བདུན། །སྲིད་ཀྱི་ཚད་དུ་སོར་མོ་བཅུ། །ཞབས་ཀྱི་བཞི་ཆར་གྱུར་པ་ཡིས། །མཐེབ་ཆེན་གྱི་ནི་སྲིད་དུ་བརྗོད། །དེ་དང་རྩེ་མོ་མཚུངས་པར་ཤེས། །གུང་མོ་ནས་ཕྱེད་ཀྱིས་དམན་ལ། །མིང་མེད་སེན་
མོ་ཕྱེད་ཀྱིས་སོ། །མཐེབ་ཆུང་ཚིགས་པས་དམན་པའོ། །མཐེ་བོ་ཆེ་ཡི་ཞེང་དུ་ནི། །ནས་ནི་བཅུ་རུ་ཤེས་པར་བྱ། །མཐེབ་ཆེན་སོར་མོའི་རྩེ་མོ་ཡི། །བར་ལ་ནས་ནི་གསུམ་དུ་འགྱུར། །རྩེ་མོའི་ཞེང་ལ་ནས་དགུ་སྟེ། །ཕྱེད་བཅས་ནས་བརྒྱད་གུང་མོའོ། །མིང་མེད་ཞེང་དུ་ནས་བརྒྱད་དང་། །མཐེབ་ཆུང་ནས་
ནི་བདུན་རྣམས་སུ། །ཚད་ཀྱི་མཚན་ཉིད་དུ་ནི་གསུངས། །ཨ་འབྲས་གཞོན་ནུའི་དབྱིབས་འདྲ་བར། །མཐེ་བོ་ཆེ་ནི་རྟག་ཏུ་བྱ། །ཞབས་ཀྱི་བོལ་གོང་རུས་སྦལ་གྱི། །རྒྱབ་ཀྱི་རྣམ་པ་མཚུངས་པར་བྱ། །ཞབས་ཀྱི་སོར་མོའི་དབྱིབས་རྣམས་ནི། །ཆུ་སྐྱེས་པདྨ་འདྲ་བར་གྲགས། །ཞབས་ཀྱི་མཐིལ་དག་མཉམ་

203-1-13b

པར་བྱ། །སེན་མོའི་དབྱིབས་ནི་ཉ་ཕྱིས་བཞིན།།      །།དེ་ནས་གཞན་ཡང་བཤད་བྱ་བ། །ཡོངས་སུ་ཟླུམ་པོའི་མཚན་ཉིད་ནི། །སོར་མོ་སུམ་ཅུ་རྩ་གཉིས་ཀྱིས། །དབུ་ནི་ཡོངས་སུ་ཟླུམ་པར་ཤེས། །སོར་མོ་བཅོ་ལྔ་སུམ་འགྱུར་གྱིས། །དབུ་ནི་ཡོངས་སུ་ཟླུམ་པར་བྱ། །ཞེས་པའང་འབྱུང་ངོ་། །མཆན་འོག་
དག་གི་དབུས་ཀྱི་རྒྱར། །འདིར་ནི་སོར་མོ་ཉི་ཤུ་སྟེ། །སོར་གཉིས་བཅུ་དགུ་རྣམས་ཀྱི་ནི། །བློ་ལྡན་རྣམས་ཀྱིས་ཟླུམ་པོར་བྱ། །ལག་པའི་རྩ་བར་བར་དང་རྩེ། །སོར་མོ་བརྒྱད་དྲུག་བཞི་ཡིན་ཏེ། །རང་གི་རྒྱ་ཡི་ཚད་ཀྱི་ནི། །སུམ་འགྱུར་གྱི་ནི་ཟླུམ་པོར་བྱ། །ལྟོ་བ་རང་དབུས་རྒྱ་ལ་ནི། །སོར་མོ་བཅོ་ལྔར་ཤེས་པར་
བྱ། །འོག་ཏུ་སོར་མོ་བཅུ་དྲུག་སྟེ། །སོར་མོ་བཅོ་བརྒྱད་རྐེད་པ་ལ། །སོར་གཉིས་དྲུག་ནི་བརླ་ཡི་རྩར། །བྱིན་པའི་དབུས་སུ་སོར་མོ་དྲུག །བྱིན་པའི་མཐའ་མར་སོར་གཉིས་གཉིས། །ཕྱེད་བཅས་རྒྱ་རུ་རབ་ཏུ་སྦྱར། །དེ་རྣམས་ཀུན་ཀྱང་དེ་བཞིན་དུ། །ཟླུམ་པོ་སུམ་འགྱུར་ཉིད་དུ་བྱ། །དེ་བཞིན་སོར་མོ་
ཀུན་ཀྱང་ནི། །ཟླུམ་པོ་ཉིད་དུ་རིག་པར་བྱ། །དབུ་ཡི་རྒྱབ་ཕྱོགས་ལྟག་པ་ནི། །སོར་གཉིས་ཕྱི་རུ་ཕྱེད་པར་གྲགས། །རྒྱབ་ཀྱི་རྒྱུད་ནི་མཉམ་པར་བྱ། །ཕང་ཚོས་མཉམ་པར་འཕྱངས་པ་ལ། །བརླ་དང་རྐང་པ་བྱིན་པ་ཡང་། །སོར་མཉམ་བར་ནི་འཕྱང་བར་བྱ། །རྒྱབ་ཀྱི་མཚན་ཉིད་རེག་བྱ་བ། །དེ་ནི་བསྡུས་
པའི་དོན་གྱིས་བསྟན། །མུ་ཏིག་གསེར་གྱི་དོ་ཤལ་སོགས། །རྣ་རྒྱན་དཔུང་རྒྱན་ལག་གདུབ་དང་། །གོས་དང་ན་བཟའི་བཀོད་པ་ཡིས། །སྐུ་ཡི་གནས་ལ་བརྒྱན་པར་བྱ། །སྐུ་གཟུགས་ལྷག་དང་བཅས་པ་ཡི། །ཡོན་ཏན་སྐྱོན་རྣམས་བརྗོད་བྱ་སྟེ། །རིང་ཞིང་ཡངས་དང་ལྡན་གྱུར་ན། །གནས་རྣམས་ལེགས་པར་
བསྟན་པ་སྟེར། །དབུ་ནི་གདུགས་ཀྱི་དབྱིབས་ལྟ་བུས། །ནོར་བུ་འབྲུ་ནི་ལེགས་འཕེལ་སྟེར། །དཔྲལ་བ་སྨིན་མའི་དབྱིབས་ལེགས་པས། །རྟག་ཏུ་དཔལ་ནི་སྟེར་བར་འགྱུར། །པད་སྒྲོས་ནེ་ཚོའི་འདྲ་བ་ཡིས། །སྐྱེས་དགུ་བདེ་བཅས་རྒྱལ་བར་འགྱུར། །སྐུ་ནི་མགྲིན་པ་དུང་འདྲ་ན། །དངོས་གྲུབ་ཐམས་ཅད་རྟག་ཏུ་བྱེད། །
སྐུ་ནི་སེང་གེའི་དབྱིབས་འདྲ་བས། །ལོ་ལེགས་དང་ནི་སྟོབས་འཕེལ་འགྱུར། །ཕྱག་ནི་གླང་ཆེན་ལག་འདྲ་བས། །འདོད་པའི་དོན་ཀུན་སྒྲུབ་པར་བྱེད། །ཕྱལ་ལེགས་འབྲུ་རྣམས་ཕུན་ཚོགས་ཤིང་། །རྟག་ཏུ་ལོ་ལེགས་རྣམས་སུ་བྱེད། །བརླ་ཡི་ཆ་ནི་ལེགས་པར་འཕེལ། །བྱིན་པའི་དབྱིབས་ལེགས་གྲོང་རྣམས་

203-1-14a

འཕེལ། །སྐུ་ཡི་ཁབས་ནི་ལེགས་གྱུར་པས། །ཚུལ་ཁྲིམས་རིག་པ་རབ་ཏུ་འགྲུབ། །དེ་རྣམས་སྐུ་ཡི་བསྔགས་བརྗོད་ནས། །དམན་པས་ཡུལ་ཕྱོགས་ནོར་རྣམས་འཇོམས། །ཞེང་དང་སྲིད་དུ་དམན་པ་ཡིས། །མུ་གེ་དང་ནི་ཡུལ་འཇོམས་འགྱུར། །ལུས་དམན་གྱུར་པས་སྒུར་པོ་དང་། །ཤངས་
དམན་པས་ནི་ཁྲོ་བ་དང་། །གཡོན་མིག་ཕྱུགས་རྣམས་ཟད་བྱེད་ཅིང་། །སྟེང་མིག་ནོར་ནི་འཛད་པར་བྱེད། །མིག་ཆུད་མིག་ནི་ཟླུམ་པོ་དང་། །དེ་བཞིན་དུ་ནི་མིག་ཡོན་དང་། །མིག་དམན་པ་དང་འོག་མིག་རྣམས། །རིང་དུ་རྣམ་པར་རིག་པར་བྱ། །སྐུ་ཡི་ཕྱལ་ནི་དམན་གྱུར་ན། །འབྲུ་རྣམས་རྟག་ཏུ་ཉམས་པར་
བྱེད། །སྐུ་ཡི་བརླ་ནི་དམན་གྱུར་ན། །མ་ལ་གནས་བརྟན་ལྟུང་བར་འགྱུར། །ཤངས་དང་སྤྱན་དང་ཕྱག་སོར་གསུམ། །ཐུང་བ་རྣམས་ནི་ཉེས་པ་ཆེ། །མགྲིན་པ་ཀོས་ཀོ་རྗེ་ངར་གསུམ། །རིང་བ་རྣམས་ནི་ཉེས་པ་ཆེ། །དབུ་དང་སྙན་དང་ཤངས་དང་གསུམ། །ཕྲ་བ་རྣམས་ནི་ཉེས་པ་ཆེ། །དེ་ཕྱིར་སྐྱོན་ཡོན་ཤེས་བྱས་
ནས། །སྐུ་གཟུགས་རྣམ་པར་སྤྲོས་པར་བྱ། །སྲིད་དུ་མཐོ་དགུའི་ཚད་ཀྱིས་ནི། །ཡོངས་སུ་ཟླུམ་པོ་མཉམ་དུ་བྱ། །ཨཱ་ཏྲེ་ཡའི་ཐིག་ལེ་ཞེས་པ་ལས་མཐོ་དགུ་པའི་མཚན་ཉིད་དོ།།      །།ཡང་ན་ཞེང་ལ་ཕྱེད་བཅས་བརྒྱད། །ལྷ་རྣམས་དང་ནི་མི་རྣམས་ཀྱི། །མི་རྣམས་ལ་ནི་མཐོ་བརྒྱད་དང་། །མི་མོ་བརྒྱད་དང་བདུན་
ཡང་ཡིན། །དགེ་བ་དྲུག་བདུན་མཐོ་ཡིས་ནི། །ཡོངས་སུ་ཟླུམ་དང་དཔངས་སུ་མཐོ། །རྣམས་ཀྱི་མཚན་ཉིད་རྟགས་རྣམས་ནི། །ཇི་སྐད་གསུངས་བཞིན་དགོད་པར་བྱ། །ལྷ་མོ་རྣམས་ཀྱི་མཚན་ཉིད་ཀྱི། །སྲིད་དུ་གདོང་བརྒྱད་མཁས་པས་བྱ། །གདོང་ལ་སོར་དྲུག་གཉིས་སུ་བྱ། །ལུས་ལ་སོར་མོ་བཅུ་གཅིག་གིས། །
འཕྲེད་ལ་མགྲིན་ནས་ནུ་མ་དང་། །དེ་བཞིན་གཉིས་པོ་ནུ་རྩེའི་བར། །ཐམས་ཅད་གདོང་གི་ནང་ནས་ནི། །ལུས་ནི་རྣམ་པར་བརྗོད་པར་བྱ། །ཆུ་སོའི་དབུས་ནི་སོར་ལྔ་དང་། །སོར་མོ་བཅུ་རུ་ཤེས་པར་བྱ། །རྐེད་པ་སོར་མོ་ཉི་ཤུར་བྱ། །བརླ་ནི་སོར་མོ་བཅུ་གཅིག་དང་། །ཕུས་མོ་སོར་གསུམ་དེ་བཞིན་དུ། །རྗེ་ངར་སོར་མོ་
བཅོ་བརྒྱད་དོ། །ལོང་བུ་ལ་ནི་སོར་གཉིས་བྱ། །ལྷ་མོ་རྣམས་ཀྱི་མཚན་ཉིད་དགེ། །སོར་མོ་སུམ་ཅུ་རྩ་གསུམ་གྱིས། །དབུ་ནི་ཡོངས་སུ་ཟླུམ་པོར་བྱ། །ཕྱག་གི་རྩ་བ་སོར་ལྔ་ཡི། །སུམ་འགྱུར་གྱི་ནི་ཟླུམ་པོར་བྱ། །སོར་མོ་གསུམ་གྱིས་མཁྲིག་མའི་མཚམས། །དེ་བཞིན་དུ་ནི་ཟླུམ་པོར་བྱ། །བརླ་ཡི་དབུས་སུ་སོར་

203-1-14b

གཉིས་དྲུག །སུམ་འགྱུར་གྱིས་ནི་ཟླུམ་པོར་འགྱུར། །བྱིན་པའི་དབུས་སུ་སོར་མོ་ལྔ། །སུམ་འགྱུར་གྱིས་ནི་ཟླུམ་པོར་འགྱུར། །ཐམས་ཅད་དུ་ནི་སུམ་འགྱུར་ཏེ། །སོར་མོ་རྣམས་ཀྱང་དེ་བཞིན་ནོ། །མིག་གི་མཐའ་དང་མིག་དང་ནི། །ནུ་མ་དེ་བཞིན་རྐེད་པ་རྣམས། །ཅུང་ཟད་ཆ་ནི་ལྷག་ཏུ་བྱ། །སྐྱེ་བོ་བལྟ་ན་སྡུག་
པར་འགྱུར། །ཨཱ་ཏྲེ་ཡ་ཡི་ཐིག་ལེ་ལས། །མཐོ་བརྒྱད་ཀྱི་ནི་མཚན་ཉིད་དོ།།      །།དེ་ནས་གཞན་ཡང་བཤད་བྱ་བ། །བྱིས་པ་རྣམས་ཀྱི་མཚན་ཉིད་ནི། །ཡོན་ཏན་དྲུག་གི་བྱིས་གཟུགས་དང་། །དམག་དཔོན་ཡང་ནི་ཡོན་ཏན་དྲུག །ལོག་འདྲེན་གནོད་སྦྱིན་རྣམས་ཀྱི་ནི། །གཟུགས་བརྙན་ཚད་ཀྱི་མཚན་ཉིད་དོ། །
མགོ་ཡི་སྟེང་དུ་སོར་གཉིས་ཤེས། །གདོང་ནི་སོར་གཉིས་དྲུག་ཏུ་འགྱུར། །མགྲིན་པ་ལ་ནི་སོར་གཉིས་བྱ། །ལུས་ལ་སོར་མོ་ཉི་ཤུར་འགྱུར། །སོར་གསུམ་ཆ་ཡི་ལྟེ་བ་དང་། །ཟབས་སུའང་དེ་བཞིན་སོར་གསུམ་མོ། །བརླ་ནི་སོར་གཉིས་མདུན་དུ་བྱ། །པུས་མོ་དེ་བཞིན་སོར་གཉིས་སོ། །རྗེ་ངར་སོར་མོ་དྲུག་
ཏུ་བྱ། །ལོང་བུ་སོར་མོ་གཅིག་ཏུ་ཤེས། །རྟིང་པ་ལ་ནི་སོར་མོ་གསུམ། །ཇི་ལྟར་སྔོན་མའི་རིམ་པ་ཡིས། །རྐང་པའི་སྲིད་དུ་སོར་གཉིས་ལྔ། །མཐེ་བོང་ལ་ནི་སོར་གཉིས་ཏེ། །མཐེ་བོང་རྩེ་མོ་མཉམ་པར་བྱ། །ནས་ཀྱིས་དམན་པ་གུང་མོ་སྟེ། །སེན་མོས་དམན་པ་མིང་མེད་དོ། །མཐེབ་ཆུང་ནས་ཀྱིས་དམན་པའོ། །
སོར་མོ་བརྒྱད་ཀྱིས་མགྲིན་མཚམས་ནས། །དཔུང་ཆ་དེ་བཞིན་སོར་མོ་དགུ། །ལག་ངར་སོར་གཉིས་ལྔ་ཡིན་ཏེ། །ལག་པའི་སྲིད་དུ་སོར་གཉིས་གཉིས། །སོར་མོས་དམན་པ་མཛུབ་མོ་སྟེ། །མིང་མེད་གུང་མོའི་སེན་ཕྱེད་ཀྱི། །ཆ་ཡིས་དམན་པར་བྱ་བ་སྟེ། །མིང་མེད་ལ་ནི་ནས་ཀྱིས་དམན། །མཐེབ་ཆེན་མཐེབ་
ཆུང་སྲིད་དུའོ། །ཨཱ་ཏྲེ་ཡའི་ཐིག་ལེ་ཞེས་པ་ལས་མཐོ་བདུན་གྱི་མཚན་ཉིད་དོ།།      །།དེ་ནས་གཞན་ཡང་བཤད་བྱ་བ། །མཐོ་དྲུག་པ་ཡི་མཚན་ཉིད་ནི། །སོར་གཅིག་མགོ་བོའི་སྟེང་དུ་སྟེ། །ཡོན་ཏན་གསུམ་མགུར་ཟླུམ་པོར་བྱ། །སོར་གཉིས་དྲུག་ནི་གདོང་དབུས་ལ། །རྣ་བ་སྣ་རྩེ་དེ་བཞིན་དུ། །སོར་གཉིས་གསུམ་
ནི་མགྲིན་དབུས་ལ། །ལྟོ་དབུས་སོར་མོ་བཅུ་དྲུག་གོ། །ལུས་ལ་སོར་གཉིས་དྲུག་ཏུ་འགྱུར། །རྐེད་པ་སོར་གཉིས་བདུན་ཡིན་ནོ། །བརླ་དབུས་སོར་གཉིས་བཞི་ཡིན་ཏེ། །པུས་མོ་སོར་བཞི་ནས་དྲུག་གོ། །བྱིན་པའི་དབུས་ལ་སོར་མོ་ལྔ། །ལོང་བུ་དེ་བཞིན་སོར་མོ་གསུམ། །སོར་མོ་ལྔ་ཡིས་རྐང་པ་ཡི། །

203-1-15a

ཞེང་གི་ཚད་དུ་ཡོངས་སུ་གྲགས། །ནས་དགུ་ཡིས་ནི་མཐེབ་ཆེན་ཏེ། །དེ་བཞིན་བར་ནི་ནས་གསུམ་མོ། །ནས་བརྒྱད་ཀྱིས་ནི་རྩེ་མོ་བྱ། །ནས་བདུན་གྱིས་ནི་གུང་མོ་བྱ། །ནས་རྡོག་དྲུག་གིས་མིང་མེད་ལ། །མཐེབ་ཆུང་ལ་ནི་ནས་རྡོག་ལྔ། །དེ་བཞིན་དུ་ནི་མཁས་པ་ཡིས། །
རྐང་པའི་སོར་མོ་མཛེས་པ་དང་། །སོར་མོ་དེ་བཞིན་རྟིང་པའི་རྒྱ། །ཇི་སྐད་གསུངས་པ་བཞིན་དུ་བྱ། །ཨཱ་ཏྲེ་ཡའི་ཐིག་ལེ་ཞེས་པ་ལས་མཐོ་དྲུག་གི་མཚན་ཉིད་དོ།།      །།དེ་ནས་གཞན་ཡང་བཤད་བྱ་བ། །མཐོ་བཅུ་པ་ཡི་མཚན་ཉིད་ནི། །ཚངས་པ་ལྷ་མོ་ཙར་ཙི་ཀ །དྲང་སྲོང་བྲམ་
ཟེ་སྲིན་མོ་རྣམས། །གང་ཞིག་ལྷ་དང་སངས་རྒྱས་རྣམས། །བློ་དང་ལྡན་པས་སྐུ་གཟུགས་བྱ། །མཁས་པས་བརྩམ་བྱ་འདི་རྣམས་ཀྱི། །གཞན་རྣམས ཀྱིས་ཀྱང་དེ་བཞིན་བྱ། །གཙུག་ཏོར་ལ་ནི་སོར་བཞིར་འགྱུར། །བཞིན་ལ་དེ་བཞིན་སོར་གཉིས་དྲུག །མགྲིན་པ་སོར་མོ་བཞི་རུ་བྱ། །ལུས་ལ་སོར་མོ་སུམ་
ཅུ་དྲུག །དེ་བཞིན་དཔྱི་ལ་སོར་མོ་བཞི། །བརླ་ལ་སོར་མོ་སུམ་ཅུ་དྲུག །པུས་མོ་སོར་མོ་ལྔ་རུ་ཤེས། །རྗེ་ངར་སོར་མོ་སུམ་ཅུ་དྲུག །ལོང་བུ་སོར་མོ་གཉིས་སུ་ཤེས། །སོར་མོ་ལྔ་ཡིས་ཤིན་ཏུ་མཛེས། །འོག་གི་ཆ་ལ་རབ་ཏུ་བྱ། །སོར་གཉིས་དགུ་ཡིས་དེ་བཞིན་དུ། །དཔུང་པའི་ཆ་ལ་རབ་ཏུ་
བྱ། །མགྲིན་མཚམས་བྲང་ཞོལ་རྩེ་དེ་བཞིན། །སོར་གཉིས་བཅུ་རུ་ཤེས་པར་བྱ། །དཔུང་པ་ལ་ནི་སོར་གཉིས་གསུམ། །དེ་བཞིན་ལག་དར་སོར་མོ་བརྒྱད། །ལག་པའི་ཡལ་ག་བླང་བ་ནི། །སོར་མོ་བདུན་དུ་ཤེས་པར་བྱ། །ཇི་ལྟར་མཛེས་པར་བྱ་བ་ནི། །ཤ་ཡི་འཁྱིལ་བག་རྣམས་སུ་
ཤེས། །ཨཱ་ཏྲེ་ཡའི་ཐིག་ལེ་ཞེས་པ་ལས་མཐོ་བཅུའི་མཚན་ཉིད་དོ།།      །།ཡང་དག་ཐུབ་པ་རྣམ་པར་ནི། །ཐུང་ངུའི་ཚད་དུ་གསུངས་པ་ཡི། །སྐུ་གཟུགས་ཆེན་པོའི་བཀོད་པ་སྟེ། །རབ་ཏུ་བཤད་བྱ་ད་ནི་ཉོན། །ཁྲུ་ནི་བཅོ་ལྔ་ལྷག་པ་ཡང་། །སྐུ་གཟུགས་ཆུང་ངུར་ཤེས་པར་བྱ། །བར་
མ་ཉིས་འགྱུར་དག་ཏུ་ཤེས། །ཆེན་པོ་རྣམས་ནི་སུམ་འགྱུར་རོ། །གལ་ཏེ་བདག་ཉིད་དག་འདོད་ནི། །དེ་ལས་གཞན་པས་མི་བྱ་སྟེ། །སྐུ་ནི་ཚར་བ་མི་སྟེར་དང་། །ཡང་ན་ནོར་རྣམས་ཟད་པར་བྱེད། །སྐུ་ནི་ཆག་པས་རིགས་ཉམས་ཤིང་། །གས་པས་ཕྱོགས་རྣམས་འཁྲུག་པར་བྱེད། །སྐུའམ་

203-1-15b

གལ་ཏེ་ལིང་ག་དང་། །ལྷ་མོ་མ་མོའི་ཚོགས་དེ་བཞིན། །གོ་ཆའི་ལས་ནི་བལྟ་བྱས་ནས། །མྱུར་དུ་དེ་རྣམས་གཤེགས་པར་བྱ། །མེ་ཏོག་མཆོད་ཡོན་དེ་བཞིན་དུ། །སྤོས་དང་ཞལ་ཟས་གཏོར་མ་དང་། །གོས་ལ་སོགས་པ་དབུལ་བྱ་ཞིང་། །དེ་བཞིན་སྦྱིན་སྲེག་ལས་བྱས་ནས། །དགེ་དང་ཞི་བའི་ཆུ་བོ་
ལ། །ལྷ་ཡི་སྔགས་ནི་བཟླས་བྱས་ནས། །སྐྲ་དང་ཐག་པ་མུན་ཛ་དང་། །ཟར་མ་དུ་ཀ་ལ་དེ་བཞིན། །ཆོ་ག་བཞིན་དུ་བལྟས་ནས་ནི། །ཐག་པ་ཡིས་ནི་བཅིང་བར་གསུངས། །ཁྱུ་མཆོག་སྟེང་དུ་བཅིངས་ནས་ནི། །ལྷ་རྣམས་རྙིང་པ་སྤྱན་དྲངས་ལ། །གོས་ཀྱི་རང་བཞིན་སྐུ་གཟུགས་ནི། །ཆུ་བོ་ཆེན་པོའི་འགྲམ་
དག་དང་། །དེ་བཞིན་གཙང་པོ་འདུས་རྣམས་ལ། །དེ་རུ་དེ་བཞིན་འཕང་བར་བྱ། །གསེར་དང་དངུལ་དང་དེ་བཞིན་དུ། །ཟངས་དང་ར་གན་རང་བཞིན་ཡང་། །གལ་ཏེ་བདག་ཉིད་དཔལ་འདོད་ན། །ཀུན་ཀྱང་མེ་ལ་གཞུ་བར་བྱེ། །ཤིང་གི་རང་བཞིན་ལས་གྱུར་སྐུ། །དེ་བཞིན་གོས་ཀྱིས་ཡོངས་དྲིལ་ནས། །སྣུམ་དང་
སྦྲང་གིས་བརླན་བྱས་ལ། །སྒྲོན་མེ་ཡིས་ནི་སྦར་བར་བྱ། །ས་རྡོ་རང་བཞིན་ལས་བྱུང་སྐུ། །རི་བོའི་ཕྱོགས་གྱུར་གང་ཞིག་ཏུ། །ས་ནི་མི་གང་ཙམ་བརྐོས་ནས། །སྐྲུ་གཟུགས་སྦས་ཏེ་དགང་བར་བྱ། །སྐུ་གཟུགས་རྙིང་པ་གཤེགས་བྱ་བ། །བདག་ཉིད་ཆེན་པོ་རྣམས་ཀྱིས་བྱ། །དུས་ནི་བྱེ་བ་སྟོང་རྣམས་སུ། །ལྷ་ཡི་
འཇིག་རྟེན་རྣམས་ཀྱིས་མཆོད། །ཨཱ་ཏྲེ་ཡའི་ཐིག་ལེ་ཞེས་པ་ལས་རྙིང་པ་གཤེགས་སུ་གསོལ་བའི་མཚན་ཉིད་དོ། །དྲང་སྲོང་ཆེན་པོ་ཨཱ་ཏྲེའི་བུས་མཛད་པའི་སྐུ་གཟུགས་ཀྱི་ཚད་ཀྱི་མཚན་ཉིད་རྫོགས་སོ།།      །།མཁས་པ་དྷརྨ་དྷ་ར་དང་། །སྒྲ་བསྒྱུར་གྲགས་པ་རྒྱལ་མཚན་གྱིས། །སྐུ་གཟུགས་ཆག་
ཚད་མཚན་ཉིད་ཀྱི། །སྒྲ་དོན་ལེགས་པར་བསྒྱུར་བ་ཡིན།།      ༄། །གྲུབ་ཐོབ་བརྒྱད་ཅུའི་མངོན་པར་རྟོགས་པ་བཞུགས།༄༅༅། །ཐམས་ཅད་མཁྱེན་པ་ལ་ཕྱག་འཚལ་ལོ། །ལཱུ་ཡི་པ་དུ་བའི་མདོག་ཅན། སྐྱེས་པ་དང་ལྷན་ཅིག་པའོ། །ལིང་པ་པ་མདོག་སེར་པོ་བུད་མེད་
དང་ལྷན་ཅིག་པའོ། །ཀུ་བི་རཱུ་པ་མདོག་དཀར་པོ་བུད་མེད་དང་ལྷན་ཅིག་པའོ། །ཌེང་གི་པ་མདོག་སེར་པོ་བུད་མེད་དང་ལྷན་ཅིག་པའོ། །ཀླུ་སྒྲུབ་ཞབས་གུར་གུམ་གྱི་མདོག་ཅན་བུད་མེད་དང་ལྷན་ཅིག་པའོ། །ཀ་ཁ་ཡ་ལ་པ་ཁ་དོག་དཀར་པོ་སྐྱེས་པ་དང་ལྷན་ཅིག་པའོ། །མཚོ་སྐྱེས་རྡོ་རྗེ་མདོག་སེར་པོ་ཞབས་

203-1-16a

གཡོན་ཕྱེད་ཀྱི་སྐྱིལ་ཀྲུང་གི་གར་ཅན་བུད་མེད་དང་ལྷན་ཅིག་པའོ། །ཟ་ཉལ་འཆག་མདོག་སྔོ་ལྗང་དགེ་སློང་གི་གཟུགས་སྐྱེས་པ་དང་ལྷན་ཅིག་པ། ས་ར་ཧ་པ་མདོག་སེར་པོ་བསམ་གཏན་གྱི་ཕྱག་རྒྱ་ཅན་བུད་མེད་དང་ལྷན་ཅིག་པ། རི་ཁྲོད་པ་དུ་བའི་མདོག་ཅན་སྐྱེས་པ་དང་ལྷན་ཅིག་པ། 
སྒེག་པའི་རྡོ་རྗེ་མདོག་སེར་པོ་རྡོ་རྗེ་དྲིལ་བུའི་ཕྱག་རྒྱ་ཅན་བུད་མེད་དང་ལྷན་ཅིག་པ། དཱ་རི་ཀ་པ་མདོག་སེར་པོ་སྐྱེས་པ་དང་ལྷན་ཅིག་པ། ཡེ་ཤེས་ཞབས་དགེ་སློང་ཁ་དོག་དཀར་པོ་སྐྱེས་པ་དང་ལྷན་ཅིག་པའོ། །ཨུཎྜ་ཏ་པ་ནག་པོ་བུད་མེད་དང་ལྷན་ཅིག་པ། ཐིག་པ་སེར་པོ་བུད་མེད་དང་ལྷན་ཅིག་པ། པདྨ་རྡོ་རྗེ་
དཀར་ཤམ་ཞབས་གཡས་བརྐྱང་གཡོན་ཕྱེད་སྐྱིལ་ཀྲུང་གི་གར་གྱིས་བཞུགས་པ་བུད་མེད་དང་ལྷན་ཅིག་པ། དབྱིག་གཉེན་རྫ་གསར་པའི་མདོག་ཅན་དགེ་སློང་ཆོས་ཀྱི་འཁོར་ལོའི་ཕྱག་རྒྱ་ཅན་སྐྱེས་པ་དང་ལྷན་ཅིག་པ། ཛཱ་ལནྡྷ་ར་པ་རོ་གཉེར་བ་དང་མཚུངས་པ་གར་གྱི་ཞབས་ཅན་བུད་མེད་དང་ལྷན་ཅིག་པ། ཆོས་
ཀྱི་གྲགས་པ་གུར་གུམ་གྱི་མདོག་ཅན་དགེ་སློང་གི་དགེས་པ་སྐྱེས་པ་དང་ལྷན་ཅིག་པ། བུབ་སེར་པོ་བུད་མེད་དང་ལྷན་ཅིག་པ། ཀ་ཤི་རི་པ་བཞེངས་པའི་གུར་གུམ་གྱི་མདོག་ཅན་བུད་མེད་དང་ལྷན་ཅིག་པ། ཏོག་ཙེ་བ་ལྗང་གུ་སྐྱེས་པ་དང་ལྷན་ཅིག་པ། ཨིན་དྲ་བྷཱུ་ཏི་པ་རྒྱལ་པོའི་འགྱིང་བག་གིས་བཞུགས་པ་སྔོ་ལྗང་བུད་
མེད་དང་ལྷན་ཅིག་པ། ཀླུའི་བྱང་ཆུབ་ཙོག་པུས་གནས་པ་སྤྱི་བོར་ཕིགས་སྒྲའི་ཕྱག་རྒྱ་ཅན་ནག་པོ་པ་སྐྱེས་པ་དང་ལྷན་ཅིག་པའོ། །འོད་མཛད་ཞབས་རྫ་གསར་གྱི་མདོག་ཅན་རལ་གྲི་བསྣམས་པ་བུད་མེད་དང་ལྷན་ཅིག་པ། མ་ག་ན་ཌི་པ་སྔོ་ལྗང་སྐྱེས་པ་དང་ལྷན་ཅིག་པ། ཌོམ་བི་བ་དཀར་ཤམ་སྟག་གི་སྨད་སྟེང་ན་
གནས་པ་བུད་མེད་དང་ལྷན་ཅིག་པ། ཐོད་པ་ཅན་དཀར་ཤམ་སྐྱེས་པ་དང་ལྷན་ཅིག་པ། ལ་བ་པ་ལ་བ་བསྣམས་པ་རྫ་གསར་གྱི་མདོག་ཅན་བུད་མེད་དང་ལྷན་ཅིག་པ། ཏཻ་ལོ་པ་ནག་པོ་བུད་མེད་དང་ལྷན་ཅིག་པ། མར་མེ་མཛད་དཀར་ཤམ་གཞོན་ནུའི་ཆ་བྱད་ཅན་བུད་མེད་དང་ལྷན་ཅིག་པའོ། །དགེ་བསྙེན་ཟླ་བ་སྔོ་ལྗང་པོ་ཏིའི་
ཕྱག་རྒྱ་ཅན་བུད་མེད་དང་ལྷན་ཅིག་པའོ། །ར་པུ་ཏ་ནག་པོ་སྐྱེས་པ་དང་ལྷན་ཅིག་པ། དགའ་བའི་རྡོ་རྗེ་སྐྱེས་པ་དང་ལྷན་ཅིག་པ། ཀ་དོ་ལ་པ་ཕྱག་སློང་བའི་སྣོད་ཅན་སྐྱེས་པ་དང་ལྷན་ཅིག་པ། ལྤགས་ལྷམ་མཁན་དཀར་པོ་བུད་མེད་དང་ལྷན་ཅིག་པ། པ་ག་ལ་པ་ནག་པོ་བཞེངས་པ་ཕྱག་ན་བུམ་པ་བསྣམས་པ་སྐྱེས་པ་

203-1-16b

དང་ལྷན་ཅིག་པ། བ་སུ་བནྡྷ་བ་གཡས་པས་རླུང་གཡབ་གཡོན་པས་བུམ་པ་བསྣམས་པ་རྫ་གསར་པ་ལྟ་བུ་བུད་མེད་དང་ལྷན་ཅིག་པ། ཙ་བི་ཌཱི་བ་གུར་གུམ་གྱི་མདོག་ཅན་འཇར་ཁྱིམ་དང་རས་བསྣམས་པ་སྔོ་ལྗང་བུད་མེད་དང་ལྷན་ཅིག་པ། དམ་ཚིག་རྡོ་རྗེ་བདུད་རྩིའི་ཐོད་པ་བསྣམས་པ་སྔོ་ལྗང་བུད་མེད་
དང་ལྷན་ཅིག་པ། ཅེ་སྤྱང་ཞབས་རྫ་གསར་གྱི་མདོག་ཅན་སྐྱེས་པ་དང་ལྷན་ཅིག་པ། ཀ་ར་ན་པ་སྔོ་ལྗང་བུད་མེད་དང་ལྷན་ཅིག་པ། དྷ་མུ་པ་ཕྱག་ན་རྔ་འཛིན་པ་ནག་པོ་སྐྱེས་པ་དང་ལྷན་ཅིག་པ། དྷ་མ་པ་སེར་པོ་བེ་ཞེངས་པ་བུད་མེད་དང་ལྷན་ཅིག་པ། ཀུ་མཱ་རི་པ་ག་ནུའི་གཟུགས་དང་ཁ་དོག་ཅན་བུད་མེད་དང་ལྷན་
ཅིག་པ། བནྡྷེ་བ་རུས་པའི་རྒྱན་ཆ་ཅན་ཕྱག་ན་གྲི་གུག་དང་ཐོད་པ་བསྣམས་པ་གར་གྱི་ཞབས་ཅན་བུད་མེད་དང་ལྷན་ཅིག་པ། ཀུ་བ་ཇི་བ་གུར་གུམ་གྱི་མདོག་ཐོད་པ་བསྣམས་པ་སྐྱེས་པ་དང་ལྷན་ཅིག་པ། རིན་ཆེན་མྱུ་གུ་རིན་པོ་ཆེའི་ཕུར་མ་བསྣམས་པ་སྔོ་ལྗང་བུད་མེད་དང་ལྷན་ཅིག་པ། རལ་གྲི་གྲུབ་པ་ནག་པོ་རལ་
གྲི་དང་ལྷུང་བཟེད་ཀྱི་ཕྱག་རྒྱ་ཅན་འགྲེང་བ་སྐྱེས་པ་དང་ལྷན་ཅིག་པ། དྷ་ཀི་པ་རྫ་གསར་གྱི་མདོག་ཅན་རྫ་རྔ་བཟུང་བ་བུད་མེད་དང་ལྷན་ཅིག་པ། ཀུ་མ་རུ་པ་གར་གྱི་ཞབས་ཅན་དཀར་པོ་སྐྱེས་པ་དང་ལྷན་ཅིག་པ། ཊེན་ཊ་ན་པ་སེར་པོ་རྩྭ་ཕད་བཟུང་བ་བུད་མེད་དང་ལྷན་ཅིག་པ། སྤྱོད་པ་པ་གུར་གུམ་གྱི་མདོག་ཅན་
འགྲེང་བ་བུད་མེད་དང་ལྷན་ཅིག་པ། ཀོ་བླས་མཁན་ལག་ཤ་བཟུང་བ་སྐྱེས་པ་དང་ལྷན་ཅིག་པ། ཀུན་ཟ་ཞབས་གུར་གུམ་གྱི་མདོག་ཅན་བུད་མེད་དང་ལྷན་ཅིག་པ། དི་པཱ་ཀ་རི་ཏི་པ་སེར་པོ་ཐལ་མོ་སྦྱར་བ་སྐྱེས་པ་དང་ལྷན་ཅིག་པ། བཞི་གཏུམ་ནག་པོ་བུད་མེད་དང་ལྷན་ཅིག་པ། དགེ་སློང་འདུན་
སྐྱོང་རྫ་གསར་གྱི་མདོག་ཅན་སྐྱེས་པ་དང་ལྷན་ཅིག་པ། ཁྲུས་མཁན་གུར་གུམ་མདོག་ཅན་བུད་མེད་དང་ལྷན་ཅིག་པ། དྷོ་ཀི་ཌི་པ་སེར་པོ་བུད་མེད་དང་ལྷན་ཅིག་པ། བེ་སྣ་སྔོ་ལྗང་བུད་མེད་དང་ལྷན་ཅིག་པ། དབྱུག་པ་པ་སེར་པོ་བུད་མེད་དང་ལྷན་ཅིག་པ། ཡན་ལག་མེད་པའི་རྡོ་རྗེ་སེར་པོ་ཁྲོ་བོའི་ཞབས་མཚན་
མ་འགྲེང་བ་རྡོ་རྗེ་དྲིལ་བུའི་ཕྱག་རྒྱ་ཅན་རུས་པའི་རྒྱན་ཅན་བུད་མེད་དང་ལྷན་ཅིག་པ། འཕགས་པའི་ལྷ་འགྲེང་བ་དགེ་སློང་གི་རང་བཞིན་སྐྱེས་པ་དང་ལྷན་ཅིག་པ། ལ་བ་པ་གུར་གུམ་གྱི་མདོག་ཅན་མཉམ་གཞག་གི་ཕྱག་རྒྱ་ཅན་བུད་མེད་དང་ལྷན་ཅིག་པ། ཐག་པ་མཁན་དཀར་ཤམ་ཞབས་འཁྲིལ་བ་བུད་མེད་

203-1-17a

དང་ལྷན་ཅིག་པ། ས་ར་ཧ་ནག་པོ་འགྲེང་བ་ཕྱག་ན་མདའ་གཞུ་བསྣམས་པ་སྐྱེས་པ་དང་ལྷན་ཅིག་པ། དཔལ་འཛིན་ཞབས་ཆོས་ཀྱི་འཁོར་ལོའི་ཕྱག་རྒྱ་ཅན་བུད་མེད་དང་ལྷན་ཅིག་པ། ཙ་ཏྲ་ལི་པ་གུར་གུམ་གྱི་མདོག་བཞེངས་པ་བུད་མེད་དང་ལྷན་ཅིག་པ། ཀོ་ཀི་ལི་པ་རྫ་གསར་གྱི་
མདོག་ཅན་འགྱིང་ཆ་གནས་པ་བུད་མེད་དང་ལྷན་ཅིག་པ། དྲིལ་བུ་པ་གུར་གུམ་གྱི་མདོག་ཅན་ཕྱག་ན་རྡོ་རྗེ་དྲིལ་བུ་བསྣམས་པ་རྟགས་ལངས་པ་ཞབས་གཡས་བརྐྱང་བ་གཡོན་བསྐུམ་བུད་མེད་དང་ལྷན་ཅིག་པ། ནཱ་རོ་པ་མདོག་སྔོ་ལྗང་བུད་མེད་དང་ལྷན་ཅིག་པ། ཁྱི་མོ་ཅན་བཞེངས་པ་མེ་ལོའི་མདོག་ཅན་བུད་
མེད་དང་ལྷན་ཅིག་པ། རིན་ཆེན་འབྱུང་གནས་ཞི་བ་དགེ་སློང་སེར་པོ་ཕྱག་ན་པོ་ཏི་བསྣམས་པ་སྐྱེས་པ་དང་ལྷན་ཅིག་པ། ཀ་ར་ལི་པ་སེར་པོ་གར་གྱི་ཞབས་ཅན་བུམ་པ་བསྣམས་པ་བུད་མེད་དང་ལྷན་ཅིག་པ། མཁའ་མཁན་སེར་པོ་ཕྱག་ན་རྡོ་རྗེ་དྲིལ་བུ་བསྣམས་ཤིང་གློག་ལ་སྡིགས་མཛུབ་བྱེད་པ་བུད་མེད་དང་
ལྷན་ཅིག་པ། ཁནྡ་རི་པ་མེ་ཏོག་ཀུ་སུམ་པའི་མདོག་ཅན་བྱའི་ཚོགས་སུ་སྤྲོ་བ་སྐྱེས་པ་དང་ལྷན་ཅིག་པ། གཡུང་པོ་མེ་ལོའི་མདོག་ཅན་ལངས་པ་འབར་བ་ཐོགས་པ་བུད་མེད་དང་ལྷན་ཅིག་པ། བྱི་ལ་ཅན་མེ་ལོའི་མདོག་ཅན་བུད་མེད་དང་ལྷན་ཅིག་པ། ཀ་ན་པ་རྣལ་འབྱོར་མ་སེར་མོ་གར་ཕྱག་དང་ཐོད་པ་འཛིན་
པ་སྐྱེས་པ་དང་ལྷན་ཅིག་པ། རྣལ་འབྱོར་མ་མེ་ལ་ཁ་ལ་མེ་ལོའི་མདོག་ཅན་རྡོ་རྗེ་དང་དྲིལ་བུ་འཛིན་པའི་ཕྱག་རྐེད་པར་གནས་པ་བུད་མེད་དང་ལྷན་ཅིག་པ། རྣལ་འབྱོར་མ་གྲུབ་པ་ཅན་དཔལ་མོ་སྔོ་ལྗང་ཞབས་གཡས་བསྐུམ་པ་གཡོན་བརྐྱང་བ་མི་རོའི་སྟན་ལ་གནས་པ་ཕྱག་ན་རྡོ་རྗེ་དྲིལ་བུ་འཛིན་པས་རིག་མ་ལ་འཁྱུད་པ་
རུས་པའི་རྒྱན་ཅན་བུད་མེད་དང་ལྷན་ཅིག་པ། ནཱི་ལོ་པ་སྔོན་པོ་མོལ་པའི་ཕྱག་རྒྱ་ཅན་སྐྱེས་པ་དང་ལྷན་ཅིག་པ། ཡེ་ཤེས་མྱུ་གུ་དཀར་པོ་མི་འཇིགས་པའི་ཕྱག་རྒྱ་ཅན་བུད་མེད་དང་ལྷན་ཅིག་པ། རང་རང་གི་ལས་དང་རྗེས་སུ་མཐུན་པའི་ཚུལ་འཛིན་པ་བཅུ་ཕྲག་བརྒྱད་དང་བཞིའི་གོ་རིམས་རྫོགས་སོ།།      །།
མི་ཕམ་ཟླ་བ་དང་། བྷ་བ་བྷ་ཊ་བ་དང་། དགེ་བའི་གོ་ཆ་དང་། གནས་བཞིའི་གྲུབ་ཐོབ་དང་བཅས་པ་བལ་པོའི་ཡུལ་གྱི་བུ་ལོན་ཁོད་པ་སྙམ་ནས་ལོ་ཉིས་བརྒྱ་དགུ་བཅུ་རྩ་གཅིག་ན། ཝ་ཟླའི་ནག་པོ་ཕྱོགས་ཀྱི་ཚེས་དྲུག་གི་ཉིན་པར་སྐར་མ་ལག་ལ་དགེ་སློང་དཔལ་སྡེས་སེམས་ཅན་ཐམས་ཅད་ཀྱི་དོན་དུ་བྲིས་པའོ།།      །།

203-1-17b

༄༅༅། །རྒྱ་གར་སྐད་དུ། སརྦེ་ཤྭ་ར་རས་ཡཱ་ན་རོ་ག་ཧ་རི་ས་རཱི་པུཥྚི་ཀ་ར་ནཱ་མ། བོད་སྐད་དུ། ཐམས་ཅད་ཀྱི་དབང་ཕྱུག་གི་བཅུད་ལེན་ནད་ཐམས་ཅད་འཇོམས་ཤིང་ལུས་ཀྱི་སྟོབས་རྒྱས་པར་བྱེད་པ་ཞེས་བྱ་བ། ཐམས་ཅད་མཁྱེན་པ་ལ་ཕྱག་འཚལ་ལོ། །དང་པོ་དངུལ་ཆུ་སྦྱང་བའི་དོན་དུ་སོ་ཕག་གི་ཕྱེ་མ་
དང་སྦྱར་ལ་ལན་བདུན་གྱི་བར་དུ་བཏག་ཅིང་སྦྱང་བར་བྱའོ། །དེའི་སྐབས་སུ་ཡང་ཉི་མ་ལ་བདུག་པར་བྱའོ། །ཤིང་ཨ་ཀོན་གྱི་འོ་མས་ལན་བདུན་གྱི་བར་དུ་བཏག་ཅིང་སྦྱང་བར་བྱའོ། །དེའི་སྟབས་སུ་ཡང་ཉི་མ་ལ་བདུག་པར་བྱའོ། །ཡང་ཤིང་བེ་འུན་གྱི་འོ་མས་སྔར་བཞིན་ནོ། །ཀནྟི་ཞེས་བྱ་བའི་ཤིང་ཚེར་མ་ཅན་གྱི་ཁུ་བས་སྔར་བཞིན་
ནོ། །ཀུ་མཱ་རའི་ཁུ་བས་སྔར་བཞིན་ནོ། །ཙི་ཏྲའི་ཁུ་བས་སྔར་བཞིན་ནོ། །མཛེ་ཚའི་ཁུ་བས་སྔར་བཞིན་ནོ། །སྨན་དེ་རྣམས་བཀྲུས་ཤིང་དངུལ་ཆུ་བཟུང་ངོ་། །ལིང་གི་ཞེས་བྱ་བའི་སྨན་འདབ་མ་གསུམ་པ། རོ་ཚ་མེ་ཏོག་མེད་པ། སྡོང་བུ་མཐོ་གང་ཙམ་ཡོད་པའི་ཁུ་བ་བླུགས་ནས་བཏགས་པས་སྐམ་ཞིང་སྐུད་པ་ལྟར་དྲང་དུ་འདོད་
པར་འགྱུར་རོ། །ཟངས་སྦྱོང་བར་འདོད་པས་སྲབ་མོར་བྱས་ལ་སྐྱུར་པོའི་ནང་དུ་ཞག་བདུན་གྱི་བར་དུ་སྦང་ངོ་། །དར་བའམ་ཆུར་ཁུ་ལ་ཡང་དེ་བཞིན་ནོ། །ལེགས་པར་བཀྲུ་བར་བྱའོ། །དེ་ནས་ཟངས་དང་མུ་ཟི་མཉམ་པར་བྱས་ལ་རྫ་གོང་ནང་དུ་དུ་བ་མི་འཆོར་བར་བྱའོ། །དངུལ་ཆུ་ལྟ་བུར་དཀར་པོར་འགྱུར་རོ། །གཤའ་ཚེ་སྦྱོང་བ་ལ་བོང་གི་ཁུ་
བས་སྔར་བཞིན་ནོ། །ལྕགས་གསད་པར་འདོད་པས་བའི་ཆུ་ལ་འབྲུ་གསུམ་བཏབ་ལ་སྲབ་མོར་བྱས་ལ་གཞུག་གོ། །བཅུག་པ་ནི་བསྲེགས་པས་སོ། །ཕྱི་ནས་ཡང་འབྲུ་གསུམ་བཅུག་ལ་ཟངས་བཞིན་ནོ། །ལྷང་ཚེར་གསད་པར་འདོད་པས་ཞིབ་ཏུ་བཏགས་ལ་སྐྱུར་པོར་བཅུག་ལ་ཟངས་བཞིན་ནོ། །ཨ་ར་དྷེའི་ལོ་མ་ནི་གཉེན་པོ་ཡིན་ཏེ་ཟངས་
བཞིན་ནོ། །བའི་ལྕི་བས་ཁ་མནན་པར་བྱའོ། །རྡོ་ཕ་ཝང་གསད་པར་འདོད་པས། ཀྵི་རི་ཀ་ན་ཏའི་ལོ་མས་ཉི་མ་ལ་ལན་བདུན་བདུག་པར་བྱའོ། །མར་ཁུ་ཚན་དེ་བཅུག་པ་སྔར་གྱི་ཟངས་བཞིན་ནོ། །དཀར་པོར་སོང་བ་ནི་འབྱེད་པའོ། །དངུལ་སྦྱང་བར་འདོད་པས་ནི་ར་བ་སིའི་ཁུ་བས་ལན་བདུན་གྱི་བར་དུ་ལྕགས་བཞིན་དུ་གསད་པར་བྱའོ། །ཇི་
ལྟར་དངུལ་ཆུ་གསད་པ་བཞིན་དུ་བི་མ་ལ་ཡང་གསད་པར་བྱའོ། །གསེར་སྦྱོང་བར་འདོད་པས་ཀ་ཙ་ནའི་བ་ཇི་ལྟར་ཟངས་གསོད་པ་བཞིན་བྱའོ། །ཇི་ལྟར་གསེར་གསོད་པ་བཞིན་སུ་བ་ཀི་ཏ་ཡང་དེ་བཞིན་ནོ། །དེ་ལྟར་སྦྱངས་པ་ཐམས་ཅད་ཆ་མཉམ་པར་བྱས་ལ། ཨ་བ་ནི་ཆ་གསུམ་མོ། །དེ་ལྟར་ཐམས་ཅད་ཞིབ་ཏུ་བཏགས་ལ་གོང་བུར་བྱའོ། །

203-1-18a

ནད་པ་ལ་ར་ཏི་བཞི་བཞི་བྱིན་ན། ནད་ཐམས་ཅད་འཕྲོག་གོ། །སྐྱུར་པོ་དང་སྔོ་སྤང་ངོ་། །ཕྱེ་དང་ཁུར་བ་ཡང་སྤང་ལ། ར་ཏི་བཞི་བཞི་ཟླ་བ་དྲུག་ཏུ་ཟོས་ན། སྐྲ་དཀར་དང་གཉེར་མ་སྤོང་ཞིང་། ཚེ་ཉི་ཟླ་དང་མཉམ་མོ། །མཚོན་གྱིས་མི་ཆོད་ཅིང་བུད་མེད་ལ་ཁུ་བ་འཕྲོ་བར་མི་འགྱུར་རོ། །ཟླ་བ་
དྲུག་གི་བར་དུ་གྲུ་ལ་ཕྱིན་ན་འབྱིངས་པ་བསྲུང་ངོ་། །དབང་ཕྱུག་གིས་བསྟན་པའི་རིན་པོ་ཆེའི་བཅུད་ལེན་གྲུབ་པ་རྫོགས་སོ།།      །།ཧ་རི་དྷོ་བར་གྱི་རྣལ་འབྱོར་པ་ཤི་བ་དཱ་ཤ་དང་། ཨུ་རྒྱན་པས་པུ་ཏྲར་བསྒྱུར་བའོ།།      ༄། །སྤོས་ཀྱི་སྦྱོར་བ་རེའུ་ཆར་བྱས་བ་བཞུགས། ༄༅༅། །དཀོན་
མཆོག་གསུམ་ལ་ཕྱག་འཚལ་ལོ། །ཨ་ཀར་པ་ཏྲ་ཏུ་རུས་རྡོ་དྲེགས་པྲི་ཡང་གླ་སྒང་སྤྲ་ཚིལ་བ་ལེ་ཀ །པྲི་ཀ་ཤིང་ཚ་རྒྱ་སྤོས་སྤང་སྤོས་ཙན་དན་སེན་མོ་ཐང་ཆུ་ཀུན་ཏུར་རྣམས། །སྦྱོར་བ་སྤོས་རྒྱལ་གླ་རྩི་ག་པུར་དག་གིས་གསོ་ཞིང་བདུག་པ་མཆོག་གིས་བདུག །མེ་ཏོག་ཞིམ་པོས་བསྒོ་བ་གྱིས་དང་དྲི་སྦྱར་
མཆོག་ཏུ་འདི་འགྱུར་ལུས་མཆོག་མ། །ཤིང་ཆ་ཨ་ཀར་པ་ཏྲ་བྲི་ཀ་ཏུ་རུས་སྤང་སྤོས་རྒྱ་སྤོས་རྡོ་དྲེགས་དང་། །ཀུན་དུ་གན་དྷ་བ་ལིག་ཐང་ཆུ་པྲི་ཡང་སེན་མོ་ཙན་དན་གླ་སྒང་རྣམས། །གོ་རིམས་བཞིན་དུ་ཆ་རེ་བསྐྱེད་ཅིང་དྲིའི་སྦྱོར་བ་བརྒྱད་པ་ཕྲག་གཉིས་དང་། །བཞི་པའི་སྦྱོར་བའང་ཉི་ཤུ་ལས་ནི་གཉིས་
ཀྱིས་ཉུང་བར་གྱིས་ཤིག་འཛངས་མ་མོ། །ཨ་ཀར་ཀུན་ཏུར་ཏུ་རུས་གན་དྷ་ཐང་ཆུ་པྲི་ཡང་ཙན་དན་གནས་རྣམས་སུ། །སུག་སྨེལ་པ་མུ་རུ་རྟ་བྱ་ཀུ་རེའུ་མིག་ཙོ་ར་གཞག་བྱ་ཞིང་། །ཤིང་ཚའི་གནས་སུ་གྲན་ཏི་བཞག་ཅིང་དེ་ཡི་ཆ་ལས་གསུམ་དུ་བསྒྱུར་བྱས་ཏེ། །དེ་དག་སྦྱོར་བ་དེ་ལྟར་བྱས་པས་ཁྲུས་
ཀྱི་ཆོ་གའི་སྦྱོར་བའི་རྣམ་པ་ཡིན། །ཤ་ཏ་མ་རྟན་མུ་ར་པི་དྲི་ལི་ནི་དེ་བ་ནཱ་གེ་སར། །དྲན་ཚེའི་གནས་སུ་སེང་ཕྲོམ་ཧ་མན་གསུམ་བཞག་དྲི་ཕྱིའི་སྦྱོར་བ་ཡིན། །ཤིང་ཚ་ཏ་མལ་པྲི་ཡང་ཙན་དན་རུ་རྟ་སེང་ཕྲོམ་དང་ནི་ཤུ་དག་དང་། །སྠེའུ་ན་ཆ་དྲུག་ལྡན་པའི་རིམ་པ་བ་ལང་ཕྲུ་གུ་ལྟ་བུར་སྲེག་པ་ཡིན། །
ག་བུར་སྦྲང་རྩི་ཀ་ར་གུར་ཀུམ་མ་ཏུ་ལུང་གའི་བདུག་སྤོས་སྦྱོར་བ་སྟེ། །རྒྱ་སྐྱེགས་དུ་རུ་ཀ་དང་སྤྲ་ཚིལ་སྦྱར་བ་དག་ནི་བདུག་སྤོས་རེང་བུ་ཡིན། །རུ་རྟ་གེ་སར་ཤུ་ཏི་ཨ་མྲ་ཙོ་ར་དག་དང་སྦྱར་བ་བཏུང་བ་བསྒོ་བ་ཡིན། །སྤོས་རྒྱལ་ཤུ་ཏི་སུག་སྨེལ་ཨ་མྲ་རུ་རྟ་སྦྱར་བ་ཞལ་ལ་བསྒོ་བ་ཡིན། །ཨ་

203-1-18b

ཀར་ཙན་དན་སྠེའུ་ན་གེ་སར་མཁན་པ་ཤུ་ཏི་ཨ་སྨྲ་རུ་རྟ་དང་། །དུ་རུ་ཀ་དང་སྦྱར་བ་ཏིལ་མར་དྲི་ཞིམ་བསྒོ་བའི་སྦྱོར་བ་ཡིན། །དེ་ལྟར་ཁོ་བོས་ཁྱོད་ལ་ཕན་པར་བྱ་ཕྱིར་སྣ་ཚོགས་རྣམ་པར་བརྟག་བྱས་པ། །བདེ་བར་གཤེགས་པའི་ཕོ་བྲང་རྐྱེན་དུ་འོས་པའི་དྲི་དང་བདུག་པའི་སྦྱོར་བ་ཡིན། །དྲི་
སྦྱར་བའི་མིག་མངས་རིས་ཀྱི་སྦྱོར་བ་ཚིག་ལེའུར་བྱས་པ་སློབ་དཔོན་ཀླུ་སྒྲུབ་ཀྱིས་མཛད་པ་རྫོགས་སོ།།      ༄། །སྤོས་ཀྱི་སྦྱོར་བ་རེའུ་ཆར་བྱས་པའི་ཐབས་བཤད་པ་བཞུགས། ༄༅༅། །དཀོན་མཆོག་གསུམ་ལ་ཕྱག་འཚལ་ལོ། །སྤོས་སྦྱོར་གཙུག་ལག་འདི་ལ་ནི། །རྣམ་
གྲངས་རྒྱས་པར་རབ་བརྗོད་ན། །མཐའ་ཡས་པ་ཞིག་འབྱུང་མོད་ཀྱི། །མདོར་བསྡུས་དོན་གྱི་རྣམ་བརྒྱད་པོ། །གདབ་སྤོས་ཕྱེ་མ་བྱུག་པ་དང་། །བདུག་སྤོས་དང་ནི་ཁྲུས་ཀྱི་སྤོས། །ལུས་ཀྱི་དྲིལ་ཕྱི་བྱ་བ་དང་། །བཏུང་བ་བསྒོ་དང་ཁ་ཡི་སྤོས། །ཏིལ་མར་དྲི་ཞིམ་བསྒོ་བ་ཡིས། །སྤོས་
རྣམས་སྦྱོར་བའི་ཆོ་ག་བསྟན། །དེ་ལ་སྤོས་ཀྱི་སྦྱོར་བ་ཐམས་ཅད་ཀྱི་རྩ་བ་ལྟ་བུར་གྱུར་པ་ཨ་ཀ་རུ་ལ་སོགས་པའི་སྤོས་རྣམ་པ་བཅུ་དྲུག་པོ་རྣམས་སྤོས་སྣོད་རེའུ་མིག་བཅུ་དྲུག་དག་ཏུ་གཞག་པ་བསྟན་པ་ནི་འདི་ལྟར། ཨ་ཀར་པ་ཏྲ་ཏུ་རུས་རྡོ་དྲེགས་པྲི་ཡང་གླ་སྒང་སྤྲ་ཚིལ་བ་ལི་ཀ །བྲི་ཀ་ཤིང་ཚ་རྒྱ་སྤོས་སྤང་སྤོས་ཙན་
དན་སེན་མོ་ཐང་ཆུ་ཀུན་ཏུར་རྣམས། །ཞེས་བྱ་བ་དག་ཡིན་ཏེ། དེ་ལྟར་ཨ་ཀ་རུ་ལ་སོགས་པ་སྤོས་སྣ་བཅུ་དྲུག་པོ་རྣམས་དང་པོར་བསྟན་པ་འདི་ནི་སྦྱོར་བའི་རྣམ་པ་ཐམས་ཅད་ལ་དྲིའི་འདུ་འཕྲོད་སྣ་མཐུན་པར་སྦྱར་བ་དང་། སྣ་བཞི་པོའི་སྦྱོར་བ་སྤྱི་ལ་ཆ་བཅོ་བརྒྱད་དུ་ངེས་པར་འདོད་པའི་ཕྱིར་རེའུ་མིག་བཅུ་དྲུག་པོ་དག་ཏུ་སོ་སོར་
གཞག་པ་གོ་རིམས་ཀྱིས་ངེས་པར་བསྟན་པ་ཡིན་ནོ། །འདིར་སྤོས་ཀྱི་རྣམ་པ་མང་པོ་བསྟན་པ་ཀུན་ཀྱང་དྲིའི་སྦྱོར་བ་སྤྱིའི་ཆོ་གར་བསྟན་པ་ནི་དྲི་གསོ་བ་དང་། བདུག་པས་བདུག་པ་དང་། མེ་ཏོག་ཞིམ་པོས་བསྒོ་བར་བསྟན་པ་ཡིན་ཏེ། འདི་ལྟར་སྤོས་རྒྱལ་གླ་རྩི་ག་པུར་དག་གིས་གསོ་ཞིང་བདུག་པ་མཆོག་གིས་བདུག །མེ་ཏོག་ཞིམ་པོས་བསྒོ་
བ་བགྱིས་པ་དང་ཞེས་བྱ་བས་བསྟན་པ་ཡིན་ཏེ། འདི་དག་གི་ཐབས་དང་ཆོ་ག་ནི་ཞིབ་ཏུ་འོག་ནས་སྟོན་ཏོ། །དྲི་སྦྱར་མཆོག་ཏུ་འདི་འགྱུར་ཞེས་བྱ་བ་ནི་སྦྱོར་བའི་ཡོན་ཏན་བརྗོད་པའོ། །ལུས་མཆོག་མ་ཞེས་བྱ་བ་ནི་སྙན་པར་བོད་པའི་ཚིག་གོ། །དེ་ལ་སྔར་བསྟན་པའི་སྤོས་སྣ་བཅུ་དྲུག་པོ་རྣམས་ཉིད་ཀྱང་སོ་སོའི་ཆ་མང་ཉུང་གི་ཚད་བསྟན་པའི་ཕྱིར་གོ་

203-1-19a

རིམས་ཀྱི་ཚུལ་དུ་གཞན་དུ་བསྟན་པ་ནི། ཤིང་ཚ་ཨ་ཀར་པ་ཏྲ་པྲི་ཀ་ཏུ་རུས་སྤང་སྤོས་རྒྱ་སྤོས་རྡོ་དྲེགས་དང་། །ཀུན་ཏུར་གན་དྷ་བ་ལིག་ཐང་ཆུ་པྲི་ཡང་སེན་མོ་ཙན་དན་གླ་སྒང་རྣམས། །གོ་རིམས་བཞིན་དུ་ཆ་རེ་བསྐྱེད་ཅིང་དྲི་ཡི་སྦྱོར་བ་བརྒྱད་པ་ཕྲག་གཉིས་དང་། །ཞེས་བྱ་བ་དག་
ཡིན་ཏེ། དྲིའི་སྦྱོར་བ་བརྒྱད་པ་ཕྲག་གཉིས་སུ་བྱ་བ་དང་། གོ་རིམས་བཞིན་དུ་ཆ་རེ་བསྐྱེད་པ་ལ་ཤིང་ཚ་ཆ་གཅིག །ཨ་ཀ་རུ་ཆ་གཉིས། གན་དྷ་པ་ཏྲ་ཆ་གསུམ། པྲི་ཀ་ཆ་བཞི། དུ་རུ་ཆ་ལྔ། སྤང་སྤོས་ཆ་དྲུག །རྒྱ་སྤོས་ཆ་བདུན། རྡོ་དྲེགས་ཆ་བརྒྱད་དུ་བྱ་བ་རྣམས་ལ་ཆ་བརྒྱད་པ་ཕྲག་ཅིག་དང་།
ཡང་ཀུན་ཏུ་རུ་ཆ་གཅིག །གན་དྷར་པ་ཆ་གཉིས། བ་ལི་ཀ་ཆ་གསུམ། ཐང་ཆུ་ཆ་བཞི། པྲི་ཡང་ཀུ་ཆ་ལྔ། ཆུ་སྲིན་སེན་མོ་ཆ་དྲུག །ཙན་དན་ཆ་བདུན། གླ་སྒང་ཆ་བརྒྱད་དུ་བྱ་བ་རྣམས་ནི་ཆ་བརྒྱད་པ་ཕྲག་གཉིས་སུ་བྱ་བ་ཡིན་ན། དེ་ལྟར་ཤིང་ཚ་ལ་སོགས་པ་སྤོས་སྣ་བཅུ་དྲུག་པོ་རྣམས་སྨོས་
པ་དེ་དག་ཨ་ཀ་རུ་ལ་སོགས་པ་དང་པོར་བསྟན་པའི་སྤོས་རྣམ་པ་བཅུ་དྲུག་པོ་དེ་དག་ཉིད་ཡིན་ན། ཅིའི་ཕྱིར་གོང་དུ་དོན་གཅིག་ཏུ་བསྡུས་ཏེ་མ་བཤད་ཅེ་ན། སྔ་མ་ནི་སྦྱོར་བ་རྣམ་པ་ཐམས་ཅད་ཀྱི་སྤྱིའི་ཆ་གྲངས་མཉམ་པར་གཏན་ལ་དབབ་པའི་ཕྱིར། རེའུ་མིག་བཅུ་དྲུག་པོ་དག་ཏུ་སྤོས་རྣམས་སོ་སོར་
གཞག་པའི་གོ་རིམས་ཀྱི་ངེས་པ་བསྟན་པ་ཡིན་ལ། འདིར་སྤོས་སྣ་བཅུ་དྲུག་པོ་དེ་དག་གི་སོ་སོའི་དྲིའི་ཁྱད་པར་འཇམ་རྩུབ་དང་དྲག་དལ་ལ་སོགས་པ་མི་འདྲ་བའི་སྒོ་ནས་སོ་སོའི་ཆ་གྲངས་མང་ཉུང་གི་ཚད་མི་མཉམ་པར་འདོད་པའི་ཕྱིར་ཆ་བསྐྱེད་པའི་གོ་རིམས་ཀྱི་ཚུལ་རྣམ་པ་གཞན་དུ་བསྟན་པ་ཡིན་ནོ། །
དེ་ལྟར་སྤོས་སྣ་བཅུ་དྲུག་པོ་དེ་ལྟར་སྤོས་སྣ་གྲངས་དུ་ཞིག་སྦྱོར་བ་གཅིག་ཏུ་བྱ། སྦྱོར་བ་རྣམས་ནི་དུ་ཞིག་ཡོད། སྦྱོར་བ་གཅིག་ལ་ཆ་གྲངས་ཇི་ཙམ་ཞིག་ཏུ་བྱ་ཞེ་ན། འདི་ལྟ་སྟེ། བཞི་པའི་སྦྱོར་བ་ཞེས་སྨོས་པས་སྣ་བཞི་ཞིང་སྦྱོར་བ་གཅིག་ཏུ་བྱ་བར་བསྟན་པ་ཡིན་ན། སྣ་བཞི་པའི་སྦྱོར་བ་དེའི་རྣམ་གྲངས་བསྟན་པ་ནི་
འདི་ལྟ་སྟེ། མཇུག་ཐོགས་སུ་ཉི་ཤུ་ཞེས་སྨོས་ཏེ། འདིས་སྤོས་སྣ་བཞི་པའི་སྦྱོར་བ་རྣམ་པ་ཉི་ཤུ་ཡོད་པར་རིག་པར་བྱའོ། །སྤོས་སྣ་བཞི་པའི་སྦྱོར་བ་གཅིག་ལ་ཆ་དུ་ཞིག་ཏུ་བྱ་བ་མ་བསྟན་པས་ཆ་ལས་ཞེས་བྱ་བ་སྨོས་ཏེ། ཆའི་སྒོ་ནས་ཞེས་བྱ་བའི་ཐ་ཚིག་གོ། །སྣ་བཞི་པའི་སྦྱོར་བ་འདི་ལ་ཆའི་སྒོ་ནས་གྲངས་བསྟན་པ་ནི། གཉིས་ཀྱིས་ཉུང་བར་

203-1-19b

གྱིས་ཤིག་ཅེས་བྱ་བར་བསྟན་ཏེ། གཉིས་ཀྱི་ཕྲིས་ཤིག་ཅེས་བྱ་བའི་ཐ་ཚིག་གོ། །གང་ལས་ཕྲི་ཞེ་ན། སྔར་བཞི་པའི་སྦྱོར་བའི་རྣམ་པ་ནི་ཉི་ཤུ་བསྟན་མ་ཐག་པ་ཉི་ཤུ་ལས་གཉིས་ཀྱིས་ཕྲི་ན་གྲངས་བཅོ་བརྒྱད་དུ་འགྱུར་ཏེ། དེ་ལྟར་སྣ་བཞི་པའི་སྦྱོར་བ་གང་ཡང་རུང་བ་གཅིག་ལ་ཆ་བཅོ་བརྒྱད་པོ་
དག་ཏུ་བྱ་བ་བསྟན་པ་ཡིན་ནོ། །འཛངས་མ་མོ་ཞེས་བྱ་བ་ནི བཤེས་གཉེན་ཅན་ཞེས་བྱ་བ་སྟེ། བོད་པའི་ཚིག་གོ། །དེ་ལྟར་སྤོས་སྣ་བཞི་ལ་ཆ་བཅོ་བརྒྱད་པའི་སྦྱོར་བ་རྣམ་པ་ཉི་ཤུ་བཞེད་པ་དེ་ཇི་ལྟ་བུ་ཞིག་སྙམ་པ་ལ། འདི་ལྟར་ཨ་ཀ་རུ་ལ་སོགས་པ་དང་པོར་བསྟན་པའི་སྤོས་རྣམ་པ་བཅུ་དྲུག་
པ་ཆ་གྲངས་གོང་དུ་བསྟན་པ་བཞིན་དུ་བསྐྱེད་ལ། རེའུ་མིག་བཅུ་དྲུག་པོ་དག་ཏུ་གོ་རིམས་ཇི་སྐད་དུ་འབྱུང་བ་བཞིན་དུ་མ་ནོར་བར་གཞག་སྟེ། འདི་ལྟར་རེའུ་མིག་བཞི་པའི་ཕྲེང་བཞི་ཞིག་ཡོད་པ་ལས་ཕྲེང་དང་པོ་ལ་ཨ་ཀ་རུ། གན་དྷ་པ་ཏྲ། ཏུ་རུ་ས་ཀ །རྡོ་དྲེག་བཞི་གཞག་པ་དང་། དེ་ནས་ཡི་གེ་ཕྲེང་བ་བཞིན་དུ་ཕྲེང་དང་འོག་
རེའུ་མིག་བཞི། པྲི་ཡང་ཀུ། གླ་སྒང་། གན་དྷ་ར་ས་ལ། བ་ལི་ཀ་བཞི་གཞག །ཕྲེང་གསུམ་པ་ལ་པྲི་ཀ །ཤིང་ཚ་རྒྱ་སྤོས་དང་། སྤང་སྤོས་བཞི་གཞག །ཕྲེང་ཐ་མ་ལ་ཙན་དན། ཆུ་སྲིན་སེན་མོ། ཐང་ཆུ། ཀུན་ཏུ་རུ་བཞི་པོ་རྣམས་གཞག་པ་བྱས་ན་ཆ་བཅོ་བརྒྱད་ཡོད་པའི་སྤོས་སྣ་བཞི་པོའི་སྦྱོར་བ་རྣམ་པ་ཉི་ཤུར་འགྱུར་ཏེ། ཇི་
ལྟར་ཞེ་ན། འདི་ལྟར་རེའུ་མིག་བཞི་པའི་ཕྲེང་བ་བཞི་པོ་ངོས་གཉིས་སུ་བསྲེས་པ་ལ་སྦྱོར་བ་རྣམ་པ་བརྒྱད། གྲྭ་བཞི་ནས་རེའུ་ཟུར་སྤྲོད་རྒྱ་གྲམ་དུ་བགྲངས་པའི་སྦྱོར་བ་རྣམ་གཉིས་ཏེ་བཅུ་དང་། ཡང་ཕྱོགས་བཞི་ནས་མཐའི་ཕྲེང་བ་རེ་རེ་བོར་ལ་འདབ་ཆགས་སུ་རེའུ་མིག་བཞིར་བགྲངས་པའི་སྦྱོར་བ་རྣམ་པ་བཞི་དང་།
མཐའ་བཞི་ནས་རེའུ་འདབ་ཆགས་སུ་བགྲངས་པའི་སྦྱོར་བ་རྣམ་པ་བཞི་སྟེ་བརྒྱད་དང་། དབུས་ཀྱི་ཆ་ལས་རེའུ་འདབ་ཆགས་སུ་བགྲངས་པའི་སྦྱོར་བ་རྣམ་པ་གཅིག་དང་། གྲྭ་བཞི་ནས་རེའུ་མིག་རེ་རེ་བཞི་ཞིག་བགྲངས་པ་ལ་སྦྱོར་བ་རྣམ་པ་གཅིག་སྟེ་བཅུ་དང་། དེ་ལྟར་རྣམ་པ་བཞི་པོ་དེ་དག་
ནི་སྤོས་སྣ་བཞི་པོ་ཆ་བརྒྱད་ཡོད་པའི་སྦྱོར་བ་རྣམ་པ་ཉི་ཤུ་པོ་དག་ཡིན་ནོ། །དེ་ལྟར་སྤོས་ཀྱི་སྦྱོར་བ་རྣམ་པ་ཉི་ཤུ་པོ་དེ་དག་ལས་གང་ཡང་རུང་བ་གཅིག་སྦྱོར་བར་འདོད་ན་སྤོས་སྣ་བཞི་པོ་ཆ་བཅོ་བརྒྱད་པོར་བྱས་པ་རྣམས་ཕྱེ་མར་བཏགས་ལ། དང་པོར་དྲི་ཆུས་སྦྲུ་བ་དང་། དྲི་གསོ་བ་དང་།

203-1-20a

བདུག་པས་བདུག་པ་དང་། མེ་ཏོག་དྲི་ཞིམ་པོས་བསྒོ་བ་རྣམས་ཀུན་ལའང་འདྲ་བར་བྱའོ། །དེ་ལ་དྲི་ཆུ་སྦྱར་བ་ནི། །ཙན་དན་གླ་སྒང་བ་ལི་ཀ །པུ་ཤེལ་ཙེ་དང་པྲི་ཡང་ཀུ། །ཛཱ་ཏི་ཕ་ལ་ཆ་བསྙམས་པ། །ཞེས་སྤོས་ཀྱི་གཙུག་ལག་གཞན་ལས་འབྱུང་བའི་སྤོས་དེ་རྣམས་རྩ་བའི་སྤོས་ཕྱེ་
མ་སྲང་ལྔ་ལ་ཁུ་བའི་སྤོས་ཞོ་གཅིག་གི་ཐང་དུ་བརྩིས་ཏེ། རྩིང་པོར་བཏགས་ལ་ཆུ་བཅུ་དྲུག་འགྱུར་གྱི་ནང་དུ་བསྐོལ་ཏེ། ཁུ་བ་བཞི་ཆ་ལུས་པས་བྲུལ་ཙམ་དུ་སྦྲུས་ནས་དེའི་ནང་དུ་དྲི་གསོ་བའི་རྫས་སྔར་རྩ་བ་ལས་བཤད་པའི་ཛཱ་ཏི་ཕ་ལ་དང་། ག་པུར་དང་། གླ་རྩི་རྣམས་ཆ་བསྙམས་ལ་རྩ་བའི་སྤོས་སྣ་བཞི་པོའི་སྤྱིར་ཇི་ཙམ་
ཡོད་པ་ལས་སྔ་མ་བཞིན་དུ་སྲང་ལ་གཞལ་ལ་དྲི་གསོ་བའི་ཕྱིར། ཞོ་གཅིག་གི་ཐང་བརྩིས་ལ། ཕྱེ་མར་བཏགས་པས་གདབ་ཅིང་འདྲེས་པར་བྱའོ། །དེ་ནས་དུད་པས་བདུག་པ་ནི་ཡང་རྩ་བའི་སྤོས་རྣམས་དྲི་ཆུས་སྦྲུས་ཏེ། ལྡེ་གུ་བྱས་ལ་རྗེའུ་གསར་བའི་ནང་དུ་ངོས་ལ་བྱུགས་ཏེ་ཅུང་ཟད་མ་སྐམས་པར་
བྱས་ལ། རྗེའུ་གཞན་གྱི་ནང་དུ་མེ་མ་མུར་བླུགས་ཏེ། སྤོས་ཀྱི་དུད་པ་འཐུལ་བར་བྱས་པའི་སྟེང་དུ་ཁ་སྦུབ་ཏུ་བཞག་ཅིང་དུད་པ་གཞན་དུ་མ་ཤོར་བར་བདུག་གོ། །དེ་ལ་བདུག་པའི་སྤོས་སྦྱོར་བཞི། །རྒྱ་སྐྱེགས་ཐང་ཆུ་པྲི་ཡང་པོག །ཆུ་སྲིན་སེན་མོ་ཀུན་ཏུ་རུ། །རུ་རྟ་དང་ནི་བུ་རམ་བཅས། །བདུག་
པ་མཆོག་ཏུ་བསྟན་པ་ཡིན། །ཞེས་བཤད་པ་ཡིན་ཏེ། འདི་རྣམས་ཆ་བསྙམས་པ་ཕྱེ་མར་བཏགས་པ་བུ་རམ་ཉིད་ཀྱིས་སྦྲུས་པ་དེས་བདུག་པར་བྱའོ། །དེ་ལ་མེ་ཏོག་དྲི་ཞིམ་པོས་བསྒོ་བ་ནི་སྣ་མའི་མེ་ཏོག་དང་། བལ་ལུ་དང་། སྐྱང་ཤོ་བ་ལ་སོགས་པ་མེ་ཏོག་དྲི་ཞིམ་པོ་ག་པུར་དང་བསྲེས་ལ་བྱི་བ་ཅིང་དྲིས་བསྒོ་
བར་བྱའོ། །སྤོས་ཕྱེ་མའི་སྦྱོར་བ་སྣ་བཞི་པོ་ལྷའི་གནས་དང་། བདག་ཉིད་ཀྱི་ཁྱིམ་དང་། གོས་དང་། ལུས་ལ་གདགས་པ་འདི་ཉིད་ཀྱི་སྦྱོར་བའི་ཆོ་ག་དྲི་གསོ་བ་ལ་སོགས་པའི་རིམ་པ་ནི་དེ་དག་ཡིན་ནོ། །གཞན་དུ་འོག་ནས་བདུག་སྤོས་ལ་སོགས་པའི་སྦྱོར་བ་གཅིག་ལ་དྲི་གསོ་བ་ལ་སོགས་
པའི་རིམ་པ་མི་མཐུན་པ་དག་ནི་སོ་སོའི་སྐབས་ཉིད་དུ་བསྟན་ཏོ། །ཕྱི་མའི་སྤོས་སྣ་བཞི་པོ་འདི་ཉིད་ཆུ་ཐབས་སུ་བྱས་ཏེ་བྱུག་པའི་གོར་ཡང་སྤྱད་པར་བྱའོ། །སྤོས་ཀྱི་སྦྱོར་བ་རེའུ་ཆར་བྱས་པའི་ཐབས་བཤད་པ་རྫོགས་སོ།།      །།འདི་དག་གི་ཞུས་དག་ལོ་ཙཱ་བ་སྣར་ཐང་པུ་ཎྱ་རསྨི་ཡིན་ནོ།།      །།

203-1-20b

༄། །ཐུབ་པ་ཆེན་པོ་དྲང་སྲོང་གར་གས་ལྟས་ཀྱི་རྣམ་པ་བསྟན་པ་བཞུགས། ༄༅༅། །ཐུབ་པ་ཆེན་པོ་དྲང་སྲོང་གར་གས་ལྟས་ཀྱི་རྣམ་པ་བསྟན་པ་ཞེས་བྱ་བའི་གཙུག་ལག །ཐམས་ཅད་མཁྱེན་པ་ལ་ཕྱག་འཚལ་ལོ། །གཟའ་སྐར་རིག་པའི་ཕ་རོལ་ཕྱིན། །ཐུབ་པའི་ཚོགས་མཆོག་གར་ག་ལ། །
བྷ་གུ་རིས་ནི་ཕྱག་འཚལ་ཏེ། །ཐལ་མོ་སྦྱར་ནས་ཡོངས་སུ་ཞུས། །ལྷ་ཡི་མིག་ལྡན་དཀའ་ཐུབ་ཆེ། །སྐལ་ལྡན་རྒྱ་མཚོ་ཆེ་ལྟ་བུ། །ཤེས་རབ་མཆོག་གིས་རབ་རྟོགས་པའི། །རིགས་པ་དེ་ནི་ཐོབ་པར་འཚལ། །ཡུལ་གྱིས་དངོས་དང་དངོས་མེད་དང་། །བསྟན་དང་འབྲས་བུ་གྲུབ་པ་དང་། །མི་རྣམས་ཀྱི་ནི་
ཕམ་རྒྱལ་དང་། །སྤྲིན་གྱི་ཁ་དོག་གཟུགས་རྣམས་དང་། །དེ་བཞིན་ཉི་མ་ཟླ་བ་དང་། །ལྷ་ཡུལ་བར་སྣང་ས་བླ་ཡི། །ལྟས་སུ་བྱུང་བའི་མཚན་མ་དང་། །འཕྲལ་གྱི་ཆར་པའི་མཚན་མ་དང་། །དུས་མཚན་ཆགས་དང་དགེ་མི་དགེ། །ཉི་ཟླ་དག་གི་ཉིན་འཁོར་ནས། །སྐར་མདའ་ལྷུང་དང་གནམ་གྲུམ་དང་། །
དྲི་ཟ་ཡི་ནི་གྲོང་ཁྱེར་དང་། །ས་གཡོ་བ་ཡི་འབྲས་བུ་དང་། །ཉི་མའི་གཟུགས་ནི་ཁྱིམ་པ་དང་། །དེ་བཞིན་ཟླ་བ་ཁྱིམ་བརྗོད་པ། །དེ་དག་ཐམས་ཅད་མ་ལུས་པར། །དཀའ་ཐུབ་འགྲུབ་པས་གསུང་བར་འོས། །དེ་སྐད་དྲིས་ནས་གཟི་ཆེན་པོ། །གར་ག་ཡིས་ནི་ཚིག་སྨྲས་པ། །བྷ་གུ་རིས་ནི་གང་དྲིས་པ། །དེ་
ཉིད་ཉོན་ཅིག་སྐལ་བ་ཅན། །མར་མེ་ལྟ་བུའི་གཙུག་ལག་འདི། །དགོས་པ་ཐམས་ཅད་རིག་བྱེད་པ། །གྲགས་དང་གསལ་དང་རྣམ་གསལ་དང་། །བདེ་སྡུག་ངེས་པར་རྟོགས་བྱེད་པ། །བྲམ་ཟེ་གཙོ་དང་རྒྱལ་པོ་ལ། །དྲང་སྲོང་མཆོག་གིས་བསྟན་པར་བྱ། །ཉི་མ་དང་ཟླ་བའི་ལྟས་ལ་ལེགས་ལྡན་གང་གི་
ཚེ་ཉི་མ་ཨུཏྤ་ལ་སྔོན་པོ་ལྟ་བུའི་འོད་ཅན། རེག་པ་ན་གཟི་བྱིན་དུ་རྣོ་བ་ཅན། ཟླ་བ་ལྟར་བསིལ་བ་ཅན་ནམ་མཁའི་དཀྱིལ་དུ་སོང་ལ་སྣང་བ་དེའི་ཚེ་ནི་རྒྱལ་པོ་འཆི་བར་འགྱུར་རོ། །གང་གི་ཚེ་ཉི་མ་འཆར་བ་དང་ནུབ་པ་ཁོ་ནའི་ཚེ་འཁོར་ལོ་བཞིན་དུ་འཁོར་བར་གྱུར་པ་དེའི་ཚེ་ནི་གདོན་མི་ཟ་བར་རྒྱལ་པོ་འཚེ་བར་འོང་ལ་
ཕ་རོལ་གྱི་དམག་ཚོགས་རྣམས་ཀྱང་འོང་ཞིང་། ཡུལ་རྣམས་ཀྱང་འཁྲུག་པར་འགྱུར་ཏེ། དེའི་ཚེ་ཡུལ་ནི་དགོན་བཞིན་རི་དྭགས་ཀྱིས་གང་བར་འགྱུར་རོ། །ཡང་ན་ཉི་མ་གཟས་ཟིན་པ་ཡང་མེད་པར་འོང་བར་འགྱུར་བ་དེ་ནི་དེའི་ཚེ་རྒྱལ་པོ་དེ་དག་གི་ཕྱི་ནང་ན་རྟག་ཏུ་འཚོ་བར་འགྱུར་རོ། །ཡང་གང་གི་ཚེ་ཉི་མ་

203-1-21a

གཟས་མ་ཟིན་པར། ནམ་མཁའ་ལ་ཕྱེད་དུ་སྣང་ངམ། ཉི་མ་ཉིད་ནམ་མཁའ་ལ་གཡོ་བར་གྱུར་ཏམ། ཁ་དོག་ངན་པའམ། སྐྱ་བོར་འགྱུར་ན་དེའི་ཚེ་རྒྱལ་པོ་འཚེ་ཞིང་། སྐྱེ་བོ་འཚེ་བ་དང་ལོ་ཉེས་པ་དང་། ཆོམ་རྐུན་རྣམས་ཀྱི་མཐུར་གྱུར་པའམ། ཡང་ན་དབང་པོས་
ཆར་མི་འབེབ་པར་འགྱུར་རོ། །ཡང་དུས་མཚམས་མ་ཡིན་པར་ཉི་མ་དང་ཟླ་བ་གཟས་ཟིན་པར་གྱུར་ན། དེའི་ཚེ་མི་དག་མཚོན་གྱིས་འདེབས་ལ། དེ་བཞིན་དུ་ནང་དང་འཐབ་པ་དག་གིས་འཚེ་བར་ཡང་འགྱུར། རྒྱལ་པོ་ཡང་འཚེ་ཞིང་། མུ་གེ་དང་། མི་ངས་དག་གི་ཚོགས་ཆེན་པོར་འགྱུར་རོ། །མི་རྣམས་
ཀྱང་ཉེ་དུ་ཕུ་ནུ་དག་དང་མི་མཐུན་ཞིང་འགལ་བར་འགྱུར་རོ། །མིའི་བུ་རྣམས་མངལ་དུ་ཡང་འཆི་བར་འགྱུར་རོ། །ཡང་ཉི་མ་འོད་ཟེར་དང་བྲལ་ཞིང་མི་ལོང་བུ་ལྟ་བུར་སྣང་ན། དེ་ཡང་ངེས་པར་རྒྱལ་པོ་འཇིགས་པར་རིག་པར་བྱའོ། །ཡང་ན་ཉི་མ་ནམ་མཁའ་ལ་ཁྲག་གི་འོད་ཅན་ལྟ་བུ་སྣང་བ་དེའི་ཚེ་རྒྱལ་
པོ་རྣམས་དང་། དེ་ལ་བརྟེན་པ་རྣམས་དང་། ཡུལ་རྣམས་དང་། དེ་བཞིན་དུ་དབང་པོ་རྣམས་དང་། ཕན་ཚུན་དུ་གསོད་པར་འགྱུར་རོ། །དེའི་ཚེ་སྐྱེ་བོ་ཐམས་ཅད་ཆོས་དང་མི་མཐུན་པར་ཕྱིན་ཅི་ལོག་པར་སྤྱོད་པའི་ལྟས་ཡིན་ནོ། །གང་གི་ཚེ་ཉི་མ་འཆར་བ་ན། གཞུ་ལྟར་རབ་ཏུ་སྒུ་བར་སྣང་ཞིང་། སྤྲིན་
དམར་དག་གིས་ཁེབས་ན། དེའི་ཚེ་ཕ་རོལ་གྱི་དམག་ཚོགས་དག་འོང་བར་འགྱུར་རོ། །གང་གི་ཚེ་ཉི་མ་འཆར་བ་ན། གཟུགས་བརྙན་དག་སྣང་བ་དེའི་ཚེ་ན་འཇིགས་པ་ཆེན་པོ་འོང་བར་བསྟན་ཏོ། །དེ་དག་གི་ཚེ་ཉི་མ་འཆར་བ་དང་། ནུབ་པ་ཁོ་ན་དེའི་ཚེ་ཉི་མ་མགོ་བཅད་པ་ལྟ་བུའི་སྤྲིན་གྱིས་ཁེབས་པ་དེའི་ཚེ་
ན། ཡུལ་དུ་འཇིགས་པ་ཆེན་པོ་འབྱུང་བར་རིག་པར་བྱའོ། །ཡང་ཉི་མ་འཆར་བ་ནུབ་པ་ཁོ་ནའི་ཚེ་ཉི་མ་འཁྱམས་པ་དང་། སྐན་མདའ་ལྟུང་བ་དང་། ས་གཡོ་བར་གྱུར་པ་དེའི་ཚེ་རྒྱལ་པོ་གསོད་པར་འགྱུར་རོ། །ཡང་གལ་ཏེ་ཉི་མ་གཟུགས་བུ་གུ་ཅན་དང་། བོང་བུ་དང་། ཁྲག་ལྟ་བུའི་ཉི་མ་ཕྱེད་དུས་གསལ་
བར་སྣང་ན། མིའི་བདག་པོ་མཐའ་དག་འཚེ་བ་དང་། ནད་དང་། མུ་གེ་དག་ལྡང་བས་སྐྱེ་བོ་བས་པའི་དུས་སུ་འགྱུར་རོ། །གང་གི་ཚེ་ཉི་མ་ཟླ་བ་དག་འཁྱམས་ཞིང་དཀྱིལ་འཁོར་ཐ་དད་དུ་ཆུད་ལ། རྩུབ་པར་གྱུར་པ་དེའི་ཚེ་ནི་ཐེ་ཚོམ་མེད་པར་དམག་འབྱུང་བར་འགྱུར་རོ། །གང་དུ་ཉི་མ་དང་ཟླ་བ་དག་

203-1-21b

འཁྱམས་པ་དང་། དཀྱིལ་འཁོར་མཐའ་བདག་མ་ཡིན་པ་དང་། རྩུབ་ཅིང་རྣམ་པར་གཞག་པ་དང་། ཉམས་པར་གྱུར་པ་དེའི་ཚེ་འཆར་བ་མེད་པར་འགྱུར་ཞིང་། མུ་གེ་དང་མི་ངས་དག་འབྱུང་བར་རིག་པར་བྱའོ། །གང་དུ་ཉི་མ་དང་ཟླ་བ་དག་རྨ་བྱའི་མགྲིན་པ་ལྟ་བུ་འཁྱམས་པར་གྱུར་པ་དེའི་ཚེ་ན་དེས་མུ་
གེ་འབྱུང་བར་བསྟན་ཏོ། །གང་གི་ཚེ་ཉི་མ་སྤྲིན་གྱི་ཁ་དོག་ལྟ་བུ་དང་། འཇའ་འདྲ་བ་དང་། དཀྱིལ་འཁོར་ཆུང་བར་གྱུར་པ་དེའི་ཚེ་ན་འཕྲལ་འཕྲལ་དུ་ཆར་པ་འབབ་པར་འགྱུར་རོ། །གང་གི་ཚེ་ཉི་མ་དང་། ཟླ་བ་དང་། གཟའ་རྣམ་གསུམ་འགལ་བར་གྱུར་པ་ནི་ཞག་གསུམ་ཚུན་ཆད་ཆར་པ་འབབ་པ་དང་། ཟླ་བ་
གསུམ་ཚུན་ཆད་དུ་འཇིགས་པ་ཆེན་པོ་འབྱུང་བར་རིག་པར་བྱའོ། །གང་གི་ཚེ་ཟླ་བ་ཆུ་ལ་ཟླ་བརྙན་དག་སྣང་བར་འགྱུར་ན་ཡང་ཞག་གསུམ་ཚུན་ཆད་ཆར་པ་འབབ་པ་དང་། ཟླ་བ་གཅིག་ལ་འཇིགས་པ་ཆེན་པོ་འབྱུང་བར་འགྱུར་རོ། །གང་གི་ཚེ་ཟླ་བ་འཁྱམས་ཤིང་ངན་དུ་ནུབ་པར་རབ་ཏུ་སྣང་ན། གཟའ་རྣམས་ཀྱི་
ཡང་ཟིལ་གྱིས་ནོན་པར་འགྱུར་རོ། །དེ་བཞིན་དུ་སྣང་བ་ཆུང་བར་གྱུར་པ་དེའི་ཚེ་ན། དམག་དཔོན་རྣམས་འཆི་བར་འགྱུར་ལ། དེ་བཞིན་དུ་ཡུལ་དེ་ཡང་ལོ་ཉེས་དང་། མུ་གེ་དང་། མི་ངས་པ་དག་ཀྱང་འབྱུང་། རྒྱལ་པོ་ཡང་འཚེ་བར་འགྱུར་བ་དང་། ཆོམ་རྐུན་པ་དག་ཀྱང་བརྒྱལ་བར་འགྱུར་བའི་ལྟས་སུ་
བསྟན་ཏོ། །ཡང་ཟླ་བའི་གཟུགས་འཁྱམས་པ་དང་། གཟའ་རྣམས་ཕན་ཚུན་དུ་མཐོ་ཞིང་ཞུམ་པར་ཡང་གྱུར་པ་དེ་ནི། ལུས་ཅན་རྣམས་ཤིན་ཏུ་མནར་བར་འགྱུར་བར་བསྟན་ཏོ། །ཟླ་བའི་གཟུགས་འཁྱམས་པ་ན། གང་གི་ཚེ། ཟླ་བ་ཁྲག་གི་མདོག་ལྟ་བུའི་ཁ་དོག་ཏུ་གྱུར་པ་དེའི་ཚེ་ན་དམག་ཁྲག་གི་འདམ་
རྫབ་ཅན་འབྱུང་བར་འགྱུར་རོ། །ཉི་ཟླའི་ལྟས་ཀྱི་ལེའུ་སྟེ་དང་པོའོ།།      །།གཟའ་སྐར་གྱི་ལྟས་ལ་དྲང་སྲོང་ཆེན་པོ་གར་ག་ལ་ལེགས་ལྡན་ཕྱོགས་ཀྱི་སྐྱོང་བ་དག་ཇི་ལྟར་གནས་པ་དང་། གཟའ་དང་རྒྱུ་སྐར་དག་གི་ཆེ་ཆུང་དང་། ཇི་ལྟར་རྒྱུ་བ་དང་། སྐར་མ་དག་གང་ནས་འབྱུང་ཞིང་ཇི་ལྟར་ལྟུང་བ་དང་།
རྣམ་པར་རྒྱུ་བ་དག་སྐྱེས་བུ་དམ་པ་ཚངས་པ་ལྟ་བུའི་གཟི་བརྗིད་ཅན་གྱིས་བདག་ལ་བསྟན་དུ་གསོལ་ཞེས་ཉོན་མོངས་པ་ཅན་མ་ཡིན་པའི་སློབ་མ་བྷ་གུ་རིས་ཀུན་དུ་དྲིས་པ་དང་། རིག་པའི་གནས་ཐམས་ཅད་ཀྱི་ཕ་རོལ་ཏུ་ཕྱིན་པས་བཤད་པ། ཕྱོགས་སྐྱོང་དག་ནི་བཞི་སྟེ། རང་གི་ཕྱོགས་ལ་ཡང་དག་པར་བརྟེན་པ་དག་

203-1-22a

གོ། །གཟའ་དང་རྒྱུ་སྐར་ཐམས་ཅད་ཀྱི་སྟེང་ན་སྨེ་བདུན་དག་གནས་ཤིང་། དེ་དག་གི་འོག་ན་ནི་སྤེན་པ་དག་གནས་སོ། །ཉི་མའི་དཀྱིལ་འཁོར་ནི་དཔག་ཚད་བརྒྱ་སྟོང་དུ་བརྗོད་དོ། །ཟླ་བ་ནི་བཅུ་དྲུག་ཏུ་བརྗོད་དོ། །སྒྲ་གཅན་འཛིན་ནི་ཉིས་འགྱུར་རོ། །སྣར་མ་དང་། གྲོ་བཞིན་དང་།
རྒྱལ་དང་། མགོ་དང་། བྱི་བཞིན་དང་། ནག་པ་དང་། ས་རི་དང་། ས་ག་དང་། ལག་དང་། སྣྲོན་དང་། སྣྲུབས་དང་། ནབ་སོ་དག་སྟེ། རྒྱུ་སྐར་བཅུ་གཉིས་པ་དག་གི་དཀྱིལ་འཁོར་ནི་དཔག་ཚད་གཉིས་གཉིས་སོ། །དེ་བཞིན་དུ་སྐར་མ་ཕྲ་མོ་གཞན་དག་གི་ཚད་དུ་རྒྱང་གྲགས་ཙམ་མོ། །དེ་དག་གི་གྲངས་ནི་
དུང་ཕྱུར་ཕྲག་གཉིས་དང་། བྱེ་བ་ཕྲག་བརྒྱད་དང་ས་ཡ་ཕྲག་ལྔར་བཤད་དེ། རྒྱུ་སྐར་གྱི་དཀྱིལ་འཁོར་ལ་གནས་པ་དག་ཡིན་ནོ། །རྒྱུ་སྐར་མེ་བཞི་དང་། ནག་པ་དང་། ས་རི་དང་། ས་ག་དང་། ལག་དང་། དེ་བཞིན་དུ་མགོ་དང་། ནབ་སོ་དང་། སྦོ་རྣམས་ནི་རླུང་གི་དཀྱིལ་འཁོར་ཡིན་ཏེ། དེ་དག་
དབང་བའི་དུས་སུ་གལ་ཏེ་ས་གཡོ་བ་དང་སེར་བ་འབབ་པ་དང་། སྒྲ་གཅན་འཛིན་མཐོང་བར་འགྱུར་བ་དང་། སྐར་མདའ་དང་། སེར་བ་མི་བཟད་པ་འབབ་པར་འགྱུར་ན་དེའི་ཚེ་ནི་རྡུལ་གྱི་ཆར་མི་ཟད་པ་འབྱུང་བ་དང་། དེའི་ཚེ་རླུང་དམར་མ་རུངས་པ་ལྡང་ཞིང་། ཁང་བཟངས་དང་། རྟ་བབས་དང་། བ་གམ་དང་
སྐྱེད་ཤིང་དང་། ཁང་པ་རྣམས་འགྱེལ་བར་བྱེད། མཚོ་ཆེན་པོ་དང་། འབབ་ཆུ་དང་། རྫིང་དང་། ཁྲོན་པ་རྣམས་ཀྱི་ཆུ་ཡང་སྐེམ་པར་བྱེད་པ་སྟེ། དེ་ལྟར་སྔོན་གྱི་རིག་པས་རླུང་ལས་གྱུར་པའི་བྱེ་བྲག་ཏུ་བརྗོད་པ་ཡིན་ནོ། །གལ་ཏེ་དེ་དག་ཉེ་བར་ཞི་བའི་རྒྱུ་ཞག་བདུན་ཚུན་ཆད་ཆར་མ་བབ་པར་གྱུར་ན་རླུང་འཁྲུགས་པ་
ལས་བྱུང་བའི་གནོད་པ་ལ་གཞན་དག་ཀྱང་འབྱུང་བར་འགྱུར་ཏེ། ཡུལ་མ་ཏུན་ད་དང་། ཡུལ་བ་ལི་ཀ་དང་། ཡུལ་ཀ་ཙ་ད་དང་། ཡུལ་ཀམ་པོ་ཛ་དང་། ཡུལ་པར་བར་དང་། ཡུལ་སྤོས་འཛིན་དང་བཅས་པ་དག་ཏུ་ཡང་འཁྲུག་ཅིང་ཕན་ཚུན་མི་མཐུན་པ་དང་། དེ་བཞིན་དུ་ནད་དག་གིས་ཟིན་པའི་སྒྲ་མི་སྙན་པ་དང་། 
ལུས་འཕགས་དག་ཀྱང་ཉེན་པར་འགྱུར། མཚོན་གྱིས་ཐེབས་པ་དག་ཀྱང་འབྱུང་། རྒྱལ་པོ་རྣམས་ལ་ཡང་དམག་འདྲེན་པར་འགྱུར་ཞིང་། དེ་བཞིན་དུ་མའི་མངལ་ཡང་འགགས་པ་དང་། ས་ཡང་འབྲས་བུ་མི་སྐྱེ་བ་དང་། ཤིང་ཐོག་དང་། འབྲས་བུའི་ཤིང་དག་ཀྱང་ངན་ཅིང་ཉུང་བ་དང་། དབང་པོས་

203-1-22b

ཀྱང་ཆར་པ་ཆེན་པོ་མི་འབེབས་པ་དང་། ཕྱོགས་ཐམས་ཅད་ཀྱི་སའི་མདངས་ཀྱང་སྔོ་གནག་ཏུ་འགྱུར་ཞིང་མི་གསལ་བ་དང་། རྩུབ་པར་སྣང་བ་དང་། བ་ལང་དང་། ར་ལུག་དང་། བྱ་དང་། རི་དྭགས་དག་ཀྱང་འཇིགས་པ་མེད་པར་ཡང་སྐྲག་ཅིང་འདྲོག་པ་དང་། ཕྱོགས་བསླད་ཅིང་ཕན་ཚུན་ཐོབ་པར་འགྱུར་
རོ། །ཡང་རྒྱུ་སྐར་ས་ག་དང་། སྨིན་དྲུག་དང་། རྒྱལ་དང་། ཁྲུམས་སྟོད་དང་། བྷ་གའི་ལྷ་གང་ཡིན་པ་འདི་དང་། མཆུ་དང་། གཤིན་རྗེའི་ལྷ་གང་ཡིན་པ་འདི་དག་དབང་བའི་དུས་སུ་ས་གཡོས་པའམ། གནམ་གྲུམ་པ་འབྱུང་བར་གྱུར་ན་མེའི་ཕྱོགས་ཀྱི་དཀྱིལ་འཁོར་ལ་བབ་པའི་ཤུགས་ཀྱིས་གནོད་པ་འབྱུང་
བར་རིག་པར་བྱ་སྟེ། མཁྲིས་པའི་རིགས་ལས་གྱུར་པའི་གནོད་པས་སྐྱེ་དགུ་ཤིན་ཏུ་གཟིར་བ་དང་། བུད་མེད་རྣམས་ལ་ཁྲག་ནད་འབྱུང་བ་དང་། བ་དང་མ་ཧེ་ཞོ་སྐམ་པ་དང་། བསོད་ནམས་བྱ་བར་བརྩམས་ཤིང་བསམ་པ་ཐམས་ཅད་ཀྱང་འགྲུབ་པར་མི་འགྱུར་ལ། སེམས་ཅན་རྣམས་ལ་ཡམས་ནད་འབྱུང་
བ་དང་། དེ་བཞིན་དུ་ནད་དང་། རྒྱལ་པོ་ལས་ཀྱང་གྱུར་པ་འབྱུང་བ་དང་། སྐྱེ་དགུ་རྣམས་ཀྱང་ཕན་ཚུན་དགའ་བ་དག་བྱེད་ནས་མི་མཐུན་པར་ཡང་འགྱུར་ཞིང་ཉིན་མཚན་དུ་ཕྱོགས་རྣམས་སུ་གནས་མེ་ཞི་བར་ཡང་མི་འགྱུར། སྤྲིན་ཡང་ཆར་པ་འབེབས་པར་མི་འགྱུར། དེ་བཞིན་དུ་འདོད་འཛོ་དག་ཀྱང་འོ་མ་མེད་པར་
འགྱུར་བ་དང་། ཤིང་ལྗོན་པའི་རིགས་དང་། ལྕུག་མ་དག་ཀྱང་མེ་ཏོག་དང་། འབྲས་བུ་ཉུང་བ་དང་། ཆུའི་གནས་ཁྲོན་པ་དང་། རྫིང་དང་། ལྟེང་ཀ་ལ་སོགས་པ་ཡང་སྐམ་པར་འགྱུར་ཞིང་། མུ་གེ་དང་ནད་ཀྱིས་ཉེན་པ་འབྱུང་བ་དང་། ཡུལ་འཁྲུག་པར་ཡང་འགྱུར། ཆོམ་རྐུན་གྱི་འཇིག་རྟེན་རྣམས་ཀྱི་མཐུ་
དང་། རི་དྭགས་རྣམས་ཀྱང་འདྲེན་པར་འགྱུར། ཤ་སྦྲང་དང་། སྦྲང་བུ་མཆུ་རིངས་རྣམས་དང་། དེ་བཞིན་དུ་རིགས་ངན་གྱི་རིགས་དག་ཀྱང་འཕེལ་བར་འགྱུར་ཏེ། དེ་ལྟར་མེའི་ཕྱོགས་ཀྱི་དཀྱིལ་འཁོར་དུ་ཆོས་ལུགས་དེ་རྣམས་འབྱུང་བར་ཤེས་པར་བྱའོ། །ཁྲུམས་སྨན་དང་། ཆུ་ལྷ་དང་། དེ་བཞིན་དུ་ནམ་གྲུ་དང་། 
བདེན་བྲལ་གྱི་ལྷ་དང་། སྐག་དང་། དེ་བཞིན་ལག་ནི་ཆུའི་དཀྱིལ་འཁོར་ཡིན་ཏེ། དེ་ནི་བསྟན་བཅོས་རིག་པ་རྣམས་ཀྱིས་བརྗོད་པ་ཡིན་ནོ། །གལ་ཏེ་འདིར་ས་གཡོ་བ་དང་། གནམ་གྲུམ་པ་བྱུང་བ་དང་། ཉི་མ་དང་། ཟླ་བ་ཡང་ཉེ་བའི་ཆགས་པ་དང་ལྡན་པ་དང་། མཇུག་རིངས་དང་། དེ་བཞིན་དུ་ལྟས་སུ་

203-1-23a

འབྱུང་བ་གཞན་མཐོང་བར་གྱུར་ན་ཆུ་ལྷའི་དེ་ནི་སྐྱེ་དགུ་རྣམས་ལ་དགེ་བའི་རྒྱུ་ཡིན་པར་ཤེས་པར་བྱ་སྟེ། དེར་ལོ་ལེགས་པ་དང་། བ་འོ་མ་མང་བ་ཉིད་དུ་ཡང་ཤེས་པར་བྱའོ། །བུད་མེད་དག་ཀྱང་དུས་ཚང་ནས་ཚོར་བ་མེད་པར་བདེ་བར་བཙའ་བར་འགྱུར་རོ། །ས་བོན་ཇི་ལྟར་བཏབ་པ་བཞིན་དུ་
གྲུབ་ནས་ས་ཡང་ལོ་ཏོག་གི་ཕྲེང་བ་ཅན་དུ་འགྱུར་ཞིང་། རྒྱལ་པོ་རིག་པའི་རྗེས་སུ་འབྲང་བ་དག་ཀྱང་མི་དགེ་བ་མེད་པར་འགྱུར་རོ། །བྲམ་ཟེ་ལ་སོགས་པའི་རིགས་བཞི་པོ་ཡང་རང་གི་ལས་རྣམས་ལ་གནས་པར་འགྱུར། {སྐྱེད}་ཀྱིས་འཚོ་བ་ཐམས་ཅད་ཀྱིས་ཀྱང་རྙེད་པའི་མཆོག་རྙེད་པར་འགྱུར་ཞིང་། ས་ལས་
སྐྱེ་བ་རྣམས་ཀྱང་འབྲས་བུ་དང་། མེ་ཏོག་དང་འདབ་མ་དང་ལྡན་ཞིང་འཕེལ་བར་འགྱུར་བ་དང་། བདེ་བ་དང་། ལོ་ལེགས་པ་དང་། ནད་མེད་པ་དང་། སྐྱེ་དགུ་རྣམས་ལ་ཡང་དགེ་བར་འགྱུར་རོ། །མོན་གྲུ་དང་། སྣར་མ་དང་། སྣྲོན་དང་། དེ་བཞིན་དུ་ལྷ་མཚམས་དང་། བྱི་བཞིན་གྲོ་བཞིན་དང་། དེ་
བཞིན་དུ་གཞན་ཡང་ཆུ་སྨད་ནི་དབང་པོ་ཆེན་པོའི་ཕྱོགས་ཀྱི་དཀྱིལ་འཁོར་དུ་རིག་པར་བྱ་སྟེ། ཐམས་ཅད་ཤིན་ཏུ་ཕན་པའི་རྒྱུ་ཡིན་ཞིང་སྐྱེ་དགུ་རྣམས་ལ་བདེ་བ་དང་། ནད་མེད་པ་དང་། རྒྱལ་པོ་རྣམས་ལ་དགེ་བ་རབ་ཏུ་སྦྱིན་པར་བྱེད་པ་ཡིན་ནོ། །གལ་ཏེ་འདིར་ས་གཡོ་བ་དང་། དེ་བཞིན་དུ་གནམ་གྲུམ་པ་ལ་
སོགས་པ་འབྱུང་བ་དང་། ཉི་མ་དང་ཟླ་བ་ཉེ་བའི་ཆགས་པ་ཅན་དུ་གྱུར་པ་དང་། མཇུག་རིངས་མཐོང་བར་གྱུར་པ་དང་། གཞན་ཡང་གློ་བུར་དུ་བྱུང་བ་གཞན་ཇི་ལྟར་འབྱུང་བ་ཡང་དེར་ནི་བསྟན་བཅོས་རིག་པའི་ཐུབ་པ་རྣམས་ཀྱིས་མི་དགེ་བ་མེད་པར་བསྟན་ཏེ། ལོ་ཏོག་དག་ཤིན་ཏུ་ཕུན་སུམ་ཚོགས་པ་དང་། ལོ་
ལེགས་པ་དང་། ཆོམ་རྐུན་མེད་པ་དང་། བྲམ་ཟེ་རྣམས་ཀྱི་སྦྱིན་སྲེག་དང་། མཆོད་སྦྱིན་གྱི་བྱ་བ་ཐམས་ཅད་འགྲུབ་པར་འགྱུར་ཞིང་། རིག་པར་བྱེད་པའི་རྒྱལ་པོ་ཐམས་ཅད་ཀྱང་ས་སྲུང་བར་བྱེད་པར་འགྱུར་བ་དང་། རིགས་ཀྱང་རང་གི་ཆོས་ལ་གཞོལ་ཞིང་། སེམས་ཆོས་ལ་མངོན་པར་དགའ་བ་དང་། དུས་ཇི་
ལྟ་བ་བཞིན་དུ་ཆར་ཆུ་འབབ་པ་དང་། ཤིང་རྣམས་མེ་ཏོག་དང་། འབྲས་བུ་སྨིན་པར་བྱེད་པ་དང་། སྐྱེ་བོ་མཐའ་དག་རབ་ཏུ་དགའ་བ་དང་། ལྷགས་པ་རྣམས་ཕན་ཚུན་དགའ་བར་འགྱུར་ཞིང་། སྤྲིན་རྣམས་དོན་མེད་པར་མ་ཡིན་ཏེ། ས་གཞིར་ཆར་པ་ལེགས་པར་འབབ་པར་འགྱུར་བ་དང་། མི་རྣམས་ཀྱི་བྱ་

203-1-23b

བ་ཇི་ལྟར་བརྩམས་པ་རྣམས་ཀྱང་ཕལ་ཆེར་གྲུབ་པར་འགྱུར་ཞིང་ལུས་ཅན་རྣམས་ལ་ཡང་གནོད་པ་བྱེད་པ་རྣམས་དང་། གྲོག་སྦུར་རྣམས་དང་། སྦྲུལ་དང་། བྱི་བ་ལ་སོགས་པ་དང་། དེ་བཞིན་དུ་ཡམས་ཀྱི་ནད་རྣམས་དང་། བ་ལ་སོགས་པ་རྣམས་ཀྱང་ཡང་དག་པར་འཇིག་པར་འགྱུར་རོ། །རྣམ་པ་གཞན་དུ་ན་
དབང་པོ་ཆེན་པོའི་དཀྱིལ་འཁོར་དབང་བར་གྱུར་ན་ཆུ་དང་། མེ་དང་། རླུང་ལས་གྱུར་པ་བད་ཀན་དང་། མཁྲིས་པ་ལས་གྱུར་པའི་ནད་རྣམས་དང་། དེ་བཞིན་དུ་རླུང་ལས་གྱུར་པ་རྣམས་འབྱུང་སྟེ། དེ་དག་ནི་གཞན་དུ་མ་ཡིན་ནོ་ཞེས་པ་བསྟན་ཏོ། །གཟའ་རྣམས་ཀྱི་ལེའུ་སྟེ་གཉིས་པའོ།།      །།
སྐར་མདའི་ལྟས་ལ་སྐར་མདའ་འདི་དག་ནི་དེ་དག་ནི་མཚན་མ་བསྟན་པའོ། །འཇིག་རྟེན་དག་ན་རྟགས་སྟོན་པར་བྱེད་པ་སྟེ། དེ་ལ་གང་གི་ཚེ་དབང་པོ་རྣམས་དང་ཆུ་ལྷ་དང་། རླུང་ལྷ་དང་། མེའི་ཕྱོགས་ཀྱི་གཞན་དག་ནི་ཁ་དོག་སྣ་ཚོགས་ཤིང་གཟུགས་འཇིགས་པ་དང་། མེ་སྟག་དང་བཅས་ཤིང་འོད་དང་
བཅས་པ་དང་། སོལ་བ་འབར་བ་ལྟར་སྣང་སྟེ། ནམ་མཁའི་ངོས་ལ་ཆར་དུ་འབྱུང་བར་འགྱུར་རོ། །གཤིན་རྗེའི་ཕྱོགས་ཀྱི་སྐར་མདའ་གནག་པ་དང་། དམར་པོ་རེང་རེང་པོ་དང་། རྩུབ་པ་ནི་འཇིགས་པར་བྱེད་པ་སྟེ་མིའི་རྒྱལ་པོ་རྣམས་དང་། ཡུལ་རྣམས་ལ་འཇིགས་པ་ཆེན་པོ་འབྱུང་བར་བརྗོད་པ་ཡིན་ནོ། །
དེ་བཞིན་དུ་བར་སྣང་ལ་འདུག་པ་དང་། རི་དང་རྒྱ་མཚོ་ལ་འདུག་པ་ཡང་ཡིན་ནོ། །གང་དུ་ལྷ་ཡུལ་དང་། ས་སྟེངས་སུ་ལྷུང་ཞིང་བཟློག་ཕྱོགས་སུ་འགྲོ་བར་འགྱུར་ན་ཡུལ་དེར་ཞི་བ་མ་ཡིན་པར་འགྱུར་རོ། །རྒྱབ་ཕྱོགས་སུ་ནི་རྟག་ཏུ་ཞི་བར་འགྱུར་རོ། །དེ་བཞིན་དུ་དེ་དག་ནི་འཇིག་རྟེན་ཐམས་ཅད་དུ་རྒྱུ་བ་དང་།
གཟུགས་འདོད་པ་འཛིན་པ་དག་ཡིན་ནོ། །གནོད་པར་གྱུར་པའི་ཡུལ་དག་ཏུ་དམག་འགྱེད་དུ་འཇུག་པ་ཡང་བྱེད་པར་འགྱུར་རོ། །དེའི་འོག་ཏུ་རང་བཞིན་གྱིས་དམག་ཁོ་ནས་འཇིག་རྟེན་རྣམས་འཆི་བར་བྱེད་པར་འགྱུར་རོ། །དེ་དག་ལྷུང་བ་དག་རྗེས་སུ་མཚན་ཉིད་ཡང་དག་པར་རབ་ཏུ་བརྗོད་པར་བྱ་སྟེ། དཀར་པོ་
འགྲོ་ཞིང་མེ་སྟག་དང་བཅས་པ་ནི་བྲམ་ཟེ་རྣམས་ལ་འཇིགས་པ་འདྲེན་པ་ཡིན་ནོ། །དེ་བཞིན་དུ་དམར་པོ་རྣམས་ནི་རྒྱལ་རིགས་རྣམས་ལའོ། །སེར་པོ་ནི་རྗེའུ་རིགས་རྣམས་ལའོ། །ནག་པོ་དང་སྔོ་བསངས་ནི་དམངས་རིགས་རྣམས་ལ་སྟེ། ཤིན་ཏུ་འཇིགས་པ་འབྱུང་བར་བརྗོད་དོ། །དེ་བཞིན་དུ་སྐར་མདའ་སྔོ་

203-1-24a

བསངས་དང་། རྩུབ་པ་དང་། འགྲུམ་པ་དང་། དཀར་པོ་དང་། སེར་པོ་དང་། ཁ་དོག་རྣམ་པ་སྣ་ཚོགས་དང་། མེ་སྟག་དང་བཅས་པ་དང་། དུ་བ་འཐུལ་བ་དག་ཏུ་ལྷུང་བ་དེར་ནི་རྒྱལ་པོ་ལ་གནོད་པར་འགྱུར་རོ། །གང་དུ་ལ་ལར་ཕག་དང་། སྤྲེའུ་དང་། ཝ་ལྟར་བཅོས་པ་
དང་། རི་དྭགས་དང་། བོང་བུའི་གཟུགས་ལྟ་བུའི་འོད་ཅན་གྱི་སྐར་མདའ་ལྷུང་བ་དེར་ནི་རྒྱལ་པོ་དང་ཡུལ་འཁོར་དུ་བཅས་ཏེ་འཆི་བར་འགྱུར་བ་ཐེ་ཚོམ་མེད་དོ། །གང་རྒྱུ་སྐར་དང་ཕྲད་ནས་གང་མིའི་མདུན་དུ་གྲུམ་ཞིང་སྐར་མདའ་གྲུགས་པ་དེར་ནི་དེ་ཉིད་དུ་འབྲས་བུར་འགྱུར་བར་རྣམ་པར་བཤད་པར་བྱའོ། །
གཟའ་དང་། རྒྱུ་སྐར་གང་གི་བ་ལང་གི་ལམ་དང་། རྟ་བབས་དང་། རྒྱལ་མཚན་ཁྱིམ་དུ་ལྷུང་བ་དེ་ལ་ནི་འཇིགས་པ་ཆེན་པོ་འབྱུང་བར་བརྗོད་པ་ཡིན་ནོ། །གང་དུ་སྐར་མདའ་ཉི་མ་ལ་མངོན་དུ་ཕྱོགས་ཏེ་ལྷུང་བ་ནི་ཤིན་ཏུ་འཇིགས་པར་བྱེད་པར་འགྱུར་རོ། །པ་བ་སངས་ལ་རེག་པར་བྱེད་པ་དེ་ནི་དེར་
རྒྱལ་པོ་ལ་འཇིགས་པ་འབྱུང་བར་འགྱུར་རོ། །གང་དུ་ཟླ་བའི་དཀྱིལ་འཁོར་ལ་རེག་པ་མེ་ལྕེའི་འོད་དང་མཉམ་པའི་སྐར་མདའ་ལྷུང་བ་དེ་ནི་རྒྱལ་ཚབ་གསོད་པར་འགྱུར་རོ། །གལ་ཏེ་སྐར་མདའ་ལྷའི་བླ་མ་ཕུར་བུ་ལ་གདུང་བར་བྱེད་པ་དེར་ནི་མདུན་ན་འདོན་གསོད་པར་འགྱུར་ཞིང་བྲམ་ཟེའི་བདག་ཉིད་ལ་ཡང་
གནོད་པར་འགྱུར་རོ། །གང་གི་ཚེ་སྐར་མདའ་ལག་ལ་གདུང་བར་བྱེད་པ་དང་། ལྷ་ལྟ་བུ་འབྱུང་བ་དེར་གཞོན་ནུ་འཆི་བར་འགྱུར་ཞིང་། དེའི་ཚེ་རྒྱལ་པོ་ལ་ཡང་གནོད་པར་འགྱུར་རོ། །གང་དུ་སྐར་མདར་ལྷུང་ཞིང་གཟའ་མིག་དམར་ལ་གནོད་པ་བྱེད་པ་དེར་ནི་དམག་དཔོན་གསོད་པར་འགྱུར་ཞིང་། མཚོན་དང་
མེའི་འཇིགས་པ་ཡང་འབྱུང་བར་འགྱུར་རོ། །གལ་ཏེ་སྐར་མདའ་འབབ་པ་ཉི་མའི་བུ་སྲིན་པ་ལ་གནོད་པར་བྱེད་པ་དེར་ནི་སྣ་བོའི་གཙོ་བོ་དང་། ཚོགས་ཅན་དག་འཆི་བར་འགྱུར་རོ། །གང་གི་སྐྱེ་བའི་རྒྱུ་སྐར་ལ་སྐར་མདའ་རྟུག་ལ་གལ་ཏེ་ཞི་བར་འགྱུར་བར་མི་བྱེད་ན་ཕོ་དེ་འཆི་བར་འགྱུར་རོ། །ཏྲི་ཤང་གུ་དང་། 
བྷི་རི་ཤི་དང་། ས་ག་དང་། ས་རི་དང་། སྐར་མ་ཁྱི་ཁྲིད་དང་། སྨལ་པོ་དང་། རི་བྱ་དང་། དེ་བཞིན་དུ་བྲ་མྟ་ན་དྷི་ད་ཡ་དང་། ཨ་རུ་ན་དང་། ཤི་ཤུ་མ་ར་དང་། སྨེའུ་བདུན་དང་། དེ་བཞིན་དུ་གུང་ཚིགས་ཀྱིས་ཁེབས་ཤིང་སྐར་མདའ་ལྷུང་བ་དེ་ཤིན་ཏུ་འཇིགས་པ་ཆེན་པོ་འབྱུང་བར་འགྱུར་ཞིང་། དམག་མང་

203-1-24b

པོས་འཁྲུག་པ་དང་། མཚོན་{གྱིས་འཚེ་བ་}ཡང་རབ་ཏུ་ཟད་པར་བྱེད་པར་འགྱུར། དེའི་ཚེ་ཡུལ་འཇིགས་པར་བྱེད་པའི་ཆོམ་རྐུན་ལ་སོགས་པ་ཡང་འབྱུང་བར་འགྱུར་རོ། །གང་དུ་སྐར་མདའ་རབ་ཏུ་འབར་བ་ས་ལ་ཐུར་དུ་ཐད་ཀར་འཇུག་པ་དེའི་ཚེ་ནི་དགྲ་དག་གིས་རྒྱལ་པོ་གསོད་པར་འགྱུར་ཞིང་ཡུལ་འཇིགས་
པར་ཡང་འགྱུར་རོ། །སྐར་མདའ་རྟའི་དབྱིབས་ལྟ་བུ་ནི་རྒྱལ་པོའི་དམག་ལ་གནོད་པར་འགྱུར་རོ། །རལ་གྲི་དང་། རྩེ་གསུམ་དང་། ཁ་ཊྭཱཾ་གའི་དབྱིབས་ལྟ་བུ་ནི་ཡུལ་དང་རྒྱལ་པོར་བཅས་པ་ལ་གནོད་པར་འགྱུར་རོ། །སྐར་མདའ་ཆེན་པོ་གདུགས་དང་། རྒྱལ་མཚན་དང་། ཤིང་རྟའི་རྣམ་པ་དག་ཏུ་
ས་ལ་ལྟུང་བ་ནི་ཞག་བདུན་གྱི་དམག་དང་རྒྱལ་པོར་བཅས་པ་ལ་གནོད་པར་འགྱུར་རོ། །གང་གི་ཚེ་ས་ལ་སྐར་མདའི་ཆར་པ་དང་། རྡོའི་ཆར་པ་ཆེན་པོ་དག་བབ་པ་དེའི་ཚེ་ནི་དམག་སྟོང་གི་ཁྲག་སས་འཐུང་བར་འགྱུར་རོ། །གང་གི་ཚེ་སྐར་མདའ་མེའི་ཁ་དོག་ལྟ་བུ་གནམ་གྲུམ་པ་དང་བཅས་ཏེ་ས་སྟེང་དུ་
ལྷུང་བ་དེའི་ཚེ་ནི་དམག་མི་སྟོང་གི་ཁྲག་སས་འཐུང་བར་འགྱུར་རོ། །གང་དུ་གླང་པོ་ཆེ་དང་། རྟ་དང་། ཤིང་རྟའི་གཟུགས་ལྟ་བུའི་འོད་དང་། རི་ལྟ་བུའི་རྣམ་པ་དག་ཐུར་དུ་ལྷུང་བ་ནི་ཡུལ་དང་། རྒྱལ་པོ་དང་བཅས་པ་ལ་གནོད་པར་འགྱུར་རོ། །གང་གི་ཚེ་སྐར་མདའ་དུས་ཚིགས་སྔ་མ་ཀུན་དུ་ཕྲད་པ་དུ་བ་ལྟ་
བུ་ས་ལ་ཐུར་དུ་ལྷུང་བ་དེའི་ཚེ་ནི་རྒྱལ་པོ་གསོད་པར་འགྱུར་རོ། །དུས་ཚིགས་ཀྱི་ཕྱི་མ་ལ་བརྟེན་པའི་སྐར་མདའ་མེ་ལྟ་བུ་ལྷུང་བ་ནི་མཆོད་སྦྱིན་བྱེད་པ་རྣམས་འཆི་ཞིང་། དེ་བཞིན་དུ་མཆོད་སྦྱིན་གྱི་ལས་རྣམས་འཇིགས་པར་འགྱུར་རོ། །གང་གི་ཚེ་སྐར་མདའི་སྒྲ་ཆེན་པོས་རབ་ཏུ་རྒྱུག་ཅིང་ཡུལ་ཡུལ་དང་། གྲོང་
གྲོང་དུ་ལྷུང་བ་དེའི་ཚེ་ནི་རྟག་ཏུ་རྒྱལ་པོ་འཆི་བར་འགྱུར་རོ། །ཤར་གྱི་ཕྱོགས་ཆར་ཀུན་དུ་འབྱུང་ཞིང་ཉི་མའི་ལམ་ལ་བརྟེན་ཏེ་ནུབ་ཏུ་ཁ་བལྟས་ཤིང་སོང་ནས་ཡུལ་མ་ག་དྷཱར་ཕྱིན་ཏེ། གྲུམ་པ་ནི་ལོ་ཏོག་རྣམས་སྨིན་ན་ཡང་ལོ་ཉེས་དང་། དེ་བཞིན་དུ་མི་ངས་འབྱུང་བར་ཡང་འགྱུར་ཞིང་འཇིག་རྟེན་རྣམས་ལ་རང་གི་མི་
མཐུན་པ་ལས་འགྱུར་བའི་དམག་ཀྱང་འབྱུང་བར་བཤད་དོ། །རྒྱལ་པོ་རྣམས་དང་ཁྱིམ་ཁོལ་འབྱོར་པའི་མི་རྣམས་ཀྱང་འཆི་བར་འགྱུར་ཏེ། འཇིག་རྟེན་ལ་གནོད་པར་བྱེད་པ་ཉེས་པ་རྣམ་པ་མང་པོ་དེ་ལྟ་བུ་དག་འབྱུང་བར་འགྱུར་རོ། །གང་དུ་མེ་ཏོག་ཀུནྡ་དང་ཟླ་བ་དང་། དངུལ་གྱི་འོད་ལྟ་བུའི་སྐར་མདའ་ལྷུང་བ་

203-1-25a

དང་། རྒྱལ་པོ་རྣམས་རྒྱལ་བ་དང་། ལོ་ལེགས་པ་དང་། བདེ་བར་བྱེད་པ་སྨྲ་བར་བྱེད་དོ། །སྐར་མདའ་ཆེན་པོ་ཁ་དོག་རབ་ཏུ་འབར་བ་ཤིན་ཏུ་སྣུམ་པ་དང་དངུལ་དང་། ཤེལ་གྱི་འོད་འདྲ་བ་ནི་ཆར་པ་འབབ་པར་སྨྲ་བར་འགྱུར་ཏེ། འདི་ལ་ཐེ་ཚོམ་མེད་དོ། །གང་དུ་སྐར་མདའ་ཆེན་པོ་དུ་བ་
དང་བཅས་པ་གཟུགས་འཛིན་པར་བྱེད་པ་མེ་སྟག་དང་བཅས་པ་སོལ་བའི་མདོག་ལྟ་བུ་བྱུང་བ་དེའི་ཚེ་ནི་རྒྱལ་པོ་ལ་འཇིགས་པ་ཆེན་པོ་འབྱུང་བར་འགྱུར་རོ། །དུ་བའི་མདོག་ལྟ་བུ་དང་། ཆེ་བ་དང་། སྐར་མ་ལྟར་དག་པ་དང་། གཡས་གཡོན་དུ་སོ་སོར་འགྲོ་བར་འགྱུར་བ་དང་། བཻ་ཌཱུརྱའི་མདོག་ལྟ་བུ་དང་། 
ཤེལ་གྱི་འོད་ལྟ་བུ་དང་། གསེར་གྱི་མདོག་ལྟ་བུ་དང་། དངུལ་ལྟ་བུ་དང་། ཟླ་བའི་འོད་ཟེར་ལྟར་དཀར་བ་དང་། ཞོའི་འོད་དང་འདྲ་བའི་སྐར་མདའ་དེ་ནི་ལོ་ལེགས་པར་འགྱུར་རོ། །རྒྱལ་པོ་རྒྱལ་བར་འགྱུར་བ་ཐུབ་པ་སྔ་མ་རྣམས་ཀྱིས་རབ་ཏུ་བསྟན་ཏོ། །བཻ་ཌཱུརྱའི་མདོག་ལྟ་བུར་བསྟན་པ་ནི་ཆར་པ་འབབ་
པར་བརྗོད་དོ། །ཤེལ་ལྟ་བུར་གྱུར་ན་ནི་ལོ་ལེགས་པར་འགྱུར་རོ། །གསེར་གྱི་འོད་ལྟ་བུར་གྱུར་ན་ནི་མེས་འཁྲུག་པར་འགྱུར་རོ། །དམར་པོར་གྱུར་ན་ནི་དམག་འབྱུང་བར་བརྗོད་དོ། །འདི་སྐད་དུ་གང་བསྟན་པ་ནི་ཟླ་བ་གཉིས་མ་ལུས་པར་དེའི་རྣམ་པར་སྨིན་པར་འགྱུར་བར་བརྗོད་དོ། །སྐར་མདའི་
ལྟས་ཏེ་ལེའུ་གསུམ་པའོ།།      །།སྤྲིན་དང་། གློག་དང་། འཇའ་འོད་ཀྱི་ལྟས་ལག་གང་གི་ཚེ་སྤྲིན་གྱི་གཟུགས་གཡུང་དྲུང་འཁྱིལ་པ་ལྟ་བུ་དང་། གདུགས་དང་། ལྟེང་ཀ་དང་། ཤིང་རྟ་བསྲེག་པ་བཀྲ་ཤིས་པ་དང་ལྡན་པའི་དབྱིབས་དང་། རི་ལྟ་བུ་དག་ནི་སྐྱེ་དགུ་བདེ་བར་བྱེད་པའོ། །དེ་
བཞིན་དུ་དབང་པོའི་མཚོན་ཆའི་རྣམ་པ་ལྟ་བུ་དག་དང་། དབྱིག་པ་ལྟ་བུ་དག་ནི་བདེ་བར་ཡང་མི་བྱེད་ལ། མུ་གེ་ཡང་སྟོན་པར་བྱེད་དོ། །གང་གི་ཚེ་དབྱར་གྱི་དུས་སུ་སྤྲིན་མདུང་ཐུང་དང་། གསལ་ཤིང་དང་དབའ་རླབས་ལྟ་བུ་དག་དང་། རྒྱལ་མཚན་དང་། བདན་ལྟ་བུ་དག་དང་། མཚོན་ཆ་སྣ་ཚོགས་ལྟ་
བུར་སྣང་བ་དེའི་ཚེ། དམག་ཁྲག་གི་འདམ་རྫབ་ཅན་མི་བཟད་པ་འབྱུང་ལ་ལོ་ཏོག་ཀྱང་ཆུད་ཟོས་པར་འགྱུར་ཞིང་། ཆོམ་རྐུན་དག་ཀྱང་འཕེལ་བར་འགྱུར་རོ། །སྤྲིན་ཐ་དད་དུ་ཆད་པ་དང་། ཤིང་སྐམ་ལྟ་བུ་དང་། གཏུན་ཤིན་ལྟ་བུ་དང་། མགོ་ཐོད་ལྟ་བུའི་དབྱིབས་གང་ཡིན་པ་དེ་དག་ནི་མོད་ལ་འཇིགས་པའི་

203-1-25b

དམག་འོང་བར་འགྱུར་རོ། །ཡང་སྤྲིན་བྱ་སྣ་ཚོགས་ལྟ་བུ་དང་། རྔ་མོ་དང་། བོང་བུའི་སྤྲིན་གྱི་ཚོགས་དག་ཉི་མ་ཤར་བ་དང་ནུབ་པ་ཁོ་ནའི་ཚེ་ཉི་མའི་ཟུར་ནས་འགྲོ་བར་གྱུར་ན་དེ་ནི་སྐྱེ་བོ་ཟད་པར་འགྱུར་བའི་ནད་དང་། མཚོན་ལ་སོགས་པ་འབྱུང་བར་རིག་པར་བྱའོ། །ཡང་སྤྲིན་གྱི་གཟུགས་འགོག་པ་ཅན་ལྟ་
བུར་གྱུར་ཅིག །རྡུལ་གྱི་ཚོགས་འདྲེན་པར་བྱེད་པའི་རླུང་དྲག་པོ་དང་བཅས་པ་འབྱུང་བ་ནི་རྒྱལ་པོ་དང་སྐྱེ་བོ་ཕལ་པ་དག་འཆི་བ་དང་། ཡུལ་འཁོར་དང་། དགོན་པ་ན་གནས་པ་དག་ལ་གནོད་པར་བསྟན་ཏོ། །ནམ་མཁའ་ལ་སྤྲིན་མེད་པར་འབྲུག་ཟེར་བ་དང་། འབྲུག་ཟེར་ལ་ཆར་མེད་པའི་སྤྲིན་ནི་གནོད་པ་
འབྱུང་བའི་སྤྲིན་ཡིན་ནོ། །འོད་གློག་དང་འཇའ་རླུང་གི་ལྟས་ལ་གང་གི་ཚེ་ཉི་མའི་དྲུང་ལྷོ་ཕྱོགས་ངོས་ནས་གློག་འབྱུང་བར་འགྱུར་ལ། དེའི་དུས་སུ་རྒྱལ་པོའི་ཕོ་བྲང་དང་། རྟ་བབས་དང་། གླང་པོ་ཆེ་དང་། རྟའི་བྲེས་ཀྱི་ཁང་སྟེང་དང་། རྒྱལ་པོའི་ལམ་དང་། ཁྲོམ་ལམ་གྱི་བཞི་མདོ་དང་། གྲོང་ཁྱེར་གྱི་སྒོ་
དང་། ཤིང་ཆེན་པོ་རྣམས་ལ་ཐོག་དང་སེར་བ་འབབ་པའམ། སྐར་མདའ་དག་ཀྱང་ལྷུང་བར་གྱུར་ན་དེར་ལོ་གཅིག་ཚུན་ཆད་དུ་འཇིག་རྟེན་ཀུན་དུ་ཟད་པར་འགྱུར་བར་རིག་པར་བྱ་ཞིང་། ཡུལ་དེར་རྒྱལ་པོ་གཞན་འོང་བར་ཡང་ཐེ་ཚོམ་མེད་དོ། །ཉི་མ་ལ་འབྱུང་བའི་གློག་དེ་ཉིད་རྒྱལ་པོའི་རྟ་བབས་དང་། ཕོ་
བྲང་གི་སྒོར་བབ་ན་རྒྱལ་པོ་དང་། དེ་ལ་བརྟེན་པ་དག་ཀྱང་འཆི་བར་འགྱུར། རྟ་བྲེས་དང་གླང་པོ་ཆེའི་བྲེས་སུ་བབ་ན་དེའི་སྲུང་མ་ངེས་པར་འཇིགས་པར་འགྱུར་རོ། །ར་བར་བབས་ན་དམག་མིའི་གཙོ་བོ་དག་འཆི་བར་འགྱུར་རོ། །གང་གི་ཚེ་མེའི་ཕྱོགས་ནས་གློག་འོད་མོ་ལྟ་བུ་འབྱུང་བ་ནི་ནད་རྣམས་ཀྱིས་
འཁྲུག་པ་དང་། རླུང་དྲག་པོས་གནོད་པ་འབྱུང་བའི་ལྟས་ཡིན་ནོ། །བདེན་བྲལ་གྱི་ཕྱོགས་ནས་གློག་འབྱུང་བར་བྱེད་པ་དེའི་ཚེ་ནི་རླུང་དལ་བ་འབྱུང་བར་བྱེད་ཅིང་ནད་ཀྱིས་འཇིག་རྟེན་ཟད་པར་ཡང་འགྱུར་རོ། །གང་གི་ཚེ་ནམ་མཁའ་སྤྲིན་མེད་པར་ཕྱོགས་དག་ཏུ་རྟག་པར་གློག་འབྱུང་བར་འགྱུར་བ་དེར་ནི་
རྒྱལ་པོ་འཆི་བ་དང་། ཡུལ་འཁོར དང་བཅས་པ་འཇིགས་པར་བྱེད་པའོ། །གང་གི་ཚེ་གློག་མེ་ཏོག་གི་འབྲས་བུར་མཛེས་ཤིང་སྣུམ་པའི་འོད་ཅན་སྤྲིན་གྱི་དབུས་ན་འདུག་པ་ནི་བདེ་བ་དང་ལོ་ལེགས་པར་འགྱུར་བར་བསྟན་ནོ། །འཇའ་ལྟས་ལ་གང་གི་ཚེ་གཞན་དག་གིས་གྲོང་ཁྱེར་བསྐོར་བ་ན་འཇའ་འབྱུང་བར་

203-1-26a

གྱུར་ན་གྲོང་དེ་ཉིད་འཇིག་ཅིང་འཇིགས་པ་ཆེན་པོ་ཉེ་བར་གནས་པར་རིག་པར་བྱའོ། །ཡང་གང་དག་ཏུ་དམག་གིས་གྲོང་ཁྱེར་བསྐོར་བ་ན་ཉི་མའི་དཀྱིལ་འཁོར་འཇས་ཁེབས་པར་གྱུར་ན་དེ་ལས་སེར་བ་འཇིགས་པ་འབྱུང་བ་དང་དམག་ཚོགས་དེ་ལས་ཀྱང་གཙོ་བོ་འཆི་བར་གྱུར་པ་སྟོན་ཏོ། །གང་
གི་ཚེ་དམག་གི་གཡུལ་ཤོམ་ཞིང་གོ་ཆ་གྱོན་པ་ན་འཇའ་ཉི་མའི་དཀྱིལ་འཁོར་དང་མཉམ་པར་གྱུར་པ་ནི། དེ་ནི་ཕྱོགས་གཉི་ག་འཆི་བ་ཡིན་ནོ། །གང་དག་ཏུ་དམག་འགྱེད་པའི་གཡུལ་དུ་ཞུགས་པ་ན་མདུན་ནམ་གཡས་ནས་འཇའ་འབྱུང་བ་ནི་དེ་དག་གསོད་པར་སྟོན་པ་ཡིན་ནོ། །དབྱར་ཀ་འཇའ་འཁྱིལ་བ་མང་
བ་དང་། ས་གཡོ་བ་དང་། ཟླ་བརྙན་དག་བྱུང་བ་དེའི་ཚེ་ཕ་རོལ་གཞན་གྱི་འཇིགས་པ་དག་འབྱུང་བར་བྱེད་པའོ། །གང་དག་ཏུ་མཚན་མོ་འཇའ་ནམ་མཁའ་ལ་མངོན་པར་བྱུང་ན་དེ་ནི་དགེ་བ་མ་ཡིན་ཏེ། ཕ་རོལ་གྱི་དམག་ཚོགས་འོང་བ་དང་། ཡུལ་འཁྲུག་ཅིང་རྒྱལ་པོ་འཆི་བ་དང་། ཡང་ན་རྒྱལ་པོ་སྨ་
འབབ་པ་ལ་སོགས་པས་སྟོན་པས་ན་དབང་པོ་མཆོད་པ་བདེ་ལེགས་སུ་འགྱུར་བའི་ཆོ་ག་བྱས་ནས་ཡུལ་དེ་ནས་གཞན་དུ་འགྲོ་བར་བྱའོ། །གང་གི་ཚེ་མཚན་མོ་ནམ་མཁའ་ལ་འཇའ་ཁ་དོག་ངན་ཅིང་ཤིན་ཏུ་ཆེ་ལ་རི་མོ་གསུམ་འབྱུང་བ་དེའི་ཚེ་རྒྱལ་པོའི་དཀྱིལ་འཁོར་རྣམས་ལ་མྱུར་དུ་འཇིགས་པ་འབྱུང་ཞིང་གཞན་གྱི་
དམག་ཚོགས་དག་གིས་ཀྱང་འཆི་བར་འགྱུར་བར་སྟོན་པའོ། །གང་གི་ཚེ་འཕྲལ་དུ་ཉེ་བར་སྤྲུལ་པའི་འཇའ་རྟགས་མཐོང་ན་དེའི་གྲོང་ཁྱེར་འཇིག་པ་དང་། ཡུལ་འཁོར་འཇིག་པར་འགྱུར་བར་རིག་པར་བྱའོ། །འོད་ལྟས་ལ་གང་གི་ཚེ་ནམ་མཁའ་ལ་འོད་ཀྱི་རྣམ་པ་གདུགས་དང་། རྒྱལ་མཚན་དང་། ཤིང་རྟའི་
རྣམ་པ་དག་དང་འཁོར་ལོ་དང་། དུང་ལ་སོགས་པ་བཀྲ་ཤིས་ཀྱི་མཚན་མར་བྱ་བ་དག་དང་། འོད་རལ་གྲི་དང་། པདྨའི་དབྱིབས་ཀྱི་རྣམ་པ་དག་འབྱུང་བ་ནི་རྒྱལ་པོ་རྣམ་པར་རྒྱལ་བར་འགྱུར་བར་བསྟན་ཏོ། །ཡང་གང་དུ་འོད་ཀྱི་རྣམ་པ་མགོ་ཐོད་ལྟ་བུ་དང་། དབྱིག་ཐོ་དང་། གཏུན་ཤིང་དང་། སྒྲོག་རུས་ལྟ་བུར་སྣང་
བ་དག་གིས་ནི་རྒྱལ་པོ་དང་བཅས་པའི་ཡུལ་འཇིགས་པར་བསྟན་ཏོ། །ཡང་གང་དུ་འོད་ཀྱི་རྣམ་པ་མགོ་ཐོད་ལྟ་བུ་དང་། དབྱིག་ཐོ་དང་། ཉ་དང་རུས་སྦལ་འདྲ་བ་དང་། དེ་བཞིན་དུ་སྦལ་བ་དང་། ཉ་ཕྱིས་དང་། ཆུ་སྲིན་ལྟ་བུ་དག་གིས་ཀྱང་འཇིགས་པ་ཆེན་པོ་འབྱུང་བར་སྟོན་ཏོ། །སྤྲིན་གློག་དང་འཇའ་འོད་ལ་

203-1-26b

སོགས་པའི་ལྟས་ཀྱི་ལེའུ་སྟེ་བཞི་པའོ།།      །།ཕྱོགས་ཆ་བརྒྱད་པོ་དག་ནས་འབྲུག་གློག་ལ་སོགས་པ་འབྱུང་བའི་ལྟས་ལ་ཤར་ཕྱོགས་ལ་སོགས་པ་ཕྱོགས་ཆ་བརྒྱད་པོ་དག་ནས་འབྲུག་གློག་ལ་སོགས་པ་ཟེར་བ་ལས་དགེ་འདུན་གྱི་ལྟས་སུ་བལྟ་བ་ནི། སོས་དང་པོ་དབྱར་ཟླ་འབྲིང་པོ་ཉ་ལ་དབང་པོའི་
ཕྱོགས་ཀྱི་གནས་སུ་འབྲུག་ཟེར་བ་ཐོས་ཤིང་དེ་ཉིད་དུ་རླུང་བྱུང་ན་དེའི་ཚེ་ནི་ཆུ་ཆེན་པོ་དང་། ཆར་པ་འབབ་པར་འགྱུར་ཞིང་ལོ་ལེགས་པ་དང་། བདེ་བ་དང་། སྐྱེ་དགུ་དག་དང་། རྒྱལ་པོ་ལ་ནད་མེད་པར་འགྱུར་ཞིང་སྔོན་གྱི་བསྟན་བཅོས་རིག་པ་རྣམས་ཀྱིས་བརྗོད་པ་ཡིན་ནོ། །དེ་བཞིན་དུ་དབྱར་ཟླ་འབྲིང་པོ་ཞེས་
ཀུན་ལ་ཡང་སྦྱར་ཏེ། མེའི་ཕྱོགས་ཆ་ནས་གལ་ཏེ་གློག་འབྱུང་ཞིང་རླུང་ཡང་འབྱུང་བར་འགྱུར་ན་དེའི་ཚེ་མེའི་འཇིགས་པ་འབྱུང་ཞིང་ལོ་ཉེས་པ་དང་། མི་ངས་དང་། དེ་བཞིན་དུ་ཆོམ་རྐུན་གྱི་གནོད་པ་དང་། རྒྱལ་པོ་ལ་མི་དགེ་བ་དང་། ནད་ཀྱིས་བསློངས་པ་ཉིད་དུ་འགྱུར་རོ། །གཤིན་རྗེའི་ཕྱོགས་སུ་གལ་
ཏེ་གློག་དང་། རླུང་དང་པོ་འབྱུང་བར་འགྱུར་ན་དེའི་ཚེ་ནི་རྒྱལ་པོ་དང་ཆོམ་རྐུན་གྱི་གནོད་པ་དང་། མེ་དག་དང་། ནད་དག་གི་འཇིགས་པ་དང་། མུ་གེ་དང་། མི་ངས་དང་། མི་རྣམས་ཕན་ཚུན་གསོད་པ་དང་། འཇིག་རྟེན་ལ་གནོད་པར་བྱེད་པ་སྤྱང་ཀི་དང་། སྟག་ལས་གྱུར་པ་དག་ཀྱང་འབྱུང་བར་
འགྱུར་རོ། །བདེན་བྲལ་གྱི་ཕྱོགས་སུ་གང་གི་ཚེ་གློག་དང་། རླུང་འབྱུང་ཞིང་སྤྲིན་དག་ཀྱང་སྣང་ལ། འབྲུག་སྒྲ་ཡང་གྲག་ན་དབང་པོས་ཆར་ཆུང་ངུ་འབེབས་པར་བྱེད་ཅིང་། ལོ་ཏོག་དག་ཀྱང་འབྱུང་བར་མི་འགྱུར། བྱི་བ་དང་བྱེ་བ་ལ་སོགས་པ་དག་ཀྱང་ཀུན་ནས་འབབ་པར་འགྱུར་རོ། །ཆུ་ལྷའི་ཕྱོགས་སུ་
གང་གི་ཚེ་གློག་དང་རླུང་འབྱུང་ཞིང་། འབྲུག་སྒྲ་ཡང་གྲག་པ་དེའི་ཚེ་ནི་ཆར་པ་ཆེན་པོ་འབབ་པར་འགྱུར་ཞིང་། ལོ་ཏོག་ཐམས་ཅད་སྨིན་པ་དང་། ལོ་ལེགས་པ་དང་། བདེ་བ་དང་། སྐྱེ་དགུ་རྣམས་ལ་ནད་མེད་པ་ཉིད་དང་། དེ་བཞིན་དུ་ཆོས་ཀྱི་བློ་འབྱུང་བར་ཡང་འགྱུར་རོ། །རླུང་གི་ཕྱོགས་སུ་གང་གི་ཚེ་
གློག་དང་རླུང་བྱུང་ན་རླུང་ཆེན་པོས་ཉམས་པའི་ཆར་མི་འབབ་པ་དང་། ལོ་ཏོག་སྐྱེ་བ་ཡང་མི་འགྱུར། རླུང་ནད་རྣམས་ཀྱང་འབྱུང་ཞིང་དེ་བཞིན་དུ་མི་ནད་རྣམས་ཀྱང་འབྱུང་བ་དང་། འཇིག་རྟེན་ལ་གནོད་པར་བྱེད་པ་ཐམས་ཅད་འབྱུང་བར་འགྱུར་རོ་ཞེས་རྣམ་པར་བཤད་པར་འགྱུར་རོ། །ཀུ་བེ་རའི་ཕྱོགས་ནས་གང་

203-1-27a

གི་ཚེ་གློག་དང་རླུང་བྱུང་བ་དེའི་ཚེ་དབང་པོས་ཟླ་བ་བཞིན་དུ་རྟག་ཏུ་ཆར་འབེབས་ཤིང་འབྲུ་ལ་སོགས་པ་ལོ་ཏོག་ཕུན་སུམ་ཚོགས་པ་དང་། མེ་ཏོག་དང་། འབྲས་བུ་ལ་སོགས་པ་ཕུན་སུམ་ཚོགས་པ་དང་། རྒྱལ་པོ་རང་གི་ཆོས་ཁོ་ནས་གནས་ཤིང་ཆོས་དང་ལྡན་པ་དང་། སྐྱེ་དགུ་ཐམས་
ཅད་ཆོས་ལ་དགའ་ཞིང་ཕན་ཚུན་ཕན་པར་འདོད་པ་ལ་དགའ་རངས་པ་དང་། བ་དང་བཞོན་རྣམས་ཀྱང་འོ་མ་མང་བར་འགྱུར་རོ། །དབང་ལྡན་གྱི་ཕྱོགས་སུ་དབྱར་ཟླ་བ་འབྲིང་པོ་ཉ་བའི་ཚེ་གློག་དང་། དེ་བཞིན་དུ་རླུང་འབྱུང་བར་གྱུར་ཅིང་སྤྲིན་སྒྲ་བྱུང་བར་ཡང་གྱུར་པ་དེའི་ཚེ་ནི་ཆུའི་ཆར་ཆེན་པོ་འབབ་པར་འགྱུར་བ་དང་། 
བདེ་བ་དང་། ནད་མེད་པ་དང་། ལོ་ལེགས་པ་དང་། ལོ་ཏོག་ཕུན་སུམ་ཚོགས་པ་དང་། སྐྱེ་དགུ་རྣམས་ནད་མེད་ཅིང་ཕན་ཚུན་བྱམས་པས་རྣམ་པར་འབྲེལ་པ་ཅན་དུ་འགྱུར་བ་དང་། རྒྱལ་པོ་རྣམ་པར་རྒྱལ་བ་དང་། དེ་བཞིན་དུ་ཡམས་ཀྱི་ནད་ཐམས་ཅད་རབ་ཏུ་ཞི་བར་འགྱུར་ཞིང་། ས་ལས་སྐྱེ་བ་ཐམས་
ཅད་ཀྱི་མེ་ཏོག་དང་། འབྲས་བུ་ལ་སོགས་པ་འབྱུང་བར་འགྱུར་རོ། །དབྱར་ཀ་འབྲུག་གི་སྒྲ་དྲག་ཏུ་ཡང་འབྱུང་ན་སྒྲ་བརྙན་གྱིས་ཉམས་པའི་སྒྲ་གནམ་ལྟ་བུ་དང་བཅས་པ་གྲག་པ་དེར་ནི་ལུས་ཅན་རྣམས་ལ་ཤིན་ཏུ་དམན་པར་འགྱུར་བར་བསྟན་པའོ། །སོ་གའི་དུས་སུ་ཕྱོགས་བརྒྱད་ནས་འབྲུག་གློག་དང་རླུང་
ལ་སོགས་པ་ལྡང་བའི་ལྟས་ཀྱི་ལེའུ་སྟེ་ལྔ་པའོ།།      །།བར་སྣང་ལས་འབྱུང་བའི་ལྟས་ལ་གང་གི་ཚེ་སྐར་མདའི་ཆར་པ་འབབ་པ་དང་། ཁྲག་གི་ཆར་པ་དང་། མར་དང་། འབྲུ་མར་དང་། ཞག་གི་ཆར་པ་བབ་ན་རྒྱལ་པོ་དང་བཅས་པའི་གྲོང་ཁྱེར་འཇིག་པར་འགྱུར་རོ། །ཡང་གྲོང་ཁྱེར་རམ། 
ཁྱིམ་དུ་སོལ་བའི་ཆར་པ་འབབ་ཅིང་། ཕུབ་མ་དང་།སྐྲ་དང་འདྲེས་པའི་རྡུལ་ལྷུང་བ་དང་། བྱེ་མའི་ཆར་པ་འབབ་པ་དེ་མྱུར་དུ་འཇིག་པར་མངོན་པར་ཤེས་པ་དག་གིས་བརྗོད་དོ། །གང་དུ་འབྲུ་མར་གྱི་ཆག་ཆག་དང་། མར་གྱི་ཐིགས་པ་ལྷུང་ཞིང་། བོང་བ་ལ་སོགས་པ་ཡི་དྭགས་ཀྱིས་ཕྱུང་བའི་ཉེས་པ་
རྣམས་འབྱུང་བར་གྱུར་ན་ཡུལ་འཁོར་དང་། གྲོང་ཁྱེར་དང་། ཁང་པ་དང་། དེ་བཞིན་དུ་བ་ལང་རྫིའི་གནས་དེར་རབ་ཏུ་འཇིག་པར་འགྱུར་རོ། །ཡང་མཆོད་རྟེན་དང་། སྐྱེ་ཤིང་དང་། སའི་ཕྱོགས་དག་ཏུ་ཁྲག་གི་ཆག་ཆག་དང་། ཤ་དང་རུས་པའི་དུམ་བུ་མགོ་ཐོད་དང་། སྐྲ་ཤད་ལ་སོགས་པས་མངོན་དུ་

203-1-27b

གང་བ་དེ་དག་ཏུ་ནི་ངེས་པར་ཉེ་འཁོར་གྱི་སྐྱེ་བོའི་སྐལ་བ་ཟད་པའི་ལྟས་སུ་བསྟན་པ་ཡིན་ནོ། །རྡོའི་ཆར་པ་ལ་གང་དུ་རྡོ་བིམ་པ་དང་། ཨུ་དུམ་བཱ་ར་ལྟ་བུ་དང་། ཀ་པིད་ཏའི་འབྲས་བུ་དག་བབ་པ་དེར་ན་འཇིགས་པ་ཆེན་པོ་འབྱུང་བར་སྟོན་ཏོ། །རྡོ་འབྲས་སཱ་ལུའི་ཚིགས་མ་འདྲ་བ་དང་། འབྲ་གོའི་རུས་པ་ལྟ་བུ་དག་ནི་
ལོ་ལེགས་པ་དང་། བདེ་བར་འབྱུང་བར་སྟོན་ཏོ། །རྡོ་དཀར་པོ་རྒྱ་ཤུག་གི་འབྲས་བུ་ལྟ་བུ་དང་། བ་རུ་རའི་ཚི་གུ་དག་བབ་པ་ནི་སྐྱེ་དགུ་རྣམས་བདེ་བའི་རྒྱུར་འགྱུར་རོ། །རྡོ་ཤེལ་དང་། རྡོ་ལྟ་བུ་དང་། མེ་ཏོག་ཀུནྡ་དང་། འོ་མ་ལྟར་སྣུམ་པ་དང་། ཟླ་བའི་མདོག་ལྟར་གསལ་བ་དག་ནི་མི་རྣམས་བདེ་
བར་བྱེད་པའོ། །གང་གི་ཚེ་སེར་བ་ཚུབ་མ་དང་། ཁ་ཅོལ་དང་བཅས་པ་དང་། མེ་ལྟ་བུ་དག་དང་། རྡུལ་དང་བཅས་པ་དང་། ས་གམ་པར་ཡང་གྱུར་པ་དེར་ནི་རྒྱལ་པོ་ཡུལ་འཁོར་དང་བཅས་ཏེ་འཇིག་པར་སྟོན་ཏོ། །ཡང་བར་སྣང་ལ་སེར་བ་བབས་ནས་རྡོ་དང་མཚོན་ཆ་ལྟ་བུ་མེའི་རྣམ་པ་དག་འབྱུང་བར་གྱུར་ན་
དེ་ནི་སྐྱེ་བོ་ལ་རིང་པོར་མི་ཐོགས་པར་འཇིགས་པ་འབྱུང་བར་བསྟན་ཏོ། །གལ་ཏེ་སེར་བ་དྲག་ཏུ་ཆུའི་ནང་དུ་བབ་པ་ལས་ནི་བདེ་བ་དང་། ལོ་ལེགས་པ་དང་། རྒྱལ་པོ་རྣམས་རྣམ་པར་རྒྱལ་བར་འགྱུར་ཏེ། འབྲས་བུ་ཟླ་བ་དྲུག་ན་སྟོན་པར་བརྗོད་དོ། །ཡང་གང་གི་ཚེ་དབྱར་ཀ་ཕྱོགས་རབ་ཏུ་ཚ་བར་འགྱུར་ལ་གནམ་
གྲུམ་པར་གྱུར་ན་དེ་ནི་རྒྱལ་པོ་དང་བཅས་པའི་སྐྱེ་བོ་རབ་ཏུ་གསོད་པར་བྱེད་དོ། །ཉིན་པར་རྟག་ཏུ་གནམ་གྲུམ་པའི་སྒྲ་འབྱུང་བ་དེར་ཡང་ཡུལ་འཇིག་པའི་རྟགས་ཡིན་ཏེ། རྒྱལ་པོ་ཡང་འཆི་བར་སྟོན་པའོ། །གང་ལྷོ་ཕྱོགས་སུ་གནམ་གྲུམ། སྤྲིན་དང་སྒྲ་མཉམ་པར་འགྱུར་ཞིང་། རླུང་རྩུབ་པ་དག་ལངས་པར་གྱུར་པ་
དེར་ནི་སྐྱེ་དགུ་རྣམས་བདེ་བར་མི་འགྱུར་བར་སྟོན་པའོ། །ཡངས་གཡོ་བ་གནམ་གྲུམ་པ་དང་བཅས་པར་འབྱུང་བ་དེའི་ཚེ་ནི་ངེས་པར་རྒྱལ་པོ་འཆི་བར་འགྱུར་རོ། །ཡངས་གཡོ་བ་དང་། གནམ་གྲུམ་པ་ལྷན་ཅིག་ཏུ་འབྱུང་བའམ། ཡང་སྐར་མདའ་ཆེན་པོ་ཕྱོགས་གང་དག་ཏུ་འགྲོ་བའི་ཕྱོགས་དེར་ནད་དང་། མུ་
གེ་ལས་གྱུར་པ་ཉམ་ཐག་པ་དང་བཅས་པའི་འཆི་བ་རྒྱུག་པ་སྟོན་པའོ། །གང་དུ་མེ་དང་། ཁུག་རྣ་དང་། སྤྲིན་གྱི་གནོད་པ་རྣམས་མེད་པར་རྡུལ་གྱི་ཁྲེམ་གཉེར་དག་གིས་ནམ་མཁའ་ཀུན་དུ་ཁེབས་ཤིང་ཉི་མའི་འོད་ཟེར་ཡང་ཟིལ་གྱིས་གནོན་པར་བྱེད་པ་དེའི་ཚེ་ན་རྒྱལ་པོ་རྣམས་ངེས་པར་འཆི་བར་འགྱུར་བ་ཡིན་ནོ། །

203-1-28a

གང་དུ་ཉིན་གཅིག་བཞིན་དུ་ཚུབ་མས་ཀུན་དུ་བསླང་བའི་རྡུལ་རེང་བུས་ནམ་མཁའ་དང་། ཕྱོགས་ཐམས་ཅད་ཀུན་དུ་ཁེབས་པར་གྱུར་པས་ནི་རྒྱལ་པོ་འཆི་བར་འགྱུར་ཞིང་སྐྱེ་བོ་རྣམས་ཀྱང་འཆི་བར་འགྱུར་བ་ཡིན་ནོ། །བར་སྣང་ལས་སྒྲ་ཆེན་པོ་འབྱུང་ངམ། ས་ཕྱོགས་ནས་འབྱུང་
ཡང་རུང་སྟེ། གང་དག་མི་སྙན་པ་དང་། མི་མཐུན་པ་དག་གི་སྒྲ་བྱུང་བ་དེ་ནི་ཕན་ཚུན་གསོད་པ་དང་། འཐབ་པ་དང་། མི་མཐུན་པར་གྱུར་པ་དག་གི་རྒྱུར་བསྟན་ཏོ། །གང་གི་ཚེ་གཟུགས་མི་སྣང་བར་སྲོག་ཆགས་རྣམ་པ་ཐ་དད་པའི་སྒྲ་བྱུང་ན་སྡུག་བསྔལ་བར་གྲགས་པ་དེའི་ཚེ་ནི་རང་གི་ཡུལ་འཁོར་དུ་བཅས་པའི་
རྒྱལ་པོ་འཆི་བར་འགྱུར། ནད་དང་། མུ་གེ་དང་། གནོད་པར་ཡང་འགྱུར་ཞིང་། འཇིག་རྟེན་ཡང་ཟད་པར་འགྱུར། རྒྱལ་སྲིད་ངན་པས་ཀྱང་བརླག་པ་དང་། བུ་སྨད་དང་ཡང་འབྲལ་བར་འགྱུར་རོ། །བར་སྣང་ལས་བྱུང་བའི་ལྟས་ཀྱི་ལེའུ་སྟེ་དྲུག་པའོ།།      །།ཕྱི་རོལ་འབྱུང་བ་ཆེན་པོའི་ལྟས་ལ་
གང་གི་ཚེ་ཤིང་ལྗོན་པ་དང་། གེལ་པ་དག་ལས་དུས་དང་མི་ལྡན་པར་འབྲས་བུ་འབྱུང་ན་རྒྱལ་པོའི་ཡུལ་ཕྱོགས་སུ་གཏོགས་པ་གསོད་པར་འགྱུར་རོ། །ཡང་གང་གི་ཚེ་མཆོད་སྦྱིན་གྱི་ཤིང་དང་། ལྷ་རྟེན་བྱས་པ་དང་། ཀ་བ་དང་། གཟུགས་ལ་སོགས་པ་ཤིང་སྐམ་པོ་དག་ལས་ལོ་མ་སྐྱེ་བར་རྩོལ་བ་ནི་རྒྱལ་པོ་
འཆི་བའི་ལྟས་དང་། དེ་བཞིན་དུ་སྐྱེ་བོ་དག་འཁྲུག་པའི་ལྟས་སུ་བསྟན་ཏོ། །ཡང་ཡུལ་དང་། གྲོང་དང་། གྲོང་ཁྱེར་གང་དག་ཏུ་ཤིང་དང་། ཤིང་ལྗོན་པ་དག་ལས་མེ་ཏོག་དང་། འབྲས་བུ་ཕྱིན་ཅི་ལོག་ཏུ་སྐྱེ་བར་གྱུར་ན་དེ་ནི་བདག་པོ་འཆི་བའི་རྟགས་ཡིན་ནོ། །གང་གི་ཚེ་སྔ་དྲོའི་དུས་སུ་ཤིང་དང་མིའི་གྲིབ་
མ་ཤར་ཕྱོགས་སུ་གནས་པར་གྱུར་པ་དང་། ཕྱི་དྲོ་ཡང་མི་དང་ཤིང་གི་གྲིབ་མ་ནུབ་ཕྱོགས་སུ་གནས་པར་གྱུར་ན་རྒྱལ་པོ་འཆི་བར་འགྱུར་རོ། །ཆུ་ཟབ་མོ་དང་། ཁྲོན་པ་དང་། རྫིང་དང་། མཚོ་ལ་སོགས་པ་སྲོག་ཆགས་ཆུ་ན་རྒྱུ་བ་རྣམས་གང་དུ་སྐམ་པ་དེར་ནི་རིང་པོར་མི་ཐོགས་པར་སྐྱེ་བོ་འཇིགས་པར་འགྱུར་
ཞེས་བསྟན་ཏོ། །རླུང་མེད་པར་གློ་བུར་དུ་ཁྲོན་པ་དང་། རྫིང་རྣམས་ཀྱི་ཆུ་དག་ཀུན་འཁྲུག་པར་འགྱུར་བ་གང་ཡིན་པ་དེར་ནི་རྒྱལ་པོ་དང་། ཡུལ་དང་ཡུལ་འཁོར་ལ་མི་དགེ་བར་བསྟན་ཏོ། །གང་དུ་རླུང་མེད་པར་གློ་བུར་དུ་གྲོང་གི་ཉེ་འཁོར་དུ་འཇུག་པའི་ཤིང་ལྗོན་པ་ཨ་ཤྭད་ཐ་དང་པ་ཏ་ལ་ལ་སོགས་པ་རྩ་བ་

203-1-28b

ཟུགས་པ་རྩ་བ་འགྱེལ་བར་གྱུར་ན་གྲོང་དེ་འཇིག་པར་འགྱུར་རོ། །ཡང་རླུང་མ་ལངས་པར་ཡང་ཐོག་ལྟུང་བ་དང་། ལུས་མི་སྣང་བར་ཚིག་མི་སྙན་པ་ཟེར་བ་དང་། ཤ་ཟ་མོའི་གླུ་སྒྲ་འབྱུང་བ་ནི་འཕྲལ་དུ་རྒྱལ་པོ་ལ་འཇིགས་པ་འོང་བར་བསྟན་ཏོ། །གལ་ཏེ་གློ་བུར་དུ་གདུགས་ཀྱི་ཤིང་དང་། ཁྲི་དང་། ཁྲིའུ་དང་།
ཁང་པའི་སྲོག་རྟེན་གྱི་ཤིང་དང་། དེ་ལྟ་བུའི་རྣམ་པ་དག་གི་ཤིང་རྡོ་ཆག་གྲུམས་སུ་གྱུར་པས་ནི་དེ་དག་གི་བདག་པོ་འཆི་བར་སྟོན་ཏོ། །ཡང་རྒྱལ་པོ་ངེས་པར་འཆི་བར་གྱུར་པའི་ཚེ་ནི་རླུང་དྲི་ང་བ་དང་། ཟས་སུངས་པ་ལྟ་བུའི་དྲི་དང་། ཁྱི་དང་། བྱ་དང་། བྱི་ལ་དང་། བོང་བུ་ལ་སོགས་པའི་དྲི་དང་། དེ་བཞིན་
དུ་ཕྱེ་མ་ལྟ་བུའི་དྲི་འབྱུང་བར་འགྱུར་རོ། །ཡང་རྒྱལ་པོ་འཆི་བའི་ཚེ་ནི་རྒྱལ་མཚན་གྱི་རྩེ་མོ་དང་། རྟ་བབས་དང་། སྒོ་གང་དག་ཏུ་སེར་བ་འབབ་ཅིང་མེ་མེད་པར་ཡང་མེ་མདག་ལྟུང་བར་འགྱུར་རོ། །རྩེ་མོ་དང་། རོལ་མོའི་སྒྲ་མི་སྙན་པ་དང་། མཚོན་རྣམ་པ་སྣ་ཚོགས་མི་མཛེས་པར་གྱུར་པ་ནི་ཡུལ་འཁོར་
དག་ཏུ་འཇིགས་པ་འབྱུང་བའི་ལྟས་ཡིན་ནོ། །གང་དུ་མཚོན་རྣམས་འགུལ་བ་དང་། རལ་གྲི་ཤུབས་དང་བྲལ་བར་གྱུར་པ་དང་། གཞུ་མ་བདུངས་པ་བདུངས་པར་གྱུར་ན་དེ་ནི་ངེས་པར་དམག་མི་བཟད་པ་འབྱུང་བར་སྟོན་ཏོ། །གང་གི་ཚེ་ཕྱོགས་ཐམས་ཅད་དུ་ནི་ཉིན་མོའམ། མཚན་མོ་ཡང་རུང་སྟེ། ནགས་
ཀྱི་མེ་སྣང་བར་གྱུར་པ་དེ་ནི་ལོ་ཉེས་པ་དང་། སྐྱེ་བོ་ངས་པར་འགྱུར་རོ། །ཉིན་མོའམ། ཡང་ན་མཚན་མོ་ཡང་རུང་སྟེ། ནམ་མཁའ་སྤྲིན་གྱིས་ཀུན་དུ་ཁེབས་པ་ན་ཕྱོགས་ཚ་བར་གྱུར་པ་དེའི་ཚེ་ནི་རྒྱལ་པོ་གསོད་པར་འགྱུར་རོ། །གལ་ཏེ་དགུན་ནི་དྲོ་བར་གྱུར་ལ་དཔྱིད་ནི་གྲང་བར་གྱུར་ན་ལུས་རྣམས་ཀྱིས་ཉེས་པ་དང་
འཆི་བར་འགྱུར་རོ། །དབང་པོས་ཀྱང་ཆར་ཉུང་ངུ་འབེབས་པ་དང་། དུས་འཆོལ་བར་ཡང་འགྱུར། འཇིགས་པར་བྱེད་པའི་ཆོམ་རྐུན་རྣམས་ཀྱིས་ཀྱང་ལོ་ཏོག་ཆུད་གསོན་པར་འགྱུར་རོ། །ཕྱི་རོལ་འབྱུང་བ་ཆེན་པོ་དག་གི་ལྟས་ཀྱི་ལེའུ་སྟེ་བདུན་པའོ།།      །།སྲོག་ཆགས་ཀྱི་ཚིག་ཏུ་སྨྲ་བ་མེད་པ་ཀུན་གྱི་
ལྟས་ལ་ཁྱི་རྣམས་འདུས་ཏེ་ཁ་གྱེན་དུ་བལྟས་ནས་ཡང་དང་ཡང་དུ་ངུ་བར་བྱེད་པ་དེ་ནི་ཡུལ་འཕོ་བར་བྱེད་པར་འགྱུར་རོ། །ཡང་ཉི་མ་འཆར་བའམ་ནུབ་པ་ཁོ་ནའི་ཚེ་ཁྱི་དག་ཕྱི་རོལ་དུ་ཁ་གྱེན་དུ་བལྟས་ཏེ་ངུ་བར་བྱེད་ན་ཡུལ་རྣམས་འཇིག་པའི་རྒྱུ་ཡིན་ནོ། །ཡང་ལྷ་ཁང་དང་། ལམ་པོ་ཆེ་དང་། རྒྱལ་པོའི་ལམ་

203-1-29a

དང་། ལམ་གྱི་བཞི་མདོར་ཁྱི་ཁ་གྱེན་དུ་བལྟས་ཏེ་ངུ་བར་བྱེད་ན་དེ་ནི་ཆོམ་རྐུན་དང་། མེའི་འཇིགས་པ་འོང་བར་སྟོན་པ་ཡིན་ནོ། །ཡང་ཁྱི་དང་། བྱ་རོག་རྒྱལ་པོའི་ལམ་དང་། ལམ་གྱི་བཞི་མདོར་ཐང་ལ་གཅིག་ཏུ་འདུས་ནས་གལ་ཏེ་སྒྲ་ཆེན་པོ་འབྱིན་པར་བྱེད་པ་དང་། ཅི་དགར་
འགྲོ་བར་བྱེད་པ་དེ་ནི་ཕ་རོལ་གྱི་དམག་ཚོགས་འོང་བ་ཡིན་ནོ། །གང་གི་ཚེ་བྱ་རོག་དང་། བུང་བ་དང་། སྦྲང་བུ་རྣམས་ར་བ་དང་། གྲོང་ཁྱེར་གྱི་སྒོ་དང་། ཐང་དང་། ལམ་གྱི་བཞི་མདོར་སྦྲང་རྩི་ཚང་དུ་བྱེད་པར་གྱུར་ན་གློ་བུར་གྱི་འཇིགས་པ་དང་། རྒྱལ་པོའི་འཇིགས་པ་འབྱུང་བར་རིག་པར་བྱའོ། །དེ་བཞིན་
དུར་བ་དང་། ཁྱིམ་གྱི་མདུན་དག་ཏུ་ཡང་དེ་ལྟ་བུར་སྣང་ན། དེ་བཞིན་དུ་འཇིགས་པ་འབྱུང་བར་རིག་པར་བྱའོ། །དེ་ལ་གློ་བུར་གྱི་འཇིགས་པ་འོང་ཞེས་བྱ་བ་ནི་ཕ་རོལ་གྱི་དམག་ཚོགས་འོང་བ་དང་། མེ་དང་ཆོམ་རྐུན་གྱི་འཇིགས་པ་དག་འབྱུང་བར་སྟོན་པ་ཡིན་ནོ། །ཡང་གང་དུ་སྲོག་ཆགས་ཕྲ་མོ་དག་ལ་ལ་
རབ་དང་། གྲོང་ཁྱེར་གྱི་སྒོ་དང་། ཡང་ཐོག་དང་། སྒོ་ཁང་ལ་འཕྱང་མོ་ཉུག་ཅིང་འཛེགས་པར་སྣང་བ་དེར་ནི་ཕ་རོལ་གྱི་དམག་ཚོགས་ཀྱིས་རིང་པོ་མི་ཐོགས་པར་གྲོང་ཁྱེར་མྱུར་དུ་འཇིག་པར་འགྱུར་རོ། །གང་གི་ཚེ་ཁྱི་དང་། ཝ་དང་། བྱི་ལ་ལ་སོགས་པ་དང་། བྱ་སྣ་ཚོགས་དག་དུས་མཚམས་མེད་པར་
འཁྲིག་པ་དང་ལྡན་པའི་ཚེ་ནི་རྒྱལ་པོ་དང་། ཡུལ་རྟག་ཏུ་འཇིག་པར་བསྟན་པ་ཡིན་ནོ། །དེ་བཞིན་དུ་མི་དང་། རྟ་དང་། རྔ་མོ་དང་། བོང་བུའི་རིགས་དང་། བ་ལང་མོ་དང་། བྱ་དང་། རི་དྭགས་རྣམས་དང་། ཁྱི་དང་། བྱི་བ་དང་། སྦྲུལ་དག་དང་། སྲོག་ཆགས་ཕྲ་མོ་གཞན་དག་གི་ཡང་མངལ་ཕྱིན་ཅི་
ལོག་ཏུ་གྱུར་པ་དེར་ནི་ཡུལ་རྣམས་འཁྲུག་པ་དང་། རྒྱལ་པོ་ཡང་འཆི་བར་འགྱུར་རོ། །ཡང་གང་དུ་བྱ་དང་། རི་དྭགས་ཀྱི་རིགས་རྣམས་དང་། ཁུང་ན་ཉལ་བ་རྣམས་ལོག་པར་འཁྲིག་པ་དང་ལྡན་པར་སྨྲ་བ་དེ་ནི་རྒྱལ་པོ་འཆི་བར་འགྱུར་རོ། །བྱ་རོག་གི་གཤོག་པ་དཀར་པོ་མཐོང་ན་མི་དགེ་བ་ཡིན་ཏེ། ཡུལ་
དེ་ནས་འགྲོ་བར་བྱའོ། །དེ་བཞིན་དུ་བྱ་རྒོད་ལ་སོགས་པའི་གཤོག་པ་ལྷུང་བར་མཐོང་བ་དང་། ཝང་ལ་མི་སོས་པར་བརྒྱལ་བར་འགྱུར་བ་དེར་ནི་ཡུལ་གྱི་བདག་པོ་དང་། རྒྱལ་པོ་དག་འཆི་བའི་ལྟས་སུ་བསྟན་ཏོ། །ཡང་གང་གི་ཚེ་གྲོང་ཁྱེར་དུ་ཁྭའི་ཚོགས་འདུས་ནས་གྲོང་གི་ཕྱི་རོལ་དུ་འདོང་བ་དེ་ནི་ངེས་པར་

203-1-29b

གྲོང་གི་སྐྱེ་བོ་མེད་པར་འགྱུར་རོ། །ཝ་ཤིང་གི་སྟེང་ན་འདུག་གམ། ར་བ་དང་། སྒོ་ཁང་དང་། ཁྱིམ་དུ་འདུག་སྟེ། སྒྲ་ཆེན་པོ་འབྱིན་ཞིང་ཤིན་ཏུ་འཇིགས་པར་སྦྲོན་པ་དང་། ཝ་ཉི་མ་ལ་ཁ་བལྟས་ཏེ་རེངས་ཐབས་སུ་འདུག་ནས་སྐད་དྲག་ཏུ་འབྱིན་པ་དེར་ནི་དམག་འབྱུང་བར་བཤད་པར་བྱའོ། །ཤིང་མཐོན་པོའམ་
ཁང་སྟེང་མཐོན་པོའམ།མཛོད་མང་པོར་འདུག་སྟེ། ཁ་ཉི་མ་ལ་བལྟས་ནས་ཝ་སྐད་དྲག་ཏུ་འབྱིན་པ་ནི་མི་ལས་གྱུར་པ་དང་། རྒྱལ་པོ་ལས་གྱུར་པའི་ཉེས་པ་འབྱུང་བར་བྱེད་དོ། །ཁྭ་འདུས་པས་ས་ལ་མཆུ་བཙུགས་ཏེ། ཅང་མི་སྨྲ་བར་སྐད་ཅིག་འདུག་ནས་འདུས་ཏེ་གང་གི་ཚེ་ནམ་མཁའ་ལ་འཕུར་བ་དེའི་ཚེ་
དམག་གིས་འཚོ་བ་རྣམས་ལ་ཤིན་ཏུ་ཁྲག་འབྱུང་བར་འགྱུར་རོ། །ཁྭ་ཁ་འཐབས་ཤིང་སྐད་འབྱིན་པའི་ཚོགས་རྟག་ཏུ་འབྲེལ་པ་གང་ཡིན་པ་དེ་ནི་གལ་ཏེ་ཁྱིམ་མམ། གྲོང་ཁྱེར་རམ། ཡུལ་འཁོར་དང་། ཡུལ་དང་། བ་ལང་རྫིའི་གནས་འཇིག་པར་འགྱུར་བར་བརྗོད་པར་བྱའོ། །ཁྭ་ས་ལ་མཆུའི་རྩེ་མོ་གཏད་
དེ། སྐད་མི་བཟད་པ་མི་གསལ་བའང་འབྱིན་པ་དེར་ནི་དེའི་ཚེ་ཤིན་ཏུ་འཇིགས་པ་ཆེན་པོ་འབྱུང་བར་བསྟན་ཏོ། །ཤ་ཟ་བའི་བྱའི་མཆུའི་རྩེ་མོ་ལས་གང་དུ་ཤ་ལྷུང་བ་དེར་ནི་གློ་བུར་དང་། རྒྱལ་པོ་ལས་གྱུར་པའི་འཇིགས་པ་ཆེན་པོ་འོང་བར་བསྟན་ཏོ། །གང་དུ་རི་དྭགས་ཁ་ཉི་མ་ལ་གྱེན་དུ་བལྟས་ཏེ། མི་དགའ་
ཞིང་མཐོང་བར་བྱེད་ན་ཡུལ་གྱི་སྐྱེ་བོ་བསྒྲུངས་སུ་ཟིན་ཀྱང་སེམས་ཅན་གཞན་དག་གིས་འཇིགས་པར་གྱུར་པ་དེར་ནི་རྒྱལ་པོ་ལ་བརྙས་པར་མཐོང་བར་འགྱུར་རོ། །གང་དུ་ཝ་ཉིན་པར་ཉི་མ་ལ་ཁ་ལྟ་ཞིང་ཡང་དང་ཡང་སྐད་དྲག་པོ་འབྱིན་པ་དང་། མཚན་མོ་གཟའ་རྣམས་ལ་ལྟ་བར་བྱེད་ཅིང་བརྒྱལ་བའི་ཚེ་ནི་ངེས་པར་
རྒྱལ་པོ་འཆི་བར་འགྱུར་རོ། །བྱ་རྒོད་དང་། བྱ་ལྷས་དང་། ཆུ་ནས་སྐྱེས་པའི་བྱ་དང་། ཁྭ་དང་། ཐི་བ་དང་། ཟས་སུ་ཤ་ཟ་བ་གཞན་དག་རྒྱལ་མཚན་གྱི་རྩེ་མོ་དག་དང་། ཁང་སྟེང་དུ་འདུག་པ་ནི་དེའི་ཚེ་ཟད་པར་འགྱུར་བར་མངོན་པར་ཤེས་པ་དག་གིས་རབ་ཏུ་བརྗོད་དོ། །གལ་ཏེ་ཉི་མ་ཕྱེད་པའི་ཚེ་གླང་པོ་ཆེ་དང་།
བ་ལང་གི་གནས་དང་། རྟའི་བྲེས་སུ་འུག་པ་སྣང་ལ་ཕྱུགས་དག་ཀྱང་བཞོན་པར་འགྱུར་བ་ནི་ངེས་པར་རྒྱལ་པོ་འཇིགས་པ་འབྱུང་བར་བསྟན་ཏོ། །ཡང་གང་གི་ཚེ་གླང་པོ་ཆེའི་ལག་པའི་རྩེ་མོས་ཁྲག་སྐྱུག་པར་བྱེད་པ་དང་། གླང་པོ་ཆེ་མཆོག་དག་མཆེ་བ་ཆག་པ་དང་། རྟ་རྣམས་ཁ་ངལ་བར་གྱུར་པའི་རྒྱལ་པོ་ལ་

203-1-30a

འཇིགས་པ་འབྱུང་བའི་རྒྱུར་བསྟན་ཏོ། །གང་དུ་པདྨའི་འདབ་མ་བཏིང་བ་དག་ཏུ་བྱ་རོག་རྣམས་རྩེ་བར་བྱེད་ཅིང་། ཐང་ལ་ཡང་བྱ་ཀ་རཎྜ་བ་དང་། ངང་པའི་ཚོགས་དག་རྩེ་བར་བྱེད་ན་ཁྱིམ་མམ་གྲོང་ཁྱེར་དེ་འཇིག་པར་འགྱུར་རོ། །སྲོག་ཆགས་ཚིག་ཏུ་སྨྲ་བ་མེད་པ་རྣམས་ཀྱི་ལྟས་
ཀྱི་ལེའུ་སྟེ་བརྒྱད་པའོ།།      །།ཆར་ལྟས་ལ་སྤྲིན་གྱི་གཟུགས་རིའི་རྣམ་པ་ལྟ་བུ་དག་དང་། ཕག་དང་ཆུ་སྲིན་ལྟ་བུ་དག་དང་། སྦལ་པ་དང་གླང་པོ་ཆེའི་གཟུགས་ལྟ་བུ་དག་དང་། རིལ་བ་དང་བུམ་པ་ལྟ་བུ་དག་དང་། སེང་གེ་དང་། སྟག་དང་། གླང་པོ་ཆེ་བཞིན་དུ་ལྷའི་སྤྲིན་དག་གིས་ཁེབས་པའི་ཉི་མའི་
མོད་ལ་ཆར་པ་འབབ་པར་བརྗོད་པར་བྱའོ། །ལྡོང་རོས་ཀྱི་མདོག་ལྟ་བུ་དང་། དེ་བཞིན་དུ་མཚལ་ལྟ་བུ་དང་། ནེ་ཙོ་ལྟར་སྣང་བའི་མདོག་དང་། ཉེ་བའི་སྤྲིན་དག་གིས་ཆར་པ་འབེབས་པར་ཡང་དག་པར་བསྟན་པར་བྱའོ། །པདྨའི་འདབ་མ་ལྟ་བུ་དང་། དེ་བཞིན་དུ་རྡོ་སྤུངས་པ་ལྟ་བུའི་སྤྲིན་གྱིས་ཉི་མ་དང་ཟླ་བའི་
གཟུགས་ཁེབས་པར་གྱུར་པ་དེ་ནི་དེའི་ཚེ་ཕྱོགས་སུ་འོད་ཆེན་པོ་འབྱུང་བར་འགྱུར་བའི་ཆར་པ་འབབ་པར་བསྟན་པར་བྱའོ། །གང་གི་ཚེ་ནམ་མཁའ་ལ་ཡན་ལག་ཐམས་ཅད་སྤྲིན་གྱིས་ཐིབས་པོར་ཁེབས་ནས་གདུགས་ལྟ་བུའི་གློག་འབྱུང་བར་བྱེད། འབྲུག་སྒྲ་རིང་དུ་འདོད་དགའ་འབྱུང་བ་དེའི་ཚེ་ནི་ས་ཆུས་ཤིན་ཏུ་
གང་བར་འགྱུར་རོ། །ཡང་གང་གི་ཚེ་སྤྲིན་ཨི་ཤ་ནིའི་ཕྱོགས་དང་། ཤར་དང་། བྱང་གི་ཕྱོགས་ནས་བྱུང་སྟེ། རིང་ཞིང་བརྟན་པའི་སྒྲས་འབྲུག་ཟེར་བ་དེའི་ཚེ་ཡང་གཅིག་པ་ཆུ་དང་ལྡན་པར་འགྱུར་རོ། །ཡང་ཟླ་བ་ཡར་གྱི་དང་མར་གྱི་ངོ་ཡང་རུང་སྟེ། གཟའ་ཐམས་ཅད་འབྱུང་ཞིང་འདུ་བའི་སྤྲིན་དེ་དག་ནི་ཆར་
པ་བབ་པར་བྱེད་དེ། འདི་ནི་སྔོན་གྱི་ལུང་ཤེས་པ་དག་གིས་བསྟན་པ་ཡིན་ནོ། །གང་གི་ཚེ་དགུན་ཟླ་འབྲིང་པོར་གྱུར་པ་ན་སྤྲིན་འདུས་པར་སྣང་ཞིང་། རླུང་སྣུན་པའི་སྤྲིན་རུམ་ནས་འབྱུང་བ་དག་ལྡང་བ་དེའི་ཚེ་ནི་ཟླ་བ་དྲུག་པར་གྱུར་ནས་དབང་པོས་ཆར་པ་འབེབས་པར་འགྱུར་རོ། །དགུན་ཟླ་ཐ་ཆུངས་ལ་སྤྲིན་བརྩེགས་
པའི་སྤྲིན་རུམ་འདུས་པ་གློག་དང་བཅས་པ་ནི་དབྱར་ཟླ་འབྲིང་པོར་ཡང་དག་པར་གྱུར་ནས་ཆུ་མང་དུ་རྣམ་པར་གཏོང་བར་འགྱུར་རོ། །དཔྱིད་ཟླ་ར་བ་ལ་སྤྲིན་རུམ་དུ་གྱུར་པས་ནི་དབྱར་ཟླ་ཐ་ཆུངས་ལ་ཆར་པ་འབབ་པར་བསྟན་པར་བྱའོ། །གང་གི་ཚེ་དགུན་ཟླ་ཐ་ཆུངས་དང་དཔྱིད་ཟླ་འབྲིང་པོ་རྣམས་ལ་སྤྲིན་རྣམས་

203-1-30b

འཛིངས་པར་བྱེད་པ་ནི་དེའི་ཚེ་ཟླ་བ་དྲུག་དྲུག་གི་ཕྱེད་དེའི་ཚེ་ཆར་པ་མི་འབབ་པར་བརྗོད་པར་བྱའོ། །གང་གི་ཚེ་དགུན་ཟླ་ཐ་ཆུངས་དང་། དཔྱིད་ཟླ་འབྲིང་པོ་རྣམས་ལ་སྤྲིན་རླུང་རུམ་ཅན་དག་ཆུ་གཏོང་བར་མི་བྱེད་པ་ནི་དབྱར་ཀ་ཆར་པ་དེ་འབེབས་པར་འགྱུར་རོ། །གང་གི་ཚེ་བྱང་ཕྱོགས་དང་། བྱང་
ཤར་དང་། དེ་བཞིན་དུ་ཤར་དང་། ནུབ་དག་ནས་གློག་འབྱུང་བ་ནི་ཆར་པ་འབབ་པར་སྟོན་པའོ། །ཡང་ཕྱོགས་ཐམས་ཅད་ནས་གློག་ཀུན་དུ་འབྱུང་བར་གྱུར་པ་དེའི་ཚེ་ནི་ནམ་མཁའ་ཁེབས་པའི་ཆར་པ་འབབ་པར་སྟོན་པ་ཡིན་ནོ། །གང་གི་ཚེ་གློག་གི་འོད་དམར་ཞིང་མཐའ་སྔོ་བར་སྣང་བ་དེའི་ཚེ་ནི་མེའི་
ཕྱོགས་ནས་ཆར་པ་ཆུང་ཟད་འབབ་པར་འགྱུར་རོ། །གང་གི་ཚེ་ནུབ་ཕྱོགས་ཀྱི་ཆར་སྤྲིན་གྱི་དབུས་འཇའ་སྣུམ་པ་ནོར་བུ་བཻ་ཌཱུརྱའི་འོད་ལྟ་བུ་བྱུང་བར་གྱུར་ཅིང་གློག་འགྱུ་བའི་ཡལ་ག་དང་། རང་གི་ཕྱོགས་ནས་རླུང་གིས་བསྐྱོད་པར་འགྱུར་བ་དེའི་ཚེ་ནི་ཞག་བདུན་བདུན་དུ་ཆར་པ་འབབ་པར་རིག་པར་བྱའོ། །གང་གི་ཚེ་
ཤར་རམ་བྱང་ནས་ཁ་བ་འབབ་ཅིང་རླུང་འབྱུང་ལ་ཕྱོགས་དུད་ཀ་དང་། སྔོ་བསངས་སུ་བྱེད་པ་དེའི་ཚེ་ནི་ཆུ་ཆེར་འབབ་པར་འགྱུར་རོ། །གང་གི་ཚེ་ཉི་མ་ཤར་བའམ། དུས་ཚིགས་ཀྱི་ཆགས་པ་འབྱུང་བར་ཆར་པའི་ཐིགས་པ་འབབ་པ་དེའི་ཚེ་ནི་ངེས་པར་ཆར་མོ་ཆེ་འབབ་པར་འགྱུར་རོ། །གལ་ཏེ་ཡང་ཉི་མ་
ཤར་བའི་ཚེ་སྦལ་པས་སྐད་རན་ཅིང་སྙན་པ་འབྱུང་བ་དེའི་ཚེ་ཆར་མོ་ཆེ་འབབ་པར་འགྱུར་རོ། །མི་གཞན་ཞིག་ལག་ན་གདུགས་ཐོགས་ནས་ཆར་པའི་མཚན་མ་དྲིས་སམ་ཁྱིམ་འགེངས་བཞིན་དུ་དྲིས་ན་དེའི་ཚེ་རྟག་ཏུ་ཆར་པ་འབབ་པར་འགྱུར་རོ། །གོས་གཤེར་བས་ཀྱང་དྲིས་ན་ཆར་པའི་རྒྱུ་ཡིན་ཏེ། དེ་ལ་
མོད་ཁོ་ནར་ཆར་དུ་འབབ་པར་འགྱུར་བ་ཐེ་ཚོམ་མེད་དོ། །ཆུའི་ཕྱོགས་སུ་འདུག་ནས་དྲིས་ཀྱང་རུང་སྟེ། ཆར་པ་འབབ་པར་བལྟ་བར་བྱའོ། །བྱི་ལ་དང་། སྲེ་མོང་དང་། སྦྲུལ་རྣམས་དང་། གང་ཡང་གཞན་དག་ཏུ་གན་དུ་གནས་པ་དག་གལ་ཏེ་དྲོད་མི་མཐུན་པར་རྒྱུག་པར་བྱེད་ན་མོད་ལ་ཆར་འབབ་པར་སྟོན་པ་
ཡིན་ནོ། །བྱིས་པ་ལུས་འཇིམ་པས་བྱུགས་པ་དང་། མགོ་མེ་ཏོག་ཕྲེང་བས་དཀྲིས་པ་གང་ན་འདུག་པ་དར་ནི། འཕྲལ་དུ་ཆར་པ་མངོན་པར་འབབ་པར་བྱེད་དོ། །ལུས་རྡུལ་གྱིས་བྱུགས་པའི་བྱིས་པ་དག་རྡུལ་གྱིས་རྩེ་བར་བྱེད་པ་དང་། ཡུར་བ་འགེངས་པར་བྱེད་ན་ཕྲལ་དུ་ཆར་པ་འབབ་པའི་རྒྱུ་ཡིན་ཏེ། ཆར་པ་

203-1-31a

འབབ་པའི་མཚན་ཉིད་ལ་མཁས་པ་རྣམས་ཀྱིས་དེ་ནི་འཕྲལ་དུ་ཆར་པ་འབབ་པར་བཤད་པ་ཡིན་ནོ། །གང་གི་ཚེ་སྤྲིན་ཀྱང་མེད། ཁ་བ་ཡང་མེད་པར་རླུང་ཤིན་ཏུ་བསིལ་བ་དག་འབྱུང་ཞིང་། ལུས་ཅན་གྲང་བར་བྱེད་པ་ནི་དེར་འཕྲལ་དུ་ངེས་པར་ཆར་པ་འབབ་པར་བྱེད་པའོ། །ཆུ་
ནས་སྐྱེས་པའི་བྱ་ཤིང་གི་ཡལ་ག་ལ་ཞོན་པ་དག་ཉི་མས་འདབ་མ་སྐེམས་པར་བྱེད་པ་ནི་ཤིན་ཏུ་ཆར་པ་འབབ་པར་ཡང་སྟོན་པ་ཡིན་ནོ། །གང་གི་ཚེ་ཤིང་ལ་གནས་པའི་བྱ་འདབ་མ་སྐེམས་པར་བྱེད་པ་དེ་ནི་ཆར་པ་འབབ་པར་བྱེད་པའི་རྒྱུ་ཡིན་པར་བསྟན་བཅོས་མཁས་པ་རྣམས་ཀྱིས་བསྟན་བཅོས་ལས་བརྗོད་པ་
ཡིན་ནོ། །གྲོང་གི་བྱིའུ་ཁྲུས་བྱེད་ཅིང་འདབ་མ་སྤྲུག་པར་བྱེད་པ་གང་ཡིན་པ་དེ་ནི་ཆར་པ་འབབ་པའི་ཡང་དག་པའི་ཤེས་པ་རྣམས་ཀྱིས་ཆར་པའི་རྒྱུ་ཡིན་པར་བརྗོད་པ་ཡིན་ནོ། །ཆར་ལྟས་ཀྱི་ལེའུ་སྟེ་དགུ་པའོ།།      །།དུས་ཚིགས་ཀྱི་འོད་ཆགས་པའི་ལྟས་ལ་བྲམ་ཟེ་རིག་པ་ཅན་གྱིས་དུས་ཚིགས་ཀྱི་
འོད་ཆགས་པ་བསྒྲིམས་ཏེ་བརྟགས་ནས་དུས་བསྟན་པར་བྱ་སྟེ། གང་གི་ཚེ་ནང་ནུབ་ཏུ་དུས་ཚིགས་མདོག་སྣུམ་ཞིང་། ལྡོང་རོས་ལྟ་བུའི་འོད་དམ་བ་བླའི་འོད་ལྟ་བུར་མཐོང་ན་ཞག་གསུམ་གྱི་བར་དུ་ཆར་པ་འབབ་པར་ལྟས་ཤེས་པ་དག་གིས་བརྗོད་པ་ཡིན་ནོ། །དུས་ཚིགས་ཀྱི་ཁ་དོག་དུང་དང་། གུར་གུམ་དང་།
བ་ལང་གི་གཅིན་ལྟ་བུའི་འོད་འབྱུང་བ་དེ་དག་ནི་འཕྲལ་དུ་ཆར་པ་འབབ་པའི་རྒྱུ་ཡིན་ནོ། །དབྱར་ཀ་དུས་ཚིགས་གཉིས་ཀར་ཡང་ཁ་དོག་སྣུམ་པ་དང་། གུར་གུམ་ལྟ་བུ་དང་། གནག་པ་དང་། རང་བཞིན་གྱིས་མཚལ་གྱི་འོད་ལྟ་བུ་འབྱུང་བ་དང་། ཁ་དོག་ཁྲག་གི་རྒྱུན་དང་མཚུངས་པའི་འོད་དང་། དེ་
བཞིན་དུ་རྒྱ་སྐྱེགས་ཀྱི་ཁུ་བ་ལྟ་བུ་དང་། དེ་བཞིན་དུ་ཟངས་ལྟར་དམར་བ་དག་གིས་ནི་དུས་ཚིགས་འཇིགས་པར་བྱེད་པར་འགྱུར་རོ། །དུས་ཚིགས་ཁ་དོག་རྩུབ་པ་དག་ཏུ་དམག་དང་མཚོན་གྱིས་འདེབས་པ་དང་། ཁྲག་གི་ཆག་ཆག་བཏབ་པའི་ས་རྣམས་འབྱུང་བ་ནི་ཤིན་ཏུ་འཇིགས་པར་འགྱུར་རོ། །དུས་
ཚིགས་ཀྱི་ཆགས་པ་ཤིན་ཏུ་དམར་བ་ནི་ཉིན་གསུམ་དུ་ཆར་པ་འབབ་པར་བསྟན་ཏོ། །ཡང་ན་མཚོན་གྱིས་འདེབས་པ་མཚོན་གྱིས་འཚོ་བའི་སྐྱེ་བོ་ཟད་པར་ཡང་འགྱུར་རོ། །གང་དུ་དུས་ཚིགས་གཉི་གར་ཕྱོགས་སུ་རྡོ་ཡི་ཆར་པ་འབབ་པ་དེར་ནི་མཁྲིས་པའི་ནད་ལ་སོགས་པས་ལུས་ཅན་འཆི་བར་འགྱུར་རོ། །

203-1-31b

གལ་ཏེ་དུས་ཚིགས་ཀྱི་ཆགས་པ་ཡང་དང་ཡང་དུ་བྱིས་པ་དག་དམག་འགྱེད་པ་ན་རྣམ་པར་སྐྲག་པར་འགྱུར་ཞིང་རབ་ཏུ་རྒྱུག་པར་བྱེད་པ་དེར་ནི་ཡུལ་འཁོར་འཇིག་པར་འགྱུར་རོ། །དུས་ཚིགས་ཀྱི་རང་བཞིན་དང་ལྡན་པའི་ཉི་ཟླ་གཉིས་དང་ལྷན་ཅིག་ཏུ་འབྱུང་ཞིང་། ཁ་དོག་གི་འོད་དམར་བ་དང་། རྩུབ་
པ་མ་ཡིན་པ་ནི་ལོ་ལེགས་པ་དང་བདེ་བའི་རྒྱུ་ཡིན་ནོ། །དུས་ཚིགས་གཉི་གར་འོད་ཤིན་ཏུ་གནག་ཅིང་མུན་པ་དང་འདྲ་བས་གང་ན་དེའི་དམག་དཔོན་རྣམས་འཁྲུག་པ་དང་། གསོད་པར་ཡང་བསྟན་པར་བྱའོ། །གང་དུ་དུས་ཚིགས་ཀྱི་རང་བཞིན་གྲང་བ་དང་། དྲོ་བ་དང་། འཇམ་པ་དང་། རྩུབ་པ་
རྣམས་ཕྱིན་ཅི་ལོག་ཏུ་གྱུར་པ་དེར་ནི་ནད་དང་། འཆི་བ་དང་། རྒྱལ་པོ་ལ་འཇིགས་པ་འབྱུང་བའམ། ཡང་ན་ངེས་པར་བདག་པོ་འཆི་བར་བསྟན་པ་ཡིན་ནོ། །དེའི་ཉེ་འཁོར་དུ་ཆོམ་རྐུན་དང་། སྦྲུལ་དང་། སྲིན་པོ་རྣམས་ཀྱི་དབང་དུ་ཡང་འགྱུར་རོ། །དུས་ཚིགས་ཀྱི་འོད་ཆགས་པའི་ལེའུ་སྟེ་བཅུ་
པའོ།།      །།དྲི་ཟའི་གྲོང་ཁྱེར་གྱི་ལྟས་ལ། གལ་ཏེ་ཤར་ཕྱོགས་སུ་དྲི་ཟའི་གྲོང་ཁྱེར་བྱུང་བར་གྱུར་ན་ནུབ་ཕྱོགས་ན་འདུག་པའི་རྒྱལ་པོ་ལ་མཆོག་ཏུ་འཇིགས་པ་འབྱུང་བར་བསྟན་པ་ཡིན་ནོ། །གང་གི་ཚེ་ནུབ་ཕྱོགས་སུ་དྲི་ཟའི་གྲོང་ཁྱེར་སྣང་བར་གྱུར་ན། དེའི་ཚེ་ན་ཤར་ཕྱོགས་ན་གནས་པ་རྣམས་ལ་
འཇིགས་པ་ཆེན་པོ་འབྱུང་བར་བརྗོད་པར་བྱའོ། །གང་གི་ཚེ་བྱང་ཕྱོགས་སུ་དྲི་ཟའི་གྲོང་ཁྱེར་སྣང་བར་གྱུར་ན་དེའི་ཚེ་ནི་ལྷོ་ཕྱོགས་ན་གནས་པའི་རྒྱལ་པོ་རྣམས་ལ་འཇིགས་པ་འབྱུང་ངོ་། །གང་གི་ཚེ་ལྷོ་ཕྱོགས་སུ་དྲི་ཟའི་གྲོང་ཁྱེར་སྣང་བར་གྱུར་ན་དེའི་ཚེ་ནི་བྱང་ཕྱོགས་ན་གནས་པ་རྣམས་ལ་འཇིགས་པ་འབྱུང་བར་
བརྗོད་པ་ཡིན་ནོ། །དྲི་ཟའི་གྲོང་ཁྱེར་ཆགས་པའི་ལེའུ་སྟེ་བཅུ་གཅིག་པའོ།།      །།གལ་ཏེ་གང་དུ་འཇིག་རྟེན་པའི་ལྷའི་གཟུགས་གར་བྱེད་པ་དང་། རབ་ཏུ་གཡོ་བར་གྱུར་པ་དང་། སྨྲ་བར་གྱུར་པ་དང་། མིག་མཆི་མས་གང་བ་དང་། རྟུལ་བར་གྱུར་པ་དང་། གས་པར་གྱུར་པ་དང་། དུམ་བུར་
གྱུར་པ་དང་། ཐམས་ཅད་ཞིག་པ་ལ་སོགས་པས་ནི་འཇིགས་པ་རྣམ་པ་དུ་མ་འབྱུང་བར་རིག་པར་བྱའོ། །དེ་ལ་ཡང་གར་གྱིས་ནི་དམག་མང་པོ་འབྱུང་ངོ་། །རབ་ཏུ་གཡོ་བས་ཟླ་བ་བཞིན་དམག་འབྱུང་བ་དང་། ཟླ་བ་དྲུག་གིས་རྒྱལ་པོ་ཀུན་དུ་ཟད་པར་འགྱུར་བ་དང་། རིང་པོ་མི་ཐོགས་པར་ཡུལ་འཇིག་པར་

203-1-32a

འགྱུར་རོ། །གོམ་པ་འདོར་བས་ནི་ཡུལ་བོར་ཏེ་འདོང་པར་འགྱུར་རོ། །གླུ་ལེན་པས་ནི་ཡུལ་འཇིག་པར་འགྱུར་རོ། །དུམ་བུ་ལས་ལྟུང་ན་ལུས་ཅན་རྣམས་འཆི་བར་འགྱུར་རོ། །རླུང་ལ་སོགས་པས་ཕུལ་བ་དང་། ལྟོས་པ་མེད་པར་ལྷའི་གཟུགས་ཀྱི་མགོ་དག་ལས་མེ་ཏོག་གི་ཕྲེང་བ་
ལག་པར་གཞག་པ་ལྷུང་བར་གྱུར་པ་ནི་རྒྱལ་པོ་དང་ཡུལ་འཁོར་དང་བཅས་ཏེ་འཆི་བར་འགྱུར་རོ། །ཡང་གང་དུ་རྒྱལ་པོ་རྟག་ཏུ་ཕན་ཚུན་འཁྱམ་པར་བྱེད་པ་དང་། འཇིགས་པ་མེད་པར་ཡང་འཇིགས་པས་སྐྲག་པ་དང་། རྡེག་འཆོས་པ་དང་། རབ་ཏུ་གྱུར་པ་དང་།ཡིད་མི་དགའ་ཞིང་ངུ་བར་གྱུར་པ་
དང་། གཟུགས་མི་སྣང་བར་སྲོག་ཆགས་རྣམ་པ་ཐ་དད་པ་དག་གིས་སྒྲ་ཤིན་ཏུ་སྡུག་བསྔལ་བར་འགྱུར་བ་དག་ཐོས་པར་གྱུར་པ་དེའི་ཚེ་ནི་རང་གི་ཡུལ་འཁོར་དང་ཡུལ་དུ་བཅས་ཏེ་རྒྱལ་པོ་འཆི་བར་འགྱུར་ལ། ཡུལ་འཁོར་དེའི་སྐྱེ་བོ་ཡང་མུ་གེ་དང་གནོད་པ་དག་གིས་གཟིར་བ་དང་། བུ་སྨད་དང་ཡང་བྲལ་
བར་གྱུར་པ་སྟོན་པ་ཡིན་ནོ། །གང་དུ་བསྟན་པ་མེད་པར་བྱིས་པ་གླུ་དང་སྤེལ་ཏེ། ཚིག་གིས་གླུ་ལེན་པར་བྱེད་ཅིང་། མི་མཐུན་པའི་དོན་བརྗོད་པ་དེར་ནི་རྒྱལ་པོ་འཆི་བར་རྗོད་པར་བྱེད་དོ། །ལྷ་རྟེན་དང་གཟུགས་འགྱུར་བའི་ལྟས་ཀྱི་ལེའུ་སྟེ་བཅུ་གཉིས་པའོ།།      །།ལམ་དུ་འཇུག་པའི་ལྟས་ལ་
གང་གི་ཚེ་རྒྱལ་པོ་དང་། བློན་པོ་དང་། བྲམ་ཟེ་དག་ལམ་དུ་འཇུག་ཅིང་འཕགས་པ་ན་གནམ་གྲུམ་པ་དང་བཅས་པའི་སྐར་མདའ་འབྱུང་བ་དང་སེར་བ་འབབ་པ་ནི་དེ་དག་མི་མཐུན་པར་བརྗོད་པ་ཡིན་ཏེ། དེ་དག་དགོས་པ་ཡང་དག་པར་མི་འགྲུབ་པ་ཙམ་དུ་མ་ཟད་ཀྱི་ལུས་འཇིག་པར་འགྱུར་རོ། །གང་གི་དུས་སུ་ཉི་
མ་འཆར་བའི་ཚེས་ཕྱོགས་གང་དག་ཏུ་འགྲོ་བ་ན་བྱ་རོག་དང་། ངང་པ་དང་། བྱ་ཀ་རཎྜ་བ་དང་། ཀྲུང་ཀྲུང་དག་སྣང་བ་དེར་ནི་དགེ་བར་བལྟའོ། །སྤྲིན་དང་། འཇའ་དང་། དེ་བཞིན་དུ་གློག་འགྱུ་བ་དང་། ཆུ་སྦྱིན་པར་བྱེད་པའི་འབྲུག་མི་གསལ་བ་འབྱིན་པ་དག་ནི་འཇིགས་པ་བདེན་པར་རིག་པར་བྱེད་པ་ཡིན་
ནོ། །ལམ་དུ་འཇུག་པའི་ལྟས་ཀྱི་ལེའུ་སྟེ་བཅུ་གསུམ་པའོ།།      །།གང་དུ་ལྟས་སྣ་ཚོགས་བསྟན་པ་དེ་དག་གི་འབྲས་བུ་འབྱུང་བའི་དུས་ཀྱི་ཚད་བསྟན་པ་གཟའ་སྐར་དག་ལ་མིག་དམར་གྱི་ལྟས་འབྱུང་བ་ནི་ཞག་བདུན་ནས་འབྲས་བུ་འབྱུང་ངོ་། །དེ་བཞིན་དུ་གཟའ་ལག་ནི་ཞག་བཅུ་ཚུན་ཆད་ཀྱིས་སོ། །ཕུར་

203-1-32b

བུ་ནི་ལོ་གཅིག་གིས་རྣམ་པར་སྨིན་པར་འགྱུར་རོ། །པ་བ་སངས་ནི་ཟླ་བ་དྲུག་ཚུན་ཆད་ཀྱིས་སྨིན་པར་འགྱུར་བར་བསྟན་པར་བྱའོ། །གནམ་གྲུམ་པ་དང་། ས་གཡོ་བ་ནི་ཟླ་བ་བརྒྱད་དུ་བརྗོད་དོ། །གྲོང་ཁྱེར་དང་། མཆོད་རྟེན་དང་། ཤིང་དང་འབྲེལ་པ་ནི་ཟླ་བ་གཅིག་ནས་སྨིན་པ་འགྱུར་རོ། །རྡོ་གསེག་མའི་
ཆར་པ་འབབ་པ་དང་། དེ་བཞིན་དུ་སྤྲིན་སྒྲ་འབྱུང་བ་དང་། གཟའ་རྣམས་འཁྱམས་པ་ནི་ཞག་གསུམ་ཚུན་ཆད་ཀྱིས་སྨིན་པར་འགྱུར་རོ། །ཉི་ཟླའི་ཡང་འཕྲལ་དུ་འབྲས་བུར་འགྱུར་བར་བསྟན་པར་བྱའོ། །འཇའ་ཟུག་པ་ནི་ཟླ་བ་བཅུ་གཉིས་སུ་བརྟག་གོ། །སེར་བ་འབབ་པ་ལས་ནི་ཟླ་བ་ཕྱེད་དང་གཉིས་
ཀྱིས་འབྲས་བུར་འགྱུར་རོ། །མེ་མེད་པར་མེ་འབར་བ་ལྟ་བུར་སྣང་བ་ནི་འབྲས་བུ་འཕྲལ་དུ་འབྱུང་བར་མཁས་པ་དག་གིས་བཤད་དོ། [།དེ་བཞིན་དུ་འབྱིག་འགྱུར་བ་དང་།] མངལ་དག་ཕྱིན་ཅི་ལོག་པ་དང་། དུས་མ་ཡིན་པར་ལོ་ཏོག་འབྲས་བུ་ཆགས་པ་ཐམས་ཅད་ཀྱི་ཡང་ཟླ་བ་དྲུག་པར་བརྗོད་དོ། །སྤྲིན་མེད་
པའི་སྒྲ་དག་ཟེར་བ་ནི་ཟླ་བ་གཅིག་གིས་སོ། །འཇའི་ལྟས་ལྟ་བུ་ནི་ཞག་གསུམ་ཚུན་ཆད་ཀྱིས་འབྱུང་ངོ་། །ཟླ་བའི་དཀྱིལ་འཁོར་སྔོན་པོར་གྱུར་པ་ནི་ཞག་བདུན་ཚུན་ཆད་ཀྱིས་འབྲས་བུ་འབྱུང་ངོ་། །གྲོང་དང་། གྲོང་ཁྱེར་དག་དང་། དེ་བཞིན་དུ་གླང་པོ་ཆེ་དང་། རྟ་དང་། བ་ལང་དང་། གླང་པོ་ཆེ་ལ་སོགས་
པའི་ལྟས་འབྱུང་བ་ནི་འབྲས་བུ་འཕྲལ་དུ་འབྱུང་། དེ་བཞིན་དུ་སྔོན་མ་བྱུང་བ་ལས་གློ་བུར་དུ་འབྱུང་བ་རྣམས་དང་། འཇིགས་སུ་རུང་བའི་སྒྲ་བྱུང་བ་རྣམས་ཀྱི་ཡང་འབྲས་བུ་འཕྲལ་དུ་འབྱུང་བར་བརྗོད་དོ། །གདུགས་དང་།རྒྱལ་མཚན་འགྱེལ་བ་དང་། གཞི་དང་། རྟ་བབས་དང་། ཁང་པ་རྡིབ་པ་དང་། མཇུག་
རིངས་འཆར་བ་ནི་ཟླ་བ་གཅིག་གིས་འབྲས་བུ་འབྱུང་ངོ་། །མི་རྒོད་པ་དང་། སྐྱིན་གོར་དང་། སྦྲང་རྩིའི་སྦྲང་བུ་རྣམས་ནི་ཞག་བཅུ་ཚུན་ཆད་ཀྱིས་སོ། །སྟག་དང་། བྱི་ལ་དང་། ཝ་དང་། སྲེ་མོ་དང་། བྱ་རྣམས་དང་། བར་སྣང་ལས་སྒྲ་བྱུང་བ་རྣམས་ཀྱིས་ནི་འབྲས་བུ་འཕྲལ་དུ་འབྱུང་ངོ་། །ཡང་བྱ་དང་། གྲོག་
སྦུར་དང་། ཕྱེ་མ་ལེབ་རྣམས་ཀྱིས་ནི་ཞག་བཅུ་ཚུན་ཆད་ཀྱིས་སོ། །ཡང་བྱི་བ་དང་། སྦྲུལ་དང་། དེ་བཞིན་དུ་སྦྲང་བུ་མང་པོའི་ལྟས་བསྟན་པ་ལས་ནི་ཟླ་བ་གཅིག་ཏུ་ཤེས་པར་བྱའོ། །རི་དྭགས་ཀྱི་རིགས་རྣམས་དང་། བྱ་དག་གི་སྐད་བྱུང་བ་ནི་ཟླ་བ་གསུམ་གྱིས་འབྲས་བུ་འབྱིན་ཏོ། །དུས་ཚིགས་ཀྱི་མཚན་

203-1-33a

མ་རྣམས་ནི་ཞག་བདུན་ཚུན་ཆད་ཀྱིས་སོ། །དྲི་ཟའི་གྲོང་ཁྱེར་ཆགས་པ་ནི་ཟླ་བ་གསུམ་གྱིས་འབྲས་བུ་འབྱུང་བར་བཤད་དོ། །ལྟས་སྣ་ཚོགས་བསྟན་པའི་འབྲས་བུ་འབྱུང་བའི་དུས་བསྟན་པའི་ལེའུ་སྟེ་བཅུ་བཞི་པའོ།།      །།གནོད་པའི་ལྟས་ངན་རྣམས་ཀྱི་རྒྱུ་བསྟན་པ་
དང་། དེ་དག་གི་ངོ་ལོན་གྱི་ཆོ་ག་བསྟན་པ། ཡོང་གི་སྲིད་པ་མ་ཡིན་པ་ཕྱིན་ཅི་ལོག་ཏུ་སྣང་བ་གང་ཡིན་པ་དེ་དག་ནི་ཕལ་ཆེར་མི་དགའ་བའི་འབྲས་བུའི་དབུས་སུ་འབྱིན་པར་རིག་པར་བྱའོ། །དེ་ཅིའི་ཕྱིར་ཞེ་ན། དེ་དག་གི་རྒྱུ་ནི་འདི་ལྟར་ཉེས་པར་སྤྱོད་པ་མང་པོ་ལ་སོགས་ཤིང་བསགས་པ་ལས་བྱུང་བའི་ཕྱིར་ཏེ། 
དེ་དག་ཡང་ཁ་ཅིག་ལས་ངན་པའི་དབང་གིས་ཡུལ་ལོག་པར་སྣང་བར་གྲུབ་པ་ཡང་ཡོད། ཁ་ཅིག་མི་མ་ཡིན་པ་དག་གིས་སྦྲན་པའི་ཕྱིར་ཆེད་དུ་བསྟན་པ་དག་ཡོད་པས་ན་གང་དག་མི་སྟོན་པ་ལྟར་སྣང་བ་དེ་དག་ཀྱང་འདིར་ཐུབ་པ་ལྷའི་མིག་ཅན་དེ་དག་གིས་བསྟན་པ་བཞིན་ངེས་པ་ཅན་དུ་གཟུང་བར་བྱའོ། །གང་དག་
ཁ་ཅིག་ཏུ་དངོས་པོ་མི་སྲིད་པ་ལྟ་བུ་ཞིག་ཏུ་བརྒྱ་ལ་སྣང་ན། དེར་ཡོན་ཏན་ཞིག་ན་དགེ་ཞིང་བཟང་བ་དང་། ཕྱིན་ཅི་ལོག་ཅིག་ནའང་མི་དགེ་བའི་དོན་དུ་རིག་པར་བྱའོ། །དེ་ལྟར་མི་དགེ་བར་གྱུར་པའི་མཚན་མ་དེ་དག་ནི་གཉེན་པོ་སོ་སོར་བརྟེན་པ་དག་གིས་ཟློག་པར་འགྱུར་སྲིད་དེ། དེ་དག་ཀྱང་གང་ཞེ་ན། བསོད་
ནམས་ལ་རབ་ཏུ་གནས་པའི་སེམས་དང་ལྡན་པ་རྣམས་དང་། རྣམ་པར་དག་པ་ལ་རྟེན་པ་དག་དང་། སྦྱིན་སྲེག་དང་། བཟླས་བརྗོད་ལ་བརྩོན་པར་བྱ་བ་དང་། སེར་སྣ་བཅོམ་པ་དང་། ལྷ་དང་བྲམ་ཟེ་དག་ལ་མཆོད་པ་དང་། ཞི་བ་དང་རྒྱས་པའི་བཟླས་བརྗོད་དང་། སྦྱིན་སྲེག་གི་ཆོ་ག་བྱ་བ་དང་། བསམ་པ་
དྲི་མ་མེད་པས་ནོར་རབ་ཏུ་སྦྱིན་པ་དག་གི་མཚན་མ་ངན་པ་དག་གིས་མི་ཚུགས་ཤིང་རྣམ་པར་འཇིག་པར་བྱེད་དོ། །གལ་ཏེ་གཉེན་པོ་བྱེད་པའི་སྟོབས་དག་གིས་ཀུན་དུ་ཟློག་པར་གྱུར་ན་ཡང་རྒྱལ་པོ་འཆི་བ་ལས་རབ་ཏུ་བཅད་དེ་ཚེ་ནུར། གྲོང་དང་། གྲོང་ཁྱེར་དང་། ཡུལ་འཁོར་དེ་དག་རྒྱུག་ཅིང་རྣམ་པར་འཇིག་པ་
ཡང་ཡུན་རིང་དུ་གནས་པ་ཙམ་དུ་འགྱུར་བར་བསྟན་ཏོ། །ཐུབ་པའི་ཚོགས་མཆོག་གར་ག་ལ། །བྷ་ར་དྷྭ་ཛ་གཽ་ཏ་མས། །ལྷ་ཡུལ་བར་སྣང་ས་བླ་དང་། །གཟའ་སྐར་སྲོག་ཆགས་རྣམས་ཀྱི་ལྟས། །ས་བདག་མི་ཡི་རྒྱལ་པོ་དང་། །གྲོང་དང་ཡུལ་འཁོར་གནས་པ་ལ། །གནོད་པར་གྱུར་པའི་ལྟས་

203-1-33b

འབྱུང་ལ། །ཆོ་ག་གང་དང་གང་དག་གིས། །ཞུ་བར་འགྱུར་བ་ཞུས་པ་ལས། །ཐུབ་པ་གར་གས་ལུང་བསྟན་པ། །ཕན་པར་འགྱུར་བའི་ཆོ་ག་གད། །གཽ་ཏ་མས་ཉན་པར་གྱིས། །དང་པོར་སྦྱིན་པ་གཏང་བྱ་སྟེ། །ལྷ་དང་བྲམ་ཟེ་མངོན་མཆོད་ན། །སྦྱིན་སྲེག་བཟླས་བརྗོད་མཆོད་སྦྱིན་གྱིས། །
གཏོང་བའི་ངོ་ལོན་བྱ་བར་བསྟན། །དེ་ལ་ཐོག་མར་བ་ལང་དང་། །དབྱིག་དང་གོས་ལ་སོགས་པ་དག །བྲམ་ཟེ་རྣམས་ལ་སྦྱིན་བྱིན་ནས། །སོ་སོར་ཁྱིམ་དུ་རྒྱལ་པོ་ལ། །གཙོ་བོ་དག་ལ་ཅི་རིགས་པར། །དབང་སྒྱུར་བ་ནི་ལེགས་པར་བྱ། །མདུན་ན་འདོན་ཞིང་མཉམ་གཞག་པ། །ཞག་བདུན་སྨྱུང་བ་
བྱས་གྱུར་པས། །ལྷ་ལ་གཏོར་མ་རབ་ཕུལ་ཏེ། །ཨུ་དུམ་བཱ་རའི་ཡམ་ཤིང་སྲེག །ཤིང་མར་བཏགས་པ་བརྒྱ་རྩ་བརྒྱད་ནང་པར་ལྡང་ཞིང་སྔགས་རིག་པས་སྦྱིན་སྲེག་བྱའོ། །ཡང་ན་བྲམ་ཟེ་གཙང་མ་ཟས་སུ་མར་ཟ་ཞིང་བཟའ་བ་དང་བཅའ་བ་སྤངས་ཏེ། ཞག་གསུམ་སྨྱུང་བ་བྱས་པའི་སྔགས་མཁན་
གྱིས་རིག་སྔགས་ཏྲ་ཏ་རམ་ཞེས་བྱ་བ་འདིས་ཨ་པ་མརྒའི་ཡམ་ཤིང་བསྲེག་ཤིང་མར་ལ་བཏགས་པ་བརྒྱ་རྩ་བརྒྱད་སྦྱིན་སྲེག་བྱའོ། །ཡང་རྒྱལ་པོའི་ཕོ་བྲང་ངམ། གྲོང་ཁྱེར་རམ། ཡུལ་གྱི་ཕྱིར་རྒྱལ་པོའི་མདུན་ན་འདོན་གྱི་ལྷ་ལ་ཞག་བདུན་དུ་གཏོར་མ་ཕུལ་ལ། མར་བྲེ་དོ་འམ། ཡང་ན་བྲེ་གང་མར་ལ་
བཏགས་པའི་ནས་བྲེའུ་ཆུང་གཉིས་ཁོ་ནས་སྦྱིན་སྲེག་བྱའོ། །དེ་ལྟར་སྦྱིན་སྲེག་གི་ཆོ་ག་ཟིན་ནས་བྲམ་ཟེ་རྣམས་བརྒྱའམ། དེ་ལས་ལྷག་པ་དག་ལ་འོ་ཐུག་བླུད་པའམ། ཡང་ན་ཞག་བདུན་དུ་ཆོས་སྟོན་བྱའོ། །དེའི་འོག་ཏུ་བྲམ་ཟེ་དག་ལ་ཡོན་སྦྱིན་པ་ནི་གསེར་དང་། དངུལ་དང་། རྟ་དང་། གླང་དང་། གོས་
རྣམ་པ་སྣ་ཚོགས་དག་སྦྱིན་པར་བྱའོ། །ཡང་ན་བྲམ་ཟེ་རྣམས་ལ་གླང་གཅིག་དང་བཅུ་སྦྱིན་པ་སྟེ། ཆོ་ག་འདི་ལྟར་བྱས་ན་ལྟས་ལས་འབྱུང་བའི་གནོད་པ་ཐམས་ཅད་ཞི་ཞིང་བཟློག་པར་འགྱུར་རོ། །ལྟས་ལས་གནོད་པར་འགྱུར་བའི་ངོ་ལོན་གྱི་ཆོ་ག་བསྟན་པའི་ལེའུ་སྟེ་བཅོ་ལྔ་པའོ།།      །།ཐུབ་པ་ཆེན་པོ་དྲང་སྲོང་
སྐར་མའི་ལྟས་ཀྱི་གཙུག་ལག་རྨ་བྱའི་ལྟས་སྣ་ཚོགས་བསྟན་པ་ཞེས་བྱ་བའི་ལྟས་ཇི་སྙེད་པ་རྫོགས་སོ།།      །།ཨཱརྱ་བྱཱ་ཀ་ར་ཎའི་ནང་ནས་འབྱུང་བ་གཟའ་དང་རྒྱུ་སྐར་གྱི་རང་བཞིན་བཤད་པ་རྒྱུ་སྐར་ཉི་ཤུ་རྩ་བརྒྱད་ནི་འདི་ལྟ་སྟེ། སྨིན་དྲུག་དང་། སྣར་མ་དང་། མགོ་དང་། ལག་དང་། ནབ་སོ་དང་། རྒྱལ་

203-1-34a

དང་། སྐག་དང་། མཆུ་དང་། གྲེ་དང་། དབོ་དང་། མེ་བཞི་དང་། ནག་པ་དང་། ས་རི་དང་། ས་ག་དང་། ལྷ་མཚམས་དང་། སྣྲོན་དང་། སྣྲུབས་དང་། ཆུ་སྟོད་དང་། ཆུ་སྨད་དང་། བྱི་བཞིན་དང་། གྲོ་བཞིན་དང་། མོན་གྲེ་དང་། མོན་གྲུ་དང་། ཁྲུམས་སྟོད་དང་། ཁྲུམས་
སྨད་དང་། ནམ་གྲུ་དང་། ཐ་སྐར་དང་། བྲ་ཉེ་དང་། འདི་རྣམས་ནི་རྒྱུ་སྐར་ཉི་ཤུ་རྩ་བརྒྱད་དོ། །དེ་ལ་རྒྱུ་སྐར་ནི་དུ། དབྱིབས་ནི་ཇི་སྙེད་ཡོད། ཡུད་ཙམ་དང་ལྡན་པ་ཇི་སྙེད། ཟས་ནི་ཅི། རུས་ནི་ཅི། ལྷ་རྣམས་ནི་གང་། ཀྱེ་བྲམ་ཟེ་པདྨ་འི་སྙིང་པོ་ཅན་སྨིན་དྲུག་ནི་སྐར་མ་དྲུག་སྟེ། དབྱིབས་ནི་སྤུ་གྲི་ལྟ་བུའོ། །
ཡུད་ཙམ་སུམ་ཅུ་དང་ལྡན་པའི་ཆ་དྲུག་དང་བཅས་པའོ། །ཟས་ནི་ཞོའོ། །ལྷ་ནི་མེ་ལྷའོ། །རུས་ནི་རྗེའུ་རིགས་ཀྱི་རྒྱུད་དོ། །རྒྱུ་སྐར་སྣར་མ་ནི་སྐར་མ་ལྔ་སྟེ། དབྱིབས་ནི་ཤིང་རྟ་ལྟ་བུའོ། །ཡུད་ཙམ་ནི་བཞི་བཅུ་རྩ་ལྔ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་ཞོ་དང་སྦྲང་རྩིར་སྦྱར་བའོ། །ལྷ་ནི་སྐྱེ་དགུའི་བདག་
པོའོ། །རུས་ནི་གཽ་ཏ་མའོ། །རྒྱུ་སྐར་མགོ་ནི་སྐར་མ་གསུམ་སྟེ། དབྱིབས་ནི་རི་དྭགས་ཀྱི་མགོ་ལྟ་བུའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་དང་བཅས་པའོ། །ཟས་ནི་རི་དྭགས་ཀྱི་ཤའོ། །ལྷ་ནི་ཟླ་བའོ། །རུས་ནི་བྷ་ར་དྷྭ་ཛའོ། །རྒྱུ་སྐར་ལག་ནི་སྐར་མ་གཅིག་སྟེ། དབྱིབས་ནི་སོག་ལེ་ལྟ་བུའོ། །ཡུད་ཙམ་བཅོ་ལྔ་
དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་ཁྲག་གོ། །ལྷ་ནི་དྲག་ཤུལ་ཅན་ནོ། །རུས་ནི་དམར་པོའི་རྒྱུད་དོ། །རྒྱུ་སྐར་ནབ་སོ་ནི་སྐར་མ་གཉིས་ཏེ། དབྱིབས་ནི་ཁང་པའི་གདུང་ལྟ་བུའོ། །ཡུད་ཙམ་བཞི་བཅུ་རྩ་ལྔ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་མར་དང་ཁུར་བའོ། །ལྷ་ནི་ཉི་
མའོ། །རུས་ནི་དབང་བྱེད་དོ། །རྒྱུ་སྐར་རྒྱལ་ནི་སྐར་མ་གསུམ་སྟེ། དབྱིབས་ནི་རིལ་བ་ལྟ་བུའོ། །ཡུད་ཙམ་སུམ་ཅུ་དང་ལྡན་ནོ། །ཁ་ཟས་ནི་སྦྲང་དང་སྤོས་སོ། །ལྷ་ནི་ཕུར་བུའོ། །རུས་ནི་རྩྭ་ཤུན་གྱོན་པའི་རྒྱུད་དོ། །རྒྱུ་སྐར་སྐག་ནི་སྐར་མ་དྲུག་སྟེ། དབྱིབས་ནི་སྦྲུལ་མགོའི་གདེངས་ཀ་ལྟ་བུའོ། །ཡུད་ཙམ་
བཅོ་ལྔ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་སྦྲུལ་གྱི་ཤའོ། །ལྷ་ཡང་སྦྲུལ་ལོ། །རུས་ནི་དམའ་བའི་རྒྱུད་དོ། །པདྨའི་སྙིང་པོ་ཅན་རྒྱུ་སྐར་འདི་བདུན་ནི་ཤར་སྒོར་གཏོགས་སོ། །རྒྱུ་སྐར་མཆུ་ནི་སྐར་མ་དྲུག་སྟེ། དབྱིབས་ནི་ཆུ་བོ་ལྟ་བུའོ། །ཡུད་ཙམ་སུམ་ཅུ་དང་འབྲེལ་པའི་མཚན་ཡིན་

203-1-34b

ནོ། །ཟས་ནི་ཏིལ་དང་སྦྱར་བའི་ཐུག་པའོ། །ལྷ་ནི་སྤེན་པའོ། །རུས་ནི་སེར་སྐྱའི་རྒྱུད་དོ། །རྒྱུ་སྐར་གྲེ་ནི་སྐར་མ་གཉིས་ཏེ། དབྱིབས་ནི་རྩིག་པའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་ཞག་དྲུག་ཅུས་སྨིན་པའི་འབྲས་སམ་ཏིལ་གྱི་ཚིགས་མ་ཟའོ། །ལྷ་ནི་ཁྱབ་
མཇུག་གོ། །རུས་ནི་གཞོན་རྩི་མོའི་ཁྱིམ་ཐབ་ཀྱི་རྒྱུད་དོ། །རྒྱུ་སྐར་དབོ་ནི་སྐར་མ་གཉིས་ཏེ། དབྱིབས་ནི་ཁྲི་ལྟ་བུའོ། །ཡུད་ཙམ་བཞི་བཅུ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་ཁྲེའོ། །ལྷ་ནི་ཉི་མ་དང་གཤིན་རྗེའོ། །རུས་ནི་ཨེ་ཏིའི་རྒྱུད་དོ། །རྒྱུ་སྐར་མེ་བཞི་ནི་སྐར་མ་ལྔ་སྟེ། དབྱིབས་
ནི་ལག་པ་ལྟ་བུའོ། །ལྷ་ནི་ར་སྐྱེས་ལ་ཞོན་པའོ། །ཡུད་ཙམ་སུམ་ཅུ་དང་ལྡན་པའི་ཆ་བདུན་དངབཅས་པའོ། །ཟས་ནི་བྱ་སྣ་ཚོགས་དང་སྲེ་དའོ། །རུས་ནི་འོད་སྲུངས་ཀྱི་རྒྱུད་དོ། །རྒྱུ་སྐར་ནག་པ་ནི་སྐར་མ་གཅིག་སྟེ། དབྱིབས་ནི་པདྨའི་སྙིང་པོ་འདྲའོ། །ལྷ་ནི་ཉི་མའོ། །ཡུད་ཙམ་ནི་སུམ་ཅུ་དང་ལྡན་
པའི་ཆ་དང་བཅས་པའོ། །ཁ་ཟས་ནི་ཤིང་ཏོག་སྣ་ཚོགས་ཟའོ། །རུས་ནི་སཱ་ལའི་ཤིང་དྲུང་པའི་རྒྱུད་དོ། །རྒྱུ་སྐར་ས་རི་ནི་སྐར་མ་གཅིག་སྟེ། དབྱིབས་ནི་ནོར་བུ་རིན་པོ་ཆེ་ལྟ་བུའོ། །ཡུད་ཙམ་བཅོ་ལྔ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་ཕྱེ་དང་ཏིལ་ཐུག་སྦྱར་བ་དང་། བལ་སྲན་སྡེའུ་བཏགས་པ་
ཟའོ། །ལྷ་ནི་རླུང་ལྷའོ། །རུས་ནི་ཡིད་ཆེན་གྱི་རྒྱུད་དོ། །རྒྱུ་སྐར་ས་ག་ནི་སྐར་མ་བཞི་སྟེ། དབྱིབས་ནི་རའི་རྟེན་མགོ་ལྟ་བུའོ། །ཡུད་ཙམ་བཞི་བཅུ་ལྔ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་ཏིལ་དང་། མེ་ཏོག་དང་། རྒྱ་སྲན་སྨུག་པོ་ཟའོ། །ལྷ་ནི་དབང་པོ་དང་མེ་ལྷའོ། །རུས་ནི་མཚན་མོ་ཞེས་
བྱ་བའི་རྒྱུད་དོ། །ཀྱེ་པདྨའི་སྙིང་པོ་ཅན་རྒྱུ་སྐར་བདུན་པོ་འདི་དག་ནི་ལྷོ་ཕྱོགས་ཀྱི་སྒོར་གཏོགས་སོ། །རྒྱུ་སྐར་ལྷ་མཚམས་ནི་སྐར་མ་བཞི་སྟེ། དབྱིབས་ནི་གླང་པོ་ཆེའི་མགོ་དང་སྣ་ལྟ་བུའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་དང་བཅས་པའོ། །ཟས་ནི་ཆང་དང་། སྲན་ཆུང་དང་། སྦྲང་རྩིའོ། །ལྷ་ནི་
ཉི་མའོ། །རུས་ནི་སྤེན་པ་དང་རྒྱུད་འགྲོའོ། །རྒྱུ་སྐར་སྣྲོན་ནི་སྐར་མ་གསུམ་མོ། །དབྱིབས་ནི་ཐེམ་སྐས་ལྟ་བུའོ། །ཡུད་ཙམ་བཅོ་ལྔ་དང་ལྡན་པའི་ཆ་དང་བཅས་པའོ། །ཁ་ཟས་ནི་འབྲས་སཱ་ལུ་དང་། མར་དང་། འབྲས་ཐུག་གོ། །ལྷ་ནི་དབང་པོའོ། །རུས་ནི་ལེགས་བྱེད་ཀྱི་རྒྱུད་དོ། །རྒྱུ་སྐར་སྣྲུབས་ནི་སྐར་མ་

203-1-35a

དགུ་སྟེ། དབྱིབས་ནི་སྐར་མ་གསུམ་དང་ལྡན་པའི་རི་དྭགས་ཀྱི་རྒྱལ་པོ་རྨད་དུ་བྱུང་བའི་རལ་པ་ལྟ་བུའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་འོ་མ་དང་། ནགས་ཀྱི་རྩ་བ་དང་། སྡོང་བུ་དང་། འབྲས་ཟའོ། །ལྷ་ནི་སྡོང་བུ་ཅན་ནོ། །རུས་ནི་ཀ་ཏ་ཡ་ནའི་
རྒྱུད་དོ། །རྒྱུ་སྐར་ཆུ་སྟོད་ནི་སྐར་མ་བཞི་སྟེ། དབྱིབས་ནི་མཆོད་རྟེན་ལྟ་བུའོ། །ཡུད་ཙམ་སུམ་ཅུ་དང་ལྡན་པའི་ཆ་བདུན་དང་བཅས་པ་ཅན་གྱི་རྒྱུད་དོ། །ཁ་ཟས་ནི་ནྱ་གྲོ་དྷ་ཟའོ། །ལྷ་ནི་ཆུ་ལྷའོ། །རུས་ནི་ཀ་ཏྱ་ཞེས་བྱ་བའི་རྒྱུད་དོ། །རྒྱུ་སྐར་ཆུ་སྨད་ནི་སྐར་མ་བཞི་སྟེ། དབྱིབས་ནི་གོམ་པ་གཡོན་པ་ལྟ་བུའོ། །ཡུད་ཙམ་
ནི་བཞི་བཅུ་རྩ་ལྔ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་སྦྲང་དང་སྤོས་སོ། །ལྷ་ནི་ཐམས་ཅད་ཅེས་བྱའོ། །རུས་ནི་སྟག་དགུ་ཞེས་བྱ་བའི་རྒྱུད་དོ། །རྒྱུ་སྐར་བྱི་བཞིན་ནི་སྐར་མ་གསུམ་སྟེ། དབྱིབས་ནི་གླང་མགོ་ལྟ་བུའོ། །ཡུད་ཙམ་ནི་དྲུག་དང་ལྡན་པ་ལས་ཡུད་ཙམ་ཅིག་ལ་ཐོག་མར་ལས་བྱེད་དོ། །
ཁ་ཟས་ནི་རླུང་ཟའོ། །ལྷ་ནི་ཚངས་པའོ། །རུས་ནི་གསོ་མ་ཅན་གྱི་རྒྱུད་དོ། །རྒྱུ་སྐར་གྲོ་བཞིན་ནི་སྐར་མ་གསུམ་སྟེ། དབྱིབས་ནི་རྔ་ལྟ་བུའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་མར་སར་བསྲུབས་མ་ཐག་པ་དང་བྱ་ཤ་ཟའོ། །ལྷ་ནི་ཁྱབ་འཇུག་གོ། །རུས་ནི་མཽད་གལ་གྱི་བུའི་
རྒྱུད་དོ། །ཀྱེ་པདྨའི་སྙིང་པོ་ཅན་རྒྱུ་སྐར་བདུན་པོ་འདི་དག་ནི་ནུབ་སྒོར་གཏོགས་སོ། །རྒྱུ་སྐར་མོན་གྲེ་ནི་སྐར་མ་བཞི་སྟེ། དབྱིབས་ནི་བྱ་ལྟ་བུའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་བྱི་ལའི་ཤ་ལ་རེག་པར་བྱེད་པ་དང་། རྒྱ་སྲན་སྨུག་པོ་ཟའོ། །ལྷ་ནི་ནོར་ལྷའོ། །རུས་ནི་
གནས་པ་ཞེས་བྱ་བའི་རྒྱུད་དོ། །རྒྱུ་སྐར་མོན་གྲུ་ནི་སྐར་མ་བརྒྱ་སྟེ། དབྱིབས་ནི་སྐར་མ་གཅིག་དང་འབྲེལ་པས་མེ་ཏོག་གི་ཕུང་པོ་འདྲའོ། །ཡུད་ཙམ་བཅོ་ལྔ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་ར་ཤ་ཟའོ། །ལྷ་ནི་ཆུ་ལྷའོ། །རུས་ནི་སྐར་མའི་བུའི་རྒྱུད་དོ། །རྒྱུ་སྐར་ཁྲུམས་སྟོད་ནི་སྐར་མ་གཉིས་
ཏེ། དབྱིབས་ནི་ཤིང་རྟ་འདྲའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་ལུག་གི་ཤ་དང་ཁྲག་གོ། །ལྷ་ནི་འབའ་ཞིག་འཚོ་ཞེས་བྱའོ། །རུས་ནི་སྐྱེ་བོའི་ལས་ཀྱི་རྒྱུད་དོ། །རྒྱུ་སྐར་ཁྲུམས་སྨད་ནི་སྐར་མ་གཉིས་ཏེ། དབྱིབས་ནི་ཤིང་རྟ་འདྲའོ། །ཡུད་ཙམ་བཞི་བཅུ་རྩ་ལྔ་

203-1-35b

དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་བལ་སྲན་ནོ། །ལྷ་ནི་སྦྲུལ་དང་གཟའོ། །རུས་ནི་ནོར་རྒྱལ་གྱི་རྒྱུད་དོ། །རྒྱུ་སྐར་ནམ་གྲུ་ནི་སྐར་མ་སུམ་ཅུ་རྩ་གཉིས་ཏེ། དབྱིབས་ནི་སྐར་མ་གཅིག་དང་ལྡན་པས་གྲུ་ལྟ་བུའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་བདུན་དང་བཅས་པའོ། །དེའི་ཟས་ནི་
ཕྱེ་དང་ཤའོ། །ལྷ་ནི་ཉི་མའོ། །རུས་ནི་བསྐྱེད་པའི་བུ་ཞེས་བྱ་བའི་རྒྱུད་དོ། །རྒྱུ་སྐར་ཐ་སྐར་ནི་སྐར་མ་གསུམ་སྟེ། དབྱིབས་ནི་རྟ་མགོའི་མགུལ་པ་ལྟ་བུའོ། །ཡུད་ཙམ་ནི་སུམ་ཅུ་དང་ལྡན་པའི་ཆ་བདུན་དང་བཅས་པའོ། །ཁ་ཟས་ནི་སྦྲང་རྩི་དང་ཤ་ཟའོ། །ལྷ་ནི་དྲི་ཟའོ། །རུས་ནི་རྟ་འཇིག་གི་རྒྱུད་དོ། །རྒྱུ་སྐར་
བྲ་ཉེ་ནི་སྐར་མ་གསུམ་སྟེ། དབྱིབས་ནི་མོ་མཚན་ལྟ་བུའོ། །ཡུད་ཙམ་ནི་སུམ་ཅུ་དང་ལྡན་ནོ། །ཁ་ཟས་ནི་ཏིལ་དང་འབྲས་སོ། །ལྷ་ནི་གཤིན་རྗེའོ། །རུས་ནི་བརྒའི་རྒྱུད་དོ། །པདྨའི་སྙིང་པོ་ཅན་རྒྱུ་སྐར་བདུན་པོ་འདི་རྣམས་བྱང་གི་སྒོར་གཏོགས་སོ། །ལེའུ་བཅུ་དྲུག་གོ།།      །།ནམ་མཁའ་ལས་
འབྱུང་བ་བརྟག་པའི་ལེའུ་ལས་འབྱུང་བ་གཤིན་རྗེ་དང་། ཆུ་ལྷ་དང་། དབང་པོ་དང་། ལུས་ངན་ལས་དབྱུག་པ་ལྟ་བུ་ཤར་ཤར་པོ་མཚན་མོའམ་ནམ་ཕྱེད་ཀྱི་དུས་ན་ཡུད་ཙམ་མམ། ཡུད་ཙམ་གསུམ་གྱི་བར་དུ་ནམ་མཁའ་ལས་ཕལ་ཆེར་རབ་ཏུ་སྣང་བ་ཡལ་ག་མང་པོ་རྒྱལ་ཆེན་དྲང་པོ་ཤིན་ཏུ་རིང་བ་རབ་ཏུ་འཕྲོས་པ་
བྱུང་ན་ཟླ་བ་གཅིག་གིས་དེའི་ཡུལ་འཁོར་དུ་འཐབ་པ་དང་། ལོ་ལ། མིའི་དབང་པོ་དང་། ཆར་པ་ལ་གནོད་པར་བྱེད་དོ། །ལེའུ་སྟེ་བཅུ་བདུན་པའོ།།      །།ལྗང་སྔོན་དང་། རྩུབ་པོ་དང་། བར་ཆད་པ་དང་། ལྗང་སེར་དང་། འོད་འཚེར་བ་དང་། དུད་པ་ལྟ་བུ་དང་། སྦྲུལ་འདྲ་བ་དང་། དབྱུག་པ་འདྲ་བ་
བརྒྱད་སྣང་ན་ཆར་པ་མི་འབབ་པ་དང་། ལོ་ཟས་དང་། བཀྲེས་པ་དང་། སྲོག་ཆགས་ལ་སོགས་པ་ལ་འཇིགས་པར་འགྱུར་རོ། །ཤིང་ཏ་ལ་ཕྱེད་ཙམ་སྣང་བའམ། ཤིང་ཏ་ལ་གཉིས་སམ། གསུམ་མམ་བཞི་འམ། ལྔ་ཙམ་གྱི་དབྱིབས་ལྟར་སྣང་ན་འཕྲལ་དུ་སྨིན་ནོ། །ཡང་ན་ཟླ་བ་བཅུ་གཉིས་སམ།
ཟླ་བ་བརྒྱད་བརྒྱད་ནི་ལོ་ཉེས་དང་། མིའི་དབང་པོ་དང་། ཆུ་སྐམ་པ་དང་། འཆི་བ་དང་། འཐབ་མོའི་གཡུལ་དང་། ནོར་སྟོར་བའི་རྣམ་པར་སྨིན་པ་འབྱུང་བར་འགྱུར་རོ། །དེ་ཡང་མོད་ལ་ཆར་བབ་ན་གནོད་པར་མི་འགྱུར་རོ། །འབྲས་བུ་རྣམ་པར་སྨིན་པ་བསྟན་པ་ཇི་ལྟར་བཤད་པ་བཞིན་དུ་ཤར་ཕྱོགས་སམ།

203-1-36a

ནུབ་ཕྱོགས་སུ་དབྱུག་པ་ལྟ་བུར་སྣང་ན་རྒྱལ་པོ་གཞན་དང་། བྲམ་ཟེ་འཆི་བར་བྱེད་དོ། །བྱང་ཕྱོགས་དང་། ལྷོ་ཕྱོགས་ནས་དབྱུག་པ་ལྟ་བུར་སྣང་ན་དེའི་འཁོར་གྱི་མི་ལ་གནོད་པ་དང་། མེའི་འཇིགས་པར་འགྱུར་རོ། །ཤིང་རིངས་ལྟར་ཐད་ཀར་བྱུང་བའམ། ཆུ་རླབས་མང་པོ་ལྟར་སྣང་བའམ། 
མིག་མངས་རིས་ལྟ་བུའི་དབྱུག་པར་འདུག་ནས་རྐུན་པོའི་དཔུང་སྐྱེ་བ་དང་། ཡུལ་འཁོར་ངན་ཞིང་མི་རིགས་པ་འབྱུང་ངོ་། །རྩུབ་པོ་དང་། དུམ་བུ་དང་། འཇམ་པོ་མ་ཡིན་པ་དང་། གློག་དང་སྐར་མདའ་དང་། གནམ་ལྕགས་དང་སྐར་མ་མཇུག་རིངས་དང་། མེས་འགག་པ་ལྟར་སྣང་བ་ལ་ཐོག་གམ། སྐར་
མདའ་འདྲེས་ན་མིའི་དབང་པོ་དང་། ཡུལ་འཁོར་དུ་འཇིག་པར་བྱེད་དེ། ལེགས་པར་གྱུར་པའི་ཚེས་གྲངས་དང་། བྱེད་པའི་ཡུད་ཙམ་ལ་འབྱུང་བའི་དབྱུག་པ་ལྟར་སྣང་བ་ནི་གནོད་པར་མི་བྱེད་དེ། རྒྱལ་པོའི་སྲིད་ཆེ་བ་དང་ཆར་འབབ་པ་དང་། ཡུལ་ལ་ཕན་པར་འགྱུར་རོ། །ཤར་ཕྱོགས་དང་། བྱང་ཕྱོགས་ན་
དབྱུག་པ་ལྟར་སྣང་བ་དེའི་ཕྱོགས་ནས་དབྱུག་པ་ལ་གནོད་དོ། །ཕྱོགས་མཚམས་ནས་དབྱུག་པ་ལྟར་སྣང་ན་བུད་མེད་དང་། བ་ལང་སྦྲུམ་མ་རྣམས་འཇིག་གོ། །ཀྱོག་ཀྱོག་དང་། མི་མཉམ་པ་ལ་སོགས་པ་རྒྱལ་མཚན་དཀར་པོ་ལྟར་གྱེན་དུ་བྱུང་ན་རྒྱལ་པོ་དང་། ཡུལ་འཁོར་འཇིག་པ་དང་། སྐྲན་ནད་དང་། འཆི་
བར་བྱེད་དོ། །ཉིན་མཚན་ཀུན་དུ་དབྱུག་པ་རྩེ་མོ་གྱེད་པ་ལྟར་སྣང་ན་ཡུལ་གྱི་རྒྱལ་པོ་འཆི་བར་འགྱུར་རོ། །དབྱུག་པ་ལྟ་བུའི་རྩེ་མོ་ཅན་དུ་སྣང་ན་ཡུལ་ཐམས་ཅད་ཀྱི་རྒྱལ་པོ་འཆི་བ་དང་། དེའི་ཡུལ་འཇིག་པར་འགྱུར་རོ། །གལ་ཏེ་ཉིན་མཚན་རྒྱུན་མི་འཆད་པར་རྟག་ཏུ་དབྱུག་པ་ལྟ་བུ་སྣང་ན་ཡུལ་འཁོར་དེ་
འཇིག་པ་དང་། དེའི་ཡུལ་ཕྱོགས་སུ་ནད་དང་། མེ་དང་། ཆར་པ་འབབ་པོ། །ལེའུ་བཅོ་བརྒྱད་པའོ།།      །།སྐར་མདའི་མཚན་མ་བཤད་པའི་ལེའུ་ལ་སྐར་མདའ་འཇའ་འདྲ་བ་དང་། གདུགས་དང་། ཤིང་གི་ཡལ་ག་འདྲ་བ་དང་། རྩ་གྲུང་པོ་དང་། དབྱིག་པ་འདྲ་བ་དང་།  དཀྱིལ་འཁོར་འདྲ་
བ་དང་། འཁོར་ལོ་ལྟ་བུའི་སྐར་མདའ་སྣང་ན། བྲམ་ཟེ་དང་། རྒྱལ་རིགས་གཙོ་བོ་དམ་པ་དང་། རྒྱལ་པོའི་བཙུན་མོ་དང་། ནང་མི་དང་། ཡུལ་འཁོར་གྱི་མི་དང་། མིའི་དབང་པོ་དང་། བླ་མར་བྱ་བ་དང་། བློན་པོ་འཆི་བར་འགྱུར་རོ། །ནམ་མཁའ་ལ་སྐར་མ་སྣང་བ་ལས་གྱུར་ན་ཆར་མི་འབབ་པོ། །སྐར་

203-1-36b

མདའ་དུས་གཉིས་སུ་བྱུང་ངམ། སྐར་མདའ་ཕར་ཕྱིར་ལོག་ན་གནམ་གར་སོང་གནས་དེར་གནོད་པར་འགྱུར་རོ། །སྐར་མདའ་དཀར་ལ་དབྱིབས་ལེགས་པར་སྣང་བ་ནི་བསྔགས་པར་བྱ་བ་ཡིན་ནོ། །ཆུའི་ནང་གི་སྲོག་ཆགས་གྱ་གྱུར་འགྲོ་བ་དང་། མཚོན་ཤ་ཀ་ཏི་དང་། སྐར་མདེའུ་དང་། རྟ་ལྟ་བུ་དང་། བྱི་ལ་ལྟ་བུ་དང་།
སྒྲ་དང་བཅས་པ་ཕལ་ཆེར་སྣང་ན་ཉེས་པ་མང་པོ་འབྱུང་ངོ་། །སྐར་མདའ་འབར་བ་བཞིན་དུ་སོང་བ་ལས་ཕྱིར་ལོག་པ་དང་། སྐར་མདའ་གཞན་གྱིས་ལོག་སྟེ་ཞིག་ན་ཡུལ་དེའི་རྒྱལ་པོ་ལ་གནོད་པའི་དགྲ་བསྐྱེད་དེ། ནང་པར་རམ། ནུབ་མོའམ། དེའི་ཚེ་མཚམས་སུ་སྐར་མདའ་རྩུབ་མོ་ཡོན་པོ་སྣང་ན་རབ་ཏུ་བསྔགས་པ་
མ་ཡིན་ནོ། །སྐར་མདའ་གནམ་གྱི་དབུས་སུ་སོང་ལ་སྤྲིན་གྱི་ཆུ་འཐུང་བ་ལྟར་ཞུགས་ཤིང་། སྐར་མདའི་སྒྲ་མེད་ན། སྐར་མདའི་དབུས་ཀྱི་མཚམས་ཡོད་པར་སྣང་བ། འཇམ་ཞིང་དྲང་ལ་ཤིན་ཏུ་ཡངས་ཤིང་དཀར་བ། ལོགས་གཡས་གཡོན་དུ་ཡང་ནམ་མཁའ་ལ་རྣམ་པར་རྒྱུ་བ་སྣང་ན་སྐར་མདའ་དེ་དག་ནི་དགེ་བ་སྟེ། 
འབྲས་བུ་དམ་པ་རབ་ཏུ་སྦྱིན་པར་བྱེད་དོ། །སྐར་མདའ་ཁ་ཡོད་པ་ཞིག་སྣང་ན་རྒྱལ་པོ་ལ་གནོད་པ་དང་། བཙུན་མོ་ལ་གནོད་པར་འགྱུར་རོ། །སྐར་མདའ་རྒྱབ་ཀྱིས་སོང་ལ་དུད་པས་ཆོག་པ་ལྟ་བུ་སྒྲ་ཅན་དུ་བྱུང་ན་ཡུལ་དེའི་འཁོར་མ་རུང་བར་འགྱུར་རོ། །སྲོད་ལ་སྐར་མདའ་བྱུང་བ་ནི་བཀྲ་ཤིས་སོ། །སྐར་མདའ་རི་
བོང་གི་ཁྲག་ལྟར་སྣང་བ་འབར་བ་ལྷུང་ན་རྒྱལ་པོ་དང་དམག་དཔོན་ལ་གནོད་དོ། །སྐར་མདའ་མཚན་མོ་ཟླ་བ་ལ་ཕོག་གམ་ཉིན་པར་ཉི་མ་ལ་ཕོག་ན་མིའི་བདག་པོ་ཟླ་བའམ་སྐར་མདའ་ལ་མོས་པར་བྱེད་པ་དེ་འཆིའོ། །སྐར་མདའ་རབ་ཏུ་འབར་བས་གཟའ་འམ་རྒྱུ་སྐར་ལ་མངོན་པར་ཕོག་ན་དེ་ལ་མོས་པ་རྣམས་ལ་མི་རུང་
བར་འགྱུར་རོ། །ཉེ་བར་སྐར་མདའ་མེའི་འོད་ལྟ་བུར་ལྷུང་ན་ཡུལ་འཁོར་གྱི་དབང་པོ་དང་ཡུལ་དུ་བཅས་པ་རྣམ་པར་འཇིག་གོ། །ཡུལ་གྱིས་གང་དུ་སྐར་མདའ་སྒྲ་གྲགས་པར་ལྷུང་ན་ཡུལ་དེར་རྒྱལ་པོ་དང་། བླུན་པོ་དང་། རྐུན་པོའི་དྲག་ཤུལ་སྣང་བར་འགྱུར་རོ། །སྐར་མདའི་ལེའུ་སྟེ་བཅུ་དགུ་
པའོ།།      །།ནམ་མཁའ་ལས་སྒྲ་བྱུང་བའི་ལྟས་ཀྱི་མཚན་མ་བསྟན་པ། རླུང་གཉིས་ཕན་ཚུན་ནས་ཕྲད་པ་ལས་གནམ་གྲུམ་པ་ལྟ་བུའི་སྒྲ་བྱུང་སྟེ། དེ་ཡང་ས་ལ་བབས་པ་དང་། གྱེན་དུ་འབྱུང་བ་དང་། ཐད་དུ་དང་། རྒྱང་རིང་པོ་ཁོང་དུ་ཆུད་པར་བྱའོ། །ཉི་མ་རྩེ་ལ་སྒྲ་བྱུང་ན་རྒྱལ་རིགས་ལ་གནོད་དོ། །སྦ་

203-1-37a

དྲོ་སྒྲ་བྱུང་ན་དམངས་རིགས་ལ་གནོད་དོ། །ཉི་མ་ཕྱེད་པའི་ཚེ་སྒྲ་བྱུང་ན་བྲམ་ཟེའི་སྡེ་ལ་གནོད་དོ། །ཉི་མ་ནུབ་པའི་ཚེ་སྒྲ་བྱུང་ན་རྗེའུ་རིགས་ཀྱི་ཚོགས་ལ་གནོད་དོ། །ཉི་མ་ནུབ་ཀའི་དུས་སུ་སྒྲ་བྱུང་ན་རིགས་ངན་རྣམས་ལ་གནོད་དོ། །ནམ་གྱི་བཞི་ཐུན་གྱི་ཐོ་རངས་སྒྲ་བྱུང་ན་ལོ་ཐོག་ལ་གནོད་
དོ། །མཚན་གྱི་གུང་ལ་སྒྲ་བྱུང་ན་སྲིན་པོ་མང་པོ་ཕུང་བར་བྱེད་པར་འགྱུར་རོ། །ནམ་མཁའ་ཕན་ཚུན་ན་སྒྲ་བྱུང་ན་གླང་པོ་ཆེ་དང་། རྟ་མ་རུང་བར་བྱེད་དོ། །ནམ་ལངས་ནས་སྒྲ་བྱུང་ན་འགྲོན་པོ་མང་པོ་ལ་གནོད་དོ། །སྒྲ་བྱུང་བ་དལ་ལ་ཐུང་ན་གནོད་པ་ཆུང་ངུར་འགྱུར་རོ། །སྒྲ་རིང་དུ་བྱུང་ན་འཇིགས་པ་འབྱུང་ངོ་། །
དུས་གསུམ་གང་ཡང་རུང་བའི་མཚམས་སུ་སྒྲ་ཆེན་པོ་བྱང་ཕྱོགས་སུ་ལྷུང་ན་བྲམ་ཟེ་དམ་པ་འཆི་བར་འགྱུར་རོ། །དེ་བཞིན་དུ་རྒྱུ་སྐར་གྱི་ཚོགས་གང་གི་ཉི་མ་ལ་སྒྲ་བྱུང་ན་དེ་ལ་བརྟེན་པའི་བྲམ་ཟེ་གང་ཡིན་པ་ལ་གནོད་དོ། །བདེན་བྲལ་གྱི་ཕྱོགས་ནས་སྒྲ་བྱུང་ན་དྲག་ཤུལ་གྱི་ལས་བྱེད་པ་ལ་གནོད་དོ། །རླུང་གི་
ཕྱོགས་ནས་སྒྲ་བྱུང་ན་མཐའ་འཁོབ་ཀྱི་ལྷོ་བྲལ་ལ་གནོད་དོ། །མེའི་ཕྱོགས་ནས་སྒྲ་བྱུང་ན་མེས་འཚོ་བ་ལ་གནོད་དོ། །ཕྱོགས་རིང་དུ་སྒྲ་འབྱིན་པ་དེར་དཔའ་བོ་རྣམས་དང་། སྦྲུལ་པོ་ཆེ་ལ་གནོད་དོ། །སྒྲ་ལྟས་ཀྱི་ལེའུ་སྟེ་ཉི་ཤུ་པའོ།།      །།ཉི་མ་དང་ཟླ་བ་འཁྱིམས་པའི་ལྟས་ཀྱི་བྱེ་བྲག་བསྟན་པ།
ཉི་མའམ། ཟླ་བའི་འོད་དང་། རླུང་གཅིག་ཏུ་འདྲེས་པ་ལས་བྱུང་བ་ནི་འོད་འཁྱིམས་པ་ཞེས་བྱ་བའོ། །དེ་ལ་མར་དང་། ཏིལ་མར་དང་། ཆུ་དང་། དངུལ་དང་། འོ་མ་དང་། ཐི་བ་ལྟ་བུའི་ཁ་དོག་ཏུ་འཁྱིམས་ན་ཆར་པ་འབབ་པོ། །བོང་བུ་དང་། རྔ་མོ་དང་། ཤིང་རྟ་ལྟ་བུའི་འོད་འཁྱིམས་པ་ལས་རབ་ཏུ་ཞིག་
སྟེ། རྣམ་པར་གྱེས་ཤིང་ཁ་དོག་ངན་པར་སྣང་ན་མི་དགེ་བར་འགྱུར་རོ། །ཉི་མ་དང་ཟླ་བ་གཉིས་ཀའི་ཉིན་མཚན་དུ་འོད་འཁྱིམས་པར་རྟག་ཏུ་འགྲོ་ན་བཅིང་བ་དང་། མཚོན་དང་ནད་འབྱུང་ངོ་། །མེ་འབར་བཞིན་དུ་འཁྱིམས་ན་མཆུ་མངོན་པར་སྐྱེའོ། །འཇའ་འདྲ་བའི་དབྱིབས་སུ་འཁྱིམས་ན་མཚོན་མང་པོ་
འབྱུང་ངོ་། །རྡུལ་འདྲ་བར་འཁྱིམས་ན་མུ་གེ་འབྱུང་ངོ་། །སུམ་རིམ་དུ་འཁྱིམས་ན་གྲོང་དང་། རྒྱལ་པོ་ལ་མི་དགེའོ། །རྒྱ་སྐྱེགས་ཀྱི་ཁུ་བ་དང་། ཞོའི་མདོག་འདྲ་བར་འཁྱིམས་ན་འཐབ་མོ་དང་གཡུལ་འབྱུང་ངོ་། །སེར་པོར་འཁྱིམས་ན་ཡུལ་འཁོར་གསུམ་དུ་འཇིགས་པར་སྟོན། སྐྱ་བོ་དང་། ལྗང་སྔོན་དུ་

203-1-37b

འཁྱིམས་ན་སྦྲུམ་མ་འཆིའོ། །ནོར་བུ་འདྲ་བའི་ཕྱེད་དང་སུམ་ཆའི་དུམ་བུ་གཅིག་འཁྱིམས་ན་ཆར་པ་འཕྲལ་དུ་འབབ་པོ། །མཚན་དུས་གསུམ་དུ་འཁྱིམས་ན་གྲོང་མི་དང་།རྒྱལ་པོ་འཆི་བར་འགྱུར་རོ། །ཉི་མ་གསུམ་གྱི་བར་དུ་འཇམ་ཞིང་སྣུམ་པར་འཁྱིམས་ན་ཆར་པ་འབབ་པོ། །རྩུབ་པོར་འཁྱིམས་ན་
ཆར་པ་འབབ་ན་ཟླ་བ་གཅིག་ན་འཇིགས་པ་འབྱུང་བར་སྟོན་ཏོ། །སྐར་མ་དང་གཟའི་ཐོག་ཏུ་འཁྱིམས་པས་ནོན་ན་རང་གི་མཐུ་ལས་བྱུང་བའི་འབྲས་བུར་བསྟན་པར་བྱའོ། །ཉི་ཟླ་འཁྱིམས་པའི་ལེའུ་སྟེ་ཉི་ཤུ་གཅིག་གོ།།      །།འཇའ་ཟུག་པའི་ལྟས་ཀྱི་མཚན་མ་བསྟན་པ། རླུང་དང་། སྤྲིན་དང་།
ཉི་མའི་འོད་ལས་བྱུང་བ་ནི་འཇའ་ཞེས་བྱའོ། །འཇའི་ཚོན་སྣ་ཚོགས་སུ་སྣང་ན་ཆར་པ་འབབ་པོ། །ཆུའི་ནང་དུ་ཟུག་ན་ཆར་རབ་ཏུ་ཆེའོ། །ཚོན་དཀར་པོ་ལ་སོགས་པ་ནི་བྲམ་ཟེ་ལ་སོགས་པ་ལ་གནོད་དོ། །སེར་སྐྱ་དང་། མེའི་མདོག་དང་། མེ་ཏོག་དམར་ཟང་ཟང་རྩ་བ་སེར་བ་ལྟ་བུའི་འཇའ་ཟུག་ན་ཡུལ་དུ་
འཇིགས་པ་འབྱུང་ངོ་། །འཇའ་སྔོན་པོར་ཟུག་ན་ལོ་མ་རུང་བར་འགྱུར་རོ། །འཇའི་དབུས་ཉི་ཚེ་ཞིག་ན་ཆར་མི་ཟད་པར་འགྱུར་རོ། །མཚན་མོ་ཤར་ཕྱོགས་སུ་འཇའ་ཟུག་ན་རྒྱལ་པོ་ལ་གནོད་དོ། །ནུབ་ཕྱོགས་སུ་མཚན་མོ་འཇའ་ཟུག་ན་མིའི་གཙོ་བོ་ལ་གནོད་དོ། །ཆར་འབབ་པའི་ཚེ་འཇའ་ཟུག་ན་ཆར་འཆད་དོ། །ཆར་
མི་འབབ་པའི་ཚེ་འཇའ་ཟུག་ན་ཆར་འབབ་པོ། །ཤར་ཕྱོགས་སུ་འཇའ་ཟུག་ན་ཆར་འབབ་པོ། །ལྷོ་ཕྱོགས་ལ་སོགས་པ་ཕྱོགས་གསུམ་དུ་འཇའ་ཟུག་ན་བྲམ་ཟེ་ལ་སོགས་པ་ལ་མཆོད་པ་མང་པོ་འོང་ངོ་། །དེ་བཞིན་དུ་ལྷོ་ཕྱོགས་ནས་ནུབ་ཕྱོགས་སུ་འཇའ་ཟུག་ན་རྒྱལ་རིགས་དང་། རྗེའུ་རིགས་དང་། དམངས་རིགས་
ལ་གནོད་དོ། །དུས་གསུམ་གྱི་མཚམས་སུ་འཇའ་ཟུག་ན་ཡུལ་འཇིག་པར་བྱེད་དོ། །ཉི་མའི་རྩེ་ལ་ལྷོ་ཕྱོགས་སུ་འཇའ་ཟུག་ན་མི་ལ་འཇིགས་པ་འོང་ངོ་། །མཚམས་སུ་འཇའ་ཟུག་ན་བུད་མེད་མ་རུང་བར་འགྱུར་རོ། །ལན་གཉིས་སུ་འཇའ་ཟུག་ན་བདེ་བ་འཕེལ་བ་དང་། ལོ་ལེགས་པར་འགྱུར་རོ། །ཚེས་
གྲངས་བཟང་པོ་དང་། རྒྱུ་སྐར་བཟང་པོ་དང་། ཡུད་ཙམ་དང་། བྱེད་པ་དང་། གཟའ་བཟང་པོ་དང་། ཁྱིམ་པ་དང་། སྐབས་བཟང་པོའི་ཚེ་འཇའ་ཟུག་ན་དགེ་བ་སྟེ། རྒྱལ་པོའི་སྲིད་སྐྱེ་སྟེ། རྐུན་པོ་སྤ་གོང་བར་འོང་ངོ་། །དེ་བཞིན་དུ་ཉ་འདྲ་བ་དང་། དབྱུག་པ་འདྲ་བ་དང་། དྲི་ཟའི་གྲོང་ཁྱེར་ལྟ་བུ་དང་།

203-1-38a

ཕྱོགས་ཚིག་པ་དང་བཅས་པར་སྣང་བ་ཡང་ཚུལ་གོང་མ་དང་འདྲ་བར་ཚེས་གྲངས་དང་། རྒྱུ་སྐར་དང་། གཟའ་ལ་སོགས་པ་བཟང་ངན་གྱི་ཚུལ་གོང་མ་དང་འདྲ་བར་གདོན་མི་ཟ་བར་རྟོགས་པའི་མིས་ཤེས་པར་བྱའོ། །དེ་ལྟ་བུར་སྣང་བ་གྱུར་པའི་རྗེས་ལ་ཞག་བདུན་ཚུན་ཆད་དུ་ཆར་བབས་ན་
ཞི་བ་ཡིན། ལེགས་པར་འགྱུར་རོ། །འཇའ་ལྟས་ཀྱི་ལེའུ་སྟེ་ཉི་ཤུ་གཉིས་པའོ།།      །།ས་གཡོ་བའི་ལྟས་ཀྱི་མཚན་ཉིད་བསྟན་པ། དེ་ལ་ཆོས་མ་ཡིན་པའི་མཐུ་ལས་བྱུང་བའི་དུས་སུ་སྐར་མ་དྲག་ཤུལ་ཅན་དང་། ཡུད་ཙམ་དང་། ཐང་ཅིག་དང་། ཚེས་གྲངས་མི་བཟད་པའི་ཚེས་གཡོས་ན་སྐྱེ་བོ་
ཐམས་ཅད་ཀྱི་ཕུན་སུམ་ཚོགས་པ་མ་ཡིན་པའི་འཇིགས་པ་འོང་བར་འགྱུར་རོ། །ཚེས་གྲངས་བཟང་པོའི་ཚེས་གཡོས་ན་རབ་ཏུ་དགེ་བ་ཞེས་བྱའོ། །སྐར་མ་ཚེས་གྲངས་ལ་སོགས་པ་བཟང་ངན་འདྲེས་པའི་ཚེས་གཡོས་ན་ཕན་གནོད་ཀྱི་འབྲས་བུ་ཡང་འདྲེན་མར་འགྱུར་རོ། །ཚེས་གྲངས་བཟང་པོའི་ཚེས་གཡོས་ན་རྒྱལ་
པོ་དང་། སྐྱེ་བོས་ཆོས་ལེགས་པའི་འབྲས་བུ་ཐོབ་པར་འགྱུར་རོ། །ས་གཡོས་བཞིན་དུ་ཡུལ་གཞན་དུ་སོང་ན་ཡུལ་དེར་གནས་པར་འགྱུར་ཞེས་བྱ་སྟེ། དེ་ཡང་ཆོས་ཉམས་པའི་ཉེས་པ་མ་བྱས་ནས་གཡོས་ཀྱང་ལེགས་པར་གྱུར་ཏེ། དེ་དག་ཏུ་ཆར་འབབ་ཅིང་རབ་ཏུ་ཞི་བར་འགྱུར་རོ། །གནམ་ལྕགས་རྣོན་པོ་ལྷུང་
བའི་སྒྲ་དྲག་པོས་ས་རབ་ཏུ་གཡོས་ན་སྐྱེ་བོ་འཐབ་ཅིང་འཁོན་པ་དང་། མུ་གེ་དང་། མི་ངས་ཀྱིས་ཟད་པར་འགྱུར་རོ། །ས་གཡོ་བ་གཡས་ཕྱོགས་སུ་འགྲོ་ཞིང་འབྲུག་སྒྲ་ལྟར་མཉེན་ཞིང་ཟབ་པའི་སྒྲ་གྲགས་ལ། དུས་ཚིགས་དང་ཚེས་གྲངས་བཟང་བ་ལ་མ་འཁྲུལ་བའི་སྐབས་སུ་ས་གཡོས་ན་དགེ་བར་འགྱུར་
རོ། །ནམ་གཟའ་སྐར་དྲག་པོའི་དུས་སུ་ས་གཡོས་པའི་དུས་ན་རི་དྭགས་དང་བྱ་རྣམས་མེ་འབར་བ་བཞིན་དུ་འགྱུར་ལ། གཞན་ཡང་མི་དགེ་བའི་མཚན་མའི་ལྟས་དག་སྣང་ན་འཇིག་རྟེན་དུ་རབ་ཏུ་གནོད་པ་དྲག་པོ་འབྱུང་བར་འགྱུར་རོ། །རྒྱུ་སྐར་དང་། གཟའ་དགེ་བའི་དུས་སུ་ཡང་དེ་ལྟར་གྱུར་ན་དེའི་ཚེ་འབྲས་བུ་
དགེ་བར་མི་འགྱུར་རོ། །དགེ་བའི་ལྟས་ཀྱི་མཚན་མ་བྱུང་ལ། བྱ་རྣམས་ཀྱང་ཁྲག་ཁྲིག་ལང་ལོང་མེད་ཅིང་རབ་ཏུ་ཞི་བ་དང་། རླུང་ཡང་ཞི་བར་གྱུར་པ་ནི་དགེ་བས་ཀྱང་རབ་ཏུ་དགེ་བ་ཞེས་བྱ་སྟེ། མི་དགེ་བའི་ལྟས་ངན་དྲག་པོ་ཞི་བར་འགྱུར་རོ། །ས་གཡོས་པའི་འོག་ཏུ་གལ་ཏེ་ཆར་པ་འབབ་པ་ན་དེའི་ཚེ་བདེ་བ་

203-1-38b

དང་། ལོ་ལེགས་པ་དང་། ནད་མེད་པར་འགྱུར་རོ། །ས་གཡོས་པའི་རྗེས་ལ་སྐར་མདའ་ཆེན་པོ་ལྷུང་བར་གྱུར་ན་དེའི་ཚེ་སྐྱེ་བོ་ལྟོགས་པ་དང་། མཚོན་དང་། ནད་ཀྱིས་ཟད་པར་འགྱུར་རོ། །ནམས་གཡོས་པའི་རྗེས་ལ་རླུང་དྲག་པོ་ལངས་པས་གསེག་མ་ཁྱེར་ཞིང་འགྲོ་བར་འགྱུར་བའི་ཚེ་ན་མུ་གེ་འབྱུང་བར་འགྱུར་
རོ། །ས་གཡོས་ཤིང་འགྲོ་བ་དང་། རླུང་ལྡང་བ་དང་། ཉི་མ་དང་། ཟླ་བའི་འོད་རྣམས་དང་། འདི་རྣམས་མཐུན་པར་འགྲོ་ན་བཀྲ་ཤིས་ཏེ་དགེའོ། །དེ་ལྟ་བུ་དང་མི་མཐུན་པར་འགྲོ་ཞིང་ས་གཡོས་ན་མི་དགེ་སྟེ་སྨད་པ་ཡིན་ནོ། །ཟླ་བ་ཕྱེད་ཕྱེད་ཅིང་ལན་གསུམ་གསུམ་གཡོས་པ་ཟླ་བ་གཅིག་ལ་སྤྱིར་ས་ལན་
དྲུག་གཡོས་པར་གྱུར་ན་དགྲའི་ཚོགས་འོང་བར་སྟོན་ཏོ། །ཡུལ་གང་དུས་གཡོ་བ་བསྟུད་པ་དེར་ཡང་དང་ཡང་ཞག་གཅིག་གམ། ཞག་བདུན་ནམ། ཞག་བཅུ་གཅིག་གམ། ཟླ་བ་ཕྱེད་དམ། ཟླ་བ་རེ་རེ་ཞིངས་གཡོའམ། ཟླ་བ་དྲུག་ཏུའམ། ཟླ་བ་བཅུའམ། ལོ་གཅིག་ཏུའམ། ལོ་བཅུའི་བར་དུའམ། 
དེ་བས་ཀྱང་ལྷག་པར་ལན་མང་དུ་གཡོས་སམ། དེ་ལས་ཉིས་འགྱུར་དུ་གཡོས་ན་ཡུལ་ཕུན་སུམ་ཚོགས་པ་དང་ལྡན་པའི་རྒྱལ་པོ་དང་དམག་དང་འཁོར་དུ་བཅས་པ་མ་རུང་བར་འགྱུར། ཡུལ་དེ་རྒྱལ་པོ་གཞན་བྱེད་དེ། དེ་ཡང་ཡུལ་དེར་རབ་ཏུ་འཚེ་ཞིང་གནོད་པ་བྱེད་པས་ཡུལ་དེ་ཉིད་དགོན་པར་གྱུར་ནས་རི་དྭགས་
གནས་པར་འགྱུར་རོ། །ཚུལ་གོང་མ་བཞིན་དུ་དཔྱིད་ཟླ་ཐ་ཆུངས་ལ་ས་གཡོས་ན་གནོད་པའི་འབྲས་བུ་ཞག་བཅུ་ནས་འབྱུང་ངོ་། །དབྱར་ཟླ་ར་བ་ལ་ས་གཡོས་ན་རྣམ་པར་སྨིན་པའི་འབྲས་བུ་ཞག་བཅུ་གཉིས་ན་འབྱུང་ངོ་། །དབྱར་ཟླ་འབྲིང་པོ་ལ་ས་གཡོས་ན་རྣམ་པར་སྨིན་པའི་འབྲས་བུ་ཞག་ཉི་ཤུ་རྩ་ལྔ་ན་འབྱུང་
ངོ་། །དབྱར་ཟླ་ཐ་ཆུངས་ལ་ས་གཡོས་ན་འབྲས་བུ་ཞག་བདུན་ཅུ་རྩ་ལྔ་ན་འབྱུང་ངོ་། །སྟོན་ཟླ་ར་བ་ལས་གཡོས་ན་རྣམ་པར་སྨིན་པའི་འབྲས་བུ་ཞག་བརྒྱད་ན་འབྱུང་ངོ་། །སྟོན་ཟླ་འབྲིང་པོ་ལ་ས་གཡོས་ན་འབྲས་བུ་ཟླ་བ་གཉིས་ན་འབྱུང་ངོ་། །སྟོན་ཟླ་ཐ་ཆུངས་ལ་ས་གཡོས་ན་འབྲས་བུ་ཟླ་བ་གསུམ་ན་འབྱུང་ངོ་། །དགུན་
ཟླ་ར་བ་ལ་ས་གཡོས་ན་འབྲས་བུ་ཟླ་བ་གཉིས་ན་འབྱུང་ངོ་། །དགུན་ཟླ་འབྲིང་པོ་ལ་ས་གཡོས་ན་འབྲས་བུ་ཞག་ལྔ་བཅུ་རྩ་ལྔ་ན་འབྱུང་ངོ་། །དགུན་ཟླ་ཐ་ཆུངས་ལ་ས་གཡོས་ན་འབྲས་བུ་ཞག་བརྒྱད་ན་འབྱུང་ངོ་། །དཔྱིད་ཟླ་ར་བ་ལ་ས་གཡོས་ན་འབྲས་བུ་ནི་ཞག་ལྔ་བཅུ་ན་འབྱུང་ངོ་། །དཔྱིད་ཟླ་འབྲིང་པོ་ལ་ས་གཡོས་ན་

203-1-39a

ཞག་ལྔ་བཅུ་རྩ་གསུམ་ན་འབྲས་བུ་འབྱུང་བར་སྐར་མཁན་གྱིས་ཤེས་པར་བྱའོ། །དེ་ལྟར་ས་གཡོས་པའི་འབྲས་བུ་དེ་ལྟར་བསྟན་པ་ཡིན་ནོ། །དེ་ལྟར་ཟླ་བའི་ངོ་རེ་རེ་ཞིང་ས་གཡོ་བའི་དམིགས་ཀྱང་ཡར་གྱི་ཚེས་གཅིག་དང་། མར་གྱི་ཚེས་བཅུ་དྲུག་དང་། མར་གྱི་ཚེས་ཉི་
ཤུ་གསུམ་དག་དང་། ཡར་གྱི་ཚེས་བཅུ་བཞི་དང་། བཅོ་ལྔ་དང་། ཉི་ཤུ་དགུ་དང་། སུམ་ཅུ་སྟེ། དུས་ཚིགས་འདི་རྣམས་ལྟ་བུའི་དུས་སུ་ས་གཡོས་པའི་འབྲས་བུ་ནི་ཚུལ་དེ་ལྟར་བལྟའོ། །ས་གཡོས་པའི་ལྟས་ཀྱི་ལེའུ་སྟེ་ཉི་ཤུ་གསུམ་པའོ།།      །།ནམ་ཟླ་བ་བཅུ་གཉིས་ཀྱི་ངོ་ཀུན་
ལས་རྟག་པར་གཡོས་ཏེ། ཤིང་ཡང་འགུལ། ཆུ་ཡང་གཡོས་ཏེ། མེར་མེར་བྱེད་ཅིང་། དེ་ལྟར་དུས་ཚིགས་དང་། དུས་ཚིགས་མ་ཡིན་པར་གཡོས་ཏེ། རླུང་ལངས་པས་ཤིང་ཡང་བཅག །གྲོང་དང་། གྲོང་ཁྱེར་དང་། གྲོང་འདབ་དང་། གྲོང་དེ་ན་བརྟེན་པའི་སྐྱེ་བོ་རྣམས་མེད་པར་གྱུར་
ཏེ། གཅན་གཟན་གྱི་ཟིལ་གྱིས་གནོན་ནས་ཡུལ་འབྲོག་ཏུ་གྱུར་ཏེ། དེ་ལྟར་ས་གཡོས་པ་ནི་གནོད་པའི་འབྲས་བུ་ལོ་བཅོ་ལྔ་ནས་ཡུལ་ཕྱོགས་དེར་ཡང་སུ་ཡང་མི་གནས་པར་འགྱུར་རོ། །རྒྱུ་སྐར་སྨིན་དྲུག་གི་ཉི་མ་ལས་གཡོས་ན་གྲོང་དང་གྲོང་ཁྱེར་ལ་མེ་བསྟུད་པར་ཤོར་ཏེ། ཤིང་རྩི་ཡང་ཚིག །
གོས་ནག་པོ་གྱོན་པའི་སྡེ་དང་། ནོར་བུ་མཁན་རྣམས་དང་། མགར་བ་དང་། བྲམ་ཟེ་མེ་འབྱིན་པའི་སྤྱོད་པ་བྱེད་པ་འདི་རྣམས་ལ་མི་དགེ། །འབྱུང་ཁུངས་ནས་ནོར་བུ་བྱུང་བ་རྣམས་དང་། འཕེལ་བ་རྣམས་ཀྱང་སུབས་པར་འགྱུར། ཡུལ་དེ་ལ་བརྟེན་པའི་བ་ལང་དང་། ཤིང་རྟ་འདྲེན་པའི་མི་དང་། བྲམ་
ཟེ་དང་། འདྲེག་མཁན་སྤུ་གྲིའི་ལས་བྱེད་པ་དང་། ཡུལ་སིན་དུ་ཞེས་བྱ་བའི་ཡུལ་ཕྱེད་ཀྱི་མི་དང་ཡུལ་ཨམ་བསྟ་དང་། ཡུལ་ཆུ་ཀླུང་ལྔ་ཞེས་བྱ་བ་ན་གནས་པའི་མི་དང་། ཡུལ་ཤི་བ་ཞེས་བྱ་བ་དང་། ཡུལ་བ་སི་ཏི་ཞེས་བྱ་བ་དང་། ཡུལ་ཏ་ཤེ་ར་ཀ་ཞེས་བྱ་བ་དང་། ཡུལ་བརྟ་བ་དང་། ཡུལ་རྟ་ལ་དྷ་ན་ཞེས་བྱ་
བ་དང་། ཡུལ་གངས་ཁྲོད་ན་གནས་པ་རྣམས་དང་། ལྷོ་ཕྱོགས་ཀྱི་ལུང་པ་ན་གནས་པའི་སྐྱེ་བོ་རྣམས་ལ་གནོད་པ་འབྱུང་བར་འགྱུར། དེ་ལྟར་ས་གཡོས་པས་གཟི་བརྗིད་ཉམས་ཏེ་ནད་དྲག་པོས་འདེབས། ལྟོགས་པར་འགྱུར། ཐན་ཆེན་དང་། ཆོམ་རྐུན་

203-1-39b

དང་། ཕ་རོལ་གྱི་དགྲ་རྣམས་ཀྱིས་གནོད་པ་དྲག་པོ་བྱེད་པར་འགྱུར་རོ། །རྒྱུ་སྐར་སྣར་མའི་ཉི་མ་ལ་ས་གཡོས་ན་ས་བོན་ཐམས་ཅད་ཆུད་ཟོས་པར་འགྱུར་རོ། །ས་ལ་འབྲུ་བཏབ་པ་ཡང་མི་སྐྱེ། དེ་དང་འདྲ་བར་རྩྭ་ཡང་དཀོན། ནགས་ཁྲོད་ནས་ཅུང་ཟད་ཅི་འཁྲུངས་པ་ཡང་དཀོན་ནོ། །བུད་མེད་སྦྲུམ་མ་
རྣམས་ཀྱི་རུམ་རབ་ཏུ་མི་བདེ། མུ་གེ་དང་། མཚོན་དང་། ནད་ཀྱིས་ཟད་དེ། སྐྱེ་བོ་སུམ་ཆ་གཅིག་གནས་པར་འགྱུར་རོ། །མིའི་དབང་པོ་ཆེ་བའི་བདག་ཉིད་ཅན་དང་། དཔལ་དང་ལྡན་པའི་མི་མཆོག་རྣམས་དང་། བྲམ་ཟེ་གཟི་བརྗིད་ཅན་མང་པོ་དང་། བ་ལང་ཕྱུག་པོ་དང་། དབང་དང་ལྡན་པ་དང་། 
ཡུལ་ཕི་པ་ཤ་དང་། ཡུལ་ཤ་ཏ་རུ་དང་། ཡུལ་སིན་དྷུ་དང་། ཡུལ་ཨན་ན་དང་། ཆུ་བོ་བ་ནི་སྟིའི་འགྲམ་ན་གནས་པ་དང་། ཆུ་བོ་ཨེ་ར་བ་ཏིའི་དྲུང་དུ་གནས་པ་དང་། ཡུལ་ཀུ་དྷ་ན་གནས་པའི་མི་དང་། ཆུ་བོ་ཙན་ཏྲ་བྷ་ག་ཞེས་བྱ་བའི་འཁོར་ན་གནས་པའི་མི་དང་། ཆུ་བོ་སུ་ཏ་ན་ཞེས་བྱ་བ་དང་། ཆུ་བོ་འདི་
དག་གི་འགྲམ་ན་གནས་པའི་མི་དང་། ཡུལ་ནགས་འབྲོག་ཆུ་དང་ལྡན་པ་དང་། ཆུ་བོ་ཨ་གྲོ་ཏ་དང་། སེ་ར་ས་ཏི་ཞེས་བྱ་བའི་འཁོར་དང་། ཡུལ་ས་པརྟ་པྲརྟ་ཞེས་བྱ་བ་རྣམས་དང་། ར་བདོག་པའི་གཙོ་བོ་དང་། འདི་རྣམ་བཞིར་ས་གཡོས་ན་གནོད་པ་འབྱུང་བར་འགྱུར་རོ། །རྒྱུ་སྐར་མགོའི་ཉི་མ་ལས་
གཡོས་ན་སྨན་རྣམས་དང་། ནད་དཔྱད་བྱེད་པའི་སྨན་པ་རྣམས་དང་། རྩྭ་སོ་མ་ཞེས་བྱ་བ་ལ་སྐོམ་དུ་སྦྱར་ཏེ། འཐུང་བའི་ཆོས་བཞིན་བྱེད་པ་རྣམས་དང་། རྩྭ་སོ་མ་ལ་སྐོམ་དུ་འཐུང་བ་རྣམས་དང་། བྲམ་ཟེ་ནགས་ཁྲོད་ན་གནས་ཤིང་དཀའ་ཐུབ་བྱེད་པ་རྣམས་ལ་མི་རུང་བར་འགྱུར། ཡུལ་དབུས་མ་ག་དྷཱར་ཆར་
ཆེར་འབེབས་ཏེ་ལོ་ལེགས། བདེ་བར་འགྱུར། རྒྱལ་པོ་ནང་ཕན་ཚུན་མི་མཐུན་ཏེ་རྩོད་པར་འགྱུར། ཡུལ་ཨ་བྷི་ཤ་ཧའི་མི་དང་། ཡུལ་ཤུལ་ར་སེ་ན་དང་། ཆུ་བོ་ཚར་མ་ནཱ་ཏི་ན་གནས་པ་དང་། ཡུལ་ཀ་ཏ་ལའི་མི་དང་། ཡུལ་བད་སའི་མི་དང་། ཡུལ་པན་ཙ་ལའི་ལྷོ་ཕྱོགས་དང་། ཡུལ་པན་ཙ་ལའི་
བྱང་ཕྱོགས་དང་། ཡུལ་མ་ག་དྷཱ་ན་གནས་པའི་མི་དང་། མི་ལ་གནོད་པར་འགྱུར་རོ། །ཡུལ་སུ་ལའི་མི་དང་། ཡུལ་བེ་ཤ་ལའི་མི་དང་། ཡུལ་མ་ལ་ཞེས་བྱ་བའི་འཁོར་མི་དང་། འདི་རྣམས་ལ་གནོད་པ་རྣམ་པ་དྲུག་འབྱུང་སྟེ། ཆོམ་རྐུན་དང་། མེས་འཇིགས་པ་དང་། མི་ངས་དང་། ཐན་ཆེན་ལ་

203-1-40a

སོགས་པའི་ཁྱད་ཞུགས་པའི་གནོད་པ་རྣམས་ཀྱིས་སྐྱེ་བོ་ལ་ཟིལ་གྱིས་གནོན་པར་འགྱུར་རོ། །རྒྱུ་སྐར་ལག་ལ་ས་གཡོས་ན་ཤིང་འོ་མ་ཅན་རྣམས་དང་། འོ་མ་མ་རུང་བར་འགྱུར་རོ། །ཟས་སྐོམ་ཕྱོགས་སུ་མ་རུང་བར་འགྱུར། འགྲོན་པ་རྣམས་དང་། གཅན་གཟན་དང་། རྒྱ་མོ་
ཐོགས་པའི་ཉ་འཆོར་བ་ལ་སོགས་པ་རྣམས་དང་། འོབ་བརྐོ་ཞིང་ཁྲོན་པ་བརྐོ་བ་དང་། སྡིག་པའི་ལས་ཅན་རྐུན་པོ་རྣམས་དང་། གདོལ་པ་དང་། རིགས་ངན་དང་། ཡུལ་ཤར་ཕྱོགས་དང་། ཡུལ་པུན་ད་བརྟ་དང་། མུ་སྟེགས་གཅེར་བུ་དང་། ཡུལ་ཨོཾ་ཏྲ་དང་། ཡུལ་བུ་ལི་དའི་མི་དང་། ཡུལ་ཤ་བ་རིའི་
མི་རྣམས་དང་།ནགས་འབྲོག་ཆུ་དང་ལྡན་པ་ཨ་ཏ་བྱ་སོ་ཏ་ཀ་ཞེས་བྱ་བ་དང་། ཡུལ་གཞན་ཡང་དེ་དང་འདྲ་བ་ཆུ་དང་ལྡན་པའི་ནགས་འབྲོག་ཀྱང་གནོད་པ་དྲག་པོ་མི་བདེ་བ་སྣ་ཚོགས་པ་རྣམ་པ་དྲུག་གིས་གནོད་པ་འབྱུང་བར་འགྱུར་རོ། །རྒྱུ་སྐར་ནབ་སོའི་ཉི་མ་ལ་ས་གཡོས་ན་ཆང་འཚོང་དང་། གསལ་ཤིང་དང་།
མཚོན་ཐོགས་པའི་མི་དང་། ཁུར་བ་འཚོང་བའི་མི་དང་། གདུགས་ཕྱེད་པའི་མི་དང་། ཤིང་མཁན་རྣམས་དང་། མི་གསོད་པའི་གཤེད་མ་རྣམས་དང་། བཙས་དང་། འགྲོ་བའི་ཚོང་པ་རྣམས་དང་། འཁོར་ལོ་བྱེད་པ་རྣམས་དང་། འཁོར་ལོ་སློབ་པ་རྣམས་དང་། ལྷང་ཚེར་འཐག་ཅིང་སྦྱོར་བ་དང་། ཤ་འཚོང་བ་
དང་། དུད་འཚོང་དང་། གྲོང་ན་གནས་པའི་ཚོང་པ་དང་། གང་དག་སྐྱེ་བོ་ཕལ་པོ་ཆེ་ལྷན་ཅིག་གནས་པས་འཚོང་བ་དང་། ཚུལ་ཅན་རྣམས་དང་། ཆར་ཆེར་འབབ་པས་ལོ་ལ་ཡང་གནོད་པར་འགྱུར་རོ། །རྒྱལ་པོ་དང་། ལྷོ་ཀའི་གནས་ན་གནས་པའི་རྒྱལ་ཕྲན་རྣམས་དང་། རྒྱལ་ཕྲན་དེ་དག་ལ་ཕྱོགས་པའི་
ཡུལ་མི་རྣམས་དང་། ཡུལ་གྱི་མཆོག་དང་། ཏོ་ཀ་ཞེས་བྱ་བ་དང་། མོན་ཡུལ་ཀན་ཏུ་ན་གནས་པའི་མི་རྣམས་དང་། སྤྱང་ཀི་ཁྱི་མང་པོ་རྣམས་ལ་ས་གཡོས་ན་གནོད་པར་འགྱུར་རོ། །རྒྱུ་སྐར་རྒྱལ་གྱི་ཉི་མ་ལ་ས་གཡོས་ན་མི་དགེ་བ་བྱས་པ་དང་། བྲམ་ཟེ་དམ་པ་དང་། རྒྱལ་པོ་སྤྱི་བོ་ནས་དབང་བསྐུར་བ་རྣམས་
དང་། རྒྱལ་པོའི་བུ་གཞོན་ནུ་དང་། དཔོན་སྣ་ཕྲ་མོ་དང་། མི་མང་པོའི་ཚོགས་པ་དང་། བློན་པོ་རྣམས་དང་། དགེ་སློང་རྣམས་དང་། སྤྲང་པོ་དང་། བྲམ་ཟེ་དང་། མཁས་པ་རྣམས་དང་། ཆོས་ལ་རབ་ཏུ་བརྩོན་པ་རྣམས་དང་། བསོད་ནམས་ཆེན་པོ་བྱེད་པའི་མི་རྣམས་ལ་གནོད་པར་འགྱུར་རོ། །དེ་ལྟར་ཤར་

203-1-40b

ཕྱོགས་དང་། ཡུལ་ཏ་མ་ལི་བ་ཏའི་གྲོང་རྡལ་དང་།ཤར་ཕྱོགས་ཀྱི་གླིང་དུ་མ་ཏ་ར་ཏི་བ་དང་། མོན་ཡུལ་ཀ་མ་རུ་བ་དང་། ཤར་ཕྱོགས་ཀྱི་རྒྱ་མཚོའི་གླིང་ན་གནས་པ་དང་། གསེར་གྱི་གླིང་ན་གནས་པ་དང་། ཆུ་བོ་གང་གཱའི་རྒྱ་མཚོའི་གཏིང་དུ་འབབ་པ་དང་། འགྲམ་ན་གནས་པའི་སྐྱེ་བོ་རྣམས་ལ་གནོད་པར་
འགྱུར་རོ། །རྒྱུ་སྐར་སྐག་གི་ཉི་མ་ལ་ས་གཡོས་ན་ཀླུ་རྣམས་དང་། སྦྲུལ་རྣམས་དང་། སྡིག་སྦྲུལ་རྣམས་དང་། གྲོག་མ་རྣམས་དང་། གྲོག་མ་མང་པོ་རྣམས་དང་། སྲིན་བུ་སྣ་ཚོགས་དང་། ཁྱི་དང་། རྨིག་པ་གཅིག་པ་རྣམས་དང་། དུག་རྣམས་དང་། དུག་སྦྱོར་ཞིང་བྱེད་པའི་མི་རྣམས་དང་། སེམས་ཅན་
གང་དག་རི་ཁྲོད་ན་གནས་པ་རྣམས་དང་། ཡུལ་མཐའ་འཁོབ་ན་རྐུ་འཕྲོག་བྱེད་ཅིང་འཇོམས་པའི་མི་རྣམས་དང་། ཟོལ་པ་དང་། རྐུ་ཐབས་ཀྱིས་འཐབ་མོ་འགྱེད་པའི་མི་རྣམས་དང་། སྡིག་པའི་ལས་ལ་དགའ་བའི་མི་རྣམས་དང་། མི་བླུན་པོ་རྣམས་དང་། མི་ངན་པ་དང་། ཚིག་ངན་པ་སྨྲ་བ་རྣམས་དང་།
ཡུལ་ཏོ་ས་ལ་དང་། ཡུལ་ཀོ་ས་ལ་དང་། གྲོང་ཁྱེར་ཀཉྩི་དང་། ཡུལ་ལིང་ག་དང་། ཡུལ་ཨན་དྲ་དང་། ཡུལ་ཨན་དྲའི་བྱང་ཕྱོགས་དང་། ཡུལ་ཡ་མའི་གྲོང་རྡལ་ཉམས་དགའ་དང་། རི་བྷྱི་ན་དྷ་དང་། རི་བྷྱི་ན་དྷ་བྱང་ཕྱོགས་ཀྱི་ངོས་དང་། རི་དེའི་དྲུང་དང་། རྩེ་མོ་དང་། སྲངས་ས་ན་གསུམ་པའི་སྐྱེ་བོ་རྣམས་
ལ་གནོད་པ་དྲག་པོ་ནད་དང་། མེ་དང་། མི་ངས་དང་། ཐན་ཆེན་དང་། སེར་བ་དང་། ཡང་དང་ཡང་མཚོན་ཀར་འགྱེད་པས་ཡུལ་དེ་ཕྱོགས་ན་མྱ་ངན་བྱེད་ཅིང་འགྲོ་སྟེ། ས་གཡོ་བས་གཟི་བརྗིད་ཉམས་ནས་གནོད་པ་དེ་ལྟ་བུ་འབྱུང་བར་འགྱུར་རོ། །རྒྱུ་སྐར་མཆུའི་ཉི་མ་ལ་ས་གཡོས་ན་རྒྱལ་པོ་ཆེན་པོ་མྱ་ངན་བྱེད་པར་
འགྱུར་རོ། །མཆོད་སྦྱིན་བྱེད་པ་དང་། དད་པ་རྣམས་ལྡོག་པར་འགྱུར། མི་མང་པོ་འདུ་བ་དང་། དགའ་སྟོན་བྱེད་པ་དང་། ལྷའི་གཙོ་བོ་ལ་མཆོད་སྦྱིན་བྱེད་པ་རྣམས་དང་། སྔགས་ཐམས་ཅད་ནི་ལྡོག་པར་འགྱུར་རོ། །གང་དག་བཙས་པ་དང་། ཆེར་སྐྱེས་པ་དང་། གཞན་ཡང་མཁས་པའི་མཆོག་
དང་། རོལ་མོ་མཁན་མཁས་པ་དང་གླུ་སྙན་པ་དང་། རེགས་ཆེན་པོ་བློ་དང་ལྡན་པའི་མི་རྣམས་དང་། འབྲུ་ནག་པོ་ཏིལ་དང་། ཟར་མ་སྲན་མ་ལ་སོགས་པ་ལ་གནོད་པ་ཡུལ་ཀ་ལིང་ཀའི་ཕྱེད་དང་། ཀ་ལིང་ཀའི་ནུབ་ཕྱོགས་དང་། ཡུལ་ཨན་ཏིའི་རི་ལ་བརྟེན་པའི་མི་རྣམས་དང་། རི་བྱིན་དྷའི་ངོས་

203-1-41a

ཕྱེད་ལ་བརྟེན་པའི་མི་རྣམས་ལ་ས་གཡོ་བ་དང་། ས་རྣམ་པར་གཡོས་ན་དེ་དག་ལ་ཡང་གནོད་པ་འབྱུང་བར་འགྱུར་རོ། །རྒྱུ་སྐར་གྲེའི་ཉི་མ་ལ་ས་གཡོས་ན་དུས་ཚིགས་ལོག་པར་འགྱུར་ཏེ། དེའི་རླུང་དྲག་པོ་ལྡང་བར་འགྱུར། བརྟེན་པ་བྱས་པ་མ་རུང་བར་འགྱུར། ཡོད་པའི་
མ་རུང་བར་འགྱུར། སྨད་འཚོང་མ་དང་། ཆོས་ལ་དགའ་བ་དང་། གཡོས་མཁན་དང་། ཤོ་གམ་གྱིས་འཚོ་བ་དང་། བཙོན་འཚོ་བ་དང་། སྣམ་བུ་འཐག་པ་དང་། ཁྱད་པར་ཆུ་བོ་སིན་དྷུའི་ལྷོ་ཕྱོགས་ཀྱི་ཕྱེད་དང་། ཤར་ཕྱོགས་ཀྱི་ཕྱེད་དང་། ཡུལ་མ་ཧཱ་ཀ་རི་རི་ཁྲོད་ཀྱི་སྡོང་བུ་དང་། ཡུལ་དང་། ལུང་
པའི་ནང་ན་གནས་པའི་སྐྱེ་བོ་དང་། རི་ཀིས་ཀིན་དའི་གྲོང་ཁྱེར་དང་། གྲོང་རྡལ་དང་། དེ་བཞིན་དུ་ཡུལ་ཤུར་པར་ཀ་དང་། ཡུལ་ཚ་སེར་ཆེ་བ་ནགས་རི་ཆུ་མང་བ་ན་གནས་པའི་བ་ལང་ལ་སོགས་པ་དང་། སྐྱེ་བོ་མི་སྲུན་པ་མང་པོས་བསྐོར་ཞིང་། མེ་ཏོག་རྒྱས་པ་ལྟར་ལྡང་ཞིང་གནས་པ་ལ་ས་གཡོས་ཏེ་མདངས་
ཉམས་ན་གནོད་པ་འབྱུང་བར་འགྱུར་རོ། །རྒྱུ་སྐར་དབོའི་ཉི་མ་ལ་ས་གཡོས་ན་ཚོང་པ་རྣམས་དང་། གླིང་ཕྲན་ན་གནས་པའི་མི་དང་། འགྲོན་པོ་ལམ་དུ་ཞུགས་པ་དང་། མཆོད་སྦྱིན་གྱི་སྣོད་དང་། ཡོ་བྱད་རྣམས་དང་། སྦྲུལ་གྱི་གདོང་གིས་འཚོ་བའི་མི་རྣམས་དང་། བག་མ་ལམ་བཅའ་བ་ལ་སོགས་པ་དང་། 
བཀྲ་ཤིས་བྱེད་པ་དང་། ཡུལ་མ་ཧེ་སེ་ནའི་གྲོང་རྡལ་དང་། གྲོང་ཁྱེར་ཉམས་དགའ་བ་ལང་གི་ཁྱུ་མང་པོ་དང་ལྡན་པ་དང་། ཆུ་བོ་གདབ་རའི་འགྲམ་གྱི་ཡུལ་དང་། ཡུལ་མ་ཧཱ་བེ་ན་ན་དང་། ཆུ་བོ་མས་རི་ཏའི་འགྲམ་ན་གནས་པའི་གྲོང་རྡལ་དང་། གྲོང་འདབ་ཀྱི་མི་དང་། ཡུལ་དབུས་ཨ་ག་དང་། མོན་ཡུལ་
བང་ག་དང་། ཡུལ་ཀ་ལིང་ཀའི་ཕྱེད་དང་། ཡུལ་ནི་ཀྲི་ཏི་དང་། ཡུལ་ཁ་ཤའི་མི་རྣམས་དང་། སླས་བུད་མེད་མང་པོ་བསྲེལ་བ་དང་། སྙིང་ལས་སེམས་པའི་མི་རྣམས་དང་། གྲོང་དང་གྲོང་དམ་པ་རྣམས་དང་། རྒྱལ་པོ་ལ་བརྟེན་པས་འཚོ་བའི་མི་དེ་ལྟ་བུ་ལས་གཡོས་ན་གནོད་པར་འགྱུར་རོ། །རྒྱུ་སྐར་མེ་བཞི་
ལ་ས་གཡོས་ན་རྫ་མཁན་དང་། སྨན་པ་རྣམས་དང་། ཚོགས་ཀྱི་གཙོ་བོ་དང་། བློན་པོ་དང་། བློན་པོ་ཆེན་པོ་དང་། དམག་དཔོན་རྣམས་དང་། གླང་པོ་འདུལ་སྦྱོང་བྱེད་པའི་མི་དང་། ཆོམ་རྐུན་བྱེད་པ་མང་པོ་དང་། ཆོམ་རྐུན་བྱེད་པའི་གཙོ་བོ་རི་གདོང་ས་བཙན་ལ་བརྟེན་པའི་མི་རྣམས་དང་། བྲམ་ཟེ་སྲད་བུ་སེ་

203-1-41b

རལ་དུ་ཐོགས་པས་འཚོ་བ་རྣམས་དང་། ལྷ་དོན་དུ་གཉེར་བ་རྣམས་ལ་མི་སྨོད་པའི་མི་རྣམས་དང་། བྲམ་ཟེའི་ལག་བརྡ་ཁ་དོན་འདོན་པ་དང་། མཆོད་སྦྱིན་གྱི་ཡོ་བྱད་ཀྱི་ཚོགས་སྦྱར་བ་དང་། ཡུལ་ཧ་སེ་ནའི་གྲོང་རྡལ་ཉམས་དགའ་བ་དང་། རི་རྨ་བྱ་ཞེས་བྱ་བའི་དྲུང་ན་གནས་པ་དང་། རི་པ་རི་ཡ་ཏྲའི་དྲུང་ན་
གནས་པ་དང་། སྡིངས་དང་། ལུང་པ་དང་། ལུང་པ་ཕྲན་མང་པོ་སྣ་ཚོགས་ན་གནས་པའི་མི་རྣམས་དང་། ཡུལ་སྤང་ཀུ་ར་དང་། ཡུལ་ས་སྲ་དང་། ཡུལ་ཨ་མུ་ཏྲ་དང་། འདི་རྣམས་ལ་ས་གཡོས་ན་གནོད་པར་འགྱུར་རོ། །རྒྱུ་སྐར་ནག་པ་ལ་ས་གཡོས་ན་རི་མོ་འབྲི་བའི་ལས་རྣམས་མ་རུང་བར་འགྱུར། 
རི་མོ་འབྲི་བ་རྣམས་དང་། ཤིང་མཁན་རྣམས་དང་། བཟོ་བོ་དང་། གསེར་མགར་དང་། རྡོ་རྗེ་གསོར་བའི་ལས་བྱེད་པ་དང་། བཟང་ཀན་དང་། ནོར་བུ་འབྲུག་ཅིང་ནོར་བུ་མདོག་པ་དང་། རྒྱན་ལ་དགའ་བ་དང་། ཚོང་པ་དང་། མིག་སྨན་སྦྱོར་ཤེས་པའི་མི་དང་། རྒྱན་བྱེད་པའི་མི་དང་། ཡུལ་པྲ་བ་ཀ་
ཤ་དང་། ཡུལ་ཨ་ནི་ལའི་གྲོང་རྡལ་དང་། ཡུལ་མ་གྱི་སྨ་དང་། ཡུལ་ཨ་པན་ཏི་དང་། རི་ས་དྷྱའི་དྲུང་དང་། རི བྱིན་མདའི་འཁོར་ན་གནས་པའི་སྐྱེ་བོ་རྣམས་དང་། མི་དྲ་མ་རྣམས་ལ་དེ་ལྟར་ས་གཡོས་ན་གནོད་པར་འགྱུར་རོ། །རྒྱུ་སྐར་ས་རི་ལས་གཡོས་ན་ཆོམ་རྐུན་བྱེད་པའི་མི་རྣམས་དང་། མགར་མཁན་
རྣམས་དང་། འཚེ་ཞིང་གནོད་པའི་མི་རྣམས་དང་། ལ་འཕྲང་འཇོམས་པའི་མི་རྣམས་དང་། ཡུལ་གངས་རིའི་བྱང་ཕྱོགས་ཀྱི་ཤོད་ན་གནས་པའི་མི་རྣམས་དང་། རོལ་མོ་མཁན་དང་། བཞད་གད་མཁན་དང་། དཀའ་ཐུབ་ཅན་ཟས་སུ་རླུང་ཟ་བ་དང་། ཚུལ་མ་ཡིན་པའི་དཀའ་ཐུབ་གྲུབ་པའི་མི་རྣམས་
དང་། མི་དགེ་བ་དམ་པའི་མི་རྣམས་དང་། ང་རྒྱལ་ཅན་རྣམས་དང་། ཡུལ་ས་ཧ་ཏའི་མི་དང་། ཡུལ་ཨན་དར་སྟིའི་མི་དང་། ཡུལ་བི་པུ་ལ་དང་། ཡུལ་ཀ་ཙའི་སྐྱེ་བོ་མང་པོ་ཕལ་པོ་ཆེ་དང་། ཡུལ་བ་ཡ་བ་དང་། ཡུལ་བ་ཤུད་ཀྲང་ཀ་དང་། ཡུལ་ད་ར་ག་ཞེས་བྱ་བའི་གྲོང་དང་། ཕལ་པོ་ཆེའི་མི་དང་། 
གླིང་སྣ་ཚོགས་ན་བུད་མེད་དམ་པ་གནས་པ་དང་། རྐང་འགྲོས་ཀྱིས་གང་བར་རྒྱས་ཤིང་གྲོང་ཁྱེར་ཀུ་བེ་ར་ཞེས་བྱ་བ་ལ་འབྱོར་ཞིང་རྒྱས་པར་གནས་པ་དང་། རི་དམ་པ་བྲད་ཛ་ཡ་ཧོ་ཞེས་བྱ་བའི་དྲུང་ན་གནས་པའི་མི་དང་། རྒྱ་མཚོའི་འགྲམ་ན་གནས་པའི་མི་དང་། ཡུལ་བྲི་སྣི་དང་།ཡུལ་ཨན་དྲག་དང་། མ་

203-1-42a

དུ་ཞེས་བྱ་བའི་མི་དང་། ས་ཏྭ་ཏ་ཞེས་བྱ་བའི་མི་དང་། འདི་དག་གི་གནས་རྣམས་དང་། མིའི་སྡེ་དྷ་ཤ་ན་ཞེས་བྱ་བ་རྒྱ་མཚོ་ཆུའི་འགྲམ་གྲོང་ཁྱེར་རྣམ་པ་བརྒྱ་དང་། གྲོང་ཁྱེར་རྣམ་པ་སྟོང་སྙེད་དུ་གནས་པ་དེ་དག་ལ་ས་གཡོས་ན་རབ་ཏུ་གནོད་པར་འགྱུར་རོ། །རྒྱུ་སྐར་ས་ག་ལ་ས་
གཡོས་ན་མི་ལས་སུ་བྱ་བ་རྣམས་མ་རུང་བར་འགྱུར་རོ། །བྲམ་ཟེ་དམ་པ་མེ་ལ་རྗེད་པ་རྣམས་དང་། གསལ་བ་མ་འཁྲུལ་པ་སྨྲ་བ་རྣམས་དང་། ཏིལ་དང་། བལ་གྱི་ས་བོན་དང་། མོན་སྲན་སྡེའུ་དང་། བུ་རམ་ཤིང་གི་ཁུ་བ་དང་། འབྲུ་རྣམས་དང་། མི་རྒན་པ་རྣམས་དང་། མི་ཕལ་པོ་ཆེར་གནས་པ་
རྣམས་དང་། འབྲས་སོ་བ་དང་། ས་བོན་བཏབ་པ་སྨན་ལས་སྲན་ཆུང་དང་། སྲན་མ་དང་། སྲན་ཙ་ན་ཤ་ཀ་དང་། རྒྱ་སྲན་ནག་པོ་དང་། ཡུངས་ཀར་དང་། ཡུལ་དུ་རའི་མི་དང་། ཡུལ་མ་ཀུ་རའི་མི་དང་། ཡུལ་བ་ཡ་ན་དང་། དེ་བཞིན་དུ་ཡུལ་རི་མ་ཀའི་མི་དང་། ཡུལ་བ་པར་ན་མི་མང་པོས་གང་བ་
དང་། ཡུལ་ཀ་མར་ཨ་དི་སྟ་ཏ་ཞེས་བྱ་བ་ན་གནས་པའི་མི་དེ་དག་ལས་གཡོས་ན་གནོད་པ་འབྱུང་བར་འགྱུར་རོ། །རྒྱུ་སྐར་ལྷ་མཚམས་ལ་ས་གཡོས་ན་མཛའ་བོ་བྱམས་ཤིང་སྡུག་པ་འབྱེ་བར་འགྱུར་རོ། །ཆུང་མ་དང་ནོར་གྱི་བྱ་བ་ལ་སོགས་པ་རྣམ་པ་བཅུ་གཅིག་ཏུ་བཤད་པ། གཉེན་བྱས་ཞིང་། བག་
མ་བླང་བ་ལ་སོགས་པ་དང་། ཡོ་བྱད་བསགས་ཤིང་སྤེལ་བ་དང་། བག་མ་བླང་བ་རྣམས་དང་། མཆོད་སྦྱིན་བྱ་བ་རྣམས་དེ་དག་གི་ལས་བྱ་བ་དང་། བཀྲ་ཤིས་པར་བྱ་བ་རྣམས་དང་། ལྟས་སུ་བལྟ་བ་རྣམས་དང་། བྲམ་ཟེ་ཞི་བ་དང་ལྡན་པ་རྣམས་དང་། དཀའ་ཐུབ་ཅན་རྣམས་དང་། ཐུབ་པ་དང་ལྡན་
པ་རྣམས་དང་། དཀའ་ཐུབ་དང་ལྡན་པ་རྣམས་དང་། བརྟུལ་ཞུགས་དང་ལྡན་པ་རྣམས་དང་། ཡུལ་ཀ་ཤ་ཞེས་བྱ་བ་ན་རྒྱལ་སྲིད་ཆེན་པོ་རྣམ་པ་བརྒྱད་དང་ལྡན་པའི་ཡུལ་དང་། རྒྱལ་པོའི་མཐའ་འཁོར་ཡུག་ན་གནས་པ་འབྲ་གོ་ཚལ་ཉམས་དགའ་བའི་གནས་ན་འབྲ་གོས་སྲོག་འཚོ་བ་རྣམས་དང་། སྐད་
རྣམ་པ་སྣ་ཚོགས་ཤེས་པའི་འཇིག་རྟེན་པ་རྣམས་དང་། གཟི་བརྗིད་མི་མངོན་པར་བྱེད། གཟུགས་དང་། གོས་དང་། རྒྱན་དང་། སྤྱོད་པ་དང་། བྱེད་པ་དང་། འགྲོ་བ་དང་། ཆ་བྱད་རྣམ་པ་སྣ་ཚོགས་དང་ལྡན་པ་ཟས་སུ་ཉ་ཤ་ཟ་ཞིང་ལུས་ཉམས་བདེ་བ་སྐྱིད་པ་དེ་ལྟ་བུའི་མི་རྣམས་ལ་ས་གཡོས་ན་རབ་ཏུ་གནོད་པར་

203-1-42b

འགྱུར་རོ། །རྒྱུ་སྐར་སྣོན་ལས་གཡོས་ན་རི་ཆེན་པོ་བསྙིལ་བར་འགྱུར། འཇིག་པའི་རླུང་རབ་ཏུ་ལྡང་། ཡུལ་ཨ་མྲ་ཀ་ཞེས་བྱ་བའི་ཡུལ་དུ་ཡུལ་ཀ་ཤའི་མི་དང་། རྐུན་པོ་དང་། མི་ངས་དང་། ཐན་ཆེན་དང་། སེར་བ་དང་། ཡང་དང་ཡང་མཚོན་ཀར་འགྱེད་པ་ཡུལ་དེ་ཕྱོགས་ན་མྱ་ངན་བྱེད་ཅིང་འགྲོ་སྟེ།
ས་གཡོས་པས་གཟི་བརྗིད་ཉམས་ནས་གནོད་པ་དེ་ལྟ་བུ་འབྱུང་བར་འགྱུར་རོ། །ཚུལ་མ་ཡིན་པ་དག་གིས་ཕན་ཚུན་དུ་གནོད་པ་བྱེད་པར་འགྱུར་རོ། །མི་གཡོན་ཅན་དང་། རྒྱལ་པོ་དང་། རྒྱའི་མི་དང་། དེ་བཞིན་དུ་སྒོ་ལྕགས་འབྱེད་ཅིང་རྐུ་བའི་མི་རྣམས་དང་། ཡུལ་ཨན་དྲའི་མི་རྣམས་དང་། ཡུལ་པུ་ལིནྡ་ན་
གནས་པའི་མི་རྣམས་འཇིག་པར་གནས་པར་འགྱུར། མཛའ་བའི་དཔུང་དང་ལྡན་པ་རྣམས་དང་ཡང་ཕྱེད་པར་འགྱུར། རྒྱལ་པོ་ཆེན་པོ་དང་། སྙོམ་ལས་དང་ལྡན་པ་རྣམས་ཀྱང་ཚར་གཅོད་པ་དང་། བྱ་རོག་དང་། རི་དྭགས་པྲི་ཤ་དང་། གཅན་གཟན་དང་། གཅན་གཟན་དྲག་ཤུལ་ཅན་ཆེན་པོ་རྣམས་དང་། 
ཡུལ་ཀ་ར་དང་། ཡུལ་པ་ར་དང་། ཡུལ་ཤུན་དྷ་སེ་ན་ན་གནས་པའི་མི་དང་། ཡུལ་མ་ལ་ཡའི་མི་རྣམས་དང་། ཐོ་གར་གྱི་ཡུལ་བག་ལེ་དང་། པར་སིག་གི་ཡུལ་དང་། ཟ་ཧོར་གྱི་ཡུལ་དང་། ཀ་པུ་ཤའི་ཡུལ་གྱི་རི་བ་རི་ཤེ་ནའི་འཁོར་ན་གནས་པའི་མི་དང་། འདི་རྣམས་ལ་ས་གཡོས་ན་དགྲ་དྲག་པོ་མྱུར་
དུ་འབྱུང་ཞིང་གནོད་པར་འགྱུར་རོ། །རྒྱུ་སྐར་སྣྲུབས་ལ་ས་གཡོས་ན་རྐང་བཞི་པ་དང་། རྐང་གཉིས་པ་དང་། དེ་བཞིན་དུ་ཕུག་ན་གནས་པ་རྣམས་དང་། ཡི་དྭགས་ཤ་ཟ་རྣམས་དང་། སེམས་ཅན་གང་དག་རི་ལ་གནས་པ་རྣམས་དང་། མུ་གེ་མྱུར་དུ་འབྱུང་། ས་ལ་ཆུ་ཡང་མྱུར་དུ་སྐམས་པར་འགྱུར་རོ། །དགྲ་
རྣམས་རི་དྲུང་དུ་སོང་ནས་དེ་ནས་དགའ་བར་གནས་པ་དང་། ཆོས་ཀྱི་ཡོ་བྱད་རྣམས་དང་། གང་ན་ནགས་ཚལ་ཕུན་སུམ་ཚོགས་པ་དང་། རྒུན་ར་དང་། བུ་རམ་ཤིང་གི་ཁུ་བ་དང་། འབྲས་བུ་མངར་པོ་ཅུང་ཟད་ཡོད་པ་རྣམས་དང་། ཤིང་དུ་ཀའི་ཚལ་དང་། མེ་ཏོག་སྣ་ཚོགས་རྣམས་དང་། འབྲུ་དང་ས་བོན་རྣམས་དང་།
འབྲས་ལ་སོགས་པ་རྣམ་པ་ཐ་དད་པ་སྣ་ཚོགས་དང་། ཁྱིམ་གྱི་ལས་ཀུན་བརྩམ་པ་དང་། བརྟན་པར་བྱ་བའི་རྣམ་པ་དང་། རྩ་བ་བསྐྱེད་ཅིང་བསྐྲུན་པའི་ལས་སྣ་ཚོགས་དང་། རོ་ལངས་བྱེད་པའི་ལས་རྣམས་དང་། ཡུལ་སུན་དང་། གོག་ཡུལ་དང་། ཡུལ་ཀ་ཏ་ཡའི་མི་དང་། བ་ལང་རྫི་ལ་སོགས་པའི་རིའི་རྩེ་མོ་

