77-1-1a

༼ཆ༽ ༄༅། ༈ །སངས་རྒྱས་ཕལ་པོ་ཆེ་བཞུགས་སོ། །
(黃)  大方廣佛華嚴經第六部

77-1-1b

སངས་རྒྱས་ཕལ་པོ་ཆེ་ཞེས་བྱ་བ་ཤིན་ཏུ་རྒྱས་པ་ཆེན་པོའི་མདོ། 
བམ་པོ་དང་པོ། དེ་ནས་ཚོང་དཔོན་གྱི་བུ་ནོར་བཟངས་མཚན་མོའི་ལྷ་མོ་རབ་ཏུ་དགའ་བའི་
མིག་འགྲོ་བར་རྣམ་པར་སྣང་བའི་བྱང་ཆུབ་སེམས་དཔའི་རྣམ་པར་ཐར་པ་ཀུན་ཏུ་བཟང་པོའི་
དགའ་བ་ཤིན་ཏུ་ཡངས་ཤིང་དྲི་མ་མེད་པའི་ཤུགས་ཀྱི་རྒྱལ་མཚན་དེ་ལ་མོས་པར་བྱ་བ་དང་། 
ཁོང་དུ་ཆུད་པར་བྱ་བ་དང་། རྟོགས་པར་བྱ་བ་དང་། ཤེས་པར་བྱ་བ་དང་། ཡིད་ཆེས་པར་བྱ་བ་
དང་། རབ་ཏུ་གཞོལ་བར་བྱ་བ་དང་། རྒྱས་པར་དགང་བ་དང་། རྗེས་སུ་ཤེས་པར་བྱ་བ་དང་། 
རྗེས་སུ་དྲན་པར་བྱ་བ་དང་། རྗེས་སུ་གཞོལ་བར་བྱ་བ་དང་། བསྒོམ་པ་བྱེད་ཅིང་། དགེ་བའི་
བཤེས་གཉེན་གྱི་གདམས་ངག་ལ་ནན་ཏན་དུ་བྱ་བ་དང་། གདམས་ངག་རྗེས་སུ་བསྟན་པ་ལ་

77-1-2a

བར་ཆད་མེད་པར་བྱ་བའི་ཕྱིར་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བས། འགྲོ་བར་གཏམས་པ་རྗེས་སུ་དྲན་པར་བྱེད་ཅིང་། དགེ་བའི་བཤེས་གཉེན་
བལྟ་བའི་རྗེས་སུ་སེམས་དཔའི་དབང་པོའི་དཀྱིལ་འཁོར་དང་། དགེ་བའི་བཤེས་གཉེན་མཐོང་བ་ཐོབ་པར་བྱ་བ་ལ་ཡང་དག་པར་སྤྱོད་པ། ཕྱོགས་ཀུན་ཏུ་མངོན་པར་ལྟས་པ་དང་། དགེ་བའི་བཤེས་
གཉེན་བཙལ་བར་ཡིད་ལ་བྱ་བ་དང་། ང་རྒྱལ་ཐམས་ཅད་དང་བྲལ་བ་དང་། དགེ་བའི་བཤེས་གཉེན་བསྙེན་བཀུར་བའི་ཚོགས་ཆེན་པོས་ཡོངས་སུ་བསྒྲུབ་པར་ཞེ་ནོན་པ་དང་། དགེ་བའི་བཤེས་གཉེན་དང་། 
རྒྱུད་ཀྱི་ཚུལ་གཅིག་ཏུ་གྱུར་པའི་དགེ་བའི་རྩ་བས་དགེ་བའི་བཤེས་གཉེན་གྱི་ཐབས་མཁས་པའི་སྤྱོད་པ་ཐམས་ཅད་ལ་བསམ་པ་མི་ཕྱེད་པས་ཞུགས་པ། དགེ་བའི་བཤེས་གཉེན་ལ་བརྟེན་པ་ཡོངས་སུ་འཕེལ་
བར་བྱ་བ་ལ་བརྩོན་འགྲུས་ཀྱི་ཤུགས་ཆེན་པོའི་རྒྱ་མཚོ་ཡོངས་སུ་སྐྱེས་པ། བསྐལ་པ་ཐམས་ཅད་དུ་དགེ་བའི་བཤེས་གཉེན་མཉམ་པ་ཉིད་ཁོང་དུ་ཆུད་པར་གནས་པར་བྱ་བའི་སྨོན་ལམ་དང་ལྡན་པ་དེ། 
མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་གྱི་དྲུང་དུ་སོང་ངོ་། །དེ་དེ་ལྟར་འགྲོ་བའི་ཚེ། མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་གྱི་བྱང་ཆུབ་སེམས་དཔའི་རྣམ་
པར་ཐར་པ་འཇིག་རྟེན་ཐམས་ཅད་མངོན་དུ་གྱུར་པས་འགྲོ་བ་རྣམ་པར་འདུལ་བ་སྟོན་པའི་ཁྱུ་མཆོག་གི་མཐུ་ཕྱུང་བ་ཡོངས་སུ་བསྟན་པའི་ཕྱིར། མཚན་དང་དཔེ་བྱད་བཟང་པོས་ཡོངས་སུ་གྲུབ་པའི་ལུས་
བསྟན་ཏེ། མཛོད་སྤུ་ནས་འོད་ཟེར་ཡེ་ཤེས་ཀྱི་འོད་ཀུན་ཏུ་སྣང་བ་དྲི་མ་མེད་པའི་མདངས་ཀྱི་རྒྱལ་མཚན་ཞེས་བྱ་བ་འོད་ཟེར་གྱི་འཁོར་མཐའ་དང་དབུས་མེད་པ་དང་ལྡན་པ་བཀྱེའོ། །དེས་འཇིག་རྟེན་

77-1-2b

ཐམས་ཅད་སྣང་བར་བྱས་ནས། ཚོང་དཔོན་གྱི་བུ་ནོར་བཟངས་ཀྱི་སྤྱི་བོར་འདུས་ཏེ་ལུས་ཐམས་ཅད་དུ་ཁྱབ་པར་གྱུར་ཏོ། །ཚོང་དཔོན་གྱི་བུ་ནོར་བཟངས་ལ་འོད་ཟེར་དེས་རེག་པར་གྱུར་མ་ཐག་ཏུ་
དེ་ཉིད་ཀྱི་མོད་ལ་ཏིང་ངེ་འཛིན་ཤིན་ཏུ་རྡུལ་དང་བྲལ་བ་ཞེས་བྱ་བའི་དཀྱིལ་འཁོར་ཐོབ་པར་གྱུར་ཏོ། །དེ་ཐོབ་པས་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བ་དང་། མཚན་མོའི་
ལྷ་མོ་སེམས་ཅན་ཀུན་ནས་སྐྱོང་བའི་གཟི་བརྗིད་ཀྱི་དཔལ་གཉིས་ཀྱི་བར་གྱི་ལམ་ན་སའི་དཀྱིལ་འཁོར་ཡོད་པ་དེ་ལ་མེའི་རྡུལ་ཤིན་ཏུ་ཕྲ་བ་འམ། ཆུའི་རྡུལ་ཤིན་ཏུ་ཕྲ་བ་འམ། སའི་རྡུལ་ཤིན་ཏུ་ཕྲ་བ་འམ། 
རྡོ་རྗེའི་རྡུལ་ཤིན་ཏུ་ཕྲ་བ་འམ། ནོར་བུ་རིན་པོ་ཆེའི་རྒྱལ་པོ་དམ་པ་སྣ་ཚོགས་ཀྱི་རྡུལ་ཤིན་ཏུ་ཕྲ་བ་དང་། མེ་ཏོག་དང་། སྤོས་དང་། ཕྱེ་མའི་རྡུལ་ཤིན་ཏུ་ཕྲ་བ་འམ། རྒྱན་ཐམས་ཅད་ཀྱི་རྡུལ་
ཤིན་ཏུ་ཕྲ་བ་འམ། དམིགས་པ་ཐམས་ཅད་ཀྱི་རྡུལ་ཤིན་ཏུ་ཕྲ་བ་ཇི་སྙེད་ཅིག་ཡོད་པའི་རྡུལ་ཤིན་ཏུ་ཕྲ་བ་དེ་དག་ཐམས་ཅད་ལ་རྡུལ་ཕྲ་མོ་རེ་རེ་ཞིང་ཡང་། འཇིག་རྟེན་གྱི་ཁམས་སངས་རྒྱས་ཀྱི་
ཞིང་གི་རྡུལ་ཤིན་ཏུ་ཕྲ་བ་སྙེད། ཆུའི་ཕུང་པོ་དང་བཅས། མེའི་ཕུང་པོ་དང་བཅས། རླུང་གི་ཕུང་པོ་དང་བཅས། སའི་ཕུང་པོ་དང་བཅས། འཇིག་རྟེན་གྱི་ཁམས་ཀྱི་མཚམས་
དང་བཅས། གཞི་དང་བཅས། རྟེན་དང་བཅས། དབྱིབས་སྣ་ཚོགས་ཅན་སའི་གཞི་རྣམ་པ་ཐ་དད་པ་སྣ་ཚོགས་དང་ལྡན་པའི་རིའི་འཁོར་སྣ་ཚོགས་ཅན། ཆུ་ཀླུང་དང་མཚོ་སྣ་
ཚོགས་ཀྱིས་བརྒྱན་པ་རྒྱ་མཚོ་སྣ་ཚོགས་ཀྱི་ཀུན་ནས་འཁོར་བ། ལྷ་རྫས་ཀྱི་ཁྱིམ་སྣ་ཚོགས་ཀྱི་རྒྱན་དང་ལྡན་པ། ཤིང་སྣ་ཚོགས་ཀྱིས་ཡོངས་སུ་གང་བ། 

77-1-3a

ནམ་མཁའི་དབྱིངས་ཀྱི་རྒྱན་སྣ་ཚོགས་ཅན། ལྷའི་གྲོངས་ཁྱེར་གྱི་ཁྱིམ་གྱི་རྒྱན་དང་བཅས་པ། ཀླུའི་གྲོང་ཁྱེར་གྱི་ཁྱིམ་གྱི་རྒྱན་དང་བཅས་པ། གནོད་སྦྱིན་གྱི་གྲོང་ཁྱེར་གྱི་ཁྱིམ་གྱི་རྒྱན་དང་བཅས་པ། 
དྲི་ཟའི་གྲོང་ཁྱེར་གྱི་ཁྱིམ་གྱི་རྒྱན་དང་བཅས་པ། ལྷ་མ་ཡིན་གྱི་གྲོངས་ཁྱེར་གྱི་ཁྱིམ་གྱི་རྒྱན་དང་བཅས་པ། ནམ་མཁའ་ལྡིང་གི་གྲོང་ཁྱེར་གྱི་ཁྱིམ་གྱི་རྒྱན་དང་བཅས་པ། མི་འམ་ཅིའི་གྲོང་ཁྱེར་གྱི་ཁྱིམ་གྱི་རྒྱན་དང་བཅས་པ། 
ལྟོ་འཕྱེ་ཆེན་པོའི་གྲོང་ཁྱེར་གྱི་ཁྱིམ་གྱི་རྒྱན་དང་བཅས་པ། མིའི་གྲོང་ཁྱེར་གྱི་ཁྱིམ་གྱི་རྒྱན་དང་བཅས་པ། ཕྱོགས་དང་ཕྱོགས་མཚམས་ཐམས་ཅད་ན་རྣམ་པར་གནས་པའི་སེམས་ཅན་ཐམས་ཅད་ཀྱི་གྲོང་ཁྱེར་གྱི་གནས་
དང་། སེམས་ཅན་དམྱལ་བའི་འཇིག་རྟེན་གྱི་ཡུལ་དང་། བྱོལ་སོང་གི་སྐྱེ་གནས་ཀྱི་འཇིག་རྟེན་གྱི་ཡུལ་དང་། གཤིན་རྗེའི་འཇིག་རྟེན་གྱིས་ཡུལ་དང་། མི་དང་མི་མ་ཡིན་གྱི་ལམ་གྱི་རྒྱུད་ཀྱི་ཤི་འཕོ་བ་དང་། སྐྱེ་བའི་ཡུལ་དང་བཅས་པ་
སྐྱེ་བ་སྣ་ཚོགས་ཀྱིས་མ་འདྲེས་པའི་རྒྱུད་མཐའ་ཡས་པའི་བྱེ་བྲག་ལ་ཡོངས་སུ་གཞོལ་བ་རྣམས་འདུ་ཞིང་འཇིག་པར་གྱུར་པ་མཐོང་ངོ་། །འཇིག་རྟེན་གྱི་ཁམས་དེ་དག་ཀྱང་རྣམ་པ་སྣ་ཚོགས་སུ་མཐོང་སྟེ། འཇིག་རྟེན་གྱི་ཁམས་
ལ་ལ་ནི་ཀུན་ནས་ཉོན་མོངས་པར་མཐོང་ངོ་། །ལ་ལ་ནི་ཡོངས་སུ་དག་པར་མཐོང་ངོ་། །ལ་ལ་ནི་ཤིན་ཏུ་ཀུན་ནས་ཉོན་མོངས་པར་མཐོང་ངོ་། །ལ་ལ་ནི་ལམ་གྱི་རྒྱུད་ཡོངས་སུ་དག་པར་མཐོང་ངོ་། །ལ་ལ་ནི་ཀུན་ནས་
ཉོན་མོངས་པ་ཡོངས་སུ་དག་པར་མཐོང་ངོ་། །ལ་ལ་ནི་རྣམ་པར་དག་པ་ལ་ཀུན་ནས་ཉོན་མོངས་པར་མཐོང་ངོ་། །ལ་ལ་ནི་ཤིན་ཏུ་ཡོངས་སུ་དག་པར་མཐོང་ངོ་། །ལ་ལ་ནི་གཞི་མཉམ་པར་མཐོང་ངོ་། །ལ་ལ་ནི་
སྤྱི་འུ་ཚུགས་སུ་གནས་པར་མཐོང་ངོ་། །ལ་ལ་ནི་སྣྲེལ་གཞིར་འདུག་པར་མཐོང་ངོ་། །འཇིག་རྟེན་གྱི་ཁམས་དེ་དག་གི་སེམས་ཅན་གྱི་ལམ་གྱི་རྒྱུད་དང་། སེམས་ཅན་གྱི་སྐྱེ་གནས་ཐམས་ཅད་ན་མཚན་མོའི་ལྷ་

77-1-3b

མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་སེམས་ཅན་སོ་སོ་ནས་འདུལ་བའི་རྐྱེན་བཞིན་དུ་འཇིག་རྟེན་ཐམས་ཅད་ལ་མ་འདྲེས་པར་ཡོངས་སུ་བསྟན་པའི་ཕྱིར། སེམས་ཅན་ཐམས་ཅད་ལ་མངོན་དུ་གྱུར་པར་
གནས་པར་མཐོང་ངོ་། །སེམས་ཅན་ཚེའི་ཚད་རྣམ་པ་ཇི་ལྟ་བུ་དང་ལྡན་པ་དང་། མོས་པའི་སྤྱོད་ཡུལ་རྣམ་པ་སྣ་ཚོགས་ཅན་དང་། ལུས་རྣམ་པ་སྣ་ཚོགས་ཅན་དང་ལུས་རྣམ་པ་ཇི་ལྟ་བུ་དང་ལྡན་པ་དང་། ངག་གི་རྣམ་
པར་ཕྱེ་བ་དང་། ངེས་པའི་ཚིག་གི་འདུ་བྱེད་ཀྱི་ཐ་སྙད་རྣམ་པ་ཇི་ལྟ་བུ་དང་ལྡན་པ་དང་། སྦྱོར་བའི་རྣམ་པ་ཇི་ལྟ་བུ་དང་ལྡན་པ་དང་། དབང་གི་རྣམ་པ་ཇི་ལྟ་བུ་དང་ལྡན་པ་རྣམས་ཡོངས་སུ་སྨྱིན་པར་བྱ་བ་དང་གདུལ་བའི་དོན་
དུ་སེམས་ཅན་ཐམས་ཅད་ལ་མ་འདྲེས་པར་མངོན་སུམ་དུ་གནས་པར་མཐོང་ངོ་། །དེ་ཡང་འདི་ལྟ་སྟེ། སེམས་ཅན་དམྱལ་བའི་ལམ་གྱི་རྒྱུད་དུ་གཏོགས་པའི་སེམས་ཅན་རྣམས་ཀྱི་སེམས་ཅན་དམྱལ་བའི་སྡུག་བསྔལ་
དང་། འཇིག་པ་རྣམ་པར་བཟློག་པ་དང་། བྱོལ་སོང་གི་སྐྱེ་གནས་སྣ་ཚོགས་སུ་སྐྱེས་པའི་སེམས་ཅན་རྣམས་ཀྱི་གཅིག་ལ་གཅིག་ཟ་བའི་འཇིགས་པ་རྣམ་པར་བཟློག་པ་དང་། གཤིན་རྗེའི་འཇིག་རྟེན་གྱི་ལམ་གྱི་
རྒྱུད་དུ་གཏོགས་པའི་སེམས་ཅན་རྣམས་ཀྱི་བཀྲེས་པ་དང་། སྐོམ་པ་ལ་སྩོགས་པའི་སྡུག་བསྔལ་གྱི་འཇིགས་པ་རྣམ་པར་བཟློག་པ་དང་། ཀླུའི་འཇིག་རྟེན་གྱི་ལམ་གྱི་རྒྱུད་དུ་གཏོགས་པའི་སེམས་ཅན་རྣམས་ཀྱི་
ཀླུའི་སྡུག་བསྔལ་དང་། འཇིགས་པ་ཐམས་ཅད་རྣམ་པར་བཟློག་པ་དང་། འདོད་པའི་ཁམས་སུ་གཏོགས་པའི་སེམས་ཅན་ཐམས་ཅད་ཀྱི་འདོད་པའི་སྡུག་བསྔལ་དང་། འཇིགས་པ་རྣམ་པར་བཟློག་པ་དང་། མིའི་
འཇིག་རྟེན་གྱི་ལམ་གྱི་རྒྱུད་དུ་གཏོགས་པའི་སེམས་ཅན་རྣམས་ཀྱི་མཚན་མོའི་མུན་པ་མུན་ནག་གིས་ཆོད་པའི་མུན་པའི་འཇིགས་པ་ཐམས་ཅད་རྣམ་པར་བཟློག་པ་དང་། མི་སྙན་པ་དང་། བསྔགས་པ་མ་ཡིན་པ་དང་། 

77-1-4a

གྲགས་པ་མ་ཡིན་པའི་སྒྲ་དང་། ཚིགས་སུ་བཅད་པ་ལ་མངོན་པར་ཞེན་པའི་སེམས་ཅན་རྣམས་ཀྱི་གྲགས་པ་མ་ཡིན་པ་དང་། བསྔགས་པ་མ་ཡིན་པའི་འཇིགས་པ་རྣམ་པར་བཟློག་པ་དང་། འཁོར་གྱི་འཇིགས་
པར་ལྟུང་བའི་སེམས་ཅན་རྣམས་ཀྱི་འཁོར་ཏུ་བག་ཚ་བའི་འཇིགས་པ་རྣམ་པར་བཟློག་པ་དང་། འཆི་བས་འཇིགས་ཤིང་སྔང་བའི་སེམས་ཅན་རྣམས་ཀྱི་འཆི་བའི་འཇིགས་པ་རྣམ་པར་བཟློག་པ་དང་། ངན་སོང་གི་
གཡང་སས་འཇིག་ཤིང་སྔང་བའི་སེམས་ཅན་རྣམས་ཀྱི་ངན་སོང་གི་གཡང་སས་འཇིག་པ་རྣམ་པར་བཟློག་པ་དང་། འཆི་བ་མེད་པས་འཇིགས་ཤིང་སྐྲག་པའི་སེམས་ཅན་རྣམས་ཀྱི་འཁོར་དུ་འཆི་བ་མེད་པའི་
བག་ཚ་བའི་འཇིགས་པ་རྣམ་པར་བཟློག་པ་དང་། དགེ་བའི་རྩ་བ་ཆུད་ཟོས་ཀྱིས་འཇིགས་ཤིང་བག་ཚ་བའི་སེམས་ཅན་རྣམས་ཀྱི་དགེ་བའི་རྩ་བ་ཆུད་ཟོས་ཀྱི་འཇིགས་པ་རྣམ་པར་བཟློག་པ་དང་། བྱང་ཆུབ་ཀྱི་
སེམས་ཉམས་ཀྱིས་འཇིགས་ཤིང་བག་ཚ་བའི་སེམས་ཅན་རྣམས་ཀྱི་བྱང་ཆུབ་ཀྱི་སེམས་ཉམས་ཀྱི་འཇིགས་པ་རྣམ་པར་བཟློག་པ་དང་། སྡིག་ཏོའི་གྲོགས་པོ་དང་ཕྲད་ཀྱིས་འཇིགས་ཤིང་བག་ཚ་བའི་སེམས་ཅན་
རྣམས་སྡིག་ཏོའི་གྲོགས་པོ་དང་ཕྲད་པའི་འཇིགས་པ་རྣམ་པར་བཟློག་པ་དང་དགེ་བའི་བཤེས་གཉེན་དང་བྲལ་གྱིས་དོགས་ཤིང་བག་ཚ་བའི་སེམས་ཅན་རྣམས་ཀྱི་དགེ་བའི་བཤེས་གཉེན་དང་བྲལ་བའི་འཇིག་
པ་རྣམ་པར་བཟློག་པ་དང་། ཉན་ཐོས་དང་། རང་སངས་རྒྱས་ཀྱི་སར་ལྟུང་གིས་འཇིགས་ཤིང་བག་ཚ་བའི་སེམས་ཅན་རྣམས་ཀྱི་ཉན་ཐོས་དང་རང་སངས་རྒྱས་ཀྱི་སར་ལྟུང་བའི་འཇིགས་པ་རྣམ་པར་བཟློག་པ་དང་། 
འཁོར་བའི་གནས་སྣ་ཚོགས་ཀྱི་སྡུག་བསྔལ་གྱིས་འཇིགས་ཤིང་སྐྲག་པ་རྣམས་ཀྱི་འཁོར་བའི་གནས་སྣ་ཚོགས་ཀྱི་སྡུག་བསྔལ་གྱིས་འཇིགས་པ་རྣམ་པར་བཟློག་པ་དང་། སེམས་ཅན་སྐལ་བ་མི་མཉམ་པ་དང་ཕྲད་

77-1-4b

ཀྱིས་འཇིགས་ཤིང་བག་ཚ་བ་རྣམས་ཀྱི་སེམས་ཅན་བསྐལ་པ་མི་མཉམ་པ་དང་ཕྲད་པའི་འཇིགས་པ་རྣམ་པར་བཟློག་པ་དང་། དུས་མི་ཟད་པར་སྐྱེས་གྱིས་འཇིགས་ཤིང་བག་ཚ་བ་རྣམས་ཀྱི་དུས་མྱི་ཟད་པར་སྐྱེ་བའི་འཇིགས་
པ་རྣམ་པར་བཟློག་པ་དང་། རིགས་ངན་པར་སྐྱེས་ཀྱི་འཇིགས་ཤིང་བག་ཚ་བ་རྣམས་ཀྱི་རིགས་ངན་པར་སྐྱེ་བའི་འཇིགས་པ་རྣམ་པར་བཟློག་པ་དང་། སྡིག་ཏོའི་ལས་བྱས་ཀྱིས་འཇིགས་ཤིང་བག་ཚ་བ་རྣམས་ཀྱིས་སྡིག་ཏོའི་ལས་
བྱེད་པའི་འཇིགས་པ་རྣམ་པར་བཟློག་པ་དང་། ལས་དང་ཉོན་མོངས་པའི་སྒྲིབ་པས་འཇིགས་ཤིང་སྔང་བ་རྣམས་ཀྱི་ལས་དང་ཉོན་མོངས་པའི་སྒྲིབ་པའི་འཇིག་པ་རྣམ་པར་བཟློག་པ་དང་། འདུ་ཤེས་ཀྱི་རྣམ་པ་སྣ་ཚོགས་ཀྱིས་གནས་དང་
འཆིང་བས་འཇིགས་ཤིང་སྔང་བ་རྣམས་ཀྱི་འདུ་ཤེས་རྣམ་པ་སྣ་ཚོགས་ཀྱི་གནས་དང་། འཆིང་བའི་འཇིགས་པ་རྣམ་པར་བཟློག་པའི་ཕྱིར་སེམས་ཅན་ཐེམ་ཀས་གཅིག་ལ་སོ་སོར་མངོན་ཏུ་གྱུར་པར་གནས་པ་མཐོང་ངོ་། །འདི་ལྟ་
སྟེ་སྒོ་ང་ལས་སྐྱེས་པའི་སེམས་ཅན་དང་། མངལ་ནས་སྐྱེས་པ་དང་། དྲོད་གཤེར་ལས་སྐྱེས་པ་དང་། རྫུས་ཏེ་སྐྱེས་པ་དང་། གཟུགས་ཡོད་པ་དང་། གཟུགས་མེད་པ་དང་། འདུ་ཤེས་ཡོད་པ་དང་། འདུ་ཤེས་མེད་པ་དང་། 
འདུ་ཤེས་ཡོད་པ་འང་མ་ཡིན། འདུ་ཤེས་མེད་པ་ཡང་མ་ཡིན་པའི་སེམས་ཅན་ཐམས་ཅད་ཡོངས་སུ་སྐྱོབ་པའི་སྨོན་ལམ་གྱི་སྟོབས་མངོན་པར་བསྒྲུབ་པ་དང་། བྱང་ཆུབ་སེམས་དཔའི་ཏིང་ངེ་འཛིན་གྱི་ཤུགས་དྲག་པོ་དང་། 
རྣམ་པར་གནོན་པ་ཤིན་ཏུ་ཡངས་པའི་སྟོབས་དང་། བྱང་ཆུབ་སེམས་དཔའི་མངོན་པར་ཤེས་པ་ཆེན་པོའི་སྟོབས་དང་མཐུ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་མངོན་པར་སྒྲུབ་པའི་སྟོབས་
ཀྱིས་སྙིང་རྗེ་ཆེན་པོའི་ཚུལ་རྒྱ་མཚོའི་ཤུགས་དྲག་པོ་ཤིན་ཏུ་སྐྱེས་པའི་ཕྱིར་འགྲོ་བ་ཐམས་ཅད་དུ་ཐོགས་པ་མེད་པའི་བྱམས་པ་ཆེན་པོས་རྒྱས་པར་དགང་བ་དང་། སེམས་ཅན་ཐམས་ཅད་ཀྱི་བདེ་བ་ཡོངས་སུ་

77-1-5a

བསྒྲུབ་པ་དང་། དགའ་བའི་ཤུགས་རྣམ་པར་འཕེལ་བར་བྱ་བ་དང་། སེམས་ཅན་ཐམས་ཅད་ཡོངས་སུ་བསྡུ་བའི་ཡེ་ཤེས་རབ་ཏུ་བསྒྲུབ་པའི་ཕྱིར། བྱང་ཆུབ་སེམས་དཔའི་རྣམ་པར་ཐར་པ་རྒྱ་ཆེན་པོའི་
རྣམ་པར་འཕྲུལ་པ་དང་། ཁྱུ་མཆོག་གི་མཐུ་ཕྱུང་བ་དང་ལྡན་པས། ཞིང་ཐམས་ཅད་ཡོངས་སུ་དག་པར་བྱ་བ་ལ་མངོན་ཏུ་གྱུར་པར་མཐོང་ངོ་། །ཆོས་ཐམས་ཅད་ཀྱི་རྒྱུས་ཤེས་པར་བྱ་བ་ལ་མངོན་ཏུ་གྱུར་པ་དང་། 
སངས་རྒྱས་ཐམས་ཅད་མཆོད་ཅིང་རིམ་གྲོར་བྱ་བ་ལ་མངོན་དུ་གྱུར་པ་དང་། དེ་བཞིན་གཤེགས་པ་ཐམས་ཅད་ཀྱི་བསྟན་པ་ཡོངས་སུ་གཟུང་བ་ལ་མངོན་དུ་གྱུར་པ་དང་། དགེ་བའི་རྩ་བ་ཐམས་ཅད་བསྩགས་པ་ལ་མངོན་དུ་
གྱུར་པ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་རྣམ་པར་འཕེལ་བར་བྱ་བ་ལ་མངོན་དུ་གྱུར་པ་དང་། སེམས་ཅན་ཐམས་ཅད་ཀྱི་སེམས་ལ་སྒྲིབ་པ་མེད་པར་མངོན་དུ་གྱུར་པར་གནས་པ་དང་། སེམས་ཅན་ཐམས་
ཅད་ཀྱི་དབང་པོ་ཡོངས་སུ་སྨིན་པར་བྱ་བ་ལ་མངོན་དུ་གྱུར་པར་གནས་པ་དང་། སེམས་ཅན་ཐམས་ཅད་ཀྱི་མོས་པ་རྒྱ་མཚོ་རྣམ་པར་སྦྱང་བ་ལ་མངོན་དུ་གྱུར་པ་དང་། སེམས་ཅན་ཐམས་ཅད་ཀྱི་སྒྲིབ་པའི་ཆོས་
རྣམ་པར་བཟློག་པ་ལ་མངོན་དུ་གྱུར་པ་དང་། སེམས་ཅན་ཐམས་ཅད་ཀྱི་མི་ཤེས་པའི་མུན་པ་རྣམ་པར་བསྩལ་བ་ལ་མངོན་དུ་གྱུར་ཅིང་ཐམས་ཅད་མཁྱེན་པའི་ཡེ་ཤེས་སྣང་བ་ཡོངས་སུ་བསྐྱེད་པའི་དོན་དུ་གནས་པ་
མཐོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་གྱིས་མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་གྱི་བྱང་ཆུབ་སེམས་དཔའི་རྣམ་པར་ཐར་པའི་ཁྱུ་མཆོག་གི་མཐུ་ཕྱུང་བ་དང་། རྣམ་པར་འཕྲུལ་
པ་འཇིག་རྟེན་ཐམས་ཅད་ལ་མངོན་པར་གནས་ཤིང་། འགྲོ་བ་རྣམ་པར་འདུལ་བ་སྟོན་པ་བསམ་གྱི་མི་ཁྱབ་པ་དེ་ལྟ་བུར་མཐོང་ནས་རབ་ཏུ་དགའ་བ་སྐྱེས་ཏེ། སྤྲོ་བ་ཆེན་པོའི་ཤུགས་དྲག་པོ་རྒྱ་མཚོ་རབ་ཏུ་ཐོབ་ནས། 

77-1-5b

མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་ལ་ལུས་ཐམས་ཅད་ཀྱིས་ཕབ་སྟེ་ཕྱག་བྱས་ནས་ངོར་གྱེན་དུ་བལྟསོ། །དེ་ནས་མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་
གྱིས་བྱང་ཆུབ་སེམས་དཔའི་གཟུགས་དང་། མཚན་རྣམ་པར་དག་པ་དེ་མི་སྣང་བར་བྱས་ཏེ། མཚན་མོའི་ལྷ་མོའི་གཟུགས་སུ་བྱས་ཏེ། རྣམ་པར་འཕྲུལ་པ་ཐམས་ཅད་འབྱིན་ཅིང་འདུག་པར་གནས་སོ། །དེ་ནས་ཚོང་
དཔོན་གྱི་བུ་ནོར་བཟངས་གྱིས་མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་གྱི་མདུན་དུ་འདུག་སྟེ། ཐལ་མོ་སྦྱར་ནས་དེའི་ཚེ་ཚིགསུ་བཅད་པ་འདི་དག་སྨྲས་སོ། །ཁྱོད་ཀྱི་སྐུ་ཡངས་མཚན་རབ་
རྒྱན་གྱིས་བརྒྱན། །ཤིན་ཏུ་བཟང་ཞིང་མཛེས་པ་བདག་གིས་མཐོང་། །ནམ་མཁའ་སྐར་མའི་ཚོགས་ཀྱིས་བརྒྱན་པ་བཞིན། །དཔེ་བྱད་བཟང་པོས་རྣམ་པར་བྲིས་པ་མཐོང་། །འོད་ཀྱི་འཁོར་ཅན་སྐུ་བཟང་དམ་པའི་
མཆོག །མཐའ་ཡས་ཞིང་གི་རྡུལ་ཁམས་མང་པོ་སྙེད། །ཁ་དོག་སྣ་ཚོགས་རྣམ་པའི་དཔེ་ཚུལ་དུ། །ཕྱོགས་རྣམས་ཀུན་གྱི་དབྱིངས་སུ་ཁྱབ་པར་གང་། །འོད་ཟེར་དྲ་བ་མང་པོ་འགྲོ་སེམས་མཉམ། །ཁྱོད་ཀྱི་བ་
སྤུའི་སྒོ་ནས་འགྱེད་པ་མཛད། །འོད་གཟེར་སྒོ་ལ་པད་མོ་ཡིད་འོང་གནས། །ཁྱོད་ཀྱི་སྤྲུལ་པ་འགྲོ་བའི་སྡུག་བསྔལ་སེལ། །སྤོས་ཀྱི་ན་བུན་སྤྲིན་དུ་ཆགས་པ་འགྱེད། །འགྲོ་བའི་གཟུགས་སུ་གནས་ཏེ་ཀུན་ནས་
མཛེས། །མེ་ཏོག་སྒོ་རྣམས་ཀུན་ནས་དགྱེས་མཛད་པས། །ཆོས་དབྱིངས་བཞུགས་པའི་རྒྱལ་བ་ཀུན་ཏུ་ཁྱབ། །ཁྱོད་ཀྱི་ཕྲག་པའི་ལྷུན་ཡངས་འཕགས་པ་ནི། །རིན་ཆེན་འོད་འཕྲོ་རི་བོ་རི་རབ་འདྲ། །
དྲི་མེད་དེ་ནི་འགྲོ་བ་ཀུན་ཏུ་གསལ། །གཏི་མུག་མུན་ནག་རྣམ་པར་བཟློག་པ་མཛད། །ཁྱོད་ཀྱི་དྲི་མེད་ཞལ་མདོག་བཟང་བ་ལས། །ན་བུན་སྤྲིན་དང་ཉི་མ་ཡངས་པ་འབྱུང་། །ཁྱོད་ཀྱི་ཉི་མའི་དཀྱིལ་འཁོར་འདྲ་འོད་

77-1-6a

བཟང་། རྣམ་པར་སྣང་མཛད་སྤྱོད་ཡུལ་ཡངས་པ་འབྱིན། ཁྱོད་ཀྱི་སྤྱན་ནས་ཟླ་སྐར་འོད་འབྱུང་བ། །རྟག་ཏུ་དྲི་མེད་སྤྲིན་ལྟར་མང་བ་སྟེ། དེ་དག་ཕྱོགས་བཅུར་བཀང་ཞིང་འགྲོ་བ་རྣམས། །རབ་ཏུ་སྣང་བྱེད་འཇིག་
རྟེན་རབ་རིབ་སེལ། །ཁྱོད་ཀྱི་མཚན་ལས་འགྲོ་བའི་ལུས་མཉམ་པའི། །སྤྲུལ་པ་རྒྱ་མཚོ་ཕྱོགས་སུ་ཁྱབ་པར་འཕྲོ། །ད་དག་ཆོས་དབྱིངས་ཡངས་པར་རྒྱས་འགེངས་ཤིང་། །སེམས་ཅན་ཚད་མེད་ཚོགས་རྣམས་ཡོངས་
སུ་འདུལ། །ཁྱོད་ཀྱི་སྐུ་ནི་འབྱམ་ཀླས་ང་ཕྱོགས་སུ་སྣང་། །འགྲོ་བ་ཀུན་ལ་མངོན་འབྱུང་དགའ་བ་བསྐྱེད། །རྒྱལ་པོ་མྱེ་དང་རྐུན་པོ་ཆུས་བསྐྱེད་པའི། །འཇིགས་པ་ཐམས་ཅད་རྣམ་སེལ་ཞི་བར་མཛད། །གང་ཚེ་ཁྱོད་ཀྱི་སྤྱན་
སྔར་བདག་བཏང་ནས། །ཡོན་ཏན་རྣམ་པར་སེམས་ཤིང་ཉེར་ཕྱིན་པ། །དེའི་ཚེ་འོད་གཟེར་དྲི་མེད་འཁོར་བཟང་བ། །ཁྱོད་ཀྱི་ཞལ་གྱི་སྨིན་མཚམས་གསེབ་ནས་འཐོན། །ཕྱོགས་རྣམས་རྒྱ་མཚོ་བརྒྱ་མང་སྣང་མཛད་ནས། །
འཇིག་རྟེན་སྣང་བ་རྒྱ་ཆེ་ཡོངས་བསྐྱེད་དེ། །རྣམ་འཕྲུལ་རྣམ་པ་མང་པོ་རྣམ་བསྟན་ནས། །དེ་ཚེ་བདག་གི་ལུས་ཀྱི་གསེབ་ཏུ་ཞི། །གང་ཚེ་འོད་ཀྱི་འཁོར་གྱིས་བདག་རེག་པ། །དེ་ཚེ་བདེ་བ་རྨད་བྱུང་ཡངས་པ་མྱོང་། །གཟུངས་དང་
ཏིང་འཛིན་བརྒྱ་མང་ཡོངས་སུ་གནོན། །ཕྱོགས་བཅུའི་རྒྱལ་བ་དཔག་ཡས་མཐོང་བར་འགྱུར། །གོམ་པ་རྣམ་བོར་གྱེན་དུ་བཏེག་པ་ལ་འང་། །རྡུལ་ཕྲན་གྲངས་སྙེད་ཚུལ་ནི་བདག་གིས་རིག །རྡུལ་ཕྲན་ཤིན་ཏུ་ཕྲ་བ་
གཅིག་ལ་ཡང་། །ཞིང་གི་རྡུལ་སྙེད་ཞིང་རྣམས་མཐོང་བར་གྱུར། །རྡུལ་ལ་གནས་ཀྱང་རྣམ་པ་ཐ་གུ་སྟེ། །ཞིང་མང་བརྒྱ་ནི་ཤིན་ཏུ་ཉོན་ཡང་མོངས། །དེ་ཡི་འགྲོ་བ་སྡུག་བསྔལ་ཉམས་སུ་མྱོང་། །ཆོ་ངེར་ངུ་ཞིང་སྨྲེ་སྔགས་
ཡོངས་སུ་འདོན། །ཞིང་མང་ལ་ལ་ཀུན་ནས་ཉོན་མོངས་དག །དེ་ན་སྡུག་བསྔལ་མང་ཞིང་བདེ་བ་ཆུང་། །རྒྱལ་བ་ཐུགས་རྗེ་ཅན་ཡང་དེར་སྐྱེས་སྟེ། །རྒྱལ་བའི་ཉན་ཐོས་རང་རྒྱལ་དེ་བཞིན་ནོ། །ཞིང་ཚུལ་ལ་ལ་ཡོངས་དག་

77-1-6b

ཉོན་མོངས་སྟེ། །བྱང་ཆུབ་སེམས་དཔའི་གནས་བཟངས་མང་པོས་བརྒྱན། །སྐྱེས་པ་བུད་མེད་ཡོངས་བརྒྱན་བལྟ་ན་སྡུག །སྐྱོན་མེད་རྒྱལ་བའི་གདུང་ཡང་རྒྱུན་མི་འཆད། །ཞིང་རྣམས་རྒྱ་མཚོ་ཡངས་ཤིང་དྲི་མྱེད་པ། །
རྡུལ་ལ་གནས་ཤིང་མཉམ་པའི་གཞི་དང་ལྡན། །དེ་དག་བསྐལ་པ་བརྒྱ་མང་སྔོན་གྱི་ཚེ། །རྣམ་པར་སྣང་མཛད་སྤྱོད་མཛད་ཡོངས་སུ་མཛད། །ཞིང་རྣམས་འབྱམ་ཀླས་ཀུན་ན་རྒྱལ་བ་དག །ཤིང་དབང་དམ་པའི་དྲུང་
དུ་གཤེགས་པ་བསྟན། །རྣམ་པར་འཕྲུལ་ཞིང་བྱང་ཆུབ་འཚང་ཡང་རྒྱ། །ཆོས་ཀྱི་འཁོར་ལོ་བསྐོར་ཅིང་འདུལ་བ་སྟོན། །རྣམ་པར་སྣང་མཛད་སྤྱོད་ཡུལ་ཡངས་པ་ལ། །ཁྱོད་ཀྱང་ཀུན་ཏུ་རྗེས་སུ་ཞུགས་
པར་མཐོང་། །མཆོད་པ་སྟོང་ཕྲག་ཚད་མེད་ཁྲག་ཁྲིག་གིས། །རྒྱལ་བ་ཀུན་ལ་མངོན་པར་མཆོད་མཛད་དོ། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་ཚིགས་སུ་བཅད་པ་དེ་དག་སྨྲས་ནས། མཚན་མོའི་ལྷ་མོ་སེམས་
ཅན་ཀུན་ཏུ་སྐྱོང་བའི་གཟི་བརྗིད་དཔལ་ལ་འདི་སྐད་ཅེས་སྨྲས་སོ། །ལྷ་མོ་བྱང་ཆུབ་སེམས་དཔའི་རྣམ་པར་ཐར་པ་དེ། དེ་ལྟ་བུ་ཟབ་པ་ནི་ངོ་མཚར་ཆེ་ན། རྣམ་པར་ཐར་པ་དེའི་མིང་ནི་ཅི་ཞེས་བགྱི། དེ་ཁྱོད་ཀྱིས་བརྙེས་ནས་
ཡུན་ནི་ཇི་སྲིད་ཅིག་ལགས། བྱང་ཆུབ་སེམས་དཔས་ཇི་ལྟར་ནན་ཏན་དུ་བགྱིས་ན་རྣམ་པར་ཐར་པ་དེ་ཡོངསུ་དག་པར་འགྱུར། སྨྲས་པ་རིགས་ཀྱི་བུ་གནས་འདི་ནི་ལྷ་དང་བཅས་པའི་འཇིག་རྟེན་དང་། ཉན་ཐོས་དང་རང་
སངས་རྒྱས་སུ་བཅས་པས་ཡིད་ཆེས་པར་དཀའ་བ་སྟེ། དེ་ཅིའི་ཕྱིར་ཞེ་ན། འདི་ནི་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་ཁོང་དུ་ཆུད་པ་རྣམས་ཀྱི་སྤྱོད་ཡུལ་ཏེ། འདི་ནི་བྱང་ཆུབ་སེམས་དཔའ་
སྙིང་རྗེ་ཆེན་པོ་ལྷུར་ལེན་པ། འགྲོ་བ་ཐམས་ཅད་ཡོངས་སུ་སྐྱོབ་པ་ལ་ཞུགས་པ། མི་ཁོམ་པ་དང་ངན་སོང་དང་། ངན་འགྲོའི་ལམ་ཐམས་ཅད་རྣམ་པར་བཟློག་པ་ལ་ཞུགས་པ། སངས་རྒྱས་ཀྱི་ཞིང་ཐམས་ཅད་སངས་རྒྱས་

77-1-7a

ཀྱི་ཞིང་ཡོངས་སུ་དག་པ། བླ་ན་མེད་པར་བྱ་བ་ལ་ཞུགས་པ། སངས་རྒྱས་ཀྱི་ཞིང་ཐམས་ཅད་ན་བཞུགས་པའི་དེ་བཞིན་གཤེགས་པའི་རིགས་རྒྱུན་མི་གཅོད་པ་ལ་ཞུགས་པ། སངས་རྒྱས་ཀྱི་བསྟན་པ་ཡོངསུ་
གཟུང་བ་ལ་ཞུགས་པ། བསྐལ་པ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་ལ་གནས་པས། གནས་པར་བྱ་བའི་སྨོན་ལམ་ཆེན་པོ་རྒྱ་མཚོ་ལ་ཞུགས་པ། ཆོས་རྒྱ་མཚོ་ཐམས་ཅད་ལ་སྒྲིབ་པ་མེད་པའི་ཡེ་ཤེས་
སྣང་བ་རྣམ་པར་སྦྱང་བ་ལ་ཞུགས་པ། སྐད་ཅིག་རེ་རེ་ཞིང་དུས་གསུམ་གྱི་ཚུལ་རྒྱ་མཚོ་ཐམས་ཅད་དུ་ཡེ་ཤེས་སྣང་བས། རྣམ་པར་གནས་པ་རབ་ཏུ་ཐོབ་པ་རྣམས་ཀྱི་ཡུལ་ཏེ། འོན་ཀྱང་དེ་བཞིན་གཤེགས་
པའི་བྱིན་གྱི་རླབས་ཀྱིས་བསྟན་པར་བྱའོ། །རིགས་ཀྱི་བུ་སྔོན་འདས་པའི་དུས་བསྐལ་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་གཅིག་གི་ཕ་རོལ་ཏུ་འཇིག་རྟེན་གྱི་ཁམས་རྣམ་པར་སྣང་མཛད་གཟི་བརྗིད་
དཔལ་ཞེས་བྱ་བར་བསྐལ་པ་རྡུལ་དང་བྲལ་བའི་དཀྱིལ་འཁོར་ཅེས་བྱ་བ་བྱུང་སྟེ། བསྐལ་པ་དེ་དག་ལ་སངས་རྒྱས་རི་རབ་གྱི་རྡུལ་ཤིན་ཏུ་ཕྲ་བ་སྙེད་ཅིག་བྱུང་བར་གྱུར་ཏོ། །འཇིག་རྟེན་གྱི་ཁམས་རྣམ་པར་སྣང་
མཛད་གཟི་བརྗིད་དཔལ་ཞེས་བྱ་བ་དེ་ནི་རིན་པོ་ཆེ་ཐམས་ཅད་ཀྱི་སྤྲིན་གྱི་རྒྱན་གྱིས་བརྒྱན་པ་སྟེ། རྡོ་རྗེ་ལས་བྱས་པའི་གཞལ་མེད་ཁང་དང་། གནས་ཀྱིས་ཡོངས་སུ་མཛེས་པར་བྱས་པའོ། །འཇིག་རྟེན་གྱི་ཁམས་
དེའི་གཞི་ནི་རིན་པོ་ཆེའི་རྒྱལ་པོ་དྲི་མ་མེད་པའི་འོད་ཀྱི་རྒྱ་མཚོ་ལས་བླངས་པ་སྟེ། ལྷུན་དང་ལུས་ནི་ནོར་བུ་རིན་པོ་ཆེའི་སྤོས་ཐམས་ཅད་ཀྱི་རྒྱལ་པོ་ལས་གྱུར་པའོ། །དེ་ནི་དབྱིབས་ཀུན་ཏུ་ཟླུམ་པ་སྟེ། རྣམ་པར་དག་
ཅིང་ཀུན་ནས་ཉོན་མོངས་པ། ལྷབ་ལྷུབ་ཐམས་ཅད་ཀྱི་སྤྲིན་གྱི་བླ་རེས་ཀུན་ནས་ཁྱབ་པ། རིན་པོ་ཆེའི་ཁོར་ཡུག་རྒྱན་ཐམས་ཅད་དང་ལྡན་པ། རིམ་པ་སྟོང་གིས་ཡོངས་སུ་བསྐོར་བ། གླིང་བཞི་པ་བྱེ་བ་ཁྲག་ཁྲིག་བརྒྱ་

77-1-7b

ཕྲག་སྟོང་གིས་ཤིན་ཏུ་རྒྱས་པར་བརྒྱན་པ་སྟེ། དེ་ལ་གླིང་བཞི་པ་ལ་ལ་ནི་ཀུན་ནས་ཉོན་མོངས་པ་སྟེ། སེམས་ཅན་ཀུན་ནས་ཉོན་མོངས་པའི་ལས་དང་ལྡན་པ་རྣམས་ཀྱི་གནས་སོ། །ལ་ལ་ནི་ཀུན་ནས་
ཉོན་མོངས་ཤིང་རྣམ་པར་དག་པ་སྟེ། སེམས་ཅན་ལས་འདྲེན་མ་དང་ལྡན་པ་རྣམས་ཀྱི་གནས་སོ། །ལ་ལ་ནི་རྣམ་པར་དག་ཅིང་ཀུན་ནས་ཉོན་མོངས་པ་སྟེ། སེམས་ཅན་ཡོངས་སུ་དག་ཅིང་ཀུན་ནས་ཉོན་མོངས་
པ་དགེ་བའི་རྩ་བ་སྦྱངས་པ། ཁ་ན་མ་ཐོ་བ་ཉུང་བ་རྣམས་ཀྱི་གནས་སོ། །ལ་ལ་ནི་ཤིན་ཏུ་ཡོངས་སུ་དག་པ་སྟེ། བྱང་ཆུབ་སེམས་དཔའ་དག་པ་རྣམས་ཀྱི་གནས་སོ། །འཇིག་རྟེན་གྱི་ཁམས་རྣམ་པར་སྣང་
མཛད་གཟི་བརྗིད་དཔལ་ཞེས་བྱ་བ་དེའི་ཤར་ཕྱོགས་ཀྱི་འཁོར་ཡུག་གི་མཚམས་ན་གླིང་བཞི་པའི་རིན་པོ་ཆེའི་མེ་ཏོག་སྒྲོལ་མའི་རྒྱལ་མཚན་ཞེས་བྱ་བ་རྣམ་པར་དག་ཅིང་ཀུན་ནས་ཉོན་མོངས་པ། མ་རྨོས་
མ་བསྐྱེད་པའི་འབྲས་ལ་ཡོངས་སུ་སྤྱོད་པ། སྔོན་གྱི་ལས་ཀྱི་རྣམ་པར་སྨིན་པས་མངོན་པར་གྲུབ་པའི་ཁང་པ་བརྩེག་པའི་གནས་དང་། གཞལ་མེད་ཁང་ལ་ཡོངས་སུ་སྤྱོད་པ། འཁོར་ཀུན་ནས་ཡིད་བཞིན་གྱི་ཤིང་
གིས་འཁོར་བ། སྤོས་ཀྱི་ཤིང་སྣ་ཚོགས་ཀྱི་ལྷུན་ལས་སྤོས་ཀྱི་སྤྲིན་རྒྱུན་མི་འཆད་པར་འབྱུང་བ། ཕྲེང་བ་སྣ་ཚོགས་ཀྱི་ཤིང་ལས་ཕྲེང་བའི་སྤྲིན་རྒྱུན་མི་འཆད་པར་འབྱུང་བ། མེ་ཏོག་སྣ་ཚོགས་ཀྱི་ཤིང་ལས་མེ་
ཏོག་ཁ་དོག་དང་དྲི་བསམ་གྱིས་མི་ཁྱབ་པའི་སྤྲིན་རྒྱ་མཚོ་རྒྱུན་མི་འཆད་པར་འབབ་པ་ཕྱེ་མ་དང་ཁ་དོག་སྣ་ཚོགས་ཀྱི་ཤིང་གི་ལྷུན་ལ་སྤོས་རིན་པོ་ཆེའི་རྒྱལ་པོ་ཐམས་ཅད་ཀྱི་ཕྱེ་མའི་ཆར་རྒྱུན་མི་འཆད་པར་འབབ་པ་
རིན་པོ་ཆེའི་ཤིང་སྣ་ཚོགས་ལས་རིན་པོ་ཆེའི་འབྲུ་མང་པོ་འབུལ་བའི་ཁ་དོག་སྣང་བས་ཤིན་ཏུ་སྣང་བར་བྱས་པ། ལྷ་རྫས་ཀྱི་རོལ་མོ་སྣ་ཚོགས་ཀྱི་ཤིང་ལས་སིལ་སྙན་སྣ་ཚོགས་ཀྱི་སྤྲིན་རླུང་གིས་བསྐྱོད་ཅིང་ནམ་

77-1-8a

མཁའི་དབྱིངས་ལས་སྒྲ་དབྱངས་སྙན་པ་འབྱུང་བ། ཉིན་མཚན་གྱི་བདེ་བ་ཉི་མ་དང་ཟླ་བས་འབྱུང་བ། ནོར་བུ་རིན་པོ་ཆེ་ཀུན་ཏུ་སྣང་བས་གཞི་བྱས་པའི་ས་རབ་ཏུ་མཉམ་པར་གྱུར་པ་སྟེ། གླིང་བཞི་པོ་དེར་
རྒྱལ་པོའི་ཕོ་བྲང་བྱེ་བ་ཁྲག་ཁྲིག་བརྒྱ་སྟོང་བྱུང་བར་གྱུར་ཏེ། རྒྱལ་པོའི་ཕོ་བྲང་དེ་དག་རེ་རེ་ཞིང་ཡང་ཆུ་ཀླུང་སྟོང་གིས་ཡོངས་སུ་བསྐོར་བའོ། །ཆུ་ཀླུང་དེ་དག་ཐམས་ཅད་ཀྱང་ལྷ་རྫས་ཀྱི་མེ་ཏོག་སིལ་མས་གང་བའོ། །
ལྷ་རྫས་ཀྱི་རོལ་མོ་དང་གླུའི་སྒྲ་སྐད་སྙན་ཅིང་ཡིད་དུ་འོང་བ་འབྱིན་པའོ། །ཆུ་འགྲམ་རིན་པོ་ཆེའི་ཤིང་ཡིད་དུ་འོང་བས་རྣམ་པར་བརྒྱན་པའོ། །རིན་པོ་ཆེ་སྣ་ཚོགས་ཀྱི་ཤིན་ཏུ་བརྒྱན་པའི་གྲུ་ཕན་ཚུན་རྒྱུ་བའོ། །བདེ་བ་
སྣ་ཚོགས་ཅི་དགའ་བར་ཡོངས་སུ་སྤྱད་དུ་ཡོད་པའོ། །ཆུ་ཀླུང་གི་མཚམས་ཀྱི་གཞི་རེ་རེ་དག་ན་འང་གྲོང་ཁྱེར་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ཀུན་ནས་གནས་པ་སྟེ། གྲོང་ཁྱེར་དེ་དག་རེ་རེ་ཞིང་ཡང་གྲོང་བརྡལ་
བྱེ་བ་ཁྲག་ཁྲིག་བརྒྱ་ཕྲག་སྟོང་གིས་ཡོངས་སུ་བསྐོར་བའོ། །གྲོང་དང་གྲོང་ཁྱེར་དང་གྲོང་བརྡལ་དེ་དག་ཐམས་ཅད་ཀྱང་ལྷ་རྫས་ཀྱི་བཟའ་ཤིང་གི་ར་བ་དང་། གཞལ་མེད་ཁང་དང་། ཁང་པ་བྱེ་བ་ཁྲག་ཁྲིག་བརྒྱ་
ཕྲག་སྟོང་གི་འཁོར་གྱིས་ཡོངས་སུ་བསྐོར་བའོ། །གླིང་བཞི་པའི་དེའི་འཛམ་བུའི་གླིང་གི་དབུས་ན་རྒྱལ་པོའི་ཕོ་བྲང་དབུ་མ་རིན་པོ་ཆེའི་མེ་ཏོག་སྒྲོན་མ་ཞེས་བྱ་བ་ཡོད་པར་གྱུར་ཏོ། །དེ་ནི་བསྐྱིད་ཅིང་ལོངས་སྤྱོད་
ཕུན་སུམ་ཚོགས་པ་དང་ལྡན་ལ། རྟག་དུ་ལོ་ལེགས་ཤིང་བདེ་བའི་རྣམ་པ་ཐམས་ཅད་དང་ལྡན་པའོ། །ལྷ་དང་མི་མང་པོས་ཡོངསུ་གང་བའོ། །སེམས་ཅན་དགེ་བ་བཅུའི་ལས་ཀྱི་ལམ་དང་ལྡན་པ་རྣམས་ཀྱི་གནས་
སུ་གྱུར་པ་སྟེ། རྒྱལ་པོའི་ཕོ་བྲང་རིན་པོ་ཆེའི་མེ་ཏོག་སྒྲོན་མ་ཞེས་བྱ་བ་དེ་ན་རྒྱལ་པོ་རྣམ་པར་སྣང་བ་རིན་ཆེན་པད་མོ་དཔལ་གྱི་གཙུག་ཕུད་སྙིང་པོ་ཞེས་བྱ་བ་འཁོར་ལོས་བསྒྱུར་བ། གླིང་བཞི་ལ་དབང་བ་པད་མོའི་

77-1-8b

སྙིང་པོ་ལས་རྫུས་ཏེ་བྱུང་བ། མི་ཆེན་པོའི་མཚན་སུམ་བཅུ་རྩ་གཉིས་ཀྱིས་ལུས་ཤིན་ཏུ་བརྒྱན་པ་ཆོས་དང་ལྡན་པ། ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་གནས་པར་གྱུར་ཏོ། །དེའི་བུ་དཔའ་ཞིང་རྡུལ་ཕོད་
ལ་ཡན་ལག་དམ་པའི་གཟུགས་དང་ལྡན་པ། གཞན་གྱི་འཁོར་རབ་ཏུ་འཇོམས་པ། རྣམ་པ་ཐམས་ཅད་ཡོངས་སུ་ཚང་བའི་ཡན་ལག་དམ་པ་དང་ལྡན་པ་སྟོང་ཚང་བར་བྱུང་ངོ་། །དེའི་བཙུན་མོའི་འཁོར་གྱི་
བུད་མེད་ཀྱང་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ཡོད་པར་གྱུར་ཏོ། །དེ་དག་ཀུན་ཀྱང་འཁོར་ལོས་བསྒྱུར་བའི་བསྐལ་པ་དང་མཉམ་པའི་དགེ་བའི་རྩ་བ་ལས་བྱུང་བ་མཐུན་པར་སྤྱོད་པ་རིན་པོ་ཆེའི་རྒྱན་རང་འཁྲུངས་
སུ་བྱུང་བ། དགེ་བའི་སེམས་དང་ལྡན་པ། ལྷའི་བུ་མོ་དང་ཁྱད་པར་མེད་པར་འདྲ་བའི་གཟུགས་ཅན། འཛམ་བུ་ཆུ་ཀླུང་གི་གསེར་གྱི་ཁ་དོག་དང་ལྡན་པའི་ལུས་ཅན། ལུས་ཀྱི་བ་སྤུ་ལས་ལྷ་རྫས་ཀྱི་སྤོས་སྣ་
ཚོགས་འབྱུང་བ། ལུས་ལས་ལྷ་རྫས་ཀྱི་འོད་དྲི་ཞིམ་པོ་དྲི་མ་མེད་པར་རབ་ཏུ་འགྱེད་པ་ཤ་སྟག་གོ། །དེའི་བློན་པོ་བྱེ་བ་ཕྲག་བཅུ་བྱུང་སྟེ་བློན་པོ་རིན་པོ་ཆེ་ལ་སྩོགས་པ་དག་གོ། །འཁོར་ལོས་བསྒྱུར་བའི་
རྒྱལ་པོ་རྣམ་པར་སྣང་བ་རིན་ཆེན་པད་མོ་དཔལ་གྱི་གཙུག་ཕུད་སྙིང་པོ་དེའི་བཙུན་མོ་དམ་པ་བུད་མེད་རིན་པོ་ཆེ་དཔལ་གྱི་བཞིན་ཡོངས་སུ་རྒྱས་པ་ཞེས་བྱ་བ་གཟུགས་མཛེས་ཤིང་སྡུག་ལ། བལྟ་ན་ཡིད་
དུ་འོང་བ་ཁ་དོག་བཟང་པོ་ཤིན་ཏུ་རྒྱས་པའི་དམ་པ་དང་ལྡན་པ་སྐྲ་མཐོན་ཏིང་དུ་འདུག་པ། མིག་དཀར་ནག་འབྱེས་པ། མདོག་གསེར་གྱི་ཁ་དོག་དུ་འདུག་པ། ཚངས་པའི་དབྱངས་དང་ལྡན་པ། ལུས་ལས་
འོད་རྟག་ཏུ་འབྱུང་བ། འཁོར་ཀུན་ཏུ་དཔག་ཚད་སྟོང་གི་ཚད་དུ་འོད་ཁ་དོག་དུ་མ་དང་ལྡན་པ། ལྷ་རྫས་ཀྱི་དྲི་ཞིམ་པོ་ཅན་འགྱེད་པ་བྱུང་ངོ་། །རྒྱལ་པོའི་བཙུན་མོ་དཔལ་གྱི་བཞིན་ཡོངས་སུ་རྒྱས་པ་ཞེས་བྱ་བ་དེ་

77-1-9a

ལས་བུ་མོ་པད་མོ་བཟང་མོ་མིག་ཡིད་དུ་འོང་བའི་དཔལ་གྱི་ཟླ་བ་ཞེས་བྱ་བ་ཡན་ལག་ཐམས་ཅད་ཚང་བ། གཟུགས་མཛེས་ཤིང་སྡུག་པ། བལྟ་ན་ཡིད་དུ་འོང་བ་འཇིག་རྟེན་ཐམས་
ཅད་ཀྱིས་བལྟ་ན་མི་ངོམས་པ་བྱུང་བར་གྱུར་ཏེ། རིགས་ཀྱི་བུ་འདི་ལྟ་སྟེ་དཔེར་ན། འཁོར་ལོས་བསྒྱུར་བའི་རྒྱལ་པོ་ལ་བལྟ་ན་སུ་ཡང་ངོམས་པར་མི་འགྱུར་བ་དེ་བཞིན་དུ་འཁོར་ལོས་བསྒྱུར་བའི་བུ་མོ་པད་མོ་
བཟང་མོའི་མིག་ཡིད་དུ་འོང་བའི་དཔལ་དེ་ལ་བལྟ་བས་ཀྱང་སུ་ཡང་ངོམས་པར་མི་འགྱུར་ཏེ། ཤེས་རབ་ཀྱིས་ཡོངས་སུ་ངོམས་པར་འགྱུར་བ་ནི་མ་གཏོགས་སོ། །དེའི་ཚེ་དེའི་དུས་ན། སེམས་ཅན་རྣམས་ཀྱང་ཚེ་དཔག་ཏུ་
མེད་པར་གྱུར་ཏེ། དེ་ལ་གཅིག་ཏུ་ངེས་པ་མེད་པས་བར་མ་དོར་འཆི་བ་ནི་ཡོད་དོ། །དེའི་དུས་ན་སེམས་ཅན་རྣམས་ཀྱི་དབྱིབས་སྣ་ཚོགས་དང་། ཁ་དོག་སྣ་ཚོགས་དང་། དབྱངས་སྣ་ཚོགས་དང་། མིང་སྣ་ཚོགས་དང་། 
རིགས་སྣ་ཚོགས་དང་། ཚེའི་ཚད་སྣ་ཚོགས་དང་། ཆུ་ཞེང་རྣམ་པ་ཐ་དད་པ་དང་། མོས་པ་དང་སྟོབས་དང་། བརྩོན་འགྲུས་དང་། མཐུ་རྣམ་པ་ཐ་དད་པ་དང་། ཡིད་དུ་འོང་བ་དང་ཡིད་དུ་མི་འོང་བ་རྣམ་པ་ཐ་དད་པ་དང་། 
ཡངས་པ་དང་དམའ་བ་ལ་མོས་པ་སྣ་ཚོགས་ཀྱང་ཡོད་པར་གྱུར་ཏེ། དེ་ལ་སེམས་ཅན་ཇི་སྙེད་ཅིག་མདོག་བཟང་བ་དང་། ཡངས་པ་ལ་མོས་པ་དང་། ཡན་ལག་ཚང་བ་དང་། བལྟ་ན་སྡུག་ཅིང་ཡིད་དུ་འོང་བར་གྱུར་
པ་དེ་དག་ནི་འདི་སྐད་ཅེས་འཛེར་ཏེ། ཀྱེ་མི་དག་ང་ནི་ཁ་དོག་མེད་པས་ཆེས་བཟང་ངོ་ཞེས་ཟེར་རོ། །དེ་བཞིན་དུ་སེམས་ཅན་ཇི་སྙེད་ཅིག་ལུས་ཀྱི་དབྱིབས་ལེགས་པ་དང་ལྡན་པར་གྱུར་པ་དེ་དག་ཀྱང་། སེམས་ཅན་
ལུས་ཀྱི་དབྱིབས་མི་སྡུག་པར་འགྱུར་བ་རྣམས་ལ་རློམ་ཞིང་ཁྱད་དུ་གསོད་དོ། །དེ་དག་དེ་ལྟར་གཅིག་ལ་གཅིག་ཁྱད་དུ་གསོད་པ་ལས་བྱུང་བའི་མི་དགེ་བའི་རྩ་བས་ཚེའི་ཚད་ལས་ཀྱང་ཡོངས་སུ་བྲི་བར་གྱུར་ཏེ། 

77-1-9b

ཁ་དོག་དང་སྟོབས་དང་བདེ་བ་ལས་ཀྱང་ཡོངས་སུ་བྲི་བར་གྱུར་ཏོ། །རྒྱལ་པོའི་ཕོ་བྲང་རིན་པོ་ཆེའི་མེ་ཏོག་སྒྲོན་མ་དེའི་བྱང་ཕྱོགས་ལོགས་ན། སྙིང་པོ་བྱང་ཆུབ་ཀྱི་ཤིང་ཀུན་ཏུ་གྲགས་པའི་ཆོས་ཀྱི་སྤྲིན་སྒྲའི་རྒྱལ་མཚན་
ཞེས་བྱ་བ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་བྱང་ཆུབ་ཀྱི་རྒྱན་སྐད་ཅིག་རེ་རེ་ལ་ཡོངས་སུ་སྟོན་ནས། རྩ་བ་རིན་པོ་ཆེའི་རྒྱལ་པོ་རྡོ་རྗེ་ལྟར་སྲ་ཞིང་མི་འཇིག་པ། ནོར་བུ་རིན་པོ་ཆེ་ཐམས་ཅད་ལས་གྲུབ་པས་ལྷུན་
ཤིན་ཏུ་ཡངས་ཤིང་རྒྱས་པ། སྡོང་པོ་དང་ཡལ་ག་དང་ལོ་མ་དང་། མདབ་མ་དང་མེ་ཏོག་དང་། འབྲས་བུ་རིན་པོ་ཆེ་ཐམས་ཅད་གྱི་རྒྱུ་ལས་གྲུབ་པ། ཀུན་ཏུ་ཆ་མཉམ་པར་བཀོད་ཅིང་། ཀུན་ཏུ་ཁྱབ་པའི་ཡན་ལག་དང་
ལྡན་པ། རྒྱན་ཀུན་ཏུ་རྒྱས་པར་འགེངས་ཤིང་མི་ཟད་པ་དང་ལྡན་པ། རིན་པོ་ཆེ་སྣ་ཚོགས་ཀྱི་འོད་འཕྲོ་བ་དང་། འོད་གཟེར་ཀུན་ཏུ་སྣང་བར་འགྱེད་པ། དེ་བཞིན་གཤེགས་པ་ཐམས་ཅད་ཀྱི་ཡུལ་རྣམ་པར་
འཕྲུལ་པའི་དབྱངས་རྗེས་སུ་སྒྲོག་པ་ཡོད་དེ། སྙིང་པོ་བྱང་ཆུབ་དེའི་མདུན་རོལ་ན། སྤོས་ཆུའི་མཚོ་རིན་པོ་ཆེའི་མེ་ཏོག་དང་། ཀློག་དང་ཆོས་ཀྱི་འབྲུག་སྒྲའི་སྤྲིན་གྱི་དབྱངས་ཤེས་བྱ་བ་ཡོད་དེ། དེ་ནི་རིན་པོ་ཆེའི་
ཤིང་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུས་ཀུན་ནས་བསྐོར་བ། རིན་པོ་ཆེའི་ཤིང་དེ་དག་ཐམས་ཅད་ཀྱང་བྱང་ཆུབ་ཀྱི་ཤིང་གི་དབྱིབས་སུ་འཁོད་པ་ཤ་སྟག་གོ། །སྤོས་ཆུའི་མཚོ་ཆེན་པོ་རིན་པོ་ཆེའི་མེ་ཏོག་
དང་། གློག་དང་ཆོས་ཀྱི་འབྲུག་སྒྲའི་སྤྲིན་གྱི་དབྱངས་ཞེས་བྱ་བ་དེའི་འགྲམ་ཐམས་ཅད་ཀྱང་ནོར་བུ་རིན་པོ་ཆེ་ཐམས་ཅད་བཀྲམ་ཞིང་རྣམ་པར་བཀོད་པ་སྟེ། རིན་པོ་ཆེ་ཐམས་ཅད་ཀྱི་ཕྲེང་བ་སྣ་ཚོགས་སུ་དགྲིགས་པ། 
རིན་པོ་ཆེ་རྣམ་པར་དག་པ་ལས་བྱས་པའི་ཁང་པ་སྣ་ཚོགས་ཀྱི་རྒྱན་གྱིས་ཡོངས་སུ་བརྒྱན་པའོ། །རྒྱན་རྣམ་པར་དག་པ་སྣ་ཚོགས་ཀྱི་རྒྱན་གྱིས་ཤིན་ཏུ་བརྒྱན་པའོ། །སྙིང་པོ་བྱང་ཆུབ་དེའི་འཁོར་ཐམས་

77-1-10a

ཅད་ཀྱང་ནོར་བུ་རིན་པོ་ཆེའི་ཁང་པ་བརྩེགས་པ་ཆེན་པོ་བསམ་གྱིས་མི་ཁྱབ་པ་དང་ལྡན་པ། པད་མའི་སྙིང་པོ་ཅན་ཤ་སྟག་གིས་ཡོངས་སུ་འཁོར་བ། སྤོས་ཆུའི་མཚོ་ཆེན་པོ་རིན་པོ་ཆེའི་མེ་ཏོག་
དང་གློག་དང་ཆོས་ཀྱི་འབྲུག་སྒྲའི་སྤྲིན་གྱི་དབྱངས་ཞེས་བྱ་བ་དེའི་དབུས་ནས། པད་མོའི་རྒྱལ་པོ་ལོ་མའི་མཚམས་ནས་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ཡུལ་རྣམ་པར་སྟོན་པའི་འོད་གཟེར་
གྱི་སྤྲིན་གྱི་རྒྱན་ཅེས་བྱ་བ་བྱུང་བར་གྱུར་ཏེ། པད་མོ་ཆེན་པོ་དེ་ལ་དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་དེ་དག་གི་ནང་ནས་བསྐལ་པའི་ཐོག་མ་པ་དེ་བཞིན་གཤེགས་པ་ཡེ་ཤེས་རིན་པོ་ཆེའི་འོད་ཀུན་
ཏུ་འཕྲོ་བའི་དཔལ་སྟོན་གྱི་རྒྱལ་པོ་ཞེས་བྱ་བར་བྱུང་བར་གྱུར་ཏེ། དེ་ནི་བསྐལ་པ་དེ་ལ་དེ་དག་ཐམས་ཅད་ཀྱི་ཐོག་མར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ། 
དེས་ལོ་སྟོང་ཕྲག་དུ་མ་ཞིག་དུ་ཆོས་བསྟན་པས། སེམས་ཅན་ཡོངས་སུ་སྨིན་པར་མཛད་ནས། ལོ་སྟོང་ཕྲག་བཅུར་འོད་གཟེར་སྣང་བའི་རྣམ་པར་འཕྲུལ་པས་ཡོངས་སུ་སྨིན་པར་མཛད་དོ། །དེ་བཞིན་
གཤེགས་པ་ལོ་སྟོང་ཕྲག་བཅུ་ན་འབྱུང་བར་འགྱུར་རོ། །ཞེས་བྱ་བའི་ཚེ་པད་མོའི་རྒྱལ་པོ་ཆེན་པོ་ལོ་མའི་མཚམས་ནས། དུ་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ཡུལ་རྣམ་པར་སྟོན་པའི་འོད་
གཟེར་གྱི་སྤྲིན་གྱི་རྒྱན་ཅེས་བྱ་བ་དེ་ལས་སེམས་ཅན་ཐམས་ཅད་རྡུལ་དང་འབྱེད་པའི་སྒྲོན་མ་ཞེས་བྱ་བའི་འོད་གཟེར་བྱུང་བར་གྱུར་ཏེ། འོད་དེས་ཕོག་པའི་སེམས་ཅན་རྣམས་ཀྱིས་ཀྱང་ལོ་སྟོང་ཕྲག་བཅུ་ན་དེ་
བཞིན་གཤེགས་པ་འབྱུང་བར་འགྱུར་རོ་ཞེས་བྱ་བར་ཤེས་སོ། །ལོ་སྟོང་ཕྲག་དགུ་ན་དེ་བཞིན་གཤེགས་པ་དེ་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་དེ་ལས་རྡུལ་དང་བྲལ་བའི་དཔལ་གྱི་

77-1-10b

སྙིང་པོ་ཞེས་བྱ་བའི་འོད་གཟེར་བྱུང་སྟེ། འོད་གཟེར་དེས་ཕོག་པའི་སེམས་ཅན་དེ་དག་གིས་ཀྱང་གཟུགས་ཐམས་ཅད་ཤིན་ཏུ་ཕྲ་བར་མཐོང་བར་གྱུར་ཏོ། །ལོ་སྟོང་ཕྲག་བརྒྱད་ན་དེ་བཞིན་གཤེགས་པ་འབྱུང་ངོ་ཞེས་
བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ཉིད་ལས་འོད་གཟེར་སེམས་ཅན་ཐམས་ཅད་ཀྱི་ལས་རྣམ་པར་སྨིན་པའི་དབྱིངས་ཞེས་བྱ་བ་བྱུང་སྟེ། དེས་ཕོག་པའི་སེམས་ཅན་དེ་དག་ཐམས་ཅད་ཀྱིས་ཀྱང་རང་རང་གི་
ལས་རྒྱ་མཚོ་ཁོང་དུ་ཆུད་པར་འགྱུར་ཏེ། ལས་དྲན་པའི་ཡེ་ཤེས་ཀྱང་ཐོབ་པར་གྱུར་ཏོ། །ལོ་སྟོང་ཕྲག་བདུན་ན་དེ་བཞིན་གཤེགས་པ་དེ་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་དེ་ཉིད་ལས་འོད་གཟེར་
དགེ་བའི་རྩ་བ་ཐམས་ཅད་ཡང་དག་པར་འབྱུང་བའི་དབྱངས་ཞེས་བྱ་བ་བྱུང་སྟེ། འོད་གཟེར་དེས་སེམས་ཅན་དེ་དག་ལ་ཕོག་ནས་དབང་པོ་ཉམས་པ་མེད་ཅིང་ཡོངས་སུ་ཚང་བར་གྱུར་ཏོ། །ལོ་སྟོང་ཕྲག་དྲུག་ན་དེ་
བཞིན་གཤེགས་པ་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ཉིད་ལས་འོད་གཟེར་སངས་རྒྱས་ཀྱི་ཡུལ་བསམ་གྱིས་མི་ཁྱབ་པའི་དབྱངས་ཞེས་བྱ་བ་བྱུང་སྟེ། དེས་སེམས་ཅན་དེ་དག་
ལ་ཕོག་ནས་བསམ་པ་རྒྱ་ཆེན་པོས་རྣམ་པར་འཕྲུལ་བར་གྱུར་ཏོ། །ལོ་སྟོང་ཕྲག་ལྔ་ན་དེ་བཞིན་གཤེགས་པ་དེ་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ཉིད་ལས་འོད་གཟེར་སངས་རྒྱས་
ཀྱི་ཞིང་ཐམས་ཅད་ཡོངསུ་དག་པར་སྒྲ་འབྱིན་པའི་གཟུགས་བརྙན་རྣམ་པར་དམིགས་པ་ཞེས་བྱ་བ་བྱུང་སྟེ། དེས་སེམས་ཅན་དེ་དག་ལ་ཕོག་ནས་སངས་རྒྱས་ཀྱི་ཞིང་རྣམ་པ་ཐམས་ཅད་དུ་ཡོངས་སུ་དག་པར་
མཐོང་བར་གྱུར་ཏོ། །ལོ་སྟོང་ཕྲག་བཞི་ན་དེ་བཞིན་གཤེགས་པ་དེ་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ཉིད་ལས་འོད་གཟེར་དེ་བཞིན་གཤེགས་པ་ཐམས་ཅད་ཀྱི་ཡུལ་ཐ་མི་དད་

77-1-11a

པའི་སྒྲོན་མ་ཞེས་བྱ་བ་འབྱུང་སྟེ། དེས་སེམས་ཅན་དེ་དག་ལ་ཕོག་ནས་དེ་བཞིན་གཤེགས་པ་དེའི་རྣམ་པར་འཕྲུལ་པ་ཐམས་ཅད་དུ་སོང་བ་ལ་ཞུགས་པར་གྱུར་ཏོ། །ལོ་སྟོང་ཕྲག་གསུམ་ན་དེ་བཞིན་
གཤེགས་པ་དེ་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ལས་འོད་གཟེར་འགྲོ་བ་ཐམས་ཅད་ལ་མངོན་ཏུ་གྱུར་པའི་སྒྲོན་མ་ཞེས་བྱ་བ་བྱུང་སྟེ། དེས་སེམས་ཅན་དེ་དག་ལ་ཕོག་ནས་དེ་བཞིན་
གཤེགས་པ་དེ་ཡང་མངོན་ཏུ་མོས་པས་མཐོང་བར་གྱུར་ཏོ། །ལོ་སྟོང་ཕྲག་གཉིས་ན་དེ་བཞིན་གཤེགས་པ་དེ་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ལས་འོད་གཟེར་དུས་གསུམ་
གྱི་ཡེ་ཤེས་ཀྱི་གློག་གི་སྒྲོན་མ་ཞེས་བྱ་བ་དེ་བཞིན་གཤེགས་པ་ཐམས་ཅད་ཀྱི་སྔོན་གྱི་ཚུལ་རབ་ཏུ་སྒྲོག་པ་བྱུང་སྟེ། དེས་སེམས་ཅན་དེ་དག་ལ་རེག་ནས་དེ་བཞིན་གཤེགས་པ་དེའི་སྔོན་གྱི་ཚུལ་རྒྱ་མཚོ་ལ་རྟོག་
ཅིང་འཇུག་པར་གྱུར་ཏོ། །ལོ་སྟོང་ན་དེ་བཞིན་གཤེགས་པ་དེ་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ལས་འོད་གཟེར་ཡེ་ཤེས་རབ་རིབ་མེད་པ། དེ་བཞིན་གཤེགས་པའི་སྒྲོན་
མ་ཞེས་བྱ་བ་བྱུང་སྟེ། དེས་སེམས་ཅན་དེ་དག་ལ་ཕོག་ནས་དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་དང་། ཞིང་ཐམས་ཅད་དང་། སེམས་ཅན་ཐམས་ཅད་ཀྱིས་མཐོང་བར་འགྱུར་བའི་
མིག་ཀུན་ཏུ་ལྟ་བ་ཐོབ་པར་གྱུར་ཏོ། །དེ་བཞིན་གཤེགས་པ་དེ་ལོ་བརྒྱ་ན་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ཉིད་ལས་འོད་གཟེར་འགྲོ་བ་ཐམས་ཅད་ཀྱིས་སངས་རྒྱས་མཐོང་
བ་རྣམ་པར་སྨིན་པའི་དགེ་བའི་རྩ་བ་ལས་བྱུང་བ་ཞེས་བྱ་བ་བྱུང་སྟེ། དེས་སེམས་ཅན་དེ་དག་ལ་ཕོག་ནས། དེ་བཞིན་གཤེགས་པ་སྐྱེ་བའི་འདུ་ཤེས་ཐོབ་པར་གྱུར་ཏོ། །དེ་བཞིན་གཤེགས་པ་དེ་ཞག་