203-1-43a

དང་། ཕུག་དང་། རྫིང་བུ་ན་གནས་པའི་མི་རྣམས་དང་། རྐང་བཞི་པ་སྣ་ཚོགས་དང་། དཀའ་ཐུབ་ཅན་ཤིང་ཐོག་དང་རྩ་བ་ཟ་བ་རྣམས་དང་། ཡུལ་ཀ་ཤའི་བྱང་ཕྱོགས་ཀྱི་གནས་ཡུལ་ས་བཙན་པོ་ལ་བརྟེན་པའི་མི་དེ་རྣམས་ལ་ས་གཡོས་ན་གནོད་པ་འབྱུང་བར་འགྱུར་རོ། །རྒྱུ་སྐར་ཆུ་སྟོད་ལ་
ས་གཡོས་ན་མི་ལས་སྐྱེས་པ་དང་། འགྲོན་པོ་ལམ་ན་གནས་པ་དང་། ཚོང་པ་དང་། རྒྱ་མཚོ་ལ་རྒྱུ་ཞིང་འགྲོ་བ་དང་། ཁ་ཟས་ཉས་འཚོ་བ་དང་། ཆུ་སྲིན་བྱིས་པ་གསོད་པ་དང་། འུག་པ་དང་། ཆུ་སྲིན་ན་ཀྲ་དང་། ཆུ་སྲིན་མ་ཀ་ར་དང་། རུས་སྦལ་དང་།  རུས་དང་། རིགས་དང་། བཙུན་པ་དང་། ཕྱུག་པོ་དང་།
མཁས་པ་རྣམས་དང་། བཞོན་པའི་མཆོག་བདོག་པ་དང་དེ་དག་ལ་འཇིགས་པ་ཆེན་པོ་རབ་ཏུ་འབྱུང་བར་འགྱུར་བ་དང་། ཆུའི་ལས་སུ་བྱ་བ་རྫིང་སྐྱིལ་བ་དང་། རྫིང་བུ་བརྐོ་བ་དང་། ཚལ་བུ་དང་། སྐྱེད་མོས་ཚལ་སྣ་ཚོགས་དང་། ནོར་དང་། འབྲུ་དང་། ཆང་གི་ཡོ་བྱད་སྦྱོར་བས་འཚོ་བའི་མི་རྣམས་དང་། ཡུལ་ཏ་རུ་ན་
དང་། ཡུལ་རུ་ག་ཀ་ཏི་ས་རའི་མི་རྣམས་དང་། ཡུལ་ཀམ་པོ་ཛ་ནས་སྐྱེས་པའི་མི་རྣམས་དང་། ཐོ་གར་གྱི་ཡུལ་དང་། ཡུལ་ཧུན་ནས་སྐྱེས་པའི་མི་རྣམས་དང་། ཡུལ་ཤ་ཟའི་མི་དང་ཕྱུགས་རྫི་རྣམས་དང་། ཡུལ་ཀ་ན་ནས་སྐྱེས་པའི་མི་རྣམས་དང་། རི་དྭགས་ཉམས་པའི་མི་དང་། སྐྱེ་གནས་ངན་པ་
ནས་སྐྱེས་པའི་མི་དང་། བྱ་གག་དང་། བུད་མེད་དང་། ཆུ་ཆེན་པོ་པཀྵུའི་འགྲམ་ན་གནས་པའི་མི་རྣམས་དང་། གངས་རིའི་རི་ལོགས་ཀྱི་ངོས་གཉི་ག་ན་གནས་པའི་མི་རྣམས་དང་། རི་རྐེ་དང་། རི་དྲུང་ན་གནས་པའི་མི་རྣམས་དང་། རི་རྒྱུད་ཆད་པ་ན་གནས་པ་དང་། ལུང་པ་ན་གནས་པ་རྣམས་ལས་
གཡོས་ན་གནོད་པར་འགྱུར་རོ། །རྒྱུ་སྐར་ཆུ་སྨད་ལ་ས་གཡོས་ན་བཟོ་བོ་རྣམས་ལ་གནོད་པར་འགྱུར་ཏེ། ལྕགས་མགར་དང་། ཕྱ་མཁན་དང་། ཚོན་མོ་སྟེང་མཁན་དང་། ཤིང་མཁན་རྣམས་དང་། འདྲེག་མཁན་དང་། ཕྱུག་པོ་རྣམས་དང་། རྐུན་པོ་རྣམས་དང་། བཟོ་བོ་རྣམས་དང་། སྣ་ཚོགས་ 
རྣམས་དང་། ཐོས་ཟློས་འདོན་པའི་གཅམ་བུ་རྣམས་ལ་གནོད་པར་འགྱུར། ཡུལ་ག་ན་རའི་མི་རྣམས་དང་། ཡུལ་ཀེ་ཀ་ཡ་དང་། ཡུལ་ཁ་ཤ་བ་རྣམས་དང་། གུ་ཟན་ཡུལ་དང་། ཡུལ་བ་གུར་ན་གནས་པ་རི་བྲགས་པ་གཏུམ་པོ་རྣམ་པ་སྟོང་སྙེད་དང་། བྲུ་ཤ་ཡུལ་ལ་སོགས་པ་དང་། ཡུལ་ས་གར་དེའི་

203-1-43b

སྐྱེ་བོ་རྣམས་ལ་གནོད་པར་འགྱུར་རོ། །རྒྱུ་སྐར་གྲོ་བཞིན་ལ་ས་གཡོས་ན་རྒྱལ་པོས་བཀུར་བའི་མི་རྣམས་དང་། བྲམ་ཟེ་རིག་བྱེད་སློབ་པའི་མི་རྣམས་དང་། བསྟན་བཅོས་ལ་མཁས་པའི་མི་རྣམས་དང་། སྙན་དངགས་ཤེས་པའི་མི་རྣམས་དང་། ཡུལ་ག་ན་ད་ར་ནས་ཡུལ་ཀཽ་ཤཱམྦཱའི་བར་དང་། ཡུལ་མེ་ཏ་ར་སྟེ་
ན་གནས་པ་རྣམས་དང་། སི་ནིས་ཀྱི་ཡུལ་གཉིས་དང་ཡུལ་དུ་སྤྲ་ས་ཧ་དང་། ཡུལ་དུ་མི་ལ་རྗེད་པའི་མི་དང་། ཡུལ་ས་གེ་ཀའི་མི་དང་། ཡུལ་ལམ་བཀའི་མི་དང་། ཡུལ་ན་ག་ཧ་ར་དང་། ཡུལ་ཙ་ཏ་བི་ཤ་ཡ་དང་། ཡུལ་ག་ཙི་ཀ་ན་གནས་པ་མ་རུང་བ་དུ་མ་དང་། ཡུལ་ལ་བ་ཞེས་བྱ་བའི་རི་ལ་གནས་པ་
དང་། མཐའི་རྒྱལ་པོ་ཆེན་པོ་རྣམས་དང་། ཡུལ་ཀི་སད་ཏ་དང་། ཡུལ་ས་བ་ཏི་ར་དང་། ཡུལ་བ་རི་ར་ཟ་དང་། ཡུལ་བརྣ་པུ་རིའི་གྲོང་རྡལ་དང་། ཀླུའི་གནས་རྣམས་དང་། འདི་དག་ལ་ས་གཡོས་ན་གནོད་པ་འབྱུང་བར་འགྱུར་རོ། །རྒྱུ་སྐར་མོན་གྲེ་ལ་ས་གཡོས་ན་མི་ཕྱུག་པོ་དང་། ར་ལུག་དང་། བོང་བུ་དང་། རྔ་
མོ་དང་། དྲེའུ་དང་། ཝ་དང་། རི་དྭགས་ཀྱི་རྣམ་གྲངས་ཐ་དད་པ་དང་། མ་ཧེ་དང་། འཕོང་དང་། རྩལ་ཆེ་བ་དང་། འདུན་ཁང་སྣ་ཚོགས་དང་། གྲོང ཁྱེར་གྱི་ཚོང་དཔོན་རྣམས་དང་། ཡུལ་ཁ་ག་དང་། ཡུལ་སྭ་ཏི་མན་ཏ་དང་། ཡུལ་ཁི་ལ་དང་། ཡུལ་མུ་ན་དང་། ཡུལ་བ་ཏྭ་ཀ་ར་དང་། ཡུལ་གོན་ཐ་མའི་རྣམས་
དང་། ཡུལ་བོ་ཟ་དང་། ཡུལ་སཱ་ལའི་གྲོང་ཁྱེར་བྲུ་ཤ་ཡུལ་དང་། གུ་ཟན་དང་། ཡུལ་ཙིད་དྲ་དང་། ཆང་ཞིམ་པོ་སྣ་ཚོགས་དག་ལ་དགའ་བ་རྣམས་དང་། རི་ཤ་ཤའི་རི་ལོགས་ན་གནས་པའི་མི་སྣ་ཚོགས་ལ་ས་གཡོས་ན་གནོད་པར་འགྱུར་རོ། །རྒྱུ་སྐར་མོན་གྲུ་ལ་ས་གཡོས་ན་སའི་འོག་ཏུ་གནས་པ་
རྣམས་དང་། རྒྱ་མཚོའི་འོག་ན་གནས་པ་དང་། རྒྱ་མཚོའི་ནང་ན་གནས་པའི་སེམས་ཅན་རྣམས་དང་། སེམས་ཅན་གཞན་ཡང་ཆུ་ལ་བརྟེན་པ་དང་། དེ་བཞིན་དུ་རྟ་དང་། གླང་པོ་ཆེ་དང་། ཁྱི་རྣམས་དང་། བོང་བུ་དང་། རྔ་མོ་དང་། བྱ་རྣམས་དང་། དེ་བཞིན་དུ་དམག་མི་དཔའ་བོ་དམ་པ་དང་། མཚོན་
ཤག་ཏི་དང་། རལ་གྲི་ཀྱོག་པོ་དང་། རལ་གྲི་ཐོགས་པའི་མི་རྣམས་དང་། ཡུལ་བྲལ་ལྷའི་མི་དང་། ཡུལ་ལྷོ་ཕྱོགས་ཀྱི་རྒྱུད་ཀྱི་རོང་ལ་བརྟེན་པ་དང་། ལྷོ་ཕྱོགས་ཀྱི་རི་རྒྱུད་ལ་དྲང་སྲོང་ཐུབ་པ་གནས་པ་རྣམས་དང་། ཡུལ་འཁོར་ལོ་གཅིག་པ་ཞེས་བྱ་བའི་མི་དང་། བུད་མེད་ནུ་མ་ཡ་གཅིག་པ་རྣམས་དང་།

203-1-44a

དམག་དཔོན་དུ་བསྐོས་པ་འདི་དག་ལ་ས་གཡོས་ན་གནོད་པར་འགྱུར་རོ། །རྒྱུ་སྐར་ཁྲུམས་སྟོད་ལ་ས་གཡོས་ན་ཆུ་དང་མེས་འཚོས་པའི་མི་རྣམས་དང་། དེ་བཞིན་དུ་བ་ལང་གསོད་ཅིང་མ་ཧེ་ལ་དགའ་བ་དང་། ནོར་བུ་དེ་སོགས་ལ་ཚོང་བྱེད་པ་དང་། ཡུལ་སུ་བི་ར་འབྱོར་བ་དང་ལྡན་པ་དང་། 
ལུག་གསོད་ཅིང་འཚོ་བའི་མི་དང་། ནགས་ཀྱིས་འཚོ་བའི་རྗེའུ་རིགས་དང་། དམངས་རིགས་དང་། རོལ་མོ་མཁན་དང་། མི་དམ་པ་དང་། རྟ་རྣམས་དང་། ཡུལ་མ་ལ་ལ་དང་། ཡུལ་མ་ལ་ལ་བ་དང་། སྒོ་འབྱེད་ཅིང་རྐུ་བའི་མི་ངན་པ་རྣམས་དང་། འདི་དག་ལ་ས་གཡོས་ན་གནོད་པར་འགྱུར་རོ། །རྒྱུ་
སྐར་ཁྲུམས་སྨད་ལ་ས་གཡོས་ན་ཚོང་པ་དང་། ཆུ་ལ་བརྟེན་པ་རྣམས་དང་། འགྲོན་ལམ་དུ་ཞུགས་པ་རྣམས་དང་། ཚོང་པ་རྒྱ་མཚོ་ལ་གྲུ་བོ་ཆེས་འགྲོ་བར་ཆས་པ་དང་། སངས་རྒྱས་ཀྱི་ཆོས་ལ་དགའ་བ་རྣམས་དང་། རང་གི་རིགས་རྣམས་དང་། ཆང་འཚོང་གི་ལས་བྱེད་པ་དང་། ཡུལ་ཤི་བའི་མི་དང་། 
ཡུལ་པའི་ཡོ་ཏའི་མི་རྣམས་དང་། རྒྱལ་རིགས་ཨ་ཛུ་ན་ཡ་ནའི་རྒྱུད་དང་། ཡུལ་སིན་དྷུ་དང་། ཡུལ་ཧ་ནུ་སྨ་དང་། ཁ་ཆེ་ཡུལ་གྱི་མི་དང་། རི་ཁྲོད་ཟབ་མོ་ན་གནས་པའི་མི་དང་། རྩེ་རྒོད་ན་གནས་པའི་ཡུལ་དང་། ཡུལ་རྣམ་པ་དུ་མ་དང་། ཡུལ་ཏ་ག་ལ་དང་། བར་ནང་ག་ལའི་མི་དང་། ལྷའི་བུ་གང་
གི་གནས་མེ་ཏོག་སྣ་ཚོགས་བྱེ་བས་བརྒྱན་པ་ཡུལ་རི་ཅན་བརྒྱད་ཅེས་པ་ན་སྐྱེ་བོ་དུ་མས་གང་བར། གོས་དང་རྒྱན་རྣམ་པ་སྣ་ཚོགས་དང་། མཚོན་ཆ་སྣ་ཚོགས་དང་ལྡན་པར་གནས་པ་ལ་ས་གཡོས་ན་གནོད་པ་འབྱུང་བར་འགྱུར་རོ། །རྒྱུ་སྐར་ནམ་གྲུ་ལ་ས་གཡོས་ན་འཐབ་མོའི་གཡུལ་དྲག་ཤུལ་ཆེར་
འབྱུང་། གྲོང་ཕུན་སུམ་ཚོགས་པ་དང་ལྡན་པ་དང་། གྲོང་མི་རྣམས་དང་། རི་ཁྲོད་ན་གནས་པ་རྣམས་དང་། འདུན་ཁང་རྣམས་དང་། ཡུལ་དེ་ཏ་ལའི་མི་དང་། ཡུལ་ཨ་ནུ་ཤ་དང་། ཙ་ཀ་དང་། ཡུལ་ཛི་བ་ར་དང་། ཡུལ་མ་ཐ་དང་། ཡུལ་ཀ་ཤ་དང་། ཡུལ་བན་ཀ་ན་ཞེས་བྱ་བ་ན་དཔུང་གིས་
སྙེམས་པའི་ང་རྒྱལ་མཆོག་དང་ལྡན་པ་ན་རློམ་པར་གནས་པ་གར་བྱེད་ཅིང་གླུ་ལེན་པ་དང་། སྨད་འཚོང་མས་འཚོ་བ་དང་། ཡུལ་ཤ་ན་ཀ་དང་། ཡུལ་ཨ་པིར་ར་དང་། ཡུལ་ནན་ཏི་དང་། ཡུལ་ཙར་མ་ནན་ཏི་ན་གནས་པའི་མི་དང་། དམག་མི་དང་། དམག་དཔོན་དང་། ཡུལ་མི་ཏི་ལའི་གྲོང་རྡལ་གྱི་མི་

203-1-44b

དང་། བལ་ཡུལ་ནས་ཤར་ཕྱོགས་དང་། བྱང་ཕྱོགས་ཀྱི་གཟེར་མཚམས་ཀྱི་ཡུལ་འདི་དག་ལ་ས་གཡོས་ན་གནོད་པ་འབྱུང་བར་འགྱུར་རོ། །རྒྱུ་སྐར་ཐ་སྐར་ལ་ས་གསོས་ན་རྟ་རྣམས་ལ་ནད་འབྱུང་བར་འགྱུར། གྲོང་དུ་མི་གསོད་པ་འབྱུང་བ་དང་། མི་སྤུན་ནང་གསོད་པ་འབྱུང་། ཐ་སྐར་གྱི་ངོ་ལ་རུམ་དུ་
བུ་ཆགས་པ་ལ་མི་དགེའོ། །ཐ་སྐར་གྱི་དུས་སུ་བཙས་པ་ལ་མི་དགེ་སྟེ། དེ་ཕན་ཆད་ལོ་གསུམ་ན་མི་བདེ་བ་འབྱུང་ངམ། དེ་ནས་ལོ་བཅུ་ན་འཆི་བར་འགྱུར། ཡུལ་ལ་རི་ད་དང་། ཡུལ་ཏི་གར་ཏ་དང་། ཡུལ་པན་ཙ་ལའི་སྐྱེ་བོ་རྣམས་དང་། ཡུལ་ཨརྫུ་ནའི་མི་རྣམས་དང་། ཡུལ་ད་རུ་དང་། ཡུལ་
ད་ན་བྱ་དང་། ཡུལ་ས་ཏི་ནའི་མི་རྣམས་ལ་གནོད་པར་འགྱུར་རོ། །རྒྱུ་སྐར་བྲ་ཉེ་ལ་ས་གཡོས་ན་རྐུན་པོ་རྣམས་ལ་གནོད་པ་ཆེར་འགྱུར། རྒྱན་པོ་བྱེད་པ་དང་། མདུད་པ་དང་། སྒོ་ལྕགས་འབྱེད་ཅིང་རྐུ་བ་དང་། མེ་ལོང་འཚོང་བ་དང་། དབྱིག་དུག་སྦྱོར་ཞིང་སྡུད་པའི་མི་དང་། འཁོར་ལོ་བྱེད་པ་
དང་། བཙོན་སྲུང་དང་། གཏུམ་པོ་སྡིག་ཅན་རྣམས་དང་། རྐུན་པོ་རྣམས་དང་། གཡོ་བྱེད་པ་རྣམས་དང་། མི་སྲུན་པ་དང་། ཕྲ་མ་བྱེད་པ་དང་། གདོལ་པ་དང་། རིགས་ངན་ལ་སོགས་པའི་ཡུལ་གྱི་མཐའ་ན་གནས་པ་རྣམས་དང་། རྒྱ་ཡུལ་ན་རྒྱ་རྣམས་དང་། རྒྱ་དམ་པ་རྣམས་དང་། ཡུལ་དགའ་
བ་བཟང་པོ་ཞེས་བྱ་བ་རྣམས་དང་། ཡུལ་སྱ་པ་ན་གནས་པའི་མི་རྣམས་དང་། ཆུ་བོ་ཆེན་པོ་སི་ཏ་ཞེས་བྱ་བའི་འགྲམ་ན་གནས་པའི་སྐྱེ་བོ་རྣམས་དང་། མཚོ་མ་དྲོས་ཕ་ཡིད་བཞིན་ཞེས་བྱ་བའི་འཇིག་རྟེན་རྣམས་ལ་གྲགས་པ་དེ་ལ་འདོད་ཆགས་དང་བྲལ་བ་རྣམས་དང་། རིག་སྔགས་གྲུབ་པ་དང་། རིག་
འཛིན་གྱི་ཚོགས་རྣམས་དང་། དྲང་སྲོང་ཐུབ་པ་རྣམས་ཀྱིས་ཀྱང་བསྙེན་པར་བྱ་བ་ཤིང་འཛམྦུའི་སྐྱེ་བོ་མང་པོ་གནས་པ་དང་། ཀེ་ལ་སེ་ཏི་སའི་གངས་དང་། གངས་མངས་ཏེ་ནོར་བུ་ཅན་གྱི་རི་དང་། སྤོས་ངད་ལྡང་བ་གངས་ལྟར་གོ་དང་། དེ་བཞིན་དུ་སུ་རི་པ་ཤ་ཞེས་བྱ་བ་ངོས་བཟང་བ་དང་། རི་དང་རི་ས་བར་ནི་
ཞེས་བྱ་བ་དང་། བྱང་ཕྱོགས་ངོས་དང་། གླིང་རྣམ་པ་སྣ་ཚོགས་མང་པོ་དང་། རི་རད་རོད་དག་ན་གནས་པའི་གནོད་སྦྱིན་དང་། འབྱུང་པོ་དང་། ཤ་ཟ་དང་། དྲི་ཟ་དང་། སྲིན་པོའི་ཚོགས་མང་པོ་དག་དང་། གྲུབ་པ་དང་།རིག་འཛིན་དང་། ཀླུ་རྣམས་དང་། དེ་བཞིན་དུ་སྨན་རྣམ་པ་སྟོང་སྙེད་ལ་

203-1-45a

གནོད་པ་འབྱུང་བར་འགྱུར་རོ། །དེ་ལྟར་ས་གཡོས་པའི་རྗེས་ལ་ཞག་བདུན་ཚུན་ཆད་དུ་ས་ལ་ཕན་པའི་སྤྲིན་སྔོ་གནག་འཇམ་པོ་མིག་བསྐུ་བའི་སྨན་གྱི་མདོག་རི་ཆེན་པོ་འདྲ་བ་ལས་འབྲུག་སྒྲ་ཟབ་མོར་སྒྲོག་ཅིང་ཉེ་བར་འབྲུག་སྒྲ་དྲག་ལ་གློག་རྣམ་པ་སྣ་ཚོགས་འགྱུ་ཞིང་། ནམ་མཁའ་ལ་སྔོན་
པོ་ཤུར་ཤུར་པོ་ལྟ་བུ་སྣང་བའམ། སྒྲ་འབྱུང་བའམ། སྐར་མདའ་ལྟ་བུ་མེད་ལ་རླུང་མེ་དྲག་པ་ལྡང་ཞིང་ཚུབ་མ་ལྟ་བུ་མི་སྡུག་པ་ནི་མེད། སྤྲིན་གྱི་གཟུགས་བཀྲ་ཤིས་ཀྱི་རི་མོ་སྣ་ཚོགས་དང་། དབང་པོ་རྡོ་རྗེ་ལྟ་བུ་སྣང་བ་དང་། ནང་པར་ཉི་མ་འཆར་བ་དང་། ཉི་མ་ནུབ་ནས་ཟླ་བ་འཆར་བའི་ཚེ་སྤྲིན་གྱིས་
མ་ཆོག་པར་ཆར་པ་དང་། ནམ་མཁའ་སྤྲིན་དལ་ལ་སྙོམས་པ་འཇམ་པོའི་གཟུགས་རྒྱང་རིང་པོར་སོང་བ་གློག་ཕན་ཚུན་དུ་འཕྲོ་བའི་སྤྲིན་དེ་ལྟ་བུ་ནི་དགེ་བའི་མཚན་མ་ཡིན་ནོ། །སྤྲིན་འཇམ་ལ་དལ་སྙོམས་ཏེ། བར་ཆད་མེད་ཅིང་སྤྲིན་གྱི་གཟུགས་ལག་པ་མི་སྣང་བ་དེ་ལྟ་བུར་སྣང་ན་སྤྲིན་མཚན་མ་དེ་ལྟ་བུ་དང་། 
ལྡན་པ་ནི་ལྷའི་དབང་པོའི་ས་གཡོས་པར་བསྟན་པ་ཡིན་ནོ། །དེ་ལྟར་གང་དང་གང་དུ་ས་གཡོས་པའི་ཕན་གནོད་ཀྱི་འབྲས་བུའི་དམིགས་ནི་འཇིགས་ཤིང་དངངས་པ་མེད་པར་ཡིད་རྟོན་ལ་ས་བོན་ཐམས་ཅད་ཐོབ་ཤིག །ལས་དང་འཚོ་ནམ་རྣམས་ཀྱང་གྱིས་ཤིག །རྣམ་པར་རྒྱལ་བར་འགྱུར་བར་ཡང་བསྟན་
ཏོ། །ཚོང་པ་ཡང་དེའི་ཚེ་ཀུན་དུ་སོང་ཡང་འཇིགས་པ་མེད་དོ། །ཡངས་གཡོས་པའི་རྗེས་ལ་ཞག་བདུན་ཚུན་ཆད་དུ་ནམ་མཁའ་ལ་སྤྲིན་གྱིས་ཁེབས་ཏེ། ཐར་ཆགས་སུ་སྤྲིན་བལ་ལྟར་དལ་སྙོམས་པར་སོང་ལ། ནུབ་ཕྱོགས་སུ་ནམ་མཁའ་ལ་ཆུ་སྲིན་བྱིས་པ་གསོད་པ་དང་། སྦལ་པ་རྣམས་དང་། ཉ་དང་།
ཆུ་སྲིན་འདྲ་བའི་སྤྲིན་གྱི་གཟུགས་སྣང་ལ་ནང་ནུབ་ཏུ་ཉི་མ་དང་ཟླ་བ་འཆར་བའི་ཚེ་སྤྲིན་གྱིས་བསྒྲིབས་པ་མེད་པ་དེ་ལྟར་སྣང་བའི་མཚན་མ་ནི་ཆུའི་དཀྱིལ་འཁོར་གྱིས་གཡོས་པ་ཞེས་བྱ་སྟེ། དེ་ལྟར་ས་གཡོས་པའི་ཕན་གནོད་ཀྱི་འབྲས་བུ་ཡང་དྲང་སྲོང་ཆེན་པོས་ཇི་ལྟར་མཐོང་བ་བཞིན་དུ་བསྟན་པར་བྱ་སྟེ། ཐང་བུ་དང་། 
རི་ངོས་དང་། ཞིང་དང་། མཚོ་འགྲམ་དང་། དེ་དག་ཏུ་ས་བོན་ཐོབ་ཤིག་དང་། ས་དམའ་བ་དང་། ཧ་ཅང་ཆུ་ཆེ་བའི་ས་དང་། འདམ་རྫབ་ཅན་དུ་བཏབ་ན་ནི་མ་རུང་བར་འགྱུར་རོ། །ཚུལ་དེ་ལྟ་བུར་ས་གཡོས་པ་ནི་བཀྲ་ཤིས་ཏེ་ཆུའི་ས་གཡོས་པ་ཞེས་བྱའོ། །ཡང་ས་གཡོས་པའི་རྗེས་ལ་ཞག་བདུན་

203-1-45b

ཚུན་ཆད་དུ་རླུང་དྲག་པོ་ལངས་ལ། ནང་པར་དང་ནུབ་ཀར་ཉི་མ་དང་ཟླ་བ་དམར་སེར་དུ་སྣང་བ་དེ་ལྟ་བུའི་མཚན་མ་སྣང་བར་མཐོང་ན་དེ་ནི་རླུང་གི་ས་གཡོས་པ་ཞེས་བྱ་སྟེ། དེའི་ཕན་གནོད་ཀྱི་འབྲས་བུ་བསྟན་པ་ཉོན་ཅིག །དེའི་ཚེ་ཤེས་རབ་ཅན་བདག་གར་ཡང་མི་འགྲོ་བར་གོ་སྟེ། འདུག་ལ་མཚོན་ཆ་བསྐྱབ་
པའི་གཅན་རྩིག་པ་དང་། འོབས་བརྐོ་བ་གྱིས་ཤིག །རྒྱལ་པོ་ཕ་རོལ་པོ་དང་། མཚམས་གཅིག་ཏུ་འདུག་པ་དང་རྩོད་པར་འགྱུར་ཏེ། སྐྱེ་བོ་ལ་འཇིགས་པ་འབྱུང་བར་འགྱུར་རོ། །དེ་ལྟར་ས་གཡོས་པ་ཐམས་ཅད་ནི་ལྷག་པར་མི་རྣམས་ལ་གནོད་པ་འབྱུང་བར་བསྒྲགས་ཏེ། དེ་ལྟ་བུ་ནི་རླུང་གི་ས་གཡོས་
པ་ཞེས་བྱ་བའོ། །ཡངས་གཡོས་པའི་རྗེས་ལ་ཞག་བདུན་ཚུན་ཆད་དུ་དེའི་ཚེ་སྐར་མདའ་ཤིན་ཏུ་དྲག་པོ་ལྟུང་བ་དང་། ནང་ནུབ་ཀྱི་ཚེ་དམར་པོར་གྱུར་ལ། ཉི་མ་དང་ཟླ་བ་ཡང་དམར་པོར་སྣང་སྟེ། ཚུལ་དེ་ལྟར་མཐོང་ན་དེ་ནི་མེའི་ས་གཡོས་པ་ཞེས་བྱ་སྟེ། ཁྱིམ་རྣམས་བསྲུངས་ཀྱང་མེས་ཚིག་པར་འགྱུར་རོ། །
དུ་བ་དང་། མེ་དང་། མཚོན་རབ་ཏུ་འབྱུང་བར་འགྱུར། ཟླ་བ་དགུར་ཆར་མི་འབབ་སྟེ། ཞིང་ཐ་བར་ལུས་པར་འགྱུར། དེ་ལྟར་ས་གཡོས་པ་ནི་ངན་ཅིང་མི་དགེ་སྟེ། མེའི་ས་གཡོས་པ་ཞེས་བྱའོ། །དེ་ལ་སྔ་དྲོ་ས་གཡོས་ན་རྒྱལ་པོ་དང་། དམག་གི་དཔུང་དང་ལྡན་པ། རྟ་དང་། གླང་པོ་ཆེ་དང་། དམག་
དཔོན་དང་། བློན་པོར་བཅས་པ་ལ་མི་དགེའོ། །ཉི་མ་གུང་ལས་གཡོས་ན་ནད་ཀྱིས་འདེབས་སོ། །ཕྱི་མ་རེད་ས་གཡོས་ན་བ་ལང་དང་། ཕྱུགས་དང་། དམངས་རིགས་དང་། དེ་བཞིན་དུ་རྗེའུ་རིགས་རྣམས་ལ་གནོད་པར་འགྱུར་རོ། །ནང་པར་དང་། ཉི་མ་ནུབ་པ་དང་། ནམ་གྱི་གུང་དུས་མཚམས་སུ་ས་གཡོས་
ན་རྐུན་པོ་དང་། གོས་དམར་པོ་གྱོན་པའི་མི་རྣམས་ལ་མི་དགེའོ། །མཚན་མོ་སྲོད་ལ་ས་གཡོས་ན་གནོད་པ་བྱེད་པ་དང་། མཐའ་འཁོབ་ན་གནས་པའི་རྐུན་པོ་རྣམས་དང་། མ་ནིང་རྣམས་དང་། མཚན་གྱུར་པ་རྣམས་དང་། ཕྱུག་པོ་རྣམས་དང་། ཚོང་སྤོགས་བྱེད་པའི་ཚོང་པ་དང་། ཞིང་རྨེད་པ་ལ་མི་དགེའོ། །ཟླ་
བ་མར་གྱི་ངོའི་ནམ་གུང་ལས་གཡོས་ན་གཏུམ་པོ་དྲག་ཤུལ་ཅན་ངན་བྱེད་པ་རྣམས་ལ་མི་དགེའོ། །ཟླ་བ་ཡར་གྱི་ངོའི་ནམ་ཆུང་ལས་གཡོས་ན་མཆོད་སྦྱིན་བྱེད་པའི་ཡོ་བྱད་དང་། བྲམ་ཟེ་མཆོད་སྦྱིན་བྱེད་པ་རྣམས་ལ་གནོད་པར་འགྱུར་རོ། །ས་གཡོས་ཀྱི་ལེའུ་སྟེ་ཉི་ཤུ་བཞི་པའོ།།      །།ཉི་མ་

203-1-46a

དང་ཟླ་བའི་འོད་དང་། གཟུགས་བརྙན་གྱི་མཚན་མ་བསྟན་པ། ཡུལ་གང་དུ་ཉི་མ་ཤར་བའི་ཚེ་ཉི་མ་དང་འདྲ་བར་ནམ་མཁའ་ལ་སྣང་ན་དེའི་ལྷོ་བྱང་གི་ཕྱོགས་ཀུན་དུ་ཉི་མའི་དཀྱིལ་འཁོར་གྱི་གཟུགས་རབ་ཏུ་གསལ་བ་ཡང་མ་ཡིན། འོད་ཟེར་ཡང་མི་གསལ་ལ། སྤྲིན་གྱིས་ཀྱང་ནམ་
ཀུན་ཆོད་ན་དེ་ནི་ཆར་པ་འབབ་པ་ཡིན་ཏེ། དབྱར་གྱི་ཚེ་ནི་ཉི་མ་འདྲ་བརྟག་པར་ཡང་འབྱུང་ངོ་། །དུས་འདི་མ་ཡིན་པ་དུས་གཞན་གྱི་ཚེ་ཉི་མ་འདྲ་བ་སྣང་ན་འཇིགས་པ་འབྱུང་བར་འགྱུར་རོ། །ཡུལ་གང་དུ་ཉི་མ་འདྲ་བ་དཀར་པོ་ཤར་ན་ཡུལ་དང་བྲམ་ཟེ་རྣམས་ལ་མི་རུང་ངོ་། །ཉི་མ་འདྲ་བའི་ཁ་དོག་དམར་པོ་
ཤར་ན་རྒྱལ་རིགས་རྣམས་དང་། མཚོན་ཆ་ཐོགས་པས་འཚོ་བ་ལ་གནོད་པར་ཤེས་པར་བྱའོ། །ཉི་མ་འདྲ་བ་ཁ་དོག་སེར་པོའམ་ཁ་དོག་སྔོན་པོར་འགྱུར་ན་རྗེའུ་རིགས་རྣམས་དང་། བ་ལང་དང་། ཕྱུགས་ཀྱིས་འཚོ་བའི་མི་རྣམས་ལ་གནོད་པར་ཤེས་པར་བྱའོ། །གལ་ཏེ་ཡུལ་གང་དང་གང་དུ་ཉི་མ་འདྲ་བ་
ཁ་དོག་ནག་པོར་ཤར་ན་དམངས་རིགས་རྣམས་ལ་གནོད་པ་དང་། ཆར་པ་ཆེར་འགྱུར་རོ། །གལ་ཏེ་ཉི་མའི་གཡས་རོལ་དུ་ཉི་མ་འདྲ་བ་བྱུང་ན་ལྷོ་ཕྱོགས་སུ་འཇིགས་པ་ཆེར་འབྱུང་། ཞག་བདུན་ཚུན་ཆད་ཆར་འབབ་པར་བཤད་དོ། །ཉི་མའི་བྱང་ཕྱོགས་ནི་ཉི་མ་འདྲ་བར་ཁ་དོག་དཀར་པོར་སྣང་བ་བྱུང་ན་དེ་ནི་བྱང་
ཕྱོགས་ཀྱི་རྒྱལ་པོ་ལ་འཇིགས་པ་ཆེར་འབྱུང་། ཆར་མི་འབབ། མུ་གེ་འབྱུང་། ཕན་ཚུན་དུ་འཐབ་པར་འགྱུར། གལ་ཏེ་ཡུལ་གང་དུ་ཉི་མའི་དཀྱིལ་འཁོར་དམར་བར་སྣང་ན་བཙོད་ཀྱི་ཁ་དོག་ལྟར་དམར་ལ། གལ་ཏེ་སྔོན་པོ་ཡང་སྣང་ན་ཟླ་བ་ལ་ལྡན་རྒྱལ་པོ་འཆི་བར་འགྱུར་རོ། །དེ་ལྟ་བུ་བྱུང་ན་དེའི་རྗེས་ལ་ལྟས་
ངན་དྲག་པོ་འབྱུང་སྟེ། རྒྱལ་པོ་འཐབ་ཅིང་གསོད་པ་དང་། ཁྲག་དང་མཁྲིས་པའི་ནད་རྣམས་ཀྱང་འབྱུང་བར་འགྱུར་རོ། །ནམ་ཉི་མའི་དཀྱིལ་འཁོར་གྱི་ནང་ན་མེ་སྐྱེས་པའི་གཟུགས་འདྲ་བ་གོ་དང་བཅས་པ་གསལ་བར་སྣང་ན་ཟླ་བ་བཞི་ཚུན་ཆད་དུ་རྒྱལ་པོ་འཆི་བར་འགྱུར་རོ། །ཡུལ་དེར་རྒྱལ་པོ་སྡེ་དང་བཅས་
ཏེ་མ་རུང་བར་འགྱུར་རོ། །ཉི་མའི་དཀྱིལ་འཁོར་གྱི་ནང་ན་ཞགས་པ་སྔོན་པོ་དང་། སེར་པོ་དང་དམར་པོ་ཤར་བ་ནམ་སྣང་བའི་ཚེ་ཟླ་བ་བཞིན་མིའི་དབང་པོ་མ་རུང་བར་འགྱུར་བ་དང་། ཡུལ་དུ་མི་ནད་ཀྱང་འབྱུང་སྟེ། འཇིགས་པ་ཆེན་པོ་ཤེས་པར་བྱའོ། །ནམ་ཉི་མའི་དཀྱིལ་འཁོར་ལ་རལ་གྲི་གྱེན་དུ་འགྲེང་

203-1-46b

བ། ཨུཏྤལ་སྔོན་པོའི་འདབ་མ་དང་འདྲ་བ་ཆང་ཟུང་དང་བཅས་པ་གསལ་བར་སྣང་བ་དང་། གང་དུ་ཞགས་པར་སྣང་བ་དེ་ཉིད་ཀྱི་འབྲས་བུ་ཡང་འདིར་བསྟན་ཏེ། ཁྱད་པར་དུ་མི་མང་པོ་མཚོན་གྱིས་འཆི་བར་འགྱུར་རོ། །ཉི་མའི་དཀྱིལ་འཁོར་གྱི་ནང་ན་རིལ་བ་སྤྱི་བླུགས་ལྟ་བུའམ། རེང་རེང་པོའམ།
ཕུབ་ལྟ་བུ་སྣང་ན་ཟླ་བ་གསུམ་ཚུན་ཆད་དུ་བྲམ་ཟེ་རྣམས་དང་། རྒྱལ་པོ་ལ་ཡང་གནོད་པ་འབྱུང་བར་སྟོན་ཏོ། །དེའི་ཚེ་ལོ་མ་རུང་བར་འགྱུར་བའི་ཆར་མོ་ཆེ་འབབ་པ་དང་། མུ་གེ་འབྱུང་བར་འགྱུར་རོ། །ཉི་མའི་དཀྱིལ་འཁོར་གྱི་ནང་ན། བསིལ་ཡབ་འདྲ་བ་དང་། ཡང་ན་སྦྲུལ་འདྲ་བ་སྣང་ན་ཟླ་བ་གསུམ་
ན་ཡུལ་དུ་འཇིགས་པ་དྲག་པོ་འབྱུང་བར་སྟོན། མི་སྦྲུལ་གྱིས་ཟིན་པ་རྣམས་ཀྱང་སྦྲུལ་གྱི་དུག་གིས་ཕོག་པས་མི་འཚོ་བར་འགྱུར་རོ། །ཉི་མའི་དཀྱིལ་འཁོར་གྱི་ནང་ན། གལ་ཏེ་བྱ་རོག་ལྟ་བུ་སྣང་ངམ་འོན་ཏེ་བྱ་སྣང་ན་བྲམ་ཟེ་རྣམས་དང་། རྒྱལ་པོ་ལ་གནོད་པ་ཟླ་བ་ཕྱེད་དང་གསུམ་ན་འབྱུང་བར་འགྱུར་རོ། །
ཡང་ཉི་མའི་དཀྱིལ་འཁོར་གྱི་ནང་ན་བྱ་རྒོད་ཀྱི་གཟུགས་དང་། གཅན་གཟན་སྨྲི་གང་མ་ཏི་ཀའི་གཟུགས་ལྟ་བུ་སྣང་ན་ཟླ་བ་ཕྱེད་དང་གཉིས་ན་གནོད་པ་འབྱུང་ངོ་། །ཝའི་གཟུགས་ལྟ་བུ་སྣང་ན་ཟླ་བ་གཅིག་ན་གནོད་པ་འབྱུང་ངོ་། །ལུང་བོང་གི་གཟུགས་ལྟ་བུ་སྣང་ན་ཞག་བཅུ་ན་གནོད་པ་འབྱུང་ངོ་། །ཡང་ཉི་
མའི་དཀྱིལ་འཁོར་གྱི་ནང་ན་དབྱིག་པ་ལྟ་བུའམ། གཏན་པ་སྦོམ་པོ་ལྟ་བུ་ཉི་མའི་ནང་ན་སྣང་ན་རྒྱལ་པོ་ཕན་ཚུན་གཅིག་པས་གཅིག་སྲིད་ཆེ་བས་བསྙེམས་པ་དང་། རྒྱ་མཚོ་བཞི་ལ་དབང་བའི་མིའི་དབང་པོ་དེ་ལྟ་བུ་ལ་མི་དགེ་སྟེ། འཇིགས་པ་མངོན་དུ་འབྱུང་བར་འགྱུར་རོ། །དེ་ལྟར་ལྟས་ངན་གྱི་འབྲས་བུ་
འབྱུང་བའི་དུས་ངེས་པ་བསྟན་པ་ལས་དུས་དེར་གནོད་པ་མ་བྱུང་སྟེ་མི་སྣང་ན་དེ་ནི་ལོ་གཅིག་ན་འབྲས་བུ་སུམ་འགྱུར་དུ་སྐྱེ་སྟེ། གནོད་པ་འབྱུང་བར་སྟོན་ཏོ། །ཟླ་བ་དུམ་བུར་ལྷགས་སམ། མདོག་གྱུར་ཏམ། གས་པ་དང་། ཟླ་བའི་གཟུགས་ཆེན་པོར་གྱུར་ཏམ། འཕྲོ་བ་དང་། རབ་ཏུ་གཡོ་བ་དང་། ཟླ་བ་
ཚེས་པའི་རྭ་མི་གསལ་བ་འདི་རྣམས་ལྟར་སྣང་ན་སྐྱེ་བོ་ལ་འཇིགས་པ་བྱུང་བའམ་སྐྱེ་བོ་ལ་འཇིགས་པ་འབྱུང་བར་འགྱུར་རོ། །ཟླ་བ་དེ་ལ་གཟའ་སྤྱང་ཀིས་ཐམས་ཅད་ཟིན་ན་ཡང་སྐྱེ་བོ་ལ་འཇིགས་པ་འབྱུང་བར་བཤད་དོ། །ཚུལ་འདི་དང་འདྲ་བར་ཉི་མ་ལ་གཟའ་ཞུགས་ཏེ། ཉི་མ་ཤི་ན་ཡང་ཟླ་བ་དང་འདྲ་བར་

203-1-47a

བལྟ་ཞིང་བག་ཡོད་པར་ཡིད་ལ་བཟུང་ཞིང་ཤེས་པར་བྱའོ། །ཡང་ཟླ་བའི་མདོག་ཐལ་བ་འདྲ་བ་དང་། སྔོ་རེང་འདྲ་བ་དང་། ཟངས་འདྲ་བའི་མདོག་དང་། མདོག་སེར་པོ་དང་། སྐྱ་བོ་དང་། བྱི་རུའི་མདོག་ཏུ་སྣང་བ་དང་། ཟླ་བའི་མདོག་མི་གསལ་བ་སྣང་ན་མིག་ནད་ཀྱི་འཇིགས་པ་འབྱུང་
བ་དང་། མཚོན་གྱིས་འགྱེད་པ་དང་། ནད་ཀྱི་འཇིགས་པ་འབྱུང་བ་དང་། གཞན་ཡང་གནོད་པ་འབྱུང་བར་འགྱུར་རོ། །ཡང་ཟླ་བའི་མདོག་དཀར་ལ་སྣུམ་ཞིང་གསལ་བར་སྣང་ན་ཕྱོགས་སུ་བདེ་བ་དང་ཆར་ཆེ་བ་དང་ཞི་བར་འགྱུར་རོ། །དེ་ལྟར་ཟླ་བ་འགྲོ་བ་དང་། བྱ་བ་དང་། གནས་པ་དང་། ཟླ་བའི་ཚད་དང་། མདོག་
གྱུར་པ་དང་། ཚུལ་དང་། ཟ་བ་རྒྱུ་བ་ཡང་སེམས་ཅན་གྱི་བསོད་ནམས་མ་ཡིན་པ་བྱས་པའི་འབྲས་བུ་མུ་གེ་དང་། མཚོན་དཀར་འགྱེད་པ་དང་། འཆི་བ་དང་། ཚེགས་འབྱུང་བའི་གནོད་པ་འབྱུང་བར་སྟོན་ཏོ། །མཚན་མོ་ཟླ་བ་ཚེས་པ་ནས་གཟའ་རྣམས་ཀྱིས་ཟླ་བའི་སྟེང་ན་ཕར་ཐལ་ཏེ་སོང་ན་དེ་རྣམས་ཀྱི་གནོད་
པའི་དམིགས་པ་སོ་སོར་བསྟན་ཏེ། སྤྱིར་ནི་རྒྱལ་པོ་དང་། མི་དམ་པ་མ་རུང་བར་འགྱུར། ཆར་པ་ཧ་ཅང་ཆེ་བ་དང་། བླ་མ་རུང་བར་འགྱུར་བ་དང་། རྒྱལ་སྲིད་མ་རུང་བར་སྤྱིར་སྟོན་ཏོ། །ཟླ་བའི་སྟེང་ན་པ་བ་སངས་ཀྱིས་མནན་ཏེ་སོང་ན་རྒྱལ་པོ་ངན་པ་མ་རུང་བར་འགྱུར་རོ། །ཟླ་བའི་ཐོག་ནས་མིག་དམར་དང་
སྤེན་པས་ནོན་ཏེ་སོང་ན་བཀྲེས་པས་འཇིགས་པ་དང་། ཁོན་དྲག་ཤུལ་ཅན་དུ་འབྱུང་བ་དང་། རབ་ཏུ་འཇིགས་པ་འབྱུང་བར་འགྱུར་རོ། །ཟླ་བ་ལ་ཕོད་མཇུག་རིངས་ཀྱིས་ནོན་ཏེ་སོང་ན་མུ་གེ་དང་། མཚོན་གྱིས་འགྱེད་པར་སྟོན་ཏོ། །ཟླ་བ་ལ་གཟའ་ལག་གིས་ནོན་ཏེ་སོང་ན་ལོ་ལེགས་པ་དང་། བདེ་བར་
འགྱུར་རོ། །དེ་ལྟར་ཟླ་བའི་སྟེང་ན་ཕར་གཟའ་རྣམས་ཀྱིས་ནོན་ཅིང་ཕུག་སྟེ་སོང་བའི་འབྲས་བུ་དེ་ལྟར་བསྟན་པ་ཡིན་ནོ། །གཟའ་རྣམས་ཀྱིས་ཟླ་བ་ཕུག་སྟེ་སོང་བ་དེའི་འབྲས་བུ་ནི་ཟླ་བ་གཟས་ཕུག་པ་ལས་ཟླ་བའི་གཟུགས་ཆེར་སྐྱེས་ལ་འོད་ལྷག་པར་ཆེ་ན་དེ་ནི་རྒྱལ་བ་ཞེས་བྱའོ། །གལ་ཏེ་ཕམ་པར་གྱུར་ཏེ། མཐུ་
རྩལ་བྲི་བ་ན་ཟླ་བ་འདར་ཞིང་གཡོ་ན་ཕམ་པ་ཞེས་བྱའོ། །དེ་ལ་པ་བ་སངས་ཀྱིས་ཕུག་སྟེ་སོང་ན་ཡུལ་མན་ཏྲོ་དང་། ཡུལ་བན་ཏྲ་ཙ་ལ་དང་། ཡུལ་མ་ག་དྷཱ་དང་། ཡུལ་ད་མོ་ཏྲ་དང་། ཡུལ་ཀུ་བ་ར་དང་། མར་གྱི་ཡུལ་དང་། ཡུལ་ས་ར་ག་ར་དང་། ཡུལ་ཁ་ཤ་དང་། ཡུལ་བུ་ལིན་ཏྲ་དང་། ཡུལ་ཀེ་ཀེ་ལ་

203-1-47b

དང་། ཁ་ཆེའི་ཡུལ་དང་། པར་སིག་གི་ཡུལ་དང་། རི་ཁྲོད་ན་གནས་པ་རྣམས་དང་། བུད་མེད་རྒྱལ་མོ་བྱེད་པའི་ཡུལ་དང་། ཡུལ་ཨུ་པ་ཏྲི་ཏྲ་དང་། ཡུལ་ཨང་ག་དང་། ཡུལ་ཨུ་ཏུ་ཀུར་ཙ་དང་། ཡུལ་སུ་ཙ་དང་། ཡུལ་སུ་ཤི་ན་ར་དང་། ཡུལ་པུ་རུ་ཤ་དང་། ཡུལ་པུ་ལིན་ཧ་དང་། བལ་ཡུལ་དང་། 
བ་ལང་རྫི་ལ་སོགས་པ་རྣམས་དང་།ཡུལ་པྲ་ཏ་ན་དང་། ཡུལ་སྟ་ལ་དན་དང་། བཅུ་ལ་གནས་པའི་མི་རྣམས་དང་། གངས་རིའི་ལྷོ་ཕྱོགས་ཀྱི་ངོས་ལ་གནས་པའི་མི་རྣམས་ལ་ཟླ་བ་བདུན་ཚུན་ཆད་ཀྱི་གཉེན་དང་བཅས་པ་རྣམས་མ་རུང་བར་འགྱུར་བ་འབྱུང་བར་འགྱུར་རོ། །ནམ་ཟླ་བ་འོད་གསལ་བ་ལ་ཕུར་
བུས་ཕུག་སྟེ་སོང་ན་ཡུལ་པ་ས་ཏ་དང་། ཡུལ་སིན་དྷ་དང་། ཡུལ་གན་དྷཱ་ར་དང་། རི་ཁྲོད་ན་གནས་པའི་མི་རྣམས་དང་། བག་ལེའི་ཡུལ་དང་། སོག་ལེའུ་ཡུལ་གྱི་ལུང་པའི་ལྗོན་ནས་རི་ཁྲོད་པ་བརྒྱ་སྟོང་སྙེད་དང་། ཁ་ཆེ་ཡུལ་གྱི་མི་ལ་ཟླ་བ་བཅུ་ཚུན་ཆད་ཀྱིས་གནོད་པར་ཐེ་ཚོམ་མེད་པར་འགྱུར་རོ། །
ནམ་ཟླ་བའི་འོད་གསལ་བ་མིག་དམར་གྱིས་ཕུག་ན་རྒྱལ་པོ་ཡུལ་གཞན་དུ་འགྲོ་བའམ། རྒྱལ་སྲིད་བྱ་བར་བརྩོན་པའམ། རྒྱལ་སྲིད་བྱེད་པར་ཞུགས་པ་ལ་མ་རུང་བར་འགྱུར་རོ། །བཞོན་པའི་རྟ་རྣམས་ཟད་པར་འགྱུར། ཕན་ཚུན་དུ་དབྱེ་ཞིང་གནོད་པ་དང་། དུག་དང་མཚོན་མང་པོས་མ་རུང་བར་
འགྱུར། ཡུལ་ཨ་ཡོ་དང་། ཡུལ་པུ་ལིན་དང་། ཡུལ་ཀ་ལིང་ཀའི་རྒྱལ་པོ་རྣམས་དང་། ཡུལ་པུ་རི་དང་། ཡུལ་ཤ་ཀ་ཏི་མི་ཏའི་སྐྱེ་བོ་རྣམས་མ་རུང་བར་འགྱུར་རོ། །ཡུལ་ཏེ་གར་ཏ་དང་། ཡུལ་མ་ལ་ཡ་བ་དང་། ཡུལ་ཀུ་ར་དང་། ཡུལ་པ་ཏད་ཙ་ར་དང་། ཡུལ་ཤི་བ་ཡའི་མི་རྣམས་དང་། 
དམག་དཔོན་རྣམས་དང་། མིའི་ཚོགས་རྣམས་དང་། དམག་གི་ཚོགས་རྣམས་དང་། དཔུང་དང་ལྡན་པའི་དུས་དང་། ངང་ཚུལ་ལ་སོགས་པ་དང་ལྡན་པའི་མི་རྣམས་དང་། ཡུལ་ལྷོ་ཕྱོགས་ན་གནས་ཤིང་རྟེན་པའི་མི་རྣམས་ལ་ཟླ་བ་དྲུག་གིས་འཇིགས་པ་འབྱུང་བར་སྟོན་ཏོ། །ནམ་ཟླ་བ་གཟའ་སྤེན་
པས་ཕུག་སྟེ་སོང་ན་བྲམ་ཟེ་གཙོ་བོ་དང་། རྒྱལ་པོ་གདུགས་ཐོགས་པ་འཐབ་མོའི་གཡུལ་དུ་འཇུག །འཐབ་པར་བྱེད། བློན་པོ་དང་བཅས། སྡེའི་གཙོ་བོ་དཔོན་ཚན་རྣམས་འཐབ་པར་འགྱུར། གྲོང་རྡལ་དང་། ཚོང་པ་ལམ་དུ་ཞུགས་པ་དང་། ཡུལ་ཨ་ཙུ་ཏའི་མི་དང་། ཡུལ་གོའུ་སའི་མི་དང་། ཡུལ་

203-1-48a

ཨ་བི་ཤ་ཧའི་མི་དང་། ཡུལ་ག་ཤུད་ཏྲའི་མི་དང་། ཡུལ་མ་ལ་བ་དང་། ཡུལ་ཨ་པི་ར་དང་། མྱ་ངན་རྣམས་དང་། ཡུལ་མང་བ་རྣམས་དང་། བ་ལང་དང་། བོང་བུ་དང་། རྔ་མོ་དང་། འདི་རྣམས་རྒྱལ་མཚན་དུ་བྱེད་པའི་ཡུལ་རྣམས་མ་རུང་བ་དང་། ཡུལ་རུས་པ་ཅན་དུ་འགྱུར་
རོ། །ཡུལ་དེ་རྣམས་ཀྱི་མི་ལ་ཟླ་བ་བཅུ་བཞི་ན་སྡིག་པ་ཞི་བ་དང་ལྡན་པ་ཡིན་ནོ། །ནམ་གཟའ་ལག་གིས་ཟླ་བ་ཕུག་ན་ལོ་ལེགས། ནད་མེད་ཆར་པ་ལེགས་པར་འབབ། སྐྱེ་བོ་ལ་གནོད་པ་མེད་ཅིང་བདེ་བ་དང་། ཞི་བར་འགྱུར་རོ། །ཟླ་བ་ཕོད་མཇུག་རིངས་ཀྱིས་ཕུག་སྟེ་སོང་ལ། གལ་ཏེ་སྐར་ཐོད་ལས་
དུད་པ་འཐུལ་ན་མི་དཔའ་བོ་དང་། མཚོན་གྱིས་འཚོ་བ་རྣམས་དང་། ཆོམ་རྐུན་བྱེད་པའི་མི་རྣམས་གཞན་གྱི་མཐུ་རྩལ་དང་། གནོད་པ་དང་། དྲག་ཤུལ་གྱིས་འཆི་བར་འགྱུར་རོ། །ཡང་གལ་ཏེ་ཟླ་བ་དེ་ལ་གཟའ་གཞན་གྱིས་འབུགས་ཤིང་ཟླ་བའི་ངོས་ལ་འདུད་ཅིང་རེག་པར་སོང་ན་མཚོན་གྱི་གནོད་པ་སྣ་
ཚོགས་མང་པོ་འབྱུང་ངོ་། །གལ་ཏེ་ཟླ་བའི་ནང་དུ་གཟའ་རྣམས་སོང་སྟེ་ནུབ་ན་རྒྱལ་པོ་འཆི་བ་དང་། ལུས་དང་ནོར་ཡང་མ་རུང་བར་འགྱུར་རོ། །ཡང་བཙས་པའི་བླ་སྐར་གྱི་ནང་དུ་གཟའ་སྤྱང་ཀི་ཞུགས་པའམ། ཟླ་བ་ལ་གཟའ་སྤྱང་ཀི་ཞུགས་ལ་སྐར་མདའ་ཟླ་བ་ལ་ཕོག་ན་རྒྱལ་པོ་འཆིའོ། །ཟླ་བ་དང་
གཟའ་གཉིས་ཀྱི་འོད་ཟེར་ཕྲད་པ་དང་། གཟའ་ཟླ་བའི་ཐོག་ན་ཕར་ནོན་ཏེ་རེག་པར་སོང་ན་གསར་དུ་ཞུགས་པས་སྔ་ན་གནས་པ་རྣམས་ཕམ་པར་བྱེད་པ་དང་། རྒྱལ་པོས་སྐྱེ་བོ་རྣམས་འཇོམས་ཤིང་ཟ་བར་འགྱུར་རོ། །ཟླ་བ་མེ་ཏོག་པདྨ་དང་མེ་ཏོག་ཀུ་མུད་དང་འདྲ། ཚེས་གྲངས་བཞིན་དུ་ཟླ་བ་སྐྱེ་ཞིང་ཤས་
ཆེར་སྣང་ན། དཀྱིལ་འཁོར་འོད་ཟེར་ལྡན་ཏེ་ཉམས་པ་མེད་པར་འགྲོ་བ་ཡིན། དེ་ལྟར་འོད་ཟེར་བསིལ་ལྡན་མི་རྣམས་རྒྱལ་བར་འགྱུར། ཟླ་བ་འཆར་ཞིང་འགྲོ་བར་བཤད་པའོ།།      །།རྒྱུ་སྐར་དང་། རྒྱུ་སྐར་གྱི་ཁྱིམ་གྱི་ནང་དུ་གཟའ་མིག་དམར་ཞུགས་པའི་མཚན་མ་བསྟན་པ། རྒྱུ་སྐར་རྒྱུ་སྐར་
གྱི་ཁྱིམ་གང་ཡང་རུང་བའི་ནང་དུ་གཟའ་མིག་དམར་འོད་ཀྱི་མདོག་འཇམ་པ་དང་ལྡན་ཞིང་ཆེན་པོར་འགྱུར་ཏེ། ཟླ་བ་བརྒྱད་དམ། ཟླ་བ་བདུན་གྱི་བར་དུ་ཞུགས་ཤིང་འདུག་པ་ལས་འོད་ཀྱི་ཁ་དོག་དང་། བོངས་ཆེ་བ་ཉམས་ན་དེ་ནི་མི་དགེ་བ་ཡིན་ཏེ། རྒྱུ་སྐར་གང་དང་གང་གི་ནང་དུ་གཟའ་མིག་

203-1-48b

དམར་ཞུགས་པ་དེ་ཉིད་ལ་གནོད་པར་འགྱུར་རོ། །གཟའ་མིག་དམར་ཚུལ་དེ་ལྟ་བུར་ཞུགས་པ་ནི་སྐྱེ་བོ་རྣམས་ལ་གནོད་པར་འགྱུར་རོ། །ཡང་གཟའ་མིག་དམར་ཡོན་པར་འགྲོ་ཞིང་འཇུག་པ་དང་། ཕྱིར་ཡང་འཁོར་ཞིང་ཞུགས་པ་དང་། མིག་དམར་གྱི་འོད་དང་མདོག་ཉམས་པ་དང་། གཟའ་མིག་དམར་
རྒྱུ་སྐར་དང་ཉེ་ཞིང་འོད་འདྲེས་པ་དང་། མིག་དམར་ལས་དུད་པ་འཐུལ་བ་དང་། འབར་བ་དང་། མིག་དམར་གྱི་རྩེ་མོ་ལུས་འོད་ཟེར་དང་ལྡན་པར་འགྱུར་བ་དང་། ཕན་ཚུན་དུ་འཕོ་ཞིང་འགྲོ་བའམ། ལམ་གཅིག་ཏུ་འདུག་ལ་འོད་དམར་པོ་འམ། ཡང་ན་དུད་པ་མི་སྡུག་པ་ཆེར་འཐུལ་ན་གནོད་པ་བྱེད་འདོད་པ་དེ་ནི་རྒྱལ་པོ་འཆི་བར་འགྱུར་རོ། །
ཡང་ན་གཟའ་མིག་དམར་འོད་དམར་པོ་འབར་ན་འབྱུང་པོ་ཐམས་ཅད་ལ་མི་རུང་བར་འགྱུར་རོ། །ཡང་ན་གཟའ་མིག་དམར་ནམ་མཁའ་ལ་རྒྱུ་ཞིང་ཤར་ནུབ་ལྟས་མི་སྣང་བར་འགྲོ་ན།མི་རིགས་བཞི་རྣམས་འཇིགས་པར་འགྱུར། གང་དང་གང་གི་རྒྱུ་སྐར་ནང་དུ་ཞུགས་སོ། །དེ་ལྟར་མི་སྣང་ན་མི་དེ་དག་ལ་གནོད་པར་འགྱུར་རོ། །ནམ་གཟའ་མིག་དམར་རྒྱུ་སྐར་
དང་། སྐར་མ་ཀུན་གྱི་ནང་དུ་འོད་ཀྱི་མདོག་བཟང་པོར་སྣང་ན། མི་རིགས་བཞི་ཐམས་ཅད་ལ་ཕན་པར་འགྱུར་རོ། །མིག་དམར་གྱི་མདོག་དང་། འོད་ཉམས་ན་མི་དགེ་སྟེ་ངན་པར་བལྟའོ། །ཡང་གཟའ་མིག་དམར་ཡོན་པོར་འགྲོ་ཞིང་འཇུག་པ་ཚ་བ་ཞེས་བྱ་བ་དང་། གདོང་མཆི་མ་ཅན་ཞེས་བྱ་བ་དང་། སྦྲུལ་ཞེས་བྱ་བ་དང་། གདོང་དམར་པོ་ཞེས་བྱ་བ་དང་། མིག་དམར་
ཡོན་པོར་འགྲོ་བར་དྲག་ཤུལ་ཅན་ཞེས་བྱ་བ་དང་། དེ་བཞིན་དུ་གཏུན་བུ་ཞེས་བྱ་བ་དང་། མིག་དམར་ཤར་བ་རྒྱུ་སྐར་བདུན་གྱི་ནང་དུ་ཞུགས་པ་དང་། ཡང་ན་རྒྱུ་སྐར་དགུའམ་ཡང་ན་རྒྱུ་སྐར་བརྒྱད་ཀྱི་ནང་དུ་ཞུགས་པ་ལས་ཕྱིར་ལོག་ན་དེ་ནི་ཡོན་པོ་ཚང་བ་ཞེས་བྱའོ། །མིག་དམར་དེ་ལྟར་ཞུགས་པ་ལ་དེའི་ཚེ་ཁང་ཐོག་གི་ཐད་ཀའམ་ནགས་ཚལ་གྱི་ཏོར་ཏོའི་
ཀ་ནས་མིག་དམར་རྟག་ཏུ་རྒྱལ་བ་བཞིན་དུ་འདུག་ལ། ནག་གུ་རེང་རེང་པོ་ཞིག་ཏུ་གྱུར་ན་རིམས་ནད་ཀྱང་འབྱུང་། རབ་ཏུ་དགའ་བ་མེད་པར་བྱེད། གང་དག་མེའི་ལས་ཀྱིས་འཚོ་ཞིང་བཙོ་བ་དང་། སྲེག་པར་བྱེད་པ་དེ་དག་ཀྱང་མེ་ཤོར་ཞིང་ཐར་པས་སྐྱེ་བ་ཟད་པར་འགྱུར་རོ། །རྒྱུ་སྐར་བཅུ་གཅིག་གམ་ཡང་ན་རྒྱུ་སྐར་བཅུ་འམ་ཡང་ན་བཅུ་གཉིས་ཀྱི་ནང་དུ་
ཞུགས་ཏེ་འདུག་ན་དེ་ནི་གཟའ་དྲག་པོ་ཡོན་པོར་ཞུགས་པ་གདོང་འཆི་མ་ཞེས་བྱ་སྟེ། གཟའ་དེ་ལྟར་ཞུགས་པ་ན་སྤྲིན་དུ་ཆར་པ་འབབ་སྟེ། ཆར་ལེགས་པར་འབབ་ཀྱང་གཞན་གྱིས་གནོད་པ་བྱས་པས་ཕམ་པར་མི་འགྱུར། མིའི་ལུས་ཀྱི་སྲོག་གཟུང་ལྔ་ཡང་ནད་ཅན་དུ་འགྱུར་བ་དེའི་ཕྱིར་ན་ནད་མང་པོ་འབྱུང་བས་མི་ཀུན་རིད་ཅིང་སྐེམས་པ་དང་། འཇིག་

203-1-49a

རྟེན་དུ་མི་རྣམས་ལ་ནད་མང་པོ་འབྱུང་བར་འགྱུར་རོ། །རྒྱུ་སྐར་བཅུ་གསུམ་མམ་ཡང་ན་རྒྱུ་སྐར་བཅུ་བཞིའི་ནང་དུ་གཟའ་མིག་དམར་ཞུགས་པ་ལས་སླར་ལོག་ན་དེ་ནི་ཡོན་པོ་སྦྲུལ་ཞེས་བྱ་སྟེ། གླང་པོ་ཆེ་རྣམས་དང་། སྦྲུལ་པོ་ཆེ་དང་། སྦྲུལ་རྣམས་ཀྱིས་གནོད་པ་བྱེད་པར་འགྱུར། མཚོན་གྱིས་སྨན་པ་རྣམས་མི་འཚོ། སྨན་དང་འབྲས་བུ་རྣམས་
དང་། ལྡུམ་བུ་རྣམས་ལེགས་པར་སྨིན་ཅིང་འཁྲུངས་པར་འགྱུར། ཆར་སྙོམས་པར་འབབ། ས་བོན་ཐམས་ཅད་རབ་ཏུ་འཁྲུང་ངོ་། །ཡང་རྒྱུ་སྐར་བཅོ་ལྔའམ། བཅུ་དྲུག་གི་ནང་དུ་གཟའ་ཞུགས་ན། གཟའ་དྲག་ཤུལ་ཅན་དེ་གདོང་དམར་པོ་ཞེས་བྱ་སྟེ། རྒྱལ་པོ་ཕན་ཚུན་འཐབ་ཅིང་གཡུལ་བཀྱེ་སྟེ། མཚོན་གྱིས་སྨས་པས་དེའི་ཚེ་ཤ་ཁྲག་གི་
འདམ་དུ་འགྱུར་རོ། །ཡང་གཟའ་མིག་དམར་རྒྱུ་སྐར་བཅུ་བདུན་གྱི་ནང་དུ་ཞུགས་ཏེ། ཕྱིར་ལོག་ན་དེ་ནི་དྲག་ཤུལ་ཅན་དང་། གཏུན་བུ་དྲག་པོ་ཞེས་བྱ་སྟེ། དེའི་ཚེ་ན་སྐྱེ་བོ་མང་པོ་རྣམས་སྙིང་རྗེ་མེད། སྙིང་བརྩེ་བ་མེད། བཀའ་ཁྲིམས་དང་། ཆོས་ལུགས་མེད་དེ། དེའི་དུས་ནི་སྐྱེ་བོ་རྣམས་གཅིག་ལ་གཅིག་རལ་གྲི་དང་། མདུང་བུས་འདེབས་
ཤིང་འཕེལ་བར་འགྱུར་རོ། །གཞན་ཡང་གཟའ་མིག་དམར་གཟའ་དྲུག་ཏུ་འཕོ་ཞིང་འགྲོ་བ་ཚངས་པ་སྐྱེ་དགུའི་བདག་པོ་ལྟར་རབ་ཏུ་སྟོན། དེ་ལྟ་བུ་ལ་མིག་དམར་དེ་སོང་ངམ། འདུག་གམ། ཡོད་དམ། མེད་དམ་བྱར་ཡང་མི་རུང་སྟེ། དེ་ལ་ནམ་ཟླ་བ་གསུམ་གྱི་བར་དུ་གཟའ་མིག་དམར་རབ་ཏུ་སང་ན་དེའི་ཚེ་སྐྱེ་བོ་རིམས་ནད་ཀྱིས་མ་རུང་བ་དང་། 
སའི་བཅུད་ཟད་པར་འགྱུར་རོ། །གཟའ་མིག་དམར་བོངས་ཆུང་དུ་འགྱུར། རྣམ་པར་གཟེར་བར་འགྱུར། རྣམ་པར་གནོད་པར་འགྱུར། དཀྱིལ་འཁོར་ཆུང་ངུར་གྱུར་པར་ཡུལ་ཕྱོགས་གང་ན་སྣང་བ་དེའི་ཚེ་མིག་དམར་ཕན་པ་ཞེས་བྱ་སྟེ། དེ་ནི་ཡུལ་ཕྱོགས་སུ་གནོད་པར་འགྱུར་རོ། །གཟའ་མིག་དམར་དེ་ལྟར་གྱུར་ན་མེའི་ལས་དང་།
མེ་ལ་རྗེད་པའི་ལས་བྱེད་པའི་མི་དང་། ཡུལ་མ་ལེ་བྱའི་མི་དང་། ཡུལ་ཀུ་ཤའི་མི་དང་། ཡུལ་ཉ་ཤའི་མི་དང་། ཡུལ་པི་ཏིའི་མི་དང་། ཡུལ་ས་ལད་མིའི་མི་རྣམས་དང་། ཡུལ་ལ་བའི་མི་དང་། ཡུལ་མོག་ཏུའི་མི་དང་། ཡུལ་ལྟའི་རྗེད་པའི་མི་རྣམས་དང་། ཡུལ་མོ་གུ་ར་དང་། ཡུལ་མེའི་དབང་པོ་ཞེས་བྱ་བ་དང་། ཡུལ་སྦ་ར་ཞེས་པ་འདི་
རྣམས་ལ་གཟའ་གཞན་གྱིས་གཟའ་མིག་དམར་ཕམ་པར་བྱས་ནས་ཡུལ་དེ་རྣམས་ཀྱི་མི་ལ་གནོད་པར་འགྱུར་རོ། །གཟའ་མིག་དམར་འཇུག་པ་བསྟན་པའོ། །ཨཱརྱ་ཤ་རུ་ལ་ཀརྞའི་ནང་ནས་གཟའ་སྐར་གྱི་ལྟས་འབྱུང་བ་བཏུས་པ། ལྟས་དང་མཚན་མ་དགེ་བར་གྱུར་ཅིག །རྫོགས་སོ།།      །།

203-1-49b

༄༅༅། །རྒྱ་གར་སྐད་དུ། ཡུ་དྷ་ཛ་ཡཱརྞ་བ་ཏནྟྲ་རཱ་ཛ་སྦ་རོ་ད་ཡ་ནཱ་མ། བོད་སྐད་དུ། གཡུལ་ལས་རྣམ་པར་རྒྱལ་བ་ཞེས་པའི་རྒྱུད་ཀྱི་རྒྱལ་པོ་དབྱངས་འཆར་བ་ཞེས་བྱ་བ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །རྗེ་བཙུན་ཡེ་ཤེས་འོད་ཟེར་གྱིས། །
འགྲོ་བ་མུན་པར་ལྡོངས་པ་རྣམས། །རྨོངས་པ་ཐར་མཛད་འདྲེན་པའི་གཙོ། །ཞི་བ་ཉི་ཟེར་གུས་ཕྱག་འཚལ། །དཔལ་ལྡན་ཀེེ་ལཱ་ས་རི་ལ། །ལྷ་མཆོག་བཅོམ་ལྡན་འདས་བཞུགས་ཏེ། །ལྷ་མོ་གངས་རིའི་སྲས་མོ་ཡང་། །མྱུར་དུ་གཙོ་བོ་མཉེས་བྱེད་བརྩོན། །གྲུབ་པའི་ཚོགས་མཉམ་
ཐམས་ཅད་དང་། །ཐུབ་པའི་ཚོགས་རྣམས་འོངས་ཤིང་འདུས། །འཇིག་རྟེན་དོན་གཉེར་འདུས་པ་ཀུན། །སྟོན་པའི་མདུན་ན་མཉན་འདོད་འཁོད། །ལྷ་མོས་གསོལ་པ། །བཅོམ་ལྡན་ལྷ་ཡི་ལྷ་མཆོག་གཙོ། །རི་བོང་ཅན་ནི་སྤྱི་བོར་འཛིན། །དབང་ཕྱུག་ཆེན་པོ་ཡེ་ཤེས་དོན། །དཀར་
མོ་བདག་ལ་རྣམ་པར་འབྱེ། །མཆོག་ཏུ་དགའ་བ་གསང་བ་ཅན། །དབྱངས་འཆར་ཞེས་བྱ་གསང་བའི་རྒྱུད། །ཁྱོད་ཀྱིས་བདག་ལ་སྔར་གསུངས་པ། །སྐྱེ་བོ་བློ་གྲོས་དམན་པ་ལ། །རྒྱས་མིན་ཤིན་ཏུ་གསལ་བ་ནི། །འདོད་པའི་དོན་ཀུན་སྒྲུབ་བྱེད་པ། །དབང་ཕྱུག་ཆེ་ལ་བདག་གསོལ་བས། །
མདོར་བསྡུས་པ་ནི་བཤད་པར་གསོལ། །ལམ་ལྔ་རྣམ་པར་ཤེས་པ་དང་། །དབྱངས་དང་གསལ་བྱེད་འཆར་བ་ལས། །སྟོབས་ཀྱི་བྱེ་བྲག་ཇི་ལྟར་ལགས། །གཟའ་གནས་དུས་སྦྱོར་འཆར་བ་ཡིས། །དགེ་དང་མི་དགེ་བདེ་དང་སྡུག །དེ་བཞིན་རྙེད་དང་མི་རྙེད་དང་། །འཚོ་དང་འཆི་
བ་དེ་བཞིན་ཅི། །དེ་བཞིན་རྒྱལ་དང་འཕམ་པ་དང་། །འགྲོ་དང་འོང་བའི་བྱེ་བྲག་ཅི། །རང་གི་ལུས་ཀྱི་སྦྱོར་བ་ཡིས། །གཞན་གྱི་སེམས་དང་ཁུ་ཚུར་གྱི། །དེ་བཞིན་བྱེ་བྲག་ཤེས་པ་དང་། །ཕོ་ཉ་ཡིས་ནི་སྨྲས་པ་ཡི། །མིང་གི་དབྱངས་དང་གསལ་བྱེད་ཀྱི། །བྱེ་བྲག་སོ་སོར་ཤེས་
པ་དང་། །འདྲི་བྱེད་མིང་གི་སྐར་མ་དང་། །དུས་སྦྱོར་བྱེ་བྲག་ཇི་ལྟར་ལགས། །ཤ་ལ་ཀ་ཡི་འཁོར་ལོ་དང་། །དེ་བཞིན་ཨ་པ་ཀ་ཧ་ཌ། །དུས་ཀྱི་འཁོར་ལོ་ཇི་ལྟ་བུ། །ཚེ་ཡི་གནས་སྐབས་ཇི་ལྟར་ལགས། །སྐྱེ་བ་བརྟག་པའི་བྱེ་བྲག་རྣམས། །ངེས་པར་བདག་འཚལ་བཤད་དུ་

203-1-50a

གསོལ། །ལམ་དང་རྔོན་པའི་འཁོར་ལོ་དང་། །དཀར་པོའི་འཁོར་ལོ་ཇི་ལྟར་ལགས། །རྨ་ལ་རྩེ་གསུམ་འཁོར་ལོ་ཅི། །སྐར་མས་རིགས་རྣམས་ཤེས་པ་ཅི། །འདབ་ཆགས་འཁོར་ལོ་ཇི་ལྟ་བུ། །ཚངས་པས་སྦྲུལ་གྱི་འཁོར་ལོ་དང་། །སེང་གེ་གདན་གྱི་
བདག་ཉིད་ཅི། །མདའ་གཞུ་རལ་གྲིའི་འཁོར་ལོ་དང་། །བུམ་པའི་འཁོར་ལོ་དེ་བཞིན་ཅི། །པདྨའི་འཁོར་ལོ་རྫོང་འཁོར་ལོ། །སྒྲ་གཅན་འཁོར་ལོ་བདག་ལ་གསུངས། །སྤེན་པ་དང་ནི་བྱ་ཁྱུང་དང་། །བཀྲིས་པའི་འཁོར་ལོ་ལྷ་ཆེན་ཅི། །མིང་གི་གསལ་བྱེད་ཕྱོགས་མཚམས་
སུ། །རྒྱལ་བའི་འཁོར་ལོ་བཤད་དུ་གསོལ། །དུས་སྦྱོར་ཕྱེད་པ་ཤེས་པ་དང་། །ཟླ་བའི་སྙིགས་མ་གནས་པ་དང་། །ཀླུ་རྣམས་འཆར་བ་ཇི་ལྟར་ལགས། །བདག་ནི་ཁྱོད་མཉེས་བྱེད་སྤྲོ་བས། །དབང་ཕྱུག་ལྷ་ཡི་ལྷ་མཆོག་ལ། །ཇི་ལྟར་བདག་གིས་ཞུས་པའི་དོན། །
གནང་ན་དཀར་མོ་བདག་ལེགས་ཉན། །ལྷ་ཆེན་ངེས་པར་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །ཁྱོད་ཀྱིས་ཇི་ལྟར་ཞུས་པ་བཞིན། །ཐམས་ཅད་རིམ་པས་གསལ་བར་བཤད། །དབྱངས་དང་གསལ་བྱེད་གཟའ་རྣམས་ནི། །མཛེས་མ་ཁྱོད་ལ་བདག་
གིས་བཤད། །འཁོར་ལོ་མཚན་ཉིད་ཐམས་ཅད་དང་། །རིགས་ལྡན་མཚན་ཉིད་མཐར་ཐུག་པ། །ཁྱོད་ལ་དགོས་པ་གང་ཡིན་པ། །མངོན་སུམ་ངེས་པར་བཤད་པར་བྱ། །སྔོན་ཚེ་ལྷ་དང་ལྷ་མིན་དག །བ་སྤུ་ལྡང་བའི་གཡུལ་འགྱེད་ཚེ། །ལྷ་ཡི་དབང་པོས་བདག་ལ་དྲིས། །འདི་བཤད་
ལྷ་མིན་ཕམ་པར་བྱས། །བསྟན་བཅོས་གསང་བ་ཆེན་པོའི་རྒྱུད། །གཡུལ་ལས་རྣམ་པར་རྒྱལ་བར་གྲགས། །གཞན་དུ་རྫོགས་པར་ངས་མ་བཤད། །གསང་ཆེན་འཁོར་ལོ་མ་ལུས་པ། །ཐུབ་པའི་ཚོགས་རྣམས་ང་ལ་ཉོན། །འདི་ལ་གཙོ་མོ་དགའ་བར་གྱིས། །རྒྱུད་རྣམས་ཀུན་དུ་
སྦས་པ་སྟེ། །གསང་བ་ལས་ཀྱང་ཆེས་གསང་བ། །གང་གིས་དབྱངས་འཆར་མི་ཤེས་པར། །གཡུལ་ལས་རྒྱལ་བར་འདོད་པ་ནི། །མཁའ་ལ་ཁུ་ཚུར་བསྣུན་འདོད་དང་། །སྨིག་རྒྱུའི་ཆུ་ནི་སྙེགས་པ་བཞིན། །མཛེས་མ་ཇི་ལྟར་འཇིག་རྟེན་དུ། །དུས་ཀྱི་ལྷ་རྣམས་འཆར་བ་ལ། །

203-1-50b

བརྟག་དཔྱད་མེད་པར་འཇུག་པ་ནི། །བླུན་པོར་ངེས་སོ་རྫོང་ལྷ་མོ། །དུས་ཀྱི་བདག་པོ་རྣམས་འབྱུང་བས། །བརྟགས་ཤིང་དཔྱད་ནས་འཇུག་པར་བྱ། །ཤིས་དང་མི་ཤིས་ཐམས་ཅད་ཀྱི། མཚན་ཉིད་རྣམས་ནི་སྟོན་པར་བྱེད། །གཅིག་ཏུ་ཡིད་ནི་དག་པ་ལ། །མི་རྟོག་ཕྱིར་ན་འདི་མི་
དགོས། །ལུས་ནད་རླུང་གི་བྱེ་བྲག་གིས། །དུས་གསུམ་འབྲས་བུ་ཤེས་པར་བྱེད། །དེས་ན་ནང་གི་རླུང་ལ་ནི། །མཉམ་པར་གཞག་ལ་རིག་པར་བྱ། །གང་ཚེ་གཡུལ་དུ་ཆས་པ་ན། །སེམས་ནི་དང་ཞིང་མཛེས་པ་དང་། །སྤྲོ་ཞིང་གསལ་བ་དགེ་བ་ཡིན། །རྔ་ལ་རང་སྒྲ་བྱུང་ན་དགེ། །རལ་གྲི་
ལ་སོགས་མཚོན་ཆ་རྣམས། །གསལ་ཞིང་རང་སྒྲ་འོད་འབར་དགེ། །རྒྱལ་མཚན་བ་དན་རྟ་དང་གླང་། །སྒྲ་འདོན་གསལ་ཞིང་སྟོབས་འབྱེད་དགེ། །མདུན་ནས་བརྟན་གཡོའི་རང་བཞིན་ཡང་། །རང་གིས་བརྟགས་ལ་ཤེས་པར་བྱ། །དེ་ལས་བཟློག་ན་མི་ཤིས་པ། །རོལ་མོ་བརྡུངས་ཀྱང་སྒྲ་མི་
གསལ། །རླུང་རྣམས་རྒྱུད་ལས་བཟློག་པ་དང་། །ཡིད་ནི་ལྡང་ཀྱོག་མྱ་ངན་ཟིན། །རོལ་མོ་མཚོན་ཆ་ལ་སོགས་རྣམས། །རལ་དང་ཆག་སོགས་ངན་པ་ཡིན། །གང་ཚེ་ཚོང་ལ་ཆས་པ་ན། །དེ་ཚེ་ཟོང་ལ་བྱི་བས་ཟོས། །ཆག་གམ་སྟོར་རམ་མི་མཛེས་པ། །མི་ཤིས་ལྟས་མཐོང་ལོག་པར་བྱ། །
དེ་བཞིན་དགོས་དོན་བྱ་བ་ཀུན། །ལྟས་ཀྱི་དགེ་དང་མི་དགེ་དཔྱད། །ཚེས་ལ་དབྱངས་དང་གསལ་བྱེད་དང་། །རྒྱུ་སྐར་གཟའ་རྣམས་འཆར་བར་འགྱུར། །རྣལ་འབྱོར་པ་གང་ཡིད་ནང་ཆུད། །མཉམ་ཉིད་དབྱིངས་ནས་མེ་བཟུང་ལ། །རང་གི་ལུས་ལ་གནས་པ་ཡི། །ལམ་ལྔ་སྟོན་ནོ་ལྷས་མཆོད་
མ། །འདིར་ནི་རྒྱས་པར་མ་བསྟན་ཏེ། །ཅུང་ཟད་ཙམ་ཞིག་བསྟན་པར་བྱ། །ལུས་ཅན་རྣམས་ཀྱི་ཞག་གཅིག་ལ། །སྟོང་ཕྲག་ཉི་ཤུ་རྩ་གཅིག་དང་། །བརྒྱ་ཕྲག་དྲུག་གི་ལྷག་པའི་དབུགས། །རྒྱུ་བའི་གྲངས་སུ་ཤེས་པར་བྱ། །དབུགས་འབྱུང་འཇུག་དང་བར་མ་སྟེ། །དབུགས་ཞེས་བྱ་བར་ཡོངས་སུ་
གྲགས། །དབུགས་དྲུག་ཆུ་སྲང་ཞེས་བྱ་སྟེ། །དྲུག་ཅུ་ལ་ནི་དབྱུ་གུ་གཅིག །དབྱུ་གུ་དྲུག་ཅུ་ཞག་གཅིག་ཡིན། །ཐ་མལ་གནས་ལ་རིག་པར་བྱ། །དེ་ལ་འཕོ་བ་བཅུ་གཉིས་ཏེ། །ཐུན་ནི་བརྒྱད་དུ་བསྟན་པ་ཡིན། །གཡས་དང་གཡོན་པའི་ལམ་ལྔ་ལས། །དཀྱིལ་འཁོར་ལྔ་ནི་རྣམ་པར་

203-1-51a

རྒྱུ། །གཡས་ནས་ས་ལ་སོགས་པ་སྟེ། །ནམ་མཁའ་ལ་སོགས་གཡོན་ནས་རྒྱུ། །ས་སོགས་དཀྱིལ་འཁོར་རེ་རེ་ལ། །དྲག་པོ་རྐང་པ་དང་བཅས་ཀྱིས། །ཉུང་བའི་སུམ་བརྒྱ་དྲུག་ཅུའོ། །ཉུང་བ་དབུ་མའི་ཁམས་སུ་གྲགས། །མི་མཉམ་པ་དང་མཉམ་པའི་ཁྱིམ། །
ལུག་དང་གླང་སོགས་རིམ་པ་བཞིན། །དུས་མདའ་རྐང་པ་དང་བཅས་པས། །ཉུང་བའི་བརྒྱ་ཕྲག་བཅོ་བརྒྱད་ལམ། །ཉུང་བ་དབུ་མའི་ལམ་དུ་གྲགས། །དེ་ལྟར་འཕོ་བ་བཅུ་གཉིས་ལ། །བདུན་ཅུ་རྩ་ལྔས་ལྷག་པ་ཡི། །དྲུག་བརྒྱར་རབ་ཏུ་གྲགས་པ་ཡིན། །མདོར་ན་དབུ་མའི་ལམ་ཉིད་ནས། །
སུམ་ཅུ་གཉིས་ཀྱི་ཆ་ཤས་གཅིག །དམན་པ་རྣམས་ལ་འཆི་སྟེར་ཞིང་། །རྣམ་འབྱོར་པ་ལ་མཆོག་སྟེར་འགྱུར། །ཉི་མ་ཟླ་བའི་ལམ་གཉིས་པོ། །ལྷོ་དང་བྱང་གི་བགྲོད་པ་སྟེ། །དཀྱིལ་འཁོར་ལྔ་ནི་རབ་ཏུ་རྒྱུ། །བྱང་གི་བགྲོད་པ་ཟླ་བ་ལ། །ནམ་མཁའ་མེ་ཆུ་ས་རླུང་ནི། །དབུས་དང་སྟེང་
འོག་ཀ་བ་དང་། །ཟུར་ལ་བརྟེན་ནས་རིམ་པ་བཞིན། །ནམ་མཁའ་ལུག་གི་ཁྱིམ་ཡིན་ཏེ། །མེ་ནི་གླང་དུ་ཡོངས་སུ་གྲགས། །ཆུ་ནི་ཉ་ཡི་འཕོ་བ་ཡིན། །ས་ནི་བུམ་པ་ཞེས་བྱ་སྟེ། །རླུང་ནི་འཁྲིག་པར་ཡོངས་སུ་གྲགས། །ཟླ་རྒྱུ་བྱང་བགྲོད་ཆུ་སྲིན་ནོ། །ནམ་མཁའ་དབུས་མའི་སྦྱོར་བ་སྟེ། །མེ་
ནི་གྲུབ་པའི་སྦྱོར་ཞེས་བྱ། །ཆུ་ནི་བདུད་རྩིའི་སྦྱོར་བར་བརྗོད། །དངོས་གྲུབ་སྦྱོར་བ་དབང་ཆེན་པོ། །ཕུན་སུམ་ཚོགས་པའི་སྦྱོར་བ་རླུང་། །པ་སངས་ཟླ་བ་གཟའ་ལྷག་དང་། །ཕུར་བུ་རིམ་བཞིན་མཁའ་མ་གཏོགས། །བཞི་དང་བཅུ་དྲུག་བཅུ་གཉིས་དང་། །བརྒྱད་ཀྱི་སོར་དུ་ཡོངས་སུ་གྲགས། །ལྷོ་ཡི་བགྲོད་པའི་ཉི་མ་
ལ། །དཀྱིལ་འཁོར་སྔ་མའི་རིམ་པ་ལས། །ནམ་མཁའ་སྲང་གི་ཁྱིམ་དུ་བརྗོད། །མེ་ནི་སྡིག་པའི་དུས་སྦྱོར་ཏོ། །ཆུ་ནི་བུ་མོའི་འཕོ་བ་ཡིན། །ས་ནི་སེང་གེའི་ཁྱིམ་དུ་གྲགས། །རླུང་ནི་གཞུ་ཞེས་དེ་བཞིན་ནོ། །ལྷོ་བགྲོད་ཉི་མ་ཀར་ཀ་ཊ། །ནམ་མཁའི་འཇིགས་བྱེད་སྦྱོར་བ་སྟེ། །མེ་ནི་འཆི་བའི་
སྦྱོར་བར་གྲགས། །མི་ཤེས་པ་ཡི་སྦྱོར་བ་ཆུ། །དབང་ཆེན་གྱིས་ནི་སྲེག་སྦྱོར་བ། །རླུང་ནི་མྱ་ངན་སྦྱོར་བར་བཤད། །མིག་དམར་དང་ནི་སྤེན་པ་དང་། །དེ་བཞིན་ཉི་མ་སྒྲ་གཅན་རྣམས། །ནམ་མཁའི་ལྷག་མ་རིམ་པ་བཞིན། །དེ་ནས་གཞན་དག་འཕོ་བ་ནི། །སྟོང་དང་བརྒྱད་བརྒྱའི་གྲངས་

203-1-51b

ལ་ནི། །གཡས་ནས་ལུག་སོགས་མི་མཉམ་དྲུག །གཡོན་ནས་གླང་སོགས་མཉམ་པ་དྲུག །རིམ་པ་བཞིན་དུ་འཕོ་འགྱུར་ཏེ། །རགས་པའི་ཆ་ལ་བསྟན་ཞེས་ཟེར། །དེ་ལྟར་ནང་གི་འཕོ་བ་ལ། །དགེ་དང་མི་དགེ་ལ་སོགས་རྣམས། །འདྲི་བར་བྱེད་པའི་སྐྱེ་བོ་ལ། །ལེགས་པར་བརྟགས་ཏེ་བཤད་
པར་བྱ། །དེ་ནས་གཞན་ཡང་བཤད་པར་བྱ། །ལམ་ལྔའི་མཚན་ཉིད་བཟང་པོ་མཆོག །ས་ཡི་ལམ་གྱིས་རྒྱལ་སྲིད་དེ། །ནོར་དང་འབྲུ་དང་ལོངས་སྤྱོད་དང་། །རྒྱལ་དང་ཕུན་སུམ་ཚོགས་པ་དང་། །རྙེད་པ་ཐོབ་དང་སྡུད་པར་བྱེད། །ཆུས་ནི་དོན་རྣམས་འགྲུབ་པར་སྟོན། །ཡིད་ལ་བསམས་པ་ཐམས་ཅད་
ཀྱི། །འདོད་པའི་དོན་བསྒྲུབ་ཀུན་བྱེད་པས། །མཛེས་མ་དེ་ལྟར་ཡིད་ལ་གཟུང་། །མེ་ཡི་ལམ་ནས་རྒྱུ་བ་ལས། །བཀྲེས་སྐོམ་ངལ་དུབ་སྡུག་བསྔལ་བྱེད། །བྱ་བ་ཐམས་ཅད་ཉམས་འགྱུར་ཞེས། །ཤེས་པར་གྱིས་ཤིག་བཟང་མོ་ཀྱེ། །རླུང་གིས་འཐབ་རྩོད་སྐྱོ་དང་རྨོངས། །ནོར་ཟད་བྱེས་འཁྱམས་གདུང་
བར་བྱེད། །ཟླ་བ་དང་ནི་ཉི་མ་དང་། །སྒྲ་གཅན་ལམ་ནས་རྒྱུ་བ་ལ། །བཟང་ངན་བྱེ་བྲག་ཤེས་པར་བྱ། །དུག་སོགས་གཞོམ་དང་རྒྱལ་ལ་སོགས། །ཟླ་བའི་རྒྱུ་བར་རབ་ཏུ་བསྔགས། །གཡུལ་བཤམ་རོལ་རྩད་སྟོན་མོ་དང་། །གཅད་བསྲེག་བཙོ་ལ་སོགས་པ་དང་། །དབང་དང་དགུག་པའི་ལས་ལ་ནི། །ཉི་མའི་
སྟོབས་ནི་བསྔགས་པ་ཡིན། །གཉིས་ཀའི་བདག་ཉིད་སྟོན་བྱེད་པས། །ཤིས་དང་མི་ཤིས་ངེས་མེད་པར། །སྒྲ་གཅན་ཐེ་ཚོམ་ཅན་ཞེས་བྱ། །མཛེས་མ་ཟླ་བའི་ལམ་རྒྱུ་ལ། །སྐྱེ་བོ་ཉི་མའི་ཕྱོགས་ནས་འདྲི། །འདོད་པའི་དོན་ནི་ཉམས་པར་འགྱུར། །ཉི་མ་ལས་རྒྱུ་ཟླ་བར་གནས། །སྔ་མ་བཞིན་དུ་དོན་མེད་
འགྱུར། །གང་ནས་ཉི་མ་ཟླ་བ་རྒྱུ། །དེར་གནས་འདྲི་བའི་སྐྱེ་བོ་ནི། །བསམ་པའི་དོན་ཀུན་འགྲུབ་པར་འགྱུར། །གལ་ཏེ་གཉིས་ཀར་གནས་པ་ལས། །འདྲི་ན་ཐེ་ཚོམ་ཅན་ཞེས་བྱ། །ལམ་ལྔ་ལ་ནི་རྒྱུ་བ་གསུམ། །འགྲོ་དང་འོང་དང་གནས་པའོ། །འདྲི་བར་བྱེད་པའམ་རང་གིའང་། །འོང་བས་ཐམས་ཅད་དགེ་
བ་སྟེ། །འགྲོ་བས་ངལ་བ་དོན་མེད་འགྱུར། །གནས་པ་ལ་ནི་ཐེ་ཚོམ་འགྱུར། །ལམ་ལྔ་རྣམ་པར་རྒྱུ་བ་ལས། །དགེ་དང་མི་དགེ་མཁས་པས་བརྟག །ཆུ་དང་ས་དང་མེ་དང་ནི། །རླུང་གི་དཀྱིལ་འཁོར་རྒྱུ་བ་ལས། །ཞི་རྒྱས་དབང་དང་དགུག་པ་དང་། །གསད་དང་བསྐྲད་སོགས་ཤེས་པར་བྱ། །ལམ་

203-1-52a

ལྔའི་དེ་ཉིད་མི་ཤེས་པར། །བྱ་བ་ཐམས་ཅད་མི་འགྲུབ་སྟེ། །དེ་ཡི་སྦྱོར་བ་མི་ཤེས་པར། །དེ་ཡི་ངལ་བ་དོན་མེད་འགྱུར། །རླུང་ནི་ཐམས་ཅད་བྱེད་པ་སྟེ། །རྟོག་གེ་པ་ཡིས་མི་ཤེས་སོ། །ལྷ་མོ་འདི་རྣམས་ལེགས་བཟུང་ལ། །དགེ་དང་མི་དགེ་བཤད་པར་གྱིས། །ལྷ་མོས་གསོལ་བ། དབང་
ཕྱུག་ཆེན་པོ་བཅོམ་ལྡན་འདས། །ལྷ་ཡི་ལྷ་མཆོག་ཐམས་ཅད་མཁྱེན། །ལམ་ལྔ་ལེགས་པར་ཁྱེད་ཀྱིས་གསུངས། །ད་ཡང་བདག་ལ་ཅུང་ཟད་ཙམ། །ཞུ་བ་མཆིས་པས་གསན་དུ་གསོལ། །དབྱངས་དང་གསལ་བྱེད་འཆར་བ་ཅི། །དབྱངས་ཀྱི་གྲངས་ནི་དུ་ཞིག་མཆིས། །དེ་བཞིན་གསལ་བྱེད་གྲངས་ནི་
དུ། །རིང་ཐུང་བྱེ་བྲག་ཇི་ལྟར་འཆར། །དཀར་ནག་ཕྱོགས་ལ་གང་འཆར་ལགས། །བདག་གིས་མི་ཤེས་ལྷ་ཁྱོད་ལ། །ངེས་པར་ཐེ་ཚོམ་མེད་པར་ཡང་། །མ་ལུས་པ་ནི་བདག་ཞུ་བས། །དེ་རྣམས་མཐར་ཐུག་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །ཇི་ལྟར་ཁྱོད་ཀྱིས་བདག་ཞུས་པ། །
ཐམས་ཅད་བཤད་ཀྱིས་མཉན་པར་གྱིས། །དབྱངས་དང་གསལ་བྱེད་བཟང་པོ་རྣམས། །ཇི་ལྟར་འཆར་བའི་ངེས་པ་ནི། །དཔྱིད་ཟླ་འབྲིང་སོགས་ཟླ་བ་ཡི། །བཅུ་དྲུག་ནས་བཟུང་སྟོང་གི་བར། །དཀར་ཕྱོགས་ཞེས་བྱ་རི་སྲས་མོ། །དེ་ཡི་ཚེས་གཅིག་ནས་བརྩམས་ཏེ། །ཉ་ཡི་བར་ནི་ནག་ཕྱོགས་འདོད། །དེ་
ལ་དཔྱིད་འབྲིང་ཟླ་བར་གྲགས། །དེ་ལྟར་རིམ་བཞིན་ཤེས་པར་བྱ། །དེ་ལ་དཔྱིད་འབྲིང་ལ་སོགས་པའི། །ཚེས་ལ་འཆར་བའི་དབྱངས་རྣམས་ནི། །ཨ་ཡིག་དང་ནི་ཨི་ཡིག་དང་། །དེ་བཞིན་གསུམ་པ་ཨུ་ཡིག་སྟེ། །ཨེ་ཡིག་ལྷ་མོ་ཡིད་འཕྲོག་མ། །ཨོ་ཡིག་དང་ནི་ལྔ་རུ་འདོད། །དེ་ལྟར་ང་ཡིས་དབྱངས་སུ་
བརྗོད། །དབྱངས་ཀྱི་རང་བཞིན་རིམ་བཞིན་དུ། །ས་དང་ཆུ་མེ་རླུང་དང་ནི། །ནམ་མཁའི་སྦྱོར་བས་ཤེས་པར་བྱ། །དྲི་དང་རོ་དང་གཟུགས་དང་ནི། །རེག་བྱ་སྒྲ་རྣམས་རིམ་བཞིན་དྲན། །དབྱངས་ལྔ་ཞེས་བྱ་ལྷ་ཆེན་མ། །བྱ་བ་ཀུན་ལ་ཤེས་པར་བྱ། །རིང་བ་ལྔ་རྣམས་དཀར་ཕྱོགས་ལ། །ལན་གསུམ་དུ་ཡང་
འགྱུར་བ་ཡིན། །ཀ་ནས་ཧ་ཡི་མཐར་ཐུག་པ། །ང་ཉ་ཎ་གསུམ་སྤངས་པ་ཡིས། །གསལ་བྱེད་ཕྱོགས་གཉིས་དག་ལས་འཆར། །དཀར་ཕྱོགས་ནག་ཕྱོགས་དག་ལ་ཡང་། །མཛེས་མ་ཡི་གེ་སུམ་ཅུར་འགྱུར། །གསལ་བྱེད་ཀ་ནས་ད་ཡི་བར། །དཀར་པོའི་ཕྱོགས་ལ་རིམ་བཞིན་འཆར། །དཀར་ཕྱོགས་

203-1-52b

རིང་བ་ལན་གསུམ་སྟེ། །ཀ་སོགས་རྣམས་དང་ལན་གཅིག་འགྱུར། །དཀར་པོའི་ཕྱོགས་ཀྱི་ཚེས་རྣམས་དང་། །ནག་པོའི་ཕྱོགས་ཀྱི་ཚེས་ལ་ཡང་། །དགའ་བ་ནས་ནི་བརྩམས་ནས་སུ། །ལན་གསུམ་དུ་ཡང་འཆར་བ་ཡིན། །རྀ་རཱྀ་ལྀ་ལཱྀ་སྤངས་པ་ཡི། །དབྱངས་ཡིག་ཐུང་ངུ་ལྔ་པོ་རྣམས། །ནག་པོའི་ཕྱོགས་
ལ་འཆར་བ་ནི། །དྷ་སོགས་རྣམས་དང་ལྷན་ཅིག་འཆར། །སོ་སོའི་ཚེས་ཀྱི་བྱེད་པ་རྣམས། །བདག་པོར་ལན་གསུམ་དུ་ཡང་འགྱུར། །ཛན་མ་ཧ་ནི་ཨན་ཏ་ཀ །ཛན་མ་ཧ་ནི་རིམ་པ་བཞིན། །བྱིས་པ་གཞོན་ནུ་ལང་ཚོ་རྒན། །སྨིན་ཏེ་ཤི་བ་རིམ་པ་བཞིན། །ཨ་སོགས་དབྱངས་ཀྱི་བྱེ་བྲག་དང་། །ཚེས་ནི་ལྔ་ལ་
རིམ་པས་སྦྱར། །བྱིས་པ་རྒན་པ་ལ་སོགས་ལ། །དར་རྒུད་ལས་ཀྱི་བྱེ་བྲག་བྱེད། །ཚེས་ལ་འཆར་བའི་དབྱངས་རྣམས་དང་། །མིང་གི་དབྱངས་རྣམས་སྦྱར་བར་བྱ། །དཔྱིད་འབྲིང་དཀར་ཕྱོགས་སོགས་བརྩམས་ནས། །དབྱངས་རྣམས་འཆར་རོ་ལྷ་མོ་ཀྱེ། །ཉིན་ཞག་བདུན་ཅུ་རྩ་གཉིས་ལ། །དབྱངས་ནི་རེ་རེ་འཆར་
བར་འགྱུར། །དེ་བཞིན་ཞག་ནི་བཅུ་གཉིས་ལ། །དབྱངས་ནི་རེ་རེ་འཆར་བ་དང་། །དེ་བཞིན་ཞག་ལྔ་དག་ལ་ཡང་། །དབྱངས་རྣམས་འཆར་བར་འགྱུར་བ་དང་། །ཉིན་རེ་བཞིན་དུ་དབྱངས་རེ་འཆར། །ཐུང་དང་རིང་བའི་དབྱངས་ལྔ་པོ། །ཉིན་ལྔ་མཚན་ལྔ་འཆར་བའང་དྲན། །ལྔ་དང་སུམ་ཅུ་བདུན་ཅུ་གཉིས། །རགས་
པ་ཕྲ་བའི་དབྱེ་བ་ཡིས། །འཆར་བར་འགྱུར་རོ་དཀར་མོ་ཀྱེ། །དཀར་ནག་ཕྱོགས་ཀྱི་སོ་སོ་ལ། །གསལ་བྱེད་རེ་རེ་འཆར་རོ་ཀྱེ། །ནག་པོའི་ཕྱོགས་ཀྱི་ཟླ་ཕྱེད་ལ། །རི་བོང་ཅན་དང་དུས་དྲུག་དང་། །དྲག་པོའི་ཚེས་གྲངས་རྣམས་ལ་ཡང་། །དགའ་བ་དང་ནི་ཨ་ཡིག་དག །ནག་པོའི་ཕྱོགས་ལ་ཐུང་རྣམས་འཆར། །
མིག་དང་ཐུབ་པ་ཉི་མ་ལ། །བཟང་པོའི་མིང་ཅན་ཚེས་དང་ནི། །དབྱངས་ཀྱི་ཡི་གེ་གཉིས་པ་ནི། །སོ་སོར་སྐྱེ་ཞིང་འཆར་བར་བྱེད། །མེ་དང་བཀྲ་ཤིས་འདོད་ཚེས་ལ། །རྒྱལ་བ་ཞེས་བྱར་གྲགས་པ་དང་། །ཨུ་ཞེས་འབྱུང་བའི་དབྱངས་ཡིག་འཆར། །བཞི་ཡི་ཉིན་ཞག་བུ་ག་དང་། །དེ་བཞིན་བཅུ་བཞིའི་ཉིན་ཞག་
ལ། །སྟོང་པར་བརྗོད་པའི་ཚེས་དང་ནི། །ཨེ་ཡི་ཡི་གེ་དབང་བྱེ་བྲག །མདའ་དང་ཕྱོགས་ཞེས་བྱ་བ་དང་། །དེ་བཞིན་བཅོ་ལྔ་ཚེས་གྲངས་ལ། །རྫོགས་པ་ཞེས་པའི་ཚེས་དང་ནི། །དབྱངས་ཡིག་ཨོ་ནི་ངེས་པར་འཆར། །དཀར་པོའི་ཕྱོགས་ཀྱི་ཚེས་གྲངས་ལ། །ཨ་སོགས་ལྔ་ནི་འཆར་བར་དྲན། །སྔར་བཞིན་བརྗོད་

203-1-53a

པའི་ཚེས་རྣམས་ལ། །ལྷ་མོ་རིང་པོར་ཤེས་པར་གྱིས། །དགའ་བ་བཟང་པོ་རྒྱལ་བ་དང་། །སྟོང་པ་རྫོགས་པའི་བྱེ་བྲག་ལ། །མིག་དམར་གཟའ་ལྷག་ཕུར་བུ་ཉིད། །པ་སངས་སྤེན་པ་རིམ་བཞིན་སྦྱར། །དཀར་ནག་ཕྱོགས་ཀྱི་བྱེ་བྲག་ལ། །དབྱངས་དང་གསལ་བྱེད་འཆར་བ་ལ། །རང་བཞིན་
དབང་གིས་དགེ་མི་དགེ། །བར་མའི་འབྲས་བུ་མཐོང་བར་འགྱུར། །དགའ་བའི་ཚེས་ལ་མིག་དམར་དང་། །རྒྱུ་སྐར་སྨིན་དྲུག་ཨ་ཡིག་རྣམས། །འཛོམ་ན་དང་པོའི་མིང་ཡིག་ཨ། །ན་འཆི་རྨ་འབྱུང་འབྲས་བུ་མེད། །བཟང་པོའི་ཚེས་དང་གཟའ་ལྷག་ཅེས། །རྒྱུ་སྐར་མཆུ་དང་ཨ་ཡིག་དབྱངས། །འཆར་ཚེ་ཨི་ཡིག་
མིང་ཅན་རྣམས། །ཉོན་མོངས་འགྱུར་ཏེ་སྔ་མ་བཞིན། །རྒྱལ་པོའི་ཚེས་ལ་བླ་མའི་གཟའ། །རྒྱུ་སྐར་སྐག་འཆར་ཨུ་ཡིག་དབྱངས། །ཨུ་ཡིག་མིང་ཅན་སྲོག་མཐར་བྱེད། །བག་མ་ལ་སོགས་འབྲས་བུ་མེད། །སྟོང་པའི་ཚེས་དང་པ་བ་སངས། །རྒྱུ་སྐར་མོན་གྲུ་དེ་བཞིན་ཏེ། །དབྱངས་ནི་ཨི་ཡིག་འཆར་བ་ལ། །ཨེ་
ཡིག་སྔར་བཞིན་འབྲས་བུ་མེད། །རྫོགས་པའི་ཚེས་ལ་སྤེན་པ་དང་། །རྒྱུ་སྐར་བྲ་ཉེ་ཉིད་འབྱུང་ནི། །དབྱངས་ཡིག་ཨོ་འཆར་དུས་སུ་ནི། །མིང་ནི་ཨོ་ཅན་མྱུར་དུ་བརླག །དགའ་བའི་ཚེས་ལ་ཉི་མའི་རེས། །ཨ་དང་མིང་ཅན་ནད་ཡུན་རིང་། །བཟང་པོར་ཟླ་བའི་རེས་ལ་ནི། །ཨི་དང་དེ་མིང་དེ་བཞིན་ནོ། །རང་ས་
ནས་ནི་ལྔ་པ་ལ། །ནུས་པར་འགྱུར་རོ་དཀའ་ཟློག་མ། །ཨ་ནི་ཨོ་ལ་ནུབ་པ་སྟེ། །ཨི་ནི་ཨ་ལ་དེ་བཞིན་ནོ། །ཨུ་ཡང་ཨི་ལ་རབ་ཏུ་ནུབ། །ཨེ་ནི་ཨུ་ཡི་དབྱངས་ལ་ནུབ། །ཨུ་ནི་ནུབ་པ་ཨེ་ཞེས་བཤད། །མདོར་ན་ས་ནི་ནམ་མཁའ་ལ། །ཆུ་ནི་ས་ལ་ནུབ་པར་འགྱུར། །དེ་བཞིན་དུ་ནི་ཤེས་པར་བྱ། །རྩོད་
པ་ནད་དང་གཡུལ་འགྱེད་དང་། །བྱ་བ་ཀུན་ལ་ཤེས་པར་བྱ། །འཆར་བའི་དུས་སུ་དགེ་བ་སྟེ། །ནུབ་དུས་མི་ཤིས་པར་ཡང་དྲན། །བྱིས་གཞོན་ལང་ཚོ་རྒན་དང་འཆི། །གནས་སྐབས་ལྔ་རུ་བརྗོད་པ་ཡིན། །རང་སར་བྱིས་པར་གྲགས་པ་སྟེ། །གཉིས་པ་གཞོན་ནུ་གསུམ་ལ་འཚོ། །བཞི་པ་རྒན་ཏེ་ལྔ་པ་ཤི། །བྱེ་
བྲག་སོ་སོར་ཤེས་པར་བྱ། །གསལ་བྱེད་ནུབ་ན་ནད་འབྱུང་སྟེ། །དབྱངས་ནི་འཆི་བ་སྟེར་བར་བྱེད། །ལུས་དང་སྲོག་གི་དབྱེ་བ་ཡིས། །གསལ་བྱེད་དབྱངས་ལ་ཤེས་པར་བྱ། །གཞན་ཡང་ཕྱོགས་ཀྱི་བྱེ་བྲག་ནི། །ཤར་དུ་ཨི་ཡིག་ལྷོ་ཕྱོགས་སུ། །ཨེ་ཡི་ཡི་གེ་འཆར་བར་འགྱུར། །ཨུ་ཡིག་ནུབ་ཏུ་འཆར་བ་སྟེ། །བྱང་དུ་

203-1-53b

ཨེ་ནི་འབྱུང་ཞིང་འཆར། །དབུས་སུ་ཨོ་ཡིག་ཞེས་བྱར་གྲགས། །དབྱངས་དང་གསལ་བྱེད་འཆར་ཕྱོགས་སུ། །འགྲོ་བ་བྱ་བ་ཀུན་ལ་སྤང་། །དེ་ལྟར་དབྱངས་རྣམས་གང་འཆར་བ། །བལྟས་ན་ཡིད་ལ་རབ་ཏུ་བཟུང་། །རགས་པ་དང་ནི་ཕྲ་བ་ཡི། །གནས་སྐབས་བྱེ་བྲག་ལ་འཆར་བ། །བདག་གིས་ཇི་ལྟར་བཤད་
པ་བཞིན། །ཤེས་པར་གྱིས་ཤིག་གངས་རིའི་བདག །གཡུལ་ལས་རྣམ་པར་རྒྱལ་བ་དབྱངས་འཆར་བ་ཞེས་བྱ་བའི་རྒྱུད་ལས་ལམ་ལྔ་དང་དབྱངས་འཆར་བ་ངེས་པར་བསྟན་པ་ཆེན་པོ་སྟེ་ལེའུ་དང་པོའོ།།      །།ལྷ་མོས་གསོལ་པ་བཅོམ་ལྡན་འདས། །ལྷ་ཆེན་ཁྱོད་ཀྱིས་དབྱངས་འཆར་བ། །ཤིན་ཏུ་
བདག་ལ་རྒྱས་པར་གསུང་། །ཡང་ནི་བདག་ལ་ཞུ་བ་མཆིས། །རཱ་ཤིའི་དཀྱིལ་འཁོར་འཆར་བ་ལས། །འདྲི་བྱེད་རྙེད་དང་མི་རྙེད་དང་། །རྒྱལ་དང་ཕམ་པ་ཐམས་ཅད་ནི། །མཛེས་དགའ་ཁྱོད་ལ་ཇི་བཞིན་ཞུ། །ཤིན་ཏུ་གསང་བ་བཤད་དུ་གསོལ། །ལོ་གཅིག་གི་ནི་དཀྱིལ་འཁོར་ལ། །ཆ་ཤས་དུམ་བུའི་
མཚན་ཉིད་དང་། །གཙོ་བོ་སྟོབས་ཀྱི་བྱེ་བྲག་དང་། །དུས་སྦྱོར་ཕྱེད་པའི་མཚན་ཉིད་དང་། །དུས་སྦྱོར་ཇི་ལྟར་ཡིན་པ་དང་། །དེ་ལ་འདྲི་བྱེད་དགེ་མི་དགེ། །གཟའ་ཡི་རིགས་ལ་སོགས་པ་ལས། །ལ་སོགས་བྱེ་བྲག་ཤེས་པ་དང་། །དུས་གསུམ་བྱེ་བྲག་ཤེས་པ་རྣམས། །དབང་ཕྱུག་གཙོ་བོས་བཤད་དུ་གསོལ། །
བཅོམ་ལྡན་འདས་ཀྱིས་བཀའ་སྩལ་པ། །ཉོན་ཅིག་མཛེས་མ་མ་ལུས་པ། །རཱ་ཤིའི་མཚན་ཉིད་ཐམས་ཅད་དང་། །གཟའ་རྣམས་ཁྱིམ་ལ་འཁོད་པ་དང་། །ཞག་གཅིག་གི་ནི་ཆ་ཤས་ལ། །བགོས་པས་དུས་སྦྱོར་བཅུ་གཉིས་ཏེ། །དུས་སྦྱོར་དཀྱིལ་འཁོར་མཉམ་པར་སྦྱོར། །དུས་སྦྱོར་གཟའ་བདུན་གནས་པ་
ཡི། །འབྲས་བུ་དཀར་པོ་ཡུམ་ཁྱོད་ཉོན། །ལུག་གླང་འཁྲིག་པ་ཀར་ཀ་ཊ། །དེ་བཞིན་སེང་གེ་བུ་མོ་དང་། །སྲང་སྡིག་གཞུ་དང་ཆུ་སྲིན་དང་། །བུམ་པ་ཉ་ཡི་ཁྱིམ་རྣམས་སུ། །མིག་དམར་པ་སངས་གཟའ་ལྷག་དང་། ཟླ་ཉི་གཟའ་ལྷག་པ་བ་སངས། །མིག་དམར་ཕུར་བུ་སྤེན་པ་ཡི། །ཕུར་བུ་ཞེས་བྱ་ཁྱིམ་བདག་
གཟའ། །ལུག་གླང་འཁྲིག་པ་ཀར་ཀ་ཊ། །ཤར་ལྷོ་ནུབ་བྱང་རིམ་པ་བཞིན། །སེང་གེ་ལ་སོགས་བརྒྱད་རིམ་བཞིན། །ཁྱིམ་གྱི་ཕྱོགས་ཀྱི་སྟོབས་སུ་བརྗོད། །ཉི་མ་པ་སངས་མིག་དམར་དང་། །རཱ་ཧུ་སྤེན་ཟླ་གཟའ་ལྷག་ཕུར། །ཤར་ནས་དབང་ལྡན་མཐར་ཐུག་པར། །གཡས་བསྐོར་ལམ་གྱི་འཁོར་ལོ་སྟེ། །ཉི་

203-1-54a

མ་ཤར་དགེ་ཆུ་བདག་ངན། །དེ་བཞིན་ཀུན་ལ་ཤེས་པར་བྱ། །ལུག་ལ་ཉིན་མཚན་དབྱུ་གུ་ནི། །ནམ་མཁའ་མེ་ཞེས་ཡོངས་སུ་གྲགས། །སུམ་ཅུ་སོ་གཉིས་ཉི་ཤུ་བརྒྱད། །གླང་གི་ཉིན་མཚན་ལས་ཤེས་བྱ། །འཁྲིག་པར་ཉིན་མོ་སུམ་ཅུ་བཞི། །ཉི་ཤུ་རྩ་དྲུག་མཚན་དུ་དྲང་། །ཀར་ཀ་
ཉིན་མོ་སུམ་ཅུ་དྲུག །མཚན་ལ་ཉི་ཤུ་རྩ་བཞི་ཟེར། །སེང་གེར་ཉིན་མོ་སུམ་ཅུ་བཞི། །ཉི་ཤུ་རྩ་དྲུག་མཚན་མོའི་ཚད། །བུ་མོར་གྲགས་པའི་ཉིན་མཚན་ལ། །སུམ་ཅུ་སོ་གཉིས་ཉི་ཤུ་བརྒྱད། །སྲང་ནི་ལུག་དང་འདྲ་བ་ཡིན། །སྡིག་པའི་ཉིན་ལ་ཉི་ཤུ་བརྒྱད། །མཚན་མོ་སུམ་ཅུ་རྩ་གཉིས་ཟེར། །གཞུ་ཡི་
ཁྱིམ་ལ་ཉི་ཤུ་དྲུག །ཉིན་མོའོ་མཚན་མོ་སུམ་ཅུ་བཞི། །ཆུ་སྲིན་ཉིན་མོ་ཉི་ཤུ་བཞི། །མཚན་ལ་སུམ་ཅུ་རྩ་དྲུག་གྲགས། །བུམ་པའི་ཉིན་མོ་ཉི་ཤུ་དྲུག །སུམ་ཅུ་རྩ་བཞི་མཚན་ལའོ། །ཉི་ཤུ་རྩ་བརྒྱད་ཉ་ཡི་ཉིན། །མཚན་མོ་སུམ་ཅུ་སོ་གཉིས་ཟེར། །དེ་ལྟར་ཆུ་ཚོད་ཤེས་པར་བྱ། །འཕོ་བ་གང་ལ་
གནས་པ་ཡི། །འདས་པའི་ཞག་གྲངས་ཇི་སྙེད་པའི། །གནས་གཉིས་སྟེང་མ་ཆུ་ཡིས་བསྒྱུར། །ཆུ་སྲང་ཉི་ཤུ་རྩ་ལྔ་ཡིས། །འོག་མ་བསྒྱུར་ལ་དྲུག་ཅུས་བགོ། །རྙེད་པ་སྟེང་དུ་སྦྱིན་པར་བྱ། །ཕྱེད་པས་ལྷག་ན་གཅིག་སྦྱིན་བྱ། །སྟེང་མ་དྲུག་ཅུས་ཐོབ་པ་རྣམས། །ཆུ་སྲིན་ལ་སོགས་བྱང་བགྲོད་ལ། །སྦྱིན་པ་ཉིད་
དུ་བྱ་བ་ཡིན། །ཀར་ཀ་ཊ་སོགས་ལྷོ་བགྲོད་ལ། །དོར་བས་ཉིན་མོའི་ཆུ་ཚོད་ཡིན། །སྟེང་མས་དྲུག་ཅུ་ལ་ཕྲི་ལ། །དེ་ལ་གཅིག་ཕབ་ལྷག་མས་དབྲི། །དེས་ནི་མཚན་མོའི་ཆུ་ཚོད་ཤེས། །འཕོ་བའི་ཉིན་མཚན་ཆུ་ཚོད་དེ། །སྟེང་མ་བརྒྱད་ཀྱིས་ཐོབ་པ་ནི། །ཐུན་ཕྱེད་ཆུ་ཚོད་བྱ་བར་གྲགས། །ལྷག་མ་དྲུག་ཅུས་བསྒྱུར་བ་
ལས། །འོག་གི་ཆུ་སྲང་སྟེང་དུ་གཞུག །བརྒྱད་ཀྱི་ཆས་རྙེད་ཐུན་ཕྱེད་ཀྱི། །ཆུ་སྲང་ཞེས་མ་ཀྱང་དཀའ་ཟློག་མ། །སྐར་མིག་དབྱུག་ཚེས་ལུག་གི་ཚད། །རིག་བྱེད་མཁའ་མེ་གླང་དུ་བརྗོད། །རོ་དང་ཞེ་ལྔ་འཁྲིག་པའི་ཡིན། །དགུ་དང་ནམ་མཁའ་ཀར་ཀ་ཊ། །དྲག་དང་བཅོ་ལྔ་སེང་གེའོ། །བཅུ་གསུམ་སུམ་ཅུ་བུ་
མོར་དྲན། །ཚེས་དང་བཞི་ལ་སྲང་ཡིན་ཟེར། །ནོར་ཟླ་སྟོང་པ་སྡིག་པར་གོ། །ཉི་ཤུ་བཅོ་ལྔ་གཞུ་ཡིན་མཉམ། །ཟུང་མིག་སུམ་ཅུ་ཆུ་སྲིན་མཐོང་། །རྒྱལ་བ་མདའ་ཆུ་བུམ་པར་གྲགས། །འཁོར་ལོ་ཉ་རུ་ཤེས་པར་བྱ། །ཁྱིམ་གྱི་འཁོར་ལོ་རྫོགས་པ་ཡི། །མཚན་ཉིད་རྣམས་ནི་བསྟན་པ་ཡིན། །གཞན་ཡང་

203-1-54b

སྐར་མ་དྲུག་ཅུས་བསྒྱུར། །འོག་གི་ཆུ་ཚོད་སྟེང་དུ་བླངས། །མདའ་དང་ཡོན་ཏན་ཟླས་ཐོབ་པ། །འདས་པའི་ཁྱིམ་ཡིན་ལྷག་མ་ལ། །སུམ་ཅུས་བསྒྱུར་ལ་ཆུ་སྲང་ནི། །གཉིས་ཀྱིས་བགོས་ཐོབ་གཞུག་པར་བྱ། །མདའ་དང་ཡོན་ཏན་ཟླས་ཐོབ་པ། །གང་ནས་ཁྱིམ་གྱི་འདས་ཞག་ཡིན། །དེ་ལ་དབྱུ་གུ་ཆུ་སྲང་
དང་། །དབུགས་ཀྱི་དོན་དུ་གོ་རིམས་བཞིན། །བསྒྱུར་བས་ཐོབ་པ་དབྱུ་གུ་དང་། །ཆུ་སྲང་དབུགས་སུ་རིམ་བཞིན་འགྱུར། །རྒྱ་མཚོ་ཆུ་དང་ཟླ་བ་ལ། །ཆ་བདུན་ཐུར་མ་གྲིབ་མར་བཅས། །བགོས་པས་ཐོབ་པ་ཆུ་ཚོད་ཡིན། །ཆུ་སྲང་དབུགས་ཀྱང་རིམ་བཞིན་སྦྱར། །ལུག་དང་སྲང་ལ་དྲུག་སྦྱིན་བྱ། །
གླང་དང་བུ་མོ་རང་སར་གཞག །འཁྲིག་པ་སེང་གེར་བརྒྱད་དོར་རོ། །ཀར་ཀ་ཊ་རུ་བཅོ་བརྒྱད་དབྲི། །སྡིག་པ་ཉ་ལ་བཅུ་པ་སྦྱིན། །གཞུ་དང་ཆུ་སྲིན་བུམ་པ་ལ། །བཅུ་གཉིས་དག་ནི་སྦྱིན་པ་ལས། །སྔ་དྲོ་འདས་པའི་ཕྱི་དྲོ་ལུས། །དེ་ཡིས་འདས་པའི་དབྱུ་གུར་བྲི། །ལྷག་མ་ལུས་དང་འདས་པ་
ཤེས། །ནམ་མཁའ་མཁའ་ཟུང་ལུག་གི་ཚད། །ནམ་མཁའ་རིག་བྱེད་མཚེ་མ་གླང་། །སྟོང་པ་ནོར་ལྷ་ཟུང་འཁྲིག་པ། །མཁའ་སོ་ཀར་ཀ་ཊ་རུ་དྲན། །མཁའ་དུས་མེ་རྣམས་སེང་གེ་ལའོ། །ནམ་མཁའ་མཁའ་མཚོ་བུ་མོར་དྲན། །རིམ་པའི་རིམ་པ་སྨིན་པ་ལས། །སྲང་སོགས་བཟློག་གོ་གངས་རིའི་བདག །
ཐམས་ཅད་ཉི་མའི་རྗེས་འབྲངས་ཏེ། །ཞག་གཅིག་ལ་ནི་ལས་ཀྱང་བྱེད། །ལུག་སོགས་ཁྱིམ་རྣམས་རེས་འཇོག་ཏུ། །མི་མཉམ་པ་དང་མཉམ་པར་ཤེས། །མི་མཉམ་པ་ནི་ཕོ་ཡིན་ཏེ། །མཉམ་པ་མོ་ཞེས་བྱ་བར་དྲན། །ཕོ་ཁྱིམ་རྣམས་ནི་དྲག་པོ་སྟེ། །མོ་ཁྱིམ་རྣམས་ནི་ཞི་བར་བརྗོད། །གཡོ་དང་བརྟན་
དང་གཉིས་རང་བཞིན། །ལུག་སོགས་རིམ་པ་བཞིན་དུ་གནས། །དུས་སྦྱོར་རྗེས་སུ་འབྲས་བུ་རྣམས། །ཐོབ་པར་འགྱུར་རོ་ལྷ་མཛེས་མ། །ཁྱིམ་གྱི་དུས་སྦྱོར་དུམ་བུ་དྲུག །བཤད་ཀྱིས་ལྷ་མོ་ཆེན་མོ་ཉོན། །དུས་སྦྱོར་གཅིག་དང་ཕྱེད་པ་དང་། །སུམ་ཆ་དགུ་ཆ་བཅུ་གཉིས་ཆ། །སུམ་ཅུའི་ཆ་ཤས་བྱེ་
བྲག་རྣམས། །ཤེས་པར་གྱིས་ཤིག་ལྷ་མཛེས་མ། །དུས་སྦྱོར་གྱི་ནི་ཆུ་ཚོད་དང་། །ཕྱེད་དང་སུམ་ཆ་དགུ་ཆ་དང་། །བཅུ་གཉིས་ཆ་ཡི་ཆུ་ཚོད་དང་། །སུམ་ཅུའི་ཆ་ཤས་རབ་གྲུབ་པའི། །དབྱུ་གུའི་གྲངས་རྣམས་བཤད་པ་ནི། །ཞག་གཅིག་ལ་ནི་བཅུ་གཉིས་ཏེ། །དེ་ཡི་གཅིག་གི་ལོངས་སྤྱོད་པ། །མཁའ་

203-1-55a

དང་ནམ་མཁའ་བརྒྱད་དང་གཟུགས། །དུས་སྦྱོར་གཅིག་གི་ཚད་དུ་བརྗོད། །ཕྱེད་པ་ལ་སོགས་བྱེ་བྲག་རྣམས། །ལྷ་མོ་དུས་སྦྱོར་ཉིད་ལས་ཕྱེ། །མཁའ་མཁའ་བུ་ག་མཁའ་མཁའ་རོ། །མཁའ་མཁའ་མིག་དང་མཁའ་དང་ཚེས། །ནམ་མཁའ་རོ་རྣམས་རིམ་པ་བཞིན། །
ཤེས་པར་བྱའོ་བཟང་མོ་ཀྱེ། །དུས་སྦྱོར་ཕྱེད་སོགས་མཚན་ཉིད་བཤད། །སྐལ་བ་ཆེན་པོའི་བདག་མོ་ཉོན། །ལུག་ལ་སོགས་བའི་འཕོ་བ་ཡི། །འདས་པའི་ཞག་གྲངས་ཇི་སྙེད་པ། །རང་གི་ཆུ་སྲང་དག་གིས་བསྒྱུར། །སུམ་ཅུས་བགོས་པས་རྙེད་པ་ནི། །ཁྱིམ་དེའི་འདས་པའི་ཆུ་སྲང་ཡིན། །
དེ་ཡིས་ཁྱིམ་གྱི་ཆུ་སྲང་ལ། །ཕྲི་བའི་ལྷག་མ་མ་འོངས་པ། །དེས་ནི་འཕོ་བའི་འདས་པ་དང་། །མ་འོངས་པ་ནི་ཤེས་པར་བྱེད། །དུས་སྦྱོར་གང་ཡིན་ངོས་གཟུང་ཕྱིར། །དེ་ཡི་དུས་ཀྱི་ཆུ་ཚོད་ནི། །འདས་རྣམས་དྲུག་ཅུས་བསྒྱུར་བར་བྱ། །དེ་ལ་མ་འོངས་ཆུ་སྲང་གིས། །ཕྲི་བས་མ་ལྡང་དེ་ཉིད་
ཡིན། །ལྡང་ན་སོ་སོར་རིམ་བཞིན་དབྱེ། །ལུག་སོགས་དྲུག་ལ་རིམ་པ་སྟེ། །སྲང་སོགས་དྲུག་ལས་བཟློག་པས་དབྱི། །གང་ཚེ་མ་ལྡང་ཐིག་ལེ་ཤར། །དེ་ཚེ་དུས་སྦྱོར་ཏད་ཀཱ་ལ། །ཕྲི་བའི་ལྷག་མ་སུམ་ཅུས་བསྒྱུར། །དེ་ལ་ཏད་ཀལ་ཆུ་སྲང་གིས། །བགོས་པས་ཐོབ་པ་ཆ་ཤས་ཡིན། །ལྷག་མ་
དྲུག་ཅུས་བསྒྱུར་བ་ལ། །ཆུ་སྲང་གིས་ཐོབ་དབྱུ་གུ་སྟེ། །ཡང་ལྷག་དྲུག་ཅུས་བསྒྱུར་བ་ལ། །ཆུ་སྲང་གིས་ཐོབ་ཆུ་སྲང་ཡིན། །ཡང་ལྷག་བསྒྱུར་བགོས་དེ་ཐོབ་དབུགས། །ཏད་ཀཱལ་ཆ་ཤས་དབུགས་སྲང་དབུགས། །དུས་སྦྱོར་གྱི་ནི་གནས་ལྟར་བཞད། །དུས་སྦྱོར་ཐོག་མར་གཞག་པའི་ཕྱིར། །ཏད་
ཀཱ་ལ་ནི་སུམ་ཅུས་བསྒྱུར། །འོག་གི་ཆ་ཤས་སྟེང་དུ་བཅུག །དེ་ཡང་དྲུག་ཅུས་བསྒྱུར་བྱ་སྟེ། །འོག་གི་ཆུ་ཚོད་སྟེང་དུ་གཞུག །མཁའ་མཁའ་བརྒྱད་དང་གཟུགས་ཀྱིས་བགོ། །ཐོབ་པ་དུས་སྦྱོར་ཏད་ཀཱ་ལ། །དུས་སྦྱོར་ཕྱེད་པ་ལྟ་བའི་ཕྱིར། །ཆ་ཤས་དྲུག་ཅུས་བསྒྱུར་བ་ལ། །འོག་གི་ཆུ་ཚོད་སྟེང་དུ་
གཞུག །མཁའ་མཁའ་བུ་གས་བགོས་པ་ལས། །ཕྱེད་པས་ལྷག་ན་གཅིག་སྦྱིན་བྱ། །གཉིས་པས་མང་བ་མི་སྲིད་དེ། །གཅིག་ནི་བདག་པོ་ཉི་མ་སྟེ། །གཉིས་ཀྱི་ཟླ་བ་བདག་པོ་ཡིན། །དེ་ནས་དུས་སྦྱོར་སུམ་ཆ་བརྟག །སྔར་བཞིན་ཆ་ཤས་དྲུག་ཅུས་བསྒྱུར། །ཆུ་ཚོད་སྟེང་གཞུག་དྲུག་བརྒྱས་

203-1-55b

བགོ། །ཇི་སྲིད་ལྷག་ན་གཅིག་སྦྱིན་བྱ། །རྙེད་པ་གསུམ་ལས་མང་བ་མིན། །གཅིག་ནི་ཏད་ཀཱ་ལ་ཡིན་ཏེ། །གཉིས་ནི་ཏད་ཀཱལ་ནས་བགྲངས་ལྔ། །གསུམ་བྱུང་དགུ་པའི་དུས་སྦྱོར་ཏེ། །གང་ཡིན་བདག་པོའི་འབྲས་བུ་འབྱུང་། །དེ་ནས་དགུ་ཆ་བརྟག་པར་བྱ། །ཆ་ཤས་དྲུག་ཅུས་བསྒྱུར་བ་ལ། །
ཆུ་ཚོད་སྟེང་གཞུག་མཁའ་སྟོང་མིག །བགོས་པས་ལྷག་ན་གཅིག་སྦྱིན་བྱ། །དེ་ནི་དུས་སྦྱོར་དགུ་ཆ་སྟེ། །ཐོག་མར་ཏད་ཀཱལ་གང་ཡིན་ནས། །བཟུང་ལ་དགུ་ཆ་གང་ཡིན་བལྟ། །གང་ཡིན་བདག་པོའི་འབྲས་བུ་འབྱུང་། །ལུག་སེང་གཞུ་རྣམས་ལུག་ནས་བགྲང་། །ཆུ་སྲིན་བུ་མོ་གླང་རྣམས་
ནི། །ཆུ་སྲིན་ནས་ནི་ཐོག་མ་བྱ། །འཁྲིག་པ་བུམ་པ་སྲང་རྣམས་ནི། །དང་པོར་སྲང་ནས་གྲངས་བཟུང་ངོ་། །ཀར་ཀ་ཊ་དང་སྡིག་པ་ཉ། །ཀར་ཀ་ཊ་ཉིད་ཐོག་མར་གཞག །བཅུ་གཉིས་ཆ་ནི་བལྟ་བ་ལ། །ཆ་ཤས་དྲུག་ཅུས་བསྒྱུར་བ་ལ། །ཆུ་ཚོད་སྟེང་གཞུག་མཁའ་ཆོས་ཀྱིས། །ཐོབ་ལ་
ལྷག་ན་གཅིག་སྦྱིན་བྱ། །ཏད་ཀཱ་ལ་ནས་བགྲངས་པ་ཡི། །གང་ཡིན་བདག་པོའི་འབྲས་བུ་འབྱུང་། །གཞན་ཡང་སུམ་ཆའི་ཆ་ལ་ཡང་། །ཆ་ཤས་སྔར་བཞིན་བསྒྱུར་བར་བྱ། །ཆུ་ཚོད་བཅུག་ལ་མཁའ་རོས་བགོ། །ལྷག་མ་ཐོབ་ན་གཅིག་སྦྱིན་བྱ། །མིག་དམར་སྤེན་པ་ཕུར་བུ་དང་། །གཟའ་
ལྷག་པ་སངས་རིམ་པས་བཞག །ལྔ་དང་ལྔ་དང་བརྒྱད་བདུན་ལྔ། །གནས་གཉིས་དག་ལ་དགོད་པར་བྱ། །ལུག་སོགས་མི་མཉམ་པ་ཡི་ཁྱིམ། །རིམ་པ་བཞིན་དུ་བགྲངས་པ་ཡི། །དབུས་ཀྱི་བདག་པོའི་འབྲས་བུ་འབྱུང་། །གླང་སོགས་མཉམ་ལ་རིམ་མིན་ཏེ། །དེ་ལྟར་ཤེས་བྱ་མཛེས་མ་ཀྱེ། །
བུམ་དྲུག་བདེན་པའི་གཟའ་རྣམས་ནི། །རིམ་པ་བཞིན་དུ་བཞག་པ་ལ། །དགེ་དང་མི་དགེའི་མཚན་མ་བརྟག །ལུག་གླང་ཀར་ཀ་གཞུ་དང་ནི། །ཆུ་སྲིན་དུས་སྦྱོར་འོག་ལྟས་སྐྱེ། །ཉ་ནི་འཕྲེད་ལྟས་སྐྱེ་བ་སྟེ། །ལྷག་མ་སྐྱེ་བ་སྟེང་དུ་ལྟ། །བུ་མོ་འཁྲིག་པ་བུམ་པ་སྲང་། །མདོག་བཟང་གཞན་ནི་ངན་
པ་ཡིན། །དུས་སྦྱོར་གནས་སྟོབས་ཉེ་བར་ཤེས། །མི་རྣམས་ལ་ནི་ཡོངས་སུ་གྲགས། །འཁྲིག་པ་བུ་མོ་སྲང་བུམ་པ། །ཤར་དུ་སྟོབས་དང་ལྡན་པ་སྟེ། །ལུག་གླང་སེང་གེ་གཞུ་རྣམས་ནི། །ལྷོ་རུ་དེ་བཞིན་སྟོབས་སུ་འགྱུར། །སྡིག་པའི་དུས་སྦྱོར་གཅིག་པུ་ནི། །ནུབ་ཏུ་སྟོབས་ཆེར་འགྱུར་བར་

203-1-56a

གྲགས། །ཀར་ཀ་ཆུ་སྲིན་ཉ་ནི་བྱང་། །ཕྱོགས་ཀྱི་སྟོབས་སུ་བཤད་པ་ཡིན། །ལུག་གླང་འཁྲིག་པ་ཀར་ཀ་ཊ། །གཞུ་དང་ཆུ་སྲིན་མཚན་མོ་ལ། །སེང་གེ་བུ་མོ་སྲང་སྡིག་པ། །བུམ་ཉ་ཉིན་མོ་སྟོབས་དང་ལྡན། །ཏད་ཀཱ་ལ་ཡི་དུས་སྦྱོར་གྱི། །མཐོང་བའི་ས་ན་བདག་པོའི་
གཟའ། །ཡོད་ན་ཤིན་ཏུ་བཟང་བ་སྟེ། །དེ་ཡི་གྲོགས་པོ་ཡོད་ཀྱང་བཟང་། །བཏང་སྙོམས་ལ་ནི་བཏང་སྙོམས་འགྱུར། །ཉ་ཡི་ཁྱིམ་བདག་ཕུར་བུ་སྟེ། །དེ་ཡིས་མཐོང་བའི་ས་རྣམས་ལ། །དེ་དང་གྲོགས་པོ་ཡོད་ན་བཟང་། །དགྲ་རྣམས་ཡོད་ན་མི་དགེ་སྟེ། །བདུན་ལ་དགྲ་ཡོད་འཆི་བར་འགྱུར། །
དགེ་སྡིག་གང་ཡོད་སྟོབས་ཆེ་སྟེ། །དྲན་པའི་སྟོབས་སུ་རབ་ཏུ་གྲགས། །དེ་ནས་གཞན་ཡང་དུས་སྦྱོར་གྱི། །དུམ་བུ་སུམ་ཅུའི་ཆ་ཤས་བཤད། །ལུག་ཏུ་ཉི་མར་ཆ་ཤས་བཅུ། །གླང་ལ་ཟླ་བ་ཆ་ཤས་གསུམ། །ཀར་ཀ་ཕུར་པ་ལྔ་ཡང་དགེ། །བུ་མོ་གཟའ་ལྷག་བཅོ་ལྔའོ། །སྲང་དུ་
སྤེན་པ་མཁའ་མིག་དང་། །ཆུ་སྲིན་མིག་དམར་ཉི་ཤུ་བརྒྱད། །ཉ་ལ་པ་སངས་ཉི་ཤུ་བདུན། །ཆ་ཤས་འདི་དག་ཡུན་ལ་དགེ། །རཱ་ས་ནས་ནི་བགྲངས་པ་ཡི། །བདུན་པ་ལ་ནི་མི་དགེ་བ། །ལུག་ཏུ་སྤེན་པ་ཉི་ཤུ་སྟེ། །ཀར་ཀ་མིག་དམར་ཉི་ཤུ་བརྒྱད། །བུམ་པར་གཟའ་ལྷག་བཅོ་ལྔ་སྟེ། །བུ་
མོར་པ་སངས་ཉི་ཤུ་བདུན། །སྡིག་པར་ཟླ་བ་གསུམ་ཡིན་ནོ། །ཆུ་སྲིན་ཕུར་པ་ལྔ་ཡིན་ནོ། །སྲང་དུ་ཉི་མ་ཆ་ཤས་བཅུ། །འདི་དག་ཆ་ཤས་ཡུན་ལ་ངན། །ཏད་ཀཱ་ལ་ཡི་དུས་སྦྱོར་ལ། །ཞིང་བདག་གཟའ་ནི་འཆར་བ་དང་། །དེ་ལས་གཞན་པའི་ཁྱིམ་རྣམས་སུ། །ཁྱིམ་བདག་གཟའ་རྣམས་
འཆར་བའི་ཚེ། །དེ་ཡིས་དགོས་པའི་དོན་རྣམས་ནི། །འགྲུབ་འགྱུར་མཛེས་དགའ་བདེ་སྐྱེད་མ། །རང་གི་སྐྱེ་བའི་ཁྱིམ་དང་ནི། །ཏད་ཀཱ་ལ་ཡི་དུས་སྦྱོར་ནས། །མཐོང་བའི་ས་ནི་བདུན་ཡིན་ཏེ། །གསུམ་དང་བཅུ་ལ་རྐང་པ་གཅིག །བཞི་དང་བརྒྱད་ལ་རྐང་པ་གསུམ། །ལྔ་དང་དགུ་ལ་ཕྱེད་མཐོང་
བཤད། །བདུན་པ་ཐམས་ཅད་རྫོགས་པར་མཐོང་། །བཞི་ནི་མི་མཐོང་མཛེས་དགའ་མ། །མཐོང་དགའ་སྟོབས་ཀྱི་བྱེ་བྲག་བཤད། །རང་རང་སྡེ་ཚན་གནས་པ་ལས། །ཉི་མ་ཕུར་བུ་པ་བ་སངས། །ཉིན་མོ་སྟོབས་དང་ལྡན་པར་འགྱུར། །མིག་དམར་རཱ་ཧུ་སྤེན་པ་ཟླ། །མཚན་ལ་སྟོབས་ཆེར་ལྡན་

203-1-56b

འགྱུར་ཏེ། །ཉིན་དང་མཚན་ལ་སྟོབས་ཆེ་བ། །གཟའ་ལྷག་ཅེས་བྱར་ཡོངས་སུ་གྲགས། །ཕུར་བུ་དང་ནི་པ་བ་སངས། །དཀར་པོའི་ཕྱོགས་ལ་སྟོབས་ཆེ་སྟེ། །ཉི་མ་དང་ནི་སྤེན་པ་དག །ནག་པོའི་ཕྱོགས་ལ་སྟོབས་སུ་འགྱུར། །གཉིས་ཀ་ལ་ནི་སྟོབས་བྱེད་པ། །ཟླ་བ་མིག་དམར་གཟའ་
ལྷག་གོ། །ཟླ་བ་དང་ནི་པ་བ་སངས། །གླང་སོགས་མོ་རྣམས་སྟོབས་ལྡན་ཏེ། །ལྷག་མའི་གཟའ་རྣམས་ཕོ་ཁྱིམ་ལ། །སྟོབས་དང་ལྡན་འགྱུར་མཐོང་དགའ་མ། །བྱང་དུ་བགྲོད་ཚེ་སྟོབས་ཆེ་བ། །ནམ་མཁའི་ནོར་བུ་རི་བོང་ཅན། །དེ་ལས་གཞན་པའི་གཟའ་རྣམས་ནི། །ལྷོར་བགྲོད་སྟོབས་
བྱེད་ཡིད་འདྲེན་མ། །ཉི་མ་ཟླ་བ་བཞི་པ་ལ། །སྟོབས་འགྱུར་མཛེས་དགའ་སྙིང་འདྲེན་མ། །རྒྱས་པར་གཟའ་ལྷག་དེ་བཞིན་ཏེ། །པ་བ་སངས་ཀྱིས་དབང་ལ་སྟོབས། །མིག་དམར་དགུག་པ་ཕུར་བུ་བསྐྲད། །གསད་ལ་སྟོབས་ཆེ་སྤེན་པའོ། །དེ་རྣམས་དབང་བྱེད་ཁྱིམ་རྣམས་ལའང་། །
སྟོབས་དང་ལྡན་པར་རབ་ཏུ་གྲགས། །རང་རང་ཁྱིམ་དུ་འོངས་པའི་ཚེ། །སྟོབས་དང་ལྡན་པར་བདག་གིས་དྲན། །གཞན་དག་ཞིང་དེར་འོངས་པའི་ཚེ། །འདི་ཡི་འབྲས་བུ་ག་ལ་སྟེར། །གཟའ་རྣམས་སྟོབས་ཀྱི་བྱེ་བྲག་ནི། །སྤེན་པ་མིག་དམར་གཟའ་ལྷག་དང་། །ཕུར་བུ་པ་སངས་
ཟླ་བ་ཉིད། །དེ་བཞིན་ཉི་མ་རིམ་པ་བཞིན། །གཅིག་ནས་བདུན་གྱི་བར་དུ་ཡང་། །རེ་རེ་ཡིས་ནི་སྟོབས་འཕེལ་འགྱུར། །ཉི་མའི་གྲོགས་པོ་ཕུར་བུ་སྟེ། །ཟླ་བའི་ཕུར་བུ་གཟའ་ལྷག་གོ། །གཟའ་ལྷག་དང་ནི་པ་བ་སངས། །མིག་དམར་གྲོགས་པོར་ཡོངས་སུ་གྲགས། །ཟླ་བ་མིག་དམར་ཕུར་
བུ་དང་། །པ་སངས་དང་ནི་སྤེན་པ་དག །གཟའ་ལྷག་དང་ནི་གྲོགས་པོར་དྲན། །ཕུར་བུའི་གྲོགས་པོ་ཉི་ཟླ་དང་། །དེ་བཞིན་པ་སངས་སྤེན་པར་བརྗོད། །དེ་བཞིན་པ་བ་སངས་ཀྱི་གྲོགས། །མིག་དམར་གཟའ་ལྷག་ཕུར་བུ་སྤེན། །ཡང་ནི་སྤེན་པར་གྲགས་པ་ལས། །གཟའ་ལྷག་ཕུར་བུ་པ་བ་
སངས། །གྲོགས་ལས་གཞན་པ་དགྲ་ཞེས་གྲགས། །གཞན་དག་གྲོགས་དང་གྲོགས་མིན་པ། །བཏང་སྙོམས་འདོད་ཟེར་ལྷས་མཆོད་མ། །མཆོད་སྦྱིན་ངེས་བརྗོད་སྲིད་སྲུང་དང་། །སྙན་ངག་དག་གི་རིག་བྱེད་ལ། །ཕུར་བུ་པ་སངས་མིག་དམར་དང་། །གཟའ་ལྷག་རིམ་བཞིན་བདག་པོར་

203-1-57a

བརྗོད། །ནག་ཆ་དག་ལ་དབང་བྱེད་པ། །ཟླ་བ་ཉི་མ་མིག་དམར་དང་། །སྤེན་པའོ་དཀར་ཆ་དབང་བྱེད་པ། །ཟླ་བ་དེ་བཞིན་ཕུར་བུ་དང་། །པ་སངས་དགེའོ་རྗེ་བཙུན་མ། །གཟའ་ལྷག་གཉིས་ཀའི་མཚམས་ལ་དབང་། །ཉི་མ་མིག་དམར་ཕུར་བུ་རྣམས། །སྐྱེས་པའི་
གཟའ་རུ་བསྟན་པ་ཡིན། །ཁུ་བ་དང་ནི་རི་བོང་ཅན། །བུད་མེད་དག་གི་གཟའ་ཞེས་གྲགས། །གཟའ་ལྷག་དང་ནི་སྤེན་པ་དང་། །མ་ནིང་ཞེས་བྱ་ལྷ་ཆེན་མ། །ཕུར་བུ་དང་ནི་པ་བ་སངས། །བྲམ་ཟེའི་རིགས་སུ་བསྟན་པ་ཡིན། །ཉི་མ་དང་ནི་མིག་དམར་དག །རྒྱལ་རིགས་ཞེས་བྱར་ཡོངས་
སུ་གྲགས། །ཟླ་བ་རྗེ་རིགས་ཞེས་བྱ་སྟེ། །གཟའ་ལྷག་དམངས་རིགས་དག་ཏུ་བརྗོད། །ཕ་ནི་བྲམ་ཟེ་མ་ནི་དམངས། །དེ་ཡི་བུ་ནི་སྤེན་ཞེས་བྱ། །སྒྲ་གཅན་ཞེས་བྱར་གྲགས་པ་ནི། །གདོལ་པའི་རིགས་སུ་ཤེས་པར་བྱ། །ཉི་མ་དང་ནི་ཟླ་བ་དག །རྒྱལ་པོའི་རིགས་སུ་ཡོངས་སུ་
གྲགས། །ཕུར་བུ་པ་སངས་བློན་པོའི་གཟའ། །མིག་དམར་དམག་དཔོན་བདག་པོར་གྲགས། །གཟའ་ལྷག་རྒྱལ་པོའི་བུ་ཞེས་གྲགས། །བྲན་གྱི་གཟའ་ནི་སྤེན་པར་གྲགས། །མིག་དམར་སྤེན་པ་སྒྲ་གཅན་ཉི། །དྲག་པོའི་གཟའ་རུ་ཡོངས་སུ་གྲགས། །ལྷག་མ་རྣམས་ནི་ཞི་བར་
བརྗོད། །པ་སངས་ཕུར་བུ་ལྷག་པ་ཟླ། །བསོད་ནམས་དག་གི་གཟའ་ཡིན་ཏེ། །གཞན་ན་སྡིག་ཅན་ཞེས་བྱར་དྲན། །མཛེས་དགའ་གཟའ་ཡི་རང་བཞིན་ཡིན། །ཕུར་བུ་ཙམ་པ་བཞིན་དུ་སེར། །ཉི་མ་དམར་སྐྱའི་མདོག་ཏུ་གསལ། །མིག་དམར་དམར་ནག་རི་བོང་ཁྲག །ཟླ་བ་དཀར་ལ་
སེར་བའི་མདངས། །གཟའ་ལྷག་སྔོ་དང་ལྗང་དམར་སྟོན། །པ་སངས་ཁ་དོག་སྣ་ཚོགས་པ། །སྤེན་པ་ནག་པོ་སྒྲ་གཅན་སྔོ། །དེ་ལྟར་གཟའ་ཡི་ཁ་དོག་བཞེད། །ཉི་མ་དང་ནི་མིག་དམར་དག །བཞུ་དང་མི་བཞུའི་ཁམས་ཞེས་བྱ། །གཟའ་ལྷག་དང་ནི་སྤེན་པ་ལ། །རྩ་བ་ཞེས་བྱ་གོས་ལ་
སོགས། །ཟླ་བ་ཕུར་བུ་པ་བ་སངས། །སྲོག་ཆགས་རིགས་ཡིན་དཀར་མོ་ཆེ། །དེ་ལྟར་དུས་སྦྱོར་བཅུ་གཉིས་ཀྱང་། །ལུག་གླང་འཁྲིག་པ་ལ་སོགས་པ། །ཁམས་དང་རྩ་བ་སྲོག་རིམ་བཞིན། །ཐ་སྐར་བྲ་ཉེ་སྨིན་དྲུག་སོགས། །ཁམས་རྩ་སྲོག་སོགས་གོ་རིམས་བཞིན། །ཀུན་ལ་

203-1-57b

སྦྱར་ཏེ་ཤེས་པར་བྱ། །ལུས་ནོར་སྤུན་ཟླ་གྲོགས་པོ་དང་། །བུ་དགྲ་ཆུང་མ་འཆི་དང་ཆོས། །ལས་དང་རྙེད་སྟོར་གོ་རིམས་བཞིན། །ཏད་ཀཱལ་དུས་སྦྱོར་སོགས་ཤེས་བྱ། །ཏད་ཀཱ་ལ་ཡི་དུས་སྦྱོར་ལ། །ཏད་ཀཱ་ལ་དང་བཞི་པ་དང་། །བདུན་པ་དང་ནི་བཅུ་པ་རྣམས། །ཨུ་པ་ཙ་ཡི་བདག་ཉིད་
དུ། །གནས་ཀྱི་དབང་གིས་གྲུ་བཞིར་གྲགས། །ཏད་ཀཱལ་དུས་སྦྱོར་གནས་པ་ལས། །གསུམ་དྲུག་བཅུ་དང་བཅུ་གཅིག་རྣམས། །ཨུ་པ་ཛ་ཡའི་བདག་ཉིད་དུ། །ཤེས་པར་བྱའོ་ལྷ་ཆེན་མ། །དང་པོ་གསུམ་སོགས་མི་མཉམ་པ། །ཨུ་པ་ཛ་ཏེ་དགེ་བ་ཡིན། །གཉིས་པ་བཞི་སོགས་
མཉམ་པ་སྟེ། །ཨུ་པ་ཛ་ཏེ་མི་དགེར་བརྗོད། །ཏད་ཀཱལ་ལྔ་པ་དགུ་པ་རྣམས། །ཟུར་གསུམ་ཞེས་བྱར་ཡོངས་སུ་གྲགས། །བར་དུ་གཉིས་ནི་གནས་པ་ལ། །གྲུ་བཞིའི་མཚན་ཉིད་ཤེས་པར་བྱ། །གསུམ་ནི་བར་དུ་གནས་གྱུར་པ། །ཟུར་གསུམ་དུ་ཡང་བརྗོད་པ་ཡིན། །ལྔ་པ་དང་
ནི་བདུན་པ་དག །དེ་བཞིན་གྲིབ་མར་ཡོངས་སུ་གྲགས། །བརྒྱད་པ་ཉིན་ངོས་ཞེས་བྱ་སྟེ། །དེ་བཞིན་བཅུ་གཉིས་མཚམས་ཞེས་བྱ། །བཞི་དང་བརྒྱད་པ་ལ་གནས་ཏེ། །བཞི་པ་ཞེས་བྱར་ཡོངས་སུ་གྲགས། །གཉིས་པ་དང་ནི་ལྔ་པ་དང་། །བརྒྱད་དང་བཅུ་གཅིག་མཐར་ཐུག་པ། །
དུས་སྦྱོར་ཏད་ཀཱལ་གནས་པ་ཡི། །ཐུར་སྨད་ཅེས་ནི་ཡོངས་སུ་གྲགས། །གསུམ་དྲུག་དགུ་པ་བཅུ་གཉིས་པ། །དེ་བཞིན་གྱེན་སྟོད་ཅེས་སྦྱར་སྨྲ། །གསུམ་པ་དང་ནི་བཅུ་པ་ལ། །རྐང་པ་གཅིག་ནི་མཐོང་བར་དྲན། །དེ་བཞིན་ལྔ་དང་དགུ་པ་ལ། །རྐང་པ་གཉིས་ནི་མཐོང་ཞེས་གྲགས། །
བཞི་པ་དང་ནི་བརྒྱད་པ་ལ། །རྐང་པ་གསུམ་མཐོང་བདེ་སྟེར་མ། །བདུན་པའི་གནས་སུ་གཞག་པ་ལ། །བཞི་པ་ཡོངས་སུ་རྫོགས་པར་མཐོང་། །མ་ལུས་པ་ནི་གནས་པ་ལ། །གཟའ་ཡི་འབྲས་བུ་བསྐྱེད་པ་ཡིན། །གསུམ་དང་བཅུ་ལ་སྤེན་པ་གནས། །ཡོངས་སུ་རྫོགས་པ་སྟེར་བ་ཡིན། །
ལྔ་དང་དགུ་ལ་ཕུར་བུ་གནས། །བཞི་དང་བརྒྱད་ལ་མིག་དམར་དང་། །བདུན་པ་ལ་ནི་ལྷག་མ་ཞེས། །གཟའ་མཆོག་རྫོགས་པར་སྟེར་བ་ཡིན། །རང་གི་སྐྱེ་བའི་དུས་སྦྱོར་ལ། །བདུན་པའི་གནས་སུ་གཞག་པ་ལ། །དུས་མེ་འཆར་ཚེ་འཆི་བར་གྲགས། །ཉི་མས་ནད་འབྱུང་མིག་དམར་དགྲ། །

203-1-58a

སྤེན་པས་ནོར་ནི་ཉམས་པར་འགྱུར། །ཀེ་ཏུས་དོན་ཉམས་ལྷས་མཆོད་མ། །སྒྲ་གཅན་ཤར་ན་དགྲ་ཡང་ཕམ། །ཟླ་བས་རང་རྒྱལ་གཟའ་ལྷག་རྩོད། །པ་བ་སངས་ཀྱིས་དོན་རྣམས་འགྲུབ། །ཕུར་བུས་སྔགས་རྣམས་འགྲུབ་པར་སྟོན། །མདོར་ན་སྐྱེ་གནས་
བདུན་པ་ལ། །བཟང་ངན་ཞི་དྲག་གནས་པས་ཤེས། །དེ་ལྟར་རཱ་ཤིའི་དཀྱིལ་འཁོར་གྱི། །ཆོ་གའི་བྱེ་བྲག་བདག་གིས་བཤད། །གཡོ་བ་ཟུང་ནི་འཕྱང་བ་ཁྱོད། །ལེགས་པར་རྟོགས་སམ་འདོད་དགའ་མ། །བྲམ་ཟེ་རྣམ་པར་དག་པའི་ཚོགས། །ཕུང་པོ་གསུམ་མཁྱེན་ཐུབ་དབང་པོ། །སྒྲ་
ཡི་བསྟན་བཅོས་དོན་སྤངས་པ། །ཀླགས་པས་ཆོག་པ་དོན་གྲུབ་པ། །ཉན་པར་འདུས་པའི་སེམས་དགེ་མ། །བླ་མ་དམ་པའི་རིམ་པ་ཡིས། །མཆོག་ཏུ་གསང་བའི་བསྟན་བཅོས་འདི། །གཟི་བརྗིད་དགའ་བ་མ་ལུས་མཐོང་། །འདི་ནི་གཡུལ་ལས་རྣམ་པར་རྒྱལ་བ་ཞེས་བྱ་བའི་རྒྱུད་ལས། དུས་
སྦྱོར་གྱི་གཟའི་དུམ་བུ་དྲུག་གི་དོན་རབ་ཏུ་ཕྱེ་བ་ཆེན་པོ་སྟེ་ལེའུ་གཉིས་པའོ།།      །།ལྷ་མོས་གསོལ་པ། སྐལ་ལྡན་ལྷ་ཡི་ལྷ་མཆོག་གཙོ། །རི་བོང་ཅན་གྱིས་དབུ་ལ་བརྒྱན། །མཆོག་ཏུ་དགེ་བ་ཐམས་ཅད་མཁྱེན། །ཇི་ལྟར་དུས་སྦྱོར་དགེ་མི་དགེ། །བཞི་དང་ཆོ་ག་སྔར་གསུངས་
ནས། །ལྷ་ཆེན་རྫུ་འཕྲུལ་མངའ་བ་ཁྱེད། །དུས་སྦྱོར་ཕྲིན་ལས་ཐམས་ཅད་ནི། །མི་གསུང་བཞུགས་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དཀའ་ཟློག་ལྷ་མོ་མཆོག་ཏུ་ནི། །གསང་བ་བཤད་ཀྱིས་གྲོགས་མོ་ཉོན། །བསམ་པ་སྔོན་དུ་ལེགས་བཞག་སྟེ། །བྱེ་
བྲག་སོ་སོར་ལེགས་བསམས་ཏེ། །སྔ་དྲོའི་དུས་སུ་སེམས་དགེ་བས། །མངོན་སུམ་དྲན་པ་སོར་བཞག་ནས། །མདུན་བསྡད་གདོང་ནི་མངོན་ཕྱོགས་ཏེ། །ཡིད་ཆེས་ཐེ་ཚོམ་མེད་དགའ་བས། །གུས་པས་ཕྱག་ནི་བཙལ་བྱས་ཏེ། །ཡོན་ཕུལ་ནས་ནི་མཉེས་པར་བྱས། །དེ་ལྟར་སྔོན་དུ་བྱས་
ནས་ནི། །ལངས་དང་རྒྱབ་ཀྱིས་ཕྱོགས་པ་མིན། །གཡས་དང་གཡོན་ནས་མ་ཡིན་པར། །མདུན་དུ་དམའ་སར་བསྡད་ནས་ནི། །དགོས་པའི་བསམ་པ་སྔོན་བཏང་སྟེ། །དོན་གསལ་ཚིག་གིས་དྲི་བར་བྱ། །སློབ་དཔོན་མཁས་ཤིང་བྱེ་བྲག་ཤེས། །དགའ་ཞིང་བློ་གསལ་ཡིད་གཞུངས་

203-1-58b

པས། །ཏད་ཀཱལ་དུས་སྦྱོར་རབ་ཤེས་པས། །དུམ་བུ་དྲུག་གི་བྱེ་བྲག་མཐོང་། །གཟའ་རྣམས་ཁྱིམ་དང་རྒྱུ་སྐར་ལ། །གནས་པའི་ལོངས་སྤྱོད་ཤེས་པ་དང་། །གཟའ་སྐར་ཚེས་དང་བྱེད་སྦྱོར་སོགས། །རྣམ་པར་དག་པ་དེས་བྱས་ཏེ། །དྲི་བར་བྱེད་པའི་ཚིག་ཚོགས་ཀུན། །ཁོང་དུ་ཆུད་
ནས་སྨྲ་བར་བྱ། །ཟུར་གསུམ་པ་དང་བསོད་ནམས་ཤར། །ཨུད་པ་ཙ་ལ་སྡིག་ཅན་གནས། །འདྲི་བྱེད་རྙེད་པ་འབྱུང་ཞེས་བསྟན། །དེ་ལས་བཟློག་ན་རྙེད་པ་མེད། །ཏད་ཀཱལ་དུས་སྦྱོར་ཕུར་བུ་གནས། །བཞི་དང་བདུན་ལ་ཟླ་བ་གནས། །བཅུ་པར་ཉི་མ་སྣང་གྱུར་ན། །སྨྲས་མ་ཐག་ཏུ་
དོན་རྣམས་འགྲུབ། །དང་པོ་དང་ནི་གཉིས་པ་ལ། །བཅུ་དང་བཅུ་གཅིག་བསོད་ནམས་ཡོད། །དེ་མ་ཐག་ཏུ་དོན་རྣམས་ནི། །དེ་ལྟར་འགྲུབ་པར་བསྟན་པ་ཡིན། །ཏད་ཀཱལ་དུས་སྦྱོར་གཡོ་བ་ལ། །སྡིག་ཅན་གཟའ་དང་ལྷན་ཅིག་གནས། །དོན་རྣམས་མེད་ཅིང་རྣམ་པར་འཇོམས། །
སྔར་ནས་མེད་པའི་སྡུག་བསྔལ་འབྱུང་། །ཏད་ཀཱལ་དུས་སྦྱོར་བདག་ཡོད་པ། །དེ་ཡི་གྲོགས་པོ་སྣང་ཡང་བདེ། །བཞི་པ་ལ་ནི་ཡོད་ན་ཡང་། །ཐེ་ཚོམ་མེད་པར་བདེ་བར་སྟོན། །བཅུ་གཅིག་པ་དང་བརྒྱད་པ་ལ། །སྡིག་ཅན་ཉེ་བར་གནས་པ་དང་། །བཞི་པ་ལ་ཡང་སྡིག་ཅན་གནས། །འདྲ་
བྱེད་སྡུག་བསྔལ་འབྱུང་བར་དྲན། །དང་པོ་གཉིས་པ་བཞི་པ་དང་། །བདུན་བརྒྱད་བཅུ་ལ་བསོད་ནམས་ཡོད། །འདྲི་བྱེད་ཚེ་རིང་ལོ་མང་ཐུབ། །གྲུ་བཞི་ལ་ཡང་དེ་བཞིན་ནོ། །ཏད་ཀཱ་ལ་ཡི་དུས་སྦྱོར་དང་། །བཞི་དང་བརྒྱད་ལ་སྡིག་པ་གནས། །དགྲ་རྣམས་ཀྱིས་འཚེ་དོན་ཉམས་ཤིང་། །འདྲི་
བྱེད་འཆི་བར་འགྱུར་བ་ཡིན། །ཏད་ཀཱལ་དུས་སྦྱོར་སྡིག་གཟའ་ཡོད། །ལུས་ལ་ནད་རྣམས་འབྱུང་བར་འགྱུར། །བཞི་པར་སྡིག་ཅན་ཡོད་པ་ན། །གཉེན་བཤེས་རྣམས་ནི་འཐབ་རྩོད་འཁྲུག །དེ་བཞིན་བདུན་པར་སྡིག་ཅན་ཡོད། །ཆུང་མ་འོང་ཚད་འཆི་བར་སྟོན། །བཅུ་པ་སྡིག་ཅན་
རྟག་པར་གནས། །བྱ་བའི་ལས་རྣམས་འགྲུབ་མི་འགྱུར། །དེ་ལས་བཟློག་སྟེ་བསོད་ནམས་ཡོད། །རིམ་པ་བཞིན་དུ་དགེ་བ་ཡིན། །གྲུ་བཞི་ཚང་བར་དགེ་བ་ཅན། །འདྲི་བྱེད་གྲགས་དང་སྙན་པ་འབྱུང་། །དང་པོ་ལྔ་པ་བདུན་དང་བརྒྱད། །དེ་ལ་བསོད་ནམས་སྣང་འགྱུར་ཞིང་། །

203-1-59a

གསུམ་དྲུག་བཅུ་དང་བཅུ་གཅིག་ལ། །ཟླ་ནས་ནད་ཅན་མྱུར་དུ་གྲོལ། །དང་པོ་ལྔ་དང་བདུན་བརྒྱད་ལ། །སྡིག་ཅན་གཟའ་དང་ཟླ་བ་འཛོམ། །དྲི་བྱེད་ནད་ནི་འབྱུང་བ་སྟེ། །ནད་ཅན་ཡིན་ན་འཆི་བར་འགྱུར། །དང་པོ་ལྔ་བདུན་བརྒྱད་ལ་སྡིག །དང་པོ་གཉིས་བཞི་
ལྔ་བདུན་བརྒྱད། །བཅུ་གཉིས་ཟླ་གནས་དེ་བཞིན་ནོ། །གསུམ་ལ་སོགས་པ་རོ་མིག་རྣམས། །ཁྱིམ་དུ་གནས་ཤིང་འཇུག་པ་སྟེ། །དགུ་པ་ལ་སོགས་དེ་བཞིན་དུ། །ཡུལ་ལམ་ཁྱིམ་ནས་འཐོན་པར་གྲགས། །འཇུག་ལ་ཞི་བའི་ལྷ་རྣམས་འབྱུང་། །འདྲི་བར་བྱེད་པ་རྒྱལ་བར་བཤད། །
འཐོན་ལ་ཞི་བའི་གཟའ་རྣམས་ཚང་། །ཕམ་པ་རྒྱལ་བར་བྱེད་པ་ཡིན། །འཇུག་ལ་སྡིག་ཅན་གཟའ་རྣམས་ཤར། །གང་ཞིག་འདྲི་བ་ཕམ་པ་སྟེ། །འཐོན་ལ་དྲག་པོའི་གཟའ་རྣམས་འབྱུང་། རྒྱལ་བ་ཕམ་པར་འགྱུར་བ་ཡིན། །ཞི་དྲག་གཉིས་ཀ་ཕྱེད་མར་གནས། །ཕན་ཚུན་འཁྲུག་པ་
འདུམ་པར་བརྗོད། །རྒྱལ་བ་ཞི་བའི་གཟའ་ཡོད་ན། །ཤིན་ཏུ་དགེ་སྟེ་རྒྱལ་བར་ངེས། །ཕམ་ལ་ཞི་བའི་གཟའ་ཡོད་ན། །ཐོག་མར་ཕམ་ནས་དེ་ནས་རྒྱལ། །རྒྱལ་ལ་སྡིག་ཅན་ཡོད་པ་ན། །དང་པོ་རྒྱལ་ནས་དེ་ནས་ཕམ། །འཁྲུག་པའི་གྲོས་བྱེད་དང་པོ་ནི། །ཕམ་པ་ཞེས་ནི་བྱ་བ་སྟེ། །
ཕྱི་ནས་གྲོས་བྱས་རྒྱལ་བ་ཞེས། །བདེ་སྟེར་ལྷ་མོས་ཤེས་པར་གྱིས། །དང་པོའི་བདུན་པར་བསོད་ནམས་ཡོད། །གསུམ་དང་དྲུག་དང་བཅུ་པ་དང་། །བཅུ་གཅིག་པ་ལ་སྡིག་པ་གནས། །དེ་ཚེ་འདྲི་བྱེད་སྐྱེས་བུ་རྒྱལ། །གཟའ་ལྷག་ཕུར་བུ་པ་སངས་གསུམ། །བཅུ་པ་ལ་ནི་ཤར་བ་ན། །དཔུང་
གི་ཚོགས་ནི་རྣམ་པར་རྒྱལ། །ཐམས་ཅད་འཇོམ་མམ་རེ་རེའང་བཟང་། །ལུག་གླང་སེང་གེ་གཞུ་རྣམས་ནི། །ཏད་ཀཱལ་དུས་སྦྱོར་ལ་འཆར་ཞིང་། །དེ་ལ་སྡིག་ཅན་ཡོད་པ་ན། །དགྲ་བོས་བདག་ཉིད་འཆི་བར་འགྱུར། །བཞི་པར་ཡང་ནི་དེ་འཆར་ཚེ། །དེ་དང་འདྲ་སྟེ་དགྲ་བོས་འཆིང་། །ཏད་ཀཱལ་
དུས་སྦྱོར་ལ་སོགས་པ། །དུས་སྦྱོར་གནས་ནི་རེ་རེ་ལ། །གཟའ་ནི་གཉིས་གསུམ་བཞི་ལ་སོགས། །འཛོམ་པར་འགྱུར་བ་ལེགས་པར་བརྟག །ལྔ་དང་དགུ་པར་སྡིག་ཅན་ཡོད། །དེ་ཚེ་དགྲ་ནི་འོངས་གྱུར་ཏམ། །ཆོམ་རྐུན་ལ་སོགས་འོང་བ་ན། །བདག་གིས་ཕམ་པར་བྱས་ཏེ་སོང་། །ཉི་མ་

203-1-59b

མིག་དམར་སྤེན་པ་གསུམ། །བཞི་ཡི་གནས་སུ་འཛོམ་པ་ན། །ལམ་དུ་ཞུགས་པའི་གཏམ་ཐོས་ཀྱང་། །དགྲ་བོ་འབྱུང་བར་ག་ལ་འགྱུར། །གཟའ་ལྷག་ཕུར་བུ་པ་སངས་གསུམ། །སྔར་བཞིན་བཞི་པར་འཛོམ་གྱུར་ན། །དོགས་པ་མེད་ཀྱང་དགྲ་བོ་རྣམས། །འོང་སྟེ་དགྲ་ཉིད་འཇོམས་
པར་འགྱུར། །གང་ཚེ་གཡོ་བའི་ཏད་ཀཱ་ལ། །ཉི་མ་དང་ནི་ཕུར་པ་ཤར། །དགྲ་བོ་ལམ་དུ་ཞུགས་ཏེ་འོང་། །དེ་ཚེ་བཟློག་པར་ཐེ་ཚོམ་མེད། །བརྟན་པའི་ཏད་ཀཱལ་དུས་སྦྱོར་ལ། །ཉི་མ་ཕུར་བུ་འཛོམ་སྟེ་གནས། །ཕ་རོལ་དམག་གི་དཔུང་ཚོགས་ཀྱང་། །ལམ་དུ་མི་འཇུག་དགེ་བ་ཡིན། །ཉི་
མ་གཟའ་ལྷག་ཕུར་བུ་དཀར། །གཡོ་བའི་དུས་སྦྱོར་ལ་འཛོམ་ན། །རེ་རེའམ་ཐམས་ཅད་གང་ཡིན་པ། །འདྲི་བ་དོན་རྙེད་དགྲ་ལས་རྒྱལ། །ཏད་ཀཱལ་དུས་སྦྱོར་བསྟན་པ་ལ། །ཕུར་བུ་སྤེན་པ་མཉམ་པར་གནས། །དགྲ་རྣམས་འབྱུང་བར་འགྱུར་བ་རྣམས། །གལ་ཏེ་མ་འོངས་པའང་སྲིད། །
ཏད་ཀཱལ་དུས་ནས་བགྲངས་པ་ཡི། །གཉིས་ལ་གསུམ་པ་ཕུར་པ་ལ། །པ་སངས་ཤར་ན་ཕ་རོལ་དགྲ། །འོང་སྟེ་རང་ཉིད་ཕམ་པར་འགྱུར། །ལུག་སེང་སྡིག་པའི་དུས་སྦྱོར་ལ། །ཉི་མ་མིག་དམར་མཐོང་སར་ཡོད། །བརྐུས་སམ་སྦས་སམ་སེམས་པ་ནི། །བཞུ་དང་མི་བཞུའི་ཁམས་
ལས་གྲུབ། །བུ་མོ་ཆུ་སྲིན་འཁྲིག་བུམ་ལ། །གཟའ་ལྷག་སྤེན་པ་འཛོམ་པའམ། །རེ་རེ་མཐོང་ན་རྩ་བའི་རིགས། །ཁུ་ཚུར་རམ་ནི་སྟོར་བ་སོགས། །སེམས་སོགས་ཚིག་ཏུ་མ་བརྗོད་རྣམས། །དེ་ལས་གྲུབ་པོ་མཐོང་དགའ་མ། །སྲང་གཞུ་ཉ་གླང་ཀར་ཀ་ཊར། །ཟླ་བ་ཕུར་བུ་པ་བ་སངས། །
འཛོམ་མམ་རེ་རེ་མིག་གིས་མཐོང་། །མ་སྨྲས་སྲོག་ཆགས་རིགས་ཡིན་ཀྱེ། །མ་བརྗོད་ལྐོག་གྱུར་ཁ་དོག་ནི། །གཟའ་ཡི་མདོག་དང་བསྟུན་པ་ཡིན། །བརྟན་པའི་ཁྱིམ་དང་དགུ་ཆའི་ཁྱིམ། །གཅིག་པར་གྱུར་པ་དེ་ཡི་ཚེ། །སྟོར་བའི་རྫས་དང་ལོངས་སྤྱོད་རྣམས། །རང་མའི་ཁྱེར་བར་ཐེ་ཚོམ་
མེད། །ཏད་ཀཱལ་དུས་སྦྱོར་དགུ་ཆ་ཡིས། །གཉིས་ཀ་གཡོ་བར་གྱུར་པ་ན། །རྐུན་མོ་ཕྱི་ཡི་མི་ཡིན་ཏེ། །ནོར་དེ་གཞན་དུ་ཁྱེར་ནས་སོང་། །ཏད་ཀཱལ་ཁྱིམ་དང་ཨ་ས་ཁྱིམ། །གཉིས་ཀའི་རང་བཞིན་ཡིན་པའི་ཚེ། །ཕྱི་ནང་གཉིས་ཀར་གཏོགས་པའི་མིས། །ནོར་དེ་ཕྱི་ནང་མཚམས་སུ་སྦས། །

203-1-60a

གྲུ་བཞི་དང་ནི་གཉིས་པ་དང་། །ཨུ་པ་ཙ་ལ་བསོད་ནམས་ཡོད། །འདྲི་བྱེད་སྟོར་བ་རྙེད་འགྱུར་ཏེ། །དེ་ལས་བཟློག་ན་མི་རྙེད་དོ། །ཟླ་བ་དཀར་ཆར་གྱུར་པ་དང་། །ཏད་ཀཱལ་དུས་སྦྱོར་གཟའ་ལྷག་དང་། །ཕུར་བུ་པ་སངས་སྣང་གྱུར་ན། །སྟོར་བའི་ནོར་ནི་རྙེད་པ་ཡིན། །དེ་
ལྟར་རྐུ་བར་བྱེད་པ་ཡི། །སྐྱེས་བུའི་རིགས་དང་ཁ་དོག་དང་། །ལས་དང་ནུས་པ་ལ་སོགས་པ། །དུས་སྦྱོར་བདག་པོའི་གཟའ་ཡིས་ཤེས། །དགུ་ཆའི་ལོངས་སྤྱོད་བརྩམས་པ་ཡི། །ཐོབ་པ་སྔོན་ཆད་སོང་བའི་གྲངས། །ལྷག་མ་ཡིས་ནི་མ་འོངས་པའི། །གྲངས་དེས་རྙེད་པའི་དུས་
ཚོད་ཤེས། །དགུ་ཆའི་བདག་པོའི་གཟའ་ལ་དྲིས། །ཟླ་བ་ཆུ་ཚོད་ལ་རྩིས་ཏེ། །དེ་ཡི་གྲངས་ཀྱིས་རྙེད་པ་ཡིན། །མིག་དམར་ཞག་གྲངས་ཀྱིས་འཛིན་ཏེ། །དགུ་ཆའི་བཅོ་ལྔ་ཟླ་ཕྱེད་ལ། །སུམ་ཅུ་ཟླ་བ་གཅིག་ན་རྙེད། །གཟའ་ལྷག་ཟླ་བ་གཉིས་ལ་བརྩི། །སུམ་ཅུ་བྱུང་ན་ཟླ་བ་གཉིས། །བཅོ་ལྔ་
ཟླ་བ་གཅིག་ན་རྙེད། །ཉི་མ་ཟླ་བ་དྲུག་ཡིན་པས། །སུམ་ཅུ་ཚང་ན་ཟླ་བ་དྲུག །བཅོ་ལྔས་ཟླ་གསུམ་དག་ན་རྙེད། །ཕུར་བུ་ཟླ་བ་དགུར་འགྱུར་བས། །སུམ་ཅུ་ཚང་ན་ཟླ་དགུ་སྟེ། །བཅོ་ལྔ་ཟླ་བ་ཕྱེད་དང་ལྔ། །པ་སངས་ཟླ་བ་ཕྱེད་ན་བྱེད། །བཅོ་ལྔ་བྱུང་ན་ཕྱེད་དང་བརྒྱད། །སྤེན་པ་ལོ་ཡི་བདག་ཉིད་
པས། །སུམ་ཅུ་ཚང་ན་ལོ་གཅིག་སྟེ། །བཅོ་ལྔ་ཟླ་བ་དྲུག་ན་རྙེད། །དེ་ཡི་བར་གྱི་གྲངས་ཀྱི་དུས། །མཁས་པས་ཞིབ་ཏུ་དཔྱད་པར་བྱ། །ཏད་ཀཱ་ལ་ཡི་དུས་སྦྱོར་རམ། །དགུ་པ་ཡི་ནི་དུམ་བུ་ཡི། །བདག་པོའི་གཟའ་ནི་བལྟས་ནས་ཀྱང་། །གཞན་ལ་བཤད་བྱ་མཛེས་དགའ་མ། །གལ་ཏེ་ཉི་མ་
ཡོད་པ་ན། །རྒྱལ་པོ་དང་ནི་མེ་དང་ཁྲག །ཉི་མ་ཤར་དང་མེ་ཏོག་གི། །དམར་པོའི་རིགས་རྣམས་རྨི་བ་ཡིན། །ཟླ་བ་བུད་མེད་མེ་ཏོག་དང་། །རིན་པོ་ཆེ་དང་སྣ་ཚོགས་རྨི། །ས་ལེ་སྦྲམ་ལ་སོགས་པ་ཡི། །དཀར་པོའི་རིགས་རྣམས་རྨི་བ་ཡིན། །མིག་དམར་བྱི་རུ་ཁྲག་དང་ནི། །ནམ་མཁའ་ལ་ནི་འཕུར་ལ་
སོགས། །ཏད་ཀཱ་ལ་ཡི་དུས་སྦྱོར་ལ། །མིག་དམར་སྣང་ན་རྨི་བ་ཡིན། །གཟའ་ལྷག་དག་ལ་རྨི་ལམ་ནི། །ཆོས་བཤད་པ་དང་ཉན་པ་རྨི། །ཕུར་པས་རི་མོ་འབྲི་བ་དང་། །ཀློག་དང་རིག་པ་སྣ་ཚོགས་དང་། །རྟ་དང་བྱིས་པ་རྩེ་བ་དང་། །པུ་ཏི་ལྷ་དང་གཉེན་མཐོང་རྨི། །པ་སངས་ཆུ་ལ་རྒལ་བ་

203-1-60b

དང་། །གར་དང་རྩེ་དང་འཁྲུག་པ་རྨི། །ཁྱིམ་དང་གཟའ་ནི་སོ་སོ་སྟེ། །ཁྱིམ་བདག་མིན་པའི་གཟའ་ཤར་ན། །རྨི་ལམ་འདྲེན་མ་འབྱུང་བའམ། །ཡང་ན་རྨི་ལམ་མི་ཤེས་སོ། །ཁྱིམ་བདག་གཟའ་ཡི་དགྲར་གྱུར་པའི། །གཟའ་རྣམས་ཤར་ན་ངན་པ་རྨི། །ཉི་མ་གནས་པ་ནས་བགྲངས་པའི། །
བདུན་ན་ཟླ་བ་ཡོད་པའམ། །ཟླ་གནས་བདུན་ལ་ཉི་མ་ཡོད། །དེ་ཚེ་འདྲི་ན་རྨི་ལམ་ཡོད། །དེ་ལས་གཞན་པ་འདྲི་བ་ལ། །རྨི་ལམ་མེད་པར་ཤེས་པར་བྱ། །རྨི་ལམ་རྨི་བའི་དུས་བསྟན་པ། །ཏད་ཀཱལ་ཆ་ཤས་སུམ་ཅུ་ཡི། །རང་བཞིན་ཡིན་པས་དེ་ལ་བལྟ། །ཆ་ཤས་བཅུ་ཤར་སུམ་ཆ་ན། །བཅོ་
ལྔ་ཤར་ན་ནམ་ཕྱེད་ན། །སུམ་ཅུ་ཡོད་ན་ཐོ་རངས་ཏེ། །དེ་ལ་སོགས་པའི་བྱེ་བྲག་རྣམས། །མཁས་པས་ཞིབ་ཏུ་བརྟག་པར་བྱ། །འཕོ་བའི་རྒྱུ་སྐར་ཚེས་བསྲེས་ལ། །སྤྱོད་པའི་གཟའ་ཡིས་ལེགས་པར་བསྒྱུར། །མིང་ཡིག་དང་པོའི་གསལ་བྱེད་ནི། །རིམ་པས་བསྲེས་ལ་གསུམ་གྱིས་བགོ །
དེ་ཡི་ལྷག་མས་དཀོན་མོད་དང་། །རིན་གྱི་བྱེ་བྲག་སྟོན་པར་བྱེད། །ཟང་དཀོན་རིམས་མང་རི་བོ་ཅན། །དབུ་མར་བརྗོད་པ་གཉིས་ལྷག་པ། །མ་ལུས་པ་ལ་རིམས་མེད་མོད། །ཟླ་རེ་བཞིན་དུ་བརྟགས་ཏེ་སྨྲ། །སྐྱེས་བུ་ཇི་སྙེད་སྣང་གྱུར་པ། །མི་རྣམས་རྒན་པའི་རིམ་པ་ཡི། །དབྱངས་དང་
གསལ་བྱེད་ཇི་སྙེད་པ། །རེ་རེ་བྲི་ལ་གསལ་བྱེད་སྡོམ། །གཉིས་ཀྱིས་བསྒྱུར་ལ་དབྱངས་ཀྱིས་དབྲི། །སྐྱེས་བུས་བགོས་ལྷག་རྒན་པོ་ནས། །རིམ་པ་བཞིན་ནོ་གངས་རིའི་བདག །བློ་གསལ་ཡིད་གཞུངས་ལས་ཤེས་བྱ། །སླར་ཡང་གཞན་ཡང་གསལ་བྱེད་རྣམས། །རིམ་པས་བགྲངས་ལ་རེ་རེ་
བྲི། །དེ་ལ་སྔར་གྱི་ཆོ་ག་ཡིས། །ཆོམ་རྐུན་ཐེ་ཚོམ་མེད་པར་ཤེས། །སྐྱེས་པ་བུད་མེད་ལྷན་ཅིག་ལས། །ལུས་དང་ཡན་ལག་སོ་སོར་ཕྱེ། །ལུས་ནི་རྒྱ་མཚོས་བསྒྱུར་བྱས་ཏེ། །ཡན་ལག་མེ་ཡིས་བསྒྱུར་བར་བྱ། །གཅིག་ཏུ་བསྡོམས་ལ་གསུམ་གྱིས་བགོ། །ཟུང་ནི་བུ་མོ་གཅིག་མཁའ་བུ། །
གང་ཚེ་བུད་མེད་འོངས་པ་ཡིས། །དྲིས་པའི་དང་པོའི་གསལ་བྱེད་གསུམ། །སྡེ་ཚན་བགྲང་བསྡམ་མིག་གིས་ཕྱེ། །ཕོ་མོ་ཟླ་བ་སྟོང་པས་ཤེས། །གསལ་བྱེད་རིམ་པས་བླངས་པ་གསུམ། །སྡོམ་ལ་བཅུས་བསྒྱུར་དགུས་ཐོབ་པ། །འདས་པའི་ཟླ་བ་ཤེས་པར་བྱ། །སྦྲུམ་མའི་ཟླ་བའོ་དགའ་བྱེད་མ། །

203-1-61a

དེ་ལྟར་ངེས་པ་མ་མཐོང་བས། །ཡང་ནས་ཡང་དུ་འདྲི་བ་ལ། །སྔར་གྱིས་ཐོབ་པས་དེ་དང་ནི། །ལྷག་མ་བསྲེས་ལ་དགུ་ཡིས་ཕྱེ། །ལྷག་མས་ཟླ་བ་རྟོགས་པ་སྟེ། །ཐིག་ལེ་ཤར་ན་ཟླ་བ་བཅུ། །ཡང་ནི་འདྲི་བར་བྱེད་པ་ལ། །རྙིད་དང་ལྷག་མ་བསྡོམས་ལ་བརྟག །གཞན་
ཡང་སྦྲུམ་མའི་གསལ་བྱེད་ནི། །དང་པོ་མི་མཉམ་བུ་སྐྱེ་ཞིང་། །གཉིས་དང་བཞི་སོགས་བུ་མོར་འགྱུར། །ཐ་མ་ལྔ་ལ་མ་ནིང་འགྱུར། །བུད་མེད་མིང་གི་སྐར་མའི་གྲངས། །དེ་བཞིན་ཚེས་དང་གཟའ་དང་ནི། །དྲི་ཚིག་དང་པོའི་ཡི་གེའི་གྲངས། །བསྲེས་ལ་བདུན་གྱིས་བགོས་པ་ཡི། །ལྷག་
མ་མཉམ་ན་བུ་མོ་སྟེ། །མི་མཉམ་པ་ནི་བུ་རུ་མཐོང་། །བུད་མེད་སྦྲུམ་མར་གྱུར་པ་ཡི། །མིང་གི་དབྱངས་རྣམས་ཇི་སྙེད་པ། །གསང་བའི་ཚད་མ་གང་ཡོད་བསྲེ། །ཐུབ་པས་བགོས་པས་རྙེད་པ་རྣམས། །ལྔ་ཡིས་བསྒྱུར་ལ་ལྷག་མ་བསྲེ། །དེ་ལ་གསུམ་གྱིས་བགོས་ཐོབ་པ། །རི་བོང་ཅན་ཉིད་
མིག་དང་མེ། །ལྷ་མི་ས་འོག་རིམ་བཞིན་འོངས། །ཡང་ན་དྲུག་གིས་བགོས་པའི་ལྷག །གཅིག་གཉིས་གསུམ་བཞི་ལྔ་དང་སྟོང་། །ལྷ་དང་ལྷ་མིན་མི་དུད་འགྲོ། །ཡི་དྭགས་དམྱལ་བ་རིམ་བཞིན་ཡིན། །གསལ་བྱེད་རིམ་ཅན་དང་པོ་གསུམ། །བསྲེས་ལ་གསུམ་གྱིས་བགོས་པ་ལས། །ལྷག་
མ་གཅིག་གིས་དོན་རྙེད་ཅིང་། །གཉིས་ལུས་དབུ་མར་བསྟན་པ་སྟེ། །ལྷག་མ་མེད་ན་འདྲི་བྱེད་ཀྱི། །དོན་ནི་ཐེ་ཚོམ་མེད་པར་ཉམས། །དེ་ལྟར་བཟང་ངན་བརྟགས་ནས་ནི། །ཡིད་ལ་སེམས་པ་ཤེས་པར་བྱ། །སྐྱེས་པ་བུད་མེད་གཉིས་ཀྱི་ནི། །མིང་གི་ཡི་གེ་ཇི་སྙེད་པ། །ཨ་སོགས་དབྱངས་སུ་ཤེས་
བྱ་སྟེ། །ཀ་སོགས་གསལ་བྱེད་ལྷ་དགའ་མ། །མིང་གི་དབྱངས་ཀྱི་གྲངས་རྣམས་དང་། །མིང་གི་གསལ་བྱེད་ཇི་སྙེད་པ། །སོ་སོར་ཕྱེ་ལ་གཅིག་ཏུ་བསྲེ། །དེ་ལ་འཇིག་རྟེན་གྱིས་ཆེ་བས། །ལྷག་མ་གཟུགས་དང་སྟོང་པར་ཤར། །སྐྱེས་པ་འཆི་བདག་གིས་འཛིན་ཏེ། །ཇི་སྲིད་གཉིས་ནི་སྣང་
གྱུར་ན། །མི་མོ་དེ་བཞིན་སྲོག་དང་བྲལ། །འདི་ནི་ཁྱོ་ཤུག་ཆོ་ག་སྟེ། །གཞན་དུ་མ་བཤད་རི་སྲས་མོ། །གྱེན་དུ་རེ་ཁཱ་དགུ་པ་ལ། །འཕྲེད་ལ་རེ་ཁཱ་གསུམ་བྲིས་ལ། །ཨ་ཀ་ཙ་ཊ་ཏ་པ་ཡ། །ཤ་རྣམས་སྟེང་དགོད་འོག་མ་ལ། །ཀླུ་མདའ་རོ་དང་མཚོ་དང་ནི། །ཟླ་མེ་མིག་རིམ་བཞིན་དུ་

203-1-61b

དགོད། །མིང་གི་ཡི་གེ་ཇི་སྙེད་པ། །འོག་མས་སྟེང་ལ་བསྒྱུར་བར་བྱ། །དབྱངས་དང་གསལ་བྱེད་སོ་སོར་བསྡོམ། །མཚོ་དང་མིག་གིས་རིམ་བཞིན་བསྒྱུར། །གཅིག་ཏུ་བསྡོམས་ལ་མེ་ཡིས་ཕྱེ། །ལྷག་མར་སྟོང་པ་རི་བོང་ཅན། །སྐྱེས་པ་གཤིན་རྗེས་སྔོན་ལ་ཁྲིད། །གང་ཚེ་
ཟུང་དུ་ལྷག་པ་ན། །དེ་ཚེ་བུད་མེད་སྔོན་ལ་འགྲོ། །མཛེས་དགའ་ཁྱོ་ཤུག་སྦྱོར་བ་སྟེ། །གཞན་དུ་ངས་ནི་མ་བཤད་དོ། །གཤིན་རྗེའི་གནས་འགྲོ་མིང་ཡིག་གི། །དང་པོར་དཀར་ཕྱོགས་ཡི་གེ་སྣང་། །ནག་པོའི་ཕྱོགས་ལ་འཆི་བ་སྟེ། །དང་པོར་ནག་ཕྱོགས་ཡི་གེ་སྣང་། །དཀར་པོའི་ཕྱོགས་ལ་
དུས་ལས་འདའ། །ཁྱོ་ཤུག་ཡིན་ཏེ་གཞན་ལས་མིན། །མིང་གི་གསལ་བྱེད་དང་པོ་ལ། །མཉམ་དང་མི་མཉམ་ཡི་གེ་སྣང་། །གཡོན་དུ་གསལ་དག་རིམ་པ་བཞིན། །མིག་གི་དང་པོ་འགྲིབ་པར་གྲགས། །རང་གི་སྐྱེས་པའི་སྐར་མ་ཡིས། །འདོད་པའི་དོན་ཀུན་སྒྲུབ་བྱེད་ཅིང་། །དགེ་དང་མི་
དགེའི་འབྲས་བུ་ཀུན། །འདི་ཉིད་གཅིག་པུས་ངེས་པར་མཐོང་། །སྐྱེས་བུ་ཟླ་བའི་ཚེས་གྲངས་ལས། །སྐར་མའི་ངེས་པ་རྟོགས་པར་འགྱུར། །ཟླ་བ་ཤེས་པས་སྐྱེས་ཁྱིམ་གང་། །ཤེས་པས་དེ་ལས་འབྲས་བུ་སྟོན། །སྐྱེས་པའི་ཚེས་གྲངས་ལྷག་མ་ཡིན། །ཉི་ཤུ་རྩ་དགུ་ལ་ཕྲི་བའི། །ལྷག་མ་
སྐྱེས་སྐར་རྟོགས་པར་དྲན། །དཀར་ཕྱོགས་གཅིག་ནས་གྲངས་རྣམས་བཟུང་། །ནག་ཕྱོགས་ཚེས་ལ་གསུམ་བསྣན་དང་། །ཟླ་བའི་སྐར་མ་ཤེས་པ་དང་། །དེ་བཞིན་རང་གི་སྐྱེས་ཟླ་ལ། །བཅུ་གཅིག་འདྲེས་པས་ཤེས་པར་བྱེད། །ཇི་ལྟར་སྐྱེ་བའི་ཉི་མའི་གྲངས། །གསུམ་གྱི་སྣོན་འབྲིང་ལྷན་ཅིག་
པ། །དེ་ཡི་གྲངས་ནི་གནས་པ་ལས། །སྐྱེས་པའི་སྐར་མ་རབ་ཏུ་བྱེད། །སྐྱེས་པའི་ཚེས་ལ་ཉི་ཤུ་ལྔ། །བསྲེས་ལ་ཉི་ཤུ་བདུན་གྱིས་བགོ། །ལྷག་མས་ཚེས་གཅིག་ནས་བརྩམས་པའི། །སྐར་མའི་གྲངས་ནི་སྟོན་པར་བྱེད། །དེ་ལྟར་སྐར་མའི་རབ་ཕྱེ་བ། །སྐྱེས་པའི་ཟླ་བ་ཉིན་ཞག་དྲན། །འདི་ལ་
རང་གི་ཟླ་བ་ནི། །སྔོན་སོང་སྐར་མ་བཙལ་བ་ཡིན། །རང་གི་སྐར་མ་ཤེས་པ་ལས། །དོན་ཀུན་ཤེས་པར་འགྱུར་བར་དྲན། །གང་གིས་སྐར་མ་མི་ཤེས་པ། །དེ་ཡི་ངལ་བ་དོན་མེད་དྲན། །རང་གི་འདོད་པའི་སྐར་མ་ནས། །ལྷ་མོ་ནན་ཏན་ལས་ཤེས་བྱ། །འདྲི་བྱེད་སྲོག་གི་ལས་བྱེད་སར། །

203-1-62a

བཟློག་ནས་གནས་ན་དགོས་དོན་མེད། །གལ་ཏེ་ལས་ནི་བྱེད་པར་གནས། །བསམ་པའི་ཡིད་ལ་འདོད་པ་འགྲུབ། །སྐྱེས་པ་སྒོ་ནང་གཡས་འཇོག་ཅིང་། །དེ་བཞིན་བུད་མེད་གཡོན་འཇོག་པ། །དགེ་ཞིང་ཤེས་པར་སྟོན་པ་སྟེ། །བཟློག་ན་འདྲི་བའི་དོན་ཉམས་
འགྱུར། །གཡས་ཀྱི་ཡན་ལག་གཡོ་བ་དང་། །སྙིང་ཉིད་ངན་པ་རྣམ་པར་སྤང་། །ཉེ་འཁོར་ཤིས་པའི་བྱ་བ་བྱེད། །བསམ་མི་དགོས་པས་དོན་མི་འགྲུབ། །འདྲི་བྱེད་མགྲིན་པ་འགྲམ་པ་དང་། །རྣ་བ་སྣ་མིག་བྲང་དང་ནི། །ལྕེ་དང་གསང་བ་སྙིང་དང་སོ། །སྐྲ་དང་དཔྲལ་བ་གསུས་པ་དང་། །ནུ་མ་
དང་ནི་དཀུ་རྣམས་སུ། །ལག་པ་གཡས་པས་རེག་ཅིང་གཡོ། །གདོང་ནི་སྔོན་དུ་བལྟས་པའི་ཚེ། །དགེ་བའི་ལས་ཡིན་བཞིན་བཟངས་མ། །གཡོན་པས་རེག་ཅིང་གཡོ་བ་ནི། །དེ་ལས་བཟློག་པར་ཤེས་པར་བྱ། །འདྲི་བྱེད་ཕོ་ཉའི་ཉེ་འཁོར་ན། །བ་ལང་ར་ལུག་གསོད་པ་དང་། །འཐབ་རྩོད་རྡེག་
བཅིང་རྡུང་བ་དང་། །བཙོན་འཛིན་སྲོག་འཇོམས་ནོར་སྟོར་དང་། །སྣོད་སྟོང་སྐྱེ་བོ་ཡུལ་དམན་པ། །གོས་ཧྲུལ་མཛེ་ཅན་མདོག་མི་སྡུག །སྐྲག་དང་བྲེད་ཅིང་ཆད་པས་བཅད། །སེམས་སྟོར་མྱ་ངན་བྱེད་པ་མཐོང་། །ཁ་དོག་ཡིད་དུ་མི་འོང་བ། །ཁ་ནི་འོག་བལྟས་རླུང་ཚུབ་མཐོང་། །འགྲོ་ཕྱོགས་
ལས་བཟློག་སྐྱེ་བོ་སོགས། །མཐོང་ན་མཛེས་པའི་དོན་རྣམས་མེད། །དུད་འགྲོ་གསོད་ལས་ཐར་པ་དང་། །བརྩེ་ཞིང་དགའ་ཞིང་དགོད་པ་དང་། །ནད་པ་སོས་དང་བཙོན་རྣམས་ཐར། །དགེ་བའི་གླུ་དང་དེ་བཞིན་གར། །ཕུན་སུམ་ཚོགས་པའི་གནས་རྣམས་མཐོང་། །རོལ་མོའི་སྒྲ་སྐད་སྙན་པ་
དང་། །དགེ་སློང་བྲམ་ཟེ་བླ་མ་ལྷ། །ལྷ་མཆོད་པ་དང་དགའ་སྟོན་བྱེད། །ནོར་རྙེད་ཚོང་པ་རྙེད་པ་ཆེ། །གང་དག་སྐྱེས་བུ་ཡ་མཚན་ཅན། །གོས་བཟང་ཡན་ལག་བཟང་བ་དང་། །རྒྱལ་པོ་བུད་མེད་རྒྱན་ཅན་མཐོང་། །དཀར་ཕྱོགས་དང་ནི་མཐུན་པའི་མདོག །ཉི་གསལ་འབྲས་བུ་མེ་ཏོག་རྒྱས། །
རྫིང་བུར་བྱ་རྣམས་རྩེ་བ་དང་། །རང་ལ་བྱིས་པའི་ཚོགས་དགའ་ཞིང་། །སེམས་དགེ་ཚིག་འབྲུ་དགེ་བ་སྒྲོགས། །མཐོང་ན་དེ་ཚེ་འདོད་དོན་འགྲུབ། །ལྷ་མོ་ཐེ་ཚོམ་ཇི་ལྟ་བུ། །འཕྲལ་དུ་མངོན་དུ་བྱེད་པ་ཉིད། །ཉི་མ་ཐབས་ལྡན་གཡས་ཕྱོགས་སུ། །ཟླ་བ་ཤེས་རབ་གཡོན་ཕྱོགས་དྲན། །

203-1-62b

ལྐོག་ཏུ་གྱུར་པའི་ཕྱི་རོལ་དོན། །དེ་ཡི་བྱེ་བྲག་ཤེས་པ་ཡིན། །དགོས་པ་མེད་ཀྱང་བྱིས་པ་རྣམས། །དགའ་བའི་ཕྱིར་བཤད་དགའ་སྦྱིན་མ། །འཇིགས་བྱེད་ལྟང་ཚེ་དབུ་མ་ཡི། །རྣམ་འགྱུར་སྟོན་ན་འགྲུབ་འགྱུར་ཞིང་། །བཟའ་བཏུང་ལ་སོགས་ཐོབ་པར་དྲན། །ཁྱབ་འཇུག་རྣམ་འགྱུར་དེ་ལས་
བཟློག །དབུ་མ་ཉལ་ན་མི་དགུ་དང་། །ཙ་མུཎྜི་ཡི་སྔར་བཞིན་གྲགས། །གང་ཞིག་སུས་ཀྱང་མི་ཤེས་ཤིང་། །འཇིག་རྟེན་གསུམ་ན་རྙེད་དཀའ་བ། །གསང་བའི་རྒྱུད་ཆེན་ཁྱོད་ལ་སྨྲས། །མཛེས་མ་གསང་སྟེ་གཅེས་པར་ཟུང་། །འདི་ནི་གཡུལ་ལས་རྣམ་པར་རྒྱལ་བའི་རྒྱུད་ཀྱི་རྒྱལ་པོ་ལས། ཕོ་
ཉས་དྲིས་པའི་ལན་བསྟན་པ་སྟེ་ལེའུ་གསུམ་པའོ།།      །།ལྷ་མོས་གསོལ་པ། བཅོམ་ལྡན་དབང་ཕྱུག་ལྷ་ཡི་གཙོ། །གཡུལ་གྱི་དུས་སུ་རྒྱལ་བ་དང་། །ཕམ་པར་བཤད་པ་ཤེས་པ་ནི། །དབང་ཕྱུག་ལྷ་ལས་ཉན་པར་འཚལ། །བཅོམ་ལྡན་འདས་ཀྱིས་བཀའ་སྩལ་པ། །ཇི་
ལྟར་ཁྱོད་ཀྱིས་བདག་དྲིས་པ། །ཉོན་ཅིག་ལྷ་མོ་བཤད་པར་བྱ། །གཞན་དུ་ངས་ནི་མ་བསྟན་ཏེ། །ངོ་མི་ཆོག་པས་ཁྱོད་ལ་བཤད། །གང་ཞིག་དབྱངས་འཆར་ཞེས་བྱ་བའི། །བསྟན་བཅོས་བཤད་པ་དོན་ཡོད་པ། །དགྲ་དང་རྩོད་པར་བྱེད་པ་ཡི། །དུས་ནི་མ་ནོར་ངེས་བཟུང་སྟེ། །འཁྲུག་པ་ལ་
སོགས་རྩོམ་པ་ལ། །མཛེས་མ་ཁྱིམ་གྱིས་སྟོན་པར་བྱེད། །རྒྱུ་སྐར་རྐང་པ་དགུ་དགུ་ལ། །ཁྱིམ་གཅིག་ཅེས་བྱར་ཡོངས་སུ་གྲགས། །ལུག་སོགས་ཉ་ཡི་མཐར་ཐུག་པར། །འཕོ་ཁྱིམ་ཅེས་བྱ་ལྷ་དགའ་མ། །ཟ་སྐར་ལ་སོགས་ནས་བཟུང་སྟེ། །ནམ་གྲུའི་མཐར་ཐུག་རིམ་བཞིན་དྲན། །བདག་
གི་མིང་གི་སྐར་མ་ཡི། །དེ་ཉིད་འཁོར་ལོ་ལས་ཤེས་བྱ། །རྐང་པ་བརྒྱ་ཡི་འཁོར་ལོ་ལས། །མིང་གི་སྐར་མ་ཤེས་པར་བྱ། །མིང་གི་ཐོག་མའི་ཡི་གེ་ནི། །བཏུས་པས་ཤེས་བྱ་དགའ་བྱེད་མ། །གང་ཚེ་ཡི་གེ་རྩེག་མ་ཡོད། །དེ་ཚེ་སྟེང་མ་གཟུང་བར་བྱ། །ཡི་གེ་དགོད་པའི་རེ་མིག་ནི། །ཕན་ཚུན་
ཀུན་ནས་བཅུ་བཅུ་སྟེ། །བརྒྱ་ཕྲག་གཅིག་གི་རེ་མིག་ལ། །མིང་གི་སྐར་མ་རིག་པར་བྱ། །དང་པོར་ཤར་ནས་བརྩམས་ནས་ནི། །རེ་མིག་རྣམས་ལ་རིམ་པ་བཞིན། །ཨ་ཝ་ཀ་ཧ་ཌ་ཞེས་པ། །སྟེང་ནས་བྲི་བ་ཉིད་དུ་བྱ། །དེ་བཞིན་དུ་ཡང་ལྷོ་ཕྱོགས་སུ། །མ་ཊ་པ་དྲ་ཏ་རྣམས་སོ། །ཆུ་ནས་

203-1-63a

ན་ཡ་བྷ་ཛ་ཁ། །ག་ས་ད་ཙ་ལ་རྣམས་ནི། །བྱང་དུ་དེ་ལྟར་རིམ་བཞིན་དྲི། །ཐོག་མའི་ཡི་གེ་བདུན་གནས་པ། །རང་གི་སྡེ་ཚན་བཞི་བཞིར་བསྟན། །དེ་ལ་ཨ་ཡིག་ཨི་ཡིག་དང་། །ཨུ་དང་ཨོ་དང་ཨེ་དང་བཞིན། །དེ་རྣམས་དབྱངས་ཀྱི་ཡི་གེ་དང་། །ལྷན་ཅིག་
བྱེད་དོ་དགའ་བྱེད་མ། །རང་རང་ཐད་ཀ་ཐད་ཀ་རུ། །རང་གི་རིགས་ཀྱི་ཡི་གེ་འབྱུང་། །ཀུ་སུ་བྷུ་དུ་གསུམ་པའི་གྲར། །རྐང་པ་བཞི་ལ་བྲི་བ་ནི། །གྷ་ང་ཚ་དང་ཥ་ཎ་ཋ། །དྷ་ཕ་ཌྷ་དང་ཐ་ཛྷ་ཉ། །རྐང་པ་རེ་རེ་གསུམ་གསུམ་སྟེ། །བཅུ་གཉིས་དག་གིས་བསྟན་པ་ཡིན། །དེ་ལྟར་རེ་མིག་བརྒྱ་པོ་
རྣམས། །ཡི་གེས་ཡོངས་སུ་གང་བ་བྲི། །ཐུང་དང་རིང་བར་མཉམ་ཤེས་པས། །རྐང་པའི་སྟེང་དུ་རྣམ་པར་བཞག །ཐ་མ་གཉིས་ཀྱིས་མ་ཚང་དབྱངས། །གསལ་བྱེད་ཡོངས་སུ་རྫོགས་པར་གནས། །ཡི་གེ་བཞི་བཞི་བསྡོམས་པ་ལས། །སྐར་མ་གཅིག་ཏུ་འགྱུར་བ་ཡིན། །རྐང་པ་བརྒྱ་དང་
བཅུ་གཉིས་ལ། །འདི་ལྟར་ཨ་ཨི་ཨུ་ཨེ་སྟེ། །བཞི་པོ་སྨིན་དྲུག་ཡི་གེར་བརྗོད། །ཨོ་དང་ཝ་ཝི་ཝུ་རྣམས་ནི། །སྣར་མའི་ཡི་གེར་རྣམ་པར་གནས། །དེ་བཞིན་ཝེ་ཝོ་ཀ་ཀི་མགོ། །ཀུ་གྷ་ང་ཚ་ལག་ཏུ་བསྟན། །ཀི་ཀོ་ཧ་ཡི་ནམ་སོར་དྲན། །ཧུ་ཧེ་ཧོ་ཌ་རྒྱལ་ཞེས་གྲག །ཌི་ཌུ་ཌེ་ཌོ་ཞེས་བྱ་བ། །སྐག་
ཏུ་ཤེས་བྱ་ལྷ་ཆེན་མ། །མཆུ་ཡི་མ་མི་མུ་མེ་སྟེ། །མོན་ཌ་ཌི་ཌུ་གྲེ་ཞེས་བརྗོད། །ཌེ་ཌོ་པ་པི་དབོ་རུ་དྲན། །མེ་བཞི་པུ་ཥ་ཎ་ཋའོ། །པེ་པོ་ར་རི་ནག་པ་ཟེར། །རུ་རེ་རོ་ཏ་ས་རིར་སྨྲ། །ཏི་ཏུ་ཏེ་ཏོ་ས་ག་སྟེ། །ན་ནི་ནུ་ནེ་ལྷ་མཚམས་སོ། །ནོ་ཡ་མེ་ཡུ་སྣྲོན་དུ་གྲགས། །ཡེ་ཡོ་བྷ་བྷི་སྣྲུབས་སུ་དྲན། །བྷུ་
དྷ་ཕ་ཊ་ཆུ་སྟོད་ཡིན། །བྷེ་དྷོ་ཛ་ཛི་ཆུ་སྨད་ཐོབ། །ཛུ་ཛེ་ཛོ་ཁ་གྲོ་བཞིན་ནོ། །ཁི་ཁུ་ཁེ་ཁོ་བྱི་བཞིན་དྲན། །ག་གི་གུ་གེ་ཞེས་བྱ་བ། །མོན་གྲུ་ཡིན་ནོ་གངས་རིའི་བདག །གོ་ས་སི་སུ་མོན་གྲེར་ཐོས། །ཤེ་ཤོ་ད་དི་ཁྲུམས་སྟོད་ཤེས། །དུ་ཐ་ཛ་ཉ་ཁྲུམས་སྨད་བཤད། །ནམ་གྲུ་དེ་དོ་ཙ་ཙིརགྲགས། །ཙུ་
ཙི་ཙོ་ལཱ་ཐ་སྐར་ལོ། །ལི་ལུ་ལེ་ལོ་བྲ་ཉེར་གྲགས། །དེ་ལྟར་རྐང་པ་བརྒྱ་འཁོར་ལོར། །མིང་གི་སྐར་མར་ཤེས་པར་བྱ། །རེ་མིག་བརྒྱ་པའི་འཁོར་ལོ་དེར། །མིང་གི་སྐར་མ་ཤེས་པར་བྱ། །རྒྱུ་སྐར་རེ་རེ་ལྡན་པ་ལ། །བཞི་བཞིའི་ཆ་རུ་ཤེས་པར་བྱ། །འཁོར་ལོའི་རི་མོ་དགོད་པ་ལ། །བརྒྱད་

203-1-63b

ཀྱིས་ལྷག་པའི་ཉི་ཤུའོ། །དེ་ལྟར་ཤར་གྱི་ཕྱོགས་ལ་གནས། །ལྷོ་ལ་སོགས་པར་མཉམ་པར་གནས། །རི་མོ་བརྒྱད་པོ་མཉམ་བྲིས་པས། །རྐང་པ་རེ་ལ་ཆ་བཞིར་བགོ། །ཤར་ནས་བརྩམས་ཏེ་གསལ་བར་ནི། །རྐང་པ་བརྒྱ་པ་ལེགས་པར་གནས། །རྒྱུ་སྐར་བཞི་ལ་གསལ་བར་ནི། །རྐང་པ་
བཞི་རུ་གྲགས་པ་ཡིན། །སྨིན་དྲུག་ལ་སོགས་བསྡོམས་པ་ལས། །བཅུ་གཉིས་ལྷག་པའི་བརྒྱ་ཕྲག་གཅིག །དབྱངས་དང་གསལ་བྱེད་ལྔ་སོགས་ལ། །དེ་ལྟར་བྱེ་བྲག་ཤེས་པར་བྱ། །རྐང་པའི་རི་མོར་གང་གནས་ལས། །གནོད་པའི་མཚན་ཉིད་ཤེས་བྱ་བ། །འདི་ལྟར་འགྱུར་རོ་གྲོགས་མོ་
ཀྱི། །སོལ་བ་དང་ནི་འཁྱུད་པ་དང་། །དུ་བ་གདོང་ཚུགས་མཐོང་ས་རྣམས། །གཙོ་མོ་ཉོན་ལ་ཡིད་ལ་གཟུང་། །དང་པོར་སྨིན་དྲུག་གནས་པ་ལ། །སྡིག་པའི་གཟའ་ནི་མཉམ་པར་གནས། །ཨ་ཡིག་ལ་ནི་འཁྱུད་པ་ཞེས། །གསལ་པོར་ཁོང་དུ་ཆུད་པར་བྱ། །ཨེ་ཡི་ཡི་གེ་དུ་བར་དྲན། །བྱང་
ཕྱོགས་ལོ་ཡིག་སོལ་བར་དྲན། །ནུབ་ཕྱོགས་ཇི་བཞིན་ཡི་གེ་ཁོ། །གདོང་ཚུགས་ཞེས་བྱར་ཡོངས་སུ་གྲགས། །མཐོང་བའི་ས་རྣམས་སླེབས་པ་སྟེ། །གནོད་པ་ལྔ་ཡིན་བཞིན་བཟང་མ། །སོལ་བས་འཆི་བར་འགྱུར་བ་སྟེ། །འཁྱུད་པས་ལུས་ལ་ནད་རྣམས་འབྱུང་། །དུ་བས་ཡིད་ལ་འདོད་པ་
མེད། །གདོང་ཚུགས་རིགས་ངན་ཐ་ཤལ་འགྱུར། །མཐོང་བའི་འབྲས་བུའི་བྱེ་བྲག་ལས། །ཤེས་བྱའི་དཔའ་བོའི་དབང་ཕྱུག་མ། །ཐོག་མར་སྨིན་དྲུག་བཞག་པ་ཡི། །རྒྱུ་སྐར་རྐང་པ་གསལ་བ་ལ། །གལ་ཏེ་ཉི་མ་མཉམ་པར་གནས། །རྒྱུ་སྐར་གསུམ་དུ་རབ་ཏུ་བརྗོད། །ཨ་ནས་བཅུ་
གཉིས་པ་ནས་ཀི། །མགོ་ཡི་རྐང་པའི་ཐ་མར་དྲན། །ཟླ་བ་གནས་ན་ནུབ་ཕྱོགས་སུ། །མཐོང་ས་རྐང་པ་ཉི་ཤུ་གཉིས། །མོན་གྲུའི་རྐང་པ་ཐ་མ་ཡི། །སུ་ཡིག་གསལ་པོར་མཐོང་བ་ཡིན། །དེ་ལྟར་གཟའ་ཀུན་དག་གིས་ནི། །མཐོང་བའི་མཚན་ཉིད་ཤེས་པར་བྱ། །ཉི་མའི་བཅུ་གཉིས་ཡིན་པར་
གྲག །མིག་དམར་གྱི་ནི་གསུམ་པར་གྲགས། །དེ་ལྟར་ལྷ་ཡི་བློན་པོ་དྲུག །ཉི་མའི་བུ་ཡི་བརྒྱད་རྣམས་ནི། །ཉི་མ་ལ་སོགས་རྒྱབ་ཏུ་གྲགས། །ཟླ་བ་ལ་སོགས་མདུན་དུ་སྟེ། །རཱ་ཧུ་གཟའ་ལྷག་པ་སངས་ཏེ། །བཞི་པོ་འགྲོགས་ལུགས་གཅིག་ཏུ་རྟེན། །ཟླ་བ་མཐོང་བ་ཉི་ཤུ་གཉིས། །དེ་བཞིན་

203-1-64a

རཱ་ཧུའི་དགུ་རུ་དྲན། །ཟླ་བའི་བུ་ཡི་བདུན་ཡིན་ཏེ། །དེ་བཞིན་དཀར་པོས་ལྔ་ཞེས་བྱ། །ཉི་མའི་མཐོང་ས་ནོར་རྣམས་ཟད། །མིག་དམར་རཱ་ཧུ་སྤེན་པ་ཡིས། །ལུས་ཅན་རྣམས་ནི་འཆི་བར་བྱེད། །ཕུར་བུས་གཉེན་རྣམས་བརླག་ཅིང་འཆི། །པ་སངས་ལས་ཉམས་དོན་མི་
འགྲུབ། །གཟའ་ལྷག་དགྲ་འབྱུང་ཟོང་མི་ལོམ། །ཟླ་བས་འཇིགས་པ་ཆེན་པོ་འབྱུང་། །གཙོ་བོ་མཐོང་བའི་འབྲས་བུར་དྲན། །དེ་ནས་གཞན་ཡང་བཤད་པར་བྱ། །ཤ་ལ་ཀ་ཡི་འཁོར་ལོ་སྟེ། །བག་མ་ལ་སོགས་ཆོ་ག་མཆོག །གྲོགས་མོ་ལྷ་ཆེན་མཛེས་དགའ་ཉོན། །སྐར་མའི་དགེ་དང་
མི་དགེ་བ། །མ་ལུས་པ་ནི་སྟོན་པར་བྱེད། །ཐུག་མ་བདུན་པའི་འཁོར་ལོ་སྟེ། །ངེས་པའི་འབྲས་བུ་སྟོན་པ་ཡིན། །ཤར་ནས་ནུབ་ཏུ་རི་མོ་བདུན། །ལྷོ་ནས་བྱང་དུའང་དེ་བཞིན་ཏེ། །ཐད་ཀར་གདོང་ཚུགས་འབྱུང་བས་ན། །ཤ་ལ་ཀ་ཞེས་གྲགས་པ་ཡིན། །སུམ་ཅུ་དྲུག་གི་རེ་མིག་བཅས། །
སྨིན་དྲུག་ནས་ནི་བྲ་ཉེའི་བར། །ཤར་ནས་བརྩམ་པའི་སྦྱོར་བ་ཡིས། །ཉི་ཤུ་རྩ་བརྒྱད་རིམ་བཞིན་བྲི། །ཆེ་ཞེ་དེ་ལ་སྡིག་པའི་གཟའ། །ལྷན་ཅིག་གནས་ཏེ་འཁྱུད་པ་ནི། །དེ་ཡི་ཐད་ཀའི་སྐར་མ་ལ། །མ་རུངས་གདོང་ནི་ཟུག་པར་ངེས། །འཁྱུད་པའི་མདུན་ན་སོལ་བ་སྟེ། །རྒྱབ་མ་དུ་བའོ་བཙུན་
མོ་ཀྱེ། །དེ་ཡི་ནུས་པ་དེ་ཙམ་དེ། །སྔོན་དུ་ཤེས་བྱ་ལྷ་སྲས་མོ། །སོལ་བ་འཁྱུད་པ་དུ་བ་གདོང་། །སྟོབས་བཞིའི་འཁོར་ལོ་ཞེས་བྱའོ། །ཉི་མ་དང་ནི་ལྷ་གཅིག་པའི། །ཕྱོགས་ནི་མི་ཤེས་པ་ཞེས་བྱ། །ཉི་མའི་དཀྱིལ་འཁོར་གནས་པའི་ཕྱོགས། །ཨ་ཏ་མི་ཏ་ཞེས་བྱར་གྲགས། །ཕྱོགས་གང་
བསོད་ནམས་གཟའ་རྣམས་ཡོད། །འཆར་བ་ཞེས་བྱ་དགེ་བ་ཡིན། །ཉི་མ་དང་ནི་ལྷན་ཅིག་པས། །ཨ་ཏ་མི་ཏར་གྲགས་པ་ཡིན། །གཟའ་རྣམས་ཟླ་བའི་ཐད་ཀ་སོགས། །བག་མའི་འབྲས་བུ་ངེས་པར་བརླག །ཉི་མའི་ཐད་ཀར་ཁྱོ་རྣམས་ཤི། །མིག་དམར་གྱི་ནི་བུ་དང་བྲལ། །ཟླ་བའི་ཏད་ཀཱར་
གཟའ་ལྷག་ཡོད། །བཟའ་བཏུང་མེད་དོ་ལྷ་ཡི་སྲས། །ལྷ་ཡི་བླ་མས་ནོར་ཉམས་ཤིང་། །སྔོན་ཆད་མེད་པའི་སྡུག་བསྔལ་འབྱུང་། །པ་སངས་ཁྱོས་ནི་སྤངས་ནས་སུ། །བཙུན་མོ་ལ་སོགས་མགོ་རེག་བྱེད། །སྤེན་པའི་ཐད་ཀར་ཟླ་བ་ཡོད། །སྨད་འཚོང་དུ་ནི་འགྲོ་ཞེས་གྲགས། །ཟླ་བ་ཡོད་པའི་

203-1-64b

ཐུར་མ་ལ། །བསོད་ནམས་སྡིག་པ་གནས་གྱུར་པ། །མདུང་དང་མདུང་ནི་ཆེན་པོ་ཡི། །སྦྱོར་བར་ཡོངས་སུ་གྲགས་པ་ཡིན། །མདུང་དང་མདུང་ཆེན་སྦྱོར་བ་ལ། །བུ་སྐྱེས་འཆི་བར་འགྱུར་བ་སྟེ། །གལ་ཏེ་བྱེས་སུ་ཕྱིན་པ་ན། །ཟླ་བ་གཉིས་ན་ངེས་པར་འཆི། །བག་མ་བླངས་ན་ཁྱོ་ནི་འཆི། །བཤེས་
དང་འབྱེ་ཞིང་དོན་རྣམས་མེད། །བྱ་བ་གང་ཡང་འགྲུབ་མི་འགྱུར། །མཛེས་དགའ་ཁོང་དུ་ཆུད་པར་གྱིས། །སྨིན་དྲུག་ལ་སོགས་སྐར་མ་རྣམས། །ཕྱོགས་སུ་བདུན་བདུན་གནས་པ་ལས། །མིག་དམར་ལ་སོགས་གཟའ་རྣམས་ནི། །རྒྱུ་སྐར་རེ་རེའི་བདག་པོར་དྲན། །སྐར་མ་རང་གི་བདག་པོར་
གནས། །སྐྱོན་མེད་བདེ་སྟེར་རང་གི་བུ། །བྱེས་བགྲོད་སོགས་དང་བྱ་བ་ལ། །རང་གི་བདག་པོས་བདེ་བར་བྱེད། །བདག་པོ་རང་གི་བུ་ལ་གནས། །ཐམས་ཅད་ཤིས་བྱེད་ལྷ་ཆེན་མ། །བྱང་ལ་སོགས་པ་ཕྱོགས་བཞི་རུ། །ཟླ་བ་གནས་པའི་སྐར་མ་རྣམས། །དབོ་དང་ཁྲུམས་སྨད་ཆུ་སྨད་དང་། །
རྒྱལ་དང་མཆུ་དང་ས་ཡི་བུ། །མིག་དམར་ཞེས་བྱ་ཐད་ཀར་སོང་། །ཆོམ་རྐུན་གྱིས་འཆེ་བཟའ་བཏུང་མེད། །སྔར་ནས་མེད་པའི་ནད་འབྱུང་ཞིང་། །ལོངས་སྤྱོད་ཟད་འགྱུར་མེད་དོ་ཀྱེ། །ཆུ་སྨད་གྲོ་བཞིན་མེ་བཞི་དང་། །ནག་པ་མོན་གྲེར་ཟླ་བ་གནས། །དེ་ཡི་ཐད་ཀར་གཟའ་ལྷག་ཤར། །འཆི་
སོགས་མི་དགེ་སྣ་ཚོགས་པ། །ནོར་བུ་བུ་དང་བུ་མོ་དང་། །ལོངས་སྤྱོད་རྣམས་ནི་མ་ལུས་ཉམས། །ཁྲུམས་སྟོད་སྣྲུབས་དང་ཐ་སྐར་མཆུ། །ས་ག་རྣམས་ལ་ཟླ་བ་གནས། །ཐ་སྐར་ཕུར་བུའི་གདོང་བཙུགས་ན། །རྒྱལ་པོ་ཡུལ་དུ་མི་བཞག་ཅིང་། །བྱ་བ་ཀུན་ལ་མི་དགེ་སྟེ། །གཉེན་རྣམས་
གསལ་བར་འཆི་བར་འགྱུར། །སྣྲོན་དང་ཆུ་སྟོད་གྲེ་དང་སྐག །ནམ་གྲུ་རྣམས་སུ་ཟླ་བ་ཡོད། །དེ་ཡི་ཐད་ཀར་པ་སངས་བལྟས། །བག་མ་བླངས་ན་ཁྱོ་འཆི་སྟེ། །པུས་མོ་ལ་སོགས་ན་བ་དང་། །ཕྱུགས་ཀུན་བརླག་པར་འགྱུར་བ་ཡིན། །སྨིན་དྲུག་ལག་དང་ཆུ་སྟོད་དང་། །བྱི་བཞིན་བྲ་ཉེར་ཟླ་བ་
གནས། །ཐ་སྐར་གལ་ཏེ་སྤེན་པ་འོངས། །ནད་འབྱུང་གྲོགས་རྣམས་འཆི་བར་དྲན། །རྒྱུ་སྐར་བདག་པོའི་ནུས་པ་སྟེ། །རང་གི་བདག་པོའི་འཁོར་ལོ་ཡིན། །སྨིན་དྲུག་ལ་སོགས་རིམ་པ་བཞིན། །བཞི་བཞིར་ཡོངས་སུ་ཕྱེ་བ་ལས། །སྡེ་ཚན་བདུན་དུ་འགྱུར་བ་སྟེ། །བཞི་ལ་རེ་ཁཱས་བསྐོར་བ་བདུན། །

203-1-65a

ཉི་ཟླ་པ་སངས་ཕུར་བུ་དང་། །མིག་དམར་གཟའ་ལྷག་རཱ་ཧུ་སྤེན། །རིམ་པ་བཞིན་བསྟན་མཐའ་མའི་ཆར། །རཱ་ཧུ་སྤེན་པ་གཉིས་ཏེ་བཞིན། །སྡེ་ཚན་ཕན་ཚུན་བསྣོལ་གནས་ལས། །མོ་དེ་ཐད་ཀའི་ནུས་པ་འབྱུང་། །ཉི་མ་མིག་དམར་ཐད་ཀར་ཏེ། །མིག་དམར་ཉི་
མར་གདོང་བཙུགས་སོ། །དེ་བཞིན་ཟླ་བ་གཟའ་ལྷག་སྟེ། །སྤེན་པ་ཕུར་པ་ཕན་ཚུན་བལྟས། །པ་སངས་རཱ་ཧུ་དེ་བཞིན་དུ། །ཐད་ཀར་བསྣོལ་བས་སྟོབས་སུ་འགྱུར། །གྲོང་དང་གྲོང་ཁྱེར་ཕྱོགས་རྣམས་སུ། །ཕྱུགས་དང་རིན་ཆེན་ལོ་ཏོག་སོགས། །ཐད་ཀའི་སྐྱོན་གྱིས་བརླག་པར་ནི། །འགྱུར་རོ་
ལྷ་ཡི་དབང་ཕྱུག་མ། །གཟའ་རྣམས་ཐད་ཀར་གདོང་བཙུགས་པས། །ཕན་ཚུན་ཆེན་པོའི་འཁོར་ལོར་གྲགས། །སྨིན་དྲུག་ལ་སོགས་རིམ་པ་བཞིན། །ཕྱོགས་དེར་བདུན་ནི་གནས་པ་ལས། །རང་གི་ཕྱོགས་སུ་འགྲོ་བར་ཆས། །དགེའོ་དཔའ་མོ་དབང་ཕྱུག་མ། །ཤར་ཕྱོགས་ཤར་བཞིན་བྱང་
དུ་སྟེ། །བྱང་ཡང་བྱང་བཞིན་ཤར་དུའང་བཟང་། །དེ་བཞིན་ལྷོ་དང་ནུབ་ཕྱོགས་ཀྱང་། །ཕན་ཚུན་མཉམ་པར་དགེ་བ་ཡིན། །མེ་ནས་རླུང་དུ་ས་རི་གྷ། །མཚམས་ལ་རྒལ་ན་མི་ཤིས་པས། །དོན་ཉམས་སྡུག་བསྔལ་ངལ་དུབ་དང་། །རྨོངས་ཤིང་འཆི་བར་འགྱུར་བ་ཡིན། །མེ་དང་རླུང་དུ་
མཚམས་བཅས་པས། །ས་རི་གྷ་ཡི་འཁོར་ལོ་ཡིན། །དབང་ལྡན་བྲ་ཉེ་སྨིན་དྲུག་དབུས། །མེར་ནི་སྐག་དང་མཆུ་ཞེས་བརྗོད། །བདེན་བྲལ་ས་ག་ལྷ་མཚམས་དབུས། །གྲོ་བཞིན་མོན་གྲེ་རླུང་དེ་བཞིན། །རང་གི་ཕྱག་རྒྱའི་སྦྱོར་བ་སྟེ། །ལྷ་མོ་དེ་ལྟར་ཕན་ཚུན་གནས། །ཕྱོགས་བཞི་ཕན་ཚུན་
མི་མཐུན་ཕྱིར། །ཕན་ཚུན་རྣམ་པར་སྤངས་པ་ཡིན། །རྫོགས་པ་དང་ནི་ཟུག་པའི་དབུས། །རང་གི་ཕྱག་རྒྱའི་སྦྱོར་བར་དྲན། །རྫོགས་དང་ཟུག་པའི་དབུས་སུ་ནི། །བཟློག་སྟེ་འགྲོ་ལ་བཟང་བ་མེད། །རྫོགས་དང་ཟུག་པའི་ཆུ་ཚོད་ལྔ། །མི་དགེའི་ལྷག་མ་སྐྱོན་དང་བྲལ། །སྔར་བཤད་ཐད་ཀའི་
གདོང་ཚུགས་ཀྱིས། །འཁོར་ལོ་དེ་ལྟར་འདིར་ཤེས་བྱ། །དེ་ལྟར་མ་འཁྲུལ་ཤེས་བྱ་སྟེ། །སྐྱོན་གྱི་འབྲས་བུ་རྣམ་པར་སྤངས། །རང་གི་ཕྱག་རྒྱའི་འཁོར་ལོ་སྟེ། །བེ་ར་མུ་པའི་འཁོར་ལོ་ཡིན། །དེ་ལྟར་ཐུར་མའི་འཁོར་ལོ་མཆོག །དགེ་དང་མི་དགེའི་བྱེ་བྲག་རྣམས། །ཕྱེ་སྟེ་རྒྱས་པར་བསྟན་པ་

203-1-65b

སྟེ། །ལེགས་པར་རྟོགས་སམ་སྐལ་བཟང་མ། །འདི་ནི་གཡུལ་ལས་རྣམ་པར་རྒྱལ་བའི་རྒྱུད་ཀྱི་རྒྱལ་པོ་ལས། རྐང་པ་བརྒྱ་པའི་འཁོར་ལོའི་ཆོ་ག་བསྟན་པ་དང་ཤ་ལ་ཀའི་འཁོར་ལོ་བསྟན་པ་ཆེན་པོ་སྟེ་ལེའུ་བཞི་པའོ།།      །།ལྷ་མོས་གསོལ་པ། ལྷ་ཆེན་འཁོར་ལོ་མཆོག་ཏུ་དགེ། །
རྐང་པ་བརྒྱད་ཅུ་རྩ་གཅིག་པའི། །ཆོ་ག་ཤིན་ཏུ་རྒྱས་པར་ཡང་། །དབང་ཕྱུག་ལྷ་ལས་ཉན་པར་འཚལ། །བཅོམ་ལྡན་འདས་ཀྱིས་བཀའ་སྩལ་པ། །རྐང་པ་བརྒྱད་ཅུ་རྩ་གཅིག་པའི། །མཉམ་པའི་འཁོར་ལོ་རྒྱས་པ་འདིར། །གཡུལ་ལས་རྣམ་པར་རྒྱལ་བ་ཡི། །བསྟན་བཅོས་དོན་ཀུན་མ་
ཚང་མེད། །ཤ་ལ་ཀ་ཡི་འཁོར་ལོ་ཡང་། །འདི་དང་ལྷན་ཅིག་མཉམ་པར་གནས། །ཐིག་ནི་དྲང་པོ་ཆ་བཅུ་རུ། །མཛེས་མ་མཉམ་པར་གནས་པར་བྱ། །དེ་ལ་རེ་མིག་བརྒྱད་ཅུ་གཅིག །འབྱུང་བར་ངེས་སོ་སྡུ་གུ་མ། །གྲྭ་ནས་གྲྭར་བཟུང་རེ་མིག་ལ། །ཨ་སོགས་དབྱངས་ཀྱི་ཡི་གེ་དགོད། །
སྨིན་དྲུག་ནས་ནི་བྲ་ཉེའི་བར། །ཕྱི་ཡི་རེ་མིག་བདུན་ལ་དགོད། །ལྔ་ལ་གསལ་བྱེད་ཉི་ཤུ་རྣམས། །ཨ་ཝ་ཀ་ཧ་ཌ་སོགས་དགོད། །དེ་བཞིན་ཐོག་མར་གླང་ལ་སོགས། །རེ་མིག་གསུམ་ལ་དགོད་པར་བྱ། །དགའ་བ་ལ་སོགས་ཚེས་རྣམས་ནི། །དབུས་ཀྱི་རེ་མིག་ལྔ་ལ་དགོད། །དེ་ལྟར་སྐར་མ་
ལ་སོགས་པ། །གཡས་བསྐོར་སྦྱོར་བས་དཀར་མོ་ཀྱེ། དེ་ལྟར་བརྒྱད་ཅུ་རྩ་གཅིག་ལ། །དུས་ཀྱི་ལྷ་རྣམས་ཐམས་ཅད་ཚང་། །རང་གི་རྒྱུ་སྐར་གསལ་བྱེད་དབྱངས། །ཁྱིམ་དང་ཚེས་ལ་མཆེ་བ་བརྟག །སྡིག་གཟའ་ཐད་ཀ་ལ་ནི་ངན། །གཉིས་དང་གསུམ་གྱིས་བརླག་འགྱུར་ཏེ། །གཅིག་གི་ཐད་
ཀར་སོང་བ་ཡིས། །དོན་ཉམས་ནོར་རྣམས་ཟད་པར་བྱེད། །མིང་ལ་དྲག་པོའི་གཟའ་རྣམས་འཇོམས། །ངེས་པར་འཆི་བར་མཐོང་ཞེས་དྲན། །བསོད་ནམས་སྡིག་ཅན་མིང་ལ་ཟིན། །རིམས་འབྱུང་ནོར་རྣམས་ཟད་པར་བྱེད། །བེ་ན་སི་ཀར་དྲག་པོའི་གཟའ། །གསུམ་འཛོམ་ཚེ་ནི་འཇིག་པར་སྟོན། །
སྐྱེས་པ་ལས་དང་བི་ནཱ་ཤར། །ཨ་དྷ་ན་ལ་རིམས་ནད་འབྱུང་། །བསོད་ནམས་གཟའ་རྣམས་ཤར་ནུབ་ཏུ། །ཉི་མ་ལ་ནུབ་ངན་པར་འགྱུར། །མིང་གི་སྐར་མར་ཉི་མ་སོང་། །འཆི་བ་ལ་སོགས་འབྱུང་བའི་ཕྱིར། །ཕྱོགས་གང་ཉི་མ་གནས་པའི་ཕྱོགས། །རྒྱུ་སྐར་ཡི་གེ་དུས་སྦྱོར་ཚེས། །ཕྱུགས་ཉམས་

203-1-66a

འཐབ་རྩོད་མྱ་ངན་འབྱུང་། །བྲན་གཡོག་ལོངས་སྤྱོད་རྣམ་པར་ཉམས། །ཉི་མ་དང་བྲལ་ཕྱོགས་གསུམ་ཀར། །དགྲ་ལས་རྒྱལ་ཞིང་གྲོགས་བཟང་ཕྲད། །འདོད་པའི་དོན་འགྲུབ་ཕུན་སུམ་ཚོགས། །རྙེད་དང་གྲགས་པ་དེ་བཞིན་འབྱུང་། །དབང་པོ་ལ་སོགས་སྡེ་ཚན་གྱི། །ལག་
སོགས་དབུས་ན་གནས་པ་ལ། །ཉི་མ་གནས་ཚེ་ནུབ་འགྱུར་ཏེ། །ཕྱོགས་དེའི་མིང་གི་རྒྱུ་སྐར་དང་། །ཚེས་ཁྱིམ་གསལ་བྱེད་དབྱངས་རྣམས་ནི། །བསྲེགས་ཉམས་ཚད་པས་གདུངས་པ་ཡིས། །རྣམ་པར་ཉམས་པར་འགྱུར་བའི་ཕྱིར། །དབུས་སུ་ཟླ་བ་གསུམ་གསུམ་ངན། །ལྷག་མའི་ཕྱོགས་གསུམ་
དགེ་བ་སྟེ། །ཟླ་བའི་སྡེ་ཚན་དེ་བཞིན་སྨྲ། །གསལ་བྱེད་རྒྱུ་སྐར་ཚེས་ཁྱིམ་དབྱངས། །ཕྱོགས་ཀྱི་བདག་པོ་མཁའ་འགྲོའི་ཕྱིར། །གང་གི་ཕྱོགས་ན་ཉི་མ་གནས། །འགྲོ་འདུག་བྱེད་པ་དགེ་བར་གྲགས། །ད་གཟོད་དགེ་དང་མི་དགེ་བརྟག །སྔོན་དུ་བསམས་པ་མཁས་པ་ཡིན། །ཤར་དུ་སྨིན་དྲུག་
སྐག་གི་བར། །དེས་གནས་ཡི་གེ་ལྔ་པོ་ཡང་། །ཨ་ཝ་ཀ་ཧ་ཌ་ལ་སོགས། །ཁྱིམ་ནི་གླང་འཁྲིག་ཀར་ཀ་ཊ། །དགའ་བ་ཞེས་བྱ་གྲྭ་ནས་དབྱངས། །དབྱངས་ཡིག་དང་པོ་ལྔ་པ་དང་། །དགུ་པ་དང་ནི་བཅུ་གསུམ་ཡོད། །ཉི་མ་ཤར་དུ་འོངས་ཚེ་ནུབ། །མཆུ་ནས་ས་གའི་བར་དུ་ཡང་། །མིང་
གི་གསལ་བྱེད་ལྔ་པོ་ནི། །མ་ཡིག་ལ་སོགས་ལྡན་པར་གནས། །དེ་བཞིན་སེང་གེ་བུ་མོ་སྲང་། །གྲྭ་ནི་དབྱངས་ཡིག་གཉིས་པ་དང་། །དྲུག་པ་བཅུ་པ་བཅུ་བཞིར་དྲན། །བཟང་པོ་ཚེས་ཏེ་ལྷོ་ཕྱོགས་སུ། །ཉི་མ་གནས་ཚེ་ནུབ་པར་གྲགས། །ལྷ་མཚམས་ལ་སོགས་གྲོ་བཞིན་མཐར། །ན་ནས་
ཁ་ཡི་མཐར་ཐུག་པར། །གསལ་བྱེད་ཡི་གེ་ལྔར་ཡང་གྲགས། །སྡིག་པ་གཞུ་དང་ཆུ་སྲིན་དྲན། །རྒྱལ་པོའི་ཚེས་སོ་དབྱངས་ཡིག་རྣམས། །མི་ཐུབ་དྲག་དང་དབང་ཕྱུག་གནས། །གལ་ཏེ་ཆུ་རུ་ཉི་མ་སོང་། །དེ་རྣམས་ནུབ་པར་བསྟན་པ་ཡིན། །མོན་གྲུ་ལ་སོགས་བྲ་ཉེ་གནས། །གང་ནས་ལ་ཡི་མཐར་
ཐུག་པར། །ཡི་གེ་ལྔ་ནི་གནས་པར་བསྟན། །ཁྱིམ་ནི་བུམ་པ་ཉ་དང་ལུག །ཚེས་ནི་སྟོང་པ་དབྱངས་ནི་ཆུ། །ནོར་དང་ཉི་མ་རྒྱལ་པོར་དྲན། །ཉི་མ་བྱང་ནས་ནུབ་པ་ཡིན། །བསོད་ནམས་གཟའ་རྣམས་དགེ་ཞེས་ཟེར། །རྩ་བ་ཡན་ལག་ཚེས་ཀྱི་གཟའ། །ཉེ་བའི་གཟའ་ལ་སོགས་པ་རྣམས། །

203-1-66b

ཉི་མ་གནས་པའི་རྗེས་འབྲང་ཞིང་། །དེ་བཞིན་སྤྲོ་ཞིང་སྡུད་པར་བྱེད། །ཇི་ལྟར་གློག་ནི་ལྔ་པ་ལ། །ལོངས་སྤྱོད་ཡོངས་སུ་རྫོགས་པར་ཤེས། །འདི་ལྟར་བརྒྱད་ལ་ཤུ་ལ་གནས། །བཅུ་བཞི་པ་ལ་འབྲུག་ཏུ་དྲན། །བཅོ་བརྒྱད་དེ་བཞིན་མཇུག་ཏུ་བརྗོད། །མཁའ་མིག་གཙོ་ཞེས་ངེས་པར་མཐོང་། །
ཐོག་ཅེས་མིང་དང་ལག་པར་གྲགས། །ས་གཡོས་གསུམ་ལྷག་ཉི་ཤུའོ། །དེ་བཞིན་རྒྱལ་བ་ཞེས་བྱ་བ། །གཏུན་ཤིང་དག་ཏུ་གྲགས་པ་ཡིན། །སྒྲ་གཅན་མིག་དམར་སྤེན་པ་རྣམས། །མཐོང་ས་སྔོན་དུ་དགུ་གསུམ་བརྒྱད། །ཉེ་བའི་གཟའ་ཡི་སྦྱོར་བ་རྣམས། །རྒྱུ་སྐར་ལ་སོགས་ཤེས་པར་བྱ། །
རྒྱུ་སྐར་ཉི་ཤུ་རྩ་བདུན་ནི། །ཐམས་ཅད་ཚང་བར་བསྐོར་བ་ཡིན། །དུས་སྦྱོར་ཕྱེད་གཟའ་འཆར་བ་ནི། །སུམ་ཅུའི་ཚེས་ལའང་འཆར་ཞིང་བསྐོར། །དང་པོའི་ཐུན་ལ་ཚེས་ཀྱི་བདག །ལན་བཞི་བྱི་བཞིན་དུས་སྦྱོར་བྱེད། །ཉིན་མོ་གཟའ་རྣམས་དྲུག་ལ་བསྐོར། །མཚན་མོ་ལྔ་ལ་བསྐོར་བ་ཡིན། །
འདི་ལྟར་ལོ་དང་ལུག་སོགས་ཁྱིམ། །ཚེས་དང་ཐུན་མཚམས་རིམ་པ་བཞིན། །བདག་པོའི་གཟའ་རྣམས་འཆར་བས་ན། །སྐར་མ་ལས་ནི་རྟོགས་པར་བྱ། །ཛན་མ་ཧཱ་ནི་ཨན་དྷ་ཀ །ཛན་མ་ཧཱ་ནི་རིམ་པ་བཞིན། །ཚེས་ལ་ལན་གསུམ་འཆར་བར་གྲགས། །དཀར་པོ་ལ་སོགས་ཚེས་གཅིག་ལ། །
དུས་སྦྱོར་ཕྱེད་ལ་དེ་ལྟར་འཆར། །ཕྱེད་གོང་ཕྱེད་འོག་དཀར་ནག་དྲན། །མཚམས་ཡང་དེ་ལྟར་དཀར་ནག་བརྗོད། །དྲག་པོའི་ཚེས་དང་དྲག་པོའི་གཟའ། །སྐར་མ་དྲག་པོ་གསུམ་འཛོམ་པ། །ཤིན་ཏུ་མི་ཤིས་ངན་པ་སྟེ། །བ་ནི་ཤ་ཀ་ཞེས་བྱར་གྲགས། །རྐང་པ་བརྒྱད་ཅུ་རྩ་གཅིག་པའི། །འཁོར་
ལོར་གསུམ་འཛོམ་གདོང་ཚུགས་གྲགས། །གླང་ཆེན་མྱོས་པའི་མཆེ་བ་ཡིས། །བླངས་ཏེ་ཟ་བར་བྱེད་དང་མཚུངས། །གཡས་གཡོན་མཆེ་བས་འཛིན་པ་སྟེ། །སྣ་ཡི་མདུན་ན་སྡོད་པ་གསོད། །ཇི་ལྟར་གྲྭ་བཞིར་གནས་པ་ཡི། །ཨ་སོགས་བཞི་པོས་སྤང་བ་ལས། །གལ་ཏེ་དབྱངས་ཡིག་བཅུ་གཉིས་
ཀྱང་། །མཆེ་བ་ངེས་པ་ཅིས་མི་སྤང་། །བསམ་གྱིས་མི་ཁྱབ་རྒྱུ་ཡི་ཕྱིར། །བརྗོད་དུ་མི་བཏུབ་གསང་སྟེ་བཞག །རེ་མིག་དང་པོ་དགུ་པ་དང་། །བཅུ་བདུན་ཉི་ཤུ་ལྔ་པ་སྟེ། །རྐང་པ་བརྒྱད་ཅུ་རྩ་གཅིག་ལས། །འདིས་ནི་མཆེ་བ་རྣམ་པར་སྤངས། །གཞན་ཡང་རྐང་པ་བཅུ་གཉིས་ཀྱི། །ཨུ་ཕྱོགས་

203-1-67a

དབྱངས་ཡིག་བཅུ་གཉིས་པོ། །གལ་ཏེ་འདི་ལ་གདོང་ཚུགས་ཤར། །གྲྭ་བཞིར་གདོང་ཚུགས་ཅི་སྟེ་མེད། །རྐང་པ་དྲུག་ལ་གང་གནས་པ། །ཉི་ཤུ་རྩ་གཅིག་ཉི་ཤུ་ལྔ། །བརྒྱ་ཕྱེད་གཅིག་གིས་མ་ལྡང་བའི། །བརྒྱ་ཡི་ཕྱེད་དང་གཅིག་ལྷག་པ། །རེ་མིག་བདུན་ཅུ་རྩ་
གཅིག་པས། །ཁེངས་པ་རྣམས་ཀྱིས་དེ་མ་སྤངས། །གྲྭར་གནས་ཡི་གེ་ཇི་བཞིན་ཏེ། །ཟླ་བ་འཕེལ་བར་མི་བྱེད་དོ། །ཉི་ཟླའི་བར་མཉམ་བཅོ་ལྔ་སྟེ། །ཅུང་ཟད་བསྣོལ་བས་འགྲིབ་པར་དྲན། །དེས་ན་གང་བའི་ཚེས་ལ་ནི། །གླང་ཆེན་མཆེ་བས་རྒྱབ་ཀྱིས་ཕྱོགས། །ལོ་དང་ཟླ་བ་ཉིན་ཞག་ལ། །
རྣམ་པར་འཆར་བར་ཤེས་པར་བྱ། །དཀར་ནག་ཕྱོགས་ཀྱི་ཉིན་ཞག་ལ། །དབྱངས་དང་གསལ་བྱེད་སྟོབས་བྱེད་དྲན། །དཀར་ཕྱོགས་ལས་སྐྱེས་དཀར་པོ་སྟེ། །ནག་ཕྱོགས་ལས་སྐྱེས་ནག་པོ་ལ། །སྟོབས་ནི་ཆེ་བར་འགྱུར་བ་སྟེ། །ཟླ་བ་ཕྱེད་པར་ཡོངས་སུ་གྲགས། །གྷ་ང་ཚ་དང་ཥ་ཎ་ཋ། །དྷ་
ཕ་ཌྷ་དང་ཐ་ཛ་ཉ། །ཀ་བ་བཞི་པོར་གནས་པ་ལས། །གསལ་བྱེད་ཡི་གེ་གསུམ་གསུམ་བསྟན། །སྨིན་དྲུག་སྡིག་ཅན་གནས་པ་ལས། །བྲ་ཉེ་གཡས་སོང་ཨ་དང་གླང་། །དགའ་བ་བཟང་པོ་སྲང་དང་ཏ། །ས་ག་གཡོན་ཏེ་བྱི་བཞིན་བདུན། །དེ་བཞིན་རྒྱུ་སྐར་ཀུན་ལ་སྦྱར། །སྣར་མ་ཨུ་དང་ཐ་
སྐར་གཡས། །ཝ་འཁྲིག་ཨོ་དང་བུ་མོ་དང་། །ས་རི་གཡོན་ཏེ་གྲོ་བཞིན་མདུན། །མགོ་ཡི་གཡོན་ནས་ཀ་ཡིག་དང་། །ཀར་ཀ་སེང་གེ་པ་ནག་པ། །མདུན་དུ་ཆུ་སྨད་ཅེས་བྱ་སྟེ། །ཨ་དང་ལ་དང་ནམ་གྲུ་གཡས། །བསོད་ནམས་ཤར་ན་ཟས་མེད་ཅིང་། །སྡིག་ཅན་བདག་ཉིད་རྣམ་པར་
ཉམས། །ལག་གི་གཡོན་ནས་ཧ་དང་ལཱི། །ཊ་ཡིག་མེ་བཞི་གཡས་སུ་ཝ། །ལི་ཙ་ཁྲུམས་སྨད་མདུན་ཕྱོགས་སུ། །ཆུ་སྟོད་སྡིག་ཅན་ཟས་མེད་ཅིང་། །སྔོན་བཞིན་སྲོག་མཐར་བྱེད་པ་ཡིན། །ནབ་སོའི་གཡོན་དུ་ཊ་བ་དབོ། །གཡས་སུ་ཀ་ཡིག་གླང་ལུག་དང་། །ཁྲུམས་སྟོད་མདུན་དུ་
སྣྲུབས་ཞེས་བྱ། །སྡིག་པས་འཇོམས་པར་སྟོན་པ་ཡིན། །རྒྱལ་གྱི་དོན་དུ་ཨུ་དང་གྲེ། །གཡས་སུ་ཧ་ཡིག་འཁྲིག་པ་ཨོ། །ཉ་དང་ས་ཡིག་མོན་གྲེ་དང་། །མདུན་དུ་སྣྲོན་ཏེ་མཆེ་བས་བཏབ། །སྐག་ནས་གཡོན་དུ་མཆུ་ཞེས་དྲན། །ཌ་དང་ཀར་ཀ་དགའ་བ་སྡོང་། །བུམ་པ་ག་ཡིག་མོན་གྲུ་

203-1-67b

གཡས། །ལྷ་མཚམས་མདུན་གནས་སྡིག་པས་གདུངས། །མཆུ་ཡི་གཡས་སུ་སྐག་བཟུང་སྟེ། །གཡོན་ནས་མ་ཡིག་སེང་གེ་དང་། །བཟང་པོ་རྐྱལ་བ་ཆུ་སྲིན་ཁ། །བྱི་བཞིན་མདུན་དུ་བྲ་ཉེའོ། །སྡག་གནས་བཅོམ་པའི་བདག་ཉིད་དྲན། །གྲེ་ཡི་གཡོན་ནས་ཌ་ཡིག་དང་། །བུ་མོ་ཨི་ཡིག་
གཞུ་དང་ཛ། །གྲོ་བཞིན་གཡས་སུ་ཨུ་དང་རྒྱལ། །མདུན་དུ་ཐ་སྐར་སྡིག་ཅན་འཇོམས། །དབོ་ཡི་གཡོན་དུ་པ་དང་སྲང་། །སྡིག་པ་འབའ་ཞིག་ཆུ་སྨད་རྣམས། །གཡས་ཕྱོགས་མ་ཌ་ནབ་སོ་བཟུང་། །མདུན་དུ་ནམ་གྲུ་སྡིག་གཟའི་བདག །ར་ཨོ་ཡ་དང་ཆུ་སྟོད་རྣམས། །མེ་བཞིའི་གཡོན་
དུ་མཆེ་བས་བཏབ། །ཌ་ལི་ཧ་དང་ལག་རྣམས་གཡས། །ཁྲུམས་སྨད་མདུན་དུ་སྡིག་པས་གནོད། །ནག་པར་སྡིག་པས་གནོད་པ་ལས། །ཏ་ན་སྣྲུབས་ནི་གཡོན་དུ་སྟེ། །པ་དང་སེང་གེ་ཀར་ཀ་ཊ། །ཀ་དང་མགོ་གཡས་ཁྲུམས་སྟོད་མདུན། །གཡས་གཡོན་མདུན་དུ་གནས་པ་རྣམས། །སྡིག་
ཅན་བདག་ཉིད་གནོད་པར་དྲན། །ས་རེར་སྡིག་གནས་གཡོན་དུ་རི། །སྣྲོན་ནོ་གཡས་སུ་དེ་བཞིན་ར། །བུ་མོ་ཨོ་དང་འཁྲིག་པ་མ། །སྣར་མ་མདུན་དུ་མོན་གྲེར་གྲགས། །ས་གར་སྡིག་ཅན་ལྷ་མཚམས་གཡོན། །གཡས་སུ་ཏ་ཡིག་སྲང་བཟང་པོ། །དགའ་བ་གླང་དང་ཨ་ཡིག་དང་། །སྨིན་
དྲུག་མདུན་དུ་མོན་གྲུ་བཟུང་། །ལྷ་མཚམས་ལ་གནས་གཡས་སུ་ནི། །ས་ག་གཡོན་ནས་ན་སྡིག་པ། །རྒྱལ་བ་སྟོང་པ་ལུག་དང་ལ། །བྲ་ཉེའོ་དེ་བཞིན་མདུན་དུ་སྐག །སྣྲོན་ལ་ཡ་ཡིག་གཞུ་ཨཿཉ། །ཙ་ཡིག་ཐ་སྐར་མཆེ་བ་གཡོན། །གཡས་སུ་རི་ཡིག་ས་རི་བཟུང་། །རྒྱལ་ནི་མདུན་ཏེ་སྡིག་
པའི་བདག །སྣྲུབས་ནས་བྷ་ཡིག་ཆུ་སྲིན་དང་། །བུམ་པ་ད་ཡིག་ནམ་གྲུ་གཡོན། །ན་ཏ་ནག་པ་གཡས་སུ་སྟེ། །མདུན་དུ་ནབ་སོ་སྡིག་ཅན་གནོད། །གང་ཞིག་ཆུ་སྟོད་སྡིག་ཅན་གནས། །ཛ་ཨཻ་ཤ་དང་ཁྲུམས་སྨད་གཡོན། །ཡ་ཨེ་ར་དང་མེ་བཞི་གནས། །མདུན་ན་ལག་གི་གནོད་ཅན་དག །
གལ་ཏེ་ཆུ་སྨད་སྡིག་ཅན་གནས། །ཁ་ག་ཁྲུམས་སྟོད་གཡོན་པས་འཛིན། །བྷ་ཡིག་སྡིག་པ་སྲང་ལ་དབོ། །གཡས་ཏེ་མདུན་དུ་མགོ་ལ་གནོད། །གྲོ་བཞིན་ལ་གནས་གཡས་སུ་ཛ། །གཞུ་དང་ཨ་ཡིག་བུ་མོ་ཊ། །བྲེའོ་གཡོན་པས་རྀ་ཡིག་དང་། །མོན་གྲུ་དེ་བཞིན་མདུན་སྣར་མ། །བྱི་བཞིན་

203-1-68a

གྱི་ནི་གཡས་ཕྱོགས་སུ། །ཁ་ཡིག་ཆུ་སྲིན་རྒྱལ་བ་བཟང་། །སེང་གེ་མ་ཡིག་མཆུ་རྣམས་ཟིན། །གཡོན་དུ་མོན་གྲེ་སྨིན་དྲུག་མདུན། །མོན་གྲེར་གལ་ཏེ་སྡིག་ཅན་གནས། །གཡས་སུ་བྱི་བཞིན་གཡོན་དུ་ག །བུམ་པ་སྟོང་དགའ་ཀར་ཀ་ཊ། །ཌ་ཀ་གཡས་སོ་
ས་ག་མདུན། །མོན་གྲུར་བདག་ཉིད་ཆེན་པོ་གནས། །ས་དང་ཉ་ཁྱིམ་ཨོ་འཁྲིག་པ། །ཧ་རྒྱལ་གཡོན་བཟུང་གཡས་སུ་རི། །གྲོ་བཞིན་དུ་ནི་ས་རིར་དྲན། །གནོད་པ་ཁྲུམས་སྟོད་ལ་གནས་ཏེ། །ཁ་ག་ཆུ་སྨད་གཡས་སུ་འཛོམ། །གཡོན་དུ་ད་ཡིག་ལུག་གླང་ཀ །ནབ་སོའི་མདུན་དུ་
ནག་པ་བཅོམ། །ཁྲུམས་སྨད་གལ་ཏེ་སྡིག་ཅན་འོངས། །ཙ་ལི་ཝ་ལག་གཡོན་པས་འཛིན། །ཤ་ཨོ་ཛ་དང་ཁྲུམས་སྟོད་གཡས། །མདུན་དུ་མེ་བཞི་རྣམ་པར་འཇོམས། །ནམ་གྲུའི་གཡས་སུ་ད་ཡིག་དང་། །བུམ་པ་ཆུ་སྲིན་བྷ་ཡིག་སྣྲུབས། །གཡོན་དུ་ལ་ཨ་རྒྱུ་སྐར་མགོ། །མདུན་
དུ་དབོ་ཞེས་བཅོམ་པར་དྲན། །ཐ་སྐར་གཡོན་དུ་ཨུ་ཡིག་དང་། །སྣར་མ་གཡས་སུ་ཙ་ཡིག་ཉ། །ཨ་ཐ་གཞུ་དང་ཡ་དང་སྣྲོན། །མདུན་དུ་གྲེ་ནི་རྣམ་པར་ཉམས། །བྲ་ཉེ་གཡོན་དུ་སྨིན་དྲུག་སྟེ། །གཡས་སུ་ལ་ཡིག་ལུག་སྟོང་པ། །རྒྱལ་བ་སྡིག་པ་ན་ཡིག་དང་། །ལྷ་མཚམས་མདུན་དུ་
མཆུ་ཞེས་གྲགས། །རང་གནས་དང་པོར་སྐྱེས་པ་སྟེ། །དེ་བཞིན་བཅུ་པར་ལས་ཞེས་བརྗོད། །དེ་ནས་རྐང་པ་བཅུ་དྲུག་པ། །རྣམ་པར་འགེས་པ་ཞེས་བྱར་དྲན། །རྐང་པའི་གྲངས་ནི་བཅོ་བརྒྱད་པར། །རྒྱ་ཅན་ཞེས་བྱར་ཡོངས་སུ་གྲགས། །ལྷ་མོ་ཉི་ཤུ་རྩ་གསུམ་པར། །བི་ནཱ་ཤཱརྐ་ཞེས་
བྱའོ། །ཉི་ཤུ་རྩ་ལྔར་བཤད་པ་ལ། །ཡིད་ཅན་ཞེས་བྱར་ཀུན་དུ་གྲགས། །དེ་ལྟར་མཆེ་བ་དྲུག་གནོད་པས། །དྲུག་འཛིན་ཞེས་བྱ་ལྷ་སྲས་མོ། །རྐང་པ་བཅུ་དགུ་པ་ཡི་གྲངས། །ཨ་དྷ་ན་ཞེས་དེ་བཞིན་བརྗོད། །རིགས་དང་ཡུལ་དང་དབང་བསྐུར་གསུམ། །གང་ལ་མཆེ་བས་བཟུང་
བའམ། །གདོང་མཇུག་མེད་ན་དགེ་བ་སྟེ། །གདོང་མཇུག་མཆེ་བས་མི་དགེ་བྱེད། །སྐྱེས་པར་གདོན་ཤར་ནད་འབྱུང་ཞིང་། །ནོར་ཟད་ཀུ་ཅོ་དགྲ་དང་རྩོད། །ལས་ལ་མཆེ་གནས་གྲོགས་དང་འཐབ། །བཟོ་བྱས་བླ་མེད་ལས་མི་འགྲུབ། །རྣམ་འགྲེས་གཉེན་བཤེས་ཕོ་མོ་དབྱེ། །གལ་

203-1-68b

ཏེ་རྒྱ་ཅན་མཆེ་བས་བཏབ། །བསམ་པའི་དོན་རྣམས་འགྲུབ་མི་འགྱུར། །བི་ན་ཤ་ཀ་རིམས་ནད་འཆི། །ཡིད་ཅན་གདོང་ཚུགས་སྡུག་བསྔལ་འཐོབ། །དེ་ལྟར་དྲུག་ལ་མི་དགེ་བྱེད། །སྨིན་དྲུག་བྲམ་ཟེའི་རིགས་ཡིན་ཏེ། །རྒྱལ་རིགས་འཛིན་པ་རྒྱལ་ཞེས་བྱ། །ནམ་གྲུ་རྗེའུའི་རིགས་ལ་
གནས། །མེ་བཞི་དམངས་རིགས་ལ་སོགས་དྲན། །དབུས་ནས་བརྩམས་ཏེ་ཡུལ་རྣམས་སུ། །སྨིན་དྲུག་ལ་སོགས་གསུམ་གསུམ་པོ། །ཧུ་རའི་ཡུལ་གྱི་མཐར་ཐུག་པར། །རིམ་པ་བཞིན་དུ་ཤེས་པར་བྱེད། །གཟུགས་འདི་སྡིག་ཅན་གང་གནས་པའི། །གསུམ་ལ་དབུགས་སོགས་
རིམ་པ་བཞིན། །ལག་སོགས་གསུམ་ལ་སྡིག་ཅན་གནས། །ཤར་གྱི་རྒྱལ་པོ་ཚོགས་རྣམས་འཇིག །སྨིན་དྲུག་སོགས་གསུམ་ཡུལ་དབུས་ཀྱི། །མ་ག་དྷཱ་སོགས་རྣམས་ལ་ངན། །སྐག་སོགས་ཤར་ལྷོའི་སེམས་ཅན་སྐྲག །དབོ་སོགས་ལྷོ་རུ་མི་དགེ་སྟེ། །ས་རི་ལ་སོགས་ལྷོ་ནུབ་
པ། །སྣྲོན་སོགས་སིན་དྷུ་སོགས་ནུབ་ཤེས། །ནུབ་བྱང་ཧོར་སོགས་ཆུ་སྨད་སོགས། །མོན་གྲེ་ལ་སོགས་བྱང་གི་ཡུལ། །ནམ་གྲུ་ལ་སོགས་བྱང་ཤར་ཡུལ། །སྡིག་གནས་མི་དགེ་དབང་ཕྱུག་མ། །སྙིང་ག་བཤང་ལམ་དེ་བཞིན་ཁ། །ཡན་ལག་བཞི་དང་ལྷན་ཅིག་ཏུ། །དབོ་གཉིས་
མཉམ་པར་གསུམ་གནས་ལ། །རུས་སྦལ་འཁོར་ལོར་ཡོངས་སུ་གྲགས། །ལྷ་མོ་སྐར་མའི་སྦྱོར་བ་ཡིས། །དགེ་དང་མི་དགེའི་འབྲས་བུ་ཐོབ། །སྙིང་གི་དབུས་ཀྱི་ཡུལ་རིག་ཅིང་། །ཡན་ལག་བཞིས་ནི་མཚམས་ཀྱི་ཡུལ། །ཁ་ཡི་ཤར་ན་གནས་པའི་ཡུལ། །བཤང་ལམ་ནུབ་ཕྱོགས་
བཙུན་མོ་ཀྭ །དབོ་གཉིས་ལྷོ་བྱང་ཡུལ་དུ་ནི། །དབྱངས་འཆར་རྒྱུད་ལས་ཡོངས་སུ་གྲགས། །བསོད་ནམས་སྡིག་ཅན་གང་སྦྱོར་བ། །དགེ་དང་མི་དགེ་ངེས་པར་མཐོང་། །དེ་ནས་སེ་བཱི་ཙཀྲ་བཤད། །ལེགས་པར་ཉོན་ཅིག་ལྷ་ཆེན་མ། །འདི་ནི་རྣམ་པར་ཤེས་ཙམ་གྱིས། །དགོས་པ་
ཐམས་ཅད་འགྲུབ་འགྱུར་བའི། །རང་གི་སྐྱེ་བར་འཛིན་པ་ཡི། །སྐར་མ་དང་པོར་གཞག་པ་ལས། །མགོ་བོར་བདུན་བཞག་མཛེས་དགའ་མ། །དེ་བཞིན་རྒྱབ་ཏུ་བདུན་ནས་བརྗོད། །སྙིང་གར་བདུན་ནི་གནས་པར་བསྟན། །རྐང་པར་བདུན་བཞག་དབང་ཕྱུག་བདག །རང་གི་སྐར་མར་

203-1-69a

གང་བརྗོད་པ། །མགོ་བོའི་དབུས་སོང་མཆོག་ཏུ་དགེ། །མགོ་བོར་གནས་པས་དགའ་བསྐྱེད་ཅིང་། །མཆོད་འགྱུར་ལེགས་སྟེར་རྗེས་འཛིན་འགྱུར། །རྒྱབ་ཀྱི་སྐར་མ་ལ་སོགས་ངན། །ཇི་བཞིན་པ་ཡི་བཅུ་ཆ་སྙེད། །གལ་ཏེ་སྙིང་གའི་སྐར་མར་སོང་། །བདག་པོའི་
དབང་སོང་ཅི་བགྱིད་བྱེད། །ཇི་སྙེད་རྐང་པའི་སྐར་མ་ལ། །ཞུ་བ་དོན་མེད་ཉོན་མོངས་འགྱུར། །མིག་གིས་མི་མཐོང་རེ་ཐག་འཆད། །བདེན་པར་ངེས་དྲན་རི་སྲས་མོ། །དེ་ལྟར་བརྒྱད་ཅུ་རྩ་གཅིག་པའི། །འཁོར་ལོ་ཞེས་གྲགས་བཞིན་བཟང་མ། །འདི་ནི་གཡུལ་ལས་རྣམ་པར་རྒྱལ་བ་གསང་
བའི་རྒྱུད་ཀྱི་རྒྱལ་པོ་ལས་རྐང་པ་བརྒྱ་ཅུ་རྩ་གཅིག་པའི་འཁོར་ལོ་སྦྱོར་བ་བསྟན་པ་ཆེན་པོ་སྟེ་ལེའུ་ལྔ་པའོ།།      །།ལྷ་མོས་གསོལ་པ། ལྷ་ཡི་ལྷ་མཆོག་བཅོམ་ལྡན་འདས། །ཐམས་ཅད་མཁྱེན་པ་ལ་ཞུས་པ། །ལུས་ཅན་སྐྱེས་པའི་གནས་སྐབས་ལ། །དགེ་དང་མི་དགེ་ཇི་
ལྟར་གནས། །དུས་ཀྱི་འཁོར་ལོ་ཇི་ལྟ་བུ། །གནས་དང་འཆི་བའི་ཁྱད་པར་ལས། །དགེ་དང་མི་དགེའི་རིམ་པ་བཞིན། །ལྷ་ཆེན་བདག་ལ་ཅིས་མ་གསུང་། །བཅོམ་ལྡན་འདས་ཀྱིས་བཀའ་སྩལ་པ། །མཆོག་ཏུ་གསང་བའི་མན་ངག་ལྷ། །དཀར་མོ་མྱུར་དུ་ཉན་པར་གྱིས། །ལུས་
ཅན་ཀུན་གྱི་སྲོག་ཤེས་པ། །དུས་ཀྱི་འཁོར་ལོ་ཞེས་བྱ་བ། །མུ་ཁྱུད་བཞི་པ་ལྟེ་བ་ཅན། །རྩིབས་ནི་བཅུ་གཉིས་རེ་མིག་ནི། །སུམ་ཅུ་བདུན་ལྡན་འཁོར་ལོ་སྟེ། །རིམ་པ་གསུམ་དུ་བྲིས་ནས་ནི། །ཚེ་དང་སྲོག་རླུང་ཞག་གྲངས་དང་། །ལོ་ཟླ་ཉིན་ཞག་རིམ་པས་བྲི། །ཉི་ཁྱིམ་འཕོ་བ་
ཞེས་བྱ་བ། །གཡས་དང་གཡོན་པའི་ལམ་ལས་ནི། །རྒྱུ་བའི་མཚན་ཉིད་རིག་པར་བྱ། །འདི་ལ་དགེ་དང་མི་དགེ་བརྟག །ནག་པོའི་ཚེས་གཅིག་ནས་བཟུང་སྟེ། །ཉིན་ཞག་གསུམ་དུ་འཕོ་གཅིག་ལ། །ཟླ་བའི་བགྲོད་པ་རྒྱུ་བ་སྟེ། །དེ་ནས་ཉིན་གསུམ་ཉི་བགྲོད་འགྱུར། །དེ་བཞིན་བཅོ་
ལྔའི་བར་དུ་ཡང་། །ཞག་ནི་གསུམ་གསུམ་ཤེས་པར་བྱ། །དཀར་པོའི་ཚེས་གཅིག་ནས་བརྩམས་ཏེ། །ཉིན་ཞག་གསུམ་དུ་སྔ་དྲོ་ནི། །ཉི་མའི་བགྲོད་པ་རྒྱུ་བ་སྟེ། །དེ་བཞིན་ཚེས་ནི་བཅོ་ལྔའི་བར། །དུས་སྦྱོར་གཅིག་ལ་རྒྱུ་བར་འགྱུར། །དུས་སྦྱོར་རེ་རེ་རྒྱུ་བ་ལས། །ཕྱིན་ཅི་ལོག་ཏུ་ངེས་

203-1-69b

པར་རྒྱུ། །རྩོད་པ་ལ་སོགས་ངེས་འགྱུར་བ། །ཉིན་ཞག་ལྔར་ནི་ལོག་པར་རྒྱུ། །རྩོད་པ་ལ་སོགས་འབྱུང་བར་འགྱུར། །ཟླ་བ་ཕྱེད་ཀྱིས་ནད་འབྱུང་ཞིང་། །ཟླ་བ་གཅིག་གིས་གཉེན་རྣམས་བརླག །ཟླ་ཕྱེད་གསུམ་གྱིས་འཆི་བར་འགྱུར། །དེ་ལྟར་ཤེས་བྱ་མཛེས་མ་ཀྱེ། །ཞག་གཅིག་
ནས་ནི་བཞི་པའི་བར། །བཅུ་ནས་བཞི་ཡི་བར་གྱི་ལོ། །ཞག་ལྔ་ནས་ནི་བརྩམས་ནས་ནི། །ཉི་ཤུ་རྩ་ལྔའི་མཐར་ཐུག་པ། །ལྔ་ལྔའི་ཞག་ནི་འཕེལ་བ་ཡིན། །ཉི་ཤུ་ལྔ་ནས་སུམ་ཅུ་གསུམ། །རེ་རེ་ཞག་ནི་འཕེལ་བ་ཡིན། །དེ་ལ་གསུམ་གཉིས་གཅིག་གི་ལོ། །དྲུག་གསུམ་གཉིས་
གཅིག་ཕྱེད་ཀྱི་ཟླ། །བཅོ་ལྔ་གསུམ་གཉིས་གཅིག་གི་ཞག །དེ་ལྟར་ལོ་ཟླ་ཞག་རྣམས་ཀྱིས། །ལུས་ཅན་རྣམས་ཀྱི་སྲོག་འདོར་བྱེད། །དེ་ལྟར་ཐེ་ཚོམ་མེད་མཚན་ཉིད། །མ་ལུས་པར་ནི་བཤད་པར་བྱ། །སྐར་མའི་མིང་ལ་ཟླ་བ་གནས། །བཅུ་བཞི་པ་ལ་ཉི་མ་སོང་། །འཛོམ་
པས་ལུས་ཅན་སྲོག་འདོར་འགྱུར། །ཐམས་ཅད་མཁྱེན་པས་གསང་སྟེ་བཤད། །དུས་འདི་ཤེས་པར་བྱ་བ་སྟེ། །སྔ་མའི་སྦྱོར་བ་འདི་རྫོགས་འགྱུར། །རང་གི་རླུང་དང་སྐར་ཁྱིམ་བརྟག །ལྟས་ཀྱི་འཁོར་ལོ་བརྟག་པར་བྱ། །ཇི་ལྟར་སངས་རྒྱས་བཅོམ་ལྡན་འདས། །གཡས་གཡོན་
རླུང་གི་བྱེ་བྲག་བལྟ། །འཕོ་བའི་དུས་ཚོད་བརྟག་བྱ་སྟེ། །བྱེ་བྲག་ཕྱེད་པས་སྨྲ་བར་བྱ། །ལམ་གསུམ་ལས་རྒྱུ་བྱེ་བྲག་ནི། །དབུས་རྒྱུ་ཉིན་ཕྱེད་འཆི་བ་སྟེ། །གཡོན་ནས་རྒྱུ་ན་ནུབ་མོ་འཆི། །གཡས་རྒྱུ་ཉིན་མོ་འཆི་བར་སྟོན། །འདི་ནི་རྩེ་གཅིག་ཡིད་གནས་པ། །མཉམ་པར་གཞག་པས་
ཤེས་པར་འགྱུར། །ཚེ་ཡི་མཚན་ཉིད་ཇི་ཙམ་ཞེས། །རླུང་གི་དབུགས་ལ་མ་གཡེངས་བལྟ། །ཇི་ལྟར་རླུང་ནི་ལམ་གཅིག་ལས། །ཞག་ལྔར་རྒྱུས་ན་རི་སྲས་མོ། །ལོ་གསུམ་གྱི་ནི་རིམ་པ་ཡིས། །མི་རྣམས་སྲོག་ནི་ཟད་པར་འགྱུར། །གལ་ཏེ་ཉིན་ཞག་བཅུ་རྒྱུས་ན། །ལོ་གཉིས་ལུས་
ཅན་སྲོག་འདོར་འགྱུར། །བཅོ་ལྔའི་ཉིན་ཞག་རྒྱུས་པ་ན། །ལོ་གཅིག་ལ་ནི་ངེས་པར་འཆི། །གལ་ཏེ་ཉིན་ཞག་ཉི་ཤུ་རྒྱུ། །མི་རྣམས་ཟླ་བ་དྲུག་ནས་འཆི། །ཉི་ཤུ་རྩ་ལྔར་རྒྱུ་བྱེད་ན། །ཟླ་བ་གསུམ་གྱིས་འཆི་བར་འགྱུར། །ཉིན་ཞག་ཉི་ཤུ་རྩ་དྲུག་གིས། །སྲོག་ནི་ཟླ་བ་གཉིས་ན་

203-1-70a

འདོར། །ཉིན་ཞག་ཉི་ཤུ་རྩ་བདུན་གྱིས། །ཟླ་བ་གཅིག་ན་གཤིན་རྗེའི་གནས། །གལ་ཏེ་ཉིན་ཞག་ཉི་ཤུ་བརྒྱད། །ཟླ་བ་ཕྱེད་ན་ལྷོ་ཕྱོགས་སོང་། །ཉིན་ཞག་ཉི་ཤུ་རྩ་དགུ་རྒྱུས། །ཉིན་ཞག་བཅུ་ན་ངེས་པར་འཆི། །སུམ་ཅུ་རྒྱུས་ན་ཞག་ལྔ་ན། །སུམ་ཅུ་གཅིག་
གིས་ཞག་གསུམ་ན། །སུམ་ཅུ་གཉིས་ཀྱིས་ཞག་གཉིས་ན། །ཉིན་ཞག་སུམ་ཅུ་སོ་གསུམ་གྱིས། །ལུས་ཅན་རྣམས་ཀྱི་ལམ་པོ་ཆེར། །ཞག་གཅིག་གིས་ནི་སྲོག་འདོར་དྲན། །ཉི་ཕྱེད་ནས་ནི་ཉེར་ལྔའི་བར། །ལྷ་ཡིས་ཤེས་ཀྱིས་གཞན་གྱིས་མིན། །ཇི་སྲིད་མ་ཤིའི་བར་དུ་ནི། །བློ་ལྡན་
མཁས་པས་ཤེས་པར་བྱ། །དང་པོར་དེ་ལྟར་ཤེས་བྱས་ལ། །འདྲི་བ་རྣམས་ལ་ལན་གདབ་བྱ། །ལུས་ཅན་རྣམས་ཀྱི་འཆི་བའི་དུས། །ལེགས་པར་བརྟགས་ན་དེ་ལྟར་མཐོང་། །བརྟག་ཏུ་དེ་ལྟར་བརྟག་བྱ་སྟེ། །ཇི་བཞིན་མཁས་ལ་དྲི་བར་བྱ། །མཆུ་ཡི་ཟླ་བ་ཤར་དུས་སུ། །ཆུ་སྲིན་འཕོ་
བར་ཡོངས་སུ་གྲགས། །དེ་ཚེ་ཐོ་རངས་མལ་ནས་ལངས། །ཉི་མ་ཤར་ཀར་བལྟ་བར་བྱ། །དགུན་ཟླ་ཐ་ཆུངས་ཞེས་བྱ་བ། །ཆུ་སྲིན་འཕོ་བའི་སྦྱོར་བར་གྲགས། དེ་ནས་གཞན་ཡང་བཤད་པར་བྱ། །ཚེ་ཡི་གནས་སྐབས་འབྲས་བུ་ལ། །དགེ་དང་མི་དགེའི་སྦྱོར་བ་རྣམས། །གཙོ་
མོ་གཞན་ལ་ངས་མ་བཤད། །ཉི་ཟླ་མིག་དམར་སྒྲ་གཅན་དང་། །ཕུར་བུ་སྤེན་པ་གཟའ་ལྷག་དང་། །དུ་མཇུག་པ་སངས་ཞེས་བྱ་བ། །གཟའ་རྣམས་དགུ་རུ་ཡོངས་སུ་གྲགས། །ལུས་ཅན་ཚེ་ཡི་གནས་སྐབས་ལ། །ཀུན་དུ་དབང་བྱེད་འདི་རྣམས་ཡིན། །ཡོངས་སུ་རྫོགས་དང་དབུ་
མ་དང་། །འབྲིང་དང་ཐ་མར་ཤེས་པར་བྱ། །ཉི་མའི་ལོ་དྲུག་ཤེས་བྱ་སྟེ། །ཟླ་བ་ལོ་བཅུ་མཛེས་དགའ་མ། །མིག་དམར་ཞེས་བྱ་ལོ་བདུན་ཡིན། །སྒྲ་གཅན་ལ་ནི་བཅོ་བརྒྱད་དྲན། །བླ་མའི་བཅུ་དྲུག་སྤེན་པ་ནི། །ཉི་ཤུར་གཅིག་གིས་མ་ཚང་བའི། །གཟའ་ལྷག་ལོ་ནི་བཅུ་བདུན་
གྲགས། །དུ་བ་མཇུག་རིངས་ལོ་བདུན་དྲན། །པ་སངས་མཉམ་པར་ཉི་ཤུ་སྟེ། །དགེ་དང་མི་དགེའི་རིམ་པས་སྤྱོད། །བསྡུས་པས་བརྒྱ་དང་ཉི་ཤུ་སྟེ། །ལུས་ཅན་མཆོག་གི་ཚེ་རབས་གྲགས། །རྒྱུ་སྐར་སྨིན་དྲུག་ལ་སོགས་པ། །ལན་གསུམ་བསྐོར་བས་ཉི་ཤུ་བདུན། །རེ་མིག་ཐད་དྲང་

203-1-70b

རིམ་པ་ལྔ། །སྡེ་ཚན་དགུ་དགུར་གནས་པ་ལ། །ཉི་མ་ནས་བརྩམས་པ་སངས་མཐར། །དགུ་པོ་རེ་མིག་རྣམས་ལ་གྲགས། །གནས་སྐབས་འབྲས་བུ་རིམ་པ་བཞིན། །འདི་འདྲའི་བསྟན་བཅོས་ལྷ་ཡིས་བཤད། །ཚེས་དང་མཁའ་མེ་བཞི་བཅུ་ལྔ། །དྲུག་ཅུའི་དུས་ཀྱི་ཆུ་ཚོད་རྣམས། །
དང་པོ་གཉིས་གསུམ་བཞི་པ་སྟེ། །ཆའམ་སྐལ་བར་གྲགས་པ་ཡིན། །ཆ་ཤས་དང་པོར་སྐྱེས་པ་རྣམས། །མཆོག་གི་ཚེ་ཞེས་ཡོངས་སུ་གྲགས། །ཆ་ཤས་གཉིས་པར་སྐྱེས་པ་རྣམས། །ཚེ་ལོ་བརྒྱ་རུ་གྲགས་པ་ཡིན། །གསུམ་པས་བརྒྱད་ཅུར་ཤེས་བྱ་སྟེ། །བཞི་པ་དྲུག་ཅུར་ཤེས་པར་བྱ། །
བསྡོམས་པས་བརྒྱ་དང་ཉི་ཤུ་སྟེ། །གནས་སྐབས་ཚེ་ཚད་དེ་ལ་ལྟོས། །རང་གི་སྐྱེས་པའི་ཆུ་ཚོད་ལ། །ཉི་ཤུ་ལྷག་པའི་བརྒྱ་ཡིས་བསྒྱུར། །དེ་ལ་དགུ་བཅུས་བགོས་ཐོབ་པ། །ཚེ་ཚད་རྣམས་ལ་རིམ་བཞིན་དབྲི། །ལྷག་མ་ལུས་ཅན་ཚེ་ཚད་དེ། །འཆི་སླུས་པ་ན་སྣོན་པར་བཤད། །ཆ་ཤས་
དང་པོས་མཆོག་ལ་དབྲི། །གཉིས་པས་བརྒྱ་ལ་དབྲི་བར་བྱ། །གསུམ་པས་བརྒྱད་ཅུ་ལ་དབྲིའོ། །ཆ་ཤས་བཞི་པ་དྲུག་ཅུར་དབྲི། །སླུས་ན་དང་པོར་སྣོན་པ་མེད། །ཆ་ཤས་གཉིས་པར་ལྔ་སྟེར་ཏེ། །ཆ་ཤས་གསུམ་པར་བཅུ་སྦྱིན་བྱ། །ཆ་ཤས་བཞི་པས་བཅོ་ལྔར་བསྣན། །ཉི་ཟླ་
མིག་དམར་ལ་སོགས་པའི། །སོ་སོའི་ལོ་རྣམས་ཞག་ཏུ་བསྒྱུར། །དེ་ལ་རང་རང་ལོ་ཡིས་བསྒྱུར། །དེ་ལ་མཁའ་དང་ཉི་མས་བགོ། །རྙེད་པ་སུམ་ཅུས་བགོས་ཐོབ་པ། །ཟླ་བར་འགྱུར་རོ་ལྷག་མ་ཞག །ཡང་ན་སོ་སོའི་ལོ་རྣམས་ཀུན། །མཁའ་དུས་མེ་ཡིས་བསྒྱུར་བར་བྱ། །དེ་
ལ་མཁའ་དང་ཉི་མས་བགོ། །རྙེད་པ་རྣམས་ན་བརྟན་པ་ཡིན། །ལྷག་མ་དྲུག་ཅུས་བསྒྱུར་ཐོབ་པ། །ཆུ་ཚོད་རྣམས་སུ་ཤེས་པར་བྱ། །གཟའ་དགུ་རང་རང་བསྟན་པ་ལ། །རང་རང་ལོ་ཡིས་བསྒྱུར་བར་བྱ། །མཁའ་དུས་མེས་བགོས་ཐོབ་པ་ལོ། །གལ་ཏེ་རྙེད་པར་མ་གྱུར་ན། །སུམ་
ཅུས་བགོས་ལ་ཟླ་བ་བྱ། །དེ་ཡི་ལྷག་མ་ཞག་ཏུ་འགྱུར། །དེ་ལྟར་མཆོག་གི་ཚེ་ལ་ནི། །ལུས་ཅན་རྣམས་ལ་ཡོངས་སུ་གྲགས། །འདྲི་བྱེད་སྐྱེས་པའི་སྐར་མ་ཡི། །བདག་པོ་གང་ཡིན་དེ་ཡི་ལོ། །མཆོག་ནས་ཆ་ཤས་བཞི་པའི་བར། །ལྷག་མ་ལུས་ཅན་ཚེ་ཚད་ཡིན། །འདྲི་བར་

203-1-71a

བྱེད་པའི་ཚེ་ཚད་གང་། །ཐོག་མར་རང་གི་ལོ་ཡིས་བསྒྱུར། །མཁའ་དང་ཉི་མས་ཐོབ་པ་ལོ། །ལྷག་མ་ཡོད་ན་གསུམ་གྱིས་བསྒྱུར། །སུམ་ཅུས་བགོས་ལ་ཟླ་བ་བྱ། །ལྷག་མ་དག་ནི་ཞག་ཏུ་འགྱུར། །དེ་འོག་རིམ་པ་ཇི་བཞིན་དུ། །དགུ་ཡི་མཐར་ཐུག་
བལྟ་བར་བྱ། །ཆ་ཤས་བཞི་ཡི་གནས་སྐབས་ཀུན། །བློ་ལྡན་བྱེ་བྲག་ཤེས་བྱ་སྟེ། །ལོ་ཟླ་ཞག་དང་དབྱུ་གུ་དང་། །ཆུ་སྲང་དབུགས་ཀུན་ཕྲ་བར་བྱེད། །ལུས་ཅན་ཚེ་ཡི་གནས་སྐབས་ལ། །དགེ་བ་དང་ནི་མི་དགེ་བའི། །ལོ་ཟླ་ཞག་གི་གནས་སྐབས་རྣམས། །ལེགས་པར་བརྟགས་
ཏེ་སྨྲ་བར་གྱིས། །ཉི་ཤུ་རྩ་བདུན་རེ་མིག་ལས། །ལོ་བདག་གང་ཡིན་ཤེས་བྱ་སྟེ། །རང་གི་སྐྱེས་པའི་སྐར་མ་ནི། །བགྲངས་ལ་གང་ཡིན་ཤེས་པར་བྱ། །གྲོ་བཞིན་དབུས་སུ་སོང་བ་ཡི། །མིང་གི་སྐར་མ་ཞེས་བྱ་བ། །དེ་ཡི་མཚམས་སུ་འཆི་བ་སྟེ། །སྡིག་པའི་གནས་སྐབས་ཐོབ་པར་
བྱེད། །སྟོབས་ལྡན་འཆི་བར་འགྱུར་བ་སྟེ། །སྟོབས་ཆུང་ལོངས་སྤྱོད་རླག་པར་བྱེད། །སྟོབས་མཉམ་ནད་ནི་འབྱུང་བར་ཡང་། །བྱེད་དོ་མཆོག་གི་གཟུགས་ཅན་མ། །ལྷ་མཆོད་སྦྱིན་དང་ཆོ་གའི་ལས། །དགེ་བའི་བཤེས་དང་འགྲོགས་ཤིང་ཞུ། །དགེ་སྦྱོང་བྲམ་ཟེ་བསྙེན་བཀུར་སོགས། །
དུས་མིན་འཆི་བ་འཇོམས་པར་བྱེད། །རྒྱུ་སྐར་འོག་ན་གནས་པའི་གཟའ། །ཚེ་ཡི་གནས་སྐབས་འབྲས་བུ་སྟོན། །དེ་ཉིད་རིམ་པས་ལུས་ཅན་ཚེ། །གནས་སྐབས་འབྲས་བུ་ཐམས་ཅད་ཤེས། །ཉི་མ་རྒྱལ་པོས་རྙེད་པ་འབྱུང་། །མཁྲིས་པའི་ནད་རྣམས་འབྱུང་བ་དང་། །གཉེན་གྲོགས་
རྣམས་དང་འབྲལ་བ་དང་། །ནོར་ཟད་པ་དང་ཉེས་པ་འབྱུང་། །ཟླ་བའི་ལོ་བཅུར་གཉིད་ཆེ་ཞིང་། །བུད་མེད་རྣམས་ནི་མཉམ་པར་རྙེད། །གོས་དང་རྒྱན་ལ་སོགས་པ་རྙེད། །རང་ཕྱོགས་དགྲར་འགྱུར་བུ་མོ་སྐྱེ། །མིག་དམར་ལོ་བདུན་དགྲ་རྣམས་འབྱུང་། །གཉེན་བཤེས་རྣམས་
དང་འཐབ་རྩོད་འབྱུང་། །ཁྲག་དང་མཁྲིས་པའི་ནད་འབྱུང་ཞིང་། །གཞན་གྱི་བུད་མེད་རྣམས་དང་འགྲོགས། །ལྷ་མིན་དབང་པོའི་བཅོ་བརྒྱད་ལ། །ནོར་ཟད་ལྕེ་ཟུག་ཆུང་མ་འཆི། །གཉེན་བརླག་དོན་ཉམས་སེམས་ནད་འབྱུང་། །གཞན་དུ་འགྲོ་དགོས་བརྙས་པར་འགྱུར། །

203-1-71b

ཕུར་བུའི་བཅུ་དྲུག་གྲགས་པ་ལ། །གཞན་གྱིས་ཁུར་ཞིང་བུ་ཐོབ་འགྱུར། །ནོར་དང་ཆོས་དང་གོས་འཕེལ་ཞིང་། །སྦྱིན་སྲེག་སེམས་དང་རིག་པ་འཕེལ། །སྤེན་པའི་བཅུ་དགུར་ལུས་ནད་འབྱུང་། །ཆུང་མ་བུ་དང་འཐབ་རྩོད་ཅིང་། །བློ་དམན་རྨུགས་ཤིང་ལེ་ལོ་ཆེ། །བྱེས་སུ་
འཁྱམས་ཤིང་ཡུལ་ན་བསྐོར། །གཟའ་ལྷག་ལོ་ནི་བཅུ་བདུན་ལ། །གཉེན་གྲོགས་དང་མཐུན་ཆོས་དང་སྦྱར། །ཤེས་རབ་འཕེལ་ཞིང་ལུས་ནད་སྦྱོར། །རླུང་ནད་ཆམ་པ་ཁྲག་ནད་འབྱུང་། ཀེ་ཏུའི་བདུན་ལ་བུ་བརླག་ཅིང་། །ནོར་ཟད་སྤུན་ཟླ་སྲིང་མོ་འཆི། །དགྲ་དང་ཕྲད་ཅིང་
རྒྱལ་པོས་འཇོམས། །བུད་མེད་མ་རུངས་རྣམས་དང་རྩོད། །པ་སངས་ཉི་ཤུ་ལོ་རྣམས་ལ། །བུད་མེད་རྙེད་ཅིང་ཆོས་ཀྱང་རྙེད། །དོན་དང་ལས་འགྲུབ་དགེ་བ་འཕེལ། །ནོར་ཐོབ་གྲགས་པ་འཕེལ་བར་འགྱུར། །དེ་ལྟར་ཚེ་ཡི་གནས་སྐབས་སུ། །དགེ་དང་མི་དགེ་རྣམ་པར་སྤྱོད། །
སྐྱེས་པའི་བྱེ་བྲག་མ་ལུས་པ། །ལྷ་མོ་བདག་གིས་ངེས་པར་བསྟན། །དེ་ནས་གཞན་ཡང་སྐྱེས་པ་ཡི། །འཁོར་ལོ་ཟབ་མོ་ལྷ་མོ་ཉོན། །བསྟན་བཅོས་འདིར་ནི་མ་གསུངས་ཀྱང་། །ཐུབ་པ་ཆེན་པོས་རྣམ་པར་བཤད། །ཉི་མས་འཁྱུད་པའི་སྐར་མ་དེ། །སྤྱི་བོའི་སྟེང་དུ་བྲི་བར་བྱ། །དེ་
བཞིན་ཁ་ལ་གསུམ་ཡིན་ཏེ། །དཔུང་མགོར་གཉིས་ཏེ་མཁྲིག་མར་གཉིས། །ལག་པ་ལ་གཉིས་སྙིང་གར་ལྔ། །སྐར་མ་གཅིག་ནི་ལྟེ་བ་ལ། །གསང་བར་སྐར་མ་གཅིག་ཡིན་ཏེ། །པུས་མོ་ལ་ནི་སྐར་མ་གཉིས། །རྐང་པར་བརྒྱད་དགོད་སྐྱེ་བ་བརྟག །རྐང་པ་ལས་སྐྱེས་ཚེ་ཐུང་འགྱུར། །
པུས་མོ་ལས་སྐྱེས་བྱེས་འཁྱམས་ཤིང་། །གསང་བ་ལས་སྐྱེས་འཁྲིག་པས་བརླག །ལྟེ་བ་ལས་སྐྱེས་དབུལ་པོར་འགྱུར། །སྙིང་ག་ལས་སྐྱེས་ལོངས་སྤྱོད་ལྡན། །ལག་པ་ལས་སྐྱེས་རྐུན་མོར་འགྱུར། །མཁྲིག་མར་སྐྱེས་པ་སྡུག་བསྔལ་ཅན། །དཔུང་པ་ལས་སྐྱེས་ཁུར་བོ་པ། །
ཁ་ལས་སྐྱེས་པ་ཆོས་དང་ལྡན། །སྤྱི་བོའི་སྐར་མ་ལས་སྐྱེས་པ། །རྒྱལ་པོར་འགྱུར་བར་ཐེ་ཚོམ་མེད། །དེ་ལྟར་དགེ་དང་མི་དགེ་བ། །སྐྱེས་མ་ཐག་ཏུ་མཁས་པས་བརྟག །དུས་ཀྱི་འཁོར་ལོའི་སྦྱོར་བ་ལས། །ཤེས་པར་འགྱུར་རོ་དབང་མོ་ཆེ། །འདི་ནི་གཡུལ་ལས་རྣམ་པར་

203-1-72a

རྒྱལ་བ་དབྱངས་འཆར་བའི་རྒྱུད་ཀྱི་རྒྱལ་པོ་ལས་སྐྱེས་པའི་སྐབས་བསྟན་པ་ཆེན་པོ་སྟེ་ལེའུ་དྲུག་པའོ།།      །།བཅོམ་ལྡན་འདས་ཀྱིས་བཀའ་སྩལ་པ། །དེ་ནས་གཞན་ཡང་བཤད་པར་བྱ། །ཇི་ལྟར་ལམ་གྱི་འཁོར་ལོ་མཆོག །ལམ་དུ་ཞུགས་
པའི་མི་རྣམས་ལ། །ཕན་གནོད་འབྲས་བུ་མཐོང་བར་འགྱུར། །རྩ་གསུམ་འཁོར་ལོ་རྣལ་འབྱོར་པ། །ཐ་སྐར་ལ་སོགས་རིམ་བཞིན་བྲི། །རྒྱུ་སྐར་རིམ་བཞིན་རྩ་གསུམ་ཁྲིད། །ནམ་གྲུའི་མཐར་ཐུག་མཛེས་མ་ཉོན། །ཐ་སྐར་དང་ནི་ལག་དང་ཡང་། །ནབ་སོ་དང་ནི་དེ་བཞིན་དབོ། །
མེ་བཞི་སྣྲོན་དང་བཅས་པ་དང་། །སྣྲུབས་དང་མོན་གྲུ་ཁྲུམས་སྟོད་རྣམས། །དང་པོའི་རྩ་ལ་རིམ་བཞིན་བྲི། །བྲ་ཉེ་དང་ནི་དེ་བཞིན་མགོ། །རྒྱལ་དང་གྲེ་ཞེས་བྱ་བ་དང་། །ནག་པ་དེ་བཞིན་ལྷ་མཚམས་དང་། །ཆུ་སྟོད་མོན་གྲུ་ཁྲུམས་སྨད་རྣམས། །བློ་ལྡན་མཆོག་གི་གཟུགས་ཅན་མ། །
གཉིས་པའི་རྩ་ཞེས་ཡོངས་སུ་གྲགས། །སྨིན་དྲུག་ནས་ནི་སྣར་མ་དང་། །སྐག་དང་མཆུ་དང་ས་རི་དང་། །ས་ག་ཆུ་སྨད་གྲོ་བཞིན་དང་། །ནམ་གྲུ་ལྷ་མོ་རྩ་གསུམ་དྲན། །དེ་རྣམས་གཟའ་དང་ཡང་དག་སྦྱོར། །བསོད་ནམས་སྡིག་ཅན་གཟའ་རྣམས་བརྟག །ལམ་འཇུག་ཏཀྐཱལ་
རྒྱུ་སྐར་གྱི། །རྩ་རྒྱུད་ལ་གནས་གཟའ་ཡི་ལས། །མདའ་འཕེན་དྲུག་ཅུས་རྐང་པ་གཅིག །རྐང་པ་བཞི་ལ་དཔག་ཚད་ཡིན། །འགྲོ་སར་དཔག་ཚད་ཇི་སྙེད་པ། །རྩ་རྒྱུད་ལ་གནས་གཟའ་ཡིས་བསྒྱུར། །དེ་ལ་ཉི་ཤུ་བདུན་བགོས་ཐོབ། །དྲོ་ལམ་དུ་འགྱུར་ལྷག་མ་ལ། །བཞིས་
བསྒྱུར་ཐོབ་པ་རྐང་པ་སྟེ། །ལྷག་མ་མཁའ་དུས་བསྒྱུར་ལས་ཐོབ། །མདའ་འཕེན་ཞེས་བྱ་དེ་རྣམས་སུ། །དགེ་དང་མི་དགེའི་འབྲས་བུ་འབྱུང་། །སྡིག་ཅན་རྣམས་ཀྱིས་མི་དགེ་བྱེད། །བསོད་ནམས་གཟའ་རྣམས་བདེ་བ་བྱེད། །ཉི་མས་འཇིགས་ཀྱང་སྐྱོན་མེད་འགྱུར། །རཱ་ཧུ་ལམ་
མེད་མི་དགེ་བྱེད། །སྤེན་པས་རྩོད་དང་འཆིང་བར་བྱེད། །མིག་དམར་འཆི་བསམ་གཞན་གྱིས་གསོད། །ཟླ་བས་བུད་མེད་མཉམ་པར་མཐུན། །གཟའ་ལྷག་རིག་བྱེད་རྣམས་དང་ཕྲད། །ཕུར་པས་ཆོས་དང་སྦྱོར་བར་བྱེད། །པ་སངས་བདག་པོས་མཆོད་པར་འགྱུར། །ཀེ་ཏུས་

203-1-72b

ཅུང་ཟད་མི་དགེ་བྱེད། །མདའ་འཕེན་རྐང་པ་དྲོ་ལམ་རྣམས། །གཟའ་ཡིས་བསྒྱུར་ལ་འཁོར་ལོ་ཡིས། །ཐོབ་པའི་གྲངས་ཀྱིས་ལམ་རྣམས་སུ། །དགེ་དང་མི་དགེ་བྱེད་པར་འགྱུར། །ལམ་གྱི་འཁོར་ལོར་འདྲི་བྱེད་གང་། །ལམ་ཞུགས་རྣམས་ལ་ཕན་བྱེད་ཡིན། །དཀར་
པོའི་འཁོར་ལོ་བཤད་པར་བྱ། །མཛེས་གཟུགས་ཐལ་སྦྱོར་འདྲི་བར་བྱ། །སྤྱི་བོའི་མིག་དང་ཁ་མགྲིན་པ། །ལག་གཉིས་ཐལ་མོ་དེ་བཞིན་རྐང་། །གསང་བ་དེ་བཞིན་སྙིང་གར་ནི། །དཀར་པོས་འཁྱུད་བརྩམས་གསུམ་གསུམ་དགོད། །སྤྱི་བོའི་དུས་ལ་གང་དབང་འདོད། །བྲམ་
ཟེ་བུད་མེད་བློན་པོ་རྣམས། །བྲམ་ཟེ་རིག་བྱེད་ཆོས་ཀྱིས་བཀུར། །བུད་མེད་བསྟན་ནས་ཆུང་མར་བྱེད། །བློན་པོས་ནོར་སྟེར་ཕུན་སུམ་ཚོགས། །མིག་གིས་བྲན་དང་བུད་མེད་འདུལ། །རང་ལ་གདུག་ཅིང་ཉེ་བ་དང་། །ཆུང་མ་ནོར་དང་བཀྲ་ཤིས་བྱེད། །ཁ་ལ་རྒྱལ་རིགས་མ་ནིང་
གིས། །མགོ་སྐོར་བྱེད་དང་སྨྲ་དགོས་དང་། །ལུས་ལ་ཚད་པ་འབབ་པ་ཡིན། །མགྲིན་པར་རྗེའུ་རྒྱལ་རྣམས་དང་། །བུད་མེད་ལ་སྨྲས་ནོར་རྣམས་དང་། །བུད་མེད་ཐམས་ཅད་འདུལ་བ་ཡིན། །ལག་གཉིས་སྐར་མར་ངག་སྨྲས་པ། །རྒྱལ་དང་དམག་དཔོན་སྐྱེས་པ་ལ། །རང་ལ་
ལྟས་ངན་འབབ་པ་དང་། །ཡུལ་དང་ནོར་དང་སྐྱེ་བོ་སྡང་། །ཐལ་མོ་ལ་ནི་གང་དབང་བ། །ཕལ་པ་དང་ནི་མ་ནིང་ལ། །ལྷ་དང་བླ་མ་མཆོད་བྱེད་ཅིང་། །ཆོས་དང་སྦྱིན་དང་རྒྱལ་རྣམས་འགྲུབ། །རྐང་པས་བདག་པོ་བྲམ་ཟེ་བློན། །སྐྱེས་པ་རྣམས་ལ་རིམ་པ་བཞིན། །ནོར་ཟད་ཆུང་མ་
སྤངས་པ་དང་། །དགྲ་ཡི་དབང་དུ་སོང་བས་འཇིག །གསང་བའི་དུས་ལ་རྣལ་འབྱོར་པས། །དབང་བྱ་བྲན་དང་བུད་མེད་དང་། །ཡོན་ཏན་ཅན་འཁོར་ཆུང་མས་འབོར། །སྙིང་གའི་དུས་ལ་དབང་བྱ་ནི། །བྲམ་ཟེ་དག་དང་མ་ནིང་ལ། །དབང་དུ་བྱེད་ན་གཉེན་གྲོགས་སྤོང་། །ནོར་དང་
བྲམ་ཟེ་བུད་མེད་རྙེད། །དགུ་ཆའི་དུམ་བུའི་མཚན་ཉིད་དེ། །ཇི་སྲིད་ན་འཐོབ་ཡུན་ཚོད་ནི། །ཁ་ན་ཆུ་ཚོད་ཡུན་ཡིན་ཏེ། །ལག་པ་ཞག་ཏུ་བརྗོད་པར་བྱ། །གཞན་རྣམས་ཟླ་བ་མིག་ལ་ལོ། །དེ་ཡི་ངེས་པ་སྔར་འདས་ཀྱི། །དྲུག་པར་ལྷག་མ་གང་ཡིན་པ། །སྤྱི་བོའི་ཕྱེད་བརྩི་མིག་

203-1-73a

ལ་གཅིག །མགྲིན་ལག་དྲང་པོ་སྙིང་ག་ཕྱེད། །ཐལ་མོ་གཉིས་ཡིན་ཁ་ལ་དྲུག །རྐང་པ་དགུ་ཡིན་གསང་གནས་དྲུག །ཉིན་ཞག་དཀྱིལ་འཁོར་མཉམ་དུས་ན། །ཇི་སྲིད་བཞིན་ལ་མ་འཕོས་པར། །དེ་ཡི་འབྲས་བུ་མཉམ་པར་མཐོང་། །དཀར་པོའི་
འཁོར་ལོ་བསྟན་ནས་ཀྱང་། །དེ་ནས་གཞན་ཡང་བཤད་པར་བྱ། །རི་དྭགས་པ་ཡི་འཁོར་ལོ་མཆོག །ཟླ་བ་དང་ནི་རི་དྭགས་པའི། །དབུས་སུ་སྡིག་པའི་གཟའ་རྣམས་ཀྱིས། །འཁྱུད་པའི་གྲངས་དང་མཉམ་པ་ནི། །སྲོག་ཆགས་རྣམས་ནི་གསོད་པར་བཤད། །སྡིག་པས་འཁྱུད་
པའི་ཁ་དོག་བཞིན། །རྔོན་པ་ལས་ནི་བཤད་པར་བྱ། །གསུམ་ནི་ཆ་ཤས་ཁྱིམ་ལ་གནས། །དགུ་ཆ་ལ་གནས་ཉིས་འགྱུར་གནས། །འཁྱོག་པོ་མཐོན་པོ་ལ་གནས་གཟའ། །གསུམ་གྱིས་བསྒྱུར་བའི་གྲངས་བཞིན་བསྟན། །འདི་ཡི་འགྱུར་གྱིས་ཐམས་ཅད་ལ། །བྱེད་དོ་དཔའ་བོས་ཕྱག་
བྱས་མ། །གཟའ་སྐར་སྦྱོར་བ་དེ་དག་གི། །རྨ་རྣམས་འབྱུང་བར་བརྗོད་པར་བྱ། །སྟོད་དང་སྨད་དང་ལོགས་དང་རྒྱབ། །ལོངས་སྤྱོད་ཆ་ཡིས་དེ་བཞིན་ནོ། །ལྷ་མོ་འདི་འདྲའི་འཁོར་ལོ་ནི། །བདེན་ཕྱིར་མངོན་སུམ་བྱེད་པ་ཡིན། །ཡང་ན་རབ་ཏུ་བྱེད་པ་གཞན། །བཤད་དོ་ཚོགས་ཀྱི་
བདག་མོ་ཀྱེ། །གཟའ་ཡི་གྲངས་ནི་ཚེས་ཀྱིས་བསྒྱུར། །གཟུགས་ཀྱིས་དམན་བྱས་རང་གིས་བསྒྱུར། །ཕྱེད་དམན་བདུན་དང་མིག་གིས་བགོ། །ལྷག་མ་ཆ་ཤས་གང་ཡོད་པའོ། །དེ་ལྟར་སྲོག་ཆགས་ཇི་ཙམ་པ། །རྒྱལ་པོ་སོགས་ཀྱིས་འཆིང་བར་བྱེད། །ཕྱེ་བའི་ལྷག་མ་གཅིག་གིས་
ནི། །བྲོས་པ་ཉིད་དུ་བསྟན་པ་ཡིན། །ཁྱིམ་དང་སྐར་མ་ཇི་བཞིན་དུ། །བློ་ལྡན་མཚན་ཉིད་ཤེས་པར་བྱ། །དེ་ནས་རབ་ཏུ་བྱེད་པ་གཞན། །ཇི་ལྟར་བཤད་དོ་བཞིན་བཟང་མ། །ཚེས་ནི་གཟའ་དང་ལྷན་ཅིག་པ། །གཟུགས་ཀྱིས་དམན་བྱས་རང་གིས་བསྒྱུར། །ཕྱེད་དང་འདོད་པའི་ཆུ་ཚོད་
ཀྱིས། །བགོས་པའི་ལྷག་མ་གང་ཡོད་པ། །སྲོག་ཆགས་དེ་ཡིན་མཁས་པ་ཡིས། །རྒྱལ་པོ་བདག་ལ་བརྗོད་པར་བྱ། །སྔོན་ལས་མ་དག་ཉིན་ཞག་ལ། །དགེ་དང་མི་དགེ་མང་པོར་འགྱུར། །མི་མཐུན་ཕྱོགས་ལ་སྡུག་བསྔལ་འབྱུང་། །ངེས་འབྱིན་ཡན་ལག་རྨ་རྣམས་འབྱུང་། །སོ་སོར་

203-1-73b

ཕྱིན་ན་གཡང་ལ་ལྟུང་། །སྐྱེས་པའི་མཚམས་ཀྱིས་རང་ནོར་ཉམས། །ལྷག་མ་རྣམས་ཀྱི་འབྲས་བུ་ནི། །ཚོགས་ཀྱི་བདག་པོས་དགེ་བར་བརྗོད། །ཉི་ཟླ་མིག་དམར་གཟའ་ལྷག་ཕུར། །པ་སངས་སྤེན་པ་རཱ་ཧུ་དང་། །ཀེ་ཏུའི་གྲངས་ཀྱིས་རིམ་པ་བཞིན། །དྲོ་ལམ་ལ་སོགས་བསྒྱུར་
བར་བྱ། །རྔོན་པའི་འཁོར་ལོ་བསྟན་ནས་ཀྱང་། །རྒྱན་གྱི་འཁོར་ལོ་བཙུན་མོ་ཉོན། །རྒྱན་གྱི་འཁོར་ལོ་འདི་ཡི་ལས། །གཡུལ་ཤོམ་ཤགས་འགྱེད་འཐབ་རྩོད་ལའོ། །ཞེང་དུ་རེ་ཁཱ་བཅུ་གཉིས་ཏེ། །དེ་བཞིན་ཆུ་རུ་དྲུག་པ་བྲི། །ཡིད་དང་རྒྱུ་སྐར་མིག་ཉི་མ། །ཚེས་དང་དྲུག་དང་རྒྱ་
མཚོ་མེ། །དེ་བཞིན་བཅུ་བདུན་བརྒྱད་དང་བུག །རེ་མིག་རྣམས་ལ་རིམ་བཞིན་བྲི། །དེ་འོག་ཨཱ་ལི་ཀཱ་ལི་ཡང་། །རིམ་པས་མཉམ་པར་བྲི་བར་བྱ། །རྀ་རཱྀ་ལྀ་ལཱྀ་ཨ་རྣམས་སྤང་། །ཀྵ་ནི་རྣམ་པར་སྤངས་པ་ཡིན། །འདི་ཡི་རེ་མིག་ཡང་དག་པ། །ལྔ་བཅུ་རྩ་ལྔར་ཡོངས་སུ་གྲགས། །དེ་
ནས་མིང་གི་ཡི་གེ་གྲངས། །དབྱངས་དང་གསལ་བྱེད་ཇི་སྙེད་པ། །ལེགས་པར་བལྟས་ལ་རང་རང་གི། །སྟེང་གི་གྲངས་ཀྱིས་བསྒྱུར་བར་བྱ། །ནོར་གྱིས་བགོས་ཏེ་ཁྱེར་བ་ཡི། །ལྷག་མས་རྒྱལ་མཚན་ལ་སོགས་འཆར། །དེ་བཞིན་དབྱངས་དང་གསལ་བྱེད་ནི། །འདི་ལྟར་
རྗེས་སུ་གྲགས་པ་རྣམས། །རྒྱལ་མཚན་དུ་བ་སེང་གེ་ཁྱི། །ཁྱུ་མཆོག་བོང་བུ་གླང་པོ་ཆེ། །བྱ་རོག་དང་ནི་བརྒྱད་དུ་གྲགས། །འདི་རྣམས་སྟོབས་ཀྱི་བྱེ་བྲག་ནི། །བྱ་རོག་གཉིས་འགྱུར་ཁྱི་ལ་བརྗོད། །ཁྱི་གཉིས་བོང་བུར་ཤེས་བྱ་སྟེ། །བོང་བུའི་ཉིས་འགྱུར་ཁྱུ་མཆོག་དྲན། །ཁྱུ་
མཆོག་ཉིས་འགྱུར་གླང་པོ་ཆེ། །གླང་པོའི་ཉིས་འགྱུར་སེང་གེ་ལ། །སེང་གེའི་ཉིས་འགྱུར་རྒྱལ་མཚན་ཏེ། །རྒྱལ་མཚན་སྟོབས་གཉིས་དུ་བ་ལའོ། །དེ་ལྟར་སྟོབས་ཀྱི་བྱེ་བྲག་ཤེས། །བརྒྱད་ཀྱི་ཆ་ཡིས་ཐོབ་པ་ཡི། །ལྷག་མ་ཡོངས་སུ་བསམ་པ་སྟེ། །གཅིག་སོགས་ལྷག་མར་གྱུར་
པའི་གྲངས། །རྒྱལ་མཚན་ལ་སོགས་བདུན་རིམ་བཞིན། །རྒྱན་ནི་འཁོར་ལོའི་སྟོབས་བསྟན་པ། །དེ་ལྟར་བརྗོད་བྱ་དབང་མོ་ཆེ། །དེ་ནས་མིང་གི་ཡི་གེ་སོགས། །བརྟག་པ་གཞན་ཡང་བཤད་པར་བྱ། །རྒྱལ་དང་ཕམ་པ་ཡོངས་ཤེས་པ། །དབྱངས་འཆར་རྒྱུད་ལ་བཤད་པ་ཉོན། །

203-1-74a

རང་དང་རང་གི་དགྲ་བོ་ཡི། །མིང་གི་གསལ་བྱེད་རྟོགས་པ་དང་། །མིང་གི་དབྱངས་ནི་ངེས་བྱས་ལ། །གསལ་བྱེད་བཞི་ཡིས་བསྒྱུར་བྱས་ཏེ། །དབྱངས་ནི་གཉིས་ཀྱིས་བསྒྱུར་བྱས་ལ། །གཅིག་ཏུ་བསྡོམས་པར་བྱས་ནས་ཀྱང་། །བདུན་གྱི་ཆ་ཡིས་བགོ་བར་
བྱ། །དེ་ཡི་ལྷག་མར་གང་གྱུར་པ། །གཉིས་ཀ་མཉམ་ན་འདུམ་པ་སྟེ། །མི་མཉམ་སྟོབས་ལ་བལྟས་པས་ཤེས། །མིང་གི་ཡི་གེ་ཇི་སྙེད་པ། །གཅིག་གིས་གཅིག་ལ་དབྲི་བར་བྱ། །ལྷག་མ་གང་ཡོད་རྒྱལ་བ་སྟེ། །མ་ལྡང་བ་ནི་འཕམ་པར་འགྱུར། །ལྷག་མེད་མཉམ་པས་འདུམ་
པར་བྱེད། །དེ་ལྟར་ཤེས་བྱ་དཀའ་བཟློག་མ། །མིང་གི་དབྱངས་དང་གསལ་བྱེད་རྣམས། །སོ་སོར་ཕྱེ་ལ་ལེགས་པར་བརྟག །ཟུང་གིས་ཕམ་པར་ཤེས་བྱ་སྟེ། །ཁ་ཡར་བས་ནི་རྒྱལ་བར་སྟོན། །དབྱངས་དང་གསལ་བྱེད་ཇི་སྙེད་པ། །སོ་སོར་མཉམ་ན་འདུམ་པར་སྟོན། །ལྷ་མོ་
དེ་ལྟར་འཁོར་ལོ་མཆོག །སོ་སོར་ཤེས་པར་བྱ་ཞེས་གྲགས། །དེ་ནས་ཤིན་ཏུ་གསང་བ་ཡི། །རྨ་བརྟག་འཁོར་ལོ་བཤད་པར་བྱ། །སྐྱེས་བུའི་གཟུགས་ཀྱི་འཁོར་ལོ་ལ། །རྒྱུ་སྐར་གནས་པའི་མཚན་ཉིད་ཅན། །ལུས་ཀྱི་ཆ་ཤས་གང་དུ་རྨ། །བྱུང་ཞིང་ཇི་ཙམ་འབྱུང་བ་ཞེས། །ཉི་
མ་གནས་པའི་རྒྱུ་སྐར་ནས། །བྱེ་བྲག་ཕྱེ་ལ་རིམ་བཞིན་བྲི། །མགོ་བོར་གསུམ་ལ་ཁ་ལ་གསུམ། །སྙིང་ག་ལྔ་སྟེ་ལག་པར་བརྒྱད། །རྐང་པ་དག་ལ་བརྒྱད་ཡིན་ཏེ། །དེ་ལྟར་གཟུགས་ལ་དགོད་པར་བྱ། །རང་གི་སྐར་མའི་དུས་སྦྱོར་ལས། །མཐོང་བར་སྡིག་ཅན་གང་ཡོད་པ། །
རྨ་བྱུང་ཆེ་ཆུང་མཐོང་དང་སྟོབས། །བདུན་པར་ཐེ་ཚོམ་མེད་པར་འགྱུར། །ཟླ་བ་གནས་པའི་ཆ་ཤས་ལ། །རྨ་རྣམས་འབྱུང་བར་ཤེས་པར་བྱ། །རྨ་རྣམས་ཆེ་ཆུང་ལྟ་བ་ནི། །དགུ་ཆའི་དུམ་བུ་བལྟ་བར་བྱ། །དེ་ཡི་གྲངས་ཀྱི་སོར་གྱིས་བཅལ། །སྡིག་ཅན་གནས་པར་རྨ་འབྱུང་བཤད། །
ཉི་མ་མཐོང་ན་རྨ་ལོག་འགྱུར། །རཱ་ཧུ་མཐོང་ན་རྨ་ཟེར་ཐེབས། །སྤེན་པ་མཐོང་ན་སྐྱེས་བུ་ཡི། །རྨ་ལ་ཁྲག་ནི་མེད་པར་འགྱུར། །མིག་དམར་མཐོང་ན་ཁྲག་དམར་འབྱུང་། །གལ་ཏེ་འཆི་བར་འགྱུར་བའང་སྲིད། །གཟའ་ཡི་འཁོར་ལོ་གནས་པ་ལས། །སྡིག་ཅན་གནས་

203-1-74b

པས་ཤེས་པར་བྱེད། །དེ་ལྟར་བདེན་པའི་མཚན་ཉིད་ཅན། །སོ་སོར་བྱེ་བྲག་ཕྱེད་པར་བྱེ། །འདི་ཡི་ཉི་མ་མགོར་བསྟན་པས། །རྨ་འབྱུང་དྲང་སྲོང་གིས་ཤེས་འགྱུར། །དེ་ནས་མདོར་བསྡུས་མཉམ་པ་ནི། །ཏྲི་ཤཱུ་ལ་ཡི་འཁོར་ལོ་བཤད། །གང་ཞིག་ཤེས་པས་གཡུལ་འགྱེད་
ཚེ། །རྩོད་པའི་མཚན་ཉིད་ཤེས་པར་བྱ། །ཏྲི་ཤཱུ་ལ་ནི་གསུམ་བྲིས་ཏེ། །རིམ་པ་བཞིན་དུ་སྐར་མ་དགོད། །ཉི་མས་འཁྱུད་པའི་སྐར་མ་དང་། །རྩེ་མོ་ནས་བཟུང་བྲི་བར་བྱ། །ཉི་མས་འཁྱུད་པའི་སྐར་མ་ནས། །མགོ་བཟུང་རྩེ་མོར་སྐར་མ་གསུམ། །ཏྲི་ཤཱུ་ལ་ཡི་ཡུ་བ་ལ། །རྒྱུ་
སྐར་དྲུག་ནི་རིམ་བཞིན་བྲི། །དེ་ཉིད་ཕྱི་རོལ་འཐོན་པ་ཡི། །མདུང་རྩེ་གསུམ་ལ་རྒྱུ་སྐར་གསུམ། །ཏྲི་ཤུ་ལ་ཡི་ཡུ་བ་ལ། །རིམ་པ་གསུམ་གསུམ་བརྩེགས་ནར་བྲི། །དེ་ནས་སྟེང་དུ་བརྩེགས་པ་ཡི། །དབུ་མའི་རྩེ་མོའི་ཡུ་བར་ཡང་། །གཡས་པའི་རྩེ་མོར་གསུམ་ཡིན་ཏེ། །ཡུ་བ་
གསུམ་གསུམ་བརྩེགས་མར་བྲི། །མདོར་ན་རྩེ་མོ་རྣམས་ལ་གསུམ། །ཡུ་བར་གསུམ་གསུམ་བརྩེགས་མར་བྲི། །དབུ་མ་འཁྲུག་པའི་ཏྲི་ཤུ་ལ། །གཡས་པ་ནང་དུ་འཇུག་པར་བརྗོད། །གཡོན་པ་ཕྱི་རོལ་འཐོན་པ་སྟེ། །དབྱངས་འཆར་རྒྱུད་ལས་དེ་ལྟར་མཐོང་། །ཟླ་བ་གང་ན་གནས་
པ་བརྟག །རང་གི་སྐར་མ་གང་ནས་གནས། །རང་གིས་བརྟགས་ལ་ཤེས་པར་བྱ། །གདུག་པའི་གཟའ་རྣམས་གར་ཡོད་ངན། །ཕྱིར་འཐོན་པ་ལ་ཕྱིར་ལོག་འགྱུར། །ནང་འཇུག་སྐར་མས་ནང་དུ་ཆུད། །དབུ་མ་འཁྲུག་པར་འགྱུར་བ་སྟེ། །འོག་མ་གཉིས་ལ་རྩོད་པ་ཆུང་། །བར་
མ་གཉིས་ལ་འབྲིང་པོར་འགྱུར། །སྟེང་མ་མཉམ་ལ་འཐབ་རྩོད་ཆེ། །རྩེ་མོ་གསུམ་ལ་ཤིན་ཏུ་ཆེ། །མདུང་ནི་དབུ་མར་གང་ཡོད་ཕམ། །རང་དང་དགྲ་ཡི་སྐར་མ་དག །འདི་ལ་བསྲུང་བ་ཤིན་ཏུ་གཅེས། །གཡས་དང་གཡོན་གྱི་ཏྲི་ཤུ་ལ། །ནང་འཇུག་ཕྱི་རོལ་འཐོན་པ་ལས། །
རྩོད་པ་ཆེ་འབྲིང་གོང་མ་བཞིན། །དབྱངས་འཆར་རྒྱུད་ལས་བཤད་པ་ཡིན། །འདི་ལྟར་རང་གི་རྒྱུ་སྐར་ལ། །སྡིག་ཅན་མི་དགེ་ཞི་བ་དགེ། །ཏྲི་ཤཱུ་ལ་གསུམ་ཞབས་བསྡུས་དགོད། །ཉི་མ་གནས་པའི་སྐར་མ་ནི། །ཏྲི་ཤཱུལ་བར་མའི་རྩེ་མོ་ནས། །རིམ་པ་བཞིན་དུ་དགོད་པར་

203-1-75a

བྱ། །ཏྲི་ཤཱུ་ལ་ཡི་རྩེ་མོ་ན། །རྒྱུ་སྐར་གསུམ་གསུམ་བྲི་བར་བྱ། །ཡུ་བའི་ཐད་ཀའི་བར་རྣམས་སུ། །རྒྱུ་སྐར་དྲུག་དྲུག་བྲི་བར་བྱ། །མདོར་ན་བར་དང་རྩེ་མོ་ལ། །རྒྱུ་སྐར་དགུ་དང་བཅོ་བརྒྱད་དང་། །ཏྲི་ཤཱུ་ལ་ནི་གསུམ་པོ་ལ། །རྒྱུ་སྐར་རྣམས་ཀྱིས་
ཡོངས་སུ་བསྐོར། །མིང་གི་སྐར་མར་ཉི་མ་སོང་། །དེ་ལ་ནད་རྣམས་འབྱུང་བར་གྲགས། །དབུ་མ་གསུམ་ལ་ནོར་ཉམས་བྱེད། །ཉི་མ་མེད་པའི་རྩེ་མོ་ལ། །འཐབ་རྩོད་འབྱུང་བར་བསྟན་པ་ཡིན། །མདོར་ན་རྩེ་མོའི་རྒྱུ་སྐར་གྱིས། །དོན་ཉམས་ཕྱུགས་རྣམས་བརླག་པ་
དང་། །གཉེན་བཤེས་རྣམས་ནི་མྱུར་དུ་ཉམས། །ཡུལ་གཞན་འཕོ་ཞིང་རྒྱལ་པོས་འཇིགས། །དབུས་ཀྱི་དྲུག་གིས་བདེ་བར་བྱེད། །བཅུ་གཉིས་ཀྱིས་ནི་ཕུན་སུམ་ཚོགས། །བུ་རྣམས་སྐྱེད་ཅིང་དགའ་སྐྱེད་དང་། །སྐལ་བཟང་བདེ་བ་སྐྱེད་པར་མཐོང་། །གཡུལ་གྱི་དུས་
སུ་ལེགས་པར་གནས། །རྩེ་མོར་གལ་ཏེ་ཟླ་བ་སོང་། །ནད་དང་སྡུག་བསྔལ་ལ་སོགས་འབྱུང་། །ཏྲི་ཤུ་ལ་ཡི་འཁོར་ལོ་ནི། །དེ་ལྟར་ལྷ་མོ་ཁྱོད་ལ་བཤད། །ཉི་མས་འཁྱུད་པའི་སྐར་མ་དེ། །མགོ་བོ་ནས་བརྩམས་རིམ་བཞིན་བྲི། །གཡས་སུ་བསྐོར་བ་སྦྱོར་བ་ཡིས། །
མགོ་བོའི་མཐར་ཐུག་བྲི་བར་བྱ། །མགོ་བོར་དགུ་ལ་རྣ་བར་གཉིས། །ལག་པ་དག་ལ་དྲུག་དྲུག་སྟེ། །རྒྱབ་ཏུ་བརྒྱད་དུ་བསྟན་པ་ཡིན། །རྐང་པ་དག་ལ་གཉིས་ཡིན་ཏེ། །དེ་ལ་རང་གི་སྐར་མ་ནི། །མགོ་དང་རྐང་པར་འཆི་བ་སྟེ། །ལག་པ་དག་ལ་རྣམ་པར་རྒྱལ། །རྒྱབ་ནི་
རྒྱལ་ཕམ་མེད་པར་འཐབ། །རྣ་བ་དག་ལ་རྣམ་པར་ཉམས། །ཟླ་བའི་སྐར་མ་དེ་བཞིན་ནོ། །གཡུལ་དུ་རྒྱལ་དང་ཕམ་པ་ཡི། །ཉི་མའི་འཁོར་ལོ་གངས་རིའི་བདག །མིང་གི་རྒྱུ་སྐར་འཁོར་ལོ་ནི། །གང་གིས་ཤེས་པ་ཙམ་གྱིས་ཀྱང་། །འཁྲུག་པ་གཉེན་དང་ལས་རྣམས་
ཀུན། །བྱེད་ན་འདིར་རྟོགས་དཀའ་བཟློག་མ། །རིམ་པ་གཉིས་དང་ལྡན་པ་ལ། །རེ་མིག་བཅུ་བཞིར་མཉམ་པར་དགོད། །སྤྱང་ཁུ་ནི་ལེ་བྱི་ལ་སྟག །ཁྲི་སྙན་མ་ཧེ་སེང་གེ་རྣམས། །རེ་མིག་སྟེང་གི་རིམ་པར་བྲི། །ལུག་སྦྲུལ་བྱི་བ་ཁྱུ་མཆོག་དང་། །སྤྲེའུ་རྟ་དང་གླང་པོ་ཆེ། །

203-1-75b

འོག་ཏུ་ཐད་དྲང་རྣམས་ལ་དགོད། །ལུག་གི་སྨིན་དྲུག་རྒྱལ་ཡིན་ཏེ། །དེ་བཞིན་སྦྲུལ་ནི་སྣར་མ་མགོ། །བྱི་བ་དབོ་དང་མོན་གྲེར་བརྗོད། །ཁྱུ་མཆོག་མཆུ་དང་ཆུ་སྟོད་ཡིན། །སྤྲེའུ་གྲོ་བཞིན་ཆུ་སྨད་དྲན། །རྟ་ནི་ཐ་སྐར་མོན་གྲུའོ། །གླང་པོ་བྲ་ཉེ་ནམ་གྲུར་བརྗོད། །དེ་ནས་སྤྱང་
ཁུ་ལག་དང་སྣྲུབས། །བྱི་བཞིན་ཁྲུམས་སྟོད་ནེའུ་ལེ། །བྱི་ལ་དེ་བཞིན་ནབ་སོ་སྐག །སྟག་ནི་ནག་པ་ས་གར་བརྗོད། །ཁྲི་སྙན་སྣྲོན་དང་ལྷ་མཚམས་བཤད། །མ་ཧེ་མེ་བཞི་ས་རིར་བཤད། །སེང་གེ་ཁྲུམས་དང་གྲེ་ཡིན་ཏེ། །འོག་དང་གོང་གི་རེ་མིག་ལ། །ལུག་སོགས་
སྤྱང་སོགས་རིམ་བཞིན་དགོད། །དེ་ལྟར་རྟ་དང་མ་ཧེ་དགྲ། །གླང་དང་སྟག་དག་མི་མཐུན་ཏེ། །སྦྲུལ་དང་ནེ་ལེ་མཛའ་བ་མེད། །ལྷ་མོ་གླང་ཆེན་སེང་གེ་དགྲ། །ལུག་དང་སྤྱང་ཁུ་མཐུན་པ་མེད། །མཛེས་མ་བྱི་བ་བྱི་ལ་ཡང་། །དེ་བཞིན་སྤྲེའུ་ཁྲི་སྙན་དྲན། །གཡུལ་དུ་ཤེས་བྱ་
ལྷས་མཆོད་མ། །ཇི་ལྟར་མིང་གི་སྐར་མ་ནི། །མཆུ་དང་ཆུ་སྟོད་ཁྱུ་མཆོག་མིང་། །སེང་གེའི་མིང་ལ་ཁྲུམས་སྨད་གྲེ། །དེ་ལྟར་ཐམས་ཅད་ཤེས་པར་བྱ། །གང་གི་རིགས་ནི་ཤེས་པ་ལས། །སྟོབས་ཀྱི་ཆེ་ཆུང་ཤེས་པར་འགྱུར། །མིང་གི་སྐར་མའི་མིང་ཤེས་པར། །མཛེས་
དགའ་གཡུལ་སོགས་ཇི་ལྟར་བྱེད། །རྒྱལ་དང་ཐ་སྐར་ནབ་སོ་མགོ། །ནམ་གྲུ་ལྷ་མཚམས་ས་རི་དང་། །གྲོ་བཞིན་མེ་བཞིར་བཅས་པ་རྣམས། །ལྷ་ཡི་རིགས་སུ་ཤེས་པར་བྱ། །ཆུ་སྟོད་ཁྲུམས་སྟོད་ཁྲུམས་སྨད་གྲེ། །དབོ་དང་ཆུ་སྟོད་བྲ་ཉེ་ལག །སྣར་མའི་མིང་གི་བྱེ་བྲག་
རྣམས། །མི་ཡི་རིགས་ཡིན་བཞིན་བཟངས་མ། །མཆུ་དང་ནག་པ་སྨིན་དྲུག་དང་། །མོན་གྲེ་མོན་གྲུ་ས་ག་དང་། །སྣྲུབས་སྐག་སྣྲོན་དང་བཅས་པ་རྣམས། །སྲིན་པོའི་རིགས་ལས་གྲུབ་པ་ཡིན། །རང་གི་རིགས་རྣམས་མཉམ་པར་མཐུན། །ལྷ་དང་མི་ནི་འབྲིང་པོ་སྟེ། །ལྷ་དང་
སྲིན་པོ་དེ་བཞིན་ནོ། །མི་དང་སྲིན་པོ་ལྷན་ཅིག་འཆི། །གལ་ཏེ་ཆུང་མ་སྲིན་པོར་འགྱུར། །ཁྱོ་ནི་མི་ཡི་རིགས་ལས་སྐྱེས། །དེ་ཚེ་ཁྱོ་ནི་འཆི་བར་འགྱུར། །ཤིན་ཏུ་རྒྱང་རིང་འདུག་པར་བྱ། །མི་མཛའ་ལྷན་ཅིག་འཆི་བ་སྟེ། །རང་གི་རིགས་མཐུན་བདེ་བར་བྱེད། །གལ་ཏེ་ལྷ་ཡི་

203-1-76a

རིགས་ཡིན་ན། །མི་དང་སྲིན་པོ་ཀུན་ལས་རྒྱལ། །མི་དང་སྲིན་པོ་ལྷན་ཅིག་པ། །མེ་དང་ཆུ་བཞིན་འགལ་བར་འགྱུར། །དེ་ལྟར་ཁྱོ་ཤུག་ལ་སོགས་པ། །རིགས་ཀྱི་འཁོར་ལོ་བསྟན་པ་ཡིན། །དེ་ནས་གཞན་ཡང་བཤད་པར་བྱ། །གང་གིས་ཤེས་པ་
ཙམ་གྱིས་ནི། །མིག་གི་མཚན་ཉིད་ཤེས་འགྱུར་བ། །ཐེ་ཚོམ་མེད་པར་བཤད་ཀྱིས་ཉོན། །ཐ་སྐར་མགོ་དང་རྒྱལ་དང་ནི། །མེ་བཞི་ལྷ་མཚམས་གྲོ་བཞིན་དང་། །ནབ་སོ་གང་དང་ལྷན་ཅིག་པ། །དེ་ཡི་མིག་ནི་དགེ་བ་སྟེ། །བསམ་པའི་དོན་ཀུན་འགྲུབ་པ་ཡིན། །དྲོ་ལམ་
བརྒྱ་ཡི་ཡུལ་ཡང་མཐོང་། །ལག་དང་སྣྲུབས་དང་མོན་གྲེ་དང་། །ས་རི་གྲེ་དང་ཆུ་སྟོད་དང་། །ཁྲུམས་སྟོད་མིག་ནི་ལོང་བ་དང་། །དོན་དང་ལས་ཀུན་འགྲུབ་པ་མེད། །མཆུ་དང་ནག་པ་སྣྲོན་ཞེས་བྱ། །སྣར་མ་དབོ་དང་ཆུ་སྨད་དང་། །ཁྲུམས་སྨད་རྣམས་ལ་འདྲི་བྱེད་ཀྱི། །མིག་ནི་
ཤེལ་ལམ་གཡོ་བར་འགྱུར། །བྲ་ཉེ་དེ་བཞིན་སྨིན་དྲུག་སྐག །མོན་གྲུ་ས་ག་བྱི་བཞིན་དང་། །ནམ་གྲུ་གང་ཡོད་མིག་དམར་ཞིང་། །ནག་པོར་འགྱུར་ཞིང་དགེ་བ་མེད། །ནོར་དང་རྙེད་པ་རབ་སྦྱོར་མེད། །ཡིད་ལ་འདོད་པ་རྣམ་པར་སྤངས། །དེ་ནས་སྡེ་བརྒྱད་འཁོར་ལོ་མཆོག །གང་
གིས་ཤེས་པའི་མི་རྣམས་ཀྱིས། །སྟོབས་དང་གཉེན་པོའི་བྱེ་བྲག་རྣམས། །བཤད་ཀྱིས་ལྷ་ཡི་བདག་མོ་ཉོན། །ཨ་ཡི་སྡེ་ཚན་ལྷ་ཡིན་ཏེ། །ཀ་སྡེ་ལྷ་མ་ཡིན་དུ་བརྗོད། །ཙ་སྡེ་གང་གནས་ཀླུ་ཞེས་བྱ། །བཞི་ཡི་སྡེ་ཚན་དྲི་ཟར་གྲགས། །ཏ་སྡེར་གནས་པ་གནོད་སྦྱིན་དྲན། །དེ་
བཞིན་པ་སྡེ་སྲིན་པོར་སྨྲ། །ཡ་ཡི་སྡེ་ཚན་ཤ་ཟ་སྟེ། །ཤ་ཡི་སྡེ་ཚན་མི་ཞེས་གྲགས། །འདི་ལྟར་ལྷ་མིན་སྟོབས་གཅིག་སྟེ། །ཀླུ་ལ་དེ་ཡི་ཉིས་འགྱུར་བཤད། །དེ་གཉིས་ཉིས་འགྱུར་དྲི་ཟ་སྟེ། །དེ་གཉིས་ཉིས་འགྱུར་གནོད་སྦྱིན་ནོ། །དེ་གཉིས་འགྱུར་གྱིས་སྲིན་པོ་སྟེ། །སྲིན་མོའི་
ཉིས་འགྱུར་ཤ་ཟ་དང་། །ཤ་ཟའི་འགྱུར་གྱིས་ལྷ་ལ་བརྟག །ལྷ་ཡི་ཉིས་འགྱུར་མི་ཞེས་གྲགས། །དེ་ལྟར་ཕན་ཚུན་ཉེ་རིང་དུ། །གྲངས་ནི་གང་མང་སྟོབས་ཆེར་འགྱུར། །ཕྱོགས་མཚམས་ཐད་ཀར་མི་མཛའ་སྟེ། །སྟོབས་ཆེན་རྣམས་ཀྱིས་ཆུང་བ་གསོད། །གཡུལ་གྱི་དུས་སུ་

203-1-76b

བསྟན་པ་སྟེ། །འཁོར་ལོའི་སྟོབས་ནི་ངེས་པར་མཐོང་། །མིང་གི་དང་པོ་གསལ་བྱེད་ལ། །རྣམ་པར་དཔྱོད་པར་ཡོངས་སུ་གྲགས། །དེ་ལྟར་ཕན་ཚུན་ཉེ་རིང་དུ། །གྲངས་ནི་གང་མང་སྟོབས་ཆེར་འགྱུར། །དེ་ལྟར་སྟོབས་ཀྱི་བྱེ་བྲག་འདི། །ཚངས་པས་རྒྱུད་དུ་བཤད་པ་
ཡིན། །གཡུལ་གྱི་དུས་སུ་འཁོར་ལོ་འདི། །སྟོབས་ཀྱི་ཆ་ཡིས་རྒྱལ་ཕམ་སྟོན། །སྡེ་ཚན་ཇི་ལྟར་གནས་པ་དང་། །སྟོབས་བསྐྱེད་པ་ཡི་རིམ་པ་ནི། །དབང་མེ་གཤིན་རྗེ་བདེན་བྲལ་དང་། །ཆུ་རླུང་གནོད་སྦྱིན་དབང་ལྡན་དང་། །གོ་རིམས་བཞིན་དུ་གནས་པ་སྟེ། །འདི་རྣམས་
སྟོབས་ལ་ཁྱད་པར་གནས། །སྟོབས་ཆེན་རྣམ་པར་རྒྱལ་འགྱུར་ཏེ། །ཆུང་བ་ཕམ་པར་འགྱུར་བ་ཡིན། །རང་ལ་ཕ་རོལ་ཕྱོགས་ཀྱི་སྟོབས། །སྲོག་ཆགས་རྣམས་ཀྱི་ལུས་ཀྱིས་གསལ། །ཨ་སྡེ་འདི་ལྟར་བྱ་ཁྱུང་སྟེ། །ཀ་ཡི་སྡེ་ཚན་བྱི་ལར་དྲན། །ཙ་ཡི་སྡེ་ཚན་སེང་གེར་
དྲན། །ཊ་སྡེ་སྤྱང་ཁུར་ཤེས་པར་བྱ། །ཏ་ཡི་སྡེ་ཚན་སྦྲུལ་དུ་གསལ། །ས་སྡེ་བྱི་ལར་ཡོངས་སུ་གྲགས། །ཡ་ཡི་སྡེ་ཚན་གླང་པོ་ཆེ། །ཤ་སྡེ་ལུག་ཏུ་ཡོངས་སུ་བརྗོད། །དེ་ནས་འདབ་ཆགས་འཁོར་ལོ་མཆོག །གང་གིས་ཤེས་པ་ཙམ་གྱིས་ཀྱང་། །དུས་ཀྱི་སྟོབས་
ཀྱིས་འདོད་དོན་ཀུན། །ཐེ་ཚོམ་མེད་པར་འགྲུབ་འགྱུར་བཤད། །དེ་ལྟར་ཕྱོགས་མཚམས་བརྒྱད་པོ་ལ། །ཤར་ནས་བརྩམས་ཏེ་ལེགས་པར་གནས། །ཤར་ཕྱོགས་བདག་པོ་ཉི་མ་སྟེ། །མིག་དམར་མེ་ཡི་ཕྱོགས་ན་གནས། །གཤིན་རྗེ་ཕུར་བུ་ལྷས་མཆོད་མ། །གཟའ་ལྷག་
བདེན་བྲལ་ཕྱོགས་ན་གནས། །པ་སངས་ཆུ་བདག་ཕྱོགས་ཞེས་དྲན། །རླུང་ཕྱོགས་བདག་པོ་སྤེན་པར་གྲགས། །ཟླ་བ་ནོར་གྱི་བདག་པོའི་ཕྱོགས། །སྒྲ་གཅན་དབང་ལྡན་སྤྱོད་ཡུལ་ལོ། །བྱ་རྒོད་ཁྲ་དང་གོང་མ་སྲེག །དེ་བཞིན་ནེ་ཚོ་ཁྲུང་ཁྲུང་དང་། །རྨ་བྱ་འུག་པ་སྲིན་བྱ་སྟེ། །འདབ་
ཆགས་བརྒྱད་དུ་ཡོངས་སུ་གྲགས། །འདི་ལྟར་རིམ་བཞིན་ཨ་སྡེ་དང་། །ཀ་སྡེ་ཙ་སྡེ་དེ་བཞིན་ཏེ། །ཊ་སྡེ་ཏ་སྡེ་ཞེས་བྱ་བ། །བ་ཡི་སྡེ་ཚན་བཅས་པ་དང་། །ཡ་ཚན་ཤ་ཚན་བྲི་བར་བྱ། །ཡ་ཡི་སྡེ་ཚན་བཅས་པ་དང་། །ཤ་ཡི་སྡེ་ཚན་ཚང་བར་ནི། །རེ་མིག་བརྒྱད་ལ་ལེགས་

203-1-77a

པར་དགོད། །སྡེ་ཚན་བརྒྱད་པོ་རང་རང་གི། །དུས་ཀྱི་སྟོབས་ནི་འདིས་ཤེས་འགྱུར། །བྱ་རྒོད་དང་ནི་ཁྲ་ཧོར་པ། །ཉིན་མོའི་ལྷག་ལ་སྟོབས་ཆེར་འགྱུར། །རྨ་བྱ་དང་ནི་ཁྲུང་ཁྲུང་དག །ཐོ་རངས་དུས་ཚེ་སྟོབས་སུ་འགྱུར། །སྲིན་བྱ་དང་ནི་གོང་མ་སྲེག །
ཉི་མའི་གུང་ལ་སྟོབས་ཆེར་གསལ། །ནེ་ཚོ་དང་ནི་འུག་པ་དག །མཚན་མོའི་དུས་ལ་སྟོབས་ཆེར་གྲགས། །འུག་པ་དང་ནི་ནེ་ཚོ་དག །དགུན་ཟླ་གསུམ་ལ་སྟོབས་ཆེར་འགྱུར། །རྨ་བྱ་ཁྲུང་ཁྲུང་ཞེས་བྱ་བ། །དཔྱིད་ཟླ་རྣམས་ལ་སྟོབས་ཆེར་གསལ། །གོང་མ་སྲེག་ཅེས་གྲགས་པ་
ཡང་། །དབྱར་ཟླ་གསུམ་ལ་བདེ་ལེགས་བྱེད། །ཁྲ་ནི་སྟོན་ཟླ་གསུམ་ལ་སྟོབས། །བྱ་རྒོད་དང་ནི་སྲིན་བྱ་དག །ཟླ་བ་ཀུན་ལ་སྟོབས་ཆེར་བརྗོད། །གཅིག་དང་དགུ་པ་བྱ་རྒོད་སྟོབས། །གཉིས་དང་བཅུ་ལ་དེ་བཞིན་ཁྲ། །གསུམ་པ་དང་ནི་བཅུ་གཅིག་ལ། །གོང་མ་སྲེག་ཀྱང་
སྟོབས་ཆེར་བྱེད། །དེ་བཞིན་བཞི་དང་བཅུ་གཉིས་ལ། །ནེ་ཚོའི་སྟོབས་ནི་འབྱུང་བར་གསལ། །ཁྲུང་ཁྲུང་ཞེས་བྱར་གྲགས་པ་ནི། །ལྔ་དང་བཅུ་གསུམ་ཚེས་ལ་དྲན། །དྲུག་དང་བཅུ་བཞིའི་ཚེས་གྲངས་ལ། །རྨ་བྱའི་སྟོབས་ནི་ཆེ་བ་ཡིན། །བདུན་པ་དང་ནི་བཅོ་ལྔ་པ། །འདབ་
ཆགས་འུག་པ་སྟོབས་སྐྱེར་འགྱུར། །བརྒྱད་ལ་སྲིན་བྱ་སྟོབས་འཕེལ་གྲགས། །བླ་མ་བརྒྱུད་པའི་རིམ་གྱིས་སོ། །དེ་ལྟར་དུས་ཀྱི་སྟོབས་བཤད་པ། །ལྷ་མོ་འདྲི་བ་རྣམས་ལ་བརྗོད། །དབང་པོར་བྱ་རྒོད་ཉི་མའི་རེས། །ཨ་ཡི་མིང་ཅན་སྟོབས་ཆེར་འགྱུར། །དེ་ལྟར་གཟའ་དང་སྡེ་
ཚན་རྣམས། །ཕྱོགས་རྣམས་ཀུན་ལ་ཤེས་པར་བྱ། །ཉིན་མཚན་ཆ་དང་ཚེས་གྲངས་དང་། །ཟླ་བའི་བྱེ་བྲག་རབ་ཤེས་བྱ། །དེ་ལྟར་མིང་གི་སྡེ་ཚན་ལས། །སྟོབས་ཀྱི་བྱེ་བྲག་ཤེས་པར་བྱ། །གང་གི་རིགས་ཡིན་བྱེ་བྲག་ཕྱེད། །དེ་ལ་སྟོབས་དང་སྟོབས་མིན་ཤེས། །ནེ་ཚོ་ལ་ནི་
སྟོབས་གཅིག་སྟེ། །ཧོར་པའི་ཁྲ་ལ་སྟོབས་གཉིས་བྱེད། །རྨ་བྱ་ལ་ནི་སྟོབས་གསུམ་སྟེ། །གོང་མ་སྲེག་ལ་བཞི་འགྱུར་རོ། །ཁྲུང་ཁྲུང་ལ་ནི་ལྔ་ཞེས་དྲན། །དེ་བཞིན་འུག་པ་དྲུག་འགྱུར་གསལ། །འུག་པའི་བདུན་འགྱུར་སྲིན་བྱར་བརྗོད། །བྱ་རྒོད་བརྒྱད་འགྱུར་བསྟན་པ་ཡིན། །

203-1-77b

འདབ་ཆགས་འཁོར་ལོ་འདི་ལྟ་བུ། །ལེགས་པར་ཟུང་ཤིག་དབང་མོ་ཆེ། །དེ་ནས་གཞན་ཡང་བཤད་པར་བྱ། །ཚངས་པའི་འཁོར་ལོ་ཆེན་པོ་དེ། །ལྷ་ཡི་ཡུལ་ན་སྔར་མེད་པ། །འཕྲལ་དུ་ཕན་འདོགས་བྱེད་པ་ཡིན། སྨིན་དྲུག་ནས་ནི་བརྩམས་ནས་ནི། །རྒྱུ་སྐར་དགུ་ཚན་གསུམ་ལ་
བྲི། །རིམ་པ་གསུམ་དུ་བཀོད་པ་ལ། །གདོང་ཚུགས་ཞེས་བྱ་རི་སྲས་མོ། །རིམ་པ་གསུམ་གྱི་རྒྱུ་སྐར་ལ། །བསོད་ནམས་སྡིག་ཅན་གང་གནས་བལྟ། །སྐྱེས་པ་ཕུན་ཚོགས་མ་ཚོགས་དང་། །སོ་སོའི་དེ་བཞིན་བསྒྲུབ་བྱ་དང་། །ངེས་སྦྱིན་བྱམས་པ་དེ་བཞིན་དུ། །ཕ་རོལ་བྱམས་
དགོད་མཛེས་མ་ཀྱེ། །སྐར་མ་གསུམ་ལ་གདོང་ཚུགས་ནི། །ཐེ་ཚོམ་མེད་པར་རྟོགས་པར་བཤད། །གཡས་གཡོན་གྱི་ནི་སྡུག་བསྔལ་ཞིང་། །རིམས་དང་ནོར་ཉམས་ལ་སོགས་བྱེད། །གསུམ་དང་གཉིས་གཅིག་འཛོམ་པ་ལས། །ཆེ་འབྲིང་བྱེ་བྲག་ཤེས་པར་བྱ། །བསོད་ནམས་
གཟའ་ཡིས་དགེ་ཞིང་བཟང་། །སྡིག་ཅན་རྣམས་ཀྱིས་མི་ཤིས་བྱེད། །བསོད་ནམས་སྡིག་ཅན་འདྲེན་མར་གནས། །འབྲས་བུའི་སྟོབས་ནི་འདྲེན་མར་གསལ། །གཟའ་རྣམས་སྐར་མར་གནས་བལྟས་ཏེ། །དེ་ཡི་སྟོབས་ཀྱིས་འབྲས་བུ་སྐྱེད། །ཉི་མ་སྒྲ་གཅན་མིག་དམར་དང་། །སྤེན་
པ་སོང་བའི་སྐར་མ་རྣམས། །གལ་ཏེ་སྐར་མ་གསུམ་ལ་འཛོམ། །དེ་ཡི་སྲོག་ནི་འཛོམས་པར་དྲན། །བསོད་ནམས་ཅན་གནས་བདེ་བར་མཐོང་། །འདྲེན་མས་འབྲས་བུ་འདྲེན་མར་གསལ། །འདི་ལ་བསོད་ནམས་སྡིག་ཅན་ནི། །གང་གནས་འབྲས་བུ་སྟོབས་ཆེར་འགྱུར། །དེ་ནས་
ཀླུ་ཡི་འཁོར་ལོ་མཆོག །ཉོན་ཅིག་ལྷ་ཡི་གཟུགས་ཅན་མ། །ཉིན་ཞག་སྐར་མ་ནས་བརྩམས་ཏེ། །ཁ་ནས་མཇུག་མའི་བར་དུ་བྲི། །ཁ་དང་མདུན་དང་གསུས་པ་དང་། །དཔྱི་དང་མཇུག་མ་མགུལ་པ་དང་། །དཔུང་པ་ལྟེ་བ་གསང་གནས་ཏེ། །ཀླུ་ཡི་འཁོར་ལོ་རིམ་པ་བཞིན། །
གསུམ་གསུམ་མཉམ་པར་དགོད་པ་ལས། །འདི་ཡི་འབྲས་བུ་རྣམ་པར་སྟོན། །མགུལ་པ་གསུས་པ་དཔྱི་དང་ནི། །མཇུག་མ་མདུན་ལ་མི་དགེ་བ། །འཆི་བ་ལ་སོགས་ཤེས་བྱ་སྟེ། །ནད་པ་རྣམས་ལ་བསྟན་པ་ཡིན། །ཁ་དང་ལྟེ་བར་སྐྱེས་སྐར་ཡོད། །ནོར་རྙེད་ན་ནི་ཞི་བར་འགྱུར། །

203-1-78a

ཕྲག་པར་རྣམ་པར་རྒྱལ་འགྱུར་ཏེ། །གསང་བར་དོན་ཉམས་ངེས་པར་མཐོང་། །གདེངས་ཀའི་འཁོར་ལོ་གང་བཤད་པ། །མིང་གི་རྒྱུ་སྐར་ལས་ཤེས་བྱ། །དེ་ནས་གཞན་ཡང་བཤད་པར་བྱ། །སྦྲུལ་བྱི་འཁོར་ལོ་བཙུན་མོ་ཉོན། །སྦྲུལ་གྱི་གཟུགས་ནི་བྲི་བར་
བྱ། །དེ་ཡི་རྩ་གསུམ་གནས་པ་ལ། །ཐ་སྐར་ལ་སོགས་རིམ་པ་བཞིན། །ནམ་གྲུའི་མཐར་ཐུག་བྲི་བར་བྱ། །རྩ་གསུམ་བརྒྱད་པའི་འཁོར་ལོ་ལ། །གར་གནས་གཟའ་ཡི་འབྲས་བུ་བརྟག །ཉི་མ་མིག་དམར་སོང་བའི་རྩེ། །སྤེན་པ་རཱ་ཧུ་གང་གནས་པ། །གལ་ཏེ་འོག་མ་དག་
ལ་སོང་། །ནད་མེད་ནད་འབྱུང་ནད་ཅན་འཆི། །བཞིས་འཆི་གསུམ་གྱིས་ནོར་ཉམས་བྱེད། །གཉིས་ཀྱིས་གཉེན་བརླག་གཅིག་གིས་ནི། །ནོར་ཉམས་གཉེན་རྣམས་རིམས་ནད་འབྱུང་། །བུད་མེད་སྡུག་ཅིང་རང་དབང་མེད། །རང་གི་སྐར་མ་གནས་པ་ལས། །བསོད་ནམས་ཡོད་ན་བདེ་
ལས་བྱེད། །གལ་ཏེ་རྩེ་ནི་གཅིག་ལ་སོང་། །དེ་ལ་དཔོན་གཡོག་དགེ་བར་དྲན། །ནོར་རྙེད་ཐམས་ཅད་མཐུན་པར་འགྱུར། །བློ་དང་ལྡན་པར་ཤེས་པར་བྱ། །བར་མའི་རྩ་ལ་སོང་བ་ན། །གྲོང་དང་ཡུལ་ཁྱིམ་བདེ་བར་གསལ། །རྩ་གཅིག་ལ་ནི་སོང་བ་ལ། །བདག་ཉིད་བདེ་ཞིང་
སྐྱིད་པ་ཡིན། །ཆུང་མ་ཁྱོ་དང་ལྷན་ཅིག་ཏུ། །རྩ་ནི་གཅིག་ལ་སོང་བ་ན། །མྱུར་དུ་ཁྱོ་ནི་འཆི་བར་འགྱུར། །ཆུང་མ་རིང་དུ་སྤང་བར་བྱ། །རང་གི་རྩ་ལ་བསོད་ནམས་སྣང་། །ཤིས་པའི་འབྲས་བུ་མདུན་ན་སྡོད། །དེ་ནས་གཞན་ཡང་བཞིན་བཟངས་མ། །གདུགས་ཀྱི་འཁོར་ལོ་
བཤད་ཀྱིས་ཉོན། །ཐ་སྐར་ལ་སོགས་ནམ་གྲུའི་མཐའ། །རྩ་བཞི་ལ་ནི་བརྒྱན་པར་བྱ། །རྩ་རྣམས་ལེགས་པར་གསལ་བ་ལ། །རྒྱུ་སྐར་རྣམས་ནི་མཉམ་པར་དགོད། །མགོ་དང་ནག་པ་མོན་གྲུ་ལ། །གདུགས་ཀྱི་ཡུ་བར་ཡོངས་སུ་གྲགས། །ཉི་མ་སྒྲ་གཅན་མིག་དམར་དང་། །སྤེན་
པ་མགོ་དང་ལྷན་ཅིག་ལ། །གལ་ཏེ་ཕུར་བུ་ཡང་དག་གནས། །ཤར་གྱི་རྒྱལ་པོ་སྲོག་དང་བྲལ། །བརྒྱ་ལ་ཕུར་བུ་མེད་སྲེད་ན། །ནད་ཀྱིས་ཐེབས་པར་འགྱུར་བ་ཡིན། །དེ་ལྟར་ནག་པར་གཟའ་ལག་གནས། །དབུས་ཀྱི་རྒྱལ་པོ་དེ་བཞིན་ནོ། །མོན་གྲུ་ཟླ་བ་ཡང་དག་གནས། །ནུབ་ཀྱི་

203-1-78b

རྒྱལ་པོ་སྔར་བཞིན་དྲན། །དེ་ནས་གཞན་ནས་གསུངས་པ་ཡི། །ཤིན་ཏུ་གསང་ཞིང་བདེན་བྱེད་པ། །སེང་གེའི་གདན་རབ་གྲགས་པ་ཡི། །འཁོར་ལོ་བཤད་ཀྱིས་དཀར་མོ་ཉོན། །གང་གིས་ཤེས་པའི་འཁོར་ལོ་ཡི། །བསྟན་བཅོས་མཐར་ཐུག་རྟོག་པར་འགྱུར། །འཇིག་རྟེན་རྣམས་ཀྱི་
བྱེད་པ་པོ། །སེམས་ཀྱི་རྒྱལ་པོ་འདི་ཤེས་འགྱུར། །ཐ་སྐར་ལ་སོགས་དགུ་རྣམས་དང་། །དེ་བཞིན་མཆུ་ལ་སོགས་པ་དང་། །སྣྲུབས་ལ་སོགས་པའི་རྒྱུ་སྐར་རྣམས། །ངོས་རེར་དགུ་དགུ་བྲི་བར་བྱ། །དེ་ལ་ནོར་བུ་ནས་བརྩམས་ཏེ། །ཆོས་ཀྱི་བར་དུ་དགུ་པ་དགོད། །ཡུལ་དང་ཡུལ་དུ་རྒྱུ་
སྐར་ཚོགས། །དེ་དང་དེ་ཡོད་ལྷ་ཆེན་མ། །མོན་གྲུ་དེ་བཞིན་མགོ་དང་ནི། །ནག་པ་རྣམས་ནི་དབུ་མ་ལ། །སེང་གེའི་གདན་གྱི་ངོས་རྣམས་སུ། །ལྷ་མོ་དེ་ལྟར་གྲགས་པ་ཡིན། །མོན་གྲུ་བྱང་གི་ཡུལ་དུ་བརྗོད། །དབུས་ཀྱི་ཡུལ་དུ་མགོ་ཞེས་གྲགས། །ལྷོ་ཕྱོགས་ནག་པ་ཞེས་བྱ་བ། །འདི་ནི་
ཡུལ་དེར་ཤེས་པར་བྱ། ནོར་བུ་རྟ་དང་དེ་བཞིན་གདུགས། །རྔ་མ་ཞེས་བྱ་ལྷས་མཆོད་མ། །སེང་གེའི་གདན་དང་གླང་པོ་ཆེ། །བུ་ཏི་དང་ནི་དེ་བཞིན་གསེར། །ཆོས་ནི་རྒྱུ་སྐར་རྣམས་ལ་སྟེ། །རིམ་པ་བཞིན་དུ་རེ་རེ་དགོད། །གདུགས་དང་སེང་གེའི་གདན་དང་ནི། །རྔ་མ་དག་ལ་རིམ་པ་
བཞིན། །ཇི་ལྟར་ཉི་མའི་དབུས་གནས་པ། །དེ་ཡི་འབྲས་བུ་ལྷ་དབང་མ། །ཡུལ་དེའི་རྒྱལ་པོ་ལྷོ་ཕྱོགས་འགྲོ། །ནོར་བུ་ལ་སོགས་གང་ལ་ཤར། །དཀོན་པར་འགྱུར་ཏེ་ཐེ་ཚོམ་མེད། །སེང་གེ་གདན་གྱི་འཁོར་ལོར་གྲགས། །དེ་ནས་གཞན་ཡང་བཤད་པར་བྱ། །མདའ་གཞུའི་འཁོར་
ལོ་ཞེས་བྱ་བ། །གང་གིས་ཤེས་པ་གཡུལ་དུ་ནི། །རྒྱལ་ཕམ་མཚན་ཉིད་ངེས་པར་སྟོན། །གཞུ་དང་རྒྱུད་དང་མདའ་བཅས་པའི། །མདའ་གཞུ་འཁོར་ལོ་མཉམ་པར་བྲི། །ཉི་མ་འཁྱུད་པའི་སྐར་མ་ནས། །གསུམ་གསུམ་རིམ་པ་བཞིན་དུ་བྲི། །མདའ་ཡི་ལྟོང་དང་རྐེད་པ་དང་། །མདེའུ་
རྣམས་ལ་རིམ་པ་བཞིན། །གཞུ་མཆོག་གཡས་དང་ཚངས་པ་དང་། །གཡོན་པར་གསུམ་གསུམ་རིམ་པར་བྲི། །གཞུ་རྒྱུད་གཡོན་དང་དབུ་མ་དང་། །གཡས་སུ་གསུམ་གསུམ་རིམ་པར་བྲི། །རང་གི་སྐྱེས་པའི་སྐར་མ་དེ། །ཇི་ལྟར་གནས་པས་ཤེས་པར་བྱེད། །མདའ་ཡི་ལྟོང་ལ་སོང་ན་

203-1-79a

འཆི། །རྐེད་པར་ནད་འབྱུང་རྩེ་མོར་རྒྱལ། །གཞུ་རྒྱུད་དབུ་མས་དོན་ཉམས་ཤིང་། །ཆངས་པ་ལ་སོང་ནོར་རྣམས་ཟད། །གཞུ་མཆོག་གཡས་པ་དགྲ་ལས་རྒྱལ། །གཞུ་རྒྱུད་གཡས་པས་རྙེད་པ་འབྱུང་། །གཞུ་མཆོག་གཡོན་པས་རྩོད་འགྱུར་འཆི། །གཞུ་རྒྱུད་
གཡོན་པས་འཆི་བར་མཐོང་། །དེ་རྣམས་ཀུན་ལ་སྡིག་ཅན་གནས། །མི་དགེ་འབྲས་འབྱུང་རི་སྲས་མོ། །གལ་ཏེ་བསོད་ནམས་སྦྱོར་བ་ཡོད། །ཤིས་པའི་འབྲས་བུ་ངེས་པར་མཐོང་། །བསོད་ནམས་སྡིག་ཅན་འདྲེས་མར་གནས། །འབྲས་བུ་འདྲེས་མར་མཐོང་བ་ཡིན། །དེ་ནས་གཞན་ཡང་
བཤད་པར་བྱ། །རལ་གྲིའི་འཁོར་ལོ་དགེ་བ་ཅན། །གང་གིས་ཤིས་པས་འདྲི་བྱེད་ཀྱི། །གཡུལ་ལས་རྣམ་པར་རྒྱལ་བར་འགྱུར། །གཞན་དུ་གསུང་བའི་འཁོར་ལོ་གང་། །དགེ་དང་མི་དགེ་རྣམ་དཔྱོད་པས། །བསྟན་བཅོས་རྒྱུད་ཀྱི་མཚན་ཉིད་ལས། །མྱུར་དུ་འདི་ནི་ངེས་པར་མཐོང་། །རལ་གྲི་
འཛིན་པའི་སྐྱེས་བུ་ལ། །སྨིན་དྲུག་ལ་སོགས་རིམ་བཞིན་བྲི། །རྩེ་མོར་ལྔ་སྟེ་ཁ་ལ་གཉིས། །རྐེད་པར་བཅུ་དང་ཡུ་བར་བཅུ། །རྩེ་མོར་སོར་བརྒྱད་གནས་པ་ལས། །རྐེད་པ་དེ་ཡི་འགྱུར་གྱིས་གནས། །ཁ་དང་ཡུ་བ་དག་ལ་ནི། །བྱེ་བྲག་ཡོངས་སུ་ཤེས་པར་བྱ། །ཁ་དང་རྐེད་པར་སྡིག་ཅན་
སོང་། །རང་ཉིད་དགེ་བར་འགྱུར་བ་སྟེ། །རལ་གྲིའི་རྩེ་མོར་སྡིག་ཅན་གནས། །བདག་ཉིད་ཉམས་པར་འགྱུར་བ་ཡིན། །ཁ་དང་རྐེད་པར་བསོད་ནམས་ཡོད། །བདག་ཉིད་མི་དགེ་བྱེད་པར་དྲན། །དྲག་དང་ཞི་བ་གཉིས་ཀ་ཡོད། །དགེ་དང་མི་དགེ་འདྲེན་མར་འབྱུང་། །རྩེ་མོར་ཞི་དྲག་
གཉིས་ཀ་ཡོད། །དེ་ལ་འཐབ་རྩོད་འབྱུང་མི་འགྱུར། །གལ་ཏེ་རྩེ་མོར་བསོད་ནམས་སྣང་། །རྒྱལ་དང་རྙེད་དང་བདེ་བར་འགྱུར། །རྐེད་པར་དགེ་སྡིག་འདྲེན་མར་གནས། །འཁྲུག་པ་འདུམ་པར་འགྱུར་མ་ཡིན། །བསོད་ནམས་སྡིག་ཅན་བདག་ཉིད་ལི། །སློབས་ཀྱིས་ཆེ་ཆུང་འབྲས་བུར་སྟོན། །
དེ་ལྟར་རིགས་པས་ལེགས་བརྟགས་ཏེ། །གཞན་ལས་བརྗོད་པས་འབྲས་བུ་སྟོན། །དེ་ནས་བུམ་པའི་འཁོར་ལོ་མཆོག །པ་ཊའི་མཚན་ཉིད་ཤེས་པར་བྱ། །ཤར་གྱི་བུམ་པ་ལུག་དང་ནི། །སེང་གེ་གཞུ་ནི་རྣམ་པར་གནས། །གླང་དང་བུ་མོ་ཆུ་སྲིན་རྣམས། །ལྷོ་ཡི་བུམ་པར་

203-1-79b

གནས་པར་བརྗོད། །འཁྲིག་པ་སྲང་དང་བུ་མོ་ནུབ། །བྱང་དུ་ཀརྐ་སྡིག་པ་ཉ། །ཕུང་པོ་བཞི་ལ་བསྡུས་པ་ཡི། །བུམ་པའི་རྣམ་པ་རིམ་པ་བཞིན། །ཉི་མ་གར་ཡོད་སྟོང་པ་སྟེ། །མེད་པ་གང་བའི་བུམ་པ་མཐོང་། །སྟོང་པར་ཕྱིན་ན་འཆི་བར་རིག །གང་བའི་སར་ནི་རྒྱལ་ཞིང་
ཤིས། །གང་བའི་སར་ནི་བསོད་ནམས་ཡོད། །དེ་ལ་རང་གི་སྐར་མ་སྣང་། །དགྲ་ཐུལ་དོན་འགྲུབ་རྙེད་པ་སྟོན། །དེ་ལས་བཟློག་ན་མི་དགེ་ཉིད། །བུམ་པའི་འཁོར་ལོ་རབ་ཤེས་པ། །གཞན་དུ་མ་བསྟན་གངས་རིའི་བདག །དེ་ནས་ཡང་དག་བཤད་པར་བྱ། །པདྨའི་འཁོར་ལོ་དགེ་བ་མཆོག །
བྱེས་འགྲོ་སྐྱེས་བུའི་འཚོ་འཆི་དང་། །དགེ་དང་མི་དགེ་ཤེས་པར་འགྱུར། །པདྨ་འདབ་མ་བརྒྱད་པ་འདི། །ལྟེ་བ་བཅས་པ་བྲི་བར་བྱ། །ལྟེ་བར་བཞི་ནི་བྲི་བར་ཏེ། །ལྷག་མ་འདབ་མ་རྣམས་ལ་དགོད། །ཤར་གྱི་འདབ་མའི་ཕུང་པོ་ལ། །ནང་དུ་འཇུག་པ་མཉམ་པར་བྲི། །མེ་མཚམས་ཕྱི་རོལ་
འཐོན་པ་དང་། །དེ་བཞིན་ལྷོ་ཕྱོགས་ནང་དུ་འཇུག །བདེན་བྲལ་འདབ་མ་ཕྱི་རོལ་འདོན། །ཆུ་ཡི་འདབ་མ་ནང་དུ་འཇུག །རླུང་ཕྱོགས་ཕྱི་རོལ་འཐོན་པར་དྲན། །གནོད་སྦྱིན་འདབ་མ་ནང་འཇུག་ཡིན། །དབང་ལྡན་ཕྱི་རོལ་འཐོན་པ་སྟེ། །དེ་ལྟར་རིམ་པ་ཇི་བཞིན་བྲི། །ཉིན་ཞག་སྐར་མ་ནས་
བརྩམས་ཏེ། །འདབ་མ་རྣམས་ལ་གསུམ་གསུམ་ནི། །ཤར་ནས་བརྩམས་ཏེ་བྲི་བར་བྱ། །དབུས་སུ་མཇུག་མ་བཞི་ཡང་བྲི། །ནང་དུ་འཇུག་དང་ཕྱིར་འཐོན་དང་། །དགེ་དང་མི་དགེ་ཤེས་པར་བྱ། །སྐྱེས་བུའི་སྐར་མ་པདྨ་ལ། །གང་ལ་གནས་པ་མ་འཁྲུལ་བརྟག །འདི་ལ་དགེ་དང་མི་དགེ་
བའི། །འབྲས་བུ་ཤེས་པར་འགྱུར་བ་ཡིན། །འདི་ལ་ལྔ་ཚན་ལྔ་དང་ནི། །ལྷག་མ་གསུམ་དུ་ཡོངས་སུ་གྲགས། །དང་པོ་ལ་ནི་བརྟན་པར་གནས། །དེ་བཞིན་ཆས་ཤིང་ལམ་ཞུགས་དང་། །ལམ་ནི་ཕྱེད་ན་གནས་པ་དང་། །དེ་བཞིན་བཞི་ཆར་གནས་པ་དང་། །དེ་བཞིན་ཡུལ་དུ་ཕྱིན་པ་རྣམས། །
རིམ་པ་བཞིན་དུ་གྲགས་པ་ཡིན། །ནང་དུ་འཇུག་པའི་རྣམ་ལྔ་ལ། །བདེ་ཞིང་རྙེད་པ་ཆེ་བ་དང་། །ནད་མེད་རྒྱལ་དང་གྲགས་པ་ཡི། །ཀུན་དུ་དགེ་བར་བསྟན་པ་ཡིན། །ཕྱི་རོལ་འཐོན་པ་ལྔ་པོ་ལ། །དབུ་མ་གནས་པ་ཉིད་དང་ནི། །བཏང་སྙོམས་སུ་ཡང་བསྟན་པ་སྟེ། །དེ་ལྟར་ཤེས་བྱ་རི་སྲས་མོ། །

203-1-80a

ལྷག་མ་གསུམ་ན་གནས་པ་ལས། །དེ་ཡི་འབྲས་བུ་མི་དགེ་བྱེད། །དང་པོར་ནོར་ནི་རྣམ་པར་ཉམས། །གཉིས་པ་ནད་ཀྱིས་ཐེབས་པར་མཐོང་། །གསུམ་པས་ཁྱིམ་དུ་སླེབས་ནས་ཀྱང་། །འཆི་བར་འགྱུར་རོ་གངས་རིའི་བདག །པདྨའི་འཁོར་ལོ་སྟོབས་
བསྟན་པ། །འདི་ནི་རྣམ་པར་ཤེས་བྱ་སྟེ། །ཏཏྐཱལ་སྐར་མ་ལ་གནས་པའི། །གཟའ་ཡི་དགེ་དང་མི་དགེ་བྱེད། །ད་ནི་འདབ་མའི་གྲངས་ཀྱིས་བཤད། །བརྒྱད་ཀྱིས་དགེ་དང་མི་དགེ་འབྱུང་། །དང་པོར་བསྟན་པར་གནས་པ་སྟེ། །ལས་ཀུན་འགྲུབ་པར་བསྟན་པ་ཡིན། །གཉིས་པ་ཆ་
ཤས་ནོར་ཤོར་དང་། །རྙེད་པ་འབྱུང་བར་བསྟན་པ་ཡིན། །གསུམ་པ་ལམ་ཞུགས་ནད་དང་ནི། །རྙེད་པ་མེད་པར་བསྟན་པ་ཡིན། །བཞི་པར་འཆི་དང་རྙེད་ནས་འཆོར། །རྙེད་པ་མེད་པར་བསྟན་པ་ཡིན། །ལྔ་པ་སླེབས་འགྱུར་ནོར་མེད་འཆི། །སྐྱིད་པར་ཡང་ནི་བསྟན་པ་ཡིན། །དྲུག་པས་
ཕྱིར་ལ་ལོག་པ་དང་། །ལུས་ཀྱང་སྐྱིད་པར་འགྱུར་བ་ཡིན། །བདུན་པ་སླེབས་འགྱུར་ནོར་རྙེད་ལོག །སྡུག་བསྔལ་འབྱུང་བར་བསྟན་པ་ཡིན། །བརྒྱད་པར་མྱུར་དུ་སླེབས་པ་དང་། །ནད་འབྱུང་སྡུག་བསྔལ་ཆེན་པོ་འབྱུང་། །དེ་ལྟར་རྙེད་དང་མི་རྙེད་དང་། །བདེ་སྡུག་འཚོ་དང་འཆི་བ་དང་། །རྒྱལ་
དང་རྣམ་པར་རྒྱལ་འགྱུར་བའི། །འཁོར་ལོ་བདག་གིས་དེ་བཤད་ཡིན། །གླིང་དང་ཉི་མ་ཟླ་བ་དང་། །བཅུ་བཞིའི་རང་བཞིན་མིག་ཉིད་དང་། །འདོད་པ་ནོར་ལྷ་སྔོན་པོ་དང་། །དུས་ཟླ་དང་ནི་འཇིག་རྟེན་དང་། ཡུལ་བ་འབྱོར་པ་བུ་ག་དང་། །རོ་དང་ཚེས་དང་རྒྱ་མཚོ་དབྱངས། །གུར་
གུམ་གི་ཝང་སྦྱར་བ་ལས། །ཛ་རི་མ་ལའི་སྨྱུ་གུས་བྲིས། །གཅིག་ནི་བཅུ་དྲུག་ཆ་ཡིན་ཏེ། །ད་ལྟ་ཉིད་དུ་སྐྱེ་བར་འགྱུར། །གཉིས་སོགས་ཆ་ཡི་བྱེ་བྲག་གིས། །ཉིན་ཞག་ཆ་རྣམས་ཤེས་པར་བྱ། །འདི་ནི་རེ་མིག་བཅུ་དྲུག་པ། །འཁོར་ལོར་སྐྱེ་བའི་དུས་བསྟན་པའོ། །ཇི་ལྟར་མཆོག་ཏུ་
གསང་བ་ཡི། །རྫོང་གི་འཁོར་ལོ་བརྩམ་པར་བྱ། །འདི་ནི་གཡུལ་ལས་རྣམ་པར་རྒྱལ་བ་དབྱངས་འཆར་བའི་རྒྱུད་ཀྱི་རྒྱལ་པོ་ལས། པདྨའི་འཁོར་ལོ་བསྟན་པ་ཆེན་པོ་ཞེས་བྱ་བ་སྟེ་ལེའུ་བདུན་པའོ།།      །།ལྷ་མོས་གསོལ་པ། ལྷ་ཡི་ལྷ་མཆོག་བཅོམ་ལྡན་འདས། །ལྷ་དང་

203-1-80b

ལྷ་མིན་ཕྱག་བྱས་པ། །དབང་ཕྱུག་ཆེན་པོ་རྫོང་འཁོར་ལོ། །མཆོག་ཏུ་གསང་བ་བདག་ལ་སྩོལ། །ཇི་ལྟར་བསྡུས་པའི་ཆོ་ག་ལས། །གཟའ་རྣམས་སྤྱོད་པའི་རབ་སྦྱོར་བ། །གངས་ཀྱི་རི་ལ་བཞུགས་པ་ཡི། །བཅོམ་ལྡན་འདས་ལས་མཉན་པར་འཚལ། །བཅོམ་ལྡན་འདས་ཀྱིས་བཀའ་
སྩལ་པ། །གསང་བ་བས་ཀྱང་ཤིན་ཏུ་གསང་། །མཆོག་ཏུ་གསང་བ་ལྷ་མོ་ཉོན། །རྫོང་གི་འཁོར་ལོ་འདི་ལྟ་བུ། །རང་གི་སེམས་ལ་གཞག་པར་བྱ། །རྫོང་དང་གྲོང་དང་དམག་ས་དང་། །བསྟན་བཅོས་ཇི་བཞིན་ཡོངས་སུ་བརྟག །གལ་ཏེ་ཕ་རོལ་རྫོང་འཕྲོག་གམ། །བདག་ཉིད་སྲུང་བ་བྱེད་
ཀྱང་རུང་། །འཁོར་ལོའི་བདག་ཉིད་རབ་བརྟགས་ཏེ། །རྫོང་དང་དམག་ས་ཤེས་པར་བྱ། །འདྲི་བྱེད་མདུན་དུ་འོངས་པའི་ཚེ། །ལྷ་ཡི་དབང་ལྡན་མཚམས་སུ་དགོད། །འདི་ལྟར་འཁོར་ལོ་གྲུ་བཞི་ལ། །ར་བ་རིམ་གསུམ་ལྡན་པར་བྲི། །དབང་ལྡན་མཚམས་ནས་བརྩམས་ནས་ནི། །སྨིན་
དྲུག་ལ་སོགས་རིམ་བཞིན་བྲི། །མཚམས་བཞི་ནང་དུ་འཇུག་པ་སྟེ། །ཕྱོགས་བཞིའི་ཕྱི་རུ་འཐོན་པར་དྲན། །རྫོང་གི་དཀྱིལ་དུ་གནས་པ་ནི། །དྲག་པོ་རྣམ་པ་བཞི་ཡིན་ཏེ། །ལག་དང་མེ་བཞི་ཆུ་སྟོད་དང་། །ཁྲུམས་སྨད་རྣམས་སུ་གྲགས་པ་ཡིན། །ནང་གི་ར་བ་མགོ་དང་དབོ། །སྣྲུབས་
དང་ཁྲུམས་སྟོད་མཚམས་སུ་དགོད། །ནབ་སོ་ནག་པ་ཆུ་སྨད་དང་། །ནམ་གྲུ་རྣམས་ནི་ཕྱོགས་སུ་དགོད། །ར་བ་བར་མར་སྣར་མ་དང་། །གྲེ་དང་སྣྲོན་དང་མོན་གྲེ་མཚམས། །རྒྱལ་དང་ས་རི་གྲོ་བཞིན་དང་། །ཐ་སྐར་རྣམས་ནི་ཕྱོགས་སུ་དྲན། །ར་བ་ཕྱི་མར་གནས་པ་ནི། །སྨིན་དྲུག་
དང་ནི་དེ་བཞིན་མཆུ། །ས་ག་ལྷ་མཚམས་བྱི་བཞིན་དང་། །མོན་གྲུ་བྲ་ཉེ་བརྒྱད་པོ་དགོད། །ཤར་ཕྱོགས་ལ་གནས་ཁྱིམ་བཤད་པ། །ཉ་ལུག་གླང་རྣམས་དེ་བཞིན་དགོད། །བྱང་གི་ཕྱོགས་སུ་གནས་པའི་ཁྱིམ། །འཁྲིག་པ་ཀརྐ་སེང་གེར་དྲན། །དེ་བཞིན་ནུབ་ཕྱོགས་དག་ཏུ་ཡང་། །བུ་
མོ་སྲང་དང་སྡིག་པར་གྲགས། །གཞུ་དང་ཆུ་སྲིན་བུམ་པ་རྣམས། །ལྷོ་ཡི་ཕྱོགས་ན་རྣམ་པར་གནས། །ར་བ་ཕྱི་ནང་བར་མ་ལ། །ཀ་ལཱ་ཨ་པ་རུ་ཏྲ་ཞེས། །རིམ་པ་བཞིན་དུ་བསྟན་པ་ཡིན། །གལ་ཏེ་མིང་གི་སྐར་མ་ནི། །ཀ་ལཱ་ལ་གནས་འཆི་བར་འགྱུར། །ཨ་པ་ལ་གནས་སྟོབས་ཆུང་སྟེ། །གལ་

203-1-81a

ཏེ་རུ་ཏྲར་གནས་པ་ན། །ཐེ་ཚོམ་མེད་པར་རྫོང་ཐོབ་འགྱུར། །ནང་མ་བཞི་ལ་དྲག་གཟའ་ཡོད། །ཕྱི་རོལ་དམག་གི་དོན་འགྲུབ་འགྱུར། །བར་མ་དྲག་པོའི་གཟའ་རྣམས་གནས། །ཕན་ཚུན་འཁྲུག་འགྱུར་རིང་ན་ཐོབ། །རྫོང་གི་འཁོར་ལོ་འདི་ལྟ་བུ། །ལྷ་མོ་ས་སྟེང་དག་ན་
དཀོན། །དྲག་པོའི་གཟའ་རྣམས་ཕྱི་ལ་གནས། །དམག་དཔུང་ཚོགས་པ་དོན་མེད་འགྱུར། །མཚམས་ལ་དྲག་གནས་མཇུག་ལ་དགེ། །ཕྱོགས་དྲག་ཕྱིར་འཐོན་དགེ་བ་ཡིན། །ནང་མ་བཞི་ལ་བསོད་ནམས་ཤར། །དྲག་པོའི་གཟའ་རྣམས་ཕྱི་རོལ་སོང་། །འཇིག་རྟེན་གསུམ་གྱི་དམག་ཚོགས་ཏེ། །
དབང་ཕྱུག་ལྷ་ཡིས་སྣ་དྲངས་ཀྱང་། །རྫོང་ནི་ཐོབ་པར་མི་འགྱུར་ཏེ། །སླར་ལ་ལྡོག་འགྱུར་བཞིན་བཟངས་མ། །གང་ཚེ་དབུ་མ་བཞི་པོ་ལ། །ཉི་མ་རཱ་ཧུ་སྤེན་པ་དང་། །ས་ཡི་བུ་དག་སོང་བ་དང་། །བསོད་ནམས་གཟའ་རྣམས་ཕྱི་རོལ་སོང་། །བརྒྱ་བྱིན་དཔུང་དང་བཅས་པ་ཡིས། །བསྲུངས་ཀྱང་
རྫོང་ནི་ཐུབ་མི་འགྱུར། །ར་བ་བར་མར་དྲག་གཟའ་གནས། །སྨྲ་བརྗོད་ནོར་གཏོང་ཟེར་བར་འགྱུར། །བར་མ་བསོད་ནམས་གཟའ་རྣམས་གནས། །ཕྱི་རོལ་དམག་དཔུང་ཕམ་པར་གསལ། །ཞི་དྲག་མེད་པར་གནས་པ་ལས། །འདྲེན་མའི་འབྲས་བུ་སྟོན་པར་བྱེད། །དྲག་པོ་ཕྱི་དང་ནང་དུ་སོང་། །
འཁྲུག་པ་ཆེན་པོ་འབྱུང་བར་འགྱུར། །ཞི་བའི་ཕྱི་དང་ནང་དུ་སོང་། །ཕན་ཚུན་འདུམ་པར་ཡོངས་སུ་གྲགས། །རང་དང་དགྲ་ཡི་རྒྱུ་སྐར་ལ། །གཟའ་རྣམས་གང་གནས་ལྟ་བ་གཅེས། །ཞི་དྲག་གདོང་ཚུགས་ཉི་མར་སོང་། །ཁྱིམ་བདག་རྣམས་ལ་མི་དགེ་བྱེད། །མདུང་དང་མདུང་ཆེན་སྦྱོར་བ་
དང་། །ཀ་བའི་སྦྱོར་བ་བརྟག་པར་བྱ། །རྫོང་གི་འཁོར་ལོའི་ཆོ་ག་ལ། །རང་དང་དགྲ་ལ་གནོད་པ་བརྟག །རྒྱན་གྱི་འཁོར་ལོ་བརྟག་པ་དང་། །ཤ་ལ་ཀ་ཡི་གདོང་ཚུགས་དང་། །བརྒྱད་ཅུ་རྩ་གཅིག་འཁོར་ལོ་སོགས། །རྗེས་སུ་མཐུན་པ་ཐམས་ཅད་བརྟག །བིཥྚིའི་འཁོར་ལོ་བརྟག་པར་བྱ། །རང་
གི་ཁྱིམ་དང་སྐྱེས་སྐར་བརྟག །ཏཏྐཱལ་དུས་སྦྱོར་བརྟག་པར་བྱ། །དཔལ་ལྡན་རཱ་ཧུའི་འཁོར་ལོ་མཆོག །ལས་ཀུན་བྱེད་པར་བརྟག་པར་བྱ། །དགྲ་ཕྱོགས་མི་དགེ་ཐམས་ཅད་བླངས། །བདག་ཉིད་མེད་དེ་མ་ལུས་པ། །དབྱངས་འཆར་རྒྱུད་ལས་གང་བཤད་མཐོང་། །མདོར་ན་ཕ་རོལ་བརླག་པ་

203-1-81b

དང་། །བདག་ཉིད་ཅི་ནས་རྒྱལ་བར་འགྱུར། །དེ་ནས་རྫོང་གི་འཁོར་ལོ་མཆོག །རིམ་པ་གསུམ་ལྡན་འདིར་བརྗོད་བྱ། །འདི་འདྲའི་འཁོར་ལོ་སུ་ལ་ཡོད། །བཅོམ་ལྡན་འདས་ལ་འཁོར་ལོ་མངའ། །སྨིན་དྲུག་ནས་ནི་བརྩམས་ནས་སུ། །ར་བ་གསུམ་ལ་དགོད་པར་བྱ། །སྨིན་དྲུག་རྒྱལ་སྐག་
མཆུ་དང་ནི། །ས་རི་ས་ག་ལྷ་མཚམས་དང་། །གྲོ་བཞིན་བྱི་བཞིན་མོན་གྲུ་དང་། །ཐ་སྐར་བྲ་ཉེ་བཅུ་གཉིས་པོ། །ཕྱི་ཡི་ར་བ་རྣམས་ལ་ཡང་། །རིམ་པ་བཞིན་དུ་དགོད་པར་བྱ། །སྣར་མ་ནབ་སོ་གྲེ་དང་ནི། །ནག་བ་སྣྲོན་དང་ཆུ་སྨད་དང་། །མོན་གྲེ་དང་ནི་ནམ་གྲུ་སྟེ། །བརྒྱད་པོ་བར་གྱི་ར་བར་དགོད། །
མགོ་དང་ལག་དང་དེ་བཞིན་དབོ། །མེ་བཞི་སྣྲུབས་དང་ཆུ་སྟོད་དང་། །ཁྲུམས་སྟོད་ཁྲུམས་སྨད་རྣམ་པ་བརྒྱད། །ནང་གི་ར་བར་དགོད་པར་བྱ། །ར་བ་བཞིན་ལ་དཔུང་གི་སྲོག །ནང་མ་བདག་པོའི་སྲོག་ཡིན་ཏེ། བར་མ་མཉམ་པོར་བསྟན་པ་ཡིན། །དེ་ལ་རཱ་ཧུ་རྒྱལ་པོ་སྟེ། །ལྷག་མ་བློན་པོར་
གནས་པ་ལས། །རྒྱལ་ཕམ་མཚན་ཉིད་སྟོན་པར་བྱེད། །ནང་གི་ཕྱོགས་བཞིར་རཱ་ཧུ་སོང་། །རྫོང་ནི་བླངས་པས་ཆོག་པ་ཡིན། །ཕྱི་རོལ་བཅུ་གཉིས་རཱ་ཧུ་སོང་། །བདག་པོ་ཉ་ལ་བསོད་ནམས་འགྲུབ། །བར་གྱི་ར་བར་རཱ་ཧུ་སོང་། །ཕྱི་ནང་མཉམ་པར་གྲགས་པ་ཡིན། །སྔར་བཤད་ཐུར་མ་བདུན་
པ་ཡི། །འཁོར་ལོ་ཇི་བཞིན་ཤེས་པར་བྱ། །སྤེན་པ་དང་ནི་ཕུར་བུ་དག །གང་གནས་པ་སྟེ་ལེགས་པར་བལྟ། །ར་བ་གསུམ་པོ་གང་ལ་གནས། །འཁོར་ལོ་འདི་ལ་མི་དགེ་ཡིན། །རྫོང་དང་གྲོང་ཁྱེར་རྣམས་སུ་ཡང་། །ཉི་མ་ཡོད་པར་མི་འགྲོ་སྟེ། །ཉི་མ་ཕུར་བུ་སྤེན་པ་གསུམ། །ལྷན་ཅིག་ཡོད་
པར་འགྲོ་མི་རུང་། །རྫོང་གི་འཁོར་ལོའི་ཆོ་ག་ལས། །སྒྲ་གཅན་ཁ་མཇུག་ལེགས་པར་རྟག །རྐང་པ་བརྒྱ་པ་ལ་སོགས་པའི། །སྔར་བཤད་ཆོ་ག་ཐམས་ཅད་བརྟག །རྫོང་དང་རྫོང་གི་བདག་པོ་ཡི། །སྐར་མ་རཱ་ཧུ་ཡོད་དམ་བརྟག །གལ་ཏེ་དེ་ལ་རཱ་ཧུ་སོང་། །རྫོང་དང་བདག་པོ་དག་ལ་ངན། །ནང་
གི་ཕྱོགས་བཞིར་རཱ་ཧུ་སོང་། །རྫོང་ལ་མི་དགེ་ལྷས་མཆོད་མ། །ར་བ་རྣམས་ཀྱི་རིམ་པ་ལ། །ཇི་ལྟར་གནས་པ་བརྟག་པར་བྱ། །དྲག་པོ་བར་མ་བདག་ལ་སོགས། །ཡུན་རིང་ལོན་ན་འཐོབ་པར་འགྱུར། །སྡིག་ཅན་གཟའ་རྣམས་སྙིང་པོར་ཞུགས། །དེ་ཚེ་ཟླ་བ་བརྟག་པར་བྱ། །ཟླ་བ་གནས་པའི་

203-1-82a

ཕྱོགས་གནས་རྒྱུག །དེ་ཚེ་དེ་ནས་རྫོང་འཇོམས་དྲན། །མིག་དམར་རཱ་ཧུ་སྤེན་པ་གསུམ། །བཅུ་གཅིག་སྙིང་པོའི་ཕྱོགས་བཞི་པོ། །ལག་ལ་སོགས་པ་བཞི་ལ་སོང་། །ཕྱོགས་དེར་ཟླ་བ་གལ་ཏེ་གནས། །ཟླ་བའི་ཕྱོགས་ནས་རྫོང་རླག་བྱེད། །དེ་ཕྱིར་ཟླ་བ་གནས་
པ་བརྟག །སྙིང་པོའི་ཕྱོགས་བཞིར་བསོད་ནམས་སོང་། །བཞི་འམ་གསུམ་མམ་གཅིག་གནས་ཀྱང་། །འཁོར་ལོས་སྒྱུར་བའི་རྒྱལ་པོ་ཡང་། །ལོག་པ་ཉིད་དུ་ཐེ་ཚོམ་མེད། །རྫོང་དང་གྲོང་ཁྱེར་གང་ཡང་རུང་། །ཉི་མ་མིག་དམར་སྤེན་པ་གསུམ། །ནང་གི་རྒྱུ་སྐར་བརྒྱད་ལ་གནས། །གཅིག་ལ་རཱ་
ཧུ་སོང་བའི་ཚེ། །ཕྱི་རོལ་དམག་དཔུང་རྒྱལ་བ་དང་། །རྣམ་པར་རྒྱལ་བར་འགྱུར་བ་ཡིན། །སྨིན་དྲུག་ལ་སོགས་རྒྱུ་སྐར་གསུམ། །དེ་བཞིན་མཆུ་ལ་སོགས་པ་གསུམ། །ལྷ་མཚམས་ལ་སོགས་གསུམ་དང་ནི། །མོན་གྲུ་ལ་སོགས་གསུམ་པོ་རྣམས། །ནང་དུ་འཇུག་ལ་དགེ་བ་སྟེ། །ཕྱི་རོལ་འཐོན་
ལ་མི་དགེ་བྱེད། །ཀ་བའི་ཡི་གེ་བཞི་པོ་ཡིས། །ཐོ་རངས་རྒྱུ་སྐར་བཅུ་གཉིས་སོ། །ལག་ནས་བྲ་ཉེའི་བར་དུ་ཡང་། །ཕྱི་རོལ་འཐོན་ལ་དགེ་བ་ཡིན། །ཀ་བར་གྲགས་པ་བཞི་པོ་ནི། །ཀུ་སུ་བྷུ་ཏུ་ཞེས་བྱར་དྲན། །སྨིན་དྲུག་ལ་སོགས་གྲྭ་རྣམས་ལ། །རྫོང་དང་བདག་པོའི་སྐར་མ་སོང་། །ཕྱི་ཡི་དམག་ལ་
དགེ་བ་སྟེ། །ལག་ལ་སོགས་པའི་ཕྱོགས་བཞི་ལ། །རྫོང་དང་བདག་པོའི་སྐར་མ་ནི། །རྫོང་སྲུང་རྣམས་ལ་དགེ་བ་ཡིན། །ནང་དུ་འཇུག་དང་ཀ་བ་ལ། །གལ་ཏེ་མིག་དམར་བརྟག་པར་གནས། །དེ་ལ་དམག་ཏུ་ཆས་པ་ན། །དོན་འགྲུབ་རྒྱལ་བར་འགྱུར་བ་ཡིན། །དེ་ལྟར་ནང་དུ་འཇུག་པ་དང་། །
ཀ་བར་མིག་དམར་གནས་པའམ། །ལུག་དང་སྡིག་པའི་ཁྱིམ་དུ་ནི། །གལ་ཏེ་མིག་དམར་ལེགས་པར་གནས། །དྲག་པོ་གཉིས་ནི་འཇོམས་པ་རྣམས། །གྲྭ་ཡི་ར་བ་རྣམས་ལ་གནས། །ནང་དུ་འཇུག་པ་རྒྱལ་མཚན་ཏེ། །སྒྲིམ་མི་དགོས་པར་རྫོང་ཐོབ་འགྱུར། །གཟའ་རྣམས་འཁྱོག་པོའི་
འགྲོས་ལ་སོང་། །དེ་ཚེ་རྫོང་ནི་ཐོབ་པ་མེད། །གང་ཚེ་ཕུར་པ་འཁྱོག་པོར་སོང་། །དེ་ཚེ་ཤར་དུ་མི་དགེ་བྱེད། །མིག་དམར་འཁྱོག་པའི་འགྲོས་ལ་གནས། །རྫོང་གི་ལྷོ་ཕྱོགས་འགྲོ་བ་ན། །པ་བ་སངས་ནི་འཁྱོག་པ་ལ། །ནུབ་ཀྱི་ཕྱོགས་སུ་འགྲོ་བ་ན། །གཟའ་ལྷག་འཁྱོག་པོའི་འགྲོས་བྱེད་

203-1-82b

པ། །བྱང་གི་ཕྱོགས་ལ་ངན་པ་ཡིན། །གཞན་ཡང་ཉི་མ་མིག་དམར་དག །གང་གནས་ཕྱོགས་སུ་འགྲོར་མི་རུང་། །སྤེན་པ་པ་སངས་གཟའ་ལག་ཕུར། །མིག་དམར་འཁྱོག་པོར་སོང་བའི་ཚེ། །རྫོང་ནི་ཐོབ་པར་མི་འགྱུར་ཏེ། །དཔུང་དང་བཅས་པ་ལོག་པར་འགྱུར། །མིག་དམར་དང་ནི་
པ་བ་སངས། །དྲག་པོའི་འགྲོས་ལ་འགྲོ་འདུག་དགེ། །འཁྱོག་པོ་ལ་ནི་ཁ་སྨྲས་དང་། །ཟོང་མི་ལོན་སོགས་མི་དགེ་ཡིན། །ཆུ་ཡི་འཁོར་ལོའི་མཚན་ཉིད་ནི། །ཡུལ་གྱི་ཡི་གེ་ཚད་མར་གཟུང་། །བུམ་པ་བརྒྱད་ནི་མཉམ་གནས་པ། །སྡེ་ཚན་བརྒྱད་ཀྱིས་རྣམ་པར་བརྒྱན། །དང་པོའི་ཡི་གེ་གཅིག་
བཟུང་ལ། །དེ་ཡི་གྲངས་ཀྱིས་ཤེས་པར་འགྱུར། །ཨཱ་ལི་སོ་དྲུག་ཤེས་བྱ་སྟེ། །སྡེ་ཚན་ཀཱ་ལི་ཁྲུ་ཞེས་དྲན། །ཤར་ནས་བགྲངས་པའི་བུམ་པ་རྣམས། །སྡེ་ཚན་གང་གནས་འདོམ་གྱི་ཚད། །འདི་ནི་རྫོང་དང་རྫོང་དག་ལ། །ཆུ་ཡི་འཁོར་ལོར་བཤད་པ་ཡིན། །ཇི་ལྟར་རཱ་ཧུའི་ལུས་དང་ནི། །རྒྱུ་
སྐར་གནས་པའི་མཚན་ཉིད་བཤད། །ཉི་ཟླ་རྣམ་པར་གནོན་པ་ཡི། །ལྟོ་འཕྱེའི་གཟུགས་ནི་བྲི་བར་བྱ། །ཁ་ནས་བརྩམས་ལ་སྤྱི་བོར་གསུམ། །མགྲིན་པར་བཞི་ནི་དགོད་པར་བྱ། །རྒྱབ་ཏུ་གསུམ་ནི་བྲི་བར་བྱ། །མཇུག་མར་གསུམ་ནི་ཚང་བར་བྲི། །ཉི་མ་ཟླ་བའི་གྲྭ་གྱུར་པའི། །བི་ཚིན་རཱ་ཧུ་ཞེས་ 
བྱར་གྲགས། །རྒྱུ་སྐར་རྣམས་ལ་ལོངས་སྤྱོད་པ། །འདི་ནི་ལེགས་པར་བརྟག་པར་བྱ། །ཡན་ལག་ལྡན་པའི་རཱ་ཧུ་ནི། །སྦྲུལ་གྱི་བྱེད་པ་མཉམ་པར་བྲི། །ལྷ་མོ་དེ་ལྟར་ལེགས་བཀོད་ལ། །རཱ་ཧུའི་འབྲས་བུ་བརྟག་པར་བྱ། །དགེ་དང་མི་དགེ་རིམ་པ་རྣམས། །བཤད་ཀྱིས་གངས་རིའི་བདག་མོ་ཉོན། །དེ་ལ་
རང་གི་སྐར་མ་ནི། །རཱ་ཧུའི་ཁ་ལ་སོང་བ་ནི། །གནས་ལས་ཉམས་ཤིང་བུད་མེད་ཤི། །འཆིང་དང་བཅོམ་དང་ཕྱུགས་རྣམས་ཟད། །རཱ་ཧུའི་མགོ་ལ་སོང་བ་ན། །ཁྱིམ་ཚིག་ནོར་ཉམས་འཐབ་རྩོད་འབྱུང་། །ལྐོག་མར་སོང་ན་ཆོས་རྙེད་ཅིང་། །ནོར་རྙེད་དོན་འགྲུབ་བདག་ཉིད་འགྱུར། །གཉེན་དང་ལྷན་ཅིག་
འགྲོགས་པར་བྱེད། །རཱ་ཧུའི་དངོས་གྲུབ་འབྱུང་བར་བྱེད། །རྒྱབ་ཏུ་སོང་ན་འཆི་བ་དང་། །རང་དང་གཉེན་རྣམས་བསུས་པ་ན། །དེ་ལ་སོགས་པའི་འབྲས་བུ་འབྱུང་། །མགུལ་པ་དགེ་བར་གྲགས་པ་ཡིན། །མཇུག་མའི་སྐར་མ་ལ་སོང་ན། །ལྕགས་སྒྲོག་འཆིང་དང་འགྱེལ་བ་དང་། །ལྷུང་དང་པུས་མོ་

203-1-83a

སྣད་པ་དང་། །གནས་ནས་གཡོ་བར་འགྱུར་བ་དང་། །ཀླུ་གནོད་འཇིགས་པ་ཆེན་པོ་འབྱུང་། །སྙིང་ནད་འབྱུང་བ་གཞུག་མས་ཕྱེད། །ཟླ་བ་ཕུར་པ་གཟའ་ལྷག་དང་། །པ་སངས་སྙིང་པོར་ཆུད་གནས་པ། །རྫོང་ལ་དཔུང་གིས་བསྐོར་གྱུར་ཀྱང་། །འཇིགས་ཟོན་མི་དགོས་གངས་རིའི་བདག །ཉི་
མ་མིག་དམར་སྤེན་པ་དང་། །རཱ་ཧུ་སྙིང་པོར་ཆུད་པ་ན། །དགྲ་ཡིས་ལེན་པར་འགྱུར་བས་ན། །རྫོང་བདག་སྡོད་པར་བྱེད་དམ་ཅི། །རིགས་ངན་གཟའ་རྣམས་སྙིང་པོར་སང་། །ཕྱི་རོལ་རྣམ་པར་རྒྱལ་བར་གྲགས། །རིགས་བཟང་གཟའ་རྣམས་སྙིང་པོར་གནས། །རྫོང་བདག་རྒྱལ་བར་བདག་གིས་དྲན། །
གལ་ཏེ་འདྲེན་མར་གནས་པ་ལས། །ཕན་ཚུན་འཁྲུག་པ་འདུམ་པ་ཡིན། །རྫོང་ནི་འཇོམས་དང་སྲུང་བ་ལས། །འདི་ཡི་ཆོ་ག་བཤད་པ་ཡིན། །རིགས་བཟང་རིགས་ངན་ཡང་དག་ཤེས། །ནག་པ་ས་ག་སྣྲོན་དང་ནི། །ཆུ་སྟོད་གྲོ་བཞིན་སྨིན་དྲུག་མགོ། །ཐ་སྐར་མཆུ་རྣམས་རིགས་བཟང་ཡིན། །བྲ་ཉེ་སྣར་
མ་ནབ་སོ་སྐག །ས་རི་ལྷ་མཚམས་ཆུ་སྨད་དབོ། །ཆུ་སྟོད་ནམ་གྲུ་མེ་བཞི་རྣམས། །རིགས་ནི་ངན་པར་སྟོན་པ་ཡིན། །ལག་དང་སྣྲུབས་དང་མོན་གྲེ་དང་། །བྱི་བཞིན་རྣམས་ནི་འདྲེན་མར་དྲན། །རིགས་སྐྱེས་རིགས་མིན་སྐྱེས་པ་ལས། །ཉི་མ་ཟླ་བ་ཕུར་བུ་སྤེན། །རིགས་སྐྱེས་ཞེས་བྱ་སྐལ་ལྡན་མ། །རིགས་
མིན་གྲགས་པ་སླར་ཡང་ཉོན། །མིག་དམར་པ་སངས་རཱ་ཧུ་ལ། །གཟའ་ལག་རྣམས་ནི་རིགས་མིན་སྐྱེས། །མདོར་ན་རྫོང་གི་བྱ་བ་དང་། །ཕ་རོལ་འཇོམས་པར་བྱེད་པ་ལ། །འདི་ཡི་ཆོ་ག་ཤེས་བྱ་སྟེ། །བདག་ཉིད་རྒྱལ་བར་བྱེད་པ་ཡིན། །རྫོང་གི་འཁོར་ལོ་མི་ཤེས་པར། །གཞོམ་འདོད་མུན་པའི་མདའ་བཞུན་
དྲན། །དོན་འགྲུབ་རྒྱས་པར་བཤད་པ་ནི། །རྫོང་གི་འཁོར་ལོ་ཡོངས་སུ་གྲགས། །དེ་ལྟར་མཆོག་ཏུ་སྒྲོལ་བ་ནི། །མཛེས་མ་ཡིས་ནི་གུས་པས་ཉོན། །འདི་ནི་གཡུལ་ལས་རྣམ་པར་རྒྱལ་བ་དབྱངས་འཆར་བའི་རྒྱུད་ཀྱི་རྒྱལ་པོ་ལས་རྫོང་གི་འཁོར་ལོ་རྣམ་པར་ཕྱེ་བ་ཆེན་པོ་སྟེ་ལེའུ་བརྒྱད་པའོ།།      །།ལྷ་མོས་
གསོལ་པ། བཅོམ་ལྡན་འདས་ནི་ལྷ་ཡི་མཆོག །ཟླ་བའི་དུམ་བུས་དབུ་བརྒྱན་པ། །ཕ་རོལ་དགྲ་རྣམས་འཇོམས་པ་ལ། །ཤིན་ཏུ་གསང་བའི་རྒྱུད་ཆེན་པོ། །རཱ་ཧུའི་འཁོར་ལོ་ཞེས་བྱ་བ། །གཡུལ་དུ་རྒྱལ་དང་ཕམ་བྱེད་པ། །བདག་ཉིད་གཡུལ་དུ་ཆས་པའི་ཚེ། །གང་གི་ཕྱོགས་སུ་རཱ་ཧུ་འཇོག །རཱ་

203-1-83b

ཧུའི་སྤྱོད་ཡུལ་ཇི་ལྟར་ལགས། །དུས་དང་ཕྱོགས་ལ་ཇི་ལྟར་འཆར། །འདྲི་བར་བྱེད་པའི་སྐྱེས་བུ་ལ། །མ་ལུས་པར་ནི་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །འདི་ལྟར་རཱ་ཧུའི་འཁོར་ལོ་ལ། །ངེས་པའི་གདམས་ངག་བཤད་པར་བྱ། །བདག་གཞན་འཆི་བ་ཐམས་ཅད་ནི། །རྒྱལ་པོ་
རཱ་ཧུ་བྱེད་པར་བྱ། །རྒྱུ་སྐར་རྣམས་ཀྱི་རིང་པོ་ནས། །རཱ་ཧུ་མཐོང་བར་རྒྱལ་བར་འགྱུར། །མདུན་དུ་བསྟན་ན་ཉི་ཟླ་ཡང་། །ཐལ་བ་བཞིན་དུ་འཇོམས་པར་བྱེད། །མཐོང་བས་འཆི་བར་འགྱུར་བའི་ཕྱིར། །རཱ་ཧུ་རྒྱབ་ཏུ་གཞག་པར་བྱ། །ཉི་མ་སྒྲ་གཅན་མིག་དམར་དང་། །སྤེན་པ་གཡུལ་དུ་མདུན་གནས་སྤང་། །
གང་གི་མགོན་པོ་ཟླ་བ་ནི། །མངོན་སུམ་མཐོང་བར་བྱས་ལ་འགྲོ། །ཁྱིམ་གྱི་འཁོར་ལོར་འགྲོ་བ་ནི། །དཔལ་ལྡན་རཱ་ཧུ་སྔར་བཤད་རིག །གྲུ་བཞི་དུམ་བུར་བཅད་པ་ལ། །ཚེས་ཀྱི་རཱ་ཧུ་འཆར་བ་དང་། །ཡུད་ཙམ་ལ་འཆར་རཱ་ཧུ་དང་། །ཐུན་ཕྱེད་ལ་འཆར་རཱ་ཧུ་དང་། །ཟླ་བ་ཕྱེད་པའི་རཱ་ཧུ་དང་། །དེ་བཞིན་ཟླ་བའི་
རཱ་ཧུ་མཆོག །ཉི་མ་མིག་དམར་སྤེན་རཱ་ཧུ། །རཱ་ཧུ་གདོང་གི་འཁོར་ལོ་སྟེ། །རཱ་ཧུ་ཐམས་ཅད་མདོར་བསྡུས་ཡིན། །ཟླ་བ་གཅིག་ལ་ཉིན་རེ་བཞིན། །ཚེས་ཀྱི་རཱ་ཧུ་ཤེས་པར་བྱ། །འདི་ལྟར་རཱ་ཧུ་དཔེ་ཆུང་ལ། །ཀ་སོགས་གསལ་བྱེད་དགོད་པར་བྱ། །རེ་ཁཱ་བདུན་ནི་གྱེན་དུ་དགོད། །དྲུག་ནི་འཕྲེད་ལ་བྲི་བར་བྱ། །
རླུང་ནས་མེ་ཡི་མཐར་ཐུག་པ། །དབུས་ནས་རེ་ཁཱ་བྲི་བར་བྱ། །སྲིན་པོ་དབང་ལྡན་དེ་བཞིན་ཏེ། །ཀཱ་ལི་རྣམས་ནི་རིམ་བཞིན་བྲི། །དེ་ལ་མེ་ཡི་ཕྱོགས་གནས་པ། །དེ་ཡི་ཡི་གེར་ཡོངས་སུ་གྲགས། །ཧ་ཡིག་རླུང་གི་གྲྭ་རུ་སྟེ། །བདེན་བྲལ་མཚམས་ཀྱི་གྲྭ་རུ་ཡང་། །ཛྷ་ཡི་ཡི་གེ་མཉམ་པར་གནས། །དབང་
ལྡན་གྲྭ་རུ་མ་ཡིག་སྟེ། །ནུབ་ནས་བརྩམས་ཏེ་རིམ་བཞིན་དུ། །ཀཱ་ལི་རྣམས་ནི་ལེགས་པར་དགོད། །ཀ་ནས་ཛ་ཡི་མཐར་ཐུག་པར། །གཡས་བསྐོར་དང་པོའི་ཕྱོགས་ལས་དགོད། །རེ་ཁཱ་བདུན་དུ་དྲངས་པ་ལ། །ང་ཉ་ཎ་རྣམས་རྣམ་པར་སྤངས། །ཊ་ནས་ཋ་ཡིག་མཐར་ཐུག་པ། །གཤིན་རྗེའི་ཕྱོགས་སུ་དེ་
བཞིན་དགོད། །དྷ་ནས་མ་ཞེས་ཤར་དུ་སྟེ། །དེ་བཞིན་ར་ནས་ས་ཡི་བར། །དྲུག་ནས་བདུན་བདག་ཕྱོགས་མཚམས་སུ། །ཚེས་ལ་རིམ་པ་བཞིན་དུ་བྲི། །དང་པོ་ཀ་ལ་སོགས་པ་ཡི། །ཟུང་གི་དྲུག་ནས་ཡི་གེ་རྣམས། །ཟླ་བ་ཉ་ཡི་བར་དུ་ཡང་། །དཀར་ཕྱོགས་དག་ལ་གཉིས་གཉིས་ཡིན། །ཤ་

203-1-84a

ནས་དྷ་ལ་སོགས་པ་དང་། །ད་ཡིག་ཟུང་དུ་དགོད་པ་སྟེ། །མ་ཡིག་ར་ཡིག་བར་དུ་ཡང་། །ཤར་ནུབ་གཉིས་ལ་རེ་ཁཱ་བདུན། །ཕྱོགས་གཉིས་ལ་ནི་དྲུག་ཏུ་འགྱུར། །ཧ་སོགས་ཡི་གེ་བདུན་པ་གཉིས། །ཡ་ཡིག་གནས་པའི་ཕྱོགས་གཉིས་སུ། །དེ་བཞིན་དུ་ཡང་འགྱུར་བ་
ཡིན། །ནག་པོའི་ཕྱོགས་གཉིས་དག་ལ་ཡང་། །དྷ་ལ་སོགས་པ་རིམ་བཞིན་དུ། །མགོ་དྲངས་ནས་ནི་ཧ་ཡི་བར། །ཕྱོགས་གཉིས་ལ་ནི་དགོད་པར་བྱ། །འདི་ལྟར་དཀར་པོའི་ཕྱོགས་ལ་ནི། །ཀ་ནས་ཐོག་དྲངས་འཆར་བར་འགྱུར། །ཀ་ཡིག་མ་ཡིག་ཐད་ཀར་ནི། །ཤར་ནུབ་ཕྱོགས་ལ་གནས་པ་ན། །མིང་
ཅན་རཱ་ཧུ་འཆར་བའི་སར། །འགྲོ་བར་བྱེད་པ་ཉམས་པར་འགྱུར། །དེ་བཞིན་ཡི་གེ་ཐམས་ཅད་ཀྱི། །ཁ་ཡིག་ཐད་ཀར་འགྲོ་མི་རུང་། །འདི་ནི་གྲྭ་བཞིའི་ཡི་གེ་ཡང་། །ཕན་ཚུན་ཐད་ཀར་རུང་མ་ཡིན། །ནག་པོའི་ཕྱོགས་ལ་ཡོད་པ་རྣམས། །དཀར་པོའི་ཕྱོགས་སུ་དགེ་བ་དེ། །དཀར་པོ་ལ་ཡོད་མིང་ཅན་
རྣམས། །ནག་པོའི་ཕྱོགས་ལ་དགེ་བ་ཡིན། །དེ་ལྟར་ཚེས་ལ་འཆར་བ་ནི། །རཱ་ཧུའི་མཚན་ཉིད་པར་པ་ཏི། །ཚེས་ཀྱི་རཱ་ཧུའི་འཁོར་ལོ་ལ། །ས་གཞི་རབ་མཉམ་ཡིད་འོང་ལ། །གྱེན་དུ་རེ་ཁཱ་བདུན་པ་ལ། །དེ་ལ་རེ་ཁཱ་བརྒྱད་པ་བྲི། །རེ་ཁཱའི་རྩེ་མོ་རྩེ་མོ་ལ། །ཀ་ནས་ཧ་ཡིག་མཐར་ཐུག་བྲི། །ནུབ་ཀྱི་ཕྱོགས་
ནས་བརྩམས་ནས་ནི། །བྱང་གི་བར་དུ་བྲི་བར་བྱ། །དེ་ནས་གཞན་ཡང་བཤད་པར་བྱ། །ཚེས་ཀྱི་རཱ་ཧུ་བཟང་པོ་ནི། །ལྷ་དང་ལྷན་ཅིག་ཐམས་ཅད་མཁྱེན། །དགྲ་རྣམས་ཀུན་ལས་རྒྱལ་བར་མཐོང་། །དབང་མཚམས་མགོ་འཆར་ལྷོ་མཚམས་ནུབ། །དེ་ལྟར་ལེགས་པར་གནས་པ་ཡིན། །འདི་ལྟར་ཚེས་
ཀྱི་བྱེ་བྲག་ལ། །མིང་ལ་འཆར་བར་འགྱུར་བ་ཡིན། །གཅིག་ནས་བདུན་གྱི་བར་དུ་ནི། །དབང་པོ་ཆུ་ཡི་ཕྱོགས་གནས་པ། །དབང་པོ་ཕྱོགས་གྲངས་དགྲ་ཉིད་དེ། །ཕྱོགས་གཉིས་མཉམ་པར་བསྟན་པ་ཡིན། །བརྒྱད་ནས་རྫོགས་པའི་མཐར་ཐུག་བར། །གཤིན་རྗེ་ལུས་ངན་ཕྱོགས་སུ་གནས། །ལུས་ངན་རཱ་
ཧུ་འཆར་བའི་ཚེ། །ཕྱོགས་དེ་སྟོབས་དང་ལྡན་པར་འགྱུར། །དཀར་ཕྱོགས་དང་པོས་ཐོག་དྲངས་ཏེ། །བརྒྱད་ལ་འཆར་ཞིང་ནུབ་པ་ཡིན། །ནུབ་ཏུ་རཱ་ཧུ་གནས་གྱུར་པ། །སྟོབས་དང་ལྡན་པར་འགྱུར་བ་ཡིན། །དགུ་པ་དང་ནི་དང་པོ་ཡང་། །དེ་ཡིས་ཐོག་དྲངས་འཆར་བ་ཡིན། །ལྷོ་ཕྱོགས་རཱ་ཧུ་གནས་པ་ལས། །

203-1-84b

དེ་བཞིན་ལྷོ་ཉིད་སྟོབས་ཆེར་འགྱུར། །ཤར་ནས་རཱ་ཧུ་གང་དག་གནས། །ནུབ་ཏུ་སྟོབས་ཆུང་འཇོམས་པར་བྱེད། །དེ་ལྟར་མེ་ལ་སོགས་པ་ཡི། །ཕྱོགས་མཚམས་ཀུན་ལ་ཤེས་པར་བྱ། །ཕྱོགས་ལ་གཟའ་བརྒྱད་འཆར་བ་ནི། །ནག་ཕྱོགས་གསུམ་ལ་དབང་པོའི་ཕྱོགས། །བདུན་ལ་དུམ་བུ་རྩ་གསུམ་པ། །
འཛིན་པའི་ཕྱོགས་ནས་འཆར་བར་འགྱུར། །བཅུ་པ་ནོར་གྱི་བདག་པོའི་ཕྱོགས། །བཅུ་བཞི་རླུང་གི་གནས་ཞེས་དྲན། །དཀར་པོའི་ཕྱོགས་སུ་གྲགས་པ་ལ། །བཞི་ལ་ཆུ་བདག་ཕྱོགས་ཞེས་བྱ། །དེ་བཞིན་བདེན་བྲལ་བརྒྱད་དུ་གྲགས། །བཅུ་གཅིག་གཤིན་རྗེར་ཤེས་པར་བྱ། །བཅོ་ལྔའི་ཚེས་ལ་མེ་
མཚམས་པ། །བརྒྱད་པོ་ཟླ་བ་གཅིག་ལ་འཆར། །ཤར་ནས་ནུབ་ཏུ་མི་དགེ་བྱེད། །དབང་ལྡན་ཕྱོགས་གནས་བདེན་བྲལ་འཇོམས། །བྱང་ཕྱོགས་ལྷོ་རུ་དེ་བཞིན་བསྣུན། །རླུང་གནས་འཆར་ཚེ་མེ་མཚམས་བརླག །ཆུ་བདག་ཕྱོགས་ནས་དབང་པོར་འཇོམས། །བདེན་བྲལ་ལ་གནས་དབང་ལྡན་སྤྱོད། །ལྷོ་
ནས་བྱང་དུ་འཇོམས་པ་སྟེ། །མེ་ནས་རླུང་དུ་རྣམ་པར་སྤྱོད། །དེ་ནས་གཞན་ཡང་བཤད་པར་བྱ། །ཡུད་ཙམ་ལ་འཆར་རཱ་ཧུ་ནི། །གང་གིས་རྣམ་པར་ཤེས་ཙམ་གྱིས། །འཐབ་རྩོད་དམག་ཆས་ཤགས་ལས་རྒྱལ། །དབང་ལྡན་གཤིན་རྗེ་རླུང་དབང་པོ། །སྲིན་པོ་ནོར་བདག་མེ་ནས་ཆུར། །ཉི་མ་དབུ་མའི་
ཡུད་ཙམ་བར། །གཡས་བསྐོར་ལྷ་ཡི་དབང་ཕྱུག་མ། །ཉི་མ་དབུ་མའི་མཐའ་ནས་ནི། །ཆུ་ནས་གཡས་སྐོར་གཉིས་ལ་འཆར། །མགོ་ནས་མཇུག་མའི་ཕྱོགས་སུ་འཆར། །མཚན་མོ་དེ་ཉིད་འཆར་བ་ནི། །ཆུ་མེ་ནོར་བདག་སྲིན་པོ་ནས། །དབང་པོ་རླུང་དང་གཤིན་རྗེའི་གནས། །དྲག་པོའི་ཕྱོགས་ནས་ཆུ་
བདག་ཏུ། །དེ་ལྟར་སོ་སོར་འཆར་བར་གྲགས། །ཉིན་བཞིན་མཚན་མོ་དབྱུ་གུ་གཉིས། །ཡུད་ཙམ་རཱ་ཧུ་ཞེས་བྱར་བརྗོད། །དྲག་པོ་ཙེ་ཏ་མི་ཏྲ་དང་། །སྭཱ་ར་བྷ་ཊོ་ས་བི་ཏྲ། །ལྔ་པོ་རྣམ་པར་སྣང་མཛད་དང་། །རྒྱལ་བ་ཞེས་ནི་བྱ་བར་བརྗོད། །བྱི་བཞིན་ར་མ་མེད་པ་ནི། །འབའ་ལམ་དང་ནི་རྣམ་རྒྱལ་དང་། །
དགའ་བ་དང་ནི་གཤིན་རྗེ་དང་། །ཆུ་ལྷ་དེ་བཞིན་སྐལ་བ་ཅན། །དེ་ལྟར་བཅོ་ལྔར་བརྗོད་པ་རྣམས། །ཞི་དང་མ་རུངས་མཚན་ཉིད་ཅན། །དབུ་མའི་ཆ་ལའང་བྱི་བཞིན་དང་། །མཐར་ནི་སྐལ་ཅན་འཆར་བ་དང་། །ལྷ་མོ་བདག་གིས་ངེས་བསྟན་པ། །ཡུད་ཙམ་རཱ་ཧུར་ཡོངས་སུ་གྲགས། །ཉི་མ་

203-1-85a

དང་ནི་སྤེན་པ་འཛོམ། །སྤེན་པ་དྲག་པོའི་སྦྱོར་བ་དང་། །ཉི་མ་དང་ནི་སྤེན་པ་དག །བྱི་བཞིན་ལྷན་ཅིག་སྦྱོར་བ་དང་། །ས་ར་བྷ་ཊོ་མིག་དམར་འཇོམས། །གཟའ་འཕོའི་མཚམས་སུ་སྟོབས་ཆེར་འགྱུར། །དེ་ལྟར་དྲག་པོའི་ཡུད་ཙམ་ལྔ། །གང་གནས་ཕྱོགས་ནི་སྟོབས་དང་
ལྡན། །རཱ་ཧུའི་ཕྱོགས་འགྲོ་སྦྱོར་བ་ལ། །ཐོག་མ་མེད་པའི་གཟའ་རྒྱུ་བས། །གཟའ་དང་ལྷ་དེ་འཛོམ་པ་ལས། །གདོང་ན་གང་ཡོད་ཐལ་བར་བརླག །དེ་ན་བརྒྱ་བྱིན་སྟོབས་གནས་པ། །སྐད་ཅིག་ཉིད་ལ་ཐལ་བར་བྱེད། །རཱ་ཧུའང་དྲག་ན་འཛོམ་པ་ནི། །སྔོན་དུ་འགྲོ་བ་འཆི་འདོད་ཡིན། །ཡུད་ཙམ་
འཆར་བའི་མཚན་ཉིད་ནི། །གང་ཡིན་སོ་བཟུང་ཤེས་པར་བྱ། །ལྷ་མོ་དང་པོའི་རྐང་པ་ལ། །དགུ་བཅུ་རྩ་དྲུག་ཉིད་དུ་དྲན། །དྲུག་ཅུ་བཅུ་གཉིས་དྲུག་དང་ལྔ། །གསུམ་དང་གཉིས་དང་སྟོང་པར་བཤད། །གཉིས་ནས་བརྒྱད་ཀྱི་མཐར་ཐུག་པ། །ཡུད་ཙམ་དེ་བཞིན་འཆར་བ་ཡིན། །ཁ་ཅིག་
གཅིག་ནས་བདུན་གྱི་བར། །ཡུད་ཙམ་འཆར་ཞེས་ཟེར་བ་ཡོད། །དབུ་མའི་བར་དུ་རིམ་པ་སྟེ། །ཕྱི་དྲོ་རིམ་མིན་ཤེས་པར་བྱ། །དེ་ལྟར་རིམ་པའི་བྱེ་བྲག་ལས། །ཡུད་ཙམ་རིམ་པ་ཤེས་པར་བྱ། །སྔ་དྲོ་ནུབ་ཏུ་བལྟ་བ་སྟེ། །ཕྱི་དྲོ་ཤར་དུ་བལྟ་བར་བྱ། །ཉི་མ་དབུ་མ་གྲིབ་མ་ནི། །གང་ཕྱིར་སྟོང་པ་
ལ་ཞུགས་པ། །ཡུད་ཙམ་ཅིག་ལ་འཕོ་བ་སྟེ། །ལྷག་མ་དག་ནི་མ་ཡིན་ནོ། །གཅིག་ནས་གཉིས་སུ་འཕོ་བ་ཡི། །མཚམས་ནི་མ་རུངས་འཇིགས་པར་སྟོན། །ཡུད་ཙམ་སྟོབས་ཆེར་གྲགས་པའི་གཟའ། །འཛོམ་ན་མི་དགེ་འཕོ་མཚམས་ངན། །གཟའ་དང་ཡུད་ཙམ་སྟོབས་ཅན་འཛོམ། །རིགས་
ལྡན་ནུས་པ་ངེས་པར་མཐོང་། །དེ་ནས་གཞན་ཡང་བཤད་པར་བྱ། །ཐུན་ཕྱེད་ཅེས་བྱར་ཡོངས་སུ་གྲགས། །ཐུན་ཕྱེད་རཱ་ཧུའི་རིམ་པ་བཞིན། །ཤར་ཕྱོགས་བདག་པོ་ཉི་མ་སྟེ། །མིག་དམར་མེ་ཡི་ཕྱོགས་ན་གནས། །གཤིན་རྗེའི་ཕྱོགས་བདག་ཕུར་བུ་ཡིན། །གཟའ་ལྷག་སྲིན་པོའི་ཕྱོགས་ན་གནས། །
པ་སངས་ཆུ་བདག་ཕྱོགས་ན་ཡོད། །སྤེན་པ་རླུང་གི་ཕྱོགས་ཞེས་བྱ། །ཟླ་བ་བྱང་ཕྱོགས་རྣམ་པར་སྤྱོད། །རཱ་ཧུ་དབང་ལྡན་ཕྱོགས་ཡུལ་ལོ། །ཐམས་ཅད་དེ་བཞིན་གནས་པ་ཡིན། །རང་རང་རྣམ་པར་སྤྱོད་པ་ལས། །འཆར་བར་འགྱུར་རོ་རྗེ་བཙུན་མ། །གཟའ་རྣམས་ཕྱོགས་ན་འཁོད་པ་ལས། །

203-1-85b

དཀར་མོ་སོ་སོར་འཆར་བར་འགྱུར། །དཀར་པོའི་ཕྱོགས་ཀྱི་ཐུན་ཕྱེད་ལ། །ཇི་ལྟར་འཆར་བར་བརྗོད་པར་བྱ། །ཇི་ལྟར་ཉི་མའི་ཉིན་ཞག་ལ། །ཤར་ནས་རཱ་ཧུ་འཆར་བར་འགྱུར། །དེ་ཡང་ཤར་དུ་ཉི་མ་ལ། །ཆུ་ཚོད་བཞི་ནི་ཡང་དག་གནས། །དེ་རྗེས་ཤར་གྱི་ཕྱོགས་ནས་ནི། །བདེན་བྲལ་ཕྱོགས་སུ་
སོང་བ་ལས། །སྲིན་པོའི་ཕྱོགས་ནས་བྱང་ཕྱོགས་འགྲོ། །བྱང་གི་ཕྱོགས་ནས་ཤར་ནས་ནི། །མེ་ཡི་ཕྱོགས་སུ་དེ་བཞིན་ནོ། །མེ་ནས་ཆུ་རུ་དེ་བཞི་འགྲོ། །ཆུ་ཡི་ཕྱོགས་ནས་དེ་བཞིན་དུ། །དབང་ལྡན་མཚམས་སུ་གནས་ཤིང་འགྲོ། །དབང་ལྡན་ནས་ནི་ཡི་དྭགས་ཕྱོགས། །དེ་ནས་སླར་ཡང་རླུང་
གི་ཕྱོགས། །སླར་ཡང་རླུང་ནས་ཤར་དུ་སྟེ། །དེ་ལྟར་མངོན་པར་འགྲོ་བར་གསལ། །དེ་ལྟར་ཕྱོགས་མཚམས་ལམ་འགྲོ་བ། །ཉིན་མོའི་ཐུན་ཕྱེད་བརྒྱ་པོར་གྲགས། །ཇི་ལྟར་ཉིན་མོའི་ཕྱོགས་བཤད་པ། །མཚན་ལ་གཟའ་བརྒྱད་འཆར་བ་ནི། །དབང་པོ་ནས་ནི་རླུང་ཕྱོགས་འགྲོ། །རླུང་ནས་གཤིན་
རྗེའི་ཕྱོགས་རིམ་བཞིན། །སྔར་བཞིན་མཉམ་པར་བསྟན་ནས་ཀྱང་། །ཆོས་ཀྱི་རྒྱལ་པོའི་ཕྱོགས་སུ་སོང་། །ཡི་དྭགས་ནས་ནི་དབང་ལྡན་དུ། །དྲག་པོ་དྲག་མོ་ངེས་པར་མཐོང་། །དེ་ནས་ཆུ་བདག་ཕྱོགས་སུ་འགྲོ། །དེ་ནས་མེ་ཕྱོགས་འགྲོ་བར་དྲན། །མེ་ནས་ནོར་བདག་ཕྱོགས་སུ་འཆར། །
ནོར་བདག་ནས་ནི་བདེན་བྲལ་ཕྱོགས། །འདི་ནི་ལུག་སོགས་ཤེས་པ་ཡིན། །ཉི་མའི་ཆོ་གས་དཀར་ཕྱོགས་བརྗོད། །ནག་པོའི་ཕྱོགས་ཀྱི་ཐུན་ཕྱེད་ལ། །སྔ་མའི་ཕྱོགས་སུ་རིམ་བཞིན་འཆར། །དབང་པོ་ནས་ནི་རླུང་ཕྱོགས་འགྲོ། །རླུང་ནས་གཤིན་རྗེའི་ཕྱོགས་སུ་སོང་། །གཤིན་རྗེའི་ཕྱོགས་ནས་
དྲག་པོར་སོང་། །དེ་ནས་ཆུ་བདག་ཕྱོགས་སུ་གནས། །ཆུ་ནས་མེ་ཕྱོགས་རྒྱུག་པར་བྱེད། །མེ་ནས་ལུས་ངན་ཡང་དག་འགྲོ། །བྱང་ཕྱོགས་ནས་ནི་བདེན་བྲལ་མཐར། །དེ་བཞིན་རབ་ཏུ་རྒྱུག་པ་ཡིན། །དེ་ལྟར་ཉིན་མོ་འགྲོ་བ་ཡི། །ཐུན་ཕྱེད་རཱ་ཧུ་ལྷས་མཆོད་མ། །དབྱངས་འཆར་རྒྱུད་ལས་གང་
བཤད་པ། །ཤར་ཕྱོགས་ནས་ནི་བདེན་བྲལ་དུ། །བདེན་བྲལ་ནས་ནི་གནོད་སྦྱིན་ཕྱོགས། །གནོད་སྦྱིན་ནས་ནི་མེ་ཕྱོགས་རྒྱུག །མེ་ནས་སོང་བས་ཆུ་ཡི་ཕྱོགས། །ཆུ་ནས་ཤར་ཀར་དུ་འགྲོ་སྟེ། །དབང་ལྡན་མཚམས་ནས་ཤར་ནས་ནི། །ཆོས་ཀྱི་རྒྱལ་པོར་རྒྱུག་པ་ཡིན། །སླར་ཡང་ཡི་དྭགས་

203-1-86a

ཕྱོགས་ནས་རླུང་། །ཉི་མའི་ཕྱོགས་ནས་དེ་ལྟར་བགྲོད། །ནག་པོའི་ཕྱོགས་ཀྱི་ཉིན་མཚན་ལ། །ཐུན་ཕྱེད་རཱ་ཧུ་མདོར་བསྡུས་ཡིན། །ཇི་ལྟར་གཟའ་ནི་འཕོ་བ་ན། །རཱ་ཧུའི་བགྲོད་པ་འཕོ་བར་སྣང་། །འཆར་བའི་སྔོན་དུ་གང་སྟོན་པ། །རྡུལ་ཕྲན་བཞིན་དུ་ཐལ་བར་བྱེད། །མདུན་ན་
གནས་ན་རྣམ་པར་ཉམས། །རྒྱབ་ཏུ་གནས་ན་རྒྱལ་བར་བྱེད། །ཇི་ལྟར་དཀར་པོའི་ཕྱོགས་ལ་ནི། །བདེན་བྲལ་ལ་སོགས་རྒྱུག་པར་བྱེད། །ནག་ཕྱོགས་གང་གིས་འཇིག་པ་ཡང་། །རླུང་ལ་སོགས་པ་འགྲོ་བར་དྲན། །དེ་ལྟར་ཐུན་ཕྱེད་རཱ་ཧུ་རྣམས། །དབྱུ་གུ་བཞི་ལ་བརྟན་པར་གནས། །དེ་ལྟར་ཐུན་ཕྱེད་
རཱ་ཧུ་ནི། །ཤིན་ཏུ་རྩུབ་པར་འཆར་བས་ན། །མཚན་ཉིད་ལེགས་པར་ཤེས་པ་ཡིས། །འཛེམ་པར་བྱའོ་རྗེ་བཙུན་མ། །ཟླ་ཕྱེད་རཱ་ཧུའི་མཚན་ཉིད་ནི། །མདོར་བསྡུས་པ་ནི་བཤད་པར་བྱ། །འདི་ནི་རྣམ་པར་ཤེས་པ་ཡིས། །གཡུལ་ལ་སོགས་པ་རྩོམ་པ་འགྲུབ། །ཕྱོགས་སུ་རེ་ཁཱ་བཞི་བཙུགས་
པས། །མཉམ་པར་གཞག་པས་གྲུ་བཞིར་དྲན། །མེ་ནས་རླུང་གི་བར་དུ་ཡང་། །དབུས་ནས་རེ་ཁཱ་མཉམ་པར་མཐོང་། །ཤར་ནས་དེ་བཞིན་བྱང་གི་ཕྱོགས། །ནག་པོའི་ཕྱོགས་ནི་ཡིན་པ་མཉམ། །ལྷོ་དང་ནུབ་ཀྱི་ཕྱོགས་གཉིས་ཀྱང་། །དཀར་པོའི་ཕྱོགས་སུ་དེ་བཞིན་འགྱུར། །ཟླ་བ་ཉ་ལ་མེ་ཡི་ཕྱོགས། །
གནམ་སྟོང་ལ་ནི་རླུང་མཚམས་གནས། །དང་པོ་ཚེས་ཀྱིས་ཐོག་དྲངས་ནས། །ཕྱོགས་ལ་འཆར་བར་འགྱུར་བ་ཡིན། །བྱང་དང་ལྷོ་ནས་འཆར་བའི་ཚེ། །ཚེས་དགུའི་ས་ནས་ཐོག་དྲངས་ཏེ། །ཉིན་ཞག་སོ་སོ་དག་ལ་ནི། །རྫོགས་པའི་བར་དུ་འཆར་བར་འགྱུར། །ནུབ་པའི་ཕྱོགས་བགྲོད་དགེ་བ་སྟེ། །
འཆར་ཕྱོགས་བགྲོད་པ་མི་དགེ་ཡིན། །དཀར་པོའི་བརྒྱད་སོགས་ནུབ་ཕྱོགས་སུ། །ཟླ་བ་ཉ་བའི་བར་དུ་ཡང་། །རཱ་ཧུ་གནས་པས་ཤར་དང་ནི། །བྱང་གི་ཕྱོགས་སུ་མི་དགེ་ཡིན། །ནག་ཕྱོགས་གཅིག་ནས་ལྷ་མིན་མཐར། །ཡང་དག་གནས་པ་སྔར་བཞིན་འཇོམས། །ཤར་ནུབ་ཕན་ཚུན་འཇོམས་
པ་དང་། །དེ་བཞིན་ལྷོ་བྱང་ཕན་ཚུན་འཇོམས། །འདི་ནི་རྣམ་པར་ཤེས་ཙམ་གྱིས། །གཡུལ་ལས་རྒྱལ་འགྱུར་རྗེ་བཙུན་མ། །དེ་ནས་གཞན་ཡང་བཤད་པར་བྱ། །གཡུལ་དུ་འཇུག་པར་བྱེད་པ་ལ། །འདི་ནི་རྣམ་པར་ཤེས་ཙམ་གྱིས། །ཉི་མ་རཱ་ཧུའི་འབྲས་བུ་མཐོང་། །ཇི་ལྟར་ཉི་མ་རཱ་ཧུ་

203-1-86b

བཞིན། །མིག་དམར་གྱི་ནི་རཱ་ཧུ་དང་། །སྤེན་པའི་རཱ་ཧུ་ཞེས་བྱ་བ། །ལྷན་ཅིག་ལམ་དུ་འཇོམས་པར་དྲན། །འདི་དང་ཉི་མ་ཁྱིམ་གཅིག་ཞུགས། །ཉི་མ་རཱ་ཧུར་ཡོངས་སུ་གྲགས། །འཛོམ་པས་མཐོང་བའི་རིམ་པ་ལས། །སྟོབས་ཀྱི་རིམ་པ་ཤེས་པར་བྱ། །དབྱངས་འཆར་རྒྱུད་
ལས་གང་གསུངས་པ། །ཕན་དང་གནོད་པའི་མཚན་ཉིད་ཅན། །གྱེན་དུ་རཱེ་ཁཱ་གསུམ་པ་ལ། །དེ་བཞིན་འཕྲེད་ལ་རེ་ཁཱ་གསུམ། །རེ་ཁཱ་ཕན་ཚུན་བསྣོལ་བ་ཡི། །རྩེ་མོར་ཁྱིམ་རྣམས་དགོད་པར་བྱ། །ཤར་གྱི་ཕྱོགས་ཀྱི་མདུང་རྩེ་ལ། །ལུག་དང་སེང་གེ་གཞུ་གསུམ་འབྱུང་། །དེ་
བཞིན་བྱང་གི་ཕྱོགས་སུ་ཡང་། །ཉ་དང་སྡིག་པ་ཀརྐ་ཊ། །གཤིན་རྗེའི་ཕྱོགས་ཀྱི་མདུང་རྩེ་ལ། །བུ་མོ་གླང་དང་ཆུ་སྲིན་དགོད། །ནུབ་ཀྱི་ཕྱོགས་ཀྱི་ཁ་ལ་ནི། །སྲང་དང་བུམ་པ་འཁྲིག་པར་གྲགས། །ལུག་སྲང་དེ་བཞིན་སེང་གེ་བུམ། །གཞུ་དང་འཁྲིག་པ་ཞེས་བྱ་བ། །འཛོམ་པ་
ཕན་ཚུན་གང་གནས་པ། །སླར་ཡང་གཡས་དང་གཡོན་པ་དག །རྐང་པ་རྫོགས་པ་མཐོང་བས་གསོད། །མ་རྫོགས་མཐོང་བས་སྟོབས་ཆུང་འགྱུར། །དེ་ལྟར་མདུང་རྩེ་བཅུ་གཉིས་ཕོ། །ཕན་ཚུན་བསྣོལ་བས་ཤེས་པར་བྱ། །ལྷན་ཅིག་གནས་དང་སྔོན་མར་གནས། །བཞི་རྣམས་མི་
ཐུབ་དགེ་བ་ཡིན། །དེ་ཡང་ལུག་གི་སེང་གེ་དང་། །གཞུ་དང་བུམ་པ་འཁྲིག་པ་དང་། །སྡིག་པ་བུ་མོ་དེ་བཞིན་གླང་། །ཉ་དང་ཆུ་སྲིན་དག་ཉིད་དགེ། །དྲག་པོའི་གཟའ་རྣམས་འཁྱོག་པོར་སོང་། །དེ་ལ་སྟོབས་ཆེར་འགྱུར་བ་ཡིན། །བསོད་ནམས་གཟའ་རྣམས་དྲང་བ་ལས། །སྟོབས་ནི་
ཆེ་བར་གྲགས་པ་ཡིན། །རྣམ་པ་ཀུན་དུ་བལྟ་བ་ཡིན། །གཡུལ་སོགས་མངོན་པར་རྟོགས་པས་འགྲུབ། །མདོར་ན་གཟའ་ཡི་ཕྱོགས་ལ་ནི། །སྟོབས་ནི་ཆེ་ཆུང་བརྟག་པ་ཡིན། །རཱ་ཧུ་སྟོབས་ཆུང་རང་ཕྱོགས་གནས། །ལན་ཅིག་རྒྱལ་ཡང་མཐར་ནི་ཕམ། །དེ་ནས་གཞན་ཡང་
བཤད་པར་བྱ། །རཱ་ཧུ་གདོང་གི་རྒྱུ་སྐར་མཆོག །གང་གིས་རྣམ་པར་ཤེས་པ་ཡིས། །རྒྱལ་ཕམ་བདེ་སྡུག་ཤེས་པར་འགྱུར། །བི་ཙིན་རཱ་ཧུ་དང་ལྡན་པའི། །རྒྱུ་སྐར་རྣམས་ནི་བརྟག་པར་བྱ། །དབྱངས་འཆར་རྒྱུད་ལས་གསུངས་པ་བལྟ། །དེ་མེད་རཱ་ཧུས་གསོད་པར་བྱེད། །རཱ་

203-1-87a

ཧུ་སོང་བའི་སྐར་མ་ནི། །ཁ་ཡི་ནང་དུ་བྲི་བར་བྱ། །མཆེ་བ་ལ་གཉིས་སྣ་བུག་གཉིས། །སྣ་སྒང་གཉིས་དང་མིག་ལ་གཉིས། །རྣ་བ་གཡོན་བཞི་གཡས་ལ་བཞི། །དཔྲལ་བར་ལྔ་སྟེ་སྤྱི་བོར་གཅིག  །ཀོ་སྐོ་ལ་གཅིག་མགྲིན་པར་བཞི། །ཁ་ཡི་ནང་ནས་
བརྩམས་ནས་ནི། །གཡས་སྐོར་དུ་ནི་རིམ་བཞིན་དགོད། །དེ་ལ་འབྲས་བུ་བརྟག་པར་བྱ། །ཁ་ཡི་སྐར་མ་ལ་སོང་ན། །སྡུག་བསྔལ་སྣ་ཚོགས་ལུས་ལ་འབྱུང་། །མཆེ་བ་གཉིས་ཀྱི་སྐར་མ་ལ། །ནད་ནི་འབྱུང་བར་སྟོན་པ་ཡིན། །སྣ་བུག་སྐར་མ་གཉིས་ལ་གནས། །བཙོན་དུ་འཛིན་
པར་འགྱུར་བ་ཡིན། །སྣ་སྒང་གཉིས་ལ་གནས་པ་ལས། །མི་མཐུན་པ་ཡང་མཛའ་བར་འགྱུར། །མིག་གཉིས་དག་གི་སྐར་མ་ལ། །འདོད་པའི་འབྲས་བུ་འབྱུང་ཞེས་དྲན། །རྣ་བ་གཡོན་པའི་སྐར་མ་བཞི། །ནོར་རྣམས་ཟད་པར་བྱེད་པ་ཡིན། །རྣ་བ་གཡས་པ་ལ་གནས་བཞིས། །འདོད་
དོན་ཐོབ་པར་འགྱུར་ཞེས་སྨྲ། །དཔྲལ་བའི་ལྔ་པོས་བུ་ཐོབ་ཅིང་། །བདེ་ཞིང་སྐྱིད་པར་ཡང་དག་སྟོན། །དེ་བཞིན་སྤྱི་བོའི་གཅིག་ལ་ནི། །རང་འདོད་གནས་ནི་ཐོབ་པར་འགྱུར། །ཀོ་སྐོའི་སྐར་མ་གཅིག་པོ་ཡིས། །འབྲུ་དང་བཟའ་བཏུང་ཐོབ་པར་འགྱུར། །མགྲིན་པའི་སྐར་མ་བཞི་པ་ལ། །
རྩོད་དང་རྡེག་སོགས་འབྱུང་ཞེས་བྱ། །འདི་ལྟར་རཱ་ཧུའི་འཁོར་ལོ་ནི། །རྒྱས་པར་བཤད་དོ་ལྷ་ཆེན་མ། །ལྷ་མོས་གསོལ་པ། སྔར་གསུངས་འཁོར་ལོའི་རིམ་པ་ལས། །དབྱངས་དང་གསལ་བྱེད་ཡི་གེ་རྣམས། །ཇི་ལྟར་འཆར་བ་སྔར་མ་འཚལ། །གཙོ་བོས་བདག་ལ་བཤད་དུ་གསོལ། །
བཅོམ་ལྡན་འདས་ཀྱིས་བཀའ་སྩལ་པ། །རབ་བྱུང་ལ་སོགས་ལོ་རྣམས་ལ། །བཅུ་གཉིས་ལྔ་ལ་ཨ་སོགས་འཆར། །དེ་བཞིན་བགྲོད་པ་རེ་རེ་ལ། །ཨ་སོགས་ལྔ་ནི་འཆར་བར་དྲན། །དེ་ཡི་གནས་སྐབས་དག་ལ་ཡང་། །ཉི་མ་ཨ་ཨི་རྀ་ཨུ་ལྀ། །ཧ་པ་ར་བ་ལ་ཟླ་བ། །མིག་དམར་
ཀ་ཁ་ག་གྷ་ང་། །རཱ་ཧུ་ཏ་ཐ་ད་དྷ་ན། །ཕུར་པ་པ་ཕ་བ་བྷ་མ། །ཊ་ཋ་ཌ་ཌྷ་ཎ་སྤེན་པ། །ཙ་ཚ་ཛ་ཛྷ་ཉ་གཟའ་ལྷག །ཨ་ཨེ་ཨར་ཨོ་ཨལ་ཀེ་ཏུ། །ཤ་ཥ་ས་ཧ་ཀྵ་དཀར་པོ། །རགས་དང་ཕྲ་བའི་རིམ་པ་ཡིས། །གནས་སྐབས་ལ་འཆར་རྗེ་བཙུན་མ། །དེ་ལྟར་ཆོ་ག་མ་ལུས་བཤད། །

203-1-87b

ད་གཟོད་ཅི་འདོད་བཤད་ཀྱིས་ཉོན། །འདི་ནི་གཡུལ་ལས་རྣམ་པར་རྒྱལ་བ་མཆོག་ཏུ་གསང་བ་དབྱངས་འཆར་བ་ཞེས་བྱ་བའི་རྒྱུད་ལས། སྒྲ་གཅན་གྱི་འཁོར་ལོ་རྣམ་པར་ཕྱེ་བ་ཆེན་པོ་སྟེ་ལེའུ་དགུ་པའོ།།      །།ལྷ་མོས་གསོལ་པ། སྤེན་པའི་འཁོར་ལོ་ཇི་ལྟ་བུ། དེ་
ལ་རྒྱུ་སྐར་ཇི་ལྟར་དགོད། །དེ་ཡི་འབྲས་བུ་ཇི་ལྟ་བུ། །བཅོམ་ལྡན་འདས་ལས་བདག་ཉན་འཚལ། །བཅོམ་ལྡན་འདས་ཀྱིས་བཀའ་སྩལ་པ། །ཉོན་ཅིག་ལྷ་མོ་བཤད་པར་བྱ། །ཁྱོད་ཀྱིས་ཇི་ལྟར་ཞུས་པ་བཞིན། །སྤེན་པའི་ཡན་ལག་རྒྱུ་སྐར་གྱིས། །དགེ་དང་མི་དགེའི་འབྲས་
བུ་དང་། །སྤེན་པ་རྒྱུ་སྐར་སྤྱོད་པ་ལས། །སེམས་ནི་མཉམ་པར་གཞག་པ་ཡིས། །རྙེད་དང་མི་རྙེད་ཤེས་པ་དང་། །དེ་བཞིན་འཆི་དང་འཚོ་བ་སྟོན། །ས་གཞི་རབ་ཏུ་ཡིད་འོང་ལ། །སྤེན་པའི་གཟུགས་ནི་མཉམ་པར་བྲི། །འཁྱུད་པའི་སྐར་མ་ཁ་ལ་བྲི། །ལག་པ་གཡས་ལ་
བཞི་དགོད་བྲི། །རྐང་པ་གཉིས་ལ་སྐར་མ་དྲུག །ལག་པ་གཡོན་བཞི་སྙིང་གར་ལྔ། །མིག་ལ་གཉིས་ཏེ་སྤྱི་བོར་གསུམ། །དེ་བཞིན་གསང་བའི་གནས་སུ་གཉིས། །དེ་ལྟར་རྒྱུ་སྐར་བཀོད་པ་ལས། །ལྷ་ཡི་བཙུན་མོ་འབྲས་བུ་བརྟག །ཁ་ཡི་སྐར་མ་ལ་སོང་ན། །སྡུག་བསྔལ་
སྣ་ཚོགས་འཚེ་བའམ་འཆི། །གཡས་པ་བཞི་ཡིས་རྙེད་པ་དང་། །རྣམ་པར་རྒྱལ་ཞིང་མི་མཐུན་མཛའ། །རྐང་པའི་སྐར་མས་གནས་ནས་འཕོ། །ནད་འབྱུང་བུ་ཡང་འཆི་བར་འགྱུར། །ལག་པ་གཡོན་བཞིས་རྒྱལ་ས་ཤོར། །ནོར་སྟོར་རང་གི་མཛའ་བོས་གསོད། །སྙིང་
གས་རྒྱལ་བ་རྙེད་པ་དང་། །བུད་མེད་ཐོབ་ཅིང་ཆོས་རྣམས་སྡུད། །མིག་གཉིས་སྐར་མས་ནོར་སྡུད་ཅིང་། །མི་མཐུན་པ་ཡང་མཛའ་བོར་འགྱུར། །མགོ་བོས་བདེ་ཞིང་དགྲ་ཡང་མེད། །གསང་བས་འཇིགས་པ་ཆེན་པོ་འབྱུང་། །ཡུལ་འཐོན་འཆིར་ཉེའི་སྡུག་བསྔལ་འབྱུང་། །བུ་
སྨད་དགྲར་འགྱུར་འཐབ་རྩོད་འབྱུང་། །དེ་ལྟར་ཉི་མའི་བུ་ལ་ནི། །རྒྱུ་སྐར་གནས་པའི་འབྲས་བུ་ཡིན། །ཁ་ནས་གསང་བར་བགྲོད་པ་སྟེ། །གསང་བ་ནས་ནི་མགོ་བོར་འགྲོ། །དེ་ནས་མིག་ལ་རྣམ་པར་སྤྱོད། །མིག་ནས་སྙིང་གའི་བར་དུ་འགྲོ། །སྙིང་ག་ནས་ནི་ལག་རྐང་གཡོན། །

203-1-88a

དེ་ནས་རྐང་པ་ལག་པ་གཡས། །སྤེན་པའི་ལུས་ལ་གནས་པ་ཡི། །རྒྱུ་སྐར་དེ་ལྟར་བསྐོར་བ་ཡིན། །དེ་ལྟར་སྤེན་པ་བཤད་ཟིན་ནས། །གྲོགས་མོ་གཞན་གྱི་ཡན་ལག་བཤད། །བྱ་ཁྱུང་འཁོར་ལོས་མངོན་སུམ་དུ། །འབྲས་བུ་སྟོན་ནོ་ལྷ་ཆེན་མ། །བྱ་
ཁྱུང་གཟུགས་མཛེས་བྲིས་ནས་ཀྱང་། །རྒྱུ་སྐར་རིམ་གྱིས་དགོད་པར་བྱ། །ཉི་མས་འཁྱུད་པའི་སྐར་མ་དེ། །མཆུ་ནས་ཇི་བཞིན་བྲི་བར་བྱ། །བརྒྱད་ནི་རྐང་པར་དགོད་པ་སྟེ། །མིག་ལ་གཉིས་ནི་ལེགས་པར་དགོད། སྤྱི་བོར་གསུམ་ནི་དགོད་པར་བྱ། །སྙིང་ག་དག་ལ་ལྔ་
ཡིན་ཏེ། །གཤོག་པ་གཉིས་ལ་བརྒྱད་བྲིས་ལ། །དེ་ལ་འབྲས་བུ་བརྟག་པར་བྱ། །མཆུ་ལ་སོང་ན་ལུས་ནད་འབྱུང་། །རྐང་པས་དོན་མེད་མི་དགེ་འབྱུང་། །མིག་གཉིས་ཀྱིས་ནི་དོན་རྙེད་འགྱུར། །སྤྱི་བོས་དགྲ་རྣམས་འཇོམས་པར་བྱེད། །སྙིང་གས་བུད་མེད་མཉམ་པར་སྦྱོར། །
གཤོག་པས་འཇིགས་པ་ཆེན་པོ་འབྱུང་། །ལྷ་མོ་འདི་འདྲའི་འཁོར་ལོ་ཡིས། །དོན་ནི་ངེས་པར་རྟོགས་པར་འགྱུར། །ཇི་ལྟར་ལྷ་ཡི་གཙོ་མོ་ཡིས། །ཞུས་བཞིན་བདག་གིས་བཤད་པ་ཡིན། །ལྷ་མོས་གསོལ་པ། བིཥྚིའི་འཁོར་ལོ་ཞེས་བྱ་བ། །བིཥྚིའི་རྣམ་པ་ཅི་ཞིག་བཤད། །
ལས་དང་བྱ་བ་ཇི་ལྟར་ལགས། །དབང་ཕྱུག་གཙོ་ལ་བདག་ཉན་འཚལ། །བཅོམ་ལྡན་འདས་ཀྱིས་བཀའ་སྩལ་པ། །ཁྱོད་ཀྱིས་ཇི་ལྟར་ཞུས་པ་བཞིན། །བཤད་ཀྱིས་ཉོན་ཅིག་རྗེ་བཙུན་མ། །པིཥྚི་རྣམ་པ་བརྒྱད་དུ་བརྗོད། །སྣ་ཚོགས་གཟུགས་ཅན་སྟོབས་ཆེ་བ། །ཐམས་ཅད་
འདུས་པས་བརྒྱད་ཡིན་ཏེ། །མེ་རུ་འབར་བ་ཅན་ཞེས་བྱ། །དབང་པོའི་ཕྱོགས་སུ་ཀ་རཱ་ལཱ། །མ་ཧཱ་གྷོ་ར་དབང་ལྡན་དུ། །བཀྲ་ཤིས་བྱང་གི་ཕྱོགས་སུ་སྟེ། །མ་ཧཱ་ཛི་ཀ་རླུང་གི་ཕྱོགས། །ཆུ་བདག་ཕྱོགས་ན་བཱ་ཏ་བཱ། །མ་ཧཱ་མ་རི་སྲིན་པོའི་ཕྱོགས། །དུས་ཀྱི་ལྕེ་ནི་ལྷོ་ཕྱོགས་
སུ། །བིཥྚི་འདི་རྣམས་ཕྱོགས་མཚམས་གནས། །གཟུགས་དང་ཁ་དོག་སྣ་ཚོགས་པ། །གདོན་གྱི་སྒྲུབ་ཐབས་སྣ་ཚོགས་སྒྱུར། །ཟླ་བ་ཉ་དང་དེ་བཞིན་གསུམ། །བདུན་དང་བཅུ་དང་འབྱུང་པོའི་ཉིན། །བཞི་དང་བརྒྱད་དང་བཅུ་གཅིག་ལ། །རིམ་པ་བཞིན་དུ་འཆར་བར་

203-1-88b

དྲན། །དེ་ལྟར་ཟླ་བ་ཉ་བ་ལ། །མེ་ནས་བིཥྚི་འབར་བ་འཆར། །དབང་ཕྱུག་གིས་ཀྱང་མེ་མཚམས་སུ། །དེ་ཚེ་ཁ་བལྟ་རུང་མ་ཡིན། །དེ་ལྟར་གནས་པའི་གནས་སྐབས་ལ། །ལས་དང་བྱ་བའི་བྱེ་བྲག་ཀྱང་། །མེ་ནས་རླུང་དུ་འགྲོ་བ་དང་། །བརྡེག་བརྡུང་མེ་སྦར་ལས་རྣམས་
བྱ། །ཀཱ་རཱ་ལ་ཡི་སྣ་ཚོགས་མཚོན། །རེངས་པའི་ལས་དགེ་ནུབ་ཏུ་དགེ། །མ་ཧཱ་གྷོ་རས་རྨོངས་དང་སྲིན། །གནོད་པའི་ལས་རྣམས་བསྒྲུབ་པར་བྱ། །བཀྲ་ཤིས་དགྲ་དང་འཐབ་པ་དང་། །དགྲ་ཡུལ་བགྲོད་པའི་ལས་བསྒྲུབ་བྱ། །མ་ཧཱ་ཛི་ཀ་དྲུག་སྦྱོར་དང་། །སྣ་ཚོགས་མཐུ་ནི་
བསྒྲུབ་པར་བྱ། །བ་ཏ་བཱ་ལ་སྔགས་དང་དབང་། །གསོད་པའི་ལས་བསྒྲུབ་ཤར་དུ་དགེ། །དགྲ་ཆེན་མ་ལ་འཁྲུལ་འཁོར་དང་། །སྒྱོགས་ཀྱི་ལས་རྣམས་བསྒྲུབ་པར་བྱ། །དུས་ཀྱི་ལྕེ་ལ་གཞན་སྡུད་བྱ། །སེམས་ཅན་ཐམས་ཅད་བསད་ལ་བསྒྲུབ། །ཅི་ལ་བབ་ཀྱང་བདག་
གིས་ནི། །བིཥྚིའི་གདོང་ནི་སྤང་བར་བྱ། །དེ་ནས་བིཥྚིའི་ལོངས་སྤྱོད་བཤད། །བིཥྚིའི་ཆུ་ཚོད་སུམ་ཅུ་སྟེ། །བིཥྚིའི་གདོང་ལ་ཆུ་ཚོད་ལྔ། །བར་གྱི་ཆ་ལ་བཅུ་བཞི་སྟེ། །ཐ་མ་ལ་ནི་བརྒྱད་དུ་བརྗོད། །གཞུག་མ་ལ་ཡང་གསུམ་དུ་དྲན། །མཚན་མོ་གདོང་དགེ་མཇུག་མ་ངན། །
མཇུག་དགེ་གདོང་གདུག་ཉིན་མོར་དྲན། །བར་གྱི་ཆ་ལ་ནོར་ཉམས་ཤིང་། །ཐ་མ་ལ་ནི་སྲོག་འཕྲོག་བྱེད། །བདུན་བརྒྱད་ཉ་དང་བཅུ་གཉིས་ལ། །ཉིན་མོའི་བིཥྚི་ཞེས་བྱ་སྟེ། །གསུམ་བཞི་བཅུ་དང་བཅུ་གཅིག་པ། །བིཥྚི་མཚན་མོར་ཤེས་པར་བྱ། །དེ་ལྟར་ཆོ་ག་དབང་
ཕྱུག་མ། །བིཥྚིའི་འཁོར་ལོར་ཡོངས་སུ་གྲགས། །གྷུ་ཛཱ་ཊེ་ཎ་དཀར་ཕྱོགས་ལ། །གུཙྪེ་ཏེ་དྷ་ནག་ཕྱོགས་བརྗོད། །གསལ་བྱེད་ཚེས་སུ་ཤེས་བྱ་སྟེ། །དེ་བཞིན་དབྱངས་ནི་ཐུན་མཚམས་ཉིད། །བཅོམ་ལྡན་འདས་ཀྱིས་གསུངས་པ་ལས། །དེ་ལྟར་བྱས་ན་གཡུལ་ལས་རྒྱལ། །
མིང་གི་ཡི་གེ་དང་པོ་ནི། །ཕྱོགས་ཀྱི་དུས་ལ་འཆར་བར་དྲན། །དབྱངས་སྡེ་མཐར་ནི་སྡེ་ཚན་ལྔ། །ཡ་ར་ལ་ཝ་དེ་བཞིན་ཏེ། །ཤ་ཥ་ས་ཧའི་མཐར་ཐུག་པ། །ཕྱོགས་མཚམས་བརྒྱད་ལ་རིམ་བཞིན་དགོད། །མིང་གི་ཡི་གེ་དབྱངས་ལས་སོ། །གཅིག་དང་དགུ་ལ་རང་ཕྱོགས་དགེ། །ཀ་སོགས་

203-1-89a

རང་གི་ཕྱོགས་ལ་ནི། །གཉིས་དང་བཅུ་ལ་དགེ་བར་དྲན། །ཙ་སོགས་རང་གི་ཕྱོགས་ལ་ཡང་། །གསུམ་དང་བཅུ་གཅིག་དག་ལ་འཛོམ། །ཊ་སྡེ་རང་གི་ཕྱོགས་གནས་པ། །བཞི་དང་བཅུ་གཉིས་ཚེས་ལ་འཆར། །ཊ་སྡེ་རང་གི་ཕྱོགས་ལ་ཡང་། །ལྔ་དང་བཅུ་གསུམ་པ་ཡི་
ཚེ། །རང་གི་ཕྱོགས་སུ་པ་སྡེ་རྣམས། །ཚེས་ནི་དྲུག་དང་བཅུ་བཞི་ལ། །ཡ་ར་ལ་ཝ་རང་ཕྱོགས་ལ། །བདུན་དང་བཅོ་ལྔ་དག་ལ་འཆར། །དེ་ལྟར་ཤ་ཥ་ས་ཧ་རྣམས། །རང་ཕྱོགས་བརྒྱད་དང་གནམ་སྟོང་ངོ་། །ཨ་ནས་ཧ་ཡི་མཐར་ཐུག་པར། །དེ་ལྟར་བདག་ཉིད་ཅན་དུ་བརྗོད། །སྡེ་ཚན་བརྒྱད་
ཀྱི་རིམ་པ་བཞིན། །དང་པོ་ནས་བརྩམས་ཕྱོགས་མཚམས་དགོད། །དེ་ལྟར་རང་གི་དབྱངས་དང་ནི། །གསལ་བྱེད་ཕྱོགས་མཚམས་ཡང་དག་གནས། །དབང་པོར་ཚེས་དང་ཡི་གེའི་གདན། །ཚངས་མ་ཞེས་བྱར་ཡོངས་སུ་གྲགས། །དེ་བཞིན་མེ་རུ་ཡི་གེ་དང་། །ཚེས་ཀྱི་བདག་མོ་གཞོན་
ནུ་མ། །གཤིན་རྗེར་མིང་གི་ཡི་གེ་ལ། །དབང་ཕྱུག་མ་ནི་འཆར་བར་འགྱུར། །སྲིན་པོར་ཡི་གེ་ཚེས་ལ་ཡང་། །ཁྱབ་འཇུག་མ་ནི་འཆར་བར་འགྱུར། །ཆུ་བདག་ལྔ་དང་བཅུ་གསུམ་ལ། །ཏ་ཡི་བདག་མོ་ཕག་ཡིན་ནོ། །རླུང་དུ་དྲུག་དང་བཅུ་བཞི་ལ། །པ་སྡེའི་བདག་མོ་དབང་མོར་འཆར། །
བདུན་དང་ཉ་ལ་རྣམ་ཐོས་བུར། །ཡ་ཚན་རྒན་བྱེད་མ་ཡང་འཆར། །དབང་ལྡན་བརྒྱད་དང་གནམ་སྟོང་ལ། །ཤ་སྡེ་སྒེག་མོ་ཆེན་མོ་འཆར། །དེ་ལྟར་ཕྱོགས་མཚམས་ཐམས་ཅད་དུ། །དཀར་མོ་ཚེས་ནི་སོ་སོ་ལ། །མིང་གི་ཡི་གེ་དབང་བྱེད་པ། །རྣལ་འབྱོར་མ་བརྒྱད་འཆར་བར་
གྲགས། །རང་ཕྱོགས་ནས་སོང་རྒྱལ་བ་སྟེ། །དེར་འཇུག་རྣམས་ལ་ཞེ་སྡང་བྱེད། །སྟོབས་ཆེན་ནུས་མེད་ཆོས་པ་ལ། །འཁོར་ལོ་བདེན་པར་ཐེ་ཚོམ་མེད། །དེ་ནས་གཞན་ཡང་བཤད་པར་བྱ། །དུས་སྦྱོར་ཕྱེད་པའི་འཁོར་ལོ་མཆོག །གང་གིས་རྣམ་པར་ཤེས་ཙམ་གྱིས། །ལས་ཀུན་
ཐེ་ཚོམ་མེད་པར་འགྲུབ། །ལྷ་ཡི་གཙོ་མོ་ཞག་གཅིག་ལ། །དུས་སྦྱོར་ཕྱེད་པ་ཉི་ཤུ་བཞི། །ཆུ་སྲང་སུམ་ཅུ་ཆུ་ཚོད་གཉིས། །ལུག་གི་དུས་སྦྱོར་ཕྱེད་པར་འགྱུར། །ཉིན་མོའི་ཆུ་ཚོད་བཅུ་གཉིས་ཀྱིས། །བགོས་པས་ཐོབ་པ་ཆུ་ཚོད་ཡིན། །ལྷག་མ་དྲུག་ཅུས་བསྒྱུར་

203-1-89b

ཐོབ་སྲང་། །མཚན་མོའང་དེ་བཞིན་ཤེས་པར་བྱ། །དེ་ལས་དུས་སྦྱོར་ཕྱེད་པ་ཡི། །ལོངས་སྤྱོད་རྟོགས་པར་འགྱུར་བ་ཡིན། །ཐོག་མར་དང་པོ་ནས་བརྩམས་ཏེ། །གང་འདོད་ལྔས་བསྒྱུར་རེས་གཟའ་བསྣན། །བདུན་གྱིས་ཕྱེ་བའི་ལྷག་མ་རྣམས། །དུས་སྦྱོར་ཕྱེད་པའི་གཟའ་རུ་
འགྱུར། །དུས་སྦྱོར་ཕྱེད་པའི་བདག་པོ་ནི། །དང་པོ་ལ་སོགས་ངེས་པར་མཐོང་། །རང་ས་ནས་བགྲངས་དྲུག་པ་ལ། །བསྐོར་བ་དུས་སྦྱོར་ཆེ་བདག་གཟའ། །ཉི་མའི་པ་སངས་ཟླ་བའི་སྤེན། །ཕུར་བུའི་མིག་དམར་དེ་བཞིན་སྦྱར། །དྲུག་གི་གྲངས་ལ་བསྐོར་བ་ཡིས། །དུས་སྦྱོར་ཕྱེད་
པའི་བདག་པོ་འབྱུང་། །དྲག་པོ་བསོད་ནམས་གཙིགས་པ་ཅན། །བརྟན་པ་སྤངས་པ་སྤོང་བྱེད་མ། །འཆི་བ་དགྲ་དང་དགེ་བ་དང་། །གདུག་པ་གཏུམ་མོ་སྨིན་དྲུག་དང་། །བདུད་རྩིའི་དུས་མཚན་དྲག་བྱེད་མ། །བི་ཀྲ་མ་དང་སྐྲག་བྱེད་མ། །གོའུ་ཧ་ར་ཞེས་གྲགས་དང་། །རྒྱུ་མའི་
འོད་ཟེར་ཆེན་མོ་དང་། །སྲོག་འཕྲོག་མྱ་ངན་འཆར་བ་མ། །ད་ཧ་ནི་དང་ཀུན་ཐོས་མ། །ཉི་ཤུ་རྩ་བཞི་རིམ་པ་བཞིན། །དུས་སྦྱོར་བྱེད་པའི་མིང་དུ་དྲན། །དྲག་པོ་དང་ནི་གཙིགས་པ་ཅན། །འཆི་བ་དེ་བཞིན་དགྲ་དང་ནི། །དུས་མཚན་སྒྱུ་མ་ཆེན་མོ་དང་། །སྐྲག་བྱེད་མ་དང་སྲོག་
འཕྲོག་མ། །མྱ་ངན་མ་དང་ད་ཧ་ནི། །བཅུ་པོ་རྩུབ་པར་ཡོངས་སུ་གྲགས། །དེ་རྣམས་ཀུན་ལ་དགེ་བ་ཡིན། །ལས་བྱས་འཇིག་པ་འབྱུང་ཞེས་སྨྲ། །ཁ་ནི་གྱེན་བལྟས་ཐུར་བལྟས་དང་། །འཕྲེད་ལ་ལྟ་བ་ཡོད་པར་སྣང་། །ཉི་མ་སྤྱོད་པའི་རིམ་པ་ཡིས། །དུས་སྦྱོར་
ཕྱེད་པ་ཤེས་པར་བྱ། །དུས་སྦྱོར་ཕྱེད་ལ་གཅིག་ཡིན་ཏེ། །དེ་ལྟར་བྱས་པས་ཉི་ཤུ་བཞི། །གྱེན་ཐུར་འཕྲེད་ཀྱི་མཚན་ཉིད་ཀྱང་། །ངེས་པར་ཉོན་ཅིག་རི་སྲས་མོ། །ཉི་མ་གང་ལ་གནས་པ་ཡིས། །སྔོན་མའི་ཕྱེད་པ་གྱེན་བལྟས་དྲན། །ཉི་མ་དང་ནི་ལྷན་ཅིག་པའི། །ཁྱིམ་ནི་
འབྲེད་ལ་ལྟ་བ་ཡིན། །ཉི་མའི་ཕྱི་ནས་འགྲོ་བ་ནི། །ཐུར་བལྟས་དུས་སྦྱོར་ཕྱེད་པ་ཡིན། །གྱེན་ཐུར་འཕྲེད་ཀྱི་རིམ་པ་ལྟ། །དགེ་བའི་ལས་ནི་རུང་མ་ཡིན། །དེ་རྣམས་སྤངས་པའི་ཕྱེད་པ་ལ། །དགེ་བའི་འབྲས་བུ་ངེས་པར་མཐོང་། །འདི་ལྟར་ལས་དང་བྱ་

203-1-90a

བ་ལ། །ཉོན་མོངས་བྱེད་པའི་དུས་སྦྱོར་ནི། །འཕྲེད་ཐུར་བལྟས་པས་ཉོན་མོངས་པར། །བྱེད་འགྱུར་ལྷ་ཡི་དབང་ཕྱུག་མ། །ཁ་ནི་འཕྲེད་བལྟས་ཐུར་སྦྱོར་གྱི། །ཕྱེད་པས་འཁོར་རྣམས་ཟད་པར་བྱེད། །གྱེན་བལྟས་ཞེས་བྱར་གྲགས་པ་ཡིས། །སྡེ་པའི་དགྲ་
ཀུན་ཕམ་པར་བྱེད། །ཁ་ནི་འཕྲེད་བལྟས་དུས་སྦྱོར་གྱི། །ཕྱེད་པས་དགྲ་ཡང་ཕམ་པར་བྱེད། །རང་གི་དུས་སྦྱོར་བདག་པོ་ཡིས། །ཕྱེད་པས་མཐོང་ན་ལས་ཀུན་འགྲུབ། །དེ་ལྟར་དུས་སྦྱོར་ཕྱེད་པའང་། །བཤད་ཟིན་དཔའ་བོའི་དབང་ཕྱུག་མ། །ཟ་བ་ཁྱིམ་ནི་གང་ལ་གནས། །
དེ་ཡི་ཆ་ཤས་ཤེས་པ་ཡིས། །ཐམས་ཅད་ལས་ནི་དེ་བཞིན་དུ། །འགྲུབ་ཅིང་འགྱུར་བར་བྱེད་པ་ཡིན། །པྲ་བྷ་སེ་དང་རང་ལུས་གནས། །འཆི་བ་དགོད་པར་སྐྱེ་བ་དང་། །འབར་བ་དགའ་བ་སྤྱོད་པ་དང་། །མི་མཐུན་བྱེད་པ་སུ་པ་ཏ། །འབྱོར་པ་རྣམས་ནི་རིམ་པ་བཞིན། །
ཟླ་བ་གང་ལ་གནས་པ་ཡི། །ལུག་ལ་སོགས་པའི་ཁྱིམ་ཤེས་པས། །དེ་ཡི་འབྲས་བུ་འབྱུང་བར་འགྱུར། །བརླག་པ་བདེ་ལེགས་འཆི་བ་དང་། །ཏཥྞི་ནོར་ཐོབ་གསོད་པ་དང་། །དགའ་བ་ཉམས་པ་ངེས་པའི་དགྲ། །རྒྱལ་བ་འཆི་བ་ལེགས་འོངས་སོ། །དེ་ལྟར་ཁྱིམ་གྱི་
ཆ་ཤས་ཀྱིས། །འབྲས་བུ་རིམ་བཞིན་ཤེས་པར་བྱ། །ཟླ་བའི་ལོངས་སྤྱོད་བཟང་ངན་ལས། །ལས་དང་བྱ་བ་ངེས་པར་མཐོང་། །ཆ་ཤས་བཟང་ངན་གནས་བལྟས་ཏེ། །དགེ་མི་དགེ་ལས་དོན་འགྲུབ་འགྱུར། །ཐུན་ཕྱེད་ཡོངས་སུ་ཤེས་པ་ལས། །རིགས་ལྡན་འཆར་བར་ཤེས་
པར་བྱ། །དགོས་འདོད་ཐམས་ཅད་འགྲུབ་པའི་ཕྱིར། །ཤིན་ཏུ་གཟབ་ལ་སྤང་བར་བྱ། །རཱ་ཧུ་དང་ནི་རིགས་ལྡན་གྱིས། །ཐུན་ཕྱེད་བྱ་བ་ཉམས་པར་བྱེད། །གང་གིས་རིགས་ལྡན་ལོངས་སྤྱོད་པའི། །ཐུན་མཚམས་གང་ཡིན་མི་ཤེས་པར། །ཟས་ཞིམ་ཟོས་ཀྱང་ནད་འགྱུར་ཞིང་། །ནད་
པས་སྨན་འཐུངས་དུག་ཏུ་འགྱུར། །སྦྲུལ་སོས་བཏབ་ལ་ཁྱུང་གིས་མིན། །དེ་ཕྱིར་རིགས་ལྡན་སྦྱར་བ་སྤང་། །ཐུན་ཕྱེད་བརྒྱད་དུ་རབ་བརྗོད་པ། །ཉི་མའི་དུས་སུ་རཱ་ཧུ་དང་། །དེ་བཞིན་རིགས་ལྡན་འཆར་བ་དང་། །ཟླ་བ་མིག་དམར་གཟའ་ལྷག་དང་། །ཕུར་བུ་པ་སངས་སྤེན་པ་དང་། །རིམ་བཞིན་དེ་རྣམས་

203-1-90b

བརྒྱད་དང་ནི། །བདུན་དང་དྲུག་དང་ལྔ་དང་ནི། །དེ་བཞིན་བཞི་དང་གསུམ་པ་དང་། །གཉིས་དང་གཅིག་ཅེས་བྱ་བ་རྣམས། །གཟའ་རྣམས་སོ་སོའི་ཐུན་བྱེད་མིན། །རིང་ཐུང་མཚན་ཉིད་ཤེས་བྱ་སྟེ། །མཉམ་དུས་ཆུ་ཚོད་གསུམ་དང་ནི། །ཆུ་སྲང་བཞི་བཅུ་རྩ་ལྔར་ལྡན། །དེ་ཡི་ཐུན་ཕྱེད་ཀུན་ལ་སྦྱར། །
གཟའ་རྣམས་ཀྱི་ནི་ཐུན་ཕྱེད་བརྒྱད། །དེ་ལ་འཆར་བ་ངེས་པར་མཐོང་། །ལྔ་དང་བཞི་སོགས་སྦྱར་ཞེས་བྱ། །ཐུན་ཕྱེད་ལོངས་སྤྱོད་བདུན་གྱིས་བསྒྱུར། །དེ་ལ་དྲུག་ཅུས་བགོས་ཐོབ་པ། །ཆུ་ཚོད་དུ་འགྱུར་ལྷག་ཆུ་སྲང་། །དེ་ལྟར་གཟའ་རྣམས་རེ་རེ་ཞིང་། །རང་གི་ཐུན་མཚམས་ཕྱེད་དུ་དྲན། །ཟླ་བ་ལ་སོགས་དྲུག་ལ་
སོགས། །དེ་ལ་རིགས་ལྡན་འཆར་བར་འགྱུར། །དྲུག་ལ་སོགས་པའི་བྱེ་བྲག་གིས། །བྱ་བ་ཐམས་ཅད་སྔར་བཞིན་རིགས། །ཉི་མའི་ཆུ་ཚོད་ཉི་ཤུ་དྲུག །ཆུ་སྲང་བཅོ་ལྔ་རི་སྲས་མོ། །ཟླ་བའི་ཆུ་ཚོད་ཉི་ཤུ་གཉིས། །ལྷ་མོ་ཆུ་སྲང་སུམ་ཅུར་བཞེད། །ཆུ་ཚོད་བཅོ་ལྔ་མིག་དམར་ལ། །ཆུ་སྲང་བཞི་བཅུ་ཞེ་ལྔ་
ཡིན། །གཟའ་ལྷག་ཆུ་ཚོད་བཅོ་ལྔ་སྟེ། །ཆུ་སྲང་སྟོང་པར་ཡོངས་སུ་གྲགས། །ཕུར་བུའི་ཆུ་ཚོད་བཅུ་གཅིག་སྟེ། །ཆུ་སྲང་བཅོ་ལྔ་ཞེས་བྱར་གྲགས། །པ་སངས་ཆུ་ཚོད་བདུན་ཡིན་ཏེ། །ཆུ་སྲང་སུམ་ཅུ་སྤེན་པ་ལ། །གསུམ་དང་བཞི་བཅུ་རྩ་ལྔར་བརྗོད། །དེ་རྣམས་རིགས་ལྡན་ཐུན་མཚམས་ཏེ། །ལས་དང་བྱ་བ་
ཐམས་ཅད་ལ། །ཅི་ལ་བབ་ཀྱང་གཟབ་པར་བྱ། །འདི་ལྟར་དུས་སྦྱོར་ཕྱེད་པ་ནི། །མཉམ་ཚེ་དབྱུ་གུ་གཉིས་དང་ཕྱེད། །དེ་ལ་གཟའ་རྣམས་དབང་བྱེད་པ། །{དྲུག་}གི་གྲངས་ལ་བསྐོར་བར་དྲན། །ཉིན་མོ་དེ་ཡིན་ལྷ་བཙུན་མ། །མཚན་མོ་དབྱུ་གུ་གཉིས་དང་ཕྱེད། །དུས་སྦྱོར་ཕྱེད་པའི་བདག་པོ་རྣམས། །ལྔ་ལ་རིམ་པས་བསྐོར་
བ་ཡིན། །སྤེན་པའི་ལོངས་སྤྱོད་དུས་སུ་ནི། །རིགས་ལྡན་ཅི་ནས་སྤང་བར་བྱ། །དགེ་འཇོམས་སྡིག་པ་ཅན་དེ་ནི། །སྤངས་པས་རང་གི་ལས་ཀུན་འགྲུབ། །ཉི་མ་ནས་ནི་པ་སངས་དང་། །ཉི་མ་ནས་ནི་ཕུར་བུ་སོགས། །ཉིན་དང་མཚན་གྱི་དུས་སྦྱོར་ཕྱེད། །དྲུག་དང་ལྔ་རུ་འགྱུར་བ་ཡིན། །དེ་ལྟར་དུས་སྦྱོར་ཕྱེད་ཤེས་པ། །
ལེགས་པར་རྟོགས་སམ་གངས་རིའི་བདག །ཉི་མ་མཐའ་ཡས་ཟླ་བ་ལ། །ནོར་རྒྱས་མིག་དམར་འཇོག་པོར་དྲན། །གཟའ་ལྷག་སྟོབས་ཀྱི་རྒྱུ་ཞེས་བྱ། །ཕུར་བུ་པདྨ་པ་སངས་ནི། །པདྨ་ཆེན་པོར་ཤེས་པར་བྱ། །སྙན་པ་དུང་སྐྱོང་ཤེས་པར་བྱ། །ཀླུ་དང་གཟའ་བདུན་རིམ་པ་བཞིན། །ཤེས་པར་བྱའོ་རི་སྲས་མོ། །བརྒྱད་

203-1-91a

པ་རིགས་ལྡན་ཉིད་ཡིན་ཏེ། །རཱ་ཧུ་དྲག་པོའི་གཟའ་རུ་འགྱུར། །ཐུན་ཕྱེད་ལོངས་སྤྱོད་གཟའ་རྣམས་ལ། །ཀླུ་རྣམས་འཆར་བར་ཡོངས་སུ་གྲགས། །ཆུ་སྲང་བཅུ་དྲུག་ཉི་མའི་དབུས། །སྤང་བྱ་གཞན་ལ་སྐྱོན་མེད་དྲན། །པ་སངས་མཐའ་མའི་ཆུ་སྲང་བཞི། །གཟའ་ལྷག་སྔོན་མའི་ཆུ་སྲང་གཉིས། །
ཟླ་བའི་དབུས་སུ་ཆུ་སྲང་བརྒྱད། །སྤེན་པའི་མཐའ་མར་ཆུ་སྲང་བཞི། །སུམ་ཅུ་རྩ་གསུམ་ཕུར་བུའི་དབུས། །མིག་དམར་ཐོག་མའི་ཆུ་སྲང་དྲུག །བཟང་པོའི་གཏམ་ཡིན་རི་སྲས་མོ། །རིགས་ལྡན་འཆར་བར་ཐེ་ཚོམ་མེད། །ཆུ་ཚོད་ཕྱེད་དང་གསུམ་ལ་ནི། །དུས་སྦྱོར་ཕྱེད་པ་ངེས་པར་མཐོང་། །དྲུག་དང་ལྔ་ནི་རིམ་པ་བཞིན། །
ཉོན་མོངས་ལ་སོགས་ལས་ཤེས་བྱ། །སྤེན་པའི་དུས་སྦྱོར་ཕྱེད་པའི་དུས། །གང་ཡིན་རིགས་ལྡན་འཆར་བར་འགྱུར། །བྱ་བ་ཐམས་ཅད་ཉམས་བྱེད་པས། །ཅི་ནས་འདི་ནི་སྤང་བར་བྱ། །གཟའ་ཡི་ཆ་ལ་ཅི་རིགས་པ། །ཀླུ་རྣམས་འཆར་བར་འགྱུར་བ་ཡིན། །རྒྱ་མཚོ་དྲང་སྲོང་མིག་དང་ནི། །འབྱུང་
བ་དང་ནི་ནོར་ལྷ་མོ། །རོ་སྟེ་ཉི་མ་སོགས་རིམ་བཞིན། །ཐུན་ཕྱེད་སྒྲ་གཅན་དྲག་པོར་དྲན། །འབྱུང་བ་མིག་དང་རོ་དང་མེ། །རི་དང་རྒྱ་མཚོ་ཟླ་བ་ནི། །མིག་དམར་རཱ་ཧུ་ཞེས་བྱ་བ། །གཞན་གསད་པ་དང་དུག་སྦྱོར་འགྲུབ། །དེ་ལྟར་ཐུན་མཚམས་བདུན་པ་དང་། །དྲུག་ལྔ་བཞི་གསུམ་གཉིས་
གཅིག་རྣམས། །ཉི་མ་ལ་སོགས་རིམ་པ་བཞིན། །ཀླུ་ཡི་དུག་དེ་ཅི་ནས་འཛེམ། །ཇི་ལྟར་ཉི་མ་ལ་སོགས། །གང་ལ་ཁྱིམ་ནི་འཕོ་བ་ན། །མཐོ་རིས་ལ་སོགས་བདག་པོ་རྣམས། །རིམ་པ་བཞིན་དུ་ཤེས་པར་བྱ། །འཕོ་བ་བཅུ་གཉིས་བདག་པོ་ནི། །སྡིག་ཅན་གྱུར་ན་མི་དགེ་བྱེད། །
བསོད་ནམས་ཀྱིས་ནི་དགེ་བར་སྟོན། །འདྲེན་མས་འབྲིང་པོར་འགྱུར་བ་སྟེ། །མང་ཉུང་ལས་ནི་དགེ་མི་དགེ། །འབྲས་བུ་མཐོང་བར་འགྱུར་བ་ཡིན། །ལྷ་མོ་དབྱངས་འཆར་ཞེས་བྱ་བ། །དགོས་དོན་མ་ཚང་མེད་པ་ཡི། །རྒྱུད་འདི་བླ་མའི་མན་ངག་ལས། །ཐེ་ཚོམ་མེད་པར་ཤེས་པར་འགྱུར། །
འཁོར་ལོའི་མཚན་ཉིད་མང་པོ་རྣམས། །གཞུང་གི་མཐར་ཐུག་འདི་ལས་ཤེས། །གང་ཚེ་བླ་མའི་མན་ངག་བྲལ། །དེ་ཚེ་བསྟན་བཅོས་གཞུང་འདི་སྤངས། །གང་ཞིག་ཐམས་ཅད་ལྟས་འདི་ལས། །འབྲས་བུ་མང་པོ་མཐོང་བར་འགྱུར། །ཐམས་ཅད་མཁྱེན་པའི་སྐྱེ་བོས་ཀྱང་། །

203-1-91b

དོན་མེད་དགའ་བས་འདིར་ཞུགས་ན། །བཤད་པའི་འཁོར་ལོས་འདྲི་བྱེད་ལ། །འབྲས་བུ་ཕྲལ་དུ་མཐོང་བ་ཡིན། །སྐྱེས་པའི་གནས་སྐབས་འཁོར་ལོ་དང་། །དུས་ཀྱི་འཁོར་ལོ་རི་སྲས་མོ། །ཨ་བ་ཀ་ཧ་ཌ་ཉིད་དང་། །ཤ་ཏ་པ་ཏ་སེང་གིའི་གདན། །དེ་བཞིན་རྒྱན་གྱི་འཁོར་ལོ་དང་། །
མཛེས་མ་མཐོང་བའི་འཁོར་ལོ་སྟེ། །དེ་རྣམས་འབྲུ་ཡི་བྱེ་བྲག་ཀུན། །བཤད་དོ་དཔའ་བོས་ཕྱག་བྱས་མ། །རཱ་ཧུའི་འཁོར་ལོ་མང་པོ་ཡང་། །མདོར་བསྡུས་བརྒྱད་བཤད་རི་སྲས་མོ། །ཁྱད་པར་ཡུད་ཙམ་འཁོར་ལོ་འདིས། །འབྲས་བུ་ཆེན་པོ་སྦྱིན་པ་ཡིན། །བཟང་
མོ་དེ་སྙེད་བཤད་པ་འདིས། །ཀུན་ལ་དབྱངས་འཆར་ངེས་པ་ཡིན། །དབྱངས་འཆར་སྤོང་བའི་བླུན་པོ་ནི། །ནོར་བུ་ཕྱུགས་ལ་ཇི་ལྟར་བུར། །ཁ་ཡི་ནོར་བུ་དཔལ་མིན་བཞིན། །སྐྱེས་བུ་བླུན་པོས་མཆོག་འདི་སྨོད། །ཐེ་ཚོམ་མེད་ཅིང་འཇིགས་མེད་པ། །གཡུལ་ལས་
རྒྱལ་བ་སེང་གེ་འདྲ། །རྗེས་སུ་བསྔགས་པའི་སྟོང་ཕྲག་གཅིག །འདི་ཡི་ཚད་མཛོད་ལྷས་མཆོད་མ། །ཐེ་ཚོམ་ཐམས་ཅད་གཅོད་པའི་རྒྱུད། །ལྷ་མོས་གསང་བ་ལས་ཀྱང་གསང་། །མཆོག་ཏུ་གསང་བས་རྣ་བཞི་པ། །ཤིན་ཏུ་སྦས་འགྲུབ་ལྷ་མོ་ཀྱེ། །སྡིག་པ་ལ་
བརྩོན་གཡོ་སྒྱུ་ཅན། །ཁྲོ་ཞིང་མ་རུངས་ལས་ལ་དགའ། །མེད་པ་པ་དང་རྒྱུད་འཚོང་བ། །གུས་མེད་རྣམས་ལ་སྦྱིན་མི་བྱ། །བླ་མ་ལ་གུས་སེམས་ཞི་བ། །བདེན་སྨྲ་རྟག་ཏུ་དགེ་ལ་བརྩོན། །བསྟན་བཅོས་དམ་པ་རྙེད་དཀའ་བ། །འདི་ལ་སྦྱིན་བྱ་ལས་མཆོད་མ། །དཔལ་ལྡན་ཁྱུ་
མཆོག་རྒྱལ་མཚན་ལས། །གྲུབ་ཐོབ་ཨུཏྤལ་དབྱུ་གུ་དེས། །དབྱངས་འཆར་བསྟན་བཅོས་འདི་ཉིད་ནི། །ས་སྟེང་འཇིག་རྟེན་གསལ་བར་མཛད། །འདི་ནི་གཡུལ་ལས་རྣམ་པར་རྒྱལ་བའི་རྒྱུད་ཀྱི་རྒྱལ་པོ་ལས་ལྷག་པའི་ལས་སྣ་ཚོགས་བསྟན་པ་ཆེན་པོ་སྟེ་ལེའུ་བཅུ་པའོ།།      །།གཡུལ་ལས་རྣམ་པར་
རྒྱལ་བ་ཞེས་པའི་རྒྱུད་ཀྱི་རྒྱལ་པོ་དབྱངས་འཆར་བ་ཞེས་བྱ་བའི་བསྟན་བཅོས་རྫོགས་སོ།།      །།རྒྱ་གར་གྱི་མཁན་པོ་པཎྜི་ཏ་དཔལ་ཛ་ཡ་ཨཱ་ནནྡ་ཆེན་པོ་དང་། བོད་ཀྱི་ལོ་ཙཱ་བ་དགེ་སློང་རྨོངས་པའི་གཉེན་པོ་དགོས་འདོད་ཐམས་ཅད་འབྱུང་བས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །།

203-1-92a

༄། །ཚེའི་གནས་སྐབས་ཀྱི་འབྲས་བུ་གནོད་པ་འབྱུང་བ་ཞེས་བྱ་བའི་ལས་བཞུགས་སོ།། ༄༅༅། །འཕགས་པ་འཇམ་དཔལ་ལ་ཕྱག་འཚལ་ལོ། །གཟའི་གནོད་པ་སྤང་བའོ། །ཉི་མ་ལ་མེ་ལྷ་མཆོད་པར་བྱའོ། །ཟླ་བ་ལ་ཀླུ་མཆོད་པར་བྱའོ། །མིག་དམར་ལ་ཁྱབ་འཇུག་གི་ཚོགས་ཀྱི་བདག་པོ་
མཆོད་པར་བྱའོ། {།ལག་}ལ་དེ་བཞིན་གཤེགས་པ་མཆོད། ཕུར་པ་ལ་ལྷག་པའི་ལྷ་མཆོད། པ་སངས་ལ་གཞོན་ནུ་མ་མཆོད། སྤེན་པ་ལ་ལམ་མདོའི་ལྷ་མཆོད། རཱ་ཧུ་ལ་ལ་དུར་ཁྲོད་དུ་ཚོགས་བདག་མཆོད། ཀེ་ཏུ་ལ་མཆོད་རྟེན་མཆོད་པར་བྱའོ། །ཉི་མ་ལ་ཟས། ཟླ་བ་ལ་ཟས་མུ་ཏིག་སྦྱིན་པར་བྱའོ། །མིག་དམར་
ལ་གསེར་སྦྱིན་པར་བྱའོ། །གཟའ་ལྷག་དང་ཕུར་བུ་ལ་གསེར་སྦྱིན་པར་བྱ། པ་སངས་ལ་ལྔ་ཏུལ་བ། སྤེན་པ་ལ་ཉ། རཱ་ཧུ་ལ་ལ་ཆད་སྦྱིན་པར་བྱའོ། །ཀེ་ཏུ་ལ་རིན་ཆེན་སྣ་ཚོགས་སྦྱིན་པར་བྱ། ཉི་མ་ལ་སྦྱིན་སྲེག་གི་ཆོ་ག་བྱ། སེམས་ཅན་ལ་ཕན་པའི་ཆོ་ག་ཟླ་བ་ལ་བྱ། མིག་དམར་ལ་གཏོར་མའི་ཆོ་ག་བྱ།གཟའ་
ལག་ལ་འཆོས་པའི་ཆོ་ག་བྱ། ཕུར་པ་ལ་འབྲི་བ་དང་ཀློག་པའི་ཆོ་ག་བྱ། པ་སངས་ལ་ཆུའི་ཆོ་ག་བྱ། སྤེན་པ་ལ་དབང་བསྐུར་བའི་ཆོ་ག་བྱ། རཱ་ཧུ་ལ་ལ་རབ་གནས་དང་ཞི་བའི་ཆོ་ག་བྱ། ཀེ་ཏུ་ལ་རྗེ་བཙུན་བཞེངས་པའི་ཆོ་ག་བྱ། ཀུན་ལ་རིག་བྱེད་ཀྱི་ཆོ་ག་རིམ་གྲོ་དང་། རྡོ་རྗེ་རྣམ་འཇོམས་དང་།
གདུགས་དཀར་པོ་ཅན་དང་། ལྷག་པའི་ལྷའི་བདེན་པ་དང་། དེ་རྣམས་ཀྱི་ཆོ་ག་བཅོམ་ལྡན་འདས་ལ་བསྙེན་བཀུར་བ་ལ་སོགས་པའོ། །ཚེའི་གནས་སྐབས་ཀྱི་འབྲས་བུ་འབྱུང་བའི་གནོད་པ་ཞེས་བྱ་བའི་ལས་རྫོགས་སོ།།      །།རྒྱ་གར་གྱི་མཁན་པོ་དཔལ་ཛ་ཡ་ཨཱ་ནནྡ་དང་། ལོ་ཙཱ་བ་དགེ་སློང་
རྨོངས་པའི་གཉེན་པོ་དགོས་འདོད་ཐམས་ཅད་འབྱུང་བས་ལམ་བུའི་གྲོང་ཁྱེར་སེ་ལོ་གང་བུའི་གཙུག་ལག་ཁང་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ། །དུས་སྦྱོར་བདུན་པའི་དུས་སུ་ཉི་མ་འཆར་བར་གྱུར་པ་དེའི་ཚེ་ནད་ཀྱིས་ཐེབས་པར་འགྱུར། མིག་དམར་འཆར་བ་དེའི་ཚེ་རྨ་འབྱུང་བར་འགྱུར་རོ། །
སྤེན་པ་ཤར་ན་དེའི་ནོར་ཉམས་པར་འགྱུར་རོ། །དེའི་ཕྱིར་དེ་རྣམས་སྤང་བར་བྱའོ། །སྒྲ་གཅན་ཤར་བར་གྱུར་པ་དེའི་ཚེ་དགྲ་བརླག་པར་འགྱུར་རོ། །ཟླ་བ་ཤར་བར་གྱུར་པ་དེའི་ཚེ་རྒྱས་པར་འགྱུར་རོ། །གཟའ་ལྷག་ཤར་བར་གྱུར་པ་དེའི་ཚེ་གཡུལ་ལས་རྒྱལ་བར་འགྱུར་རོ། །པ་སངས་ཤར་བར་གྱུར་

203-1-92b

པ་དེའི་ཚེ་རྫས་རྙེད་པ་དང་། བདེ་བར་བཅས་ཏེ་བུད་མེད་དང་ལྷན་ཅིག་པར་འགྱུར་རོ། །གལ་ཏེ་ཡང་དག་པའི་དུས་ཐམས་ཅད་འཆར་བར་འགྱུར་བ་དེའི་ཚེ་འགྲུབ་པར་འགྱུར་རོ། །པཎྜི་ཏ་ཛ་ཡ་ཨཱ་ནནྡ་དང་ལོ་ཙཱ་བ་ཤེས་རབ་རིན་ཆེན་གྱི་འགྱུར་རྫོགས་སོ།།      །།
༄༅༅། །རྒྱ་གར་སྐད་དུ། ཙུ་ཌ་མ་ཎི་ནཱ་མ། བོད་སྐད་དུ། གཙུག་གི་ནོར་བུ་ཞེས་བྱ་བ། ཐམས་ཅད་མཁྱེན་པ་ལ་ཕྱག་འཚལ་ལོ། །ཀེེ་ལཱ་ས་རིའི་གནས་མཆོག་ཏུ། བསྟན་བཅོས་དབྱངས་འཆར་ཞེས་བྱ་བ། གཡུལ་ལས་རྣམ་པར་རྒྱལ་བ་བཤད་དེ། དེའི་དོན་ཤིན་ཏུ་གསལ་བར་འདིར་བཤད་དེ། ལ་ལ་
ནི་གཞུང་ཉིད་ཀྱིས་དཀྲུགས་ཤིང་། རིགས་ལ་སོགས་པ་ཤིན་ཏུ་བསྡུས་སམ་གོ་ཡིད་རྟོགས་པ་དང་། དུམ་བུ་དྲུག་ལ་སོགས་པའི་དུས་སྦྱོར་རྣམས་དབྱངས་འཆར་བའི་རྩིས་དེ་ལྟ་བུ་ཡིན་པས། དེ་དག་ལག་ལེན་དུ་དྲིལ་ཏེ་བཤད་པ་དང་། མན་ངག་སྙིང་གཏམ་དུ་བཤད་པ་དང་། སྙན་དངགས་དང་སྡེབ་སྦྱོར་
སྤངས་ཏེ་དོན་ཁོལ་བུར་ཕྱུང་བ་དང་། བུ་རྣམས་ལ་ཡང་སྟེ་བཀག་པ་ནི་འདིའོ། །བཅོམ་ལྡན་འདས་ཞེས་པ་ནས་བཤད་དུ་གསོལ་ཞེས་པའི་བར་དུ་བསྟོད་ཅིང་ཞུས་པའོ། །ལམ་ལྔ་ཞེས་པ་ནས་ཀླུ་རྣམས་འཆར་བ་ཞེས་པ་ནི་ལྷ་མོས་འཁོར་ལོ་རྣམས་སྡོམ་དུ་ཞུས་པའོ། །སྔོན་ཚེ་ཞེས་པ་ནས་མི་དགོས་ཞེས་པ་ཡན་
ཆད་ནི། རྒྱུད་འདིའི་བྱུང་ཚུལ་དང་། གྲགས་ཕྱོགས་དང་། ཉན་པར་རྣ་གཏད་བསྐུལ་བ་དང་། རྒྱུད་རྣམས་ཀྱི་རྩ་བར་གདམས་པ་དང་། ལྟ་བ་རྟོགས་པ་ལ་མི་དགོས་པར་བཤད་པའོ། །ལུས་གནས་ཞེས་པ་ནས་ལྟས་ཀྱི་དགེ་མི་དགེ་བཤད་ཅེས་པ་ཡན་ཆད་ནི། རླུང་དང་ལྟས་ཀྱི་རིམ་པ་སྟེ་གོ་བླའོ། །ཚེས་ལ་ཞེས་པ་
ནས་ཐ་མལ་ཞེས་པ་ཡན་ཆད་ནི། ཞག་གཅིག་ལ་དབུགས་ཉི་ཁྲི་ཆིག་སྟོང་དྲུག་སྟེ་དྲུག་བརྒྱ་རྒྱུ་ཞིང་། ཆུ་སྲང་དང་དབྱུ་གུའང་དེས་ཤེས་སོ། །དབུགས་ཀྱི་གྲངས་ནི་ཞག་གཅིག །ཆུ་སྲང་ནི་ཟླ་བ་གཅིག །དབྱུ་གུ་ནི་ལོ་གཅིག་སྟེ། ཉི་ཁྲི་ཆིག་སྟོང་དྲུག་བརྒྱའི་གྲངས་ལ། བཅུ་གཉིས་ཀྱིས་བགོས་པས། 
ནོར་འདི་དུས་སྦྱོར་གྱི་ཕུང་པོར་འགྱུར་རོ། །བརྒྱད་ཀྱིས་བགོས་པས་ནོར་ནི་ཐུན་དུ་འོང་ཞིང་། རྒྱལ་མཚན་ལ་སོགས་པ་ཡང་འཆར་རོ། །དེ་དག་ལ་ལམ་ལྔ་ཡོད་དེ། ས་དང་། ཆུ་དང་། མེ་དང་། རླུང་དང་། ནམ་མཁའོ། །དེ་དག་ཀྱང་སྣ་བུག་གི་གཡས་གཡོན། སྟེང་འོག །དབུས་རྣམས་ལ་

203-1-93a

རིམ་པ་བཞིན་རྒྱུའོ། །ས་ལ་སོགས་པ་འབྱུང་བ་རེ་རེ་ལ་སུམ་བརྒྱ་བཞི་བཅུ་ཞེ་དགུའི་དབྱུག་གི་དབུགས་རྒྱུའོ། །སྣ་བུག་གཡས་རྒྱུ་ཉི་མ་གཡོན་རྒྱུ་ཟླ་བ། གཉིས་ཀ་རྒྱུ་བ་སྒྲ་གཅན། གཡས་ལྷོ་གཡོན་བྱང་། ཁྱིམ་འཕྲིན་ལས་རིང་ཐུང་རྣམས་གཞུང་ཉིད་ལ་གསལ་ལོ། །མིག་དམར་
མེ། སྤེན་པ་ཆུ། ཉི་མ་ས། སྒྲ་གཅན་རླུང་། ལག་པ་ནམ་མཁའ། གཞན་རྣམས་ནི་སྒྲ་གཅན་ནམ་མཁར་བཞེད་དོ། །གཡས་པའི་འབྱུང་བ་དག་གཞུང་ན་གསལ་ལོ། །དེ་དག་གི་ལམ་ལྔའི་རིམ་པའོ། །སུམ་ཅུ་གཉིས་ཀྱི་མིང་ཡིག་ཤར་བ་དེ་བྱིས་པ། དེ་ནས་བགྲངས་པའི་གཉིས་པའི་གཉིས་པ་གཞོན། གསུམ་
པ་ལང་ཚོ། བཞི་པ་རྒན། དགའ་བ་རིམ་བཞིན་དེས་གོ་ཞིང་། ཞིབ་པར་གཞུང་ལས་ཤེས་སོ། །ལེའུ་དང་པོའོ།།      །།གཙོ་བོར་དུས་སྦྱོར་སྟོན་པས། དེ་ཡང་ལོའང་དུས་སྦྱོར་སྟོན་པས་ཡིན་ཞིང་། འབྲས་བུས་ཞག་གཅིག་གི་དུམ་བུ་ལ་འབྱུང་བས། དེའི་རྩིས་རླུང་གྲངས་ལ་ལྟ་སྟེ། 
ཞག་གཅིག་རྩིས་པ་ནས། ཁྱིམ་བདག་ཡན་ཆད་ནི། དུས་བཅུ་གཉིས་ཀྱི་འཁོར་ལོ་རྣམས་ཀྱི་དང་པོ་སྟེ་རྩ་བ་ཡིན་ནོ། །ཁྱིམ་དབང་བ་ཡང་འདིས་ཤེས་སོ། །དུས་སྦྱོར་ཀྱི་འཁོར་ལོ་འོག་མ་རྣམས་འདིའི་སྟེང་ནས་ལྟ་བ་ཡིན་ནོ། །ཆུ་བདག་ངན་ཞེས་པ་ཡན་ཆད་ནི། དུས་སྦྱོར་གྱི་ནུས་པ་ཆེ་ཆུང་
ཕྱོགས་ཀྱི་སྟོབས་ཀྱི་ཙཀྲའོ། །ཟླ་བ་བཅུ་གཉིས་ཀྱི་ཉིན་མཚན་གྱི་དབྱུ་གུ་ནི་གོ་སླའོ། །ཉིན་མོ་དུ་དབང་བའི་ཆུ་ཚོད་ལ་བརྒྱད་ཀྱིས་བགོས་པས་ནོར་གྱི་ཐུན་ཕྱེད་དོ། །མཚན་མོ་ཡང་ནོར་ལྷས་བགོས་པས་ཐུན་ཕྱེད་ཅེས་ཏེ། འདི་ནི་མཚོན་ཆ་དར་ཅན་ལྟ་བུ་སྒྲ་གཅན་ལ་གལ་ཆེ། ཆུ་སྲང་ནི་བློས་སྤྱོད་
སྐར་མ་གཉིས་དང་། དབྱུ་གུ་བཅོ་ལྔས་ཁྱིམ་གཅིག་རྫོགས། དེས་གཞན་རྣམས་ཤེས་སོ། །གཞན་ཡང་ཞེས་པ་ནི་ཡན་ལག་ལྔ་རྩིས་ཀྱི་ཉིན་སྐར་དག་པ་ལ་ཟེར་རོ། །འདི་ཕྱོགས་ནི་ཟླ་བ་ལ་དབང་བའི་ཁྱིམ་བཅུ་གཉིས་ཀྱི་ཉི་མའི་འཕོ་བའོ། །ལུག་ལ་སོགས་པར་འཕོས་པའི་འདས་པའི་
ཞག་དུ་ལོན་གནས་གཉིས་སུ་བྱ་སྟེ། ཉི་མ་ཞག་རེ་ཞིང་ཆུ་ཚོད་བགོ་ཞིང་ཆུ་སྲང་ཉི་ཤུ་རྩ་ལྔ་ཟ་བས་སྟེང་བཞི་འོག་ཉི་ཤུ་རྩ་ལྔས་བསྒྱུར་རོ། །དྲུག་ཅུས་བགོས་ལྷག་དབྱེ། ནོར་སྟེང་དུ་གཞུག །ཕྱེད་ལྷག་ན་གཅིག་སྦྱིན་ནོ། །སྟེང་དུ་དྲུག་ཅུས་བགོ་བར་བྱ་ཞིང་། ནོར་གྱིས་ཆུ་སྲིན་ལ་སོགས་བྱང་བགྲོད་

203-1-93b

དྲུག་ལ་དབྲི། ཀར་ཀ་སོགས་ལྷོ་བགྲོད་དྲུག་ལ་བསྣན་པས་འཕོ་བའི་ཆུ་ཚོད་དག་པར་འགྱུར། ཆུ་ཚོད་དུ་འདས་ལྟ་བ་དེ། །རྒྱ་མཚོ་ཆུ་དང་ཟླ་བ་ལ། །ལུག་དང་སྲང་ལ་དྲུག་སྦྱིན་བྱ། །གླང་དང་བུ་མོ་རང་སར་གཞག །འཁྲིག་པ་སེང་གེ་བརྒྱད་དོར་བྱ། །ཀར་ཀ་གཉིས་ལ་བཅོ་བརྒྱད་དབྲི། །སྡིག་ཉ་གཉིས་
ལ་བཅུ་སྦྱིན་ཞིང་། །གཞུ་དང་ཆུ་སྲིན་བུམ་པ་ནི། །གསུམ་ལ་ཉི་མ་བྱིན་པ་ལ། །ལུག་དང་སྲང་ལ་དྲུག་སྦྱིན་བྱ། །ཆ་བདུན་གྲིབ་མར་བཅས་པས་བགོས་པས་ཐོབ་པའི་ནོར་ནི་སྔ་དྲོ་ཆུ་ཚོད་འདས་པ་ཡིན། ཕྱི་དྲོ་ལུས་པ་ཉིད་དུ་འགྱུར་རོ། །འདི་དུས་སྦྱོར་བཅུ་གཉིས་ལ་སོགས་ལ་ངོས་འཛིན་ན། དེའི་དུས་
ཀྱི་ཆུ་ཚོད་ནི་འདས་པ་དྲུག་ཅུས་བསྒྱུར་བར་བྱ། དེས་ནི་དབྱུ་གུ་ཡང་ཆུ་སྲང་གི་ཕུང་པོར་འགྱུར་རོ། །དེ་ལ་ལུག་ལ་ཉིས་བརྒྱ་ལྟ་བུ་ཁྱིམ་རང་རང་གིས་བགོའོ། །ལུག་སོགས་དྲུག་ལ་ཡས་ཀྱིས་དབྲི་ཞིང་། སྲང་སོགས་དྲུག་ལ་མས་ཀྱིས་དབྲིའོ། །མ་ལྡང་བ་དེ་ཏཏྐ་ལ་ཡིན་ནོ། །དེ་ནི་ཉིན་ཞག་
གཅིག་གི་བཅུ་གཉིས་ཆའོ། །འཕེལ་བ་དེ་ལས་གནས་ལྔ་བྱེད་ན། ལྷག་སུམ་ཅུས་བསྒྱུར་བ་ལ་ཁྱིམ་ཆུ་སྲང་གིས་བགོས་པས། ནོར་ནི་ཆ་ཤས་ཡིན་པས་ཏདྐཱལ་འོག་ཏུ་བྲིའོ། །ལྷག་དྲུག་ཅུས་བསྒྱུར་ཞིང་། ཐོབ་པ་དབྱུ་གུ་ཡིན་ཞིང་། དེའི་ལྷག་དྲུག་ཅུས་བསྒྱུར་བས་ཐོབ་པ་ཆུ་སྲང་ཡིན། དེའི་ལྷག་དྲུག་
གིས་བསྒྱུར་བས་ཐོབ་པ་དབུགས་ཡིན་ནོ། །གནས་ལྔ་ཞེས་ནི་དེ་ལ་ཟེར། །དུས་དྲུག་དག་གམ་ལྟ་བ་དང་། །དུམ་བུ་དྲུག་གི་དོན་དུ་ཡང་། །ཏངྐཱ་ལ་ཆུ་སྲང་སུམ་ཅུས་བསྒྱུར། །དེ་ལ་འོག་གི་ཆ་ཤས་གཞུག །དེའང་དྲུག་ཅུས་བསྒྱུར་ཞིང་ཆུ་ཚོད་གཞུག །སྟོང་དང་བརྒྱད་བརྒྱས་དེ་ལ་བགོ་བར་བྱ། །ནོར་ནི་
དུས་སྦྱོར་གཅིག་གི་རང་བཞིན་ཏེ། །གོང་གི་དེ་དང་མཉམ་ན་དག་པ་ཡིན། །དག་པར་མ་གྱུར་མཉམ་པའང་མིན་ནོ། །ཆ་ཤས་དྲུག་ཅུས་བསྒྱུར་ཆུ་ཚོད་སྟེང་དུ་གཞུག །དེ་ནི་དུམ་བུ་ལྔའི་དགོད་བྱ་ཡིན་ནོ། །དེ་ལ་དགུ་བརྒྱས་བགོས་ནོར་དུས་སྦྱོར་ཕྱེད་པའོ། །དྲུག་བརྒྱས་བགོས་ནོར་སུམ་ཆ་ཡིན། །
ཉིས་བརྒྱས་བགོས་ནོར་དགུ་ཆ་ཡིན། །བརྒྱ་དང་བཅུ་ཡིས་བགོས་ནོར་ནི། །བཅུ་གཉིས་ཆ་རུ་འགྱུར་བ་ལགས། །དྲུག་ཅུས་བགོས་པའི་ནོར་ནི་སུམ་ཅུའོ། །དེ་ལྟར་དུམ་བུ་དྲུག་སྟེ་འདི་རྣམས་ཐམས་ཅད་ལ་ཕྱེད་པས་ལྷག་ལ་རེ་རེ་སྟེང་དུ་སྦྱིན་པར་བྱའོ། །འདི་རྣམས་རྒྱུད་ཀྱི་བཅུད་ལྟ་བུ་ཡིན་ཞིང་།

203-1-94a

འོ་མའི་བཅུད་མར་ལྟ་བུའོ། །དུམ་དྲུག་གིས་ནི་གསལ་བའི་མིག་དང་འདྲ་སྟེ་ཐམས་ཅད་མཐོང་ངོ་། །དམག་དང་། རྐུན་མ། རྫས། བྱེད་ལས། བཟང་ངན། ཆགས་ཀ་ཐམས་ཅད་ལ་གནོད་དྲུག་རིམ་གྱིས་རྫས་དང་འདྲའོ། །དུས་འདི་རྩིས་རྣམས་ཀྱི་གཞི་
མ་ཡིན་པས་སྦྱིན་པར་བྱའོ། །ཁྱིམ་བདག་གལ་ཆེ་འདི་བཞིན་རྩིས་ཏེ། ལུག་དང་སྡིག་པའི་མིག་དམར་ཡིན་ནོ། །གླང་དང་སྲང་ནི་པ་བ་སངས་ཡིན་ནོ། །འཁྲིག་པ་བུ་མོ་ལྷག་པའི་ཞིང་ཡིན་ནོ། །ཀར་ཀཊ་ཟླ་བའི་ཁྱིམ་ཡིན་པས། སེང་གེ་ཉི་མའི་ཞིང་ཡིན། གཞུ་དང་ཉ་ནི་ཕུར་བུའི་
ཞིང་ཡིན། ཆུ་སྲིན་བུམ་པ་སྤེན་པའི་ཞིང་ལགས་པས་བདག་པོ་རྣམས་ཀྱི་འབྲས་བུ་བཞིན་བརྩིའོ། །བརྟན་གཡོ། ཞི་དྲག །ཕོ། མོ། སྡིག །བསོད། མཉམ། མི་མཉམ་རྣམས་ཞིབ་པར་རྒྱུད་ཉིད་ལ་གསལ་ཞིང་། ཏཏྐཱ་ལ་ནས་བགྲངས་པའི་བདུན་པ་ན་མཐོང་བ་ཡོད་པའོ། །རྐང་པ་ཞེས་
པ་ནི་ཞིབ་རྩིས་སོ། །སྟོབས་ནི་གོ་སླའོ། །དགྲ་གྲོགས་ནི་གལ་ཆེ་བས་རྒྱུད་ཉིད་ཇི་བཞིན་པར་བལྟའོ། །ཏངྐཱ་ལ་ན་མིག་དམར་ཡོད་ཅིང་། བདུན་པ་ན་ཕུར་བུ་ཡོད་ན་གཟའ་གཉིས་ཀའི་འབྲས་བུ་འབྱུང་ངོ་། །དེས་གཞན་ཡང་འགྲེའོ། །ཁམས་ནི་ཟླ་བ་ཕུར་བུ་ཡིན་ཞིང་། པ་སངས་མིག་
དམར་རྣམས་རྩ་བ་ཡིན་ནོ། །རྩ་བ་ན་ཤིང་དང་། གོས་དང་། རས་དང་། དར་ལ་སོགས་པ་རྫས་རྩ་བའི་རིགས་སོ། །ལྷག་པ་སྲོག་ཆགས་རིགས་ཡིན་ནོ། །ཉི་མ་སྤེན་པ་ནི་ལྷ་དང་རྐང་མངས་ཀྱི་རིགས་ཡིན་ནོ། །འདི་རྣམས་རྒྱུད་ཉིད་ལ་འཁོར་ཡང་བདག་པོ་གཟའ་ནད་ཡིན་པས་འབྲས་བུ་འབྱུང་
བ་ལ་སོགས་པ་མེད་དོ། །ལེའུ་གཉིས་པའོ།།      །།བསམ་པ་ཞེས་པ་ནས་དོན་གསལ་ཚིག་པ་ཡན་ཆད་ནི་ཞུ་བ་པོའི་མཚན་ཉིད་ནི་གལ་ཆེའོ། །སློབ་དཔོན་གྱི་མཚན་ཉིད་གོ་སླའོ།།      །།འདྲི་བའི་དུས་སུ་ཟུར་གསུམ་དང་། གྲུ་བཞིར་ཞི་བའི་གཟའ་ཤར་ཞིང་། གཞན་རྣམས་སུ་སྡིག་གཟའ་
ཤར་ན། འདྲི་བྱེད་ཀྱི་དོན་འགྲུབ་སྟེ། ཨུ་པ་ཙ་ཡ་འདི་ཁྱད་པར་དུ་དོན་གཉེར་བ་རིང་ཐུང་ལ་ཤིས་སོ། །ཏཏྐཱལ་ཞེས་པ་ནས། ཞིབ་ཏུ་བརྟག་ཡན་ཆད་ནི། དུས་སྦྱོར་དུམ་བུ་དྲུག་གི་བཟང་ངན། རིགས། རྙེད། མི་རྙེད། རྐུན་མ་ངོས་འཛིན། མ་བརྗོད་ལྐོག་གྱུར་གྱི་རྩིས་ཕྱི་ནང་རྒྱལ་ཕམ། འདུམ།

203-1-94b

མི་འདུམ། ཚེ་རིང་ཐུང་། འོང་མི་འོང་། སྦེད་པའི་ས། ཁ་དོག །རྨི་ལམ་རྣམས་བཤད་པས། རྒྱུད་ཉིད་ལས་ཤིན་ཏུ་ཞིབ་པར་གསུངས་ཏེ། བློས་ཞིབ་པར་བརྟག་གོ། །སྨྲ་ཤེས་པ་ཡན་ཆད་ཟས་དཀོན་མོད་ཀྱི་རྩིས་སོ། །རྐུན་མ་ངོས་འཛིན་ལོ་གྲངས་ཀྱིས་ངོས་འཛིན་པ་ནི་གོ་སླའོ། །བུ་མོ་སྐྱེ་བ་ལ་
སོགས་པ་གཞུང་ཉིད་ན་ཞིབ་ཅིང་མ་འགྲིག་པས་ཁོ་བོས་རྒྱས་པར་བཤད་དོ། །ལེའུ་གསུམ་པའོ།།      །།རྐང་པ་བརྒྱ་པའི་འཁོར་ལོ་འདིས། གཤིན་རྗེ་ལྟོ་བའི་ཙཀྲ་འདི་དག་བྱེད་པ་ཡིན་ནོ། །གལ་ཆེ་བ་ཐམས་ཅད་དུ་མིང་གི་སྐར་མ་ཤེས་ཤིང་མཐོང་བ་ནི་སྒྲ་གཅན་གྱི་རྐང་པ་དགུ་དང་ཉི་མའི་
ཉི་མ་དང་། མིག་དམར་གྱི་མེ་དང་། ཕུར་བུའི་དྲུག་དང་། སྤེན་པའི་ནོར་རྣམས་དང་། ལྷག་གི་བདུན་དང་། པ་བ་སངས་ཀྱི་ལྔ་པ་རྣམས་མཐོང་ངོ་། །ཟླ་བས་གཡོན་དུ་བསྐོར་བའི་ཉི་ཤུ་གཉིས་མཐོང་ངོ་། །འཁྱུད་པས་ལུས་ལ་ན་ཚ་སྣ་ཚོགས་པ་འབྱུང་ཞིང་། སྟོབས་བཞིས་འཇིགས་ཞེས་པ་ནི་
འདི་ཁོ་ནས་ཡིན་པས་མིང་སྤོ། གོས་བསྒྱུར་ཡུལ་ནས་འབྲོས་པ་ལ་སོགས་བྱའོ། །སོལ་བ་ནི་དྲང་སྲོང་གི་ནད་དང་། དུག་རོ་རྙིང་པ་དང་། མཛེ་ནད་དང་། གཅོང་ནད་ཀྱིས་ཟིན་ཞིང་། སྲོག་དང་བྲལ་བ་ལ་ཉེའོ། །དུ་བས་ནི་བློའི་སྡུག་བསྔལ་བ་དང་། གཏམ་ངན་འབྱུང་ངོ་། །སྟོང་གིས་སྣ་
ཁྲག་དང་། ཁྲག་ནད་འབྱུང་ངོ་། །འདི་དག་ཀུན་ལ་འཆི་བསླུའི་ལུགས་བཞིན། ལྷ་དང་རླུང་བཟུང་བ་དང་། དབང་ཕྱུག་གི་སྐྱབས་ཀྱིས་འཚོ་བར་བྱེད་དོ། །མཐོངས་ནི་གཞུང་ཉིད་ལ་གསལ་ལོ། །ཤ་ལ་ཀ་ཡིས་བག་མ་བརྩིའི། སྟོབས་བཞི་ཡིས་མི་དང་རྟ་ལ་སོགས་པའི་ཐུག་
དགྱེ་བ་བརྩིའོ། །ཉི་མ་གར་གནས་པ་ལས་དང་བྱ་བ་ཅི་བྱེད་ཀྱང་ངན་པས། ཨ་ཏ་མི་ཏ་ཡང་བརྩིའོ། །མདུང་ཆེན་ཆག་ཀྱང་བག་མ་དང་། དོན་གཉེར་བ་རྣམས་ལ་གལ་ཆེའོ། །གྲོང་དང་གྲོང་གི་བྱ་བ་ལ། ཕན་ཡོན་ཆེན་པོའི་ཙཀྲ་གལ་ཆེའོ། །པ་རི་གྷའི་ཙ་ཀྲ་ནི་དགོས་པ་ཆུང་ངོ་། །
བེ་ར་མུ་པའི་ཙཀྲ་ནི། ལོ་གཅིག་གི་ཆགས་ཀ་བརྟག་པ་ལ་དགོས་སོ། །ལེའུ་བཞི་པའོ།།      །།སྔགས་ལ་དྲག་པའི་ཕྱིར་ཨ་བ་ཀ་ཧ་ཞེས་བྱ་བའི་ཙཀྲའོ། །གླང་ཆེན་མཆེ་བའི་ཙཀྲ་འང་ཟེར་རོ། །འདི་ནི་འདིས་རྒྱལ་པོ་བྱ་བ་དང་། དམག་དཔོན་དང་། གྲལ་དཔོན་བྱ་བ་དང་།

203-1-95a

ལྷ་ཁང་བརྩིག་པ་དང་། ལྷ་བཞེངས་པ་དང་། རྔམས་ཆེ་བའི་ལས་ལ་མིག་གི་འབྲས་བཞིན་གལ་ཆེའོ། །བེ་ལ་སེ་གའང་འདིའི་ནང་ན་ཞིབ་པས་ལྟད་མོ་དང་སྟོན་མོ་གལ་ཆེའོ། །རུས་སྦལ་འཁོར་ལོས་ཡུལ་གྱི་བདེ་སྡུག་དང་། ལེགས་ཉེས་ཤེས་པ་ས་ཞི་དྲག་གི་གཟའ་ལ་
བལྟའོ། །དེས་པ་ཙཀྲ་ནི་རྒྱལ་པོའི་བླ་མཆོད་དང་། མི་དཔོན་གྱི་གཡོག་བྱེད་པ་དང་། རང་ལས་ཆེ་བ་རྣམས་བརྟག་གོ། །ལེའུ་ལྔ་པའོ།།      །།འཁོར་ལོ་དུས་གདན་ལ་བརྟེན་ནས། རླུང་རྒྱུ་བའི་ཡུན་ནམ་རིང་ཐུང་བལྟ་སྟེ། འཆི་ལྟས་དང་། ན་ཚ་དང་། ཁ་སྨྲས་དང་། དེ་རྣམས་ཤེས་ཏེ། 
རླུང་རྒྱུ་བ་ཡུན་རིང་ན་འཆི། འབྲིང་ན་ན། ཡུན་ཐུང་ན་ཁ་སྨྲས་འོང་ངོ་། །ཚེ་ཚད་ནི་ལོ་བདག་དང་སྐྱེ་སྐར་དྲི་སྟེ། བློ་ཞིབ་ན་བརྟན་ནོ། །གཟའི་ལོ་བདག་རེ་རེ་ཞིང་ཡང་དགེ་མི་དགེ་གཞུང་ཉིད་ཀྱིས་བགོའོ། །སྐྱེས་བུ་དུས་ཇི་ཙམ་ན་སྐྱེས་པའི་དུས་ཀྱི་ཉིན་སྐར་ཁ་ལ་དགོད། དེ་ནས་རྩིའོ། །འདི་ནས་སྐྱེ་
བ་བརྟག་པའི་ཆོ་ག་སྟེ། གཞོན་པ་ཁ་བྱང་གི་རྩིའོ། །ལེའུ་དྲུག་པའོ།།      །།ལམ་གྱི་འཁོར་ལོ་ལ་སྦྲུལ་གྱི་ལུས་ལ་རྩ་གསུམ་ལ་སོགས་པ་གཞུང་ཉིད་ཀྱིས་གོ་ཞིང་། དེ་དག་ལ་ཞི་དྲག་གི་གཟའ་གང་གནས་བལྟའོ། །ལམ་དུ་ཞུགས་པའི་ཉིན་ཞག་ལ་དབང་བའི་སྐར་མ་དང་། རྒྱུད་གཅིག་
པའི་རྩ་ལ་གཟའ་གང་གནས་པའི་འབྲས་བུ་འབྱུང་ངོ་། །ས་ཚིགས་ཇི་ཙམ་དུ་འབྱུང་ན། འགྲོ་སར་དཔག་ཚད་དུ་ཡོད་པ་དེ་རྩ་རྒྱུད་ལ་གནས་པའི་གཟའ་དེ་ཡིས་བསྒྱུར། འཁོར་ལོས་བགོ་ནོར་ནི་འགྲོ་ལ་མ་ཡིན། ལྷག་མ་བཞིས་བསྒྱུར། འཁོར་ལོས་ཐོབ་པ་ནི། མདའ་འཕེན་དྲུག་ཅུའམ་རྐང་པ་
གཅིག་ཡིན་ནོ། །ལྷག་མ་དྲུག་ཅུས་བསྒྱུར་ཅིང་ཐོབ་པ་ནི་མདའ་རྒྱང་གང་དུ་འགྱུར་བ་ཡིན་ནོ། །ས་ཡུལ་འདི་ནས་བརྩིས་པའི་དྲོ་ལམ་ཀྱང་ལ། མདའ་འཕེན་རྣམས་འདིའི་འབྲས་བུ་འབྱུང་ཞེས་བྱའོ། །རྒྱན་གྱི་ཙཀྲ་ནི་མིང་ཡིག་ཉེར་གཉིས་རང་གིས་བསྒྱུར་ཏེ། བརྒྱད་ཀྱིས་བགོས་པས་ཐོབ་པའི་
ལྷག་མ་ལ་བལྟའོ། །རྒྱལ་མཚན་ལ་སོགས་འཆར་རོ། །འདས་པའི་དབྱུ་གུ་ལ་བརྒྱད་ཀྱིས་བགོ། དེ་ནི་རྒྱལ་མཚན་པ་འཆར་རོ། །རེ་རེ་ཞིང་གཟའ་བདུན་གྱི་བདག་པོ་ཡང་ཡོད་དོ། །མིང་ཡིག་མཉམ་ན་འདུམ་ཞིང་། བཟའ་མིའང་འགྲོགས་ལུགས་ཡུན་རིང་ངོ་། །མི་མཉམ་ན་གང་མང་རྒྱལ་ལོ། །

203-1-95b

ཡ་དང་ཟུང་གཉིས་གཉིས་ཡ་རྒྱལ་བར་བཤད་དོ། །སྐྱེས་བུའི་ལུས་ལ་སྐར་མ་བཀོད་དོ། །ཟླ་བ་གནས་པའི་ཐོག་ཏུ་རྨ་འོང་ངོ་། །དགུ་ཆའི་དུམ་བུ་ནི་གཞུང་ཉིད་ནས་གསལ་ལོ། །ཏྲི་ཤུ་ལ་ཡི་ཙ་ཀྲས་ནི་འཁྲུག་པ་འོང་མི་འོང་དང་། མིང་སྐར་བལྟ་སྟེ་རྒྱལ་ཕམ་དང་རྩེད་མོ་དང་། བར་དང་ཡུལ་རྣམས་གོ་
སླའོ། །ཞབས་སྐུད་ཀྱི་ཙཀྲ་ནི་མ་བཀོད་དོ། །བརྟག་པའི་འཁོར་ལོའོ། །ཉིན་སྐར་ནས་མགོ་བཙུགས་ཏེ་སྐྱེས་བུའི་ལུས་ལ་དགོད་དོ། །དེ་ལ་རང་གི་མིང་སྐར་གར་བབས་བལྟའོ། །དགེ་སྡིག་གཞུང་ན་གསལ་ལོ། །འདི་ནི་ཆགས་ཀ་བརྟག་པའི་འཁོར་ལོའང་ཟེར་རོ། །རེ་མིག་བཅུ་བཞི་པའི་འཁོར་ལོ་
འདི། སྨིག་རྒྱུ་ལྟ་བུ་ལ་ཁྱད་པར་དུ་གལ་ཆེ་སྟེ་སྟེང་རྣམས་རྒྱལ་ཞིང་། འོག་མ་རྣམས་ཕམ་མོ། །རིགས་གསུམ་གྱི་འཁོར་ལོ་ནི་ལྷན་ཅིག་སྡོད་པ་རྣམས་ལ་བརྟག་སྟེ་གཟའ་མི་དང་དཔོན་གཡོག་གཤིས་མ་ལོག་པ་གལ་ཆེའོ། །མིག་ནི་ཁ་འཕོས་སོ། །ཨ་ཀ་ལ་སོགས་པ་སྡེ་བརྒྱད་ཀྱི་ཙཀྲ་ནི། སྤྱིར་རྒྱལ་
ཕམ་ཀུན་ལ་དགོས་ཤིང་། ཁྱད་པར་དུ། ཤོ་དང་རྒྱན་ལེན་པ་དང་། ཐུག་འགྱེད་པ་དང་། གླང་པོ་ཆེ་འཐབ་པ་རྣམས་ཀྱི་ལས་སོ། །འདབ་ཆགས་བརྒྱད་ནི་ལས་དང་བྱ་བ་གང་ལའང་དགོས་ཏེ། ཟླ་བ་ཞག་དུས་ཚོད་རྣམས་སྟོབས་ཆེ་བ་ལ་བྱའོ། །ཤར་དུ་རྒོད། ཉི་མ་འཕྲེད་ཟླ་ཐམས་ཅད་
ཚེས་གཅིག་དང་དགུ་འདི་རྣམས་ཨའི་མིང་ཅན་ཤར་དུ་སྟོབས་ཆེའོ། །ཚངས་པའི་ཙཀྲ་འདི་སྡོད་ས་ལ་བརྟག་སྟེ། གནོད་པ་བཞིས་ནི་སྲོག་དང་བྲལ་བར་འགྱུར་ཞིང་། གསུམ་གྱིས་ནི་ཡུན་རིང་། གཉིས་ཀྱིས་ཁ་སྨྲས་འོང་། གཅིག་གིས་དོན་ཉམས། དེ་བཞིན་དུ་ཞི་གཟའ་ལ་
ཡོན་ཏན་གྲངས་མང་བ་བཞིན་ཆེའོ། །འདྲི་བའི་ཉིན་པར་སྐར་མ་གང་ལ་གནས་པ་ནས་ཁ་ལ་དགོད་ཅིང་། ཀླུའི་འཁོར་ལོས་ནད་པ་རྣམས་བརྟགས་ཏེ་བདེན་པས་བརྟག་གོ། །དཔོན་གཡོག་དང་བཟའ་མི། རྗེ་འབངས། དཔོན་པོ་རྣམས་ལ་ཟམ་པ། མདའ་གཅིག་གི་སྟེང་ལ། ལས་ཚུར་
ཐུག་པ་བཞིན་ཏེ། ཤིན་ཏུ་བདེན་ཞིང་གལ་ཆེ་བས་རྩ་གསུམ་ལ་བལྟའོ། །གདུགས་ཀྱི་འཁོར་ལོས་ནི་ཕྱོགས་ཀྱི་རྒྱལ་པོ་སྟོན་ཏེ་བདེན་པ་ཉུང་ངོ་། །ཐ་སྐར་ལ་སོགས་ཞེས་པ་ནས། རིམ་པ་བཞིན་དུ་ཞེས་པ་ཡན་ཆད་ནི། ཡུལ་དེ་ལ་སྐར་མ་དང་ཟོང་རྣམས་དགོད་པའི་ལུགས་སོ། །

203-1-96a

སྤེན་པ་གང་ལ་གནས་པ་ནས་མི་རྙེད་ཅིང་དཀོན་པའོ། །འཕོ་བའི་རྒྱུ་སྐར་ཚེས་བསྲེས་ཏེ་ཞེས་པའང་འདི་དང་སྦྱར་རོ། །སེང་གེ་བརྟན་ནི་མིང་དང་འདྲ་སྟེ། བདེན་པ་བཞི་བརྟན་ནོ། །མདའ་གཞུ་ནི་སྐྱེས་བུ་མདའ་འཛིན་རྣམས་ལ་དགོས་ཏེ། གཡས་གཡོན་ནི་སྟེང་འོག་གོ། །དུང་
གི་སྐྱེས་སྐར་དང་མིང་སྐར། སྟོད་ལ་སོང་ན་འཆི། ན། འཕམ། རྨ་འབབ་པོ། །རྩེ་ལ་སོང་ན་ཐམས་ཅད་རྒྱལ་ལོ། །རལ་གྲི་ནི་གོ་སླའོ། །ཡ་ཏྲན་ལྟད་མོ་སྟེ། འདི་བུམ་པ་བཞིས་བརྟག་གོ། །ཉི་མ་གནས་པའི་ཕྱོགས་ལྟད་མོ་ལ་སོགས་བྱས་ན་འཆི་ཞིང་རྨ་འབབ། རྟ་འགྱེལ། ལུག་འཆི། གླང་ཆེན་
གུམ་རྩེད་མོ་བསྡུམས་སྟོང་པར་འགྲོའོ། །ཉི་མ་དང་བྲལ་ན་དགོས་པས་རང་རྒྱུད་གང་སྟེ་བཟང་ངོ་། །བྱེས་སུ་སོང་བ་རྣམས་ལ་པདྨའི་འཁོར་ལོས་བརྟག་སྟེ། ཤིན་ཏུ་བདེན་ཞིང་གཞུང་ཉིད་ནམ་སྦས་པས་གསལ་ལོ། །བྲེའི་འཁོར་ལོ་ནི། ཐུབ་པའི་ཚོགས་རྣམས་ལ་གཞན་དུ་ཞིབ་པར་བཤད་དོ། །
ལེའུ་བདུན་པའོ།།      །།བྱིས་པ་སྐྱོང་གི་རྫོང་ནི་གཞུང་ནས་ཇི་ལྟར་བཤད་པ་བཞིན། ཁྱད་པར་བསྲུངས་པ་རྣམས་ལ་གཅེས་སོ། །རྫོང་དང་། རྫོང་དག་གི་མིང་སྐར་ལ་དགྲ་མ་དར་གཅེས་སོ། །བྷི་ཏྲིའང་གལ་ཆེའོ། །སྲིན་པོའི་རྫོང་འདིས་གཞན་འབེབས་པ་ལ་གལ་ཆེ་སྟེ། དུས་རཱ་ཧུ་ལ་རྒྱལ་
པོ་ཡིན་པས་སྟོབས་ཆེའོ། །གཟའ་གཞན་རྣམས་བློན་པོ་ཡིན་པས་གཞུག་པ་བསྟན་ཏོ། །རྩ་བའི་སྒྲ་གཅན་ལ་རྣ་བ་གཡས་པ་བསྟན། སྐར་མ་རྣམས་ཟས་ཀྱིས་བཅོས་ཤིང་། གཟའ་བདུན་གྱི་གོས་ཆས་སུ་ཞུགས་ཏེ། དུས་སྦྱོར་གྱི་གནས་བརྩི་ཞིང་ཉི་མ་ལ་རྒྱབ་བསྟན། ཟླ་བ་མདུན་དུ་བཞག་སྟེ།
ཐུན་ཕྱེད་པའི་སྒྲ་གཅན་དང་བསྡོངས་ནས་འབེབས་པ་ཡིན་ཏེ། རྩི་ཏའི་དོན་ཁོ་ནའོ། །ཆུའི་མཚན་ཉིད་ལ་ཡུལ་དེའི་མིའི་འདྲི་ཚིག་དང་པོ་བཟུང་སྟེ་བརྟག་གོ། །སྡེ་ཚན་འདོམ། དབྱངས་འཁྲུ། གསལ་བྱེད་སོར། དེས་ཤེས་སོ། །བྷི་ཚན་རཱ་ཧུ་ནི་རྫོང་བདག་གལ་ཆེ་བས་བརྟག་གོ། །ཉི་ཟླའི་
སྟོབས་ལས་ཆེའོ། །དྲག་གཟའ་ནང་དུ་ཆུད། ཞི་གཟའ་ཕྱི་རུ་གནས་ན། འབེབས་མི་འགྲུབ་པ་རྣམས་ཀྱི་བསམ་པ་འགྲུབ། དེ་ལས་བཟློག་ན་བསྲུངས་མཁན་རྒྱལ་ལོ། །རིགས་ཀྱི་ནུས་པ་ནི་རྩིས་བདེའོ། །ལེའུ་བརྒྱད་པའོ།།      །།གྲུ་བཞི་ཞེས་པ་ནས། རྣམ་པར་ཕྱེད་ཞེས་པ་ཡན་ཆད་ནི།

203-1-96b

རཱ་ཧུའི་རྩིས་རྣམ་པ་དགུ་སྟེ། མཁར་ལེན་ལ་ཁྱིམ་གྱི་རཱ་ཧུ་གཅེས་སོ། །དྲག་ལས་ལ་རྩ་བའི་རཱ་ཧུ་གཅེས་སོ། །གཏད་ལ་ཡུད་ཙམ་གཅེས་སོ། །རིམ་གྲོ་ལ་ཚེས་ཀྱི་རཱ་ཧུ་གཅེས་སོ། །ས་བོན་ལ་སོགས་ལ་དཀར་ནག་གི་རཱ་ཧུ་གཅེས་སོ། །བག་མ་ལ་ཉི་མ་ལ་སོགས་པའི་རཱ་ཧུ་གཅེས་སོ། །ཐུན་ཕྱེད་
པ་ནི་མཚོན་ལ་ངར་གྱིས་ཞུགས་པ་དང་འདྲ་སྟེ། ཀུན་ལ་གཅེས་པས་འདི་ཁོ་ན་བལྟའོ། །ལེའུ་དགུ་པའོ།།      །།སྤེན་པའི་ཙཀྲ་འདིས་གཞོན་པའི་སྐྱེས་སྐར་དང་རྒན་པའི་མིང་སྐར་བལྟ་སྟེ། དགེ་སྡིག་གཞུང་ནས་བཤད་དོ། །བྱ་ཁྱུང་ནི་གོ་སླ་སྟེ་བདུན་དུ་རུང་ངོ་། །བིཥྚི་བརྒྱད་པོ་འདི་ནི། 
དོན་བསྒྲུབ་པ་དང་། འགྲོ་དོན་བྱ་བ་དང་། ཁྱད་པར་དུ་ལྷ་འདྲེའི་ལས་བྱེད་ན་གལ་ཆེ་ཞིང་དགོས་སོ། །ཚེས་ལ་དབང་བས་བརྟག་པ་ཞིབ་ཏུ་བྱའོ། །རྣལ་འབྱོར་མ་བརྒྱད་ནི། བྲེའི་འཁོར་ལོ་དང་། ལམ་ལྔ་དང་མཐུན་ན་ནུས་པ་ཆེ་བས། ཕན་གནོད་ཀྱི་འཁོར་ལོ་ལ་གཅེས་སོ། །དུས་སྦྱོར་བྱེད་
པ་འདི་རྣམས་མངོན་ཡང་ནུས་པ་ཆུང་བས་བརྟག་པ་དཀའོ། །རིགས་ལྡན་ནི་ཀླུ་བརྒྱད་ཡོད་དེ། དེ་བཞིན་དུ་གཟའ་བདུན། རཱ་ཧུ་དང་བརྒྱད་ཡོད་པས། ཐུན་ཕྱེད་པའི་རཱ་ཧུ་ལ་བལྟས་ཏེ། རིག་ལྡན་དུས་སུ་ལས་ཅིའང་སྤང་ཞིང་། ཁྱད་པར་དུ་ཟས། སྨན། གཏར། བསྲེག །ནད་པའི་ལས་རྣམས་སྤང་
ངོ་། །དགོས་ནོར་ཀུན་འབྱུང་ཞིང་། ཆ་ཤས་ཕྲ་བ་གཏན་ལ་འབེབས་ཤིང་། གནད་ཆེ་བས་གདམས་པ་ཡང་འདི་ཁོ་ན་ཟབ་པོ། །རྒྱུད་ཀྱི་འཁྲུགས་བསྡེབས་དང་། མང་བ་བསྡུས་ཤིང་ཉུང་བ་བཤད་དེ། གལ་ཆེ་བ་རྣམས་ཞིབ་ཏུ་བྱས་ལ། མི་གོ་བ་རྣམས་གོ་སླ་བར་སྨོས་པའོ། །
མིག་ནང་ནས་འབྲས་བུ་བཞིན། འདི་དང་རྒྱུད་དོ། །ལེའུ་བཅུ་པའོ།།      །།དཔལ་གཙུག་གི་ནོར་བུ་ཞེས་བྱ་བ་རྫོགས་སོ།།      །།རྒྱ་གར་ཤར་ཕྱོགས་ཀྱི་པཎྜི་ཏ་དཔལ་ལྷན་ཅིག་སྐྱེས་པའི་ཞལ་སྔ་ནས་དང་། །ཨུ་རྒྱན་པ་རིན་ཆེན་དཔལ་གྱིས་ལྗོངས་ཏེ་རཱ་ཧུའི་ཏིར་བསྒྱུར་
བའོ།།      །།༄༅༅། །རྒྱ་གར་སྐད་དུ། ཨཱ་ཡུ་ག་ཎི་ཏ་ཕ་ལ་པྲ་ཀ་ཤ་ནཱ་མ། བོད་སྐད་དུ། ཚེ་རྩིས་ཀྱི་འབྲས་བུ་གསལ་བར་བྱེད་པ་ཞེས་བྱ་བ། འཇམ་པའི་དབྱངས་ལ་ཕྱག་འཚལ་ལོ། །གནས་སྐབས་བཞིན་ཤེས་སྐྱེས་བུ་ཡིས། །དང་པོའི་གནས་སྐབས་གསལ་འདོད་ན། །མཁའ་

203-1-97a

ཉི་དྲུག་སོགས་ལོ་ཡིས་བསྒྱུར། །དེ་ལ་མཁའ་ཉིས་བགོས་ཐོབ་ལོ། །དག་ན་ཀུན་བསྡོམས་མཁའ་ཉིད་གྲུབ། །སོ་སོའི་མེ་རྣམས་མཁའ་དུས་མེས། །བསྒྱུར་ཏེ་མཁའ་ཉིས་རྙེད་བརྟན་པའོ། །རང་རང་བརྟན་པ་དྲུག་སོགས་བསྒྱུར། །མཁའ་དུས་མེ་ཡིས་ཐོབ་པ་ལོ། །
ལྷག་མ་མཁའ་མེས་ཐོབ་ཟླ་བ། །དེ་ཡི་ལྷག་མ་ཞག་ཏུ་འགྱུར། །དག་ན་རང་ལོའི་འགྲོ་ལྡོག་ངེས། །དང་པོའི་ཆ་ཤས་དེས་རྒྱས་ཤེས། །བརྒྱ་སོགས་གསུམ་ལའང་དྲུག་ལ་སོགས། །གཟའ་དགུ་སོ་སོའི་ལོ་ཡིས་བསྒྲེ། །མཁའ་དང་ཉི་མས་ཐོབ་པ་ལོ། །ལྷག་ལ་ནམ་མཁའ་མེ་ཡིས་
བསྒྲེ། །ཐོབ་པ་ཟླ་བ་ལྷག་མ་ཞག །དེ་ནས་སོ་སོའི་ལོ་རྣམས་ཀུན། །མཁའ་དུས་མེ་ཡིས་བསྒྱུར་བར་བྱ། །ཟླ་བ་མཁའ་མེས་བསྒྲེས་པ་སྦྱིན། །མཁའ་རོས་རྙེད་པ་བརྟན་པ་ཞག །ལྷག་མ་དྲུག་ཅུས་ཐོབ་ཆུ་ཚོད། །དེ་ནས་རང་རང་བརྟན་པ་རྣམས། །དྲུག་ལ་སོགས་པའི་རང་ལོས་བསྒྲེ། །མཁའ་
དུས་མེས་བགོས་ཐོབ་པ་ལོ། །གལ་ཏེ་རྙེད་པར་མ་གྱུར་ན། །མཁའ་མེས་བགོས་པ་ཟླ་བ་བྱ། །དེ་ཡི་ལྷག་མ་ཞག་ཏུ་འགྱུར། །དག་ན་ལྔ་སོགས་རང་གི་ལོ། །དགུ་ཚན་རེ་ལ་འགྲོ་ལྡོག་ངེས། །ཆ་ཤས་ཕྱི་མ་རྒྱས་པའོ། །ཆ་ཤས་རེ་རེ་དྲུག་ཆ་རེ། །ཕྲི་བས་བརྟན་པའང་དྲུག་ཆ་འབྲི། །དེ་ནི་
རྩིས་ཀྱི་གཞི་མ་ཡིན། །བསྒྱུར་དང་འགོད་བྱེད་མཚུངས་པར་ལྡན། །དེ་ལྟར་ཟླ་ཀླུ་རྣམས་གཞི་ཤེས། །གཞན་ཡང་ཚེ་ཡི་སྣོད་འབྲིད་དང་། །བསླུ་ཞིང་བསྲིང་བའི་ཆོ་ག་རྣམས། །ཁོང་དུ་ཆུད་ནས་སྟོན་པར་གྱིས། །རྡོ་རྗེའི་ཚིག་འབྱེད་ལྡེ་མིག་འདི། །ཇི་སྙེད་མཁྱེན་པས་བསྒྱུར་བའོ། །ཚེ་
འབྲས་ཀྱི་རྩིས་གསལ་བར་བྱེད་པ་མ་ན་པུ་རུ་ཥས་མཛད་པ། ཨྠི་ནི་ཀ་ར་ཀ་ཊའི་བྲམ་ཟེ་ལག་མ་ཏི་དང་། མཁའ་འགྲོ་རྡོ་རྗེས་བསྒྱུར།།      ༄༅༅། །རྒྱ་གར་སྐད་དུ། སྭ་རོད་ཡ་ཨརྠ་སཾ་གྲ་ཧ། བོད་སྐད་དུ། དབྱངས་འཆར་བའི་དོན་བསྡུས་པ། འཕགས་པ་འཇམ་དཔལ་
གཞོན་ནུར་གྱུར་པ་ལ་ཕྱག་འཚལ་ལོ། །མགོན་པོ་དུས་གསུམ་སྒྲིབ་པ་མེད། །ཐམས་ཅད་མཁྱེན་ལ་ཕྱག་འཚལ་ནས། །དགོས་པ་ཐམས་ཅད་བྱེད་པ་ཡི། །རྒྱུད་ཀྱི་དོན་བསྡུས་བཤད་པར་བྱ། །གཡུལ་ལས་རྒྱལ་བར་འདོད་པ་ཡིས། །དབྱངས་འཆར་རྒྱུད་ཀྱི་དོན་བསྒྲུབ་པ། །ལེགས་

203-1-97b

བརྟགས་ལས་ཀུན་བྱེད་པ་ཡིན། །དགའ་བ་སྟེར་འདི་མཉན་པར་གྱིས། །གང་དུ་ཡིད་ནི་དག་པ་ལ། །མི་རྟག་ཕྱིར་ནི་འདི་མི་དགོས། །འཇིག་རྟེན་གསུམ་གྱི་བྱེད་པའོ། །སེམས་འདི་གཅིག་པུ་ཡིན་པའི་ཕྱིར། །དུས་གསུམ་དུས་མེད་མ་རྟོགས་པ། །བདེ་བ་འདོད་པས་འདི་བསྒྲུབ་བྱ། །སྡིག་པའི་
གཟའ་ཡིས་གནོད་བྱས་པས། །སྐར་མ་ཇི་བཞིན་ལས་མི་བཟང་། །ཁྱིམ་དང་འགྲོས་ཀྱི་བྱེ་བྲག་གིས། །གཟའ་ཡི་ལས་ཀྱང་སོ་སོར་མཐོང་། །ཇི་ལྟར་གསུངས་པའི་བདག་པོ་རྣམས། །གནོད་པའི་དབང་གིས་གཞན་དུ་འགྱུར། །འདི་ལྟར་མཁན་པོ་འདྲི་བྱེད་དང་། །རྒྱུ་དང་འབྲས་བུ་བཞི་
ཞེས་དྲན། །མཁན་པོ་མཁས་ཤིང་བྱེ་བྲག་ཤེས། །སྤྲོ་ཞིང་བློ་གསལ་ཡིད་གཞུངས་པ། །འདྲི་བྱེད་ལེའུ་གསུམ་པ་ལས། །ཇི་ལྟར་གསུངས་པའི་མཚན་ཉིད་ཅན། །རྒྱུ་ཡི་མཚན་ཉིད་ཅེས་བྱ་བ། །ལུས་ངག་ཡིད་ཀྱི་བྱེད་པ་སྟེ། །རེས་ཀྱི་གཟའ་དང་རྒྱུ་སྐར་དང་། །བྱེད་སྦྱོར་ཚེས་ཀྱི་ཡན་
ལག་དང་། །གཟའ་རྣམས་ཁྱིམ་ལ་འཁོད་པ་དང་། །དུས་སྦྱོར་ཐུན་ཚོད་བྱེ་བྲག་རྣམས། །ལམ་ལྔའི་རྣམ་པར་ཤེས་པ་དང་། །དབྱངས་དང་གསལ་བྱེད་འཆར་ནུབ་དང་། །ལྟས་དང་ཡི་གེའི་བྱེ་བྲག་དེ། །འདི་ལ་ངེས་པར་ཤེས་པར་བྱ། །མཐོང་དང་འབྲས་བུ་གཉིས་ཀྱིས་ཀ །འབྲས་བུ་
ཐམས་ཅད་བསྡུས་པ་ཡིན། །མཐོང་བ་རྒྱལ་པོ་བློན་པོ་དང་། །བུད་མེད་དམག་དང་མཚོན་ཆ་དང་། །གཏོང་ལེན་སྲིད་སྡེ་འབྲུ་ནད་དང་། །ཟས་དང་དཔའ་དར་བཤེས་དང་ནི། །ཕན་ཚུན་མཐུན་པ་ཞེས་བྱ་བ། །དེ་ལྟར་བཅུ་གཉིས་བསྟན་པ་ཡིན། །གནས་ཀྱི་གཟའ་དགུ་རྒྱལ་པོས་ཏེ། །བཀའ་
སྩལ་གང་གསུངས་ཐོང་བར་བྱ། །ཁྱེད་ཀྱི་རྒྱུ་སྐར་བློན་པོ་སྟེ། །རྗེ་ཡི་ཁ་ལོ་སྒྱུར་བ་ཡིན། །ཡན་ལག་ལྔ་བསྡུས་དམག་དཔུང་སྟེ། །བཟང་ངན་གང་མང་བལྟ་བར་བྱ། །ཏཏྐཱལ་དུས་སྦྱོར་མཚོན་ཆ་སྟེ། །ཐེབས་ན་འགྱུར་བ་མེད་པ་ཡིན། །རང་གི་བསོད་ནམས་བུད་མེད་འདྲ། །མོ་ངག་དབང་
དུ་ཀུན་ཀྱང་འགྲོ། །ཧོམ་ར་ཐུན་ཕྱེད་ལས་རྣམས་ནི། །གཡུལ་གྱི་མཚོན་ཆ་གཏོང་ལེན་འདྲ། །འདི་ལ་བསྒྲིམས་ཏེ་སྤང་བླང་བྱ། །ལྟས་ཀུན་སྲིད་སྡེ་ཉིད་ཡིན་ཏེ། །དང་པོར་ཅི་སྣང་བརྟག་པར་བྱ། །ལམ་ལྔ་ནད་པའི་ཟས་དང་འདྲ། །འཕྲལ་དུ་ཕན་གནོད་བྱེད་པ་ཡིན། །ལྡང་དུས་སྔ་

203-1-98a

དྲོའི་ཟས་དང་འདྲ། །ཉིན་གཅིག་དེ་ཡི་འབྲས་བུ་བྱེད། །གསལ་བྱེད་དབྱངས་འཆར་དཔའ་སྔར་འདྲ། །འཆར་ནུབ་དར་རྒུད་བརྟག་པར་བྱ། །མིང་དང་ཕོ་ཉའི་ཡི་གེའི་རྣམས། །སྔར་འདྲིས་མི་དང་འདྲ་བས་ན། །ཅིར་ཕུབ་ཏུ་ཡང་ཤེས་པ་ཡིན། །དུས་སྦྱོར་བྱེ་བྲག་ཕྲ་
བ་ཡི། །དུས་སྦྱོར་བྱེ་བྲག་གང་ཡིན་པ། །འཁུས་པའི་མི་དང་འདྲ་བ་ཡིན། །བཟང་ངན་ཐམས་ཅད་འདི་ཡིས་བྱེད། །ཐུན་མོང་དང་ནི་ཁྱད་པར་དེ། །འབྲས་བུ་རྣམ་པ་གཉིས་སུ་དྲན། །འདྲི་བྱེད་ལུས་ཀྱི་གནས་སྐབས་ལ། །སྡིག་ཅན་གནོད་པའི་མཚན་ཉིད་རྣམས། །དབྱངས་དང་གསལ་
བྱེད་དར་ནུབ་དང་། །ཤ་ལ་ཀ་ཡི་ཙཀྲ་དང་། །བརྒྱད་ཅུ་རྩ་གཅིག་འཁོར་ལོ་དང་། །གླང་ཆེན་མཆེ་བའི་མཚན་ཉིད་དང་། །ཚངས་པ་ཀླུ་དང་སྦྲུལ་དང་ནི། །བི་ཆིན་རཱ་ཧུའི་འཁོར་ལོ་དང་། །རཱ་ཧུ་གདོང་དང་སྤེན་པ་དང་། །བྱ་ཁྱུང་འཁོར་ལོ་རྣམས་ལ་བརྟག །ཁྱོ་ཤུག་ལ་སོགས་ལྷན་ཅིག་ཏུ། །གནས་
པ་རྣམས་ལ་མིང་ཡིག་དང་། །རིགས་གསུམ་སྟོབས་ཀྱི་བྱེ་བྲག་རྣམས། །ཇི་ལྟར་གནས་པ་བརྟག་པར་བྱ། །ཁྱད་པར་འབྲས་བུ་ཅི་སྙེད་པ། །རང་རང་ལས་ལ་ཤིས་པ་བརྟག །ལམ་ལྔས་འཕྲལ་གྱི་བྱ་བ་བརྟག །དབྱངས་འཆར་དར་རྒུད་ལས་ལ་བརྟག །ཕོ་ཉའི་བྱ་བ་ཐམས་ཅད་ལ། །
ཏཏྐཱལ་དུས་སྦྱོར་བརྟག་པར་བྱ། །གཡུལ་དུ་ཆས་པར་འདོད་པའི་ཚེ། །ལྟས་ཀྱི་རིམ་པ་བརྟག་པར་བྱ། །ཟོང་ནི་འཕོ་བའི་དུས་ཚོད་བརྟག །ཆོམ་རྐུན་མིང་ལ་བརྟག་པར་བྱ། །སྦྲུམ་མ་ཕོ་ཉའི་མིང་ལ་བརྟག །དོན་ནི་ཕོ་ཉའི་གསལ་བྱེད་ལ། །སྐྱེས་སྐར་ཞག་གྲངས་ལྷག་མས་བརྟག །ཉིན་
གཅིག་དགེ་སྡིག་ལྡང་དུ་བརྟག །ཏཏྐཱལ་སྐར་མའི་བྱེ་བྲག་བརྟག །ཤ་ར་ཀ་ཡི་འཁོར་ལོར་བརྟག །ཡུལ་རྣམས་མཚན་ཉིད་ཅེས་བྱ་བ། །ཀུརྨའི་ཙཀྲ་བརྟག་པར་བྱ། །གོང་མའི་གནས་སུ་འགྲོ་བ་ན། །སེ་བའི་ཙཀྲ་བརྟག་པར་བྱ། །འཆི་ལྟས་རྣམས་ཀྱི་མཚན་ཉིད་ནི། །དུས་ཀྱི་འཁོར་ལོ་
ལས་ཤེས་བྱ། །ཇི་ལྟར་ལུས་ནི་གནས་པ་ལས། །ཚེ་ཡི་གནས་སྐབས་འབྲས་བུ་བརྟག །བསོད་ནམས་སྡིག་པའི་བྱེ་བྲག་གིས། །འདི་ཡི་འབྲས་བུ་ཞེས་སུ་སྨྲ། །ཇི་ལྟར་སྐྱེས་པའི་འདུ་ཤེས་ལས། །ཛཱ་ཏིའི་ཙཀྲ་བརྟག་པར་བྱ། །ལམ་ཞུགས་ལམ་གྱི་འཁོར་ལོར་བརྟག །དཀར་པོའི་

203-1-98b

འཁོར་ལོས་བུད་མེད་བརྟག །རྔོན་པའི་འཁོར་ལོས་རི་དྭགས་བརྟག །རྒྱན་གྱི་འཁོར་ལོས་སྟོབས་ལ་བརྟག །རྒྱལ་འཕམ་མིང་གི་ཡི་གེས་བརྟག །ཐུན་མོང་རྨ་ནི་ཏྲི་ཤཱུ་ལ། །བྱེ་བྲག་རྨ་ནི་མ་འཁོར་ལོས། །རིམ་པ་བཞིན་དུ་བརྟག་པར་བྱ། །ཚངས་པའི་འཁོར་ལོས་གནས་སྐབས་བརྟག །
གདུགས་ཀྱི་འཁོར་ལོས་ཤར་ནུབ་དང་། །དབུས་ཀྱི་རྒྱལ་པོའི་ལེགས་ཉེས་བརྟག །སེང་གེ་གདན་གྱི་འཁོར་ལོས་ཀྱང་། །ལྷོ་བྱང་དབུས་ཀྱི་རྒྱལ་པོ་དང་། །ནོར་བུ་རྟ་དང་གླང་པོ་ཆེ། །པོ་ཏི་གསེར་དང་ཆོས་རྣམས་བརྟག །མདའ་གཞུའི་ཙཀྲས་དེ་ཉིད་བརྟག །རལ་གྲིའི་ཙཀྲས་དེ་ཉིད་བརྟག །
རལ་གྲི་བཞི་ཡིས་གསོད་པ་དག །བུམ་པའི་ཙཀྲས་པ་ཏྲ་བརྟག །པདྨའི་ཙཀྲས་བྱེས་འགྲོ་བརྟག །བྲེ་ཡི་ཙཀྲས་སྦྲུམ་མ་བརྟག །བསྲུང་དང་འཇོམས་པའི་ཙཀྲ་ལས། །རྫོང་གི་འཁོར་ལོ་བཤད་པ་ཡིན། །བུམ་པའི་ཙཀྲས་ཁྲོན་པ་བརྟག །དྲག་པོའི་ལས་ལ་བིཥྚི་བརྟག །གཡུལ་དུ་
མཁའ་འགྲོ་མ་བརྒྱད་བརྟག །དུས་ཚོད་གཟེམ་པར་བྱ་བ་ནི། །དུས་སྦྱོར་ཕྱེད་དང་ཐུན་ཕྱེད་ཡིན། །ཟླ་བའི་སྙིགས་མ་བྱ་བ་བརྟག །འཕོ་བའི་བརྟག་པ་འཕོ་བ་ཡིས། །དགེ་སྡིག་བྱེ་བྲག་ཤེས་པར་བྱ། །འདི་ལྟར་འཁོར་ལོ་ཇི་སྙེད་པ། །ལྷ་ཡི་དབང་པོས་གསུངས་པ་ལ། །ལམ་ལྔའི་རྣམ་པར་
ཤེས་པ་དང་། །དུས་ཀྱི་འཁོར་ལོའི་ཆོ་ག་བཤད། །རྡུལ་ཚོན་དཀྱིལ་འཁོར་དམ་པ་རུ། །མི་རྣམས་འཇུག་པ་བྱས་ལ་བྱིན། །དུས་ཀྱི་འཁོར་ལོའི་བྱེད་པ་ནི། །འདོད་ལྷ་མཆོད་དེ་བསྟེན་པར་བྱ། །རྗེས་སུ་བསྔགས་པའི་ཚིགས་བཅད་སྟོང་། །དབུ་ཞབས་དུམ་བུར་མ་ཡིན་པ། །དེ་ལྟར་བདག་
པོ་རྣམས་འབྱུང་མོད། །ཇི་སྐད་གསུངས་པའི་ཆོ་ག་རྣམས། །སྐད་ཅིག་རེ་རེ་ལེགས་བརྟགས་པས། །བྱེ་བྲག་མ་འཁྲུལ་ཤེས་པར་བྱ། །ཡང་དག་ངེས་པ་ཐུབ་པའི་མི། །གནོད་པ་ཀུན་གྱིས་མི་འཇིགས་ཤིང་། །ཚེ་རིང་ཕུན་སུམ་ཚོགས་པ་དང་། །གནས་སྐབས་ཀུན་དུ་བདེ་ཐོབ་འགྱུར། །
དབྱངས་འཆར་བའི་དོན་བསྡུས་པ། པཎྜི་ཏ་ཆེན་པོ་སེང་གེའི་གོ་ཆས་མཛད་པ་རྫོགས་སོ།།      །།རྒྱ་གར་གྱི་མཁན་པོ་པཎྜི་ཤྲཱི་ཛ་ཡ་ཨཱ་ནནྡ་དང་། ལོ་ཙཱ་བ་དགེ་སློང་རྨོངས་པའི་གཉེན་པོ་དགོས་འདོད་ཐམས་ཅད་འབྱུང་བས་བལ་ཡུལ་རྣལ་འབྱོར་པའི་གཙུག་ལག་ཁང་དུ་ཞུས་ཤིང་བསྒྱུར་ཏེ་

203-1-99a

གཏན་ལ་ཕབ་པའོ།།      ༄༅༅། །རྒྱ་གར་སྐད་དུ། སྭ་རོ་ད་ཡ་ཀཱ་ལ་ཡུ་ག་ཕ་ལ་ཨུ་པ་དེ་ཤ །བོད་སྐད་དུ། དབྱངས་འཆར་བའི་དུས་སྦྱོར་གྱི་འབྲས་བུ་ཉེ་བར་མཁོ་བ། ཨཱརྱ་མཉྫུ་ཤྲི་ཡེ་ནཱ་མཿ། ལུག་གི་དུས་སྦྱོར་ཤར་མ་ཐག་ཏུ། དགྲ་དང་འཐབ་པ་
དང་དབང་བསྐུར་བ་དང་། འཐབ་རྩོད་ཀྱི་ལས་དང་། ཁམས་ལ་སོགས་པ་ལ་སྦ་བ་དང་། རང་དང་གཞན་འབྲེལ་པར་བྱེད་པ་ལ་སོགས་པའི་ལས་བྱའོ། །གླང་གི་དུས་སྦྱོར་ཤར་བ་དང་། བག་མ་དང་། བརྟག་པའི་ལས་བྱའོ། །ཁང་པའི་བྱ་བ་དང་། རང་གི་གནས་སུ་གཞུག་པ་དང་། གཞོན་
ནུ་མའི་གོས་དང་། རྒྱན་ལ་སོགས་པ་བྱ་བ་དང་། སྦྱིན་པའི་ལས་དང་། ཞིང་ཉོ་བ་དང་། ཞིང་ལས་བྱའོ། །འཁྲིག་པའི་དུས་སྦྱོར་ཤར་བ་དང་། སྒྱུ་རྩལ་གྱི་ལས་དང་བཟོ་དང་རྒྱན་ལ་སོགས་པ་དང་། གཞན་གྱི་དུས་སྦྱོར་དུ་བཤད་པ་ཐམས་ཅད་ཀྱང་བྱའོ། །ཀརྐ་ཊའི་དུས་སྦྱོར་ལ་བབ་པ་ན། 
རྫིང་བུ་དང་། ཁྲོན་པའི་ལས་དང་། ཆུ་བསྒྱུར་བ་དང་། རྒྱས་པའི་ལས་དང་། གྲུབ་པའི་ལས་དང་། མཐར་ཐོན་པའི་ལས་རྣམས་བྱའོ། །སེང་གེའི་དུས་སྦྱོར་ཤར་བའི་དུས་སུ། ཚོང་བྱ་བ་དང་། ཤེས་པར་བྱ་བའི་ལས་དང་། ཚོང་ཕྲན་དང་། ཧེ་ཧ་ལས་དང་། མིའི་བདག་པོར་
དབང་བསྐུར་བའི་ལས་དང་། གཞན་དང་མཐུན་པར་བྱ་བ་དང་། ལུག་གི་དུས་སྦྱོར་དུ་བཤད་པ་ཐམས་ཅད་ཀྱང་བྱའོ། །བུ་མོའི་དུས་སྦྱོར་ལ་སྨན་གྱི་ལས་དང་། ཟས་སྦྱོར་དང་། བཟོ་བྱ་བ་དང་། བརྟན་པ་དང་། གཡོ་བའི་ལས་དང་། རྒྱས་པའི་ལས་ཐམས་ཅད་བྱའོ། །སྲང་གི་དུས་སྦྱོར་
ཤར་བའི་ཚེ། སོ་ནམ་བྱ་བ་དང་། ཚོང་དང་བརྟན་པའི་ལས་དང་། སྒྱུ་འཕྲུལ་དང་། སྲང་ལ་སོགས་པ་ལ་གཞལ་བའི་ལས་བྱའོ། །སྡིག་པ་ཤར་བའི་དུས་སྦྱོར་ལ། འབེབས་པའི་ལས་དང་། དྲག་པོའི་ལས་དང་། ཁྲག་གི་ལས་དང་། རྒྱལ་པོ་བསྙེན་བཀུར་བྱ་བ་དང་། དབང་བསྐུར་
བྱ་བ་དང་། དཔའ་བོའི་མཚོན་ཆ་བྱ་བའི་ལས་དང་། བརྟན་པའི་བྱ་བ་རྩོམ་པ་དག་བྱའོ། །གཞུའི་དུས་སྦྱོར་ཤར་དུས་སུ། གཞན་དུ་སོག་པ་དང་། རྒྱས་པའི་ལས་དང་། བག་མའི་ལས་དང་། ཕྱུགས་ཀྱི་འདུལ་སྦྱང་བྱ་བ་དང་། ཡོངས་སུ་བཟུང་བ་དང་། ནད་ཟད་པར་བྱེད་པ་ལ་སོགས་

203-1-99b

པ་བྱའོ། །གཡོ་བའི་ལས་དག་བྱའོ། །ཆུ་སྲིན་གྱི་དུས་སྦྱོར་ལ། ཞིང་ལས་དང་། བརྟན་པ་བརྩལ་བའི་ལས་དང་། ཆུའི་ལས་དང་། རྒྱུ་འགྲུལ་བྱ་བ་དང་། བཅིངས་པ་བཀྲོལ་བ་དང་། ཆུ་བརྟོལ་བར་བྱ་བ་དང་། གཡོག་མོ་གཞུག་པ་དང་། རྐང་པའི་ལས་དང་། རྔ་མོའི་ལས་དག་བྱའོ། །བུམ་
པའི་དུས་སྦྱོར་ཤར་བ་དང་། གྲུ་པའི་ལས་ཐམས་ཅད་དང་། ཆུ་སྦྱིན་པ་དང་། བརྟན་པའི་ལས་དང་། ས་བོན་བསྡུ་བའི་ལས་རྣམས་བྱའོ། །ཉ་ཡི་དུས་སྦྱོར་ཤར་བ་དང་། རིག་པ་རྩོམ་པ་དང་། རྒྱན་འདོགས་པ་དང་། བཟོའི་ལས་དང་། སོ་ནམ་བྱ་བ་དང་། ཕྱུགས་ཀྱི་ལས་དང་། སྒྱུ་
འཕྲུལ་བྱ་བ་དང་། བཟའ་བ་དང་། བག་མ་དང་། ཆོས་སློབ་པ་ལ་སོགས་པ་མཁས་པའི་ལས་བྱའོ། །འཕོ་བ་ཡང་དེ་དང་འདྲ་བར་ཤེས་པར་བྱའོ། །དུས་སྦྱོར་བརྟག་པ་རྫོགས་སོ།།      །།རྒྱ་གར་གྱི་མཁན་པོ་ཤྲཱི་ཛ་ཡ་ཨཱ་ནནྡ་དང་། ཆག་ལོ་ཙཱ་བ་དགེ་སློང་ཆོས་རྗེ་དཔལ་གྱིས་བསྒྱུར་བའོ།།      །།
༄༅༅། །རྒྱ་གར་སྐད་དུ། པྲ་ཛྙཱ་ཤ་ཏི་ཀ་ནཱ་མ་པྲ་ཀ་ར་ཎ། བོད་སྐད་དུ། ཤེས་རབ་བརྒྱ་པ་ཞེས་བྱ་བའི་རབ་ཏུ་བྱེད་པ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །གང་ཞིག་ལེགས་པར་རྟོགས་པ་ཡིས། མི་རྣམས་ཤེས་རབ་བརྒྱ་བསྐྱེད་པ། །དོན་གྱི་བསྟན་བཅོས་ལུགས་དག་
གི། །འབྱུང་གནས་ཆེན་པོར་རབ་ཏུ་བཤད། །མཁས་པས་དོན་གྱི་བསྟན་བཅོས་ལས། །དངོས་པོ་གང་དག་གཟིགས་གྱུར་པ། །དེ་དག་ཡི་གེ་མང་པོ་ཡིས། །འཇིགས་པའི་ཆེད་དུ་འདིར་བསྡུས་བྱས། །ཡི་གེ་ཉུང་ལ་དོན་མང་བ། །གཏན་ཚིགས་སྣ་ཚོགས་རྣམས་ཀྱིས་བརྒྱན། །འདི་ནི་ཚིགས་
སུ་བཅད་པ་བརྒྱ། །ཤེས་རབ་བརྒྱ་པ་ཞེས་བྱའོ། །མཐོང་དང་མ་མཐོང་ཡོན་ཏན་འདི། །ཀུན་གྱི་རྩ་བ་ཤེས་རབ་ཡིན། །དེ་ལྟར་གཉིས་ཀ་བསྒྲུབ་པའི་ཕྱིར། །ཤེས་རབ་ཡོངས་སུ་གཟུང་བར་བྱ། །ཆོས་དོན་འདོད་དང་ཐར་པ་ཡི། །འབྱུང་གནས་ཆེན་པོ་རིག་པ་ཡིན། །དེ་ལྟས་དང་པོར་གུས་
པ་ཡིས། །ཤེས་རབ་ཡུམ་ཆེན་གཟུང་བར་བྱ། །ཤེས་རབ་ལྡན་པ་གཅིག་རྐྱ་ཡང་། །གཞན་གྱིས་འདི་ལ་གནོད་མི་འགྱུར། །དོར་ཐབས་ལྡན་པའི་ལུས་ཆུང་ཡང་། །མཚན་དང་ལྡན་པས་ཡོ་མི་བརྙས། །ཤེས་རབ་ཀྱིས་ནི་ལུས་བསྲུངས་ལ། །དགྲ་ཡི་ཚོགས་ཀྱིས་ཅི་བྱར་ཡོད། །ལག་ན་

203-1-100a

གདུགས་དང་བཅས་པ་ལ། །ཆར་གྱི་རྒྱུན་གྱིས་རྫི་བ་མེད། །ཤེས་རབ་རྩལ་དང་བྲལ་བ་ནི། །གཞན་གྱི་བྲན་བྱེད་ཁོ་ནར་ཟད། །གླང་ཆེན་རི་བརྩེགས་ལྟ་བུ་ཡི། །ལུས་དང་ལྡན་པ་སྣང་བ་བཞིན། །ཤེས་རབ་མིག་ཕྱེ་རྣམས་ལ་ནི། །རྒུད་པ་རྣམ་པར་འཇིག་འགྱུར་ཏེ། །ལག་ན་མར་
མེ་ཐོགས་པ་ཡི། །མདུན་ན་མུན་པ་མེད་པ་བཞིན། །ཤེས་རབ་མེད་པའི་ཕུན་སུམ་ཚོགས། །གནམ་བབས་བཞིན་དུ་བྱུང་བ་ཡང་། །སྐད་ཅིག་ཁོ་ནས་དེ་དག་མེད། །མ་རུངས་པ་རྣམས་བཤེས་པ་བཞིན། །ལེགས་པར་བརྟགས་ཏེ་བྱེད་པ་ལ། །མ་རུངས་པ་དག་མི་སྣང་སྟེ། །འཕྲོད་པ་ཟ་བའི་
ལུས་ལ་ནི། །ནད་ཀྱི་བར་ཆད་མི་འབྱུང་ངོ་། །གང་ལ་རང་དོན་འཕེལ་འགྱུར་བའི། །ཤེས་ཉེན་ཡོད་པ་དེ་མཁས་པ། །ཆུ་ཡིས་གང་བའི་མཚོ་ལ་ནི། །མཁའ་ལ་རྒྱུ་བ་རྣམས་ཀྱང་བརྟེན། །གང་ཞིག་ཉེན་དང་འབྲེལ་པ་ཡི། །ནོར་དེ་ཡང་ནི་ཅི་རུ་རུང་། །སྦྲུལ་གྱི་མགོ་ལ་འདུག་པ་ཡི། །ནོར་
བུ་ལ་ནི་སུ་ཞིག་རེག །རང་དོན་བསྒྲུབ་པར་བྱ་བ་རྣམས། །བག་མེད་ལས་ཀྱིས་བསྒྲུབ་མི་བྱ། །སྦྲུལ་སོ་ཤིན་ཏུ་གདུག་པ་ཡིས། །དོན་མ་བསྒྲུབས་པར་ཕུང་བར་སྣང་། །རང་དོན་བསྒྲུབ་པར་བྱ་བ་རྣམས། །བག་དང་བཅས་པའི་ལས་ཀྱིས་བསྒྲུབ། །སྲིན་བུ་པད་པ་ཟོན་ཅན་ལུས། །ཁྲག་
འཐུངས་བཞིན་དུ་མི་མཐོང་ངོ་། །རང་གི་གཏིང་འཛུགས་འདོད་པ་ཡིས། །གཞན་གྱི་ཕན་ལ་བརྩོན་པར་བྱ། །གཏིང་འཛུགས་སྦྱོར་བ་མ་བྱས་པའི། །སྒྲུབ་པ་པོ་ཡིས་ཅི་མི་འགྲུབ། །གཞན་གྱི་ཕྱོགས་གཞོམ་འདོད་པས་ཀྱང་། །བདག་ཉིད་ཡོན་ཏན་ལྡན་པར་བྱ། །གཞུ་ནི་རྒྱུད་དང་མི་
ལྡན་པའི། །མདས་ལྟ་གང་དུ་ཕྱིན་པར་འགྱུར། །དབྲི་མཁྱུད་མེད་པར་སྨྲ་བ་དང་། །ཇི་སྐད་སྨྲས་བཞིན་སྒྲུབ་པ་དང་། །ཆས་བཞི་ཉམས་དང་སྦྱོར་བ་ཡི། །མི་ཕོ་རྣམས་ནི་བདེ་བར་འཚོ། །ཡ་རབས་རྣམས་ཀྱི་སྤྱོད་པ་ལ། །སྐྱེ་བོ་ངན་པས་གནོད་མི་འགྱུར། །རིན་ཆེན་སྒྲོན་མ་འབར་
བའི་ཚེ། །འཐོར་རླུང་ཚོགས་ཀྱིས་མི་སོད་དོ། །གྱ་ནོམ་སྐྱེས་བུའང་ཇི་ཞིག་ལྟར། །ངན་པའི་གནས་སུ་ཕྱིན་འགྱུར་ན། །དུར་ཁྲོད་ཀྱི་ནི་མེ་བཞིན་དུ། །གྲོགས་ངན་བསྟན་ལས་འཇིགས་པ་འབྱུང་། །གཡོན་ཅན་ངག་འཇམ་སྨྲ་བ་ལ། །མཁས་པས་ནན་ཏན་མ་བརྟགས་པར། །

203-1-100b

ཡིད་བརྟན་བྱ་བར་རུང་མ་ཡིན། །རྨ་བྱ་ཡིད་འོང་སྒྲ་སྒྲོགས་པར། །ཟས་སུ་དུག་ཆེན་ཟ་བ་བཞིན། །ཤེས་རབ་ཅན་གང་དགྲ་ལ་ཡང་། །མཛའ་བཤེས་ལྟ་བུར་སྒྲུབ་བྱེད་པ། །རྒྱ་མཚོ་བཞིན་དུ་མི་འཁྲུགས་ཏེ། །སྐྱེ་བོ་ངན་པས་དྲོད་མི་ཟིན། །ཕྱིར་རྗེས་སུ་ནི་ལྟ་བ་དང་། །བག་ཡོད་ཁོང་ཁྲོ་
མེད་པ་དང་། །བརྩོན་འགྲུས་བརྟན་ཞིང་མི་གཡེལ་བའི། །མི་ལ་དཔལ་མགོན་ཉེ་བར་གནས། །གང་ཞིག་ལན་ལ་མི་རེ་བར། །སྦྱིན་པ་གཏོང་ལ་སེམས་སྤྲོ་བ། །དེ་ནི་སྙན་དངགས་མཁས་པ་བཞིན། །མི་ཡུལ་འདི་ན་གྲགས་པས་མཛེས། །གང་ཞིག་དབང་པོ་བྲན་ལྟ་བུར། །བཀའ་བཞིན་རྗེས་སུ་
མཐུན་བྱེད་པ། །རྒྱ་མཚོ་ཆེ་ལ་རིན་ཆེན་བཞིན། །དེ་ལ་འདོད་དགུ་ཕུན་སུམ་ཚོགས། །བྱ་བ་མ་ཡིན་མི་བྱེད་ཅིང་། །བཤམས་པ་མཁོས་སུ་ཕེབས་པ་དང་། །ཡུལ་ལ་འདོད་པ་ཐག་བསྲིངས་པའི། །སྐྱེས་བུ་མཁས་པ་སུས་མི་བཀུར། །མཐུ་རྩལ་ལྡན་པའི་ཁེངས་སེམས་ཀྱིས། །ལུགས་ཀྱི་གདམས་
ངག་ཡོངས་མི་སྤང་། །རུ་ཤིང་བཟང་པོའི་གཞུ་མཆོག་ཀྱང་། །རྒྱུད་མེད་གཡུལ་ངོར་ཅི་ཞིག་བྱ། །གཡོན་ཅན་རྣམས་ཀྱི་གྲོན་ཅན་ཚིག །མཛངས་པས་ལེགས་པར་མ་བརྟགས་ན། །ཁོང་གླུའི་དོན་རྣམས་མ་དཔྱད་པའི། །རི་དྭགས་གཞན་གྱིས་བརླག་པར་སྣང་། །མཁས་པ་རྟག་ཏུ་དགྲ་ལ་ཡང་། །མཉེན་
དེས་ཅན་དུ་བྱ་དགོས་ཏེ། །འཁྲི་ཤིང་མཉེན་པོས་ལྗོན་ཤིང་ལ། །འཁྲིས་ནས་རྩེ་མོར་ཕྱིན་ཏེ་གནས། །ཁོང་རྒྱུད་དོགས་པ་ཙམ་གྱིས་འདིར། །དགོས་དགུ་འགྲུབ་པར་མི་འགྱུར་བས། །ཡིད་ཀྱིས་ལེགས་པར་རྣམ་བརྟགས་ཏེ། །ངག་གིས་ཀུན་དང་མཐུན་པར་བྱ། །ངག་གིས་བཞམས་ཏེ་སྨྲ་བྱ་
ཞིང་། །རེས་འགའ་བྱི་ལའི་སྤྱོད་པའང་སྤྱད། །ཐབས་དང་ལྡན་པའི་སྤྱོད་པ་ལ། །མཁས་པ་སུ་ཡང་སྨོད་མི་བྱེད། །རྔོན་པ་པུས་མོ་གཉིས་བཙུགས་ཏེ། །ཡན་ལག་རྣམས་ཀྱི་གུམ་ཕག་ཏུ། །བྱས་ཏེ་ཁོང་གླུ་སྙན་ལེན་པས། །རི་དྭགས་སོད་པར་མི་འགྱུར་རམ། །རྒྱལ་པོའི་བཞེད་པ་མི་སྦྱོར་བ། །
མཁས་པས་རྟག་ཏུ་འབད་དེ་སྤང་། །ས་བདག་འཁོར་བཅས་ཐག་རིང་ཞེས། །ཁྱད་དུ་གསད་པ་རུང་མ་ཡིན། །ལུགས་ལ་མཁས་པའི་བློན་པོ་ཡིས། །སྐྱེ་བོ་མ་ལུས་སྐྱོང་བྱེད་པའི། །རྒྱལ་པོ་གཅིག་པུ་ཁོ་ནས་ཀྱང་། །ས་རྣམས་མ་ལུས་ཆོམ་དུ་ཕེབས། །གང་ན་རྒྱལ་པོ་འབངས་རྣམས་

203-1-101a

ཀྱིས། །ལེགས་ཉེས་སེམས་པར་བྱེད་པ་ཡི། །ཡུལ་དེ་རྒྱལ་པོ་ཡོད་ཅེས་བྱ། །དེ་ལྟར་དེ་དག་གཙོར་བརྟག་གོ། །གང་ན་རྒྱལ་པོ་འབངས་རྣམས་ཀྱིས། །ལེགས་ཉེས་སེམས་པར་མི་བྱེད་པ། །རྒྱལ་པོ་དེ་དག་གཙུག་ལག་ལ། །མཁས་པ་རྣམས་ཀྱིས་བརྟེན་མི་བྱ། །
ཡོན་ཏན་ལྡན་པ་ཆུང་ཡང་ནི། །འཇིག་རྟེན་ཐབས་ཆེན་ཐོབ་པར་འགྱུར། །ཟླ་བ་ཤས་ཙམ་ལུས་པ་ཡང་། །དྲག་པོ་ཡིས་ནི་སྤྱི་ལ་ཐོགས། །མཁས་པ་གང་ཞིག་བག་མེད་པའི། །གནས་ནས་བྱོལ་ཏེ་འབྲོས་པ་དཔའ། །རི་དྭགས་རྒྱལ་པོ་མི་གཙང་བའི། །གནས་ནས་འཛུར་བ་
ག་ལ་ལྟར། །ལེགས་ཉེས་དོན་ཆེན་མི་སེམས་པར། །མུན་སྤྲུལ་བརྟུལ་བ་དཔའ་མ་ཡིན། །དོན་མེད་དཔག་ཚད་བརྒྱ་ཡོད་པའི། །གཡང་སར་མཆོང་བ་ཅི་ཆ་ཡོད། །ཡོན་ཏན་ལྡན་ཡང་ཐམས་ཅད་དུ། །གྲགས་ཆེན་ཐོབ་པར་འགྱུར་མ་ཡིན། །ཟླ་བའི་འོད་ཟེར་བསིལ་བ་རྣམས། །
པདྨའི་རྫིང་དང་འཕྲོད་མི་འགྱུར། །མཇུག་ཏུ་སྐྱོར་འབྱིན་བྱེད་པ་ཡི། །སྙན་ཚིག་མཁས་པ་སུས་མི་བསྔགས། །གང་གིས་ཁམས་འཁྲུག་འགྱུར་བ་ཡི། །ཁ་ཟས་ཞིམ་པོ་དེ་སུ་ཟ། །མཁས་རྣམས་རྣ་བར་མི་སྙན་ཡང་། །ཕན་ཚིག་སྨན་བཞིན་བསྟེན་པར་གྱིས། །རེ་ཞིག་ཅིག་
ན་དེ་དག་ཀྱང་། །ཡང་དག་བདུད་རྩི་ལྟ་བུར་འགྱུར། །རིགས་པའི་དོན་དང་མི་ལྡན་པའི། །གཞུང་ལུགས་གང་ཞིག་རྩོམ་བྱེད་པ། །དེ་ཡང་དགོས་པ་འགྲུབ་མི་འགྱུར། །སྔགས་དང་བྲལ་བའི་སྦྱིན་སྲེག་བཞིན། །སྐྱོན་དང་ཡོན་ཏན་འདི་གཉིས་ལ། །གཅིག་ཏུ་མཁས་པར་བྱས་
ནས་ནི། །དགོས་པ་རྩོམ་པར་བྱེད་པ་གང་། །དེ་ལ་ཉེས་པ་རྒྱབ་ཀྱིས་ཕྱོགས། །སྙིང་ལ་ཁོང་དུ་དམ་བཟུང་ནས། །བཤེས་པའི་ཚིག་ནི་སྟོན་བྱེད་པ། །དེ་དག་མཛེས་པ་མ་ཡིན་ཏེ། །སྲིན་བུས་ཟོས་པའི་སྡོང་རུལ་བཞིན། །གང་དག་ཚིག་ཏུ་སྙན་སྨྲ་ཞིང་། །སྙིང་ལ་གཞན་ཞིག་འཇོག་བྱེད་པ། །
རི་དྭགས་གཟུགས་ཅན་སྟག་ལྟ་བུར། །དེ་བས་ཡིད་བརྟན་གནས་མ་ཡིན། །གསོན་ཚེ་གྲགས་པ་དགའ་བའི་རྒྱུ། །འཇིག་རྟེན་ཕ་རོལ་ཕན་འགྱུར་བ། །དེ་གཉིས་གཅིག་ཀྱང་མེད་པ་ནི། །འཇིག་རྟེན་གཉིས་ན་ཅི་ཞིག་མི། །གར་སྐྱེས་སུ་ནི་ཟད་ཅེས་ཏེ། །རང་གི་བརྩོན་པ་དོར་མི་བྱ། །འབད་པ་

203-1-101b

མེད་པར་ཏིལ་དག་ལས། །ཏིལ་མར་ཐོབ་པར་འགྱུར་མ་ཡིན། །ཀུན་ལ་གཉེན་དེས་མི་བྱ་སྟེ། །ཧ་ཅང་དེས་པ་གནོད་པར་འགྱུར། །ཆུ་ཤིང་སྙིང་པོ་མེད་པ་ལ། །སུ་ཞིག་སྤྱོད་པར་རྩོམ་མི་བྱེད། །གང་ཞིག་གཏོང་ཕོད་བློ་ལྡན་དཔའ། །ཚིག་བདེན་གཙང་ལ་བྱས་པ་གཟོ། །དེ་ལ་རྟག་ཏུ་དཔལ་གྲོགས་
རྣམས། །གྲིབ་མ་བཞིན་དུ་རྗེས་སུ་འབྲང་། །ནགས་ཀྱི་གླང་ཆེན་ཞགས་པ་ཡིས། །བཅིངས་ནས་དབང་དུ་བྱེད་པ་ཡང་། །ཐབས་མཁས་ཚུལ་ལ་གནས་པ་ཡི། །ཡོན་ཏན་རྣམས་ཀྱི་མཐུ་སྟོབས་ཡིན། །རྗེ་དཔོན་རང་དོན་ལྷུར་ལེན་པ། །གཡོག་འཁོར་རྟེན་པར་མི་བྱེད་དེ། །ཤ་ལ་བརྐམ་པའི་
སེང་གེ་ལ། །ཝ་སྐྱ་རེ་ཐག་ཆད་པ་བཞིན། །གང་ཞིག་ལེགས་བྱས་མི་ཚོར་བ། །དེ་ལ་གཡོག་འཁོར་རྟེན་མི་བྱེད། །ཚ་སྒོ་ཅན་ལ་ལེགས་རྨོས་ཀྱང་། །ལོ་ཏོག་ཕུན་སུམ་ཚོགས་མི་འགྱུར། །བདོག་པ་ཧ་ཅང་སྤེལ་བ་ཡང་། །མཇུག་ཏུ་རྒུད་པས་གདུངས་པར་འགྱུར། །ཚང་ཚིང་མང་དང་ལྡན་པ་
ཡིས། །ས་ཕྱོགས་ཚིག་པར་འགྱུར་བ་བཞིན། །གང་ཞིག་སྐྱེ་དགུ་འཚོ་བྱེད་པ། །དེ་ནི་ལས་ཉིད་སྟོན་པར་བྱེད། །བྱིས་པ་གནས་ས་མ་བྱེ་བར། །ནུ་ཞོ་འཐུང་བ་སུ་ཡིས་བསྟེན། །གང་ལ་ཞེ་འགྲས་ཡོད་པ་ཡི། །དགྲ་བོ་དེ་དང་གཞར་མི་འགྲོགས། །ཟ་བས་བག་ཙམ་བརྗོད་པ་ཡིས། །སྒྲ་
གཅན་འཛིན་གྱིས་ཉི་མ་ཟིན། །བྱ་བ་ཉམས་ཀྱིས་མི་ལྕོགས་པ། །གཞན་གྱིས་རྦད་ཀྱང་བྱར་མི་རུང་། །དགེའོ་དགེའོ་ཞེས་སྨྲས་པས། །མེ་ཡི་ནང་དུ་སུ་ཞིག་མཆོང་། །ཅི་ནས་བདག་དམུས་མ་བྱུང་བའི། །ལས་ཀྱིས་སྦྱོར་བ་རྣམས་བྱ་སྟེ། །གསང་བས་འདི་ནི་སློབ་མ་རྣམས། །བློན་པོ་
ཉིད་དུ་འགྱུར་རམ་ཅི། །ཕོངས་པ་ལས་གང་བྱེད་པ་སྟེ། །རྣལ་མར་འདུག་པས་བྱར་མི་རུང་། །མཛེ་ཅན་མེར་ནི་འཇུག་ཅེས་ཏེ། །དེ་ཅི་གཞན་གྱི་སྨན་ཡིན་ནམ། །གང་གིས་འཇིག་རྟེན་འདི་དང་ནི། །གཞན་དུ་སྡུག་བསྔལ་མི་འགྱུར་བ། །འདི་འདྲ་བ་ཡི་ཚུལ་དེ་ནི། །ཤིན་ཏུ་ཡུན་
རིང་དུས་སུ་སྤྱད། །གང་དག་རྒས་རབ་མི་བསྟེན་པ། །དེ་དག་གཙུག་ལག་མཁས་མི་འགྱུར། །གཟུ་ལུམས་ཅན་གྱི་སྤྱོད་པ་རྣམས། །དགོས་པ་མྱུར་དུ་ཉམས་པར་འགྱུར། །ཧ་ཅང་སོག་ལ་ཞེན་པ་ཡི། །བདོག་པ་གཞན་གྱི་དོན་དུ་འགྱུར། །སྦྲང་མས་འབད་དེ་བསགས་པ་ཡི། །སྦྲང་རྩི་

203-1-102a

གཞན་དག་སྤྱོད་པར་སྣང་། །ངན་པ་རྣམས་དང་བཤེས་འདོད་པ། །ཕུང་བ་ཁོ་ནར་འགྱུར་བར་ཟད། །ཆུ་བོས་དྲུང་ནས་ཟོས་པ་ཡིས། །ལྗོན་ཤིང་འགྲེང་ཡང་འགྱེལ་དང་འདྲ། །ཕན་སྐྱབས་ཆེ་ལ་བརྟེན་ན་ནི། །ཆུང་ཡང་བཙན་པོ་ཉིད་དུ་འགྱུར། །རི་རབ་བཙན་ལ་བརྟེན་
པའི་བྱ། །གསེར་གྱི་མདོག་ཏུ་འགྱུར་ཞེས་གྲགས། །ཁང་བཟངས་ཟོ་མདོག་གྱ་གྱུ་མེད། །ཀླན་ཀ་མི་ཚོལ་འཇར་ལ་ཕན། །སྒྲུབ་པའི་འབྲས་བུ་ཡོད་པ་ཡི། །གྲོགས་པོ་རྣམས་ལ་ལྷ་ཡང་དགའ། །མང་པོ་རྣམས་ནི་འཇིང་དྲིལ་ནས། །ལོངས་སྤྱོད་ཕྱིར་ནི་དཔུང་འཆང་བ། །ཆགས་པའི་
དབང་གིས་ཕུང་འགྱུར་ཏེ། །ནས་དང་བྲལ་བའི་སྲིན་བཞིན་ནོ། །དོན་རྣམས་ཀུན་ལ་མི་གསལ་བའི། །ངན་པ་རྣམས་ནི་འཛིངས་བསྡོངས་ནས། །གོ་འཕང་ཐོབ་ཀྱང་རླག་འགྱུར་ཏེ། །སྲིན་བུ་ར་བའི་ཁར་ཕྱིན་བཞིན། །ཡུལ་ངན་བཤེས་ནི་ངན་པ་དང་། །ཆུང་མ་ངན་དང་འཁོར་ངན་དང་། །རྒྱལ་པོ་
སྐྱེ་བོ་ངན་སྤོང་བ། །དེ་དག་རྟག་ཏུ་བདེ་བ་འཐོབ། །སྐྱེས་བུ་མཁས་པ་གཅིག་རྐྱ་ཡང་། །འདོད་པའི་དོན་མཆོག་གྲུབ་པར་འགྱུར། །རི་དྭགས་རྒྱལ་པོ་གཅིག་པུ་ཡིས། །གླང་ཆེན་དྲེགས་ཁྱུའི་གླད་པ་འགེམས། །མང་པོ་ཚོགས་པར་གྱུར་པ་ཡི། །ནང་ན་འདུག་ན་གཞན་དག་གིས། །དེ་འདིར་ཟད་ཅེས་
མི་རྩི་བ། །སྐྱེས་བུ་ཐ་ཤལ་ཡིན་སྙམ་བྱེད། །རང་དོན་བསྒྲུབ་པར་འདོད་པ་ཡིས། །རྟག་ཏུ་སྐྱབས་ཆེན་བཙལ་བར་བྱ། །གང་དག་རྒྱ་མཚོ་ཆེར་ཕྱིན་ན། །རང་གི་མིང་ཡང་མི་གླེང་ངོ་། །རང་བཞིན་ངན་པའི་སྐྱེ་བོ་དང་། །ཤིན་ཏུ་མཛའ་བོར་བྱས་ཀྱང་ནི། །མར་མེའི་མེ་ལྕེ་ཚ་བ་བཞིན། །ཉིད་ཀྱི་རང་བཞིན་མི་
འདོར་རོ། །ཁོན་ཆེན་ཞགས་པས་ཕན་ཚུན་དུ། །གླགས་པའི་སེམས་དང་ལྡན་པ་རྣམས། །འཆི་འཕོ་སྐྱེས་ནའང་དེ་དག་ལ། །ཁོན་ཆེན་དེ་བཞིན་རྗེས་སུ་འབྲང་། །དཔེར་ན་སྦྲུལ་དང་ནེའུ་ལེ་དང་། །བྱ་རོག་འུག་པ་མ་ཧེ་རྟ། །ཚེ་རབས་གཞན་ལ་བསྒྲུབས་པ་གང་། །དེ་ཅི་འདི་ལ་མི་སྣང་ངམ། །
ཁྲོ་བ་ལ་ནི་བརྟེན་རྣམས་ཀྱིས། །རང་གི་དོན་ཡང་མི་རིགས་པས། །མཁས་པས་རྣམ་པར་མ་བརྟགས་པར། །ཁྲོ་བའི་ཡུས་སུ་མི་བྱའོ། །གང་ལ་བཟོད་པའི་རང་བཞིན་ཆུ། །ཁྲོ་བའི་མེ་ནི་ཞི་བྱེད་པ། །གདུལ་བའི་ཐབས་ཀྱི་མཆོག་ཡོད་པ། །དེ་ལ་དགྲ་རྣམས་ག་ལ་སྡང་། །གཡུང་དྲུང་ཆོས་ཀྱི་གོ་འཕང་

203-1-102b

མཆོག །ལེགས་པའི་གཞི་ལ་མ་འབད་ན། །མཐོང་དང་མ་མཐོང་ཕུན་སུམ་ཚོགས། །ཆུ་ཡི་ཆུ་བུར་བཞིན་དུ་གཡོ། །སྙིང་ལ་ཡོད་པའི་གསང་ཚིག་རྣམས། །ངན་པ་རྣམས་ལ་སྤེལ་མི་བྱ། །བྲང་འགྲོ་གདུག་པ་ཁྲོས་པ་བཞིན། །དེ་ལ་དེ་ཡིས་གནོད་འགྱུར་སྲིད། །བློ་ལྡན་གང་ཞིག་རྩོམ་པ་ཀུན། །ཆོས་
གཙོར་བྱེད་པའི་དཔལ་ལྡན་པ། །དེ་ལ་འདི་དང་གཞན་དུ་ཡང་། །བདེ་བར་འགྱུར་བ་ཐེ་ཚོམ་མེད། །ཐབས་མཁས་ཆོ་གར་ལྡན་པ་ལ། །དགྲ་རྣམས་ཀྱིས་ནི་རྫི་མི་འགྱུར། །ཆོ་ག་རབ་ཏུ་སྦྱར་ལེགས་ན། །དུག་ཀྱང་བདུད་རྩི་ཉིད་དུ་འགྱུར། །དགྲ་བཅོམ་ཕྱོགས་དང་བྲལ་བ་ཡིས། །སེམས་ཀྱི་གནོད་
པ་ག་ལ་སྤོང་། །མཚོན་ཆག་གཡུལ་ངོར་ཆེར་ཞུགས་པ། །གདོན་མི་ཟ་བར་ཕམ་པར་འགྱུར། །གྲོགས་མི་བདོག་པ་འགས་ཀྱང་ནི། །དགྲ་དཔུང་གཞོམ་པར་དཀའ་བར་འགྱུར། །ཚང་ཚིང་ཉུང་ཟད་བསྲེགས་པ་ཡི། །མེ་ཡང་རླུང་ལ་ལྟོས་དགོས་སོ། །བདག་དང་གཞན་ལ་མི་ཕན་པའི། །
ཕྱུག་པོ་བཀྲེན་དང་ཅིས་མི་མཚུངས། །བུད་ཤིང་རྣམས་དང་ཕྲད་པའི་མེ། །བུད་ཤིང་བསྲེགས་ནས་ཤི་བ་བཞིན། །གཞན་གྱིས་བཟུང་བའི་བུད་མེད་དག །རུམ་དུ་བཅུག་སྟེ་ཉལ་བ་ནི། །ལྕགས་ཀྱོ་མེད་པར་གླང་པོ་ཆེ། །མྱོས་པའི་རྒྱབ་ཏུ་ཞོན་པས་ཐུ། །གང་ཞིག་རྟག་ཏུ་སྨད་འཚོང་མའི། །
བུད་མེད་རྣམས་ལ་གླ་འཇལ་བ། །སྟོན་ཀའི་ཆུ་བོའི་རྩ་ལག་བཞིན། །དེ་ཡི་ཕུན་སུམ་ཚོགས་པ་འགྲིབ། །བློ་ལྡན་སྤྱོད་ལམ་ཞི་བ་ཡི། །ལུས་ཀྱི་ཕན་པ་འགྲུབ་པར་བྱེད། །ཆུ་སྐྱར་སྤྱོད་ལམ་ཞི་བ་ཡིས། །སྤྱོད་པས་ཉ་རྣམས་འབྱིན་པར་བྱེད། །བདོག་པ་རིགས་པས་ཉེར་བསྒྲུབས་ཤིང་། །
འཇིག་རྟེན་ཀུན་ལ་ཕན་འདོགས་གང་། །དེ་ནི་འཇིག་རྟེན་ཐམས་ཅད་ཀྱིས། །སྤྱི་ལ་མེ་ཏོག་ཕྲེང་བཞིན་བཀུར། །འཇིག་རྟེན་འདི་ན་མཁས་པ་གང་། །དགྲ་རྣམས་སྙིང་ནང་འཇུག་འདོད་པ། །དེས་ཀྱང་བདག་ཉིད་རྟག་པར་ནི། །ཡོན་ཏན་རྣམས་དང་ལྡན་པར་བྱ། །གང་ཞིག་གཞན་དག་བརླག་
བྱ་ཞེས། །ཁྲོས་པའི་མེ་ཡིས་རང་རྒྱུད་སྲེག །ཡོན་ཏན་ལྷུར་ལེན་མི་བྱེད་པ། །དེ་དག་ནམ་ནམ་ཞར་ཞར་ཕུང་། །གང་ལ་རང་གི་ཤེས་རབ་མེད། །དེ་ལ་བསྟན་བཅོས་ཅི་བྱར་ཡོད། །མིག་གཉིས་དང་ནི་བྲལ་བ་ལ། །མེ་ལོང་གིས་ནི་ཅི་ཞིག་བྱ། །སྦྲུལ་ལ་འོ་མ་བླུད་པ་ནི། །དུག་འཕེལ་

203-1-103a

འགྱུར་བ་ཁོ་ནར་ཟད། །ངན་པ་རྣམས་ལ་གདམས་པ་ཡང་། །ཚིག་པ་ཟ་འགྱུར་ཞི་མི་འགྱུར། །ཡོན་ཏན་མཆོག་ལྡན་མི་རྣམས་ནི། །སྙིང་དང་ཡིད་ཀྱང་འདྲེན་པར་བྱེད། །མཁས་པ་ཡོན་ཏན་ལྕགས་ཀྱོ་ཡིས། །ལམ་ལོག་གླང་ཆེན་དྲངས་ཏེ་བཀོལ། །འཇིག་རྟེན་ཀུན་
གྱི་དཔལ་འདི་ནི། །ཡིད་ཀྱིས་ལག་ཏུ་འོངས་དང་འདྲ། །དཔའ་བོ་ཚམ་ཚོམ་མེད་རྩོམ་པ། །མཐུ་སྟོབས་ཅན་གྱི་དབང་དུ་འགྱུར། །དཔལ་གྱི་འགྲོ་བ་བཟང་མོ་འདི། །འདི་དང་རང་དབང་མེད་པར་འདུག །མཐུ་རྩལ་ལྡན་པའི་སྐྱེས་མཆོག་གིས། །ལག་ནས་དྲངས་པ་བཞིན་དུ་སྤྱོད། །གང་
ཞིག་འབྱུང་པོ་ཐམས་ཅད་ལ། །རྟག་ཏུ་བདག་དང་འདྲར་བྱེད་པ། །མཛའ་བཤེས་འཕེལ་བ་འདི་ལ་ནི། །ཕུན་སུམ་ཚོགས་པ་འཚེ་བ་མེད། །བཙན་ལ་མི་འགྱུར་ཐབས་མཁས་ཤིང་། །སྐྱེ་དགུ་རྣམས་ཀྱི་གདུང་བ་སེལ། །ཀུན་ལ་སྙིང་བརྩེར་བཅས་པ་ཡི། །མི་དབང་རྣམས་ནི་སྤྲིན་དང་འདྲ། །གནམ་
ལ་སྤྲིན་ཆེན་དལ་སྙོམས་པ། །ས་ལ་ལོ་ཏོག་ཀུན་གྱི་གསོས། །བཟོད་ཆེན་གྲིབ་མར་ལྡན་པ་ཡི། །ལྗོན་ཤིང་སྐྱེ་དགུའི་གདུང་བ་སེལ། །མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང་། །ལྷ་དང་མི་ཡི་ཐེམ་སྐས་ལས། །འཛེགས་ན་ཐར་པ་གམ་ན་འདུག །དོན་གྱི་བསྟན་
བཅོས་ལུགས་ཆེན་པོ། །དོན་མང་ཕྲེང་བ་བརྒྱུས་པ་ལས། །གཅེས་པའི་སྙིང་པོ་མདོར་བསྡུས་པ། །ཤེས་རབ་བརྒྱ་པ་འདི་ཡིན་ནོ། །གང་ཞིག་གཞན་དྲིང་མི་འཇོག་པར། །ཤེས་རབ་རྩལ་གྱིས་འཚོ་འདོད་པ། །དེ་ཡིས་ཕྱོགས་འདི་བརྟག་བྱས་པས། །རང་གཞན་དོན་དུ་སྤྱད་པ་སྤྱོད། །བྱང་ཆུབ་སེམས་
དཔའི་ས་དང་པོ་རབ་ཏུ་དགའ་བ་བརྙེས་ཤིང་། ཆོས་ཀྱི་དབྱིངས་ཀུན་དུ་འགྲོ་བའི་དོན་རྟོགས་པ། དེ་བཞིན་གཤེགས་པ་ཡེ་ཤེས་འབྱུང་གནས་འོད་ཅེས་བྱ་བར་ལུང་བསྟན་པ། སངས་རྒྱས་གཉིས་པར་གྲགས་པ། སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་ཤེས་རབ་བརྒྱ་པ་ཞེས་བྱ་བའི་རབ་ཏུ་
བྱེད་པ་བརྒྱ་པ་རྫོགས་སོ།།      །།རྒྱ་གར་གྱི་མཁན་པོ་སརྦ་ཛྙཱ་དེ་བ་དང་། ཞུ་ཆེན་གྱི་ལོ་ཙཱ་བ་བན་དེ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      ༄༅༅། །རྒྱ་གར་སྐད་དུ། ནཱི་ཏི་ཤཱསྟྲ་པྲཛྙཱ་དཎྜ་ནཱ་མ། བོད་སྐད་དུ། ལུགས་ཀྱི་བསྟན་བཅོས་ཤེས་རབ་སྡོང་

203-1-103b

བུ་ཞེས་བྱ་བ། དཀོན་མཆོག་གསུམ་ལ་ཕྱག་འཚལ་ལོ། །མི་སྲུན་སྐྱེ་བོ་གདུལ་བར་བྱ། །ཡོན་ཏན་ཅན་ནི་བཀུར་བར་བྱ། །དྲང་པོའི་སྤྱོད་པས་དཀོར་མཛོད་དགང་། །རང་གི་ཡུལ་འཁོར་བསྐྱང་བར་བྱ། །བདག་གི་གསང་དང་གཞན་གྱི་གསང་། །རང་གི་བུ་གཅེས་བཞིན་བསྲུངས་ནས། །ས་
རྣམས་ལ་ནི་སྙོམས་གྱུར་པའི། །མི་ནི་གཅེས་པ་རབ་གཅེས་འགྱུར། །ཆུང་མ་ངན་དང་མཛའ་བོ་ངན། །རྒྱལ་པོ་ངན་དང་ཉེ་དུ་ངན། །ཁྱིམ་མཚེས་ངན་དང་ཡུལ་ངན་རྣམས། །ཐག་རིང་དུ་ནི་སྤང་བར་བྱ། །གྲོགས་པོ་ནོར་དད་ཆེ་བ་སྤང་། །ཆུང་མ་ལོག་གཡེམ་དད་ཆེ་སྤང་། །བཀུར་དཀའ་སོ་མི་
མཁས་པ་ཡི། །དེ་ལྟ་བུ་ཡི་སྨན་པ་སྤང་། །བྱེ་བྲག་ཕྱེད་པའི་བློ་ལྡན་ཡང་། །བྱ་བ་གྲོས་ཀྱིས་བསྒྲུབ་པར་བྱ། །འགྲུབ་འགྱུར་ཁོ་ནར་མ་ཟད་ཀྱི། །མ་འགྲུབ་ན་ཡང་མཛེས་པ་ཡིན། །བརྟན་ཞིང་འཇམ་ལ་ཚིག་ཉུང་གང་ཡིན་པ། །དེ་ལ་ཤིན་ཏུ་བག་བྱ་སྟེ། །ཉི་མ་སྤྲིན་བུག་ནང་ནས་
བྱུང་བ་ཡི། །འོད་ཟེར་ཤིན་ཏུ་ཚ་བར་གྱུར་པ་བཞིན། །བརྟན་རྣམས་སྡུག་བསྔལ་མྱོང་གྱུར་ཀྱང་། །ཡིད་ནི་གདུང་བར་མི་བྱེད་དེ། །ཟླ་བ་སྒྲ་གཅན་ཁར་ཞུགས་ནས། །འཆར་བར་ཅི་ག་མི་བྱེད་དམ། །ཀུན་དགའ་ར་བའི་ཕྲེང་རྒྱུད་ལྟར། །མེ་ཏོག་རྒྱས་པ་བཏུ་བྱ་ཡི། །ཇི་ལྟར་སོལ་བ་མཁན་
བཞིན་དུ། །རྩ་ནས་གཅད་པར་མི་བྱའོ། །གསུག་དང་རྒྱལ་པོའི་བཀའ་དྲིན་དང་། །སྨད་འཚོང་གླ་དང་ལེགས་བརྗོད་དང་། །གྲུ་ཡི་གླ་དང་གནས་ཀྱི་སྐལ། །འདི་ཉིད་དུ་ནི་བླང་བྱ་སྟེ། །དྲུག་པོ་ཡུན་རིང་ཐོབ་མི་འགྱུར། །རིག་སྔགས་ལོག་པར་ཤེས་པ་དུག །ནད་ལ་བཏང་སྙོམས་བྱས་པ་
དུག །རྒན་པོས་གཞོན་ནུ་བསྟེན་པ་དུག །དབུལ་པོ་ཉིན་པར་ཉལ་བ་དུག །དམ་པ་མང་པོ་ཁས་འཆེས་མི་བྱེད་ལ། །གལ་ཏེ་དཀའ་བས་ཁས་ནི་བླངས་གྱུར་ན། །རྡོ་ལ་རི་མོ་བྲིས་པ་ལྟ་བུར་ནི། །ཤི་ཡང་གཞན་དུ་བྱེད་པར་མི་འགྱུར་རོ། །དུས་སུ་དགྲ་དང་འདུམ་པར་བྱ། །དུས་སུ་བཤེས་དང་
འཐབ་པར་བྱ། །བྱ་དང་མི་བྱའི་ཚོད་ཤེས་པས། །མཁས་པས་དུས་ནི་འདའ་བར་བྱ། །ཁ་ཡི་ཉེས་པས་ཕུང་འགྱུར་ཏེ། །ནེ་ཙོ་རི་སྐེགས་ཏི་ཏི་ར། །མི་སྨྲ་ཆུ་སྐྱར་མིས་མི་འཛིན། །ཐམས་ཅད་འགྲུབ་བྱེད་མི་སྨྲ་ཡིན། །ཆས་བཞག་བསྟར་བས་དགྲ་བོ་གདུལ། །གོས་ངན་གྱིས་ནི་ཆུང་མ་

203-1-104a

གདུལ། །སྨྱུང་བ་བྱས་པས་ནད་རྣམས་གདུལ། །གོམས་པ་ཡིས་ནི་མ་རིག་གདུལ། །རང་གི་སྤྱོད་པ་སྦ་བར་བྱ། །འདམ་གྱི་ནང་དུ་ལུས་བཅུག་པའི། །གལ་ཏེ་མྱུ་གུས་མ་བོས་ན། །པདྨའི་རྩ་བ་སུ་ཡིས་རྙེད། །གལ་ཏེ་མངོན་སུམ་གྱུར་ཀྱང་ནི། །མི་སྲིད་དངོས་པོ་སྨྲ་མི་བྱ། །
རི་མོ་ལ་གནས་རྨ་བྱ་ཡིས། །ཇི་ལྟར་ནོར་བུ་ཟ་བར་བྱེད། །གང་ཞིག་ཡིད་ལ་གནོད་བྱེད་འདོད། །དེ་ལ་རྟག་ཏུ་སྙན་ཚིག་བརྗོད། །རྔོན་པ་རི་དྭགས་གསོད་མཐོང་ཚེ། །ཡིད་འོང་གླུ་སྙན་ལེན་པ་བཞིན། །བསམ་པ་གང་དང་གང་གིས་ནི། །མི་རྣམས་ཡིད་ནི་ཡང་དག་སྦྱོར། །དེས་ན་དེ་ཡི་དབང་དུ་
འགྱུར། །སྣ་ཚོགས་ནོར་བུ་ཇི་བཞིན་ནོ། །གཞན་གྱི་ཁུ་ཚུར་འཚོ་བ་བླ། །ནགས་ན་ཤིང་ཤུན་གྱོན་པ་བླ། །མི་རྣམས་ཤི་བར་གྱུར་ཀྱང་བླ། །ཉིན་རེ་བཞིན་དུ་བརྙས་ཐབས་མིན། །མ་བརྙས་མི་ཡི་རྩ་བ་ཡིན། །བརྙས་པའི་ནོར་གྱིས་ཅི་ཞིག་བྱ། །ང་རྒྱལ་དྲེགས་པས་རབ་བཅོམ་པའི། །ནོར་དང་སྲོག་
གིས་ཅི་ཞིག་བྱ། །བྱ་བ་མི་ལྕོགས་རྩོམ་པར་བྱེད་པ་དང་། །ཚོགས་དང་འཁོན་ཞིང་སྟོབས་ལྡན་དག་ལ་རྒོལ། །བུད་མེད་ལ་ནི་ཡིད་བརྟན་བྱེད་པ་སྟེ། །འཆི་བདག་བཞི་པོ་སྒོ་ཡི་དྲུང་ན་སྡོད། །རྒྱལ་པོ་ངན་པ་ཡོང་མ་མཐོང་། །མཛའ་བོ་གཡོན་ཅན་ཡོང་མ་མཐོང་། །འདོད་ལྡན་ཆུང་མ་ཡོང་མ་
མཐོང་། །སྐྱེ་བོ་སྡིག་ཅན་ཡོང་མ་མཐོང་། །གང་ཞིག་ཀུན་དུ་བགྲོད་བྱ་ཡོད་པ་དེ། །རང་ཡུལ་ཆགས་པས་བརླག་པར་ཅི་ཕྱིར་བྱེད། །སྐྱེ་བོ་ངན་པ་བདག་གི་ཁྲོན་པ་ནི། །འདི་ཡིན་ཟེར་ཞིང་བ་ཚྭ་ཅན་ཆུ་འཐུང་། །སྐྱེ་བོ་བློ་དཔངས་མཐོ་བ་ལ། །འདི་ན་བདེ་སྐྱིད་གཉིས་ཡོད་དེ། །འདུ་འཛི་ཐམས་ཅད་སྤངས་
པའམ། །འབྱོར་པ་ཤིན་ཏུ་རྒྱ་ཆེ་བའོ། །དཔལ་ནི་རྒྱབ་ཀྱིས་ཕྱོགས་གྱུར་ཅིང་། །རྩོལ་བ་དོན་མེད་ཉིད་གྱུར་པའི། །དམ་པ་དབུལ་པོར་གྱུར་པ་ལས། །ནགས་ལས་གཞན་དུ་བདེ་བ་མེད། །དམ་པའི་འགྲོ་བ་གཉིས་ཡིན་ཏེ། །མེ་ཏོག་དག་གི་མགོ་ལྕོགས་བཞིན། །འཇིག་རྟེན་ཀུན་གྱིས་སྤྱིར་བཀུར་
བའམ། །ནགས་ཉིད་དུ་ནི་དེངས་པར་བྱ། །རང་གིས་སྐད་ཅིག་འཇིག་པ་ཡི། །ཚེ་ཡི་སྙིང་པོ་འདི་ཡིན་ཏེ། །མཛའ་དང་མཁས་དང་ཤེད་མ་བྱེ། །ལྷན་ཅིག་བག་ཡངས་གནས་པའོ། །བསགས་ན་གྲོགས་འཁར་འཕེལ་འགྱུར་ལ། །སྤྱད་ན་མིག་སྨན་ཟད་འགྱུར་ལྟར། །དུས་ལས་འགོད་པ་

203-1-104b

ཆུང་འགྱུར་བ། །དེ་ཉིད་ཁོ་ན་མཁས་པ་ཡིན། །གྲོགས་འཁར་དང་ནི་སྦྲང་རྩི་དང་། །ཟླ་བ་ཚེས་པ་ཡར་གྱི་ངོ་། །རྒྱལ་པོའི་ནོར་དང་སྤྲང་པོའི་ནོར། །ཅུང་ཟད་ཅུང་ཟད་བསགས་པས་འཕེལ། །ཧ་ཅང་སྲེད་པར་མི་བྱ་སྟེ། །སྲེད་པ་ཆེ་ལ་ཉེས་པ་འབྱུང་། །ཧ་ཅང་སྲེད་པས་རྨོངས་བྱས་ན། །ཅེ་
སྤྱང་གཞུ་མཆོག་གཙུག་ཏོར་བཞིན། །བྱ་བའི་དོན་དུ་རྗེས་སུ་འབྲང་། །བྱས་ཟིན་པ་ལ་བརྟེན་མི་བྱེད། །བློ་ངན་ཞོ་ཡི་རྣ་བ་ཅན། །བསྲུང་བར་བྱ་བ་ཁྱོད་ཀྱིས་བཅོམ། །རབ་ཏུ་གྲགས་པ་འགྲོ་མི་བྱ། །བདག་ཉིད་ཀྱིས་ནི་མངོན་སུམ་བྱ། །བིལ་བ་ཆུ་ནང་ལྷུང་བ་ཡིས། །ནགས་ཚལ་སྟོང་པར་
གྱུར་ལ་ལྟོས། །གནད་དུ་འཕོག་པའི་ཚིག་མི་བརྗོད། །ཤིན་ཏུ་གནོད་པའང་བརྗོད་མི་བྱ། །སྐྱེས་བུ་དང་ནི་མཚོན་ཆ་ཡི། །ཕ་རོལ་དག་ནི་ཤེས་པར་བྱ། །དགྲ་བོའི་བུ་ནི་སྙན་པར་སྨྲ་ན་ཡང་། །མཁས་པ་ཡིས་ནི་བཏང་སྙོམས་མི་བྱ་སྟེ། །དུག་ལོ་ཤིན་ཏུ་མི་བཟད་ཡིན་པས་ན། །དེ་ཉིད་དུས་
གཞན་དག་ཏུ་གནོད་པ་སྐྱེད། །གང་ཞིག་དགྲ་བོ་དག་ལ་ཡང་། །གཡོ་མེད་སེམས་ཀྱིས་ཕན་བྱེད་པ། །དེ་ལ་དགྲ་བོ་ཐམས་ཅད་ཀྱང་། །ཐལ་མོ་སྦྱོར་བ་ཉིད་དུ་བྱེད། །དགྲ་བོ་ཟིལ་གནོན་འདོད་པ་ཡིས། །བདག་ཉིད་ཡོན་ཏན་གྱིས་བསྟོད་ཀྱི། །གནོད་སེམས་ངན་པས་ཅི་ཞིག་བྱ། །དེས་ནི་
བདག་གནོད་དགྲ་ལ་མིན། །མི་སྲུན་སྐྱེ་བོ་ཞི་བས་མིན། །དེ་དང་འཚམ་པའི་རྩུབ་པས་བསྟེན། །བུ་ནི་མི་བསྒྲུངས་པ་དག་ལ། །ཕན་འདོད་ཕ་ཡིས་མི་བསྡིགས་སམ། །ཇི་སྲིད་ལམ་ནི་མཐོང་བ་དང་། །ཇི་སྲིད་རྐང་པ་བརྟན་པ་དང་། །ཇི་སྲིད་ཤེས་རབ་མ་ཉམས་པ། །དེ་སྲིད་རང་གི་
ཕན་པ་གྱིས། །རྣམ་པ་ཀུན་དུ་རང་ཕན་སྤྱད་བྱ་ཡི། །འགྲོ་མང་ནང་དུ་གནས་པས་ཅི་ཞིག་བྱ། །སྐྱེ་བོ་ཐམས་ཅད་ཡོངས་སུ་མགུ་འགྱུར་བ། །དེ་འདྲའི་ཐབས་ནི་གང་ཡང་ཡོད་མ་ཡིན། །གཞན་ལས་ཚོལ་ཞིང་ཟས་ཞིམ་འདོད། །སློང་མོས་འཚོ་ཞིང་ཁེངས་པ་ཆེ། །བསྟན་བཅོས་ཤེས་མེད་རྩོད་པར་འདོད། །
ཁྱོད་ཀྱི་དེ་གསུམ་བཞད་གད་རྒྱུ། །ནགས་བསྲེགས་པ་ཡི་མེ་ལ་ནི། །རླུང་གིས་གྲོགས་སུ་འགྱུར་བ་ཡིན། །དེ་ཉིད་མར་མེ་འཇིག་བྱེད་པས། །ཉམ་ཆུང་བ་ལ་བཤེས་ཡོད་མིན། །གཞན་ལ་གནོད་པ་མ་བྱས་དང་། །དམན་ལ་འདུད་པ་མ་བྱས་ཤིང་། །དམ་པའི་ལམ་ནི་མ་སྤངས་གང་། །ཉུང་བ་དེ་ནི་

203-1-105a

མང་པོ་ཡིན། །ནད་ཀྱི་འཇིགས་པ་མ་བྱུང་ཞིང་། །དམ་པ་དག་དང་འགྲོགས་པར་བརྩོན། །དམན་པའི་ཚིག་ནི་མ་སྨྲས་པའི། །ཉིན་གཅིག་ལོ་བརྒྱ་བས་མཆོག་ཡིན། །དམན་པས་གང་ཚེ་ནོར་ནི་ཅུང་ཟད་རྙེད། །འགྲོ་བ་ཐམས་ཅད་བརྙས་པའི་ང་རྒྱལ་ལྡན། །དམ་པ་ནོར་གྱི་འབྱོར་པ་ཐོབ་གྱུར་
ཀྱང་། །སཱ་ལུ་སྨིན་པ་ལྟ་བུར་ཤིན་ཏུ་འདུད། །རིགས་རུས་དམའ་བའི་སེམས་ཅན་དག །ནོར་རམ་རིག་པ་རྙེད་གྱུར་ན། །འགྲོ་བ་ཀུན་ལ་རྩྭ་སྙམ་སེམས། །པགས་པ་སྔོན་པོའི་ཝ་བཞིན་ནོ། །ནོར་རམ་རིག་པར་ལྡན་གྱུར་ན། །དམན་པ་རྣམས་ནི་དྲེགས་པར་འགྱུར། །གོ་འཕང་གཉིས་པོ་དེ་དག་གིས། །
མཁས་པ་ཤིན་ཏུ་དུལ་བར་འགྱུར། །བོགས་མེད་ཚོང་དང་འཁོར་ལྡན་དག་ལ་འཚེ། །སློང་ཞིང་འགྱིང་ལ་ནོར་མེད་འདོད་ལ་དགའ། །བུད་མེད་གཞོན་ལ་ཚིག་རྩུབ་སྨྲ་བ་སྟེ། །སྐྱེས་བུ་ལོག་པར་སྤྱོད་པ་དེ་ལྔའོ། །རྨ་བྱ་སོ་གའི་ཚ་བས་གདུངས་གྱུར་ཀྱང་། །མཁའ་དཀྱིལ་ཆར་གྱི་རྒྱུན་ལ་རེ་བླ་ཡི། །
རྫིང་བུ་རྙོག་པ་ཅན་གྱི་ཆུ་ངན་ལ། །དྲེགས་པས་བསྟོད་པའི་མགྲིན་པ་མ་གདུད་ཅིག །ཏི་ཏི་ར་ནི་ཟིལ་པ་ཡི། །ཐིགས་པས་སྲོག་ནི་འཛིན་བྱེད་ཀྱང་། །བསླང་ན་གཏུགས་པའི་འཇིགས་པ་ཡིས། །བརྒྱ་བྱིན་ལ་ཡང་མི་སློང་ངོ་། །དེ་ཉིད་ཤེས་ན་སློབ་དཔོན་ཅི། །ནད་སོས་སྨན་པ་ག་ལ་དགོས། །ཆུ་བོ་
བརྒལ་ན་གྲུ་པས་ཅི། །ཆགས་བྲལ་བྱད་མས་ཅི་ཞིག་བྱ། །ངན་པ་ཇི་སྲིད་ཉམ་ཆུང་བ། །དེ་སྲིད་བར་དུ་རང་བཞིན་བཟང་། །སྟོན་ཀ་ཡི་ནི་ཆུ་བོའི་ཆུ། །སྐྱེ་བོ་ཀུན་གྱིས་བགྲོད་པ་བླ། །གང་དུ་བྱི་བས་མཛོད་པ་བྱེད། །བྱི་ལས་མར་ནི་བསྲུང་བ་དང་། །ཁྭ་ཡིས་ཕྱག་ཚང་བྱེད་པ་ཡི། །དངོས་དེ་ལ་ནི་སྨོས་ཅི་
དགོས། །གང་ན་ཞལ་ཏ་བྱེད་པ་མང་། །ཐམས་ཅད་མཁས་པར་ང་རྒྱལ་ཆེ། །ཀུན་ཀྱང་གཙོ་བོ་བྱེད་འདོད་པ། །དེ་ཡི་ཚོགས་རྣམས་འཇིགས་པར་འགྱུར། །ཉིན་པར་འཁྲིག་དང་ཉིན་ཉལ་དང་། །ཆང་གསར་ཞོ་ནི་གཞོན་ནུ་འཐུང་། །ཤ་སྐམ་བུད་མེད་རྒན་ཉལ་ཏེ། །འདི་དྲུག་ལུས་ཀྱི་སྟོབས་
འཕྲོག་པའོ། །གང་ཞིག་ཁྲོ་ནའང་འཇིགས་མེད་ལ། །དགའ་ནའང་ཕན་འདོགས་མི་ནུས་པ། །ཚར་གཅོད་བསྡུ་བ་མེད་འགྱུར་བའི། །དེ་ཁྲོས་པས་ནི་ཅི་བྱར་ཡོད། །ནད་དང་ཕངས་དུས་བྱུང་བ་དང་། །མུ་གེའི་ཚེ་དང་དགྲས་འཇིགས་དང་། །རྒྱལ་པོའི་སྒོ་དང་གཤིན་རྗེའི་གནས། །དེ་རྣམས་

203-1-105b

ཀུན་གྱི་གཉེན་པོར་འགྱུར། །དགོས་པའི་དོན་དུ་འཇིག་རྟེན་སྒྲུབ། །དམ་པའི་དོན་དུ་དེ་དག་མིན། །བེའུས་འོ་མ་ཟད་མཐོང་ནས། །བ་ནི་རིང་དུ་སྤང་བ་བཞིན། །སྡུག་པ་དང་བྲལ་རང་མིས་བརྙས་པ་དང་། །བུ་ལོན་མང་ཞིང་ངན་པ་དག་ལ་བརྟེན། །དབུལ་པོར་མཐོང་ནས་མཛའ་བོས་སྤངས་པ་སྟེ། །
མེ་མ་ཡིན་པས་ལུས་སྲེག་དེ་ལྔའོ། །མི་མཐུན་ཆུང་ངུ་འཕེལ་བ་ལ། །མི་གང་ཞི་བར་མི་བྱེད་པ། །སྦྲང་རྩིའི་ཐིགས་པ་འཛག་པ་དང་། །ཡུལ་འཁོར་འཇིག་པར་འགྱུར་བ་བཞིན། །གང་ཞིག་རིགས་ལྡན་དེ་བཞིན་བརྟེན་པ་དང་། །དམ་པ་ཕངས་ཀྱང་ཡོན་ཏན་གཏོང་མི་བྱེད། །ཉི་མའི་རང་བཞིན་
ཚ་བས་གདུངས་ཀྱང་ནི། །ཁ་བ་གྲང་བའི་རང་བཞིན་གཏོང་མི་བྱེད། །སྡིག་པ་ཟད་འདོད་བདེ་བར་གཤེགས་ལ་དད། །སྐལ་བ་ཟད་འདོད་སྐྱེ་བོ་ངན་དང་བསྟེན། །རིགས་རྒྱུད་ཟད་འདོད་གླན་ཞིང་ལྐུགས་པ་སྐྱེ། །འབྲུ་རྣམས་ཟད་འདོད་ཕོ་བའི་མེ་དྲོད་སྐྱེ། །འདོད་པས་ལོང་བས་སྡིག་མི་མཐོང་། །དམུས་ལོང་
གིས་ནི་གཟུགས་མི་མཐོང་། །དྲེགས་པ་ཡིས་ནི་སྐྱོན་མི་མཐོང་། །བདག་ལྟས་དེ་ཉིད་མི་མཐོང་ངོ་། །རྒྱལ་པོ་ཡུར་ཆུ་འཁྲི་ཤིང་དང་། །བུད་མེད་དམུས་ལོང་ལྔ་པོ་ནི། །གཡོན་ཅན་བློ་ཡིས་ཇི་ལྟར་ཁྲིད། །ཁྲིད་རྣམས་གཞན་གྱི་དབང་དུ་འགྱུར། །བདེ་བའི་རྗེས་ལ་སྡུག་བསྔལ་ཏེ། །སྡུག་བསྔལ་རྗེས་ལ་བདེ་བ་ཡིན། །མི་
རྣམས་ཀྱི་ནི་བདེ་སྡུག་དག །འཁོར་ལོ་བཞིན་དུ་འཁོར་བར་བྱེད། །མ་མཐོང་བ་དག་མདུན་དུ་ལྷགས། །སླར་ཡང་མ་མཐོང་བ་རུ་སོང་། །ཁྱོད་ཀྱི་དེ་ཅི་ཁྱོད་ཀྱང་ཅི། །དེ་ལ་མྱ་ངན་སུ་ཞིག་བྱེད། །ཇི་ལྟ་ཇི་ལྟར་ཤིང་དག་ནི། །རྒྱ་མཚོ་ཆེ་ལ་མཉམ་འགྲོ་བ། །དབའ་རླབས་ཀྱིས་ནི་སོ་སོར་ཕྱེ། །དེ་ལ་
མྱ་ངན་སུ་ཞིག་བྱེད། །བློ་གྲོས་ཆེ་ལྡན་ཁྲོ་བས་ཤུགས་ལས་རྒྱལ། །སྐྱེ་བོ་ངན་པ་ཁྲོ་བས་མོད་ལ་ཕམ། །ཕམ་པས་ཕམ་པར་བྱས་པའི་བློ་ངན་དག །བློ་ལྡན་དག་དང་ལྷན་ཅིག་ཅི་ཕྱིར་འགྲན། །ཕ་བོང་འབད་པ་ཆེན་པོ་ཡིས། །རི་ཡི་རྩེ་མོར་འདེགས་པར་ནུས། །ཅུང་ཟད་ཙམ་གྱིས་དེ་
སྐུར་བ། །རང་གི་སྐྱོན་ཡོན་དེ་དང་མཚུངས། །མི་གང་བྱ་བ་མ་ཡིན་པའི། །བྱ་བ་ལ་ནི་སྦྱོར་བྱེད་པ། །དེས་ནི་ངེས་པར་ཕུང་འགྱུར་ཏེ། །ཁྱིའུ་འབྱིན་པའི་སྤྲེའུ་བཞིན། །རང་གི་ཕྱོགས་ནི་ཡོངས་སྤངས་ནས། །གཞན་གྱི་ཕྱོགས་ལ་དགའ་བ་གང་། །དེ་ནི་ངེས་པར་བརླག་འགྱུར་ཏེ། །རྒྱལ་

203-1-106a

པོ་རབ་དམར་ཇི་བཞིན་ནོ། །མཁའ་ལ་སྐར་མཁན་དག་གིས་རྩིས་བྱས་ན། །ཟླ་བ་དང་ནི་སྐར་མའི་ལམ་རྣམས་ཤེས། །ཁྱིམ་ན་མི་དང་ཁྱིམ་ཐབ་ལོག་པ་དག །སྣ་ཚོགས་སྤྱོད་པ་དེ་ནི་མཐོང་མ་གྱུར། །རྙོག་མེད་ཆུ་ནང་ཟླ་ཚེས་སྣང་གྱུར་པ། །པདྨའི་རྩ་བ་ལེན་པར་
ཁྱོད་བྱེད་གྱུར། །ངང་པ་ཆུ་དང་འོ་མ་འབྱེད་ཤེས་པའི། །ཁྱོད་ཀྱི་བློ་གྲོས་དེ་རིང་གང་དུ་སོང་། །མི་གང་བྱ་བ་ཆེན་པོ་གང་། །ཅུང་ཟད་བྱེད་པར་འདོད་ན་ཡང་། །དེ་ནི་བསྒྲིམས་ནས་རབ་བྱ་སྟེ། །སེང་གེའི་ལས་གཅིག་ཡིན་པར་བཤད། །ཇི་ལྟར་རྒྱལ་སྲིད་བསྐྱང་བ་དང་། །བསྡོ་བའི་དགྲ་
རྣམས་འདུལ་བ་དག །འབངས་ལ་རེ་བ་མ་འཇོག་པར། །ཞལ་བཞུགས་ཚེ་ན་སྨྱུར་ཏེ་མཛོད། །སྙིང་དུ་སྡུག་པའམ་གཞན་གང་ཞེས། །སེམས་ཡང་བ་དག་རྩེ་བར་བྱེད། །སྤྱོད་པ་རྒྱ་ཆེན་ལྡན་པ་དག །ས་ཡི་དཀྱིལ་འཁོར་ཐམས་ཅད་གཉེར། །རྟག་ཏུ་སྙན་ཚིག་སྨྲ་བ་ཡི། །རྒྱལ་
པོས་སྐྱེ་དགུ་བྲིད་པར་སླ། །ཕན་ཚིག་སྨན་དང་འདྲ་བ་དེ། །ཉན་པ་བས་ཀྱང་སྨྲ་བ་དཀོན། །གལ་ཏེ་ཆོས་དོན་རྟོགས་པ་ཡིས། །ཞལ་ཆེ་ལམ་སྲང་སྐྱོན་ན་ནི། །འགྲོ་བ་བློ་ལྡན་གཅིག་གྱུར་ཀྱང་། །དེ་ལས་བདག་ནི་རྣམ་པར་རྒྱལ། །ནོར་མཉམ་ནུས་པ་མཉམ་པ་དང་། །གནད་ཤེས་
འབད་རྩོལ་ཆེ་བ་ཡི། །འཁོར་གྱིས་ངེས་པར་གནོད་འགྱུར་གྱི། །གང་དགྲས་མི་ཕུང་དེ་ཡིས་ཕུང་། །ཆུ་ཡི་ནང་ནས་མེ་འབར་ན། །མེ་དེ་གང་གིས་ཞི་བར་བྱེད། །སྐྱོབ་པ་ལས་ནི་འཇིགས་པ་བྱུང་། །འཇིགས་པ་དེ་ལས་སུ་ཡིས་སྲུང་། །མ་བསྐུལ་མི་སྙན་དགྲ་སྟོན་ལ། །བསྐུལ་ནས་
སྙན་པ་མི་སྒྲོགས་ལ། །འཇིག་རྟེན་རྔ་ཟླུམ་དང་འདྲ་ལ། །དེ་ལྟར་བསྐུལ་ཞིང་སྒྲ་སྙན་སྒྲོགས། །ས་བདག་འདོད་ལ་ཆགས་པས་ཕན་དང་གནོད་པ་ཤེས་མི་འགྱུར། །ཇི་ལྟར་རང་དགར་རང་སྤྱོད་མྱོས་པའི་གླང་ཆེན་བཞིན་དུ་སྤྱོད། །དེ་འོག་འགྱོད་པས་རབ་གདུངས་ཉམ་ངའི་མྱ་ངན་གཡང་
སར་ལྷུང་། །དེ་ཡིས་འཁོར་ལ་ཉེས་པ་བགོད་བྱེད་རང་གི་སྐྱོན་མ་རིག །རྩོད་དུས་རྒྱལ་པོ་ནོར་ཚོགས་ཐོབ་པ་ལས། །སྲོག་ནི་སྲུང་གི་ནོར་ནི་གཏང་བར་བྱ། །ཇི་ལྟར་ཤན་པས་ལུག་གི་བལ་བྲེགས་ནས། །སྲོག་ཐར་བྱས་པ་རྙེད་པ་ཆེ་བ་བཞིན། །རྩ་བ་བྲང་འགྲོ་རྩེ་མོ་མཁའ་ལྡིང་དང་། །ཡལ་

203-1-106b

ག་སྤྲེ་འཛེགས་མེ་ཏོག་བུང་བས་བསྐོར། །གང་ཞིག་གདུག་པའི་སེམས་ཅན་གནས་བཅས་པ། །ཙན་དན་ཤིང་དེ་ལ་ནི་བསྙེན་དུ་མེད། །གང་གིས་ཐབས་ཀྱིས་ཕ་རོལ་གནོན། །ནུས་པས་མ་ཡིན་ཐབས་ཀྱིས་དེ། །བྱ་རོག་གིས་ནི་གསེར་ཕྲེང་གི། །སྦྲུལ་དག་གསད་པར་གྱུར་ལ་ལྟོས། །གང་ལ་བློ་ཡོད་དེ་
སྟོབས་ལྡན། །བློ་མེད་སྟོབས་ཀྱིས་ཅི་ཞིག་བྱ། །ཅི་ཞིག་སེང་གེ་སྟོབས་དང་ལྡན། །རི་བོང་གིས་ནི་སྲོག་དང་ཕྲལ། །བྱ་བའི་ཐབས་ཀྱིས་གྲོགས་བྱེད་ན། །བློ་ལྡན་དག་ལ་དྲི་བར་བྱ། །ཕུན་སུམ་ཚོགས་པས་སྨོས་ཅི་དགོས། །ཕུང་གྱུར་ན་ཡང་མཛེས་པ་ཡིན། །ཡོན་ཏན་ཚུལ་སྤྱོད་རང་
བཞིན་གསལ་བ་ཡིས། །སྐྱེ་བོ་ངན་པ་བཅོས་སུ་ག་ལ་རུང་། །ཚ་ཞིང་དྲོད་ཆེ་རྩུབ་པས་བསྒྲུབས་པ་ཡི། །བད་ཀན་ནད་བཞིན་ཤིན་ཏུ་འཕེལ་བར་འགྱུར། །སྙིང་ལ་ཁོན་དུ་གཟུང་བྱ་ཡི། །དེ་ལ་ཚིག་གིས་མི་བསྐུལ་བར། །དགྲ་བོའི་རྐང་པ་ནས་གཟུང་ཞིང་། །ཚིག་གི་མཚོན་ཆས་བསྣུན་པར་
བྱ། །ཇི་སྲིད་འཇིགས་པ་མ་བྱུང་བ། །དེ་སྲིད་འཇིགས་ལ་འཇིགས་པར་བྱ། །འཇིགས་པ་མངོན་དུ་བྱུང་བའི་ཚེ། །འཇིགས་མེད་ལྟ་བུར་གཞོམ་པར་བྱ། །བདེན་པ་ཞུགས་པར་གྱུར་པ་ལ། །སླུ་བྱེད་མཁས་པ་ཡིན་ནམ་ཅི། །པང་པར་བརྟེན་ཏེ་ཉལ་བ་ལ། །གསོད་པ་དེ་ཅི་དཔའ་
བོའམ། །གཞོན་ཡང་རྒན་པའི་ཉེ་བར་ཞི་ལ་དགའ། །མཁས་པར་གྱུར་ཀྱང་ཤེས་པའི་ང་རྒྱལ་མེད། །གཟི་བརྗིད་ཆེ་ཡང་བཟོད་ཅིང་དེས་པའི་ངང་། །ཇེ་མཐོར་ཕྱིན་ཡང་ང་རྒྱལ་དྲེགས་པ་མེད། །རྟག་ཏུ་སེམས་ཅན་ཕན་དགའ་རྣམས། །རིན་ཆེན་སྒྲོན་ལྟར་མཆོག་ཡིན་ཏེ། །
སྣུམ་ལ་ལྟོས་པར་མི་བྱེད་ཅིང་། །སྣོད་དང་སྡོང་བུ་ལ་ལྟོས་མིན། །སྨན་པ་ཟས་ནི་མ་ཞུ་དང་། །རྒྱལ་པོ་བརྫུན་དུ་སྨྲ་བ་དང་། །རིགས་ལྡན་སྡིག་པ་སྤྱོད་པ་སྟེ། །འདི་གསུམ་ཤིན་ཏུ་མི་རིགས་པའོ། །མཐུ་ཆེ་བ་དང་འགྲོགས་གྱུར་ན། །མཐོན་པོ་ཉིད་དུ་སུ་མི་འགྱུར། །མེ་ཏོག་
ཕྲེང་བར་འབྲེལ་པ་ཡི། །སྐུད་པ་མགོ་ལ་འདོགས་པར་བྱེད། །དུས་ལ་བབ་པར་སྟོན་པ་དང་། །གནས་སྐབས་བཅས་པར་སྨྲ་བ་དང་། །ཤིན་ཏུ་ངོ་མཚར་གྱུར་ལ་འགོད། །འཇིག་རྟེན་ཆེན་པོ་ཉིད་ཐོབ་འགྱུར། །བརྩོན་འགྲུས་བརྟུལ་ཕོད་བརྟན་པ་དང་། །སྟོབས་དང་བློ་གྲོས་ཕ་

203-1-107a

རོལ་གནོན། །འབད་རྩོལ་ཡོན་ཏན་དྲུག་ལྡན་པ། །དེ་ལ་ལྷ་ཡང་འཇིགས་པ་སྐྱེ། །སྐྱོན་ཆད་དགྲ་བོ་ཕམ་པར་བྱས་པ་དག །མཛའ་བོར་འདོད་འོངས་པ་ལ་ཡིད་མི་བརྟན། །བྲག་ཕུག་འུག་པའི་ཚོགས་ཀྱིས་གང་བ་ལ། །བྱ་རོག་གིས་ནི་མེ་བཏང་བསྲེགས་ལ་ལྟོས། །
ཟ་དང་གཉིད་ལོག་འཇིགས་དང་འཁྲིག་པ་སྤྱོད། །མི་དང་ཕྱུགས་རྣམས་དེ་དག་མཉམ་པ་ཡིན། །ཆོས་སྤྱོད་པ་ཡི་མི་རྣམས་ཁྱད་པར་འཕགས། །ཆོས་མི་ཤེས་ན་ཕྱུགས་དང་ཅི་མི་མཉམ། །གང་ཞིག་ཆོས་ལ་སྨོད་པ་རྣམས། །ཉི་མར་འགྲོ་དང་འོང་ན་ཡང་། །དེ་ནི་མགར་བའི་སྦུད་པ་ཡིན། །དབུགས་
འབྱིན་ཀྱང་ནི་གསོན་མ་ཡིན། །སངས་རྒྱས་མགོན་པོ་ཡོངས་སྤངས་ཏེ། །ལྷ་གཞན་ལ་ནི་ཕྱག་བྱེད་པ། །བློ་ངན་གང་གཱའི་འགྲམ་དུ་ནི། །སྐོམ་ནས་ཁྲོན་པ་བྱེད་དང་མཚུངས། །ཡུལ་ནི་ཤིན་ཏུ་ཡུན་རིང་གནས་ཀྱང་ངེས་པ་ཁོ་ནར་འགྲོ་བར་འགྱུར། །འབྲལ་ལ་ཁྱད་པར་ཅི་ཞིག་ཡོད་ལ་འགྲོ་བ་རང་ཉིད་སྤོང་
མི་བྱེད། །དབང་མེད་འབྲལ་བས་ཡིད་ལ་ཡོངས་སུ་གདུང་བ་མཐའ་ཡས་སྐྱེད་པར་བྱེད། །འདི་དག་རང་གིས་སྤོང་ན་ཞི་བའི་བདེ་བ་མཐའ་ཡས་འཐོབ་པར་འགྱུར། །འདོད་པ་ཡིད་འོང་ཡིན་པ་བདེ། །འབྱོར་པ་མཉམ་དགའ་ཡིན་མོད་ཀྱི། །འོན་ཀྱང་འཚོ་བའི་འཇིག་རྟེན་འདི། །ནད་མེད་ཆང་འཐུང་ཁུར་པར་
མཚུངས། །འགྲོ་བའི་དྲི་མ་ཆགས་པ་འདྲ་བ་མེད། །གཞན་ལ་གནོད་པ་ཕྲག་དོག་འདྲ་བ་མེད། །མཛའ་བོ་སློང་མོ་པ་འདྲ་ཡོད་མིན་ཏེ། །གཏོང་དང་མཉམ་པའི་གཉེན་བཤེས་གང་ཡང་མེད། །ཤེས་རབ་དང་མཉམ་མིག་མེད་དེ། །རྨོངས་པ་དང་མཉམ་མུན་པ་མེད། །ནད་དང་འདྲ་བའི་དགྲ་མེད་
དེ། །འཆི་བ་དང་མཉམ་འཇིགས་པ་མེད། །དེ་བས་ཤིན་ཏུ་མི་བཟད་པའི། །འཆི་བ་ངེས་པར་འབྱུང་འགྱུར་བས། །འདོད་པ་རྣམས་ལ་སེམས་བཟློག་ལ། །དམ་པའི་ཆོས་ལ་དགའ་བར་གྱིས། །གྲོགས་པོ་འདི་ན་ནོར་དེ་ཡོད་ལེགས་པས། །ཡིད་བཞིན་ནོར་ཁྱེད་རྡོར་འགྱུར་ནོར་མ་བྱེད། །སྤུར་
ལོང་རྒྱན་གྱི་དམ་པར་བྱེད་འགྱུར་བ། །དེར་ནི་འདི་འདྲའི་ནོར་བུ་འཇིག་རྟེན་ཕུང་། །གང་ཞིག་ས་སྟེངས་འབྲུ་རྣམས་དང་། །གསེར་དང་ཕྱུགས་དང་ནད་མེད་རྣམས། །དེ་དག་ཀུན་གྱིས་གཅིག་མི་ངོམས། །དེ་ལྟར་ཤེས་ནས་ཞི་བར་གྱིས། །འབད་པས་བསགས་པའི་ནོར་ལ་ནི། །ཡང་དང་ཡང་དུ་