77-1-11b

བདུན་ན་སྐྱེ་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ཉིད་ལས་འོད་ཟེར་སེམས་ཅན་ཐམས་ཅད་རབ་ཏུ་དགའ་བ་དང་། སྤྲོ་བ་དང་མོས་པ་ཡོངས་སུ་འབྱུང་བའི་དབྱངས་ཤེས་བྱ་བ་བྱུང་སྟེ། དེས་
སེམས་ཅན་དེ་དག་ལ་ཕོག་ནས་སངས་རྒྱས་མཐོང་བར་འགྱུར་བའི་དགའ་བའི་ཤུགས་ཆེན་པོ་སྐྱེས་པར་གྱུར་ཏོ། །རིགས་ཀྱི་བུ་དེ་ལྟར་འོད་ཟེར་གྱི་ཡོངསུ་སྨིན་པར་བྱ་བའི་ཚུལ་ཚད་མེད་པ་རྣམ་པ་དེ་ལྟ་
བུས་ལོ་སྟོང་དུ་སེམས་ཅན་རྣམས་ཡོངས་སུ་སྨྱིན་པར་མཛད་ནས་ཞག་བདུན་པ་ལ་ཐུག་པ་དང་། འཇིག་རྟེན་གྱི་ཁམས་དེ་ཐམས་ཅད་ཡོངས་སུ་བ་སྤྱོད་པའི་ཚུལ་ཚད་མེད་པས་ཡོངས་སུ་བསྐྱོད་ནས་ཤིན་ཏུ་
དག་པར་བྱིན་གྱི་བརླབས་སོ། །ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་སངས་རྒྱས་ཀྱི་ཞིང་ཡོངས་སུ་དག་པ་ཇི་སྙེད་པ་རྒྱན་བསམ་གྱིས་མི་ཁྱབ་པ་རྣམ་པ་སྣ་ཚོགས་དང་ལྡན་པ་དེ་དག་ཐམས་ཅད་ཀྱང་
སངས་རྒྱས་ཀྱི་ཞིང་དེར་སེམས་ཀྱི་སྐད་ཅིག་རེ་རེ་ལ་ཡོངས་སུ་བསྟན་པར་གྱུར་ཏོ། །དེ་ནས་ཞག་བདུན་པ་ཐ་མ་ལ་བབ་པ་དང་། འཇིག་རྟེན་གྱི་ཁམས་དེ་ན་སེམས་ཅན་སངས་རྒྱས་མཐོང་བར་འགྱུར་བ་ཡོངས་སུ་སྨིན་
པ་དེ་དག་ཐམས་ཅད་སྙིང་པོ་བྱང་ཆུབ་ཏུ་མངོན་པར་གཞོལ་བར་གྱུར་ཏོ། །དེ་ནས་འཇིག་རྟེན་གྱི་ཁམས་དེའི་འཁོར་ཡུག་ཐམས་ཅད་དང་། རི་རབ་ཐམས་ཅད་དང་། རི་ཐམས་ཅད་དང་། ཆུ་ཀླུང་ཐམས་ཅད་དང་། 
རྒྱ་མཚོ་ཐམས་ཅད་དང་ཤིང་ཐམས་ཅད་དང་། སའི་གཞི་ཐམས་ཅད་དང་། གྲོང་ཁྱེར་ཐམས་ཅད་དང་། ར་བ་ཐམས་ཅད་དང་། གནས་ཐམས་ཅད་དང་། གཞལ་མེད་ཁང་ཐམས་ཅད་དང་། གོས་དང་རྒྱན་དང་ལོངས་སྤྱོད་ཐམས་ཅད་དང་། རོལ་
མོའི་ཤིང་ཐམས་ཅད་དང་། རོལ་མོ་བདུང་བའི་དབྱངས་ཐམས་ཅད་དང་། སྤྲུལ་པའི་རྒྱན་ཐམས་ཅད་ཀྱི་དམིགས་པ་རེ་རེ་ལས་ཀྱང་དེ་བཞིན་གཤེགས་པ་ཐམས་ཅད་ཀྱི་ཡུལ་དང་། མཐུའི་སྒྲ་རབ་ཏུ་སྒྲོག་པའི་སྤོས་

77-1-12a

དང་། བདུག་སྤོས་ཐམས་ཅད་ཀྱི་སྤྲིན་མངོན་པར་འཐོན་ཏེ། རིན་པོ་ཆེའི་འོད་འཕྲོ་བའི་སྤྲིན་དང་། སྤོས་དང་བདུག་སྤོས་ཐམས་ཅད་ཀྱི་འོད་འཕྲོ་བ་དམ་པ་དང་། སྤོས་རིན་པོ་ཆེ་ཐམས་ཅད་ཀྱི་གཟུགས་ཀྱི་སྤྲིན་དང་། 
གོས་རིན་པོ་ཆེ་དང་། རྒྱན་རིན་པོ་ཆེ་ཐམས་ཅད་ཀྱི་སྤྲིན་དང་། རིན་པོ་ཆེའི་མེ་ཏོག་སྣ་ཚོགས་ཀྱི་རི་རབ་ཀྱི་སྤྲིན་དང་ཕྱེ་མ་སྣ་ཚོགས་ཀྱི་སྤྲིན་མང་པོ་དེ་བཞིན་གཤེགས་པ་ཐམས་ཅད་ཀྱི་འོད་གཟེར་གྱི་སྤྲིན་རྣམ་པར་སྟོན་
པ་དེ་བཞིན་གཤེགས་པ་ཐམས་ཅད་ཀྱི་འོད་ཀྱི་དཀྱིལ་འཁོར་གྱི་སྤྲིན་རབ་ཏུ་འགྱེད་པ། རོལ་མོ་བརྡུང་བ་དང་། དཀྲོལ་བ་ཐམས་ཅད་ཀྱི་སྤྲིན་ཡོངས་སུ་འཁྲོལ་ཞིང་རྡུང་བ། དེ་བཞིན་གཤེགས་པ་ཐམས་ཅད་ཀྱི་སྨོན་
ལམ་གྱི་སྒྲ་སྐད་ཀྱི་སྤྲིན་རབ་ཏུ་འབྱིན་པ། དེ་བཞིན་གཤེགས་པ་ཐམས་ཅད་ཀྱི་དབྱངས་ཀྱི་ཡན་ལག་དང་། གསུང་རྒྱ་མཚོའི་སྤྲིན་རབ་ཏུ་སྒྲོག་པ། དེ་བཞིན་གཤེགས་པ་ཐམས་ཅད་ཀྱི་མཚན་དང་དཔེ་བྱད་བཟང་
པོའི་གཟུགས་བརྙན་སྣ་ཚོགས་ཀྱི་སྤྲིན་རབ་ཏུ་སྟོན་པར་བྱེད་ཅིང་། དེ་བཞིན་གཤེགས་པའི་ལྟས་སྔོན་དུ་བྱུང་བ་བསམ་གྱིས་མི་ཁྱབ་པ་ཡོངསུ་སྟོན་ཏེ། རིན་པོ་ཆེའི་རྒྱལ་པོའི་པད་མོ་ཆེན་པོའི་ལོ་མའི་
མཚམས་ནས། དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ཡུལ་རྣམ་པར་སྟོན་པའི་འོད་གཟེར་གྱི་སྤྲིན་གྱི་རྒྱན་དེའི་པད་མོའི་འཁོར་རིན་པོ་ཆེའི་རྒྱལ་པོ་ལས་བྱས་པ་ཆེན་པོ་ཤ་སྟག་ཏུ་བྱས་ཏེ་འཁོད་དོ། །
རིན་པོ་ཆེའི་རྒྱལ་པོའི་པད་མོ་ཆེན་པོའི་འཁོར་ཀྱི་རིན་པོ་ཆེའི་པད་མོ་ཆེན་པོ་དེ་དག་གི་ཟེ་བ་དང་། སྙིང་པོ་ལ་སེང་གེའི་ཁྲི་རིན་པོ་ཆེའི་པད་མོ་ཆེན་པོའི་སྙིང་པོ་ཅན། སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་
དག་བྱུང་བར་གྱུར་ཏེ། རིན་པོ་ཆེའི་སྙིང་པོ་ཅན་གྱི་ཁྲི་དེ་དག་ལ་འང་བྱང་ཆུབ་སེམས་དཔའ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་སྐྱིལ་མོ་ཀྲུང་བཅས་ཏེ། འཁོད་པར་གྱུར་ཏོ། །བཅོམ་ལྡན་འདས་ཡེ་ཤེས་

77-1-12b

རིན་པོ་ཆེའི་འོད་ཀུན་ཏུ་འཕྲོ་བའི་དཔལ་ཡོན་ཏན་དཔལ་གྱི་རྒྱལ་པོ་དེ་བཞིན་གཤེགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་མ་ཐག་ཏུ་དེའི་མོད་ལ། ཕྱོགས་བཅུའི་འཇིག་རྟེན་གྱི་
ཁམས་སུ་དེ་བཞིན་གཤེགས་པ་མང་པོ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཏེ། སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་དུ་མངོན་སུམ་དུ་ཆོས་ཀྱི་འཁོར་ལོ་
བསྐོར་བར་གྱུར་ཏོ། །དེ་ནས་ཀྱང་འཇིག་རྟེན་གྱི་ཁམས་དེ་དག་གི་སེམས་ཅན་ཚད་མེད་པ་རྣམས་ངན་སོང་དང་ལོག་པར་ལྟུང་བ་ཐམས་ཅད་ལས་རྣམ་པར་བཟློག་གོ། །སེམས་ཅན་ཚད་མེད་པ་ནི་མཐོ་རིས་སུ་སྐྱེ་བ་
ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་ཉན་ཐོས་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་རང་སངས་རྒྱས་ཀྱི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །སེམས་ཅན་ཚད་མེད་པ་ནི་ཤུགས་དྲག་པོའི་
འོད་ཀྱིས་འབྱུང་བའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །སེམས་ཅན་ཚད་མེད་པ་ནི་བརྩོན་འགྲུས་དྲི་མ་མེད་པའི་རྒྱལ་མཚན་གྱི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །སེམས་ཅན་ཚད་མེད་པ་ནི་ཆོས་
རབ་ཏུ་བསྒོམ་པའི་གནས་སུ་འབྱུང་བའི་བྱང་ཆུབ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་དབང་པོ་ཡོངས་སུ་དག་པ་རབ་ཏུ་བསྒོམས་པས་འབྱུང་བའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །སེམས་ཅན་
ཚད་མེད་པ་ནི་སྟོབས་མཉམ་པ་ཉིད་ལ་ཡང་དག་པར་སྤྱོད་པ་ཁོང་དུ་ཆུད་པས་འབྱུང་བའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །སེམས་ཅན་ཚད་མེད་པ་ནི་ཆོས་ཀྱི་གྲོང་ཁྱེར་མངོན་དུ་འགྱུར་བའི་ཡུལ་གྱི་ཐེག་པ་
སྐྱེ་བས་འབྱུང་བའི་བྱང་ཆུབ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་ཐམས་ཅད་དུ་རྗེས་སུ་སོང་བའི་རྫུ་འཕྲུལ་ཐ་མི་དད་པའི་ཚུལ་གྱི་ཐེག་པས་འབྱུང་བའི་བྱང་ཆུབ་ལ་རབ་ཏུ་བཀོད་དོ། །སེམས་ཅན་

77-1-13a

ཚད་མེད་པ་ནི་སྤྱོད་པའི་སྦྱོར་བ་ལ་ཡང་དག་པར་གཞོལ་བའི་ཚུལ་གྱིས་འབྱུང་བའི་བྱང་ཆུབ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་ཏིང་ངེ་འཛིན་གྱིས་འཇུག་པའི་ཚུལ་གྱིས་འབྱུང་བའི་བྱང་ཆུབ་ལ་
རབ་ཏུ་བཀོད་དོ། །སེམས་ཅན་ཚད་མེད་པ་ནི་དམིགས་པའི་ཡུལ་ཐམས་ཅད་ཡོངས་སུ་དག་པའི་དཀྱིལ་འཁོར་གྱི་ཚུལ་གྱིས་འབྱུང་བའི་བྱང་ཆུབ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་བྱང་ཆུབ་སེམས་དཔའི་
བྱང་ཆུབ་ཏུ་སེམས་བསྐྱེད་དོ། །སེམས་ཅན་ཚད་མེད་པ་ནི་བྱང་ཆུབ་སེམས་དཔའི་ལམ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་ཕ་རོལ་ཏུ་ཕྱིན་པའི་ལམ་རྣམ་པར་དག་པ་ལ་རབ་ཏུ་བཀོད་དོ། །སེམས་ཅན་
ཚད་མེད་པ་ནི་བྱང་ཆུབ་སེམས་དཔའི་ས་དང་པོ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་བྱང་ཆུབ་སེམས་དཔའི་ས་གཉིས་པ་དང་། གསུམ་པ་དང་བཞི་པ་དང་ལྔ་པ་དང་། དྲུག་པ་དང་བདུན་པ་དང་། བརྒྱད་པ་དང་
དགུ་པ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་བྱང་ཆུབ་སེམས་དཔའི་ས་བཅུ་པ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་བྱང་ཆུབ་སེམས་དཔའི་སྤྱོད་པ་སྨོན་ལམ་གྱི་ཁྱད་པར་ཅན་ལ་བཙུད་དོ། །
སེམས་ཅན་ཚད་མེད་པ་ནི་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་རྣམ་པར་བཀོད་པ་ལ་རབ་ཏུ་བཀོད་དོ། །དེ་ལྟར་དེ་བཞིན་གཤེགས་པ་དེས་སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་དང་། 
རྣམ་པར་འཕྲུལ་པ་བསམ་གྱིས་མི་ཁྱབ་པས་ཆོས་ཀྱི་འཁོར་ལོ་བསྐོར་བས་སེམས་ཀྱི་སྐད་ཅིག་རེ་རེ་ལ་སེམས་ཅན་གྱི་ཁམས་མཐའ་དང་དབུས་མེད་པ་རྣམ་པར་འདུལ་བར་གྱུར་ཏོ། །འཇིག་རྟེན་གྱི་ཁམས་དེའི་
སེམས་ཅན་ཐམས་ཅད་ཀྱིས་ཀྱང་དེ་བཞིན་གཤེགས་པ་དེའི་སྐུ་སྣ་ཚོགས་དང་། ཐབས་མཁས་པ་སྣ་ཚོགས་ཀྱིས་བསྒྲུབས་པའི་ཆོས་བསྟན་པ་ཡོངས་སུ་ཤེས་པར་གྱུར་ཏེ། རྒྱལ་པོའི་ཕོ་བྲང་རིན་པོ་ཆེའི་

77-1-13b

མེ་ཏོག་སྒྲོན་མའི་སེམས་ཅན་གཟུགས་དང་། ཁ་དོག་དང་ཡུལ་དང་ལོངས་སྤྱོད་གྱིས་རྒྱགས་ཤིང་དྲེགས་ཏེ་གཅིག་ལ་གཅིག་ཁྱད་དུ་གསོད་པ་དེ་རྣམས་གདུལ་བའི་དོན་དུ་བྱང་ཆུབ་སེམས་དཔའ་ཀུན་དུ་བཟང་
པོས་ཁ་དོག་དང་གཟུགས་མཆོག་ཏུ་ཕྱིན་པར་མངོན་པར་སྤྲུལ་ཏེ། རྒྱལ་པོའི་ཕོ་བྲང་དེར་ཕྱིན་ཏོ། །དེའི་འོད་ཤིན་ཏུ་ཡངས་པས་རྒྱལ་པོའི་གནས་དེ་དག་ཐམས་ཅད་དུ་ཡོངས་སུ་སྣང་བར་གྱུར་ཏེ། རྒྱལ་པོའི་གནས་
དེའི་འོད་དང་། འཁོར་ལོས་བསྒྱུར་བའི་རྒྱལ་པོ་རྣམ་པར་སྣང་བ་རིན་ཆེན་པད་མོའི་དཔལ་གྱི་གཙུག་ཕུད་སྙིང་པོའི་ལུས་ལས་བྱུང་བའི་འོད་དང་། བུད་མེད་རིན་པོ་ཆེའི་འོད་དང་། རིན་པོ་ཆེའི་ཤིང་གི་འོད་དང་། 
ནོར་བུ་རིན་པོ་ཆེ་ཆེན་པོའི་འོད་དང་། ཉི་ཟླ་དང་གཟའ་སྐར་དང་རྒྱུན་སྐར་གྱི་འོད་དང་། འཛམ་བུའི་གླིང་ན་འོད་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་མི་སྣང་བར་གྱུར་ཏེ། དཔེར་ན་ཉི་མ་ཤར་ཏེ་མུན་པ་དང་བྲལ་
པ་དང་། ཟླ་བ་དང་གཟའ་སྐར་དང་། རྒྱུ་སྐར་གྱི་འོད་ཀྱང་མི་སྣང་ལ་མེ་དང་ནོར་བུའི་འོད་ཀྱང་མི་སྣང་ངོ་། །དེ་བཞིན་དུ་བྱང་ཆུབ་སེམས་དཔའ་ཀུན་དུ་བཟང་པོས་ཟིལ་གྱིས་ནོན་ནས་འཛམ་བུའི་གླིང་དེ་ན་འོད་ཡོད་པ་
ཐམས་ཅད་ཀྱང་མི་སྣང་བར་གྱུར་ཏོ། །འདི་ལྟ་སྟེ་དཔེར་ན། འཛམ་བུ་ཆུ་ཀླུང་གི་གསེར་གྱི་ས་ལེ་སྦྲམ་གྱི་དྲུང་དུ་སྣག་ཙའི་གཟུགས་བཞག་ན་མཛེས་པར་མི་རུང་། ལྷང་ངེར་མི་རུང་། ལྷམ་མེར་མི་རུང་། ལྷང་ངེར་མི་
རུང་ངོ་། །དེ་བཞིན་དུ་བྱང་ཆུབ་སེམས་དཔའ་ཀུན་དུ་བཟང་པོའི་མདུན་དུ་སེམས་ཅན་དེ་དག་གི་གཟུགས་ཀྱི་ལུས་ཀྱང་མཛེས་པར་མི་རུང་། ལྷག་གེར་མི་རུང་། ལྷམ་མེར་མི་རུང་། ལྷང་ངེར་མི་རུང་ངོ་། །དེ་ནས་
དེ་དག་འདི་སྙམ་དུ་གྱུར་ཏེ། དེ་ལྟ་སུ་ཞིག་དེ་ལྟར་དེའི་དྲུང་དུ་བདག་ཅག་གི་ལུས་སམ། འོད་དམ་ཁ་དོག་གམ། གཟི་བརྗིད་ཀྱིས་ཀྱང་མཛེས་པར་མི་རུང་། ལྷག་གེར་མ་རུང་། ལྷམ་མེར་མི་རུང་། ལྷང་ངེར་མི་རུང་བ་དེ་

77-1-14a

ལྟ་ལྷ་འམ། ཚངས་པ་འམ། ཅི་ཞིག་དེའི་མཚམས་ནི་གཟུང་བར་མི་ནུས་སོ་སྙམ་མོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་རྒྱལ་པོའི་གནས་རིན་པོ་ཆེའི་མེ་ཏོག་སྒྲོན་མའི་དབུས་འཁོར་
ལོས་བསྒྱུར་བའི་རྒྱལ་པོ་རྣམ་པར་སྣང་བ་རིན་ཆེན་པད་མོ་དཔལ་གྱི་གཙུག་ཕུད་སྙིང་པོའི་གཞལ་མེད་ཁང་གི་སྟེང་གི་བར་སྣང་ལ་འདུག་སྟེ། འཁོར་ལོས་བསྒྱུར་བའི་རྒྱལ་པོ་རྣམ་པར་སྣང་བ་པད་མོ་དཔལ་གྱི་
གཙུག་ཕུད་སྙིང་པོ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཤེས་པར་གྱིས་ཤིག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་སྟེ། ཁྱོད་ཀྱི་ཁམས་འདི་
ཉིད་ཀྱི་སྙིང་པོ་བྱང་ཆུབ་ཆོས་ཀུན་ཏུ་སྣང་བའི་ཆོས་ཀྱི་སྤྲིན་གྱི་སྒྲ་དབྱངས་རྒྱལ་མཚན་འདི་ཉིད་ན་རྣམ་པར་སྤྱོད་དོ་ཞེས་པ་དང་། རྒྱལ་པོའི་བུ་མོ་ཡེ་ཤེས་ཀྱི་འོད་ཀུན་ཏུ་འཕྲོ་བ་པད་མོ་བཟང་པོ་མིག་ཡིད་དུ་
འོང་བའི་དཔལ་གྱི་ཟླ་བས་བྱང་ཆུབ་སེམས་དཔའ་ཀུན་ཏུ་བཟང་པོའི་གཟུགས་ཀྱི་ལུས་དང་། འོད་རྣམ་པར་འཕྲུལ་པ་དང་རྒྱན་མཐོང་སྟེ། དབྱངས་ཐོས་ནས་དགའ་བ་དང་། མོས་པའི་ཤུགས་ཆེན་པོ་སྐྱེས་
ཏེ། དེའི་ཚེ་སེམས་འདི་སྙམ་དུ་བསྐྱེད་དོ། །བདག་གི་དགེ་བའི་རྩ་བ་གང་ཅི་བསྩགས་པ་དེས་བདག་ཀྱང་ལུས་འདི་འདྲ་བར་ཐོབ་པར་ཤོག་ཤིག །རྒྱན་འདི་འདྲ་བ་དང་། མཚན་འདི་འདྲ་བ་དང་། སྤྱོད་ལམ་འདི་
འདྲ་བ་དང་། རྫུ་འཕྲུལ་འདི་འདྲ་བར་ཤོག་ཤིག །ཇི་ལྟར་འདིས་མཚན་མོ་མུན་ནག་གི་ནང་ན་སེམས་ཅན་རྣམས་ལ་སྣང་བ་ཆེན་པོ་བསྐྱེད་དེ། སངས་རྒྱས་སྐྱེ་བ་ཡོངས་སུ་བརྗོད་པ་དེ་བཞིན་དུ། བདག་གིས་
ཀྱང་སེམས་ཅན་རྣམས་ཀྱི་མི་ཤེས་པའི་མུན་པ་བསྩལ་དེ་ཡེ་ཤེས་ཆེན་པོའི་སྣང་བ་བསྐྱེད་པར་བྱའོ། །གང་དང་གང་དུ་སྐྱེས་པ་ཐམས་ཅད་དུ་འང་དགེ་བའི་བཤེས་གཉེན་འདི་དང་མི་འབྲལ་བར་ཤོག་ཤིག །

77-1-14b

དེ་ནས་རིགས་ཀྱི་བུ་འཁོར་ལོས་སྒྱུར་བའི་རྒྱལ་པོ་རྣམ་པར་སྣང་བ་རིན་ཆེན་པད་མོ་དཔལ་གྱི་གཙུག་ཕུད་སྙིང་པོ་ཡན་ལག་བཞིའི་དཔུང་གི་ཚོགས་དང་ལྷན་ཅིག །རིན་པོ་ཆེ་བདུན་དང་ལྷན་ཅིག །བུད་མེད་ཀྱི་ཚོགས་
ཀྱི་འཁོར་དང་ལྷན་ཅིག །བུ་དང་བློན་པོ་དང་། ལྗོངས་ཀྱི་མི་དང་ལྷན་ཅིག་ཏུ་རྒྱལ་པོའི་རྫུ་འཕྲུལ་ཆེན་པོ་དང་། རྒྱལ་པོའི་མཐུ་ཆེན་པོས་རྒྱལ་པོའི་གནས་རིན་པོ་ཆེའི་མེ་ཏོག་སྒྲོན་མ་དེ་ནས་འཕགས་ཏེ་གྱེན་ཏུ་ནམ་
མཁའ་ལ་དཔག་ཚད་གཅིག་ཙམ་དུ་མངོན་པར་འཕགས་ནས། འཛམ་བུའི་གླིང་ཐམས་ཅད་དང་། གླིང་བཞིའི་འཇིག་རྟེན་གྱི་ཁམས་ཐམས་ཅད་སྣང་བ་ཆེན་པོས་རྒྱས་པར་བཀང་སྟེ། སེམས་ཅན་ཐམས་
ཅད་སངས་རྒྱས་བལྟ་བ་ལ་ཡོངས་སུ་བསྐུལ་བའི་དོན་དུ་རིན་པོ་ཆེའི་རི་ཐམས་ཅད་ལ་གཟུགས་བརྙན་མངོན་པར་བསྟན་ཅིང་གླིང་བཞི་པའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ལ་
མངོན་སུམ་དུ་གནས་ཏེ་སངས་རྒྱས་ལ་བལྟ་བ་དེ་ཚིགས་སུ་བཅད་དེ་གླུའི་དབྱངས་ཀྱིས་བསྔགས་པ། ལུས་ཅན་ཐམས་ཅད་སྐྱབས་མཛད་པའི། །སངས་རྒྱས་འཇིག་རྟེན་བྱུང་བར་གྱུར། །འཇིག་རྟེན་གཙོ་
བོ་དེ་བལྟ་བར། །ཀུན་ཀྱང་ལོངས་ཏེ་འདོང་བར་གྱིས། །ལུས་ཅན་ཀུན་ལ་ཕན་དོན་དུ། །ཆོས་རབ་སྟོན་པར་གང་མཛད་པའི། །དེ་བཞིན་གཤེགས་པ་འབྱུང་བ་ནི། །བསྐལ་པ་བྱེ་བའི་བརྒྱ་ལམ་ནའོ། །འཇིག་
རྟེན་ཕྱིན་ཅི་ལོག་གྱུར་ཅིང་། །མི་ཤེས་སྒྲིབ་པས་བསྒྲིབས་གྱུར་ཏེ། །འཁོར་བའི་སྡུག་བསྔལ་མྱོང་བ་རྣམས། །གཟིགས་ཤིང་ཐུགས་རྗེ་ཆེ་བསྐྱེད་ནས། །སྡུག་བསྔལ་ཐམས་ཅད་གཞིལ་དོན་དུ། །
སེམས་ཅན་ཡོངས་སུ་སྨིན་བྱའི་ཕྱིར། །བསྐལ་པ་བྱེ་བ་གྲངས་མེད་དུ། །བྱང་ཆུབ་སྤྱོད་པ་སྤྱད་པ་མཛད། །བསྐལ་པ་མཐའ་ཡས་མུ་མེད་པར། །སངས་རྒྱས་བྱང་ཆུབ་མཆོག་དོན་དུ། །ཞབས་དང་ཕྱག་ཀྱང་

77-1-15a

ཡོངས་སུ་བཏང་། །སྤྱན་དང་སྙན་དང་དབུ་ཡང་བཏང་། །མཐོང་ཞིང་བསྙེན་བཀུར་བྱས་པ་དང་། །ཐོས་པ་དོན་ཡོད་འགྱུར་བ་ཡིན། །འཇིག་རྟེན་མགོན་པོ་འཇིག་རྟེན་དུ། །འབྱུང་བ་བསྐལ་པ་བྱེ་བར་དཀོན། །
དེ་ནི་བྱང་ཆུབ་གདན་ལ་བཞུགས། །གསུང་བའི་དམ་པ་ལྟར་ཡང་ཡོད། །བདུད་རྣམས་སྡེ་དང་བཅས་བཏུལ་ཏེ། །བྱང་ཆུབ་མཆོག་ཏུ་རྣམ་སངས་རྒྱས། །འོད་ཟེར་དཀྱིལ་འཁོར་མཐའ་ཡས་པ། །སངས་རྒྱས་སྐུ་
ལས་མངོན་བཀྱེ་ཞིང་། །འགྲོ་བ་ཚིམ་པར་མཛད་པ་ཡི། །ཁ་དོག་སྣང་ཚོགས་འདི་ལ་ལྟོས། །འོད་ཟེར་སྤྲིན་མང་གྲངས་མེད་པ། །སངས་རྒྱས་སྐུ་ལས་འཐོན་པ་རྣམས། །དེས་ནི་སེམས་ཅན་སྣང་གྱུར་ན། །
བདེ་བ་དཔེ་མེད་འཐོབ་པར་འགྱུར། །བརྩོན་འགྲུས་ཆེན་པོ་རབ་རྩོམ་སྟེ། །རང་དང་རང་གི་བསམ་པ་ཡིས། །མགོན་པོ་དེ་ལ་མཆོད་པ་བགྱིས། །ཚུར་ཤོག་དེ་ཡི་གན་དུ་འདོང་། །དེ་ནས་རྒྱལ་པོ་རྣམ་པར་སྣང་བ་
རིན་ཆེན་པད་མོ་དཔལ་གྱི་གཙུག་ཕུད་སྙིང་པོས་ཚིགས་སུ་བཅད་པ་དེ་དག་གི་བདག་གི་ཁམས་ན་གནས་པའི་སེམས་ཅན་ཐམས་ཅད་ཡོངས་སུ་བསྐུལ་ཏེ། མཆོད་པའི་སྤྲིན་སྣ་ཚོགས་བརྒྱ་སྟོང་ཕྲག་བཅུ་འཁོར་
ལོས་བསྒྱུར་བའི་དགེ་བའི་རྩ་བས་ཡོངས་སུ་གྲུབ་པའི་ཆར་པ། སྙིང་པོ་བྱང་ཆུབ་ཀུན་ནས་ལྡང་བའི་ཆོས་ཀྱི་སྤྲིན་གྱི་དབྱངས་ཀྱི་རྒྱལ་མཚན་གྱི་འཁོར་ཀུན་ཏུ་མངོན་པར་འབེབས་ཤིང་། རིན་པོ་ཆེའི་གདུགས་ཀྱི་
སྤྲིན་གྱི་ནམ་མཁའ་ཀུན་ནས་གཡོགས་པར་བྱ་བ་དང་། མེ་ཏོག་ཐམས་ཅད་ཀྱི་བླ་རེའི་སྤྲིན་གྱིས་ནམ་མཁའ་ནས་ཁེབ་པར་བྱ་བ་དང་། ན་བཟའ་སྣ་ཚོགས་ཀྱི་སྤྲིན་གྱིས་ནམ་མཁའ་ཀུན་ནས་ཡོག་ཅིང་བརྒྱན་པར་བྱ་བ་དང་། 
རིན་པོ་ཆེ་སྣ་ཚོགས་ཀྱི་དྲིལ་བུའི་དྲ་བའི་སྤྲིན་གྱིས་ནམ་མཁའི་དབྱིངས་བརྒྱན་པར་བྱ་བ་དང་། སྤོས་སྣ་ཚོགས་རྒྱ་མཚོས་དྲི་ཞིམ་པར་བྱས་པའི་འོད་ཟེར་གྱི་སྤྲིན་གྱི་རྒྱན་ནམཁའི་དབྱིངས་ལ་བྱིན་གྱིས་བརླབས་པར་

77-1-15b

བྱ་བ་དང་། རིན་པོ་ཆེ་ཐམས་ཅད་ཀྱི་ཁྲི་ལ་རིན་པོ་ཆེའི་གདན་འབྲེལ་བར་བཏིང་བའི་སྤྲིན་གྱི་རྒྱན་ནམ་མཁའི་དབྱིངས་ལ་བྱིན་གྱིས་བརླབ་པ་དང་། རིན་པོ་ཆེ་ཐམས་ཅད་ཀྱི་རྒྱལ་མཚན་གྱི་སྤྲིན་མངོན་པར་བསྒྲེང་བའི་རྒྱན་ནམ་
མཁའི་དབྱིངས་ལ་བྱིན་གྱིས་བརླབས་པ་དང་། ཁང་པ་དང་གཞལ་མེད་ཁང་ཐམས་ཅད་ཀྱི་སྤྲིན་གྱིས་ཀུན་ནས་ཡོག་པའི་རྒྱན་ནམ་མཁའི་དབྱིངས་ལ་བྱིན་གྱིས་བརླབ་པ་དང་། མེ་ཏོག་སྣ་ཚོགས་ཀྱིས་ཀུན་ནས་
ཡོག་པའི་རྒྱན་ནམ་མཁའི་དབྱིངས་ལ་བྱིན་གྱིས་བརླབས་པ་དང་། མཆོད་པའི་རྒྱན་ཐམས་ཅད་ཀྱི་སྤྲིན་གྱི་ཆར་རབ་ཏུ་འབབ་པའི་རྒྱན་ནམཁའི་དབྱིངས་ལ་བྱིན་གྱི་བརླབ་པ་བྱེད་ཅིང་། བཅོམ་ལྡན་འདས་དེ་བཞིན་གཤེགས་
པ་ཡེ་ཤེས་རིན་པོ་ཆེའི་འོད་ཀུན་ཏུ་འཕྲོ་བའི་དཔལ་གྱི་རྒྱལ་པོ་གང་ན་བ་དེར་སོང་སྟེ། ཕྱིན་ནས་བཅོམ་ལྡན་འདས་དེ་བཞིན་གཤེགས་པའི་ཡེ་ཤེས་རིན་པོ་ཆེའི་འོད་ཀུན་ཏུ་འཕྲོ་བའི་ཡོན་ཏན་དཔལ་གྱི་རྒྱལ་པོའི་ཞབས་
གཉིས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་སྟན་ནོར་བུ་རིན་པོ་ཆེ་ཆེན་པོའི་ཕྱོགས་ཀུན་ཏུ་རྣམ་པར་སྣང་
བའི་པད་མོའི་སྙིང་པོ་ཅན་ལ་འདུག་གོ། །དེ་ནས་འཁོར་ལོས་བསྒྱུར་བའི་བུ་མོ་ཡེ་ཤེས་རིན་པོ་ཆེའི་འོད་ཀུན་ཏུ་འཕྲོ་བའི་པད་མོ་བཟང་མོ་མིག་ཡིད་དུ་འོང་བའི་དཔལ་གྱི་ཟླ་བའི་དཀྱིལ་འཁོར་གྱི་ལུས་ལས་རྒྱན་
བཀྲོལ་ཏེ། བཅོམ་ལྡན་འདས་དེ་བཞིན་གཤེགས་པ་ཡེ་ཤེས་ཀྱི་འོད་ཀུན་ཏུ་འཕྲོ་བའི་དཔལ་ཡོན་ཏན་དཔལ་གྱི་རྒྱལ་པོ་ལ་གཏོར་ཏོ། མངོན་པར་གཏོར་ཏོ། །དེ་ནས་རྒྱན་དེ་དག་བཅོམ་ལྡན་འདས་དེའི་དབུའི་
གཙུག་གི་སྟེང་གི་བར་སྣང་ལ་ནོར་བུ་རིན་པོ་ཆེའི་རྒྱན་གྱི་གདུགས་ཆེན་པོ་ནོར་བུ་རིན་པོ་ཆེ་སྣ་ཚོགས་ཀྱི་དྲ་བས་ཡོངས་སུ་བསྐོར་ཀླུའི་དབང་པོའི་ལུས་ཀྱིས་གཟུང་བ་རྒྱན་ཐམས་ཅད་ཀྱིས་ལུས་ཀྱི་དབྱིབས་ཤིན་ཏུ་

77-1-16a

ལེགས་པར་ཀུན་ནས་བསྐོར་བ། རྒྱན་གྱི་གདུགས་ཀྱི་དཀྱིལ་འཁོར་བཅུས་ཡོངས་སུ་བསྐོར་བ། ཤིན་ཏུ་དག་པ་ཁང་པ་བརྩེགས་པའི་དབྱིབས་སྣ་ཚོགས་ཀྱིས་རྒྱན་པ། རིན་པོ་ཆེ་ཐམས་ཅད་ཀྱི་ལྷབ་
ལྷུབ་ཀྱི་སྤྲིན་གྱི་ཀུན་ནས་ཡོག་པ། ནོར་བུ་རིན་པོ་ཆེའི་རྒྱལ་པོ་ཐམས་ཅད་ཀྱི་ཤིང་གི་རྒྱན་གྱིས་ཀུན་ནས་ཁེབས་པ། ནོར་བུ་རིན་པོ་ཆེའི་རྒྱལ་པོ་སྤོས་ཐམས་ཅད་ཀྱི་རྒྱ་མཚོས་ཡོངས་སུ་བརྒྱན་པར་འདུག་པར་གྱུར་ཏེ། 
དེའི་དབུས་ན་བྱང་ཆུབ་ཀྱི་ཤིང་ཆེན་པོ་ཆོས་ཀྱི་དབྱིངས་ལས་བྱུང་བའི་རིན་པོ་ཆེ་ཐམས་ཅད་ཀྱི་ཡན་ལག་དང་། ལྷུན་དུ་ལྡན་པ་ཞེས་བྱ་བས་རྒྱན་པའི་མཛོད་མཐའ་དང་དབུས་མེད་པ་སྐད་ཅིག་རེ་རེ་ཞིང་རྒྱན་སྣ་ཚོགས་
ཡོངས་སུ་སྟོན་པ་ཡོད་པ་མཐོང་བར་གྱུར་ཏོ། །དེའི་དྲུང་ན་དེ་བཞིན་གཤེགས་པ་རྣམ་པར་སྣང་མཛད་ཅེས་བྱ་བ་བྱང་ཆུབ་སེམས་དཔའ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་བྱང་
ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་གྱིས་བྱུང་བ་བྱང་ཆུབ་སེམས་དཔའི་རྒྱན་སྣ་ཚོགས་ཐ་མི་དད་ཅིང་བསམ་གྱིས་མི་ཁྱབ་པ་ལ་རྣམ་པར་སྤྱོད་པ་ཤ་སྟག་གིས་བསྐོར་ཅིང་མདུན་དུ་བྱས་
པ་དང་། འཇིག་རྟེན་གྱི་དབང་པོ་ཐམས་ཅད་ཀྱང་དེ་ལ་མངོན་ཏུ་གྱུར་པ་མཐོང་ངོ་། །བཅོམ་ལྡན་འདས་རྣམ་པར་སྣང་མཛད་དེའི་སངས་རྒྱས་ཀྱིས་རྣམ་པར་འཕྲུལ་པ་མཐའ་དང་དབུས་མེད་པ་ཡང་མཐོང་བར་གྱུར་ཏོ། །
སྔོན་གྱི་བྱང་ཆུབ་སེམས་དཔའི་སྤྱོད་པ་བསྐལ་པ་གཅིག་ནས་གཅིག་ཏུ་རྒྱུད་པ་ལ་འང་ཞུགས་པར་གྱུར་ཏོ། །འཇིག་རྟེན་གྱི་ཁམས་དེའི་འདུ་བ་དང་འཇིག་པའི་བསྐལ་པ་འང་ཞུགས་པར་གྱུར་ཏོ། །འཇིག་རྟེན་གྱི་
ཁམས་དེར་འདས་པའི་སངས་རྒྱས་ཀྱི་རྒྱུད་གཅིག་ནས་གཅིག་ཏུ་བརྒྱུད་པ་ལ་འང་ཞུགས་པར་གྱུར་ཏོ། །འཇིག་རྟེན་གྱི་ཁམས་དེ་ན་བྱང་ཆུབ་སེམས་དཔའ་ཀུན་ཏུ་བཟང་པོ་དེ་བཞིན་གཤེགས་པ་ཐམས་

77-1-16b

ཅད་ཀྱི་ཞབས་དྲུང་ན་སངས་རྒྱས་མཆོད་པ་ལ་བརྩོན་པར་གནས་པ་ཡང་མཐོང་ངོ་། །སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བར་བྱ་བ་ལ་མངོན་དུ་གྱུར་པར་ཡང་མཐོང་ངོ་། །བྱང་ཆུབ་
སེམས་དཔའ་ཐམས་ཅད་ཀྱང་བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་ལ་གཟུགས་བརྙན་དུ་གྱུར་པར་འཁོད་ཅིང་བདག་ཉིད་ཀྱང་རྗེས་སུ་འབྲང་བར་མཐོང་ངོ་། །དེ་བཞིན་གཤེགས་པ་ཐམས་ཅད་
ཀྱི་ཞབས་ཀྱི་དྲུང་དུ་བྱང་ཆུབ་སེམས་དཔའ་ཐམས་ཅད་ཀྱི་དྲུང་དང་། སེམས་ཅན་ཐམས་ཅད་ཀྱི་གནས་དང་། འཇིག་རྟེན་གྱི་ཁམས་དེ་དང་དེ་དག་ཐམས་ཅད་ན་འང་བྱང་ཆུབ་སེམས་དཔའ་ཀུན་ཏུ་བཟང་པོའི་
གཟུགས་བརྙན་ཀུན་ཏུ་བྱུང་སྟེ། འཇིག་རྟེན་གྱི་ཁམས་དེ་དག་རེ་རེ་ན་འང་སངས་རྒྱས་ཀྱི་ཞིང་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་མཚམས་གྱི་རྒྱན་དང་བཅས་པ། གཞི་དང་བཅས་པ་དང་། དབྱིབས་
དང་བཅས་པ་དང་། ལྷུན་དང་བཅས་པ་དང་། རྒྱན་སྣ་ཚོགས་ཡོངས་སུ་དག་པ་དང་བཅས་པ། རྒྱན་སྣ་ཚོགས་ཀྱི་སྤྲིན་གྱིས་ཀུན་ནས་ཁེབས་པ་རྣམ་པར་བཀོད་པ་དང་། མྱིང་དང་གྲངས་རྣམ་པ་སྣ་ཚོགས་དང་
ལྡན་པ་དང་། དེ་བཞིན་གཤེགས་པའི་རྒྱུད་སྣ་ཚོགས་ལས་བརྗོད་པ་དུས་གསུམ་གྱི་ཚུལ་སྣ་ཚོགས་སུ་གཏོགས་པ་དང་། ཕྱོགས་འབྱམ་ཀླས་པ་སྣ་ཚོགས་སུ་འདུ་བ་ཆོས་ཀྱི་དབྱིངས་འབྱམ་ཀླས་པ་སྣ་ཚོགས་
ཀྱི་ཁོངས་སུ་གཏོགས་པ། ཆོས་ཀྱི་དབྱིངས་ཀྱི་གཞི་སྣ་ཚོགས་སུ་འདུས་པ། ནམཁའི་དབྱིངས་སྣ་ཚོགས་ལ་རྣམ་པར་གནས་པ། སྙིང་པོ་བྱང་ཆུབ་སྣ་ཚོགས་ཀྱིས་བརྒྱན་པ། དེ་བཞིན་གཤེགས་པའི་རྣམ་པར་
འཕྲུལ་པ་སྣ་ཚོགས་ཀྱིས་བྱུང་བ་སངས་རྒྱས་ཀྱི་སེང་གེའི་གདན་སྣ་ཚོགས་ཀྱིས་བརྒྱན་པ། དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོ་སྣ་ཚོགས་དང་ལྡན་པ། དེ་བཞིན་གཤེགས་པའི་འཁོར་གྱི་

77-1-17a

དཀྱིལ་འཁོར་གྱི་རྒྱུད་སྣ་ཚོགས་ཅན། དེ་བཞིན་གཤེགས་པའི་ཐབས་མཁས་པ་སྣ་ཚོགསུ་བརྗོད་པ་དང་ལྡན་པ། དེ་བཞིན་གཤེགས་པའི་ཆོས་ཀྱི་འཁོར་ལོ་བསྐོར་བའི་ཚུལ་སྣ་ཚོགས་ཅན་
དེ་བཞིན་གཤེགས་པའི་དབྱངས་ཀྱི་ཡན་ལག་དང་། གསུང་གི་ང་རོ་སྣ་ཚོགས་རབ་ཏུ་བྱུང་། སྐད་སྣ་ཚོགས་རྒྱ་མཚོ་ཤིན་ཏུ་བསྟན་པ་དང་ལྡན་པ་དང་། མདོ་སྡེའི་སྤྲིན་སྣ་ཚོགས་རྗེས་སུ་སྒྲོག་པ་ཅན་དག་ཀྱང་
མཐོང་བར་གྱུར་ཏོ། །མཐོང་ནས་དེ་བས་ཀྱང་དགའ་བ་དང་། མོས་པའི་ཤུགས་ཆེན་པོ་ཐོབ་པར་གྱུར་ཏེ། དེ་དེ་ལྟར་དགའ་བའི་ཤུགས་ཆེན་པོ་སྐྱེས་པར་གྱུར་པ་ལ། བཅོམ་ལྡན་འདས་ཡེ་ཤེས་རིན་པོ་ཆེའི་འོད་
ཀུན་ཏུ་འཕྲོ་བའི་དཔལ་ཡོན་ཏན་དཔལ་གྱི་རྒྱལ་པོ་དེ་བཞིན་གཤེགས་པ་དེས་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་རབ་ཏུ་བསྒྲགས་པ་ཞེས་བྱ་བའི་མདོ་སྡེ་འཁོར་གྱི་མདོ་སྡེ། སངས་རྒྱས་
ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང་བཅས་པ་ཡང་དག་པར་བསྟན་ཏེ། དེས་མདོ་སྡེ་དེ་ཐོས་པར་གྱུར་ནས། ཏིང་ངེ་འཛིན་གྱི་སྒོ་སྟོང་ཕྲག་བཅུ་ཤིན་ཏུ་ཕྲ་ཞིང་རེག་ན་བདེ་བར་ཐོབ་པར་གྱུར་ཏེ། དེ་ནི་
དཔེར་ན་མའི་མངལ་དུ་རྣམ་པར་ཤེས་པ་ཞུགས་པར་གྱུར་མ་ཐག་པ་ལྟ་བུ་དང་འདི་ལྟ་སྟེ་དཔེར་ན། སེམས་ཅན་རྣམས་ཀྱི་ལས་མངོན་པར་བསྒྲུབས་པ་ལྟ་བུ་དང་། འདི་ལྟ་སྟེ་དཔེར་ན། ཞིང་བཟང་པོ་དམ་
པའི་ས་བོན་བཏབ་ནས་རིང་པོར་མ་ལོན་ཡང་མྱུ་གུ་སྐྱེ་བའི་རྒྱུར་གྱུར་པ་སྟེ་ལྟ་བུ་སྟེ། དེ་བཞིན་དུ་ཏིང་ངེ་འཛིན་དེ་དག་ཀྱང་འཇམ་ཞིང་ཡིད་དུ་འོང་བ་སྟེ། འདི་ལྟར་དེ་བཞིན་གཤེགས་པ་ཐམས་ཅད་མངོན་དུ་རྣམ་
པར་དམིགས་པ་ཞེས་བྱ་བའི་ཏིང་ངེ་འཛིན་དང་། ཞིང་འབྱམ་ཀླས་པ་ཐམས་ཅད་དུ་སྣང་བ་རྗེས་སུ་སོང་བ་ཞེས་བྱ་བའི་ཏིང་ངེ་འཛིན་དང་། དུས་གསུམ་གྱི་ཚུལ་ཐམས་ཅད་ལ་འཇུག་པ་ཁོང་དུ་ཆུད་པ་ཞེས་

77-1-17b

བྱ་བའི་ཏིང་ངེ་འཛིན་དང་། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་སྒྲོག་པ་ཞེས་བྱ་བའི་ཏིང་ངེ་འཛིན་དང་། སངས་རྒྱས་ཐམས་ཅད་ཀྱི་སྨོན་ལམ་རྒྱ་མཚོ་རྣམ་པར་དམིགས་པ་ཞེས་བྱ་བའི་
ཏིང་ངེ་འཛིན་དང་། འཁོར་བ་ཐམས་ཅད་ཀྱི་སྡུག་བསྔལ་གྱིས་གཟིར་བའི་སེམས་ཅན་འབྱུང་བའི་ང་རོ་རབ་ཏུ་བསྒྲགས་པས་རྣམ་པར་དམྱིགས་པར་བྱེད་པ་ཞེས་བྱ་བའི་ཏིང་ངེ་འཛིན་དང་། སེམས་ཅན་
ཐམས་ཅད་ཀྱི་མུན་ནག་རྣམ་པར་སེལ་བའི་སྨོན་ལམ་གྱི་རྒྱན་ཅེས་བྱ་བའི་ཏིང་ངེ་འཛིན་དང་། སེམས་ཅན་ཐམས་ཅད་སྡུག་བསྔལ་དང་བྲལ་བའི་སྨོན་ལམ་གྱིས་རྣམ་པར་དམིགས་པ་ཞེས་བྱ་བའི་
ཏིང་ངེ་འཛིན་དང་། སེམས་ཅན་ཐམས་ཅད་ཀྱི་བདེ་བ་འགྲུབ་པ་ཡོངས་སུ་འབྱིན་པ་ཞེས་བྱ་བའི་ཏིང་ངེ་འཛིན་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། འདུལ་བས་མི་སྐྱོ་བའི་སྙིང་པོ་ཞེས་
བྱ་བའི་ཏིང་ངེ་འཛིན་དང་། བྱང་ཆུབ་སེམས་དཔའ་ཐམས་ཅད་ཀྱི་ལམ་ལ་འཇུག་པའི་རྒྱལ་མཚན་ཞེས་བྱ་བའི་ཏིང་ངེ་འཛིན་དང་། བྱང་ཆུབ་སེམས་དཔའི་ས་ཐམས་ཅད་ཡོངས་སུ་གནོན་པར་བསྒྲུབ་པའི་
རྒྱན་ཅེས་བྱ་བའི་ཏིང་ངེ་འཛིན་དང་། དེ་དག་ལ་སྩོགས་པའི་ཏིང་ངེ་འཛིན་གྱི་སྒོ་སྟོང་ཕྲག་བཅུ་རྣམས་དེས་ཐོབ་པར་གྱུར་ཏོ། །དེ་ཕྲ་བ་ལ་མཉམ་པར་བཞག་པའི་སེམས་དང་། མི་གཡོ་བའི་སེམས་དང་། 
རབ་ཏུ་དགའ་བའི་སེམས་དང་། དབུགས་ཕྱིན་པའི་སེམས་དང་། དཔག་ཏུ་མེད་པའི་སེམས་དང་། དགེ་བའི་བཤེས་གཉེན་གྱི་རྗེས་སུ་འབྲང་བའི་སེམས་དང་། ཐམས་ཅད་མཁྱེན་པ་ཉིད་ཤིན་ཏུ་ཟབ་པ་ལ་
དམིགས་པའི་སེམས་དང་། བྱམས་པའི་རྗེས་སུ་འགྲོ་བའི་ཚུལ་རྒྱ་མཚོ་ལ་ཞུགས་པའི་སེམས་དང་། མངོན་པར་ཞེན་པ་ཐམས་ཅད་ལས་གྱེན་དུ་འཕགས་པའི་སེམས་དང་། འཇིག་རྟེན་གྱི་ཡུལ་ཐམས་

77-1-18a

ཅད་ལ་དེ་མི་གནས་པའི་སེམས་དང་། དེ་བཞིན་གཤེགས་པའི་ཡུལ་ལ་འཇུག་པའི་སེམས་དང་། སངས་རྒྱས་ཐམས་ཅད་ཀྱི་གཟུགས་དང་། ཁ་དོག་རྒྱ་མཚོས་སྣང་བར་གྱུར་པའི་སེམས་དང་། 
འཁྲུག་པ་མེད་པའི་སེམས་དང་། གཡོ་བ་མེད་པའི་སེམས་དང་། ཁོང་ཁྲོ་བ་མེད་པའི་སེམས་དང་། མཐོན་དམན་མེད་པའི་སེམས་དང་། མི་སྐྱོ་བའི་སེམས་དང་། མི་ཟློག་པའི་སེམས་དང་། ཞུམ་པ་མེད་
པའི་སེམས་དང་། ཆོས་ཐམས་ཅད་ཀྱི་རང་བཞིན་ངེས་པར་རྟོགས་པའི་སེམས་དང་། ཆོས་ཐམས་ཅད་ཀྱི་ཚུལ་རྒྱ་མཚོའི་རྗེས་སུ་སོང་བའི་སེམས་དང་། ཆོས་ཐམས་ཅད་རབ་ཏུ་འབྱེད་པའི་ཚུལ་གྱི་
རྗེས་སུ་སོང་བའི་སེམས་དང་། སེམས་ཅན་རྒྱ་མཚོ་ཐམས་ཅད་ལ་འཇུག་པའི་སེམས་དང་། འགྲོ་བ་ཐམས་ཅད་ཡོངས་སུ་སྐྱོབ་པའི་སེམས་དང་། སངས་རྒྱས་རྒྱ་མཚོ་མང་པོའི་སྣང་བ་ཡོངས་སུ་
སྐྱེས་པའི་སེམས་དང་། དེ་བཞིན་གཤེགས་པ་ཐམས་ཅད་ཀྱི་སྨོན་ལམ་རྒྱ་མཚོ་ལ་འཇུག་པའི་སེམས་དང་། སྒྲིབ་པ་ཐམས་ཅད་ཀྱི་རི་རྣམ་པར་འཐོར་བའི་སེམས་དང་། བསོད་ནམས་ཀྱི་ཚོགས་རྒྱ་ཆེན་པོ་
ཡང་དག་པར་བསྒྲུབ་པའི་སེམས་དང་། དེ་བཞིན་གཤེགས་པའི་སྟོབས་བཅུ་ལ་སྤོབས་པ་མངོན་སུམ་དུ་གྱུར་པའི་སེམས་དང་། བྱང་ཆུབ་སེམས་དཔའི་ཡུལ་ཐམས་ཅད་ལ་སྣང་བ་ཐོབ་པའི་སེམས་དང་། བྱང་
ཆུབ་སེམས་དཔའི་ཚོགས་ཐམས་ཅད་འཕེལ་བར་བྱེད་པའི་སེམས་དང་། ཕྱོགས་རྒྱ་མཚོ་ཐམས་ཅད་རྒྱས་པར་འགེངས་པའི་སེམས་དང་ལྡན་པས་ཀུན་ཏུ་བཟང་པོའི་སྨོན་ལམ་ཆེན་པོ་ལ་ལྷག་པར་
དམྱིགས་པར་བྱ་བས་སྨོན་ལམ་རྒྱ་མཚོ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས། དེ་བཞིན་གཤེགས་པ་ཐམས་ཅད་ཀྱི་སྔོན་གྱི་སྨོན་ལམ་རང་གི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་

77-1-18b

དོན་དུ་མངོན་པར་བསྒྲུབ་སྟེ། འདི་ལྟར་སེམས་ཅན་གྱི་ཁམས་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བར་བྱ་བ་དང་། ཆོས་ཀྱི་དབྱིངས་འབྱམ་ཀླས་པ་ཡོངས་སུ་ཤེས་པར་བྱ་བ་དང་། ཆོས་ཀྱི་
དབྱིངས་ཀྱི་ཚུལ་རྒྱ་མཚོ་ལ་འཇུག་པར་བྱ་བ་དང་། སངས་རྒྱས་ཀྱི་ཞིང་ཐམས་ཅད་དུ་ཕྱི་མའི་བསྐལ་པར་བྱང་ཆུབ་སེམས་དཔའི་སྤྱོད་པ་སྤྱད་པར་བྱ་བ་དང་། བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་
ཐམས་ཅད་ལ་ཕྱི་མའི་མཐའ་བསྐལ་པར་གནས་པར་བྱ་བ་དང་། དེ་བཞིན་གཤེགས་པ་ཐམས་ཅད་ཀྱི་དྲུང་དུ་འགྲོ་བར་བྱ་བ་དང་། དགེ་བའི་བཤེས་གཉེན་ཐམས་ཅད་བསྙེན་བཀུར་བ་དང་། དེ་བཞིན་
གཤེགས་པ་ཐམས་ཅད་ལ་མཆོད་ཅིང་རིམ་གྲོར་བྱ་བ་ཡོངས་སུ་རྫོགས་པར་བྱ་བ་དང་། སེམས་ཀྱི་སྐད་ཅིག་རེ་རེ་ལ་ཐམས་ཅད་མཁྱེན་པའི་ཡེ་ཤེས་རྣམ་པར་བསྒྲུབ་པ་དང་། རྣམ་པར་འཚང་རྒྱ་
བར་བྱ་བས་བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་པར་བྱ་བའི་ཕྱིར། དེ་དག་ལ་སྩོགས་པ་སྨོན་ལམ་མངོན་པར་བསྒྲུབ་པའི་སྒོ་རྒྱ་མཚོ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་
སེམས་དཔའ་ཀུན་ཏུ་བཟང་པོའི་སྤྱོད་པ་ལ་སྨོན་ལམ་མངོན་པར་བསྒྲུབ་པར་གྱུར་ཏོ། །དེའི་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་མངོན་པར་བསྒྲུབ་པའི་ཕྱིར། བཅོམ་ལྡན་
འདས་དེ་བཞིན་གཤེགས་པ་ཡེ་ཤེས་རིན་པོ་ཆེའི་འོད་ཀུན་ཏུ་འཕྲོ་བའི་དཔལ་ཡོན་ཏན་དཔལ་གྱི་རྒྱལ་པོས་སྔོན་གྱི་དགེ་བའི་རྩ་བ་ཡོངས་སུ་བསྐུལ་བ་མཛད་དོ། །རབ་ཏུ་བསྟན་པ་མཛད་དོ། །ཡོངས་སུ་
བསྟན་པ་མཛད་དོ། །རྣམ་པར་དབྱེ་བ་མཛད་དོ། །རྣམ་པར་དགྲོལ་བ་མཛད་དོ། །ཡང་དག་པར་བསྟན་པར་མཛད་དོ། །ཆུད་ཟ་བར་མི་འགྱུར་བར་བྱ་བའི་ཕྱིར་རབ་ཏུ་བསྟན་པར་མཛད་དོ། །རྒྱ་ཆེན་པོར་ཁྱབ་པར་བྱ་བའི་

77-1-19a

ཕྱིར་ཤིན་ཏུ་ཡངས་པར་མཛད་དོ། །ཐམས་ཅད་མཁྱེན་པ་ཉིད་ལྷུར་ལེན་པར་བྱ་བའི་ཕྱིར་རབ་ཏུ་གནས་པར་མཛད་དོ། དེ་ནི་འདི་ལྟ་སྟེ། ཐོག་མ་སེམས་བསྐྱེད་པ་ནས་ཉེ་བར་བཟུང་བ་ཕྱིན་ཅད་དེ་བཞིན་
གཤེགས་པའི་སྔོན་གྱི་སྨོན་ལམ་རྒྱ་མཚོ་གྲངས་མེད་པ་རབ་ཏུ་ཐོབ་པར་བྱ་བའི་ཕྱིར་རོ། །རིགས་ཀྱི་བུ་སྔོན་འདས་པའི་དུས་དེའི་ཡང་ཕ་རོལ་གྱི་བསྐལ་པ་བཅུ་པ་ལ་འཇིག་རྟེན་གྱི་ཁམས་རིན་ཆེན་ཉི་མའི་འཁོར་
ལོ་རྣམ་པར་སྣང་བའི་འོད་ཅེས་བྱ་བར་དེ་བཞིན་གཤེགས་པ་ཟླ་བའི་རྒྱལ་མཚན་དཔལ་གྱི་གསུང་རབ་ལ་བུ་མོ་ཡེ་ཤེས་ཀྱི་འོད་ཀུན་ཏུ་འཕྲོ་བ་པད་མོ་བཟང་མོ་མིག་ཡིད་དུ་འོང་བའི་དཔལ་གྱི་ཟླ་བ་དེ། 
བྱང་ཆུབ་སེམས་དཔའ་ཀུན་ཏུ་བཟང་པོས་ཡོངས་སུ་བསྐུལ་ཏོ། དེ་བཞིན་གཤེགས་པའི་སྐུ་གཟུགས་པད་མོ་ལ་བཞུགས་པ་ཞིག་བཅོས་སོ། །བཅོས་ནས་ཀྱང་རི་མོ་བྲིས་སོ། །རི་མོ་བྲིས་ནས་ཀྱང་རིན་པོ་
ཆེས་ཤིན་ཏུ་བརྒྱན་ཏོ། །དགེ་བའི་བཤེས་གཉེན་བྱང་ཆུབ་སེམས་དཔའ་ཀུན་ཏུ་བཟང་པོ་ལ་བརྟེན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འང་སེམས་བསྐྱེད་དོ། །དགེ་བའི་རྩ་བ་དེས་ལོག་པར་མི་
ལྟུང་བའི་ཆོས་ཅན་དུ་གྱུར་ཏོ། །རྟག་ཏུ་ལྷའི་དབང་པོའི་རིགས་དང་མིའི་དབང་པོའི་རིགསུ་སྐྱེས་པར་གྱུར་ཏོ། །ཐམས་ཅད་དུ་ཡང་གཟུགས་མཛེས་ཤིང་སྡུག་ལ་བལྟ་ན་ཡིད་དུ་འོང་བ་དང་། ཁ་དོག་བཟང་པོ་ཤིན་ཏུ་
རྒྱས་པ་དམ་པ་དང་ལྡན་པར་གྱུར་ཏེ། རྟག་ཏུ་དེ་བཞིན་གཤེགས་པ་མཐོང་བ་དང་། བྱང་ཆུབ་སེམས་དཔའ་ཀུན་ཏུ་བཟང་པོ་དང་ཡང་བྲལ་བར་མ་གྱུར་ཏོ། །དགེ་བའི་བཤེས་གཉེན་དེ་ཉིད་ཀྱིས་ཚེ་རབས་དེ་དག་དུ་ཡོངསུ་
སྨིན་པར་བྱས་སོ། །དྲན་པར་བྱས་སོ། །དེ་ཡང་དེས་བྱང་ཆུབ་སེམས་དཔའ་ཀུན་ཏུ་བཟང་པོ་ཡོངས་སུ་བསྙེན་བཀུར་ཏེ། ཡིད་འབྱུང་བར་མ་བྱས་སོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་

77-1-19b

འཁོར་ལོས་བསྒྱུར་བའི་རྒྱལ་པོ་རྣམ་པར་སྣང་བ་རིན་ཆེན་པད་མོ་དཔལ་གྱི་གཙུག་ཕུད་སྙིང་པོ་ཞེས་བྱ་བ་དེ་གཞན་ཞིག་ཡིན་སྙམ་དུ་སེམས་ན་ནི། རིགས་ཀྱི་བུ་ཁྱོད་ཀྱིས་དེ་ལྟར་མི་བལྟ་སྟེ། བྱང་ཆུབ་སེམས་
དཔའ་བྱམས་པ་ནི། དེའི་ཚེ་དེའི་དུས་ན་འཁོར་ལོས་བསྒྱུར་བའི་རྒྱལ་པོ་རྣམ་པར་སྣང་བ་རིན་ཆེན་པད་མོ་དཔལ་གྱི་གཙུག་ཕུད་སྙིང་པོ་ཞེས་བྱ་བར་གྱུར་ཏོ། །རིགས་ཀྱི་བུ་དེའི་ཚེ་དེའི་དུས་ན་རྒྱལ་པོའི་
བཙུན་མོའི་དཔལ་གྱི་བཞིན་ཡོངས་སུ་རྒྱས་པ་ཞེས་བྱ་བ་བྱུང་བ་དེ། གཞན་ཞིག་ཡིན་སྙམ་དུ་སེམས་ན་ཡང་དེ་ལྟར་མི་བལྟ་སྟེ། མཚན་མོའི་ལྷ་མོ་ཁོ་མོའི་དྲུང་ན་འདུག་པ་སྒྲ་རྒྱ་མཚོ་རབ་ཏུ་ཞི་བ་དང་
ལྡན་པ་འདི་ཡིན་ནོ། །རིག་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོའི་བུ་མོ་ཡེ་ཤེས་ཀྱི་འོད་ཀུན་ཏུ་འཕྲོ་བ། པད་མོ་བཟང་མོ་མིག་ཡིད་དུ་འོང་བའི་དཔལ་གྱི་ཟླ་བ་ཞེས་བྱ་བ་དེ་གཞན་ཞིག་ཡིན་
སྙམ་དུ་སེམས་ན་ནི་དེ་ལྟར་མི་བལྟ་སྟེ། ཁོ་མོ་ནི་དེའི་ཚེ་དེའི་དུས་ན་རྒྱལ་པོའི་བུ་མོ་ཡེ་ཤེས་ཀྱི་འོད་ཀུན་ཏུ་འཕྲོ་བ། པད་མོ་བཟང་མོ་མིག་ཡིད་དུ་འོང་བའི་དཔལ་གྱི་ཟླ་བ་ཞེས་བྱ་བར་གྱུར་ཏོ། །ཁོ་མོ་བུ་མོ་གཞོན་ནུར་
གྱུར་ཏོ། །དེ་བཞིན་གཤེགས་པ་དབང་པོའི་རྒྱལ་མཚན་དཔལ་གྱི་གསུང་རབ་ལ་དེ་བཞིན་གཤེགས་པའི་སྐུ་པད་མོ་ལ་བཞུགས་པ་བཅོས་པ་དེ་ནི་ཁོ་མོའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུར་གྱུར་ཏོ། །
དེའི་ཚེ་བྱང་ཆུབ་སེམས་དཔའ་ཀུན་ཏུ་བཟང་པོས། ཁོ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྐུལ་བ་དེ་ནི། ཁོ་མོས་བྱང་ཆུབ་ཏུ་སེམས་དང་པོ་བསྐྱེད་པ་ཡིན་ནོ། །ཁོ་མོས་བཅོམ་ལྡན་
འདས་དེ་བཞིན་གཤེགས་པ་ཡེ་ཤེས་རིན་པོ་ཆེའི་འོད་ཀུན་ཏུ་འཕྲོ་བའི་དཔལ་ཡོན་ཏན་དཔལ་གྱི་རྒྱལ་པོའི་དྲུང་དུ་ཕྱིན་ཏེ། རྒྱན་གྱིས་གཏོར་ནས་དེ་བཞིན་གཤེགས་པའི་རྣམ་པར་འཕྲུལ་པ་དང་། ཆོ་འཕྲུལ་

77-1-20a

མཐོང་བར་གྱུར་ཏེ། ཁོ་མོས་བཅོམ་ལྡན་འདས་དེའི་དྲུང་ནས་ཆོས་ཐོས་པར་གྱུར་པ་དེའི་ཚེ། ཁོ་མོས་བྱང་ཆུབ་སེམས་དཔའི་རྣམ་པར་ཐར་པ། འཇིག་རྟེན་ཐམས་ཅད་མངོན་དུ་གྱུར་པས་འགྲོ་
བ་རྣམ་པར་འདུལ་བ་སྟོན་པ་འདི་དག་ཐོབ་པོ། །དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་དག་ཐམས་ཅད་ཀྱང་བསྙེན་བཀུར་ཏེ། ཡོ་བྱད་དང་མཆོད་ཅིང་རིམ་གྲོར་བྱ་བ་ཐམས་ཅད་ཀྱིས་ཀྱང་
བཀུར་སྟིར་བྱསོ། །དེ་བཞིན་གཤེགས་པ་དེ་དག་གིས་ཆོས་བསྟན་པ་དེ་དག་ཐམས་ཅད་ཀྱང་ཁོ་མོས་ཐོས་ཏེ། དེ་བཞིན་གཤེགས་པ་དེ་དག་གི་གདམས་ངག་དང་རྗེས་སུ་བསྟན་པ་ལ་འང་ཞུགས་པར་གྱུར་ཏོ། །
དེ་བཞིན་གཤེགས་པ་དེ་དག་ལ་ཁོ་མོས་རིམ་གྲོ་ཆེར་བྱས་ཏེ། རིམ་གྲོ་དེའི་རྣམ་པས་སེམས་ཀྱི་སྐད་ཅིག་གཅིག་ལ་དེ་བཞིན་གཤེགས་པ་དེ་དག་ཐམས་ཅད་དང་། བྱང་ཆུབ་སེམས་དཔའི་འཁོར་གྱི་དཀྱིལ་
འཁོར་དེ་དག་དང་། སངས་རྒྱས་ཀྱི་ཞིང་དེ་དག་ཐམས་ཅད་ཀྱང་མཐོང་སྟེ། འཇིག་རྟེན་གྱི་ཁམས་རྣམ་པར་སྣང་བའི་ཁམས་དེ་ནི་འདས་པར་གྱུར། བསྐལ་པ་རྡུལ་དང་བྲལ་བའི་དཀྱིལ་འཁོར་དེ་ནི་
མཐར་ཕྱིན་པར་གྱུར་ནས། དེའི་རྗེས་ལ་འཇིག་རྟེན་གྱི་ཁམས་ནི་རིན་ཆེན་འཁོར་ལོ་སྣ་ཚོགས་ཀྱིས་ཀླུབས་ཤིང་བརྒྱན་པ་ཞེས་བྱ་བ། བསྐལ་པ་ནི་འོད་ཆེན་པོ་ཞེས་བྱ་བ་ཞིག་བྱུང་སྟེ། དེ་ལ་སངས་
རྒྱས་ལྔ་བརྒྱ་བྱུང་བར་གྱུར་ཏོ། །དེ་དག་ཐམས་ཅད་ཀྱང་ཁོ་མོས་བསྙེན་བཀུར་ཏེ། བསྐལ་པ་འོད་ཆེན་པོ་དེ་ལ་དེ་བཞིན་གཤེགས་པ་ཐུགས་རྗེ་ཆེན་པོའི་སྤྲིན་གྱི་རྒྱལ་མཚན་ཞེས་བྱ་བ་བསྐལ་པའི་དང་
པོ་ལས་གྲུབ་སྟེ། དེ་མངོན་པར་བྱུང་བའི་ཚེ། ཁོ་མོ་མཚན་མོའི་ལྷ་མོར་གྱུར་པས་མཆོད་པ་བྱས་སོ། །དེའི་འོག་ཏུ་དེ་བཞིན་གཤེགས་པ་རྡོ་རྗེ་མཐུ་བོ་ཆེའི་དཔལ་ཞེས་བྱ་བ་བྱུང་སྟེ། དེ་ལ་ཁོ་མོ་འཁོར་ལོས་བསྒྱུར་

77-1-20b

བར་གྱུར་པས་མཆོད་པ་བྱས་སོ། །དེ་བཞིན་གཤེགས་པ་དེས་ཁོ་མོ་ལ་མདོ་སྡེ་སངས་རྒྱས་ཐམས་ཅད་སྐྱེ་ཞིང་འབྱུང་བ་ཞེས་བྱ་བ། མདོ་སྡེ་སངས་རྒྱས་ཀྱིས་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་
དང་བཅས་པ་ཡང་དག་པར་བསྟན་ཏེ། དེ་ཡང་ཁོ་མོས་ཐོས་ནས་ཡོངས་སུ་བཟུང་ངོ་། །དེའི་འོག་ཏུ་དེ་བཞིན་གཤེགས་པ་མེའི་འོད་འཕྲོ་བ་རིའི་དཔལ་གྱིས་རྣམ་པར་བརྒྱན་པ་ཞེས་བྱ་བ་བྱུང་སྟེ་དེ་ལ་ཁོ་མོ་ཚོང་
དཔོན་གྱི་བུ་མོར་གྱུར་པས་མཆོད་པ་བྱས་སོ། །དེ་བཞིན་གཤེགས་པ་དེས་ཁོ་མོ་ལ་མདོ་སྡེ་དུས་གསུམ་སྣང་བའི་སྙིང་པོ་ཞེས་བྱ་བ། མདོ་སྡེ་འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་དང་བཅས་པ་ཡང་
དག་པར་བསྟན་ཏེ། དེ་ཡང་ཁོ་མོས་ཐོས་ནས་ཡོངས་སུ་བཟུང་ངོ་། །དེའི་འོག་ཏུ་དེ་བཞིན་གཤེགས་པ་ཆོས་རྒྱ་མཚོ་ཐམས་ཅད་མངོན་པར་འཕགས་པའི་ཤུགས་ཀྱི་རྒྱལ་པོ་ཞེས་བྱ་བ་བྱུང་སྟེ། དེ་ལ་ཁོ་མོ་
ལྷའི་རྒྱལ་པོ་གྱུར་པས་མཆོད་པ་བྱས་སོ། །དེ་བཞིན་གཤེགས་པ་དེས་ཁོ་མོ་ལ་མདོ་སྡེ་ཆོས་ཀྱི་དབྱིངས་ཀྱི་གཞི་ཐམས་ཅད་ཤེས་པའི་བྱེ་བྲག་ཅེས་བྱ་བ་མདོ་སྡེ་ལྔ་བརྒྱའི་འཁོར་དང་བཅས་པ་ཡང་དག་པར་
བསྟན་ཏོ། དེ་ཡང་ཁོ་མོས་ཐོས་ནས་ཡོངས་སུ་བཟུང་ངོ་། །དེའི་འོག་ཏུ་དེ་བཞིན་གཤེགས་པ་ཆོས་ཟབ་མོའི་དཔལ་རྒྱ་མཚོས་ཡང་དག་པར་འབྱུང་བའི་འོད་ཅེས་བྱ་བ་བྱུང་སྟེ། དེ་ལ་ཁོ་མོ་ཀླུའི་དབང་པོའི་བུ་
མོར་གྱུར་པས། ནོར་བུ་རིན་པོ་ཆེ་ཡིད་བཞིན་གྱི་རྒྱལ་པོའི་སྤྲིན་གྱི་ཆར་མངོན་པར་ཕབ་སྟེ་མཆོད་པ་བྱས་སོ། །དེ་བཞིན་གཤེགས་པ་དེས་ཁོ་མོ་ལ་མདོ་སྡེ་དགའ་བ་རྒྱ་མཚོ་རྣམ་པར་འཕེལ་བའི་ཤུགས་
ཤེས་བྱ་བ་མདོ་སྡེ་བྱེ་བ་བརྒྱ་སྟོང་ཕྲག་བཅུའི་འཁོར་དང་བཅས་པ་ཡང་དག་པར་བསྟན་ཏེ། དེ་ཡང་ཁོ་མོས་ཐོས་ནས་ཡོངས་སུ་བཟུང་ངོ་། །དེའི་འོག་ཏུ་དེ་བཞིན་གཤེགས་པ་རིན་ཆེན་རི་བོའི་སྤོའི་

77-1-21a

འོད་ཟེར་སྒྲོན་མ་ཞེས་བྱ་བ་བྱུང་སྟེ། དེ་ལ་ཁོ་མོ་རྒྱ་མཚོའི་ལྷ་མོར་གྱུར་པས། རིན་པོ་ཆེའི་པད་མོའི་སྤྲིན་གྱི་ཆར་གྱིས་ཉེ་བར་བསྙེན་ཏེ་མཆོད་པ་བྱས་སོ། །དེ་བཞིན་གཤེགས་པ་དེས་ཁོ་མོ་
ལ་མདོ་སྡེ་ཆོས་དབྱིངས་རྒྱ་མཚོའི་ཚུལ་ཞེས་བྱ་བ་མདོ་སྡེ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་དང་བཅས་པ་ཡང་དག་པར་བསྟན་ཏེ། དེའང་ཁོ་མོས་ཐོས་ནས་ཡོངསུ་བླངསོ། །དྲན་པས་ཡང་
དག་པར་བཟུང་ངོ་། །དེའི་འོག་ཏུ་དེ་བཞིན་གཤེགས་པ་ཡོན་ཏན་རྒྱ་མཚོ་སྣང་བའི་དཀྱིལ་འཁོར་གྱི་དཔལ་ཞེས་བྱ་བ་བྱུང་སྟེ། དེ་ལ་ཁོ་མོ་དྲང་སྲོང་མངོན་པར་ཤེས་པ་ལྔ་དང་ལྡན་པར་གྱུར་པ། དྲང་སྲོང་
སྟོང་ཕྲག་དྲུག་བཅུས་ཀུན་ནས་བསྐོར་བས་རྫུ་འཕྲུལ་ཆེན་པོའི་རྣམ་པར་འཕྲུལ་པ་ཉེ་བར་བསྟན་ཏེ། སྤོས་ཀྱི་མེ་ཏོག་རི་བོ་ཙམ་གྱི་སྤྲིན་གྱི་ཆར་མངོན་པར་ཕབ་སྟེ། མཆོད་པ་བྱས་སོ། །དེ་བཞིན་གཤེགས་
པ་དེས་ཁོ་མོ་ལ་མདོ་སྡེ་ཆོས་གནས་མེད་པའི་སྒྲོན་མ་ཞེས་བྱ་བ་མདོ་སྡེ་སྟོང་ཕྲག་བཅུའི་འཁོར་དང་བཅས་པ་བསྟན་ཏེ། དེ་ཡང་ཁོ་མོས་ཐོས་ནས་ཡོངསུ་བཟུང་ངོ་། །དེའི་འོག་ཏུ་དེ་བཞིན་གཤེགས་
པ་རྣམ་པར་སྣང་མཛད་དཔལ་གྱི་སྙིང་པོ་ཞེས་བྱ་བ་བྱུང་སྟེ། ཁོ་མོ་ཡང་མཉམ་པ་ཉིད་ཀྱི་དོན་འབྱུང་བ་ཞེས་བྱ་བའི་སའི་ལྷ་མོ་ཞིག་ཏུ་གྱུར་ནས། ཁོ་མོ་སའི་ལྷ་མོའི་འཁོར་གྲངས་མེད་པ་དང་བཅས་
པས་རིན་པོ་ཆེའི་ཤིང་ཐམས་ཅད་ཀྱི་ལྷུན་ལས་རིན་པོ་ཆེའི་མེ་ཏོག་གི་སྤྲིན་གྱི་ཆར་མངོན་པར་ཕབ་སྟེ་རིན་པོ་ཆེའི་ཕྲེང་བའི་སྤྲིན་གྱི་ཆར་ཡང་རབ་ཏུ་ཕབ་ནས། དེ་བཞིན་གཤེགས་པ་དེ་ལ་མཆོད་
པ་བྱ་བའི་ཕྱིར་སྤྱན་སྔར་ཕྱིན་ཏོ། །དེ་བཞིན་གཤེགས་པ་དེས་ཁོ་མོ་ལ་མདོ་སྡེ་དེ་བཞིན་གཤེགས་པ་ཐམས་ཅད་ཡང་དག་པར་འབྱུང་བའི་གནས་སྙིང་པོ་ཞེས་བྱ་བའི་མདོ་སྡེ་གྲངས་མེད་པའི་འཁོར་

77-1-21b

དང་བཅས་པ་ཡང་དག་པར་བསྟན་ཏེ། དེ་ཡང་ཁོ་མོས་ཐོས་ནས་བཟུང་སྟེ་ཆུད་ཟོས་པར་མ་བྱས་སོ། །རིགས་ཀྱི་བུ་དེ་བཞིན་གཤེགས་པ་ལྔ་བརྒྱ་པོ་དེ་དག་ཐམས་ཅད་ཀྱི་ཐ་མར་དེ་བཞིན་གཤེགས་པ་ཆོས་
ཀྱིས་དབྱིངས་ནམཁའ་མཛོད་སྤུས་ཡོངསུ་རྒྱས་པའི་རྩེ་མོ་དཔལ་གྱི་སྒྲོན་མ་ཞེས་བྱ་བ་འཇིག་རྟེན་དུ་བྱུང་སྟེ། དེའི་ཚེ་ཁོ་མོ་ཡང་གར་མཁན་གྱི་བུ་མོ་བཞིན་མངོན་པར་མཛེས་པའི་དཔལ་ཞེས་བྱ་བ་ཞིག་ཏུ་
གྱུར་ཏེ། དེ་བཞིན་གཤེགས་པ་དེ་གྲོང་ཁྱེར་དུ་གཤེགས་ནས། གར་མཁན་གྱི་ཚོགས་ཀྱིས་རོལ་མོ་བྱས་པའི་ཚེ། ཁོ་མོས་སངས་རྒྱས་ཀྱི་བྱིན་གྱིས་སྟེང་གི་ནམཁའི་དབྱིངས་ལས། ཚིགསུ་བཅད་པ་སྟོང་གིས་དེ་བཞིན་
གཤེགས་པ་དེ་ལ་མངོན་པར་བསྟོད་དེ། སྤྱན་སྔར་ཕྱིན་ཏོ། །དེ་བཞིན་གཤེགས་པ་དེས་མཛོད་སྤུ་ནས་འོད་ཟེར་ཆོས་ཀྱི་དབྱིངས་རྣམ་པར་སྣང་བའི་རྒྱན་ཅེས་བྱ་བ་བཀྱེ་སྟེ། ཁོ་མོའི་ལུས་ཐམས་ཅད་ཀྱང་སྣང་བར་མཛད་
དོ། །འོད་ཟེར་དེས་ཁོ་མོ་ལ་ཕོག་མ་ཐག་ཏུ་རྣམ་པར་ཐར་པ། ཆོས་ཀྱི་དབྱིངས་ཀྱི་ཚུལ་ཡོངསུ་འཁྱིལ་བའི་སྙིང་པོ་ཞེས་བྱ་བ་ཐོབ་པར་གྱུར་ཏོ། །རིགས་ཀྱི་བུ་དེ་ལྟར་དེ་བཞིན་གཤེགས་པ་དེ་དག་ལ་སྩོགས་པ་བསྐལ་
པ་འོད་ཆེན་པོ་ལ་འཇིག་རྟེན་གྱི་ཁམས་རིན་ཆེན་འཁོར་ལོ་སྣ་ཚོགས་ཀྱིས་ཀླུབས་ཤིང་བརྒྱན་པར་སངས་རྒྱས་ལྔ་བརྒྱ་བྱུང་བར་གྱུར་པ་དེ་དག་ཐམས་ཅད་ཀྱང་མཉེས་པར་བྱས་ཏེ། དེ་བཞིན་གཤེགས་པ་དེ་དག་
ལ་ཁོ་མོས་མཆོད་པ་ཡང་བྱས་སོ། །དེ་བཞིན་གཤེགས་པ་དེ་དག་གི་ཁོ་མོ་ལ་ཆོས་བསྟན་པ་དེ་དག་ཐམས་ཅད་ཀྱང་དྲན་ཏེ། ཆོས་ཀྱི་ཚུལ་དེ་དག་ལས་ཡི་གེ་འགའ་འམ། ཚིག་འགའ་ཡང་བརྗེད་པར་མ་གྱུར་ཏོ། །
དེ་བཞིན་གཤེགས་པ་དེ་དག་རེ་རེའི་དྲུང་དུ་འགྲོ་བའི་ཚེ་ཡང་སངས་རྒྱས་ཀྱི་ཆོས་ཡོངས་སུ་བརྗོད་པར་བྱ་བས་སེམས་ཅན་ཚད་མེད་པའི་དོན་བྱས་སོ། །དེ་བཞིན་གཤེགས་པ་དེ་དག་རེ་རེ་ལ་ཡང་ཁོ་མོས་ཆོས་