203-1-107b

ཉུགས་པར་བྱེད། །བཀྲེན་པས་བྱི་བ་ཇི་བཞིན་དུ། །ནོར་རྣམས་སྡུག་བསྔལ་ཁོ་ནར་ཟད། །འཇིག་རྟེན་འཚོ་བ་བརྟན་མ་ཡིན། །ནོར་དང་ལོངས་སྤྱོད་བརྟན་མ་ཡིན། །བུ་དང་ཆུང་མ་བརྟན་མིན་གྱི། །ཆོས་དང་གྲགས་པ་སྙན་པ་བརྟན། །རྒྱལ་པོ་ནོར་སོགས་ངོམས་པ་མེད། །མཁས་པ་ལེགས་
བཤད་ཀྱིས་མ་ངོམས། །རྒྱ་མཚོ་ཆུ་ཡིས་ངོམས་པ་མེད། །འཇིག་རྟེན་སྡུག་ལ་བལྟས་མི་ངོམས། །མེ་ལ་ཤིང་གིས་ངོམས་པ་མེད། །བྱིས་པ་འདོད་པས་ངོམས་པ་མེད། །ཚུལ་ཁྲིམས་དག་དང་དུལ་བ་དང་། །སེམས་ནི་དུལ་བར་གྱུར་པ་དང་། །གང་ཞིག་དྲང་པོར་ཞུགས་པ་དག །
དེ་ལ་གནས་ན་ཅི་ཞིག་དགོས། །ཆོག་ཤེས་དབང་ཕྱུག་ལ་གནས་ན། །སྐྱེ་བོ་ངན་པའི་ས་དང་རིང་། །ལོངས་སྤྱོད་འདོད་པའི་སྲེད་པས་བཅིང་། །གོམ་རེ་བརྙས་པ་ཐོབ་པར་འགྱུར། །ལུས་ཞེས་བྱ་བ་སྐྱོན་ལྡན་འདི། །ཡོན་ཏན་ཆེན་པོ་གཅིག་ཡིན་ཏེ། །གནས་སྐབས་གང་དང་གང་ཕྲད་པ། །
དེ་དང་དེར་འགྲོ་གོ་ར་བ། །ནགས་ཀྱི་གླང་པོ་རྩྭ་ལོ་ཟ་ཡང་སྟོབས་དང་ལྡན། །སྦྲུལ་ནི་ཟས་སུ་རླུང་ཟར་གྱུར་ཀྱང་སྦེགས་པ་མེད། །དྲང་སྲོང་རྩ་བ་འབྲས་བུ་ཙམ་གྱིས་དུས་འདས་བྱེད། །དེ་བས་ཁྲེལ་འཛེམ་ཆོག་ཤེས་ཁོ་ན་འབྱོར་པའི་མཆོག །ཚོད་མ་དག་དང་རྡུལ་མེད་པའི། །ཆུ་ཡི་
དགོན་པ་གང་ནའང་ཡོད། །ཟླ་བ་ཐུན་མོང་མར་མེ་ཡིན། །འབྱོར་པ་དག་གིས་ཅི་ཞིག་བྱ། །ཆོག་ཤེས་ངེས་པའི་བདག་ཉིད་ཅན། །འཚོ་བ་གང་ནའང་བཙལ་མི་དཀའ། །རྩྭ་དང་ལོ་མ་ཆུ་ཡི་གནས། །གང་ནའང་མེད་པ་མ་ཡིན་ནོ། །ནགས་མཆོག་སྟག་དང་གླང་པོའི་གཙོས་བསྟེན་པར། །རྩྭ་ཡི་
སྟན་བྱས་ཤིང་ཤུན་གོས་སུ་གྱོན། །ཤིང་གི་འབྲས་བུ་ལ་སོགས་ཟས་ཟ་བའི། །ནོར་མེད་ཉེ་དུའི་ཚོགས་ནང་གསོན་པ་མིན། །བཟང་པོའམ་ནི་ངན་པ་ཡི། །སྦྱོར་བ་གང་ཡང་རུང་བ་ཡིས། །ལུས་ནི་ཤིན་ཏུ་བསྲུང་བྱ་ཡི། །ནོར་ལ་ཆགས་པས་ཅི་ཞིག་བྱ། །བསོད་ནམས་ཆེན་པོའི་རིན་གྱིས་
ནི། །ཁྱོད་ཀྱིས་ལུས་ཀྱི་གྲུ་ཉོས་པ། །ཇི་སྲིད་ཆག་པར་མ་གྱུར་པར། །སྡུག་བསྔལ་རྒྱ་མཚོའི་ཕ་རོལ་སོང་། །ཇི་སྲིད་སྡུག་པའི་དུས་ཀྱི་ཟླ་རྒྱས་པ། །འཆི་བདག་གཟའ་ཆེན་འདི་ཡིས་མ་རྙེད་པ། །དེ་སྲིད་བག་ཡོད་པར་ནི་གནས་བྱ་སྟེ། །རང་གི་བྱ་བ་དག་ནི་བྱ་བའི་རིགས། །གང་ཚེ་

203-1-108a

འདུ་ཤེས་བྲལ་ཞིང་མིག་མི་གཡོ། །སྐིགས་བུ་རྒྱུན་འབྱུང་དབུགས་མཐར་ཐུག་པས་སླེབས། །མུན་པར་གཡང་ས་ཆེར་ཁྲིད་ལྟར་གྱུར་ན། །དེ་ཚེ་བུ་དང་ཆུང་མ་གཉེན་ཅིར་འོང་། །སྙིང་རྗེས་གདུངས་པའི་ཡིད་དང་དབང་པོ་དུལ་ཞིང་སེམས་ནི་ཆོག་ཤེས་དག་ལ་དགའ་བ་
དང་། །ཆགས་བྲལ་མངོན་དགའི་སེམས་དང་ཤིང་དྲུང་དག་ན་ལྟུང་བའི་འབྲས་བུས་བཟའ་བའི་བྱ་བ་བྱེད། །ལུས་རིད་ཤིང་ཤུན་གྱོན་ཞིང་རྒྱལ་བ་ཞེས་ནི་སྙན་པ་ལྟ་བུར་སྒྲ་སྒྲོགས་ལ། །བཱ་རཱ་ཎ་སཱིར་གཤིན་རྗེའི་དབང་གྱུར་བཅོམ་པའི་ལུས་ཚིག་འདི་ནི་ནམ་ཞིག་སྤོང་བར་འགྱུར། །བསྟན་བཅོས་
འཛིན་པས་ཐར་པ་ཡིན། །ལུས་དུབ་པས་ཀྱང་མ་ཡིན་ཏེ། །ཤེས་རབ་ཀྱིས་ནི་སེམས་བཏུལ་ན། །ཐར་པ་ཐག་ཉེ་འདི་ན་ཡོད། །ཉེས་པའི་སྐྱོན་ནི་བྲེག་པར་གྱིས། །མགོ་བོ་བྲེགས་པས་ཅི་ཞིག་བྱ། །གང་ཞིག་ཡིད་ཀྱི་གོས་མེད་ན། །རས་ཀྱི་ཆོས་གོས་ཅི་ལ་ཕན། །སེམས་ཅན་རྣམས་ལ་གང་གི་ཚེམས། །
སྙིང་རྗེས་བརླན་པར་གྱུར་པ་དག །ཐར་དང་ཡེ་ཤེས་དེ་ཡིན་གྱི། །ཐལ་བ་རལ་པ་ཆོས་གོས་མིན། །གང་ཞིག་ལང་ཚོ་ལ་ཞི་བ། །དེ་ནི་ཞི་བར་བདག་གིས་ཤེས། །ཁམས་རྣམས་ཡོངས་སུ་ཟད་པ་ན། །ཅི་ཡི་ཕྱིར་ན་ཞི་མི་འགྱུར། །མཛའ་བཤེས་ཉེ་དུ་དུར་ཁྲོད་དུ། །དུ་བ་འཐུལ་ནས་
ལྡོག་པར་བྱེད། །གང་ཞིག་རང་དང་ལྷན་ཅིག་འགྲོགས། །ལས་ཏེ་དེས་ན་དགེ་བ་སྤྱད། །གང་ཞིག་རབ་ཏུ་ཉོན་མོངས་དང་། །ཆོས་དང་འགལ་བར་བྱེད་པ་དང་། །དགྲ་ལ་འདུད་པའི་ནོར་རྣམས་ནི། །གང་གི་ནོར་དུ་རུང་མ་ཡིན། །དམ་པ་ལེགས་སྤྱོད་ལ་སྲེད་ཤིན་ཏུ་བསྡམས་གྱུར་ཏེ། །ཀུན་
དུའང་སྐྱེ་བོས་སྨོད་འཇིགས་རྟག་ཏུ་སྡུག་བསྔལ་གནས། །གང་ཞིག་འཛེམ་མེད་ལོངས་སྤྱོད་ངག་གི་རྩ་རྩོལ་བ། །རིགས་དང་མི་རིགས་དཔྱོད་མེད་ཐ་མལ་སྐྱེ་བོ་སྐྱེད། །རིགས་དང་མི་རིགས་དཔྱོད་པའི་བློ་མེད་ཅིང་། །ཐོས་དང་སྡོམ་པ་མང་པོ་རྣམ་སྤངས་ནས། །ལྟོ་བ་འགེངས་པ་ཙམ་ཞིག་
འབའ་ཞིག་འདོད། །སྐྱེས་བུ་ཕྱུགས་དང་ཕྱུགས་ལ་ཁྱད་ཅི་ཡོད། །མཐོང་དང་མ་མཐོང་ཡོན་ཏན་གྱི། །འབྱུང་གནས་ཆེན་པོ་རིགས་པ་ཡིན། །དེས་ན་དེ་བས་དོན་གཉེར་བས། །ཤེས་རབ་ཡོངས་སུ་གཟུང་བར་བྱ། །བརྒྱ་ཡི་ནང་ནས་དཔའ་བོ་སྐྱེ། །སྟོང་གི་ནང་ནས་མཁས་པ་འབྱུང་། །བརྒྱ་

203-1-108b

སྟོང་ལས་ནི་མཛངས་པ་སྟེ། །སྟོང་པ་སྐྱེའམ་མི་སྐྱེའང་སྲིད། །མཁས་པས་རིག་པ་རྣམ་ཀུན་དུ། །ན་ཚོད་ཡོལ་ཡང་བསླབ་པར་བྱ། །གལ་ཏེ་འདིར་འབྲས་མི་སྟེར་ཡང་། །སྐྱེ་བ་གཞན་དུ་རྙེད་པ་སླ། །སྐྲ་དཀར་གཉེར་མ་ལྷགས་དུས་སུའང་། །ཐོས་པ་བསགས་པར་བྱ་བ་སྟེ། །གང་དུ་ཐོས་མང་
འགྲོ་འགྱུར་བ། །དེར་ནི་ཕུང་པོ་འགྲོ་མི་འགྱུར། །རྒྱལ་པོ་དང་ནི་ཡོན་ཏན་ལྡན། །དེ་གཉིས་འདྲ་བ་མ་ཡིན་ཏེ། །རྒྱལ་པོ་རང་གི་ཡུལ་ན་བཀུར། །ཡོན་ཏན་ལྡན་པ་ཀུན་དུ་བཀུར། །ཡོན་ཏན་ལྡན་པ་སྐྱོན་ཡོད་ཀྱང་། །ཡོན་ཏན་དགའ་རྣམས་སྐྱོ་མི་བྱེད། །ཟླ་བ་རྙོག་པ་ཡོད་གྱུར་ཀྱང་། །
བརྟན་རྣམས་དགའ་བས་ལྟ་བར་བྱེད། །ཡོན་ཏན་དང་འདྲ་ལུས་ཀྱི་རྒྱན་གཞན་མེད། །སེམས་ལས་དང་འདྲ་ལུས་ཀྱི་སྡུག་བསྔལ་མེད། །བཟོད་པ་དང་འདྲ་ལུས་ཀྱི་སྲུང་མ་མེད། །གཏོང་བ་དང་མཉམ་གཉེན་ནི་གང་ན་མེད། །དམ་པ་རིང་ན་གནས་གྱུར་ཀྱང་། །ཡོན་ཏན་ཕོ་ཉ་ཉིད་
བྱེད་དེ། །ཀེ་ཏ་ཀ་ཡི་དྲི་བསྣམས་ནས། །བུང་བ་རང་ཉིད་འོང་བར་འགྱུར། །ཡོན་ཏན་དག་ལ་འབད་བྱ་ཡི། །འགྱིང་ཚུལ་དགོས་པ་ཅི་ཞིག་ཡོད། །བ་ནི་འོ་མ་མེད་པ་ལ། །དྲིལ་བུ་བཏགས་ཀྱང་ཉོ་མི་འགྱུར། །དུས་ནི་ཡུན་ཐུང་རིག་པའི་རྣམ་པ་མང་། །ཚེ་ཡི་ཚད་ཀྱང་ཇི་ཙམ་མི་
ཤེས་པས། །ངང་པས་ཆུ་ནང་ནས་ནི་འོ་མ་བཞིན། །གང་ཞིག་གཅེས་པ་དེ་ནི་བསྟེན་པར་བྱ། །སྐར་མ་ཆེན་པོ་མང་དུ་ཤར་གྱུར་ཅིང་། །ས་ཡི་རྒྱན་གྱུར་ཟླ་བ་ཤར་ན་ཡང་། །གང་དུ་ཉི་མ་ནུབ་ན་མཚན་མོར་འགྱུར། །ཉི་མ་མ་གཏོགས་ཤར་ནུབ་མིང་མི་འདོགས། །གང་ཞིག་ཤར་བར་
གྱུར་ན་ནི། །མུན་པ་མེད་ཅིང་གཟི་ཅན་བྱེད། །ཉི་མ་ཤར་བ་མཆོག་ཡིན་གྱི། །གཞན་རྣམས་ཤར་བས་ཅི་ཞིག་བྱ། །སྐྱེས་བུ་བྱ་བ་གང་ཡིན་གཅིག་བྱས་མཐར་ཕྱིན་པས། །སེམས་འཕགས་འགྱུར་ཏེ་མང་པོ་ཅི་ལ་དགོས། །ཟླ་བ་རྒྱས་པས་ས་སྟེངས་གསལ་བ་བཞིན། །སྐར་མ་མང་
པོའི་ཚོགས་ཀྱིས་ནུས་མ་ཡིན། །ཡོན་ཏན་སྐྱེས་པ་རང་ཁར་ལས། །རྫས་ནི་བསོད་ནམས་ཁར་ལས་པས། །སྐྱེས་བུ་ལ་ནི་ཅི་ཕྱིར་སྨྲེ། །ཡོན་ཏན་འབད་པས་བསྒྲུབ་བྱ་ཡིན། །འབད་པའང་བདག་ཉིད་ལ་གནས་ན། །གཞན་དག་ཡོན་ཏན་ལྡན་ཞེས་ཏེ། །དེ་ལྟར་གསོན་པ་སུ་ཡིས་

203-1-109a

བཟོད། །བསྟན་བཅོས་དོན་ནི་ཤེས་པའི་མི། །འདི་ན་ཞ་བོ་རྣམས་ལའང་མང་། །རལ་གྲིའི་རྩེ་མོ་རྣོན་པོ་ཡིས། །དགྲ་ལས་རྒྱལ་བྱེད་དེ་རྙེད་དཀའ། །ཕྱུག་པོ་ཀླ་ཀློ་རྣམས་ལའང་ཡོད། །དཔའ་བོ་དུད་འགྲོ་རྣམས་ལའང་མང་། །སྣ་ཚོགས་དོན་གྱི་གཏམ་སྨྲ་བའི། །དམ་པ་དག་ནི་
ཀུན་དུ་དཀོན། །རི་བོ་ཀུན་ལ་ཙནྡན་མེད། །གླང་པོ་ཀུན་ལ་མུ་ཏིག་མེད། །ཡང་དག་དོན་གྱི་གཏམ་སྨྲ་བའི། །མཁས་པའང་ཀུན་ན་ཡོད་མ་མིན། །ཡོན་ཏན་ཤེས་ལ་དེ་ཉིད་ཡོན་ཏན་འགྱུར། །ཡོན་ཏན་མེད་ན་དེ་ཉིད་སྐྱོན་དུ་འགྱུར། །ཆུ་བོའི་ཆུ་ནི་ཤིན་ཏུ་སྐྱོན་མེད་པའང་། །རྒྱ་མཚོར་ཕྱིན་ན་བཏུང་དུ་མི་རུང་འགྱུར། །
ཡོན་ཏན་ལྡན་པ་ཡོན་ཏན་ལ་དགའ་ཡི། །ཡོན་ཏན་མེད་པ་ཡོན་ཏན་གྱིས་མི་མགུ། །བུང་བ་ནགས་ནས་པདྨར་འོང་འགྱུར་གྱི། །སྦལ་པ་ལྷན་ཅིག་གནས་ཀྱང་དེ་ལྟ་མིན། །མཁས་པ་རྣམས་ཀྱི་གྲགས་པ་ནི། །མཁས་པ་ཉིད་ཀྱི་ནང་དུ་འཕེལ། །རིན་ཆེན་ཤེལ་ལ་རིན་ཆེན་དང་། །གཡུལ་ངོ་དག་
ཏུ་དཔའ་བོ་བཞིན། །ངང་པ་ཁྭ་ཡི་ཚོགས་ནང་མཛེས་མ་ཡིན། །ཅང་ཤེས་བོང་བུའི་ཚོགས་ནང་མཛེས་མ་ཡིན། །སེང་གེ་ཝ་ཡི་ཚོགས་ནང་མཛེས་མ་ཡིན། །མཁས་པ་བླུན་པོའི་ཚོགས་ནང་མཛེས་མ་ཡིན། །གང་ཞིག་ཆེན་པོས་སྤྱི་བོས་བཀུར། །དེ་ཉིད་དམན་པས་རྩྭ་སྙམ་སེམས། །མཁས་
པས་ཕྱག་བྱས་མཆོད་རྟེན་ནི། །ཁྭ་དག་སྟན་དུ་བྱེད་པ་ཡིན། །བདག་ལ་གྲངས་མེད་ཡོད་གྱུར་ཀྱང་། །གཞན་ལ་ཉུང་ཟད་ཡོད་པ་ཡི། །ཡོན་ཏན་མེད་ལ་དམ་པ་དགའ། །སྤྱོད་པ་འདི་ནི་ངོ་མཚར་ཆེ། །ཐམས་ཅད་མཁྱེན་པའི་ཡོན་ཏན་ནི། །ཐམས་ཅད་མཁྱེན་པ་ཉིད་ཀྱིས་མཁྱེན། །ས་གཞི་ཡི་ནི་
ལྕི་བའི་ཚད། །མཐའ་ཡས་ཉིད་ཀྱིས་ཤེས་པ་ཡིན། །གཞན་གྱིས་གཞན་དག་བསྒྲགས་ན་ནི། །མེད་པའང་ཡོན་ཏན་ཅན་དུ་འགྱུར། །ཡོན་ཏན་རང་ཉིད་སྒྲོགས་པ་ནི། །བརྒྱ་བྱིན་ཡིན་ཡང་མི་བཙུན་འགྱུར། །གང་དུ་ཡོན་ཏན་ལྡན་མི་མཆོད། །མཁས་པ་དེ་རུ་ཅི་ཕྱིར་འགྲོ། །གོས་མེད་
གཅེར་བུའི་གྲོང་ཁྱེར་དུ། །ཁྲུས་མཁན་གྱིས་ནི་ཅི་ཞིག་བྱ། །ཀྱེ་མ་འཇིག་རྟེན་གླེན་པ་འདི། །རང་རྒྱུད་གྲུབ་པ་ཡོད་མིན་ཏེ། །གཞན་གྱིས་བྱས་པའི་རྗེ་འབྲང་བས། །ཟངས་མའི་སྣོད་ནི་སྟོར་ནས་མེད། །བཞད་གད་མཁན་དང་མཁས་པ་གཉིས། །བླུན་ལ་བཞད་གད་བྱེད་པ་མཆོག །བཞད་གད་

203-1-109b

མཁན་གྱིས་ནོར་རྙེད་ཀྱིས། །མཁས་ལ་ནོར་མེད་སྟོང་པར་འགྲོ། །སྣ་ཚོགས་དོན་ལྡན་གཏམ་རྒྱུད་ཀྱིས། །མཁས་པ་དུས་ནི་འདའ་བར་བྱེད། །དབུལ་པོ་ཆོས་ཀྱིས་ཕོངས་གྱུར་པས། །གཉིད་ལོག་ན་ཡང་འཐབ་པར་བྱེད། །གང་ཞིག་མང་པོ་ཚོགས་པར་གྱུར་པ་ལས། །སྐྱེ་བོ་དམ་པའི་ཡོན་ཏན་
སྟེན་མི་བྱེད། །དེ་ནི་རང་གི་མ་ཡི་སྡུག་བསྔལ་གྱིས། །བསྐྱེད་དེ་སྐྱེས་པར་གྱུར་ཀྱང་ཅི་ཞིག་ཕན། །མཁས་པའི་ཚུལ་ནི་རིགས་པ་ཡིན། །ཁུ་བྱུག་ཚུལ་ནི་སྒྲ་སྙན་ཡིན། །དཀའ་ཐུབ་ཚུལ་ནི་བཟོད་པ་ཡིན། །བུད་མེད་ཚུལ་ནི་ཉོན་མོངས་ཡིན། །སྐར་རྩིས་དེ་བཞིན་གྲུབ་མཐའ་དང་། །མཁའ་ལྡིང་
སྔགས་དང་སྔགས་སྨྲ་བ། །དོན་གྱི་དེ་ཉིད་གཟུང་བྱ་ཡི། །སྒྲ་ལ་དཔྱད་པར་མི་བྱའོ། །གླེགས་བམ་ལ་བཞག་རིག་པ་དང་། །གཞན་ལ་ཚོལ་བའི་ནོར་དག་ནི། །དགོས་པའི་དུས་ལ་བབ་པ་ན། །དེ་ནི་ནོར་མིན་རིག་པ་མིན། །བཟོ་སློབ་པ་ཡི་ཡོན་ཏན་ཀུན། །ཡོན་ཏན་འཚོ་བའི་རྒྱུ་ཙམ་
ཡིན། །འཁོར་བ་གཅོད་པའི་བློ་གྲོས་གང་། །ཅི་ཡི་ཕྱིར་ན་དེ་མི་བྱིན། །མི་ནི་སུ་ལའང་མ་བརྟགས་པར། །གདམས་ངག་སྦྱིན་པར་མི་བྱ་སྟེ། །སྤྲེའུ་ཙམ་གྱི་གནས་བཅས་དང་། །གནས་མེད་པར་ནི་བྱས་ལ་ལྟོས། །ཁ་ཅིག་སྨྲ་བ་ལྷུར་ལེན་ཏེ། །ཁ་ཅིག་མི་སྨྲ་དོན་ཡང་བསྒྲུབ། །འདམ་
བུ་མེ་ཏོག་འབྲས་བུ་མེད། །སྟར་ཀ་འབྲས་བུ་མེ་ཏོག་ལྡན། །ཀེ་ཏ་ཀ་ཡི་འབྲས་བུ་ནི། །ཆུ་རྣམས་དང་བར་བྱེད་མོད་ཀྱི། །དེ་ཡི་མིང་ཙམ་སྨོས་པ་ཡིས། །ཆུ་རྡུལ་དང་བར་མི་བྱེད་དོ། །གཞུང་ལུགས་དག་ལ་བྱང་བྱས་ཀྱང་། །ཉམས་སུ་ལེན་པར་མི་བྱེད་ན། །ལག་ན་སྒྲོན་མ་
ཡོད་ཀྱང་ནི། །ལོང་བས་ལམ་ནི་མཐོང་མི་འགྱུར། །ཟླ་བ་ཡར་ངོ་མར་ངོ་ལྟར། །དམ་པ་དམ་མིན་བསྟེན་པ་ལས། །ཡོན་ཏན་ཆུང་ངུའང་རྒྱས་འགྱུར་ཞིང་། །རྒྱ་ཆེན་པོ་ཡང་འགྲིབ་པར་འགྱུར། །མཁས་པས་དགྲ་བོར་གྱུར་པའང་བླའི། །མི་མཁས་པ་དང་མཛའ་བ་མིན། །རྐུན་པོས་
བྲམ་ཟེ་བསྲུངས་པ་དང་། །སྤྲེའུས་རྒྱལ་པོའི་མིག་བཅར་བཞིན། །མཁས་པ་དང་ནི་དུལ་བ་དང་། །ཆོག་ཤེས་བདེན་པར་སྨྲ་བ་དང་། །འཆི་བ་ན་ཡང་འདུག་བླ་ཡི། །སྐྱེ་བོ་ངན་དང་རྒྱལ་སྲིད་མིན། །སྦྲུལ་གདུག་སྐྱེ་བོ་ངན་པ་དུག །སྦྲུལ་ལས་ལྷག་པར་སྐྱེ་ངན་དུག །སྦྲུལ་

203-1-110a

གདུག་སྨན་དང་སྔགས་ཀྱིས་ཐུབ། །སྐྱེ་ངན་གདུག་པ་གང་གིས་ཞི། །སྐྱེ་བོ་ངན་པ་ཡོན་ཏན་བརྒྱ་ཡིས་ཕན་བཏགས་ཏེ། །དགའ་བར་གྱུར་ཀྱང་དེ་ནི་ཚིག་རྩུབ་སྨྲ་བར་བྱེད། །གང་ཞིག་རིགས་ལྡན་དེ་བཞིན་བརྟན་པ་དང་། །བསྔགས་འོས་ཕོངས་ཀྱང་ཡོན་ཏན་
གཏོང་མི་བྱེད། །རང་བཞིན་ངན་པའི་མི་དག་དང་། །སྲང་གི་མཚན་ཉིད་དག་དང་མཚུངས། །ཅུང་ཟད་ཙམ་གྱིས་མཐོ་འགྱུར་ཞིང་། །ཅུང་ཟད་ཙམ་གྱིས་དམའ་བར་འགྱུར། །ཙན་དན་གླ་རྩི་ག་བུར་གྱིས་བྱུགས་ཀྱང་། །སྒོག་སྐྱའི་རང་བཞིན་དྲི་ང་མི་འདོར་ལྟར། །རིགས་པའི་གཞུང་ལུགས་
མང་པོ་རབ་བསླབས་ཀྱང་། །རང་བཞིན་ངན་པའི་མཚན་ཉིད་འདོར་མི་སྲིད། །དམ་པའི་བུ་ལ་གདོང་ན་པདྨ་མེད། །སྨད་འཚོང་བུ་ལ་གླད་ནས་རྭ་མ་སྐྱེས། །ཇི་ལྟ་ཇི་ལྟར་ལོག་པར་བྱེད་གྱུར་པ། །དེ་ལྟ་དེ་ལྟར་ནལ་བུའི་མཚན་ཉིད་ཡིན། །ཁ་ནས་སྨྲས་པའི་ཚིག་གཞན་ལ། །ཡིད་ལ་སེམས་པའི་
བསམ་པ་གཞན། །ཀྱེ་མ་ཡོན་པོའི་བློ་གྲོས་ཅན། །འདི་ཡི་རང་བཞིན་སུ་ཡིས་སྤྲུལ། །འབད་པས་སྐྱོན་ནི་ལེན་པར་བྱེད། །ཡོན་ཏན་རྟག་ཏུ་སྤོང་བར་བྱེད། །སྐྱོན་ལེན་ཡོན་ཏན་སྤོང་བ་ཡི། །སྐྱེ་བོ་ངན་པ་ཆུ་ཚགས་འདྲ། །སྐྱེ་བོ་ངན་པ་སུན་ཕྱུང་ན། །དམ་པ་ལ་ཡང་ཡིད་མི་རྟོན། །བྱིས་པ་འོ་མས་ཁ་ཚིག་ན། །
ཞོ་ལའང་ཕུ་ཡིས་འདེབས་ཤིང་འཐུང་། །མཚན་མོ་མཚོ་ནང་སྐར་མའི་གཟུགས་བརྙན་སྣང་བ་ལ། །ངང་པ་པདྨའི་རྩ་བར་འཁྲུལ་པས་སུན་ཕྱུང་བ། །ཉིན་མོ་པད་རྩ་མངོན་སུམ་མཐོང་ཡང་ཟ་མི་བྱེད། །བརྫུན་སྨྲས་སུན་ཕྱུང་བདེན་པ་ལ་ཡང་དོགས་པ་སྐྱེ། །བུད་མེད་ཟས་ནི་ཉིས་འགྱུར་ཏེ། །དེ་ཡི་གཡོ་
སྒྱུ་བཞི་འགྱུར་རོ། །ངོ་ཚ་དག་ནི་དྲུག་འགྱུར་རོ། །འདོད་ཆགས་བརྒྱད་འགྱུར་ཞེས་བརྗོད་དོ། །སྦྱིན་པས་མ་ཡིན་རིམ་གྲོས་མིན། །མཆོད་པས་མ་ཡིན་བསྙེན་བཀུར་མིན། །བརྟན་པས་མ་ཡིན་བརྩོན་པས་མིན། །ཀུན་དུ་མི་བཟད་བུད་མེད་ཡིན། །མཁའ་ལྡིང་དབང་པོས་ཁྱེར་བའི་ཚེ། །པད་དཀར་ཀླུ་
ཡིས་སྨྲས་པ་ནི། །གསང་ཚིག་བུད་མེད་ལ་སྨྲ་བ། །དེ་ཡི་སྲོག་ནི་དེ་ཟད་འགྱུར། །དོན་དང་ཆོས་ནི་རྣམ་པར་ཉམས་བྱེད་ཅིང་། །མཐོ་རིས་དག་དང་ཐར་པའི་གེགས་བྱེད་ལ། །གནོད་པ་ཀུན་གྱི་རྩ་བ་ཉིད་གྱུར་པས། །དེ་བས་གཞན་གྱི་བུད་མེད་རྟག་ཏུ་སྤང་། །གང་གིས་ཚིགས་བཅད་གཅིག་ཙམ་ཞིག །བླ་མས་

203-1-110b

སློབ་མ་ལ་བྱིན་ན། །གང་ཞིག་བཏང་ནས་ཤོག་བཏང་འགྱུར། །རྫས་དེ་ས་སྟེངས་ཡོད་མ་ཡིན། །འདུ་འཛི་ཀུན་དུ་སྤང་བར་གྱིས། །གལ་ཏེ་དེ་སྤོང་མ་ནུས་ན། །དམ་པ་དག་དང་འདྲེ་བར་གྱིས། །དེ་ཉིད་དེ་ཡི་སྨན་ཡིན་ནོ། །འདོད་པ་ཀུན་དུ་སྤང་བར་གྱིས། །གལ་ཏེ་སྤོང་བར་མ་ནུས་ན། །ཐར་པ་དག་
ལ་འདོད་པར་གྱིས། །དེ་ཉིད་དེ་ཡི་སྨན་ཡིན་ནོ། །ཕན་མེད་གཉེན་ཡང་གཞན་ཡིན་ཏེ། །ཕ་རོལ་ཡིན་ཡང་གང་ཕན་གཉེན། །ལྷན་ཅིག་འབྱུང་བའི་ལུས་སོགས་ནད། །ཕན་བྱེད་དགོན་པའི་སྨན་བཞིན་ནོ། །འབད་པ་ཡིས་ནི་བཟུང་བ་ཡི། །བུམ་པ་ཡི་ནི་ཆུ་ཕྱེད་བཞིན། །སྤྱི་བོ་ལ་ནི་བཀུར་བྱས་ན། །
སྐྱེ་བོ་ངན་པ་ཁྲོ་བར་བྱེད། །གང་ཞིག་ཡིད་དང་རྗེས་མཐུན་པ། །རིང་ན་གནས་ཀྱང་ཉེ་བ་ཡིན། །གང་ཞིག་ཡིད་ལ་བརྟན་མི་གནས། །དྲུང་ན་གནས་ཀྱང་རིང་བ་ཡིན། །དམ་པ་མིན་དང་ལྷན་ཅིག་གནས་གྱུར་ཀྱང་། །ཆུ་དང་པད་མོ་བཞིན་དུ་འདྲེས་མི་འགྱུར། །དམ་པ་ཐག་རིང་དག་ཏུ་གནས་གྱུར་
ཀྱང་། །ཟླ་བ་ཀུ་མུ་ཏ་ལྟར་དགའ་བར་བྱེད། །གལ་ཏེ་རྟག་ཏུ་མཛའ་འདོད་ན། །གསུམ་པོ་འདི་དག་མི་བྱ་སྟེ། །རྒྱན་པོ་འགྱེད་དང་ནོར་འབྲེལ་དང་། །ལྐོག་ཏུ་ཆུང་མ་དང་སྨྲ་བའོ། །ཇི་ལྟར་རྭ་ལས་འོ་མ་འབྱུང་། །འདམ་བུ་མེ་ཏོག་སྦྲང་རྩི་འཛག །གལ་ཏེ་བུད་མེད་བདེན་གྱུར་ན། །སྐམ་ས་ལས་
ཀྱང་པདྨ་སྐྱེ། །བསོད་ནམས་ཡོངས་སུ་དམན་པའི་མིས། །ལོངས་སྤྱོད་ཐོབ་ཀྱང་སྤྱོད་མི་ཤེས། །གངས་ཆེན་མཚོ་ལ་ཁྱི་བཞིན་དུ། །སྐོམ་ནའང་ལྕེ་ཡིས་ལྷག་པར་བྱེད། །འཇིག་རྟེན་འདི་ན་ལས་བྱེད་པ། །གླ་མེད་ལམ་བརྒྱགས་ཁྱེར་མི་བཏུབ། །སློང་བ་དམན་པ་མི་མངོན་པར། །ཕྱི་མའི་
དུས་ན་བརྒྱ་འགྱུར་ཁྱེར། །རང་ནོར་སྤངས་ནས་འགྲོ་འགྱུར་བས། །སྐྱེས་བུ་སྦྱིན་པ་གཏོང་བར་བྱེད། །ཤི་ནའང་ནོར་ནི་མི་འདོར་བས། །སྦྱིན་བྱེད་སེར་སྣ་ཅན་འདྲར་ཤེས། །སྦྱིན་ན་དབུལ་གྱུར་དོགས་པ་ཡིས། །བཀྲེན་པ་སྦྱིན་པ་གཏོང་མི་བྱེད། །ངེས་པར་འཇིག་པ་དེ་ཉིད་ཀྱིས། །
མཁས་པས་ནོར་ནི་གཏོང་བར་བྱེད། །ཟས་ལས་ཟན་གྱི་ཕྱེད་ཙམ་ཡང་། །སློང་བ་རྣམས་ལ་ཅིས་མི་སྟེར། །འདོད་དང་རྗེས་མཐུན་འབྱོར་པ་ཡང་། །གང་གི་ཚེ་ན་འབྱུང་བར་འགྱུར། །ལས་ཀྱིས་འབྱོར་པ་མེད་ཀྱང་གདུང་བ་མི་སྐྱེད་ཀྱི། །འོན་ཀྱང་ཅི་འབྱོར་པ་ལ་སྦྱིན་པ་གཏང་བྱ་སྟེ། །

203-1-111a

ལོ་མ་མེ་ཏོག་འབྲས་བུ་ཆུ་དང་སྨན་རྣམས་ནི། །ཐམས་ཅད་མཐའ་ཡས་བསྔོ་བའི་སྟོབས་ཀྱིས་མཐའ་ཡས་འགྱུར། །སྦྱིན་དང་སྤྱོད་པས་སྟོང་པ་ཡི། །ནོར་དེས་ནོར་བདག་ཡིན་ན་གོ། །ནོར་དེ་ཉིད་ཀྱིས་བདག་ཀྱང་ནི། །ནོར་གྱི་བདག་པོ་ཅིས་མ་ཡིན། །ཡབ་གཅིག་
འདི་ནི་ལས་ཀྱི་ས། །འདི་ནས་ཕ་རོལ་འབྲས་བུའི་ས། །འདི་ནི་གང་ཞིག་བྱས་གྱུར་པ། །དེ་ཉིད་གཞན་དུ་ངེས་པར་སྤྱོད། །གཞན་འབྱོར་རིགས་དང་གཟུགས་དང་ནད་མེད་ཉིད། །མཐོང་ནས་འདིར་ནི་ཅི་ཕྱིར་གདུང་བར་བྱེད། །གལ་ཏེ་འདི་ཀུན་ཁྱོད་འདོད་བསོད་ནམས་ཀྱི། །ས་བོན་
ལས་ནི་འབྲས་འབྱུང་མ་ཐོས་སམ། །འབྱོར་པ་ཡོད་ཀྱང་གཏོང་མེད་ན། །ཉེ་བར་འཚོ་བས་ཅི་བྱར་ཡོད། །ཀིམ་པ་ཀ་ཡི་འབྲས་བུ་ནི། །ཆག་ཀྱང་ལྟོགས་ལ་ཅི་བྱར་ཡོད། །གང་ཞིག་གཞན་ལ་གནོད་པ་མེད་པར་སྦྱིན་གཏོང་བ། །འདི་ཡི་ལོངས་སྤྱོད་སྣ་ཚོགས་ཆུ་ཡིས་མི་འཁྱེར་ཞིང་། །
མེ་ཡིས་མི་ཚུགས་རྐུན་པོ་རྣམས་ཀྱིས་འཕྲོག་མི་ནུས། །དེ་ཡི་འབྱོར་པ་ནམ་ཡང་རབ་ཉམས་མི་འགྱུར་རོ། །གང་ཞིག་དམྱལ་བའི་ནད་ལ་ནི། །གསོ་བ་དག་ནི་མི་བྱེད་པ། །སྨན་མེད་གནས་སུ་སོང་ནས་ནི། །ནད་དང་བཅས་པས་ཅི་བྱར་ཡོད། །མི་སྲུན་སྐྱེ་བོ་ས་ཁུང་ལས་བྱུང་བའི། །ཚིག་ནི་སྦྲུལ་གྱིས་
སྐྱེ་བོ་དམ་པ་ཟིན། །དུག་དེ་ཞི་བར་བྱེད་པའི་གཉེན་པོར་ཡང་། །ཤེས་རབ་བཟོད་པའི་སྨན་དག་བཏུང་བར་བྱ། །ཇི་སྲིད་འཚོ་བར་བསད་ཀྱང་ནི། །དགྲ་བོ་ཟད་པར་མི་འགྱུར་གྱི། །དེ་ནི་དགྲ་བོ་ཉིད་གསོད་ཡིན། །མཐུ་ཆེན་བཅོས་སུ་མི་རུང་ལ། །བཟོད་པ་བྱར་ཡང་ཅི་ཞིག་ཡོད། །དུལ་བ་ཞི་བའི་སྤྱོད་
པ་ལ། །བཟོད་པར་བྱ་ཡང་ཅི་ཞིག་དགོས། །གནོད་བྱེད་འོས་པས་ཁྲོ་ཞེ་ན། །ཆོས་དོན་འདོད་དང་ཐར་པ་དག །མངོན་སུམ་དུ་ནི་འཇིག་བྱེད་པའི། །ཁྲོ་ལ་ཁྱོད་ནི་ཅིས་མི་ཁྲོ། །གཞན་གྱི་འབྱོར་པ་དམ་པ་མཐོང་ནས་ནི། །གང་ཞིག་སེམས་འཁྲུག་པ་ནི་སྐྱེ་འགྱུར་བས། །དོན་དེ་ཅུང་ཟད་རྙེད་པར་
མི་འགྱུར་གྱི། །འགྲོ་དེ་རང་གི་བསོད་{ནམས་}འཇོམས་པར་བྱེད། །ཐམས་ཅད་ཆོས་ནི་མཉན་པར་བྱ། །ཐོས་ནས་རབ་ཏུ་གཟུང་བྱ་སྟེ། །གང་ཞིག་བདག་ཉིད་མི་འདོད་པ། །དེ་དག་གཞན་ལ་མི་བྱའོ། །འཇིག་རྟེན་ཕ་རོལ་འགྲོ་བ་དག །ཤེས་པར་སྨྲ་ལ་སུ་ཞིག་མཁས། །དེ་ནི་ཉམས་སུ་ལེན་

203-1-111b

པ་ན། །དྲང་སྲོང་རྣམས་ཀྱང་མཁས་པ་ཡིན། །འབྱོར་པ་གཡོ་ཞིང་ལང་ཚོ་ཡུད་ཀྱིས་འཇིག །སྲོག་ནི་གཤིན་རྗེའི་སོ་གཅིག་གནས་དང་མཚུངས། །འོན་ཀྱང་འཇིག་རྟེན་ཕ་རོལ་སྒྲུབ་ལ་ལྷོད། །ཀྱེ་མ་མི་ཡི་སྤྱོད་པ་ངོ་མཚར་ཆེ། །བློ་གྲོས་བཟང་ཡང་ལེ་ལོ་ཡིས། །སྐྱེ་བ་མཐོན་པོར་མི་འགྱུར་
ཏེ། །ལག་རྩིས་ས་ལ་འདྲི་བ་ཡི། །ཕོ་ལོང་གཤེར་བ་དག་དང་མཚུངས། །གལ་ཏེ་འགྲོ་བ་འདི་ཀུན་གྱིས། །འཆི་བདག་སྤྱི་བོར་གནས་མཐོང་ན། །ཟས་ཀྱང་ཡི་གར་མི་འོང་ན། །བྱ་བ་གཞན་ལྟ་སྨོས་ཅི་དགོས། །འདུས་བྱས་ཟིན་ཏམ་མ་ཟིན་ཅེས། །འཆི་བདག་སྡོད་པར་མི་འགྱུར་བས། །
སང་གི་བྱ་བ་དེ་རིང་བྱ། །ཕྱི་དྲོའི་བྱ་བ་སྔ་དྲོ་བྱ། །ཇི་སྲིད་ནད་མེད་ལོ་ཏོག་སྐྱེས་གྱུར་པ། །ནད་ཀྱི་སེར་བ་ཆེན་པོས་མ་བརླག་ཅིང་། །ཇི་སྲིད་བློ་ནི་བྱ་བའི་རྗེས་འཇུག་པ། །འདི་ནི་དམ་ཆོས་མཉན་པའི་དུས་ཡིན་ནོ། །བོང་བུ་ཕྱུགས་ལ་མེ་ཏོག་ཕྲེང་བ་ཅི། །དུད་འགྲོ་ཕག་ལ་ཁ་ཟས་ཞིམ་
པོ་ཅི། །ལོང་ལ་སྣང་དང་འོན་པ་དག་ལ་གླུ། །གླེན་པ་རྣམས་ལ་ཆོས་ཀྱིས་ཅི་ཞིག་བྱ། །ཇི་སྲིད་འདོད་ཆེན་མ་གྱུར་པར། །དེ་སྲིད་ཡོན་ཏན་ཆེ་ཉིད་ཡིན། །འདོད་ཆེན་ཉིད་ལ་ཞུགས་གྱུར་ན། །ཡོན་ཏན་བཙུན་པར་ག་ལ་འགྱུར། །ཇི་སྲིད་སུ་ལའང་མི་སློང་བ། །དེ་སྲིད་དཀའ་ཐུབ་གཟི་བརྗིད་
ཅན། །དཔའ་ཞིང་ཤེས་ལྡན་རིགས་མཐོ་དག །སྐྱེས་བུ་ཞེས་ཀྱང་དེ་སྲིད་བརྗོད། །དང་པོའི་རྩོམ་པ་གང་ཡིན་པ། །འདི་ལྟར་ངོ་མཚར་ཆེ་བ་ཡིན། །ཟོ་ཆུན་བཟོ་སྦྱར་གྱུར་པ་ནི། །བུད་མེད་ཀྱི་ཡང་དབང་དུ་འགྱུར། །དྲང་སྲོང་བུ་ནི་མྱུར་དུ་ཤི་ཡང་རུང་། །རྒྱལ་པོའི་བུ་ནི་ཡུན་རིང་གསོན་ཡང་
རུང་། །རྔོན་པའི་བུ་ནི་ཤིའམ་གསོན་མི་རུང་། །དམ་པའི་བུ་ནི་ཤིའམ་གསོན་ཡང་རུང་། །དེ་ནས་འབྱུང་བ་ལ་གནས་པའི། །མི་ཡི་བློ་ནི་འཕེལ་བྱའི་ཕྱིར། །གང་གིས་བསྟན་བཅོས་ཤེས་གྱུར་པའི། །ལེགས་པར་བཤད་པ་བཤད་པར་བྱ། །ལེགས་པར་བཤད་པའི་རང་བཞིན་ཚིག །
གང་ཡང་རུང་བ་བསག་པར་བྱ། །ཚིག་གི་གནས་སྐབས་མཆོད་སྦྱིན་ལ། །ནོར་མེད་ཅི་ཞིག་སྟེར་བར་བྱེད། །རིག་པ་བསླབ་དང་དཔའ་བོ་དང་། །གང་ཡང་གཟུགས་བཟང་ལྡན་བུད་མེད། །གང་དང་གང་དུ་འགྲོ་གྱུར་པ། །དེ་དང་དེར་ནི་དཔལ་ཆེན་ཐོབ། །རིག་པར་ལྡན་དང་རྒྱལ་པོ་ཡི། །

203-1-112a

གང་དུའང་མཉམ་པ་མ་ཡིན་ཏེ། །རྒྱལ་པོ་རང་གི་ཡུལ་ན་བཀུར། །རིགས་ལྡན་ཀུན་དུ་བཀུར་བར་འགྱུར། །གཟུགས་དང་ལང་ཚོ་ཕུན་ཚོགས་ཤིང་། །རིགས་མཐོ་རྣམས་ལས་སྐྱེས་གྱུར་ཀྱང་། །རྒྱ་སྐྱེགས་ཤིང་གི་མེ་ཏོག་ལྟར། །རིགས་དང་བྲལ་ན་མཛེས་མ་
ཡིན། །ལུས་ཅན་རིགས་དང་བྲལ་གྱུར་པ། །རིགས་ལྡན་ཡིན་ཡང་ཅི་ཞིག་དགོས། །འཇིག་རྟེན་དུ་ནི་རིག་པས་མཆོག །རིག་པ་མེད་པས་རླག་པར་བྱེད། །བདེ་བ་འདོད་ན་རིག་པ་དོར། །རིག་པ་འདོད་ན་བདེ་བ་དོར། །བདེ་ལྡན་རིག་པ་ག་ལ་འགྲུབ། །རིག་པ་དོན་གཉེར་ག་ལ་བདེ། །རིགས་
དང་མཛའ་བཤེས་མེད་གྱུར་པའི། །མི་ནི་རྟག་ཏུ་སྡུག་བསྔལ་འགྱུར། །རིགས་དང་མཛའ་བཤེས་ལྡན་གྱུར་པའི། །མིས་ནི་རྟག་ཏུ་དགའ་བ་འཐོབ། །རིགས་དང་ལྡན་པ་གཞན་ཡུལ་གང་། །སྙན་པར་སྨྲ་ལ་ཕ་རོལ་སུ། །གནས་དང་ལྡན་པ་ཁུར་ལྕི་གང་། །བརྩོན་དང་ལྡན་ལ་ཐག་རིང་
ཅི། །རྩོལ་བ་ཡི་ནི་གྲོགས་ཡོད་ལ། །རི་རྒྱལ་རྩེ་མོའང་མཐོ་བ་མིན། །ས་ཡི་འོག་ཀྱང་དམའ་བ་མིན། །རྒྱ་མཚོས་ཆོད་པའང་ཕ་རོལ་མིན། །རིག་པ་གླེགས་བམ་ལ་བསླབས་ཀྱི། །བླ་མའི་ཐད་རྣམས་མ་བསླབས་པ། །འཕྱོན་མའི་བུད་མེད་སྦྲུམ་མ་བཞིན། །ཚོགས་པའི་ནང་དུ་མི་མཛེས་
སོ། །བླ་མ་གང་ཞིག་ཡི་གེ་གཅིག །སྟེར་བ་ལ་ནི་བརྙས་བྱེད་པ། །ཁྱི་ཡི་སྐྱེ་གནས་བརྒྱར་བརྒྱུད་ནས། །རིགས་ངན་དུ་ཡང་སྐྱེ་བར་འགྱུར། །གང་ཞིག་ལ་ནི་ཡི་གེ་གཅིག །བླ་མས་སློབ་མ་ལ་བྱིན་ན། །གང་ཞིག་བཏང་ནས་ཤོག་གཏོང་བའི། །ནོར་ནི་ས་སྟེངས་ཡོད་མ་ཡིན། །སྐྱེད་པར་བྱེད་དང་
ལེགས་སློབ་དང་། །གང་ཞིག་རིག་པ་སྟེར་བ་དང་། །ཟས་སྟེར་བ་དང་མི་འཇིགས་སྦྱིན། །ལྔ་པོ་འདི་དག་ཕ་རུ་བཤད། །རྒྱལ་པོ་བློན་པོའི་ཆུང་མ་དང་། །དེ་བཞིན་མཛའ་བོའི་ཆུང་མ་དང་། །སྤུན་ཟླའི་ཆུང་མ་མ་ཉིད་དེ། །ལྔ་པོ་འདི་དག་མ་རུ་བཤད། །བླུན་པོ་རྣམས་ལ་གདམས་པ་ནི། །འཁྲུག་
པར་འགྱུར་གྱི་ཞི་མི་འགྱུར། །སྦྲུལ་ལ་འོ་མ་བླུད་པ་ནི། །དུག་འཕེལ་འགྱུར་བ་ཁོ་ནར་ཟད། །མངོན་སུམ་པ་ཡི་རྐང་གཉིས་ཕྱུགས། །བླུན་པོ་ཡོངས་སུ་སྤང་བར་བྱ། །མ་མཐོང་ཚེར་མ་ཇི་ལྟ་བར། །ཚིག་གི་ཟུག་རྔུས་གནོད་པར་བྱེད། །བླུན་པོས་བླུན་པོ་མཐོང་གྱུར་ན། །ཙན་དན་བས་ཀྱང་བསིལ་

203-1-112b

བར་བྱེད། །གལ་ཏེ་མཁས་པ་མཐོང་གྱུར་ན། །ཕ་གསོད་པ་ནི་ལྟ་བུར་སེམས། །སྐྱེ་བོ་ངན་ལ་ཕན་པ་དག །བྱས་ཀྱང་གང་ལའང་བྱས་མི་གཟོ། །དམ་པ་ཅུང་ཟད་བཀུར་ན་ཡང་། །ཇི་སྲིད་འཚོ་བར་རང་དབང་འགྱུར། །བླུན་པོ་ཆུ་ཡི་རི་མོ་ལྟར། །གང་ཞིག་བྱས་པ་དེ་མྱུར་འཇིག །དམ་པ་རྡོ་ཡི་རི་མོ་
ལྟར། །ཤིན་ཏུ་ཆུང་ངུའང་བརྟན་པར་གནས། །སྐྱེ་བོ་ངན་པ་སྙན་སྨྲ་ཡང་། །འདི་ལ་ཡིད་བརྟན་རུང་མ་ཡིན། །རྨ་བྱ་སྒྲ་སྙན་སྒྲོགས་ན་ཡང་། །ཟས་སུ་དུག་ཆེན་ཟ་བ་ཡིན། །ཨེ་མ་སྐྱེ་བོ་ངན་པ་དང་། །བད་ཀན་དག་གི་རང་བཞིན་མཚུངས། །འཇམ་པོ་ཡིས་ནི་འཁྲུག་འགྱུར་ལ། །རྩུབ་པོ་ཡིས་
ནི་ཞི་བར་འགྱུར། །སྐྱེ་བོ་ངན་དང་གསེར་དང་རྔ། །མི་སྲུན་རྟ་དང་བུད་མེད་དྲེགས། །བརྡུངས་ནས་དུལ་བ་ཉིད་འགྱུར་གྱི། །དེ་དག་ལེགས་བྱས་སྣོད་མ་ཡིན། །སྐྱེ་བོ་ངན་དང་ལྷན་ཅིག་ཏུ། །དགྲར་གྱུར་མཛའ་བའང་མཛེས་མ་ཡིན། །ཁྱིམ་ནི་རྩེ་བར་བྱེད་པའམ། །ལྷག་པའང་མཛེས་པར་
འགྱུར་མ་ཡིན། །སྦྲུལ་བས་ཀྱང་ནི་མི་སྲུན་གདུག །སྦྲུལ་གདུག་སྨན་དང་སྔགས་ཀྱིས་ཞི། །མི་སྲུན་ཅིས་ཀྱང་ཞི་མི་བྱེད། །མི་སྲུན་པ་ཡི་ཉེས་པ་ནི། །ངོ་བོ་ཉིད་ཀྱིས་རྗེས་འཇུག་ལ། །གང་ཞིག་མི་སྲུན་དང་འདྲེས་དེ། །མི་སྲུན་ལས་ཀྱང་མི་སྲུན་འགྱུར། །ཕ་ཡི་སྤྱོད་པ་མ་མཐོང་ཡང་། །བུ་
ནི་རྗེས་སུ་འཇུག་བྱེད་དེ། །ཀེ་ཏ་ཀ་ཡི་ཤིང་ལས་ནི། །སྐྱུ་རུ་ར་འབྲས་འབྱུང་མི་འགྱུར། །ཕ་དང་མ་དང་དེ་བཞིན་སྤུན། །ཆུང་མ་རྗེས་མཐུན་འཇུག་པ་རྣམས། །དེ་ཡིས་སྡིག་པ་བྱས་པ་གང་། །དེ་ནི་མི་དེས་བྱས་དང་མཚུངས། །ས་འདི་རྒྱ་མཚོ་ཆེན་པོ་དང་། །རི་བོར་བཅས་པ་ཁུར་
མིན་གྱི། །གང་ཞིག་བྱས་པ་མི་གཟོ་བ། །དེ་ནི་ཤིན་ཏུ་ཁུར་ལྕི་ཡིན། །ཚུལ་ཁྲིམས་ལྡན་དང་ལྷན་ཅིག་གནས། །འབྱུང་པོ་ཀུན་ལ་ཕན་པར་དགའ། །གཤིན་རྗེ་འཇིགས་བྱེད་གང་ཡིན་པ། །དེ་ནི་མཁས་པས་རབ་ཏུ་བསྔགས། །མཁས་པ་དང་ནི་དུལ་བ་དང་། །ཆོག་ཤེས་བདེན་
སྨྲ་ལྷན་ཅིག་ཏུ། །བཙོན་རར་གནས་པའང་གནས་བླ་ཡི། །མི་སྲུན་ནང་གི་རྒྱལ་སྲིད་མིན། །དམ་པ་དག་དང་ལྷན་ཅིག་འདྲིས། །མཁས་དང་ལྷན་ཅིག་སྨྲ་བ་དང་། །བརྐམ་མེད་ལྷན་ཅིག་མཛའ་བ་ཉིད། །བྱེད་པ་སྐྱོང་བར་མི་འགྱུར་རོ། །ཤིན་ཏུ་ཡུན་རིང་དུས་སུ་ཡང་། །གང་གིས་

203-1-113a

འཇིག་རྟེན་འདི་དང་ནི། །གཞན་དུ་སྡུག་བསྔལ་མི་འཐོབ་པའི། །བློ་ནི་ཆོས་མཐུན་ཉིད་དུ་བྱ། །སེམས་ནི་དགའ་བར་བྱེད་ན་ཡང་། །རྣམ་སྨིན་གནོད་བྱེད་ཅི་རུ་རུང་། །གང་གིས་ཁམས་ནི་འཁྲུག་བྱེད་པའི། །ཁ་ཟས་ཞིམ་པོའང་ཅི་རུ་རུང་། །གནོད་ཀྱང་ཕན་པར་འགྱུར་
བ་ནི། །མཁས་པས་སྨན་བཞིན་བཏུང་བྱ་སྟེ། །འདི་ཡི་འབྲས་བུ་རྗེས་ཐོབ་པ། །མཚུངས་པ་མེད་པ་ཉིད་དུ་འགྱུར། །དོན་འདིར་རིགས་དང་ལྡན་པ་ཡི། །རྒྱལ་པོས་བསྡུ་བ་བྱས་ན་ནི། །ཐོག་མ་དབུས་དང་ཐ་མ་རུ། །དེ་ནི་གཞན་དུ་མི་འགྱུར་རོ། །རྒྱ་མཚོ་འཇིག་པའི་དུས་སུ་ནི། །
གཞུང་ལས་རྒལ་བར་འགྱུར་ཞེས་གྲགས། །དམ་པ་འཆི་ནའང་གཞུང་ལུགས་ལས། །ནམ་ཡང་འདའ་བར་མི་བྱེད་དོ། །ལུགས་ཀྱི་བསྟན་བཅོས་ཤེས་རབ་སྡོང་བུ་ཞེས་བྱ་བ། སློབ་དཔོན་ཀླུ་སྒྲུབ་ཀྱིས་མཛད་པ་ལས་ལེའུ་གཉིས་པ་ལོགས་ཤིག་ཏུ་བསྒྱུར་བ་རྫོགས་སོ།།      །།ལོ་ཙཱ་བ་ཤཱི་ལེན་
དྲ་བོ་དྷི་དང་། བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།།      ༄༅༅། །རྒྱ་གར་སྐད་དུ། བྱ་ཤ་སུ་ཛནྟུ་བིནྡུ་པོ་ཤ་ནཱ་མ། བོད་སྐད་དུ། ལུགས་ཀྱི་བསྟན་བཅོས་སྐྱེ་བོ་གསོ་བའི་ཐིགས་པ་ཞེས་བྱ་བ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་
ལོ། །དཔལ་གྱི་འབྱུང་གནས་འཇམ་དཔལ་ཀུན་གྱི་དཔལ། །མཐའ་དག་བྱམས་པས་ཁྱབ་པས་འཇམ་པའི་ངང་། །འཇམ་དང་དཔལ་དུ་གྲགས་པས་ཐུགས་རྗེའི་མགོན། །འཇམ་དཔལ་ཀུན་གྱི་མགོན་ལ་ཕྱག་འཚལ་ཏེ། །བློ་དམན་སྐྱེ་བོ་མུན་ནག་ལྟ་བུ་ལ། །སྙན་ངག་སྒྲོན་མེ་རབ་ཏུ་གསལ་
བྱའི་ཕྱིར། །བདག་ལྟ་དམན་པས་སྙན་ངག་སྒྲོན་མེད་ཀྱང་། །བླུན་པོ་གསོ་ཕྱིར་ཆུ་ཐིགས་ཙམ་ཞིག་བརྗོད། །གཞན་གྱི་སྐྱོན་རྣམས་བརྗོད་མི་བྱ། །གཞན་གྱི་སྐྱོན་རྣམས་ཅི་བརྗོད་པ། །དེ་བཞིན་བདག་ལའང་ཡོད་པ་སྟེ། །དཔེར་ན་ཝ་དང་བུད་མེད་བཞིན། །བདག་ཉིད་ལ་ནི་བསྟོད་མི་བྱ། །
བདག་ཉིད་ལ་ནི་གང་བསྟོད་པ། །དེ་ནི་བློ་ཆུང་ཤེས་རབ་ཞན། །དཔེར་ན་ཀ་ལན་ད་ཀ་འདྲ། །གྲོགས་ངན་བསྟེན་པར་མི་བྱ་སྟེ། །གྲོགས་པོ་ངན་པ་སུས་བསྟེན་པ། །མ་གུ་ཏ་ནི་བསྟེན་པ་ཡིས། །ཤིག་རྣམས་ཕུང་བར་གྱུར་ལ་ལྟོས། །ངན་པ་རྣམས་ལ་གྲོས་མི་གདབ། །ངན་པ་རྣམས་

203-1-113b

ལ་གྲོས་བཏབ་ན། །ལེགས་པར་སྨྲས་ཀྱང་ཉེས་པར་འགྲོ། །སྤྲེའུས་ཀ་ལན་ད་ཀ་ཡི། །ཚང་བཤིག་པ་ཡི་ཚུལ་ལ་ལྟོས། །སྤྱོད་པ་རྣམས་ལ་བག་ཡོད་བྱ། །བག་མེད་རྒྱུན་དུ་སྤང་བར་བྱ། །གླང་ཆེན་མྱོས་པ་ལྟ་བུ་ནི། །ནམ་ཡང་བྱ་བ་མ་ཡིན་ནོ། །ཚིག་རྣམས་བརྗོད་འདོད་རྟག་ཏུ་ནི། །
ཇི་ལྟར་བརྟགས་ཤིང་དེ་ལྟར་སྨྲ། །གང་ཞིག་མ་བརྟགས་པར་སྨྲ་བ། །དཔེར་ན་སྨྱོན་པའི་བསྙོན་ཚིག་བཞིན། །དགོས་པ་མེད་པའི་བརྫུན་ཚིག་ནི། །ནམ་ཡང་བརྗོད་པར་མི་བྱའོ། །བདག་མི་ཕན་པར་གཞན་གནོད་པ། །དཔེར་ན་ནེ་ཙོའི་བརྫུན་ཚིག་བཞིན། །བརྫུན་གྱི་ཚིག་རྣམས་བརྗོད་མི་བྱ། །
བརྫུན་གྱི་ཚིག་རྣམས་བརྗོད་བྱས་ན། །མྱུར་བར་གཞན་གྱིས་ཤེས་འགྱུར་ཏེ། །དཔེར་ན་བྱི་ལའི་བརྫུན་ཚིག་བཞིན། །ཚུལ་འཆོས་སྤྱོད་པར་བྱ་བ་ཡིས། །ཚུལ་འཆོས་སྤྱོད་པ་གང་བྱེད་པ། །དེ་ནི་བཙུན་པར་མི་འགྱུར་ཏེ། །བྲམ་ཟེ་ན་ཡའི་རྒྱལ་མོ་བཞིན། །མཛའ་བཤེས་ངན་པའི་ཚིག་མི་མཉན། །
མཛའ་བཤེས་ངན་པའི་ཚིག་ཉན་པ། །འདོད་དོན་མེད་པར་བསླུས་པར་འགྱུར། །དཔེར་ན་རུས་སྦལ་སྤྲེའུ་བཞིན། །གཡོན་ཅན་ངག་འཇམ་ཚིག་མི་མཉན། །དེ་ཡི་ཚིག་རྣམས་ཉན་བྱེད་པ། །དཔེར་ན་དབང་པོའི་རྒྱལ་མཚན་གྱིས། །ལྷ་མིན་ལ་སོགས་བསླུས་ལ་ལྟོས། །གནོད་སེམས་ཅན་གྱི་
ཚིག་མི་མཉན། །དེ་ཡི་ཚིག་རྣམས་ཉན་བྱེད་པ། །བདག་ལ་ཕན་པ་མི་འབྱུང་སྟེ། །ཝ་ནི་སྲེག་པས་ཕུང་བ་བཞིན། །སྡིག་པའི་གྲོགས་པོ་ཡིད་མཐུན་ཞིང་། །དགའ་བས་སྣ་ཚོགས་ཚིག་བརྗོད་ཀྱང་། །སྡིག་ཅན་དེ་ནི་བདུད་ཡིན་ཏེ། །དཔེར་ན་གླིང་གི་སྲིན་མོ་བཞིན། །ཕྱུག་པོ་ཀླ་ཀློ་ལ་ཡང་
ཡོད། །དཔའ་བོ་དུད་འགྲོ་ལ་ཡང་ཡོད། །དོན་དང་མཐུན་པའི་གཏམ་སྨྲ་བ། །འཇིག་རྟེན་འདི་ན་ཤིན་ཏུ་དཀོན། །དེ་ཕྱིར་ཡོན་ཏན་དག་ལ་ནི། །སྲོག་དང་བསྡོས་ཏེ་འབད་པར་བྱ། །གང་ཞིག་ཡོན་ཏན་མི་སློབ་པ། །དེ་ནི་བླུན་པོ་ཕྱུགས་ལྟ་བུ། །ཡོན་ཏན་མེད་པའི་ཁ་ཉིད་ནི། །ས་ཡི་བུ་ག་
དག་དང་མཚུངས། །ཡོན་ཏན་རབ་ཀྱིས་བརྒྱན་པ་ཡི། །ཁ་ནི་པད་མོ་ཡིད་འོང་ལྡན། །གཞོན་པའི་དུས་སུ་རིག་པ་བསླབ། །ཞོ་འདོད་པ་ནི་དགུན་ནས་གསོ། །དྲོད་གཤེར་ལྡན་དུས་ས་བོན་གདབ། །འདི་གསུམ་འཕྲལ་དུ་སྨིན་པའི་རྒྱུ། །ཡོན་ཏན་དག་ལ་འབད་བྱ་ཡི། །འགྱིང་

203-1-114a

ཚུལ་དགོས་པ་ཅི་ཞིག་ཡོད། །འོ་མ་མེད་པར་གྱུར་པའི་བ། །དྲིལ་བུ་བཏགས་ཀྱང་ཉོར་མི་འདོད། །བདག་ལ་ཕུན་སུམ་ཚོགས་བཅས་ཀྱང་། །གཞན་ལ་བརྙས་པར་མི་བྱ་སྟེ། །ཞུན་མར་ལྟ་བུའི་སེམས་ཀྱིས་སུ། །ཡོན་ཏན་མཐའ་དག་ཁོང་དུ་སྦ། །ཤེས་
རབ་ལྡན་པ་ལུས་ཆུང་ཡང་། །དོར་ཐབས་ཅན་གྱིས་བརྙས་མི་བྱ། །དཔེར་ན་བློ་གསལ་རི་བོང་གིས། །སེང་གེ་སྲོག་དང་ཕྲལ་བ་བཞིན། །ཀུན་ལ་མཐོན་དམན་མེད་པ་ཡིས། །ཉི་མ་ལྟ་བུའི་ཕན་བྱས་ན། །ཀུན་གྱི་ལན་རྣམས་ལྡོན་འགྱུར་ཏེ། །བྱི་བས་གླང་ཆེན་བསླང་བ་བཞིན། །
སེམས་ཅན་ཀུན་ལ་ཕན་སེམས་བསྐྱེད། །རེས་འགའ་རྩྭ་བཞིན་ཞུམ་པར་བྱ། །རེས་འགའ་མེ་བཞིན་འབར་བར་གྱིས། །རེས་འགའ་གངས་རི་ལྟ་བུར་བྱ། །རེས་འགའ་དམག་ལ་བབ་པ་བཞིན། །གཞན་གྱི་ཡུལ་ན་གནས་པ་དང་། །གཞན་གྱི་འཚོ་བས་འཚོ་བའི་ཚེ། །ཇི་ལྟ་བུར་ནི་
བརྙས་གྱུར་ཀྱང་། །ཁ་རོག་འདུག་པས་བདེ་བ་འཐོབ། །སྐྱེ་བོ་ངན་པ་ཡུན་རིང་བསྟེན་བྱས་ཤིང་། །བཟའ་བཏུང་ཞིམ་པ་མང་པོ་བསྟེན་བྱས་ཀྱང་། །དེས་ནི་ངེས་པར་གྲོགས་པོ་སྤོང་འགྱུར་ཏེ། །དཔེར་ན་ཁྲོན་པར་ལྷུང་བའི་མི་བཞིན་ནོ། །མི་གང་བློ་ནི་རྣམ་པར་འགྱུར་བྱེད་པ། །དེ་
ཡི་མཛའ་བཤེས་རྟག་པར་མི་འགྱུར་ཏེ། །རབ་ཏུ་ཉོན་མོངས་མི་དེ་ཅི་འདྲ་ན། །ཤིང་ཤུན་ཚོན་གྱིས་རས་དཀར་བཙོས་པ་བཞིན། །གལ་ཏེ་བློ་ལྡན་མཁས་པ་དགྲ་བོ་དག །རབ་ཏུ་མི་དགའ་བར་ནི་བྱེད་འདོད་ན། །ཚིག་རྩུབ་མི་སྨྲ་རབ་ཏུ་ངག་འཇམ་གྱིས། །དེས་ནི་དེ་ལ་གནོད་པ་ཆེན་
པོར་འགྱུར། །རྒྱ་མཚོ་དང་ནི་རི་རབ་གླིང་ལ་སོགས། །འཇིག་རྟེན་ས་རྣམས་བདག་གི་ཁུར་མིན་གྱི། །འཇིག་རྟེན་བྱས་པ་མི་གཟོ་གང་ཡིན་པ། །དེ་ནི་བདག་གི་ཁུར་ཆེན་དག་ཏུ་འབྱུང་། །མི་གང་སེམས་ནི་མི་རྒོད་ཅིང་། །བྱས་པ་གཟོ་དང་བྱས་པ་ཚོར། །བྱས་པ་ཆུད་གསོན་མི་
བྱེད་པ། །དེ་ནི་མཁས་པས་རབ་ཏུ་བསྔགས། །ཆོས་བདེ་བྱམས་པ་བདེ་བ་སྟེ། །འཇུག་ངོགས་བདེ་བའི་ཆུ་ཀླུང་བཞིན། །གྲོགས་ལ་འཁུ་བ་མེད་པ་དང་། །ང་སྙེམས་ང་རྒྱལ་ཟད་པ་བདེ། །ཁེངས་དང་ཟོལ་བྱེད་ང་རྒྱལ་ཆེ། །སྡིག་པའི་གྲོགས་པོ་བསྟེན་པ་དང་། །སྟོབས་

203-1-114b

ལྡན་རྣམས་ལ་རྒོལ་བྱེད་པ། །དེ་དག་ཡིད་ནི་བདེ་མི་འགྱུར། །དེ་ཕྱིར་ཁེངས་པར་མི་བྱ་སྟེ། །ཁྲོ་བ་རྣམ་པར་སྤང་བར་བྱ། །ཁེངས་དང་ཁྲོ་བ་འོངས་གྱུར་ན། །དེ་དག་རྣམས་ཀྱི་གྲགས་པ་འཇིག །གང་ཞིག་རྒན་པོ་བྱིས་པ་ནད་པ་དང་། །ཉམ་ཆུང་ཐབས་སྟོར་དེ་བཞིན་དམན་པ་དང་། །
རྒྱལ་པོས་སྤངས་དང་སྐྱབས་མེད་པ་དག་ལ། །སྙིང་རྗེ་མེད་པ་དེ་དག་མིར་མི་རུང་། །རང་གི་ཡུལ་འཁོར་གནས་སྤངས་ཏེ། །གཞན་གྱི་ལྗོངས་སུ་ཕྱིན་པ་ན། །ཚིག་ངན་སོ་སོར་ལྡོག་པ་ལ། །བཟོད་པ་ཆེན་པོ་བསྐྱེད་པར་བྱ། །དཀའ་ཐུབ་ཚུལ་ནི་བཟོད་པ་ཡིན། །གཙོ་བོའི་ཚུལ་ནི་དཀའ་
སྤྱོད་ཡིན། །ཤར་བའི་ཚུལ་ནི་དཀའ་ཟློག་ཡིན། །བུད་མེད་ཚུལ་ནི་དཀའ་ཐུབ་ཡིན། །དེ་ལྟར་མ་ཡིན་རང་བཞིན་ངན་པའི་མི། །བྱམས་ལ་ལན་མེད་གཞན་བགྱིས་ཕན་བྱས་བརྗེད། །སྡང་བས་གནོད་པ་ཇི་སྙེད་བྱས་གྱུར་ཀྱང་། །བརྙས་ཐབས་བྱས་པ་དེ་ཡང་ཆུ་བཞིན་འཐུང་། །ཚེ་དང་ལོངས་
སྤྱོད་གཉེན་བཤེས་ཀུན་དར་དཀོན། །དེ་དག་རྒུད་པ་ཤིན་ཏུ་རྙེད་པར་སླ། །དེ་ཕྱིར་སེམས་ནི་དམས་པར་གྱུར་པའི་ཚེ། །ཁྭ་བཞིན་མི་སྨྲ་ཁ་རོག་འདུག་པར་བྱ། །གལ་ཏེ་ནོར་མེད་བདག་གི་ཕྱོགས་ཉུང་ལ། །མཛའ་བཤེས་ཕྱོགས་ཀྱི་སྟོབས་ཀྱང་ཆུང་གྱུར་ཅིང་། །དགྲ་བོའི་ཕྱོགས་ཀྱི་སྟོབས་
ཚུལ་ལྡན་པའི་ཚེ། །ཚིག་ངན་མི་སྨྲ་ཁ་རོག་འདུག་པར་བྱ། །ཡ་རབས་ཚུལ་མེད་ཁེངས་པས་ཤིན་ཏུ་ང་རྒྱལ་ཆེ། །གཡོ་སྒྱུ་དད་མེད་ཁྭ་བཞིན་ཤིན་ཏུ་མུ་ཅོར་སྨྲ། །གཟུ་ལུམས་ཕྲག་དོག་བརྐམ་དང་ཁྲེལ་མེད་ངོ་ཚ་བྲལ། །མི་དེ་བུར་གྱུར་ཀྱང་ནི་གཞན་བཞིན་སྤང་བར་བྱ། །དེ་ལྟ་བུ་ཡི་དམན་ཞིང་
ངན་པ་དེ། །མཐོན་པོའི་སར་མི་དྲོང་ཞིང་དེར་མི་བཞག །ས་དེར་བཞག་ཀྱང་དྲེགས་དང་ཁེངས་མི་ཐུབ། །དཔེར་ན་པགས་པ་སྔོན་པོའི་ཝ་བཞིན་ནོ། །སྐྱེ་བོ་རྨོངས་པ་འགའ་ཞིག་ནི། །ལོག་པའི་ཆོས་ལ་རབ་ཞེན་པས། །འདོད་པའི་དོན་དེས་བསླུས་འགྱུར་ཏེ། །རུས་སྦལ་སོ་ཡིས་བྱ་བསླུས་
བཞིན། །རབ་ཏུ་མི་གཟོའི་སྐྱེ་བོ་རྣམས། །སྡུག་བསྔལ་འབྱུང་བའི་རྒྱུ་དག་ལ། །དང་བླངས་དོན་དུ་གཉེར་བྱེད་པ། །གཅན་གཟན་གལ་སྒོར་བཅུག་པ་བཞིན། །དྲེགས་པ་ལོག་པ་འགའ་ཞིག་ནི། །རང་གི་སྐྱོན་རྣམས་མ་བསམས་པར། །ཡོན་ཏན་ཕྲ་མོས་རབ་མགུ་བ། །ཁྲོན་པའི་སྦལ་པ་ཇི་

203-1-115a

བཞིན་ནོ། །རྨོངས་པ་ལོང་བ་འགའ་ཞིག་ནི། །ཆོས་ཀྱི་དེ་ཉིད་མ་རྟོགས་པར། །ལོག་པའི་ཆོས་ཀྱིས་རབ་མགུ་བ། །བླུན་པོ་ནོར་བུ་ལེན་པ་བཞིན། །ཤིན་ཏུ་བླུན་པོ་ལ་ལ་དག །འཆི་བའི་རྣམ་པ་རབ་བརྗེད་ནས། །བྱ་བ་མང་པོ་རྩོམ་བྱེད་དེ། །བདུད་ཀྱིས་བསླུས་པར་
རིག་པར་བྱ། །འགྲོ་བ་བཟང་པོ་བཟང་མོ་ལ། །གང་ཞིག་རབ་ཏུ་ཆགས་བྱེད་པ། །སྲོག་ཆགས་མེ་ལ་མཆོང་བ་བཞིན། །འདོད་པས་ཕུང་བར་འགྱུར་བ་ཡིན། །རྟ་དང་མ་ཧེ་གླང་པོ་སོགས། །འགའ་ཞིག་དེ་ལ་ཆགས་བྱེད་པ། །འདོད་པ་ཅན་གྱི་སྐྱེས་བུ་ཡིས། །རྨི་ལམ་ནོར་རྙེད་བསླུས་
པ་བཞིན། །སྡིག་པའི་ལས་ལ་རབ་དགའ་ཞིང་། །དགེ་བ་དྲན་པར་མི་བྱེད་ལ། །འཇིག་རྟེན་དག་ལ་རབ་ཏུ་ཆགས། །དུག་དང་འདྲ་བའི་སྐྱེས་བུ་དེས། །འདིར་ཡང་སྡུག་བསྔལ་ཆེན་པོ་ཅན། །ཕྱི་མ་མནར་མེད་རབ་ཏུ་འཇིགས། །བར་དོའི་སྲིད་པར་ལས་རྣམས་དྲན། །གསལ་བའི་མེ་ལོང་རབ་
འཇིགས་པས། །ལས་ཀྱི་དགེ་སྡིག་རྣམ་པར་འཕྱེ། །རང་འདོད་གནས་སུ་གནས་དབང་མེད། །མི་འདོད་པ་རུ་རྣམ་པར་འཁྲིད། །ལས་ཀྱི་རྒྱུ་འབྲས་མི་སླུ་བ། །ཁོ་བོས་མཐོང་གི་རྣམ་པའམ། །གཞན་ཡང་རབ་ཏུ་གྲངས་མང་ལྟོས། །དེ་ཕྱིར་དམ་པའི་སྐྱེ་བོ་རྣམས། །རྒྱུན་དུ་འཆི་
བ་དྲན་པར་བྱ། །རང་གིས་ཅི་བྱས་ལས་རྣམས་བགྲང་། །ཡུད་ཙམ་པ་ཡི་ཚེ་འདི་ལ། །ཐང་ཅིག་འདུག་པའི་བློ་ཅན་དེ། །དེ་ནི་ཤིན་ཏུ་འཁྲུལ་པ་སྟེ། །མཁའ་འགྲོ་མ་ཡི་རྫུ་འཕྲུལ་བཞིན། །དེ་ཕྱིར་རྟག་པའི་སེམས་མི་བསྐྱེད། །ངན་སོང་གསུམ་པོ་དྲན་པར་བྱ། །སྲོག་གཅོད་ལ་སོགས་
ལུས་ཀྱི་ནི། །ཉེས་པ་རྣམ་པར་བསྡམ་པར་བྱ། །བརྫུན་སོགས་ངག་གི་ཉེས་པ་དང་། །མ་ལུས་པ་ནི་བསྡམ་པར་བྱ། །དེ་བཞིན་ཡིད་ཀྱི་ཉེས་པ་ཡང་། །མ་ལུས་རབ་ཏུ་བསྡམ་པར་བྱ། །དེ་ནི་སྐྱེས་བུ་དམ་པའི་ཚུལ། །རབ་ཏུ་ཚ་ཞིང་གྲང་བ་ཡི། །དམྱལ་བ་ཉི་མ་གཅིག་བཞིན་དྲན། །བཀྲེས་
སྐོམ་དག་གིས་རིད་པ་ཡི། །ཡི་དྭགས་དག་ཀྱང་དྲན་པར་བྱ། །རྨོངས་པའི་སྡུག་བསྔལ་རབ་མང་བའི། །བྱོལ་སོང་བལྟ་ཞིང་དྲན་པར་བྱ། །དེ་རྒྱུ་རྣམ་སྤང་བདེ་རྒྱུ་སྤྱད། །ཐོབ་དཀའ་འཛམ་གླིང་མི་ཡི་ལུས། །དེ་ཐོབ་དུས་སུ་ངན་སོང་རྒྱུ། །རབ་ཏུ་བསྒྲིམས་ཏེ་གཅད་པར་བྱ། །འདིར་

203-1-115b

བདག་མི་ཡི་ལུས་ཐོབ་ནས། །ཕྱི་མར་སྨོན་ལམ་འདེབས་བྱེད་པ། །དེ་ནི་བླུན་པོ་ལེ་ལོ་ཅན། །ངན་སོང་གནས་སུ་རབ་འགྱོད་དེ། །གྲོ་བཞིན་སྐྱེས་ཀྱིས་རྡོ་འཇོག་གི། །ཡི་དྭགས་མཐོང་བ་ཇི་བཞིན་ནོ། །འདི་ཡི་ཚེ་ནི་མ་ངེས་པས། །དི་རིང་སང་ངམ་ཟླ་བའམ། །ལོ་ཡི་རྣམ་པས་འཆི་འགྱུར་
ཏེ། །དེ་ཕྱིར་དགེ་ལ་བརྩོན་པར་བྱ། །དམ་པའི་ཆོས་ལ་རབ་འཇུག་ན། །རིགས་དང་བྲན་མོ་ལྟ་བུ་དང་། །འཁོར་ལོས་སྒྱུར་བའི་རྒྱལ་པོ་ཡང་། །བྲན་མོ་བཙུན་པར་ཐུབ་པས་གསུངས། །དམ་པའི་ཆོས་ལ་མི་འཇུག་ཅིང་། །འཇིག་རྟེན་ཁྲེལ་ལ་མི་སྲུང་བ། །ཤིན་ཏུ་སྨད་ཅིང་བཤུང་
འགྱུར་ཏེ། །བི་ར་ལི་བའི་དཀའ་ཐུབ་བཞིན། །རི་བྲག་འདོམ་གང་སོགས་ཡོད་ཟབས། །དེ་ལའང་རབ་ཏུ་སྲུང་བྱེད་ན། །ཤིན་ཏུ་གཏིང་མེད་གྱུར་པ་ཡི། །གཡང་སར་ལྟུང་བ་ཅིས་མི་སྲུང་། །ཡུངས་འབྲུ་ཙམ་གྱི་རྨ་ཁུང་ཡང་། །ཤིན་ཏུ་བསྒྲིམས་ཏེ་འཆོས་བྱེད་ན། །འཚོ་མེད་ཚལ་པར་གས་
པ་ཡི། །རྨ་དེ་ཅི་ཕྱིར་འཆོས་མི་བྱེད། །ཉིན་པར་འགའ་ཟུང་ཙམ་དུ་ཡང་། །ཟས་སྐོམ་གྱིས་དབུལ་མི་བཟོད་ན། །བར་གྱི་བསྐལ་པ་ལ་སོགས་སུ། །ཟས་སྐོམ་མི་བརྒྱོང་ཅི་ཕྱིར་བཟོད། །རང་ལུས་དག་ལ་ཚེར་མ་ཡི། །རྩེ་མོའང་བཟོད་པར་མི་འགྱུར་ན། །གཞན་གྱི་ལུས་ལ་མཚོན་
དག་གིས། །སྲོག་དང་འབྲལ་བ་ཅི་ཕྱིར་བཟོད། །རྨ་འབུ་དུག་སྲིན་ཤིང་སྲིན་དང་། །ས་བོན་མྱུ་གུ་སྡོང་སྐྱེས་མ། །དེ་བཞིན་ངན་པའི་མི་རྣམས་ནི། །རང་རྟེན་ཁོ་ན་ཕུང་བ་བསྒྲུབ། །ཕྱི་མ་ཤེས་པ་མཛངས་པའི་ཚུལ། །ཉོན་མོངས་དགྲ་ཐུབ་དཔའ་བོའི་ཚུལ། །ཆགས་པ་མེད་པ་
ཆོས་བྱེད་ཚུལ། །མཁས་པའི་ཚུལ་ནི་རྟོགས་པ་ཡིན། །རྟོགས་པའི་ཚུལ་ནི་བྱེད་པ་ཡིན། །སྐྱོ་བ་མེད་པ་སྦྱིན་པའི་ཚུལ། །ཚུལ་ཁྲིམས་ཚུལ་ནི་མ་དཔྱས་པ། །བཟོད་པའི་ཚུལ་ནི་ཆོས་ཉིད་ཤེས། །བརྩོན་འགྲུས་ཚུལ་ནི་འཆི་བ་དྲན། །བསམ་གཏན་ཚུལ་ནི་གཡེང་མེད་ཡིན། །རྣམ་
པར་འབྱེད་ཤེས་ཤེས་རབ་ཚུལ། །སངས་རྒྱས་འདོད་པ་དད་པའི་ཚུལ། །རྟོག་པ་ཆུང་བ་རྣལ་འབྱོར་ཚུལ། །ཟང་ཟིང་གཉེན་བྲལ་སྒོམ་མཁན་ཚུལ། །ཕན་སེམས་ཆེ་བ་སྒྲིན་པའི་ཚུལ། །དྲང་པོའི་ཚུལ་ནི་མི་སླུ་བ། །བག་ཡོད་ཉམ་ང་མེད་པ་ནི། །དེ་ནི་རྒྱལ་པོའི་ཚུལ་དུ་བཤད། །དེ་ལྟའི་

203-1-116a

ཚུལ་དང་མ་ལྡན་ལ། །དམན་ཞིང་སྨད་པའི་ཚུལ་བྱེད་པ། །ལས་ཀྱི་རྒྱུ་འབྲས་མི་སླུའི་ཚུལ། །འོག་གི་ཚུལ་ནི་འདི་ཡིན་ནོ། །ཡོན་ཏན་ལྡན་ལ་སེར་སྣས་བཅིངས། །བསླངས་ན་ཁྲོ་བ་དང་བཅས་པ། །སྡུག་བསྔལ་ཆེན་པོས་ནོན་འགྱུར་ཏེ། །ཤུ་མ་ར་ཡི་མི་སྡུག་བཞིན། །མཉམ་
སོགས་དག་ལ་ཕྲག་མ་དོག །འདིར་ཡང་སྡུག་བསྔལ་ཆེ་འགྱུར་ལ། །ཕྱི་མར་རྣམ་སྨིན་ཆེ་འགྱུར་ཏེ། །དཔེར་ན་གཞོན་ནུ་ཝ་དང་འདྲ། །དྲེགས་མེད་ཤིན་ཏུ་དུལ་བར་བྱ། །ཀུན་ལ་གསོང་པོར་སྨྲ་བར་བྱ། །ཁྲོ་མེད་ང་རྒྱལ་སྤང་བར་བྱ། །ཀུན་ལ་འཛུམ་ཞིང་དྲང་པོར་སྨྲ། །དོན་མེད་
ཅ་ཅོ་སྨྲ་མི་བྱ། །འདུ་བ་མང་པོའི་སར་མི་འགྲོ། །ཆང་སོགས་མྱོས་པ་བཏུང་མི་བྱ། །ཅི་འདོད་སྦྱིན་པ་གཏང་བར་བྱ། །བཤེས་མེད་མེ་ལ་བྱམས་པར་བྱ། །དགེ་བའི་ཆོས་ལ་བརྩོན་པར་བྱ། །ཁྲིམས་སོགས་བླངས་ལ་བསྲུང་བར་བྱ། །དེ་ལྟར་བྱས་ནས་མང་པོའི་མི། །ངང་གིས་བདེ་བ་ཐོབ་པར་
བྱེད། །ད་ནི་ཤིན་ཏུ་ངན་པའི་མིས། །རྒྱལ་བའི་བསྟན་པ་ནུབ་ཏུ་ཉེ། །ད་ནི་མ་བསྔགས་ངན་སྤྱོད་དང་། །ལོག་པར་ལྟ་བ་ངན་པའི་མི། །རྨོངས་པ་དག་གིས་བཅོམ་ལྡན་གྱི། །བསྟན་པའི་ལྗོན་ཤིང་བཅད་ཀྱིས་མེད། །ད་ནི་སྙིང་རྗེ་མེད་པ་ཡིས། །ཆོས་ལུགས་བོར་ཞིང་རང་བཟོ་བྱེད། །བརྐམ་
ཆགས་ཕ་རོལ་མི་མཐོང་བས། །བསྟན་པའི་རྒྱལ་མཚན་བསྙལ་གྱིས་མེད། །ད་ནི་གདུལ་དཀའ་ངོ་ཚ་མེད། །སྡིག་ལ་དགའ་ཞིང་ཚུལ་འཆོས་བྱེད། །སྡིག་ཅན་རྣམས་ཀྱིས་ཐུབ་པ་ཡི། །བསྟན་པའི་ཟམ་པ་བཅག་གིས་མེད། །ད་ནི་མགོ་བྲེགས་ཉམས་མི་ལེན། །སྤྱོད་འཆལ་སྨད་པ་
ལུས་ལ་འཆོས། །ངན་གཡོ་ཅན་གྱིས་ཐུབ་པ་ཡིས། །བསྟན་པའི་ཚོང་དུས་བཅོམ་གྱིས་མེད། །ད་ནི་ཁྲོ་དང་ང་རྒྱལ་དང་། །རྒྱགས་ཆོས་བྱེད་ཅིང་རྙེད་ལ་ཞེན། །སྡིག་པ་སྣ་ཚོགས་བྱེད་པའི་མིས། །ཆོས་ཀྱི་གྲུ་བོ་བཅག་གིས་མེད། །ད་ནི་ཐུབ་པའི་བསྟན་པ་ཡང་། །ཅུང་ཟད་ཙམ་ཞིག་ལུས་
པར་ཟད། །ཐུབ་པའི་བསྟན་པ་གང་ཆེན་མཚོ། །རིང་པོར་མི་ཐོགས་སྐམ་པར་འགྱུར། །སེང་གེའི་སྒྲ་ཡི་བསྟན་པ་ནི། །དུས་ཀྱི་འཁོར་ལོས་རབ་བཅོམ་ནས། །མྱུར་བ་ཉིད་དུ་འཇིག་པར་འགྱུར། །གང་དག་འདི་འདྲའི་དུས་བབ་ཚེ། །བདེ་འདོད་རྣམས་ཀྱིས་ཕན་པའི་དོན། །དེ་ནི་ལེགས་

203-1-116b

པར་བརྟག་པའི་རིགས། །དུས་ཀྱི་འཁོར་ལོ་ངན་བྱེད་པ། །མ་རབས་ཤེས་རབ་འཆལ་པ་དང་། །ཚུལ་ཅན་དག་དང་སྟེན་མི་ཤེས། །ཉེས་པ་བསྟེན་ཞིང་ཚུལ་ཁྲིམས་སྤང་། །དབེན་པས་འཇིགས་ཤིང་འདུ་འཛི་འདོད། །མི་མཁས་བསླབ་ཉེས་སློབ་དཔོན་ནོར། །གདུག་རྩུབ་ང་རྒྱལ་
བརྙས་ང་ཆེ། །ངན་པའི་མི་ལ་ཡིད་རྟོན་པས། །སངས་རྒྱས་བསྟན་པ་མ་རུང་བྱས། །ཞི་ཞིང་བདེ་བའི་དུས་ནི་ཟད། །གདུག་རྩུབ་མི་བཟད་དུས་ནི་བྱུང་། །ཤེས་རབ་ཅན་གྱི་མི་རྣམས་དང་། །དབང་གྱུར་སྐྱེ་བོ་རྣམས་ནི་ཟད། །དེ་ལྟའི་དུས་རྣམས་བྱུང་བའི་ཚེ། །རང་གི་ཡུལ་འཁོར་གནས་སྤངས་ཏེ། །
གཞན་གྱི་ལྗོངས་སུ་ཕྱིན་ནས་སུ། །དེར་ཡང་ནགས་འདབ་དབེན་པ་རུ། །སྨྲ་བ་བསྙུངས་ཏེ་གནས་པར་བྱ། །དཀར་པོའི་ཆོས་རྣམས་ཡིད་ལ་མི་འཇོག་སྐྱེ་བོ་རྣམས་ལ་ནི། །མི་ཆོས་ཕུལ་དུ་བྱུང་བ་ཡིད་ལ་འཇོག་པ་ཉིད་ལ་ནི། །ཅུང་ཞིག་དགེ་བར་འགྱུར་སྙམ་ནས་ནི་འདི་རྣམས་བྲིས་པ་ཡིན། །དགེ་བས་
བླུན་པོ་མ་ལུས་གྲོལ་ཞིང་ཡུན་དུ་གནས་པར་ཤོག །ལུགས་ཀྱི་བསྟན་བཅོས་སྐྱེ་བོ་གསོ་བའི་ཐིགས་པ་ཞེས་བྱ་བ། སློབ་དཔོན་ཀླུ་སྒྲུབ་ཀྱི་ཞལ་སྔ་ནས་མཛད་པ་རྫོགས་སོ།།      །།རྒྱ་གར་གྱི་མཁན་པོ་ཤཱི་ལནྡྲ་བོ་དྷི་དང་། ཞུ་ཆེན་གྱི་ལོ་ཙཱ་བ་བན་དེ་ཡེ་ཤེས་སྡེས་བསྒྱུར་བའོ།།      །།
༄༅༅། །རྒྱ་གར་སྐད་དུ། གཱ་ཐཱ་ཀོ་ཥ་ནཱ་མ། བོད་སྐད་དུ། ཚིགས་སུ་བཅད་པའི་མཛོད་ཅེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །གང་ཞིག་རྣམ་པ་ཐམས་ཅད་དུ། །ཡོན་ཏན་ཀུན་ལྡན་སྐྱོན་སྤངས་ཤིང་། །ས་ཀུན་སྐྱོང་བ་གང་ཡིན་ལ། །དེ་ལ་རྟག་ཏུ་ཕྱག་འཚལ་ལོ། །
ཡོན་ཏན་སྐྱོན་དང་གློ་བུར་མཉམ། །འདི་ཉིད་འཇིག་རྟེན་གོམས་པ་སྟེ། །ངང་གིས་བྱ་རྒོད་དུར་ཁྲོད་དང་། །ངང་པ་མཚོར་འབབ་ཇི་བཞིན་ནོ། །འགྲོ་བ་མི་སྲུན་དུས་ཀུན་དུ། །སྐྱེ་བོའི་ཡོན་ཏན་འཆབ་པར་བྱེད། །རིགས་བཟང་པོ་ཡི་རིན་ཆེན་དག །ཀུན་གྱི་དོན་དུ་སྦ་བ་བྱེད། །སེམས་ཅན་སྐྱོན་དང་འདྲེས་
ན་ཡང་། །ཡོན་ཏན་ལྡན་པས་ཡོན་ཏན་བླང་། །ཆུ་ལས་འོ་མ་འབྱེད་པ་ཡང་། །ངང་པ་ལས་གཞན་སུ་ཡིས་ཤེས། །མི་སྲུན་འགྲོ་ལ་འཚེ་བ་དང་། །སྐྱེས་མཆོག་ཕན་འདོགས་ངོམས་པ་མེད། །མུན་པས་ས་སྟེང་སྣང་བ་མིན། །ཉི་མས་རྟག་ཏུ་གསལ་བར་བྱེད། །མི་སྲུན་གཞན་ལ་

203-1-117a

གནད་གཅོད་ཚིག །འཕན་མཁས་དེ་ནི་རིགས་སྨྲ་མིན། །འདི་ལྟར་དུག་ནི་གནོད་ནུས་ཀྱི། །དེ་ནི་ཕན་པར་བྱེད་མི་ནུས། །སྐྱེ་བོ་དམ་པ་རབ་བསྒྲིམས་ཏེ། །གཞན་གྱི་སྐྱོན་སྦེད་སྨད་རིགས་མཚུངས། །འོན་ཀྱང་འདི་གཉིས་ཁྱད་ཡོད་དེ། །སྐྱེས་མཆོག་སྦེད་ཀྱི་
སྨད་རིགས་སྨྲ། །གཡོ་སྤྱོད་སྐྱེ་བོས་རབ་གཙེས་ན། །ལྷག་པར་དེས་པ་དྲན་པར་འགྱུར། །འཇིག་རྟེན་ཉི་མས་རབ་གདུངས་ན། །ལྷག་པར་ཟླ་བ་མངོན་པར་འདོད། །ངན་པ་ཕ་རོལ་འབྱེད་བརྩོན་ལྟར། །སྐྱེ་བོ་དམ་པ་སྡུམ་དེ་བཞིན། །ཁབ་ཀྱིས་རིམ་གྱིས་ཕུག་པ་ཡི། །བུ་ག་སྐུད་པས་
འགོག་པར་བྱེད། །ཕ་རོལ་གཙེས་མཐོང་ངན་པ་དག །དགའ་བར་འགྱུར་གྱི་སྟོད་རིགས་མིན། །ལྕགས་ལས་བྱས་པའི་མཚོན་ཆ་དག །ཕལ་ཆེར་གཡུལ་ངོར་སྤྱོད་པ་བཞིན། །སྐྱེ་བོ་ངན་པས་སྨད་པར་ཤེས། །སྐྱེ་བོ་དམ་པས་ལེགས་བསྔགས་ཤེས། །དགུན་གྱི་དུས་ན་སྐམ་པར་བྱེད། །དཔྱིད་ཉིན་
ནགས་ཚལ་ཁ་ཡང་འབུ། །སྣོད་དག་ལྷག་པར་འདུག་པ་ཡང་། །འཚེ་ཁེངས་རྩུབ་པའི་རང་བཞིན་གྱི། །དུས་ན་བདག་ཉིད་ཆེན་པོ་བས། །སྤྱི་རྟོལ་ཅན་དག་ཕལ་ཆེར་བཀུར། །དམ་པ་སྡིག་པ་ཆུང་ཡང་སྤོང་། །ངན་པ་རྣམས་ནི་ཆེ་ཡང་མིན། །མིག་ནི་རྡུལ་ཡང་འཛེམ་པར་བྱེད། །ལག་པ་
མེ་ལྕེར་རེག་པར་བྱེད། །སྨད་རིགས་གོ་འཕང་བསྟོད་དྲགས་དང་། །གཞུང་ངན་ཕན་བཏགས་མི་སེམས་ཏེ། །གྱེན་དུ་མི་གཙང་ཟས་གཏོར་ན། །ཐོག་མར་མགོ་ལ་འབབ་པར་འགྱུར། །རིགས་ཤིང་འོས་པའི་འགྲོན་པོ་ལ། །དཔྱང་ཐག་བཅད་པ་འབྱུང་འགྱུར་གྱི། །ཐང་སྐྱེད་བཟང་པོ་མ་ཡིན་ཏེ། །
མི་སྲུན་པ་ཡི་སྐྲ་སེན་བཞིན། །མཆོག་ལས་མཆོག་དག་སྐྱེ་བ་དང་། །དམན་ལས་དམན་སྐྱེད་དེ་རིགས་ཏེ། །ཕུག་ལ་བརྟེན་ནས་མུན་པ་དང་། །ཐང་ལ་ཟླ་ཟེར་འབབ་པར་བྱེད། །ངན་པ་ཇི་ལྟར་འཕང་མཐོ་ཡང་། །རིགས་ལྡན་རྒུད་པས་ཟིལ་གྱིས་གནོན། །རིགས་ལྡན་ནོར་བུ་ཉམས་མདུན་
དུ། །བཅོས་མའི་ནོར་བུས་གཟི་མ་བྱིན། །ཡོན་ཏན་ལྡན་པའི་གྲགས་པ་དག །ཕྱོགས་བཅུར་གྲགས་པས་སྒྲ་གྲགས་ཚུལ། །གཡའ་དང་ལྡན་པའི་མེ་ལོང་གིས། །གཟུགས་བརྙན་བྱུང་ལ་དགའ་བ་མེད། །ཉི་མ་རྒྱ་མཚོར་ནུབ་པ་དང་། །ཟླ་བ་བྲི་ཡང་གཞན་མི་འགྱུར། །ཡོན་ཏན་

203-1-117b

ལྡན་པ་རྒུད་གྱུར་ཀྱང་། །ནམ་དུའང་ཆེ་བ་ཉིད་མི་ཉམས། །ཚེ་དང་ལང་ཚོ་དག་དང་ནི། །མེ་ལྕེའི་རྩེ་དང་ཆུ་རྒྱུན་གྱི། །འདས་པ་ཕྱིར་ནི་ལྡོག་པ་མེད། །མི་སྲུན་གོ་འཕང་དེ་བཞིན་ནོ། །མི་རིགས་ཞེན་པའི་མི་སྲུན་དག །རིགས་པའི་གཞི་ལ་གནས་པ་མེད། །རུལ་པའི་རོ་ལ་ཟ་བས་ཀྱང་། །ཙན་དན་སྡོང་
པོ་སྤོང་བར་བྱེད། །ངན་པ་བདག་བསྟོད་རང་བཞིན་གྱི། །ལྷན་ཅིག་སྐྱེས་པ་འདོར་མི་སྲིད། །ཟླ་བ་ཚེས་ན་ངེས་པར་ནི། །དབང་ཕྱུག་ཆེན་པོའི་སྤྱི་བོར་ཐོགས། །ཕལ་པ་དག་ནི་རླུང་བཞིན་དུ། །གཞན་གྱི་དྲི་ཡི་རྗེས་སུ་འབྲང་། །སྐྱེས་བུ་དམ་པ་ཉི་ཟེར་བཞིན། །སྐྱོན་གྱིས་རྟག་ཏུ་གོས་པ་
མེད། །ཁྲིམས་ལྡན་གཞན་ལ་གནོད་སྤངས་པ། །རྣམ་ཤེས་སྤངས་ཀྱང་དགའ་བར་བྱེད། །རྒྱུད་དང་བྲལ་བའི་དབང་པོའི་གཞུ། །ས་དང་ནམ་མཁའི་རྒྱན་དུ་འགྱུར། །མི་སྲུན་གང་ཞིག་ཆེ་བདག་གང་། །རིགས་ལྡན་དེས་གང་རྒུད་པ་གང་། །འབྱོར་པ་མི་འདྲ་བྱེད་པ་འདི། །རང་བཞིན་
བླུན་པོ་ཅིས་མི་གདུང་། །བདག་ཉིད་ཆེན་པོས་སྨད་རིགས་དག །ཡོངས་བཟུང་ཤིན་ཏུ་སྐྱེད་ཀྱང་འབྱུང་། །བཟོ་བོ་མཁས་པས་ཤེལ་སྦྲམ་ཡང་། །ཚོན་གྱིས་བསྒྱུར་ན་ནོར་བུར་སྣང་། །ཁ་ཅིག་སྨྲ་བ་ལྷུར་ལེན་ཏེ། །ཁ་ཅིག་མི་སྨྲ་དོན་ཡང་སྒྲུབ། །འདམ་བུའི་མེ་ཏོག་འབྲས་བུ་མེད། །སྟར་
ཀའི་འབྲས་བུ་མེ་ཏོག་མེད། །ཡོན་ཏན་དྲང་བས་མི་ཆོག་སྟེ། །སྐྱེ་བོའི་གྱ་གྱུ་སྐྱོན་མིན་ནོ། །མདའ་དྲང་བས་ནི་གསོད་པར་བྱེད། །ཕུབ་ནི་འཁྱོག་སྟེ་ལུས་ཀྱང་སྲུང་། །ཤིན་ཏུ་གཏུམ་ཡང་དྲང་བ་བདམ། །ངན་གཡོ་ཕུབ་མེ་རྩྭས་གཡོགས་མིན། །སོ་གའི་སྤྲིན་མེད་ཉི་མ་བས། །སྤྲིན་
གྱིས་མི་གསལ་ཤིན་ཏུ་སྲེག །དཔལ་འགོ་ན་ནི་བླུན་པོ་ཡང་། །ཤེས་རིག་གསལ་བའི་སྐྱེས་བུར་འགྱུར། །ལང་ཚོས་རྒྱགས་པའི་འདོད་ལྡན་དག །འཇོ་བ་སྒེག་པ་སྟོན་པར་བྱེད། །ཞི་བ་ཡི་ནི་ལུས་ཅན་ལས། །འཇིགས་པ་མི་འབྱུང་ངེས་མེད་དེ། །མར་མེའི་རྩེ་མོ་དཀར་བ་ལས། །དུད་
པ་ནག་པོ་ཅིས་མི་འབྱུང་། །འཇིགས་འབྱུང་གཅིག་ཏུ་མ་ངེས་ཏེ། །འཇིགས་བྱེད་ཆེན་པོ་ཞིག་པའི་གཟུགས། །ཞི་བའི་ཆེད་དུ་ཅིས་མི་འགྱུར། །ཡོན་ཏན་ཆུ་ཡིས་མི་མཛའ་བའི། །འགྲོ་བའི་མེ་འཇིལ་སྐྱོན་ཕུབ་མིན། །སྣང་བ་ཁོ་ནས་མུན་པ་ནི། །སེལ་འགྱུར་མིན་ནམ་མུན་པས་

203-1-118a

མིན། །བླུན་པས་དོན་འགྲུབ་གང་ཡིན་པ། །དེ་ནི་བྱ་རོག་ཏ་ལར་མཚུངས། །སྲིན་བུས་ཤིང་དག་ཟོས་པའི་རྗེས། །སྟེས་དབང་ཡི་གེ་སྣང་བ་བཞིན། །སྐྱེ་བོ་ཡོན་ཏན་ལྡན་པ་དག །མཁོ་བའི་སྒོ་ནས་ཕལ་ཆེར་ཉམས། །ནེ་ཙོ་ཚིག་གསལ་སྨྲ་བ་ཡང་། །གཟེབ་ཀྱི་སྤྱིལ་བུས་
སྲུང་བར་འགྱུར། །གདུལ་བར་བླ་བའི་དགྲ་དག་ཀྱང་། །སེམས་ཅན་ཆེས་བསྟེན་གདུལ་བར་དཀའ། །ཆུ་ཐིགས་མཚོ་ནང་ལྷུང་བ་དག །ཉི་མས་སྐེམས་པར་མི་ནུས་སོ། །བདག་ཉིད་བརྩམས་པ་མཐར་ཕྱིན་པའང་། །ཡང་ན་མ་བརྩམས་རྩོམ་མི་བྱེད། །གང་དུ་ཐོག་བབ་འཇོམས་བྱེད་ཅིང་། །ཡང་ན་
འབབ་པར་མི་བྱེད་དེ། །རྟོགས་པར་བླ་ཡང་བླུན་པོས་ནི། །ཡོན་ཏན་སྐྱོན་དག་འབྱེད་མི་ནུས། །སྐྱེ་བོ་མིག་ནི་ལོང་བ་ལ། །སྣང་བ་དང་ནི་མུན་པར་མཚུངས། །འགྲོ་བ་གནོད་ལས་སྣོད་སྨད་དེ། །རྟག་ཏུ་རོ་གཅིག་འབབ་པའི་ཆར། །སྦྲུལ་ཁར་བབ་ན་དུག་ཏུ་འགྱུར། །ཉ་ཕྱིས་ཁར་བབ་མུ་ཏིག་
འགྱུར། །བླུན་པོ་ཕལ་ཆེར་ཐུབ་ཆོད་བྱེད། །མཁས་པ་དེ་ལྟ་མ་ཡིན་ནོ། །ཆུ་ནང་ཟླ་བའི་གཟུགས་བརྙན་ནི། །བྱིས་པ་ལས་གཞན་སུ་ཞིག་འཛིན། །ཅུང་ཟད་མི་མཐུན་བྱས་པའི་རྒྱུས། །སེམས་ཡང་བ་དག་ལྷག་པར་ཁྲོ། །རླུང་གིས་བདས་པའི་རྡུལ་ཕྲན་ཡང་། །ཤིན་ཏུ་ཐག་རིང་
འཐུལ་བར་བྱེད། །ཡོན་ཏན་ཅན་ལ་མི་སྲུན་དག །ཐིབས་ནོན་བརྙས་ཐབས་སྣ་ཚོགས་བྱེད། །རྩྭ་ཤིང་ཆུ་བོའི་སྟེང་ན་འཕྱོ། །རིན་པོ་ཆེ་དག་མ་ཡིན་ནོ། །བློ་དང་ལྡན་པས་རྒུད་པ་ལས། །བསླང་བར་ནུས་ཀྱི་ཕལ་པས་མིན། །ཤ་ར་བྷ་ཡིས་དབུགས་རྔུབས་པས། །ཁྲོན་པའི་ཆུ་ནི་
འཐུང་བར་བྱེད། །ཡུན་རིང་འདྲིས་པའི་ཡོན་ཏན་ལ། །ལུས་ཅན་དག་ནི་སྐྱོ་བ་སྐྱེ། །ཤིན་ཏུ་ངོམས་པར་ཆུ་འཐུངས་ནས། །དེ་ཉིད་ཡོངས་སུ་སྤོང་བར་བྱེད། །ཐབས་དང་བྲལ་བར་བྱེད་པ་ན། །དམ་པས་ཀྱང་ནི་དོན་མི་འགྲུབ། །གཞུ་ནི་ལོག་པར་འགེངས་པའི་མིས། །མདའ་དྲང་
འབེམ་ལ་ཕོག་མི་འགྱུར། །མི་དག་གོ་འཕང་མཐོ་རྙེད་ན། །ཕལ་ཆེར་དེ་ན་རྨོངས་པར་འགྱུར། །རི་རྩེ་མཐོ་ལ་འདུག་པས་ཀྱང་། །གཤོང་ཡང་ཐང་དང་འདྲ་བར་མཐོང་། །ཁ་ཅིག་ཡོན་ཏན་མེད་འཁོར་ནའང་། །དམ་པ་འཁོར་བ་སྤོང་མི་བྱེད། །ཟླ་དཀྱིལ་ལ་བརྟེན་ར་རི་ཡི། །ལྷན་

203-1-118b

ཅིག་སྐྱེ་ཞིང་འགྲིབ་པ་བཞིན། །བདག་ཉིད་ཆེ་ལ་རྒུད་དུས་སུའང་། །ལྷག་པར་མཐུ་རྩལ་ཐ་མལ་མིན། །ཨ་ཀ་རུ་ནི་མེར་བསྲེགས་ན། །དྲི་ཞིམ་ཐ་མལ་དེ་ལྟ་མིན། །བདག་ཉིད་ཆེ་ལ་སྐྱོན་ཕྲ་ཡང་། །བསལ་གྱི་ཕལ་ལ་དེ་ལྟ་མིན། །ཇི་ལྟར་ཟླ་བ་ཉ་བ་ལ། །ར་རི་མངོན་གྱི་ཚེས་ལ་མིན། །མཐུ་ཡིས་
ཕོངས་པའི་ཕལ་པ་དག །གཞན་ལ་རྩོལ་ཞིང་འགྲོ་བའི་ཚེ། །རང་གཅོད་མི་ནུས་བདར་རྡོས་ཀྱང་། །སྟ་རེ་རྣོན་པོར་བདར་བར་བྱེད། །སྐྱེ་བོ་གཅམ་པ་ཕ་རོལ་གྱི། །ཐག་རིང་སྐྱོན་ལྟ་རང་གི་མིན། །མིག་གིས་རང་གི་སྐྱོན་མི་མཐོང་། །ཟླ་བའི་ར་རི་རྟོགས་པར་བྱེད། །སྐྱེ་བ་མེད་ཅིང་རིན་ཆེན་
དང་། །སེལ་མེད་བརྟན་ལ་དབྱེ་དགའ་བའི། །ནོར་བུ་འབར་འདྲའི་དམ་པ་དག །ཕྲན་ཚེགས་ཙམ་གྱིས་འགྱུར་བ་མེད། །གཉུག་ཐུང་རང་བཞིན་ཡང་བ་དང་། །མགུ་དཀའ་ཁྲེལ་མེད་ཁོང་རྩུབ་པའི། །ངན་པས་མཛའ་བཤེས་ཡིད་གཅོད་བྱེད། །མཁའ་ལ་མེ་ནི་རླུང་གིས་སྦོར། །
ཕན་བྱེད་ས་བོན་དམ་པའི་སར། །བཏབ་འཁྲུངས་མི་སྲུན་ཚ་སྒོར་མིན། །ཏིལ་མར་ཐིགས་པ་ཆུང་ངུས་ཀྱང་། །ཆུ་ལ་སྙོམས་ཀྱི་བྱེ་མས་མིན། །བློ་ལྡན་དགྲ་སྲོག་ཉིད་འཇོམས་ཀྱི། །མི་མཁས་པ་ནི་ཡན་ལག་གོ། །སེང་གེ་ཁྲོས་ནས་མི་གསོད་ཀྱི། །ཁྱི་ཁྲོས་ནས་ནི་རྡོ་ལ་སྙེགས། །
འབྱོར་པ་ཕན་རྩེ་གང་དག་གིས། །སེམས་ཡང་བ་དག་དྲོད་མི་ཐུབ། །བ་རྒྱས་སྦྲང་བུ་འཛིན་བྱེད་ཀྱི། །མ་ཏང་ཀཱ་ཡིས་གླང་པོ་མིན། །མང་པོས་རེག་པར་མི་བཟོད་པའི། །ཟེར་ལྡན་བཀྲ་ཤིས་ཟླ་བ་ཡང་། །སྐྱོན་གྱི་རྡུལ་གཅིག་བསྐྱེད་པ་ན། །ཡོན་ཏན་བརྒྱ་ལྡན་མཚུངས་པར་བྱེད། །
ངན་པ་འཚོ་བ་ཚུལ་འཆོས་པས། །གླགས་རྙེད་གཞན་ལ་འཚེ་བར་བྱེད། །ལག་འགྲོ་ཟས་སུ་རླུང་ཟ་ཡང་། །ཕ་རོལ་འཚེ་བ་མི་གཏོང་ངོ་། །མི་སྲུན་མི་ཡིས་ངན་པ་དག །སྐྱོན་བཏགས་རབ་ཏུ་འཚེ་རབ་བྱེད། །པ་ཡིས་མཁའ་ལ་རྒྱ་བཙུགས་ནས། །སྦྲང་བུ་བཟུང་ཞིང་གསོད་པར་བྱེད། །ཡུལ་གྱི་
དུག་གིས་གྲོང་པའི་ཡིད། །རང་བཞིན་ངན་པ་ཅིས་མི་བྱེད། །ཤ་རུལ་དྲི་མི་ཞིམ་པ་དག །ཁྱི་ལྟོགས་ཀྱིས་དེ་ཅིས་མི་ལེན། །སྐྱེ་བོ་དམ་པ་གཡོ་མེད་ལ། །ངན་པ་ལྷག་པར་འཚེ་བར་བྱེད། །པདྨས་གནོད་པ་མ་བྱས་པར། །བ་མོས་རྟག་ཏུ་སྐེམས་པར་བྱེད། །མི་སྲུན་པ་དག་མི་སྲུན་

203-1-119a

པས། །འདུལ་འགྱུར་སྐྱེ་བོ་དམ་པས་མིན། །མཛེ་ཡི་ནད་དང་མཐུན་པའི་སྨན། །ཨ་རི་ཏ་ཡི་ཤིང་བསྟེན་ནོ། །ངན་གཡོ་ཅན་དག་དང་པོར་ནི། །ཡོན་ཏན་ལྡན་པའི་ཆེ་བ་འགོག །བུད་མེད་ཀྱི་ནི་ནུ་རྒྱས་ལ། །དགའ་བ་དང་པོར་དེ་ལ་འབབ། །བླུན་པོ་ལྷག་པར་སྲིད་
མཐོ་ཡང་། །བློ་ལྡན་དབུལ་པོས་ཟིལ་གྱིས་གནོན། །མཁའ་ལས་ཆར་པ་བབ་པ་ཡིས། །རྡུལ་ཕྲན་ལྡང་བ་ཞི་བར་བྱེད། །བློ་ལྡན་རབ་ཏུ་ཉམ་ཐག་ཀྱང་། །བརྙས་ཐབས་བསྲེས་པའི་ནོར་མི་ལེན། །ཁུ་རྟ་དག་ནི་ས་སྟེངས་ཀྱི། །མཚོ་ཆུའང་འཐུང་བར་མི་བྱེད་དོ། །བདག་ཉིད་ཆེན་པོ་དར་བ་
དང་། །རྒུད་པ་ན་ཡང་སེམས་སྙོམས་འགྱུར། །ཉི་མའི་དཀྱིལ་འཁོར་འཆར་བ་དང་། །ནུབ་པ་ན་ཡང་འགྱུར་བ་མེད། །ཉིན་རེ་འབྲི་བའི་སྡུག་བསྔལ་དག །ཟླ་དེས་ལྟ་བུར་བཟོད་པར་ནུས། །ཉི་མ་ལྟ་བུའི་བཙན་པོ་ཡང་། །ནུབ་འདོད་བྲི་བ་སྤྲོ་བ་མེད། །རང་ཉིད་ཉམ་ཐག་མ་བྱུང་བར། །དེ་སྲིད་
མི་དང་འགྲོགས་བྱེད་དེ། །གླད་པར་གནམ་ལྕགས་བབ་པ་སྟེ། །སུ་ཞིག་གིས་ནི་བསྐྱབ་པར་ནུས། །ཡོན་ཏན་ལྡན་པ་གཞན་ཕན་པ། །མི་བྱེད་ཕལ་དང་ཁྱད་ཅི་ཡོད། །ཉི་མ་མུན་བསལ་མི་བྱེད་ན། །དེ་ནི་མུན་ལས་ཁྱད་པར་མེད། །འགའ་ཞིག་དགའ་བསྡོམས་མཐུ་ཡོད་ཀྱི། །གཅིག་པོས་ཀུན་
འགྲུབ་ཡོད་པ་མིན། །རྡོ་རྗེས་ཕ་བོང་འབིགས་བྱེད་ཀྱང་། །དེ་ཉིད་རྭ་རུས་གཅོད་པར་བྱེད། །འདབ་གཤོག་རྫོགས་ཀྱང་འགྲོ་འདོད་པའི། །འབད་རྩོལ་གྱིས་འཕངས་ཐག་རིང་འཕུར། །འཕངས་པའི་ཤུགས་ཟད་མདའ་དག་ཀྱང་། །རང་ཉིད་ལྟུང་བར་བྱེད་པ་བཞིན། །ལོངས་སྤྱོད་བདོག་
ཀྱང་འཇུངས་པ་དག །རང་གི་ལས་ཀྱིས་སྤྱོད་དབང་མེད། །རྒུན་གྱི་འབྲས་བུ་སྨིན་པའི་ཚེ། །ཁྭ་ལ་མཆུ་ནད་འོང་ཞེས་གྲགས། །ཤེས་རབ་ལྡན་པས་རྫས་བཟང་པོ། །མཐོང་ན་མོད་ལ་བྱེ་བྲག་ཕྱེ། །ལག་པའི་ཚོད་ལ་རབ་གོམས་པས། །སྲང་ཚད་རྣམས་ནི་ཤེས་པར་བྱེད། །སྡིག་པས་
སྦགས་པའི་རང་བཞིན་ལས། །དཀའ་བས་ཡིད་ནི་དག་འགྱུར་ཏེ། །ངང་གིས་དྲི་མ་ཅན་གྱི་གོས། །རབ་ཏུ་འབད་པས་དཀར་པོར་འགྱུར། །གཡོན་ཅན་གུས་པ་སྟོན་པ་ནི། །དགོས་པའི་ཆེད་ཡིན་གུས་པས་མིན། །སྨད་འཚོང་སྐྱེས་པ་དགའ་བྱེད་པ། །འདྲིད་པའི་ཆེད་ཡིན་དགའ་བས་

203-1-119b

མིན། །སྤུ་དང་མྱུ་གུ་སྒོང་སྐྱེས་མེ། །དུག་དྲེའུ་ཤིང་སྲིན་རྨ་འབུ་དང་། །རང་བཞིན་ཁྲེལ་མེད་མི་དག་ནི། །རང་རྟེན་མི་ཕུང་མི་གཏོང་ངོ་། །ཡོན་ཏན་ལྡན་ལ་ཕྱུག་པོ་དཀོན། །ཕྱུག་པོ་ཕལ་ཆེར་ཡོན་ཏན་མེད། །མེ་ཏོག་རྣ་རྒྱན་རབ་མཛེས་ཀྱང་། །ལི་ཤིའི་མེ་ཏོག་དྲི་རབ་ཞིམ། །རང་བཞིན་
མི་བརྟན་ལྷག་པར་གཡོ། །གཟུང་དཀའ་བཅོས་དཀའ་སྐྱོན་ལྡན་པའི། །དངུལ་ཆུ་ལྟ་བུའི་སྦྱོར་བ་ཡིས། །མ་བསྡམས་དམ་པ་གང་ལ་འགྲུབ། །མཐོ་ན་དྲེགས་པར་མི་བྱེད་དེ། །རྒུད་ནའང་ཡི་ཆད་མི་བྱའོ། །ཉི་མས་མུན་པ་གསལ་མོད་ཀྱི། །ཉི་མ་ཤར་བ་ནུབ་པར་འགྱུར། །ཀུ་ལའི་རི་
བརྟན་རབ་ཆེ་ཡང་། །མི་གཞོལ་སྐྱོན་གྱིས་སྤངས་ནས་ནི། །ཆུ་རྣམས་རྒྱ་མཚོར་འབབ་པ་ཡང་། །བདག་ཉིད་རིམ་གྱིས་གཞོལ་བ་ལྟོས། །ཆོ་རིགས་ཡོན་ཏན་ལྡན་ན་ཡང་། །རང་བཞིན་མི་སྲུན་བཤེས་མི་བྱ། །མེ་མཆེད་གྱུར་ན་མ་ལ་ཡའི། །ཙན་དན་གྱིས་ཀྱང་སྲེག་པར་བྱེད། །སྨད་
རིགས་གཟེངས་མཐོས་ཐོག་མར་ནི། །རྗེ་དཔོན་ཁྱད་དུ་གསོད་པར་བྱེད། །ས་རྡུལ་གྱེན་དུ་འཐོར་བ་ཡང་། །འཐོར་བྱེད་ཉིད་ལ་ཐོག་མར་འབབ། །གང་གིས་བླུན་པོ་ཉམ་ཐག་པས། །བགྲོད་དཀའ་ཤེས་རབ་ལྡན་པས་རྒལ། །ལྕགས་གོང་ཆུ་ནང་བྱིང་བ་དག །དེ་ཉིད་སྣོད་བྱས་སྟེང་ན་
འཕྱོ། །ཕུང་ཁྲོལ་རང་ཉམས་འཇུངས་ནོར་དང་། །དམན་པ་གསོན་པོར་གྱུར་པ་དང་། །བྱ་རོག་ཡུན་རིང་འཚོ་བ་དག །གནོད་པར་འགྱུར་གྱིས་ཕན་པ་མེད། །དམ་པ་སྙིང་རྗེའི་གཟི་ལྡན་པ། །འགྲོ་བ་ཀུན་ལ་གཉེན་པར་བྱེད། །འཇིག་རྟེན་ཕར་ཕྱིན་ཉི་མའི་ཟེར། །མཐོན་པོའི་
གནས་ནས་ས་ལ་འབབ། །སྨད་རིགས་ཕལ་ཆེར་དམན་རྣམས་ལ། །རྔན་ཅན་བྱེད་ཀྱི་མི་མཆོག་མིན། །ཏིལ་མར་ཆུ་ནང་ཁྱབ་བྱེད་ལ། །མར་གསར་བཅུག་ན་འཁྱག་པར་བྱེད། །སྐྱེ་བོ་དམ་པ་རབ་ཁྲོས་ཀྱང་། །ཐབས་ཀྱིས་གཉེན་འགྱུར་དམུ་རྒོད་མིན། །ཆབ་རོམ་སྲ་ཡང་བཞུ་བ་
ཡིན། །ཐབས་ཡོད་རྩྭ་འཇམ་མ་ཡིན་ནོ། །སྨད་རིགས་དག་ནི་ཕན་བྱེད་ནའང་། །ཡ་རབས་ལ་གནོད་ཁྲོས་ཅི་སྨོས། །གཤིན་རྗེ་འཛུམ་ནའང་འཆི་འགྱུར་ན། །རབ་ཏུ་ཁྲོས་ན་སྨོས་ཅི་དགོས། །དམ་པ་ཡོན་ཏན་སྟོན་བྱེད་དེ། །སྐྱེ་བོ་ངན་པ་སྐྱོན་ཉིད་བསྟན། །ནོར་བུ་རིན་

203-1-120a

ཆེན་རང་བཞིན་ལྕི། །ཀ་ཤའི་ཤིང་བལ་རང་བཞིན་ཡང་། །འགྲོ་བ་ཤིན་ཏུ་གྲངས་མེད་ཀྱང་། །སེམས་ཅན་ཡོན་ཏན་ལྡན་པ་དཀོན། །ཡུལ་ལྗོངས་དཔག་ཏུ་མེད་མོད་ཀྱི། །རིན་པོ་ཆེ་དག་འབྱུང་བ་དཀོན། །རྒྱུ་སྤུན་མང་པོ་བསྡོམས་པ་བཞིན། །སྐྱེ་བོ་
ངན་བསྡོངས་གཞིག་པར་དཀའ། །བྱེའུ་དུས་གཅིག་འཕུར་བ་ཡིས། །ཉི་མའི་ངོས་ནི་ཁེབས་པར་བྱེད། །དམན་ལས་ཡོན་ཏན་ལྡན་པ་འབྱུང་། །དམ་པ་ལས་ཀྱང་ངན་པ་འབྱུང་། །འདམ་གྱི་ནང་ནས་པདྨ་འབྱུང་། །པདྨ་ལས་ཀྱང་སྲིན་བུ་འབྱུང་། །རྒྱལ་པོ་མི་སྲུན་གཅེས་བྱེད་
ལས། །ཡོན་ཏན་ལྡན་པའི་གོ་འཕང་མིན། །ཁང་པ་སྦྲུལ་གདུག་ཅན་དག་ཏུ། །སྒྲོན་མ་ཁེགས་པར་གསལ་མི་འགྱུར། །བདག་ཉིད་ཆེན་པོ་ཉམས་པ་ལ། །ཆེན་པོ་མིན་པས་མི་བཀུར་རོ། །ཟླ་བའི་ཤས་ཙམ་ལུས་པ་ཡང་། །དྲག་པོ་ཉིད་ཀྱིས་སྤྱི་ལ་བཀུར། །གནོད་པ་བྱེད་ན་
ཕན་འདོགས་དང་། །དཔོན་བྱེད་དང་ཆེ་ཉམ་ཐག་བསྟེན། །ཕོངས་ཀྱང་སྦྱིན་གཏོང་སེམས་ཡོད་པ། །བདག་ཉིད་ཆེན་པོ་ཆེ་བའི་རྟགས། །ཡ་རབས་དག་གི་ངར་ཅན་ཚིག །ཙང་ཤུའི་ཁུ་བས་ཟ་འཇིལ་བཞིན། །ངན་གཡོ་ཚིག་སྙན་རྒྱ་ཤུག་གི། །འབྲས་བུ་མངར་ཡང་འཁྲུ་བར་བྱེད། །
ཕན་བཏགས་དྲིན་བགྲང་མི་བྱེད་དང་། །དམན་ལ་དད་ཆེན་མ་བསླངས་སྟེར། །བྱ་བ་འདུམ་བྱེད་ཡོན་ཏན་ཅན། །བརྒྱ་ཡི་ནང་ན་འགའ་འགར་ཤེས། །གང་ཞིག་ཆད་པས་གཅོད་ནུས་པ། །དེ་ཉིད་ཕན་པར་བྱེད་ཀྱང་ནུས། །ཉི་མས་སྐེམས་བྱེད་ཆར་ཉིད་ཀྱང་། །འབེབས་པར་བྱེད་ཀྱི་
ཟླ་བས་མིན། །དོན་གཉིས་མི་མཐོང་བྱིས་པས་མིན། །མཁས་པ་དེས་ཀྱང་ཅི་ཞིག་བྱ། །ལོང་བ་གཉིས་ཏེ་དམུས་ལོང་དང་། །རིག་པ་མེད་པའི་ལོང་བའོ། །བསྟན་བཅོས་བརྩོན་བྱས་ཕན་མེད་ན། །དོན་མེད་བརྩོན་པ་བྱ་ཞེས་བྱ། །སྦྱོར་བ་མེད་པར་ནད་ཞི་ན། །བཅུད་ཀྱིས་ལེན་སོགས་
དོན་མེད་དོ། །སྨྲ་བ་སྨྲ་ཞིང་བག་འཁུམས་མིན། །བཙན་ཚིག་མ་ཡིན་རན་ན་མཛེས། །རན་པར་འཇལ་བའི་སྲང་མདའ་ནི། །མཐོ་བ་མ་ཡིན་དམའ་བའང་མིན། །རང་བཞིན་མི་སྲུན་ཕལ་ཆེར་ནི། །མ་བསྡིགས་ཕན་པ་མི་བྱེད་དེ། །སྨད་འཚང་མི་ཡི་རྡོག་པ་ཡིས། །མྱ་ངན་འཚང་བསྣུན་མེ་

203-1-120b

ཏོག་ལྟར། །ངན་པ་ལེགས་ཀྱང་ལེགས་པ་གང་། །མཐོང་ན་དེ་ནི་དེ་ལས་བླངས། །ཡོན་ཏན་ལྡན་པའི་རིན་ཆེན་ཡང་། །ངན་ལ་ནམ་ཡང་འབྱུང་བ་མེད། །འཇིག་རྟེན་རྗེས་སུ་འགྲོ་འདོད་པས། །འཚོ་ཆོས་ཐམས་ཅད་ཤེས་པར་བྱ། །མཁའ་འགྲོ་མ་ཡི་དམ་ཚིག་དག །མི་ཤེས་གནད་རྣམས་
ཤེས་པ་མེད། །འགྲོ་བའི་ནང་ན་འདི་གཉིས་བདེ། །འདི་གཉིས་རག་ལས་མེད་པ་སྟེ། །འདོད་པ་ཐམས་ཅད་སྤངས་པ་དང་། །འདོད་དགུ་ཕུན་སུམ་ཚོགས་པའོ། །ཆེ་བདག་བསྐལ་བསྒྲུབ་སྤྱོད་པ་ཡང་། །ངན་པས་ཐང་ཅིག་ཆུད་གསོན་བྱེད། །ཆུ་ཡིས་རིམ་བསྒྲུབས་ལོ་ཏོག་ཀྱང་། །
སྐད་ཅིག་གིས་ནི་མེས་སྲེག་བྱེད། །སྐྱེ་བོ་བླུན་ཁྲོད་གཡོན་ཅན་གྱི། །གོ་འཕང་མཆོག་ཐོབ་ཆེ་བདག་མིན། །རབ་རིབ་སྟུག་པོར་སྐར་མ་ལྟར། །ཉི་མ་ནམ་ཡང་གསལ་མི་འགྱུར། །རང་བཞིན་རྣམ་དག་བསོད་ནམས་ལྡན། །བཙུན་མོའི་འཁོར་ནའང་སེམས་ཞི་ཡི། །དགོན་པ་ཞི་བའི་ནགས་
དག་གི། །སྟག་དག་ཞི་བ་མ་ཡིན་ནོ། །མི་སྲུན་འདྲིས་བྱས་ཕུང་འགྱུར་ཞེས། །མི་དག་ཟེར་བ་དེ་རེ་བདེན། །སྦྲུལ་གདུག་དང་ནི་རྩེ་བའི་དུས། །བདེ་ལེགས་ཞིག་ཏུ་ག་ལ་འགྱུར། །རང་བཞིན་ཤིན་ཏུ་མ་དག་པའི། །སྐྱེ་བོ་ངན་པའི་སྡོམ་པ་ཡང་། །རྔོན་པ་ངུར་སྨྲིག་གོས་བགོས་
པས། །རི་དྭགས་འདྲིས་ནས་གསོད་པ་བཞིན། །བློ་ལྡན་ཀུན་དུ་ཐོག་མར་ནི། །འདུལ་བའི་ཆེད་དུ་སྤུངས་བསྐྱེད་དེ། །གསེར་ནི་སྦྱང་བ་མ་བྱས་པར། །ལས་སུ་རུང་བར་མི་འགྱུར་རོ། །སློང་ལ་བྱིན་པས་ཕྱུག་པོ་ནི། །ཆོས་དང་གྲགས་འབྱུང་སློང་བ་མིན། །དེ་བཞིན་ཕྱུགས་ལ་
བཀུར་སྟི་འབྱུང་། །སློང་ལ་མིན་པས་སློང་བ་ཀུན། །ངན་གཡོ་ཚིག་སྙན་སྨྲ་བ་དག །སྤྱོད་པ་སྤུ་གྲི་བཞིན་དུ་བྱེད། །ལག་འགྲོ་ལ་སོགས་བྱ་བ་གཞན། །སྒྲ་སྙན་རྨ་བྱའང་བྱ་བ་བཞིན། །བླུན་པོ་བློ་ལྡན་གསལ་བ་ཡིས། །བླ་འོག་གི་ནི་དོན་མི་ཉམས། །མིག་ལྡན་ལམ་དུ་
ཞུགས་པ་ནི། །གོམ་པ་ཆུད་ཟོས་མི་འགྱུར་རོ། །དབང་ཕྱུག་ཡོན་ཏན་མ་དད་གང་། །བླུན་ནམ་འོན་ཏེ་བརྙས་ལས་འགྱུར། །མུ་ཏིག་མི་ཤེས་ལོང་བ་ཡིས། །གཅེས་པར་མ་བརྩིས་ཅི་ཞིག་འགྱུར། །རྒྱལ་པོའི་བྱིན་དང་བློན་པོའི་མཐུས། །ཐབས་ཀྱིས་འགྲུབ་པར་འགྱུར་

203-1-121a

བ་ནི། །ཆད་པ་དམ་པོར་བསྡམས་པའི་མཐུས། །རལ་གྲིའི་གཟས་པ་ཆད་པར་འགྱུར། །གཞུང་ལུགས་རྣམས་ལ་བྱང་བྱས་ཀྱང་། །ཉམས་སུ་ལེན་པར་མི་བྱེད་ན། །ལག་པ་ན་ནི་སྒྲོན་ཡོད་ཀྱང་། །ལོང་བས་ལམ་ནི་མི་མཐོང་བཞིན། །ཀུན་ལ་ཕྱོགས་
སུ་མ་ལྷུང་ཞིང་། །ལྷག་པར་བྱམས་སྡང་མི་བྱའོ། །རོ་གཅིག་ཟས་ཀྱི་སྤྱོད་པ་ནི། །ནད་མི་འགྱུར་ཞེས་སྨྲ་བ་ཡིན། །ཀུན་དུ་དབུས་ན་གནས་པ་ནི། །མཁས་པ་རྣམས་ཀྱིས་བསྔགས་པ་ཡིན། །ཉི་མ་འཆར་ཚེ་ཆེ་བ་སྟེ། །ནམ་མཁའི་དཀྱིལ་ཕྱིན་རན་པར་འགྱུར། །བུད་
མེད་ཆེ་བདག་ཉིད་ཀྱང་སྤང་། །རྒྱལ་པོའི་འབྱོར་པ་སྨད་འཚོང་བཞིན། །འཁོར་ཡུག་གནས་པའི་ས་ཉིད་ཀྱང་། །གདེངས་ཅན་ཆ་ཤས་གཡོ་བར་བྱེད། །དེ་ལྟར་འབྱོར་པ་འགས་རྙེད་ལྟར། །མཁས་པའི་ཡོན་ཏན་མཁས་པས་ཤེས། །གྲོང་ན་སྐྱོན་ཅན་ལམ་ལོག་སྤྱོད། །
རྩྭ་བཞིན་དུ་ནི་རབ་ཏུ་མང་། །ལེགས་པ་མ་མཐོང་བདག་ཉིད་ཆེའི། །ཡོན་ཏན་ཡོད་ཀྱང་ཡིད་མི་ཆེས། །རྒྱ་མཚོའི་ཆུ་ནི་རྒྱ་ཆ་ཞེས། །ཁྲོན་པའི་རུས་སྦལ་སུས་ཡིད་ཆེས། །སྒྲུབ་པ་སྣ་ཚོགས་སྒོ་ནས་ནི། །ལ་ལ་ངན་དགོས་ཆེ་བདག་མིན། །འཁོར་བ་ལས་ནི་བྱས་པ་ཡི། །མེ་ལོང་
སྟེན་གྱི་གསེར་གྱི་མིན། །དམ་པ་གཞན་གྱིས་ཕྱེ་ན་ཡང་། །རང་གི་ཡོན་ཏན་གྱིས་འདུམ་བྱེད། །མི་སྲུན་ལྕགས་གྱོང་འདྲ་བ་ནི། །འབྱེད་པར་ནུས་ཀྱིས་འདུམ་མི་ནུས། །བདག་ཉིད་ངན་པ་མ་རིག་པ། །རིག་པའི་ལམ་ལའང་རྨོངས་པ་སྐྱེ། །སྒྲོན་མས་ཕྱུང་བའི་སྣང་བ་
ལ། །མཁའ་ལ་རྒྱུ་བ་ལོག་པར་རྒྱུ། །ཇི་ལྟར་ནོངས་སྐྱོན་མེད་པའི་ཚིག །དྲག་པོའི་སྐྱོན་གྱིས་འགྱུར་བ་ལྟར། །གནོད་བྱེད་དེ་ལྟར་མ་ཡིན་ཏེ། །སྲེག་པའི་གནོད་འགྱུར་ཆུ་སྐྱར་མིན། །བདག་ཉིད་ཆེན་པོའི་འབྱོར་པ་གང་། །དེ་ལས་རིམ་གྱིས་རྒུད་པ་འབྱུང་། །ཉི་མས་
ཡུན་རིང་བསྐྱངས་ནས་ནི། །དུས་ཀྱི་མཐའ་མར་འགྲོ་སྲེག་བྱེད། །འབྱོར་པ་རང་བཞིན་མི་བརྟན་པའང་། །སེམས་ཅན་ཆེ་ལ་བརྟན་པར་འགྱུར། །དངུལ་ཆུས་བྱེར་བ་སྦྱོར་བ་ཡིས། །ཕན་ཚུན་འབྱེད་བསྡུ་ཅིས་མི་ནུས། །ངན་གཡོའི་འཇམ་ཚིག་རྣོན་པོ་ཡིས། །ཇི་ལྟར་སྙིང་

203-1-121b

ལ་གདུང་བྱེད་པ། །དེ་ལྟར་རལ་གྲི་རྣོན་པོ་དང་། །རླུང་ཆུ་དེ་བཞིན་མེས་མི་བྱེད། །ཉམས་པར་གྱུར་ན་སེམས་ཅན་དག །སྤྱོད་པ་ལོག་པར་བྱེད་པར་འགྱུར། །རྨི་ལམ་ན་ནི་འོད་མེད་པའི། །ཉི་མ་མཐོང་ན་འཆི་བར་འགྱུར། །གཞན་ལ་གནོད་པས་ཡིད་གདུངས་ལྟར། །རང་ལ་གནོད་པས་དེ་ལྟ་
མིན། །རང་ལ་གནོད་ན་མི་གཡོ་བའི། །ས་ནི་གཞན་ལ་གནོད་པས་གཡོ། །མཁས་པས་འདི་ནི་གཉེན་གདུག་ཅེའམ། །དབང་ཕྱུག་ཤེས་རབ་བག་མི་དབབ། །རླུང་གིས་མེ་ཡང་གཏོར་མོད་ཀྱི། །སྒྲོན་མ་འབར་བའང་གསོད་པར་བྱེད། །གཏུམ་པོ་འདིས་ནི་ཕན་བཏགས་ཞེའམ། །འཕང་ཞེས་
སུ་ཡི་ངོར་མི་བལྟ། །མེ་མཆེད་གྱུར་ན་སྦྱིན་སྲེག་མཁན། །ཡོ་བྱད་བཅས་ཏེ་ཚིག་པར་འགྱུར། །སྲོག་ལ་བབ་ཀྱང་བློ་ལྡན་ཉིད། །ངང་གཙང་ཡོན་ཏན་འདོར་མི་བྱེད། །དུང་ནི་མེ་ཡིས་བསྲེགས་ན་ཡང་། །རང་བཞིན་དཀར་བ་མི་འདོར་རོ། །ཁྲེལ་མེད་བྱ་བ་བྱ་བ་མིན། །སྤྱོད་པས་ནམ་ཡང་ཆོག་པ་མེད། །
མྱ་ངམ་ལམ་དུ་ཞུགས་པ་དག །ཆུ་གཙང་མི་གཙང་སུ་ཞིག་རྟོག །ངང་གིས་རབ་བསྒྲིམས་བྱ་བ་ལས། །དེ་ལས་ལྷག་པར་ལ་བཟླར་མེད། །བདེ་བར་ཤིང་རྩེར་འཛེགས་པས་ཀྱང་། །དེ་ལས་བརྩལ་ན་ལྟུང་བར་འགྱུར། །ཕལ་ཆེར་འགྲོ་མང་ཕ་རོལ་ལས། །སྐྱོན་འབྱུང་སྨྲ་རིགས་རང་ལས་མིན། །
བུད་ཤིང་དང་ནི་མེ་གཉིས་ལ། །བརྟེན་ནས་མེས་ནི་སྲེག་པར་འགྱུར། །ཐོས་པ་མང་བས་ང་རྒྱལ་དང་། །ཕྱུག་ཁེངས་གཟུགས་མཛེས་རྒྱགས་པ་དང་། །རྒྱ་མཚོ་ལ་ནི་བུལ་ཏོག་ཆུ། །གཤིན་རྗེའི་རྩེད་མོ་ཕྱིན་ཅི་ལོག །བཀྲེན་པ་འདི་བས་བདག་འབྱོར་པས། །བདག་ལ་མི་ཕོད་དེ་མི་བསམ། །མི་
གཡོ་རིན་ཆེན་རྩེ་མོ་ཡང་། །ཅི་ག་རྡོ་རྗེས་མི་འབིགས་སམ། །ནོར་གྱི་བདག་པོ་སྲུང་མཁས་ཀྱང་། །ནང་བྱད་ཤིན་ཏུ་བསྲུང་བར་དཀའ། །ཉ་དག་རྒྱ་མཚོའི་ཆུ་འཐུང་ཡང་། །འཐུང་ངོ་བར་ནི་མཐོང་བ་མེད། །སྦྱིན་པས་ཕྱུག་པོ་ཉིད་རྙེད་ནས། །ཕོངས་ལ་སྦྱིན་པར་མི་བྱེད་པའི། །ཁྲེལ་མེད་
གང་ཡིན་དེ་ལ་ནི། །ཁྲོས་པས་ལྷག་པར་ཕྱིར་མི་སྟེར། །ཇི་སྲིད་དམ་པ་མི་བརྩོན་པ། །དེ་སྲིད་ཉེས་པ་སྟོབས་ལྡན་འགྱུར། །བརྩོན་པས་ཉོན་མོངས་སྡར་མ་ལ། །བློ་ལྡན་སྐྲག་པར་མི་བྱ་སྟེ། །ཉོན་མོངས་བག་ཆགས་དྲི་མ་ནི། །ཤེས་རབ་མེས་སྲེག་ཏིང་འཛིན་ཆུས། །རྡོ་

203-1-122a

ཐལ་རྡོ་བསྲེགས་ཆུས་གཏོར་ན། །དུམ་བུ་བརྒྱར་འགྱེས་བཞིན་དུ་བྱ། །བདག་ཉིད་ཆེན་པོས་བསྟེན་པའི་ལམ། །གཞན་དག་གོམས་པར་བྱེད་པ་ཡིས། །ཅི་ནས་འདི་ལ་དགའ་ལྟའི་ཕྱིར། །འདི་ནི་གོམས་ནས་སྨྲས་པ་ཡིན། །དེ་ལྟར་འགྲོ་བ་ཉེས་པ་སྣ་
ཚོགས་མེས། །དགེ་ལེགས་ས་བོན་མྱུ་གུ་བསྐྱེད་བསྲེགས་པས། །ཇི་སྲིད་སྲིད་གསུམ་ཟ་ཕོད་འཆི་བདག་ནི། །གནམ་ལྕགས་འབབས་ལ་གྲགས་པའི་ཚོགས་སྐྱེད་ཤོག །ཚིགས་སུ་བཅད་པའི་མཛོད་ཅེས་བྱ་བ། སློབ་དཔོན་ཉི་མ་སྦས་པས་མཛད་པ་རྫོགས་སོ།།      །།ཟ་ཧོར་གྱི་
མཁན་པོ་ཛྙཱ་ན་ཤཱན་ཏི་དང་། བོད་ཀྱི་ལོ་ཙཱ་བ་དཔལ་གྱི་ལྷུན་པོའི་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།།      ༄༅༅། །རྒྱ་གར་སྐད་དུ། ཤ་ཏ་གཱ་ཐཱ། བོད་སྐད་དུ། ཚིགས་སུ་བཅད་པ་བརྒྱ་པ། དཀོན་མཆོག་གསུམ་ལ་ཕྱག་འཚལ་ལོ། །རིག་པ་གཞོན་
པའི་དུས་ན་སློབ། །བ་ནི་རྒུན་གྱི་དུས་སུ་གསོས། །ཞིང་ནི་སེར་དང་ལྡན་ལ་རྨོས། །འདི་གསུམ་འབྲས་བུ་སྨིན་པའི་རྒྱུ། །མཁས་པས་རིག་པ་རྣམ་ཀུན་དུ། །ལང་ཚོ་ཡོལ་ཀྱང་བསླབ་བྱ་སྟེ། །གལ་ཏེ་འདིར་འབྲས་མ་སྨིན་ཡང་། །སྐྱེ་བ་གཞན་དུ་རྙེད་པར་སླ། །ཡོན་ཏན་དག་ལ་
འབད་བྱ་ཡི། །འགྱིང་ཚུལ་བསྟན་པས་ཅི་ཞིག་བྱ། །འོ་མ་མེད་པའི་བ་དག་ནི། །དྲིལ་བུ་བཏགས་ཀྱང་ཉོར་མི་འགྱུར། །ཡོན་ཏན་ལྡན་པ་ཡོན་ཏན་ལ་དགའ་ཞིང་། །ཡོན་ཏན་མེད་པ་ཡོན་ཏན་ལ་མི་དགའ། །ནགས་ཀྱི་བུང་བ་མཚོ་ཡི་པདྨར་དགའ། །སྦལ་པ་ལྷན་ཅིག་གནས་
ཀྱང་དེ་ལྟ་མིན། །ཡོན་ཏན་ལྡན་ལ་ཕྱུག་པོ་དཀོན། །ཕྱུག་པོ་ལ་ཡང་ཡོན་ཏན་དཀོན། །ཡུལ་ལྗོངས་དཔག་ཏུ་མེད་མོད་ཀྱི། །རིན་པོ་ཆེ་དག་སྐྱེ་བ་དཀོན། །འགྲོ་བ་དཔག་ཏུ་མེད་མོད་ཀྱི། །ཕ་མ་རྙེད་པ་ཤིན་ཏུ་དཀོན། །དམ་པ་རིང་ན་གནས་གྱུར་ཀྱང་། །ཕོ་ཉ་ཡོན་ཏན་ཉིད་བྱེད་དེ། །
ཀེ་ཏ་ཀ་ཡི་དྲི་ཡིས་ནི། །བུང་བ་རང་བཞིན་འོང་བ་བཞིན། །རྒྱལ་པོ་ཡོན་ཏན་ལྡན་པ་གཉིས། །མཉམ་ཞིང་འདྲ་བ་མ་ཡིན་ཏེ། །རྒྱལ་པོ་རང་གི་ཡུལ་ན་འཁུར། །ཡོན་ཏན་ལྡན་པ་ཀུན་དུ་འཁུར། །དུས་ནི་ཡུན་ཐུང་རིག་པའི་རྣམ་པ་མང་། །གང་ཞིག་གཅེས་པ་དེ་ནི་བསྟེན་པར་

203-1-122b

གྱིས། །ཡུལ་ནི་ཤིན་ཏུ་དུས་རིང་གནས་ཀྱང་ངེས་པ་ཁོ་ནར་འགྲོ་བར་འགྱུར། །འབྲལ་ལ་ཁྱད་པར་གཅིག་ཞིག་ཡོད་ན་འགྲོ་བ་རང་ཉིད་སྤོང་མི་བྱེད། །དབང་མེད་འབྲལ་ལས་ཡིད་ལ་ཡོངས་སུ་གདུང་བ་མཐའ་ཡས་སྐྱེད་པར་བྱེད། །འདི་དག་རང་གིས་སྤངས་ན་ཞི་བའི་བདེ་བ་མཐའ་ཡས་འབྱུང་
བར་འགྱུར། །དམ་པ་མིན་དང་ལྷན་ཅིག་གནས་གྱུར་ཀྱང་། །ཆུ་དང་པདྨ་བཞིན་དུ་འདྲེས་མི་འགྱུར། །དམ་པ་ཐག་རིང་དག་ན་གནས་གྱུར་ཀྱང་། །ཟླ་བ་ཀུ་མུ་ད་ལྟར་དགའ་བར་བྱེད། །འདུ་འཛི་ཀུན་དུ་སྤང་བར་བྱ། །དམ་པ་དག་དང་འགྲོགས་པར་བརྩོན། །ནད་ཀྱིས་འཇིག་པ་མེད་པ་ནི། །
ཉིན་གཅིག་ལོ་བརྒྱ་བས་ཀྱང་མཆོག །འདོད་པ་ཀུན་དུ་སྤང་བར་བྱ། །གལ་ཏེ་དེ་སྤོང་མ་ནུས་ན། །ཐར་པ་དག་ལ་འདོད་པར་གྱིས། །དེ་ཉིད་དེ་ཡི་སྨན་ཡིན་ནོ། །སྐར་མ་ཆེན་པོ་མང་དུ་ཤར་གྱུར་ཅིང་། །ས་ཡི་རྒྱན་གྱུར་ཟླ་བ་ཤར་ན་ཡང་། །གང་ཚེ་ཉི་མ་ནུབ་ན་མཚན་མོར་འགྱུར། །ཉི་མ་མ་
གཏོགས་ཤར་ནུབ་ཕྱོགས་མི་བྱེད། །གང་ཞིག་ཤར་བར་གྱུར་ན་ཡང་། །ཉི་མ་མེད་ན་གཟི་ཅན་མེད། །ཉི་མ་ཤར་བ་མཆོག་ཡིན་གྱི། །གཞན་དག་ཤར་བ་ཅི་ཞིག་དགོས། །མེ་ཏོག་གི་ནི་མགོ་ལྕོགས་བཞིན། །དམ་པའི་འགྲོ་བ་གཉིས་ཡིན་ཏེ། །འཇིག་རྟེན་ཀུན་གྱི་སྤྱི་བཀུར་བའམ། །ནགས་
ཉིད་དུ་ནི་དེངས་པར་བྱ། །མི་སྲུན་སྐྱེ་བོ་ཁུངས་ནས་བྱུང་བ་ཡི། །ཚིག་ངན་སྦྲུལ་གྱིས་སྐྱེ་བོ་དམ་པ་ཟིན། །སྦྲུལ་དེ་ཞི་བར་བྱེད་པའི་གཉེན་པོར་ཡང་། །ཤེས་རབ་བཟོད་པའི་སྨད་དག་བསྟེན་པར་བྱ། །བརྟན་རྣམས་སྡུག་བསྔལ་མྱོང་གྱུར་ཀྱང་། །ཡིད་ནི་ཞུམ་པར་མི་བྱེད་དེ། །ཟླ་བ་སྒྲ་
གཅན་ཁར་ཞུགས་ནས། །འཆར་བར་ཅི་ག་མི་བྱེད་དམ། །སེམས་ཅན་རྣམས་ལ་གང་གི་སེམས། །སྙིང་རྗེས་བརླན་པར་གྱུར་པ་དག །ཐར་དང་ཡེ་ཤེས་དེ་ཡིན་གྱི། །རལ་པ་ཐལ་བ་ཆོས་གོས་མིན། །ནགས་སྲེག་པ་ཡི་མེ་ལ་ནི། །རླུང་ལངས་གྲོགས་སུ་འགྱུར་བ་ཡིན། །དེ་ཉིད་
མེད་པར་གསོད་བྱེད་པའི། །ཉམ་ཆུང་བ་ལ་བཤེས་ཡོད་མིན། །གཞན་གྱིས་གཞན་དུ་བསྒྲགས་ནས་ནི། །མེད་པའང་ཡོན་ཏན་ཅན་དུ་འགྱུར། །རང་ཉིད་ཡོན་ཏན་སྨྲ་བྱེད་ན། །བརྒྱ་བྱིན་ཡིན་ཡང་བཙུན་མི་འགྱུར། །གང་ཞིག་རིགས་ལྡན་ཁེངས་པ་དང་། །ནོར་ཡོད་སེར་སྣ་ལྡན་

203-1-123a

པ་དག །དེ་ནི་ལྷ་ཡིས་སྨོད་འདོར་ཏེ། །ཆུ་ལས་མེ་ནི་བྱུང་དང་མཚུངས། །གང་ཞིག་ཡིད་དང་རྗེས་མཐུན་པ། །རིང་ན་གནས་ཀྱང་ཉེ་བ་ཡིན། །གང་ཞིག་ཡིད་དང་མི་མཐུན་པ། །གམ་ན་གནས་ཀྱང་རིང་བ་ཡིན། །གཞན་གྱི་འབྱོར་པ་དམ་པ་མཐོང་ནས་
ནི། །གང་ཞིག་སེམས་འཁྲུགས་པ་ནི་སྐྱེ་འགྱུར་བ། །དོན་དེ་ཅུང་ཟད་རྙེད་པར་མི་འགྱུར་གྱི། །འགྲོ་དེས་རང་གི་བསོད་ནམས་འཇོམས་པར་བྱེད། །ཆགས་པ་དང་འདྲའི་དྲི་མ་འགྲོ་ན་མེད། །ཕྲག་དོག་དང་འདྲའི་གནོད་པ་གཞན་ཡོད་མིན། །སློང་བ་དང་འདྲའི་མཛའ་བོ་ཡོད་མིན་ཏེ། །
གཏོང་བ་དང་མཉམ་གཉེན་ནི་འགྲོ་ན་མེད། །བཀྲེས་པ་དང་འདྲའི་ལུས་ཀྱི་ཟུག་གཟེར་མེད། །སེམས་ལས་དང་མཚུངས་ལུས་ཀྱི་སྐེམ་བྱེད་མེད། །ཡོན་ཏན་ལྟ་བུའི་རྒྱན་ནི་ཡོད་མིན་ལ། །བཟོད་པ་དང་མཉམ་ལུས་ཀྱི་གོ་ཆ་མེད། །སྐྱེ་བོ་སེར་སྣ་ཅན་ལ་ནོར་ཡོད་ཅི་ཞིག་བྱ། །གཡོ་
སྒྱུ་ཕྲག་དོག་ཅན་གྱི་བཤེས་ཀྱིས་ཅི་ཞིག་བྱ། །ཕ་རོལ་གནོད་བྱེད་ཡོན་ཏན་མང་ལྡན་ཅི་ཞིག་བྱ། །ཕོངས་དུས་རྒྱབ་ཀྱིས་ཕྱོགས་པའི་མཛའ་བོས་ཅི་ཞིག་བྱ། །རྣམ་པ་ཀུན་དུ་རང་ཕན་སྤྱད་བྱ་ཡི། །འཁོར་མང་ནང་དུ་སྨྲས་པས་ཅི་ཞིག་བྱ། །སྐྱེ་བོ་ཐམས་ཅད་ཡོངས་སུ་མགུ་
འགྱུར་བ། །དེ་འདྲའི་ཐབས་ནི་གང་ནའང་ཡོད་མ་ཡིན། །གནས་སྐབས་དང་ནི་མཐུན་པར་བྱ། །བདེན་དང་བསྟུན་དང་བྱམས་སྡང་དང་། །བདག་གཞན་དུས་དང་སྦྱར་ནས་སྤྱོད། །གང་ཡིན་དེ་ཤེས་མཛངས་པ་ཡིན། །ཇི་སྲིད་འཚེ་བ་བསད་ཀྱང་ནི། །དགྲ་བོ་ཟད་པར་མི་འགྱུར་གྱི། །
རང་གི་ཁྲོ་བ་ཉིད་བསད་ན། །དེས་ནི་དགྲ་རྣམས་ཀུན་བསད་ཡིན། །མི་སྲུན་སྐྱེ་བོ་གདུལ་བར་བྱ། །ཡོན་ཏན་ཅན་དག་ཀུན་དུ་བཀུར། །དྲང་པོའི་སྤྱོད་པས་དཀོར་མཛོད་དགང་། །རང་གི་ཡུལ་འཁོར་བསྐྱང་བར་བྱ། །ཇི་སྲིད་ལས་ནི་མཐོང་བ་དང་། །ཇི་སྲིད་རྐང་པ་བརྟན་པ་དང་། །ཇི་
སྲིད་ཤེས་རབ་མ་ཉམས་པ། །དེ་སྲིད་རང་གི་ཕན་པ་གྱིས། །རྒྱལ་པོ་བྱི་བོ་བྱེད་པ་དང་། །དེ་ཡི་བློན་པོ་མི་མཁས་པས། །ནོར་བསགས་པ་ལྟ་ག་ལ་སྟེ། །འབད་པ་ཆེན་པོས་སྲོག་སྲུངས་ཤིག །གང་ན་ཞལ་ཏ་བྱེད་པ་མེད། །ཀུན་ཀྱང་མཁས་པར་ང་རྒྱལ་ཆེ། །ཐམས་ཅད་གཙོ་

203-1-123b

བོ་བྱེད་འདོད་པ། །དེ་ཡི་ཚོགས་ནི་འཇིག་པར་འགྱུར། །གང་ན་བྱི་བས་མཛོད་པ་བྱེད། །བྱི་ལས་མར་ནི་སྲུང་བ་དང་། །བྱ་རོག་ཕྱག་ཚང་བྱེད་པ་ཡི། །དེ་ཡི་དངོས་དེ་སྨོས་ཅི་དགོས། །ཀུན་དགའ་ར་བའི་ཕྲེང་རྒྱུད་བཞིན། །མེ་ཏོག་རྒྱས་པ་བཏུ་བྱ་ཡི། །ཇི་ལྟར་སོལ་བ་མཁན་བཞིན་དུ། །
རྩ་ནས་གཅད་པར་མི་བྱའོ། །གྲོག་མཁར་ས་དང་སྦྲང་རྩི་དང་། །ཟླ་བ་ཚེས་པ་ཡར་གྱི་ངོ་། །རྒྱལ་པོའི་ནོར་དང་སྤྲང་པོའི་ནོར། །ཅུང་ཟད་ཅུང་ཟད་བསགས་པས་འཕེལ། །ཏི་ཏི་ར་ནི་ཟིལ་པ་ཡི། ཐིགས་པ་ཙམ་གྱིས་སྲོག་འཛིན་བྱེད། །བསླངས་པས་ཐོབ་པར་མི་འགྱུར་ན། །བརྒྱ་
བྱིན་ལ་ཡང་མི་སློང་ངོ་། །རྨ་བྱ་སོ་གའི་ཚ་བས་གདུངས་ཀྱང་ནི། །མཁའ་དཀྱིལ་ཆར་གྱི་རྒྱུན་ལ་རེ་བླ་ཡི། །རྫིང་བུ་རྙོག་མ་ཅན་གྱི་ཆུ་དམན་ལ། །དྲེགས་པས་བསྟོད་པའི་མགྲིན་པ་མ་གདུད་ཅིག །སྟོབས་ལྡན་སེང་གེ་རི་དྭགས་ཤ་ཁྲག་ཟ་འཐུང་ཡང་། །ལོ་གཅིག་ཁྱུད་ཀོར་ལ་ནི་འཁྲིག་
པ་ལན་ཅིག་སྤྱོད། །བོང་བུ་རྡུལ་ཙམ་ཟ་བའང་འདོད་པ་རྟག་ཏུ་སྤྱོད། །དེ་གཉིས་གང་གི་རྒྱུས་བསྐྱེད་ཁྱེད་ཀྱིས་ང་ལ་སྨྲོས། །ནགས་ཀྱི་གླང་པོ་རྩྭ་ལོ་ཟ་ཡང་སྟོབས་དང་ལྡན། །སྦྲུལ་ནི་ཟས་སུ་རླུང་ཟར་གྱུར་ཀྱང་སྦེགས་པ་མེད། །དྲང་སྲོང་རྩ་བ་འབྲས་བུ་ཙམ་གྱིས་དུས་འདའ་བྱེད། །དེ་བས་
ཁྲེལ་འཛེམ་ཆོག་ཤེས་ཁོ་ནར་འབྱོར་པའི་མཆོག །གང་ཞིག་ཡི་གེ་མཆོག་གིས་བརྒྱན་པའི་ཁ་ནི་གང་ཡིན་པ། །དེ་ནི་ཡིད་འོང་པདྨ་རབ་གསར་རྒྱས་པ་ལྟ་བུར་མཛེས། །ཡི་གེ་མེད་པར་གྱུར་པའི་ཁ་ནི་གང་ཡིན་པ། །དེ་ནི་ཁ་མིན་ས་ཡི་བུ་ག་དག་དང་མཚུངས། །བོང་བུ་ཕྱུགས་
ལ་ནོར་བུ་མུ་ཏིག་ཅི། །དུད་འགྲོ་ཕག་ལ་ཁ་ཟས་ཞིམ་པོ་ཅི། །ལོང་ལ་སྣང་དང་འོན་པ་དག་ལ་གླུ། །གླེན་པ་དག་ལ་ཆོས་ཀྱིས་ཅི་ཞིག་བྱ། །ཀ་ཏན་ཏྲ་ཞེས་སྒྲ་མཁན་དང་། །གཅེས་སྒྲུབ་ཤེས་པའི་སྨན་པ་དང་། །དབྱིག་པ་ཐོག་པའི་རལ་ཀ་བས། །དེ་གསུམ་འཇིག་རྟེན་བཞད་གད་
སའོ། །བདག་ལ་བྱིན་ཟེར་དམན་པའི་ཚིག །མི་སྦྱིན་ཟེར་བ་དམན་པས་དམན། །འདི་ཁྱེར་ཟེར་བ་མཆོག་གི་ཚིག །མི་ཁྱེར་ཟེར་བ་དེ་བས་མཆོག །གནོད་སྤངས་ཕན་པ་བསྟེན་པ་ཡི། །སྦྱོར་བ་གང་ཡང་རུང་བ་ཡིས། །ལུས་ནི་ཤིན་ཏུ་བསྲུང་བྱ་ཡི། །ནོར་ལ་སྲེད་པས་ཅི་

203-1-124a

ཞིག་བྱ། །འབྱོར་པ་ཡོད་ཀྱང་གཏོང་མེད་ན། །ཉེ་བར་འཚོ་བས་ཅི་ཞིག་བྱ། །ཀིཾ་ཤུ་ཀ་ཡི་འབྲས་བུ་ནི། །ཆགས་ཀྱང་ཁ་བས་ཅི་བྱར་ཡོད། །འདོད་པས་གདུངས་ལ་ཁྲེལ་མེད་ངོ་ཚ་མེད། །བཀྲེས་པས་གདུངས་ན་སྟོབས་མེད་མདངས་ཀྱང་མེད། །ནད་
ཀྱིས་གདུངས་ན་གཉིད་མེད་བདེ་བ་མེད། །ལམ་གྱིས་དུབ་ན་འཇིགས་དང་བརྩོན་པ་མེད། །གྲོགས་པོ་ནོར་ལ་བརྐམ་པ་སྤང་། །ཆུང་མ་ལོག་གཡེམ་ཆེ་བ་སྤང་། །རྒྱལ་པོ་ཆོས་མིན་སྤྱོད་པ་སྤང་། །བློན་པོ་རབ་གཏུམ་དབྱེན་སྨྲ་སྤང་། །ཡུལ་ངན་འཚོ་བ་ངན་པ་སྤང་། །བཤེས་
གཉེན་ངན་པ་སྤང་བར་བྱ། །བཀུར་དཀའ་གསོ་དཔྱད་མི་མཁས་པ། །དེ་ལྟ་བུ་ཡི་སྨན་པ་སྤང་། །ཕན་དང་མི་ཕན་དཔྱོད་པའི་བློ་མེད་ཅིང་། །ཐོས་དང་བསམ་དང་བསྒོམ་པ་རྣམ་སྤངས་ཏེ། །ལྟོ་བ་འགེངས་པ་ཙམ་ཞིག་གཙོར་འཛིན་པ། །སྐྱེས་བུ་དེ་བློ་ཕྱུགས་དང་ཁྱད་ཅི་ཡོད། །
ཆུ་ཡིས་བུམ་པ་ཕྱེད་བཀང་བ། །རབ་ཏུ་འབད་པས་བཟུང་བྱས་ཏེ། །སྤྱི་བོར་བདག་གིས་ཁུར་བ་བཞིན། །སྐྱེ་བོ་ངན་པ་བཀུར་ན་ཁྲོ། །རང་བཞིན་ངན་པའི་མི་རྣམས་དང་། །སྲང་གི་མཚན་ཉིད་ཤིན་ཏུ་མཚུངས། །ཅུང་ཟད་ཙམ་གྱིས་མཐོ་འགྱུར་ལ། །ཅུང་ཟད་ཙམ་གྱིས་
དམའ་བར་འགྱུར། །ཙན་དན་གླ་རྩི་ག་བུར་གྱིས་བྱུགས་ཀྱང་། །སྒོག་སྐྱའི་དྲི་ནི་རང་བཞིན་མི་འདོར་ལྟར། །ལེགས་པའི་གཞུང་ལུགས་བཟང་པོ་རབ་བསླབ་ཀྱང་། །རང་བཞིན་ངན་པའི་མཚན་ཉིད་འདོར་མི་སྲིད། །ཇི་ལྟར་རིགས་པས་བརྒྱན་གྱུར་ཀྱང་། །སྐྱེ་བོ་ངན་པ་
ཡོངས་སུ་སྤང་། །སྦྲུལ་གདུག་ནོར་བུས་བརྒྱན་གྱུར་ཀྱང་། །ཅི་སྟེ་འཇིགས་པ་མི་སྐྱེད་དམ། །ངན་པ་ཇི་ལྟར་ཉམ་ཆུང་བ། །དེ་སྲིད་བར་དུ་རང་བཞིན་བཟང་། །སྟོན་ཀ་ཡི་ནི་ཆུ་བོ་དག །སྐྱེས་བུ་ཀུན་གྱིས་རྒལ་བར་བླ། །ཡོན་ཏན་ཚུལ་སྤྱོད་རང་བཞིན་གསལ་བ་ཡིས། །
སྐྱེ་བོ་ངན་པ་བཅོས་སུ་ག་ལ་རུང་། །ཚ་ཞིང་དྲོད་ཆེ་རྩུབ་པས་བསྒྲུབས་པ་ཡི། །བད་ཀན་ནད་བཞིན་རབ་ཏུ་འཕེལ་བར་འགྱུར། །མི་སྲུན་སྐྱེ་བོ་མ་གུས་བྲན། །མ་དུལ་རྟ་དང་ཆུང་མ་ངན། །བརྡུངས་ན་མཉེན་པར་འགྱུར་བ་སྟེ། །འདི་དག་ལེགས་བྱའི་སྣོད་མ་ཡིན། །

203-1-124b

རྒྱ་མཚོར་ཆར་ཕབ་དོན་མེད་དོ། །འགྲངས་ལ་ཟས་བྱིན་དོན་མེད་དོ། །ཕྱུག་ལ་ནོར་བྱིན་དོན་མེད་དོ། །དམན་ལ་ལེགས་བྱས་དོན་མེད་དོ། །དམ་པའི་བུ་ཡི་གདོང་ལ་པདྨ་ཡོད། །སྨད་འཚོང་བུ་ཡི་གླང་ནས་དུག་ལོ་སྐྱེས། །ཇི་ལྟ་ཇི་ལྟར་ལོག་པར་སྤྱོད་པར་བྱེད། །དེ་ལྟ་དེ་ལྟར་གོ་འཕང་
འདའ་བར་འགྱུར། །སྤྲིན་གྱི་གྲིབ་མ་སྐྱེ་བོ་ངན་དང་མཛའ། །རྗེ་བོ་ངན་དང་བདག་པོ་དམན་ལ་བརྟེན། །ཟིལ་པའི་ཆུ་དང་རྩྭ་ལས་འབར་བའི་མེ། །དྲུག་པོ་དེ་དག་ཆུ་ཡི་ཆུ་བུར་མཚུངས། །ཤ་སྐམ་དང་ནི་བུད་མེད་རྒན། །ཆང་གསར་ཞོ་ནི་འཆག་མ་ཐག །ཉིན་ཕྱེད་གཉིད་དང་ནམ་
ཕྱེད་ཟས། །འདི་དྲུག་འཕྲལ་དུ་སྲོག་འཕྲོག་པའོ། །མར་གསར་འབྲས་ཆན་འོ་མར་བཅས། །ཤ་གསར་བུད་མེད་གཞོན་ནུ་དང་། །ཤིང་གི་གྲིབ་མ་ཆུ་དྲོན་ཁྲུས། །འདི་དྲུག་འཕྲལ་དུ་སྟོབས་སྐྱེད་དོ། །སྡུག་པ་དང་བྲལ་རང་མིས་བརྙས་པ་དང་། །བུ་ལོན་མང་ཞིང་ངན་པ་དག་
ལ་བརྟེན། །དབུལ་པོར་གྱུར་ནས་མཛའ་བོས་རིང་དུ་སྤངས། །འདི་ལྔ་མེ་མེད་པར་ནི་སྲེག་པའོ། །བོགས་མེད་ཆོང་དང་སྟོབས་ལྡན་དག་ལ་འཚེ། །སློང་ཞིང་འགྱིང་ལ་ནོར་མེད་འདོད་ལ་དགའ། །ན་ཆུང་སྡུག་ལ་ཚིག་རྩུབ་སྨྲ་བྱེད་པ། །འདི་ལྔ་ལོག་པར་སྤྱོད་པའི་སྐྱེས་བུའོ། །གང་
ཞིག་ཆོས་ནི་སྦྱིན་བྱེད་དང་། །མི་འཇིགས་སྦྱིན་དང་ཁ་ཟས་སྦྱིན། །ལུས་སྐྱེད་པ་དང་གདམས་ངག་སྦྱིན། །འདི་ལྔ་ཕན་འདོགས་བྱེད་པའོ། །རབ་ཏུ་བྱུང་ནས་སླར་ལོག་དང་། །བུད་མེད་ཁྱོ་གསུམ་མཐོང་བ་དང་། །ཅེ་སྤྱང་རྙི་ལས་ཤོར་བ་སྟེ། །འདི་གསུམ་གཡོན་ཅན་ཤེས་པར་བྱ། །
སྨན་པ་ཁ་ཟས་མ་ཞུ་དང་། །རྒྱལ་པོ་བརྫུན་དུ་སྨྲ་བ་དང་། །རིགས་ལྡན་སྡིག་པ་སྤྱོད་པ་སྟེ། །འདི་གསུམ་ཤིན་ཏུ་མི་རིགས་པའོ། །གཞན་ལས་ཚོལ་ཞིང་ཟས་ཞིམ་འདོད། །སློང་མོས་འཚེ་ཞིང་ཁེངས་པ་ཆེ། །བསྟན་བཅོས་མི་ཤེས་རྩོད་པར་འདོད། །འདི་གསུམ་འཇིག་རྟེན་
བཞད་གད་རྒྱུ། །རྒྱལ་པོ་སྨྲ་བ་ལན་ཅིག་དང་། །བུ་མོ་གཏོང་བ་ལན་ཅིག་དང་། །འཕགས་པ་མཐོང་བ་ལན་ཅིག་ཏེ། །འདི་གསུམ་འཇིག་རྟེན་ལན་རེ་བ། །དཀའ་ཐུབ་ལུས་ནི་འཚོ་བ་དང་། །མཛེས་མ་གཅིག་པུར་ཉལ་བ་དང་། །དཔའ་བོ་རྨ་མཚན་མེད་པ་སྟེ། །འདི་གསུམ་ཡིད་མི་

203-1-125a

ཆེས་པའི་རྒྱུ། །རྒྱལ་པོ་བྱི་གཡེམ་བྱེད་པ་དང་། །བྲམ་ཟེ་གཞན་ལ་འཚེ་བ་དང་། །དགེ་སློང་རྩེད་འཇོ་བྱེད་པ་སྟེ། །འདི་གསུམ་འཇིག་རྟེན་སྨད་པའི་གནས། །མཁས་པ་ང་རྒྱལ་མེད་པ་དང་། །དཔའ་བོ་ཉེ་བར་ཞི་བ་དང་། །ཕྱུག་པོ་གཏོང་བའི་སྒོ་ཕྱེ་བ། །འདི་གསུམ་འཇིག་རྟེན་
བསྟོད་པའི་གནས། །བརྩེར་ལྡན་ཕན་འདོགས་ངོམས་པ་མེད། །གདུག་ཅན་འཚེ་བས་ངོམས་པ་མེད། །བྱིས་པ་འདོད་པས་མི་ངོམས་ཏེ། །འདི་གསུམ་འཇིག་རྟེན་ངོམས་མེད་པའོ། །ནོར་ཕྱིར་ཡིད་མི་གདུངས་པ་དང་། །ཁྱིམ་ན་ཆུང་མ་ལོག་པར་སྤྱོད། །བསླུས་དང་བརྙས་པ་བྱས་པ་རྣམས། །བློ་
དང་ལྡན་པས་སྨྲ་མི་བྱ། །མཁའ་ལ་སྐར་མཁན་དག་གིས་རྩིས་བྱས་ན། །ཟླ་བ་དང་ནི་སྐར་མའི་ལམ་རྣམས་ཤེས། །ཁྱིམ་ན་ཆུང་མ་ལོག་གཡེམ་བྱེད་པ་དང་། །སྣ་ཚོགས་ངན་སྤྱོད་དེ་ནི་མཐོང་མ་གྱུར། །དེ་ཉིད་ཤེས་ན་སློབ་དཔོན་ཅི། །ནད་དང་བྲལ་ལ་སྨན་པ་ཅི། །ཆུ་བོ་རྒལ་ལ་གྲུ་པ་
ཅི། །ཆགས་བྲལ་མཛེས་མས་ཅི་ཞིག་བྱ། །ལྷ་དང་བྲམ་ཟེ་དམ་པ་དག །བདེན་པ་ཡིས་ནི་དགའ་བར་འགྱུར། །མཁས་པ་ཚིག་ཟབ་སྨྲ་བས་དགའ། །ཕལ་པ་ཟས་དང་སྐོམ་གྱིས་དགའ། །རི་བོ་ཀུན་ལ་རིན་ཆེན་མེད། །ནགས་ཚལ་ཀུན་ན་ཙན་དན་མེད། །ཉ་རྣམས་ཀུན་ལ་མུ་
ཏིག་མེད། །དམ་པ་ཀུན་ལ་ཡོད་མ་ཡིན། །ངང་པ་ཆུ་སྐྱར་ཚོགས་ནང་མཛེས་མ་ཡིན། །ཅང་ཤེས་བོང་བུའི་ཚོགས་ནང་མཛེས་མ་ཡིན། །སེང་གེ་ཝ་ཡི་ཚོགས་ནང་མཛེས་མ་ཡིན། །མཁས་པ་བླུན་པོའི་ཚོགས་ནང་མཛེས་མ་ཡིན། །ཁུ་བྱུག་ཚུལ་ནི་སྒྲ་སྙན་ཡིན། །མཁས་པའི་ཚུལ་
ནི་རིག་པ་ཡིན། །བུད་མེད་ཚུལ་ནི་ཁྲེལ་ཡོད་ཡིན། །དཀའ་ཐུབ་ཚུལ་ནི་བཟོད་པ་ཡིན། །མཐུ་ཆེན་བཅོས་སུ་མི་རུང་ལ། །བཟོད་པ་བྱར་ཡང་ཅི་ཞིག་ཡོད། །ཞི་བ་དུལ་བར་སྤྱོད་པ་ལ། །བཟོད་པ་བྱ་བ་ཅི་ཞིག་དགོས། །ཕན་མེད་གཉེན་ནི་གཞན་ཡིན་ཏེ། །ཕ་རོལ་ཡིན་ཡང་གང་ཕན་
གཉེན། །ལྷན་ཅིག་སྐྱེས་པའི་ནགས་སོགས་དང་། །གངས་ཅན་རི་བོའི་སྨན་བཞིན་ནོ། །མཐུ་ཆེ་བ་དང་འགྲོགས་གྱུར་ན། །མཐོན་པོ་ཉིད་དུ་སུ་མི་འགྱུར། །མེ་ཏོག་ཕྲེང་དང་འབྲེལ་བ་ཡིས། །སྲད་བུ་མགོ་ལ་འཆིང་བར་བྱེད། །རང་བཞིན་བདེན་པར་སྨྲ་བ་ལ། །སླུ་བྱེད་མཁས་པ་ཡིན་

203-1-125b

ནམ་ཅི། །པང་པར་བརྟེན་ཏེ་ཉལ་བའི་མི། །གསོད་པ་དེ་ཅི་དཔའ་བོའམ། །གཞོན་ནུའི་དུས་ན་ཕ་མའི་དབང་གྱུར་ཅིང་། །ལང་ཚོའི་དུས་ན་བུད་མེད་དབང་གྱུར་ཏེ། །རྒན་པོའི་དུས་ན་བུ་ཡི་དབང་གྱུར་པས། །བླུན་པོ་ནམ་ཡང་རང་དབང་ཡོད་མ་ཡིན། །ཇི་ལྟར་འདོད་ཆགས་མ་གྱུར་པ། །དེ་
སྲིད་ཡོན་ཏན་དེ་ཉིད་ཡིན། །འདོད་ཆེན་འདི་ལ་ཞུགས་གྱུར་ན། །ཡོན་ཏན་བཙུན་པར་ག་ལ་འགྱུར། །སྐྱེ་བོ་ཕལ་ཆེར་རང་གི་ནི། །ཚད་མས་གཞན་དག་འཇལ་བར་བྱེད། །དྲང་སྲོང་གིས་ནི་ཡི་དྭགས་མཐོང་། །འདི་ནི་དཀའ་ཐུབ་པ་ཞེས་ཟེར། །སྐྱེ་བོ་ངན་པས་སུན་ཕྱུང་ན། །དམ་པ་
ལ་ཡང་ཡིད་མི་ཆེས། །བྱིས་པ་འོ་མས་ཁ་ཚིག་ན། །ཞོ་ལའང་ཕུ་ཡིས་འདེབས་ཤིང་འཐུང་། །ཟོ་ཆུན་བཟོར་ནི་སྦྱར་གྱུར་ན། །བུད་མེད་ཀྱི་ཡང་དབང་དུ་འགྱུར། །དང་པོ་བརྩམས་པ་གང་ཡིན་པ། །དེ་ནི་ངོ་མཚར་ཆེ་བ་ཡིན། །གང་ཞིག་ཆེན་པོའི་སྤྱིར་བཀུར་བ། །དེ་ཉིད་དམན་པས་རྩྭ་སྙམ་
སེམས། །མཁས་པས་ཕྱག་བྱས་མཆོད་རྟེན་ནི། །ཁྭ་ཡིས་སྟན་དུ་བྱེད་པ་ཡིན། །ཀེ་ཏ་ཀ་ཡི་འབྲས་བུ་ནི། །ཆུ་རྣམས་དང་བར་བྱེད་མོད་ཀྱི། །དེ་ཡི་མིང་ཙམ་བརྗོད་པ་ཡིས། །ཆུ་རྡུལ་དང་བར་མི་བྱེད་དོ། །དམ་པ་དང་པོར་ཁས་འཆེ་མི་བྱེད་ལ། །གལ་ཏེ་དཀའ་བས་ཁས་ནི་བླངས་གྱུར་ན། །རྡོ་ལ་
རི་མོ་བྲིས་པ་ཇི་ལྟ་བར། །ཁས་བླངས་དེ་ནི་ངེས་པར་སྒྲུབ་པར་བྱེད། །དམན་པས་གང་ཚེ་ནོར་ནི་ཅུང་ཟད་རྙེད། །འགྲོ་བ་གཞན་ལ་བརྙས་པའི་ང་རྒྱལ་ལྡན། །དམ་པ་ནོར་གྱི་འབྱོར་པ་ཐོབ་གྱུར་ཀྱང་། །སཱ་ལུ་སྨིན་པ་བཞིན་དུ་ཤིན་ཏུ་འདུད། །ཤེས་རབ་དང་འདྲའི་མིག་མེད་དེ། །རྨོངས་པ་དང་མཉམ་
མུན་པ་མེད། །ནད་དང་འདྲ་བའི་དགྲ་མེད་དེ། །འཆི་བདག་དང་མཉམ་འཇིགས་པ་མེད། །དེ་བས་ཤིན་ཏུ་མི་བཟད་པའི། །འཆི་བ་ངེས་པར་འབྱུང་འགྱུར་གྱི། །འདོད་པ་རྣམས་ལ་སེམས་ཟློག་ལ། །དམ་པའི་ཆོས་ལ་དགའ་བར་གྱིས། །ཡོན་ཏན་ཅན་ལ་རིག་པ་ཡོན་ཏན་འགྱུར། །ཡོན་ཏན་
མེད་ལ་དེ་ཉིད་སྐྱོན་དུ་འགྱུར། །ཆུ་བོའི་ཆུ་ནི་ཤིན་ཏུ་དྲི་མེད་པའང་། །རྒྱ་མཚོར་ཕྱིན་ན་བཏུང་དུ་མི་རུང་འགྱུར། །བྱེ་བྲག་ཕྱེད་པའི་བློ་ལྡན་ཡང་། །བྱ་བ་གྲོས་ཀྱིས་བསྒྲུབ་པར་བྱ། །དེ་ལ་ཉེས་དམིགས་མི་འབྱུང་སྟེ། །བྱུང་ནའང་དེ་ཡི་སླར་སྤོང་བྱེད། །བརྟན་ཞིང་འཇམ་ལ་ཚིག་ཉུང་གང་ཡིན་པ། །

203-1-126a

དེ་ལ་མི་ཡིས་ཤིན་ཏུ་བག་བྱ་སྟེ། །ཉི་མ་སྤྲིན་སྟུག་མ་ནས་བྱུང་བ་ཡི། །འོད་ཟེར་ཤིན་ཏུ་ཚ་བར་འགྱུར་བ་བཞིན། །ན་ཚོད་གཞོན་ཡང་ཉེ་བར་ཞི་ལ་དགའ། །མཁས་པར་གྱུར་ཀྱང་ཤེས་པའི་ང་རྒྱལ་མེད། །གཟི་བརྗིད་ཆེ་ཡང་བཟོད་ཅིང་དེས་པ་ཡི། །དགྲ་ལས་རྒྱལ་བྱེད་དེ་ནི་རྙེད་པར་
དཀའ། །ཕྱུག་པོ་ཀླ་ཀློ་རྣམས་ལའང་ཡོད། །དཔའ་བོ་དུད་འགྲོ་རྣམས་ལའང་ཡོད། །སྣ་ཚོགས་དོན་ལྡན་གཏམ་སྨྲ་བའི། །དམ་པ་དག་ནི་ཤིན་ཏུ་དཀོན། །འབྱོར་པ་གཡོ་ཞིང་ལང་ཚོ་མྱུར་དུ་འཇིག །སྲོག་ནི་གཤིན་རྗེའི་སོ་ཡི་བར་ན་གནས། །འདིར་བདེ་དོན་གཉེར་ཕ་རོལ་ཡལ་བར་འདོད། །དེ་
ནི་གཡང་སའི་མཐར་གནས་ལོང་བ་བཞིན། །གང་ཞིག་ཉོན་མོངས་ནད་བཅས་པ། །དེ་སྨན་དམ་ཆོས་མི་བསྟེན་པར། །ཡུལ་ལ་བག་ཡངས་སྤྱོད་པ་ནི། །སྲིད་པའི་ལམ་ནས་འབྱུང་མི་འགྱུར། །གལ་ཏེ་འགྲོ་བ་འདི་དག་གིས། །འཆི་བདག་སྤྱི་བོར་གནས་མཐོང་ན། །ཟས་ཀྱང་ཡིད་དུ་མི་འོང་
ན། །བྱ་བ་གཞན་ལྟ་ཇི་ཞིག་སྨོས། །བྱ་བ་ཟིན་ནམ་མ་ཟིན་ཞེས། །འཆི་བདག་བསྟོད་པར་མི་འགྱུར་བས། །སང་གི་བྱ་བ་དེ་རིང་ཉི། །ཕྱི་དྲོའི་བྱ་བ་སྔ་དྲོའོ། །འཇིག་རྟེན་འཚོ་བ་བརྟན་མ་ཡིན། །ནོར་དང་ལོང་ཚོ་བརྟན་མ་ཡིན། །བུ་དང་ཆུང་མ་བརྟན་མིན་ཏེ། །ཆོས་དང་བདེན་དང་ཕན་པ་བརྟེན། །
རྒྱལ་པོ་ཡུན་རིང་གསོན་ན་རུང་། །དྲང་སྲོང་མྱུར་དུ་ཤི་ནའང་རུང་། །རྔོན་པ་ཤིའམ་གསོན་མི་རུང་། །དམ་པ་ཤིའམ་གསོན་ཡང་རུང་། །ཚིགས་སུ་བཅད་པ་བརྒྱ་པ་ཞེས་བྱ་བ། སློབ་དཔོན་ཆེན་པོ་མཆོག་སྲེད་ཀྱིས་མཛད་པ་རྫོགས་སོ།།      །།རྒྱ་གར་གྱི་མཁན་པོ་བི་ན་ཡ་ཙནྡྲ་དང་། བོད་ཀྱི ལོ་ཙཱ་བ་དགེ་སློང་
ཆོས་ཀྱི་ཤེས་རབ་ཀྱིས་བསྒྱུར་ཅིང་ཞུས་པའོ།།      ༄༅༅། །རྒྱ་གར་སྐད་དུ། བི་མ་ལ་{པྲཤྣོ་}ཏ་ཏ་ར་རཏྣ་མཱ་ལི་ནཱ་མ། བོད་སྐད་དུ། དྲི་མ་མེད་པའི་དྲིས་ལན་རིན་པོ་ཆེའི་ཕྲེང་བ་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དྲི་མེད་དྲིས་ལན་རིན་ཆེན་
ཕྲེང་བ་འདི། །གང་གི་མགུལ་ན་ངེས་པར་གནས་གྱུར་ན། །མཐོང་དང་མ་མཐོང་སྒྲུབ་པ་ལ་མཁས་པས། །ངེས་པར་རྒྱན་དུ་འགྱུར་བ་ཅིས་མ་ཡིན། །བཅོམ་ལྡན་བླང་བྱ་གང་ཞེ་ན། །བླ་མའི་དོན་ལྡན་ཚིག་རྣམས་སོ། །སྤང་བར་བྱ་བ་གང་ཞེ་ན། །བྱ་བ་མ་ཡིན་ཐམས་ཅད་དོ། །བླ་མར་

203-1-126b

གྱུར་པ་གང་ཞེ་ན། །དེ་ཉིད་ཇི་བཞིན་རྟོགས་པ་དང་། །རྟག་ཏུ་སེམས་ཅན་ཐམས་ཅད་ལ། །ཕན་པར་མངོན་པར་བརྩོན་པའོ། །མཁས་པས་རིང་བྱ་གང་ཞེ་ན། །འཁོར་བའི་རྒྱུ་ནི་ངེས་བཅད་པའོ། །ཐར་པའི་ས་བོན་ཞིང་མཆོག་གང་། །ཡང་དག་ཡེ་ཤེས་བརྩོན་བྱས་པའོ། །ཤིན་ཏུ་མཐུན་པ་གང་
ཞེ་ན། །ཆོས་ཀྱི་སྤྱོད་པ་སྐྱོན་མེད་པའོ། །འདི་ན་གཙང་བ་གང་ཞེ་ན། །གང་གི་ཡིད་ནི་ཡོངས་དག་པའོ། །མཁས་པར་གྱུར་པ་གང་ཞེ་ན། །བྱེ་བྲག་ཇི་བཞིན་ཕྱེད་པའོ། །གདུག་པའི་དོན་ནི་གང་ཞེ་ན། །བླ་མ་བརྙས་བྱེད་གང་ཡིན་པའོ། །འཁོར་བ་ན་ནི་སྙིང་པོ་གང་། །ཡང་དག་དོན་ལ་རྣམ་
དཔྱོད་ཉིད། །མི་ཡི་དེ་ཉིད་ཐོབ་པ་གང་། །བདག་གཞན་ཕན་པར་བརྩོན་པའོ། །ར་རོ་ལྟ་བུའི་རྨོངས་པ་གང་། །ཕྱིན་ཅི་ལོག་ལ་ཆགས་པའོ། །མི་སྲུན་དགྲ་འདྲ་གང་ཞེ་ན། །མི་བཟད་པ་ཡི་ཡུལ་རྣམས་སོ། །འཁོར་བའི་འཁྲི་ཤིང་གང་ཞེ་ན། །ལོག་པར་སྲེད་པ་དམ་པའོ། །དགྲ་
བོར་གྱུར་པ་གང་ཞེ་ན། །ཡང་དག་དོན་ལ་བརྩོན་མེད་པའོ། །འདི་ལ་འཇིགས་པ་གང་ཞེ་ན། །སྲོག་མཐར་གྱུར་པའི་འཆི་བའོ། །ལོང་བ་ལས་ཀྱང་ལོང་བ་གང་། །ཕུང་ཁྲོལ་འདོད་ཆགས་ཅན་རྣམས་སོ། །སྐྱེས་བུ་དཔའ་བོ་གང་ཞེ་ན། །གང་ཞིག་བུད་མེད་མཛེས་མ་ལ། །ཆགས་པའི་མིག་གི་མདའ་
ཡིས་ནི། །ཡིད་ལ་ཕོག་པར་མ་གྱུར་པའོ། །རྣར་སྙན་བདུད་རྩི་ལྟ་བུ་གང་། །ཡང་དག་དོན་གྱི་མན་ངག་གོ། །འདི་ན་ལྕི་བའི་རྩ་བ་གང་། །གང་འདི་བླུན་པར་གྱུར་པའོ། །ཚང་ཚིང་མི་བཟད་གང་ཞེ་ན། །བུད་མེད་རྣམས་ཀྱི་སྤྱོད་པའོ། །ཤིན་ཏུ་སྒྲིན་པ་གང་ཞེ་ན། །གང་གིས་དེས་དྲལ་མ་གྱུར་པའོ། །
འདི་ན་དབུལ་པོ་གང་ཞེ་ན། །གང་ཞིག་ཆོག་ཤེས་མེད་པའོ། །ཤིན་ཏུ་ཡངས་པ་གང་ཞེ་ན། །གཞན་ལྟོས་སློང་མོ་པ་རྣམས་སོ། །དོན་ཡོད་འཚོ་བ་གང་ཞེ་ན། །ཁ་ན་མ་ཐོ་མེད་པའོ། །སྐྱེས་བུ་གླེན་པ་གང་ཞེ་ན། །མཁས་བྱའི་ཡུལ་ལ་མི་སློབ་པའོ། །གཉིད་ཀྱིས་མ་ལོག་གང་ཞེ་ན། །མ་རྨོངས་
དོན་གྱི་བྱེ་བྲག་ཤེས། །གཉིད་ཀྱིས་ལོག་པ་གང་ཞེ་ན། །སྐྱེས་བུ་ཤིན་ཏུ་རྨོངས་པའོ། །པདྨའི་འདབ་ཆགས་ཆུ་ཐིགས་ལྟར། །མི་བརྟན་མྱུར་འཇིག་གང་ཞེ་ན། །སྐྱེས་བུ་རྣམས་ཀྱི་ལང་ཚོ་དང་། །ནོར་དང་དེ་བཞིན་ཚེ་ཉིད་དོ། །ཟླ་ཚེས་ལྟ་བུའི་ཡིད་འོང་གང་། །སྐྱེ་བོ་དམ་པ་ཕན་འདོད་པའོ། །

203-1-127a

དམྱལ་དང་འདྲ་བ་གང་ཞེ་ན། །གཞན་གྱི་དབང་དུ་གྱུར་པའོ། །ཤིན་ཏུ་བདེ་བ་གང་ཞེ་ན། །འདུ་འཛི་ཀུན་ལ་མ་ཆགས་པའོ། །སྲོག་ཆགས་རྣམས་ནི་དགའ་བྱ་གང་། །དོན་ཡོད་འཚོ་བའི་སྲོག་ཉིད་དོ། །ལེགས་པར་བྱིན་པ་གང་ཞེ་ན། །ལན་ལ་རེ་བ་མེད་པའོ། །མཛའ་བཤེས་ཡིད་
འོང་གང་ཞེ་ན། །གང་ཞིག་སྡིག་ལས་ཟློག་བྱེད་པའོ། །མཛེས་པའི་རྒྱན་ནི་གང་ཞེ་ན། །གང་ཞིག་ཚུལ་ཁྲིམས་ཕུན་ཚོགས་པའོ། །ཚིག་གི་རྒྱན་གྱུར་གང་ཞེ་ན། །གཞན་ལ་མི་སླུ་བདེན་པའི་ངག །ཕུང་ཁྲོལ་འབྲས་འབྱིན་གང་ཞེ་ན། །ཡིད་ནི་ཀུན་དུ་མ་བསྡམས་པའོ། །བདེ་བ་འཐོབ་བྱེད་གང་ཞེ་ན། །ཀུན་
ལ་བྱམས་ཤིང་ཕན་བྱེད་པའོ། །ཕོངས་པ་ཀུན་འཇིག་མཁས་པ་གང་། །ཐམས་ཅད་དུ་ནི་སྐལ་ལྡན་པའོ། །སྐྱེས་བུ་དམུས་ལོང་གང་ཞེ་ན། །བྱ་བ་མ་ཡིན་ལ་དགའ་བའོ། །འོན་པར་གྱུར་པ་གང་ཞེ་ན། །ཕན་དང་མི་ཕན་མི་ཉན་པའོ། །ལྕེ་མེད་ལྐུགས་པ་གང་ཞེ་ན། །གང་ཞིག་སྙན་སྨྲ་མི་ཤེས་པའོ། །
སྐྱེས་བུ་འཆི་བ་གང་ཞེ་ན། །གླེན་ཞིང་གཏི་མུག་ཅན་ཉིད་དོ། །རིན་ཆེན་གྱུར་པ་གང་ཞེ་ན། །གང་ཞིག་དུས་སུ་བྱིན་པའོ། །མི་ཡི་ཟུག་རྔུར་གྱུར་པ་གང་། །དབེན་པར་བྱ་མིན་བྱས་པའོ། །གང་ལ་འབད་བྱ་གང་ཞེ་ན། །རིག་པ་ལེགས་པར་སློབ་པ་དང་། །སྨན་ཆེན་ཚུལ་བཞིན་བསྟེན་པ་དང་། །སྦྱིན་པ་ཀུན་དུ་
གཏོང་བའོ། །ལྟོས་མེད་བྱ་བ་གང་ཞེ་ན། །འགྲོ་བ་མི་སྲུན་འདུལ་མིན་དང་། །ཆགས་གྱུར་གཞན་གྱི་བུད་མེད་དང་། །འབྲེལ་མེད་གཞན་གྱི་ནོར་རྣམས་ལའོ། །གང་ཞིག་ཉིན་དང་མཚན་རྣམས་སུ། །བསམ་པར་བྱ་བ་གང་ཞེ་ན། །འཁོར་བ་སྙིང་པོ་མེད་ཉིད་ལ། །བག་མེད་པར་ནི་མི་བྱའོ། །ཡིད་
དུ་འོང་བ་གང་ཞེ་ན། །གཡོ་མེད་ཀུན་དུ་སྙིང་རྗེར་ལྡན། །སྦྱིན་པར་བྱ་བ་གང་ཞེ་ན། །བྱམས་པའི་སེམས་དང་ཡང་དག་ལྡན། །ལྐོག་མར་སྲོག་ཕྱིན་གྱུར་ཀྱང་ནི། །བདག་དང་མི་འབྲལ་གང་ཞེ་ན། །གླེན་པ་སྐྱོན་ནི་ལྡན་པ་དང་། །ཀུན་གནོད་བྱས་པ་མི་གཟོ་བའོ། །མཆོད་པར་བྱ་བ་གང་ཞེ་ན། །
ལེགས་པ་རྣམས་ལ་འཛུད་པའོ། །ཐ་ཤལ་དུ་ནི་ཤེས་བྱ་གང་། །རྩོམ་པ་ཀུན་ལ་མི་བརྟན་པའོ། །འགྲོ་བ་ཀུན་ལ་ཐམས་ཅད་ལས། །ངེས་པར་རྒྱལ་བ་གང་ཞེ་ན། །སྐྱེས་བུ་བདེན་པར་སྨྲ་བ་དང་། །བཟོད་པ་ཡང་དག་ལྡན་པའོ། །ལྷས་ཀྱང་གུས་པས་ཕྱག་བྱ་གང་། །སྙིང་རྗེ་གཙོ་བོར་བྱེད་པའོ། །

203-1-127b

གང་ལ་སྐྱོ་བར་བྱ་ཞེ་ན། །མཁས་པས་འཁོར་བའི་འབྲོག་དགོན་ལས། །སྲོག་ཆགས་རྣམས་ཀྱི་ཚོགས་དག་ནི། །གང་གི་དབང་དུ་འགྱུར་ཞེ་ན། །གང་ཞིག་ཕན་དང་སྙན་སྨྲ་དང་། །དུལ་བར་སྤྱོད་པ་རྣམས་ཀྱིས་སོ། །སྐྱེས་བུ་ལེགས་པར་འདོད་པ་ཡིས། །གང་ལ་གནས་པར་བྱ་ཞེ་ན། །མཐོང་
དང་མ་མཐོང་བྱ་བའི་ཕྱིར། །བདེན་པའི་ལམ་ལ་ངེས་གནས་བྱ། །མྱ་ངན་འགྱུར་བ་གང་ཞེ་ན། །འབྱོར་པ་བཞིན་དུ་ཞེན་པའོ། །གློག་ལྟར་མི་བརྟན་གང་ཞེ་ན། །སྐྱེས་བུ་དམ་པ་ཕྲད་བསྟེན་པའོ། །བསྔགས་པར་བྱ་བ་གང་ཞེ་ན། །གང་ཞིག་བློ་གྲོས་ཆེ་བ་དང་། །ཤིན་ཏུ་ཉམ་ཆུང་སྟོབས་མེད་
ལ། །ནུས་དང་ལྡན་ཞིང་བཟོད་བྱེད་པའོ། །རིགས་ཀྱི་རི་ལྟར་མི་གཡོ་གང་། །རྩོད་དུས་སྐྱེས་བུ་དམ་པའོ། །འདི་ན་སྐྱེས་བུས་རྙེད་དཀའ་བའི། །བཟང་པོ་བཞི་ནི་གང་ཞེ་ན། །སྦྱིན་པ་སྙན་སྨྲར་བཅས་པ་དང་། །ཤེས་པ་ཁེངས་པ་མེད་ལྡན་དང་། །བཟོད་པ་བརྩོན་འགྲུས་བཅས་པ་དང་། །
སེམས་ནི་རྣལ་འབྱོར་ལྡན་པའོ། །དྲི་མེད་དྲིས་ལན་རིན་ཆེན་ཕྲེང་བ་ནི། །གང་གི་མགུལ་ན་ལེགས་པར་ཡོད་གྱུར་ན། །དེ་ནི་སྐྱེས་བུ་མཁས་པ་འདུས་ནང་དུ། །མགུལ་གྱི་མུ་ཏིག་རྒྱན་བཞིན་མཛེས་པ་ཡིན། །བརྟགས་ནས་རྒྱལ་སྲིད་རྣམ་སྤོང་བའི། །རྒྱལ་པོ་རིན་ཆེན་ཕྲེང་བ་འདི། །དོན་
ཡོད་འཆར་གྱིས་བྱས་པ་སྟེ། །བློ་བཟད་དམ་པའི་རྒྱན་ཡིན་ནོ། །དྲི་མ་མེད་པའི་དྲིས་ལན་རིན་པོ་ཆེའི་ཕྲེང་བ་ཞེས་བྱ་བ། རྒྱལ་པོ་ཆེན་པོ་སྙན་ངག་མཁན་གྱི་དམ་པ་སློབ་དཔོན་དོན་ཡོད་འཆར་གྱིས་མཛད་པ་རྫོགས་སོ།།      །།རྒྱ་གར་གྱི་མཁན་པོ་ཀ་མ་ལ་གུཔྟ་དང་། ཞུ་ཆེན་གྱི་ལོ་ཙཱ་བ་
དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ།།      ༄༅༅། །རྒྱ་གར་སྐད་དུ། ཙ་ན་ཀ་རཱ་ཛཱ་ནཱ་ཏི་ཤཱསྟྲ། བོད་སྐད་དུ། ཙ་ན་ཀའི་རྒྱལ་པོའི་ལུགས་ཀྱི་བསྟན་བཅོས། དཀོན་མཆོག་གསུམ་ལ་ཕྱག་འཚལ་ལོ། །འཇིག་རྟེན་གསུམ་གྱི་བདག་པོ་གཙོ། །ཐམས་
ཅད་མཁྱེན་ལ་ཕྱག་འཚལ་ཏེ། །གང་ཞིག་ལེགས་པར་རྟོགས་པ་ཡིས། །མི་རྣམས་ཀྱི་ནི་དོན་བྱེད་དང་། །རྒྱལ་པོའི་ལུགས་ཀྱི་བསྟན་བཅོས་ནི། །སྣ་ཚོགས་ལས་བཏུས་བཤད་པར་བྱ། །བསྟན་བཅོས་འདི་ནི་བསླབས་གྱུར་ན། །ཆོས་བཤད་རིན་ཆེན་རྣམ་གྲགས་པའི། །བྱ་དང་མི་བྱ་དགེ་མི་

203-1-128a

དགེ། །ཡང་དག་ཉིད་དུ་ཤེས་པར་འགྱུར། །ཀུན་དུ་གྲགས་པ་ཐོབ་འགྱུར་ཞིང་། །ཕོངས་པ་རྣམས་དང་མི་ཕྲད་དོ། །ཕྱེ་ན་དོན་ཆུང་ཕྲ་མ་དང་། །གཞན་གྱི་ཉེས་པ་སྒྲོགས་པ་དང་། །གཞན་དང་འཐོབ་པར་བྱེད་པ་ནི། །རིང་དུ་ཡོངས་སུ་སྤང་བར་བྱ། །ཆོས་རྣམས་ཐམས་
ཅད་མཉན་བྱ་ཞིང་། །ཐོས་པ་ཉིད་ཀྱང་གཟུང་བར་བྱ། །བདག་ཉིད་གང་ལ་མི་དགའ་བ། །གཞན་ལ་ཀུན་དུ་མི་སྤྱད་དོ། །རྩོད་པ་སྨྲ་བ་ཕྲ་མ་དང་། །བལྟ་མིན་ལྟ་བར་བྱེད་པ་དང་། །མཛའ་དང་ལྷན་ཅིག་ཁོན་གཅུགས་དང་། །དགྲ་དང་ཀུན་དུ་མཛའ་བ་སྤང་། །དམ་པ་དག་དང་འགྲོགས་པ་དང་། །མཁས་
དང་ལྷན་ཅིག་སྨྲ་བ་དང་། །བརྐམ་ཆགས་མེད་དང་མཛའ་བ་དག །བྱེད་ན་སྐྱོ་བར་མི་འགྱུར་རོ། །བྱ་དང་བྱེད་པ་ལ་བརྟེན་ཏེ། །དུས་སུ་དགྲ་དང་མཛའ་བ་དང་། །དུས་སུ་མཛའ་དང་འཐབ་པ་ཡིས། །མཁས་པས་དུས་ནི་འདའ་བར་བྱ། །གང་ཞིག་ཤེས་པ་ཙམ་གྱིས་ནི། །ཐམས་ཅད་རྟོགས་པ་
ཉིད་འགྱུར་བའི། །ཙ་ན་ཀ་ལས་ཇི་སྐད་བཤད། །རྩ་བའི་དོན་ནི་རབ་བཤད་བྱ། །གཞན་དང་རྩོད་དང་གཞན་ནོར་དང་། །གཞན་གྱི་བཞད་གད་གཞན་བུད་མེད། །གཞན་གྱི་ཁྱིམ་དུ་གནས་པ་དག །ནམ་ཡང་བྱ་བ་མ་ཡིན་ནོ། །ཕན་བྱེད་གཞན་ཡིན་ན་ཡང་གཉེན། །གཉེན་ཡང་ཕན་མེད་གཞན་ཡིན་ཏེ། །
ཕན་བྱེད་དགོན་པའི་སྨན་དང་ནི། །ཕན་མེད་ལུས་སྐྱེས་ནད་དང་མཚུངས། །གང་ཞིག་ཕན་ལ་སྦྱོར་དེ་གཉེན། །གང་ཞིག་གསོ་བ་དེ་ཕ་ཡིན། །གང་ཞིག་བསྒོ་བ་ཉན་དེ་བྲན། །གང་ཞིག་སྐྱེ་བ་དེ་ས་བོན། །གང་ཞིག་ཡིད་འོང་དེ་ཆུང་མ། །གང་ཞིག་བདེ་སྐྱིད་དེ་བུ་ཡིན། །གང་ཞིག་ཡིད་ཆེས་དེ་མཛའ་
བོ། །གང་དུ་འཚོ་བ་དེ་ཡུལ་ཡིན། །ཁྱིམ་ཚགས་མཁས་གང་དེ་ཆུང་མ། །གང་ཞིག་སྙན་སྨྲ་དེ་ཆུང་མ། །ཁྱིམ་ཐོབ་སྲོག་གཅིག་དེ་ཆུང་མ། །ཁྱིམ་ལས་མི་འཕྱོ་དེ་ཆུང་མ། །རྟག་ཏུ་ཁྲུས་བྱེད་ལུས་དྲིས་བསྒོས། །ཅུང་ཟད་ཟ་ལ་ཉུང་དུ་སྨྲ། །ཀུན་ལ་རྟག་ཏུ་དེས་པ་ནི། །ལྷ་མོ་དེ་ཡིན་མི་མོ་མིན། །
རྟག་ཏུ་བཀྲ་ཤིས་དང་ལྡན་ཞིང་། །རྟག་ཏུ་ཆོས་ལ་དགའ་བ་དང་། །རྟག་ཏུ་ཁྱོ་ལ་གུས་བྱེད་ཅིང་། །རྟག་ཏུ་བཞིན་ནི་འཛུམ་པ་དང་། །རྟག་ཏུ་སྙན་པར་སྨྲ་བ་དང་། །རྟག་པར་དུས་ཚིགས་འདོད་སྤྱོད་ཡིན། །རྟག་ཏུ་ཕན་པར་བྱེད་པ་དང་། །རྟག་ཏུ་ཕན་པའི་ཟས་ཟ་བའི། །བྱ་བ་དེ་དག་ཀུན་གྱིས་ནི། །

203-1-128b

སྐལ་བ་བཟང་པོ་རྣམ་པར་འཕེལ། །གང་ལ་འདི་འདྲའི་ཆུང་མ་ཡོད། །དེ་ནི་ལྷ་མོ་མི་མོ་མིན། །ཆུང་མ་གང་ཞིག་ཚིག་མི་སྙན། །དྲི་མ་མང་ཞིང་རྩོད་ལ་དགའ། །ཚིག་ལན་ཡང་ནས་ཡང་དུ་སྨྲ། །དེ་རྒས་རྒས་པ་རྒས་མ་ཡིན། །ཆུང་མ་གང་ཞིག་མིག་མི་སྡུག །གཞན་ཁྱིམ་འགྲོ་བར་
མངོན་པར་དགའ། །ངོ་ཚ་དང་བྲལ་རང་བཞིན་ངན། །དེ་རྒས་རྒས་པ་རྒས་མ་ཡིན། །གང་ཞིག་ཆུང་མ་སྒྲིན་ཞིང་གཙང་། །ཟས་ཞིམ་མཐོང་ན་སྡུག་པ་དང་། །བདག་ཉིད་སྦས་ཤིང་ཁྱོ་ལ་གུས། །དེ་ཉིད་ལྷ་མོའི་གཟུགས་སུ་བཤད། །ཆུང་མ་གང་ཞིག་ཡོན་ཏན་ཤེས། །ཁྱོ་ཡི་
རྗེས་སུ་འཇུག་བྱེད་ཅིང་། །ཉུང་ངུ་ཉུང་ངུས་ཆོག་ཤེས་པ། །དེ་དཔལ་དཔལ་ན་དཔལ་མོ་ཡིན། །མཛའ་བོ་གཡོན་ཅན་ཆུང་མ་ངན། །བྲན་གཡོག་ནང་ནས་འཁུ་བྱེད་པ། །དེ་ནི་ཁྱིམ་གནས་སྦྲུལ་དང་ནི། །འཆི་བདག་ཡིན་པར་ཐེ་ཚོམ་མེད། །ཁྱིམ་དུ་སྦྲུལ་མཐོང་མི་སྣང་གྱུར་པ་དང་། །
ནད་པ་གསོ་བ་བྱས་ནས་ལུས་མ་བརྟས། །དགྲ་བོ་ལག་ཏུ་ཆུད་ནས་ཤོར་བ་དང་། །ཁོང་པའི་ནང་ནས་ཟུག་རྔུ་ཡིད་ཅེས་བརྟན། །ཙ་ན་ཀའི་རྒྱལ་པོའི་ལུགས་ཀྱི་བསྟན་བཅོས་ལས་ལེའུ་དང་པོའོ།།      །།ཕོངས་པའི་དོན་དུ་ནོར་བསྲུངས་ཏེ། །ནོར་གྱིས་ཀྱང་ནི་ཆུང་མ་བསྲུངས། །
ནོར་དང་ཆུང་མ་དག་གིས་ཀྱང་། །བདག་ཉིད་ཀུན་དུ་བསྲུང་བར་བྱ། །ཁྱིམ་གྱི་དོན་དུ་གཅིག་བཏང་སྟེ། །གྲོང་ཁྱེར་ཕྱིར་ནི་ཁྱིམ་བཏང་ངོ་། །ལྗོངས་ཀྱི་ཕྱིར་ནི་གྲོང་ཁྱེར་ཏེ། །བདག་གི་དོན་དུ་ས་རྣམས་བཏང་། །དམྱལ་བར་གནས་པ་མཆོག་ཡིན་གྱི། །དབུལ་པོའི་ཁྱིམ་གནས་
དེ་ལྟ་མིན། །དམྱལ་བར་སྡིག་པ་ཟད་འགྱུར་གྱི། །ཁྱིམ་ནང་དུ་ནི་འཕེལ་བར་འགྱུར། །མཁས་པས་རྐང་པ་གཅིག་བཏེག་ན། །རྐང་པ་གཅིག་ནི་གཟུགས་པར་བྱ། །གནས་གཞན་ལེགས་པར་མ་བརྟགས་པར། །སྔ་མའི་གནས་ནི་དོར་མི་བྱ། །ཡུལ་ནི་འཚོ་བ་མེད་པ་དང་། །འཚོ་
ཡང་འཚེ་བ་ཡོད་པ་དོར། །རྒྱལ་པོ་བཀྲེན་པ་སྤང་བྱ་ཞིང་། །མཛའ་བོ་གཡོན་ཅན་སྤང་བར་བྱ། །སེར་སྣ་ཅན་གྱི་ལག་ནས་ནོར་ཅི་རུང་། །གཡོན་ཅན་ཕྲག་དོག་ཅན་གྱི་བཤེས་ཅི་རུང་། །ཡོན་ཏན་ཕ་རོལ་གནོད་བྱེད་ཤེས་ཅི་རུང་། །ཕོངས་དུས་རྒྱབ་ཕྱོགས་མཛའ་བོ་དེས་ཅི་རུང་། །

203-1-129a

སྤྱད་དུ་མེད་པའི་ལོངས་སྤྱོད་དེས་ཅི་རུང་། །འབངས་རྣམས་མི་སྐྱོང་རྒྱལ་པོ་དེས་ཅི་རུང་། །རང་གཞན་མི་ཕན་རིག་པ་དེས་ཅི་རུང་། །ནད་ལ་མི་ཕན་སྨན་པ་དེས་ཅི་རུང་། །སྔོན་ཆད་མ་མཐོང་གྲོགས་མང་ཡོད་མིན་གྱིས། །འབྱོར་གནས་གྱུར་ན་ཀུན་ཀྱང་
མཛའ་བོར་འགྱུར། །ནོར་དར་བྲལ་ཞིང་གནས་ལས་ཉམས་གྱུར་པའི། །དུས་སུ་རང་གི་མི་ཡང་དགྲ་བོར་འགྱུར། །གཡུལ་དུ་དཔའ་བོ་དབེན་གཙང་སྦྲ། །འབྱོར་པ་ཟད་ཚེ་ཆུང་མ་དང་། །མུ་གེ་གློ་བུར་མགྲོན་དགའ་དང་། །ཕོངས་ཚེ་མཛའ་བོར་ཤེས་པར་བྱ། །ཤིང་ནི་
འབྲས་བུ་ལྷགས་ན་བྱ་རྣམས་སྤོང་། །མཚོ་སྐམས་གྱུར་ན་བཞད་ནི་སྤོང་བར་བྱེད། །ནོར་མེད་སྐྱེས་བུ་བུད་མེད་སྤོང་བར་བྱེད། །རྒྱལ་སྲིད་ཉམས་ན་བློན་པོས་སྤོང་བར་བྱེད། །སྦྲང་མ་མེ་ཏོག་རྙིང་པ་སྤོང་བྱེད་ཅིང་། །ནགས་ཚིག་གྱུར་པ་རི་དྭགས་སྤོང་བྱེད་དེ། །སྐྱེ་བོ་ཐམས་ཅད་
བྱས་ལ་རག་ལས་པས། །རྗེས་སུ་འཇུག་ན་སུ་ཡིས་མཛའ་བོ་གང་། །བརྐམ་ཆགས་ཅན་ནི་ནོར་གྱིས་བསྡུ། །ཁེངས་པ་ཐལ་མོ་སྦྱོར་བ་ཡིས། །བླུན་པོ་རྗེས་མཐུན་མགུ་བ་སྟེ། །མཁས་པ་བདེན་པས་མགུ་བར་བྱ། །ལྷ་དང་བྲམ་ཟེ་སྐྱེས་བུ་མཆོག །བདེན་པ་ཉིད་ཀྱིས་མགུ་བར་
འགྱུར། །ཐ་མལ་པས་ནི་ཟས་སྐོམ་གྱིས། །ཚིག་རན་སྦྱིན་པས་མཁས་པ་དགའ། །དམ་པ་རྣམས་ལ་བཏུད་པ་ཡིས། །དཔའ་བོ་ལ་ནི་དབྱེ་བ་སྦྱར། །དམན་ལ་ཅུང་ཟད་སྦྱིན་པ་སྟེ། །མཉམ་ལ་ཕ་རོལ་གནོད་པ་སྦྱར། །གང་གི་བསམ་པ་གང་ཡིན་པ། །དེ་ལ་དེ་དང་མཐུན་པར་ནི། །བློ་དང་
ལྡན་པས་རྗེས་ཞུགས་ལ། །མྱུར་དུ་རང་གི་དབང་དུ་བྱེ། །ཆུ་བོ་དང་ནི་སྡེར་མོ་ཅན། །རྭ་ཅན་ལག་ན་མཚོན་ཐོགས་དང་། །བུད་མེད་རྒྱལ་པོའི་ཕོ་བྲང་ལ། །ཡིད་བརྟན་པར་ནི་མི་བྱའོ། །ནོར་བརླག་ཡིད་ནི་གདུང་བ་དང་། །ཁྱིམ་ན་ཉེས་པ་སྤྱོད་པ་དང་། །བསླུས་དང་བརྙས་ཐབས་སྤྱོད་པ་
དག །བློ་དང་ལྡན་པས་སྤང་བར་བྱ། །ཉེས་བྲལ་གང་གི་རིགས་ལ་ཡོད། །ནད་ཀྱིས་མ་གཟིར་སུ་ཞིག་ཡོད། །ཕོངས་པ་གང་གིས་མཐོང་མ་གྱུར། །འབྱོར་པ་རྟག་པ་སུ་ལ་ཡོད། །ས་སྟོང་ནོར་རྙེད་སུ་མི་དྲེགས། །དྲེགས་དང་བྲལ་བུ་སུ་ཞིག་ཡིན། །སུ་ཞིག་བུད་མེད་ཀྱིས་མ་སྨས། །རྒྱལ་

203-1-129b

པོ་རྟག་ཏུ་ཡིད་འོང་སུ། །གཤིན་རྗེའི་ཡུལ་དུ་མ་གྱུར་གང་། །སློང་བར་གྱུར་ན་སུ་ཞིག་བཙུན། །སྐྱེས་ངན་ཆུས་སུ་སུས་མ་ཆུད། །སྐྱེས་བུ་བདེ་བས་མཐར་བྱིན་སུ། །མཛའ་བོ་རང་མི་གཉེན་འདུན་གྱི། །བློ་ནི་བདག་ཉིད་གང་ཡིན་པའི། །ཕོངས་པའི་བརྡར་ནི་རྟོགས་གྱུར་ནས། །མི་ཡིས་ངེས་
པར་ཤེས་པར་འགྱུར། །ལས་གང་གྲུབ་པར་གྱུར་ན་ཡང་། །ཕུན་ཚོགས་ཆེན་པོར་མི་འགྱུར་ལ། །ཕོངས་ཚེ་སྡུག་བསྔལ་ཆེར་འགྱུར་ལ། །དེ་ལ་མཁས་པ་ཇི་ལྟར་སྤྱོད། །ཡུལ་གང་དུ་ནི་མི་བཀུར་ཞིང་། །མི་འཚོ་ཉེ་དུའང་མེད་པ་དང་། །རིག་པ་འགའ་ཡང་མི་རྙེད་ན། །དེ་བཞིར་གནས་པར་མི་
བྱའོ། །ནད་དང་འཕོངས་པར་གྱུར་པ་དང་། །མུ་གེ་འཚེ་དང་དགྲ་དང་འཐབ། །རྒྱལ་པོའི་སྒོའམ་དུར་ཁྲོད་དུ། །གང་ཞིག་ཕན་འདོགས་དེ་གཉེན་ཡིན། །ནོར་གང་རྒྱལ་པོ་དག་དང་ནི། །རྐུན་པོའི་འཇིགས་པ་མི་འབྱུང་ཞིང་། །གང་ཞིག་ཤི་ནའང་མི་འདོར་བའི། །ནོར་དེ་ལེགས་པར་
བསགས་པར་བྱ། །གང་ཞིག་སྲོག་འཆད་ངལ་བས་བསགས། །ཤི་ན་སྐལ་བ་མི་མཉམ་འགྱུར། །ནོར་ལ་ཆགས་ཤིང་ཉེས་སྤྱོད་བྱས་གྱུར་པ། །དེ་ཉིད་ལྷ་ཡིས་ཉེར་བཅོམ་སྨད་བྱ་ཡིན། །རྫས་གང་བསགས་ཤིང་སྦས་གྱུར་ལ། །ཡང་དང་ཡང་དུ་རེག་གྱུར་པ། །འཇུངས་པའི་ནོར་ནི་བྱེ་བའི་
ལྟར། །སྡུག་བསྔལ་སྐྱེད་པ་ཁོ་ནར་ཟད། །གཅེར་བུ་ཕོངས་ཤིང་ལུས་དུབ་ལ། །ལག་པ་ན་ནི་ཐོད་པ་ཐོགས། །འཇིག་རྟེན་ན་ནི་སྣང་གྱུར་པ། །སྦྱིན་མེད་འབྲས་བུ་འདི་འདྲ་བའོ། །བྲན་ནི་མངག་གཞུག་བྱས་ཚེ་དང་། །ཉེ་དུ་ཕོངས་པར་གྱུར་པ་དང་། །མཛའ་བོ་ཉམ་ཐག་དུས་ན་ནི། །
ཆུང་མ་ཁ་ཟས་མེད་ཚེ་རྟོགས། །བུད་མེད་ཁ་ཟས་ཉིས་འགྱུར་ཏེ། །ངོ་ཚ་དག་ནི་བཞི་འགྱུར་ཡིན། །རྩོལ་བ་དག་ནི་དྲུག་འགྱུར་ཏེ། །འདོད་པ་བརྒྱད་འགྱུར་ཡིན་པར་བཤད། །ཤིང་རྣམས་ཀྱིས་ནི་མེ་དང་ནི། །ཆར་པས་རྒྱ་མཚོ་ཆེན་པོ་དང་། །འབྱུང་པོ་ཀུན་གྱིས་གཤིན་རྗེ་དང་། །སྐྱེས་
པས་བུད་མེད་ངོམས་མི་འགྱུར། །ཟས་ཞིམ་ཟ་བར་བྱེད་པ་དང་། །མཛའ་བོ་སྙན་སྨྲ་དང་འགྲོགས་དང་། །བདེ་བ་དང་ནི་བུ་དང་ནི། །འཚོ་དང་ནོར་གྱིས་ངོམས་པ་མེད། །རྒྱལ་པོ་ནོར་གྱིས་ངོམས་མེད་ཅིང་། །ཕྱུག་པོ་ནོར་སོགས་ངོམས་པ་མེད། །རྒྱ་མཚོ་ཆུ་ཡིས་ངོམས་པ་མེད། །མཁས་

203-1-130a

པ་ལེགས་བཤད་ཀྱིས་མི་ངོམས། །བལྟ་ན་སྡུག་པས་མིག་མི་ངོམས། །སྒྲ་སྙན་དྲི་ཞིམ་རོ་མཆོག་དང་། །རེག་བྱ་ཡིད་འོང་ཆོས་རྣམས་ཀྱིས། །རྣ་བ་ལ་སོགས་ངོམས་མི་འགྱུར། །འཚོ་བ་རང་གི་ལས་དང་ཆོས་ཀྱིས་བསྔགས། །རང་རང་གི་ནི་ཆུང་མ་ལ་
རྟག་དགའ། །དབང་པོ་དུལ་ཞིང་གློ་བུར་མགྲོན་ལ་དགའ། །སྐྱེས་བུ་དམ་པའི་ཁྱིམ་ན་ཐར་པ་ཡོད། །ཙ་ན་ཀའི་རྒྱལ་པོའི་ལུགས་ཀྱི་བསྟན་བཅོས་ལས་ལེའུ་གཉིས་པའོ།།      །།གང་ཞིག་བསྟན་བཅོས་ཡོངས་སྤངས་ནས། །མི་བརྟན་པ་ནི་སྒྲུབ་བྱེད་པ། །དེ་ཡི་བརྟན་
པ་ཉམས་འགྱུར་ཏེ། །མི་བརྟན་ཉམས་པ་ཉིད་དུ་ཟད། །ཟས་ཀྱི་ཚོད་ལས་ཁ་ཟས་སྦྱིན། །བུད་མེད་མཆོག་ལ་དགའ་ནུས་ཤིང་། །འབྱོར་པའི་ཚུལ་ལས་སྦྱིན་པ་སྟེ། །དཀའ་ཐུབ་འབྲས་བུ་ཆུང་མ་ཡིན། །རིག་བྱེད་འབྲས་བུ་སྦྱིན་སྲེག་སྟེ། །ཐོས་པའི་འབྲས་བུ་ཚུལ་ཁྲིམས་དུལ། །
ཆུང་མའི་འབྲས་བུ་དགའ་དང་བུ། །ནོར་གྱི་འབྲས་བུ་སྤྱད་དང་སྦྱིན། །བུ་མོ་རིགས་བཟང་ཤེས་རབ་ལྡན། །གཟུགས་ངན་ན་ཡང་བླང་བར་བྱ། །གཟུགས་བཟང་བ་ལ་དུལ་བ་དག །འདི་འདྲའི་བུད་མེད་ག་ལ་ཡོད། །དུག་ལས་ཀྱང་ནི་བདུད་རྩི་བླང་། །བྱིས་པ་ལས་ཀྱང་ལེགས་བཤད་པ། །
མི་གཙང་ལས་གསེར་བུད་མེད་ནི། །རིན་ཆེན་རིགས་ངན་ལས་ཀྱང་བླང་། །རྒྱལ་པོའི་མཛའ་བོ་རྟག་པ་མིན། །སྦྲུལ་ལ་དུག་མིན་གང་ཡང་མེད། །གང་དུ་བུད་མེད་སྐྱེས་གྱུར་པའི། །རིགས་ལ་སྐྱོན་མེད་ཡོད་མ་ཡིན། །བུ་མོ་རིགས་ནི་བཟང་ལ་བཏང་། །བུ་ནི་རིག་པ་ལ་སྦྱར་བྱ། །
དགྲ་བོ་ཕོངས་པ་ཉིད་ལ་སྦྱར། །མཛའ་བོ་ཆོས་ལ་སྦྱར་བར་བྱ། །བྲན་གཡོག་དང་ནི་རྒྱན་རྣམས་ནི། །འཚམ་པའི་གནས་སུ་ངེས་པར་གཞག །གཙུག་གི་ནོར་བུ་རྐང་པར་ནི། །གདགས་པར་རིགས་པ་མ་ཡིན་ནོ། །མེ་ཏོག་དྲི་དང་ཁ་དོག་ལྟར། །དམ་པའི་ཚུལ་ནི་གཉིས་ཡིན་ཏེ། །འཇིག་
རྟེན་ཀུན་གྱིས་སྤྱིར་བཀུར་བའམ། །ནགས་ཉིད་དུ་ནི་དེངས་པའོ། །རྟ་དང་གླང་པོ་ལྕགས་དང་ནི། །ཤིང་དང་རྡོ་དང་གོས་རྣམས་དང་། །ཆུ་དང་སྐྱེས་པ་བུད་མེད་དག །ཁྱད་ལས་ཁྱད་པར་ཆེ་བ་ཡིན། །བརྟན་པ་ཕོངས་པར་གྱུར་ན་ཡང་། །སྙིང་སྟོབས་ཡོན་ཏན་ཉམས་མི་འགྱུར། །མེ་ནི་ཐུར་དུ་

203-1-130b

ཁ་བསྟན་ཡང་། །མེ་ལྕེ་ནམ་ཡང་ཐུར་མི་འགྲོ། །རྟ་མཆོག་ལྕག་གིས་གཞུ་མི་དགོས། །སེང་གེས་འབྲུག་སྒྲ་མི་བཟོད་ལྟར། །གཞན་གྱིས་སོར་མོས་བསྟན་པ་ནི། །མཁས་པ་རྣམས་ཀྱིས་བཟོད་མ་ཡིན། །བློ་དང་ལྡན་པའི་མི་རྣམས་ནི། །གལ་ཏེ་འབྱོར་པ་ཉམས་གྱུར་ཏམ། །རང་གི་
ཡུལ་དང་བྲལ་གྱུར་ཀྱང་། །དམན་པ་ལ་ནི་འདུད་མི་བྱེད། །མི་རྣམས་དྲེགས་པ་དང་བྲལ་ཞིང་། །ཤིན་ཏུ་ཕོངས་པར་གྱུར་ན་ཡང་། །ཕལ་ཆེར་གླང་པོ་རྣམས་ཀྱི་ནི། །ཁྲག་ནི་དྲོན་མོ་འཐུང་མི་བྱེད། །ལན་ཅིག་ཞེ་འགྲས་དགྲ་བོ་དང་། །སླར་ཡང་འདུམ་པར་འདོད་པ་ནི། །དེ་ནི་དྲེའུ་མོ་
མངལ་ཆགས་ལྟར། །འཆི་བདག་ཉེ་བར་བཟུང་བ་ཡིན། །དགྲ་བོའི་བུ་ནི་སྙན་པར་སྨྲ་ན་ཡང་། །བློ་ལྡན་མི་ཡིས་བཏང་སྙོམས་མི་བྱ་སྟེ། །དེ་ནི་དུས་གཞན་ཞིག་ཏུ་གནོད་སྐྱེད་དེ། །དུག་གི་ལོ་མའང་ཤིན་ཏུ་མི་བཟད་བཞིན། །ཚེར་མ་རྐང་པར་ཟུག་པ་ལ། །ལག་པ་དག་གིས་འབྱིན་པ་ལྟར། །ཕན་
བཏགས་པ་ཡི་ཚུལ་གྱིས་ནི། །དགྲ་བོས་དགྲ་བོ་བླང་བར་བྱ། །གནོད་པ་བྱེད་ལ་ནམ་ཡང་ནི། །གནོད་པའི་བསམ་པ་མི་བྱ་སྟེ། །ཆུ་འགྲམ་གྱི་ནི་ཤིང་ལྟ་བུར། །རང་ཉིད་ཁོ་ན་འགྱེལ་བར་འགྱུར། །ནོར་གྱི་ཚུལ་གྱིས་གནོད་སྐྱེད་པས། །དོན་དང་དོན་མིན་ཉེ་བར་བརྟག །ནོར་ལས་ཕུང་ཁྲོལ་
འབྱུང་འགྱུར་ཏེ། །དེ་བས་རིག་པས་ཡོངས་སུ་བརྟག །བློ་ལྡན་མཁས་པར་གྱུར་ཀྱང་ནི། །བྱ་བ་གྲོས་ཀྱིས་བསྒྲུབ་པར་བྱ། །འབྱོར་འགྱུར་ཁོ་ནར་མ་ཟད་ཀྱིས། །རྒུད་པར་གྱུར་ཀྱང་མཛེས་པ་ཡིན། །ནོར་དང་འབྲུ་ཡི་སྦྱོར་བ་དང་། །དེ་བཞིན་རིག་པ་བཙལ་བ་དང་། །ཁ་ཟས་ཚོང་སྤོགས་རྣམས་ལ་ནི། །
རྟག་ཏུ་ངོ་ཚ་དོར་མི་བྱ། །ངོ་མཚར་ལྟད་མོ་འཇིགས་མེད་དང་། །ངོ་ཚ་གཞུང་ལུགས་གཏོང་ཚུལ་ཁྲིམས། །ལྔ་པོ་གང་ལ་ཡོད་མིན་པ། །དེར་ནི་འགྲོ་བར་མི་བྱའོ། །ཁྲེངས་ཤིང་དྲེགས་པར་གྱུར་པ་དག །སྐྱེ་དགུའི་གདུང་བར་བྱེད་པ་ཡིན། །ཀུན་དུ་བརྩེ་བ་དང་ལྡན་པའི། །རྒྱལ་པོ་སྤྲིན་དང་
འདྲ་བ་ཡིན། །ཟས་དང་སྐོམ་ལ་ཆགས་གྱུར་པ། །གདུག་ཅིང་ཡོན་པོར་འགྲོ་བ་དང་། །གདེངས་ཀ་སྔགས་ཀྱིས་བསྒྲུབ་བྱ་བའི། །རྒྱལ་པོ་སྦྲུལ་དང་འདྲ་བ་ཡིན། །ལྕེ་གཉིས་པ་ལ་ལས་དུག་ཅིང་། །རྟག་ཏུ་གླགས་སྐབས་ཚོལ་བྱེད་ལ། །ལྟ་བ་གཅིག་ལ་རབ་ཆགས་པའི། །རྒྱལ་པོ་སྦྲུལ་

203-1-131a

དང་འདྲ་བ་ཡིན། །ཀུན་ནས་འབད་པ་ཐམས་ཅད་ཀྱིས། །རྒྱལ་པོ་གདུག་པ་སྤང་བར་བྱ། །རྒྱལ་པོའི་རྟོག་ཆེན་མ་ཡེངས་པས། །ཐག་རིང་ལས་ཀྱང་ཐོབ་པར་འགྱུར། །རྒྱལ་པོ་གཅིག་པུ་ཉིད་ཡིན་ཡང་། །སྐྱེས་བུ་ཉན་རྣ་མཁས་པ་ཡིས། །ཀུན་ལ་ལེགས་པར་གནས་
ཡིན་ཏེ། །འགྲོ་བ་མ་ལུས་འབྱེར་བར་བྱེད། །གང་ཞིག་ཞོ་ཤས་འཚོ་བ་དང་། །རྒྱལ་པོ་གང་ཞིག་བརྙས་གྱུར་པ། །དེ་ནི་ས་བདག་མ་ཡིན་ཏེ། །གཡོག་འཁོར་རྣམས་ཀྱང་བསྟེན་མི་འགྱུར། །བརྐམ་ཆགས་ལ་ནི་རབ་ཞེན་ལ། །རྒྱུད་པ་རིང་ན་གནས་མ་ཡིན། །མཆིལ་པའི་ཤ་ལ་ཆགས་པ་ཡི། །
ཉ་རྣམས་དང་ཡང་མཚུངས་པ་ཡིན། །ཀུན་གྱིས་ཐམས་ཅད་མི་ཤེས་ཏེ། །ཐམས་ཅད་ཤེས་པ་གང་ནའང་མེད། །གནས་གཅིག་ལ་ནི་མཐར་ཐུག་པ། །ཤེས་པའི་སྐྱེས་བུ་གང་ནའང་དཀོན། །འཇིག་རྟེན་ན་ནི་ཀུན་རིག་ཡོད་མིན་ཞིང་། །ཤིན་ཏུ་བླུན་པའང་ཡོད་པ་མ་ཡིན་ཏེ། །ཤེས་པ་
མཆོག་དང་བར་མ་ཐ་མའང་རུང་། །གང་གིས་གང་ཞིག་ཤེས་དེ་མཁས་པ་ཡིན། །ཙ་ན་ཀའི་རྒྱལ་པོའི་ལུགས་ཀྱི་བསྟན་བཅོས་ལེའུ་གསུམ་པའོ།།      །།ས་བདག་ཉིད་དང་བྲན་གཡོག་གི། །མཚན་ཉིད་ཁོ་ན་བཤད་པར་བྱ། །རྒྱལ་པོ་ཀུན་ལ་མཁས་པ་ཡིས། །བྲན་གཡོག་
ལེགས་པར་བརྟག་པར་བྱ། །བདེན་དང་ཆོས་ལ་གཞོལ་བ་ཡིས། །རྟག་ཏུ་ཡུལ་འཁོར་བསྐྱང་བྱ་ཞིང་། །གཞན་གྱི་དཔུང་ནི་གནོད་པ་དང་། །རྟག་ཏུ་ཆོས་ཀྱིས་ས་བསྐྱང་བྱ། །ཀུན་དགའ་ར་བའི་ཕྲེད་བརྒྱུད་ལྟར། །མེ་ཏོག་མེ་ཏོག་ཙམ་བཏུ་ཡི། །སོལ་བ་མཁན་ནི་ཇི་བཞིན་དུ། །རྩ་
ནས་གཅད་པར་མི་བྱའོ། །འོ་མ་བཞོས་ནས་འཐུང་བཞིན་དུ། །བ་ནི་གསད་པར་མི་བྱའོ། །དེ་བཞིན་རྒྱལ་པོའི་ཡུལ་འཁོར་ནི། །དུས་ཤེས་ནས་ནི་ལོངས་སྤྱོད་བྱ། །བ་ཡི་བརླ་ནི་བཅག་གྱུར་ན། །བཞོ་བས་འོ་མ་ཐོབ་མི་འགྱུར། །དེ་བཞིན་ཡུལ་འཁོར་ཚུལ་མིན་པས། །གནོད་པ་
བྱས་ན་འཕེལ་མི་འགྱུར། །ཡུལ་འཁོར་སྦྲང་རྩི་ལྟར་སྤྱད་ཅི། །སྦྲང་བུ་གསད་པར་མི་བྱའོ། །བ་ལས་བདག་པོས་བཞོ་བ་ལྟར། །རྒྱལ་པོས་ས་ནི་དེ་ལྟར་བསྐྱང་། །དེ་བས་འབད་པ་ཐམས་ཅད་ཀྱིས། །ས་ནི་རྗེས་སུ་བསྐྱང་བྱ་སྟེ། །ས་རྣམས་ལེགས་པར་བསྐྱངས་ན་ནི། །ཚེ་དང་

203-1-131b

སྙན་པ་གྲགས་དཔུང་འཕེལ། །བརྟན་རྣམས་ཕོངས་པ་ཐོབ་གྱུར་ཀྱང་། །རྣམ་པར་ཉམས་པར་མི་འགྱུར་ཏེ། །ཟླ་བ་སྒྲ་གཅན་ཁར་ཆུད་ཀྱང་། །སླར་ཡང་འཆར་བར་མི་བྱེད་དམ། །གླུ་མཁན་གར་མཁན་རི་མོ་མཁན། །རོལ་མོ་མཁན་དང་རྩིས་མཁན་དང་། །དོན་གྱི་བསྟན་བཅོས་འཕང་སློབ་
དཔོན། །ས་ཡི་བདག་པོས་འབད་དེ་སྲུང་། །བྲན་གཡོག་ལ་ནི་རྒྱུ་མེད་པར། །གང་ཞིག་ཁྲོ་བར་བྱེད་པ་དག །དེ་ནི་སྦྲུལ་ནག་མཆེ་བ་ཟུག །ཉེས་པའི་དུག་གིས་ཟིན་པ་ཡིན། །རྒྱལ་པོས་འགྱུར་ཞིང་གཡོན་ཅན་ལ། །ཡོན་པོ་ཉིད་དུ་ཀུན་དུ་སྤྱད། །སྡུག་ལ་མཛའ་དང་གཡོ་ལ་གཡོ། །དྲང་པོ་
རྣམས་ལ་ཁོང་དྲང་ཉིད། །མི་བརྟན་པ་ལ་བརྟན་པ་དང་། །ལོག་པར་སྨྲ་ལའང་དེ་བཞིན་ནོ། །གཙང་སྦྲ་སྤྱོད་དང་དེ་བཞིན་དུ། །གཡོག་འཁོར་ཚོགས་ནི་སྦྱིན་པས་བསྡུ། །གཡོག་འཁོར་ནོར་གྱིས་དྲེགས་པ་དང་། །གང་ཞིག་རྒྱལ་པོ་ལ་བསྡོ་དང་། །ཉམ་ཆུང་གཡུལ་དུ་འཇུག་པ་ནི། །དགྲ་ཡི་ཟིལ་
གྱིས་གནོན་པར་འགྱུར། །ས་བདག་རྟག་ཏུ་རྒྱུ་མེད་པར། །ཁྲོ་གཉེར་དག་ནི་མི་བྱ་ཞིང་། །བྲན་གཡོག་ནོར་མེད་པར་མ་ཡིན། །རྒྱལ་པོའི་ཆོས་ནི་བསྲུང་བར་བྱ། །ས་བདག་གིས་ནི་རྩེད་མོ་དང་། །བདེ་ལ་ཆགས་པ་རིང་དུ་སྤང་། །ཁྱིམ་ན་གནས་བཞིན་དགྲ་བོ་ལའང་། །བདེ་བས་རབ་ཏུ་
གདུལ་བར་བྱ། །བརྩོན་དང་བརྟུལ་ཕོད་བརྟན་པ་དང་། །བློ་དང་ནུས་པ་ཕ་རོལ་གནོན། །ཡོན་ཏན་དྲུག་པོ་གང་ལ་ཡོད། །དེ་ལ་ལྷ་ཡང་དགའ་བ་སྐྱེ། །གང་སྲིད་རྒྱལ་སྲིད་འདོད་པ་ཡིས། །སྒྲུབ་ཀྱང་ཐོབ་པར་མ་གྱུར་ན། །དེ་ནི་བསོད་ནམས་རྒྱུ་ཡིན་གྱི། །སྐྱེས་བུའི་རྩོལ་བས་ཉེས་པ་མིན། །ཙ་ན་
ཀའི་རྒྱལ་པོའི་ལུགས་ཀྱི་བསྟན་བཅོས་ལས་ལེའུ་བཞི་པའོ།།      །།གཡོག་འཁོར་གང་གི་ཡོན་ཏན་ནི། །གང་ཡིན་ཡོངས་བརྟགས་བཤད་པར་བྱ། །མཛངས་ཤིང་བྱ་བ་ཀུན་ལ་མཁས། །གྲུབ་མཐའ་བསྟན་བཅོས་ལ་རབ་བྱང་། །རྟག་པར་རྒྱལ་པོའི་བྱ་བ་སྒྲུབ། །འདི་ནི་བློན་པོ་ཡིན་པར་
བཤད། །རིག་བྱེད་ཀྱི་ནི་ཡན་ལག་ཤེས། །བཟླས་དང་སྦྱིན་སྲེག་དག་ལ་བརྩོན། །རྟག་ཏུ་ཤིས་པ་བརྗོད་ལ་བརྩོན། །འདི་ནི་རྒྱལ་པོའི་མདུན་ན་འདོན། །ཚེ་ཡི་རིག་བྱེད་ལ་ལེགས་བསླབས། །ཐམས་ཅད་ཤེས་ཤིང་བལྟ་ན་སྡུག །ངང་ཚུལ་བཟང་ལ་བྱ་བ་མཁས། །འདི་ནི་སྨན་པ་ཡིན་ཞེས་

203-1-132a

བྱ། །བློ་ལྡན་སྨྲ་མཁས་ཤེས་རབ་ཆེ། །བདེན་པར་སྨྲ་ཞིང་དབང་པོ་དུལ། །བསྟན་བཅོས་ཐམས་ཅད་ལེགས་མཐོང་བ། །འདི་ནི་ཡི་གེ་པ་ཞེས་བྱ། །རིགས་དང་ངང་ཚུལ་ཡོན་ཏན་ལྡན། །བདེན་དང་ཆོས་ལ་མཆོག་ཏུ་གཞོལ། །གཟུགས་བྱད་ཤིན་ཏུ་བཟང་བ་ནི། །
རྒྱལ་པོའི་སྤྱན་མིག་ཡིན་པར་བཤད། །རང་ལུགས་མ་འཆོས་རྒྱལ་ལ་བསྟེན། །རིན་ཆེན་ཐམས་ཅད་ཡོངས་རྟོགས་ཤེས། །སྨ་མ་བབ་ཅིང་རྩོལ་བ་ཅན། །དམག་ཅན་ཡིན་པར་ཤེས་པར་བྱ། །བརྡ་ལ་ལེགས་པར་བྱང་གྱུར་ཅིང་། །སྟོབས་ལྡན་མཐོང་ན་སྡུག་པ་དང་། །བག་ཡོད་ནོར་ནི་ཆེ་བ་
དག །སྒོ་དཔོན་ཆེན་པོར་དེ་བཤད་དོ། །བློ་ལྡན་ཤེས་རབ་ཆེ་བ་དང་། །གཞན་གྱི་བསམ་པ་རྟོག་མཁས་ཤིང་། །བརྟན་ལ་ཇི་བཞིན་ལན་འདེབས་ཤིང་། །འདི་ནི་ཕོ་ཉར་ཤེས་པར་བྱ། །གཡོས་ཀྱི་བསྟན་བཅོས་ཀུན་ལ་མཁས། །དགེ་ཞིང་སྙན་སྨྲ་དབང་པོ་ཞི། །གཙང་སྦྲ་ཆེ་ཞིང་ཡིད་
བརྟེན་རུང་། །འདི་ནི་ཕྱག་ཚང་ཡིན་པར་བཤད། །ཞར་བ་ཞ་བོ་མ་ནིང་དང་། །སྒུར་པོ་རྒན་པོ་དབང་པོ་བསྡམས། །འདི་དག་བཙུན་མོའི་སྲུང་མར་ནི། །རྒྱལ་པོས་ཉེ་བར་སྦྱར་བར་བྱ། །བྲན་གཡོག་མཆོག་དང་ཐ་མ་དང་། །བར་མ་མང་པོ་ཤེས་བྱས་ནས། །དེ་རྣམས་ལས་དོན་གསུམ་
པོ་ལ། །ཅི་རིགས་པར་ནི་སྦྱར་བར་བྱ། །སྨྲ་མང་ཁེངས་དང་ལེ་ལོ་ཅན། །གདུག་དང་གཡོན་ཅན་ཕོངས་ཆོས་ལྡན། །ཆོག་མི་ཤེས་དང་སྨེ་ཤ་ཟ། །བྲན་གཡོག་རྒྱལ་པོས་སྤང་བར་བྱ། །བདག་པོ་ལ་འཁུ་སྤང་བྱ་ཞིང་། །ཤིན་ཏུ་བཀྲེན་པའི་མི་སྲུན་ཡང་། །བཀྲེན་པས་བྱེ་བྲག་མི་ཤེས་པས། །
དེ་བཀྲེན་འདི་གནོད་བྱེད་པ་ཡིན། །མི་སྲུན་བརྐམ་ཆགས་ཕོངས་ཆོས་ཅན། །མུ་ཅོར་སྨྲ་དང་གུས་པ་མེད། །ཞེ་འགྲས་པ་དང་སྡིག་ལས་ཅན། །རྒྱལ་པོས་ཡོངས་སུ་སྤང་བར་བྱ། །སྐྱོད་དང་སྨྲ་བ་ལྕེ་གཉིས་དང་། །གདུག་ཅིང་གཅིག་ཏུ་མི་སྲུན་དང་། །རང་བཞིན་ངན་དང་འཚེ་བར་དགའ། །
གནོད་པ་འབའ་ཞིག་སྐྱེད་བྱེད་ཡིན། །གལ་ཏེ་རིག་པས་བརྒྱན་གྱུར་ནའང་། །སྐྱེ་བོ་ངན་པ་སྤང་བྱ་སྟེ། །སྦྲུལ་ནི་ནོར་བུས་བརྒྱན་ན་ཡང་། །འདི་ན་འཇིགས་པ་མི་སྐྱེད་དམ། །གང་ཞིག་རྟག་ཏུ་བརྣགས་དཀའི་ཚིག་ངན་ནི། །སྨྲ་ཞིང་རྒྱུ་མེད་པར་ནི་མི་བཟད་ཁྲོ། །དུག་ཆེན་སྦྲུལ་དང་མཚུངས་

203-1-132b

པར་བྱེད་པ་ཡི། །རང་བཞིན་ངན་ལ་འཇིགས་པ་སུ་མི་སྐྱེད། །ཟབ་ཅིང་སྙན་དང་རན་པར་སྨྲ་བ་དང་། །དབང་དུལ་བདེན་ལ་གཞོལ་ཞིང་རང་དབང་འགྱུར། །དངོས་དོན་ལེགས་ཤེས་ཡང་དག་དོན་ལ་མཁས། །བྲན་གཡོག་ཕལ་ཆེར་རང་དབང་གྱུར་པ་ཡིན། །ལེ་ལོ་མེད་ཅིང་ཆོག་ཤེས་
ལ། །ལེགས་པར་གཉིད་ལོག་རབ་ཏུ་སད། །བདེ་སྡུག་ལ་མཉམ་བརྟན་པ་ཡི། །བྲན་གཡོག་འཇིག་རྟེན་ན་རྙེད་དཀའ། །བཟོད་མེད་མགུ་བར་དཀའ་བ་དང་། །གཏོང་དང་བྲལ་ཞིང་ནོར་ལ་དགའ་བ་དང་། །སྨོད་བྱེད་སྟོབས་ཆུང་རབ་ཏུ་གདུག །རྟེན་མི་བདག་པོས་སྤང་བར་བྱ། །
གཡོ་དང་ཟོལ་ལ་དགའ་བ་དང་། །སྨྲ་ཞིང་སྐལ་བཟང་དང་བྲལ་བ། །མེད་པར་འཇིགས་ཤིང་སྐྲག་གྱུར་པ། །རྒྱལ་པོས་འདི་ནི་སྤང་བར་བྱ། །ཟླ་བ་དྲུག་གམ་ལོ་གཅིག་ནས། །རྒྱལ་པོས་སྡུམས་ནི་བྱ་བ་ཡིན། །བདག་ཉིད་ལ་ནི་དགའ་བསམས་ལ། །དགྲ་དང་ཉེ་བར་འཐབ་པར་བྱ། །གླེན་པའི་
ལས་ལ་སྦྱར་བ་ནི། །གྲགས་པ་ངན་དང་དོན་ཉམས་དང་། །དམྱལ་བར་ལྟུང་བ་ཉིད་དག་སྟེ། །རྒྱལ་པོ་ལ་ནི་ཉེས་གསུམ་འབྱུང་། །མཁས་པའི་ལས་ལ་སྦྱར་གྱུར་ན། །གྲགས་དང་ཚེ་དང་ཡོན་ཏན་དང་། །གཉེན་དང་ནོར་ནི་འཕེལ་བ་དང་། །མཐོ་རིས་གནས་སུ་སྐྱེ་བར་འགྱུར། །དགེ་བའམ་
ཡང་ན་མི་དགེ་བའི། །ལས་རྣམས་གང་དག་བྱེད་པ་ནི། །ལེགས་སྤྱོད་དང་ནི་ཉེས་སྤྱོད་ཀྱི། །རྒྱལ་པོ་དེ་དང་འབྲེལ་པ་ཡིན། །དེ་བས་ས་ཡི་དབང་ཕྱུག་གིས། །ཆོས་དང་འདོད་དོན་གྲུབ་བྱའི་ཕྱིར། །དགེ་སྦྱོང་དང་ནི་བྲམ་ཟེ་དག །རྟག་ཏུ་ཕན་དང་བདེ་ལ་སྦྱར། །ཙ་ན་ཀའི་རྒྱལ་པོའི་
ལུགས་ཀྱི་བསྟན་བཅོས་ལས་ལེའུ་ལྔ་པའོ།།      །།ཡོན་ཏན་ལྡན་པ་བསྟེན་བྱ་ཞིང་། །ཡོན་ཏན་མེད་པ་སྤང་བྱ་སྟེ། །མཁས་ལ་ཡོན་ཏན་ཀུན་ཡོད་དེ། །བླུན་པོ་ལ་སྐྱོན་འབའ་ཞིག་ཡིན། །རྟག་ཏུ་དམ་པ་དང་འགྲོགས་ཤིང་། །དམ་པ་རྣམས་དང་འདྲ་བ་དང་། །བྱ་རྩོམ་དམ་པ་
དང་བྱ་ཡི། །ཅི་ཡང་ངན་པ་དང་མི་བྱ། །གྲོག་མཁར་དང་ནི་སྦྲང་རྩི་དང་། །ཡར་ངོ་ཡི་ནི་ཟླ་བ་དང་། །རྒྱལ་པོའི་ནོར་དང་སྤྲང་པོའི་ནོར། །ཅུང་ཟད་ཅུང་ཟད་ཙམ་གྱིས་འཕེལ། །མིག་སྨན་དག་ནི་ཟད་པ་དང་། །གྲོག་མཁར་ཡང་ནི་བསགས་པས་མཐོ། །འདུ་ལས་འགོད་པ་ཆུང་བྱ་བ། །འདི་

203-1-133a

ཉིད་ཁོ་ན་མཁས་པ་ཡིན། །ནགས་སམ་ཁྱིམ་ན་གནས་ཀྱང་རུང་། །གཞན་དང་རང་ལ་ཕན་འགྱུར་བའི། །སྦྱིན་དང་ཀླག་པའི་ལས་རྣམས་ལ། །ཉིན་ཞག་དོན་མེད་མི་བྱའོ། །ཆགས་ཅན་ནགས་ན་གནས་ཀྱང་ཉེས་པ་འབྱུང་། །དམ་པ་ཁྱིམ་ན་གནས་ཀྱང་དབང་པོ་དུལ། །ནགས་
ན་གནས་པའི་གཅན་གཟན་ཁྲོ་བ་དང་། །ཁྱིམ་ན་གནས་པའི་རྟ་མཆོག་དུལ་བ་བཞིན། །དམ་པས་སྨད་པའི་ལས་ལ་རབ་འཇུག་ཅིང་། །ཡུལ་ལ་ཆགས་པའི་ནགས་ནི་ཉེས་པའི་གནས། མ་སྨད་པ་ཡི་ལས་ལ་འཇུག་བྱེད་ཅིང་། །འདོད་ཆགས་ལས་ལོག་ཁྱིམ་ཉིད་དཀའ་ཐུབ་ཚལ། །སེམས་ཀྱིས་
ཆོས་ནི་བསྲུང་བར་བྱ། །རིག་པ་དག་ནི་སྦྱོར་བས་སྲུང་། །གཟུགས་ནི་བྱི་དོར་གྱིས་བསྲུང་ཞིང་། །རིགས་ནི་ངང་ཚུལ་དག་གིས་བསྲུང་། །རྟག་ཏུ་སྦྱིན་པ་གཏང་བྱ་སྟེ། །སྐྱེ་བོ་བཀྲེན་པར་མི་བྱའོ། །འབྱོར་པ་སྤྱད་པས་མི་ཟད་ཀྱང་། །སྐལ་བ་ཟད་པས་ཟད་པར་འགྱུར། །སྦྱིན་པས་ཟད་པར་
མི་འགྱུར་ཞིང་། །མ་སྤྱད་པ་ཡིས་འཕེལ་མི་འགྱུར། །གཞན་དུ་སྔོན་ཆད་བསགས་པ་ཡི། །ལེགས་སྤྱད་ཟད་པས་ཟད་པར་འགྱུར། །བྱིན་ཞེས་མི་སྨྲའི་ནོར་ཅི་རུང་། །སྟེར་བ་ན་ཡང་འཕེལ་འགྱུར་ཏེ། །ཁྲོན་པ་ལས་ཆུ་བླངས་གྱུར་ཀྱང་། །ཉིན་རེ་ཆུ་ནི་མང་པོར་འགྱུར། །གང་ལ་ཆོས་ཡོད་
བདེ་བ་སྟེ། །གང་ལ་ཆོས་མེད་སྨད་བྱ་ཞིང་། །ཆོས་ནི་འཇིག་རྟེན་ལ་རྟོགས་པས། །ནོར་གྱི་དོན་དུ་དེ་མི་སྤང་། །སྐྱེ་བོ་བཀྲེན་པ་ནོར་འདོད་པས། །སྡུག་བསྔལ་གང་ཞིག་བྱས་གྱུར་པ། །དེ་ཡིས་གལ་ཏེ་ཆོས་དོན་གཉེར། །སླར་ཡང་ཉོན་མོངས་གནོད་མི་འགྱུར། །གཙང་སྦྲ་དག་ནི་ཐམས་ཅད་
ལས། །ནོར་གྱི་གཙང་སྦྲ་ཁྱད་པར་འཕགས། །གང་འདིར་ནོར་ཡོད་གཙང་སྦྲ་ཡིན། །ས་དང་ཆུ་གཙང་གཙང་མ་ཡིན། །བདེན་པའི་གཙང་སྦྲ་སེམས་གཙང་སྦྲ། །དབང་པོ་དུལ་བའི་གཙང་སྦྲ་དང་། །སེམས་ཅན་ལ་བརྩེའི་གཙང་སྦྲ་དང་། །ཆུ་ཡི་གཙང་སྦྲ་ལྔ་པ་ཡིན། །བསྒུལ་བས་འགུལ་
བར་མི་འགྱུར་ཞིང་། །བརྙས་པས་འཁྲུག་པར་མི་བྱེད་ལ། །ཁྲོ་མེད་སྐྱེས་བུ་ཞེས་བཤད་དེ། །འདི་ནི་དམ་པའི་མཚན་ཉིད་ཡིན། །སྐྱེས་བུ་དབུལ་པོ་རྣམས་ཀྱི་ཚིག །མཁས་ཤིང་སྙན་པར་སྨྲ་བ་དང་། །དུས་སུ་སྨྲ་ཞིང་ཕན་སྨྲས་ཀྱང་། །སུ་ཡང་ཉན་པར་མི་བྱེད་དོ། །བསྔགས་

203-1-133b

དང་སྟོབས་དང་རྩོད་པ་དང་། །ཤེས་དང་སྐྱེས་བུའི་རྩོལ་བས་ཀྱང་། །དངོས་གང་རྙེད་པར་མ་གྱུར་པ། །དེ་ལ་སུ་ཞིག་གདུང་བར་བྱེད། །བདེ་བའམ་ཡང་ན་སྡུག་བསྔལ་དག །ཐོབ་པར་བྱེད་པ་མ་ཐོབ་ཅིང་། །བགྲོད་པར་བྱ་བ་མ་བགྲོད་ལ། །རྙེད་པར་བྱ་བ་མ་རྙེད་ལས། །དོན་གཅིག་གྲུབ་པར་
གྱུར་ན་ནི། །དེ་ལ་གདུང་བྱར་ཅི་ཞིག་ཡོད། །གང་དུ་འཆི་བདག་ཡོད་དེར་འཆི། །གང་ན་དཔལ་གནས་དེར་ཕུན་ཚོགས། །རང་གི་ལས་ཀྱིས་ཁྲིད་ནས་ནི། །དེ་དང་དེར་ནི་བདག་ཉིད་འགྲོ། །དགེ་དང་མི་དགེའི་ལས་རྣམས་ནི། །སྔོན་ཆད་བྱས་པ་གང་ཡིན་པ། །སྔོན་ཚེ་ཇི་ལྟར་སྤྱད་པ་བཞིན། །
བྱེད་པ་པོ་ཡི་རྗེས་སུ་འབྲང་། །སྐྱེ་བོ་ངན་པ་གཞན་གྱི་སྐྱོན། །ཡུངས་འབྲུ་ཙམ་ལ་རྟོག་བྱེད་ཀྱི། །རང་སྐྱོན་བིལ་བ་ཙམ་ཡང་ནི། །ཡོད་དུ་ཟིན་ཀྱང་མི་མཐོང་ངོ་། །གཞན་དབང་ཐམས་ཅད་སྡུག་བསྔལ་ཏེ། །རང་དབང་ཐམས་ཅད་བདེ་བ་ཡིན། །བདེ་དང་སྡུག་བསྔལ་གཉིས་མཚན་ཉིད། །མདོར་ན་
འདི་དག་ཡིན་ཞེས་བྱ། །བདེ་བའི་རྗེས་ལ་སྡུག་བསྔལ་ཞིང་། །སྡུག་བསྔལ་རྗེས་ལ་འོང་བདེ་བ་སྟེ། །མི་རྣམས་ཀྱི་ནི་བདེ་སྡུག་དག །འཁོར་ལོ་བཞིན་དུ་ཡོངས་སུ་འཁོར། །གང་ཞིག་སོང་བ་དེ་འདས་ཟིན། །གང་ཞིག་མ་འོངས་དེ་ཐག་རིང་། །གང་ཞིག་གདུང་བར་མི་འགྱུར་བར། །དེ་ལྟར་བྱུང་བ་
གནས་པར་གྱིས། །ཙ་ན་ཀའི་རྒྱལ་པོའི་ལུགས་ཀྱི་བསྟན་བཅོས་ལས་ལེའུ་དྲུག་པའོ།།      །།འགའ་ཡང་སུ་ཡི་མཛའ་བོའང་མིན། །སུ་ཡང་གང་གིའང་དགྲ་བོ་མིན། །མཛའ་བོ་དང་ནི་དགྲ་བོ་ཡང་། །རང་གི་ནུས་པ་ཉིད་ལས་བྱུང་། །མྱ་ངན་དགྲ་སྐྱེད་འཇིགས་ལས་སྐྱོབ། །ཡིད་ཆེས་
གནས་གྱུར་སྙིང་དུ་སྡུག །མཛའ་ཞེས་བྱ་བའི་ཡི་གེ་གཉིས། །གང་གིས་རིན་ཆེན་འདི་སྤྲུལ་འགྱུར། །གལ་ཏེ་རྟག་ཏུ་མཛའ་འདོད་ན། །ཕོ་ཉ་ནོར་གྱི་ཁེ་སྤོགས་དང་། །དེ་མིན་ཆུང་མ་ལ་ལྟ་བ། །ཉེས་པ་གསུམ་པོ་སྤང་བར་བྱ། །རླུང་ཤུགས་མི་བཟད་ལྡང་བ་དང་། །རྒྱ་མཚོ་ཆེན་པོའི་དབའ་
རླབས་དག །འབྱུང་བ་དགག་པ་ནུས་སྲིད་ཀྱི། །རྗེས་ཆགས་སེམས་ནི་དེ་ལྟ་མིན། །མེ་དང་ཆུ་དང་བུད་མེད་དང་། །བླུན་པོ་སྦྲུལ་དང་རྒྱལ་པོ་དྲུག །འཕྲལ་དུ་སྲོག་འཕྲོག་བྱེད་མིན་པས། །རྟག་ཏུ་བག་དང་ཆས་པས་བསྟེན། །གཞན་གྱིས་རང་སྐྱོན་མི་རྟོགས་པས། །རང་གི་སྐྱོན་ཡང་ཤེས་

203-1-134a

པར་བྱ། །རུས་སྦལ་ཡན་ལག་སྦེད་པ་སྟར། །རང་གི་ཡོན་ཏན་སྦ་བར་བྱ། །གཞན་གྱི་རང་བཞིན་མ་བརྟགས་ན། །རྔོན་པའི་གླུ་ཡིས་རི་དྭགས་ལྟར། །བཅོས་མའི་ཚིག་གིས་སླུ་བྱེད་པས། །གཞན་གྱི་རང་བཞིན་ཤེས་པར་བྱ། །དམའ་བར་རྩ་དང་ཆུ་སྔོན་པོ། །དུལ་བས་སློབ་མ་བྲིད་
བྱས་པ། །དཀའ་ཐུབ་ཀྱིས་ལྷ་ནོར་བུ་མེད། །ཡོན་ཏན་གྱིས་ནི་ཐམས་ཅད་བསྡུ། །མཛའ་བོ་ལ་གཡོས་རྙོག་པོས་ཆོས། །གཞན་ལ་གནོད་པས་སྦྱོར་བ་དག །རྩུབ་པས་བུད་མེད་བདེར་རེག་པ། །གང་ཞིག་འདོད་དེ་མཁས་པ་མིན། །གང་ཞིག་རྒན་པོའི་གྲོས་མི་ཉན། །བསྟན་བཅོས་ཤེས་པའི་
སྐྱེ་བོ་མེད། །མ་བརྟགས་པར་ནི་སྤྱོད་འགྱུར་བ། །དེ་ཡི་བྱ་བ་མོད་ལ་འཇིག །བགྲོད་དཀའ་བར་ནི་གནས་གྱུར་ཀྱང་། །མི་ཡིས་གསང་ཐུབ་རང་དབང་འགྱུར། །ཕྱེ་བར་གྱུར་པས་འཁྲུག་པ་ནི། །གཡུལ་གྱི་བུ་བཞིན་མྱ་ངན་སྐྱེ། །དཀའ་ཐུབ་ལུས་ནི་འཇམ་པ་དང་། །དཔའ་བོ་རྨ་ནི་མེད་པ་དང་། །བུད་
མེད་དམ་པ་ཆང་འཐུང་དང་། །རྒྱལ་པོ་ཆོས་མེད་ཡིད་མི་ཆེས། །མཛའ་བོ་མིན་ལ་ཡིད་མི་བརྟན། །གལ་ཏེ་མཛའ་བོ་ཁྲོས་གྱུར་ན། །གསང་ཚིག་ཐམས་ཅད་སྨྲ་བར་བྱེད། །བྱེད་པ་པོ་ལ་མ་ལྟོས་པར། །བྱ་བ་ཅི་ཡང་མི་འགྲུབ་པས། །བྱ་བ་ཀུན་ལ་འཇུག་ན་ཡང་། །བློ་ནི་བརྟན་པ་ཉིད་དུ་བྱ། །བུ་
ལོན་དབུལ་པོའི་དུག་ཡིན་ཏེ། །རྒན་པོའི་དུག་ནི་གཞོན་ནུ་མ། །བློ་ངན་གྱི་ནི་རིག་པ་དུག །མ་ཞུ་ཟས་ཟ་དུག་ཡིན་ནོ། །ལྐོག་མ་མི་བདེ་གླུ་ལ་དགའ། །དམངས་རིགས་སྟན་མཐོ་ལ་དགའ་དང་། །དབུལ་པོ་གཏང་བ་ལ་དགའ་ཞིང་། །རྒན་པོ་གཞོན་ནུ་ལ་དགའ་བྱུར། །ཆུ་མང་འཐུང་ཞིང་སྟན་སྲབ་དང་། །
ལུས་ཟུངས་ཟད་དང་ཤུགས་བཀག་དང་། །ཉིན་པར་གཉིད་ལོག་མཚན་གཉིད་མེད། །དྲུག་པོ་འདི་རྣམས་ནད་སྐྱེད་བྱེད། །ཤ་སྐམ་དང་ནི་བུད་མེད་རྒན། །ཆང་གསར་ཞོ་ནི་ཆགས་མ་ཐག །ནང་པར་འཁྲིག་སྤྱོད་ཉིན་གཉིད་ལོག །དྲུག་པོ་འཕྲལ་དུ་སྲོག་འཕྲོག་ཡིན། །ཆང་རྙིང་ཤ་དང་མར་
གསར་དང་། །བུད་མེད་གཞོན་དང་འོ་མ་འཐུང་། །ཆུ་ཚན་དང་ནི་བསིལ་གྲིབ་དག །འཕྲལ་དུ་སྲོག་ནི་སྟེར་བྱེད་ཡིན། །ཁྲུས་བྱས་འོ་མ་ཆུ་སྤྱོད་ཤ །འཕྲལ་དུ་སྟོབས་སྐྱེད་གསུམ་ཡིན་ནོ། །གོས་ངན་སོ་ཡི་དྲི་མ་འཇོག་པ་དང་། །མང་དུ་ཟ་ཞིང་བརླང་བའི་ཚིག་སྨྲ་དང་། །ཉི་མ་འཆར་དང་ནུབ་

203-1-134b

པའི་ཚེ་ན་ཉལ། །དེ་ཡི་དཔལ་ནི་ཉམས་པ་ཉིད་དུ་འགྱུར། །མགོ་བོ་བྱི་དོར་བཟང་བྱས་རྐང་ལེགས་བཀྲུས། །བུད་མེད་མཆོག་བསྟེན་ཁ་ཟས་ཉུང་ངུ་ཟ། །གཅེར་བུ་མི་ཉལ་དུས་ཚིགས་འདོད་པ་སྤྱོད། །དྲུག་པོ་ཡུན་རིང་དཔལ་ཉམས་སླར་སྐྱེད་བྱེད། །གང་དང་གང་གི་མེ་ཏོག་ནི། །མཆོག་ཏུ་དཀར་
བར་གྱུར་པ་དག །མགོ་ལ་བཞག་པར་གྱུར་ན་ནི། །བྱུར་ནི་རབ་ཏུ་འཇིག་པར་བྱེད། །མར་མེ་ཐ་མའི་གྲིབ་མ་དང་། །མལ་ཁྲི་ཡི་ནི་གྲིབ་མ་དང་། །ཁྲུས་མཁན་གྱི་ནི་ཆུ་ངོགས་གང་། །དེར་ནི་དཔལ་མིན་གནས་པ་ཡིན། །རང་མི་ལ་དྲང་སྐྱེ་བོ་གཞན་ལ་གཡོ། །སྐྱེ་བོ་དམ་པ་དང་མཛའ་མི་སྲུན་སྤོང་། །
དགྲ་ལ་དཔའ་ཞིང་བླ་མ་ལ་གུས་པ། །འདི་དག་གང་གིས་ཤེས་དེ་དུས་ཤེས་ཡིན། །གཟུགས་ལྡན་རིགས་མཐོ་མཁས་པར་གྱུར་པ་དག །རིགས་ལྡན་ལྡན་ཞིང་བསྟན་བཅོས་མང་ཐོས་ལ། །གལ་ཏེ་ཡོན་ཏན་སྣ་ཚོགས་ཀྱིས་བརྒྱན་ཀྱང་། །གོས་ངན་སྐྱེ་བོ་མཛེས་པར་སྣང་མ་ཡིན། །བུད་
མེད་རྒྱལ་པོ་{སྦྲུལ་}དང་ནི། །ཁ་དྲག་དགྲ་དང་གྲོགས་པོ་དང་། །ལོངས་སྤྱོད་ཉིད་དང་ཚེ་ལ་ནི། །ནམ་ཡང་ཡིད་བརྟན་མི་བྱའོ། །དགྲ་བོ་དག་དང་སྡུམས་བྱས་ནས། །བག་ཕེབས་ནས་ནི་བདེར་ཉལ་བ། །དེ་ནི་ཤིང་རྩེར་ཉལ་གྱུར་པ། །སད་ནས་ལྷུང་བར་འགྱུར་དང་མཚུངས། །འཇམ་པོས་
འཇམ་པོ་འཇོམས་བྱེད་ཅིང་། །འཇམ་པོས་རྩུབ་མོའང་འཇོམས་བྱེད་དེ། །འཇམ་པོས་མི་འགྲུབ་ཅི་ཡང་མེད། །དེ་བས་འཇམ་ཉིད་རྣོན་པོ་ཡིན། །ཤིན་ཏུ་དྲང་པོར་མི་བྱ་སྟེ། །ནགས་སུ་སོང་ལ་ལྟོས་ཤིག་དང་། །དེར་ནི་ཤིང་དྲང་གཅོད་བྱེད་ཀྱི། །ཡོན་པོ་ལུས་པར་གྱུར་པ་ཡིན། །འབྲས་
བུ་དང་ལྡན་ཤིང་འདུད་ཅིང་། །སྐྱེ་བོ་མཁས་པ་དུལ་བ་ཡིན། །ཤིང་སྐམ་དང་ནི་བླུན་པོ་དག །འདུད་པར་མི་བྱེད་དུལ་མ་ཡིན། །ཤེས་དང་བྱེ་བྲག་ཤེས་མེད་ཅིང་། །བླུན་པོ་རྣམས་ནི་རྟག་ཏུ་དགའ། །ཤེས་པའི་ལྕགས་ཀྱུས་དབང་བྱས་པའི། །མཁས་པ་རྟག་ཏུ་སེམས་འདུལ་
བྱེད། །རི་ཡི་རྩེ་མོར་ཆར་འབབ་ཅིང་། །བུད་མེད་མཛའ་བོ་ངན་ལ་དགའ། །དཔལ་ནི་བླུན་པོ་ལ་གནས་ཤེས། །མཁས་པ་ཕལ་ཆེར་དབུལ་པོར་ཡོད། །ཙ་ན་ཀའི་རྒྱལ་པོའི་ལུགས་ཀྱི་བསྟན་བཅོས་ལས་ལེའུ་བདུན་པའོ།།      །།ཆུང་མ་ངན་དང་མཛའ་བོ་ངན། །རྒྱལ་པོ་ངན་དང་བཤེས་ངན་

203-1-135a

དང་། །འབྲེལ་པ་ངན་ལ་བརྟེན་པ་ནི། །རིང་དུ་ཡོངས་སུ་སྤང་བར་བྱ། །ཡུལ་འཇིགས་པ་དང་རིགས་ཟད་དང་། །ཆུང་མ་གཞན་སེམས་ཕྲོགས་པ་དང་། །བུ་ནི་ལོག་པས་ཕོངས་ལ་གནས། །གང་ཞིག་མ་མཐོང་དེ་སྐལ་ལྡན། །ངན་པའི་ཡུལ་དུ་སུ་ཞིག་སྡོད། །བུ་
ངན་པ་ལ་སུ་ཞིག་དགའ། །མཛའ་བོ་ངན་ལ་སུ་ཡིད་རྟོན། །རྒྱལ་པོ་ངན་ལ་སྲོག་ཡོད་མིན། །གཞན་གྱི་ཟས་དང་གཞན་གྱི་གོས། །གཞན་གྱི་ཡུལ་དང་གཞན་བུད་མེད། །གཞན་གྱི་ཁྱིམ་དུ་གནས་གྱུར་ན། །བརྒྱ་བྱིན་ཡིན་ཡང་དཔལ་ཉམས་འགྱུར། །དྲེགས་པས་དཔལ་ནི་ཉམས་འགྱུར་ཞིང་། །
ཁྲོ་བས་དཀའ་ཐུབ་ཉམས་པར་བྱེད། །ལམ་རིང་གིས་ནི་སྟོབས་ཉམས་བྱེད། །བྲམ་ཟེ་གཙང་སྦྲ་མེད་པས་ཉམས། །སྨད་རིགས་རྩོད་པ་ཉིད་ཀྱིས་དགའ། །དམ་པ་འདུམ་པས་དགའ་བ་ཡིན། །མི་མཆོག་གོ་འཕང་བསྟོད་འདོད་དེ། །གོ་འཕང་བསྟོད་པ་ནོར་གྱི་མཆོག །བུད་མེད་ཚོགས་སྤྱོད་བྲན་
གྱུར་ང་རྒྱལ་ཆེ། །སྨད་འཚོང་སྙན་པར་སྨྲ་བར་བྱེད་པ་དང་། །དཀའ་ཐུབ་ཆོས་གཟོབ་ནོར་མེད་འདོད་ལ་གདུང་། །ལྔ་པོ་འདི་དག་ཚུལ་མིན་སྤྱོད་པ་ཡིན། །གཏོང་དགའ་དབུལ་ཞིང་སེར་སྣ་ཅན་ནོར་ལྡན། །རང་ལ་མི་སྐུར་བུ་ནི་བསྒོ་མི་ཉན། །གཞན་ལ་ཕན་བྱེད་སྔོན་དགའ་ཚེ་ཐུང་བ། །ལྔ་པོ་སྐྱེ་
དགུའི་བདག་པོས་ཉེས་སྤྱད་ཡིན། །ཆུང་མ་དང་བྲལ་རང་མིས་བརྙས་པ་དང་། །བུ་ལོན་ལྷག་མ་སྐྱེ་བོ་ངན་ལ་བརྟེན། །དབུལ་པོར་གྱུར་ནས་སྐྱེ་བོས་རྒྱབ་ཀྱིས་ཕྱོགས། །ལྔ་པོ་མེ་མེད་པར་ཡང་ཤིན་ཏུ་སྲེག །རིགས་པས་དོན་བྱེད་བུ་ནི་བསྒོ་བ་ཉན། །ནད་མེད་པ་དང་དམ་པ་དག་དང་འགྲོགས། །
རང་དབང་ཡོད་ཅིང་རྗེས་འཇུག་ཆུང་མ་བརྟེན། །ལྔ་པོ་སྡུག་བསྔལ་རྩ་ནས་འབྱིན་བྱེད་ཡིན། །ཞུམ་དང་མདོག་ངན་ཁེངས་པ་དང་། །གོས་ངན་རང་ཉིད་འོངས་པ་ནི། །ལྔ་པོ་འདི་དག་ཕུར་མི་ཡིས། །མཆོད་སྡོང་ཡིན་ཡང་མཆོད་མི་འགྱུར། །ཚེ་དང་ལས་དང་སེམས་དང་ནི། །མཛའ་བོ་དང་ནི་
ནོར་རྙེད་དེ། །ལྔ་པོ་འདི་དག་ལུས་ཅན་རྣམས། །སྐྱེ་བའི་རྗེས་ལ་རྗེས་སུ་སྐྱེས། །རི་བོ་ལ་འཛེགས་ཆུ་དང་ནི། །བ་ལང་ཁྱི་དང་འཐབ་པ་དང་། །འགྱེལ་བ་ལས་ནི་སློང་བ་སྟེ། །བེ་རྒའི་ཡོན་ཏན་ལྔ་རུ་བཤད། །འཇིག་རྟེན་ན་ནི་སྲོག་མི་བརྟེན། །ནོར་དང་ལང་ཚོ་བརྟན་མ་ཡིན། །མཛའ་

203-1-135b

བར་རྩོམ་པ་མི་བརྟན་ཏེ། །ཆོས་དང་གྲགས་དང་སྙན་པ་བརྟན། །མི་རྣམས་ཚེ་ནི་རབ་ཐུང་ལས། །དེ་ཕྱེད་མཚན་མོས་འདས་པར་བྱས། །ནད་རྒས་ཉོན་མོངས་ཕོངས་པ་ཡིས། །ཕྱེད་པོ་དེ་ཡང་ཚང་མ་ཡིན། །འགྲོའམ་འདུག་པར་གྱུར་པའམ། །གཉིད་མ་ལོག་པར་ཉལ་བ་ན། །གང་ཞིག་གཞན་
དོན་མི་སེམས་པ། །དེ་ཡི་སྤྱོད་པ་ཕྱུགས་དང་མཚུངས། །ཕན་དང་མི་ཕན་དཔྱོད་པའི་བློ་མེད་ཅིང་། །བློ་དང་ཐོས་པ་མང་པོ་དང་བྲལ་ལ། །ལྟོ་བ་འགེངས་པ་འབའ་ཞིག་འདོད་གྱུར་པ། །དེ་ཡི་བསམ་པ་ཕྱུགས་ལས་ཁྱད་ཅི་ཡོད། །མཛའ་བོ་རྣམས་ལ་ཕན་གདགས་བྱ་བ་དང་། །དགྲ་བོ་རྣམས་ལ་
གནོད་པ་བྱ་བའི་ཕྱིར། །མཁས་པས་རྒྱལ་པོ་རྣམས་ལ་བརྟེན་བྱ་ཡི། །ལྟོ་འགྲངས་འབའ་ཞིག་ཙམ་ཞིག་སུ་ཞིག་བྱེད། །མཁས་ཤིང་རྩལ་དང་གྲགས་ལྡན་སྨ་མ་བབ། །མིས་བཀུར་འཚོ་བ་སྐད་ཅིག་གང་ཡིན་པ། །དེ་ནི་གསོན་པོ་ཡིན་ཞེས་དམ་པ་འཆད། །ཁྭ་ནི་ཡུན་རིང་འཚོ་ཡང་གཏོང་
ཟར་ཟད། །ཆུ་ཆུང་གྲོག་པོ་དགང་སླ་ཞིང་། །བྱིས་པའི་སྙིམ་པ་དགང་སླ་ལ། །སྐྱེ་བོ་ངན་པ་མགུ་སླ་སྟེ། །ངན་ངོན་གྱིས་ཀྱང་མགུ་བར་བྱེད། །སྤྲིན་གྱི་གྲིབ་མ་རྩྭ་ཡི་མེ། །བླུན་པོ་ལ་བརྟེན་སྐམ་སའི་ཆུ། །སྨད་འཚོང་ཆགས་དང་མི་སྲུན་མཛའ། །དྲུག་པོ་འདི་དག་ཆུ་བུར་མཚུངས། །ཉམ་
ཆུང་དཔུང་ནི་རྒྱལ་པོ་ཡིན། །བྱིས་པའི་དཔུང་ནི་ད་མོ་ཡིན། །གླེན་པའི་དཔུང་ནི་མི་སྨྲ་ཡིན། །རྐུན་མའི་དཔུང་ནི་བརྫུན་ཚིག་ཡིན། །ཇི་ལྟ་ཇི་ལྟར་སྐྱེས་བུ་ཡིས། །བསྟན་བཅོས་ལེགས་པར་རྟོགས་གྱུར་པ། །དེ་ལྟ་དེ་ལྟར་ཤེས་པ་ཡིས། །ཁྱད་པར་ངེས་པར་སྐྱེ་བར་འགྱུར། །ཇི་ལྟ་ཇི་ལྟར་
སྐྱེས་བུ་ཡིས། །བློ་ཡིས་དགེ་བའི་ལས་བྱེད་པ། །དེ་ལྟ་དེ་ལྟར་དོན་རྣམས་ཀུན། །འགྲུབ་འགྱུར་འདི་ལ་ཐེ་ཚོམ་མེད། །བརྐམ་ཆགས་བག་མེད་ཡིད་ཆེས་པས། །གསུམ་པོས་སྐྱེས་བུ་སླུ་བར་བྱེད། །དེ་བས་བརྐམ་ཆགས་བག་མེད་དང་། །ཡིད་ཆེས་སུ་ཡང་མི་བྱའོ། །ལྐོག་ན་བྱ་བ་ཉམས་
བྱེད་པ། །མངོན་སུམ་དུ་ནི་སྨྲ་བྱེད་པ། །དུག་བུམ་ཁ་ན་འོ་མ་ཅན། །དེ་འདྲའི་མཛའ་བོ་སྤང་བར་བྱ། །སྐྱེ་བོ་ངན་དང་འདྲེས་པ་ཡིས། །སྐྱེ་བོ་ངན་པའང་རླག་པར་བྱེད། །ཆུ་ནི་ཤིན་ཏུ་དང་བ་ཡང་། །འདམ་གྱིས་རྙོག་པ་ཅན་དུ་བྱེད། །གང་ཞིག་མགྲོན་མཆོད་ལྷག་མར་གྱུར་དེ་ཟས། །གང་

203-1-136a

ཞིག་སྡིག་པ་མི་བྱེད་དེ་ཤེས་ལྡན། །གང་ཞིག་ལྐོག་ཏུ་ཕན་དེ་མཛའ་བོ་ཡིན། །གང་ཞིག་གཡོ་མེད་པས་བྱེད་དེ་ཆོས་ཡིན། །གང་ཞིག་རྒན་མེད་པ་དེ་འདུན་ས་མིན། །གང་ཞིག་ཆོས་ལྡན་མི་སྨྲ་དེ་རྒན་མིན། །གང་ལ་བདེན་མེད་དེ་ནི་ཆོས་མ་ཡིན། །གང་ཞིག་སླུ་བ་
དང་འབྲེལ་དེ་བདེན་མིན། །གང་དུ་སེམས་དང་དགའ་བ་བཀྲ་ཤིས་དེ། །གང་ཞིག་གཞན་ལ་མི་རྟེན་དེ་འཚོ་བ། །གང་ཞིག་རང་མི་དང་སྤྱོད་དེ་བསགས་པ། །གང་ཞིག་དགྲ་བོ་ཟིལ་གནོན་དེ་ང་རྒྱལ། །གང་ཞིག་ང་རྒྱལ་བྲལ་དེ་དེས་པ་ཡིན། །གང་ཞིག་སྲེད་པས་མ་རྨོངས་དེ་དཔལ་ཡིན། །གང་
ཞིག་བག་ཕེབས་གྱུར་པ་དེ་མཛའ་བོ། །གང་ཞིག་དབང་པོ་དུལ་བ་དེ་དཔའ་བོ། །རྒྱལ་པོ་མེད་པར་འདུག་མི་བྱ། །བུད་མེད་གཙོ་བོ་བྱེད་པ་དང་། །གཙོ་མང་ཡོད་པར་གནས་མི་བྱ། །རྒྱལ་པོ་མཁས་ཡོད་གནས་པར་བྱ། །གཞོན་ནུའི་ཚེ་ན་ཕས་བསྲུངས་ལ། །ལང་ཚོའི་ཚེ་ན་ཁྱོས་བསྲུངས་ཤིང་། །རྒན་
པའི་ཚེ་ན་བུས་བསྲུངས་པས། །བུད་མེད་རང་དགར་གནས་མ་ཡིན། །གཅེར་བུའི་ཁྲུས་དང་གླང་པོ་མྱོས། །བ་ནི་དང་པོ་བེའུ་སྐྱེས་པ་དང་། །ཆུ་མེད་པ་ཡི་སྦལ་པ་དག །རིང་དུ་ཡོངས་སུ་སྤང་བར་བྱ། །ནོར་གྱིས་གདུངས་ལ་གཉེན་མེད་བཤེས་ཀྱང་མེད། །འདོད་པས་གདུངས་ལ་འཇིགས་མེད་ངོ་ཚ་
མེད། །བཀྲེས་པས་གདུངས་ལ་སྟོབས་མེད་མདངས་ཀྱང་མེད། །ནད་ཀྱིས་གདུངས་ལ་གཉིད་མེད་བདེ་བ་མེད། །རིགས་ནི་སྤྱོད་པས་སྟོན་པར་བྱེད། །ཡུལ་ནི་སྐད་ཀྱིས་སྟོན་པར་བྱེད། །བརྩེ་བར་རྟབ་རྟབ་བྱེད་པས་སྟོན། །ཁ་ཟས་ལུས་ཀྱིས་སྟོན་པར་བྱེད། །གང་ཞིག་ཡིད་དང་མཐུན་གྱུར་
པ། །རིང་ན་གནས་ཀྱང་གམ་ན་འདུག །གང་ཞིག་ཡིད་དུ་མི་འོང་བ། །གམ་ན་གནས་ཀྱང་ཐག་རིང་ཡིན། །མི་ནི་སྨྲ་སྤོབས་ཞན་པའི་རིག་པ་དང་། །བསྟན་བཅོས་སྐྱེས་བུ་ངན་པའི་ལག་གནས་པ། །ལོང་བའི་ཆུང་མ་གཟུགས་བཟང་ལྟ་བུ་སྟེ། །ལུས་ཅན་དགའ་བ་སྐྱེད་པར་བྱེད་མ་
ཡིན། །ནོར་ནི་རི་བྲགས་ཀུན་ན་མེད། །མུ་ཏིག་ཉ་རྣམས་ཕལ་ལ་མེད། །ནགས་ཚལ་ཀུན་ལ་ཙན་དན་མེད། །དམ་པ་ཀུན་ན་ཡོད་པ་མིན། །རྐང་གཉིས་པ་ལ་མངོན་སུམ་ཕྱུགས། །བླུན་པོ་ཡོངས་སུ་སྤང་བར་བྱ། །མི་མངོན་པ་ཡི་ཚེར་མ་ལྟར། །ཚིག་གི་ཟུག་རྔུས་གནོད་

203-1-136b

པ་སྐྱེད། །མཁས་པས་རྟག་ཏུ་བུ་དག་ནི། །རིག་པ་སྣ་ཚོགས་ལ་སྦྱར་བྱ། །མཁས་ཤིང་བློ་ནི་ཕུན་ཚོགས་ངན། །རྟག་ཏུ་མཆོད་པ་ཉིད་དུ་འགྱུར། །གང་ཞིག་གཞོན་ཚེ་རིག་མི་སློབ། །ཕ་དགྲ་མ་ནི་ཞེས་དགྲ་ཡིན། །ངང་པའི་ནང་ན་ཆུ་སྐྱར་ལྟར། །མང་པོའི་ནང་ན་མཛེས་མ་ཡིན། །
གལ་ཏེ་བློ་རྒྱ་ཆེ་འདོད་ན། །ཚིགས་བཅད་དམ་ནི་དེ་ཡི་ཕྱེད། །རྐང་པའམ་ཡི་གེ་བསླབས་པ་ཡིས། །ཉི་མ་དོན་མེད་མི་བྱའོ། །གཟུགས་དང་ལང་ཚོ་ཕུན་ཚོགས་ཤིང་། །རིགས་མཐོ་བ་ལས་བྱུང་གྱུར་ཀྱང་། །རིགས་དང་བྲལ་ན་མི་མཛེས་ཏེ། །ཀིང་ཤུ་ཀ་ཡི་མེ་ཏོག་
ལྟར། །བྲིད་པ་ལས་ནི་ཉེས་པ་འབྱུང་། །བརྡེག་པ་ལས་ནི་ཡོན་ཏན་མང་། །དེ་བས་བུ་དང་སློབ་མ་ལ། །བརྡེག་པར་བྱ་ཡིས་བྲིད་མི་བྱ། །ལོ་ལྔའི་བར་དུ་བྲིད་བྱ་སྟེ། །ལོ་བཅུའི་བར་དུ་བརྡེག་པར་བྱ། །ལོ་ནི་བཅུ་དྲུག་ལོན་པ་དང་། །བུ་ལ་མཛའ་བ་བཞིན་དུ་སྤྱད། །དྲི་རབ་
བཟང་ཞིང་མེ་ཏོག་རྒྱས། །ཤིང་གཅིག་གིས་ཀྱང་ནགས་སུ་ནི། །ནགས་དེ་ཐམས་ཅད་བསྒོས་པར་འགྱུར། །རིགས་ལ་བུ་བཟང་དེ་དང་འདྲ། །རང་བཞིན་བཟང་ཞིང་རིགས་ལྡན་པ། །བུ་ནི་བཟང་པོ་གཅིག་པོ་ཡིས། །རིགས་ནང་སྐྱེས་བུ་སེང་གེ་དེ། །ཟླ་བ་ལྟ་བུར་གསལ་བྱེད་
ཡིན། །ཤིང་སྐམ་སྡོང་བུ་གཅིག་པུ་ཞིག །མེ་ཡིས་ཚིག་པར་གྱུར་པ་ན། །ནགས་དེ་ཐམས་ཅད་སྲེག་པ་ཡིན། །རིགས་ནང་བུ་ངན་དེ་དང་འདྲ། །ཚིག་ཙམ་ཀླག་པ་ཉིད་དང་ནི། །གང་གཞན་བསྟན་བཅོས་ལ་དཔྱོད་དང་། །ཐམས་ཅད་ཉོན་མོངས་ལྡན་པ་སྟེ། །བྱ་བར་
མ་རྨོངས་གང་དེ་མཁས། །ལ་ལ་མི་ཤེས་པས་ཉམས་ལ། །ཁ་ཅིག་བག་མེད་པ་ཡིས་ཉམས། །ཁ་ཅིག་རང་བཞིན་གྱིས་ཉམས་ལ། །ལ་ལ་ཉེས་པ་ཉིད་ཀྱིས་ཉམས། །ཤེས་ལྡན་མཁས་པ་གཞན་ཡིན་ལ། །བསྟན་བཅོས་མཁས་པའང་གཞན་ཡིན་ཞིང་། །
གཞན་དག་གནས་དེ་མི་ཤེས་པས། །གཞན་དུ་འཇིག་རྟེན་ཉོན་མོངས་སོ། །གང་གིས་ཡི་གེ་གཅིག་ཙམ་ཞིག །བླ་མས་སློབ་མ་ལ་བསླབས་ན། །གང་བྱིན་བུ་ལོན་མེད་གྱུར་པའི། །རྫས་དེ་ས་སྟེང་ཡོད་མ་ཡིན། །བླ་མ་གང་ནི་ཡི་གེ་གཅིག །སྟེར་ལ་ཕྱག་ནི་མ་བྱས་ན། །ཁྭ་

203-1-137a

ཡི་སྐྱེ་གནས་བརྒྱར་སྐྱེ་ནས། །སྨེ་ཤ་ཅན་དུ་སྐྱེ་བར་འགྱུར། །རིག་པ་གླེགས་བམ་ལ་བསླབས་ཤིང་། །བླ་མའི་ཐད་ནས་མ་བསླབས་ན། །འཕྱོན་མའི་བུད་མེད་སྦྲུམ་མ་བཞིན། །ཚོགས་ཀྱི་ནང་ན་མཛེས་མ་ཡིན། །བྲམ་ཟེའི་བླ་མ་མེ་ཡིན་ལ། །རིགས་
ཀྱི་བླ་མ་བྲམ་ཟེ་ཡིན། །ཆུང་མའི་བླ་མ་ཁྱིམ་ཐབ་ཡིན། །ཀུན་གྱི་བླ་མ་གློ་བུར་ལྷགས། །མཛའ་བོ་ལ་ལ་ཕྲེང་བ་འདྲ། །མཛའ་བོ་ལ་ལ་ཤིང་བལ་འདྲ། །མཛའ་བོ་ལ་ལ་ལྷུན་པོ་འདྲ། །མཛའ་བོ་ལ་ལ་ས་གཞི་འདྲ། །མཛའ་བོ་ཕྲེང་བ་འདྲ་སྤང་ཞིང་། །ཤིང་བལ་དང་འདྲའི་མཛའ་
བོ་དང་། །ལྷུན་པོ་དང་འདྲའི་མཛའ་བོའང་སྤང་། །ས་གཞི་དང་འདྲའི་མཛའ་བོ་བསྟེན། །པདྨ་དམར་བ་ཉིད་དང་ནི། །དམ་པ་གཞན་དོན་བྱེད་ཉིད་དང་། །དམ་པ་མིན་པའི་བརྩེ་མེད་ཉིད། །གསུམ་པོ་རྣམ་གསུམ་ངང་གིས་འགྲུབ། །ཚེར་མ་རྣོ་བར་གྱུར་པ་སུ་ཡིས་བྱས། །རི་དྭགས་བྱ་
ཡི་རི་མོ་སུ་ཡིས་བྲིས། །བུ་རམ་ཤིང་མངར་ནིམ་པ་ཁ་བ་དག །འདི་དག་ཐམས་ཅད་ངོ་བོ་ཉིད་ཀྱིས་འགྲུབ། །གང་ན་སྐྱེ་བོ་གླང་པོ་མྱོས་ལྟར་དྲེགས། །གང་ན་རྟ་དང་བོང་བུ་ཁྱད་པར་མེད། །གང་ན་མཆིང་བུ་མ་རྒད་དབྱེར་མེད་པ། །དེ་རུ་ཡོན་ཏན་ཅན་གནས་ཅི་རུ་རུང་། །ཡུལ་
གང་ན་ནི་ཡོངས་རྟོགས་མཁས་པ་མེད། །རྒྱ་མཚོ་ལས་བྱུང་ནོར་བུ་དེར་མི་བྲིན། །ནོར་བུ་ཆུ་ཤེལ་རིན་ཐང་ཆེ་བ་ལ། །བ་ལང་རྫི་ནི་ཕུལ་གསུམ་སྦྱིན་ཞེས་ཟེར། །ཁྭ་ཡི་ཚོགས་ནང་ངང་པ་མཛེས་མ་ཡིན། །ཝ་ཡི་ཚོགས་ནང་སེང་གེ་མཛེས་མ་ཡིན། །བོང་བུའི་ཚོགས་ནང་རྟ་མཆོག་
མཛེས་མ་ཡིན། །སྐྱེས་བུ་བླུན་ནང་མཁས་པ་མཛེས་མ་ཡིན། །ཡོན་ཏན་ཤེས་པའི་ནང་དུ་ཡོན་ཏན་འགྱུར། །ཡོན་ཏན་མེད་ལ་དེ་ཉིད་སྐྱོན་དུ་འགྱུར། །ཆུ་བོའི་ཆུ་ནི་ཤིན་ཏུ་ཞིམ་པ་དག །རྒྱ་མཚོར་ཕྱིན་ན་བཏུང་དུ་མི་རུང་འགྱུར། །ཡོན་ཏན་འབད་པས་འགྲུབ་པ་ཡིན། །འབད་པ་
བདག་ཉིད་ལ་གནས་པས། །འབད་ནས་ཡོན་ཏན་མི་སློབ་པར། །གཞན་དག་ཡོན་ཏན་ལྡན་ཞེས་སྒྲོགས། །ཡོན་ཏན་ཀུན་དུ་མཆོག་བྱེད་ཀྱི། །ཕ་མེས་རིགས་ནི་དོན་མེད་ཡིན། །ཁྱབ་འཇུག་ལ་ནི་སྐྱེ་བོ་རྣམས། །ཕྱག་འཚལ་ནོར་ལྷ་ལ་མ་ཡིན། །ཆོས་ཀྱི་རྩེ་མོ་རྒྱལ་པོ་སྟེ། །ཆོས་

203-1-137b

རྩ་དགེ་སློང་བྲམ་ཟེ་ཡིན། །རྩ་བ་ལས་ནི་འབྲས་བུ་སྐྱེ། །དེ་བས་རྩ་བ་གནོད་མི་བྱ། །ཆོས་ཀྱི་འབྲས་བུ་རྒྱལ་པོ་ཡིན། །མེ་ཏོག་དགེ་སྦྱོང་བྲམ་ཟེ་ཡིན། །མེ་ཏོག་ལས་ནི་འབྲས་བུ་སྐྱེ། །དེ་ཕྱིར་མེ་ཏོག་ལ་མི་གཙེ། །རྒྱལ་པོ་ཤིང་དེ་དགེ་སྦྱོང་རྩ་བ་ཡིན། །བློན་པོ་ཡལ་ག་གྲོང་མི་
འདབ་མ་ཡིན། །རྩ་བ་བསྲུངས་ན་ཤིང་དེ་མི་ཉམས་པ། །དེ་ཕྱིར་དགེ་སྦྱོང་བྲམ་ཟེ་ལེགས་པར་བསྲུང་། །ཐམས་ཅད་གཞན་ལ་རག་ལས་གྱུར་ཀྱང་ན། །མི་ཡི་དབང་པོས་དགེ་སྦྱོང་བྲམ་ཟེ་བསྲུང་། །ཆོས་དང་ནོར་དང་གྲོགས་དང་སྙན་པ་དག །དགེ་སྦྱོང་བྲམ་ཟེ་ལེགས་པར་
བསྐྱངས་ལས་འཐོབ། །རྒྱལ་པོ་ཙ་ན་ཀ་ཡི་བློས། །བསྟན་བཅོས་ཐམས་ཅད་ལེགས་བརྟགས་ནས། །ལོངས་སྤྱོད་ལྷ་ཡིས་བསྟངས་པ་དང་། །ཁྱད་པར་ཤེས་པ་ཉིད་དུ་འགྱུར། །བློ་ལྡན་མཁས་པ་ཐར་པའི་ཕྱིར། །གང་གིས་བསྟན་བཅོས་འདི་བསླབ་ཅིང་། །བསླབས་པས་འདི་
ལ་གནས་གྱུར་ན། །དཔལ་དང་དགེ་བ་ཐོབ་པར་འགྱུར། །དེ་ལ་དགྲ་ཡིས་མི་ཚུགས་ཤིང་། །ནད་ཀྱིས་འཇིགས་པ་ཡོད་མ་ཡིན། །ནང་པར་དང་ནི་དགོངས་ཀའི་ཚེ། །རྒྱལ་པོས་འདི་ནི་བཟླ་བར་བྱ། །གང་གིས་འདི་དོན་ལེགས་བསམས་ནས། །ཇི་བཞིན་རྗེས་སུ་བསྒྲུབས་
གྱུར་ན། །དེས་ནི་རྒྱལ་སྲིད་ཡུལ་འཁོར་ཡང་། །རྟག་ཏུ་འཕེལ་བ་ཉིད་དུ་འགྱུར། །དཔལ་ལྡན་པ་ལ་ཀ་ཏྱའི་བུས། །ལུགས་ཀྱི་བསྟན་བཅོས་ལས་བཏུས་པ། །ཐོས་པའི་ནོར་མེད་ས་སྟེངས་ན། །ལོང་བ་ཡིན་སྙམ་བསམས་ཏེ་བྱས། །ཙ་ན་ཀའི་རྒྱལ་པོའི་ལུགས་ཀྱི་བསྟན་
བཅོས་ལས་ལེའུ་བརྒྱད་པ་རྫོགས་སོ།།      །།རྒྱ་གར་གྱི་མཁན་པོ་པྲ་བྷཱ་ཀ་ར་ཤྲཱི་མི་ཏྲ་དང་། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་གཏན་ལ་ཕབ་པ།།      ༄༅༅། །རྒྱ་གར་སྐད་དུ། ནཱི་ཏི་ཤཱསྟྲ། བོད་སྐད་དུ། ལུགས་ཀྱི་བསྟན་བཅོས།
ཐམས་ཅད་མཁྱེན་པ་ལ་ཕྱག་འཚལ་ལོ། །དོན་གྱི་བསྟན་བཅོས་བྱེ་བྲག་ལས། །བསྟན་བཅོས་བདག་ལ་ཕན་པ་དང་། །མི་རྣམས་བློ་ནི་བསྐྱེད་བྱའི་ཕྱིར། །མ་སུ་རཀྵས་བསྡུས་ཏེ་བཤད། །འཇིག་རྟེན་དག་ནི་དགའ་བ་བསྐྱེད་པ་དང་། །སྤྱོད་པ་ངན་པ་རྣམས་ནི་སྤང་ཕྱིར་དང་། །ཤེས་

203-1-138a

རབ་བསླབ་ཅིང་ཡང་དག་དོན་སྒྲུབ་ཕྱིར། །བློ་སྐྱེད་ཕྱིར་ནི་ཚིགས་བཅད་ཚུལ་འདི་བརྗོད། །དངོས་པོ་ཀུན་ལ་མཁས་ཤིང་གོམས་པར་བྱ། །ཆོས་སྤྱད་གཞན་གྱི་མངོན་སུམ་བསྲུང་བར་བྱ། །ཁྲོ་བ་སྤང་ཞིང་མཁས་པ་བསྟེན་པར་བྱ། །བདེན་པར་སྨྲ་ཞིང་སྒྲ་
ཉམས་བརྗོད་མི་བྱ། །བྲམ་ཟེ་བཀུར་ཞིང་ངན་ལའང་བརྙས་མི་བྱ། །རྒྱལ་པོས་འཇིགས་ཤིང་སྤྱོད་པ་སྦ་བར་བྱ། །དགྲ་བོས་ཤེས་བྱ་མི་རྣམས་བརྙས་མི་བྱ། །དྲེགས་པ་སྤང་ཞིང་སྨད་དངོས་བསྟེན་མི་བྱ། །ཕན་པའི་ཟས་བསྟེན་གྲོགས་པོ་མཉེས་པར་བྱ། །མེ་ལ་མི་འགོམ་གཡུལ་
ལ་བལྟ་མི་བྱ། །སྙན་ངན་མཉན་བྱ་སྲོག་ཆགས་གནོད་མི་བྱ། །བྱ་མིན་མི་བྱ་ཁྲོན་པ་བགོམ་མི་བྱ། །རིག་པ་བླང་ཞིང་སྦྲུལ་དང་རྩེ་མི་བྱ། །ཅི་ནུས་སྦྱིན་ཞིང་དམན་ལ་བསླང་མི་བྱ། །བདག་ལ་མི་བསྟོད་གཞན་ལ་སྨད་མི་བྱ། །དེ་ཉིད་ཤེས་བྱ་མཚན་མོ་རྒྱུ་མི་བྱ། །ཞགས་
པ་དང་བྲལ་གླང་པོའི་རྗེས་མི་འགྲོ། །ལྷམ་མེད་མི་འགྲོ་གྲོགས་མེད་ལམ་མི་འགྲོ། །སྨྱོ་བྱེད་བློ་ངན་རིང་དུ་སྤང་བར་བྱ། །ཆུང་མ་མ་རུངས་སྤང་ཞིང་ཡིད་འོང་བསྟེན། །མ་འདྲིས་པ་དང་ནམ་ཡང་མཐུན་མི་འཇུག །རྒྱལ་པོའི་བྲན་མོ་འདོད་སྤང་མའི་ངག་ཉན། །གང་དང་ལྷན་ཅིག་ཞེ་འགྲས་
ཡོང་མི་བྱ། །བེའུ་གཞོན་པ་རིང་དུ་སྤང་བར་བྱ། །བུད་མེད་རྣམས་ལ་ནམ་ཡང་ཡིད་མི་བརྟན། །ཆུ་བོ་རྒལ་དཀའ་རྒྱ་ཆེར་འཇུག་མི་བྱ། །ཆང་འཐུངས་ར་རོ་ཤིང་མཐོར་འཛེག་མི་བྱ། །དོན་རྣམས་བསྒྲུབ་ཅིང་ཆོས་དང་ནོར་མི་སྤང་། །གང་དུ་བསྲུང་བ་མེད་པའི་ཡུལ་དུ་ཡང་། །
ཀུན་གྱི་གསང་ཚིག་ནམ་ཡང་མི་སྨྲ་སྟེ། །ཀུན་ལ་ཡིད་བརྟན་མི་བྱ་ལེགས་པར་རྟག །ཁར་རྗེར་མི་གཏང་སྐྱེས་བུའི་རྩོལ་ལ་འབད། །གསང་བོར་སྨྲ་ཞིང་འབྲེལ་མེད་ཚིག་མི་བརྗོད། །གློ་བུར་ལྕག་མདུན་དུས་སུ་ལེགས་འོངས་བརྗོད། །མི་དང་ལྷ་དང་བྲམ་ཟེ་རྣམས་ལ་མཆོད། །
བསོད་ནམས་ཡུལ་ནི་རྟག་ཏུ་བསྟེན་པར་བྱ། །རྟག་ཏུ་ཁྲུས་དང་གོས་དཀར་གྱོན་ལ་འགྲུས། །ཧ་ཅང་བུད་མེད་ཆགས་མིན་ཞུ་ནས་ཟ། །ཤེས་ལྡན་གང་ཞིག་དེ་ལྟར་བྱེད་པ་ནི། །འཚོ་བ་ནད་མེད་ཚེ་རིང་ཤེས་པར་བྱ། །མ་སུ་རཀྵས་བྱས་པའི་ལུགས་ཀྱི་བསྟན་བཅོས་

203-1-138b

ལས་ལེའུ་དང་པོའོ།།      །།བདག་གིས་གསང་དང་གཞན་གྱིས་གསང་། །བུ་གཅིག་གཅེས་བཞིན་བསྲུང་བྱ་སྟེ། །ས་བཞིན་ཀུན་ལ་སྙོམས་བྱས་ནས། །མི་རྣམས་དགའ་བས་རབ་ཏུ་དགའ། །གནད་ཀྱི་ཚིག་རྣམས་མི་བརྗོད་ཅིང་། །གནད་དུ་ཕོག་འགྱུར་
མི་བསྒྲགས་ཏེ། །གཞན་གྱི་གནད་རྣམས་སྨྲ་བ་ནི། །སྐྱེས་བུས་མཚོན་ཆ་བཞིན་ཞེས་བྱ། །སྙིང་ལ་ཚམ་ཚོམ་མེད་བྱས་ཏེ། །བུ་རམ་ཆུ་བཞིན་ཁ་ནས་བརྗོད། །ཞེ་འགྲས་ཡིད་ཆེས་བྱས་ནས་ནི། །དེ་ནས་ངག་གམ་མཚོན་གྱིས་གཞོམ། །དགྲ་རྣམས་སྙན་པ་བརྗོད་
ཀྱང་ནི། །བློ་ལྡན་བཏང་སྙོམས་མི་བྱའོ། །དེ་ཉིད་མཐར་ནི་གནོད་བྱེད་དེ། །ཇི་ལྟར་དུག་གནོད་མི་བཟད་བཞིན། །རང་སྟོབས་ཆུ་བོ་མི་བརྟན་ཏེ། །ཆུ་བོའི་རྒྱ་ཁྱོན་ཡོངས་བརྟགས་ནས། །དེ་བཞིན་དུས་སུ་བརྒལ་བྱ་སྟེ། །རང་དོན་དེ་བཞིན་རྗེས་སུ་བསམ། །ཇི་སྲིད་
འཇིགས་པ་མ་བྱུང་བ། །དེ་སྲིད་བར་དུ་འཇིགས་པར་བྱ། །འཇིགས་པ་མངོན་སུམ་བྱུང་ན་ནི། །འཇིགས་པ་བཏང་སྟེ་བརྡེག་པར་བྱ། །དོན་ནི་ཆུ་སྐྱར་བཞིན་དུ་བསམ། །ཕ་རོལ་གནོན་པ་སེང་གེ་བཞིན། །བྱི་བའི་དྲི་ཚོར་བྱི་ལ་ལྟར། །ཤེས་ནས་ཤིན་ཏུ་བརྟུལ་
བར་བྱ། །སེང་གེའི་གཅིག་དང་ཆུ་སྐྱར་གཅིག །བྱ་གག་གི་ནི་བསླབ་པ་བཞི། །བྱ་རོག་ལྔ་དང་ཁྱི་ཡི་དྲུག །བོང་བུའི་བསླབ་པ་གསུམ་རྣམས་སོ། །བྱ་བ་མང་ཉུང་གང་ཡང་རུང་། །སྐྱེས་བུ་གང་ཞིག་བྱེད་འདོད་པ། །རྟོག་མེད་བྱ་བ་ཀུན་བསལ་ཏེ། །སེང་གེའི་
གཅིག་ཅེས་གྲགས་པ་ཡིན། །དབང་པོ་རྣམས་ནི་རབ་བསྡམས་ཤིང་། །ཡུལ་དང་དུས་ལ་ཅི་རིགས་པར། །བྱ་བ་རྣམས་ནི་བརྟག་དཔྱོད་དེ། །སྐྱེས་བུ་མཛངས་པ་ཆུ་སྐྱར་བཞིན། །ཐོ་རངས་ལྡང་དང་འཐབ་པ་དང་། །གཉེན་ལ་ཁ་ཟས་སྙོམས་པར་འགྱེད། །མོ་ལ་རབ་གནོན་
ཉེ་བར་སྤྱོད། །ཁྱིམ་བྱའི་བསླབ་པ་བཞི་ཡིན་ནོ། །མི་མངོན་འཁྲིག་དང་རྔོམ་པ་དང་། །དུས་སུ་གནས་ནི་འཆའ་བ་དང་། །བག་ཡོད་པ་དང་ཡིད་མི་ཆེས། །འདི་ནི་བྱ་རོག་བསླབ་པ་ལྔ། །མང་དུ་ཟ་དང་ཅུང་ཟད་ཆོག །ལེགས་པར་གཉིད་ལོག་མྱུར་དུ་སད། །དཔའ་

203-1-139a

ལ་སྙིང་ཉེ་བརྟན་པ་སྟེ། །ཁྱི་ཡི་སྤྱོད་པ་དྲུག་ཡིན་ནོ། །ཁལ་གྱིས་བཀལ་ན་འདེགས་པ་དང་། །གྲང་དང་ཚ་བས་མི་སྐྱོ་དང་། །རྟག་ཏུ་ཆོག་ནི་ཤེས་པ་སྟེ། །བོང་བུའི་སྤྱོད་པ་གསུམ་ཡིན་ནོ། །དེ་ལྟར་ཉི་ཤུ་ཤེས་བྱ་སྟེ། །སྐྱེས་བུ་གང་ཞིག་སྤྱོད་
འགྱུར་བ། །འདི་ནི་དགྲ་ལས་རྒྱལ་འགྱུར་ཏེ། །དགྲ་རྣམས་ཀུན་གྱིས་ཚུགས་མི་འགྱུར། །མ་སུ་རཀྵས་བྱས་པའི་ལུགས་ཀྱི་བསྟན་བཅོས་ལས་ལེའུ་གཉིས་པའོ།།      །།ཇི་སྲིད་དུས་ལ་མ་བབ་པར། །དགྲ་ནི་ཕྲག་གོང་བཀུར་བྱ་སྟེ། །དེ་བཞིན་དུས་སུ་ཕྱིན་
གྱུར་ན། །རྡོ་ལ་རྫ་མ་བསྣུན་བཞིན་གཞོམ། །དམན་ཞིང་སྙིང་རྗེའི་སྐད་བརྗོད་ཀྱང་། །དགྲ་ནི་གཏང་བར་མི་བྱའོ། །དེ་ལ་སྙིང་རྗེ་མི་བྱ་ཞིང་། །སྔོན་ཆད་གནོད་པ་བྱེད་པ་གཞོམ། །བུ་ལོན་མེ་ཡི་ལྷག་མ་དང་། །དེ་བཞིན་དགྲ་ཡི་ལྷག་མ་ནི། །ཡང་དང་ཡང་དུ་འཕེལ་
འགྱུར་བས། །དེ་བས་ལྷག་མ་གཞག་མི་བྱ། །བྱས་ལ་ལན་དུ་ཕན་བྱ་སྟེ། །འཆི་བ་བྱེད་ལ་སླར་ཡང་གཙེ། །དེ་ལ་ཉེས་པར་མི་ལྟ་ཞིང་། །མ་རུངས་བྱེད་ལ་མ་རུངས་བྱ། །ཕོངས་པའི་དོན་དུ་ནོར་རྣམས་བསྲུང་། །ནོར་བས་ཆུང་མ་བསྲུང་བར་བྱ། །ནོར་དང་ཆུང་མ་
གཉིས་པས་ཀྱང་། །ཐམས་ཅད་དོན་དུ་བདག་བསྲུང་ངོ་། །ལྐོག་ན་འཕྱ་བ་བྱམས་བྱེད་ཅིང་། །མངོན་སུམ་སྙན་པར་སྨྲ་བྱེད་པ། །དེ་འདྲའི་གྲོགས་པོ་སྤང་བྱ་སྟེ། །བུམ་ཁའི་འོ་མའི་དུག་བཞིན་ནོ། །བརྐམ་ཆགས་སྦྱིན་པ་མི་སྟེར་དང་། །ཁེངས་པ་ཐལ་མོ་མི་
སྦྱོར་དང་། །དེ་འདྲའི་གླེན་པའི་རྗེས་མཐུན་པར། །ཇི་ལྟ་དེ་ལྟར་ཐབས་ལ་མཁས། །དགྲ་ལ་ཐལ་སྦྱར་ཡིད་ཆེས་དང་། །སྤྱི་བོས་གཏུགས་ཏེ་གུས་བྱ་ཞིང་། །གདུང་གྱུར་མཆི་མ་འཛག་སོགས་བྱ། །འབྱོར་པར་འདོད་པས་དེ་ལྟར་སྤྱད། །དགྲ་བོ་སྟོབས་
ལྡན་རྗེས་མཐུན་བྱ། །སྟོབས་ཆུང་དགྲ་བོ་བརླག་བྱ་སྟེ། །མཐུ་སྟོབས་མཉམ་པའི་དགྲ་ལ་ནི། །མཐུན་མིན་དུལ་མིན་བྱ་བའོ། །གང་གིས་གདུང་འགྱུར་དེ་མི་བྱ། །གང་གིས་ཞུམ་འགྱུར་ཚུལ་མི་སྤྱད། །མཐར་མི་ཕྱིན་པའི་ལས་མི་བརྩམ། །མགོ་ལྟུང་མི་འགྱུར་

203-1-139b

བརྡེག་མི་བྱ། །ཕ་རོལ་མི་རྒལ་དེ་མི་བརྩད། །གང་དུ་དགྲ་རྣམས་དེར་འདུག་མིན། །ཤིང་རྩ་མ་ཕྱུང་ཕྱུང་བ་མིན། །གཉིས་སུ་མ་གྱུར་བཅད་པ་མིན། །རྒན་པོ་མེད་པ་ཚོགས་པ་མིན། །ཆོས་མི་སྟོན་གང་རྒན་པ་མིན། །གང་ལ་བདེན་མེད་ཆོས་མ་ཡིན། །ཚིག་
དོན་མ་འབྲེལ་དོན་མ་ཡིན། །ཚེར་མ་གཏིང་དུ་ཟུགས་པ་དང་། །ཆོས་ལས་ཉམས་པ་ཉིད་དང་ནི། །དགྲ་དང་ཤ་ཁོན་ཞུགས་པ་གསུམ། །རྩ་ནས་ཕྱུང་བ་བདེ་བ་ཡིན། །གཏན་དུ་དྲང་པོ་མི་བྱ་སྟེ། །ནགས་སུ་སོང་ལ་ཡོངས་ལྟོས་དང་། །དེར་ནི་ཤིང་
དྲང་གཅོད་འགྱུར་ཏེ། །ཡོན་པའི་ཤིང་ནི་གནས་ལ་ལྟོས། །གང་དང་གང་ནི་ཅི་བསམས་པ། །དེ་དང་དེ་ལ་ཕན་བསམས་ཏེ། །རྗེས་སུ་འཇུག་པའི་མཁས་པ་ནི། །མྱུར་དུ་བདག་གི་དབང་དུ་འགྱུར། །འདི་ལྟར་གསད་བྱ་གང་ཡིན་དེ། །མི་བརྗོད་མ་ཚོར་གསད་བྱ་
སྟེ། །རི་དྭགས་རྒྱལ་པོ་རབ་འཁྲུགས་པས། །ལུས་བསྐུམས་ན་ནི་གནོད་བྱེད་ལྟར། །སྙིང་ལ་ཁོན་དུ་དམ་བཟུང་ནས། །གཞན་ལ་མ་ལྟོས་སྤྱད་པར་བྱ། །བློ་ལྡན་བཟོད་དང་ལྡན་བྱས་ནས། །གཞན་གྱི་སྐྱོན་ནི་ཡང་མི་བགྲང་། །དཔེར་ན་ཁུ་བྱུག་གྲོག་མ་དང་། །
དངུལ་རྡོ་ལྟ་བུའི་མདོག་ལྡན་པའི། །ལག་འགྲོའི་རྐང་མཐིལ་གང་ཡིན་དེས། །དུས་མ་ཡིན་པར་ཉམས་ཀྱང་ནི། །གང་ཞིག་བློ་གྲོས་ལ་བརྟེན་ཏེ། །གདེངས་ཀ་གོ་འཕང་མི་སྨད་ཅིང་། །དེ་ནི་དུག་ཉམས་མི་འགྱུར་ལྟར། །སྐྱེས་བུ་ཉམས་ཀྱང་གོ་འཕང་མཐོ། །ཅི་སྲིད་
དགྲ་བོ་ཕ་རོལ་ལ། །འདིར་ནི་པུས་བཙུགས་གདུང་བྱ་སྟེ། །སྐྱེ་བོ་དམ་པ་རྣམས་ལ་ནི། །བསྙེན་བཀུར་སྣ་ཚོགས་སྤྱོད་པ་དང་། །རྔོན་པའི་སྤྱོད་ལམ་འཇབ་བུ་ཡིས། །རི་དྭགས་དྲུང་དུ་ཕྱིན་ནས་ནི། །དུག་བསྒོས་མདའ་ཡིས་བསྣུན་བཞིན་བྱ། །མ་སུ་རཀྵས་བྱས་པའི་
ལུགས་ཀྱི་བསྟན་བཅོས་ལས་ལེའུ་གསུམ་པའོ།།      །།བདག་དོན་འབད་པས་བྱ་བ་སྟེ། །གཞན་དོན་དེ་བཞིན་བསམ་མི་བྱ། །བདག་གཞན་དོན་རྣམས་སྤངས་པས་ནི། །མཛངས་པ་ཐོབ་པར་མི་འགྱུར་རོ། །གཞན་གྱི་དོན་ལ་མི་བརྟུལ་ཏེ། །རང་གི་ལས་ལ་

203-1-140a

བརྩོན་པས་བྱ། །མིག་སྨན་སྤྱད་ན་ཟད་སྣང་ཞིང་། །གྲོག་མ་ཡིས་ནི་བསགས་པ་དང་། །དེ་བཞིན་དུ་ནི་མཁས་པ་ཡིས། །བསགས་པ་ཉུང་ངུ་སྤྱད་པར་བྱ། །མ་རྨོངས་ཐམས་ཅད་རྨོངས་བྱ་ཞིང་། །རྨོངས་རྣམས་རྟག་ཏུ་མགོ་བསྐོར་བྱ། །
ཡིད་མི་ཆེས་ལ་ཡིད་ཆེས་བྱ། །བདག་ཉིད་སྦ་ཞིང་གཞན་རྗེས་བསམ། །ཉི་མ་དོན་མེད་མི་བྱ་སྟེ། །སྦྱིན་པ་ཁ་ཏོན་ལས་རྣམས་བྱ། །ཇི་ལྟར་སྲིན་འོད་ཁ་ཆུ་ཡིས། །གྲོག་མ་བསླུས་པ་བཞིན་དུ་བྱ། །དམ་པའི་སྐྱེ་བོ་དགའ་བར་བྱ། །མི་སྲུན་སྐྱེ་བོ་བསྟེན་མི་བྱ། །སྐྱེ་བོ་
མ་རུངས་ཡིད་མི་བརྟན། །སྐྱེ་བོ་དགྲ་ལ་དཔའ་བརྟན་བྱ། །བླ་མའི་སྐྱེ་བོ་བཟོད་པར་བྱ། །སྨད་འཚོང་མ་ནི་བྲིད་པར་བྱ། །གང་གིས་དེ་དག་མ་ལུས་པར། །ཐམས་ཅད་ཡོངས་སུ་ཤེས་གྱུར་པ། །དེས་ནི་བླང་དོར་དཔྱད་པ་ཡིས། །འཇིག་རྟེན་འཇིག་རྟེན་ཤེས་
པ་ཡིན། །གང་དང་གང་ལ་ནོར་ལྡན་པའི། །སྐྱེས་བུ་ལས་ལ་ཆགས་འགྱུར་བ། །གང་དང་གང་ལ་དགའ་བའི་ཚིག །དེ་དང་དེ་ཡི་ཡོན་ཏན་བརྗོད། །ཡིད་མི་ཆེས་ལ་ཡིད་མི་བརྟེན། །ཡིད་ཆེས་ལྷག་པར་ཡིད་བརྟན་མིན། །ཡིད་ཆེས་པ་ལས་འཇིགས་པ་འབྱུང་། །རྩ་
བ་ལས་ཀྱང་གཅོད་པར་བྱེད། །འབྱུང་པོ་ཀུན་ལ་ཡིད་མི་བརྟན། །ཀུན་ལ་ཡིད་ཆེས་བྱ་བའང་མིན། །གང་གི་རང་བཞིན་སྦ་བྱ་ཞིང་། །གཞན་གྱི་རང་བཞིན་ཤེས་པར་གྱིས། །གཞན་གྱི་བུད་མེད་དུག་ཡིན་ཏེ། །དེ་བཞིན་ཆུང་མ་གཞན་འགྲོ་དང་། །གཉིས་པོ་དེ་ལ་ཡིད་
རྟོན་པའི། །མི་རྣམས་འཆི་སྒོར་བསྙེན་པ་ཡིན། །བུད་མེད་རྒྱལ་པོ་སྦྲུལ་རྣམས་དང་། །ཁ་དོན་དག་དང་དགྲ་རྣམས་དང་། །ཚེ་དང་ལོངས་སྤྱོད་དག་ལ་ནི། །ཤེས་ལྡན་རྣམས་ཀྱིས་ཡིད་བརྟན་མིན། །རིག་པ་འདོད་པས་མཁས་བརྟེན་བྱ། །ཤེས་པར་གྱུར་
པ་གཞན་སྟེན་བྱེད། །དེ་བས་ལས་རྣམས་ཐམས་ཅད་ནི། །ལུས་པ་མེད་པར་བསླབ་པར་བྱ། །སྡིག་པ་ཅན་ལ་ཡིད་མི་བརྟན། །བློ་ལྡན་བདག་ཅེས་ཟེར་ཡང་ཡིན། །གང་ཕྱིར་དེ་ལ་ཡིད་ཆེས་མིན། །དེ་ཡི་འཚོ་བ་ཉམས་པར་འགྱུར། །གཤིན་རྗེ་གཤེད་པོ་འཆི་བ་དང་། །

203-1-140b

ས་འོག་རྒྱ་མཚོ་གླིང་རྣམས་དང་། །སྤུ་ཡི་སོ་དུག་སྦྲུལ་དག་ནི། །མི་བསྟེན་ཕྱོགས་གཅིག་བུད་མེད་ཡིན། །དགྲ་ཡི་ཕྱོགས་བྱེད་སྤང་བར་བྱ། །བདག་ལ་དགའ་བ་ཡོངས་སུ་བསྡུ། །ཀུན་ལ་བློ་ནི་ཡོད་པ་སྟེ། །ཡུན་རིང་བློ་ནི་དཀའ་བ་ཡིན། །མིག་འབྱེད་མིག་འཛུམས་ཙམ་ཡང་རུང་། །
དགྲ་ལ་མངོན་སུམ་བྱ་བ་མིན། །སྨོད་པ་ན་ཡང་འོན་པ་བཞིན། །དུས་བབ་རལ་གྲིས་བཅད་བཞིན་བྱ། །གང་དུ་ཆུ་ཡོད་ངང་པ་གནས། །ཆུ་སྐམས་མཚོ་ནི་འདོར་བར་འགྱུར། །ཆུ་ཡིས་གང་ན་ཕྱིར་གནས་བཞིན། །ངང་པ་ལྟ་བུའི་གྲོགས་མི་བརྟན། །རྒྱལ་པོ་སྨད་འཚོང་མ་དང་ནི། །དེ་བཞིན་ཉི་དུ་དམན་པ་
དང་། །གཡོག་འཁོར་རྣམས་ལ་རྟག་ཏུ་ཡང་། །ཧ་ཅང་གདུང་པར་མི་བྱའོ། །གང་གི་རྒྱུ་ལས་མྱ་ངན་དང་། །དར་དང་སྡུག་བསྔལ་ཉིད་དང་ནི། །ལུས་ཀྱི་གནོད་བྱེད་རྩ་བ་དེ། །གཅིག་གམ་ཅུང་ཟད་ཙམ་ཡང་རུང་། །མཁས་པས་སྤང་ཞིང་དོར་བར་བྱ། །གསེར་ནི་རྣམ་བཞིས་བརྟག་བྱ་སྟེ། །བདར་བཅད་བསྲེག་
དང་བརྡུང་བར་བྱ། །དེ་བཞིན་རྣམ་བཞིས་སྐྱེས་བུ་བརྟག །ཐོས་དང་ཚུལ་ཁྲིམས་རིག་ལ་སོགས། །ཐམས་ཅད་ཤེས་ཤིང་རིག་པར་བྱ། །ཀུན་ལ་དོགས་བྱ་དུས་ཤེས་ཀྱིས། །འཇིག་རྟེན་སེམས་ནི་བསྲུང་བྱ་སྟེ། །ཚིག་རྣམས་ཀུན་གྱིས་ཡིད་ཆེས་བྱ། །བདག་གི་གསང་ཚིག་གཞན་མི་
སྨྲ། །མ་སུ་རཀྵས་བྱས་པའི་ལུགས་ཀྱི་བསྟན་བཅོས་ལས་ལེའུ་བཞི་པའོ།།      །།བློན་པོ་བློ་ནི་ཕུན་སུམ་ཚོགས། །བསྟན་བཅོས་ཀུན་ལ་འཇིགས་མེད་ཅིང་། །དབང་མཛོད་སྟོབས་དང་ལྡན་པ་ནི། །མ་བསད་དེར་ནི་ཕྱིར་གསོད་འགྱུར། །ཡིད་ཆེས་སྐྱེས་བུ་
འཆི་འགྱུར་ཏེ། །སྨྱིག་མའི་འབྲས་བུ་བྱུང་བ་བཞིན། །ཡིད་ཆེས་ཞགས་པས་གསོད་འགྱུར་ཏེ། །ནགས་ན་གནས་པའི་རི་དྭགས་བཞིན། །མིག་རྩ་དམར་ཞིང་ཚིག་འཇམ་སྨྲ། །དགའ་བས་སེམས་ཅན་ཀུན་དང་མཐུན། །དོན་རྣམས་ཀུན་ལ་གྱ་གྱུར་སྨྲ། །གཞན་
ཚིག་དག་ལ་འཇིག་རྟེན་སྨོད། །དེ་ནི་གཡོན་ཅན་སྤྱོད་ལམ་སྟེ། །དེ་སྙིད་ཉེས་པ་ཆེན་པོ་ཡིས། །སྡིག་པ་ཉི་ཚེའི་ཚོགས་བསགས་ནས། །གྲོང་གི་ཚོགས་དེ་བཟློག་བྱ་སྟེ། །གྲོང་ཁྱེར་འཁྲུག་བྱེད་གཡོན་ཅན་འདི། །འབྱུང་ཁུངས་སྐྱེ་བོ་ངན་པའི་གཏེར། །དེ་ནི་འཇིག་

203-1-141a

རྟེན་སྤྱི་དགྲ་ཡིན། །མ་རུངས་སྐྱེ་བོ་ཁ་སྙན་ཅིང་། །ཙན་དན་ལྟ་བུ་བསིལ་བའི་ངག །སྙིང་ནི་མ་རུངས་བདག་ཉིད་དེ། །སོག་ལེ་བས་ཀྱང་ཁྱད་པར་འཕགས། །མ་རུངས་བདག་ཉིད་ཚིག་འཇམ་ཞིང་། །སྐྱོན་དང་རྗེས་མཐུན་སྙན་སྨྲ་སྟེ། །མི་མངོན་ཁོན་བཟུང་བྱམས་
བྱེད་ལ། །ཡིད་བརྟན་བྱེད་པ་གཤིན་རྗེ་བཞིན། །ཐག་རིང་མཐོང་ནས་མགོ་སྨད་ཅིང་། །ཤིན་ཏུ་དམ་པའི་ཚིག་བརྗོད་ལ། །སྐད་གསང་ཆུང་བས་སྨྲ་བ་ནི། །གཡོན་ཅན་རྣམས་ཀྱི་མཚན་ཉིད་ཡིན། །གང་ཞིག་སྔོན་ཆད་གནོད་བྱས་དང་། །དེ་ལྟར་གང་གིས་གནོད་བྱེད་
པ། །དེ་ལ་ཡིད་ཆེས་མི་རིགས་ཏེ། །ཁུང་ན་གནས་པའི་ལག་འགྲོ་བཞིན། །འབབ་ཆུ་སྡེར་མོ་ཅན་རྣམས་དང་། །རྭ་ཅན་ལག་ན་མཚོན་ཐོགས་དང་། །རྒྱལ་པོའི་ཕོ་བྲང་བུད་མེད་ལ། །ཡིད་བརྟན་བགྲོད་པར་མི་བྱའོ། །མེ་ཆུ་བུད་མེད་བླུན་པོ་དང་། །སྦྲུལ་དང་རྒྱལ་
རིགས་དག་ལ་ནི། །རྟག་ཏུ་འབད་པས་སྟེན་བྱེད་པ། །འཕྲལ་དུ་སྲོག་འཕྲོག་དེ་དྲུག་ཡིན། །ནོར་རྣམས་མང་པོ་སྟེར་བྱེད་པའི། །དགྲ་ལ་གང་ཞིག་དཔའ་བརྟན་དང་། །ཆུང་མ་ཁྱོ་ལ་མ་ཆགས་གཉིས། །དེ་ཡི་འཚོ་བ་རབ་ཏུ་གཅོད། །སྔན་ཆད་དགྲར་འགྱུར་སྟེན་བྱེད་
ཅིང་། །ཁོན་པ་གཞི་མེད་འཁྲུག་བྱེད་པ། །གྲོགས་པོ་འདོད་པ་ཟློག་བྱེད་པའི། །དེ་འདྲའི་གྲོགས་པོ་རིང་དུ་སྤང་། །དགྲ་དང་བཤེས་གཉེན་གཡོག་འཁོར་དང་། །བར་གནས་རྒན་པོ་ཉམ་ཆུང་རྣམས། །རྨངས་པས་བྱེ་བྲག་མི་ཤེས་པས། །དེ་ནི་སྐྱེས་བུ་ཐ་ཤལ་
ཡིན། །རྐུན་མའི་ཆོས་པ་གསད་པ་དང་། །གྲོགས་འཁུ་མྱུར་དུ་བརྗོད་པར་བྱ། །ཆུང་མ་འཁུ་བ་མལ་སྟན་བྱེད། །བྲམ་ཟེ་ཤེས་བྱེད་སྤྱན་མི་དྲང་། །བདག་གིས་མངོན་སུམ་མ་གྱུར་པར། །གང་གིས་ཉེས་པ་སྨྲ་བྱེད་པ། །གང་གིས་དམྱལ་བར་ལྟུང་བའི་རྒྱུ། །ལམ་
དེ་བརྩམ་པར་མི་བྱའོ། །བདག་ཉིད་བདག་གི་གཉེན་ཡིན་ཞིང་། །བདག་ཉིད་བདག་གི་དགྲ་ཡང་ཡིན། །མཐོ་རིས་དམྱལ་བ་དེ་བཞིན་དུ། །ཐམས་ཅད་བདག་གི་དབང་དུ་བྱ། །མ་སུ་རཀྵས་བྱས་པའི་ལུགས་ཀྱི་བསྟན་བཅོས་ལས་ལེའུ་ལྔ་པའོ།།      །།

203-1-141b

བློན་པོས་ལེགས་པར་མཉམ་བཞག་སྟེ། །སྤྱོད་པ་གཞན་ལ་སྨྲ་མི་བྱེད། །ཉི་མ་བཞིན་དུ་དགྲ་རྣམས་ལ། །གཟི་བརྗིད་ཀྱིས་ནི་གདུང་བར་བྱེད། །མི་སྲུན་ལྷན་ཅིག་སྤྱོད་པ་དག །དང་པོ་དགའ་ཞིང་མཉན་པ་དང་། བར་དུ་རྩོད་པས་དགའ་མེད་དོ། །ཐ་མར་
ཤ་ཁོན་ཞུགས་པ་ཡིན། །བདག་ཉིད་ཚེ་དང་མཚུངས་པར་བྱེད། །དང་པོ་ཆུང་ངུར་བཤེས་བྱེད་ཅིང་། །བར་དུ་དེ་བས་ལྷག་པར་འགྱུར། །ཐ་མར་རབ་ཏུ་དགའ་བས་མཛའ། །དམ་པའི་བཤེས་ནི་འབབ་ཆུ་འདྲ། །དང་པོ་མྱུར་ཞིང་རབ་ཏུ་ཆེ། །རིམ་གྱིས་རིམ་
གྱིས་རྒྱ་ཆེར་འཕེལ། །འགྲོ་བ་ཕྱིར་ནི་བཟློག་པ་མེད། །དུད་འགྲོ་དྲི་ཡིས་མཐོང་བར་བྱེད། །རིག་བྱེད་ཀྱིས་ནི་བྲམ་ཟེ་མཐོང་། །སྨན་གྱི་རིག་པས་སྨན་པ་མཐོང་། །རྒྱལ་པོ་ཉན་རྣམས་མཐོང་བར་བྱེད། །མི་ཡི་དགྲ་ནི་གཞོམ་འདོད་པས། །རྟག་ཏུ་སྙན་
སྨྲ་དྲན་པ་བསམ། །གླུ་ཡིས་བྲིད་པའི་རི་དྭགས་བཞིན། །སེམས་འཁྲུལ་འགྱུར་ནས་གསད་པར་བྱ། །གང་ལ་ནོར་ཡོད་བཤེས་གཉེན་དང་། །གང་ལ་ནོར་ཡོད་ཉེ་དུ་སྟེ། །གང་ལ་ནོར་ཡོད་འཇིག་རྟེན་མི། །གང་ལ་ནོར་ཡོད་དེ་མཛངས་ཡིན། །ནོར་མེད་
གྱུར་ན་གཉེན་བཤེས་དང་། །བུ་དང་ཆུང་མ་ཉེ་དུ་དང་། །སྐྱེ་བོ་སྡུག་པ་རྣམས་ཀྱིས་སྤོང་། །ནོར་ལྡན་གྱུར་ན་ཕྱིར་ཡང་བསྟེན། །ནོར་ནི་འཇིག་རྟེན་མི་ཡི་གཉེན། །གོ་འཕང་མཆོག་ཐོབ་གྱུར་ན་ནི། །བཤེས་གཉེན་གྲོགས་པོ་ལ་སོགས་པ། །
སྔོན་མ་མཐོང་བ་རྣམས་ཀྱང་འདུད། །ནོར་ཟད་གོ་འཕང་ཉམས་དུས་ན། །རང་མི་རྣམས་ཀྱང་དགྲར་འགྱུར་ལ། །ནོར་དང་མི་ལྡན་སྐྱེ་བོ་ཡིས། །བདེན་པ་སྨྲས་ཀྱང་སྤོང་བར་བྱེད། །གསང་ངམ་ཁོང་ནི་གྲིམས་པ་དང་། །བརྣག་པ་མཐར་ཕྱིན་བྱེད་
དུས་དང་། །དགྲ་ལ་རིགས་པ་སྤྱོད་པ་ནི། །དགྲ་བོ་འཇིགས་འགྱུར་ཐེ་ཚོམ་མེད། །དགྲ་ཡི་ཕྱོགས་ལ་མཁས་པ་ཡིས། །དང་པོ་རྩ་བ་གཅད་པར་བྱ། །དེ་ནས་རང་གི་ཕྱོགས་བཅས་པས། །སྔོན་ཆད་གནོད་པ་བྱེད་པ་གསད། །གང་ཞིག་དགྲར་འགྱུར་སྐྱེ་བོ་དང་། །སླར་

203-1-142a

ནི་འདུམ་པར་འདོད་གྱུར་པ། །དེ་ནི་འཆི་བ་ཉེར་ལེན་ཏེ། །དྲེའུ་མོ་ཡི་ནི་མངལ་བཞིན་ནོ། །དགྲ་དང་ལྷན་ཅིག་འདུམ་བྱེད་ཅིང་། །ཡིད་བརྟན་བདེ་བར་གཉིད་ལོག་པ། །དེ་ནི་ཤིང་རྩེར་གཉིད་ལོག་པ། །ལྷུང་ནས་གསད་པ་ཇི་བཞིན་ནོ། །གལ་ཏེ་བུའམ་སྤུན་ཟླ་འམ། །སྣག་
གི་གཉེན་མཚམས་འགྲོགས་བཤེས་རྣམས། །རྒྱལ་པོས་བར་དུ་གཅོད་བྱེད་ན། །གསང་བྱར་འདི་ལ་ཐེ་ཚོམ་མེད། །མཉེན་པས་མི་མཉེན་འཇིག་པ་སྟེ། །འཇམ་པོས་རྩུབ་པ་འཇིག་པར་བྱེད། །མཉེན་པས་མི་འདུལ་ཅུང་ཟད་མེད། །དེ་བས་མཉེན་པ་ཤིན་ཏུ་རྣོ། །
ནོར་མཉམ་ནུས་པ་མཉམ་པ་དང་། །གནས་ལ་མཁས་ཤིང་བརྩོན་འགྲུས་ཆེ། །རྒྱལ་སྲིད་དངོས་སུ་འཕྲོག་པའི་མི། །གལ་ཏེ་མ་བསད་དེས་གསོད་འགྱུར། །ཟབ་མོ་བློ་ལྡན་ངག་འཇམ་ཞིང་། །དམན་པར་སྨྲ་ལ་དབང་པོ་ཐུལ། །བདེན་པར་སྨྲ་ཞིང་གཞན་དབང་ཅན། །ཤིས་
པའི་ཚིག་ལྡན་དེ་ཉིད་རིག །རྗེ་བོ་ལ་ནི་རྟག་གུས་པས། །དེ་འདྲའི་གཡོག་འཁོར་བཟང་པོ་ཡིན། །ཤིན་ཏུ་མཆོག་ཤེས་ལེ་ལོ་མེད། །ལེགས་པར་གཉིད་ལོག་རབ་ཏུ་སད། །བདེ་དང་སྡུག་བསྔལ་གྲོགས་བྱེད་པའི། །གཡོག་འཁོར་འཇིག་རྟེན་རབ་ཏུ་དཀོན། །གཡོ་ཅན་རྣམས་ལ་
གཡོ་སྟོན་ཅིང་། །དྲང་ལ་དྲང་བའི་སྤྱོད་པ་སྟོན། །དགའ་དང་དགའ་བ་ཉིད་དང་ནི། །མི་དགའ་བ་ལ་མི་དགའ་སྟོན། །དངོས་པོ་གང་ལ་གང་དགའ་བའི། །སྐྱེས་པའམ་བུད་མེད་སྟོན་བྱེད་པ། །དམ་པ་རྣམས་ཀྱི་འཇུག་སྒོ་ནི། །ནམ་དུ་ཡང་ནི་མི་འདོར་རོ། །སྐྱེ་བོ་ངན་དང་
འགྲོགས་ན་ནི། །སྐྱེ་བོ་དམ་པའང་ཉམས་བྱེད་དེ། །ཆུ་དང་འདམ་དུ་འདྲེས་ན་ནི། །དང་བའང་དྲི་མ་ཅན་དུ་འགྱུར། །ཁ་ལ་སྦྲང་རྩིས་བསྒོས་བཞིན་དང་། །ཁོང་ན་རྙོག་པའི་བདག་ཉིད་དེ། །ནང་ན་ར་གན་ཕྱི་དངུལ་ལམ། །ཁ་ཡི་ནང་གི་རྡོ་ཕྱེ་བཞིན། །ཚིག་འཇམ་བརྩེ་མེད་
ཤེས་རབ་ལྡན། །མི་མངོན་ཤིན་ཏུ་མི་བཟད་པ། །བུ་རམ་དུག་འདྲེས་ལྟ་བུ་ཡི། །དེ་འདྲའི་སྐྱེས་བུ་བསྟེན་མི་བྱ། །ཤིན་ཏུ་མ་རུངས་སྐྱེ་བོ་ལ། །རྗེས་སུ་མཐུན་པས་ཞི་བྱ་ཞིང་། །མངར་བའི་ངག་གིས་བསྒོ་བྱ་སྟེ། །མཁྲིས་པའི་ནད་འབྱུང་ཇི་བཞིན་ནོ། །ནྱ་གྲོ་དྷ་ཞེས་བྱ་བ་ཡི། །

203-1-142b

ཤིང་གི་རྒྱལ་པོར་གྲགས་པ་ཡོད། །དེ་ཡི་མྱུ་གུ་བུ་རྣམས་ནི། །རྩ་བ་ཟུགས་ནས་གཏིང་གནས་ཏེ། །གཅིག་ལ་གཅིག་ནི་འབྲེལ་བྱས་ནས། །དེ་ནས་ཤིང་དེ་འཇིག་པར་འགྱུར། །དེ་བཞིན་བུ་དང་ཚ་བོ་དང་། །བློན་པོའི་ཚོགས་དང་བཅས་པ་ཡི། །རྒྱལ་པོ་གནས་ནས་སྐྱོད་བྱེད་དེ། །ནྱ་
གྲོ་དྷ་ཡི་མྱུ་གུ་བཞིན། །མ་སུ་རཀྵས་བྱས་པའི་ལུགས་ཀྱི་བསྟན་བཅོས་ལས་ལེའུ་དྲུག་པའོ།།      །།ས་བདག་གི་ནི་གཡོག་འཁོར་གྱི། །མཚན་ཉིད་བཤད་ཀྱིས་མཉན་པར་གྱིས། །རྒྱལ་པོ་ཇི་ལྟར་ཤེས་ཉེན་ལྡན། །གཡོག་འཁོར་དེ་ལྟར་བརྟག་པར་བྱ། །ཇི་ལྟར་དབང་
པོ་ལ་སོགས་པའི། །མེ་ནི་ལྷ་རྣམས་ཀུན་གྱི་ཁ། །དེ་བཞིན་རྒྱལ་པོའི་བློན་པོ་ཡང་། །ཡུལ་འཁོར་རྒྱུ་དང་མི་རྒྱུའི་ཁ། །བརྟན་ཞིང་ཟབ་མོའི་བློ་དང་ལྡན། །མདངས་ལྡན་ཆོས་དང་བསྟན་བཅོས་རིག །དུལ་ཞིང་བདེན་པར་སྨྲ་བ་དང་། །རྒྱལ་པོའི་འཁོར་ལ་ཕན་པར་སེམས། །རིགས་
བཙུན་རྒྱུད་ནི་མཉེན་པ་དང་། །བླ་མ་ལ་ནི་གུས་ཉན་དང་། །སྐྱེ་དགུ་རྗེས་བརྩེར་ལྡན་པ་ཡི། །རྒྱུད་བྱུང་དེ་ནི་རྒྱལ་སྲས་ཡིན། །རྒྱལ་པོ་སྙིང་རྗེ་ཕན་སེམས་ལྡན། །བླ་མའི་སྐྱོན་ནི་སྦེད་པ་དང་། །གཡུལ་འཇུག་སླར་ཡང་མི་ལྡོག་ཅིང་། །བདེ་དང་སྡུག་བསྔལ་མཉམ་པར་ཤེས། །རིགས་
དང་ཚུལ་ཁྲིམས་ཕུན་སུམ་ཚོགས། །ཆོས་ལུགས་འཆད་པ་མཁས་པ་སྟེ། །དེ་བཞིན་དུལ་དང་དད་པ་དང་། །གྲིམས་པ་རྒྱལ་པོར་རབ་གྲགས་སོ། །ཚིག་གསལ་བློ་ནི་ཕུན་སུམ་ཚོགས། །ལུགས་ཀྱི་བསྟན་བཅོས་དག་ལ་མཁས། །ངང་འཇམ་དཔྱོད་པར་བྱེད་པ་སྟེ། །རྒྱལ་པོའི་
བློན་པོ་དེ་འདྲས་བྱ། །ཡིད་གཞུངས་ཚིག་གསལ་ཤེས་རབ་ལྡན། །གཞན་སེམས་ཉེ་བར་མཚོན་ནུས་དང་། །བརྟན་ཞིང་ཇི་སྐད་བསྒོ་བཞིན་སྨྲ། །རྒྱལ་པོའི་ཕོ་ཉ་དེ་འདྲས་བྱས། །རིག་བྱེད་ཡན་ལག་དེ་ཉིད་ཤེས། །བཟླས་བརྗོད་སྦྱིན་སྲེག་མཆོག་ཏུ་བརྩོན། །རྟག་ཏུ་ཤིས་པ་རྗོད་
བྱེད་པ། །ཤེས་རབ་ལྡན་དེ་མདུན་ན་འདོན། །སྒྲ་རིག་རྩིས་ཀྱང་ཤེས་པ་སྟེ། །ཡི་གེ་བྱང་ཞིང་ལག་པ་མྱུར། །ཡིད་གཞུངས་ཚིག་ནི་གསལ་བ་དང་། །གྲགས་དང་སྦྱིན་ལྡན་ཡི་གེ་པ། །ཡི་གེ་བྱང་ཞིང་སྒྲ་ལ་མཁས། །སྒྲ་ཡི་མཚན་ཉིད་རྟོགས་བྱེད་ཅིང་། །དྲི་ཟ་བཞིན་དུ་དབྱངས་མཁས་ཏེ། །

203-1-143a

དེ་འདྲའི་ཀློག་མཁན་བསྐོ་བར་བྱ། །བརྟན་ཞིང་དབང་པོར་རྗེས་སུ་འོས། །ཤེས་རབ་ཆེ་ཞིང་ལེགས་ཉེས་རྟོགས། །གཙང་ཞིང་རྒྱལ་པོའི་སྐུ་ཕྱེད་བརྟེན། །དེ་འདྲ་ཆད་པ་གཅོད་བྱེད་ཡིན། །ཚེ་ཡི་རིག་བྱེད་གོམས་པ་དང་། །ཆོས་རིག་ཡིད་འོང་སྙན་སྨྲ་ཞིང་། །ཆོ་ག་ངང་
ཚུལ་ཕུན་སུམ་ཚོགས། །ཐང་ལ་འབར་བཞིན་གསོ་མཁས་ཤིང་། །ནད་ཀྱི་མཚན་ཉིད་ཀུན་ལ་མཁས། །རྒྱལ་པོ་དེ་འདྲའི་སྨན་པ་བསྟན། །གཞན་གྱི་སྤྱོད་ལམ་ཟུར་གྱིས་ཤེས། །སྟོབས་ལྡན་སྙན་པར་སྨྲ་བ་དང་། །གཞན་གྱི་བསམ་པ་རྟག་ཏུ་ཤེས། །སྒོ་དཔོན་དེ་འདྲ་བསྒོ་
བར་བྱ། །མཚོན་ལ་གོམས་ཤིང་ནུས་དང་ལྡན། །བཞོན་པ་དག་ལ་བྱ་བཞིན་གོམས། །དཔའ་ཞིང་བརྟན་པ་ཕུན་སུམ་ཚོགས། །དེ་འདྲ་དམག་དཔོན་ཡིན་པར་ཤེས། །ཕ་མེས་རྒྱུད་བྱུང་གྲིམས་པར་ཤེས། །བསྟན་བཅོས་རིག་ཅིང་ཞིམ་པར་འཚེད། །གཙང་སྦྲ་ཆེ་ཞིང་སྙིང་
ཉེ་བ། །དེ་ལྟ་བུ་ཡིས་ཕྱག་ཚང་བྱ། །ཤེས་ཆེར་དཔྱད་མེད་ཕུན་སུམ་ཚོགས། །བསྟན་བཅོས་ཀུན་ལ་འཇིགས་མེད་དང་། །རིགས་ནི་ཆེན་པོར་སྐྱེས་གྱུར་པ། །དེ་ནི་ནང་བློན་ཤེས་པར་བྱ། །ལོང་བ་འཕྱེ་བོ་ཐེང་པོ་དང་། །སྙིང་ཉེ་བརྟན་ལ་རྟག་འགྲུས་ཏེ། །རི་བོ་བཞིན་དུ་མི་
འགུལ་བ། །དེ་འདྲས་བཙུན་མོའི་སྲུང་མ་བྱ། །ལུས་ཀྱི་འགྱུར་བ་བཅས་པ་ཡིས། །གླུ་ཚིག་ལམ་ལ་མཁས་པ་དང་། །གར་དང་སྡེབ་སྦྱོར་མཆོག་ཤེས་པ། །དེ་འདྲའི་སྲུང་མཁན་བསྟེན་པར་བྱ། །བསྟན་ཞིང་རྒྱལ་བ་འཐོབ་པ་དང་། །གདུགས་དཀར་བ་དན་དཀར་བ་སྟེ། །
གཡུལ་ལས་རྟག་པར་རྒྱལ་བ་ནི། །རྒྱལ་པོའི་བུ་ཞེས་རབ་ཏུ་གྲགས། །ཇི་ལྟར་ཁྱི་ཞིག་བཀྲེས་ཉེན་ཏེ། །རུས་པ་སྐམ་པོ་ཁར་བཅངས་ནས། །ཁྲག་བྱུང་སྡུག་བསྔལ་བདེ་སྙམ་པ། །དེ་བཞིན་འདོད་རྨོངས་རྣམས་ཀྱིས་ནི། །བུད་མེད་རྣམས་ལ་བདེ་སྙམ་སེམས། །མ་སུ་
རཀྵས་བྱས་པའི་ལུགས་ཀྱི་བསྟན་བཅོས་ལས་ལེའུ་བདུན་པའོ། །ལུགས་ཀྱི་བསྟན་བཅོས་རྫོགས་སོ།།      །།རྒྱ་གར་གྱི་མཁན་པོ་ཨཱ་ཙཱརྱ་དྷརྨ་ཤྲཱི་བྷ་དྲ་དང་། ལོ་ཙཱ་བ་དགེ་སློང་ཤཱཀྱ་བློ་གྲོས་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །།

203-1-143b

༄༅༅། །རྒྱ་གར་སྐད་དུ། ས་མུ་དྲ་བྷ་ཛཱ་བི་ན། བོད་སྐད་དུ། རྒྱ་མཚོས་བསྟན་པའི་མཚན། ཐམས་ཅད་མཁྱེན་པ་ལ་ཕྱག་འཚལ་ལོ། །རྐང་པའི་གོང་གི་སོར་མོའི་མཚན་རྣམས་ནི། །སྐྱིད་དང་སྡུག་པ་ཐམས་ཅད་ཤེས་པར་བྱེད། མཐེ་བོང་ཆེ་ན་སྡུག་བསྔལ་འཐོབ་
པར་བྱེད། །ཆུང་བ་སྐམ་པ་ཡུལ་རྣམས་བསྐོར་ཞིང་སྡུག །ལེབ་མོ་སྐམ་པ་སྐྱེ་བོ་མི་བཟང་སྟེ། །མཐེབ་མཛུབ་བར་དུ་ཁ་འདྲ་སྐམ་པ་ནི། །ཉོན་མོངས་ཐམས་ཅད་སྐྱེ་བར་འགྱུར་བ་ཡིན། །མཐེ་བོང་གྱེན་དུ་མཐོ་བ་ལེགས་པར་སྙོམས། །སྣུམ་ཞིང་སྙོམས་པར་སྐྱེས་པ་བདེ་བའི་མཚན། །སོར་མོ་
ཟླུམ་པ་སེན་མོ་ཟངས་ཀྱི་མདོག །ཤིན་ཏུ་དམར་བ་ཁྲག་གི་མདོག་ཅན་ནི། །རྒྱལ་པོར་འགྱུར་བའི་མཐེ་བོའི་མཚན་མ་ཡིན། །རྐང་པའི་མཛུབ་མོ་སྦོམ་ཞིང་རིང་བ་ནི། །བུད་མེད་ལོངས་སྤྱོད་ཀྱི་ནི་རྙེད་པ་ཐོབ། །ཐོབ་པའི་བུད་མེད་མྱུར་དུ་འཆི་བར་བྱེད། །ཡང་ན་བུ་སྐྱེས་འཆི་བར་འགྱུར་བ་ཡིན། །
མཛུབ་མོ་ཆུང་ན་ཀུན་དང་འཁོན་པར་བྱེད། །གུང་མོ་མཐོ་ན་དོན་རྣམས་ཉམས་པར་བྱེད། །ཆུང་ན་སྡུག་བསྔལ་བཞིན་དུ་འབྱུང་བར་འགྱུར། །སྲིན་ལག་རིང་ན་རིག་པ་འཛིན་པར་བྱེད། །ཐུང་ན་ཆུང་མ་འཆི་བར་འགྱུར་བ་ཡིན། །མཐེ་ཆུང་རིང་ན་དོན་རྣམས་འགྲུབ་པར་འགྱུར། །ཆུང་ན་ཕ་རོལ་
ནོར་རྣམས་འཕྲོག་པར་བྱེད། །མཛུབ་མོ་མཐེ་ཆུང་ཤིང་ཏུ་སྦོམ་པ་ནི། །ཨ་མ་འཆི་བར་འགྱུར་བ་རྒྱ་མཚོས་བཤད། །གུང་མོ་སྙོམས་ཤིང་ཟླུམ་པ་ལེགས་པ་ནི། །བུ་སྐྱེས་ཆུང་ངུའི་ལོ་ལ་འཆི་བར་བྱེད། །རྒྱ་མཚོས་བསྟན་པའི་མཚན་གཅིག་པའོ།།      །།སོར་མོ་མི་སྙོམས་སྦོམ་ཕྲར་
གནས་པ་ནི། །འབངས་པོའི་འབངས་ཀྱི་ལས་རྣམས་བྱེད་པར་འགྱུར། །འབངས་པོ་མིན་ཡང་གཞན་གྱི་ལས་རྣམས་བྱེད། །སོར་མོ་འཁྱོག་ཅིང་གང་གིས་དང་། །རྟག་ཏུ་སྡུག་བསྔལ་འབའ་ཞིག་སྤྱོད་པར་བྱེད། །སོར་མོ་སྙོམས་པ་གཅིག་ཏུ་སྐྱེས་པ་འདྲ། །ཟླུམ་ཞིང་འདྲིལ་བ་བྱིན་གྱིས་ཕྲ་
བ་ནི། །རྒྱལ་པོའི་མཚན་གྱིས་བརྒྱན་པའི་སོར་མོ་ཡིན། །སེན་མོ་དཀར་བ་ཤ་དང་བཅས་པ་ནི། །སྐྱེས་པ་སྡུག་བསྔལ་བཞིན་དུ་གནས་པར་བཤད། །སེན་མོ་གས་པ་འདོད་པའི་ལོངས་སྤྱོད་མེད། །སེན་མོ་འཁྱོག་པ་ཆག་པ་སྦོམ་པ་ལས། །རྟག་ཏུ་སློང་མོ་བྱེད་པའི་དབུལ་པོར་

203-1-144a

བཤད། །བ་བླ་ལྟ་བུ་སེན་མོ་སེར་པོ་ཡིས། །བྲམ་ཟེ་གསོད་དམ་བཀུར་འོས་གསོད་པར་བཤད། །སེན་མོ་དམར་བ་རྒྱལ་པོར་འགྱུར་བ་སྟེ། །དེས་ནི་གཉེན་པོ་བྱས་པ་མི་བཟང་སྟེ། །རང་གི་རིགས་རྣམས་སྨོད་པར་བྱེད་པ་ཡིན། །སེན་མོ་དུང་གི་མདོག་གིས་
རྒྱལ་པོར་འགྱུར། །ཟངས་ཀྱི་མདོག་ཅན་རྒྱལ་པོའི་སེན་མོ་སྟེ། །པདྨའི་མདོག་ཅན་ཀྱང་ནི་དེ་བཞིན་ནོ། །སེན་མོ་ཁྲག་མདོག་མཆོག་གི་དབང་ཕྱུག་སྟེ། །སྣུམ་པ་ལེགས་པ་ཟངས་མདོག་རྒྱལ་པོར་འགྱུར། །རྒྱ་མཚོས་བསྟན་པ་ལས་མཚན་གཉིས་པའོ།།      །།མཐེ་བོང་ནས་
བཟུང་མཐིལ་གྱི་ཤ་རྒྱུད་ནི། །སྙོམས་པ་མདོག་བཟང་རིང་བ་བདེ་བར་འཚོ། །ཐུང་ངུ་མདོག་ངན་མཐོ་དམན་ལྡན་པ་ནི། །བསམ་ངན་ཀུན་ལ་གནོད་ཅིང་བདེ་བ་མེད། །རྐང་པ་པག་གི་ལྟ་བུ་ཡོད་པ་ལ། །རྟག་ཏུ་གཞན་གྱིས་འཆིང་བར་འགྱུར་བ་ཡིན། །མཉམ་སྙོམས་པས་ནི་བདེ་བ་
ཐོབ་པར་བྱེད། །བོལ་ཚིགས་མ་ཧེ་ལྟ་བུ་ཕག་བཞིན་ནོ། །བོལ་ཚིགས་རྡོ་རྗེ་ལྟ་བུ་རྟག་ཏུ་སྡུག །བོལ་ཚིགས་རྟ་ཡི་ལྟ་བུ་དབང་ཕྱུག་ཐོབ། །རྒྱ་མཚོས་བསྟན་པ་ལས་མཚན་གསུམ་པའོ།།      །།བྱིན་པ་རི་དྭགས་ལྟ་བུས་རྒྱལ་པོར་འགྱུར། །ཅེ་སྤྱང་ལྟ་བུའི་བྱིན་པས་སྡུག་
བསྔལ་འཐོབ། །བྱིན་པ་སྦོམ་པོས་མཆོག་གི་དབང་ཕྱུག་ཐོབ། །བྱིན་པ་སྦོམ་པོ་རིང་པོ་གང་གིས་ཀྱང་། །རྟག་ཏུ་འགྲོ་བ་འབའ་ཞིག་འཐོབ་པར་བྱེད། །བྱིན་པ་ཕག་པ་ལྟ་བུས་ལོངས་སྤྱོད་མེད། །བྱིན་པ་ཕོ་རོག་ལྟ་བུས་སྡུག་བསྔལ་ཐོབ། །བྱིན་པ་དོམ་མམ་སྤྲེའུ་ལྟ་བུས་འཆིང་། །
སེང་གེ་སྟག་གི་བྱིན་པ་འདྲ་བ་ལས། །ཕ་རོལ་གྲགས་པ་ནོར་རྣམས་མང་པོར་ལྡན། །བ་སྤུ་རེ་རེ་སྐྱེས་པ་རྒྱལ་པོར་འགྱུར། །གཅིག་གཉིས་སྐྱེས་པ་ནོར་གྱི་བདག་པོར་འགྱུར། །གསུམ་བཞི་ཡན་ཆད་གང་ཡང་རྙེད་པ་མེད། །རྒྱ་མཚོས་བསྟན་པ་ལས་མཚན་བཞི་པའོ།།      །།
དང་པ་ནེ་ཙོའི་གདངས་ཅན་རྒྱལ་པོར་འགྱུར། །དེ་གཉིས་འགྲོས་ཀྱིས་འགྲོ་བ་མཆོད་པར་འགྱུར། །ཁྱུ་མཆོག་སེང་གེ་གླང་གི་གདངས་དང་འགྲོས། །ལོངས་སྤྱོད་མང་པོའི་བདག་པོ་བྱེད་པར་འདོད། །སྣ་ཚོགས་བྱ་དང་དུད་འགྲོའི་གདངས་དང་འགྲོས། །དེ་དང་དེ་ཡི་ལོངས་སྤྱོད་ཐོབ་

203-1-144b

པར་བཤད། །ཆུ་ནང་སེམས་ཅན་བཞིན་དུ་དབུགས་ཀྱིས་པ། །གནས་པ་མི་ཡི་འཇིགས་དང་སྡུག་བསྔལ་འཐོབ། །ཁྱི་དང་ཕག་དང་མ་ཧེ་ལྟ་བུའི་དབུགས། །འགྲོས་ཅན་དེ་འདྲ་སྡུག་བསྔལ་དོན་མི་ཐོབ། །རྒྱ་མཚོས་བསྟན་པ་ལས་མཚན་ལྔ་པའོ།།      །།བརླ་ཕྲའི་སྐྱེས་པ་དེ་ནི་བུ་དང་བྲལ། །བརླ་སུལ་
མཛེས་པ་སྦོམ་པོ་ལོ་བརྒྱ་འཚོ། །ནན་ཏུར་སྦོམ་ན་སྡུག་བསྔལ་མང་པོ་ཐོབ། །ཤ་རྒྱས་སྙོམས་པ་མི་ཡི་དབང་ཕྱུག་ཡིན། །སྦོམ་པོ་རིང་བ་གཞན་གྱི་འཆིང་བ་ཐོབ། །སྲབ་མོ་ཕུག་དང་འདྲ་བ་སྡུག་བསྔལ་འཛིན། །ཤ་སྐམས་བརླ་ནི་སྲབ་ཅིང་རྒྱུས་འདྲུལ་བྱེད། །སྦོམ་ཕྲ་མེད་པར་མཛེས་ཤིང་
སྙོམས་པ་ནི། །ཡོན་ཏན་མང་པོ་འཛིན་པར་བྱེད་པ་ཡིན། །བརླ་སྒང་ལེབ་པ་བུད་མེད་རྙེད་པ་ཐོབ། །བརླ་སྟོད་ཕྲ་བ་བརླ་སྨད་སྦོམ་པ་ནི། །རྟག་ཏུ་རྒྱུ་འགྲུལ་བྱེད་པར་འགྱུར་བ་ཡིན། །རྒྱ་མཚོས་བསྟན་པ་ལས་མཚན་དྲུག་པའོ།།      །།སོར་མོའི་རི་མོ་གཡས་སུ་འཁྱིལ་བ་ནི། །བུ་ཐོབ་གཡོན་
པར་འཁྱིལ་བ་བུ་མོ་འབྱུང་། །སོར་མོ་མི་སྙོམས་སྦོམ་ཕྲ་རྩ་དང་བཅས། །དེ་འདྲ་གང་ལ་ཡོད་པ་སྡུག་བསྔལ་འཐོབ། །སྙོམས་པ་རིང་བ་རྩ་མེད་ཤ་དང་བཅས། །གང་ལ་ཡོད་པ་དེ་ནི་བདེ་བར་འཚོ། །རྐང་པ་འཕོངས་ཚོས་མཉམ་པོར་འདུག་པ་ལ། །རྟགས་ཀྱིས་ས་ལ་རེག་པ་སྡུག་བསྔལ་
འགྱུར། །དབང་པོས་ཚིགས་ལ་སླེབས་པས་དབང་ཕྱུག་འཐོབ། །སེང་གེ་སྟག་གི་དབང་པོ་འདྲ་བ་ཡིས། །ལོངས་སྤྱོད་དབང་པོའི་བདག་པོ་བྱེད་པར་འགྱུར། །རྟ་ཡི་དབང་པོ་ལྟ་བུའང་དེ་བཞིན་ནོ། །དབང་པོའི་ནང་དུ་པདྨའི་རི་མོ་འདྲ། །གང་ལ་ཡོད་པ་དེ་ནི་རྒྱལ་པོར་འགྱུར། །
གསེར་དངུལ་མུ་ཏིག་རྡོ་ཡི་སྙིང་པོ་དང་། །དམར་བ་སྣུམ་པ་ནོར་བུ་རིན་ཆེན་འདྲ། །གང་ལ་ཡོད་པ་དེ་ནི་རྒྱལ་པོའི་མཚན། །ལྗང་དང་སྔོ་ནག་དངུལ་དང་བཅས་པ་དང་། །རི་མོ་སྔོ་སྐྱ་གས་པ་ཀང་ཀོང་ཅན། །གང་ལ་ཡོད་པ་སྡུག་བསྔལ་མང་པོ་ཐོབ། །བརླ་ཡི་རི་མོ་ལྟ་བུ་རྒྱལ་
པོར་འགྱུར། །མདོག་ངན་རྡུལ་དང་བཅས་པ་རི་མོ་ཅན། །དེ་འདྲ་གང་ལ་ཡོད་པ་རྙེད་པ་མེད། །ཡང་ན་དེ་འདྲའི་མཚན་མ་མ་ནིང་འགྱུར། །མཆོག་ཏུ་འདོད་པ་ཆེ་བ་བུ་མོ་སྐྱེ། །ཨུཏྤལ་སྔོན་པོ་པད་རྒྱས་འདྲ་བ་སྙོམས། །བཟང་པོའི་མཚན་མ་ཡིན་པར་རྒྱ་མཚོས་གསུངས། །དྲི་ཆུ་རིང་པོར་

203-1-145a

འགྲོ་བ་བདེ་བར་འཚོ། །དྲི་ཆུ་གཉིས་གསུམ་བཞི་ལྔ་ངན་པར་བཤད། །ནན་ལྟར་མང་པོར་འགྲོ་བ་བདེ་བར་བཤད། །དྲི་ཆུ་སྒྲ་དང་བཅས་པ་བདེ་བར་འཚོ། །དྲི་ཆུ་སྒྲ་མེད་སྡུག་བསྔལ་འབྱུང་བར་བཤད། །འབབ་ཚེ་གཡས་སུ་འཁོར་བ་བཟང་པོར་བཤད། །ཕྱི་ནས་
བུ་དང་ལྡན་པར་འགྱུར་བ་ཡིན། །གཡོན་དུ་འཁོར་ན་བུ་མོ་བཟང་མོ་སྐྱེ། །རལ་གྲི་སྔོན་པོ་ལྟ་བུ་སྡུག་ཅིང་གསོན། །སྐྱ་བ་སྐྱེད་མེད་སྡུག་བསྔལ་མང་པོ་འཐོབ། །རྟགས་ལ་རེག་ཚེ་ཤིང་ལྟར་གྱོང་བ་ཡིས། །རང་གི་རིགས་རྣམས་རླག་པར་བྱེད་པ་ཡིན། །སྙོམས་པ་ཟླུམ་པ་འཇམ་པ་ཆུ་བ་
འཛིན། །གང་ལ་དེ་འདྲའི་རྟགས་ཅན་བདེ་བར་འཚོ། །སོར་གསུམ་སོར་ལྔ་ལྡན་པའི་དབང་པོ་ནི། །གང་ལ་ཡོད་པ་ས་ཡི་བདག་པོར་བཤད། །རྒྱ་མཚོས་བསྟན་པ་ལས་མཚན་བདུན་པའོ།།      །།ལྟེ་བ་ཡངས་པ་ཟབ་པ་ནང་དུ་ཟླུམ། །དེ་འདྲ་གང་ལ་ཡོད་པ་བདེ་བར་འཚོ། །ནང་དུ་
ཟླུམ་པ་མེད་ན་སྡུག་ཅིང་གསོན། །ཚང་ར་ཤ་དང་བཅས་པ་བདེ་བར་འཚོ། །ཤ་སྐམས་སྔོ་དང་བཅས་པ་སྡུག་བསྔལ་འཛིན། །ཤ་སྐམས་རྟིང་སོང་རྐུབ་ཚོས་སྤུ་དང་བྲལ། །རྟག་ཏུ་དེ་ལ་སྡུག་བསྔལ་མང་པོ་འབྱུང་། །སྟག་དང་སེང་གེ་ལྟ་བུའི་འཕོངས་ཚོས་བཅས། །རྟག་ཏུ་བདེ་ཆེན་
བདག་པོ་བྱེད་པར་འགྱུར། །དོམ་དང་སྤྲེའུ་ལྟ་བུ་བདེ་བ་མེད། །ཤ་སྐམས་ཁྱི་ཡི་ལྟ་བུའང་དེ་བཞིན་ནོ། །གསུས་པ་རི་དྭགས་ལྟ་བུ་བདེ་བའི་མཚན། །གསུས་པ་རྨ་བྱ་ལྟ་བུའང་དེ་བཞིན་ནོ། །སྟག་དང་སེང་གེ་ལྟ་བུ་རྒྱལ་པོར་འགྱུར། །གསུས་པ་ཆུང་བ་མི་ཡི་བདག་པོར་འགྱུར། །གསུས་པ་ཤིན་
ཏུ་ཆེ་བ་བདེ་བའི་མཚན། །གསུས་པ་སྦེ་ག་ཟླུམ་པོ་ལྟ་བུ་ནི། །དེ་ནི་ས་ཡི་བདག་པོ་བྱེད་པར་འགྱུར། །ལྟེ་བ་ཟབ་པ་ཟླུམ་པོ་སྐྱེས་བུ་མཆོག །ཟླུམ་པོ་ཕྱི་རུ་འཐོན་ན་ངན་པར་བཤད། །ལྟེ་བ་གཡས་སུ་འཁྱིལ་བས་དོན་རྣམས་འགྲུབ། །གཡོན་དུ་འཁྱིལ་བས་དོན་རྣམས་སྟོང་པར་བྱེད། །སྤུ་གཉིས་
སྙོམས་ཤིང་ཟབ་པ་བདེ་བའི་མཚན། །སྤུ་གཉིས་མི་མངོན་གསུས་པ་སྙོམས་པ་ལས། །བུད་མེད་ལོངས་སྤྱོད་ཐོབ་པ་བདེ་བའི་མཚན། །སྤུ་གཉིས་རི་བོང་ལྟ་བུའང་སྐྱེས་པའི་མཚན། །གསུས་པ་ནས་འདྲ་རྩ་ཡིས་གང་བ་ལས། །མཚན་ངན་སྡུག་བསྔལ་མང་པོ་འཐོབ་པར་བྱེད། །གསུས་

203-1-145b

པ་ཟླ་གམ་སྦྲུལ་འདྲ་གྲོད་པ་ཆེ། །སྦྲུལ་དང་ཉ་འདྲ་རང་གི་དཀའ་ཐུབ་ཉམས། །ཁྱི་དང་ཅེ་སྤྱང་ལྟ་བུར་ལྟོགས་ཤིང་སྐོམ། །ཚེ་རིང་ལོ་བརྒྱ་འཚོ་ཡང་སྡུག་ཅིང་གསོན། །རྒྱ་མཚོས་བསྟན་པ་ལས་མཚན་བརྒྱད་པའོ།།      །།ནུ་མ་མཐོ་བ་སྣུམ་ཞིང་སྙོམས་པ་ལས། །བདེ་ཞིང་བཟང་པོའི་མཚན་
གྱིས་བརྒྱན་པ་ཡིན། །བྲང་ཞེང་སྙོམས་པ་ཟབ་པ་བདེ་བར་འཚོ། །ཚེ་རིང་ལོ་བརྒྱ་འཚོ་ཞིང་ལོངས་སྤྱོད་ཆེ། །ཤ་རྒྱས་ཆེ་ཞིང་ཟླུམ་པ་རྒྱལ་པོར་འགྱུར། །གདོང་པ་ཤ་མེད་མི་དེ་སྡུག་བསྔལ་འགྱུར། །དབང་ཕྱུག་སྟག་དང་སེང་གེ་འདྲ་བས་ཐོབ། །སྡེ་ཡི་བདག་དང་དཔོན་པོ་ཐོབ་པར་འགྱུར། །སེང་
གེའི་རྒྱབ་ཅན་འདུད་ཅིང་ཀུན་གྱིས་མཆོད། །རྟ་ཡི་རྒྱབ་ཅན་སྐྱིད་སྡུག་ཕྱེད་མར་སྤྱོད། །ཤིན་ཏུ་རྒྱབ་གཞུང་རིང་བ་གཉེན་དང་བཅས། །རྟག་ཏུ་བདེ་བར་སྐྱོང་ཞིང་རང་དོན་མེད། །རྒྱ་མཚོས་བསྟན་པ་ལས་མཚན་དགུ་པའོ།།      །།སྙིང་གར་སྤུ་དང་བཅས་པ་བདེ་བར་འཚོ། །སྤུ་དང་བྲལ་ཡང་
བདེ་བར་འཚོ་བར་བྱེད། །སྤུ་སྙོམས་ཅུང་ཟད་སྐྱེས་པ་མཁས་པར་འགྱུར། །སྤུ་གཅིག་སྐྱེས་པ་ཕྱུག་པོར་འགྱུར་བར་བཤད། །གཉིས་དང་གསུམ་དུ་སྐྱེས་པ་ངན་པར་བཤད། །སེར་སྐྱ་སྔོ་ནག་སྤྲིན་གྱི་མདོག་ཅན་དང་། །ལྡོང་རོས་ཟླ་བའི་ཁ་དོག་པདྨ་དང་། །འདྲ་བ་དེ་ལ་རྒྱལ་པོའི་མཚན་མར་
འདོད། །སེར་སྐྱ་ཉི་མ་འཆར་བའི་ཁ་དོག་ཅན། །ས་སྐྱོང་རྒྱལ་པོ་བྱེད་པར་འགྱུར་བ་ཡིན། །རྒྱ་མཚོས་བསྟན་པ་ལས་མཚན་བཅུ་པའོ།།      །།གླང་ཆེན་ལྟ་བུར་ལུས་པོ་བྱིན་དུ་རྒྱས། །བདེ་བར་སོན་པ་བཟང་པོའི་མཚན་མ་ཅན། །ཐད་ཀར་ལངས་པ་ལག་པས་པུས་མོར་སླེབ། །ཡོན་ཏན་ཀུན་གྱིས་
བརྒྱན་པའི་ལག་པ་ཡིན། །ཤིན་ཏུ་ལག་པ་ཆུང་བ་འབངས་པོར་འགྱུར། །ལག་པའི་རི་མོ་གཡོན་དུ་འཁྱིལ་བ་ནི། །ཐམས་ཅད་ཡོངས་སུ་རྫོགས་པར་རྒྱས་པ་ཡིན། །ཕ་རོལ་གྲགས་པའི་རྒྱལ་པོ་ཐོབ་པར་འགྱུར། །ལག་པའི་རི་མོ་གཡས་སུ་འཁྱིལ་བ་ནི། །རྟག་ཏུ་སྐྱེས་པ་སྡུག་བསྔལ་འགྱུར་བ་
ཡིན། །ལག་པ་སྙོམས་ལ་མཐུག་པ་སོར་མོ་རིང་། །དམར་ལ་ཟླུམ་པ་ཤ་དང་བཅས་པ་ནི། །འཇམ་པ་ནང་དུ་ཆུ་བླུགས་འཛིན་པར་བྱེད། །དེ་འདྲ་གང་ལ་ཡོད་པ་རྒྱལ་པོར་འགྱུར། །ལག་པ་ཤ་མེད་རྩ་དང་རྡུལ་གྱིས་གང་། །སེར་སྐྱ་སེན་མོ་སེར་བ་སྡུག་བསྔལ་འཛིན། །མཛུབ་མོའི་དཀྱིལ་ལམ་

203-1-146a

གྱེན་དུ་ལངས་པ་ཡི། །རི་མོ་གང་ལ་ཡོད་པ་བུ་གསུམ་འགྱུར། །གང་དུ་སྲང་གི་རི་མོ་ཡོད་གྱུར་པ། །ལག་པའི་རྟིང་པར་ཉའམ་རྔ་མ་འདྲ། །གང་ལ་ཡོད་པ་སྒྲུབ་པའི་འབྲས་བུ་ཐོབ། །དེ་ནི་བུ་མང་བདག་པོ་བྱེད་པར་བཤད། །མཐེ་ཆུང་སྲིན་ལག་རྩ་བའི་ཚིགས་གསུམ་གྱི། །འོག་མའི་
དཀྱིལ་དུ་རི་མོ་སྙོམས་པ་གསུམ། །ནན་ཏར་གསལ་བ་ཡོད་ན་ལོ་བརྒྱ་འཚོ། །ལག་པ་གུར་འཆང་ལྟ་བུ་མདོག་ཅན་ནི། །གསེར་དང་ནོར་མང་བདག་པོ་བྱེད་པ་ཡིན། །གཞན་ཡང་རིག་པ་འཛིན་པར་བྱེད་པ་ཡིན། །ལག་པའི་དཀྱིལ་ལམ་ཡང་ན་གནས་གཞན་དུ། །ཧོམ་གཟར་ལྟ་བུ་གང་ལ་ཡོད་པ་དེ། །
ཀུན་གྱིས་བཀུར་རམ་མཆོད་སྦྱིན་བདག་པོར་བཤད། །ལག་པའི་རི་མོ་མང་པོ་ཡོད་གྱུར་ན། །བྲམ་ཟེར་གྱུར་ན་རིག་བྱེད་བཞི་ལ་མཁས། །དབྱུག་པ་གདུགས་དང་ཆུ་བུམ་ལྟ་བུ་ཡི། །རི་མོ་གང་ལ་ཡོད་པ་བྲམ་ཟེའི་རིགས། །དེ་ཡི་རྐང་ལ་རྒྱལ་པོའི་མགོ་བོས་འདུད། །རྡོ་རྗེ་རྩེ་གསུམ་ཤཀྟི་འདྲ་བ་དང་། །
དགྲ་སྟའི་རི་མོ་རལ་གྲི་འདྲ་བའི་གཟུགས། །དེ་རྣམས་ཡོད་པ་དེ་ནི་རྒྱལ་པོར་འགྱུར། །དུང་དང་གདུགས་དང་ལྕགས་ཀྱུ་མཚན་ལྡན་དང་། །གང་ལ་ཡོད་པ་མི་ཡི་རྒྱལ་པོར་འགྱུར། །རི་མོ་དོད་སྙོམས་སྣུམ་པ་འཁོར་ལོ་འདྲ། །གང་ལ་ཡོད་པ་དེ་ཡང་རྒྱལ་པོར་འགྱུར། །རི་མོ་ཆད་པ་རྡུལ་ཅན་ཉུང་ངུ་གསོན། །
རི་མོ་རི་དང་ཤིང་སྡོང་ལྟ་བུ་དང་། །སོར་མོ་རིང་པོ་ཟླུམ་པོ་སྙོམས་པ་ནི། །དུད་འགྲོ་མང་པོའི་བདག་པོ་བྱེད་པར་འགྱུར། །རི་མོ་གདུགས་དང་རྒྱལ་མཚན་འཁོར་ལོ་དག །གང་ལ་ཡོད་པ་རྒྱལ་པོ་ངེས་པར་ཐོབ། །འགྲོའམ་འདུག་དང་ངེས་པར་བདེ་བར་སོན། །རྒྱ་མཚོས་བསྟན་པ་ལས་མཚན་བཅུ་གཅིག་
པའོ།།      །།ལག་པ་མཐོ་བ་ཟླུམ་པོ་ཤ་དང་བཅས། །དེ་ནི་སྡེ་ཆེན་བདག་པོ་བྱེད་པར་འགྱུར། །མགྲིན་པ་རིང་བ་རྔ་མོ་ལྟ་བུ་ནི། །ཕ་རོལ་ནོར་ལ་རློམ་སེམས་བྱེད་པར་འགྱུར། །མགྲིན་པ་སྣུམ་པ་ཀི་ར་ལྟ་བུ་དང་། །གླང་ཆེན་ལྟ་བུ་ཡོད་ན་རྒྱལ་པོར་འགྱུར། །བཟའ་བཏུང་ལོངས་སྤྱོད་མང་པོ་འཐོབ་པར་
བྱེད། །གདོང་པ་ཟླུམ་པོ་ཆོས་དང་ཚུལ་ཁྲིམས་ལྡན། །གདོང་པ་ཤ་དང་བྲལ་བ་ཞ་ཀྱོག་ཅན། །ཕ་རོལ་དོན་རྣམས་མང་པོ་སྨྲ་བར་བྱེད། །མང་པོ་སྨྲ་བ་དེ་ནི་རྐུན་མར་བཤད། །དོན་རྣམས་རྫོགས་པར་སྨྲ་བ་རྒྱལ་པོར་འགྱུར། །ར་དང་སྤྲེའུའི་སྐད་དང་གདོང་པ་ནི། །ཕ་རོལ་གྲགས་པ་ནོར་རྣམས་

203-1-146b

མང་པོར་འགྱུར། །འགྲམ་མགོ་པདྨའི་འདབ་མ་ལྟ་བུ་ལ། །དེ་ཡི་མགྲིན་པ་ལོངས་སྤྱོད་མང་པོར་ལྡན། །ཡ་མཆུ་དམར་བ་སྲབ་པ་མི་ཡི་བདག །ཡ་མཆུ་མཐུག་པར་གྱུར་པ་རྨོངས་པར་འགྱུར། །ནན་ཏར་སྐམས་ན་སྡུག་བསྔལ་མང་པོ་ཅན། །བིམ་པའི་མཆུ་ཅན་བཟའ་བཏུང་མང་བར་བཤད། །
སོ་རྣམས་ཀུ་མུ་ཏ་ལྟར་དཀར་བ་ནི། །མཆོག་ཏུ་བཟང་པོ་མི་ཡི་རྒྱལ་པོར་འགྱུར། །གླང་ཆེན་བོང་བུའི་སོ་ཅན་སྣུམ་པོ་རྣམས། །བདེ་བར་འཚོ་བ་བཟང་པོའི་མཚན་མ་ཡིན། །དོམ་དང་སྤྲེའུ་ལྟ་བུ་ལྟོགས་པར་འགྱུར། །རྡོ་བ་ལྟ་བུ་གདོལ་ཅན་འཁྱོག་པ་ནི། །སྡུག་བསྔལ་ཐོབ་པ་སོ་ཡི་
མཚན་མ་ཡིན། །གཡས་པའི་སོ་གཉིས་སྦོམ་པ་དཔོན་པོར་འགྱུར། །སྟོབས་དང་ལོངས་སྤྱོད་མང་པོ་ལྡན་པ་ཡིན། །གཡོན་པའི་སོ་གཉིས་སྦོམ་པ་ཕ་མ་འཆི། །སོ་བཞི་འཁྱོག་པ་སྡུག་ཅིང་ཕ་མ་འཆི། །དཀར་པོ་རྣོ་བ་ལེགས་པ་ས་ཡི་བདག །རིང་ཞིང་རྣོ་བ་མཁས་པའི་མཚན་མ་
ཡིན། །སུམ་ཅུ་སོ་གཉིས་སོ་ཅན་རྒྱལ་པོར་འགྱུར། །ལོངས་སྤྱོད་དག་དང་ལྡན་པར་འགྱུར་བ་ཡིན། །སུམ་ཅུ་ཡོད་ན་བདེ་བར་འཚོ་བར་འགྱུར། །སུམ་ཅུ་སོ་དགུའི་སོ་ཅན་སྡུག་ཅིང་གསོན། །ཉི་ཤུ་རྩ་བཞི་པ་ནི་བདེ་བར་འཚོ། །དེས་ནི་འདོད་པའི་ལོངས་སྤྱོད་མང་པོ་རྙེད། །ཡ་སོ་མ་སོ་མཉམ་པ་
ནོར་གྱི་བདག །དམར་སྨུག་ལྕེ་ཅན་སྡིག་པ་བྱེད་པ་ཡིན། །མཐུག་པ་རྡུལ་ཅན་ལྕེ་ནི་མི་བཟང་སྟེ། །དཀར་པོ་ལྕེ་ཅན་སྤྱོད་པ་གཙང་བ་ཡིན། །པདྨའི་འདབ་མ་ལྟ་བུ་རིང་བ་ནི། །ཤིན་ཏུ་སྲབ་པ་མ་ཡིན་མཐུག་པ་མིན། །རྒྱལ་པོར་འགྱུར་བའི་ལྕེ་ཡི་མཚན་མ་ཡིན། །སྣུམ་དང་དམར་བ་རིག་པ་
འཛིན་པར་བྱེད། །དམར་སྨུག་དཀར་ཅན་རིགས་རྣམས་ཉམས་པར་བྱེད། །དེས་ནི་ནོར་མེད་སྡུག་བསྔལ་མང་པོ་འཐོབ། །སེར་ནག་དམར་སྨུག་ཅན་གང་བཟང་པོ་མིན། །སེང་གེ་གླང་ཆེན་ལྟ་བུ་མི་ཡི་བདག །ངང་པ་འབྲུག་གི་གདངས་ཅན་ནོར་དང་ལྡན། །གླང་ངམ་བོང་བུའི་སྐད་ཅན་སྡུག་བསྔལ་
ཆེ། །རྟ་དང་བོང་བུ་བྱ་རོག་སྒྲ་ཅན་སྡུག །ཚིག་གཏམ་ཟེར་བ་སྡིག་ཅན་ཡིན་པར་བཤད། །ཉུང་ངུ་སྨྲ་ཞིང་བདེན་པ་རྒྱལ་པོར་འགྱུར། །རྒྱ་མཚོས་བསྟན་པ་ལས་མཚན་བཅུ་གཉིས་པའོ།།      །།གླང་ཆེན་རྟ་ཡི་རྣ་ཅན་རྣོ་བ་ནི། །འཇིག་རྟེན་འདྲེན་པ་བྱེད་པར་འགྱུར་བ་ཡིན། །ནེ་ཚོའི་

203-1-147a

མཆུ་ཅན་དེ་ཡང་དེ་བཞིན་ནོ། །ཤིན་ཏུ་རྣ་གོང་མཐོ་བ་ལོངས་སྤྱོད་ལྡན། །སྣ་ཆུས་ཆོས་པ་ཚུལ་ཁྲིམས་གཙང་མ་བསྲུང་། །སྣ་གོང་འཁྱོག་པ་སྡིག་པ་བྱེད་པ་ཅན། །སྣ་རྩེ་སྦོམ་པ་མཐུག་པའང་སྡིག་པ་བྱེད། །སྣ་རྩེ་སྦོམ་པ་སྣ་གོང་ལེབ་པ་ནི། །དེ་ཡང་སྡུག་བསྔལ་མང་པོ་འཛིན་པར་བྱེད། །རྒྱ་མཚོས་བསྟན་པ་
ལས་མཚན་བཅུ་གསུམ་པའོ།།      །།མེ་ཏོག་དམར་པོ་ལྟ་བུའི་མིག་ཅན་ནི། །ལོངས་སྤྱོད་བདག་པོ་སྡེ་ཡི་འདྲེན་པ་བྱེད། །གྲུ་གསུམ་མིག་ཅན་འཇིགས་པ་ཟླུམ་པ་དང་། །བྱི་ལ་ངང་པ་ལྟ་བུའང་དཔོན་པོར་འགྱུར། །ཁྲག་ལྟར་དམར་བ་ནད་དང་བཅས་ཤིང་སྡུག །མཆོག་ཏུ་མིག་འབོར་མཐོ་བ་སྡུག་པར་བཤད། །མ་ཧེ་ལུག་དང་
ར་འདྲ་འཁྲུག་པ་རེམ། །གཡོ་བ་མིག་ཅན་ཀུན་དུ་ལྟ་བ་ནི། །ཕ་རོལ་བུད་མེད་ལ་ནི་བསམ་པ་ཅན། །མིག་གཉིས་ནང་དུ་སོང་བ་རིང་པོར་གསོན། །ཟླུམ་པའི་མིག་ཅན་ཉུང་ངུ་གསོན་པར་བཤད། །རི་དྭགས་རྨ་བྱ་ཅེ་སྤྱང་བ་ལང་དང་། །གླང་ཆེན་ལྟ་བུས་ལོངས་སྤྱོད་ཐོབ་པར་བྱེད། །མཆོག་ཏུ་ཆུང་བ་སྐེམ་པོ་ཡོ་བ་ནི། །ཆུ་ཡིས་གང་
པ་ཟག་པ་མཆི་མ་ཅན། །ནོར་མེད་སྡུག་བསྔལ་ཅན་གྱི་མིག་ཏུ་བཤད། །རྒྱལ་མོ་ཤིན་ཏུ་གནག་པ་བདེ་བར་འཚོ། །རྒྱལ་མོ་དཀར་བ་འཆི་བ་འཐོབ་པར་བྱེད། །རྒྱལ་མོ་དམར་བ་ནོར་གྱི་བདག་པོར་བཤད། །མིག་ཀོང་ལེགས་པ་དབང་ཕྱུག་ཐོབ་པར་བྱེད། །མིག་རྩ་དམར་བ་ལོངས་སྤྱོད་ཐོབ་པར་བྱེད། །དམར་དང་དཀར་
བའི་རི་མོ་དོད་པ་ལ། །དེ་ནི་མཁས་ཤིང་བློ་གྲོས་བཟང་པོ་ཅན། །མིག་ནས་མཆི་མ་འཛག་པས་འཁོན་ཞིང་སྡུག །འགྲོ་ཚེ་ལམ་ལ་ལྟ་བ་མཁས་པའི་མཚན། །ཀུན་དུ་ལྟ་བ་བ་ལང་ལྟ་བུ་ངན། །རྒྱ་མཚོས་བསྟན་པ་ལས་མཚན་བཅུ་བཞི་པའོ།།      །།པདྨ་སྐྲ་ཅན་དམར་བ་ལེགས་པ་དང་། །མེ་ལྟར་འོད་ཟེར་འབར་བ་མདངས་
དང་བཅས། །དེ་འདྲའི་མདངས་ཅན་འཁོར་ལོས་སྒྱུར་བར་བཤད། །གསེར་གྱི་མདོག་ཅན་དབང་ཕྱུག་ཐོབ་པར་བྱེད། །ཕུག་རོན་ཨ་རོག་ར་དང་ཁུ་བྱུག་དང་། །དབང་ཕྱུག་ལོངས་སྤྱོད་མང་པོ་འཐོབ་པར་བྱེད། །བྱི་ལ་འུག་པའི་མདོངས་ཅན་དཔལ་ཐོབ་ཅིང་། །ཉི་མ་གླང་གི་གཟུགས་ཅན་རྒྱལ་པོར་བཤད། །ཀ་ལ་པིང་ཀའི་
སེར་སྐྱའི་མིག་ཅན་ནི། །འཁོར་ལོས་སྒྱུར་བའི་རྒྱལ་པོ་བྱེད་པར་འགྱུར། །རིན་ཆེན་མུ་ཏིག་མིག་ཅན་མཁས་པར་འགྱུར། །མིག་གཉིས་འབྱེད་འཛུམས་མང་བ་ཉུང་ངུ་གསོན། །འབྱེད་འཛུམས་ཉུང་བ་རིང་དུ་གསོན་པར་བྱེད། །བསྟུད་ནས་འབྱེད་འཛུམས་མང་བ་ནད་མང་ཞིང་། །ལན་གཉིས་འཛུམས་པ་གཡོན་དུ་འགྱུར་

203-1-147b

བ་ཡིན། །གསུམ་དུ་འཛུམས་པ་བདེ་བར་བྱེད་པ་ཡིན། །ལན་བཞི་འཛུམས་པ་ལྟོགས་པར་གནས་པ་ཡིན། །དེ་ནི་ཚེ་ཐུང་སྡུག་ཅིང་བཀྲེན་པར་བཤད། །དཔྲལ་བ་སྐམས་པ་རྡུལ་དང་བཅས་པས་སྡུག །གཉེར་མ་ལྔ་པ་ལོ་བརྒྱ་འཚོ་བར་བཤད། །གཉེར་མ་བཞི་པ་དགུ་བཅུར་གསོན་པར་བཤད། །གཉེར་
མ་གཉིས་པ་དགུ་བཅུ་གསོན་པར་བཤད། །གཉེར་མ་མེད་པའི་མི་རྣམས་ཚེ་ཐུང་ཞིང་། །གཉེར་མ་ཐུང་ངུ་གཅིག་པ་ནད་མང་ཞིང་། །གཉེར་མ་ཉི་ཤུ་རྩ་ལྔ་སྡུག་བསྔལ་མང་། །དཔྲལ་བར་རྩ་གསུམ་ཡོད་པ་དབང་ཕྱུག་ཐོབ། །གཉེན་འདུན་མང་པོའི་འཁོར་དང་ལྡན་པར་འགྱུར། །མེ་ཏོག་པདྨ་ལྟ་
བུའི་དཔྲལ་བ་ཅན། །ཆོས་དང་ཚུལ་ཁྲིམས་འཛིན་པར་བྱེད་པ་ཡིན། །རྡོ་རྗེ་རྒྱལ་མཚན་འཁོར་ལོ་ཟླ་བ་དང་། །དེ་འདྲ་གང་ཡོད་ས་ཡི་བདག་པོར་བཤད། །གྱེན་དུ་རི་མོ་གཅིག་པ་འབངས་ཀྱི་བདག །ཟླ་ཕྱེད་འདྲ་བས་དབང་ཕྱུག་ཐོབ་པར་བྱེད། །གྱེན་ཐུར་འཕྲེད་ལ་རི་མོ་མང་པོ་ཅན། །སྡུག་བསྔལ་
འཛིན་པའི་སྐྱེས་བུའི་མཚན་མ་ཡིན། །རི་མོ་རིང་པོ་སློབ་དཔོན་བྱེད་པར་འགྱུར། །མགོ་བོ་གདུགས་འདྲ་མི་ཡི་བདག་པོར་འགྱུར། །དཔྲལ་བ་ཏོག་པོར་མཐོན་ནས་རྣོ་བ་ལ། །ལྟོགས་ཤིང་རྟག་ཏུ་ནོར་མེད་དབུལ་པོར་འགྱུར། །མགོ་བོ་གླང་ཆེན་ལྟ་བུ་རྒྱལ་པོ་འདྲ། །དབང་ཕྱུག་དུ་མའི་བདག་པོ་བྱེད་
པར་འགྱུར། །མགོ་བོ་གྲུམ་པ་ལྟ་བུ་སྐྱེས་པ་དང་། །རྡུལ་དང་སྐྲ་དང་ལྡན་པའང་དེ་བཞིན་ནོ། །རྡུལ་ཅན་ཆེན་པོ་མཐུག་པོར་སྐྱེས་པས་སྡུག །སྲབ་མཐུག་སྙོམས་པ་སྐྱེས་པ་བདེ་བར་འཚོ། །ལེགས་པ་རྩ་བ་སྙོམས་པ་རིང་ཐུང་མེད། །དེ་འདྲ་མི་ཡི་དབང་ཕྱུག་ཐོབ་པར་བྱེད། །རྒྱ་མཚོས་བསྟན་པ་ལས་
མཚན་བཅོ་ལྔ་སྐྱེས་པའི་མཚན་བསྟན་པ་རྫོགས་སོ།།      །།བུད་མེད་མཚན་རྣམས་བསྟན་གྱིས་མཉན་པར་གྱིས། །པདྨ་ལྟ་བུར་དམར་བ་སྣུམ་པོ་དང་། །རྐང་པ་ཆུང་བའི་བུད་མེད་བདེ་བར་འཚོ། །འཁོར་ལོག་དུགས་དང་པདྨ་རྒྱལ་མཚན་དང་། །རལ་གྲི་འདྲ་བའི་རི་མོ་གང་ཡོད་པ། །རྒྱལ་པོའི་
བཙུན་མོར་འགྱུར་བར་རྒྱ་མཚོས་བཤད། །རྐང་པའི་སོར་མོའི་འོག་ཏུ་གྱེན་ཐུར་ལ། །རི་མོ་ཡོད་ན་དཔོན་པོའི་ཆུང་མར་འགྱུར། །རྐང་པ་སྲབ་མོ་ཆེ་ན་གཡོག་ཏུ་འགྱུར། །རྐང་པ་སྐམས་པ་ལྟོགས་པར་འགྱུར་བ་ཡིན། །འགྲོ་ན་བྱ་བྲན་ལྟ་བུའང་དེ་བཞིན་དུ། །དེ་ལ་རང་གི་རིགས་དང་ཚུལ་

203-1-148a

ཁྲིམས་མེད། །མཐེ་ཆུང་ས་ལ་མི་འབྱར་ཁྱོ་པོ་འཆི། །གུང་མོ་ས་ལ་མི་འབྱར་བུད་མེད་ནི། །སྐྱེས་པ་ལྟ་བུའི་སྤྱོད་པ་བྱེད་པར་འགྱུར། །མཛུབ་མོ་ཟླུམ་པ་ས་ལ་མི་རེག་པ། །ཁྱོ་པོ་སྤངས་ཤིང་སྐྱེས་པ་གཞན་དང་སྤྱོད། །སོར་མོ་སོ་སོར་གྱེས་པ་
སྟུག་ཅིང་གསོན། །དེ་ནི་གཞན་གྱི་གཡོག་མོ་བྱེད་པར་འགྱུར། །སོར་མོ་སྦོམ་པོ་བདེ་བ་མེད་པར་བྱེད། །སོར་མོ་སྐམས་པ་རྩ་དང་བཅས་པ་ནི། །སྡུག་བསྔལ་འཛིན་པར་བྱེད་པའི་བུད་མེད་ཡིན། །རིང་བ་སྙོམས་པ་གཙང་བ་བདེ་བར་འགྱུར། །སོར་མོ་སྙོམས་པ་བར་མེད་ཤ་
དངས་པ། །རྟག་ཏུ་བདེ་བར་འགྱུར་བའི་བུད་མེད་ཡིན། །རང་གི་ཁྱོ་བོས་ཆོག་པར་འཛིན་པར་བྱེད། །སོར་མོ་མཐོ་བ་ཟླུམ་པ་པད་མའི་མདངས། །དེ་ལ་བུ་དང་ནོར་རྣམས་བརྟན་པར་འགྱུར། །སོར་མོ་ཆུང་བ་ས་ལ་རེག་པར་བྱེད། །སྐམས་ལ་རྡུལ་དང་བཅས་པའི་བུད་མེད་
དེ། །རྟག་ཏུ་སྡུག་བསྔལ་འབའ་ཞིག་སྤྱོད་པར་བྱེད། །མཐེབ་ཆེན་གས་པ་སེན་མོ་ངན་པ་ཅན། །དེ་ཡི་སྤུན་ཟླ་ཉམས་པར་འགྱུར་བ་ཡིན། །རྒྱ་མཚོས་བསྟན་པ་ལས་བུད་མེད་ཀྱི་མཚན་བསྟན་པ་གཅིག་པའོ།།      །།རྐང་པའི་མཐིལ་གྱི་ཤ་རྒྱུད་མཛེས་ཤིང་ཀོང་། །དེ་
ནི་སྨད་འཚོང་བྱེད་པར་འགྱུར་བ་ཡིན། །ཤིན་ཏུ་སྦོམས་ན་སྡུག་བསྔལ་འབའ་ཞིག་འཐོབ། །ས་ལ་རེག་ཅིང་སྙོམས་པ་བདེ་བར་འཚོ། །བོལ་ཚིགས་མ་ཧེ་ལྟ་བུ་འཆི་བར་འགྱུར། །བོལ་ཚིགས་སྙོམས་པའི་བུད་མེད་བདེ་བར་འཚོ། །བརླ་ཡི་ཤ་རྒྱས་སྙོམས་པ་སྣུམ་པ་དང་། །རྩ་མེད་
སྤུ་དང་བྲལ་བའི་བུད་མེད་དེ། །འགྲོ་བ་འདུག་པ་ཀུན་དུ་བདེ་བར་འཚོ། །བརླ་ལ་གྱེན་ཐུར་རི་མོ་གཉིས་ཡོད་ན། །སྨད་འཚོང་བྱེད་དེ་ཚུལ་ཁྲིམས་གཉིས་པ་ཡིན། །རི་མོ་ཆུང་ན་ཁྱོ་པོ་འཆི་བར་འགྱུར། །གྱེན་དུ་རི་མོ་གཅིག་པ་བདེ་བར་འཚོ། །རྒྱ་མཚོས་བསྟན་པ་ལས་མཚན་
གཉིས་པའོ།།      །།བརླ་འོག་རི་མོ་འཕྲེད་ལ་ཡོད་པ་ནི། །ཕྱི་རོལ་སྐྱེས་པ་གཞན་རྣམས་འཚོ་བར་བྱེད། །བརླ་སྟོང་ཤིན་ཏུ་ཤ་རྒྱས་བདེ་བའི་མཚན། །ནང་ནས་ཕྱི་རོལ་ཤིན་ཏུ་གནག་པའི་སྤུ། །ཉུང་ངུ་སྙོམས་པར་སྐྱེས་པའི་བུད་མེད་ནི། །མི་ཡི་བདག་པོའི་བཙུན་མོ་བྱེད་

203-1-148b

པར་འགྱུར། །མཚན་མ་རུས་སྦལ་རྒྱབ་ཅན་སྣུམ་ཞིང་རྒྱས། །བ་སྤུ་ལྟ་བུའི་སྤུ་དང་བཅས་པ་ནི། །ནོར་དང་དོན་འདོད་བུ་དང་ལྡན་ཞིང་བདེ། །དེ་ནི་ཁྱོ་ལ་བསྙེན་བཀུར་བྱེད་པར་འགྱུར། །ཤ་སྐམས་ཆེན་མོ་རྩ་ཡིས་གང་བ་ནི། །ལྟོགས་ཤིང་སྡུག་བསྔལ་ཆེན་པོ་སྐྱེ་བར་འགྱུར། །
གཡས་ཀྱི་ཤ་རྒྱས་བུ་དང་ལྡན་པ་ཡིན། །གཡོན་པ་མཐོ་ན་བུ་མོ་སྐྱེ་བར་འགྱུར། །དམར་སེར་སྤུ་ཅན་ལྟོགས་པར་འགྱུར་བ་ཡིན། །སྤུ་ནང་སྐྱེས་པ་བདེ་བ་འཚོ་བར་བྱེད། །བ་སྤུ་ལྟ་བུ་མང་པོ་རྒྱས་པའི་སྤུ། །གནག་པ་མ་ཡིན་ཉུང་བ་མ་ཡིན་པས། །ཤིན་ཏུ་བདེ་བ་མང་
པོས་གང་བར་འགྱུར། །ཤིན་ཏུ་དཀྱིལ་འཁོར་གང་བ་མཐའ་མ་ལ། །སྙོམས་ཤིང་མཛེས་པར་གྱུར་པའི་སྤུ་དང་ལྡན། །རུས་སྦལ་རྒྱབ་བམ་གླང་ཆེན་སྤྱི་བོ་ལྟར། །འགྲམ་གྱི་ཤ་རྒྱས་ཁྱོ་དང་བཅས་པ་བདེ། །མཚན་མ་སྐམས་པ་ཀོང་པ་ངན་པའི་མཚན། །གང་ལ་ཡོད་
པ་ལྟོགས་དང་སྡུག་བསྔལ་འབྱུང་། །འགྲོ་ཚེ་ཚང་ར་འགུལ་ཞིང་ཕྱི་ནས་སྙོགས། །ཚུལ་ཁྲིམས་གཉིས་པ་བྱེད་པའི་འོས་སུ་འགྱུར། །མི་འགྱུར་བརྟན་པ་བདེ་བ་ཐོབ་པར་བྱེད། །ཚང་ར་སྦོམ་པ་གྲུ་བཞི་གཅང་བ་ནི། །བ་སྤུ་ཅུང་ཟད་ཡོད་པ་བདེ་བར་འགྱུར། །རྒྱ་མཚོས་བསྟན་པ་
ལས་མཚན་གསུམ་པའོ།།      །།ལྟེ་བ་ཟབ་པ་སྐྱེས་པས་ཕོངས་པ་མེད། །པདྨ་གེ་སར་ལྟ་བུའི་ལྟེ་བ་ཅན། །བདེ་བར་འཚོ་ཞིང་བཟང་པོའི་མཚན་དུ་བཤད། །ལྟེ་བ་མཐོ་བ་རྒྱས་པ་རྡུལ་དང་སྤུ། །མེད་པ་སྡུག་བསྔལ་མང་པོ་འཛིན་པར་འགྱུར། །ཤ་སྐམས་རིང་པོ་
རྡུལ་དང་སྤུ་ཡིས་གང་། །ལེགས་པ་མེད་པ་གང་ཞིག་འཇིགས་པར་སྐྱེས། །གླང་ཆེན་འགྲོས་དང་བ་ལང་ངང་པ་དང་། །རྨ་བྱ་ནེ་ཙོའི་འགྲོས་ཅན་བཟང་པོའི་མཚན། །འགྲོ་ཞིང་སྨྲ་དང་ཅེ་སྤྱང་སྐད་ཅན་ནི། །བདེ་སྤོང་སྡུག་བསྔལ་ཆེན་པོ་འཛིན་པར་བྱེད། །རྐུབ་ཚོས་རྩ་ཡིས་གང་
དང་མདུད་པ་ཅན། །བུད་མེད་ཁྱོ་དང་བྲལ་བར་ཆགས་པ་ཡིན། །ཚུལ་ཁྲིམས་གཉིས་པ་དེ་ནི་སྨད་འཚོང་འགྱུར། །གསུས་པ་ཆུང་ན་བུད་མེད་སྨད་འཚོང་འགྱུར། །གསུས་པ་ཤ་ཡིས་གང་བ་རྩ་དང་བྲལ། །རྟག་ཏུ་ལྟོགས་ཤིང་ནོར་མེད་སྡུག་བསྔལ་འགྱུར། །གསུས་པ་གཙང་

203-1-149a

ཞིང་སྣུམ་པ་ལེགས་པ་སྟེ། །ནུ་མ་གཡས་པ་རྒྱས་པ་བུ་དང་བཅས། །གཡོན་པ་མཐོ་ན་བུ་མོ་འབྱུང་བར་འགྱུར། །འཁྱོག་ཅིང་ཡོ་བ་བུ་དང་བྲལ་བར་འགྱུར། །སྐམས་དང་རྩ་བ་ཡོ་བར་འགྱུར་བ་ལ། །རྩེ་མོ་སྐམས་པ་སྡུག་པའི་མཚན་མ་སྟེ། །དེ་ཡི་ཁྱོ་
འཆི་བུ་དང་བྲལ་བ་ཡིན། །ནུ་མ་རྒྱས་པ་ཤ་ཡིས་གང་བ་ཡི། །རབ་ཏུ་དལ་རྒྱས་པ་ནི་མདངས་དང་ལྡན། །དེ་ལ་བུ་དང་ནོར་དང་བུ་མོ་འབྱུང་། །རྒྱ་མཚོས་བསྟན་པ་ལས་མཚན་བཞི་པའོ།།      །།སྐེད་པ་སྒུར་བ་གཞུ་འདྲ་གཡོག་མོར་འགྱུར། །རྐེད་པ་གྱོང་
པོ་ཁྱོ་པོ་འཆི་བར་འགྱུར། །ཤ་སྐམས་རྩ་ཡིས་གང་བ་སྡུག་པར་འགྱུར། །རྐེད་པ་སྤུ་ཅན་ཤུ་བ་འདྲ་བས་གང་། །དེ་ལ་སྡུག་བསྔལ་ཆེན་པོ་ཐོབ་པར་འགྱུར། །བྱ་བྲང་བྱུང་བ་སྡུག་པའི་མཚན་མ་ཡིན། །བྲང་ཞེང་སྙོམས་པ་སྤུ་ཡིས་གང་བ་དང་། །ཤ་ཡིས་རྒྱས་པ་ཁྱོ་པོ་བཟང་པོ་
ཐོབ། །བྲང་ཞེང་སྲབ་པ་ཁྱོ་པོ་འཆི་བར་བཤད། །བསྐམས་པའི་བྲང་ཀྱང་དེ་བཞིན་ཁྱོ་པོ་འཆི། །རྒྱ་མཚོས་བསྟན་པ་ལས་མཚན་ལྔ་པའོ།།      །།ལག་པ་སྤུ་མེད་ཆུ་འཛིན་ཟངས་ཀྱི་མདོག །སྣུམ་པ་བདེ་ཞིང་ཤ་རྒྱས་ནོར་དང་ལྡན། །ལག་པ་གཡས་པའི་སེན་མོ་
གས་པ་དང་། །ཤིན་ཏུ་སྲབ་པ་སྤུ་ཡིས་གང་བ་ནི། །རྡུལ་ཅན་རྩ་དང་བཅས་པ་ངན་པ་ཡིན། །པདྨ་འདབ་མ་ལྟ་བུ་སྙོམས་ཤིང་དག །གཤིབས་ནས་བསླང་ན་བར་དུ་མཐོང་བ་མེད། །དེ་འདྲའི་བུད་མེད་བདེ་བར་འགྱུར་བའི་མཚན། །ལྟེ་བའི་དཀྱིལ་དུ་གོས་ཀྱིས་གཡོགས་ཤིང་
གནས། །ནོར་བུ་དང་ནི་ལྡན་པར་འགྱུར་བ་ཡིན། །ལག་པ་སྲབ་མོ་རྣ་བ་ཆེན་མོ་ཅན། །ཚེ་ཐུང་མྱུར་དུ་འཆི་བར་འགྱུར་བ་ཡིན། །མཛུབ་མོ་ཆེན་མོའམ་རྣ་བ་ཆེན་པོ་ཅན། །སྲིན་མོའི་རིགས་ཏེ་བདག་པོ་ཟ་བར་བྱེད། །ལག་པའི་རི་མོ་རྒྱང་ནས་གསལ་པོར་མཐོང་། །སྣུམ་པ་མཐོ་བ་དེ་ནི་
བདེ་བར་འཚོ། །ལག་པ་ཆུང་བ་སྣུམ་པ་དེ་འདྲ་བ། །བདེ་ཞིང་གསོན་པར་འགྱུར་བའི་མཚན་མ་ཡིན། །ལག་པ་མཐུག་པ་རི་མོ་རྡུལ་དང་བཅས། །དམར་བ་སྣུམ་པ་རིང་བ་མཆོག་ཏུ་བཟང་། །དེ་འདྲའི་ལག་པ་གང་ལ་ཡོད་གྱུར་ན། །རིགས་ངན་ཡིན་ཡང་རྒྱལ་པོའི་བཙུན་མོར་འགྱུར། །

203-1-149b

ཤ་ཡིས་གང་ལ་བཀྲ་ཤིས་མཚན་མ་ཅན། །དཔོན་པོའི་ཆུང་མ་ནོར་གྱི་དབང་ཕྱུག་འགྱུར། །སྤུ་མེད་དཀར་པོར་གནས་པ་ཟངས་ཀྱི་མདོག །སྣུམ་པ་དེ་ཡང་བདེ་བར་འཚོ་བའི་མཚན། །སེན་མོ་གས་པ་རྡུལ་ཅན་བུ་གས་གང་། །སྤུ་དང་བཅས་པ་དེ་ནི་སྡུག་པར་འགྱུར། །ལག་པ་བཀྲ་
ཤིས་རྟགས་ཅན་སྣུམ་པ་ནི། །བུ་དང་ནོར་རྣམས་ཐོབ་པར་བྱེད་པ་ཡིན། །ལག་པ་དམར་པོ་སྣུམ་པ་གཙང་བ་ནི། །ཡོད་པ་དེ་ནི་རྒྱལ་པོའི་བཙུན་མོར་འགྱུར། །མེ་ཏོག་གདུགས་དང་བུམ་པ་བཀྲ་ཤིས་མཚན། །རྔ་མ་རལ་གྲི་ཡོད་པ་དོན་གསུམ་འགྲུབ། །གཙང་མ་པདྨོ་རྒྱལ་མཚན་ཡོད་
གྱུར་ན། །དེ་ལ་སྐྱེས་པ་རྒྱལ་པོ་འདྲ་བར་འགྱུར། །རྒྱ་མཚོས་བསྟན་པ་ལས་མཚན་དྲུག་པའོ།།      །།ཧ་ཅང་ལག་ཆུང་ཉོན་མོངས་སྐྱེ་བར་འགྱུར། །ནན་ཏུར་ཆེ་བ་བདག་པོ་འཆི་བར་འགྱུར། །སྤུ་ཡིས་གང་བའང་དེ་བཞིན་འགྱུར་བ་ཡིན། །རིང་བ་སྙོམས་པ་བདེ་བ་འཐོབ་
པར་བྱེད། །མཆོག་ཏུ་མགྲིན་པ་སྦོམ་པའང་དེ་བཞིན་ནོ། །གང་ཞིག་མདུན་དུ་སྒུ་བ་སྡུག་པ་ཡིན། །གཡོན་ན་ཤ་མཚན་ནག་པོ་ཡོད་པ་ན། །དེ་ཡི་ཁྱོ་པོ་འཆི་བར་འགྱུར་བ་ཡིན། །ཤ་མཚན་དཀར་པོ་གཙང་བ་ཡོད་པ་ནི། །དཔོན་པོའི་ཆུང་མ་བྱེད་པར་འགྱུར་བ་ཡིན། །མགྲིན་
པ་ཤ་སྐམས་རྩ་ཡིས་གང་བ་ནི། །སྡུག་བསྔལ་མང་པོ་སྐྱེ་བར་འགྱུར་བ་ཡིན། །རྒྱ་མཚོས་བསྟན་པ་ལས་མཚན་བདུན་པའོ།།      །།མཆུ་ལ་སེར་ཀ་མང་པོ་ཤུ་བ་ཅན། །མཆོག་ཏུ་མཐུག་པ་སྨད་འཚོང་བྱེད་པར་འགྱུར། །སྐམས་པའི་མཆུ་ཅན་ཁྱོ་པོ་འཆི་བར་འགྱུར། །
རྩ་བའི་མཐའ་ཅན་སྣུམ་པ་སྙོམས་པ་ནི། །བུ་དང་བྲལ་བ་དམར་བ་ནོར་དང་བུ། །རྒྱས་ཤིང་རྟག་ཏུ་བདེ་བ་ཐོབ་པར་འགྱུར། །མཆུ་སྒྲོས་ཐད་ཀར་གྱེན་དུ་རི་མོ་ཅན། །ཤིན་ཏུ་བདེ་ཞིང་སྐྱིད་པའི་མཚན་མ་ཡིན། །ནག་པོའི་མཆུ་ཅན་ཀུན་དང་འཁོན་པར་བྱེད། །སྐམས་པ་རྡུལ་ཅན་མཐུག་པ་
སྡུག་པའི་མཚན། །སྙོམས་པ་དཀར་པོ་སྣུམ་པ་བདེ་བར་བྱེད། །མ་སོ་འཁྱོག་པ་བུ་མོ་འཆི་བར་བྱེད། །ཡ་སོ་འཁྱོག་པ་བུ་རྣམས་འཆི་བར་འགྱུར། །བརྫུན་ཅན་སྨད་འཚོང་བྱེད་པའི་རིགས་སུ་འགྱུར། །སོ་ལ་རེག་ན་ལྡེག་པར་ལྟོགས་པ་དང་། །བཅུ་དྲུག་ལོན་ནས་སྐྱེས་པ་འཚོ་བར་འགྱུར། །

203-1-150a

རྒྱ་མཚོས་བསྟན་པ་ལས་མཚན་བརྒྱད་པའོ།།      །།ལྕེ་མདོག་དམར་པོ་ནོར་དང་ལྡན་པར་འགྱུར། །སྲབ་མཐུག་སྙོམས་པའི་ལྕེ་ཡང་དེ་བཞིན་ནོ། །མཆོག་ཏུ་སྲབ་པ་དཀར་བ་ནད་དང་བཅས། །ཤིན་ཏུ་མཐུག་པའི་ལྕེ་ཡང་དེ་བཞིན་ནོ། །དེ་ནི་ཀུན་དང་འཁོན་པར་བྱེད་པ་ཡིན། །
རིང་བར་སླེབ་ཅིང་དམར་བ་སྣུམ་པ་ནི། །དེ་ཡིས་བདེ་བ་ཆེན་པོ་ཐོབ་པ་ཡིན། །རྐན་གྱི་ཁ་དོག་དཀར་བ་ལྟོགས་པ་ཡིན། །རྡུལ་ཅན་རྐན་ནི་ཆོས་ལ་རྟོན་པར་འགྱུར། །སེར་མོ་མཆོག་ཏུ་སྡུག་བསྔལ་ཆེན་པོ་འཐོབ། །པདྨའི་འདབ་ཅན་བདེ་བ་ཐོབ་ཅིང་མཆོད། །ཆུ་བྱའི་སྐད་ཅན་ངང་པ་ཁུ་བྱུག་གི། །གདངས་
ཅན་རྒྱལ་པོའི་བཙུན་མོ་བྱེད་པར་འགྱུར། །འགྲམ་འོག་སྣུམ་པ་ཤ་རྒྱས་བདེ་བར་འགྱུར། །སྐམས་པ་རྡུལ་ཅན་ཤུ་བ་མང་བ་དང་། །རྩ་ཡིས་གང་བ་སྡུག་བསྔལ་མང་པོ་ཐོབ། །དེ་ལ་བུ་དང་འབྲལ་བ་རྒྱ་མཚོས་བཤད། །སྣ་གོང་རིང་བ་ཁྲོ་བར་འགྱུར་བ་ཡིན། །ནན་ཏུར་ཆུང་ན་གཡོག་པོར་
འཁོལ་བར་འགྱུར། །སྣ་གོང་སྲབ་པ་ཁྱོ་པོ་འཆི་བར་འགྱུར། །རིང་པོའི་རྡུལ་དང་ཚུལ་ཁྲིམས་གཉིས་པ་ཡིན། །ཆེ་ཆུང་སྙོམས་པ་བུད་མེད་བདེ་བ་ཆེ། །སྣ་གོང་མཐོ་བ་བདེ་བ་ཆེན་པོར་བཤད། །རྒྱ་མཚོས་བསྟན་པ་ལས་མཚན་དགུ་པའོ།།      །།དམར་སེར་མིག་ལ་རྩ་དང་
ལྡན་པ་ནི། །བུ་དང་བདེ་བ་མང་པོ་འཐོབ་པར་བྱེད། །གཡོན་པ་མཐོ་བ་བདེ་བ་མེད་པར་འགྱུར། །གཡས་པ་མཐོ་ན་བུད་མེད་དོན་དང་བྲལ། །སྦྲུལ་དང་བྱི་ལའི་མིག་ཅན་དགེ་བ་མེད། །དམར་སེར་མིག་ཅན་གྱོས་པོའམ་བུ་དང་ནི། །ཕ་ལ་སོགས་པ་རྣམས་ལ་སྦྱོར་བར་བྱེད། །པདྨའི་
འདབ་མ་ལྟ་བུ་སྙོམས་ཤིང་སྡུག །སྣུམ་པ་རིང་ཞིང་ཞིབ་པའི་མདངས་ཅན་དང་། །རྨ་བྱ་ངང་པ་རི་དྭགས་ལྟ་བུ་ཡང་། །བུད་མེད་མཆོག་ཏུ་གྱུར་པའི་མཚན་མ་ཡིན། །མིག་གི་རྫི་མ་མང་བ་སྣུམ་ཞིང་གཙང་། །ནོར་ཅན་ནོར་གྱི་བདག་པོ་བྱེད་པར་འགྱུར། །སྨིན་མ་མཐོ་ནག་རིང་ཞིང་སྙོམས་ལ་
གཙང་། །རྣ་བ་ཆེན་མོ་ཤ་ཅན་ཞུམ་ཞིང་གཙང་། །སྐྲ་མང་ཆུང་བ་གནས་ནི་བདེ་བའི་མཚན། །དཔྲལ་བར་རི་མོ་གསུམ་པ་རྩ་དང་སྤུ། །སྙོམས་པ་དྲུག་པ་ཚེ་རིང་བདེ་བའི་མཚན། །ཆེ་ཆུང་སྙོམས་པ་རིང་ཐུང་མེད་པ་ནི། །རི་མོ་ལེགས་པར་མཐོང་བ་རྒྱལ་པོ་དང་། །ལྷན་ཅིག་གནས་པར་

203-1-150b

གྱུར་པ་རྒྱ་མཚོས་བཤད། །བུད་མེད་དྲེད་ཀྱི་སྐྲ་ཅན་སྦོམ་ཞིང་རིང་། །དེས་ནི་ཁྱོ་པོ་ཟ་བར་འགྱུར་བ་ཡིན། །བུད་མེད་ཕག་གི་གཟུགས་ལྟར་སྦོམ་ཞིང་རིང་། །སེར་སྐྱའི་སྐྲ་ཅན་ཁྱོ་དང་འཁོན་པར་བྱེད། །རྡུལ་ཅན་སྐྲ་ཚོགས་སྲབ་པ་སྡུག་བསྔལ་ཐོབ། །རིང་ཐུང་ལག་པའི་ཚད་ཅན་སྣུམ་
པ་དང་། །རྨ་བྱའི་མདངས་ཅན་རྒྱལ་པོའི་སྦྱོར་བར་འགྱུར། །རྒྱ་མཚོས་བསྟན་པ་ལས་བུད་མེད་ཀྱི་མཚན་བཅུ་པ་རྫོགས་སོ།།      །།པཎྜི་ཏ་པྲ་བྷཱ་ཀ་ར་དང་། བོད་ཀྱི་ལོ་ཙཱ་བ་དགེ་སློང་ཨུ་རྒྱན་པས་བསྒྱུར་བའོ།།       ༄། །མི་དཔྱད་ཀྱི་བསྟན་
བཅོས་བསྡུས་པ་བཞུགས།      ༄༅༅། །གང་ལ་གཉེར་མ་ལྔ་ཡོད་ཅིང་། །དེ་ཡི་སྣ་རྒྱུད་མཐོ་བ་དང་། །དཔྲལ་བའི་མཐའ་གཉིས་རྒྱས་ཤིང་མཐོ། །ལུས་པོ་ཤིན་ཏུ་སྦོམ་ལ་སྙོམས། །མགོ་བོ་ཟླུམ་ཞིང་རབ་ཏུ་རྒྱས། །སྨན་ར་སྲབ་ཅིང་སྙོམས་པ་དང་། །ན་ཆུང་ལྟ་བུར་ནུ་མ་རྒྱས། །
དཀར་དྭངས་སོ་ནི་དམ་ཞིང་སྙོམས། །མིག་གི་དབང་པོ་རྒྱས་ལ་གསལ། །རྣ་བ་མདངས་སྙུག་ཆུང་ཞིང་སྙོམས། །ཕྲག་གོང་རབ་ཏུ་རྒྱས་པ་དང་། །རྐང་པའི་སོར་མོ་བཅུ་པོ་ནི། །ཤ་རྒྱས་བཀྲག་བཟང་བོལ་གོང་མཐོ། །གང་གི་མཆན་ཁུང་སྤུ་མེད་པ། །ལག་པ་ཆུང་ཤིང་ཤ་རྒྱས་པ། །དེ་
རྣམས་མཚན་ལྡན་ལྷ་ཡི་རིགས། །སྐོམ་གདུངས་ཆེ་ཞིང་ཆུང་ངུ་ཟ། །ཤ་ཡི་ཟས་ལ་རྣམ་པར་རྩི། །ནད་མེད་དེ་ཡི་ལུས་ལ་ནི། །ཉི་ཤུ་རྩ་ལྔའི་ལོ་ལོན་ཚེ། །ཆུ་ཡི་གནོད་པ་འབྱུང་བར་འགྱུར། །ཡུལ་རྣམས་བསྐོར་ཞིང་རྣམ་པར་འཁྱམས། །ཀུན་དུ་བདེ་སྐྱིད་ལྡན་པར་བྱེད། །བརྫུན་
ཚིག་སྤངས་ཤིང་ཐམས་ཅད་སྟེར། །འདོད་པ་ཆུང་ཞིང་མི་རྐུ་བ། །དོན་རྣམས་སྨྲ་བ་བཞིན་དུ་སྒྲུབ། །གང་ཞིག་མི་ཡི་རིགས་གྱུར་པ། །གདོང་རིང་གྱེན་དུ་གཉེར་མ་ཅན། །སྨ་ར་ཉུང་ཞིང་རྣ་ཤལ་རིང་། །བསྡུས་པ་ལག་པ་རྣམ་པར་འགུལ། །འབྲུ་ཚུགས་སུ་ནི་རྣམ་པར་ལྟ། །ལུས་
པོ་རྗུད་ཅིང་སྐེམས་པ་དང་། །བ་སྤུ་མང་ཞིང་རིང་བ་དང་། །དེ་ཡི་མིག་ནི་གཏིང་དུ་སོང་། །སྣ་ནི་ཆུང་ཟད་ལེབ་པ་དང་། །ལུས་བོང་རིང་ཞིང་བརྣབ་སེམས་ཆེ། །མང་དུ་ཟ་ཞིང་ཀུན་ལ་འཁོན། །འདོད་པ་ཆེ་ལ་གཅིག་ཏུ་བརྗོད། །ཆོས་མིན་སྤྱོད་ཅིང་ཐོབ་ཚད་ཟ། །སེམས་ངན་དེ་ནི་མི་ཡི་

203-1-151a

རིགས། །རྐང་པ་རིང་ཞིང་གདོང་པ་སྐམས། །རྐང་ལག་སེར་ཀ་མང་བ་དང་། །གནག་ཅིང་བ་སྤུ་མེད་པ་དང་། །ཟས་ངན་བཟའ་ཞིང་བཟང་པོ་འདོར། །མཚན་ངན་དེ་ནི་ཉི་མ་འདོད། །ལག་པའི་ནོར་རྣམས་ཉམས་པར་བྱེད། །དེ་རྣམས་མཚན་ངན་ཡི་དྭགས་
མི། །འགྲོ་ཞིང་འགྲོ་ཞིང་སྡོད་པ་དང་། །འགྲོ་ཞིང་ཕྱོགས་རྣམས་ཀུན་དུ་བལྟ། །རྐང་པ་ཤ་མེད་རྩ་ཡིས་གང་། །སྨ་ར་ཆེའམ་ཡང་ན་མེད། །དེ་རྣམས་མཚན་ལྡན་དུད་འགྲོའི་རིགས། །དེ་རྣམས་རྣམ་པར་བཤད་བྱ་བ། །གང་གི་དཔྲལ་བའི་སྐྲ་མཚམས་ལ། །ཐིག་ལེའམ་
རི་མོ་མངོན་ཅན་ཆགས། །བློ་ལས་ལྡན་ཞིང་སྡུག་བསྔལ་ཐོབ། །སྣ་ཡི་གཡས་གཡོན་མཁུར་བ་ལ། །ཤ་མཚན་ནག་པོ་ཆགས་གྱུར་ན། །ཟླ་དྲུག་ལོན་ནས་ནད་ཀྱིས་འདེབས། །མིག་ལ་ནག་པོ་ཆགས་པ་ན། །ནོར་ཡོད་ཟས་ཀྱིས་ཕོངས་པར་འགྱུར། །གདོང་པ་གཙང་
ཞིང་མདངས་བཟང་ན། །ནད་མེད་གཙང་ཞིང་བདེ་བར་འཚོ། །མཁུར་བ་གཡས་སམ་གཡོན་པ་ལ། །མཛེར་པ་ཆུང་ངུ་ཆགས་པ་ན། །ལོངས་སྤྱོད་ལྡན་ཞིང་རྙེད་པ་ཐོབ། །སྣ་འདེབས་ནང་ན་སྨེ་བ་ཆགས། །གང་ཞིག་སུམ་ཅུ་ལོན་པའི་ཚེ། །གསེར་དང་རྟ་ཡི་རྙེད་པ་ནི། །རྒྱལ་
པོ་ལས་ནི་ཐོབ་པར་འགྱུར། །མི་དཔྱད་འདི་རྡོ་རྗེ་གདན་དུ་ཨུ་རྒྱན་པས་བསྒྱུར་བའོ།།      ༄༅༅། །རྒྱ་གར་སྐད་དུ། ས་མུ་དྲི་ཀམ་པ་རཱི་ཀྵ་ཏེ་ན་ར་ལཀྵ་ཎེ་ནཱ་མ། བོད་སྐད་དུ། མིའི་མཚན་ཉིད་བརྟག་པ་རྒྱ་མཚོ་ཞེས་བྱ་བ། ཐམས་ཅད་མཁྱེན་
པ་ལ་ཕྱག་འཚལ་ལོ། །ཐམས་ཅད་མཁྱེན་པས་ཐམས་ཅད་གཟིགས། །དང་པོའི་ལྷ་ལ་ཕྱག་འཚལ་ནས། །སྐལ་བཟང་སྐྱེས་པ་བུད་མེད་ཀྱི། །རྒྱ་མཚོ་རབ་ཏུ་བཤད་པར་བྱ། །སྔོན་དུ་ཚེ་ནི་ཡོངས་སུ་བརྟག །ཕྱི་ནས་མཚན་ཉིད་ལ་སོགས་རྣམས། །ཚེ་ཐུང་པ་ཡི་མི་
རྣམས་ལ། །མཚན་ཉིད་ཀྱིས་ནི་ཅི་ཞིག་བྱ། །བུད་མེད་རྣམས་ཀྱི་གཡོན་གྱི་ཆ། །སྐྱེས་པ་དེ་ནི་གཡས་སུ་དེ། །རྒྱ་མཚོ་ཡི་ནི་ཚིག་བཞིན་དུ། །དེ་རྣམས་མཚན་ཉིད་ངེས་པར་བརྟག །གནས་ལྔ་རིང་ཞིང་བཞི་ནི་ཐུང་། །ལྔ་ནི་འཕྲ་ཞིང་དྲུག་ནི་མཐོ། །བདུན་ནི་དམར་ཞིང་གསུམ་

203-1-151b

ནི་ཟབ། །གསུམ་ནི་རབ་ཏུ་ཡངས་པར་བསྔགས། །ལག་པ་མིག་དང་བྲང་དང་ནི། །དེ་ནི་པུས་མོ་སྣ་དེ་ནི། །ཡན་ལག་འདི་རྣམས་རིང་བ་ནི། །ལྔ་པོ་རིང་བར་བསྔགས་པ་སྟེ། །མགྲིན་པ་རྐང་པ་རྒྱབ་དང་ནི། །རྗེ་ངར་རྣམས་ནི་ཐུང་བར་བསྔགས། །གང་གི་བཞི་པོ་ཐུང་བ་
རྣམས། །རྟག་ཏུ་མཆོད་པ་ཐོབ་པར་འགྱུར། །སོར་མོ་ཕྲ་ཞིང་ཚིགས་པ་རྣམས། །སོ་དང་སྐྲ་དང་སེན་མོ་པགས། །གང་གི་ལྔ་པོ་ཕྲ་བ་ཉིད། །དེ་ནི་མཚན་ཉིད་མཆོག་ཡིན་ནོ། །མཆན་འོག་རྩིབ་འོག་བྲང་དང་ནི། །སྣ་དང་དཔུང་པ་དཔྲལ་བ་རྣམས། །རྒྱ་མཚོ་ཆེན་པོའི་བདག་
ཉིད་ཀྱིས། །དྲུག་པོ་མཐོ་ན་དགེ་བར་བཤད། །ལག་པ་རྐང་པའི་མཐིལ་དམར་ཞིང་། །མིག་གི་མཐའ་དང་སེན་མོ་དང་། །རྐན་དང་ལྕེ་དང་མཆུ་རྣམས་ནི། །བདུན་པོ་རྣམས་ནི་དམར་བར་བསྔགས། །དབྱངས་དང་སེམས་དང་ལྟེ་བ་སྟེ། །གསུམ་པོ་རྣམས་ནི་ཟབ་ན་
བསྔགས། །བྲང་དང་མགོ་བོ་དཔྲལ་བ་སྟེ། །གསུམ་པོ་རྣམས་ནི་ཡངས་པ་བསྔགས། །ལུས་ཀྱི་ནང་ནས་བཞི་འམ་ནི། །ཡང་ན་ཐམས་ཅད་དུ་ཡང་བརྗོད། །དེ་ལ་མཆོག་ཏུ་རྣ་དང་ནི། །དེ་བཞིན་མཆོག་ཏུ་སོ་རྣམས་དང་། །ཁ་དོག་རྣམས་ནི་མཆོག་ཏུ་སྣུམ། །དབྱངས་ནི་
མཆོག་ཏུ་སྙན་པ་དང་། །དབྱངས་ལས་མཆོག་ཏུ་བདེན་པ་དང་། །ཀུན་ནས་བདེན་པས་རབ་ཏུ་གནས། །མིག་དམར་བུད་མེད་སྤོང་མི་བྱེད། །གསེར་མདོག་དམར་སྐྱ་ནོར་མེད་མིན། །ལག་རིང་རྣམས་ནི་དབང་ཕྱུག་སྟེ། །ཡན་ལག་མཛེས་བསྔགས་བདེན་པར་བྱེད། །དབང་
པོ་ཆུང་ན་ནོར་ལྡན་ཞིང་། །བུ་བྲལ་ཆེ་བས་ནོར་རྣམས་དམན། །སྒྲོ་བའི་གཡོན་དམའ་བུ་ནོར་ཉམས། །གཞན་རྣམས་མོན་པོ་བུ་ལྡན་དབུལ། །མགོ་བོ་ཆེ་ཞིང་རྩ་ཕྲ་དང་། །རྩུབ་དང་རྩ་ནི་མཐོ་བ་དང་། །སྦོམ་དང་མདུད་པ་གང་འགྱུར་དབུལ། །མཉེན་པས་རྟག་ཏུ་བདེ་བ་དང་། །
རྟགས་ནི་གྱོང་པོ་ཡུལ་གཞན་འཁྱམ། །ཆུང་ངུ་རྣམས་ནི་སྐལ་བ་བཟང་། །ཆེན་པོ་ཡིས་ནི་དབུལ་པོ་དང་། །དམའ་མོས་བུད་མེད་ངེས་པར་རྒྱལ། །སྒྲོ་བ་མཉམ་ཞིང་མཛེས་པར་མཐོང་། །ཕན་པ་དང་ནི་ཚེ་དང་ལྡན། །བྲང་ཡངས་འབྲུ་དང་ནོར་རྣམས་སྤྱོད། །བུ་ཡངས་མི་

203-1-152a

བདག་མཆོད་དང་ལྡན། །རྐེད་ཡངས་བུ་ནི་མང་དུ་སྤྱོད། །རྐང་པ་ཡངས་པ་ནོར་དང་ལྡན། །མིག་སྣུམ་པ་ནི་སྐལ་བ་བཟང་། །སོ་སྣུམ་པ་ནི་ཟས་དང་ལྡན། །པགས་པ་སྣུམ་པ་བདེ་བར་འགྱུར། །རྐང་པ་སྣུམ་པ་བཞོན་པར་ལྡན། །ལས་མེད་ལག་པ་དག་ནི་སྲ། །
རྐང་པ་དག་ནི་ལམ་ལ་མཉེན། །གང་གི་ལག་པ་རྐང་པར་ལྡན། །དེ་ནི་རྒྱལ་པོར་ངེས་པར་ལྡན། །གང་ལ་ཉ་ཡི་དབྱིབས་ཡོད་ན། །བརྒྱ་ཡི་བདག་པོར་ཤེས་པར་བྱ། །ཕན་ཚུན་གྱིས་ནི་སྟོང་དུ་ཤེས། །དུང་གིས་བྱེ་བར་ཤེས་པར་བྱ། །པདྨ་ཡིས་ནི་བྱེ་བ་སྟོང་། །མཐེའུ་ཆུང་
གི་ཕྱོགས་རྣམས་ནས། །མིང་མེད་ལ་ནི་རི་མོ་འགྲོ། །རྟགས་ནི་དེ་ཡི་སུམ་ཅུའི་ལོར། །འཚོ་བ་ཉིད་དུ་ཤེས་པར་བྱ། །མཐེའུ་ཆུང་གི་ཕྱོགས་རྣམས་ནས། །གུང་མོ་ལ་ནི་རི་མོ་འགྲོ། །འདི་ཡི་རྟགས་ཀྱིས་དྲུག་ཅུའི་ལོར། །འཚོ་བ་ཉིད་དུ་ཤེས་པར་བྱ། །མཉམ་པའི་ཕྱིར་ན་
བརྒྱད་ཅུར་འཚོ། །མ་མཉམ་དེ་བཞིན་བདུན་ཅུར་འཚོ། །ཚིགས་པས་དམན་པའི་སྐྱེས་བུ་རྣམས། །ལོ་ནི་དྲུག་ཅུར་འཚོ་བར་འགྱུར། །མཐེབ་ཆེན་གྱི་ནི་ཚིགས་ཀྱི་དབུས། །གང་ལ་ནས་ཡོད་རྣམ་པར་དགེ། །རྙེད་དང་ཟས་སུ་ལོངས་སྤྱོད་ཅིང་། །མི་དེ་བདེ་བའི་ལོངས་སྤྱོད་ལྡན། །
རི་མོ་མང་པོ་ཉོན་མོངས་ཤིང་། །ཉུང་བ་ཡིས་ནི་ནོར་དམན་ནོ། །དམར་པོ་ཡིས་ནི་བདེ་བ་ཐོབ། །ནག་པོ་ཡིས་ནི་ཁོལ་པོར་བྱེད། །སློ་མའི་དབྱིབས་དང་རྣམ་པར་རྩུབ། །སེན་མོ་ཡོན་པོ་སྐྱ་བོ་དང་། །རྩེ་མོ་ལ་ནི་རི་མོ་དང་། །ཤིན་ཏུ་དཀར་བར་གྱུར་པ་དང་། །རྐང་པའི་སོར་མོ་
སྤྲད་པ་ནི། །དབུལ་བའི་སྡུག་བསྔལ་རབ་ཏུ་སྟེར། །གང་གི་རྐང་པ་ཚ་བ་དང་། །ངུར་སྨྲིག་འདྲ་བར་གྱུར་པ་ནི། །རིགས་ནི་རྣམ་པར་ཆད་པ་སྟེ། །ཚངས་འཇོམས་གཞན་གྱི་ལས་བྱེད་པ། །ས་སྟེངས་དབང་མེད་མནར་བར་བྱེད། །རྡུལ་མི་འབྱུང་ཞིང་མཐིལ་ནི་མཉེན། །པདྨའི་ལྟེ་
བ་ལྟ་བུས་ཏེ། །སོར་མོ་འབྱར་ཞིང་མཛེས་པ་དང་། །སེན་མོ་ཟངས་མདོག་རྟིང་པ་ལེགས། །བྲོ་ཞིང་རྩ་ནི་མི་མངོན་དང་། །ལོང་བུ་དག་ནི་མི་མངོན་ཞིང་། །རྐང་པ་རུས་སྦལ་ལྟར་མཐོ་ན། །མི་རྣམས་ཀྱི་ནི་དབང་ཕྱུག་གོ། །ཤིན་ཏུ་བློ་ལྡན་གྲགས་པ་ལྡན། །དེ་བཞིན་དུ་ནི་རྣམ་

203-1-152b

པར་གནོན། །བདེ་དང་ཤིན་ཏུ་སྣུམ་པའི་མིག །དེ་རྣམས་ཚེ་ནི་ཐུང་བར་བཤད། །གོས་ངན་ས་ཡི་དྲི་མ་སེལ། །མང་དུ་ཟ་ཞིང་ཚིག་རྩུབ་སྨྲ། །ཉི་མ་ནུབ་ཤར་ཉལ་བ་རྣམས། །གལ་ཏེ་འཁོར་ལོ་ལག་ལྡན་ཡང་། །དཔལ་ནི་རྣམ་པར་སྤོང་བར་འགྱུར། །མགོ་བོ་ལ་
ནི་མེ་ཏོག་བཅས། །རྐང་པ་ལ་ནི་ལེགས་པར་མཆོད། །ཡན་ལག་མཆོག་ལྡན་བསྟེན་པ་དང་། །ཁ་ཟས་ཉུང་ངུ་སྤྱོད་པ་དང་། །གོས་མེད་ཉལ་བར་མི་བྱེད་ཅིང་། །དུས་ཚིགས་འཁྲིག་པ་མི་བསྟེན་ན། །དཔལ་ནི་རབ་ཏུ་ཉམས་གྱུར་ཀྱང་། །སླར་ཡང་རབ་ཏུ་ཐོབ་པར་
འགྱུར། །མི་སྦྱིན་གྱིས་གསུངས་པའི་རྒྱ་མཚོ་ལས་སྐྱེས་པའི་མཚན་ཉིད་བརྟག་པའི་ལེའུ་སྟེ་དང་པོའོ།།      །།མི་སྦྱིན་གྱི་ནི་གསུང་ཇི་བཞིན། །བུད་མེད་མཚན་ཉིད་བཤད་པར་བྱ། །ཉི་མ་འཆར་ཁའི་འོད་མཚུངས་པའི། །བུ་མོ་ཟླ་བ་གང་བའི་གདོང་། །མིག་ཡངས་མཆུ་
ནི་དམར་བ་ཡི། །བུ་མོ་དེ་ནི་རྙེད་ན་བདེ། །ཨུཏྤལ་སྔོན་པོའི་མདོག་ལྟར་སྔོ། །རི་དྭགས་མིག་ཅན་གླང་ལྟར་དཀར། །ནོར་བུ་རིན་ཆེན་མཐའ་དག་དང་། །གསེར་གྱི་རྒྱན་གྱིས་བརྒྱན་གྱུར་མ། །དེ་ནི་གང་ཞིག་མིག་ནག་པའི། །བུ་མོ་དཀར་མོ་ཤིན་ཏུ་མཛེས། །མིག་ཡངས་མཆུ་
ནི་དམར་བ་ཡི། །བུ་མོ་དེ་ནི་རྙེད་ན་བདེ། །གང་ཞིག་འགྲོ་བ་ཙམ་གྱིས་ནི། །ས་གཞི་གཡོ་བ་ལྟར་བྱེད་འགྲོ། །ཇི་ལྟར་མི་སྦྱིན་གསུངས་པ་ན། །དེ་ཡི་ཞེ་འགྲས་བྱེད་པར་གསུངས། །གང་གི་སོར་མོ་མི་སྡུག་ཅིང་། །རྐང་པའི་མཐིལ་ནི་ཉག་པོར་གྱུར། །དེ་ཡང་ཞེ་འགྲས་བྱེད་པ་
ནི། །ཇི་ལྟར་མི་སྦྱིན་གྱིས་ནི་གསུངས། །གང་ཞིག་རྐང་པའི་མཐེ་ཆུང་དག །ས་གཞི་ལ་ནི་མི་རེག་ན། །བདག་པོ་བརྒྱ་ཡང་མྱུར་འཇོམས་ཤིང་། །དེ་སྲིད་དེ་ནི་འཚོ་བར་འགྱུར། །གང་གི་སྐྲ་ཡི་ཚོགས་པ་རྣམས། །རྟག་ཏུ་ལངས་པར་གྱུར་པ་ནི། །རྒྱལ་རིགས་ཉིད་དུ་སྐྱེས་གྱུར་
ཀྱང་། །དེ་ནི་བྲན་མོ་ཉིད་དུ་འགྱུར། །རྨ་བྱ་འཁོར་ལོ་པདྨ་དང་། །བུམ་པ་གང་དང་རྟ་བབས་ལྡན། །དེ་ནི་བྲན་མོའི་རིགས་སྐྱེས་ཀྱང་། །རྒྱལ་པོ་ཡི་ནི་བཙུན་མོར་འགྱུར། །གང་གི་ལག་མཐིལ་རི་མོ་ལ། །སོ་དང་རྟ་བབས་རབ་ཏུ་གནས། །བྲན་མོའི་རིགས་སུ་སྐྱེས་གྱུར་ཀྱང་། །

203-1-153a

དེ་ནི་རྒྱལ་པོའི་བཙུན་མོར་འགྱུར། །རྣམ་པར་བརྩོན་པའི་ངང་ཚུལ་ཅན། །བློ་ནི་རྐུ་བ་ལ་དགའ་ཞིང་། །གཞན་གྱི་རིགས་དང་ལྡན་གྱུར་པ། །སྡིག་པ་མང་བྱེད་ལས་མེད་ཅིང་། །གཞན་གྱི་ཁྱིམ་ལ་ཉེར་བརྟེན་ན། །གལ་ཏེ་བུ་དང་བཅས་གྱུར་ཀྱང་། །མི་ཡིས་དེ་འདྲའི་ཆུང་མ་
སྤང་། །མིག་སྐྱ་ཁྲོན་པའི་འགྲམ་པ་དང་། །ཕ་རོལ་སྐྱེས་བུ་རྣམས་ལ་དགའ། །བྱིན་པ་སྦོམ་ཞིང་སྐྲ་ནི་འཕྱར། །མཆུ་འཕྱང་རྩིབས་ནི་རིང་བ་དང་། །སོ་ནི་སྤྲད་པོ་ཁ་དོག་སྔོ། །རྐན་དང་མཆུ་དང་རྐེད་ལྕེ་དང་། །ཡན་ལག་སྐམས་ཤིང་ཁ་སྐམས་དང་། །ནུ་མ་ཟུང་དག་མི་མཉམ་
དང་། །སྣ་དང་པུས་མོ་རིང་བ་རྣམས། །བུ་བྲལ་ཚུལ་ཉམས་བུད་མེད་དེ། །བུ་མོ་དེ་ནི་ནོར་རྣམས་སྤོང་། །རྡུལ་མི་འབྱུང་ཞིང་མཐིལ་ནི་མཉེན། །པདྨའི་ལྟེ་བ་ལྟ་བུ་སྟེ། །སོར་མོ་འབྱར་ཞིང་མཛེས་པ་དང་། །སེན་མོ་ཟངས་མདོག་རྟིང་པ་ལེགས། །དྲོ་ཞིང་རྩ་ནི་མི་མངོན་
པ། །ལོང་བུ་དག་ནི་མི་མངོན་ཞིང་། །རྐང་པ་རུས་སྦལ་ལྟར་མཐོ་དང་། །བརླ་རྒྱས་འགྲམ་པ་རྒྱས་པ་དང་། །སོ་ནི་དཀར་ཞིང་མཉམ་པ་དང་། །པདྨའི་འདབ་འདྲ་སྤྱན་ཡངས་མ། །བིམ་པའི་མཆུ་དང་སྣ་མཐོ་དང་། །གོམ་པ་གླང་པོ་ལྟར་འགྲོ་དང་། །གཡས་སུ་བསྐོར་ཞིང་
ལོག་པ་དང་། །ལུས་ནི་སྣུམ་ཞིང་ཁ་དོག་མཛེས། །གསང་གནས་མཉེན་ཞིང་མཐུག་པ་དང་། །དབྱངས་སྙན་སྐྲ་ནི་མཛེས་པ་རྣམས། །དེ་ནི་བདག་མོའི་ཞིང་དུ་འགྱུར། །སྐལ་བཟང་བུ་བཅས་བུད་མེད་དེ། །རྔུལ་ཆུ་སྤུ་ནི་ཉུང་བ་དང་། །གཉིད་དང་ཟས་ནི་ཆུང་བ་དང་། །མིག་དང་ལུས་ལ་སྤུ་མེད་ན། །
བུད་མེད་རྣམས་ཀྱི་མཚན་ཉིད་མཆོག །གཉིས་པོའི་མཚན་ཉིད་ཡང་དག་ལ། །གཞོན་ནུ་མ་དང་སྐྱེས་བུ་ཡང་། །དགེ་བ་དང་ནི་མི་དགེའི་ལས། །དེ་བཞིན་དུ་ནི་བྱེད་པར་འགྱུར། །ཞེས་པ་ནི་བུད་མེད་ཀྱི་མཚན་ཉིད་མི་སྦྱིན་གྱི་གསུང་ལས། མིའི་མཚན་ཉིད་བརྟག་པ་
རྒྱ་མཚོ་ཞེས་བྱ་བ་རྫོགས་སོ།།      །།སྡེ་སྣོད་འཛིན་པ་ཆེན་པོ་བྷོ་ཊ་པཎྜི་ཏའི་གསུང་གིས་བསྐུལ་ནས་པཎྜི་ཏ་དྷརྨ་དྷ་རིའི་ཞལ་སྔ་ནས། ཡར་ལུངས་པ་གྲགས་པ་རྒྱལ་མཚན་གྱིས་དཔལ་ས་སྐྱའི་གཙུག་ལག་ཁང་ཆེན་པོར་བསྒྱུར་བའོ།།      ༄། སློབ་དཔོན་པདྨ་དགེ་བསྙེན་གྱིས་

203-1-153b

འཇིག་རྟེན་དབང་ཕྱུག་ལས་གྲུབ་པ་ཐོབ་པའི་ལོ་རྒྱུས་བཞུགས།།      ༄༅༅། །ན་མོ་ལོ་ཀི་ཤྭ་རཱ་ཡ། སྔོན་རྒྱ་གར་ལྷོ་ཕྱོགས་ན་བསྟན་པ་དར་བའི་ཚེ་གཙུག་ལག་ཁང་ཆེན་པོ་གཅིག་ན་པཎྜི་ཏ་ཏིང་ངེ་འཛིན་ལ་བརྟན་པ་ཐོབ་པ་ཅིག་སྔ་དྲོ་རང་གི་བྲང་ཁང་སྒོ་བསྡམས་ཏེ་ཏིང་ངེ་འཛིན་ལ་བཞུགས་ནས།
པོ་ཊ་ལ་ཀེའི་རི་ལ་ཐུགས་རྗེ་ཆེན་པོ་ལ་ཉི་མ་རེ་རེ་ཞིང་ཆོས་གསན་དུ་གཤེགས་སྐད། དེ་ལ་གཡོག་དགེ་བསྙེན་གཅིག་ཡོད་པ་ན་རེ། སློབ་དཔོན་ཉིན་རེ་ཞིང་སྒོ་བསྡམས་ནས་ཐུགས་དམ་མཛད་པ་དེ་ཅི་ལགས་ཞེས་ཞུས་པས། དེ་ཁྱོད་ལ་དོན་ཅི་ཡོད་ཅེས་གསུང་ངོ་། །དེས་བདག་ལ་ཡང་
ཆོས་དེ་ཞུས་ནས་སློབ་དཔོན་བཞིན་དགེ་སྦྱོར་བགྱིད་ཅེས་བྱས་པས། པཎྜི་ཏའི་ཞལ་ན་རེ་ཁྱོད་ཀྱིས་མི་འོང་སྟེ། དགེ་སྦྱོར་གཞན་མི་བྱེད་དཔལ་པོ་ཊ་ལར་ཐུགས་རྗེ་ཆེན་པོ་ལས་ཆོས་ཉན་དུ་འགྲོ་བ་ཡིན་གསུང་ངོ་། །དགེ་བསྙེན་གྱིས་བདག་ཀྱང་དེ་བཞིན་དུ་ཞུ་ཞེས་བྱས་པས། ཇོ་བོ་ལ་ཞུ་དགོས་
གསུངས་ཏེ། ནང་པར་ཆོས་ཐོན་རྗེས་ལ་བཅོམ་ལྡན་འདས་ལ་ཕྱག་དང་བསྐོར་བ་བྱས་ནས་ཞུས་པས། བཅོམ་ལྡན་འདས་ཀྱི་ཞལ་ནས། ལས་ངན་ཚན་པོ་ཆེ་བྱས་པས་དམྱལ་བར་མྱུར་དུ་སྐྱེ་བ་དེ་དང་མཇལ་བའི་སྐལ་བ་མེད་པས་དེ་སྐད་མ་ཟེར་ཅིག་ཅེས་གསུང་ངོ་། །དེའི་ཚུལ་ཞུས་
པས་ཁྱེད་རང་གི་གཙུག་ལག་ཁང་དེ་ན་དུས་གསུམ་གྱི་སངས་རྒྱས་ཐམས་ཅད་ཀྱི་ཡུམ་བརྒྱད་སྟོང་པ་དངུལ་གྱི་གླེགས་བམ་ལ་གསེར་གྱིས་བྲིས་པའི་ཤོག་བུ་གཉིས་བརྐུས་ཏེ་གཟུགས་འཚོང་ལ་བྱིན་གསུང་ངོ་། །དེ་པཎྜི་ཏ་དེ་ལྟ་བུར་རང་གི་ལས་ངན་ཡང་མི་ཤེས་པའི་སེམས་ཅན་གྱིས་བཅོམ་
ལྡན་འདས་ལ་གསོལ་བ་འདེབས་སུ་འཛུད་པ་སྙམ་དུ་སྡུག་བསྔལ་ནས་དེར་ལོག་སྟེ་སྒོ་ཕྱིར་བྱོན་པ་དང་། དགེ་བསྙེན་གྱིས་སློབ་དཔོན་ལ་ཕྱག་ཕུལ་ནས་ཞུས་པས། ཁྱོད་དམྱལ་བར་སྐྱེ་བ་དེ་ལྟ་བུའི་ལས་བྱས་པས་མི་ཤེས་པར་ཞུར་བཅུག་ངན་པ་ཡིན་ཞེས་གསུང་ངོ་། །བདག་གིས་ཅི་
བགྱིས་ཞེས་སྨྲས་པ་སྔར་གྱི་གཏམ་བསྙེན་པ་དང་། དེ་ངོ་ཚ་བ་དང་རྣམ་སྨིན་དམྱལ་བར་སྐྱེ་བས་སྐྲག་ནས་མང་པོ་ངུས་སོ། །དེ་ནས་ཡང་སློབ་དཔོན་ལ་ཕྱག་ཕུལ་ཏེ་ད་བདག་ལས་ངན་པ་འདི་ལས་ཐར་བའི་ཐབས་ཀྱིས་རྗེས་སུ་གཟུང་དུ་གསོལ་ཞེས་ཞུས་པས། དེ་ཁྱོད་ཀྱིས་ནུས་ན་ནི་ངས་

203-1-154a

མི་ཤེས་པས་བཅོམ་ལྡན་འདས་ལ་ཞུ་དགོས་ཞེས་གསུངས་ཏེ། ནང་པར་ཆོས་ཐོན་པའི་རྗེས་ལ་ཕྱག་དང་བསྐོར་བ་བྱས་ནས་བདག་གིས་སྡིག་དེ་ལས་ཐར་པའི་ཐབས་བདོག་ན་ཐུགས་རྗེས་གཟུང་བར་ཞུ་ཞེས་གསོལ་པས། ཐབས་གཞན་མེད་མ་ཤི་བ་ལ་ངའི་ཡི་གེ་དྲུག་པ་འདི་སྒོམ་
བཟླས་རྒྱུན་མི་ཆད་པར་བྱས་ན་ཐབས་ཀྱི་མཆོག་གོ་ཞེས་གསུང་ངོ་། །པཎྜི་ཏས་ཏིང་ངེ་འཛིན་དེ་ལས་བཞེངས་ཏེ་ཕྱིར་བྱོན་ནས་ཁྱོད་བྱ་བ་གཞན་ཐམས་ཅད་བཏང་སྟེ། བཅོམ་ལྡན་འདས་ཡི་གེ་དྲུག་པའི་སྒོམ་བཟླས་ཀྱིས་དུས་འདའ་བར་བྱས་ན་ཕན་ཡོན་ཆེན་པོ་འབྱུང་ཞེས་འཕགས་པ་གསུང་ངོ་ཞེས་སྨྲས་
པས། དེར་དགེ་བསྙེན་གྱིས་སློབ་དཔོན་ལ་གདམས་ངག་རྫོགས་པར་ཞུས་ཏེ། དེ་སྡིག་པའི་འབྲས་བུ་ལ་ཤིན་ཏུ་འཇིགས་སྐྲག་པས་ལྷོ་ཕྱོགས་དཔལ་གྱི་རིའི་ནགས་གསེབ་ཤིན་ཏུ་དབེན་པར་ཕྱིན་ཏེ། ཤིང་མ་ལའི་སྡོང་པོའི་ལོགས་ལ་བུག་པ་ཁོང་སྟོང་ཡོད་པའི་ནང་དུ་བསྡད་དེ་ཤིང་དེའི་པགས་
པ་ཟ་ཞིང་ལོ་བཅུ་གཉིས་གཞན་ཅི་ཡང་ཡིད་ལ་མི་བྱེད་པས་དེར་སྒྲུབ་པ་བྱས་སོ། །ནམ་ཞིག་ཕྱིར་སྒོམ་བཟླས་བྱེད་པའི་ཚེ་བྱ་རོག་ཅིག་གིས་ཡུལ་གཞན་ནས་འབྲས་ཟན་དུམ་བུ་ཁྱེར་ཏེ་སྡོང་པོ་དེའི་ཡལ་གའི་སྟེང་དུ་བཟའ་བར་བརྩམས་པ་དང་ཁ་ནས་ཤོར་ཏེ་ལྷུང་བ་དེ་དང་པོའི་ཟས་སུ་དྲན་ཏེ་ཟོས་པས་དེ་
ལ་སྲེད་པ་ཆེན་པོ་སྐྱེས་ཏེ་གྱོ་མོའི་དུམ་བུ་ཁྱེར་ནས། མཐར་གྱིས་འགྲོ་བའི་ཁྱིམ་ཀུན་གྱི་སྒོར་ཕྱིན་ནས་བླངས་པས་འབྲས་ཟན་ལ་སོགས་པ་ཁྱེར་ནས་ཕྱིན་ཀྱང་ཅི་ཡང་མ་མཐོང་སྟེ། ཐམས་ཅད་ཀྱང་དེ་བཞིན་ནང་དུ་ལོག་པས། དེའི་བསམ་པ་ལ་འདི་ནི་ངེས་པར་ང་རང་གི་ལས་ངན་ལེན་ཏེ། དེ་དང་ལས་
ངན་མ་ཟད་སྙམ་པའི་ཁྲོ་བ་དང་བཅས་པས་གྱོ་མོ་ས་ལ་བརྡབས་ནས་ཡང་སྡོང་པོའི་སར་ལོག་གོ། །དེའི་ཚེ་གྱོ་མོ་ཆག་པའི་དུམ་བུ་ཅིག་སའི་གཏིང་དུ་སོང་དེ་ཀླུ་ནོར་རྒྱས་ཀྱི་མདུན་དུ་བྱུང་བ་དང་ས་གཡོ་བ་ལ་སོགས་པའི་ལྟས་བྱུང་བ་དང་། ཀླུའི་རྒྱལ་པོས་འདི་གཉིས་ཀྱི་རྒྱུ་ཅི་ཡིན་སྙམ་དུ་མངོན་
ཤེས་ཀྱིས་བལྟས་པས་དེ་ལས་བྱུང་བར་ཤེས་ཏེ། དེས་བཟའ་བཏུང་ཕུན་སུམ་ཚོགས་པ་ཁྱེར་ནས་དེའི་དྲུང་དུ་ཕྱིན་ཏེ་དྲངས་པས། འདི་མི་འདོད་དེ་ང་ལས་ངན་པ་བསགས་པའི་གང་ཟག་ཡིན། དེ་རིང་འདི་ཟ་ན་ནང་པར་ཅི་བཞེས་གསུངས་ནས་མ་བཞེད། ཀླུ་རྒྱལ་གྱིས་ནང་པར་ནས་ཀྱང་བདག་

203-1-154b

གིས་ཉི་མ་རེ་རེ་ཞིང་འདྲེན་པས་ཅིས་ཀྱང་གསོལ་བར་ཞུ་ཞུས་པས། དེར་ཟོས་ཏེ་ཀླུའི་རྒྱལ་པོ་ཡང་དགའ་བཞིན་དུ་ལོག་སྟེ། ནང་པར་ནས་ཉི་མ་རེ་རེ་ཞིང་བཟའ་བཏུང་མང་པོ་བུ་མོ་ལ་བསྐུར་ཏེ་གཉིས་ཀ་ཡང་སློབ་དཔོན་གྱི་དྲུང་དུ་འོང་ངོ་། །དེ་ནས་ཀླུའི་བུ་མོ་དེ་སློབ་དཔོན་ལ་ཆགས་ཏེ་ཕ་
ལ་སྨྲས་པ། ཡབ་གཅིག་བདག་སློབ་དཔོན་གྱི་ཇོ་མོ་བྱེད་པས་ཕུལ་ཅིག་ཅེས་སྨྲས་ཏེ་ཀླུའི་རྒྱལ་པོས་སློབ་དཔོན་ལ་འབུལ་ལགས་ཀྱིས་ཞེས་གསོལ་བ་བཏབ་པས་མ་གནང་ངོ་། །དེའི་ཚེ་ཀླུའི་རྒྱལ་པོས་གསོལ་བ་ཆེར་བཏབ་པ་དང་། ད་སློབ་དཔོན་གྱིས་འདི་མི་འགྲུབ་སྙམ་སྟེ་འོ་ན་ངའི་ཕ་
ཐུགས་རྗེ་ཆེན་པོ་དང་། མ་རྗེ་བཙུན་སྒྲོལ་མ་ཡིན་ཏེ། བུ་མོ་འདི་ལ་ཕས་ཁྲུས་དང་། མས་བཀྲ་ཤིས་གསོལ་ན་བྱ། དེ་མ་གྲུབ་ན་ང་དེ་ལྟ་བུའི་བྱ་བ་མི་བྱེད་དོ་གསུངས་པས་ཀླུའི་རྒྱལ་པོ་ས་པོ་ཊ་ལར་ཕྱིན་ནས་གཉིས་པོ་ལ་ཕྱག་བྱས་ཏེ། དེ་ལྟ་བུ་ཁྱེད་ཀྱི་སྲས་པོ་ལ་རུང་ན་བདག་གི་བུ་མོ་ལ་
ཐུགས་རྗེས་གཟིགས་པར་ཞུས་པས། རུང་ཞེས་གསུངས་ནས་མྱུར་བར་གསུམ་ཀས་བྱོན་ཏེ། འཕགས་པས་སྐུ་ཁྲུས་དང་། འཕགས་མས་ཨཥྚ་མངྒ་ལ་ཞེས་བྱ་བའི་བཀྲ་ཤིས་གསོལ་ནས་བཙུན་མོར་བཞེས་སོ། །དེ་འཇིག་རྟེན་དུ་ཀ་མ་ལ་གོ་མི་ཞེས་པའི་གྲུབ་ཐོབ་ཆེན་པོར་གྲགས་སོ། །
དེས་ན་དམ་པ་རྣམས་ཀྱིས་ལོ་རྒྱུས་འདི་ཡིད་ཆེས་པར་བྱས་ནས། ཡི་གེ་དྲུག་པའི་སྒོམ་བཟླས་ལ་བརྩོན་པར་བྱས་ན་ངེས་པར་འགྲུབ་གསུང་ངོ་། །སློབ་དཔོན་པདྨ་དགེ་བསྙེན་གྱིས་འཇིག་རྟེན་དབང་ཕྱུག་ལས་གྲུབ་པ་ཐོབ་པའི་ལོ་རྒྱུས་སོ། །པཎྜི་ཏ་བི་མ་ལ་ཤྲཱི་མི་ཏྲ་དང་། ལོ་ཙཱ་བ་ལྡན་མ་ཚུལ་ཁྲིམས་སེང་གེས་
བསྒྱུར་བའོ།།      ༄༅༅། །ཏཱ་རཱའི་སྔོན་གཙུག་ལག་ཁང་ཞིག་ན་སློབ་དཔོན་ཟླ་གྲགས་དང་ཙནྡྲ་གོ་མི་གཉིས་ཅུང་ཟད་འགྲན་སྐད། སློབ་དཔོན་ཟླ་གྲགས་སྐུ་འཆག་པའི་ཚེ་རྒན་མོ་ཅིག་གིས་བུ་མོ་བག་མར་གཏོང་བའི་ནོར་བླངས་པ་སང་ལ་མེད་ཕ་གི་ལ་སློངས་ཞེས་སློབ་དཔོན་ཙནྡྲ་གོ་མི་ལ་ཁ་བསྟན་ནོ། །དེར་
བསླངས་པས་སློབ་དཔོན་ལ་ན་བཟའ་ལ་བ་ཅིག་དང་། པོ་ཏི་ཅིག་མིན་པ་ཅི་ཡང་མེད་པས་མ་དགྱེས་ནས་བཤུམ་སྐད། དེ་ནས་སློབ་དཔོན་གྱིས་རྩིག་པའི་ལོགས་ལ་སྒྲོལ་མ་རྒྱན་དང་བཅས་པ་ཅིག་བྲིས་ནས་མ་ཧཱ་ཏཱ་ར་ཤྲཱི་བུ་ཏ་ཞེས་པ་སྒྲོལ་མ་དཔལ་ཆེན་མོ་ལ་བསྟོད་པ་ཞེས་པ་ཚིགས་སུ་བཅད་པ་བཞི་བཅུ་པ་ཅིག་མཛད་པས་

203-1-155a

ཞབས་ཀྱི་གདུ་བུའི་ནོར་བུ་རིན་པོ་ཆེ་བརྒྱ་སྟོང་རི་བ་ཅིག་བོག་ནས་བྱུང་བ་དེ་བྱིན་ནས་ཚིམ་པར་མཛད་སྐད་དོ། །ཙནྡྲ་གོ་མིའི་གཏམ་རྒྱུད་བི་ན་ཡ་ཤྲཱིས་བསྒྱུར་བའོ།།      ༄༅༅། །ན་མོ་ལོ་ཀི་ཤྭ་རཱ་ཡ། བི་ཁྱཱ་ཏ་དེ་བས་ཐུགས་རྗེ་ཆེན་པོའི་གྲུབ་པ་ཐོབ་པའི་གཏམ་རྒྱུད་ནི། དེ་རྒྱ་གར་ཤར་ཕྱོགས་སུ་འཁྲུངས་
ཏེ་བི་ཀྲ་མར་རབ་ཏུ་བྱུང་རིག་པའི་གནས་ལ་མཁས་པར་གྱུར་ཏོ། །འོན་ཀྱང་སྲེད་པ་ཆེ་བའི་སྐྱོན་གྱིས་དེར་མ་བཞུགས་པར་རྡོ་རྗེ་གདན་དུ་ཇོ་མོ་གཅིག་དང་ལྷན་ཅིག་འཁོར་ཁ་ཅིག་ལ་ཆོས་སྟོན་གྱིན་བཞུགས་སོ། །ནུབ་ཅིག་གི་རྨི་ལམ་ན་ཐུབ་པ་ཆེན་པོའི་ཞལ་ནས་ཁྱོད་ད་ལོ་གསུམ་ན་ནད་དྲག་ལ་ཡུན་རིང་བས་ཤི་
ནས་ལས་ངན་པས་དམྱལ་བར་སྐྱེ་བས། ད་བཤད་པས་མི་ཕན་གྱི། ཡི་གེ་དྲུག་པའི་སྒོམ་བཟླས་གྱིས་ཤིག་ཅེས་གསུངས་སོ། །སད་པ་དང་ཤིན་ཏུ་སྐྲག་སྟེ་འཁོར་རྣམས་ལ་སྨྲས་ནས་ཇོ་མོས་གཡོག་བྱས་འཁོར་རྣམས་ཀྱིས་འཚོ་བ་སྦྱར་ནས་སྒྲུབ་པ་མཛད། དེ་ནས་ལོ་དུས་སུ་ནད་དེ་འདྲ་བས་གྲོངས་ཏེ། འཁོར་རྣམས་
ཀྱིས་དུར་ཁྲོད་དུ་མེའི་གསེབ་ཏུ་གཞུག་སྟེ་མེ་མཐའ་ནས་སྦར་བ་དང་། ཤིང་གི་སྟེང་དུ་འཐོན་བྱུང་ངོ་། །རོ་ལངས་བྱུང་སྙམ་སྟེ་བྲོས་པ་དང་། མ་འབྲོས་པའི་བརྡ་བྱས་པས་འཁོར་རྒན་པོ་ཕོ་ཚོད་ཅན་ཅིག་གིས་ཉི་མ་རིང་བསྡད་པས་མ་གྲོངས་པར་ཤེས་ནས། དེར་ཐམས་ཅད་ཀྱིས་ཅི་ལགས་ཞུས་པས། ངས་བཤད་
མི་ནུས་ཞོ་དང་འབྲས་ཟན་ཁྱེར་ཤོག་ཅེས་གསུངས་སོ། །དེར་གསོལ་ནས་གསུངས་པ། གཤིན་རྗེའི་མི་ཤིན་ཏུ་འཇིགས་པ་བཞིས་ང་ཐག་རིང་པོར་ཁྱེར་ཏེ་རི་ཅིག་རྩེ་ལ་སླེབ་པ་དང་། འོད་དཀར་པོ་ཟླ་བའི་འོད་པས་ཆེས་ལྷག་པ་ནམ་མཁའ་ལ་བྱུང་བའི་རྗེས་ལ་ཐུགས་རྗེ་ཆེན་པོ་དོན་ཞགས། རྟ་མགྲིན། སྒྲོལ་
མ། ནོར་བཟངས་དང་བཞི་ནམ་མཁའ་ལ་བྱོན་པ་མཐོང་སྟེ། དེས་གཤིན་རྗེ་དེ་དག་ཤིན་ཏུ་བྲད་ནས་འདར་རོ། །དེར་མི་དག་རྟ་མགྲིན་གྱི་དབྱུག་ཏོས་བརྡུངས་པས་བཅོམ་ལྡན་འདས་ཀྱི་ཞལ་ནས་སྙིང་རྗེ་མ་བྱེད་གསུངས་པས་རྟ་མགྲིན་གྱི་ཞལ་ནས་འོ་སྐོལ་གྱི་མི་ལ་འདིར་བར་ཆད་བྱེད་པ་མི་རིགས་གསུང་ངོ་། །དེར་བཅོམ་
ལྡན་འདས་ཀྱི་ཞལ་ནས་ད་ཚོག་གིས་འདི་ཕ་གི་མ་ཚིག་པ་ལ་ཅིག་ཅར་སྐྱོལ་ཞེས་གསུངས་སོ། །དེར་བཞི་པོས་འདིར་བསྐྱལ། སྐྱེལ་གྱི་བར་དུ་མཐོང་། ད་ནས་མ་མཐོང་སྟེ་ད་ངའི་ནད་དྲག་པར་ཐེག་ཅེས་གསུང་ངོ་། །དེ་ནས་པཎྜི་ཏ་གྲུབ་ཐོབ་ཏུ་གྲགས་ཏེ་བླ་མ་ཤཱཀྱ་ཤྲཱི་དང་བུདྡྷ་ཤྲཱི་ལ་སོགས་པ་མང་པོ་

203-1-155b

འདུས་ཤིང་གྲགས་པ་ཤིན་ཏུ་ཆེ་སྐད་དོ། །པཎྜི་ཏ་རྣམ་པར་གྲགས་པའི་ལྷས་ཐུགས་རྗེ་ཆེན་པོ་ལ་གྲུབ་པ་ཐོབ་པའི་གཏམ་རྒྱུད་པཎྜི་ཏ་བི་ན་ཡ་ཤྲཱི་མི་ཏྲས་བསྒྱུར་རོ།།      ༄༅༅། །ན་མོ་ལོ་ཀེ་ཤྭ་ར་ཡེ། ཤིང་བཟོ་བས་གྲུབ་པ་ཐོབ་པ་ནི། ཛ་ག་ཏ་ལར་གར་ལོག་བྱུང་བའི་ཚེ་མི་
རྣམས་ཀྱིས་ཤར་ཕྱོགས་བྷཾ་ག་ལར་བྲོས་སོ། །ལམ་ཀ་ན་ཤིང་བཟོ་བའི་བུ་ཅིག་ཡོད་པས་མཐོང་ནས་བྲོས་པའི་དགེ་འདུན་རྣམས་ལ་བརྐྱང་ཕྱག་བཙལ་ཞབས་སྤྱི་བོར་བླངས། བསྙེན་བཀུར་བྱས་སྐད། དེར་དེ་ལྟར་བྱས་པའི་རྒྱུ་མཚན་དྲིས་པས། དེ་ན་རེ་བདག་གི་ཕ་དད་པ་ཆེ་བས། རབ་བྱུང་
ཅིག་ལ་བསྙེན་བཀུར་བྱས། དེས་ཀྱང་ཐུགས་རྗེ་ཆེན་པོའི་སྒོམ་བཟླས་ཕོག་ནས་ཉམས་སུ་བླངས། དུས་རིང་ཞིག་ན་ནད་ཀྱིས་བཏབ་ནས་ཤི་སྟེ་དུར་ཁྲོད་དུ་ཤིང་བརྩིགས་ཏེ་དཀྱིལ་དུ་བཅུག་ནས་མཐའ་ནས་མེ་སྦར་བ་དང་ཐོན་བྱུང་། དེར་དྲིས་པས་ང་ཁྱིམ་དུ་ཐེག་བཤད་དོ་ཞེས་ཟེར་རོ། །
དེར་བཏེག་ནས་སྨྲས་པ། ང་གཤིན་རྗེའི་སྐྱེས་བུ་ཤིན་ཏུ་འཇིགས་པ་བཞིས་ཁྱེར་ནས་དམྱལ་བའི་གནས་སུ་བཀུམ་པ་ན་ར་ཀའི་ནང་མེས་གང་བར་བཅུག་པ་དང་། དེར་བཀུམ་པ་ན་ར་ཀ་ཁ་ཟུམ་ནས་མ་ཚུད་ཕྱིར་བསྐྱེད་པ་དང་། ཁ་བྱེ་ནས་བྱུང་། ཡང་ཡང་དེ་བཞིན་དུ་བྱུང་བས་སྐྱེས་བུ་བཞི་པོ་འཇིགས་
ནས་གཤིན་རྗེ་ཆོས་ཀྱི་རྒྱལ་པོ་ལ་དྲིས་པས། དེ་ན་རེ་འདིར་སྐྱེ་བའི་རྒྱུ་ཟད་ཐུགས་རྗེ་ཆེན་པོའི་བུ་ཡིན་ད་ཅིག་ཅར་སྐྱོལ་ཞེས་ཟེར་ནས་བསྐྱལ་བ་དང་ངའི་ནད་དྲག་འདུག་ཅེས་ཟེར་རོ། །དེ་ཕྱིར་རབ་ཏུ་བྱུང་བ་མཐོང་ཚད་ལ་བརྐྱང་ཕྱག་འཚལ་ཞིང་བསྙེན་བཀུར་བྱེད། བྱ་བ་ཐམས་ཅད་བཞག་ནས་སྒོམ་བཟླས་
བྱེད་པ་ཅིག་བྱུང་། བདག་ཀྱང་ཕའི་རྗེས་སུ་བགྱིད་པ་ལགས་ཟེར་རོ། །སྔགས་པ་ཁཪྶ་པཱ་ཎིའི་སྙིང་པོ་བགྲང་བ་ཅིག་ལ་ཡང་དེ་ཁོ་ན་བཞིན་བྱུང་སྐད། ཤིང་བཟོ་བས་གྲུབ་པ་ཐོབ་པ་པཎྜི་ཏ་བི་ན་ཡ་ཤྲཱིས་བསྒྱུར་རོ།།      ༄༅༅། །ཡང་བྷཾ་ག་ལའི་བུད་མེད་ཅིག་གི་ཁྱོ་ཤི་
ནས་ཡི་དྭགས་སུ་སྐྱེས་ཏེ་དེས་བདག་ཏུ་བཟུང་ནས་རྟག་ཏུ་འོང་བ་ལ་ཡུལ་དབུས་ཀྱི་ཚོང་དཔོན་ཅིག་གིས་ཤར་ཕྱོགས་སུ་ཚོང་ལ་ཕྱིན་ཏེ་དེར་བཞག་ནས་གཡོག་གིས་རྐང་པ་བཀྲུས། ཁྲུས་དང་བསྐུ་མཉེ་བྱས་ཏེ་སྟན་ཐོག་ཏུ་ཡི་གེ་དྲུག་པའི་སྒོམ་བཟླས་བྱེད་གྱིན་བསྡད་དོ། །དེར་ཡི་དྭགས་དེས་ནང་དུ་

203-1-156a

འོང་མ་ནུས་པར་ཕྱི་ནས་ཀུ་ལུ་ཀུ་ལུ་ཟེར་ཞིང་ཚོང་དཔོན་ཕྱིར་ཐོན་གྱི་སྒྲ་བརྗོད་པ་བུད་མེད་དེས་མཐོང་སྟེ་བློ་སྐྱེས་ནས་ཚོང་དཔོན་ལ་ཕྱག་དང་བསྙེན་བཀུར་བྱས་ཏེ་བདག་ལའང་དེ་བསླབ་པར་ཞུ་ཞེས་གསོལ་ནས་ཉམས་སུ་བླངས་ནས་དེ་ལས་ཐར་སྐད། བུད་མེད་ཀྱིས་གྲུབ་པ་ཐོབ་པ་ནི་
བི་ན་ཡ་ཤྲཱིས་བསྒྱུར་རོ།།      ༄༅༅། །ན་མོ་ལོ་ཀེ་ཤྭ་རཱ་ཡ། སྔོན་རྒྱ་གར་ལྷོ་ཕྱོགས་སུ་བསྟན་པ་དར་བའི་ཚེ། གྲོང་ཁྱེར་ཆེན་པོ་ཅིག་ན་ཚོང་དཔོན་གྱི་བུ་སུ་ཁ་དེ་བ་ཞེས་པས་ལོངས་སྤྱོད་ཐམས་ཅད་རང་གིས་ཆུད་གསན་ནས་ཤིན་ཏུ་སྡུག་བསྔལ་ཞིང་ཡོད་པ་ན། ཡུལ་
དེར་བུད་མེད་ཅིག་ཚད་པས་ཐེབས་ཏེ་ཙནྡན་གོ་ཤིཪྵ་མིན་པས་གསོ་མི་ནུས་ལ་དེ་ཡང་མ་རྙེད་དེ་སྨན་པ་ཐམས་ཅད་ཀྱིས་བོར་རོ། །དེར་ཚོང་དཔོན་གྱི་བུ་དེས་དྲིས་པས་ཙནྡན་དེ་རྙེད་ནས་སོས་ན་བུ་མོ་སྟེར་ཞེས་ཟེར་རོ། །དེར་ཕ་མེས་ཀྱི་ཡི་དམ་གོ་ཤིཪྵ་ལས་བྱས་པའི་ཐུབ་པའི་སྐུ་ཅིག་ཡོད་པ་བདར་ཏེ་
ནང་དུ་བཏང་ཞིང་ཕྱིར་བྱུགས་པས་སོས་སོ། །དེ་གཉིས་ལྷན་ཅིག་གནས་པ་ན་བུད་མེད་དེས་དེ་ལ་འདི་ལྟ་བུའི་ལས་བྱེད་པ་གཉིས་ཀ་དམྱལ་བར་སྐྱེའོ་ཞེས་སྤྱོས། དེར་ཚོང་དཔོན་གྱི་བུ་དེ་དེ་དང་ཉེ་བའི་གཙུག་ལག་ཁང་ཅིག་ཏུ་པཎྜི་ཏ་ཅིག་ལ་ཡི་གེ་དྲུག་པ་ཞུས་ནས་བུད་མེད་ཀྱིས་གཡོག་
བྱས་ནས་གཉིས་ཀའི་དོན་དུ་ལོ་བཅུ་གཉིས་བསྒྲུབས་པས་རྨི་ལམ་དུ་ཞལ་གཟིགས་ཏེ་པོ་ཊ་ལར་འདེངས་ཞེས་གསུང་ངོ་། །ཁོས་བདག་འགྲོ་སྟེ་སློབ་དཔོན་ལ་འདྲི་དགོས་ཞེས་བྱས་སོ། །སད་པ་དང་སློབ་དཔོན་དང་གཡོག་ལ་དྲིས་པས་དེ་ངེད་ཀྱི་དྲིན་ཡིན་པས་མི་འཁྲིད་ན་མི་ཕན་ཞེས་
བྱས་པས། ཡང་སྒྲུབ་པ་ཡུན་རིང་དུ་བྱས་ཏེ་བཅོམ་ལྡན་འདས་བྱོན་ནས་གསུམ་ཆར་པོ་ཊ་ལར་ཁྲིད་དོ། །སུ་ཁ་དེ་བས་སྨྲས་པ། ལྟོས་ཤིག་སྔགས་ཀྱི་ནུས་པ་དག །ཕྲ་བའི་ལྷ་ཡང་གྲུབ་པ་ཐོབ། །བྱ་བ་ཐམས་ཅད་ཡོངས་སྤོངས་ལ། །སྔགས་ཀྱི་
བྱ་བ་སྒྲུབ་པར་གྱིས། །ཞེས་གསུངས་ནས་པོ་ཊ་ལར་གཤེགས་སྐད། སུ་ཁ་དེ་བས་གྲུབ་པ་ཐོབ་པ། པཎྜི་ཏ་བི་ན་ཡ་ཤྲཱིས་བསྒྱུར་བའོ།།      །།

203-1-156b

༄༅༅། །རྒྱ་གར་སྐད་དུ། ཤ་ལི་ཧོ་ཏྲ་ཡ་ཡཱཾ་ཨ་ཤྭ་ཨཱ་ཡུར་བཻ་དྱ་སཾ་ཧི་ཏ་ནཱ་མ། བོད་སྐད་དུ། རྟའི་ཚེའི་རིག་བྱེད་ཤ་ལི་ཧོ་ཏྲས་བསྡུས་པ་ཞེས་བྱ་བ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་
བཻ་ཌཱུརྱ་འོད་ཀྱི་རྒྱལ་པོ་ལ་ཕྱག་འཚལ་ལོ། །ཁྱབ་འཇུག་གི་ནི་བཙུན་མོའི་མཆོག །ལྷ་མོ་དཔལ་མོ་རྟ་ཡི་མངལ། །ཕྱག་འཚལ་ནས་ནི་རྟ་རྣམས་ཀྱི། །ཚེ་ཡི་རིག་བྱེད་རྟོགས་བཤད་བྱ། །གང་ལས་གང་ཕྱིར་གང་དོན་ཡིན། །དེ་དག་ཀུན་ཀྱང་བརྗོད་པར་བྱ། །ཁ་བ་ཅན་གྱི་
བྱང་ཕྱོགས་ན། །ལྷ་ཡི་དབང་པོའི་གནས་འདྲ་བར། །ཤ་ལི་ཧོ་ཏྲ་དྲང་སྲོང་ཆེ། །སྦྱིན་སྲེག་བྱས་ནས་འདུག་པའི་ཚེ། །ལེགས་ཐོས་ཐོས་པ་ཕུན་ཚོགས་ལྡན། །བུ་ཡིས་ཕ་ལ་དྲིས་གྱུར་པ། །ལེགས་ལྡན་ཆོས་རྣམས་ཐམས་ཅད་མཁྱེན། །རྟ་ཚེའི་རིག་བྱེད་མཁས་
ལགས་ན། །རྟ་རྣམས་ཀྱི་ནི་གསོ་བ་འདི། །ཇི་ལྟར་བྱུང་བར་གྱུར་པ་ལགས། །དྲང་སྲོང་གཟི་བརྗིད་ཆེན་པོ་ཡིས། །དེ་ལ་མཉན་པར་གྱིས་ཞེས་སྨྲས། །སྔོན་ཚེ་རྟ་རྣམས་རང་དགར་ནི། །མཁའ་ལ་རྒྱུ་ཞིང་གནས་བྱེད་ཅིང་། །ཟས་དང་སྤྱོད་པ་ཅི་དགའ་བར། །དེ་རྣམས་རང་
དགར་སྤྱོད་པ་ཡིན། །ཐམས་ཅད་ལ་ཡང་ལུས་ཀྱི་ནི། །གོམས་པས་ནད་ནི་བྱུང་མ་གྱུར། །གང་ནས་བརྩམས་ཏེ་ང་ཡི་བུ། །བཞོན་པ་ཉིད་དུ་བྱས་གྱུར་པ། །དེ་ནས་བརྩམས་ཏེ་གནོད་བྱེད་པའི། །ནད་ཀུན་གྱིས་ནི་གཟིར་བ་ཡིན། །དེ་ནས་དེ་ལ་སེམས་གདུང་སྐྱེས། །ང་
ཡིས་དཀའ་ཐུབ་ཆེན་པོ་བྱས། །ཚངས་པ་ལྷ་ནི་མཉེས་བྱས་ནས། །དེ་ཡི་གསོ་བ་རྙེད་པ་ཡིན། །ཟུག་རྔུ་ལུས་ཀྱི་གསོ་བ་དང་། །དེ་བཞིན་ཆ་སྤྱད་ཉིད་དང་ནི། །རྟེའུ་ཡི་ནི་གསོ་བ་དང་། །དུག་གི་རང་བཞིན་སྨན་དང་ནི། །བཅུད་ལེན་གདོན་ནད་གསོ་བ་དང་། །རོ་ཙ་བྱེད་པ་
བརྒྱད་པ་ཡིན། །དེ་ལྟར་རྟ་ཡི་ཚེའི་རིག་བྱེད། །འདི་ནི་ཡན་ལག་བརྒྱད་དུ་བཤད། །ཡན་ལག་བརྒྱད་པོ་འདི་ཡི་གནས། །རྒྱས་པར་བུ་ཡིས་མཉན་པར་གྱིས། །མདོ་ཡི་གནས་ནི་དང་པོ་སྟེ། །དེ་ཡི་ཕྱི་མ་གཉིས་པ་ཡིན། །གསུམ་པ་འདིར་ནི་ལུས་ཡིན་ལ། །བཞི་པ་ཉིད་ནི་གསོ་

203-1-157a

བ་ཡིན། །ལྔ་པ་རྟེའུ་སྨན་ཡིན་ཏེ། །དྲུག་པ་ཕྱི་མའི་ཕྱི་མ་ཡིན། །བྱ་བ་དེ་དང་དེ་བསྟན་པ། །གྲུབ་པའི་གནས་ནི་བདུན་པ་ཡིན། །གསང་བ་གནས་ནི་བརྒྱད་པ་སྟེ། །ཚེ་ཡི་རིག་བྱེད་བསྡུས་པ་ཡིན། །ལེའུའི་རིམ་པ་ངེས་པ་ནི། །གནས་གནས་སུ་ནི་ངས་
བཤད་བྱ། །ཚེ་ཡི་རིག་བྱེད་བྱུང་བ་དང་། །དེ་བཞིན་སློབ་མ་སྦྱང་བ་དང་། །ངེས་པའི་ཚིག་དང་བྱུང་ཚུལ་དང་། །དེ་ནས་མངལ་དུ་ཆགས་གྱུར་དང་། །རང་བཞིན་དང་ནི་སྐྱེ་གནས་དང་། །དེ་བཞིན་རིགས་ནི་བཞི་དག་དང་། །ཡན་ལག་ཐམས་ཅད་བརྟག་པ་དང་། །བཤད་པ་
དང་ནི་ཚད་གཞལ་དང་། །ཡན་ལག་བཅུ་ཡི་ཆ་དབྱེ་དང་། །སྡུག་དང་མི་སྡུག་ཤེས་བྱ་དང་། །ཚད་ཤེས་བྱ་དང་ཟས་སྦྱོར་བ། །མཛེས་དང་མཚན་གྱི་ལེའུ་དང་། །དེ་བཞིན་ཁ་དོག་ཤེས་བྱ་དང་། །ཞུར་མདངས་དང་ནི་ཐིག་ལེ་བརྟག །ཤ་རའི་མདོག་ནི་བཟང་ངན་དང་། །
འདྲེན་མ་རྒྱལ་པོའི་བཞོན་པ་དང་། །མིག་བརྟག་པ་དང་སོ་བརྟག་པ། །གཙུག་དང་ན་ཚོད་ཤེས་བྱ་དང་། །ཚེ་ཤེས་པ་དང་བཅས་པ་དང་། །དྲི་དང་སྐད་གསང་བརྟག་པ་དང་། །འགྲོས་དང་ལུས་འཕེལ་ཆོ་ག་དང་། །རྒྱུག་པ་བརྟག་དང་གྲ་མ་ཅན། །ཉེས་པ་ཆེ་དང་སྙིང་སྟོབས་
བརྟག །གཟི་མདངས་བརྟག་དང་རིགས་བརྟག་དང་། །སྟོན་ཀ་པ་དང་ཉོ་འཚོང་བཅས། །དེ་ལྟར་གནས་ནི་དང་པོ་ཡི། །ལེའུའི་རིམ་པ་གནས་པ་ཡིན།།      །།དྲི་བ་ཆེན་པོ་ཉིད་དང་ནི། །དེ་བཞིན་སྒོ་ང་ལས་བྱུང་དང་། །རྨེན་བུའི་ལེའུ་གསུམ་པ་སྟེ། །ནད་ཤེས་བྱ་བ་རྣམ་གསུམ་
དང་། །ཡིད་བདེ་ཡིད་མི་བདེ་ཤེས་དང་། །རླུང་འཁྱིལ་འཁྲུལ་པ་ཤེས་བྱ་དང་། །རླུང་འཁྱིལ་གཏུགས་པ་ཤེས་བྱ་དང་། །དེ་བཞིན་ལྟོ་བ་རྒྱས་པ་དང་། །རྩུབ་པར་འཁྱིལ་བའི་ལེའུ་དང་། །དེ་བཞིན་གཅིན་འགགས་གསོ་བ་དང་། །རི་དྭགས་ལྟར་འཁྱིལ་མ་འདྲེས་འཁྱིལ། །རླུང་གི་
རྨུ་རྫིང་གསོ་བ་དང་། །དེ་བཞིན་ཁྲག་གི་གཅིན་ནད་དང་། །ཀོ་ར་དུ་ཤས་གནོད་གྱུར་དང་། །སྣུམ་འཁྱིལ་བ་དང་རྣམ་འཁྱིལ་བ། །ཁྲག་འཁྲུགས་ནད་ནི་གསོ་བ་དང་། །ཁྲག་འཁྲུགས་ནད་གཞི་བཞི་ལས་གྱུར། །ཁྲག་འཁྲུགས་རྗེས་ལ་གསོ་བ་དང་། །འཐེང་དང་རྐང་ནད་གསོ་བ་དང་། །

203-1-157b

སྐྱེ་འབྲུ་དབུགས་མི་བདེ་གསོ་དང་། །དབུགས་མི་བདེ་བ་ལུད་པ་ཅན། །སྣ་རྣག་དང་ནི་མངོན་པར་ཚ། །རླུང་དང་མཁྲིས་པ་བད་ཀན་རིམས། །འདུས་པ་ལས་གྱུར་རིམས་གསོ་དང་། །དུས་ནི་གོ་བཟློག་ལས་བྱུང་དང་། །སྣད་པ་ལས་གྱུར་རིམས་དང་ནི། །ཡིད་ཀྱི་རིམས་ནི་གསོ་བ་དང་། །
དེ་བཞིན་འཁྲུ་བ་མང་པོ་དང་། །སྨན་ཁུའི་གོང་བུའི་སྦྱོར་བ་དང་། །སྦེག་པ་བརྟག་པའི་ལེའུ་དང་། །དེ་བཞིན་རྔ་མའི་ནད་གསོ་དང་། །གཞང་བྱུང་བ་ཡི་གསོ་བ་དང་། །ཁྲག་དང་མཁྲིས་པ་གསོ་བ་དང་། །སོ་ལྷག་བྱུང་བ་གསོ་བ་དང་། །འུག་པའི་རྐང་འདྲའི་ལེའུ་དང་། །གདུག་པས་
ཟིན་པའི་མཚན་ཉིད་གསོ། །སྨད་པའི་མཚན་ཉིད་ཅན་ལེའུ། །དུག་གི་ཤུགས་ནི་ཤེས་བྱ་དང་། །དེ་བཞིན་དུག་གིས་ཟིན་གསོ་བ། །དུག་མདས་ཕོག་པ་ཞེས་བྱ་བ། །གཉིས་པའི་གནས་སུ་བསྡུས་པ་ཡིན། །མངལ་ཆགས་ཞེས་པའི་ལེའུ་དང་། །དེ་བཞིན་ལུས་ཀྱི་རྣམ་དབྱེ་
དང་། །ལུས་བསྐྱེད་པ་དང་རྩ་ཡི་ཚོགས། །ཡུལ་དང་ཚ་སོགས་བསྟན་པ་དང་། །འཕེལ་དང་འབྲི་བ་ཤེས་བྱ་དང་། །རོ་དྲུག་གི་ནི་བདག་ཉིད་དང་། །ནང་གི་བདག་ཉིད་ཅན་བྱུང་དང་། །བྱ་དང་བྱ་མིན་བརྟག་པ་དང་། །འདིར་ནི་ཟས་སྐོམ་ཆོ་ག་དང་། །དེ་བཞིན་ལྗང་པའི་རོ་ཡི་
ཚོགས། །གསོ་བའི་ཡན་ལག་དབང་བྱས་དང་། །ལོང་དང་ལྐུགས་སོགས་བསྟན་པ་དང་། །དེ་བཞིན་སྐྲངས་པ་གསོ་བ་དང་། །གཞན་ཡང་རྨ་གཉིས་ལེའུ་དང་། །ཟུག་རྔུ་ཁོང་བརླག་གདོན་པ་དང་། །ཟུག་རྔུ་དབྱུང་བའི་ལེའུ་དང་། །སྦུབས་ཀྱི་རྨ་ནི་གསོ་བ་དང་། །དེ་
བཞིན་ཆག་གྲུགས་གསོ་བ་དང་། །ཆུ་བུར་གསོ་བ་ཉིད་དང་ནི། །རྒོད་མའི་མཚན་ཉིད་བརྟག་པ་དང་། །རླུང་ཉེན་མངལ་གྱི་ཉེས་པ་དང་། །མངལ་དུ་ཤི་བའི་ནད་གསོ་དང་། །བ་ལའི་ཏིལ་མར་དང་བཅས་པ། །ལེའུའི་རིམ་པ་འཆད་རྣམས་ཀྱིས། །གནས་ནི་གསུམ་པ་ཡིན་པར་
བཤད། །གསོ་བའི་གནས་ཀྱི་ལེའུ་ནི། །སེམས་ཁོང་ཆུད་པར་བྱེད་པ་དང་། །ནི་ར་ཀ་ཡི་ནད་གསོ་དང་། །རྒན་ནད་བྱེ་བ་མེད་པ་ཉིད། །ཨ་བཏང་ཀའི་གསོ་བ་དང་། །ལྕེ་རིངས་སྣ་ནད་འཛག་བྱེད་དང་། །སྣ་ནད་གལ་ལ་ཀ་གསོ་དང་། །མགོ་ནད་རླུང་ལས་གྱུར་པ་དང་། །

203-1-158a

དེ་བཞིན་མཁྲིས་པ་ལས་གྱུར་དང་། །བད་ཀན་ལས་གྱུར་ཁྲག་ལས་གྱུར། །འདུས་པ་ལས་གྱུར་མགོ་ནད་དང་། །གློ་བུར་སྲིན་བུ་ལས་གྱུར་པ། །དེ་བཞིན་རྣ་བའི་ནད་གསོ་དང་། །མཆི་མ་འཛག་པ་གསོ་བ་དང་། །རླུང་ནད་པ་ལ་ཤ་ཉིད་དང་། །དེ་བཞིན་ཀོལ་ཉེས་
ནད་ཉིད་དང་། །གཞན་ཡང་བྲང་ཚ་བ་ཡི་ནད། །ཚེའུ་ཚེའི་ནད་ནི་གསོ་བ་དང་། །གཟུགས་འཁུམས་གཟུགས་གྱོང་ནད་གསོ་དང་། །རྨིག་པ་རྔུལ་ཅན་ནད་གསོ་དང་། །སྦལ་པ་ཚ་བར་བཤད་པ་དང་། །མཚན་ནི་འཕྱང་བར་གྱུར་གསོ་དང་། །རླིག་པ་སྐྲངས་པ་གསོ་བ་དང་། །དེ་
བཞིན་རླིག་འབྲས་གཡོས་པ་དང་། །ཁྲག་ལས་གྱུར་པའི་རླིག་ནད་དང་། །དེ་བཞིན་མཁྲིས་པ་ལས་གྱུར་དང་། །བད་ཀན་ལས་གྱུར་རྔ་མའི་ནད། །སྣ་རེངས་དེ་བཞིན་རྒྱབ་རེངས་དང་། །ལྟོ་བ་གཞོང་འདྲའི་ནད་གསོ་དང་། །མཆུ་སྐྲངས་ནད་ནི་གསོ་བ་དང་། །རླུང་ནད་ཐི་བ་ལྟ་བུ་དང་། །
མཁྲིས་ནད་སྦྲང་བུ་ལྟ་བུ་དང་། །རི་དྭགས་ཅན་དང་རི་དྭགས་གླལ། །ཆུ་འཛིན་ཞེས་བྱའི་ནད་དང་ནི། །དེ་བཞིན་སྙིང་ནད་རླུང་གྱུར་དང་། །མཁྲིས་པ་ལས་གྱུར་སྙིང་ནད་དང་། །གཞན་ཡང་བད་ཀན་ཅན་སྙིང་ནད། །སྲིན་བུ་ལས་གྱུར་སྙིང་ནད་དང་། །རླུང་གི་གཟེར་དང་ལྐོག་མའི་ནད། །སྣུམ་
ཆོས་ཉེས་པའི་ནད་དང་ནི། །ལན་ཚྭའི་སྦྱོར་ཉེས་ཆང་བླུད་ཉེས། །དེ་བཞིན་འབྲུ་ཟོས་ཉེས་པ་དང་། །འོ་མ་འཐུང་ཉེས་ཆུ་འཐུང་ཉེས། །སྦུབས་ལས་བླུད་ནི་ཉེས་པ་དང་། །བརྡུང་ཉེས་བཞོན་པ་པོས་སྣད་དང་། །ལུད་པ་གསོ་དང་མཛེ་ནད་གསོ། །གྱེན་འབྱུང་ཀློ་ནད་གསོ་བ་དང་། །
དྲེགས་དང་ཉེས་པ་གསོ་བ་དང་། །སྨྱོ་ནད་གསོ་དང་མཚན་མོ་བཅོམ། །གཞང་འབྲུམ་གསོ་དང་རྔོ་གསོ་དང་། །དེ་བཞིན་གཡན་པ་གསོ་བ་དང་། །སྐྲངས་ནད་གསོ་བ་ཉིད་དང་ནི། །གཞན་ཡང་རི་བོ་ཅན་ནད་གསོ། །ཡན་ལག་ཕྱོགས་གཅིག་ནད་ཅོང་ཅན། །མགོ་འཁོར་ཆུ་ཡི་རྨུ་
རྫིང་དང་། །ཆུ་ལྷའི་གདོན་ནི་གསོ་བ་དང་། །མིག་ཅན་འགེབས་པ་ཁན་གསོ་དང་། །མིག་ནད་མིག་ནད་སྒོ་ང་ཅན། །ཆུ་བུར་ཅན་དང་སྔོ་མཚན་ཉིད། །ལིང་ཏོག་ཅན་དང་མཆི་མ་འཛག །ལིང་ནད་མ་འདྲེས་མཐོང་བ་ཉིད། །མིག་དམར་དང་ནི་མུན་ཛ་ཅན། །མུན་ཛའི་དྲ་བ་ཅན་

203-1-158b

གསོ་དང་། །ཐལ་མོ་བྱེད་པ་ཅན་གྱི་ནད། །ཁྲག་འཁྲུགས་པ་ཡི་ནད་གསོ་དང་། །ཚིགས་སུ་རྨ་བྱུང་ཐོག་འབབ་དང་། །གཉེའུ་རེངས་དང་སྦོས་ནད་གསོ། །འཁྲུ་བ་གསོ་བ་ཞེས་བྱ་བ། །གནས་ཆེན་བཞི་པ་གསོ་བ་ཡིན། །རྟེའུའི་གདོན་ནི་བསྟན་དང་བཤད། །འཁྲུ་དང་དེ་བཞིན་རིམས་
དང་ནི། །གཡན་པ་ལྐོག་ནད་ཤ་ལུ་ཀ །ཁོང་པའི་སྲིན་ནད་གཅིན་སྲིར་བཅས། །བོང་བུ་ཅན་དང་རླིག་རླུགས་དང་། །གཅིན་ནད་གཟེའུ་ཞེས་བྱ་བ། །སྦོ་དང་བྲང་ནད་ཅེས་བྱ་བ། །བཀྲེས་པས་ཉེན་དང་ལུད་པ་གསོ། །ཟད་བྱེད་དང་ནི་རོ་ཧི་ནི། །རི་མོ་ཅན་དང་སྦལ་པ་འདྲ། །མེས་ཚིག་ཚིགས་ནད་
གཅིན་དམར་གསོ། །ཡིད་མི་བདེ་དང་རྣ་བའི་ནད། །སོ་ནད་དང་ནི་མཇིང་པའི་ནད། །འགྲམ་ནད་ལྕེ་ཡི་ནད་བཅས་དང་། །མིག་ནད་སྣ་ནད་བཅས་པ་དང་། །རྨིག་པའི་ནད་དང་དབྱིག་པའི་ནད། །སེམས་འཁྲུལ་པ་དང་རྔུལ་ནད་བཅས། །སྦྲུལ་གྱིས་ཟིན་དང་མེས་ཚིག་གསོ། །དེ་བཞིན་
ཆག་གྲུགས་གསོ་བ་ནི། །ལྔ་པའི་གནས་སུ་ངས་བཤད་ཅིང་། །རྟེའུའི་ནད་རྣམས་གསོ་བ་ཡིན།།      །།རྟ་ཁང་པ་ནི་བརྟག་པ་དང་། །ཁང་པའི་ལྷ་རྣམས་མཆོད་པ་དང་། །དེ་གཞིན་གདོན་ནི་བསལ་བ་དང་། །དཔལ་འཕེལ་བ་ཞེས་བྱ་བ་དང་། །རྟ་རྣམས་རྗེས་སུ་བསྲུང་བ་དང་། །རྣམ་རྒྱལ་
རྟ་ནི་དབང་བསྐུར་དང་། །མཆེ་བ་ཆག་པའི་ལྟས་བསྟན་དང་། །ལྟས་ཀྱི་མཚན་ཉིད་གཞན་བསྟན་དང་། །ཞི་བ་བསྐྱེད་པར་བྱ་བ་རྣམས། །དྲུག་པའི་གནས་སུ་བསྡུས་པ་ཡིན། །དང་པོར་རྗེས་བཏུང་ཆོ་ག་སྟེ། །དེ་འོག་ལན་ཚྭའི་ཆོ་ག་ཡིན། །སྣུམ་དང་ལན་ཚྭ་ཆང་དང་འབྲུ། །འོ་མ་ཆུ་
དང་སྦུབས་ལས་བྱུང་། །གནོད་པའི་ནད་ནི་བདུན་པོ་ཡི། །ནད་གཞི་གསོ་བར་བཅས་བསྟན་དང་། །མར་བླུད་དུགས་ཀྱི་ཆོ་ག་དང་། །དུར་བྱིད་ཀྱི་ནི་ཏིལ་མར་དང་། །དོན་གྲུབ་ཅེས་བྱའི་ཏིལ་མར་དང་། །མེ་བཙའི་ལས་ཀྱི་ཆོ་ག་དང་། །མས་གཏོང་ཆོ་ག་བསྟན་པ་དང་། །གཙགས་བུ་
ལས་གྱུར་ནད་བསྟན་དང་། །དེ་བཞིན་ལྟ་བའི་ལས་བསྟན་དང་། །སྣུམ་བླུད་པ་ཡི་ཡོན་ཏན་དང་། །རོ་ཙར་བྱེད་པ་བསྟན་པ་དང་། །སྣུམ་ལས་གྱུར་པའི་ནད་གསོ་བའི། །བྱ་བ་བསྟན་པའི་གནས་འདི་ནི། །བདུན་པ་གྲུབ་པའི་མཚན་ཉིད་ཡིན། །དང་པོ་རི་མོ་ལས་ཆེ་བརྟག །

203-1-159a

དེ་རྗེས་ནད་ཀྱིས་འཆི་ལྟས་བསྟན། །ནད་མེད་འཆི་ལྟས་བསྟན་པ་དང་། །ཕོ་ཉ་ལ་སོགས་ལྟས་བསྟན་དང་། །ཕྱེ་མ་རྣམས་ཀྱི་ལེའུ་དང་། །སྨན་མར་དང་ནི་ཏིལ་མར་དང་། །དེ་བཞིན་སྨན་ཁུའི་ལེའུ་དང་། །མ་ཞུ་སྦྱང་བའི་སྦྱོར་བ་དང་། །སོ་སོར་
བཏུང་དང་རྗེས་སུ་བཏུང་། །མས་གཏོང་ལས་ཀྱི་ཆོ་ག་དང་། །སྣ་སྨན་རྣམས་ནི་བསྟན་པ་དང་། །འཇམ་རྩི་སྣ་ཚོགས་བསྟན་པ་དང་། །དེ་བཞིན་ཕྱི་ཡི་ལྡེ་གུ་དང་། །ཐལ་སྨན་ལན་ཚྭའི་ཆོ་ག་དང་། །འབྲས་བུ་གསུམ་དང་ཨ་རུ་ར། །གུ་གུལ་སྒོག་སྐྱའི་ཆོ་ག་དང་། །མི་ལ་
བརྟག་པ་དང་བཅས་པའི། །ཁུར་བསྟན་པ་ཡི་ལེའུ་དང་། །དེ་བཞིན་སྐྱེས་བུ་དང་བཅས་པའི། །ཤིང་རྟ་དང་སྦྱར་ཆོ་ག་དང་། །སྔགས་དང་བྱ་བའི་སྦྱོར་བ་དག །མཆོག་ཏུ་གསང་བ་ཉིད་ཡིན་ནོ། །དེ་ལྟར་གསང་བ་མཆོག་གྱུར་པའི། །གནས་ཀྱི་ལེའུ་ཡིན་ཤེས་བྱ། །གནས་བརྒྱད་ཡན་
ལག་བརྒྱད་དང་བཅས། །རྟ་ཡི་ཚེ་ཡི་རིག་བྱད་མཆོག །མ་ལུས་འདི་ནི་ཚངས་པ་ཆེ། །ཞལ་བཟང་བཞི་དང་ལྡན་པས་བྱིན། །ལེགས་ལྡན་ཤ་ལི་ཧོ་ཏྲ་ཡིས། །དེ་སྐད་རྗེས་བསྟན་སྨྲས་པ་ཡིན། །ཤ་ལི་ཧོ་ཏྲའི་གནས་དང་པོ་ལས་ཚེའི་རིག་བྱེད་བྱུང་བའི་ཚུལ་བསྟན་པ་ཞེས་བྱ་བའི་ལེའུ་སྟེ་དང་པོའོ།།      །།
དེ་ནས་ཤ་ལི་ཧོ་ཏྲ་ཡིས། །ལེགས་ཐོས་ལ་ནི་ཡང་སྨྲས་པ། །སློབ་མ་སྦྱང་བ་ཞེས་བྱ་བ། །ལེགས་ཐོས་དེ་བཞིན་ང་ལས་ཉོན། །སློབ་མ་རིགས་བཟང་ཡན་ལག་ཚང་། །མཚན་ལྡན་དད་པར་བཅས་པ་བྱ། །བྲམ་ཟེ་སོགས་གསུམ་གང་ཡང་རུང་། །གཙང་མ་བླ་མས་སློབ་ཏུ་གཞུག །རྟ་
ལ་ཤིན་ཏུ་བརྩེ་བས་ན། །བྲམ་ཟེ་ལས་ནི་སློབ་མ་གཟུང་། །སྐྱེ་དགུ་སྐྱོང་ལ་བརྩོན་པ་ཡི། །རྒྱལ་རིགས་སློབ་མར་གཟུང་བར་བྱ། །དམངས་རིགས་རྣམས་ནི་གསོ་བ་ཡིས། །འཚོ་བ་ཚོལ་བས་དེ་ཡང་གཟུང་། །ཉི་མ་བྱང་འགྲོ་བསོད་ནམས་དུས། །གཟའ་ལ་མིག་དམར་ཉི་མ་དང་། །
ཚེས་དྲུག་བརྒྱད་དང་ལྔ་དང་བཅུ། །ཚེས་བཞི་ཚེས་ནི་བཅུ་བཞི་དང་། །ཚེས་གཅིག་དང་ནི་ཚེས་དགུ་ནི། །རིག་པ་རྩོམ་ལ་སྤང་བར་བྱ། །ཚེས་གྲངས་ལྷག་མ་ཤིས་པ་ཡིན། །གཞན་ཡང་སྐར་མ་ང་ལས་ཉོན། །གང་ཞིག་འཇམ་དང་མྱུར་བ་དང་། །གཡོ་དང་

203-1-159b

གདུག་དང་སྨིན་དྲུག་དང་། །ཐ་སྐར་མ་གཏོགས་མི་རྣམས་ཀྱིས། །རིག་སློབ་རྩོམ་ལ་རྟག་ཏུ་ཤིས། །སྐར་མ་ཡང་ནི་འདི་རྣམས་དང་། །ཐང་ཅིག་ཀྱང་ནི་ཤིས་པ་དང་། །གཟའ་ནི་མ་སྨད་པ་རྣམས་དང་། །ཆུ་ཚོད་བཟང་ལ་བརྩམ་པར་བྱ། །དེ་ལྟའི་དུས་ནི་ཤིས་པ་ལ། །སློབ་
མ་གོས་གཙང་བགོས་པ་དང་། །བྲམ་ཟེ་མཆོད་ཕྱིར་ཐོགས་དཀར་བཏགས། །དྲི་ནི་དཀར་པོས་བྱུགས་པ་དང་། །ཕྲེང་བ་དཀར་བཏགས་མཁས་པ་དང་། །གོས་དཀར་བགོས་པ་འདོན་དུ་གཞུག །དེ་བཞིན་རྒྱལ་རིགས་རྣམས་ཀྱང་ནི། །ཆ་ལུགས་ཐམས་ཅད་དམར་བ་དང་། །
དེ་བཞིན་དམངས་རིགས་ཐམས་ཅད་སེར། །ལྷ་རྣམས་ཐམས་ཅད་བྱེད་དུ་གཞུག །བྲམ་ཟེ་ཡིས་ནི་ཚངས་པ་མཆོད། །རྒྱལ་རིགས་ཀྱིས་ནི་བརྒྱ་བྱིན་ཏེ། །དམངས་རིགས་ཀྱིས་ནི་རླུང་ལྷ་མཆོད། །བྱེ་བྲག་མེད་པར་ཀུན་གྱིས་ནི། །དབྱངས་ཅན་དེ་བཞིན་དཔལ་མོ་དང་། །ཤ་ལི་
ཧོ་ཏྲ་མཆོད་པར་བྱ། །དེ་རྣམས་ལ་ནི་མེ་ཏོག་སྤོས། །ཁ་ཟས་ཕུན་ཚོགས་ཀྱིས་མཆོད་ནས། །དེ་ཡི་འོག་ཏུ་ས་བི་ཏྲ། །མེ་ལ་མར་གྱིས་ཚིམ་པར་བྱས། །བྲམ་ཟེ་རྣམས་ལ་ཁ་ཟས་སྦྱིན། །དེ་ནས་བུ་གཅིག་ཡོན་བྱས་པས། །སློབ་དཔོན་ལ་ནི་ཡོན་བྱིན་ཏེ། །ས་ཕྱོགས་དག་ཅིང་བརྒྱན་པ་
རུ། །སློབ་མ་ནུབ་ཏུ་བལྟས་ནས་ནི། །སློབ་དཔོན་ཤར་དུ་བལྟས་ཏེ་བརྗོད། །རྟག་ཏུ་ལས་ལ་བརྩོན་པ་ཡི། །བུ་ཁྱོད་ཀྱིས་ནི་བསླབ་པར་བྱ། །སྲོག་གིས་ཀྱང་ནི་བླ་མ་དག །མཉེས་པར་བྱ་ན་ནོར་ཅི་སྨོས། །བླ་མ་བྲམ་ཟེ་ས་བདག་ལ། །བུ་ཡིས་འཁུ་བར་མི་བྱ་སྟེ། །ཁྱོད་ཀྱིས་རྟ་རྣམས་
ལ་ཡང་ནི། །འཁུ་བར་ནམ་ཡང་མི་བྱའོ། །ང་ཡི་ཁ་ལས་གང་ཐོས་པ། །དེ་ནི་བུ་ཡིས་འབད་དེ་སློབས། །དེ་བཞིན་ཕོངས་པར་གྱུར་ཀྱང་ནི། །གླེགས་བམ་ལས་ནི་སློབ་མི་བྱ། །གླེགས་བམ་ལས་ནི་གང་བསླབས་དེ། །འཇིག་རྟེན་གཉིས་ཀ་དག་དང་འགལ། །དང་པོ་འདི་དག་ཐམས་
ཅད་ནི། །གསོ་བ་བུ་ཡིས་བསླབ་པར་བྱ། །མ་བསླབས་པ་ནི་སྤངས་ནས་ཀྱང་། །གང་སྨྲས་འདི་ནི་མཉན་པར་གྱིས། །བཅོ་ལྔ་གཉིས་དང་བཅུ་བཞི་གཉིས། །ཚེས་བརྒྱད་དང་བཅས་ས་འགུལ་དང་། །བུ་བཙས་ཤིང་དྲུང་ཉིད་དང་ནི། །མི་གཙང་བས་ནི་ཁྱབ་གནས་དང་། །བདག་

203-1-160a

ཉིད་མི་གཙང་བ་ཉིད་དང་། །ནད་ཀྱིས་སེམས་ནི་རྨོངས་པ་དང་། །རླུང་ནི་ཆེན་པོ་རྒྱུ་བ་དང་། །དེ་བཞིན་འབྲུག་སྒྲ་སྒྲོགས་པའི་ཚེ། །འདི་བསླབ་པ་ནི་སྤང་བྱས་ལ། །བུ་ཡིས་བསྟན་བཅོས་གཟུང་བར་བྱ། །བསྟན་བཅོས་གཟུང་བ་བྱས་ནས་ནི། །བསྟན་བཅོས་དོན་ནི་གཟུང་བར་
གྱིས། །བསྟན་བཅོས་དོན་ནི་གཟུང་བྱས་ནས། །དེ་འོག་ལས་ལ་གོམས་པར་གྱིས། །བསྟན་བཅོས་ཤེས་པ་འབའ་ཞིག་ལ། །ལས་ཀྱི་བྱ་བ་ཙམ་མཐོང་བ། །གསོ་བའི་ལས་ལ་འཇུག་པར་ནི། །དེ་དག་གཉི་ག་དོན་མེད་འགྱུར། །གསོ་བའི་ལས་ལ་འཇུག་པ་ན། །ཁྱོད་ཀྱིས་
རྟ་ནི་རྟག་ཏུ་སྐྱོངས། །མི་བཟད་ནད་ཀྱིས་ཉེན་ན་ཡང་། །ཁྱོད་ཀྱིས་སྤང་བར་མི་བྱའོ། །རྟ་གང་གསོར་ནི་མི་རུང་བ། །དེ་ཡང་རིགས་པས་གསོ་བར་བྱ། །མ་གསོས་ན་ནི་ངེས་པར་འཆི། །གསོས་ཀྱང་ངེས་པ་མེད་གྱུར་པའི། །ནད་ཀྱིས་གདུངས་པར་གྱུར་པ་གང་། །ནད་ནི་གཞན་ལ་འགོ་བར་
འགྱུར། །བསྟན་བཅོས་ལས་དེ་སྤང་བར་བཤད། །སྤང་ཚུལ་དེ་ཡང་ང་ལས་ཉོན། །དེ་ནི་རྟ་བྲེས་ལས་རིང་བར། །སྲུང་མ་དང་བཅས་གཞག་པར་བྱ། །ན་བའི་རྟ་ནི་གང་ཡང་རུང་། །གཏན་སྤང་བ་ནི་རིགས་མ་ཡིན། །ནད་དང་སྦེགས་དང་རྒས་པའི་རྟ། །གཏན་སྤང་བྲམ་ཟེ་གསོ་
དང་མཚུངས། །རྟ་ནི་མཚན་ཉིད་ངན་གྱུར་པ། །ཉོ་བའི་དུས་སུ་བླང་མི་བྱ། །གང་ཞིག་རང་གི་ཁྱིམ་དུ་སྐྱེས། །བྲམ་ཟེ་གཞན་ཡུལ་པ་ལ་སྦྱིན། །ལྟས་ངན་བྱུང་བར་གྱུར་ན་ནི། །འདི་ཉིད་སྦྱིན་པ་གཏང་བར་བྱ། །མི་འཚེ་བ་ནི་ཚེ་སྐྱི་མཆོག །སེམས་ཅན་ལ་བརྟག་བརྩེ་བྱ་ཞིང་། །
དེ་བས་ཅི་ཙམ་གསོ་ནུས་པ། །དེ་ཙམ་ཞིག་ནི་གཞག་པར་བྱ། །བདེ་བར་འཇོག་པར་ནུས་གྱུར་ལས། །ལྷག་པར་འཇོག་པ་འབད་མི་བྱ། །རྟ་ནི་སྡུག་བསྔལ་བར་བཞག་ན། །ཆོས་དོན་འདོད་པ་འཇོམས་པར་འགྱུར། །གཞན་ཡང་རྒྱལ་པོའི་ས་སྐྱོང་བའི། །བྱ་བ་རྟ་ལ་རག་ལས་
པས། །དེ་ལ་ཁྱེད་ཀྱིས་གུས་བྱ་ཞིང་། །དེ་བཞིན་སློབ་དཔོན་བླ་མ་དང་། །བྲམ་ཟེ་ལ་ཡང་གུས་པར་བྱ། །དེས་ནི་ཁྱེད་ཀྱིས་དཔལ་ཐོབ་འགྱུར། །དེ་ལས་གཞན་དུ་བྱེད་ན་ནི། །ལྟུང་ལས་ཉེ་བར་ལྟུང་བར་འགྱུར། །དམྱལ་བར་རང་ནི་ལྟུང་བ་དང་། །ངེས་པར་ལྡན་པ་ཉིད་དུ་

203-1-160b

འགྱུར། །དམ་པའི་ལམ་ལ་གནས་ན་ནི། །གྲགས་དང་བསོད་ནམས་ཚེ་རིང་དང་། །ཆོས་དོན་འདོད་པ་མ་ལུས་པའི། །དཔལ་མཆོག་འབད་པ་མེད་པར་འཐོབ། །དེ་སྐད་བརྗོད་ནས་སློབ་མ་ཡིས། །ཁས་བླང་དེ་རྗེས་སློབ་དཔོན་གྱིས། །དུས་ཤིས་པ་ལ་མ་ཡེངས་པར། །སློབ་
མ་དེ་ནི་སློབ་ཏུ་གཞུག །དེ་ཡི་འོག་ཏུ་རྒྱུན་དུ་ནི། །མཁས་པ་རྟག་ཏུ་བརྩོན་པ་ཡིན། །བྱ་བ་ཅི་བཞིན་རྫོགས་བར་དུ། །སློབ་མ་དེ་ནི་སློབ་ཏུ་གཞུག །དེ་ལྟར་རིག་པ་བྱིན་པ་ཡིས། །བླ་མས་སློབ་མར་བསླབ་པ་ཡིན། །སློབ་དཔོན་དང་ནི་སློབ་མ་དག །འདོད་འཇོ་བ་
ལྟར་ཟད་མེད་འགྱུར། །ཤ་ལི་ཧོ་ཏྲའི་མདོའི་གནས་ལས་སློབ་མ་སྦྱང་བའི་ལེའུ་སྟེ་གཉིས་པའོ།།      །།དེ་ནས་ཤ་ལི་ཧོ་ཏྲས་བུ། །ལེགས་ཐོས་ལ་ནི་ཡང་སྨྲས་པ། །གང་ཕྱིར་འདི་ནི་དཔལ་མོའི་བུ། །དེ་ཕྱིར་མཆོག་ཏུ་བཀྲ་ཤིས་ཡིན། །གཞན་ཡང་རྟ་ཡི་མཆོད་སྦྱིན་
ལ། །རྟ་ནི་དགོས་པ་ཉིད་ཡིན་པས། །དེ་བས་ཤིན་ཏུ་དག་བྱེད་དེའང་། །འདི་ནི་བཀྲ་ཤིས་དམ་པ་ཡིན། །རི་དྭགས་དང་ནི་ཐག་རིང་འགྲོ། །དེ་བཞིན་གཡུལ་གྱི་ལས་རྣམས་ལའང་། །རྒྱལ་པོ་རྒྱལ་བྱེད་པ་ཡི་རྒྱུ། །རྟ་ལས་མཆོག་གྱུར་ཡོད་མ་ཡིན། །རྟ་ཡི་མཆོད་སྦྱིན་དག་ལ་
ནི། །སྐྱེ་དགུའི་བདག་གིས་ལོངས་སྤྱོད་ཅིག །དེ་བས་མཆོད་སྦྱིན་ཐམས་ཅད་ལ། །དེ་ནི་སྤྱད་བྱ་ཉིད་ཡིན་ནོ། །དེ་ཕྱིར་ཤིན་ཏུ་གཙང་བས་ན། །ཀུན་ལ་རྗེས་སུ་གནང་བ་ཡིན། །དེ་ཕྱིར་ཚངས་པ་མ་གཏོགས་པ། །ཐམས་ཅད་ཀྱི་ནི་ཟས་མ་ཡིན། །རྟ་ཡི་མཆོད་སྦྱིན་ལས་
ལྷག་པའི། །དག་བྱེད་མི་ལ་ཡོད་མིན་པས། །རྟ་མ་གཏོགས་པར་ས་གསུམ་ན། །བཀྲ་ཤིས་མཆོག་གཞན་ཡོད་མ་ཡིན། །རྣག་ཅན་མྱུར་འགྲོ་ལམ་ལས་རྒྱལ། །འགྲོས་ལེགས་འཕྲོག་བྱེད་ལས་རྫོགས་དང་། །མགྱོགས་དང་མགྱོགས་འགྲོ་མྱུར་འགྲོས་ཅན། །དཔལ་
མོའི་བུར་ཡང་བཤད་པ་ཡིན། །འཇིག་རྟེན་ན་ནི་སྣ་ཆེ་བས། །དེ་ནི་སྣ་ཅན་ཞེས་བྱར་བཤད། །རྟག་ཏུ་འགྲོ་བས་མགྱོགས་འགྲོ་ཡིན། །ལམ་དུ་རྒྱལ་བས་ལམ་ལས་རྒྱལ། །འགྲོས་ལེགས་ལྡན་པས་འགྲོས་ཅན་ཡིན། །དབང་མེད་ཁྱེར་བས་འཕྲོག་བྱེད་དེ། །ལས་

203-1-161a

རྣམས་རྫོགས་པར་བྱེད་ནུས་པས། །ལས་རྫོགས་ཞེས་ནི་ཚངས་པས་བཤད། །མགྱོགས་པ་དང་ནི་མགྱོགས་འགྲོ་དང་། །དེ་བཞིན་མྱུར་འགྲོ་ཅན་ཞེས་པ། །དེ་ནི་མགྱོགས་པ་ཁོ་ནར་བཤད། །འདི་དག་ངེས་ཚིག་ཚུལ་ཡིན་ནོ། །རྟ་ནི་དཔལ་མོའི་
བུ་ཡིན་པས། །དཔལ་མོའི་བུ་ཞེས་བཤད་པ་ཡིན། །མཚན་དང་རིགས་ནི་བཟང་བ་དང་། །དཔའ་བོས་བཞོན་ཞིང་བྱང་བ་ཡི། །རྟ་ནི་སྟོང་གིས་ས་བཞི་དག །མ་ལུས་པ་ལས་རྒྱལ་བར་ནུས། །མཚོན་ཐོགས་པ་ཡིས་མི་ཐུབ་པའི། །གནས་དེར་སྟོབས་ཆེ་བ་ཡི་རྟས། །འཕྲལ་
དུ་རྒྱལ་བར་ནུས་པ་ཡིན། །དེ་ཕྱིར་ཁྱེད་ཀྱིས་དེ་ལ་ནི། །ཤིན་ཏུ་གུས་ཤིང་བརྩེ་བར་བྱ། །རྒྱལ་པོ་སྨན་པའི་ཆོས་དོན་དང་། །ཕུན་ཚོགས་པ་ཡང་གཞན་ལས་མིན། །ཤ་ལི་ཧོ་ཏྲའི་མདོའི་གནས་ལས་ངེས་པའི་ཚིག་གི་ལེའུ་སྟེ་གསུམ་པའོ།།      །།ཤ་ལི་ཧོ་ཏྲ་
བློ་གྲོས་ཆེ། །རྟ་ཡི་གནས་ན་འདུག་པ་ལ། །ལེགས་ཐོས་ཐོས་པ་ཕུན་ཚོགས་པས། །སླར་ཡང་ཕ་ལ་དྲིས་གྱུར་པ། །རྟ་ནི་ཅི་ལྟར་བྱུང་བར་གྱུར། །མཆོད་སྦྱིན་འཚམ་པ་ཅི་ལྟར་འགྱུར། །དེ་ནི་དང་པོར་རྒྱལ་པོ་དག །གང་གི་བཞོན་པ་ཉིད་དུ་འགྱུར། །དེ་ཡི་རིགས་བཞི་ཅི་ལྟ་བུ། །
དེ་ལྟ་བུར་ནི་ཅི་ལྟར་འགྱུར། །ཅི་ཡི་ཕྱིར་ནི་དེ་འདྲར་འགྱུར། །དེ་དག་ཤེས་པར་འཚལ་ལགས་སོ། །དེ་ཡི་ཚིག་ནི་ཐོས་པ་དང་། །ཤ་ལི་ཧོ་ཏྲས་སྨྲས་གྱུར་པ། །འདི་ན་རྒྱལ་པོའི་ཆོས་ཀྱི་མཆོག །ས་རྣམས་ཡོངས་སུ་སྐྱོང་བ་ཡིན། །དེ་ཡང་དཔུང་གིས་བྱེད་པར་ནུས། །དཔུང་
གི་མཆོག་ནི་རྟ་རྣམས་ཡིན། །དེ་ཕྱིར་རང་དོན་ལ་མཁས་པའི། །རྒྱལ་པོའི་ཆོས་དོན་འདོད་དོན་དུ། །ཡང་ཡེ་རྣམ་པ་ཐམས་ཅད་དུ། །འབད་དེ་རྟ་རྣམས་བསྲུང་བར་བྱ། །ཆོས་དང་གྲགས་འདོད་སྨན་པ་ནི། །བསྟན་བཅོས་མཁས་གྱུར་པས་ཀྱང་བསྟེན། །དེ་བས་དེ་
རྣམས་ལྷ་དང་ནི། །མི་ནི་ཇི་ལྟར་བྱུང་བ་བཤད། །རིགས་དང་ཉེ་བའི་རིགས་དང་ཚེ། །ན་ཚོད་ཤིས་དང་མི་ཤིས་དང་། །གཙུག་དང་གདོང་དང་ཐིག་ལེ་དང་། །འཚེར་དང་འགྲོས་ཀྱི་རིམ་པ་དང་། །མཚན་ངན་གཉེན་པོ་མཆན་ཁུང་དང་། །འབྱུང་དང་བཞོན་

203-1-161b

པའི་བྱ་བ་དང་། །ནད་མེད་ནད་ནི་རྒྱས་པ་དང་། །རྣ་བ་རྣམས་ཀྱི་སྨན་དང་ནི། །དེ་བཞིན་སྨན་ནི་བྱུང་བ་ཡི། །གོ་རིམས་ཅི་བཞིན་ཉིད་དང་ནི། །སྤུ་མདོག་མདོག་འདྲེས་ཁྱད་པར་དང་། །སྤུ་མདོག་དག་དང་མིག་དག་དང་། །རང་བཞིན་སྙིང་སྟོབས་དག་དང་ནི། །སྟོན་ཀ་
སྐྱེས་པའི་མཚན་ཉིད་དེ། །འདི་དག་ཐམས་ཅད་མདོར་བསྡུས་ནས། །ཁྱེད་ལ་ལེགས་པར་བཤད་པར་བྱ། །ལྷ་རྣམས་ཀྱིས་ནི་མངལ་སྐྱེས་དང་། །མངལ་མེད་བྱུང་བ་གཉིས་སུ་བཤད། །སྔོན་ཚེ་འཇིག་རྟེན་ཞིག་གྱུར་ཅིང་། །འཇིག་རྟེན་འདི་ནི་མེད་པའི་ཚེ། །འབྱིན་བྱེད་
མེ་ལ་སྦྱིན་སྲེག་ནི། །བྱས་པས་དང་པོར་ཚངས་པ་དང་། །རྟ་ཕོ་དེ་རྗེས་རྒོད་མ་མཆོག །རང་གི་སྐྱེ་གནས་དག་ཏུ་བསྐྱེད། །གཞན་ཡང་སྐྱེ་དགུའི་བདག་མོ་ཡི། །མཆོད་སྦྱིན་ལ་ནི་ཚངས་པ་ཡི། །མཆི་མ་བྱུང་བ་དཔལ་མོ་ནི། །དགའ་བས་སྙིམ་པ་སྦྱར་བས་བླངས། །དེ་
ཡི་ཡན་ལག་ལས་བྱུང་སྟེ། །རྟ་རྣམས་བྲམ་ཟེའི་རིགས་སོགས་གྱུར། །ཁ་དང་དཔུང་པ་བརླ་གཉིས་དང་། །རྐང་པ་གཉིས་ལས་གོ་རིམས་བཞིན། །གཡས་གཡོན་ལས་ནི་ཕོ་མོ་སྟེ། །ཚངས་པ་ལས་རྟ་དེ་ལྟར་སྐྱེས། །འོ་མའི་རྒྱ་མཚོ་བསྲུབས་པའི་ཚེ། །རྟ་དང་བདུད་རྩི་ལྷན་
ཅིག་བྱུང་། །དེ་མིང་ཨུ་ཙ་སྲ་བ་སྟེ། །སྒྲ་ནི་སྤྲིན་ཆེན་ལྟ་བུ་ཡིན། །རྒྱ་མཚོ་དེ་ལས་ནམ་མཁའ་ལ། །ཤུགས་ཀྱིས་རྣམ་པར་འགྲོ་བ་ན། །ལྷ་མིན་སྟོབས་དང་ལྷ་འཁྲུག་པས། །ཕྱི་རྐང་གཉིས་ནི་བཟུང་བར་གྱུར། །སྟོབས་ཆེན་སྟོབས་ལྡན་གྱིས་དྲངས་པས། །དཔྱི་ནི་ཅུང་ཟད་
ཉམས་པར་གྱུར། །དེ་བས་རྟ་རྣམས་ད་རུང་མི། །དཔྱི་ནི་མྱུར་བར་མི་འདེབས་ཤིང་། །ངལ་སོ་བ་ན་རྐང་པ་ནི། །ཕྱི་མ་རེས་ཀྱིས་དལ་བར་འདེགས། །ཚངས་པའི་བུར་གྱུར་གཏུམ་པོ་ནི། །དམོད་པ་ཡིས་ནི་འུག་པར་གྱུར། །ཡིད་འོང་ཡིད་ཀྱི་མཆོད་སྦྱིན་ནི། །རི་དྭགས་མོར་གྱུར་དེ་
གཉིས་འདུས། །དེ་ལ་སྒོ་ང་སྣ་ཚོགས་པ། །དུ་མ་བྱུང་བར་གྱུར་པ་ཡིན། །ལྟེ་བ་མན་ཆད་མེས་གདུངས་པའི། །རྡུལ་ནི་ཐལ་བར་འཛག་གྱུར་པ། །དེ་ལས་ཀྱང་ནི་ཁ་དོག་རྣམས། །ཐ་དད་བོང་ཕོ་བོང་མོར་གྱུར། །སྒྲ་སྐད་རྩུབ་ཅིང་རྣོ་བ་དང་། །རང་བཞིན་རྩུབ་ཅིང་རྐང་པ་རྩུབ། །དེ་ཡང་

203-1-162a

རྟ་དང་ལྷན་ཅིག་བྱུང་། །སྐྱེ་དགུའི་བདག་གི་གནས་ན་འདུག །དེ་ནས་དེ་དག་རྨོངས་པ་ཡིས། །དེ་ཡི་སྦྱིན་སྲེག་ཁང་པ་བརླག །དེས་ནི་དེ་ལ་བསད་དང་བཅིངས། །སྒྲོ་བཅད་རྩྭ་ནི་ཟ་བ་དང་། །ལྷ་དང་མི་ཡི་བཞོན་པ་ནི། །ཉིད་གྱུར་ཅིག་ཅེས་དམོད་པ་
བཏབ། །རྟ་དེ་ཡིད་ནི་ཁུམས་གྱུར་ནས། །སྐྱེ་དགུའི་བདག་ལ་གསོལ་བ་བཏབ། །དེ་ནས་དེ་ལ་མགུ་གྱུར་ནས། །མཆོག་འདི་ཐོབ་པར་གྱུར་པ་ཡིན། །རྟ་ཡི་མཆོད་སྦྱིན་ལ་བསད་དང་། །གཡུལ་དུ་གཡོ་བར་གྱུར་པ་དང་། །ལེགས་པར་སྦྱིན་པ་བཏང་བ་ན། །བསོད་ནམས་ཁྱེད་ཀྱིས་
ཐོབ་གྱུར་ཅིག །དེ་བཞིན་དུ་ནི་ཡོན་གནས་ཀྱི། །མཆོག་ཉིད་དུ་ནི་རྟ་གྱུར་ཅིག །དད་པས་དགེ་སྦྱོང་བྲམ་ཟེ་ལ། །རྟ་རྣམས་བྱིན་པར་གྱུར་ན་ནི། །རྟ་ཡི་བ་སྤུ་ཇི་སྙེད་པར། །ལྷ་ཡུལ་དུ་ནི་སྐྱེ་བར་འགྱུར། །སྦྱིན་པ་བཏང་བའི་རྟ་ཡང་ནི། །འགྲོ་བའི་མཆོག་ཏུ་འགྱུར་བ་ཡིན། །དེ་ནས་
སྐྱེ་དགུའི་བདག་པོ་ཡིས། །ཚིག་གིས་འདུས་ནས་ཁ་བ་ཅན། །ཤ་ལི་ཧོ་ཏྲ་ལ་འཁུར་ཞིང་། །དྲང་སྲོང་རྣམས་དང་ལྷན་ཅིག་རྩེ། །སྟོབས་ལྡན་ཨུ་ཙ་སྲ་བ་ནི། །ཞོན་ནས་ལྷ་རྣམས་གཟིར་བར་བྱེད། །ལྷ་ཀུན་མངོན་མཐོ་འདོད་པ་ཡིས། །ཤ་ལི་ཧོ་ཏྲ་ལ་གསོལ་བཏབ། །དེ་ནས་
ལྷ་ལ་བཞོན་པའི་ཕྱིར། །ཇི་ལྟར་འདོད་པ་བཞིན་དུ་བྱིན། །ཟླ་བ་ལ་དཀར་ལྷ་ཆེན་ལ། །ལྗང་གུ་ཁྱབ་འཇུག་ལ་རྟ་སེར། །མརྐཏ་མདོག་འདྲ་ཉི་མ་ལ། །མེ་ལྷ་ལ་དམར་གཤིན་རྗེ་ནག །པདྨ་དཀར་འདྲ་ཆུ་ལྷ་ལ། །སྔོ་དང་ཁྲ་བོ་ཐ་སྐར་གྱི། །བུ་གཉིས་དམར་པོ་རླུང་ལྷ་ལ། །ལྷ་
རྣམས་གཞན་ལ་སྣ་ཚོགས་པ། །རང་རང་ཇི་ལྟར་དགའ་བར་ནི། །འདི་འདྲ་ཡིད་འཕྲོག་བྱེད་པ་བྱིན། །ལྷག་མའི་རྟ་ནི་སྐྱེ་དགུའི་བདག །ཡིད་ཆེས་བྱས་པས་བླངས་ནས་ནི། །དེ་ཡིས་མི་ཡི་རྒྱལ་པོ་ལ། །ཅི་རིགས་པར་ནི་བགོས་ཏེ་བྱིན། །གཤོག་པ་བཅད་པས་དེ་རྣམས་ནི། །
ན་གྱུར་སླར་ཡང་མེ་ཡིས་བསྲེགས། །ནད་གདུངས་ཤ་ལི་ཧོ་ཏྲ་ལ། །འཁུས་པར་གྱུར་ཏེ་ཁྲོ་བ་ཡི། །མཆེ་བ་བཅད་ནས་སྟོབས་ཀྱིས་ནི། །དེ་གཉིད་ལོག་པ་བཟའ་སྙམ་ན། །དེ་ཚེ་དྲང་སྲོང་མི་སྣང་གྱུར། །དེ་ནས་རྟ་རྣམས་ཟོས་སྙམ་ནས། །དགའ་བས་རྟ་སྦངས་འབྱིན་ཅིང་སྣོམ། །

203-1-162b

དེ་ཕྱིར་རྟ་རྣམས་ད་རུང་ཡང་། །རྟ་སྦངས་བཏང་ནས་སྣོམ་པར་བྱེད། །སྐྱེ་དགུའི་བདག་གི་ཁྱིམ་བདག་ཚེ། །ཧ་ཧ་ཟེར་བས་ཧ་ཡར་བཤད། །བྱ་ལྟར་གཤོག་པ་མགྱོགས་འགྲོ་བས། །མགྱོགས་འགྲོ་ཞེས་ནི་བཤད་པ་ཡིན། །ལམ་རྫོགས་མགྱོགས་པས་བྱེད་པ་ནི། །འཕྲོག་
པ་འཚེར་བ་ཉིད་ལའང་བྱ། །ལྷ་རྣམས་ཀྱིས་ནི་རྟ་བྱུང་བ། །རྣམ་པ་བཞི་སྟེ་དུ་མའང་ཡིན། །བོང་བུ་རྒོད་མ་ལ་དྲེའུ། །བོང་བུ་བས་ནི་བཟང་བར་འདོད། །དྲེའུ་ལས་སྐྱེས་ཀི་ན་ཡིན། །དེ་ལས་སྐྱེས་པ་ཀི་སཏ་ཏ། །ཀི་སཏ་ཏའི་བུ་ཆུ་བུར་ཅན། །ཆུ་བུར་ཅན་བུ་བོང་བུར་གྱུར། །
རང་དང་རྟ་ཡི་སྐྱེ་གནས་ཏེ། །བོང་བུའི་སྐྱེ་གནས་གཉིས་སུ་འདོད། །བོང་བུ་དང་ནི་རྟ་སོགས་ལ། །ལུགས་སུ་འབྱུང་དང་ལུགས་ལས་བཟློག །དེ་ལྟར་རིགས་ཀྱི་དབྱེ་བ་འདི། །གོ་རིམས་བཞིན་དུ་བརྗོད་པ་ཡིན། །རྟ་རྣམས་ཀྱི་ནི་འབྱུང་བ་དག །སླར་ཡང་འོད་ཆེན་བཀའ་སྩོལ་ཅིག །
འོ་མའི་རྒྱ་མཚོ་ལས་བྱུང་ཉིད། །ཐམས་ཅད་ཤེས་པར་འཚལ་ལགས་སོ། །བུ་ཡིས་དེ་ལྟར་དྲིས་པ་དང་། །ཤ་ལི་ཧོ་ཏྲས་སྨྲས་པ་ནི། །སྐྱེ་དགུ་དང་པོ་བྱུང་བའི་ཚེ། །འཚོ་བའི་འཇིག་རྟེན་བདེ་གནས་གྱུར། །དེ་རྗེས་ལྷ་དང་ལྷ་མིན་གྱི། །འཇིག་རྟེན་ཀུན་ལ་ཚངས་པ་ཡིས། །འཇིག་རྟེན་
ཐམས་ཅད་ཁྱབ་བྱེད་པའི། །སྐོམ་གྱིས་གདུངས་པ་ཉིད་དུ་བྱས། །འཇིག་རྟེན་པ་ཡི་སྲོག་ཆགས་རྣམས། །སླར་ཡང་རྒྱུག་ཅིང་འགྲོ་བར་བྱེད། །ལྷ་དང་ལྷ་མིན་ཤ་ཟ་དང་། །ལྟོ་འཕྱེ་སྲིན་པོ་དེ་རྣམས་ཀྱང་། །སྟོབས་དང་ལྡན་པའི་སྐོམ་གྱིས་ནི། །གདུངས་པས་ཉེ་བར་ཟིན་པར་གྱུར། །ལྷ་
དང་ལྷ་མིན་ཁ་ཟས་དང་། །མལ་སྟན་ལ་ནི་དགའ་མེད་གྱུར། །དེ་རྣམས་དེ་ལྟར་སེམས་པ་ན། །དེ་ཡི་ཚེ་ན་བློ་སྐྱེས་པ། །གང་འདི་ཆུ་ཡི་སྙིང་པོར་ནི། །གནས་དེར་བདག་ཅག་སྐོམ་སེལ་གྱུར། །དེ་ནས་རི་བོ་མནྡཱ་ར། །གྲགས་ལྡན་སྲུབ་ཤིང་ཉིད་དུ་བྱས། །ཀླུ་ཡི་རྒྱལ་ཆེན་མཐའ་
ཡས་ནི། །སྲུབ་ཐག་ཏུ་ནི་ཡང་དག་སྦྱར། །དེར་ནི་ཕྱོགས་གཅིག་ལྷ་རྣམས་ཏེ། །ཕྱོགས་གཅིག་ཏུ་ནི་ལྷ་མིན་གནས། །སྲུབ་ཐག་འདྲེན་ཞིང་མཚོ་ཆེན་ནི། །འཇིགས་པའི་སྒྲ་རྣམས་བསྲུབས་པ་ན། །མཚོ་ཆེན་དེར་ནི་ལྷ་དང་མིའི། །སྨན་ནི་རྩ་བ་ལོ་མ་དང་། །འོ་མར་བཅས་པ་བསྡུས་ནས་ནི། །

203-1-163a

ཐམས་ཅད་བཅུག་པ་ཉིད་དུ་འགྱུར། །གཟི་བརྗིད་ཆེ་ཞིང་གཟི་བརྗིད་ཅན། །རོ་ལ་སོགས་པ་འབྱུང་ཞིང་དགེ། །མེ་ཏོག་སེར་དང་གོ་སྲིང་གི། །དེ་བཞིན་སོར་མོ་ལ་སྤྱོད་དང་། །མདངས་ལྡན་ཛཱ་ཏི་ས་ར་དང་། །འཚོ་བྱེད་འཆི་བ་གསོ་བྱེད་དང་། །དེ་བཞིན་རྨ་འཚོ་བྱེད་ལ་
སོགས། །གཞན་ཡང་ཚངས་པས་གང་སྤྲུལ་པའི། །བཅུད་དང་མཐུ་སྟོབས་བསམ་མི་ཁྱབ། །སྨན་རྣམས་མཚོ་ཆེན་དེར་བཅུག་སྟེ། །རྒྱ་མཚོ་བསྲུབས་པར་གྱུར་པ་ན། །དེ་ཚེ་དང་པོ་ཁོ་ནར་ནི། །དཔལ་མོ་ལ་སོགས་བྱུང་བར་འགྱུར། །གང་གིས་ནང་པར་བརྗོད་ན་ནི། །རྨི་ངན་
ལ་སོགས་འཇིག་བྱེད་པའི། །དགེ་བ་ཞེས་བྱའི་རིན་པོ་ཆེ། །བརྒྱད་ནི་ཆུ་ལས་བྱུང་བར་གྱུར། །ཉི་མ་བཞོན་པའི་ཤིང་རྟ་ནི། །འདྲེན་པའི་རྟ་དང་ལྷ་ཡི་ཆང་། །དེ་བཞིན་ནོར་བཟང་ཀོ་ཐུ་བ། །ནོར་བུའི་རྣ་ཆ་བཟང་པོ་དང་། །བདུད་རྩི་ཞེས་བྱའི་སྨན་དང་ནི། །བདུད་རྩི་ཉིད་ཀྱང་བྱུང་བར་
འགྱུར། །བསྟན་བཅོས་ཐམས་ཅད་འཛིན་པའི་མཆོག །སྨན་པ་ཐང་ལ་འབར་དང་ནི། །སྒྲ་མཐོ་ཞེས་ནི་བྱ་བའི་རྟ། །སྙིང་སྟོབས་ཆེ་ཞིང་སྟོབས་ཆེ་ལ། །འབྲུག་དང་རྔ་ཡི་སྒྲ་དང་ནི། །དུང་དང་རྔ་ཆེན་སྒྲ་འདྲ་བ། །གང་ཞིག་སྐད་གསང་མཐོན་པོ་ཡིས། །སྒྲ་དེས་མིང་དུ་བཏགས་པ་ནི། །
དེ་ཚེ་ལྷ་དང་ལྷ་མིན་གྱིས། །སྒྲ་མཐོ་ཞེས་ནི་བྱ་བར་བཏགས། །སྤྲིན་དཀར་གྱི་ནི་མདོག་འདྲ་ཞིང་། །མགྱོགས་ཤིང་བདུད་རྩི་ལས་བྱུང་བ། །མདངས་ལྡན་རྒྱ་མཚོ་ཆེན་པོ་ལས། །བྱུང་སྟེ་མཁའ་ལ་འགྲོ་བར་བྱེད། །སྟོབས་ལྡན་ཞེས་བྱའི་སྣང་བྱེད་བུས། །དེ་ཡི་རྐང་པ་གཉིས་
ལས་བཟུང་། །དེ་ཚེ་ལྷ་མིན་ཐམས་ཅད་ཀྱིས། །མནྡཱ་ར་དང་དེ་བཞིན་དུ། །ཀླུ་ཡི་རྒྱལ་པོ་བོར་ནས་ནི། །རྟ་ཡི་རིན་ཆེན་ལ་འཇུས་ཏེ། །འོ་མའི་རྒྱ་མཚོ་སྤངས་ནས་ནི། །ས་གཞི་འདིར་ནི་ཕྱིན་པར་གྱུར། །ལྷ་མིན་བུམ་པ་མཉམ་པ་དང་། །དེ་བཞིན་སེམས་རབ་འཕགས་པ་དང་། །
མེ་འདྲ་བ་དང་འདོད་ལྷ་དང་། །གནོད་སྐྱོབས་གསེར་མདོག་ཅེས་བྱ་བ། །ཆུ་བུར་ཟླུམ་པོ་ཞེས་བྱ་བས། །སྟོབས་ལྡན་ལ་ནི་ཚིག་འདི་སྨྲས། །གང་གིས་དཔལ་ཐོབ་འགྱུར་བ་ཡི། །དོན་གཉེར་རིན་ཆེན་ཐོབ་པས་ན། །བདག་ཅག་ལྷ་དང་མི་རྣམས་ལ། །འཇིགས་པ་འབྱུང་བར་མི་འགྱུར་རོ། །

203-1-163b

རྟག་པར་རབ་ཏུ་དགའ་བྱེད་ཅིང་། །ཐམས་ཅད་སྟོབས་ཀྱིས་དྲེགས་པ་དང་། །ལྷ་མིན་སྐྱེས་བུ་ཐམས་ཅད་ནི། །དགའ་ཞིང་མགུ་བ་ཉིད་དུ་བྱ། །དེ་ནས་སྟོབས་ལྡན་ཡིད་དགའ་བས། །དེས་ནི་ལྷ་རྣམས་ལ་སྨྲས་པ། །རྒྱ་མཚོ་ཆེན་པོ་བསྲུབས་པ་ལས། །རིན་ཆེན་གང་ཞིག་ཐོབ་གྱུར་པ། །དེ་
ནི་ང་ལ་བྱིན་པས་ན། །གཞན་གྱིས་དེ་རྙེད་འོན་མ་ཡིན། །ལྷ་རྣམས་ཀྱིས་ཀྱང་ཚིག་སྨྲས་པ། །བདག་ཅག་གི་ཡང་རྩལ་ཡིན་པས། །རིན་ཆེན་ཁྱོད་ནི་གཅིག་པུའི་མིན། །ཁྱེད་དང་བདག་ཅག་ཐུན་མོང་ཡིན། །དེ་ནས་ལོ་ནི་ཁྲི་ཡི་བར། །སྐར་མའི་ཚད་ཀྱིས་གཡུལ་འགྱེད་དེ། །ལྷ་དང་ལྷ་མིན་
གཡུལ་ངོར་ནི། །དཔུང་ཚོགས་ལྡང་ཞིང་ལྡང་ཞིང་འཐབ། །དེ་ཚེ་སྟོབས་ལྡན་སྒྲ་མཐོ་བའི། །སྟོབས་མགྱོགས་ལྡན་པའི་རྟ་ཞོན་ནས། །ལྷ་རྣམས་ཀྱི་ནི་དཔུང་གི་ཚོགས། །ཆེན་པོ་དག་ཀྱང་བརླག་པར་གྱུར། །གང་ཡང་དེར་ནི་ལྷ་རྣམས་ཀྱིས། །གཡུལ་དུ་བསད་པའི་ལྷ་མིན་རྣམས། །
རྟ་དབང་དེ་ཡིས་བསྣམས་པ་དང་། །ཡང་དང་ཡང་དུ་སླར་འཚོ་གྱུར། །དེ་ནས་ལྷ་མིན་ཆེན་པོ་ཡིས། །བསད་པར་གྱུར་པས་རྨོངས་ནས་ནི། །སྐྱབས་འདོད་པ་ཡིས་ཚངས་པ་ལ། །སྐྱབས་སུ་ཉེ་བར་སོང་བར་གྱུར། ལེགས་ལྡན་སྟོབས་ཆེན་ལྡན་པ་ཡི། །ལྷ་མིན་གཡུལ་གྱིས་ཕམ་པར་
བགྱིས། །ལེགས་ལྡན་གྱིས་ནི་བདག་ཅག་ལ། །བཞོན་པ་བཟང་པོ་སྩལ་བའི་རིགས། །བདག་ཅག་གིས་ཀྱང་ལྷ་མིན་གྱི། །གཡུལ་ངོའི་གནས་ལས་རྒྱལ་བར་བགྱི། །དེ་ནས་ཚངས་པ་སྐྱེ་དགུ་ཡི། །བདག་པོས་དེ་ལ་སྨྲས་པ་ནི། །ཕྱིས་འབྱུང་བ་ནི་གང་ཡང་རུང་། །ང་ཉིད་ཀྱིས་ནི་སྔར་ཤེས་
ཏེ། །གང་ཚེ་གང་གིས་ཅི་ཙམ་འགྱུར། །འདི་ནི་ཁོ་བོས་སྔར་ཤེས་པས། །ང་ཡིས་སྔོན་ཚེ་རྟ་སྤྲུལ་པས། །དེ་བཞིན་ས་སྟེང་འགྲོ་བ་དང་། །བར་སྣང་དང་ནི་ས་འོག་གི། །རྒྱུ་དང་མི་རྒྱུ་གང་ཡིན་དང་། །སྲོག་ཆགས་རྣམས་ནི་གང་ཅིའང་རུང་། །དེ་དག་ཐམས་ཅད་མངོན་སྤྲུལ་ཏོ། །མཆོད་
སྦྱིན་བཞོན་པའི་དོན་དུ་ནི། །རྟ་ཡང་ང་ཡིས་སྔོན་ཕྱུང་སྟེ། །སྦྱིན་སྲེག་བྱེད་ཚེ་ང་ཡི་ནི། །མཆི་མ་འཛག་པར་གྱུར་པ་དེ། །དཔལ་མོ་ཡིད་ནི་དགའ་བ་ཡིས། །ལག་པ་གཉིས་ཀྱིས་བླངས་པར་གྱུར། །དེ་ལས་དེར་ནི་རྟ་བྱུང་བས། །དེ་ཕྱིར་དཔལ་མོའི་བུ་ཞེས་བྱ། །དེར་ནི་ལག་པ་

203-1-164a

གཡས་པ་ཡི། །མཆི་མ་ལས་ནི་རྟ་ཕོར་གྱུར། །གཡོན་པའི་མཆི་མ་ལས་རྒོད་མ། །སྙིང་སྟོབས་ལྡན་དང་མགྱོགས་མདངས་ལྡན། །དཔལ་མོའི་ལག་པའི་ངའི་མཆི་མ། །དེར་ནི་རྟ་དེ་བྲམ་ཟེའི་རིགས། །ང་ཡི་མཆི་མ་དཔལ་མོ་ཡི། །ལག་པ་གཉིས་ལས་
འཛག་གྱུར་པ། །བྲང་ན་གནས་པ་རྒྱལ་རིགས་ཏེ། །གཡུལ་ངོར་སྲ་བར་ཤེས་པར་བྱ། །ལྟེ་བ་བརླ་ཡི་རྗེའུ་རིགས་ཏེ། །རྐང་པ་འཛག་པ་དམངས་རིགས་ཡིན། །དེར་ནི་གཡོན་ངོས་རྒོད་མ་སྟེ། །གཡས་ངོས་ཀྱིས་ནི་རྟ་ཕོར་བཤད། །འདི་རྣམས་ཕན་ཚུན་འདུས་པ་ནི། །རིགས་བཞི་དག་ཏུ་བཤད་
པ་ཡིན། །དེ་ལྟར་རྟ་རྣམས་ཡང་དག་བྱུང་། །ཡིད་ལྟར་མགྱོགས་ཞིང་མདོག་ལྡན་ཏེ། །མདོག་གཅིག་མདོག་ནི་འདྲེས་པ་དང་། །སྣ་ཚོགས་མདངས་ཀྱིས་ཕྱེ་བ་དང་། །ཐིག་ལེ་ཅན་དང་ཁ་དོག་མངའ། །མཚན་མ་ཅན་དང་ཞུར་བ་དང་། །རྐང་དཀར་རྡོག་མ་མུན་ཛ་འདྲ། །རྒྱལ་མཚན་
དཀྱིལ་འཁོར་འདྲ་བ་དང་། །རྔ་རྔོག་མདོག་ནི་མང་བ་དང་། །ཁྲ་བོ་ཐིག་ལེ་ཕྲ་བ་དང་། །འདམས་མདོག་སེ་བ་ཉིད་དང་ནི། །དཀར་ལ་རྔོག་མ་གནག་པ་སྟེ། །ཕལ་ཆེར་ཁ་དོག་སྣ་ཚོགས་ཤིང་། །བ་སྤུ་སྣུམ་ཞིང་བཟང་བ་དང་། །ཚད་དང་ལྡན་ཞིང་མིག་བཟང་ལ། །རོ་སྟོད་མཐོ་བར་གྱུར་
པ་དང་། །དབུས་ཕྲ་གསུས་ཁྱིམ་ཆུང་བ་དང་། །མཆུ་ལེགས་བྲང་ཞེང་ཡངས་པ་དང་། །རྔོག་མ་རྐེད་པ་རྨིག་པ་བཟང་། །པགས་སྲབ་སྤུ་མཚམས་ཕྲ་བ་དང་། །ཡིད་དུ་འོང་ཞིང་ཕུམ་ཕུམ་བཟང་། །སྙིང་སྟོབས་ལྡན་ཞིང་རྐང་མདོག་མཐུན། །ལུས་ལས་སྐྱེས་པའི་གཤོག་པ་བཞི། །ནམ་
མཁའ་འགེབས་པ་ལྟ་བུ་དང་། །ཡན་ལག་དང་ནི་ཉིང་ལག་རྣམས། །ལྷ་ཡི་ཆར་ལྡན་གཟི་བརྗིད་ཆེ། །དཔལ་ལྡན་གྱུར་པ་དཔལ་མོའི་བུ། །ཚངས་པའི་མཆི་མ་ལས་བྱུང་མགྱོགས། །མེ་ཡིས་གདུངས་པ་ལས་གྱུར་པའི། །ལྟེ་བ་ལས་ནི་བྱུང་བའི་རྡུལ། །ཐལ་བར་འཛག་གྱུར་དེ་ལས་
ནི། །བོང་བུ་དང་ནི་བོང་མོར་གྱུར། །རྣ་བ་རིང་ཞིང་མཇུག་མར་ལྡན། །གཞུང་ཐིག་ཕྲ་ཞིང་རྨིག་པ་སྲ། །སྐད་གདངས་རྩུབ་ཅིང་ཁུར་སྲན་ཆེ། །གང་ཞིག་རྩུབ་པ་བོང་བུ་ཡིན། །ཐལ་བ་ལས་ནི་སྐྱེས་པའི་ཕྱིར། །དེ་བས་བོང་བུ་ཐལ་མདོག་ལྡན། །དེ་དག་དེ་ལྟར་གྱུར་ནས་ནི། །སྐྱེ་

203-1-164b

དགུའི་བདག་མོའི་གནས་ན་འདུག །དེ་ནས་དྲེགས་པས་རྩེ་བ་དང་། །སྲེག་རྫས་དགང་གཟར་བླུགས་གཟར་དང་། །གཞོང་པ་སྣོད་དང་བུམ་པ་བསྣམས། །རྨོངས་པའི་རྟ་ཡིས་རབ་ཏུ་བརླག །འཇག་མག་ཐལ་བས་ཁྱབ་པ་ཡི། །མི་གང་དེ་ནི་མཐོང་བ་དང་། །དང་ཁྲ་ཁྲོས་པར་
གྱུར་ནས་ནི། །རྟ་རྣམས་དམོད་པ་བཏབ་པར་གྱུར། །གཤོག་བཅད་མཚན་ནི་ནུབ་པ་དང་། །ས་ལ་རྒྱུ་ཞིང་ཚིག་མི་འདོན། །ལྷ་རྣམས་དང་ནི་མི་རྣམས་ཀྱི། །བཞོན་པ་ཉིད་དུ་སོང་གྱུར་ཅིག །དེ་ཐོས་སྡུག་བསྔལ་གྱིས་གདུངས་ཏེ། །དེ་ཚེ་རྟ་རྣམས་དང་ཁྲ་ནི། །དེ་ཉིད་ལ་ནི་
སྐྱབས་སོང་ནས། །སླར་ཡང་རྗེས་སུ་ཕན་བཏགས་བྱས། །རྟ་ཡི་མཆོད་སྦྱིན་འབྲས་བུ་ནི། །བསོད་ནམས་དོན་དུ་འགྲོ་གྱུར་ཅིང་། །མཆོད་པ་བཟང་པོ་ཐོབ་གྱུར་ཅིང་། །བསོད་ནམས་འཇིག་རྟེན་གྱིས་ཐོབ་ཤོག །ཕན་བཏགས་ཐོབ་པས་དེ་དགའ་སྟེ། །དང་ཁྲ་ལ་ནི་བསྐོར་བར་
བྱས། །མགོ་བོས་ཕྱག་བྱས་བདག་ཅག་གིས། །ཅི་ཞིག་བགྱིས་ཞེས་ཚིག་ཏུ་སྨྲས། །དང་ཁྲས་དེར་ནི་ལུང་བསྒོ་བ། །ཁ་བ་ཅན་དུ་ཁྱེད་སོང་ལ། །རི་འདབ་ཡིད་དུ་འོང་བ་དང་། །ཆུ་དང་ལྡན་པར་གནས་པར་གྱིས། །དེ་སྐད་སྨྲས་ནས་རྟ་རྣམས་ནི། །དགའ་བ་རི་རྒྱལ་དག་ཏུ་སོང་། །
སྦྱིན་སྲེག་བཤིགས་པས་ཁྲོས་པ་ན། །དང་ཁྲས་ཧ་ཧ་ཞེས་བཟློག་པས། །དེ་ཕྱིར་འདི་ལ་ཧ་ཡི་སྒྲ། །རྟ་རྣམས་ལ་ནི་བཏགས་པ་ཡིན། །རི་བོ་དམ་པ་དེ་རུ་ནི། །རྟ་རྣམས་གནས་པར་གྱུར་པས་ནི། །གང་ཞིག་འདོད་པ་སྤྱོད་གྱུར་པ། །རིགས་ནི་འདྲེས་པར་གྱུར་པའི་རྒྱུས། །རྟ་དང་བོང་
བུ་དེ་དག་གི། །སྐྱེ་གནས་འདྲེ་བར་བཤད་པར་བྱ། །བོང་བུ་རྟ་ལ་འཇུག་གྱུར་པ། །གང་ཡིན་དེ་ལས་དྲེའུ་འབྱུང་། །དྲེའུ་དང་རྒོད་མ་དག་ལས་ནི། །གོ་རི་ཞེས་ནི་བྱ་བ་སྐྱེ། །གོ་རི་རྒོད་མར་འཇུག་པ་ལས། །ཀི་ནི་ཞེས་ནི་བྱ་བ་སྐྱེ། །ཀི་ནི་རྒོད་མ་ལས་སྐྱེས་པ། །ཀི་སཏ་ཏ་ཞེས་བྱ་
བ་ཡིན། །ཀི་སཏ་ཏ་དང་རྒོད་མ་ལས། །ཆུ་བུར་ཅན་ཞེས་བྱ་བ་ཡིན། །ཆུ་བུར་ཅན་དང་རྒོད་མ་ལས། །སླར་ཡང་བོང་བུ་ཞེས་བྱར་བཤད། །བོང་བུ་འོང་བར་མཐོང་ན་ནི། །རྟ་ནི་ཐམས་ཅད་རྨོངས་པར་འགྱུར། །བྱ་བ་མང་ཞིང་བསླབ་པར་དཀའ། །དེ་ཕྱིར་བོང་བུ་བཞོན་

203-1-165a

དགྲ་ཡིན། །དེ་ལྟར་འདི་ནི་དྲེའུ་སྟེ། །མ་འདྲེས་འཇུག་ལས་རྟ་ཉིད་ཡིན། །རང་དང་རྟ་ཡི་སྐྱེ་གནས་ཏེ། །བོང་བུའི་སྐྱེ་གནས་གཉིས་སུ་འདོད། །རྟ་རྣམས་གཞན་གྱི་མངལ་དུ་ནི། །འཁྲིག་པ་སྤྱོད་པར་མི་བྱེད་ལ། །གལ་ཏེ་བྱེད་པར་གྱུར་ན་ནི། །ཡུལ་དེ་འཇིག་པར་
ཤེས་པར་བྱ། །དེ་ལྟར་ང་ནི་རྟ་འབྱིན་ལ། །མཆོད་སྦྱིན་དོན་ནི་ཕྱུགས་ཀྱི་མཆོག །དགྲ་འཇོམས་རྒྱས་བྱེད་ལ་སོགས་པ། །རྒྱལ་པོ་རྣམས་ཀྱི་དཔུང་གི་མཆོག །དེ་ནས་ཁ་དོན་ལ་དགའ་ཞིང་། །སྦྱིན་སྲེག་བྱེད་ལ་རབ་གཞོལ་བ། །གཞོན་ནུ་ཚངས་པར་སྤྱོད་ལ་གནས། །ཤ་ལི་ཧོ་ཏྲ་
དཀའ་ཐུབ་ཆེ། །ཁ་བ་ཅན་གྱི་ངོས་ཀྱི་ནགས། །ལྷ་ཡི་ཚལ་འདྲར་འོངས་པར་གྱུར། །དེ་ནི་དེ་རུ་གནས་བཅས་ནས། །རི་ཡི་ཚོགས་ནི་ཉམས་དགའ་ཞིང་། །རི་དྭགས་ཚོགས་ནི་དུ་མས་ཁྱབ། །མིའམ་ཅི་ནི་སྣ་ཚོགས་གནས། །བྱ་ཚོགས་དུ་མ་སྒྲ་སྒྲོགས་ཤིང་། །དྲི་ཟའི་བུ་མོ་རྣམས་ཀྱིས་བསྐོར། །
གྲུབ་དང་དྲང་སྲོང་རོལ་པ་ཡི། །ཚོགས་དང་ལྷ་རྣམས་དག་གིས་མཛེས། །མེ་ཏོག་འབྲས་བུ་མང་པོ་ཡིས། །ཉམས་དགའ་ནེའུ་གསེང་བཟང་པོས་ཁྱབ། །ཤིན་ཏུ་ཡིད་དུ་འོང་བའི་གནས། །ཉམས་དགའ་དེར་ནི་གནས་པར་གྱུར། །དེར་ནི་ཕྱེ་ལེབ་ཡན་ཆད་ཀྱི། །ཡི་དྭགས་
ལ་སོགས་སྣ་ཚོགས་གནས། །རྟ་དང་དྲི་ཟ་མི་འམ་ཅི། །ནེའུ་ལེ་སྦྲུལ་དང་བྱ་རྣམས་ནི། །སེང་གེ་སྟག་དང་ཕག་དང་ནི། །གླང་པོའི་དབང་པོ་སྤྲེའུ་དང་དོམ། །དེ་ལ་སོགས་པ་མང་པོ་ནི། །ཤ་ལི་ཧོ་ཏྲ་དྲང་སྲོང་ཆེ། །བདག་ཉིད་ཐུལ་ཅིང་གཙང་བ་ཡིས། །གནས་དང་ཉེ་བར་
འཁོད་པ་ན། །ཤ་ལི་ཧོ་ཏྲས་རྟ་དེ་རྣམས། །བུ་དང་འདྲ་བར་ཡོངས་སུ་བསྐྱང་། །ཁ་བ་ཅན་གྱི་ངོས་ན་རྩེ། །ཤ་ལི་ཧོ་ཏྲའི་དབང་དུ་གྱུར། །དེ་བས་ལྷ་རྣམས་མྱུར་དུ་ནི། །ཤ་ལི་ཧོ་ཏྲའི་གནས་སུ་སོང་། །དེར་ནི་ཁྱེད་ལ་བཞོན་པ་མགྱོགས། །ཤ་ལི་ཧོ་ཏྲ་སྟེར་བར་འགྱུར། །ལྷ་
མཆོག་ཚངས་པས་དེ་སྐད་དུ། །ལྷ་རྣམས་ལ་ནི་སྨྲས་པ་དང་། །དགའ་བས་དེ་ལྟར་བགྱི་ཞེས་ཏེ། །དེ་རྣམས་རི་མཆོག་དེ་རུ་ཆས། །དེ་ནས་སྐད་ཅིག་ཙམ་གྱིས་ནི། །བརྒྱ་བྱིན་གཤིན་རྗེ་ཆུ་ལྷ་དང་། །དཔལ་ལྡན་ནོར་གྱི་བདག་པོ་དང་། །བཅས་པ་དྲང་སྲོང་གནས་སུ་སོང་། །ཕྱིན་ནས་

203-1-165b

བསྟི་གནས་གནས་དེ་ལ། །སྙན་པའི་ཚིག་ནི་འདི་སྐད་སྨྲས། །དྲང་སྲོང་ཁྱེད་ནི་གང་གི་ཕྱིར། །དཀའ་ཐུབ་གནས་བཅས་དཀའ་ཐུབ་གྲུབ། །ཚུར་སྤྱོན་གྲུབ་དང་དྲང་སྲོང་ཚོགས། །མི་བཟད་པ་ཡི་གནས་སུ་དེངས། །དེ་ནས་ངས་ནི་དགྲ་འཇོམས་པའི། །བརྒྱ་བྱིན་ལ་ནི་དེར་སྨྲས་པ། །ང་ལ་དཀའ་
ཐུབ་ཡང་སྤྱད་པ། །མི་དགོས་དེ་ལྟར་བྱ་ཞེས་སྨྲས། །དེ་ནས་ང་ལ་གཤིན་རྗེ་ཡིས། །སྙན་པའི་ཚིག་ནི་འདི་སྐད་སྨྲས། །རྒ་མེད་འཆི་མེད་ཟད་མེད་པ། །ལྷ་ཡི་དབང་པོའི་གནས་འདྲ་བ། །འཇིག་རྟེན་ཀུན་ན་གང་བཟང་བའི། །གནས་དེ་ང་ཡིས་སྦྱིན་པར་བྱ། །ཟས་དང་སྟན་དང་མལ་ཁྲི་
དང་། །སྤྱོད་ལམ་ཅི་བདེ་གནས་མེད་པའི། །ནགས་ཚལ་འདིར་ནི་དཀའ་ཐུབ་ཅན། །ཁྱེད་ནི་ཇི་ལྟར་དགའ་བར་གྱུར། །བརྒྱ་བྱིན་བཅས་པའི་ལྷ་མཆོག་ནི། །ཀུན་ལ་ང་ཡིས་ལྷར་སྨྲས་པ། །རྩ་བ་འབྲས་བུ་ང་ཡི་ཟས། །གོས་ནི་ཤིང་ཤུན་རི་དྭགས་པགས། །འདོན་དང་སྦྱིན་སྲེག་བྱེད་པ་
ན། །མཐར་ཐུག་མེད་པར་ངའི་བློ་འཇུག །རི་དྭགས་ཚོགས་ཀྱང་རྟག་ཏུ་ནི། །ཁོ་བོའི་བསྟི་གནས་དག་ཏུ་འོངས། །གློ་བུར་ལྷགས་པ་གཞན་དག་དང་། །གཤོག་ཐོགས་དག་ནི་བལྟ་བྱ་ཡིན། །དེ་དང་ལྷན་ཅིག་གནས་བྱ་ཡིན། །ལྷ་ཡུལ་འདོད་པ་ང་ལ་མེད། །དེ་ནས་དགྲ་ཐུབ་གཤིན་
རྗེ་ཡིས། །ང་ལ་ཡང་ནི་སླར་སྨྲས་པ། །གང་དང་འགྲོགས་ན་ཁྱེད་དགའ་བའི། །གཟུགས་སྡུག་རི་དྭགས་བྱ་ཚོགས་དང་། །གཤོག་པ་ཡོད་པའི་རྐང་བཞི་པ། །ཐམས་ཅད་བདག་ཅག་ལ་བསྟན་གསོལ། །ང་ཡིས་དེ་ལྟར་ཁས་བླངས་ཏེ། །རི་དྭགས་བྱ་ཚོགས་དེ་དག་ཀུན། །ཇི་སྲིད་
མཐོང་བར་གྱུར་གྱི་བར། །ལྷ་རྣམས་ཡུད་ཙམ་འདུག་པར་གྱིས། །དེ་ནས་ལྷ་རྣམས་མཁའ་ལས་ནི། །ཕྱོགས་རྣམས་ཀུན་ནས་འོངས་གྱུར་ཅིང་། །རི་རྩེ་ཆུ་བོ་རྣམས་ལས་ཀྱང་། །བྲང་གི་ཕྱོགས་ནི་སྟོན་ཅིང་འོངས། །དེ་ཚེ་རྟ་ཕྲན་བར་སྣང་ལ། །ཡིད་དུ་འོང་བའི་སྐད་དུ་འཚེར། །རྣར་སྙན་
པ་ཡི་སྒྲ་དང་ནི། །གཤོག་པའི་རླུང་ནི་ཡིད་འོང་བའི། །སྒྲ་དེས་མདངས་དང་ལྡན་པ་ཡི། །སྒྲ་དེས་ངོ་མཚར་སྐྱེས་པར་གྱུར། །ལྷ་རྣམས་དགའ་བས་ང་ལ་ནི། །སྣུམ་ཞིང་ཡིད་འོང་ཟབ་པ་དང་། །རྗེས་མཐུན་སྒྲ་ལྡན་པ་སྙམ་དགའ། །ཨེ་མའོ་མཐོ་རིས་མཚུངས་ཞེས་སྨྲས། །ཀྱེ་མའོ་ཁྱོད་ནི་

203-1-166a

ཉམས་དགའ་བར། །གནས་པར་གྱུར་པ་ལེགས་སོ་ལེགས། །ཀྱེ་མའོ་རི་དྭགས་གཟུགས་བཟང་ཞིང་། །ཉམས་སྟོབས་སྙིང་པོར་མགྱོགས་པར་ལྡན། །ལྷ་དང་མི་ནི་སུ་ལ་ཡང་། །འདི་འདྲའི་བཞོན་པ་ཡོད་མ་ཡིན། །བདག་ཅག་འདི་ལ་ཞོན་ནས་ནི། །
འགྲོ་ན་ངེས་པར་རྒྱལ་བར་འགྱུར། །ཁྱོད་ཀྱིས་བདག་ཅག་ལ་གསོལ་ཅིག །ཅི་ལྟར་བཞོན་པར་གྱུར་པ་ཡི། །ཐབས་དེ་དྲང་སྲོང་མཆོག་གིས་ནི། །ཡིད་ལ་བདག་ཅག་བསམ་པར་འདོད། །དེ་ནས་དེ་སྐད་སྨྲས་པ་ཡི། །ལྷ་མཆོག་རྣམས་ལ་ངས་ལན་སྨྲས། །ལྷ་མིན་བརླག་པའི་
དོན་དང་ནི། །དེ་ཕྱིར་ཁྱེད་རྣམས་རྒྱལ་ཕྱིར་དང་། །བྲམ་ཟེ་རྣམས་ཀྱི་མཆོད་སྦྱིན་ཕྱིར། །ཚངས་པས་རྟ་ནི་སྤྲུལ་པ་ཡིན། །དེ་བས་ཚངས་པས་ང་བསྒོ་བས། །ཁྱེད་རྣམས་ཤས་ཆེར་དགའ་འགྱུར་བའི། །བཞོན་པ་རྣམས་ཀྱི་དམ་པ་ནི། །མ་ལུས་པར་ནི་སྦྱིན་པར་བྱ། །ལྷ་ཡི་དམ་པ་
ཁྱེད་རྣམས་ནི། །བྲམ་ཟེའི་ཡུལ་དུ་འགྲོ་བར་གྱིས། །དེར་ནི་འདུལ་ཐབས་བྱ་བ་དག །འོངས་ནས་བྱ་ཡི་གཞན་དུ་མིན། །དེར་སོང་དེ་རྗེས་ང་ཡིས་ནི། །རྟ་ནི་ཇི་སྙེད་བོད་པར་བྱ། །དེ་ནས་ང་ཡིས་རྟ་རྣམས་ཀུན། །བསྡུས་ནས་ཚིག་ནི་འདི་སྐད་སྨྲས། །བླ་མ་མཁན་པོ་མཛའ་བ་དང་། །
གཉེན་དང་རང་མི་རྣམས་ཀྱང་ནི། །རིང་བར་བལྟ་བར་ང་འདོད་ལ། །ཁྱེད་རྣམས་ལ་ཡང་མགྲོན་དུ་འབོད། །དེར་ནི་འབྲས་བུ་མུངྒ་དང་། །མ་ཤ་ནས་དང་ཏིལ་དག་དང་། །སཱ་ལུ་དྲུག་ཅུ་པ་དང་འབྲུ། །རྩྭ་ནི་མཐོ་ཞིང་འཇམ་པ་དང་། །ཆུ་བོ་ནེའུ་གསིང་རྣམས་ཀྱང་ཡོད། །དེའི་ནགས་
གཟར་པོ་མ་ཡིན་ན། །ང་དང་ལྷན་ཅིག་འགྲོ་བྱའམ། །ཡང་ན་འདི་རུ་གནས་པར་གྱིས། །དེ་ནས་ང་ལ་རྟ་ཀུན་གྱིས། །སྙན་པའི་ཚིག་ཏུ་འདི་སྐད་སྨྲ། །ནགས་ཚལ་སྟོང་པ་འདི་མཐོང་ན། །བདག་ཅག་ཤས་ཆེར་ཡིད་སྐྱོ་བས། །ཁྱེད་ནི་གང་དུ་འགྲོ་འགྱུར་བ། །བདག་ཅག་དེར་
འབྲེང་གཞན་དུ་མིན། །ཁྱེད་ཀྱི་རྗེས་སུ་འབྲངས་ཏེ་ནི། །འགྲོ་བ་བདག་ཅག་རབ་ཏུ་བསྔགས། །དེ་ནས་ང་ནི་རྟས་བསྐོར་ཞིང་། །བདེ་གནས་དགྲ་དང་ལྷན་ཅིག་ཏུ། །གང་དུ་ལྷ་དང་དུས་བཏབ་པའི། །བྲམ་ཟེའི་ཡུལ་དུ་ཕྱིན་པར་གྱུར། །དེས་ནི་ཨ་ཤྭདྠ་ཡི་རྩྭར། །གཙུབ་ཤིང་

203-1-166b

ལས་ནི་མེ་ཕྱུང་སྟེ། །སྦྱིན་སྲེག་ང་ཡིས་བྱས་ནས་ནི། །ལྷ་དང་སྲིན་པོ་ཚིམ་པར་བྱས། །དེ་ནས་ཡུལ་དེའི་ས་མཚམས་ཀྱི། །ཉེ་འཁོར་ཀུན་དུ་ཁྱབ་ནས་ནི། །རྟ་དེ་དག་གིས་འབྲུ་དག་ནི། །ཐམས་ཅད་ཟ་བ་ཉིད་དུ་འགྱུར། །དེ་ནས་འབྲུ་དེ་བརླག་གྱུར་པ། །བྲམ་ཟེས་མཐོང་
ནས་ཁྲོས་པ་ཡི། །ཡིད་ཀྱིས་མིག་ནི་དམར་པོ་དང་། །དེ་ལ་ཚིག་རྩུབ་འདི་སྐད་སྨྲ། །སྔོན་ནི་དཀའ་ཐུབ་ལ་གནས་པའི། །བྲམ་ཟེ་གཞན་དག་འདིར་འོངས་ཚེ། །དཀའ་ཐུབ་ཚངས་པར་སྤྱོད་པ་དང་། །འདོན་དང་སྦྱིན་སྲེག་བྱེད་པ་ཡིས། །ལོ་གྲངས་མང་པོར་འདིར་གནས་ཤིང་། །
དེ་བཞིན་ཡམས་ཀྱང་ཞི་བྱེད་ན། །ཁྱེད་ནི་རི་དྭགས་འདི་འདྲ་བ། །ཁྱེར་ཏེ་ཡུལ་དུ་ཇི་ལྟར་འོང་། །ལམ་གང་ནས་ནི་ཁྱེད་འོངས་པ། །དེ་ལས་སླར་ནི་འགྲོ་བར་གྱིས། །ཁྱེད་ཀྱི་ཡམས་འདི་བདག་ཅག་གིས། །བཟློག་པར་ནུས་པ་མ་ཡིན་ནོ། །བྲམ་ཟེ་ཁྲོས་པ་དེ་ལ་ངས། །བཟོད་གསོལ་
སྔོན་འགྲོའི་ཚིག་འདི་སྨྲས། །རྟ་རྣམས་འབྲུ་ནི་ཟ་བ་དང་། །ཁྱེད་ལ་འཚེ་བར་ང་མི་དགའ། །སྦྱིན་སྲེག་བྱེད་པས་ང་བྲེལ་བས། །ཁྱེད་ལ་གནོད་པ་ངས་མ་བཀག །དེ་ནས་ང་ཡིས་རྟ་རྣམས་ནི། །ཐམས་ཅད་བསྡུས་ནས་འདི་སྐད་སྨྲས། །ང་ལ་ཡུལ་གྱི་མི་རྣམས་ནི། །ཅི་སྐད་སྨྲས་གྱུར་
པ་ལ་ལྟོས། །འདི་དག་མགུ་བར་བྱ་བའི་ཕྱིར། །རེ་ཞིག་ཁྱེད་ནི་ལེགས་པར་བཅིང་། །དེ་ནས་མཚན་མོར་གྱུར་པ་དང་། །སླར་ཡང་ཅི་དགར་སྤྱད་པར་གྱིས། །དེ་ནས་བཅིངས་པའི་ཚོར་བ་ནི། །མ་མྱོང་པས་ན་བཅིང་བར་ལྷགས། །ལྷ་རྣམས་ལྟད་མོ་སྐྱེས་པ་ཡི། །ཡིད་ཀྱིས་ང་ལ་ཡིད་
ཆེས་འགྱུར། །དེ་ནས་ཆུ་ལྷ་རང་ཉིད་ནི། །བོས་ནས་ཞགས་པས་རྟ་རྣམས་ནི། །ཡན་ལག་ལྔར་བཅས་ཤིང་ལ་ནི། །གོ་རིམས་བཞིན་དུ་བཅིངས་པར་གྱུར། །བཅིངས་པའི་རྗེས་ལ་སྟོབས་ཡོད་ཀྱང་། །འགུལ་བར་གྱུར་པ་མ་གྱུར་ཏོ། །ཉེ་བར་བཅིང་བ་བྱས་ནས་ནི། །མཚོན་ནི་
རྣོན་པོ་ཐོགས་ནས་སུ། །ལྷ་ཡིས་མདུན་དང་རྒྱབ་ཀྱི་ནི། །རྟ་རྣམས་ཀྱི་ནི་གཤོག་པ་བྲེགས། །དེ་ནས་གཤོག་པ་བཅད་ཀྱང་ནི། །ཕྱི་ཕྱིར་ཞིང་ནི་{སྐྱེ་}བར་གྱུར། །དེ་རྗེས་མེ་ཡིས་བསྲེགས་པས་ན། །ཚིག་པས་མེ་ལྕེ་བྱུང་བར་གྱུར། །བཅིངས་ཤིང་གཤོག་པ་མེད་བྱས་ནས། །གང་ཚེ་

203-1-167a

རྟ་རྣམས་ཉམ་ཐག་པ། །དེ་ཚེ་ལྷ་རྣམས་ཡིད་ལ་ནི། །ཇི་ལྟར་འདོད་པ་བཞིན་དུ་ཁྱེར། །ཟླ་བས་རི་བོང་དཀར་འདྲ་བ། །ཉི་མ་ནེ་ཚོའི་མདོག་འདྲ་བ། །བརྒྱ་བྱིན་གྱིས་ནི་སྔོ་བསངས་ཏེ། །གཤིན་རྗེ་ཡིས་ནི་ནག་པོ་ཡིན། །མེ་ལྷས་རྒྱ་སྐྱེགས་མདོག་འདྲ་བ། །རླུང་ལྷས་
དམར་སེར་མདོག་འདྲ་བ། །ཆུ་ལྷས་སྔོན་པོ་ཁྱེར་བར་གྱུར། །ཉི་མ་གཞན་གྱིས་ཁ་དོག་སྐྱ། །ལྷ་ཆེན་གྱིས་ནི་སེར་པོ་སྟེ། །སྣ་ཚོགས་ལས་ཀྱིས་རྒྱང་མདོག་ཅན། །ཉི་མ་སུ་ཤས་སྣ་གནག་པ། །ཏྲཥྚས་མཚན་དང་ལྡན་པ་སྟེ། །ལྷ་གཞན་གྱིས་ནི་རང་རང་གི། །ཡིད་ལ་འདོད་པ་
བཞིན་དུ་ཁྱེར། །དེ་ལྟར་རྟ་རྣམས་བགོས་ནས་ནི། །ལྷག་མ་ང་ཡི་གནས་བཞག་སྟེ། །གཡུལ་དུ་དགོས་པའི་ལས་རྣམས་དང་། །མཚན་ཉིད་མཚན་མ་རྣམས་དང་ནི། །གསོ་དང་སླར་འབྲོས་ལས་རྣམས་ལ། །བུ་དང་ལྷན་ཅིག་ཉེ་བར་བསྐྱང་། །ངའི་བུ་མཛའ་བོ་ལས་རྒྱལ་དང་། །
འཁྲུལ་མེད་ཐ་ཆུངས་བྱེད་པ་ཞེས། །ཡོན་ཏན་ངེས་ལས་མིང་བཏགས་པ། །བུ་གསུམ་མཁས་པར་གྱུར་པ་ཡིན། །ཞི་ཞིང་མཛའ་བོ་རྣམས་ལས་རྒྱལ། །དེས་དེ་མཛའ་ལས་རྒྱལ་ཞེས་བྱ། །རིགས་བྱེད་བསྟན་བཅོས་མ་འཁྲུལ་བས། །དེ་ཕྱིར་འཁྲུལ་མེད་ཅེས་འདི་བཤད། །
ང་ཡི་ཚིག་ལ་མངོན་དགའ་བས། །རྟག་ཏུ་འདི་ལྟར་བྱེད་པས་ན། །དེའི་ཕྱིར་དེ་ལ་བྱེད་པ་ཞེས། །ཐ་ཆུངས་ལ་ནི་བཏགས་པ་ཡིན། །དེ་ནས་རྟ་གཞན་བདག་ཉིད་ཆེ། །མ་ན་ཞེས་བྱ་ཚངས་སྲས་བྱིན། །དེ་ལས་གཞན་པ་རྟ་བྲེས་སུ། །ལས་རྣམས་ལ་ནི་བྱང་བར་བྱས། །བཞོན་པ་
ལ་ནི་གདུལ་བ་དང་། །བྱ་བའི་ལས་རྣམས་ལ་ཡང་གཞག །ད་ནི་རྒས་ཕྱིར་གྲོལ་བ་ཚོལ། །རྟ་རྣམས་ཀྱི་ནི་ནང་དུ་ཉལ། །དེ་ནས་རྟ་ཁྲོས་པ་ཡིས་ང་། །གཉིད་ལོག་སྙམ་སྟེ་བསད་པར་བརྩམས། །དེ་དག་འདུས་ནས་འཁོན་གྱིས་ནི། །སྐྱོ་བའི་ཡིད་དང་ཕན་ཚུན་སྨྲ། །
བདག་ཅག་བཅིང་དང་གསོད་འདི་ནི། །གང་ལས་སྡུག་བསྔལ་སྐྱེ་འགྱུར་བ། །འདི་དག་ཀུན་གྱི་རྩ་བ་ནི། །དྲང་སྲོང་གཉིད་ལོག་འདི་ཡིན་གྱི། །དེ་བས་གནོད་བྱས་ལན་བྱ་ཞིང་། །ཟོས་པར་གྱུར་ན་ལེགས་པ་ཡིན། །དེ་ནས་བཅིངས་པ་བཅད་ནས་ནི། །ང་གསོད་ཕྱིར་ནི་ལྷགས་

203-1-167b

པར་གྱུར། །ང་ནི་དེ་ལ་ཐབས་གང་གིས། །བདེ་བར་འགྱུར་ཞེས་སེམས་ཤིང་ཉལ། །དེ་ནས་ལྷ་ཡིས་སད་བྱས་པ། །ང་ཡིས་རྟ་ལ་དམོད་པ་བཏབ། །དེང་ནས་བརྩམས་ཏེ་ང་ཡི་ནི། །དམོད་པས་བཞོན་ཁྱེད་དོང་ལ་ནི། །འཇུག་ཅིང་རླིག་པ་འཕྱང་བ་དང་། །བརྗེད་ངས་པ་ནི་ཉིད་གྱུར་ཅིག །
དེ་ནས་དེ་ནི་འཆིག་པ་དག །སྐྱེས་ཤིང་དམོད་པས་བརྗེད་ངས་གྱུར། །དེ་སྐད་དེ་ལ་ངས་སྨྲས་ནས། །གནས་དེ་ནས་ནི་མི་སྣང་བྱས། །རྟ་ཡི་སྒྲ་དེ་ཐོས་པ་དང་། །དེ་ནས་རྟ་ཡིས་འཚོ་བ་དང་། །རྟ་ལ་ཞོན་དང་འཆིང་བྱེད་དང་། །རྟ་བྲེས་སུ་ནི་འོངས་པར་གྱུར། །རྟ་རྣམས་གྲོལ་ནས་གནས་
གནས་སུ། །ཕན་ཚུན་རྒྱུ་བར་བྱེད་པ་དང་། །མལ་ཁྲི་རྒྱ་ཆེན་དག་དང་ནི། །མལ་སྟན་དག་ཀྱང་སྟོང་པ་མཐོང་། །དེ་ཡིས་ང་ནི་མ་མཐོང་བས། །རྟ་རྣམས་ཀྱིས་ནི་ཟོས་སྙམ་ན། །དེ་ཡི་མལ་ཁྲི་ལས་མཚོན་པས། །བྲམ་ཟེ་མི་སྣང་ཉིད་གྱུར་སྙམ། །འདི་ལྟར་རྟ་ནི་དེ་དག་རྣམས། །བྲམ་
ཟེ་ཟོས་པར་བྱས་སྙམ་སེམས། །དེ་ཡི་ཕྱིར་ན་རྟ་རྣམས་ནི། །རྟ་སྦངས་བཏང་ནས་མང་དུ་སྣོམ། །ཤ་ལི་ཧོ་ཏྲ་ཅི་ནས་ཀྱང་། །ཕྱིས་མི་འབྱུང་བར་གྱུར་ཏོ་སྙམ། །རྟ་ཡི་སྐྱེ་བ་བྱུང་བ་འདི། །གང་ཞིག་རྟག་ཏུ་ཉན་བྱེད་པའམ། །ཡང་ན་ལ་ལ་འཛིན་བྱེད་དམ། །གཏམ་ལ་དད་པར་གྱུར་ན་ནི། །
ལྷ་རྣམས་ཀྱིས་ནི་བཀུར་བ་དང་། །བུ་དང་ཚ་བོ་འཕེལ་བར་འགྱུར། །ཚེ་རིང་བ་ནི་ཐོབ་འགྱུར་ཞིང་། །གྲགས་པ་ཆེ་བ་ཉིད་དུ་འགྱུར། །འདི་ལྟར་ལྷ་ཡི་མཐུ་ལྡན་ཞིང་། །འདས་དང་མ་འོངས་དོན་ཤེས་པའི། །དྲང་སྲོང་ཤ་ལི་ཧོ་ཏྲ་ཡིས། །བུ་ཡིས་དྲིས་ཏེ་སྨྲས་པ་ཡིན། །ཤ་ལི་
ཧོ་ཏྲའི་མདོའི་གནས་ལས་རྟ་རྣམས་བྱུང་བའི་ཚུལ་ཞེས་བྱ་བའི་ལེའུ་སྟེ་བཞི་པའོ།།      །།ཐ་སྐར་ཚ་བོ་དྲང་སྲོང་ཆེ། །རྟ་སྐད་ལས་ནི་ལུས་སྐྱེས་པ། །ལྷ་ཡི་མཐུ་ལྡན་དཀའ་ཐུབ་ཅན། །ཚངས་པ་ཉི་མ་མེའི་གཟི་མདངས། །ཤ་ལི་ཧོ་ཏྲ་དྲང་སྲོང་མཆོག །དེ་ལ་
ལེགས་ཐོས་ཀྱིས་དྲིས་པ། །འདི་ལྟར་མངལ་དུ་ཆགས་པར་འགྱུར། །སྲོག་ནི་ཇི་ལྟར་འཛིན་པ་ལགས། །ལུས་གཟུངས་རྨིག་པ་སྤུ་དག་དང་། །ནད་གཞི་ལྟོ་བ་འབྱུང་བ་དང་། །ཡན་ལག་ལུས་ཀྱི་ཤ་རྣམས་དང་། །རྩ་དང་རུས་པ་དེ་བཞིན་ཚིགས། །ཟླ་བ་གང་ལ་འབྱུང་བར་

203-1-168a

འགྱུར། །མངལ་དུ་ཇི་ལྟར་འཚོ་བ་ལགས། །རྟེའུ་ཕོ་མོ་ཇི་ལྟར་འགྱུར། །མཚན་མི་ལྡན་དང་མ་ནིང་དང་། །རྟེའུ་ཕོ་གཉིས་སམ་རྟེའུ་མོ་གཉིས། །སྐྱེ་བའམ་གཡང་གཤམ་ཉིད་འགྱུར་བའམ། །རྟེའུ་ཕོ་མོ་སྐྱེ་བའམ། །ཕྲ་དང་རགས་པ་ཇི་ལྟར་འགྱུར། །
འདུག་པ་དང་ནི་ཉལ་བ་དང་། །མངལ་དུ་ཞུ་དང་སྐམས་པ་དང་། །ཤིན་ཏུ་དགྱེ་དང་མཐུག་པ་དང་། །བསླབ་སྦྱང་སོ་སོར་ཤེས་པ་དང་། །དེ་བཞིན་ཟས་དང་རྣོ་དང་བུལ། །ལྷོ་དང་ཞི་བ་ཇི་ལྟར་འགྱུར། །དཔལ་དང་མི་འཇིགས་བློ་ལྡན་དང་། །སྟོབས་ཆེ་མགྱོགས་པ་ཕུན་ཚོགས་དང་། །
བུལ་དང་བློ་ནི་ཞེན་པ་དང་། །སྦེགས་དང་ཉམས་དང་ལྡན་པ་དང་། །ངང་ཚུལ་མདངས་ལྡན་ནད་མེད་དང་། །ཕོར་སྐྱེས་དོན་མེད་ཅི་ལྟ་བུ། །ཚེ་རིང་བ་དང་ཚེ་ཐུང་ཉིད། །བཀྲ་ཤིས་བཀྲ་མི་ཤིས་གཟུགས་བཟང་། །མདོག་མ་འདྲེས་དང་མདོག་འདྲེས་དང་། །སྣ་ཚོགས་དབྱེ་བ་
ཇི་ལྟར་འགྱུར། །མཚན་དང་རླིག་པ་ལྕེ་དང་ནི། །སྤུ་དང་རྔོག་མ་དག་དང་རྐན། །སོ་དང་རྨིག་པ་མིག་མི་སྡུག །ཁ་དོག་མི་སྡུག་ཇི་ལྟར་འགྱུར། །སྒུར་དང་མ་ནིང་ཡན་ལག་ཉམས། །གཟུགས་དང་མཇུག་མ་ཡོ་བ་དང་། །བེམས་པོ་འདྲ་དང་ལྐུགས་དང་འོན། །རྣ་ཡོན་ཁ་ནི་ཆེ་བ་
དང་། །མི་སྡུག་པ་ཡི་ནད་བུ་ཅན། །གཞན་གྱི་དབྱིབས་འདྲ་འཁུ་བ་མེད། །སི་སི་ཅན་ནམ་ཁྱི་རྔོ་ཅན། །མངལ་དུ་གནས་ཚེ་ཇི་ལྟར་འགྱུར། །དེ་ལྟར་བློ་ལྡན་གྱིས་དྲིས་ཚེ། །ཤ་ལི་ཧོ་ཏྲས་སྨྲས་གྱུར་པ། །ཇི་ལྟར་ལས་དང་ཉོན་མོངས་ལས། །སེམས་ཅན་རྣམས་ནི་འབྱུང་
འགྱུར་བ། །ཡིད་བློ་དབང་པོ་ཞེས་བྱ་བ། །རྣམ་ཤེས་དང་ནི་འདུས་གྱུར་ནས། །མངལ་དུ་ཆགས་པར་གྱུར་པ་ན། །ལས་ཀྱི་ཚུལ་ལ་གནས་པ་ཡིན། །སེམས་ཅན་འབྱུང་བར་གྱུར་པའི་ཚེ། །ཁོང་ཁྲག་རླུང་ལ་བརྟེན་པ་ཡིན། །གང་ཚེ་རྟ་ཕོ་རྒོད་མ་ནི། །ཟླ་མཚན་ལྡན་ལ་འཇུག་
གྱུར་པ། །དེ་ཚེ་འབར་བར་གྱུར་པ་ཡིས། །རྣམ་ཤེས་མངལ་དུ་གནས་པ་ཡིན། །དེས་ནི་ཁུ་བ་ཁྲག་བླངས་ནས། །མངལ་གྱི་གནས་སུ་འདྲེན་པར་འགྱུར། །ཇི་ལྟར་པདྨའི་སྡོང་བུའི་རྩར། །སྐྱེས་བུས་ཆུ་ནི་བླུགས་པ་ལྟར། །དེ་བཞིན་མངལ་གྱི་གནས་སུ་ནི། །ཁུ་བ་རླུང་

203-1-168b

གིས་འདྲེན་པར་བྱེད། །དེ་ནི་རྩོལ་བ་ཐམས་ཅད་ཀྱིས། །ཁྲག་གིས་ལུས་ནི་འཕེལ་བར་བྱེད། །ཇི་ལྟར་མེ་གྲོགས་དུ་བ་ནི། །ཤིང་ལས་བྱུང་བས་གྱེན་དུ་འདྲེན། །དེ་ནི་བར་སྣང་ལ་གནས་ནས། །གཟུགས་ཅན་དུ་ནི་གནས་པར་བྱེད། །དེ་བཞིན་མངལ་ན་གནས་པའི་རླུང་། །
ཁུ་བ་ཁྲག་ཏུ་བྱུང་བ་རྣམས། །དེ་ནི་མངལ་ཆགས་གྱུར་པ་ན། །རྣམ་ཤེས་དང་ནི་བཅས་པ་ལས། །སེམས་མེད་གྱུར་པའི་དངོས་པོ་ཡང་། །སེམས་དང་ལྡན་པ་ཉིད་དུ་འགྱུར། །དེ་ནས་ལུས་སུ་ཚོར་འགྱུར་ཞིང་། །རང་གི་གནས་སུ་འབྱུང་ལས་སྐྱེ། །མངལ་གྱི་ཁུ་བ་ཁྲག་
དང་རླུང་། །འདུས་པ་ལས་ནི་མངལ་ཆགས་འགྱུར། །རྣམ་ཤེས་དང་ནི་འདྲེས་གྱུར་ལ། །ཁྲག་གིས་གསོས་པར་གྱུར་པ་ལས། །སྙིང་སྟོབས་དང་ནི་འདྲེས་འགྱུར་བ། །དེ་ནི་མངལ་ཆགས་ཤེས་པར་བྱ། །ལེགས་ཐོས་ཀྱིས་ནི་སླར་སྨྲས་པ། །བདག་ལ་ཐེ་ཚོམ་འདི་
སྐྱེས་ཏེ། །ཁུ་བ་ཟླ་བའི་བདག་ཉིད་ཅན། །ཁྲག་ནི་མེ་ཡི་རང་བཞིན་ཡིན། །དེ་གཉིས་འདུས་པར་གྱུར་པ་ན། །ཇི་ལྟར་མངལ་ནས་ཟགས་མ་གྱུར། །བུ་ཡིས་དེ་སྐད་དྲིས་པ་དང་། །ཤ་ལི་ཧོ་ཏྲས་སྨྲས་གྱུར་པ། །དེ་ནི་རྣམ་ཤེས་ཀྱིས་ཟིན་པས། །དྲོད་ཀྱིས་ཁུ་བར་འགྱུར་
མ་ཡིན། །མ་ཡི་ཉེས་པའི་དབང་དང་ནི། །ཚེ་ཡང་ཡོངས་སུ་ཟད་ན་འཇིག །ས་སོགས་འབྱུང་བ་ཆེན་པོ་དང་། །ཁུ་ཁྲག་སྐྱོན་མེད་གྱུར་པ་ལས། །དེ་ཚེ་ཡོན་ཏན་དང་ལྡན་པར། །མངལ་ནི་འཛིན་པར་འགྱུར་བ་ཡིན། །དེ་ནི་ང་ཡིས་བཤད་བྱ་ཡི། །རིམ་གྱིས་ཁྱོད་ཀྱིས་ཤེས་
པར་གྱིས། །ནམ་མཁའ་རླུང་དང་མེ་དང་ནི། །ཆུ་དང་དེ་བཞིན་ས་རྣམས་ཏེ། །འབྱུང་བ་ཆེན་པོ་དེ་དག་ལས། །མངལ་ནི་སྐྱོན་མེད་འབྱུང་བར་འགྱུར། །ལུས་ཅན་དག་ནི་ཐམས་ཅད་ཀྱི། །སྐྱེ་བ་དེ་ལྟར་འབྱུང་བ་ཡིན། །གཞན་བཤད་གཞུང་ཡང་མང་མོད་ཀྱི། །ཁོ་བོ་དེ་ལྟར་
མི་འདོད་དོ། །ཕ་དང་མ་ལས་བྱུང་བ་དང་། །ལས་དང་དེ་བཞིན་སྙིང་སྟོབས་སྐྱེས། །དེ་ལྟར་སེམས་ཅན་ཐམས་ཅད་ནི། །མངལ་དུ་ཆགས་པར་ཤེས་པར་བྱ། །ཇི་ལྟར་འབྱུང་བ་བཤད་བྱ་སྟེ། །ལ་ལ་མགོ་བོ་སྔར་སྐྱེ་ཟེར། །ཁ་ཅིག་གིས་ནི་དང་པོར་སྙིང་། །

203-1-169a

གཞན་དག་རྒྱུ་མ་སྐྱེ་ཞེས་ཟེར། །དེ་ལྟ་མོད་ཀྱི་མངལ་དུ་ནི། །མིང་ཅན་ཅིག་ཅར་སྐྱེ་བར་འདོད། །ཁུ་བ་ཁྲག་དང་རྣམ་ཤེས་དག །འདྲེས་ཀྱང་བརྒྱལ་བར་གྱུར་པ་ལས། །ཞག་བདུན་ནས་ནི་རླུང་དག་གིས། །བསྐམས་ལས་ནུར་ནུར་པོར་འགྱུར་རོ། །ཞག་
བཅུ་ན་ནི་མེར་མེར་པོ། །ཟླ་བ་གཅིག་ན་གོར་གོར་པོ། །རྫ་བུམ་གསེར་ལས་ཆུ་བླུགས་པ། །ཀུན་དུ་གཤེར་བར་བྱེད་པ་ལྟར། །མ་ཡི་ཁ་ཟས་ཡོན་ཏན་གྱིས། །མངལ་དུ་ཆགས་པ་གསོ་བར་བྱེད། །ནུར་ནུར་པོ་ལ་སོགས་པའི་ཚེ། །ཡན་ལག་མི་གསལ་ཉིད་དུ་
བཤད། །ཟླ་བ་གཉིས་ན་རྐང་ལག་ནི། །སོ་སོའི་ཆར་ནི་འགྲོ་བར་འགྱུར། །དུས་ནི་དུས་ཀྱི་ཁྱད་པར་གྱིས། །ཡན་ལག་གསལ་ཞེས་བཤད་པ་ཡིན། །སྔར་ནི་མི་གསལ་དེ་རྗེས་ལ། །གསལ་བ་ཉིད་དུ་སྣང་བ་ཡིན། །ཇི་ལྟར་སྨན་གྱི་ས་བོན་ལ། །ཐམས་ཅད་མི་གསལ་ཉིད་དུ་
འདོད། །དེར་ནི་བྱེད་པ་པོ་མི་སྣང་། །ས་བོན་ལ་རྟ་དེ་བཞིན་ནོ། །དཔེར་ན་འོ་མ་མར་ཡོད་པ། །དེ་ལ་སྣང་བར་འགྱུར་མ་ཡིན། །དེ་ནི་བསྲུབས་པར་གྱུར་པ་ན། །ཐམས་ཅད་གསལ་བར་འགྱུར་བ་ཡིན། །དེ་བཞིན་མ་ཆགས་རང་བཞིན་ནི། །ཕྲ་བས་མངོན་པར་མི་འགྱུར་ལ། །
དེ་ཉིད་འཕེལ་བར་གྱུར་པ་ཡི། །དུས་གཞན་དུ་ནི་གསལ་བར་འགྱུར། །ཇི་ལྟར་ཨ་མྲའི་ས་བོན་ལ། །ཤུན་པ་ལ་སོགས་མི་སྣང་གི། །དུས་གཞན་ཞིག་ན་གསལ་བར་སྣང་། །མངལ་དུ་ཆགས་པ་དེ་དང་འདྲ། །གང་ཚེ་གསལ་བར་གྱུར་ནས་ནི། །མངལ་དུ་སླར་ཡང་འཕེལ་
འགྱུར་ཏེ། །ཡན་ལག་ཉིང་ལག་ཆགས་གྱུར་པ། །ཟླ་བ་གསུམ་ལོན་ལ་སོགས་ཉོན། །ལུས་དང་རྒྱབ་དང་བྲང་དང་སྤུ། །པགས་པ་བུ་ག་རྐེད་པ་ལྟོ། །མིད་པ་དཔུང་པ་རྨིག་པ་དང་། །རྐན་མཆུ་ནུ་མ་ཁ་འགྲམ་སོགས། །ནམ་ཚོང་བྲང་དང་རྩིབ་མ་རྣམས། །ཟླ་བ་གསུམ་ན་སྐྱེ་
བར་འགྱུར། །ཟླ་བ་བཞི་པར་ཕོ་མཚན་ནི། །རྩ་རྒྱུས་བཅས་པ་སྐྱེ་བར་འགྱུར། །དེ་བཞིན་པགས་སྲ་ཤ་འཕེལ་དང་། །མཇུག་མ་རྔོག་མ་རུས་པ་སྐྱེ། །ཟླ་བ་ལྔ་པར་རྐུབ་དང་ནི། །ལོང་ཀ་དག་ཀྱང་སྐྱེ་འགྱུར་ཞིང་། །སྙིང་དང་གློ་བ་མཚེར་པ་དང་། །མཆིན་པ་མཁལ་མ་གཞང་

203-1-169b

དང་ནི། །རྒྱུ་མ་གཉེ་མ་སོགས་པ་འབྱུང་། །ཟླ་བ་དྲུག་པར་ཡན་ལག་ཀུན། །རྒྱས་ཤིང་རྩ་ཕྲན་རྩ་ཆེན་དང་། །རུས་པ་ཀུན་དང་ཚིགས་རྣམས་འབྱུང་། །ཟླ་བ་བདུན་པའི་ཚེ་ན་ནི། །མ་ཡི་ནུ་མ་གཡོས་འགྱུར་ཞིང་། །དབང་པོ་དྲུག་ནི་ཚང་བ་དང་། །དབུགས་ནི་དམན་པ་ཉིད་ཀྱིས་
རྟ། །དབང་པོའི་དོན་དང་བྱ་བ་ལ། །ནུས་པ་ཆུང་བ་ཉིད་དུ་འགྱུར། །དེ་ཕྱིར་ཟླ་བ་བདུན་པ་ན། །རྒོད་མ་དབུགས་རྔུབ་བདེར་མི་ནུས། །དེ་ཚེ་ཡན་ལག་རྒྱས་ཤིང་བརྟན། །རྩ་སོགས་བདུན་བརྒྱ་གསལ་བར་འགྱུར། །དེ་བཞིན་ཟླ་བ་བརྒྱད་པ་ལ། །མངལ་དུ་ལུས་དེ་ཆེར་འཕེལ་ཞིང་། །
ལུས་རྒྱས་རོ་དྲུག་ཚོར་བ་དང་། །སྟོབས་དང་ལྡན་ཞིང་དབང་པོ་གསལ། །དབང་པོས་དོན་ནི་གསལ་བྱེད་ཅིང་། །མ་ཡང་བདེ་བར་དབུགས་མི་རྔུབ། །ཚགས་ཚིགས་མཉེན་ཞིང་བརྟན་འགྱུར་ཞིང་། །རྒོད་མའི་ལྟོ་བ་ཅི་ཞིག་ན། །ཟླ་བ་དགུ་པར་རྒོད་མ་ནི། །མཚན་དང་དེ་
བཞིན་ནུ་མ་སྐྲངས། །འབྱུང་བ་གསལ་བ་ཉིད་འགྱུར་ཞིང་། །ཡན་ལག་ཉིང་ལག་རྫོགས་པར་འགྱུར། །ཟླ་བ་དགུའམ་ནི་བཅུ་པའམ། །ཟླ་བ་བཅུ་གཅིག་པ་དག་ལ། །ཉེ་བར་བཙས་པ་ཉིད་དུ་འགྱུར། །རྒོད་མ་ནད་དང་བཅས་པར་ནི། །བུ་བཙས་པ་ནི་འགྱུར་བ་ཡིན། །བུ་
ཡི་ལྟེ་བ་དང་འབྲེལ་པའི། །མངལ་ན་རྩ་སྦུབས་ཡོད་པས་ན། །དེ་ལས་དྭངས་མ་རྒྱུ་མ་ཡི། །མངལ་ནི་འཕེལ་བར་གྱུར་པ་ཡིན། །མངལ་ན་གནས་པ་རྟག་པར་ནི། །མགོ་བོ་གྱེན་དུ་བལྟས་ནས་གནས། །མངལ་ན་གནས་པའི་གཅིན་རྟུག་ནི། །སྐྱེ་བའི་དུས་ན་འབྱུང་
འགྱུར་ལ། །ཟླ་བ་བཅུ་པར་དེ་འཕེལ་ཏེ། །དེ་ནི་ཤ་མ་ལ་གནོད་བྱེད། །དེ་ནི་གཅིན་རྟུག་ལ་གནས་པས། །ཡིད་མི་བདེ་ཕྱིར་སྒྱུར་བར་བྱེད། །མགོ་ནི་ཐུར་དུ་སྒྱུར་བྱེད་ཅིང་། །གོ་བཟློག་པར་ནི་གནས་པས་ན། །རྒྱུ་མ་དཀྲུགས་པར་གྱུར་པའི་ཕྱིར། །མ་ཡི་ནད་ནི་མི་བཟད་
སྐྱེད། །དེ་ལྟར་ཐུར་དུ་བསྒྱུར་བས་ན། །དེ་བས་རྒོད་མའི་ཁ་ཟས་ནི། །རྗེས་སུ་མཐུན་པ་ཉིད་དུ་བྱ། །རྒྱུ་དེས་ཟླ་བ་བཅུ་ན་ནི། །ལེགས་པར་བཙས་པ་ཉིད་དུ་འགྱུར། །དེ་ནི་འབྱུང་བར་བྱེད་པས་ན། །དང་པོ་མགོ་བོ་འབྱུང་འགྱུར་ཏེ། །དེ་ནས་ལུས་ནི་རིམ་གྱིས་འབྱུང་། །

203-1-170a

དེ་ལྟར་ན་ནི་བཙས་པར་བཤད། །དེ་ཡི་རྗེས་ལ་ཤ་མ་ནི། །མངལ་ནས་འབྱུང་བར་འགྱུར་བ་ཡིན། །ཕོ་ལ་སོགས་པ་མངལ་དུ་ནི། །ཆགས་པར་བྱེད་པའི་རྒྱུ་ཉོན་ཅིག །ཁུ་བ་མང་ཞིང་ཁྲག་ཉུང་བ། །རླུང་གིས་འདྲེས་པར་བྱས་ནས་ནི། །དེར་ནི་
རྣམ་ཤེས་ཞུགས་གྱུར་ན། །རྟེའུ་ཕོ་རུ་སྐྱེ་བར་འགྱུར། །དེ་ལྟ་བུ་ཡི་ཚུལ་གྱིས་ནི། །ཁུ་བ་ཉུང་ཞིང་ཁྲག་མང་ན། །དེ་ལས་རྟེའུ་མོར་སྐྱེ་བར་འགྱུར། །གང་གིས་མ་ནིང་སྐྱེ་འགྱུར་ཉོན། །རྩ་དང་ཆུ་ནི་ཟད་འགྱུར་ཞིང་། །ཁ་རླུང་གིས་ཉེན་གྱུར་པ་ཡི། །ཕྱིན་ཅི་ལོག་གི་
དུས་སུ་ནི། །ཕ་མ་དག་ཀྱང་ཉམ་ཆུང་ཞིང་། །དབང་པོའི་སྟོབས་ཀྱང་ཟད་གྱུར་པ། །དེ་གཉིས་ཕྲད་པར་གྱུར་པ་ནི། །ཁུ་བ་ཁྲག་ཀྱང་ཆ་མཉམ་ན། །མ་ནིང་དུ་ནི་སྐྱེ་བར་འགྱུར། །ཉེས་པ་དེ་དག་གཉིས་དང་ནི། །ཕ་མ་ནད་གཞིར་བཅས་གྱུར་ན། །ཟླ་མཚན་ཉེས་པ་ཆེར་
ལྡན་ལས། །རྟ་ནི་གཡང་གཤམ་དག་ཏུ་འགྱུར། །སྔར་བཤད་པ་ཡི་རྒྱུ་ཡོད་ཅིང་། །མངལ་དུ་ཆགས་པར་གྱུར་པ་ན། །མངལ་གྱི་གནས་ནི་ནད་གཞིར་བཅས། །རླུང་ནི་ཤས་ཆེར་གྱུར་པ་ན། །དེ་ལ་རྟེའུ་ཕོ་མོ་འབྱུང་། །ཁུ་བ་ཉེས་པར་ལྡན་འགྱུར་ན། །གསེབ་ཀྱིས་བུ་ནི་
སྐྱེད་མི་བྱེད། །ཁུ་བ་སྟོང་པར་གྱུར་པ་ན། །རླུང་གིས་གཉིས་སུ་ཕྱེ་བ་ལས། །ཁྲག་དང་འདྲེས་པར་གྱུར་པ་རུ། །རྣམ་ཤེས་གཉིས་ནི་ཞུགས་པ་ན། །རྟེའུ་མཚེ་མར་སྐྱེ་འགྱུར་ལ། །ཁུ་བ་མང་ན་ཕོ་གཉིས་ཏེ། །ཁྲག་ནི་མང་བར་གྱུར་པ་ལས། །རྟེའུ་མོའི་མཚེ་མར་སྐྱེ་བར་
འགྱུར། །དེ་ལས་གཞན་ཡང་མངལ་གྱི་ནི། །ཉེས་པ་བཞི་པོ་མཉན་པར་གྱིས། །རླུང་ནད་གནོད་ཀྱི་ཉེས་པ་ཡིས། །མངལ་དུ་ཞུ་བར་གྱུར་པ་ཡིན། །དེ་ལ་བད་ཀན་ལྷགས་གྱུར་ན། །མངལ་ན་ཉལ་བ་ཞེས་བྱར་འགྱུར། །རླུང་དང་བད་ཀན་གྱིས་ཉེན་པས། །མངལ་
དུ་ལུགས་པ་ཞེས་བྱར་འགྱུར། །རྒོད་མ་རྩེག་ཅིང་མེ་དྲོད་ཉམས། །མངལ་སྐམ་པ་ཞེས་བྱ་བར་འགྱུར། །མངལ་དུ་རླུང་གིས་གཟིར་གྱུར་ཅིང་། །འཇུག་ཚེ་ཤིན་ཏུ་གནོད་བྱས་ལ། །བད་ཀན་ཁྲག་དང་འདྲེས་པ་ལས། །དེ་ཚེ་མཚན་མི་ལྡང་བར་འགྱུར། །སྦྲུམ་

203-1-170b

མ་ཡི་ནི་ཉེས་པ་དང་། །ཁ་ཟས་རྩུབ་པས་རླུང་བསྐྱེད་ཅིང་། །གྲང་བས་བཀག་ཅིང་གནོད་གྱུར་པས། །དེ་ནི་མངལ་དུ་གཟུགས་ཐུང་འགྱུར། །གང་ཚེ་དུས་ཚིགས་ཉེས་པ་ལ། །རྒོད་མའི་ནད་གཞི་དང་ཕྲད་པར། །མངལ་དུ་ཆགས་པར་གྱུར་པ་ན། །དེ་ཚེ་ནད་བུ་ཅན་དུ་
འགྱུར། །རོ་ནི་མི་མཉམ་ཉེས་པ་དང་། །དེ་བཞིན་དུས་ནི་གོ་ལོག་པས། །མངལ་གྱི་རླུང་མཁྲིས་བད་ཀན་གྱི། །ཉེས་པ་ཉེ་བར་འཁྲུག་པར་འགྱུར། །རླུང་གིས་ལྕེ་ཡི་རྩ་དག་ཏུ། །རྗེས་སུ་རྒྱུ་བར་བྱེད་པ་ན། །ནད་གཞི་དེ་ནི་འཁྲུགས་གྱུར་ན། །དེ་ལས་རྟ་ནི་ལྐུགས་
པར་འགྱུར། །རྣ་བའི་བུ་ག་འགགས་པ་ལས། །འོན་པ་ཉིད་དུ་སྐྱེ་བར་འགྱུར། །མིད་པའི་རྩ་ནི་འགགས་པ་ལས། །བེམས་པོ་འདྲ་བར་སྐྱེ་བར་འགྱུར། །མངལ་དུ་མིག་གི་རྩ་དག་ལ། །གནོད་གྱུར་པ་ཡིས་ཁེབས་པ་ལས། །རྟེའུ་དམུས་ལོང་དག་ཏུ་ནི། །
རྒོད་མ་ལས་ནི་སྐྱེ་བར་འགྱུར། །སྣ་ཡོན་རྔོག་མ་གཡོ་བ་དང་། །གཞོགས་ཉམས་གཞོགས་ཕྱེད་ཆེ་བ་དང་། །ལུས་དང་མཇུག་རྔོག་མི་སྡུག་དང་། །རྒྱབ་སྒུར་རླིག་པ་ཆེ་བ་དང་། །རླིག་པ་རབ་ཆུང་ལྷག་པ་དང་། །མཚན་ནི་རིང་དང་ཐུང་དང་གུག །ཡན་ལག་
རེངས་དང་ཡོ་བ་དང་། །མ་ནིང་ཡན་ལག་མ་ཚང་དང་། །གཟུགས་མི་སྡུག་དང་ཡན་ལག་ཉམས། །ཡན་ལག་ཕྲ་དང་ལྷག་མ་རྣམས། །དེ་ནི་རླུང་གི་གནོད་ལས་གྱུར། །དེ་ལྟར་ཇི་སྐད་བཤད་པ་དང་། །དེ་ལས་ལྷག་པའི་སྨད་བྱ་བ། །སྣང་ན་རྟ་དེ་རླུང་གི་ནི། །ནད་ཀྱིས་
ཉེན་པར་ཤེས་པར་བྱ། །རྟ་ནི་གསེབ་དང་ཕྲད་གྱུར་ཚེ། །ཡིད་ལ་གང་ཞིག་འདོད་གྱུར་པ། །དེ་ཡི་བུ་ནི་དེ་འདྲ་བར། །སྐྱེ་བར་འགྱུར་བ་ཁོ་ན་ཡིན། །དེ་བཞིན་སྤྱོད་ལམ་དག་དང་ཚང་། །མདོག་དང་གཟི་མདངས་འགྲོས་དང་ནི། །ཕ་དང་མ་ནི་ཅི་འདྲ་བ། །དེ་འདྲ་ཕལ་
ཆེར་འགྱུར་བ་ཡིན། །ཁ་ཟས་ངན་དུ་འཁྲུ་བ་དང་། །སྣད་དང་འཇིགས་དང་ངལ་བ་ལས། །སྦྲུམ་མའི་ནད་ནི་འཁྲུགས་གྱུར་པས། །མངལ་འཇིག་པར་ནི་འགྱུར་བ་ཡིན། །གང་ཚེ་རླུང་ནི་མངལ་གནས་པའི། །རྔོག་མའི་གནས་སུ་ཕྱིན་གྱུར་ན། །རྔོག་མ་རྩུབ་དང་མི་སྙོམས་

203-1-171a

པའམ། །རྔོག་མ་སྲབ་པར་འགྱུར་བ་ཡིན། །པགས་པ་སྤུ་དང་རྔ་མ་ཡི། །སྐྱོན་གང་ཡོད་དེ་རླུང་ལས་གྱུར། །བད་ཀན་མཁྲིས་པ་ལས་གནས་པའི། །སོ་ཡི་རྩ་བར་གནས་གྱུར་ལ། །བད་ཀན་མཁྲིས་པ་ཤས་ཆེ་ལས། །སོ་མི་སྡུག་པར་འགྱུར་བ་
ཡིན། །འཁྲིག་ཚེ་ཁུ་བ་སྐྱོན་མེད་ཅིང་། །ཟླ་མཚན་ཡོན་ཏན་ལྡན་པ་དང་། །གོམས་ཤིང་འདོད་པ་དང་ཕྲད་ཅིང་། །ཡིད་ལ་འདོད་པ་མ་བཀག་དང་། །བཀྲ་ཤིས་ཤིས་པ་བརྗོད་བྱས་དང་། །དགེ་སྦྱོང་བྲམ་ཟེ་མཆོད་པ་ལས། །ཚེ་རིང་བར་ནི་འགྱུར་བ་ཡིན། །གཞན་དུ་དེ་ནི་
ཚེ་ཐུང་འགྱུར། །གསེབ་སྦྱར་ཚེ་ན་སྐར་མ་ཚེས། །བྱེད་པ་ལ་སོགས་བཟང་པོ་དང་། །ཡིད་འོང་གཞན་ཡང་མང་པོ་ཡིས། །བཀྲ་ཤིས་དང་ནི་མཆོད་བྱས་ཏེ། །རྟ་ནི་མཚན་ལྡན་རྒོད་མ་ནི། །ཤིས་པ་དང་ནི་སྦྱར་བར་བྱ། །ལྷ་དང་བྲམ་ཟེ་མཆོད་བྱས་ལ། །རོལ་མོ་སེམས་
ཅན་གཞན་གྱིས་བསྐོར། །རོ་ཙ་གཙང་བའི་ཁ་ཟས་དང་། །ཁུ་བཅུད་བཟང་པོ་དག་ཀྱང་སྦྱིན། །དེ་ལྟར་བྱས་ན་བཟང་འགྱུར་ཏེ། །གཞན་དུ་བྱས་ན་བཟང་མི་འགྱུར། །གཟི་མདངས་ཉམས་དང་སྙིང་སྟོབས་རྩལ། །གཟུགས་དང་ནད་མེད་དཔའ་བ་དང་། །འཇིགས་མེད་པ་
དང་བློ་ལྡན་པ། །འོག་ནས་རྒྱ་ཆེར་བཤད་པར་བྱ། །རྫས་བཅུད་ནུས་པ་སྨིན་པ་ལས། །རྟ་རྣམས་མངལ་དུ་ཆགས་པའི་ཚེ། །བད་ཀན་པགས་པར་ཁྱབ་གྱུར་ན། །རྟེའུ་དཀར་པོར་སྐྱེ་བར་འགྱུར། །རླུང་གི་ཁ་དོག་སྔོ་བསངས་འགྱུར། །མཁྲིས་པ་ཡིས་ནི་ནག་པོར་སྐྱེ། །
བད་ཀན་མཁྲིས་པ་འདྲེས་པ་ལས། །རྟ་མདོག་སེར་སྐྱར་སྐྱེ་བ་ཡིན། །གལ་ཏེ་ཁྲག་མཁྲིས་ཉུང་གྱུར་ལ། །བད་ཀན་ཡང་ནི་ཤས་ཆུང་བས། །རྟེའུའི་པགས་པར་ཕྱིན་གྱུར་ན། །མདོག་རྗེས་སེ་བོ་དག་ཏུ་འགྱུར། །ཁྲག་ནི་གལ་ཏེ་མང་གྱུར་ཅིང་། །བད་ཀན་མཁྲིས་པ་ཤས་ཆུང་བ། །
རྟ་ཡི་པགས་པར་ཕྱིན་ན་ནི། །རྟ་ནི་དམར་གྲོ་དག་ཏུ་འགྱུར། །གང་ཚེ་མཁྲིས་པ་མང་གྱུར་ཅིང་། །ཁྲག་དང་བད་ཀན་ཉུང་གྱུར་པ། །རྟེའུའི་པགས་པར་ཕྱིན་གྱུར་ན། །རྟ་ནི་གྲོ་ནག་དག་ཏུ་འགྱུར། །བརྟག་པའི་ཚུལ་ནི་འདི་ཉིད་ཀྱིས། །བད་ཀན་དང་ནི་ཁྲག་འདྲེས་དང་། །ཁྲག་མཁྲིས་

203-1-171b

འདྲེས་པར་གྱུར་པ་ལས། །རྟ་ནི་སེར་སྐྱ་དག་ཏུ་འགྱུར། །རླུང་དང་མཁྲིས་པ་བད་ཀན་དང་། །ཁྲག་རྣམས་འདྲེས་པར་གྱུར་པ་ལས། །རྟ་རྣམས་ཀྱི་ནི་ཁ་དོག་དག །རྣམ་པ་དུ་མར་འགྱུར་བ་ཡིན། །ནད་གཞི་རླུང་གིས་བཅད་གྱུར་པ། །པགས་པར་ཕན་ཚུན་གཏོར་བ་
ལས། །ཁྲ་བོ་དང་ནི་ཐིག་ལེ་ཅན། །ཁ་དོག་དབྱེ་བ་དག་ཏུ་འགྱུར། །མདངས་ཀྱིས་གཟི་མདངས་འཕེལ་འགྱུར་ལ། །དེ་བཞིན་སྙིང་སྟོབས་དག་ཏུ་འགྱུར། །མདངས་དང་རླུང་ནི་ཤས་ཆེ་ཞིང་། །མ་འདྲེས་ཟས་ནི་ཟ་བ་ལས། །ནད་མེད་པར་ནི་འགྱུར་བ་ཡིན། །མེ་
རླུང་སྙིང་སྟོབས་དག་ལས་དཔལ། །འབྱུང་བ་ཆེན་པོ་ཆ་མཉམ་ཞིང་། །སྙིང་སྟོབས་ཆེ་ལས་འཇིགས་མེད་འགྱུར། །སྙིང་སྟོབས་རླུང་དང་སྟོབས་ཆེ་ལས། །མགྱོགས་པ་ཕུན་སུམ་ཚོགས་པར་འགྱུར། །སེམས་དང་བློ་དང་སྙིང་སྟོབས་ཡིད། །དེ་བཞིན་བད་ཀན་རང་བཞིན་
ཅན། །འདི་དག་ལྷགས་པར་གྱུར་པ་ལས། །ཡན་ལག་བཅུ་ཚང་བློ་ལྡན་འགྱུར། །དགེ་ཞིང་བྱད་ལ་རབ་དགའ་དང་། །དེ་བཞིན་དབང་པོ་དགའ་བྱེད་པ། །རིགས་དང་དུས་ཚིགས་ཕུན་ཚོགས་ལྡན། །ཡིད་དང་བློ་ནི་མ་ཡེངས་པ། །མངལ་དུ་རྟ་ནི་གང་སྐྱེས་པ། །དེ་ནི་ཡོན་ཏན་
ཀུན་ལྡན་འགྱུར། །དེ་ལས་བཟློག་པར་གང་སྐྱེས་པ། །དེ་ནི་ཡོན་ཏན་ཅན་མི་འགྱུར། །བཟང་དང་རྣོ་དང་ཞན་པ་སྟེ། །རང་བཞིན་རྣམ་གསུམ་ཅི་བཞིན་དང་། །སྐྱེ་བའི་ཆ་ཡང་དེ་བཞིན་ཏེ། །རང་བཞིན་གསུམ་དུ་ཤེས་པར་བྱ། །མངལ་དུ་གནས་ནས་ཟླ་གཉིས་ན། །
ནགས་སུ་ཉེ་བར་བསྐྱེད་བྱ་ཞིང་། །ཁ་ཟས་སྣ་ཚོགས་པ་དག་དང་། །ཐུག་པ་དང་ནི་བལྡག་པ་སྦྱིན། །དེར་ནི་རྟག་ཏུ་གང་བརྟེན་པ། །ཁ་ཟས་གང་ཞིག་འདོད་གྱུར་པ། །དེ་ནི་ཡིད་ལ་རེ་བར་བཤད། །འདི་ནི་དེ་ལ་སྦྱིན་པར་བྱ། །གལ་ཏེ་འདོད་པ་མ་བྱིན་ན། །གཟུགས་
མི་སྡུག་ཅིང་མི་སྲུན་དང་། །ཡན་ལག་མི་ཚང་བློ་ཆུང་དང་། །འཇིགས་སྐྱེན་སྟོབས་ཆུང་སེམས་ཉམས་ཤིང་། །འདུས་དང་ལས་ཀྱི་དབང་དང་ནི། །ནད་གཞི་རྣམས་ཀྱི་རང་བཞིན་ལས། །མངལ་དུ་སྐྱེ་བར་འགྱུར་བ་ནི། །ཅི་ལྟ་བར་ནི་ཡོངས་སུ་བཤད། །ལེགས་

203-1-172a

ཐོས་ཐོས་དང་ལྡན་པ་ཡིས། །ཚུལ་བཞིན་ཡོངས་སུ་དྲིས་པ་ན། །ཤ་ལི་ཧོ་ཏྲ་དཀའ་ཐུབ་ཆེས། །དྲིས་ལན་དེ་ལྟར་སྨྲས་པ་ཡིན། །ཤ་ལི་ཧོ་ཏྲའི་མདོའི་གནས་ལས་མངལ་དུ་ཆགས་པ་ཞེས་བྱ་བ་སྟེ་ལེའུ་ལྔ་པའོ།།      །།རྟ་སྐད་ལས་
སྐྱེས་དྲང་སྲོང་ནི། །རྟ་ཡི་རང་བཞིན་ཤེས་གྱུར་པ། །ཤ་ལི་ཧོ་ཏྲ་ཉིད་ལས་ནི། །ལེགས་ཐོས་ཀྱིས་ནི་ཡོངས་སུ་དྲིས། །བུ་ཡིས་དྲིས་ནས་དྲང་སྲོང་དེ། །དགའ་བའི་ཚིག་ཏུ་སྨྲས་པ་ནི། །རླུང་དང་མཁྲིས་པའི་བདག་ཉིད་ཅན། །རང་བཞིན་གསུམ་དུ་ཤེས་པར་
བྱ། །རྩུབ་ཅིང་མི་བརྟན་རྔ་རྔོག་སྲབ། །འཇིགས་སྐྱེན་སྒྱིད་ཞན་ཁུར་སྟོབས་ཆུང་། །ལམ་གྱིས་དུབ་ཅིང་སྣ་ནད་མང་། །གཉིད་མེད་ཤིན་ཏུ་གཟུགས་མི་སྡུག །འཁྲིག་པ་ལ་འདུ་འདུལ་བར་དཀའ། །འདོད་པའི་ནུས་པ་ཆུང་བ་དང་། །རླུང་གིས་གང་ཚེ་
འཁུམས་པ་དང་། །སླར་ཡང་རྗེས་སུ་རྒྱུག་པ་དང་། །རྟག་ཏུ་རྟ་རྫི་རྣམས་དང་ནི། །རྟ་ལ་སོས་ནི་འདེབས་པ་དང་། །མི་དང་རྟ་ཡི་ཕྱི་ནས་ནི། །རྔུན་ནས་མདུན་དུ་བརྒྱུག་པ་དང་། །འདྲེ་བར་བྱེད་ཚེ་ལུས་ཀུན་ནི། །བཟློག་ཅིང་འདྲེ་བར་མ་ནུས་ཀྱི། །གཞོགས་གཅིག་
པ་ནི་ཡང་དང་ཡང་། །འགྲོ་བར་བྱེད་པའང་ཉིད་དང་ནི། །དེ་བཞིན་ལམ་གྱི་གཞི་མཉམ་པར། །ཁལ་མེད་པར་ཡང་བུབ་པ་དང་། །བརྡེག་ཀྱང་རང་གི་སྤྱོད་པ་ནི། །ཡུན་རིང་ཞིག་ནས་འདོར་བ་དང་། །བསླབས་པ་རྣམས་ནི་བརྗེད་གྱུར་པའི། །རྟ་ནི་རླུང་གི་རང་བཞིན་
ཅན། །རྡུལ་ཅན་ཁྲོ་བ་ཡུན་རིང་དང་། །གཉིད་མེད་འཐབ་ལ་དགའ་བ་དང་། །སོ་དང་དེ་བཞིན་ལག་གཉིས་ཀྱིས། །རྟ་ལ་རྟག་ཏུ་འཚེ་བ་དང་། །རྟ་རྫིའི་ལས་ནི་བྱེད་པ་ལ། །རང་བཞིན་ཞི་བ་སྟོན་པ་ནི། །རྟག་ཏུ་འཇིགས་ཤིང་ནུས་པ་ཆུང་། །ལམ་དང་ལས་ལ་སྲན་ཆུང་
དང་། །གཞོགས་གཅིག་གིས་ནི་ཅུང་ཟད་ཙམ། །ཐོག་མར་འདྲེ་བར་བྱེད་གྱུར་ཅིང་། །དེ་རྗེས་ལུས་ནི་ཐམས་ཅད་ཀྱིས། །ཟློག་ཅིང་འདྲེ་བར་བྱེད་པ་དང་། །དེ་བཞིན་ཉམ་ངའི་ལམ་དུ་ནི། །ཁལ་གྱིས་དུབ་ན་བུབ་པ་དང་། །འདུལ་སྦྱོང་བ་ཡི་ཚིག་སྙན་ཅིང་། །བསླབ་པ་

203-1-172b

འདོར་ཞིང་འབྲོས་བྱེད་དང་། །གྲང་བ་ལ་ནི་དགའ་གྱུར་པའི། །རྟ་ནི་མཁྲིས་པའི་རང་བཞིན་ཅན། །སྤུ་མདོག་སྣུམ་ཞིང་སྟོབས་ཆེ་ལ། །སྒྲ་སྙན་དལ་གྱིས་འཚེར་བ་དང་། །རྟ་དང་དེ་བཞིན་མི་རྣམས་ལ། །རང་བཞིན་ཞི་བ་སྟོན་པ་དང་། །འདུལ་སྦྱོང་སླ་ཞིང་བསླབས་ལ་བརྟན། །
གཉིད་ཆེ་རྟག་ཏུ་བརྟག་པ་དང་། །ཁལ་དང་ལམ་དུ་གཡུལ་ངོ་རུ། །རྟག་ཏུ་སྡུག་བསྔལ་ཆེར་བཟོད་དང་། །ཆུ་ལ་བརྟན་ཞིང་ཤུགས་ཆེ་ལ། །གང་དུའང་བུབ་པར་འགྱུར་མ་ཡིན། །འགྲོ་ཚེ་གཞོགས་ནི་གཉིས་ཀ་ཡིས། །ཡང་དང་ཡང་དུ་ཟློག་པ་དང་། །འོབས་ལ་གོམ་པ་
མི་འདོར་གྱི། །ཤུགས་ཀྱིས་མཆོང་བར་འདོད་པ་དང་། །བདག་པོ་ལ་ནི་དགའ་བ་ཡི། །རྟ་ནི་བད་ཀན་རང་བཞིན་ཅན། །མཚན་ཉིད་གཉིས་ཀ་དང་ལྡན་པ། །རང་བཞིན་གཉིས་པ་ཞེས་བྱར་བཤད། །རླུང་དང་མཁྲིས་པའི་རང་བཞིན་ཅན། །ཐ་མ་ཡིན་པར་ཡོངས་སུ་
བཤད། །རླུང་དང་བད་ཀན་རང་བཞིན་ཅན། །བར་མ་དག་ནི་ཡིན་པར་བཤད། །མཁྲིས་པ་བད་ཀན་རང་བཞིན་ཅན། །རྟ་ནི་རབ་མཆོག་ཡིན་པར་བཤད། །ནད་མེད་ལུས་ཟུངས་མཉམ་གྱུར་ཅིང་། །བད་ཀན་ཅན་གྱི་རྟ་བསྔགས་སོ། །ཤ་ལི་ཧོ་ཏྲའི་མདོའི་གནས་ལས་
རྟའི་རང་བཞིན་གྱི་ལེའུ་སྟེ་དྲུག་པའོ།།      །།ལེགས་ཐོས་ཐོས་པ་འཛིན་པ་ཡི། །བུ་ལ་ཤ་ལི་ཧོ་ཏྲས་སྨྲས། །བཟང་པོ་སྨན་དང་རི་དྭགས་དང་། །འདྲེས་པའི་མཚན་ཉིད་མཉན་པར་གྱིས། །སྟོབས་ཆེན་མདོག་ནི་སྣུམ་པ་དང་། །དུལ་བའི་གཟུགས་ཅན་
གཙང་སྦྲར་ལྡན། །ཚངས་སྤྱོད་མཚན་མོ་གཉིད་ལོག་ཅིང་། །ལེ་ལོ་མེད་ཅིང་ཕྲག་དོག་མེད། །ལངས་ནས་གཉིད་ནི་ལོག་པ་དང་། །རྟག་ཏུ་ལངས་ནས་འདུག་པ་དང་། །བདག་པོ་ལ་དགའ་ལྡབ་སྐྱེན་དང་། །བསླབས་པ་ནམ་ཡང་མི་འདོར་དང་། །ཐམས་ཅད་དུ་ནི་དཔའ་བ་
དང་། །གཡུལ་དང་ལམ་དང་མེ་ལ་ནི། །སྡུག་བསྔལ་གྱིས་ཞུམ་མེད་པ་དང་། །ནད་ཀྱིས་གདུངས་པར་གྱུར་ན་ཡང་། །ཤིན་ཏུ་ཉོན་མོངས་མེད་པ་དང་། །ཅི་ཡང་རུང་བ་ཟོས་ནས་ནི། །མྱུར་དུ་ལུས་ནི་རྒྱས་འགྱུར་དང་། །ཐམས་ཅད་དུ་ནི་བརྟན་པ་ཡི། །རྟ་ནི་བཟང་པོའི་སྐྱེ་

203-1-173a

གནས་ཡིན། །བཀྲ་ཤིས་མཚན་ཉིད་ལྡན་མོད་ཀྱི། །ཅུང་ཟད་སྨད་པ་ཡོད་པ་དང་། །བསླབ་པ་མྱུར་དུ་ལོབས་ན་ཡང་། །མྱུར་དུ་བརྗེད་པར་གྱུར་ན་ཡང་། །མཚན་མོའི་དུས་སུ་ལུས་ཕབ་སྟེ། །གཉིད་ནི་ལོག་པར་བྱེད་པ་དང་། །རྟ་ལ་ཞེ་སྡང་ཆེ་བ་དང་། །འཁྲིག་
པ་ལ་འདུ་ཕྲག་དོག་ཅན། །དང་པོ་དཔའ་ཞིང་དེ་རྗེས་ལ། །འཇིགས་པ་དག་ཏུ་འགྱུར་བ་དང་། །ལྕག་གིས་ཅུང་ཟད་གཞུས་པ་ནའང་། །རིང་དུ་འགྲོ་བར་བྱེད་པ་སྟེ། །དེ་ལྟ་བུ་ཡི་རིགས་ལྡན་པའི། །རྟ་ནི་དམན་པ་ཉིད་ཡིན་ནོ། །རྩུབ་ཅིང་རྟ་ལ་འཇིགས་སྐྱེན་དང་། །གཉིད་ཆེ་རྒྱུན་
ཅན་ལེ་ལོ་ཅན། །ལྟོ་ཆེ་སྦེགས་ཅིང་འཁྱམ་ལ་དགའ། །དེ་བཞིན་ཀུན་དུ་དོག་པ་ཅན། །ཉིན་མོ་དང་ནི་མཚན་མོའང་རུང་། །ཡན་ལག་མ་ལུས་བརྐྱང་ནས་ནི། །རྟག་ཏུ་གཉིད་ནི་ལོག་པ་དང་། །རྟ་ལ་འཚེ་བར་བྱེད་ལ་དགའ། །ལྕག་གིས་གཞུས་ལ་མི་ཚོར་ཞིང་། །མྱུར་
དུ་ན་བར་བྱེད་པ་དང་། །ལུས་རྒྱས་པར་ནི་དཀའ་བ་ཡི། །རྟ་ནི་རི་དྭགས་སྐྱེ་གནས་ཡིན། །ཡོན་ཏན་འདྲེས་ལས་འདྲེས་གྱུར་ཏེ། །དེ་བཞིན་དབྱེ་བ་མང་པོའང་ཡོད། །བཟང་པོ་མཆོག་ཏུ་ཤེས་པར་བྱ། །དམན་པ་བར་མ་ཞེས་བཤད་ལ། །རི་དྭགས་ཐ་མ་ཡིན་ཞེས་བྱ། །
རྟ་ཡི་སྐྱེ་གནས་འདི་ཉིད་ཡིན། །མདོར་ན་སྐྱོན་དང་ཡོན་ཏན་དག །འདྲེས་དང་ལྷག་པ་ཡིན་ཞེས་བྱ། །ཤ་ལི་ཧོ་ཏྲའི་མདོའི་གནས་ལས་རྟའི་སྐྱེ་གནས་ཀྱི་ལེའུ་སྟེ་བདུན་པའོ།།      །།རྟ་ཡི་རང་བཞིན་དེ་ཉིད་ཤེས། །དུལ་ལ་བརྩོན་ཞིང་དབང་པོ་ཐུལ། །ཤ་ལི་ཧོ་ཏྲ་བློ་ཆེན་
ལ། །མཛའ་བོ་ལས་རྒྱལ་གྱིས་དྲིས་པ། །གཟི་བརྗིད་ཆེན་པོ་རྟ་རྣམས་ཀྱི། །རིགས་བཞི་ཇི་ལྟར་ཤེས་པར་བགྱི། །མཚན་ཉིད་སྤྱོད་ལམ་གང་དག་གིས། །དེ་ལས་བཟློག་པར་ཤེས་པར་བགྱིས། །དེ་སྐད་དྲིས་ཏེ་དྲང་སྲོང་ཆེ། །ཤ་ལི་ཧོ་ཏྲས་སླར་སྨྲས་པ། །རྟ་ཡི་
རིགས་བཞི་ཤེས་དགའ་བས། །དེ་ནི་ང་ཡིས་གོ་བར་བྱ། །རིགས་བཞི་རྣམ་པར་དབྱེ་བ་ནི། །སྐྱེ་གནས་དང་ནི་གཟུགས་བྱད་དང་། །ཚུལ་སྤྱོད་དང་ནི་དུལ་བ་དང་། །སྐད་གདངས་དབྱིབས་དང་ཁ་དོག་དང་། །དྲི་ཉིད་ལས་ནི་ཉེར་ཤེས་བྱ། །གང་ཞིག་དེ་ལས་གོ་བཟློག་སྟེ། །