77-1-22a

ཀྱི་དབྱིངས་ཀྱི་རང་བཞིན་རྒྱ་མཚོ་དུས་གསུམ་གྱི་ཡེ་ཤེས་ཀྱི་སྙིང་པོ་ཆོས་ཀྱི་དབྱིངས་ཤིན་ཏུ་ཡངས་པ་ཞེས་བྱ་བའི་ཐམས་ཅད་མཁྱེན་པའི་གློག་མངོན་པར་སྣང་བ་ཀུན་ཏུ་བཟང་པོའི་སྤྱོད་པ་ཐམས་
ཅད་ལ་གནས་པར་ཡང་དག་པར་གཞོལ་བ་ཐོབ་པར་གྱུར་ཏོ། རིགས་ཀྱི་བུ་ཁོ་མོ་ལ་ནི་ད་ལྟར་ཡང་སེམས་ཀྱི་སྐད་ཅིག་རེ་རེ་ལ་དེ་བཞིན་གཤེགས་པ་མཐའ་དང་དབུས་མེད་པ་ཡོངསུ་སྣང་སྟེ། དེ་བཞིན་གཤེགས་
པ་དེ་དག་ཁོ་མོས་མཐོང་བར་གྱུར་པས་ཐམས་ཅད་མཁྱེན་པའི་གློག་མངོན་པར་སྣང་བ། སྔན་ཆད་མ་ཐོབ་པ་སྔན་ཆད་མ་མཐོང་བ་དག་ཀྱང་ཁོ་མོའི་སེམས་ཀྱི་རྒྱུད་ལ་གནས་པར་གྱུར་ཏོ། འོན་ཀྱང་བྱང་ཆུབ་སེམས་
དཔའ་ཀུན་ཏུ་བཟང་པོའི་སྤྱོད་པ་ལས་གཡོ་བ་མེད་དོ། །དེ་ཅིའི་ཕྱིར་ཞེ་ན། ཐམས་ཅད་མཁྱེན་པའི་གློག་མངོན་པར་སྣང་བ་ཐོབ་པ་འདི་ནི་མཐའ་དང་དབུས་མེད་པར་བསྟན་པའོ། །དེ་ནས་མཚན་མོའི་ལྷ་མོ་
སེམས་ཅན་ཀུན་ཏུ་སྐྱོང་བའི་གཟི་བརྗིད་ཀྱི། དཀྱིལ་འཁོར་དེའི་ཚེ་བྱང་ཆུབ་སེམས་དཔའི་རྣམ་པར་ཐར་པ་འཇིག་རྟེན་ཐམས་ཅད་མངོན་དུ་གྱུར་པས། འགྲོ་བ་རྣམ་པར་འདུལ་བ་ཞེས་བྱ་བ་འདི་བརྟེན་ཏེ་
བསྟན་པ་དང་། རྣམ་པར་དབྱེ་བར་བྱ་བའི་ཕྱིར་སངས་རྒྱས་ཀྱི་བྱིན་གྱིས་བརླབ་ཀྱིས་ཚོང་དཔོན་གྱི་བུ་ནོར་བཟངས་ལ་ཚིགསུ་བཅད་དེ་སྨྲས་པ། །ཟབ་མོ་བལྟ་དཀའ་ཁོང་དུ་ཆུད་དཀའ་སྟེ། །དུས་གསུམ་དབྱིངས་ཀུན་ཐ་དད་
ཚུལ་ལྡན་ལ། །ཆོས་འོད་དཀྱིལ་འཁོར་ཀུན་ཏུ་འོད་འབྱུང་བའི། །ཁོ་མོའི་ཚིག་འདི་ནོར་བཟངས་མཉན་པར་གྱིས། །སངས་རྒྱས་ཡོན་ཏན་འདོད་པས་བྱང་ཆུབ་ཏུ། །ཁོ་མོས་ཐོག་མ་ཇི་ལྟར་སེམས་བསྐྱེད་དང་། །
ཇི་ལྟར་ཁོ་མོས་རྣམ་ཐར་འདི་ཐོབ་པ། །དེ་དག་རྣམ་པར་ཕྱེ་བའི་ཚུལ་འདི་ཉན། །འདི་ནས་སངས་རྒྱས་ཞིང་གི་རྡུལ་སྙེད་ཀྱི། །བསྐལ་པ་གཅིག་ནས་གཅིག་བརྒྱུད་ཕ་རོལ་ཏུ། །འཇིག་རྟེན་ཁམས་ཡངས་

77-1-22b

དྲི་མའི་སྐྱོན་མེད་པ། །རྣམ་སྣང་རྒྱལ་མཚན་སྒྲོན་མའི་དཔལ་བྱུང་སྟེ། །བསྐལ་པ་རྡུལ་དང་བྲལ་བའི་དཀྱིལ་འཁོར་བྱུང་། །དེ་ལ་སངས་རྒྱས་རིགས་ནི་རྒྱུན་མ་ཆད། །དེ་ཚེ་རི་རབ་རྡུལ་ཕྲན་རབ་སྙེད་ཀྱི། །
སྟོབས་བཅུ་སྐྱོན་མེད་མང་པོ་བྱུང་བར་གྱུར། །དེ་ལ་བདེ་གཤེགས་ཐོག་མར་རིན་ཆེན་འོད། །ཀུན་ཏུ་འཕྲོ་དཔལ་ཡོན་ཏན་དཔལ་རྒྱལ་བྱུང་། །རྒྱལ་བ་ཆོས་ཀྱི་རྒྱལ་མཚན་རི་རབ་དཔལ། །ཡོན་ཏན་སེང་གེའི་
དབང་པོ་རྒྱལ་བ་བཞི། །རྒྱལ་བ་ཞི་བའི་རྒྱལ་པོ་སྐྱེ་བཅིལ་དང་། །གྲགས་པའི་རི་བོ་ཡོན་ཏན་རི་རབ་དཔལ། །རྒྱལ་བ་ཉི་མ་ཟླ་ཞལ་བཅོམ་ལྡན་འདས། །བཅུ་པ་འདི་དག་ཚུལ་འདི་ཐོག་མའོ། །
རྒྱལ་བ་ནམ་མཁའི་གཞི་དང་ཀུན་ནས་འོད། །ཕྱོགས་སུ་ཡོངས་བྱུང་དྲན་པ་རྒྱ་མཚོའི་སྒོ། །རྒྱལ་བ་མངོན་འཕགས་འོད་མངའ་རི་རབ་དཔལ། །བདེ་གཤེགས་ཆོས་ཀྱི་འོད་འཕྲོ་རི་བོའི་དཔལ། །ཐུགས་
རྗེ་ཆེ་མངའ་དགུ་པ་པད་མོས་འཕགས། །སངས་རྒྱས་བཅུ་པ་ཆོས་དབྱིངས་མེ་ཏོག་སྟེ། །སངས་རྒྱས་རྒྱ་མཚོ་ཡོངས་སུ་བརྗོད་པ་ལགས། །ཚུལ་འདི་བཅུ་པ་གཉིས་པ་འདི་ཡིན་ནོ། །འོད་དཔལ་རྒྱལ་པོ་
ཡེ་ཤེས་བློ་གྲོས་དང་། །སྣ་ཚོགས་དོན་དབང་དཔལ་གྱི་བློ་གྲོས་ལྷ། །རྒྱལ་བ་ཤུགས་ཀྱི་རྒྱལ་བློ་ཡེ་ཤེས་དཔལ། །སྣང་བའི་རྒྱལ་པོ་འོད་ཀྱི་རྒྱལ་མཚན་དཔལ། །རྒྱལ་བ་རྣམ་པར་གནོན་པའི་ལྷ་སྟབས་དང་། །
དེ་བཞིན་ཆོས་དབྱིངས་པད་མོ་བཅུ་པ་སྟེ། །རྒྱ་ཆེན་ཡོངསུ་བསྟན་ནས་ཚུལ་འདི་ནི། །ཚུལ་འདིར་བཅུ་པ་གསུམ་པ་བསྟན་པའོ། །རིན་ཆེན་འོད་འཕྲོ་རི་དཔལ་བཅོམ་ལྡན་འདས། །དེ་ཡི་འོག་མ་ཡོན་ཏན་རྒྱ་མཚོ་
དཔལ། །ཆོས་ཀྱི་འོད་དང་པད་མོ་སྙིང་པོ་དཔལ། །འགྲོ་བའི་ཟླ་བ་སྤྱན་ཚུལ་བདེ་བར་གཤེགས། །སྤོས་ཀྱི་འོད་དང་རིན་ཅན་རི་རབ་དཔལ། །རྒྱལ་བ་དྲི་ཟ་ལུས་འོད་རྒྱལ་པོ་དང་། །རིན་ཆེན་སྙིང་པོ་རྒྱལ་དཔལ་

77-1-23a

གཟི་བརྗིད་ལྡན། །རྒྱལ་བ་བཅུ་པ་ཞི་བའི་གཟུགས་ཀྱི་སྟབས། །དེ་ཡི་འོག་མ་རྒྱལ་བ་རྒྱ་ཆེན་བློ། །རིན་ཆེན་འོད་དང་ནམ་མཁའི་སྤྲིན་གྱི་དཔལ། །རྒྱལ་བ་དམ་པའི་མཚན་གྱི་དཔལ་གྱུར་དང་། །
བརྟུལ་ཞུགས་དཀྱིལ་འཁོར་རང་གི་ལུས་ཀྱི་འོད། །མཐུ་ཆེན་བརྟུལ་ཞུགས་རི་རབ་དཔལ་མངའ་དང་། །རྒྱལ་བ་ཡོན་ཏན་འཁོར་ཡུག་དཔལ་གྱི་རྒྱལ། །བཅོམ་ལྡན་མི་ཕམ་བརྟུལ་ཞུགས་རྒྱལ་
མཚན་དང་། །ཤིང་གི་རི་བོ་རྒྱལ་བ་དེ་དག་བཅུ། །རྒྱལ་བ་སྩ་ལའི་རྒྱལ་པོ་དཔལ་གྱི་མཆོག །འཇིག་རྟེན་དབང་པོའི་ལུས་ནི་སྣ་ཡི་འོད། །མངོན་པར་འཕགས་འོད་དཔལ་གྱི་བཅོམ་ལྡན་འདས། །
རྡོ་རྗེའི་འོད་དང་ས་ཡི་གཟི་བརྗིད་དཔལ། །རྒྱལ་བ་ཟབ་ཆོས་འོད་ཀྱི་རྒྱལ་པོ་དཔལ། །ཆོས་ཀྱི་རྒྱ་མཚོ་དབྱངས་ཀྱི་བློ་གྲོས་དང་། །རི་རབ་རྒྱལ་མཚན་དཔལ་དང་བློ་གྲོས་སྣང་། །རྒྱལ་བ་བཅུ་པ་
རིན་ཆེན་རྒྱལ་པོ་དཔལ། །ཚངས་པའི་འོད་དང་རྒྱལ་བ་ནམ་མཁའ་དབྱིངས། །དེ་བཞིན་ཆོས་ཀྱི་དབྱིངས་ནི་གཟུགས་བརྙན་དཔལ། །སྣང་བའི་དཀྱིལ་འཁོར་འོད་ཀྱི་བཅོམ་ལྡན་འདས། །ཐ་དད་ཕྱོགས་
མཁྱེན་ཡེ་ཤེས་བློ་གྲོས་དང་། །ནམ་མཁའི་སྒྲོན་མ་མངོན་པར་དགའ་བའི་དཔལ། །རྣམ་པར་སྣང་མཛད་འོད་དཔལ་བདེ་བར་གཤེགས། །བསོད་ནམས་རབ་ཏུ་སྣང་དཔལ་ཞི་བའི་དཔལ། །བཅུ་པའི་སྙིང་
རྗེ་ཆེན་པོའི་སྤྲིན་གྱི་དཔལ། །དེ་བཞིན་ཉིད་འོད་སྟོབས་སྣང་བློ་གྲོས་དང་། །རྒྱལ་བ་འགྲོ་བ་ཐམས་ཅད་མངོན་གཟིགས་དང་། །དེ་ཚེ་རྒྱལ་བ་མངོན་འཕགས་འོད་མང་འབྱུང་། །དེ་ཡི་འོག་མ་ཞི་བའི་སྐུ་ཡི་
འོད། །ཆོས་འཕགས་བདེ་གཤེགས་དེ་བཞིན་བྱུང་བར་འགྱུར། །དེ་ཡི་འོག་མ་རླུང་གི་དྲག་ཤུལ་དཔལ། །དཔའ་བོའི་རྒྱལ་མཚན་རིན་ཆེན་ལུས་ཀྱི་དཔལ། །དུས་གསུམ་སྣང་བའི་འོད་ནི་བཅུ་པའོ། །

77-1-23b

སྨོན་ལམ་རྒྱ་མཚོ་རབ་ཏུ་སྣང་དཔལ་དང་། །གཉིས་པ་དགོངས་པ་རྡོ་རྗེ་རི་བོ་དཔལ། །རྒྱལ་བ་གསུམ་པ་སེང་གེ་རི་རབ་དཔལ། །དྲན་པའི་རྒྱལ་མཚན་རྒྱལ་པོ་ཆོས་དཔལ་བློ། །ཤེས་རབ་སྒྲོན་མ་འོད་
ཀྱི་རྒྱལ་མཚན་དཔལ། །དེ་ཡི་འོག་མ་རྒྱལ་བ་རྒྱ་ཆེན་བློ། །རྒྱལ་བ་ཆོས་དབྱིངས་ཚུལ་གྱི་ཡེ་ཤེས་སྟབས། །ཆོས་ཀྱི་རྒྱ་མཚོ་བློ་གྲོས་ཡེ་ཤེས་དཔལ། །ཆོས་འཛིན་པ་དང་རིན་ཆེན་སྦྱིན་དཔལ་དང་། །
རྒྱལ་བ་ཡོན་ཏན་ཁོར་ཡུག་དཔལ་གྱི་སྤྲིན། །བཟོད་པའི་སྒྲོན་མ་དཔལ་དང་གཟི་བརྗིད་ལྡན། །ཤུགས་འོད་ཞི་གནས་དབྱངས་ཀྱི་རྒྱལ་བ་དང་། །ཞི་བའི་རྒྱལ་མཚན་འགྲོ་བའི་སྒྲོན་མ་དཔལ། །སངས་རྒྱས་
སྨོན་ལམ་ཆེན་པོ་ཤུགས་ཀྱི་དཔལ། །བཅོམ་ལྡན་གཞན་གྱིས་མི་ཐུབ་རྒྱལ་མཚན་སྟོབས། །རྒྱལ་བ་ཡེ་ཤེས་འོད་འཕྲོ་རྒྱ་མཚོ་དཔལ། །རྒྱལ་བ་ཆོས་དབང་བློ་གྲོས་ཆགས་པ་མེད། །འགྲོ་སྐད་རྒྱ་མཚོ་
དབྱངས་ཀྱི་བློ་གྲོས་དང་། །ཐམས་ཅད་དབྱངས་ཀྱི་ཡན་ལག་སྒྲ་སྐད་དཔལ། །དབང་བསྒྱུར་མཆོད་སྦྱིན་གྲགས་པའི་མཆོད་སྡོང་བློ། །ཕྱོགས་ཡུལ་འགྲོ་བ་མངོན་སུམ་བཅོམ་ལྡན་འདས། །སེམས་ཅན་
བསམ་པར་མཉམ་པ་སྐུ་ཡི་དཔལ། །གཞན་ཡང་སངས་རྒྱས་གནས་དང་བཅས་པའི་དཔལ། །རྒྱལ་བ་རང་བཞིན་ལུས་དཔལ་བཟང་པོ་དང་། །དེར་ནི་རྒྱལ་བ་དེ་ལ་སྩོགས་པ་བྱུང་། །དེ་དག་བྱུང་ནས་འགྲོ་བ་སྒྲོན་
མ་མཛད། །བསྐལ་པ་རི་རབ་ཤིན་ཏུ་ཕྲ་རྡུལ་སྙེད། །བདག་གིས་རྒྱལ་བ་རྒྱ་མཚོ་དེ་དག་མཆོད། །བསྐལ་པ་སངས་རྒྱས་ཞིང་གི་རྡུལ་སྙེད་པོ། །དེ་དག་དུ་ནི་རྒྱལ་བ་གང་བྱུང་བ། །བདེ་གཤེགས་དེ་དག་ཐམས་
ཅད་བདག་གིས་མཆོད། །རྣམ་པར་ཐར་པའི་ཚུལ་ནི་འདི་ལ་ཞུགས། །རྣམ་པར་ཐར་པའི་ཚུལ་འདི་སྒོམ་བྱེད་ཅིང་། །བསྐལ་པ་མཐའ་ཡས་བདག་གིས་སྔོན་སྤྱད་ཀྱིས། །ཁྱོད་ཀྱིས་ཐོས་ནས་ནན་ཏན་མྱུར་

77-1-24a

གྱིས་ཤིག །ཚུལ་འདི་རིང་པོ་མི་ཐོགས་ཐོབ་པར་འགྱུར། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་འཇིག་རྟེན་ཐམས་ཅད་མངོན་དུ་གྱུར་པས། འགྲོ་བ་རྣམ་པར་འདུལ་
བ་སྟོན་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་མཐའ་དང་དབུས་མེད་པའི་བྱང་ཆུབ་སེམས་དཔའི་སྤྱོད་པ་རྒྱ་མཚོ་ལ་མོས་པ་སྣ་ཚོགས་ཀྱིས་ཡང་དག་པར་གནས་པ། བསམ་པ་སྣ་
ཚོགས་ཀྱི་ལུས་དང་ལྡན་པ། དབང་པོ་རྒྱ་མཚོ་སྣ་ཚོགས་ཡོངས་སུ་གྲུབ་པ། བྱང་ཆུབ་སེམས་དཔའི་སྤྱོད་པ་དང་། སྨོན་ལམ་སྣ་ཚོགས་ཤིན་ཏུ་རྟོགས་པ་དེ་དག་གི་སྤྱོད་པ་ཤེས་པ་འམ། ཡོན་ཏན་
བརྗོད་པར་ནུས་རེ་སྐན། སོང་རིགས་ཀྱི་བུ་སྙིང་པོ་བྱང་ཆུབ་འདི་ཉིད་ན་ཁོ་མོ་དང་རྒྱང་མི་རིང་བ་ཞིག་ན་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པ་ཞེས་བྱ་བ་པད་མོའི་ཁྲི་རིན་པོ་ཆེའི་རྒྱལ་པོ་སྣང་
བའི་རྒྱལ་མཚན་གྱིས་རབ་ཏུ་བརྒྱན་པ་ཞིག་ལ་འདུག་ཅིང་། མཚན་མོའི་ལྷ་མོ་གྲངས་མེད་པ་བརྒྱ་སྟོང་ཕྲག་བཅུའི་འཁོར་གྱིས་བསྐོར་བ་འདུག་གི། དེའི་གན་དུ་སོང་ལ་ཇི་ལྟར་བྱང་ཆུབ་སེམས་
དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་
བརྗིད་དཔལ་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ཡང་དང་ཡང་
བལྟས་ཏེ། མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་གྱི་དྲུང་ནས་སོང་ངོ་།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་གཉིས་པ། 

77-1-24b

དེ་ནས་ཚོང་དཔོན་གྱི་བུ་ནོར་བཟངས་མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་གྱི་བྱང་ཆུབ་སེམས་དཔའི་རྣམ་པར་ཐར་པ་འཇིག་རྟེན་ཐམས་ཅད་མངོན་དུ་གྱུར་པས་འགྲོ་བ་རྣམ་པར་འདུལ་
བ་དེ་ལ་ཡོངས་སུ་སྒོམ་ཞིང་ཁོང་དུ་ཆུད་པར་བྱ་བ་དང་། ཡིད་ཆེས་པར་བྱ་བ་དང་། འཇུག་པར་བྱ་བ་དང་། ཤིན་ཏུ་རྒྱས་པར་བྱ་བ་དང་། ཡོངས་སུ་ཁྱབ་པར་བྱ་བ་དང་། རབ་ཏུ་མཆོད་པར་བྱ་བ་དང་། དབང་དུ་བྱ་བ་དང་། 
སྣང་བར་བྱ་བ་དང་། ཡང་དག་པར་གཞོལ་བར་བྱ་བ་བྱེད་ཅིང་། མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པ་གང་ན་བ་དེར་ཕྱིན་ཏེ། མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པའི་རྐང་པ་
གཉིས་ལ་སྤྱི་བོས་ཕྱག་འཚལ་ཏེ། མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་
བ་དང་ལྡན་པའི་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་མ་ལྷ་མོ་བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་སྟེ། བདག་ནི་དགེ་
བའི་བཤེས་གཉེན་གྱི་རྟེན་གྱིས་བྱང་ཆུབ་སེམས་དཔའི་སྤྱོད་པ་ལ་སློབ་ཅིང་། བྱང་ཆུབ་སེམས་དཔའི་སྤྱོད་པ་ལ་ཞུགས་ཏེ། བྱང་ཆུབ་སེམས་དཔའི་སྤྱོད་པ་ལ་ནན་ཏན་དུ་བགྱི་བ་དང་། བྱང་ཆུབ་
སེམས་དཔའི་སྤྱོད་པ་ལ་རབ་ཏུ་གནས་པས་ཐམས་ཅད་མཁྱེན་པ་ཉིད་དུ་འབྱུང་བར་འཚལ་ན། འཕགས་མ་ལྷ་མོ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་
བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཤད་དུ་གསོལ། དེ་ནས་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པས། ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་དེ་

77-1-25a

ལྟར་ཁྱོད་དགེ་བའི་བཤེས་གཉེན་གྱི་རྟེན་གྱིས་བྱང་ཆུབ་སེམས་དཔའི་སྤྱོད་པ་ཡོངསུ་ཚོལ་བ་ལེགསོ་ལེགསོ། །རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུག་འབྱུང་བས་
སེམས་ཀྱི་སྐད་གཅིག་རྣམ་པར་བརྒྱན་པ་ཐོབ་པའོ། །ནོར་བཟངས་ཀྱི་སྨྲས་པ། འཕགས་མ་ཁྱོད་ནི་འཕྲིན་ལས་ཅི་མཛད་ཡུལ་གང་དང་ལྡན་པ་སྦྱོར་བ་གང་དང་ལྡན། ཅི་ལ་རྣམ་པར་དཔྱོད། བྱང་ཆུབ་སེམས་དཔའི་རྣམ་པར་
ཐར་པ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་དེ་ཡུལ་ཇི་ལྟ་བུ་ཞིག་མཆིས་དེས་སྨྲས་པ། རིགས་ཀྱི་བུ་ཁོ་མོ་ནི་སེམས་དང་བསམ་པ་རྒྱ་མཚོ་ཡོངསུ་དག་པའི་མཉམ་པ་ཉིད་ལ་
ཞུགས་པ་སྟེ། འཇིག་རྟེན་གྱི་རྡུལ་དང་དྲི་མ་ཐམས་ཅད་རྣམ་པར་བསལ་བས་མི་ཕྱེད་པས་བརྒྱན་པའི་བསམ་པ་ལ་ཞུགས་པའོ། །བརྩམ་པ་ལས་མི་ལྡོག་མི་བཟློག་པའི་སེམས་དང་ལྡན་པའོ། །རིན་པོ་ཆེའི་
རི་བོ་ལྟར་ཡོན་ཏན་གྱིས་བརྒྱན་པའི་སེམས་མི་སྐུལ་བ་དང་ལྡན་པའོ། །མི་གནས་མི་རྟེན་པའི་སེམས་དང་ལྡན་པའོ། །འགྲོ་བ་ཐམས་ཅད་ཡོངསུ་སྐྱོབ་པ་ལ་མངོན་པར་ཕྱོགས་པའི་སེམས་དང་ལྡན་པའོ། །
སངས་རྒྱས་རྒྱ་མཚོ་ཐམས་ཅད་མཐོང་བས་མི་ངོམ་པའི་སེམས་དང་ལྡན་པའོ། །བྱང་ཆུབ་སེམས་དཔའ་ཐམས་ཅད་ཀྱི་སྟོབས་ཀྱི་བསམ་པ་རྣམ་པར་དག་པའི་སེམས་དང་ལྡན་པའོ། །དྲན་པའི་རྒྱ་མཚོ་ཡེ་ཤེས་
ཀྱི་སྣང་བ་ཆེན་པོས་བརྒྱན་པ་ལ་ཡང་དག་པར་གནས་པའི་སེམས་དང་ལྡན་པའོ། །སེམས་ཅན་ཐམས་ཅད་མྱ་ངན་གྱི་དགོན་པ་ལས་ཡང་དག་པར་ཟླ་བ་ལ་ཞུག་པའོ་སེམས་ཅན་ཐམས་ཅད་སྡུག་བསྔལ་བ་དང་ཡིད་མི་བདེ་བ་
ལས་རྣམ་པར་བཟློག་པ་ལ་མངོན་པར་བརྩོན་པའོ། །སེམས་ཅན་ཐམས་ཅད་ཀྱི་ཡིད་དུ་མི་འོང་བའི་གཟུགས་དང་། སྒྲ་དང་དྲི་དང་རོ་དང་རེག་ཡོངསུ་རྒྱུ་བ་རྣམ་པར་བཟློག་པ་ལ་ཞུགས་པའོ། །སེམས་ཅན་ཐམས་ཅད་ཀྱི་སྡུག་པ་དང་། 

77-1-25b

མི་སྡུག་པ་དང་བྲལ་ཞིང་ཕྲད་པའི་སྡུག་བསྔལ་རབ་ཏུ་ཞི་བར་བྱ་བ་ལ་ཞུགས་པའོ། །སེམས་ཅན་ཐམས་ཅད་ཀྱི་ཡུལ་གྱི་རྐྱེན་ལས་བྱུང་བས་མགོ་རྨོངས་པའི་སྡུག་བསྔལ་རྣམ་པར་བཟློག་པ་ལ་རབ་
ཏུ་བརྩོན་པའོ། །ལོག་པར་ལྷུང་བའི་སེམས་ཅན་ཐམས་ཅད་ཀྱི་རྟེན་དུ་གྱུར་པའོ། །སེམས་ཅན་ཐམས་ཅད་འཁོར་བའི་གནས་གྱི་སྡུག་བསྔལ་ལས་འབྱུང་བ་ཡང་དག་པར་སྟོན་པ་ལ་མངོན་པར་བརྩོན་
པའོ། །སེམས་ཅན་ཐམས་ཅད་ཀྱི་རྒ་ཤི་དང་མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་ཡིད་མི་བདེ་བ་དང་། འཁྲུག་པ་རྣམ་པར་བཟློག་པ་ལ་ཞུགས་པའོ། །སེམས་ཅན་ཐམས་ཅད་ལ་
དེ་བཞིན་གཤེགས་པའི་བདེ་བ་བླ་ན་མེད་པ་ཡོངས་སུ་བསྒྲུབ་པར་ཞུགས་པ་སྟེ། གྲོང་དང་གྲོང་ཁྱེར་དང་། ལྗོངས་དང་། ཡུལ་དང་ཁམས་དང་། རྒྱལ་པོའི་གནས་ན་འཁོད་པའི་སེམས་ཅན་ཐམས་ཅད་
བདེ་བར་རིམ་གྲོར་བྱ་བས་ཉམས་དགའ་བར་འགྱུར་ཞིང་དེ་དག་ལ་ཆོས་དང་འཐུན་པར་བསྲུང་བ་དང་། བསྐྱབ་པ་དང་རིམ་གྲོར་བྱ་བ་ཡང་ལེགས་པར་བྱེད་དེ། དེ་དག་རིམ་པས་ཐམས་ཅད་མཁྱེན་པ་ཉིད་དུ་
ཡོངས་སུ་སྨྱིན་པར་བྱེད་དོ། །འདི་ལྟ་སྟེ་ཁང་ཁྱིམ་དང་། གཞལ་མེད་ཁང་ན་གནས་པའི་སེམས་ཅན་རྣམས་ཀྱི་མངོན་པར་ཆགས་པ་ཡོངས་སུ་བསྐྱེད་དོ། །ཡིད་མི་བདེ་བ་དེ་དང་དེ་དག་ཀྱང་རྣམ་པར་སེལ་ཏོ། །
མངོན་པར་ཞེན་པ་ཐམས་ཅད་རྒྱུན་གཅོད་པ་དང་། ཆོས་ཐམས་ཅད་ཀྱི་རང་བཞིན་ཡོངས་སུ་ཤེས་པར་བྱ་བའི་ཕྱིར་ཆོས་སྟོན་ཏོ། །ཕ་མ་དང་ཕུ་ནུ་དང་སྲིང་མོ་དང་གཉེན་བཤེས་དང་འགྲོགས་པའི་སེམས་ཅན་
ཡུན་རིང་པོ་ནས་བཤེས་ཤིང་འཛའ་བར་གྱུར་པ་དག་ལ་སངས་རྒྱས་དང་བྱང་ཆུབ་སེམས་དཔའ་དང་ཕྲད་པར་བྱ་བའི་ཕྱིར་ཆོས་སྟོན་ཏོ། །བུ་སྨད་དང་འགྲོགས་པའི་སེམས་ཅན་རྣམས་ལ་འཁོར་བའི་

77-1-26a

སྲེད་པ་ཐམས་ཅད་རབ་ཏུ་སྤང་བ་དང་། སེམས་ཅན་ཐམས་ཅད་ལ་མཉམ་པ་ཉིད་ཀྱི་སེམས་སུ་བྱ་བ་དང་། སྙིང་རྗེ་ཆེན་པོ་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ཚོང་དུས་
ཀྱི་དབུས་ན་འཁོད་པའི་སེམས་ཅན་རྣམས་ལ་འཕགས་པའི་དགེ་འདུན་དང་། དེ་བཞིན་གཤེགས་པ་མཐོང་བར་བྱ་བ་ལ་ཡང་དག་པར་གཞོལ་བར་བྱ་བའི་ཕྱིར་ཆོས་སྟོན་ཏོ། །ལོངས་སྤྱོད་
ཀྱི་དྲེགས་པས་མྱོས་པའི་སེམས་ཅན་རྣམས་ལ་བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བའི་ཕྱིར་ཆོས་སྟོན་ཏོ། །གླུ་དང་གར་དང་རོལ་མོ་ལ་མངོན་པར་དགའ་བའི་སེམས་
ཅན་རྣམས་ལ་ཆོས་ཀྱི་དགའ་བ་ལ་མོས་པར་བྱ་བའི་ཕྱིར་ཆོས་སྟོན་ཏོ། །ཡུལ་གྱི་དགའ་བ་ལ་ཆགས་པའི་སེམས་ཅན་རྣམས་ལ་དེ་བཞིན་གཤེགས་པའི་ཡུལ་ལ་ཡང་དག་པར་གཞོལ་བར་
བྱ་བའི་ཕྱིར་ཆོས་སྟོན་ཏོ། །ཁྲོ་བས་ཡོངས་སུ་ནོན་པའི་སེམས་ཅན་རྣམས་ལ་བཟོད་པའི་ཕ་རོལ་ཏུ་ཕྱིན་པ་ལ་རབ་ཏུ་དགོད་པར་བྱ་བའི་ཕྱིར་ཆོས་སྟོན་ཏོ། །སེམས་ཅན་ལེ་ལོ་ཅན་རྣམས་
ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པར་བྱ་བའི་ཕྱིར་ཆོས་སྟོན་ཏོ། །སེམས་རྣམ་པར་མོས་པའི་སེམས་ཅན་རྣམས་ལ་དེ་བཞིན་གཤེགས་པའི་བསམ་གཏན་གྱི་ཕ་རོལ་ཏུ་ཕྱིན་པ་
རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ལྟ་བའི་རྣམ་པ་ཐིབས་པོར་སུབས་པའི་སེམས་ཅན་མ་རིག་པའི་མུན་ནག་ན་འཐོམས་པ་རྣམས་ལ་ལྟ་བའི་རྣམ་པ་ཐིབས་པོ་དང་མ་རིག་
པའི་མུན་པ་རྣམ་པར་བསྩལ་བའི་ཕྱིར་ཆོས་སྟོན་ཏོ། །ཤེས་རབ་འཆལ་བ་ཅན་གྱི་སེམས་ཅན་རྣམས་ལ་ཤེས་རབ་ཀྱི་ཕ་རོལ་ཏུ་ཕྱིན་པ་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །

77-1-26b

ཁམས་གསུམ་པ་ལ་མངོན་པར་ཞེན་པའི་སེམས་ཅན་རྣམས་ལ་འཁོར་བ་ལས་འབྱུང་བར་བྱ་བའི་ཕྱིར་ཆོས་སྟོན་ཏོ། །དམའ་བ་ལ་མོས་པའི་སེམས་ཅན་རྣམས་ལ་དེ་བཞིན་གཤེགས་པའི་
བྱང་ཆུབ་ཏུ་སྨོན་ལམ་ཡོངས་སུ་རྫོགས་པར་བྱ་བའི་ཕྱིར་ཆོས་སྟོན་ཏོ། །བདག་ལ་ཕན་པར་བརྩོན་པའི་སེམས་ཅན་རྣམས་ལ་སེམས་ཅན་ཐམས་ཅད་ལ་ཕན་པར་བྱ་བའི་སྨོན་ལམ་ཡོངས་སུ་
རྫོགས་པར་འགྱུར་བར་བྱ་བའི་ཕྱིར་ཆོས་སྟོན་ཏོ། །བསམ་པ་ཉམ་ཆུང་བའི་སེམས་ཅན་རྣམས་ལ་བྱང་ཆུབ་སེམས་དཔའི་སྟོབས་ཀྱི་ཕ་རོལ་ཏུ་ཕྱིན་པ་རྣམ་པར་དག་པར་བྱ་བའི་ཕྱིར་ཆོས་སྟོན་
ཏོ། །མ་རིག་པའི་མུན་པས་སེམས་བློང་བའི་སེམས་ཅན་རྣམས་ལ་བྱང་ཆུབ་སེམས་དཔའི་ཡེ་ཤེས་ཀྱི་ཕ་རོལ་ཏུ་ཕྱིན་པ་རྣམ་པར་དག་པར་བྱ་བའི་ཕྱིར་ཆོས་སྟོན་ཏོ། །གཟུགས་མི་སྡུག་པ་དང་
ལྡན་པའི་སེམས་ཅན་རྣམས་ལ་དེ་བཞིན་གཤེགས་པའི་གཟུགས་རྣམ་པར་དག་པར་བྱ་བའི་ཕྱིར་ཆོས་སྟོན་ཏོ། །ལུས་ཀྱི་དབྱིབས་མི་མཛེས་པ་དང་ལྡན་པའི་སེམས་ཅན་རྣམས་ལ་ཆོས་ཀྱི་
སྐུ་བླ་ན་མེད་པ་རྣམ་པར་དག་པའི་ཕྱིར་ཆོས་སྟོན་ཏོ། །ཁ་དོག་མི་སྡུག་པ་དང་ལྡན་པའི་སེམས་ཅན་རྣམས་ལ་དེ་བཞིན་གཤེགས་པའི་སྐུ་མདོག་གསེར་གྱི་ཁ་དོག་ལྟ་བུ་དང་ཤིན་ཏུ་འཇམ་
ཞིང་ཀ་ཙ་ལིནྡི་ལྟར་རེག་ན་བདེ་བའི་ལུས་རྣམ་པར་དག་པའི་ཕྱིར་ཆོས་སྟོན་ཏོ། །སྡུག་བསྔལ་བའི་སེམས་ཅན་རྣམས་ལ་དེ་བཞིན་གཤེགས་པའི་བདེན་པ་དམ་པ་ཐོབ་པར་བྱ་བའི་ཕྱིར་ཆོས་
སྟོན་ཏོ། །བདེ་བའི་སེམས་ཅན་རྣམས་ལ་ཐམས་ཅད་མཁྱེན་པ་ཉིད་ཀྱི་བདེ་བ་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ནད་པ་ན་བའི་སེམས་ཅན་རྣམས་ལ་བྱང་ཆུབ་སེམས་

77-1-27a

དཔའི་ལུས་གཟུགས་བརྙན་ལྟ་བུ་ཡོངས་སུ་གྲུབ་པར་བྱ་བའི་ཕྱིར་ཆོས་སྟོན་ཏོ། །དགའ་བ་སྣ་ཚོགས་ལ་བརྩོན་པའི་སེམས་ཅན་རྣམས་ལ་བྱང་ཆུབ་སེམས་དཔའི་སྤྱོད་པའི་
དགའ་བ་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ཕོངས་པའི་སེམས་ཅན་རྣམས་ལ་བྱང་ཆུབ་སེམས་དཔའི་ཆོས་ཀྱི་གཏེར་དང་མཛོད་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །
བཟའ་ཤིང་གི་ར་བ་ན་གནས་པའི་སེམས་ཅན་རྣམས་ལ་སངས་རྒྱས་ཀྱི་ཆོས་ཡོངས་སུ་བཙལ་བར་ལ་མངོན་པར་བརྩོན་པའི་རྒྱུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ལམ་དུ་ཞུགས་པའི་
སེམས་ཅན་རྣམས་ལ་ཐམས་ཅད་མཁྱེན་པའི་ལམ་དུ་འཇུག་པར་བྱ་བའི་ཕྱིར་ཆོས་སྟོན་ཏོ། །གྲོང་ན་གནས་པའི་སེམས་ཅན་རྣམས་ལ་ཁམས་གསུམ་པ་ཐམས་ཅད་འབྱུང་བར་བྱ་
བའི་ཕྱིར་ཆོས་སྟོན་ཏོ། །ཡུལ་གྱི་མདབ་ན་གནས་པའི་སེམས་ཅན་རྣམས་ལ་ཉན་ཐོས་དང་རང་བྱང་ཆུབ་ཀྱི་ལམ་ལས་ཡང་དག་པར་འདའ་བར་བྱ་བ་དང་། དེ་བཞིན་གཤེགས་
པའི་ས་ལ་རབ་ཏུ་དགོད་པར་བྱ་བའི་ཕྱིར་ཆོས་སྟོན་ཏོ། །གྲོང་རྡལ་ན་འཁོད་པའི་སེམས་ཅན་རྣམས་ལ་ཆོས་ཀྱི་རྒྱལ་པོའི་ཕོ་བྲང་དུ་གནས་པར་འགྱུར་བར་བྱ་བའི་ཕྱིར་ཆོས་སྟོན་ཏོ། །
ཕྱོགས་མཚམས་ན་འཁོད་པའི་སེམས་ཅན་རྣམས་ལ་དུས་གསུམ་མཉམ་པ་ཉིད་ཀྱི་ཡེ་ཤེས་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ཕྱོགས་ན་གནས་པའི་སེམས་ཅན་རྣམས་ལ་ཆོས་
ཐམས་ཅད་ཡེ་ཤེས་མངོན་པར་ཤེས་པར་བྱ་བའི་ཕྱིར་ཆོས་སྟོན་ཏོ། །འདོད་ཆགས་ལ་གཅིག་ཏུ་དགའ་བའི་སེམས་ཅན་རྣམས་ལ་མི་སྡུག་པའི་སྒོས་འཁོར་བའི་སྲེད་པ་རྣམ་པར་བཟློག་པའི་ཕྱིར་ཆོས་

77-1-27b

སྟོན་ཏོ། །ཞེ་སྡང་ལ་སྤྱོད་པའི་སེམས་ཅན་རྣམས་ལ་བྱམས་པ་ཆེན་པོའི་ཚུལ་རྒྱ་མཚོ་ལ་འཇུག་པར་བྱ་བའི་ཕྱིར་ཆོས་སྟོན་ཏོ། །གཏི་མུག་ལ་སྤྱོད་པའི་སེམས་ཅན་རྣམས་ལ་ཆོས་ཐམས་ཅད་
ཀྱི་སྒོ་རྒྱ་མཚོ་རབ་ཏུ་འབྱེད་པའི་ཡེ་ཤེས་མངོན་པར་ཤེས་པར་བྱ་བའི་ཕྱིར་ཆོས་སྟོན་ཏོ། །ཆ་མཉམ་པ་ལ་སྤྱོད་པའི་སེམས་ཅན་རྣམས་ལ་ཐེག་པ་ཐམས་ཅད་ཀྱི་སྨོན་ལམ་གྱི་ཚུལ་རྒྱ་མཚོས་
ཁྱད་པར་དུ་འགྲོ་བར་བྱ་བའི་ཕྱིར་ཆོས་སྟོན་ཏོ། །འཁོར་བའི་ཡུལ་ལ་དགའ་བའི་བསམ་པ་ཅན་གྱི་སེམས་ཅན་རྣམས་ལ་འཁོར་བའི་ཡུལ་ལ་དགའ་བ་རྣམ་པར་བཟློག་པའི་ཕྱིར་ཆོས་སྟོན་ཏོ། །
འཁོར་བའི་སྡུག་བསྔལ་ཐམས་ཅད་ཀྱིས་གཙེས་པའི་སེམས་ཅན་རྣམས་ལ་འཁོར་བའི་སྡུག་བསྔལ་ཐམས་ཅད་ཀྱིས་ཉེ་བར་ཉོན་མོངས་པ་མེད་པར་བྱ་བའི་ཕྱིར་ཆོས་སྟོན་ཏོ། །དེ་བཞིན་
གཤེགས་པས་འདུལ་བའི་སེམས་ཅན་རྣམས་ལ་མི་སྐྱེ་བའི་གནས་ཡང་དག་པར་བསྟན་པའི་ཕྱིར་ཆོས་སྟོན་ཏོ། །ཕུང་པོ་ལ་གནས་པའི་བསམ་པ་ཅན་གྱི་སེམས་ཅན་རྣམས་ལ་
གཞི་མེད་པའི་ཆོས་ཀྱི་སྤྱོད་ཡུལ་ལ་རྣམ་པར་སྤྱོད་པར་བྱ་བའི་ཕྱིར་ཆོས་སྟོན་ཏོ། །བསམ་པ་ཞུམ་པའི་སེམས་ཅན་རྣམས་ལ་ལམ་གྱི་རྒྱུན་གྱི་ཁྱད་པར་ཡང་དག་པར་བསྟན་པར་བྱ་བའི་
ཕྱིར་ཆོས་སྟོན་ཏོ། །མཐོ་བའི་ང་རྒྱལ་ཅན་གྱི་སེམས་ཅན་རྣམས་ལ་ཆོས་ཐམས་ཅད་མཉམ་པ་ཉིད་ཀྱི་བཟོད་པ་ཡང་དག་པར་བསྟན་པར་བྱ་བའི་ཕྱིར་ཆོས་སྟོན་ཏོ། །གཡོ་སྒྱུའི་ཡུལ་གྱི་བསམ་པ་
དང་ལྡན་པའི་སེམས་ཅན་རྣམས་ལ་བྱང་ཆུབ་སེམས་དཔའི་བསམ་པ་ཡོངས་སུ་དག་པར་བྱ་བའི་ཕྱིར་ཆོས་སྟོན་ཏེ། དེ་ལྟར་རིགས་ཀྱི་བུ་ཁོ་མོ་ནི་སེམས་ཅན་ཐམས་ཅད་ཆོས་ཀྱི་

77-1-28a

སྦྱིན་པས་ཡོངས་སུ་བསྡུས་ཤིང་ངན་སོང་གི་ལམ་གྱི་རྒྱུད་སྡུག་བསྔལ་བ་ཐམས་ཅད་ནས་རྣམ་པར་བཟློག་པ་དང་། ལྷ་དང་མིའི་ཕུན་སུམ་ཚོགས་པ་དང་བདེ་བ་ཡོངས་སུ་བསྟན་པ་དང་། 
ཁམས་གསུམ་པ་ལས་གྱེན་དུ་བསྐྱོད་པ་དང་། །ཐམས་ཅད་མཁྱེན་པ་ཉིད་ལ་རབ་ཏུ་དགོད་པ་དང་། ཐབས་རྣམ་པ་སྣ་ཚོགས་ཀྱིས་ཡོངས་སུ་སྨྱིན་པར་བྱེད་པས། དགའ་བ་ཆེན་པོའི་ཤུགས་
རྒྱ་མཚོ་སྣང་བ་རབ་ཏུ་ཐོབ་པས་དགའ་ཞིང་སྤྲོ་ལ་ཡིད་བདེ་བར་གྱུར་ཏོ། །གཞན་ཡང་རིགས་ཀྱི་བུ་ཁོ་མོ་ནི་ཕྱོགས་དང་། ཕྱོགས་མཚམས་ཀྱི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་
རྒྱ་མཚོ་ལ་རྣམ་པར་ལྟ་ཞིང་སྨོན་ལམ་རྒྱ་མཚོ་ལ་སྤྱོད་པའི་བྱང་ཆུབ་སེམས་དཔའ་ལུས་སྣ་ཚོགས་རྣམ་པར་དག་པ། འོད་ཀྱི་དཀྱིལ་འཁོར་སྣ་ཚོགས་ཀྱི་རྒྱན་དང་ལྡན་པ། འོད་ཟེར་དང་འོད་
ཀྱི་དཀྱིལ་འཁོར་ཁ་དོག་མཐའ་ཡས་པ་རབ་ཏུ་འགྱེད་པ་ཐམས་ཅད་མཁྱེན་པ་ཉིད་ཀྱི་ཚུལ་རྒྱ་མཚོ་སྣ་ཚོགས་པའི་ཡེ་ཤེས་སྣང་བ་ཅན། ཏིང་ངེ་འཛིན་རྒྱ་མཚོ་སྣ་ཚོགས་ལ་ཞུགས་པའི་
རྣམ་པར་འཕྲུལ་བ་སྣ་ཚོགས་ཀྱི་ཡུལ་དང་ལྡན་པ། དབྱངས་ཀྱི་ཡན་ལག་དང་སྐད་སྣ་ཚོགས་ཀྱི་དབྱངས་དང་ལྡན་པ། རྒྱན་སྣ་ཚོགས་ཀྱིས་རྣམ་པར་གླུབས་པའི་ལུས་ཅན། དེ་བཞིན་
གཤེགས་པའི་ཚུལ་སྣ་ཚོགས་ལ་ཞུགས་པ། ཞིང་རྒྱ་མཚོ་འབྱམ་ཀླས་པ་སྣ་ཚོགས་སུ་ཞུགས་པའི་ལུས་དང་ལྡན་པ། སངས་རྒྱས་རྒྱ་མཚོ་སྣ་ཚོགས་ལ་ཞུགས་པ། སོ་སོ་ཡང་དག་པར་
རིག་པ་རྒྱ་མཚོ་སྣ་ཚོགས་ལ་ཞུགས་པ། དེ་བཞིན་གཤེགས་པའི་རྣམ་པར་མཛད་པ་དང་། ཡེ་ཤེས་ཀྱི་ཡུལ་སྣ་ཚོགས་ཀྱིས་སྣང་བར་གྱུར་པ། ཡེ་ཤེས་རྒྱ་མཚོ་སྣ་ཚོགས་ཀྱི་སྣང་བ་རབ་ཏུ་

77-1-28b

ཐོབ་པ། ཏིང་ངེ་འཛིན་རྒྱ་མཚོ་སྣ་ཚོགས་ཀྱི་ཚུལ་རྣམ་པར་སྤྱོད་པ། སྣ་ཚོགས་ཀྱི་རྣམ་པར་ཐར་པའི་གཞལ་མེད་ཁང་ན་རྣམ་པར་རྩེ་བའི་ཡུལ་དང་ལྡན་པ། ཐམས་ཅད་མཁྱེན་པ་ཉིད་ཀྱི་
སྒོ་སྣ་ཚོགས་ལ་མངོན་དུ་གནས་པ། ཆོས་ཀྱི་དབྱིངས་སྣ་ཚོགས་ཀྱི་ནམ་མཁའི་རྒྱན་དང་ལྡན་པ། རྒྱན་སྣ་ཚོགས་ཀྱི་སྤྲིན་གྱིས་ནམ་མཁའ་རྒྱས་པར་འགེངས་པ། འཁོར་གྱི་དཀྱིལ་འཁོར་
རྒྱ་མཚོ་སྣ་ཚོགས་ལ་རྣམ་པར་ལྟ་བ། འཇིག་རྟེན་གྱི་ཁམས་སྣ་ཚོགས་ནས་འདུས་པ། སངས་རྒྱས་ཀྱི་ཞིང་སྣ་ཚོགས་འབྱམ་ཀླས་པར་རྗེས་སུ་འདོང་བ། ཕྱོགས་
རྒྱ་མཚོ་སྣ་ཚོགས་ནས་ཡོངས་སུ་འདུས་པ། དེ་བཞིན་གཤེགས་པ་ཐ་དད་པས་བཀྱེ་བ། །དེ་བཞིན་གཤེགས་པ་ཐ་དད་པའི་ཞབས་ཀྱི་དྲུང་ནས་ལྷགས་པ། 
བྱང་ཆུབ་སེམས་དཔའི་ཚོགས་སྣ་ཚོགས་ཀྱི་འཁོར་དང་ལྡན་པ། རྒྱན་སྣ་ཚོགས་ཀྱི་སྤྲིན་གྱི་ཆར་རབ་ཏུ་འབེབས་པ། དེ་བཞིན་གཤེགས་པའི་ཚུལ་སྣ་ཚོགས་ལ་ཞུགས་
པ་དེ་བཞིན་གཤེགས་པའི་ཆོས་རྒྱ་མཚོ་སྣ་ཚོགས་ཀྱི་འཁོར་དང་ལྡན་པ། ཡེ་ཤེས་སྣ་ཚོགས་རྒྱ་མཚོ་ལ་ཞུགས་པ། རྒྱན་གྱི་སྙིང་པོ་སྣ་ཚོགས་ཅན་གྱི་སྟན་ལ་འཁོད་
པ་རྣམས་ཀྱི་དགའ་བ་སྣ་ཚོགས་ཀྱི་ཤུགས་རྒྱ་མཚོ་ཡོངས་སུ་བསྐྱེད་དེ། དེ་དག་དགའ་བ་སྣ་ཚོགས་ཀྱི་ཤུགས་རྒྱ་མཚོ་ཡོངས་སུ་བསྐྱེད་ནས། 

77-1-29a

དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོར་འདོང་སྟེ། དེ་དག་དེ་བཞིན་གཤེགས་པའི་སྟོབས་ཚད་མེད་པ་རྗེས་སུ་སེམས་པས་ཀྱང་དགའ་བའི་ཤུགས་ཆེན་པོ་རྒྱ་མཚོ་ཡོངས་སུ་
འབྱུང་བར་འགྱུར་རོ། །རིགས་ཀྱི་བུ་གཞན་ཡང་ཁོ་མོ་ནི་བཅོམ་ལྡན་འདས་རྣམ་པར་སྣང་མཛད་ཀྱི་གཟུགས་ཀྱི་སྐུ་ཡོངས་སུ་དག་པ་མཚན་གྱིས་རབ་ཏུ་བརྒྱན་པ། བསམ་གྱིས་མི་ཁྱབ་པ་མཐོང་ནས་དགའ་བ་
ཆེན་པོ་དང་མོས་ཤིང་བདེ་བ་རབ་ཏུ་ཐོབ་སྟེ། སེམས་ཀྱི་སྐད་ཅིག་རེ་རེ་ལ་འང་འོད་ཀྱི་དཀྱིལ་འཁོར་ཆོས་ཀྱི་དབྱིངས་ལྟར་ཡངས་པ། ཁ་དོག་རྒྱ་མཚོ་མཐའ་དང་དབུས་མེད་པར་སྣང་བ་ལ་ལྟ་ཤིང་སེམས་ཀྱི་
སྐད་ཅིག་རེ་རེ་ལ་དགའ་བ་ཆེན་པོའི་ཤུགས་རྒྱ་མཚོ་རབ་ཏུ་འཐོབ་བོ། །རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུའི་བ་སྤུའི་སྒོ་རེ་རེ་ནས་ཀྱང་འོད་གཟེར་ཆེན་པོ་སངས་རྒྱས་ཀྱི་
ཞིང་མཐའ་དང་དབུས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་སྟེ་འོད་ཟེར་རེ་རེ་ཞིང་ཡང་འོད་ཟེར་རྒྱ་མཚོ་སངས་རྒྱས་ཀྱི་ཞིང་མཐའ་ཡས་པའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་དང་ལྡན་པས་ཆོས་ཀྱི་དབྱིངས་ཐམས་ཅད་རྒྱས་པར་
འགེངས་པ་དང་། སེམས་ཅན་ཐམས་ཅད་ཀྱི་སྡུག་བསྔལ་རབ་ཏུ་ཞི་བར་མཛད་པ་མཐོང་ཞིང་སེམས་ཀྱི་སྐད་ཅིག་རེ་རེ་ལ་དགའ་བ་ཆེན་པོའི་ཤུགས་རྒྱ་མཚོ་རབ་ཏུ་འཐོབ་བོ། །རིགས་ཀྱི་བུ་གཞན་ཡང་
བཅོམ་ལྡན་འདས་རྣམ་པར་སྣང་མཛད་ཀྱི་དབུ་དང་། སྐུ་ཕྲག་པ་གཉིས་ཀྱི་ལྷུན་ལས་སེམས་ཀྱི་སྐད་ཅིག་རེ་རེ་ལ་རིན་པོ་ཆེ་ཐམས་ཅད་ཀྱི་འོད་འཕྲོ་བའི་རི་སངས་རྒྱས་ཀྱི་ཞིང་ཐམས་ཅད་ཀྱི་
རྡུལ་ཤིན་ཏུ་ཕྲ་བ་སྙེད་བྱུང་ཞིང་། ཆོས་ཀྱི་དབྱིངས་རྒྱ་མཚོ་ཐམས་ཅད་རྒྱས་པར་འགེངས་པ་མཐོང་ནས། དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་པོ། །རིགས་ཀྱི་

77-1-29b

བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུའི་བ་སྤུའི་སྒོ་རེ་རེ་ནས་སེམས་ཀྱི་སྐད་ཅིག་རེ་རེ་ལ་ཁ་དོག་དྲི་ཞིམ་པོ་དང་། འོད་གཟེར་སྣ་ཚོགས་ཅན་གྱི་སྤྲིན་སངས་རྒྱས་ཀྱི་ཞིང་
ཐམས་ཅད་ཀྱི་རྡུལ་ཤིན་དུ་ཕྲ་བ་སྙེད་བྱུང་ཞིང་ཐམས་ཅད་རྒྱས་པར་འགེངས་པ་མཐོང་ནས། དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་པོ། །རིགས་ཀྱི་བུ་གཞན་ཡང་བཅོམ་ལྡན་འདས་
རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་མཚན་རེ་རེ་ནས། དེ་བཞིན་གཤེགས་པའི་སྐུ་གཟུགས་མཚན་རབ་ཏུ་བརྒྱན་པའི་སྤྲིན་སངས་རྒྱས་ཀྱི་ཞིང་ཐམས་ཅད་
ཀྱི་རྡུལ་ཤིན་ཏུ་ཕྲ་བ་སྙེད་བྱུང་སྟེ་འཇིག་རྟེན་གྱི་ཁམས་རྒྱ་མཚོ་ཐམས་ཅད་རྒྱས་པར་འགེངས་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །རིགས་ཀྱི་བུ་གཞན་ཡང་བཅོམ་
ལྡན་འདས་རྣམ་པར་སྣང་མཛད་ཀྱི་སྐུའི་དཔེ་བྱད་བཟང་པོ་རེ་རེ་ལས་སེམས་ཀྱི་སྐད་ཅིག་རེ་རེ་ལ་དེ་བཞིན་གཤེགས་པའི་སྤྲུལ་པའི་སྐུ་དཔེ་བྱད་བཟང་པོ་བརྒྱད་བཅུ་ཤིན་ཏུ་འབར་བའི་སྤྲིན་སངས་རྒྱས་ཀྱི་ཞིང་
ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་བྱུང་བ་སྟེ། སངས་རྒྱས་ཀྱི་ཞིང་ཐམས་ཅད་རྒྱས་པར་འགེངས་ཤིང་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་དབྱངས་སུ་སྒྲོག་པའི་འབྲུག་སྒྲ་འབྱིན་པ་
མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་
བ་སྤུའི་སྒོ་ཐམས་ཅད་ནས་སངས་རྒྱས་རྣམ་པར་འཕྲུལ་པའི་སྐུ་དང་པོ་བྱང་ཆུབ་ཏུ་ཐུགས་བསྐྱེད་པ་དང་བཅས། ཕ་རོལ་ཏུ་ཕྱིན་པའི་ལམ་རྣམ་པར་དག་པའི་རྒྱན་དང་བཅས། བྱང་ཆུབ་སེམས་དཔའི་ས་ཡོངས་སུ་

77-1-30a

གནོན་པའི་རྣམ་པར་འཕྲུལ་པ་དང་བཅས་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་འབྱུང་བ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །རིགས་
ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལས་སེམས་ཀྱི་སྐད་ཅིག་རེ་རེ་ལ་ལྷའི་དབང་པོའི་ལུས་ཀྱི་སྤྲིན་ལྷའི་དབང་པོའི་རྣམ་པར་འཕྲུལ་པ་དང་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་
ཕྲ་བ་སྙེད་བྱུང་ཞིང་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ། ལྷའི་དབང་པོའི་ལུས་ཀྱི་སྤྲིན་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས། 
དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་པོ། །རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལས་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་ཀླུའི་དབང་པོའི་ལུས་ཀྱི་སྤྲིན་ཀླུའི་དབང་པོའི་རྣམ་པར་འཕྲུལ་པ་དང་
བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་ཏེ། ཀླུའི་དབང་པོའི་ལུས་བསྟན་པའི་འདུལ་བའི་སེམས་ཅན་རྣམས་ལ་མངོན་
དུ་གནས་ཤིང་ཆོས་སྟོན་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་པོ། །རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་
བལྟས་ན། སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་ཐམས་ཅད་ནས་གནོད་སྦྱིན་གྱི་དབང་པོའི་ལུས་ཀྱི་སྤྲིན་གྱི་གནོད་སྦྱིན་གྱི་དབང་པོའི་རྣམ་པར་འཕྲུལ་པ་དང་བཅས་པ། སངས་རྒྱས་ཀྱི་ཞིང་བརྗོད་
དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་དབྱིངས་ཐམས་ཅད་རྒྱས་པར་བཀང་སྟེ། གནོད་སྦྱིན་གྱི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམ་ལ་མངོན་དུ་གནས་ཤིང་ཆོས་

77-1-30b

སྟོན་པ་མཐོང་ནས། དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་པོ། །རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམས་པར་བལྟས་ན་སེམས་ཀྱི་སྐད་
ཅིག་རེ་རེ་ལ་བ་སྤུའི་སྒོ་ཐམས་ཅད་ནས། དྲི་ཟའི་དབང་པོའི་ལུས་ཀྱི་སྤྲིན་དྲི་ཟའི་དབང་པོའི་རྣམ་པར་འཕྲུལ་པ་དང་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་
དབྱིངས་ཐམས་ཅད་རྒྱས་པར་བཀང་སྟེ། དྲི་ཟའི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་
པ་རབ་ཏུ་འཐོབ་བོ། །རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན་སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་ནས་ལྷ་མ་ཡིན་གྱི་དབང་པོའི་ལུས་ཀྱི་སྤྲིན་ལྷ་མ་ཡིན་གྱིས་
དབང་པོའི་རྣམ་པར་འཕྲུལ་པ་དང་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ། ལྷ་མ་ཡིན་གྱི་དབང་པོའི་ལུས་
ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་པར་གནས་ཤིང་། ཆོས་སྟོན་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་བོ། །རིགས་ཀྱི་བུ་གཞན་ཡང་བཅོམ་ལྡན་
འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་རེ་རེ་ནས་ནམ་མཁའ་ལྡིང་གིས་དབང་པོའི་ལུས་ཀྱི་སྤྲིན་ནམཁའ་ལྡིང་གི་དབང་པོའི་རྣམ་པར་འཕྲུལ་པ་དང་བཅས་པ། 
སངས་རྒྱས་ཀྱི་ཞིང་བརྗོད་དུ་མེད་པ་རྡུལ་ཤིན་ཏུ་ཕྲ་བ་སྙེད་བྱུང་ཞིང་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ། ནམ་མཁའ་ལྡིང་གི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་

77-1-31a

རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས། དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་བོ། །གཞན་ཡང་རིགས་ཀྱི་བུ་བཅོམ་ལྡན་འདས་རྣམ་པར་སྣང་
མཛད་ཀྱི་སྐུ་ལ་རྣམ་པར་བལྟས་ན་སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་རེ་རེ་ནས་མི་འམ་ཅིའི་དབང་པོའི་ལུས་ཀྱི་སྤྲིན་མི་འམ་ཅིའི་དབང་པོའི་རྣམ་པར་འཕྲུལ་པ་དང་བཅས་པ། སངས་རྒྱས་ཀྱི་ཞིང་བརྗོད་དུ་
མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་དབྱིངས་ཐམས་ཅད་རྒྱས་པར་བཀང་སྟེ། མི་འམ་ཅིའི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་
ནས། དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན་སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་རེ་རེ་
ནས་ལྟོ་ཕྱེ་ཆེན་པོའི་ལུས་ཀྱི་སྤྲིན་ལྟོ་འཕྱེ་ཆེན་པོའི་རྣམ་པར་འཕྲུལ་པ་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་དབྱིངས་རྒྱས་པར་བཀང་སྟེ། ལྟོ་འཕྱེ་ཆེན་པོའི་
དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་པོ། །རིགས་ཀྱི་བུ་གཞན་
ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་རེ་རེ་ནས་མིའི་དབང་པོའི་ལུས་ཀྱི་སྤྲིན་མིའི་དབང་པོའི་རྣམ་པར་འཕྲུལ་པ་དང་བཅས་པ། སངས་
རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་དབྱིངས་ཐམས་ཅད་རྒྱས་པར་བཀང་སྟེ། མིའི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་

77-1-31b

ཤིང་བརྗོད་པ་མཐོང་ནས། དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་བོ། །རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན་སེམས་
ཀྱི་སྐད་ཅིག་རེ་རེ་ལ་བ་སྤུའི་སྒོ་རེ་རེ་ནས་ཚངས་པའི་དབང་པོའི་ལུས་ཀྱི་སྤྲིན་ཚངས་པའི་དབང་པོའི་རྣམ་པར་འཕྲུལ་པའི་ཡུལ་དང་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་
ཞིང་ཆོས་ཀྱི་དབྱིངས་ཐམས་ཅད་རྒྱས་པར་བཀང་སྟེ། ཚངས་པའི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཚངས་པའི་སྒྲ་སྐད་དང་དབྱངས་ཀྱི་ཆོས་སྟོན་
པ་མཐོང་ནས་སེམས་ཀྱི་སྐད་ཅིག་རེ་རེ་ལ་ཐམས་ཅད་མཁྱེན་པ་ཉིད་དང་ལྡན་པའི་དགའ་བ་ཆེན་པོའི་ཤུགས་རྒྱ་མཚོ་ཆོས་ཀྱི་དབྱིངས་ལྟར་རྒྱ་ཆེ་ཞིང་ཤིན་ཏུ་ཡངས་པ་རབ་ཏུ་འཐོབ་སྟེ། སྔོན་ཐོབ་
པར་གྱུར་པ་འཐོབ་པར་འགྱུར་བ་མ་ཡིན་ནོ། །སྔོན་ཁོང་དུ་ཆུད་པ་ཁོང་དུ་ཆུད་པར་འགྱུར་བ་མ་ཡིན་ནོ། །སྔོན་ཞུགས་པ་ལ་འཇུག་པར་འགྱུར་བ་མ་ཡིན་ནོ། །སྔོན་ཁྱབ་པར་གྱུར་པ་ཁྱབ་པར་འགྱུར་བ་
མ་ཡིན་ནོ། །སྔོན་མཐོང་བ་མཐོང་བར་འགྱུར་བ་མ་ཡིན་ནོ། །སྔོན་ཐོས་པ་ཐོས་པར་འགྱུར་བ་མ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཀྱི་རང་བཞིན་གྱི་མཚན་ཉིད་ཡོངས་སུ་ཤེས་པ་ལྟར་ན་ཆོས་ཐམས་
ཅད་མཚན་ཉིད་གཅིག་པ་འང་ཅི་རོབ་མ་ཡིན་ཏེ། དུས་གསུམ་གྱི་ཚུལ་ལ་འཇུག་པའི་སྒོ་ནས་ཆོས་ཐམས་ཅད་ཀྱང་མཐའ་དང་དབུས་མེད་པར་བསྟན་ཏུ་ཡོད་པ་སྟེ། འདི་ནི་རིགས་ཀྱི་བུ་བྱང་ཆུབ་སེམས་དཔའི་རྣམ་
པར་ཐར་པའི་ཚུལ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་ཐར་པའི་ཚུལ་རྒྱ་མཚོའི་སྣང་བ་སྟེ། རིགས་ཀྱི་བུ་རྣམ་པར་ཐར་པ་འདི་ནི་ཆོས་ཀྱི་དབྱིངས་ཀྱི་ཚུལ་རྒྱ་མཚོ་ལ་འཇུག་པའི་ཕྱིར་

77-1-32a

མཐའ་དང་དབུས་མེད་པའོ། །རྣམ་པར་ཐར་པ་འདི་ནི་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་དང་། ཐ་མི་དད་པས་ཟད་མི་ཤེས་པའོ། །རྣམ་པར་ཐར་པ་འདི་ནི་བྱང་ཆུབ་སེམས་དཔའི་
ཡེ་ཤེས་ཀྱང་མིག་གིས་རྣམ་པར་ཤེས་པར་བྱ་བ་ཡིན་པས་མུ་མེད་པའོ། །རྣམ་པར་ཐར་པ་འདི་ནི་ཆོས་ཀྱིས་དབྱིངས་ཐ་མི་དད་པའི་ཚུལ་གཏན་ཏུ་རྒྱས་པར་འགེངས་པས་གཏིང་ཟབ་མེད་པའོ། །རྣམ་པར་
ཐར་པ་འདི་ནི་དམིགས་པ་ཅིག་ཏུ་རྣམ་པར་འཕྲུལ་པ་ཐམས་ཅད་ཡོངས་སུ་འདུ་བར་བྱེད་པས་སྒོ་ཐམས་ཅད་དང་ལྡན་པའོ་རྣམ་པར་ཐར་པ་འདི་ནི་ཆོས་ཐམས་ཅད་ཀྱི་ལུས་དང་མི་གཉིས་པར་སྤྱོད་པས་དོན་ཡོད་པའོ། །
རྣམ་པར་ཐར་པ་འདི་ནི་སྒྱུ་མ་ལྟ་བུར་ཡོངས་སུ་སྤྱོད་པས་མ་སྐྱེས་པའོ། །རྣམ་པར་ཐར་པ་འདི་ནི་ཐམས་ཅད་མཁྱེན་པ་ཉིད་ཀྱི་སྨོན་ལམ་གྱི་གཟུགས་བརྙན་དུ་བྱུང་བས་གཟུགས་བརྙན་ལྟ་བུའོ། །རྣམ་
པར་ཐར་པ་འདི་ནི་བྱང་ཆུབ་སེམས་དཔའི་སྤྱོད་པས་ཤིན་ཏུ་སྤྲུལ་པའི་ཕྱིར་སྤྲུལ་པ་ལྟ་བུའོ། །རྣམ་པར་ཐར་པ་འདི་ནི་འགྲོ་བ་ཐམས་ཅད་ཀྱི་རྟེན་དུ་གྱུར་པས་ས་ཆེན་པོ་ལྟ་བུའོ། །རྣམ་པར་ཐར་པ་འདི་
ནི་འགྲོ་བ་ཐམས་ཅད་སྙིང་རྗེ་ཆེན་པོས་མངོན་པར་བརླན་པར་བྱེད་པས་ཆུའི་ཕུང་པོ་ལྟ་བུའོ། །རྣམ་པར་ཐར་པ་འདི་ནི་སེམས་ཅན་ཐམས་ཅད་ཀྱི་སྲེད་པའི་བརླན་ཡོངས་སུ་སྐེམས་པས་མྱེའི་ཕུང་པོ་ལྟ་བུའོ། །
རྣམ་པར་ཐར་པ་འདི་ནི་སེམས་ཅན་ཐམས་ཅད་ཐམས་ཅད་མཁྱེན་པ་ཉིད་དུ་རབ་ཏུ་སྟོན་པའི་ཕྱིར་རླུང་གི་ཕུང་པོ་ལྟ་བུའོ། །རྣམ་པར་ཐར་པ་འདི་ནི་འགྲོ་བ་ཐམས་ཅད་ཀྱི་ཡོན་ཏན་གྱི་རྒྱན་གྱི་གཞི་ཡིན་པས་རྒྱ་
མཚོ་ལྟ་བུའོ། །རྣམ་པར་ཐར་པ་འདི་ནི་ཆོས་ཐམས་ཅད་ཀྱི་ཡེ་ཤེས་རིན་པོ་ཆེ་རྒྱ་མཚོ་ལས་མངོན་པར་འཕགས་པས་རི་རབ་རིའི་རྒྱལ་པོ་ལྟ་བུའོ། །རྣམ་པར་ཐར་པ་འདི་ནི་ཆོས་ཐམས་ཅད་ཀྱི་རྣམ་པར་ཐར་

77-1-32b

པའི་གཞལ་མེད་ཁང་རྣམ་པར་སྤྱོད་པའི་ཕྱིར་རྣམ་པར་སྤྱོད་པའི་རླུང་གི་དཀྱིལ་འཁོར་ལྟ་བུའོ། །རྣམ་པར་ཐར་པ་འདི་ནི་དུས་གསུམ་དུ་འབྱུང་བའི་དེ་བཞིན་གཤེགས་པའི་རྣམས་པར་འཕྲུལ་པ་ཐམས་ཅད་ཀྱི་གོ་འབྱེད་
པས་ནམ་མཁའ་ལྟ་བུའོ། །རྣམ་པར་ཐར་པ་འདི་ནི་སེམས་ཅན་ཐམས་ཅད་ལ་ཆོས་ཀྱི་སྤྲིན་གྱི་ཆར་མངོན་དུ་འབེབས་པས་སྤྲིན་ཆེན་པོ་ལྟ་བུའོ། །རྣམ་པར་ཐར་པ་འདི་ནི་སེམས་ཅན་ཐམས་ཅད་ཀྱི་མི་ཤེས་པའི་
མུན་ནག་རྣམ་པར་སེལ་བས་ཉི་མ་ལྟ་བུའོ། །རྣམ་པར་ཐར་པ་འདི་ནི་བསོད་ནམས་དང་ཡེ་ཤེས་ཀྱི་རྒྱ་མཚོ་ཆེན་པོས་ཤིན་ཏུ་བསྒྲུབ་པའི་ཕྱིར་བ་ལྟ་བུའོ། །རྣམ་པར་ཐར་པ་འདི་ནི་ཐམས་ཅད་དུ་སོང་བའི་ཕྱིར་དེ་བཞིན་
ཉིད་ལྟ་བུའོ། །རྣམ་པར་ཐར་པ་འདི་ནི་ལས་ཀྱི་ཆོས་ཀྱིས་ཤིན་ཏུ་སྤྲུལ་པའི་ཕྱིར་རང་གི་གྲིབ་མ་ལྟ་བུའོ། །རྣམ་པར་ཐར་པ་འདི་ནི་སེམས་ཅན་མོས་པ་ཇི་ལྟ་བ་བཞིན་དུ་ཆོས་ཀྱི་སྒྲ་རབ་ཏུ་སྒྲོག་པས་བྲག་ཆ་ལྟ་
བུའོ། །རྣམ་པར་ཐར་པ་འདི་ནི་བསམ་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ཀྱི་རྣམ་པར་དམིགས་པར་བྱེད་པའི་ཕྱིར་གཟུགས་བརྙན་ལྟ་བུའོ། །རྣམ་པར་ཐར་པ་འདི་ནི་སངས་རྒྱས་ཐམས་ཅད་ཀྱི་རྣམ་པར་
འཕྲུལ་པའི་མེ་ཏོག་ཤིན་ཏུ་རྒྱས་པའི་ཕྱིར་ཤིང་གི་རྒྱལ་པོ་ལྟ་བུའོ། །རྣམ་པར་ཐར་པ་འདི་ནི་མི་ཤིགས་པའི་ཆོས་ཅན་ཡིན་པས་རྡོ་རྗེ་ལྟ་བུའོ། །རྣམ་པར་ཐར་པ་འདི་ནི་རྣམ་པར་འཕྲུལ་པ་མཐའ་དང་དབུས་མེད་པ་རྒྱ་མཚོ་མངོན་
པར་བསྒྲུབ་པས། ནོར་བུ་ཡིད་བཞིན་རིན་པོ་ཆེའི་རྒྱལ་པོ་ལྟ་བུའོ། །རྣམ་པར་ཐར་པ་འདི་ནི་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་རྣམ་པར་དམིགས་པར་བྱ་བ་ལ་སྒྲིབ་པ་མེད་པས་རིན་
པོ་ཆེའི་རྒྱལ་པོ་དྲི་མ་མེད་པའི་སྙིང་པོ་ལྟ་བུའོ། །རྣམ་པར་ཐར་པ་འདི་ནི་སངས་རྒྱས་ཐམས་ཅད་ཆོས་ཀྱི་འཁོར་ལོ་མཉམ་པ་ཉིད་དུ་སྒྲོག་པས་ནོར་བུ་རིན་པོ་ཆེ་དགའ་བའི་རྒྱལ་མཚན་ལྟ་བུ་སྟེ། རིགས་ཀྱི་བུ་བྱང་

77-1-33a

ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་ཤིན་ཏུ་ཡངས་པ་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་འདི་ནི་དཔེ་ཚད་མེད་པ་རྣམ་པར་འགོད་པའི་རྗེས་སུ་འབྲང་བས་བསྟན་
པར་བྱའོ། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པ་ལ་འདི་སྐད་ཅེས་སྨྲས་སོ། །འཕགས་མ་ལྷ་མོ་ཇི་ལྟར་ནན་ཏན་དུ་བགྱིས་ན། བྱང་ཆུབ་སེམས་
དཔའ་དེ་ལྟ་བུའི་རྣམ་པར་ཐར་པ་དེ་ཡོངས་སུ་འགྲུབ་པར་འགྱུར། སྨྲས་པ་རིགས་ཀྱི་བུ་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཚོགས་ཆེན་པོའི་ཆོས་ཡངས་པ་དང་ལྡན་པ། རྣམ་པར་རྒྱ་ཆེན་པོ་
གསལ་བ་ཆེན་པོ་སྣང་བ་ཆེན་པོ། འོད་ཆེན་པོ་བྱིན་ཆེན་པོ་རྣམ་པར་དབྱེ་བ་ཆེན་པོ་འབྱུང་བ་ཆེན་པོ་ཕུན་སུམ་ཚོགས་པ་ཆེན་པོ་སྟེ། དེ་དག་ལ་ནན་ཏན་དུ་བྱེད་པའི་བྱང་ཆུབ་སེམས་དཔའ་རྣམས་ཀྱི་
རྣམ་པར་ཐར་པ་འདི་ལྟ་བུ་ཕུན་སུམ་ཚོགས་པར་འགྱུར་བ་དག་གོ། །བཅུ་གང་ཞེ་ན་འདི་ལྟ་སྟེ། བྱང་ཆུབ་སེམས་དཔའི་སྦྱིན་པ་སེམས་ཅན་རྒྱ་མཚོ་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་ཡོངས་
སུ་ཚིམ་པར་བྱེད་པ་ལ་ཞུགས་པས་ནི་རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་ཚུལ་ཁྲིམས་དེ་བཞིན་གཤེགས་པའི་ཡོན་ཏན་རྒྱ་མཚོ་ལ་འཇུག་པའི་ནན་ཏན་ལ་ཞུགས་པ་ནི་རྒྱ་ཆེན་པོའི་ཆོས་
སོ། །བྱང་ཆུབ་སེམས་དཔའི་བཟོད་པ་ཆོས་ཐམས་ཅད་ཀྱི་རང་བཞིན་ངེས་པར་རྟོག་པར་བྱ་བ་ལ་ཞུགས་པ་ནི་རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་བརྩོན་འགྲུས་ཐམས་ཅད་མཁྱེན་པ་ཉིད་དུ་ཡང་དག་པར་
བརྩམས་པ་ལས་ཕྱིར་མི་ལྡོག་པ་ལས་ཞུགས་པ་ནི་རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་བསམ་གཏན་སེམས་ཅན་ཐམས་ཅད་ཀྱི་ཉོན་མོངས་པའི་གདུང་བ་རབ་ཏུ་ཞི་བར་བྱ་བ་ལ་ཞུགས་པ་ནི་རྒྱ་ཆེན་པོའི་ཆོས་སོ། །

77-1-33b

བྱང་ཆུབ་སེམས་དཔའི་ཤེས་རབ་ཀྱི་ཆོས་རྒྱ་མཚོ་ཐམས་ཅད་ཡོངས་སུ་ཤེས་པར་བྱ་བ་ལ་ཞུགས་པ་ནི་རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་ཐབས་སེམས་ཅན་རྒྱ་མཚོ་ཐམས་ཅད་ཡོངསུ་སྨིན་པར་བྱ་བ་
དང་གདུལ་བར་བྱ་བ་ལ་ཞུགས་པ་ནི་རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་སྨོན་ལམ་ཕྱི་མའི་མཐའི་མུར་ཐུག་པའི་བསྐལ་པར་སངས་རྒྱས་ཀྱི་ཞིང་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་སྤྱད་པའི་ཕྱིར་
རྒྱ་མཚོ་ཐམས་ཅད་ལ་ཞུགས་པ་ནི་རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་སྟོབས་སངས་རྒྱས་ཀྱི་ཞིང་ཐམས་ཅད་དུ་སྐད་ཅིག་རེ་རེ་ལ་མངོན་པར་རྫོགས་པར་འཚང་རྒྱ་བར་ཡོངས་སུ་བསྟན་པ་རྒྱུན་མི་བཅད་
པའི་ཕྱིར་ཆོས་ཀྱི་དབྱིངས་ཀྱི་ཚུལ་རྒྱ་མཚོ་ཐམས་ཅད་ལ་ཞུགས་པ་ནི་རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་ཡེ་ཤེས་དུས་གསུམ་གྱི་ཆོས་ཐམས་ཅད་ལ་སྒྲིབས་པ་མེད་པའི་ཡེ་ཤེས་ཐོབ་པར་བྱ་བའི་ཕྱིར་དེ་
བཞིན་གཤེགས་པའི་སྟོབས་ལ་ཞུགས་པ་ནི་རྒྱ་ཆེན་པོའི་ཆོས་སོ། །རིགས་ཀྱི་བུ་ཆོས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྒྱ་ཆེན་པོའི་ཆོས་ཚོགས་ཆེན་པོ་དང་ལྡན་པ་རྣམས་ཏེ། དེ་དག་ལ་གནས་པའི་བྱང་ཆུབ་
སེམས་དཔའ་རྣམས་ཀྱི་རྣམ་པར་ཐར་པ་དེ་ལྟ་བུ་ཕུན་སུམ་ཚོགས་པར་འགྱུར་རོ། །རྣམ་པར་དག་པར་འགྱུར་རོ། །ཡོངས་སུ་འབྱུང་བར་འགྱུར་རོ། །ཡང་དག་པར་འཕེལ་བར་འགྱུར་རོ། །ཀུན་ནས་འབྱུང་བར་འགྱུར་རོ། །རབ་
ཏུ་སྐྱེ་བར་འགྱུར་རོ། །ཡོངསུ་འགྲུབ་པར་འགྱུར་རོ། །ཤིན་ཏུ་བརྟན་པར་འགྱུར་རོ། །རྣམ་པར་ཡངས་པར་འགྱུར་རོ། །ཡོངས་སུ་རྫོགས་པར་འགྱུར་རོ། །ཡོངས་སུ་གནས་པར་འགྱུར་རོ། །ནོར་བཟངས་ཀྱི་སྨྲས་པ། འཕགས་མའི་ལྷ་
མོ་ཁྱོད་ཡུན་ཇི་སྲིད་ཅིག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས། དེས་སྨྲས་པ། རིགས་ཀྱི་བུ་འཇིག་རྟེན་གྱི་ཁམས་རྒྱ་མཚོ་གཞི་མེ་ཏོག་གི་སྙིང་པོའི་རྒྱན་གྱི་བརྒྱན་པ། འདི་ཤར་ཕྱོགས་སུ་

77-1-34a

འཇིག་རྟེན་གྱི་ཁམས་རྒྱ་མཚོ་སྟོང་ཕྲག་བཅུ་འདས་པའི་ཕ་རོལ་ན་འཇིག་རྟེན་གྱི་ཁམས་རྒྱ་མཚོ་རིན་པོ་ཆེ་ཐམས་ཅད་ཀྱི་དྲི་མ་མེད་པའི་འོད་རྣམ་པར་བརྒྱན་པ་ཞེས་བྱ་བ་ཡོད་དེ། དེའི་དབུས་ན་
འཇིག་རྟེན་གྱི་ཁམས་ཀྱི་རྒྱུད་དེ་བཞིན་གཤེགས་པ་ཐམས་ཅད་ཀྱི་འོད་དང་སྨོན་ལམ་གྱི་དབྱངས་ཤེས་བྱ་བ་ཡོད་དོ། །དེའི་དབུས་ན་འཇིག་རྟེན་གྱི་ཁམས་རིན་པོ་ཆེ་ཐམས་ཅད་ཀྱི་སྤྲིན་སྣ་ཚོགས་དང་ལྡན་པ་འཇིག་རྟེན་
གྱི་འོག་གི་འཚམས་ནས། རིན་པོ་ཆེ་ཐམས་ཅད་ཀྱི་ཕྲེང་བའི་དྲ་བ་རྒྱ་མཚོས་བསྟན་པ། རིན་པོ་ཆེའི་རྒྱལ་པོ་སྤོས་ཀྱི་རྡོ་རྗེ་ཐམས་ཅད་ཀྱི་རྒྱན་གྱི་ལྷུན་དང་ལྡན་པ། ཁང་པ་བརྩེགས་པ་བརྒྱའི་དབྱིབས་སུ་
འདུག་པ་རྣམ་པར་དག་ཅིང་ཀུན་ནས་ཉོན་མོངས་པ་ལྷ་རྫས་ཀྱི་གཞལ་མེད་ཁང་དང་གནས་ཀྱི་སྤྲིན་གྱིས་ཀུན་ཏུ་གང་བ། གསེར་ལྟར་དྲི་མ་མེད་པའི་འོད་ཀྱི་རྒྱན་ཅེས་བྱ་བ་ཡོད་པ་དེར་བསྐལ་པ་ཀུན་ཏུ་
སྣང་བའི་རྒྱལ་མཚན་ཅེས་བྱ་བ་བྱུང་སྟེ། འཇིག་རྟེན་གྱི་ཁམས་དེ་ནས་སྙིང་པོ་བྱང་ཆུབ་རིན་པོ་ཆེ་ཐམས་ཅད་ཀྱི་སྙིང་པོ་འོད་སྣ་ཚོགས་ཅན་ཞེས་བྱ་བ་ཡོད་དེ། དེར་བཅོམ་ལྡན་འདས་དེ་བཞིན་གཤེགས་པ་ཕྱིར་
མི་ལྡོག་པའི་ཆོས་ཀྱི་དབྱིངས་ཀྱི་དབྱངས་ཤེས་བྱ་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཏེ། དེའི་ཚེ་དེའི་དུས་ན་ཁོ་མོ་ཡང་སྙིང་པོ་བྱང་ཆུབ་ཀྱི་ལྷ་མོ་བསོད་ནམས་
ཀྱི་སྒྲོན་མ་ཕུན་སུམ་ཚོགས་པ་ཀུན་ནས་དཔལ་གྱི་འོད་ཅེས་བྱ་བ་ཞིག་ཏུ་གྱུར་ཏོ། །བྱང་ཆུབ་ཀྱི་ཤིང་དེ་ལ་འདུག་འདུག་ནས། དེར་ཁོས་མོས་དེ་བཞིན་གཤེགས་པ་དེ་མངོན་པར་འཚང་རྒྱ་བ་རྣམ་པར་འཕྲུལ་པ་
མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་བཞིན་གཤེགས་པ་དེ་མཐོང་ནས་ཀྱང་ཁོ་མོས་དེ་བཞིན་གཤེགས་པའི་ཡོན་ཏན་རྒྱ་མཚོའི་འོད་ཅེས་བྱ་བའི་ཏིང་ངེ་འཛིན་

77-1-34b

ཐོབ་པོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་ཀྱི་རྒྱལ་པོའི་གནས་ཀུན་ནས་ཡོངས་སུ་རྒྱས་པའི་དཔལ་གྱི་སྙིང་པོ་ཞེས་བྱ་བར་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཆོས་ཀྱི་སྡོང་པོ་རི་བོ་གཟི་
བརྗིད་ཅེས་བྱ་བ་མངོན་པར་སངས་རྒྱས་སོ། །ཁོ་མོ་ནི་དེ་ནས་ཤི་འཕོས་ཏེ་སྙིང་པོ་བྱང་ཆུབ་དེ་ཉིད་དུ་ཡེ་ཤེས་ཕུན་སུམ་ཚོགས་པའི་བསོད་ནམས་འོད་ཅེས་བྱ་བའི་མཚན་མོའི་ལྷ་མོ་ཞིག་ཏུ་གྱུར་ཅིང་འདུག་
འདུག་སྟེ། ཁོས་མོ་དེར་བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་སྡོང་པོ་རི་བོ་གཟི་བརྗིད་དེས་ཆོས་ཀྱི་འཁོར་ལོ་བསྐོར་བའི་རྣམ་པར་འཕྲུལ་པ་མཐོང་ནས་འགྲོ་བ་ཐམས་ཅད་དུ་ཡོངས་སུ་སྟོན་པའི་
མཉམ་པ་ཉིད་ཀྱི་འོད་ཀྱི་ཡུལ་ཞེས་བྱ་བའི་ཏིང་ངེ་འཛིན་ཐོབ་པོ། །དེའི་འོག་ཏུ་ཁོས་མོས་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཆོས་རྒྱ་མཚོ་ཐམས་ཅད་ཀྱི་གསུང་གི་རྒྱལ་པོ་ཞེས་བྱ་བ་བསྙེན་
བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཆོས་ཐམས་ཅད་ཀྱིས་ཡང་དག་པ་འཕེལ་བར་བྱེད་པའི་གནས་ཞེས་བྱ་བའི་ཏིང་ངེ་འཛིན་ཐོབ་པོ། །དེའི་འོག་ཏུ་ཁོ་མོས་སྙིང་པོ་བྱང་ཆུབ་དེ་ཉིད་དུ་དེ་བཞིན་
གཤེགས་པ་རིན་པོ་ཆེའི་འོད་གཟེར་སྒྲོན་མའི་རྒྱལ་མཚན་རྒྱལ་པོ་ཞེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་སངས་རྒྱས་རྒྱ་མཚོ་རབ་ཏུ་སྣང་བ་ཞེས་བྱ་བའི་ཏིང་ངེ་འཛིན་
ཐོབ་པོ། །དེའི་འོག་ཏུ་ཁོ་མོས་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཆོས་ཀྱི་སྤྲིན་གྱི་སྒྲའི་རྒྱལ་པོ་ཞེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་ཆོས་རྒྱ་མཚོ་ཐམས་
ཅད་ཀྱི་སྒྲོན་མ་ཞེས་བྱ་བའི་ཏིང་ངེ་འཛིན་ཐོབ་པོ། །དེའི་འོག་ཏུ་ཁོ་མོ་ལྷའི་བུ་མོ་ཞིག་ཏུ་གྱུར་ཏོ། །སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཡེ་ཤེས་སྐར་མདའ་སྣང་བའི་རྒྱལ་པོ་ཞེས་བྱ་བ་བསྙེན་བཀུར་ཏེ། 

77-1-35a

དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་སེམས་ཅན་ཐམས་ཅད་ཀྱི་སྡུག་བསྔལ་རབ་ཏུ་ཞི་བར་བྱེད་པའི་སྒྲོན་མའི་སྣང་བ་ཞེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་ཁོ་མོས་
སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཆོས་རྣམ་པར་འཕྲུལ་པའི་ཤུགས་ཀྱི་རྒྱལ་མཚན་དཔལ་ཞེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་དུས་གསུམ་གྱི་དེ་
བཞིན་གཤེགས་པ་ཐམས་ཅད་ཡང་དག་པར་འཇུག་པའི་སྙིང་པོ་སྣང་བ་ཞེས་བྱ་བའི་ཏིང་ངེ་འཛིན་ཐོབ་པོ། །དེའི་འོག་ཏུ་ཁོ་མོས་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཆོས་ཀྱི་སྒྲོན་མ་ཡེ་ཤེས་ཀྱི་
རྣམ་པར་གནོན་པ་ཞེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་འཇིག་རྟེན་གྱི་ཁམས་ཐམས་ཅད་དུ་ཡེ་ཤེས་ཐོགས་པ་མེད་པའི་འཁོར་ལོ་སྣང་བའི་གཟི་བརྗིད་ཅེས་བྱ་བའི་ཏིང་
ངེ་འཛིན་ཐོབ་པོ། །དེའི་འོག་ཏུ་ཁོ་མོས་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཡེ་ཤེས་ཀྱི་སྟོབས་ཀྱི་རི་བོའི་གཟི་བརྗིད་ཅེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་
དུས་གསུམ་གྱི་སེམས་ཅན་གྱི་སྤྱོད་པ་དང་། དབང་པོ་རབ་ཏུ་སྣང་བ་ཞེས་བྱ་བའི་ཏིང་ངེ་འཛིན་ཐོབ་བོ། །རིགས་ཀྱི་བུ་དེ་ལྟར་ཁོ་མོས་འཇིག་རྟེན་གྱི་ཁམས་གསེར་ལྟར་དྲི་མ་མེད་པའི་འོད་དེར་བསྐལ་པ་ཀུན་
ཏུ་སྣང་བའི་རྒྱལ་མཚན་ལ་དེ་བཞིན་གཤེགས་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་གཅིག་སྙེན་བཀུར་ཏེ། ལ་ལ་ནི་ལྷའི་དབང་པོར་གྱུར་ཏེ་བསྙེན་བཀུར་ཏོ། །ལ་ལ་ནི་ཀླུའི་དབང་པོར་གྱུར་ཏེ་བསྙེན་
བཀུར་ཏོ། །ལ་ལ་ནི་གནོད་སྦྱིན་གྱི་དབང་པོར་གྱུར་པས། ལ་ལ་ནི་དྲི་ཟའི་དབང་པོར་གྱུར་པས། ལ་ལ་ནི་ལྷ་མ་ཡིན་གྱི་དབང་པོར་གྱུར་པས། ལ་ལ་ནི་ནམ་མཁའ་ལྡིང་གི་དབང་པོར་གྱུར་པས། ལ་ལ་

77-1-35b

ནི་མི་འམ་ཅིའི་དབང་པོར་གྱུར་པས། ལ་ལ་ནི་ལྟོ་འཕྱེ་ཆེན་པོའི་དབང་པོར་གྱུར་པས། ལ་ལ་ནི་མིའི་དབང་པོར་གྱུར་པས། ལ་ལ་ནི་ཚངས་པའི་དབང་པོར་གྱུར་པས། ལ་ལ་ནི་ལྷར་གྱུར་པས། ལ་ལ་ནི་མིར་གྱུར་པས། 
ལ་ལ་ནི་བུ་མེད་དུ་གྱུར་པས། ལ་ལ་ནི་སྐྱེས་པར་གྱུར་པས། ལ་ལ་ནི་ཁྱེའུར་གྱུར་པས། ལ་ལ་ནི་བུ་མོར་གྱུར་པས་བསྙེན་བཀུར་ཏེ། དེ་བཞིན་གཤེགས་པ་དེ་དག་ཐམས་ཅད་ཀྱང་ཁོ་མོས་མཆོད་
པའི་ཡོ་བྱད་ཅི་བདོག་པས་མཆོད་དོ། །དེ་བཞིན་གཤེགས་པ་དེ་དག་ཐམས་ཅད་ཀྱང་རིམ་གྲོ་བྱས་སོ། །དེ་བཞིན་གཤེགས་པ་དེ་དག་ཐམས་ཅད་ཀྱི་ཆོས་བསྟན་པ་ཡང་ཐོས་སོ། །དེ་ནས་ཁོ་མོ་ཤི་
འཕོས་ནས་འཇིག་རྟེན་གྱི་ཁམས་དེ་ཉིད་དུ་བསྐལ་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་གཅིག་ཏུ་བྱང་ཆུབ་སེམས་དཔའི་སྤྱོད་པ་སྤྱད་དོ། །དེ་ནས་ཤི་འཕོས་ནས་འཇིག་རྟེན་གྱི་ཁམས་རྒྱ་མཚོ་
གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ་འདིའི་འཇིག་རྟེན་གྱི་ཁམས་མི་མཇེད་དུ་སྐྱེས་ཏེ། ཁོ་མོས་བཅོམ་ལྡན་འདས་དེ་བཞིན་གཤེགས་པ་ལོག་པར་དད་སེལ་བསྙེན་བཀུར་ཏོ། །དེ་བཞིན་
གཤེགས་པ་དེ་མཐོང་མ་ཐག་ཏུ་ཁོ་མོས་མུན་པའི་རྡུལ་ཐམས་ཅད་དང་བྲལ་བའི་རབ་ཏུ་སྣང་བ་ཞེས་བྱ་བའི་ཏིང་ངེ་འཛིན་ཐོབ་པོ། །དེའི་འོག་ཏུ་ཁོ་མོས་དེ་བཞིན་གཤེགས་པ་གསེར་ཐུབ་བསྙེན་བཀུར་ཏེ། དེ་བཞིན་
གཤེགས་པ་དེ་མཐོང་མ་ཐག་ཏུ་ཁོ་མོས་ཞིང་རྒྱ་མཚོ་ཐམས་ཅད་སྣང་བ་རྗེས་སུ་འཕྲོ་བར་བྱ་བས་རྒྱས་པར་འགེངས་པ་ཞེས་བྱ་བའི་ཏིང་ངེ་འཛིན་ཐོབ་པོ། །དེའི་འོག་ཏུ་ཁོ་མོས་དེ་བཞིན་གཤེགས་པ་བསོད་སྐྱབ་བསྙེན་
བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་སེམས་ཅན་ཐམས་ཅད་ཀྱི་སྐད་རྒྱ་མཚོ་འབྲུག་སྒྲ་སྒྲོག་པའི་སྒྲ་དབྱངས་ཞེས་བྱ་བའི་ཏིང་ངེ་འཛིན་ཐོབ་པོ། །དེའི་འོག་ཏུ་ཁོ་མོས་བཅོམ་ལྡན་

77-1-36a

འདས་དེ་བཞིན་གཤེགས་པ་རྣམ་པར་སྣང་མཛད་འདི་བསྙེན་བཀུར་ཏེ། དེ་སྙིང་པོ་བྱང་ཆུབ་ལ་དེ་བཞིན་གཤེགས་པ་མངོན་པར་རྫོགས་པར་སངས་རྒྱས་པའི་རྣམ་པར་འཕྲུལ་པའི་སྒོ་རྒྱ་
མཚོ་སེམས་ཀྱི་སྐད་ཅིག་རེ་རེ་ལ་ཡོངས་སུ་སྟོན་པ་མཛད་པ་མཐོང་ནས་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་རྒྱན་པ་འདི་ཐོབ་བོ་དེ་
ཐོབ་མ་ཐག་ཏུ་ཆོས་ཀྱི་དབྱིངས་ཀྱི་ཚུལ་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ལ་ཞུགས་པར་གྱུར་ཏོ། །ཆོས་ཀྱི་དབྱིངས་ཀྱི་ཚུལ་རྒྱ་མཚོ་དེ་དག་
ཐམས་ཅད་དུ་གཏོགས་པའི་སངས་རྒྱས་ཀྱི་ཞིང་ཇི་སྙེད་པ་དེ་དག་ལ་རྡུལ་ཤིན་ཏུ་ཕྲ་བ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱི་རྡུལ་ཤིན་ཏུ་ཕྲ་བ་རེ་རེ་ལ་ཡང་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་
དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་ཞིང་ལ་ཞུགས་ཏེ་མཐོང་བར་གྱུར་ཏོ། །སངས་རྒྱས་ཀྱི་ཞིང་དེ་དག་ཐམས་ཅད་ལས་སངས་རྒྱས་ཀྱི་ཞིང་དེ་དག་རེ་རེ་ན་ཡང་བཅོམ་ལྡན་འདས་རྣམ་པར་སྣང་མཛད་
སྙིང་པོ་བྱང་ཆུབ་ཏུ་གཤེགས་ཏེ་སེམས་ཀྱི་སྐད་ཅིག་རེ་རེ་ལ་མངོན་པར་རྫོགས་པར་འཚང་རྒྱ་བའི་རྣམ་པར་འཕྲུལ་པ་ཡོངསུ་སྟོན་པ་མཛད་ཅིང་མངོན་པར་འཚང་རྒྱ་བའི་རྣམ་པར་འཕྲུལ་པ་རེ་རེས་ཀྱང་ཆོས་ཀྱི་དབྱིངས་
ཀྱི་ཚུལ་རྒྱ་མཚོ་རྒྱས་པར་འགེངས་པ་མཛད་པ་མཐོང་ངོ་། །དེ་བཞིན་གཤེགས་པ་དེ་དག་ཐམས་ཅད་ལས་དེ་བཞིན་གཤེགས་པ་རེ་རེའི་ཞབས་ཀྱི་དྲུང་ན་ཡང་བདག་མངོན་དུ་འདུག་པར་ཤེས་པར་གྱུར་ཏོ། །འཇིག་རྟེན་
གྱི་ཁམས་དེ་དག་ཏུ་དེ་བཞིན་གཤེགས་པ་སྙིང་པོ་བྱང་ཆུབ་ལ་ཞུགས་པ་དེ་དག་གིས་ཆོས་བསྟན་པ་དེ་དག་ཐམས་ཅད་ཀྱང་ཐོས་པར་གྱུར་ཏོ། །དེ་བཞིན་གཤེགས་པ་དེ་དག་ཐམས་ཅད་ཀྱི་བ་སྤུའི་སྒོ་ཐམས་ཅད་ནས་

77-1-36b

སྤྲུལ་པ་རྒྱ་མཚོ་བྱུང་སྟེ། ཆོས་ཀྱི་སྤྲིན་རྒྱ་མཚོ་རབ་ཏུ་སྒྲོག་པ་དང་རྣམ་པར་འཕྲུལ་པ་སྣ་ཚོགས་ཡོངས་སུ་སྟོན་པ་མཛད་ཅིང་ཆོས་ཀྱི་དབྱིངས་ཀྱི་ཕྱོགས་རྒྱ་མཚོ་ཐམས་ཅད་དུ་གཏོགས་པའི་ཞིང་རྒྱ་མཚོ་ཐམས་
ཅད་དང་འཇིག་རྟེན་གྱི་ཁམས་ཀྱི་རྒྱུད་ཐམས་ཅད་དང་འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་ཀྱི་སེམས་ཅན་འབྱམ་ཀླས་པ་ཐམས་ཅད་འགྲོ་བའི་རྒྱུད་སྣ་ཚོགསུ་སྐྱེས་པ་དག་གི་ནང་ན་སེམས་ཅན་
གྱི་བསམ་པའི་དབང་དུ་འདུ་ཤེས་ཀྱི་རྣམ་པ་སྣ་ཚོགས་ཀྱི་ཆོས་ཀྱི་འཁོར་ལོ་བསྐོར་བ་དེ་དག་ཐམས་ཅད་ཀྱང་ཡོངས་སུ་འཛིན་ཏོ། །ཁོང་དུ་ཆུད་པར་བྱེད་དོ། །ངེས་པར་རྟོགས་པར་བྱེད་དོ། །དོན་དང་ཚིག་དང་ཡི་གེ་འཛིན་
པའི་ཤུགས་ཀྱི་རྣམ་པར་གནོན་པའི་གཟུངས་ཀྱིས་མཐུས་ཡོངསུ་འཛིན་ཏོ། །ཆོས་ཀྱི་དཀྱིལ་འཁོར་ཐམས་ཅད་རྣམ་པར་དག་པའི་སྙིང་པོ་ཁོང་དུ་ཆུད་པའི་ཤེས་རབ་ཀྱིས་ཡོངས་སུ་སྤྱོད་དོ། །ཆོས་རྒྱ་མཚོ་ཐམས་
ཅད་རྣམ་པར་འབྱེད་པ་ལ་མཁས་པའི་རིགས་པས། ཁོང་དུ་ཆུད་པར་བྱེད་དོ། །དུས་གསུམ་ལྟར་རྣམ་པར་ཡངས་པའི་བློས་རྒྱས་པར་འགེངས་སོ། །དེ་བཞིན་གཤེགས་པ་དང་མཉམ་པ་ཉིད་ཀྱི་རྗེས་སུ་འགྲོ་བའི་ཤེས་
རབ་ཀྱིས་མཉམ་པར་ནི་བྱེད་ཅིང་ཆོས་ཀྱི་ཚུལ་ཐམས་ཅད་མངོན་པར་བསྒྲུབ་པོ། །ཚུལ་ཐམས་ཅད་ལ་མདོ་སྡེའི་སྤྲིན་མངོན་པར་བསྒྲུབ་པོ། །མདོ་སྡེའི་སྤྲིན་ཐམས་ཅད་ལ་ཆོས་རྒྱ་མཚོ་ཡོངས་སུ་གཞོག་པར་བྱེད་དོ། །
ཆོས་རྒྱ་མཚོ་ཐམས་ཅད་ལ་ཆོས་ཀྱི་རྒྱུད་ཐམས་ཅད་ཡང་དག་པར་གཞོལ་བར་བྱེད་དོ། །ཆོས་ཀྱི་རྒྱུད་ཐམས་ཅད་ལ་ཆོས་ཀྱི་སྤྲིན་ཡོངས་སུ་འགེངས་པར་བྱེད་དོ། །ཆོས་ཀྱི་སྤྲིན་ཐམས་ཅད་ལ་ཆོས་ཀྱི་རླབས་
ཡོངས་སུ་བསྐྱེད་དོ། །ཆོས་ཀྱི་རླབས་ཐམས་ཅད་ལ་ཆོས་ཀྱི་དགའ་བའི་ཤུགས་རྒྱ་མཚོ་རབ་ཏུ་ཐོབ་པར་བྱེད་དོ། །ཆོས་ཀྱི་དགའ་བའི་ཤུགས་རྒྱ་མཚོ་ཐམས་ཅད་ལས་རབ་ཏུ་ཐོབ་པར་བྱ་བའི་ཤུགས་མངོན་པར་བསྒྲུབ་

77-1-37a

པོ། །སའི་ཤུགས་ཐམས་ཅད་ལ་ཏིང་ངེ་འཛིན་རྒྱ་མཚོའི་ཤུགས་མངོན་པར་བསྒྲུབ་པོ། །ཏིང་ངེ་འཛིན་རྒྱ་མཚོའི་སྤྲིན་ཐམས་ཅད་ལ་སངས་རྒྱས་མཐོང་བ་རྒྱ་མཚོ་རབ་ཏུ་ཐོབ་པར་བྱེད་དོ། །སངས་
རྒྱས་མཐོང་བ་རྒྱ་མཚོ་ཐམས་ཅད་ལ་སྣང་བ་རྒྱ་མཚོ་རབ་ཏུ་ཐོབ་པར་བྱེད་དོ། །སྣང་བ་རྒྱ་མཚོ་ཐམས་ཅད་ལ་དུས་གསུམ་གྱི་ཡེ་ཤེས་ཀྱི་དཀྱིལ་འཁོར་གྱིས་ཡོངས་སུ་གཞོག་པར་བྱེད་དོ། །ཕྱོགས་རྒྱ་མཚོ་མཐའ་དང་
དབུས་མེད་པ་རྒྱས་པར་དགའ་བའི་ཚུལ་དང་། དེ་བཞིན་གཤེགས་པའི་སྔོན་གྱི་མཐའི་སྤྱོད་པ་རྒྱ་མཚོ་ཚད་མེད་པ་ལ་འཇུག་པའི་ཚུལ་དང་། དེ་བཞིན་གཤེགས་པའི་སྔོན་གྱི་སྦྱོར་བ་རྒྱ་མཚོ་ཚད་མེད་པའི་ཡེ་ཤེས་སྣང་
བའི་ཚུལ་དང་། དེ་བཞིན་གཤེགས་པའི་དཀའ་བ་ཚད་མེད་པ་ཡོངསུ་གཏོང་བའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་ཚུལ་ཁྲིམས་ཀྱི་དཀྱིལ་འཁོར་ཚད་མེད་པ་ཡོངས་
སུ་དག་པ་སྣང་བར་བྱ་བའི་ཚུལ་དང་། དེ་བཞིན་གཤེགས་པའི་བཟོད་པ་ཚད་མེད་པ་ཡོངས་སུ་སྦྱོང་བའི་ཚུལ་དང་། དེ་བཞིན་གཤེགས་པའི་བརྩོན་འགྲུས་ཆེན་པོའི་ཤུགས་ཚད་མེད་པ་རྣམ་པར་འཕེལ་བར་
བྱེད་པའི་མཐུའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་བསམ་གཏན་གྱི་དཀྱིལ་འཁོར་དང་། བསམ་གཏན་གྱི་ཡན་ལག་རྒྱ་མཚོ་ཚད་མེད་པ་ཡོངས་སུ་དག་པར་བྱ་
བའི་སྦྱོར་བས་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་རྒྱ་མཚོ་ཚད་མེད་པ་ཡོངས་སུ་དག་པར་བྱ་བ་དང་། རྣམ་པར་དམིགས་པ་སྣང་
བར་བྱ་བའི་ཚུལ་དང་། དེ་བཞིན་གཤེགས་པའི་ཐབས་མཁས་པའི་ཕ་རོལ་ཏུ་ཕྱིན་པའི་ཚུལ་རྒྱ་མཚོ་ཚད་མེད་པ་ལ་འཇུག་པར་བྱ་བའི་ཚུལ་དང་། དེ་བཞིན་གཤེགས་པའི་སྨོན་ལམ་གྱི་ཕ་རོལ་ཏུ་ཕྱིན་པའི་ཚུལ་

77-1-37b

རྒྱ་མཚོ་ཚད་མེད་པ་ལ་འཇུག་པར་བྱ་བའི་ཚུལ་དང་། དེ་བཞིན་གཤེགས་པའི་བསོད་ནམས་དང་། ཡེ་ཤེས་ཀྱི་ཕ་རོལ་ཏུ་ཕྱིན་པ་ཚད་མེད་པ་ལ་གནས་པར་བྱ་བ་དང་། ཡོངས་སུ་འཕེལ་བར་བྱ་བའི་ཡེ་ཤེས་
རབ་ཏུ་འཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་ཡེ་ཤེས་ཀྱི་ཕ་རོལ་ཏུ་ཕྱིན་པའི་ཚུལ་རྒྱ་མཚོ་ཚད་མེད་པ་ལ་རྣམ་པར་སྤྱད་པ་རབ་ཏུ་ཐོབ་པར་བྱ་བའི་ཡེ་ཤེས་ཡོངས་སུ་བསྒྲུབ་པའི་ཚུལ་དང་། 
དེ་བཞིན་གཤེགས་པའི་སྔོན་གྱི་བྱང་ཆུབ་སེམས་དཔའི་ས་ཡོངས་སུ་གནོན་པར་མཛད་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་ས་ཡོངསུ་གནོན་པའི་མཚམས་ཀྱི་རྣམ་
པར་འཕྲུལ་པ་ཚད་མེད་པས་བསྐལ་པ་རྒྱ་མཚོ་གནས་པར་བྱ་བའི་ཚུལ་དང་། དེ་བཞིན་གཤེགས་པའི་སྔོན་གྱི་བྱང་ཆུབ་སེམས་དཔའི་སའི་དཀྱིལ་འཁོར་ཚད་མེད་པ་ཡོངས་སུ་གནོན་པའི་ཚུལ་དང་། དེ་བཞིན་གཤེགས་
པའི་སྔོན་གྱི་བྱང་ཆུབ་སེམས་དཔའི་ས་ཚད་མེད་པ་ལ་གནས་པར་བྱ་བའི་ཚུལ་དང་། དེ་བཞིན་གཤེགས་པའི་སྔོན་གྱི་བྱང་ཆུབ་སེམས་དཔའི་ས་ཚད་མེད་པ་ཡོངས་སུ་དག་པར་བྱ་བའི་ཚུལ་དང་། དེ་བཞིན་གཤེགས་
པའི་ས་ཚད་མེད་པ་ཡེ་ཤེས་རྒྱ་མཚོ་རྣམ་པར་དཔྱད་པའི་ཚུལ་དང་། དེ་བཞིན་གཤེགས་པའི་སའི་ཡེ་ཤེས་སྣང་བ་ཚད་མེད་པ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པ་བྱང་ཆུབ་སེམས་པར་གྱུར་པས་
སྔོན་གྱི་སངས་རྒྱས་མ་ལུས་པར་གཟིགས་པ་དང་། རྗེས་སུ་འབྲང་བར་མཛད་པ་ཚད་མེད་པ་རྣམ་པར་དམིགས་པར་བྱ་བའི་ཚུལ་དང་། དེ་བཞིན་གཤེགས་པ་བྱང་ཆུབ་སེམས་པར་གྱུར་པས་སྔོན་གྱི་སངས་
རྒྱས་རྒྱ་མཚོ་མ་ལུས་པར་གཟིགས་ཤིང་བསྐལ་པ་རྒྱ་མཚོར་བཞུགས་བཞུག་པ་ཚད་མེད་པའི་ཚུལ་དང་། དེ་བཞིན་གཤེགས་པ་སྔོན་བྱང་ཆུབ་སེམས་དཔར་གྱུར་པའི་ཞིང་རྒྱ་མཚོ་མ་ལུས་པར་རྒྱས་པར་གང་བའི་སྐུ་

77-1-38a

མངོན་པར་བསྒྲུབ་པ་ཚད་མེད་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་བྱང་ཆུབ་སེམས་དཔའི་སྤྱོད་པ་ཚད་མེད་པས་ཆོས་ཀྱི་དབྱིངས་མ་ལུས་པར་དགང་བའི་ཚུལ་དང་། དེ་
བཞིན་གཤེགས་པའི་སྔོན་གྱི་བྱང་ཆུབ་སེམས་དཔའི་སྤྱོད་པ་ཐབས་སྣ་ཚོགས་ཀྱི་སྒོ་དང་ལྡན་པས་སེམས་ཅན་ཐམས་ཅད་ཡོངས་སུ་སྨིན་པར་མཛད་པ་དང་། རྣམ་པར་གདུལ་བ་མཛད་པ་ཚད་མེད་པ་ཡོངས་སུ་བསྟན་
པའི་ཚུལ་དང་། དེ་བཞིན་གཤེགས་པའི་འོད་ཕྱོགས་རྒྱ་མཚོ་མ་ལུས་པ་ཐམས་ཅད་ཏུ་རབ་ཏུ་འཕྲོ་བ་མཛད་པས་རྒྱས་པར་དགང་བར་བྱ་བའི་ཚུལ་དང་། དེ་བཞིན་གཤེགས་པ་སེམས་ཅན་ཐམས་ཅད་
ལ་མངོན་དུ་གྱུར་པ་རྣམ་པར་འཕྲུལ་པ་ཚད་མེད་པ་ཡོངས་སུ་བསྟན་པའི་ཚུལ་དང་། དེ་བཞིན་གཤེགས་པའི་ཡེ་ཤེས་ཀྱི་ཚད་མེད་པ་ཡོངས་སུ་གནོན་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་
བཞིན་གཤེགས་པའི་མངོན་པར་རྫོགས་པར་བྱང་ཆུབ་པའི་རྣམ་པར་འཕྲུལ་པ་ཚད་མེད་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་ཆོས་ཀྱི་འཁོར་ལོ་རབ་ཏུ་བསྐོར་བ་དང་། 
ཆོས་ཀྱི་སྤྲིན་ཚད་མེད་པ་ཐམས་ཅད་མ་ལུས་པར་ཡང་དག་པར་བླང་ཞིང་ཡོངས་སུ་གཟུངས་བའི་ཚུལ་དང་། དེ་བཞིན་གཤེགས་པའི་མཚན་རྒྱ་མཚོ་ཚད་མེད་པ་ལ་དམིགས་པའི་ཡེ་ཤེས་སྣང་བ་རབ་ཏུ་
ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་སྐུ་རྒྱ་མཚོའི་རྒྱུད་ཚད་མེད་པ་རྣམ་པར་དམིགས་པའི་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་ཡུལ་ཤིན་ཏུ་ཡངས་པའི་ཡེ་ཤེས་
སྣང་བ་རབ་ཏུ་ཐོབ་པར་བྱ་བའི་ཚུལ་གྱི་དེ་བཞིན་གཤེགས་པ་དེ་དག་གིས་ཐོག་མ་ཐུགས་བསྐྱེད་པ་ནས། དམ་པའི་ཆོས་ནུབ་པར་མ་གྱུར་པའི་བར་དེ་དག་ཐམས་ཅད་ལ་ཡང་འཇུག་ཅིང་ཁོང་དུ་ཆུད་པར་

77-1-38b

བྱེད་དོ། །དེ་སྐད་དུ་ཁྱོད་ཀྱིས་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་འདི་ཐོབ་ནས་ཇི་སྲིད་ཅིག་ལོན་ཞེས་ཟེར་བ་ནི། དེ་ལྟར་ཁོ་མོས་
བསྐལ་པ་སངས་རྒྱས་ཀྱི་ཞིང་གཉིས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་གསེར་ལྟར་དྲི་མ་མེད་པའི་འོད་དུ་བྱང་ཆུབ་ཀྱི་ཤིང་གི་ལྷ་མོ་བསོད་ནམས་སྒྲོན་མ་ཕུན་སུམ་ཚོགས་པ་
ཀུན་ནས་དཔལ་གྱི་འོད་ཅེས་བྱ་བར་གྱུར་ཏེ། དེ་བཞིན་གཤེགས་པ་ཕྱིར་མི་ལྡོག་པའི་ཆོས་ཀྱི་དབྱིངས་ཀྱི་དབྱངས་ཀྱིས་ཆོས་བསྟན་པ་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
བསྐྱེད་དེ། བསྐལ་པ་སངས་རྒྱས་ཀྱི་ཞིང་གཉིས་ཀྱི་རྡུལ་ཤིན་ཏུ་ཕྲ་བ་སྙེད་པ་དེ་དག་ཏུ་བྱང་ཆུབ་སེམས་དཔའི་སྤྱོད་པ་སྤྱད་ན། མི་མཇེད་ཀྱི་འཇིག་རྟེན་གྱི་ཁམས་འདིར་སྐྱེས་ཏེ། ལོག་པར་དད་སེལ་ལ་སྩོགས་
པ་ཐ་མ་ཤཱཀྱ་ཐུབ་པའི་བར་གྱི་དེ་བཞིན་གཤེགས་པ་བསྐལ་པ་བཟང་པོ་པ་དག་ཀྱང་བསྙེན་བཀུར་ཏོ། །མ་བྱོན་པའི་སངས་རྒྱས་རྣམས་ཀྱང་བསྙེན་བཀུར་རོ། །འཇིག་རྟེན་གྱི་ཁམས་འདིར་ཇི་ལྟ་བ་དེ་བཞིན་
དུ་འཇིག་རྟེན་གྱི་ཁམས་ཐམས་ཅད་དུ་སངས་རྒྱས་ཀྱི་རྒྱུད་མ་བྱོན་པ་རྣམས་ཡོངས་སུ་བསྙེན་ཅིང་བཀུར་རོ། །མཆོད་དོ་རིགས་ཀྱི་བུ་ད་དུང་དུ་འང་འཇིག་རྟེན་གྱི་ཁམས་གསེར་ལྟར་དྲི་མ་མེད་པའི་འོད་དེ་ཡང་ཡོད་ལ་
སངས་རྒྱས་ཀྱི་རིགས་ཀྱང་རྒྱུན་མ་ཆད་ཀྱིས། དེ་བས་ན་རིགས་ཀྱི་བུ་ཚུལ་འདི་ལ་བྱང་ཆུབ་སེམས་དཔའི་རྣམ་པར་གནོན་པ་ཆེན་པོས་བརྩོན་པར་གྱིས་ཤིག །དེ་ནས་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་
ལྡན་པས། དེའི་ཚེ་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་དང་། འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་འདི་ཉིད་བསྣན་ཏེ་བསྟན་པར་བྱ་བའི་ཕྱིར། ཚོང་དཔོན་གྱི་བུ་

77-1-39a

ནོར་བཟངས་ལ་ཚིགས་སུ་བཅད་དེ་སྨྲས་པ། །རྣམ་ཐར་དགེ་བ་འདི་ལྟར་ཐོབ་གྱུར་པ། །ཁོ་མོའི་ཚིགས་འདི་ནོར་བཟངས་ཁྱོད་ཉོན་ཅིག །ཐོས་ནས་དགའ་བའི་སྟོབས་ཀྱང་ཡོངས་བསྐྱེད་དེ། །
རྣམ་ཐར་ཚུལ་འདི་ལ་ནི་འཇུག་པར་གྱིས། །བདག་གི་སེམས་དང་བསམ་པ་ཡོངས་སྒྱོངས་ཞིང་། །མོས་པའི་ཤུགས་ཡངས་ཡོངས་སུ་བསྐྱེད་བྱས་ཏེ། །ཐམས་ཅད་མཁྱེན་པའི་ཡེ་ཤེས་གྲོང་བདུན་པས། །
བསྐལ་པ་རྒྱ་མཚོ་མང་པོར་སྔོན་སྤྱད་དོ། །བདེ་གཤེགས་དུས་གསུམ་བྱུང་བ་ཐོས་ནས་ཀྱང་། །དེ་དག་ཀུན་ལ་མོས་པ་ཡངས་བསྐྱེད་དོ། །བསྐལ་པ་བརྒྱ་ཕྲག་མང་པོར་སྒོ་ཀུན་ཏུ། །དེ་དག་འཁོར་དང་བཅས་
པར་ཁོ་མོས་བཀུར། །སྔོན་གྱི་བདེ་གཤེགས་ཁོ་མོས་མཐོང་གྱུར་ནས། །འགྲོ་ལ་ཕན་ཕྱིར་ཡུན་རིང་མཆོད་བྱས་ཏེ། །སྤྲོ་བའི་སྟོབས་ནི་རྣམ་ཡངས་ཡོངས་བསྐྱེད་ནས། །བདག་གིས་གདུང་བ་མེད་པའི་ཆོས་
ཀྱང་ཐོས། །རྣམ་པར་ཐར་པ་འདི་ལ་འཇུག་པ་ན། །ཕ་དང་མ་དང་བླ་མའི་སྐྱེ་བ་ལ། །དེ་ཚེ་བདག་གིས་ཕན་བདེས་སྟི་སྟང་བྱས། །བསྙེན་བཀུར་སྲི་ཞུར་གནས་པ་ཀུན་ཀྱང་བྱས། །རྒས་པ་ནད་པ་ནོར་
མེད་མི་རྣམས་དང་། །དབང་པོ་མ་ཚང་སྡུག་བསྔལ་མགོན་མེད་པ། །མང་པོ་བདག་གིས་བྱམས་སེམས་བདེ་བཀོད་ནས། །ཚེ་རབས་བརྒྱར་ཡང་ནོར་ཕྱུག་མགོན་ཡོང་བྱས། །རྒྱལ་པོ་མི་དང་རྐུན་ཆོམ་རྐྱེན་
གྱུར་དང་། །སེང་གེ་གླང་པོ་ཕ་རོལ་དགྲས་འཇིགས་དང་། །སྲིད་པའི་རྒྱ་མཚོའི་འཇིགས་དངོས་སྣ་ཚོགས་ལས། །སྔོན་ཚེ་སྤྱོད་པའི་དུས་ན་བདག་གིས་བསྐྱབས། །རྟག་ཏུ་སྲིད་གསུམ་ཉོན་མོངས་གདུངས་
གྱུར་ཏེ། །ལས་ཀྱིས་རབ་གདུངས་དེ་བཞིན་མི་དགེ་བས། །འཁོར་བའི་རི་གཟར་གཡང་དུ་ལྷུང་བ་ཡི། །སྐྱེ་བོ་འགྲོ་བའི་རྒྱུད་ཏུ་བདག་གིས་བསྐྱབས། །སྡུག་བསྔལ་ངན་སོང་གཡང་སས་འཇིགས་

77-1-39b

པ་དག །རྟག་ཏུ་མི་བདེ་ཤིན་ཏུ་མི་ཟད་དང་། །སྐྱེ་དགའ་ན་ཞིང་འཆི་བའི་འཇིགས་མེད་ཀུན། །བདག་གིས་འཇིག་རྟེན་སྤྱོད་ཚེ་ཞི་བར་བྱས། །འཁོར་བའི་སྡུག་བསྔལ་ཞི་བར་བྱ་བ་དང་། །སེམས་ཅན་
ཀུན་གྱི་བདེ་བ་ཡོངས་བསྐྱེད་ཅིང་། །སངས་རྒྱས་བདེ་བ་དམ་པ་བསྐྱེད་པ་ནི། །བསྐལ་པ་ཕྱི་མཐར་ཁོ་མོའི་སྨོན་ལམ་མོ། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་དགའ་
བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་ཆོས་ཀྱི་དབྱིངས་ཀྱི་ཚུལ་རྒྱ་མཚོ་ཐམས་ཅད་ལ་ཞུགས་པ་
ཕྱི་ནང་གི་སྡུག་བསྔལ་མ་ལུས་པ་ལས་རྣམ་པར་གྲོལ་བ། བསྐལ་པའི་མིང་དུ་བྱ་བ་ཐམས་ཅད་ཤེས་པར་གྱུར་པ་འཇིག་རྟེན་གྱི་ཁམས་རྒྱ་མཚོ་ཐམས་ཅད་འབྱུང་བ་དང་། འཇིག་པའི་རྒྱུས་ལ་མཁས་པ་
དེ་དག་གི་སྤྱོད་པ་ཤེས་པ་འམ་ཡོན་ཏན་བརྗོད་པ་ནུས་རེ་སྐན། སོང་རིགས་ཀྱི་བུ་སྙིང་པོ་བྱང་ཆུབ་འདི་ཉིད་ན་བཅོམ་ལྡན་འདས་རྣམ་པར་སྣང་མཛད་ཀྱི་འཁོར་གྱི་དཀྱིལ་འཁོར་ན། མཚན་མོའི་ལྷ་མོ་གྲོང་ཁྱེར་ཐམས་
ཅད་བསྲུང་བ་འབྱུང་བའི་གཟི་བརྗིད་དཔལ་ཞེས་བྱ་བ་འདུག་གིས། དེའི་གན་ཏུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་
ཚོང་དཔོན་གྱི་བུ་ནོར་བཟངས་ཀྱིས་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པ་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་སྨྲས་སོ། །དགེ་བའི་བཤེས་གྱིས་མ་ནོར་འཐུན་བསྟན་པས། །ལྷ་མོ་
ཁྱོད་ཀྱི་དྲུང་དུ་ཉེ་བར་མཆིས། །མཐའ་དང་དབུས་མི་མངའ་བའི་སྐུ་ཚུལ་དུ། །ཁྱོད་ནི་གདན་ལ་བཞུགས་པར་བདག་གིས་མཐོང་། །ཁ་དོག་དབྱིབས་དང་མཚན་མའི་སྤྱོད་ཡུལ་བ། །སྲིད་པ་གནས་དང་དངོས་པོར་འདུ་ཤེས་དང་། །

77-1-40a

འདུ་ཤེས་དམའ་དང་ལོག་པར་ལྟ་བ་ཡིས། །ཁྱོད་ཀྱི་སྤྱོད་ཡུལ་འཚལ་བར་མི་ནུས་སོ། །ཁྱོད་ཀྱི་སྐུ་གཟུགས་བལྟ་ན་མཐའ་ཡས་པས། །ཁྱོད་ཀྱི་སྐུ་གཟུགས་མདོག་གི་མཚན་མ་ནི། །བསྐལ་
པ་མཐའ་ཡས་དག་དུ་ཡོངས་བརྟགས་ཀྱང་། །ལྷ་དང་འཇིག་རྟེན་བཅས་པས་ཤེས་མི་ནུས། །ལྷ་མོ་ཁྱོད་ནི་ཕུང་པོའི་གནས་ལས་འཕགས། །སྐྱེ་མཆེད་རྣམས་ལ་དེ་བཞིན་མི་གནས་ཏེ། །འཇིག་རྟེན་
རྣམ་པར་འདས་པས་ཐེ་ཙོམ་བྲལ། །འཇིག་རྟེན་དག་ཏུ་རྣམ་པར་འཕྲུལ་པ་མཛད། །གཡོ་བ་མི་མངའ་སྐྱོན་བྲལ་ཆགས་པ་མེད། །ཁྱོད་ཀྱིས་ཡེ་ཤེས་སྤྱན་ནི་རྣམ་སྦྱངས་པས། །རྡུལ་གྱི་གོ་ལ་ཐམས་ཅད་
རྡུལ་ཚད་དུ། །སངས་རྒྱས་རྣམ་པར་འཕྲུལ་པ་མང་པོ་གཟིགས། །ཁྱོད་གྱི་སྐུ་ནི་ཆོས་སྐུའི་སྙིང་པོ་ཅན། །ཁྱོད་ཀྱི་ཐུགས་ཀྱང་ཡེ་ཤེས་ཆགས་པ་མེད། །ཁྱོད་ནི་ཀུན་ཏུ་འོད་ཀྱི་སྣང་མཛད་པས། །འཇིག་རྟེན་སྐྱེ་
བོ་རྣམས་ལ་མཐའ་ཡས་སྣང་། །སེམས་ལས་མཐའ་ཡས་ལས་རྣམས་ཡོངས་སུ་འབྱུང་། །འཇིག་རྟེན་ཐམས་ཅད་ལས་ཀྱི་རྣམ་པར་བྲིས། །འགྲོ་བ་སེམས་ཀྱི་དངོས་སུ་མཁྱེན་གྱུར་པས། །རང་གི་སྐུ་ཡང་
འགྲོ་བ་སྙེད་དུ་བསྟན། །འཇིག་རྟེན་དུ་ནི་རྨི་ལམ་འདྲར་མཁྱེན་ནས། །སངས་རྒྱས་ཀུན་ཀྱང་གཟུགས་བརྙན་ལྟ་བུ་དང་། །མ་ལུས་ཆོས་རྣམས་སྒྲ་རྙན་འདྲར་མཁྱེན་པས། །ཆགས་པ་མི་མངའ་འགྲོ་བ་ཀུན་ཏུ་སྤྱོད། །
དུས་གསུམ་གནས་པའི་འགྲོ་བ་ཐམས་ཅད་ལ། །སྐད་ཅིག་རེ་རེ་རང་གི་སྐུ་སྟོན་ཀྱང་། །ཁྱོད་ཀྱིས་ཐུགས་ལ་གཉིས་སུ་མི་རྒྱུ་སྟེ། །ཕྱོགས་རྣམས་ཀུན་ཏུ་ཆོས་ཀྱང་རབ་ཏུ་བསྟན། །རྡུལ་ལ་འགྲོ་བ་རྒྱ་མཚོ་
མཐའ་ཡས་དང་། །དེ་བཞིན་སེམས་ཅན་མཚོ་ཆེན་དཔག་ཡས་དང་། །མཐའ་དང་དབུས་མེད་བདེ་གཤེགས་གངས་ཆེན་མཚོ། །ཀུན་ཀྱང་ཁྱོད་ཀྱི་རྣམ་ཐར་དམ་པའི་ཡུལ། །དེ་ནས་ཚོང་དཔོན་གྱི་བུ་ནོར་

77-1-40b

བཟངས་ཀྱིས་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པ་ལ། ཚུལ་དང་འདྲ་བའི་ཚིགས་སུ་བཅད་པ་དེ་དག་གིས་མངོན་པར་བསྟོད་དེ། ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་
ཡང་དང་ཡང་བལྟས་ཏེ། མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པའི་དྲུང་ནས་སོང་ངོ་། །སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་གསུམ་པ། 
དེ་ནས་ཚོང་དཔོན་གྱི་བུ་ནོར་བཟངས་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་འབྱུང་བས། སེམས་ཀྱི་སྐད་ཅིག་རྣམ་པར་བརྒྱན་པ་དེ་ནི་སྒོམ་པ་དང་། རྗེས་སུ་སྒོམ་པ་དང་། ཡང་དག་པར་
སྒོམ་པ་དང་། མཚན་མོའི་ལྷ་མོའི་སྒྲ་རྒྱ་མཚོ་རབ་ཏུ་ཞི་བ་དང་ལྡན་པའི་གདམས་ངག་དང་། རྗེས་སུ་བསྟན་པ་ལ་ནི་རྗེས་སུ་འབྲང་བར་བྱ་བ་དང་། རྗེས་སུ་དྲན་པར་བྱ་བ་དང་། ཁོང་དུ་ཆུད་པར་བྱེད། 
ཚིག་དང་ཡི་གེ་རེ་རེ་ལ་ནི་ཚུལ་དུ་མ་དང་བསམ་པ་ཚད་མེད་པས་ཆོས་ཉིད་ཀྱི་ཚུལ་ཤེས་པ་རྗེས་སུ་དྲན་པར་བྱེད་ཅིང་དྲན་པས་རྗེས་སུ་འབྲང་བར་བྱ་བ་དང་། བློ་གྲོས་ཀྱི་རྣམ་པར་དབྱེ་བ་དང་། རིགས་པ་ཁོང་དུ་ཆུད་པར་
བྱ་བ་དང་། བློས་ཤིན་ཏུ་ཡངས་པར་བྱ་བ་དང་། ལུས་ཀྱིས་རེགས་པར་བྱས་ཏེ། རྣམ་པར་སྤྱད་པ་དང་། རྗེས་སུ་འཇུག་པར་བྱེད་ཅིང་། མཐར་གྱིས་མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་
བའི་གཟི་བརྗིད་དཔལ་གང་ན་བ་དེར་ཕྱིན་པ་དང་། མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་བའི་གཟི་བརྗིད་དཔལ་པད་མོའི་ཁྲི་ཆེན་པོ། ནོར་བུ་རིན་པོ་ཆེའི་རྒྱལ་པོ་གྲོང་ཁྱེར་དང་། གནས་ཐམས་
ཅད་རབ་ཏུ་སྣང་བར་བྱེད་པའི་སྙིང་པོ་ཅན་ལ་ཕྱོགས་ཐམས་ཅད་དང་། འགྲོ་བ་ཐམས་ཅད་ལ་མངོན་སུམ་དུ་གྱུར་པའི་ལུས་དང་། འགྲོ་བ་ཐམས་ཅད་ཀྱི་གཟུགས་དང་། མཉམ་པའི་ལུས་དང་སེམས་ཅན་

77-1-41a

ཐམས་ཅད་ལ་མངོན་དུ་གྱུར་པའི་ལུས་དང་། འགྲོ་བ་ཐམས་ཅད་ཀྱིས་མ་གོས་པའི་ལུས་དང་། འགྲོ་བ་ཐམས་ཅད་དང་རང་བཞིན་མཉམ་པའི་ལུས་དང་། འགྲོ་བ་ཐམས་ཅད་ལས་
མངོན་པར་འཕགས་པའི་ལུས་དང་། འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། གཏུལ་བ་ལ་འཐུན་པའི་ལུས་དང་། འགྲོ་བ་ཐམས་ཅད་དུ་སྒྲ་རབ་ཏུ་སྒྲོག་པའི་ལུས་དང་། འགྲོ་བ་ཐམས་ཅད་
དུ་འཕོ་བ་མེད་པའི་ལུས་དང་། སྒྲིབ་པ་ཐམས་ཅད་ཤིན་ཏུ་བཅོམ་པའི་ལུས་དང་། དེ་བཞིན་ཉིད་ཀྱི་རང་བཞིན་གྱི་ལུས་དང་། འགྲོ་བ་ཐམས་ཅད་གཏུལ་བར་མཐར་ཕྱིན་པར་བྱེད་པའི་ལུས་སུ་འདུག་
ཅིང་། མཚན་མོའི་ལྷ་མོ་བརྗོད་དུ་མེད་པའི་འཁོར་གྱིས་བསྐོར་ཏེ། འདུག་པ་མཐོང་ནས། དགའ་རངས་ནས་མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས། མཚན་མོའི་ལྷ་མོ་གྲོང་ཁྱེར་
ཐམས་ཅད་བསྲུང་བ་འབྱུང་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུངས་བ་འབྱུང་བའི་གཟི་བརྗིད་དཔལ་ལ་ལན་བརྒྱ་སྟོང་དུ་མར་གཡས་ཕྱོགས་སུ་
བསྐོར་བ་བྱས་ནས། མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་བའི་གཟི་བརྗིད་དཔལ་གྱི་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །ལྷ་མོ་བདག་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ན། ལྷ་མོ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་རྗེས་སུ་བསླབས་ན་སེམས་ཅན་ལ་སྨིན་པར་གྱུར་པ་ལགས། 
ཇི་ལྟར་ན་སེམས་ཅན་བླ་ན་མེད་པའི་ཡོངསུ་བསྡུ་བས་ཡོངས་སུ་སྡུད་པར་འགྱུར། ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པས་གནང་བའི་བྱང་ཆུབ་སེམས་དཔའི་ལས་ལ་བརྩོན་པ་ལགས། 

77-1-41b

ཇི་ལྟར་བརྩོན་པར་བགྱིས་ན་བྱང་ཆུབ་སེམས་དཔའ་ཆོས་ཀྱི་རྒྱལ་པོ་ཉེ་བར་འགྱུར་བ་བདག་ལ་བཤད་དུ་གསོལ། དེ་སྐད་ཅེས་སྨྲས་པ་དང་། མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་
བའི་གཟིད་བརྗིད་དཔལ་གྱིས། ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་དེ་ལྟར་འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། རྣམ་པར་གཏུལ་བའི་མཐར་ཕྱིན་
པར་བྱ་བ་དང་། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་བདག་པོར་གཟུང་བའི་སྦྱོར་བ་མཐར་ཕྱིན་པར་བྱ་བ་དང་། ཕྱོགས་འབྱམ་ཀླས་པ་ཐམས་ཅད་རྒྱས་པར་གང་བར་ཡེ་ཤེས་རབ་ཏུ་སྦྱར་བ་དང་། 
ཆོས་ཀྱི་དབྱིངས་ཀྱི་ཚུལ་རྒྱ་མཚོ་ཐམས་ཅད་ལ་འཇུག་པ་མངོན་དུ་འགྱུར་བ་དང་། ཤེས་བྱ་ནམ་མཁའི་དབྱིངས་དང་མཉམ་པར་མཐའ་ཡས་པ་རྒྱས་པར་དགང་བ་དང་། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་
འཁོར་ལོ་རབ་ཏུ་བླང་ཞིང་ཡོངསུ་གཟུང་བའི་ཕྱིར་འགྲོ་བ་རྒྱ་མཚོ་ཐམས་ཅད་ཀྱི་བསམ་པ་ཇི་ལྟ་བཞིན་དུ་ཆོས་ཀྱི་སྤྲིན་གྱི་ཆར་མངོན་པར་དབབ་པའི་སྤྱོད་པའི་ཚུལ་ཡོངསུ་འདྲི་བ་ལེགསོ་ལེགསོ། །རིགས་
ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང་། རྣམ་པར་འཕྲུལ་པ་ཟབ་མོ་ལ་འཇུག་པ་ཐོབ་སྟེ། དེ་ལྟར་ཁོ་མོ་རྣམ་པར་ཐར་པ་དེ་དང་ལྡན་པས་ཆོས་སྨྲ་བ་ཆེན་པོའི་གོ་
འཕང་ཐོགས་པ་མེད་པ་ལ་དམིགས་པའི་སྦྱོར་བ་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་མཛོད་ཡོངས་སུ་གཏོང་བའི་སྨོན་ལམ་དང་ལྡན་པ། སྙིང་རྗེ་ཆེན་པོ་དང་བྱམས་པ་ཆེན་པོའི་སྟོབས་
རབ་ཏུ་ཐོབ་པ། སེམས་ཅན་ཐམས་ཅད་བྱང་ཆུབ་ཀྱི་སེམས་ལ་འགོད་པའི་ཕྱིར་སེམས་ཅན་ཐམས་ཅད་ཀྱི་དོན་བྱ་བ་ལ་ཞུགས་པ། བྱང་ཆུབ་ཀྱི་སེམས་ཀྱི་དགེ་བའི་རྩ་བ་དང་། ཚོགས་རབ་ཏུ་བསྩགས་པ་

77-1-42a

རྒྱུན་མི་གཅོད་པའི་ཕྱིར། འགྲོ་བ་ཐམས་ཅད་ཁ་ལོ་བསྒྱུར་བའི་ས་ལ་ཡང་དག་པར་གནས་པ་སེམས་ཅན་ཐམས་ཅད་ཐམས་ཅད་མཁྱེན་པ་ཉིད་ཀྱི་ལམ་ལ་རབ་ཏུ་དགོད་པའི་ཕྱིར། འཇིག་རྟེན་གྱི་ཆོས་ཀྱི་སྤྲིན་
ཐམས་ཅད་ལས་ཆོས་ཀྱི་ཉི་མ་ཡོངས་སུ་འབྱུང་བའི་སྦྱོར་བ་དང་ལྡན་པ། དགེ་བའི་རྩ་བ་ཚད་མེད་པ་བསྐྱེད་པས། འཇིག་རྟེན་ཐམས་ཅད་སྣང་བར་བྱ་བའི་ཕྱིར། འགྲོ་བ་ཐམས་ཅད་ལ་མཉམ་པའི་སེམས་སུ་
འཇུག་པ་རྒྱུན་མི་གཅོད་པ། འགྲོ་བ་ཐམས་ཅད་ཀྱི་དགེ་བའི་རྩ་བ་མངོན་པར་འདུ་བྱ་བ་ཡོངས་སུ་བསྒྲུབ་པའི་སྦྱོར་བ་ཤེས་པར་བྱ་བའི་ཕྱིར། སེམས་རྣམ་པར་དག་པའི་སྦྱོར་བ་དང་ལྡན་པའི་དགེ་བའི་
ལས་ཀྱི་ལམ་ཐམས་ཅད་འཐུན་པར་བསྒྲུབ་པས་སེམས་ཅན་ཐམས་ཅད་ཀྱི་དེད་དཔོན་དུ་ཞུགས་པ། མི་དགེ་བའི་ལས་ཀྱི་ལམ་ཐམས་ཅད་རབ་ཏུ་སྤངས་པ། སེམས་ཅན་ཐམས་ཅད་དགེ་བའི་ཆོས་ལ་རབ་ཏུ་
དགོད་པའི་སྦྱོར་བ་དང་ལྡན་པ། སེམས་ཅན་ཐམས་ཅད་ལ་ལམ་བདེ་བ་ཡོངསུ་སྟོན་པའི་སྦྱོར་བ་དང་ལྡན་པ། སེམས་ཅན་ཐམས་ཅད་ཀྱི་ཐེག་པའི་རྒྱན་ཀྱི་ཐོག་མར་འདྲེན་པ་ལ་ཞུགས་པ། དགེ་བའི་ཆོས་ཀྱི་སྤྱོད་
པ་ཐམས་ཅད་ལ་སེམས་ཅན་རབ་ཏུ་དགོད་པའི་སྦྱོར་བ་དང་ལྡན་པ། དགེ་བའི་བཤེས་གཉེན་ཐམས་ཅད་ལ་མི་ཕྱེད་པར་བསྙེན་བཀུར་དང་རིམ་འགྲོ་བྱེད་པ་ལ་ཞུགས་པ། སེམས་ཅན་ཐམས་ཅད་དེ་བཞིན་གཤེགས་
པའི་སྟན་པ་ལ་རབ་ཏུ་དགོད་པའི་སྦྱོར་བ་དང་ལྡན་པ། ཆོས་ཀྱི་སྦྱིན་པའི་སྔོན་དུ་འདྲེན་ཅིང་ཆོས་དཀར་པོ་ཐམས་ཅད་ཡང་དག་པར་བརྩམ་པའི་སྦྱོར་བ་དང་ལྡན་པ། ཐམས་ཅད་མཁྱེན་པ་ཉིད་ཀྱི་སེམས་བསྐྱེད་པས་
མངོན་པར་འབྱུང་བས་བསམ་པ་བརྟན་ཞིང་མི་ཤིགས་པ། རྡོ་རྗེ་མཐུ་བོ་ཆེ་ལྟར་བརྟན་ཞིང་སྲ་བས་སངས་རྒྱས་ཀྱི་སྟོབས་ལ་དམིགས་པའི་སེམས་རྒྱ་ཆེན་པོའི་དཀྱིལ་འཁོར་དང་ལྡན་པར་དགེ་བའི་བཤེས་གཉེན་

77-1-42b

ལ་རྟེན་ཅིང་རྣམ་པར་སྤྱོད་དེ། ཁོ་མོ་ནི་ཉོན་མོངས་པ་དང་ལས་ཀྱི་སྒྲིབ་པ་ཐམས་ཅད་ཀྱི་རི་རྣམ་པར་གཏོར་བའི་སེམས་དང་ལྡན་པའོ། །ཐམས་ཅད་མཁྱེན་པ་ཉིད་ཀྱི་ཚོགས་ཡང་དག་པར་རྩོགས་པའོ། །
དཀར་པོའི་ཆོས་ཐམས་ཅད་ཡང་དག་པར་བསྒྲུབ་པའི་སྦྱོར་བ་དང་ལྡན་པའོ། །ཐམས་ཅད་མཁྱེན་པ་ཉིད་མཐའ་དང་དབུས་མེད་པ་མངོན་པར་འདུན་ཅིང་དམིགས་པའི་སེམས་ཀྱི་སྦྱོར་བ་ལ་བརྩོན་པའོ། །རིགས་
ཀྱི་བུ་དེ་ལྟར་ཁོ་མོ་ཆོས་སྣང་བའི་སྒོ་སེམས་ཅན་ཐམས་ཅད་ཡོངས་སུ་སྟོན་པ་རྣམ་པ་དེ་ལྟ་བུ་ཡོངས་སུ་སྦྱོང་ཞིང་དགེ་བའི་རྩ་བ་བསྩགས་པའི་ཚོགས་ལ་སྟ་གོན་ཏུ་གནས་པས་རྣམ་པ་བཅུས་ཆོས་ཀྱི་དབྱིངས་ལ་རྣམ་པར་བལྟ་
ཞིང་ཁོང་དུ་ཆུད་པ་དང་། རྗེས་སུ་གཞོལ་བར་བྱེད་དོ། །བཅུ་གང་ཞེ་ན་འདི་ལྟ་སྟེ། ཡེ་ཤེས་སྣང་བ་ཤིན་ཏུ་ཡངས་པ་ཐོབ་པས་ཆོས་ཀྱི་དབྱིངས་ནི་ཚད་མེད་པར་ཁོང་དུ་ཆུད་པར་བྱེད་དོ། །དེ་བཞིན་གཤེགས་པ་
ཐམས་ཅད་ཀྱི་རྣམ་པར་འཕྲུལ་པ་རྣམ་པར་དམིགས་པར་བྱ་བའི་ཕྱིར་ཆོས་ཀྱི་དབྱིངས་ནི་མཐའ་དང་དབུས་མེད་པར་ཁོང་དུ་ཆུད་པར་བྱེད་དོ། །སངས་རྒྱས་ཀྱི་ཞིང་ཐམས་ཅད་ཡོངས་སུ་གནན་པ་དང་། དེ་བཞིན་
གཤེགས་པ་མཆོད་ཅིང་རིམ་གྲོར་བྱ་བའི་ཕྱིར་ཆོས་ཀྱི་དབྱིངས་ནི་མུ་མེད་པར་ཁོང་དུ་ཆུད་པར་བྱེད་དོ། །འཇིག་རྟེན་གྱི་ཁམས་རྒྱ་མཚོ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་ཡོངསུ་བསྟན་པའི་ཕྱིར་ཆོས་ཀྱི་དབྱིངས་
ནི་ས་མཚམས་མེད་པ་ཁོང་དུ་ཆུད་པར་བྱེད་དོ། །དེ་བཞིན་གཤེགས་པའི་ཡེ་ཤེས་ཀྱི་དཀྱིལ་འཁོར་ཐ་མི་དད་པ་ལ་འཇུག་པར་བྱ་བའི་ཕྱིར། ཆོས་ཀྱི་དབྱིངས་ནི་རིས་ཆད་མེད་པར་ཁོང་དུ་ཆུད་པར་བྱེད་དོ། །
བསམ་པ་ཇི་ལྟ་བར་སེམས་ཅན་ཐམས་ཅད་ཀྱིས་རྣམ་པར་དམིགས་པའི་དེ་བཞིན་གཤེགས་པའི་གསུང་གི་དཀྱིལ་འཁོར་ལ་འཇུག་པར་བྱ་བའི་ཕྱིར་ཆོས་ཀྱི་དབྱིངས་ནི་རྒྱུད་ཀྱི་ཚུལ་གཅིག་ཏུ་གྱུར་པར་

77-1-43a

ཁོང་དུ་ཆུད་པར་བྱེད་དོ། །འགྲོ་བ་ཐམས་ཅད་རྣམ་པར་གཏུལ་བ་མཐར་ཕྱིན་པས། དེ་བཞིན་གཤེགས་པས་སྔོན་གྱི་སྨོན་ལམ་གྱི་མཐར་ཐུག་པ་ལ་འཇུག་པར་བྱ་བའི་ཕྱིར། ཆོས་ཀྱི་དབྱིངས་
ནི་རང་བཞིན་གྱི་རྒྱ་ཆེར་ཁོང་ཏུ་ཆུད་པར་བྱེད་དོ། །བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་འབྱམ་ཀླས་པ་ལ་འཇུག་པར་བྱ་བའི་ཕྱིར། ཆོས་ཀྱི་དབྱིངས་ནི་འགྲོ་བ་ཐམས་ཅད་ལ་མཉམ་པ་ཉིད་དུ་གྱུར་
པར་ཁོང་དུ་ཆུད་པར་བྱེད་དོ། །ཀུན་ཏུ་བཟང་པོའི་སྤྱོད་པས་རྣམ་པར་འཕྲུལ་པའི་རྒྱན་ལ་འཇུག་པར་བྱ་བའི་ཕྱིར་ཆོས་ཀྱི་དབྱིངས་ནི་རྒྱན་གཅིག་ཏུ་གྱུར་པར་ཁོང་དུ་ཆུད་པར་བྱེད་དོ། །དགེ་བ་ཐམས་ཅད་ཀྱི་
ཆོས་ཀྱི་དབྱིངས་རྒྱས་པར་དགང་ཞིང་རྣམ་པར་དག་པར་བྱ་བའི་ཆུད་མི་ཟ་བའི་ཆོས་ཅན་དུ་བྱ་བའི་ཕྱིར་ཆོས་ཀྱི་དབྱིངས་ནི་ཐུག་པ་མེད་པར་ཁོང་དུ་ཆུད་པར་བྱའོ། །རིགས་ཀྱི་བུ་དེ་ལྟར་ཁོ་མོ་རྣམ་པ་བཅུ་པོ་དེ་དག་
གིས་དགེ་བའི་རྩ་བ་དང་། ཚོགས་ཐམས་ཅད་ཡོངས་སུ་བསྩགས་པ་དང་། སངས་རྒྱས་ཀྱི་བདག་ཉིད་ཆེ་བ་ཉིད་ལ་འཇུག་པར་བྱ་བ་དང་། སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་རྗེས་སུ་རྟོགས་པར་
བྱ་བའི་ཕྱིར། ཆོས་ཀྱི་དབྱིངས་ཐམས་ཅད་ལ་རྣམ་པར་བལྟའོ། །ཁོང་དུ་ཆུད་པ་དང་རྗེས་སུ་གཞོལ་བར་བྱེད་དོ། །རིགས་ཀྱི་བུ་གཞན་ཡང་ཁོ་མོ་དེ་ལྟར་དེ་བཞིན་གཤེགས་པའི་བདག་ཉིད་ཆེ་བ་ཉིད་ཀྱི་རྗེས་
སུ་འབྲང་བའི་ཡིད་ལ་བྱ་བ་དང་ལྡན་པས། གཟུངས་ཀྱི་དཀྱིལ་འཁོར་གྱི་རྒྱུད་སྟོང་ཕྲག་བཅུས་སེམས་ཅན་རྣམས་ལ་ཆོས་སྟོན་ཏེ། བཅུ་གང་ཞེ་ན་འདི་ལྟར་ཆོས་རྒྱ་མཚོ་ཐམས་ཅད་ཡང་དག་པར་
འདུ་བ་ཞེས་བྱ་བའི་གཟུངས་ཀྱི་དཀྱིལ་འཁོར་དང་། ཆོས་ཐམས་ཅད་བྱིན་གྱིས་རླབ་པའི་གཟུངས་ཀྱི་དཀྱིལ་འཁོར་དང་། ཆོས་ཀྱི་སྤྲིན་ཐམས་ཅད་ཡོངས་སུ་འཛིན་པའི་གཟུངས་ཀྱི་དཀྱིལ་འཁོར་

77-1-43b

དང་། དེ་བཞིན་གཤེགས་པ་ཐམས་ཅད་ཀྱི་དགོངས་པ་སྒྲོན་མའི་གཟུངས་ཀྱི་དཀྱིལ་འཁོར་དང་། སེམས་ཅན་ཐམས་ཅད་ཀྱི་ལས་རྒྱ་འཚོ་རབ་ཏུ་སྣང་བར་བྱེད་པའི་སྙིང་པོའི་གཟུངས་ཀྱི་དཀྱིལ་འཁོར་
དང་། ཐེག་པའི་ཚུལ་རྒྱ་མཚོ་དྲི་མ་མེད་པ་ཐམས་ཅད་ཡང་དག་པར་གཞོལ་བའི་གཟུངས་ཀྱི་དཀྱིལ་འཁོར་དང་། སངས་རྒྱས་རྒྱ་མཚོ་ཐམས་ཅད་ཀྱི་སྒྲོན་མའི་སྙིང་པོའི་གཟུངས་ཀྱི་དཀྱིལ་འཁོར་དང་། དེ་བཞིན་གཤེགས་
པ་ཐམས་ཅད་ཀྱི་མཚན་གྱི་འཁོར་ལོའི་གློང་རབ་ཏུ་སྒྲོག་པའི་གཟུངས་ཀྱི་དཀྱིལ་འཁོར་དང་། དུས་གསུམ་གྱི་སངས་རྒྱས་སྔོན་གྱི་སྨོན་ལམ་རྒྱ་འཚོ་བསྟན་པ་ལ་ཡང་དག་པར་གཞོལ་བའི་གཟུངས་ཀྱི་
དཀྱིལ་འཁོར་དང་། ཆོས་ཐམས་ཅད་ལ་མངོན་པར་འཁྱིལ་པའི་ཤུགས་དྲག་པོའི་གཟུངས་ཀྱི་དཀྱིལ་འཁོར་དང་། ཐམས་ཅད་མཁྱེན་པ་ཉིད་ཀྱི་ཤུགས་རབ་ཏུ་འབྱུང་བ་ཞེས་བྱ་བའི་གཟུངས་ཀྱི་དཀྱིལ་
འཁོར་དང་། རིགས་ཀྱི་བུ་གཟུངས་ཀྱི་དཀྱིལ་འཁོར་བཅུ་པོ་དེ་དག་ལ་སྩོགས་པ་གཟུངས་ཀྱི་དཀྱིལ་འཁོར་གྱི་རྒྱུད་སྟོང་ཕྲག་བཅུས་སེམས་ཅན་རྣམས་ལ་ཆོས་སྟོན་ཏོ། །རིགས་ཀྱི་བུ་གཞན་ཡང་
ཁོ་མོ་ནི་ཐོས་པའི་ཤེས་རབ་ཀྱིས་སེམས་ཅན་རྣམས་ལ་ཆོས་སྟོན་ཏོ། །བསམ་པའི་ཤེས་རབ་དང་། བསྒོམ་པའི་ཤེས་རབ་ཀྱིས་སེམས་ཅན་རྣམས་ལ་ཆོས་སྟོན་ཏོ། །སྲིད་པའི་རྒྱུད་གཅིག་ལས་ཀྱང་
བརྩམ་ཤིང་སེམས་ཅན་རྣམས་ལ་ཆོས་སྟོན་ཏོ། །སྲིད་པའི་རྒྱུད་རྒྱ་མཚོ་ཐམས་ཅད་ལས་ཀྱང་བརྩམས་ཤིང་སེམས་ཅན་རྣམས་ལ་ཆོས་སྟོན་ཏོ། །དེ་བཞིན་གཤེགས་པ་གཅིག་གིས་མཚན་གྱི་འཁོར་ལོ་རྒྱ་
མཚོ་ལས་ཀྱང་བརྩམ་ཤིང་ཆོས་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་མཚན་གྱི་འཁོར་ལོ་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །འཇིག་རྟེན་གྱི་ཁམས་རྒྱ་མཚོ་གཅིག་ལས་ཀྱང་

77-1-44a

བརྩམས་ཤིང་ཆོས་སྟོན་ཏོ། །འཇིག་རྟེན་གྱི་ཁམས་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །སངས་རྒྱས་གཅིག་གིས་ལུང་བསྟན་པ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་
གཤེགས་པ་ཐམས་ཅད་ཀྱི་ལུང་བསྟན་པ་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་གཅིག་གི་འཁོར་གྱི་དཀྱིལ་འཁོར་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་
གཤེགས་པ་ཐམས་ཅད་ཀྱི་འཁོར་ཀྱི་དཀྱིལ་འཁོར་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་གཅིག་གི་ཆོས་ཀྱི་འཁོར་ལོ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་
གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །མདོ་སྡེ་གཅིག་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་
འཁོར་ལོ་ལ་ཡང་དག་པར་གཞོལ་བའི་མདོ་སྡེ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་གཅིག་གི་འཁོར་གྱི་དཀྱིལ་འཁོར་ཀུན་ནས་འདུས་པ་ལས་ཀྱང་བརྩམས་ཤིང་ཆོས་སྟོན་ཏོ། །
དེ་བཞིན་གཤེགས་པ་ཐམས་ཅད་ཀྱི་འཁོར་ཀྱི་དཀྱིལ་འཁོར་ཀུན་ནས་འདུས་པ་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །ཐམས་ཅད་མཁྱེན་པ་ཉིད་ཀྱི་སེམས་གཅིག་ལས་ཀྱང་བརྩམས་ཤིང་
ཆོས་སྟོན་ཏོ། །བྱང་ཆུབ་ཀྱི་སེམས་ཀྱི་ཡན་ལག་རྒྱ་མཚོ་ཐམས་ཅད་ལས་ཀྱང་བརྩམས་ཤིང་ཆོས་སྟོན་ཏོ། །ཐེག་པ་གཅིག་ལས་ཀྱང་བརྩམས་ཤིང་ཆོས་སྟོན་ཏོ། །ཐེག་པ་ཐམས་ཅད་ཀྱི་འབྱུང་བ་རྒྱ་མཚོ་
ལས་ཀྱང་བརྩམས་ཤིང་ཆོས་སྟོན་ཏོ། །རིགས་ཀྱི་བུ་དེ་ལྟར་ཁོ་མོས་བསྟན་པའི་ཚུལ་མངོན་པར་བསྒྲུབ་པ་བརྗོད་དུ་མེད་པས་སེམས་ཅན་རྣམས་ལ་ཆོས་སྟོན་ཏེ། རིགས་ཀྱི་བུ་དེ་ལྟར་ཁོ་མོ་ཆོས་ཀྱི་དབྱིངས་ཀྱི་