203-1-173b

དེ་ཡི་ཁྱད་པར་སྨྲ་བ་ནི། །ཉོན་ལ་རྣམ་པར་དཔྱད་པར་གྱིས། །གཟུགས་བཟང་དཔལ་དང་ལྡན་པ་དང་། །སྤྱོད་པ་དུལ་ཞིང་བསྔགས་པར་འོས། །བློ་ལྡན་ངང་ཚུལ་བཟང་བ་དང་། །འདུལ་སྦྱོང་མཁན་གྱིས་བྱས་པ་ཉན། །རྗེས་སུ་མཐུན་ཞིང་ནུས་པ་ལྡན། །གཙང་ཞིང་
གཙང་སྦྲ་དག་ལ་བརྟེན། །བཀྲེས་དང་སྐོམ་ལ་སྲན་ཆེ་ཞིང་། །ཁྲོ་བ་ཆུང་ཞིང་བླན་པར་སླ། །གཟི་བརྗིད་དང་ལྡན་གྲགས་དང་ལྡན། །ལས་རྣམས་ཀུན་གྱི་རྗེས་སུ་འཇུག །བཏུང་དང་ཁ་ཟས་བཟའ་བྱ་ཡི། །ལྷག་མ་དང་ནི་མི་གཙང་དང་། །རྟ་སྦངས་དང་ནི་དེ་བཞིན་
གཅིན། །འདི་ནི་རིང་དུ་སྤོང་བྱེད་ཅིང་། །གཙང་ཞིང་གཙང་མར་སྤྱོད་པ་དང་། །ཉལ་ཡང་གཉིད་ནི་མེད་པ་དང་། །སྦྲང་རྩི་འབྲས་ཡོས་ཁུར་བ་མར། །འོ་ཐུག་སྲེག་རྫས་ལ་དགའ་ཞིང་། །དྲི་དང་སྣ་མའི་ཕྲེང་བ་དང་། །ཁྲུས་དང་བཀྲ་ཤིས་ལ་དགའ་ཞིང་། །འཚེར་
ཞིང་དེ་དག་སྣོམ་པ་དང་། །མི་དག་ལྟ་ན་སྡུག་པ་དང་། །འཇིགས་མེད་མཁས་ལ་སྲན་ཆེ་དང་། །སྙན་པར་འཚེར་ཞིང་སྒྲ་སྐད་ཆེ། །སེར་དང་དཀར་དང་དམར་བ་དང་། །ཕལ་ཆེར་སྦྲང་རྩི་ལྟར་སེར་དང་། །འགྲོས་ཆེ་སྲན་ནི་ཆེ་བ་དང་། །བརྟན་ཞིང་སྙན་པ་རྗེས་སུ་འཚེར། །
མདོག་སྣུམ་པགས་པ་སྲབ་པ་དང་། །བྲམ་ཟེ་ཀུན་ལ་དགའ་བ་དང་། །གཉིད་ལོག་ཚེ་ནི་འབྲས་ཡོས་དང་། །མར་དང་ཨུ་ཤིར་དྲི་འབྱུང་ལ། །ལྷ་དང་དྲི་ཟའི་སྙིང་སྟོབས་ཅན། །དགེ་ཞིང་རྟག་ཏུ་དེས་པ་སྟེ། །དེ་ལྟའི་ཚུལ་སྤྱོད་ལྡན་པའི་རྟ། །བྲམ་ཟེའི་རིགས་སུ་ཤེས་པར་བྱ། །རྒྱལ་
རིགས་ཁྲོ་བའི་ཚུལ་ཅན་ཏེ། །ཚངས་པའི་མདོག་ལྡན་ཤེས་པར་བྱ། །རང་བཞིན་རྣོ་ཞིང་དཔའ་བ་དང་། །སྒྲ་སྐད་བཏང་ནས་འཚེར་བ་དང་། །དཔུང་པ་གློ་ཞིང་སྙིང་སྟོབས་ཆེ། །རང་བཞིན་གཙང་ཞིང་སྤྱོད་པ་ཡང་། །གཅེས་པར་བསྡུས་དང་ལྡན་པ་དང་། །ཡན་ལག་
འབྱེས་ཤིང་པགས་པ་སྲབ། །སྤྱོད་པ་གཙང་ཞིང་དུལ་བ་དང་། །འཇིགས་པ་རྣམས་ལ་མི་སྐྲག་པ། །ཆུ་དང་མེ་དང་འབྲུག་སྒྲ་དང་། །སྒྲ་ཆེར་གྲགས་དང་ལྷུང་དང་ཁུར། །ཚ་དང་རྩུབ་པའི་རེག་པ་དང་། །ས་རྩུབ་ཤིང་གི་ཚང་ཚིང་དང་། །རིང་དུ་འགྲོ་དང་ལམ་དོག་པར། །གང་

203-1-174a

ཞིག་འཇིགས་པ་མེད་པ་དང་། །གླང་པོའི་ཚོགས་ནི་ཆེན་པོ་དང་། །དྲིལ་བུ་རོལ་མོའི་སྒྲ་རྣམས་དང་། །ཅ་ཅོ་འདོན་པའི་སྒྲ་རྣམས་དང་། །རྟ་གཞན་འཚེར་བར་གྱུར་པ་དང་། །དུང་དང་རྔ་ཆེན་སྒྲ་དང་ནི། །རོལ་མོའི་སྒྲ་དང་རྫ་རྔའི་སྒྲ། །གདུགས་དང་
རྒྱལ་མཚན་བ་དན་གྱིས། །སྐྲག་པར་མི་འགྱུར་རྟ་མཆོག་ཡིན། །རྔ་རྔོག་ལེགས་པར་བརྐྱང་ནས་ནི། །དགའ་བའི་ཡིད་ཀྱིས་འཚེར་བ་དང་། །རྐང་གཉིས་ལེགས་པར་འཇུག་བཞིན་དུ། །ས་སྟེང་ན་ནི་འཚེར་བ་དང་། །རྡུལ་དང་གཅིན་དང་རྟ་སྦངས་ནི། །ཡན་ལག་
བརྐྱང་སྟེ་འདོར་བ་དང་། །མཐར་ནི་ཤུགས་ཀྱིས་འདོར་བ་དང་། །རྟ་གཞན་ལ་ནི་བསྡིགས་པ་དང་། །གཡུལ་ངོར་རྟ་དང་གླང་པོ་དང་། །ཤིང་རྟ་དཔུང་བུ་ཆུང་འཇོམས་དང་། །རྗེས་སུ་སྐད་འདོན་སྒྲ་འཇམ་པས། །ཕྱོགས་ཀུན་ཁྱབ་པར་འཚེར་བ་དང་། །རྟ་གཞན་དག་ནི་
ཕྱིན་ནས་ནི། །དེ་ནི་འགྲོ་བར་བཟོད་མི་བྱེད། །མཚོན་གྱིས་བསྣུན་ཀྱང་ནད་ཆུང་ཞིང་། །མཚོན་ཆ་མཐོང་ན་འཇིགས་མི་འགྱུར། །སྤྱོད་པ་མྱུར་ཞིང་དཔའ་བ་དང་། །འཐབ་ཚེ་མྱུར་དུ་ཕ་རོལ་གནོན། །ནོར་བུ་ལྟ་བུར་མིག་སེར་ཞིང་། །མདོག་བཟང་ཁ་དོག་ངན་པ་མེད། །བློ་
ལྡན་དེ་བཞིན་མགྱོགས་པ་དང་། །སྒྲིན་ཞིང་མ་ཞུམ་སྟོབས་ཆེ་ལ། །རྟག་ཏུ་ལས་ཀུན་ནུས་པ་དང་། །བག་ཡོད་རྟག་ཏུ་ཉོན་མོངས་མེད། །བསོད་ནམས་བྱེད་པའི་མེ་ཏོག་མར། །འབྲས་བུ་ལྡན་པའི་དྲི་ཡོད་ལ། །ལྷ་དང་དྲི་ཟའི་སྙིང་སྟོབས་ཅན། །དེ་མཚུངས་སྤྱོད་ཡུལ་
སྤྱོད་པར་ལྡན། །དགེ་ཞིང་སྤྱོད་པ་ངེས་པའི་རྟ། །རྒྱལ་རིགས་སུ་ནི་ཤེས་པར་བྱ། །རྗེའུ་རིགས་བཏུང་བ་ལ་དགའ་བརྟན། །ཞི་ཞིང་བློ་ཆེ་ལེ་ལོ་ཅན། །མི་འཁྲུགས་དགའ་བར་འགྱུར་བ་མེད། །དུལ་བའི་སྤྱོད་པ་ཡང་དག་ལྡན། །ཁྲོ་བ་མེད་ཅིང་ང་རྒྱལ་མེད། །དུལ་ཞིང་ངང་
ཚུལ་སྙོམས་པ་དང་། །ནད་དང་ཚ་དང་བཀྲེས་པ་བཟོད། །ཁལ་བཀལ་ལམ་དུ་འགྲོ་ཚེ་བརྟན། །དེ་ནི་མགྱོགས་བུལ་རན་མ་ཡིན། །ཉམས་དང་ལུས་སྟོབས་བར་མ་སྟེ། །མིག་ནི་དེ་བཞིན་སྔོ་དང་སེར། །གནག་དང་དཱུར་བའི་མདོག་འདྲ་དང་། །སྔོ་བསངས་སྤུ་མདོག་

203-1-174b

དཀར་བ་དང་། །སྨྱིག་མ་ཏ་ལའི་མདོག་འདྲ་དང་། །ཕལ་ཆེར་ངང་པའི་མདོག་འདྲ་ཞིང་། །སྟེང་འོག་ཐད་དཀར་ཆེ་མིན་གྱི། །རོ་སྟོད་ཆེ་བ་ཉིད་ཡིན་ནོ། །ཧ་རེ་ཎུ་ཀ་དེ་བཞིན་དུ། །རྔ་མོའི་འོ་མའི་དྲི་དང་ལྡན། །བག་ཆུང་གཉིད་ནི་ཆེ་བ་དང་། །མི་ཡི་སྙིང་སྟོབས་ལ་བརྟེན་པ། །
བཟོད་ལྡན་དེ་ལྟའི་སྤྱོད་པ་ཅན། །རྟ་ནི་རྗེ་རིགས་ཡིན་ཞེས་བྱ། །དམངས་རིགས་ངང་ཚུལ་ངན་པ་དང་། །སྤྱོད་ལམ་སྤྱོད་ཡུལ་མི་གཙང་ཞིང་། །གཞན་གྱིས་ཡོངས་སུ་ལོངས་སྤྱོད་པའི། །ལྷག་མའི་ཟས་སྐོམ་དག་ལ་དགའ། །སྐམ་དང་སྨད་དང་ངན་པ་དང་། །བཤང་
གཅི་དག་ནི་བརྟེན་པར་དགའ། །མིག་རྐོང་མིག་ནི་ཟླུམ་པ་དང་། །རྐང་པས་ས་ནི་བརྐོ་བ་དང་། །བཤང་གཅི་སྣོམ་པར་བྱེད་པ་དང་། །ཟ་ཞིང་ཉུང་ངུ་སྤྱོད་པ་དང་། །མི་གཙང་སར་ནི་འགྲོ་བ་དང་། །རྟ་རྫི་ལ་ནི་འཕྲ་བ་དང་། །རང་དང་རྩིག་པ་ཤིང་ལ་སོགས། །སོ་
ཡིས་འདྲད་པར་བྱེད་པ་དང་། །འབྲེང་བ་དབྱིག་པ་ལྕུག་མ་ཡི། །ལྕག་མི་ཚོར་ཞིང་མི་འཁྲུགས་ལ། །ལུད་པ་ལུ་ཚེ་གསུས་པ་ཆེ། །འཇིགས་པ་ཀུན་ལས་སྡར་བ་དང་། །མི་གཙང་བ་ལ་མི་སྨོད་ཅིང་། །གཙང་སྦྲའི་སྤྱོད་པ་དེ་ལ་མེད། །དུ་བ་རྡུལ་འདྲའི་མདོག་ལྡན་ཞིང་། །
སེར་སྐྱ་མོ་གྲོ་དམར་སྐྱའི་མདོག །བསྲུང་བར་རབ་ཏུ་དཀའ་བ་དང་། །སྤྱོད་པ་ངན་ཞིང་ཞི་ཚུལ་ཆུང་། །མ་ཁྲོས་ལས་སྦྱར་མི་ནུས་ཀྱི། །ཁྲོས་ན་ལས་ནི་ནུས་པ་དང་། །བྱ་རོག་ཚང་གི་དྲི་བྲོ་ཞིང་། །ཁྲ་དང་མི་རོའི་དྲི་དང་ནི། །ཀུན་ཁྱབ་གཉིད་ཆེ་བག་ཆུང་ལ། །སྲིན་པོ་
ཤ་ཟའི་སྙིང་སྟོབས་ཅན། །དེ་འདྲའི་སྤྱོད་པ་མདོག་ལྡན་པའི། །རྟ་ནི་དམངས་རིགས་ཡིན་ཤེས་བྱ། །དེ་དག་འདྲེས་པར་འགྱུར་བ་ཡི། །སྐྱེ་བ་དག་ཀྱང་བསྟན་པར་བྱ། །རྒྱལ་རིགས་བྲམ་ཟེའི་རིགས་མོ་ལ། །ཞུགས་པའི་བུ་ནི་དངུལ་ཆུར་བཤད། །དངུལ་ཆུ་
དེ་ནི་སྤྱོད་པ་གཙང་། །དེས་ཤིང་ལྷག་མ་ཟ་མི་བྱེད། །མདོག་ནི་བ་སོ་ལྟར་དཀར་སེར། །ནག་པོའི་མདོག་ཏུའང་འགྱུར་བ་ཡིན། །ཕལ་ཆེར་མིག་ནི་དང་བ་དང་། །སྒྲ་སྙན་རྗེས་སུ་སྒྲོགས་པར་བྱེད། །ཆང་དང་ཕྲེང་བའི་དྲི་ལྡན་གྱི། །དྲི་མི་ཞིམ་པའང་ཡོད་མ་ཡིན། །

203-1-175a

གཉིད་ལོག་ན་ནི་བག་མེད་པའི། །རྟ་ནི་རིགས་འཛིན་རྒྱུད་ཡིན་ནོ། །བྲམ་ཟེའི་རིགས་མོར་རྗེའུ་རིགས་ཞུགས། །དེ་ནི་མ་ག་ད་ཞེས་བྱ། །སྙིང་སྟོབས་ཞན་ཞིང་ཁུར་སྟོབས་ཆེ། །ལམ་དུ་ཆས་ཚེ་འཚེར་ཞིང་འགྲོ། །རྡོག་མ་འཆོལ་བར་སྐྱེ་བ་དང་། །གང་
ལའང་སྨོད་པར་མི་བྱེད་དོ། །བུད་མེད་མིག་ནི་ན་བ་དང་། །འགྲོས་ཆེ་ཡིད་ཕེབས་མེད་པ་དང་། །ཁ་དོག་མི་སྡུག་པ་ཉིད་དེ། །ཤ་ཟའི་སྙིང་སྟོབས་དག་ལ་གནས། །སྡིག་ལ་དགའ་ཞིང་བསྟར་བ་དང་། །གདུལ་དཀའ་དྲི་ནི་མི་ཞིམ་པ། །སྤྱོད་པ་ངན་པར་སྤྱོད་པ་དང་། །དམན་
པར་ལྟ་བ་མ་ག་ད། །བྲམ་ཟེའི་རིགས་མོར་རྗེའུ་རིགས་དག །ཞུགས་པ་ལས་ནི་སྐྱེས་པའི་རྟ། །དེ་ནི་གདོལ་པ་ཞེས་བཤད་དེ། །སྡིག་པ་སྐྱེད་པའི་སྤྱོད་ཡུལ་ཅན། །ལས་རྣམས་ལ་ནི་མི་འཇུག་ཅིང་། །གཏུམ་པ་བོང་བུའི་སྒྲ་ཅན་ཡིན། །སྒྲ་འཆག་རྩུབ་ཅིང་གདུག་པ་
དང་། །ཡན་ལག་མི་སྙོམས་བག་མེད་ལྡན། །མི་ཤིས་པ་ཡི་མཚན་ཉིད་དང་། །མཚན་མ་སྤྱོད་པས་ཉེ་བར་བསྒོས། །ཐིག་ལེ་ཞུ་བ་མི་སྡུག་པ། །སྨད་པ་ཡིས་ནི་ཡོངས་སུ་ཁྱབ། །བདག་ལ་གསོད་པར་བྱེད་པ་དང་། །བག་མེད་གནས་སུ་ཁྱེར་བར་བྱེད། །རྟ་སྦངས་
ལྕི་བ་གཏོང་བ་ན། །ཟ་ཞིང་སྨོད་པར་མི་བྱེད་ལ། །མཐར་ནི་གནོད་པ་ཉིད་བྱེད་ཅིང་། །ཁང་སྟོང་དག་ཏུ་དགའ་བར་བྱེད། །ཅེ་སྤྱད་དག་གམ་སྤྱང་ཀི་འམ། །དུ་བའི་མདོག་གམ་མདོག་ངན་ལྡན། །སྒྲ་རྩུབ་ཡི་དྭགས་དྲི་ཅན་ཏེ། །ཆང་ལ་དགའ་ཞིང་ཤ་ལ་དགའ། །ཤ་ཟ་
སྲིན་པོའི་སྤྱོད་པ་ཅན། །སྤྱོད་པ་ངན་པ་གདོལ་བའི་རྟ། །རྟགས་དང་མཚན་མ་འདི་དག་གིས། །རིགས་བཞིར་རྣམ་པར་དབྱེ་བར་བྱ། །གང་ཞིག་ཕ་དང་རྟག་སྤྱོད་འདྲ། །སྐྱེས་པའི་བུ་ནི་གང་ཡིན་པ། །རིགས་བཞི་རུ་ནི་རྣམ་ཕྱེ་ལ། །རྟ་ནི་རང་གི་རིགས་སུ་གཞག །རིགས་ཀྱི་
དབྱེ་བ་ཅི་བཞིན་ཤེས། །སྡིག་པས་གོས་པར་མི་འགྱུར་རོ། །སྙིང་སྟོབས་སྤྱོད་པ་ལྷག་མ་ནི། །གང་གང་ཡིན་པ་མཉན་པར་གྱིས། །དྲི་ཟ་བྲམ་ཟེ་དང་མཉམ་ལ། །གནོད་སྦྱིན་རྒྱལ་རིགས་ཉིད་དང་འདྲ། །སྲིན་པོ་རྗེའུ་རིགས་དང་མཚུངས་ཏེ། །དམང་རིགས་ཤ་ཟ་ཉིད་དང་འདྲ། །

203-1-175b

དེ་ལྟར་སྐྱེ་གནས་འདྲ་བ་ཡི། །རང་རང་ཅི་བཞིན་རྣམ་པར་དབྱེ། །དེ་བཞིན་སྤྱོད་ཚུལ་མི་མཐུན་པ། །ཕྱེ་ན་སྡིག་པས་གོས་པར་འགྱུར། །དེ་ལྟར་ལེགས་ལྡན་རྗེས་སྟོན་པ། །ཤ་ལི་ཧོ་ཏྲས་བཤད་པ་ཡིན། །ཤ་ལི་ཧོ་ཏྲའི་མདོའི་གནས་ལས་རྟའི་རིགས་བཞིའི་
ལེའུ་སྟེ་བརྒྱད་པའོ།།      །།དེ་ལ་རྟ་ཡི་མཚན་ཉིད་ནི། །ཡན་ལག་མ་གཏོགས་ཐ་དད་དེ། །གདོང་ནི་སྲབ་ལ་རྒྱ་ཆེ་ཞིང་། །ཟུར་བཞི་པ་ལ་གཡུལ་སྙོམས་པ། །དྲང་ཞིང་འཁྱོག་པ་མ་ཡིན་ལ། །ཡོངས་སུ་ཚང་བ་བསྔགས་པ་ཡིན། །ཁ་ནི་བཙུམས་
དང་རྒྱ་ཆེ་ལ། །དྲི་ཟད་ཁ་ཆུ་ཉུང་བ་དང་། །ཁ་ཆུ་མི་འཇིག་སྐམ་པོ་མིན། །རྟ་ལ་རབ་ཏུ་བསྔགས་པ་ཡིན། །སོ་ནི་ཁ་དོག་ཡིད་འོང་བཟང་། །སྲོག་ཤིང་སྲ་ལ་བརྟན་པ་དང་། །མ་གྱེས་དྲང་པོར་སྐྱེ་བ་དང་། །སྣུམ་ཞིང་ནང་མ་མཐོ་བ་དང་། །མཐོ་ཞིང་རྩ་བ་བརྟན་པ་
དང་། །མཚན་མ་གསལ་ཞིང་སྲ་བ་དང་། །སྦྲང་རྩི་འདྲ་བའམ་རབ་ཏུ་དཀར། །རྟ་ལ་བསྔགས་པར་གྱུར་པ་ཡིན། །འགྲམ་སོ་མཉམ་ཞིང་ཟླུམ་པ་དང་། །སྲ་ཞིང་སྙོམས་པར་གྱུར་པ་བཟང་། །མཆེ་བ་མདུན་སོའི་མདོག་འདྲ་ཞིང་། །རྩེ་མོ་རྣོ་བར་གྱུར་པ་དང་། །ཟླུམ་
ཞིང་རྩ་བ་བརྟན་པ་དང་། །སྣུམ་ཞིང་འཇམ་ལ་སྐྱེ་བ་བསྔགས། །ལྕེ་ནི་སྲབ་ཅིང་རྗེས་འབྲེལ་དང་། །འཇམ་ཞིང་རིང་ལ་སྙོམས་པ་དང་། །མཉམ་ཞིང་འཇམ་ལ་དམར་བ་དང་། །ཁྱི་ཡི་ལྕེ་དང་འདྲ་ན་བཟང་། །ལྕེ་རྩ་ཅུང་ཟད་མཐུག་པ་དང་། །འཇམ་ཞིང་མཉེན་ལ་
སྙོམས་ལ་སྲབ། །བརྟན་ཞིང་ལྗན་ལྗིན་མེད་པ་དང་། །རིང་ཞིང་དམར་ན་རབ་ཏུ་བཟང་། །ལྕེའུ་ཆུང་གཏིང་རིང་རྩེ་མོ་དམར། །སྲབ་ལ་རི་མོས་རྣམ་པར་ཁྱབ། །འཇམ་ཞིང་གོས་པ་མེད་པ་དག །རྟ་ལ་རབ་ཏུ་བསྔགས་པ་ཡིན། །མཆུ་ནི་འཇམ་ཞིང་མཉེན་པ་དང་། །
དབྱེ་སླ་ཤ་རྒྱས་དབྱིབས་ལེགས་དང་། །ཤིན་ཏུ་གཡོ་དང་འཕྱང་བའང་མིན། །སོ་ནི་ཁེབས་པར་གྱུར་པ་དང་། །མཉམ་ཞིང་སྙོམས་ལ་ཟླུམ་པ་དང་། །ཚད་ལྡན་དྲང་ན་བསྔགས་པ་ཡིན། །སྣ་གུང་མཉམ་པར་དབུགས་རྒྱུ་ཞིང་། །ཟླུམ་ལ་ནང་ན་ཡངས་པར་

203-1-176a

སྣང་། །མཉེན་ཞིང་འཇམ་ལ་གནོད་པ་མེད། །རྟ་ལ་བསྔགས་པར་གྱུར་པ་ཡིན། །མཚུལ་པ་དྲང་ཞིང་དབྱིབས་མཛེས་ལ། །སྐྱོན་མེད་པར་ཡང་གང་གནས་དང་། །དྲང་ཞིང་ཟླུམ་ལ་འཇམ་ཞིང་མཉེན། །ཡོན་ཏན་དག་གིས་བརྒྱན་ན་བཟང་། །
རྟ་ཡི་འཛུམ་ནི་དབུས་སྲབ་ཅིང་། །འགྲམ་གཉིས་མཐོ་བར་གྱུར་ན་བཟང་། །ཁ་འགྲམ་མཉེན་ཞིང་སྲབ་ལ་སྙོམས། །བུ་ག་ཁེབས་ཤིང་ཟླུམ་ལ་འབྱར། །ཁ་འགྲམ་ཡངས་པར་སྣང་གྱུར་པའི། །རྟ་ནི་ཡིད་དུ་འོང་བ་ཡིན། །མཁུར་ཚོས་བྱི་དོར་བྱས་འདྲ་ཞིང་། །
དབུས་སྡུག་སྲབ་ལ་ལྟ་ན་སྡུག །རིམ་གྱིས་མཁུར་བའི་ཞེང་ཆེ་ཞིང་། །ཤ་ཡིས་རྒྱས་པར་གྱུར་པ་བསྔགས། །སྣ་འགྲམ་པགས་སྲབ་ན་ཆུང་བ། །རིམ་གྱིས་ཞིང་ཆེ་སྲ་བ་དང་། །མཁུར་པ་ལེགས་པའི་འཕྲལ་དང་ནི། །རྣ་བར་ལེགས་པར་གནས་ན་བཟང་། །མཆི་
མ་འཛག་གནས་རྒྱུས་པ་སྲ། །མི་མངོན་ཤ་ནི་སྲབ་ན་བཟང་། །མིག་ནི་དཀྱུས་རིང་མིག་འབྲས་དག །ཤིན་ཏུ་དང་བར་སྣང་བ་དག །ནོར་བུའི་འོད་ཀྱི་མདངས་འདྲ་ཞིང་། །སྣུམ་པའི་སྦྲང་རྩི་ལྟར་སེར་སྐྱ། །སྣ་མ་འདྲ་འམ་རྨ་བྱ་འདྲ། །རྔ་མོ་ཀ་ལ་པིངྐ་ཡི། །ངུར་
པའམ་གང་མ་སྲེག་ནག་པོ། །གླང་ཆེན་གྱི་ནི་མིག་འདྲའམ། །སེང་གེ་རི་དྭགས་མིག་འདྲའམ། །དེ་བཞིན་མཆིལ་པའི་མིག་འདྲ་ཞིང་། །རྫི་མ་མཐུག་ཅིང་རིང་བ་ཡི། །མིག་ནི་རྟ་ལ་བསྔགས་པ་ཡིན། །མིག་སྦུབས་སྦོམ་པོ་མ་ཡིན་ཞིང་། །གཙང་དང་མི་མཉམ་མེད་
པ་དང་། །དྲང་ཞིང་རིམ་གྱིས་སྲབ་པ་དང་། །བལྟ་བའི་ཚེ་ན་ལྷོད་པ་དང་། །སྨིན་མའང་སྙོམས་ཞིང་རིམ་གྱིས་སྲབ། །ཤ་ནི་སྲ་ཞིང་ཟླུམ་པ་དང་། །ཤ་དང་པགས་པ་ལེགས་པར་འབྲེལ། །རྩ་རྒྱུས་མི་མངོན་མཉམ་ན་བཟང་། །འཕྲལ་བ་ཡངས་པར་སྣང་བ་དག །ཤ་
སྲབ་མཉམ་ཞིང་དབྱེས་ཆེ་དང་། །རིམ་གྱིས་ཡངས་པར་གྱུར་པ་དང་། །གཉེར་མ་མེད་ན་བསྔགས་པ་ཡིན། །འགྲམ་གླིང་རིམ་གྱིས་ཡངས་པ་དང་། །བརྟན་ཞིང་སྲ་བར་གྱུར་པ་བཟང་། །རྣ་བ་སྤུ་དང་གཉེར་མ་མེད། །རྩེ་མོ་ཕྲ་བ་བསྔགས་པ་ཡིན། །རྟ་ཡི་མགོ་བོ་

203-1-176b

སྙོམས་པ་དང་། །རིང་ཞིང་རྒྱ་ཆེ་ནད་མེད་དང་། །གཙུག་དང་ཕུམ་ཕུམ་ལེགས་པ་དང་། །དབྱིབས་ལེགས་པ་ནི་བསྔགས་པ་ཡིན། །རྔོག་མ་ཤིན་ཏུ་མང་ཉུང་མིན། །འཇམ་ཞིང་དེ་བཞིན་ནག་ནོག་མེད། །སྣུམ་ཞིང་རིང་ལ་ཅུང་ཟད་འཁྱིལ། །དེ་བཞིན་རིམ་པར་ལེགས་
གནས་ཤིང་། །ཤིན་ཏུ་མི་རིང་རབ་ཐུང་མིན། །རྟ་ལ་བསྔགས་པར་འགྱུར་བ་ཡིན། །རྟ་ཡི་སྤུ་ནི་མཐུག་མཉེན་འཇམ། །རྩ་བ་བརྟན་ཞིང་ཤ་ལ་འཛུགས། །ཤིན་ཏུ་སྣུམ་ཞིང་ལེགས་པར་སྐྱེ། །ཉག་རེ་ལས་ནི་སྐྱེ་བ་བསྔགས། །ལྐོག་མ་མགོ་དང་མགྲིན་པར་འབྲེལ། །
རང་བཞིན་ཟླུམ་ལ་སྙོམས་པ་དང་། །ལྗན་ལྗིན་གྱིས་ནི་གོས་པ་མེད། །དྲི་མ་མེད་ན་བསྔགས་པ་ཡིན། །སྲོལ་མདུད་ཟླུམ་ཞིང་མཉམ་ལ་འབྲེལ། །དབྱིབས་ནི་དྲང་པོར་འདུག་པ་བསྔགས། །སྐེ་མགྲིན་རིམ་གྱིས་ཟླུམ་པ་དང་། །རིང་ཞིང་དབྱིབས་ནི་ལེགས་པ་དང་། །
མིད་པ་རྩེའུ་ཆུང་དང་འབྲེལ་ཞིང་། །དེ་བཞིན་མགོ་བོ་དང་འབྲེལ་པ། །ལྐོག་མའི་ཕྱོགས་ནི་ཤ་སྲབ་ཅིང་། །ལྷོད་མིན་ཅུང་ཟད་གུག་པ་དང་། །ཤ་རྒྱས་ལེགས་པར་འབྲེལ་པ་ནི། །རྟ་ལ་རབ་ཏུ་བསྔགས་པ་ཡིན། །སྐྲ་རྩ་ལེགས་པར་རྒྱས་པ་དང་། །ཤ་ཆེ་སུམ་མདོ་
ཡངས་པ་དང་། །ཤ་མཁྲིགས་ཡན་ལག་ལེགས་འབྲེལ་ཞིང་། །ཤ་མོ་ལྷོད་ན་བསྔགས་པ་ཡིན། །ཟེའུ་ནི་ལེགས་འབྲེལ་ཆེར་མི་མཐོང་། །ཟེའུ་ལྟག་དང་ནི་རྗེས་སུ་འབྲེལ། །ཕྲག་གང་ཟེ་འདབ་འབྲེལ་ཞིང་ཡངས། །ཤ་རྒྱས་ཚིགས་འབྲེལ་མཉམ་ཞིང་སྲ། །སོག་
པ་ཤ་རྒྱས་རབ་ཏུ་འབྲེལ། །རྟ་ལ་བསྔགས་པར་འགྱུར་བ་ཡིན། །བ་ཧ་ཟླུམ་ཞིང་ཤ་རྒྱས་ལ། །གཙུག་མེད་ཤིན་ཏུ་བརྟན་པ་དང་། །ཡངས་ཤིང་དབུགས་ནི་རྒྱུ་བ་དང་། །མཐོང་བར་གྱུར་ན་བསྔགས་པ་ཡིན། །དཔུང་རྒྱབ་ཟླུམ་ཞིང་རྒྱུས་པ་རྩ། །མི་མངོན་ཚིགས་
དང་ཤ་སྙོམས་ལ། །ཤ་ནི་ཅུང་ཟད་མཐོ་བར་སྣང་། །དེ་ནི་ཤིན་ཏུ་བསྔགས་པ་ཡིན། །དཔུང་པ་ཤ་རྒྱས་རིང་བ་དང་། །སྲ་ཞིང་ཟླུམ་ལ་དྲང་ཞིང་མཉམ། །རིམ་གྱིས་ཕྲ་བར་གྱུར་པ་དང་། །ཚིགས་ནི་ལེགས་པར་འབྲེལ་བ་བཟང་། །པུས་མོ་དག་ནི་རབ་མཉམ་

203-1-177a

ཟླུམ། །ཚིགས་སམ་ཚིགས་ནི་མི་མངོན་དང་། །མཛེས་ཤིང་རྩ་མི་མངོན་པ་དང་། །འགྲོ་ཚེ་གུག་པར་བདེ་ན་བཟང་། །ཆེ་དྲང་རིང་ཞིང་ཤིན་ཏུ་ཟླུམ། །ཤིན་ཏུ་ཤ་སྲབ་མ་ཡིན་མཁྲེགས། །རྩ་རྒྱུས་དག་ནི་མི་མངོན་ལ། །ནད་མེད་པ་ནི་རྟ་ལ་
བསྔགས། །ཚེའུ་རྩུབ་ཅིང་འགྲེང་བ་དང་། །ཟླུམ་ཞིང་ལེགས་སྐྱེས་ཐུང་བ་དང་། །ཚིགས་མི་མངོན་ཞིང་ལོང་མོ་དང་། །སྒྲོག་མཁར་རིང་པོར་སྣང་དང་བཅས། །རྐང་པ་དང་འབྲེལ་མཉམ་ཞིང་རིང་། །རྟ་ལ་བསྔགས་པར་གྱུར་པ་ཡིན། །ཚེའུ་ཆེ་ཤིན་ཏུ་མཉམ་
ཞིང་ཟླུམ། །རིང་ཞིང་ཟླུམ་ལ་མཛེས་པ་དང་། །དབུས་ནི་ཅུང་ཟད་རྐྱོང་བ་དང་། །ཚེའུ་སྤུས་གཡོགས་བསྔགས་པ་ཡིན། །རྨིག་པ་མཐོ་ཞིང་ཟླུམ་པ་དང་། །ཤིན་ཏུ་སྲ་ཞིང་མཐུག་པ་དང་། །ཟ་མ་ཏོག་ལྟར་ཟླུམ་ཞིང་མཛེས། །བོང་རྨིག་འདྲ་ནའང་བསྔགས་
པ་ཡིན། །དེ་བཞིན་སྒྲོས་ནི་མ་གས་ཤིང་། །རྣོ་ཞིང་མི་གུག་ཟེགས་པ་མེད། །ཁ་དོག་དུ་མའམ་ཁ་དོག་གཅིག །ཁྲ་བོར་གྱུར་པ་མེད་ན་བཟང་། །དབུས་ནི་ཤིན་ཏུ་ཟབ་པ་དང་། །རྨིག་མཐིལ་རྡོ་ལེབ་ལྟར་སྲ་ཞིང་། །སྦལ་མཚམས་ལེགས་པར་སྐྱེས་པ་
ནི། །མཛེས་པ་དག་དང་ལྡན་པ་དང་། །སྦལ་པ་བུབ་ཅིང་གསལ་བར་མངོན། །མཚམས་ནི་ལེགས་པར་དོད་པ་དང་། །ཉེ་འཁོར་མཉམ་ཞིང་འཇམ་པ་དང་། །རྐང་པའི་ནད་དང་བྲལ་བ་དང་། །བརྟན་ཞིང་ལྗན་ལྗིན་མེད་པ་དང་། །ཁ་དོག་སྣུམ་པ་བསྔགས་པ་
ཡིན། །ཟེའུའི་ཤ་ནི་རྒྱས་པ་དང་། །གཙུག་མེད་པ་ནི་བསྔགས་པ་ཡིན། །སྒ་འོག་མཉམ་ཞིང་ཡངས་པ་དང་། །རྒྱབ་ནི་མཐེབ་སོར་ཙམ་གྱིས་དམའ། །སྒལ་ཚིགས་ཅུང་ཟད་མཐོ་བ་དང་། །ཤ་ཡིས་རྒྱས་ན་བསྔགས་པ་དང་། །རྩིབ་མ་གུག་ཅིང་ལྕང་ལྕོང་
མེད། །མི་མངོན་རབ་ཏུ་མཉམ་ཞིང་སྲ། །ཕྲག་གོང་རྒྱས་པར་ཁྱབ་གྱུར་ཅིང་། །མཉམ་ཞིང་འཇམ་ན་བསྔགས་པ་ཡིན། །གསུས་ཁྱིམ་ཟླུམ་ཞིང་ཡངས་པ་དང་། །རི་དྭགས་ཀྱི་ནི་དབྱིབས་འདྲ་ཞིང་། །བུ་ག་མེད་ལ་ཐུང་ཟླུམ་ཆུ། །དགུ་སྙོམས་པ་ནི་བསྔགས་པ་

203-1-177b

ཡིན། །ཨོང་དོ་མཉམ་ཞིང་ཟླུམ་པ་དང་། །དབྱིབས་ནི་ལེགས་པར་གྱུར་པ་དང་། །མཇུག་དོ་ཤིན་ཏུ་རྒྱས་མིན་ཞིང་། །ཧ་ཅང་ཞུམ་པ་ཡང་མ་ཡིན། །རྒྱབ་གཞུང་བས་ནི་མཐོ་ན་བཟང་། །སྲ་ཞིང་ཟླུམ་ལ་རྒྱུས་མི་མངོན། །གསལ་ཞིང་རིམ་གྱིས་མཛེས་པར་གནས། །
ཤིན་ཏུ་ཐུང་དང་རིང་བ་མིན། །གདོང་གི་ཚད་དང་མཉམ་པ་དང་། །མཇུག་མ་དང་ལེགས་འབྲེལ་བ་བཟང་། །རྟ་ཡི་རྔ་མ་སྤུ་རིང་ཞིང་། །མ་ཉམས་ཁ་དོག་གཅིག་པ་དང་། །མཉེན་ཞིང་སྣུམ་པར་གྱུར་པ་ནི། །རྟ་ལ་ཤིས་པར་བཤད་པ་ཡིན། །མཇུག་ཙོས་ཤིན་
ཏུ་མཐོ་མ་ཡིན། །ཤིན་ཏུ་གྱེས་དང་འདུས་པའང་མིན། །ལུས་དང་རྗེས་མཐུན་ཚད་དང་ལྡན། །དེ་ལྟ་བུ་དག་བསྔགས་པ་ཡིན། །རྐུབ་ནི་ཟབ་ཅིང་ཟླུམ་པ་དང་། །དབྱིབས་ལེགས་ཕྱི་རོལ་གཉེར་མ་མེད། །གང་གིས་རྟ་སྦངས་ལེགས་གཏོང་བ། །དེ་ནི་རབ་
ཏུ་བསྔགས་པ་ཡིན། །བརླ་ནང་ཤིན་ཏུ་ཡངས་མིན་ཞིང་། །དོག་པར་གྱུར་པ་མིན་ན་བསྔགས། །རླིག་པ་ངོ་མཉམ་ལེགས་འབྲེལ་སྐྱེས། །སྤུ་ནི་མེད་པར་གྱུར་པ་དང་། །དབུས་ནི་བིལ་བ་ཙམ་ཞིག་ནི། །ཤིན་ཏུ་མི་འཕྱང་གྱུར་པ་བསྔགས། །མཚན་ནི་རྩ་
སྦོམ་རིམ་གྱིས་ཕྲ། །འཇམ་ཞིང་མྱུར་དུ་ལྡང་བ་དང་། །སྦུབས་ཡངས་པས་ནི་གཡོགས་པ་དང་། །ཁ་ཞེང་ཤིན་ཏུ་ཕྱེ་ཞིང་ཟླུམ། །གཏིང་རིང་ཁ་དོག་གཅིག་ལྡན་པའི། །རྟ་ནི་བསྔགས་པར་འགྱུར་བ་ཡིན། །དཔྱི་མགུལ་མཉམ་ཞིང་དབྱིབས་ལེགས་ལ། །
པགས་སྲབ་སྤུ་ནི་ལེགས་པ་བཟང་། །རྐུབ་ཚོས་སྲ་ཞིང་ལེགས་པར་འབྲེལ། །རྩ་རྒྱུས་དག་ནི་མི་མངོན་བཟང་། །དཔྱི་ནི་ལེགས་པར་འབྱོར་པ་དང་། །ལེགས་པར་རྫོགས་པར་གྱུར་པ་དང་། །ཡངས་ཤིང་དཀྱུས་ནི་རིང་བ་དང་། །པགས་པ་སྲབ་ལ་ཤ་རྒྱས་
བཟང་། །རྗེ་ངར་སྙོམས་ཤིང་དབྱིབས་ལེགས་དང་། །རིམ་གྱིས་ཕྲ་བར་གྱུར་པ་དང་། །ཤིན་ཏུ་ཕྲ་བའི་རུས་པས་ཁྱབ། །རྟ་ནི་བསྔགས་པར་འགྱུར་བ་ཡིན། །ཆེ་དྲང་ལ་སོགས་ལུས་སྟོད་ནི། །ཅི་འདྲར་རོ་སྨད་དེ་བཞིན་དུ། །མཚན་ཉིད་ཐམས་ཅད་བཤད་

203-1-178a

པར་བྱ། །དེ་ཡི་འོག་ཏུ་རྒོད་མ་ཡི། །ལུས་ཀྱི་ཕྱོགས་ཀྱི་མཚན་ཉིད་དག །གང་དག་ཡིན་པ་བཤད་པར་བྱ། །དེ་ཡི་མཚན་ནི་མཉམ་ཆེ་གསལ། །ལེགས་པར་བལྟམས་ཤིང་ལེགས་པར་འཛག །བུ་ག་ཆེ་ཞིང་གྲྭ་མཚམས་ཆེ། །རིང་ཞིང་མཚན་ནི་
རྒྱ་ཕྱེད་ལ། །མངལ་གྱི་ཉེས་པ་དང་བྲལ་བ། །དེ་ཡི་མོ་མཚན་དེ་འདྲ་བསྔགས། །ནུ་མ་ཟླུམ་ཞིང་རྒྱས་པ་དང་། །ཤིན་ཏུ་འཕྱང་བ་མ་ཡིན་དང་། །འོ་མ་སྐྱོན་མེད་ལེགས་པར་རྒྱས། །རྒོད་མ་རབ་ཏུ་བསྔགས་པ་ཡིན། །ནུ་སོར་མཉམ་ཞིང་ཟླུམ་པ་དང་། །བུ་ག་ལེགས་
ཤིང་འོ་མ་རྒྱས། །ཤིན་ཏུ་འདུས་མིན་གྱེས་པའང་མིན། །མཐུག་ཅིང་བརྟན་ལ་ལེགས་པར་སྐྱེས། །ཤིན་ཏུ་འབྱར་མིན་རབ་འཕྱང་མིན། །རྟེ་འུས་འོ་མ་བཏུང་བདེ་བསྔགས། །ལྷག་མ་རྒོད་མའི་ཡན་ལག་ཀུན། །རྟ་ཕོ་དང་ནི་འདྲ་བར་བསྔགས། །དེ་ལྟ་མོད་ཀྱི་
གཟུགས་མཛེས་པས། །རྒོད་མའི་གཟུགས་ནི་བཟང་བར་བཤད། །ལུས་ནི་སྦོམ་པོར་གྱུར་པ་ཡང་། །ཕྲ་བ་ལྟ་བུར་མངོན་པ་ཡིན། །ལུས་སྲབ་པར་ནི་གྱུར་ན་ཡང་། །རྒོད་མ་སྤུ་མདངས་ཡོད་པ་མངོན། །དེ་འདྲའི་ཚུལ་གྱིས་ལུས་ཀྱི་ནི། །དབྱིབས་ཀྱི་བྱེ་བྲག་ཤེས་པར་
བྱ། །རྒོད་མ་རྟ་ཕོ་འདྲ་བ་དང་། །རྟ་ཕོ་རྒོད་མ་འདྲ་བ་རུ། །གལ་ཏེ་ཕྱིན་ཅི་ལོག་ཅི་སྣང་། །དགོས་པའི་འབྲས་བུ་འབྱིན་མི་འགྱུར། །ལུས་ཆེ་མདངས་ནི་བཟང་བ་དང་། །ལེགས་པར་སྐྱེས་ཞིང་ཚད་དང་ལྡན། །གཟི་བརྗིད་ཡན་ལག་དབྱེས་པ་དང་། །ཡན་ལག་
ཆ་ནི་སྙོམས་པ་དང་། །གཙུག་འཁྱིལ་དགེ་ཞིང་གཟི་མདངས་དགེ། །དྲི་བཟང་ཡན་ལག་མི་སྡུག་མེད། །ལུས་རྒྱས་འགྲོས་ནི་བཟང་བ་དང་། །འཇིགས་མེད་གནས་གསུམ་ཡངས་པ་དང་། །ཚད་མཉམ་དབྱིབས་ནི་ལེགས་པ་སྟེ། །གང་ཞིག་དེ་འདྲའི་ལུས་ལྡན་
པ། །བདག་པོའི་གྲགས་དང་རིགས་དང་ནོར། །རྣམ་པར་འཕེལ་བར་འགྱུར་བ་ཡིན། །ཡོན་ཏན་ཕྱིན་ཅི་ལོག་ལྡན་པ། །བདག་པོའི་དོན་རྣམས་ཉམས་བྱེད་ཡིན། །ཤ་ལི་ཧོ་ཏྲའི་མདོའི་གནས་ལས་ཡན་ལག་ཐམས་ཅད་ཀྱི་མཚན་ཉིད་ཀྱི་ལེའུ་སྟེ་དགུ་པའོ།།      །།

203-1-178b

དཀའ་ཐུབ་བསམ་གཏན་ཆེན་པོ་ཡིས། །གཟི་བྱིན་གསལ་གྱུར་དྲང་སྲོང་ལ། །བློ་དང་ལྡན་པ་ལེགས་ཐོས་ཀྱིས། །སྔར་བཤད་པ་ནི་དྲིས་གྱུར་པ། །ཁྱོད་ཀྱིས་ཕྱོགས་བསྟན་གསུངས་མོད་ཀྱི། །བཤད་པ་དག་ནི་མ་གསུངས་པས། །བསྟན་པ་རྣམས་ཀྱི་བཤད་
པ་ནི། །ལེགས་ལྡན་གསུང་བར་མཛད་པའི་རིགས། །བསྟན་པ་བཤད་པ་དང་བཅས་པ། །བུ་ཡིས་བསྐུལ་བས་སྨྲས་པ་ནི། །མིད་པ་སྲོལ་གོང་དང་འབྲེལ་བས། །རོ་འཛིན་ལྕེར་ནི་ཤེས་པར་བྱ། །དེ་ཡི་སྟེང་ནི་རྐན་ཡིན་ཏེ། །མ་རྐན་ལྕེ་འོག་ཡིན་པར་བཤད། །འགྲམ་
སོ་འགྲམ་པ་ལས་སྐྱེས་པ། །ལྡང་བའི་སོ་ནི་ཡིན་པར་བཤད། །དེ་ལས་གཞན་པ་མདུན་གྱི་སོ། །བཅུ་གཉིས་མཚན་མར་ལྡན་པ་ཡིན། །དེ་རྣམས་ཀྱི་ནི་དབུས་གནས་པ། །སྟེང་འོག་བཞི་ནི་མཆེ་བ་ཡིན། །སྟེང་འོག་གི་ནི་སོ་འགེབས་པ། །གཉིས་པོ་མཆུ་ནི་
ཡིན་པར་བཤད། །མཆུ་མཐའ་ཡི་ནི་ངོས་གཉིས་ན། །འགྲམ་པའི་དབུས་ཆུད་ཁ་འགྲམ་ཡིན། །ཡ་མཆུའི་སྟེང་ན་སྒྲོས་ཡོད་དེ། །དེ་ཡི་སྟེང་གི་མཆུ་ལྷག་ཡིན། །མ་མཆུའི་འོག་མ་ཀོ་སྐོ་སྟེ། །དེ་ལྟག་འགྲམ་པ་ཡིན་པར་བཤད། །སྣ་གོང་མིག་གཉིས་བར་མཚམས་
གདོང་། །གདོང་གི་ཡན་ལག་སྣ་ཁུང་གཉིས། །གདོང་གི་ངོས་གཉིས་མཁུར་ཚོས་ཡིན། །དེ་བར་དམའ་བ་མཆི་མའི་སྟན། །དེ་དག་རྣམས་ཀྱི་གོང་ན་མིག །མིག་འབྲས་འགེགས་པ་མིག་མཆུ་ཡིན། །མིག་མཐའི་དཀར་པོ་མིག་སྤྲིན་ཡིན། །དེ་དབུས་ཟླུམ་ནག་
མཐོང་མིག་ཡིན། །མཐོང་མིག་ནག་པོ་ཟླུམ་པོའི་དབུས། །ཕྲ་ཞིང་དང་བ་མིག་རྒྱལ་བོང་། །མིག་ལྟག་གཉིས་ནི་མིག་གི་སྐྱུ། །དེ་སྟེང་སྨིན་མ་གཉིས་ཡིན་ནོ། །མིག་གི་རྒྱབ་ནི་མིག་ཟུར་ཏེ། །ནང་གི་མཚམས་ནི་མིག་ཕུགས་ཡིན། །སྨིན་མ་གཉིས་རེ་དཔྲལ་བ་
སྟེ། །དཔྲལ་བའི་སྟེང་གི་དཔྲལ་མཚམས་ཡིན། །དེ་སྟེང་སྤྱི་བོ་ཡིན་པར་བཤད། །རྣ་བའང་གཉིས་བར་གླད་པ་སྟེ། །མིག་ཟུར་མིག་འགྲམ་བར་མུར་གོང་། །མུར་གོང་རྣ་བའི་བར་མུར་འགྲམ། །མཁུར་ཚོས་གཉིས་ཀྱི་རྒྱབ་ཟ་ཡུང་། །དེ་གཉིས་ཕྱི་རོལ་

203-1-179a

འགྲམ་གླད་ཡིན། །འགྲམ་པ་སྲོལ་གོང་གཉིས་ཀྱི་བར། །ལྐོག་མ་ཞེས་ནི་བྱ་བར་བཤད། །རྣ་བ་གཉིས་ཀྱི་སྟེང་དང་རྒྱབ། །རྣ་ལྟག་དང་ནི་རྣ་མཆན་ཡིན། །མགོ་དང་ཕྲག་སོའི་བར་སྐེ་མགྲིན། །སྐེ་མགྲིན་ཕྲག་སོའི་ལྟག་སྐེ་རྩ། །དེ་སྟེང་རྔོག་
གཡབ་ཡིན་པར་བཤད། །རྔོག་མཐའ་རྣ་བའི་བར་ཕུམ་ཕུམ། །རྔོག་གཡབ་མཐའ་ནི་ཟེའུ་ལྟག་སྟེ། །དེ་ཡི་རྒྱབ་ནི་དང་རུ་ཡིན། །དང་རུའི་འོག་ནི་ནམ་ཙོང་ཞེས། །རྟ་རྣམས་ལ་ནི་བཤད་པ་ཡིན། །ཟེའུ་ལྟག་ནི་འོག་མ་ཉིད། །ཟེའུ་ཡིན་པར་ཤེས་པར་བྱ། །ཟེའུའི་རྗེས་
ཐོགས་ཁོ་ན་ལ། །སྒ་འོག་ཡིན་པར་ཤེས་པར་བྱ། །དེ་ཕན་ཅད་ནི་སྒལ་ཚིགས་དང་། །རྒྱབ་ཉིད་ཡིན་པར་ཤེས་པར་བྱ། །ཟེའུའི་སོ་གཉིས་ཕྲག་སོ་སྟེ། །ཕྲག་སོའི་རྩ་བ་དཔུང་མགོ་ཡིན། །ལྐོག་མ་དང་ནི་སྲོལ་གོང་བར། །མིད་པའོ་དེ་འོག་སྲོལ་མདུད་ཡིན། །མིད་
འོག་ལག་བར་བྲང་ཡིན་ཏེ། །དེ་རྗེས་ལག་འོག་བར་སྙིང་ག །དེ་འོག་དཔུང་སྣ་དཔུང་པ་ཡིན། །དཔུང་པའི་ནང་ནི་མཆན་ཁུང་ཕན། །རྒྱབ་ཀྱི་ཆ་ནི་དཔུང་རྒྱབ་ཡིན། །དེ་འོག་པུས་མོ་གཉིས་ཀྱི་ལྟག །པུས་གོང་དང་ནི་ལག་ངར་གཉིས། །པུས་མོའི་འོག་ཏུ་ཆིག་གྲང་
སྟེ། །དེ་འོག་ཆིག་གྲང་ཕྲ་མོ་ཡིན། །ཆིག་གྲང་སྦོམ་ཕྲའི་བར་ན་ནི། །ཆིག་གྲང་ནང་སྟེ་དེ་འོག་གི། །མདུན་གྱི་ཆ་ནི་ཚེའུ་གདོང་ཡིན། །རྒྱབ་ནི་ཚེའུ་སྤུར་ཤེས་པར་བྱ། །དེའི་ལྟག་དེ་ནི་སྒྲོག་མཁར་ཡིན། །དེའི་ཡང་འོག་ན་ཡོད་པ་ཡི། །ཚེའུ་ཆེ་ཞེས་ནི་བྱ་བར་བཤད། །
དེའི་འོག་རྨིག་པའི་མཚམས་ཡིན་ལ། །དེ་ཡི་འོག་ཏུ་རྨིག་པ་ཡིན། །རྨིག་པའི་མཐའ་མ་རྨིག་སྒྲོས་ཡིན། །རྨིག་པའི་འོག་ནི་རྨིག་མཐིལ་ཏེ། །རྨིག་མཐིལ་ནང་མཐའ་སྦལ་པའི་མཚམས། །རྨིག་མཐིལ་དབུས་ནི་སྦལ་པ་ཡིན། །དཔུང་མཐའི་མགོ་ན་སྙིང་ཡོད་དེ། །
དེ་ཡི་ངོས་ནི་རྩིབ་ལོགས་ཡིན། །རྩིབ་ལོགས་འོག་ཏུ་དཀུ་ཡིན་ལ། །དེ་ཡི་སྟེང་ནི་སྒ་འདབ་ཡིན། །སྒལ་ཚིགས་ཀྱི་ནི་ཆ་དག་གི། །མཚམས་ནི་རོ་སྨད་ཡིན་པར་བཤད། །རུས་པ་གསུམ་ནི་འདུས་པ་ཡི། །སུམ་མདོ་མཇུག་དོ་ཡིན་པར་བཤད། །མཇུག་དོའི་འོག་ཏུ་ཨོང་

203-1-179b

དོ་སྟེ། །དེ་རྗེས་རྔ་རྩ་ཡིན་པར་བཤད། །དེ་ཡི་ངོས་གཉིས་དཔྱི་སྟེང་ཡིན། །དཔྱི་སྟེང་འོག་ནི་རོ་ཧི་ནི། །བར་ན་རྔ་མ་རྔ་སྙིང་བཅས། །དེ་གཉིས་འོག་ནི་བརླ་དཔྱིའི་མཚམས། །རྔ་རྩའི་འོག་ནི་རྐུབ་ཡིན་ལ། །དེ་ཡི་ངོས་གཉིས་རྐུབ་ཚོས་ཡིན། །དེ་ཡི་འོག་ནི་འབྲེག་
ཡིན་ལ། །དེ་དག་བར་ནི་མཇུག་སྲུབ་ཡིན། །བརླ་ཡི་ཡང་ན་རླིག་པ་སྟེ། །རླིག་པ་དང་འབྲེལ་མཚན་ཡིན་ནོ། །དེ་གཉིས་མདུན་ན་རྨོང་ཁ་སྟེ། །རྨོང་ཁ་སྙིང་དེའི་དབུས་ལྟེ་བ། །དཀུ་ཡང་བར་ན་གནས་པ་ཡིན། །དཀུ་ན་ལྟེ་བའི་བར་ན་རྒྱུ། །རྒྱབ་དང་དཀུ་ཡི་བར་རན་
འདྲ། །རན་འདྲའི་འོག་ནི་སྡུ་གུ་མིག །དེ་ཡི་ཕ་རོལ་དཔྱི་ཡིན་ཏེ། །དེ་ཡི་འོག་མ་བརླ་ཡིན་ནོ། །དེ་ཡི་ཡང་འོག་བརླ་ཕྲ་མོ། །དེ་ཡི་འོག་ནི་རྗེ་ངར་ཡིན། །དེ་འོག་སྲེ་ལོང་ཆིག་གྲང་ཡིན། །ལྷག་མ་རོ་སྟོད་རྗེས་འབྲངས་ཏེ། །ཐམས་ཅད་ཉེ་བར་དབྱེ་བར་བྱ། །ཤ་
ལི་ཧོ་ཏྲའི་མདོའི་གནས་ལས་བསྟན་པ་རྣམས་བཤད་པ་སྟེ་ལེའུ་བཅུ་པའོ།།      །།རྟ་ཡི་ཚེ་ཡི་རིག་བྱེད་མཁན། །དྲང་སྲོང་མགྱོགས་འགྲོའི་གཉེན་གྱུར་པ། །ཤ་ལི་ཧོ་ཏྲ་དབང་ཐུལ་ལ། །མཛའ་ལས་རྒྱལ་གྱིས་ཡོངས་དྲིས་པ། །རྟ་ཡི་ཚུལ་གྱི་དེ་ཉིད་
མཁྱེན། །ཚད་ནི་རྣམ་པ་དུ་རུ་བཤད། །མི་སྡུག་གཞལ་མིན་གང་ཞིག་ལགས། །སྡུག་ཅིང་གཞལ་བཟོད་གང་ཞིག་ལགས། །ཡན་ལག་ཉིང་ལག་ཤེས་པ་དང་། །གྲངས་ཉིད་ཀྱི་ནི་བྱེ་བྲག་རྣམས། །བདག་ཅག་བློ་གྲོས་ཞན་པས་ན། །ལེགས་ལྡན་ཁྱོད་ལས་
མཉན་པར་འཚལ། །དེ་སྐད་སྨྲས་ཚེ་སློབ་དཔོན་གྱུར། །དྲང་སྲོང་དམ་པས་སླར་སྨྲས་པ། །ཇི་སྐད་བསྟན་པ་འདི་མཉན་ནས། །མཛའ་ལས་རྒྱལ་གྱིས་བཟུང་བར་གྱིས། །སྒུར་ཞིང་གདོང་དང་སྐེ་བ་ཞུམ། །འཁུམས་དང་ཤིན་ཏུ་རྒྱས་དྲགས་དང་། །འདུག་དང་དབང་པོ་
ཡུལ་གྱི་གནས། །དེ་བཞིན་བྲང་ནི་འཕྱུགས་པ་དང་། །རྐེད་པ་སྐྲོངས་པར་གྱུར་པ་དང་། །ཤིན་ཏུ་དམའ་དང་ཤིན་ཏུ་མཐོ། །གང་ཞིག་ལུས་སྟོད་ཤིན་ཏུ་ཆེ། །དེ་བཞིན་རྒྱབ་ནི་ལྷག་པར་དམའ། །ལུས་ནི་ཤིན་ཏུ་མི་སྙུག་དང་། །དེ་བཞིན་རྐེད་པ་ཞུམ་པ་སྟེ། །མི་སྡུག་

203-1-180a

རྟ་ནི་བཅུ་པོ་འདི། །གཞལ་མིན་ཡིན་པར་ཤེས་པར་བྱ། །སྟོབས་མ་ཉམས་ཤིང་མཛེས་པ་ཡི། །ལུས་ལྡན་རྟ་ནི་བཅོ་ལྔ་པ། །ལུས་ཀྱི་ཆུ་ཞེང་ལེགས་གནས་ཤིང་། །གནས་ཀྱི་ཆ་ནི་མ་འཕྱུགས་པ། །ཚོད་ཤེས་པ་ཡི་གཞལ་བྱ་ཡིན། །
གཟུགས་ངན་ནམ་ཡང་མི་གཞལ་ལོ། །སྐེ་མགྲིན་ལུས་ནི་ཆ་མཉམ་ཞིང་། །རྔ་སྙིང་མགོ་དང་མཉམ་པ་དང་། །ཨོང་དོ་དང་ནི་བྲང་ཞིང་མཉམ། །པུས་མོའི་ཚེའུ་མཉམ་པ་དང་། །དཔངས་དང་ཞིང་གི་ཚད་དང་ནི། །ལེགས་པ་སྙོམས་པར་གྱུར་པའི་རྟ། །དེ་འདྲའི་ཚད་དང་ལྡན་
པ་དག །ཆ་མཉམ་ཡིན་པར་ཤེས་པར་བྱ། །རྟ་ནི་ལུས་ཀྱི་ཆ་མཉམ་པའི། །ཚད་ནི་རྣམ་གསུམ་མཉན་པར་གྱིས། །རྟ་མཆོག་གི་ནི་དཔྲལ་བ་ལ། །སོར་ནི་བཅུ་གཉིས་ཡོད་པར་བཤད། །རྣ་བ་སོར་དྲུག་ཡིན་ཞེས་བྱ། །སོ་དག་སོར་ནི་ཕྱེད་དང་གཉིས། །མིག་ནི་སོར་
གསུམ་ཤེས་པར་བྱ། །མཆེ་བའི་དཔངས་ནི་སོར་གཉིས་ཡིན། །མགོ་བོ་སོར་ནི་ཉི་ཤུ་བརྒྱད། །ཕུམ་ཕུམ་གནས་ནི་དཔངས་སོར་གསུམ། །རྟ་མཆོག་གི་ནི་ཆུ་རུ་ནི། །སོར་བརྒྱ་རྩ་བཞི་ཉིད་ཡིན་ནོ། །སྐེ་མགྲིན་སོར་ནི་སུམ་ཅུ་སྟེ། །ཟེའུ་ལྟག་སོར་ནི་དྲུག་ཡིན་ལ། །
རྒྱབ་ནི་སུམ་ཅུར་ཤེས་པར་བྱ། །ཨོང་དོ་གདོང་པ་དག་དང་མཉམ། །འབྲེག་ནི་སོར་ནི་བཅུ་ཡིན་ཏེ། །འདི་ནི་ཆུ་ཡི་ཚད་དུ་བཤད། །རླིག་པ་བིལ་བ་བཟང་པོ་ཡི། །ཚད་ཙམ་ཡོད་པར་ཤེས་པར་བྱ། །རྟ་མཆོག་གི་ནི་མཚན་དག་ལ། །སོར་ནི་བཅུ་དྲུག་ཡིན་ཞེས་བྱ། །
ཕྲག་སོ་སོར་ནི་ཉི་ཤུ་དྲུག །དཔུང་མགོ་ཉིད་ནི་སོར་བཅུ་ཡིན། །དཔུང་པ་ཉི་ཤུ་རྩ་བཞི་སྟེ། །པུས་མོའི་ཚིགས་ནི་སོར་དྲུག་པ། །ཚེའུ་སྤུ་སོར་དྲུག་ཡིན་ཞེས་བྱ། །ཆིག་གྲང་དཀྱུས་སུ་སོར་བཅུ་དྲུག །ཚེའུ་ཚེ་སོར་ནི་དྲུག་པ་ཡིན། །རྨིག་པའང་དེ་དང་མཉམ་པ་ཡིན། །
རྐེད་པའི་དབུས་ཀྱི་ཞེང་གང་ཡིན། །དཔངས་ནི་དེ་དང་མཉམ་པ་ཡིན། །ཚད་ནི་རྟ་མཆོག་དག་གི་ཡིན། །དེ་ནས་བར་མའི་བཤད་བྱ་སྟེ། །དཔྲལ་བའི་ཚད་ནི་སོར་བཅུ་ཡི། །གདོང་པ་སོར་ནི་ཉི་ཤུ་དྲུག །མིག་ལ་སོར་ནི་ཕྱེད་དང་གསུམ། །ཕུམ་ཕུམ་གནས་ཀྱང་དེ་དང་

203-1-180b

འདྲ། །སོ་ལ་སོར་གཅིག་བཞི་ཆ་གཅིག །མཆེ་བ་སོར་གཅིག་བཞི་ཆ་གསུམ། །རྣ་བའི་དཔངས་སུ་སོར་ལྔ་རུ། །རྟ་ནི་བར་མའི་ཡིན་པར་བཤད། །སྐེ་མགྲིན་ཉི་ཤུ་རྩ་བདུན་དུ། །བསྟན་བཅོས་རྟོགས་པས་ཤེས་པར་བྱ། །རྔོག་མཐའ་སོར་ནི་ལྔ་རུ་བཤད། །རྒྱབ་ནི་སྐེ་མགྲིན་
དག་དང་མཉམ། །འབྲེག་ལ་སོར་ནི་བདུན་ཡིན་ཏེ། །ཨོང་དོ་ཉི་ཤུ་རྩ་དྲུག་ཡིན། །བར་མ་འདི་ཡི་ཆུ་རུ་ནི། །སོར་ནི་དགུ་བཅུ་རྩ་གཉིས་ཡིན། །མགོ་བོ་སོར་ནི་ཉི་ཤུ་དྲུག །འདི་ཡི་རྔ་སྙིང་དེ་དང་མཉམ། །བར་མ་རླིག་པའི་ཚད་དག་ནི། །བིལ་བ་འབྲིང་པོ་ཙམ་ཡིན་ནོ། །
བར་གྱི་མཚན་གྱི་ཚད་དག་ནི། །སོར་ནི་བཅུ་བཞི་ཡིན་པར་བཤད། །དཔངས་སུ་སོར་ནི་བཅུ་དགུ་དག །འདི་ལ་བསྔགས་པར་གྱུར་པ་ཡིན། །ཕྲག་སོར་སོར་ནི་ཉི་ཤུ་ལྔ། །དཔུང་མགོ་སོར་ནི་བརྒྱད་ཡིན་ནོ། །དཔུང་པ་སོར་ནི་ཉི་ཤུ་གསུམ། །པུས་མོ་ཚེའུ་དང་མཉམ་པ་
ཡིན། །ཆིག་གྲང་སོར་ནི་བཅུ་བཞི་སྟེ། །ཚེའུ་སྤུ་སོར་ནི་ལྔ་པ་ཡིན། །ཚེའུ་ཚེའང་སོར་ནི་ལྔ་པ་སྟེ། །རྨིག་པའང་དེ་དང་འདྲ་བར་བཤད། །རྟ་ཡི་ཐ་མ་དག་གི་ཚད། །དཔྲལ་བ་སོར་ནི་བརྒྱད་ཡིན་ཏེ། །མགོ་བོ་སོར་ནི་ཉི་ཤུ་བཞི། །མིག་ནི་སོར་གཉིས་ཡིན་ཤེས་བྱ། །
ཕུམ་ཕུམ་གནས་ཀྱང་དེ་དང་འདྲ། །མཆེ་བ་སོར་ནི་ཕྱེད་དང་གཉིས། །སོ་ཡི་དཔངས་སུ་སོར་གཅིག་ཡིན། །རྣ་བའི་དཔངས་ནི་སོར་བཞི་སྟེ། །སྐྲ་འགྲམ་ཉི་ཤུ་རྩ་བཞི་སྟེ། །རྔོག་མཐའ་སོར་ནི་བཞི་ཡིན་ནོ། །རྒྱབ་ནི་སྐེ་བ་ཉིད་དང་མཉམ། །འབྲེག་གི་ཚད་ནི་སོར་བཞི་
སྟེ། །ཨོང་དོ་སོར་ནི་ཉི་ཤུ་བཞི། །ཆུ་རུ་སོར་ནི་བརྒྱད་ཅུ་ཡིན། །མགོ་བོ་ཉི་ཤུ་རྩ་བཞི་སྟེ། །རྔ་སྙིང་དག་ཀྱང་དེ་དང་མཉམ། །རླིག་པ་བིལ་བ་ཆུང་ངུ་ཙམ། །ཕོ་མཚན་སོར་ནི་བཅུ་གཉིས་ཡིན། །རྟ་ནི་ཐ་མའི་དཔངས་སུ་ནི། །སོར་ནི་བརྒྱད་ཅུ་ཡིན་པར་བཤད། །ཕྲག་
སོ་སོར་ནི་ཉི་ཤུ་བཞི། །དཔུང་མགོ་འདི་ཡི་སོར་དྲུག་ཡིན། །དཔུང་པ་སོར་ནི་ཉི་ཤུ་གཉིས། །པུས་མོ་སོར་ནི་བཞི་ཡིན་ལ། །རྟ་ནི་ཐ་མའི་ཆིག་གྲང་གི། །དཔངས་ནི་སོར་བཅུ་གཉིས་ཡིན་ནོ། །ཚེའུ་སྤུའི་གནས་ནི་སོར་བཞི་སྟེ། །ཚེའུ་ཚེའི་རྨིག་པ་དེ་དང་འདྲ། །དེ་ལྟར་

203-1-181a

ཆུ་ཡི་ཚད་བཤད་པ། །ཆ་ནི་ཅི་བཞིན་གཞག་པ་ཡིན། །རོ་སྟོད་ཀྱི་ནི་དཔངས་གང་ཡིན། །འོག་ནས་རྔོག་མཐའི་བར་དུ་གཞལ། །རོ་སྨད་མཇུག་དོའི་མཚམས་ནས་ནི། །འོག་ནས་སྟེང་དུ་དེ་བཞིན་གཞལ། །དེ་ལྟར་དཔངས་སུ་གཞལ་ནས་
ནི། །བསྟན་བཅོས་མཁས་པས་བྱ་བ་ཡིན། །རྔ་སྙིང་རྩ་ནས་མིག་ཟུར་གྱི། །བར་དུ་ཆུར་ནི་གཞལ་བར་བྱ། །དཔྱི་སྟེང་མཇུག་ཏོ་དཔྱི་མགུལ་དང་། །བརླ་དཔྱིའི་མཚམས་ནི་གང་ཡིན་པ། །མཆོག་དང་བར་མ་ཐ་མ་ལའང་། །ཕྲག་སོ་དང་ནི་མཉམ་པ་ཡིན། །རྗེ་ངར་དཔྱི་ཡི་
བ་ཧ་ལས། །སོར་གཅིག་གིས་ནི་ཆུང་བར་བཤད། །སྤུ་ར་པུས་མོའི་ཚད་ལས་ནི། །སོར་གཅིག་ལྷག་པར་ཤེས་པར་བྱ། །ཆིག་གྲང་ལ་སོགས་སྔར་བཤད་པ། །ཕྱི་རྐང་གི་ཡང་དེ་འདྲར་ལྡན། །ནས་རྒྱས་ཀྱི་ནི་ལྟོ་གཤིབས་པའི། །ཞེང་ནི་སོར་དུ་ཤེས་པར་བྱ། །
ལ་ལ་མཐེ་བོའི་ཚིགས་ཀྱི་ཞེང་། །སོར་ཡིན་པར་ནི་འཆད་པར་བྱེད། །གཞན་དག་སྐྱེས་བུ་རན་པ་ཡི། །ལག་སོར་གྱི་ནི་གུང་མོ་ཡི། །ཚིགས་ནི་དབུས་མའི་ནང་དག་ལ། །སོར་མིན་པར་ནི་འདོད་པ་ཡིན། །རྟ་གཞན་གང་དག་ཡོད་པ་དག །ཚད་འདི་ཡིས་སྣ་གཞལ་
བར་བྱ། །དེ་ལྟར་མཆོག་དང་བར་མ་དང་། །ཐ་མར་གྱུར་པའི་རྟ་གསུམ་ལ། །ཚད་ནི་རྣམ་པ་གསུམ་དག་གིས། །གཞལ་བར་འདི་ནི་བཤད་པ་ཡིན། །དེ་ལྟར་ཆུ་ཞེང་ཚད་ལྡན་པའི། །ལུས་དང་ལྡན་པ་གང་ཞིག་ཡིན། །ལུས་དང་འཚམ་པར་ཤ་རྒྱས་ཤིང་། །རྐང་པ་
སྲ་ལ་མཚན་དང་ལྡན། །ཡན་ལག་གསལ་ཞིང་མཉན་པ་དང་། །ལུས་སྙོམས་ཤ་ནི་མཁྲེགས་པ་དག །བཀྲ་ཤིས་དཔལ་སྐྱེད་དགེ་བ་དང་། །འདོད་པ་ཐམས་ཅད་སྦྱིན་བྱེད་ཡིན། །ཤ་ལི་ཧོ་ཏྲའི་མདོའི་གནས་ལས་ཚད་གཞལ་བའི་ལེའུ་སྟེ་བཅུ་གཅིག་པའོ།།      །།
དེ་ནས་གཞན་ཡང་ཡན་ལག་བཅུའི། །ཆ་ཡི་ལེའུ་བཤད་པར་བྱ། །དང་པོའི་གནས་ནི་དཔྲལ་བ་ཡིན། །མཐར་ཐུག་ཚད་དུ་བཤད་པ་ཡིན། །གཉིས་པ་དཔྲལ་བའི་སྟེང་གི་ནི། །གླད་པ་ལ་ནི་བརྟེན་པ་ཡིན། །གསུམ་པ་སྐེ་མགྲིན་ཕྲག་སོ་ཡི། །ལུས་ཀྱི་ཕྱོགས་ནི་ཡིན་

203-1-181b

པར་བཤད། །ནམ་ཚོང་ཟེའུའི་ལྟག་ཟེའུ། །དཔུང་མགོ་དེ་བཞིན་ཕྲག་སོ་དང་། །སོག་པའི་གནས་ནི་གང་ཡིན་པ། །བཞི་པ་དག་ནི་ཡིན་པར་འདོད། །ལུས་ཀྱི་རོ་སྟོད་ཆ་མཉམ་དང་། །དཔུང་སྣ་ལ་སོགས་ལྔ་པོ་ཡིན། །སྙིང་ག་ལག་འོག་རྩིབ་ལོགས་དང་། །སྒ་འོག་དང་
ནི་རྒྱབ་ཉིད་ནི། །རྟ་ཡི་གནས་ནི་དྲུག་པ་ཡིན། །སྒལ་ཚིགས་དང་ནི་ལྟོ་བ་དང་། །མཚན་གྱི་ཉེ་འཁོར་གང་ཡིན་དང་། །རྒྱུ་དང་མི་རྒྱུ་གང་ཡིན་རྣམས། །གནས་ནི་བདུན་པ་དག་ཏུ་བཤད། །ཨོང་དོའི་ཕྱོགས་ན་གང་ཡོད་དང་། །བརླ་གཉིས་དང་ནི་བཅས་པ་དག །དེ་
དག་གནས་ནི་བརྒྱད་པ་ཡིན། །དཔུང་པ་དཔུང་རྒྱབ་པུས་མོ་དང་། །རྐུབ་ཚོས་དཔྱི་མགུལ་དཔྱི་མཚམས་དང་། །རྗེ་ངར་དང་ནི་བཅས་པ་དང་། །གནས་ནི་དགུ་པ་ཡིན་པར་འདོད། །པུས་མོ་རྗེ་ངར་མན་ཆད་ནི། །གནས་ནི་བཅུ་པ་ཞེས་བྱའོ། །དགེ་བའམ་ཡང་ན་མི་དགེ་
བ། །ཐམས་ཅད་ཀྱང་ནི་མཚོན་པར་བྱ། །གནས་སྐབས་ཆ་ཡི་འབྲས་བུ་དག །དེ་ཡི་རྟག་ཏུ་བརྗོད་བྱ་མིན། །དེ་བཞིན་གནས་ཀྱི་དབྱེ་བ་ཡི། །རྟ་ཡི་ཚད་ལ་སོགས་པའང་བཤད། །གནས་ཤེས་པ་ཡི་གནས་རྣམས་ནི། །རྟོགས་པར་བྱས་ལའང་འབྲས་བུ་བརྗོད། །
ཚེ་དང་ན་ཚོད་ཆ་རྣམས་ནི། །གནས་ལས་ཤེས་པར་བྱས་ཏེ་བསྟན། །མཚན་ཉིད་ལྡན་ན་འབྲས་བུར་བཅས། །གོ་བཟློག་པ་ནི་འབྲས་བུ་མེད། །མཚན་ཉིད་གནས་ནི་འཁྲུག་པ་ལས། །འབྲས་བུ་ཁྱད་པར་འཕགས་པར་འགྱུར། །མདོག་དང་གཟི་མདངས་སྙིང་སྟོབས་དྲི། །
ཅི་བཞིན་དུས་སུ་འབྲས་བུ་སྟེར། །ལུས་ཀྱི་འགྲོས་དང་སྐད་དང་ནི། །རྟག་ཏུ་འབྲས་བུ་འབྱིན་པ་ཡིན། །ཐིག་ལེ་དང་ནི་གཙུག་གི་ནི། །གནས་སྐབས་ཆ་ནི་འདི་ལས་བྱུང་། །ཤ་ལི་ཧོ་ཏྲའི་མདོའི་གནས་ལས་ཡན་ལག་བཅུའི་ཆ་དབྱེ་བའི་ལེའུ་སྟེ་བཅུ་གཉིས་པའོ།།      །།
ལེགས་ཐོས་ཐོས་པ་ཕུན་ཚོགས་པས། །ཤ་ལི་ཧོ་ཏྲ་ལ་དྲིས་པ། །མི་སྡུག་ཅི་ལྟར་ཤེས་པར་གྱིས། །ཇི་བཞིན་སྡུག་པ་ཇི་ལྟ་བུ། །དམན་དང་དེ་བཞིན་མི་དམན་དང་། །ཡན་ལག་ཚང་དང་མི་ཚང་དང་། །གཞལ་བྱ་ཉིད་དང་གཞལ་མིན་དང་། །གསོ་སླ་གསོ་དཀའ་ཇི་ལྟ་བུ། །

203-1-182a

དེ་ལྟར་བུ་ཡིས་དྲིས་པ་དང་། །ཤ་ལི་ཧོ་ཏྲས་སླར་སྨྲས་པ། །སོ་སོའི་མཚན་ཉིད་ཅི་འདྲ་བ། །དེ་དག་ཁྱེད་ལ་བཤད་པར་བྱ། །གང་ཡང་ལུས་ཀྱི་དབྱིབས་ལེགས་ཤིང་། །རྩ་རྒྱུས་སྣང་བར་མི་འགྱུར་དང་། །ཆུ་ཞེང་ཚད་དང་ལྡན་པ་དང་། །ཤ་ནི་གནས་
དང་འཚམ་པར་སྐྱེས། །ལུས་སྙོམས་གསུས་པ་ཆུང་བ་དང་། །ཡིད་དང་མིག་ནི་དགའ་བྱེད་པ། །རོ་སྨད་མཉམ་ཞིང་ཟླུམ་པ་དང་། །མཛེས་ཤིང་དབྱིབས་ནི་ལེགས་གནས་དང་། །ཡན་ལག་ཉིང་ལག་རྫོགས་པ་དང་། །ཡན་ལག་ཀུན་གྱི་དབྱིབས་ལེགས་དང་། །ཉིང་ལག་
རྣམས་ནི་མི་སྡུག་དང་། །མགྱོགས་ཤིང་མཉམ་དང་ལྡན་པ་དང་། །དེས་ཤིང་སྟོབས་དང་ལྡན་པ་དང་། །ན་ཚོད་གཞོན་ཞིང་འགྲོས་ཆེ་དང་། །སྐེ་མགྲིན་ཕྲག་སོ་བྲང་གི་ཕྱོགས། །ཤ་རྒྱས་ཚད་དང་ལྡན་ལ་སོགས། །འདི་དག་གཞལ་བྱ་ཆ་མཉམ་དང་། །གསོ་སླ་མི་སྡུག་
མེད་པ་ཡིན། །དེ་ལས་བཟློག་པར་གྱུར་པའི་རྟ། །གཞལ་བྱའི་ལས་དག་མ་ཡིན་ནོ། །དེ་ལྟའི་མི་སྡུག་ལ་སོགས་དང་། །ལྡན་པའི་རྟ་ནི་གང་ཡིན་པ། །ཤིང་རྟ་ལམ་དང་ཁལ་དང་ནི། །རྩེད་མོའི་གནས་དང་གཡུལ་དག་ཏུ། །ལས་དང་འཚམ་པ་མ་ཡིན་པས། །དེ་ཕྱིར་
དེ་ནི་སྤང་བར་བྱ། །དེ་ཕྱིར་བཟང་པོ་ཤེས་བྱས་ལ། །དེ་ལྟའི་རྟ་ནི་བླང་བར་བྱ། །དེ་ལྟར་བླང་འོས་བླངས་ནས་ནི། །ལྷག་མ་སྤང་བྱ་རྣམ་པར་སྤང་། །ཚོང་པ་རྣམས་ལ་རྟ་དག་ནི། །བཟང་པོ་བླང་བར་གྱུར་པ་དང་། །སྤྲིས་མ་བཤུགས་པའི་ཞོ་ལྟ་བུར། །ལྷག་མ་
སྙིང་པོ་མེད་པ་ཡིན། །དེ་ལྟ་མོད་ཀྱི་བརྩེ་བ་ཡིས། །སྤང་བྱ་དེ་ཡང་ཚོང་པ་དང་། །རྟ་ལ་བརྩེ་བར་བྱ་བའི་ཕྱིར། །བླངས་ཏེ་སྦྱིན་པ་གཏང་བར་བྱ། །མཚན་ནི་ངན་པར་གྱུར་ན་ཡང་། །མགྱོགས་ཤིང་རིགས་དང་ན་ཚོད་ལྡན། །རྒྱལ་པོས་ལྷག་གང་རྣམས་
དང་ནི། །བྲམ་ཟེ་ལ་ནི་སྦྱིན་པར་བྱ། །མ་ནིང་རྒན་དང་ནད་ཀྱིས་ཉེན། །ཉེ་འཁོར་གནས་པའི་མི་ལ་སྦྱིན། །རླིག་པ་མེད་དང་རླིག་གཅིག་པ། །རླིག་སེར་དང་ནི་ལུས་སྐེམས་དང་། །ཡན་ལག་མ་ཚང་གྱུར་པ་དག །ཉུང་རུམ་ལ་སོགས་རྣམས་ལ་

203-1-182b

སྦྱིན། །གཡུལ་དུ་འཇུག་པར་མི་ནུས་པ། །གར་མཁན་དང་ནི་གླུ་མཁན་དང་། །འཁྲུས་མཁན་དང་ནི་འདྲེག་མཁན་དང་། །དེ་འདྲའི་ཚུལ་ལྡན་དག་ལ་སྦྱིན། །དེ་ལ་ཤིན་ཏུ་མི་སྡུག་པ། །ཤིན་ཏུ་བཟང་བ་མི་སྦྱིན་ནོ། །ཤུ་ལ་ཀ་དང་གཟུགས་མི་སྡུག །སོ་མི་སྡུག་དང་མི་
སྲུན་པ། །ཉེ་འཁོར་ཀྱི་ནི་ཕོ་ཉ་སོགས། །དྲག་ཤུལ་བྱེད་པ་རྣམས་ལ་སྦྱིན། །འགྲོས་ཆུང་བ་དང་སྦེགས་པ་དང་། །རྐང་ངན་གླས་ཀྱི་ནང་མིར་སྦྱིན། །རྟ་ལ་གདུག་པར་གྱུར་པ་ནི། །མཚམས་སྲུང་མཐའ་འཁོབ་པ་དག་དང་། །ཉེས་པ་ཆེར་བསྟེན་དག་ལ་སྦྱིན། །རང་གི་
ཡུལ་དུ་དེ་མི་གཞག །དེ་རྣམས་རྟོག་ལ་མཁས་པ་ནི། །རྒྱལ་པོའི་དྲུང་དུ་རྟག་པར་གཞག །དེ་ལྟར་རྟ་ནི་རྣམ་ཕྱེ་ན། །རྒྱལ་པོའི་འབྱོར་པ་འཕེལ་འགྱུར་ཞིང་། །ཡིད་ནི་དགའ་ཞིང་མགུ་བ་དང་། །གཡུལ་དང་དགྲ་ལས་རྒྱལ་བར་འགྱུར། །ཤ་ལི་ཧོ་ཏྲའི་མདོའི་གནས་ལས་སྡུག་
པ་དང་མི་སྡུག་པ་རྣམ་པར་ཕྱེ་བའི་ལེའུ་སྟེ་བཅུ་གསུམ་པའོ།།      །།ཉི་མ་འཆར་ཀ་འདྲ་བ་ཡི། །དྲང་སྲོང་ཕ་ལ་ཕྱག་བྱས་ཏེ། །ལེགས་ཐོས་ཀྱིས་ནི་ཟས་ཀྱི་ཚད། །རྣམ་པར་བརྟག་པ་དྲིས་གྱུར་པ། །ལེགས་ལྡན་མི་ལ་ཟས་ཀྱི་ཚད། །བཤད་ཀྱིས་རྟ་ལ་ཅི་ཞིག་འཚལ། །
ཕྱུགས་རྣམས་དང་ནི་ཁྱད་པར་དུ། །རྟ་ལ་དེ་གསོ་མ་མཆིས་ཏེ། །དེ་རྣམས་དབུགས་འབྱིན་ཙམ་གྱིས་ནི། །ཟོས་ཤིང་བཅས་པ་འཇུ་གྱུར་ལ། །ཕྱུགས་ནི་ལྟོ་བར་གྲགས་པས་ན། །དེ་ལ་ཚད་ནི་ཅི་ཞིག་བག་བགྱི། །དེ་སྐད་ལེགས་ཐོས་ཀྱིས་སྨྲས་ཚེ། །ཤ་ལི་ཧོ་ཏྲས་སླར་སྨྲས་པ། །
བློ་གྲོས་བཟང་པོ་ནན་ཏན་དུ། །ཤིན་ཏུ་འདྲངས་ཀྱང་ཚད་ཙམ་དུ། །བྱིན་ན་དགའ་བ་སྐྱེད་བྱེད་ཅིང་། །ཚོད་ཟིན་དུག་ཀྱང་བདུད་རྩིར་འགྱུར། །ཚོད་མ་ཟིན་ན་བདུད་རྩིས་ཀྱང་། །གསོད་པར་འགྱུར་བ་ཉིད་ཡིན་ནོ། །བདེ་ཞིང་གསོ་ལ་འཚོ་བྱེད་པས། །ཚོད་ཟིན་འཇིག་རྟེན་མ་དང་
འདྲ། །དེ་མེད་སྲོག་མཐའི་འཇིགས་བསྐྱེད་ལ། །དེ་དང་ལྡན་ན་གནས་མཆོག་འགྱུར། །རྟ་ནི་མང་དུ་ཟ་བས་ན། །ཚད་ཀྱི་དགོས་པ་བདེན་མོད་ཀྱི། །སྨན་དང་ཟས་སྐོམ་ཆོ་ག་ནི། །འགྲོ་ངན་བོང་བུ་ལ་ཡང་དགོས། །ཚོད་མ་ཟིན་ན་སྨན་གྱིས་ཀྱང་། །ནད་གཞན་སྐྱེད་པར་འགྱུར་

203-1-183a

ཡིན་ལ། །ཚོད་དང་ལྡན་པ་བྱས་པ་ཡིས། །དུག་གིས་ཀྱང་ནི་ནད་འཇོམས་སོ། །རྫས་དང་འཇུ་སྟོབས་རྫས་ཅི་ཡང་། །ཚད་ནི་རྣམ་པ་གསུམ་ལ་འཇུག །སྙིང་དགའ་ཤུགས་ནི་མ་བཀག་དང་། །ལྟོ་ལ་ཤིན་ཏུ་མི་གནོད་དང་། །རྩིབ་ལོགས་རྣམས་
ནི་བདེ་བ་དང་། །གསུས་པ་ཚིམ་པར་མ་གྱུར་ལ། །བཀྲེས་དང་སྐོམ་ནི་ཞི་བ་དང་། །དབང་པོ་རྣམས་ནི་ཚིམ་པ་དང་། །དབུགས་རྔུབ་དབུགས་དབྱུང་བདེ་བ་དང་། །གཉིད་ནི་བདེ་བར་ལོག་བྱེད་དང་། །སྟོབས་དང་ཁ་དོག་འཕེལ་བྱེད་དང་། །བདེ་བར་འཇུ་བར་འགྱུར་བ་དང་། །
ལུས་གཟུངས་འཁྲུག་པར་མི་བྱེད་པ། །ཚོད་ཟིན་ཟོས་པ་ཡིན་པར་བཤད། །ཁ་ཟས་ལྕི་བས་ལྟོ་བ་ཡི། །ཕྱེད་དམ་སུམ་ཆ་བཀང་བ་བསྔགས། །ཁ་ཟས་ཤིན་ཏུ་ཡང་བ་ཡང་། །ཤིན་ཏུ་འདྲངས་པར་མི་སྦྱིན་ནོ། །དེ་ལྟར་ཚད་ལས་ཚད་མིན་པར། །ལྷག་པའམ་ཆུང་བར་གྱུར་
པ་ནི། །སྟོབས་དང་སྙིང་སྟོབས་བློ་དང་ནི། །མདོག་དང་དབང་པོ་ལ་གནོད་བྱེད། །རླུང་ནི་འགགས་པའམ་སྦྱོར་བར་བྱེད། །ནད་སྐྱེད་བྱེད་པའི་མཆོག་ཡིན་ལ། །རོ་མི་ཙ་ཞིང་ཚེ་ཐུང་དང་། །མདངས་མེད་བཀྲ་མི་ཤིས་པར་འགྱུར། །དེ་བས་རྟ་རྣམས་ལོག་པ་ཡི། །
ཟས་ལ་སྤྱོད་ལམ་བཟློག་པར་བྱ། །འདྲངས་དྲགས་པར་ནི་གྱུར་པ་ལས། །ནད་གཞི་ཐམས་ཅད་འཁྲུག་བྱེད་ཅིང་། །གསུད་དང་ཕོ་བའི་ནང་སྐྱེས་པས། །རྟ་ནི་དེ་ལས་བཟློག་པར་བྱ། །ཇི་ཙམ་གྱིས་ནི་ལྟོ་བའི་མེ། །འབར་གྱུར་དེ་ཙམ་སྦྱིན་པར་བྱ། །ཚད་མི་ལྡན་པར་བྱིན་
པ་ཡིས། །ཡང་ན་དྲགས་པའམ་ཆུང་བར་འགྱུར། །རྫས་ནི་ཆུ་སྐྱེས་རླན་ཅན་དང་། །སྐམ་པར་སྐྱེ་སྟེ་གསུམ་དུ་འདོད། །དེ་དག་ཚད་མི་ལྡན་པར་ནི། །བཟའ་བའི་བྱ་བའང་ཐ་དད་དོ། །མར་དང་སྦྲང་རྩི་མཉམ་ཟས་སོགས། །ཚད་མི་ལྡན་དང་འདྲ་བ་ཡི། །ཟས་ཀྱི་
སྨོས་ཀྱི་སྐོམ་མམ་ནི། །སྣུམ་མམ་རྩྭ་ཡི་ཚོད་དང་ནི། །གྲང་ལྷགས་འདྲེན་པ་དྲགས་པས་ཀྱང་། །ཚད་མི་ལྡན་པར་གནོད་པ་སྐྱེད། །དེ་བས་སྤྱི་དང་ཁྱད་པར་གྱི། །ཚད་ནི་ང་ཡིས་བཤད་པར་བྱ། །འོལ་མ་སེ་བཞི་མ་ཤ་བཞི། །དེ་བཞི་ལ་ནི་ཤ་ན་སྟེ། །དེ་

203-1-183b

བཞི་ལ་ནི་སུ་བ་སྣ། །དེ་ཉིད་ཞོ་གཉིས་ཞེས་བྱའོ། །དེ་བཞི་ལ་ནི་སྲང་གཅིག་སྟེ། །དེ་བཞི་ལ་ནི་ཕུལ་དུ་བཤད། །ཕུལ་བཞི་ལ་ནི་བྲེ་གང་ཡིན། །དེ་བཞི་ལ་ནི་བྲེ་བཞི་སྟེ། །དེ་བཞི་ལ་ནི་དྲོ་ན་ཡིན། །འདི་ནི་སྤྱི་ཡི་ཚད་ཡིན་ལ། །གཤེར་རྫས་ལ་ནི་ཉིས་
འགྱུར་བྱ། །སྣུམ་ནི་ཚད་ཀྱི་ཕྱེད་དུ་བྱ། །ཨཀྵ་ལག་པའི་མཐིལ་ལ་སོགས། །ཞོ་གཉིས་ཀྱི་ནི་མིང་ཡིན་ནོ། །སྲང་ཕྱེད་མིང་ནི་ཨ་སྨུར་བཅས། །སྲང་གཅིག་ཨུ་དུམྺཱ་རར་བཤད། །སྲང་གཉིས་ཁྱོར་གང་ཞེས་བྱར་བཤད། །དེ་གཉིས་ལ་ནི་གཉིས་པར་བཤད། །
དེ་ལ་རྩྭ་སྐམ་དག་ལས་སྲང་། །བརྒྱད་བརྒྱ་ཏ་ལ་རན་པ་ཡིན། །རློན་པ་དེའི་འདབ་སྙེ་མར་བཅས། །བཞི་བརྒྱ་ཉིན་མཚན་གཅིག་ལ་རན། །ཐུག་སོགས་ལ་ནི་བྲེ་བཞི་ཙམ། །བཟའ་སྐམ་བྲེ་ནི་ཕྱེ་དང་གཉིས། །སྣུམ་ལས་ཕུལ་གང་བཏུང་བ་ནི། །བྲེ་གང་སྦྱིན་པར་ཤེས་
པར་བྱ། །སྦྲང་རྩི་ལས་ནི་ཕུལ་གང་སྦྱིན། །བུ་རམ་ལས་ནི་སྲང་བརྒྱད་སྦྱིན། །ཧྭགས་དང་ཁ་ར་གང་ཡིན་པ། །སྲང་ནི་བཅུ་ཡི་ཚད་དུ་སྦྱིན། །སྣ་སྨན་ཁུ་བ་ཕུལ་གང་སྟེ། །སྣུམ་གྱི་སྣ་སྨན་དེ་ཡི་ཕྱེད། །དུ་བས་བདུག་ལ་ཞོ་དྲུག་སྟེ། །དུ་བ་དྲག་པོ་ཞོ་གཉིས་ཚད། །
སྨན་ཁའི་གོང་བུ་སྲང་བཞི་དག །བད་ཀན་ནད་ལ་སྦྱིན་པར་བྱ། །རྟ་ལ་དགོངས་ཀ་བཏུང་བར་ནི། །ཆང་ནི་བྲེ་གང་བླུད་པར་བྱ། །རྟ་རྣམས་ལ་ནི་ཕྱེ་མའི་སྨན། །བཏགས་པ་སྲང་གཉིས་སྦྱིན་པར་བྱ། །ཟས་དང་སྣུམ་ནི་མཉམ་བྱིན་ཚེ། །སྐོམ་དུ་ཆང་ནི་བླུད་པར་བྱ། །
རྟ་ལ་ལན་ཚྭ་སྲང་ལྔ་ཡི། །ཚད་དུ་རབ་ཏུ་སྦྱིན་པར་བྱ། །ལུས་ཀུན་བསྐུ་བྱུག་བྱ་བ་ཡང་། །སྣུམ་ནི་བྲེ་དང་སྦྱར་བར་བྱ། །རྣ་བཀང་ལ་ཡང་སྣུམ་དག་ནི། །སྲང་གཉིས་ཉེ་བར་གཞུག་པར་བྱ། །བསྐུ་བའི་སྣུམ་ལ་སྨན་ལས་ནི། །སྲང་བརྒྱ་ཕྱེ་མར་བཏགས་པ་གཞུག ། 
ཕྱེ་ལས་བྲེ་ནི་དོ་དག་དང་། །དེ་རུ་བུ་རམ་སྲང་བརྒྱད་གཞུག །མར་ལས་ཕུལ་དོ་བསྲེས་པ་ཡི། །སྐྱོ་མ་དག་ནི་སྦྱིན་པར་བྱ། །ཆུ་སྐྱེས་ཤ་ནི་སྲང་ལྔ་བཅུ། །རླན་ཅན་ཤ་ནི་སྲང་བདུན་ཅུ། །སྐམ་པའི་ཤ་ནི་སྲང་དགུ་བཅུ། །ཤ་ཡི་ཁ་ཟས་ཚད་ཡིན་ནོ། །ཁྲག་བྲེ་དོ་ལ་རྒྱམ་

203-1-184a

ཚ་ནི། །སྲང་གཉིས་ཉེ་བར་གཞུག་བྱ་ཞིང་། །སྣུམ་ཡང་སྲང་གཉིས་བཅུག་པ་ནི། །ཁྲག་ཟད་པ་ལ་སྦྱིན་པར་བྱ། །མས་གཏོང་བ་ལ་བྲེ་གང་ཙམ། །དུམ་བུ་གསུམ་དུ་བྱས་ཏེ་གཏོང་། །བཏགས་པ་ལས་ནི་སྲང་གསུམ་ཙམ། །སྲང་རེ་རུ་ནི་
བཅད་དེ་གཏོང་། །འཇམ་རྩི་ཕུལ་བཞི་གཏང་བར་བྱ། །འཇམ་རྩིའི་གོང་མ་ཕུལ་གང་གཏོང་། །མར་ལ་འཇམ་རྩི་གཏོང་བ་ནི། །ཕུལ་དོ་དག་ནི་བྱ་བར་བཤད། །སྨན་ནི་སྲང་བཞིའི་ཚད་དག་ནི། །ཆུ་སྲང་སུམ་ཅུ་རྩ་གཉིས་བསྐོལ། །བཞི་ཆ་ལུས་པར་བྱས་པ་
དག །འདི་ཡི་སྨན་ཁུ་ཡིན་པར་བཤད། །ཆུ་སྨན་བཅུ་དྲུག་འགྱུར་ནང་དུ། །བསྐོལ་བའི་སྨན་ནི་སྲང་བརྒྱ་གཞུག །སྣུམ་ཡང་སྲང་བརྒྱ་བཅུག་ནས་ནི། །བཞི་ཆ་ཆ་གསུམ་བསྲུབ་པར་བྱ། །དེར་ནི་སྣུམ་གྱི་བཞི་ཆ་ཡི། །སྨན་ཕྱེ་བཅུག་ལ་ལྡེ་གུར་བྱ། །དེ་ལ་
ཤ་ཁུ་འོ་མ་ནི། །ཆུ་ཡི་བཞི་ཆ་གཞུག་པར་བྱ། །བསྐོལ་ཆུ་སྨན་དང་སྦྱར་བ་ཡང་། །ཞག་ལོན་པ་ནི་སྦང་བར་བྱ། །བུ་རམ་བསིལ་དུ་འདོད་པ་དང་། །བསྲེགས་ན་སྒྲ་མི་འབྱུང་བ་ཡི། །མཚན་མ་དེ་དང་དང་བར་ནི། །སྣང་ན་ཐོབ་ལ་དབོག་པར་བྱ། །དེ་ནི་ཚོས་
པ་ཡིན་པའི་ཕྱིར། །སྣུམ་དེ་སླར་ནི་དབབ་པར་བྱ། །དེ་ནི་བཙགས་པར་གྱུར་ན་ནི། །ཡོན་ཏན་ལྷག་པར་འགྱུར་བ་ཡིན། །སྣུམ་ཞིང་དང་བར་འགྱུར་བ་དང་། །གསལ་བར་གྱུར་ན་མཁས་པ་ཡིས། །སྣུམ་དེ་མདོག་ནི་ཕྱིན་པའི་ཕྱིར། །ཚོས་པ་ཡིན་པར་ཤེས་
པར་བྱ། །དེ་འདྲ་ནད་ཀུན་འཇོམས་བྱེད་ཡིན། །མ་ཚོས་ཆུ་དང་འདྲེས་པ་དང་། །ཚོས་དྲགས་ནག་པོར་གྱུར་པ་ནི། །ནད་ཀུན་འཁྲུགས་པར་བྱེད་པ་ཡིན། །རྨ་དང་སྣ་སྨན་འཇམ་རྩི་ལ། །འཇམ་པར་ཚོས་པ་གཏང་བར་བྱ། །བསྐུ་ལ་ཚོས་དྲགས་བཏུང་བ་ལ། །བར་
མ་ཙམ་ནི་བསྔགས་པ་ཡིན། །མ་ཚོས་སྣུམ་ནི་ནད་སྐྱེད་ལ། །ཚོས་དྲགས་ཕན་པ་མེད་པ་ཡིན། །ལེགས་པར་ཚོས་པའི་སྣུམ་དག་ནི། །རྟ་ཡི་ནད་ནི་འཇིག་བྱེད་ཡིན། །རླུང་མཁྲིས་བད་ཀན་སེལ་བའི་སྣུམ། །བཏུང་དང་བསྐུ་དང་སྣ་སྨན་དང་། །རྨ་དང་འཇམ་རྩི་

203-1-184b

ལས་རྣམས་ཏེ། །རྣམ་པ་ལྔ་ལ་གཏང་བར་བྱ། །ཚད་འདི་དག་ནི་རྟ་རྣམས་ལས། །མཆོག་གི་ཡིན་པར་ཤེས་པར་བྱ། །བར་མ་ལ་ནི་བཞི་ཆ་དབྲི། །ཐ་མ་ལ་ནི་ཕྱེད་དབྲིའོ། །སོ་སོའི་ཟས་སྐོམ་ཆོ་ག་དང་། །སུམ་གྱི་ཆོ་ག་ཐ་དད་པས། །ནད་རྣམས་ཞི་བ་ཉིད་
འགྱུར་གྱི། །ཀུན་ལ་གཅིག་ནི་བསྔགས་མ་ཡིན། །ཨུཏྤ་ལ་ནི་ཁ་འབྱེད་པ། །ཟླ་བའི་འོད་ཟེར་ཉིད་ཡིན་ལ། །ཉི་མའི་ཟེར་གྱིས་པདྨ་ནི། །ཁ་འབྱེད་པར་ནི་སྣང་བ་ཡིན། །ཚད་ནི་མེ་སྟོབས་ལས་ཤེས་བྱ། །ཇི་དགའ་སྦྱིན་པར་མི་བྱའོ། །མེ་དྲོད་དེ་ཡང་
རྣམ་བཞི་སྟེ། །རྣོ་རྟུལ་མཉམ་དང་མི་མཉམ་པའོ། །རྣོ་བས་ཤིན་ཏུ་མྱུར་དུ་འཇུ། །རྟུལ་བས་དཀའ་བས་འཇུ་བ་ཡིན། །མ་སྙོམས་པས་ནི་འཇུ་མི་སྙོམས། །སྙོམས་པས་འཇུ་བ་སྙོམས་པ་ཡིན། །མེ་དྲོད་རྟུལ་བས་གཟི་མདངས་མདོག །དང་པོ་དང་ནི་
འགྲོས་ཞན་འགྱུར། །མེ་དྲོད་རྣོ་བས་དེ་རྣམས་དང་། །ལྡན་ཞིང་ནད་ནི་ཉུང་བར་འགྱུར། །མེ་དྲོད་སྙོམས་པས་སྙིང་སྟོབས་མདོག །ནད་མེད་འགྲོས་དང་སྐད་དང་ནི། །དབང་པོ་བདེ་ལྡན་ནད་མེད་འགྱུར། །མེ་དྲོད་མི་སྙོམས་སྐད་དང་མདོག །སྟོབས་ཆུང་
ནད་ནི་མང་བ་དང་། །བདེ་བ་མེད་པར་འགྱུར་རོ་ཞེས། །ཤ་ལི་ཧོ་ཏྲ་ས་རྗེས་སུ་བསྟན། །ཤ་ལི་ཧོ་ཏྲའི་མདོའི་གནས་ལས་ཚད་ཀྱི་ལེའུ་སྟེ་བཅུ་བཞི་པའོ།།      །།རྟ་བྲེས་ལ་ནི་ལེགས་གནས་པའི། །དྲང་སྲོང་ཆེན་པོ་དབང་པོ་ཐུལ། །མེ་ལ་སྦྱིན་
སྲེག་བྱེད་བརྩོན་ལ། །ལེགས་ཐོས་ལ་སོགས་ཀྱིས་དྲིས་པ། །ཚོད་ཤིས་གང་གི་དོན་འགྱུར་ཞིང་། །གང་གི་ཡོན་ཏན་སྐྱོན་བཤད་པ། །དེ་ཡི་ཟས་ཀྱི་བྱ་བ་ནི། །ལུས་དང་དེས་འབྲེལ་བཀའ་སྩོལ་ཅིག །དེ་སྐད་ཤ་ལི་ཧོ་ཏྲ་ལ། །དྲང་སྲོང་དམ་པ་བུས་
དྲིས་ཚེ། །ཟས་ཀྱི་སྦྱོར་བ་དྲང་སྲོང་ཆེ། །མདངས་དང་ལྡན་པས་སླར་སྨྲས་པ། །ཟས་ཀྱི་སྦྱོར་བས་ཁ་དོག་མདངས། །མགྱོགས་མཛེས་སྙིང་སྟོབས་དྲན་པ་དང་། །འདྲངས་དང་སེམས་ནི་དགའ་བ་དང་། །ན་ཚོད་ལ་ནི་འཇོག་པ་ཡིན། །ལ་ལ་འཚམ་དང་མི་

203-1-185a

འཚམ་དང་། །ཟས་ཀྱི་སྦྱོར་བས་བདེ་འགྱུར་བའི། །སྦྱོར་བའི་ཆོ་ག་བཤད་པར་བྱ། །བཤད་པ་དེ་ནི་མཉན་པར་གྱིས། །མེ་དྲོད་ཆུང་དང་ཡིད་མི་བདེ། །ལྟོ་བ་ན་དང་དབུགས་མི་བདེ། །དུབ་ཅིང་ཁལ་གྱིས་ཉན་པ་དང་། །དུག་འཐུངས་པ་དང་སྐམས་པ་
དང་། །ལམ་འགྲོ་མཚན་ནི་མི་ལྡང་དང་། །དུབ་ལའང་ཁ་ཟས་མི་སྦྱིན་ནོ། །སྟོབས་ལྡན་ལྕི་བའི་ཁ་ཟས་ནི། །དེ་ལ་སྦྱིན་པར་མི་བྱའོ། །ལམ་གྱིས་ཉམ་ཆུང་གྱུར་སྟོབས་བྲི། །རྒན་དང་རབ་གཞོན་དབང་ཉམ་ཆུང་། །རྩ་དང་འབྲས་དང་གློ་གཅོང་ཅན། །ཟས་སྦྱོར་རྟག་ཏུ་
བྱ་བར་རིགས། །གང་ཚེ་ཕྱི་དྲོའི་དུས་སུ་ནི། །སྐྱེས་བུ་གསུམ་པོའི་གྲིབ་མ་ལྷགས། །ཅུང་ཟད་ལྷག་པའམ་མ་ཚང་བའམ། །ཟས་སྦྱོར་བྱ་བའི་དུས་ཡིན་ནོ། །འབྲས་བྲེ་གང་ནི་ལེགས་བཙོས་ལ། །དེ་རྗེས་ཚ་དང་བསྲེ་བར་དང་། །སྣུམ་དང་ལྡན་པར་བྱས་པ་ནི། །བྱིན་ན་
ལེགས་པར་འཇུ་བར་འགྱུར། །དང་པོར་སྣུམ་དང་ལྡན་པ་ཡི། །རྗེས་ལ་ལན་ཚྭར་ལྡན་པ་དང་། །ཟས་སྦྱོར་འདི་ནི་སྐོམ་དད་དག །མི་སྐྱེད་ལེགས་པར་འཇུ་བར་འགྱུར། །ཞོ་དང་ཀུ་ལདྠའི་ཁུ་བ། །ཆང་དང་སྦྲང་རྩི་ཀཉྫི་དང་། །ཏིལ་མར་བསྲེས་པས་མཉེན་བྱ་མིན། །
ཁུ་བ་གཞན་དང་བསྲེ་མི་བྱ། །ཀཉྫི་དང་ནི་ཤ་ཁུ་འམ། །འོ་མའམ་ཡང་ན་ཧྭགས་དང་ནི། །འདི་དག་མཉེ་བ་སྦྱིན་བྱ་ཞིང་། །ཡང་ན་ཏིལ་མར་སྦྱར་བའང་རུང་། །ཞག་དང་ཏིལ་མར་མར་སྦྱར་བ། །གསུམ་པོ་སྦྱར་བ་ཞེས་བྱ་བའང་བསྐུ། །དེ་ལ་ཤ་ཁུ་མཆོག་ཡིན་ཏེ། །དེ་དང་ཉེ་
བར་བྱ་བ་ཡི། །ནས་དང་མ་ཤ་གྲོ་དང་ནི། །དྲུག་ཅུ་པ་ཡི་སྦྱོར་བ་གང་། །དེ་ནི་འོ་མའམ་སྦྲང་རྩིའམ། །མར་དང་སྦྱར་བས་མཉེ་བར་བྱ། །འདི་དག་དང་ནི་མཉེ་བའི་ཚེ། །དེ་རུ་ལན་ཚྭ་གཞུག་མི་བྱ། །རླུང་དང་བད་ཀན་གྱིས་ཉེན་དང་། །རྟ་ཡི་སྣུམ་མང་འཐུངས་པ་དང་། །
མེ་དྲོད་ཆུང་དང་མི་སྙམས་དང་། །སྦེགས་ལ་ལན་ཚྭར་བཅས་པ་གཏང་། །མཉེ་བའི་སྦྱོར་བ་བྱ་བ་དང་། །ཆང་དང་ཆང་སྙིང་ཞོ་ག་ཆུས། །ལྟོ་བའི་མ་ཞུ་རྣམ་སྦྱང་ཞིང་། །ཁ་ཆུའི་རྒྱུན་ནི་འཛག་པར་བྱ། །ཁོང་པའི་སྲིན་བུ་ཡོད་པ་ལ། །བ་གཅིན་དང་སྦྱར་སྦྱིན་པར་བྱ། །གང་

203-1-185b

ཞིག་རྒན་དང་ལུད་པ་ཅན། །དེ་ལ་ཁ་ཟས་སྐམ་མི་སྦྱིན། །དེ་ལྟ་བུ་ལ་སྣུམ་དང་ནི། །བཅས་པའི་ཟས་ཀྱི་སྦྱོར་བ་བྱ། །རྟ་ལ་ཟས་ནི་སྦྱིན་པ་ནི། །མགོ་བོ་གྱེན་དུ་ལེགས་བསྟན་ནས། །ཟས་ནི་ཁམ་རེ་བཅད་ནས་ནི། །མྱུར་མིན་འགོར་བ་མེད་པར་སྦྱིན། །ནས་ཐུག་མར་དང་
ལྡན་པའམ། །ཡང་ན་ཆག་ཚེ་མར་གྱིས་སྦངས། །རྟ་རྣམས་རྟས་བྱེད་དམ་པ་ཡིན། །མཁྲིས་པ་ཅན་ལ་མཆོག་ཏུ་ཕན། །ཆག་ཚེ་ནས་ཐུག་སྣུམ་མེད་པ། །ལན་ཚྭ་དང་ནི་ལྡན་པ་རུ། །བཅའ་ལྒ་བཏབ་པར་གྱུར་པ་ནི། །བད་ཀན་ཅན་ལ་སྦྱིན་པར་བྱ། །རྒྱམ་ཚ་དང་
ནི་བཅས་པ་དང་། །མ་ཤ་རི་ལ་མར་བཅུག་པ། །རླུང་ནད་ཅན་ལ་ཕན་མོད་ཀྱི། །དེ་ལས་མཁྲིས་པ་སྐྱེ་བ་བསྲུང་། །ཤ་རྣམས་སྣ་ཚོགས་དག་དང་ནི། །བད་ཀན་ཅན་ལ་ཆང་བླུད་ཅིང་། །མཁྲིས་པ་ཅན་ལ་འོ་མ་བླུད། །རླུང་ནད་ཅན་ལ་ཤ་ཁུ་སྦྱིན། །མཁྲིས་པ་
ཅན་ལ་རབ་བསིལ་བ། །རླུང་ནད་ཅན་ལ་དྲོ་འཇམ་ཙམ། །ཅུང་ཟད་དྲོ་འཇམ་བད་ཀན་ཅན། །ཟས་དང་སྐོམ་ནི་སྦྱིན་པར་བྱ། །རྒུད་ཅིང་སྣུམ་ནི་མེད་པ་དང་། །ཡང་ཤིང་ཚད་ལས་ཆུང་བ་ནི། །བད་ཀན་ཅན་ལ་སྦྱིན་བྱ་ཡི། །ཁ་ཟས་སྣུམ་པའང་མི་སྦྱིན་ནོ། །ཆུ་དྲོན་
གྱིས་ནི་ཁ་བཀྲུས་ལ། །ཁ་འགྲམ་ལེགས་པར་བལྟས་ནས་ནི། །མཉེས་ལ་སྣ་སྨན་བཏང་ནས་ནི། །དེ་ཡི་འོག་ཏུ་འདྲེ་རུ་གཞུག །དེ་ཡི་མོད་ལ་རྩྭ་མི་སྦྱིན། །ཁྱད་པར་དུ་ནི་སྔོ་མི་སྦྱིན། །དེ་ཚེ་ལམ་འགྲོ་དུབ་པའམ། །ཆུ་རྒལ་བ་ནི་བསྔགས་མ་ཡིན། །ཟས་སྦྱིན་
འོག་ཏུ་བཏུང་བ་ནི། །ཆུ་བྲེ་ཕྱེད་ནི་བླུད་པར་བྱ། །དེས་ནི་དྲོད་སྐྱེད་ནད་གཞི་སེལ། །ལེགས་པར་འཇུ་བར་བྱེད་པ་ཡིན། །མགྱོགས་ཤིང་སྟོབས་དང་ལྡན་པ་དང་། །ཤ་མཁྲེགས་དབང་པོ་བརྟན་པ་དང་། །ཁལ་དང་ཁུར་ལ་སྲན་ཆེ་བར། །ཟས་དེ་ཡིས་ནི་འགྱུར་བ་
ཡིན། །རྙིང་དང་འབུ་ཡིས་ཟོས་པ་དང་། །ཚིག་དང་དུ་བས་ཁྱེར་བ་དང་། །གཡུལ་སར་ཆར་གྱིས་ཉེན་པ་ཡི། །རྩྭ་ནི་རྟ་ལ་མི་བསྔགས་སོ། །སྐྱོན་མེད་པ་ནི་ནས་བས་ཀྱང་། །ཡི་གར་འོང་ཞིང་ཟོས་པས་སྲེད། །དེ་ནས་རྟ་ཡི་འཚོ་བ་ནི། །རྩྭ་ཡིས་ངེས་པར་

203-1-186a

བསྡུས་པ་ཡིན། །ལྗང་པ་དགའ་ཞིང་ཡི་གང་འོང་། །མེ་དྲོད་གཟི་མདངས་སྲེད་འཕེལ་བྱེད། །དེ་ཕྱིར་རྟ་ཡི་ལྗང་པ་ཡིན། །ཟོས་ན་དེ་འདྲར་འགྱུར་བ་ཡིན། །ལྗང་པ་ཚད་ལྡན་བྱིན་ན་ནི། །ནད་རྣམས་སྐྱེ་བར་མི་འགྱུར་ཞིང་། །རིགས་པར་ལྗང་པ་
བྱིན་པ་ཡིས། །སྐྱེས་ཟིན་ནད་ཀྱང་འཇུ་བར་འགྱུར། །བོང་ང་སྤུ་ཤེལ་ཚ་བ་གསུམ། །བྱི་དང་ག་དང་དུག་མོ་ཉུང་། །འབྲས་བཏགས་ཆང་དང་སྦྱར་བ་ནི། །མདོག་དང་ཚེ་ནི་འཕེལ་བྱེད་མཆོག །འོ་མ་མར་དང་མ་ཤར་བཅས། །ཏིལ་བཏགས་སྦྱར་བ་ཞོ་ཅན་ཡིན། །
མ་ཤའི་ཕྱེ་ལ་ལན་ཚྭར་བཅས། །སྟོབས་སྐྱེད་བྱེད་པ་གཞན་དག་གམ། །སཱ་ལུའི་ཕྱེ་མའང་སྦྲང་རྩིར་བཅས། །བི་ད་རི་དང་ལྡན་པ་ནི། །འོ་མར་སྦྱར་བ་ཞག་གསུམ་བྱིན། །སྟོབས་དང་ཁ་དོག་འཕེལ་བྱེད་ཡིན། །ཞོ་དང་སྐྱུར་རྫས་ལན་ཚྭ་དང་། །མར་དང་བཅས་
པར་དཀྲུགས་པ་ནི། །ནས་དང་སྦྱར་བྱིན་ལུས་ཟུངས་བཟང་། །སྟོབས་དང་ཁ་དོག་སྐྱེད་བྱེད་ཡིན། །སྐམས་དང་ཆུ་ལ་རྐྱལ་བ་དང་། །རྩྭ་ནི་སྔོན་པོ་དག་དང་ནི། །གང་ཞིག་ཁ་ཟས་མངར་བ་དང་། །མར་ལ་སོགས་དང་སྦྱར་བ་དང་། །ཤ་ལ་སོགས་བཅས་
བསིལ་བ་སྟེ། །དྲུག་པོ་འཕྲལ་དུ་སྲོག་སྟེར་ཡིན། །འབྲོག་ཏུ་རྩྭ་ནི་སྣ་ཚོགས་ལས། །རྩྭ་གཅིག་ལ་ནི་སྲེད་པ་གང་། །གོམས་པས་བསྟེན་པ་ཡིན་ཞེས་བྱ། །རོ་ཡི་གོམས་པ་ཟས་སྦྱོར་ལས། །དེ་ཡི་རོ་ལས་ཤེས་པར་བྱ། །བྱ་བའི་སྦྱོར་བས་ལུས་
འཕེལ་འགྱུར། །གཞན་གྱིས་ཟོས་དེ་གང་བོར་དང་། །གང་ཞིག་རྩ་ནས་བྱུང་བ་དང་། །ནང་དུ་རུལ་བར་གྱུར་པ་ཡི། །རྩྭ་ནི་ཤིན་ཏུ་སྟོབས་འཕྲོག་བྱེད། །ཤ་ལི་ཧོ་ཏྲའི་མདོའི་གནས་ལས་ཟས་ཀྱི་སྦྱོར་བའི་ལེའུ་སྟེ་བཅོ་ལྔ་པའོ།།      །།གང་ཞིག་
ཟས་སྦྱོར་སྣ་ཚོགས་ཀྱིས། །འབད་པ་མང་པོས་བསྒྲུབས་བྱས་པ། །མཛེས་པ་ཞེས་འདི་གྲགས་པ་འདི། །ཅི་འདྲ་རྣམ་པ་དུ་ཞིག་མཆིས། །ལེགས་ལྡན་དེ་ནི་གསུངས་ཤིག་ཅེས། །དེ་ལྟར་ལེགས་ཐོས་ཀྱིས་བསྐུལ་ཏོ། །ཤ་ལི་ཧོ་ཏྲ་དྲང་སྲོང་ཆེས། །གོ་

203-1-186b

རིམས་དེ་ནི་སླར་སྨྲས་པ། །ལྗང་པ་ཟས་དང་སྐོམ་རྣམས་དང་། །དེ་བཞིན་མར་དང་སྣུམ་ཚོགས་ཀྱིས། །སོས་པར་གྱུར་ཚེ་མཛེས་གྱུར་ཏེ། །དེ་ནི་རྣམ་པ་ལྔར་བཤད་དོ། །བྲག་བཅས་ཞེས་བྱ་དང་པོ་སྟེ། །གཉིས་པ་རྩིབ་ལོགས་འགེངས་བྱེད་ཡིན། །གསུམ་པ་
སྟོབས་ནི་སྐྱེད་པ་སྟེ། །བཞི་པ་ཤ་ནི་རྒྱས་པ་ཡིན། །ལྔ་པ་ལུད་པ་ཅན་ཞེས་བྱ། །དེ་ལྟར་རྣམ་པ་ལྔར་བཤད་དོ། །འདི་དག་རྣམས་ཀྱི་མཚན་ཉིད་ནི། །སོ་སོར་བཤད་ཀྱི་ཉན་པར་གྱིས། །མཚན་དང་རླིག་པ་རྨོང་ཀ་དང་། །རྐུབ་དང་བྲང་དང་རྩ་སྦུབས་རྣམས། །
ཁྲག་དང་ཤ་ནི་སྲབ་པ་ཡིས། །མཉེན་ཞིང་ཁྲག་གིས་རྒྱས་འདྲ་བ། །དེ་ནི་ཁྲག་བཅས་མཛེས་ལ་གནས། །རྟ་ནི་གདུལ་སྦྱོར་དག་ལ་སྦྱར། །ཡན་ལག་ཤ་ནི་འཇམ་པོ་ཡིས། །ཅུང་ཟད་གཡོགས་པར་གྱུར་པ་དང་། །ཕྲག་སོ་བྲང་སོགས་ཤ་སྐྱེས་པ། །
སྟོབས་ལྡན་རྩིབ་ལོགས་འགེངས་བྱེད་ཡིན། །རྐེད་པ་བརླ་ནི་ཤ་རྒྱས་ཤིང་། །རྩིབ་མ་ཤས་ནི་ལེགས་པར་ཁེབས། །སྟོབས་ཆེན་ཅུང་ཟད་མ་རྫོགས་པ། །མཛེས་པ་དང་ནི་སྟོབས་སྐྱེས་ཡིན། །འདིར་ནི་ཇི་ལྟར་དགའ་བ་རུང་། །བཞོན་པའི་དོན་དུ་བཤད་པར་བྱ། །
ཅི་ནུས་པར་ནི་བཀོལ་བ་ཡང་། །དེ་ནི་ཉམ་ཆུང་གིས་འགྱུར་རོ། །ཤ་ནི་རྒྱས་པར་གྱུར་པའི་རྟ། །བྱ་བ་ཀུན་ལ་ནུས་པར་ལྡན། །དྲེགས་པར་བཅས་ཤིང་མཛེས་དང་བཅས། །དཔའ་ཞིང་སྟོབས་ལྡན་དཔའ་བ་དང་། །ཚིགས་རུས་རྩིབ་ལོགས་རྐེད་པ་དང་། །མཇུག་
དོ་དང་ནི་ཤར་ནུས་ཟླུམ། །ཟེའུ་ནས་རྔ་སྙིང་བར་དུ་ནི། །དམའ་ཞིང་གང་གི་རི་མོ་ཆགས། །ཤ་ནི་ཤིན་ཏུ་རྒྱས་གྱུར་པ། །དེ་ནི་ལུད་པ་ཅན་ཞེས་བྱ། །མཛེས་པ་འདི་དང་ལྡན་པའི་རྟ། །བྱ་བ་ཐམས་ཅད་བདེ་བླག་ནུས། །ཤ་རྣམས་འཕྱང་ཞིང་དབུགས་མི་བདེ། །
རྔུལ་དང་དུབ་པའི་ཤས་ཆེ་བ། །ཁྲུ་སྨན་ལེགས་པར་བཏང་བ་ཡིས། །འདི་ནི་ཉམ་སྨད་ཉིད་དུ་བྱ། །དེ་ཡན་ཆད་ནི་ཤ་རྒྱས་པར། །རྟ་ནི་ནམ་ཡང་མི་བྱའོ། །ཚིལ་ནི་ཤིན་ཏུ་ཆེས་གྱུར་པ། །དེ་ཡིས་ལས་སྦྱོར་མི་ནུས་འགྱུར། །གསོ་དཀའ་པ་ཡི་ནད་ལྡན་ན། །རིགས་

203-1-187a

པས་ལེགས་པར་གསོ་བར་བྱ། །ཟས་ཀྱི་སྦྱོར་སོགས་སྤང་བ་དང་། །རིམ་གྱིས་དབྲི་ཞིང་སྦྱང་བར་བྱ། །ཉམས་སྨད་དྲགས་པའམ་མྱུར་དུ་ནི། །བྱས་ན་མ་གོམས་དབང་གིས་འཆི། །མེ་དྲོད་ཁོང་ནས་འབར་གྱུར་ལ། །རྒྱུ་བའི་ལམ་ནི་ཚིལ་གྱིས་བཀག །
སྣུམ་རྣམས་བྱིན་པར་གྱུར་པ་ནི། །དེ་ནི་ཉེ་བར་རྒྱས་པར་འགྱུར། །དེ་བས་བདེ་བ་དྲགས་པ་དང་། །ཉམས་སྨད་དྲགས་པར་མི་བྱའོ། །དེ་དག་གཉི་ག་དྲགས་པ་ཡིས། །གསོར་མི་རུང་བ་ཉིད་དུ་འགྱུར། །གྲིབ་མ་འདོད་དང་སྐོམ་དད་ཆེ། །ལུད་པ་དབུགས་མི་བདེ་བས་ཉེན། །
ཁུ་བཞིའི་ནད་ནི་མང་བ་དང་། །གཅིན་མང་བདེ་བ་མེད་པ་དང་། །གང་ཞིག་བདག་ཉིད་སྡུག་བསྔལ་ཞིང་། །ཉམ་ཐག་པར་ནི་འགྲོ་གྱུར་ལ། །ལམ་འཇུག་པར་ནི་མི་ནུས་པ། །བཞོན་པ་པོ་ཡིས་ཅི་བྱར་ཡོད། །དེ་ནི་གྲང་དྲགས་ཚ་དྲགས་པའི། །བཀྲེས་དང་སྐོམ་པ་མི་བཟོད་
པས། །མཛེས་འདོད་རྟ་ནི་སྐྱིད་ཆོས་དག །ཤིན་ཏུ་དྲགས་པར་མི་བྱའོ། །བཀོལ་དུ་མེད་ཅིང་ལུས་ཉམ་ཆུང་། །གཟི་མདངས་ཆུང་ཞིང་སྟོབས་མེད་ལ། །ལས་ལ་སྦྱོར་བར་མི་ནུས་པ། །དེ་ནི་མཛེས་པར་མི་འདོད་དོ། །ཤ་ལི་ཧོ་ཏྲའི་མདོའི་གནས་ལས་མཛེས་པའི་ལེའུ་
སྟེ་བཅུ་དྲུག་པའོ།།      །།ཤ་ལི་ཧོ་ཏྲ་དྲང་སྲོང་མཆོག །ལེགས་ཐོས་ཀྱིས་ནི་ཡང་དྲིས་པ། །གཟུགས་ནི་གང་དག་ཉིད་ཀྱིས་ན། །རྟ་ནི་གཟུགས་སྡུག་འགྱུར་བ་ལགས། །སྤྱོད་པ་དང་ནི་མཚན་དག་སྟེ། །དེ་ནི་བདག་ལ་ལུང་བསྟན་སྩོལ། །དེ་ནས་རྟ་ཡི་མཚན་
མཁས་པ། །ཤ་ལི་ཧོ་ཏྲས་སླར་སྨྲས་པ། །རྟ་ཡི་ཡན་ལག་ཉིང་ལག་གི། །སྐྱོན་མེད་མཚན་ཉིད་མཉན་པར་གྱིས། །མཚན་ཉིད་སུམ་ཅུ་དྲུག་ལྡན་པ། །གང་གིས་དེ་ནི་བསྔགས་པ་ཡིན། །རིགས་དང་མཚན་ཉིད་ནད་མེད་དང་། །ལུས་ཀྱང་སྨད་པ་མེད་གྱུར་པ། །གང་
ལ་འདི་བཞི་ཡོད་པ་ཡི། །རྟ་དེ་བསྔགས་པར་འོས་པ་ཡིན། །གང་ཞིག་དབུགས་ནི་ཆེར་འབྱིན་ཅིང་། །མིད་པ་སྲབ་པར་མངོན་པ་དང་། །སྣ་ཡི་སྦུབས་ནི་མི་མཐུག་པ། །རྟ་ནི་རབ་ཏུ་བསྔགས་པ་ཡིན། །མཆུ་ལྟག་མཉམ་ཞིང་ཟླུམ་པ་དང་། །ཆེ་བར་གྱུར་ན་བཟང་

203-1-187b

བ་ཡིན། །མ་མཆུ་སྲབ་ཅིང་མཉེན་པ་དང་། །མི་འཕྱང་ན་ནི་བསྔགས་པ་ཡིན། །སོ་ནི་ཐམས་ཅད་སྙོམས་པ་དང་། །ཐགས་བཟང་དཀར་ཞིང་ནག་མཐོ་ལ། །སྣུམ་ཞིང་སྲབ་པར་གྱུར་པ་དང་། །མཚན་ཉིད་ལེགས་པར་ལྡན་ན་བསྔགས། །རྐན་ནི་སྲབ་ཅིང་གཉེར་མ་ཆགས། །
ཟབ་ཅིང་དམར་བ་བསྔགས་པ་ཡིན། །ལྕེ་ནི་སྲབ་ཅིང་མཉེན་པ་དང་། །རྩ་མཐུག་རྒྱ་སྐྱེགས་འདྲ་བ་ལ། །ཁྱི་ཡི་ལྕེ་དང་དབྱིབས་འདྲ་བའི། །རྟ་ནི་བསྔགས་པར་གྱུར་པ་ཡིན། །མགོ་བོ་ཕྲ་མིན་སྦོམ་པ་མིན། །ལུས་དང་འཚམ་པར་གྱུར་པ་དང་། །འགྲམ་གླང་ཆེ་བར་
གྱུར་པ་ནི། །བསྔགས་པར་གྱུར་པ་ཉིད་ཡིན་ནོ། །དཔྲལ་བ་མཉམ་ཞིང་ཡངས་ལ་ཆེ། །པགས་པ་སྲབ་ཅིང་མི་གྱོང་ལ། །དབུས་ན་གཙུག་འཁྱིལ་གནས་པ་དག །གང་ཡིན་དེ་ནི་བསྔགས་པ་ཡིན། །རྟ་ཡི་མིག་ནི་མིག་མཆུ་དག །སྲབ་ཅིང་ལེགས་གནས་རྫི་མ་
སྲབ། །མིག་འབྲས་ཀྱི་ནི་མཐའ་མ་དག །ལེགས་པར་དཀར་ཞིང་དབུས་ནག་ལ། །གང་ཞིག་གཟུགས་ཀྱི་མདོག་སྡུག་ཅིང་། །ཕྲ་ཞིང་ཐག་རིང་མཐོ་བ་དང་། །གླང་པོའི་མིག་འདྲ་མེ་ཏོག་ནི། །མ་ལི་ཀ་ཡི་སྙིང་པོ་འདྲ། །ཤེལ་ལྟར་ཡོངས་སུ་དང་བ་དང་། །མཐོང་
བ་བརྟན་པ་བསྔགས་པ་ཡིན། །རྣ་བ་སྲབ་ཅིང་མཉེན་པ་དང་། །སྤུ་སྲབ་ཐུང་བར་གྱུར་པ་དང་། །གང་གི་སྐྲ་གྲགས་ཕྲ་བ་དང་། །ཐག་རིང་བ་ཡང་ཐོས་པ་བཟང་། །གདོང་པ་གསལ་ཞིང་རྩ་མི་མངོན། །ཤ་སྲབ་ཤ་མཐུག་མ་ཡིན་ཞིང་། །དཔྲལ་མཚམས་ཆུང་ཞིང་
རྔོག་རིང་བསྔགས། །སྐེ་མགྲིན་ཤ་རྒྱས་རིང་བ་དང་། །རྣ་ལྟག་རྣ་མཆན་ལེགས་པར་གནས། །པགས་སྲབ་རིམ་གྱིས་སྦོམ་པར་ནི། །གྱུར་པ་དེ་ནི་དགེ་བ་ཡིན། །ཕྲག་སོ་ལེགས་འབྲེལ་ནམ་ཚོང་ནུབ། །རྔོག་མཐའ་ལེགས་པར་འདུས་པ་དང་། །རིང་ཞིང་
ཁ་ཞེང་ཆེ་ན་བཟང་། །བྲང་ནི་མཐུག་ཅིང་ཡངས་ལ་མཁྲེགས། །སྲ་ཞིང་གཉེར་མ་མེད་པ་དང་། །བར་ཡངས་དཔུང་སྣ་ཆེ་བ་དང་། །འདི་འདྲ་བ་དག་བསྔགས་པ་ཡིན། །དཔུང་པ་མཁྲེགས་ཤིང་ཡངས་པ་དང་། །ཟླུམ་ཞིང་སྦོམ་ལ་རྩ་མི་མངོན། །རིམ་གྱིས་ཕྲ་བར་

203-1-188a

གྱུར་པ་ནི། །རྟ་ལ་བསྔགས་པར་གྱུར་པ་ཡིན། །ལག་ངར་ཕྲ་མོ་རིམ་གྱིས་ཕྲ། །པུས་མོ་ཟླུམ་པར་གྱུར་པ་དང་། །མཉེན་ཞིང་བསྐྱང་བར་བདེ་བ་དང་། །རྟ་ལ་བསྔགས་པར་གྱུར་པ་ཡིན། །ཕྱི་གྲང་རིང་ཞིང་དབྱིབས་ལེགས་པ། །ཤ་སྲབ་རྩ་
རྒྱུས་མི་མངོན་སྲབ། །པགས་སྲབ་ཤིན་ཏུ་ཟླུམ་པ་ཡི། །རྟ་ནི་བསྔགས་པར་གྱུར་པ་ཡིན། །ཚེའུ་ཚེ་ལེགས་སྐྱེས་མཉམ་ཞིང་ཟླུམ། །དོད་ཅིང་སྙོམས་པར་གྱུར་པ་དང་། །སྤུ་ཕྲ་པགས་པ་སྲབ་པ་ཡི། །རྟ་ནི་བཟང་པོར་བཤད་པ་ཡིན། །རྨིག་པ་སྲ་ཞིང་དཀྱིལ་
ལེགས་ལ། །བོང་བུའི་རྨིག་པ་འདྲ་བ་དང་། །སྦལ་པ་ནུབ་ཅིང་ལེགས་པར་འབྱར། །ཆ་མཉམ་པར་ནི་འགྲོ་བ་དང་། །རྒྱ་ནི་ཟབ་མོ་དང་འདྲ་ཞིང་། །རྨིག་སྒྲོས་སྙོམས་ཤིང་སྲ་བ་དང་། །མཁྲེགས་ཤིང་གཉེར་མ་མེད་པ་ཡི། །རྟ་ནི་རབ་ཏུ་བསྔགས་པ་ཡིན། །རྒྱབ་
སོ་ཐུང་དང་རབ་ཏུ་བསྔགས། །རྩིབ་མ་ལེགས་པར་སྒུ་བ་དང་། །ངོས་གཉིས་ལེགས་པར་སྐྱེ་བ་བསྔགས། །སྒ་འོག་གནས་ནི་ཁང་པ་བཟང་། །ལྟོ་བ་ཟླུམ་ཞིང་རྩིབ་མའི་ནང་། །འདུས་པ་ལྟར་འདུག་བསྔགས་པ་ཡིན། །ཨོང་དོ་ཡངས་ཤིང་ཆེ་ལ་འཇམ། །སྤུ་ཡི་
ཚོགས་ཀྱིས་ཁེབས་པ་བཟང་། །མཇུག་མ་རྔ་མ་ཕྲ་ཞིང་འཇམ། །མཇུག་རྩ་ཨོང་དོ་ལེགས་པར་འབྲེལ། །མཇུག་མའི་ཕྱོགས་སུ་དྲང་པོར་སྐྱེས། །རྟ་ནི་བསྔགས་པར་གྱུར་པ་ཡིན། །རྐུབ་ནི་ཟླུམ་ཞིང་ལེགས་པར་འཛུམས། །ཐུང་ཞིང་གཉེར་མ་ལེགས་པར་གནས། །
གང་གིས་རྟ་སྦངས་ལེགས་པར་འབྱིན། །དེ་ནི་བསྔགས་པར་གྱུར་པ་ཡིན། །རླིག་པ་མཉམ་ཞིང་ལེགས་པར་སྐྱེས། །སྤུ་མེད་པར་ནི་གྱུར་པ་དང་། །བིལ་བ་ཆུང་ངུའི་ཚོད་ཙམ་ཞིག །མ་འཕྱངས་གྱུར་པ་བསྔགས་པ་ཡིན། །རྟ་ཡི་ཕོ་མཚན་རིམ་གྱིས་ཕྲ། །ཐུང་ཞིང་དྲང་
ལ་མྱུར་དུ་འབྱིན། །གཏིང་རིང་ཁ་དོག་གཅིག་པར་ནི། །རྟ་ལ་བསྔགས་པར་གྱུར་པ་ཡིན། །རྗེ་ངར་རྒྱབ་མཐོང་ཡ་ཡོ་མེད། །ཤ་སྲབ་གུག་པ་མ་ཡིན་ཞིང་། །མཉམ་ཞིང་མ་འཁུམས་དབྱིབས་ལེགས་པའི། །རྟ་ནི་བསྔགས་པར་གྱུར་པ་ཡིན། །རྟ་སྤུ་སྲབ་ཅིང་དྲང་

203-1-188b

བ་དང་། །མདངས་ལྡན་ཁ་དོག་མ་འདྲེས་བཟང་། །རྟ་ནི་འདྲེ་བར་བྱེད་པའི་ཚེ། །གང་གིས་ལེགས་པར་སྤྲུགས་པ་དང་། །སྟོབས་དང་ལྡན་པའི་གཟུགས་ཡོད་པ། །མཚན་ཉིད་མཆོག་ཏུ་བཤད་པ་ཡིན། །ཆུ་ལ་རྒལ་བའི་གནས་དང་ནི། །ཁལ་བཀལ་ལམ་དུ་འགྲོ་བ་དང་། །
བསྣུན་དང་ཉམ་ངའི་གནས་དག་ཏུ། །རྩལ་འབྱིན་གཟི་ཅན་མཚན་ཉིད་ཅན། །དེ་ལྟར་བསྔགས་པའི་མགྱོགས་འགྲོ་ནི། །རྒྱལ་པོའི་བཞོན་པར་རབ་ཏུ་བརྗོད། །ཤ་ལི་ཧོ་ཏྲའི་མདོའི་གནས་ལས་མཚན་གྱི་ལེའུ་སྟེ་བཅུ་བདུན་པའོ།།      །།ལེགས་ལྡན་རྟ་ཡི་ཁ་དོག་དང་། །
དེ་བཞིན་མདོག་གི་དབྱེ་བ་དང་། །དེ་ཡི་མིང་གི་ཉེས་པ་དག །བདག་ཅག་མཉེན་པར་འཚལ་ལགས་སོ། །བུ་ཡིས་དེ་སྐད་སྨྲས་པ་དང་། །སྙན་པའི་ཚིག་གིས་སླར་སྨྲས་པ། །ང་ཡི་གཞུང་གི་མ་འདྲེས་མདོག །རྟ་ལ་རྣམ་བཞི་ཡོད་པར་འདོད། །དཀར་དང་དམར་དང་གནག་
པ་དང་། །བཞི་པ་སེར་པོ་ཞེས་བཤད་དོ། །འདི་རྣམས་ལུས་ཀྱི་ཕྱོགས་གནས་དང་། །ཕན་ཚུན་འདྲེས་པར་གྱུར་པ་དང་། །རྫས་དང་རྫས་མིན་འདྲེས་པ་ལས། །རྒྱས་པར་མདོག་ནི་དུ་མ་ཡིན། །དཀར་ལ་སོགས་པ་དེ་དག་རྣམས། །མ་ལུས་ཤེས་བྱ་མཉན་པར་གྱིས། །
པགས་པ་དཀར་ཞིང་བ་སྤུ་དཀར། །དེ་བཞིན་རྔ་མ་རྔོག་མ་དཀར། །འདི་ནི་དཀར་པོ་ཞེས་བཤད་དོ། །རྟ་དེ་སྲིད་སྒྲུབ་ཡིན་པར་འདོད། །པགས་པ་དམར་ཞིང་བ་སྤུ་དམར། །རྔ་མ་རྔོག་མ་དག་ཀྱང་དམར། །ཁྲག་དང་ཉི་མ་འཆར་ཀ་འདྲ། །རྟ་ནི་དམར་པོ་ཞེས་བྱའོ། །
པགས་པ་སྤུ་དང་རྔོག་མ་གནག །བུང་བ་འདྲ་བ་གང་ཡིན་པ། །སྟག་ཟིལ་ནག་པོའི་མདངས་འདྲའི་རྟ། །དེ་ཡི་ཐམས་ཅད་ནག་པོར་བཤད། །པགས་པ་རྔ་རྔོག་སྤུ་རྣམས་ནི། །གང་ཞིག་གསེར་གྱི་མདོག་འདྲ་ཞིང་། །དར་ནི་སེར་པོའི་མདངས་ལྡན་པ། །རྟ་དེ་སེར་
པོ་ཡིན་ཞེས་བྱ། །དེ་ལྟར་ཁ་དོག་རྣམ་པ་བཞི། །སོ་སོར་ཡང་དག་བཤད་པ་ཡིན། །དེ་རྣམས་མདོག་ནི་འདྲེས་གྱུར་པ། །བཤད་པ་ང་ལས་རྟོགས་པར་གྱིས། །པགས་པ་དམར་ཞིང་མིག་སྐྱོན་མེད། །ཁ་དང་རྐན་དང་ཕོ་མཚན་དམར། །མ་དུ་ཀ་ཡི་མེ་ཏོག་འདྲ། །

203-1-189a

འདི་ནི་ལ་ལས་ཀར་ཀར་བཤད། །ཕོ་མཚན་རྨང་ཁ་རླིག་པ་དང་། །རླིག་པ་དེ་བཞིན་རྐུབ་དང་ནི། །མཆུ་ལྟག་མཆུ་དང་ཁ་དང་ནི། །པགས་པ་པདྨའི་མདོག་འདྲ་གང་། །མིག་དང་ཕུམ་ཕུམ་རྔོག་མའི་བར། །བ་སྤུ་དཀར་བར་གྱུར་པ་ནི། །རྟ་ནི་ཀར་
ཀ་ཁ་ཅིག་འདོད། །བཀྲ་ཤིས་དགེ་བ་དམ་པ་ཡིན། །པགས་པ་དམར་ཞིང་བ་སྤུ་དམར། །རྔ་མ་རྔོག་མ་དམར་བ་ནི། །ཉི་མ་སྐྱོན་བྲལ་མདོག་འདྲ་བ། །དེ་ཡང་ཀར་ཀར་ཤེས་པར་བྱ། །བཙོ་མའི་གསེར་གྱི་མདོག་འདྲ་བའི། །སྤུ་ནི་གང་ལ་ཡོད་གྱུར་པ། །པགས་
པ་པདྨའི་དབུས་འདྲ་ཞིང་། །མིག་ནི་མེ་ཡི་རྩེ་མོ་འདྲ། །རྨིག་པ་ཁ་དོག་གཅིག་པ་ཡི། །རྟ་དེ་འཁོར་ལོས་སྒྱུར་བའི་ཡིན། །གང་ཞིག་ཀར་ཀ་དྲའི་གཞི་ལ། །ཡན་ལག་ལྟོ་དང་དཔྱི་དང་སྟོང་། །ཐིག་ལེ་ནག་པོ་ཆགས་གྱུར་པ། །རྟ་ནི་ཁྱིམ་བྱ་ཅན་ཞེས་བྱ། །གང་
ཞིག་ཀར་ཀ་ཅན་འདྲ་ལ། །དཔྱི་ལ་སོགས་པ་དམར་པོ་ཡི། །ཐིག་ལེ་ཆགས་པར་གྱུར་པ་ནི། །དེ་ཡང་ཁྱིམ་བྱ་ཅན་གཉིས་པ། །བ་སྤུ་རྔ་མ་རྔོག་མ་ནི། །དཀར་ལ་པགས་པ་ནག་པོ་ཅན། །མཚན་དང་རྨིག་པ་མིག་ཀྱང་ནག །དེ་ནི་ངུར་པའི་གཤོག་པར་
བཤད། །པགས་འཇམ་པགས་པ་མིག་དང་སྤུ། །རྔ་རྔོག་རྨིག་པ་དཀར་བ་དང་། །སིན་དུ་བ་ར་དང་འདྲ་བས། །མདོག་དེ་སིན་དུ་བ་ར་ཅན། །པགས་དམར་སེང་གེའི་སྤུ་འདྲ་ཞིང་། །རྔ་མ་དང་ནི་རྔོག་མ་དཀར། །རླིག་པ་དམར་ཞིང་འབྱར་གྱུར་ལ། །རྟ་དེ་སེང་
གེའི་མདོག་ཅན་ཡིན། །གང་ཞིག་སྤུ་རྩེ་དུ་བ་འདྲ། །ཅུང་ཟད་དམར་ཞིང་སེར་སྐྱར་འདྲེས། །ཁ་དོག་དེ་ཡི་རྟ་དེ་ནི། །གོ་རིའི་སྤུ་ཞེས་བྱ་བར་བཤད། །དེ་བཞིན་དུ་བའི་མདོག་ལྡན་པ། །དུད་སེར་ཞེས་ནི་བྱ་བར་བཤད། །སེར་ཤས་ཆེ་བ་གང་ཡིན་པ། །
མེ་ཏོག་ཀུ་རུཎྜ་ཀ་དང་འདྲར་བཤད། །སེར་པོའི་ངེས་ཚིག་འདི་ཡི་ནི། །དཔེ་ཡང་ཁྱེད་ཀྱིས་མཉེན་པར་གྱིས། །སོག་མ་མདའ་སྨྱུག་དང་འདྲ་ཞིང་། །སོ་དང་བད་ཀན་དང་འདྲ་ལ། །གང་ཞིག་སེར་པོ་ཟླུམ་པོ་ཡི། །དེ་ནི་ཁྱབ་འཇུག་བཞོན་པ་སྟེ། །རྒྱལ་དང་

203-1-189b

རྣམ་རྒྱལ་དོན་གཉེར་ལ། །འདི་དག་ཐམས་ཅད་བསྔགས་པ་ཡིན། །དེ་བཞིན་ཁ་དོག་མང་བ་དང་། །སེང་གེའི་མདོག་དང་འདྲ་བ་དང་། །དུང་དང་ཀུནྡ་ཁ་ཤ་དང་། །འོ་མ་དང་བ་ཉི་མའི་མདོག །ཀུ་མུ་ད་ཡི་མདོག་འདྲ་དང་། །ཆུ་སྐྱར་བཟང་པོ་འདྲ་བ་དག །
དཀར་དང་སེར་པོ་འདྲེས་པ་ནི། །ཐམས་ཅད་ངང་པ་ཞེས་བྱར་བཤད། །གང་ཞིག་མེ་ཏོག་མཁའ་ལྡིང་འདྲ། །རྔ་མ་རྔོག་མ་ནག་པོ་ནི། །ཡོད་པའི་རྟ་དེ་སྟང་ཟིལ་གྱི། །སྤྱི་བོ་ཅན་ཞེས་བྱ་བ་ཡིན། །རྔོག་མ་འཇམ་ཞིང་དཀར་བ་ནི། །རྔོག་མ་མུཉྫ་ཅན་ཞེས་བྱ། །ཤིན་
ཏུ་དཀར་ལ་རྔོག་མ་གནག །རྔོག་མ་མིག་སྨན་མདོག་འདྲར་བཤད། །གང་ཞིག་རྔོག་མའི་མདོག་སྣ་ཚོགས། །འདྲེས་པའི་རྔོག་མ་ཞེས་བྱར་བཤད། །རྔ་མའི་ཁ་དོག་སྣ་ཚོགས་པ། །རྔ་མ་འདྲེས་པ་ཞེས་བྱར་བཤད། །དེ་དང་འདྲ་བ་གཞན་དག་ཀྱང་། །དཀར་
པོའི་མདོག་འདྲེས་པ་ཞེས་བྱ། །གསོ་མའི་མེ་ཏོག་མདོག་འདྲ་དང་། །ལྷམ་བུ་ཆུ་གཤེར་འདྲ་བ་དང་། །ཨ་མྲའི་ལོ་མའི་མདོག་འདྲ་དང་། །རྟ་གང་ཀི་ཤུ་དང་འདྲ་དང་། །ཆུ་ཤིང་མེ་ཏོག་འདྲ་བ་དང་། །ཀར་ཀན་རུ་ཡི་མདོག་འདྲ་དང་། །མེ་ཏོག་བནྡུ་ཛི་བའི་མདོག །ལྕང་མ་ཨ་ཤྭ་
ཀའི་མདོག་དང་། །གང་ཡང་བྱུ་རུའི་མདོག་འདྲ་དང་། །མིག་དང་རྔ་རྔོག་ནག་པ་དང་། །མཚན་དང་པགས་པ་དེ་བཞིན་གནག །དེ་ནི་སྤུ་གནག་ཞེས་བྱར་བཤད། །དེ་དག་དམར་པོ་དང་འདྲེས་མདོག །ནག་པོ་དང་འདྲེས་མདོག་ཉོན་ཅིག །ཁུ་བྱུག་དང་ནི་ཆར་སྤྲིན་འདྲ། །
དཱུར་བའམ་མ་ཧེའི་མདོག་འདྲ་བ། །ཨ་མྲ་བ་ཡི་མདོག་འདྲ་བ། །གང་ཡང་ལུང་ཏང་རློན་འདྲ་དང་། །སཱ་ལ་ཏ་ལའི་མདོག་འདྲ་དང་། །ཨུཏྤལ་སྔོན་པོ་ལྟ་བུ་དང་། །གང་གཞན་ཚུལ་ནི་འདི་འདྲ་བ། །རྟ་ནི་ནག་པོ་དང་འདྲེས་མདོག །གང་ཡང་སཱ་ལུའི་གྲ་མ་འདྲ། །ནེ་ཚོའི་སྒྲ་གཤོག་
འདྲ་བ་དང་། །མར་གྱི་སྙིང་པོའི་མདོག་འདྲ་དང་། །པདྨའི་ས་བོན་མདོག་འདྲ་དང་། །པདྨའི་གེ་སར་ལྟ་བུ་དང་། །དེ་བཞིན་མེ་ཡི་རྩེ་འདྲ་དང་། །གང་ཞིག་གཞའ་དང་འདྲ་བ་དང་། །གང་ཡང་བ་བླ་འདྲ་བ་དང་། །སྦུ་ཏི་ཀ་ཡི་སེར་པོ་འདྲ། །ཤྲི་ཤའི་མེ་ཏོག་འདྲ་བ་དང་། །

203-1-190a

གང་ཡང་ཁྲེ་འབྲས་མདོག་འདྲ་དང་། །གང་ཡང་སྤྱང་ཁུའི་མདོག་ཅན་དང་། །ཁ་དོག་སེར་པོ་ཇི་སྙེད་དང་། །གཞན་ཡང་སེར་པོ་དང་འདྲེས་དང་། །དེ་འདྲ་དེ་ལས་གཞན་པ་དག །རྟ་ནི་སེར་པོ་དང་འདྲེས་མདོག །དེ་ལྟར་རྣམ་པ་བཞི་པོ་ནི། །མདོག་འདྲེས་པ་
ཞེས་བྱ་བར་བཤད། །གཞན་ཡང་ཁ་དོག་དབྱེ་བ་དང་། །ཁ་དོག་སྣ་ཚོགས་མཉན་པར་གྱིས། །ཕུག་རོན་གྱི་ནི་སྐེ་འདྲ་ཞིང་། །པགས་པ་སྤུ་ཡི་མདོག་དམར་བ། །ཕུག་རོན་སྐེ་འདྲ་ཕུག་རོན་སྐེ། །དམར་དང་ནག་པོ་ཅུང་ཟད་འདྲེས། །པགས་པ་རྔ་མ་རྔོག་མ་གནག །
མིག་དང་གསང་བ་རྨིག་པའང་གནག །མཁལ་མའི་མདོག་འདྲ་ནག་འཚེར་བ། །འདི་ཉིད་གནག་པའི་ཤས་ཆེ་བ། །ནག་འཚེར་བ་ནི་ཡིན་ཞེས་བྱ། །གལ་ཏེ་མར་ནག་ཚམ་མཉམ་འདྲེས། །རྒུན་འབྲུ་ལྟར་འཚེར་ཡིན་པར་བཤད། །རྒུན་འབྲུ་ལྟར་འཚེར་དེ་ཉིད་ལ། །
ཅུང་ཟད་སེར་སྐྱས་འདྲེས་པ་ནི། །ཁ་དོག་གཉིས་ནི་བསྡུས་པ་ལས། །གང་ཞིག་ཤས་ཆེ་དེ་ལ་གདགས། །ནག་པོ་དཀར་པོ་དང་འདྲེས་ཤིང་། །པགས་པ་ནག་པོར་འདུག་པ་ནི། །སྤུ་འདྲེས་དྲང་སྲོང་པ་ཞེས་བཤད། །གསལ་བ་རི་དྭགས་མདོག་ཅན་ཡིན། །དེ་
ཉིད་དཀར་པོ་མ་གྱུར་ན། །དཀར་པོའི་དྲང་སྲོང་པ་ཞེས་བཤད། །དཀར་པོའི་གཞི་ལ་གནག་དང་འདྲེས། །ཁོར་ལིང་མང་དུ་སྣང་བ་དང་། །ཡན་ལག་གནག་ཅིང་མཇུག་མ་དཀར། །དེ་ནི་སྐྱ་བའི་དྲང་སྲོང་པ། །དཀར་དང་དམར་དང་ནག་པོར་འདྲེས། །པགས་པ་ནག་
པོ་ཡོད་གྱུར་ཅིག །མིག་དང་ཕོ་མཚན་རྨིག་པ་གནག །འདྲེན་མའི་དྲང་སྲོང་པ་ཞེས་བྱ། །དམར་དང་སེར་དང་ནག་པོ་ཡིས། །དཀར་ལ་འདྲེས་གྱུར་གསོ་དར་མདོག །དམར་སེར་དཀར་པོ་མདོག་འདྲེས་རྟ། །སེར་སྐྱའི་བ་འདྲ་སེར་སྐྱ་ཡིན། །ནག་པོ་དམར་པོས་
ཁྱབ་གྱུར་ཅིང་། །དམར་པོ་དང་ཡང་ཆེར་ལྡན་པ། །རྟ་དེ་རྟ་མཁན་དག་གིས་ནི། །དུད་ཀ་ཞེས་ནི་བྱ་བར་བཤད། །ཁྲག་དང་བཙག་གི་མདོག་འདྲ་ཞིང་། །པགས་པ་འདྲེན་མར་སྣང་བ་དང་། །རྔ་མ་རྔོག་མ་དམར་བ་ཡི། །སེར་དང་དམར་པོའི་འདྲེ་གྱུར་པ། །སྤུ་

203-1-190b

རྩེའི་མདོག་ནི་གནག་པ་དང་། །རྔ་རྔོག་གཉིས་ཀྱང་གནག་གྱུར་པ། །རྟ་དེ་མཚལ་བུ་ཞེས་བྱར་བཤད། །གང་ཞིག་སྤུ་རྩེ་གནག་གྱུར་ཅིང་། །གཞན་དག་སེར་སྐྱར་གནས་གྱུར་པ། །གདོང་གི་མདོག་ནི་མ་འདྲེས་པའི། །རྟ་དེ་ངུར་པ་ཞེས་བྱར་བཤད། །ཀུན་དུ་དཀར་དང་
དམར་བ་ཡི། །སྤུ་ནི་འདྲེན་མར་གནས་གྱུར་ལ། །པགས་པ་ཕོ་མཚན་མཆུ་དམར་བའི། །རྟ་ནི་སེ་བོ་ཞེས་བྱར་བཤད། །དཀར་དང་སེར་བའི་མདོག་འདྲེས་ཤིང་། །པགས་ནག་རྔ་མ་འདྲེན་མར་གནས། །སེར་ལ་དཀར་ཤས་ཆེ་བ་ནི། །ཁན་ཛ་ཏེ་ཞེས་བྱ་བ་ཡིན། །
གོས་ནི་སྲབ་མོས་བཀབ་པ་ལྟར། །ཁ་དོག་གཅིག་ཏུ་མི་མངོན་ཞིང་། །འཁོར་ལིང་མང་པོ་དང་ལྡན་པའི། །རྟ་དེ་འཁོར་ལིང་ཅན་ཞེས་བྱ། །ཁ་དོག་མང་པོ་དང་ལྡན་ཞིང་། །མདོག་གཞན་འཁོར་ལིང་གནས་པ་ཡིས། །བརྒྱན་པ་ལྟ་བུར་སྣང་བ་ནི། །རྟ་དེ་ཁྲ་བོ་
ཞེས་བཤད་དོ། །རྟ་ཡི་རྐང་པ་བཞི་དང་ནི། །མགོ་དང་རྔ་མ་རྔོག་མ་དང་། །རྐེད་པ་དཀར་པོར་སྣང་བ་ནི། །རྟ་དེ་བཀྲ་ཤིས་རྒྱས་པར་བཤད། །དམར་བའམ་དཀར་བའི་འཁོར་ལིང་ངམ། །ནག་པའམ་ཁ་དོག་གཞན་དག་ལས། །ཁ་དོག་དང་ནི་རྗེས་མཐུན་པར། །
དེ་ལས་མིང་དུ་གདགས་པར་བྱ། །གང་གིས་ཁ་དོག་གང་དག་ལ། །མདོག་གིས་འདྲེས་པར་གྱུར་ན་ཡང་། །མདོག་གི་ཤས་ནི་གང་ཆེ་བ། །དེ་ཡི་མདོག་ལས་གདགས་པར་བྱ། །གང་ཞིག་མདངས་སྣུམ་བརྟན་ཞིང་གསལ། །ཁ་དོག་དེ་ནི་ཐམས་ཅད་བསྔགས། །དེ་
ནས་དཀར་བ་མཆོག་ཡིན་ལ། །དེ་དང་ལྡན་པ་གཞན་ཡང་བཟང་། །རྟ་ཡི་ཁ་དོག་ཐམས་ཅད་ལས། །ཁ་དོག་དཀར་པོ་མི་འགྱུར་ཡིན། །བརྟན་ཞིང་མི་ཟད་ཉིད་ཀྱིས་ནི། །དཀར་པོ་ཉིད་ནི་ཁྱད་པར་འཕགས། །དེ་ལྟར་རྟ་ཡི་ཁ་དོག་ནི། །མདོར་བསྡུས་ནས་ནི་བསྟན་པ་
ཡིན། །ཁ་དོག་དབྱེ་བ་མ་ལུས་པར། །སྨྲ་བར་ནུས་པ་མ་ཡིན་ནོ། །ཤ་ལི་ཧོ་ཏྲའི་མདོའི་གནས་ལས་ཁ་དོག་ཤེས་པར་བྱ་བའི་ལེའུ་སྟེ་བཅོ་བརྒྱད་པའོ།།      །།ཤ་ལི་ཧོ་ཏྲ་ཐུབ་མཆོག་ལ། །ལེགས་ཐོས་ཀྱིས་ནི་ཡང་དྲིས་པ། །ཞུར་དང་དེ་བཞིན་རྒྱལ་མཚན་

203-1-191a

དག །ཇི་ལྟར་གནས་པ་བཀའ་སྩོལ་ཅིག །དེ་ལྟར་དྲིས་ཚེ་ལེགས་ཐོས་ལ། །ཤ་ལི་ཧོ་ཏྲས་སླར་སྨྲས་པ། །མཆུ་སྒྲོས་ལྟག་ནས་དཔྲལ་མཚམས་བར། །དཀར་བའམ་ཤིན་ཏུ་དཀར་གང་ཡིན། །དེར་ནི་ཞུ་བོར་ཤེས་བྱ་སྟེ། །འདི་ཡིས་འབྲས་
བུ་རྣམ་བཞི་ཡིན། །གནས་དང་དབྱིབས་དང་ཁ་དོག་དང་། །རང་བཞིན་ལས་ཤིས་མི་ཤིས་འགྱུར། །ཁུར་བ་དེ་ཡི་འབྲས་བུ་ནི། །རིམ་པ་བཞིན་དུ་བཤད་པར་བྱ། །མཆུ་ལྟག་དཔྲལ་བ་སྣ་གདོང་དང་། །གཞན་ཡང་མཆུ་ལྟག་གདོང་པ་དང་། །མཆུ་ལྟག་
ཕུམ་ཕུམ་མཐར་ཐུག་དེ། །རྟ་ཡི་གདོང་པ་ཀུན་དཀར་བ། །རིགས་ཀྱི་དབང་ཕྱུག་འཕེལ་བྱེད་ཡིན། །མགོ་བོ་རྣ་བར་བཅས་དཀར་བ། །བདག་པོ་བདེ་བ་ཀུན་སྐྱེད་དོ། །གནས་གཉིས་ན་ནི་གནས་པའི་འབྲས། །མེ་ལོང་ལྕགས་ཀྱུ་བུམ་པ་དང་། །གདུགས་དང་
རྔ་ཡབ་འདྲ་བ་དང་། །དཔལ་ཤིང་རིམ་གྱིས་འཕེལ་འདྲ་དང་། །བུམ་པ་གཡུང་དྲུང་དབྱིབས་འདྲ་བའི། །ཞུར་ནི་གང་གི་རྟ་ལ་ཡོད། །བུ་ཚ་བྲན་དང་མཛའ་བོ་འཕེལ། །རྒྱལ་པོས་ལེགས་པར་བཀུར་གྱུར་ལ། །རྟ་ཡང་བདེ་བར་འཚོ་བར་འགྱུར། །ཞུར་ནི་བྱང་
ཆུབ་ཤིང་ལོ་འདྲ། །དེ་ཡིས་སྐལ་བ་བཟང་འགྱུར་ཞིང་། །བུ་ནི་མང་པོ་ཡོད་པར་འགྱུར། །ཟུར་བཞི་ཡོད་ན་རྒྱལ་པོས་ནི། །ཡུལ་ཁམས་རྙེད་པར་སྟོན་པ་ཡིན། །རལ་གྲི་འཁོར་ལོ་རྡོ་རྗེ་གཞུ། གཤོལ་དང་གཏུན་ཤིང་དབྱིག་པ་དང་། །རྒྱལ་མཚན་བ་དན་གདུགས་
འདྲ་བ། །ཞུར་ལ་དབྱིབས་ཡོད་རྒྱལ་པོ་ཡིས། །ཞོན་ན་གཡུལ་ལས་རྒྱལ་བྱེད་ཡིན། །རྟ་དེ་བཞོན་ནས་རྒྱལ་པོ་ཡིས། །དགྲ་རྣམས་ཐུལ་བར་འགྱུར་བ་ཡིན། །ཆུང་མ་བུ་དང་ཚ་བོ་དང་། །ནོར་ཡང་ཤིན་ཏུ་མང་བར་འགྱུར། །དགང་གཟར་བླུགས་གཟར་
མཆོད་སྡོང་མེ། །ཁ་ཁྱེར་གྱི་ནི་དབྱིབས་འདྲ་བའི། །ཞུར་ཡོད་བདག་པོས་འབྲས་ཆེན་ཐོབ། །མཆོད་སྦྱིན་མང་དུ་བྱེད་པ་དང་། །སྦྱིན་པ་མང་དུ་འགྱེད་པར་འགྱུར། །གང་གི་ཞུར་ནི་བུམ་པ་འདྲ། །མེ་ཏོག་མགོ་ལྕོགས་དབྱིབས་འདྲ་བ། །རྟ་བདག་གཏེར་ནི་བརྒྱ་བྱིན་ཐོབ། །

203-1-191b

མེ་ཏོག་པདྨའི་དབྱིབས་འདྲ་བའི། །མིག་མངས་རིས་ཀྱི་དབྱིབས་ཡོད་པ། །གང་གི་རྟ་ལ་ཡོད་གྱུར་པ། །བདག་པོ་བཀུར་སྟི་ནོར་མང་དགེ། །ཤིང་རྟའི་དབྱིབས་འདྲའི་ཞུར་ཡོད་པའི། །རྟ་ནི་ནོར་རྣམས་འཕེལ་བྱེད་ཡིན། །སྟེང་ཆ་ཁ་ཞེང་ཆེ་བའི་ཞུར། །ནོར་དང་འབྲུ་དང་
ཕྲད་བྱེད་དོ། །དེ་ཡི་བདག་པོས་དཔལ་ཐོབ་ཅིང་། །བུ་དང་ཚ་བོ་རྣམ་པར་འཕེལ། །དེ་ཡི་ཁྱིམ་དུ་དཔལ་རྟག་གནས། །རྒྱལ་སྲིད་ཀྱང་ནི་ཐོབ་པར་འགྱུར། །རྟ་དེ་ཅི་འདོད་མ་སྨྲས་པར། །བདེ་བར་འཆི་བ་ཉིད་དུ་འགྱུར། །མི་ཤིས་པ་ཡི་མཚན་རྟགས་ནི། །རྟའི་
ཞུར་ཁ་དོག་འདྲེས་པ་དང་། །གཡོན་ངོགས་འགྲམ་གླང་བར་དུ་ཆགས། །གཡོན་པའི་མིག་དཀྱུས་དཔྲལ་བའི་ངོས་དང་བཅས། །ཁྱད་པར་སྐྱེས་པའི་རྟ་དེ་ནི། །དཔྲལ་ཆགས་ཞེས་ཏེ་ངང་ཚུལ་ངན། །རྒྱུན་དུ་དངང་ཞིང་འཐབ་རྩོད་དགའ་བར་འགྱུར། །མུར་འགྲམ་དག་ཏུ་ཆགས་
པའི་རྟ་ཡང་སྨད། །གདོང་པར་དབྱིག་འདྲའི་ཞུར་ཆགས་དང་། །གཡོན་ངོས་ཆེ་ཞིང་ཅུང་ཟད་དང་། །དབུས་ན་ལྕགས་སྒྲོག་འདྲ་ཡོད་པ། །རྟ་དེ་བདེ་བར་མི་འགྱུར་རོ། །དེ་ཡི་བདག་པོ་ཐག་པའམ། །ལྕགས་སྒྲོག་གིས་ནི་བཅིང་བར་འགྱུར། །མཚན་ཉིད་དེ་འདྲས་མི་
འགོར་བར། །དེ་ནི་དགྲ་བོའི་དབང་དུ་འགྱུར། །འཕྲེད་དུ་ཞེང་དུ་ཆེ་བའི་ཞུར། །ནོར་བརླག་པར་ནི་སྟོན་པ་ཡིན། །ནག་ནོག་ཅན་གྱི་ཞུར་ཡོད་པ། །བདག་པོའི་ནོར་ནི་ཉམས་པར་བྱེད། །ཞུར་བ་ཡོ་དང་སྦུབ་པ་དང་། །ཆད་པའི་ཞུར་ཡང་སྡུག་བསྔལ་སྐྱེད། །
སྤང་ལེབ་འདྲ་དང་འདྲེས་པ་ཡི། །ཞུར་ཡོད་རྟ་ཡང་དེ་དང་འདྲ། །ཁ་དོག་དཀར་ལ་མདོག་གཞན་གྱི། །ཞུར་ཡོད་པ་ནི་སྨད་པ་ཡིན། །ནག་པོས་བདག་པོ་མི་བཟད་དུག །རེག་པའང་བརླག་པར་བྱེད་པ་ཡིན། །གང་ཞིག་གློག་གི་དབྱིབས་འདྲ་དང་། །མདུང་ཐུང་གི་ནི་
དབྱིབས་འདྲ་བའོ། །དེ་བཞིན་མི་སྣང་གཞན་དག་དང་། །སྲབ་ཅིང་གསལ་བར་མི་མངོན་པ། །དེས་ནི་ནོར་རྣམས་བརླག་པ་དང་། །འཆི་བ་ཉིད་དུ་འགྱུར་བའོ། །མདོངས་ཀྱི་མཚན་ཉིད་གང་ཡིན་པ། །དེ་དག་བཤད་དོ་ཉན་པར་གྱིས། །ཟླ་བའམ་སྐར་མ་འདྲ་བ་ཡི། །

203-1-192a

མདོངས་ཡོད་བདག་པོ་རྒྱལ་སྲིད་ཐོབ། །བུ་དང་ཚ་བོ་འཕེལ་བར་འགྱུར། །གང་གི་དགའ་བ་འཁྱིལ་འདྲ་བའི། །རུས་སྦལ་པདྨའི་དབྱིབས་འདྲ་ཡི། །མདོངས་ཡོད་བདག་པོ་ནོར་མང་རྙེད། །གང་ཞིག་རྒྱལ་མཚན་སོགས་དབྱིབས་འདྲ། །མདོངས་
ཡོད་བདག་པོའི་ནོར་བརྒྱན་འཕེལ། །བུ་དང་ཚ་བོ་འཕེལ་བར་བྱེད། །ནས་འབྲས་འདྲ་ཡོད་ཐ་སྙད་མཁས། །གདུ་བུ་འདྲ་ཡོད་ཟས་རྙེད་འགྱུར། །བ་གླང་ར་དང་བྱ་དང་སྦྲུལ། །རྔ་མོ་ཡི་ནི་དབྱིབས་འདྲ་བ། །མདོངས་དེ་ཤིས་པ་སྐལ་བ་བཟང་། །མི་ཤིས་པ་ཡང་བཤད་
པར་བྱ། །དཔྲལ་བར་བྱ་རོག་རྗེས་འདྲ་དང་། །བ་གླང་ལྕི་བའི་འབུ་འདྲ་དང་། །གཡོན་འདུག་པའམ་འོག་ན་འདུག །གང་ཞིག་ཐུར་དུ་བལྟས་པ་ཡོད། །དེ་ཡི་བདག་པོ་སྡུག་བསྔལ་ཞིང་། །རྟ་དང་ལྷན་ཅིག་ཉམ་ང་ཐོབ། །ཆད་དང་ཁ་དོག་མི་སྡུག་དང་། །མི་གསལ་
བ་དང་སྲབ་པ་དང་། །འདྲེས་དང་པགས་པ་ལྟ་བུ་དང་། །གང་ཞིག་དབྱིབས་ནི་མི་སྡུག་དང་། །ཁ་དོག་གཞན་ལ་གཞན་པ་དང་། །རྩུབ་དང་བཙོག་པ་ཅན་རྣམས་ཀྱི། །མདོངས་དེས་ནོར་རྣམས་ངེས་པར་འཇིག །རྒྱན་མཚན་ལ་སོགས་མཚན་མ་ཉོན། །མགོ་དང་
རྣ་བ་མིག་རྔོག་མཐའ། །རྔ་མ་རྐང་པ་ལྟོ་དང་རྒྱབ། །ཁ་དོག་སྟེང་དུ་མདོག་གཞན་གྱི། །མཚན་མ་ཡོད་པར་གྱུར་པའི་རྟ། །ཞོན་ན་གཡུལ་ལས་ཕམ་པར་འགྱུར། །དེ་བཞིན་སྐྲ་མཚམས་གདོང་དང་ཙེག །ཟེའུ་དང་ཟེའུ་མཐའ་ཨན་ཏོང་དང་། །སྨིན་མ་
དང་ནི་སྣ་རྩེ་གཉིས། །མཆུ་ལྟག་ཕོ་མཚན་རྔ་མ་དང་། །མདོག་སྟེང་ཁ་དོག་བྱུང་གྱུར་པ། །རྟ་དེ་རྒྱལ་མཚན་ཅན་ཞེས་བྱ། །རྒྱལ་མཚན་ཅན་དེ་ཞོན་ནས་ནི། །རྒྱལ་པོ་གཡུལ་འཇུག་དཔུང་ཉམས་འགྱུར། །ཤ་ལི་ཧོ་ཏྲའི་མདོའི་གནས་ལས་ཞུར་མདོངས་བརྟག་
པའི་ལེའུ་སྟེ་བཅུ་དགུ་པའོ།།      །།ཤ་ལི་ཧོ་ཏྲ་ཐུབ་ཆེན་ལ། །རྒྱལ་པོ་ནེ་ཤ་ཏྲས་དྲིས་པ། །རྟ་ལ་ཁ་དོག་དུ་མ་ཡི། །ཐིག་ལེ་རྣམས་ནི་མཐོང་ལགས་ན། །དགེ་དང་མི་དགེ་ཞུ་འཚལ་ལོ། །དྲང་སྲོང་གིས་ནི་སླར་སྨྲས་པ། །གང་ཞིག་ཐིག་ལེའི་མདོག་མི་གསལ། །

203-1-192b

ལུས་ལ་སྐྱེས་པར་གྱུར་པ་ནི། །ཕྲ་ཞིང་མི་གསལ་བ་ཡི་གཟུགས། །དེ་ལ་ཐིག་ལེ་ཞེས་བྱའོ། །ཁ་དོག་འདྲ་བའི་ཐིག་ལེ་ནི། །འཇམ་པ་ཉིད་ཀྱི་མངོན་གྱུར་ཅིང་། །སྦུབས་དང་རྩུབ་དང་གསལ་བ་དང་། །སྤུ་འདུས་གྱུར་པ་ལས་ཀྱང་སྔོན། །ཇི་ལྟར་མིག་འབྲས་ནག་
པོའི་དབུས། །མིག་གི་རྒྱལ་མོ་སྣང་བ་ལྟར། །ལོགས་ཤིག་གྱུར་པ་མེད་གྱུར་ཅིང་། །མདོག་མཐུན་ན་ཡང་མངོན་པ་ཡིན། །མདོག་ནི་ཕན་ཚུན་འདྲེས་པ་ལས། །ཐིག་ལེ་གཞན་ཡང་འབྱུང་བར་འགྱུར། །ཇི་ལྟར་ཤིང་ལ་མེ་ཏོག་ལྟར། །དེ་ནི་གནས་
དབྱིབས་ཁ་དོག་ལས། །ཤིས་པ་དང་ནི་མི་ཤིས་སྐྱེད། །མདུན་སོ་ཡ་མཆུ་མ་མཆུ་ལ། །སྣུམ་ཞིང་དཀར་བའི་ཁ་དོག་སྣང་། །རྨིག་པ་རྣམས་ལའང་དེ་འདྲར་ཆགས། །མཁས་པས་དེས་ནི་ཞག་བདུན་ན། །ནོར་ཐོབ་ལྟས་སུ་ཤེས་པར་བྱ། །ཆེ་ཆུང་ལས་ཀྱི་ཟླ་ཕྱེད་
ནི། །བདུན་ནམ་ཟླ་བ་བདུན་གྱིས་ཐོབ། །མཆུ་སྒྲོས་ལས་ནི་ཐིག་ལེ་ཆགས། །ཟས་དང་སྐོམ་ནི་རྙེད་པར་བཤད། །ཁ་འགྲམ་ཀོ་སྐོར་བྱུང་ན་ནི། །དེ་ཡིས་ཟས་དང་སྐོམ་རྙེད་ཅིང་། །བདག་པོ་བདེ་དང་ལོངས་སྤྱོད་ཐོབ། །འདི་ཡིས་ཁྱིམ་ནི་འཕེལ་འགྱུར་ཞིང་། །གཏེར་
ཐོབ་པར་ཡང་སྣང་བ་ཡིན། །ཤིས་པ་བཤད་ཟིན་འདྲེས་མ་ཉོན། །སྣ་རུ་བྱུང་ན་མཚོན་གྱིས་འཆི། །མཁུར་བར་བྱུང་ན་བུ་ངེས་འཆི། །དཔྲལ་བར་བྱུང་ན་ནོར་ཐོབ་འགྱུར། །དཔྲལ་མཚམས་ཀྱིས་ནི་རྒྱལ་སྲིད་འགྱུར། །ལྐོག་མར་བྱུང་ན་ཟས་སྐོམ་རྙེད། །
མུར་འགྲམ་དག་ཏུ་བྱུང་ན་ཕུང་། །འཆིས་སྲན་བྱུང་ན་ཉེར་འཚེ་བྱེད། །མུར་འགྲམ་ཟ་ཡུར་བྱུང་དེ་འདྲ། །རྣ་བ་གཡོན་པའི་གཡས་ལས་འཕོ། །གཡས་སུ་བྱུང་ན་མཛའ་བོ་འཕེལ། །སྐེ་མཇིང་ལྟག་པ་ཟེ་མཆེན་དུ། །བྱུང་ན་མཚོན་གྱི་འཐབ་མོ་འོང་། །ལྐོག་
མར་བྱུང་ན་རྟ་བདག་གིས། །ཆུང་མ་དང་ནི་བུ་རྙེད་འགྱུར། །ཕྲག་སོར་བྱུང་ན་བུ་རྙེད་དོ། །རྩིབ་ལོགས་བྱུང་ན་རང་ཕྱོགས་འཕེལ། །པུས་མོར་བྱུང་ན་གནོད་པ་སྐྱེད། །དཔུང་པར་བྱུང་ན་མཛའ་དང་ཕྲད། །གཡོན་ལོགས་ཀྱིས་ནི་སྐྲོད་པར་བྱེད། །ལུས་ཀྱི་སྟོད་སྨད་དུ་བྱུང་

203-1-193a

ན། །བདག་པོ་ཕྲོག་པར་སྟོན་པ་ཡིན། །མཆན་ཁུང་དཀུ་ཡི་གནས་སུ་བྱུང་། །ལྟོགས་འགྱུར་མ་མཆུར་བྱུང་ན་འཆི། །ཡ་མཆུར་བྱུང་ན་མི་འཆི་ལ། །མིག་ཏུ་བྱུང་ན་གོས་ཟས་ཐོབ། །ཟེ་བ་ལྟག་དང་ཟེའུ་དང་། །དཔྱི་མགུལ་བརླ་ནི་ཕྲ་མོ་དང་། །
རྗེ་ངར་དང་ནི་དེ་མཚམས་སུ། །བྱུང་ན་འདིར་ནི་སྨད་པར་བཤད། །སྐེ་རྩར་བྱུང་ན་ནོར་ཐོབ་ཅིང་། །རྔོག་ལྟག་གིས་ནི་རྒྱལ་སྲིད་སྐྱེད། །རྒྱུ་མཚམས་ཐིག་ལེ་ནོར་རྙེད་ལ། །སྙིང་གར་བྱུང་ན་གཅོང་ཅན་འགྱུར། །རྩིབ་ལོགས་གཡས་བྱུང་བུད་མེད་རྙེད། །མཇུག་
དོར་བྱུང་ན་ནོར་ཟད་འགྱུར། །རྒྱུར་བྱུང་ན་ནི་སྐལ་བ་བཟང་། །རྒྱབ་ཏུ་བྱུང་ན་གནས་རྣམས་འཕེལ། །ལྟོར་བྱུང་རྟོགས་པའི་འཇིགས་པ་སྟེ། །རླིག་པར་བྱུང་ན་སྐལ་བཟང་རྙེད། །ལྟེ་བའི་རྩ་ལས་དམག་དཔོན་འགྱུར། །ཨོང་དོར་བྱུང་ན་ཆུང་མ་འཕྱོ། །རྐུབ་དང་རྔ་
མའི་རྩ་བར་བྱུང་། །ནོར་རྣམས་ཐམས་ཅད་བརླག་པར་འགྱུར། །པུས་མོར་བྱུང་ན་འཆི་བ་སྐྱེད། །ལྐོག་མ་ཚེའུ་པུས་ལམ་འགྲོ་སྟོན། །རྨང་ཁའི་ཐིག་ལེས་བུ་སྐྱེ་སྟོན། །སྤྱི་ལ་བུད་མེད་ཉེས་པ་སྐྱེད། །ཚེའུ་ཚེར་བྱུང་ན་གནོད་པ་སྐྱེད། །གང་ཞིག་བརྟན་པའི་གནས་སུ་
བྱུང་། །འདོད་པ་ཐམས་ཅད་སྐྱེད་བྱེད་དོ། །ཡན་ལག་ལ་བྱུང་དོན་ཀུན་འགྲུབ། །མཛའ་བོ་འཕེལ་ཞིང་དཔལ་སྐྱེད་ལ། །རིགས་དང་གྲགས་པ་འཕེལ་བར་བྱེད། །མདོག་དང་རྗེས་མཐུན་མདོག་བྱུང་ཤིས། །མདོག་གཞན་ཤིས་པ་མ་ཡིན་ནོ། །སེར་པོ་བྱུང་ན་
གཡུལ་དུ་འཇུག །དཀར་པོ་ལ་ཡང་དེ་དང་འདྲ། །ནག་པོ་འཐབ་མོ་སྐྱེད་པར་བྱེད། །ནག་པོ་བྱུང་ན་གཡུལ་དུ་འཆི། །སྡུག་དང་མི་སྡུག་པ་དག་གིས། །བདག་པོ་ལ་ནི་འཇིགས་ཆེན་འབྱུང་། །ཐིག་ལེའི་སྟེང་དུ་ཐིག་ལེ་བྱུང་། །དེ་ཡང་རྗེས་མཐུན་མདོག་ཏུ་མིན། །
དེས་ནི་རྒྱལ་པོ་བརླག་པ་དང་། །ཡུལ་འཁོར་དག་ཀྱང་འཁྲུག་པར་སྟོན། །གང་ཚེ་རྟ་ནི་དཀར་པོ་ལ། །ཐིག་ལེ་དཀར་པོ་རྣམས་གྱུར་ན། །དེ་ཡི་བདག་པོ་རྟག་ཏུ་བདེ། །བུ་དང་ཚ་བོ་རྣམ་པར་འཕེལ། །གང་ཞིག་རྟ་ནི་དམར་པོ་ལ། །ཐིག་ལེ་དམར་པོ་སྣང་གྱུར་ན། །

203-1-193b

བདག་པོས་མི་བཟད་དགྲ་འདུལ་ཞིང་། །ལོངས་སྤྱོད་ཆེན་པོའང་ཡུན་རིང་འགྱུར། །ནད་ཀྱིས་ཐེབས་ཀྱང་མྱུར་དུ་འཚོ། །གང་ཚེ་རྟ་ནི་སེར་པོ་ལ། །ཐིག་ལེ་སེར་པོ་སྣང་གྱུར་ན། །བདག་པོ་རིགས་བཙུན་ནོར་མང་འཕེལ། །གང་ཚེ་རྟ་ནི་ནག་པོ་ལ། །ཐིག་ལེ་ནག་པོ་
སྣང་གྱུར་ན། །དེ་ཡི་བདག་པོ་མི་བཟད་པའི། །ནད་ཀྱིས་བཏབ་ཅིང་མྱུར་དུ་འཆི། །གང་ཚེ་རྟ་ནི་དཀར་པོ་ལ། །ཐིག་ལེ་དམར་པོ་སྣང་གྱུར་ན། །བདག་པོ་མྱུར་དུ་དགྲ་ཡིས་གསོད། །ཐིག་ལེ་ནག་པོ་བྱུང་བ་ན། །བདག་པོ་མྱུར་དུ་འཆིའམ་འཆི། །རྟ་དམར་པོ་ལ་ཐིག་
ལེ་སེར། །མི་སྣང་དགྲ་བོ་བདག་པོ་གསོད། །རྟ་དམར་ཐིག་ལེ་ནག་པོ་སྣང་། །དེ་ཡི་བདག་པོ་གྲགས་མིན་པའི། །ལས་ཀྱིས་གསོད་པར་འགྱུར་བ་ཡིན། །རྟ་ནག་ཐིག་ལེ་དཀར་པོ་སྣང་། །བདག་པོ་གྲགས་ཐོབ་གཡུལ་ལས་རྒྱལ། །ནག་པོ་དམར་པོའི་ཐིག་ལེ་
སྣང་། །བདག་པོ་གཡུལ་དུ་སྙན་གྲགས་ཐོབ། །དཀར་ལ་ཤིན་ཏུ་དཀར་བ་དང་། །སྣུམ་ཞིང་མཉམ་པའི་ཐིག་ལེ་སྣང་། །དེ་ཡི་བདག་པོ་རྒྱལ་སྲིད་ཐོབ། །དེ་ནི་རྒྱལ་པོར་འགྱུར་བ་ཡིན། །བུ་དང་ཚ་བོ་རྣམ་པར་འཕེལ། །རྒྱལ་པོ་དང་ནི་ཡུལ་འཁོར་ཤིས། །
དཔུང་དང་མཛོད་ཀྱང་འཕེལ་བར་འགྱུར། །ཐིག་ལེ་ཤེས་པའི་གཟུགས་ལྡན་ཞིང་། །རྗེས་སུ་མཐུན་པའི་མདོག་ཅན་ལ། །སྣུམ་ཞིང་མདོག་ནི་སྡུག་པ་དང་། །གནས་ལས་མདུན་དུ་བལྟ་བ་དང་། །དེ་ནི་ནོར་རྣམས་རྙེད་པར་འགྱུར། །གོ་བཟློག་པ་ནི་སྨད་པ་ཡིན། །ཐིག་ལེ་ནས་
འབྲས་འདྲ་བ་ནི། །བདག་པོ་བུ་དང་ཕྲད་པར་འགྱུར། །ཁ་དོག་སྣ་ཚོགས་དམར་ཤས་ཆེ། །ནོར་རྙེད་པར་ནི་སྟོན་པ་ཡིན། །མདོག་མི་སྡུག་ཅིང་འཐོར་བ་དང་། །རྩུབ་ཅིང་ཆ་ནི་མི་མཉམ་དང་། །དབྱིབས་ངན་པ་དང་ཕྲ་བ་དང་། །དེ་བཞིན་རྒྱབ་ཏུ་བལྟ་བ་དང་། །མི་མཐུན་
གནས་དང་མཚོན་ཚོགས་དང་། །མདོག་ལས་མདོག་གཞན་གྱུར་པ་རྣམས། །དེས་ནི་ཡུལ་འཁོར་འཇོག་བྱེད་ཡིན། །རྒྱལ་སྲིད་ཉམས་པར་བྱེད་པ་ཡིན། །རྒྱལ་པོ་ཡི་ནི་དཔུང་རྣམས་དང་། །མཛོད་དང་བུ་ནི་འཇོམས་པ་ཡིན། །ཐིག་ལེ་ཤིས་པའི་གནས་བྱུང་ཡང་། །

203-1-194a

གང་ཞིག་མཚམས་སུ་སྐྱེས་པ་དང་། །སྣུམ་མདངས་ཆུང་བར་གྱུར་པ་རྣམས། །སྨད་པ་ཡིན་ཞེས་རྣམ་པར་བསྟན། །སྣུམ་ཞིང་མཛེས་པར་གྱུར་པ་ནི། །ཤིས་པ་ཐོབ་པ་ཁོ་ནར་བསྟན། །དེ་ལྟར་གནས་དང་གནས་མིན་པར། །སྐྱེས་པའི་མཚན་མ་
ཀུན་བསྟན་ནས། །འདིར་ནི་ཁ་དོག་ཀུན་འབྲས་བུ། །འདི་ནི་རྩེ་གཅིག་ཡིད་ཀྱིས་ཟུང་། །ཇི་ལྟར་གནས་ནི་རྣམ་པ་བཅུར། །མཚན་ཉིད་སོ་སོར་རྣམ་པར་དབྱེ། །དེ་བཞིན་ཐིག་ལེ་འབྲས་བུ་ཡང་། །ལྟས་སུ་གྱུར་པར་ཤེས་པར་བྱ། །དེ་བས་གནས་དང་ལྟས་རྣམས་ནི། །མཚན་
མ་དག་ཀྱང་གཟུང་བར་བྱ། །དེ་ལྟར་ཐིག་ལེ་མ་ལུས་པའི། །མཚན་ཉིད་ཇི་བཞིན་སྨྲས་པ་ཡིན། །ཤ་ལི་ཧོ་ཏྲའི་མདོའི་གནས་ལས་ཐིག་ལེ་བཟང་ངན་བརྟག་པའི་ལེའུ་སྟེ་ཉི་ཤུ་པའོ།།      །།ཤ་ལི་ཧོ་ཏྲ་བདེར་གནས་ལ། །ལེགས་ཐོས་ཀྱིས་ནི་ཡང་དྲིས་པ། །
ཤ་ར་ཞེས་བྱའི་ཁྱད་པར་ཟློག །དཀའ་ཐུབ་ཆེན་པོས་དེ་གསུངས་ཤིག །དཀར་ལ་མདོག་གཞན་དང་འདྲེས་པ། །ཤ་ར་ཞེས་ནི་བྱ་བར་བཤད། །གང་ཞིག་ཁོ་ན་གཞན་གྱིས་ནི། །ཁ་དོག་དཀར་བ་ཟིལ་མནན་ན། །གནས་དང་གྲགས་པ་གཞན་དག་གིས། །དེ་ཡི་
བདག་པོ་ཟིལ་མནན་འགྱུར། །འདི་ཡང་གནས་དང་དབྱིབས་དག་ནི། །གཞན་ལས་འབྲས་བུ་གཞན་དུ་འགྱུར། །ར་བ་མདའ་ཡབ་འདྲ་བ་དང་། །ཁང་པའི་ཕྱི་སྒོ་ལྟ་བུ་ཡི། །རྟ་ལ་ཤ་ར་ཡོད་ན་ནི། །བདག་པོ་ས་ལ་དབང་བྱེད་འགྱུར། །གདེངས་ཀ་སྦྲུལ་འཁྱིལ་
ཤིང་འདྲ་དང་། །ཁྱུ་མཆོག་རུས་སྦལ་ཆུ་སྲིན་འདྲ། །ཤ་ར་རྟ་ལ་ཡོད་ན་ནི། །བདག་པོ་ཤིན་ཏུ་ཕྱུག་པར་འགྱུར། །ཁ་བཟང་རི་ཡི་རྩེ་མོ་འདྲ། །རི་མོ་གསལ་པོ་ཡོད་པའི་རྟ། །བདག་པོ་དབང་ཕྱུག་ལྡན་པ་དང་། །རང་དང་གཞན་ཉིད་བཀུར་བར་འགྱུར། །ཆག་
པའི་ཤིང་དང་སྐྲ་འདྲ་ཡོད། །བདག་པོ་ལ་ཕན་ཟད་པར་འགྱུར། །རྔ་རྩེ་དག་ཏུ་བྱུང་ན་ནི། །བདག་པོའི་འཆིང་བ་འཕེལ་བར་འགྱུར། །གང་ཞིག་ལྟེ་བ་ནས་བཟུང་ནས། །རོ་སྟོད་ཉི་མ་ཤར་ཁ་འདྲ། །དེ་བཞིན་རོ་སྨད་ཆ་དང་ནི། །ཟླ་བ་ཡི་ནི་མདོག་འདྲ་བ། །མདངས་དང་

203-1-194b

མདོག་ནི་ཕུན་ཚོགས་པ། །ཉིན་མོ་གཡུལ་ལས་རྒྱལ་བྱེད་ཡིན། །དེ་ལས་གོ་བཟློག་གྱུར་པ་དང་། །མཚན་མོ་གཡུལ་ལས་རྒྱལ་བྱེད་ཡིན། །གང་གི་ལྟེ་བ་ནས་བཟུང་ནས། །རོ་སྟོད་མདངས་སྣུམ་དཀར་བ་ལ། །རོ་སྟོད་མདངས་སྣུམ་ནག་པོ་ནི། །དེ་ཡང་ཉིན་མོ་རྒྱལ་བྱེད་
ཡིན། །དེ་ལས་གོ་བཟློག་གྱུར་ཏེ་ཡང་། །མཚན་མོ་རྒྱལ་བར་བྱེད་པ་ཡིན། །ཆ་ནི་འདི་དག་ཉིད་ཀྱིས་ནི། །གཡས་དང་གཡོན་དུ་འོད་གཞན་བྱུང་། །ཉིན་མོ་འམ་ནི་མཚན་མོ་དག །འཐབ་པའི་ཚེ་ན་རྒྱལ་བྱེད་ཡིན། །གཡས་ཕྱོགས་ཀྱི་ནི་ཁ་དོག་དང་། །རོ་
སྟོད་ཀྱི་ནི་མདོག་འདྲ་ཞིང་། །མདངས་སྣུམ་ཤིས་པའི་གཟུགས་ཅན་ནི། །རྟ་དེ་བསྔགས་པར་གྱུར་པ་ཡིན། །བྲམ་ཟེ་འམ་ནི་རྒྱལ་རིགས་ལས། །གཞན་གྱིས་དེ་ཐོབ་མི་རིགས་སོ། །དེས་ནི་དགྲ་ཀུན་ཟད་བྱེད་ཡིན། །ཆོས་དང་འདོད་པའང་སྟེར་བྱེད་ཡིན། །གང་
གི་རོ་སྟོད་མདོག་ནག་ཅིང་། །རོ་སྨད་མདངས་སྣུམ་དཀར་བ་ནི། །དགྲ་འཇོམས་མཛའ་བོ་འཕེལ་བྱེད་དེ། །དེ་ཡང་གཡུལ་ལས་རྒྱལ་བྱེད་ཡིན། །རོ་སྟོད་དུང་ལྟར་དཀར་བ་ལ། །རོ་སྨད་མདོག་ཞན་ལྡན་པ་ཡིན། །དེ་ལ་མཛའ་སྐྱེས་ཞེས་བྱ་སྟེ། །རིགས་འཕེལ་ཉིན་
མོ་ཤིས་པ་ཡིན། །པ་ར་ལ་ལྟར་མཆུ་དམར་ཞིང་། །ཁ་དང་ལྕེའུ་ཆུང་དམར་གྱུར་པ། །ཁྱིམ་དུའང་ཤིས་པར་འགྱུར་བ་དང་། །ལམ་དུའང་ཕན་པ་སྐྱེད་བྱེད་ཡིན། །གཞན་ཡང་དེ་དང་འདྲ་བའི་རྟ། །མདོག་ལ་སྤུ་ནི་སྲབ་པ་དང་། །མདངས་སྣུམ་ཤིས་པའི་གཟུགས་ཅན་
ནི། །རྟ་མཆོག་དེ་ནི་བསྔགས་པ་ཡིན། །གནག་དང་དམར་དང་སེར་པོ་ལ། །ཟླུམ་རིས་དཀར་པོས་བརྒྱན་པའམ། །དཀར་ལ་མདོག་གཞན་གྱིས་བརྒྱན་པའི། །རྟ་ནི་དཔལ་སྐྱེད་བྱེད་པ་ཡིན། །ཤ་ལི་ཧོ་ཏྲའི་མདོའི་གནས་ལས་ཤ་རའི་མདོག་གི་ཁྱད་པར་ཞེས་བྱ་བའི་ལེའུ་
སྟེ་ཉི་ཤུ་རྩ་གཅིག་པའོ།།      །།ལྷ་དང་དྲང་སྲོང་གྲུབ་པའི་ཕ། །གཙང་མའི་བདག་ཉིད་དབང་པོ་ཐུལ། །རྟ་ཡི་ཚེ་ཡི་རིག་བྱེད་མཁས། །རྟ་བྲེས་ནས་ནི་གནས་པ་ལ། །ཀ་ར་ཡ་ནས་རྐང་པ་ལ། །ལེགས་པར་བཟུང་ནས་ཚིག་འདི་དྲིས། །རྟ་ཡི་ཤིས་དང་མི་

203-1-195a

ཤིས་པའི། །མཚན་ཉིད་ཐམས་ཅད་ཤེས་བྱ་བ། །སོ་སོར་རྒྱས་པ་དག་ཏུ་ནི། །ལེགས་ལྡན་གྱིས་ནི་སྔར་བཤད་ན། །འདི་དག་ཐམས་ཅད་མ་ལུས་པ། །བསྲེས་པ་དག་ཀྱང་རྟོགས་པར་འཚལ། །ཤ་ལི་ཧོ་ཏྲས་སླར་སྨྲས་པ། །མཚན་
ཉིད་ཐམས་ཅད་ཕུན་སུམ་ཚོགས། །བསྲེས་པའི་མཚན་ཉིད་ཉན་པར་གྱིས། །ནག་པོ་སྣུམ་མདངས་ལྡན་པ་ལ། །ཁ་དང་རྐང་པ་རྔོག་མ་ལ། །དེ་བཞིན་མིག་དང་བྲང་རྣམས་ནི། །གང་ཞིག་དཀར་པོར་གྱུར་པ་དག །རྟ་དེ་ཞོན་ན་རྒྱལ་པོ་ནི། །མ་ལུས་པ་ལས་རྒྱལ་
བར་འགྱུར། །གང་ཞིག་རྨིག་པ་སྤུ་ཡིས་ནི། །ཀུན་ནས་ཁེབས་པར་སྣང་གྱུར་པ། །རྟ་དེ་གཡོགས་པ་ཞེས་བྱ་སྟེ། །བདག་པོ་ཕུན་ཚོགས་འཕེལ་བྱེད་ཡིན། །ཡན་ལག་ཉིང་ལག་ལ་བརྟེན་ནས། །གང་གི་མདངས་ནི་ཤིས་པ་ཡོད། །མཐོང་ན་མིག་ནི་དགའ་བྱེད་
ཅིང་། །ཡིད་ཀྱང་མགུ་བར་བྱེད་པ་ཡིན། །རྟ་ནི་ཁ་དོག་གཅིག་གྱུར་པའི། །ལུས་དང་ལྡན་པ་དེ་ཡི་བདག །འཇིག་རྟེན་དུ་ནི་འགྲོ་ཀུན་ལ། །སྲོག་འདྲ་བར་ནི་སྡུག་པར་འགྱུར། །འཛམ་བུ་སྨིན་པ་ལྟ་བུར་སྣང་། །གནག་པ་ལེགས་པར་བྲིས་པ་འདྲ། །རྟ་དེ་རྒྱལ་
པོས་ཞོན་པ་ནི། །མི་དབང་བ་ཡང་དབང་དུ་འགྱུར། །ཤིན་ཏུ་དམར་ཞིང་རབ་སྣུམ་པའི། །རྟ་ནི་གང་ཞིག་འཆང་བྱེད་པ། །དེ་ནི་དོན་ཀུན་ཕུན་སུམ་ཚོགས། །གཡུལ་ངོ་དག་ཏུ་རྒྱལ་བར་འགྱུར། །ཀུན་ནག་བྱ་རོག་འདྲ་བའམ། །ཅེ་སྤྱང་སྤྱང་ཁུའི་མདོག་འདྲ་བའི། །
གང་ཡང་གྲ་མའི་མདོག་འདྲ་བ། །དེ་ནི་གཡུལ་དུ་རྒྱལ་བྱེད་ཡིན། །རྒྱབ་གཞུང་བོང་བུ་འདྲ་བ་ཡི། །མདོག་གཞན་གྱི་ནི་རི་མོ་ཅན། །དེ་ནི་གཞུང་ཐིག་ཡིན་ཞེས་བྱ། །རྟ་དེ་ནོར་ནི་འཇིག་བྱེད་ཡིན། །གང་ཞིག་ལུས་མདོག་རི་དྭགས་འདྲ། །རྨིག་པ་སོར་མོ་འདྲ་
བར་སྐྱེ། །བྱི་བའི་སྡེར་མོ་ཞེས་བཤད་དོ། །རྟ་དེ་མཛའ་དང་འབྲལ་བྱེད་ཡིན། །གཞུང་ཐིག་ཅན་དང་མིག་མི་སྡུག །དེ་བཞིན་བྱི་བའི་སྡེར་མོ་ཅན། །མདོག་མི་སྡུག་པའི་རྟ་མཐོང་ན། །རིང་དུ་ཡོངས་སུ་སྤང་བར་བྱ། །རྫ་གྱོ་ཆག་པའི་མདོག་འདྲ་བའི། །ཐལ་བའི་

203-1-195b

མདོག་དང་བྱི་ལའི་མདོག །བྱི་བའི་མདོག་དང་མདོག་མི་སྡུག །དེ་དག་གིས་ནི་བདག་པོ་གསོད། །དོན་གྲུབ་པ་ལ་སྨད་པ་ཡིན། །དུ་བ་དུ་བ་མིག་མདོག་འདྲེས། །མེ་ཏོག་ཁ་སེ་ཏཱ་ལའི་མདོག་འདྲ་བ། །རྔ་མ་རྔོག་མ་དམར་སེར་ཡོད། །རྟ་དེ་རིགས་ནི་རླག་བྱེད་ཡིན། །
གང་གི་རླིག་པ་རྨིག་པ་དང་། །རྔ་མ་མིག་དང་རྐན་ཡང་གནག །དེ་ནི་མཇུག་གནག་ཅེས་བྱ་སྟེ། །རིགས་དང་མཛོད་ནི་ཟད་བྱེད་ཡིན། །ཕྲག་སོ་རྒྱབ་དང་སྐེ་རྩ་དང་། །ཨོང་དོ་དག་ཏུ་རི་དྭགས་ནི། །ཨེ་ན་ཡ་ཡི་མདོག་ལྟར་གནག །དེ་ནི་གཡང་གཞི་ཅན་ཞེས་བྱ། །ཕྲག་
སོས་བུ་ནི་འཆི་བར་འགྱུར། །སྐེ་རྩས་ཁ་ལོ་བ་འཆི་འགྱུར། །རྒྱབ་ཀྱིས་བདག་པོ་འཆི་བར་འགྱུར། །ཨོང་དོས་ཆུང་མ་ངན་སྤྱོད་འགྱུར། །གང་ཞིག་སྟག་འདྲའི་རི་མོ་ཡོད། །རྟ་དེ་བླུན་པོ་ཞེས་བྱ་སྟེ། །གསེར་ཅན་ཞེས་ཀྱང་དེ་ལ་བྱ། །གཡུལ་དུ་བདག་པོ་གསོད་བྱེད་ཡིན། །
རོ་སྟོད་དམ་ནི་གཞན་དག་ཏུ། །རི་དྭགས་པགས་འདྲའི་ནག་པོས་ཁྱབ། །བདག་པོ་གསོད་ཅིང་ཀུན་གསོད་སྐྱེད། །གང་ཞིག་མདངས་དང་བཅས་པ་ཡི། །རྐང་ལག་གཉི་གར་ཤིས་པ་ཡིན། །རྐང་ལག་གཉིས་ནི་དཀར་གྱུར་པ། །མདངས་དང་བཅས་ན་དེ་མི་སྨད། །ལག་པ་
གཅིག་དཀར་མདངས་མེད་པ། །བདག་པོ་གསོད་བྱེད་གཡུལ་དུ་སྤང་། །རྐང་ལག་གཉིས་ནི་དཀར་གྱུར་པ། །གཡུལ་དུ་ཤིས་ཤིང་དཔལ་སྐྱེད་མིན། །རྐང་ལག་དཀར་བའི་འབྲས་བུ་ནི། །རྒྱ་ཆེར་ང་ཡིས་བཤད་པར་བྱ། །རྟ་གང་གིས་ནི་མདུན་རྐང་གི། །གཡས་པ་དཀར་པོར་
གྱུར་པ་དེ། །གཡུལ་དུ་དོན་མི་འགྲུབ་པར་བྱེད། །སྔ་རྐང་གཡོན་པ་དཀར་གྱུར་པ། །དཔུང་པ་གནོད་པ་སྐྱེད་བྱེད་ཡིན། །ཕྱི་རྐང་གིས་ནི་གཡས་པ་དཀར། །བདག་པོ་གསོད་པར་བྱེད་པ་ཡིན། །གཡོན་པ་དཀར་བས་གཡུལ་དུ་ནི། །ཞོན་པ་པོ་དང་བཅས་བཙོན་འཁྱེར། །
སྔ་རྐང་གཉིས་དང་དེ་བཞིན་དུ། །ཕྱི་རྐང་གི་ནི་གཡོན་པ་དཀར། །བདག་པོ་གཡུལ་དུ་མདའ་མདུང་གིས། །འཆི་བར་བྱེད་པ་ཉིད་ཡིན་ནོ། །སྔ་རྐང་གཉིས་དང་དེ་བཞིན་དུ། །ཕྱི་རྐང་གཡས་པ་དཀར་གྱུར་པ། །གཡུལ་དུ་བདག་པོ་འཆི་གྱུར་ནས། །དེ་ཡི་རྗེས་ལ་རང་ཉིད་འཆི། །

203-1-196a

སྔ་རྐང་གཡོན་པ་དཀར་གྱུར་ཅིང་། །ཕྱི་རྐང་གཉིས་ཀ་དཀར་གྱུར་པ། །རྟ་དེ་གཡུལ་དུ་འཇུག་གྱུར་ན། །གྲོགས་དང་བཅས་པ་འཆི་བར་འགྱུར། །སྔ་རྐང་གཡས་པ་དཀར་གྱུར་ཅིང་། །ཕྱི་རྐང་གཉིས་ཀ་དཀར་ན་ནི། །རྟ་དེ་བདག་པོ་གསོད་བྱེད་
ཡིན། །ལས་རྣམས་འགྲུབ་པར་མི་འགྱུར་རོ། །དེ་ལྟར་མི་ཤིས་བཤད་ནས་ནི། །ཤིས་པ་བཤད་ཀྱིས་ཉན་པར་གྱིས། །སྔ་རྐང་གཡས་པ་དཀར་གྱུར་ཅིང་། །ཕྱི་རྐང་གཡོན་པ་དཀར་བ་ནི། །ཐད་ཀར་དཀར་པོ་ཞེས་བྱ་སྟེ། །མཛའ་བཤེས་ཉེ་དུ་འཕེལ་བྱེད་ཡིན། །
དེ་བཞིན་ཅིག་ཤོས་གཉིས་དཀར་བ། །མཛའ་བོ་འཕེལ་བར་བྱེད་པ་ཡིན། །སྔ་རྐང་གཉིས་ནི་དཀར་གྱུར་ན། །ནོར་དང་བདེ་དང་དགའ་བ་སྐྱེད། །ཕྱི་རྐང་གཉིས་ནི་དཀར་གྱུར་པ། །གཡུལ་དུ་དགྲ་ལས་རྒྱལ་བར་འགྱུར། །ངོས་གཅིག་དཀར་བར་གྱུར་པ་ལས། །
གཡས་པ་དཔུང་དང་མཛོད་འཕེལ་བྱེད། །གཡོན་པས་སྐལ་བ་བཟང་བ་དང་། །ནོར་དང་མཛོད་ཀྱང་འཕེལ་བར་བྱེད། །རྐང་པ་བཞི་ཆར་དཀར་བའི་རྟ། །རིགས་དང་ཆོས་ནི་འཕེལ་བྱེད་ཡིན། །ཆིག་གྲང་མན་ཆད་རྐང་བཞི་དཀར། །འབྲས་བུ་ཆེན་པོ་སྐྱེད་ཅེས་བྱ། །
བ་སྤུའི་མཐའ་མ་རྟིང་པའམ། །སྤྱི་བོར་གང་ཞིག་དཀར་གྱུར་རྟ། །དེ་ནི་སྔར་བཤད་ལས་ཁྱད་པར། །འབྲས་བུ་ཆུ་ངུན་སྐྱེད་པར་བྱེད། །པུས་མོའི་བར་དུ་དཀར་བའི་རྟ། །འབྲས་བུ་གསལ་པོར་འབྱིན་པར་འགྱུར། །རྟ་ནི་ཁ་དོག་གཞན་ཡོད་པ། །རྐང་པ་ལུས་
མདོག་མི་མཐུན་ན། །དེ་ཡི་འབྲས་བུ་སྔར་བཤད་པའི། །ཁྱད་པར་བཞིན་དུ་ཤེས་པར་བྱ། །གང་གི་ལག་པ་གཉིས་དཀར་ཞིང་། །རྐང་པ་གཉིས་ནི་གནག་པ་འམ། །དམར་བའི་ཁ་དོག་གཞན་ཡོད་པ། །དེ་ནི་ཉིན་མོ་རྒྱལ་བྱེད་ཡིན། །དེ་ལས་བཟློག་པར་གྱུར་པ་
ནི། །མཚན་མོ་རྒྱལ་བར་བྱེད་པ་ཡིན། །གང་ཞིག་ཁ་དོག་དམར་པོའི་རྟ། །རྐང་པ་སྔོ་སེར་དཀར་དང་གནག །ཡང་ན་རྨིག་པ་སྔོ་བ་འམ། །སེར་དང་དམར་དང་དཀར་དང་གནག །ཁ་དོག་གཉིས་སམ་གསུམ་མམ་བཞི། །མདོག་གང་མདོག་རྗེས་ཡོད་གྱུར་པ། །

203-1-196b

ལྷ་ཡི་རྟ་ནི་དེ་འདྲ་འབྱུང་། །དེ་ཡི་རྒྱལ་པོ་རྒྱལ་བྱེད་ཅིང་། །དགྲ་རྣམས་ཐུལ་བར་བྱེད་པ་དང་། །གཡུལ་དུ་རྟག་ཏུ་ཤིས་པ་དང་། །ནོར་དང་བུ་དང་ཚ་བོར་ལྡན། །གང་ཞིག་སྐྱེས་པ་ཚུན་ཚང་ནི། །རྔ་རྔོག་སྐྱེ་བར་མི་འགྱུར་བ། །བདག་པོ་རིགས་ནི་བརླག་བྱས་ནས། །དེ་ཡི་
རྗེས་ལ་ངར་ཉིད་ཉམས། །རྨོང་ཁ་ཡི་ནི་གཡས་གཡོན་ན། །བ་ཡི་ནུ་སོར་ལྟ་བུ་དག །ཡོད་པ་དེ་ཡིས་རྒྱལ་སྲིད་འཇིག །བ་གླང་རྭ་འདྲ་རུ་རུ་ཡི། །རྭ་ཡི་རྩེ་འམ་བ་ནུ་འདྲ། །ལྕི་བའི་རྩེ་མོ་ལྟ་བུ་འམ། །དེ་བཞིན་པགས་པའི་མཛེར་པའི་དབྱིབས། །ཡང་ན་བིལ་བ་ལྟ་
བུ་འམ། །ལག་སོར་ལྟ་བུའི་རྭ་དག་ནི། །སྦོམ་པོའམ་ཡང་ན་ཕྲ་མོ་དག །རིང་དང་ཐུང་དང་རྩུབ་དང་ལྗང་། །སྲ་དང་སྙི་བ་གང་ཡང་རུང་། །རྣ་རྩའམ་སྐྲ་མཚམས་ཐ་མ་འམ། །དཔྲལ་བ་ཡང་ན་སྤྱི་བོ་འམ། །དེ་ལས་གཞན་པའི་གནས་དག་ཏུ། །དེ་ལས་གཞན་པའི་དབྱིབས་ཡོད་
པ། །གང་བྱུང་དེ་ནི་རྭ་ཅན་དེ། །བདག་པོ་ཡུལ་འཁོར་འཇིག་བྱེད་ཡིན། །ཡུལ་ཕྱོགས་གང་ན་རྟ་དེ་ཡོད། །ཡུལ་དེ་རླག་པར་འགྱུར་བ་ཡིན། །དེས་ན་དེ་ནི་དགྲ་བོ་ཡི། །ཡུལ་དུ་བསྐྱལ་ལ་རྗེས་ཞི་བྱ། །རྟ་ནི་གང་གི་ཁ་ལ་ནི། །ཤ་ཁྲ་ཡིས་ནི་ཀུན་དུ་ཁྱབ། །དེ་བཞིན་རྐུབ་དང་རླིག་
པ་དང་། །རྣ་བ་དག་དང་མིག་ཏུ་བྱུང་། །རྟ་དེ་ཤ་ཁྲ་ཅན་ཞེས་བྱ། །མི་ཤིས་སྡིག་པའི་མཚན་ཉིད་ཅན། །རྟ་བྲེས་སུ་ནི་མི་གཞུག་ཅིང་། །བཀྲ་ཤིས་འདོད་པས་རེག་མི་བྱ། །མིག་གི་ཉེས་པ་བཤད་བྱ་ཡི། །ཁྱི་མིག་དོམ་དང་བྱི་བའི་མིག །སྦལ་མིག་ནོར་བུའི་མིག་འདྲ་དང་། །བྱི་བ་
འུག་པ་ཉ་མིག་ཅན། །ཕག་དང་ཁྱུ་མཆོག་ལྟ་བུའི་མིག །བྱ་རོག་ལུག་དང་ཁྲ་མིག་ཅན། །ཁྲ་ཡི་མིག་ཅན་སྨད་པ་ཡིན། །མིག་ཡོ་མིག་ནི་གདུག་པ་དང་། །མིག་སེར་བ་ཡང་སྤང་བར་བྱ། །དེས་ནི་བདག་པོ་མི་བདེ་ཞིང་། །རིགས་ཟད་པ་ཡང་བྱེད་པ་ཡིན། །གཡུལ་དུ་བདག་
པོ་ཕམ་དང་གསོད། །རྐན་གྱི་མདོག་ནི་སྣ་ཚོགས་དང་། །དབྱིབས་ཀྱི་འབྲས་བུ་ང་ཡིས་བཤད། །གེ་སར་ནག་པོ་ལྟ་བུ་ཡི། །ཐིག་ལེ་གང་ལ་ཁྱབ་གྱུར་པ། །དེས་ནི་ལམ་དུ་ཉོན་མོངས་འགྱུར། །རྐན་གྱི་ཕྱེད་ནི་དཀར་བ་ཡིས། །ནོར་ཟད་གེ་སར་ལྟ་བུ་ཡིས། །འགགས་

203-1-197a

ན་མི་ཤིས་གྱུར་པ་ཡིན། །རྐན་ནི་སྣུམ་ཞིང་ཟབ་པ་དང་། །དམར་བར་གྱུར་ན་བསྔགས་པ་ཡིན། །ཤིན་ཏུ་དམར་ཞིང་ཆེར་ཁྱབ་ལ། །རྩུབ་མོ་མེད་ལའང་འབྲས་བུ་ཆེ། །སྣུམ་ཆུང་དམར་བའི་ཤ་ཆུང་བ། །འབྲས་བུ་ཆུང་བར་ཤེས་པར་བྱ། །རྐན་
གྱི་ཁ་དོག་འབྲས་བུ་དང་། །སོ་ཡི་འབྲས་བུ་ཉིད་དང་ནི། །མཚན་ཉིད་གནས་དང་བཞི་ལས་བརྟག །རླིག་འབྲས་གཅིག་པ་བདག་པོ་གསོད། །རླིག་འབྲས་གསུམ་པ་བུ་གསོད་བྱེད། །རླིག་འབྲས་མེད་པ་བཀྲ་མི་ཤིས། །རླིག་འབྲས་དམར་སེར་ནོར་ཉམས་བྱེད། །རླིག་
འབྲས་ཤིན་ཏུ་འཕྱང་བ་དང་། །གཡུལ་དུ་བདག་པོ་གསོད་པར་བྱེད། །རླིག་པ་སྤུ་ནི་ཆེ་བ་འམ། །ཡང་ན་སེར་སྐྱར་གྱུར་པ་འམ། །དེ་བཞིན་ཞུ་བར་གྱུར་པ་ཡང་། །དེ་ཡིས་བདག་པོ་གསོད་བྱེད་ཡིན། །ཁ་དོག་གཞན་དང་ལྡན་པ་ལ། །པུས་མོ་གཉིས་ནི་ནག་གྱུར་ཅིང་། །
སྲེ་ལོང་ནག་པོར་གྱུར་པ་ནི། །བདག་པོ་གསོད་བྱེད་ཤེས་པར་བྱ། །ལུས་ཀྱི་ཁ་དོག་ཉིད་ལས་ནི། །རྔ་མའི་ཁ་དོག་གཞན་གྱུར་པ། །འབར་བའི་རྔ་མ་ཅན་ཞེས་བྱ། །རྟ་དེ་རྟག་ཏུ་སྤང་བར་བྱ། །རྔ་མའི་རྩེ་མོ་མདོག་གཞན་གྱུར། །ཡུལ་འཁོར་ཡང་ནི་རླག་པར་བྱེད། །རྟ་ནི་
མདོག་དཀར་གྱུར་པ་ལ། །ནག་པོ་ཅུང་ཟད་ཡོད་མི་ཤིས། །རྣ་བ་དང་ནི་རྔོག་མ་ནག །རྔ་རྩེ་ནག་པོར་གྱུར་པ་ནི། །དེ་ནི་རྣ་ནག་ཡིན་ཞེས་བྱ། །ལས་རྣམས་ཀུན་ལ་ཤིས་པ་ཡིན། །གཡུལ་དང་ལམ་ཞུགས་ཁལ་བཀལ་བ། །རྒྱལ་པོའི་འདོད་པ་ཀུན་སྒྲུབ་ཡིན། །རྔ་མ་
འབར་བ་ཞེས་བྱ་དང་། །རྔ་རྩེ་ནག་པ་མ་གཏོགས་པ། །རྟ་ནི་ཁ་དོག་ནག་པ་ལ། །དཀར་པོ་ཅུང་ཟད་ཡོད་པ་ཤིས། །ལྷམ་བུ་ཆུ་ཤེལ་མདོག་འདྲ་ཞིང་། །གང་གི་མགོ་ནི་དཀར་གྱུར་པ། །རྟ་དེ་དཔལ་ཡོན་ཅན་ཞེས་བྱ། །རྒྱལ་པོ་རྣམ་རྒྱལ་སྐྱེད་བྱེད་ཡིན། །ཤ་ལི་ཧོ་
ཏྲའི་མདོའི་གནས་ལས་འདྲེས་པའི་ལེའུ་སྟེ་ཉི་ཤུ་རྩ་གཉིས་པའོ།།      །།ཁ་བ་ཅན་གྱི་རི་བོའི་མཆོག །འབྱུང་ཁུངས་སྣ་ཚོགས་ཀྱིས་བརྒྱན་པ། །ཤིན་ཏུ་མཐོ་ཞིང་རྩེ་མོ་ཆེ། །ཀུན་ནས་རླུང་ནི་མི་ལྡང་ཞིང་། །རྩེ་མོ་ཁ་བས་རྣམ་པར་གཡོགས། །མི་འམ་ཅི་ཡི་གླུ་

203-1-197b

སྒྲས་ཁྱབ། །བྱ་རྣམས་སྣ་ཚོགས་སྒྲ་འབྱིན་ཅིང་། །རི་དྭགས་སྣ་ཚོགས་རྣམས་ཀྱིས་མཛེས། །སྣ་ཚོགས་ཤིང་གིས་ཀུན་དུ་ཁྱབ། །མཁའ་ལ་རྒྱུ་བ་རྟག་ཏུ་དགའ། །རིག་འཛིན་ཚོགས་ནི་ལེགས་གནས་ཤིང་། །དྲི་ཟའི་ཚོགས་ཀྱིས་བསྟེན་པར་ནི། །ཤ་ལི་ཧོ་ཏྲ་ལེགས་
གནས་ལ། །ལེགས་ཐོས་ཀྱིས་ནི་ཡང་དྲིས་པས། །རྒྱལ་པོའི་བཞོན་པར་འོས་པའི་རྟ། །དྲང་སྲོང་ཆེན་པོས་བདག་ལ་གསུངས། །རྒྱལ་པོའི་རྟ་ནི་ཅི་ལྟ་བུ། །དེ་ཡི་ངེས་པ་བདག་ལ་གསུངས། །བུ་ཡིས་དེ་སྐད་དྲིས་པ་དང་། །ཤ་ལི་ཧོ་ཏྲས་སླར་སྨྲས་པ། །ཡོན་ཏན་སྐྱོན་
དག་རྒྱལ་པོ་ལ། །འཇིག་རྟེན་འབྱུང་བ་ཅི་འདྲ་བར། །དེ་ལྟར་ཐ་མ་མི་རྣམས་ལ། །འབྱུང་མི་འབྱུང་བར་གཞུང་ལས་བཤད། །དེ་བས་རྒྱལ་པོའི་བཞོན་པ་ཡི། །མཚན་ཉིད་འབད་པས་བརྟག་པར་བྱ། །ཅི་ནས་ཉེས་པ་མི་འབྱུང་བར། །རྣམ་པ་ཀུན་ཏུ་བྱ་བ་ཡིན། །ཚད་དང་སྟོབས་དང་
སྙིང་སྟོབས་གཟི། །སྟོབས་དང་ལུས་ཀྱི་མེ་དྲོད་ལྡན། །གཙུག་འཁྱིལ་བཟང་ཞིང་མདངས་རབ་སྣང་། །འགྲོས་ནི་ཕུན་སུམ་ཚོགས་པ་དང་། །སྐད་བཟང་དྲི་ནི་ཞིམ་པ་དང་། །དེ་བཞིན་སྐྱེ་གནས་བཟང་བ་དང་། །རིག་ལྡན་ངང་ཚུལ་ཕུན་སུམ་ཚོགས། །དུལ་ཞིང་མཐོང་ན་དགའ་བ་དང་། །
བད་ཀན་རང་བཞིན་ཅན་མཆོག་དང་། །དེ་བཞིན་བཟང་པོའི་སྐྱེ་གནས་དང་། །སྨད་པའི་མཚན་ཉིད་མེད་གྱུར་ཅིང་། །ཀུན་ནས་རྣམ་པ་ཐམས་ཅད་དུ། །མཚན་ཉིད་བཟང་པོ་ཕུན་ཚོགས་པ། །རབ་ཏུ་འབད་དེ་བརྟག་པར་བྱ། །རྒྱལ་པོའི་བཞོན་པར་འོས་པའི་རྟ། །རྒྱལ་པོའི་
རྟ་ཞེས་བྱ་བར་བཤད། །གང་ཞིག་གཞན་ཀུན་མེད་པ་ཡི། །བརྟན་པའི་གཙུག་ནི་བཅུ་དང་ལྡན། །རྒྱལ་པོའི་བཞོན་པར་འོས་པའི་རྟ། །མ་ལི་ཀ་དང་འདྲ་བའི་མིག །མདོག་སྣུམ་རབ་ཏུ་དཀར་བའི་རྟ། །ཟླ་བའི་ལྷ་དང་ལྡན་པ་ཡིན། །རྒྱལ་པོ་དེ་ལ་ཞོན་ན་ནི། །ས་སྟེང་
དབང་དུ་བྱེད་པར་འགྱུར། །ནེ་ཚོ་མདོག་ཅན་ཉི་མའི་རྟ། །རྒྱལ་པོའི་གཡུལ་ངོར་ཞོན་ན་ནི། །དེ་ཡི་དོན་རྣམས་འགྲུབ་འགྱུར་ཞིང་། །ས་ཡང་དབང་དུ་བྱེད་པར་འགྱུར། །དེ་བཞིན་རྒྱལ་པོའི་མདོག་དམར་རྟ། །རྣམ་ཐོས་སྲས་ཀྱི་ལྷ་ཅན་ཏེ། །དེ་ལ་བཞོན་ན་ས་རྣམས་ནི། །མ་

203-1-198a

ལུས་དབང་བྱེད་ཐེ་ཚོམ་མེད། །སྔོ་བསངས་ལྷ་དབང་རྟ་ཡིན་ཏེ། །མདངས་སྣུམ་ལྡན་ལ་རྒྱལ་པོ་ནི། །ཞོན་ན་ས་ནི་མ་ལུས་ལས། །རྟག་ཏུ་རྒྱལ་བར་ངེས་པ་ཡིན། །གནག་ཅིང་འཚེར་བའི་མདངས་དང་ལྡན། །རྟ་མཆོག་དེ་ནི་ཆུ་ལྷའི་ཡིན། །དེ་ལ་ཞོན་ན་རྒྱལ་
པོ་ནི། །མྱུར་དུ་ནོར་དང་འབྲུ་འཕེལ་འགྱུར། །མདོག་དཀར་རྣ་བ་སྔོ་བ་དང་། །རྔོག་མ་དང་ནི་རྔ་མ་གནག །ཆུ་ལྷའི་རྟ་ནི་གཉིས་པ་སྟེ། །དེ་རྙེད་པ་ནི་མ་ལུས་འཐོབ། །ལྷམ་བུ་ཆུ་ཤེལ་ལྟར་སྣང་བ། །རྟ་ནི་ནོར་ལྷའི་ཡིན་པར་བཤད། །རྒྱལ་པོ་དེ་ལ་ཞོན་ན་ནི། །མྱུར་དུ་ནོར་མང་
བདག་པོར་འགྱུར། །བ་སོའི་མདོག་འདྲ་རྔ་མ་གནག །ཀུན་ནས་མདངས་ནི་སྣུམ་དང་ལྡན། །ཆོས་ཀྱི་ལྷ་དེས་དེ་ཞོན་ན། །རྒྱལ་པོ་མཆོག་སྦྱིན་བྱེད་པར་འགྱུར། །ལུང་ཏང་སྣུམ་པོ་དང་འདྲ་བ། །རྟ་མཆོག་དེ་ནི་གཤིན་རྗེའི་ཡིན། །རྒྱལ་པོ་དེ་ལ་ཞོན་གྱུར་ན། །མྱུར་དུ་དགྲ་ཀུན་
ལས་རྒྱལ་འགྱུར། །རྨ་བྱའི་མདངས་དང་འདྲ་བ་ཡི། །རི་མོས་ཁྱབ་པར་གྱུར་པའི་རྟ། །སྣ་ཚོགས་ལྷའི་ཡིན་ཏེ་ཞོན་ན། །འདོད་པ་ཐམས་ཅད་ཐོབ་པར་འགྱུར། །དེ་བཞིན་མརྒད་བཅག་པ་ཡི། །མདོག་ལྟར་ཤིན་ཏུ་དམར་བའི་རྟ། །ཁྱབ་འཇུག་རྟ་སྟེ་དེ་ཞོན་ན། །མྱུར་དུ་ས་ནི་
དབང་བྱེད་འགྱུར། །དེ་བཞིན་གསེར་དང་འདྲ་བ་ལ། །འཚེར་བས་རྣམ་པར་བརྒྱན་གྱུར་པ། །དབང་ཕྱུག་ཆེན་པོའི་རྟ་ཞོན་ན། །དགྲ་རྣམས་དབང་དུ་འགྱུར་བ་ཡིན། །དེ་བཞིན་ཤེལ་དང་འདྲ་བ་རུ། །དང་ཞིང་མདངས་བཅས་ལུས་ཡོད་པ། །རྙེད་ན་མཆོག་སྦྱིན་དམ་པ་ཡི། །སྐལ་
བ་རྙེད་པར་འགྱུར་བ་ཡིན། །གང་ཞིག་ནག་ལ་མགོ་བོ་དང་། །རྐང་པ་བཞི་ནི་དཀར་གྱུར་པ། །ཤེས་ལྡན་རྟ་དེ་རྙེད་ན་ནི། །ནད་ཀྱིས་ཟིལ་གནོན་མི་འགྱུར་རོ། །ལྷམ་བུ་ཆུ་ཤེལ་འདྲ་བ་ལ། །སྔར་ཞིང་ཡན་ལག་ལྔ་དཀར་བ། །རྒྱལ་པོ་དེ་ལ་ཞོན་ན་ནི། །ཕུན་སུམ་ཚོགས་པ་ཐམས་
ཅད་ཐོབ། །ལུས་ཀྱི་མདོག་ནི་གཞན་འདྲ་ཞིང་། །མཚན་ཉིད་ཐམས་ཅད་ལྡན་པ་ཡི། །ཐ་སྐར་བུ་ཡི་རྟ་རྙེད་ན། །རྟ་ནི་མང་པོ་རྙེད་པར་འགྱུར། །དཀར་དང་གནག་པའི་ཚུལ་གྱིས་ཁྲ། །གཡས་ལོགས་དཀར་བའི་ཤས་ཆེ་ལ། །གཡོན་པ་ཁྲ་བོར་གྱུར་པ་ཡི། །རྟ་ནི་ཁྲ་བོར་རྙེད་

203-1-198b

གྱུར་ན། །རྟ་དེའི་ལྷ་ནི་ངན་སྤོང་སྟེ། །འདོད་པ་ཐམས་ཅད་རབ་སྒྲུབ་ཡིན། །ལྷམ་བུ་ཆུ་ཤེལ་འདྲའི་མདོག་ལ། །ནེ་ཚོའི་མདོག་འདྲའི་འཁོར་ལིང་ཅན། །དྲག་པོའི་རྟ་དེ་རྙེད་ན་ནི། །འདོད་པ་ཐམས་ཅད་ཐོབ་པར་འགྱུར། །དེ་ལྟ་བུ་ཡི་རྒྱལ་བའི་རྟ། །རྒྱལ་པོ་ཡི་ནི་རྟག་ཏུ་བྱ། །
དེ་ཡི་གནས་ནི་རྟ་གཞན་དག །གང་དང་ཡང་ནི་གཅིག་མི་བྱ། །ངོ་མཚར་མདོག་དང་ལྡན་པའི་རྟ། །དམོད་པས་ས་སྟེང་སྐྱེས་པ་ཡིན། །དྲི་ཟའི་བུར་ནི་ཤེས་གྱིས་ལ། །རབ་ཏུ་འབད་དེ་བསྙེན་བཀུར་བྱ། །ཤ་ལི་ཧོ་ཏྲའི་མདོའི་གནས་ལས་རྒྱལ་པོའི་བཞོན་པའི་རྟའི་མཚན་
ཉིད་བརྟག་པའི་ལེའུ་སྟེ་ཉི་ཤུ་རྩ་གསུམ་པའོ།།      །།དེ་ནས་གཞན་ཡང་བཤད་བྱ་བ། །རྟ་ཡི་མིག་གི་མཚན་ཉིད་དོ། །གང་ཞིག་བཻ་ཌཱུརྱ་འདྲའི་མདོག །དེ་བཞིན་ཤེལ་གྱི་མདོག་འདྲ་དང་། །ཕུག་རོན་གྱི་ནི་མིག་འདྲ་དང་། །ཀ་ལ་པིངྐའི་མིག་འདྲ་དང་། །གླང་ཆེན་རྨ་
བྱ་རྔ་མོ་དང་། །སྲེག་པའི་མིག་དང་འདྲ་བ་དང་། །གསེར་གྱི་མདོག་དང་འདྲ་བ་ཉིད། །དེ་ཡི་མིག་ནི་ཤིས་པ་ཡིན། །སྐྱོན་མེད་པ་ཡི་མིག་ལ་ནི། །རྫི་མ་ཕྲ་མོས་ཁྱབ་པ་དང་། །མིག་འབྲས་ལེགས་ཤིང་མ་སྣད་ལ། །ཐུར་དུ་བལྟས་པར་མ་གྱུར་པ། །མདོག་ནི་བཟང་པོ་
དང་ལྡན་ཞིང་། །མིག་གི་མདངས་དང་ལྡན་པའི་རྟ། །དེ་ནི་གཡུལ་ལས་རྒྱལ་བྱེད་པའི། །རྒྱལ་བ་ཡི་ནི་བཞོན་པར་འགྱུར། །ཡངས་ཤིང་སྣུམ་ལ་མཉམ་པ་དང་། །མེ་ཏོག་མ་ལི་ཀ་འདྲ་དང་། །ཐ་མ་རིང་མོ་ཡོད་གྱུར་ཅིང་། །དབུས་ན་ཡོངས་སུ་མཛེས་པ་དག །རྟ་དེ་མ་
ལི་ཀའི་མིག་ཅན། །མིག་ཟུར་ཅུང་ཟད་གནག་པ་ཡིན། །དེ་ཡིས་མཛའ་བོ་འཕེལ་འགྱུར་ཞིང་། །རྟ་དང་མཛོད་ཀྱང་རྒྱས་པར་འགྱུར། །དཀར་བའམ་མདོག་རྗེས་དཀར་གྱུར་ལ། །མིག་ལ་སྐྱོན་མེད་མཐོང་མིག་ནག །རྫི་མ་མིག་དཀྱུས་ནག་གྱུར་པ། །གང་ལ་ཡོད་པ་
དེར་ནོར་སྐྱེད། །མིག་ནི་ཤེལ་དུ་འདྲ་བ་ལ། །རྒྱལ་མོའི་རྩ་བ་གནག་གྱུར་ཅིང་། །མིག་གི་རྒྱལ་མོ་རྡུལ་མེད་པས། །དེ་ནི་ཤེལ་མིག་ཅན་ཞེས་བྱ། །མིག་དང་ལུས་ཀྱི་མདོག་འདྲ་བ། །མིག་གི་མདོག་ཅན་ཞེས་བྱ་དགེ། །ཁ་དོག་ལུས་དང་ཐ་དད་ཀྱང་། །གང་གི་མིག་

203-1-199a

ནི་བཟང་གྱུར་ཅིང་། །མི་སྡུག་པ་དང་མ་ཚང་མེད། །དེ་ནི་མིག་བཟང་ནོར་འཕེལ་བྱེད། །ཁ་དོག་ལུས་དང་ཐ་དད་ཅིང་། །སྨད་པར་བྱ་བའི་མིག་ཡོད་པ། །མིག་ངན་པ་ཡི་རྟ་གང་ཡིན། །ལས་རྣམས་ཀུན་ལ་སྨད་པ་ཡིན། །དེ་བས་དབྱིབས་
དང་ཚད་ལྡན་ཞིང་། །དཔེ་དང་ལེགས་པར་འདྲ་བ་དང་། །རྫི་མའི་ཁ་དོག་སྣུམ་པ་ཡི། །མིག་གང་ཡིན་པ་དེ་བསྔགས་སོ། །ཤ་ལི་ཧོ་ཏྲའི་མདོའི་གནས་ལས་མིག་བརྟག་པའི་ལེའུ་སྟེ་ཉི་ཤུ་རྩ་བཞི་པའོ།།      །།བསྒྲུབ་དང་གྲུབ་པའི་རིག་འཛིན་གཙོ། །དྲང་སྲོང་
གཟི་བརྗིད་ཆེན་པོ་ལ། །ཡོན་ཏན་ངེས་ཀྱིས་ཡོངས་དྲིས་པ། །རྟ་སོའི་རིག་བྱེད་མཁྱེན་ལགས་སམ། །དེ་སྐད་དྲིས་ཆེ་དྲང་སྲོང་མཆོག །ཤ་ལི་ཧོ་ཏྲའི་སླར་སྨྲས་པ། །རྟ་སོའི་རིག་བྱེད་ཤེས་ལགས་སོ། །བུ་ཁྱོད་ཀྱིས་ནི་ཉན་པར་གྱིས། །མདུན་མོ་ཐམས་ཅད་ཐགས་
བཟང་སྙོམས། །སྲ་ཞིང་མཚན་མ་རབ་ཏུ་གསལ། །སྣུམ་པའམ་སྦྲང་རྩིའི་མདོག་འདྲ་བའི། །རྟ་ཡི་སོ་ནི་བསྔགས་པ་ཡིན། །མཆེ་བ་སོ་དང་མདོག་འདྲ་དང་། །འགྲམ་སོ་རྣམས་ཀྱང་དེ་དང་འདྲ། །སོ་རྣམས་གཏིང་རིང་སྲབ་པ་དང་། །རི་མོ་ཕྲ་ཞིང་ཤིན་ཏུ་འཇམ། །གོས་
པ་མེད་ཅིང་རྩ་བ་ཡི། །མདོག་དང་ཀུན་དུ་འདྲ་བ་ཤིས། །མཉམ་ཞིང་ཡན་ལག་རབ་ཏུ་འབྱོར། །ཆུ་ཞེང་ཚད་དང་ལྡན་པ་དང་། །གཟུགས་ནི་ཤིན་ཏུ་ལེགས་གྱུར་པའི། །སོ་ནི་བདེ་བ་སྐྱེད་བྱེད་ཡིན། །སོ་ནི་ལྷག་པ་ཡོད་པའི་རྟ། །བདག་པོ་ཡུལ་མི་རྣམས་ལ་གནོད། །དེ་
བཞིན་སོ་ནི་མ་ཚང་བ། །བདག་པོ་ཆུང་མར་བཅས་པ་བརླག །སོ་ཡིས་ཁ་ནི་ཁེངས་གྱུར་པ། །རིགས་རླག་བྱེད་པས་སྤང་བར་བྱེད། །སོ་རྩ་སོ་དང་བཅས་པ་ནི། །མི་ཤིས་པ་ཡི་གཟུགས་ལྡན་ཞིང་། །ལོག་ལས་བྱུང་བར་གྱུར་པ་དག །གཙིགས་པ་དེ་ནི་རིགས་རླག་བྱེད། །
རྟ་ཡི་སོ་ནི་གནག་གྱུར་པ། །བདག་པོའི་ནོར་ནི་རླག་བྱེད་ཡིན། །མཐོ་དམན་ཁྱེར་དང་སྦོམ་ཕྲ་ཁྱེར། །དེ་བཞིན་ཕྲེད་ནི་རྣམ་པར་སྤངས། །མི་མཉམ་མེད་ཅེས་བྱ་སོ་དེ། །བདག་པོའི་བུ་ནི་གསོད་བྱེད་ཡིན། །རྩེ་མོ་ནང་དུ་གྲུབ་པ་ཡི། །སོ་ནི་ནོར་རྣམས་འཇིག་བྱེད་ཡིན། །

203-1-199b

ཐམས་ཅད་བྱུང་བའི་ཆག་པ་འམ། །གང་ཞིག་སོ་ནི་སྔོན་དུ་འདུས། །དེ་ནི་ཤིན་ཏུ་ཉེས་ཆེན་སྐྱེད། །མདོག་དང་དབྱིབས་ནི་ཉ་ཕྱིས་འདྲ། །སོ་དེ་ཉ་ཕྱིས་ཅན་ཞེས་བྱ། །ཉ་ཕྱིས་སོ་ཅན་རྟ་ཡིས་ནི། །ཟས་དང་སྐོམ་ལ་གནོད་པ་སྐྱེད། །འོག་སོ་ཤིན་ཏུ་གྱེས་གྱུར་ན། །བདག་
པོ་ལྟོགས་པའི་འཇིགས་པ་འབྱུང་། །ཡ་སོ་ཤིན་ཏུ་གྱེས་གྱུར་ན། །བདག་པོ་དགྲ་ལས་ཕམ་པར་འགྱུར། །ཟུར་གསུམ་རྩེ་མོ་རྣོ་བའི་སོ། །སྒ་དང་ནོར་ནི་འཕྲོག་བྱེད་ཡིན། །ས་དང་བཅས་པར་སྐྱེས་གྱུར་ན། །དེ་ནི་ཐམས་ཅད་ཟད་བྱེད་ཡིན། །དེ་དག་ལས་ནི་གོ་བཟློག་
པའི། །སོ་བཟང་འབྲས་བུ་ཤིས་པ་ཡིན། །མཆེ་བ་དང་ནི་འགྲམ་སོ་ཡི། །འབྲས་བུ་དེ་བཞིན་ཤེས་པར་གྱིས། །ཤ་ལི་ཧོ་ཏྲའི་མདོའི་གནས་ལས་སོ་བརྟག་པའི་ལེའུ་སྟེ་ཉི་ཤུ་རྩ་ལྔ་པའོ།།      །།མེ་དང་ཉི་མའི་མདོག་འདྲ་བ། །དཀའ་ཐུབ་ཅན་དེ་སྡིག་པ་
མེད། །ཐུབ་མཆོག་ཤ་ལི་ཧོ་ཏྲ་ལ། །མཛའ་ལས་རྒྱལ་གྱིས་ཡང་དྲིས་པ། །བརྟན་པའི་གཙུག་ནི་དུར་ཤེས་བྱ། །གློ་བུར་བས་ནི་དུ་ཞིག་ཡིན། །ཤེས་དང་ཤེས་བྱའི་བདག་པོ་ཡིས། །གཙུག་རྣམས་ཀྱི་ནི་མཚན་ཉིད་ནི། །གང་དུ་ཇི་ལྟར་གནས་པ་ཡིན། །གཙུག་རྣམས་
ཀྱི་ནི་དབྱིབས་གྱུར་པ། །རྣམ་པ་དུར་ནི་འགྱུར་བ་གསུངས། །གཙུག་གི་ཚད་ནི་ཇི་ཙམ་ཞིག །ཤེས་དང་སྨད་པའི་གྲངས་ནི་དུ། །ཐམས་ཅད་གནས་ལས་འཕྲོ་བ་དང་། །གཡས་པ་དང་ནི་གཡོན་པ་དང་། །སྟབས་པ་དང་ནི་སྨན་པ་ཡི། །འབྲས་བུ་འོད་ཟེར་ཅི་ལྟར་
འགྱུར། །གཞན་ཡང་ལུས་ཀྱི་མཚན་ཉིད་ནི། །བརྟན་དང་མི་བརྟན་ཇི་ལྟ་བུ། །ལུས་ལས་སྐྱེས་པའི་གནས་རྣམས་ནི། །གནས་ཀྱི་གང་ཞིག་གནས་སྐབས་དང་། །རྐན་གྱི་ཁ་དོག་བྱེ་བྲག་གི། །གློ་བུར་བྱུང་བའི་འབྲས་བུ་དང་། །སྲབ་དང་མཐུག་པའི་སྤུ་རྣམས་ནི། །
གཙུག་ལ་ཇི་ལྟར་འབྱུང་བ་ལགས། །དེ་སྐད་ཐུབ་མཆོག་ལ་དྲིས་ཚེ། །ཤ་ལི་ཧོ་ཏྲས་བུ་ལ་སྨྲས། །འདི་ན་བརྟན་དང་མི་བརྟན་དང་། །ཡན་ལག་རྣམ་པ་བརྒྱད་ཡིན་ལ། །འབྲས་བུ་འབྱུང་བའི་ཚུལ་གྱིས་ནི། །མཚན་ཉིད་རབ་ཏུ་ཤེས་པར་བྱ། །ཤིས་དང་རྨ་བྱའི་མཚན་

203-1-200a

ཉིད་ནི། །ཐམས་ཅད་ལུས་ལ་བརྟེན་པ་ཡིན། །ལུས་ལས་འབྱུང་བར་གྱུར་པ་ནི། །ལུས་དང་ཡན་ལག་རྣམ་པ་གཉིས། །དགེ་བའི་གནས་སུ་ཤིས་པའི་གཙུག །རྒྱ་ཆེ་བ་ཡི་འབྲས་བུ་སྟེར། །མི་ཤིས་གནས་ནི་ངན་པ་འབྱུང་། །ཤིན་ཏུ་མི་ཤིས་སྐལ་
ཆེན་འགྱུར། །ཚད་དང་ལྡན་ཞིང་གསལ་བར་བྱུང་། །མཚན་ཉིད་ལྡན་པའི་འབྲས་བུ་ཆེ། །ཚད་མི་ལྡན་ཞིང་མི་གསལ་བ། །དེའི་འབྲས་བུ་ཆུང་བར་འདོད། །གནས་དང་དབྱིབས་ཀྱི་བྱེ་བྲག་ལས། །མཚན་ཉིད་འབྲས་བུ་ཆེན་པོར་འགྱུར། །སོར་གཉིས་ལས་ལྷག་ཉ་ཕྱིས་
ཏེ། །སོར་གཉིས་པ་ནི་ལྷག་ཅེས་བྱ། །ཤིང་ལྷམ་འདྲ་དང་རྐང་བརྒྱ་པ། །སོར་ནི་ཕྱེད་དང་གཉིས་པ་ཡིན། །ཤིང་ལྷམ་ཕྱེད་ནི་ནས་དྲུག་ཞེང་། །འདྲེས་པ་སོར་ནི་བརྒྱད་པ་ཡིན། །དེ་ཡི་ཆ་གསུམ་ཕྲི་བ་ནི། །འཁྱིལ་བ་ཞེས་ནི་བྱ་བར་བཤད། །བཞི་ཆ་ཕྲི་བར་གྱུར་པ་ནི། །
ཁ་འབུས་པ་ཞེས་བྱ་བ་ཡིན། །དེ་ལས་ལྷག་པའམ་མ་ཚང་བའི། །གཙུག་ནི་འབྲས་བུ་མེད་པ་ཡིན། །པགས་སྲབ་སྤུ་ནི་ཕྲ་བ་དང་། །ལུས་ཀྱི་གསང་བའི་གནས་སུ་བྱུང་། །དེ་ནི་ངོ་བོ་ཉིད་ཀྱིས་ཕྲ། །ཚད་དང་ལྡན་རུང་མི་ལྡན་རུང་། །འབྲས་བུ་བཅས་པར་ཤེས་པར་བྱ། །
ཕྲ་བ་དེ་དག་གནོད་བྱེད་ཡིན། །ཡན་ལག་བརྒྱད་པའི་མཚན་ཉིད་ཀྱིས། །ཤིས་དང་མི་ཤིས་འོག་ནས་བཤད། །རྟ་ཡི་གནས་བཅུའི་སྤུ་ཚོགས་ལ། །བསྟན་པ་གང་ཡིན་དེར་ཤེས་བྱ། །མཆུ་སྒྲོས་རྡོག་མར་རེ་རེ་དང་། །གཙུག་དང་བྲང་ལ་གཉིས་གཉིས་ཏེ། །རྒྱུ་ཞབས་
རྐུབ་ལྷག་གཉིས་གཉིས་ཏེ། །བཅུ་པོ་དེ་དག་ལྡན་པར་བཤད། །ཀུན་ནས་རྫོགས་ཤིང་ཤིན་ཏུ་གསལ། །གཙུག་ནི་གཡས་སུ་འཁྱིལ་བ་དང་། །ཆུང་བ་མ་ཡིན་ཆེ་བ་མིན། །གསེར་ལྟར་མདངས་སྣུམ་འོད་དང་བཅས། །དབྱིབས་ནི་ལེགས་པར་སྐྱེས་པ་དག །ལས་རྣམས་
ཐམས་ཅད་སྒྲུབ་བྱེད་ཡིན། །ལེགས་ཐོས་ཐེ་ཚོམ་སྐྱེས་གྱུར་ནས། །དྲང་སྲོང་དེ་ལ་སླར་སྨྲས་པ། །ཇི་ལྟར་བཅུ་པོ་ཉིད་ལྡན་གྱི། །གཞན་དག་དེ་ལྟར་མ་ཡིན་བཤད། །རྟ་རྣམས་སྐྱེས་ཟིན་གྱུར་ནས་ནི། །གཙུག་དེ་ནམ་ཡང་མི་སྐྱེ་ལ། །སྐྱེས་པ་འཇིག་པར་མི་འགྱུར་ཞིང་། །

203-1-200b

གནས་ལས་འཕོ་བར་མི་འགྱུར་རོ། །སྐྱེས་ཚེ་ལྷན་ཅིག་སྐྱེ་བར་འགྱུར། །དེ་བས་ཐམས་ཅད་བསྟན་པ་ཡིན། །ལེགས་ཐོས་ཚིག་ནི་ཐོས་པ་དང་། །དེ་རྗེས་དྲང་སྲོང་གིས་སྨྲས་པ། །ཇི་ལྟར་ཕྱོགས་དེར་སྐྱེས་གྱུར་པ། །དེ་ལྟར་གཞན་དུ་མ་ཡིན་པ། །ཕ་མར་ཡོད་དང་མེད་གྱུར་ཀྱང་། །ཅིག་
ཤོས་ལ་ནི་དབང་བ་ཡིན། །ཕལ་ཆེར་གནས་བཅུར་དབང་གྱུར་གྱི། །དེ་ལྟར་གཞན་དུ་མི་སྣང་ངོ་། །དེ་བས་བཅུ་པོ་བསྟན་པར་བྱ། །ངེས་པ་ཉིད་དུ་ཟུང་བར་གྱིས། །འདི་དག་ལ་མེད་ངེས་འབྱུང་བ། །གཞན་དག་དེ་ལྟར་མིན་པར་བཤད། །བརྟན་དང་མི་བརྟན་གང་ཡིན་ཀྱང་། །འབྲས་
བུ་རྣམ་པ་གཉིས་སུ་བཤད། །གནས་ནི་དགུ་བཅུ་རྩ་དྲུག་ཡིན། །དབྱིབས་ནི་རྒྱལ་པོ་ཉིད་ཡིན་ནོ། །འདྲེས་དང་ཁ་འབུས་འཁྱིལ་བ་དང་། །རྐང་པ་བརྒྱ་དང་ལྷག་པ་དང་། །ཤིང་ལྷམ་དང་འདྲ་ཤིང་ལྷམ་ཕྱེད། །ཉ་ཕྱིས་འདྲ་སྟེ་རྣམ་པ་བརྒྱད། །སྨད་པའམ་བསྔགས་པའི་གནས་
དག་གམ། །གནས་སུ་བསྟན་དང་མ་བསྟན་གང་། །གཙུག་འཁྱིལ་པ་ཡི་དབྱིབས་བྱུང་ན། །དེ་ནི་རྗེས་མཐུན་འབྲས་བུ་སྐྱེད། །འཁྱིལ་བ་ཆུ་སྐོར་ལྟ་བུ་ཡིན། །ཉ་ཕྱིས་ཉ་ཕྱིས་དབྱིབས་ལྟར་འོང་། །དབྱིབས་གཅིག་གཉིས་སམ་མང་པོར་ནི། །དུ་མ་གང་ཚེ་འདུས་གྱུར་པའི། །
གཙུག་འཁྱིལ་དེ་ནི་འདྲེས་པའམ། །འདུས་པ་ཞེས་ནི་བྱ་བར་བཤད། །སྤུ་ནི་འགྲོ་ཚེ་མེ་ཏོག་དག །ཁ་འབུས་ལྟར་སྣང་ཁ་འབུས་ཡིན། །བཟློག་པ་ལྟར་སྣང་ལྷག་པ་ཡིན། །ཟླུམ་པོའམ་ཡང་ན་ཟུར་བཞི་ནི། །ཤིང་ལྷམ་དབྱིབས་འདྲ་ཤིང་ལྷམ་ཅན། །བྲང་བའམ་ཡང་ན་རྟིང་
པའི་གནས། །བྱེད་འདྲ་ཤིང་ལྷམ་ཕྱེད་པ་ཡིན། །མེ་ཏོག་མགོ་ལྕོགས་དབྱིབས་འདྲ་བ། །དེ་ནི་རྐང་བརྒྱད་པར་ཤེས་བྱ། །དབྱིབས་ལས་མི་མཐུན་གྱུར་པ་ནི། །གཞན་དག་ཀྱང་ནི་སྣང་མོད་ཀྱི། །དེ་ནི་སྤུ་ཡི་འགྱུར་བ་ཡིན། །གནས་ལས་ཤིས་དང་མི་ཤིས་འགྱུར། །གཙུག་ཀྱང་
གནས་དང་དབྱིབས་དང་ནི། །མི་ཤིས་མཚན་ཉིད་ཤེས་པར་བྱ། །ཆ་དང་འཕོས་དང་འཐོར་བ་དང་། །གཙུག་ནི་འཕྲེད་དུ་འབྱུང་བ་དང་། །ལྷག་པའམ་ཆད་པར་གྱུར་པ་འམ། །གང་ཡང་གནས་ལས་འཕོ་འགྱུར་བའམ། །དབྱིབས་ངན་མདོག་ནི་མི་སྡུག་པ། །བརྟན་པོ་རྣམས་ནི་མི་སྣང་

203-1-201a

བའམ། །སྨད་པའི་གནས་སུ་གཡས་འཁྱིལ་དང་། །བསྔགས་པའི་གནས་སུ་གཡོན་འཁྱིལ་བ། །མཚན་ཉིད་ངན་པ་ཡིན་ཞེས་བྱ། །དེས་ནི་ཚེ་ཐུང་སྐྱེད་པར་བྱེད། །གཙུག་གི་གནས་ནི་དགུ་བཅུ་དྲུག །ཡོད་པ་བཤད་པ་དེ་རྣམས་ནི། །ཤིས་དང་སྨད་པར་
བྱ་བ་སྟེ། །རྣམ་པ་གཉིས་སུ་བསྡུ་བར་བྱ། །དེ་ལས་གཞན་ནི་ཉི་ཤུ་ཞིག །ཤིས་པ་ཡིན་པར་ཤེས་པར་བྱ། །བདུན་ཅུ་རྩ་དྲུག་སྨད་བྱ་སྟེ། །དེ་ལྟར་དགུ་བཅུ་རྩ་དྲུག་ཡིན། །ཁ་འགྲམ་ལ་གཉིས་དཔྲལ་བར་བཞི། །དཔྲལ་མཚམས་ལ་གཅིག་ཁོ་ན་ཡིན། །རྣ་རྩར་
གཉིས་ཏེ་ལྐོག་མར་གཅིག །མགོ་བོའི་མཐར་ནི་གཉིས་ཡིན་ལ། །བྲང་དུ་གསུམ་སྟེ་དཔུང་པར་གཉིས། །མིད་པ་གཅིག་སྟེ་དེ་བཞིན་དུ། །རྒྱུ་དང་ལོང་བུ་གཉིས་གཉིས་སུ། །གཙུག་ནི་འབྱུང་བར་ཤེས་པར་བྱ། །དེ་ལྟར་ཤིས་པར་གྱུར་པའི་གནས། །ཉི་ཤུ་ཡིན་
པར་རྣམ་པར་བཤད། །གཙུག་ནི་འདི་རྣམས་གཉིས་ལ་ནི། །སུམ་ཅུ་རྩ་བདུན་གྲངས་སུ་འགྱུར། །མུར་འགྲམ་མུར་གོང་མཆི་སྟན་དང་། །མཁུར་ཚོས་སྣ་ཕོར་སྨིན་མ་དང་། །རྣ་རྩ་ལྕེའུ་ལྡང་རྩིའུ་ཆུང་དང་། །མཆན་ཁུང་དཀུ་དང་འགྲམ་སྲེ་ལོང་། །སྣ་རྩེ་པུས་མོ་
མིག་འབྲས་གཉིས། །རྩིབ་ལོགས་རྐུབ་ཚོས་དག་ཏུ་ནི། །གནས་ནི་གཉིས་གཉིས་དག་ཏུ་གཙུག །གཉིས་གཉིས་འབྱུང་བ་སུམ་ཅུ་དྲུག །སྣ་གདོང་མཆུ་ལྟག་སྲོལ་མདུད་དང་། །དཔུང་སྣ་སྙིང་ག་ཟེའུ་དྲུག་མདོ། །ལྟེ་བ་རྐུབ་དང་མཇུག་སྲུབ་དང་། །ཡ་མཆུ་ཟེའུ་ལྟག་སྒ་
འོག་སྟེ། །དེ་ལྟར་གནས་ནི་དེ་དག་ཏུ། །གཙུག་ནི་བཅུ་གསུམ་འབྱུང་བ་ཡིན། །ཚེའུ་སྤུ་དེ་བཞིན་ཚིགས་གྲངས་དང་། །ཚེའུ་ཚེ་གཅིག་ཕྲ་མོ་ཡི། །གནས་ནི་བཅུ་དྲུག་འདི་དག་ཏུ། །གཙུག་ཀྱང་བཅུ་དྲུག་ཉིད་ཡིན་ནོ། །ཨན་དང་རུ་དང་སྐེ་བའི་རྩ། །རྨང་ཁ་རྔ་མར་གནས་
གཉིས་གཉིས། །དེ་ལྟར་གནས་བརྒྱད་ལྡན་པ་རུ། །གཙུག་ནི་རྣམ་པའང་བརྒྱད་ཡིན་ནོ། །མཆུ་སྒྲོས་དེ་ཡི་སོ་གཉིས་ཏེ། །གནས་ཀྱི་གསུམ་པོ་འདི་དག་ཏུ། །གཙུག་ནི་གསུམ་པོ་འབྱུང་བ་ཡིན། །དེ་ཕྱིར་དགུ་བཅུ་དྲུག་གསལ་ནས། །དེ་ལྟར་བསྟན་ཞིང་དགེ་བ་དང་། །སྨད་

203-1-201b

པ་དག་ཀྱང་བཤད་པ་ཡིན། །གཙུག་རྣམས་ཀྱི་ནི་ཁྱད་པར་གྱིས། །འབྲས་བུ་འབྱུང་བ་མཉན་པར་བགྱི། །ཡ་མཆུར་གནས་པའི་གཙུག་གིས་ནི། །བདག་པོའི་བློན་པོ་གསོད་པར་བྱེད། །མཆུ་སྒྲོས་སྟེང་དང་གཡས་ཀྱིས་ནི། །བདག་པོའི་ཕ་ནི་འཆི་བར་འགྱུར། །དེ་ཡི་གཡོན་ན་
ཡོད་པས་ནི། །ཞོན་པ་པོ་ཡི་མ་འཆི་བྱེད། །མཆུ་ལྟས་གོང་དུ་གཙུག་བྱུང་ན། །བདག་པོའི་རིགས་དང་བཅས་པ་སྲེག །སྣ་ཕོར་ལ་ནི་གཡས་པ་ཡིས། །འཚོ་བའི་སྒོ་ནི་འགག་པར་བྱེད། །གང་གི་མཁུར་ཚོས་གཉིས་ཀ་ལ། །གཙུག་འཁྱིལ་བ་ནི་སྣང་གྱུར་ན། །དེ་ཡི་
བདག་པོའི་བུ་ཐུ་བོ། །རྟ་ཡིས་ཟ་བར་འགྱུར་བ་ཡིན། །རྟ་གདོང་འགྲམ་དང་སྣ་གདོང་ལ། །གང་གི་གཙུག་ནི་སྣང་གྱུར་པ། །རྟ་དེའི་བདག་པོ་གཡུལ་དུ་ནི། །དགྲ་བོས་གསོད་པར་འགྱུར་བ་ཡིན། །གང་གི་རྟ་ལ་མཆི་སྟན་དུ། །གཙུག་འཁྱིལ་བ་ནི་གནས་གྱུར་པ། །གང་ལ་
འདི་འདྲའི་རྟ་ཡོད་པ། །དེའི་རིགས་རྟག་ཏུ་ངུ་བར་འགྱུར། །གང་གི་རྟ་ཡི་མུ་འགྲམ་གཉིས། །གཙུག་ནི་གསལ་པོར་སྣང་གྱུར་པ། །དེ་ལྟའི་གཙུག་ཅན་བཅང་གྱུར་ན། །དེས་ནི་རིགས་ནི་གཉིས་སུ་འགྱེས། །གང་གི་གཙུག་གི་སྨིན་མ་ཡི། །བར་དུ་གནས་པར་སྣང་གྱུར་པ། །
རྟ་དེ་ཁྲོ་གཉེར་ཅན་ཞེས་བྱ། །ཉེ་དུ་མཛའ་བཤེས་རྣམས་ལ་གནོད། །གང་གི་མུར་གོང་གཉིས་སུ་ནི། །གཙུག་ནི་རེ་རེ་སྣང་གྱུར་པ། །དེ་ཡིས་རིགས་ཀུན་ཟད་བྱེད་ཅིང་། །བདག་པོའི་ཕོངས་པ་སྐྱེད་བྱེད་ཡིན། །འགྲམ་གླང་ཙེའུ་ཆུང་དག་གམ་ནི། །ཚེའུ་སྤུའམ་སྐེ་རྩ་ཆིག་གྲང་ཕྲ། །
མཆན་གཉིས་དག་ཏུ་གཙུག་འཁྱིལ་བ། །སྤུ་ནི་གཡོན་དུ་འཁྱིལ་གྱུར་ན། །དེ་ཡིས་རྟ་དང་བདག་པོ་ནི། །མདའ་ཆར་གྱིས་ནི་འཆི་བར་འགྱུར། །གང་གི་རྟ་ཡི་རྣ་བའི་རྩེ། །གཉི་གར་གཙུག་ནི་སྣང་གྱུར་ན། །གསང་འཕེལ་བ་ཡི་ཉེས་པ་ཡིས། །དེ་ཡི་བདག་པོ་འཆི་བར་འགྱུར། །
གང་གི་རྟ་ལ་རྣ་རྩ་རུ། །གནས་པའི་གཙུག་ནི་སྣང་གྱུར་དང་། །ཟེའུ་ལྷད་ལ་ཡོད་པའི་རྟ། །བདག་པོའི་དོན་སྒྲུབ་མ་ཡིན་ནོ། །གང་གི་རྟ་ཡི་སྲོང་གོང་དབུས། །གཙུག་འཁྱིལ་བ་ནི་སྣང་གྱུར་པ། །དེ་ཡི་བདག་པོ་བཟའ་བ་དང་། །བཏུང་བ་རེ་བ་འགྲུབ་མི་འགྱུར། །ཨན་

203-1-202a

དོང་རུར་ནི་གཙུག་འཁྱིལ་བ། །རྟ་ནི་གང་ལ་སྣང་གྱུར་པ། །བདག་པོའམ་བུའམ་འདུལ་སྦྱོར་མཁན། །གང་ཡང་རུང་ལ་གནོད་པ་སྐྱེད། །གང་གི་ཟེ་འུར་གཙུག་བྱུང་བ། །རྟ་དེ་ཕོངས་པ་དང་བཅས་པར། །བདག་པོའི་རིགས་རྒྱུད་བཅས་བརླག་པའམ། །རིགས་
ཀྱི་གཙོ་ལ་གནས་གྱུར་པ། །རྟ་དང་ནོར་ནི་རླག་བྱེད་ཅིང་། །རྒྱལ་པོའི་ཡུལ་འཁོར་བཅས་འཆི་དང་། །དོན་ཀུན་འཇིག་ཅིང་འདུག་པར་ན། །སྐྱེས་པའི་ཚེ་ནི་ཉིད་ན་བསྐྲད། །ལག་གིས་རེག་དང་མིག་གིས་མཐོང་། །ཐག་རིང་དུ་ནི་སྤང་བར་བྱ། །དེ་ནི་དགྲ་ལ་སྦྱིན་
པ་འམ། །གཞན་གྱི་ཡུལ་འཁོར་དག་ཏུ་བསྒྱུར། །གང་གི་ཟེའུ་ལྟག་གཙུག་ཡོད་པ། །དེ་ཡི་བདག་པོ་ཁྭ་འམ་ནི། །སེམས་ཅན་མི་སྡུག་པས་ཟོས་ཤིང་། །གཡུལ་དུ་དཔུང་དང་བཅས་པར་འཆི། །སྒ་འོག་གཙུག་གིས་བདག་པོ་འཆི། །གསལ་ཤིང་བསྐྱོན་ཏེ་འཆི་བར་འགྱུར། །
ཉེན་པས་ཉེན་ཅིང་ནོར་བརླག་པའམ། །ཡང་ན་མཚོན་གྱིས་འཆི་བར་བྱེད། །གང་གི་གཙུག་ནི་སྙིང་ག་འམ། །དཔུང་སྣ་དག་ཏུ་ཡོད་གྱུར་པ། །རྟ་དེ་བདག་པོ་འཁོར་བཅས་པར། །གཡུལ་དུ་འཆི་བར་བྱེད་པ་ཡིན། །པུས་མོའི་གཙུག་གིས་གཡུལ་དུ་ནི། །འཁྲུལ་ཞིང་
དཔུང་བཅས་དགྲ་བོས་གསོད། །རྒྱལ་པོ་རྐུན་མ་ཆད་པ་མེས། །བདག་པོའི་རིགས་ནི་རླག་པར་བྱེད། །གང་གིས་ཆིག་གང་གཉིས་ལ་ནི། །གཙུག་ནི་གནས་པར་སྣང་གྱུར་ན། །དེ་ཡི་བདག་པོ་གཉེན་བཅས་པ། །ལྕགས་སྒྲོག་གིས་ནི་བཅིང་བར་འགྱུར། །གང་གི་ཚེའུའི་ཚེ་
རྣམས་སུ། །གཙུག་འཁྱིལ་བ་ནི་སྣང་གྱུར་པ། །བཅིང་དང་གསོད་པའི་སྡུག་བསྔལ་གྱིས། །དེ་ཡི་བདག་པོ་རླག་པར་འགྱུར། །མཆན་ཁུང་གཙུག་ནི་ཡོད་པའི་རྟ། །གཡུལ་དུ་མྱུར་དུ་འཆི་འགྱུར་ཞིང་། །དེ་ཡི་བདག་པོ་དག་ཀྱང་ནི། །བདེ་དང་ལྡན་པར་མི་གནས་སོ། །མཆན་
ཁུང་གཅིག་གིས་ཉེས་པ་ཆུང་། །གཉིས་ཀས་སྨད་པར་གྱུར་པ་ཡིན། །རྩིབ་ལོགས་གཙུག་གིས་བདག་པོ་ནི། །ཕྱོགས་དང་བཅས་པར་ཟད་པར་འགྱུར། །ལྟེ་བར་གཙུག་ནི་འཁྱིལ་གྱུར་པ། །གང་ཞིག་གིས་ནི་རྟ་ལ་སྣང་། །དེ་ཡི་བདག་པོ་རིགས་རྒྱུད་བཅས། །ནད་

203-1-202b

ཀྱིས་ཡོངས་སུ་གདུངས་པར་འགྱུར། །རྨང་ཁར་གཙུག་ནི་ཡོད་གྱུར་པའི། །བདག་པོ་ཆུང་མ་མི་རིགས་སྤྱོད། །རླིག་པར་གང་གི་གཙུག་འཁྱིལ་བ། །རྟ་དེའི་བདག་པོར་གྱུར་པ་ནི། །བུ་མང་ཚེ་ནི་ཐུང་གྱུར་ཏེ། །རྟ་དེ་བལྟ་ན་མི་སྡུག་ཡིན། །རྟ་གང་གི་ནི་དྲུག་མདོ་ཡི། །
དབུས་ན་གཙུག་ནི་སྣང་གྱུར་པ། །འདུལ་སྦྱོང་མཁན་གྱིས་དེ་ཞོན་ཏེ། །གལ་ཏེ་གཡུལ་དུ་འཇུག་གྱུར་ན། །རྟ་དེ་ཉིད་དང་ལྷན་ཅིག་ཏུ། །ཟུག་རྔུ་ཡིས་ནི་འཆི་བར་བྱེད། །རྔ་རྩར་གང་གི་རྟ་ལ་ནི། །གཙུག་འཁྱིལ་པ་དག་ཡོད་གྱུར་པ། །འདི་ནི་རྩ་གནས་འཇིག་བྱེད་
ཡིན། །བདག་པོའི་སྒོ་བ་སྡུག་པར་བྱེད། །རྐུབ་ཀྱི་ཕྱོགས་དང་སྤུ་དག་དང་། །འབྲེག་ལ་གནས་པར་གྱུར་པ་ནི། །བདག་པོའི་ལྟོ་བའི་ནད་སྐྱེད་ཅིང་། །གར་ཡང་བདེ་བར་སི་འགྱུར་རོ། །རྐུབ་ཚོས་རྐུབ་ཀྱི་སྟེང་དག་ཏུ། །གང་གི་གཙུག་ནི་སྣང་གྱུར་པ། །དེ་ནི་རྟུག་
འབྲུལ་ཞེས་བྱ་སྟེ། །བདག་པོའི་རིགས་ནི་རླག་བྱེད་ཡིན། །སྲེ་ལོང་བར་ནི་གཙུག་འཁྱིལ་བའི། །རྟ་ནི་རྟག་ཏུ་ལམ་འཇུག་འགྱུར། །བདག་པོ་གཡོག་དང་བཅས་པ་ནི། །མཚོན་གྱིས་འཆི་བ་ཉིད་དུ་འགྱུར། །ཆིག་གྲང་གཙུག་ལ་སོགས་པ་ཡི། །བཤད་འབྲས་ཕྱི་
རྒད་ལ་ཡང་སྦྱར། །དེ་ལྟར་མི་ཤིས་བཤད་པ་ནི། །ཤིས་པ་དག་ཀྱང་བཤད་པར་བྱ། །གང་གི་ཁ་འགྲམ་དག་ཏུ་གཙུག །གསལ་བའམ་ཉ་ཕྱིས་དབྱིབས་འདྲ་གནས། །རྟ་མཆོག་དེ་ཡི་བདག་པོ་ནི། །ཟས་ཐོབ་དོན་རྣམས་འགྲུབ་པར་འགྱུར། །དཔྲལ་བར་གང་གི་
གཙུག་འཁྱིལ་བ། །གཡས་སུ་འཁྱིལ་བ་གཉིས་ཡོད་པ། །དེ་ཡི་བདག་པོ་གཡུལ་དུ་ནི། །རྒྱལ་ཞིང་བུ་ཚ་རྣམ་པར་འཕེལ། །གང་གི་གཙུག་ནི་དཔྲལ་བ་ན། །མི་མཉམ་གསུམ་ནི་ཡོད་གྱུར་པ། །རྒྱལ་རིགས་ཀྱི་ནི་དེ་འདྲ་རྙེད། །དགྲ་བོའི་ས་ལ་དབང་བྱེད་འགྱུར། །མཆོད་
སྦྱིན་ལེགས་པར་བྱེད་པ་དང་། །རྒྱལ་ཆེན་ཡོན་ཀུན་གཏོང་བར་འགྱུར། །གང་གི་དཔྲལ་བར་གཙུག་འཁྱིལ་གསུམ། །གོང་ནས་གོང་དུ་བརྩེགས་པ་ནི། །གཡོན་དུ་མི་འཁྱིལ་མཉམ་ཟླུམ་ཡོད། །དེ་ནི་རྟ་ཡི་རིན་ཆེན་ཡིན། །དེས་ནི་རྒྱལ་པོ་ས་སྟེང་དུ། །དགྲ་རྣམས་ལས་

203-1-203a

ནི་ངེས་པར་འགྱུར། །གང་གི་དཔྲལ་བར་གཙུག་དག་ནི། །ཕྱོགས་བཞིར་བཞི་ནི་ཡོད་གྱུར་པ། །གང་ལ་དེ་འདྲའི་རྟ་ཡོད་པ། །དེ་ནི་མྱུར་དུ་ས་བདག་འགྱུར། །གཡུལ་དུ་རྟག་ཏུ་རྒྱལ་བ་དང་། །ནོར་ལྡན་བུ་དང་ཚ་བོ་འཕེལ། །རིན་ཆེན་ཚོགས་ཀྱང་རྣམ་
པར་འཕེལ། །དགྲ་རྣམས་ཀྱི་ནི་སྤྱི་བོར་གནས། །གང་གི་དཔྲལ་འཚམས་གཙུག་གཡས་འཁྱིལ། །ཁ་འབུས་པའམ་འཁྱིལ་བ་ཡོད། །དེ་ནི་ལྷན་ཅིག་གཡུལ་ཞུགས་ན། །དགྲ་ལས་རྒྱལ་ཏེ་བཟློག་པར་འགྱུར། །རྣ་རྩེ་ཁོ་ནར་གཙུག་འཁྱིལ་བ། །རྟ་ནི་གང་ལ་ཡོད་གྱུར་
པ། །དེ་ནི་གོས་པ་ཞེས་བྱ་སྟེ། །བདག་པོའི་མཆོད་སྦྱིན་འཕེལ་བྱེད་ཡིན། །ལྐོག་མ་རུ་ནི་གནས་པའི་གཙུག །གཡས་སུ་འཁྱིལ་ཞིང་རབ་གསལ་ཡོད། །ལྷ་ཡི་ནོར་བུ་ཞེས་དེ་བྱ། །འདོད་པའི་དོན་ཀུན་སྒྲུབ་བྱེད་ཡིན། །མགུལ་པ་སྐེ་བ་ཁ་རུ་ནི། །ཉ་ཕྱིས་འདྲ་བའི་གཙུག་
ཡོད་པ། །ཡིད་དུ་འོང་བ་ཞེས་བྱ་སྟེ། །རྟ་དེ་དགྲ་བོ་འཇིག་བྱེད་ཡིན། །གང་གི་རྔོག་མཐར་ཉ་ཕྱིས་འདྲའི། །གཙུག་འཁྱིལ་གསལ་ཞིང་གཡས་སུ་འཁྱིལ། །རྒྱལ་རིགས་ཀྱི་ནི་དེ་འདྲ་བ། །རྙེད་ན་དགྲ་བོའི་སྤྱི་བོར་གནས། །གང་གི་བྲང་ལ་ལེགས་གནས་པའི། །གཙུག་
ནི་གསུམ་པོ་གཡས་འཁྱིལ་ཞིང་། །གསལ་ཞིང་ཉ་ཕྱིས་དབྱིབས་འདྲ་བ། །སྤུ་ནི་གྱེན་དུ་བལྟས་པ་སྣང་། །དེས་ནི་གཡུལ་དུ་དགྲ་བསད་ནས། །བདེ་བར་ལྡོག་པར་འགྱུར་བ་ཡིན། །གང་ལ་བྲང་ལ་གཙུག་བཞི་ནི། །གཡས་སུ་འཁྱིལ་པ་ཡོད་པ་དང་། །དེ་བཞིན་ཡིད་འོང་གཙུག་
ཡོད་པ། །དེ་ནི་དཔལ་གྱི་ཤིང་ཞེས་བྱ། །དཔལ་ཤིང་ཞེས་བྱ་འདི་ཉིད་ནི། །དོན་སྒྲུབ་བྱེད་པའི་རྟ་ཡིན་ཏེ། །དེ་ཡིས་གཡུལ་ལས་རྒྱལ་བ་དང་། །བུ་དང་ཚ་བོ་འཕེལ་བར་འགྱུར། །དཔུང་པ་ལ་ནི་གཙུག་ཡོད་ཅིང་། །དེ་ཡང་ཉ་ཕྱིས་དབྱིབས་འདྲ་བ། །དེ་ནི་དཔུང་རྒྱན་ཅན་
ཞེས་བྱ། །བདག་པོའི་འདོད་པ་སྟེར་བྱེད་ཡིན། །རྒྱུ་ཡི་ལྟག་ན་གང་གི་གཙུག །གཡས་སུ་འཁྱིལ་བ་ཡོད་གྱུར་པ། །དེ་ནི་འོག་པག་ཅན་ཞེས་བྱ། །འབྲུ་དང་ནོར་རྣམས་འཕེལ་བྱེད་ཡིན། །ནོར་གྱིས་ཚིམས་པར་བྱས་ནས་ནི། །བུ་དང་ཚ་བོ་འཕེལ་བར་བྱེད། །དཔལ་ཤིང་པདྨ་གཡུང་

203-1-203b

དྲུང་དང་། །སཱ་ལུ་དབྱིག་པ་རྒྱལ་མཚན་དང་། །དགའ་བ་འཁྱིལ་དང་འཁོར་ལོ་གཤོལ། །དུང་དང་དོ་རྗེ་རལ་གྲི་གཞུ། །ཉ་དང་ཟླ་བ་ཟླ་ཕྱེད་དམ། །དར་དང་དེ་བཞིན་གཏུན་ཤིང་འདྲ། །མཚན་མ་དེ་འདྲ་རབ་གསལ་བའི། །གཙུག་འཁྱིལ་རྟ་ནི་གང་དག་གི། །བྲང་ངམ་འཕྲལ་བར་
ཡོད་གྱུར་པའི། །རྒྱལ་པོ་དེ་ནི་རྒྱལ་སྲིད་བརྟན། །དེ་ལྟར་སྨད་དང་ཤིས་པ་ཡི། །གཙུག་ནི་ཡང་དག་བཤད་པ་ཡིན། །གཙུག་ལས་ལྷག་པའི་སྤུ་ཡོད་པ། །བདག་པོའི་ནོར་དང་འབྲུ་སྐྱེད་བྱེད། །སྔར་བཤད་པ་ནི་སྣང་གྱུར་ན། །གནས་ལས་འབྲས་བུ་འབྱིན་པ་ཡིན། །ལེགས་ཐོས་
ཐེ་ཚོམ་གྱུར་པ་ཡིས། །སླར་ཡང་ཕ་ལ་སྨྲས་པ་ནི། །ཡན་ལག་བརྒྱད་པོ་འདི་དག་ལས། །འབྲས་བུ་སྣ་ཚོགས་འབྱུང་འགྱུར་བ། །རྒྱལ་པོའི་འབྲས་བུ་བྱེད་པ་ནི། །རྟ་ཡི་ལུས་ལ་བརྟེན་པ་མཐོང་། །གལ་ཏེ་རྟ་ལས་དགེ་མི་དགེ། །འབྲས་བུ་རྒྱལ་པོས་ཐོབ་གྱུར་ན། །རྒྱལ་པོ་དེ་
ཡི་རང་ལུས་ལས། །བྱུང་བའི་མཚན་ཉིད་དོན་མ་མཆིས། །བུ་ཡིས་དེ་སྐད་སྨྲས་པ་དང་། །ཤ་ལི་ཧོ་ཏྲས་སླར་སྨྲས་པ། །དཀའ་ཐུབ་ཅན་གྱི་དྲང་སྲོང་གིས། །རྒྱལ་པོའི་མཚན་མ་གང་མཐོ་བ། །དེ་ཡི་འབྲས་བུ་གསལ་བར་ནི། །རྟ་ཡི་མཚན་ཉིད་ཀྱིས་སྟོན་འགྱུར། །བདག་
པོ་བསོད་ནམས་ཅན་ལ་ནི། །མཚན་ཉིད་བཟང་པོ་འབྱུང་བར་འགྱུར། །བདག་པོ་སྨད་པར་བྱ་བ་ལ། །རྟ་ཡང་སྨད་པར་སྐྱེ་བར་འགྱུར། །རྒྱལ་པོ་འདྲེན་མའི་ལས་ཅན་ལ། །རྟ་ཡང་མཚན་ཉིད་འདྲེན་མར་འབྱུང་། །ཚེ་ནི་གནས་དང་འབྲེལ་བ་ལས། །གནས་སྐབས་ཇི་བཞིན་
འབྱུང་བར་འགྱུར། །རྐན་གྱི་མདོག་ནི་འདྲེན་མ་ཡིས། །ལེའུའི་ནང་དུ་སྔར་བཤད་ཟིན། །གློ་བུར་བ་ཡི་འབྲས་བུས་ནི། །ལྟས་ནི་ལེའུ་ནང་ནས་སྟོན། །དེ་ལྟར་གཙུག་ཀུན་ཤིས་མི་ཤིས། །བརྟན་དང་བརྟན་མིན་མཚན་ཉིད་ནི། །ཇི་ལྟར་དྲིས་པ་མ་ལུས་པར། །དེ་ཡིས་
ལེགས་པར་བཤད་པ་ཡིན། །ཤ་ལི་ཧོ་ཏྲའི་མདོའི་གནས་ལས་གཙུག་བསྟན་པ་ཞེས་བྱ་བའི་ལེའུ་སྟེ་ཉི་ཤུ་རྩ་དྲུག་པའོ།།      །།ལེགས་ཐོས་ལ་སོགས་བུ་ཀུན་དང་། །གཅེར་བུ་རྒྱལ་ཚོགས་སློབ་མ་རྣམས། །ན་ཚོད་ཤེས་ལ་མཚར་སྐྱེས་ནས། །ཕ་ལ་དེ་རྣམས་ཀྱིས་

203-1-204a

དྲིས་པ། །རྟ་ཡི་ན་ཚོད་ཇི་ལྟར་ཤེས། །འདི་ཡི་ཚེ་ནི་ཇི་ལྟར་བཤད། །སོ་རྣམས་སུ་ནི་མཚན་མ་དང་། །པགས་པ་སྤུ་ནི་ཇི་ལྟར་འགྱུར། །ན་ཚོད་གནས་སུ་ཕྱིན་མ་ཕྱིན། །ཅི་ལྟར་ཤེས་པར་གྱུར་པ་ལགས། །གང་གིས་ན་ཚོད་ཤེས་
འགྱུར་བའི། །མཚན་མ་ཇི་ལྟར་ཤེས་པར་གྱིས། །དེ་སྐད་དྲིས་ཚེ་དྲང་སྲོང་མཆོག །དེ་ཉིད་ཤེས་པར་སླར་སྨྲས་པ། །རྟ་ཡི་ན་ཚོད་ཤེས་པ་ནི། །མཚན་མ་ལས་ཀྱིས་གཉེར་རྙེད་འགྱུར། །ལ་ལ་གཞོན་པའང་རྒས་འདྲ་དང་། །རྒས་པའང་གཞོན་པའི་ཚུལ་དུ་སྣང་། །
དེ་བས་རྟ་ལས་ཁ་ཅིག་ནི། །ཤིན་ཏུ་རྨོངས་པར་བྱེད་པ་ཡིན། །དུས་ནི་བརྟག་ཅིང་བསམ་མི་ཁྱབ། །འཇིག་རྟེན་ཐམས་ཅད་མ་ལུས་ཁྱབ། །ཉིན་མཚན་དང་ནི་ཟླ་བ་དང་། །ལོ་དང་དུས་དྲུག་བཅས་པར་ནི། །དུས་ཀྱི་མཚན་ཉིད་ལྡན་པ་རུང་། །དུས་འདི་ཤེས་པར་
བྱ་བ་ཡིན། །གང་གི་སོ་སོགས་ལ་རིམ་བཞིན། །དུས་ནི་དུས་ཀྱི་གྲངས་སུ་འགྲོ། །དུས་ལས་མཚན་མ་གསལ་གྱུར་ལ། །མཚན་མ་ལས་ཀྱང་དུས་ཤེས་བྱ། །རྟ་ནི་སྐྱེས་ནས་དུ་ལོན་པ། །མཚན་མ་ལས་ནི་ཤེས་པར་བྱ། །མཁས་པས་མཚན་མ་བསྟན་ནས་ནི། །
ལེགས་པར་ཤེས་ནས་བསྟན་པར་བྱ། །ལེགས་པར་བརྟག་པར་གྱུར་པ་ཡིས། །གཟུང་བ་དེ་ནི་དེ་བཞིན་ཡིན། །མྱུར་བར་བལྟས་པས་མ་ཤེས་པ། །དེ་ནི་ལོག་པར་འཛིན་པར་འགྱུར། །ལེགས་བལྟས་མ་རྨོངས་པར་གྱུར་པ། །མཚན་མ་དུས་ནི་སྟོན་པ་ཡིན། །དེ་ལས་འབད་
ཅིང་མཁས་པ་དང་། །བསྟན་བཅོས་དོན་མཐོང་ཡང་དག་ཤེས། །མཚན་མ་ཤིན་ཏུ་ངེས་བརྟགས་ལ། །དོགས་པ་མེད་པར་བསྟན་པར་བྱ། །མདུན་སོ་སྟེང་དང་འོག་དག་ལ། །སྐྱེས་པ་དྲུག་དྲུག་ཡིན་ཞེས་བྱ། །དེ་ནས་རྟ་ཡི་མཆེ་བ་ནི། །སྟེང་འོག་གཉིས་ལ་བཞི་ཡོད་
དེ། །འགྲམ་སོ་སྟེང་དང་འོག་གཉིས་ན། །ཉི་ཤུ་རྩ་བཞི་ཡོད་པ་ཡིན། །དེ་ལྟར་སོ་བསྡུས་ཀུན་གྱི་སྤྱི། །བཞི་བཅུ་ཡོད་པར་ཤེས་པར་བྱ། །མདུན་སོའི་འོག་མ་ཅི་ལྟ་བར། །སྟེང་སོ་དེ་ལྟར་མི་མངོན་ཏེ། །རྟ་ཡི་སོ་ལ་མཚན་མ་ནི། །མེ་ལོང་གཟུགས་བརྙེན་ལྟ་བུར་

203-1-204b

མངོན། །ཟླ་བའི་རིམ་གྱིས་སྐྱེས་པ་ཡི། །མཚན་མ་ལོ་གཅིག་ཡིན་པར་འདོད། །ལོ་གཉིས་ནས་ནི་གོ་རིམས་བཞིན། །སོ་སོའི་ཁ་དོག་ལས་ཤེས་བྱ། །དེ་ནས་ལོ་གསུམ་ནས་བརྩམས་ཏེ། །སོ་འབྱུང་བར་ནི་འདོད་པ་ཡིན། །ལོ་ལྔའི་བར་དུ་སོ་དག་ནི། །འབྱུང་
ཞིང་སྐྱེ་བར་ཤེས་པར་བྱ། །དེ་ཡི་རྗེས་ལ་སོ་རིས་ཀྱི། །ཆ་ནས་ན་ཚོད་ཤེས་པར་བྱ། །གནག་དང་སེར་དང་དཀར་བ་དང་། །མཆིང་བུ་སྦྲང་བུའི་མདོག་འདྲ་དང་། །དུང་དང་གཏུན་གྱི་དབྱིབས་འདྲ་དང་། །དེ་ནས་སོ་ནི་འགུལ་བ་དང་། །དེ་རྗེས་དེ་ནི་འབྱུང་བ་སྟེ། །
འདི་ནི་མཚན་མ་བསྡུས་པ་ཡིན། །མཚན་མ་རྣམས་ནི་གོ་རིམས་བཞིན། །རེ་རེ་ལས་ནི་རབ་བཤད་བྱ། །དེ་ལས་ཐོག་མར་ཟླ་རེ་ནི། །ལོན་པའི་མཚན་ཉིད་ཤེས་པར་བྱ། །རྔ་རྔོག་པགས་པ་ཤིན་ཏུ་ཕྲ། །ཡན་ལག་དང་ནི་རྨིག་པ་མཉེན། །དཔྲལ་བ་
མཐོ་དམན་ཁྱེར་བ་དང་། །ལུས་གུག་རྩོལ་བ་ཆུང་བ་དང་། །མདུན་སོའི་དབུས་མ་གཉིས་ཟླུམ་པའི། །རྟེའུ་ཟླ་གཅིག་ལོན་ཞེས་བྱ། །ལུས་ཀྱི་ཚུལ་ནི་མཛེས་པ་དང་། །མདུན་སོ་གཉིས་ནི་གསལ་བར་གནས། །དྲེགས་པས་འགྲོ་བའི་ཚུལ་ཅན་དག །དེ་ནི་ཟླ་བ་
གཉིས་ལོན་ཡིན། །ཤ་ནི་རྒྱས་ཤིང་འབྱེས་པ་དང་། །སྲ་ཞིང་བརྟན་པར་གནས་པ་དང་། །མདུན་སོ་དག་ནི་རྣོ་བ་དང་། །སྤུ་ནི་རྩུབ་པར་སྐྱེ་བ་དག །རྟ་ལ་མཁས་པས་རྟེའུ་ནི། །ཟླ་གསུམ་ལོན་པར་ཤེས་པར་བྱ། །སྐྱེས་པའི་སྤུ་ནི་བྱི་བ་དང་། །མདུན་སོ་
གཉིས་ནི་རྫོགས་པ་ཡི། །རྟེའུ་ཟླ་བ་བཞི་ལོན་པར། །མཁས་པ་རྣམས་ཀྱིས་ཤེས་པར་བྱ། །མདུན་སོ་གཉིས་ནི་རྫོགས་པ་དང་། །བར་མ་དག་ཀྱང་སྐྱེ་བ་ཡི། །རྟེའུ་གང་ཡིན་དེ་ཉིད་ནི། །ཟླ་ལྔ་ལོན་པར་ཤེས་པར་བྱ། །གང་ཚེ་རི་མོ་དུང་མར་འདྲ། །
ཤིན་ཏུ་ཕྲ་བར་སྣང་གྱུར་པ། །མདུན་སོ་ལ་ནི་ཡོད་གྱུར་ཅིང་། །སོ་མཐའ་ལས་ནི་གྱེན་དུ་འགྲེང་། །དེ་ཚེ་རྟེའུ་ཟླ་དྲུག་པར། །ཐེ་ཚོམ་མེད་པར་ཤེས་པར་བྱ། །སྤུ་ནི་མི་མཉམ་གྱུར་པ་དང་། །མདུན་སོ་བར་མར་རི་མོ་སྣང་། །ལུས་དང་རྨིག་པ་བརྟན་གྱུར་ཅིང་། །

203-1-205a

ཀུན་ནས་འགྲིམ་པར་གྱུར་པ་དང་། །མདུན་སོ་ཐ་མ་རྟོལ་གྱུར་པ། །དེ་ཚེ་ཟླ་བ་བདུན་པ་ཡིན། །མདུན་སོ་རྫོགས་པར་གྱུར་པ་དང་། །འགྲམ་སོ་ཅུང་ཟད་སྐྱེ་བ་དང་། །རྔ་མའི་ཚོགས་ཀྱང་ལེགས་སྐྱེས་པ། །ཟླ་བ་བརྒྱད་པར་ཤེས་པར་བྱ། །མདུན་སོ་བར་
མ་ལེགས་རྫོགས་ཤིང་། །དེར་ཡང་རི་མོ་སྣང་གྱུར་ལ། །རྔོག་མའམ་མི་མཉམ་པར་སྣང་ལ། །དེ་ཚེ་ཟླ་བ་དགུ་པ་ཡིན། །རྔོག་མའང་རྣམ་པར་གྱེས་པ་དང་། །མདུན་སོ་བར་མའང་དཀར་བ་དག །གང་ཡིན་དེ་ནི་མཁས་པ་ཡིས། །སྐྱེས་ནས་ཟླ་བཅུ་ལོན་ཞེས་བྱ། །
འགྲམ་སོ་རྫོགས་པར་གྱུར་པ་དང་། །རླིག་པ་དག་ཀྱང་འཕྱང་བ་དག །དེ་ལྟ་བུ་ཡི་རྟེའུ་ཡིས། །ཟླ་བ་བཅུ་གཅིག་ལོན་ཞེས་བྱ། །གང་གི་སོ་ནི་ཐམས་ཅད་ཀྱང་། །དཀར་བ་ཉིད་དུ་སྣང་བ་དང་། །བ་སྤུ་འཇམ་ཞིང་རིང་བ་ཡིས། །ལུས་ལ་ཁྱབ་པར་གྱུར་པ་ཡི། །རྟེའུ་
མཚན་མ་འདི་དག་གིས། །ལོ་གཅིག་ལེན་པར་ཤེས་པར་བྱ། །གང་ཚེ་སོ་ནི་མདོག་སེར་ཞིང་། །དུད་མར་དག་ཏུའང་སྣང་གྱུར་པ། །རྔོག་མ་དང་ནི་རྔ་མ་རིང་། །སྤུ་ཡང་འབྱི་བར་འགྱུར་བ་དང་། །གཉིད་ཀྱང་ཆེ་བར་སྣང་བ་དང་། །གྲགས་པ་གཟི་མདངས་འཕེལ་འགྱུར་
བ། །མཚན་མ་འདི་དག་ལྡན་པ་ཡི། །རྟ་ནི་ལོ་གཉིས་ལོན་ཞེས་བྱ། །ལོ་གཉིས་གསུམ་མམ་དེ་བཞིན་དུ། །བཞི་འམ་ཡང་ན་ལྔ་ཡི་ཚེ། །མཆེ་བ་བཞི་ནི་སྐྱེ་འགྱུར་ཏེ། །འདི་ལ་ངེས་པ་མི་སྣང་ངོ་། །རྟེའུ་ལོ་གཉིས་ལོན་པ་ལ། །རླིག་པའི་འབྲས་བུ་གཅིག་སྣང་
སྟེ། །གཉིས་ནས་ལྔ་ན་མཉམ་གྱུར་ཏེ། །གཞན་དུ་མི་ཤིས་པ་ཉིད་ཡིན། །རླིག་པ་དག་ནི་གཉིས་ཀ་ཡང་། །གང་ཞིག་མིར་སྐྱེས་དེ་གོ་བཟློག །རང་བཞིན་རྫོགས་པར་གྱུར་པ་ན། །རླིག་པ་རང་གི་གནས་སུ་ཕྱིན། །བུ་སྐྱེད་པར་ཡང་འགྱུར་བ་དང་། །ལམ་དུ་འགྲོ་བའང་དེ་སྲན་
ཐུབ། །དོན་ཀུན་ཡང་དག་སྒྲུབ་བྱེད་ཅིང་། །ནོར་དང་དགའ་དང་བདེ་འཐོབ་བྱེད། །མཆེ་བ་སྐྱེ་བའི་དུས་དག་གི། །བྱ་བ་འདི་ནི་ཁྱེད་ལ་བཤད། །དེ་ཡན་ཆད་ནི་མཆེ་བ་དང་། །རླིག་པ་རྟ་ལ་མི་སྐྱེའོ། །ལོ་གསུམ་པ་ལ་མདུན་སོ་གཉིས། །ལོ་བཞི་པ་ལ་བར་མ་སྟེ། །ལྔ་པ་ལ་

203-1-205b

ནི་ཐ་མ་དག །འབྱུང་ཞིང་སྐྱེ་བར་འགྱུར་བ་ཡིན། །ཕྱེད་དང་གསུམ་ན་མདུན་སོ་ནི། །གཉིས་འབྱུང་བར་ནི་ངེས་པ་ཡིན། །དེ་སྐྱེས་ཡོངས་སུ་རྫོགས་པ་ནི། །ལོ་གསུམ་པར་ནི་ཤེས་པར་བྱ། །ཕྱེད་དང་བཞི་ན་དེ་ཡི་ནི། །བར་མ་འབྱུང་བར་ཤེས་པ་ཡིན། །དེ་ཉིད་སྐྱེས་པར་གྱུར་
པ་ནི། །ལོ་བཞི་པར་ནི་ཤེས་པར་བྱ། །ཕྱེད་དང་ལྔ་ན་མདུན་སོ་ཡི། །ཐ་མ་དག་ནི་འབྱུང་བར་འགྱུར། །དེ་ནས་ཐ་མ་སྐྱེས་གྱུར་པ། །ལོ་ལྔ་པར་ནི་དེ་ཤེས་བྱ། །སོ་འབྱུང་བ་དང་སྐྱེས་གྱུར་ཀུན། །རྫོགས་པའི་རྟ་ནི་ལོ་ལྔ་པ། །གཞོན་པ་ལས་ནི་དེ་འདས་ཤིང་། །མཆོག་ཏུ་
ལུས་ནི་རྒྱས་པ་དང་། །པགས་པ་རྔ་རྔོག་སྡུག་པ་དང་། །དབང་པོ་དང་ཞིང་དགའ་བ་དང་། །ནུས་པ་ཐོབ་པར་འགྱུར་བ་དང་། །དར་ལ་བབ་པ་གནས་གྱུར་ཅིང་། །ཁུ་བ་འབྱུང་བར་འགྱུར་བ་དང་། །སྐད་ཀྱང་ཡོངས་སུ་བརྗེས་འགྱུར་ཏེ། །ཇི་ལྟར་སྐྱེས་པ་ལོ་བཅུ་དྲུག །ལོ་ལྔ་པ་
ཡི་རྟ་དེ་འདྲ། །དེ་ཚེ་དར་ལ་བབ་ཅེས་བྱ། །ལས་རྣམས་ཀུན་ནི་ནུས་པར་འགྱུར། །དེ་རྗེས་བུ་ནི་ཐེ་ཚོམ་དག །སྐྱེས་པར་གྱུར་པས་དྲི་བ་དྲིས། །སོ་ནི་མི་འབྱུང་བར་ཤེས་ན། །ཇི་ལྟར་འབྱུང་ཞིང་སྐྱེ་བ་ལགས། །དེ་ནི་བདག་ལ་བཤད་པའི་རིགས། །དྲང་སྲོང་གིས་ཡང་
སླར་སྨྲས་པ། །དཔེར་ན་འབྲས་བུ་སྐྱེ་བ་ན། །མེ་ཏོག་ལུང་ལས་ཆད་པར་འགྱུར། །དེ་བཞིན་སོ་ནི་སྐྱེ་གྱུར་པ། །གཡོ་ཞིང་འབྱུང་བར་འགྱུར་བ་ཡིན། །གང་ཞིག་གཞན་པར་གྱུར་པའི་སོ། །ལྟུང་བ་སྐྱེ་བ་ལྷན་ཅིག་པ། །དེ་ནི་གོ་རིམས་ཇི་བཞིན་དུ། །ཐམས་ཅད་
ང་ཡིས་བསྟན་པར་བྱ། །འོ་མ་འབྱུང་བའི་སོ་སྲབ་ཅིང་། །ཐུང་ཞིང་འཇམ་ལ་མི་མཉམ་ལྷོད། །རྩ་བ་ཕྲ་ཞིང་རྩེ་མོ་སྦོམ། །མ་སོ་རྩེ་མོ་ཟླུམ་པ་དང་། །དེ་བཞིན་ཁ་དོག་ནག་ནོག་ཅན། །སོ་རྟེན་ཆུང་ཞིང་སྙི་བ་དང་། །སོ་རྩེ་རི་མོ་ནག་པོ་དང་། །ནག་ནོག་ཅན་གྱིས་མཚོན་
པ་ཡིན། །འདི་ནི་དང་པོར་སྐྱེས་པ་ཡི། །སོ་ཡི་མཚན་ཉིད་གྱུར་པ་ཡིན། །རྩེ་མོ་རྣོ་ཞིང་རྩ་བ་སྦོམ། །ལེགས་གནས་སོ་དཀྱུས་མཉམ་པ་དང་། །དཀར་ཞིང་སྣུམ་ལ་རིང་བ་དང་། །སྲ་ཞིང་ཐགས་ནི་བཟང་བ་དང་། །སྟེང་མི་རྐྱོང་ཞིང་དེ་བཞིན་དབུས། །གསལ་བར་

203-1-206a

སྐྱེས་པ་དེ་འདྲའི་སོ། །རིམ་གྱིས་ཡོངས་སུ་རྫོགས་གྱུར་པ། །ནས་དང་འབྲུ་ནི་ཟ་བར་ནུས། །དེ་ལྟར་འབྱུང་དང་སྐྱེས་པའི་སོ། །རང་གི་མཚན་ཉིད་ཤེས་པར་བྱ། །ནག་པོ་མདུན་སོར་ཆགས་ལོ་དྲུག །བདུན་པ་ལ་ནི་བར་མ་དང་། །བརྒྱད་པ་ལ་ནི་ཐ་མ་རུ། །ཆགས་
པ་ཡིན་པར་མངོན་པར་བསྟན། །སེར་པོ་དགུ་པར་མདུན་སོ་སྟེ། །བཅུ་པ་ལ་ནི་བར་མ་དོ། །ལོ་ནི་བཅུ་གཅིག་ལོན་པ་ལ། །ཐ་མར་དེ་ནི་ཆགས་པར་བསྟན། །དཀར་པོ་ལ་ནི་བཅུ་གཉིས་ན། །མདུན་སོ་བར་མར་བཅུ་གསུམ་ན། །ཐ་མར་ལོ་ནི་བཅུ་བཞི་ན། །གནས་པར་དེ་
ནི་བསྟན་པ་ཡིན། །མཆིང་བུ་ལོ་ནི་བཅོ་ལྔ་ན། །མདུན་སོ་དག་ལ་གནས་པ་ཡིན། །བཅུ་དྲུག་པར་ནི་བར་མ་ལ། །བཅུ་བདུན་པར་ནི་ཐ་མར་འགྲོ། །སྦྲང་མདོག་ལོ་ནི་བཅོ་བརྒྱད་ན། །མདུན་སོ་བར་མ་བཅུ་དགུ་ན། །ཉི་ཤུ་ཚེ་ན་ཐ་མ་རུ། །དེ་ནི་གནས་པར་འགྱུར་བ་
ཡིན། །དུང་འདྲ་ཉི་ཤུ་རྩ་གཅིག་ན། །མདུན་སོར་ཉི་ཤུ་གཉིས་ན་དབུས། །ཉི་ཤུ་གསུམ་ན་ཐ་མ་རུ། །དེ་ནི་གནས་པར་རབ་ཏུ་བཤད། །གཏུན་འདྲ་ཉི་ཤུ་རྩ་བཞི་ན། །མདུན་སོར་རྩ་ལྔའི་ཚེ་ན་དབུས། །ཐ་མ་དག་དང་ལྡན་པར་ནི། །ལོ་ནི་ཉི་ཤུ་དྲུག་ན་འབྱུང་། །
ཉི་ཤུ་རྩ་བདུན་ལ་མདུན་སོ། །རྩ་བརྒྱད་པ་ལ་བར་ན་སྟེ། །ཉི་ཤུ་དགུ་ལ་ཐ་མ་དག །ཡོངས་སུ་འགུལ་བར་འགྱུར་བ་ཡིན། །ལོ་སུམ་ཅུ་ན་མདུན་སོ་སྟེ། །སུམ་ཅུ་གཅིག་ན་བར་མ་ཡིན། །སུམ་ཅུ་གཉིས་ན་ཐ་མ་ནི། །འབྱུང་བ་འདི་ནི་ཐེ་ཚོམ་མེད། །དེ་ནས་གནས་ཀྱི་དབྱེ་བ་
ཡིས། །མཚན་མ་རྣམས་ནི་ཤེས་པར་གྱིས། །སྙིང་པོ་ཆ་ཡི་ཕྱི་རོལ་གནས། །སོ་ཡི་རྩེ་མོར་མངོན་གནས་ཡིན། །གནག་དང་སེར་དང་དཀར་པོ་ལས། །དཀར་པོ་ཡིན་ན་མཐིལ་དབུས་སྐྱེ། །རྟ་ཡི་སོ་རྩར་ཆགས་པ་ནི། །ཉེ་བའི་ལུས་ཞེས་བྱ་བ་ཡིན། །མཆིང་བུ་སྦྲང་བུ་དུ་
མདོག་འདྲ། །ཐེལ་གྱིས་དབུས་ལ་བརྟེན་པ་ཡི། །ནང་གི་སྙིང་པོའི་ཆ་ནས་ནི། །སོ་རྩེའི་བར་དུ་བརྟེན་པ་ཡིན། །གཏུན་འདྲ་སོ་རྟེན་དག་ལས་ནི། །བརྩམས་ཏེ་སྐྱེ་བ་ཡིན་པར་བཤད། །དེ་ནི་འཇོད་དང་ཟུར་བཞི་དང་། །ཤིན་ཏུ་ཟླུམ་པའི་ཁྱད་པར་གྱི། །རྨ་འདྲ་དང་ནི་བཅས་

203-1-206b

མཚན་མ། །དབྱིབས་ནི་རྣམ་པ་གསུམ་དུ་འགྱུར། །སྦྲང་བུའི་མདོག་ཅན་གྲུ་བཞིར་འགྱུར། །མཆིང་བུ་ཉིད་ནི་འཇོད་པར་གནས། །དུང་དང་གཏུན་འདྲ་ཉིད་དག་ནི། །ཤིན་ཏུ་ཟླུམ་པོར་གནས་པ་ཡིན། །རྟ་རྣམས་ཀྱི་ནི་སོ་ལ་མཚོན། །ངོ་བོ་ཉིད་ཀྱི་ཆགས་པ་ཡིན། །དཔེར་ན་ཤིང་
ལས་སྐྱེས་ལོ་མ། །གཞོན་ཆ་དམར་པོར་གནས་པ་ཡིན། །རྒྱས་པའི་ཚེ་ན་སྔོན་པོར་འགྱུར། །དེ་ཡི་རྗེས་ལ་སེར་པོ་སྟེ། །སྐམས་ཤིང་མི་སྡུག་གྱུར་པ་ན། །སྨིན་ཅིང་ལྷུང་བར་གྱུར་པ་ཡིན། །དེ་བཞིན་རྟ་ཡི་སོ་དག་གི། །ཚོན་ནི་རིམ་གྱིས་ཡལ་བ་ཡིན། །དེ་ལས་གཞན་ཡང་
མཚན་མ་ནི། །སོ་སོ་ཞིང་གི་རབ་སྦྱར་བྱ། །ལ་ལ་ལུང་ཏང་མདོག་ཅན་ལ། །གཞི་གཅིག་འཛམ་བུའི་འབྲས་བུ་མདོག །ཁ་ཅིག་ལྕགས་ནི་བཅག་པ་འདྲ། །ལ་ལ་དངུལ་རྡོ་འདྲ་བ་ནི། །ནག་པོ་དྲུག་ནས་དགུ་ཡི་བར། །རི་མོ་སོ་ལ་གནས་པ་ཡིན། །དེ་ཚེ་ཉམས་དགའ་
སྟོབས་ལྡན་ཞིང་། །ཤ་ནི་རྒྱས་པར་གྱུར་པ་དང་། །རྔ་མ་དང་ནི་རྔོག་མ་སྣུམ། །སྤུ་མདོག་ཤིན་ཏུ་གསལ་བ་དང་། །མ་ཞུམ་མཚེར་ཞིང་འགྲོས་བཟང་དང་། །མཐོང་ན་དགའ་བ་ཉིད་དུ་ནི། །ཤུགས་དང་སྤྲོ་བར་ལྡན་པ་དང་། །གྲིམ་ཞིང་ལང་ཚོ་དག་ལ་གནས། །པདྨའི་གེ་
སར་འདྲ་བ་འམ། །གསེར་རམ་སྦྲང་རྩིའི་མདོག་འདྲ་ན། །བ་སེར་བ་ལང་སྦྲང་བུ་ཡི། །མདོག་འདྲ་དེ་ཡི་དབུས་ན་ནི། །གྲོག་མའི་དབྱིབས་འདྲ་ཆགས་པ་དང་། །འདམ་བུའི་ཤུན་པའི་མདོག་འདྲ་བའམ། །ཅུང་ཟད་སྔོ་ཞིང་སེར་བ་ནི། །རིང་པོར་སོ་ཡི་ངོས་ལ་ཆགས། །
སེར་པོ་མདུན་སོ་ལ་སོགས་པར། །དེ་ལྟར་དགུ་པ་ཡན་ཆད་ནས། །སེར་པོའི་མཚན་མ་ལྡན་པའི་རྟ། །ཤ་ཡིས་རྒྱས་ཤིང་སྟོབས་དང་ལྡན། །མདངས་ལྡན་དེ་བཞིན་ཁ་དོག་བཟང་། །བརྟན་ཞིང་དགའ་བར་བྱེད་པ་ཡིན། །འབྲས་ནི་གྲུས་པ་ལྟ་བུ་དང་། །དེ་བཞིན་
མུ་ཏིག་མདོག་ཅན་ལ། །ཐིལ་དང་དབུས་ནི་མཉམ་ཞིང་ཟླུམ། །དེ་བཞིན་ཞོ་ཡི་མདོག་ཅན་དུ། །དཀར་པོ་རྣམ་པ་ཐ་དད་པར། །བཅུ་གཉིས་སོགས་པར་མདུན་སོར་གནས། །དཀར་པོའི་མཚན་མར་ལྡན་པ་ལ། །ཕྱི་རོལ་མཚན་མ་འདི་འབྱུང་སྟེ། །པགས་པ་ཤ་ནི་

203-1-207a

ལྷོད་པ་དང་། །སྟོབས་ནི་ཡོངས་སུ་བྲི་བ་དང་། །ཁ་དོག་དག་ཀྱང་ཉམས་པ་དང་། །དཔྲལ་བ་སེར་བར་འགྱུར་བ་དང་། །ལུས་ཀྱི་སྟོབས་དང་མགྱོགས་པ་དང་། །སྤྲོ་བ་དག་ནི་འབྲི་བར་འགྱུར། །བྲང་གི་སྟོབས་ནི་ཟད་པའི་ཕྱིར། །ཕྲག་སོར་གཉེར་མ་འབྱུང་
བར་འགྱུར། །ཁ་ཅིག་ཡུངས་ཀར་དཀར་འདྲ་དང་། །ལ་ལ་སྦྲང་རྩི་འདྲ་བ་དང་། །ཁ་ཅིག་མཆིང་བུ་ནག་པོ་འདྲ། །དམར་ཞིང་ཟླུམ་པའི་ཐིག་ལེ་ཆགས། །མཆིང་བུ་མདུན་སོ་ལ་སོགས་པར། །བཅོ་ལྔ་ཡན་ཆད་འབྱུང་བ་ཡིན། །མིག་དང་ཕྲག་སོ་འཕྲལ་བ་དང་། །རྒྱུ་དང་མཆན་
ཁུང་དག་དང་ནི། །རྔ་རྩའི་གནས་ནི་གང་ཡིན་པར། །སྤུ་དཀར་གཉེར་མ་འབྱུང་བར་འགྱུར། །རྟ་ཡི་སྤྱོད་པ་འཁྲིག་པ་དང་། །འདྲ་བ་དག་ཀྱང་སྤོང་བྱེད་ཅིང་། །འགྲོས་དང་སྐད་ཀྱང་ཆུང་བ་དང་། །ཉམ་ངའམ་ལམ་དུ་བུབ་པར་ནི། །ལོ་ནི་བཅུ་བདུན་པ་དག་ལ། །ཕྱི་རོལ་མཚན་མ་
འདི་དག་འབྱུང་། །སེར་དང་ནག་དང་དམར་བ་འམ། །སྦྲང་བུའི་དབྱིབས་འདྲར་སྦྲང་བུའི་མདོག །བཅོ་བརྒྱད་ནས་ནི་ཉི་ཤུའི་བར། །རྟ་ལ་འདི་འདྲ་འབྱུང་བར་འགྱུར། །དེ་ལ་གཉེར་མ་སྤུ་དཀར་ནི། །སླར་ཡང་འཕེལ་བར་འགྱུར་བ་དང་། །རྟ་ཡི་སྤྱོད་པ་འཁྲིག་པ་དང་། །འདྲ་བའང་
རྣམ་པར་འདོར་བར་འགྱུར། །དུང་ནི་དུང་གི་མདོག་འདྲ་བར། །མཁས་པ་རྣམས་ཀྱིས་ཤེས་བྱ་སྟེ། །ཟླུམ་དང་ཟླ་བ་ཕྱེད་འདྲ་བར། །སོ་ཡོ་སོ་ལ་འཕྲེད་དུ་ཆགས། །རྟ་དེ་ཉི་ཤུ་རྩ་གཅིག་ནས། །རྩ་གསུམ་པ་ཡི་བར་ཡིན་ནོ། །དེ་ནི་ལྤགས་མཐུག་མདོག་འགྱུར་ཞིང་། །
མཉམ་པོ་ཉམ་ཆུང་རེག་ན་རྩུབ། །གཉེར་མ་དང་ནི་སྤུ་དཀར་སྐྱེ། །རྣ་བ་དང་ནི་མཇུག་མ་ལྷོད། །ཉི་ཤུ་རྩ་གསུམ་པ་ཡི་རྟ། །འདི་འདྲར་འགྱུར་བར་ཤེས་པར་གྱིས། །སོ་ཡི་དབུས་སུ་བུག་གང་བྱུང་། །དེ་ནི་གཏུན་འདྲར་ཤེས་པར་བྱ། །མདུན་སོ་ལ་སོགས་ཉི་ཤུ་ནི། །རྩ་
བཞི་ཡན་ཆད་འབྱུང་ཤེས་བྱ། །འདི་ཡི་ཚིགས་རུས་གང་ཡིན་དང་། །ཚེའུ་སྤུ་པུས་མོ་མི་སྡུག་ཅིང་། །སྒྲོག་མཁར་གུག་པར་འགྱུར་བ་དང་། །ཞུམ་ཞིང་ལེ་ལོས་འགྲོ་བར་འགྱུར། །གཉིད་ཆེ་བར་ནི་འགྱུར་བ་དང་། །རྩ་ཡང་འདོར་བར་འགྱུར་བ་ཡིན། །རྟ་ནི་ཉི་ཤུ་དྲུག་ལོན་པ། །

203-1-207b

འདི་འདྲ་བར་ནི་ཤེས་པར་བྱ། །སོ་མདོག་མི་སྡུག་གྱུར་ནས་ནི། །དེ་ཡི་རྗེས་ལ་འགུལ་བར་འགྱུར། །སྤུ་ནི་ཤོར་བར་འགྱུར་བ་དང་། །འབྱི་ཞིང་འགྲོས་ནི་ཞེན་པ་དང་། །མིག་གྱུར་མིག་ནི་འདྲེས་པ་དང་། །མཆི་མར་བཅས་ཤིང་དམན་པར་ལྟ། །མཚན་མ་འདི་ཡིས་རྟ་དག་
ནི། །ཉི་ཤུ་དགུ་པར་ཤེས་པར་བྱ། །ཤ་ཡི་གནས་ནས་རིམ་བཞིན་དུ། །སོ་རྣམས་འབྱུང་བར་འགྱུར་བ་དང་། །འབྲེལ་པ་ཆད་ཅིང་གྱེས་པ་དང་། །རྟ་རྒས་མིག་ནི་ཞུམ་པ་དང་། །མདངས་བྲལ་སེམས་ཁོང་ཆུད་པ་དང་། །ཉལ་བར་དགའ་ཞིང་སེམས་ཞུམ་དང་། །ཁ་ཡི་དབུགས་
ནི་དྲི་མི་ཞིམ། །རྟ་ཡི་ཁ་ནས་ཁ་ཆུ་འཛག །མིག་ལ་རྒྱུན་དུ་འཛག་པ་དང་། །ཟོས་པ་དཀའ་བས་འཇུ་བར་འགྱུར། །གང་ཚེ་སུམ་ཅུ་གཉིས་ལོན་པའི། །རྟ་ནི་ལས་ལ་སྦྱོར་མི་ནུས། །ཇི་ལྟར་གླང་པོས་བརྒྱ་ཉི་ཤུ་ཐུབ། །རྔ་མོ་བོང་བུ་ཉི་ཤུ་ལྔ། །བ་ལང་འདི་དག་ཉི་ཤུ་ནི། །
རྩ་བཞིས་ལྷག་པ་ཉིད་ཡིན་ལ། །ར་ལུག་ལོ་ནི་བཅུ་གཉིས་ཏེ། །དྲེའུ་ལོ་ནི་ཉི་ཤུ་ཡིན། །མི་དང་གླང་པོ་མཉམ་པ་ལྟར། །དེ་བཞིན་རྟའི་ལོ་སུམ་ཅུ་གཉིས། །ཚེ་ཡི་མཐར་ཐུག་གྱུར་པ་ཡི། །རྩྭ་ཡི་མེ་ལྟར་འཆི་བར་འགྱུར། །ན་ཚོད་ལོ་ཡི་དབྱེ་བ་ནི། །ཇི་བཞིན་རབ་ཏུ་བསྟན་པ་
ཡིན། །ཤ་ལི་ཧོ་ཏྲའི་མདོའི་གནས་ལས་ན་ཚོད་བརྟག་པའི་ལེའུ་སྟེ་ཉི་ཤུ་རྩ་བདུན་པའོ།།      །།དེ་ནས་ཤ་ལི་ཧོ་ཏྲའི་བུ། །མཛའ་ལས་རྒྱལ་གྱིས་ཡང་དྲིས་པ། །རྟ་ཡི་ཚེ་ནི་ཤེས་བྱ་སྟེ། །ལེགས་ལྡན་བདག་ལ་བཀའ་སྩོལ་ཅིག །ཤ་ལི་ཧོ་ཏྲ་གཟི་བརྗིད་ཆེ། །
ཕ་ཡིས་བུ་ལ་སླར་སྨྲས་པ། །གང་གི་སོ་ནི་གྱེས་པ་དང་། །སོ་རྩ་འབྱུང་བར་གྱུར་པ་དང་། །མིག་ནི་གནས་བསྐྱོད་མཆི་མ་འཛག །ཞུམ་ཞིང་རྩ་བ་ལྷོད་པ་དང་། །རྣ་རྩ་དང་ནི་ལུས་ཀུན་ཀྱང་། །རབ་ཏུ་ལྷོད་པར་གྱུར་པ་དང་། །གཟི་མདངས་མེད་ཅིང་སེམས་ཁོང་ཆུད། །
ཉལ་བར་དགའ་ཞིང་བློ་ཞུམ་དང་། །ཁའི་དབུགས་དྲི་ནི་མི་ཞིམ་དང་། །ཁ་ལས་ཁ་ཆུ་འཛག་པའི་རྟ། །དེ་ནི་དང་པོའི་གནས་སྐབས་ལས། །ལྷག་པར་འཚོ་བ་མ་ཡིན་ནོ། །གང་ཞིག་ཚིགས་ནི་མི་སྡུག་དང་། །ཆིག་གྲང་ཚེའུ་གུག་པ་དང་། །སྲེ་ལང་པ་ཡང་ཡོ་བ་དང་། །འགྲོས་

203-1-208a

ལྷོད་ལེ་ལོ་ཆེ་གྱུར་པ། །གཉིད་ནི་ཤིན་ཏུ་ཆེ་བ་དང་། །སོ་ཡི་མདོག་ནི་མི་སྡུག་དང་། །འདི་འདྲའི་མཚན་ཉིད་ལྡན་པའི་རྟ། །གནས་སྐབས་ཉིད་ལས་ལྷག་མི་འཚོ། །པགས་མཐུག་ཁ་དོག་མི་གསལ་དང་། །དབང་པོའི་སྟོབས་ཞན་རེག་ན་
རྩུབ། །རྣ་བ་རྔ་མ་ཞུམ་གྱུར་པ། །གསུམ་ལས་ལྷག་པར་མི་གནས་སོ། །མི་སྡུག་སྐད་ནི་དམན་པ་དང་། །གང་ཞིག་སོ་ནི་སྦོམ་པ་དང་། །དབུགས་འབྱིན་རྒྱུན་རིང་མི་བརྟན་པའི། །རྟ་དེ་བཞི་ལས་ལྷག་མི་འཚོ། །མིག་ནི་ཆུ་ཡིས་ཁེངས་པ་དང་། །ཅུང་ཟད་ཞུམ་
པར་གྱུར་པ་དང་། །ལུས་ཀུན་བརྟན་པ་ཆུང་བའི་རྟ། །ལྔ་ལས་ལྷག་པར་མི་འཚོ་འོ། །གང་ཞིག་དར་ལ་བབ་པ་ཡི། །མཚན་ཉིད་གཞོན་པའི་ཚེ་ན་ཡོད། །དེ་ནི་གནས་སྐབས་དྲུག་འཐོབ་སྟེ། །རྟ་དང་འདྲ་བར་གྱུར་པ་ཡིན། །སྟོབས་དང་སྤྲོ་བའི་ཡོན་ཏན་ལྡན། །སྐད་
གསང་དམན་པར་སྤྱོད་པ་ནི། །རྟ་དེ་གནས་སྐབས་བདུན་ཐོབ་ན། །སྲོག་དང་འབྲལ་བར་འགྱུར་བ་ཡིན། །སྟོབས་ལྡན་སྙིང་སྟོབས་ཕུན་སུམ་ཚོགས། །དྲི་མི་ཞིམ་པར་གྱུར་པའི་རྟ། །དེ་ནི་གནས་སྐབས་བརྒྱད་དུ་ནི། །ཕྱིན་ནས་སྲོག་དང་འབྲལ་བ་ཡིན། །ཚད་དང་སྟོབས་དང་
སྙིང་སྟོབས་དང་། །གཟི་མདངས་བརྟན་པ་རྒྱ་ཆེན་ལྡན། །རླིག་པ་འབྱར་བར་གྱུར་པ་གང་། །གནས་སྐབས་དགུ་ནས་འཆི་བར་འགྱུར། །རྟ་གང་རྟག་ཏུ་དགའ་ཞིང་སྤྲོ། །ལྟ་སྟངས་སྡུག་ཅིང་བརྐམ་ཆགས་ཆུང་། །སྟོབས་ལྡན་སྙིང་སྟོབས་ཕུན་སུམ་ཚོགས། །རླིག་
འབྲས་ཟླུམ་ཞིང་མི་འཕྱང་རྟ། །དེ་ནི་གནས་སྐབས་བཅུ་པ་རུ། །ཕྱིན་ནས་སྲོག་འདོར་འགྱུར་བ་ཡིན། །སྙིང་སྟོབས་ཁ་དོག་མདངས་མཚན་ཉིད། །ལྡན་ཞིང་འགྲོས་བཟང་སྐད་གསང་སྙན། །ཕུན་ཚོགས་སྟོབས་ལྡན་དྲགས་པར་ལྡན། །རུས་པ་ཆེ་ཞིང་ཚིགས་
སྦོམ་ལ། །མདོག་བཟང་ཤ་མཚམས་ཀུན་ཚོགས་པ། །ཚེ་ཡི་མཐར་ཕྱིན་འགྱུར་བ་ཡིན། །ཤ་ལི་ཧོ་ཏྲའི་མདོའི་གནས་ལས་ཚེ་ཤེས་པར་བྱ་བའི་ལེའུ་སྟེ་ཉི་ཤུ་རྩ་བརྒྱད་པའོ།།      །།ཤ་ལི་ཧོ་ཏྲ་དབང་པོ་ཐུལ། །མཆོག་དང་མཆོག་མིན་དེ་ཉིད་ཤེས། །བུ་ཡི་