77-1-44b

ཚུལ་མི་ཐ་དད་པས་དེ་བཞིན་གཤེགས་པ་རྒྱ་མཚོ་ལ་འཇུག་ཅིང་སེམས་ཅན་ཐམས་ཅད་ལ་ཆོས་སྟོན་པས། བླ་ན་མེད་པའི་ཡོངས་སུ་བསྡུ་བ་བྱེད་ཅིང་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་ཕྱི་
མའི་མཐའི་མུར་ཐུག་པའི་བསྐལ་པ་རྒྱ་མཚོར་གནས་པར་བྱ་བའི་བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང་། རྣམ་པར་འཕྲུལ་པ་ཟབ་མོ་ལ་འཇུག་པ་འདི་ལ་སེམས་ཀྱི་སྐད་ཅིག་རེ་
རེ་ཞིང་རྣམ་པར་འཕེལ་བའི་རྣམ་པར་ཐར་པའི་ཡུལ་སྒོམ་པའི་ཚུལ་གྱིས་ཡོངས་སུ་སྒོམ་སྟེ་རྣམ་པར་ཐར་པའི་ཡུལ་སྒོམ་པའི་ཚུལ་རེ་རེས་ཀྱང་སེམས་ཀྱི་སྐད་ཅིག་རེ་རེ་ལ་ཆོས་ཀྱི་དབྱིངས་
ཐམས་ཅད་དུ་རྒྱས་པར་འགེངས་སོ། །ནོར་བཟངས་ཀྱིས་སྨྲས་པ། ལྷ་མོ་བྱང་ཆུབ་སེམས་དཔའི་རྣམ་པར་ཐར་པ་དེ། དེ་ལྟར་ཟབ་མོ་ངོ་མཚར་ཆེ་ན། འཕགས་མ་ཁྱོད་ཀྱིས་བྱང་ཆུབ་སེམས་དཔའི་
རྣམ་པར་ཐར་པ་འདི་བརྙེས་ནས་ཇི་སྲིད་ཅིག་ལགས་སྨྲས་པ། རིགས་ཀྱི་བུ་སྔོན་འདས་པའི་དུས་བསྐལ་པ་འཇིག་རྟེན་གྱི་རྒྱུད་ཀྱི་རྡུལ་ཤིན་ཏུ་ཕྲ་བ་སྙེད་འདས་པའི་ཕ་རོལ་གཅིག་ཏུ་འཇིག་རྟེན་
གྱི་ཁམས་ཆོས་ཀྱི་འོད་འཕྲོ་བའི་གྲོང་ཁྱེར་དཔལ་གྱི་སྤྲིན་ཅེས་བྱ་བ་རིན་པོ་ཆེའི་སྤོས་ཐམས་ཅད་དང་ལྡན་པ། གླིང་བཞི་པའི་འཇིག་རྟེན་གྱི་ཁམས་རྡུལ་ཤིན་ཏུ་ཕྲ་བ་སྙེད་ཀྱི་སྤྲོ་བ་བླངས་པ། 
དེ་བཞིན་གཤེགས་པ་ཐམས་ཅད་ཀྱི་སྔོན་གྱི་སྨོན་ལམ་དབྱངས་སུ་སྒྲོག་པའི་པད་མོས་མཚམས་རྣམ་པར་བརྒྱན་པ། ལྷུན་སེམས་ཅན་ཐམས་ཅད་ཀྱི་ལས་རྒྱ་མཚོས་བྱུང་བའི་ནོར་བུ་རིན་པོ་ཆེའི་རྒྱལ་
པོ་རྒྱ་མཚོ་ལས་གྲུབ་པ། པད་མོ་ཆེན་པོའི་དབྱིབས་སུ་འདུག་པ། རྣམ་པར་དག་ཅིང་ཀུན་ནས་ཉོན་མོངས་པ་མེད་པ། མེ་ཏོག་གི་འཁོར་ཡུག་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་ཀུན་ནས་

77-1-45a

བསྐོར་བ། སྤོས་ཀྱི་རིན་པོ་ཆེ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་རྒྱན་རི་རབ་ལྟར་མངོན་པར་འཕགས་པ་དང་ལྡན་པ། གླིང་བཞི་པ་ཆེན་པོའི་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་རྒྱན་
དང་ལྡན་པ། གླིང་བཞི་པ་རེ་རེ་ཞིང་ཡང་གྲོང་བརྡལ་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པའི་ཡང་བརྗོད་དུ་མེད་པ་དང་ལྡན་པ་བྱུང་ངོ་། །རིགས་ཀྱི་བུ་འཇིག་རྟེན་གྱི་ཁམས་དེའི་བསྐལ་པ་མདོག་དྲི་
མ་མེད་པའི་འོད་ཅེས་བྱ་བ་བྱུང་སྟེ། བསྐལ་པ་དེ་ལ་དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་བྱུང་ངོ་། །འཇིག་རྟེན་གྱི་ཁམས་ཆོས་ཀྱི་འོད་འཕྲོ་བའི་གྲོང་ཁྱེར་དཔལ་གྱི་སྤྲིན་གྱི་གླིང་བཞི་
པ་དབུས་མ་རྒྱན་མཚན་སྣ་ཚོགས་ཤེས་བྱ་བ་བྱུང་སྟེ། དེའི་དབུས་ན་རྒྱལ་པོའི་གནས་རིན་ཆེན་མེ་ཏོག་ཀུན་ནས་སྣང་བ་ཞེས་བྱ་བ་ཡོད་པར་གྱུར་ཏེ། རྒྱལ་པོའི་གནས་དེ་དང་ཧ་ཅང་ཡང་མི་རིང་བ་ཞིག་ན་སྙིང་པོ་
བྱང་ཆུབ་ཀྱི་ཆོས་ཀྱི་རྒྱལ་པོའི་ཕོ་བྲང་རབ་ཏུ་སྣང་བ་ཞེས་བྱ་བ་ཡོད་དོ། །སྙིང་པོ་བྱང་ཆུབ་དེ་ལ་དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་པོ་དེ་དག་གི་བསྐལ་པ་དང་པོ་ལ་དེ་བཞིན་གཤེགས་པ་
ཆོས་རྒྱ་མཚོ་ཐམས་ཅད་ཀྱི་དབྱངས་འོད་ཀྱི་རྒྱལ་པོ་ཞེས་བྱ་བ་བྱུང་སྟེ། དེའི་ཚེ་འཁོར་ལོས་བསྒྱུར་བའི་རྒྱལ་པོ་ཉི་མ་ལྟར་བཞིན་མདོག་དྲི་མ་མེད་པ་ཞེས་བྱ་བ་བྱུང་ནས། དེས་བཅོམ་ལྡན་འདས་དེ་བཞིན་གཤེགས་པ་
ཆོས་རྒྱ་མཚོ་ཐམས་ཅད་ཀྱི་དབྱངས་འོད་ཀྱི་རྒྱལ་པོ་ལས་མདོ་སྡེ་ཆོས་ཐམས་ཅད་ཀྱི་ཀློང་རྒྱ་མཚོ་ཞེས་བྱ་བ་ཡོངས་སུ་བཟུང་སྟེ། བཟུང་ནས་ཀྱང་ཆོས་ཀྱི་འཁོར་ལོ་རྗེས་སུ་བསྐོར་ཏོ། །ཡོངས་སུ་མྱ་ངན་ལས་
འདས་ནས་ཀྱང་རབ་ཏུ་བྱུང་སྟེ། བསྟན་པ་ཡོངསུ་བཟུང་ངོ་། །བསྟན་པ་ནུབ་དུ་ཆ་སྟེ། བསྟན་པ་ཡང་སྟོང་དུ་གྱིས། ཆོས་བསྟན་པ་ཤིན་ཏུ་བསྟན་པའི་ཚུལ་ནི་བརྒྱ་ཕྲག་བཅུར་གྱུར་ཏོ། །རྙོག་པའི་བསྐལ་

77-1-45b

པ་བར་མ་དོར་ཉེ་བར་གནས་པར་གྱུར་པའི་ཚེ། སེམས་ཅན་ལས་དང་ཉོན་མོངས་པའི་སྒྲིབ་པས་སྒྲིབས་པ། འཐབ་མོ་དང་རྩོད་པ་དང་། དཀྲུག་མ་ལ་ཞུགས་པར་གྱུར་པ་དང་། དགེ་སློང་སངས་རྒྱས་ཀྱི་བསྟན་པའི་
ཡོན་ཏན་དོན་དུ་མི་གཉེར་ཅིང་ཡུལ་གྱི་དགའ་བ་ལྷུར་ལེན་པར་གྱུར་པ། རྒྱལ་པོ་དང་རྐུན་པོའི་གཏམ་ལ་ཞུགས་པ། བུད་མེད་དང་ཡུལ་དང་། རྒྱ་མཚོའི་གཏམ་ལ་ཞུགས་པ། བུད་མེད་དང་ཡུལ་དང་། རྒྱ་མཚོའི་གཏམ་ལ་མོས་པ་འཇིག་རྟེན་རྒྱང་ཕན་
པའི་ཚིག་ལ་ཞུགས་པ་རྣམས་ཡོངས་སུ་སྐྱོ་བ་བསྐྱེད་པའི་ཕྱིར། ཀྱེ་མའོ་བསྐལ་པ་དུ་མར་ཡོངས་སུ་བསྒྲུབས་པའི་ཆོས་ཀྱི་སྒྲོན་མ་ཆེན་པོ་ནི་ནུབ་པར་གྱུར་མ་ཁད་དོ། །ཞེས་ཆོས་དང་ལྡན་པའི་འོ་དོད་བོས་ཏེ། ཡོངས་སུ་
སྐྱོ་བར་འགྱུར་བའི་གཏམ་བྱས་ནས། དེ་སྟེང་གིས་ནམ་མཁའི་དབྱིངས་སུ་ཏ་ལ་བདུན་ཙམ་དུ་མངོན་པར་འཕགས་པ་ནས། འོད་འཕྲོ་བ་ཁ་དོག་མཐའ་ཡས་པའི་སྤྲིན་རབ་ཏུ་བཀྱེ་སྟེ། འོད་གཟེར་
གྱི་དྲ་བའི་རྒྱན་ཆེན་པོ་ཁ་དོག་སྣ་ཚོགས་དང་ལྡན་པ་བཀྱེ་ནས། འོད་ཁ་དོག་དུ་མ་དང་ལྡན་པས་འཇིག་རྟེན་གྱི་ཉོན་མོངས་པའི་གདུང་བ་ཞི་བར་བྱས་ཏེ། སེམས་ཅན་མཐའ་དང་དབུས་མེད་པ་དག་
ཀྱང་བྱང་ཆུབ་ལ་རབ་ཏུ་བཀོད་དོ། །དེ་བཞིན་གཤེགས་པའི་བསྟན་པ་དེ་ཡང་ཕྱིར་གསལ་བར་བྱས་ཏེ། ལོ་སྟོང་ཕྲག་དྲུག་བཅུར་གནས་པར་གྱུར་ཏེ། དེའི་ཚེ་འཁོར་ལོས་བསྒྱུར་བའི་རྒྱལ་པོ་
ཉི་མ་ལྟར་བཞིན་མདོག་དྲི་མ་མེད་པ། དེ་ཉིད་ཀྱི་བུ་མོ་དགེ་སློང་མ་ཆོས་ཀྱི་འཁོར་ལོས་སྤྲུལ་པའི་འོད་ཅེས་བྱ་བ་དགེ་སློང་མ་བརྒྱ་ཕྲག་སྟོང་གི་འཁོར་དང་ལྡན་པ་བྱུང་སྟེ། དེས་ཡོངས་སུ་
སྐྱོ་བར་འགྱུར་བའི་སྒྲ་དེ་ཐོས་ནས་ཆོ་འཕྲུལ་ཆེན་པོ་དེ་མཐོང་སྟེ། འཁོར་དང་བཅས་པས་བྱང་ཆུབ་ཏུ་སེམས་བསྐྱེད་ནས། དགེ་སློང་མ་བརྒྱ་ཕྲག་སྟོང་པོ་དེ་དག་ཀྱང་བླ་ན་མེད་

77-1-46a

པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བྱས་ཏེ། དེ་བཞིན་གཤེགས་པ་མངོན་དུ་འགྱུར་བ་ལ་ཡང་དག་པར་གཞོལ་བ་ཞེས་བྱ་བའི་ཏིང་ངེ་འཛིན་ཀྱང་རབ་
ཏུ་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོས་སྤྲུལ་པའི་འོད་ཅེས་བྱ་བའི་གཟུངས་ཀྱང་རབ་ཏུ་ཐོབ་པོ། །ཆོས་རྒྱ་མཚོའི་ཚུལ་ཐམས་ཅད་ལ་འཇུག་པ་
ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་རབ་ཏུ་ཐོབ་པར་གྱུར་ཏོ་དགེ་སློང་མ་ཆོས་ཀྱི་འཁོར་ལོས་སྤྲུལ་པའི་འོད་ཀྱི་ཀྱང་དེ་བཞིན་གཤེགས་པ་ཐམས་ཅད་ཀྱི་བསྟན་པ་ལས་བྱུང་བའི་འོད་ཀྱི་སྒྲོན་མ་ཞེས་བྱ་བའི་ཏིང་
ངེ་འཛིན་དང་། བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང་། རྣམ་པར་འཕྲུལ་པ་ཟབ་མོ་ལ་འཇུག་པ་འདི་ཡང་ཤིན་ཏུ་ཕྲ་ཞིང་འཇམ་པའི་ཚུལ་དུ་རབ་ཏུ་ཐོབ་པར་གྱུར་ཏོ། །དེ་ཐོབ་
པས་དེ་ལ་དེ་བཞིན་གཤེགས་པ་ཆོས་རྒྱ་མཚོ་ཐམས་ཅད་ཀྱི་དབྱངས་འོད་ཀྱི་རྒྱལ་པོའི་རྣམ་པར་འཕྲུལ་པ་དེ་དག་ཐམས་ཅད་ཀྱང་མངོན་དུ་གྱུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་
ཚེ་དེའི་དུས་ན་འཁོར་ལོས་བསྒྱུར་བའི་རྒྱལ་པོ་ཉི་མ་ལྟར་བཞིན་མདོག་དྲི་མ་མེད་པ་ཞེས་བྱ་བ་དེ་བཞིན་གཤེགས་པ་ཆོས་རྒྱ་མཚོ་ཐམས་ཅད་ཀྱི་དབྱངས་འོད་ཀྱི་རྒྱལ་པོའི་བསྟན་པ་ལ་རབ་ཏུ་བྱུང་སྟེ། 
ཆོས་ཀྱི་འཁོར་ལོ་རྗེས་སུ་བསྐོར་བ་དང་། ཡོངས་སུ་མྱ་ངན་ལས་འདས་ནས་ཀྱང་བསྟན་པ་ནུབ་ཏུ་ཆ་བའི་ཚེ་དང་དུས་ན་བསྟན་པ་ཡོངས་སུ་འཛིན་ཅིང་ཆོས་ཀྱི་སྒྲོན་མ་ཆེན་པོ་འབར་བར་བྱེད་པ་དེ་གཞན་
ཞིག་ཡིན་པ་སྙམ་དུ་སེམས་ན་ནི། རིགས་ཀྱི་བུ་ཁྱོད་ཀྱི་དེ་ལྟར་མི་ལྟ་སྟེ། བྱང་ཆུབ་སེམས་དཔའ་ཀུན་ཏུ་བཟང་པོ་ནི་དེའི་ཚེ་དེའི་དུས་ན་འཁོར་ལོས་བསྒྱུར་བའི་རྒྱལ་པོ་ཉི་མ་ལྟར་བཞིན་མདོག་དྲི་མ་

77-1-46b

མེད་པ་ཞེས་བྱ་བར་གྱུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་འཁོར་ལོ་བསྒྱུར་བའི་རྒྱལ་པོ་ཉི་མ་ལྟར་བཞིན་མདོག་དྲི་མ་མེད་པའི་བུ་མོ་དགེ་སློང་མ་ཆོས་ཀྱི་འཁོར་ལོས་སྤྲུལ་པའི་འོད་
ཅེས་བྱ་བ་དགེ་སློང་མ་བརྒྱ་ཕྲག་སྟོང་གི་འཁོར་དང་ལྡན་པ་བྱུང་བ་དེ་གཞན་ཞིག་ཡིན་པ་སྙམ་དུ་སེམས་ན་ནི་དེ་ལྟར་མི་ལྟ་སྟེ། ཁོ་མོ་ནི་དེའི་ཚེ་དེའི་དུས་ན་དགེ་སློང་མ་ཆོས་ཀྱི་འཁོར་ལོས་སྤྲུལ་པའི་
འོད་ཅེས་བྱ་བར་གྱུར་ཏེ། དེ་ལྟར་ཁོ་མོས་དེ་བཞིན་གཤེགས་པ་ཆོས་རྒྱ་མཚོ་ཐམས་ཅད་ཀྱི་དབྱིངས་འོད་ཀྱི་རྒྱལ་པོའི་བསྟན་པ་ཡང་ཡོངསུ་བཟུང་ངོ་། །དགེ་སློང་མ་བརྒྱ་ཕྲག་སྟོང་པོ་དེ་དག་ཀྱང་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བྱས་ཏེ། དེ་བཞིན་གཤེགས་པ་མངོན་དུ་འགྱུར་བ་ལ་ཡང་དག་པར་གཞོལ་བའི་ཏིང་ངེ་འཛིན་ལ་འང་རབ་ཏུ་བཀོད་དོ། །དེ་བཞིན་
གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོས་སྤྲུལ་པའི་འོད་ཀྱི་གཟུངས་དང་། ཆོས་རྒྱ་མཚོའི་ཚུལ་ཐམས་ཅད་ལ་འཇུག་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་འང་རབ་ཏུ་བཀོད་དོ། །དེ་བཞིན་
གཤེགས་པ་དེའི་འོག་ཏུ་ཁོ་མོས་དེ་བཞིན་གཤེགས་པ་ཆོས་དྲི་མ་མེད་པའི་ཡེ་ཤེས་གྱི་རྩེ་མོའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་དཀྱིལ་འཁོར་གྱི་འོད་
རབ་ཏུ་སྣང་བའི་གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ཉི་མ་དཔལ་གྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་རྒྱ་མཚོ་ཤིན་
ཏུ་བསྟན་པའི་དབྱངས་ཤེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ཉི་མའི་དཀྱིལ་འཁོར་ཡེ་ཤེས་ཀྱི་སྒྲོན་མ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་

77-1-47a

ཆོས་ཀྱི་མེ་ཏོག་དཔལ་གྱི་རྒྱལ་མཚན་གྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་འོད་འཕྲོ་རི་བོ་དཔལ་གྱི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་
འོག་ཏུ་དེ་བཞིན་གཤེགས་པ་ཆོས་ཀྱི་ཚུལ་ཟབ་མོ་དཔལ་གྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ཡེ་ཤེས་ཡང་དག་པར་འབྱུང་བ་ཀུན་ཏུ་སྣང་བའི་སྙིང་པོ་ཞེས་
བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་འབྱུང་གནས་གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིའི་དབང་པོ་དཔལ་གྱི་སྙིང་
པོའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྒོ་ཀུན་ནས་མཁྱེན་པའི་རི་བཟང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཐམས་ཅད་ཀྱི་བརྩོན་
འགྲུས་དྲག་པོའི་རྒྱལ་མཚན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་རིན་པོ་ཆེའི་མེ་ཏོག་དཔལ་གྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་
འོད་ཟབ་མོ་ཞི་བ་བརྩེགས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་གཟེར་གྱི་ཚུལ་རབ་ཏུ་སྣང་བའི་འོད་ཀྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་
བཞིན་གཤེགས་པ་ཡེ་ཤེས་འོད་འཕྲོ་བ་དཔལ་གྱི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀུན་ཏུ་བཟང་པོའི་དཀྱིལ་འཁོར་ཅེས་བྱ་བ་བསྙེན་བཀུར་ཏོ། །དེའི་
འོག་ཏུ་དེ་བཞིན་གཤེགས་པ་སྤྱིའུ་ཚུགས་ཀྱི་ཕྱོགས་ཡེ་ཤེས་སྣང་བར་མཛད་པའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་གཟེར་གྱི་མེ་ཏོག་ཀུན་ཏུ་རྒྱས་པའི་སྒྲོན་མ་

77-1-47b

ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་སེང་གེའི་དཔལ་གྱི་རྒྱལ་མཚན་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཉི་མ་ཀུན་ཏུ་སྣང་བའི་རྒྱལ་པོ་
ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་རིན་པོ་ཆེས་རྣམ་པར་བརྒྱན་པའི་རི་བོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཉི་མའི་རྣམ་པར་གནོན་
པས་ཀུན་ཏུ་སྣང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་དྲ་བ་རྣམ་པར་སངས་རྒྱས་པའི་དཔལ་གྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་
པ་ཆོས་ཀྱི་པད་མོ་རབ་ཏུ་རྒྱས་པའི་དཔལ་གྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་གྱི་ཉི་མའི་འཁོར་ལོ་ཀུན་ཏུ་སྣང་བ་ཞེས་བྱ་བ་བསྙེན་བཀུར་ཏོ། །དེའི་
འོག་ཏུ་དེ་བཞིན་གཤེགས་པ་མི་སྙེངས་པའི་རྡོ་རྗེ་སེང་གེ་མཐུ་བོ་ཆེ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་རྒྱལ་མཚན་ཀུན་ཏུ་དཔལ་ཞེས་བྱ་བ་བསྙེན་བཀུར་ཏོ། །
དེའི་འོག་ཏུ་དེ་བཞིན་གཤེགས་པ་སྐུ་ཆོས་ཀྱི་པད་མོའི་མེ་ཏོག་ཤིན་ཏུ་རྒྱས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡོན་ཏན་མེ་ཏོག་དཔལ་གྱི་རྒྱལ་མཚན་ཞེས་བྱ་བ་
བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་དབྱིག་རི་བོ་སྣང་བའི་ཕུང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་སྤོའི་འོད་འཕྲོ་བ་
སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྒོ་ཀུན་ནས་ཆོས་སྟོན་པའི་རི་བོའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྙིང་པོ་བྱང་ཆུབ་རྣམ་པར་

77-1-48a

སངས་རྒྱས་པའི་དཔལ་གྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་སྒྲོན་མ་རབ་ཏུ་འབར་བའི་དཔལ་གྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་
འོག་ཏུ་དེ་བཞིན་གཤེགས་པ་གཟུགས་བརྙན་ཀུན་ཏུ་སྣང་བའི་གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་སྤྲིན་གྱི་རྒྱལ་མཚན་སྒྲོན་མ་ཞེས་བྱ་བ་
བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རྡོ་རྗེ་ལྟར་བརྟན་པའི་རྒྱལ་མཚན་རྒྱ་མཚོའི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་གྲགས་པའི་རི་བོ་
དཔལ་གྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཙན་དན་དཔལ་གྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་དཔལ་གྱི་མེ་ཏོག་
ཀུན་ནས་རྒྱལ་བའི་གཟི་བརྗིད་སྣང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སེམས་ཅན་ཐམས་ཅད་ཏུ་སྣང་བའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་
བཞིན་གཤེགས་པ་ཡོན་ཏན་པད་མོ་དཔལ་གྱི་སྙིང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྤོས་ཀྱི་འོད་འཕྲོ་བ་རབ་ཏུ་སྣང་བའི་རྒྱལ་པོ་ཞེས་བྱ་བ་
བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རྒྱུ་པད་མོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་གྱི་རི་བོ་རྣམ་པར་སྣང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་
དེ་བཞིན་གཤེགས་པ་སྙེན་པ་ཀུན་ཏུ་རྣམ་པར་གྲགས་པའི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀུན་ཏུ་སྣང་བའི་རི་བོ་ཞེས་བྱ་བ་བསྙེན་བཀུར་

77-1-48b

ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་གྲོང་ཁྱེར་རབ་ཏུ་སྣང་བའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཤིང་གི་རི་བོ་གཟི་བརྗིད་ཅེས་བྱ་བ་བསྙེན་
བཀུར་ཏོ། །དེའི་འོག་ཏུ་དེ་བཞིན་གཤེགས་པ་དཔལ་ཀུན་ཏུ་རྣམ་པར་སྣང་བའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་རྒྱ་མཚོའི་ང་རོ་རབ་ཏུ་སྒྲོག་པའི་འོད་
ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཐམས་ཅད་ཀྱི་གནས་བསྒྲུབ་པ་ཡོངས་སུ་འགྲུབ་པའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་
གཤེགས་པ་ཡེ་ཤེས་ཀུན་ཏུ་སྣང་བའི་དམ་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་དམ་པའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་
གཤེགས་པ་ཆོས་ཀྱི་སྟོབས་ཀྱི་དཔའ་བའི་རྒྱ་མཚན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་འཁོར་ལོའི་འོད་ཀྱི་དབྱངས་ཞེས་བྱ་བ་བསྙེན་བཀུར་ཏོ། །དེའི་འོག་
དུ་དེ་བཞིན་གཤེགས་པ་འོད་གཟེར་ཡོན་ཏན་གྱི་ཅོད་པན་ཡེ་ཤེས་དང་ཤེས་རབ་ཀྱི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་འཁོར་ལོའི་ཟླ་བས་
འཕགས་པའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་པད་མོ་རྣམ་པར་སྣང་བས་རྣམ་པར་སངས་རྒྱས་པའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་
ཏུ་དེ་བཞིན་གཤེགས་པ་རིན་ཆེན་པད་མོ་སྣང་བའི་སྙིང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་ཆེན་དཔལ་གྱི་རྩེ་མོའི་སྤྲིན་རབ་ཏུ་སྣང་བ་ཞེས་བྱ་བ་བསྙེན་བཀུར་ཏོ། །དེའི་

77-1-49a

འོག་ཏུ་དེ་བཞིན་གཤེགས་པ་ཡེ་ཤེས་ཀྱི་མེ་ཏོག་ཀུན་ནས་རྣམ་པར་དག་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་གཟེར་དཔལ་གྱི་རི་བོའི་
སྙིང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་གཟེར་གྱི་དཀྱིལ་འཁོར་སྤོའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་བསོད་
ནམས་སྣ་ཚོགས་ཀྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་རི་བོའི་རྒྱལ་མཚན་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་
པ་ཡོན་ཏན་རི་བོའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ཉི་མའི་སྤྲིན་རབ་ཏུ་སྣང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་
ཆོས་ཀྱི་སྤྲིན་སྙན་པ་རྣམ་པར་གྲགས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་དཀྱིལ་འཁོར་ན་བུན་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་
གཤེགས་པ་བྱང་ཆུབ་རྣམ་པར་སངས་རྒྱས་པའི་ཡེ་ཤེས་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་དཀྱིལ་འཁོར་རྣམ་པར་སངས་རྒྱས་པའི་དཔལ་གྱི་ཟླ་
བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་གསེར་རིན་པོ་ཆེའི་རི་བོ་གཟི་བརྗིད་བཟང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་དཔལ་གྱི་རི་བོ་
གཟི་བརྗིད་བཟང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཤེས་རབ་ཀྱི་སྒྲ་ཀུན་ཏུ་འབྱུང་བའི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་

77-1-49b

པ་ཆོས་ཀྱི་སྟོབས་ཀྱི་དཔལ་བརྩེགས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྤོས་འོད་འཕྲོ་བའི་སྤྲིན་ཕུན་སུམ་ཚོགས་པའི་རྒྱལ་པོ་ཞེས་བྱ་བ་བསྙེན་བཀུར་ཏོ། །
དེའི་འོག་ཏུ་དེ་བཞིན་གཤེགས་པ་གསེར་རིན་པོ་ཆེའི་རིའི་རྒྱལ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་གཙུག་ཏོར་གྱི་མཛོད་ཆོས་ཐམས་ཅད་ཀྱི་འོད་ཀྱི་དཀྱིལ་
འཁོར་གྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་འཁོར་ལོ་རབ་ཏུ་འབར་བའི་གཟི་བརྗིད་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་
གཤེགས་པ་རིའི་རྩེ་མོ་མངོན་པར་འཕགས་པའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་བརྩོན་འགྲུས་ཀྱི་སྒྲོན་མ་ཀུན་ཏུ་སྣང་བའི་སྤྲིན་ཅེས་བྱ་བ་བསྙེན་བཀུར་
ཏོ། །དེའི་འོག་ཏུ་དེ་བཞིན་གཤེགས་པ་ཏིང་ངེ་འཛིན་གྱི་ཕྱག་རྒྱ་ཤིན་ཏུ་ཡངས་པའི་ཅོད་པན་ཤེས་རབ་ཀྱི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་པོ་ཆེ་ཡིད་དུ་འོང་
བ་དཔལ་གྱི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་སྒྲོན་མ་རིན་ཆེན་བླ་རེའི་དབྱངས་ཤེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་
པ་ཆོས་ཀྱི་ནམ་མཁའ་ལ་སེང་གེའི་འོད་ཤིན་ཏུ་མཛེས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་གྱིས་རྣམ་པར་བརྒྱན་པའི་རྒྱལ་མཚན་ཟླ་བ་ཞེས་བྱ་བ་
ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་གཟེར་གྱི་རི་བོ་རྣམ་པར་སྣང་བའི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ནམ་མཁའ་སྒྲིབ་པ་མེད་

77-1-50a

པའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་ཡིད་དུ་འོང་བའི་མེ་ཏོག་གི་ཡན་ལག་ཤིན་ཏུ་རྒྱས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་
གཤེགས་པ་འཇིག་རྟེན་གྱི་དབང་པོ་དམ་པའི་འོད་ཀྱི་དབྱངས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཐམས་ཅད་ཏིང་ངེ་འཛིན་གྱི་འོད་ཀྱི་དབྱངས་ཤེས་བྱ་བ་
བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་སྒོའི་དབྱངས་མང་པོའི་མཛོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་འབར་བའི་འོད་འཕྲོ་རྒྱ་མཚོའི་
དབྱངས་ཤེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་དུས་གསུམ་གྱི་མཚན་མ་རབ་ཏུ་སྣང་བའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་
པ་ཆོས་ཀྱི་དཀྱིལ་འཁོར་དཔལ་གྱི་རི་བོ་སྣང་བའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་སེང་གེའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་
གཤེགས་པ་རྣམ་པར་སྣང་མཛད་དཔལ་གྱི་རི་རབ་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཏིང་ངེ་འཛིན་རྒྱ་མཚོ་ཐམས་ཅད་སྣང་བར་མཛད་པའི་སེང་གེ་ཞེས་
བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀྱི་འོད་ཀུན་ཏུ་སྣང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཤེས་རབ་ཀྱི་འོད་ཀུན་ཏུ་གསལ་
བའི་ཆོས་ཀྱི་གྲོང་ཁྱེར་རབ་ཏུ་སྣང་བ་ཞེས་བྱ་བ་བསྙེན་བཀུར་ཏོ། །དེ་ལྟར་རིགས་ཀྱི་བུ་སངས་རྒྱས་བརྒྱ་པོ་འདི་དག་ལ་སྩོགས་པ། བསྐལ་པ་མདོག་དྲི་མ་མེད་པའི་འོད་ཅེས་བྱ་བ་ལ་དེ་བཞིན་

77-1-50b

གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་གཅིག་བྱུང་ཏེ། རིགས་ཀྱི་བུ་དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་པོ་དེ་དག་ཐམས་ཅད་ཀྱི་ཐ་མར་དེ་བཞིན་
གཤེགས་པ་ཆོས་ཀྱི་གྲོང་ཁྱེར་ཡེ་ཤེས་ཀྱི་འོད་ཀྱིས་རབ་ཏུ་སྣང་བའི་རྒྱལ་པོ་ཞེས་བྱ་བ་བྱུང་བར་གྱུར་ཏེ། དེ་ལྟར་རིགས་ཀྱི་བུ་ཁོ་མོས་དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་
བ་སྙེད་པོ་དེ་དག་ལས་ཆོས་རྒྱ་མཚོ་ཐམས་ཅད་ཀྱི་དབྱངས་ཀྱི་འོད་ཀྱི་རྒྱལ་པོ་ཞེས་བྱ་བ་ལ་སྩོགས་པ་ཐ་མ་ཆོས་ཀྱི་དབྱིངས་ཀྱི་གྲོང་ཁྱེར་ཡེ་ཤེས་ཀྱི་འོད་ཀྱི་རབ་ཏུ་སྣང་བའི་བར་དེ་དག་ཐམས་
ཅད་ཁོ་མོས་མཆོད་དོ། །དེ་བཞིན་གཤེགས་པ་དེ་དག་ཐམས་ཅད་ལ་ཁོ་མོས་རིམ་གྲོར་བྱས་སོ། །ཐམས་ཅད་ཀྱི་ཆོས་བསྟན་པ་ཡང་ཐོས་སོ། །དེ་བཞིན་གཤེགས་པ་དེ་དག་ཐམས་
ཅད་ཀྱི་བསྟན་པ་ལ་འང་ཁོ་མོས་རབ་ཏུ་བྱུང་ངོ་། །དེ་བཞིན་གཤེགས་པ་དེ་དག་ཐམས་ཅད་ཀྱི་བསྟན་པ་ཡང་ཁོ་མོས་ཡོངས་སུ་བཟུང་ངོ་། །བྱང་ཆུབ་སེམས་དཔའི་རྣམ་པར་ཐར་
པ་སྒྲ་ཡིད་དུ་འོང་བ་དང་། རྣམ་པར་འཕྲུལ་པ་ཟབ་མོ་ལ་འཇུག་པ་འདི་ཡང་དེ་བཞིན་གཤེགས་པས་དེ་དག་ཐམས་ཅད་ལས་ཐོབ་པའི་ཚུལ་རྣམ་པ་སྣ་ཚོགས་ཀྱིས་རབ་ཏུ་ཐོབ་བོ། །
དེ་བཞིན་གཤེགས་པ་དེ་དག་ཐམས་ཅད་ཀྱི་ཞབས་ཀྱི་དྲུང་དུ་འང་ཁོ་མོས་སེམས་ཅན་རྒྱ་མཚོ་མཐའ་དང་དབུས་མེད་པ་ཡོངས་སུ་སྨིན་པར་བྱས་སོ། །དེ་ཚུན་ཆད་དུ་བསྐལ་པ་སངས་རྒྱས་
ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ལ་དེ་བཞིན་གཤེགས་པ་ཇི་སྙེད་ཅིག་བྱུང་བར་གྱུར་པ་དེ་དག་ཐམས་ཅད་ནི་ཁོ་མོས་ཆོས་གྱི་ནན་ཏན་གྱིས་མཆོད་པ་བྱས་ཏེ། རིགས་ཀྱི་བུ་དེ་ཕྱིན་ཆད་ཏུ་ཁོ་མོས་

77-1-51a

སེམས་ཅན་འཁོར་བའི་མུན་པ་ན་འཁོད་ཅིང་མི་ཤེས་པའི་གཉིད་ཀྱི་ལོགས་པ་རྣམས་ཀྱི་མེལ་ཚེ་ཆེར་བྱས་སོ། །དེ་དག་གི་སེམས་ཀྱི་གྲོང་ཁྱེར་ཡང་ཡོངས་སུ་བསྲུངས་སོ། །དེ་དག་
ཁམས་གསུམ་གྱི་གྲོང་ཁྱེར་ནས་གྱེན་དུ་བསྐྱོད་ཅིང་ཐམས་ཅད་མཁྱེན་པ་ཉིད་ཀྱི་གྲོང་རྡལ་དུ་ཡང་རབ་ཏུ་བཀོད་དོ། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་
དང་། རྣམ་པར་འཕྲུལ་པ་ཟབ་མོ་ལ་འཇུག་པ་འཇིག་རྟེན་གྱི་ཚིག་ཁྱལ་པ་རྣམ་པར་བཟློག་པ། གཉིས་སུ་སྨྲ་བ་མེད་པ་ལ་རབ་ཏུ་བཀོད་དོ། །བདེན་པ་ལ་རབ་ཏུ་གཞོག་པའི་མཐར་ཕྱིན་པ་འདི་
ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་དག་གི་ལམ་གྱི་རང་བཞིན་ཐམས་ཅད་ཐོགས་པ་མེད་པར་ཤེས་པ། སེམས་ཀྱི་སྐད་ཅིག་རེ་རེ་ལ་ཆོས་ཐམས་ཅད་མངོན་པར་འཚང་རྒྱ་
བར་དབང་བསྒྱུར་བ། སེམས་ཅན་ཐམས་ཅད་ཀྱི་སྒྲ་སྐད་དང་། ཚིག་རྒྱ་མཚོ་ལ་ཞུགས་པ། སྐད་རྒྱ་མཚོ་ཐམས་ཅད་མངོན་པར་འདུ་བྱ་བ་ལ་མཁས་པ། ཆོས་ཐམས་ཅད་ཀྱི་གྲངས་དང་མིང་རྒྱ་
མཚོའི་ཚུལ་དང་། ཆོ་ག་ལ་མཁས་པ། ཆོས་ཐམས་ཅད་ལ་ཡང་དག་པར་གཞོལ་བའི་གཟུངས་རྒྱ་མཚོ་ལ་དབང་བསྒྱུར་བ། སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་ཏུ་ཆོས་ཀྱི་སྤྲིན་
མངོན་པར་བསྒྲུབ་པ་ལ་མཁས་པ། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བར་སྤྱོད་པའི་མཐར་ཕྱིན་པར་བྱེད་པ་དེ་དག་གི་སྤྱོད་པ་ཤེས་པ་འམ། ཡོན་ཏན་བརྗོད་པར་
འམ། སེམས་ཅན་ཐམས་ཅད་ཡོངས་སུ་སྡུད་པའི་ནན་ཏན་ཤེས་པར་བྱ་བ་དང་། བྱང་ཆུབ་སེམས་དཔའི་ལམ་བླ་ན་མེད་པར་བརྩམས་པའི་སྦྱོར་བ་འམ། བྱང་ཆུབ་སེམས་དཔའི་ཡེ་

77-1-51b

ཤེས་ཤིན་ཏུ་ཕྲ་བ་ཁོང་དུ་ཆུད་པ་འམ། བྱང་ཆུབ་སེམས་དཔའི་ཆོས་ཀྱི་གཏེར་དང་། མཛོད་རྣམ་པར་འབྱེད་པའི་ཁྱུ་མཆོག་གིས་མཐུ་འམ། བྱང་ཆུབ་སེམས་དཔའི་ཆོས་ཀྱི་སྟན་ལ་སེང་
གེའི་ཁྲི་ཡོངས་སུ་གཏན་པར་བྱ་བ་ཤེས་པར་ནུས་རེ་སྐན་དེ་ཅིའི་ཕྱིར་ཞེ་ན། སྐྱེས་བུ་དམ་པ་དེ་དག་ནི་ཆོས་ཐམས་ཅད་ཀྱི་སའི་དཀྱིལ་འཁོར་གྱི་གཟུངས་སུ་གནོན་པ་ཤ་སྟག་དག་གོ། །སོང་
རིགས་ཀྱི་བུ་བཅོམ་ལྡན་འདས་རྣམ་པར་སྣང་མཛད་ཀྱི་ཞབས་ཀྱི་དྲུང་འདི་ཉིད་དུ་མཚན་མོ་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པར་བདེ་བར་གནས་པ་ཞེས་བྱ་བ་འདུག་སྟེ། ཁོ་མོ་དང་རྒྱང་
མི་རིང་བ་ཞིག་ན་འདུག་གིས། དེའི་གན་དུ་སོང་བ་ལ་ཇི་ལྟར་བྱང་ཆུབ་སེམས་དཔའ་རྣམས་ཐམས་ཅད་མཁྱེན་པ་ཉིད་དུ་སློབ་པ་དང་། ཇི་ལྟར་ནན་ཏན་དུ་བྱེད་ཅིང་སེམས་ཅན་ཐམས་
ཅད་ཐམས་ཅད་མཁྱེན་པ་ཉིད་དུ་འགྲོ་བ་བྱེད་པ་དྲིས་ཤིག །དེ་ནས་མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུངས་བའི་གཟི་བརྗིད་དཔལ་གྱིས་དེའི་ཚེ་བྱང་ཆུབ་སེམས་དཔའི་རྣམ་
པར་ཐར་པ་སྒྲ་ཡིད་དུ་འོང་བ་དང་། རྣམ་པར་འཕྲུལ་པ་ཟབ་མོ་ལ་འཇུག་པ་འདི་ཉིད་བསྟན་ཏེ། བརྟན་པའི་ཕྱིར་ཚོང་དཔོན་གྱི་བུ་ནོར་བཟངས་ལ་ཚིགས་སུ་བཅད་དེ་སྨྲས་པ། རྣམ་ཐར་
གང་གིས་དུས་གསུམ་རྒྱལ་བ་མ་ལུས་དང་། །ཆོས་དབྱིངས་ཀུན་ཏུ་འབྱམ་ཀླས་མཐའ་དང་དབུས་མེད་པ། །ཤེས་བྱེད་མཚན་ཉིད་ཀུན་གྱི་གཞིར་ཐུག་རྟོགས་པ་ཡི། །རྒྱལ་སྲས་
རྣམས་ཀྱི་རྣམ་ཐར་ཟབ་ཅིང་བལྟ་བར་དཀའ། །ཚོགས་ལས་བྱུང་བའི་རྣམ་ཐར་ཚུལ་ནི་མཐའ་ཡས་ཏེ། །ཆོས་ཉིད་ཐོས་པས་ཚད་མེད་བསམ་དུ་མེད་པ་ཡིན། །ཡོངསུ་འཕེལ་ཞིང་ཀུན་ཏུ་ཆགས་

77-1-52a

མེད་ཤུགས་དྲག་པར། །དུས་གསུམ་བྱམས་པའི་ཚུལ་གྱིས་ལམ་ལ་འཇུག་པར་གྱིས། །འདི་ལྟར་སངས་རྒྱས་ཞིང་རྒྱུད་རྡུལ་ཕྲན་རབ་སྙེད་ཀྱི། །བསྐལ་པ་འདས་པའི་སྔ་
རོལ་སྔོན་གྱི་ཞིང་བྱུང་བ། །འཇིག་རྟེན་ཁམས་ནི་ཆོས་འོད་སྤྲིན་གྱི་དཔལ། །བསྐལ་པ་འབྱུང་བ་དྲི་མེད་མདོག་ཏུ་འོད་ཆེན་ནོ། །བསྐལ་པ་དེ་གཅིག་རྒྱལ་བའི་གདུང་ནི་རྒྱུན་མ་ཆད། །སངས་
རྒྱས་རི་རབ་རྡུལ་ཕྲན་རབ་སྙེད་བྱུང་བར་འགྱུར། །བདེ་གཤེགས་ཆོས་ཀྱི་རྒྱ་མཚོ་འོད་དབྱངས་རྒྱལ་པོ་ནི། །ཐོག་མར་བྱུང་སྟེ་དེ་དག་བསྐལ་པ་དང་པོ་པ། །རྒྱལ་བ་ཆོས་སྤྲིན་གྲོང་ཁྱེར་འོད་
སྣང་རྒྱལ་པོ་ནི། །བདེ་གཤེགས་དེ་དག་ཀུན་གྱི་ཐ་མར་འཇིག་རྟེན་བྱུང་། །དེ་དག་ཀུན་གྱི་སྤྱན་སྔར་ཕྱིན་ཏེ་ཁོ་མོས་མཆོད། །དེ་དག་ཀུན་ལས་ཆོས་ཀྱང་དགའ་བ་ཆེན་པོས་ཐོས། །
ཁོ་མོས་ཐོག་མར་མཐོང་བ་གསེར་མདོག་འོད་མངའ་བ། །རྒྱ་མཚོའི་ཆོས་འོད་སྒྲོགས་པའི་གསུང་གི་རྒྱལ་པོ་སྟེ། །མཚན་རབ་སུམ་བཅུ་གཉིས་ཀྱིས་ཡོངས་བརྒྱན་རི་བོ་འདྲ། །མཐོང་
ནས་བདག་ནི་བདེ་གཤེགས་འགྱུར་སྙམ་བློ་གྲོས་གྱུར། །དེ་བཞིན་གཤེགས་པ་དེ་ནི་ཁོ་མོས་མཐོང་མོད་ལ། །ཐམས་ཅད་མཁྱེན་ཉིད་འབྱམ་ཀླས་འབྱུང་བའི་རྒྱུ་རྐྱེན་གྱིས། །མཁའ་དབྱིངས་རྣམ་
ཡངས་དེ་བཞིན་ཉིད་ཀྱི་རང་བཞིན་ཅན། །རྒྱལ་བའི་སེམས་ཀྱི་དང་པོ་སྟོབས་ལྡན་རབ་ཏུ་སྐྱེས། །སྙིང་རྗེ་བདུད་རྩིའི་རྒྱ་མཚོ་ཆེ་ལས་བྱུང་བ་དེས། །དུས་གསུམ་གཤེགས་པའི་བདེ་བར་
གཤེགས་པ་ཐམས་ཅད་ཀུན། །རྒྱལ་སྲས་རྒྱ་མཚོས་བསྐོར་བ་མ་ལུས་ཐམས་ཅད་དང་། །སེམས་ཅན་རྒྱ་མཚོར་བཅས་པའི་རྒྱ་མཚོའི་ཞིང་ཡང་རྒྱས། །ལུས་ཀྱིས་ཞིང་རྣམས་ཐམས་

77-1-52b

ཅད་མ་ལུས་ཁྱབ་བྱ་དང་། །འགྲོ་བ་ཀུན་གྱི་བསམ་པ་བཞིན་ཏུ་ལུས་བསྟན་ཕྱིར། །ཞིང་རྣམས་མ་ལུས་བསྐྱོད་ཅིང་སྣང་བར་བྱ་བ་དང་། །འགྲོ་བ་སྨིན་བྱའི་དོན་དུ་བདག་གིས་སེམས་
ཀྱང་བསྐྱེད། །རྒྱལ་བ་གཉིས་པའི་སྤྱན་སྔར་ཁོ་མོ་ཕྱིན་ནས་ཀྱང་། །ཞིང་རྣམས་རྒྱ་མཚོ་བཅུ་བཞུགས་རྒྱལ་བའི་དབང་པོ་མཐོང་། །རྒྱ་བ་ཐ་མ་མཐོང་ནས་ཞིང་གི་རྒྱ་མཚོ་རྣམས། །རྒྱ་
མཚོའི་ཞིང་གི་རྡུལ་ཕྲན་རབ་བསྙེད་བཞུགས་པ་མཐོང་། །དེ་ཡི་ཚུ་རོལ་བསྐལ་པ་ཞིང་རྒྱུད་རྟུལ་སྙེད་ཏུ། །རྒྱལ་བ་འགྲོ་བའི་སྒྲོན་མ་ཇི་སྙེད་སྐྱེས་གྱུར་པ། །དེ་དག་ཐམས་ཅད་
སྤྱན་སྔར་ཁོ་མོ་ཕྱིན་གྱུར་ཏེ། །རྣམ་ཐར་རྒྱ་མཚོའི་ཚུལ་འདི་སྤྱོད་ཚེ་མཆོད་པ་བྱས། །དེ་ནས་ཚོང་དཔོན་གྱི་བུ་ནོར་བཟངས་བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང་། 
རྣམ་པར་འཕྲུལ་པ་ཟབ་མོ་ལ་འཇུག་པ་ཐོབ་པ་ཏིང་ངེ་འཛིན་གྱི་སྒོ་རྒྱ་མཚོ་མཐའ་དང་དབུས་མེད་པ་ལ་ཞུགས་པ། གཟུངས་ཀྱི་སྒོ་རྒྱ་མཚོ་རྒྱ་ཆེན་པོ་ལས་བྱུང་བའི་སེམས་དང་ལྡན་
པ། བྱང་ཆུབ་སེམས་དཔའི་མངོན་པར་ཤེས་པའི་སྣང་བ་ཆེན་པོ་རབ་ཏུ་ཐོབ་པ། སོ་སོ་ཡང་དག་པར་རིག་པ་ཆེན་པོ་རྒྱ་མཚོ་ལ་ཞུགས་པའི། དགའ་བའི་ཤུགས་རྒྱ་མཚོ་ཤིན་ཏུ་ཡངས་
པ་རྣམ་པར་འཕེལ་བའི་སེམས་དང་ལྡན་པ་དེས། མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བའི་གཟི་བརྗིད་དཔལ་ལ་ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་
དོ། །ཁྱོད་ཀྱི་ཤེས་རབ་ཆོས་ཡངས་རྒྱ་མཚོ་ཀུན་ལ་སྤྱོད། །སྲིད་པའི་རྒྱ་མཚོ་མཐའ་དང་དབུས་མེད་ཁྱོད་ཀྱི་སྦྱངས། །ཡེ་ཤེས་ལུས་མཆོག་སྙིང་པོ་ཚེ་རིང་སྙེངས་བྲལ་བ། །ལྷ་མོ་ཁྱོད་ནི་འཁོར་

77-1-53a

འདིར་བྱོན་ཅིང་རྣམ་པར་མཛེས། །ཆོས་ཀྱི་རང་བཞིན་ནམ་མཁའ་ལྟ་བུ་ཐུགས་ཆུད་དོ། །དུས་གསུམ་ཀུན་གྱི་ཚུལ་ཡང་ཆགས་མེད་ཐུགས་ཆུད་མཛད། །ཐུགས་ཀྱི་སྐད་
ཅིག་གཅིག་ལ་ཚད་མེད་བསམ་ཡས་པའི། །དམིགས་པ་ཐམས་ཅད་རྟོག་པ་མི་མངར་འཇལ་བར་མཛད། །ཡེ་ཤེས་སྤྱན་མངའ་ཆོས་ཉིད་སེམས་ཅན་མེད་གཟིགས་ཀྱང་། །སེམས་ཅན་རྒྱ་མཚོ་
མཐའ་ཡས་ཐུགས་རྗེས་གཟིགས་པ་མཛད། །ཐུགས་ཀྱི་རྣམ་ཐར་ཤིན་ཏུ་ཡངས་ལ་འཇུག་མཛད་ཅིང་། །སེམས་ཅན་ཚད་མེད་འདུལ་ཞིང་ཡོངས་སུ་སྨིན་པར་མཛད། །ཁྱོད་ནི་ཆོས་ཀྱི་དཀྱིལ་འཁོར་
རྣམས་སྤྱད་ཚུལ་མཁྱེན་ཏེ། །ཆོས་ཀྱི་རང་བཞིན་ཤེས་བྱའི་ཚུལ་ལ་རྣམ་སངས་རྒྱས། །འཕགས་ལམ་དྲི་མ་མེད་པ་ཐམས་ཅད་ཡོངས་སྒོམ་སྟེ། །འགྲོ་བ་མ་ལུས་རྣམ་པར་སྦྱོང་ཞིང་
ཡོངས་སུ་འབྱུང་། །ཐམས་ཅད་མཁྱེན་པའི་ཡེ་ཤེས་དྲི་མེད་རྟོགས་མཛད་པའི། །ཁྱོད་ནི་སེམས་ཅན་རྒྱ་མཚོའི་མཆོག་ལས་མངོན་པར་སྐྱེས། །ཁྱོད་ནི་ཆོས་དབྱིངས་ཁོངས་སུ་སེམས་ཅན་
ཀུན་ཁྱབ་པར། །ཆོས་རབ་བསྟན་ཅིང་འཇིག་རྟེན་འཇིགས་པ་ཞི་བར་མཛད། །ཁྱོད་ནི་རྣམ་པར་སྣང་མཛད་སྨོན་ལམ་ལམ་ཚུལ་གྱིས། །ཡང་དག་བཞུད་ཅིང་ཆགས་མེད་བློ་ཡང་དྲི་
མེད་ལྡན། །ཐམས་ཅད་བགྲོད་པའི་རྒྱལ་བའི་སྟོབས་ནི་ཐུགས་ཆུད་ཅིང་། །ཞིང་རྣམས་ཀུན་གྱི་རྒྱལ་བ་རྣམ་པར་འཕྲུལ་པ་གཟིགས། །ཁྱོད་ཀྱི་ཐུགས་ནི་མཁའ་འདྲ་
ཐུབ་པར་དཀའ་བ་སྟེ། །ཉོན་མོངས་ཀུན་གྱི་དྲི་མས་མ་གོས་སྔ་ནས་དག །དེར་ནི་དུས་གསུམ་བྱུང་བའི་ཞིང་རྣམས་ཐམས་ཅད་དང་། །སངས་རྒྱས་སྲས་

77-1-53b

དང་བཅས་པ་སེམས་ཅན་ཀུན་བཅས་འདུས། །སྐད་ཅིག་གཅིག་གིས་ཉིན་མཚན་ཡུད་དུ་ཟླ་བ་དང་། །སྐད་ཅིག་ཡུད་ཙམ་ལོ་དང་འདུ་འཇིག་བསྐལ་པ་དང་། །བསྐལ་པ་རྒྱ་མཚོ་མི་གྲངས་རྒྱ་མཚོར་བཅས་པ་དང་། །
འགྲོ་བ་རྣམས་ཀྱི་འདུ་ཤེས་རྒྱ་མཚོ་འང་ཐུགས་སུ་ཆུད། །ཕྱོགས་རྣམས་ཀུན་གྱི་སེམས་ཅན་སྐྱེ་མཆེད་ཇི་སྙེད་དང་། །གཟུགས་ཡོད་པ་དང་གཟུགས་མེད་འདུ་ཤེས་ཡོད་མེད་
ཀྱི། །རྣམ་སྤྱོད་བདེན་པའི་ཚུལ་ནི་ཐུགས་སུ་ཆུད་མཛད་ཅིང་། །དེ་དག་ལམ་བསྟན་བྱང་ཆུབ་མངོན་དུ་དགོད་པར་མཛད། །རྣམ་པར་སྣང་མཛད་སྨོན་ལམ་དྲི་བའི་རིགས་ལས་འབྱུང་། །
བདེ་གཤེགས་ཀུན་གྱི་སྐུ་གཅིག་ཚུལ་ལས་ཡང་དག་རྣམ་པར་འཁྲུངས། །ཆོས་སྐུ་ཡོངས་དག་ཐུགས་ལ་ཆགས་མི་མངའ། །འཇིག་རྟེན་ཀུན་ཏུ་སྐུ་གཟུགས་ཡིད་བཞིན་
སྟོན་པ་མཛད། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་བའི་གཟི་བརྗིད་དཔལ་ལ་ཚུལ་དང་འདྲ་བའི་ཚིགས་སུ་བཅད་པ་དེ་དག་
གིས་མངོན་པར་བསྟོད་དེ། མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་བའི་གཟི་བརྗིད་དཔལ་གྱི་རྐང་པ་གཉིས་ལ་སྤྱི་བོས་ཕྱག་འཚལ་ནས། 
མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་བའི་གཟི་བརྗིད་དཔལ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ཏེ། །ཡང་དང་ཡང་བལྟས་ནས་
མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་བའི་གཟི་བརྗིད་དཔལ་གྱི་དྲུང་ནས་སོང་ངོ་།། །།སངས་རྒྱས་རྨད་ག་ཅད་

77-1-54a

ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཞི་པ། །དེ་ནས་ཚོང་དཔོན་གྱི་བུ་ནོར་བཟངས་བྱང་ཆུབ་སེམས་དཔའི་རྣམ་པར་ཐར་པ་སྒོ་
ཡིད་དུ་འོང་བ་དང་། རྣམ་པར་འཕྲུལ་པ་ཟབ་མོ་ལ་འཇུག་པ་དེ། དེ་ལས་ཀྱང་རྒྱ་ཆེར་བསྒོམ་པ་དང་། ཡིད་ཆེས་པར་བྱ་བ་དང་། ཤིན་ཏུ་རྒྱས་པར་བྱེད་ཅིང་། མཚན་
མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པ་གང་ན་བ་དེར་ཕྱིན་ནས། མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་གནས་པ་སྤོས་རིན་པོ་ཆེ་ཐམས་
ཅད་ཀྱི་ཤིང་ཡལ་གའི་ཁང་པ་བརྩེགས་པ་ཞིག་ན། སེང་གེའི་ཁྲི་རིན་པོ་ཆེ་ཤིང་གི་མྱུ་གུའི་སྙིང་པོ་ཅན་ཞིག་ལ་འདུག་སྟེ། མཚན་མོའི་ལྷ་མོ་སྟོང་ཕྲག་བཅུས་ཀུན་
ནས་བསྐོར་ཅིང་འདུག་པ་མཐོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་གྱིས་མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པའི་རྐང་པ་གཉིས་ལ་
སྤྱི་བོས་ཕྱག་འཚལ་ཏེ། མདུན་དུ་འདུག་ནས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །ལྷ་མོ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན་ཇི་
ལྟར་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་སྤྱད་པ་སྤྱོད་པ་དང་། ཇི་ལྟར་སྤྱོད་པ་དང་། ཇི་ལྟར་སློབ་ཅིང་ཐམས་ཅད་མཁྱེན་པ་ཉིད་དུ་འབྱུང་བ་བདག་ལ་
བཤད་དུ་གསོལ། དེ་སྐད་ཅེས་སྨྲས་པ་དང་། མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གཤེགས་པས། ཚོང་དཔོན་གྱི་བུ་ནོར་བཟངས་

77-1-54b

ལ་འདི་སྐད་ཅེས་སྨྲས་སོ། །རིག་ཀྱི་བུ་ཁོ་མོའི་མཐུས་ནི་མི་མཇེད་ཀྱི་འཇིག་རྟེན་གྱི་ཁམས་ན་ཉི་མ་ནུབ་དུ་ཆ་བའི་ཚེ། པད་མོ་ཤིན་ཏུ་རྒྱས་པ་རྣམས་ཀྱང་རྣམ་པར་
འཛུམ་པར་འགྱུར་རོ། །སྐྱེས་པ་དང་བུ་མེད་བཟའ་ཤིང་གི་ར་བ་ན་གནས་ཤིང་། དགའ་བར་རྩེ་བ་ལ་བརྩོན་པ་དག་ཀྱང་ཁྱིམ་དུ་འདོང་བའི་བློ་བསྐྱེད་དོ། །ལམ་སྲང་
ན་རྒྱུ་བའི་སེམས་ཅན་རྣམས་ཀྱང་ཞགིས་གནས་སེམས་ཤིང་ཚོལ་ཏེ་འགྲོ་བ་གནས་ཐམས་ཅད་དུ་མངོན་པར་གཞོལ་བར་འགྱུར་རོ། །ནགས་ཚལ་དང་གསེབ་དང་། 
ཕུག་ལ་རྟེན་པའི་སེམས་ཅན་རྣམས་ཀྱང་ནགས་ཚལ་དང་གསེབ་དང་ཕུག་དུ་འདོང་ངོ་། །ཤིང་ལ་གནས་པའི་སེམས་ཅན་རྣམས་ཀྱང་ཤིང་གི་གནས་ལ་བརྟེན་པར་མངོན་པར་
གཞོལ་ལོ། །ཁུང་ན་གནས་པའི་སེམས་ཅན་རྣམས་ཀྱང་ཁུང་དུ་འདོང་ངོ་གྲོང་དང་གྲོང་ཁྱེར་དང་། ལྗོངས་དང་ཡུལ་ལ་གནས་པའི་སེམས་ཅན་རྣམས་ཀྱང་གྲོང་ཁྱེར་དང་ལྗོངས་དང་
ཡུལ་དུ་འདོང་ངོ་། །ཆུ་ན་གནས་པའི་སེམས་ཅན་རྣམས་ཀྱང་ཆུར་འདོང་ངོ་། །ཕྱོགས་གཞན་གྱི་ཡུལ་དུ་ཕྱིན་པའི་སེམས་ཅན་རྣམས་ཀྱང་ནུབ་མོ་བདེ་ཞིང་དགའ་བར་གནས་པའི་དོན་དུ་
རང་རང་གིས་ཡུལ་གྱི་ཕྱོགས་ཀྱི་བསམ་པ་བསྐྱེད་དོ། །རིགས་ཀྱི་བུ་གཞན་ཡང་། ཁོ་མོས་ནི་སྐྱེ་པ་དང་བུ་མེད་གཞོན་ནུ་དར་ལ་བབ་པ། དར་བའི་ཉམ་དོད་ཀྱིས་མྱོས་པ་དང་། 
གླུ་དང་གར་དང་རོལ་མོའི་དགའ་བས་མྱོས་པ་དང་། འདོད་པའི་ཡོན་ཏན་ལ་དགའ་ཞིང་། བརྩོན་པ་རྣམས་ལ་སྐྱེ་བ་དང་། རྒ་ཤི་དང་། གཏི་མུག་མུན་པ་ཆེན་པོས་འཇིག་པ་གཉེན་པོ་དགེ་བའི་རྩ་བ་ཡོངས་སུ་བསྐྱེད་པའི་ཕྱིར། 

77-1-55a

བརྩོན་འགྲུས་གྱི་ལེགས་པ་བརྗོད་པ་དང་བསྔགས་པ་བྱེད་དོ། །སེམས་ཅན་སེར་སྣ་དང་ལྡན་པ་རྣམས་ནི་སྦྱིན་པ་ལ་རབ་ཏུ་སྦྱོར་རོ། །སེམས་ཅན་
ཚུལ་ཁྲིམས་ངན་པ་ཅན་རྣམས་ནི། ཚུལ་ཁྲིམས་ལ་རབ་ཏུ་འགོད་དོ། །ངན་སེམས་དང་ལྡན་པའི་སེམས་ཅན་དེ་རྣམས་ལ་ནི། བྱམས་པའི་ལེགས་པ་བརྗོད་
པར་བྱེད་དོ། །སེམས་འཁྲུགས་པའི་སེམས་ཅན་རྣམས་ནི་བཟོད་པ་ལ་རབ་ཏུ་འགོད་དོ། །ལེ་ལོ་ཅན་གྱི་སེམས་ཅན་རྣམས་ནི། བྱང་ཆུབ་སེམས་དཔའི་
བརྩོན་འགྲུས་བརྩམ་པ་ལ་རབ་ཏུ་འགོད་དོ། །སེམས་ཅན་རྣམ་པར་མྱོས་པའི་སེམས་ཅན་རྣམས་ནི་བསམ་གཏན་ལ་རབ་ཏུད་འགོད་དོ། །ཤེས་རབ་འཆལ་བ་ཅན་གྱི་
སེམས་ཅན་རྣམས་ནི་བསམ་གཏན་ལ་རབ་ཏུ་འགོད་དོ། །ཐེག་པ་དམའ་བ་ལ་མོས་པའི་སེམས་ཅན་རྣམས་ནི་ཐེག་པ་ཆེན་པོ་ལ་རབ་ཏུ་འགོད་དོ། །ཁམས་གསུམ་ལ་
མངོན་པར་ཞེན་པའི་སེམས་ཅན་རྣམས་ནི་བྱང་ཆུབ་སེམས་དཔའི་སྨོན་ལམ་གྱི་ཕ་རོལ་ཏུ་ཕྱིན་པ། སྲིད་པའི་ལམ་གྱི་རྒྱུད་མཐར་ཕྱིན་པའི་དཀྱིལ་འཁོར་ལ་སྤྱོད་པ་ལ་
རབ་ཏུ་འགོད་དོ། །དམིགས་པའི་དབང་དུ་གྱུར་པའི་སེམས་ཅན་ལས་དང་། ཉོན་མོངས་པས་རབ་ཏུ་མནར་བ་བསོད་ནམས་དང་། ཡེ་ཤེས་གྱི་སྟོབས་མེད་པ་
རྣམས་ནི། བྱང་ཆུབ་སེམས་དཔའི་སྟོབས་ཀྱི་ཕ་རོལ་ཏུ་ཕྱིན་པ་ལ་རབ་ཏུ་འགོད་དོ། །མི་ཤེས་པའི་མུན་ནག་གིས་ཁེབས་པའི། སེམས་ཅན་བདག་ཏུ་བྱ་བ་དང་། 

77-1-55b

བདག་གིར་བྱ་བས་མ་རིག་པའི་མུན་ནག་དུ་འཐོམས་པ་རྣམས་ནི་བྱང་ཆུབ་སེམས་དཔའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རབ་ཏུ་འགོད་དེ། རིགས་
ཀྱི་བུ་གཞན་ཡང་ཁོ་མོས་ནི། བྱང་ཆུབ་སེམས་དཔའི་རྣམ་པར་ཐར་པ་དགའ་བའི་འོད་འཕྲོ་བ། ཡངས་པ་ཡང་དག་པར་འགྱུར་བ་ཐོབ་པའོ། །ནོར་བཟངས་ཀྱི་སྨྲས་
པ། ལྷ་མོ་བྱང་ཆུབ་སེམས་དཔའི་རྣམ་པར་ཐར་པའི་དགའ་བའི་འོད་སྤྲོ་བ་ཡངས་པ་ཡང་དག་པར་འབྱུང་བ་དེའི་ཡུལ་ཇི་ལྟ་བུ་ཞིག་མཆིས་སྨྲས་པ། རིགས་ཀྱི་བུ་རྣམ་པར་ཐར་
པ་དེ་ནི། དེ་བཞིན་གཤེགས་པའི་བསོད་ནམས་གྱིས་སེམས་ཅན་ཡོངས་སུ་སྡུད་པའི་ཡེ་ཤེས་དང་། ཐབས་སྣང་བ་དང་ལྡན་པ་སྟེ། དེ་ཅིའི་ཕྱིར་ཞེ་ན། རིགས་ཀྱི་
བུ་སེམས་ཅན་རྣམས་ཀྱི་བདེ་བ་ཉམས་སུ་མྱོང་བ་ཇི་སྙེད་ཅིག་ཡོད་པ་དེ་དག་ཐམས་ཅད་ནི་དེ་བཞིན་གཤེགས་པའི་བསོད་ནམས་ཀྱི་མཐུས་བྱུང་བའོ། །དེ་བཞིན་གཤེགས་
པའི་གདམས་ངག་གིས་ཚུལ་གྱིས་བྱུང་བའོ། །དེ་བཞིན་གཤེགས་པའི་གསུང་ལ་ནན་ཏན་ཏུ་བྱས་པས་བྱུང་བའོ། །དེ་བཞིན་གཤེགས་པའི་རྗེས་སུ་བསླབས་པས་
བྱུང་བའོ། །དེ་བཞིན་གཤེགས་པའི་བྱིན་གྱིས་བརླབས་ཀྱི་བྱུང་བའོ། །དེ་བཞིན་གཤེགས་པས་བསྟན་པའི་ལམ་ལ་ནན་ཏན་དུ་བྱས་པས་བྱུང་བའོ། །
དེ་བཞིན་གཤེགས་པ་དང་ཚུལ་འདྲ་བའི་དགེ་བའི་རྩ་བ་བསྐྱེད་པས་བྱུང་བའོ། །དེ་བཞིན་གཤེགས་པས་ཆོས་བསྟན་པའི་མཐུན་པའི་རྒྱུས་བྱུང་བའོ། །དེ་བཞིན་

77-1-56a

གཤེགས་པའི་ཡེ་ཤེས་གྱི་ཉི་མ་སྣང་བས་བྱུང་བའོ། །རིགས་ཀྱི་བུ་དེ་བཞིན་གཤེགས་པའི་རིགས་ཀྱི་ཆོས་དཀར་པོའི་དཀྱིལ་འཁོར་གྱིས་སྣང་
བས་ནི། སེམས་ཅན་རྣམས་ཀྱི་བདེ་བ་ཡོངསུ་འབྱུང་སྟེ། དེ་ཅིའི་ཕྱིར་ཞེ་ན། འདི་ལྟར་རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་
པ་དགའ་བའི་འོད་འཕྲོ་བ། ཡང་དག་པར་འབྱུང་བ་འདི་ལ་འཇུག་པའི་ཚེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རྣམ་པར་སྣང་མཛད་གྱི་སྔོན་གྱི། བྱང་ཆུབ་སེམས་དཔའི་སྤྱོད་པ་རྒྱ་མཚོ་རྗེས་སུ་དྲན་པར་བྱེད་ཅིང་འཇུག་པ་དང་། ཁོང་ཏུ་ཆུད་པར་བྱེད་པའི་ཚེ། 
འདི་ལྟར་བཅོམ་ལྡན་འདས་སྔོན་བྱང་ཆུབ་སེམས་དཔའི་ས་ལ་བཞུགས་པས། སེམས་ཅན་བདག་ཏུ་བྱ་བ་དང་། བདག་གིར་བྱ་བ་ལ་མངོན་པར་ཞེན་པ། མ་རིག་
པའི་མུན་པས་འཐོམས་པ། ལྟ་བའི་ཐིབས་པོའི་དགོན་པར་འཁྱམས་པ། སྲིད་པའི་དབང་དུ་གྱུར་པ། འདོད་ཆགས་ཀྱི་བཅིངས་པས་གླགས་པ། ཞེ་སྡང་གིས་
ཁོང་ཁྲོ་བའི་སེམས་དང་ལྡན་པ། གཏི་མུག་གིས་སེམས་ཀྱི་རྒྱུད་འཁྲུགས་པར་གྱུར་པ། ཕྲག་དོག་དང་སེར་སྣས་ཀུན་ནས་འཁོར་བ། ཉོན་མོངས་པས་རབ་ཏུ་དཀྲུགས་
པའི་སེམས་དང་ལྡན་པ། འཁོར་བའི་སྡུག་བསྔལ་ཆེན་པོ་ཉམས་སུ་མྱོང་བར་གྱུར་པ། འཁོར་བ་ན་འཕོངས་པའི་སྡུག་བསྔལ་གྱིས་རབ་ཏུ་གཟིར་བ། སངས་རྒྱས་

77-1-56b

བལྟ་བ་ལས་ཕྱིར་ཕྱོགས་པར་གྱུར་པ། ཐམས་ཅད་གཟིགས་ནས་ཐུགས་རྗེ་ཆེན་པོའི་དགོངས་པ་སྐྱེས་པར་གྱུར་ཏོ། །སེམས་ཅན་ཐམས་ཅད་ཀྱིས་དོན་དུ་
འགྲོ་བ་ཐམས་ཅད་ལ་ཡོ་བྱད་དང་། རིན་པོ་ཆེ་ཡོངས་སུ་བསྡུ་ཞིང་། ཡོངས་སུ་བསྡུད་པའི་དགོངས་པ་དང་། སེམས་ཅན་ཐམས་ཅད་ཀྱི་མཁོ་བའི་ཡོ་བྱད་ཡོངས་
སུ་བསྒྲུབས་པའི་དགོངས་པ་དང་། དངོས་པོ་ཐམས་ཅད་ལ་ཆགས་པ་མི་མངའ་བའི་དགོངས་པ་དང་། ཡུལ་ཐམས་ཅད་ལ་ཡི་བརྔམ་པ་མི་མངའ་བའི་དགོངས་པ་དང་། 
དགའ་བ་ཐམས་ཅད་ལ་ཆགས་པ་མི་མངའ་བའི་དགོངས་པ་དང་། ལོངས་སྤྱོད་ཐམས་ཅད་ལ་ཡོངས་སུ་མ་ཞེན་པའི་དགོངས་པ་དང་། སྦྱིན་པ་ཐམས་ཅད་ལ་རྣམ་པར་
སྨིན་པ་ལ་རེ་བ་མེད་པའི་དགོངས་པ་དང་། འཇིག་རྟེན་གྱི་ཕུན་སུམ་ཚོགས་པ་ཐམས་ཅད་ལ་བཞེད་པ་མི་མངའ་བའི་དགོངས་པ་དང་། རྒྱུ་དང་རྐྱེན་ལ་མ་རྨོངས་པའི་
དགོངས་པ་དང་། ལེགས་པར་འཚལ་བའི་ཆོས་ལ་ཡང་དག་པ་ཇི་ལྟ་བ་བཞིན་དུ་མཁྱེན་པའི་དགོངས་པ་དང་། སེམས་ཅན་ཐམས་ཅད་ཀྱི་དོན་ལ་གཞོལ་བར་བྱ་
བ་ལ་མངོན་པར་བསྒྲུབ་པའི་དགོངས་པ་ཡང་དག་པར་སྐྱེས་པར་གྱུར་ཏེ། དེ་དེ་ལྟར་ཆོས་ཐམས་ཅད་ཀྱི་རང་བཞིན་ལ་ཡང་དག་པར་ཞུགས་པའི་དགོངས་པ་དང་
ལྡན་པ་སེམས་ཅན་གྱི་ཁམས་ཐམས་ཅད་དུ་བྱམས་པ་ཆེན་པོས་སྙོམས་པར་ཞུགས་པ་འགྲོ་བ་ཐམས་ཅད་ཐུགས་རྗེ་ཆེན་པོའི་སྤྲིན་གྱིས་རྒྱས་པར་དགང་

77-1-57a

བའི་སྦྱོར་བ་མངའ་བ་སེམས་ཅན་གྱི་འཇིག་རྟེན་ཐམས་ཅད་ཀུན་ནས་ཁེབས་པའི་ཆོས་ཀྱི་གདུགས་ཆེན་པོའི་དཀྱིལ་འཁོར་མངའ་བ། སེམས་ཅན་ཐམས་ཅད་ཀྱི་ཉོན་མོངས་པའི་
རི་རྣམ་པར་འཇོམས་པའི་ཡེ་ཤེས་རྡོ་རྗེའི་མཚོན་ཆ་མངའ་བ། འགྲོ་བ་ཐམས་ཅད་ཀྱི་བདེ་བ་ཡོངས་སུ་བསྒྲུབ་པས་དགྱེས་པའི་ཤུགས་རྣམ་པར་འཕེལ་བའི་དགོངས་པ་མངའ་བ། 
སེམས་ཅན་ཐམས་ཅད་ལ་བདེ་བ་ཕུལ་དུ་ཕྱིན་པ་མངོན་པར་བསྒྲུབ་པའི་སྨོན་ལམ་གྱི་དགོངས་པ་མངའ་བ། བསམ་པ་དང་སྨོན་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ལ་ནོར་གྱི་
ཆར་རབ་ཏུ་དབབ་པའི་དགོངས་པ་མངའ་བ། སེམས་ཅན་ཐམས་ཅད་ཡོངས་སུ་མི་གཏོང་ཞིང་སྙོམས་པར་སྦྱར་བའི་དགོངས་པ་མངའ་བ། འཕགས་པའི་ནོར་གྱིས་སེམས་ཅན་ཐམས་
ཅད་ཚིམ་པར་མཛད་པའི་དགོངས་པ་མངའ་བ། སྟོབས་བཅུའི་ཡེ་ཤེས་རིན་པོ་ཆེ་ཕུལ་དུ་དྲི་མ་མེད་པ་ཐོབ་པར་མཛད་པའི་དགོངས་པ་མངའ་བ། བྱང་ཆུབ་སེམས་དཔའི་མངོན་པར་ཤེས་
པ་ཆེན་པོའི་སྟོབས་དང་ཤུགས་རབ་ཏུ་བརྙེས་པ་དེ་བྱང་ཆུབ་སེམས་དཔའི་རྣམ་པར་འཕྲུལ་བ་སྣ་ཚོགས་ཀྱི་སྤྲིན་ཆེན་པོས་སེམས་ཅན་གྱི་ཁམས་ཆོས་ཀྱི་དབྱིངས་ཀྱི་ཀླས་པ་ནམ་མཁའི་མཐས་
གཏུགས་པ་ཐམས་ཅད་རྒྱས་པར་བཀང་སྟེ། སེམས་ཅན་ཐམས་ཅད་ལ་མངོན་པར་གྱུར་པར་བཞུགས་ཤིང་སྦྱིན་པའི་དམིགས་པ་ཐམས་ཅད་ཀྱི་སྤྲིན་ཀྱི་ཆར་ཆེན་པོ་རྣམ་པ་ཐམས་ཅད་དུ་དབབ་པ་དང་། 
རིན་པོ་ཆེའི་རྒྱན་ཐམས་ཅད་ཀྱི་སྤྲིན་ཆེན་པོའི་ཆར་མངོན་པར་འབེབས་པ་མཛད་དེ། འདི་ལྟར་སེམས་ཅན་ཐམས་ཅད་སོ་སོའི་ཚུལ་དང་ཇི་ལྟར་འཐུན་པས་ལོངས་སྤྱོད་པར་བྱ་བའི་ཕྱིར་དངོས་

77-1-57b

པོ་རྣམ་པ་ཐ་དད་པ་མཐའ་ཡས་པ་ཡོངས་སུ་གཏང་བ་དང་ཡོ་བྱད་རྣམ་པ་ཐ་དད་པ་ཚད་མེད་པ་ལ་སྤྱོད་པ་བྱ་བ་དང་སྦྱིན་པ་རྣམ་པ་སྣ་ཚོགས་ཐམས་ཅད་ཀྱིས་ཡོངས་སུ་བསྡུ་བའི་ཚུལ་དང་། དངོས་པོ་ཡོངས་སུ་གཏང་བ་རྣམ་པ་
དུ་མ་ལ་ཡོངས་སུ་སྤྱོད་པ་དང་། ཡོ་བྱད་ཀྱི་རྣམ་པ་དང་། རྒྱན་གྱི་འདུ་བྱེད་བརྗོད་དུ་མེད་པ་དང་། སྦྱིན་པའི་ཚོགས་རྣམ་པ་སྣ་ཚོགས་མཚན་ཉིད་སྣ་ཚོགས་དང་ལྡན་པ། སེམས་ཅན་རྣམས་བསམ་པ་ཅི་
ལྟ་བ་བཞིན་དུ་ཡོངས་སུ་ཚིམ་པར་བྱ་བའི་སྦྱིན་པའི་ཚུལ་མཐའ་ཡས་པ་ཐུགས་སུ་ཆུད་པས་སེམས་ཅན་གྱི་བསམ་པ་ཅི་ལྟ་བ་བཞིན་དུ་ཡོངས་སུ་ཚིམ་པར་བྱ་བར་མངོན་པར་བསྒྲུབ་པའི་དངོས་པོ་ཐམས་
ཅད་བཏང་བ་དང་། ཡོངས་སུ་གཏང་བ་དང་། སྦྱིན་པར་བྱ་བ་དང་། འགྲོ་བ་ཐམས་ཅད་ཀྱི་འདུ་བྱེད་ཀྱི་སྡུག་བསྔལ་རྒྱུན་མི་ཆད་པ་ལས་ཡོངས་སུ་སྐྱོབ་པའི་ཚུལ་དུ་བྱ་བ་རྣམས། སེམས་
ཅན་ཐམས་ཅད་ལ་ལན་ལ་རེ་བ་མི་མངའ་བ་དང་། འགྲོ་བ་ཐམས་ཅད་ལ་མཉམ་པ་ཉིད་དུ་བྱུང་བའི་དགོངས་པ་མངའ་བས། འགྲོ་བ་ཐམས་ཅད་ཀྱི་སེམས་རིན་པོ་ཆེ་ཡོངས་སུ་སྦྱོང་བ་མཛད་ཅིང་སངས་
རྒྱས་ཐམས་ཅད་ཀྱི་དགེ་བའི་རྩ་བ་རྒྱ་མཚོ་གཅིག་ཏུ་གྱུར་པ་ལས་བྱུང་བའི་ཡོངས་སུ་བསྡུ་བའི་ཚུལ། འགྲོ་བ་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་ཡོ་བྱད་ཀྱི་ཆར་དབབ་པ། འགྲོ་བ་
ཐམས་ཅད་ལ་ཐམས་ཅད་མཁྱེན་པའི་བསོད་ནམས་རྒྱ་མཚོའི་ཤུགས་རྣམ་པར་འཕེལ་བར་མཛད་པས་དགོངས་པའི་སྐད་གཅིག་རེ་རེ་ལ་སེམས་ཅན་མ་ལུས་པ་ཐམས་ཅད་ཡོངས་སུ་
སྨྱིན་པར་བྱ་བ་དང་། གདུལ་བ་གཅིག་ནས་གཅིག་ཏུ་བརྒྱུད་པ་རྣམ་པར་དག་པར་བྱ་བའི་ཕྱིར་མངོན་པར་བསྒྲུབ་པར་མཛད་པ་དང་། དགོངས་པའི་སྐད་

77-1-58a

ཅིག་རེ་རེ་ལ་ཞིང་གཅིག་ནས་གཅིག་ཏུ་བསྒྱུར་བ་མ་ལུས་པ་ཐམས་ཅད་སངས་རྒྱས་ཀྱི་ཞིང་ཉེ་བར་ཉོན་མོངས་པ་མེད་པའི་བླ་ན་མེད་པའི་རྒྱན་རྣམ་པར་དག་པས་རྣམ་པར་ཀླུབ་
ཅིང་རབ་ཏུ་བརྒྱན་པ་ཡོངས་སུ་རྫོགས་པར་བྱ་བ་དང་། དགོངས་པའི་སྐད་ཅིག་རེ་རེ་ལ་ཆོས་ཀྱི་ཚུལ་རྒྱ་མཚོ་མ་ལུས་པ་ཐམས་ཅད་རྒྱས་པར་དགང་བ་རྣམས་དགོངས་པའི་སྐད་ཅིག་རེ་རེ་ལ་ནམ་མཁའི་
དབྱིངས་ཀྱིས་གཏུགས་པ་མ་ལུས་པ་ཐམས་ཅད་རྒྱས་པར་དགང་བའི་ཡེ་ཤེས་ཀྱི་ཚུལ་ཡོངས་སུ་རྫོགས་པར་བྱ་བ་དང་། དགོངས་པའི་སྐད་ཅིག་རེ་རེ་ལ་སེམས་ཅན་དང་དུས་མ་ལུས་པ་
ཐམས་ཅད་ལ་འཇུག་ཅིང་ཡེ་ཤེས་ཀྱི་ཚུལ་རྣམ་པར་དག་པར་བྱ་བ་དང་། དགོངས་པའི་སྐད་ཅིག་རེ་རེ་ལ་འགྲོ་བ་མ་ལུས་པ་ཐམས་ཅད་རྣམ་པར་འདུལ་བའི་ཡེ་ཤེས་ཀྱི་ཚུལ་སྣང་བ་རབ་ཏུ་
ཐོབ་པར་བྱ་བ་དང་། དགོངས་པའི་སྐད་ཅིག་རེ་རེ་ལ་དུས་མ་ལུས་པ་ཐམས་ཅད་དུ་ཆོས་ཀྱི་འཁོར་ལོ་བསྐོར་བ་ལས་ཕྱིར་མི་ལྡོག་པར་བྱ་བ་དང་། དགོངས་པའི་སྐད་ཅིག་རེ་རེ་ལ་ཐམས་ཅད་
མཁྱེན་པའི་ཡེ་ཤེས་ཀྱི་བྱིན་གྱིས་བརླབས་ལ་མཁས་པ་མ་ལུས་པར་ཡོངས་སུ་བསྟན་པས་འགྲོ་བ་ཐམས་ཅད་ལ་ཐོགས་པར་བྱ་བ་དང་། དགོངས་པའི་སྐད་ཅིག་རེ་རེ་ལ་འཇིག་རྟེན་གྱི་ཁམས་
མ་ལུས་པའི་གྲངས་སུ་བྱ་བའི་རྒྱུད་དང་ལྡན་པ། འཇིག་རྟེན་གྱི་ཁམས་རྒྱ་མཚོ་ཐམས་ཅད་མངོན་པར་བསྟན་པ། འཇིག་རྟེན་གྱི་ཁམས་རྒྱ་མཚོ་ཐམས་ཅད་ཡོངས་སུ་འདུ་བ། འཇིག་རྟེན་གྱི་
ཁམས་འབྱམ་ཀླས་པ་སྣ་ཚོགས་བརྗོད་དུ་ཡོད་པ། འཇིག་རྟེན་གྱི་ཁམས་ཀྱི་རྒྱུད་རྣམ་པར་གནས་པ་སྣ་ཚོགས་ཀྱི་མཚམས་རྣམ་པར་བརྒྱན་པ། གཞི་སྣ་ཚོགས་དང་ལྷུན་དུ་མར་བརྗོད་དུ་ཡོད་པ་རྣམ་པར་

77-1-58b

ཕྱེ་བ་སྣ་ཚོགས་ཀྱིས་བསྐལ་པ་རྣམ་པ་ཐ་དད་པ་བསྟན་དུ་ཡོད་པ། ཀུན་ནས་ཉོན་མོངས་ཤིང་རྣམ་པར་དག་པ་དང་རྣམ་པར་དག་ཅིང་ཀུན་ནས་ཉོན་མོངས་པ་དང་། གཅིག་ཏུ་ཡོངས་སུ་དག་པ་དང་གཅིག་ཏུ་ཀུན་ནས་
ཉོན་མོངས་པ་དང་ཆེ་བ་དང་ཡངས་པ་དང་། ཚད་མེད་པ་དང་དོག་པ་དང་ཕྲ་བ་དང་རྒྱ་ཆེ་བ་དང་། གཞི་མཉམ་པ་དང་སྣྲེལ་གཞི་དང་སྤྱིའུ་ཚུགས་དང་། ཕྱོགས་དང་ཕྱོགས་མཚམས་སུ་མངོན་པར་བལྟས་པ་དང་། 
ཕྱོགས་རྒྱ་མཚོ་སྣ་ཚོགས་སུ་གཞོལ་བ་སྒོ་སྣ་ཚོགས་ནས་བསྟན་ཅིང་སྒོ་མཐའ་ཡས་པའི་དབྱིབས་རྣམ་པ་སྣ་ཚོགས་སུ་འདུག་པའི་རྣམ་པར་ཕྱེ་བ་སྣ་ཚོགས་དང་ལྡན་པའི་འཇིག་རྟེན་གྱི་ཁམས་རྒྱ་མཚོ་
རྣམས་སུ་བྱང་ཆུབ་སེམས་དཔའི་སྤྱོད་པ་སྤྱད་དེ། བྱང་ཆུབ་སེམས་དཔའི་སྐྱོན་མེད་པ་ཡོངས་སུ་མནན་ནས། བྱང་ཆུབ་སེམས་དཔའི་སྤྱོད་པ་དང་། རྣམ་པར་འཕྲུལ་པས་རྒྱས་པར་དགང་པར་བྱ་བ་དང་། 
དགོངས་པའི་སྐད་ཅིག་རེ་རེ་ལ་དུས་གསུམ་གྱི་སངས་རྒྱས་ཀྱི་འཕྲིན་ལས་མ་ལུས་པ་ཐམས་ཅད་སེམས་ཅན་ཕ་རོལ་གྱི་སེམས་དང་བསམ་པས་རྣམ་པར་དམིགས་པར་བྱ་བའི་ཕྱིར་འགྲོ་བ་ཐམས་
ཅད་ལ་ཐམས་ཅད་མཁྱེན་པའི་བསོད་ནམས་རྒྱ་མཚོའི་ཤུགས་རྣམ་པར་འཕེལ་བར་མཛད་དེ། མངོན་པར་བསྒྲུབ་པ་མཛད་པར་གྱུར་པ་མངོན་པར་ཤེས་སོ་རྗེས་སུ་དྲན་ནོ། །རིགས་ཀྱི་བུ་དེ་ལྟར་
བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ། འཇིག་རྟེན་གནས་པ་བསོད་ནམས་དང་ཡེ་ཤེས་ཀྱི་ཚོགས་དང་བྲལ་བ། སེམས་
ཅན་བྱས་པ་དྲིན་དུ་མི་གཟོ་བས་ཡོངས་སུ་གང་བ། མི་ཤེས་པའི་མུན་པས་ཆོད་པ། བདག་ཏུ་བྱ་བ་དང་། བདག་གིར་བྱ་བ་ལ་མངོན་པར་ཞེན་པ་མ་རིག་པའི་མུན་པ་དང་རབ་རིབ་ཀྱིས་བསྒྲིབས་པ་

77-1-59a

ཚུལ་བཞིན་མ་ཡིན་པར་རྣམ་པར་རྟོག་པ་ལ་ཞུགས་པ། ལྟ་བ་ཐིབས་པོའི་དགོན་པར་མགོ་རླག་པ། རྒྱུ་དང་འབྲས་བུ་ལ་མགོ་རྨོངས་པ་ཉོན་མོངས་པ་དང་ལས་ཀྱི་དབང་དུ་གྱུར་པ་འཁོར་བའི་
མྱ་ངན་ཆེན་པོའི་སྡུག་བསྔལ་གྱི་སའི་འོག་ཏུ་ལྟུང་བ། ཕོངས་པའི་སྡུག་བསྔལ་ཉམས་སུ་མྱོང་བར་གྱུར་པ་རྣམས་ལ་ཐུགས་རྗེ་ཆེན་པོ་བསྐྱེད་དེ། ཕ་རོལ་ཏུ་ཕྱིན་པ་སྤྱད་པའི་སྤྲིན་རྒྱ་ཆེན་པོ་མངོན་
པར་བསྒྲུབས་ཏེ་དགེ་བའི་རྩ་བ་ལ་བརྟེན་པར་གནས་པ་ཡོངས་སུ་བསྔགས་པ་དང་། སེམས་ཅན་ཐམས་ཅད་ཀྱི་འཁོར་བའི་ཕོངས་པའི་སྡུག་བསྔལ་རྣམ་པར་བཟློག་པ་དང་། བསོད་ནམས་དང་ཡེ་ཤེས་ཀྱི་
ཚོགས་ཆེན་པོ་ལ་མངོན་པར་མོས་པར་བྱ་བ་དང་། རྒྱུའི་དཀྱིལ་འཁོར་གྱི་ཕྱོགས་མངོན་པར་བསྟན་པ་དང་། ལས་དང་ཆོས་སུ་མི་འགལ་བའི་ཕྱོགས་རབ་ཏུ་བརྗོད་པ་དང་། སངས་རྒྱས་ཀྱི་
ཆོས་ཀྱི་དཀྱིལ་འཁོར་ཡོངས་སུ་བསྡུས་པའི་ཕྱོགས་སྣང་བར་བྱ་བ་དང་། སེམས་ཅན་ཐམས་ཅད་ཀྱི་མོས་པའི་ཕྱོགས་རབ་ཏུ་བརྗོད་པར་བྱ་བ་དང་། སེམས་ཅན་ཐམས་ཅད་ཀྱི་ཞིང་
ཡོངས་སུ་བསྒྲུབ་པའི་ཕྱོགས་ལེགས་པར་བསྟན་པ་དང་། དེ་བཞིན་གཤེགས་པ་ཐམས་ཅད་ཀྱི་རིགས་མི་གཅོད་པའི་ཕྱོགས་ཀྱི་རྗེས་སུ་འབྲང་བར་བྱ་བ་དང་། སངས་རྒྱས་ཐམས་ཅད་ཀྱིས་
བསྟན་པའི་ཕྱོགས་ཡོངས་སུ་གཟུང་བ་དང་། མྱི་དགེ་བའི་ཆོས་ཐམས་ཅད་ཀྱི་ཕྱོགས་རྣམ་པར་བཟློག་པ་དང་། ཐམས་ཅད་མཁྱེན་པ་ཉིད་ཀྱི་ཚོགས་ཀྱི་ཕྱོགས་ཡོངས་སུ་བརྗོད་པ་མཛད་དེ། 
ཕ་རོལ་ཏུ་ཕྱིན་པའི་སྤྲིན་ཆེན་པོས་སེམས་ཅན་གྱི་ཁམས་ཐམས་ཅད་རྒྱས་པར་བཀང་སྟེ། མངོན་པར་བསྒྲུབས་ནས་བསམ་པ་ཇི་ལྟ་བ་བཞིན་དུ་སེམས་ཅན་ཚིམ་པར་འགྱུར་བར་ཆོས་

77-1-59b

གྱིས་ཤིན་ཏུ་བསྡུ་བ་ལ་སེམས་ཅན་རབ་ཏུ་དགོད་པར་མཛད་དོ། །ཐམས་ཅད་མཁྱེན་པ་ཉིད་ཀྱི་ཚོགས་ལ་ཡང་དག་པར་བསྐུལ་ཏོ། །བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ཆེན་པོ་ལ་རབ་ཏུ་བཙུད་དོ། །
འཕགས་པའི་ནོར་ཐམས་ཅད་རབ་ཏུ་ཐོབ་པར་བྱ་བས་ཉེ་བར་བརྟེན་ཏོ། །ཐམས་ཅད་མཁྱེན་པ་ཉིད་དུ་འདུན་པའི་ཤུགས་ཀྱིས་སེམས་ཅན་རྣམས་ཀྱི་དགེ་བའི་རྩ་བ་རྒྱ་མཚོ་རྣམ་པར་འཕེལ་བར་མཛད་དེ། །དེ་
བཞིན་གཤེགས་པ་རྣམ་པར་འཕེལ་པའི་སྒོར་ཡང་དེ་དག་རབ་ཏུ་བཙུད་དོ། །ཕུང་པོ་ཤིན་ཏུ་ཞི་བའི་བདེ་བས་ཡོངས་སུ་བསྡུ་བས་ཡོངས་སུ་བསྡུས་ཏེ། དེ་བཞིན་གཤེགས་པའི་བདག་ཉིད་ཆེ་བ་ཉིད་ལ་མངོན་དུ་
མོས་པར་བྱས་ཏེ། བྱང་ཆུབ་སེམས་དཔའ་ཡོངས་སུ་གཟུང་བའི་ཡེ་ཤེས་ལ་རབ་ཏུ་བཀོད་དོ། །ནོར་བཟངས་ཀྱིས་སྨྲས་པ། འཕགས་མ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་
ནས་ཇི་སྲིད་ཅིག་ལགས། སྨྲས་པ་རིགས་ཀྱི་བུ་གནས་འདི་ནི་ཡིད་ཆེས་པར་དཀའ་བ་སྟེ། ཤེས་པར་དཀའ་བའོ། །མོས་པར་དཀའ་བའོ། །འཇུག་པར་དཀའ་བའོ། །བརྗོད་པར་དཀའ་བའོ། །ཁོང་དུ་ཆུད་
པར་དཀའ་བ་སྟེ། ལྷ་དང་བཅས་པའི་འཇིག་རྟེན་དང་ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་ཁོང་དུ་ཆུད་པར་མི་ནུས་སོ། །གཞན་དུ་ན་དེ་བཞིན་གཤེགས་པའི་བྱིན་གྱི་བརླབས་དང་། དགེ་བའི་བཤེས་
གཉེན་གྱིས་ཡོངས་སུ་བཟུང་བ་མ་གཏོགས་ཏེ། གནས་འདི་ནི་སེམས་ཅན་འཁོར་བའི་བདེ་བ་ཐམས་ཅད་ལ་མངོན་པར་འདོད་པ་མེད་པ་དེ་བཞིན་གཤེགས་པའི་བདེ་བ་ལ་ལྷག་པར་དམྱིགས་པ། སེམས་ཅན་
ཐམས་ཅད་ཀྱི་སྡུག་བསྔལ་དང་ཡིད་མི་བདེ་བ་རབ་ཏུ་ཞི་བར་བྱ་བ་ལ་ཞུགས་པ། དེ་བཞིན་གཤེགས་པའི་ཡོན་ཏན་རྒྱ་མཚོ་ལ་འཇུག་པའི་ནན་ཏན་ལ་མངོན་པར་མོས་པ། ཆོས་ཐམས་ཅད་ཀྱི་རང་

77-1-60a

བཞིན་ངེས་པར་རྟོགས་པ་ནམ་མཁའི་སྤྱོད་ཡུལ་དང་ལྡན་པ། མོས་པ་ཡངས་པའི་ལམ་གྱིས་རྣམ་པར་དག་པ། འཁོར་བའི་རྒྱུན་ལས་ཕྱིར་ཕྱོགས་པ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་
རྒྱ་མཚོ་ལ་མངོན་པར་མོས་པ་ཆོས་ཀྱི་གྲོང་ཁྱེར་དུ་འགྲོ་བར་གཅིག་ཏུ་ཆད་པ། དེ་བཞིན་གཤེགས་པའི་ཡུལ་ཡོངས་སུ་གནོན་པའི་བརྩོན་འགྲུས་ཅན། སངས་རྒྱས་ཀྱིས་སའི་རྒྱུད་རྣམ་པར་གནོན་པ་
ཐམས་ཅད་མཁྱེན་པའི་སྟོབས་ཡོངས་སུ་རྫོགས་པར་བྱ་བ་ལ་མངོན་པར་མོས་པ། སྟོབས་བཅུ་རབ་ཏུ་ཐོབ་པར་བྱ་བའི་མཐར་ཐུག་པ་རྣམས་ཀྱི་བསོད་ནམས་དང་ཡེ་ཤེས་ཀྱི་ཚོགས་ཡངས་པས་ཉེ་བར་
བརྟེན་པའི་སེམས་དང་བསམ་པ་རྣམ་པར་དག་པ་དང་མ་ཞུམ་པ་དང་ཉོན་མོངས་པ་མེད་པ་དང་མ་ཡོ་བ་དང་མ་ཉམས་པ་དང་། མ་འཆུམས་པ་དང་མུན་པ་མེད་པའི་སེམས་དང་ཡེ་ཤེས་ཀྱི་སྣང་བ་ཀུན་ཏུ་སྣང་བས་
སྣང་བར་འགྱུར་བའི་སེམས་དང་། སེམས་ཅན་ཐམས་ཅད་ལ་ཕན་པ་དང་བདེ་བར་བྱ་བར་ཤིན་ཏུ་འདུན་པའི་སེམས་དང་། བདུད་ཀྱི་འཁོར་དང་། ཉོན་མོངས་པ་ཐམས་ཅད་ཀྱིས་མི་ཐུབ་པའི་སེམས་
དང་ཐམས་ཅད་མཁྱེན་པ་ཉིད་ཀྱི་ཡེ་ཤེས་ཐོབ་པར་བྱ་བར་སྐབས་ཕྱེ་བའི་སེམས་ཀྱིས་ཁོང་དུ་ཆུད་པ་དང་ཡིད་ཆེས་པར་བྱ་བ་དང་། གཟུང་བ་དང་རྗེས་སུ་འབྲང་བར་བྱ་བ་འམ་ཤེས་པར་བྱ་བར་མི་ནུས་
སོ། །དེ་ཅིའི་ཕྱིར་ཞེ་ན། རིགས་ཀྱི་བུ་གནས་འདི་ནི་དེ་བཞིན་གཤེགས་པའི་ཡེ་ཤེས་ཀྱི་ཡུལ་ཏེ་བྱང་ཆུབ་སེམས་དཔའ་ཐམས་ཅད་ཀྱིས་ཀྱང་ཡོངས་སུ་མ་ནོན་ན། སེམས་ཅན་གཞན་ཐམས་ཅད་
ཀྱིས་ལྟ་ཅི་ཞིག་སྨོས་འོན་ཀྱང་སེམས་ཅན་ཅང་ཤེས་རྣམས་ཀྱི་བསམ་པ་ཕུན་སུམ་ཚོགས་པ་རྣམ་པར་དག་པར་བྱ་བ་དང་དགེ་བའི་རྩ་བ་ལ་སྤྱོད་པའི་སེམས་ཅན་རྣམས་ཀྱི་ལྷག་པའི་བསམ་

77-1-60b

པ་དབང་དུ་འགྱུར་བར་བྱ་བ་དང་། ཁྱོད་ཀྱིས་བསམ་པ་ཐག་པ་ནས་ཡོངས་སུ་དྲིས་པའི་ལུང་བསྟན་པའི་ཆོས་ཉིད་རབ་ཏུ་འབྱུང་བ་ཐོབ་པར་བྱ་བའི་ཕྱིར་དེ་བཞིན་གཤེགས་པའི་བྱིན་གྱི་བརླབས་ཀྱིས་བསྟན་
ཏོ། །དེ་ནས་མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པས་དེའི་ཚེ་དོན་དེ་ཉིད་ལ་བརྟེན་ཏེ་བསྟན་པའི་ཕྱིར་དུས་གསུམ་དུ་བྱུང་བའི་དེ་བཞིན་གཤེགས་པའི་ཡུལ་ལ་
རྣམ་པར་བལྟས་ཏེ། །ཚིགས་སུ་བཅད་པ་འདི་དག་སྨྲས་སོ། །སངས་རྒྱས་སྲས་པོ་ཁྱོད་ཀྱིས་གང་དྲིས་པ། །དེ་ནི་བསམ་ཡས་ཟབ་མོ་སངས་རྒྱས་ཡུལ། །བསམ་ཡས་ཞིང་གི་རྡུལ་ཕྲན་
རབ་སྙེད་ཀྱི། །བསྐལ་པ་མང་པོས་དེ་ཀུན་བརྗོད་མྱི་ནུས། །སེམས་ཅན་འདོད་པའི་སེམས་ལྡན་སྡང་བ་དང་། །དེ་བཞིན་གཏི་མུག་མུན་པས་བསྒྲིབས་པ་དང་། །འཆབ་དང་དྲེགས་པས་བསམ་
པ་ཉམས་གྱུར་པས། །རྒྱལ་བའི་ཆོས་ཉིད་ཞི་བ་ཤེས་མི་ནུས། །ཕྲག་དོག་འཇུངས་པའི་དབང་གིས་རྗེས་འབྲང་དང་། །གཡོ་སྒྱུས་བསམ་པ་རྙོགས་པར་གྱུར་པ་དང་། །ཉོན་མོངས་ལས་ཀྱི་
སྒྲིབ་པས་བསྒྲིབས་པ་ཡིས། །སངས་རྒྱས་ཡུལ་འདི་ཤེས་པར་མི་ནུས་སོ། །ཕུང་པོ་ཁམས་དང་སྐྱེ་མཆེད་གནས་པ་དང་། །འཇིག་ཚོགས་མང་ལ་གནས་པར་གྱུར་པ་དང་། །ལྟ་སེམས་
འདུ་ཤེས་ཕྱིན་ཅི་ལོག་གྱུར་པས། །ཞི་བའི་ས་འདི་ཤེས་པར་མི་ནུས་སོ། །རྒྱལ་བའི་ཡུལ་ནི་ཤེས་དཀའ་ཞི་བ་སྟེ། །རང་བཞིན་དྲི་མེད་རྣམ་པར་རྟོག་པ་མེད། །སྲིད་པར་རྟེན་ཅིང་འཁོར་ལ་ཆགས་པ་
ཡིས། །ཆོས་འདི་ཡང་དག་ཤེས་པར་མི་ནུས་སོ། །སངས་རྒྱས་རིགས་སུ་རིགས་ལྡན་གང་སྐྱེས་པ། །དེ་བཞིན་གཤེགས་པ་ཀུན་གྱིས་བྱིན་བརླབས་ཤིང་། །ཆོས་ཀྱི་རྒྱལ་པོའི་གདུང་རབས་ཡོངས་

77-1-61a

འཛིན་པ། །དྲང་སྲོང་དེ་དག་ཡུལ་ནི་འདི་ཡིན་ནོ། །དཀར་ཆོས་རྒྱ་མཚོས་མི་ངོམས་སེམས་ལྡན་ཞིང་། །གང་རྣམས་དགེ་བའི་བཤེས་ཀྱིས་ཡོངས་བཟུང་སྟེ། །ཐུབ་པའི་སྟོབས་ལ་དམིགས་
པའི་སེམས་སྤྲིན་ཅན། །དེ་དག་འདི་ཐོས་བཟོད་པ་ཐོབ་པར་འགྱུར། །གང་རྣམས་བསམ་པ་དྲི་མེད་རྣམ་རྟོག་མེད། །བར་སྣང་མཁའི་བཞིན་ཕྱོགས་དང་ཕྱོགས་མཚམས་སུ། །མུན་པ་རྣམ་
བསལ་བློ་གྲོས་སྒྲོན་མའི་སྤྲིན། །དྲི་མེད་དེ་དག་སྤྱོད་ཡུལ་འདི་ཡིན་ནོ། །སྙིང་རྗེའི་བསམ་པས་འགྲོ་བ་རྒྱ་མཚོ་རྣམས། །དུས་གསུམ་བྱུང་བ་གང་རྣམས་རྒྱས་བྱེད་ཅིང་། །སེམས་ཅན་མ་ལུས་རྗེས་
འབྲང་བྱམས་པ་ཅན། །དེ་དག་རྒྱལ་བའི་ཚུལ་འདིར་འཇུག་པར་འགྱུར། །གང་རྣམས་འཛིན་མེད་དགའ་བའི་སེམས་ལྡན་ཞིང་། །རྟག་པར་བདོག་པ་ཐམས་ཅད་སྦྱིན་བརྩོན་ལ། །སེམས་ཅན་ཀུན་
ལ་མཉམ་པར་ཞུགས་གྱུར་པ། །ཆགས་པ་མེད་དེ་སྤྱོད་ཡུལ་ས་འདི་ཡིན། །ཉོན་མོངས་མེད་སེམས་སྐྱོན་མེད་སྤྱོད་ལྡན་ཞིང་། །གང་རྣམས་འགྱོད་པ་རྣམ་བསྩལ་སེམས་ལྡན་ཏེ། །སངས་རྒྱས་
གདམས་ངག་ནན་ཏན་བྱེད་ལྡན་པ། །དྲི་མེད་དེ་དག་སྤྱོད་ཡུལ་འདི་ཡིན་ནོ། །གང་རྣམས་མི་སྒུལ་སེམས་ལྡན་མི་བསྐྱོད་སེམས། །ཆོས་ཀྱི་རང་བཞིན་རྟོགས་པའི་སེམས་ལྡན་ཞིང་། །ལས་ཀྱི་རྒྱ་
མཚོ་མི་འགལ་སེམས་ལྡན་པ། །མི་ཟད་དེ་དག་རྣམ་ཐར་འདི་ཡིན་ནོ། །གང་རྣམས་མི་སྐྱོའི་སེམས་དང་མི་ལྡོག་སེམས། །བརྩོན་འགྲུས་མཐུ་དང་རྩལ་དུ་ལྡན་པ་རྣམས། །ཐམས་ཅད་
མཁྱེན་ཚོགས་བརྩོན་འགྲུས་མཐའ་ཡས་པ། །བརྟུལ་ཞུགས་བཟང་ལྡན་དེ་དག་ཡུལ་འདི་ཡིན། །ཞི་བའི་སེམས་ལྡན་མཉམ་པར་བཞག་པ་གང་། །ཤིན་ཏུ་ཞིར་གྱུར་རིམས་དང་བྲལ་བ་

77-1-61b

རྣམས། །ཀུན་ནས་བསམ་གཏན་ཡན་ལག་འཚོར་སྤྱོད་པ། །རབ་ཏུ་ཞི་བ་དེ་དག་ཚུལ་འདི་ཡིན། །གང་རྣམས་ཆགས་པ་ཀུན་ལས་སེམས་གྲོལ་ཞིང་། །ཆོས་ཀྱི་རང་བཞིན་ཁོང་དུ་ཆུད་
སེམས་ཅན། །རྒྱལ་བའི་ཆོས་དབྱིངས་རྟོགས་པར་ཁོང་ཆུད་པ། །ཤེས་རབ་སྒྲོན་མ་དེ་དག་ཚུལ་འདི་ཡིན། །སེམས་ཅན་རང་བཞིན་རྟོགས་སེམས་ལྡན་གྱུར་ཅིང་། །གང་རྣམས་སྲིད་པའི་
མཚོ་ལ་ཆགས་མེད་སེམས། །སེམས་ཅན་སེམས་ལ་གཟུགས་བརྙན་ཟླ་འཆར་བ། །ལམ་མཁན་དེ་དག་རྣམ་ཐར་འདི་ཡིན་ནོ། །དུས་གསུམ་འབྱུང་བའི་རྒྱལ་བ་རྒྱ་མཚོ་རྣམས། །
སྨོན་ལམ་གངས་ཆེན་མཚོ་རྒྱུད་སྐྱེས་པ་ཡི། །ཞིང་རྣམས་ཀུན་ཏུ་ཕྱི་མའི་མཐར་སྤྱོད་པ། །ཀུན་ཏུ་བཟང་པོ་དེ་དག་ཚུལ་འདི་ཡིན། །གང་རྣམས་ཆོས་དབྱིངས་ཚུལ་རྣམས་རྒྱ་མཚོ་ཡིས། །
འགྲོ་བ་རྒྱ་མཚོ་འདུ་དང་འཇིག་པ་ཡི། །བསྐལ་པར་བཅས་པ་ཁོང་དུ་ཆུད་ལེགས་རྣམས། །རྟོག་མེད་དེ་དག་རྣམ་ཐར་འདི་ཡིན་ནོ། །ཞིང་རྣམས་ཀུན་གྱི་རྡུལ་ཕྲན་ཐམས་ཅད་ལ། །སངས་
རྒྱས་གྲངས་མེད་ཤིང་རྒྱལ་དྲུང་བཞུགས་ཤིང་། །བྱང་ཆུབ་འཚང་རྒྱ་འགྲོ་འདུལ་མཐོང་བ་ཡི། །ཆགས་མེད་མིག་ཅན་དེ་དག་ཚུལ་འདི་ཡིན། །ཁྱོད་ནི་བསྐལ་པ་རྒྱ་མཚོ་རྒྱ་ཆེན་དུ། །དགེ་བའི་
བཤེས་གཉེན་མང་པོ་བསྙེན་བཀུར་ཏེ། །ཆོས་འདོད་ཆོས་ཚོལ་མི་སྐྱོ་འདིར་ཕྱིན་པ། །ཐོས་ནས་དེ་ནི་ཡོངས་སུ་གཟུང་བར་ནུས། །ཁྱོད་ཀྱི་བསམ་པ་ཡོངས་སུ་སྦྱང་བའི་ཕྱིར། །བདེ་གཤེགས་
བྱིན་བརླབ་བསམ་གྱིས་མི་ཁྱབ་པས། །རྣམ་པར་སྣང་མཛད་ཚད་མེད་ཡུལ་འདི་ཡང་། །ཁོ་མོའི་ཚིག་ལས་ཆགས་པ་མེད་པར་འབྱུང་། །རིགས་ཀྱི་བུ་སྔོན་འདས་པའི་དུས་བསྐལ་པ་འཇིག་རྟེན་

77-1-62a

གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་དེའི་ཡང་ཕ་སྔ་ཞིག་ཏུ་འཇིག་རྟེན་གྱི་ཁམས་རྒྱ་མཚོ་གསེར་རིན་པོ་ཆེའི་རི་སྤོ་རྣམ་པར་སྣང་བ་ཞེས་བྱ་བ་བྱུང་སྟེ། རིགས་ཀྱི་བུ་འཇིག་རྟེན་གྱི་
ཁམས་རྒྱ་མཚོའི་གསེར་རིན་པོ་ཆེའི་རི་སྤོ་རྣམ་པར་སྣང་བ་དེར་དེ་བཞིན་གཤེགས་པ་ཡེ་ཤེས་རི་བོའི་འོད་ཆོས་ཀྱི་དབྱིངས་སུ་སྣང་བའི་གཟིགས་བརྗིད་རྒྱལ་བ་ཞེས་བྱ་བ་བྱུང་སྟེ། དེ་བཞིན་གཤེགས་
པ་ཡེ་ཤེས་ཀྱི་རི་བོའི་འོད་ཆོས་ཀྱི་དབྱིངས་སུ་སྣང་བའི་གཟི་བརྗིད་རྒྱལ་པོ་དེ། སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ་འཇིག་རྟེན་གྱི་ཁམས་རྒྱ་མཚོ་གསེར་རིན་པོ་ཆེའི་རི་སྤོ་རྣམ་པར་སྣང་
བ་ཞེས་བྱ་བ་འཇིག་རྟེན་གྱི་ཁམས་རྒྱ་མཚོའི་ས་དང་། རི་རྡུལ་ཤིན་ཏུ་ཕྲ་བ་སྙེད་གྱི་འཇིག་རྟེན་གྱི་ཁམས་འབྱམ་ཀླས་པ་བསྟན་དུ་ཡོད་པ་དང་ལྡན་པ། འཇིག་རྟེན་གྱི་ཁམས་ཀྱི་རྒྱུད་རེ་རེ་ཞིང་ཡང་
བསྐལ་པའི་གྲངས་ཤིན་ཏུ་བསྟན་པ་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་ལྡན་པ་བསྐལ་པ་རེ་རེ་ཞིང་ཡང་བསྐལ་པ་བར་མ་ཤིན་ཏུ་བསྟན་པ་དུ་མ་དང་ལྡན་པ་བསྐལ་པ་བར་མ་རེ་རེ་ཞིང་ཡང་
འཇིག་རྟེན་གྱི་ཁམས་རྣམ་པ་ཐ་དད་དུ་བྱ་བ་བསྟན་པ་དུ་མ་དང་ལྡན་པ། དེ་བཞིན་གཤེགས་པ་འབྱུང་བ་དང་། རྫུ་འཕྲུལ་སྣ་ཚོགས་བསྟན་དུ་ཡོད་པ་དེ་བཞིན་གཤེགས་པ་འབྱུང་བ་རེ་རེ་ཞིང་ཡང་མདོ་སྡེ་
ཡང་དག་པར་བསྟན་པ། འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་བརྗོད་དུ་ཡོད་པ་མདོ་སྡེ་རེ་རེ་ལ་ཡང་བྱང་ཆུབ་སེམས་དཔའི་ལུང་བསྟན་པ། འཇིག་རྟེན་གྱི་ཁམས་བརྗོད་དུ་མེད་པའི་རྡུལ་
ཤིན་ཏུ་ཕྲ་བ་སྙེད་བསྟན་དུ་ཡོད་པ་སེམས་ཅན་འདུལ་བ་མཐའ་དང་དབུས་མེད་པ་ཤིན་ཏུ་བསྟན་པ། ཐེག་པ་ཐ་དད་པའི་ཚུལ་གྱིས་བསྒྲུབས་པ། སངས་རྒྱས་ཀྱི་རྣམ་པར་འཕྲུལ་པ་དང་ཆོ་འཕྲུལ་སྣ་ཚོགས་

77-1-62b

གྱིས་རྣམ་པར་འདུལ་བ་དང་ལྡན་པ་ཡོངས་སུ་སྦྱངས་ཏེ། རིགས་ཀྱི་བུ་འཇིག་རྟེན་གྱི་ཁམས་རྒྱ་མཚོ་གསེར་རིན་པོ་ཆེའི་རི་སྤོས་རྣམ་པར་སྣང་བ་དེར། འཇིག་རྟེན་གྱི་ཁམས་བར་མའི་རྒྱུད་ཕྱོགས་ཀུན་
ཏུ་མངོན་པར་ལྟས་པའི་སྒོ་རྒྱལ་མཚན་གྱིས་རྣམ་པར་བརྒྱན་པ་ཞེས་བྱ་བ་བྱུང་སྟེ། རིགས་ཀྱི་བུ་འཇིག་རྟེན་གྱི་ཁམས་བར་མའི་རྒྱུད་ཕྱོགས་ཀུན་ཏུ་མངོན་པར་བལྟས་པ་རྒྱལ་མཚན་གྱིས་རྣམ་པར་
བརྒྱན་པ་དེར། འཇིག་རྟེན་གྱི་ཁམས་རིན་པོ་ཆེ་ཐམས་ཅད་ཀྱི་མདོག་ཀུན་ཏུ་སྣང་བའི་དཔལ་ཞེས་བྱ་བ་འཇིག་རྟེན་གྱི་ཁམས་ཀྱི་གཞི་དང་། མཚམས་ཀྱི་རྒྱན་རིན་པོ་ཆེའི་རྒྱལ་པོ་དེ་དག་དེ་བཞིན་གཤེགས་
པ་ཐམས་ཅད་ཀྱི་སྙིང་པོ་བྱང་ཆུབ་རབ་ཏུ་སྣང་བ་ལས་བྱས་པ། རིན་པོ་ཆེ་སྣ་ཚོགས་ཀྱི་མེ་ཏོག་རྒྱ་མཚོ་ལ་གནས་པ། ལྷུན་རིན་པོ་ཆེའི་རྒྱལ་པོ་དེ་བཞིན་གཤེགས་པ་ཐམས་ཅད་ཀྱི་སྤྲུལ་པའི་གཟུགས་
བརྙན་རབ་ཏུ་སྟོན་པ་ལས་བསྒྲུབས་པ། ལྷའི་གྲོང་ཁྱེར་གྱི་དབྱིབས་སུ་འདུག་པ་རྣམ་པར་དག་ཅིང་ཀུན་ནས་ཉོན་མོངས་པ་བྱུང་བར་གྱུར་ཏེ། འཇིག་རྟེན་གྱི་ཁམས་དེར་གླིང་བཞི་པའི་འཇིག་
རྟེན་གྱི་ཁམས་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་བྱུང་བར་གྱུར་ཏེ། གླིང་བཞི་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་པོ་དེ་དག་གི་གླིང་བཞི་ལ་དབུ་མ་རིན་པོ་ཆེ་སྣ་ཚོགས་ཀྱི་རྩེ་མོའི་རྒྱལ་མཚན་ཞེས་བྱ་
བ་བྱུང་སྟེ། གླིང་བཞི་པའི་འཇིག་རྟེན་གྱི་ཁམས་རིན་པོ་ཆེ་སྣ་ཚོགས་ཀྱི་རྩེ་མོའི་རྒྱལ་མཚན་དེར་གླིང་ཆུ་ཞེང་དུ་དཔག་ཚད་རྒྱ་ཕྲག་སྟོང་ཡོད་པ་བཞི་བྱུང་ནས་གླིང་རེ་རེ་ཡང་གྲོང་ཁྱེར་ཆེན་
པོ་སྟོང་ཕྲག་རེ་རེ་བྱུང་ངོ་། །གླིང་བཞི་པ་དེའི་འཛམ་བུ་གླིང་གི་དབུས་སུ་རྒྱལ་པོའི་གནས་རིན་པོ་ཆེའི་ས་ལས་རྣམ་པར་རྒྱན་པ། སྤྲིན་གྱི་སྒྲོན་མ་ཞེས་བྱ་བ་གྲོང་ཁྱེར་སྟོང་ཕྲག་

77-1-63a

བཅུའི་འཁོར་དང་ལྡན་པ་བྱུང་ངོ་། །དེའི་འཛམ་བུའི་གླིང་དེའི་མྱི་རྣམས་ཀྱང་ཚེའི་ཚད་ལོ་སྟོང་ཕྲག་བཅུ་ཐུབ་པར་གྱུར་ཏོ། །རྒྱལ་པོའི་གནས་རིན་པོ་ཆེའི་ས་ལས་རྣམ་པར་བརྒྱན་པ་སྤྲིན་
ཀྱི་སྒྲོན་མ་དེར་འཁོར་ལོས་བསྒྱུར་བའི་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ཞེས་བྱ་བ་བྱུང་སྟེ། འཁོར་ལོས་བསྒྱུར་བའི་རྒྱལ་པོ་ཆོས་ཐམས་ཅད་ཀྱི་ང་རོའི་
གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེའི་བློན་པོ་ནི་ལྔ་བརྒྱ་བྱུང་ངོ་། །བཙུན་མོ་ནི་སྟོང་ཕྲག་དྲུག་བཅུ་བྱུང་ངོ་། །སྲས་ནི་ཀུན་ཀྱང་དཔའ་བ་བརྟུལ་ཕོད་པ། ཡན་ལག་དམ་པའི་གཟུགས་དང་ལྡན་
པ། བལྟ་ན་སྡུག་པ་གཟི་བརྗིད་ཆེ་བ། སྟོབས་ཆེ་བ་བརྒྱ་ཕྲག་བདུན་བྱུང་ངོ་། །རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེའི་ཚེ་ལ་འཛམ་བུའི་གླིང་ཐམས་ཅད་ཀྱང་
གདུགས་ཅིག་གིས་ཀྱང་བསྐྱངས་པར་གྱུར་ཏེ། ཕ་རོལ་གྱི་འཁོར་དང་དགྲ་ཐམས་ཅད་ཀྱང་ཤིན་ཏུ་ཆོམས་པར་གྱུར་ཏོ། །དེའི་ཚེ་འཇིག་རྟེན་གྱི་ཁམས་དེར་སྐལ་པ་བར་མ་ནི་ཟད་དུ་ཉེ། རྙོག་པ་ལྔ་ནི་
འཇིག་རྟེན་དུ་བྱུང་། དགེ་བ་བཅུའི་ལས་ཀྱི་ལམ་ནི་ནུབ་པར་གྱུར་ནས། སེམས་ཅན་མི་དགེ་བ་བཅུའི་ལམ་ལ་སྤྱོད་པ་ཕལ་ཆེར་ངན་སོང་དུ་ཡང་འདོང་བར་གྱུར་ཏེ། དེ་དག་མྱི་དགེ་བ་བཅུའི་ལས་ཀྱི་ལམ་
ཡོངས་སུ་འཛིན་པའི་རྒྱུས་ཚེ་ཐུང་བ་དང་ལོངས་སྤྱོད་ཆུང་བ་དང་གཟུགས་མ་ལེགས་པ་དང་། ཁ་དོག་མི་སྡུག་པ་དང་ལུས་མ་ལེགས་པ་དང་། བདེ་བའི་རྣམ་པ་ཉུང་བ་དང་སྡུག་བསྔལ་ཉམས་སུ་མྱོང་
བའི་རྣམ་པ་མང་པོ་དང་། ཕན་ཚུན་བསླུ་ཞིང་འདྲིད་པའི་རང་བཞིན་ཅན་དང་ཕན་ཚུན་དབྱེ་བ་ལ་ཞུགས་པ་དང་། ཞེ་གཅོད་པའི་ཚིགས་ལ་སྤྱོད་པ་དང་། འཆལ་བའི་ཚིག་ཏུ་སྨྲ་བ་དང་། འདོད་པ་

77-1-63b

མི་བཟད་པས་ཟིལ་གྱིས་གནོན་པ་དང་ཞེ་སྡང་བའི་ཡིད་གྱི་རྟོག་པ་དང་ལྡན་པ་དང་། ལྟ་བའི་ཐིབས་པོ་སྣ་ཚོགས་གྱི་མྱ་ངན་དུ་འཁྱམས་པར་གྱུར་ནས་དེ་དག་ཆོས་མ་ཡིན་པའི་འདོད་ཆགས་ལ་ཞེན་
ཅིང་འདོད་པ་མི་བཟད་པས་ཟིལ་གྱིས་ནོན་ལ། ལོག་པའི་ཆོས་ཀྱིས་ཀུན་ནས་འཁོར་བས་ས་ལ་ཤིང་རྩི་དང་ལོ་ཟས་སྐྱེ་བར་འགྱུར་བའི་ཆར་ཡང་དུས་སུ་མི་འབབ་པར་གྱུར་ཏེ། སེམས་ཅན་དེ་དག་ཀྱང་རྩ་
དང་གེལ་བ་དང་སྨན་དང་ནགས་ཚལ་དང་བཟའ་ཤིང་ར་བ་དང་སྡོང་པོ་དག་ཀྱང་སྐམས་པར་གྱུར་ནས། ནད་སྣ་ཚོགས་གྱིས་ཐེབས་ཤིང་ཕྱོགས་དང་ཕྱོགས་མཚམས་སུ་སྐྱབས་མེད་པས། ཕན་ཚུན་
ཁོད་མི་སྙོམ་ཞིང་གཡེན་སྤྱོད་པར་གྱུར་ཏེ་དེ་དག་ཀུན་ཀྱང་གཅིག་ཏུ་འདུས་ནས་རྒྱལ་པོའི་གནས་རིན་པོ་ཆེ་ས་ལས་རྣམ་པར་བརྒྱན་པ་སྤྲིན་གྱི་སྒྲོན་མ་གང་ན་བ་དེར་དོངས་སྟེ། ཀུན་ནས་བསྐོར་ནས། ལ་ལ་
ནི་ལག་པ་གྱེན་དུ་སྒྲེང་། ལ་ལ་ནི་ཐལ་མོ་སྦྱོར། ལ་ལ་ནི་ལུས་ཤིན་ཏུ་འདར། ལ་ལ་ནི་འགྱེལ། ལ་ལ་ནི་བུབ། ལ་ལ་ནི་ལུས་ཐམས་ཅད་ཀྱིས་ཕབ་ཅིང་ཕྱག་འཚལ། ལ་ལ་ནི་པུས་མོ་ས་ལ་
འཛུགས། ལ་ལ་ནི་ལག་པ་ནམ་མཁའི་དབྱིངས་སུ་གཡོ་བ། ལ་ལ་ནི་གོས་མེད་ཅིང་སྒྲེན་མོར་འཁོད། ལ་ལ་ནི་ཁ་མིག་མྱི་སྡུག་པར་གྱུར་ཅིང་། རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་
འཁོར་རབ་ཏུ་སྒྲོག་པ་ལ་མངོན་ཏུ་བལྟས་ཤིང་། སྙིང་རྗེ་རྗེ་སྐད་དུ་འོ་དོད་ཆེན་པོ་འབོད་དེ། ལྷ་ཆེན་པོ་བདག་ཅག་ནི་ཉམ་ཐག་གོ། །བཀྲེས་པ་དང་སྐོམ་པའི་སྡུག་བསྔལ་གྱིས་རབ་ཏུ་གཟིར་ཏོ། །འཇིགས་
པ་སྣ་ཚོགས་གྱིས་གཡེན་སྤྱོད་དོ། །བདག་ཅག་ལ་སྐྱབས་མ་མཆིས་སོ། །བདག་ཅག་ལ་མགོན་དང་དཔུང་གཉེན་མ་མཆིས་སོ། །སྡུག་བསྔལ་གྱི་ཤིང་ཐགས་ཀྱིས་འཁོར་ཏོ། །སྲོག་ཆད་ལ་ཐུག་

77-1-64a

གོ། །འཆི་བར་གྱུར་མ་ཁད་དོ། །ཞེས་ཏེ་སྨྲེ་སྔགས་སྣ་ཚོགས་སུ་བླ་ཞིང་དབྱངས་ཀྱི་རྣམ་པ་སྣ་ཚོགས་དང་། ཚིག་སྣ་ཚོགས་ཀྱིས་ཁ་གདོང་མི་སྡུག་པར་གྱུར་པར་འདུ་ཤེས་དང་ཚིག་
སྣ་ཚོགས་ཀྱི་ཐ་སྙད་དང་། ཆོ་འབྲང་བ་དང་སྐད་ཀྱི་གདངས་དོན་སྣ་ཚོགས་བརྗོད་པའི་ཚིག་དང་། ངག་གིས་འོ་དོད་བོས་སོ། །རྒྱལ་པོའི་གནས་དེའི་སྐྱེས་པ་དང་བུ་མེད་དང་ཁྱེའུ་དང་། བུ་མོ་བཀྲེས་
པ་དང་སྐོམ་པས་མནར་བ་ལུས་ལ་རྒྱན་མེད་པ་སྒྲེན་མོ་གོས་མེད་པ། ཁ་དོག་དང་མདོག་མི་སྡུག་པ་ལུས་སྲ་ཤིང་རྩུབ་པ། སྡུག་བསྔལ་ཞིང་ཡིད་མི་བདེ་ལ། མི་དགའ་བ་དེ་དག་ཐམས་ཅད་ཀྱང་བདེ་བ་ནི་
མངོན་པར་འདོད། །སྡུག་བསྔལ་གྱི་འཇིགས་པས་ནི་བརླ་ཁྱེར་ནས་རྒྱལ་པོ་ཤེས་པའི་སྐྱེས་བུ་ཆེན་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ། དེ་ལ་བདེ་བ་ཐམས་
ཅད་ཐོབ་པར་བྱ་བའི་འདུ་ཤེས་དང་། སྡུག་བསྔལ་ཐམས་ཅད་དང་མི་འགྲོགས་པར་བྱ་བའི་འདུ་ཤེས་དང་། འཚོ་བའི་བསམ་པ་དང་ལྡན་ཞིང་གཏེར་ཐོབ་པར་བྱ་བའི་འདུ་ཤེས་དང་། མུ་སྟེགས་མཐོང་བར་
བྱ་བའི་འདུ་ཤེས་དང་། ལམ་ཆེན་པོ་ལ་ནན་ཏན་དུ་བྱ་བའི་འདུ་ཤེས་དང་། གྲུ་ཆེན་པོའི་འདུ་ཤེས་དང་། ཡེ་ཤེས་ཀྱི་གླིང་ཆེན་པོའི་འདུ་ཤེས་དང་། དོན་ཆེན་པོ་རབ་ཏུ་ཐོབ་པར་བྱ་བའི་འདུ་ཤེས་དང་། 
མཐོ་རིས་ཀྱི་དགའ་བ་དང་བདེ་བ་ཐམས་ཅད་རབ་ཏུ་ཐོབ་པར་བྱ་བའི་འདུ་ཤེས་ཀྱིས་མགོན་དང་སྐྱབས་ཚོལ་བར་གྱུར་ཏོ། །རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་
སྒྲོགས་པས་འཁོར་ཀུན་ནས་སློང་བ་མང་པོ་སྙིང་རྗེ་རྗེ་སྐད་དུ་འབོད་པའི་འོ་དོད་ཆེན་པོ་དེ་ཐོས་ནས། དེ་སྙིང་རྗེ་ཆེན་པོའི་སྒོ་བརྒྱ་སྟོང་གྲངས་མེད་པ་ཕྲག་བཅུ་ལ་ཞུགས་པར་གྱུར་ཏོ། །དེ་སྙིང་རྗེ་ཆེན་པོའི་

77-1-64b

ཚུལ་ཡིད་ལ་བབ་པའི་སེམས་སུ་གྱུར་ནས། ཡུད་ཙམ་ཞིག་རྩེ་གཅིག་ཏུ་བསམས་ཏེ་སྙིང་རྗེ་ཆེན་པོ་དང་ལྡན་པའི་ཚིག་བཅུ་བརྗོད་དོ། །བཅུ་གང་ཞེ་ན། ཀྱེ་ཧུད་ཀྱེ་སེམས་ཅན་འདི་དག་ནི་འཁོར་
བའི་གཡང་ས་ཆེན་པོར་ལྷུང་ཡང་སྐྱབས་མེད་པ་ལྟ་ན། བདག་ནམ་ཞིག་འཁོར་བའི་གཡང་ས་ཆེན་པོར་ལྷུང་བའི་སེམས་ཅན་རྣམས་དེ་བཞིན་གཤེགས་པའི་ས་ལ་འཁོད་པས་གནས་
སུ་འགྱུར་ཀྱི་ཧུད་ཀྱེ་སེམས་ཅན་འདི་དག་ཉོན་མོངས་པའི་གནོན་པས་གཙེས་ཤིང་སྐྱབས་མེད་པ་ལྟ་ན། ནམ་ཞིག་བདག་སེམས་ཅན་ཉོན་མོངས་པ་སྣ་ཚོགས་ཀྱིས་འཇིགས་པ་དང་། གནོད་པས་
གཙེས་ཏེ་སྐྱབས་མེད་པ་རྣམས་ཁ་ན་མ་ཐོ་བ་མེད་པའི་ལས་ཀྱི་མཐའ་ལ་འགོད་པས་སྐྱབས་སུ་འགྱུར། ཀྱི་ཧུད་ཀྱེ་སེམས་ཅན་འདི་དག་འཇིག་རྟེན་ན་རྒ་ཤིའི་འཇིགས་པས་ཚར་ཆོད་
ཅིང་མགོན་མེད་པ་ལྟ་ན་ནམ་ཞིག་བདག་སེམས་ཅན་མགོན་མེད་པ་རྣམས་ཀྱི་འཁོར་བའི་འཇིགས་པ་ཐམས་ཅད་རྣམ་པར་སེལ་བས་མགོན་དུ་འགྱུར། ཀྱི་ཧུད་ཀྱེ་སེམས་ཅན་འདི་དག་
འཇིག་རྟེན་གྱི་འཇིགས་པ་སྣ་ཚོགས་ཀྱིས་གཙེས་ཏེ། རྟེན་མེད་པ་ལྟ་ན་ནམ་ཞིག་བདག་སེམས་ཅན་འཇིག་རྟེན་གྱི་འཇིགས་པ་སྣ་ཚོགས་ཀྱིས་གཙེས་པ་རྣམས་ཤིན་ཏུ་བདེ་ཞིང་སྐྱོན་
མེད་པའི་ཐམས་ཅད་མཁྱེན་པའི་ལམ་ལ་འགོད་པས་རྟེན་དུ་འགྱུར། ཀྱི་ཧུད་ཀྱེ་སེམས་ཅན་འདི་དག་འཇིག་རྟེན་ན་མ་རིག་པའི་མུན་པར་འཐོམས་ཏེ་ཐེ་ཙོམ་དང་ཡིད་གཉིས་ཀྱི་རབ་
རིབ་གྱིས་བསྒྲིབས་པ་ལྟ་ན། ནམ་ཞིག་བདག་སེམས་ཅན་ཐམས་ཅད་གྱི་མ་རིག་པའི་མུན་པ་རྣམ་པར་སེལ་བས་སྒྲོན་མར་གྱུར་པར་འོང་། ཀྱི་ཧུད་ཀྱེ་སེམས་ཅན་འདི་དག་ནི་

77-1-65a

སྣང་བ་དང་བྲལ་བ་ལྟ་ན་ནམ་ཞིག་བདག་ཡེ་ཤེས་ཀྱི་སྒོ་རབ་རིབ་མེད་པར་ཡོངས་སུ་སྟོན་པས་ཡེ་ཤེས་ཆེན་པོའི་སྣང་བ་འབྱིན་པར་འགྱུར། ཀྱི་ཧུད་ཀྱེ་སེམས་ཅན་འདི་དག་ནི་ཕྲག་
དོག་དང་འཇུངས་པ་དང་། གཡོ་དང་སྒྱུའི་རྙོག་པས་བསམ་པ་རྙོག་པ་ཅན་དུ་གྱུར་ཏེ། ཡེ་ཤེས་ཀྱི་མདོག་གསལ་བ་མེད་པ་ལྟ་ན། ནམ་ཞིག་བདག་སེམས་ཅན་ཐམས་ཅད་ཤིན་ཏུ་དག་པ་ལ་རབ་
ཏུ་འགོད་ཅིང་བླ་ན་མེད་པའི་ཡེ་ཤེས་ཀྱི་མདོག་རབ་ཏུ་གསལ་བར་བྱེད་པར་འགྱུར། ཀྱི་ཧུད་ཀྱེ་སེམས་ཅན་གྱི་འཇིག་རྟེན་ནི་འཁོར་བའི་རྒྱ་མཚོའི་ཡུལ་གྱི་རྒྱུད་དུ་ཞུགས་ཤིང་འདྲེན་པ་མེད་པ་ལྟ་ན། 
ནམ་ཞིག་བདག་སེམས་ཅན་ཐམས་ཅད་ཆོས་རྒྱ་མཚོའི་ཚུལ་ལ་འཛུད་ཅིང་འདྲེན་པར་འགྱུར་བར་འོང་། ཀྱི་ཧུད་ཀྱེ་སེམས་ཅན་གྱི་འཇིག་རྟེན་མ་ལུས་ཞིང་རྣམ་པར་འདྲེན་པ་མེད་པ་ལྟ་
ན། ནམ་ཞིག་བདག་སེམས་ཅན་ཐམས་ཅད་རྣམ་པ་ཐམས་ཅད་དུ་ཡོངས་སུ་སྨྱིན་པར་བྱ་བ་དང་། རྣམ་པར་གདུལ་བ་ལ་དེ་བཞིན་གཤེགས་པའི་བྱིན་གྱིས་བརླབས་གྱི་དུས་ལས་མི་འདའ་
ཞིང་རྣམ་པར་འདྲེན་པར་འགྱུར་བར་འོང་། །ཀྱི་ཧུད་ཀྱེ་སེམས་ཅན་གྱི་འཇིག་རྟེན་ནི་དམུས་ལོང་དུ་གྱུར་ཏེ། ཡོངས་སུ་འདྲེན་པ་མེད་པ་ལྟ་ན། ནམ་ཞིག་བདག་སེམས་ཅན་ཐམས་ཅད་སྒྲིབ་
པ་མེད་པའི་ཐམས་ཅད་མཁྱེན་པའི་ཡེ་ཤེས་ཀྱི་ཚུལ་ལ་འཛུད་ཅིང་ཡོངས་སུ་འདྲེན་པར་འགྱུར་དེ་སྐད་དུ་དེས་སྙིང་རྗེ་ཆེན་པོ་དང་ལྡན་པའི་ཚིག་རྣམ་པ་བཅུ་བརྗོད་ནས་རྒྱལ་པོའི་གནས་དེར་དྲིལ་
བུ་ཆེན་པོ་བརྡུངས་ཏེ། གཏོང་བ་ཆེན་པོའི་རྔ་བོ་ཆེ་ཡང་ཡོངས་སུ་བརྡུངས་ནས། སུ་ཅི་འདོད་པ་དེ་ལ་དེ་སྦྱིན་གྱིས་འགྲོ་བ་ཐམས་ཅད་ཀྱང་ཡོངས་སུ་ཚིམ་པར་བྱའོ་ཞེས་སྒྲ་བརྗོད་དོ། །དེས་

77-1-65b

འཛམ་བུའི་གླིང་ཐམས་ཅད་གྱི་རྒྱལ་པོའི་གནས་ཐམས་ཅད་དང་། གྲོང་དང་གྲོང་ཁྱེར་དང་ལྗོངས་དང་། ཡུལ་དང་གྲོང་རྡལ་ཐམས་ཅད་དུ་ཡོ་བྱད་ཐམས་ཅད་ཀྱི་མཛོད་ཕྱེ་སྟེ། ལམ་གྱི་བཞི་མདོ་དང་། 
ལམ་གྱི་སུམ་མདོ་དང་སྲང་ཐམས་ཅད་དུ་ཡང་ཡོ་བྱད་སྣ་ཚོགས་ཀྱི་རྣམ་པ་མང་པོ་བཀོད་དེ་འགྲོ་བ་ཐམས་ཅད་ཉེ་བར་འཚོ་བར་བསྟབས་སོ། །མཛོད་དང་བང་བ་ཐམས་ཅད་ཀྱང་ཕྱེ་སྟེ། རིན་པོ་ཆེའི་གཏེར་
ཆེན་པོ་དང་ཚོགས་ཀྱང་ཡོངས་སུ་བསྟན་ཏོ། །རིན་པོ་ཆེ་རྣམ་པ་སྣ་ཚོགས་ཀྱི་ཕུང་པོ་དུ་མ་ཡང་སྤུངས་སོ། །ཟས་དང་སྐོམ་དང་། གོས་དང་བཞོན་པ་དང་མེ་ཏོག་དང་། ཕྲེང་བ་དང་བདུག་པ་དང་བྱུག་པ་
དང་། ཕྱེ་མ་དང་གོས་རིན་པོ་ཆེ་ཁ་དོག་སྣ་ཚོགས་ཀྱི་མཛོད་ཕྱེ་ནས། ཁང་པ་དང་གཞལ་མེད་ཁང་དང་། ཁྱིམ་མང་པོ་མལ་ཆ་དང་། སྟན་དང་གོས་ཀྱིས་ཡོངས་སུ་བསྟན་ཏེ། ནོར་དང་དབྱིག་ཐམས་ཅད་
ཕུན་སུམ་ཚོགས་པར་བྱས་ནས། ནོར་བུ་རིན་པོ་ཆེའི་རྒྱལ་པོ་སྣང་བའི་གཟི་བརྗིད་རྣམ་པར་བཀོད་པས་མུན་པ་རྣམ་པར་སེལ་བ་བཤམས་ནས། དེས་སེམས་ཅན་དེ་དག་ཅི་འདོད་པའི་བསམ་པ་
ཐམས་ཅད་ཡོངས་སུ་རྫོགས་པར་བྱ་བའི་ཕྱིར། ཁྱིམ་དེ་དག་རེ་རེ་ཡང་རང་གི་ལུས་དང་འདྲ་བའི་སྤྲུལ་པའི་ལུས་མངོན་པར་སྤྲུལ་པ་ཀུན་ཏུ་བཀོད་དོ། །སེམས་ཅན་ཐམས་ཅད་ཀྱི་ནད་ཐམས་ཅད་གསོ་
བའི་ཕྱིར་སྨན་པ་དང་སྨན་དང་། རིམ་གྲོ་བ་དང་། འཚོ་བའི་ཡོ་བྱད་སྣ་ཚོགས་ཀྱི་རྐྱེན་ཕུན་སུམ་ཚོགས་པ་ཡོངས་སུ་བཤམས་སོ། །རིན་པོ་ཆེ་སྣ་ཚོགས་གྱིས་ཅི་རིགས་སུ་བཀང་
བ་དག་ཀྱང་ཉེ་བར་བཀོད་དོ། །འདི་ལྟར་རིན་པོ་ཆེ་རྡོ་རྗེའི་སྣོད་ནི་སྤོས་གྱིས་ནོར་བུ་རིན་པོ་ཆེ་སྣ་ཚོགས་གྱིས་ཡོངས་སུ་བཀང་། 

77-1-66a

སྤོས་ཀྱི་ནོར་བུ་རིན་པོ་ཆེ་སྣ་ཚོགས་ཀྱི་སྣོད་ནི་གོས་ཁ་དོག་དམ་པ་སྣ་ཚོགས་ཀྱིས་ཡོངས་སུ་བཀང་ངོ་། །ཤིང་རྟ་མང་པོ་དབྱིབས་དང་། མདོག་སྣ་ཚོགས་སུ་འདུག་པ། རིན་པོ་ཆེ་སྣ་
ཚོགས་གྱིས་རབ་ཏུ་བརྒྱན་པ། རྟ་དང་གླང་པོ་དང་བ་ལང་ཅང་ཤེས་དང་བཅས་པ། རིན་པོ་ཆེ་ཤིང་རྟ་སྣ་ཚོགས་རྒྱལ་པོའི་རྐྱེན་དུ་རུང་བ། རིན་པོ་ཆེ་ཐམས་ཅད་ཀྱི་རྒྱན་གྱིས་ལོངས་སྤྱོད་དང་
ལྡན་པ། སྟན་སྣ་ཚོགས་བཏིང་བ། རིན་པོ་ཆེ་སྣ་ཚོགས་གྱིས་རྣམ་པར་བརྒྱན་པ། བླ་རེ་སྣ་ཚོགས་བྲེས་པ། རིན་པོ་ཆེའི་དྲིལ་བུའི་དྲ་བ་འབྲེས་པ། གདུགས་དང་། རྒྱལ་མཚན་དང་བ་དན་
བསྒྲེང་བས་བརྒྱན་པ་དག་གིས་ཀྱང་། ཡུལ་གྱི་ཕྱོགས་གང་བར་བཀོད་དོ། །གྲོང་དང་གྲོང་ཁྱེར་དང་། ལྗོངས་དང་ཡུལ་ཐམས་ཅད་སྦྱིན་པར་ཡང་འོ་དོད་ཀྱིས་བསྒོའོ། །བཟའ་ཤིང་གི་ར་བ་དང་། 
ཀུན་དགའ་ར་བ་དང་། དཀའ་ཐུབ་ཀྱི་ནགས་ཚལ་སྣ་ཚོགས་ཡོངས་སུ་གཏང་བ་དང་། ཁྱིམ་དང་ཆུང་མ་དང་བུ་དང་བུ་མོ་ཐམས་ཅད་ཡོངས་སུ་གཏང་བ་དང་། རིན་པོ་ཆེ་རིན་ཐང་
མེད་པ་ཐམས་ཅད་ཡོངས་སུ་གཏང་བ་དང་། རང་གི་སྙིང་དང་རྐང་དང་རྒྱུ་མ་དང་མཁལ་མ་དང་ཚིལ་དང་། ཤ་དང་ཁྲག་དང་པགས་པ་དང་རྐ་ལག་དང་རྣ་བ་དང་། མིག་དང་སྣ་དང་ལྕེ་དང་སོ་དང་། 
མཆུ་དང་མགོ་ཡོངས་སུ་བཏང་བ་དང་། ཕྱི་ནང་གི་དངོས་པོ་ཐམས་ཅད་རྣམ་པ་ཐམས་ཅད་དུ་ཡོངས་སུ་གཏང་བར་ཡང་འོ་དོད་ཀྱིས་བསྒོའོ། །དེས་ཡོ་བྱད་དེ་ལྟ་བུ་ཡོངས་སུ་གཏང་བའི་རྣམ་པ་
མང་པོ་བཤམས་ཏེ་བསྩོགས་ནས་རྒྱལ་པོའི་གནས་རིན་པོ་ཆེའི་ས་ལས་རྣམ་པར་བརྒྱན་པ། སྤྲིན་གྱི་སྒྲོན་མ་དེའི་ཤར་ཕྱོགས་ལོགས་ན་གྲོང་ཁྱེར་རིན་པོ་ཆེ་རྩེ་མོའི་གཟི་བརྗིད་ཅེས་བྱ་བའི་

77-1-66b

མདུན་རོལ་ནས་གཞི་མཉམ་པའི་ཕྱོགས་ཡངས་པ་ཆུ་ཞེང་དུ་རྒྱ་ཆེ་ཞིང་མཉམ་པ་མཐོ་དམན་མེད་པ། རྣམ་པར་དག་ཅིང་གཞི་མཉམ་པ་ངམ་གྲོག་དང་གཡང་ས་དང་སྡོང་དུམ་དང་། ཚེར་མ་དང་། 
གསེག་མ་དང་། གྱོ་མོ་ཐམས་ཅད་མེད་པ་རིན་པོ་ཆེ་ཐམས་ཅད་ཀྱི་ཁམས་ལས་གྲུབ་པ་གཞི་རིན་པོ་ཆེ་ཐམས་ཅད་ལས་བྱས་ཤིང་། རིན་པོ་ཆེའི་རྒྱལ་པོ་ཐམས་ཅད་བཀྲམ་པ། ནོར་བུ་རིན་
པོ་ཆེའི་རྒྱན་རྣམ་པ་དུ་མས་བརྒྱན་པ་རིན་པོ་ཆེའི་མེ་ཏོག་སྣ་ཚོགས་གྱིས་གང་བ་ཕྱེ་མ་སྣ་ཚོགས་དྲི་ཤིན་ཏུ་ཞིམ་པའི་རྡུལ་ལྟར་བདུག་སྤོས་སྣ་ཚོགས་གྱིས་བདུག་པ། རིན་པོ་ཆེའི་
སྒྲོན་མ་དཔལ་གྱི་གཟི་བརྗིད་ཅན་རབ་ཏུ་འབར་བ། སྤོས་དང་བདུག་སྤོས་ཐམས་ཅད་ཀྱི་ན་བུན་དང་། སྤྲིན་ཀྱི་ནམ་མཁའ་ཀུན་ཏུ་ཁེབས་པའི་རྒྱན་དང་ལྡན་པ། རིན་པོ་ཆེ་སྣ་ཚོགས་ཀྱི་ཤིང་གི་
ཕྲེང་བ་ལེགས་པར་བཀྱེ་བས་མཛེས་པར་བརྒྱན་པ། ཁང་པ་དང་གཞལ་མེད་ཁང་དང་ཁང་པ་བརྩེག་པ་སྣ་ཚོགས་ཀྱིས་ཡོངས་སུ་བརྒྱན་པ། གདུགས་དང་རྒྱལ་མཚན་དང་། བ་དན་བསྒྲེང་བ་རིན་
པོ་ཆེའི་སྣམ་བུ་ལྡིང་བ། རྣམ་པར་སྣང་བ་རིན་པོ་ཆེ་སྣ་ཚོགས་ཀྱི་མེ་ཏོག་གི་དྲ་བས་ཀུན་ནས་ཁེབས་པ། རིན་པོ་ཆེ་སྤོས་ཐམས་ཅད་ཀྱི་རྒྱལ་པོའི་དྲ་བའི་གདུགས་ཀྱི་དཀྱིལ་འཁོར་ཅན། 
གསེར་གྱི་དྲ་བ་ལས་རིན་པོ་ཆེའི་དྲིལ་བུ་འཁྲོལ་བ་དང་ལྡན་པ། བླ་རེ་རིན་པོ་ཆེ་སྣ་ཚོགས་ཀྱིས་རྣམ་པར་མཛེས་པར་བྱས་པས་ཁེབས་པར་བྲེས་པ། སྤོས་ཀྱི་རྒྱལ་པོ་སྣ་ཚོགས་ཀྱི་ཕྱེ་
མ་རྣམ་པར་བཀྲམ་པ། རིན་པོ་ཆེ་སྣ་ཚོགས་ཀྱི་མེ་ཏོག་སིལ་མས་དགའ་དགའ་ལྟར་གང་བ་རོལ་མོ་བརྡུངས་པ་དང་། དཀྲོལ་བ་བྱེ་བ་ཁྲག་ཁྲིག་བརྒྱ་སྟོང་གི་སྒྲ་སྐད་ཡིད་དུ་འོང་བ་འབྱུང་བ། 

77-1-67a

རིན་པོ་ཆེ་ཐམས་ཅད་ཀྱི་རྒྱན་སྣ་ཚོགས་རྣམ་པར་དག་པས་རྣམ་པར་བརྒྱན་པ། བྱང་ཆུབ་སེམས་དཔའི་ལས་རྣམ་པར་སྨྱིན་པས་མངོན་པར་གྲུབ་པ་ཞིག་ཡོད་པ། དེའི་དབུས་སུ་སེང་གེའི་ཁྲི་
ཆེན་པོ་རིན་པོ་ཆེ་སྣ་བཅུ་ལས་གྲུབ་པའི་སའི་གཞི་སྣ་ཚོགས་ལ་གནས་པ། རིན་པོ་ཆེའི་ཁྲི་འཕང་སྣ་ཚོགས་བཅུའི་འཁོར་གྱིས་རྣམ་པར་མཛེས་པར་བྱས་པ། རིན་པོ་ཆེའི་ཤིང་ཡལ་ག་ཅན་
བཅུས་སྟེགས་བུའི་མཚམས་རྣམ་པར་གྲུབ་པར་ཀླུབས་པའི་རྒྱན་མཛེས་པ་དང་ལྡན་པ། རྡོ་རྗེའི་འཁོར་ལོའི་སའི་གཞི་མི་ཤིགས་པ་ལ་རྐང་པ་རབ་ཏུ་རྟེན་པ། རིན་པོ་ཆེ་ཐམས་ཅད་ཀྱི་གཟུགས་དང་། 
མདོག་ཡོངས་སུ་འཛིན་པའི་སྟན་གྱི་འཁོར་ལོ་ཅན། རིན་པོ་ཆེ་དུ་མ་ལས་བྱས་པའི་སྤོག་རེའི་རྒྱན་བརྒྱ་ཕྲག་དུ་མས་བརྒྱན་པ། རིན་པོ་ཆེ་སྣ་ཚོགས་ཀྱི་ཚོམ་བུ་རྣམ་པ་ཐ་དད་པའི་རྒྱན་གྱིས་ཤིན་ཏུ་
བརྒྱན་པ་རིན་པོ་ཆེའི་རྒྱལ་མཚན་ཀུན་ནས་རྣམ་པར་ཕྱེ་སྟེ། འབྲེལ་བར་བསྒྲེང་བ་རིན་པོ་ཆེ་སྣ་ཚོགས་ཀྱི་བ་དན་སྤྱངས་པ། རྣམ་པ་ཐ་དད་པའི་རྒྱན་དང་ལྡན་པ། རིན་པོ་ཆེའི་དྲིལ་བུའི་དྲ་བས་བརྒྱན་
པའི་ལྷ་རྫས་ཀྱི་རིན་པོ་ཆེ་སྣ་ཚོགས་དང་། གསེར་གྱི་དྲ་བ་སྣ་ཚོགས་རྣམ་པར་བྲེས་པ། རིན་པོ་ཆེ་སྣ་ཚོགས་ཀྱི་མེ་ཏོག་གི་དྲ་བ་དང་། རིན་པོ་ཆེའི་རྒྱལ་པོ་ཆེན་པོའི་དྲ་བ་དང་། གོས་རིན་པོ་ཆེ་སྣ་ཚོགས་
དང་། རིན་པོ་ཆེའི་དྲ་བས་ཅི་རིགས་སུ་ཀུན་ནས་བཀབ་ཅིང་མཛེས་པར་བྱས་པའི་རྒྱན་དང་ལྡན་པ། སྤོས་རིན་པོ་ཆེ་རྣམ་པ་ཐ་དད་པའི་ཚོགས་ལས་སྙིམ་པས་བཅུས་ཤིང་སྤོས་ཀྱི་སྤྲིན་མངོན་པར་
གཏོར་བ། རིན་པོ་ཆེའི་རྒྱལ་པོ་ཁ་དོག་དང་དྲི་བསམ་གྱིས་མི་ཁྱབ་པ་ལས་བྱུང་བའི་དབྱིབས་ཡིད་དུ་འོང་བ་སྣ་ཚོགས་དང་། སྤོས་ཐམས་ཅད་ཀྱི་ན་བུན་དང་སྤྲིན་འབྱུང་བ། གམ་ཡོ་ནས་ལྷ་རྫས་ཀྱི་སྤོས་དང་། 

77-1-67b

བདུག་སྤོས་སྣ་ཚོགས་ཀྱིས་རབ་ཏུ་བདུགས་པ། ལྷ་རྫས་ལས་ཀྱང་འདས་པའི་སྟན་རེག་ན་བདེ་བ་ཁ་དོག་བཟང་པོ་དུ་མ་ཅན་ལེགས་པར་གཏིང་བ། ལྷ་རྫས་ཀྱི་རོལ་མོ་དང་གླུ་སྙན་པ་དུ་མ་ཡིད་དུ་འོང་བ་བརྒྱ་
སྟོང་དུ་མའི་སྒྲ་ཀུན་ནས་འབྱུང་བ། རིན་པོ་ཆེ་སྣ་ཚོགས་གྱི་ཐེམ་སྐས་ཀྱི་ཕྲེང་བ་བ་དན་གྱིས་རྣམ་པར་ཀླུབས་པས། རབ་ཏུ་བརྒྱན་པའི་རྒྱན་དང་ལྡན་པ། རིན་པོ་ཆེའི་འབྲུའི་གཟུགས་རིན་པོ་ཆེ་སྣ་ཚོགས་
ཀྱིས་སྤྲས་པ་རྣམ་པར་འཕྲུལ་པ་སྣ་ཚོགས་ཀྱིས་རྣམ་པར་སྣང་བར་བྱེད་པའི་འོད་དང་ལྡན་པ་མངོན་པར་གྲུབ་སྟེ། དེ་ལ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ། 
གཟུགས་བཟང་བ་ཤིན་ཏུ་མཛེས་པ། བལྟ་ན་སྡུག་པ་ཁ་དོག་བཟང་པོ་དམ་པ་རྒྱས་པ་དང་ལྡན་པ་མི་ཆེན་པོའི་མཚན་སུམ་བཅུ་རྩ་གཉིས་རྣམ་པར་དག་པ་རབ་ཏུ་ཐོབ་པ། རིན་པོ་ཆེ་རྣམ་པར་སྣང་བའི་ཅོད་
པན་ཅན། རྡོ་རྗེ་མཐུ་བོ་ཆེ་ལྟར་འཁྲིགས་ཤིང་མི་ཤིགས་པའི་ལུས་དང་ལྡན་པ། རྩིབ་མའི་མཚམས་ཐགས་བཟང་ཞིང་བརྟེན་པར་འབྲེལ་བ། ཡན་ལག་དང་ཉིང་ལག་ཐམས་ཅད་ཡོངས་སུ་བཟང་
བ་ཀུན་ནས་བཟང་བ། ཀུན་ནས་མཛེས་པ་ཀུན་ནས་སྡུག་པ། རྣམ་པའི་མཆོག་ཐམས་ཅད་དང་ལྡན་པ། ཆོས་གྱི་རྒྱལ་པོ་ཆེན་པོའི་རིགས་སུ་བྱུང་བ། ཡོ་བྱད་ཐམས་ཅད་ལ་དབང་རབ་ཏུ་ཐོབ་པ། 
ཆོས་ཀྱི་དབང་ཤིན་ཏུ་རྣམ་པར་དག་པ། རང་གི་སེམས་ལ་དབང་བསྒྱུར་བ། ཚིག་གི་དཀྱིལ་འཁོར་ལ་མཁས་པ། མི་འཁྲུགས་པའི་ཡེ་ཤེས་དང་ལྡན་པ། ཆོས་ཀྱི་སྦྱོར་བ་མ་ནོར་བ་ཤིན་ཏུ་
བརྟན་པར་བྱས་པ། ཡོན་ཏན་དང་ལེགས་པ་མཐའ་ཡས་པར་བརྗོད་དུ་ཡོད་པ་དེ་འདུག་པར་གྱུར་ཏོ། །རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེ་སེང་གེའི་ཁྲི་

77-1-68a

ཆེན་པོ་ལ་འདུག་པ་དང་། སྟེང་གི་སྤྱི་བོའི་ཐད་ཀའི་བར་སྣང་ལ་གདུགས་ཀྱི་དཀྱིལ་འཁོར་ཆེན་པོ་རིན་པོ་ཆེ་སྣ་ཚོགས་རྣམ་པར་འབྲེལ་བའི་ཡུ་བ་ཅན་ནོར་བུ་རིན་པོ་ཆེ་དམ་པའི་མཛོད་
ཀྱི་སྙིང་པོ་དང་ལྡན་པ། རིན་པོ་ཆེ་སྣ་ཚོགས་ཀྱི་ཤར་བུ་བརྒྱ་སྟོང་ལེགས་པར་བྲེས་པ། རིན་པོ་ཆེ་དུ་མའི་འོད་འཕྲོ་བ། དཔལ་གྱི་གཟི་བརྗིད་རབ་ཏུ་འབར་བས་རྣམ་པར་བརྒྱན་པ། འཛམ་
བུ་ཆུ་ཀླུང་གི་གསེར་གྱི་འོད་འཚེར་ཞིང་གསལ་ལ་རྣམ་པར་དག་པས་བླ་ནས་བཀབ་པ། རིན་པོ་ཆེ་སྣ་ཚོགས་སྤ་བར་སྤེལ་བས་སྤྲས་པའི་གསེར་གྱི་དྲ་བས་ནང་ཤུན་གྱི་རྒྱན་བྱས་པ་མུ་ཏིག་སྣ་
ཚོགས་ཀྱི་སེ་མོ་དོ་མངོན་པར་སྤྱངས་པ་རིན་པོ་ཆེ་སྣ་ཚོགས་ཀྱི་དྲ་བས་ཀུན་ནས་བཀབ་པ། རིན་པོ་ཆེའི་དྲིལ་བུའི་དྲ་བ་ལས་གསེར་རིན་པོ་ཆེའི་དྲིལ་ཆེན་རིན་པོ་ཆེའི་ཆུན་པོའི་ལྡ་ལྡི་
ལ་བརྒྱུས་པ་མངོན་པར་སྤྱངས་པ། ནོར་བུ་རིན་པོ་ཆེ་དམ་པའི་འཕྲེང་བ་ཀུན་ནས་མངོན་པར་འབྱུང་པའི་རྒྱན་དང་ལྡན་པ། ལྷ་རྫས་ཀྱི་སྒྲ་ཡིད་དུ་འོང་བའི་གདངས་གྲག་པར་འབྱུང་བ། 
སེམས་ཅན་ཐམས་ཅད་དགེ་བའི་ལས་ཀྱི་ལམ་ལ་བསྐུལ་བའི་དྲིལ་གྱི་སྒྲ་རྣམ་པར་གྲག་པ་བྱུང་བར་གྱུར་ཏེ། རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེ། རིན་
པོ་ཆེའི་རྡུལ་ཡབ་ཀྱིས་མངོན་པར་གཡོབ་ཅིང་། ལྷའི་དབང་པོ་བརྒྱ་བྱིན་པས་ཀྱང་ལྷག་པར་གཟི་བརྗིད་རབ་ཏུ་འབར་བས་ཤིན་ཏུ་མཛེས་སོ། །དེ་སེང་གེའི་ཁྲི་དེ་ལ་འདུག་མ་ཐག་ཏུ་འགྲོ་བ་མང་པོ་དེ་དག་
ཐམས་ཅད་མངོན་དུ་གྱུར་ཏེ། ཐལ་མོ་སྦྱར་ནས་རྒྱལ་པོ་དེ་ལ་ཕྱག་འཚལ་ལོ། །དེ་ནས་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེའི་དྲུང་དུ་སློང་བའི་སྲོག་ཆགས་