203-1-208b

ཐུ་བོ་མཛའ་ལས་རྒྱལ། །ཉེ་བར་སོང་སྟེ་ཡང་དྲིས་པ། །དྲི་ནི་ཡིད་འོང་དགེ་བ་དང་། །དེ་བཞིན་དྲི་གང་མི་དགེ་བ། །དེ་རྣམས་ཀྱིས་ནི་འབྲས་བུ་དག །ཅིར་འགྱུར་བ་ནི་བཤད་དུ་གསོལ། །བུ་ཡིས་དེ་སྐད་དྲིས་པ་དང་། །ཤ་ལི་ཧོ་ཏྲས་སླར་སྨྲས་པ། །འདི་དག་ཐམས་ཅད་རབ་
བཤད་ཀྱིས། །ཐོས་ནས་ཟུང་ལ་བཅང་བར་གྱིས། །འོ་ཐུག་སྦྱིན་སྲེག་དུ་བ་དང་། །དེ་བཞིན་ཨུཏྤལ་དམར་པོ་དང་། །ཙནྡན་ཨ་ཀར་འདྲ་བ་དང་། །བྱིའུ་རུག་པ་ཨརྫ་ཀ །སྦྲང་རྩི་ཆང་དང་འདྲ་བ་དང་། །དེ་བཞིན་ཆང་གི་དྲི་འདྲ་དང་། །ས་ལ་གསར་དུ་ཆར་བབ་དྲི། །དེ་བཞིན་
སྣ་མ་སྤང་སྤོས་དང་། །ཨུཏྤལ་པདྨའི་གེ་སར་དང་། །ཧ་རི་བེ་ཏ་པདྨའི་རྩ། །ཨ་མྲ་བི་བ་ཀ་བིཏ་ཐ། །བ་ན་ས་འབྲས་སྨིན་འདྲ་དང་། །ནིམ་པ་ཨརྫུ་ཀ་དམ་དང་། །བ་ར་ལ་དང་ཨ་ཤོ་ཀ །དུག་མོ་ཉུངས་དང་པན་ད་ན། །སྤུ་ན་ག་ཡི་དྲི་འདྲ་དང་། །ཙམ་པ་ཀ་དང་ར་མ་ལའི། །
ལོ་མ་རྒྱ་སྤོས་དྲི་འདྲ་དང་། །དཔྱིད་ཀའི་ནགས་ཀྱི་ཚོགས་འདྲ་དང་། །གླང་པོའི་རྡུལ་གྱི་དྲི་འདྲ་དང་། །གང་ཞིག་དྲི་ནི་ཞིམ་གྱུར་པའི། །མེ་ཏོག་འབྲས་བུ་ལྡན་པ་དག །དེ་རྣམས་དྲི་ནི་མཚུངས་པ་ཡི། །རྟ་མཆོག་དེ་ནི་བཀྲ་ཤིས་སོ། །རྟག་ཏུ་རབ་ཏུ་དགའ་བ་དང་། །ཀུན་གྱི་
ཡིད་དུ་འོང་བ་དང་། །དོན་ཀུན་ཡང་དག་སྒྲུབ་བྱེད་ཅིང་། །སྐལ་ལྡན་རིགས་ནི་འཕེལ་བྱེད་ཡིན། །ཅི་ཙམ་ཡིད་འོང་དྲི་ཡོད་པ། །དེ་ཙམ་ཡིད་འོང་དོན་སྒྲུབ་བྱེད། །ཚེ་རིང་ནད་ནི་མེད་པ་དང་། །ནོར་དང་དགའ་དང་བདེ་བ་སྐྱེད། །གཡུལ་ལས་རྟག་ཏུ་རྒྱལ་བྱེད་ཅིང་། །གྲགས་
དང་བུ་དང་ཚ་བོ་སྐྱེད། །དེ་ལྟར་དགེ་བའི་དྲི་དག་ནི། །བཤད་ནས་ཅིག་ཤོས་མཉན་པར་གྱིས། །རྟ་ནི་རྔུལ་བར་གྱུར་པ་དང་། །མང་ཀུ་ན་ཡི་དྲི་འདྲ་དང་། །བཤང་དང་གཅི་བའི་དྲི་བཅས་དང་། །དེ་བཞིན་སྒོག་པའི་དྲི་བཅས་དང་། །བྱི་ལ་རྔ་མོ་ཕག་དང་ནི། །འུག་པའི་དྲི་དང་
འདྲ་བ་དང་། །གང་ཞིག་ཁྱི་རླིག་དྲི་འདྲ་བ། །དགེ་བའི་དྲི་ལ་བརྟེན་མ་ཡིན། །ཉེས་པ་འདི་དག་ལྡན་པ་ཡི། །རྟ་དེ་ཤིས་པ་མ་ཡིན་ནོ། །རྒྱལ་པོའི་དོན་མི་འགྲུབ་པ་དང་། །དེ་བཞིན་བཀྲ་མི་ཤིས་པ་ཡིན། །རིང་དུ་འཚོ་བར་མི་འགྱུར་ཞིང་། །ལས་རྣམས་ཀུན་ལ་སྨད་པ་ཡིན། །

203-1-209a

དེ་ལྟར་ཤིས་དང་མི་ཤིས་པའི། །དྲི་རྣམས་རབ་ཏུ་བཤད་པ་ཡིན། །ཤ་ལི་ཧོ་ཏྲའི་མདོའི་གནས་ལས་དྲི་བརྟག་པའི་ལེའུ་སྟེ་ཉི་ཤུ་རྩ་དགུ་པའོ།།      །།ཤ་ལི་ཧོ་ཏྲས་བུ་ལ་ནི། །རྟ་ཡི་སྐད་གསང་མཚན་ཉིད་བཤད། །སྲོག་ཅེས་བྱ་བའི་རླུང་ཤུགས་
ཀྱིས། །ལྟེ་བའི་རྩ་ནས་བྱུང་གྱུར་ཏེ། །ལུས་ལ་གདོས་པར་གྱུར་ནས་ནི། །ཁར་ཕྱིན་འཚེར་བ་ཞེས་བཤད་དོ། །ཤིན་ཏུ་འཇམ་ཞིང་གཏིང་རིང་ལ། །ཀློང་ཆེ་འདྲིལ་ཞིང་རྒྱུན་མི་འཆད། །འཚེར་བར་བྱེད་པའི་རྒྱལ་བྱེད་རྟ། །རྒྱལ་པོས་ཡང་དག་རྒྱལ་བ་ཐོབ། །རྩུབ་
ཅིང་ཉམ་ཆུང་ཀློད་ཆུང་ཆད། །ངར་ངར་པོ་དང་འཛེར་བར་ནི། །མགོ་བོར་ཕྱིན་ཏེ་འཚེར་བ་ཡི། །རྟ་ནི་བསྔགས་པ་མ་ཡིན་ནོ། །དུང་དང་རྔ་ཆེན་སེང་གེ་སྟག །ཤིང་རྟའི་གླིང་བུ་ཁྱུ་མཁྱོག་སྒྲ། །ངར་ངུར་གླང་པོ་ཀུ་ར་ར། །འབྲུག་དང་རྫ་རྔའི་སྒྲ་འདྲ་ཞིང་། །ཆུ་བོ་འདྲ་བའི་སྒྲར་
ལྡན་པའི། །དེ་ནི་རྟག་ཏུ་འཕེལ་བྱེད་སྟེར། །སྤྱང་ཁུ་བྱ་རྒོད་རྔ་མོ་དང་། །བྱི་ལ་ཅེ་སྤྱང་སྣོད་ཆག་སྒྲ། །ཁྱི་དང་སྤྲེའུ་འུག་པ་དང་། །ཤིང་དང་རྡོ་དང་འདྲེ་བ་དང་། །སེར་བ་ཡི་ནི་སྒྲ་འདྲ་བ། །རྟ་ཡི་ཐ་མ་སྡིག་ལྡན་ཡིན། །སྐད་ཟད་པ་ཡི་རྟ་རྙེད་ན། །མྱུར་དུ་ཉམས་པ་ཐོབ་པར་
འགྱུར། །ཐུར་དུ་ཁ་བལྟས་འཚེར་བའི་རྟ། །དེ་ནི་བདག་པོའི་ཕོངས་པ་སྐྱེད། །གཡོན་ལོགས་བལྟས་ཏེ་འཚེར་བ་དག །རིགས་རྒྱུད་ཉོན་མོངས་བྱེད་པ་ཡིན། །བཀྲ་མི་ཤིས་པའི་རྫས་དག་ནི། །མཐོང་ནས་མང་དུ་འཚེར་བྱེད་པ། །རྟ་དེ་མི་ཤིས་བསྐྱེད་པ་སྟེ། །བདག་
པོའི་སྡུག་བསྔལ་བྱེད་པར་བཤད། །བོང་བུ་ཡི་ལྟར་གང་ཡིན་པ། །དེ་ནི་བཀྲ་མི་ཤིས་པར་བཤད། །བཀྲ་ཤིས་པ་ཡི་རྫས་མཐོང་ན། །གང་ཞིག་འཚེར་བར་བྱེད་པའི་རྟ། །བདག་པོ་རྣམ་པར་འཕེལ་བྱེད་ཅིང་། །ནོར་དང་འབྲུ་ནི་རྒྱས་པར་བཤད། །གཡས་ལོགས་སུ་ནི་
བལྟས་པ་འམ། །རེག་ཅིང་འཚེར་བྱེད་གང་ཡིན་པ། །རྟ་དེ་ཞོན་ན་རྒྱལ་པོ་ནི། །ས་རྣམས་ལས་ནི་རྒྱལ་བར་འགྱུར། །མང་པོ་འཚེར་བར་བྱེད་པ་ན། །དེ་ཡི་འཚེར་བ་གསལ་གྱུར་གང་། །རྟ་དེ་རྗེས་སྒྲོགས་ཞེས་བྱ་སྟེ། །བདག་པོའི་དོན་ཀུན་སྒྲུབ་བྱེད་ཡིན། །གཅིག་པུ་

203-1-209b

འཚེར་བར་བྱེད་པ་ཡང་། །མང་པོ་ལྟ་བུར་མངོན་གྱུར་པ། །རྟ་དེ་གཏིང་རིང་འཚེར་ཞེས་བྱ། །བདག་པོའི་རྣམ་རྒྱལ་འཕེལ་བྱེད་ཡིན། །གང་ཞིག་འཚེར་བ་ཐོས་ནས་ནི། །རྟ་གཞན་འཚེར་བར་བྱེད་པ་དག །དེས་ནི་རྒྱལ་པོའི་རྟ་བརྒྱ་སྟོང་། །འདོད་པར་བྱེད་པ་ཉིད་ཡིན་ནོ། །
གཞན་ཡང་འཚེར་བ་ཐོས་ནས་ནི། །རྟ་གང་ཕྱིས་ནས་འཚེར་བྱེད་པ། །རྟ་དེ་ཞོན་པར་གྱུར་ནས་ནི། །མཛའ་བོ་འཕེལ་བར་བྱེད་པ་ཡིན། །རྒན་དང་བྱིས་པ་ནད་པ་དང་། །གཅོང་ཅན་ངལ་དང་སྐོམ་པ་དང་། །བཀྲེས་ཚེ་འཚེར་བར་གྱུར་པ་ཡི། །རྟ་སྐད་བརྟག་པར་མི་བྱའོ། །
ཤ་ལི་ཧོ་ཏྲའི་མདོའི་གནས་ལས་ས་སྐད་གསང་བརྟག་པའི་ལེའུ་སྟེ་སུམ་ཅུ་པའོ།།      །།རྟ་ཡི་ཚེ་ཡི་དེ་ཉིད་ཤེས། །རིག་བྱེད་ཡན་ལག་མཐར་ཕྱིན་ལ། །འགྲོས་ཀྱི་བྱ་བ་ཤེས་པ་ལ། །ཐེ་ཚོམ་སྐྱེས་པ་གར་དགར་སྲིད། ལེགས་ལྡན་ས་ཡི་བདག་པོ་རྣམས། །གཡུལ་དུ་
ཤུགས་མགྱོགས་རྟ་ལ་ནི། །དགའ་ཞིང་བརྟན་པས་རྩོམ་བྱེད་ལ། །རྟ་ལ་གཅེས་པར་འཛིན་པ་ཡི། །མཆོང་བ་དགའ་བ་སྐྱེ་འགྱུར་ལ། །མགྱོགས་པས་ཤིན་ཏུ་ཡིད་རྟོན་འགྱུར། །རྟ་ནི་འདི་ལྟར་མི་མཆོང་བ། །མགྱོགས་ཤུགས་མེད་ན་དགའ་མི་འགྱུར། །འགྲོས་འདེབས་མྱུར་བར་
འགྲོ་བ་ལ། །ཞོན་ན་དགའ་བ་སྐྱེད་པར་བྱེད། །ས་ཐག་རིང་དུ་འགྲོ་བ་ན། །འགྲོས་བདེ་བ་ནི་བསྔགས་པ་ཡིན། །རྒྱལ་པོ་དང་ནི་རྒྱལ་བུ་དང་། །བུད་མེད་སྐྱིད་དེ་བ་ཡིན་པས། །བཞོན་པས་བསྐྱོད་པའི་ནད་རྣམས་ནི། །དེ་འདྲས་འབྱུང་བར་མི་འགྱུར་རོ། །འགྲོས་ཀྱི་ཚུལ་ནི་སྣ་
ཚོགས་ལས། །ཤིས་དང་མི་ཤིས་འབྲས་བུ་འབྱུང་། །ལེགས་ལྡན་འགྲོས་ཀྱི་ཚུལ་དག་ནི། །རྟ་ལ་གང་ཡོད་བདག་ལ་གསུངས། །གརྒའི་ཚིག་དེའི་རྗེས་ལ་ནི། །ཤ་ལི་ཧོ་ཏྲས་སླར་སྨྲས་པ། །མདོར་ན་ནེའུ་ལེ་སྲེག་པ་དང་། །རྨ་བྱ་དང་ནི་མཚུངས་པར་འགྲོ། །ཇི་ལྟར་ནེའུ་
ལེའི་རྐང་པ་ནི། །མྱུར་དུ་འདོར་བར་བྱེད་པ་ནི། །བར་མཚམས་མེད་པ་ལྟ་བུར་མངོན། །རང་གི་སྤྱི་བོ་ཅུང་ཟད་འགུལ། །མགོ་མགྲིན་སེང་གེ་ལྟར་འདེགས་ཤིང་། །རྒྱབ་དང་ལུས་ནི་བརྟན་པར་གནས། །མཇུག་ཚོས་རྒལ་ཚིགས་མི་འགུལ་ཞིང་། །རྔ་མའང་འགུལ་བར་མི་བྱེད་གང་། །

203-1-210a

དེ་ནི་ནེའུ་ལེའི་འགྲོས་ཅན་དུ། །བློ་དང་ལྡན་པས་ཤེས་པར་བྱ། །འཁྲུལ་པ་མེད་ཅིང་གཡོ་བ་མེད། །ལམ་དུ་མ་ཡེངས་བྱེད་པ་དང་། །ཞོན་པའི་མི་ནི་བརྟན་བཟང་ངམ། །གྲུ་ལ་གནས་པ་སྙམ་སེམས་ཞིང་། །གང་གི་ཤུགས་ནི་འདོར་བ་ན། །ཞོན་པ་སྤུ་རྩེ་ཙམ་མི་
འགུལ། །ལམ་རིང་དུ་ནི་སོང་གྱུར་ཀྱང་། །ཆད་པར་འགྱུར་བ་མེད་པ་དང་། །ལམ་གྱིས་ངོམས་པ་མེད་ལྟར་འགྲོ། །དབྱིབས་ནི་ལེགས་པར་གྱུར་པའི་རྟ། །མེ་མདག་ལ་ནི་རེག་པ་ལྟར། །ལམ་དུ་མྱུར་དུ་འགྲོ་བ་དང་། །སེང་གེ་ལྟ་བུར་ལུས་འདེགས་ཤིང་། །མཆུ་ཡིས་ནམ་ཚོང་བརྐོ་བ་
འདྲ། །ས་ལ་རྟོག་བྱེད་དེ་བཞིན་དུ། །ལུས་ནི་འདེགས་པ་ལྟར་བྱེད་དང་། །ཞོན་པ་པོ་ནི་དགའ་སྐྱེད་པ། །གང་མ་སྲེག་གི་འགྲོས་བསྟེན་ཡིན། །གང་ཞིག་མགོ་དྲང་ལ་འཁུམས་དང་། །མགོ་དང་སྐེ་མགྲིན་རབ་ཏུ་རྐྱོང་། །བདག་པོའི་སེམས་དང་རྗེས་མཐུན་པར། །ལམ་དུ་མཉམ་
པར་ལྟ་བ་དང་། །རྟག་པར་ལམ་དུ་མི་བུབ་ཅིང་། །ཆུ་ཡི་ནང་དུ་མི་ནུབ་ལ། །བརྟན་ཞིང་མ་འཆོལ་འགྲོ་བའི་རྟ། །རྨ་བྱའི་འགྲོས་ལ་བརྟེན་པ་ཡིན། །གསུམ་པོ་འདི་དག་འགྲོས་ཀྱི་ནི། །གཙོ་བོ་ཡིན་པས་ཤིས་པ་འཐོབ། །དེ་ལས་གཞན་པའི་འགྲོས་གང་ཡིན། །ཕལ་ཆེར་སྨད་པར་
བྱ་བ་ཉིད། །འགྲོས་ཀྱི་མཚན་ཉིད་ཕུན་སུམ་ཚོགས། །རྟ་མཆོག་རྙེད་པར་གྱུར་ན་ནི། །རྒྱལ་པོ་དགྲ་ལས་རྒྱལ་འགྱུར་ཞིང་། །ལམ་དུ་དུབ་པར་མི་འགྱུར་རོ། །འགྲོས་བཟང་རྟ་ལ་བདག་པོ་ཡིས། །ལྷག་པར་དགའ་བར་བྱ་བ་ཡིན། །དེ་བས་རྟ་ཡི་བསྟན་བཅོས་ནི། །ཤེས་
པས་འགྲོས་ནི་བརྟག་པར་བྱ། །ཕག་དང་མ་ཧེ་རྔ་མོ་དང་། །ཁྱི་སྤྲེའུ་རུས་སྦལ་གླང་སེང་འགྲོས། །གང་ཡང་བྱི་ལ་ལྟར་འགྲོ་བ། །རྟ་དེ་མི་ཤིས་ཡིན་ཞེས་བྱ། །ཚེའུ་ཚེ་ཚིག་གྲང་དཔུང་པ་བརླ། །འདེགས་པར་དཀའ་ཞིང་འགྲོས་ཞན་ལ། །འཁུམས་ཤིང་རྐང་འཆོལ་འགྲོ་བ་
དང་། །རྒྱབ་ངན་བཞོན་པར་མི་བདེ་དང་། །གོམས་སྟེངས་འཇོག་ཉེས་བུལ་བས་འགྲོ། །དེ་ནི་ཡོངས་སུ་སྤང་བར་བྱ། །དབུགས་རྒོད་སླར་བསྡུ་དཀའ་བ་དང་། །ལམ་ནི་ཐུང་ངུས་རྟག་ཏུ་དུབ། །སྙིང་སྟོབས་ཆུང་སྟེ་རྟ་མཁན་གྱིས། །དགྲ་ཡི་བསམ་པ་འགྲུབ་དེ་སྤང་། །རྟ་གང་མགོ་བོ་

203-1-210b

འདེགས་པ་དང་། །རྨིག་པ་མཐོ་བར་འདེབས་པ་དང་། །བདག་པོ་དགའ་བར་འགྲོ་བྱེད་པ། །འགྲོས་དེ་མཆོག་ནི་ཡིན་པར་བཤད། །མགྱོགས་ཤུགས་མདའ་ལྟར་རྒྱུག་བྱེད་ཅིང་། །ལུས་ཀུན་དུབ་པ་མེད་པ་དང་། །སྡུད་ཅིང་རིང་དུ་སྙོབ་བྱེད་པ། །འགྲོས་དེ་མཆོག་ནི་ཡིན་པར་
བཤད། །རྐང་འཇོག་ལྷག་ཆད་མི་སྙོམས་ཤིང་། །དེ་བཞིན་མྱུར་ཆེས་བུལ་ཆེས་པ། །ཤིན་ཏུ་འདུས་དང་ཤིན་ཏུ་སྐྱེ། །འགྲོས་ཀྱི་ཉེས་པ་འདི་དྲུག་ཡིན། །ཤ་ལི་ཧོ་ཏྲའི་མདོའི་གནས་ལས་འགྲོས་ཀྱི་བཟང་ངན་ཤེས་པར་བྱ་བ་སྟེ་ལེའུ་སུམ་ཅུ་སོ་གཅིག་པའོ།།      །།ཤ་ལི་ཧོ་
ཏྲ་ཡིད་གཞུངས་པས། །ཚངས་པ་མེ་ཡི་རྒལ་འདྲ་ལ། །ལུས་ཀྱི་འཕེལ་བའི་བྱ་བ་ནི། །མཛའ་ལས་རྒྱལ་གྱིས་ཡང་དྲིས་པ། །ཐོག་མ་ཐ་མ་བར་མར་ནི། །ལུས་འཕེལ་བར་ནི་ཇི་ལྟར་འགྱུར། །འགྲོས་དང་འགྲོས་གཞན་བཅས་པར་ནི། །འདི་དག་ཤེས་པར་འཚལ་ལགས་སོ། །
རྟ་ནི་ཇི་ལྟར་རྒྱུ་བ་དང་། །རྟེན་དུ་ཇི་ལྟར་གྱུར་པ་དག །འདི་དག་ཤེས་པར་འཚལ་ལགས་སོ། །བུ་ཡིས་དེ་སྐད་དྲིས་པ་དང་། །ཤ་ལི་ཧོ་ཏྲས་སླར་སྨྲས་པ། །འདི་ན་ནམ་མཁའ་ས་དང་རླུང་དང་མེ་དང་ཆུ་དང་ས་རྣམས་སྣང་གི། སེམས་ཞེས་བྱ་བ་དྲུག་པ་དང་འདྲེས་པ་རྒོད་མའི་མངལ་དུ་ཞུགས་ཤིང་
གཅིག་ཏུ་འགྱུར་བ་ལས་ལུས་སུ་འབྲེལ་པ་ཡོངས་སུ་རྫོགས་པར་བྱེད་པར་འགྱུར་རོ། །དེ་ནས་དུས་ཡོངས་སུ་སྨིན་ཅིང་ཚོང་བ་ན། མངལ་གྱི་དྲི་མ་དང་བྲལ་བའི་ཚུལ་གྱིས་སྐྱེ་ཞིང་འབྱུང་བ་ན། ཤ་མའི་དྲི་མས་ལུས་ལ་གོས་ཤིང་། ལུས་དང་སེམས་ཉོན་མོངས་པ་ལས་ལུས་བདེ་བར་གནས་པ་
ན་གྲང་བ་དང་ཚ་བ་དང་ཕྲད་པའི་ཚོར་བ་བདེ་སྡུག་བདག་ཉིད་ཀྱིས་མངོན་པར་ཤེས་པར་འགྱུར་རོ། །དེ་ལ་རྒྱུ་གང་གིས་འབྱུང་བ་ཆེན་པོ་ལྔ་དང་ནང་གི་བདག་ཉིད་དྲུག་པོ་ཕན་ཚུན་འདྲེས་པར་གྱུར་པ་སྟེ། ས་བོན་དང་འབྲས་བུའི་ཚུལ་དུ་ཉམས་པ་མེད་པར་གནས་པར་འགྱུར་རོ། །རྟ་དེ་དེ་ལྟར་བྱུང་
བ་ན་ཤིང་ལྟར་རིམ་གྱིས་འཕེལ་བར་འགྱུར་ཞིང་ཡོན་ཏན་དུ་མ་དང་ལྡན་པར་འགྱུར་རོ། །དེ་བཞིན་དུ་སྲེད་པའི་དབང་གིས་དང་པོ་ཡུལ་ལ་འཇུག་པར་ཞུས་པ་དང་། རླུང་འཐོར་བས་དབུས་ན་ཕན་ཚུན་དུ་ཁྱབ་པ་ན། ལུས་ཀྱི་འགྲོས་དང་གོམ་པའི་ཤུགས་རིམ་གྱིས་འབྱུང་བར་འགྱུར་ཏེ།

203-1-211a

འགྲོས་གང་དང་གང་གིས་དང་པོར་མའི་རྗེས་སུ་འབྲང་ཞིང་ཟས་འདོད་པར་གྱུར་པ་དེ་ནི་ལུས་འཕེལ་བ་ཞེས་བྱའོ། །དེ་བཞིན་དུ་གཅིག་པུ་རྒྱུ་ཞིང་རྗེས་སུ་འབྲང་བའི་འགྲོས་ཀྱིས་འགྲོ་བར་བྱེད་པ་དང་། རིམ་གྱིས་འཕེལ་བར་གྱུར་པ་ན་ཡང་། ལུས་དང་རྗེས་སུ་མཐུན་པའི་སྟོབས་དང་།
འགྲོས་དང་། རྒྱུག་པ་དང་། རྩེ་བ་དང་། མཆོང་བ་དང་། དཀྱུ་བ་དང་། འགྲོས་དམ་པའི་ཡོན་ཏན་དང་ལྡན་པ་དེ་ནི་དང་པོ་གཅིག་ཏུ་རྒྱུ་ཞིང་རྗེས་སུ་འབྲེང་བ་ཞེས་བྱའོ། །དེ་ལ་རྐང་པ་འཇོག་པའི་འགྲོས་ནི་རྣམ་པ་བཞི་སྟེ། འདི་ལྟ་སྟེ་སྤོ་ཞིང་འགྲོ་བ་དང་། བཞག་པ་མཉམ་པས་རྗེས་སུ་འགྲོ་བ་
དང་། གཞོགས་དུད་ཅིང་འགྲོ་བ་དང་། སྤྱོད་པ་གཅིག་གིས་རྗེས་སུ་འགྲོ་བའོ། །དེ་དག་ནི་རང་བཞིན་གང་ཡིན་པ་དེ་ཉེ་བར་བཤད་པར་བྱའོ། །སྔ་མ་གཉིས་དང་ཕྱི་མ་གཉིས། །རྐང་པ་མཉམ་པར་འགྲོ་བྱེད་ཅིང་། །རང་གི་ལུས་ནི་སྤོ་བ་དག །དེ་ནི་སྤོ་བའི་འགྲོས་ཡིན་ནོ། །རྩིབ་ལོགས་
གཉིས་ནི་མཉམ་གནས་ཤིང་། །རེས་ཀྱིས་ཉེ་བར་གནས་བྱེད་ལ། །རིམ་གྱིས་རྨིག་པ་ཉེ་བར་འདེགས། །དེ་ནི་གཞོགས་མཉམ་འགྲོ་བ་ཡིན། །མིག་སྤྲུག་འཁྲུལ་པ་མེད་པར་ནི། །ལུས་ནི་དད་ཅིང་རྒྱུ་བྱེད་ལ། །སྤྱོད་པ་གཅིག་གིས་མི་འགྲོ་བ། །གཞོགས་དུས་འགྲོས་ནི་དེ་ཡིན་
ནོ། །གང་ཞིག་ཡན་ལག་རེས་མོས་ཀྱིས། །འཇོག་ཅིང་འདེགས་པར་བྱེད་པ་དང་། །རྐང་པ་གསུམ་ནི་ཤས་ཆེར་འདེགས། །རྟ་ནི་སྤྱོད་པ་གཅིག་འགྲོས་ཡིན། །དེ་བཞིན་དུ་རི་དྭགས་དང་། མ་ཧེ་དང་། བྱི་ལ་དང་། ཁྱི་དང་། དོམ་དང་། སྟག་དང་། ནེའུ་ལེ་དང་། གླང་པོ་ཆེ་དང་། ཁྱུ་
མཆོག་དང་། རྔ་མོ་དང་། དྲེའུ་དང་། བོང་བུ་དང་། ར་དང་། ལུག་དང་། ཨེ་ནེ་ཡ་དང་། ས་ལ་དང་། སྤྱང་ཀུ་དང་། གཞན་ཡང་དེ་ལྟ་བུའི་རྣམ་པ་དག་ཀྱང་ལུས་མཆོག་དང་། བར་མ་དང་། ཐ་མའི་དབྱེ་བའི་ཚད་ཀྱིས་རྐང་བཞི་པ་རྣམས་ཀྱི་ལུས་འཕེལ་བའི་རྣམ་པར་དབྱེ་བ་བཤད་པ་ཡིན་ནོ། །
ཤ་ལི་ཧོ་ཏྲའི་མདོའི་གནས་ལས་ལུས་འཕེལ་བ་ཞེས་བྱ་བའི་ལེའུ་སྟེ་སུམ་ཅུ་སོ་གཉིས་པའོ།།      །།ཐུབ་མཆོག་ཤ་ལི་ཧོ་ཏྲ་ལས། །ལེགས་ཐོས་ཀྱིས་ནི་ཡང་དྲིས་པ། །ལེགས་ལྡན་རྒྱུག་པའི་མཚན་ཉིད་ནི། །མཉན་པ་རུ་ནི་འཚལ་ལགས་སོ། །འདིར་ནི་སྐྱོན་གང་ཡོན་ཏན་གང་། །

203-1-211b

འདི་རྣམས་རྣམ་པ་དུ་རུ་གྲགས། །མཚན་ཉིད་གང་དག་ཡིན་པ་དག །འདི་དག་ཐམས་ཅད་ཤེས་པར་འཚལ། །དེ་སྐད་སྨྲས་ཚེ་དྲང་སྲོང་མཆོག །ཤ་ལི་ཧོ་ཏྲས་སླར་སྨྲས་པ། །ཁྱེད་ཀྱི་ཡིད་ལ་གང་གནས་པ། །དེ་ནི་བཤད་ཀྱིས་མཉན་པར་གྱིས། །རྒྱུག་པ་མེད་པར་རྟ་རྣམས་ནི། །རྩིག་
པ་ཤིང་འདྲ་བེམས་པོ་ཡིན། །རྒྱལ་པོའི་སྟེ་ཚོམས་གསུམ་པོ་ནི། །སྒྲུབ་ལ་དེ་ནི་གཙོ་བོ་ཡིན། །དེ་བས་རྒྱུག་པའི་མཚན་ཉིད་ནི། །བཞི་བཅུ་དག་ཏུ་ཤེས་པར་བྱ། །དང་པོར་གཏང་བའི་དོན་དུ་ནི། །ཉེས་པ་ཉི་ཤུ་ལྔ་ཤེས་བྱ། །ཡང་དག་གཞག་པར་བྱ་བ་ཡི། །ཡོན་ཏན་བཅོ་ལྔ་ཉིད་དུ་
བཤད། །དེ་ལྟ་བུ་ཡི་རྒྱུག་པ་ནི། །ཟླུམ་པོ་དག་ཏུ་ཉེ་བར་སྦྱར། །རང་བཞིན་ལེགས་པར་ཤེས་བྱ་སྟེ། །གཞན་དུ་དེ་ནི་དོན་མེད་འགྱུར། །བརྡེག་ན་ལན་བྱེད་དང་པོ་སྟེ། །རྡེག་བྱེད་གཞན་ལ་དོགས་པ་དང་། །སྐེ་བ་གཅུ་དང་རྔ་མ་བསྐྱོད། །མི་སྡུག་ལྟ་ཞིང་འབྲུ་ཚུགས་ལྟ། །མགོ་མདུད་
རྣ་བ་མི་མཉམ་དང་། །སྡིགས་དང་རྡེག་པར་གྱུར་ན་ཡང་། །མགོ་ནི་མི་བརྟན་གྱུར་པ་དང་། །འདུ་ཤེས་མི་གསལ་དེ་ལས་གཞན། །དབྱིག་པ་ལ་སྔངས་རྐོ་བྱེད་དང་། །སོ་ནི་སྒྲ་དང་བཅས་པར་འཆའ། །གོམ་པ་དུད་དང་འཁྱོར་བ་དང་། །བཅིང་དང་ཁྲོ་བ་དེ་ལས་གཞན། །གཞན་ཡང་
བཅིངས་པས་རྨོངས་པ་དང་། །སྐེ་སྐྱོད་བརྟན་པར་མི་གནས་དང་། །དོགས་བཅས་ཡན་ལག་འཁྱོར་བ་དང་། །ཡན་ལག་རེངས་དང་ཡན་ལག་ཆུང་། །ལུས་ནི་བརྟན་པར་མི་གནས་དང་། །དེ་བཞིན་གོམ་པ་མི་བརྟན་དང་། །དབྱིབས་མི་མཉམ་དང་དབྱིབས་མི་སྡུག །འདི་དག་རྟ་ནི་
ངན་པར་བཤད། །འདི་དག་རྣམས་ཀྱི་མཚན་ཉིད་ནི། །བཤད་པ་ང་ལས་བཟུང་བར་གྱིས། །གང་ཞིག་རྡེག་ན་སླར་རྡེག་པ། །རྡེག་ན་ལན་བྱེད་ཡིན་ཤེས་བྱ། །གང་ཞིག་རྡེག་པར་བྱེད་པ་ལ། །དོགས་འདོད་འདོག་པ་ཅན་ཞེས་བྱ། །སྐེ་བ་རང་དགར་འཇོག་པ་ནི། །སྐེ་གཅུ་རྟ་ཡི་ཐ་མ་
ཡིན། །རྔ་མ་བརྐྱང་དང་སྤྲུག་བྱེད་ཅིང་། །ཡང་ཡང་བསྐྱོད་པ་རྔ་སྤྲུགས་ཡིན། །རྟག་ཏུ་རྡེག་པར་འདོད་པ་ནི། །མི་སྡུག་རྟ་ཞེས་དེ་བཤད་དོ། །གང་ཞིག་བསླབས་ཀྱང་ཅུང་ཟད་ཙམ། །མི་སྟོང་སེམས་ཀྱིས་སྟོང་པར་འདུག །དེ་ནི་བལྟ་བར་སྡུག་པ་སྟེ། །དེས་ན་འབྲུ་ཚུགས་ལྟ་ཞེས་བཤད། །

203-1-212a

གང་ཞིག་རྟག་ཏུ་ས་ལ་བལྟ། །མགོ་དུད་པ་ནི་ཡིན་ཞེས་བྱ། །བརྡེགས་སམ་གཞུས་པར་གྱུར་པ་ན། །ཁྲོས་པས་རྣ་བ་འཆོལ་བར་འཇོག །དེ་ནི་རྣ་བ་མི་མཉམ་ཡིན། །རང་བཞིན་གྱིས་ཡོང་མ་གཏོགས་སོ། །གང་ཞིག་སྤྱི་བོ་རྟག་ཏུ་བསྐྱོད། །དེ་ན་མགོ་མི་བརྟན་ཞེས་བྱ། །
གང་ཞིག་རྟ་ནི་མི་དྲན་པ། །དེ་ནི་འདུ་ཤེས་མི་གསལ་ཡིན། །ལྕག་ལ་སོགས་པ་གཅིག་གིས་ཀྱང་། །གནོད་མེད་དབྱིག་པ་ལའང་སྔངས་ཡིན། །ལག་པ་གཉིས་ཀྱིས་ས་རྐོ་བ། །དེ་ནི་རྐོ་བྱེད་ཞེས་བཤད་དོ། །ཁྲོ་བས་སོ་ནི་འཆའ་བྱེད་པ། །སོ་སྒྲ་འཆའ་ཞེས་བྱ་བར་བཤད། །
རྟ་གང་འདུལ་བར་བྱེད་པ་ཡི། །རྗེས་སུ་ཅུང་ཟད་མི་འཇུག་ཅིང་། །གོམ་པ་ལ་ལར་སྡུད་པ་དང་། །ལ་ལར་ཡང་ནི་འཁྱོར་བྱེད་པ། །མི་མཉམ་པ་ཡི་འགྲོས་ཅན་ཏེ། །གོམ་པ་སྡུད་ཅིང་འཁྱོར་བ་ཡིན། །རོ་སྟོད་རོ་སྨད་གདོང་པ་འམ། །ཡིད་ན་ལུས་ཀྱི་བར་དག་ཏུ། །གང་ཞིག་བཅིངས་ན་
མྱུར་དུ་འཁྲུག །བཅིངས་ན་ཁྲོ་བའི་རྟ་རུ་འདོད། །གང་ཞིག་ཐག་པས་བཅིངས་ན་ནི། །བཅིངས་པས་བློ་གྲོས་རྨོངས་གྱུར་ཡིན། །རོ་སྨད་ཀྱི་ནི་ལུས་བྱེད་འགུལ། །བསྐྱོད་པས་རྐེད་པ་སྐྱོད་བྱེད་ཡིན། །འདིས་ནི་བདག་ལ་རྡེག་སྙོམ་སྟེ། །འདུལ་སྦྱོང་མཁན་ལ་སྔར་རྡེག་བྱེད། །དེ་ནི་
དོགས་པ་ཅན་ཞེས་བྱ། །ར་རོ་བ་ལྟར་ཡན་ལག་ཀུན། །ཕན་ཚུན་འཆོལ་བར་འགྲོ་བྱེད་པའམ། །གཟེར་བཅས་ལྟ་བུར་བྱེད་པའི་རྟ། །དེ་ནི་ཡན་ལག་འཁྱོར་ཞེས་བྱ། །ཡན་ལག་ཀྱང་ནི་འཁྱོར་བྱེད་ཅིང་། །ཡང་དང་ཡང་དུ་རེངས་པ་དག །དེ་ནི་ཡན་ལག་རེངས་ཡིན་པའམ། །
ཡང་ན་རྟག་ཏུ་ལུས་མི་འགྱུར། །གང་གི་ཡན་ལག་རབ་སྲ་ཞིང་། །བརྡེག་ཀྱང་ཚོར་བ་མེད་པ་དང་། །དགའ་བས་བྱ་བ་ལ་འཇུག་པ། །ཡན་ལག་རྩུབ་པར་དེ་བཤད་དོ། །གང་གི་ལུས་ཀྱི་དབྱིབས་དག་ནི། །ཚུལ་གཅིག་དུ་ནི་མི་མངོན་ཞིང་། །ལུས་ཀྱང་སྤྲུགས་པར་བྱེད་གྱུར་པ། །དེ་
ནི་བརྟན་མི་གནས་ཞེས་བྱ། །རྟ་གང་དང་པོར་གཞན་དུ་འགྲོ། །དེ་ཡི་རྗེས་ལའང་གཞན་འགྲོ་བ། །འགྲོས་ནི་གཏན་ནས་མེད་པའི་ཕྱིར། །དེ་ནི་གོམ་མི་བརྟན་ཞེས་བྱ། །གང་ཞིག་ལུས་ནི་འཛུམ་པ་འམ། །གང་ཞིག་ལུས་ནི་མི་མཉམ་པ། །དེ་ནི་དབྱིབས་མི་མཉམ་ཞེས་བྱ། །ལམ་དུ་འཇུག་

203-1-212b

བྱེད་འོས་མ་ཡིན། །རྒྱབ་ནི་ཤིན་ཏུ་རིང་གྱུར་ཅིང་། །ལུས་ནི་རྔ་མོ་དང་འདྲ་བ། །དབྱིབས་མི་སྡུག་པར་ཤེས་བྱ་སྟེ། །བསླབ་དང་མཛེས་པ་མེད་པ་ཡིན། །འདི་དག་སྐྱོན་ཅན་ཡིན་པས་ན། །མཁས་པས་སྐྱོན་ནི་ཤེས་པར་བྱ། །ད་ནི་ཡོན་ཏན་བསྟན་པ་ཡི། །མཚན་ཉིད་དག་ནི་བཤད་
བྱ་སྟེ། །རྣ་བ་མཇུག་མ་རྒལ་ཚིགས་རྣམས། །ཡོན་ཏན་ཆེ་ཞིང་ཡིད་གཞུངས་ལས། །ཡིད་གཞུངས་སེམས་ནི་དེ་ཉིད་ལ། །ངེས་པར་སྦྱོར་བ་ཉིད་ཡིན་ནོ། །ལུས་ལ་ཡེངས་པ་མེད་ཉིད་དང་། །ཡོན་ཏན་ཀུན་དང་ལྡན་པ་དག །ཡེངས་མ་དག་དང་བྲལ་བ་ཉིད། །མ་ཡེངས་ཞེས་བྱ་གཉིས་
པ་ཡིན། །རོ་སྟོད་མཆོག་ཏུ་ཐེལ་ཀ་ཆེ། །ཤུགས་ཀྱིས་ཡོངས་སུ་རྒྱུག་བྱེད་ཅིང་། །ལྟེ་བར་ལྟ་བར་བྱེད་པ་འདི། །ཡོན་ཏན་གསུམ་པར་ཤེས་པར་བྱ། །མཁའ་ལ་འགྲོ་བ་ལྟར་བྱེད་ཅིང་། །རྒྱུག་པ་ལ་ནི་མངོན་དགའ་ལ། །བར་འཚམས་མེད་པ་ལྟར་རྒྱུག་པ། །ཡོན་ཏན་ཆེན་པོ་
བཞི་པ་ཡིན། །དང་པོ་དབུས་དང་ཐ་མ་རུ། །ཆ་མཉམ་པར་ནི་མངོན་རྒྱུག་ཅིང་། །དམན་དང་བར་མའང་མ་ཡིན་པར། །རྟ་ཡི་ཡོན་ཏན་ལྔ་པ་ཡིན། །རབ་ཏུ་ཐུང་མིན་རིང་མ་ཡིན། །ཡེངས་པ་དག་ནི་མེད་པར་ནི། །རྟ་ནི་གང་ཞིག་རྒྱུག་བྱེད་ཅིང་། །རྟག་ཏུ་ལེགས་གནས་དྲུག་
པ་ཡིན། །གང་ཞིག་དང་པོར་ཞོན་པ་ན། །དྲང་པོར་གཞུ་འདོམ་བརྒྱར་འགྲོ་ཞིང་། །ཤུགས་ཀྱིས་མྱུར་དུ་རྒྱུག་བྱེད་པ། །ཡོན་ཏན་དེ་ནི་བདུན་པར་བཤད། །རྐང་པ་འདོར་བ་མཁའ་ལ་ནི། །འགྲོ་བར་མང་དུ་སྣང་བྱེད་ཅིང་། །ས་ཡི་ཆ་ནི་ཅུང་ཟད་སྣང་། །ཡོན་ཏན་དེ་ནི་བརྒྱད་པར་འདོད། །
རྟ་ནི་གང་ཞིག་ཡན་ལག་ལ། །རེག་པ་ཙམ་གྱིས་རྒྱུག་བྱེད་ཅིང་། །བསྐུལ་བ་ཙམ་གྱིས་སེམས་ཤེས་པ། །ཡོན་ཏན་དམ་པ་དགུ་པ་ཡིན། །གང་གི་དང་ནི་ཚད་ལྡན་པར། །མཛེས་པར་བྱུགས་ནའང་སྣང་གྱུར་འདྲ། །སྲབ་ནི་ལེགས་པར་འཚོ་གྱུར་པ། །དེ་ནི་བཞིན་བཟངས་
ཡིན་ཞེས་བྱ། །མ་འཆོལ་བར་ནི་འགྲོ་བྱེད་ཅིང་། །མཁའ་ལ་འགྲོ་བ་ལྟར་སྣང་བ། །མཚན་ཉིད་གང་ཡིན་མ་ཞེན་པ། །དེ་ནི་ཡོན་ཏན་བཅུ་གཅིག་པ། །བྱ་བ་ལ་བསྐུལ་ཚེ་ན་ནི། །མྱུར་དུ་ལྡང་ཞིང་འཇུག་བྱེད་ལ། །ཚིག་གིས་མྱུར་དུ་གོ་བྱེད་པ། །ཡོན་ཏན་མཆོག་སྟེ་བཅུ་

203-1-213a

གཉིས་པ། །ང་རྒྱལ་མེད་པར་ལྡང་བྱེད་ཅིང་། །འབད་པ་མེད་པར་ལྡོག་པ་དང་། །ཡོན་ཏན་གང་གི་ཡོན་ཏན་དང་། །ལྡན་ཞེས་བཅུ་གསུམ་པ་ཡིན་ནོ། །འཕང་མཁན་བྱ་བ་དག་གིས་ནི། །མདའ་ཡིས་བསྣུན་པར་གྱུར་ན་ཡང་། །ཞུམ་པ་མེད་པར་འགྲོ་བྱེད་པ། །ཡོན་
ཏན་བཅུ་བཞི་པ་ཡིན་ནོ། ཡོན་ཏན་གང་གི་ཤུགས་ཀྱིས་ནི། །བྱ་དང་འདྲ་བར་འགྲོ་བྱེད་ཅིང་། །ཤུགས་ཀྱི་རྒྱུན་གྱིས་རྒྱུག་བྱེད་པ། །ཡོན་ཏན་འདི་ནི་བཅོ་ལྔ་པའོ། །དེ་ལྟར་ཡོན་ཏན་ཡང་དག་བཤད། །མཚན་ཉིད་ཅུང་ཟད་ལྡན་པའང་རུང་། །ཡོན་ཏན་འདི་དག་ཡང་དག་
ལྡན། །རྟ་མཆོག་གང་ཞིག་ཐོག་མཐར་ནི། །ཡོན་ཏན་རྟག་ཏུ་མི་འགྱུར་ཞིང་། །ལེགས་པར་རྒྱུག་པ་བྱེད་པ་ཡི། །རྟ་དེ་རབ་ཏུ་བསྔགས་པ་ཡིན། །ཁྱེད་ལ་རྒྱུག་པ་དེ་ལྟར་བཤད། །གཞན་དག་དྲིས་པ་ཅི་ཞིག་བྱ། །ཤ་ལི་ཧོ་ཏྲོའི་མདོའི་གནས་ལས་རྒྱུག་པ་བརྟག་པའི་ལེའུ་སྟེ་
སུམ་ཅུ་སོ་གསུམ་པའོ།།      །།ལེགས་ལྡན་གྲ་མ་ཅན་ཞེས་པ། །འདི་ནི་གང་ཞིག་རྒྱུ་གང་ལགས། །མཚན་ཉིད་གང་གིས་དེ་ཤེས་བྱ། །དེ་ཡི་གསོ་བ་ཇི་ལྟ་བུ། །དེ་ལྟར་བུ་ཡིས་དྲིས་པ་ན། །ཤ་ལི་ཧོ་ཏྲ་དྲང་སྲོང་ཆེས། །དོན་གྱི་རྗེས་སུ་འགྲོ་བའི་ཚིག །གྲ་མ་ཅན་མཚན་
ཉིད་འདི་སྨྲས། །གྲ་མ་རྩེར་བྱར་འོས་པ་སྟེ། །དེ་ན་ངོ་ཚ་འཇིག་སོགས་ཡིན། །དེ་རྣམས་གང་ཞིག་བྱེད་པ་ནི། །གྲ་མ་ཅན་ཞེས་དེ་བཤད་དོ། །དེ་བས་འཇིགས་མེད་ཚུལ་ངན་དང་། །བརྩེ་མེད་རྩུབ་ཅིང་མི་སྲུན་པ། །འབྲས་བུའི་གྲ་མ་དང་འདྲ་བའི། །ཉེས་པ་འཛིན་པས་དེ་སྐད་
བཤད། །དེ་བས་ཉེས་པ་འདི་ལྡན་པའི། །རྟ་ཡང་གྲ་མ་ཅན་ཞེས་བྱ། །རྟ་གང་གཏུམ་ཞིང་མི་སྲུན་པ། །ཁྲོ་བར་གྱུར་པ་གང་ཞིག་ཡིན། །དེ་ཀུན་གྲ་མ་ཅན་ཡིན་ཏེ། །དེ་ནི་རང་དབང་འགྱུར་མ་ཡིན། །ཆས་ན་འཁྲུག་ཅིང་རྫས་མཐོང་སྐྲག །འགྱུར་ཞིང་མི་སྲུན་བྱེད་པ་དང་། །ཞོན་
དུ་མི་བཏུབ་པ་དང་ནི། །ཞོན་ནས་འཕག་པར་བྱེད་པ་དང་། །འཁྲུག་ཅིང་རིང་ནས་སོས་འདེབས་ལ། །ཟ་ཞིང་ལྟུང་བར་བྱེད་པ་དང་། །ལྕག་གིས་གཞུས་ཀྱང་འདུག་བྱེད་ཅིང་། །འཕྲ་བ་ཡང་དང་ཡང་དུ་བརྡེག །འདུལ་སྦྱོང་མཁན་ཡང་སྐྱུར་བྱེད་ཡིན། །འགྲེ་བ་ལྟ་བུར་བྱེད་པ་དང་། །

203-1-213b

ཁལ་ནི་ལེགས་པར་བཀལ་གྱུར་ཀྱང་། །ས་གཞིར་སྐྱུར་བར་བྱེད་པ་དང་། །འདུལ་སྦྱོང་མཁན་ལ་གནོད་བྱའི་ཕྱིར། །མགལ་མེ་བསྐོར་བ་ལྟ་བུར་འཁོར། །རྒྱབ་ནི་གླང་པོ་ལྟར་བསྒྱུར་ཞིང་། །ཡང་དང་ཡང་དུ་སྤྲུགས་པ་དང་། །སོ་དང་ལག་ཡབ་དག་གིས་འདེབས། །ཤིང་ཡང་
ལྟུང་བར་བྱེད་པ་དང་། །གཡང་དུ་ཡང་ཡང་སྐྱུར་བྱེད་དེ། །བགྲོད་བྱ་ལས་ནི་གཞན་དུ་རྒྱུག །དོགས་པ་མེད་པར་ལྡོག་པ་དང་། །ལན་འགས་གཞན་དུའང་འགྲོ་བར་བྱེད། །ར་དང་རི་དྭགས་ལྟར་མཆོང་ཞིང་། །བར་བར་དུ་ནི་འདུལ་བྱེད་སྐྱུར། །ཆུ་ངོགས་ཤིང་དང་ཁྲོན་པ་དང་། །
གྲོགས་སྲོལ་དུ་ཡང་རྒྱུག་ཅིང་འབྱེར། །རྟ་ཁྱུའི་ནང་ན་མི་འདུག་ཅིང་། །དཔུང་གཞན་གྱི་ནི་ནང་དུའང་འགྲོ། །རབ་ཏུ་འབད་པས་ཁ་བསྒྱུར་ཡང་། །ཟློག་པར་ནུས་པ་མ་ཡིན་ལ། །རྟ་བྲེས་ལས་ནི་མི་འབྱུང་ཞིང་། །བྱུང་དང་འཇུག་ཏུ་མི་འདོད་ལ། །སྲོག་འཕྲོག་ལས་ནི་གང་དང་
གང་། །ཡིད་དུ་མི་འོང་ལས་གང་ཡིན། །དེ་དག་ལྷག་པར་བྱེད་འགྱུར་ཞིང་། །བརྡུངས་ཀྱང་ཕན་པ་མེད་པ་ནི། །དེ་ནི་གྲ་མ་ཅན་ཞེས་བྱ། །དེ་ཡི་མཚན་ཉིད་འདི་ཉོན་ཅིག །ཁུར་ཚད་ཁུར་ནི་ཡོ་བ་དང་། །ཁ་དང་ཕོ་མཚན་ཡོ་བ་དང་། །རྟ་གང་འཕྲལ་བ་མགོས་འདྲ་དང་། །རླིག་
པ་ཤིན་ཏུ་འཕྱང་བ་དང་། །རི་མོ་ཆེན་པོ་ཡོད་པ་དང་། །ཡ་མཆུ་ནག་ཅིང་རྐན་ཡང་ནག །གང་ཞིག་མཆུ་ལྟག་ཞོམ་པ་དང་། །སེར་སྐྱ་དམར་སེར་མདོག་ཅན་དང་། །གང་གི་མཆེ་བ་མི་མཉམ་ཞིང་། །གདོང་ལ་གཉེར་མ་ཡོད་པ་དང་། །མིག་ནག་སེར་བ་ཉིད་དང་ནི། །མིག་སྦོམ་
ཁྲ་ཡི་མིག་འདྲ་དང་། །བྱ་རྒོད་མིག་འདྲ་མཁུར་ཚོས་ཆུང་། །གང་གི་ཡ་མཆུ་ཐུང་བ་དང་། །མགོ་བོ་རྣ་བ་རབ་ཏུ་ཆེ། །འགྲམ་པ་ཡང་ནི་ཞུམ་པ་དང་། །སྦལ་པ་བྱི་ལའི་མིག་འདྲ་ཞིང་། །རི་བོང་མདོག་འདྲ་མདངས་རྩུབ་དང་། །རླིག་པ་གཅིག་ནི་དཀར་བ་འམ། །ཡང་ན་རླིག་པ་
གསུམ་དཀར་ལ། །བཤང་བའི་མདོག་འདྲ་དུ་བའི་མདོག །ཕྲག་སོ་ལ་ནི་གཉེར་མ་ཆགས། །འདི་དག་དང་ནི་གཞན་མང་ངོ་། །མཚན་ལྡན་གྲ་མ་ཅན་དུ་འདོད། །དེ་བས་འདི་དང་རིགས་ཅན་རྟ། །གནས་དང་སློབ་སྦྱོང་བྱ་བ་དང་། །དེ་བཞིན་རྒྱུག་པའི་བྱ་བ་རྣམས། །རྟེའུ་

203-1-214a

ནས་བརྩམ་པ་སོ་སོར་བྱ། །བྱ་བའི་ཁྱད་པར་གཞན་ཡང་ནི། །རིམ་པ་བཞིན་དུ་བཤད་པར་བྱ། །རླུང་མེད་གནས་ན་རབ་དབེན་པ། །སྤྱོད་ཡུལ་བདེ་བར་གཞག་པར་བྱ། །དེ་རྗེས་རེག་ན་བཟོད་གྱུར་ལ། །དེ་ནས་བྱ་བ་གཞན་དག་བྱ། །བདག་པོ་ཟས་དང་སྐོམ་བཅས་
དང་། །སྨན་རྣམས་ཆོ་ག་ཅི་བཞིན་བྱ། །གནྡྷ་བྷ་དྲ་པུ་ཤེལ་ཙེ། །ཀར་བཱི་རའི་མེ་ཏོག་ནི། །འོ་མར་བཅས་དང་ཀ་ལང་ཐ། །བསྐོལ་བ་དེར་ནི་ཏིལ་ཐལ་བ། །ཀོ་ཀེ་ལཀྵ་སྭརྫི་ཀའི། །ཐལ་བ་དང་ནི་བཅས་པར་གཞུག །བསྐོལ་བ་དར་བ་དང་བཅས་པར། །ཉི་མ་བདུན་གྱི་བར་དུ་
གཞག །འདི་ནི་འདི་ལ་ཞག་བདུན་པར། །ཆོ་ག་བཞིན་དུ་བཏུང་བ་སྦྱིན། །དེ་ལྟར་བཏུང་བས་དབང་གྱུར་ན། །རྟ་ནི་རེག་པ་ལ་སོགས་བཟོད། །བདག་གཅིན་དང་ནི་རྒོད་མའི་གཅིན། །ཡུངས་ཀར་དེ་བཞིན་རྣ་སྤབས་དང་། །པི་པི་ལིང་རྩ་ནག་ཚུར་བཅས། །ཧ་རེ་ནུ་ཀ་ཚ་བ་གསུམ། །
ཙནྡན་དང་ནི་ལྡན་པ་རུ། །བཏགས་ཏེ་དབེན་པར་སྤང་བར་བྱ། །འདི་ཡིས་ཟླ་ཚིགས་དག་ཏུ་ནི། །རྟ་ལ་མིག་སྨན་བསྐུ་བར་བྱ། །དེ་ནི་རང་བཞིན་གྱིས་གསོ་དཀའ། །གྲ་མ་ཅན་ནི་ཞི་བར་བྱ། །དོམ་དང་གཟིག་སྡེར་ཁྱིའི་རུས་པ། །བ་ལང་འགྲམ་པ་ཡུངས་ཀར་དང་། །རྨ་བྱའི་མཁྲིས་པ་
ལྡན་པར་ནི། །གདུག་པ་གྲ་མ་ཅན་སེལ་ཡིན། །རྟ་བྲེས་སུ་ནི་རྟག་པ་རུ། །གདུག་པ་འདི་ནི་གདུལ་བར་བྱ། །ཚེས་བརྒྱད་དང་ནི་བཅུ་བཞི་ལ། །ཁྱད་པར་དུ་ནི་བདུག་པས་བདུག །དེས་ན་རེག་དང་སྒྲ་དང་ནི། །གཟུགས་ནི་བདེ་བར་བརྟེན་བཟོད་འགྱུར། །གང་དང་གང་ནི་བྱེད་
དུ་བཅུག །དེ་དེ་རྗེས་སུ་མཐུན་པར་བྱེད། །རྐན་དང་ཁ་འགྲམ་དཔྲལ་བ་དང་། །མ་རྐན་སྨིན་མའི་འོག་དང་ནི། །རྟ་ཡི་མིག་ལའང་པི་པི་ལིང་། །རྩ་བ་ཚ་བ་གསུམ་གྱིས་བསྐུ། །འདི་ཡི་ལུས་ནི་ཐམས་ཅད་ཀྱང་། །བ་ཡི་ལྕི་བས་ཡང་ཡང་བསྐུ། །འདི་ཡི་ཡན་ལག་ནང་གྲོལ་
ནི། །སྦྲང་རྩི་དང་ནི་ཁ་རས་བསྐུ། །ཨེ་ལ་ཨུ་ཤྲིར་པྲ་རྩི་པོག །རུ་རྟ་ཙནྡན་ཨ་ཀ་རུ། །ནཱ་ག་གེ་སར་ཏིལ་མར་བཅས། །བདུག་པས་རྟ་ལ་རབ་ཏུ་བདུག །རྟ་ནི་ཉག་པར་གྱུར་པ་ན། །བདུག་པས་ཡང་ཡང་བདུག་ན་ནི། །སྒྲ་དང་རེག་དང་གཟུགས་དག་ནི། །ངེས་པར་བཟོད་པར་

203-1-214b

འགྱུར་བ་ཡིན། །ཇི་སྲིད་ངེས་པར་ཞི་གྱུར་པར། །ཆོ་ག་འདི་ནི་སྦྱར་བར་བྱ། །དེ་ཚེ་འཁྲུགས་པར་མི་བྱེད་ཅིང་། །རྟ་རྫི་ལ་ནི་གནོད་མི་བྱེད། །གང་ན་གནས་ལ་མི་སྡང་ཞིང་། །ཁྲོ་བ་མེད་པར་རྩྭ་རྣམས་ཟ། །རྣ་བ་འཇུམས་པར་མི་བྱེད་ཅིང་། །འདུལ་སྦྱོང་མཁན་ལ་མངོན་པར་དགའ། །
ལམ་དུ་ཞུགས་པར་ཆས་པ་ན། །འདོར་ཞིང་འཇིགས་པར་མི་འགྱུར་ལ། །ཁྲིད་ན་སེམས་ནི་དུལ་འགྱུར་ཞིང་། །ཚིག་གིས་བསྡིགས་ནའང་འཇིགས་པར་འགྱུར། །ཅི་དགའ་བར་ནི་ཁྱེར་ན་ཡང་། །ལོག་པར་བྱེད་པར་མི་འགྱུར་རོ། །དངོས་པོ་གཞན་ལ་བརྡེགས་ན་ཡང་། །དེ་ནི་འཇིགས་
པ་སྐྱེ་མི་འགྱུར། །དེ་ལྟར་གྲ་མ་མེད་པའི་རྟ། །བཟོད་པ་ཅན་དུ་བཤད་པ་ཡིན། །དམོད་པ་གདོན་གྱི་ཉེས་པ་དང་། །རྟ་ཡི་རླུང་ནད་ཉེས་པ་དང་། །ཡུལ་གྱི་ཉེས་པ་བཏང་སྙོམས་གཞག །མི་སྲུན་འགྲོགས་པ་དག་ལས་ཀྱང་། །རྟ་ནི་སེམས་ཤེས་མི་འགྱུར་ལས། །གྲ་མ་ཅན་
དུ་འགྱུར་བ་ཡིན། །དེ་བས་ཉེས་པ་འདི་རྣམས་ལ། །ཞི་བའི་ཐབས་འདི་ཡིན་པར་འདོད། །གང་ལ་ཆོ་ག་འདི་དག་ནི། །བྱས་ཀྱང་གྲ་མ་མ་ཞི་ན། །དེ་ཚེ་འབྲོག་སྟོང་དག་ཏུ་ཡང་། །དེ་ལ་ལྟོས་པར་མི་བྱའོ། །གང་ཚེ་མི་འམ་རྟ་གཞན་གྱི། །ཕྱི་ནས་སྙེག་པར་བྱེད་པར་འགྱུར། །
དེའི་ཚེ་རླིག་པ་ཆུང་བ་ཡིས། །འདི་ཡི་སེམས་འཁྲུགས་ཞི་བར་བྱེད། །གྲ་མ་ཅན་ནི་ལེགས་དུལ་ཡང་། །གཡུལ་དུ་གཞུག་པར་མི་བྱ་སྟེ། །གལ་ཏེ་འདི་ཡིས་རང་བཞིན་ཉིད། །ལས་ཀྱི་དབང་གིས་གསལ་བྱེད་སྲིད། །གང་ཞིག་གྲ་མ་ཅན་ཞི་ནས། །ལ་ལར་མི་སྲུན་བྱེད་གྱུར་ན། །
དང་པོ་དེ་ནི་བྱེད་ཚུལ་གྱིས། །ཉེ་བར་ལེགས་པར་སྦྱར་བར་བྱ། །ཤ་ལི་ཧོ་ཏྲའི་མདོའི་གནས་ལས་གྲ་མ་ཅན་བརྟག་པའི་ལེའུ་སྟེ་སུམ་ཅུ་རྩ་བཞི་པའོ།།      །།བུ་སྔོན་ང་ནི་རྟ་བྲེས་སུ། །གཉིད་ལོག་པ་ན་རྟ་དེར་བཏབ། །ང་ནི་ཁྲོ་བ་ཆེས་ཁྱབ་པས། །དེ་ལ་དམོད་པ་བཏབ་
པར་གྱུར། །བཀྲ་མི་ཤིས་དང་རྣམ་ཀུན་དུ། །སྤང་བར་བྱ་བ་ཉིད་གྱུར་ཅིང་། །བདག་པོ་ཆུང་མར་བཅས་པའི་ཡང་། །རིགས་ནི་རླག་པ་ཉིད་གྱུར་ཅིག །ང་ཡི་དམོད་པའི་དབང་གིས་ནི། །ཉེས་པ་ཆེ་དང་ལྡན་པར་ནི། །རྟ་རྣམས་འགྱུར་བ་ཉིད་ཡིན་ལ། །འདི་ཡི་མིང་ནི་ཤེས་པར་

203-1-215a

གྱིས། །ཤིས་པ་གཞན་དང་ལྡན་གྱུར་ཀྱང་། །རྟ་ཡི་ཐ་ཆད་དེ་སྤང་བྱ། །སོ་ཡིས་ཁ་ཁེངས་ཁ་དོག་ནག །དེ་བཞིན་སོ་ནི་མི་མཉམ་ལྷག །ཡོ་ཞིང་འགུལ་ལ་ཆག་པ་དང་། །སོ་གྱེས་པ་དང་མི་ཚང་དང་། །ཉ་ཕྱིས་འདྲ་དང་ཟུར་གསུམ་དང་། །
སྐྱེས་ཚེ་སོ་ཡོད་ཉིན་མོ་སྐྱེས། །ཟེའུ་ལྟ་པུས་མོ་ཟེའུ་དང་། །སྙིང་ག་ན་ནི་གཙུག་ཡོད་དང་། །ཡན་ལག་མ་ཚང་རླིག་ཆེར་སྐྱེས། །མཚན་ཆེ་ཡན་ལག་ལྷག་པ་དང་། །ཐིག་ལེ་ཆགས་ཤིང་གསུམ་པོ་འཕྱང་། །མདོམས་ནི་སྤྲེའུའི་སྤུ་འདྲ་ལ། །མི་སྡུག་གཡོ་ཞིང་
དོམ་འདྲ་ལ། །སྡིག་པ་འདྲ་བའམ་རླིག་པ་མེད། །ཁྲ་དང་ལུག་དང་ཀང་ཀ་དང་། །ཉ་དང་སྤྲེའུ་བྱི་བ་འདྲ། །དམར་སེར་ཕག་དང་བྱི་ལ་དང་། །བྱ་རྒོད་འུག་པའི་མིག་འདྲ་ཞིང་། །དེ་བཞིན་མ་ཧེ་ཁྱིའི་མིག་འདྲ། །བྱ་རོག་མིག་འདྲ་མིག་གཅིག་སེར། །པགས་པ་
བསྲེགས་པའི་དྲི་འདྲ་དང་། །འབྲལ་བ་མི་སྡུག་དེ་བཞིན་བླུན། །ཡི་དྭགས་ཀྱིས་ཟིན་ཤ་བཀྲ་ཅན། །སྤུ་སྦོམ་དེ་བཞིན་རལ་པ་ཅན། །འཕྲལ་བ་བསྐུས་འདྲ་རྔོག་མ་གནག །རྐང་བཀྲ་མི་ལེགས་མ་ནིང་དང་། །རྔ་མ་རྔོག་མ་མེད་པ་ནི། །བཀྲ་མི་ཤིས་པར་སྐྱེ་བ་དང་། །རླིག་
པའི་སྤུ་མདོག་ཞན་པ་དང་། །དེ་བཞིན་མགོ་བོའི་མདོག་མི་མཐུན། །རྒྱབ་ཏུ་ཞོན་ལ་གནོད་བྱེད་དང་། །དེ་བཞིན་རྟ་དྲེའུའི་སྤུ་འདྲ་དང་། །རྔོག་མ་ཕུམ་ཕུམ་འདྲེས་པ་དང་། །ཁ་འགྲམ་མཆེ་རླིག་ནག་པ་དང་། དེ་བཞིན་མགོ་དང་ལྕེ་ནག་དང་། །རྐན་དང་ལྟག་པ་མཆུ་
གནག་དང་། །མངལ་ན་གཉིས་སྐྱེ་མང་པོ་སྐྱེ། །ཉེས་པ་ཆེན་པོར་རབ་ཏུ་བཤད། །རྭ་ཅན་རྣམ་གསུམ་རྨིག་པ་གཉིས། །རྐང་ལྔ་བུ་ཅན་གཡང་གཞིར་ལྡན། །དྲུག་པོ་འདི་དག་མཆོག་ཏུ་ནི། །མི་ཤིས་ཉེས་ཆེན་ལྡན་པར་བཤད། །རྟ་ཡི་སོ་ནི་མི་ཚང་བ། །
བདག་པོའི་བུ་དང་བཅས་པ་དང་། །ཆུང་མ་སྤུན་ཟླར་བཅས་པ་དང་། །རྟ་ཡི་ཐ་མས་གསོད་པར་བྱེད། །སོ་ནི་ལྷག་པར་གྱུར་པའི་རྟ། །དེ་ཡི་བདག་པོ་མི་རིང་བར། །ཉོན་མོངས་ཆེ་དང་ཕྲད་བྱེད་ནས། །ཡིད་དུ་མི་འོང་ལས་ཀྱིས་གསོད། །འོག་སོ་ལྷག་ཅིང་སོ་གྱེས་

203-1-215b

པར། །གང་ཞིག་སྐྱེས་པར་གྱུར་པ་ནི། །སོ་སྐྱེས་དེ་ཡི་རིགས་ཀྱི་མཆོག །རིང་པོར་མི་ཐོགས་རླག་པར་བྱེད། །སོ་དང་བཅས་པར་ཉིན་མོ་སྐྱེས། །ཐམས་ཅད་ཟད་པར་བྱེད་པ་ཡིན། །ཆུ་ཞེང་ཚད་ཀྱི་གྲངས་ལས་ནི། །ལྷག་པར་གང་ཞིག་གནས་གྱུར་པའི། །ཡན་ལག་
ཡོད་པའི་རྟ་ཡིས་ནི། །ནོར་ནི་ལྷག་པར་ཉམས་བྱེད་ཡི་ན། །ལོ་ལྔའི་བར་དུ་རླིག་པ་མེད། །རྒོད་མ་ལ་ཡང་མི་འཇུག་པ། །དབང་འཕེལ་གང་ཡིན་རྟ་དེས་ནི། །རིགས་ནི་རླག་པར་བྱེད་པར་བཤད། །གང་གི་རླིག་པ་མདོག་མི་མཐུན། །ཐིག་ལེ་ཡིས་ནི་ཁྲ་བོར་གྱུར། །དེ་ནི་རླིག་
པ་ཐིག་ལེ་ཅན། །བདག་པོའི་རིགས་ནི་རླག་བྱེད་ཡིན། །པགས་པ་བསྲེགས་པའི་དྲི་འདྲ་བ། །མེ་ཡིས་ཚིག་པར་བྱེད་པ་ཡིན། །རྟ་མི་གནག་ལ་རྐན་ནག་པ། །མྱུར་དུ་མཚོན་གྱིས་གསོད་པར་བྱེད། །གང་གི་རྐན་ལ་གཉེར་མ་ནི། །གསུམ་མམ་བཞི་དག་ཡོད་གྱུར་པ། །དེ་ནི་
རྐན་ནག་ཉེས་པ་ཡིས། །དགོས་པ་མེད་པའི་རྟར་འགྱུར་རོ། །མདོག་ནག་དུད་པའི་མདོག་ཅན་དང་། །དངུལ་རྡོ་བཅག་པའི་མདོག་ལྟར་འཚེར། །རྟ་དེའི་རྐན་ཀུན་ནག་ན་ཡང་། །མདོག་དང་མཐུན་པས་ཉེས་པ་མེད། །ཁ་དོག་བརྒྱད་པོ་རྣམས་ཀྱི་ནི། །ཅུང་ཟད་དམར་ཞིང་གཉེར་
མ་གསལ། །དཀར་དང་དར་མདོག་སྐྱ་བ་དང་། །སེང་གེ་ངུར་པའི་མདོག་རྗེས་འདྲ། །དམར་དང་སེར་དང་སྔོ་བསངས་ཀྱི། །རྐན་གནག་པ་ནི་བསྔགས་མ་ཡིན། །རི་མོ་ཤིན་ཏུ་དམའ་བ་ཡིས། །རྨིག་པ་གཉིས་སུ་སྣང་གྱུར་ཏེ། །བ་ལང་རྨིག་པ་འདྲ་བ་ནི། །གང་གི་རྨིག་པ་
སྣང་གྱུར་པ། །བདག་པོའི་ལུས་དང་ཡིད་ཀྱི་ནི། །མི་བཟད་སྡུག་བསྔལ་གཉིས་བསྐྱེད་ནས། །རིང་པོར་མི་ཐོགས་དུས་ཀྱིས་ནི། །དེ་དང་ལྷན་ཅིག་འཆི་བར་འགྱུར། །རྔོག་མའི་མཐར་ནི་རྟེན་པའི་རྭ། །མཐེ་བོའི་ཚིགས་དང་འདྲ་བ་འམ། །རྒྱ་ཤུགས་སྐྱུ་རུ་ར་འདྲ་བའམ། །ཨ་མྲའི་
རུས་པ་འདྲ་བ་ནི། །གང་གི་རྟ་ལ་སྣང་གྱུར་རམ། །རྭ་ཡི་རྩེ་ན་རྭ་འདྲ་གནས། །ཤ་འཚེར་གཞང་འབྲུམ་འདྲ་བ་སྟེ། །རྟ་ནི་རྣམ་པ་དེ་བདུན་ཡིན། །རྭ་ཅན་དེ་ནི་སྐྱེས་གྱུར་པའི། །གྲོང་དེར་རིང་པོར་མི་ཐོགས་བརླག །རྣ་བ་གསུམ་པའི་རྟ་གང་ཡིན། །དེ་ཡང་རྭ་ཅན་དག་དང་མཚུངས། །

203-1-216a

རྟ་ཡི་ཐ་མ་འདི་གཉིས་ཀ །ཡུལ་མཐའ་གཞན་དུ་སྤང་བར་བྱ། །པུས་མོའི་ཚེའུ་སྤུ་དང་ཉེ་བར། །རྐང་པ་འདྲ་སྟེ་རྐང་ལྔ་པ། །རྭ་ཅན་ལྟ་བུ་དེའི་མོད་ལ། །སྤངས་པ་ཁོ་ནར་བསྔགས་པ་ཡིན། །ཟེའུ་འམ་རྒྱབ་ཏུ་གཙུག་ཡོད་པ། །རིགས་ནི་གཙོ་བོ་གསོད་བྱེད་
ཡིན། །མི་ཤེས་བཞོན་བྱ་མ་ཡིན་ཏེ། །དེ་བས་དེ་དག་ཐམས་ཅད་རྟ། །མདོག་ནི་གང་ཡང་རུང་བ་ལ། །ལྕེ་ནག་པར་ནི་གྱུར་པའི་རྟ། །ཁྱིམ་དེ་མི་ཤིས་བྱ་བ་སྟེ། །རྟ་དེ་ཐམས་ཅད་ཟད་བྱེད་ཡིན། །གང་གི་ཁ་འགྲམ་ནག་པ་ཡི། །རྟ་ནི་བདག་པོ་གསོད་བྱེད་ཡིན། །རྟ་ཡི་ཐ་
ཆད་ཤ་བཀྲ་ཅན། །བདག་པོ་ནོར་དང་འབྲལ་བྱེད་ཡིན། །སྟག་འདྲ་ཁ་དོག་གཞན་པ་ཡི། །མདོག་ནི་སྣ་ཚོགས་གྱུར་པ་དག །དེ་ནི་མི་ཤིས་སྡུག་བསྔལ་ནི། །ཐམས་ཅད་སྐྱེ་བས་སྤང་བར་བྱ། །སྟག་དང་འདྲ་ཞིང་རྗེས་མཐུན་ལ། །སྤྲེའུའི་མིག་དང་འདྲ་བ་ཡི། །དེ་འདྲ་བ་ཡི་བདག་
པོ་ནི། །སེམས་ནི་སྨྱོ་བར་བྱེད་པ་དང་། །ཁྱིམ་ནས་བྱུང་བའམ་སྦྱུག་པའམ། །ལོག་པའི་ཆད་པ་ཐོབ་པར་འགྱུར། །གང་ཞིག་མདོག་ཀུན་དཀར་བ་ལ། །རྔོག་མ་ནག་པོ་ཡོད་པ་ནི། །རྟ་དེ་རྔོག་ནག་ཅེས་བྱ་སྟེ། །གཡུལ་དུ་བདག་པོ་གསོད་བྱེད་ཡིན། །བོང་བུ་ལྟར་ནི་ཁྲ་བོའི་རྟ། །
འཁོར་ལིང་དམའ་བར་གྱུར་པ་དང་། །ཤིས་མིན་ཚེ་འཕེལ་བྱེད་མིན་ལ། །ལས་རྣམས་ཀུན་ལ་སྨད་པ་ཡིན། །མཆུ་ནག་པ་ཡི་བུ་དང་ནི། །རྟ་རྣམས་དུག་གིས་གསོད་པར་བྱེད། །རླིག་ནག་གསོད་དང་འཆི་བྱེད་ལ། །ཕོ་མཚན་ནག་པར་གྱུར་པ་ཡིས། །ཆུང་མ་མནའ་མ་སྒྱུག་མོ་
དང་། །དེ་བཞིན་དུ་ནི་བྲན་མོ་རྣམས། །འདི་དག་ཐམས་ཅད་རླག་པར་ནི། །རྟ་དེ་ལ་ནི་ཞོན་པས་འགྱུར། །རྟ་གང་རྨིག་པར་བཅས་པར་སྐྱེ། །མཚེ་མར་བྱུང་བར་གྱུར་པ་དག །གང་དག་ཏུ་ནི་བྱུང་གྱུར་པ། །རིགས་དེ་ཡོངས་སུ་བརྡུག་པ་ཡིན། །སེམས་མེད་བཅིང་དང་གསོད་
པ་དང་། །བླུན་པས་ངར་སེམས་མེད་པར་འགྱུར། །འཇིགས་པ་ཆེན་པོ་ཉེ་བར་ནི། །བྱེད་པས་རིང་དུ་སྤང་བར་བྱ། །གང་ཞིག་གཤིན་པོ་ལ་བསྔོས་དང་། །རྟ་གང་གཤིན་པོས་ཁྱེར་བ་ཡི། །རྟ་དེ་ཡི་དྭགས་ཀྱིས་ཁྱེར་ཡིན། །རྟག་ཏུ་ཉེས་པ་ཐམས་ཅད་སྐྱེ། །དབང་པོ་

203-1-216b

འཕེལ་བ་དང་འདྲ་ཞིང་། །ཟ་མའི་གཟུགས་ཅན་མ་ནིང་ཡིན། །རྒྱབ་ཏུ་ཞོན་པ་གནོད་བྱེད་པ། །ཡི་དྭགས་ཀྱིས་ཁྱེར་བཞིན་དུ་ཡང་། །གཉིས་སམ་མང་པོ་མཚེ་མར་སྐྱེས། །བུ་དང་བཅས་པ་ཡོངས་སུ་སྤང་། །སོ་ཡི་ལེའུར་སོའི་ཉེས་པ། །མིག་ལེའུར་མིག་གི་ཉེས་པ་དང་། །
གཙུག་གི་འབྲས་བུ་དག་ལས་ནི། །གཙུག་ངན་འབྲས་བུ་བཅས་ཞེས་བྱ། །དཔྲལ་བར་ཆགས་པ་ཞུར་དང་འདྲ། །འདྲེས་པའི་ལེའུ་གང་བཤད་པ། །ནུ་མ་ཅན་དང་རླིག་པ་ནག །མགོ་ནག་ལ་སོགས་པར་བཤད་པ། །འདི་ཡི་འབྲས་བུའི་མཚན་ཉིད་ནི། །འདི་རུ་རྒྱས་
པས་མ་བཤད་དོ། །དེར་ནི་སྤང་བྱ་གང་ཡིན་པ། །འདིར་ཡང་འབྲས་བུ་དེ་དང་འདྲ། །དེ་ཉིད་ཚེ་ཡི་གནས་སྐབས་ལ། །བབ་ལ་ཉེས་པའི་འབྲས་བྱིན་བཤད། །ཉེས་ཆེན་ཤིན་ཏུ་ཉེས་ཆེ་བ། །རྟག་ཏུ་འབྲས་བུ་འབྱིན་བྱེད་ཡིན། །ཤིན་ཏུ་བཟང་བའི་མཚན་ཉིད་ཀུན། །
ལྡན་ན་ཉེས་པ་ཆེན་པོའང་བཅང་། །ཤིན་ཏུ་ཉེས་ཆེན་ལྡན་པ་ནི། །ནམ་ཡང་བཅང་བར་མི་བྱའོ། །གལ་ཏེ་ཡོན་ཏན་གཞན་ལྡན་ཡང་། །ཤིན་ཏུ་ཉེས་ཆེར་ལྡན་པའི་རྟ། །ཁྱིམ་དུ་སྐད་ཅིག་ཙམ་གྱིས་ནི། །མཁས་པས་གཞག་པར་མི་བྱའོ། །རེག་པ་ཡིས་ཀྱང་རྟ་དེ་ནི། །
ཕུང་ཁྲོལ་དང་ནི་ཕྲད་པར་འགྱུར། །ཤ་ལི་ཧོ་ཏྲའི་མདོའི་གནས་ལས་ཉེས་པ་ཆེན་པོ་བརྟག་པའི་ལེའུ་སྟེ་སུམ་ཅུ་རྩ་ལྔ་པའོ།།      །།ཤ་ལི་ཧོ་ཏྲ་བདག་ཉིད་ཆེ། །ལེགས་ཐོས་ཀྱིས་ནི་རྟ་རྣམས་ཀྱི། །སྙིང་སྟོབས་ཤེས་པར་བྱ་བ་དྲིས། །དྲང་སྲོང་གིས་དེ་དེ་ལ་སྨྲས། །
དཔའ་ཞིང་གཙང་སྦྲ་ཆེ་བ་དང་། །བདག་པོ་ལ་གུས་བཞིན་དགེ་ལ། །སྟོབས་དང་སྙིང་སྟོབས་མགྱོགས་དང་ལྡན། །དེ་མཆོད་གཏོར་མ་ལ་དགའ་ཞིང་། །རང་གི་སྤྱོད་པའི་མཚན་ཉིད་ལྡན། །དེ་བཞིན་ཞི་བའི་རང་བཞིན་ཅན། །འདུལ་བྱེད་དབང་བསྒྱུར་ལྡོབ་སྐྱེན་པའི། །རྟ་
ནི་ལྷ་ཡི་སྙིང་སྟོབས་ཅན། །གཙང་སྦྲ་ལ་དགའ་དུལ་བ་དང་། །སྐད་སྙན་ལམ་ནི་རྣལ་མར་འགྲོ། །རིག་བྱེད་སྒྲ་ལ་རབ་ཏུ་དགའ། །རྒོད་མ་ལ་ནི་རྒྱབ་ཀྱིས་ཕྱོགས། །ཁྲུས་ལ་དགའ་ཞིང་དེ་བཞིན་ཞི། །དྲང་སྲོང་སྙིང་སྟོབས་ཅན་དུ་བཤད། །དཔའ་ཞིང་སྟོབས་ཆེ་ཚམ་ཚོམ་

203-1-217a

མེད། །དེ་བཞིན་འཐབ་མོ་ལ་དགའ་ཞིང་། །ཤ་དང་ཆང་ལ་དགའ་བ་ནི། །ལྷ་མིན་སྙིང་སྟོབས་ཅན་དེ་ཡིན། །དྲི་དང་ཕྲེང་བ་ལ་དགའ་ཞིང་། །གླུ་རྣམས་ལ་ནི་ཤིན་ཏུ་མོས། །གཡུལ་འགྱེད་ལ་སྤྲོ་དེ་བཞིན་ཞི། །དྲི་ཟའི་སྙིང་སྟོབས་ལ་བརྟེན་ཡིན། །
གཉིད་ལ་དགའ་ཞིང་ཁྲོ་ལ་བརྟག །རྟག་ཏུ་གཅིག་པུར་གནས་པ་དགའ། །སྟོབས་ཆེ་སྤྲོ་བ་ཆེ་བ་ཡི། །རྟ་ནི་རླུང་གི་སྙིང་སྟོབས་ཅན། །ཆུ་ཡི་གནས་ལ་དགའ་བ་དང་། །རྟག་ཏུ་ཆུ་དང་ཕྲད་པར་འདོད། །ཕལ་ཆེར་ཏིལ་ལ་དགའ་གྱུར་པ། །ཡི་དྭགས་མཚུན་ལྷའི་སྙིང་སྟོབས་
ཅན། །རི་ལ་འཛེག་ན་མི་སྐྱོ་ཞིང་། །སྟོབས་ལྡན་འཚེར་ཞིང་འགྲོ་བ་དང་། །ཏིལ་ལམ་ཁ་ཟས་མངར་ལ་དགའ། །གནོད་སྦྱིན་སྙིང་སྟོབས་ཅན་དུ་བཤད། །མི་བརྟན་ཁྲོ་ཞིང་གདུག་པ་དང་། ཆང་དང་སྦྱར་ཆང་ཤ་ལ་དགའ། །གདོང་ནི་མི་སྡུག་པར་སྣང་བ། །སྲིན་པོའི་
སྙིང་སྟོབས་ལ་བརྟེན་ཡིན། །མི་བརྟན་རྩུབ་ཅིང་དྲི་མ་ཅན། །རྟག་ཏུ་མི་གཙང་ལ་སྤྱོད་ཅིང་། །ཞུམ་ཞིང་ཁང་སྟོང་དག་ལ་དགའ། །ཤ་ཟའི་སྙིང་སྟོབས་ལ་བརྟེན་ཡིན། །བླུན་ཞིང་ལམ་ལོག་འགྲོ་ལ་དགའ། །རྒོད་མ་ཡི་ནི་ཕྱི་བཞིན་རྒྱུག །རྟག་ཏུ་རྩྭ་ཟ་ལ་དགའ་བ། །
དུད་འགྲོའི་སྙིང་སྟོབས་དག་དང་མཚུངས། །རླུང་དང་གྲང་ལྷགས་ཚད་པ་བཟོད། །བདག་པོ་ལ་དགའ་སྐད་སྙན་ཅིང་། །སེམས་ཁོང་ཆུད་ཅིང་ལེ་ལོ་ཅན། །མི་རྒྱུའི་སྙིང་སྟོབས་ལ་བརྟེན་ཡིན། །རྐེ་མགྲིན་བཏུད་ཅིང་འཇིགས་པ་ཅན། །རྟག་ཏུ་གནས་འདི་སྟོང་པར་
དགའ། །མི་གཙང་ལ་དགའི་ངང་ཚུལ་ཅན། །སྲིན་བུའི་སྙིང་སྟོབས་ལ་བརྟེན་ཡིན། །ཤུགས་ཆེན་རྒྱུན་དུ་ལྟོས་པ་དང་། །ཡོངས་སུ་འཁོར་བའི་ངང་ཚུལ་ཅན། །རྒོད་མ་ལ་ནི་རབ་དགའ་བའི། །རྟ་ནི་འདབ་ཆགས་སྙིང་སྟོབས་ཅན། །དཔའ་ཞིང་འཇིགས་པ་
ཉིད་དུ་ནི། །དུས་དང་དུས་སུ་གནས་འགྱུར་ཞིང་། །རྒོད་མ་ལ་ནི་རབ་དགའ་བ། །འཆི་བ་ཡིས་ནི་ཤིན་ཏུ་འཇིགས། །བརྡེགས་པ་ན་ནི་རབ་ཏུ་འཁྲུག །རྩེ་དང་ཁྱིམ་དུ་གནས་ལ་དགའ། །བྱས་པ་ཚོར་ནི་སྟོབས་དང་ལྡན། །མི་ཡི་སྙིང་སྟོབས་ཅན་དེ་ཡིན། །ལྷ་དང་དྲང་

203-1-217b

སྲོང་གནོད་སྦྱིན་ཀླུ། །དྲི་ཟ་དང་ནི་སྙིང་སྟོབས་དག །མཉམ་པར་གྱུར་པའི་རྟ་གང་ཡིན། །ལས་རྣམས་ཀུན་ལ་རབ་ཏུ་བསྔགས། །མི་དང་ཡི་དྭགས་ལྷ་མ་ཡིན། །བྱ་དང་མཚུངས་པ་བར་མ་ཡིན། །དེ་ལས་གཞན་པའི་སྙིང་སྟོབས་ཅན། །རྟ་ནི་ཐ་མ་ཡིན་པར་བཤད། །ཀུན་དུ་
སྙིང་སྟོབས་གཙོ་བོ་སྟེ། །སྙིང་སྟོབས་ལ་ནི་ཐམས་ཅད་གནས། །ཤ་ལི་ཧོ་ཏྲའི་མདོའི་གནས་ལས་སྙིང་སྟོབས་བརྟག་པའི་ལེའུ་སྟེ་སུམ་ཅུ་རྩ་དྲུག་པའོ།།      །།བུ་དག་གཟི་མདངས་རྣམ་པ་ལྔར། །རྟ་ལ་དུས་སུ་འབྱུང་བར་འགྱུར། །གང་ཕྱིར་འདི་དག་འབྱུང་བ་ཡི། །བདག་
ཉིད་ཡིན་པས་རྣམ་ལྔར་འདོད། །མདོག་དང་སྤུ་ཁ་རྫས་དང་ནི། །དེ་བཞིན་དུ་ནི་དབྱིབས་དག་ལས། །མིག་གིས་གཟུང་བྱ་གཞན་གང་ཡིན། །གཟི་མདངས་ཀྱི་ནི་སྒྲར་བཤད་དོ། །རེ་ཞིག་རྫས་ནི་ཡོན་ཏན་བཞི། །ཁ་དོག་གཟུགས་ནི་དཀར་ལ་སོགས། །རྟ་ནི་ཁ་དོག་ཐ་དད་ཀྱང་། །
སྤུ་ཁ་རིང་པོ་ལས་ཀྱང་སྣང་། །གཟི་མདངས་ཕྲ་ཞིང་དང་བས་ན། །ཉེ་བ་ཉིད་ན་མངོན་པ་ཡིན། །མདངས་ནི་མེད་པ་ཙམ་དེ་ལའང་། །མེད་པར་ཡང་ནི་དམིགས་མ་ཡིན། །རླུང་དང་དེ་བཞིན་ནམ་མཁའ་དང་། །མེ་དང་དེ་བཞིན་ས་དང་ནི། །ཆུ་ཉིད་ཀྱི་ནི་མཚན་ཉིད་དག །གང་ཡིན་
དེ་ནི་མཉན་པར་གྱིས། །རླུང་གི་གཟི་མདངས་སྨད་པ་ཡིན། །ནམ་མཁའ་ཡི་ནི་འབྲིང་དུ་བཤད། །མེ་དང་ས་དང་ཆུ་ཡི་ནི། །མཚན་ཉིད་གསུམ་པོ་རྟག་ཏུ་ཤིས། །མི་བརྟན་རྩུབ་ཅིང་མདོག་ལ་གནོད། །དེ་བཞིན་ཅུང་ཟད་དཀར་བ་སྣང་། །རྟ་ཡི་སྤུ་ཁ་ལ་གནོད་པ། །རླུང་
གི་གཟི་མདངས་དེ་སྨད་བྱ། །ཤིན་ཏུ་དང་བ་ནམ་མཁའ་ནི། །སྤྲིན་དང་བྲལ་བ་དང་འདྲ་བ། །མདངས་ཅན་ཞི་བར་གྱུར་པ་དག །དེ་ནི་ནམ་མཁའ་ཅན་ཞེས་བཤད། །རྟ་རྣམས་ཕལ་ཆེར་རྟག་ཏུ་ནི། །ནམ་མཁའི་གཟི་མདངས་ཅན་དུ་སྣང་། །དེ་ནི་མི་སྨད་བསྟོད་བྱ་དག །
མིན་པར་གྱུར་པ་ཉིད་ཡིན་ནོ། །གཟི་མདངས་ལྡན་ཞིང་འོད་ཅན་འདྲ། །དེ་བཞིན་མེ་ནི་འབར་བ་འདྲ། །མེ་ཡི་གཟི་མདངས་བསྔགས་པ་སྟེ། །བསོད་ནམས་ཀྱིས་ནི་རྟ་ལ་འབྱུང་། །སྣུམ་ཞིང་ཆུ་ཡི་མདོག་ལྡན་པ། །དགེ་སྐྱེད་དེ་ནི་ཆུ་ཡི་ཡིན། །གཟི་བརྗིད་ལྡན་ཞིང་ཤིན་ཏུ་

203-1-218a

བརྟན། །ས་ཡི་གཟི་མདངས་གཉིས་ཡིན་ལ། །རྟ་ལ་རྟག་ཏུ་ས་ཡི་ནི། །གཟི་མདངས་བསྔགས་པར་གྱུར་པ་ཡིན། །སྨད་པའམ་བསྔགས་པར་བྱ་བ་ཡི། །གཟི་མདངས་ཡུན་རིང་གནས་གྱུར་པ། །བདག་པོས་བདེ་དང་སྡུག་བསྔལ་གྱི། །འབྲས་བུ་ཡུན་རིང་མྱོང་
བར་འགྱུར། །གཙུག་དང་ཁ་དོག་འབྲས་བུ་ནི། །ཤིས་པ་དང་ནི་མི་ཤིས་གང་། །ཞར་ལ་བྱུང་བར་གྱུར་པ་གང་། །གཟི་མདངས་སུ་ནི་རྗེས་སུ་འགྱུར། །དཔེར་ན་ཉི་མའི་འོད་ཟེར་ནི། །སྤྲིན་གྱིས་ཁེབས་པར་བྱེད་པ་ཡིན། །དེ་བཞིན་རྟ་ལ་གཟི་མདངས་ཀྱི། །མཚན་ཉིད་ཀྱིས་ནི་ཁེབས་
པར་འགྱུར། །གཉིད་ལོག་ལས་ལངས་ཁྲུས་བྱས་དང་། །རྣམ་ཀུན་སྐོམ་འཐུངས་ཟས་ཟོས་པའི། །རྟ་ལ་རྟ་མཁན་དག་གིས་ནི། །གཟི་མདངས་ཉེ་བར་བརྟག་པར་བྱ། །ཤ་ལི་ཧོ་ཏྲའི་མདོའི་གནས་ལས་གཟི་མདངས་བརྟག་པའི་ལེའུ་སྟེ་སུམ་ཅུ་རྩ་བདུན་པའོ།།      །།
ཤ་ལི་ཧོ་ཏྲ་དྲང་སྲོང་ཆེ། །རིག་བྱེད་ཡན་ལག་མཐར་ཕྱིན་པ། །རྟ་བྲེས་གནས་ན་འདུག་པ་ན། །མཛའ་ལས་རྒྱལ་སོགས་བུ་རྣམས་དང་། །བླ་མ་ལ་གུས་སློབ་མ་རྣམས། །རྟ་སྤྱོད་ཤེས་ལ་ཡང་དྲིས་པ། །ལེགས་ལྡན་རྒྱ་མཚོའི་མཐར་ཐུག་པའི། །ས་གཞི་དྲི་ཡི་
ཕྲེང་བས་བསྐོར། །གྲོང་རྡལ་འབྱུང་གནས་ཡུལ་དག་དང་། །ནགས་ཚལ་རྣམས་ཀྱིས་ཉེར་མཛེས་པར། །རང་དགར་རྒྱུ་བའི་རྟ་རྣམས་ནི། །ཁྱེད་ཀྱིས་བགོ་བཤའ་མཛད་ལགས་ན། །དེ་རྣམས་ཀྱི་ནི་འབྱུང་ལུགས་དང་། །རིགས་དང་ཉེ་བའི་རིགས་རྣམས་དང་། །
ཡུལ་གྱི་རྟགས་ནི་འབྱུང་བ་དང་། །ཁ་དོག་སྤྱོད་པ་གཟི་མདངས་ཤུགས། །སོ་སོའི་རིགས་ཤེས་རྣམ་བརྟག་པ། །བདག་ཅག་ལ་ནི་བཤད་དུ་གསོལ། །དོག་པའི་གནས་ཀྱི་ཤེས་བྱ་དང་། །རྟ་རྣམས་སྐྱེ་བ་ཉིད་དང་ནི། །ཡུལ་མཐར་ཡོན་ཏན་ཆེར་ལྡན་དང་། །ཡུལ་
དབུས་ཡོན་ཏན་ཆུང་བར་ནི། །འགྱུར་བས་དེ་ཕྱིར་དེ་ཐམས་ཅད། །ལེགས་ལྡན་གྱིས་ནི་བཤད་པར་རིགས། །དེ་ནས་ལེགས་ལྡན་དྲང་སྲོང་མཆོག །བུ་རྣམས་ལ་ནི་སླར་སྨྲས་པ། །གཟུགས་དང་སྐྱེ་གནས་ཁ་དོག་དང་། །སྙིང་སྟོབས་སྤྱོད་པ་མདངས་དང་མ། །གཟི་

203-1-218b

མདངས་དབྱིབས་དང་དྲི་དང་ནི། །བདེ་དང་མི་བདེ་སྐད་རྣམས་དང་། །རིགས་ལས་བྱུང་བ་འདི་དག་ཀུན། །ཇི་ལྟ་བར་ནི་སྨྲས་པ་ཡིན། །ཐོག་མ་ཁོ་ནར་སྤྲུལ་པ་ན། །ལྷ་ཡུལ་དུ་ནི་རྒོད་མ་བྱུང་། །མདོག་འདྲེས་གནག་དང་དམར་བ་དང་། །དུད་ཀ་སྔོ་བསངས་སྐྱ་བོ་དང་། །
ཁྲ་དང་ལྗང་བ་རྣམས་ཡིན་ཏེ། །དེ་དག་ཡུལ་ཡུལ་དག་ཏུ་བགོས། །རྟ་མཆོག་དེ་དག་རྣམས་ཀྱིས་ནི། །བདག་པོ་ཡང་ནི་དེ་སྙེད་དེ། །བརྒྱ་བྱིན་ཟླ་བ་ཉི་མ་དང་། །རླུང་ལྷ་དང་ནི་ཆུ་ལྷ་དང་། །མེ་ལྷ་དང་ནི་ནོར་བདག་རྣམས། །རྟ་རྣམས་ཀྱི་ནི་བདག་པོར་གྱུར། །ལྷ་ཡི་རྟ་
ཡི་འབྱུང་གནས་ཏེ། །ས་སྟེང་ཕྱོགས་ཕྱོགས་དག་ཏུ་བགོས། །ལྷ་ཡི་མཆོག་གི་རྒོད་མ་ནི། །དེ་ལྟར་རྗེས་སུ་སྤྲུལ་པ་ཡིན། །དབང་པོ་ཆེ་ལ་མདོག་འདྲེས་པ། །གཞན་དག་གོ་རིམས་ཇི་བཞིན་ནོ། །དེ་ཡི་བུ་དང་ཚ་བོ་ཡིས། །ས་གཞི་ཐམས་ཅད་ཁྱབ་པ་ཡིན། །
ལ་ལ་རྒྱ་མཚོ་ལ་གནས་ཏེ། །དེ་བཞིན་གཞན་དག་སིན་དུར་བརྟེན། །ནས་གླིང་ཐོ་གར་ལ་གནས་ཤིང་། །གཞན་དག་ནོར་ཅན་དག་ཏུའོ། །ཤ་ཁ་བྲུ་ཞ་གན་དུ་ར། །དྲང་སྲོང་ཅན་དང་ཉམས་དགའ་དང་། །མཉའ་དཀའ་གུར་ཤཱི་ཀ་ལི་ཀ །ཉ་དང་མེ་ཆ་ཏིག་ཏིག་
གི། །ཆུ་བོ་བརྒྱ་པ་ཝིང་ས་ཤ །ཟླ་བའི་ཆ་ཞེས་བྱ་བ་དང་། །ཀཱོ་ཤི་ཀ་དང་སྦྱངས་ཅན་དང་། །གང་གཱ་དེ་བཞིན་ས་སྲུང་དང་། །ཆུ་བོ་ཆེར་ལྡན་དེ་དག་དང་། །རུས་སྦལ་ཅན་དང་ཁ་བ་ཅན། །བ་ལང་ཤིང་རྟ་མ་ལ་ཡ། །སྤོས་ངད་ལྡང་དང་དུ་ནི་རོ། །ཅ་ཅོ་ཅན་
ནའང་གནས་པ་ཡིན། །གྲོང་ཁྱེར་བཟང་དང་དཔའ་བོའི་སྟེ། །ཁ་ཆེའི་འབྲོག་གི་ཆ་དང་ནི། །ལྔ་ལེན་སྒྲ་ངན་ཨཾ་པཤྩ། །རི་ཁྲོད་མཐའ་འཁོབ་ནས་ཀྱི་ཡུལ། །ཡུལ་དབུས་རྒྱ་མཚོ་བཅུ་པ་དང་། །དངུལ་རྡོའི་རི་དང་ནི་ཤ་དང་། །ཤར་གྱི་མཐའ་དང་བུ་ལིང་དང་། །
བི་དར་པ་དང་ཀེ་ཤི་ཀ །ཕྱོགས་དང་མི་ཡི་ཡུལ་ཀུན་ན། །ས་ལ་བརྡ་ནི་བརྟེན་པ་ཡིན། །ཡུལ་དེ་རྣམས་ཀྱི་ཁྱད་པར་གྱིས། །དབྱེ་བ་གསུམ་དུ་འགྱུར་བ་ཉོན། །དབྱངས་ཅན་གྱི་ནི་བྱང་ཕྱོགས་སུ། །དེར་ནི་གང་ཞིག་སྐྱེས་གྱུར་པ། །སྣ་ཚོགས་འབྱུང་གནས་ལས་

203-1-219a

བྱུང་བ། །སྤྱོད་པ་མཆོག་དང་ལྡན་ཞེས་བྱ། །ཡང་ན་ལྷོ་ཕྱོགས་ཆ་རུ་ནི། །ཤར་དུ་འབབ་པའི་ཆུ་ངོགས་གནས། །དེ་ནི་སྟོབས་དང་གཟི་མདངས་སོགས། །ཚད་ཀྱང་བར་མ་ཡིན་ཞེས་བྱ། །ས་རྡུལ་ཅན་དང་རི་རོང་དོག །སོ་ར་སྲ་ལ་སོགས་པའི་
རྟ། །གཟི་མདངས་སྟོབས་དང་ལུས་ཀྱི་ཚད། །སྙིང་སྟོབས་དམན་པ་ཡིན་ཞེས་བྱ། །རྟ་ཡི་རིགས་དང་དབྱེ་བ་ནི། །ཡུལ་ནི་སོ་སོ་ལས་བྱུང་བ། །རིགས་དང་སྐྱེ་བའི་ཚུལ་དག་ནི། །ཡུལ་ལས་ལྔ་བཅུ་རྩ་བཞིར་འགྱུར། །དེ་ལས་གཞན་ཡང་དོག་པ་ཡི། །ཡུལ་ལས་
སྐྱེ་བ་རབ་བཤད་བྱ། །མ་དང་ཆ་ཡིས་བསྟེན་པ་ཡི། །ཉེས་པ་ཡོན་ཏན་མེད་འགྱུར་ཞིང་། །རིགས་བཟང་ཡིན་ཡང་ཕལ་ཆེར་ཡིན། །ལུས་ནི་མི་སྡུག་པ་དག་སྣང་། །དཔེར་ན་ལ་ལར་མི་དག་ནི། །སྒུར་པོ་དང་ནི་མིའུ་ཐུང་ཡོད། །དེ་བཞིན་རྟ་ཡང་ལུས་བྱད་ནི། །མི་སྡུག་
པར་ནི་ཤེས་པར་བྱ། །ལུས་དང་མགྱོགས་ཚུལ་སྟོབས་རྣམས་ནི། །དམན་པས་རྟ་གཞན་དག་ཏུ་གྱུར། །ཡུལ་ནི་བཟང་པོར་སྐྱེས་ན་ཡང་། །ཡོན་ཏན་མེད་པ་དག་ཀྱང་ཡོད། །ཕ་དང་མ་ཡི་སྐྱོན་དང་ནི། །སྟོན་ཀ་སྐྱེས་པར་གྱུར་པ་དང་། །དེ་འདྲ་གཞན་ལས་བྱུང་བ་
ཡི། །དེ་དག་དང་ནི་འདྲ་བར་བཤད། །དེ་བཞིན་ཕ་དང་མ་དག་ནི། །ལུས་ཀྱི་ཡོན་ཏན་ལྡན་གྱུར་ཀྱང་། །ལེགས་པར་སྐྱེས་པར་མ་གྱུར་པ། །མཚན་ཉིད་དེ་དང་ལྡན་པ་མིན། །རིགས་ལས་བྱུང་བའི་མང་པོ་དང་། །འདུས་པ་དག་ཏུ་བསྟན་པའང་མིན། །མཛའ་ལས་རྒྱལ་
ལ་སོགས་པ་ཡི། །བུ་ཡིས་ཕ་ལ་ཡང་དྲིས་པ། །རྒྱུ་ནི་མཚུངས་པ་དང་ལྡན་ཞིང་། །མངལ་ལས་དུས་གཅིག་སྐྱེས་གྱུར་པ། །དབྱིབས་དང་ཡོན་ཏན་མཚུངས་གྱུར་ཅིང་། །རླུང་གི་ཤུགས་འདྲར་མཉམ་པར་ནི། །སྔོན་ཚེ་ཚངས་པ་ཉིད་ཀྱིས་ནི། །རྟ་རྣམས་སྤྲུལ་པར་
བྱས་པ་ཡིས། །དེ་ལྟར་ཡོན་ཏན་མཉམ་པ་ལས། །ཅི་ཕྱིར་དེ་དག་ཐ་དད་གྱུར། །འདི་ཡི་རྒྱུ་ནི་གང་ཡིན་པ། །ཁྱེད་ཀྱིས་བདག་ཅག་ལ་བཤད་རིགས། །དེ་ལྟར་བུ་ཡིས་བསྐུལ་བ་དང་། །ཤ་ལི་ཧོ་ཏྲས་སླར་སྨྲས་པ། །དཔེར་ན་ཆུ་ནི་རོ་གཅིག་པར། །མཁའ་ལས་

203-1-219b

བབ་ཀྱང་ས་རྣམས་ཀྱི། །ཁྱད་པར་དག་གིས་བཟང་ངན་གྱི། །རོ་ནི་སྣ་ཚོགས་མང་པོར་འགྱུར། །དེ་བཞིན་ཚངས་པས་ཚུལ་གཅིག་པར། །རྟ་རྣམས་སྤྲུལ་པར་བྱས་མོད་ཀྱི། །ལྷ་རྣམས་ལ་ནི་བགོས་པ་ལས། །ལྷག་པ་གང་ཡིན་ས་གཞི་འདིར། །རྒྱལ་པོ་རྣམས་ལ་བྱིན་
གྱུར་པ། །རྟ་དེ་ས་ཡི་ཁྱད་པར་གྱིས། །རིགས་དང་སྐྱེ་གནས་མིང་དག་ནི། །ཁྱད་པར་མང་པོར་གྱུར་པ་ཡིན། །ཤ་ལི་ཧོ་ཏྲའི་མདོའི་གནས་ལས་རིགས་བརྟག་པའི་ལེའུ་སྟེ་སུམ་ཅུ་རྩ་བརྒྱད་པའོ།།      །།ཤ་ལི་ཧོ་ཏྲ་རྟ་བྲེས་ན། །འདུག་ཆ་དྲི་ཟའི་རྒྱལ་པོ་
དང་། །མཛའ་ལས་རྒྱལ་བ་གཉིས་ཀ་ནི། །དུལ་དང་ལྡན་པས་དྲིས་གྱུར་པ། །ལེགས་ལྡན་རྟ་ནི་བཟང་པོ་ཡང་། །སྤྱོད་པ་ངན་པ་སྣང་བ་དང་། །མཚན་ཉིད་མི་ཤེས་ལྡན་གྱུར་ཀྱང་། །ཁ་ཅིག་རང་བཞིན་བཟང་པོ་མཆིས། །དེར་ནི་རྒྱུ་དག་གང་ལགས་པ། །ཡང་
དག་པར་ནི་གསུངས་ཞེས་དྲིས། །སྟོན་ཀ་བཙས་པའི་མཚན་ཉིད་ནི། །ཡང་དག་པར་ནི་བཀའ་སྩོལ་ཅིག །དེ་གཉིས་ཀྱིས་དེ་དྲིས་པ་ན། །ཤ་ལི་ཧོ་ཏྲས་སླར་སྨྲས་པ། །ལུང་ལ་གོམས་བྱས་ཤེས་རབ་ནི། །ནམ་ཡང་སླུ་བར་བྱེད་པ་མིན། །ལུས་དང་མདོག་དང་སྟོབས་
ལྡན་པ། །ཚུལ་ངན་རིང་དུ་གྱུར་པ་ཡིན། །ལ་ལ་ལུས་ནི་གཙང་གྱུར་ཀྱང་། །སྙིང་སྟོབས་མི་ཉམས་གྱུར་པ་ཡིས། །ཕྱིན་ཅི་ལོག་གི་སྙིང་སྟོབས་ཅན། །ལུས་ནི་གཏུགས་པར་སྟོན་པར་བཤད། །དེ་ནི་ཤེས་རབ་དམན་པ་ཡི། །སྐྱེ་བོ་ཕལ་ཆེར་རྨོངས་པར་འགྱུར། །
སྐྱེ་བ་ཉིད་དང་གཅེས་པ་དང་། །ཤིས་དང་མི་ཤིས་མི་རྟོགས་འགྱུར། །དེ་བས་དབྱིབས་ལེགས་སྙིང་སྟོབས་ལྡན། །ངང་ཚུལ་བཟང་བའི་དམ་པ་ནི། །སྙིང་སྟོབས་ངང་ཚུལ་ལུས་བྱད་ནི། །སུན་འབྱིན་བྱེད་དེ་སྤང་བར་བྱ། །དེ་ནི་ང་ཡིས་བཤད་བྱ་ཡིས། །ཁྱད་
པར་མཉན་པ་ཉིད་དུ་གྱིས། །དབྱིབས་ལེགས་པ་དང་དཔའ་བ་དང་། །གཟི་མདངས་སྟོབས་དང་མ་ཡེངས་དང་། །འཕེལ་ཀ་ཆེ་ཞིང་སེམས་བཟང་ལ། །དར་ལ་བབ་ཅིང་མདངས་བཟང་ལ། །དབང་པོ་བརྟན་ཞིང་དགའ་བ་དང་། །སྙིང་སྟོབས་མགྱོགས་བྱད་ལྡན་པ་ཡི། །དེ་འདྲ་

203-1-220a

བ་ཡི་རྟ་དག་ནི། །ཡུལ་དང་དུས་ལས་དགའ་གྱུར་པར། །རྩྭ་དང་ཆུ་མང་དུས་སུ་ནི། །ཕ་དང་མ་ནི་འདུས་གྱུར་པའང་། །དེ་ཚེ་སྐྱེས་གྱུར་རྟེའུ་ནི། །ཡོན་ཏན་ཀུན་དང་ལྡན་པ་ཡི། །རྟ་ནི་དེ་དག་ཉིད་ཀྱིས་ན། །ཡོན་ཏན་དེ་ཉིད་སྐྱེ་བར་འགྱུར། །
འདོད་བཅས་པ་དང་འདོད་བྲལ་བའམ། །དོན་དུ་གཉེར་དང་དོན་མི་གཉེར། །གཞོན་དང་ཤིན་ཏུ་རྒན་པ་དང་། །རྟེའུ་དང་རྟ་རྒན་ཉིད་ཀྱིས་ནི། །ལུས་དང་སྙིང་སྟོབས་ངང་ཚུལ་རྣམས། །བཟང་ངན་འདྲེས་པ་ཉིད་དུ་འགྱུར། །ཁྲོ་དང་འཁྲུག་པར་གྱུར་པ་དང་། །འཇིགས་
དང་སྐྲག་པར་བྱེད་པ་དང་། །གཅོང་ཅན་དང་ནི་ཉམ་ཆུང་དང་། །ངལ་དང་སེམས་ནི་དུབ་པ་དང་། །སྐྱེ་བར་བྱེད་པའི་རྟ་གང་ཡིན། །ལས་ལ་མཁོ་བར་མི་འགྱུར་རོ། །དེ་ནི་མདངས་སྟོབས་དམན་འགྱུར་ཞིང་། །ལས་རྣམས་ཀུན་ལ་ནུས་པ་ཆུང་། །རྟག་ཏུ་ན་ཞིང་རྒྱུན་དུ་
སྦེག །གང་ཞིག་རྙོག་ཅན་འགྱུར་བའི་རྟ། །ཕ་དང་མ་ཡི་རྒུད་པ་ཡིས། །སྟོབས་ཆུང་གཟི་མདངས་ཞན་པར་འགྱུར། །དེ་ལྟར་སྐྱེ་བར་གྱུར་པའི་རྟ། །ལས་རྣམས་འགྲུབ་པར་མི་བྱེད་དོ། །དགུན་མཐའ་ཚད་པའི་ཐོག་མ་རུ། །དཔྱིད་དུས་སྲོག་ཆགས་རྣམས་ལ་ཕན། །
ཐུན་མོང་དུས་སུ་གྱུར་པའི་ཚེ། །ལུས་གཟུངས་སྙོམས་པར་གྱུར་པའི་རྟ། །རྒོད་མ་ལོ་བཞི་ལོན་པ་དང་། །རྟ་ཕོ་ལོ་བརྒྱད་ལོན་པ་དང་། །འདུས་གྱུར་པ་ལས་གྱུར་པའི་རྟ། །རྟག་ཏུ་ལས་རྣམས་ཀུན་ལ་བསྔགས། །དེ་ནི་ཡོན་ཏན་ཀུན་ལྡན་ཞིང་། །ཉེས་པ་
ཀུན་དང་བྲལ་བ་ཡིན། །ལུས་ཀྱི་ཕྱི་ནང་དག་གི་ནི། །ཡོན་ཏན་ལྡན་ཞིང་ཀུན་སྦྱོར་ནུས། །མཛའ་ལས་རྒྱལ་གྱིས་ཡང་སྨྲས་པ། །ཐ་མལ་པ་དང་ནད་བཅས་གནས། །སྟོན་ཀ་པ་ནི་གང་དག་ལགས། །གསོར་རུང་གསོར་མི་རུང་བ་དག །གང་ལགས་
ཐེ་ཚོམ་སྐྱེས་ལགས་ཀྱི། །དྲང་སྲོང་ཆེན་པོ་དེ་གསུངས་ཤིག །མཛའ་ལས་རྒྱལ་གྱིས་དེ་སྐད་དྲིས། །ལེགས་ལྡན་གྱིས་ནི་སླར་སྨྲས་པ། །འབྲས་བུ་བཟང་དང་ངན་པ་ཡི། །ཕུན་ཚོགས་སྟོན་ཀའི་ཚེ་ན་གནས། །འབྲུ་ཡི་ཕུན་ཚོགས་མཐུན་པས་

203-1-220b

ན། །རྟ་ལའང་སྟོན་ཀ་པ་ཞེས་བཤད། །རང་བཞིན་དེ་འདྲར་གྱུར་པ་ཡི། །སྟོན་ཀ་རྣམ་པ་བཞི་རུ་མཐོང་། །རང་བཞིན་ལ་གནས་དེ་བཞིན་སྦོམ། །ཕྲ་དང་དམར་བའི་སྟོན་ཀ་པའོ། །རང་བཞིན་ལ་གནས་མཆོག་ཡིན་ཏེ། །ཕྲ་དང་སྦོམ་དང་གཞན་པ་ཡིན། །རྟེའུ་སྟོན་ཀ་
དམར་པོ་ནི། །སྤང་བར་བྱ་བར་གྱུར་པ་ཡིན། །ཕྲ་དང་སྦོམ་པ་ཕྲད་པ་ལས། །སྦོམ་པའམ་ཡང་ན་ཕྲ་བར་འགྱུར། །ཕལ་ཆེར་གང་གི་མཚན་ཉིད་གང་། །དེ་ལས་ལྷག་པར་མི་འགྱུར་རོ། །སྐྱེ་གནས་སྙིང་སྟོབས་ལུས་ཀྱི་ནི། །མཚན་ཉིད་དང་ནི་རྟགས་དག་ལས། །
འདི་རྣམས་ཀྱི་ནི་ལས་དག་ཀྱང་། །ཐམས་ཅད་རིམ་བཞིན་བཤད་པར་བྱ། །རྒོད་མའི་སེམས་སྟོབས་ཉེ་བ་དང་། །ལམ་དུ་ཞུགས་པར་གྱུར་པ་ཡིས། །ཁུར་དང་གོམ་པ་དག་གིས་ནི། །དེ་ནི་ཚ་བས་གདུངས་གྱུར་ཅིང་། །བཀྲེས་དང་སྐོམ་པས་ཉེན་པས་ན། །མངལ་
ནས་ཁྲག་ནི་འཛག་པར་འགྱུར། །ཟླ་བ་དྲུག་ནི་འདས་པ་ན། །ཤ་ནི་ཁྲག་ཏུ་འགྱུར་བ་ཡིན། །མངལ་དེའི་ཚིལ་ནི་གང་ཡིན་པའང་། །ཕྲ་མོ་ཙམ་ཞིག་ཡོད་མི་འགྱུར། །རུས་ཕྲ་ཤ་ནི་སྲབ་པ་རུ། །སྐྱེ་བ་སྟོན་ཀ་དམར་པོ་ཡིན། །འདི་ནི་ལོངས་སྤྱོད་མི་རུང་ཞིང་། །ལས་རྣམས་
ནུས་པའང་མ་ཡིན་ནོ། །མངལ་ནི་ཆགས་པར་གྱུར་པའི་རྟ། །ཟས་ཀྱི་བྱ་བས་འཕེལ་མི་འགྱུར། །རྩུབ་ཅིང་རྣོ་བ་ཟ་བ་དང་། །དེ་བཞིན་ལམ་དུ་ཞུགས་པ་དང་། །ཁུར་གྱིས་དུབ་པར་བྱས་པ་དང་། །བཅིངས་དང་རྟ་ཕོ་དང་སྦྱར་དང་། །དེར་ནི་མངལ་ཆགས་གྱུར་པ་ཡིས། །ཁྲག་
ཟད་ལོག་པར་འགྱུར་བ་ཡིན། །ཇི་ལྟར་ཆར་མེད་སྨན་རྣམས་ནི། །སྐྱེ་བར་འགྱུར་བ་མ་ཡིན་ལ། །འབད་མེད་མེ་ཏོག་འབྲས་བུ་སོགས། །འཕེལ་བར་འགྱུར་བའང་མ་ཡིན་ནོ། །དེ་བཞིན་ལོག་པར་གསོས་པ་ཡིས། །རྟ་ཡི་མངལ་ནི་སྐམས་པར་འགྱུར། །དེ་ནི་སྦེག་ཅིང་
ཉམ་ཆུང་བའི། །རྟེའུ་དུས་ནི་འདའ་བར་བྱེད། །དུས་མ་འདས་པའང་ཉམ་ཆུང་ཞུམ། །ཡན་ལག་མ་ཚང་སྐྱེ་བར་འགྱུར། །རྟེའུ་དེ་ནི་སྟོབས་ཞན་ཞིང་། །དབང་པོ་ཞན་པར་སྐྱེ་བར་འགྱུར། །ཁྲག་ཆུང་སྙིང་སྟོབས་དམན་པ་རུ། །དུས་སུ་དེ་ནི་ལས་ཀྱིས་སྐྱེ། །དེ་ནི་རུས་

203-1-221a

པའི་སྟོན་ཀ་བར། །ཤེས་བྱ་དེ་ཡི་ལས་ཉོན་ཅིག །རྟེའུ་དེ་ནི་མར་རམ་ནིམ། །ཡང་ན་འོ་མས་གསོ་བྱ་ཞིང་། །སྟོབས་སྐྱེད་པ་ནི་གཞན་དག་ནི། །ཕྲ་བའི་སྟོན་ཀ་གསོ་བར་བྱ། །མ་ནི་འབྲས་ཆན་ཡུ་ཤ་དང་། །དེ་བཞིན་ཁུ་བ་སྣ་ཚོགས་དང་། །
དེ་བཞིན་བཏུང་བ་སྣ་ཚོགས་དང་། །བསྐུ་དང་འཇམ་རྩིས་བརྡ་བར་བྱ། །ཡང་ན་རྟེའུ་ཟླ་དྲུག་པ། །བསྐུ་དང་འཇམ་རྩི་འབྲས་ཆན་ཞུ། །ཚད་དང་ལྡན་པས་གོ་རིམས་བཞིན། །དེ་བཞིན་ལྷག་པར་བྱ་བ་དང་། །མེ་སྟོབས་སྐྱེད་པ་སྦྱིན་པར་བྱ། །ཁ་ར་འོ་མར་སྦྱར་བ་ལ། །མར་
ནི་ཚད་ཙམ་བཅུག་པ་སྦྱིན། །རྟེའུ་ལོ་གཉིས་ལོན་པ་ལ། །ཁ་ཟས་སྦྱིན་པར་བྱ་བ་ཡིན། །ལུག་གི་ཤ་དང་རྨ་བྱའི་ཤ །ཁྱིམ་བྱ་བྱ་ཡི་ཤ་རྣམས་དང་། །ཉ་དང་རུས་སྦལ་ཤ་རྣམས་ལས། །ཤ་ཁུ་དང་ནི་ཁ་ཟས་བྱ། །སྣ་སྨན་དགོངས་ཀ་བཏུང་བ་དང་། །བསྐུ་དང་འཇམ་རྩི་
རྩྭ་ཡིས་ཀྱང་། །ལུས་ཀྱི་ལུས་གཟུངས་བརྟས་བྱ་བ། །ཟླ་དྲུག་བར་དུ་བྱ་བར་བཤད། །དེ་ནས་ས་འདིར་བསྐྱང་བྱ་ཞིང་། །ལུས་དང་སྲོག་ཀྱང་བསྲུང་བར་བྱ། །སོར་ནི་ཉི་ཤུ་བཞི་ལ་ཁྲུ། །ཁྲུ་བཞི་ལ་ནི་གཞུ་གང་སྟེ། །གཞུ་འདོམ་བརྒྱད་སྟོང་དག་ལ་ནི། །ལས་ལ་སྦྱོར་བའི་
དཔག་ཚད་ཡིན། །དེར་ནི་དང་པོར་རྟེའུ་དག །རིམ་པ་འདི་དང་ལྡན་པས་ཀྱང་། །འདོམ་ནི་སུམ་བརྒྱ་ནས་བརྩམས་ཏེ། །དཔག་ཚད་བར་དུ་རིམ་གྱིས་བཀྲི། །དགུན་ཟླ་འབྲིང་དང་ཐ་ཆུངས་ཚེ། །དེ་ལས་ཉིས་འདབ་བྱ་བ་ཡིན། །དཔྱིད་ཟླ་ར་བ་གསུམ་འགྱུར་ཏེ། །དཔྱིད་
ཟླ་འབྲིང་པོ་དཔག་ཚད་མེད། །དེ་ཡི་རྗེས་ལ་དཔག་ཚད་ནི། །གཅིག་ཙམ་ཟླུམ་པོས་བསྐོར་བར་བྱ། །བྱ་བའི་སྦྱོར་བ་འདི་ཉིད་ནི། །ཉམ་ཆུང་བ་ལ་བྱ་བ་ཡིན། །ནས་དང་མ་ཤ་མར་འོ་མས། །བསྐུ་དང་འཇམ་རྩི་རྩྭ་རྣམས་དང་། །ཤིན་ཏུ་སྣུམ་པའི་བཏུང་བ་ཡིས། །གང་ཚེ་
གཉི་ག་བརྟས་བྱས་ལ། །དེ་བཞིན་རྒོད་མ་སྦོམ་གྱུར་ཀྱང་། །སྦོམ་པོ་བསྐྱེད་པ་ཉིད་ཡིན་ཏེ། །སྦོམ་ཞིང་མངལ་དུ་ལྕི་བའི་ཕྱིར། །དེ་ནི་དུས་སུ་སྐྱེ་མི་འགྱུར། །དེ་ཡི་ཡང་ཡང་མ་ཞུ་ལྟར། །དུས་མིན་པར་ནི་སྐྱེ་བར་འགྱུར། །རྟེའུའི་ཚིལ་ནི་ཆེར་འགྱུར་ཞིང་། །ཤ་ཡི་ཚོགས་

203-1-221b

ལྟར་གནས་པ་ཡིན། །དེ་ནི་ལྡང་དང་བརྩེ་མི་ནུས། །ལྕི་ཞིང་ཁུར་གྱིས་ནོན་ལྟར་འགྲོ། །སྦལ་པ་ལྟར་འགྲོ་སྦོམ་པ་དང་། །ལུས་ནི་སྙོམས་པར་སྐྱེ་བར་འགྱུར། །སྦལ་པ་སྐྲངས་པར་གྱུར་པ་ལྟར། །བརྟན་པར་འགྲོ་བར་འགྱུར་མ་ཡིན། །ཚིལ་གྱིས་སྙིང་ནི་ཁྱབ་གྱུར་ཅིང་། །མི་རྩུབ་
རྩ་བ་རྟེན་པ་ཡིན། །ཚིལ་ནི་ལྷག་པར་གྱུར་པ་ནི། །ལུས་ཀྱི་རྩེ་དང་འདེགས་པར་དཀའ། །འདི་ནི་ཚིལ་ཆེས་ཡིན་ཞེས་བྱ། །དེ་ལ་ལས་ནི་འདི་ཕན་ནོ། །པི་པི་ལིང་དང་བཅའ་ལྒ་དང་། །ཧཾ་སྟི་པི་པི་ལིང་ཙི་ཏྲ། །འདི་དག་བསྐོལ་བའི་མར་དག་ནི། །ནང་པར་ཟས་ཀྱི་
སྔོན་དུ་སྦྱིན། །ཚད་ཙམ་རྟེའུ་དེ་ལ་ནི། །སྦྱང་བའི་ཕྱིར་ནི་སྦྱིན་པར་བྱ། །དེ་ལ་མ་ཡི་འོ་མ་ནི། །མི་བླུད་ར་ཡི་འོ་མ་སྦྱིན། །ཚོན་མོའི་འོ་མ་ལྕི་བས་ན། །དེ་ཕྱིར་ར་ཡི་འོ་མ་བླུད། །འོ་མ་སྦྱོང་བར་བྱེད་པ་ཡི། །བཏུང་བ་རྒོད་མ་ལ་སྦྱིན་བྱ། །ཁ་བ་དང་ནི་བསྐ་བ་དང་། །ཚ་བ་
སྦྱིན་པས་དེ་སྦྱང་བྱ། །དེ་ལ་ཏིལ་མར་འཇམ་རྩི་དང་། །དེ་ནས་སླར་ཡང་གནས་པར་བྱ། །ཟླ་བ་དྲུག་གི་བར་དུ་ནི། །རྟེའུ་དེ་ལས་ཡང་དག་སྤྱད། །གཞུ་འདོམ་སྟོང་ནི་སོང་ནས་ཀྱང་། །དེ་ཉིད་ཙམ་དུ་བཟློག་པར་བྱ། །དེ་ཡི་རྗེས་ལ་འདོམ་བཞི་སྟོང་། །དེ་ཉིད་འགྲོ་ཞིང་བཟློག་
པར་བྱ། །ཟས་དང་བསྐྱང་བ་ཉིད་ཀྱིས་ནི། །ལུས་ནི་ལེགས་པར་མཁྲང་བར་འགྱུར། །ལུས་དང་ཡན་ལག་རྐང་པ་བརྟན། །ལག་གནས་དབང་པོ་དགའ་བ་དང་། །གང་ཚེ་ནད་མེད་ཡིད་བདེ་བ། །དེ་ཚེ་ལས་ལ་སྦྱར་བར་བྱ། །དེ་ལྟར་སྦོམ་ཕྲ་ཤེས་བྱས་ལ། །དེ་ནས་ལས་
རྣམས་སྦྱར་བར་བྱ། །འདི་ནི་དམར་པོར་གྱུར་པ་དང་། །སྦོམ་ཕྲ་དག་ཀྱང་བཤད་པ་ཡིན། །རྟ་མཆོག་གི་ནི་སྟོན་ཀ་དག །རང་བཞིན་ལ་གནས་བཤད་པར་བྱ། །སྔར་ནི་ང་ཡི་རྟ་རྣམས་ཀྱི། །ཡོན་ཏན་ཀུན་ལྡན་གསེབ་དང་ནི། །རྒོད་མ་ཡོན་ཏན་དེ་ལྡན་ཞིང་། །ན་ཚོད་
སྟོབས་ནི་ཕུན་ཚོགས་པ། །སྲོག་ཆགས་ཐམས་ཅད་བདེ་བའི་དུས། །དཔྱིད་དོ་མེ་ཏོག་དྲི་ཅན་ལ། །ཕན་ཚུན་འདོད་པ་བསྐྱེད་པའི་ཚེ། །རྒོད་མ་འཁྲིག་པའི་དོན་དུ་འགྲོ། །དེར་ནི་མངལ་དུ་ཆགས་གྱུར་པ། །རྟ་ཡི་ཉམས་མཉམ་བཟང་པོ་ཡིན། །མངལ་དུ་ཆགས་

203-1-222a

པ་བསྲུང་བའི་ཕྱིར། །ནས་དང་མ་ཤ་མར་གྱིས་གསོ། །དམན་པ་བསྟེན་དུ་མི་གཞུག་ཅིང་། །སྐར་ཁུང་དྲ་བ་ཅན་དུ་གཞག །གོམ་པ་དལ་གྱིས་འགྲོ་བྱ་ཞིང་། །དབེན་པའི་ཕྱོགས་སུ་བསྐྱང་བར་བྱ། །ཁང་པ་སྐར་ཁུང་ཅན་དེར་ནི། །བཞི་མཉམ་
སྟན་དང་བཅས་པར་བྱ། །རྟེའུ་ལ་ནི་ཕན་པའི་ཕྱིར། །འདི་དག་ཐམས་ཅད་ཡང་དག་སྤྱད། །ཡུངས་ཀར་དང་ནི་ཆུ་དག་དང་། །པུ་ཤེལ་ཙེ་དང་ཤུག་པ་དང་། །བསེ་ཤིང་འབྲས་བུ་ཞིབ་བཏགས་པའི། །ཕྱེ་མ་ཡི་ནི་བདུག་པས་བདུག །དེ་ལྟར་ལེགས་པར་བསྲུངས་གྱུར་ན། །
རྟེའུ་དུས་ཀྱི་བཟང་པོར་སྐྱེ། །ལུས་ཀྱི་སྟོབས་ནི་ཕུན་ཚོགས་ཤིང་། །ཤིན་ཏུ་འབྱེས་པ་ལེགས་པར་འདུས། །ལུས་གཟུངས་ཐམས་ཅད་རྒྱས་པ་དང་། །ཡན་ལག་མཛེས་ཤིང་ལྟ་ན་སྡུག །མགྱོགས་ཤིང་གཙུག་ནི་དག་པ་དང་། །མཁྲེགས་ཤིང་གྲ་མ་ཅན་མིན་དང་། །
པགས་སྲབ་བ་སྤུ་སྣུམ་པ་དང་། །འགྲོ་ལེགས་གཟུང་བར་སླ་བ་དང་། །ལུས་ཀྱི་ཡོན་ཏན་ཀུན་ལྡན་ཞིང་། །མཚན་ཉིད་ཐམས་ཅད་བསྔགས་པ་དང་། །འཛིན་དང་འཇོག་པར་བྱེད་པ་ལ། །རྟག་ཏུ་མཉམ་པ་མེད་པར་དཔའ། །སྟོན་ཀ་དག་དང་ཞེས་འདི་བཤད། །རྟ་
ནི་བཟང་པོ་ཡིན་པར་བསྟན། །རྐང་པ་བརྟན་ཞིང་འགྲོས་ཆེ་ལ། །ལུས་ཀྱི་འཕེལ་ཀ་ཆེ་ཞིང་ལེགས། །རྟག་ཏུ་ཁལ་གྱི་སྦྱོར་བ་དང་། །ལས་རྣམས་ལ་ནི་ངེས་སྦྱོར་ནུས། །དེ་ནི་སློབ་དཔོན་དམ་པ་ཡིས། །རག་པའི་རང་བཞིན་སྟོན་ཀར་བཤད། །དེ་ནི་བཀྲ་ཤིས་རྟ་
ཡིན་ཏེ། །རྒྱལ་པོའི་བཞོན་པར་དེ་ཉིད་བཤད། །དེ་ནི་གཡུལ་ངོར་རབ་ཏུ་བསྔགས། །རྟག་ཏུ་རྒོད་མའི་གསེབ་ཏུ་བཟང་། །དེ་ནི་བྱང་ཞིང་དཔའ་བ་དང་། །མཆོད་སྦྱིན་ལ་ཡང་རྟ་དེ་བཟང་། །རྟག་ཏུ་ཚངས་པ་སྨྲ་བ་ཡི། །རྟ་མཆོག་ཅེས་ནི་དེ་བཤད་དོ། །དེ་ནི་རྟག་ཏུ་བཞོན་
པར་བཟང་། །སྐྱེ་དགུ་སྐྱེད་པ་ཡིན་པར་བཤད། །འདི་ཡི་ལས་རྣམས་བཤད་པ་སྟེ། །གཞན་ཡང་མངལ་ཅན་ཞེས་བྱའོ། །རྟ་ཡི་མཆོག་ཏུ་གྱུར་པ་འདི། །ལས་ལ་སྒྱིད་ལུག་འགྱུར་མ་ཡིན། །སྟོན་ཀ་བ་ནི་བཞི་པོ་འདི། །མཚན་ཉིད་གྲངས་ནི་དུས་མ་ཡིན། །སྦོམ་དང་

203-1-222b

རང་བཞིན་ལ་གནས་དང་། །དམར་དང་དེ་བཞིན་ཕྲ་བ་སྟེ། །རྣམ་པ་བཞི་པོ་གསོ་བ་དང་། །བཅས་པར་དེ་བཞིན་བཤད་པ་ཡིན། །གཞན་ཡང་པགས་པ་ལ་སོགས་པའི། །རང་བཞིན་གང་ཡིན་བཤད་པར་བྱ། །པགས་སྲབ་མདངས་སྣུམ་ཕུན་སུམ་ཚོགས། །བ་
སྤུ་སྣུམ་ཞིང་གཉེར་མ་སྙོམས། །གསང་བའི་ཕྱོགས་ནི་མཛེས་པ་དང་། །གཙུག་ནི་བཟང་པོར་གང་གྱུར་དང་། །བློ་ལྡང་བྱང་ཞིང་མགྱོགས་པ་དང་། །རྨང་ཁ་མཉན་ཞིང་ཚོར་བ་ཅན། །ཤིན་ཏུ་འབྱར་བར་གང་གྱུར་པ། །པགས་པ་བཟང་པོར་དེ་བཤད་དོ། །ཡན་ལག་ཚད་
དང་ལྡན་པ་དང་། །ལུས་ཀུན་ལག་པར་སྙོམས་པ་དང་། །དམར་ཞིང་དམར་བའི་མདོག་རྫས་ཅན། །མིག་དམར་ལྟ་ན་སྡུག་པ་དང་། །མདངས་ལྡན་ཡིད་ནི་གཞུངས་པ་དང་། །བློ་དང་དྲན་པའི་ཡོན་ཏན་ལྡན། །ཁྲག་གི་མཚན་ཉིད་བཟང་ལྡན་རྟ། །མཚན་དང་ཁ་དང་རྐན་
དམར་བའོ། །སོ་སྣུམ་མིག་ནི་ལེགས་པ་དང་། །བ་སྤུ་རྔ་མའི་མདངས་སྣུམ་ཞིང་། །དེ་བཞིན་ཕུམ་ཕུམ་འཇམ་ལ་སྣུམ། །རྔོག་མ་རིང་ཞིང་བཟང་བ་དང་། །ལྕེ་ནི་འཇམ་ཞིང་ཡངས་པ་དང་། །པདྨ་འདྲ་ཞིང་ལུས་ཚུགས་ནས། །ཤིན་ཏུ་མཛེས་ཤིང་ཤ་ཡིས་
རྒྱས། །རྐན་དང་མ་རྐན་མིག་དམར་ཞིང་། །སྟོབས་ཆེན་གཟུགས་ནི་བཟང་བ་དག །ཤ་མཁྲེགས་པ་ཞེས་བྱ་བར་བཤད། །གསེང་ཁྲོམ་མེ་ཏོག་མདོག་འདྲ་ཞིང་། །ཟླུམ་ལ་ཚིལ་གྱིས་རྒྱས་ཤིང་བཟང་། །ཤ་ཆེ་ཚིལ་ནི་ཆེ་གྱུར་པ། །ཆེ་མཁྲེགས་པ་ཡི་རྟ་ཞེས་
བྱ། །ཁ་དོག་དཀར་བའམ་སྦྲང་རྩི་འདྲ། །མདངས་གསལ་སྙོམས་ཤིང་མཁྲེགས་པ་ཡི། །སོ་འམ་མཆེ་བ་ཡོད་གྱུར་ལ། །མཚན་ནི་ཤིན་ཏུ་ལེགས་གྱུར་ཅིང་། །གང་གི་རུས་པ་ལས་སྐྱེས་ཤིང་། །འབྱེས་ལས་བརྟན་པར་གྱུར་པ་དག །ཁུར་གྱིས་ཞུམ་པ་མེད་གྱུར་པ། །
དེ་ནི་རུས་མཁྲེགས་རྟ་ཡིན་ནོ། །རྐང་ནི་མར་གྱི་སྙིང་པོ་འདྲ། །སྲ་ཞིང་ལྕི་ལ་མཁྲེགས་པར་སྣང་། །ཤ་ཡི་ཕྱི་དང་ནང་དག་ནི། །ཤིན་ཏུ་སྣུམ་པར་སྣང་བ་དང་། །མིག་གི་མདངས་བཟང་ནག་པ་དང་། །གང་གི་བ་སྤུ་སྣུམ་གྱུར་ཅིང་། །སྟོབས་དང་མདངས་ཀྱི་ཡོན་ཏན་ལྡན། །

203-1-223a

དེ་ནི་རྐང་མཁྲེགས་པ་ཞེས་བྱ། །སྣུམ་ཞིང་བསྐ་ལ་དྲི་ང་མེད། །མང་ཞིང་བ་རའི་འོ་མ་འདྲ། །གང་ལ་དེ་འདྲའི་ཁུ་བ་ཡོད། །དེ་ནི་ང་ཡིས་བཤད་ཀྱིས་ཉེན། །སྲ་ཞིང་སྟོབས་ལྡན་དྲེགས་པ་བདོ། །རྒྱ་ཆེར་དགའ་ཞིང་མགྱོགས་དང་ལྡན། །རྒོད་མ་ཤིན་ཏུ་ཚིམ་
བྱེད་ཅིང་། །མདངས་སྣུམ་འགྲོས་ནི་མྱུར་བ་དང་། །དཀར་བའམ་ཡང་ན་མདོག་རྗེས་དཀར། །ཤ་དང་གནད་དང་ཚིལ་དང་ནི། །རྐང་དང་རུས་པ་པགས་པ་དང་། །ལུས་གང་གཞན་ལ་ཡོད་པ་རྣམས། །ཐམས་ཅད་རྒྱུས་པས་སྦྲེལ་བ་ཡིན། །འདི་ནི་མཁྲེགས་པར་གྱུར་པ་ཡི། །
སྟོབས་དང་གཟི་མདངས་མགྱོགས་པར་ལྡན། །ལུས་ཀྱི་ཡན་ལག་ཀུན་ལེགས་འབྲེལ། །ཚིགས་ལེགས་ལས་རྣམས་ཐམས་ཅད་བྱེད། །འདི་ནི་རྩ་རུས་སྲ་བ་ཡིན། །སྙིང་སྟོབས་བརྟན་ལ་ད་ཉོན་ཅིག །དཔའ་ཞིང་གཡུལ་དུ་དཔའ་བའི་མགོ །བློ་དང་དྲན་པའི་ཡོན་ཏན་ལྡན། །
མདོག་སྣུམ་དེ་བཞིན་མདངས་དང་ལྡན། །ཕོ་མཚན་ལྡན་ཞིང་ཚོར་བ་ཆེ། །ཆུ་ཞེང་གབ་པར་གྱུར་པ་ཡི། །ཡོན་ཏན་ཐམས་ཅད་ལྡན་པ་དག །སྙིང་སྟོབས་བརྟན་པའི་རྟ་ཡིན་ཏེ། །རྡོ་རྗེ་མཁྲེགས་པ་འདྲ་ཞིང་གྲིམས། །ས་ཀུན་ལ་ནི་ཐོར་མེད་ཅིང་། །ལས་རྣམས་ཀུན་ལ་
བསྔགས་པ་ཡིན། །འཁྲུགས་ཤིང་ཚིམ་པར་བྱས་ན་ཡང་། །ཁོང་འཁྲུགས་དགའ་བར་འགྱུར་བ་མེད། །འདི་དག་སྲ་བར་ཡང་དག་བཤད། །དེ་རྣམས་ཀྱི་ནི་ཡོན་ཏན་ཉོན། །པགས་མཁྲེགས་སྲབ་ཅིང་མཚན་ལེགས་སྐྱེ། །མགྱོགས་དལ་དག་དང་ལྡན་པ་ཡི། །ཁྲག་
བཟང་མདངས་དང་ལྡན་པ་དང་། །ཡིད་གཞུངས་པར་ནི་འགྱུར་བ་ཡིན། །ཤ་མཁྲེགས་སྟོབས་དང་ལྡན་པ་དང་། །རྟ་ནི་གཟུགས་བཟང་འགྱུར་བ་ཡིན། །ཚིལ་མཁྲེགས་པར་ནི་གྱུར་པའི་རྟ། །ལམ་གྱི་ཕ་རོལ་ཕྱིན་པར་འགྱུར། །རུས་མཁྲེགས་སྟོབས་དང་ལྡན་པ་དང་། །དཔངས་མཐོ་
དེ་བཞིན་ཀུན་བྱེད་ནུས། །རྐང་མཁྲེགས་པར་ནི་གྱུར་པའི་རྟ། །སྟོབས་དང་གཟི་མདངས་ཕུན་ཚོགས་འགྱུར། །ཁུ་བ་མང་བར་གྱུར་པའི་རྟ། །བུ་མང་སྟོབས་ཆེ་འདོད་མོས་མེད། །རྩ་རྒྱུས་མཁྲེགས་པར་གྱུར་པའི་རྟ། །གཉིད་སྲབ་ངལ་བ་མེད་པར་འགྱུར། །སྙིང་སྟོབས་ཆེ་བ་བདག་

203-1-223b

ཉིད་བརྟན། །བདག་ཉིད་ཐུལ་ཞིང་ཐམས་ཅད་བྱེད། །དེ་ལྟར་སྟོན་ཀ་ཞེས་བྱ་དང་། །མཁྲེགས་པར་གྱུར་པའང་བཤད་པ་ཡིན། །ཤ་ལི་ཧོ་ཏྲའི་མདོའི་གནས་ལས་སྟོན་ཀ་པ་ཞེས་བྱ་བའི་ལེའུ་སྟེ་སུམ་ཅུ་རྩ་དགུ་པའོ།།      །།དཀའ་ཐུབ་བརྟུལ་ཞུགས་ཡང་དག་གྲུབ། །ཚངས་
པའི་གཟི་ལྡན་ཐུལ་བར་དཀའ། །ཤེས་དང་རྣལ་འབྱོར་བསམ་གཏན་དང་། །སྒོམ་པ་ལ་གོམས་སྡིག་བྲལ་ལ། །ཤ་ལི་ཧོ་ཏྲའི་བུ་ལེགས་ཐོས། །ཐོས་པ་ཕུན་ཚོགས་དུལ་བར་ལྡན། །དྲི་བའི་ཚིག་འདི་དོན་མཆོག་ལྡན། །ཤ་ལི་ཧོ་ཏྲ་ལ་དྲིས་པ། །ལེགས་ལྡན་སྔར་ནི་རྒྱལ་
པོ་ལ། །རྟ་ལས་མཆོག་གྱུར་དཔུང་གཞན་མེད། །རྟ་ཡིས་ཐོབ་པར་མི་ནུས་པའི། །གནས་ཀྱང་རྒྱལ་པོས་ཐོབ་ཅེས་གསུངས། །དེ་ལ་རྟག་པར་རྟ་ཡོད་ཀྱང་། །གལ་ཏེ་རྒྱལ་པོ་གཞན་ལས་ནི། །ཡུལ་གཞན་ལས་ནི་བྱུང་བ་ཡི། །རྟ་དག་ཉོ་བར་འདོད་གྱུར་ལ། །གང་ལ་
རིན་ནི་ཅི་ལྟ་བུ། །ཡིན་པ་དེ་ལ་རྟོགས་པར་འདོད། །དེ་དོན་མ་ལུས་ཤེས་འགྱུར་བ། །ཁྱེད་ཀྱི་དོན་ནི་ཤེས་པར་འཚལ། །བདག་ཉིད་ཆེན་པོ་ལེགས་ཐོས་ཀྱིས། །དེ་ལ་བསྙེན་བཀུར་བྱེད་པ་ན། །དྲང་སྲོང་ཆེན་པོས་ཉོ་ཚོང་གི། །བརྟག་པ་འདི་ནི་སྨྲས་པ་ཡིན། །གལ་ཏེ་
རྟ་ནི་ཡོད་གྱུར་ཀྱང་། །རྟ་གཞན་ཉོ་བར་འདོད་གྱུར་ན། །རྟ་ཉུང་བ་འམ་འོན་ཏེ་ནི། །བཞོན་པ་ཟད་ཚེ་སྨོས་ཅི་དགོས། །རྒན་ཡང་འཁོར་ལོས་སྒྱུར་བ་ཡི། །རྒྱལ་པོ་ལ་འོས་མཚན་ཉིད་རྫོགས། །མཚན་ཉིད་དོན་གྱིས་འབྲས་འདོད་པས། །རབ་ཏུ་འབད་དེ་ཉོ་བར་བྱ། །རྟ་
གང་གཡུལ་དུ་མི་ཤིས་ཡོད། །ཡོན་ཏན་གཞན་དག་ལྡན་གྱུར་ན། །རྒྱུ་བའི་ཡོན་ཏན་ལྡན་པའི་ཕྱིར། །དེ་ཡང་འབད་པས་ཉོ་བར་བྱ། །མཚན་ཉིད་ངན་པའི་གནས་སྐབས་ལྡན། །རྟ་ཡང་ཉོ་བ་ཉིད་དུ་བྱ། །དཔེར་ན་མི་ཤིས་ཉེས་བྲལ་བའི། །ཉིན་ཞག་འདས་ན་ལན་
དང་མཚུངས། །ལྷ་ཡི་སྙིང་སྟོབས་གཟི་མདངས་ལྡན། །མགྱོགས་ཤིང་རིགས་སྟོབས་ལ་གནས་ན། །མཚན་ཉིད་ཅུང་ཟད་ལྡན་ན་ཡང་། །རྟ་ནི་བླང་བར་བྱ་བར་འོས། །དང་པོ་ལུས་ཀྱི་མཚན་ཉིད་དག །བཟང་ངན་གང་ཡིན་ཡན་ལག་ནི། །རེ་རེ་ནས་སྒོས་བརྟག་

203-1-224a

པར་བྱ། །དེ་ཡི་རྗེས་ལ་ན་ཚོད་བརྟག །ལུས་བརྟགས་ནས་ནི་ཚེ་ཚད་དེ། །ཅི་སྲིད་ནས་ནི་འཆི་བ་བརྟག །དེ་རྗེས་རིན་ཐང་གདབ་བྱ་སྟེ། །གཞན་དུ་བཟང་པོ་ངན་པར་འགྱུར། །དེ་བཞིན་རིགས་དང་ཤེས་པ་དང་། །མཚན་ཉིད་བཟང་དང་ངན་པ་དང་། །མདོག་
དང་གཙུག་དང་འགྲོས་ཀུན་དང་། །དེ་ལས་གཞན་ཅིའང་རུང་བ་དང་། །ཆུ་ཞེང་གི་ནི་ཚད་དག་དང་། །དེ་བཞིན་རྒྱུ་བའི་འགྲོས་དང་ནི། །བརྒྱུག་ཚེ་ལུས་ཀྱི་མཐོ་དམན་དང་། །དེ་བཞིན་སྡུག་དང་མི་སྡུག་དང་། །ཞོན་ཚེ་སྙིང་ཉེ་སྙིང་རིང་དང་། །སྐྱེ་གནས་བཅས་པར་ཤེས་
པར་བྱ། །ལྷན་ཅིག་སྐྱེས་པའི་བ་དང་ནི། །སྲ་སྙི་དག་གི་རང་བཞིན་དང་། །རྟ་ཡི་ནང་ན་རྒྱུ་བ་ན། །སྙིང་སྟོབས་ངང་ཚུལ་གཟི་མདངས་དང་། །ནད་མེད་ནད་དང་བཅས་རྣམས་དང་། །རྟ་འདོད་པ་ཡིས་རྟག་ཏུ་བརྟག །རིན་ཐང་དག་ནི་ཅི་ཙམ་གྱིས། །ས་ནི་ཅི་ཙམ་ཆོད་
གྱུར་པ། །དེ་ནི་རབ་ཏུ་བཤད་བྱ་ཡིས། །ངས་སྨྲས་པ་ལ་མཉན་པར་གྱིས། །རྟ་མཁན་དང་ནི་རྟ་རྫི་དང་། །རྟ་ལ་གོམ་དང་འགྲོས་མཐུན་དང་། །རིགས་མཐོ་བརྐམ་ཆགས་མེད་ཅིང་དུལ། །བློ་ཟབ་བསྟན་བཅོས་ཤེས་པ་དང་། །གསོ་བ་ལེགས་པར་ཤེས་པ་
དང་། །ནད་གསོ་པ་ལ་མཁས་པ་དང་། །ལན་འདེབས་པ་ལ་མཁས་པ་དང་། །ལོང་ཡོད་པར་ནི་བརྟག་པར་བྱ། །སྐར་མ་ཉིན་ཞག་ཤིས་པ་དང་། །གཟའ་ནི་བཟང་པོ་ལ་བབ་ཚེ། །རྒྱལ་པོ་བློན་པོའི་རྒྱལ་པོ་ཉིད། །གྲོང་ཁྱེར་གྱི་ནི་ཕྱི་རོལ་གྱི། །ཤར་དང་བྱང་གི་
ཕྱོགས་སུ་ནི། །ས་ཕྱོགས་མཉམ་ཞིང་གཙང་བ་དག །ཐག་ཐོགས་མེད་ཅིང་བགྲོད་བདེ་བར། །ཀུན་དུ་མཉམ་པར་གྱུར་པ་ཡིས། །ཆུ་ཞེང་མཉམ་ཞིང་ཤར་དུ་ཡངས། །རིན་ཐང་སྤྱོད་པ་གཙང་མར་གནས། །ཆུར་ནི་གཞུ་འདོམ་ཉིས་བརྒྱ་པ། །ཞེང་དུ་དེ་ཡི་བརྒྱད་
ཆ་རུ། །སྐེ་ནས་འཛིན་པར་བྱེད་པ་ཡི། །མི་རྣམས་ཀྱང་ནི་གཞག་པར་བྱ། །མང་པོ་ལས་ནི་མཆོག་དང་འབྲིང་། །ཐ་མ་སྡེ་ཚོམས་གསུམ་དུ་བྱ། །དེ་རྣམས་མཚན་ཉིད་ངན་པ་ཡི། །ཉེས་དང་རིང་ལས་རིན་ཐང་གདབ། །ཉོ་བྱ་ཉུང་ཞིང་མཉམ་གྱུར་ན། །ཆ་

203-1-224b

མཉམ་པ་ཡི་རིན་ཐང་གདབ། །སོ་སོར་ཡོངས་སུ་བརྟགས་ནས་ནི། །རིན་ཐང་སོ་སོར་གདབ་པར་བྱ། །དེ་བཞིན་བསླབ་པར་བྱ་བ་དང་། །མ་བྱང་བ་ཡི་མཚན་ཉིད་ནི། །ཞོན་ཏེ་འབད་པས་བརྟགས་ནས་ནི། །རིན་ཐང་གདབ་པ་ཉིད་དུ་བྱ། །སྒྲ་ཆེན་སྐྱེ་བོ་མང་པོ་ཡི། །ཐལ་
མོ་ཅ་ཅོ་བསྡིགས་བྱས་པས། །སེམས་ཀྱི་རང་བཞིན་བརྟག་བྱ་ཞིང་། འཇམ་པ་ཡིས་ཀྱང་རེག་པ་བརྟག །གློ་བུར་གླང་ཆེན་འབྲུག་སྒྲ་དག །གྲག་ལས་སྙིང་སྟོབས་བརྟག་པར་བྱ། །གཟི་མདངས་དང་ནི་མི་མཐུན་ཕྱོགས། །ངང་ཚུལ་དང་ནི་དུལ་བ་དག །རེ་རེ་ནས་ནི་ཤར་
ཕྱོགས་སམ། །བྱང་དུ་{ཁ་ནི}བསྟན་བྱས་ལ། །གདོང་ནི་མཐར་ཐུག་ཡོངས་སུ་ནི། །བསྐོར་ཞིང་བརྟག་པ་ཉིད་དུ་བྱ། །ཅི་ནས་འཚོང་དང་ཉོ་བ་དང་། །མཆོག་དང་དགའ་བ་གྱུར་པ་ནི། །རྟ་འདུལ་མཁན་དང་ཚོང་ཁ་བས། །དེ་ལྟར་རང་བཞིན་ངེས་པར་བཅད། །ཉོ་བ་དང་ནི་
ཚོང་པ་དག །ལག་བརྔས་དང་པོར་གོ་བྱས་ལ། །དེ་ཡི་འོག་ཏུ་ཐམས་ཅད་ཀྱི། །མདུན་དུ་གནས་དེ་གསལ་བར་བྱ། །རྟ་ལ་བརྫུན་གྱིས་སླུ་བྱེད་ན། །རིགས་བརྒྱ་ངེས་པར་རླག་འགྱུར་བས། །འཚོང་བའམ་ཉོ་བར་བྱེད་པ་ལ། །སླུ་བ་དག་ཏུ་མི་བྱའོ། །གལ་ཏེ་རིན་ཐང་
གསལ་བྱས་ནས། །རྟ་མི་གཏོང་ངམ་མི་ལེན་ནམ། །གང་ཞིག་འགལ་བར་གྱུར་པ་ན། །དེ་ལ་ཆད་པ་ཅི་རིགས་བཅད། །ཤ་ལི་ཧོ་ཏྲའི་མདོའི་གནས་ལས་ཉོ་ཚོང་བརྟག་པའི་ལེའུ་སྟེ་བཞི་བཅུ་པའོ། །གནས་དང་པོ་རྫོགས་སོ།།      །།ཤ་ལི་ཧོ་ཏྲ་བདེར་གནས་ལ། །
ལེགས་ཐོས་ཀྱིས་ནི་ཡང་དྲིས་པ། །རྗེས་སུ་བཏུང་བའི་ཆང་དག་ནི། །ཅི་འདྲ་བར་ནི་བླུད་པར་བྱ། །ནད་ཀྱི་རང་བཞིན་ཅི་འདྲ་བར། །སྨན་ནི་ཅི་འདྲ་དང་སྦྱར་སྦྱིན། །རོ་ནི་གཞན་དུ་གྱུར་པ་ན། །ཆང་གིས་ནད་ནི་གང་ཞིག་སྐྱེད། །འདིར་ནི་ཆུ་སྦུབས་ཚད་ཅི་ཙམ། །དེ་
བཞིན་ཆང་ནི་ཅི་འདྲ་བླུད། །རྗེས་སུ་བཏུང་བའི་ཆོ་ག་འདི། །སྨྲ་མཆོག་ཁྱེད་ཀྱིས་བསྟན་དུ་གསོལ། །བུ་ཡིས་དེ་སྐད་དྲིས་པ་ན། །ཤ་ལི་ཧོ་ཏྲས་སླར་སྨྲས་པ། །འོད་མ་ཚིགས་ནི་གཉིས་པ་ལས། །སྨན་པ་ཡི་ནི་སོར་ཚད་ཀྱིས། །ཆུར་ནི་སོར་ཡང་བཅུ་དྲུག་ལ། །ཞེང་དུ་

203-1-225a

སོར་གཉིས་ཆུ་སྦུབས་བྱ། །ཟླུམ་ཞིང་རྩེ་མོ་རྟ་རྣ་འདྲ། །འཇམ་ཞིང་ཤིན་ཏུ་སྲ་བ་ལ། །བུ་ག་མཐེ་བོང་ཤོང་ཙམ་ནི། །རྩེ་མོའི་ཕྱོགས་སུ་བྱ་བ་ཡིན། །ཡ་སོའི་གསེབ་ཏུ་བཏང་ནས་ནི། །གཡོན་ཕྱོགས་སུ་ནི་གཞག་པར་བྱ། །བདེ་ཞིང་དྲང་པོར་བཞག་ནས་
ནི། །མགོ་བོར་སླར་ཡང་བརྡེག་བྱས་ལ། །ཆུ་སྦུབས་མཚན་ཉིད་དེ་འདྲ་བ། །སུམ་ཆ་ཉེ་བར་བཟུང་ནས་ནི། །སོར་བཞིར་ཁ་ཡི་ནང་བསྲིངས་ལ། །གནོད་པ་མེད་པར་བླུད་པར་བྱ། །རིང་བར་སྦྱིན་པར་མི་བྱ་ཞིང་། །ཉུང་ཉུང་ཡང་དང་ཡང་མི་སྦྱིན། །དེ་འདྲའི་ཚུལ་གྱི་ཆུ་
སྦུབས་དང་། །རྟ་ལ་བཏུང་བ་བླུད་པར་བྱ། །འོ་མ་ཆང་ལས་གྱུར་པའི་ནད། །ནམ་ཡང་ཆུ་སྦུབས་ཀྱིས་ནི་སེལ། །དེ་བས་ཆུ་དང་འོ་མ་ནི། །ཆུ་སྦུབས་དང་ནི་བླུད་མི་བྱ། །ཆང་ནི་འབུ་ཞུགས་རུལ་པ་དང་། །སྐྱུར་ཞིང་མདོག་ཉམས་སྤྱི་བག་ཅན། །གསར་དང་ཚིག་དང་
ཤུན་པ་ཆགས། །སྙིགས་མར་གྱུར་པ་སྨད་པ་ཡིན། །གང་ཚེ་རྟ་ནི་སྐྱུར་བ་འམ། །སྤྱི་བག་ཅན་གྱི་ཆང་བླུད་ན། །དེ་ཚེ་ཁྲག་དང་མཁྲིས་པ་ནི། །ཐ་མལ་པ་གནས་འཁྲུག་པར་འགྱུར། །ཚིག་ཅིང་ཉམས་པས་བད་མཁྲིས་དང་། །རླུང་ཡང་སྐྱེད་པར་བྱེད་པ་ཡིན། །
དྲི་མི་ཞིམ་ཞིང་རུལ་པ་ཡིས། །རླུང་དང་བད་ཀན་མཁྲིས་པ་དག །གནས་ནས་སྐྱོད་པར་བྱེད་པ་དང་། །བརྒྱལ་དང་རྨོངས་བག་སྐྱེད་པར་འགྱུར། །རྙིངས་དང་ཆང་གི་སྙིགས་མ་དང་། །འབུ་དང་བཅས་པར་སྦྱིན་ན་ནི། །རྟ་ཡི་ནད་གཞི་རྣམས་དང་ནི། །ལུས་གཟུངས་དག་
ཀྱང་འཁྲུགས་པར་འགྱུར། །རོ་དང་མཐུ་མེད་ཆང་གཞོན་དང་། །བླུད་ན་རླུང་ནི་འཁྲུགས་པར་བྱེད། །དེ་བས་ཤས་ཆེར་མངར་གྱུར་པ། །ཁ་དང་ཚ་བའི་རོ་ལྡན་པ། །སྐྱུར་དང་ལན་ཚྭ་ཆེར་མི་བྲོ། །བསྐ་བ་བསྔགས་པར་གྱུར་པ་ཡིན། །ཆང་ནི་རོ་དྲུག་རྗེས་འཇུག་པས། །ཡོན་
ཏན་དྲུག་དང་ལྡན་པ་ཡིན། །མདོག་བཟང་དྲི་ནི་བཟང་བ་དག །གསལ་བ་རྣམས་ནི་བསྔགས་པ་ཡིན། །རོ་ཙ་རླུང་ནི་ཤད་སེལ་ཞིང་། །དྲི་མེད་སྟོབས་ཀྱང་འཕེལ་བྱེད་ཡིན། །ངལ་བ་སེལ་ཞིང་ཡི་གར་འགྲོ། །ཕྱི་ལོ་བསིལ་བྱེད་ཡོན་ཏན་ལྡན། །ལུས་ཀྱི་ནང་ནི་ཚ་བྱེད་

203-1-225b

ཅིང་། །ཞུ་རྗེས་ཀྱང་ནི་ཚ་བ་ཡིན། །བན་ཀན་སྨུག་དང་སྐེམས་པ་སེལ། །ཁྲག་ཀྱང་དང་བར་བྱེད་པ་ཡིན། །གཅིན་སྲི་བ་དང་ཚད་འཁྲུ་བ། །ཕན་ཞིང་རླུང་ནི་བདེ་རྒྱུ་བྱེད། །རྟས་བྱེད་འཇུག་བྱེད་མཆོག་ཡིན་ཞིང་། །མདོག་ཀྱང་གསལ་བར་བྱེད་པ་ཡིན། །མེ་དྲོད་
ཉམས་པས་ཟོས་རྗེས་ལ། །ཆང་འཐུང་མེ་དྲོད་སྐྱེད་པར་བྱེད། །རྟ་ཡི་ནད་ནི་ཐམས་ཅད་ལ། །ཕལ་ཆེར་ཆང་ནི་ཕན་པ་ཡིན། །ཆང་ནི་ཁ་ར་སྦྲང་རྩི་དང་། །སྦྱར་བ་བཏུང་བར་བླུད་གྱུར་ན། །ཁོང་པའི་མེ་དྲོད་སྐྱེད་བྱེད་ཅིང་། །ཁ་ཡི་ལྗན་ལྗིན་སྦྱོང་བར་བྱེད། །བུ་རམ་ཡང་
ནི་ཁྱད་པར་དུ། །རོ་ཙ་བྱེད་ཅིང་རླུང་མཁྲིས་སྐྱེད། །ཁ་ཞིང་བསྐ་བའི་རོ་ལྡན་པ། །ཞུ་རྗེས་ཚ་བར་གྱུར་པ་ཡིན། །ཞུ་རྗེས་ཚ་ཞིང་རྩུབ་པས་ན། །བད་ཀན་སྦྱོང་བར་བྱེད་པ་ཡིན། །དེ་བཞིན་ཚ་ཞིང་རྩུབ་པ་ན། །མཁྲིས་པ་རླུང་ནི་འཁྲུགས་པར་བྱེད། །ཁ་རབ་སིལ་ཞིང་
རྩུབ་པས་ན། །དྲོད་པོ་མིན་པས་རླུང་སྐྱེད་བྱེད། །ནིམ་པ་སེང་ཕྲོམ་པྲི་ཡང་ཀུ། །གླ་སྒང་པི་པི་ལིང་བཏབ་དང་། །སྦྲང་རྩི་དང་ནི་སྦྱར་བ་ཡི། །བཏུང་བ་དཔྱིད་ཀྱི་དུས་སུ་བསྔགས། །ཤིང་མངར་སེང་ཕྲོམ་པི་པི་ལིང་། །པྲི་ཡང་ཀུ་དང་བཅའ་ལྒ་བཏབ། །བུ་རམ་དང་
སྦྱར་བཏུང་བ་བླུད། །སོས་ཀའི་ཚེ་ན་བསྔགས་པ་ཡིན། །ཐང་ཤིང་དང་ནི་བཅའ་ལྒ་དང་། །ལན་ཚྭ་དང་ནི་ཏིལ་མར་དང་། །པི་པི་ལིང་ཕྱེ་བཏབ་པ་ཡི། །རྗེས་སུ་བཏུང་བ་དབྱར་ཚེ་བསྔགས། །ཤུ་ཏི་བཅའ་ལྒ་པི་པི་ལིང་། །ཙི་ཏྲ་ཀ་དང་ན་ལེ་ཤམ། །ཁ་ར་རྒུན་འབྲུ་དང་
སྦྱར་བའི། །རྗེས་སུ་བཏུང་བ་སྟོན་ཚེ་བསྔགས། །འཚོ་བྱེད་སྡེ་ཚན་པི་པི་ལིང་། །ཤིང་མངར་དང་ནི་མ་ནུ་དང་། །སེང་ཕྲོམ་རྒྱམ་ཚ་དང་སྦྱར་བའི། །བཏུང་བ་དགུན་གྱི་དུས་སུ་བསྔགས། །ཟི་ར་དང་ནི་བྱི་དང་ག །ཚ་བ་གསུམ་དང་ཙི་ཏྲ་ཀ །ལྕེ་མྱང་ཚ་དང་སྦྲང་རྩི་བཏབ། །
བཏུང་བ་དགུན་གྱི་དུས་སུ་བསྔགས། །རླུང་དང་མཁྲིས་པ་བད་ཀན་རྣམས། །རྣམ་པ་དུ་མར་འཁྲུགས་གྱུར་པའི། །གསོ་བ་ཉེ་བར་བསྟན་པ་ལ། །རྗེས་སུ་བཏུང་བ་བླུད་པར་བྱ། །ཉི་མ་ཤར་མ་ཐག་ཏུ་ནི། །དང་པོ་གདོང་ནི་བཀྲུས་ནས་ཀྱང་། །ཁོང་པ་དག་གྱུར་རྟ་རྣམས་

203-1-226a

ལ། །རྗེས་སུ་བཏུང་བ་བླུད་པར་བྱ། །ཆུ་ནི་གྲང་མོ་དག་གིས་ཀྱང་། །གདོང་དུ་ཉེ་བར་བླུགས་བྱས་ལ། །རྩྭ་ནི་ཡིད་ཙམ་བྱིན་ནས་ཀྱང་། །ཁྲུས་བྱས་རྗེས་ལ་ཁ་ཟས་སྦྱིན། །སོ་སོའི་མེ་སྟོབས་སོ་སོའི་ནད། །སོ་སོའི་རང་བཞིན་ལས་དཔག་སྟེ། །དུས་ནི་
སོ་སོར་བླུད་བྱ་བས། །དེ་ཕྱིར་སོ་སོར་བཏུང་བར་བཤད། །ཟོས་པའི་རྗེས་ལ་བླུད་བྱ་བས། །རྗེས་སུ་བཏུང་བ་ཞེས་ཀྱང་བཤད། །ཟོས་པའི་རྗེས་ལ་བཏུང་བ་ནི། །འབྲས་ཆང་དྭངས་མ་འབའ་ཞིག་བསྔགས། །སྐོམ་དུ་ཆང་ནི་བླུད་གྱུར་པ། །ཟས་ནི་ཡི་ག་འབྱེད་བྱེད་ཅིང་། །
སྟོབས་ནི་འཕེལ་བར་བྱེད་པ་དང་། །ནད་རྣམས་སེལ་པར་བྱེད་པ་ཡིན། །ལྟོགས་དང་ཤིན་ཏུ་དུབ་པ་དང་། །ལུས་ཀྱི་ཁོང་ཚ་དྲན་པ་ཉམས། །གདོན་ནད་ཅན་དང་དུག་གིས་ཕོག །རྟ་ལ་ཆང་ནི་བླུད་མི་བྱ། །ཆང་བླུད་པ་ཡི་རྟ་ལ་ནི། །ནམ་ཡང་མཉེ་བར་མི་བྱའོ། །དེ་ལྟར་
མེ་དྲོད་ཚུལ་ལས་ནི། །རྫས་སུ་བཏུང་བ་བླུད་པར་བྱ། །རྗེས་སུ་བཏུང་བ་ལན་ཚྭ་ལྟར། །བུ་རམ་ཡང་ནི་སྦྱིན་པར་བྱ། །པི་པི་ལིང་དང་བཅའ་ལྒ་ནི། །དེར་ནི་སྲང་བཞི་གཞུག་པར་བྱ། །ཏིལ་མར་ཕུལ་གང་ཉིད་དང་བསྲེ། །བཏུང་བ་སྔ་དྲོ་བླུད་པར་བྱ། །ཆང་གི་ཉེས་པ་ལས་གྱུར་
པའི། །ནད་ནི་སྣང་གྱུར་གང་ཡིན་ལ། །གསོ་བ་རུ་ནི་བཤད་པ་ཡིན། །སྨན་གྱིས་སླར་ནི་བཅོས་པར་བྱ། །རྗེས་སུ་བཏུང་བའི་དོན་དུ་ནི། །ལེགས་ཐོས་ཀྱིས་ནི་ཡང་སྨྲས་པ། །གང་གི་དུས་སུ་གང་སྦྱིན་ཞིང་། །ཚད་དང་སྨན་ནི་གང་དང་བཅས། །བཏུང་བ་སྨན་ནི་གང་དུ་སྦྱིན། །
ཆང་དྭངས་ཆང་རྙིང་སྦྱར་བའི་ཆང་། །དེ་བཞིན་རྒུན་ཆང་ལ་སོགས་པ། །གང་ཚེ་སྦྱིན་པ་བདག་ལ་གསུངས། །བུ་ཡིས་དེ་སྐད་དྲིས་པ་དང་། །ཤ་ལི་ཧོ་ཏྲས་སླར་སྨྲས་པ། །དགུན་ཚེ་ནས་ཆང་སྦྱིན་བྱ་ཞིང་། །དགུན་སྨད་དུས་སུ་ནས་ཆང་བླུད། །དཔྱིད་ནི་སྦྲང་ཆང་སྦྱིན་
བྱ་ཞིང་། །སོས་ཀ་ཆང་དྭངས་སྦྱིན་པར་བྱ། །དབྱར་གྱི་དུས་སུ་ཆང་རྙིང་སྦྱིན། །སྟོན་ནི་རྒུན་ཆང་སྦྱིན་པར་བྱ། །ཟླ་ཕྱེད་དུས་དང་སྨན་སྦྱར་བ། །གང་ཞིག་བླུད་བྱ་དེ་བཤད་བྱ། །སྔ་དྲོ་ཁོང་པ་སྦྱངས་པ་ལ། །ཆང་གི་དྭངས་མ་ཕུལ་གང་དང་། །དེ་བཞིན་ཏིལ་མར་

203-1-226b

ཕུལ་ཕྱེད་དང་། །ཁ་ར་དཀར་པོ་སྲང་བཅུ་དང་། །ཚ་བ་གསུམ་ནི་སྲང་གཅིག་དང་། །ལན་ཚྭ་ཡང་ནི་སྲང་གཅིག་དག །རྟ་ནི་ཆེན་པོ་ལ་སྦྱིན་བྱ། །དེ་ཡིས་དེ་ལ་ཐོབ་པར་འགྱུར། །བར་མ་ལ་ནི་བརྒྱད་ཆ་དག །དེ་ལ་རྣམ་པར་དབྱེ་བར་བྱ། །པི་པི་ལིང་དང་ན་ལེ་ཤམ། །
པ་ར་ཆུ་དག་པུ་ཙེ་ཤེལ། །བཅའ་ལྒ་དང་ནི་ཤིང་ཀུན་དག །སྲང་གཅིག་དག་ནི་ཡིན་པར་བཤད། །སྔར་བཤད་པ་ཡི་ཚད་ལས་ནི། །ཕུལ་གང་ཉིད་ནི་འདི་ལ་སྦྱིན། །ལན་ཚྭ་ཁ་ར་ཏིལ་མར་ནི། །སྔར་བཤད་པ་ཡི་ཕྱེད་དུ་འདོད། །ཆང་བླུད་རྗེས་ལ་འོ་མ་ནི། །འབད་
དེ་ཡོངས་སུ་སྤང་བར་བྱ། །དེ་བཞིན་འོ་མ་བླུད་རྗེས་ལ། །ཆང་སྦྱིན་པར་ཡང་མི་བྱའོ། །ཆང་འཐུངས་རྗེས་ལ་སྐོམ་བླུད་པའམ། །ཟས་ཀྱི་རྗེས་ལ་བླུད་པའང་རུང་། །ཟས་ནི་དུས་རྣམས་ཀུན་དུ་སྦྱིན། །སྐོམ་ནི་ཕྱི་དྲོ་བླུད་པར་བྱ། །སྐོམ་བླུད་རྗེས་ལ་རྩོལ་དྲག་པ། །རྣམ་
པ་ཀུན་དུ་སྤང་བར་བྱ། །ཟླ་ཕྱེད་དུས་སུ་གང་སྦྱིན་པ། །དེ་ནི་ཅི་བཞིན་སྔར་བཤད་ཡིན། །ཤ་ལི་ཧོ་ཏྲའི་གནས་བདུན་པ་ལས་རྗེས་སུ་བཏུང་བ་བསྟན་པའི་ལེའུའོ།།      །།ཤ་ལི་ཧོ་ཏྲ་ཐུབ་མཆོག་ལ། །ལེགས་ཐོས་ཀྱིས་ནི་ཡང་དྲིས་པ། །སྨན་པ་མཆོག་གིས་རྟ་
རྣམས་ལ། །རོ་དྲུག་པོ་ནི་དགོས་པར་གསུངས། །རོ་དྲུག་པོ་ནི་དགོས་པ་ལ། །འདི་ལ་ཤས་ཆེར་ལན་ཚྭ་ནི། །སྦྱོར་བ་ཀུན་ལ་རབ་ཤེས་ཏེ། །ལུས་ནི་རྟས་པར་བྱེད་པ་དང་། །ཁ་ཟས་ལེན་པར་ནུས་པ་དང་། །ལྟོ་བར་ཕྱིན་པར་གྱུར་པ་ནི། །ལེགས་ཉེས་ཅི་འགྱུར་རྒྱུ་དེ་གསུངས། །
དེ་སྐད་དྲིས་ཚེ་ལེགས་ལྡན་ནི། །ཤ་ལི་ཧོ་ཏྲས་སླར་སྨྲས་པ། །རྟ་ནི་རླུང་གི་ཤུགས་ལྡན་ཞིང་། །རླུང་ཤས་ལྷག་པར་ཆེ་བ་ཡིན། །རླུང་འཇོམས་པས་ནི་རོ་དྲུག་ལས། །ལན་ཚྭ་རྟ་ལ་མཆོག་ཏུ་བསྔགས། །མདངས་ནི་རྣམ་པར་འཕེལ་བྱེད་ཅིང་། །སྦྱོར་བ་ཀུན་དང་རྗེས་མཐུན་ལ། །
ལྗང་པ་ཤས་ཆེར་མངར་བས་ན། །འཇུ་དཀའ་བར་ནི་བཤད་པ་ཡིན། །དེ་བས་ལན་ཚྭ་ཕན་གྱུར་ཅིང་། །རྟ་རྣམས་རྟས་པར་བྱེད་པ་ཡིན། །གཞན་ཡང་ལན་ཚྭའི་ཡོན་ཏན་རྣམས། །ང་ཡིས་བཤད་ཀྱིས་དེ་ཉན་གྱིས། །འདྲུལ་ཞིང་དྲོད་ནི་སྐྱེད་བྱེད་ལ། །ཟས་འཇུ་ལུས་རྒྱས་

203-1-227a

བྱེད་པའི་མཆོག །དྲགས་ན་བད་ཀན་སྐྱེད་བྱེད་ཅིང་། །ལུས་ཀྱང་ལྷོད་པར་འགྱུར་བ་བཤད། །རན་པས་ཁ་ནི་སྦྱོང་བྱེད་ཅིང་། །སྟོབས་སྐྱེད་མདོག་ནི་དག་བྱེད་ཡིན། །གང་ཞིག་རླུང་ནད་ཀྱིས་ཉེན་དང་། །གང་ཞིག་རྩྭ་དང་འགྲས་པ་དང་། །གང་ཡང་
ཡིད་མི་བདེར་གྱུར་དང་། །གཉིད་ནི་མེད་པར་གྱུར་པ་དང་། །གང་ཞིག་མེ་དྲོད་ཉམས་པའམ། །གང་ཞིག་མེ་དྲོད་མ་སྙོམས་དང་། །ལུས་གཟུངས་རྣམས་ལ་གནོད་བྱ་ལས། །བརྟས་ཀྱང་ཚོན་པོར་མ་གྱུར་དང་། །དེ་ལ་ཚད་ལྡན་ལན་ཚྭ་ནི། །བྱིན་ན་ནད་རྣམས་སེལ་བྱེད་ཡིན། །
ལན་ཚྭ་འབའ་ཞིག་བྱིན་པའམ། །ཆང་དང་སྦྱར་ཏེ་སྦྱིན་པར་བྱ། །ལན་ཚྭ་ཕོ་བའི་མེ་དྲོད་ནི། །སྐྱེད་ཅིང་མདོག་སྟོབས་འཕེལ་བྱེད་ཡིན། །ལུས་ནི་རྣམ་པར་རྒྱས་བྱེད་ཡིན། །ཟས་ཀྱང་མང་དུ་ཟ་བར་ནུས། །དེ་ལྟར་ལན་ཚྭའི་ཡོན་ཏན་ནི། །བཤད་ནས་སོ་སོའི་དབྱེ་བ་
བསྟན། །རྒྱམ་ཚ་དང་ནི་ཁ་རུ་ཚ། །རྒྱ་མཚོའི་ཚ་དང་མཚོ་ཚ་དང་། །ཡ་བཀྵ་ར་སྲོ་ཧྣི་ཀ །རྩལ་རུ་ཚ་ནི་བདུན་པ་ཡིན། །བུལ་ཏོག་བརྒྱད་པ་ཉིད་ཡིན་ནོ། །འདི་ནི་ལན་ཚྭའི་ཚོགས་སུ་འདོད། །ཀུན་ལ་རྒྱ་ཚ་མཆོག་ཡིན་ཏེ། །དེ་ནས་རིམ་གྱིས་ཡོན་ཏན་ཆུང་། །
འདི་རྣམས་སྦྱོར་བའི་ཚད་དང་ནི། །དུས་ཀྱང་ང་ལས་ཉན་པར་གྱིས། །ཟས་དང་རྗེས་སུ་བཏུང་བ་ལ། །དེ་ཡི་ཁུ་བ་དང་སྦྱར་བྱ། །སྔ་དྲོའམ་ཡང་ན་ཕྱི་དྲོ་འམ། །ཡང་ན་ཁྲུས་བྱས་དུས་སུ་ནི། །རྟག་ཏུ་ལན་ཚྭ་བྱིན་གྱུར་ན། །མེ་དྲོད་རྣམ་པར་འཕེལ་བྱེད་ཡིན། །
སྦེགས་དང་རྒན་དང་ཤིན་ཏུ་གཞོན། །དེ་བཞིན་སྐོམ་གྱིས་གདུངས་པ་དང་། །མཁྲིས་པ་ཁྲག་གི་ནད་བཅས་དང་། །གང་ཡང་བད་ཀན་གྱིས་ཉེན་དང་། །གཅིན་ནི་ཁྲག་འདྲ་འབྱུང་བ་ཡི། །ནད་ནི་གང་ཚེ་སོགས་གྱུར་པ། །དེ་ཚེ་བཏང་ན་ཐམས་ཅད་ལ། །ཁོང་པར་
གནོད་པ་སྐྱེད་པར་བྱེད། །ལན་ཚྭའི་སྦྱོར་ཉེས་ཁོང་པར་ནི། །ཁྲག་གི་ནད་ནི་སོག་པར་བྱེད། །མཁྲིས་པ་ཡང་ནི་སྐྱེད་བྱེད་ཡིན། །བད་ཀན་ཡང་ནི་སྡུད་པར་འགྱུར། །ཁྲག་དང་མཁྲིས་པ་ལས་བྱུང་བའི། །ཚ་བ་སྙིང་གར་སྐྱེད་པར་བྱེད། །དེ་ནི་རྨིང་བག་སྐྱེ་འགྱུར་ཏེ། །

203-1-227b

རྟགས་འདིས་སྦྱོར་ཉེས་ཡིན་ཤེས་བྱ། །སྙིང་ག་ཚ་ཞིང་ཁ་ནས་ནི། །ཁ་ཆུ་ལྦུ་བ་དང་བཅས་འབྱུང་། །ཆུ་ལ་མངོན་པར་དགའ་བ་དང་། །རྟག་ཏུ་འཐུང་བར་འདོད་པར་འགྱུར། །ཉམ་ཆུང་བཤང་བ་སྲི་བ་དང་། །ལྕེ་ཡང་འབྱིན་པར་བྱེད་པར་འགྱུར། །རྩྭ་ལ་སྲེད་པ་ཆུང་
བ་དང་། །ས་ལ་ལྕེ་ཡིས་འདེགས་པར་བྱེད། །ཀུན་དུ་དབུགས་རྒོད་ལུས་རུལ་ཞིང་། །མཁྲིས་པའི་ཚ་བས་གདུངས་པ་དང་། །སྙིང་ག་སྲེག་པ་སྙམས་སེམས་ཤིང་། །དེ་ཡི་ཁ་ཡང་སྐམས་པར་འགྱུར། །མགོ་བོ་འགུགས་ཤིང་སྐེ་བར་འཇོག །མདོག་ཉམས་
ལུས་ནི་བཅག་པར་འགྱུར། །ལན་ཚྭ་ལས་འགྱུར་ནད་དེ་འདྲར། །ཤེས་པར་བྱས་ནས་གསོ་བ་བརྩམ། །ཆུ་ལ་སྦང་དང་བླུགས་པ་དང་། །འདམ་གྱིས་ཡོངས་སུ་བསྐུ་བར་བྱ། །ཆུ་བསིལ་ཁ་ར་དང་སྦྱར་བའི། །བཏུང་བ་དེ་ལ་བླུད་པར་བྱ། །ཆུ་གྲང་ལ་ནི་སྦང་བར་
བྱ། །འཐུང་དུ་གཞུག་པར་མི་བྱའོ། །འབྲས་ཆང་གྲང་མོ་འོ་མ་དང་། །མར་དང་སྦྲང་རྩི་དང་སྦྱར་བྱིན། །བ་རུ་ཤ་ཀ་རྒུན་འབྲུ་དང་། །ཙི་ལུའི་འབྲས་བུ་ཁ་ར་དཀར། །སྦྲང་རྩི་དང་ནི་བསྲེས་པ་ཡིས། །སྨན་གྱི་ཆང་བུ་དེ་ལ་བྱིན། །སྔར་བཤད་པ་ནི་གང་ཡིན་
པ། །ཁ་སྦྱོང་ཆོ་ག་དེ་ཡང་བྱ། །ནས་དང་འབྲས་ནི་དྲུག་ཅུ་པ། །བ་གཅིན་དང་ནི་སྦྲུས་པ་བྱིན། །ཡང་ན་འབྲས་ཆན་བ་ལ་དང་། །སྐྱུར་རྩབས་དང་ནི་སྦྱར་བ་བྱིན། །ཕལ་ཆེར་མངར་ཞིང་རླུང་འཇོམས་པའི། །སྨན་གྱིས་བདའ་བའི་ཆོ་ག་བྱ། །ཁྲག་དང་མཁྲིས་པ་
སེལ་བ་ཡི། །མངར་བའི་སྨན་གྱི་འཇམ་རྩི་གཏང་། །གལ་ཏེ་ཁྲག་ནི་ཤས་ཆེ་བས། །ལུས་ནི་ཤིན་ཏུ་ལྕི་གྱུར་ན། །རྟ་ལ་གཏར་ག་བྱས་གྱུར་ན། །བདེ་བ་ངེས་པར་འཐོབ་པར་འགྱུར། །ངང་པ་ངུར་པ་ཁྲུང་ཁྲུང་དང་། །ཆུ་བྱ་གཞན་དང་འོལ་བྱ་དང་། །རྨ་བྱ་ཁྱིམ་བྱ་སྲེག་
པ་ཡི། །ཤ་ལས་ཤ་ཁུ་བྱས་ཏེ་སྦྱིན། །གནས་ནི་བདེ་ཞིང་སེར་བུ་རྒྱུ། །བསིལ་ཞིང་ཆག་ཆག་བཏབ་པར་གཞག །ཨུཏྤལ་བརྒྱད་པ་དཱུར་བ་དང་། །རྟ་མ་བྲིཏྟ་ཨརྫུ་ན། །རྩྭ་ཡི་ཕྱེད་དུ་སྦྱིན་བྱས་ན། །དེས་ནི་བདེ་བ་འཐོབ་པར་འགྱུར། །ཤ་ལི་ཧོ་ཏྲའི་གནས་བདུན་པ་

203-1-228a

ལས་ལན་ཚྭའི་སྐྱོན་དང་ཡོན་ཏན་བསྟན་པའི་ལེའུའོ།།      །།ལེགས་ཐོས་ཐོས་པ་ཕུན་ཚོགས་པས། །ཤ་ལི་ཧོ་ཏྲ་ལ་དྲིས་པ། །ཁྱེད་ནི་རྟ་ཡི་ཚེ་རིག་བྱེད། །ཡན་ལག་བརྒྱད་ཀྱི་དེ་ཉིད་མཁྱེན། །རྒྱུ་དང་མི་རྒྱུའི་འདྲི་བ་ནི། །ཆུ་ལ་རག་ནི་ལས་པ་ལགས། །
འགྲོ་བ་འབྱུང་དང་འབྱུང་འགྱུར་དང་། །དེ་ལྟར་གང་ཞིག་གནས་པ་ཡི། །སེམས་ཅན་རོ་ལ་རྣམ་པར་བརྟེན། །རོ་ཡང་ཆུ་ལས་འབྱུང་བར་བཤད། །མཆོག་ཏུ་རྟ་ནི་རོ་ཀུན་གྱི། །བདག་ཅག་ཆ་ནི་སྐོག་ཏུ་བཤད། །འདི་ནི་རྟ་ཡི་ཁང་པ་ན། །གནས་ཚེ་ནད་ནི་ཅི་ལྟར་བསྐྱེད། །ཟས་ཀྱི་
ནང་དུ་རོ་གང་ཞིག །ཆུ་ཡིས་རྣམ་པར་རྒྱས་པར་བྱེད། །སྨན་པ་མཆོག་ལས་འདི་དག་གི། །ངེས་པ་བདག་ནི་མཉན་པར་འཚལ། །བུ་ཡིས་དེ་སྐད་དྲིས་པ་དང་། །ཤ་ལི་ཧོ་ཏྲས་སླར་སྨྲས་པ། །ལེགས་ཐོས་འདི་དག་ཐམས་ཅད་ནི། །ཡང་དག་ཉིད་དུ་མཉན་པར་གྱིས། །ཆུ་
དང་ཤིང་ནི་མང་བ་དང་། །རླུང་མང་ཐན་པ་མེད་གྱུར་པ། །དེ་ནི་རླན་ཅན་ཡིན་ཞེས་བྱ། །རྟ་ལ་མཆོག་ནི་ཡིན་པར་འདོད། །གང་ན་ཤིང་དང་ཆུ་ཉུང་ཞིང་། །རླུང་མེད་ཐན་པ་ཆེ་གྱུར་པ། །ཡུལ་དེ་སྐམས་པ་ཅན་ཞེས་བྱ། །རྟ་ལ་རྟག་ཏུ་བཟང་མ་ཡིན། །རླན་ཅན་སྐམས་པ་
འདྲེན་མ་ནི། །དེ་ནི་ཐུན་མོང་ཡིན་པར་བཤད། །དེ་ལྟར་རྣམ་པ་གསུམ་པོ་ཡི། །ཡུལ་ལས་གོམས་པར་འབྱུང་བ་ཡིན། །ཡུལ་ནི་ཡོན་ཏན་མང་བ་ལས། །བུ་ཡི་ཡོན་ཏན་ཆེན་པོར་འགྱུར། །ཆུ་ཡི་ཡོན་ཏན་ཆུ་ལས་ནི། །སྨན་རྣམས་ཀྱི་ནི་ཡོན་ཏན་འབྱུང་། །སྨན་གྱི་ཡོན་ཏན་རྫོགས་
གྱུར་ན། །ལུས་ཀྱི་ཡོན་ཏན་ཆེན་པོ་སྐྱེད། །དེ་ཕྱིར་རྟ་ཡི་ལུས་འཛིན་པ། །གཙོ་བོ་ཡུལ་ནི་ཡིན་པར་བཤད། །བསིལ་ཞིང་འཚོ་བྱེད་རླན་པར་བྱེད། །ཤིན་ཏུ་ཕྲ་ཞིང་བརྟགས་པ་དང་། །ཁྱབ་ཅིང་རི་ཡི་གནས་གྱུར་ལ། །ཡང་ཞིང་སྣུམ་པ་བཅུད་ལེན་འགྱུར། །ཆུ་ནི་སེམས་
ཅན་ཐམས་ཅད་ཀྱི། །དགོས་པའི་གཙོ་ཡིན་རིགས་དྲུག་ལྡན། །དེ་ལས་ཆར་ཆུ་མཆོག་ཡིན་ཏེ། །དེ་ནི་རླུང་དང་འདྲེ་བར་འགྱུར། །ལྡུད་ཅིང་ཕྱོགས་ཀྱི་གཙོར་གྱུར་ལ། །རང་བཞིན་གྱིས་ནི་མཁའ་ལ་གནས། །ཆུ་ལ་རོ་གང་མི་སྣང་བ། །དེ་ནི་ཡུལ་ལས་བརྟག་པར་བྱ། །

203-1-228b

རོ་ནི་གང་ཡང་མི་བྲོ་ཞིང་། །གཙང་ཞིང་དྭངས་ལ་དྲི་མེད་པ། །མ་འདྲེས་སླ་ལ་བསིལ་ཞིང་ཡང་། །ཆུ་དེ་ནད་གཞི་གསུམ་སེལ་ཡིན། །སྐོམ་པ་འཇོམས་ཤིང་གཙང་བྱེད་ཅིང་། །གཞན་ཡང་འདི་དང་འདྲ་མཆོག་ཡིན། །དེ་ལས་བཟློག་པ་པར་གནས་པ། །སྨད་དེ་ཁྲག་དང་
ཉེས་གསུམ་བསྐྱེད། །རྫིང་བུའི་ཆུ་ནི་རླུང་སྐྱེད་དེ། །ཁྲོན་པའི་ཆུ་ཡིས་མཁྲིས་པ་སྐྱེད། །ཆུ་བལ་ཅན་ནི་བད་ཀན་སྐྱེད། །རྒྱ་མཚོའི་ཆུ་ཡིས་ཉེས་ཀུན་སྐྱེད། །འབུ་ཅན་ལྕི་ཞིང་འཇུ་དཀའ་ལ། །ཉི་མའི་ཟེར་དང་མ་ཕྲད་དང་། །ཡུལ་ཕྱོགས་ཉེས་པའི་ཁྱད་པར་གྱིས། །གནོད་
བཅས་དེ་ནི་སྨད་པ་ཡིན། །ཆུ་བོ་རྫིང་དང་བང་སོ་ཡི། །ཆུ་ནི་རྒྱུན་གྱི་དུས་སུ་བསྔགས། །གཡའ་ཆུ་བསིལ་མོ་གང་ཡིན་པ། །དེ་ནི་སོས་ཀའི་དུས་སུ་བསྔགས། །ཁྲོན་པའི་ཆུ་ནི་དབྱར་ཚེ་བསྔགས། །སྟོན་གྱི་ཆུ་ནི་ཐམས་ཅད་བཟང་། །ཁ་ར་འོ་མ་དང་བསྲེས་པ། །དགུན་
གྱི་དུས་སུ་བསྔགས་པ་ཡིན། །ས་ཕྱོགས་དཀར་ལས་བསྐ་དང་སེར་ལས་ཚ། །དམར་བས་ཁ་བ་སྐྱ་ལས་ལན་ཚྭ་ཅན། །གྲོ་བོ་ལས་གྱུར་གནག་ལས་མངར་བག་ཅན། །འབྱུང་བར་འགྱུར་ཞེས་བསྟན་བཅོས་མཁན་རྣམས་འཆད། །འདི་ནི་ལོག་པར་བླུད་པ་ལས། །ཆུ་
ཡིས་ཁོང་པར་ནད་སྐྱེད་དེ། །ཐན་པར་རིང་དུ་ལམ་ཞུགས་དང་། །ཁུར་ལྕི་བ་ཡིས་ཉེན་པ་དང་། །ཤིན་ཏུ་དུབ་པར་གྱུར་པ་ཡིས། །རྔུལ་ཞིང་སྐོམ་གྱིས་ཉེན་པ་དང་། །ལྟོ་སྟོང་གནས་དང་ངལ་མ་བསོས། །ཉེས་ཤིང་སྨན་གྱི་སྦྱོར་མ་རྫོགས། །ཆུ་ལ་སྦངས་པའི་མོད་ལ་
ནི། །གང་ཚེ་བླུན་པོས་ཆུ་བླུད་ན། །དེ་ཚེ་གནོད་པས་བསྐྱོད་པ་ཡིས། །ཆུ་ནི་མང་དུ་འཐུང་གྱུར་ཞིང་། །དབུགས་མ་བཏོན་པར་འཐུངས་པ་ལས། །སྣོད་ལས་ལྷག་པར་གྱུར་པ་སྟེ། །དབུགས་ཆུང་བར་ནི་གྱུར་པ་ན། །རླུང་གིས་ཀུན་དུ་སྐྱོད་པར་བྱེད། །དེ་ཚེ་རྩེ་གང་ལྟེ་
བ་དང་། །འབྲེལ་དང་སྙིང་ག་ལ་བརྟེན་དང་། །ལྟོ་བར་ཆུ་ནི་རྒྱུ་བའི་ཚེ། །གང་ཚེ་འཕྲལ་དུ་ཆུས་རྒྱས་འགྱུར། །རླུང་གིས་ཀུན་དུ་བསྐྱོད་གྱུར་ཅིང་། །དེ་ཡི་ལྟོ་ལ་རྒྱས་བྱས་ལས། །མཚན་མ་མཁལ་མའི་ནད་སྐྱེད་ཅིང་། །ལྟོ་སྦོས་ཀྱང་ནི་འབྱུང་འགྱུར་བའམ། །ལོག་པར་

203-1-229a

བླུད་པ་ལས་བྱུང་བའི། །འཆི་བ་ཉིད་ནི་འབྱུང་བར་འགྱུར། །དེ་ཡི་ལྟོ་བ་སྐྲངས་གྱུར་པའམ། །ཆུ་ཡིས་དམུ་རྫིང་འབྱུང་བར་འགྱུར། །དེ་ཡི་ལུས་ལ་སྐྲངས་འགྱུར་ཞིང་། །ཁོང་པར་ཆུ་ཡང་འཕེལ་བར་འགྱུར། །དེ་ཡི་སྐོམ་དད་མི་ཞི་ཞིང་། །སྤུ་ཡང་
འབྱི་བར་འགྱུར་བ་ཡིན། །གོམ་པ་ལྕི་ཞིང་སྟོབས་ཆུང་ལ། །ལྡང་བར་དཀའ་ཞིང་སྦེགས་པར་འགྱུར། །གཅིན་རྟུག་སྲི་བར་འགྱུར་བ་དང་། །རྟག་ཏུ་འདུག་པ་ལ་དགར་འགྱུར། །མིག་ནི་དམར་ཞིང་ཞུམ་པ་དང་། །ལྟེ་བར་སྒྲ་ཡང་འཁྲོག་པར་འགྱུར། །ཤིན་ཏུ་སྐྲག་
པར་འགྱུར་བ་དང་། །མདོག་དང་དབང་པོ་ཞན་པར་འགྱུར། །དེ་ལྟར་ནད་གཞི་ཤེས་བྱས་ལ། །གསོ་བའི་ལས་ནི་བརྩམ་པར་བྱ། །ལྟོ་བ་ཏིལ་མར་གྱིས་བྱུགས་ལ། །གསོ་མའི་ལོ་མའི་དུགས་ཀྱང་བྱ། །ཤི་ཏ་བ་ལི་ནིམ་པ་དང་། །ཨ་རུ་རའི་ཤ་པ་ཏ་ལ། །སྣ་མ་ཀ་
ར་བཱི་རའི་རྩི། །བཏགས་པ་དར་བ་དང་སྦྱར་བ། །ལན་ཚྭ་ལྔ་པོ་བཏབ་པ་ནི། །སྔ་དྲོ་རྟ་ལ་བླུད་པར་བྱ། །དེས་ནི་ཀྱུ་རུ་ཆུ་འབྲས་དང་། །རུས་སྐྲངས་ཆུ་ཡི་དམུ་རྫིང་ལ། །སྟོབས་དང་ཁ་དོག་གཟི་མདངས་དག །རྣམ་པར་འཕེལ་བར་འགྱུར་བ་ཡིན། །ཧ་རེ་ཎུ་ཀ་པྲི་ཡང་ཀུ། །
རྒུན་འབྲུ་ཤུ་དག་སྤང་སྤོས་དང་། །ཛ་ཏི་ཀ་ར་བཱི་རའི་རྩི། །ཆུ་ཡི་ནང་དུ་བསྐོལ་བར་བྱ། །ཁུ་བ་དེ་ནི་ལན་ཚྭར་བཅས། །སྔ་དྲོའི་ཚེ་ན་བླུད་པར་བྱ། །ཡང་དང་ཡང་དུ་ངལ་སོས་ལ། །ཞག་གསུམ་གྱིས་ཆོད་མང་དུ་སྦྱིན། །གལ་ཏེ་དེས་བདེར་མ་གྱུར་ན། །དེ་ལས་ཆུ་ནི་གནོད་
བྱས་ལ། །ཆུ་ཡི་དམུ་རྫིང་གསོ་བ་ལས། །བཤད་པའི་ཆོ་ག་འདི་ལ་གཏང་། །ཕག་དང་བྱ་རོག་པྲི་ཤ་ཏ། །ནེའུ་ལེ་ཁྱིམ་བྱ་འུག་པའི་ཤ །ཁུ་བར་བཅས་པ་བྱིན་གྱུར་ན། །དེས་དེ་འཚེ་བ་མེད་པར་འགྱུར། །ཤ་ཁུ་ཤིན་ཏུ་མི་སྐྱུར་ཞིང་། །སྣུམ་ཞོ་པི་པི་ལིང་བཏབ་པ། །
ཟི་ར་དང་ནི་བཅའ་ལྒ་དང་། །ཚ་ཡང་རན་པ་དང་སྦྱར་བྱ། །དེ་དང་སྦྱར་བའི་འབྲས་ཆན་ནི། །དྲུག་ཅུ་པ་རྙིང་ལས་བྱས་སྦྱིན། །ཟས་འདི་དང་ནི་འཇམ་རྩི་དག །ཞག་རེ་ཡིས་ནི་ཅི་མང་གཏང་། །ཞག་རེ་ཞིང་ནི་ལུས་ཀུན་ལ། །སྣུམ་གྱིས་ལེགས་པར་བསྐུ་བར་བྱ། །ནས་ཟན་འོ་

203-1-229b

མའམ་ཤ་ཁུ་འམ། །བཅས་པའི་ཟས་ཀྱང་སྦྱིན་པར་བྱ། །དེ་ནི་གཙང་ཞིང་རླུང་མེད་པའི། །གནས་ནི་བདེ་བར་གཞག་པར་བྱ། །བི་བན་ཛི་ཀ་ཀུ་ལ་དང་། །ཤ་ཤ་བེན་བུ་མོན་སྲན་སྡེའུ། །རྩྭ་ཡི་དོན་དུ་སྦྱིན་བྱ་ཞིང་། །དུར་བྱིད་ཀྱང་ནི་བླུད་པར་བྱ། །དེ་འདྲ་བས་ནི་ཆུ་ཡི་
ནད། །སེལ་ཞིང་བདེ་བར་འགྱུར་བ་ཡིན། །ཤ་ལི་ཧོ་ཏྲའི་གནས་བདུན་པ་ལས་ཆུ་ཤོར་བའི་ནད་གསོ་བའི་ལེའུའོ།།      །།ལེགས་ཐོས་ཐོས་པ་ཕུན་སུམ་ཚོགས། །རྟ་ཡི་ཁོང་པར་ཕྱིན་ནས་ནི། །ཕ་ཡི་རྐང་པ་ལ་བཏུད་དེ། །འདྲི་བའི་ཚིག་ནི་འདི་སྐད་སྨྲས། །བླ་མའི་
རྫས་ཀྱི་ནང་ན་ནི། །འོ་མ་མཆོག་ནི་ཡིན་པར་བཤད། །རྒྱུ་བའི་འགྲོ་བ་མར་དང་ནི། །འོ་མའི་བདག་ཉིད་ལ་བརྟེན་ལགས། །དེ་ཕྱིར་ཡོན་ཏན་ཀུན་འོ་མ། །རོ་དེས་ཕན་ཚུན་ཉིད་ཁྱབ་ན། །རྟ་ཡི་ཁོང་པར་བྱིན་པ་ན། །ནད་དུ་ཅི་ཕྱིར་གྱུར་པ་ལགས། །དེ་སྐད་སྨྲས་ཚེ་ལེགས་
ལྡན་གྱིས། །དྲིས་པ་ཀུན་གྱི་ལན་སྨྲས་པ། །འོ་མ་ཡོན་ཏན་གྲངས་མེད་ཅིང་། །རྫས་རྣམས་ཀུན་གྱི་དམ་པ་ཡིན། །ལུས་ཅན་དང་ནི་ལྷན་ཅིག་ཏུ། །བྱུང་བས་སྐྱེས་ནས་བརྩམས་ཏེ་གོམས། །རོ་རྣམས་ཀྱི་ནི་མཆོག་ཡིན་ཞིང་། །ཚེ་འཕེལ་བྱེད་པ་ཉིད་ཀྱང་ཡིན། །དེ་ཕྱིར་
འོ་མ་མཆོག་ཡིན་ནོ། །གཞན་ཡང་འདི་ཡི་ཡོན་ཏན་ཡང་། །བ་དང་ར་དང་བུད་མེད་དང་། །དེ་བཞིན་མ་ཧེ་ཉིད་དང་ནི། །བ་གླང་རྔ་མོ་རྟའི་འོ་མ། །དེ་བཞིན་ལུག་གི་བརྒྱད་པ་ཡིན། །འདི་དག་ཐམས་ཅད་མངར་བ་དང་། །སྣུམ་ཞིང་བསིལ་བ་ཡིན་པར་བཤད། །རྟས་བྱེད་
ཁོང་སྣུམ་ཕན་རོ་ཙ། །བློ་བསྐྱེད་བཅུད་ཀྱིས་ལེན་འགྱུར་ཡིན། །འཚོ་བྱེད་ཡིན་ཞིང་ངལ་བ་དང་། །དབུགས་མི་བདེ་དང་ཉོན་མོངས་སེལ། །ཁྲག་མཁྲིས་ནད་ནི་ཞི་བྱེད་ཡིན། །ཚིགས་རྣམས་བདེ་བར་བྱེད་པ་ཡིན། །འདི་ནི་ལྷག་པར་རྟ་རྣམས་ལ། །བླུད་ན་སྲོག་ནི་
འཕེལ་བྱེད་འགྱུར། །སྐོམ་དད་འཕེལ་ཞིང་མེ་དྲོད་སྐྱེད། །སྦེག་ཅིང་ཉམ་ཆུང་ལ་མཆོག་ཡིན། །རླུང་འཁྱིལ་ལྟོ་བའི་ནད་རྣམས་དང་། །དབུགས་མི་བདེ་ལ་མཆོག་ཏུ་ཕན། །ཚད་པར་འཁྲུ་དང་རིམས་པ་དང་། །སྐྲངས་པ་དང་ནི་སྦྲུམ་མ་དང་། །མངལ་གྱི་ནད་དང་

203-1-230a

གཅིན་སྲི་བའི། །ནད་ལའང་ཤིན་ཏུ་བསྔགས་པ་ཡིན། །བཤད་པ་སྲི་བར་བྱེད་པ་དང་། །དེ་བཞིན་རླུང་གི་ནད་ཀྱང་སེལ། །སྣ་སྨན་ལྡེ་གུ་ལུས་སྨན་དང་། །རྟ་ཡི་ཆོ་ག་རྣམས་ལ་བསྔགས། །ཟུགས་དང་དེ་བཞིན་དུག་ལ་ཡང་། །ཐམས་ཅད་དུ་
ནི་འོ་མ་བཟང་། །ན་ཚོད་ལ་འཇུག་ཚེ་ལ་ཕན། །སྟོབས་བསྐྱེད་པ་ཡང་བསྟེན་ན་གྲུབ། །གསོ་བའི་སྦྱོར་བ་དུས་དང་ནི། །གོམས་དང་ནད་ཚུལ་ལེགས་བརྟགས་ནས། །ལེགས་པར་བཏང་ན་རྟ་ཡི་ནད། །ཐམས་ཅད་འོ་མས་སེལ་བར་འགྱུར། །བ་ཡི་འོ་མའི་
བསིལ་བཅུད་ལེན། །ཞུ་རྗེས་མངར་ཞིང་ཕན་པ་ཆེ། །རླུང་མཁྲིས་སེལ་ཞིང་ཁོང་སྣུམ་བྱེད། །འཚོ་བྱེད་རྟས་བྱེད་མཆོག་ཡིན་ནོ། །ར་ཡི་འོ་མའང་དེ་འདྲ་ལས། །སྐྲ་དང་ཚད་འཁྲུ་དག་ལ་ཕན། །མ་ཧེའི་འོ་མ་ཤིན་ཏུ་ལྕི། །བ་ཡི་བས་ཀྱང་དེ་བསིལ་ཞིང་། །སྣུམ་
ཆེ་གཉིད་མེད་ལ་ཕན་གྱི། །མེ་དྲོད་ཉམས་པར་བྱེད་པ་ཡིན། །རྔ་མོའི་ཚ་ཞིང་ལན་ཚྭ་བྲོ། །གཞང་འབྲུམ་སྐྲངས་དང་ལྟོ་ནད་སེལ། །ལུག་གི་ལྕི་ཞིང་བད་ཀན་སྐྱེད། །མངར་ཞིང་སྣུམ་ཤས་ཆེ་བ་ཡིན། །རྟ་ཡི་འོ་མ་ཞུ་རྗེས་ཚ། །ཡང་ཞིང་ཕན་པར་བྱེད་པ་ཡིན། །
བ་གླང་འོ་མ་ཚ་ཞིང་ཞིམ། །ཡང་ཞིང་ལུད་པ་ཐམས་ཅད་སེལ། །བུད་མེད་འོ་མ་མངར་བཅས་སྣུམ། །མིག་ནད་རྣམས་ལ་ཕན་པ་ཡིན། །སྐྱེ་གནས་གོམས་པས་ལུས་རྟས་བྱེད། །མངར་བས་བད་ཀན་འཕེལ་བྱེད་ཡིན། །བསིལ་བས་སྣུམ་པ་སྐྱེད་བྱེད་ཡིན། །གྲང་
བས་ཁུ་བ་འཕེལ་བར་བྱེད། །འདི་དག་ལྕི་དང་ཡང་བ་དང་། །འདྲེས་ན་ནུས་པ་འདྲེན་པར་བྱེད། །ཡང་ན་སྣུམ་དང་ལྡན་པར་ནི། །བྱ་བ་དེ་དག་རྣམས་ལ་སྦྱིན། །སོས་ཀའི་ཚེ་ན་མ་ཧེའི་མཆོག །དགུན་ནི་ལུག་གིའང་བསྔགས་པ་ཡིན། །བ་ཡི་འོ་མ་དབྱར་གྱི་ཚེ། །
རྟ་ལ་བྱིན་ན་བསྔགས་པ་ཡིན། །ར་དང་མ་ཧེ་དཔྱིད་ཚེ་བཟང་། །མར་ཡང་འོ་མ་དང་འདྲར་བཤད། །མར་གསར་རོ་ཙ་འཁྲུ་གཅོད་ཅིང་། །བསྐ་ལ་བད་ཀན་སེལ་བྱེད་ཡིན། །ཞོ་ནི་སྣུམ་སྐྱུར་དྲོ་བ་བསྲེ། །འཁྲུ་གཅོད་ལུས་ནི་རྟས་བྱེད་ཡིན། །དཀྱུགས་པ་སྐྱུར་བ་

203-1-230b

ཉེས་ཆུང་ཞིང་། །མེ་དྲོད་སྐྱེད་ཅིང་བད་ཀན་སེལ། །དར་བ་བད་རླུང་སེལ་བྱེད་ཡིན། །སྐྲ་དང་གཞང་འབྲུམ་དག་ལ་ཕན། །འདི་ནི་བླུད་ཉེས་ཉེས་པ་ཡིས། །འོ་མས་ཁོང་པའི་ནད་སྐྱེད་ཡིན། །ཚད་ལས་ཆེས་སམ་དུས་མིན་པར། །འོ་མ་འཐུངས་ན་གནོད་པ་སྐྱེད། །
ཆང་འཐུངས་འོ་མ་འཐུངས་པ་འམ། །འོ་མའི་རྗེས་ལ་ཆང་འཐུངས་པའམ། །རྟ་ནི་རྩོལ་དྲགས་བྱས་གྱུར་ནས། །གལ་ཏེ་འོ་མ་བླུད་པ་ལས། །དེ་རྗེས་རྗེན་པ་ཟོས་གྱུར་ན། །འོ་མ་མ་ཞུར་གྱུར་པ་དེས། །བད་ཀན་གནས་ལས་བསྐྱོད་གྱུར་ནས། །དེ་རྗེས་སྙིང་ལ་གནོད་པར་བྱེད། །
བད་ཀན་གཡོས་པར་གྱུར་པ་ན། །མེ་དྲོད་ཉམས་པར་བྱེད་པའི་རྟ། །ལྟོ་བ་སྦོ་བར་གྱུར་པ་དང་། །དེ་བཞིན་འཁྲུ་བར་འགྱུར་བ་ཡིན། །རྒྱབ་རེངས་རྒྱུ་ལོང་རྒྱས་པ་དང་། །ནད་དང་བཅས་པར་འགུལ་བ་ཡིན། །སྙིང་ག་ཚ་ཞིང་རྔུལ་བ་དང་། །ཁ་ནས་ཁ་ཆུ་འབྱུང་བར་འགྱུར། །ནད་
ཀྱིས་གདུངས་ཤིང་ཉམ་ཆུང་བ། །ཤིན་ཏུ་ཤས་ཆེར་འཁྲུ་བར་འགྱུར། །ཡན་ལག་ཀུན་དུ་འཁུམས་པ་དང་། །མདོག་མི་སྡུག་ཅིང་ཡིད་མི་བདེ། །མགོ་ཡི་གཡུར་ནི་ལྕི་བ་དང་། །སེམས་ཁོང་ཆུད་པ་ཉིད་ཀྱིས་འདུག །འོ་མ་ལས་གྱུར་ནད་འདི་ནི། །ཤེས་པར་བྱས་ལ་གསོ་བ་བརྩམ། །
དེ་ཡང་གསོ་དཔྱད་ལས་བཤད་པའི། །སྨན་དང་ཁ་ཟས་སྦྱིན་པས་བཅོས། །ལེགས་ལྡན་རྟ་ལ་ཁྱད་པར་བསྔགས། །ཤ་ལི་ཧོ་ཏྲའི་གནས་བདུན་པ་ལས་འོ་མའི་ཡོན་ཏན་བསྟན་པའི་ལེའུའོ།།      །།མང་ཐོས་ཤ་ལི་ཧོ་ཏྲ་ལ། །ལེགས་ཐོས་ཀྱིས་ནི་ཡང་དྲིས་པ། །ལེགས་
ལྡན་རྟ་ལ་ཁྱད་པར་དུ། །མར་བླུད་པ་དང་དུས་གང་ཚེ། །བྱིན་ན་ཕན་གྱུར་ཆོ་ག་དེ། །ཡང་དག་བདག་ནི་ཉན་པར་འཚལ། །རྟ་ཡི་ལས་ནི་བྱས་གྱུར་པ། །སྦྱར་བཞིན་པ་འམ་སྦྱོར་གྱུར་ཏེ། །རྒན་དང་ཁལ་གྱིས་དུབ་པ་དང་། །ལམ་རིང་དུ་ནི་ཞུགས་པ་དང་། །རླུང་དང་དེ་
བཞིན་མཁྲིས་པ་དང་། །བད་ཀན་གྱི་ནི་ནད་རྣམས་ལ། །མར་ནི་ཇི་ལྟར་སྩལ་བགྱི་བ། །འདི་ནི་བདག་ལ་བཀའ་སྩོལ་ཅིག །བུ་ཡིས་དེ་སྐད་དྲིས་པ་དང་། །ཤ་ལི་ཧོ་ཏྲས་སླར་སྨྲས་པ། །མཁས་རྣམས་འཚོ་བའི་འཇིག་རྟེན་གྱི། །བདུད་རྩི་མར་ནི་ཡིན་ཞེས་འཆད། །

203-1-231a

དེ་ཡི་དུས་སུ་བཏང་གྱུར་ཅིང་། །ཚད་ལྡན་བྱིན་པ་ཤིན་ཏུ་བསྔགས། །མར་ནི་ཅི་སྲིད་ལས་འཁྲུས་པ། །དེ་སྲིད་བར་དུ་རྟ་ལ་སྦྱིན། །དེ་ནི་དུས་ཚིགས་རྣམས་ལ་ནི། །དྲི་མ་སྦྱང་བའི་དོན་དུ་བླུད། །བསྲུང་དང་ནད་གཞན་སྦྱང་ཕྱིར་ཡང་། །རྟ་ལ་མར་ནི་སྦྱིན་
པར་བྱ། །མཛེ་དང་དམར་རིགས་བཤང་འགགས་དང་། །འབུ་ནད་ངེས་པར་སེལ་བ་ཡིན། །ནད་གཞན་ལ་ཡང་ཕན་བྱེད་ཅིང་། །འདི་ཡིས་ཁྲག་ནི་སྐྱེད་མི་བྱེད། །གང་ཚེ་སྡོང་བུ་ཚེར་མར་གྱུར། །རྩྭ་ནི་སྣ་ཚོགས་ཟ་གྱུར་པ། །དེ་ཚེ་མར་ནི་བླུད་བྱ་ཞིང་། །ལན་ཚྭ་ཡི་ནི་ཆང་བུ་
སྦྱིན། །སྨན་པ་མཆོག་གིས་དེ་བཞིན་དུ། །སྟོན་གྱི་ཟླ་བ་གཉིས་པ་ལ། །རྟ་རྣམས་ནད་ནི་མེད་བྱའི་ཕྱིར། །སླར་ཡང་མར་ནི་བླུད་པར་བྱ། །རྟ་ལ་མར་ནི་བླུད་གྱུར་ན། །ཁོང་པའི་འབུ་ནི་རིང་པོ་དང་། །རྔོ་དང་གཡན་པ་ལ་སོགས་པའི། །ནད་ནི་ནམ་ཡང་འབྱུང་མི་འགྱུར། །དཔྱིད་
ཀྱི་དུས་ལ་བབ་པ་ན། །ཚ་དང་ཁ་བ་བྱིན་པར་བྱ། །དེས་ནི་ནད་མེད་གཡེན་པ་སེལ། །ཚེ་འཕེལ་མདོག་བཟང་སྟོབས་འཕེལ་འགྱུར། །མར་བླུད་པས་ནི་བཀྲ་ཤིས་ཤིང་། །དེ་བཞིན་ལུས་ནི་བདེ་བར་བྱེད། །འདིས་ནི་བློ་གྲོས་གསལ་བྱེད་ཅིང་། །བཅུད་ལེན་དུ་ཡང་འགྱུར་བ་ཡིན། །
བཙས་པ་རྣམས་དང་དེ་བཞིན་དུ། །སྲོག་ཆགས་རྒན་པོ་རྣམས་ལའང་ཕན། །གཅོང་ཅན་ལ་ཡང་འདི་ཕན་ཞིང་། །གཞན་ཡང་རླུང་མཁྲིས་ལས་གྱུར་དང་། །ཁྲག་ལས་གྱུར་པའི་ནད་རྣམས་དང་། །རྟ་གང་ལུས་ཟུངས་ཟད་པ་དང་། །གཞོན་དང་དེ་བཞིན་རྒས་པ་དང་། །གང་
ཡང་ལུད་པ་དབུགས་མི་བདེ། །དུག་འཐུངས་དུག་མདངས་ཕོག་པ་དང་། །དེ་བཞིན་རེག་པའི་དུག་རྣམས་ལ། །མར་ནི་གསར་པའམ་རྙིང་པའང་རུང་། །འདི་ལ་ཕན་པར་ཐེ་ཚོམ་མེད། །གསེབ་ལ་ཁུ་བ་འཕེལ་བྱའི་ཕྱིར། །མར་ནི་ལེགས་པར་བླུད་པར་བྱ། །དེ་ལས་སྐྱེས་
པའི་རྟེའུ་ནི། །སྙིང་སྟོབས་ཆེ་ཞིང་ལུས་མཁྲང་འགྱུར། །དབྱར་གྱི་ཟླ་བ་དང་པོ་ལ། །རྩྭ་ཡིས་རྟ་ནི་ཤིན་ཏུ་འཁྲུ། །དེ་ཚེ་རྟ་སྦངས་སླས་གྱུར་པ། །བཏུང་བར་མར་ནི་བླུད་པར་བྱ། །སྔ་དྲོ་ཟས་ནི་ཞུ་བ་ན། །བྱིན་པ་དེ་ནི་མཆོག་ཏུ་བསྔགས། །སྨན་པ་མཁས་པས་མེ་དྲོད་

203-1-231b

དང་། །གོམས་པ་ལ་སོགས་ལེགས་བརྟགས་ལ། །ཅི་རིགས་པ་ཡི་སྦྱོར་བ་ཡིས། །མར་གྱི་ཚད་ནི་བསྐྱེད་པར་བྱ། །ཡུང་བའི་ཕྱེ་དང་སྦྱར་བ་ཡང་། །དེ་བཞིན་སརྫི་ཀ་སྦྱར་བའི། །མར་ནི་རྟ་ལ་བླུད་པའི་ཚེ། །བཅའ་བ་དང་ནི་བཟའ་བ་དང་། །ལན་ཚྭ་སྦྱིན་པར་མི་
བྱ་ཡི། །རྩྭ་ནི་འབའ་ཞིག་སྦྱིན་པར་བྱ། །ཆུ་ཡང་ཚ་ཞིང་དྲོ་བ་དག །དེ་ལ་བླུད་དང་བསྲུང་བ་དང་། །མར་ནི་འཐུངས་པར་གྱུར་པ་ལ། །ཉེར་སྤྱོད་ཐམས་ཅད་དྲོན་པོ་བྱ། །ཞག་གསུམ་མམ་ནི་ཞག་ལྔ་འམ། །ཡང་ན་ཞག་ནི་བདུན་ཉིད་དམ། །ཞག་དགུ་ཡི་ནི་བར་
དག་ཏུ། །ཇི་སྲིད་འཁྲུས་ཀྱི་བར་དུ་སྦྱིན། །ཚད་ཆུང་བར་ནི་བྱིན་གྱུར་པའི། །མར་གྱིས་འཁྲུ་བར་བྱེད་མི་ནུས། །དེ་བས་ཅི་སྲིད་ལེགས་པར་ནི། །འཁྲུས་ཀྱི་བར་དུ་སྦྱིན་པར་བྱ། །ཆོ་ག་འདི་འདྲས་བརྟེན་གྱུར་ཀྱང་། །འོན་ཀྱང་འཁྲུས་པར་མ་གྱུར་ན། །འདི་ནི་ལེགས་
པར་འཁྲུས་གྱུར་པ། །དེ་ཡི་བར་དུ་སྦྱིན་པར་བྱ། །རྟ་ནི་མཆོག་ཏུ་གྱུར་པ་ལ། །མར་སྲང་སུམ་ཅུ་རྩ་གཉིས་སྦྱིན། །ཟས་ཀྱི་ནང་དུ་དེ་ཡི་ཕྱེད། །སྣ་སྨན་ལ་ནི་སྲང་བཞི་བཏང་། །འདི་ལས་བཞི་ཆ་ཕྲི་བ་ནི། །བར་མའི་ཚད་དུ་ཤེས་པར་བྱ། །སྔ་མ་དེ་ཡི་ཕྱེད་གང་ཡིན། །
ཆུང་བ་ལ་ནི་སྦྱིན་པར་བྱ། །གལ་ཏེ་དེས་ཀྱང་མི་འཁྲུ་ན། །སརྫི་ཀ་ར་དང་སྦྱར་སྦྱིན། །གལ་ཏེ་རྟ་སྦངས་སྣུམ་གྱུར་ཞིང་། །སྟོབས་དང་བཟའ་སྟོབས་ཆུང་གྱུར་པ། །དེ་ཚེ་མར་ནད་མ་ཆུང་བར། །དེ་ནི་ལེགས་པར་གསོ་བར་བྱ། །ནས་ཐུག་ཆང་དང་ལན་ཚྭ་བཅས། །
ཞག་གསུམ་བར་དུ་བླུད་པར་བྱ། །དེ་ནས་རིམ་གྱིས་མེ་དྲོད་ཀྱི། །སྟོབས་ནི་ལེགས་པར་བསྐྱེད་པར་བྱ། །བཏུང་བ་དེ་ནི་ཅི་རིགས་པར། །སྦྱིན་ཞིང་ཆུ་ནི་ཉུང་ངུ་བླུད། །དེ་ནས་འདི་ལ་འཇམ་རྩི་ནི། །བཏང་བའི་ཚུལ་གྱིས་ལུས་བརྟས་བྱ། །དེ་ལ་མངར་བའི་ཁ་ཟས་ནི། །
དགོངས་ཀའི་དུས་སུ་སྦྱིན་པར་བྱ། །ཁྱིམ་བྱ་འམ་ནི་རྨ་བྱ་འམ། །ཕག་གམ་ར་འམ་མ་ཧེ་འམ། །སྲེག་པ་འོལ་བྱ་པར་ཏ་ཀ །ཀ་པིན་ཙ་ལ་དང་བཅས་པ། །ཤིན་ཏུ་ཚོ་མིན་སྦེགས་པ་མིན། །རྒས་པ་མེད་པའི་ཤ་སྦྱིན་བྱ། །དེ་ཡི་ཁུ་བས་ལུས་རྒྱས་ཤིང་། །སྟོབས་

203-1-232a

དང་སྤྲོ་བ་རྩོལ་བ་ཆེ། །དགའ་ཞིང་སྲན་མི་ཆེ་བ་ཡི། །ལས་རྣམས་ཐམས་ཅད་ནུས་པར་འགྱུར། །ཆོ་ག་འདི་ཡིས་རྟ་ལ་ནི། །མར་ནི་མང་པོ་བླུད་གྱུར་ན། །མདོག་མདངས་སྟོབས་དང་ལྡན་གྱུར་ཅིང་། །ནད་མེད་པར་ནི་འཚོ་བར་འགྱུར། །ཏིལ་མར་ལེགས་པར་
བྱིན་གྱུར་པ། །ཡོན་ཏན་འདི་དང་འདྲ་བ་ཡིན། །རྟ་ཡིས་ཏིལ་མར་འཐུང་འགྱུར་ན། །ནད་མེད་སྟོབས་དང་ལྡན་པར་འགྱུར། །དབྱར་ནི་ལན་ཚྭ་དང་སྦྱར་སྦྱིན། །དབྱར་མཐའ་འོ་མ་དང་ལྷན་ཅིག །དགུན་ཚེ་སྐྱུར་བ་དང་སྦྱར་བ། །དགུན་སྨད་འབྲས་བུ་གསུམ་དང་བཅས། །དཔྱིད་
ནི་ཆང་དང་ལྡན་བྱ་ཞིང་། །སོས་ཀ་ཆུ་དང་ལྡན་པ་སྦྱིན། །ཏིལ་མར་བླུད་པར་གྱུར་པའི་རྟ། །ཆུ་གྲང་ནང་དུ་སྦེད་པར་བྱ། །ཆོ་ག་འདི་ཡིས་སྣུམ་དག་ནི། །ལེགས་པར་བླུད་པར་གྱུར་པའི་རྟ། །ལས་ལ་བཀོལ་ཡང་མི་གནོད་ཅིང་། །ནད་མེད་པར་ཡང་འགྱུར་བ་ཡིན། །ཏིལ་མར་ཞུ་
བར་གྱུར་རྗེས་ལ། །ཆུ་གྲང་བླུད་ན་བསྔགས་པ་ཡིན། །ཤ་ལི་ཧོ་ཏྲ་གྲུབ་པའི་གནས་བདུན་པ་ལས་མར་བླུད་པའི་ཆོ་གའི་ལེའུའོ།།      །།རྟ་ཡི་བསྟན་བཅོས་ལ་མཁས་པ། །གཟི་བརྗིད་རྣམ་པར་འབར་གྱུར་པས། །ཉེ་བར་འདུག་པར་གྱུར་པ་ལ། །ལེགས་ཐོས་ཀྱིས་ནི་ཡང་
དྲིས་པ། །རྒྱུ་དང་མི་རྒྱུའི་འགྲོ་བ་རྣམས། །དྲོ་དང་བསིལ་བའི་རང་བཞིན་ཅན། །གསོ་བའང་དེ་ཡི་བདག་ཅན་དུ། །ལེགས་ལྡན་ཁྱེད་ཀྱིས་ཐམས་ཅད་གསུངས། །ཁྲག་དང་མཁྲིས་པས་ཉེན་རྣམས་ཀྱི། །ནད་ཀྱི་གསོ་བ་ལན་མང་བཤད། །དེ་ལ་བསིལ་བའི་གསོ་བ་ཡི། །
རྣམ་པ་དུ་མའང་ཁྱེད་ཀྱིས་གསུངས། །རླུང་དང་བད་ཀན་དག་གི་ནད། །ལྕི་ཞིང་གནོད་པ་མ་གྱུར་ལ། །གསོ་དཀའ་བར་ནི་སྣང་གྱུར་ན། །དེ་ཡི་གསོ་བ་ཅི་འདྲ་ལགས། །དུས་ཀྱི་རྣམ་པ་དུ་ཞིག་མཆིས། །དྲོས་པའི་མཚན་ཉིད་ཅི་ལྟ་བུ། །ཚད་ནི་ཆེ་དང་ཆུང་གྱུར་དུགས། །མཚན་ཉིད་
ཁྱེད་ནི་ཅི་ལྟར་བཞེད། །དུགས་མི་བྱ་བའི་ནད་གང་ལགས། །དུགས་ཀྱི་ཡོན་ཏན་གང་ཞིག་ལགས། །ཚ་ཞིང་རྔུལ་གྱུར་གསོ་བ་དག །ཡང་དག་གཙོ་བོས་བདག་ལ་གསུངས། །དེ་ནས་ལེགས་ལྡན་དེ་ཡིས་ནི། །ཅི་སྐད་སྨྲས་པ་དྲིས་གྱུར་པ། །དུགས་ཀྱི་ཆོ་ག་རྣམ་པ་བརྒྱད། །

203-1-232b

རིམ་བཞིན་ཁྱེད་ཀྱིས་མཉན་པར་གྱིས། །སྣུམ་གྱི་དུགས་དང་ལ་གསོ་མ། །བྱེ་མ་དང་ནི་འདྲེན་མ་དང་། །རྟུག་པ་གསུམ་དང་གོ་བྲ་དང་། །ལྕགས་ལེབ་དང་ནི་རྫ་མའི་དུགས། །གཅི་བའི་དུགས་ཀྱིས་བཙོས་པའི་སྣུམ། །འོ་མ་དེ་བཞིན་ཤ་ཁུ་ནི། །ཤ་ཟ་པ་དང་རླན་ཅན་ཤ །
སྨན་སྤོད་ལེགས་པར་བཏབ་གྱུར་པ། །ཁྲོན་པའི་རྫིང་བུ་གཞོང་པ་ན། །ལེགས་པར་བསྲོས་པ་བླུགས་པར་བྱ། །སྣུམ་གྱི་དུགས་སུ་བྱ་བ་ནི། །སྣ་ཚོགས་སྨན་དང་སྦྱར་བྱ་སྟེ། །ཤི་ཀྲུ་དང་ནི་ཏད་ཀ་རི། །བ་སྲ་ར་ཧི་ཨེ་རན་དང་། །བ་སྤྲུ་ཉེའུ་ཤིང་སརྫ་ཀ །ཀུ་བེ་རཀྵི་དུར་བྱིད་དང་། །
གཞན་ཡང་ཚུལ་འདི་དེ་འདྲ་བ། །དེ་རྣམས་ལ་ལ་སོ་སོར་ནི། །ཆུ་ནི་མང་པོ་དང་བསྐོལ་ལ། །བྲི་བ་རན་པ་བླུགས་པར་བྱ། །འདི་ནི་གསོ་མའི་དུགས་ཡིན་ཞིང་། །ཤི་ཀུ་ཀ་ཡི་མེ་ཏོག་དང་། །གླང་པོ་རྟ་དང་རྔ་མོ་ཡི། །རྟུག་པ་དང་ནི་འོ་མ་ཞོ། །གསོ་མའི་ལོ་མ་གཅིག་ཏུ་བསྡུས། །
འདྲེན་མའི་དུགས་ཞེས་བྱ་བ་ཡིན། །གསོ་དང་སྐྱུར་རྩབ་ནང་དུ་སྦངས། །ཀུན་ནས་ལེགས་པར་བཙིར་ནས་ཀྱང་། །དེ་ལ་ཨར་ཀའི་ལོ་མའམ། །ཨེ་རཎྜ་ཡི་ལོ་མ་ལྡིང་། །སླ་ངའམ་ས་སློང་ལ་བརྔོས་པའི། །བྱེ་མ་ཚན་དེ་དེར་བསྲེ་བྱ། །དེ་ནས་དེ་ཡི་ཐོན་པོར་བྱ། །ལག་པ་
གཉིས་ནི་གཉེས་ནས་ཀྱང་། །ཡང་དང་ཡང་དུ་དུགས་བྱ་བ། །ཐུམ་པོའི་དུགས་སུ་དེ་བཤད་དེ། །བ་གླང་བོང་བུ་རའི་རྟུག་པ། །འོ་མ་དང་ནི་བསྲེས་པ་བསྐོལ། །གོས་ཀྱི་ནང་བཅུག་རབ་ཚ་མིན། །རྟུག་པ་གསུམ་གྱི་དུགས་ཞེས་བྱ། །ལ་ཕུག་ཆོམ་ཆོམ་བརྫུངས་ནས་ནི། །
འོ་མའི་ནང་དུ་བཅུག་ནས་བསྐོལ། །འོ་མ་དག་ཀྱང་དེར་བཅུག་སྟེ། །དེ་བཏགས་ནས་ནི་གོང་བུར་བྱ། །གྱོ་མོ་མེ་མདག་འདྲ་དེར་གཞག །གྱོ་མོའི་དུགས་དེ་ཅི་རིགས་པ། །ཁྲེ་དང་འབྲས་དང་གྲོ་རྣམས་ནི། །ཕྱེ་མར་བཏགས་ལ་འོ་མར་སྦྱར། །ལ་ཕུག་ཨེ་རཎྜའི་འབྲས་བུ། །
ག་གོན་གསོ་མའི་ས་བོན་དང་། །ཕབས་དང་མ་ཤ་ཏིལ་རྣམས་དང་། །ཡུངས་ཀར་རྣམས་ནི་ཕྱེར་བཏགས་ལ། །ཕྱེ་མ་དེ་ནི་འོ་མ་དང་། །ཆང་བསྲེས་ལན་ཚྭ་བྲོ་བྱས་ལ། །དེ་ཡིས་མང་དུ་བསྒོས་པ་ཡི། །རས་མ་ཡིས་ཀྱང་རབ་དཀྲིས་ལ། །དེ་ནི་ལྕགས་ལེབ་རབ་ཚ་བ། །ཀུན་དུ་

203-1-233a

ཉེ་བར་སྦྱར་བར་བྱ། །འདི་ནི་ལྕགས་ལེབ་དུགས་ཡིན་ཏེ། །རླུང་གི་ནད་ནི་འཇོམས་བྱེད་ཡིན། །ལྕགས་ལེབ་ལ་ནི་ཇི་ལྟར་བྱས། །བུམ་པ་ཡིས་ཀྱང་དེ་བཞིན་བྱ། །བུམ་པའི་དུགས་སུ་བྱ་བ་འདི། །བརྒྱད་པ་བུམ་པའི་དུགས་སུ་བཤད། །འདི་ནི་
སོ་སོའི་བྱ་བ་དག །ང་ཡིས་ཁྱེད་ལ་བསྟན་པ་ཡིན། །རྫ་བུམ་ཆེན་པོར་གསོ་མ་བཙོས། །སྦུབས་ཀྱི་དུགས་ཀྱང་བྱེད་དུ་གཞུག །འདི་ནི་རླངས་པའི་དུགས་ཡིན་ཏེ། །རེག་ན་བདེ་བར་བྱེད་པ་ཡིན། །བུམ་པའམ་རྫ་མ་དག་ཏུ་ནི། །གསོ་མ་དང་ནི་འབྲས་བུའི་རིགས། །སྣ་ཚོགས་
པ་ནི་བཙོས་པ་ཡིས། །རླངས་པའི་དུགས་ནི་སོ་སོར་བྱ། །དཀྲི་བའི་དུགས་ཞེས་བྱ་བ་ནི། །གོང་བུའི་དུགས་ཀྱང་ཡིན་པར་བཤད། །ཏིལ་དང་མ་ཤ་ཟར་མ་ཕབས། །ནས་དང་གྲོ་དང་ཀུ་ལཏྠ། །ལ་ཕུག་ཨེ་རཎྜའི་ས་བོན། །དེ་བཞིན་ག་གོན་གསོ་མ་ཡི། །ས་བོན་ཡུངས་
ཀར་ཐང་ཤིང་དང་། །ས་ལ་ར་དང་རུ་རྟ་དང་། །ཤུ་ཏི་དང་ནི་པོ་སོན་ཆ། །ར་སྣ་རྒྱ་སྤོས་ཆུ་སྲིན་སན། །དེ་བཞིན་རླུང་འཇོམས་པ་ཡི་སྨན། །ཕྱེ་མར་ཞིབ་ཏུ་བཏགས་པར་བྱ། །སྣུམ་ནི་བཞི་པོ་གཞུག་བྱ་ཞིང་། །སྦྲང་རྩི་ཞོ་དང་འོ་མ་གཞུག །དེ་ལྟར་སྣུམ་རབ་ལྡན་སྦྱར་ལ། །
ལན་ཚྭ་བཏབ་ལ་བཙོ་བར་བྱ། །ཚོས་ནས་གོང་བུར་གྱུར་པ་ནི། །གོང་བུའི་དུགས་ཞེས་བྱ་བར་བཤད། །རླུང་དང་བད་ཀན་ལས་གྱུར་ན། །ཚིལ་དང་སྨིན་བུར་བཅས་གང་ཡིན། །དེ་ལ་གོང་བུའི་དུགས་བྱ་ཡིན། །འདི་ནི་ཤིན་ཏུ་བསྔགས་པ་ཡིན། །སྨན་ནི་ཕན་ཚུན་སྦྱར་
བ་འམ། །དེ་བཞིན་ཉི་མ་མེ་དྲོད་ཀྱིས། །གང་ཕྱིར་རྡུལ་ནི་འབྱིན་བྱེད་པས། །དེ་ཕྱིར་དུགས་ཞེས་བྱ་བར་བཤད། །འདི་ཡིས་ལུས་ནི་མཉེན་བྱེད་ཅིང་། །འགགས་པ་འབྱིན་པར་བྱེད་པ་ཡིན། །ཞུ་བའི་ཕྱིར་ནི་འབྱིན་བྱེད་ཅིང་། །འཐས་པ་ཞུ་བར་བྱེད་པ་ཡིན། །སྐྲངས་
པ་ཞི་བར་བྱེད་པ་དང་། །རླུང་ནི་བདེ་བར་རྒྱུ་བར་བྱེད། །ནད་ནི་ཚར་གཅོད་པར་བྱེད་ཅིང་། །དེ་བཞིན་གསོ་མའི་གྲོགས་ཀྱང་བྱེད། །སྨིན་པར་བྱ་བའི་ནང་ན་ནི། །ནང་འཇིག་བྱེད་པའི་མཆོག་ཡིན་ནོ། །དཔེར་ན་ཤིང་ལ་སྣུམ་བསྐུས་ཤིང་། །དཀྲི་ཞིང་བལྟོས་ན་དབུག་

203-1-233b

པ་སླ། །དེ་བཞིན་དུས་ཚིགས་ཐམས་ཅད་དུ། །ལེགས་པར་སྦྱར་ན་ལུས་བདེ་བྱེད། །འཇམ་དང་དྲག་པོའི་སྦྱོར་བ་ནི། །ནད་ཀྱི་ཚོད་ལས་དཔག་སྟེ་བྱ། །ལེགས་པར་བསྐུས་ལ་དུགས་བྱ་ཡི། །རྩུབ་པོར་ནམ་ཡང་དུགས་མི་བྱ། །དཔེར་ན་ཤིང་ནི་རླན་མེད་པར། །བསྲོས་
ན་འཇིག་པར་འགྱུར་བ་ཡིན། །དེ་བཞིན་ལུས་ནི་སྣུམ་མེད་པར། །དུགས་བྱས་ན་ནི་འཇིག་པར་འགྱུར། །ནད་གང་སྣུམ་དང་དུགས་རྣམས་ཀྱིས། །ལུས་ལ་ཟགས་པར་བྱས་གྱུར་པ། །དེ་ནི་སྦྱངས་པས་བསལ་བར་བྱ། །རྣ་བ་རྒྱུ་མ་དཀུ་དང་ནི། །རླིག་པ་མཚན་གྱི་བར་དག་
ཀུན། །གང་ཚེ་རྔུལ་བར་གྱུར་པ་དང་། །ཁ་ནི་ཡོངས་སུ་བསྐམ་གྱུར་པ། །ལུས་ལྷོད་ཉམས་ནི་མི་བསོད་པ། །དེའི་ཚེ་དུགས་གྱུར་ཡིན་ཞེས་བྱ། །མཉེན་ཞིང་ཡང་བ་ཉིད་དང་ནི། །དེ་བཞིན་ཟུག་གཟེར་ཞི་བ་དང་། །ནད་ནི་རྣམ་པར་བསལ་གྱུར་པ། །རྟའི་དུགས་ལེགས་
པའི་མཚན་ཉིད་ཡིན། །གང་གི་སྤུ་ནི་འབྱི་འགྱུར་ཞིང་། །ཁྲག་དང་འདྲ་བའི་གཅིན་འབྱུང་ངན། །སྐོམ་དད་དང་ནི་རྨོངས་བག་སྐྱེད། །ཉལ་བ་ལ་ནི་མངོན་པར་དགའ། །འདར་བས་ཉན་པར་གྱུར་པ་ནི། །དུགས་དྲགས་པ་ནི་ཡིན་པར་བཤད། །དུགས་ནི་ཆུང་བར་གྱུར་པ་ཡིས། །
ནད་ནི་ཞི་བར་བྱེད་གྱུར་ཏེ། །ནད་ནི་སྐྱེད་པར་གྱུར་ན་ཡང་། །གནས་དེ་ལས་ནི་ཕྱིན་མ་བྱས། །དེ་བས་འདི་ལ་ནད་ཤུགས་ནི། །ཤིན་ཏུ་དྲག་པོ་སྐྱེད་པར་བྱེད། །འདི་ལས་མཉེན་པ་མི་འབྱུང་གི། །སླར་ཞིང་རེངས་པ་སྐྱེད་པར་བྱེད། །དུགས་དྲགས་པ་ལ་ལན་བརྒྱར་ནི། །གཅིན་
པའམ་མར་གྱིས་བསྐུ་བར་བྱ། །འོ་མ་ཅན་ཤིང་ཁུ་བ་དང་། །འོ་མ་ཞོ་དང་ཞོ་ག་ཆུ། །ཏིལ་དང་དེ་བཞིན་གཞན་གྱི་ཆུས། །ལེགས་པར་བསྐུས་ལ་བླུགས་པར་བྱ། །དུགས་ཆུང་བ་ལ་སླར་ཡང་ནི། །ཆོ་ག་བཞིན་དུ་དུགས་བྱའོ། །དུགས་དྲགས་ཆུང་བར་གྱུར་པའམ། །ཚད་ལས་
ལྷག་པར་སྦྱར་གྱུར་ན། །ནད་གཞན་དག་ཀྱང་སྐྱེད་བྱེད་ཅིང་། །འདི་ཡིས་ལུས་ལ་གནོད་པར་བྱེད། །ཁོང་ཚ་སྐྲངས་པར་གྱུར་པ་དང་། །ལུས་ཀྱང་ཚིག་པར་འགྱུར་བ་ཡིན། །ཤིན་ཏུ་ཚིག་པའམ་ཆོས་མིན་པས། །ལས་ནི་ནམ་ཡང་འགྲུབ་མི་འགྱུར། །ཚད་པར་འཁྲུ་དང་

203-1-234a

རིམས་ཀྱིས་ཐེབས། །པགས་ནད་ཅན་དང་ལུས་ཟུངས་ཟད། །དམུ་རྫིང་དབུགས་བདོ་གཅིན་ནད་དང་། །ཁྲག་དང་མཁྲིས་པའི་ནད་ཡོད་དང་། །གསེབ་ནི་མང་པོས་དུབ་པ་དང་། །སྦྲུམ་མ་དང་ནི་བཙས་མ་ཐག །ཟླ་དྲུག་ལོན་པར་མ་གྱུར་དང་། །གནོད་པ་ཅན་
དང་སྣད་པ་དང་། །དེ་བཞིན་གློ་བུར་པ་ཡི་ནད། །གང་ཡང་སྦྲུལ་གྱིས་ཟིན་པ་དང་། །དུག་མདངས་ཕོག་པར་གྱུར་པ་དང་། །གྱེན་དུ་རླུགས་བཟློག་སྐྱུགས་པ་དང་། །ལུད་པ་ཅན་དང་ཁོང་པ་ན། །འབུ་ཡོད་པ་ལ་དུགས་མི་བྱ། །འདི་དག་ལ་ནི་དུགས་བྱས་ན། །འཆི་བའམ་རིམས་
ཀྱིས་འདེབས་པར་འགྱུར། །ཤིན་ཏུ་གྲང་མིན་དྲོད་མིན་པའི། །དུས་སུ་རྟ་ལ་དུགས་བྱ་བསྔགས། །གནས་སྐབས་གཞན་དུ་གྱུར་པ་དང་། །སོས་ཀ་སྟོན་ཚེ་བྱ་དགོས་ན། །ཚད་དང་དུས་ནི་ལེགས་བརྟགས་ལ། །ཅི་ནས་གནོད་པར་མི་འགྱུར་བྱ། །ཤ་ལི་ཧོ་ཏྲའི་གྲུབ་པའི་
གནས་བདུན་པ་ལས་དུགས་ཀྱི་ཆོ་གའི་ལེའུའོ།།      །།དུར་བྱིད་གནྡ་བི་ར་དི། །པི་ལུ་བརྞ་བ་ལ་གཉིས། །གན་ད་ར་བའི་རྩ་བ་དང་། །ས་ཧ་ཙ་རའི་རྩ་བ་དང་། །ཨགྣི་མ་ན་བིལ་བ་དང་། །གཟི་མདངས་དང་ནི་ཏིནྟུ་ཀ །དེ་འདྲའི་སྨན་གྱི་རྩ་བ་རྣམས། །བསྡུས་ཏེ་ཆུ་བྲེ་བཞི་ནང་
བསྐོལ། །ལེགས་པར་ཚོས་པར་གྱུར་པ་ན། །སྨན་པས་སླར་ནི་དབོག་པར་བྱ། །དེ་བཙགས་སྨན་ཁུ་དང་མཉམ་པའི། །ཏིལ་མར་འོ་མ་གཉིས་འགྱུར་གཞུག །དེ་ནི་ཐང་ཤིང་ཏ་རུ་པ། །སྤང་སྤོས་ཆུ་དག་རྡོ་དྲེག་དང་། །ཙནྡན་སྤང་སྤོས་རུ་རྟ་དང་། །ཨང་ཤུ་མ་ཏི་ཨ་ཀ་
རུ། །བ་ལ་ར་སྣ་ཤིང་མངར་དང་། །པི་པི་ལིང་དང་རྒྱམ་ཚ་ནི། །སྨན་ནི་རེ་རེ་སྲང་ཕྱེད་ཀྱི། །ཚད་དུ་མཁས་པས་གཞུག་པར་བྱ། །དེར་ནི་སླར་བསྐོལ་སྦྱར་བ་ཡི། །ཏིལ་མར་འདི་ཡི་ནུས་པ་ཉོན། །རྟ་ནི་རླུང་གིས་ཉེན་པ་འམ། །གླང་པོ་ཤིན་ཏུ་སྦེགས་པ་འམ། །འདི་ཡིས་དབང་
པོ་བརྟས་པར་འགྱུར། །བུད་མེད་མོ་གཤམ་གྱུར་པ་དག །འདི་ལའང་དེ་ནི་བླུད་པར་བྱ། །འདི་ཡིས་དྲེ་མོའང་བུ་ཆགས་ན། །མི་ཡི་བུད་མེད་སྨོས་ཅི་དགོས། །འདི་དག་ཚོགས་པར་གྱུར་བླུད་ལ། །དེ་རྗེས་ཆང་ནི་བླུད་གྱུར་ན། །རླུང་གི་གཟེར་གྱིས་ཉེན་པ་དང་། །མི་བཟད་རྣ་བའི་

203-1-234b

གཟེར་དང་ནི། །སྙིང་ནད་དང་ནི་སྙིང་གཉེར་དང་། །མངལ་འཇིག་ཉམ་ཆུང་རྣམས་སེལ་ཡིན། །དེ་བཞིན་སྣ་ནད་ཁ་ནད་དང་། །གཞོགས་ཕྱེད་ཀྱི་ནི་ནད་ལའང་ཕན། །དོན་གྲུབ་ཅེས་བྱའི་ཏིལ་མར་ནི། །ཁྱབ་འཇུག་གིས་ནི་བསྟན་པ་ཡིན། །ཤ་ལི་ཧོ་ཏྲའི་གྲུབ་པའི་གནས་
བདུན་པ་ལས་དོན་གྲུབ་ཅེས་བྱ་བ་ཏིལ་མར་གྱི་ལེའུའོ།།      །།རྟ་ཡི་དེ་ཉིད་ལ་མཁས་པས། །བུ་དང་སློབ་མ་ལ་སྨྲས་པ། །ནད་གང་ལ་ནི་མེ་བཙའ་དག །གོ་རིམས་ཇི་བཞིན་བྱའོ་ཞེས། །གསོ་བའི་གནས་སུ་བསྟན་པ་སྟེ། །མེ་བཙའ་བཏབ་པའི་ཐབས་བཤད་བྱ། །
དེ་ལ་རེ་ཞིག་མེ་བཙའ་ལ། །དགོས་པའི་ཆ་བྱད་བརྗོད་བྱ་སྟེ། །ལྕགས་ལེབ་དན་དའི་འབྲས་བུའི་དབྱིབས། །ཆུར་ཆག་ཕྱེད་དང་གཉིས་ཀྱི་ཚད། །འདབ་མའི་ཆུར་ནི་སོར་བརྒྱད་ལ། །ཞེང་དུ་སོར་ནི་བཞི་པར་བྱ། །ཡུ་བའི་སྦོམ་ནི་མཐེབ་སོར་ཚད། །ཤིན་ཏུ་ཟླུམ་ཞིང་སྲ་
བར་བརྡུང་། །སྲེག་པར་བྱེད་པའི་ཆ་བྱད་ཀྱང་། །ལྕགས་ལེབ་དང་ནི་འདྲ་བར་བརྡུང་། །དེ་ཡི་རྩེ་མོ་ཞེང་སོར་གཉིས། །བྱང་ཆུབ་ཤིང་ལོ་འདྲ་བར་བྱ། །ཤེ་བ་ལི་འབྲས་ལྟར་གུག་པའི། །སོར་ནི་བཅོ་བརྒྱད་ཚད་དུ་བྱ། །ལྕགས་ནག་ལས་ནི་རབ་ཟླུམ་པའི། །རྩེ་མོ་
དགུག་པའི་བཞར་སྤྱད་བྱ། །འཛམ་བུའི་ཚི་གུ་ཡུ་བ་འཇམ། །སོར་ནི་བཅོ་བརྒྱད་ཚད་དུ་བྱ། །འཇལ་ད་ཚེག་གུ་འདྲ་བ་ལ། །ཟླུམ་ཞིང་ལེགས་པ་ཉིད་དུ་བྱ། །ཐུར་མ་སོར་ནི་བཅུ་དྲུག་པའོ། །མར་མེའི་རྩེ་ལྟར་ཟླུམ་པ་ནི། །སྤུ་བསྲེག་པ་ཡི་ཆ་སྤྱད་འདི། །ལྕགས་
ལས་ལེགས་པར་བརྡུང་བར་བྱ། །ལྕགས་དེ་མེ་ཡི་མདོག་འདྲ་བར། །བསྲེགས་པའི་གནས་ཆ་ཤེས་བྱས་ལ། །འཛམ་བུའི་ཚི་གུ་འདྲ་བ་ཡི། །དབྱིབས་ནི་དུ་མར་བསྲེག་པར་བྱ། །ཚིགས་ཀྱི་ཆ་ཡི་ཕྱོགས་སུ་ནི། །དབྱིབས་གང་བྱ་བ་ནི་ཉོན་ཅིག །ཆ་བཟུང་བར་ནི་གནས་
པ་ལས། །དང་པོར་བྲི་བ་ཉིད་དུ་འདོད། །པིར་རམ་ཡང་ན་བཙག་གམ་ནི། །ས་དཀར་གྱིས་ནི་བྲི་བར་བྱ། །དེ་ནས་ཐུར་མ་བསྲེགས་པ་ཡིས། །གནས་དར་སྤུ་ནི་བསྲེག་པར་བྱ། །སྐྲེག་པར་བྱེད་ཚེ་ཚིགས་ལས་ནི། །གཞན་དུ་དབྱིབས་འདི་འགྱུར་སྲིད་ལ། །དེ་བས་མེ་བཙའི་ལས་

203-1-235a

ལ་ནི། །དང་པོར་མཚན་མ་བྲི་བར་བྱ། །ཤིན་ཏུ་དྲང་དང་ཚ་བ་ཡི། །དུས་སུ་མེ་ཡི་ལས་མི་བྱ། །གྲང་བའི་ཚེ་ན་རྩ་རྒྱུས་ནི། །རེངས་ཤིང་འཐས་པར་འགྱུར་བ་ཡིན། །ནད་འདི་འཐས་པར་གྱུར་པ་དག །མེ་ཡི་ལས་ཀྱིས་སེལ་མི་ནུས། །དེ་ནས་གྲང་བས་ཉེན་གྱུར་
རྟའི། །ནད་མི་སེལ་བས་དེ་མི་བྱ། །ཤིན་ཏུ་ཚ་ཚེ་ཁོང་ཚ་དང་། །རྨོངས་བག་མགོ་འཁོར་དབུགས་རྒོད་བསྐྱེད། །སོས་ཀ་དབྱར་གྱི་ཚེ་ན་ནི། །སྲོག་ནི་ངེས་པར་ཟད་པར་བྱེད། །དེ་བས་སྔ་དྲོའི་ཚེ་ན་ནི། །ཤིན་ཏུ་གྲང་མིན་ཚ་མིན་པའི། །མེ་ལས་ཚད་ཙམ་བྱས་གྱུར་པ། །རྟ་ཡི་
བདེ་བ་སྐྱེད་པ་ཡིན། །འདུག་པ་ངལ་ནི་ལེགས་བཅིངས་ལ། །ཕྱོགས་གཅིག་ཏུ་ནི་སྐྱེལ་བར་བྱ། །ཐག་པ་སྲ་ཞིང་སྦོམ་པ་ཡིས། །ལག་པ་གཉིས་ནི་བསྡམ་པར་བྱ། །ཕྱི་རྐང་གཉིས་ཀྱང་བཅིངས་ནས་ནི། །མ་སྣད་འགྱུར་བ་མེད་པར་བྱ། །ཞགས་པས་ནང་ནས་བསྡམས་ཏེ་བརྡུང་། །
འདིས་ནི་གཡོ་བ་མེད་པར་འགྱུར། །ཨ་བཅུ་དག་ཀྱང་བཅིང་བྱ་ཞིང་། །རྣ་བ་གཉིས་ཀྱང་ལེགས་པར་བསྡམ། །བསྡམས་ཏེ་ལེགས་པར་བཞག་ནས་ནི། །དེ་རྗེས་ལས་ནི་བརྩམ་པར་བྱ། །གནས་ནི་མཉམ་ཞིང་རྩ་དགྲམ་པར། །པགས་པ་འཇམ་པོ་བཏིང་བར་ནི། །ཐག་པ་འཇམ་
ཞིང་སྲ་བ་ལ། །སྦོམས་སུ་མཐེབ་སོར་དག་གི་ཚད། །དཀྱུས་སུ་འདོམ་དྲུག་ཡོད་པ་དག །བཅིངས་པའི་དོན་དུ་བྱ་བ་ཡིན། །ཕྲག་སོ་ནས་ནི་བཏབ་མ་ཡིན། །རོ་སྟོད་ལེགས་པར་བསྡམས་ནས་ནི། །ནང་ནས་བཅུག་སྟེ་ཚེའུ་ཚེ་ནས། །རོ་སྨད་དུ་ནི་བསྡམ་པར་བྱ། །བཟློག་ནས་
བྱིན་པ་ནས་བཀྲི་བྱ། །དེ་ལྟར་ལེགས་པར་བསྡམས་ནས་ནི། །སྟོབས་དང་ལྡན་པས་ལེགས་པར་མནན། །རྩིབ་མ་ཕབ་སྟེ་ལེགས་བཞག་ལ། །དེ་ཡི་རྔ་མ་ནས་གཟུང་བྱ། །དེ་ནས་ལགས་པར་དགབ་པ་ཡིས། །མིག་གིས་མཐོང་བ་མེད་པར་གཞག །ལུས་ནི་ཤས་ཆེར་མི་བཙིར་
ཞིང་། །ཆུ་སོ་དང་ནི་མཆན་ཁུང་དང་། །དཀུ་ཡི་བར་ནི་ལེགས་བསྲུངས་ལ། །དེ་ནས་གྲུབ་པའི་ལས་ཀྱང་བྱ། །སྙིང་ག་ཁ་དང་རྨང་ཀ་རུ། །ཆུ་ནི་ཡོངས་སུ་བླུགས་པར་བྱ། །དབུགས་ཕྱུང་སྙན་པའི་ཚིག་སྨྲས་པ། །དེ་རྗེས་སྲེག་པའི་ལས་རྣམས་བྱ། །དེ་ནས་གཞན་ཡང་

203-1-235b

བསྲེག་བྱ་ཡི། །གནས་དང་དབྱིབས་ནི་བཤད་པར་བྱ། །མཆུ་ལྟག་གོང་དུ་འཕྲེད་དུ་ནི། །རི་མོ་གསུམ་ནི་བྱ་བ་ཡིན། །སྣ་གདོང་དང་ནི་འཁུར་ཚོས་སུའང་། །མཉམ་པར་བྱེད་དུ་བྱ་བ་ཡིན། །མཆུ་སྒྲོས་དང་ནི་མཆུ་དག་ཏུ། །རི་མོ་ཟླུམ་པོ་དག་ཀྱང་བྱ། །འགྲམ་གླང་རྟག་ཏུ་ཐིག་
ལེ་ཡི། །རི་མོ་ཅུང་ཞིག་བྱ་བ་ཡིན། །འཛམ་བུའི་ཚི་གུས་འབྲལ་བར་ནི། །བྱ་རོག་རྗེས་ནི་མཉམ་པོ་བྱ། །རྣ་བ་མིག་གི་ཕ་རོལ་དུ། །ཟླུམ་པོ་དག་ཀྱང་བྱ་བ་ཡིན། །མུར་གོང་དང་ནི་ཨུཏྤལ་འདབ། །དེ་བཞིན་བྱ་རོག་རྗེས་གཉིས་བྱ། །སྣ་རྩ་རུ་ནི་སྣུམ་གྱིས་ནི། །ས་ཐ་
ལི་ཡིས་ཐིག་ལེ་བྱ། །རྩེའུ་ཆུང་གཉིས་སུ་ཟླུམ་པོའི་ནང་། །རི་མོ་གསུམ་དག་བྱ་བ་ཡིན། །ཕྲག་སོ་གཉིས་སུ་སིན་ཛི་ཡི། །འདབ་མ་ལྟ་བུར་བྲི་བར་བྱ། །དཔུང་མགོར་དགའ་བ་འཁྱིལ་པ་དང་། །ཤིང་རིས་ལྟ་བུ་བྱ་བ་ཡིན། །ནམ་ཚོད་དུ་ནི་ཐིག་ལེ་རིས། །ཡང་ན་
ཟླུམ་པོ་བྱ་བ་ཡིན། །སྙིང་ག་ཡི་ནི་ཕྱོགས་དག་ཏུ། །ནམ་ཡང་བསྲེག་པར་མི་བྱའོ། །པུས་གོང་དང་ནི་དཔུང་པ་རུ། །ཆུ་སྲིན་སོ་འདྲ་བྱ་བ་ཡིན། །ཡང་ན་ཆུ་སྲིན་སོའི་འོག་ཏུ། །རི་མོ་རེང་བུར་བྱ་བ་ཡིན། །དཔུང་པ་གཉིས་ཀྱི་བར་དུ་ནི། །ཐིག་ལེ་ལྟ་བུའི་རི་མོ་བྱ། །ལག་
ངར་ཆིག་རང་ཕྲ་མོ་རུ། །ཐིག་ལེའམ་ཡང་ན་འཁོར་ལོ་བྱ། །བྱིན་པ་ཚེའུ་ཚེ་དག་ལ་ནི། །ཐིག་ལེ་ཐོར་བུར་བྱ་བ་ཡིན། །དཀུ་གཉིས་སུ་ནི་བྱ་རོག་རྗེས། །ཡང་ན་ཨུཏྤལ་ཐིག་ལེ་བྱ། །སྒལ་ཚིགས་དོར་བའི་རྒྱབ་ཏུ་ནི། །མཉམ་ཞིང་ཆུར་ནི་འགྲོ་བ་ཡི། །རི་མོ་གསུམ་དག་བྱ་བ་
སྟེ། །དྲུག་མདོར་ཡང་ནི་གསུམ་པོ་བྱ། །ཡང་ན་དྲུག་མདོའི་གནས་སུ་ནི། །བྱ་རོག་རྗེས་ནི་བྱ་བ་ཡིན། །ཡང་ན་ལག་པ་དྲང་བ་འམ། །མར་མེ་ཡི་ནི་རྩེ་འདྲ་བྱ། །ལོང་བུ་བྱ་རོག་རྗེས་འདྲ་བའམ། །ཨུཏྤ་ལ་ཡི་ཐིག་ལེ་བྱ། །ལྟོ་བར་རི་མོ་བརྒྱད་པ་འམ། །པདྨ་ཡི་ནི་
དབྱིབས་འདྲ་བྱ། །སྙིང་ག་དང་ནི་སྤུ་རིས་དང་། །ལྟེ་བར་ཡོངས་སུ་སྤང་བར་བྱ། །དཔྱི་སྟེང་དུ་ནི་གཡུང་དྲུང་རུང་། །དགའ་བ་འཁྱིལ་པའམ་པདྨ་བྱ། །ཡང་ན་རི་མོ་མཛེས་པ་འམ། །ཟླུམ་པོ་ཉིད་དུ་བྱ་བ་ཡིན། །རྔ་རྩ་དོར་ལ་མཇུག་ཚོས་སུ། །བྱ་རོག་རྗེས་སམ་

203-1-236a

ཨུཏྤལ་བྱ། །ཚིགས་ཀྱི་མཚམས་སུ་ལེགས་བརྟགས་ལ། །དགའ་བ་འཁྱིལ་པའམ་ཟླུམ་པོ་འམ། །ལོ་མ་བདུན་པ་ལྟ་བུ་ནི། །ཀུན་དུ་གནོད་པ་མེད་པརབསྲེག །དཔྱི་ཡི་འོག་གི་ཆ་རུ་ནི། །ཆུར་ནི་རེངས་པའི་རི་མོ་བྱ། །ཡང་ན་ཟླ་བ་ལྟ་
བུ་འམ། །ཆུ་སྲིན་གྱི་ནི་སོ་འདྲ་བྱ། །བརླ་ཡི་ཕྱི་དང་ནང་དུ་ནི། །རི་མོ་འཕྲེད་དུ་བྱ་བ་ཡིན། །སྲེ་ལོང་ཚིགས་སུ་མཁས་པ་ཡིས། །ནྱ་གྲོ་དྷ་ཡི་འདབ་འདྲ་བྱ། །རོ་སྟོད་ཀྱི་ནི་ཆ་བཞིན་དུ། །རོ་སྨད་དུ་ཡང་བྱ་བ་ཡིན། །དེ་བཞིན་མཁས་པས་སྐྲངས་པ་དང་། །རྨར་གྱུར་
པ་ཡི་ནད་ལ་ཡང་། །དགའ་བ་འཁྱིལ་དང་ཆུ་སྲིན་གྱི། །སོ་འདྲ་བ་ནི་བྱ་བ་ཡིན། །ནད་ཀྱིས་ཉེན་པར་གྱུར་པ་ལ། །དབྱིབས་ནི་དེ་འདྲར་བསྲེག་པར་བྱ། །ཆ་རུ་དབྱིབས་འདི་གསལ་མངོན་ཞིང་། །ལེགས་པར་གནས་པ་དྲོས་ནས་ནི། །རི་མོ་སྙོམས་པར་གནས་པ་
ལ། །མཁས་པས་ལེགས་པར་བསྲེག་པར་བྱ། །ཏ་ལའི་སྙིང་པོ་དང་འདྲ་བའམ། །བིལ་བའི་སྙིང་པོ་འདྲར་གྱུར་པའམ། །ལེགས་པར་བསྲེག་པར་གྱུར་པ་སྟེ། །མདོག་གཞན་སྨད་པར་གྱུར་པ་ཡིན། །བསྲེགས་དྲགས་ན་ནི་ཤ་འདྲུལ་ཞིང་། །ཤིན་ཏུ་གཏིང་
རིང་རྨ་འཚོ་དཀའ། །སྡུག་བསྔལ་དག་ཀྱང་སྐྱེ་འགྱུར་ཞིང་། །ཡན་ལག་སྡུད་མི་ཤེས་པར་འགྱུར། །བསྲེགས་ཆུང་བས་ནི་འདི་ཡི་ནད། །ལེགས་པར་བསལ་བར་མི་ནུས་ཤིང་། །རྨ་ཡང་མྱུར་དུ་མི་འཚོ་ལ། །ལས་སུ་མི་རུང་ཉིད་དུ་འགྱུར། །རྟ་ནི་ལེགས་པར་
བསྲེགས་པའི་རྨ། །ཤ་ནི་ཆུ་བུར་འདྲས་ཁྱབ་ཅིང་། །ཅུང་ཟད་འཛག་པ་འདྲ་བ་དང་། །ནད་ཀྱང་རབ་ཏུ་ཞི་བར་བྱེད། །སྐྲངས་པ་རྣམས་ནི་ཞི་འགྱུར་ཞིང་། །སྐམ་པོ་སླར་ནི་སྐྱེད་པར་བྱེད། །རྨ་ནི་སྦྱོང་བར་བྱེད་པ་དང་། །འཚོབ་ཅིང་རྣག་ནི་ཟད་པར་བྱེད། །
གཟེར་ནི་སེལ་བར་འགྱུར་བ་དང་། །རླུང་ནི་བདེ་བར་རྒྱུ་བར་བྱེད། །རྨེན་བུ་སྐྱེ་བར་མི་བྱེད་ཅིང་། །རྨ་ཡང་མཆེད་པར་མི་འགྱུར་རོ། །གྱོང་པོ་རྣམས་ནི་མཉེན་འགྱུར་ཞིང་། །ལྷོད་པ་རྣམས་ནི་སྲ་བར་བྱེད། །ཁྲག་ནི་རྨིག་ཏུ་འབྱུང་འགྱུར་བ། །མེ་བཙའ་ཉིད་ཀྱིས་ཞི་བར་

203-1-236b

བྱེད། །རྨིག་མཐིལ་ཚད་དང་དུགས་ལ་ནི། །མེ་ཉིད་ཁོ་ན་བདེ་སྐྱེད་ཡིན། །དེ་ལ་སོགས་དང་གཞན་པ་ཡི། །ཡོན་ཏན་མེས་བསྲེགས་ལེག་ལས་བྱུང་། །ཁ་ཟས་དང་ནི་བཏུང་བ་དང་། །སྣ་སྨན་དང་ནི་འཇམ་རྩི་དང་། །སྨན་ཆུ་བླུགས་དང་བསྐུ་བ་དང་། །དུགས་ཡང་ཡོངས་
སུ་མཉེ་བ་དང་། །དཀྲི་བའི་ཚུལ་ནི་སྣ་ཚོགས་སམ། །ཡང་དག་གཏར་གིའི་ལས་རྣམས་ཀྱིས། །ནད་གཅོད་བདེ་བར་མི་སྣང་ཞིང་། །ནད་ནི་ཤིན་ཏུ་འཕེལ་གྱུར་ན། །བདག་པོ་ལ་ནི་དྲིས་ནས་ཀྱང་། །མེ་ཡི་ལས་ནི་བརྩམ་པར་བྱ། །མེ་ཡི་ལས་བྱས་འོག་ཏུ་ནི། །གང་དག་
བྱ་བ་དེ་བཤད་བྱ། །ཚིག་དྲགས་གྱུར་ལ་ཡང་དང་ཡང་། །མར་གྱིས་ལེགས་པར་བསྐུ་བར་བྱ། །ཏིལ་དང་འོ་མའི་ལྡེ་གུ་འམ། །མར་གསར་གྱིས་ཀྱང་བསྐུ་བར་བྱ། །གཞན་ཡང་གང་དག་བསིལ་གྱུར་པ། །འདབ་མ་ཉེས་པར་སྦྱར་བར་བྱ། །མ་ཚིག་རྨ་ནི་རེད་འགྱུར་ལ། །
སྣུམ་ནི་དྲོན་པོ་གཏང་བར་བྱ། །དེ་བཞིན་སྨན་ཆུ་དྲོ་བ་དང་། །བསྐུ་བ་དག་ཀྱང་དྲོན་པོ་བྱ། །དུས་ཀྱིས་ལས་དང་དེ་བཞིན་དུ། །དྲིལ་ཕྱིས་དག་ཀྱང་བྱ་བ་ཡིན། །དེ་ཡིས་ནད་ཞིར་མ་གྱུར་ན། །སླར་ཡང་དེ་ལ་བསྲེག་པར་བྱ། །བསྲེགས་ནས་ཡང་དང་ཡང་དུ་ནི། །དེ་ལ་མར་ནི་བླུགས་
པར་བྱ། །དེ་ནས་ཉིན་ཞག་གསུམ་ན་ནི། །བརྟགས་ལ་འདྲུལ་བར་གྱུར་ན་ནི། །ཆུ་ནི་དྲོ་འཇམ་དག་གིས་ནི། །བླུགས་ཤིང་ལེགས་པར་བཀྲུ་བར་བྱ། །མར་དང་སྦྱར་བའི་ཏིལ་གྱི་ནི། །ལྡེ་གུ་ཡིས་ཀྱང་བསྐུ་བར་བྱ། །མེ་ཡིས་གདུངས་པར་གྱུར་པ་ལ། །རྒྱམ་ཚ་དང་སྦྱར་ལྡེ་
གུ་བསྐུ། །དེ་ཡི་འོག་ཏུ་མར་དང་ནི། །སྤག་རྣམས་སྦྱར་བ་བསྐུ་བར་བྱ། །དེ་ལྟར་བསིལ་བཅོས་ཀྱིས་བཅོས་ན། །མེ་ཡིས་ནད་ནི་སེལ་བར་འགྱུར། །ལེགས་ལྡན་ཤ་ལི་ཧོ་ཏྲ་ཡིས། །དེ་སྐད་རྗེས་བསྟན་སྨྲས་པ་ཡིན། །ཤ་ལི་ཧོ་ཏྲའི་གྲུབ་པའི་གནས་བདུན་པ་ལས་མེ་
བཙའི་ལས་ཀྱི་ཆོ་གའི་ལེའུའོ།།      །།ག་ག་ནེ་ཤ་དའི་རྒྱལ་པོ། །མཛའ་བོ་བཟང་དང་ཀ་རི་ཏས། །མས་གཏོང་སྦུ་གུའི་ཆོ་ག་རྣམས། །ཤ་ལི་ཧོ་ཏྲ་ལ་དྲིས་པ། །མས་གཏོང་སྦུ་གུ་སྨན་དང་ནི། །བདའ་བ་ཡི་ནི་ཚོད་དག་དང་། །སྨད་དུ་ཞུགས་པའི་ནད་རྣམས་ནི། །གསོ་

203-1-237a

བ་དང་བཅས་རྒྱས་པ་དག །རྟ་ལ་ཅི་ལྟར་བགྱི་བ་ནི། །ལེགས་ལྡན་ཁྱེད་ལས་ཤེས་པར་འཚལ། །དེ་རྣམས་དེ་སྐད་སྨྲས་པ་དང་། །ཤ་ལི་ཧོ་ཏྲས་སླར་སྨྲས་པ། །རྟ་ནི་སྣུམ་ཞིང་སྒོ་ལྔ་ནས། །ཡོངས་སུ་རྟས་པར་བྱེད་པ་ཡིན། །མར་དང་ཏིལ་མར་ཞག་དང་
རྐང་། །ཁ་དང་སྣ་དང་མཚན་མཇུག་མ། །པགས་པ་ལས་ནི་ཞུགས་པ་ཡིས། །ཐབས་ནི་བདེ་བས་དེ་རྟས་བྱེད། །སྟོབས་བསྐྱེད་རོ་ཙ་འཚོ་བྱེད་རྣམས། །སྦྱར་བའམ་ཡང་ན་མ་སྦྱར་བའམ། །སྦྱོར་བ་ལེགས་པར་གཏང་བའི་སྣུམ། །རྟ་ནི་འཚོ་བར་བྱེད་པ་ཡིན། །བཟའ་དང་
རྗེས་སུ་བཏུང་བ་དང་། །ཁ་བཀང་ཁ་ཡི་སྣུམ་ཡིན་ནོ། །དེ་བས་འཇམ་རྩིར་བཏང་གྱུར་པའི། །སྣུམ་གྱིས་ཁོང་སྣུམ་སྟོབས་སྐྱེད་ཅིང་། །རྟས་བྱེད་མགྱོགས་དང་རོ་ཙ་དང་། །དེ་བཞིན་མདོག་ནི་བཟང་བར་བྱེད། །འཇམ་རྩི་རྟ་ཡི་གསོ་བྱེད་ཀྱི། །མཆོག་ཡིན་པར་ཡང་བཤད་
པ་ཡིན། །འཇམ་རྩི་སྦུ་གུའི་ཚད་དང་རྫས། །ངས་བཤད་པ་ལས་མཉན་པར་གྱིས། །ལྕགས་དང་ཤིང་དང་རི་དྭགས་དང་། །བྱ་རྣམས་ཀྱི་ནི་ཆུ་སྦུབས་དང་། །ཤ་མི་སེང་ལྡེང་ཤྲི་མི་ཤ །ཤིང་ཤ་པ་དང་ཏིན་ཏུ་ཀི། །ད་བ་འོ་མ་ཅན་ཙནྡན། །ཤིང་ནི་འདི་བརྒྱད་བསྔགས་པ་
ཡིན། །ངང་པ་བྱ་རྒོད་ཀུ་དྲ་བ། །རྨ་བྱ་ས་རི་བླ་བ་དང་། །དུད་པ་བ་ལ་མདའ་གུ་སྟེ། །བྱ་ཡི་མཆོག་ནི་དེ་བརྒྱད་ཡིན། །བོང་བུ་མ་ཧེ་རྔ་མོ་དང་། །དེ་བཞིན་གླང་དང་བ་མེན་དང་། །གཡག་དང་རུ་རུ་གླང་པོ་ཆེ། །ལྒང་པ་མཆོག་ཏུ་འདོད་པ་ཡིན། །གསེར་དང་དེ་བཞིན་དངུལ་
དང་ནི། །ཁར་བ་ར་གན་ཞ་ཉེ་དང་། །རོ་ཉེ་ཟངས་དང་ལྕགས་རྣམས་ནི། །ལྕགས་ཀྱི་རིགས་ནི་བརྒྱད་དུ་བཤད། །བ་དང་ར་ལུག་མ་ཧེ་ཡི། །ལྒང་བ་སྦུ་གུ་དང་ཉེར་བཤད། །ཤིང་རྣམས་ལས་ནི་ཙནྡན་མཆོག །ཕྱུགས་ཀྱི་ནང་ན་གླང་པོ་མཆོག །པ་རི་བླ་བ་བྱ་ཡི་མཆོག །
ལྕགས་རྣམས་མཆོག་ནི་གསེར་ཡིན་ནོ། །ཚན་ལྡན་གྲང་ལྡན་ཚེ་ལ་ཕན། །བཀྲ་ཤིས་བསིལ་སྨན་རྣམས་ཀྱི་མཆོག །པ་རི་བླ་བའི་འཛེར་པ་དང་། །བསིལ་བ་མཆོག་ཏུ་བཤད་པ་ཡིན། །གསོ་བ་ལ་བཅས་སྦུ་གུ་ནི། །ལྕི་ཞིང་འཇམ་ལ་སྲ་བ་ཡིན། །དེ་ནི་རྟ་ཡི་

203-1-237b

ནད་སེལ་ཡིན། །ཕན་པ་དམ་པ་ཡིན་པར་བཤད། །གསེར་ལས་བྱས་པའི་སྦུ་གུ་ནི། །འཇམ་ཞིང་མྱུར་དུ་ཆུད་པ་དང་། །མྱུར་དུ་འབྱིན་པར་བྱེད་པ་དང་། །ལྕི་བས་རྟ་ལ་ཕན་ཞིང་བཟང་། །དེ་ནི་གས་མེད་འགྱུར་བ་མེད། །ཟླུམ་ཞིང་ཤིན་ཏུ་བདེ་བར་བྱ། །དེ་དག་རྙེད་
པར་མ་གྱུར་ན། །འོད་མ་ལྕང་མ་དག་ལས་བྱ། །འཇམ་ཞིང་འབུ་ཡིས་མ་ཟོས་ལ། །གཞུག་པ་ལ་གནོད་མི་སྐྱེད་བྱ། །འོད་མའི་ནང་ནས་ནག་པོ་ནི། །སྦུ་གུའི་རྒྱུ་ནི་བཟང་བར་བཤད། །ཤ་མི་ཤིན་ཏུ་གཞོན་མིན་པ། །བདེ་བར་འགྲོ་བར་བྱེད་པ་ཡིན། །ས་རང་ག་ཡི་
ལྒང་པ་ནི། །ལྒང་པ་རྣམས་ཀྱི་དམ་པ་ཡིན། །སྦུ་གུ་སོར་ནི་བཅུ་གཉིས་པ། །འཇམ་ཞིང་གག་པ་དང་བཅས་པ། །ཞེང་དུ་སོར་དྲུག་གིས་འཁྱུད་པ། །རྩེ་མོ་རིམ་གྱིས་ཕྲ་བ་བྱ། །རྩེ་མོ་སྣ་མའི་མེ་ཏོག་ནི། །ཁ་འབུས་འདྲ་ཞིང་བུ་ག་ཆུང་། །མཐེའུ་ཆུང་གི་རྩེ་
མོའི་ཚད། །འདི་ཡི་ཚད་ནི་ཡིན་པར་བཤད། །སྨན་པ་ལས་རྣམས་གྲུབ་འདོད་པས། །དེ་ལྟ་བུ་ཡི་སྦུ་གུ་ཡིས། །ཆོ་ག་བཞིན་དུ་ཟོས་འཐུངས་ལ། །འཇམ་རྩིའི་ལས་ནི་སྦྱར་བར་བྱ། །ལག་པ་གཡོན་པའི་མཛུབ་མོ་ཡིས། །བཀག་པ་ཡིས་ནི་བཅུག་
ནས་ཀྱང་། །ཆུད་ནས་རྩེ་མོ་བཀག་པ་ཡིས། །རྩེ་མོ་ཡོངས་སུ་གཏང་བར་བྱ། །དེ་ནས་ལག་པ་གཡས་པས་ནི། །ལྒང་པ་བརྩིར་བས་སྣུམ་པར་བྱ། །ཁ་ནས་སྣུམ་དང་ཚད་གང་ཡིན། །མས་གཏོང་བ་ལ་གཉིས་འགྱུར་བྱ། །སྲང་ནི་དྲུག་ཅུ་རྩ་བཞི་འམ། །
བཅུ་བཞི་བརྒྱད་དང་སུམ་ཅུ་གཉིས། །བཅུ་དྲུག་དང་ནི་དེ་ཡི་ཕྱེད། །དེ་ལྟར་རིམ་པར་གཞག་པ་ནི། །མཆོག་དང་བར་མ་ཐ་མ་ལ། །མས་གཏོང་བར་ནི་ཡིན་པར་བཤད། །འཇམ་རྩི་སྦུ་གུར་སྦུད་པ་ནི། །ཚད་དེ་རྣམ་པ་བཞི་ཡིན་ཏེ། །སོར་བཞི་སོར་གསུམ་སོར་
གཉིས་དང་། །སོར་གཅིག་པ་ནི་ཡིན་ཤེས་བྱ། །ཟླ་དྲུག་ལོན་པའི་རྟེའུ་ལ། །སོར་གཅིག་ནང་དུ་གཏང་བར་བྱ། །སྣུམ་ནི་སྲང་བཞི་ཡིན་པར་བཤད། །སྣུམ་ཚད་དེ་ནི་གོ་ལོག་བྱ། །ལོ་གཅིག་ལོན་ལ་སོར་གཉིས་ཏེ། །འཇམ་རྩིར་སྣུམ་ནི་སྲང་བརྒྱད་གཏང་། །

203-1-238a

ལོ་གཉིས་ལོན་ལ་སྦུ་གུའི་རྩེར། །སོར་གསུམ་ནང་དུ་གཏོང་བར་བྱ། །དེ་ཡི་འཇམ་རྩིར་གཏོང་བའི་སྣུམ། །སྲང་ནི་བཅུ་དྲུག་གཏང་བར་བྱ། །ལོ་ལྔ་ཡན་ཆད་སྣུམ་ཚོད་ནི། །གོང་དུ་ཅི་སྐད་བསྟན་པ་བྱ། །སྦུ་གུ་ནང་དུ་གཞུག་པའི་ཚེ། །ཐམས་
ཅད་ལ་ཡང་སོར་བཞི་ཡིན། །རྩ་བ་ལྔ་ལ་ཉི་རྒྱ་ཚ། །ཡུངས་ཀར་བཅས་པ་བསྐོལ་བ་འམ། །མེ་དང་ལན་ཚྭ་དང་བཅས་པ། །དབྱར་གྱི་ཚེ་ན་མས་གཏོང་བྱ། །པི་པི་ལིང་དང་བཅའ་ལྒ་དང་། །འབྲུ་སྐྱུར་དང་ནི་ཡུངས་ཀར་དག །ལན་ཚྭ་བྲོ་ཞིང་སྣུམ་དང་བཅོས། །
དགུན་གྱི་དུས་ཀྱི་མས་གཏོང་ཡིན། །ཏིལ་ནག་དང་ནི་ཤིང་ནག་དང་། །ཐང་ཤིང་དང་ནི་ས་ར་ལ། །ཀ་ར་བཱི་ར་ཨུཏྤ་ལ། །ཤུག་པ་ཙནྡན་པུ་ཤེལ་ཙེ། །ཤ་ར་བ་ཡི་ལྡེ་གུར་བཅས། །འོ་མ་དང་སྦྱར་སོ་གར་བསྔགས། །ནད་དང་བཅས་པའི་རྟ་རྣམས་ནི། །ཅི་སྐད་
བཤད་པའི་བརྡ་ལ་བྱ། །མགོ་ནི་ཐུར་དུ་གཡངས་གྱུར་ན། །ལྒང་པ་མེད་པ་བཙིར་དྲགས་ན། །ཞུ་བའི་གནས་ལ་འདས་པ་ནི། །སྣུམ་ནི་གྱེན་དུ་འགྲོ་བར་འགྱུར། །དེ་ལས་འདི་ནི་རྨིག་བག་དང་། །སེམས་མྱོང་ཁོང་ཚ་སྐྱེ་བར་འགྱུར། །སྣུམ་ནི་ཟློག་པར་མི་བྱེད་
པའམ། །ཡང་ན་དུས་རིང་ཞིག་ན་འབྱུང་། །དེས་ན་མགོ་བོ་རྒྱབ་ནས་ནི། །ལག་པས་ཅུང་ཟད་བརྡེག་པར་བྱ། །བསྐུ་ཞིང་མཉེ་བར་བྱས་ནས་ནི། །འཇམ་པོར་གྱུར་ནས་གཏོང་བར་བྱ། །དུབ་པར་གྱུར་པའམ་སྐོམ་གྱིས་གདུངས། །ལྟོགས་དང་ཤིན་ཏུ་ཉམ་ཆུང་བའི། །
མས་གཏོང་བྱར་མི་རུང་བ་ཡིན། །གལ་ཏེ་རྨོངས་པས་བཏང་གྱུར་ན། །དེ་ཡི་བདེ་བ་སྒྲུབ་འདོད་ཀྱང་། །སྡུག་བསྔལ་ཉིད་ནི་སྐྱེད་པར་བྱེད། །འཇམ་རྩི་དབྱར་ནི་མི་གཏོང་ལ། །གལ་ཏེ་བློ་ཆུང་བས་གཏོང་ན། །སྣུམ་ནི་མྱུར་དུ་ལྡོག་འགྱུར་ཞིང་། །དེ་ཡིས་ཕན་པ་བྱེད་མི་
འགྱུར། །དེ་ལྟར་ཉེས་པར་གྱུར་པ་ལ། །གཅིན་རྟུག་བསིལ་བའི་སྦྱོར་བ་བྱ། །དེ་རྗེས་འཇམ་རྩི་ལེགས་བཏང་ལ། །དེ་ཡི་དོན་ནི་སྒྲུབ་པར་བྱེད། །དུབ་ལ་སོགས་པར་མས་གཏོང་བྱས། །སྨར་ནི་བྱུང་རུང་མ་བྱུང་རུང་། །དེ་ཡིས་ཕན་པ་མི་བྱེད་དེ། །ནད་ནི་སྐྱེད་པར་བྱེད་

203-1-238b

པ་ཡིན། །སྨྱོ་དང་ལུད་པ་དབུགས་མི་བདེ། །ལྐོག་ནད་དང་ནི་གཉའ་རེངས་དང་། །འཁྲུ་བ་དང་ནི་རླུང་འཁྱིལ་དང་། །དེ་བཞིན་སྙིང་ནད་བཞི་པོ་དང་། །མཇུག་དོ་རྒྱབ་རེངས་ལྟོ་སྦོས་པའི། །ནད་རྣམས་དེ་ལས་འབྱུང་བར་འགྱུར། །མས་གཏོང་ལས་གྱུར་ནད་འདི་རྣམས། །སོ་
སོར་འབྱུང་བར་གྱུར་པ་ལ། །གསོ་བ་ལ་ནི་ཇི་སྐད་བསྟན། །ཆོ་ག་བྱས་པས་བསལ་བར་བྱ། །ལེགས་པར་འདུག་པར་འགྱུར་བ་ལ། །རྔ་མ་གཡས་སུ་གཟུང་བྱ་ལ། །ལག་པ་གཡོན་པས་བཅུག་ནས་ནི། །གཡས་པ་ཡིས་ནི་བཙིར་བར་བྱ། །རེངས་ན་ཤིན་ཏུ་དལ་མིན་པར། །
རྒྱུན་གྱིས་རྗེས་སུ་འབབ་པར་གཏང་། །ལན་ཅིག་གཏང་བར་བྱ་བ་འམ། །ཡང་ན་དུས་ནི་གཉིས་སུ་གཏང་། །དུས་གསུམ་དུ་ནི་མི་གཏོང་ཞིང་། །བག་མེད་པར་ནི་མི་བཙིར་རོ། །རྒྱབ་ནི་བསྐུ་སྟེ་བཏང་གྱུར་ན། །དེ་ལས་སྣུམ་ནི་སྙོམས་པར་འགྲོ། །བདེ་བས་ནད་རྣམས་གསོས་
ནས་ནི། །སླར་ཡང་བཟློག་པར་འགྱུར་བ་ཡིན། །རླུང་ནི་མང་དུ་འབྱིན་བྱེད་ཅིང་། །ནད་ནི་སླར་ཡང་འཇུག་པར་བྱེད། །འཇམ་རྩི་བཏང་བར་གྱུར་པ་ལ། །རྒྱབ་མཉེ་སེན་མོས་འཕྲུག་པར་བྱ། །ཏིལ་མར་འཇམ་རྩི་བཏང་གྱུར་ན། །ས་ཞག་གིས་ནི་བསྐུ་བར་འདོད། །ཏིལ་
མར་དྲོ་ཞིང་ཚ་བས་ན། །རྟ་ཡི་མཁྲིས་པ་སྐྱེད་པར་བྱེད། །དེ་བས་རྐེད་པའི་ལོགས་གཉིས་སུ། །ས་ཞག་གིས་ནི་བསྐུ་བ་བསྔགས། །འཇམ་རྩི་གཏོང་བར་བྱེད་པ་ན། །གལ་ཏེ་རླུང་ནི་ཞུགས་གྱུར་ན། །འཇམ་རྩི་དང་ནི་འདྲེས་པ་ཡི། །ནད་ནི་དེ་རུ་གནས་པར་འགྱུར། །
དེ་བས་ཤིན་ཏུ་མི་ལྷོད་ཅིང་། །དྲག་ཏུ་བཙིར་བར་མི་བྱའོ། །འཇམ་རྩི་ཕྱེད་ཙམ་བཏང་བ་ན། །གལ་ཏེ་རྟ་ནི་དབུགས་སྟོང་ན། །སྦུ་གུ་མྱུར་དུ་དབྱུང་བྱ་ཞིང་། །རླུང་དགག་པར་ནི་མི་བྱའོ། །རླུང་དེ་བཏང་བར་གྱུར་པ་ན། །རྟ་ནི་མཉམ་དུ་ལེགས་གཞག་ལ། །དེ་ནས་སྣུམ་
གྱི་ལྷག་མ་ཡིས། །འཇམ་རྩི་གཉིས་པ་གཏང་བར་བྱ། །གང་ཕྱིར་རྗེས་མཐུན་བཏང་བས་ནི། །དེ་ཕྱིར་འཇམ་རྩི་ཡིན་པར་བཤད། །འཇམ་རྩི་ཟུང་དུ་མ་གྱུར་པས། །བཏང་ན་ཚེ་དང་སྟོབས་འཕེལ་བྱེད། །མཁྲིས་པ་ཅན་ལ་ལན་གསུམ་གཏང་། །བད་ཀན་ཅན་ལ་

203-1-239a

ལྔ་འམ་བདུན། །དེ་བཞིན་རླུང་ནད་ཅན་ལ་ནི། །དགུའམ་ཡང་ན་བཅུ་གཅིག་གཏང་། །ནད་བུ་ཅན་ལ་ཅི་སྲིད་དུ། །ནད་ནི་ཞི་གྱུར་བར་དུ་གཏང་། །ནད་ནི་མ་གཡོས་སྐྱེད་བྱེད་ཅིང་། །བསྐྱོད་པ་རྣམས་ནི་འབྱིན་པར་བྱེད། །ནད་མེད་གྱུར་པ་རྣམས་
ལ་ཡང་། །ཟླ་བ་ཕྱེད་ཅིང་རྟག་ཏུ་གཏང་། །ནད་མེད་པ་ལ་བཏང་གྱུར་ན། །སྟོབས་དང་མདོག་ནི་མཆོག་ཏུ་སྐྱེད། །ཟླ་ཕྱེད་ཚིགས་སུ་ལྷག་པར་ཡང་། །འཇམ་རྩི་བཏང་བར་གྱུར་ན་ནི། །དེ་ཡི་ཡིད་ནི་བདེ་འགྱུར་ཞིང་། །སྟོབས་སོགས་ཡོན་ཏན་འཕེལ་བར་འགྱུར། །དེ་ནི་
ལེགས་པར་འཇུག་བྱའི་ཕྱིར། །རྗེས་སུ་བཏང་བ་བླུད་པར་བྱ། །དེ་ཡིས་ཕོ་བའི་དྲོད་སྐྱེད་ཅིང་། །རླུང་ནི་བདེ་བར་རྒྱུ་བར་བྱེད། །འཇམ་རྩི་བཏང་བར་གྱུར་པ་ན། །སྨན་ཆུ་བླུད་པ་མཆོག་ཏུ་བསྔགས། །དེ་ནས་འཇམ་རྩི་གོང་མ་ཡི། །ཆོ་ག་ཡང་དག་བཤད་པར་བྱ། །སྔར་
བཤད་པ་ཡི་རྫས་ལས་ནི། །སྦུ་གུ་འཇམ་ཞིང་ཕྲ་བ་བྱ། །བདག་མེད་མེད་ཅིང་ཁ་སྒོ་ཕྲ། །དཔངས་སུ་སོར་ནི་བཅུ་དྲུག་པ། །རྩ་བ་འཁོར་ལོ་གཉིས་དང་བཅས། །འཇམ་ཞིང་བཅིངས་པར་བདེ་བར་བྱ། །འདི་ནི་ཚད་ཆེན་སྲང་བརྒྱད་དེ། །གཞན་དག་ལ་ནི་དེ་ཡི་ཕྱེད། །
མཚན་ནི་སྦུབས་ནས་ཕྱུང་ནས་ཀྱང་། །བུ་གུ་དེ་རུ་གཞག་པར་བྱ། །དེ་ནས་རྟ་ནི་ལེགས་གཞག་ལ། །དེ་ནས་སྔར་བཤད་ཚུལ་དུ་ནི། །ལྒང་པ་ལེགས་པར་བཙིར་བར་བྱ། །དེ་འདྲའི་མས་གཏོང་གོང་མ་ནི། །གཅིན་ནད་ཅན་ལ་གཏང་བར་བྱ། །ཆོ་ག་འདི་འདྲས་རྟ་ལ་ནི། །
གཅིན་ནད་སླར་ཡང་འབྱུང་མི་འགྱུར། །ལྷག་མ་ལུས་སམ་ཕྱིའི་འོག་འགྱུར། །མས་གཏོང་པས་ནི་གནོད་སྐྱེད་དེ། །དེ་བས་རྟ་ནི་ལེགས་གཞག་ལ། །དང་པོར་ལེགས་པར་གཟེགས་པར་བྱ། །སྨན་པ་བློ་དང་ལྡན་པ་ཡིས། །ན་ཚོད་སྟོབས་དང་དུས་ཚིགས་དང་། །རང་
བཞིན་གོམས་པ་ཀུན་བརྟགས་ལ། །སྣུམ་བཏང་ཅི་རིགས་དུགས་བྱའོ། །བ་ཡི་མར་རམ་ཡང་ན་ནི། །ཏིལ་མར་ཤིན་ཏུ་དང་བ་བསྐོལ། །རྟ་ཡི་གསོ་བ་ཐམས་ཅད་ལ། །བ་ཡི་མར་ནི་མཆོག་ཡིན་ནོ། །སྟོན་སྐྱེས་ཏིལ་ནི་ནག་པོ་ལ། །ལག་པས་བཙིར་བའི་ཏིལ་མར་ཡང་། །

203-1-239b

འཇམ་རྩི་དང་ནི་བསྐུ་བ་ལ། །རྟ་ལ་ཕན་པར་འགྱུར་བ་བསྔགས། །འཇམ་རྩི་གཏོང་བའི་དུས་སུ་ནི། །ཁ་ནས་གཏང་བར་མི་བྱའོ། །རྟ་ནི་སྐྱོན་མེད་ཤེས་བྱས་ལ། །ལྟོ་བར་ན་འགྲངས་ལེགས་གནས་ལ། །ཚད་ནི་ལེགས་པར་བརྟགས་ནས་ནི། །མར་གྱི་འཇམ་རྩི་གཏང་བར་
བྱ། །ཕྱི་དེ་ཉིན་ནི་ལྟོ་སྟོང་ལ། །རྟ་ཡི་ཟས་ནི་རན་པར་སྦྱིན། །འགྲངས་ཟིན་པ་ལ་བརྟག་མི་བྱ། །ལྟོགས་ལ་འཇམ་རྩི་མི་གཏོང་ངོ་། །གལ་ཏེ་རྨོངས་པས་བཏང་གྱུར་ན། །མས་གཏོང་དེ་ལས་གནོད་འབྱུང་སྟེ། །དེ་ནི་རྣོ་བས་མ་བྱིན་པར། །ཟས་ནི་འབྱིན་པར་བྱེད་པ་ཡིན། །
འཁྲུ་བ་སྐྱེད་པར་འགྱུར་བ་དང་། །དེ་བཞིན་མི་བཟད་སྦོ་བར་འགྱུར། །གང་ཚེ་ལྟོ་སྟོང་གྱུར་པ་ལ། །འཇམ་རྩི་བཏང་བར་གྱུར་ན་ནི། །དེ་ཡི་ཁོང་པ་སྟོང་པས་ན། །རྟ་སྦངས་དང་ནི་མ་འདྲེས་པར། །སླར་ཡང་དོན་མེད་འབྱུང་འགྱུར་ཞིང་། །ནད་ཀྱང་སྐྱེད་པར་བྱེད་པ་ཡིན། །
དེ་བས་རྟ་སྦངས་བཏང་གྱུར་ཅིང་། །ལྟོ་ནི་ཟས་དང་བཅས་པ་ལ། །ཚ་དང་ཁ་དང་དྲོ་བ་ཡིས། །འཇམ་རྩི་ཚད་ཙམ་གཏང་བར་བྱ། །འཇམ་རྩི་རྐུབ་ལས་བཏང་གྱུར་ཀྱང་། །ཆོ་ག་ལེགས་ན་རིམ་གྱིས་ནི། །ལུས་ཀྱི་སྟེང་འོག་ཐད་ཀ་རུ། །རྣམ་པར་ཁྱབ་པར་བྱེད་པ་ཡིན། །
མདོག་དང་ཁ་དོག་སྐྱེད་བྱེད་ཅིང་། །ནད་ཀྱང་སེལ་བར་བྱེད་པ་ཡིན། །དབང་པོ་གསལ་ཞིང་དགའ་བ་དང་། །ལུས་ཟུངས་རྣམས་ཀྱང་འཕེལ་བྱེད་ཡིན། །མེ་དྲོད་སྐྱེ་ཞིང་བརྟན་པ་དང་། །གཅིན་རྟུག་བདེ་བར་འབྱུང་བ་ཡིན། །མངལ་ནི་ལེགས་པར་བྱེད་པ་དང་། །ལུས་ཀྱང་
བརྟན་པར་བྱེད་པ་ཡིན། །འདི་ནི་འཇམ་རྩི་བཏང་གྱུར་པ། །ལེགས་པར་གྱུར་པའི་མཚན་ཉིད་ཡིན། །འཇམ་རྩི་བཏང་དྲགས་མ་ལེགས་པས། །འཕྱིན་དང་རྟུག་པ་འགགས་འགྱུར་ཞིང་། །དེ་བཞིན་གཅིན་ནད་འབྱུང་བ་དང་། །རླུང་འཁྱིལ་ལྟོ་ནི་སྦོ་བ་དང་། །ཚོན་གྱི་ནད་
རྣམས་འབྱུང་འགྱུར་ལ། །སྣུམ་རགས་གྱུར་པའི་རྒྱུ་ལས་ནི། །དེ་བཞིན་མེ་དྲོད་མི་མཉམ་དང་། །ངལ་སྐྱེན་རྨོངས་བག་རྣམས་ཀྱང་འབྱུང་། །དེ་བས་འཇམ་རྩིའི་ལས་རྣམས་ནི། །ཤིན་ཏུ་ལེགས་པར་བྱ་བ་ཡིན། །དེ་བས་དྲགས་པར་མ་གྱུར་པའི། །སྣུམ་གྱི་འཇམ་རྩི་

203-1-240a

གཏང་བར་བྱ། །འཇམ་རྩི་བཏང་བར་གྱུར་པའི་རྟ། །བཀོལ་བ་ལ་སོགས་སྤང་བར་བྱ། །འཇམ་རྩི་གཏོང་བའི་དུས་སུ་ནི། །སྨན་པས་མ་གཡེངས་ཉིད་དུ་བརྟག །འཇམ་རྩི་བཏང་བའི་རྗེས་ལ་ནི། །ཕོ་བའི་མེ་དྲོད་སྐྱེད་པའི་ཕྱིར། །ལན་ཚྭ་བཅའ་སྒ་ཤིང་ཀུན་དང་། །
ན་ལེ་ཤམ་སྦྱར་ཆང་བླུད་བྱ། །རྗེས་སུ་བཏུང་བ་འདི་ཉིད་ནི། །ནང་པར་ཟ་མ་ཟོས་ཚེ་བྱིན། །དུས་ནི་ཅི་སྲིད་བྱིན་གྱུར་པ། །དེ་སྲིད་བར་དུ་ཁོང་རྩུབ་བྱ། །ཁོང་རྩུབ་གྱུར་པར་ཤེས་ནས་ནི། །དེ་ལ་བཅོས་པའི་ཐབས་ཀྱང་བྱ། །དེ་ཡི་ཉིན་ཞག་གཉིས་པ་ལ། །སྔ་དྲོ་ཁ་ཟས་བྱིན་
པ་ཕན། །ཕྱི་དྲོ་ཁྲུས་བྱས་རྗེས་ལ་ནི། །ཤ་ཁུ་དང་སྦྱར་ཁ་ཟས་ནི། །སྣུམ་དང་ལན་ཚྭ་བྲོ་བ་སྦྱིན། །དེ་སྟོབས་ཚེ་ནི་འཕེལ་བར་འགྱུར། །དེ་ནས་ཟས་སྐོམ་འོ་མར་བཅས། །སྦྱིན་ཞིང་ཆང་བླུད་པས་བརྡ་བྱ། །རྟ་ནི་ལེགས་པར་བརྟས་གྱུར་ནས། །ལས་རྣམས་ཀུན་ལ་ལེགས་
པར་སྦྱར། །ཚེར་མ་ཆེན་པོ་ལས་སྐྱེས་དང་། །ལྕུག་མ་ལས་སྐྱེས་རྩ་བ་སྐྱེས། །ལྔ་པ་རྩ་ལས་བྱུང་བ་སྟེ། །རྩ་བ་ལྔ་པ་རྣམ་ལྔ་ཡིན། །ལྔ་པའི་འོག་མ་དྲུག་པ་དང་། །དེ་བཞིན་བདུན་པ་འཁྲུ་སྤྱོད་བྱེད། །བིལ་བ་ཨགྣི་མན་ཐ་དང་། །སོ་ན་ཀ་དང་ཀ་མ་རི། །ས་ཧ་མ་སྟེ་
འདི་དག་ནི། །རྩ་བ་ལྔ་པ་ཆེན་པོར་བཤད། །བྲྀ་ཧ་ཏི་གཉིས་ཨ་རན་དང་། །ཨདྴུ་མ་ཏི་བ་སུ་ག །རྩ་བ་ལྔ་པ་ཆུང་ངུ་རུ། །གཉིས་པ་འདི་ནི་ཤེས་པར་བྱ། །བྲྀཀྵ་དང་ནི་སྲེ་ཏྲེས་དང་། །མི་ད་རི་དང་ཤ་རི་བ། །ཨ་ཛ་ཤྲྀངྒ་ལྕུག་མ་ལས། །སྐྱེས་པ་ལྕུག་མ་ཡིན་ཞེས་བྱ། །
བྱ་བྲ་ན་ག་ཤྲེ་ཡ་དང་། །ཀ་ར་མ་ཏི་ཏྲི་ཀ་ནར། །འདི་ནི་རྩ་བ་ལས་བྱུང་བའི། །རྩ་བ་ལྔ་པར་བཞི་པར་བཤད། །ཀུ་ཤ་འཇག་མ་འདམ་བུ་དང་། །ཀུན་ཛ་མཱུ་ལ་དར་བ་ནི། །འདི་ནི་རྩ་ལས་བྱུང་བ་ཡི། །རྩ་བ་ལྔ་པ་ལྔ་པ་ཡིན། །ཀོ་ཤ་ཕ་ལ་བ་རུ་ན། །ཤི་ཀྲུ་བི་ར་རྟ་རུ་དང་། །རྟ་
རུ་ཞེས་བྱ་ལྔ་པ་ནི། །ལྔ་པའི་ཕྱི་མ་དྲུག་པ་ཡིན། །སྲེ་བརྟག་པར་ནི་བ་ལ་གཉིས། །དེ་བཞིན་པུ་ན་རྣ་བ་གཉིས། །འདི་ནི་གཅོད་བྱེད་ལྔ་པ་སྟེ། །བདུན་པ་ཡིན་པར་རབ་ཏུ་བཤད། །དུར་བྱིད་ཙནྡན་ཙི་ཏྲ་ཀ །ས་ར་དེ་བཞིན་ཤིང་མངར་དང་། །ཀུ་ཤ་ན་ས་ཤ་མ་དང་། །བེ་ཛ་

203-1-240b

ཡན་ཏི་ཏྲ་བན་ཏི། །དོང་ཀ་ནིམ་པོ་འུ་ཏི་ཀ །དེ་བཞིན་ག་པུར་སླེ་ཏྲེས་དང་། །དེ་བཞིན་སཔྟ་པརྞི་དང་། །མ་ཧཱ་ནིམ་པའི་འབྲས་བུ་དང་། །ནས་དང་རྒྱ་ཤུག་ཀུ་ལད་དང་། །འདི་ནི་འཇམ་རྩིའི་སྨན་སྡེ་ཚན། །འདི་དག་ཐམས་ཅད་བསྡུས་ནས་ནི། །ཆུ་བྲེ་བཞི་ནང་མེ་ཆུང་ལ། །
ལེགས་པར་བཙོས་པའི་སྲང་བརྒྱ་ནི། །རྟ་ནི་མཆོག་གྱུར་པ་ལ་གཏང་། །བར་མ་རྣམས་དང་ཆུང་ངུ་ལ། །བཞི་བཅས་ཕྲི་བ་གཏང་བར་བྱ། །སྨན་ཁུ་དེ་ནི་བླངས་ནས་ཀྱང་། །བཞི་ཆ་ལུས་ཀྱི་བར་དུ་བསྐོལ། །ཡུངས་ཀར་ཤ་ར་པུཥྤ་དང་། །པི་པི་ལིང་དང་བཅའ་ལྒ་
དང་། །ན་ལེ་ཤམ་དང་བྱི་དང་ག །ས་ར་ལ་དང་ཐང་ཤིང་དང་། །སུག་སྨེལ་རུ་རྟ་ཧ་རེ་ཎུ། །བྱ་བྲ་ན་ཁ་ཤ་མ་དང་། །ཧ་ཏི་པི་པི་ལིང་རྩ་བ། །དེ་བཞིན་ཡུངས་ཀར་སེར་པོ་དང་། །པུ་ཙེ་ཤེལ་དང་བོང་ང་དང་། །དེ་བཞིན་དུ་ནི་ག་རུ་རྣམས། །ཆང་དང་ཏིལ་མར་གཅིན་དང་ནི། །
དེ་བཞིན་ལན་ཚྭ་རྣམས་དང་ནི། །པོ་སོན་ཆ་དང་གཞན་ཡང་ནི། །འབྲས་བུ་གསུམ་ཡང་གཞུག་པར་བྱ། །དེ་ནི་གཅིག་ཏུ་བསགས་ནས་ཀྱང་། །མཁས་པ་ཡིས་ནི་གནས་སྐབས་སུ། །རྟ་ནི་ལྟོགས་པར་གྱུར་པ་ལ། །ནི་རུ་ཧ་ནི་གཏང་བར་བྱ། །ལྒང་པ་ཚ་དང་ཁ་ར་པའི། །
ཁུ་བ་ལ་ནི་སྦངས་ཏེ་གཏང་། །རྟ་ཡི་ནད་དང་ཚེ་དང་ནི། །གོམས་དང་སྟོབས་དང་དུས་ཚོད་རྣམས། །ལེགས་པར་བརྟགས་ལ་བཞག་ནས་ཀྱང་། །སྨན་གྱི་སྦྱོར་བ་ལེགས་པར་གཏང་། །ལོ་གསུམ་ལོན་པ་ནི་རུ་ཧ། །སྲང་ལྔ་ཡོངས་སུ་གཏང་བར་བྱ། །རྟེའུ་དང་རྒན་དང་
གཞོན་ནུ་ལ། །བཞི་ཆར་དབྱེ་བས་སྦྱང་བར་བྱ། །མཆོག་ལ་སྨན་ཁུ་བྲེ་དོ་སྟེ། །བར་མ་ལ་དེ་བཞི་ཆ་བྲི། །ཆུང་ངུ་ལ་ནི་དེ་ཡི་ཕྱེད། །འདི་ནི་ཚད་ཀྱི་ངེས་པ་ཡིན། །དང་པོར་རེག་ན་བདེ་བ་དང་། །དེ་བཞིན་རྣོ་བྲོ་ཚ་བྲོ་གཏང་། །ནད་ཀྱི་ཚུལ་ནི་བརྟགས་ནས་ཀྱང་། །
གོང་ནས་གོང་དུ་བསྐྱེད་པར་བྱ། །དེ་ནས་ནད་ནི་མ་གདུངས་དང་། །གནས་གསུམ་དག་ཀྱང་རྗེས་བརྟགས་ལ། །ནད་ཀྱི་ཚུལ་ལས་ཅི་རིགས་པར། །སྨན་གྱི་སྦྱོར་བ་བྱ་བ་ཡིན། །ནི་རུ་ཧ་ཡི་རྗེས་ཐོགས་ལ། །འོ་མའི་འཇམ་རྩི་བདེ་སྐྱིད་ཡིན། །ཁ་ར་སྦྲང་རྩི་མར་

203-1-241a

དང་ནི། །ཤིང་མངར་དང་ནི་མ་དུ་ཀ །ཤུག་པ་བཙོད་དང་པུ་ཤེལ་ཙི། །ཙནྡན་པདྨ་གེ་སར་དང་། །གཏང་པལ་དང་ནི་རྒུན་འབྲུ་དང་། །ཤ་འགག་པ་དང་རིལ་རྣམས་དང་། །འོ་མ་དྲང་དང་སྦྱར་བ་ཡི། །འོ་མའི་འཇམ་རྩི་བསིལ་མོ་གཏང་། །འདི་
ཡིས་ཁོང་པར་བདེ་འགྱུར་ཞིང་། །ལུས་ཡང་ཡི་ག་འབྱེད་པ་དང་། །གཅིན་རྟུག་འཕྱེན་ནི་འགགས་འགྱུར་བ། །ལེགས་པར་སེལ་བར་བྱེད་པ་ཡིན། །སེམས་གསལ་བ་དང་འགྲེས་གྱུར་པ། །ནི་རུ་ཧ་ལེགས་མཚན་ཉིད་ཡིན། །སེམས་བདེ་སྙིང་སྟོབས་ཆེ་བ་དང་། །རྟ་ཡི་
གཟི་མདངས་འཕེལ་བར་འགྱུར། །ལུས་ལ་གནས་པའི་རླུང་ལྔ་ཡང་། །རྗེས་སུ་མཐུན་པར་རྒྱུ་བར་བྱེད། །རླུང་གི་ནད་ནི་འཁྱིལ་བ་དང་། །དེ་བཞིན་རྟུག་སྐམ་ནད་རྣམས་དང་། །གཞན་ཡང་དེ་འདྲ་བ་ཡི་ནད། །མས་གཏོང་དྲག་པོས་སེལ་བར་བྱེད། །པགས་ནད་སེལ་
ཅིང་དབང་པོ་གསལ། །དེ་བཞིན་རིམ་གྱིས་སེལ་བྱེད་དེ། །ནམ་མཁའ་དྭངས་པའི་ཟླ་བ་ལྟར། །རྟ་དེ་སྐྱོན་མེད་པར་སྣང་ཡིན། །ནི་རུ་ཧ་ཉེས་མཚན་ཉིད་ནི། །ནད་ནི་བརྟན་པས་གནས་པ་དང་། །ལུས་ལྕི་ཞུམ་པར་གྱུར་པ་དང་། །འཕྱེན་དང་རྟ་སྦངས་འགགས་པ་
དང་། །ཚབས་ཆེ་རློན་པར་འགྱུར་བ་དང་། །གཅིན་འགགས་སྦོས་པར་འགྱུར་བ་ཡིན། །ནི་རུ་ཧ་ནི་དྲགས་གྱུར་ན། །རྟ་ཡི་རྟུག་པ་ཟད་འགྱུར་ཞིང་། །ཁོང་པ་གཟེར་གྱིས་ཁྱབ་པ་དང་། །ལུས་ཀུན་ན་བར་བྱེད་པ་ཡིན། །དྲི་མ་ཤིན་ཏུ་བསལ་དྲགས་པས། །རླུང་ནི་རབ་ཏུ་
འཁྲུགས་པར་བྱེད། །དེ་ལས་སྦེག་དང་མདོག་ངན་དང་། །དབང་པོ་ཤིན་ཏུ་ཞུམ་འགྱུར་བའི། །རྨོངས་ཞིང་འཁྲུལ་པ་ཉིད་དང་ནི། །ལུས་རེངས་པར་ཡང་འགྱུར་བ་ཡིན། །དཀར་བའི་མཆུ་ནི་འབའ་ཞིག་པའི། །བདག་ནི་འཁྲུ་བར་འགྱུར་བ་ཡིན། །འདི་ཡི་ནད་བཞིར་འགྱུར་བ་
ཡང་། །ཡིད་བདེ་བར་ནི་མི་འགྱུར་རོ། །ཆུ་འཐུངས་པ་འམ་ཁྲུས་བྱས་པའི། །དེ་བཞིན་འགྲངས་པར་གྱུར་པ་དང་། །རླུང་ནི་གྱེན་དུ་ཟློག་པ་དང་། །ཤིན་ཏུ་འཁྲུ་བར་བྱེད་པ་དང་། །རྟ་གང་འཇིགས་པས་ཉེན་པ་དང་། །གཅོང་ཆེན་ནད་ཀྱིས་བཏབ་པ་དང་། །ཁུར་གྱིས་ཤིན་

203-1-241b

ཏུ་དུབ་པ་དང་། །རྟེའུ་དང་དེ་བཞིན་གསེབ་དང་ནི། །ཁྱད་པར་དུ་ནི་སྦྲུམ་མ་དང་། །དུགས་གིས་ཉེན་དང་ཆང་འཐུངས་དང་། །དུབ་ཅིང་འཁྲུལ་བར་འགྱུར་བ་དང་། །ལུད་པ་དབུགས་མི་བདེས་ཉེན་དང་། །ཁྲག་དང་མཁྲིས་པས་ཉེན་པ་དང་། །སྟོན་དང་སོས་ཀའི་ཚེ་ན་ནི། །མས་
གཏོང་བས་ནི་གཏང་མི་བྱ། །འདི་ཡིས་ཕན་པ་མི་སྐྱེད་ཀྱི། །གནོད་པ་མི་བཟད་སྐྱེད་པར་བྱེད། །དེ་ནས་མས་གཏོང་བྱས་པ་ཡི། །རྟ་ནི་རླུང་མེད་གནས་སུ་གཞག །སྐེ་རེངས་ཀྱིས་ནི་བཏབ་གྱུར་ན། །རྗེས་སུ་གསོ་བ་འདི་བྱ་སྟེ། །ས་མང་ག་ར་ཤུ་ཏི་དང་། །རུས་རུ་རྒྱམ་ཚ་སྦྱར་བ་
ཡིས། །བསྐུས་ནས་དེ་ཡི་རྗེས་ལ་ནི། །རྡོ་དང་གསེག་མས་དུགས་བྱའོ། །སྣ་སྨན་གྱི་ནི་ལས་རྣམས་དང་། །མེ་བཙའ་ཡི་ནི་ལས་ཀྱང་བྱ། །འོ་མ་དང་ནི་ཤ་ཁུ་དང་། །སྦྱར་བའི་ཟས་ནི་སྦྱིན་པར་བྱ། །གཞང་ཁ་ན་བར་གྱུར་པ་དག །དེ་ཡི་གསོ་བ་བཤད་པར་བྱ། །བསིལ་
སྨན་གྱི་ནི་ལྡེ་གུ་དང་། །འདམ་ལ་སོགས་པ་བསྐུ་བ་བྱ། །མཇུག་མ་མཚན་དང་མགོ་བོ་དང་། །རྣ་བ་མཇུག་མ་ཚིགས་ཀུན་བསྐུ། །ཁ་ཟས་བུ་རམ་མར་དག་དང་། །སྦྱར་བ་གྲང་མོ་བྱིན་ན་ཕན། །མར་དང་སྦྲང་རྩི་རྒུན་འབྲུ་དང་། །ཁ་ར་དང་སྦྱར་སྦྱིན་བྱ་ཞིང་། །གནས་ནི་བསིལ་བར་
གཞག་པར་བྱ། །དེས་ནི་བདེ་བ་འཐོབ་པར་འགྱུར། །གཅིན་ནི་གལ་ཏེ་འགགས་གྱུར་ན། །དེ་ལ་གསོ་བ་འདི་བྱ་སྟེ། །མངར་བའི་སྨན་དང་སྦྱར་བ་ཡི། །འོ་མའི་འཇམ་རྩི་དེ་ཉིད་གཏང་། །སྨན་པས་རྟ་ནི་སྣུམ་ཆོས་དང་། །དུགས་བྱས་ནས་ནི་རུ་ཧ་གཏང་། །མངར་བའི་སྨན་
དང་སྦྱར་བ་ཡི། །འཇམ་རྩི་ཉེ་བར་གཏང་བར་བྱ། །ཚ་བ་གསུམ་དང་སྦྱར་བ་ཡི། །རེང་བུ་རྣོ་ཞིང་ཚ་བ་དང་། །ལན་ཚྭར་བཅས་པ་མཚན་ནས་གཏང་། །དེ་ནི་གཅིན་འགགས་སེལ་བར་བྱེད། །ཁ་ཟས་མར་དང་འོ་མ་དང་། །སྦྲང་རྩི་པི་པི་ལིང་བཅས་བྱིན། །ཡང་ན་ཕྱེད་
དང་གསུམ་རི་དང་། །པི་པི་ལིང་སྦྱར་སྦྱིན་པར་བྱ། །སྨན་དེ་དག་དང་ཆང་དང་སྦྱར། །རྗེས་སུ་བཏུང་བ་སྦྱིན་པར་བྱ། །འབྲས་ཆན་སཱ་ལུ་འོ་མ་དང་། །ཞོ་སྦྱར་ཁ་ཟས་སྦྱིན་པ་བསྔགས། །ཅི་ནས་འདིར་ནི་བདེར་འགྱུར་བའི། །མེ་བཙའ་ཡི་ནི་ལས་ཀྱང་བྱ། །གལ་ཏེ་

203-1-242a

ལུས་ནི་རེངས་གྱུར་ན། །དེ་ལ་གསོ་བ་འདི་བྱ་སྟེ། །ཟས་དང་བསྐུ་དང་བཏུང་བ་དང་། །སྣ་སྨན་དང་ནི་འཇམ་རྩི་གཏང་། །རྟུག་པ་གསུམ་གྱི་དུགས་དག་ཀྱང་། །འདི་ལ་ལེགས་པར་སྦྱར་བར་བྱ། །གཏར་ག་ཡི་ནི་ལས་བྱ་ཞིང་། །རླུང་མེད་པ་ཡི་གནས་སུ་
གཞག །སྨྱོ་ན་འབྱུང་པོའི་གཏོར་མ་དང་། །བདུག་པ་དང་ནི་མིག་སྨན་དང་། །སྦྱིན་སྲེག་གི་ནི་ལས་བྱ་ཞིང་། །བྲམ་ཟེ་དགེ་སྦྱོང་ཚིམ་པར་བྱ། །གཞན་ཡང་སྨྱོ་བ་གསོ་བ་ལས། །བཤད་པའི་ཆོ་ག་རྣམས་ཀྱང་བྱ། །དེ་བཞིན་ནད་ཀྱི་ཁྱད་པར་གཞན། །བྱུང་ནའང་ཅི་
རིགས་གསོ་བར་བྱ། །ཤ་ལི་ཧོ་ཏྲའི་གྲུབ་པའི་གནས་བདུན་པ་ལས་མས་གཏོང་བའི་ཆོ་ག་བསྟན་པའི་ལེའུའོ།།      །།ཐུབ་མཆོག་ཤ་ལི་ཧོ་ཏྲ་ལ། །ལེགས་ཐོས་དུལ་བ་དང་ལྡན་པས། །རྐང་པ་ལ་ནི་མགོ་གཏུགས་ཏེ། །དྲི་ཞིང་སྐུལ་བའི་ཚིག་གིས་སྨྲས། །ཁྱེད་
ཀྱིས་བརྩེ་བའི་ཕྱོགས་དང་ནི། །གནོད་པར་གྱུར་པ་རྣམས་ཀྱང་གསུངས། །གཙག་དཔྱད་ཀྱི་ནི་དབྱེ་བ་ཡང་། །རྣམ་པ་དྲུག་ཏུ་ཡོངས་སུ་གསུངས། །རྩ་ཕུག་དྲགས་དང་རྒྱུས་པ་དང་། །ཚིགས་ལ་གནོད་གྱུར་ལས་ནད་གྱུར། །འདི་དག་གི་ནི་མཚན་མ་དང་། །གསོ་བ་
བདག་ལ་བཀའ་སྩོལ་ཅིག །དེ་ནས་བུ་ཡིས་དྲིས་གྱུར་པའི། །ལེགས་ལྡན་གྱིས་ནི་སླར་སྨྲས་པ། །ནང་དང་རུས་པ་རྒྱུས་པ་ལ། །གནོད་འགྱུར་གསུམ་པོ་གསོར་མི་རུང་། །ཚིགས་པ་གཉའ་བར་རྩ་བོ་ཆེར། །གནོད་པར་གྱུར་པ་གསོར་རུང་ཡིན། །བསྟན་བཅོས་
ལས་རྣམས་ལེགས་མཐོང་ཞིང་། །རང་བཞིན་བརྟན་ལ་ལས་ལ་བྱ། །ལག་པ་ཤིན་ཏུ་གོམས་གྱུར་པ། །དེ་ཡིས་ནམ་ཡང་གནོད་མི་སྐྱེད། །རྟ་རྫི་ལས་བྱུང་ཉེས་པ་ཡང་། །ནད་པ་སྤྱོད་ལམ་འཆོལ་བ་ལས། །ནད་ཀྱི་ཚུལ་ནི་བྱུང་གྱུར་པ། །དེ་ནི་གསོ་བར་སླ་བ་ཡིན། །
གཙག་བུས་བཅད་དམ་ཕུག་པ་ན། །སྨན་པའི་ཉེས་པ་ལས་ནད་གྱུར། །དེ་ཡི་དབང་པོ་མ་ཚང་བ། །འཆི་བ་ཉིད་དུ་འགྱུར་བ་ཡིན། །སྨན་པ་ར་རོ་ནད་བུ་ཅན། །དེ་བཞིན་དུབ་དང་ཚ་བས་ཉེན། །སྨྱོས་སམ་ཤིན་ཏུ་འཁྲུག་གྱུར་པའམ། །རྨོངས་པས་འཁྲུལ་པར་གྱུར་

203-1-242b

པའམ། །ངོ་ཚས་འཁུམས་སམ་འདར་གྱུར་ཏམ། །ལས་ལ་ཐེ་ཚོམ་བཅས་པ་དང་། །རྒན་པོའམ་ཡང་ན་བྱིས་པའམ། །ཡིད་མི་བདེ་བའམ་འཇིགས་གྱུར་པ། །དམ་པ་ལ་ནི་མི་བརྟེན་པའམ། །གང་ཞིག་རྨོངས་པར་གྱུར་པ་ཡི། །ཐོས་པ་ཉུང་ཞིང་ང་རྒྱལ་ཆེ། །བདག་
ཉིད་མི་སྤྱོད་ནོར་ལ་སྡང་། །གླེན་ཞིང་དོན་ཚོམ་ཡིན་ལ་མཁས། །སྨན་པ་གཞན་མི་བཟོད་ཅིང་སྨོད། །ཡུལ་ལ་བརྐམ་ཞིང་ཁྲོ་ལ་གདུག །རྟག་ཏུ་རང་གི་དོན་ལ་བརྩོན། །བདག་པོ་འམ་ནི་བླ་མ་དང་། །དེ་བཞིན་ལེགས་པར་སྤྱོད་པ་ན། །འཛེམ་པ་མེད་ཅིང་ངོར་མི་ལྟ། །ངོ་
ཚ་དང་ནི་འཇིགས་པ་སྤངས། །རྒྱལ་པོའི་བཀའ་དྲིན་གྱིས་གསོ་ཡང་། །རྒྱལ་པོའི་མཛོད་ནི་སྟོང་བར་བྱེད། །དེ་འདྲའི་སྨན་པ་ནམ་ཡང་ནི། །རྟ་ཡི་གནས་སུ་གཉེན་མི་བྱ། །དེ་འདྲའི་སྨན་པ་དྲག་ལྡན་པས། །རྟ་ལ་མཚོན་གྱིས་གནོད་པ་སྐྱེད། །ཚད་ལས་རྒྱལ་བའམ་
གནས་ནོར་བའམ། །སྟེང་དང་འོག་ཏུ་གནོད་པ་འམ། །ཕུག་དྲགས་པ་འམ་མ་ཕུགས་པ། །རྩ་ནི་བློ་ངན་དེས་མི་ཤེས། །དེ་བས་ཕུག་ནི་དྲགས་པ་ཡི། །གནོད་པ་བཤད་ཀྱིས་མཉན་པར་གྱིས། །ཁྲག་ནི་ཕུག་དྲགས་མ་བྱུང་ན། །དབུགས་མི་བདེ་དང་ལུད་པ་སྐྱེད། །
འདུག་པ་ན་ནི་ན་འགྱུར་ཞིང་། །ཡན་ལག་ཉམས་དང་བརྩོན་ཆེན་སྐྱེད། །ཤ་སྙིང་རྨ་ནི་འདྲུལ་བ་དང་། །ཁོང་ཚ་སྐྲངས་པ་མི་བཟོད་སྐྱེད། །སྤུ་ཡང་གཤོར་བར་འགྱུར་བ་དང་། །རྩ་རྒྱུས་ཀྱི་ནི་ནད་སྐྱེད་བྱེད། །ནད་འདིས་སྲོག་ནི་འཕྲོག་བྱེད་དེ། །འཕྲལ་དུ་འཆི་བར་འགྱུར་བ་
ཡིན། །མཚོན་གྱིས་གནད་དུ་ཕོག་གྱུར་པ། །དཔེར་ན་མེ་དང་གནམ་ལྕགས་སམ། །དུག་འཐུངས་ལས་ནི་གསོད་པ་ལྟར། །རྟ་ཡི་སྲོག་ནི་ཟད་བྱེད་ཡིན། །དེ་བས་ལུས་དང་ནད་ཚུལ་དང་། །ཡུལ་དང་གོམས་པ་ན་ཚོད་སྟོབས། །དུས་ཚིགས་ལུས་རྣམས་ལེགས་
བརྟགས་ལ། །སྨན་པས་ཁྲག་ནི་དབྱུང་བར་བྱ། །རྩ་ནི་ཕུག་དྲགས་མ་ཕུགས་པ། །གཉིས་ཀ་ལས་ནི་ཉེས་པ་འབྱུང་། །ལེགས་པར་ཕུག་ན་ནད་འབྱིན་ཅིང་། །སྡུག་བསྔལ་དེ་ལས་ཐར་བར་བྱེད། །གལ་ཏེ་རྩ་ནི་རང་གནས་སུ། །མ་རྒྱས་གསལ་བར་མི་སྣང་

203-1-243a

བའམ། །གནས་མིན་པར་ནི་ཕུག་གྱུར་པ། །དེ་ལས་གནོད་པ་སྐྱེད་པར་འགྱུར། །རུས་པ་རྒྱུས་པ་གནད་རྣམས་དང་། །མིད་པ་དང་ནི་ཙེའི་ལྷད་དང་། །དེ་ནི་ཚིགས་ཀྱི་སྦྲེལ་མཚམས་སུ། །གཙག་བུའི་ལས་ནི་སྤང་བར་བྱ། །ཙེའུ་ལྷད་གནས་སུ་རྩ་བཅད་
ན། །དེ་ཡི་ལུས་ནི་སྐམས་འགྱུར་ཞིང་། །རྩ་བ་ནས་བཅད་ཤིང་ལྟ་བུར། །དེ་ནི་འཆི་བར་འགྱུར་བ་ཡིན། །ཚིགས་ཀྱི་མཚམས་ལས་རྟ་ལ་ནི། །གཏར་ག་བྱས་པས་རྩ་བཅད་ནས། །དེ་ཡི་ཚིགས་ནི་སྲང་འགྱུར་ཞིང་། །རྟག་ཏུ་འཐེང་བ་ཉིད་དུ་འགྱུར། །མཚོན་གྱིས་
གང་གི་གནད་དུ་ནི། །རྩ་བཅད་དེ་ནི་འཚོ་མི་འགྱུར། །གང་གིས་གཙག་བུའི་རྩེ་ཡིས་ནི། །རྒྱུས་པ་ལ་ནི་གནོད་གྱུར་པ། །དེ་ཡིས་འཐེང་པོར་འགྱུར་བ་འམ། །འཕྲལ་དུ་དབང་པོ་ཉམས་པར་འགྱུར། །རུས་པ་ཕུག་ན་ཆུ་སེར་ནི། །སེར་པོ་སླ་བ་འཛག་པར་འགྱུར། །གླང་
པོའི་སྣ་དང་འདྲ་བར་ནི། །ཡན་ལག་དེ་ནི་འཁུམས་པར་འགྱུར། །མིད་པ་བརྟན་ལ་ཕུག་གྱུར་ན། །དེ་ལས་གནོད་པ་མང་འགྱུར་ཏེ། །རླུང་གིས་རྒྱས་པར་འགྱུར་བ་དང་། །ཡང་ན་འཆི་བར་འགྱུར་བ་ཡིན། །དེ་བས་ནད་དང་རུས་ཚིགས་སུ། །བྱུང་བ་གསུམ་པོ་གསོར་མི་
རུང་། །གསོར་རུང་བ་ནི་བཤད་པ་གསུམ། །དེ་ཡི་གསོ་བ་བཤད་པར་བྱ། །དེ་ལ་ཕུག་དྲགས་གྱུར་པ་ན། །སྣུམ་དང་དུགས་ཀྱི་ཆོ་ག་བྱ། །སྣུམ་ནི་བཞི་པོས་བསྐུས་ནས་ནི། །ཁྲག་ནི་སླར་ཡང་བསྐྱེད་པར་བྱ། །ཁྲག་འཕེལ་གྱུར་པས་ན་བ་དང་། །ཚ་བས་གདུངས་
པར་གྱུར་ན་ཡང་། །འོ་མ་བསིལ་སྨན་ཁུ་བ་ཡིས། །བསྐུ་ཞིང་ཡོངས་སུ་བླུགས་པར་བྱ། །གནས་དང་ཁ་ཟས་བཟང་པོ་དང་། །མངར་བག་དག་གིས་དེ་བསལ་བྱ། །སྨན་ཁུ་བསིལ་བའི་འཇམ་རྩི་ཡང་། །སྨན་པས་བསྒྲིམས་ཏེ་བྱ་བ་ཡིན། །བཙགས་པ་དང་ནི་སྨན་ཁུ་
བླུགས། །དུས་གཉིས་སུ་ནི་བྱ་བ་ཡིན། །ཇི་ལྟར་འཇུ་བར་གྱུར་པའི་ཚོད། །ཤེས་ནས་འོ་མའི་བཏུང་བ་སྐྱེད། །ཆུ་ལ་ཏིལ་མར་བླུད་པ་དང་། །དེ་བཞིན་ལྗང་པ་སྦྱིན་པར་བྱ། །དེ་ཡི་འོག་ཏུ་འདི་ལ་ནི། །སྣ་སྨན་གྱི་ནི་ལས་ཀྱང་བྱ། །ཤིན་ཏུ་ཁྲག་མང་བྱུང་གྱུར་ན། །

203-1-243b

གདོན་བསྲུང་པ་ཡི་ཆོ་གའང་བྱ། །འོ་མའི་འཇམ་རྩི་གཏང་བྱ་ཞིང་། །དེ་བཞིན་ནས་ཆག་ཁ་ཟས་སྦྱིན། །སྨན་པས་འདི་ལ་ནས་ཐུག་དང་། །ཉ་ཤ་ཡི་ནི་ཤ་ཁུ་སྦྱིན། །གཙག་བུ་ལས་བྱུང་ནད་རྣམས་ཀུན། །སྔར་ནི་རྣམ་པར་བཤད་པ་ཡིན། །དེ་ལས་བཤད་པའི་གསོ་
བ་ནི། །བྱས་ནའང་བདེ་བ་ཐོབ་པར་འགྱུར། །ཤ་ལི་ཧོ་ཏྲའི་གྲུབ་པའི་གནས་བདུན་པ་ལས་གཙག་བུ་ལས་གྱུར་པའི་ནད་བསྟན་པའི་ལེའུའོ།།      །།ཤ་ལི་ཧོ་ཏྲ་བདེ་གནས་ལ། །ལེགས་ཐོས་ཀྱིས་ནི་ཡང་དྲིས་པ། །བརྟ་བྱའི་ཆོ་ག་མ་ལུས་པ། །དོན་གྱིས་ཡང་དག་ཤེས་
པར་འཚལ། །འོ་མའི་འཇམ་རྩིའི་ཡོན་ཏན་དང་། །འཇམ་རྩི་གཞན་ཡང་བསྟན་དུ་གསོལ། །བུ་ཡིས་དེ་སྐད་དྲིས་པ་དང་། །ཤ་ལི་ཧོ་ཏྲས་སླར་སྨྲས་པ། །འདི་དག་ཐམས་ཅད་མ་ལུས་པར། །ངས་བཤད་པ་ལས་ཤེས་པར་གྱིས། །ཐོག་མ་ཐ་མར་བཅས་པ་ཡི། །
རྩ་བ་ལྔ་པ་ཉིད་པོ་དང་། །ནས་དང་རྒྱ་ཤུག་ཀུ་ལདྠ། །ཏ་པལ་ཡང་ནི་བསྐོལ་བར་བྱ། །ཡང་ན་བི་ད་རི་ལ་སོགས། །སྨན་གྱི་སྡེ་ཚན་བསྡུས་ནས་ནི། །ཆུར་བསྐོལ་བ་ཡི་ཁུ་བ་དག །ཚད་བཞིན་དུ་ནི་གཏང་བར་བྱ། །སྨན་ཁུ་དེར་ནི་ཐལ་སྨན་དང་། །གཅིན་དང་དེ་བཞིན་
གཞང་ཁ་ཆུང་། །བུ་རམ་ཤིང་ཁུ་འོ་མ་དང་། །ཆང་དང་སྦྱར་བའི་ཆང་རྣམས་ནི། །སྲོག་ཆགས་ཀུན་གྱི་ཤ་ཁུ་ནི། །སྨན་པ་མཆོག་གིས་གཅིག་ཏུ་བསྡུ། །དེ་ལས་རྟ་ཡི་རླུང་ནད་ནི། །གསོ་བའི་སྨན་གྱིས་སྦྱང་བར་བྱ། །གཅིན་རྣམས་ཀྱིས་ནི་བད་ཀན་སེལ། །ཐལ་
སྨན་དེ་ལས་ལྷག་པ་ཡིན། །བུ་རམ་ཤིང་གི་ཁུ་བ་དང་། །དེ་བཞིན་འོ་མ་སྣ་ཚོགས་ནི། །ཁྲག་དང་མཁྲིས་པ་སེལ་བྱེད་ཅིང་། །རླུང་ནི་བདེ་བར་བྱེད་པ་ཡིན། །ནད་ཀྱི་ཚིགས་ནི་གསུམ་སེལ་བའི། །ལྡེ་གུ་ང་ལས་ཉན་པར་གྱིས། །ཤིང་མངར་དང་ནི་ཐང་ཤིང་དང་། །
ས་ར་ལ་དང་ཉུངས་ཀར་དང་། །རུ་རྟ་སུག་སྨེལ་ཧ་ཏེ་བུ། །རྒྱ་སྤོས་དང་ནི་བཅའ་ལྒ་དང་། །རསྣ་བྱཱ་གྷྲ་ན་ཁ་དང་། །པི་པི་ལིང་དང་ཤུ་དག་དང་། །དེ་བཞིན་ལན་ཚྭ་ལྔ་པོ་དང་། །པོ་སོན་ཆ་ཡི་འབྲས་བུ་དང་། །ཏིལ་མར་དང་ནི་སྦྱར་བ་དང་། །འཁྲུ་བའི་དོན་དུའང་སྦྱིན་པར་

203-1-244a

བྱ། །ཅི་སྐད་བཤད་པའི་རིམ་པ་ཡིས། །བཏབ་པའི་ཆོ་ག་ཉིད་བྱ་སྟེ། །དུས་སུ་རྟོགས་པར་གྱུར་པ་ལ། །སྨན་པས་ནི་རུ་ཧ་གཏང་བྱ། །དེ་ནི་ལན་ཚྭ་དང་བཅས་པ། །རྣམ་པ་གསུམ་ནི་གཏང་བྱ་སྟེ། །དང་པོ་འཇམ་པོ་ཉིད་དུ་བྱ། །དེ་ནས་ཕྱིར་ཞིང་
རྣོན་པོ་བྱ། །ཚད་ལས་བཞི་ཆས་ཆུང་བ་དང་། །དྲོ་ཞིང་ལན་ཚྭ་ཆུང་འཇམ་པ། །ནད་ནི་གདུལ་བར་དང་པོར་ནི། །མས་གཏོང་པ་ནི་འདི་བྱའོ། །ཚད་ལས་བཞི་ཆས་ལྷག་གྱུར་ཅིང་། །ཚ་དྲོ་ལན་ཚྭ་དང་ལྡན་པ། །བཏུལ་ཟིན་པ་ཡི་ནད་ལ་ནི། །བཏང་ན་ནད་ནི་འབྱིན་
པར་བྱེད། །སྨན་ནི་མངར་པོ་དང་ལྡན་ཞིང་། །འོ་མ་མར་དང་སྦྱར་བ་དང་། །སྦྲང་རྩི་ལེགས་པར་བཏགས་པ་དག །ནད་བསལ་ཟིན་ནས་སྦྱིན་པར་བྱ། །སྦྱང་བྱས་རྟ་ལ་བྱས་པ་ཡིན། །དྭངས་མ་རླུང་ནི་སྐྱོན་མེད་བྱེད། །ཞུ་བའི་གནས་ཀྱི་མཁྲིས་བད་ཀན། །ལེགས་
པར་སེལ་བར་འགྱུར་བ་ཡིན། །ལུས་ཀྱི་རླུང་ནི་ལྔ་པོ་ཡང་། །བདེ་བར་རྒྱུ་བར་བྱེད་པ་ཡིན། །ཅི་སྟེ་ཐལ་སྨན་བསྲེ་ན་ནི། །དྲི་མ་འབྱིན་པར་བྱེད་པ་ལྡན། །དེ་བཞིན་སྦྱངས་པས་ནད་ཀྱི་ཚོགས། །གཏིང་ནས་སེལ་བར་བྱེད་པ་ཡིན། །སྦྱངས་པས་ནད་ནི་བསལ་
གྱུར་ཅིང་། །ཁོང་པ་དག་པར་གྱུར་པ་ལ། །འཇམ་རྩི་ལེགས་པར་བཏང་ན་ནི། །ཟླ་རྒྱས་ལྟ་བུར་ལུས་འཕེལ་འགྱུར། །དུག་དང་རྒན་པོ་གཞོན་ནུ་དང་། །ཆང་འཐུངས་པ་དང་ལྟོགས་པ་དང་། །ཆུ་འཐུངས་པ་དང་ཁྲུས་བྱས་པ། །དེ་བཞིན་རྩུབ་བག་ཟོས་པ་
དང་། །གཅོང་ཅན་དག་དང་རླུང་ཡར་འཁྱིལ། །དེ་བཞིན་སྐྲངས་པ་རེད་པ་དང་། །ལུད་པ་དབུགས་མི་བདེ་དམུ་རྫིང་། །ཡིན་ལ་མས་གཏོང་ལས་མི་བྱེད། །གང་ལ་ནི་རུ་ཧ་གཏོང་བའི། །རྟ་དེ་ལ་ནི་ནང་པར་དག །ལྟོ་སྟོང་ཉིད་དུ་བཞག་ནས་ནི། །དེ་ནས་ལེགས་བཏང་ནད་བསལ་
བྱ། །འཇམ་རྩི་ཆོ་གའི་ཚུལ་ལས་ནི། །སྔར་བཤད་ལྟ་བུར་གཏང་བར་བྱ། །ནད་དང་བཅས་པར་གྱུར་པ་ལ། །བདའ་བ་དག་ཀྱང་བྱ་བ་ཡིན། །ཚད་བཞིན་འཇམ་རྩི་བཏང་བ་དང་། །འོ་མའི་འཇམ་རྩིའང་གཏང་བར་བྱ། །སྣུམ་འཐུངས་པ་ལས་གང་བཤད་པའི། །ཆོ་ག་དང་ནི་

203-1-244b

བཏུང་བ་བླུད། །སྣུམ་གྱི་ཆོ་གས་རོ་སྟོད་ཀྱི། །ནད་ནི་སེལ་བར་བྱེད་པ་ཡིན། །དེ་བཞིན་ལུས་ཀྱི་རོ་སྨད་ཀྱི། །ནད་ནི་འཇམ་རྩིས་སེལ་བར་བྱེད། །སྦེག་དང་གཞོན་ནུ་རྒན་པོའི་དང་། །རྟ་གང་སྟོབས་ནི་ཟད་པ་དང་། །ལས་ཆེན་དག་ལ་སྦྱར་བ་དང་། །དེ་བཞིན་ལུས་
ཟུངས་ཟད་པ་དང་། །རོ་སྨད་ཀྱི་ནི་ནད་རྣམས་དང་། །ནད་ནི་ཚིགས་སུ་ཞུགས་པ་དེ། །འདི་དག་གིས་ནི་ཉེན་གྱུར་པ། །འཇམ་རྩི་བཏང་ན་བདེ་འཐོབ་འགྱུར། །ཁྱད་པར་དུ་ནི་སོས་ཀ་སྦྱར། །འཇམ་རྩི་ཚད་ཙམ་བཏང་བྱས་ཏེ། །འདི་ནི་སྦྱོར་བ་རྗེས་མཐུན་པའི། །འཇམ་རྩི་
སྟོབས་ནི་སྐྱེད་བྱེད་ཡིན། །རྟ་ཡི་བཅུད་ཀྱིས་ལེན་དང་ནི། །རོ་ཙ་རྟས་བྱེད་ཉིད་དུ་འགྱུར། །སྔ་དྲོ་ཁྲུས་བྱས་སྐོམ་བླུད་ལ། །བཟའ་དང་བཅའ་བ་བྱིན་གྱུར་ནས། །སྔར་བཤད་པ་ཡི་ཆོ་ག་ཡིས། །ལེགས་པར་བཏང་ན་བདེ་འཐོབ་བྱེད། །རྩ་བ་ལྔ་པ་གཉིས་ཁུ་བ། །དེ་ལ་རྗེས་སུ་
བཏུང་ཕྱིར་བླུད། །རམ་ཉེ་ཀརྟི་ཀ་ཀོ་ལ། །བི་ཛ་ཀ་དང་རི་ཤ་བ། །མ་ཤ་མུངྒ་པརྞི་གཉིས། །མེ་དང་དེ་བཞིན་སླེ་ཏྲེས་དང་། །སྟག་པ་ཚེར་དང་མ་དུ་ཀཾ །ནཱ་ག་གེ་སར་པ་ཏ་ཀ །པྲི་ཡང་ཀུ་དང་ག་དུར་དང་། །འོ་མ་ཅན་ཤིང་ཤུན་སྤང་སྤོས། །པདྨའི་རྩ་བ་སྡོང་བུར་བཅས། །ཀ་ཤེ་རུ་
ཀ་ཤྲི་ག་ཏ། །ཀ་ར་བཱི་ར་ཨུཏྤ་ལ། །པུ་ཤེལ་ཙེ་དང་གསེང་ཕྲམ་དང་། །ཙནྡན་དང་ནི་པ་ཡས་སྱ། །ཤ་རི་བ་དང་པྲ་ཏི་དང་། །ཏིལ་ནག་དང་ནི་བཙོད་དང་ནི། །ཤུག་པ་སྲིང་སྣ་ཤ་ར་བ། །འདི་རྣམས་ལྡེ་གུར་བསྐོལ་བའི་ཆུ། །འོ་མ་དང་ནི་ལེགས་སྦྱར་བ། །ཚགས་ཀྱིས་ལེགས་
པར་བཙགས་པ་ལ། །ཁ་ར་དང་ནི་སྦྲང་རྩི་བཏབ། །བསིལ་ཞིང་སྙིགས་མ་མེད་གྱུར་པ། །མར་དང་ལྷན་ཅིག་བསྲེས་ནས་ནི། །བཤང་གཅི་རྣམ་པར་བསལ་གྱུར་པ། །ཤར་དུ་བསྟན་དེ་མགོ་ལྡོག་ནས། །དྲང་བར་གཞག་པར་གྱུར་པ་ལ། །རྔ་མ་གཡས་ནས་བཟུང་ནས་ནི། །བློ་དང་
ལྡན་པས་མ་བལྟབས་པར། །ལན་གསུམ་མམ་ནི་ལན་ལྔ་གཏང་། །འོ་མའི་འཇམ་རྩིས་བསལ་བའི་ནད། །སོས་ཀ་སྦྱར་ཚེ་བསལ་བ་མཆོག །མཁྲིས་པ་ལས་བྱུང་ནད་རྣམས་དང་། །དེ་བཞིན་རྟ་ཡི་ཁྲག་ནད་དང་། །རིང་ནས་འོངས་དང་ལས་ཀྱིས་དུབ། །དབུགས་རྒོད་མགོ་

203-1-245a

འཁོར་གྱུར་པ་དང་། །ལུས་ཀྱི་ཕྱི་ནང་ཚ་བ་དང་། །རིམས་ཀྱིས་བཏབ་དང་སྣུམ་ཡལ་ལ། །འོ་མའི་འཇམ་རྩི་བཏང་གྱུར་པ། །ལུས་ཀྱི་མེ་དྲོད་སྐྱེད་བྱེད་ཡིན། །རྟ་གང་མཁྲིས་པ་ཅན་དང་ནི། །མཁྲིས་པ་རྗེས་འདྲེས་ནད་རྣམས་སེལ། །དེ་བས་ཚ་བ་སེལ་བ་
འདི། །དུས་རྣམས་ཀུན་ཏུ་བསྔགས་པ་ཡིན། །ཤ་ལི་ཧོ་ཏྲའི་གྲུབ་པའི་གནས་བདུན་པ་ལས་བདའ་བ་དང་འོ་མའི་འཇམ་རྩིའི་ལེའུའོ།།      །།ཤ་ལི་ཧོ་ཏྲ་དྲང་སྲོང་མཆོག །ལེགས་ཐོས་ཀྱིས་ནི་ཡང་དྲིས་པ། །རྟ་རྣམས་ལ་ནི་སྣ་ཚོགས་སྣུམ། །ཟས་དང་སྐོམ་དང་བཏུང་
བ་དང་། །དེ་བཞིན་རྗེས་སུ་བཏུང་བ་ལ། །མང་དུ་ཅི་ཕྱིར་སྦྱིན་པར་བགྱི། །འཇམ་རྩི་ཡི་ནི་ལས་རྣམས་ལའང་། །ཅི་ཕྱིར་མར་དང་ཏིལ་མར་དང་། །སྣ་སྨན་གྱི་ནི་ལས་རྣམས་ལ། །ཅི་ཕྱིར་སྣུམ་ནི་བསྔགས་པ་ལགས། །སྣུམ་འཐུང་སྦྱོར་བ་ཉེས་པ་ཡིས། །ནད་དུ་ཅི་ཕྱིར་གྱུར་པ་
ལགས། །ཁྱད་པར་མཁྱེན་པ་ཁྱེད་ཀྱིས་ནི། །འདི་དག་སོ་སོར་བསྟན་དུ་གསོལ། །བུ་ཡིས་དེ་སྐད་དྲིས་པ་དང་། །ཤ་ལི་ཧོ་ཏྲས་སླར་སྨྲས་པ། །འདི་དག་ཐམས་ཅད་མ་ལུས་པར། །ངས་བཤད་པ་ལས་ཤེས་པར་གྱིས། །རྟ་ནི་མེ་དང་རླུང་བདག་ཅན། །ལས་རྣམས་ཀུན་ལས་
མྱུར་དུ་འགྲོ། །བསྐུལ་བར་ཆུང་ངུ་བྱས་གྱུར་ཀྱང་། །རྩོལ་བ་ཆེན་པོ་བྱས་པར་འགྱུར། །མ་གོམས་པ་ཡི་ཡུལ་དུ་ནི། །རྟག་ཏུ་རྒོད་པར་འགྱུར་བ་ཡིན། །རླུང་དང་མཁྲིས་པ་དང་ལྡན་པས། །དེ་ཕྱིར་རྟག་ཏུ་སྣུམ་ཆོས་འཕྲོད། །ཆོ་ག་བཞིན་དུ་སྣུམ་བྱིན་ན། །སྟོབས་དང་མེ་དྲོད་
འཕེལ་བར་འགྱུར། །དེ་ནི་རླུང་དང་གཅིན་རྟུག་རྣམས། །བདེ་བར་རྒྱུ་བར་བྱེད་པ་ཡིན། །དེའི་དོན་ཕྱིར་ན་གསོ་བ་ལ། །སྣུམ་ནི་རབ་ཏུ་བསྔགས་པ་ཡིན། །ལམ་ནི་རིང་པོར་ཞུགས་པ་དང་། །ཡུལ་ཁམས་དུ་མར་ཕྱིན་པ་ཡིས། །ལུས་ནི་ཉམ་ངར་གནས་གྱུར་ཅིང་། །ཤིང་དང་འདྲ་བར་
གྱུར་པའི་རྟ། །དེ་ལ་མར་དང་ཏིལ་མར་དང་། །གང་ཞིག་ཀུན་དུ་བསྐུས་ན་ནི། །ལུས་ནི་མཉེན་པར་གྱུར་པ་དང་། །ལས་རྣམས་ཀུན་ལ་སྟོབས་ལྡན་འགྱུར། །གང་ཞིག་རྟག་ཏུ་སྣུམ་བསྐུས་པ། །གནས་ངན་ཉལ་བ་ངན་པ་དང་། །བཅིང་བ་དང་ནི་བརྡེག་པ་ཡིས། །སྡུག་བསྔལ་ཐམས་

203-1-245b

ཅད་གནག་བུས་འགྱུར། །དཔེར་ན་ཤིང་ནི་ཆུས་བརླན་ན། །མྱུར་དུ་ཀུན་དུ་རྒྱས་པར་འགྱུར། །རྩ་བ་ཉིད་ནས་ཟུག་ནས་ནི། །རྒྱས་ཤིང་མེ་ཏོག་འབྲས་ལྡན་འགྱུར། །དེ་བཞིན་རྟ་ལ་སྣུམ་བསྐུས་དང་། །བླུགས་པ་བདེ་བ་སྐྱེད་བྱེད་དེ། །བ་སྤུའི་བུ་ག་ལས་ཞུགས་ནས། །
ཤ་དང་ཚིལ་ནི་རྒྱས་པར་འགྱུར། །རྩོལ་བ་དྲགས་གྱུར་ནད་ལ་ནི། །ཞུན་མར་ཁོ་ན་བདེ་སྐྱེད་ཡིན། །སྣུམ་འཐུངས་གྱུར་པའི་ལུས་ལ་ནི། །རླུང་ནི་ནམ་ཡང་འཁྲུགས་མི་འགྱུར། །དེ་བས་རླུང་གི་ནད་ལ་ནི། །སྣུམ་བསྐུས་པས་ནི་བསྔགས་པ་ཡིན། །རྟ་ལ་མར་ནི་བླུད་གྱུར་ན། །
སྟོབས་དང་ལུས་ཟུངས་འཕེལ་བར་འགྱུར། །ཕོ་བའི་མེ་དྲོད་སྐྱེད་བྱེད་ཡིན། །སྟོབས་སྐྱེད་རོ་ཙ་ཚེ་འཕེལ་འགྱུར། །དབང་པོ་གཟི་མདངས་ཁ་དོག་ལ། །དུག་དང་རྨོངས་བག་སེལ་མཆོག་ཡིན། །དེ་ཡི་ཕྱིར་ན་རྟ་ལ་ནི། །མར་བླུད་པར་ནི་མཆོག་ཏུ་བསྔགས། །ཟས་ཀྱི་
གང་དུ་སྣུམ་བྱིན་ཞིང་། །རྗེས་སུ་བཏུང་བའང་སྣུམ་དག་ནི། །ཚད་དང་ལྡན་པ་ཉིད་དུ་ནི། །ཕྱི་དྲོའི་ཚེ་ཡང་སྦྱིན་པར་བྱ། །མཛེ་དང་གཡན་པའང་སེལ་བྱེད་ཡིན། །མཆོག་ཏུ་རླུང་ཡང་ཞི་བྱེད་ལ། །བད་ཀན་ལས་གྱུར་ནད་ཀྱང་ནི། །འདི་ཡིས་སེལ་བར་བྱེད་པ་ཡིན། །
བཀྲེས་པ་དང་ནི་སྐོམ་པ་དང་། །སྡུག་བསྔལ་ཀུན་ལའང་སྲན་ཆེར་འགྱུར། །དེ་བས་རྟག་ཏུ་ཟས་རྗེས་ལ། །སྣུམ་ནི་ཉེ་བར་བླུད་པར་བྱ། །སོས་ཀའི་ཚེ་ནི་ཏིལ་མར་ནི། །ཆ་གཉིས་དང་སྦྱར་ཆུ་སྦྱིན་བྱ། །དེས་ནི་དུབ་པ་མི་འབྱུང་ཞིང་། །ལུད་པ་དབུགས་མི་བདེ་མི་འབྱུང་། །ལུས་
ལ་ནད་ཀྱིས་མི་ཚུགས་ཤིང་། །ལས་རྣམས་ཀྱིས་ནི་ཞུམ་མི་འགྱུར། །དེ་བས་ཆུ་དང་སྦྱར་བ་ཡི། །ཏིལ་མར་སྦྱིན་པ་བསྔགས་པ་ཡིན། །སྣུམ་གྱི་སྦྱོར་བ་ཐམས་ཅད་ལས། །འཇམ་རྩི་མཆོག་ནི་ཡིན་པར་བཤད། །རྟ་ནི་རླུང་གི་བདག་ཉིད་ཅན། །འདི་ནི་རླུང་སེལ་བྱེད་མཆོག་
ཡིན། །འཇུ་ཚེ་རྩ་ཡི་སྒོ་ནས་ནི། །ལུས་ཀུན་ལ་ནི་ཁྱབ་པར་བྱེད། །དེས་ནི་ཚིགས་རྣམས་ཐམས་ཅད་དང་། །རྒྱུས་པ་བཀུར་ནི་ཁྱབ་པར་བྱེད། །དེ་དག་དང་ནི་འབྲེལ་པའི་ནད། །ཐམས་ཅད་ཉེ་བར་སེལ་བར་ནུས། །རོ་སྨད་འདྲ་བར་འགྱུར་བ་དང་། །མཇུག་དོ་ཡངས་

203-1-246a

པར་བྱེད་པ་ཡིན། །གཅིན་རྟུག་འགགས་པའང་སེལ་བྱེད་ཅིང་། །ལུས་ཀུན་བདེ་བར་བྱེད་པ་ཡིན། །སྟོབས་དང་གཟི་བརྗིད་འཕེལ་བར་བྱེད། །དེ་བས་འཇམ་རྩི་ཁྱད་པར་འཕགས། །གཅིན་ནད་རྣམས་ནི་སེལ་བྱེད་ཅིང་། །རོ་ཙ་ལྒང་པའི་སྒོ་སྦྱོང་བྱེད། །མངལ་
གྱི་ནད་ནི་སྦྱོང་བྱེད་ཅིང་། །གསེབ་ཀྱི་ཁུ་བ་འཕེལ་བར་བྱེད། །ཁུ་བ་ཟླ་མཚན་སྐྱོན་སེལ་བས། །མངལ་འཛིན་པར་ཡང་བྱེད་པ་ཡིན། །མཚན་མ་བཏང་བའི་སྣུམ་གོང་མ། །གསེབ་ཀྱི་གཅིན་ནད་རྣམས་ལ་བསྔགས། །རྟ་ཡི་སྣ་ནས་སྣུམ་བཏང་བ། །མིག་གི་མཐོང་
སྟོབས་འཕེལ་བར་བྱེད། །རྣ་བ་མིག་དང་སྣ་ནད་དང་། །དེ་བཞིན་དུ་ནི་མགོ་ནད་རྣམས། །རྟ་ལ་སྣ་སྨན་བཏང་ན་ནི། །ནམ་ཡང་འབྱུང་བར་མི་འགྱུར་རོ། །ནམ་འཚང་ཡན་ཆད་ནད་རྣམས་དང་། །ལྐོག་མ་སྐེ་དང་མགོར་གཏོགས་པ། །སེལ་ཅིང་ཡིད་ནི་བདེ་བ་དང་། །
ཟས་འཇུ་བདེ་བར་གནས་པར་འགྱུར། །རོ་སྟོད་སྟོབས་ནི་ཆེ་བ་དང་། །རྣམ་པར་འཕེལ་བར་འགྱུར་བ་ཡིན། །དེ་ཡི་ཕྱིར་ན་རྟ་ལ་ནི། །རྟ་སྨན་མཆོག་ཏུ་བསྔགས་པ་ཡིན། །ཏིལ་མར་གྱིས་ནི་རྟ་ཡི་ནི། །རླུང་སེལ་སྟོབས་ནི་སྐྱེད་པར་བྱེད། །ཤིན་ཏུ་ཚ་མིན་དྲོ་བ་མིན། །དེ་ནི་རླུང་
འཇོམས་མཆོག་ཡིན་ནོ། །འདིས་ནི་ཡི་ག་འབྱེད་པ་དང་། །གཟི་འཕེལ་དེ་ཡི་སྟོབས་སྐྱེད་བྱེད། །རྟ་ཡི་མདོག་ནི་བཟང་བྱེད་ཅིང་། །ལུས་ཀྱང་མཉེན་པར་བྱེད་པ་ཡིན། །མྱུར་དུ་འཇུ་བར་ཤེས་བྱ་སྟེ། །ཏིལ་མར་ཡོན་ཏན་དེ་དག་ལྡན། །མར་གྱི་ཚེ་ནི་འཕེལ་བར་བྱེད། །ནད་ཀུན་
འཇིག་པར་བྱེད་པ་ཡིན། །བཅུད་ཀྱིས་ལེན་དང་རོ་ཙར་བྱེད། །སྣུམ་རྣམས་ཀྱི་ཡང་མཆོག་ཡིན་ནོ། །བསིལ་ཞིང་མངར་བ་སྣུམ་པ་དང་། །གདོན་འཇོམས་དུག་ནི་སེལ་བ་དང་། །གོམས་ན་སྲོག་ནི་འཛིན་བྱེད་ཡིན། །རྟ་ཡི་རང་བཞིན་དག་དང་མཐུན། །དེ་བས་སྣུམ་ནི་ཐམས་ཅད་
ལས། །མར་ནི་མཆོག་ཏུ་གྱུར་པ་ཡིན། །ཕག་དང་རླན་ཅན་ཆུ་ན་རྒྱུ། །ཤ་ཟ་བ་ཡི་ཞག་དང་རྐང་། །སྣུམ་མཆོག་ཡིན་ཞིང་སྟོབས་སྐྱེད་པས། །གསོ་བའི་ལས་ནི་ཀུན་ལ་བཏང་། །ཞག་ནི་ཀུན་གྱི་ནང་ནས་ཀྱང་། །ཕག་གི་ཞག་ནི་མཆོག་ཡིན་ནོ། །རླུང་དང་

203-1-246b

མཁྲིས་པ་སེལ་བྱེད་ཅིང་། །རྟས་པར་བྱེད་པའི་དམ་པ་ཡིན། །ཆུ་དང་རླན་ཅན་ལས་བྱུང་བ། །གང་དེ་དབུགས་མི་བདེ་བ་སེལ། །འབྲས་བུ་ཟ་བའི་མཁྲིས་པ་སེལ། །ལོ་མ་ཟ་བའི་བད་ཀན་འཇོམས། །བ་ལང་མ་ཧེ་ར་དང་ནི། །དེ་བཞིན་རྟ་ཞག་རྐང་ཉིད་དེ། །ཞག་རྐང་བཞི་པོ་
འདི་དག་གིས། །མཁྲིས་པ་དང་ནི་བད་ཀན་སེལ། །ཤིན་ཏུ་སྟོབས་ཆེའི་རྐང་དང་ཞག །ཐམས་ཅད་རླུང་ནད་ཅན་ལ་ཕན། །དེ་ལྟར་སྨན་པས་རླུང་གི་མཆོག །བཞི་པོ་ལེགས་པར་གཏང་བར་བྱ། །སྣ་སྨན་གྱི་ནི་སྦྱོར་བ་དང་། །ཉེས་པ་རབ་ཏུ་བཤད་བྱ་སྟེ། །ཆུ་སྦུབས་སྲིད་དུ་
སོར་བཅུ་པ། །ཞིང་དུ་སོར་ནི་ཕྱེད་དང་གཉིས། །ཁོང་སྟོང་ཚིགས་ནི་གཅིག་པ་ཡིན། །མོད་ལ་ལས་ནི་བྱ་བ་ཡིན། །རྩེ་མོ་རྟ་ཡི་སྣ་འདྲ་བ། །འཇམ་པོར་བྱས་ལ་སྣ་སྨན་གཏང་། །ཡང་ན་བལ་གཙང་སྦངས་པ་ཡིས། །ཏིལ་མར་བཙིར་ཏེ་གཏང་བར་བྱ། །ཅི་སྐད་བཤད་པའི་
ནད་རྣམས་སམ། །ནད་མེད་གྱུར་པའི་རྟ་ལ་ཡང་། །ཚད་ཤེས་པ་ཡི་སྦྱོར་བ་ཡིས། །ཅི་སྐད་བཤད་པ་བཞིན་དུ་གཏང་། །སྔ་དྲོ་ལྟོ་ནི་བཀྲེས་གྱུར་ཚེ། །མཁའ་ལ་སྤྲིན་ནི་མེད་པ་ན། །སྣ་ནི་དྲང་པོར་གཞག་བྱས་ལ། །ཁར་བའི་སྦུབས་ལས་སྣ་རུ་བླུགས། །དབུགས་ཕྱུང་བས་ནི་
མ་གནོད་པར། །རྒྱུ་ནི་ཕྲ་མོར་གཏང་བར་བྱ། །མོད་ལ་སྣུམ་ནི་བླུགས་གྱུར་ན། །ལུད་པ་དབུགས་མི་བདེ་བ་སྐྱེད། །སྲིལ་རྐང་ཞུགས་པས་མཛེར་བྱེད་ཅིང་། །མིག་དང་སྣ་ནས་ཆུ་འཛག་འགྱུར། །མགོ་ནི་ཡོན་པོར་གཞག་གཏད་ན། །རོ་སྟོད་ཀྱི་ནི་ཚིགས་རྣམས་དང་། །བུ་ག་
རྒྱུས་པ་རྩ་རྣམས་སུ། །གོ་རིམས་ཇི་བཞིན་འགྲོ་མི་ནུས། །གྱེན་རྒྱུ་སྣུམ་གྱིས་བཀག་པས་ན། །རྟ་ཡི་བུ་ག་ཐམས་ཅད་ནས། །རྒྱུན་ལམ་འགག་པར་འགྱུར་བ་ཡིས། །རོ་སྟོད་ཀྱི་ནི་ནད་རྣམས་སྐྱེད། །སྣབས་འཛག་མགོ་བོའི་ནད་དང་ནི། །གཉེའུ་རེངས་ལྐོག་མའི་ནད་རྣམས་
དང་། །ལུད་པ་དབུགས་མི་བདེ་གཅོང་ཅན། །ནད་རྣམས་འདི་ཡིས་སྐྱེད་པར་བྱེད། །ཚ་དང་རླུང་བཅས་ཁ་ཆར་འབབ། །ཁྲུས་བྱས་ཟས་སྐོམ་ཟོས་དང་འཐུངས། །སྐོམ་གྱིས་ཉེན་པར་གྱུར་པ་ན། །སྣ་སྨན་བཏང་བས་ནད་སྐྱེད་འགྱུར། །ཆོ་ག་ཉེས་པ་འདི་དག་ལས། །སྣ་སྨན་ཉེ་

203-1-247a

བར་བསྲུང་བར་བྱ། །སྣ་སྨན་བཏང་ཞིང་ལུས་བསྐུ་དང་། །རྟ་ལ་སྣུམ་ནི་བླུད་པ་དང་། །འཇམ་རྩི་བཏང་བར་གྱུར་པ་ལ། །ཆུ་ཡིས་གང་བའི་སྣོད་ལྟར་བསྲུང་། །མཆོང་དང་རྒྱུག་པ་ཉིད་དང་ནི། །རྩོལ་དང་མི་འཕྲོད་ཟ་བ་དང་། །ཁྲུས་དང་ཆར་དང་རླུང་ལས་ནི། །བསྲུང་
ཞིང་ཀུན་ཏུ་བསྡམ་པར་བྱ། །སྣུམ་ནི་དྲི་མ་སེལ་བྱེད་ཅིང་། །ནད་ནི་འགོག་པར་བྱེད་པ་ཡིན། །བརྟན་པར་གནས་པ་སྐྱོན་བྱེད་ཅིང་། །གཡོས་པ་རྣམས་ནི་འབྱིན་པར་བྱེད། །དེ་ཡི་ནད་ནི་བསལ་གྱུར་པས། །མེ་སྟོབས་བྲི་བར་གྱུར་པ་ན། །ཉམ་ཆུང་དེ་ཡིས་ཁ་ཟས་ནི། །ལྕི་བ་
མྱུར་དུ་འཇུ་མི་ནུས། །དེ་བས་ལས་ཀྱི་རྩོལ་བ་དང་། །ཁ་ཟས་ལྕི་བ་བྱིན་པ་དག །དང་པོར་སྣུམ་ནི་འཐུངས་པ་ལ། །རྟག་ཏུ་སྤང་བར་བྱ་བ་ཡིན། །རྩོལ་བ་བྱས་ལས་རླུང་གི་ནད། །རྣམ་པ་དུ་མར་འབྱུང་འགྱུར་ཞིང་། །བྲང་དུ་དྲུག་མདོ་རྒལ་ཚིགས་རེངས། །སྣ་ཚོགས་
མགོ་བོའི་ནད་རྣམས་དང་། །ལུད་པ་དབུགས་མི་བདེ་གཅོང་ཅན། །ལུས་ནི་སྐེམ་པར་འགྱུར་བ་འམ། །མཆི་མ་རུ་ནི་འགྱུར་བ་དག །སྣུམ་འཐུངས་རྩོལ་བ་སྦྱར་ལས་འབྱུང་། །འཁྲུ་ཞིང་རླུང་ནི་འཁྱིལ་བ་དང་། །དེ་བཞིན་སྙིང་ནད་རྣམ་བཞི་དང་། །གཞན་ཡང་པགས་
པའི་ནད་རྣམས་དང་། །ལུས་ཟུངས་ཟད་པར་འགྱུར་བ་འམ། །ཁྲག་དང་མཁྲིས་པའི་ནད་རྣམས་དང་། །བད་ཀན་གྱི་ནི་ནད་རྣམས་འབྱུང་། །དེ་བས་སྣུམ་འཐུངས་གྱུར་པའི་རྟ། །ལེགས་པ་ཁོ་ནར་བསྲུང་བར་བྱ། །སྣུམ་ནི་ལེགས་པར་བཏང་གྱུར་ཅིང་། །སྤྱོད་ལམ་ལེགས་པར་
བསྲུངས་གྱུར་ན། །ནད་རྣམས་ཀུན་དང་བྲལ་བ་དང་། །ཡོན་ཏན་ཐམས་ཅད་རྒྱས་པར་འགྱུར། །གནོད་པའི་དབང་དུ་མི་འགྱུར་ཞིང་། །ལས་རྣམས་ལ་ནི་ཞུམ་པ་མེད། །སྣུམ་གྱི་བཏུང་བ་ལེགས་གྱུར་པར། །སྲོག་ནི་གནད་ལ་གནས་པར་འགྱུར། །ལུས་ཀྱི་མེ་སྟོབས་
འབར་བ་ཡིས། །ཁ་ཟས་སྙོམས་པར་འཇུ་བར་འགྱུར། །འདི་ཡིས་ལུས་ཟུངས་རྣམས་དང་ནི། །སྟོབས་དང་ལུས་ཀྱི་ཡོན་ཏན་འཕེལ། །ལུས་ཀྱང་འགྱུར་བ་མེད་པ་དང་། །མདོག་ཀྱང་གསལ་བ་ཉིད་དུ་འགྱུར། །གཅིན་དང་རྟུག་པ་འཕྱེན་རྣམས་ཀྱང་། །བདེ་བ་ཁོ་ནར་འབྱིན་པར་

203-1-247b

འགྱུར། །སྣུམ་ནི་ལེགས་པར་བཏང་གྱུར་པ། །མཚན་མ་འདི་ལས་ཤེས་པར་བྱ། །སྣུམ་ཆུང་བས་ནི་དྲི་མ་དག །འབྱིན་པར་དཀའ་ཞིང་ནད་དང་བཅས། །ཡན་ལག་སྐྲངས་ཤིང་རྒྱུ་བ་བུལ། །ལུས་ལྕི་གཅིན་ནི་དམར་བ་དང་། །ཁ་ཆུ་འཛག་ཅིང་བཞིན་རས་ངན། །མེ་
དྲོད་ཆུང་ཞིང་ཉམ་ཆུང་འགྱུར། །སྣུམ་སྦྱོར་ཉེས་པར་གྱུར་པ་ཡི། །རྟ་ཡི་ཚུལ་ནི་འདི་ཡིན་ཏེ། །རྟ་སྦངས་འགྲིལ་བར་བྱེད་པ་འམ། །ཡང་ན་སླ་ཞིང་མང་དུ་འཛག །འགྲོ་ཞིང་འཛག་པར་བྱེད་པ་འམ། །ཤིན་ཏུ་འཚེར་བར་བྱེད་པ་ཡིན། །སྤུ་ནི་ཤིན་ཏུ་གཤོར་བ་དང་། །པགས་
པའི་མདོག་ནི་མི་སྡུག་འགྱུར། །དེ་ནི་ཁོང་རྩུབ་ཤེས་བྱས་ལ། །སྣུམ་ནི་སླར་ཡང་སྦྱིན་པར་བྱ། །ཁ་ཟས་རྩུབ་བག་ཟོས་པ་འམ། །ཤུགས་ནི་བཀག་པར་འགྱུར་བ་ཡི། །རླུང་གི་གནས་ལས་བསྐྱོད་གྱུར་ནས། །ལུས་ཀུན་དུ་ནི་ཁྱབ་པར་བྱེད། །ཚིགས་དང་རྒྱུས་པ་རྩ་
དང་ནི། །བུ་ག་རྣམས་ལའང་གནོད་པར་བྱེད། །དེ་ནི་རྟག་ཏུ་སྣུམ་བྱིན་ཡང་། །ནད་ནི་བསལ་བར་ནུས་མ་ཡིན། །ནད་ནི་རབ་ཏུ་བསལ་བ་ལ། །ལུས་ཀྱི་མེ་དྲོད་སྐྱེད་པར་བྱེད། །མེ་དྲོད་འབར་ཞིང་ཁོང་སྣུམ་ན། རྟག་ཏུ་ནད་མེད་ཉིད་དུ་འགྱུར། །དེ་བས་ཇི་སྐད་བཤད་པ་ཡི། །
ཆོ་གས་རྟ་ལ་སྣུམ་བྱིན་བྱ། །སྣུམ་ནི་ལེགས་པར་བཏང་གྱུར་ན། །ཡོན་ཏན་ཀུན་དང་ལྡན་པར་བཤད། །ཤ་ལི་ཧོ་ཏྲའི་གྲུབ་པའི་གནས་བདུན་པ་ལས་སྣུམ་ལེགས་པར་བཏང་བའི་ཡོན་ཏན་བསྟན་པའི་ལེའུའོ།།      །།ཌརྟ་ཡི་ཚུལ་གྱི་དེ་ཉིད་ཤེས། །རྟ་ཡི་བསྟན་བཅོས་ལ་
མཁས་ཤིང་། །རྟ་ཡི་ཚེ་ཡི་རིག་བྱེད་བྱ། །རྟ་ལ་ཕན་པར་རྟག་དགའ་བ། །ཤ་ལི་ཧོ་ཏྲ་བདག་ཉིད་ཐུལ། །ཚངས་པ་ཉི་མ་མེའི་གཟི་ཅན། །དཀའ་ཐུབ་ཀྱིས་ནི་གཙོར་བྱས་ལ། །ལེགས་ཐོས་ཐེ་ཚོམ་སྐྱེས་གྱུར་ནས། །དེ་ཡི་རྐང་གཉིས་ལ་བཏུད་དེ། །འདྲི་བའི་ཚུལ་ནི་འདི་དག་
སྨྲས། །ཁྱེད་ཀྱིས་རྟ་ཡི་བསྟན་བཅོས་སུ། །ཟུག་རྔུ་ལུས་ཀྱི་གསོ་བ་དང་། །དེ་བཞིན་རྟེའུའི་གསོ་བ་དང་། །མཚོན་དང་བསྲུང་བའི་ཆོ་ག་དང་། །དུག་གི་གསོ་བ་ཉིད་དག་ནི། །ཡན་ལག་དྲུག་ནི་ལེགས་གསུངས་ན། །ཁྱེད་ཀྱིས་བཅུད་ཀྱིས་ལེན་དང་ནི། །རོ་ཙར་བྱ་བ་བཀའ་

203-1-248a

མ་སྩལ། །རྟ་ནི་ཁུ་བ་མང་གྱུར་ན། །འགྲོས་ཡང་རྩོལ་བ་ཆེ་བར་འགྱུར། །རང་བཞིན་དེ་དག་ཉིད་ཀྱིས་ནི། །རྒོད་མ་རྣམས་ལ་ངོམས་པ་མེད། །རྒྱུ་དེ་ཉིད་ཀྱིས་བློ་ལྡན་པ། །གཞན་གྱིས་རྟ་ལྟར་བྱེད་ཅེས་བཤད། །དེ་བས་ལ་ལར་མི་ལ་ཡང་། །རྟ་ལྟར་བྱེད་པ་ཉིད་
ཅེས་ཟེར། །རྟ་ཡི་དེ་ཉིད་མཁྱེན་གྱུར་པ། །རོ་ཙ་བར་ནི་ཅི་ལྟར་འགྱུར། །བཅུད་ཀྱིས་ལེན་གྱི་སྦྱོར་བ་དང་། །དེ་དག་གི་ནི་རྒྱུ་ཉིད་ཀྱང་། །ལེགས་ལྡན་བློ་གྲོས་མཆོག་གྱུར་པ། །ཁྱེད་ལས་ཡོངས་སུ་ཤེས་པར་འཚལ། །དེ་ལྟར་ཡོངས་སུ་དྲིས་པ་ན། །ལེགས་ལྡན་དྲང་སྲོང་
གིས་སྨྲས་པ། །ལེགས་ཐོས་འདི་ཡི་རྒྱུ་ཡི་ཚུལ། །རྣམ་པ་སྣ་ཚོགས་ཡོད་པ་ཡི། །རེ་ཞིག་རྟ་ཡི་བཅུད་ཀྱིས་ལེན། །ཐོག་མ་ཁོ་ནར་བཤད་པར་བྱ། །དེ་ནི་ཚེ་འཕེལ་བློ་སྐྱེད་ཅིང་། །སྐྲ་དཀར་གཉེར་མ་འཇིག་བྱེད་ལ། །དཔལ་ལྡན་མདོག་དང་ཁ་དོག་སྐྱེད། །ན་ཚོད་འཇོག་པའི་
དམ་པ་ཡིན། །དབང་པོ་གསལ་ཞིང་མདངས་སྐྱེད་བྱེད། །དགེ་ཞིང་ཚིམ་ལ་མགྱོགས་པར་བྱེད། །དེ་ཡི་རྒྱུད་དང་བྱ་བ་ཡི། །ཐབས་ནི་ང་ལས་ཤེས་པར་གྱིས། །བཅུད་ཀྱི་སྦྱོར་བ་ཁྱད་འཕགས་པས། །བཅུད་ཀྱིས་ལེན་ཞེས་བྱ་བར་བཤད། །ལུས་ཟུངས་རྒྱས་པར་བྱེད་པ་
དང་། །ནད་རྣམས་འཇོམས་པར་བྱེད་པ་ཡིན། །དུས་དང་དུས་ཚིགས་གོམས་པ་དང་། །ཡུལ་དང་སྟོབས་ནི་ཅི་བཞིན་དང་། །རྟ་ཡི་ཁོང་པ་དག་གྱུར་ལ། །སྔ་དྲོའི་ཚེ་ན་བླུད་པར་བྱ། །བསེ་ཤིང་འབྲས་བུའི་ཁུ་བ་དང་། །འབྲས་བུ་གསུམ་གྱི་ཁུ་བར་བསྲེ། །ལྕགས་ཕྱེ་དང་
ནི་སྦྱར་བ་དག །ཕོ་བའི་མེ་དྲོད་ལེགས་དྲགས་ལ། །ཤིན་ཏུ་བསིལ་བ་ཞག་བཅུའི་བར། །མ་ཡེངས་པར་ནི་འདི་ལ་བླུད། །ཉེར་སྤྱོད་དང་ནི་ཁ་ཟས་དག །ཀུན་ཀྱང་བསིལ་ཆོས་ཉིད་དུ་བྱ། །འབྲས་ཆན་འོ་མ་དང་བཅས་ཤིང་། །སྦྲང་རྩི་མར་ནི་བཏབ་པ་བྱིན། །དེ་ནས་
བསེ་ཤིང་འབྲས་བུའི་ཁུ། །ཆ་ནི་རིམ་གྱིས་བསྐྱེད་ནས་ཀྱང་། །སྔར་བཤད་པ་ཡི་ཆོ་ག་ཡིས། །ཞག་བཅུའི་བར་དུ་བླུད་པར་བྱ། །དེ་ལྟར་བླུད་པར་གྱུར་པ་ན། །རྟ་ནི་སྙོམས་བག་སྐྱེ་བར་འགྱུར། །ཞུ་བར་གྱུར་ནས་འོ་མ་ནི། །སྦྲང་རྩི་དང་སྦྱར་བཏུང་བ་བླུད། །དེ་ཡི་

203-1-248b

རྗེས་ལ་བྲག་ཞུན་གྱི། །ཁུ་བ་སྦྲང་རྩི་དང་སྦྱར་བླུད། །མི་སྟོབས་ལ་སོགས་བརྟགས་ནས་ནི། །དེ་ནི་ཟླ་ཕྱེད་བར་དུ་སྦྱིན། །འོལ་བྱ་གོང་མ་སྲེག་ཤ་ཁུ། །དྲུག་ཅུ་པ་ཡི་འབྲས་ཆན་བྱིན། །ཁྱི་ར་བུལ་ཀ་སླེ་ཏྲེས་དང་། །བ་ལ་བི་དར་འབྲས་བུ་གསུམ། །བསྐོལ་བའི་ཁུ་བའི་
གྲང་མོ་ནི། །ཞག་བཅུའི་བར་དུ་བླུད་པར་བྱ། །སྦྲང་རྩི་ཁ་ར་དང་བཅས་པའི། །འབྲས་བུ་གསུམ་གྱི་ལྡེ་གུ་བྱིན། །ཉེ་བར་སྤྱོད་པ་འདི་ཡིས་ནི། །སྟོབས་དང་སྟོབས་མིན་ཤེས་པར་བྱ། །སྦྱོར་བ་འདི་དག་རྟ་རྣམས་ཀྱི། །བཅུད་ལེན་ཆོ་གར་ཡོངས་སུ་བཤད། །ཉེ་བར་སྤྱོད་
པ་བསིལ་བ་དང་། །རྩ་ཡང་མངར་པོ་བསྔགས་པ་ཡིན། །ཆོ་གར་ལྡན་པའི་མར་བྱིན་གྱི། །ཏིལ་མར་ལན་ཚྭ་སྦྱིན་མི་བྱ། །གནས་ནི་བསིལ་ཞིང་བདེ་བ་དང་། །འཇམ་ཞིང་དབེན་པ་བྱེད་དུ་གཞུག །སྨན་གྱི་དུས་ཀྱི་ཉིས་འགྱུར་རམ། །ཡང་ན་དེ་ཡི་སུམ་འགྱུར་དུ། །འཇམ་རྩི་
བཏང་བའི་སྦྱོར་བ་ལྟར། །རྟ་ནི་འབད་དེ་བསྲུང་བར་བྱ། །དེ་ལྟར་ལེགས་པར་སྤྱོད་པ་ཡིས། །རྟ་ལ་བཅུད་ལེན་བྱིན་གྱུར་ན། །སྔར་བཤད་པ་ཡི་ཡོན་ཏན་དང་། །དེ་ལྟར་གཞན་ཡང་ཐོབ་པར་འགྱུར། །རྟ་རྣམས་ཀྱི་ནི་རོ་ཙ་བའི། །ཆོ་ག་ཡང་དག་མཉན་པར་གྱིས། །
རོ་ཙ་བ་ཡི་ཆོ་ག་ཡི། །དྲི་བ་ཁྱེད་ཀྱིས་ལེགས་པར་སྨྲས། །རོ་ཙ་བར་ནི་བྱེད་པ་ཡི། །རྒྱུ་ནི་འདི་ཙམ་ཉིད་ཡིན་ནོ། །རྟ་ནི་སུ་ཡང་རུང་བ་ལ། །རོ་ཙ་འདི་ནི་བྱ་བ་མིན། །སྦེག་དང་རྒན་དང་ཉམ་ཆུང་དང་། །སྟོབས་ཆུང་ཁུ་བ་ཟད་པ་དང་། །རྒོད་མ་དང་ནི་སྦྱོར་འདོད་ལ། །རོ་ཙ་
བ་ཡི་ཆོ་ག་བྱ། །དེ་རྣམས་ཡོན་ཏན་བཅས་འགྱུར་གྱི། །ལྷག་མ་རྣམས་ལ་དེ་ལྟར་མིན། །ཁྱོད་ལ་ཡང་དག་བཤད་པ་ཡི། །ཡོན་ཏན་འདི་ནི་རིམ་གྱིས་ཉོན། །ཡིད་བདེ་ཤུགས་ནི་ཆེ་བ་དང་། །སྤྲོ་བ་ཆེ་ཞིང་ཁུ་བ་མང་། །འཇུག་དགའ་བུ་སྐྱེས་པ་ལ་བཟང་། །བུ་ནི་
མང་པོ་ཉིད་སྐྱེད་བྱེད། །ལུས་དྲང་མཛེས་ཤིང་མདངས་ལྡན་པ། །རོ་ཙ་ལས་བྱུང་ཡོན་ཏན་ཡིན། །དེ་བས་རྟ་འམ་གཞན་དག་ལ། །རོ་ཙར་བྱ་བ་དེ་ཉིད་ཉོན། །ལེགས་པར་སྣུམ་བཏང་སྦྱངས་བྱས་པའི། །ཁོང་པ་དག་འགྱུར་རྟ་ཡི་ནི། །ཁུ་བ་ལེགས་པར་འཕེལ་བྱེད་

203-1-249a

པའི། །བཏུང་བ་འདི་ནི་བླུད་པར་བྱ། །འོ་མ་དང་ནི་བི་ར་ཏི། །ཛི་ད་ཀ་ད་རི་ཤ་བ། །མ་ཤ་པརྞི་རམ་ཉེ་བ། །ཨདྨ་གུཔྟ་ཉེའུ་ཤིང་། །མུངྒ་པྲི་ཏགས་པརྞི་དང་། །ས་མད་ག་དང་མ་དུ་ཀ །མེ་དང་ཤུ་ག་ན་པ་ཉིད། །ཙོ་ར་ཀ་དང་བཅས་པ་
དག །བསྐོལ་བའི་ཁུ་བ་གྲང་མོ་ནི། །ཁ་ར་དང་ནི་སྦྲང་རྩིར་བཅས། །ལྡེ་གུ་དང་སྦྱར་བཏུང་བ་ནི། །སྔ་དྲོའི་ཚེ་ན་བླུད་པར་བྱ། །བཏུང་བ་འདི་ནི་ཞུ་བ་དང་། །འོ་མ་སླར་ཡང་སྦྱིན་པར་བྱ། །བདེ་བར་གནས་ཚེ་ལྗང་པ་ནི། །སྔར་བཞིན་དུས་སུ་བྱུང་བ་སྦྱིན། །དེ་ཡིས་རྟ་ནི་
ཉམས་བརྟས་ཤིང་། །རྒོད་མ་ལ་ཡང་གདའ་བར་འགྱུར། །པདྨ་དང་ནི་ཀུ་མུད་དང་། །དྲི་ཞིམ་པ་ཡི་སྡོང་བུ་དང་། །པུཎྜ་རཱི་ཀ་བ་ད་རི། །ཨུཏྤ་ལ་དང་པ་སྤང་བྱ། །ཏ་པ་རི་ནི་དམར་པོ་དང་། །ཤ་ལུ་ཀ་ཡི་སྡོང་བུ་དང་། །ཀ་ཤེ་རུ་དང་པདྨའི་རྩ། །འབྲ་གོ་དང་ནི་མ་ག་ཧ། །
སྲིང་ཀ་ཏ་ཀ་དང་བཅས་པ། །ཆ་མཉམ་བྱས་ཏེ་སྨན་ཁུ་བསྐོལ། །དེ་ཡི་ཁུ་བ་གྲང་མོ་ནི། །ཁ་ར་དང་ནི་སྦྲང་རྩིར་བཅས། །ཨདྨ་གུཔྟའི་མེ་ཏོག་དང་། །འབྲས་བུ་དང་བཅས་སྔ་དྲོ་བླུད། །དེ་ཞུ་རྗེས་ལ་སྐོམ་བླུད་ཅིང་། །སྐོམ་གྱི་རྗེས་ལ་ཁ་ཟས་བྱིན། །མ་ཤ་སྣུན་བསམ་
ལེགས་པར་ཚོས། །ཕྱི་དྲོ་ལེགས་པར་སྦྱིན་པར་བྱ། །སཱ་ལུའི་འབྲས་ཆན་རི་དྭགས་དང་། །བྱ་ཡི་ཤ་ཁུར་བཅས་པ་སྦྱིན། །རྩྭ་ཡང་མངར་པོ་སྦྱིན་ན་ཕན། །གནས་ནི་མཉམ་ཞིང་བདེ་བར་གཞག །འདི་ཡི་ཤིན་ཏུ་དྲེགས་བདོ་ཞིང་། །རྟ་ཡི་རིགས་ནི་འཕེལ་བར་བྱེད། །
ཡང་ན་སྦྱོར་བ་འདི་ཉིད་དང་། །བ་བཞོན་བེའུ་རྒན་པོ་ཡི། །བ་ཡར་གྱི་ནི་འོ་མར་སྦྱང་། །རྟ་དེ་ལ་ནི་བླུད་པར་བྱ། །འདི་ཡིས་རྟ་ནི་དྲེགས་བདོ་ཞིང་། །ལན་མང་འཇུག་པར་ནུས་པར་འགྱུར། །སྨན་འདི་རྣམས་ཀྱི་ཁུ་བ་དང་། །འོལ་བའི་ཤ་ཁུ་དང་བཅས་པ། །རྟ་ལ་བླུད་པར་གྱུར་
པ་ནི། །དེས་ཀྱང་རོ་ཙ་ཉིད་དུ་བྱེད། །གསེབ་ནི་ཤིན་ཏུ་ཆགས་འདོད་ཅིང་། །རྒོད་མ་ལ་ཡང་མངོན་དགར་འགྱུར། །ཨདྨ་གུཔྟ་པདྨའི་རྩ། །བཏགས་པའི་ལྡེ་གུ་བསིལ་པོ་ནི། །འོ་མ་དང་སྦྱར་བླུད་ན་ཡང་། །ཤིན་ཏུ་རོ་ཙ་འགྱུར་བ་ཡིན། །ཀརྐ་ཏ་ཀ་རྒྱ་མཚོའི་ལྦུ། །

203-1-249b

དེ་ནི་གཏུན་ནང་བརྡུངས་ནས་ནི། །ཤིན་ཏུ་ཞིབ་པར་གྱུར་པ་དང་། །ཏིལ་མར་དང་ནི་གཅིག་ཏུ་བསྲེ། །ཨདྨ་གུཔྟའི་འབྲས་བུར་བཅས། །ཟས་ཀྱི་རྗེས་ལ་སྦྱིན་པར་བྱ། །བི་ད་ར་ཡི་སྡོང་བུ་ནི། །ཏིལ་མར་དང་བསྐོལ་བྱིན་པ་བསྔགས། །ཨུད་ཙ་ཏ་ཡི་ཕྱེ་མ་བཏགས། །སྦྲང་རྩི་
ཁ་ར་དང་སྦྱར་བ། །སྣ་ནས་བཏང་དང་བཏུང་བ་དང་། །འཇམ་རྩིར་བཏང་བ་བསྔགས་པ་ཡིན། །བསྐོལ་ནས་ཞག་བདུན་བཞག་པ་ཡི། །ཏིལ་མར་གྱིས་ཀྱང་བསྐུ་བར་བྱ། །སྐམ་པའི་སྲོག་ཆགས་ལྔ་དང་ནི། །རྩ་བ་སྡོང་བུ་འབྲས་བུ་དག །བསིལ་ཞིང་ཡོན་ཏན་དང་
ལྡན་པ། །ཚུལ་འདི་འདྲ་བ་གཞན་གང་ཡིན། །དེ་དག་ཐམས་ཅད་གཞན་གང་ནི། །རོ་ཙ་སྐྱེད་པའི་མཆོག་ཡིན་ནོ། །ར་ཡི་འོ་མ་ཉ་དང་མར། །དེ་བཞིན་མར་ཡང་ཤ་ཁུ་ནི། །ཡོངས་སུ་ལེགས་པར་བྱས་པ་དག །ཁ་ཟས་མཆོག་ནི་སྦྱིན་པར་བྱ། །རྒྱས་དང་བསྡུས་
པའི་ཚུལ་གྱིས་ནི། །སྦྱོར་བ་སྔར་ནི་བསྟན་པ་ལས། །རོ་དང་ཞུ་རྗེས་དུས་ཀྱི་ཆ། །མཁས་པས་ལེགས་པར་བརྟག་པར་བྱ། །ཟས་སུ་ལྗང་པ་བྱིན་པ་དང་། །ཆང་བླུད་པ་དང་བསྐུ་བ་དང་། །ཨུད་ཙ་ར་དང་བི་ད་ར། །ཨཱདྨ་གུཔྟའི་འབྲས་བུ་ནི། །རྟག་ཏུ་འདི་ལ་སྦྱིན་བྱ་ཡི། །
ཞག་གཅིག་ཤིན་ཏུ་དྲགས་མི་བྱ། །མེ་སྟོབས་གནས་ནི་ཅི་འདྲ་དང་། །ནད་གཞི་དུས་ཚིགས་ཇི་བཞིན་དུ། །ལུས་ཀྱི་ཉམས་ནི་ཅི་ཡོད་པ། །ལེགས་པར་བརྟགས་ཏེ་བྱ་བ་ཡིན། །སྔར་ནི་ཅི་སྐད་བསྟན་པ་ཡི། །བདའ་བའི་ཆོ་ག་རྣམས་ཀྱང་བྱ། །རྒོད་མ་ལ་ནི་གསོ་བ་དང་། །
མངལ་སྐྱོན་སྦྱང་བའི་ལས་རྣམས་བྱ། །འདི་ནི་བཅུད་ལེན་དམ་པ་དང་། །རྩར་བྱེད་པ་ནི་ཉིད་ཡིན་ནོ། །རྟ་ལ་གང་དག་དགོས་པ་ཡི། །དྲིས་པ་མ་ལུས་བསྟན་པ་ཡིན། །ལེགས་ཐོས་ཀྱིས་ནི་ཡང་སྨྲས་པ། །བདག་ལ་ཐེ་ཚོམ་གཞན་མཆིས་ཏེ། །རྟ་ལ་དངས་མ་སྐྱོན་མེད་པ། །
རིམ་གྱིས་ལུས་ཟུངས་ལ་འཇུག་ན། །རོ་ཙ་བ་ཡི་ཡོན་ཏན་ནི། །ཞག་གཅིག་ནས་འབྱུང་ཁྱོད་ཀྱིས་བཤད། །ལུས་ཟུངས་རྣམས་ཀྱི་མཆོག་གྱུར་པ། །ཁུ་བ་རྒྱུ་ནི་གང་ཞིག་གིས། །འཕྲལ་དུ་འཕེལ་བར་འགྱུར་བ་བཤད། །ཤ་ལི་ཧོ་ཏྲས་སླར་སྨྲས་པ། །ཅི་ལྟར་ཤིང་ལ་ཆུ་

203-1-250a

བླུད་ན། །དེ་ནི་མེ་ཏོག་འབྲས་བུ་ལ། །ཉིན་ཞག་དེ་ཉིད་ཁོ་ན་ལ། །ཁྱད་པར་གྱུར་པར་སྣང་བ་ཡིན། །དེ་བཞིན་སྨན་གྱི་བཅུད་རྣམས་ནི། །འཕྲལ་དུ་ནུས་པ་སྐྱེད་པ་ཡིན། །བུ་རམ་ཤིང་གི་རྩ་བ་དང་། །བར་དང་རྩེ་མོ་བྱེ་བྲག་ཡོད། །དེ་བཞིན་
མེ་ཏོག་འབྲས་བུ་སོགས། །ཞུ་རྗེས་སོ་སོར་སྣང་བ་ཡིན། །ཡོན་ཏན་ནུས་པ་ཐ་དད་པས། །རྫས་ཀྱི་རང་བཞིན་སྣ་ཚོགས་ཡིན། །སྦྱོར་བའི་ཡོན་ཏན་དབང་གིས་ནི། །འཕྲལ་དུ་དུས་གཞན་ནུས་པ་འབྱིན། །འདི་ནི་མངོན་སུམ་ཡིན་ཤེས་བྱ། །རྒྱུ་དྲིས་པ་ཡང་
མཉན་པར་གྱིས། །དུར་བྱིད་དང་ནི་དེ་འདྲ་གཞན། །མོད་ལ་འཁྲུ་བར་བྱེད་པ་ཡིན། །འོ་མ་འཐས་པར་འགྱུར་བ་དང་། །པོ་སོན་ཆ་ཡི་འབྲས་བུ་དག །འཕྲལ་དུ་འཁྲུ་བར་བྱེད་པ་དང་། །ཐལ་སྨན་གྱིས་ཀྱང་འཕྲལ་སྲེག་བྱེད། །ཏིལ་མར་མར་གྱིས་འཕྲལ་སྣུམ་བྱེད། །
མ་ཤ་འཕྲལ་དུ་འདུལ་བར་བྱེད། །ཆང་གིས་འཕྲལ་དུ་དྲེགས་པ་སྐྱེད། །འོ་མས་འཕྲལ་དུ་སྲོག་སྐྱེད་བྱེད། །བསེ་ཤིང་གི་ནི་འབྲས་བུ་ཡིས། །ལ་ལ་རྨ་ནི་འཕྲལ་དུ་སྐྱེད། །དེ་དང་འདྲ་བ་གཞན་དག་ཀྱང་། །ནུས་པ་མོད་ལ་འབྱིན་པ་ཡོད། །རོ་ཡི་རྫས་ནི་ཁྱད་པར་ཅན། །
མངོན་སུམ་གཏན་ཚིགས་འདི་དག་གིས། །རྫས་ཀྱི་ཞུ་རྗེས་ནུས་པ་ནི། །འཕྲལ་དུ་སྐྱེད་པར་མངོན་པ་ཡིན། །རོ་ཙ་བྱེད་པའང་དེ་བཞིན་དུ། །འཕྲལ་དུ་ཁུ་བའང་འཕེལ་བར་བྱེད། །སྔར་བཤད་པ་ཡི་སྨན་རྣམས་ཀྱང་། །སྦྱོར་ལེགས་འབྲས་བུ་འཕྲལ་དུ་སྐྱེད། །འདི་ནི་
སློབ་མ་མིན་པ་དང་། །ལོག་འཇུག་བུ་ལའང་སྦྱིན་མི་བྱ། །སྨོད་པར་བྱེད་པ་རྣམས་དང་ནི། །སྡིག་ཅན་ལ་ནི་མི་སྦྱིན་ནོ། །ཤ་ལི་ཧོ་ཏྲའི་གྲུབ་པའི་གནས་བདུན་པ་ལས་རོ་ཙ་བར་བྱེད་པ་བསྟན་པའི་ལེའུའོ།།      །།རྟ་ཡི་ཆུ་སྦུབས་གྱུར་ནད་དང་། །བླུད་བྱ་བླུད་
མི་བྱ་ཉིད་དང་། །གསོ་བའི་ནད་ནི་ཡང་དག་ཉིད། །ལེགས་ལྡན་གྱིས་ནི་བསྟན་དུ་གསོལ། །བུ་ཡིས་དེ་སྐད་སྨྲས་པ་ན། །ཤ་ལི་ཧོ་ཏྲས་སླར་སྨྲས་པ། །གང་ཚེ་རྟ་ལ་འོ་མ་ཆུ། །ཆུ་སྦུབས་བྱིན་གྱུར་དེ་ཡི་ཚེ། །ཉེས་སྐྱེད་འོ་མ་དང་བཅས་པ། །ཚ་སྐྱེད་མགོ་བོར་

203-1-250b

ཞུགས་པ་ན། །སྤོས་བདུག་མགོ་ཡི་སྦྱངས་པ་ཡིས། །དེ་ནི་བསལ་བར་ནུས་མ་ཡིན། །སྐམ་པར་གྱུར་ཚེ་ཆུ་ཡི་ཚད། །ལེགས་པར་བསལ་བར་ནུས་མ་ཡིན། །དེ་བས་ཆུ་དང་འོ་མ་ནི། །ཆུ་སྦུབས་ལས་ནི་སྦྱིན་མི་བྱ། །ཆུ་དང་འོ་མ་དེ་དག་ཀྱང་། །སྨན་དང་བཅས་པར་
བསྐོལ་བ་ནི། །ཆུ་སྦུབས་ལས་ནི་སྦྱིན་མོད་ཀྱི། །ཅི་ནས་གནོད་མི་འགྱུར་བར་བྱ། །གང་ཚེ་ཆང་དང་འོ་མ་ཆུ། །སྦུབས་ལས་བླུད་པའི་ཤུགས་དྲགས་ན། །སྦྱོར་བ་ཉེས་པར་འགྱུར་བའི་རྒྱུས། །མོད་ལ་མང་དུ་ཞུགས་གྱུར་པ། །དེ་ཚེ་ལྕེ་དང་ལྐོག་མའི་སྦུབས། །ཤིན་ཏུ་
བཀང་ན་དྲགས་པར་འགྱུར། །དེ་བཞིན་ཤིན་ཏུ་འཐོར་བ་ཡིས། །སྲོལ་གོང་དུ་ཡང་འཇུག་པར་འགྱུར། །དེ་ཡི་གྱེན་རྒྱུའི་རླུང་ལས་ནི། །བྱུང་བའི་ནད་ཀྱིས་ལུས་སྣོད་བྱེད། །དེ་ལས་ལུད་པ་འབྱུང་བ་ན། །ལྐོག་མར་གནས་པས་གནོད་སྐྱེད་བྱེད། །གྱེན་བྱུང་ཤུགས་ཀྱིས་བསྐྱོད་པ་
ན། །མགོ་བོར་ཡང་ནི་ཕྱིན་པར་བྱེད། །དེ་ཡིས་མཆི་མ་འཛག་འགྱུར་ཞིང་། །མགོ་འདེགས་པ་ཡང་དཀའ་བ་ཡིན། །ལྕེ་ནི་ནག་པོར་འགྱུར་བ་དང་། །ལུད་པ་ལུ་ཞིང་སྐམ་པར་འགྱུར། །མིག་གཉིས་རྣམ་པར་འགྱུར་བ་དང་། །ས་ལ་འགྲེ་ཞིང་འདར་བར་འགྱུར། །
པ་ལ་ཤ་ཡི་མདོག་འདྲ་བའི། །སྣབས་ནི་སྣ་ནས་འཛག་པར་བྱེད། །རྣ་བ་ཆག་ཅིང་ཡིད་མི་བདེ། །ལུས་ནི་རྔུལ་ཞིང་ཞུམ་པར་འགྱུར། །ཆུ་སྦུབས་ལས་ནི་གྱུར་པའི་ནད། །གསོ་བར་ཤིན་ཏུ་དཀའ་བ་ཡིན། །འཆི་བར་འདྲ་བ་ཡིན་ན་ཡང་། །དེ་ལ་ཕན་འགྱུར་གསོ་
དཔྱད་བྱ། །དང་པོར་མར་གྱིས་བསྐུས་ནས་ནི། །ཤིན་ཏུ་བསིལ་བའི་སྨན་ཆུ་བླུགས། །ཏ་ལའི་འདབ་མའི་རླུང་གཡབ་བམ། །གོས་ནི་གཤེར་བས་གཡབ་པར་བྱ། །མར་བསྐུས་ནས་ནི་སྨན་བསིལ་བའི། །ལྡེ་གུའམ་འདམ་གྱིས་བསྐུ་བར་བྱ། །དེ་འཕྲལ་ཚ་དང་དབུགས་
མི་བདེ། །རྔུལ་དང་དུབ་པ་དང་བྲལ་འགྱུར། །དེ་ནས་དུད་པས་བདུགས་པ་ཡིས། །བཅུད་བདེར་གནས་པར་གྱུར་བྱ་ལ། །ཐང་ཤིང་དང་ནི་ས་ར་ལ། །ཤིང་མངར་དང་ནི་ག་བུར་དང་། །པྲི་ཡང་ཀུ་དང་ཙནྡན་དང་། །དེ་བཞིན་རྟ་ལ་པརྞི་དང་། །ནཱ་ག་པུཥྤ་སྦོ་ན་ཡང་། །

203-1-251a

དུག་མོ་ཉུང་དང་བྱ་མ་ཀ །ཤྲེ་བེ་ར་དང་སྤང་སྤོས་དང་། །རྡོ་དྲེག་གླ་སྒང་མ་དུ་ལི། །ཤིང་ཚ་དང་ནི་སྨྱིག་རྐང་དང་། །ཨིང་གུ་དེའི་ཤུན་གུ་གུལ་དང་། །ར་སྣ་ག་བྲ་ལྡོང་རོས་དང་། །པུ་ཤེལ་ཙེ་དང་བ་ལ་ཀ །སྨན་ནི་འདི་རྣམས་ཆ་མཉམ་དུ། །ལེགས་པར་
སྦྱར་བར་བྱ་བ་ཡིན། །གཞན་ཡང་དེ་འདྲ་འདུག་པ་ལ། །བསྔགས་པར་གྱུར་པ་རྣམས་ཀྱང་བཏུལ། །རླུང་ལས་གྱུར་པའི་ནད་ལ་ནི། །སྣུམ་དང་སྦྱར་ཏེ་བཏུལ་བར་བྱ། །བད་ཀན་གྱི་ནི་ནད་ཀུན་ལ། །བར་ཏ་ཀི་ཡི་ཁུ་བ་སྦྱར། །ཀ་ར་མར་དང་སྦྱར་བ་ཡིས། །ལྐོག་མ་
བདེ་བའི་སྨན་ཡང་སྦྱིན། །སྦུ་གུ་མོད་ལ་ཁོང་སྟོང་ལས། །ཆ་གཉིས་པ་ནི་ཆེ་ཚད་ཡིན། །བཞི་ཆས་ཕྲི་བ་བར་མ་སྟེ། །ཕྱེད་ཕྲི་བ་ནི་ཐ་མ་ཡིན། །དེ་ནས་རྫ་བུམ་བླངས་ནས་ནི། །དེར་ནི་མེ་མདག་གཞུག་པར་བྱ། །ཁ་བཀག་པ་ཡི་དབུས་སུ་ནི། །སོར་གཅིག་པ་ཡི་
བུ་ག་གདོད། །སྦུ་གུའི་བུ་ག་མཉམ་བྱས་ལ། །སྦུ་གུ་བུམ་པའི་བུ་གར་སྦྱར། །ངོས་ལ་བུ་ག་ཕྲ་གཏད་དེ། །དེ་ལས་དེ་ནི་བུད་པར་བྱ། །འདབ་མ་དེར་ནི་བདུག་པ་དེ། །བཅུག་ལ་དུད་པ་བདུག་ཏུ་གཞུག །སྨན་པ་མཆོག་གིས་དུ་བ་ནི། །ལེགས་པར་དེ་ལ་བདུག་པར་བྱ། །
དུད་པ་བདུག་པའི་ཆེ་ཚད་ཡིན། །གྲངས་བརྒྱའི་བར་དུ་གཏུལ་བ་ཡིན། །བར་མ་བཞི་པས་ཕྲི་བ་སྟེ། །ཕྱེད་ཕྲི་བ་ནི་ཆུང་ཚད་ཡིན། །རྨ་ལམ་དུད་པས་བདུགས་གྱུར་ན། །ནད་སེལ་བར་ནི་འགྱུར་བ་ཡིན། །གང་ཚེ་སྣ་ནས་ལྗན་ལྗིན་ནི། །སྦྱིན་བག་མང་པོ་འཛག་འགྱུར་ཞིང་། །
སྒྲ་ནི་འབྱིན་པར་ནུས་འགྱུར་བ། །སྦྱང་བ་ལེགས་པར་ཤེས་པར་བྱ། །དུ་བས་མགོར་སོང་ནད་དང་ནི། །རྐན་དང་ལྐོག་མར་གནས་པ་ཡང་། །སེལ་ཅིང་བུ་ག་བད་ཀན་གྱིས། །ཁེངས་པའང་སྦྱོང་བར་བྱེད་པ་ཡིན། རླུང་ནི་བདེ་བར་རྒྱུ་བྱེད་ཅིང་། །སོ་ཡི་སྟོབས་ཀྱང་འཕེལ་བར་
བྱེད། །དབང་པོ་རྣམས་དང་ལུས་ཟུངས་དག །དྭངས་ཤིང་སྐྱོན་མེད་བྱེད་པ་ཡིན། །རླུང་གིས་ཚིལ་ནི་སེལ་བྱེད་ཅིང་། །སེམས་གསལ་ཡི་ག་འབྱེད་པར་བྱེད། །ལྷོད་པ་རྣམས་ནི་དམ་བྱེད་ཅིང་། །གྱོང་བ་མཉེན་པར་བྱེད་པའང་ཡིན། །གསེབ་དང་ལམ་རིངས་ནས་འོངས་

203-1-251b

དང་། །ཤིན་ཏུ་རྒན་དང་སྐོམ་གྱིས་ཉེན། །ཟས་རྩུབ་ཟོས་དང་ཡོངས་སུ་དུབ། །ཁྲག་དང་མཁྲིས་པ་ན་བ་དང་། །ཆུ་ཡི་དམུ་རྫིང་ཅན་དང་བརྟགས། །སྣུམ་བཏང་བ་དང་དུག་ཟོས་དང་། །སྦེགས་དང་འཇིགས་པས་ཉེན་པ་དང་། །ཆང་འཐུངས་པ་དང་ཉམ་ཆུང་དང་། །འོ་མ་
འཐུངས་པར་གྱུར་པ་ཡི། །རྟ་ལ་ནམ་ཡང་དུད་མི་བདུག །ལྐོག་ནད་ནམ་འཚང་ཡན་ཆད་ནད། །ལུད་པ་རྣམས་ཀྱི་ནད་རྣམས་དང་། །སྐྱིགས་བུ་མགོ་བོའི་ནད་རྣམས་དང་། །ཆུ་སྦུབས་ལས་གྱུར་ནད་རྣམས་དང་། །བད་ཀན་ལས་གྱུར་ནད་དང་ནི། །དེ་བཞིན་རླུང་གི་ནད་
རྣམས་དང་། །པུས་ཚིགས་ན་བ་རྣམས་ལ་ཡང་། །དུད་པས་བདུགས་པ་བསྔགས་པ་ཡིན། །རྟ་ཡིས་ཁ་ཟས་ཟོས་གྱུར་ཅིང་། །བསིལ་བར་གནས་ལ་དུད་པ་བཏང་། །དུད་པས་ནད་ནི་བསལ་བ་དང་། །སྨན་པས་རླུང་འཇོམས་ཁ་ཟས་སྦྱིན། །འབྲས་ཆན་སྦྲང་རྩི་
དང་སྦྱར་ཅིང་། །འོ་མ་བཅའ་སྒ་བཏབ་པ་སྦྱིན། །པི་ཙུ་མར་དའི་ཁུ་བ་དང་། །བསྐོལ་བའི་མུངྒ་ཉིད་སྦྱིན་ཅིང་། །དེ་ལ་རྩ་ཡི་དོན་དུ་ནི། །དཱུར་བ་ཉེ་བར་སྦྱིན་པར་བྱ། །ལེགས་ལྡན་ཤ་ལི་ཧོ་ཏྲ་ཡིས། །དེ་སྐད་ཅེས་བསྟན་སྨྲས་པ་ཡིན། །ཤ་ལི་ཧོ་ཏྲའི་གྲུབ་པའི་
གནས་ཏེ་བདུན་པ་ལས་སྦུབས་ལས་གྱུར་པའི་ནད་གསོ་བའི་ལེའུའོ། །གྲུབ་པའི་གནས་ཞེས་བྱ་བ་གནས་བདུན་པ་རྫོགས་སོ།།      །།རིག་བྱེད་རིག་བྱེད་ཡན་ལག་མཁས། །སྙིང་སྟོབས་ལྡན་ཞིང་དབང་པོ་ཐུལ། །གསོ་དང་རིག་པའི་ལས་ལ་མཁས། །རྟ་
ཡི་བསྟན་བཅོས་ཕ་མཐར་ཕྱིན། །ཤ་ལི་ཧོ་ཏྲ་ཐུབ་མཆོག་ལ། །ལེགས་ཐོས་ཀྱིས་ནི་ཡོངས་དྲིས་པ། །རྟ་ནི་འཆི་བར་འདོད་གྱུར་པ། །ནད་དང་བཅས་པར་གནས་གྱུར་ཅིང་། །སུམ་ཅུ་རྩ་གཉིས་བར་དག་གི། །མཚན་ཉིད་ལེགས་ལྡན་ལས་རྟོགས་འཚལ། །འདི་
ནི་ན་ཚོད་གང་གི་ཚེ། །ནད་ནི་གང་དང་གང་དག་གིས། །རྟ་ནི་འཆི་བ་ཉིད་འགྱུར་བའི། །མཚན་ཉིད་དེ་ནི་བདག་ལ་གསུངས། །དེ་ནས་ཤ་ལི་ཧོ་ཏྲ་ཡིས། །ལེགས་ཐོས་དྲིས་དོན་སླར་སྨྲས་པ། །རྟ་ཡི་ངེས་པ་འཆི་འགྱུར་རྟགས། །ཤ་ཡི་མིག་ཅན་གྱིས་ཤེས་དཀའ། །

203-1-252a

རིམ་གྱིས་བརྒྱུད་དེ་ཤེས་གྱུར་པ། །བཤད་ཀྱིས་མཉན་ཏེ་བཟུང་བར་གྱིས། །མཆུ་ལྟག་སོར་ནི་བཞི་པ་ལ། །དེ་ནི་རི་མོ་བརྟག་བྱས་ཏེ། །ཁྱད་པར་རྣམ་པ་སྣ་ཚོགས་པ། །དེ་ལ་འཆི་བར་ཤེས་པར་བྱ། །མི་ཡི་ལག་པ་དང་འདྲ་བར། །རྟ་
རྣམས་ཀྱི་ནི་མཆུ་ལྟག་བརྟག །གང་ལ་ཚེ་ནི་ཡོད་གྱུར་པ། །དེ་ཉིད་བཤད་ཀྱིས་མཉན་པར་གྱིས། །མཆུ་ལྟག་དབུས་མར་རི་མོ་ནི། །གྱེན་དུ་སོར་གཅིག་གང་ལ་ཡོད། །དེ་ནི་ལོ་གཅིག་ཉིད་ལ་ནི། །ཁ་ནད་ཀྱིས་ནི་འཆི་བར་འགྱུར། །དེ་འདྲ་བ་ཡི་རི་མོ་གཉིས། །
སོར་གཉིས་པར་ནི་སྣང་གྱུར་ན། །རྟ་དེ་ཉིད་ནི་ལོ་གཉིས་ན། །ལྕེ་རེངས་ཀྱིས་ནི་འཆི་བར་འགྱུར། །འདི་འདྲ་བ་ཡི་རི་མོ་གཉིས། །མཆུ་ལྟག་ཏུ་ནི་འཕྲེད་དུ་སྣང་། །ལོ་གསུམ་ནས་ནི་འགྲམ་ནད་ཀྱིས། །དེ་ནི་འཆི་བར་འགྱུར་བ་ཡིན། །འདི་འདྲའི་རི་མོ་དབུས་ན་
དམའ། །རྟ་གང་ལ་ནི་ཡོད་གྱུར་པ། །རྟ་དེ་ལོ་བཞི་ལོན་པ་ན། །འགྲམ་ལྐོག་ནད་ཀྱིས་འཆི་བར་འགྱུར། །གང་གི་གཡོན་ན་རི་མོ་ནི། །རྩེ་མོ་ཡོན་པོ་སོར་གཉིས་ཡོད། །རྟ་དེ་ཉིད་ནི་ལོ་ལྔ་ནས། །རི་དྭགས་གླལ་གྱི་ནད་ཀྱིས་འཆི། །མཆུ་ལྟག་དབུས་ན་རི་མོ་ནི། །
སོར་གཉིས་ཚད་ནི་ཡོན་པོ་ཡོད། །གང་ཡིན་དེ་ནི་ལོ་དྲུག་ནས། །ཨ་བ་ར་གའི་ནད་ཀྱིས་འཆི། །གང་གིས་རི་མོ་འདི་འདྲ་བ། །སོར་ཕྱེད་ཁར་ནི་ཆུད་གྱུར་པ། །རྟ་དེ་ལོ་ནི་བདུན་ཉིད་ན། །གྲི་ཤིའི་ནད་ཀྱིས་གདུངས་ནས་འཆི། །རི་མོ་དེ་འདྲ་སོར་གསུམ་པ། །རྟ་ནི་གང་ལ་
སྣང་གྱུར་པ། །རྟ་དེ་ལོ་བརྒྱད་ལོན་ནས་ནི། །རིམ་གྱིས་ཉེ་བར་འཆི་བར་འགྱུར། །གང་གི་རི་མོ་འདི་འདྲ་ལས། །དབུས་ན་ནས་འདྲ་སྦོམ་པོ་ཡོད། །རྟ་དེ་ཉིད་ནི་ལོ་དགུ་ན། །རླུང་གི་གཟེར་གྱིས་སྲོག་ཟད་འགྱུར། །རི་མོ་མཆུ་ལྟག་དང་མཉམ་པ། །གྱེན་དུ་བྱུང་བ་དབུས་
ན་གནས། །རྟ་དེ་ལོ་ནི་བཅུ་པ་ན། །སྐེ་རེངས་ཀྱིས་ནི་བརླག་པར་འགྱུར། །གང་ལ་རི་མོ་འདི་འདྲ་གཉིས། །མཆུ་ལྟག་དབུས་ན་གནས་གྱུར་པ། །ལོ་ནི་བཅུ་གཅིག་ལོན་པ་ན། །རླུང་འཁྱིལ་ནད་ཀྱིས་སྲོག་ཟད་འགྱུར། །གང་ལ་དེ་ནི་སོར་གཉིས་ལས། །བཅུད་

203-1-252b

ཆེ་བ་ཡི་རི་མོ་ཡོད། །རྟ་དེ་ལོ་ནི་བཅུ་གཉིས་ན། །གྱེན་དུ་ལོག་པའི་རླུང་གིས་གསོད། །རི་མོ་ཆུར་ནི་སོར་ཕྱེད་པ། །སྦོམ་པོ་ནས་དང་འདྲ་བ་ཡོད། །རྟ་དེ་ལོ་ནི་བཅུ་གསུམ་ན། །དབུགས་མི་བདེ་བའི་ནད་ཀྱིས་འཆི། །སྟེང་དང་ཐད་ཀར་རི་མོ་ནི། །མཆུ་ལྟག་དབུས་ན་
གཉིས་གཉིས་ཡོད། །ཡང་ན་བྱ་རོག་རྗེས་འདྲ་བ། །གཉིས་ནི་རྟ་གང་ལ་ཡོད་པ། །རྟ་ནི་ལོ་ནི་བཅུ་བཞི་ན། །འབྱུང་བའི་ནད་ཀྱིས་དུས་བྱེད་འགྱུར། །དེ་ཡི་བདག་པོའི་ནོར་དང་འབྲུ། །ཉམས་པར་བྱེད་པ་ཉིད་དུ་འགྱུར། །གང་གི་རི་མོ་རིམ་ཙམ་ནི། །གྱེན་དུ་འགྲེང་ཞིང་
དབྱིབས་ལེགས་ལ། །དྲང་ཞིང་གསལ་བར་གྱུར་པ་དང་། །བལྟ་ན་སྡུག་ཅིང་ཡིད་འོང་བ། །གང་གི་མཆུ་ལྟག་དབུས་ན་ཡོད། །དེ་ནི་གང་གི་ཁྱིམ་ན་འདུག །མྱུར་དུ་རྒྱལ་པོ་ཉིད་འགྱུར་ཞིང་། །དྲིན་སྐྱབས་ནོར་དང་འབྲུ་འཕེལ་འགྱུར། །རྟ་དེ་གང་ན་གནས་གྱུར་དེ། །གྲོང་
ཁྱེར་རྒྱལ་སྲིད་འཕེལ་བར་འགྱུར། །དེ་འདྲའི་རྟ་ནི་རྙེད་གྱུར་ན། །མཆོད་ཅིང་ཡོངས་སུ་བསྐྱང་བར་བྱ། །དེ་ནི་དེ་འདྲས་ལོ་བཅོ་ལྔ། །བདེ་བ་ཁོ་ནར་སོན་ནས་ནི། །རྟ་རྫི་ཡིས་ནི་སྣང་བྱས་པ། །དེ་རྗེས་སྲོག་ནི་འདོར་བར་འགྱུར། །གང་ལ་མཆུ་ལྟག་རི་མོ་ནི། །འདི་འདྲ་
དཀར་པོར་སྣང་གྱུར་པ། །དེ་ཡང་ལོ་ནི་བཅོ་ལྔ་ན། །བ་ལ་ཤ་ཡི་ནད་ཀྱིས་འཆི། །གང་གི་མཆུ་ལྟག་དབུས་ན་ནི། །རི་མོ་སོར་ནི་གསུམ་པ་ཡོད། །དེ་ནི་ལོ་ནི་བཅུ་དྲུག་ན། །ལོ་ལོགས་ནས་ནི་འཆི་བར་འགྱུར། །དེ་ལྟ་བུ་ཡི་རྟ་དེ་ནི། །བདག་པོ་མཛའ་བོའི་ནོར་
འཕེལ་འགྱུར། །གང་ལ་དེ་འདྲའི་རི་མོ་ནི། །མཉམ་པོ་གསུམ་ནི་མཆུ་ལྟག་ནས། །དེ་ཡང་ལོ་ནི་བཅུ་དྲུག་ན། །རླིག་སྐྲངས་ཀྱིས་ནི་དུས་བྱེད་འགྱུར། །དེ་ལྟ་བུ་ཡི་རྟ་དེ་ནི། །རྟག་ཏུ་བདག་པོའི་དོན་སྒྲུབ་འགྱུར། །བུ་མང་བར་ནི་འགྱུར་བ་དང་། །རྟ་ནི་ཕོ་མོ་འཕེལ་
བར་འགྱུར། །སྟེང་གི་ཆར་གཉིས་འོག་ཁར་གཉིས། །རི་མོ་རྟ་ནི་གང་ལ་སྣང་། །དེ་ནི་ལོ་ནི་བཅུ་བདུན་ན། །མཚོན་གྱིས་འཆི་བ་ཐོབ་པར་འགྱུར། །དེ་ལྟ་བུ་ཡི་རི་མོ་ནི། །གྱེན་དུ་ལྟ་བ་གང་ལ་ཡོད། །རྟ་དེ་ལོ་ནི་བཅོ་བརྒྱད་ན། །ཁྲག་ནད་ཀྱིས་ནི་སྲོག་ཟད་འགྱུར། །

203-1-253a

རི་མོ་གྱེན་དུ་ལྟ་ཞིང་མཉམ། །སྣུམ་པ་བཞི་ནི་གང་ལ་ཡོད། །རྟ་དེ་ལོ་ནི་བཅུ་དགུ་ན། །གཅིན་འགག་པ་ཡིས་དུས་བྱེད་འགྱུར། །རི་མོ་ཉམས་ཤིང་རིང་བ་ལྔ། །གང་གི་མཆུ་ལྟག་མཉམ་ཡོད་པ། །དེ་ཡང་ལོ་ནི་ཉི་ཤུ་ན། །མགོ་ནད་ཀྱིས་ནི་འཆི་བར་
འགྱུར། །གང་ལ་རྟ་ཕྱིས་འོན་ཏེ་ནད། །འདྲ་ཡོད་དེ་ནི་གསེབ་ཀྱི་མཆོག །ལོ་ནི་ཉི་ཤུ་རྩ་གཅིག་ན། །ཁ་ནད་ཀྱིས་ནི་འཆི་བར་འགྱུར། །གང་གི་མཆུ་ལྟག་རི་མོ་ནི། །བཅུད་གུག་པ་ནི་ཡོད་གྱུར་པ། །དེ་ནི་ཉི་ཤུ་རྩ་གཉིས་ན། །སྨད་ནད་ཀྱིས་ནི་འཆི་བར་འགྱུར། །
མཆུ་ལྟག་ལྕགས་ཀྱུ་འདྲས་བརྒྱན་པ། །རྒྱལ་པོ་ལ་གཅེས་དཔལ་ཡོན་ཅན། །ལོ་ནི་ཉི་ཤུ་རྩ་གསུམ་ན། །བྲང་ཚ་བ་ཡིས་འཆི་བར་འགྱུར། །རུས་སྦལ་ཆུ་སྲིན་འདྲ་གང་ཡོད། །དེ་ཡང་རྒྱལ་པོའི་རྗེས་མཐུན་ཡིན། །ལོ་ནི་ཉི་ཤུ་རྩ་བཞི་ན། །རྣ་བའི་ནད་ཀྱིས་འཆི་བར་
འགྱུར། །རྟ་ནི་གང་གི་མཆུ་ལྟག་ན། །པདྨའམ་ཨུཏྤལ་འདྲ་ཡོད་པ། །བདག་པོའི་ནོར་ནི་རྟག་ཏུ་བསྐྱེད། །ལོ་ལེགས་པར་ཡང་བྱེད་པ་ཡིན། །ལོ་ནི་ཉི་ཤུ་རྩ་ལྔ་ན། །གཞོང་འདྲའི་ནད་ཀྱིས་དུས་བྱེད་འགྱུར། །དེ་ནི་ཐ་སྐར་བཅས་ཡོད་པ། །བདག་པོའི་ནོར་དང་བུད་མེད་
བསྐྱེད། །ལོ་ནི་ཉི་ཤུ་རྩ་དྲུག་ན། །སྣུམ་ནད་ཀྱིས་ནི་འཆི་བར་འགྱུར། །བ་དན་བཅས་པ་གང་ལ་ཡོད། །བདག་པོ་བསྟེན་ན་ནོར་སྟེར་འགྱུར། །ལོ་ནི་ཉི་ཤུ་རྩ་བདུན་ལ། །སྦྲུལ་གྱིས་བཟུང་སྟེ་འཆི་བར་འགྱུར། །གང་ལ་མཆོད་སྡོང་འདྲ་རིས་ཡོད། །བདག་པོ་མཆོད་
སྦྱིན་གྱིས་འབྱོར་འགྱུར། །ལོ་ནི་ཉི་ཤུ་རྩ་བརྒྱད་ན། །གཟེར་ནད་ཀྱིས་ནི་འཆི་བར་འགྱུར། །གང་ལ་རི་མོ་བླུགས་གཟར་འདྲ། །མཆུ་ལྟག་དབུས་ན་ཉེ་བར་སྐྱེས། །དེ་ཡི་བདག་པོ་མཆོད་སྦྱིན་བྱེད། །སྦྱིན་གཏོང་རྟག་ཏུ་འགྱེད་པར་འགྱུར། །ལོ་ནི་ཉི་ཤུ་རྩ་དགུ་ན། །
མགོ་ནད་ཀྱིས་ནི་དུས་བྱེད་འགྱུར། །གཡུང་དྲུང་རིས་དང་རིན་ཆེན་འདྲ། །དཔལ་གྱི་ཤིང་ངམ་ལྷ་ཡི་ཤིང་། །དགའ་བ་འཁྱིལ་པའམ་ཕྲེང་བ་འདྲ། །གང་གི་མཆུ་ལྟག་ཉིད་ན་སྣང་། །རྟ་མཆོག་དེ་ནི་བདག་པོ་ཡི། །དཔལ་ནི་མཆོག་ཏུ་འཕེལ་བར་བྱེད། །བུ་དང་ཚ་བོ་

203-1-253b

འཕེལ་བར་བྱེད། །བདེ་བར་རྣམ་པར་རྒྱལ་བར་བྱེད། །གང་ལ་འདི་འདྲའི་རྟ་ཡོད་པ། །རྒྱལ་པོ་དེ་ནི་རྣམ་རྒྱལ་འགྱུར། །བདག་པོ་ཚིམ་ཞིང་བདེ་བ་དང་། །ནོར་རྙེད་པ་ནི་ཚིམ་བྱས་ནས། །དེ་ནི་ལོ་ནི་སུམ་ཅུ་ན། །ཁོང་པའི་སྲིན་བུའི་ནད་ཀྱིས་འཆི། །འཁོར་
ལོའམ་རྡོ་རྗེ་ལྟ་བུའི་དབྱིབས། །རྟ་གང་གི་ནི་མཆུ་ལྟག་གནས། །རྟ་དེ་རྒྱལ་པོའི་བཞོན་པར་འགྱུར། །བདག་པོ་རྟག་ཏུ་བདེ་སྐྱིད་བྱེད། །རྒྱལ་པོས་དེ་ནི་བཞོན་གྱུར་ན། །དགྲ་ཡི་ཚོགས་ནི་ཀུན་ལས་རྒྱལ། །རྟ་དེ་སུམ་ཅུ་རྩ་གཅིག་ན། །ནད་མེད་པར་
ནི་འཆི་བར་འགྱུར། །གང་ལ་མཆུ་ལྟག་དབུས་ན་ནི། །ཟླ་བ་ཁམ་པའི་ཉི་འདྲ་ཡོད། །རྒྱལ་པོ་གང་ལའང་འདི་འདྲ་ཡི། །རྟ་ཡོད་དེ་ནི་འབྱོར་ཆེན་ཡིན། །ལོ་ནི་སུམ་ཅུ་རྩ་གཉིས་ན། །བདེ་བར་འདུག་བཞིན་དུས་བྱེད་འགྱུར། །གལ་ཏེ་རི་མོ་རྩུབ་བམ་
ཆད། །དུམ་བུའམ་ཡོན་པོ་ཡོད་གྱུར་ན། །དེ་ནི་བསྔགས་པ་མ་ཡིན་གྱི། །དྲང་ཞིང་མདངས་སྣུམ་བསྔགས་པ་ཡིན། །དེ་ལྟར་ཚེ་ནི་ཤེས་བྱ་བ། །ང་ཡིས་ཁྱོད་ལ་བཤད་པ་ཡིན། །དེ་དག་ཤེས་ཀྱང་བརྗོད་མི་བྱ། །བརྗོད་ན་ཉེས་པར་འགྱུར་བ་མི་
ཡིན། །ཉོ་བ་དང་ནི་འཚོང་བ་དང་། །གསོ་དཔྱད་ཚེ་ཡང་བརྗོད་མི་བྱ། །ཤ་ལི་ཧོ་ཏྲའི་མདོའི་གསང་བའི་གནས་བརྒྱད་པ་ལས། རི་མོ་ལས་ན་ཚོད་དང་ཚེ་བརྟག་པའི་ལེའུའོ།།      །།ནད་ནི་ཤིན་ཏུ་མི་བཟད་པས། །རྟ་རྣམས་ཟད་པར་གྱུར་པ་ན། །གཞི་
ནས་བརླག་པར་འགྱུར་བ་ཡིས། །བཞོན་པའི་བདེ་ལས་ཉམས་པར་འགྱུར། །དེ་ཚེ་རྒྱལ་པོ་སྐམ་པོ་རྩྭ། །གན་ད་ར་དང་མ་ཏྲ་ཀ །སིན་དུ་སོ་པི་ར་དང་ནི། །ལྷོ་ཕྱོགས་པ་ཡི་གཙོ་བོ་སོགས། །རྒྱལ་པོ་དང་ནི་གླིང་བར་པའི། །མི་རྣམས་གང་དག་ཡིན་པ་དང་། །
ཡུལ་གྱི་སྐྱེ་བོ་ཐམས་ཅད་ཀྱང་། །རྟ་ཡི་འཆི་བའི་འཇིགས་པས་ཉེན། །ཤ་ལི་ཧོ་ཏྲ་དྲང་སྲོང་ཆེ། །དེ་ཡི་གནས་སུ་ཉེ་བར་ལྷགས། །ཉི་མ་ལྟ་བུའི་གཟི་བརྗིད་ཅན། །དེ་ལ་དུལ་བས་ཕྱག་བྱས་ནས། །རྟ་ཡི་ཚུལ་ལ་བརྟེན་ནས་ནི། །ཐམས་ཅད་ཀྱིས་ནི་དྲིས་པ་ལ། །

203-1-254a

སྣ་ཚོགས་ནད་ཀྱིས་ཉེན་གྱུར་པ། །རྟ་རྣམས་ཤིན་ཏུ་མ་རུང་འགྱུར། །སྲོག་དང་བྲལ་གྱུར་ཉེ་བ་ན། །དེ་རྣམས་ཀྱི་ནི་སྐྱབས་ཁྱེད་ལགས། །ཁྱེད་ནི་རྟ་ཡི་དེ་ཉིད་མཁྱེན། །ཅི་ནས་དེ་དག་འཚོ་གྱུར་པ། །དེ་དག་ཁྱེད་ཀྱིས་བསྟན་པར་མཛོད། །དེ་ནས་
ཤ་ལི་ཧོ་ཏྲ་ཡིས། །མི་དབང་འཁོར་བཅས་ལ་སྨྲས་པ། །སེམས་ནི་སྡུག་བསྔལ་གྱིས་གདུངས་ཤིང་། །འཇིག་རྟེན་འདི་ནས་ལོག་ནས་ནི། །འཇིག་རྟེན་གཞན་དུ་འགྲོ་གྱུར་པ། །སྲོག་སྦྱིན་པ་ཡི་ཐབས་མེད་དོ། །དེ་ཡི་སྲོག་ནི་ཤེས་བྱ་དང་། །འཆི་འདོད་པ་ནི་ཤེས་བྱ་
དག །ཤེས་ལ་གོམས་པའི་མིག་ལྡན་ལས། །སྨན་པ་ཡིས་ནི་ཤེས་པར་བྱ། །བློ་མེད་བསྟན་བཅོས་མི་ཤེས་པས། །གསོ་བར་ནུས་པ་མ་ཡིན་ནོ། །གང་ཞིག་དུས་ལ་བབ་གྱུར་པ། །དེ་ལ་སྨན་པར་བྱར་མེད་དེ། །སེམས་ཅན་ཀུན་ལ་འཆི་བ་ནི། །
བཅོས་སུ་མེད་པ་མདུན་ན་བསྟོད། །སེམས་ཅན་ཀུན་གྱི་དུས་མིན་འཆི། །ནད་ལས་བྱུང་བར་གྱུར་པ་ནི། །སྨན་དང་སྦྱོར་བ་རྣམས་དང་ནི། །སྔགས་རྣམས་ཀྱིས་ཀྱང་བཟློག་པར་བྱ། །གང་ཞིག་སྔོན་གྱི་ལས་ཀྱིས་ནི། །ཚེ་ནི་ངེས་པར་ཟད་གྱུར་པ། །དེ་ལ་ལྷ་སོགས་
བཅས་པས་ཀྱང་། །བཟློག་པར་ནུས་པ་མ་ཡིན་ནོ། །སྡུག་བསྔལ་ཚོར་བ་བཟློག་པ་དང་། །ནད་རྣམས་བསལ་བར་བྱ་བ་ལ། །ཚེ་ཡི་རིག་བྱེད་ཡན་ལག་བརྒྱད། །རྟག་ཏུ་ནུས་དང་ལྡན་པར་བཤད། །ནད་རྣམས་ཞི་བར་བྱེད་པ་དང་། །དེ་བཞིན་ཚོར་བ་གསལ་
གྱུར་པ། །འདི་དག་སྨན་པའི་ལས་ཡིན་གྱི། །ཚེ་ཡི་བདག་པོ་སྨན་པ་ཡིན། །འཆི་ལྟས་ཀྱིས་ནི་ཟིལ་གནོན་པ། །འཆི་བར་འགྱུར་གྱིས་སྲོག་ཡོད་མིན། །འཆི་ལྟས་མེད་པར་གྱུར་ན་ནི། །དེ་ལ་འཆི་བ་ཡོད་མ་ཡིན། །གང་ཚེ་དུས་ལ་བབ་པ་ན། །དེ་ཚེ་འཆི་ལྟས་
མང་དུ་འབྱུང་། །དུས་ནི་གོ་བཟློག་གྱུར་པ་དང་། །རྒྱལ་པོའི་སྐྱེས་སྐར་མི་འཕྲོད་དང་། །སྔོན་གྱི་ལས་ཀྱི་ཉེས་པ་འམ། །དེ་བཞིན་རྒྱལ་པོའི་སྡིག་སྤྱོད་ལས། །ལོག་པར་སྤྱོད་པར་གྱུར་པ་ལས། །ལྟོས་ནས་མང་དུ་འབྱུང་བར་འགྱུར། །འཆི་ལྟས་ཀྱི་ནི་མཚན་ཉིད་དང་། །

203-1-254b

ནད་ནི་སྣ་ཚོགས་དེ་ལས་འབྱུང་། །མི་བཟད་ཚུལ་ཅན་དུ་མ་ནི། །སྲོག་ནི་འཇིག་པར་བྱེད་པ་འབྱུང་། །དེ་ཚེ་གསོ་བ་སྔགས་བཅས་པས། །དོན་ནི་ཅི་བཞིན་བྱེད་མི་ནུས། །སྨན་རྣམས་ཀྱིས་ཀྱང་ནད་ཀྱི་ཚོགས། །ལེགས་པར་སེལ་བར་བྱེད་མི་ནུས། །དེ་ཚེ་ལྷ་
ཚོགས་མཆོད་པ་དང་། །སྡོམ་པ་གནས་དང་ཞི་བའི་ལས། །སྔགས་དང་སྦྱིན་སྲེག་གཏོར་མ་ཡིས། །ནད་ཀྱི་ཚོགས་རྣམས་ཞི་བར་བྱ། །ཡམས་ཀྱི་ནད་ནི་ཞི་བྱའི་ཕྱིར། །སྔར་བཤད་པ་ཡི་ཞི་བའི་ལས། །བྱས་པས་སྲུང་ཞིང་འཚེ་བ་བསལ། །དེས་ནི་སྣ་ཚོགས་
ནད་གཞི་འགྱུར། །སྨན་པས་གང་ཞིག་མཐོང་གྱུར་ན། །རྟ་ནི་ངེས་པར་བརླག་འགྱུར་བའི། །ཚེ་ཟད་པ་ཡི་རྟགས་དང་ནི། །མཚན་མ་ཡང་དག་བཤད་པར་བྱ། །ནད་ནི་མི་བཟད་ཀྱིས་ཉེན་ཅིང་། །སྲོག་དང་འབྲལ་བར་འགྱུར་བ་ན། །མཚན་མ་གང་ཞིག་སྣང་གྱུར་
པ། །དེ་འདི་ང་ལས་ཤེས་པར་གྱིས། །གང་ཞིག་སྐེ་བསྡམས་ལུད་པ་ལུ། །ཁ་ཆུ་དང་ནི་མཆི་མ་འཛག །དཀུ་ནི་སྟོང་པར་སྣང་གྱུར་པ། །ནད་དེའི་མཚན་མ་ངན་པ་ཡིན། །གང་གི་ལུས་ཀུན་སྐྲངས་པ་དང་། །རྨེན་བུ་མང་པོ་འབྱུང་བ་དང་། །གས་ཤིང་འཛག་པར་བྱེད་
པ་དང་། །དེ་ལ་དྲི་ང་འབྱུང་འགྱུར་ཏེ། །བྱ་རྒོད་ཚང་གི་རིར་འབྱུང་བ། །དེ་ནི་ཅི་ནས་འཚོ་མི་འགྱུར། །རྔ་མ་གཡབ་པར་མི་བྱེད་ཅིང་། །སོ་ཡང་ཀྲིག་ཀྲིག་འཆའ་བར་བྱེད། །སེམས་རྨུགས་ཤིན་ཏུ་ཡིད་མི་བདེ། །མགོ་ཡང་བྲུག་པར་བྱེད་མི་ནུས། །མཚན་དང་ལྟོ་བ་
སྐྲངས་གྱུར་པ། །རྟ་དེ་འཚོ་བར་མི་འགྱུར་རོ། །རྣ་བ་ཆག་ཅིང་ཟས་མི་ཟ། །བཞིན་རས་ངན་ཅིང་རྔ་མ་འབྱི། །འདར་དང་མགོ་འཁོར་གྱིས་ཉེན་པ། །སྐད་མི་འབྱིན་ཅིང་འདུག་མི་ཚུགས། །སེམས་ཁོང་ཆུད་ཅིང་མཆི་མས་དཀྲུགས། །ཚེ་ཟད་པར་ནི་ཤེས་
པར་བྱ། །ཁ་ནས་ཆུ་སྔོན་འདྲ་བ་ཡི། །ཁ་ཆུ་རྒྱུན་དུ་འཛག་པ་དང་། །རྟ་སྦངས་རྒྱུན་མི་འཆད་པར་འཁྲུ། །གཅིན་ནི་ཁྲག་དང་འདྲ་བར་འཛག །སྨན་པ་མཁས་པར་གྱུར་པ་ཡིས། །དེ་ནི་འཆི་དང་འདྲར་ཤེས་བྱ། །རྟ་གང་སྒྲ་ནི་མི་ཐོས་དང་། །གང་ཞིག་མི་འཕྲོད་

203-1-255a

ལ་བརྟེན་ལ། །ཁ་ཟས་དང་ནི་བྲལ་གྱུར་པ། །དེ་ཡང་འཆི་བ་འདྲར་ཤེས་བྱ། །ཤིན་ཏུ་འཁྲུ་ཞིང་མི་ཟད་བྱེད། །བརྒྱལ་རེངས་ཡིད་མི་བདེ་དང་ལྡན། །གང་ཞིག་དཀུར་ནི་ལྟ་བྱེད་པ། །དེ་ཡང་སྲོག་ཟད་གྱུར་པ་ཡིན། །གང་ཞིག་རྩ་ནི་མི་ཟ་བར། །རྒྱུན་དུ་སོ་
ནི་འཆའ་བྱེད་ལ། །རྐང་པས་ས་ནི་རྐོ་བྱེད་པ། །དེ་ཡང་འཆི་བར་འགྱུར་ཤེས་བྱ། །གང་གི་ཁ་དང་སྣ་ནས་ནི། །ཁྲག་ནི་རབ་ཏུ་འབྱུང་འགྱུར་ཞིང་། །རྫི་མ་དམར་པོར་སྣང་གྱུར་ལ། །ཉེ་བར་གྱུར་ཀྱང་མཐོང་མི་ནུས། །མིག་ནི་དམར་ཞིང་འཚུབས་པར་བྱེད། །གཅིན་ནི་
ཁྲག་འདྲ་འབྱུང་འགྱུར་ལ། །སེམས་ཁོང་ཆུད་པར་གྱུར་པ་དག །དེ་འདྲ་འཚོ་བར་འགྱུར་མ་ཡིན། །གང་གི་མིག་ནི་སེར་གྱུར་ཅིང་། །འཁྲུལ་པའི་མིག་གིས་ལྟ་བ་འམ། །རྐང་པ་ལ་ནི་རྟོག་བྱེད་པ། །རྟ་དེའང་འཆི་བར་འགྱུར་བ་ཡིན། །གང་གི་མིག་ནི་དམར་གྱུར་ཅིང་། །
དཀར་པོའི་ཆ་ནི་མི་མངོན་ལ། །རབ་ཏུ་གཡོགས་པར་གྱུར་པ་གང་། །དེ་ཡང་མྱུར་དུ་མ་རུང་འགྱུར། །འགྲོ་བའི་ཚེ་ན་རྣམ་པར་འཁྱོར། །རྐང་པ་འཛུགས་པར་མི་ནུས་ཤིང་། །འཚེའུ་ཚེ་འཁུམས་པར་བྱེད་པ་དང་། །གཉེའུ་རེངས་གྱུར་པ་དེ་མི་འཚོ། །རྩིབ་ལོགས་དག་ནི་རེ་རེ་
ཡིས། །ཡང་དང་ཡང་དུ་འགྲེ་བྱེད་ཅིང་། །གསུས་ཆེ་མཆུ་འཕྱང་ལྕེ་ནག་པ། །འགྲོ་བར་བྱེད་པས་དེ་མི་འཚོ། །འགྲོ་བཞིན་དུ་ནི་ལྕི་བ་དང་། །དཀུ་ལ་ཡང་དང་ཡང་དུ་ལྟ། །ཁ་ནས་བཏུང་བར་གྱུར་པ་རྣམས། །སྣ་ནས་འབྱུང་བར་བྱེད་པ་དང་། །མིག་གིས་མཐོང་བར་མི་
ནུས་ཤིང་། །རྣ་བ་དག་ཀྱང་རེངས་གྱུར་པ། །དེ་ནི་འཆི་བ་དང་འདྲ་བས། །སྨན་གྱི་སྦྱོར་བ་མི་བྱའོ། །གང་ཞིག་རླུང་འཁྱིལ་དྲག་ཏུ་སྦོ། །ཡང་དང་ཡང་དུ་དྲག་ཏུ་འཁྲུ། །འཁྲུ་བ་རིང་དུ་འབྱིན་བྱེད་ཅིང་། །འཁྲུས་ནས་སླར་ཡང་སྦོ་བ་དང་། །གཅིན་དང་རྟུག་པ་ཟད་
གྱུར་ཀྱང་། །རྩ་ནི་ཟ་བར་མི་བྱེད་པ། །དེ་ཡང་འཆི་བ་དང་འདྲ་བས། །སྨན་གྱི་སྦྱོར་བ་མི་བྱའོ། །གང་གི་རྔོག་མ་མཐོར་གྱུར་ཅིང་། །དཀུར་ནི་ལྟ་བར་བྱེད་པ་དང་། །ལྕེ་རྐན་ཁ་དང་མཆུ་གནག་ཅིང་། །འགྲམ་པ་འཐས་པར་གྱུར་པ་དང་། །པགས་པ་སྤུ་དང་

203-1-255b

ལུས་དྲི་ང་། །འཇིག་རྟེན་ཕ་རོལ་འགྲོར་ཤེས་བྱ། །ཁའི་ཚོང་འདྲ་མ་ཤ་རུལ་པའམ། །མདའ་སྒྲོ་བསྲེགས་པ་ལྟ་བུ་ཡི། །རྟ་ནི་གང་ལ་ཡོད་གྱུར་པ། །དེ་ཡང་འཆི་བར་ཤེས་པར་བྱ། །གང་ལ་རྔོ་དང་གཡན་པ་སོགས། །པགས་ནད་འབྱུང་བར་གྱུར་པ་ན། །པགས་
པ་ནག་པོ་ཉིད་འགྱུར་ཞིང་། །སྤུ་ཡི་ཚོགས་ཀྱང་བྱི་ནས་ནི། །ཆུ་སེར་ཤས་ནི་ཆེ་བ་ཡི། །ཁྲག་ནི་འཛག་པར་བྱེད་གྱུར་པ། །དེ་མཐོང་ནས་ནི་ཟླ་གསུམ་བཅས། །ལྷག་མའི་འཚོ་བར་ཤེས་པར་བྱ། །ལུས་ནི་རྟག་ཏུ་རེངས་པ་དང་། །ཁ་ནས་ཁ་ཆུའི་རྒྱུན་འཛག་
ཅིང་། །ཡང་དང་ཡང་དུ་སྒྲ་འབྱིན་པའི། །འཇིག་རྟེན་ཕ་རོལ་པར་ཤེས་བྱ། །རྟ་གང་ཁ་སྐམ་ལྕེ་དང་ནི། །རྐན་དང་མཆུ་ནི་ནག་པོར་འགྱུར། །མི་རོ་ལྟ་བུའི་དྲི་འབྱུང་བ། །དེ་ཡང་རོ་དང་འདྲ་ཤེས་བྱ། །གང་གི་འབྲས་བུ་ལྐོག་མ་ནི། །རབ་སྐྲངས་མགོ་བོའི་ནད་
ཀྱིས་བཏབ། །ཁ་ཆུ་མདོག་ནི་དུ་མ་འཛག །དེ་ཡང་འཆི་བ་དང་འདྲར་བཤད། །གང་ཞིག་ལུད་པ་མི་བཟད་ལུ། །གང་དུ་གནས་པར་རྣམ་པར་འགྲེ། །དབུགས་མི་བདེ་ཞིང་རྐང་འཛག་པ། །དེ་འདྲ་བ་ཡང་འཚོ་མི་འགྱུར། །ཟད་བྱེད་ནད་ཀྱིས་བཏབ་གྱུར་
ཀྱང་། །ཡིད་བདེ་ལྟ་བུར་བྱེད་གྱུར་པ། །གང་ལ་མཚན་ཉིད་འདི་ཡོད་པ། །དེ་ཡང་འཆི་བར་ཤེས་པར་བྱ། །མདོག་དང་སྟོབས་དང་སྐད་གསང་ཉམས། །མིག་དང་སྣ་དང་ལུས་སྐྲངས་ཤིང་། །རྣ་བ་མཇུག་མ་བསྐྱོད་མི་ཤེས། །དེ་ཡང་འཆི་བར་
ཤེས་པར་བྱ། །གང་ཞིག་མགོ་དང་དེ་བཞིན་དུ། །རོ་སྟོད་བསྐྱོད་པར་གྱུར་པ་དང་། །ལུད་པ་ལུ་ཚེ་ཁ་ནས་ནི། །ཁྲག་ནི་འབྱུང་བར་བྱེད་པ་དང་། །ལུས་སྐྲངས་གཅིན་ནི་དམར་པོ་འབྱུང་། །དེ་ཡང་རོ་དང་འདྲ་བ་ཡིན། །རྟ་གང་གཅིན་མང་སྣ་ཚོགས་པའི། །
མདོག་ཅན་མང་དུ་འབྱུང་འགྱུར་ལ། །རྩྭ་ནི་ཅི་ཡང་མི་ཟ་བ། །དེ་ཡང་རོ་དང་འདྲ་བ་ཡིན། །སྙིང་ག་སྐྲངས་པ་དང་བཅས་པས། །ཤིན་ཏུ་མི་བཟད་ལུད་པ་ལུ། །སྨན་པ་མཁས་པས་མཐོང་གྱུར་ན། །འདི་ནི་མི་འཚོ་ཞེས་བསྟན་བྱ། །རྟ་གང་སྐེ་ནི་ཡང་ཡང་

203-1-256a

རྐྱོང་། །འདར་ཞིང་མིག་ནི་དམར་བ་དང་། །ལུས་ལྕི་ཡན་ལག་རེངས་གྱུར་པ། །དེ་ཡང་འཆི་བར་འགྱུར་ཞེས་བྱ། །གང་གི་བུ་གའི་སྒོ་སྐྱ་ཞིང་། །མཆུ་ལྟག་སྐྲངས་པར་གྱུར་པ་དང་། །མིག་ནི་ཐུར་དུ་འགེབས་ཤིང་འགྲོ། །སྤུ་ནི་ཤིན་ཏུ་གཤོར་གྱུར་
པ། །ཡིད་མི་བདེ་བས་རིང་དུ་འདུག །ཕྲག་སོའི་སྟེང་ནི་སྐམ་པོར་སྣང་། །གཉེའུ་རེངས་ཀྱིས་ཀྱང་བཏབ་གྱུར་པ། །རྟ་དེའང་འཚོ་བར་འགྱུར་མ་ཡིན། །རྩོལ་བ་ཆུང་ཞིང་ཆུ་ཉུང་འཐུང་། །ཟས་ཀྱང་ཟ་བར་མི་བྱེད་ཀྱང་། །རྟ་སྦངས་གཅིན་ནི་མང་གྱུར་པ། །དེ་ཡང་
རོ་དང་འདྲ་ཤེས་བྱ། །གང་ཞིག་ཚུལ་ནི་འདི་འདྲ་བའི། །འཆི་ལྟས་སྣང་བར་གྱུར་པ་ན། །དེ་ཡང་ལེགས་པར་སྣང་གྱུར་ན། །གཞན་དུ་འགྱུར་བ་དེ་མ་ཡིན། །ནད་པ་གང་དག་ལུས་འཇམ་ཞིང་། །མདོག་དང་སྤྱོད་པ་མང་གྱུར་ལ། །མིག་དང་སྤྱོད་པ་སྐྱོན་མེད་སྣང་། །
ཐམས་ཅད་དུ་ཡང་སྤྱོད་པ་ཡང་། །དྲོ་གྲང་དུས་ནི་ཅི་བཞིན་ཤེས། །གཅིན་རྟུག་གནོད་པ་མེད་པར་འབྱུང་། །ས་ལ་འགྲེ་བར་གྱུར་ནས་ནི། །སླར་ཡང་ཆུར་འཇུག་པར་མི་བྱེད། །སྨན་གྱི་སྦྱོར་བ་བྱས་པ་ན། །ཕན་དང་གནོད་པའི་ཁྱད་པར་སྣང་། །དེ་ནི་གསོ་བའི་ལས་
རྣམས་ལ། །གྲུབ་པའི་འབྲས་བུ་ཡོད་པ་ཡིན། །དེ་ལྟར་གསོར་རུང་གསོར་མི་རུང་། །ཤེས་ནས་གསོ་བའི་ལས་རྣམས་བརྩམ། །དེ་ལྟར་ཤེས་ནས་གང་སྤྱོད་པ། །སྨན་པ་དེས་ནི་ལས་གྲུབ་འགྱུར། །གསོ་བའི་བྱ་བ་བྱས་ཀྱང་ནི། །འཆོས་པར་
མི་འགྱུར་འཆི་འདོད་པ། །དེ་ལ་སྨན་གྱི་སྦྱོར་བ་ནི། །ཡོན་ཏན་སྐྱེད་པར་འགྱུར་བ་ཡིན། །འཆི་ལྟས་ཀྱི་ནི་མཚན་ཉིད་འདི། །ཡོན་ཏན་མེད་ལ་སྦྱིན་མི་བྱ། །བུ་དང་སློབ་མ་ཡོན་ཏན་གྱི། །སྣོད་ལྡན་རྣམས་ལ་སྦྱིན་པར་བྱ། །
འཆི་ལྟས་བྱུང་བ་གསང་བ་ནི། །ནམ་ཡང་སུ་ལའང་བརྗོད་མི་བྱ། །ཤ་ལི་ཧོ་ཏྲའི་གནས་ཏེ་བརྒྱད་པ་ལས་ནད་ཀྱིས་འཆི་ལྟས་བསྟན་པའི་ལེའུའོ།།      །།ཤ་ལི་ཧོ་ཏྲ་དྲང་སྲོང་ཆེ། །རྟ་ཡི་ཁང་པ་ལ་དགའ་བ། །ཐོས་ལྡན་བུ་ནི་ལེགས་ཐོས་ཀྱིས། །

203-1-256b

ཚིག་ནི་འདི་སྐད་སྨྲས་པར་གྱུར། །ནད་དང་ལྡན་པའི་འཆི་ལྟས་རྣམས། །འདི་དག་ལེགས་པར་ཐོས་ལགས་ན། །ནད་མེད་རྣམས་ཀྱི་འཆི་ལྟས་ཀྱང་། །གོ་རིམས་བཞིན་དུ་བརྟག་པར་མཛོད། །དེ་སྐད་དྲིས་ཚེ་ལེགས་ལྡན་ནི། །ཤ་ལི་ཧོ་ཏྲས་སླར་སྨྲས་པ། །ནད་མེད་
རྣམས་ཀྱི་འཆི་ལྟས་ཀྱང་། །ལེགས་ཐོས་ཉེ་བར་མཉན་པར་གྱིས། །རྟ་གང་ནད་ནི་མེད་བཞིན་དུ། །ལུས་ཀྱི་ཉམས་ནི་འགྲིབ་པ་དང་། །ཡིད་མི་བདེ་ཞིང་སེམས་ཁོང་ཆུད། །ཕྱིན་ཅི་ལོག་ཏུ་སྣང་གྱུར་ན། །འཚེར་ཡང་ལོག་པར་འཚེར་བྱེད་ཅིང་། །ལོག་པ་ཁོ་ནར་མཐོང་
བར་བྱེད། །དབུགས་ཀྱང་དེ་འདྲར་སྣང་གྱུར་ཅིང་། །ལུས་ནི་དེ་ལྟར་མི་སྡུག་འགྱུར། །དེ་མཐོང་ན་ནི་སྨན་པ་ཡི། །འཆི་བར་ངེས་པར་ཤེས་པར་བྱ། །མང་དུ་ཟ་ཡང་ཉོན་མོངས་བྱེད། །ཁ་ཆུ་མང་དུ་འཛག་བྱེད་ལ། །གཅིན་དང་རྟུག་པ་ཉུང་གྱུར་པ། །དེ་ཡང་མྱུར་དུ་
བརླག་པར་འགྱུར། །ཉི་མའམ་ཡང་ན་མར་མེ་འམ། །ཟླ་བ་འམ་ནི་ཆུ་ནང་དུ། །གང་གི་གྲིབ་མ་མི་མངོན་པ། །ཡང་ན་མུན་པའི་ནང་དུ་ནི། །ཤིན་ཏུ་རིང་མ་ཐུང་བར་སྣང་། །དེ་ཡང་མྱུར་དུ་འཇིག་པར་འགྱུར། །གང་ཞིག་འགྲོ་བར་བྱེད་པ་ན། །གྲིབ་མ་རྒྱབ་ཏུ་
ཕྱོགས་གྱུར་པའམ། །ཡང་ན་ཉིས་འགྱུར་སྣང་གྱུར་པ། །རྟ་དེའང་འཆི་བར་འགྱུར་བ་ཡིན། །ཕག་གམ་དེ་བཞིན་རྔ་མོ་འམ། །ཁྱི་དང་འདྲ་བ་སྣང་གྱུར་ཞིང་། །མི་སྡུག་རྟ་དང་མི་འདྲ་བའི། །གྲིབ་མ་གང་ལ་སྣང་གྱུར་པ། །དེ་ཡང་ཡུན་རིང་ནད་ཀྱིས་ནི། །འཆི་
བར་འགྱུར་བ་ཁོ་ན་ཡིན། །ཤིན་ཏུ་དྭངས་པའི་ཆུ་ལ་ཡང་། །གཟུགས་བརྙན་སྣང་བར་མི་འགྱུར་བའི། །སྐྱོན་དང་བཅས་པར་སྣང་གྱུར་པ། །དེ་ཡང་མྱུར་དུ་འཆི་བར་འགྱུར། །གང་གི་མགོ་ནི་སྟོད་སྨད་དག །མི་འདྲ་བར་ནི་སྣང་གྱུར་ལ། །རྩྭ་ཉུང་ཟ་ཞིང་ཆུ་ལ་
དགའ། །དེ་ཡང་མྱུར་དུ་སྲོག་འཇིག་འགྱུར། །གང་གི་མིག་ནི་མཆི་མས་ཁེངས། །དེ་བཞིན་དབང་པོ་ལོག་པར་འགྱུར། །གང་གི་ལུས་ནི་ཤིན་ཏུ་ཞུམ། །སྐོམ་གྱིས་གདུངས་པ་ལྟ་བུར་སྣང་། །སྦྲང་བུ་རྣམས་ནི་འདུས་ནས་ཀྱང་། །རྒྱུན་དུ་ཚོར་བ་མི་བཟད་སྐྱེད། །

203-1-257a

དེ་ལྟ་བུ་ཡི་རྟ་དེ་ནི། །སྲོག་ཟད་པར་ནི་ཤེས་པར་བྱ། །གང་ཞིག་རྣ་བས་མི་ཐོས་ཤིང་། །དབང་པོ་ཉམས་པར་སྣང་གྱུར་ལ། །རྩྭ་ཡང་ཉུང་ངུ་ཟ་བྱེད་པ། །དེ་ཡང་མྱུར་དུ་འཆི་བར་འགྱུར། །གང་གི་རྣ་བ་རེངས་ནས་ནི། །ཤིན་ཏུ་འགྲེང་བར་སྣང་
བ་དང་། །ཡང་དང་ཡང་དུ་འདུག་བྱེད་ཅིང་། །དྲན་པའང་ཡང་དང་ཡང་དུ་སྟོར། །མིག་ཀྱང་ལིང་ཐོག་དག་གིས་ནི། །ཁེབས་པ་ལྟ་བུར་སྣང་གྱུར་པ། །ཤིན་ཏུ་ལྷོད་པར་སྣང་བ་དང་། །རྣམ་པར་བསྐྱོད་པར་མི་ཤེས་ལ། །རྙོག་ཅན་ཚད་ནི་ཆེན་པོར་སྣང་། །དེ་ཡང་
མྱུར་དུ་མ་རུངས་འགྱུར། །གང་ཞིག་ཤིན་ཏུ་སྐྲག་པ་ལྟ། །རྒྱས་བསྡུས་འགུགས་པར་སྣང་བ་དང་། །ལྕེ་ཡང་སྐྲང་ཞིང་རེངས་གྱུར་པ། །དེ་ཡང་མྱུར་དུ་འཆི་བར་འགྱུར། །སྐྲངས་པར་གྱུར་པ་མ་ཡིན་ཡང་། །ཤིན་ཏུ་སྐྲངས་པར་ལྟར་སྣང་ལ། །རྟ་ནི་གང་ལ་སྣང་བར་གྱུར། །
དེ་ནི་ཡུན་རིང་འཚོ་མི་འགྱུར། །གང་ཞིག་པདྨ་དཀར་འདྲ་བས། །མིག་ནི་རྣམ་པར་ཁྱབ་ལྟར་སྣང་། །རབ་རིབ་ཡོད་ཀྱང་མཐོང་གྱུར་པ། །དེ་ཡང་མྱུར་དུ་འཆི་བར་འགྱུར། །མོད་ལ་སྟོབས་དང་ལྡན་གྱུར་ཞིང་། །སྤྱོད་པ་ལ་ཡང་ཐག་ཐོགས་མེད། །དེ་ནས་མྱུར་དུ་ལུས་
ཞུམ་པ། །དེ་ཡང་མྱུར་དུ་འཆི་བར་འགྱུར། །གང་ཞིག་ཁྲུས་ནི་བྱས་མོད་ལ། །དང་པོ་སྙིང་ག་སྐམས་འགྱུར་ཞིང་། །ལུས་ཀུན་རློན་པར་གནས་གྱུར་པ། །དེ་ནི་ཟླ་ཕྱེད་ལས་མི་འཚོ། །གསོས་ཀྱང་རྟས་པར་མི་བྱེད་ཀྱི། །འགྲིབ་པ་ཚབ་ཆེར་སྣང་གྱུར་ལ། །སྟོབས་དང་
མདོག་ནི་མེད་གྱུར་པ། །དེ་ཡང་ཡུན་རིང་འཚོ་མ་ཡིན། །བྱ་ནི་འཕུར་བར་གྱུར་པ་ན། །ཡུན་རིང་བལྟ་ཞིང་འགྲེང་འདོད་ལ། །དྲན་པ་ཉམས་ཀྱང་དགའ་དགའ་ལྟར། །ཡང་དང་ཡང་དུ་འཚེར་བར་བྱེད། །རྟ་དེ་ཚེ་ནི་ཐུག་ཟོས་པས། །རིང་པོར་ཐུབ་པར་འགྱུར་མ་ཡིན། །
བུ་གའི་ཚོགས་རྣམས་སྐམ་གྱུར་ཞིང་། །བློ་ཡང་ཤིན་ཏུ་འགྲིབ་པར་འགྱུར། །ལུས་ཀྱི་ཁྲག་ཀྱང་འགྲིབ་འགྱུར་ཅིང་། །སྤྱི་བག་སྤྱོད་ཀྱང་འབྱར་མི་བཏུབ། །ལུས་ལས་དྲི་ནི་མི་ཞིམ་འབྱུང་། །སྐད་གསང་མདོག་ཀྱང་ཉམས་གྱུར་པ། །ལུས་ཀྱིས་ཀྱང་ནི་ཚ་གྲང་དང་། །འཇམ་

203-1-257b

རྩུབ་ཚོར་བར་མ་གྱུར་པའམ། །ཕྱིན་ཅི་ལོག་ཏུ་བྱེད་གྱུར་པ། །རྟ་དེའང་འཆི་བར་འགྱུར་བ་ཡིན། །ཟས་དང་སྤྱོད་ཚུལ་ཐམས་ཅད་ལ། །ཐམས་ཅད་དུ་ནི་འགྱུར་བ་སྟོན། །བློ་དང་ལྡན་པས་དེ་ལྟ་བུ། །སེམས་ཉམས་པར་ནི་ཤེས་པར་བྱ། །མཚན་མར་སྣང་བ་འདི་དག་གིས། །
ཉམས་པར་འགྱུར་བར་ཤེས་པར་བྱ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ནད་མེད་པའི་འཆི་ལྟས་བསྟན་པའི་ལེའུའོ།།      །།ཤ་ལི་ཧོ་ཏྲ་དྲང་སྲོང་མཆོག །བསྟན་བཅོས་ཀུན་ལ་འཇིགས་མེད་པ། །ཐོས་ལྡན་བུ་ནི་ལེགས་ཐོས་ཀྱིས། །དུལ་དང་ལྡན་པས་
དྲིས་གྱུར་པ། །ཕོ་ཉ་འོངས་དང་ལམ་དང་ནི། །ཁྱིམ་དུ་འཇུག་ཚེ་ཤེས་བྱ་དང་། །ནད་ལ་མཐོང་བར་གྱུར་པ་དང་། །ལས་ནི་རྩོམ་པར་གྱུར་པ་ན། །ཤིས་དང་མི་ཤིས་མཚན་ཉིད་དག །འདི་ནི་ལེགས་ལྡན་བསྟན་པའི་རིགས། །བུ་ཡིས་དེ་སྐད་དྲིས་པ་དང་། །ཤ་ལི་ཧོ་ཏྲས་
སླར་སྨྲས་པ། །འདི་ནི་རྟ་ཡི་ཕོ་ཉ་ཡི། །མཚན་ཉིད་ང་ཡིས་བཤད་པར་བྱ། །ནད་པའམ་ཞུམ་པའམ་རྟགས་ཅན་ནམ། །ཡང་ན་གོས་ནི་དྲི་མ་ཅན། །སྡང་དང་གདུག་པའི་ལས་ཅན་དག །ཕོ་ཉར་འོངས་པ་མཐོང་གྱུར་ན། །སྨན་པ་མཆོག་གིས་ན་བ་ཡི། །རྟ་དེ་འཆི་
བར་ཤེས་པར་བྱ། །ནད་པའི་དོན་དུ་ཕོ་ཉ་ནི། །རྟ་དང་རྔ་མོ་མི་ལ་ནི། །ཞོན་ཏེ་འོངས་པར་མཐོང་གྱུར་ན། །རྟ་དེ་འཆི་བར་ཤེས་པར་བྱ། །ཕོ་ཉར་བུད་མེད་འོངས་པ་འམ། །མགོ་རེག་སྐྲ་བཅིངས་རལ་པ་ཅན། །གོས་ནི་རྡུལ་ཅན་གྱོན་པ་འམ། །ཡང་ན་ནག་གམ་རྙོག་ཅན་
གྱོན། །མཐོང་ན་སྨན་པས་རྟ་གསོའི་ཕྱིར། །དེར་ནི་འགྲོ་བར་མི་བྱའོ། །གང་ཞིག་གོས་དམར་རློག་པ་ཡིས། །ལུས་ནི་ཀུན་ནས་དཀྲིས་གྱུར་ཅིང་། །སྨན་པས་དྲིས་པར་འགྱུར་བ་ན། །མེད་ཅེས་བྱ་བའི་ཚིག་སྨྲ་དང་། །སོ་འདར་བ་དང་དེ་བཞིན་དུ། །སེན་མོ་ཕན་ཚུན་འདར་
བྱེད་ལ། །སྐྲ་དང་ཁ་སྤུ་རྒྱུ་མེད་པར། །ཤིན་ཏུ་སྤྲུག་ཅིང་ཉེད་བྱེད་པའི། །ཕོ་ཉ་འོངས་པར་མཐོང་གྱུར་ན། །སྨན་པ་དེར་ནི་འགྲོ་མི་བྱ། །རྩྭ་དང་ཤིང་དང་རྡོ་བ་དག །གཅོད་དམ་གཅོད་པར་བྱེད་པ་འམ། །ཡང་ན་བཅོག་ཅིང་ཉེད་པ་འམ། །སྐྲ་དང་ཐལ་བ་

203-1-258a

འཐོར་བྱེད་པ། །དེ་ལྟ་བུ་ཡི་ཚུལ་སྟོན་པ། །ཡོངས་སུ་སྤང་བར་བྱ་བ་ཡིན། །ཐལ་བ་ཕྱག་དར་སོལ་ཕུབ་དང་། །གྱོ་མོ་བདར་བར་བྱེད་བཞིན་དུ། །ཕོ་ཉ་འོངས་པར་གྱུར་ན་ནི། །དེས་ནི་དོན་ནི་འགྲུབ་མི་འགྱུར། །སྐྱེས་བུ་ལག་ན་འཁར་ཐོགས་པ། །ཁྲོས་
པའམ་ཤིན་ཏུ་ཞུམ་པ་ཡི། །ཡང་ན་མིག་ནི་མཆི་མས་ཁེངས། །གོས་དང་ཕྲེང་བ་དམར་པོ་ཐོགས། །གང་གི་ཕོ་ཉ་འདི་འདྲ་བ། །རྟ་ནི་དེ་རུ་འཚོ་མི་འགྱུར། །རྣ་བཅད་ཡན་ལག་ཉམས་པ་དང་། །ཡང་ན་ཅུང་ཟད་ཚིག་གྱུར་པ། །ཁ་ནས་མི་ཤིས་ཚིག་སྨྲ་བའམ། །ཡང་
ན་ཡིད་ལ་མི་དགེ་སེམས། །སྨན་པ་ཉམས་ཚེ་འོངས་གྱུར་ན། །དེ་ཡང་ངེས་པར་བརླག་པར་འགྱུར། །ཤི་འོ་ཚིག་གོ་ཉམས་སོ་ཞེས། །གཏམ་ནི་སྒྲོགས་པར་བྱེད་པ་འམ། །མི་ཤིས་པ་ནི་གཞན་སྨྲ་བ། །ཕོ་ཉ་དེས་ཀྱང་འཆི་འདོད་སྟོན། །ཕོ་ཉ་གང་གི་མདུན་ན་ནི། །
མཚུན་གཏོར་བྱེད་པའི་རྫས་ཐོགས་པའམ། །ཤིང་རྟ་ཆག་གྱུར་མཐོང་ན་ནི། །དེ་ཡང་སྤང་བར་བྱ་བ་ཡིན། །གང་གི་མདུན་ན་ཆུ་ཡི་ནི། །བུམ་པ་ཆག་པ་མཐོང་གྱུར་པ། །ནད་པ་དེ་ནི་འཆི་འདོད་ཅིང་། །འཇིག་རྟེན་གཞན་དུ་འགྲོ་ཤེས་བྱ། །སོག་མ་ཕུབ་མ་ཉའི་
རུས་པ། །སྐྲ་དང་ཤ་དང་སེན་མོ་སོ། །ཞིབ་མ་གཏུན་དང་མཆིལ་ལྷམ་དང་། །ཐལ་བ་དང་ནི་ཕྱག་དར་དང་། །རྩྭ་དང་ཤིང་དང་སོལ་བ་དང་། །བོང་བ་ལ་ཡང་རེག་བྱེད་དང་། །ཤིང་དང་སྔོན་པོའི་གོས་གྱོན་པའམ། །མི་རོའི་རྒྱན་གྱིས་བརྒྱན་པ་འམ། །བཅོམ་དང་ཉམས་
དང་རླག་པ་དང་། །ཚིག་དང་ཆག་དང་དེ་བཞིན་ཤིང་། །དེ་ལ་སོགས་པ་གཞན་དག་ཀྱང་། །མཐོང་ངམ་ཐོས་སམ་རེག་གྱུར་པ། །ཕོ་ཉ་འོངས་པའི་ཐོག་མར་ནི། །སྣང་བར་གྱུར་ན་དེ་མི་འཚོ། །ཕོ་ཉ་འོངས་པར་གྱུར་པ་ན། །རྟ་ཡི་ཚུལ་ནི་དྲིས་པའི་ཚེ། །ནན་གྱིས་
མི་ཤེས་སྨྲར་བཅུག་པ། །དེ་འདིར་བརྟག་པར་བྱ་མ་ཡིན། །ཕོ་ཉ་འོངས་པར་གྱུར་པའི་ཚེ། །རོ་ནི་ཡིད་དུ་མི་འོང་བའམ། །ཡང་ན་བཤང་བའམ་གཅི་བ་ཡི། །དྲི་མ་གློ་བུར་བྱུང་གྱུར་པའམ། །འདྲི་བའི་ཚེ་ན་བྱུང་གྱུར་ན། །སྨན་པས་དེ་ནི་སྤང་བར་བྱ། །གསོ་བའི་

203-1-258b

གནས་སུ་སོང་བ་དང་། །ནད་པ་མཐོང་བར་གྱུར་པ་དང་། །ལས་ནི་རྩོམ་པར་བྱེད་པ་དང་། །མཚན་མ་མཐོང་བ་བཤད་པར་བྱ། །དམོད་མོ་འདེབས་པའམ་བརྡེག་པ་འམ། །བཟློག་པ་འམ་ནི་སྨོད་པ་འམ། །གོས་དང་གཙུག་ཏོར་སྟོད་གཡོགས་དང་། །ཕྱུགས་
དང་བྱ་ཡི་ཚོགས་རྣམས་དང་། །ཤིང་རྟ་དང་ནི་གླང་པོ་ཆེ། །དེ་འདྲ་འཇིག་པར་འགྱུར་བ་དང་། །གདུགས་དང་རྒྱལ་མཚན་བ་དན་དག །བསྒྲེང་བ་འགྱེལ་བར་མཐོང་བ་དང་། །སྣོད་ནི་གང་བར་གྱུར་པ་དག །མངོན་སུམ་དུ་ནི་ཆག་གྱུར་པ། །བཅོམ་དང་ཡིད་དུ་མི་འོང་
དང་། །མཆིལ་མ་ཐལ་བ་འཐོར་བ་དང་། །ལམ་ནི་འགེགས་པར་མཐོང་གྱུར་ན། །ནད་པ་ཡི་ནི་སྲོག་ཟད་འགྱུར། །འཇུག་ཚེ་བུམ་པ་གང་དང་མེ། །རྒུན་འབྲུའི་འབྲས་བུ་མར་དང་ནི། །ཁྱུ་མཆོག་བྲམ་ཟེ་རིན་པོ་ཆེ། །ལྷ་ནི་ཕྱིར་འབྱུང་མཐོང་གྱུར་ན། །སྨན་པས་དེར་ནི་ན་བ་
ཡི། །རྟ་དེ་འཚོར་མི་འགྱུར་ཤེས་བྱ། །ཐལ་བས་གང་བའི་སྣོད་དང་ནི། །ཀུན་ནས་ཆག་པར་གྱུར་པ་དང་། །ཉམ་ཆུང་བ་འམ་ཆག་གྱུར་པ། །ཐལ་བ་ཕུབ་མ་སོལ་བ་དག །ཁྱིམ་གང་དུ་ནི་འཇུག་མཐོང་ན། །དེར་ནི་རྟ་དེ་འཚོ་མི་འགྱུར། །ཟས་དང་སྐོམ་དང་སྨན་རྣམས་ནི། །
དེ་བཞིན་ལོངས་སྤྱོད་གཞན་དག་ནི། །རོ་ལ་བྱེད་པ་ལྟར་བྱེད་ན། །རྟ་དེ་འཚོ་བར་འགྱུར་མ་ཡིན། །ནད་པའི་གན་ན་གནས་པ་དག །ཕན་ཚུན་སྤྱོད་པ་བྱེད་པ་ན། །ཤིན་ཏུ་རྨོངས་པ་ལྟར་འཇུག་ན། །དེ་ཡི་སྲོག་ཀྱང་རྙེད་པར་དཀའ། །དུད་པ་སོལ་བ་འཐོར་བྱེད་དང་། །དེ་བཞིན་
ཁྲི་ནི་གཅོག་པ་དང་། །སྦེད་པའམ་ཡང་ན་མི་སྙན་སྨྲ། །ཡང་ན་སྣོད་ནི་གཅོག་པ་འམ། །གསོ་བ་ལས་ནི་ཟློག་བྱེད་པ། །གལ་ཏེ་སྨན་པས་མཐོང་གྱུར་ན། །དེར་ཡང་ནད་པ་དེ་ཡི་ནི། །སྲོག་ཟད་གྱུར་པར་ཤེས་པར་བྱ། །ཐལ་བས་བསྐུས་པའམ་ཚིག་པའམ། །འདམ་གྱིས་
བསྐུས་པར་གྱུར་པ་འམ། །སྨྱོན་པའམ་རྫ་མཁན་མཐོང་གྱུར་ན། །དེ་ནི་འཆི་བར་སྟོན་པ་ཡིན། །སྐྱེས་བུ་གདོལ་པ་མཐོང་བ་དང་། །ཡང་ན་ཏིལ་མར་གྱིས་བསྐུས་མཐོང་། །ཤིན་ཏུ་ཉམས་པར་མཐོང་གྱུར་ན། །དེ་ཡང་མ་རུང་འགྱུར་ཤེས་བྱ། །གློ་བུར་ནས་ནི་དྲི་ང་བ། །བྱུང་

203-1-259a

ན་དེ་ནི་འཆི་བར་འགྱུར། །སྨན་པ་ཡིས་ནི་མངོན་སུམ་དུ། །བྲམ་ཟེའི་ཁྱིམ་ནས་ཆུ་འམ་ནི། །མར་སྣོད་ཐོགས་ཏེ་སོང་གྱུར་ན། །དེ་ཡང་འཚོ་བར་འགྱུར་མ་ཡིན། །གང་ཞིག་ཨག་ཚོམ་དེ་བཞིན་དུ། །མཇུག་མ་ཉེད་ཅིང་ཕྱི་བྱེད་ན། །དེ་འདྲའི་མཚན་མ་
མཐོང་ན་ཡང་། །སྲོག་ཟད་པར་ནི་ཤེས་པར་བྱ། །སྨན་གྱིས་རྣམ་པ་ཐམས་ཅད་དུ། །ནད་ནི་བསལ་བར་མ་ནུས་པ། །གང་ཡིན་དེ་ནི་མྱུར་བ་རུ། །འཆི་བར་འགྱུར་བར་ཤེས་པར་བྱ། །དེ་ལྟར་མི་ཤིས་གྱུར་པ་ཡི། །མཚན་ཉིད་རྒྱས་པར་བསྟན་པ་ཡིན། །དེ་ནས་གཞན་
ཡང་ཤིས་པ་དག །བཤད་ཀྱིས་ང་ལས་མཉན་པར་གྱིས། །གཙང་ཞིང་ཀུན་སྤྱོད་བཟང་དང་ལྡན། །ས་ཕྱོགས་ཡིད་འོང་ཉམས་དགའ་བར། །ཕོ་ཉ་འོངས་གྱུར་མཐོང་ན་ནི། །ལས་གྲུབ་པར་ནི་ཤེས་པར་བྱ། །བཅུ་བཞི་ཚེས་དགུ་མ་ཡིན་དང་། །དེ་བཞིན་བཅུ་བཞི་མ་
ཡིན་ཞིང་། །མཚན་ཕྱེད་དང་ནི་ཉི་མ་གུང་། །དུས་སུ་མ་ཡིན་ན་བ་མིན། །ཤིས་ཤིང་གནོད་པ་མེད་པ་ཡི། །ཡུལ་དང་དུས་སུ་ཅི་བཞིན་འོངས། །སྨན་པས་དེར་ནི་འོངས་པ་ལས། །ལས་གྲུབ་པར་ནི་ཤེས་པར་བྱ། །ལམ་དུ་འགྲོ་བར་གྱུར་པ་ན། །ཤིས་པའི་མཚན་མ་
བཤད་པར་བྱ། །ཞོ་དང་འབྲས་བུ་མ་གནང་དང་། །སྐྱེས་བུ་དྲེགས་དང་ལྡན་པ་དང་། །ཁྱུ་མཆོག་དང་ནི་བུམ་པ་གང་། །མཐོང་ན་འགྲུབ་པར་སྟོན་པ་ཡིན། །རྒྱལ་པོ་དང་ནི་དེད་དཔོན་དང་། །དེ་བཞིན་གདུགས་དཀར་མཐོང་བ་དང་། །བྲམ་ཟེ་ལག་པ་ཁེངས་དག་ནི། །
མཐོང་ན་ལས་རྣམས་འགྲུབ་པར་འགྱུར། །ན་ཆུང་དགའ་སྟོན་བྱེད་པ་དང་། །དེ་བཞིན་རིན་ཆེན་མཐོང་བ་དང་། །ཕྱུགས་གཅིག་བཏགས་པར་གྱུར་པ་དང་། །དེ་བཞིན་མེ་ནི་འབར་བ་དང་། །དྲི་དང་ཕྲེང་བ་ཤིས་པ་དང་། །བུད་མེད་བཟང་དང་རྒོད་མ་དང་། །ས་ནི་འདེགས་
པར་བྱེད་པ་དག །མཐོང་ན་ལས་ནི་འགྲུབ་པར་འགྱུར། །བུད་མེད་རིན་ཆེན་རྣམས་ཀྱི་ནི། །རྒྱན་གྱིས་བརྒྱན་ཅིང་བཀྲ་ཤིས་སྨྲ། །འབྲས་བུས་གང་བའི་སྣོད་དང་ནི། །ཆང་དང་སྦྲང་རྩིས་གང་བ་དང་། །དྲི་དང་སྒྲ་ནི་ཡིད་འོང་དང་། །གོས་དཀར་རོ་ནི་མངར་བ་ཡང་། །

203-1-259b

མཐོང་ངམ་ཐོས་ན་བློ་ལྡན་པས། །དོན་གྲུབ་པར་ནི་ཤེས་པར་བྱ། །ཕྲེང་བ་སར་པ་ཡིད་འོང་བ། །དེ་བཞིན་ཟས་སྐོམ་བཟང་པོ་དང་། །ཤིང་རྟ་མི་དང་བཅས་པ་དག །མཐོང་ན་དགེ་བར་བཤད་པ་ཡིན། །རྒྱལ་མཚན་སྒྲེང་བར་གྱུར་པ་དང་། །བ་དན་གྱིས་བརྒྱན་མཐོང་བ་འམ། །
གླང་པོ་ར་རོ་མཐོང་གྱུར་ན། །བློ་ལྡན་གྲུབ་པར་ཤེས་པར་བྱ། །ལྷ་དང་དེ་བཞིན་བྲམ་ཟེ་དང་། །སྐྱེས་པ་བུད་མེད་ཆས་དང་ལྡན། །པདྨ་འདབ་བརྒྱད་ངང་པ་དང་། །ས་ར་ལ་དང་རྨ་བྱ་དང་། །ཡུངས་ཀར་དང་ནི་སཱ་ལའི་ཤིང་། །དེ་བཞིན་གི་ཝཾ་ཉིད་དག་ནི། །ལམ་དུ་མཐོང་ན་
སྨན་པ་ཡིས། །དོན་གྲུབ་པར་ནི་ཤེས་པར་བྱ། །གང་ན་ཁྱུ་མཆོག་བཟང་པོ་ནི། །ལམ་ཀ་ན་ནི་སྣང་གྱུར་ན། །དེ་ནི་རྙེད་པ་དང་བཅས་པར། །བྱ་བ་ཐམས་ཅད་འགྲུབ་པར་འགྱུར། །ཤིང་རྟ་ས་ཡིས་གང་བ་ནི། །བ་བཞི་ཡིས་ནི་དྲངས་གྱུར་པའམ། །ཡང་ན་འབྲུ་ཡིས་
གང་གྱུར་པ། །མཐོང་ན་དོན་ནི་འགྲུབ་པར་འགྱུར། །ཤིན་ཏུ་བདེ་ལེགས་སྒྲ་དང་ནི། །མི་ནི་ལག་ན་པདྨ་ཐོགས། །གང་ཞིག་བྲམ་ཟེ་དགེ་སྦྱོང་མཆོད། །བརྒྱན་ཅིང་ཡིད་ལ་རེ་བ་རྫོགས། །དེ་ལས་གང་ཡང་རུང་བ་ནི། །མཐོང་ན་དོན་ནི་འགྲུབ་པར་འགྱུར། །ཁྱིམ་
དུ་འཇུག་ཚེ་བུམ་པ་གང་། །མཚན་མ་སྣ་ཚོགས་ཀྱིས་བརྒྱན་དང་། །དེ་བཞིན་བུད་མེད་རྒྱན་ཅན་དག །མཐོང་ན་ལས་ནི་འགྲུབ་པར་འགྱུར། །དྲི་ཞིམ་མདོག་ནི་བཟང་པོ་དང་། །དེ་བཞིན་རོ་ནི་མངར་ཞིང་གཙང་། །བྱ་དང་རི་དྭགས་མི་རྣམས་ཀྱི། །སྒྲ་སྐད་སྙན་པ་
ཐོས་ན་དགེ། །གདུགས་དང་རྒྱལ་མཚན་བསྒྲེང་བ་དག །འཇུག་པའི་ཚེ་ན་མཐོང་གྱུར་ན། །བློ་ལྡན་དོན་གྲུབ་ཤེས་པར་བྱ། །དུང་དང་རྫ་རྔ་རྔ་བོ་ཆེ། །སྒྲ་ནི་སྙན་ཅིང་སྒྲ་ཆེ་དང་། །གླུ་གར་རོལ་མོའི་སྒྲ་དག་དང་། །སྙན་པའི་སྒྲ་ནི་སྐོར་ཕྱོགས་འགྲོ། །གནས་སུ་
འཇུག་ཚེ་ཐོས་གྱུར་ན། །བློ་ལྡན་དོན་གྲུབ་ཤེས་པར་བྱ། །མཛའ་བོ་ཆུ་ལྷ་སྐེམ་བྱེད་དང་། །ཉི་མ་ཟླ་བ་རྒྱ་མཚོ་ཆེ། །དགའ་བྱེད་དང་ནི་ཁྱབ་འཇུག་དང་། །ཚངས་པ་ལྷ་ཆེན་མི་ཐུབ་དང་། །བརྒྱ་བྱིན་དང་ནི་རྣམ་ཐོས་སྲས། །ཐ་སྐར་གཉིས་དང་ཚོགས་དང་རླུང་། །

203-1-260a

མིང་ནི་སྒྲོགས་པར་བྱེད་པ་དག །དོན་གྲུབ་པར་ནི་སྟོན་པ་ཡིན། །དད་པར་བྱེད་དང་རྗེས་མཐུན་དང་། །ནོར་ནི་མང་པོ་བསགས་པ་དང་། །ལས་ཀྱི་མཐའ་ནི་གྲུབ་པ་དང་། །དེ་བཞིན་དགེ་བར་སྨྲ་བ་དང་། །དབུགས་འབྱིན་བྱེད་ཅིང་ཉུག་པ་དང་། །དེ་བཞིན་
སྨན་ནི་འཐུང་བ་དང་། །གྲུབ་པའི་ཕྱིར་ནི་བྱེད་པ་དང་། །དེ་ནི་ནད་མེད་འགྱུར་རྟགས་ཡིན། །སྨན་རྣམས་རྙེད་པར་འགྱུར་བ་དང་། །དེ་བཞིན་དགའ་བ་ཐོབ་པ་དང་། །སྨན་ནི་སྣ་ཚོགས་སྦྱོར་བ་དང་། །བྱེད་པར་མཐོང་ན་འགྲུབ་པར་འགྱུར། །མཚན་ཉིད་ཐམས་ཅད་ཕུན་
སུམ་ཚོགས། །དགེ་བ་ཐམས་ཅད་འདོད་གྱུར་པ། །ལྟས་འདི་ལས་ནི་ནད་མེད་པའི། །དོན་གྲུབ་པར་ནི་འགྱུར་བ་ཡིན། །དེ་ལྟར་ཕོ་ཉའི་གནས་སྐབས་སུ། །རྟགས་ནི་འདི་དག་བསྟན་པ་དག །ནད་ཀྱིས་བཏབ་པར་གྱུར་པ་ཡི། །གསོར་རུང་མི་རུང་སྟོན་པ་ཡིན། །ལམ་དང་ཁྱིམ་དུ་
འཇུག་པ་ན། །ནད་པ་མཐོང་བར་གྱུར་པ་དང་། །ལས་ནི་རྩོམ་པར་གྱུར་པའི་ཚེ། །འདིས་ནི་འགྲུབ་དང་མི་འགྲུབ་སྟོན། །འཆི་ལྟས་གསང་བ་འདི་དག་ནི། །ཡང་དག་ཉིད་དུ་ཤེས་པར་བྱ། །འདི་དག་ཐམས་ཅད་གང་གིས་ནི། །ཡང་དག་ཤེས་ཏེ་སྨན་པའི་མཆོག །ལེགས་
ལྡན་ཤ་ལི་ཧོ་ཏྲ་ཡིས། །དེ་སྐད་རྗེས་བསྟན་སྨྲས་པ་ཡིན། །ཤ་ལི་ཧོ་ཏྲའི་གནས་བརྒྱད་པ་ལས་གསང་བའི་གནས་ཏེ་ཕོ་ཉའི་ལས་བསྟན་པའི་ལེའུའོ། །རྟའི་ཚེའི་རིག་བྱེད་རྫོགས་སོ།།      །།ཤ་ལི་ཧོ་ཏྲ་ཐུབ་ཆེན་ལ། །ལེགས་ཐོས་ཀྱིས་ནི་ཡང་དྲིས་པ། །ལེགས་ལྡན་
ཆོས་རྣམས་ཐམས་ཅད་མཁྱེན། །བསྟན་བཅོས་ཀུན་གྱི་ཕ་མཐར་བྱོན། །གསང་བ་དང་ནི་བཅས་པའི་གནས། །ལེགས་ལྡན་གྱིས་ནི་སྔར་གསུངས་གང་། །ཁྱེད་ཀྱི་དྲིན་གྱིས་ལེགས་པར་ནི། །དེ་ཉིད་མཉན་པར་འཚལ་ལགས་སོ། །བློ་ལྡན་དེ་སྐད་འདྲི་བ་དང་། །ཤ་ལི་ཧོ་ཏྲས་
སླར་སྨྲས་པ། །གསང་བ་ལེགས་རབ་རྙེད་དཀའ་དང་། །ཕྱེ་མ་ཏིལ་མར་སྨན་མར་དང་། །བཅུད་ཀྱིས་ལེན་ནི་བཟང་པོ་དང་། །རོ་ཙ་བ་ཡི་མཆོག་གྱུར་པ། །འདོད་ནས་གནས་ཤིང་བསླབ་བྱ་བ། །བཤད་ཀྱི་བུ་ཡིས་མཉན་པར་གྱིས། །པི་པི་ལིང་དང་བཅའ་ལྒ་དང་། །

203-1-260b

བྱི་དང་ག་དང་ལན་ཚྭ་རྣམས། །པི་ཙུ་མར་ད་པ་ཏོ་ལ། །ཨ་རུ་ར་དང་ན་ལེ་ཤམ། །བ་རུ་ར་དང་སྐྱུ་རུ་ར། །ཡུངས་ཀར་ཤིང་ཀུན་ཙི་ཏྲ་ཀ །ཐང་ཤིང་དང་ནི་པ་ལ་ཤ །དུག་མོ་ཉུང་ཤུན་ཙུ་ཀ་དང་། །ཨར་ཀའི་རྩ་བ་བོང་ང་དང་། །སཔྟ་པརྞ་ཤིང་ཚ་དང་། །ཏེ་ཛོ་བ་ཏི་ཛི་བ་ཏི། །ཀཎྜ་
ཀ་རི་བྲྀ་ཧ་ཏི། །ཨ་མྲའི་ཚི་གུ་སྲུ་སྲུའི་རྩ། །དེ་བཞིན་སྤང་སྤོས་ཀད་ཕ་ལ། །སེའུ་འབྲུ་དང་ནི་ཏི་ཀ །ཤུ་དག་རུ་རྟ་སྟར་བུ་དང་། །བྱི་ཚེར་བ་དང་སེར་པོ་གཉིས། །དུར་བྱིད་ཏིག་ཏ་རོ་ཧི་ནི། །ནས་ཚིག་འཁུས་ཐལ་སརྫི་ཀ །ཧ་རེ་ཎུ་ཀ་ཀྱི་ལྕེ་བ། །ཤུ་ཏི་དང་ནི་མ་ནུ་དང་། །
སླེ་ཏྲེས་དང་ནི་བི་ཤ་ལ། །པི་པི་ལིང་རྩ་དབྱི་མོང་དང་། །དེ་བཞིན་ཧ་རི་པི་པི་ལིང་། །རྒྱ་ཤུག་དང་ནི་དྲ་བན་ཏི། །ཨ་ཤྭ་གནྡྷ་དན་བྱ་དང་། །ཨ་ཛ་མོ་དང་ཟི་ར་ལྔ། །སོ་མ་ཀུརྩི་ལ་ལ་ཕུད། །ཉེའུ་ཤིང་དང་དུག་མོ་ཉུང་། །དེ་བཞིན་ཀར་ཀ་ཏ་ཤྲི་ཀ །ཏ་མ་ལ་ག་ག་བྲའི་རྩ། །
ཀེ་ར་ཏ་དང་བུ་ནིམ་པ། །པར་པ་ཏ་དང་གླ་སྒང་དང་། །པྲི་ཡང་ཀུ་དང་བ་ལུ་ཀ །བྲྀ་ཤྩི་ཀ་ལི་སོ་ན་ཀ །གཟེ་མ་དང་ནི་གཡེར་མ་རྣམས། །དེ་དག་ཆ་ནི་མཉམ་བྱས་པ། །ཕྱེ་མ་ཞིབ་མོར་བཏགས་པར་བྱ། །ཕྱེ་མ་དག་ནི་སྲང་གཅིག་དང་། །ཆང་སྦྱར་བ་ནི་བླུད་པར་བྱ། །ཡང་ན་ཉ་ཁུ་
ཆུ་འམ་ནི། །ཆུ་ཚན་དང་ནི་སྦྱར་བ་བླུད། །དེ་ཡིས་རྟ་ནི་གང་ཞིག་གི། །མེ་དྲོད་ཉམས་དང་མ་སྙོམས་དང་། །ཁོང་པའི་སྲིན་བུ་རྣམས་དང་ནི། །ཟད་བྱེད་ཚངས་པར་འཁྲུ་བ་སེལ། །བ་གཅིན་དང་ནི་སྦྱར་ནས་ཀྱང་། །དེ་ལ་བླུད་པར་གྱུར་ན་ནི། །འདི་ལ་རྟ་ཡི་སྒོམ་དང་དག །
མཆོག་ཏུ་སེལ་བར་བྱེད་པ་ཡིན། །ཤ་ལི་ཧོ་ཏྲའི་གཞུང་བསྒྲུབ་པ། །རྟ་ཡི་སྟོབས་སྐྱེད་བྱེད་པ་ཡིན། །གསང་བའི་གནས་ཏེ་བརྒྱད་པ་ལས་ཕྱེ་མ་བདུན་ཅུ་རྩ་ལྔ་པའོ།།      །།ཚ་བ་གསུམ་དང་འབྲས་བུ་གསུམ། །ཤིང་ཀུན་པི་པི་ལིང་རྩ་བ། །ཏིན་ཏི་ལི་ཀ་སེའུ་
འབྲུ་དང་། །སྟར་བུ་རྒྱམ་ཚ་ཀྲུ་ཏྲུག་ཏྲེས། །ཕ་ཐ་གླ་སྒང་གཡེར་མ་དང་། །ཤིང་ཚ་སུག་སྨེལ་གཡེར་མ་དང་། །ཀར་ཀ་ཏ་སྲིང་ཧ་པུ་ཤ །བྱི་དང་ག་དང་ཁ་རུ་ཚ། །ཤུ་དག་ཐང་ཤིང་དུར་བྱིད་དང་། །དུག་མོ་ཉུད་དང་བོང་ར་དང་། །པ་ཐ་མ་ནུ་ག་བྲའི་རྩ། །ཡ་བཀྵ་

203-1-261a

ར་པུ་ཙེ་ཤེལ། །འདི་དག་ཆ་ནི་མཉམ་བྱས་ནས། །ཕྱེ་མ་ཞིབ་མོ་ཉིད་དུ་བཏགས། །ཕྱེ་མ་ཁྱོར་གང་ཆང་དང་ནི། །སྦྱར་བ་རྟ་ལ་བླུད་གྱུར་ན། །རླུང་དང་བད་ཀན་ནད་རྣམས་དང་། །དེ་བཞིན་མེ་དྲོད་ཉམས་པ་དང་། །ནད་ཀུན་སེལ་ཅིང་སྟོབས་སྐྱེད་
ལ། །སྲིན་བུའི་ནད་ནི་སྦྱོང་བར་བྱེད། །ཏིལ་མར་ཡང་ན་མར་སྦྱར་བའི། །ཕྱེ་མ་སྣུམ་ཅན་མེ་དྲོད་སྐྱེད། །མཁྲིས་དང་བད་ཀན་ལས་གྱུར་པ། །ཝ་ར་སྦྲང་རྩི་དང་སྦྱར་སྦྱིན། །རླུང་ལས་གྱུར་པའི་ནད་རྣམས་དང་། །གཉེའུ་རེངས་དང་ལྐོག་ནད་དང་། །ཁ་ཡི་ནད་ནི་ཐམས་
ཅད་ལ། །སྦྲང་ཆང་དང་སྦྱར་སྦྱིན་ན་ཕན། །སྦེག་དང་ཟད་བྱེད་ཅན་ལ་ནི། །ཤ་ཁུ་དང་ནི་སྦྱར་ཏེ་སྦྱིན། །གལ་ཏེ་འདི་དག་མ་རྙེད་ན། །དར་བའམ་ཆུ་ཚན་དང་སྦྱར་སྦྱིན། །སྨན་པ་ཡི་ནི་རྟའི་གནས་དང་། །ཉེ་བར་རྟག་ཏུ་འདི་གཞག་བྱ། །ཚ་བ་གསུམ་ལ་སོགས་པའི་ཕྱེ། །
ཤ་ལི་ཧོ་ཏྲས་བཤད་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཚ་བ་གསུམ་ལ་སོགས་པའི་ཕྱེ་མ་བསྟན་པའོ།།      །།ཚ་གསུམ་པི་པི་ལིང་མཱུ་ལ། །ཤུ་དག་ཙི་ཏྲ་འབྲས་བུ་གསུམ། །ཐལ་སྨན་གཉིས་དང་ལན་ཚྭ་ལྔ། །དེ་བཞིན་ཟི་ར་ལྔ་དང་
བཅས། །ཀྱི་ལྕེ་བ་དང་སེར་པོ་གཉིས། །ཀྱི་ལྕེ་བ་དང་གླ་སྒང་དང་། །དབྱི་མོ་ཧ་ཏི་པི་པི་ལིང་། །ལ་ལ་ཕུད་དང་བོང་ང་དཀར། །མུར་བ་དང་ནི་དུག་མོ་ཉུང་། །དེ་བཞིན་དུག་མོ་ཉུང་ཤུན་པ། །ཐང་ཤིང་དང་ནི་ས་ཁྲིས་དང་། །ནིམ་པ་དང་ནི་རོ་ཙ་ཀ །སོ་མ་ར་ཙ་སོ་བན་ཛི། །
རུ་རྟ་དང་ནི་པར་པ་ཏ། །གཡེར་མ་ཤིང་ཀུན་སྒོག་སྐྱ་དང་། །དེ་བཞིན་རྟ་སྒ་ཉིད་དང་ནི། །ཟུར་པ་ཀན་ཏ་ཀ་རི་དང་། །དེ་བཞིན་བྱི་ཛ་སུ་རའི་ཁུ། །འདི་དག་ཆ་མཉམ་བསྡུས་ནས་ནི། །ཕྱེ་མ་ཞིབ་མོ་ཉིད་དུ་བཏགས། །སྦྲང་རྩི་དང་སྦྱར་གོམ་བུ་འམ། །ཆང་དང་སྦྱར་ཏེ་
བླུད་པར་བྱ། །ཡང་ན་མར་རམ་ཏིལ་མར་རམ། །བ་གཅིན་ཀཱཉྫི་དང་སྦྱར་བླུད། །བད་ཀན་གྱི་ནི་ནད་ཀུན་ལ། །སྦྲང་རྩི་དང་སྦྱར་སྦྱིན་ན་ཕན། །མཁྲིས་པའི་ནད་ནི་ཐམས་ཅད་ལ། །མར་རམ་ཁ་ར་དང་སྦྱར་སྦྱིན། །རླུང་གི་ནད་ནི་ཐམས་ཅད་ལ། །མར་རམ་ཏིལ་

203-1-261b

མར་དང་སྦྱར་སྦྱིན། །གཅིན་སྲི་བ་དང་ཟ་གུ་ལ། །བ་གཅིན་ཀཱཉྫི་དང་སྦྱར་བླུད། །ཆག་གྲུགས་དང་ནི་ལུས་ཞུམ་དང་། །ཁྱད་པར་དུ་ནི་སྦེག་ནད་དང་། །ཟད་བྱེད་ཀྱིས་ནི་བཏབ་པ་ཡི། །རྟ་ལ་སྨན་གྱི་མཆོག་ཡིན་ནོ། །ནད་རྣམས་ཀུན་ལས་རྣམ་གྲོལ་ཞིང་། །སྐྱོན་
ཀུན་དང་ནི་བྲལ་བར་འགྱུར། །ཤུགས་ནི་རླུང་དང་མཉམ་པ་དང་། །སྟོབས་ནི་གླང་པོ་དང་འདྲར་འགྱུར། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཚ་བ་གསུམ་ལ་སོགས་པའི་ཕྱེ་མ་གཉིས་པའོ།།      །།ཧ་པུ་ཤ་དང་ལྕེ་མྱང་ཚ། །རུ་རྟ་ཤིང་ཀུན་ཟི་ར་དང་། །ཤུ་དག་ཨེ་
རཎྜའི་ས་བོན། །ར་སྣ་བཅའ་སྒ་ཡུངས་ཀར་དང་། །ཐང་ཤིང་ཨ་ཛ་མོ་ད་དང་། །ནས་ཚིག་འཁུས་ཐལ་ལན་ཚྭ་རྣམས། །ཕྱེ་མར་བྱས་པ་མར་དང་ནི། །ཏིལ་མར་དང་བསྐོལ་དམ་པ་འདི། །རྟ་ནི་རླུང་གིས་ཉེན་པ་ལ། །འཇམ་རྩི་བཏང་ན་སྟོབས་སྐྱེད་ཡིན། །ཕྱེ་མ་འདི་དང་
སྦྱར་བ་ཡི། །སྣུམ་གྱི་འཇམ་རྩི་གཞན་ཡང་བསྔགས། །ནད་མེད་རྟས་བྱེད་རོ་ཙ་བྱེད། །ནད་ཀྱིས་གདུངས་ལ་ངལ་བ་སེལ། །སྨན་པ་མཁས་པས་འཇམ་རྩི་ཡི། །ལས་རྣམས་ཀུན་ལ་འདི་སྦྱར་བྱ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཧ་པུ་ཤ་ལ་སོགས་པའི་ཕྱེ་
མའོ།།      །།བྱི་དང་ག་དང་སེར་མོ་གཉིས། །ལྕེ་མྱང་ཚ་དང་ཙལ་རུ་ཚ། །པ་ཐ་པ་ཏོ་ལའི་ལོ་མ། །ནིམ་པའི་ལོ་མ་ཙི་ཏྲ་ཀ །པི་པི་ལིང་དང་བཅའ་ལྒ་རྣམས། །ཕྱེ་མར་བཏགས་པ་འདི་སྦྱིན་ན། །སྙིང་ནད་ཁོང་པའི་སྲིན་བུ་སེལ། །མེ་དྲོད་སྐྱེད་ཅིང་སྨིན་བྱེད་ཡིན། །ནད་
ཀུན་རྣམ་པར་ཞི་བྱེད་ཅིང་། །བད་ཀན་དང་ནི་མཛེ་ནད་སེལ། །རྟ་ནི་མེ་དྲོད་ཉམས་པ་ལ། །ལུས་ཀྱི་མེ་དྲོད་སྟོབས་འཕེལ་བྱེད། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་བྱི་དང་ག་ལ་སོགས་པའི་ཕྱེ་མའོ།།      །།འབྲས་བུ་གསུམ་དང་སེར་པོ་གཉིས། །དེ་བཞིན་
ཚ་བ་གསུམ་པོ་དང་། །གླ་སྒང་ཏེ་ཛོ་བ་ཏི་དང་། །མུར་པ་ཧ་རི་པི་པི་ལིང་། །ཡུངས་ཀར་པི་པི་ལིང་རྩ་བ། །བ་ལ་ཀ་དང་པུ་ཙེ་ཤེལ། །བྱི་ཚེར་སྲོ་ལོ་ཀྲུ་ཏྲུག་ཏྲེས། །དུག་མོ་ཉུང་གི་ས་བོན་དང་། །པི་ཙུ་མར་ད་པ་ཏོ་ལ། །དྲ་བན་ཏི་དང་དུར་བྱིད་དང་། །བྲྀ་ཤྩི་ཀ་ལི་ཟིར་

203-1-262a

དང་། །ག་བྲའི་རྩ་བ་ཐང་ཤིང་དང་། །གཡེར་མ་དང་ནི་བྱི་དང་ག །ཤིང་ཀུན་རུ་རྟ་ཤི་ཀྲུ་དང་། །ཨ་པ་མརྒ་བི་ཤ་ལ། །ཤུ་དག་དང་བཅས་ཕྱེ་མ་སྦྱར། །སྨན་གྱི་སྦྱོར་བ་འདི་ཉིད་ནི། །རྟ་ལ་བདུད་རྩི་དང་འདྲ་ཡིན། །རླུང་དང་བད་ཀན་ནད་རྣམས་དང་། །
དེ་བཞིན་རླུང་ཁྲག་འདྲེས་པ་དང་། །དེ་བཞིན་ནད་ཁྲག་ཅན་དང་ནི། །གཡན་པ་བཀྲ་བ་སེལ་བ་ཡིན། །ཁྱད་པར་དུ་ཡང་སྙིང་ནད་དང་། །ལུད་པ་མེ་དྲོད་ཉམས་ལ་བསྔགས། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་འབྲས་བུ་གསུམ་ལ་སོགས་པའི་ཕྱེ་མའོ།།      །།
གཡེར་མ་ཤིང་ཀུན་ཨ་རུ་ར། །མ་ནུ་དང་ནི་ལན་ཚྭ་བརྒྱད། །ནས་བསྐོལ་ཁུ་བ་དང་སྦྱར་སྦྱིན། །ནད་གཞི་གསུམ་སྐྱེས་གཟེར་རྣམས་འཇོམས། །གནས་བརྒྱད་པ་ལས་གཟེར་འཇོམས་པ་ཞེས་བྱ་བའི་ཕྱེ་མའོ།།      །།པི་ཙུ་མར་ད་པ་ཏོ་ལ། །ཀཎྜ་ཀ་རི་བྲྀ་ཧ་ཏི། །སླེ་
ཏྲེས་དང་ནི་འབྲས་བུ་གསུམ། །གཡེར་མ་ཆུ་དང་ལྷན་ཅིག་བསྐོལ། །དེ་བཅགས་པ་ཡི་ཁུ་བར་ནི། །མུད་ག་ལེགས་པར་བཙོ་བར་བྱ། །དེ་ནི་ལེགས་པར་ཚོས་པ་དང་། །ཐབ་ནས་སླར་ཡང་ཕོག་ནས་ནི། །དེར་ནི་ཚ་བ་གསུམ་པོ་དང་། །ལན་ཚྭ་དག་ཀྱང་ཚད་ཙམ་
གཞུག །མར་དང་ཏིལ་མར་ཞག་སྦྲང་རྩི། །དེ་དག་ཐམས་ཅད་གཅིག་ཏུ་བསྲེ། །ཚ་ཡི་ཕྱེ་མ་དག་དང་ནི། །མུད་གའི་ཁུ་བ་སྦྱར་བར་བྱ། །དེ་ནས་ཚ་བའི་ཁ་ཟས་ཏེ། །ཉ་ལ་ཆོ་ག་བཞིན་དུ་སྦྱིན། །དེས་ནི་བད་རླུང་སེལ་བྱེད་ཅིང་། །ལུད་པ་དབུགས་མི་བདེ་བ་འཇོམས། །
སྙིང་ནད་ཞི་བར་བྱེད་པ་དང་། །སྐྲངས་པ་དག་ཀྱང་སེལ་བར་བྱེད། །འགོ་བའི་ནད་དང་རྣ་ནད་རྣམས། །ངེས་པར་སེལ་བར་བྱེད་པ་ཡིན། །ལྐོག་ནད་རྣམ་པར་སྦྱོང་བྱེད་ཅིང་། །མཆོག་ཏུ་མེ་དྲོད་ཉམས་ལ་ཕན། །གནས་བརྒྱད་པ་ལས་ཚ་བའི་ཕྱེ་མ་དང་བསྲེས་པ་ཞེས་བྱ་བ་སྟེ་
ཕྱེ་མའི་ལེའུའོ།།      །།ཏིལ་མར་དེ་བཞིན་མར་ཆ་མཉམ། །ཞག་དང་རྐང་ནི་ཅི་རྙེད་དང་། །དེ་བཞིན་སྐྱུར་ཡང་ཅི་རྙེད་དང་། །འདིར་ནི་ཞོ་ནི་བཞི་འགྱུར་གཞུག །དེར་ནི་སྨན་ནི་འདི་དག་རྣམས། །ལྡེ་གུ་བཏགས་པ་གཞུག་པར་བྱ། །ཤུ་དག་ར་སྣ་ཤིང་མངར་དང་། །འཚོ་བྱེད་དང་ནི་ཛི་བན་

203-1-262b

ཏི། །ཨ་ཤུ་མ་ཏི་འདི་དག་ནི། །བ་ལ་བ་སྒི་བ་སྤྲུ་བ། །འདི་དག་དང་བསྐོལ་སྣུམ་ཆེན་པོ། །སྟོབས་དང་ནད་མེད་སྐྱེད་པར་བྱེད། །རླུང་ལས་སྐྱེས་པའི་ནད་བརྒྱད་ཅུ། །འདི་ཡིས་སེལ་བར་ཐེ་ཚོམ་མེད། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་སྣུམ་ཆེན་པོའོ།།      །།ཀཎྜ་ཀ་རི་
རྩའི་རྩ་དང་། །འབྲས་བུ་བསྲེས་པ་སྲང་བརྒྱ་ནི། །ཆུ་བྲེ་བཞི་ཡི་ནང་དུ་བསྐོལ། །བཞི་ཆ་ལུས་པར་གྱུར་པ་དང་། །དེ་ལས་བྲེ་གང་ལུས་པ་རུ། །མར་ནི་བྲེ་གང་དང་བསྲེས་བསྐོལ། །གོ་རིམས་བཞིན་དུ་བཤད་པ་ཡི། །སྨན་གྱི་ལྡེ་གུ་འདི་ཡང་གཞུག །པི་པི་ལིང་རྩ་བྱི་དང་ག །ཧ་ཏི་པི་ལིང་
ཙི་ཏྲ་ཀ །ནས་ཚིག་འཁུས་ཐལ་ཁ་རུ་ཚ། །ར་སྣ་ཤུ་དག་ཚ་བ་གསུམ། །འདི་བཅུ་མར་གྱི་དུད་པ་ལྔ། །སེལ་ཞིང་ལེགས་པར་གསོ་བར་བྱ། །ནད་ཀུན་སེལ་བར་བྱེད་པ་ཡིན། །སྣུམ་དེ་བདེ་བ་སྐྱེད་བྱེད་ཡིན། །གསང་བའི་གནས་ཏེ་བརྒྱད་པ་ལས་ཀཎྜ་ཀ་རིའི་སྨན་མར་རོ།།      །།
ཡུང་དང་སྐྱེར་པ་ཤུ་དག་བཅས། །ནིམ་པ་བྱི་ཚེར་པར་པ་ཏ། །སླེ་ཏྲེས་དང་ནི་ཀྱི་ལྕེ་བ། །པུ་ཙེ་ཤེལ་ནི་ཆ་མཉམ་བྱས། །དེ་ལ་འབྲས་བུ་གསུམ་དང་ནི། །ཏིག་ཏ་ཙནྡན་པི་པི་ལིང་། །དུག་མོ་ཉུང་དང་ག་དུར་དང་། །རི་ཤོ་བ་གཉིས་ཛི་བ་ཀ །ལྡེ་གུར་བཏགས་པ་དང་བསྲེས་
པའི། །མར་བསྐོལ་གྱུར་པ་དེ་ཡིས་ནི། །རྟ་ཡི་མཁྲིས་པ་སེལ་བྱེད་ཅིང་། །གཞང་འབྲུམ་ཁོང་ཚ་ཞི་བར་བྱེད། །རྔོ་དང་གཡན་པ་རྣམས་དང་ནི། །མེ་དབལ་དང་ནི་རིམས་ལ་ཡང་། །འདི་ནི་རྟག་ཏུ་བསྔགས་པ་ཡིན། །དབྱར་ཚེ་རྟ་ལ་རྟག་ཏུ་ཕན། །ཤ་ལི་ཧོ་ཏྲའི་གསང་བའི་གནས་
དེ་བརྒྱད་པ་ལས་ཚ་བའི་སྨན་མར་རོ།།      །།ཨ་ཤྭ་གནྡྷའི་རྩ་བ་དང་། །འབྲས་བུ་ཡལ་ག་སྲང་བརྒྱ་ནི། །ཆུ་བྲེ་བཞི་ཡི་ནང་དུ་བསྐོལ། །དེ་ནས་སྨན་ཁུ་དེ་དང་ནི། །མར་ནི་བྲེ་གང་བསྐོལ་བར་བྱ། །ཏིལ་མར་མར་དང་མཉམ་པ་དང་། །འོ་མ་བཞི་འགྱུར་དེ་རུ་གཞུག །ཙནྡན་
དང་ནི་བཅའ་ལྒ་དང་། །ཨ་ག་རུ་དང་ཤུག་པ་དང་། །རྒུན་འབྲུ་པད་རྩ་འབྲས་བུ་གསུམ། །སྣ་མའི་ལོ་མ་ཤ་རི་བ། །ཀཎྜ་ཀ་རི་བྲྀ་ཧ་ཏི། །ནཱ་ག་པུཥྤ་བ་སྤྲུ་བ། །ས་ལ་ཀྲྀཥྞ་པརྞི་གཉིས། །ཤིང་ཚ་གནྡྷ་བྷ་དྲ་དང་། །པདྨ་གེ་སར་ལྡེ་གུ་ནི། །བཏགས་པ་དེར་ནི་གཞུག་པར་བྱ། །འདི་

203-1-263a

ཡིས་རྟ་ནི་སྦེག་པ་དང་། །རླུང་གིས་ཉམ་ཐག་གྱུར་པ་དང་། །ཟད་བྱེད་ཀྱིས་ནི་བཏབ་པ་དག །ཤ་སྐྱེད་བྱེད་པའི་མཆོག་ཡིན་ནོ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཨ་ཤྭ་གནྡྷའི་སྨན་མར་རོ།།      །།བོང་ང་མུར་བ་པུ་ཙེ་ཤེལ། །
གླ་སྒང་ཤིང་ཚ་པ་ཏོ་དང་། །སཔྟ་པརྞི་པ་ཏོ་ལ། །པི་ཙུ་མར་ད་བྱི་ཚེར་མ། །པར་པ་ཏ་དང་འབྲས་བུ་གསུམ། །སེར་པོ་གཉིས་དང་དྲ་བན་ཏི། །ཙནྡན་དམར་པོ་མ་དུ་ཀ །རྩ་མཁྲིས་དང་ནི་པི་པི་ལིང་། །ཉེའུ་ཤིང་ཤུག་པ་པུ་ཤེལ་ཙེ། །དོང་ག་དང་ནི་སླེ་ཏྲེས་རྣམས། །དུག་
མོ་ཉུང་གི་ས་བོན་བཅས། །སྲང་རེ་ཆ་མཉམ་སྦྱར་ལྡེ་གུ། །ནིམ་པ་པ་ཏོ་ལ་དང་བཅས། །ཀཎྜ་ཀ་རི་བ་ཤ་ཀ །སྲང་ནི་ལྔ་ཡི་ཚད་དུ་བྱས། །སྐྱུ་རུ་ར་ནི་བྲེ་གང་བཅས། །ཆོ་ག་བཞིན་དུ་བསྐོལ་ནས་ནི། །སྨན་ཁུ་མར་ཁུ་དང་བསྲེས་ལ། །མེ་ནི་ཆུང་ངུས་བཙོ་བར་བྱ། །
ཏིག་ཏ་ཆེན་པོ་ཞེས་བྱ་སྟེ། །འདི་ནི་གུ་གུལ་དང་བཅས་པའམ། །ཡང་ན་འབའ་ཞིག་སྦྱིན་བྱས་ན། །ཡོན་ཏན་བདུད་རྩི་དག་དང་མཚུངས། །ལུས་ཀྱི་མེ་དྲོད་སྐྱེད་པར་བྱེད། །གཟི་མདངས་སྟོབས་ནི་འཕེལ་བྱེད་ཡིན། །མཛེ་དང་ཁྲག་མཁྲིས་ནད་རྣམས་སེལ། །ལུས་
རྒྱས་པར་ཡང་བྱེད་པ་ཡིན། །ཤ་སྐྱེད་མདོག་ནི་བཟང་བྱེད་ཅིང་། །ནད་ཀུན་སེལ་བའི་དམ་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཏིག་ཏ་ཆེན་པོའི་སྨན་མར་རོ།།      །།རྩ་བ་ལྔ་པ་གཉིས་ནིམ་པ། །སླེ་ཏྲེས་ཨ་ཏ་རུ་ཤ་ཀ །དོང་ག་དང་
ནི་པ་ཏོ་ལ། །འབྲས་བུ་གསུམ་ནི་ཆ་མཉམ་བྱ། །ཆམ་ཆོམ་བརྡུངས་ལ་ཆུ་ནང་བསྐོལ། །སྨན་ཁུ་བཞི་ཆ་ལུས་པ་རུ། །དེ་དང་མཉམ་པའི་ཞུན་མར་དང་། །སྨན་ནི་འདི་རྣམས་དང་བཅས་བསྐོལ། །ཀྱི་ལྕེ་བ་དང་པར་པ་ཏ། །ཤ་རི་བ་གཉིས་ཙནྡན་དང་། །ཏིག་ཏ་དང་
ནི་པུ་ཙེ་ཤེལ། །པ་ཐ་དང་ནི་བཅས་པ་དང་། །བལ་བུ་དང་ནི་པུ་ཤེལ་ཙེ། །ཨུཏྤལ་སྔོན་པོ་ཤུག་པ་དང་། །པི་པི་ལིང་རྩ་བྱི་དང་ག །ཏེ་ཛོ་བ་ཏི་ཙི་ཏྲ་ཀ  །བོང་ང་ཧ་ཏི་པི་པི་ལིང་། །དུག་མོ་ཉུང་ཤུན་ས་བོན་དང་། །སེར་པོ་གཉིས་དང་པི་པི་ལིང་། །ན་ལེ་ཤམ་དང་

203-1-263b

བཅའ་ལྒ་དང་། །ཐང་ཤིང་ཞེས་བྱ་ཐམས་ཅད་ནི། །ཆ་མཉམ་དེར་ནི་གཞུག་པར་བྱ། །མེ་ཆུང་གིས་བསྐོལ་ཚོས་པ་དང་། །ཤིན་ཏུ་སྦྱངས་པའི་སྣོད་དུ་གཞུག །ཏིག་ཏ་ཆེན་པོའི་སྨན་མར་འདི། །རྟ་ཡི་སྨན་གྱི་མཆོག་ཏུ་བཤད། །ལུད་པ་དབུགས་མི་བདེ་དང་མཛེ། །ལ་བ་
འབྲས་ཀྱི་ཕྲེང་བ་དང་། །བད་ཀན་གྱི་ནི་ནད་རྣམས་དང་། །དེ་བཞིན་རྣ་རྣག་གྱུར་པ་དང་། །བད་ཀན་ནད་ནི་གཞན་དག་ལའང་། །འདི་ནི་ཤིན་ཏུ་བསྔགས་པ་ཡིན། །འདི་ནི་ནད་ཀུན་སེལ་བྱེད་ཅིང་། །གཟི་མདངས་སྟོབས་ནི་སྐྱེད་པ་དང་། །བརྟན་ཞིང་ལུས་ནི་སྲ་བར་བྱེད། །དབང་
པོ་གསལ་བར་བྱེད་པ་དང་། །ཡིད་ཀྱང་དགའ་བར་བྱེད་པ་ཡིན། །ཁྲག་དང་མཁྲིས་པ་སེལ་བྱེད་ཅིང་། །གཅོང་ཆེན་རིམས་དང་ལུད་པ་འཇོམས། །པགས་པ་ལ་སྣད་ནད་རྣམས་དང་། །གང་ཡང་ཁྲག་ལ་གནས་པ་དང་། །རུས་པ་རྐང་ལ་ཞེན་པ་རྣམས། །མར་འདི་ཡིས་ནི་
སེལ་བར་བྱེད། །ནད་ཀྱི་རྒྱ་མཚོ་རྒལ་འདོད་ལ། །གཟིངས་དང་འདྲ་བ་མར་འདི་ཡིན། །ཏིག་ཏ་ཆེན་པོའི་སྨན་མར་གཉིས་པའོ།།      །།ཤྲི་ཤ་དང་ནི་ཡན་ལག་ལྔ། །ཆ་མཉམ་སྲང་ནི་བརྒྱ་རུ་བྱ། །ཆུ་བྲེ་བཅུ་དྲུག་ནང་དུ་བསྐོལ། །བཞི་ཆ་ལུས་པར་གྱུར་པ་དང་། །དེ་རྣམས་སྨན་ཁུ་དེ་དང་
ནི། །མར་ནི་བྲེ་དོ་བསྐོལ་བར་བྱ། །སྨན་ནི་འདི་དག་ཉིད་ཀྱི་ནི། །ལྡེ་གུ་དེར་ནི་གཞུག་པར་བྱ། །པི་པི་ལིང་རྩ་ཚ་བ་གསུམ། །བྲྀ་ཤྩི་ཀ་ལི་འབྲས་བུ་གསུམ། །ཤུ་ཏི་དང་ནི་ཐང་ཤིང་དང་། །སྤང་སྤོས་དང་ནི་བ་ལུ་དང་། །བྱ་ཀྲ་ན་ཀ་ཤྲི་ཀ་ཏ། །ཙི་ཏྲ་ཀ་དང་ན་ཀུ་ལི། །བཙོད་དང་ཛི་བ་
ནི་ཡ་དང་། །ཧ་ཏི་པི་པི་ལིང་ཙནྡན། །གནྡྷ་བྷ་དྲ་རུ་རྟ་རྣམས། །ལྡེ་གུར་བྱས་བཅུག་མེ་ཆུང་བསྐོལ། །རྟ་གང་རླུང་ནད་ཅན་དང་ནི། །དེ་བཞིན་མཁྲིས་པའི་ནད་ཡོད་དང་། །བད་ཀན་སྙིང་གར་འཁྱིལ་གྱུར་པ། །དེ་རྣམས་ཀྱི་ནི་སྨན་མཆོག་ཡིན། །ཤྲི་ཤ་ལ་སོགས་སྨན་མར་འདི། །
ནད་ཀུན་སེལ་བའི་མཆོག་ཡིན་ནོ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཤྲི་ཤ་ལ་སོགས་པའི་སྨན་མར་རོ།།      །།ཤྲི་ཤ་ཡི་ནི་ལོ་མ་ནི། །ཆུ་བསྐོལ་དེ་ཡི་ཁུ་བ་དང་། །མར་ནི་ཚད་བཞིན་བསྐོལ་བ་རུ། །ཚ་བ་གསུམ་དང་འབྲས་བུ་གསུམ། །དེ་བཞིན་ཧ་ཏི་པི་པི་ལིང་། །

203-1-264a

ལྡེ་གུར་སྦྱར་བ་དང་བསྲེས་བསྐོལ། །མཛེ་ཡི་ནད་ནི་ཐམས་ཅད་དང་། །དུག་སེལ་མེ་དྲོད་སྐྱེད་མཆོག་ཡིན། །རླུང་དང་མཁྲིས་པ་ལས་གྱུར་དང་། །ཁོང་ཚ་ཁྲག་གི་ནད་རྣམས་སེལ། །དབྱར་གྱི་ཚེ་ན་བྱིན་གྱུར་ན། །འདི་ནི་བདུད་རྩི་དང་འདྲ་ཡིན། །ཤྲི་ཤ་ལ་
སོགས་པའི་སྨན་མར་གཉིས་པའོ།།      །།མུར་བ་དང་ནི་འབྲས་བུ་གསུམ། །ཙི་ཏྲ་ཀ་དང་ཤུ་དག་དང་། །བཅའ་ལྒ་དང་ནི་སེར་པོ་གཉིས། །པ་ཐ་ཤིང་ཚ་པར་པ་ཏ། །ན་ལེ་ཤམ་དང་གླ་སྒང་དང་། །དེ་བཞིན་ནཱ་ག་གེ་སར་དང་། །ཙནྡན་དང་ནི་ཤ་རི་བ། །རྒྱ་སྤོས་དང་ནི་མ་ལུ་ཀ །
བོང་ང་ཧ་ཏི་པི་པི་ལིང་། །དན་ད་དང་ནི་དྲ་བན་ཏི། །རོ་ཧི་ནི་དང་ཙི་ཏྲ་ཀ །དབྱི་མོ་དཱུར་བ་ཀྱི་ལྕེ་བ། །ཆ་མཉམ་སྦྱར་ཏེ་ཆུ་དང་ནི། །མར་དང་མེ་ནི་ཆུང་ངུས་བཙོ། །ཚོས་ཏེ་མར་ནི་ལུས་པ་དང་། །དེ་ནི་དེ་ལས་དབབ་པར་བྱ། །འདི་བླུད་རྟ་ནི་མགྱོགས་པ་དང་། །ལུས་སྟོབས་རྒྱ་ཆེར་འཕེལ་བར་
འགྱུར། །པགས་པར་གཏོགས་པའི་ནད་ཀྱི་ཚོགས། །རྡོ་ལ་སོགས་དང་བྲལ་བར་འགྱུར། །རླུང་དང་མཛེ་ཡི་ནད་རྣམས་དང་། །མཁྲིས་པའི་ནད་དང་ལུས་རེངས་དང་། །དེ་བཞིན་དབུགས་མི་བདེ་ཀུན་དང་། །ནད་ནི་སྣ་ཚོགས་གཞན་ཡང་སེལ། །འདི་ནི་ནད་འཇོམས་མཆོག་ཡིན་ཞིང་། །
བཀྲ་ཤིས་པར་ཡང་བྱེད་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་མུར་བ་ལ་སོགས་པའི་སྨན་མར་རོ།།      །།ནིམ་པ་པ་ཏོ་ལ་འབྲས་གསུམ། །སེར་པོ་གཉིས་དང་པུ་ཙེ་ཤེལ། །བྱི་ཚེར་བ་དང་པར་པ་ཏ། །དྲ་བན་ཏི་དང་སླེ་ཏྲེས་རྣམས། །འདི་དག་ཆ་ནི་མཉམ་
བྱས་ལ། །བརྡུངས་པ་ཆུ་ནང་བསྐོལ་བར་བྱ། །བཞི་ཆ་ལུས་པར་གྱུར་པ་རུ། །སྨན་འདི་དག་གི་ལྡེ་གུ་གཞུག །ཙནྡན་པི་པི་ལིང་གླ་སྒང་། །རི་ཤོ་བ་གཉིས་ཛི་བ་ཀ །ཀན་ད་ཀ་རི་ཏིག་ཏ་དང་། །དུག་མོ་ཉུང་གི་ས་བོན་རྣམས། །ཆ་ནི་མཉམ་པར་སྦྱར་བྱས་ནས། །དེ་བཞིན་
དུ་ནི་མར་ཁུ་དང་། །འོ་མ་སྣུམ་དང་མཉམ་བཅུག་ལ། །མེ་ནི་ཆུང་ངུས་བཙོ་བར་བྱ། །འདི་ནི་ཏིག་ཏ་ཆེན་ཞེས་བྱ། །མཛེ་དང་རིམས་དང་མེ་དབལ་དང་། །འབྲུམ་བུ་དང་ནི་འབྲས་ནད་དང་། །དེ་བཞིན་པགས་ནད་གཞན་དག་ཀྱང་། །ཁྲག་མཁྲིས་ནད་རྣམས་སེལ་བར་བྱེད། །སྨན་

203-1-264b

པ་མཁས་པས་འདི་ཉིད་ནི། །རྟ་ལ་ཉེ་བར་བླུད་པར་བྱ། །དཔྱིད་དང་དགུན་གྱི་ཚེ་ན་ནི། །སྣ་སྨན་འཇམ་རྩིར་བཏང་ན་ཕན། །དབྱར་གྱི་ཚེ་ན་ཁྱད་པར་དུ། །སྨན་འདི་རབ་ཏུ་བསྔགས་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཏིག་ཏ་ཅན་གྱི་སྨན་མར་རོ།།      །།དུར་བྱིད་
ཆེན་པོ་བརྡུངས་ནས་ནི། །ཆུ་བྲེ་བཞི་ཡི་ནང་དུ་བསྐོལ། །བཞི་ཆ་ལུས་པར་གྱུར་པ་དང་། །དེ་རུ་མར་ཁུ་བྲེ་གང་བླུགས། །རམ་ཉེ་ཀྵི་ར་ཀ་ཀོ་ལ། །རི་ཤོ་བ་གཉིས་ཛི་བ་ཀ །བ་ལ་ཨ་ཏི་བ་ལ་དང་། །དེ་བཞིན་ཀྵི་ར་བ་དང་ནི། །མེ་ད་མ་ཧཱ་མེ་ད་དང་། །ཤིང་མངར་དང་
ནི་ཤ་རི་བ། །ཆ་ནི་མཉམ་པོར་བྱས་ནས་ཀྱང་། །དེ་ནི་ལྡེ་གུར་བཏགས་པར་བྱ། །མར་དེར་བཅུག་ནས་དཀྲུགས་ནས་ནི། །མེ་ནི་ཆུང་ངུས་དལ་གྱིས་བཙོ། །དེ་ནི་ཚོས་པར་ཤེས་པ་ན། །དེ་ལས་ཕོག་སྟེ་བཙགས་པར་བྱ། །སྣུམ་འདི་རྟག་ཏུ་བཏུང་བ་དང་། །འཇམ་རྩི་ཡི་
ནི་ལས་ལ་སྦྱར། །རྒྱུན་དུ་བྱིན་ན་མོ་གཤམ་ཡང་། །བུ་སྐྱེད་པར་ནི་ནུས་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཤ་མ་དུར་བྱིད་ཀྱི་སྨན་མར་རོ།།      །།ནིམ་པ་དང་ནི་པ་ཏོ་ལ། །སྐྱེར་པ་ཙནྡན་པུ་ཙེ་ཤེལ། །ཀྱི་ལྕེ་བ་དང་ལ་ལ་ཕུད། །པར་པ་
ཏ་ནི་སྲང་རེ་དང་། །སྐྱུ་རུ་ར་ནི་བྲེ་གང་བཅས། །ཆུ་བལ་ཅན་གྱི་ཆུ་ལས་ནི། །ཆུ་བྲེ་བཞི་ཡི་ནང་དུ་བསྐོལ། །བཞི་ཆ་ལུས་དང་མར་བྲེ་གང་། །གླ་སྒང་རྩ་མཁྲིས་ཤིང་མངར་དང་། །བཙན་དུག་དུག་མོ་ཉུང་ལ་ཕུད། །པི་པི་ལིང་དང་བཅས་བསྐོལ་བའི། །མར་གྱིས་སྣ་
མིག་རྣ་ནད་འཇོམས། །རྒྱུ་རླུགས་རིམས་དང་ནད་དང་ནི། །མེ་དབལ་ལ་སོགས་སེལ་བར་བྱེད། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ནིམ་པ་ལ་སོགས་པའི་སྨན་མར་རོ།།      །།ནིམ་པ་པ་ཏོ་ལའི་ལོ་མ་དང་། །སླེ་ཏྲེས་དང་ནི་ཀཎྜ་ཀ་རི་ཉིད། །ཆ་མཉམ་
སྲང་བཞི་ཉི་ཤུར་བྱས་པ་དག །ཆུ་ནི་སྨན་གྱི་བཅུ་དྲུག་ནང་དུ་བསྐོལ། །སྨན་གྱི་ཁུ་བ་བཞི་ཆ་ལུས་པ་དང་། །སྨན་ཁུ་དེ་དང་མཉམ་པའི་མར་དང་བསྐོལ། །དེར་ནི་ཚ་བ་གསུམ་ནི་སྲང་གསུམ་དག །ཞིབ་ཏུ་བཏགས་པའི་ཕྱེ་མ་གཞུག་པར་བྱ། །དེ་ནི་ལེགས་པར་

203-1-265a

ཚོས་པར་ཤེས་པ་དང་། །གུ་གུལ་དང་སྦྱར་རྟ་ལ་བླུད་པར་བྱ། །ཡང་ན་དེ་དང་མར་བསྲེས་འགའ་ཞིག་སྦྱིན། །དེས་ནི་མཛེ་ཡི་ནད་ཀུན་སེལ་བར་འགྱུར། །ཁྲག་མཁྲིས་རྔོ་དང་དེ་བཞིན་གཡན་པ་དང་། འབྲུམ་བུ་འབྲུམ་ཕྲན་དེ་བཞིན་ཤུ་བ་ནི། །སེལ་
ཞིང་རྟ་ཡི་མདོག་དང་སྟོབས་ནི་སྐྱེད། །ནད་ཀྱི་ཚོགས་འཇོམས་བདུད་རྩི་དང་འདྲ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་བདུད་རྩི་ལྟ་བུའི་སྨན་མར་རོ།།      །།ཀ་རན་ཛ་དང་བ་ཤ་ཀ །སྥོ་ར་ཁྱིམ་གྱི་དུད་པ་དང་། །ཀ་པིད་ཐ་དང་དོང་ག་དང་། །ཡུག་སྣམ་
དང་ནི་པདྨ་དང་། །ཀ་ར་བཱི་ར་བོང་ང་དང་། །རོ་ཧི་ཏ་དང་སླེ་ཏྲེས་དང་། །བྲྀ་ཧ་ཏི་ཡི་འབྲས་བུ་ནི། །ར་ཐུག་གི་ནི་གཅིན་དང་བཏགས། །འདི་དག་སྲང་གཉིས་སྦྱར་བ་ལ། །མར་སྲང་སུམ་ཅུ་རྩ་གཉིས་བསྐོལ། །མར་དང་མཉམ་པའི་འོ་མ་གཞུག །བསྐོལ་བའི་སྨན་མར་
སྟོབས་ཆེན་ཡིན། །མཛེ་ཡི་ནད་ནི་ཐམས་ཅད་ལ། །རྟག་ཏུ་བསྐུས་དང་བླུད་ན་ཕན། །ཤ་ཚིལ་རུས་པ་སྐྱེད་བྱེད་ཅིང་། །པགས་པར་ཞུགས་པའི་ཁྲག་སྦྱོང་བྱེད། །མཛེ་ནད་འཛག་པར་བྱེད་པ་ཡང་། །ཐམས་ཅད་ཞི་བར་བྱེད་པ་ཡིན། །ལེགས་ལྡན་ཤ་ལི་ཧོ་ཏྲ་ཡིས། །
དེ་སྐད་རྗེས་བསྟན་སྨྲས་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཀ་རན་ཛ་ལ་སོགས་པའི་སྨན་མར་རོ། །སྨན་མར་གྱི་ལེའུའོ།།      །།དེ་ནས་གཞན་ཡང་ཏིལ་མར་གྱི། །ལེའུ་ངེས་པར་བཤད་བྱ་སྟེ། །པྲ་ས་ར་ནི་སྲང་བརྒྱ་ནི། །ཆུ་བྲེ་བཅུ་དྲུག་ནང་དུ་བསྐོལ། །
བཞི་ཆ་ལུས་པར་གྱུར་པ་ན། །ཁུ་བ་དེ་ནི་ཐབ་ལས་དབོག །སྨན་ཁུ་དེ་དང་མཉམ་པ་ཡི། །ཏིལ་མར་ཉེ་བར་གཞུག་པར་བྱ། །ཀཉྫི་རང་སྐྱུར་ཉིས་འགྱུར་གཞུག །དེ་ལ་སྨན་ནི་འདི་དག་གི། །ལྡེ་གུ་ཉེ་བར་གཞུག་པར་བྱ། །ར་སྣ་བ་ལ་གཟེ་མ་དང་། །ལྕེ་མྱང་ཚ་དང་ཤི་ཀྲུ་
དང་། །པྲ་ས་ར་ནའི་རྩ་བ་དང་། །པི་པི་ལིང་གི་རྩ་བར་བཅས། །ཙི་ཏྲ་ཀ་དང་བཅའ་ལྒ་དང་། །ཤུ་ཏི་དང་ནི་ཐང་ཤིང་དང་། །བསེ་ཤིང་འབྲས་བུ་བོང་ང་དང་། །པི་པི་ལིང་ཡང་སྲང་རེ་ནི། །ཆ་ནི་མཉམ་པོར་སྦྱར་ནས་ཀྱང་། །ཕྱེ་མ་ཞིབ་མོ་འཐག་ཏུ་གཞུག །མེ་ནི་ཆུང་ངུ་

203-1-265b

དང་བཙོས་ཏེ། །སྣུམ་དེ་སྣོད་ནི་བཟང་པོར་གཞུག །འདི་ནི་སྣ་སྨན་བསྐུ་བ་དང་། །འཇམ་རྩི་བཏུང་བ་དག་ལ་བསྔགས། །རྟ་ནི་རླུང་ནད་ཀྱིས་བཅོམ་དང་། །མི་འམ་ཡང་ན་གླང་པོ་རུང་། །ལུས་འཐེང་ཡུན་རིང་ནད་ཀྱིས་བཏབ། །ངེས་པར་བདེ་བ་འཐོབ་པར་འགྱུར། །རྟ་གང་
བུ་ནི་མི་ཆགས་པ། །འདི་ཡིས་ངེས་པར་མངལ་སྐྱེད་འགྱུར། །ཕོ་མིན་སྐྱེས་པ་ཉིད་འགྱུར་ཞིང་། །མོ་གཤམ་ཡང་ནི་བུ་སྐྱེད་བྱེད། །འདི་ཡིས་ལོང་བ་ཁྱབ་འཇུག་རིགས། །རབས་ཆད་བུ་ནི་ཡིད་འོང་སྐྱེས། །པྲ་ས་ར་ཡི་ཏིལ་མར་འདི། །ནད་ཀུན་འཇིག་པར་བྱེད་པ་ཡིན། །
ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་པྲ་ས་རའི་ཏིལ་མར་རོ།།      །།པྲ་ས་ར་ཡི་རྩ་བ་དང་། །ཡལ་ག་ལོ་མ་བཅས་སྲང་བརྒྱ། །རྩ་བ་བཅུ་ནི་དེ་ཡི་ཕྱེད། །ཆུ་ཕྲེ་བཅུ་དྲུག་ནང་དུ་བསྐོལ། །བཞི་ཆ་ལུས་པར་གྱུར་བ་དང་། །ཐབ་ལས་སླར་ནི་དབོག་པར་བྱ། །སྨན་ཁུ་དེ་
ཡི་ཉིས་འགྱུར་གྱི། །ཀཉྫི་རང་སྐྱུར་གཞུག་པར་བྱ། །ཞོ་ཡང་སྨན་ཁུའི་ཉིས་འགྱུར་ནི། །དེ་ལ་ཉེ་བར་གཞུག་པར་བྱ། །སྨན་ནི་འདི་རྣམས་སྲང་རེ་ལ། །ལྡེ་གུར་བྱས་ལ་དེ་རུ་གཞུག །བསེ་ཤིང་འབྲས་བུ་བཅའ་ལྒ་དང་། །ཙི་ཏྲ་ག་དང་ལྕེ་མྱང་ཚ། །{པྲ་}ས་ར་ཡི་རྩ་བ་
དང་། །དེ་བཞིན་པི་པི་ལིང་རྩ་བ། །ཐང་ཤིང་དང་ནི་ཤུ་ཏེ་དང་། །མེ་ད་ཙ་ཀྲ་ཧྭ་གན་དང་། །ཨེ་རཎྜའི་རྩ་ཛི་བན་ཏི། །རུ་རྟ་ཤུ་དག་ས་ཧ་ཙར། །པོ་སོན་ཆ་ནི་བཟང་པོ་དང་། །དེ་བཞིན་མང་དུ་སྲ་བ་དང་། །ས་བོན་ཛ་ན་སེར་པོ་གཉིས། །ཨ་ཤྭ་གནྡྷ་ཧ་པུ་ཤ། །བ་མ་སེང་
ཕྲོམ་མི་རྐང་དང་། །ཤྲེ་ཡ་སེ་ནི་ཆ་མཉམ་གཞུག །འདི་ནི་བསྐུ་དང་སྣ་སྨན་དང་། །བཏུང་དང་འཇམ་རྩི་དག་ལ་གཏང་། །རླུང་གི་ནད་ནི་ཐམས་ཅད་དང་། །དེ་བཞིན་གཞན་ཀུན་སེལ་བར་བྱེད། །སྨྱོ་དང་འབྱུང་པོ་བརྗེད་བྱེད་དང་། །དེ་བཞིན་གདོན་ནད་སྣ་ཚོགས་དང་། །
ཞ་བོ་མེ་དབལ་གྱིས་ཐེབས་ལ། །ཏིལ་མར་བསྟེན་ན་བདེ་ཐོབ་འགྱུར། །སྐམ་དང་རུས་པའི་ནད་རྣམས་ལ། །ཏིལ་མར་འདི་ནི་གཏང་བར་བྱ། །རྒོད་མ་བུ་ནི་མི་ཆགས་པ། །འདི་བླུད་ན་ནི་བུ་ཆགས་འགྱུར། །རྒོད་མ་དང་ནི་རྟ་ཕོ་ཡི། །རླུང་ནད་བརྒྱད་ཅུ་སེལ་བར་བྱེད། །

203-1-266a

གཉེར་མ་འདུས་ཤིང་ན་ཚོད་རྒས། །སླར་ཡང་ལང་ཚོ་ཐོབ་པར་འགྱུར། །པྲ་ས་ར་ཡི་ཏིལ་མར་འདི། །རྟ་ལ་ཕན་བྱེད་མཆོག་ཏུ་བཤད། །ཚེ་དང་སྟོབས་ནི་སྐྱེད་བྱེད་ཅིང་། །དྲན་པ་སེམས་གསལ་དཔལ་སྐྱེད་བྱེད། །རྒྱུས་པ་ཆད་དང་རྩ་ཆད་ལ། །ཏིལ་
མར་འདི་ཡིས་སྣ་སྨན་གཏང་། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་པྲ་ས་རའི་ཏིལ་མར་གཉིས་པའོ།།      །།སླེ་ཏྲེས་ཆུ་ཡི་ནང་བསྐོལ་ལ། །ཁུ་བ་བཞི་ཆའི་ཏིལ་མར་གཞུག །འོ་མ་དེ་དང་མཉམ་བཅུག་ལ། །སྨན་འདི་དག་གི་ལྡེ་གུ་གཞུག །པི་པི་ལིང་
རྩ་ཚ་བ་གསུམ། །ཙི་ཏྲ་ཧ་ཏི་པི་པི་ལིང་། །ཤུ་དག་རུ་རྟ་བྱི་དང་ག །སྐྱེར་པ་དང་ནི་ལྕེ་མྱང་ཚ། །པྲ་ས་ར་ནི་བ་ལ་དང་། །ར་སྣ་གཟེ་མ་ཧ་པུས་པ། །བཅུག་ལ་མེ་ནི་ཆུང་ངུས་བཙོ། །དེ་བཞིན་བཅའ་ལྒ་གཞུག་པར་བྱ། །འདི་ཡིས་སྣ་རེངས་རླིག་སྦོས་དང་། །ལུས་
རེངས་རྐེད་པ་ན་བ་དང་། །དེ་བཞིན་རྒྱབ་ནི་རེངས་པ་དང་། །རླུང་ནད་པ་ལ་ཤ་དང་ནི། །རླུང་ལས་གྱུར་པའི་མིག་ནད་ལ། །ཁྱད་པར་དུ་ནི་རྟག་ཏུ་བཏང་། །སླེ་ཏྲེས་ལ་སོགས་ཏིལ་མར་ནི། །ཚངས་པས་སྔོན་ཚེ་བཤད་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་
པ་ལས་སླེ་ཏྲེས་ལ་སོགས་པའི་ཏིལ་མར་རོ།།      །།ཤུ་ཏི་ར་སྣ་དོང་གྲ་དང་། །བཙོད་དང་རུ་རྟ་ལྕེ་མྱང་ཚ། །ཐང་ཤིང་དང་ནི་བ་ལ་གཉིས། །སེར་པོ་གཉིས་དང་ཙནྡན་དམར། །སླེ་ཏྲེས་ཀྱི་ནི་ཁུ་བ་དང་། །ཏིལ་མར་འོ་མ་བཅས་བསྐོལ་བ། །འཐེང་པའི་ནད་ནི་ཐམས་ཅད་ལ། །
བསྐུ་དང་སྣ་སྨན་འཇམ་རྩི་གཏང་། །གསང་བའི་གནས་ཏེ་བརྒྱད་པ་ལས་ཤུ་ཏིའི་ཏིལ་མར་རོ།།      །།པི་པི་ལིང་དང་པོ་སོན་ཆ། །བིལ་བ་ཤིང་མངར་ཤུ་ཏི་དང་། །རུ་རྟ་དེ་བཞིན་མ་ནུ་དང་། །ཙི་ཏྲ་ཀ་དང་ཐང་ཤིང་ནི། །བཏགས་ཏེ་ཏིལ་མར་འོ་མ་ནི། །ཉིས་འགྱུར་བཅུག་སྟེ་བསྐོལ་བར་
བྱ། །གཞང་འབྲུམ་རླུང་ནི་འཁྱིལ་བ་ལ། །འཇམ་རྩིར་གཏང་བའི་མཆོག་ཡིན་ནོ། །གཞང་འབྲུམ་པ་དང་གཟེར་ནད་དང་། །གཅིན་སྲི་བ་དང་ཟ་གུ་དང་། །རྐེད་པ་བརླ་ཡི་ནད་རྣམས་དང་། །སྦེག་པ་དང་ནི་སྦོས་ནད་དང་། །ཁྲག་འཛག་པ་དང་གཞང་ཁ་སྐྲངས། །རླུང་འཁྱིལ་བ་ནི་སེལ་བར་

203-1-266b

བྱེད། །དེ་ལ་སོགས་པའི་ནད་རྣམས་ནི། །འཇམ་རྩི་བཏང་ན་སེལ་འགྱུར་རོ། །གསང་བའི་གནས་ཏེ་བརྒྱད་པ་ལས་པི་པི་ལིང་ལ་སོགས་པའི་ཏིལ་མར་རོ།།      །།{འཚོ་བྱེད་ཤིང་མངར་མ་དང་།} །པི་པི་ལིང་དང་པོ་སོན་ཆ། །ཤུ་དག་ར་སྣ་བ་ལ་དང་། །བིལ་བ་ཉེའུ་ཤིང་ཤུ་ཏི་
ནི། །བཏགས་པའི་ལྡེ་གུ་ཏིལ་མར་དང་། །འོ་མ་ཉིས་འགྱུར་བཅུག་སྟེ་བསྐོལ། །ཏིལ་མར་འདི་ནི་འཇམ་རྩི་རུ། །བཏང་ན་རླུང་ནད་སེལ་བར་བྱེད། །གསང་བའི་གནས་ལས་འཚོ་བྱེད་ལ་སོགས་པའི་ཏིལ་མར་རོ།།      །།མ་ཤའི་རྩ་བ་སྲང་བརྒྱ་ནི། །དུས་སུ་སྐྱེས་པ་བཏུ་བར་བྱ། །
ཆུ་བྲེ་བཅུ་དྲུག་ནང་དུ་བསྐོལ། །བཞི་ཆ་ལུས་པར་གྱུར་པ་དང་། །སྨན་གྱི་ཁུ་བ་དེ་དང་ནི། །ཏིལ་མར་བྲེ་བཞི་བསྲེས་པ་རུང་། །སྨན་འདི་དག་ནི་སྲང་གཉིས་པ། །མཉམ་བྱས་ལྡེ་གུ་བཅུག་སྟེ་བསྐོལ། །བཙོད་དང་ཨ་ཤྭ་གནྡྷ་དང་། །རྒྱམ་ཚ་དང་ནི་ཤིང་མངར་དང་། །ནིམ་
པའི་རྩ་བ་ཤུ་ཏི་དང་། །ར་སྣ་ཡང་ནི་བཅུག་སྟེ་བསྐོལ། །མེ་ཆུང་ལ་བསྐོལ་ཏིལ་མར་འདིས། །རླུང་གི་ནད་ཀུན་སེལ་བྱེད་ཅིང་། །ལུས་རེངས་པ་ཡི་ནད་རྣམས་ནི། །རབ་ཏུ་འཇོམས་པར་བྱེད་པ་ཡིན། །རླུང་ལས་གྱུར་པའི་ནད་བརྒྱད་ཅུ། །ཐམས་ཅད་འདི་ཡིས་སེལ་བར་
བྱེད། །གསང་བའི་གནས་ཏེ་བརྒྱད་པ་ལས་མ་ཤའི་ཏིལ་མར་རོ།།      །།ར་སྣ་ལ་སོགས་བཤད་བྱ་ཡིས། །ལེགས་ཐོས་མ་ཡེངས་མཉན་པར་གྱིས། །ར་སྣའི་རྩ་བ་ལོ་མ་དང་། །འབྲས་བུ་ཡལ་ག་སྲང་བརྒྱ་ནི། །བརྡུངས་ཏེ་ཆུ་བྲེ་བཅུ་དྲུག་དང་། །བསྐོལ་ལ་བཞི་ཆ་
ལུས་པ་ན། །དེ་ཡི་ཁུ་བ་བྲེ་བཞིར་ནི། །ཏིལ་མར་བྲེ་དོ་གཞུག་པར་བྱ། །ར་སྣ་དེ་ཉིད་ལྡེ་གུ་བྱས། །སྲང་བཅུ་དེར་ནི་བཅུག་པར་བྱ། །དེར་ནི་འོ་མ་བཞི་འགྱུར་དང་། །བློ་ལྡན་སྨན་པས་སྦྱར་བར་བྱ། །ཁ་ར་སྲང་ནི་བཅོ་ལྔ་དག །སྲང་བཅུ་ཉེ་བར་གཞུག་པར་བྱ། །ཁ་ར་རྙེད་པར་མ་
གྱུར་ན། །བུ་རམ་ཉིས་འགྱུར་གཞུག་པར་བྱ། །མེ་ནི་ཆུང་ངུས་བསྐོལ་ནས་ནི། །ཨུ་དུམྺཱ་རའི་སྣོད་ནང་གཞག །ཏིལ་མར་འདིས་ནི་རླུང་གྱུར་དེ། །བརྒྱད་ཅུ་སེལ་བར་བྱེད་པ་ཡིན། །ར་སྣའི་སྦྱོར་བ་ཅི་བཞིན་དུ། །ཧ་ས་ཙ་རའང་དེ་དང་འདྲ། །སྣ་སྨན་བསྐུ་བ་བཏུང་བ་དང་། །

203-1-267a

འཇམ་རྩིའི་ལས་ལའང་བསྔགས་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ར་སྣ་ལ་སོགས་པའི་ཏིལ་མར་རོ།།      །།འབྲས་བུ་གསུམ་དང་ན་ལེ་ཤམ། །བཅའ་ལྒ་ལྡོང་རོས་བ་བླ་དང་། །ནག་ཚུར་དུར་བྱིད་གླ་སྒང་དང་། །དེ་བཞིན་ཨར་
ཀའི་ལོ་མ་དང་། །ཐང་ཤིང་དང་ནི་སེར་པོ་གཉིས། །སྤང་སྤོས་དང་ནི་ཙནྡན་དམར། །འདི་དག་སྲང་རེའི་ཚད་བྱས་པ། །བ་གཅིན་དང་ནི་ལྷན་ཅིག་བསྐོལ། །ཡུངས་མར་སྲང་ནི་སུམ་ཅུ་དང་། །དུག་ནི་སྲང་གཅིག་གཞུག་པར་བྱ། །ལྕགས་ཀྱི་སྣོད་དུ་མེ་ཆུང་གིས། །རིམ་
གྱིས་དེ་ནི་བསྐོལ་བར་བྱ། །ཏིལ་མར་འདི་ཡིས་རྟ་ཡི་ནི། །ལུས་ཀྱི་ནད་རྣམས་སེལ་བར་བྱེད། །གཡན་པ་དང་ནི་རྐང་ཤུ་དང་། །དེ་བཞིན་འབྲུམ་བུ་སྣ་ཚོགས་ནི། །བསྐུས་པ་ཡིས་ནི་སེལ་བྱེད་ཅིང་། །མཉན་པར་ཡང་ནི་འགྱུར་བ་ཡིན། །གང་ཞིག་རྨ་རེད་གྱུར་པ་དག །
དེ་ལའང་སྨན་ནི་མཆོག་ཡིན་ནོ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་དུག་གི་སྙིང་པོ་ཅན་གྱི་ཏིལ་མར་རོ།།      །།རུ་རྟ་རྒྱམ་ཚ་སེར་པོ་གཉིས། །ཀ་ར་བཱི་ར་ན་ལེ་ཤམ། །ན་ཏ་མན་ཏ་བི་ཤ་ལ། །ཀམ་པི་ལེ་དང་སྲ་རྩི་པོག །ཡུངས་ཀར་གླ་སྒང་པ་ཏོ་ལ། །ནི་
བཾ་སྦང་མ་སྐྱེར་ཁཎ་དང་། །བྱི་དང་ག་ནི་ཆ་མཉམ་བྱ། །འདི་དང་ཏིལ་མར་བ་གཅིན་ནི། །ཉིས་འགྱུར་བཅུག་ལ་བསྐོལ་བར་བྱ། །ཏིལ་མར་བསྐ་བར་གྱུར་པའི་ཚེ། །རྙིགས་མར་བཅས་པས་བསྐུས་ན་ནི། །རྔོ་དང་གཡན་པའི་ནད་རྣམས་དང་། །མཛེ་ནད་ལོ་མང་ལོན་པ་
འཇོམས། །རྐང་ཤུ་དང་ནི་ཤ་བཀྲ་ཡང་། །ལན་ཅིག་བསྐུས་པས་སེལ་བར་བྱེད། །མཛེ་ཡི་ནད་ནི་བཅོ་བརྒྱད་དག །དབང་པོའི་ཐོག་བབ་ལྟ་བུར་འཇོམས། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་རུ་རྟ་ལ་སོགས་པའི་ཏིལ་མར་རོ། །ཏིལ་མར་གྱི་ལེའུ་
རྫོགས་སོ།།      །།ར་སྣ་བ་ལ་སླེ་ཏྲེས་དང་། །བ་སྤྲུ་བ་དང་ཨེར་ཎ་དང་། །ཤི་ཀྲུ་བཅའ་ལྒ་ཐང་ཤིང་དང་། །ཨ་ཤྭ་གནྡྷ་ཉེའུ་ཤིང་དང་། །རྩ་བ་ལྔ་པ་ཨ་རུ་ར། །ས་ཧ་ཙ་ར་སྲུ་སྲུའི་རྩ། །ཆུ་དང་བསྐོལ་བའི་སྨན་ཁུ་འདི། །གུ་གུལ་བཅས་པའམ་དེ་

203-1-267b

གཅིག་པུ། །སྦྲང་རྩི་དང་ནི་སྦྱར་བྱས་པས། །སྐེ་རེངས་རྒྱབ་རེངས་མཇུག་དོའི་ནད། །གཞང་འབྲུམ་རོ་སྟོད་ནད་རྣམས་དང་། །སྣ་རྣག་འབྱུང་བ་སེལ་བར་ངེས། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ར་སྣ་ལ་སོགས་པའི་སྨན་གྱི་ཁུ་བའོ།།      །།གླ་སྒང་
བོང་ང་པ་ཐ་དང་། །ཤུ་དག་དང་ནི་ཨ་རུ་ར། །པུ་ཙེ་ཤེལ་དང་ཀྱི་ལྕེ་བ། །ཐང་ཤིང་དང་ནི་པར་པ་ཏ། །པི་པི་ལིང་རྩ་བྱི་ཚེར་བ། །སླེ་ཏྲེས་དང་ནི་བཅའ་ལྒ་དང་། །པ་ཏོ་ལ་ཡི་ལོ་མར་བཅས། །སྨན་ཁུ་བཟང་པོ་བསྐོལ་བར་བྱ། །མེ་དྲོད་བྲི་དང་རིམས་བཅས་དང་། །སེམས་
ཁོང་ཆུད་དང་ལྐོག་ནད་དང་། །གཞོང་འདྲ་སྨངས་ནད་ལུད་པ་དང་། །མ་ཞུ་རླུང་དང་སྟོབས་ཟད་པའི། །རྟ་ཡི་ནད་ལ་བཏང་གྱུར་ན། །ནད་ཀུན་སེལ་བའི་མཆོག་ཡིན་ནོ། །གསང་བའི་གནས་ཏེ་བརྒྱད་པ་ལས་གླ་སྒང་ལ་སོགས་པའི་སྨན་ཁུའོ།།      །།ཤྲིང་ག་ཏ་ཀ་ཤྲི་ཤ་ཡི། །
ཤུན་པ་ལ་ཀའི་རྩ་བ་དང་། །ཨ་ཤྭ་གནྡྷ་ར་སྣ་དང་། །སྲ་པ་ར་ཡི་རྩ་བ་ནི། །ཆ་ནི་མཉམ་པོར་སྦྱར་བྱས་ལ། །གཏུན་གྱི་ནང་དུ་བརྡུངས་ཏེ་བསྐོལ། །བཞི་ཆ་ལུས་པར་གྱུར་པ་དང་། །དྲོ་འཇམ་རྟ་ལ་བླུད་པར་བྱ། །བྲང་གི་ནད་ནི་ཐམས་ཅད་ལ། །སྨན་ཁུ་འདི་ནི་མཆོག་ཏུ་
བསྔགས། །གསང་བའི་གནས་ཏེ་བརྒྱད་པ་ལས་ཤྲིང་ག་ཏ་ཀ་ལ་སོགས་པའི་སྨན་ཁུའི་ལེའུའོ། །སྨན་ཁུའི་ལེའུ་རྫོགས་སོ།།      །།རྟ་ནི་མ་ཞུར་གྱུར་པ་དག །རྩྭ་ཉུང་ཟ་ཞིང་ཡིད་མི་བདེ། །བྱིན་པ་གཉིས་ནི་འཐེང་གྱུར་ཞིང་། །ཉམ་ཐག་པ་ཡིས་གཅིན་རྟུག་གཏོང་། །ཡང་
ན་བྱིན་པ་སྐྲངས་པ་འམ། །རྨ་ཡི་ནད་ནི་འབྱུང་བར་འགྱུར། །སྲོད་དང་ང་རྒྱལ་མེད་འགྱུར་ཞིང་། །རྨོངས་བག་མ་ཞུ་ལས་བྱུང་སྐྱེ། །དེ་ལ་ཅི་སྲིད་ནད་མེད་ནི། །ཉམ་ཆུང་གྱུར་པར་སྨྱུང་བར་གཞག །ཤིན་ཏུ་ན་ན་ནད་གཞི་གསུམ། །སེལ་བའི་སྨན་ཁུ་དྲོ་འཇམ་བླུད། །རྟ་ལ་སྨྱུང་བ་བྱས་རྗེས་
ལ། །དུས་མཐུན་ཟས་དང་སྐོམ་བྱིན་ཏེ། །ཞག་ལྔའམ་ཞག་བཞིའི་བར་དུ་ནི། །རྗེས་སུ་བཏུང་བ་བླུད་པར་བྱ། །དེ་ཡིས་ནད་བྱང་མ་གྱུར་ན། །ནད་སྟོབས་སྐྱེས་ལ་སྨན་པ་ཡིས། །ཞག་བདུན་གྱི་ནི་རྗེས་ལ་ནི། །གཏར་ག་ཉེ་བར་གདབ་པར་བྱ། །རྣ་བ་མུར་འགྲམ་རྩེའུ་ཆུང་

203-1-268a

དང་། །བྲང་གི་རྩ་ལ་གཏར་ག་གདབ། །བྱིན་པ་རྐང་པ་ཚེའུ་ཚེ་ཡི། །རྩ་ལས་འཐེང་གྱུར་གཏར་ག་གདབ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་མ་ཞུ་བ་སྦྱར་བའོ།།      །།དེ་ནས་རྟ་ཡི་སོ་སོར་བཏུང་། །ཁྱེད་ལ་ཡང་དག་བཤད་པར་
བྱ། །ཨརྫ་མོ་དང་ལ་ལ་ཕུད། །པི་པི་ལིང་དང་ཙི་ཏྲ་ཀ །པི་པི་ལིང་གི་རྩ་བ་དང་། །བཅའ་ལྒ་ཡང་ནི་ཆ་མཉམ་སྦྱར། །འདི་དག་གི་ནི་ཕྱེ་མ་དག །ཆུ་ཚན་དང་སྦྱར་བླུད་པར་བྱ། །བཙོད་དང་སྦྲང་རྩི་ད་ཏ་ཀི། །སེར་པོ་གཉིས་དང་ལོ་མ་བདུན། །པྲི་ཡང་ཀུ་དང་ཁ་ར་དང་། །
ཡུངས་ཀར་དམར་དང་པི་པི་ལིང་། །འདི་དག་ཆ་ནི་མཉམ་བྱས་ལ། །བུ་རམ་ཆང་དང་སྦྱར་བ་བླུད། །འདིས་ནི་རྟ་ཡི་ལྟོ་བ་ན། །གནས་པའི་ནད་རྣམས་སེལ་བར་བྱེད། །གསང་བའི་གནས་ཏེ་བརྒྱད་པ་ལས་སོ་སོར་བཏུང་བའོ།།      །།པི་པི་ལིང་དང་ན་ལེ་ཤམ། །བཅའ་ལྒ་ཤུ་དག་
བྱི་དང་ག །ཤིང་ཀུན་གཡེར་མ་ཙི་ཏྲ་ཀ །དན་ད་དང་ནི་པུ་ཙེ་ཤེལ། །ཆང་དྭངས་དང་ནི་སྦྱར་བ་ནི། །སོ་སོར་བཏུང་བ་བླུད་པར་བྱ། །གསང་བའི་གནས་ཏེ་བརྒྱད་པ་ལས་སོ་སོར་བཏུང་བ་གཉིས་པའོ།།      །།པི་པི་ལིང་དང་ལན་ཚྭ་དང་། །ཤུ་དག་དང་ནི་ཤིང་ཚར་བཅས། །
ཨརྫ་མོ་ད་གོ་སྙོད་དང་། །ཙི་ཏྲ་ཀ་དང་ན་ལེ་ཤམ། །ཆང་དྭངས་དང་ནི་སྦྱར་བ་ཡི། །རྗེས་སུ་བཏུང་བ་བླུད་པར་བྱ། །འདི་ཡིས་རླུང་དང་བད་ཀན་གྱི། །ནད་རྣམས་སེལ་བར་བྱེད་པ་ཡིན། །གསང་བའི་གནས་ཏེ་བརྒྱད་པ་ལས་རྗེས་སུ་བཏུང་བའོ།།      །།ལུས་ཀྱི་རྩ་བ་མཇུག་ཁུང་
ཡིན། །སྨན་ལུགས་དེ་ནི་རབ་ཏུ་གནས། །འདི་ཡིས་རྐང་མཐིལ་སྤྱི་བོའི་བར། །ལུས་ཀུན་རྟས་པར་བྱེད་པ་ཡིན། །ཁུར་ཆེན་དང་ནི་བཀྲེས་དང་སྐོམ། །ཆར་དང་དེ་བཞིན་རླུང་རྣམས་ནི། །རྟ་ཡིས་རབ་ཏུ་བརྣགས་ནུས་ཤིང་། །རྩ་མེད་ན་ཡང་སེམས་མི་ཞུམ། །རྟ་ནི་ཤ་ཚིལ་རུས་
པ་བརྟན། །གོམ་པ་ཤིན་ཏུ་ཡངས་པ་དང་། །ལུས་ནི་མཛེས་པར་སྣང་བ་དང་། །རྒྱབ་དང་རྐང་པ་སྲ་བར་འགྱུར། །ཇི་ལྟར་ཤིང་ནི་རྩ་བ་ནས། །ཆུ་ཡིས་བརླན་པར་གྱུར་པ་ན། །ལོ་འདབ་ལ་སོགས་རྒྱས་པར་འགྱུར། །རྟ་ཡི་འཇམ་རྩིའང་དེ་དང་འདྲ། །ལུས་ལ་གནས་པའི་

203-1-268b

རླུང་ལྔ་པོ། །སྲོག་དང་གྱེན་རྒྱུ་ཐུར་སེལ་དང་། །མེ་དང་མཉམ་གནས་ཁྱབ་བྱེད་རྣམས། །རྗེས་སུ་མཐུན་པར་རྒྱུ་བར་འགྱུར། །དེ་ཚེ་ཐུར་སེར་རླུང་གིས་ནི། །མེ་དང་མཉམ་གནས་སྐྱེད་པར་བྱེད། །མཉམ་གནས་ཀྱིས་ཀྱང་ཁྱབ་བྱེད་བརྟན། །དེས་ཀྱང་གཞན་དག་བརྟན་པར་
བྱེད། །དེ་ལྟར་གོང་ནས་གོང་དུ་ནི། །འདི་དག་རིམ་གྱིས་རྗེས་མཐུན་གནས། །དཔེར་ན་སོས་ཀའི་ཉི་མ་ཡིས། །ས་ལ་གནས་པའི་ཆུ་ཚོགས་ཀྱི། །གཟི་མདངས་བླངས་པར་གྱུར་ནས་ནི། །ནམ་མཁའི་ངོས་ལ་གནས་པ་ཡིན། །རྟ་ལ་འཇམ་རྩི་ལེགས་བཏང་བ། །
དེ་དང་འདྲ་བར་ཤེས་པར་བྱ། །ཇི་ལྟར་ལེ་བརྒན་རྩིས་བསྒྱུར་བའི། །མཚོན་པའི་འདག་ཆལ་གྱིས་སེལ་ལྟར། །དེ་བཞིན་མས་གཏོང་ནི་རུ་ཧ། །ཕྲ་བའི་ལམ་ནས་ཞུགས་གྱུར་པས། །མགོ་ནས་རྐང་པའི་བར་གྱི་ནི། །ནད་རྣམས་སེལ་བར་བྱེད་པ་ཡིན། །ཤ་ལི་ཧོ་
ཏྲའི་གསང་བའི་གནས་ཏེ་བརྒྱད་པ་ལས་མས་གཏོང་བའི་ལས་ཀྱི་ཡོན་ཏན་བསྟན་པའོ།།      །།སྣ་སྨན་གཏོང་བའི་སྦུ་གུ་ནི། །སོར་བཅུ་རུ་ནི་བྱ་བར་བཤད། །ཡང་ན་སྟེང་ནས་བླུགས་བྱ་སྟེ། །དེ་ཡང་རས་བལ་ཉིད་ལ་གཟག །སྔ་དྲོ་ལྟོ་སྟོང་གྱུར་པ་ཡི། །རྟ་ཡི་ལུས་
ནི་དྲང་པོར་གཞག །འཕྲལ་དུ་བླུགས་ཀྱིས་རྒྱུན་དུ་མིན། །དབུགས་དབྱུང་ཚེ་ན་སྤྱད་པར་བྱ། །སྣ་སྨན་གཏོང་བ་རྩོལ་བ་དང་། །ཆུ་འཐུངས་པ་ལས་བསྲུང་བར་བྱ། །གསང་བའི་གནས་ལས་སྣ་སྨན་བཏང་བའི་ཆོ་གའོ།།      །།རུ་རྟ་ཡུང་བ་པི་པི་ལིང་། །བཅའ་
ལྒ་ཤིང་ཀུན་སྐྱེར་ཁཎ་དང་། །པྲི་ཡང་ཀུ་དང་ར་སྣ་ནི། །ལྷན་ཅིག་སྦྱར་ཏེ་བཏགས་པར་བྱ། །སྨན་ཁུ་དེ་ལ་ར་སྣ་ནི། །བཞི་ཆ་སླར་ཡང་གཞག་པར་བྱ། །སྣ་སྨན་འདི་ནི་གཉེའུ་རེངས་དང་། །རྣ་རྩེའི་ནད་ལ་གཏང་བར་བྱ། །དེ་ནི་འཐེང་དང་བྲང་ཁ་ན། །འགྲམ་པ་དང་ནི་བརླ་
རེངས་དང་། །རླུང་དང་བད་ཀན་ལས་གྱུར་པའི། །ནད་ཀུན་སེལ་བར་བྱེད་པ་ཡིན། །གསང་བའི་གནས་ལས་རུ་རྟ་ལ་སོགས་པའི་སྣ་སྨན་ནོ།།      །།བུ་རམ་བཅའ་ལྒའི་ར་བ་འམ། །པི་པི་ལིང་དང་རྒྱམ་ཚར་སྦྱར། །སྣ་སྨན་བཏང་ན་འགྲམ་པ་སྣད། །དཔུང་པ་མགོ་བོའི་ནད་རྣམས་དང་། །

203-1-269a

ལྐོག་ནད་དང་ནི་རྣ་བའི་ནད། །རྒྱབ་རེངས་སེལ་བར་བྱེད་པ་ཡིན། །གསང་བའི་གནས་ལས་བཅའ་ལྒ་ལ་སོགས་པའི་སྣ་སྨན་ནོ།།      །།པི་པི་ལིང་དང་བཅའ་ལྒ་དང་། །རྒྱམ་ཚ་བྲྀ་ཧ་ཏིའི་འབྲས་བུ། །བ་གཅིན་དང་ནི་སྦྱར་བ་དག །སྣ་སྨན་དུ་ནི་གཏང་བར་
བྱ། །སྣ་སྨན་འདི་ཡིས་རེངས་པའི་ནད། །ཅུང་ཟད་རྙིང་པར་འགྱུར་བ་ཡིན། །གསང་བའི་གནས་ལས་པི་པི་ལིང་ལ་སོགས་པའི་སྣ་སྨན་ནོ།།      །།བྲྀ་ཧ་ཏི་ཡི་འབྲས་བུ་ནི། །ཆུ་དང་བཅས་པ་ཞིབ་ཏུ་བཏགས། །སྣ་སྨན་སྦྱར་བར་བཏང་གྱུར་ན། །ནི་ར་ན་ཀའི་ནད་སེལ་འགྱུར། །
གསང་བའི་གནས་ལས་བྲྀ་ཧ་ཏིའི་འབྲས་བུ་ལ་སོགས་པའི་སྣ་སྨན་ནོ།།      །།ཤྲི་ཤ་ནི་དང་ཛི་བན་ཏི། །ཤུ་དག་ར་སྣ་ཐང་ཤིང་དང་། །ཨ་ར་ཤ་དང་བཅས་པ་ནི། །བ་གཅིན་གྱི་ནི་ནང་དུ་བསྐོལ། །རླུང་ལས་གྱུར་པའི་ནད་བརྒྱད་ཅུ། །སེལ་བར་བྱེད་པར་ཐེ་ཚོམ་མེད། །གསང་བའི་
གནས་ལས་ཤྲི་ཤ་ལ་སོགས་པའི་སྣ་སྨན་གྱི་ལེའུའོ།།      །།ཨ་ཤྭ་གནྡྷ་ཤུ་དག་དང་། །ཉེའུ་ཤིང་རུ་རྟ་ཐང་ཤིང་དང་། །ཨ་བ་དང་ནི་ཨ་པུ་ཤ །སེན་ངུ་བ་ར་སེར་པོ་གཉིས། །ཆུ་ཡི་ནང་དུ་བསྐོལ་ནས་ནི། །བཞི་ཆ་ལུས་པར་གྱུར་པ་ནི། །རླུང་ནད་ཅན་གྱི་རྟ་རྣམས་ལ། །མས་
གཏོང་བ་ཡི་སྦྱོར་བ་བྱ། །རླུང་ནད་རྐེད་པའི་ཚིགས་གནས་དང་། །དེ་བཞིན་བརླ་ལ་བརྟེན་པ་ལ། །རུས་པ་ལ་གནས་དེ་ཐམས་ཅད། །མྱུར་དུ་སེལ་བར་བྱེད་པ་ཡིན། །མདོག་དང་སྟོབས་ནི་སྐྱེད་བྱེད་དེ། །རྟ་ཡི་འཇམ་རྩི་མཆོག་གྱུར་ཡིན། །སྦྱོར་བ་འདི་ཡིས་ལམ་རིང་དུ། །བཀོལ་ཡང་
གནོད་པ་མེད་པར་འགྱུར། །འདི་བྱས་གྱུར་ན་རྟ་དེ་ནི། །རང་གི་ལུས་སྟོབས་བྲི་མི་འགྱུར། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཨ་ཤྭ་གནྡྷ་ལ་སོགས་པའི་འཇམ་རྩིའོ།།      །།ཨ་པུ་ཤ་དང་ལྕེ་མྱང་ཚ། །ཙི་ཏྲ་ཀ་དང་དབྱི་མོང་དང་། །ཤུ་ཏི་རུ་རྟ་ཤུ་དག་དང་། །
ཐང་ཤིང་དང་ནི་ཡུངས་ཀར་རྣམས། །སྨན་གྱི་ཕྱེ་མར་བྱས་པ་ཡིས། །འཇམ་རྩིའི་སྦྱོར་བ་བྱས་གྱུར་ན། །རླུང་གི་ནད་ནི་བརྒྱད་ཅུ་དང་། །མཁྲིས་པའི་ནད་ནི་བཞི་བཅུ་དང་། །བད་ཀན་ནད་ནི་ཉི་ཤུ་དག །འཇམ་རྩི་འདི་ཡིས་སེལ་བར་འགྱུར། །ཤ་ལི་ཧོ་ཏྲའི་གསང་བའི་

203-1-269b

གནས་ལས་ཨ་པུ་ཤ་ལ་སོགས་པའི་འཇམ་རྩིའོ།།      །།རྟ་ལ་ཕན་པར་འདོད་པ་ཡིས། །རུ་རྟ་བརྒྱད་པ་བཤད་པར་བྱ། །རུ་རྟ་ཤུ་ཏི་ཤིང་མངར་དང་། །ཨེ་རཎྜ་དང་ཐང་ཤིང་དང་། །སྐྱེར་བ་དང་ནི་ཧ་པུ་ཤ །པོ་སོན་ཆ་ཡི་འབྲས་བུ་ནི། །ཆ་མཉམ་ཉིད་དུ་བསྡུས་
ནས་ཀྱང་། །ཕྱེ་མ་ཞིབ་མོར་བཏགས་ནས་ནི། །ཕྱེ་མ་དེ་ལས་སྲང་གཅིག་ཅིག །མར་རམ་ཏིལ་མར་དང་སྦྱར་ལ། །འཇམ་རྩི་རྟར་ནི་བཏང་གྱུར་ན། །རླུང་འཁྱིལ་བ་ཡི་ནད་རྣམས་སེལ། །ཁུ་བ་ཟད་དང་གཅོང་ཆེན་དང་། །རླུང་ནད་སྨད་དུ་ཞུགས་པ་དང་། །རླིག་སྐྲངས་
གཅིན་ནི་སྲི་བ་དང་། །རླུང་ནད་ཀྱིས་ནི་སེམས་བཅོམ་ལ། །དུས་དང་མཐུན་པའི་སྣུམ་དང་ནི། །བྱིན་ན་ཕན་པར་འགྱུར་བ་ཡིན། །ཤ་ལི་ཧོ་ཏྲའི་གསང་བའི་གནས་ལས་རུ་རྟ་བརྒྱད་པ་ཞེས་བྱ་བའི་འཇམ་རྩིའོ།།      །།པི་པི་ལིང་དང་བཅའ་ལྒ་དང་། །ན་ལེ་ཤམ་དང་དུར་
བྱིད་དང་། །བྲྀ་ཧ་ཏི་ཡི་འབྲས་བུ་དང་། །གུར་གུམ་དེ་བཞིན་ག་བུར་དང་། །གླ་རྩི་དང་ནི་རྒྱ་སྤོས་དང་། །དེ་བཞིན་སྨིག་རྐང་ཉིད་དང་ནི། །སྐྱེར་པ་རྣམས་ནི་ཆ་མཉམ་བྱས། །ཕྱེ་མར་ཞིབ་ཏུ་བཏགས་པར་བྱ། །དེ་ལས་འཇམ་རྩིའི་སྦྱོར་བ་ནི། །བྱས་ཏེ་རྟ་ལ་བཏང་གྱུར་ན། །རླུང་
དང་མཁྲིས་པའི་ནད་རྣམས་ནི། །འཇམ་རྩི་འདི་ཡིས་སེལ་བར་བྱེད། །གསང་བའི་གནས་ལས་པི་པི་ལིང་ལ་སོགས་པའི་འཇམ་རྩིའོ།།      །།ཤ{་ཁི་}ར་ནི་སྲང་གཅིག་དང་། །མང་དུ་ཀ་ནི་སྲང་གཉིས་དང་། །དེ་བཞིན་མར་ནི་སྲང་ལྔ་དང་། །འོ་མ་ལས་ཀྱང་
སྲང་བཅུ་དྲུག །འོ་མའི་འཇམ་རྩི་འདི་བཏང་ན། །མཁྲིས་པའི་ནད་རྣམས་སེལ་བར་འགྱུར། །ཁྲག་དང་མཁྲིས་པ་ཞི་བྱེད་ལ། །སྟོན་དང་སོས་ཀའི་ཚེ་ན་བསྔགས། །གསང་བའི་གནས་ལས་འོ་མའི་འཇམ་རྩིའོ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་
འཇམ་རྩིའི་ལེའུའོ།།      །།ཕྱེ་མ་མར་ནི་ཁ་ར་འམ། །བུ་རམ་དག་དང་སྦྱར་བྱས་ལ། །ཆུ་གྲང་དག་དང་སྐྱོས་པ་ནི། །ནང་པར་རྟ་ལ་བྱིན་གྱུར་ན། །ངལ་དང་ལྟོགས་དང་དབུགས་མི་བདེ། །གཅིན་འགགས་པ་ཡི་ནད་རྣམས་ནི། །འདི་ཡིས་འཕྲལ་དུ་ཞི་བྱེད་

203-1-270a

ཅིང་། །སྟོབས་ཀྱང་སྐྱེད་བྱེད་བྱེད་པ་ཡིན། །སྦེག་དང་གཅོང་ཆེན་གྱིས་ཉེན་དང་། །ཉམ་ཆུང་ལམ་གྱིས་དུབ་པ་ལ། །འོ་མ་མར་དང་ཕྱེར་བྱས་པའི། །ལྡེ་གུ་དེ་ལ་སྦྱིན་པར་བྱ། །ཡང་ན་ཕྱེ་མར་པི་པི་ལིང་། །ཁ་ར་དང་སྦྱར་སྦྱིན་གྱུར་ན། །སེམས་
ནི་གསལ་བར་འགྱུར་བ་ཡིན། །མཁྲིས་ནད་ངལ་བ་སེལ་བར་འགྱུར། །ལུས་ཀྱང་སྦོམ་པ་ཉིད་འགྱུར་བས། །རྟག་ཏུ་རྟ་ལ་འདི་སྦྱིན་བྱ། །སྔ་དྲོ་ཁྲུས་བྱས་ཆུ་འཐུངས་ནས། །ཕྱེ་མ་ལྡེ་གུ་སྦྱིན་པར་བྱ། །གང་གི་ཁོང་པར་རླུང་ཞུགས་དང་། །ལུས་ལ་མཁྲིས་པས་ཉེན་གྱུར་
པ། །དེ་ལ་བཏུང་བ་དང་སྦྱར་སྦྱིན། །རླུང་མཁྲིས་ནད་རྣམས་སེལ་བར་བྱེད། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཕྱེ་མའི་ལྡེ་གུའོ།།      །།ཡ་བཀྵ་ར་ཚ་བ་གསུམ། །སེར་པོ་གཉིས་དང་ཙི་ཏྲ་ཀ །ཀ་ར་བཱི་ར་དཀར་ཙ་བ། །ལྕེ་མྱང་ཚ་དང་བཅས་པ་
དང་། །ཨརྐའི་རྩ་བ་བི་ཤ་ལ། །ཁང་པའི་དུད་པ་ཡུངས་ཀར་བཅས། །དེ་བཞིན་སརྫི་ཀ་ཀྵ་ར། །དུག་ནི་ཆ་ཕྱེད་དང་བསྲེས་པ། །རང་སྐྱུར་དང་ནི་བཏགས་ནས་ཀྱང་། །གྲིབ་མ་ལ་ནི་བསྐམ་པར་བྱ། །བ་གཅིན་དང་ནི་སྦྱར་ནས་ཀྱང་། །སྔ་དྲོ་མཛེ་ཅན་རྟ་ལ་སྦྱིན། །ལྗན་ལྗིན་
རྣམ་པར་བསལ་ནས་ཀྱང་། །ཐལ་སྨན་གྱིས་ཀྱང་དྲིལ་ཕྱིས་བྱ། །ཕྱི་བ་དང་ནི་བསྐུ་བ་དང་། །ཞག་བདུན་གྱི་ནི་བར་དུ་བྱ། །འདི་ཡིས་འབུས་ཟོས་སྦྲུལ་གྱིས་ཟིན། །གཡན་པ་རྔོ་དང་འབྲུམ་ཕྲན་དང་། །དེ་བཞིན་པགས་པའི་ནད་གཞན་དང་། །སྡིག་པ་དང་ནི་དེ་བཞིན་
དུ། །སྲོག་ཆགས་གདུག་པས་ཟིན་པ་དང་། །རྐང་ནད་གསོར་ནི་མི་རུང་རྣམས། །ངེས་པར་སེལ་བར་བྱེད་པ་ཡིན། །ཐལ་སྨན་གྱི་ནི་སྦྱོར་བ་འདི། །དྲང་སྲོང་རྣམས་ཀྱིས་སྔོན་ཚེ་བཤད། །འདི་ཡིས་རྨ་རེད་རྟག་ཏུ་ནི། །སྦྱོང་བར་བྱེད་པར་ཐེ་ཚོམ་མེད། །ཤ་ལི་ཧོ་ཏྲའི་
གསང་བའི་གནས་ཏེ་བརྒྱད་པ་ལས་ཨརྐའི་ཐལ་སྨན་ནོ།།      །།ནས་ཚིག་འཁུས་ཐལ་ཆོ་ག་བཞིན། །བྱིན་པ་དེ་ཡི་ཡོན་ཏན་གང་། །དེ་ནི་ང་ཡིས་བཤད་པར་བྱ། །ངས་བཤད་པ་ལས་མཉན་པར་གྱིས། །ཆེན་པོ་ལ་ནི་སྲང་གཅིག་བྱིན། །ཆ་གཅིག་ཁྲི་བ་བར་

203-1-270b

མ་ལ། །ཐ་མ་ལ་ནི་སྲང་ཕྱེད་བྱིན། །ཡང་ཐ་ལ་ནི་ཞོ་གཉིས་སོ། །དབྱར་ཚེ་ཏིལ་མར་དང་སྦྱར་བ། །རྟག་ཏུ་སྦྱིན་པར་བྱ་བ་ཡིན། །དུས་ཀུན་དུ་ནི་མར་བཅས་པར། །བྱིན་པར་གྱུར་པ་རབ་ཏུ་བསྔགས། །འདི་ཡིས་སྐྲངས་པ་དུག་དང་ནི། །མཛེ་ནད་ཁོང་པའི་སྲིན་
བུ་དང་། །རླུང་འཁྱིལ་བ་ཡང་སྦོས་ནད་དང་། །གཟེར་གྱི་ནད་དང་གཞང་འབྲུམ་དང་། །ཕོ་བ་ཡི་ནི་ནད་རྣམས་དང་། །ཁ་ཡི་ནད་རྣམས་མ་ལུས་དང་། །ཤུ་བའི་ནད་རྣམས་སེལ་བ་ཡིན། །དེ་ནི་ཚད་ཙམ་བྱིན་གྱུར་ན། །སྟོབས་སྐྱེད་མདོག་ནི་གསལ་བར་བྱེད། །
རྟ་ལ་ནས་ཚིག་འཁུས་ཐལ་བ། །བཅུད་ལེན་མཆོག་ནི་ཡིན་པར་བཤད། །རྟ་གང་རྟག་ཏུ་མི་འཐུངས་པ། །དེ་ནི་རྟག་ཏུ་ནད་མེད་འགྱུར། །དེ་ནི་རླུང་གི་ནད་རྣམས་དང་། །མཁྲིས་པ་དང་ནི་བད་ཀན་དང་། །ལྡན་པ་དང་ནི་འདུས་པ་དང་། །དེ་བཞིན་གློ་བུར་བ་ཡི་
ནད། །ཁྲག་ལས་བྱུང་བའི་ནད་རྣམས་སེལ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ནས་ཚིག་འཁུས་པའི་ཐལ་བའི་ཆོ་གའོ།།      །།དེ་ནས་གཞན་ཡང་ལན་ཚྭ་ཡི། །ཆོ་ག་དམ་པ་བཤད་པར་བྱ། །ལན་ཚྭ་ཡི་ནི་ཡོན་ཏན་རྣམས། །བཤད་
ཀྱིས་དེ་ནི་མཉན་པར་གྱིས། །རྒྱམ་ཚ་རྟ་ལ་ཕན་པའི་མཆོག །རླུང་དང་བད་ཀན་སེལ་བར་བྱེད། །དེ་ཡིས་སྙིང་ནད་མ་ཞུ་བའི། །ནད་རྣམས་སེལ་བར་བྱེད་པ་ཡིན། །རྟ་རྣམས་ནད་མེད་པར་འགྱུར་ཞིང་། །རྔ་རྔོག་ཀྱང་ནི་ལེགས་པར་སྐྱེ། །མེ་དྲོད་བྲི་བར་མི་
འགྱུར་ཞིང་། །ཕོ་བའི་ནད་རྣམས་འབྱུང་མི་འགྱུར། །ཟོས་པ་མྱུར་དུ་འཇུ་འགྱུར་ཞིང་། །བདེ་བ་ཁོ་ནར་སྨིན་པར་བྱེད། །ལན་ཚྭས་རྟ་ཡི་གཅིན་རྟུག་དག །བདེ་བ་ཁོ་ནར་འབྱུང་བར་འགྱུར། །ལན་ཚྭ་རྟ་ཡི་ཚེ་ཡིན་པས། །དུས་ནི་རྟག་ཏུ་བསྔགས་པ་ཡིན། །སྨན་
པས་དགུན་སྟོད་དགུན་སྨད་ཚེ། །ལན་ཚྭ་སྔ་དྲོ་སྦྱིན་པར་བྱ། །དཔྱིད་དང་སོས་ཀ་དབྱར་དང་སྟོན། །ཕྱི་དྲོའི་དུས་སུ་སྦྱིན་པར་བྱ། །རྟ་ནི་མཆོག་ཏུ་གྱུར་པ་ལ། །ལན་ཚྭ་སྲང་དྲུག་སྦྱིན་པར་བྱ། །བར་མ་ལ་ནི་སྲང་བཞི་སྦྱིན། །ཆུང་བ་ལ་ནི་སྲང་གསུམ་སྦྱིན། །དབྱར་གྱི་

203-1-271a

ཚེ་ན་ལན་ཚྭ་ནི། །ནིམ་པའི་ལོ་མ་དང་སྦྱར་སྦྱིན། །དགུན་གྱི་ཚེ་ནི་དགུ་ཐི་ཡི། །ལོ་མ་དང་བཅས་སྦྱིན་པར་བྱ། །པ་ཏོ་ལ་ཡི་ལོ་མར་བཅས། །དགུན་སྨད་དང་ནི་དཔྱིད་དུས་སྦྱིན། །སོས་ཀ་དང་ནི་སྟོན་གྱི་ཚེ། །མར་དང་སྦྱར་བ་སྦྱིན་
པར་བྱ། །ལན་ཚྭ་ཡི་ནི་སྦྱོར་བ་འདི། །བུ་ལ་ང་ཡིས་བཤད་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ལན་ཚྭའི་ཆོ་གའོ།།      །།ཚངས་པ་དྲག་པོ་ཁྱབ་འཇུག་ནི། །བད་ཀན་མཁྲིས་པ་རླུང་དག་ཅན། །ཕན་ཚུན་བསྟེན་པར་བྱེད་པ་
དང་། །གཅིག་ལ་གཅིག་ནི་མ་འདྲེས་གནས། །དེ་ལ་ཚངས་པ་བད་ཀན་ཏེ། །དྲག་པོ་མཁྲིས་པ་ཡིན་པར་བཤད། །ཁྱབ་འཇུག་རླུང་གི་བདག་ཉིད་ཅན། །དེ་ལྟར་ཚུལ་ནི་རྣམ་གསུམ་ཡིན། །ས་ལ་བཅོས་མས་གནས་པ་ཡིན། །ཚངས་པ་ལ་སོགས་ལྷ་
གསུམ་པའོ། །ལུས་ཅན་རྣམས་ཀྱི་བརྟེན་པའི་རྒྱུ། །ཨ་རུ་ར་དང་སྐྱུ་རུ་ར། །བ་རུ་ར་སྟེ་འབྲས་བུ་གསུམ། །འདི་ཡི་ཡོན་ཏན་རྣམས་དང་ནི། །སྦྱོར་བའི་ཁྱད་པར་བཤད་པར་བྱ། །རྐེད་པ་བརླ་ཡི་ནད་སེལ་ཅིང་། །ལུས་ཟུངས་ཐམས་ཅད་དང་བར་བྱེད། །མདོག་
དང་སྟོབས་ནི་སྐྱེད་པའི་མཆོག །དེ་བཞིན་གནས་གསུམ་སྦྱོར་བར་བྱེད། །འདིས་ནི་མེ་དྲོད་སྐྱེད་བྱེད་ཅིང་། །སྨིན་དང་ཉམས་བྱེད་མཆོག་ཡིན་ནོ། །དེ་བས་རླུང་དང་མཁྲིས་པ་དང་། །བད་ཀན་འཁྲུགས་པར་གྱུར་པ་ན། །འབྲས་བུ་གསུམ་བསྐོལ་སྦྱོར་བ་
ཡིས། །ནད་ནི་སྦྱོང་བར་བྱེད་པ་ཡིན། །ཨ་རུ་ར་ནི་ཆ་གཅིག་སྟེ། །བ་རུ་ར་ནི་དེའི་ཉིས་འགྱུར། །སྐྱུ་རུ་ར་ནི་བ་རུ་རའི། །ཉིས་འགྱུར་ཁོ་ནར་གཞུག་པར་བྱ། །སྨན་ནི་བྲེ་གང་དག་དང་ནི། །ཆུ་ནི་བྲེ་བཞི་བསྐོལ་བར་བྱ། །བཞི་ཆ་ལུས་པར་གྱུར་པ་དང་། །
སྨན་ཁུ་དེ་ནི་ཐབ་ལས་དབོག །ཚགས་ཀྱིས་ལེགས་པར་བཙགས་ནས་ནི། །དུས་ཀྱི་ཆོ་ག་ཤེས་པ་ཡིས། །མེ་སྟོབས་ཆེ་ཆུང་བརྟགས་བྱས་ལ། །རྟ་ལ་ཉེ་བར་བླུད་པར་བྱ། །རླུང་ནད་ཅན་ལ་ཏིལ་མར་སྦྱིན། །མཁྲིས་པ་ཅན་ལ་མར་སྦྱར་བླུད། །བད་ཀན་ཅན་ལ་

203-1-271b

སྲེ་ཏྲེས་དང་། །པི་པི་ལིང་དང་སྦྱར་བ་བླུད། །མིག་གི་ནད་དང་རླིག་སྐྲངས་དང་། །རྨ་དང་རྒྱུས་ནད་འཁུམས་པ་དང་། །རྔོ་དང་གཡན་པ་འབྲུམ་ཕྲན་དང་། །འབྲུམ་བུ་ལྟོ་ཡི་ནད་རྣམས་དང་། །དེ་བཞིན་ལྟོ་ནད་གཞོང་འདྲ་དང་། །ལྐོག་ནད་འབྲས་ཀྱི་ཕྲེང་བ་ལ། །ཞག་
ནི་ཉི་ཤུ་རྩ་གཅིག་བར། །བླུད་ན་བདེ་བ་ཐོབ་པར་འགྱུར། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་འབྲས་བུ་གསུམ་གྱི་སྦྱོར་བའོ།།      །།ལེགས་ཐོས་ཐོས་པ་ཕུན་ཚོགས་པས། །ཤ་ལི་ཧོ་ཏྲ་ལ་དྲིས་པ། །ཨ་རུ་ར་ནི་གང་ན་སྐྱེ། །རིགས་ནི་དུ་ཞིག་རོ་དུ་
མཆིས། །སྐྱེ་གནས་རྣམ་པ་དུ་ཞེས་བགྱི། །མིང་དང་ཁ་དོག་མཚན་ཉིད་དང་། །རྟ་ཡི་ཉེས་པ་གང་དང་གང་། །སེལ་འགྱུར་ཐུབ་མཆོག་ཁྱེད་ཀྱིས་གསུངས། །བུ་ཡིས་དེ་སྐད་དྲིས་པ་དང་། །ཤ་ལི་ཧོ་ཏྲས་སླར་སྨྲས་པ། །བརྒྱ་བྱིན་བདུད་རྩི་འཐུངས་པ་ན། །ཐིགས་
པ་ས་ལ་ལྷུང་བར་གྱུར། །དེ་ལས་རིགས་དང་ཡོན་ཏན་ནི། །ཐམས་ཅད་དང་ལྡན་སྨན་སྐྱེས་འགྱུར། །བསིལ་དང་བདུད་རྩིའི་ཐིགས་ལས་འབྱུང་། །ཡོན་ཏན་གསུམ་ལྡན་ཨ་རུ་ར། །ལན་ཚྭ་ཉིད་ནི་མ་གཏོགས་པ། །རོ་ལྔ་དང་ནི་ལྡན་བཤད་དེ། །བསྐ་དང་མངར་དང་ཚ་
བ་དང་། །ཁ་དང་སྐྱུར་བར་གྲགས་དང་ལྡན། །དེ་ལྟར་རོ་ལྔ་བཤད་ནས་ནི། །དེ་ཡི་མིང་ནི་བཤད་པར་བྱ། །རྣམ་རྒྱལ་འཕེལ་བ་ཞེས་བྱ་དང་། །སྐེམ་བྱེད་དེ་བཞིན་བདུད་རྩི་དང་། །ནག་པོ་དང་ནི་འཇིགས་མེད་དང་། །འཚོ་བྱེད་ཅེས་ནི་མིང་དུ་གྲགས། །རྣམ་རྒྱལ་ཀུ་
བ་ལྟ་བུར་ཟླུམ། །འཕེལ་བྱེད་ཤིན་ཏུ་ཟླུམ་པ་ཡིན། །སྐེམ་བྱེད་རུས་པ་ཆེ་ཞིང་དཀར། །བདུད་རྩི་རྩེ་མོ་སྦོམ་པ་ཡིན། །འཚོ་བྱེད་གསེར་གྱི་མདོག་ཅན་དེ། །འཇིག་མེད་ཟུར་ནི་ལྔ་པ་ཡིན། །ནག་པོ་ཟུར་གསུམ་པ་ཉིད་དེ། །རིགས་ནི་བདུན་དུ་ཤེས་
པར་བྱ། །འཇིག་མེད་རྟ་ཡི་རྐང་པ་ཡི། །ནད་ལ་རྟག་ཏུ་གཏང་བར་བྱ། །འཕེལ་བྱེད་དང་ནི་བདུད་རྩི་དག །རྟག་ཏུ་རྟ་ཡི་ལུས་ལ་གཏང་། །ནག་པོ་སྦྱོང་བར་བྱེད་པར་བཤད། །འཚོ་བྱེད་སྟོབས་ནི་འཕེལ་བར་བྱེད། །སྐེམ་བྱེད་མིག་གི་ནད་ལ་གཏང་། །

203-1-272a

རྣམ་པར་རྒྱལ་བས་འཁྲུ་བར་བྱེད། །དེ་ལྟར་རིགས་དང་མིང་དག་གིས། །རྣམ་པ་བདུན་དུ་བཤད་པ་ཡིན། །རླུང་དང་མཁྲིས་པ་ལས་གྱུར་དང་། །ཁྱད་པར་དུ་ནི་བད་ཀན་ནད། །མངོན་དུ་འཕྲོག་བྱེད་ཨ་རུ་ར། །སྐྱུར་བས་རླུང་ནི་སེལ་བར་བྱེད། །མངར་
དང་ཁ་བས་མཁྲིས་པ་སེལ། །ཚྭ་དང་བསྐ་བས་བད་ཀན་སེལ། །དེ་བས་ཉེས་གསུམ་འཇོམས་ཞེས་བཤད། །རྟ་ལ་ཅི་ལྟར་སྦྱིན་བྱ་བ། །དེ་ཡི་ཉེས་པ་ཉན་པར་གྱིས། །བ་གཅིན་ནང་དུ་ཟླ་བ་གཅིག །ཨ་རུ་ར་ནི་གཞག་པར་བྱ། །དང་པོའི་ཞག་ནི་རྡོག་མ་ལྔ། །
གཉིས་པ་ལ་ནི་བཅུ་སྦྱིན་བྱ། །ཞག་ནི་ཉི་ཤུ་རྩ་གཅིག་བར། །ལྔ་ལྔ་ཡིས་ནི་བསྐྱེད་པར་བྱ། །ནིམ་པ་ཡི་ནི་ཁུ་བ་དང་། །སེང་ལྡེང་ཁུ་བ་དང་བཏགས་ལ། །ལྕགས་ཀྱི་སྣོད་ནང་དུ་བཅུག་སྟེ། །མཚན་མོ་བཀབ་སྟེ་དབེན་པར་གཞག །ལྡེ་གུ་བཏགས་པའི་ཚད་
གང་ཡིན། །སྣུམ་གྱི་ཚད་ཀྱང་དེ་ཙམ་དུ། །སྨན་པ་མཆོག་གིས་སྦྱིན་བྱ་ཡི། །སྣུམ་མང་སྐྱོན་ནི་ཡོད་ཤེས་བྱ། །ཤུ་བ་གཡན་པ་འབྲུམ་བུ་དང་། །མཛེ་དང་རྐང་ཤུ་འབྲས་དང་ནི། །ནད་ནི་རྐང་ལ་ཞུགས་པ་དང་། །གཞང་འབྲུམ་དང་ནི་ཤ་བཀྲ་དང་། །དེ་བཞིན་
རྟ་ཡི་རྐང་པའི་ནད། །ཨ་རུ་ར་ཡིས་སེལ་བར་བྱེད། །དབྱར་ཚེ་རྒྱམ་ཚ་དང་བཅས་སྦྱིན། །སྟོན་ནི་ཁ་ར་ཨ་རུ་ར། །དགུན་ནི་བཅའ་ལྒ་དང་བཅས་པ། །དགུན་སྨད་ཁ་རུ་ཚ་དང་བཅས། །སྦྲང་རྩི་དང་སྦྱར་དཔྱིད་ཚེ་སྦྱིན། །སོས་ཀ་བུ་རམ་སྦྱར་བ་སྦྱིན། །དེ་འདྲས་མེ་
ཡིས་ཤིང་བསྲེགས་ལྟར། །ནད་ཀྱི་ཚོགས་རྣམས་ཟད་པར་བྱེད། །གནད་དང་རུས་པ་ཚིགས་རྣམས་དང་། །དྲུག་མདོ་དང་ནི་གནས་པའི་ནད། །རླུང་མཁྲིས་ལས་ནི་གྱུར་པ་དང་། །དེ་བཞིན་བད་ཀན་ལས་གྱུར་དང་། །ཁྲག་དང་གྱུར་ལས་ཡན་ལག་གི། །ནད་ནི་སྣ་
ཚོགས་གནས་པ་སེལ། །བློ་དང་སྟོབས་དང་དབང་པོ་ཡི། །ཚོགས་ཀྱི་ཁ་ནི་འབྱེད་པ་ཡིན། །རླུང་དང་མཁྲིས་པ་བད་ཀན་གྱི། །ནད་རྣམས་ཁ་ནི་འཛུམས་པར་བྱེད། །གཅིན་དང་དེ་བཞིན་རྟུག་པ་དང་། །དྲི་མ་རྣམས་ནི་སྦྱོང་བྱེད་པ། །ཨ་རུ་རས་ནི་རྟ་ཡི་ནི། །ནད་

203-1-272b

ནི་མ་ལུས་འཇོམས་པར་བྱེད། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཨ་རུ་རའི་ཆོ་གའོ།།      །།ཤ་ལི་ཧོ་ཏྲ་ཐུབ་མཆོག་ལ། །ལེགས་ཐོས་ཀྱིས་ནི་ཡང་དྲིས་པ། །གུ་གུལ་ཇི་ལྟར་བྱུང་གྱུར་ཅིང་། །རང་བཞིན་མཚན་ཉིད་ཅི་འདྲ་ལགས། །ཚད་དང་
ཚུལ་ནི་ཇི་ཙམ་ཞིག །ནད་ནི་གང་ལ་གཏང་བར་བགྱི། །བུ་ཡིས་དེ་སྐད་དྲིས་པ་དང་། །ཤ་ལི་ཧོ་ཏྲས་སླར་སྨྲས་པ། །བདུད་རྩི་བསྲུབས་པར་གྱུར་པའི་ཚེ། །ཐིགས་པ་ཕྲ་མོར་འཐོར་གྱུར་པ། །འཛམ་བུ་ཆུ་བོའི་གྲུབ་པ་དང་། །དྲི་ཟས་བརྟེན་པའི་གནས་སུ་བཅས། །དེ་
ལས་རྩ་བ་རྒྱས་པ་ཡི། །ཤིང་ནི་ཆེན་པོར་སྐྱེས་པར་གྱུར། །དེ་ཡི་ཁུ་བཅུད་འཛགས་གྱུར་པ། །གུ་གུལ་ཞེས་ནི་བྱ་བར་གྲགས། །བསྐ་ཞིང་ཚ་ལ་བསྐ་བ་སྟེ། །ཞུ་རྗེས་མངར་བོ་ཡིན་པར་བཤད། །སྨིན་པ་འཛམ་བུའི་གསེར་འདྲ་ཞིང་། །སྨིན་པའི་གི་ཝང་ལྟ་བུ་ཡིན། །
དེ་འདྲའི་གསེར་མདོག་བསྟེན་འོས་ཡིན། །དེ་ལས་བཟློག་པ་སྨད་པར་འོས། །ཞག་བདུན་བ་གཅིན་དང་སྦྱར་བ། །ཞག་བདུན་འབྲས་བུ་གསུམ་དང་སྦྱར། །ཞག་བདུན་མར་དང་སྦྱར་བསྟེན་པ། །རྗེས་སུ་མཐུན་པ་གཏང་བར་བྱ། །རླུང་གི་ནད་ལ་མར་དང་སྦྱར། །བད་
ཀན་ནད་ལ་བ་གཅིན་སྦྱར། །མཁྲིས་པ་འབྲས་བུ་གསུམ་སྦྱར་གཏང་། །འདི་དག་ཚུལ་ནི་རྣམ་གསུམ་ཡིན། །སོས་ཀ་དང་ནི་དབྱར་གྱི་ཚེ། །མར་དང་སྦྱར་ཏེ་སྦྱིན་པར་བྱ། །སྟོན་གྱི་ཚེ་དང་དགུན་སྟོད་ནི། །འབྲས་བུ་གསུམ་ཁུ་དང་སྦྱར་གཏང་། །དགུན་སྨད་དང་ནི་
དཔྱིད་ཀྱི་ཚེ། །བ་གཅིན་དང་སྦྱར་སྦྱིན་པར་བྱ། །དང་པོ་སྲང་ནི་ཕྱེད་སྦྱིན་ཞིང་། །སྲང་ཕྱེད་ཀྱིས་ནི་རིམ་བཞིན་བསྐྱེད། །སྲང་ལྔ་དག་གི་ཚད་བྱས་པ། །ཆེ་ཚད་ཁོ་ན་ཡིན་པར་བཤད། །རྟ་ལ་སྔ་དྲོ་བླུད་ནས་ནི། །ཕྱི་དྲོ་ཁ་ཟས་སྦྱིན་བྱ་སྟེ། །ཤིན་ཏུ་སྣུམ་ཞིང་གཡོས་སུ་
བྱ། །ཤ་ནི་དེ་ལ་སྦྱིན་པར་བྱ། །ཆུ་ནི་ཉེ་བར་བསྐོལ་བ་དང་། །ལྗང་པ་སྐམ་པོ་སྦྱིན་པ་བསྔགས། །རྟ་ནི་ཆེན་པོ་ཉིད་ལ་ནི། །མཐར་གྱིས་དྲུག་ཅུ་རྩ་བཞི་སྦྱིན། །བར་མ་ལ་ནི་བཞི་བཅུ་བརྒྱད། །ཉེ་བར་སྦྱིན་པ་ཉིད་དུ་བྱ། །ཆུང་ངུ་ལ་ནི་སྲང་སུམ་ཅུ། །རྩ་གཉིས་

203-1-273a

ཀྱི་ནི་ཚད་དུ་སྦྱིན། །འདི་ནི་རྟ་ཡི་ནད་གཞི་གསུམ། །འཁྲུགས་པར་གྱུར་ལ་བསྔགས་པ་ཡིན། །ཚིགས་སྐྲངས་པ་དང་སྐྲན་དང་ནི། །དེ་བཞིན་རྨ་ཡི་ནད་རྣམས་དང་། །ལུས་རེངས་ཡན་ལག་སྐྲངས་པ་དང་། །སྐྲངས་དང་གཞང་ཁའི་ནད་
རྣམས་དང་། །ལྟོ་བ་ཡི་ནི་ནད་རྣམས་དང་། །དེ་བཞིན་བད་ཀན་ནད་རྣམས་དང་། །འཐེང་བའི་ནད་ནི་ཐམས་ཅད་དང་། །མཛེ་ནད་བད་ཀན་ལས་གྱུར་དང་། །རྟ་གང་མེ་དྲོད་ཉམས་པ་དང་། །དེ་བཞིན་འབྱུང་བ་མི་སྙོམས་དང་། །མཚན་དང་རླིག་པ་སྐྲངས་
པ་དང་། །ནད་རྣམས་སྦྱོང་བར་བྱེད་པ་ཡིན། །རྒོད་མ་རྟེའུ་ཤོར་མངལ་མི་ཆགས། །གང་ཞིག་རྟག་ཏུ་བུ་འཆི་དང་། །གང་ཞིག་རྟག་ཏུ་རླུང་གིས་གནོད། །རྒོད་མ་དེ་ལའང་སྨན་པས་སྦྱིན། །ལུས་ཀྱི་སྟོབས་དང་གོམས་པ་དང་། །མེ་དྲོད་ཆེ་ཆུང་ཤེས་
བྱས་ལ། །ཉམས་སྟོབས་ལྡན་ཞིང་གཟུགས་དྲེགས་བདོ། །ཁུར་དང་སྡུག་བསྔལ་བསྟེན་ནུས་ལ། །བྱིན་ན་བདེ་བ་ཉིད་འགྱུར་གྱི། །གཞན་ལ་བཅུད་ཀྱིས་ལེན་མི་འགྱུར། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་གུ་གུལ་གྱི་ཆོ་གའོ།།      །།
ཤ་ལི་ཧོ་ཏྲ་དྲང་སྲོང་མཆོག །ལེགས་ཐོས་ཀྱིས་ནི་ཡང་དྲིས་པ། །སྒོག་སྐྱ་ཇི་ལྟར་བྱུང་བར་གྱུར། །འདི་ཡི་རོ་ནི་དུ་རུ་བཤད། །རོ་མ་ཚང་ཞེས་ཇི་ལྟར་གདགས། །བཅུད་ཀྱིས་ལེན་དུ་ཇི་ལྟར་འགྱུར། །གང་ཞིག་དང་ནི་སྦྱར་གྱུར་ན། །སྨན་གྱི་བྱ་བ་བྱེད་པ་ལགས། །
ནད་ནི་གང་ལ་སྦྱིན་པར་བགྱི། །ཅི་ལྟར་ན་ནི་ལུས་རྒྱས་བགྱིད། །བུ་ཡིས་དེ་སྐད་དྲིས་པ་དང་། །ཤ་ལི་ཧོ་ཏྲས་སླར་སྨྲས་པ། །ལྟ་དང་ལྷ་མིན་དག་གི་ནི། །གནས་སུ་བདུད་རྩི་བྱུང་བར་གྱུར། །དེ་བྱུང་བ་དང་ལྷ་རྣམས་ནི། །ཐམས་ཅད་འབད་དེ་སྲུང་བར་བྱེད། །དེ་ཚེ་མ་
ལ་ཕན་འདོད་པས། །མཁའ་ལྡིང་གིས་ནི་ཕྲོགས་པར་གྱུར། །དེ་ནི་ཤུགས་ཀྱིས་སོང་བ་ན། །བདུད་རྩི་ཐིགས་པ་ས་ལ་ལྷུང་། །མི་གཙང་བ་ཡིས་སྨེས་པ་ཡི། །ལོགས་སུ་ལྷུང་བས་དྲི་ངར་གྱུར། །བདུད་རྩི་ལས་ནི་བྱུང་བས་ན། །དེ་བས་བཅུད་ཀྱིས་ལེན་ཉིད་ཡིན། །

203-1-273b

སྣུམ་ཞིང་བརྟན་ལ་རོ་ལྔར་ལྡན། །ཚ་ཞིང་སྟོབས་ནི་སྐྱེད་པར་བྱེད། །ལྕི་ཞིང་རོ་ཚ་བྱེད་པ་སྟེ། །སྐྱུར་བའི་རོ་དང་བྲལ་བ་ཡིན། །དེ་བས་རོ་མ་ཚང་བ་ཞེས། །དྲང་སྲོང་རྣམས་ཀྱིས་བཤད་པ་ཡིན། །གང་ཞིག་རླུང་གི་ཤུགས་ཀྱིས་ནི། །ཡན་ལག་འབྱུང་ངམ་འཁུམས་གྱུར་
ཏམ། །གང་ཡང་ཤིན་ཏུ་འཐེང་བ་དང་། །གང་གི་ལམ་དུབ་འཐེང་གྱུར་དང་། །གང་ཡང་འཁྱོར་ཞིང་འགྲོ་བ་དང་། །བྱིན་པ་རྒྱབ་དང་དྲུག་མདོ་དང་། །དཔུང་པ་པུས་མོ་རྣམས་སུ་ནི། །ནད་ནི་ཞུགས་པར་གྱུར་པ་དང་། །རྩ་རྒྱུས་ཤ་དང་རུས་པ་དང་། །རྩ་ལ་ནད་ཀྱིས་
ཁྱབ་གྱུར་པ། །དེ་ལ་སྒོག་སྐྱ་ལས་ལྷག་པའི། །སྟོབས་ལྡན་སྨན་གཞན་ཡོད་མ་ཡིན། །རྟ་ནི་ལྟོ་བའི་ནད་ཀྱིས་ཉན། །སྒོག་སྐྱ་ཆང་དང་སྦྱར་བ་ནི། །ཆོ་ག་བཞིན་དུ་བྱིན་གྱུར་ན། །མྱུར་དུ་དེ་ལས་ཐར་བར་འགྱུར། །རླུང་འཁྱིལ་བ་ལ་སོགས་པའི་ནད། །
ཁོང་པ་ལ་བརྟེན་མི་བཟད་དང་། །སྐྲན་དང་མཆིན་པ་མཁལ་མའི་ནད། །ཤིན་ཏུ་གསོ་དཀའ་ཐམས་ཅད་ཀྱང་། །འདི་ཡིས་ཉེ་བར་སེལ་བར་བྱེད། །མངར་དང་ཚ་དང་ཁ་བ་དང་། །བསྐ་དང་དེ་བཞིན་ལན་ཚྭ་སྟེ། །དེ་ལྟར་རོ་ལྔ་དང་ལྡན་ཞིང་། །རོ་སྐྱུར་གཅིག་པོ་
མེད་པ་ཡིན། །འདི་ལ་ས་བོན་མངར་བ་ཡི། །མཚན་ཉིད་ཡོད་པར་བཤད་པ་ཡིན། །རྩ་བ་ཚ་བ་ཉིད་ཡིན་ལ། །ལོ་མ་ཁ་བ་ཡིན་པར་བཤད། །སྡོང་བུའི་རོ་ནི་བསྐ་བ་ཡིན། །སྡོང་བུའི་རྩེ་མོ་ལན་ཚྭ་ཅན། །སྦྱོར་བ་ཇི་བཞིན་བྱས་པ་ཡིས། །འདི་ཡི་ཡོན་
ཏན་བཤད་པར་བྱ། །རླུང་གི་ནད་ལ་མར་དང་ནི། །ཤ་ཁུ་དང་སྦྱར་གཏང་བར་བྱ། །མཁྲིས་པ་ཅན་ལ་འོ་མ་དང་། །ལེགས་པར་བསྐོལ་ཏེ་སྦྱིན་པར་བྱ། །རང་སྐྱུར་ཀཉྫི་དང་སྦྱར་བས། །སྦོ་དང་བཤང་བ་འགགས་པ་སེལ། །ཁོང་པའི་སྲིན་བུ་རྣམས་ལ་ནི། །བ་
གཅིན་དང་ནི་སྦྱར་བ་བླུད། །བད་ཀན་ལ་ནི་འབྲས་བུ་གསུམ། །ཁུ་བ་དང་སྦྱར་བླུད་པར་བྱ། །འདི་ནི་སྦེག་པའི་རྟ་རྣམས་དང་། །རླུང་ནད་ཅན་དང་སེམས་ཉམས་དང་། །རྟ་གང་ཁྲག་དང་ཉམས་སྟོབས་ཟད། །དེ་རྣམས་བརྟ་བའི་མཆོག་ཡིན་ནོ། །ལུད་པ་དབུགས་མི་བདེ་

203-1-274a

སེལ་ཞིང་། །ནད་ཀུན་འཇོམས་པར་བྱེད་པ་ཡིན། །ཏིལ་མར་དང་སྦྱར་བད་རླུང་འཇོམས། །མར་དང་སྦྱར་བས་རླུང་མཁྲིས་སེལ། །འོ་མ་བུ་རམ་ཤིང་ཁུར་སྦྱར། །ཁྲག་དང་མཁྲིས་པ་སེལ་བྱེད་ཡིན། །མེ་དྲོད་ཉམས་པ་རྒྱམ་ཚ་དང་། །ཆང་དང་སྦྱར་ཏེ་སྦྱིན་པར་
བྱ། །འོ་བྱང་སོས་ཀ་སྟོན་གྱི་ཚེ། །སྒོག་སྐྱ་སྦྱིན་པར་མི་བྱའོ། །གལ་ཏེ་རྨོངས་པས་སྟེར་གྱུར་ན། །རྟ་ནི་ཉེ་བར་གསོད་པ་ཡིན། །ཞུ་རྗེས་ཁ་དང་མངར་བས་ན། །བད་ཀན་དང་ནི་མཁྲིས་པ་སེལ། །རྒོད་མ་མངལ་ནི་ཆགས་བྱེད་ཅིང་། །གསེབ་ཀྱི་ཁུ་བ་འཕེལ་བར་བྱེད། །རླུང་ནད་
ཀྱིས་ནི་ཉེན་པ་དང་། །ཚིགས་སུ་བྱུང་བའི་སྨན་མཆོག་ཡིན། །སྒོག་པ་ལས་ནི་སྣུམ་ཉིས་འགྱུར། །བྱ་བ་སྦྱོར་བ་ལ་རབ་བསྔགས། །སྣོད་ནི་བཟང་པོའི་ནང་བཅུག་སྟེ། །ཤིན་ཏུ་དབེན་པའི་གནས་སུ་སྦ། །ལོ་གཅིག་ལོན་པར་གྱུར་པའི་ཚེ། །དྲི་ནི་གང་ཚེ་བྱུང་གྱུར་པ། །དེ་ཚེ་
དུས་ཚིགས་ཁྱད་པར་དང་། །རྟ་ནི་སྟོབས་དང་མེ་དྲོད་དང་། །རང་བཞིན་དང་ནི་གོམས་པ་དག །ཤེས་པར་བྱས་ལ་ལེགས་པར་གཏང་། །ཉིན་ཞག་བཟང་ལ་ལུས་སྦྱང་བྱ། །གཏར་ག་སྦྱོང་སོགས་ཀྱིས་བྱས་ལ། །བཅུད་ཀྱིས་ལེན་གྱི་སྦྱོར་བ་འདི། །རྟ་རྣམས་ལ་ནི་བྱ་བར་
བཤད། །རྟ་ཡི་མཆོག་ནི་རྟག་ཏུ་ནི། །དེ་ལ་སྲང་ནི་ཉི་ཤུ་སྦྱིན། །བར་མ་ལ་ནི་བཅོ་ལྔ་སྟེ། །ཐ་མ་ལ་ནི་བཅུ་ཉིད་སྦྱིན། །ཕག་དང་དེ་བཞིན་མ་ཧེ་དང་། །ཡང་ཉ་བྱིའུ་གོང་མ་སྲེག །རྨ་བྱ་དང་ནི་རི་དྭགས་ཤ །མར་བཏབ་གཡོས་ནི་ལེགས་པར་བྱས། །ཁ་ཟས་བཟང་པོ་
དང་སྦྱར་བ། །བྱིན་པས་ལུས་ནི་བརྟ་བར་བྱ། །བཅུད་ཀྱིས་ལེན་གྱི་དམ་པ་འདི། །རྟ་ནི་གང་གིས་བསྟེན་བྱས་པ། །ཤིན་ཏུ་ཉམ་ང་ལ་སྦྱར་ཡང་། །ལུས་ནི་འབྲི་བར་འགྱུར་མ་ཡིན། །སྒོག་པ་དག་ནི་ཚེ་ལ་ཕན། །སྟོབས་སྐྱེད་ཁ་དོག་བཟང་བྱེད་ཅིང་། །ལུས་འདི་རྒྱས་
པར་བྱེད་པས་ན། །རོ་རྣམས་ཀྱི་ནི་མཆོག་ཡིན་ནོ། །འདི་ནི་ལེགས་པར་བརྟན་གྱུར་ན། །ན་ཚོད་རྒས་པར་གྱུར་པ་ཡང་། །ཤིན་ཏུ་གཞོན་པ་ཉིད་འགྱུར་ཞིང་། །ནུས་པ་ཀུན་དང་ལྡན་པར་འགྱུར། །ལེགས་ལྡན་ཤ་ལི་ཧོ་ཏྲ་ཡིས། །རྗེས་བསྟན་དེ་སྐད་སྨྲས་པ་ཡིན། །ཤ་ལི་ཧོ་

203-1-274b

ཏྲའི་གསང་བའི་གནས་ཏེ་བརྒྱད་པ་ལས་སྒོག་སྐྱའི་ཆོ་ག་རྫོགས་སོ།།      །།ཤ་ལི་ཧོ་ཏྲ་དྲང་སྲོང་མཆོག །ཉི་མ་དང་ནི་གཟི་མཉམ་པ། །རྟ་ཁང་ན་ནི་འདུག་པ་ན། །ལེགས་ཐོས་ཀྱིས་ནི་ཡང་དྲིས་པ། །རྟ་ལ་གོ་ཆ་བསྐོན་པ་ནི། །ཅི་འདྲ་བ་ཞིག་བགྱི་བ་གསུངས། །དེ་བཞིན་ཡན་ལག་
གཅིག་པར་ནི། །ཤིང་རྟ་ལ་སྦྱར་བདག་ལ་གསུངས། །གཡུལ་དུ་དགྲ་དང་ལྷན་ཅིག་ནི། །འཐབ་པ་ན་ནི་གནོད་མེད་པ། །རྟ་ཡི་ལས་ཀྱི་ཆོ་ག་མཁྱེན། །འདི་ནི་ཁྱེད་ཀྱིས་བཤད་དུ་གསོལ། །ལེགས་ཐོས་ཀྱི་ནི་ཚིག་ཐོས་ནས། །ཤ་ལི་ཧོ་ཏྲས་སླར་སྨྲས་པ། །ན་ཚོད་ཀྱིས་ནི་ཆེ་
བ་ཡི། །སྐྱེས་བུ་སྔར་ནི་སྨྲས་པ་ཡིན། །སུམ་ཅུ་མ་ལོན་བར་མ་ཡིན། །ལྔ་པོ་འབྲི་བ་ཆུང་ངུ་ཡིན། །གྲགས་ལྡན་རྣམས་ཀྱི་མི་ཡི་ཚད། །དེ་ལྟར་སྔར་ནི་བཤད་པ་ཡིན། །ཤིང་རྟ་པ་ཡང་རྟ་ཡི་ནི། །བསྟན་བཅོས་ཤེས་ཤིང་ལེགས་པར་བྱས། །མདའ་གཞུ་རལ་གྲི་ལ་
སོགས་པའི། །མཚོན་ཆ་ཡི་ནི་ཐབས་ལ་མཁས། །ལེགས་པར་གོ་བགོས་ཡན་ལག་བདེ། །དེ་ལྟ་བུ་དག་རྟ་ལ་བསྐྱོན། །རྟ་ནི་རིགས་བཟང་ལེགས་བརྟགས་ལ། །འཐབ་པ་རྩེད་མོའི་ཚུལ་དུ་སྦྱར། །འདི་ཡི་དང་པོའི་ཁུར་པོ་ཡི། །མདོར་བསྡུས་ནས་ནི་བཤད་པར་བྱ། །
དང་པོ་གོ་ཆ་སྲང་ཚད་ནི། །བརྒྱད་ཅུ་རྩ་བཞི་ཡིན་པར་བཤད། །ལས་གཅིག་ལ་ནི་རྗེས་བསྔགས་པ། །དེ་ཡི་སྲང་ཚད་སུམ་ཅུར་བཤད། །མགོ་བོ་འགེབས་པ་ལེགས་བརྡུངས་པ། །སྲང་ཚད་སུམ་ཅུ་རྩ་ལྔར་བཤད། །བརླ་འགེབས་པ་ནི་སྲང་བརྒྱད་དང་། །དེ་བཞིན་བཅུ་
ནི་ཡིན་པར་བཤད། །ལྐོག་མ་དང་ནི་རྨིག་པ་སོགས། །བསྲུང་བཞིན་བརྒྱན་པར་བྱེད་པ་ནི། །ཐམས་ཅད་སྲང་ནི་ལྔ་བཅུ་སྟེ། །རྟ་མཆོག་ལ་ནི་དེ་ལྟར་བྱ། །བར་མ་ལ་ནི་བརྒྱ་ཡིས་འབྲི། །ཆུང་ངུ་ལ་ནི་བརྒྱ་ལྔ་བཅུ། །ཅི་ནས་གཡུལ་དུ་ཤུགས་དྲགས་པས། །འགྲོ་བར་མི་
འགྱུར་དེ་ལྟར་བྱ། །རལ་གྲི་སྲང་ཚད་ཉི་ཤུ་ལྔ། །གཡོན་ལོགས་སུ་ནི་གདགས་པར་བྱ། །གཞུ་ཉིད་སྲང་ནི་ཉི་ཤུ་ལྔ། །དེ་ཉིད་དུ་ནི་གདགས་པར་བྱ། །གཡས་ངོས་སུ་ནི་མདའ་ཡི་ཚོགས། །བརྒྱ་པོ་སྲང་ནི་ཉི་ཤུ་གསུམ། །ཚད་དུ་ཕྱིན་པ་གདགས་པར་བྱ། །ཕུག་དང་

203-1-275a

དེ་བཞིན་ཐག་པ་ཡི། །ཚད་ནི་འདིར་ནི་དེས་མ་བྱས། །མདུང་ལའང་ཚད་གཅིག་ཡོད་གྱུར་པས། །འདི་འདྲ་གདགས་ཞེས་དེ་ལ་སྨྲས། །རྟ་ཡི་རྒྱབ་ཏུ་དགབ་བྱ་བ། །རི་དྭགས་རིའུ་བལ་ཤ་རང་བ། །སྤུ་གཞན་འཇམ་པ་ལས་བྱས་པ། །སྲ་ཞིང་ཤིན་ཏུ་འཇམ་
པ་བྱ། །ཤིན་ཏུ་ལེགས་པར་བཏགས་པ་ལས། །སྣ་ཚོགས་མདོག་གིས་བརྒྱན་པར་བྱ། །དེ་ཡི་འབྲེལ་ཐག་དང་བཅས་པ། །སྲང་ནི་སུམ་ཅུའི་ཚད་དུ་བྱ། །གདོང་རྒྱན་སྲང་ནི་ཉི་ཤུ་ལྔ། །ལེགས་པར་ལྷས་པ་གདགས་པར་བྱ། །གློ་ནི་སྡོམ་པར་བྱེད་པས་ན། །རྒྱབ་ཏུ་གནོད་
སྐྱེད་མི་འགྱུར་བར། །ལུག་བལ་ཤིན་ཏུ་འཇམ་པ་ཡིས། །སྲད་བུ་ལས་ནི་ལེགས་པར་བྱ། །ཡང་ན་པགས་པ་ལེགས་ཉེད་པའམ། །རས་བལ་དཀར་པོ་ལས་བྱས་པའམ། །དར་རམ་གསོ་མ་དར་ལ་བྱས། །གཞན་ཡང་མཛེས་ཤིང་སྲ་ལ་འཇམ། །སྟན་དང་ཆ་བྱད་ལེགས་
པ་ཡི། །རྫས་ཀྱི་བཟོ་ནི་དུ་མ་བྱ། །དེ་བཞིན་གདོང་གཟན་སྲང་ཚད་ནི། །བཅུ་དག་རྣ་བའི་གྲ་ནས་གདགས། །གདོང་ནི་ལེགས་པར་སྲུང་བྱེད་པ། །ཤིན་ཏུ་ལེགས་པ་ཉིད་དུ་བྱ། །གཡེར་ཁ་ཤིན་ཏུ་སྙན་པ་ནི། །སྲང་རེ་ཡི་ནི་ཚད་བྱས་པས། །སྲ་ཞིང་ལུས་ནི་བརྟན་པ་
དག །རྣ་བའི་ངོས་ན་གདགས་པར་བྱ། །དེ་ལྟར་ཐམས་ཅད་བཏགས་ནས་ནི། །དེ་རྗེས་རྟ་ལ་ཞོན་པར་བྱ། །གཡུལ་དུ་རྟ་ཡིས་བསྐུར་བྱ་བའི། །ཁུར་དག་བདག་གིས་བཤད་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་གོ་ཆ་ལ་སོགས་པའི་ཁུར་བསྟན་
པའོ།།      །།དེ་ནས་ཤིང་རྟ་དང་སྦྱར་བའི། །ངེས་པ་ང་ཡིས་བཤད་པར་བྱ། །རྟ་ནི་གང་གི་མཆུ་ལྟག་ན། །ཤིན་ཏུ་ཤིས་པའི་མཚན་མ་ཡོད། །བ་དན་བཟང་པོའམ་ཟླ་བ་རྒྱས། །ཉ་དང་རྒྱལ་མཚན་ཡོད་གྱུར་པ། །རྟ་དེ་རྟག་ཏུ་བསྔགས་པ་ཡིན། །དེ་འདྲའི་མཚན་ཉིད་དང་
ལྡན་པའི། །རྟ་ནི་ས་རྟེང་ཤིས་པར་བཤད། །ངང་ཚུལ་བཟང་ཞིང་བུ་བཟང་ལ། །སྐད་ནི་དུང་དང་འདྲ་གྱུར་པ། །རྟ་དེ་རྒྱལ་པོ་ལ་ཤིས་པས། །རིགས་མཐུན་ཤིང་རྟ་ལ་སྦྱར་བྱ། །མདོག་དང་ཚད་ནི་མཚུངས་གྱུར་ཅིང་། །སྟོབས་ལྡན་ཉོན་མོངས་བཟོད་པ་ཤིས། །འཐབ་པའི་

203-1-275b

ཚེ་ན་མི་སྐྲག་ཅིང་། །འདྲེས་པ་ན་ཡང་མི་འཐེན་ལ། །མདའ་དང་དབྱིག་པ་མདུང་སོགས་ཀྱིས། །བརྒྱབ་པ་ན་ནི་སྲན་ཆེ་བ། །དེ་འདྲ་བ་ཡི་རྟ་དག་ནི། །གཡུལ་གྱི་དུས་སུ་བསྔགས་པ་ཡིན། །རྣ་བར་བཟླས་པའི་ཚེ་ན་ནི། །མིག་ལས་མཆི་མ་འབྱིན་བྱེད་ཅིང་། །སྣ་སྦུབས་ཤིན་ཏུ་རྒྱས་བྱས་ནས། །
ཉི་མ་ལ་ཡང་བལྟ་བར་བྱེད། །རྐང་པ་གཡས་པ་ས་ལ་ནི། །ཡང་དང་ཡང་དུ་རྡེབས་པར་བྱེད། །འདི་ནི་སྐྱེ་བ་དྲན་པ་ཡི། །མཚན་ཉིད་དང་ལྡན་མཆོག་ཏུ་བཤད། །དེ་ལས་གཞན་པའི་རྟ་ངན་དག །ཤིང་རྟ་ལ་ཡང་སྦྱར་མི་བྱ། །ལེགས་ཐོས་རྣམ་པ་ཐམས་ཅད་དུ། །རྣ་བར་བཟླས་ལ་བརྟག་པར་
བྱ། །སྔོན་ཚེ་ང་ཡིས་ཇི་ལྟར་ཐོས། །རྣ་བར་བཟླས་པ་གང་གི་ནི། །རྟ་ནི་ཤིན་ཏུ་རིགས་ལྡན་འབྱུང་། །དོན་མེད་མི་འགྱུར་དེ་མཉན་གྱིས། །ཤིང་རྟ་ཡན་ལག་ཀུན་ལྡན་ཞིང་། །འཁོར་ལོ་ལེགས་པར་བཏགས་པ་དང་། །གདུགས་དང་རྒྱལ་མཚན་ལེགས་པར་བསྒྲེང་། །ཤིན་ཏུ་རྫོགས་པ་ཉིད་
དུ་སྦྱར། །ལེགས་པར་སྦྲེལ་ཞིང་ཤིན་ཏུ་ཕྱིས། །ཉི་མ་ལྟ་བུར་གཟི་མདངས་ལྡན། །རིགས་དང་མཚན་ཉིད་བཟང་བ་ཡིན། །རྟ་བཞི་དང་ནི་ཡང་དག་ལྡན། །ཁ་ལོ་བསྒྱུར་བ་བཟང་པོར་བཅས། །འབྲུག་སྒྲ་ལྟ་བུའི་སྒྲ་སྒྲོགས་པ། །ཤིང་རྟ་དེ་ནི་ལེགས་གནས་པས། །ཤར་ཕྱོགས་སུ་ནི་ཁ་
བསྟན་གཞག །གཡས་སུ་བསྐོར་ཞིང་བཀྲ་ཤིས་དང་། །ཤིས་པར་བརྗོད་པ་ལེགས་པར་བྱ། །དེ་ཡི་རྣ་བ་གཡས་པར་ནི། །སྔགས་ཀྱི་ཚིག་འདི་བརྗོད་པར་བྱ། །ཁྱོད་ནི་དྲི་ཟའི་རིགས་སུ་སྐྱེས། །རིགས་སུན་པར་ནི་མ་བྱེད་ཅིང་། །ཁྱོད་ནི་དངུལ་ལས་བྱུང་གྱུར་ཅིང་། །དཔལ་མོའི་ལག་ཏུ་
གནས་ན་འཕེལ། །མེ་ཡི་བུ་ཉིད་ཁྱོད་དྲན་བྱོས། །ཀོ་ཏུ་བ་ཡི་ནོར་བུའང་དྲན། །འོ་མའི་མཚོ་ལས་བདུད་རྩིའི་ཕྱིར། །ལྷ་དང་ལྷ་མིན་གྱིས་བསྲུབས་ཚེ། །དང་པོ་ཨུ་ཙ་སྲ་བ་བྱུང་། །དེ་ལས་ཁྱོད་སྐྱེས་དྲན་པར་གྱིས། །ཤུགས་མཆོག་སྟོན་དེ་ང་ཡིས་ནི། །དགྲ་དཔུང་མ་ལུས་ལས་རྒྱལ་གྱིས། །
ཚངས་པ་དང་ནི་ཟླ་བ་དང་། །ཆུ་ལྷ་ཡི་ནི་བདེན་ཚིག་དང་། །ཉི་མ་ཡི་ནི་གཟི་བརྗིད་དང་། །དེ་བཞིན་དྲང་སྲོང་དཀའ་ཐུབ་དང་། །སྟོབས་བཟང་གི་ནི་ཚངས་སྤྱོད་དང་། །དེ་བཞིན་རླུང་གི་ཤུགས་ཉིད་དང་། །མེ་ཉིད་ཀྱི་ནི་ནུས་མཐུ་ཡིས། །རྟ་ཁྱོད་རྒྱལ་བ་སྐྱེད་གྱུར་ཅིང་། །འཐབ་པའི་ཚེ་ན་རྟ་ཁྱོད་ཀྱིས། །

203-1-276a

གལ་ཏེ་ལོག་པར་འགྲོ་འགྱུར་ན། །བྲམ་ཟེ་ཕ་མ་གསོད་འདྲ་ཡི། །ཉེས་དེ་ཁྱོད་ཀྱིས་འཐོབ་པར་འགྱུར། །གལ་ཏེ་གཡུལ་ལས་རྒྱལ་གྱུར་ན། །བདག་པོ་བདེ་བ་ཉིད་སྐྱེད་བྱེད། །ཨོཾ་ན་མ། ཨཱ་དི་ད་ཏྱ་ཡ་ཨུ་པ་ཡ་ག་ག་ག་སྭཱ་ཧཱ། རྟ་ཡི་རྣ་བ་གཡས་པར་ནི། །འཐབ་པའི་ཚེ་ན་བརྗོད་
གྱུར་ན། །སྐྱེ་བ་དྲན་པ་ཙམ་གྱིས་ནི། །དོན་མེད་ཉིད་དུ་འགྱུར་མ་ཡིན། །དེ་འདྲའི་སྟོབས་དང་སྙིང་སྟོབས་ལྡན། །རྟ་དང་སྦྱར་བའི་ཤིང་རྟར་ཞུགས། །གོ་བགོས་མཚོན་ཆར་ལྡན་བརྩོན་པ། །ཡུལ་འཁོར་འཇིགས་པ་ལས་བསྐྱབ་བྱ། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་ཤིང་རྟ་དང་
སྦྱར་བའི་ཆོ་གའོ།།      །།དེ་ནས་རྣ་བར་བཟླ་བྱ་བ། །གང་ཞིག་ཤེས་པ་ཙམ་གྱིས་ནི། །སྔོན་གྱི་སྐྱེ་བ་དྲན་བྱེད་པ། །ཤིན་ཏུ་ངེས་པར་བཤད་པར་བྱ། །བུ་ཡིས་མཚན་ཉིད་འདི་དག་ནི། །དང་པོར་ང་ལས་མཉན་པར་གྱིས། །སྦྲང་མ་ན་སབ་སྱ་བཱ་དེ་ནས། །སོ་མ་སབ་ཏུ་ན་ས་ཙཿ ཨོཾ་ཛྭ་སྭ་
ཙཻ་བ་སུ་ཏྱ་སྱ། མཱ་ནི་ན་མ་ཏ་པ་སཏྟ། བྷ་དྲ་སཾ་བྷྲ་མ་ཙརྱེ་ན། པ་བྷ་ན་ས་བ་ལེ་ན་ཙ་སྲ་བྷ་བཱནྟུ་ཏ། ཤྭཱ་སཱ་བརྡྷ་ས་ཏྭཾ་ཏུ་རཾ་ག་མཿཨོཾ་ཡ་ཡ་ཡ་ཡ། ག་ག་ག་ག་སྭཱ་ཧཱ། འདི་ནི་བདག་ཉིད་ཆེན་པོ་ནི། །རྟ་ཡི་སྙིང་པོར་གྱུར་པ་ཡིན། །གཡུལ་གྱི་དུས་སུ་དྲན་བྱ་ཡི། །གཞན་དུ་ནམ་ཡང་མ
ཡིན་ནོ། །ལེགས་པར་བཏགས་ཤིང་གོ་བགོས་ལ། །འདྲ་བ་ལ་རྟག་ཞོན་ནས་ནི། །འགའ་ཞིག་རང་གི་དོན་གྱི་ཕྱིར། །རྨོངས་པས་བདག་ཉིད་སྐྱོབ་བྱེད་ཀྱི། །ལེགས་ཐོས་རྟ་ཡི་ལུས་ཡན་ལག །ལེགས་པར་སྲུང་བ་མི་བྱེད་ན། །དེ་ཚེ་སྡིག་ཅན་དམྱལ་བར་ནི། །ཡུན་རིང་དུ་ནི་
འཚེད་པར་འགྱུར། །རྟ་ཡི་སྤུ་ནི་ཅི་སྙེད་པའི། །དམྱལ་བར་དེ་ཚེ་གནས་པར་བྱེད། །རྟ་ལ་གོ་ཞིག་མ་བསྐོན་ཡང་། །བདག་ཉིད་གོ་གྱོན་ཞོན་གྱུར་པ། །མང་དུ་བཤད་པས་ཅི་ཞིག་བྱ། །དེ་འདྲའི་སྡིག་པ་ཡོད་མ་ཡིན། །དེ་བས་འབད་པ་ཐམས་ཅད་ཀྱིས། །རྟ་ནི་ལེགས་པར་བསྲུང་
བར་བྱ། །དཀའ་ཐུབ་ཡོན་ཏན་ཀུན་གྱི་གཏེར། །རྟ་ཚེའི་རིག་བྱེད་ལ་མཁས་པ། །ལེགས་ལྡན་ཤ་ལི་ཧོ་ཏྲ་ཡིས། །འདི་སྐད་ཅེས་བསྟན་སྨྲས་པ་ཡིན། །ཤ་ལི་ཧོ་ཏྲའི་གསང་བའི་གནས་ཏེ་བརྒྱད་པ་ལས་རྣ་བར་བཟླས་པ་བསྟན་པའོ། །དྲང་སྲོང་ཆེན་པོ་ཤ་ལི་ཧོ་ཏྲས་ཡང་དག་པར་བསྡུས་པའི་

203-1-276b

རྟའི་ཚེའི་རིག་བྱེད་མཐའ་དག་རྗེས་སུ་བསྟན་པ་ཞེས་བྱ་བ་རྒྱས་པ་རྫོགས་སོ།།      །།རྒྱ་གར་གྱི་མཁན་པོ་ཨཱ་ཙཱརྱ་དྷརྨ་ཤྲཱི་བྷ་དྲ་དང་། བུདྡྷ་ཤྲཱི་ཤཱནྟི་དང་།ཞུ་ཆེན་གྱི་ལོ་ཙཱ་བ་ཆེན་པོ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།      །།དཔལ་ལྡན་རྒྱལ་པོའི་
རྒྱལ་པོ་ཆེ། །མི་དབང་མངའ་བདག་ཅེས་གྲགས་པ། །རྩོད་པའི་དུས་སུ་འཁྲུངས་གྱུར་ཀྱང་། །དམ་པའི་སྤྱོད་པ་ཀུན་དང་ལྡན། །ཁྱེད་ནི་ཐམས་ཅད་མཁྱེན་དང་ཅིང་། །ཁྱེད་ལ་བཟོད་དང་བདེན་སོགས་མངའ། །ཁྱེད་ལ་ཡོན་ཏན་ཀུན་གནས་པས། །ཁྱོད་ཉིད་བསྟོད་པར་འོས་པ་དང་། །
ཁྱེད་ལ་མཁས་དང་རྒྱལ་ཕྲན་གཞན། །བྲམ་ཟེ་སློང་མོ་པ་རྣམས་ཀྱིས། །རང་རེ་གསེར་གྱི་དབང་ཕྱུག་ཏུ། །རྒྱལ་ཆེན་ཁྱེད་ནི་གཅིག་ཏུ་བསྒྲགས། །མི་དབང་རྒྱལ་པོ་དགྱེས་པ་དང་། །གསང་དཔྱད་ཀྱིས་གཞན་ཕན་གདགས་ཕྱིར། །བཀའ་ཡིས་བསྐུལ་བས་གཞུང་རྒྱས་འདི། །བོད་ཀྱི་
རང་སྐད་སྤྱོད་ཡུལ་བྱས། །ཆོས་ལྡན་གཞུང་ལུགས་ལ་མཁས་པས། །ས་རྣམས་ལེགས་པར་སྐྱོང་མཛད་ཅིང་། །ཡོན་ཏན་ཕུན་ཚོགས་ཀུན་ལྡན་པས། །སྐྱེ་དགུ་ཡུན་རིང་རྒྱས་པར་མཛོད། །དྲང་སྲོང་ཤེས་པ་རྒྱ་མཚོ་ཕ་མཐར་ཕྱིན། །མངོན་ཤེས་ལྔ་ལྡན་ཡོན་ཏན་ཕུན་ཚོགས་པའི། །ཤ་
ལི་ཧོ་ཏྲས་ཚངས་པ་ལས་ཐོས་ནས། །རྟ་ཡི་ཚེ་ཡི་རིག་བྱེད་གང་གཏམས་ཏེ། །ཡུལ་མཐོ་ས་གཙང་འཛམ་གླིང་དཀྱིལ་སྒང་ན། །མི་རྗེ་ལྷས་མཛད་སྤུ་རྒྱལ་བཙན་པོའི་གདུང་། །བྱང་ཆུབ་སེམས་དཔའི་སྤྲུལ་པའི་རྒྱུད་དུ་འཁྲུངས། །མཐའ་བཞིའི་རྒྱལ་པོ་གཞན་ལས་ཁྱད་པར་
འཕགས། །འཁོར་དང་སྟོང་སྡེ་གསེར་དབྱེར་ཀུན་ལ་མཁས། །ས་ཡི་བདག་པོ་སེང་གེའི་གཟི་བྱིན་གྱིས། །རྒྱལ་ཕྲན་གླང་ཆེན་མྱོས་པའི་དྲེགས་འཕྲོག་པ། །མི་དབང་བཀྲ་ཤིས་ལྷ་ལྡེ་བཙན་གྱི་བཀས། །གསང་སྔགས་ཕ་རོལ་ཕྱིན་དང་བདེན་པ་ཡི། །
ལུང་དང་རིགས་པའི་བསྟན་བཅོས་ཀུན་ལ་མཁས། །སྐྱེ་འགྲོ་དམ་པ་མི་དང་མགྱོགས་འགྲོ་ཡི། །ཚེ་ཡི་རིག་བྱེད་ཀུན་ཀྱང་ཞུགས་སླད་དུ། །དམན་ལ་སྙིང་བརྩེ་བག་ཡོད་ཁྲེལ་ལ་སོགས། །གཏོང་ལ་སོགས་པའི་ཡོན་ཏན་རྣམས་དང་ལྡན། །མི་ཤེས་

203-1-277a

བརྡ་སྤྲོད་སྒྲ་བསྒྱུར་ལོ་ཙཱ་བས། །ལྷ་མི་སྐལ་བ་ཅན་གྱི་མཆོད་པའི་གནས། །རིན་ཆེན་ཀུན་ལ་ཡོད་ཀྱང་བཟང་པོ་མེད། །རིན་ཆེན་སྔོན་འགྲོ་བཟང་པོས་མཐའ་བརྒྱན་པ། །གུས་པ་སྔོན་འགྲོའི་བཀའ་ཡིས་རབ་བསྐུལ་བས། །
སྒྲ་དང་ཚད་མའི་བསྟན་བཅོས་ལ་མཁས་པ། །རྒྱ་གར་མཁན་པོ་སངས་རྒྱས་ཞི་དཔལ་དང་། །རྟ་དཔྱད་ཤ་ལི་ཧོ་ཏྲས་བསྡུས་པ་བསྒྱུར། །འདི་ནི་དབང་པོའི་རྡོ་རྗེ་བསྡེབས་ཚུལ་དུ། །ཚིགས་བཅད་ཕྱེད་དང་བདུན་དུ་བྱས་པའོ།།      །།ཨོཾ་སྭ་སྟི་སིདྡྷིཾ།
གྲགས་པའི་འོད་ཟེར་བྱེ་བ་རབ་སྤྲོ་ཞིང་། །རྒྱལ་མཚན་ཐུབ་བསྟན་ཤར་རིའི་རྩེར་སོན་ནས། །ཚོགས་གཉིས་རྟ་ལྗང་ཤུགས་ཀྱིས་གླིང་བཞི་ཡི། །མུན་སེལ་ནམ་མཁའི་ནོར་བུ་དེ་ལ་འདུད། །ཁྱེད་ཀྱིས་བསྐལ་པ་བྱེ་བ་དཔག་ཡས་སུ། །རང་གཞན་དོན་དུ་
ཚོགས་གཉིས་རབ་རྫོགས་བྱས། །ཕུལ་ཆེན་ཤུགས་ཀྱིས་སྟོབས་ཀྱི་འཁོར་ལོས་སྒྱུར། །འཛིན་མའི་ཁྱོན་ཉུལ་ཁམས་གསུམ་བདེ་མཛད་བསྟོད། །བསོད་ནམས་ཕུལ་ཕྱིན་སྟོབས་ཀྱིས་རབ་བསྐྱོད་པས། །སྲིད་ཞིའི་དཔལ་འབྱོར་ལོངས་སྤྱོད་གང་
མཆོག་དང་། །གསང་སྔགས་ལུང་རིགས་མན་ངག་བསྟན་བཅོས་སོགས། །མ་ལུས་ཉིད་ཀྱི་དྲུང་དུ་འདུ་བའི་ཕྱིར། །མངའ་བདག་བཙན་པོ་སྡེ་ཡིས་རབ་བསྒྲུབས་པའི། །མགྱོགས་འགྲོ་དཔལ་མོའི་བུ་ཡི་བླང་དོར་གྱི། །གཏན་ཚིགས་ཆེན་པོ་བསྟན་
བཅོས་རབ་གསལ་བ། །ཤིན་ཏུ་གསང་ཞེས་ཡང་ཡང་གདམས་པ་འདི། །གསང་སྔགས་ཟབ་མོར་སྤྱད་ན་དངོས་གྲུབ་ཐོབ། །འཆོལ་བར་སྤྱོད་པ་མཁས་པའི་ཚུལ་མིན་པས། །ཙནྡན་ཚུལ་དཔང་ཀླུ་དབང་ནོར་བུ་ལྟར། །ཉམས་སུ་དོན་བཞེས་
དཀོར་མཛོད་དུ་གཞག་གསོལ། །ཅེས་པ་དང་བཅས་པ་འདི་དག་ཕག་ལོ་ཟླ་བ་དང་པོའི་ཚེས་གཅིག་གི་ཉིན། ཐོས་པ་ཅུང་ཟད་འཛིན་པ་མ་ཏི་བྷ་དྲས་གསོལ་པ་ཕྱོགས་ཀུན་དུ་བདེ་ལེགས་ཀྱིས་གང་བར་གྱུར་ཅིག།      །།

203-1-277b


204-1-1a