77-1-68b

བྱེ་བ་ཁྲག་ཁྲིག་བརྒྱ་སྟོང་སྣ་ཚོགས་དངོས་པོ་སྣ་ཚོགས་ཡོངས་སུ་ལེན་པ་ཡོ་བྱད་སྣ་ཚོགས་ལ་མོས་པ། རིགས་སྣ་ཚོགས་དང་ལྡན་པ། འགྲོ་བའི་རྒྱུད་སྣ་ཚོགས་སུ་གཏོགས་པ། འདོད་པ་སྣ་ཚོགས་
ཀྱི་སེམས་དང་ལྡན་པ། སྨོན་པ་དང་བསམ་པ་སྣ་ཚོགས་ཅན། ཕྱོགས་སྣ་ཚོགས་ནས་འདུས་པ། ཡུལ་གྱི་སྤྱོད་པ་སྣ་ཚོགས་ལ་གནས་པ། ལོངས་སྤྱོད་སྣ་ཚོགས་ལ་མངོན་པར་སྨོན་པའི་སེམས་
དང་ལྡན་པ། བསམ་པ་ཡོངས་སུ་རྟོག་པ་སྣ་ཚོགས་ཅན། མིའི་རིས་སྣ་ཚོགས་སུ་གཏོགས་པ། རིགས་ཀྱི་སྐྱེ་གནས་སྣ་ཚོགས་སུ་སྐྱེས་པ། ཡུལ་སྣ་ཚོགས་ནས་འོངས་པ། སྒྲ་སྐད་དང་ཚིག་གི་
འདུ་བྱེད་སྣ་ཚོགས་དང་ལྡན་པ། དབྱངས་ཀྱི་དཀྱིལ་འཁོར་སྣ་ཚོགས་འབྱིན་པ། དངོས་པོ་སྣ་ཚོགས་ཀྱི་དོན་དུ་གསོལ་བ་འདེབས་པ། ཚིག་དང་ངག་སྣ་ཚོགས་བརྗོད་པ། བསོད་ནམས་ཀྱི་རི་རབ་ཆེན་
པོ་དེ་འབའ་ཤིག་གི་གདོང་དུ་ལྟ་བ་འདི་འབའ་ཤིག་ཤེས་པའི་སྐྱེས་བུ་ཆེན་པོ་ཡིན་ཞེས་ངེས་པར་སེམས་པ། བསོད་ནམས་ཆེན་པོས་བརྟན་པའོ། །སྐྱེས་བུ་ཆེན་པོའི་ཟླ་བའོ། །གཏོང་བ་ཆེན་པོའི་
བསམ་པ་དང་ལྡན་པའོ། །ཞེས་བྱ་བར་འདུན་པའི་སེམས་ཀྱིས་རྟོག་པ། བྱང་ཆུབ་སེམས་དཔའི་སྨོན་ལམ་གྱིས་འདུས་པ་བྱང་ཆུབ་སེམས་དཔའི་སྨོན་ལམ་གྱི་སེམས་ཀྱིས་སྤྲུལ་པའི་སློངས་
མོ་བའི་ཚོགས་ཆེན་པོ་དེ་མཐོང་ནས། སློངས་མོ་བ་དེ་དག་ལ་སེམས་དགའ་བ་དང་སེམས་མོས་པ་དང་། སེམས་སྤྲོ་བ་དང་དགེ་བའི་བཤེས་གཉེན་མཐོང་བའི་འདུ་ཤེས་སུ་གྱུར་ཏོ། །སྙིང་རྗེ་ཆེན་
པོའི་ཤུགས་དྲག་པོ་ཤིན་ཏུ་ཡངས་པ་ཡང་བྱུང་བར་གྱུར་ཏོ། །ཕྱི་མའི་མཐའི་བསྐལ་པར་སློངས་མོ་བ་ཐམས་ཅད་ཡོངས་སུ་ཚིམ་པར་བྱ་བ་ལས་ཕྱིར་མི་ལྡོག་པའི་བརྩོན་འགྲུས་ཤུགས་དྲག་པོ་ཡང་སྐྱེས་པར་

77-1-69a

གྱུར་ཏོ། །འགྲོ་བ་ཐམས་ཅད་དུ་སྙོམས་པའི་སྦྱོར་བས་ཡོངས་སུ་གཏང་བའི་སེམས་ཀྱིས་རྒྱས་པར་དགང་བའི་སྤྲིན་ཀྱང་མངོན་པར་བྱུང་བར་གྱུར་ཏེ། རྒྱལ་པོ་ཆོས་ཐམས་ཅད་ཀྱི་ང་རོའི་
གདུགས་ཀྱི་འཁོར་རབ་ཏུ་སྒྲོག་པ་དེས། སློངས་མོ་བ་དེ་དག་མཐོང་བའི་མོད་ལ་དེའི་རྒྱུས་ཆོས་ལ་དགའ་བས་འགྱུར་གྱི། བསྐལ་པ་མཚམས་མེད་པའི་མཐས་ཀླས་པར་སྟོང་གསུམ་གྱི་འཁོར་ལོ་
བསྒྱུར་བའི་རྒྱལ་པོ་ཐོབ་པས་ནི་མ་ཡིན་ནོ། །བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོའི་མཐས་ཀླས་པར་བརྒྱ་བྱིན་གྱི་དབང་ལ་གནས་པས་མ་ཡིན་ནོ། །བསྐལ་པ་བྱེ་བ་ཁྲག་ཁྲིག་སྟོང་
མང་པོའི་མཐས་ཀླས་པར་རབ་མཚེ་མའི་ལྷའི་རྒྱལ་པོའི་དབང་ལ་གནས་པ་ཐོབ་པས་ནི་མ་ཡིན་ནོ། །བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོའི་མཐས་ཀླས་པར་རབ་ཏུ་དགའ་ལྡན་གྱི་ལྷའི་
རྒྱལ་པོའི་དབང་ལ་གནས་པས་ནི་མ་ཡིན་ནོ། །བསྐལ་པ་ཚད་མེད་པའི་མཐས་ཀླས་པར་རབ་འཕྲུལ་དགའི་ལྷའི་རྒྱལ་པོའི་དབང་ཕྱུག་གི་དབང་ལ་གནས་པ་ཐོབ་པས་ནི་མ་ཡིན་ནོ། །བསྐལ་པ་
བསམ་གྱིས་མི་ཁྱབ་པའི་མཐས་ཀླས་པར་དབང་བསྒྱུར་གྱི་ལྷའི་རྒྱལ་པོའི་དབང་རབ་ཏུ་ཐོབ་པ་སྟེ། ལྷའི་བུ་མོ་བཞིན་བཟང་མོ་ཡིད་དུ་འོང་བས་བསྙེན་བཀུར་བས་ནི་མ་ཡིན་ནོ། །བསྐལ་པ་བརྗོད་དུ་མེད་
པའི་མཐའ་ཀླས་པར་ཚངས་པའི་གནས་ཀྱི་བདེ་བས་ཚངས་པའི་ཐབས་ལ་གནས་པ་ཐོབ་པས་ནི་མ་ཡིན་ནོ། །བསྐལ་པ་མཐའ་ཡས་པའི་མཐས་ཀླས་པར་གྱ་ནོམ་སྣང་བའི་ལྷའི་བདེ་བ་ཐོབ་པས་
ནི་མ་ཡིན་ནོ། །བསྐལ་པ་དཔག་ཏུ་མེད་ཅིང་མི་ཟད་པར་དགེ་རྒྱས་ཀྱིས་ལྷའི་བདེ་བ་ཐོབ་པས་ནི་མ་ཡིན་ནོ། །བསྐལ་པ་མུ་མེད་པའི་མཐས་ཀླས་པར་གནས་གཙང་མའི་ལྷའི་རྣམ་པར་ཐར་པ་ཞི་

77-1-69b

བའི་བདེ་བ་ལ་རྣམ་པར་སྤྱོད་པ་ཐོབ་པས་མ་ཡིན་ནོ། །རིགས་ཀྱི་བུ་འདི་ལྟ་སྟེ་དཔེར་ན། སྐྱེས་བུ་སྲེད་པ་ལ་སྤྱོད་པ། ཕ་མ་དང་ཕུ་ནུ་དང་། བུ་སྲིང་དང་མཛའ་བོ་དང་། བློན་པོ་དང་གཉེན་བཤེས་དང་། 
བུ་དང་བུ་མོ་དང་ཆུང་མ་དང་། ཡུན་རིང་པོ་ཞིག་ཏུ་བྲལ་ལ་འབྲོག་དགོན་པར་འཁྱམས་ཏེ། དེ་དག་དང་ཕྲད་ན་དེ་དག་མཐོང་བས་མི་ངོམས་ཞིང་དགའ་བ་དང་ཆགས་པ་ཆེན་པོ་སྐྱེ་བར་འགྱུར་རོ། །རིགས་
ཀྱི་བུ་དེ་བཞིན་དུ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོགས་པས། སློངས་མོ་པ་དེ་དག་མཐོང་བར་གྱུར་པའི་མོད་ལ་དགའ་བའི་ཤུགས་ཆེན་པོ་སྐྱེས་སོ། །
སེམས་ཀྱི་དགའ་བའི་རོ་བདེ་བ་དང་ལྡན་པར་གྱུར་ཏོ། །སེམས་སྤྲོ་བའི་ཤུགས་རབ་ཏུ་བྱུང་ངོ་། །རབ་ཏུ་དགའ་བ་ཆེན་པོའི་ཤུགས་ཡོངས་སུ་སྐྱེས་སོ། །སངས་རྒྱས་ཀྱི་བྱང་ཆུབ་ཏུ་དད་པ་དང་། མོས་
པའི་ཤུགས་ཀྱི་སྟོབས་ཆེན་པོ་འཕེལ་ཏོ། །ཐམས་ཅད་མཁྱེན་པ་ཉིད་དུ་རྩ་བ་བརྟན་པའི་དད་པ་རྣམ་པར་འཕེལ་ལོ། །སངས་རྒྱས་ཐམས་ཅད་ཀྱི་ཆོས་ལྟར་ལྷག་པའི་བསམ་པ་རྣམ་པར་དག་པའི་སྟོབས་
མངོན་པར་འཕེལ་ཏོ། །བྱང་ཆུབ་སེམས་དཔའི་དབང་པོ་ལས་སུ་རུང་བ་ཡོངས་སུ་བྱུང་ངོ་། །སེམས་དགའ་བས་རྒྱས་པས་མོས་པའི་ཤུགས་ཆེན་པོ་སྐྱེས་པར་གྱུར་ཏོ། །སེམས་སྤྲོ་བའི་ཤུགས་
ཡངས་པས་དགེ་བའི་བཤེས་གཉེན་ལ་དབང་པོ་དང་། བསམ་པ་ཤིན་ཏུ་གུས་པར་གྱུར་ཏོ། །དེ་ཅིའི་ཕྱིར་ཞེ་ན། རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་
ཐམས་ཅད་མཁྱེན་པ་ཉིད་དུ་དམྱིགས་པ་ལ་བརྩོན་པ། ཐམས་ཅད་མཁྱེན་པ་ཉིད་ལ་རབ་ཏུ་གཞོལ་བ། ཐམས་ཅད་མཁྱེན་པ་ཉིད་ཀྱི་ལམ་དང་སྒོ་ལ་མངོན་དུ་བལྟས་པ། འགྲོ་བ་ཐམས་ཅད་

77-1-70a

ཤིན་ཏུ་ཚིམ་པར་བྱས་པའི་ཡིད་ལ་བྱ་བ་ལ་བརྩོན་པ། སངས་རྒྱས་ཐམས་ཅད་ཀྱི་ཡོན་ཏན་རྒྱ་མཚོ་ལ་འཇུག་པའི་ནན་ཏན་ལ་འདུན་པ། བདུད་དང་ལས་དང་ཉོན་མོངས་པའི་སྒྲིབ་
པ་ཐམས་ཅད་ཀྱི་རི་རྣམ་པར་འཐོར་བ་ལ་བརྩོན་པ། དེ་བཞིན་གཤེགས་པ་ཐམས་ཅད་ཀྱི་གདམས་ངག་འཐུན་པར་བླང་བ་ལ་སྟ་གོན་དུ་གནས་པ། དགེ་བའི་རྩ་བ་རྒྱ་མཚོ་སྒོ་ཀུན་ནས། ཡོངས་
སུ་བསྡུ་བ་ལ་བརྩོན་པའི་སྙིང་པོ་ཅན། མངོན་པར་ཞེན་པ་ཐམས་ཅད་ལས་གྱེན་དུ་འཕགས་པའི་རྒྱུད་དང་ལྡན་པ། འཇིག་རྟེན་གྱི་ཡུལ་ཐམས་ཅད་ལ་མངོན་པར་ཞེན་པ་མེད་པ། ཆོས་ཀྱི་
རང་བཞིན་ནམ་མཁའི་སྤྱོད་ཡུལ་ཅན། དེས་སློངས་མོ་བ་དེ་དག་ལ་བུ་གཅིག་པའི་འདུ་ཤེས་བསྐྱེད་པའི་ཕྱིར་རོ། །ཕ་དང་མའི་འདུ་ཤེས་དང་། སྦྱིན་པའི་གནས་ཀྱི་འདུ་ཤེས་དང་། དགེ་བའི་
བཤེས་གཉེན་གྱི་འདུ་ཤེས་དང་། དཀོན་པའི་འདུ་ཤེས་དང་། དཀའ་བ་བྱེད་པའི་འདུ་ཤེས་དང་། མང་པོ་བྱས་པའི་འདུ་ཤེས་དང་། ཕན་འདོགས་པ་དམ་པའི་འདུ་ཤེས་དང་། བྱང་ཆུབ་གྱི་ལམ་ཉེ་བར་སྟོན་
པའི་འདུ་ཤེས་དང་། མཁན་པོའི་འདུ་ཤེས་དང་། སྟོན་པའི་འདུ་ཤེས་བསྐྱེད་པའི་ཕྱིར་ཏེ། དེ་ལྟར་དེས་སློངས་མོ་བ་དེ་དག་དོན་ཅི་ལས་འོངས་པ་དང་། དོན་ཅི་ལ་ཕྱིན་པ་དང་། དུས་ཇི་ཙམ་ན་འདུས་
པ་དང་། ཡུན་གང་དང་གང་ན་གནས་པ་དང་། དངོས་པོ་ཅི་དང་ཅི་སློང་བ་དང་། རྣམ་པ་གང་འདོད་པ་དང་། བསམ་པ་ཅི་འདྲ་བ་དང་། ཅི་དང་ཅི་ལ་སྨོན་པ་དང་། ཅི་དང་ཅི་འདོད་པ་དང་། དངོས་པོ་གང་དང་
གང་ཚོལ་བ་དེ་དག་ཐམས་ཅད་ཚུལ་བཞིན་དུ་མི་དགའ་བ་མེད་པའི་བྱམས་པ་ཆེན་པོའི་དཀྱིལ་འཁོར་དང་། སློངས་མོའི་འགྲོ་བ་ལས་ཕྱིར་ཕྱོགས་སུ་མ་བལྟས་པའི་གཏོང་བ་ཆེན་པོའི་འོད་གཟེར་དང་། 

77-1-70b

སེམས་ཅན་ཐམས་ཅད་ལ་སྙོམས་པར་སྦྱོར་བའི་གཏོང་བའི་སྒོས་ཡོངས་སུ་ཚིམ་པར་བྱས་སོ། །དེས་ཟས་འདོད་པ་ལ་ནི་ཟས་བྱིན་ནོ། །སྐོམ་འདོད་པ་ལ་ནི་སྐོམ་བྱིན་ནོ། །གོས་འདོད་པ་ལ་ནི་གོས་བྱིན་
ནོ། །མེ་ཏོག་འདོད་པ་ལ་ནི་མེ་ཏོག་བྱིན་ནོ། །དེ་བཞིན་དུ་སྤོས་དང་། ཕྲེང་བ་དང་བྱུག་པ་དང་། ཕྱེ་མ་དང་གོས་དང་། གདུགས་དང་། རྒྱལ་མཚན་དང་། བ་དན་དང་རིན་པོ་ཆེ་དང་། རྒྱན་དང་སྟན་དང་། 
མལ་ཆ་དང་། ཁྱིམ་དང་གཞལ་མེད་ཁང་དང་། གཙུག་ལག་ཁང་དང་། བཟའ་ཤིང་གི་ར་བ་དང་། ཀུན་དགའི་ར་བ་དང་། དཀའ་ཐུབ་ཀྱི་ནགས་ཚལ་དང་། རྟ་དང་གླང་པོ་ཆེ་དང་། ཤིང་རྟ་དང་རྐང་ཐང་
དང་། གལ་བ་དང་། ཁྱོགས་དང་བཞོན་པ་དང་། གསེར་དང་དབྱིག་དང་། ནོར་བུ་དང་མུ་ཏིག་དང་། དུང་དང་མན་ཤེལ་དང་། བྱི་རུ་དང་ས་ལེ་སྦྲམ་དང་། དངུལ་དག་ཀྱང་བྱིན་པར་གྱུར་ཏོ། །རང་གི་ཁྱིམ་
དང་། གཞལ་མེད་ཁང་དང་། བཙུན་མོའི་འཁོར་དང་གཡོག་འཁོར་དང་། རྒྱལ་པོའི་མཛོད་ཐམས་ཅད་ཀྱང་ཕྱེ་སྟེ། བགོས་པ་ནས་རབ་ཏུ་བཏང་བར་གྱུར་ཏེ། སུ་ཅི་འདོད་པ་དེ་དག་དེ་ཁྱེར་ཅིག་ཅེས་
ནས། ཡུལ་འདོད་པ་དག་ཀྱང་ཡུལ་བྱིན་ནོ། །གྲོང་འདོད་པ་དག་ཀྱང་གྲོང་བྱིན་ནོ། །གྲོང་ཁྱེར་འདོད་པ་དག་ཀྱང་གྲོང་ཁྱེར་བྱིན་ཏེ། སེམས་ཅན་ཐམས་ཅད་ལ་སྙོམས་པར་ཞུགས་པ་དེས་སློངས་མོ་བ་
དེ་དག་ཐམས་ཅད་ལ་ཅི་བདོག་པ་ཡོངས་སུ་བཏང་སྟེ། དངོས་པོ་ཐམས་ཅད་ཡོངས་སུ་བཏང་བས་མངོན་པར་སྡུད་དོ།། །།སངས་རྒྱས་རྨད་ག་ཆད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། 
བམ་པོ་ལྔ་པ། དེའི་ཚེ་ཚོང་དཔོན་གྱི་བུ་མོ་རིན་པོ་ཆེ་འོད་ཅེས་བྱ་བ་བུ་མོ་དྲུག་ཅུའི་འཁོར་དང་ལྡན་པ། གཟུགས་བཟང་ཞིང་མཛེས་ལ་བལྟ་ན་སྡུག་པ། ཁ་དོག་ཟང་པོའི་དམ་པ་རྒྱས་པ་

77-1-71a

དང་ལྡན་པ། མདོག་གསེར་གྱི་ཁ་དོག་ལྟ་བུ་དང་ལྡན་པ། སྐྲ་མཐོན་ཏིང་དུ་འདུག་པ། མིག་དཀར་ནག་འབྱེས་པ། དྲི་ཞིམ་པོ་ཡིད་དུ་འོང་བ་དང་ལྡན་པ། ཚངས་པའི་དབྱངས་དང་
ལྡན་པ། གོས་བཟང་རྒྱན་གྱིས་ལེགས་པར་བརྒྱན་པ། དྲན་པ་དང་བློ་གྲོས་དང་། རིག་པ་དང་ཁྲེལ་ཡོད་པ། དགའ་བ་དང་ངོ་ཚ་ཤེས་པ་དང་། སྤྱོད་པ་དང་ཆ་ལུགས་ཕུན་སུམ་
ཚོགས་པ། བླ་མ་ལ་སྲིད་ཞུ་དང་ལྡན་པ། ཤེས་བཞིན་གྱི་དམ་པས་སྤྱོད་པ། བྱེད་དགུ་ཟབ་པ། ཆོས་བླང་བ་དང་། གཟུང་བ་དང་། ཁོང་དུ་ཆུད་པར་བྱ་བ་ལ་ཡིད་གཞུངས་པ་དང་ལྡན་པ། 
སྔོན་དགེ་བའི་རྩ་བ་ལ་ལེགས་པར་བྱས་པ། ཆོས་གྱིས་མངོན་པར་བརླན་པའི་སེམས་གྱི་རྒྱུད་རབ་ཏུ་དང་བ། དགེ་བའི་བསམ་པ་རྣམ་པར་དག་པ། མོས་པ་ཡངས་པ། ནམ་མཁའི་
སྤྱོད་ཡུལ་ཅན། གཞན་ལ་ཕན་པར་དགའ་བའི་སེམས་དང་ལྡན་པ། སངས་རྒྱས་ལྟ་བའི་ཕྱོགས་ལ་རྣམ་པར་བལྟས་པ་ཐམས་ཅད་མཁྱེན་པའི་ཡེ་ཤེས་ལ་མངོན་པར་འདུན་པ་
ཞིག་མཆོད་བྱིན་གྱི་ར་བ་ཆེན་པོ་དེར་འོངས་ཏེ། ཚོང་དཔོན་གྱི་བུ་མོ་རིན་པོ་ཆེའི་འོད་ཅེས་བྱ་བ་དེ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པའི་སེང་གེའི་
ཁྲི་ཆེན་པོའི་གཡས་རོལ་ཧ་ཅང་མི་རིང་བ་ཞིག་ན་འདུག་སྟེ། རྒྱལ་པོ་དེ་ལ་ཕྱག་འཚལ་བ་ལས་ཕར་ཅི་ལ་ཡང་ལེན་པ་མེད་དོ། །དེ་ཕྱོགས་གཅིག་ན་འདུག་ཅིང་སེམས་འདི་ལྟར་བསྐྱེད་
པར་གྱུར་ཏེ། བདག་གིས་དགེ་བའི་བཤེས་གཉེན་འདི་ལྟ་བུ་མཐོང་ཞིང་འགྲོགས་སུ་ཡོད་པ་ནི་བདག་གིས་ཐོབ་པར་བྱ་བ་ལེགས་པར་ཐོབ་པོ་སྙམ་སྟེ། དེས་རྒྱལ་པོ་ཆོས་ཐམས་

77-1-71b

ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེ་ལ་དགེ་བའི་བཤེས་གཉེན་གྱི་འདུ་ཤེས་དང་། སྟོན་པའི་འདུ་ཤེས་དང་། སྙིང་བརྩེ་བར་བྱེད་པའི་འདུ་ཤེས་དང་། ཕན་འདོགས་པའི་
འདུ་ཤེས་དང་། སངས་རྒྱས་ཀྱི་འདུ་ཤེས་བསྐྱེད་དེ་གཡོ་སྒྱུ་མེད་པའི་སེམས་ཀྱིས་དགའ་བ་དང་མོས་པ་དང་། སྤྲོ་བའི་ཤུགས་རབ་ཏུ་ཡངས་པ་ཐོབ་པས། རང་གི་རྒྱན་རྣམས་ལུས་ལས་
བཀྲོལ་ཏེ། རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་གང་ན་བ་དེར་མངོན་པར་བལྟས་ཏེ། གཏོར་བ་དང་དེ་དག་དེའི་སེང་གེའི་ཁྲི་འཕང་གི་སའི་སྟེང་དུ་
གྲམ་པར་གྱུར་ཏོ། །དེའི་རྒྱན་དེ་དག་དེ་ལྟར་གཏོར་ནས་སྨོན་ལམ་བཏབ་པ། ཇི་ལྟར་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་འདི་སེམས་ཅན་
མགོན་མེད་ཅིང་མུན་པའི་ནང་ན་འཐོམས་པ་རྣམས་ཀྱི་མགོན་སྐྱབས་སུ་གྱུར་པ་དེ་ལྟར་བདག་ཀྱང་མ་འོངས་པའི་དུས་ན་འགྱུར་བར་ཤོག་ཤིག །འདས་པའི་དེ་བཞིན་གཤེགས་པ་དེ་
དག་གི་ཀྱང་བདག་གིས་ཀྱང་ཤེས་པར་ཤོག་ཤིག །འདི་ལྟར་ཐེག་པ་གང་གིས་འབྱུང་བ་དེས་བདག་ཀྱང་འབྱུང་བར་ཤོག་ཤིག །འདི་ལམ་གང་ནས་ཞུགས་པ་དེ་ནས་བདག་ཀྱང་
འཇུག་པར་ཤོག་ཤིག །ཇི་ལྟར་འདི་གཟུགས་བལྟ་ན་གཏང་མི་བྲ་ལ་ཟད་མི་ཤེས་པའི་ལོངས་སྤྱོད་དང་ལྡན་ཏེ། གཡོག་འཁོར་མཐའ་ཡས་ལ་གཞན་གྱི་མི་ཐུབ་ཅིང་
ཐུབ་པར་དཀའ་སྟེ། ཐུབ་པ་མེད་པ་དེ་བཞིན་བདག་ཀྱང་ཤོག་ཤིག །འདི་གང་དང་གང་དུ་སྐྱེ་བར་འགྱུར་བ་དེ་དང་དེར་བདག་ཀྱང་སྐྱེ་བར་འགྱུར་བར་ཤོག་ཤིག །སྙམ་པ་དང་དེ་དེ་

77-1-72a

ལྟར་སེམས་ཤིང་ཡིད་ལ་བྱེད་པ་ལ་བརྩོན་པ། རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོགས་པས་ཤེས་ནས་དེ་ལ་བསྟས་ཏེ། འདི་སྐད་ཅེས་སྨྲས་
སོ། །བུ་མོ་ཁྱོད་ལ་ཅི་དགོས་པ་ཁྱེར་ཅིག །བུ་མོ་དེ་ནི་བདོག་པ་ཐམས་ཅད་ཡོངས་སུ་གཏོང་བ་སྟེ། སེམས་ཅན་ཐམས་ཅད་ཡོངས་སུ་ཚིམ་པར་བྱ་བ་ལ་ཞུགས་པའོ། །དེ་སྐད་ཅེས་
བྱས་པ་དང་། དེའི་ཡིད་ལ་ཡང་བདག་ནི་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པས་ཐུགས་སུ་ཆུད་པར་གྱུར་ཏོ། །སྙམ་ནས་དེ་བས་ཀྱང་མོས་པར་གྱུར་ཏོ། །
དེ་དེ་ལྟར་མོས་པའི་སེམས་སུ་གྱུར་ཏེ། དགེ་བའི་རྩ་བ་ཡངས་ཤིང་རྒྱ་ཆེ་བའི་ཤུགས་ཡོངས་སུ་སྐྱེས་ནས་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ལ་དེའི་
ཚེ་ཚིགས་སུ་བཅད་པ་འདི་དག་སྨྲས་སོ། །སྔོན་ཅད་ས་ལས་རྣམ་བརྒྱན་སྤྲིན་འདི་ནི། །རྒྱལ་པོ་སེང་གེ་ཁྱོད་འཁྲུངས་མ་གྱུར་ཚེ། །མདངས་དཀར་མ་གྱུར་གཟི་བརྗིད་མ་མཆིས་ཏེ། །ཡི་
དགས་འཇིགས་པའི་གནས་དང་ཅི་མི་འདྲ། །མི་དག་ཀུན་ཀྱང་སྲོག་གཅོད་མོས་པར་གྱུར། །མ་བྱིན་ལེན་ལ་ཚུལ་དང་སྦྱོར་མ་མཆིས། །བརྫུན་དུ་སྨྲ་ཞིང་བརླང་བའི་ཚིག་ཀྱང་བརྗོད། །
ཕྲ་མ་ཁྱལ་བའི་ཚིག་ཀྱང་རབ་ཏུ་སྨྲ། །གཞན་གྱི་ནོར་ལ་ཆགས་པའི་སེམས་དང་ལྡན། །གང་ཟག་གཞན་ལ་ཀུན་ཀྱང་ངན་དུ་སེམས། །ལྟ་བའི་རྣམ་གནས་སྡིག་ཏོའི་སྤྱོད་ཡུལ་ཅན། །
ལོག་པའི་སྦྱོར་བས་ངན་པའི་འགྲོ་བར་ལྷུང་། །ཆོས་ངན་ཆོས་ལ་སྤྱོད་པའི་མྱི་རྣམས་ནི། །མ་རིག་གཏི་མུག་མུན་པས་བསྒྲིབས་པ་དག །ལྟ་བ་ལོག་ཞུགས་ཕྱིན་ཅི་ལོག་མཐོང་བས། །དགུང་

77-1-72b

ལོ་མང་པོར་དགུང་ཆར་བབ་མ་གྱུར། །དགུང་ཆར་མ་བབ་ས་བོན་ཆབ་འཚབ་ཏེ། །ལོ་ཐོག་མི་འཁྲུང་ཞུགས་ཤིང་འཁྲུངས་མ་གྱུར། །མཚོ་དང་ལུ་མ་ཆུ་བྲན་རྒྱུད་ཀྱང་སྐམས། །ནགས་ཚལ་རྩི་
ཤིང་ཀུན་ཀྱང་དེ་བཞིན་ཏེ། །རྣམ་དག་སྤྱན་ཁྱོད་འཁྲུངས་པར་མ་གྱུར་པས། །ཆུ་ཀླུང་དག་ཀྱང་མ་ལུས་སྐམས་པར་གྱུར། །བཟའ་ཤིང་ར་བ་ཀུན་ཀྱང་རི་དགོན་འདྲ། །རུས་པ་དཀར་པོས་དོག་ས་གཏམས་
པར་གྱུར། །གང་ཚེ་ཁྱོད་ལ་སློང་བ་མང་འདུས་ཏེ། །སློང་བ་ཐམས་ཅད་ཡོངས་སུ་ཚིམ་མཛད་ནས། །ཕྱོགས་བཞི་ཀུན་ནས་སྤྲིན་ཆེན་འདུས་པར་གྱུར། །ཐང་དང་གཤོང་རྣམས་ཀུན་ཀྱང་ངོམས་
པར་བགྱིས། །སླན་ཅད་རྐུན་ཆོམ་གཡོན་ཅན་ཆད་པར་གྱུར། །དགུམ་པ་མ་མཆིས་སུ་འང་གཟུང་མ་མཆིས། །མགོན་མེད་གང་ཡང་གུམ་པར་མི་འགྱུར་ཏེ། །ཁྱོད་ནི་འགྲོ་བ་མགོན་མེད་ཀུན་
ཀྱི་སྐྱབས། །སྲོག་གཅོད་པ་ལ་མངོན་པར་མོས་པའི་མྱི། །གཞན་རྣམས་བཀུམ་ཞིང་དེ་ཡི་ཁྲག་ལ་འཚལ། །གཅིག་ལ་གཅིག་གི་ཤ་འཚལ་གྱུར་པ་དག །ཁྱོད་ཀྱི་སྦྱིན་པ་ཆེན་པོས་
བྱམས་སེམས་གྱུར། །བརྒྱ་སྟོང་གྲངས་སུ་བགྲངས་པར་གྱུར་པ་ལས། །དེ་ཚེ་དགའ་ཞིང་རངས་པ་འཚལ་འགྱུར་གྱི། །གཞན་ནི་རྩ་དང་ལོ་མ་རི་དེ་འཚལ། །དེ་ཚེ་ཀུན་ཀྱང་ཡི་དགས་བཀྲེས་
མནར་བཞིན། །འགྲོ་བ་མགོན་མེད་མགོན་དུ་ཁྱོད་འཁྲུངས་ནས། །ས་བོན་མ་བཏབ་མ་རྨོས་འབྲས་ཀྱང་བྱུང་། །དཔག་བསམ་ཤིང་ལས་མཛོད་རྣམས་རྣམ་པར་འཐོན། །སྐྱེས་པ་བུད་མྱེད་
མཁས་པ་གདའ་བར་གྱུར། །ཟླ་བ་ཟླ་ཕྱེད་དོན་དུ་སྔོན་ཅད་ནི། །ལམ་ནོར་གནས་པ་སྩོགས་ཤིང་སྲིད་ཞུར་བགྱིད། །དེང་སང་རེད་པ་རབ་འཚལ་རྒྱན་མང་ལྡན། །དགའ་བའི་གནས་ན་རྩེ་བའི་ལྷ་ཡང་འདྲ། །

77-1-73a

སྔན་ཆད་ལོག་པ་རྣམས་ལ་མི་ཟད་ཞུགས། །ཆོས་ངན་འདོད་ཆགས་མྱི་རྣམས་ཞེན་ཅིང་ཆགས། །ན་ཆུང་གཞོན་ནུ་གཞན་གྱིས་བསྲུང་པ་རྣམས། །ནན་གྱིས་ཕྲོགས་རློམ་
ཆབ་འཚལ་མ་རུངས་བགྱིས། །ལྷ་མོ་བཟང་མོའི་ཁ་དོག་གཟུགས་ལྡན་པ། །གོས་བཟང་རྒྱན་ལྡན་དེང་སང་མཐོན་གྱུར་ཏེ། །གཞན་གྱི་བུད་མེད་སྤོས་དྲི་གདའ་མཆིས་ཀྱང་། །དགའ་
ལྡན་ཇི་བཞིན་མཆིས་བྲང་རྐྱེན་གྱིས་འཚལ། །ཤོ་བེ་བརླང་བ་ཕྲ་མ་ཀྱལ་པ་རྣམས། །སྔན་ཚད་གཡོ་སྒྱུའི་དབང་གིས་ངག་དུ་བརྗོད། །དེང་སང་ཚིག་གི་ནོངས་པ་བཞི་སྤངས་ཤིང་། །ལྟ་བ་
ངན་སྤངས་ཆོས་ལ་ཀུན་ཀྱང་སྤྱོད། །ཚངས་དབྱངས་ཀ་ལ་པིང་ཀའི་སྒྲར་བྱུང་བའི། །ཁྱོད་ཀྱི་གསུང་མཆོག་འདི་ཡི་ཆ་ཤས་ལ་འང་། །རོལ་མོ་སྒྲ་དབྱངས་ཤིན་ཏུ་སྙན་པ་དང་། །ལྷ་རྫས་གླུ་
དབྱངས་འདི་དག་ཉེར་མྱི་འགྱུར། །ཁྱོད་ཀྱི་སྤྱི་གཙུག་དབུ་སྟེངས་གདུགས་ལྡིང་བ། །རིན་ཆེན་རྒྱུས་བགྱིས་གསེར་གྱི་དྲ་བས་བཀབ། །དཔལ་གྱི་སྙིང་མཛོད་ཡུ་བ་བཻ་ཌུྰརྱ། །ཀུན་ནས་རིན་ཆེན་
མཆོག་གི་དྲིལ་གྱིས་འཁོར། །དྲིལ་ལས་བྱུང་བའི་སྒྲས་ཀྱང་མ་ལུས་པའི། །འཇིག་རྟེན་སྒྲ་དབྱངས་མ་ལུས་ཟིལ་མནན་ཅིང་། །སངས་རྒྱས་གསུང་གི་ཡན་ལག་འདྲ་བར་འཁོད། །དམ་
པའི་ཆོས་ཀྱི་སྒྲ་དབྱངས་ཞི་བ་སྒྲོག །དེ་ཐོས་སེམས་ཅན་ཉོན་མོངས་ཞི་བར་བགྱིད། །མ་ལུས་ཕྱོགས་གྱི་ཞིང་རྣམས་བརྒྱུད་པ་ཡི། །བསྐལ་པ་རྒྱ་མཚོའི་བདེ་གཤེགས་རྒྱ་མཚོ་དང་། །
བློ་ལྡན་རྒྱ་མཚོའི་མཚན་གྱི་འཁོར་ལོ་རྣམས། །སྔོན་མཐའི་ཞིང་གང་གཅིག་ནས་གཅིག་བརྒྱུད་དུ། །གང་མཚན་གང་དང་གང་ལགས་རིགས་བཞིན་དང་། །མ་ལུས་ཕྱོགས་སུ་དམ་ཆོས་

77-1-73b

འཁོར་ལོ་ཡང་། །ཁྱོད་ཀྱིས་བྱིན་གྱིས་དྲིལ་རྣམས་རབ་ཏུ་སྒྲོག །ཁྱོད་ཀྱི་དྲིལ་སྒྲ་ཐོགས་པ་མ་མཆིས་པར། །ཚངས་དབང་ལྷ་དབང་འགྲོ་བའི་བདག་པོ་རྣམས། །རང་རང་ལས་གྱི་ཚུལ་ནི་
ཀུན་བརྗོད་ཅིང་། །འཛམ་བུའི་རྒྱལ་མཚན་ཁྱབ་པར་ཀུན་ཏུ་སྒྲོག །དྲིལ་གྱི་སྒྲ་ལས་ལྷ་དང་མི་རྣམས་ཀྱིས། །རང་རང་བྱང་ཆུབ་ཚུལ་རྒྱུད་ཐོས་གྱུར་ནས། །སྡིག་ཏོ་རྣམས་སྤངས་དགེ་བ་
སྤྱོད་པར་གྱུར། །སངས་རྒྱས་བྱང་ཆུབ་མཆོག་ལ་ཀུན་ཀྱང་གནས། །ཁྱོད་ཀྱི་ཡབ་ནི་མི་བདག་སྐར་མའི་འོད། །དེ་ཡི་བཙུན་མོ་པད་མོ་ཁྱོད་ཀྱི་ཡུམ། །རྙོག་པ་ལྔ་རྣམས་ཤིན་ཏུ་རྒྱས་གྱུར་དུ། །
ཆོས་འགྲིབས་རྒྱལ་སྲིད་དེས་ནི་བཞེས་པར་གྱུར། །དེ་ཡི་བཟའ་ཤིང་ར་བ་ཡངས་བྱུང་བ། །མེ་ཏོག་རྒྱས་བརྒྱན་རིན་ཆེན་སྒྲོན་མ་སྟེ། །ཤིང་མང་བརྒྱས་བསྐོར་རྫིང་བུ་ལྔ་བརྒྱས་བསྐོར། །དེ་ནི་
ཤིན་ཏུ་བརྒྱན་པ་བྱུང་བར་གྱུར། །དེ་དག་སོ་སོ་རེ་རེའི་ངོས་སུ་ཡང་། །ཀ་བ་སྟོང་ལྡན་གཞལ་མེད་ཁང་བཟངས་བྱུང་། །སྟེགས་བུ་བཟང་པོ་སྣ་ཚོགས་སྟོང་གིས་བརྒྱན། །ཟླ་བ་གམ་པས་
ཀུན་ནས་མཛེས་པར་བགྱིས། །ཆོས་ངན་སྟོབས་ནི་རབ་ཏུ་འཕེལ་གྱུར་པས། །དགུང་ལོ་མང་པོར་དགུང་ཆར་བབ་མ་གྱུར། །རྫིང་བུ་ཀུན་ཀྱི་ཆབ་དང་ཞུགས་ཤིང་རྣམས། །དེ་ཚེ་ལོ་མ་
མདོག་དང་བཅས་ཏེ་སྐམས། །དགུང་བདུན་ལོན་ནས་ཁྱོད་བལྟམ་གྱུར་པའི་ཚེ། །དེ་ཚེ་ངོ་མཚར་རྨད་བྱུང་ལྟས་བྱུང་སྟེ། །དེ་དག་མཐོང་ནས་སེམས་ཅན་ངས་རྟོགས་པར། །བདག་
ཅག་སྐྱོབ་པ་ངེས་པར་འབྱུང་ཞེས་མཆིས། །དགུང་གི་གུང་ལ་བབ་ནས་རྣམ་དྲུག་དུ། །ཁམས་ཀྱི་དོག་ས་ཡོངས་སུ་གཡོས་པར་གྱུར། །མ་སྨྲས་ཤིན་ཏུ་བཟང་བའི་རྫིང་དེ་ཡི། །དབུས་

77-1-74a

སུ་གདུགས་དང་མཉམ་པའི་འོད་ཅིག་བྱུང་། །ཆབ་བཟང་ཡན་ལག་བརྒྱད་ལྡན་རྒྱས་པར་གྱུར། །རྫིང་བུ་ལྔ་བརྒྱ་ཀུན་ཀྱང་དེ་བཞིན་ཏེ། །ཞུགས་ཤིང་ཀུན་ཀྱང་ལོ་མ་འཁྲུངས་པར་གྱུར། །
མེ་ཏོག་འབྲས་བུ་ཁ་དོག་མདོག་དང་ལྡན། །རྫིང་བུ་དེ་རྣམས་ཆབ་ཀྱིས་བལྟམ་གྱུར་པས། །ནགས་ཚལ་མ་ལུས་དེ་དག་ངོམས་པར་བགྱིས། །ཆབ་ཆེན་དེ་ལས་བྱུང་བའི་རྒྱུད་འཕྲོས་
པས། །འཛམ་བུའི་རྒྱལ་མཚན་ཆབ་གྱིས་བལྟམས་པར་གྱུར། །ཞུགས་ཤིང་སྨན་དང་ལོ་ཐོག་ལྡུམ་བུ་ཡང་། །འཁྲུངས་གྱུར་ཞུགས་ཤིང་མེ་ཏོག་འབྲས་བུས་རྒྱས། །དོག་སའི་སྟིང་
ན་མཆིས་དགུའི་ས་བོན་རྣམས། །ཀུན་ཀྱང་ཆབ་གྱིས་བརླན་པས་རྣམ་པར་འཁྲུངས། །ཆབ་གྱིས་བངས་གྱུར་དོག་སའི་ཕྱོགས་རྣམས་ཀྱང་། །དེ་ཚེ་ཐམས་ཅད་རབ་ཏུ་མཉམ་པར་གྱུར། །
སྒང་གཤོང་དེ་ཡི་ཕྱོགས་རྣམས་ཇི་སྙེད་པ། །དེ་དག་ཀུན་ཀྱང་དེ་ཚེ་མཉམ་པར་གྱུར། །གཡང་ས་གྲོག་པོ་མི་བདེ་ཕྱོགས་གྱི་རྣམས། །དེ་ཚེ་ཡུད་ཀྱིས་ཀུན་ཀྱང་མཉམ་པར་གྱུར། །ཚེར་མ་
གསེག་མ་ལ་སྩོགས་མ་མཆིས་གྱུར། །རིན་ཆེན་བཟང་པོའི་འབྱུང་གནས་ཡོངས་སུ་འཐོན། །སྐྱེས་པ་བུད་མེད་ཚོགས་རྣམས་དགའ་བར་གྱུར། །སྐོམ་པས་གདུངས་པ་ཀུན་ཀྱང་ཆབ་
ལ་འཚལ། །ཀྱེ་མ་དེ་རིང་བདེ་ན་སུ་མཐུ་ཤེས། །སྙན་པར་བརྗོད་པ་དེ་སྐད་ཚིག་ཏུ་བརྗོད། །དོག་སའི་མངའ་བདག་སྐར་འོད་སྲས་དང་བཅས། །སྲས་མོ་བློན་པོའི་ཚོགས་བཅས་དེ་ཡི་ཚེ། །
སྐྱེ་བོ་བྱེ་བ་སྟོང་གིས་ཡོངས་བསྐོར་ཏེ། །བཟའ་ཤིང་ར་བར་དགྱེས་པར་གཤེགས་པ་མཛད། །མདངས་དགའ་རྫིང་ཆེན་ཡོངས་སུ་མ་སྨད་པ། །སྤོས་ཆུས་བལྟམས་པ་དབུས་ན་མཆིས་གྱུར་

77-1-74b

པའི། །དེ་ཡི་དབུས་སུ་ཆོས་སྟེགས་བཟང་པོ་ཡི། །ཕོ་བྲང་སྟེང་གཤེགས་བཙུན་མོ་བཅས་པར་བཞུགས། །དགུང་བདུན་ལོན་པར་གྱུར་ནས་དེ་ཡི་ཆབ། །དགུང་གི་གུང་ལ་གྱེན་དུ་ལོག་པར་གྱུར། །
རི་དང་གཞལ་མེད་ཁང་གི་ཕྲེང་བཅས་པའི། །དོག་ས་འང་དེ་ཚེ་ཡོངས་སུ་གཡོས་པར་གྱུར། །ཡོངས་སུ་མ་སྨད་དེ་ཡི་དབུས་ནས་ཀྱང་། །པད་མོ་ཆེན་པོ་ལོ་མ་སྟོང་ལྡན་འཁྲུངས། །གདུགས་
སྟོང་མདོག་གསལ་སྤྲིན་གྱི་དྲ་བ་ཅན། །རི་རབ་རྩེ་མོ་མན་ཅད་འོད་ཀྱིས་འགེངས། །ཆུ་བོ་རྡོ་རྗེ་ནང་རིམ་དྲི་གདའ་སྟེ། །རིན་ཆེན་དབང་པོའི་ལོ་མ་རྣམ་དག་ཡངས། །འཛམ་བུ་ཆུ་ཀླུང་
གསེར་བཟང་སྙིང་པོ་ཅན། །ཟེ་བ་སྤོས་རབ་འབར་བ་ཕུན་སུམ་ཚོགས། །མགོན་པོ་ཁྱོད་ནི་དེ་ཡི་སྙིང་པོ་ལས། །བསྐྱིལ་མོ་དཀྲུང་བཅས་སྐུས་ནི་བྱུང་བར་གྱུར། །མཚན་གྱིས་རྣམ་
བརྒྱན་ཡན་ལག་ཤིན་ཏུ་མཛེས། །ལྷ་མང་བརྒྱས་ཀྱང་མངོན་པར་མཆོད་པ་བགྱིས། །རྒྱལ་པོ་ཕོ་བྲང་སྟེང་ནས་ཤོད་གཤེགས་ཏེ། །ཕྱག་གཉིས་བརྐྱང་སྟེ་ལེགས་པར་ཁྱོད་བླངས་ནས། 
བཙུན་མོའི་མགོ་ལ་བཞག་སྟེ་འདི་སྐད་གསུངས། །ཁྱོད་ཀྱི་བུ་འདི་ཡིན་གྱིས་དགར་གྱིས་ཤིག །འཇིག་རྟེན་མགོན་ཁྱོད་དེ་ལྟར་བལྟམས་གྱུར་ཚེ། །བྱེ་བའི་གཏེར་རྣམས་རབ་ཏུ་འཐོན་
པར་གྱུར། །ཞུགས་ཤིང་ཀུན་ཀྱང་མངོན་པར་ཁ་འབུས་ཏེ། །སྟེང་གི་མཁའ་ལས་རོལ་མོའི་སྒྲ་ཡང་བྱུང་། །འཛམ་བུ་རྒྱལ་མཚན་སེམས་ཅན་ཐམས་ཅད་ཀྱང་། །ཁྱོད་ལ་མངོན་ལྟ་འདུད་
ཅིང་ཕྱག་ཀྱང་འཚལ། །ཐལ་མོ་སྦྱར་ཅིང་ཀྱེ་མ་མགོན་མེད་པའི། །མགོན་ཞིག་བྱུང་ཞེས་དགའ་བའི་ཚིག་ཀྱང་བརྗོད། །ཁྱོད་ཀྱི་སྐུ་ལས་འོད་གཟེར་མང་བྱུང་བས། །དོག་ས་ཀུན་ཏུ་

77-1-75a

རབ་ཏུ་སྣང་བར་གྱུར། །འགྲོ་བའི་མུན་པ་ཀུན་ཀྱང་རྣམ་བསྩལ་ནས། །ནད་མང་མ་ལུས་རབ་ཏུ་ཞི་བར་གྱུར། །གནོད་སྦྱིན་གྲུལ་བུམ་ཤ་ཟ་མང་པོའི་ཚོགས། །རྣམ་པར་འཚེ་བ་དེ་དག་
བསྩལ་བར་གྱུར། །ཤིན་ཏུ་གདུག་པས་སེམས་ཅན་འགུམ་པ་ཡི། །སྦྲུལ་གདུག་ཀུན་ཀྱང་དེ་ཚེ་ཡོངས་མི་རྒྱུ། །ཐོབ་མེད་སྨད་པ་མི་སྙན་སྡུག་བསྔལ་དང་། །ནད་རླུང་ནད་མང་གནོད་
པར་འཚེ་བ་དག །མདོར་བསྡུས་ཀུན་ཀྱང་ཞི་ཞིང་མ་མཆིས་གྱུར། །འཇིག་རྟེན་ཀུན་ཏུ་རབ་དགའ་བྱུང་བར་གྱུར། །ཕན་ཚུན་མ་དང་འདྲ་བའི་འདུ་ཤེས་ཀྱིས། །ཁོང་ནས་བྱམས་པར་དེ་ཚེ་འགྲོ་
ཀུན་གྱུར། །ཤར་གཉེར་སེམས་བྲལ་འཚེ་བ་མ་མཆིས་ཏེ། །ཐམས་ཅད་མཁྱེན་ལམ་ནན་ཏན་ལྡན་པར་གྱུར། །ངན་སོང་རྒྱུད་རྣམས་རྣམ་པར་རབ་ཏུ་བཟློག །མཐོ་རིས་ལམ་ཆེན་ཀུན་
ཀྱང་བཏོད་པར་གྱུར། །ཐམས་ཅད་མཁྱེན་པའི་ལམ་ཡང་ཤིན་ཏུ་བསྟན། །དེ་ལྟར་ཁྱོད་ཀྱིས་འགྲོ་དོན་ཡངས་པ་མཛད། །རྒྱ་མཚོ་ཆེ་འདྲ་ཡོངས་སུ་གཏོང་མཛད་པ། །ཁྱོད་མཐོང་བདག་ནི་
ཐོབ་པ་དམ་པ་ཐོབ། །ཡུན་རིང་འཁྱམས་པའི་འགྲོ་བ་མགོན་བྲལ་དུ། །ཁྱོད་ནི་རྨད་དུ་བྱུང་བའི་མགོན་ཞིག་གཤེགས། །དེ་ནས་ཚོང་དཔོན་གྱི་བུ་མོ་རིན་ཆེན་འོད་ཀྱིས་རྒྱལ་པོ་ཆོས་
ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ལ་ཚིགས་སུ་བཅད་པ་དེ་དག་གིས་མངོན་པར་བསྟོད་དོ། །སྙན་པར་བཀུར་ནས་རབ་ཏུ་བསྔགས་ཏེ། ལན་བརྒྱ་ཕྲག་སྟོང་དུ་
གཡས་ཕྱོགས་སུ་བསྐོར་བ་བྱས་ཏེ། ཕྱག་འཚལ་ནས་ཕྱོགས་གཅིག་ཏུ་གུས་པའི་ཚུལ་གྱིས་འདུག་གོ། །དེ་ནས་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་

77-1-75b

སྒྲོག་པས། ཚོང་དཔོན་གྱི་བུ་མོ་རིན་ཆེན་འོད་ལ་བལྟས་ཏེ་འདི་སྐད་ཅེས་སྨྲས་སོ། །བུ་མོ་དེ་ལྟར་ཁྱོད་སེམས་ཅན་ཕ་རོལ་གྱི་ཡོན་ཏན་གྱི་ཁྱད་པར་ཤེས་པའི་མངོན་པར་ཤེས་པ་ལ་ཞུགས་པ་
ལེགས་སོ་ལེགས་སོ། །བུ་མོ་འཇིག་རྟེན་ཐམས་ཅད་ནའང་སེམས་ཅན་གང་སེམས་ཅན་ཕ་རོལ་གྱི་ཡོན་ཏན་ལ་མོས་པ་དེ་ལྟ་བུ་ནི་དཀོན་ཏེ། བུ་མོ་སེམས་ཅན་མུན་པས་བསྒྲིབ་པ་ཕན་
བཏགས་པ་ལ་དྲིན་དུ་མི་གཟོ་བ། བློ་ཕྱིན་ཅི་ལོག་ལ་ཞུགས་པ་སེམས་འཁྲུགས་པར་གྱུར་པ། རྒྱུད་འཛིངས་པར་གྱུར་པ། མུན་པའི་སེམས་དང་ལྡན་པ། བསམ་པ་ངང་གིས་ལོག་པ། ནན་ཏན་
དང་མྱི་ལྡན་པ། སེམས་ཅན་ཕ་རོལ་གྱི་ཡོན་ཏན་གྱི་ཁྱད་པར་མངོན་པར་མི་ཤེས་པ་རྣམས་ཀྱིས་ནི་བྱང་ཆུབ་སེམས་དཔའི་ཡོན་ཏན་ལ་འཇུག་པར་བྱ་བ་འམ། དེ་བཞིན་གཤེགས་པའི་ཡོན་
ཏན་ལ་བརྟག་པར་བྱ་བ་འམ། ཡོན་ཏན་ཐམས་ཅད་ཤེས་པའི་ཁྱད་པར་མངོན་པར་ཤེས་པ་ཐོབ་པར་བྱ་བར་མི་ནུས་སོ། །བུ་མོ་དེ་ལྟར་ཁྱོད་སེམས་ཅན་ཆེན་པོ་མངོན་པར་ཤེས་པས་བྱང་ཆུབ་
སེམས་དཔའི་ཡོན་ཏན་གྱི་རྣམ་པ་དེ་ལྟ་བུ་ལ་འཇུག་པ་ནི་གདོན་མི་ཟ་བར་བྱང་ཆུབ་ཏུ་ཡང་དག་པར་ཞུགས་པའོ། །དེ་ལྟར་ངའི་ཁམས་སུ་ཁྱོད་ལྟ་བུ་ཡེ་ཤེས་དེ་འདྲ་བ་དང་ལྡན་པ་སྐྱེས་པ་
ནི། འཛམ་བུའི་གླིང་དུ་ངས་སེམས་ཅན་ཡོངས་སུ་བསྡུས་པའི་མཐུ་དོན་ཡོད་དོ། །དེ་ནས་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པས། ནོར་
བུ་རིན་པོ་ཆེ་ཆེན་པོ་རིན་ཐང་མེད་པ་དང་། ནོར་བུ་རིན་པོ་ཆེ་སྐར་མའི་འོད་སྣ་ཚོགས་དང་། གོས་རིན་པོ་ཆེ་རིན་ཐང་མེད་པ་བདག་གི་ལག་བདར་ཏེ་བླངས་ནས། ཚོང་དཔོན་གྱི་བུ་མོ་རིན་ཆེན་འོད་ལ་

77-1-76a

བྱིན་ནོ། །དེའི་འཁོར་གྱི་བུ་མོ་ཐམས་ཅད་ཀྱང་གོས་རིན་པོ་ཆེ་སྣ་ཚོགས་ཀྱིས་ཁྱེད་པར་བྱིན་ནས་འདི་སྐད་ཅེས་སྨྲས་སོ། །བུ་མོ་གོས་རིན་པོ་ཆེ་འདི་ཁྱེར་ལ་བདག་གིས་ཡོངས་སུ་
སྤྱད་པར་གྱིས་ཤིག །དེ་ནས་ཚོང་དཔོན་གྱི་བུ་མོ་རིན་ཆེན་འོད་འཁོར་དང་བཅས་པས་པུས་མོ་གཉིས་ས་ལ་ཕབ་སྟེ། གོས་རིན་པོ་ཆེ་དེ་དག་ལག་པ་གཉིས་ཀྱིས་བླངས་ནས་སྤྱི་བོས་བླངས་
ཏེ། ཕྱིར་ཕྱུང་ནས་གོས་རིན་པོ་ཆེ་དེ་དག་བགོས་སོ། །དེའི་འཁོར་གྱི་བུ་མོ་ཐམས་ཅད་གྱིས་ཀྱང་སོ་སོ་ནས་རང་རང་གི་གོས་རིན་པོ་ཆེ་དེ་དག་བགོས་ནས། དེས་རིན་པོ་ཆེ་དེ་དག་བགོས་པའི་འོག་
ཏུ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ལ་བདག་གི་འཁོར་བུ་མོ་དེ་དག་དང་བཅས་པས་གཡས་ཕྱོགས་སུ་བསྐོར་བ་བྱས་སོ། །དེ་དག་ཐམས་
ཅད་ཀྱི་གོས་རིན་པོ་ཆེ་དེ་དག་ལ་རྒྱུ་སྐར་ཐམས་ཅད་ཀྱི་གཟུགས་བརྙན་སྣང་བར་གྱུར་ཏེ། དེ་དག་མཐོང་ནས་འགྲོ་བའི་ཚོགས་མང་པོ་འདི་སྐད་ཅེས་འཛེར་ཏེ། བུ་མོ་ཁྱོད་ཀྱི་འཁོར་བུ་
མོ་འདི་དག་ནི་མཚན་མོའི་ལྷ་མོ་སྐར་མའི་ཚོགས་ཀྱིས་བརྒྱན་པ་ལྟར་ཤིན་ཏུ་མཛེས་པ་སྟེ། ཁྱོད་དེ་དག་གིས་བསྐོར་བས་གྱ་ནོམ་པར་མཛེས་སོ། །དེ་ནས་མཚན་མོའི་ལྷ་མོ་ཤིང་ཐམས་
ཅད་ཀྱི་མེ་ཏོག་རྒྱས་པས་བདེ་བར་གནས་པས་ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་ཆོས་ཐམས་
ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ཞེས་བྱ་བ་བྱུང་བ་དེ་གཞན་ཞིག་ཡིན་པ་ཙམ་དུ་སེམས་ན། དེ་ལྟར་མྱི་བལྟ་སྟེ། བཅོམ་ལྡན་འདས་དེ་བཞིན་གཤེགས་པ་དགྲ་

77-1-76b

བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་འདི་ནི། དེའི་ཚེ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྐྲོག་པ་ཞེས་བྱ་བར་གྱུར་ཏོ། །
རིགས་ཀྱི་བུ་དེའི་ཚེ་དེའི་དུས་ན་རྒྱལ་པོ་སྐར་མའི་འོད་ཀྱི་བཙུན་མོའི་འོད་ཅེས་བྱ་བ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པའི་ཡུམ་དུ་གྱུར་པ་དེ་བཞིན་
ཞིག་ཡིན་པ་སྙམ་དུ་སེམས་ན་ཡང་དེ་ལྟར་མྱི་བལྟ་སྟེ། ལྷ་མོ་སྒྱུ་མ་འདི་ནི་དེའི་ཚེ་རྒྱལ་པོ་བཙུན་མོ་པད་མོའི་འོད་ཅེས་བྱ་བར་གྱུར་ཏེ། རྫུས་ཏེ་བྱུང་བའི་གཞོན་ནུ་ཐུ་བར་ལེན་ལེན་
པའོ། །ཡང་རིགས་ཀྱི་བུ་ཁྱོད་དེའི་ཚེ་དེའི་དུས་ན་རྒྱལ་པོ་སྐར་མའི་འོད་ཅེས་བྱ་བ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པའི་ཡབ་དུ་གྱུར་བ་བྱུང་
བ་དེ་གཞན་ཞིག་ཡིན་པ་སྙམ་དུ་སེམས་ནའང་། དེ་ལྟར་མི་བལྟ་སྟེ། རྒྱལ་པོ་ཟས་གཙང་མ་ནི་དེའི་ཚེ་དེའི་དུས་ན་རྒྱལ་པོ་སྐར་མའི་འོད་ཅེས་བྱ་བར་གྱུར་ཏོ། །ཡང་རིགས་ཀྱི་
བུ་ཁྱོད་དེའི་ཚེ་དེའི་དུས་ན་ཚོང་དཔོན་གྱི་བུ་མོ་རིན་ཆེན་འོད་ཅེས་བྱ་བ་བྱུང་བ་དེ་གཞན་ཞིག་ཡིན་པ་སྙམ་དུ་སེམས་ན་འང་དེ་ལྟར་མྱི་བལྟ་སྟེ། ཁོ་མོ་ནི་དེའི་ཚེ་དེའི་དུས་ན་ཚོང་དཔོན་གྱི་བུ་
མོ་རིན་ཆེན་འོད་ཅེས་བྱ་བར་གྱུར་ཏོ། །ཡང་རིགས་ཀྱི་བུ་ཁྱོད་དེའི་ཚེ་དེའི་དུས་ན་སེམས་ཅན་འཛམ་བུའི་གླིང་དེར་སྐྱེས་ཤིང་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་
འཁོར་རབ་ཏུ་སྒྲོག་པས་བསྡུ་བའི་དངོས་པོ་བཞིས་ཡོངས་སུ་བསྡུས་པ་དེ་དག་གཞན་དག་གཅིག་ཡིན་པ་སྙམ་དུ་སེམས་ན་དེ་ལྟར་མྱི་བལྟ་སྟེ། བཅོམ་ལྡན་འདས་ཀྱི་དཀྱིལ་འཁོར་

77-1-77a

འདི་ཉིད་དུ་འདུས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་བྱང་ཆུབ་སེམས་དཔའི་ས་ལ་བཀོད་དེ། ལ་ལ་ནི་ས་དང་པོ་ལ་བཀོད། ལ་ལ་ནི་ས་གཉིས་
པ། ལ་ལ་ནི་ས་གསུམ་པ། ལ་ལ་ནི་ས་བཞི་པ། ལ་ལ་ནི་ས་ལྔ་པ། ལ་ལ་ནི་ས་དྲུག་པ། ལ་ལ་ནི་ས་བདུན་པ། ལ་ལ་ནི་ས་བརྒྱད་པ། ལ་ལ་ནི་ས་དགུ་པ། ལ་ལ་ནི་བྱང་ཆུབ་སེམས་དཔའི་
ས་བཅུ་པ་ལ་བཀོད་པར་གྱུར་པའི་བྱང་ཆུབ་སེམས་དཔའི་སྨོན་ལམ་སྣ་ཚོགས་རྣམ་པ་ཐ་དད་པ་དང་། ཐམས་ཅད་མཁྱེན་པ་ཉིད་དུ་འཇུག་པ་སྣ་ཚོགས་དང་། ཡང་དག་པར་བསྒྲུབ་པ་སྣ་ཚོགས་དང་། 
སྤྱོད་པ་སྣ་ཚོགས་དང་། འབྱུང་བ་སྣ་ཚོགས་དང་། ལམ་གྱི་རྒྱན་རྣམ་པར་དག་པ་སྣ་ཚོགས་དང་། ལམ་རྣམ་པར་འཕྲུལ་པ་དང་། ཁྱུ་མཆོག་གི་མཐུ་ཕྱུང་བ་སྣ་ཚོགས་དང་། ལམ་གྱི་རྒྱན་རྣམ་
པ་སྣ་ཚོགས་ཀྱིས་ཡོངས་སུ་བྱུང་སྟེ། རྣམ་པར་ཐར་པ་ལ་རྣམ་པར་སྤྱོད་པ་སྣ་ཚོགས་ཀྱིས་འཁོར་གྱི་དཀྱིལ་འཁོར་འདི་ན་ཆོས་ཀྱི་གཞལ་མེད་ཁང་སྣ་ཚོགས་ན་རྣམ་པར་སྤྱོད་པས་འཁོད་ཅིང་
རྣམ་པར་སྤྱོད་པ་འདི་དག་ཡིན་ནོ། །དེ་ནས་མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པས་དེའི་ཚེ་བྱང་ཆུབ་སེམས་དཔའི་རྣམ་པར་ཐར་པ་དགའ་བའི་འོད་སྤྲོ་བ་
ཡངས་པ་ཡང་དག་པར་འབྱུང་བ་འདི་ཉིད་བརྣན་ཏེ་བསྟན་པའི་ཕྱིར་ཚོང་དཔོན་གྱི་བུ་ནོར་བཟངས་ལ་ཚིགས་སུ་བཅད་དེ་སྨྲས་པ། རྒྱལ་བའི་སྲས་པོ་ཁོ་མོའི་མྱིག་ཡངས་ཏེ། །ཕྱོགས་ཀུན་ཞིང་
མང་རྒྱ་མཚོ་སྣ་ཚོགས་ཀྱི། །སེམས་ཅན་རྒྱ་ཆེན་གངས་ཆེན་མཚོ་ཡི་རྣམས། །འཁོར་བར་གྱུར་ཚེ་ཀུན་ལ་རྣམ་པར་བལྟ། །འབྱམ་ཀླས་ཞིང་རྣམས་ཀུན་ན་བཞུགས་པ་ཡི། །རྒྱལ་བ་

77-1-77b

བྱང་ཆུབ་ཤིང་གི་དྲུང་བཞུགས་པ། །རྡུལ་མེད་ཀུན་ཀྱང་ཕྱོགས་བཅུ་རྒྱས་བཀང་སྟེ། །ཆོས་སྒྲོག་རྟག་པར་འགྲོ་འདུལ་མཐོང་བར་བྱེད། །ཁོ་མོའི་རྣ་བ་རྒྱ་མཚོ་ཡོངས་སུ་དག །སྒྲ་རྣམས་
མ་ལུས་ཐམས་ཅད་དེས་ཐོས་ཏེ། །བདེ་བར་གཤེགས་པས་ཆོས་གསུངས་མ་ལུས་པར། །ཐམས་ཅད་དགའ་བས་ཡང་དང་ཡང་དུ་ཐོས། །ཁོ་མོའི་ཡེ་ཤེས་གཉིས་མེད་ཆགས་
པ་མེད། །སེམས་ཅན་གཞན་གྱི་སེམས་ཀྱི་ཡུལ་ལ་འཇུག །འགྲོ་བའི་སེམས་ཀྱི་རྒྱ་མཚོ་ཡངས་པ་རྣམས། །མ་ལུས་ཀུན་ལ་མཚན་ཉིད་དངོས་ཀྱིས་འཇུག །སྔོན་གྱི་མཐའ་
དྲན་ཏིང་ངེ་འཛིན་སྟོབས་ཀྱིས། །བསྐལ་པའི་རྒྱ་མཚོ་ཚད་མེད་ཁོ་མོས་ཤེས། །ཚེ་རབས་རྒྱུད་མང་གངས་ཆེན་མཚོ་དག་ཀྱང་། །ཕ་རོལ་དག་དང་བདག་ལ་འང་དེ་བཞིན་ཤེས། །རྒྱ་མཚོའི་
ཞིང་གཅིག་རྡུལ་ཕྲན་རབ་སྙེད་ཀྱི། །བསྐལ་པ་སྐད་ཅིག་གཅིག་གིས་མ་ལུས་ཤེས། །སེམས་ཅན་འགྲོ་རྒྱུད་དག་ན་འཁོར་བ་དང་། །སངས་རྒྱས་རྣམ་འཕྲུལ་ཚོགས་བཅས་དེ་བཞིན་ནོ། །
དེ་དག་ཐོག་མའི་སྨོན་ལམ་ཅི་འདྲ་དང་། །ཡང་དག་བསྒྲུབ་ཚུལ་འཇུག་ཚུལ་རྣམ་ཡངས་དང་། །སྤྱོད་ལ་བརྟེན་པས་ཚོགས་རྣམས་ཡངས་བསྒྲུབ་པ། །འཇིག་རྟེན་མཁྱེན་པ་རྣམས་ཀྱང་ཁོ་མོས་
དྲན། །མཉམ་མེད་ཚད་མེད་ཚོགས་གྱུར་ཡོན་ཏན་མཚོ་མངའ་བའི། །དབང་སྐུར་སར་བྱོན་ཇི་སྙེད་དེ་དག་དང་། །བྱང་ཆུབ་འཚང་རྒྱའི་ཚུལ་ནི་རྣམ་ཡངས་ལ། །སེམས་ཀྱི་སྐད་ཅིག་གཅིག་གིས་
ཁོ་མོས་འཇུག །ཐབས་ཀྱི་རྣམ་པ་གང་དང་གང་དག་གིས། །བདེ་གཤེགས་འཁོར་ལོ་དམ་པ་འགྲོར་བསྐོར་དང་། །མྱ་ངན་འདས་པ་ཡོན་ཏན་ཚད་མྱེད་དང་། །ཆོས་རྣམས་གནས་པའི་དུས་ཀྱང་ཁོ་

77-1-78a

མོས་ཤེས། །དྲི་མེད་ཐེག་པ་རྒྱ་མཚོའི་ཚུལ་རྣམས་དང་། །སེམས་ཅན་རྣམས་འདུལ་རྣམ་ཡངས་ཇི་སྙེད་དང་། །འགྲོ་བ་དེ་དག་གིས་ནི་གང་བསྟན་པ། །སོ་སོ་ཀུན་ལ་སྣ་ཚོགས་
ཚུལ་གྱིས་འཇུག །དགའ་བའི་གཏེར་དང་མོས་པའི་དབྱིག་གི་རྣམས། །ཀུན་ཏུ་སྣང་བ་རྣམ་ཐར་ཚུལ་འདི་ཡིན། །ཁོ་མོས་བསྐལ་པ་བརྒྱ་མང་རྒྱ་ཆེར་བསྒོམས། །དེ་ཚུལ་དེ་ལ་ཁྱོད་ཀྱང་
མྱུར་འཇུག་གིས། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ། དགའ་བའི་འོད་འཕྲོ་བ་ཡངས་པ་ཡང་དག་པར་འབྱུང་བ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་
དཔའ་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་ཐམས་ཅད་མཁྱེན་པ་ཉིད་ལ་འཇུག་པའི་སྨོན་ལམ་རྒྱ་མཚོ་ལ་ཞུགས་པ། དེ་བཞིན་གཤེགས་པ་ཐམས་ཅད་ཀྱི་སྔོན་གྱི་སྨོན་ལམ་རྒྱ་མཚོ་
མངོན་པར་བསྒྲུབ་པའི་སྨོན་ལམ་ཡོངས་སུ་རྫོགས་པ། བྱང་ཆུབ་སེམས་དཔའི་ས་གཅིག་ནོན་པས་བྱང་ཆུབ་སེམས་དཔའི་ས་རྒྱ་མཚོ་ཐམས་ཅད་ཡོངས་སུ་གནོན་པའི་སྟོབས་ལ་མཁས་པ། 
བྱང་ཆུབ་སེམས་དཔའི་སྤྱོད་པ་རྒྱ་མཚོ་ཐམས་ཅད་སྤྱོད་པ་རེ་རེར་ཡང་དག་པར་འདུ་བའི་སྨོན་ལམ་དང་། སྤྱོད་པ་ཡོངས་སུ་དག་པ་བྱང་ཆུབ་སེམས་དཔའི་རྣམ་པར་ཐར་པ་རེ་རེ་ལ། བྱང་ཆུབ་སེམས་
དཔའི་རྣམ་པར་ཐར་པ་རྒྱ་མཚོ་ཐམས་ཅད་ཡོངས་སུ་འདུ་བར་རྣམ་པར་སྤྱད་པ་ལ་དབང་བསྒྱུར་བ་དེ་དག་གི་སྤྱོད་པ་ཤེས་པ་འམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ་སྙིང་པོ་བྱང་ཆུབ་
འདི་ཉིད་ན་མཚན་མོའི་ལྷ་མོའི་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ཅེས་བྱ་བ་ཞིག་བཅོམ་ལྡན་འདས་གྱི་སྤྱན་སྔར་ཕྱིན་ཅིང་འདུག་གིས་དེའི་གན་དུ་སོང་ལ། ཇི་ལྟར་བྱང་

77-1-78b

ཆུབ་སེམས་དཔས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་ཅན་ཡོངས་སུ་སྨྱིན་པར་བྱ་བ་དང་། ཇི་ལྟར་སངས་རྒྱས་ཀྱི་ཞིང་ཐམས་ཅད་ཡོངས་སུ་སྦྱང་བར་བྱ་བ་དང་། ཇི་ལྟར་དེ་བཞིན་
གཤེགས་པ་ཐམས་ཅད་ཤིན་ཏུ་མཉེས་པར་བྱ་བས་བསྙེན་བཀུར་ཞིང་རིམ་གྲོར་བྱ་བ་དང་། ཇི་ལྟར་བྱང་ཆུབ་སེམས་དཔས་སངས་རྒྱས་ཀྱི་ཞིང་ཐམས་ཅད་ལ་བརྩོན་པར་བྱ་བ་དྲིས་ཤིག །དེ་ནས་
ཚོང་དཔོན་གྱི་བུ་ནོར་བཟང་ཀྱིས་མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་
རྒྱས་པས་བདེ་བར་གནས་པ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བར་བྱས་ནས་ཡང་དང་ཡང་བལྟས་ཏེ། མཚན་མོའི་ལྷ་མོ་ཤིང་ཐམས་ཅད་མེ་ཏོག་རྒྱས་པས་བདེ་བར་གནས་པའི་
དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་གང་ན་བ་དེར་སོང་སོང་ནས། མཚན་མོའི་ལྷ་མོ་འགྲོ་བ་
ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་འཁོར་གྱི་དཀྱིལ་འཁོར་དེ་ཉིད་ན། ཆོས་ཀྱི་དབྱིངས་ཀྱི་ཚུལ་རབ་ཏུ་སྣང་བའི་རིན་པོ་ཆེའི་དྲ་བས་ཡོག་པའི་ལུས་དང་ལྡན་པ། གཉི་ཟླ་དང་
གཟའ་སྐར་དང་། རྒྱུ་སྐར་ཐམས་ཅད་ཀྱི་གཟུགས་བརྙན་ཡོངས་སུ་སྟོན་པའི་ལུས་དང་ལྡན་པ། བསམ་པ་ཇི་ལྟ་བ་བཞིན་དུ་སེམས་ཅན་གྱིས་རྣམ་པར་དམྱིགས་པར་སྟོན་པའི་ལུས་དང་ལྡན་པ། 
སེམས་ཅན་ཐམས་ཅད་ཀྱི་ལུས་ཀྱི་དབྱིབས་དང་འདྲ་བར་རང་གི་ལུས་རྣམ་པར་དམྱིགས་པར་བྱེད་པའི་ལུས་དང་ལྡན་པ། ཁ་དོག་རྒྱ་མཚོ་ཡངས་པ་མཐའ་དང་དབུས་མེད་པར་རྣམ་པར་དམྱིགས་

77-1-79a

པར་སྟོན་པའི་ལུས་དང་ལྡན་པ་སྤྱོད་ལམ་ཐམས་ཅད་ལ་རྣམ་པར་སྤྱོད་པའི་ཚུལ་ཡོངས་སུ་སྟོན་པའི་ལུས་དང་ལྡན་པ། སྒོ་ཀུན་ཏུ་མངོན་པར་བལྟས་པར་དམྱིགས་པར་བྱེད་པའི་ལུས་
དང་ལྡན་པ། ཆོས་ཀྱི་སྤྲིན་གྱི་འབྲུག་སྒྲ་ཀུན་ཏུ་སྒྲོག་ཅིང་རྣམ་པར་འཕྲུལ་པ་སྣ་ཚོགས་ཀྱི་ཕྱོགས་ཐམས་ཅད་རྒྱས་པར་བཀང་སྟེ། འགྲོ་བ་ཐམས་ཅད་ལ་མངོན་དུ་གནས་པའི་ལུས་དང་ལྡན་
པ། དུས་ཐམས་ཅད་དུ་འགྲོ་བ་ཐམས་ཅད་ཀྱི་དོན་ལ་མངོན་ཏུ་བལྟས་པར་ནམ་མཁའི་དབྱིངས་ཀྱི་ཀོལ་བའི་ལུས་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་ཞབས་ལ་འདུད་ཅིང་ཕྱག་
འཚལ་བའི་ལུས་དང་ལྡན་པ། སེམས་ཅན་ཐམས་ཅད་ཀྱི་དགེ་བའི་རྩ་བ་བསྩགས་པ་ལ་གཅེས་ཤིང་སྔོན་དུ་འགྲོ་བའི་ལུས་དང་ལྡན་པ། དེ་བཞིན་གཤེགས་པ་ཐམས་ཅད་ལས་མངོན་དུ་
ཆོས་ཀྱི་སྤྲིན་ཡང་དག་པར་ལེན་ཅིང་ཡོངས་སུ་འཛིན་པའི་སྨོན་ལམ་གྲུབ་ཅིང་ཡོངས་སུ་རྫོགས་པར་བྱ་བའི་སེམས་ལས་ཕྱིར་ཕྱོགས་སུ་མ་གྱུར་ཅིག །དྲན་པས་ཡོངས་སུ་འཛིན་པའི་ལུས་
དང་ལྡན་པ། མཐའ་དང་དབུས་མེད་པའི་འོད་ཀྱི་ཕྱོགས་མཚམས་ཐམས་ཅད་རྒྱས་པར་འགེངས་པའི་ལུས་དང་ལྡན་པ། འགྲོ་བ་ཐམས་ཅད་ཀྱི་མུན་པ་རྣམ་པར་སེལ་བའི་ཆོས་ཀྱི་སྒྲོན་
མའི་འོད་ཀུན་ཏུ་འགྱེད་ཅིང་། སྣང་བ་ཡོངས་སུ་སྟོན་པའི་ལུས་དང་ལྡན་པ། ཆོས་སྒྱུ་མའི་རྣམ་པ་ལྟ་བུའི་ཡེ་ཤེས་ཀྱི་ལུས་དྲི་མ་མྱེད་པ་རབ་ཏུ་སྟོན་པའི་ལུས་དང་ལྡན་པ། ཆོས་ཀྱི་
ལུས་མུན་པ་དང་རྡུལ་དུ་བྲལ་བ་རབ་ཏུ་སྟོན་པའི་ལུས་དང་ལྡན་པ། ཆོས་ཉིད་སྒྱུ་མ་ལྟ་བུ་ལས་བྱུང་བའི་ལུས་དང་ལྡན་པ། ཆོས་ཉིད་རབ་ཏུ་རྟོགས་པས་མུན་པ་མེད་པའི་སེམས་དང་ལྡན་

77-1-79b

པ། ཡེ་ཤེས་ཀྱི་སྣང་བ་སྒོ་ཀུན་ཏུ་གསལ་བ་རབ་ཏུ་ཐོབ་པ། ཤིན་ཏུ་ནད་མེད་ཅིང་གདུང་བ་མེད་པའི་ཡིད་ཀྱི་ལུས་དང་ལྡན་པ། ཆོས་ཀྱི་སྐུ་མི་ཤིགས་ཤིང་བརྟན་པ་དང་ལྡན་པའི་དབྱིངས་ལས་བྱུང་བ། དེ་
བཞིན་གཤེགས་པའི་བྱིན་གྱི་བརླབས་གནས་མེད་པའི་རང་བཞིན་ཀུན་ནས་ཉོན་མྱོངས་པ་མེད་པའི་ངང་དྲི་མ་མེད་པའི་ཆོས་ཉིད་ཀྱི་ལུས་རྣམ་པར་དག་པའི་ལུས་དང་ལྡན་པ་དེ་རིན་པོ་ཆེའི་རྒྱལ་པོ་
འགྲོ་བ་ཐམས་ཅད་ཀྱི་གནས་རབ་ཏུ་སྙིང་པོ་ཅན་གྱི་སྟན་ལ་འདུག་པ་མཐོང་ངོ་། །དེས་མཐོང་ནས་སྤྱི་བོས་བཏུད་དེ་མཐོང་བར་བྱ་བའི་ཚུལ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་རྗེས་སུ་དྲན་
པར་བྱས་ནས་སའི་གཞི་ལས་བཏུད་དེ་རྒྱངས་བཅད་པ་ཞིག་ཏུ་མངོན་པར་བཏུད་དོ། །དེ་ནས་ཚོང་དཔོན་གྱི་བུ་ནོར་བཟངས་ས་གཞི་དེ་ལས་ཐལ་མོ་སྦྱར་ནས། མཚན་མོའི་ལྷ་མོ་འགྲོ་བ་
ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་དེའི་ལུས་ལ་བལྟས་པ་དང་། འདུ་ཤེས་རྣམ་པར་དག་པ་བཅུ་ཐོབ་པར་གྱུར་ཏེ། དེ་དག་ཐོབ་པས་དགེ་བའི་བཤེས་གཉེན་ཐམས་ཅད་དང་
སྐལ་བ་མཉམ་པར་རབ་ཏུ་ཐོབ་པར་གྱུར་ཏོ། །བཅུ་གང་ཞེ་ན་འདི་ལྟ་སྟེ། ཐམས་ཅད་མཁྱེན་པ་ཉིད་དུ་བརྩམས་པའི་བརྩོན་འགྲུས་ལ་དམྱིགས་པ་ཐམས་ཅད་དུ་གནས་པར་བྱ་བའི་ཕྱིར། དགེ་
བའི་བཤེས་གཉེན་རྣམས་ལ་རང་གི་སེམས་ཀྱི་འདུ་ཤེས་རབ་ཏུ་ཐོབ་པར་གྱུར་ཏོ། །དགེ་བའི་བཤེས་གཉེན་བསྙེན་བཀུར་ཞིང་དགེ་བའི་རྩ་བ་ཡངས་པ་ཡོངས་སུ་བསྒྲུབ་པ་གྲུབ་པར་བྱ་བའི་ཕྱིར། རང་གི་
ལས་རྣམ་པར་སྨྱིན་པ་དག་པའི་རང་བཞིན་གྱི་འདུ་ཤེས་རབ་ཏུ་ཐོབ་བོ། །སྨོན་ལམ་ཐམས་ཅད་ཀྱིས་བརྒྱན་པའི་སྤྱོད་པ་ལ་ཡང་དག་པར་གནས་པར་བྱ་བའི་ཕྱིར། བྱང་ཆུབ་སེམས་དཔའི་

77-1-80a

སྤྱོད་པའི་རྒྱན་གྱི་འདུ་ཤེས་རབ་ཏུ་ཐོབ་བོ། །དགེ་བའི་བཤེས་གཉེན་ཐམས་ཅད་ཀྱི་གདམས་ངག་གི་ལམ་ལ་ནན་ཏན་དུ་བྱ་བའི་ཕྱིར་སངས་རྒྱས་ཀྱི་ཆོས་ཐམས་ཅད་རབ་ཏུ་བསྒྲུབ་པའི་འདུ་
ཤེས་རབ་ཏུ་ཐོབ་པོ། །སངས་རྒྱས་ཐམས་ཅད་ཀྱི་ཡུལ་དུ་གྱུར་པའི་ཆོས་བླ་ན་མེད་པ་ལ་རྣམ་པར་སྤྱོད་པའི་སྣང་བ་ཡོངས་སུ་མཐོང་བར་བྱ་བའི་ཕྱིར་ཉམས་སུ་མྱོང་བ་བསྐྱེད་པའི་འདུ་ཤེས་རབ་ཏུ་ཐོབ་
བོ། །ཀུན་ཏུ་བཟང་པོའི་སྤྱོད་པས་འབྱུང་བའི་སྨོན་ལམ་དང་། སྤྱོད་པ་རྣམ་པར་དག་པར་བྱ་བའི་ཕྱིར་འབྱུང་བ་གཅིག་གི་འདུ་ཤེས་རབ་ཏུ་ཐོབ་པར་གྱུར་ཏེ། དགེ་བའི་ཆོས་ཡོངས་སུ་བསྩགས་པ་ཐམས་
ཅད་རྣམ་པར་འཕེལ་བར་བྱ་བའི་ཕྱིར་ཐམས་ཅད་མཁྱེན་པའི་བསོད་ནམས་རྒྱ་མཚོའི་འབྱུང་གནས་ཀྱི་འདུ་ཤེས་རབ་ཏུ་ཐོབ་བོ། །སངས་རྒྱས་ཀྱི་བྱང་ཆུབ་དུ་ཐམས་ཅད་མཁྱེན་པའི་ཡེ་ཤེས་ལ་
བརྩོན་འགྲུས་ཀྱི་ཤུགས་ཡོངས་སུ་འཕེལ་བར་བྱ་བའི་ཕྱིར། དགེ་བའི་ཆོས་ཡོངས་སུ་མ་རྫོགས་པ་ཡོངས་སུ་རྫོགས་པར་བྱེད་པ་དང་། ཡང་དག་པར་འཕེལ་བར་བྱེད་པ་དང་། ཡོངས་སུ་སྐྱོང་བའི་འདུ་
ཤེས་རབ་ཏུ་ཐོབ་པར་གྱུར་ཏོ། །སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱ་བའི་ཕྱིར། དགེ་བའི་རྩ་བ་ཐམས་ཅད་ཡོངས་སུ་རྫོགས་པའི་འདུ་ཤེས་རབ་ཏུ་ཐོབ་པར་གྱུར་ཏོ། །
བྱང་ཆུབ་སེམས་དཔའ་ཐམས་ཅད་ཀྱི་ཆོས་ལ་དབང་བསྒྱུར་བ་རབ་ཏུ་གནས་པར་བྱ་བའི་ཕྱིར་དགེ་བའི་བཤེས་གཉེན་རྣམས་ལ་དོན་ཐམས་ཅད་ཡོངས་སུ་བསྒྲུབ་པའི་འདུ་ཤེས་རབ་ཏུ་ཐོབ་སྟེ། འདུ་ཤེས་
རྣམ་པར་དག་པ་བཅུ་པོ་དེ་དག་རབ་ཏུ་ཐོབ་པར་གྱུར་ཏོ། །དེ་དག་ཐོབ་པས་མཚན་མོའི་ལྷ་མོ་འགྲོ་བ་ཐམས་ཅད་སྲུང་བའི་སྨོན་ལམ་ལ་བརྩོན་པའི་འོད་སྣང་བ་ལས་བྱང་ཆུབ་སེམས་དཔའ་དང་། 

77-1-80b

བསྐལ་པ་འཐུན་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཐོབ་པར་གྱུར་ཏོ། །འདི་ལྟར་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་དུས་གསུམ་རྗེས་སུ་དྲན་པའི་ཚུལ་ལ་དྲན་པའི་སྐལ་བ་
མཉམ་པ་དང་། ཆོས་རྒྱ་མཚོའི་ཚུལ་ཐམས་ཅད་ཐ་མྱི་དད་པར་ཁོང་དུ་ཆུད་པར་བྱ་བ་ལ་བློ་གྲོས་ཀྱི་བསྐལ་བ་མཉམ་པ་དང་། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་དཀྱིལ་འཁོར་
རིག་པས་རྗེས་སུ་ཤེས་པར་བྱ་བའི་བྱེ་བྲག་དང་། ཚུལ་ཐ་དད་པར་མཁས་པ་ལ་རེག་པའི་སྐལ་བ་མཉམ་པ་དང་། བློ་ནམ་མཁའ་དང་མཉམ་པས་དུས་གསུམ་ཐམས་ཅད་ཀྱི་ཚུལ་རྒྱ་མཚོ་
སྣང་བ་རབ་ཏུ་ཐོབ་པར་བྱ་བའི་ཕྱིར་བློའི་སྐལ་བ་མཉམ་པ་དང་། བྱང་ཆུབ་སེམས་དཔའ་ཐམས་ཅད་ཀྱི་དབང་པོ་རྒྱ་མཚོ་ཤེས་པའི་སྣང་བ་རབ་ཏུ་ཐོབ་པར་བྱ་བའི་ཕྱིར་དབང་པོ་རྣམ་པར་དག་པའི་སྐལ་བ་
མཉམ་པ་དང་། རྣམ་པ་ཐམས་ཅད་དུ་སེམས་ཅན་ཡོངས་སུ་བསྡུ་བའི་རྒྱན་གྱིས་རྣམ་པར་བརྒྱན་པའི་བྱང་ཆུབ་སེམས་དཔའི་ལམ་གྱི་ཡོན་ཏན་ལ་ནན་ཏན་དུ་བྱ་བའི་རྒྱན་གྱི་ལམ་ཁོང་དུ་ཆུད་པར་
བྱ་བའི་ཕྱིར་སེམས་རྣམ་པར་དག་པའི་སྐལ་བ་མཉམ་པ་དང་། དེ་བཞིན་གཤེགས་པའི་ཡེ་ཤེས་ཀྱི་སྤྱོད་ཡུལ་སྣང་བ་རབ་ཏུ་ཐོབ་པར་བྱ་བའི་ཕྱིར་སྤྱོད་ཡུལ་གྱི་བསྐལ་བ་མཉམ་པ་དང་། 
ཐམས་ཅད་མཁྱེན་པའི་ཚུལ་རྒྱ་མཚོ་ལ་འཇུག་པའི་ལམ་སྣང་བ། རྣམ་པ་ཐམས་ཅད་རབ་ཏུ་ཐོབ་པར་བྱ་བའི་ཕྱིར་ཚུལ་གྱི་རྗེས་སུ་འབྲང་བའི་སྐལ་བ་མཉམ་པ་དང་། ཆོས་ཐམས་ཅད་ཀྱི་རང་
བཞིན་ཤེས་ཤིང་ཁོང་དུ་ཆུད་པ་རབ་ཏུ་ཐོབ་པར་བྱ་བའི་ཕྱིར། དོན་ཁོང་དུ་ཆུད་པའི་སྐལ་བ་མཉམ་པ་དང་། ཆོས་ཀྱི་ཚུལ་རྒྱ་མཚོ་ཐམས་ཅད་ལ་ཆོས་ལ་རྣམ་པར་སྤྱོད་པའི་སྐལ་བ་མཉམ་པ་དང་། སྒྲིབ་

77-1-81a

པ་ཐམས་ཅད་ཀྱི་རི་རྣམ་པར་གཏོར་བའི་ཕྱིར་མི་འཇིགས་པའི་སྐལ་བ་མཉམ་པ་དང་། བསམ་པ་ཇི་ལྟ་བ་བཞིན་དུ་འགྲོ་བ་རྣམས་ལ་རྣམ་པར་ཡོངས་སུ་བསྟན་པའི་མཚན་དང་དཔེ་བྱད་བཟང་
པོས་རྣམ་པར་བྲིས་པའི་ལུས་རྣམ་པར་དག་པ་རབ་ཏུ་ཐོབ་པར་བྱ་བའི་ཕྱིར་གཟུགས་ཀྱི་ལུས་རྣམ་པར་དག་པའི་སྐལ་བ་མཉམ་པ་དང་། བྱང་ཆུབ་སེམས་དཔའི་སྟོབས་ཡོངས་སུ་རྫོགས་པས་ཐམས་
ཅད་མཁྱེན་པ་ཉིད་དུ་དམྱིགས་པ། རྣམ་པར་འཕེལ་བར་བྱ་བའི་ཕྱིར་སྟོབས་ཀྱི་སྐལ་བ་མཉམ་པ་དང་། སེམས་དང་བསམ་པའི་ནམ་མཁའ་ཡོངས་སུ་དག་པར་བྱ་བའི་ཕྱིར་མྱི་འཇིགས་པའི་སྐལ་
བ་མཉམ་པ་དང་། བསྐལ་པ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་ལ་གནས་པས་མི་སྐྱོ་བ་རབ་ཏུ་ཐོབ་པར་བྱ་བའི་ཕྱིར་བརྩོན་འགྲུས་ཀྱིས་སྐལ་བ་མཉམ་པ་དང་། ཆོས་ཐམས་ཅད་ལ་སྒྲིབ་
པ་མེད་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཕྱིར་སྤོབས་པས་སྐལ་བ་མཉམ་པ་དང་། འགྲོ་བ་ཐམས་ཅད་ལས་མངོན་པར་འཕགས་པའི་ལུས་ཡོངས་སུ་དག་པར་བྱ་བའི་ཕྱིར་ཟིལ་གྱིས་མི་ནོན་
པའི་སྐལ་བ་མཉམ་པ་དང་། འཁོར་གྱི་དཀྱིལ་འཁོར་ཐམས་ཅད་མངོན་པར་དགའ་བར་བྱ་བའི་ཚིགས་ཡོངས་སུ་དག་པར་བྱ་བའི་ཕྱིར་མ་ཞུམ་མྱི་དམའ་བའི་སྐལ་བ་མཉམ་པ་དང་། ཆོས་ཀྱི་ཚུལ་
རྒྱ་མཚོ་ཐམས་ཅད་ཀྱི་སྒྲ་རབ་ཏུ་བསྒྲག་པའི་ཕྱིར་དབྱངས་ཀྱིས་བསྐལ་པ་མཉམ་པ་དང་། འགྲོ་བ་ཐམས་ཅད་ཀྱི་ཚིག་རྣམ་པར་དམྱིགས་པའི་ཐ་སྙད་དང་། ཚུལ་རྒྱ་མཚོ་ལ་དབྱངས་ཀྱི་ཡན་ལག་རྣམ་པར་
དག་པའི་སྐལ་བ་མཉམ་པ་དང་། དེ་བཞིན་གཤེགས་པའི་གདམས་ངག་གི་ཡོན་ཏན་ཁོང་དུ་ཆུད་པ་རྣམ་པར་དག་པར་བྱ་བ་ལ་ཡོན་ཏན་རྣམ་པར་དག་པའི་སྐལ་བ་མཉམ་པ་དང་། ཁ་ན་མ་ཐོ་བ་མེད་པའི་ལས་

77-1-81b

རྣམ་པར་སྨིན་པ་ཡོངས་སུ་དག་པར་བྱ་བའི་ཕྱིར་ཆོས་དང་ལས་ཀྱི་རྒྱུད་དུ་མི་འགལ་བའི་སྐལ་བ་མཉམ་པ་དང་། སངས་རྒྱས་བྱུང་བ་ཐམས་ཅད་ཀྱི་ཆོས་ཀྱི་འཁོར་ལོ་རབ་ཏུ་བསྐོར་བའི་ཕྱིར་མཆོད་
སྦྱིན་གྱིས་ཆོས་བཟང་པོ་ལ་རབ་ཏུ་གནས་པའི་སྐལ་བ་མཉམ་པ་དང་། དེ་བཞིན་གཤེགས་པ་ཐམས་ཅད་ཀྱི་ཡུལ་དང་ཡེ་ཤེས་ལ་ཡང་དག་པར་གནས་པར་བྱ་བའི་ཕྱིར། ཚངས་པའི་སྤྱོད་པ་
རྣམ་པར་དག་པའི་སྐལ་བ་མཉམ་པ་དང་། བྱམས་པའི་ཚུལ་སྣ་ཚོགས་གྱིས་སྐད་ཅིག་རེ་རེ་ལ་སེམས་ཅན་རྒྱ་མཚོ་ཐམས་ཅད་དུ་རྒྱས་པར་དགང་བར་བྱ་བའི་ཕྱིར་བྱམས་པ་ཆེན་པོའི་སྐལ་བ་མཉམ་
པ་དང་། སེམས་ཅན་གྱི་ཁམས་ཐམས་ཅད་ཡོངས་སུ་བསྐྱབ་པའི་ཆོས་ཀྱི་སྦྱིན་གྱི་ཆར་མངོན་པར་འབབ་པའི་ཕྱིར། སྙིང་རྗེ་ཆེན་པོའི་ཚུལ་རྒྱ་མཚོ་ལ་འཇུག་པའི་སྐལ་བ་མཉམ་པ་དང་། སེམས་
ཅན་ཐམས་ཅད་ཡོངས་སུ་སྨྱིན་པར་བྱེད་པའི་ཐབས་ཀྱི་རྒྱུད་དུ་སྐལ་བ་མཉམ་པར་བྱ་བའི་ཕྱིར་ལུས་ཀྱི་ལས་ཀྱིས་བསྐལ་བ་མཉམ་པ་དང་། ཆོས་ཐམས་ཅད་བརྗོད་ཅིང་སྨོས་པ་ལ་ངག་གི་ལས་རྣམ་
པར་དག་པའི་སྐལ་བ་མཉམ་པ་དང་། སེམས་ཅན་ཐམས་ཅད་གྱི་སེམས་ལ་རྣམ་པ་ཐམས་ཅད་མཁྱེན་པ་ཉིད་དུ་དམྱིགས་པར་ཉེ་བར་བསྒྲུབ་པའི་ཕྱིར་ཡིད་ཀྱི་ལས་ཀྱིས་བསྐལ་པ་མཉམ་པ་དང་། སངས་
རྒྱས་ཀྱི་ཞིང་ཐམས་ཅད་ལ་རྒྱན་རྣམ་པ་སྣ་ཚོགས་པ་ཐམས་ཅད་ཀྱིས་རབ་ཏུ་བརྒྱན་པའི་སྐལ་བ་མཉམ་པ་དང་། སངས་རྒྱས་འབྱུང་བ་རྒྱ་མཚོ་ཐམས་ཅད་དུ་དེ་བཞིན་གཤེགས་པ་ཐམས་ཅད་
ཀྱི་སྤྱན་སྔར་འགྲོ་བའི་སྐལ་བ་མཉམ་པ་དང་། དེ་བཞིན་གཤེགས་པ་ཐམས་ཅད་ལ་ཆོས་ཀྱི་འཁོར་ལོ་སྐོར་བར་གསོལ་བ་གདབས་པའི་སྐལ་བ་མཉམ་པ་དང་། དེ་བཞིན་གཤེགས་པ་ཐམས་

77-1-82a

ཅད་ལ་དུས་མ་ལུས་པར་མཆོད་པ་ཐམས་ཅད་གྱིས་རིམ་གྲོར་བྱ་བའི་ཕྱིར། མཆོད་པས་རིམ་གྲོར་བྱ་བའི་སྐལ་བ་མཉམ་པ་དང་། སེམས་ཅན་གྱི་ཁམས་ཐམས་ཅད་དུ་སེམས་ཅན་ཡོངས་
སུ་སྨྱིན་པར་བྱ་བ་དང་། གདུལ་བའི་སྐལ་བ་མཉམ་པ་དང་། ཆོས་ཀྱི་ཚུལ་ཐམས་ཅད་ལ་སྣང་བ་རབ་ཏུ་ཐོབ་པའི་སྐལ་བ་མཉམ་པ་དང་། ཏིང་ངེ་འཛིན་གྱི་ཚུལ་རྒྱ་མཚོ་ཐམས་ཅད་ལ་ཏིང་ངེ་འཛིན་
རབ་ཏུ་ཐོབ་པའི་སྐལ་བ་མཉམ་པ་དང་། སངས་རྒྱས་ཀྱི་ཞིང་རྒྱ་མཚོ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་དང་། རྣམ་པར་འཕྲུལ་པས་རྒྱས་པར་དགང་བའི་ཕྱིར་ཀུན་ཏུ་རྒྱས་པར་དགང་
བའི་སྐལ་བ་མཉམ་པ་དང་། བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་འཕྲུལ་པའི་ཚུལ་རྒྱ་མཚོ་ལ་བྱང་ཆུབ་སེམས་དཔའི་རྣམ་པར་སྤྱོད་པའི་སྐལ་བ་མཉམ་པ་དང་། བྱང་ཆུབ་སེམས་
དཔའི་སྤྱོད་པ་ལ་གནས་པའི་འཁོར་ཀྱི་སྐལ་བ་མཉམ་པ་དང་། འཇིག་རྟེན་གྱི་ཁམས་ཐམས་ཅད་ཤིན་ཏུ་ཕྲ་བར་འཇུག་པ་ལ་འཇུག་པའི་སྐལ་བ་མཉམ་པ་དང་། སངས་རྒྱས་ཀྱི་ཞིང་ཤིན་ཏུ་
ཡངས་པ་ཐམས་ཅད་དུ་སེམས་རྣམ་པར་ཕྱེ་བའི་སྐལ་བ་མཉམ་པ་དང་། སངས་རྒྱས་ཀྱི་ཞིང་རྒྱ་མཚོ་ཐམས་ཅད་ལ་འཇུག་པ་རྣམ་པ་ཐ་དད་པ་ཁོང་དུ་ཆུད་པར་བྱ་བ་ལ་ཁོང་དུ་ཆུད་པ་རྣམ་པ་ཐ་
དད་པའི་སྐལ་བ་མཉམ་པ་དང་། སངས་རྒྱས་ཀྱི་ཞིང་ཐམས་ཅད་རྣམ་པར་ཕྱེ་བ་ཡེ་ཤེས་མཐའ་ཡས་པས་རྣམ་པར་དམིགས་པར་བྱ་བ་ལ་ཚུལ་འབྱམ་ཀླས་པས་ཀུན་ཏུ་རྒྱས་པར་
དགང་བའི་སྐལ་པ་མཉམ་པ་དང་། སངས་རྒྱས་ཀྱི་ཞིང་ཐམས་ཅད་དུ་མངོན་པར་འབྱུང་བའི་སྐལ་པ་དང་། ཕྱོགས་ཐམས་ཅད་རྒྱས་པར་དགང་བ་ཡང་དག་པར་གཞོལ་བ་ཐོགས་པ་

77-1-82b

མེད་ཅིང་ཕྱིར་མི་ལྡོག་པར་བྱ་བའི་ཕྱིར། ཕྱིར་མི་ལྡོག་པའི་སྐལ་བ་མཉམ་པ་དང་། སངས་རྒྱས་ཐམས་ཅད་ཀྱི་སྙིང་པོ་བྱང་ཆུབ་ཏུ་རྣམ་པར་འཚང་རྒྱ་བའི་ཡེ་ཤེས་ཀྱི་དཀྱིལ་འཁོར་སྣང་བ་རབ་
ཏུ་ཐོབ་པར་བྱ་བའི་ཕྱིར་མུན་པ་རྣམ་པར་སེལ་བའི་བསྐལ་པ་མཉམ་པ་དང་། སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་རྒྱ་མཚོར་རྗེས་སུ་ཕྱིན་པའི་སྐལ་བ་མཉམ་པ་དང་། 
སངས་རྒྱས་ཀྱི་ཞིང་བརྗོད་དུ་མེད་པའི་དེ་བཞིན་གཤེགས་པ་མཆོད་ཅིང་རིམ་གྲོར་བྱ་བའི་སྦྱོར་བ་ལ་སངས་རྒྱས་ཀྱི་ཞིང་ཐམས་ཅད་ལུས་ཀྱི་དྲ་བས་རྒྱས་པར་དགང་བའི་སྐལ་བ་མཉམ་
པ་དང་། ཆོས་ཀྱི་ཚུལ་རྒྱ་མཚོ་རྗེས་སུ་རྒྱུ་བ་དེ་དང་དེ་དག་ལ་ཡེ་ཤེས་མངོན་སུམ་གྱི་སྐལ་བ་མཉམ་པ་དང་། རྗེས་སུ་འཐུན་པའི་ཆོས་ཀྱི་ཚུལ་ཐམས་ཅད་མངོན་དུ་བྱ་བའི་སྦྱོར་བ་ལ་ནན་
ཏན་གྱིས་སྐལ་བ་མཉམ་པ་དང་། ཆོས་ཀྱི་མོས་པ་ཤིན་ཏུ་ཤས་ཆེ་བ་བརྩམས་པ་རྣམ་པར་དག་པར་བྱ་བའི་ཕྱིར་བརྩམས་པའི་བསྐལ་པ་མཉམ་པ་དང་། ལུས་དང་ངག་དང་ཡིད་ཀྱི་
ལས་གྱིས་སངས་རྒྱས་ཀྱི་ཡོན་ཏན་གྱི་རྒྱན་ཡོངས་སུ་བསྒྲུབ་པ་ལ་རྣམ་པར་དག་པའི་སྐལ་བ་མཉམ་པ་དང་། ཉམ་ངའི་རྟོག་པ་མེད་པའི་སེམས་ཀྱི་དཀྱིལ་འཁོར་གྱིས་ཆོས་ཐམས་
ཅད་ཀྱི་ཡེ་ཤེས་དཀྱིལ་འཁོར་ཡོངས་སུ་དག་པར་བྱ་བའི་ཕྱིར་ཡིད་ཀྱི་སྐལ་བ་མཉམ་པ་དང་། དགེ་བའི་རྩ་བ་ཐམས་ཅད་ཀྱི་ཚོགས་ཡང་དག་པར་བརྩམས་པ་མཐར་ཕྱིན་པར་བྱ་བའི་སྦྱོར་བ་
ལ་བརྩོན་འགྲུས་བརྩམས་པའི་སྐལ་བ་མཉམ་པ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་ཡོངས་སུ་རྫོགས་པར་བྱ་བ་ལ་སྤྱོད་པའི་རྒྱན་ཀྱི་སྐལ་བ་མཉམ་པ་དང་། 

77-1-83a

ཆོས་ཐམས་ཅད་ཀྱི་མཚན་མ་ཁོང་དུ་ཆུད་པར་བྱ་བ་ལ་ཆགས་པ་མེད་པ་རྣམ་པར་སྤྱད་པའི་སྐལ་པ་མཉམ་པ་དང་། ཆོས་ལ་རྣམ་པར་སྤྱོད་པའི་ཡེ་ཤེས་ཀྱིས་རྣམ་པར་འཕྲུལ་པ་
དེ་དང་དེ་དག་ཏུ་ཐབས་མཁས་པའི་ཚུལ་གྱིས་བསྐལ་པ་མཉམ་པ་དང་། བསམ་པ་ཇི་ལྟ་བ་བཞིན་དུ་སེམས་ཅན་རྣམས་ལ་ཡུལ་བསྟན་པས་ཡང་དག་པར་བསྐུལ་བའི་ཕྱིར་སྐྱེ་མཆེད་རྣམ་པར་
དག་པས་སྐལ་བ་མཉམ་པ་དང་། ཆོས་ཐམས་ཅད་བསྒོམ་པ་དང་། རྣམ་པར་བསྒོམ་པ་རབ་ཏུ་ཐོབ་པར་བྱ་བའི་ཕྱིར་བྱང་ཆུབ་སེམས་དཔའི་ཏིང་ངེ་འཛིན་ཀྱི་སྒོ་རབ་ཏུ་ཐོབ་པར་བྱ་བའི་སྐལ་བ་
མཉམ་པ་དང་། དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་ཀྱི་སྐལ་བ་མཉམ་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་རབ་ཏུ་ཐོབ་པར་བྱ་བ་ལས་
ཡོངས་སུ་གནན་པའི་སྐལ་བ་མཉམ་པ་དང་། བྱང་ཆུབ་སེམས་དཔའི་རྣམ་པར་དགོད་པ་ཐམས་ཅད་ལ་རབ་ཏུ་གནས་པའི་བསྐལ་པ་མཉམ་པ་དང་། སངས་རྒྱས་ཐམས་ཅད་ཀྱིས་ལུང་
བསྟན་པ་ལ་ཡོངས་སུ་ཇི་སྐད་བསྟན་པའི་སྐལ་བ་མཉམ་པ་དང་། སྐད་ཅིག་གཅིག་གི་ཏིང་ངེ་འཛིན་རྒྱ་མཚོའི་ཚུལ་ཐམས་ཅད་ལ་ཏིང་ངེ་འཛིན་གྱི་སྐལ་བ་མཉམ་པ་དང་། སངས་རྒྱས་ཀྱི་
འཕྲིན་ལས་མཚན་ཉིད་སྣ་ཚོགས་ལ་ཏིང་ངེ་འཛིན་རྣམ་པར་དགོད་པའི་སྐལ་བ་མཉམ་པ་དང་། རྗེས་སུ་དྲན་པའི་དམིགས་པའི་ཚུལ་རྒྱ་མཚོ་ཐམས་ཅད་ལ་རྗེས་སུ་དྲན་པའི་སྐལ་བ་མཉམ་
པ་དང་། བྱང་ཆུབ་སེམས་དཔའི་བྱ་བ་ལ་ཕྱི་མའི་མཐའི་བསྐལ་པའི་མུར་ཐུག་པར་ཞེ་ནོན་པ་ལ་བྱང་ཆུབ་སེམས་དཔའས་སྤྱད་པའི་སྐལ་བ་མཉམ་པ་དང་། སངས་རྒྱས་ཀྱི་ཡེ་ཤེས་ཚད་མེད་

77-1-83b

པ་ལ་མོས་ཤིང་དགའ་བའི་ཤུགས་རྒྱ་མཚོ་རྣམ་པར་འཕེལ་བར་བྱ་བའི་ཕྱིར། མོས་པའི་སྐལ་བ་མཉམ་པ་དང་། སྒྲིབ་པའི་རི་ཐམས་ཅད་ལ་རྣམ་པར་བཟློག་པའི་སྐལ་བ་མཉམ་པ་དང་། 
སངས་རྒྱས་ཀྱི་ཡེ་ཤེས་ཀྱི་ཚོགས་མཐའ་ཡས་པ་ཡོངས་སུ་བསྒྲུབ་པའི་ཕྱིར། ཕྱིར་མི་ལྡོག་པའི་ཡེ་ཤེས་གྱིས་སྐལ་བ་མཉམ་པ་དང་། སེམས་ཅན་ཐམས་ཅད་ཡོངས་སུ་སྨྱིན་པར་
བྱ་བ་དང་། གདུལ་བའི་དུས་སུ་སྐྱེ་བའི་སྐལ་བ་མཉམ་པ་དང་། ཐམས་ཅད་མཁྱེན་པ་ཉིད་ཀྱི་ཚུལ་གྱི་སྒོ་ལ་རྣམ་པར་སྤྱོད་པའི་སྐལ་བ་མཉམ་པ་དང་། ཆོས་ཀྱི་དབྱིངས་གྱི་ཚུལ་གྱིས་ཁྱུ་
མཆོག་གི་མཐུ་ཕྱུང་བའི་ཡུལ་ལ་རབ་ཏུ་འཇུག་པར་བྱ་བའི་ཕྱིར་ཡུལ་གྱིས་སྐལ་བ་མཉམ་པ་དང་། གཞི་ཐམས་ཅད་ཡོངས་སུ་ཆོམས་པའི་སེམས་སུ་བྱ་བའི་ཕྱིར་གཞི་མེད་པའི་སྐལ་
བ་མཉམ་པ་དང་། ཆོས་མཉམ་པ་ཉིད་གྱི་ཡེ་ཤེས་ལ་འཇུག་པར་བྱ་བའི་ཕྱིར་ཆོས་བསྟན་པའི་སྐལ་བ་མཉམ་པ་དང་། སངས་རྒྱས་ཐམས་ཅད་ཀྱི་བྱིན་གྱི་བརླབས་རང་གི་ལུས་ཀྱིས་
ཡང་དག་པར་གནོན་པའི་ཕྱིར་བརྩོན་པའི་སྐལ་བ་མཉམ་པ་དང་། འཇིག་རྟེན་གྱི་ཁམས་ཐམས་ཅད་ཁོང་དུ་ཆུད་པར་བྱ་བའི་ནན་ཏན་གྱི་ཚུལ་ལ་མངོན་པར་ཤེས་པའི་སྐལ་བ་
མཉམ་པ་དང་། ཕྱོགས་ཐམས་ཅད་ཀྱི་ཞིང་རྒྱ་མཚོར་འཇུག་པར་བྱ་བ་ལ་མངོན་པར་འདུ་བྱ་བ་མེད་པའི་རྫུ་འཕྲུལ་རབ་ཏུ་ཐོབ་པའི་སྐལ་བ་མཉམ་པ་དང་། གཟུངས་རྒྱ་མཚོ་
ཐམས་ཅད་ཀྱི་སྣང་བ་རབ་ཏུ་ཐོབ་པར་བྱ་བ་ལ་གཟུངས་ཀྱི་སའི་སྐལ་བ་མཉམ་པ་དང་། མདོ་སྡེའི་ཆོས་ཀྱི་རྣམ་གྲངས་ཐམས་ཅད་ལ་སངས་རྒྱས་ཐམས་ཅད་ཀྱི་ཆོས་ཀྱི་འཁོར་

77-1-84a

ལོའི་དགོངས་པ་ཁོང་དུ་ཆུད་པར་བྱ་བའི་སྐལ་བ་མཉམ་པ་དང་། ནམ་མཁའི་དབྱིངས་ལྟ་བུའི་ཆོས་ཀྱི་ཚུལ་ཐམས་ཅད་ཁོང་དུ་ཆུད་པར་བྱ་བའི་ཕྱིར་ཆོས་ཟབ་མོ་ལ་འཇུག་པའི་
སྐལ་བ་མཉམ་པ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་དུ་སྣང་བར་བྱ་བའི་སྐལ་བ་མཉམ་པ་དང་། བསམ་པ་ཇི་ལྟ་བ་བཞིན་དུ་འགྲོ་བས་རྣམ་པར་དམིགས་པར་བསྟན་པ་
ལ་མངོན་པར་གསལ་བའི་སྐལ་བ་མཉམ་པ་དང་། ཞིང་གི་བྱིན་གྱི་བརླབས་དང་། རྣམ་པར་འཕྲུལ་བ་དང་སེམས་ཅན་ཡོངས་སུ་བསྟན་པའི་ཕྱིར་རབ་ཏུ་བསྐྱོད་པའི་བསྐལ་བ་མཉམ་པ་
དང་། མཐོང་བ་དང་ཐོས་པ་དང་། རྗེས་སུ་དྲན་པས་སེམས་ཅན་འདུལ་བའི་ཕྱིར་དོན་ཡོད་པའི་སྐལ་བ་མཉམ་པ་དང་། སྨོན་ལམ་རྒྱ་མཚོའི་ཚུལ་ཐམས་ཅད་ཡོངས་སུ་རྫོགས་པས་
སྟོབས་བཅུའི་ཡེ་ཤེས་རྗེས་སུ་འཚང་རྒྱ་བར་བྱ་བའི་ཕྱིར་འབྱུང་བའི་སྐལ་བ་མཉམ་པ་ཡང་རབ་ཏུ་ཐོབ་པར་གྱུར་ཏོ། །དེ་ལྟར་ཚོང་དཔོན་གྱི་བུ་ནོར་བཟངས་ཤིན་ཏུ་དགའ་བའི་སེམས་སུ་གྱུར་ཏོ། །
མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ལ་བལྟས་པས་འདུ་ཤེས་རྣམ་པར་དག་པ་དེ་དག་ཐོབ་པར་གྱུར་ཏོ། །འདི་དག་ལ་སྩོགས་པ་མཚན་མོའི་
ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ལ་བསྐལ་བ་མཉམ་པའི་ཚུལ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཐོབ་པར་གྱུར་ཏོ། །དེ་ནས་
ཚོང་དཔོན་གྱི་བུ་ནོར་བཟངས་མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ལ་བལྟ་བའི་ཚུལ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་

77-1-84b

སྙེད་ལ་ཞུགས་པ་དགེ་བའི་བཤེས་གཉེན་གྱི་འདུ་ཤེས་རྣམ་པར་དག་པ་ཐམས་ཅད་མཐའ་དང་དབུས་མེད་པ་རབ་ཏུ་ཐོབ་པ་སྐལ་བ་མཉམ་པའི་ཚུལ་སངས་རྒྱས་ཀྱི་ཞིང་གི་རྡུལ་
ཤིན་ཏུ་ཕྲ་བ་སྙེད་ལ་ཞུགས་པས་བླ་གོས་ཕྲག་པ་གཅིག་ལ་བཟར་ཏེ། མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ག་ལ་བ་དེར་ཐལ་མོ་
སྦྱར་ཏེ། བཏུད་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་ནི་བདག་གི་སེམས་ལ་བདག་དབང་སྟེ། །བྱང་ཆུབ་མོས་པ་མི་ལྡོག་ཤིན་ཏུ་བརྟན། །ཁྱོད་ཀྱི་ཐུགས་
ལ་འང་བདག་ནི་དེ་བཞིན་དུ། །བདག་གི་བཞིན་དུ་དེ་རིང་བརྟན་པར་སྐྱེས། །སྡིག་ཏོ་མ་ལུས་རྣམ་པར་བྱང་བར་གྱུར། །དགེ་བའི་རྣམ་སྨྱིན་མི་མཉམ་རབ་ཏུ་ཐོབ། །བདག་
གིས་བལྟ་ན་མཛེས་པ་ཁྱོད་མཐོང་བས། །ཆོས་དཀར་མི་བས་བདག་གིས་ཡོངས་སུ་བསྩགས། །བདག་གི་སེམས་ནི་ཡོན་ཏན་ཆུ་བོས་བརྒྱན། །སེམས་ཅན་ཕན་
བརྩོན་རྣམ་པ་ཐ་དད་པས། །བརྒྱན་གྱུར་དེས་ནི་ཕྱི་མཐའི་བསྐལ་པར་ཡང་། །ཞིང་རྣམས་ཀུན་ཏུ་སྤྱོད་པ་སྤྱད་པར་བགྱི། །འཕགས་མས་བདག་ལ་ཐུགས་བརྩེ་མཛད་
སླད་དུ། །ཆོས་རྣམས་ཐམས་ཅད་གྲུབ་པ་ཁྱོད་ཀྱིས་བསྟན། །བདག་ལ་སྨན་སླད་རྗེས་སུ་བཟུང་དགོངས་ཏེ། །ཆོས་ཀྱི་གདམས་ངག་དམ་པ་བསྩལ་དུ་གསོལ། །ངན་
འགྲོར་ལྷུང་བའི་ལམ་ནི་རྣམ་པར་བཟློག །མཐོ་རིས་ཤུལ་གཙང་དམ་པ་ཡོངས་སུ་བསྟན། །བདེ་གཤེགས་མ་ལུས་བཞུད་ཅིང་རྗེས་བཞུད་པའི། །ཐམས་ཅད་མཁྱེན་

77-1-85a

པའི་ཤུལ་ཀྱང་ཁྱོད་ཀྱིས་བསྟན། །དཔེ་མེད་རྨད་དུ་བྱུང་མངའ་ཁྱོད་ལ་བདག །འབྱུང་བའི་འདུ་ཤེས་དམ་པ་ཉེ་བར་སྐྱེས། །ནམ་མཁའ་ལྟ་བུར་དྲི་མེད་ཚད་མེད་པའི། །ཐམས་ཅད་
མཁྱེན་ཉིད་ཆོས་སྒོ་རྣམ་པར་དག །ཀུན་མཁྱེན་ཚད་མེད་འབྱུང་གནས་བཟང་པོ་ཡི། །འདུ་ཤེས་དེ་རིང་ཚད་མེད་ཁྱོད་ལ་སྐྱེས། །བསོད་ནམས་རྒྱ་མཚོ་མཁའ་ལྟར་ཚད་མེད་པའི། །
སེམས་ལས་བྱུང་བ་སྐད་ཅིག་རེ་རེར་འབྱུང་། །འཕགས་མ་ཕ་རོལ་ཕྱིན་པས་བདག་བཀུར་གསོལ། །བསམ་ཡས་བསོད་ནམས་ཀྱིས་ཀྱང་རྣམ་སྤེལ་གསོལ། །ཡོན་ཏན་དགེ་བ་
ཐམས་ཅད་ཡོངས་འཕེལ་ནས། །ཐམས་ཅད་མཁྱེན་པའི་གོ་འཕང་མྱུར་ཐོབ་མཛོད། །དགེ་བའི་བཤེས་གཉེན་རྣམས་ལ་རྟག་པར་བདག །ཐམས་ཅད་མཁྱེན་ལམ་རབ་རྫོགས་
འདུ་ཤེས་ཏེ། །དེ་ཡི་སླད་དུ་བདག་གི་ཆོས་དཀར་རྣམས། །མྱུར་དུ་རྫོགས་པར་འགྱུར་ཞེས་ཚིམ་པར་གྱུར། །དེ་སླད་འདི་ལས་དོན་ཀུན་རབ་ཏུ་བྱུང་། །དགེ་བའི་ཡོན་ཏན་ལྡན་པ་གྲུབ་
པར་གྱུར། །བརྗོད་པ་མཐའ་ཡས་ཐམས་ཅད་མཁྱེན་པའི་ལམ། །འདི་ནི་ཡོངས་སུ་བསྒྲུབས་ཤིང་འགྲོ་ལ་བརྗོད། །ཡོན་ཏན་ཚད་མེད་ཁྱོད་ནི་སློབ་དཔོན་གྱུར། །ཐམས་ཅད་
མཁྱེན་ཀྱི་ཆོས་ལ་བདག་འདྲེན་པ། །བསྐལ་པ་བྱེ་བ་ཁྲག་ཁྲིག་གྲངས་མེད་པས། །འཕགས་མ་ཁྱོད་ལ་བདག་གིས་ལན་མི་ལོན། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་ཚིགས་
སུ་བཅད་པ་དེ་དག་སྨྲས་ནས། མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ལ་འདི་སྐད་ཅེས་སྨྲས་སོ། །ལྷ་མོ་ཁྱོད་ཀྱིས་བདག་ལ་བྱང་ཆུབ་སེམས་དཔའི་

77-1-85b

རྣམ་པར་ཐར་པའི་ཡུལ་བསམ་གྱིས་མི་ཁྱབ་པ་འདི་ནི་བསྟན་ན་ལྷ་མོ་རྣམ་པར་ཐར་པ་འདིའི་མིང་ནི་ཅི་ཞེས་བགྱི། ལྷ་མོ་ཁྱོད་ནི་ཇི་སྲིད་གཅིག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
ཞུགས་ཇི་སྲིད་གཅིག་ན་ནི་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར། དེ་སྐད་ཅེས་སྨྲས་པ་དང་། མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་
ལ་བརྩོན་པའི་འོད་ཀྱིས་ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་རྣམ་པར་ཐར་པ་འདི་ནི་སེམས་ཅན་ཐམས་ཅད་ཡོངས་སུ་སྨྱིན་པར་བྱ་བ་ལ་ཡང་དག་པར་
བསྐུལ་བའི་དགེ་བའི་རྩ་བ་ཡོངས་སུ་འབྱུང་བ་ཞེས་བྱ་བ་སྟེ། རིགས་ཀྱི་བུ་ཁོ་མོ་རྣམ་པར་ཐར་པ་འདི་དང་ལྡན་པས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་ཁོང་དུ་ཆུད་དེ་ཆོས་ཐམས་
ཅད་ཀྱི་ངོ་བོ་ཉིད་ལ་ཞུགས་ནས། གནས་མེད་པའི་ཆོས་ལ་རྟེན་ཏེ། འཇིག་རྟེན་ཐམས་ཅད་ལས་འཕགས་པར་གྱུར་ཏོ། །ཆོས་རྣམས་ཀྱི་གཟུགས་ཤིན་ཏུ་རྣམ་པར་ཕྱེ་བ་ལ་ཞུགས་
ཏེ། མི་འདྲ་བ་མེད་པའི་ཁ་དོག་དང་། སྣ་ཚོགས་མེད་པའི་ཁ་དོག་དང་། རྣམ་པ་ཐ་དད་པ་མེད་པའི་ཁ་དོག་དང་། མི་རྟོག་པའི་ཁ་དོག་དང་། མི་སྔོ་བའི་ཁ་དོག་དང་། མི་སེར་བའི་ཁ་དོག་དང་། མི་དམར་བའི་
ཁ་དོག་དང་། མི་དཀར་བའི་ཁ་དོག་དང་། མི་འཐུན་པ་མེད་པ་དང་། སྣ་ཚོགས་མེད་པ་དང་། རྣམ་པ་ཐ་དད་པ་མེད་པ་དང་རྟོག་པ་མེད་པ་དང་མི་སྔོ་བ་དང་མི་སེར་བ་དང་། མི་དམར་བ་དང་མི་དཀར་བའི་ཁ་དོག་
གི་ཆོས་ཉིད་ལ་ཞུགས་ནས་ཁ་དོག་རྣམ་པར་ཕྱེ་བ་དུ་མའི་གཟུགས་ཀྱི་ལུས་སྣ་ཚོགས་ཀྱི་ཁ་དོག་ཅན། ཁ་དོག་དུ་མ་དང་ཁ་དོག་ཚད་མེད་པ་དང་། ཁ་དོག་རྣམ་པར་དག་པ་དང་རྒྱན་ཐམས་ཅད་འབྱིན་

77-1-86a

པའི་ཁ་དོག་དང་ཀུན་ཏུ་སྣང་བའི་ཁ་དོག་དང་འགྲོ་བ་ཐམས་ཅད་དང་འདྲ་བའི་ཁ་དོག་དང་། འཇིག་རྟེན་ཐམས་ཅད་ལ་མངོན་དུ་གྱུར་ཅིང་ལྷག་པའི་ཁ་དོག་དང་གཟུག་རྙན་ཀུན་ཏུ་སྣང་བའི་ཁ་དོག་དང་། མཚན་
དང་དཔེ་བྱད་བཟང་པོས་རྣམ་པར་སྦྱངས་པའི་ཁ་དོག་དང་། ཁ་ན་མ་ཐོ་བ་མེད་པར་སྤྱོད་པའི་འོད་དང་ལྡན་པའི་ཁ་དོག་དང་། སྟོབས་ཆེན་པོས་རྣམ་པར་གནོན་པ་ཡོངས་སུ་སྟོན་པའི་ཁ་དོག་དང་། ཟབ་མོ་ཐོབ་
པར་དགའ་བའི་ཁ་དོག་དང་། འཇིག་རྟེན་ཐམས་ཅད་ཀྱིས་མི་ཐུབ་པའི་ཁ་དོག་དང་། འགྲོ་བ་ཐམས་ཅད་ཀྱི་ཚིག་གིས་མི་ཟད་པའི་ཁ་དོག་དང་། སྐད་ཅིག་རེ་རེ་ལ་སྣ་ཚོགས་སུ་འགྱུར་བའི་ཁ་དོག་དང་། 
ཁ་དོག་གི་སྤྲིན་སྣ་ཚོགས་ཡོངས་སུ་སྟོན་པའི་ཁ་དོག་དང་། གཟུགས་དང་དབྱིབས་སྣ་ཚོགས་ཀྱི་ཁ་དོག་དང་། རྣམ་པར་འཕྲུལ་པ་ཚད་མེད་པ་སྟོན་པའི་ཁ་དོག་དང་། ཤིན་ཏུ་ཡིད་དུ་འོང་ཞིང་རྣམ་པར་སྣང་
བའི་ཁ་དོག་དང་། བཟང་པོ་དང་མཛེས་པ་ཐམས་ཅད་འཕེལ་བའི་ཁ་དོག་དང་། །སེམས་ཅན་ཐམས་ཅད་ཡོངས་སུ་སྨྱིན་པར་བྱ་བ་དང་། འཐུན་པའི་ཁ་དོག་དང་། བསམ་པ་ཇི་ལྟ་བ་བཞིན་
དུ་འདུལ་བ་ལ་མངོན་ཏུ་འགྱུར་བའི་དགེ་བའི་ཁ་དོག་དང་། ཐོགས་པ་མེད་པར་ཀུན་ཏུ་སྣང་བའི་ཁ་དོག་དང་། ཁ་དོག་དང་ཞིང་རྙོག་པ་མེད་ལ་རྣམ་པར་གསལ་ཏེ། འོད་འདང་བའི་ཁ་དོག་དང་། 
མི་ཤེས་པའི་ལུས་ཀྱིས་བསྒྲུབ་པས་མཛེས་པར་གྱུར་པའི་ཁ་དོག་དང་། ཆོས་ཀྱི་ཚུལ་བསམ་གྱིས་མི་ཁྱབ་པ་རབ་ཏུ་སྟོན་པའི་ཁ་དོག་དང་། ཟིལ་གྱིས་མི་ནོན་པ་ཟིལ་གྱིས་གནོན་པས་ཐམས་
ཅད་ཟིལ་དུ་རླག་པར་བྱེད་པའི་ཁ་དོག་དང་། མུན་པ་དང་རབ་རིབ་མེད་པའི་ཁ་དོག་དང་། མུན་པ་ཐམས་ཅད་རྣམ་པར་སེལ་བའི་ཁ་དོག་དང་། དཀར་པོ་ཐམས་ཅད་ཤིན་ཏུ་བསྒྲུབས་པའི་

77-1-86b

ཁ་དོག་དང་། བདག་ཉིད་ཆེ་བའི་ཡོན་ཏན་རྒྱ་མཚོའི་ཁ་དོག་དང་། སྔོན་བླ་མ་ལ་རིམ་གྲོར་བྱས་པས་ཤིན་ཏུ་བསྒྲུབས་པའི་ཁ་དོག་དང་། ལྷག་པའི་བསམ་པའི་ནམ་མཁའ་ཡོངས་སུ་དག་པར་བྱེད་པའི་
ཁ་དོག་དང་། མཆོག་དམ་པ་ཕུལ་དུ་བྱུང་བར་ཤིན་ཏུ་ཡངས་པའི་ཁ་དོག་དང་། མི་འཕྲོགས་མི་ཟད་པའི་ཡོན་ཏན་རྒྱ་མཚོ་རབ་ཏུ་སྟོན་པའི་ཁ་དོག་དང་། འཇིག་རྟེན་ཐམས་ཅད་ལ་མི་གནས་ཤིང་མ་
འདྲེས་པའི་ཁ་དོག་དང་། ཐོགས་པ་མེད་པར་ཕྱོགས་ཐམས་ཅད་རྒྱས་པར་འགེངས་པའི་ཁ་དོག་དང་། སེམས་ཀྱི་སྐད་ཅིག་འབྱམ་ཀླས་པ་ལ་ཞིང་རྒྱ་མཚོ་བརྗོད་དུ་མེད་པར་ཁ་དོག་སྣ་ཚོགས་
པ་རྣམ་པ་དུ་མ་ཡོངས་སུ་སྟོན་པའི་ཁ་དོག་དང་། སེམས་ཅན་ཐམས་ཅད་ཀྱི་དགའ་བའི་ཤུགས་ཆེན་པོ་རྣམ་པར་འཕེལ་བར་བྱེད་པའི་ཁ་དོག་དང་། སེམས་ཅན་རྒྱ་མཚོ་ཐམས་ཅད་
ཡོངས་སུ་བསྡུ་བའི་ཁ་དོག་དང་། བ་སྤུའི་སྒོ་ཐམས་ཅད་ནས་སངས་རྒྱས་གྱི་ཡོན་ཏན་རྒྱ་མཚོ་མ་ལུས་པའི་སྤྲིན་གྱི་སྒྲ་སྒྲོགས་པའི་ཁ་དོག་དང་། སེམས་ཅན་ཐམས་ཅད་ཀྱི་བསམ་
པ་དང་། མོས་པ་རྒྱ་མཚོ་རྣམ་པར་སྤྱོད་པའི་ཁ་དོག་དང་། ཆོས་ཐམས་ཅད་ཀྱི་དོན་རྣམ་པར་གདོན་མི་ཟ་བ་ཡོངས་སུ་སྟོན་པའི་ཁ་དོག་དང་། འོད་གཟེར་གྱི་དྲ་བའི་དཀྱིལ་འཁོར་ཁ་དོག་སྣ་ཚོགས་
སུ་སྣང་བའི་ཁ་དོག་དང་། ནམ་མཁའ་ལྟར་དྲི་མ་མེད་པར་སྣང་བའི་ཁ་དོག་དང་། རིན་པོ་ཆེའི་རྒྱལ་པོ་རྣམ་པར་དག་པ་ལྟར་རྡུལ་གྱི་དྲི་མ་མེད་པའི་འོད་ལ་གནས་པའི་ཁ་དོག་དང་། ཆོས་ཉིད་དྲི་མ་མེད་
པའི་འོད་ཀྱི་ཁ་དོག་དང་། ཁ་དོག་དཔག་ཏུ་མེད་པའི་ཚུལ་རྒྱ་མཚོ་རྣམ་པ་ཐ་དད་པ་ཡོངས་སུ་སྟོན་པའི་ཁ་དོག་དང་། ཕྱོགས་ཀུན་ཏུ་སྣང་བར་བྱེད་པའི་ཁ་དོག་དང་། དུས་ལ་གང་དུ་བབ་པར་འགྲོ་བ་

77-1-87a

ཡོངས་སུ་བསྟན་པར་མ་འདྲེས་པའི་ཁ་དོག་དང་། ཞི་བ་དང་དུལ་བའི་སྟོབས་ལས་བྱུང་བའི་ཁ་དོག་དང་། ཉོན་མོངས་པ་ཐམས་ཅད་རབ་ཏུ་ཞི་བར་བྱེད་པའི་ཁ་དོག་དང་། འགྲོ་བ་
བསོད་ནམས་ཀྱི་ཞིང་ཐམས་ཅད་ལ་རབ་ཏུ་སྟོན་པའི་ཁ་དོག་དང་། འཇིགས་པ་ཐམས་ཅད་རབ་ཏུ་སེལ་བའི་ཁ་དོག་དང་། དོན་ཡོད་པར་འགྲོ་བ་རྒྱས་པར་འགེངས་པའི་ཁ་དོག་དང་། ཡེ་ཤེས་ཀྱི་
རྣམ་པར་གནོན་པ་ཆེན་པོ་རབ་ཏུ་རྗོགས་པའི་ཁ་དོག་དང་། ཆགས་པ་མེད་པའི་ལུས་ཀྱིས་ཀུན་ཏུ་རྒྱས་པར་འགེངས་པའི་ཁ་དོག་དང་། ལུས་དམ་པའི་སྤྲིན་ཀྱི་དབྱིངས་ཀྱིས་འགྲོ་བ་ཀུན་ཏུ་སྟོན་པར་
བྱེད་པའི་ཁ་དོག་དང་། བྱམས་པའི་རྒྱ་མཚོ་ཆེན་པོ་ཡོངས་སུ་སྡུད་པའི་ཁ་དོག་དང་། བསོད་ནམས་ཀྱི་རི་རབ་ཆེན་པོ་ཡོངས་སུ་བསྒྲུབ་པའི་ཁ་དོག་དང་། འགྲོ་བ་ཐམས་ཅད་དུ་མི་གནས་ཀྱང་འཇིག་
རྟེན་གྱི་རྒྱུད་ཐམས་ཅད་དུ་གཟུགས་བརྙན་འབྱུང་བའི་ཁ་དོག་དང་། ཡེ་ཤེས་ཀྱི་སྟོབས་ཆེན་པོ་རྣམ་པར་སྐྱོང་བའི་ཁ་དོག་དང་། འཇིག་རྟེན་ཐམས་ཅད་ཀྱི་རྗེས་སུ་དྲན་པ་དང་། འགྲོ་བའི་ཁ་དོག་དང་། 
རིན་པོ་ཆེ་ཐམས་ཅད་ལྟ་བུའི་ཁ་དོག་དང་། རྣམ་པར་སྣང་བའི་སྙིང་པོ་ལྟར་ཡོངས་སུ་སྟོན་པའི་ཁ་དོག་དང་། འགྲོ་བ་ཐམས་ཅད་ཀྱི་མོས་པའི་ཚུལ་དང་འཐུན་པའི་ཁ་དོག་དང་། ཐམས་ཅད་མཁྱེན་
པ་ཉིད་ཀྱི་རྣམ་པ་ལ་མངོན་དུ་གྱུར་པའི་ཁ་དོག་དང་། མིག་འཛུམ་གྱིས་བརྒྱན་པས་འགྲོ་བ་མོས་པར་བྱེད་པའི་ཁ་དོག་དང་། རིན་པོ་ཆེའི་རྒྱན་དམ་པའི་འོད་ཀྱི་ཁ་དོག་དང་། འགྲོ་བ་ཐམས་ཅད་དུ་ཐོགས་
པ་མེད་པ་ལ་ཕྱིར་ཕྱོགས་པ་མེད་པའི་ཁ་དོག་དང་། ངེས་པ་མེད་ཅིང་མངོན་པར་ཞེན་པ་མེད་པའི་ཁ་དོག་དང་། བྱིན་གྱི་བརླབས་ཀྱིས་རྣམ་པར་འཕྲུལ་པའི་ཁྱུ་མཆོག་གི་མཐུ་བྱིན་པ་ཡོངས་སུ་སྟོན་

77-1-87b

པའི་ཁ་དོག་དང་། རྫུ་འཕྲུལ་ཐམས་ཅད་ཀྱིས་རྣམ་པར་འཕྲུལ་པའི་ཁྱུ་མཆོག་གི་མཐུ་ཕྱུང་བ་ཡོངས་སུ་སྟོན་པའི་ཁ་དོག་དང་། དེ་བཞིན་གཤེགས་པའི་དགེ་བའི་རྩ་བ་སྣང་བར་བྱེད་པའི་ཁ་དོག་
དང་། ཆོས་ཀྱི་དབྱིངས་ཁ་ན་མ་ཐོ་བ་མེད་པའི་ཚུལ་རྒྱ་མཚོ་ལ་རབ་ཏུ་ཞུགས་པའི་ཁ་དོག་དང་། སངས་རྒྱས་ཐམས་ཅད་ཀྱི་འཁོར་ཀྱི་དཀྱིལ་འཁོར་དུ་ཕྱིན་པའི་གཟུགས་རྙན་འབྱུང་བའི་ཁ་དོག་དང་། 
ཁ་དོག་སྣ་ཚོགས་རྒྱ་མཚོ་རབ་ཏུ་བསྒྲུབ་པའི་ཁ་དོག་དང་། ལེགས་པར་སྤྱད་པ་དང་། རྒྱུ་འཐུན་པ་བཟང་པོས་བྱུང་བའི་ཁ་དོག་དང་། འདུལ་བ་ཇི་ལྟ་བ་བཞིན་དུ་ཉེ་བར་བསྒྲུབ་པའི་ཁ་དོག་དང་། 
འཇིག་རྟེན་ཐམས་ཅད་ཀྱིས་བལྟ་ན་མི་ངོམས་པའི་ཁ་དོག་དང་། འོད་དང་བ་རྣམ་པ་སྣ་ཚོགས་ཀྱི་འོད་དུ་སྣང་བའི་ཁ་དོག་དང་། དུས་གསུམ་གྱི་ཁ་དོག་རྒྱ་མཚོ་ཐམས་ཅད་ཡོངས་སུ་བསྟན་པའི་ཁ་དོག་
དང་། འོད་གཟེར་ཁ་དོག་ཐམས་ཅད་དང་ལྡན་པ་རྒྱ་མཚོ་རབ་དུ་འགྱེད་པའི་ཁ་དོག་དང་། འོད་ཀྱི་དཀྱིལ་འཁོར་རྒྱ་མཚོ་ཁ་དོག་བརྗོད་དུ་མེད་པ་སྣ་ཚོགས་རྣམ་པ་ཐ་དད་པ་ཡོངས་སུ་སྟོན་པའི་ཁ་དོག་དང་། སྤོས་
ཐམས་ཅད་ཀྱི་འོད་འཕྲོ་བ་ཀུན་ལས་འདས་པའི་ཁ་དོག་དང་། བ་སྤུའི་སྒོ་རེ་རེ་ནས་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཉི་མའི་དཀྱིལ་འཁོར་གྱི་སྤྲིན་ཡོངས་སུ་སྟོན་པའི་ཁ་དོག་དང་། 
ཟླ་བའི་དཀྱིལ་འཁོར་གྱི་གཟུགས་དྲི་མ་མེད་ཅིང་ཡངས་པའི་སྤྲིན་གྱི་བྱིན་གྱིས་རླབས་ཀྱི་ཁ་དོག་དང་། མེ་ཏོག་ཡིད་དུ་འོང་བའི་རི་རབ་ཀྱི་སྤྲིན་གྱིས་མཐའ་ཡས་པ་རབ་ཏུ་འགྱེད་པའི་ཁ་དོག་དང་། ཕྲེང་བ་
སྣ་ཚོགས་མངོན་པར་བསྒྲུབ་པའི་ཤིང་གི་སྤྲིན་གྱི་ཕྲེང་བ་ཐམས་ཅད་ཀྱི་ཆར་རབ་ཏུ་འབེབས་པའི་ཁ་དོག་དང་། རིན་པོ་ཆེ་ཐམས་ཅད་ཀྱི་པད་མོའི་སྤྲིན་ཡོངས་སུ་སྟོན་པའི་ཁ་དོག་དང་། སྤོས་དང་

77-1-88a

བདུག་སྤོས་ཐམས་ཅད་གྱི་ན་བུན་གྱི་གཟུགས་ཀྱི་སྤྲིན་གྱིས་ཆོས་ཀྱི་དབྱིངས་རྒྱས་པར་འགེངས་པའི་ཁ་དོག་དུ་སེམས་ཀྱི་སྐད་ཅིག་རེ་རེ་ལ་ཕྱེ་མའི་མཛོད་ཀྱི་སྤྲིན་ཐམས་ཅད་བྱིན་གྱིས་
བརླབས་ཤིང་། ཕྱོགས་བཅུར་ཆོས་ཀྱི་དབྱིངས་ཀྱི་ཚུལ་རྒྱ་མཚོ་ཐམས་ཅད་རྒྱས་པར་བཀང་ནས་མཐོང་བས་འདུལ་བའི་སེམས་ཅན་རྣམས་དང་། ཐོས་པས་འདུལ་བ་དང་། རྗེས་སུ་དྲན་པས་
འདུལ་བ་དང་། ཆོས་ཀྱི་འཁོར་ལོ་སྤྲུལ་པ་མངོན་པར་བསྒྲུབ་པས་འདུལ་བ་དང་། ཡོངས་སུ་སྨིན་པར་འགྱུར་བའི་དུས་ལ་བབ་པས་འདུལ་བར་གྱུར་བ་དང་། གཟུགས་ཀྱི་ལུས་ཡོངས་སུ་བསྟན་པས་
འདུལ་བ་དང་། བསྙེན་བཀུར་བྱ་བས་འདུལ་བ་དང་། ཁོང་དུ་ཆུད་པར་བྱ་བས་འདུལ་བ་དང་། རྣམ་པར་འཕྲུལ་པ་དང་། ཆོ་འཕྲུལ་སྣ་ཚོགས་ཡོངས་སུ་བསྟན་པས་འདུལ་བ་དང་། རྣམ་པར་འཕྲུལ་
པ་དང་། ཆོ་འཕྲུལ་བསམ་གྱིས་མི་ཁྱབ་པ་རྣམ་པར་དམིགས་པ་ཡོངས་སུ་བསྟན་པས་འདུལ་བའི་སེམས་ཅན་རྣམས་ཀྱི་བསམ་པའི་དབང་དང་། དུས་ཀྱི་དབང་དང་། མི་དགེ་བའི་ལས་ལས་རྣམ་
པར་བཟློག་པའི་དབང་དང་། དགེ་བའི་ལས་ཡོངས་སུ་བསྒྲུབ་པ་ལ་སོ་སོར་འགོད་པའི་དབང་དང་། སྔོན་སྨོན་ལམ་ཆེན་པོ་མངོན་པར་བསྒྲུབ་པའི་དབང་དང་། ཐམས་ཅད་མཁྱེན་པ་ཉིད་ཀྱི་ཤུགས་ཀྱི་
དབང་དང་། བྱང་ཆུབ་སེམས་དཔའི་རྣམ་པར་ཐར་པ་རྒྱ་ཆེན་པོའི་རྣམ་པར་འཕྲུལ་པ་རབ་ཏུ་ཐོབ་པའི་ཆོས་ཀྱི་དབང་དང་། འགྲོ་བ་ཐམས་ཅད་ཡོངས་སུ་སྐྱོབ་པ་ཤིན་ཏུ་བསྲུང་བའི་སྙིང་རྗེ་ཆེན་པོའི་
སྟོབས་ཡོངས་སུ་འབྱུང་བའི་དབང་དང་། བྱམས་པ་ཆེན་པོའི་རྒྱ་མཚོ་རྣམ་པར་དག་པ་ཡོངས་སུ་བསྐྱེད་པའི་བསམ་པའི་དབང་གིས། དེ་བཞིན་གཤེགས་པའི་བྱིན་གྱིས་བརླབས་ཡང་དག་པར་

77-1-88b

བླང་བའི་ཕྱིར་རབ་ཏུ་འཇུག་གོ། །རིགས་ཀྱི་བུ་དེ་ལྟར་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨིན་པར་བྱས་པས་བསམ་པ་ཇི་ལྟ་བ་བཞིན་དུ་དགེ་བའི་རྩ་བ་ལ་
ཡང་དག་པར་བསྐུལ་བ་ལ་རབ་ཏུ་གནས་ཏེ། རྣམ་པར་དབྱེ་བ་མེད་པའི་ཆོས་ལ་ཞུགས་ནས་མཐའ་དང་དབུས་མེད་པའི་ལུས་ཀྱི་ཁ་དོག་དང་དབྱིབས་ཡོངས་སུ་བསྟན་ཏེ། སྤྱོད་པའི་ལུས་རེ་རེ་ལས་མཐའ་
དང་དབུས་མེད་པའི་ཁ་དོག་རྒྱ་མཚོ་འཇིག་རྟེན་དུ་རྣམ་པར་དམིགས་པར་བྱས་ཏེ། སྤྱོད་པའི་ཁ་དོག་རེ་རེ་ལས་མཐའ་དང་དབུས་མེད་པའི་འོད་གཟེར་ཀྱི་སྤྲིན་ཡོངས་སུ་བཀྱེ་ཞིང་འོད་གཟེར་རེ་རེ་ལས་ཀྱང་
སངས་རྒྱས་ཀྱི་ཞིང་གི་གཟུགས་བརྙན་མཐའ་དང་དབུས་མེད་པ་ཡོངས་སུ་བསྟན་ནས། སངས་རྒྱས་ཀྱི་ཞིང་རེ་རེར་ཡང་དག་པར་འབྱུང་བ་མཐའ་དང་དབུས་མེད་པ་ཡོངས་སུ་བསྟན་ཏེ། དེ་བཞིན་གཤེགས་
པ་རེ་རེ་ཞིང་ཡང་སངས་རྒྱས་ཀྱི་རྣམ་པར་འཕྲུལ་པ་མཐའ་དང་དབུས་མེད་པ་ཡོངས་སུ་སྟོན་པ་བྱེད་ཅིང་སྔོན་གྱི་དགེ་བའི་རྩ་བས་ཡང་དག་པར་བསྐུལ་བ་བྱེད་དོ། །དགེ་བའི་རྩ་བ་མ་བསྐྱེད་པ་རྣམས་
ཀྱང་ཡོངས་སུ་བསྐྱེད་དོ། །བསྐྱེད་པ་རྣམས་ཀྱང་ཡངས་པར་བྱེད་དོ། །དགེ་བའི་རྩ་བ་ཡངས་པར་བྱས་པ་རྣམས་ནི་རྣམ་པར་འཕེལ་བར་བྱེད་དོ། །ཁོ་མོ་ནི་སེམས་ཀྱི་སྐད་ཅིག་རེ་རེ་ལ་ཡང་། སེམས་ཅན་
གྱི་ཁམས་མཐའ་དང་དབུས་མེད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་ས་ལ་རབ་ཏུ་འགོད་པར་བྱེད་དོ།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་
རྒྱས་པ་ཆེན་པོའི་མདོ། བམ་པོ་དྲུག་པ། རིགས་ཀྱི་བུ་གཞན་ཡང་ཁྱོད་ཀྱིས་འདི་སྐད་དུ་སྨྲས་ཏེ། ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་ནས་ནི་ཇི་སྲིད་གཅིག་

77-1-89a

ལོན། བསྐལ་པ་བརྒྱ་ཕྲག་ཇི་སྙེད་ཅིག་ནས་ནི་བྱང་ཆུབ་གི་སྤྱོད་པ་ལ་སྤྱོད་སྤྱོད་ཅེས་ཟེར་བ་དེའི་དོན་ཀྱང་། སངས་རྒྱས་ཀྱི་བྱིན་གྱིས་བསྟན་པར་བྱའོ། །རིགས་ཀྱི་བུ་སེམས་དཔའ་
རྣམས་ཀྱི་ཡེ་ཤེས་ཀྱི་དཀྱིལ་འཁོར་ནི་རྟོག་པ་དང་། རྣམ་པར་རྟོག་པའི་ཡུལ་དང་ལྡན་ཏེ། དེ་ལ་འཁོར་བ་རིང་བའམ། འཁོར་བ་ཐུང་བར་རྣམ་པར་དགོད་ཅིང་བརྗོད་པར་བྱ་བ་བྱེད་དོ། །
བསྐལ་པ་ཀུན་ནས་ཉོན་མོངས་པ་འམ། བསྐལ་པ་རྣམ་པར་དག་པ་འམ། བསྐལ་པ་ཆུང་བ་འམ། བསྐལ་པ་ཆེ་བ་འམ། བསྐལ་པ་མང་བ་འམ། བསྐལ་པ་ཐ་དད་པ་འམ། བསྐལ་
པ་རྣམ་པ་སྣ་ཚོགས་སུ་བྱ་བ་འམ། བསྐལ་པ་རྣམ་པ་ཐ་དད་པར་བྱ་བར་ཡང་རྣམ་པར་དགོད་པ་དང་། བརྗོད་པར་བྱ་བ་མེད་དོ། །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔའ་རྣམས་
ཀྱི་ཡེ་ཤེས་ཀྱི་དཀྱིལ་འཁོར་ནི་རང་བཞིན་གྱིས་ངོ་བོ་ཉིད་ཀྱིས་ཡོངས་སུ་དག་པ་སྟེ། འདུ་ཤེས་ཀྱི་དྲ་བ་ཐམས་ཅད་དང་བྲལ་བ་སྒྲིབ་པའི་རི་ཐམས་ཅད་ལས་ཡང་དག་པར་འདས་པའི་དུས་བསམ་
པ་ལ་ཡོངས་སུ་འཆར་ཏེ། དེ་འང་སེམས་ཅན་ཐམས་ཅད་ཡོངས་སུ་སྨྱིན་པར་བྱ་བའི་དུས་སུ་འདུལ་བ་ཇི་ལྟ་བ་བཞིན་དུ་སྣང་བར་བྱེད་དོ། །རིགས་ཀྱི་བུ་འདི་ལྟ་སྟེ། ཉི་མའི་དཀྱིལ་འཁོར་ལ་ཉིན་
མཚན་གྱི་གྲངས་སུ་བྱ་བ་མེད་དེ། མི་སྲིད་ཀྱང་ཉི་མའི་དཀྱིལ་འཁོར་ནུབ་ན་ནི་ནུབ་མོར་སྣང་ངོ་། །ཉི་མའི་དཀྱིལ་འཁོར་ཤར་ན་ནི་ཉིན་བར་དུ་སྣང་ཞིང་བརྗོད་པ་ཡོད་དོ། །རིགས་ཀྱི་བུ་དེ་བཞིན་དུ་
བྱང་ཆུབ་སེམས་དཔའ་ཡེ་ཤེས་ཀྱི་དཀྱིལ་འཁོར་རྣམ་པར་རྟོག་པ་མེད་པ་ལ་རྟོག་པ་དང་། ཡོངས་སུ་རྟོག་པ་ཐམས་ཅད་མེད་དེ། འཁོར་བ་ན་གནས་པའི་འདུ་ཤེས་ཀྱི་རྣམ་པ་ཐམས་ཅད་དང་། 

77-1-89b

དུས་སུ་བྱ་བ་ཐམས་ཅད་ཀྱང་མེད་མོད་ཀྱི། འོན་ཀྱང་བྱང་ཆུབ་སེམས་དཔའི་བསམ་པ་ལས་བྱུང་བའི་ཡེ་ཤེས་ཀྱི་དཀྱིལ་འཁོར་རྣམ་པར་རྟོག་པ་མེད་པ་ནི་སེམས་ཅན་ཐམས་ཅད་ཡོངས་སུ་སྨྱིན་
པར་བྱ་བའི་དུས་ཀྱི་དབང་གིས་བསྐལ་པར་གནས་པ་དང་། འཁོར་བའི་འདུ་ཤེས་ཀྱི་རྣམ་པར་བགྲང་བའི་གྲངས་སུ་བགྲང་བ་ཡིན་ཏེ། ཡེ་ཤེས་ཀྱི་དཀྱིལ་འཁོར་རྣམ་པར་རྟོག་པ་མེད་པ་ལ་སྔོན་གྱི་མཐའ་
དང་ཕྱི་མའི་མཐའི་བསྐལ་པར་གནས་པའི་འདུ་ཤེས་ཀྱི་རྣམ་པར་བགྲང་བ་ཡོད་དོ། །རིགས་ཀྱི་བུ་འདི་ལྟ་སྟེ་དཔེར་ན། ཉི་མའི་དཀྱིལ་འཁོར་ནི་ནམ་མཁའི་དབྱིངས་ལ་འདུག་ཀྱང་། རིན་པོ་ཆེའི་རི་ཐམས་
ཅད་དང་། རིན་པོ་ཆེའི་ཤིང་ཐམས་ཅད་དང་། རིན་པོ་ཆེའི་སྣོད་ཐམས་ཅད་དང་། རིན་པོ་ཆེའི་འབྱུང་གནས་ཐམས་ཅད་དང་། རྒྱ་མཚོ་ཐམས་ཅད་དང་། མཚོ་དང་མཚེའུ་ཐམས་ཅད་དང་། 
ཆུ་དང་བའི་སྣོད་ཐམས་ཅད་དང་། འགྲོ་བ་ཐམས་ཅད་ཀྱི་སེམས་ལ་གཟུགས་བརྙན་རྣམ་པར་དམིགས་པ་སྣང་སྟེ། སེམས་ཅན་ཐམས་ཅད་ལ་མངོན་དུ་གྱུར་པར་སྣང་ངོ་། །རིན་པོ་ཆེ་ཐམས་ཅད་
ཀྱི་རྡུལ་ཤིན་ཏུ་ཕྲ་བ་རྣམས་ལ་ཉི་མའི་དཀྱིལ་འཁོར་གྱི་གཟུགས་བརྙན་བྱུང་བར་སྣང་ཡང་། ཉི་མའི་དཀྱིལ་འཁོར་དེ་ནི་རིན་པོ་ཆེའི་རི་རྣམས་ལ་འང་གནས་པ་མེད་དོ། །རིན་པོ་ཆེའི་ཤིང་ནས་རིན་
པོ་ཆེའི་རྡུལ་ཤིན་ཏུ་ཕྲ་བ་རྣམས་ཀྱི་བར་དུའང་ཞུགས་པ་མེད། རིན་པོ་ཆེའི་འབྲུ་རྣམས་ཀྱི་ཁོངས་སུ་ཆུད་པ་འང་མ་ཡིན། རིན་པོ་ཆེའི་འབྱུང་གནས་རྣམས་ཀྱི་རྗེས་སུ་སོང་བ་འང་མ་ཡིན། 
རྒྱ་མཚོ་རྣམས་ཀྱི་ནང་དུ་སོང་བ་འང་མ་ཡིན། ཆུའི་སྣོད་ཐམས་ཅད་ཀྱི་ནང་དུ་ཞུགས་པ་ཡང་མ་ཡིན་མོད་ཀྱི། ཐམས་ཅད་ཀྱི་ཁོངས་ན་འདུག་པར་ཡང་སྣང་ངོ་། །རིགས་ཀྱི་བུ་དེ་བཞིན་དུ་

77-1-90a

བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་བའི་རྒྱ་མཚོ་ལས་ནི་གྱེན་དུ་འཕགས། དེ་བཞིན་གཤེགས་པའི་ཆོས་ཀྱི་དབྱིངས་ཀྱི་ནམ་མཁའ་ལ་ནི་མངོན་པར་བྱུང་། ཆོས་
ཀྱི་རང་བཞིན་ནམ་མཁའི་རྒྱུད་ལ་ནི་རྒྱུ་ཞིང་སྤྱོད། ཞི་བའི་ནམ་མཁའི་དབྱིངས་ལ་ནི་གནས་པར་གྱུར་མོད་ཀྱི་སྲིད་པའི་ལམ་གྱི་རྒྱུད་དང་། སྐྱེ་གནས་ཐམས་ཅད་དུ་འང་སེམས་ཅན་ཐམས་ཅད་
ཡོངས་སུ་སྨིན་པར་བྱ་བ་དང་། །གདུལ་བའི་དོན་དུ་སེམས་ཅན་ཐམས་ཅད་དང་འདྲ་བའི་ལུས་སུ་སྐྱེ་བར་སྣང་སྟེ། འཁོར་བའི་ཉེས་པས་གོས་པར་མི་འགྱུར་རོ། །སྐྱེ་བ་དང་འཆི་འཕོ་བའི་
སྡུག་བསྔལ་གྱིས་ཉེ་བར་གདུང་བ་མེད་དོ། །རྟོག་པ་དང་རྣམ་པར་རྟོག་པ་དག་དང་། འགྲོགས་པ་མེད་དོ། །བསྐལ་པ་ལ་འང་རིང་བའི་འདུ་ཤེས་སམ། ཐུང་བའི་འདུ་ཤེས་སུ་གྱུར་པ་མེད་དོ། །
དེ་ཅིའི་ཕྱིར་ཞེ་ན། དེ་ནི་བྱང་ཆུབ་སེམས་དཔའ་ཕྱིན་ཅི་ལོག་ལས་ཤིན་ཏུ་འདས་པ་དང་། འདུ་ཤེས་དང་སེམས་དང་ལྟ་བའི་ཕྱིན་ཅི་ལོག་ལས་ཡོངས་སུ་འདས་པ་དང་། རྨྱི་ལམ་ལྟ་བུའི་འཇིག་
རྟེན་ཐམས་ཅད་ཡང་དག་པ་ཇི་ལྟ་བ་བཞིན་དུ་ཡེ་ཤེས་ཀྱིས་ཁོང་དུ་ཆུད་པ་དང་། སྒྱུ་མ་ལྟ་བུའི་འཇིག་རྟེན་ཐམས་ཅད་རབ་ཏུ་རྟོགས་པ་དང་། སེམས་ཅན་མེད་པའི་ཡེ་ཤེས་ཀྱི་དབྱིངས་རབ་
ཏུ་ཐོབ་པ་དང་། ཡང་དག་པ་ཇི་ལྟ་བ་བཞིན་དུ་ཆོས་རབ་ཏུ་མཐོང་བའི་སྙིང་རྗེའི་དཀྱིལ་འཁོར་ཤིན་ཏུ་ཡངས་པ་དང་སྨོན་ལམ་ཆེན་པོའི་སྟོབས་ཀྱིས་སེམས་ཅན་ཐམས་ཅད་ཡོངས་སུ་སྨིན་པར་
བྱ་བ་དང་། གདུལ་བའི་དོན་དུ་སེམས་ཅན་ཐམས་ཅད་ལ་མངོན་དུ་གྱུར་པར་སྣང་ངོ་། །རིགས་ཀྱི་བུ་འདི་ལྟ་སྟེ་དཔེར་ན། ཆུ་ཀླུང་ཆེན་པོ་ལ་སྩོགས་པ་ལ་གྲུ་ནི་རྟག་ཏུ་རྒྱུན་མི་

77-1-90b

འཆད་པར་སེམས་ཅན་ཡོངས་སུ་བསྒྲལ་བ་ལ་བརྩོན་པ་སྟེ། ནམ་མ་ཞིག་གི་བར་དུ་རྒྱུན་གཅོད་པ་མེད་ཀྱང་། དེ་ལ་ཕ་རོལ་གྱི་ངོགས་ལ་མངོན་པར་ཆགས་པ་མེད། ཚུ་རོལ་གྱི་
ངོགས་ལ་འང་མངོན་པར་ཆགས་པ་མེད། ཆུའི་དབུས་ནའང་གནས་པ་མེད་དོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་ཡང་ཕ་རོལ་ཏུ་ཕྱིན་པ་ཆེན་པོའི་གྲུའི་མཐུས་འཁོར་
བའི་ཆུ་གླུང་གི་རྒྱུད་ལས་སེམས་ཅན་ཐམས་ཅད་ཡོངས་སུ་བསྒྲལ་བ་ལ་ཞུགས་པ་ཡིན་ཏེ། དེ་ལ་ཚུ་རོལ་གྱི་མུས་འཇིགས་པ་མེད་དོ། །ཕ་རོལ་གྱི་མུར་བདེ་བར་འགྱུར་བའི་འདུ་ཤེས་མེད་དོ། །
འོན་ཀྱང་རྟག་ཏུ་རྒྱུན་མི་འཆད་པར་བྱེད། བྱང་ཆུབ་སེམས་དཔའི་སྤྱོད་པ་ལ་བསྐལ་པ་དཔག་ཏུ་མེད་པ་ཐམས་ཅད་དུ་གནས་པར་བྱ་བར་ཞེ་ནོན་པས་སེམས་ཅན་ཐམས་ཅད་ཡོངས་སུ་བསྒྲལ་
བར་བྱ་བ་ལ་ཞུགས་པ་ཡིན་ཏེ། བསྐལ་པའི་རྣམ་པ་ཐ་དད་པ་ལ་མངོན་པར་ཞེན་པ་མེད་དོ། །བསྐལ་པ་འདའ་བར་བྱ་བ་ལ་རིང་བའི་འདུ་ཤེས་སུ་གྱུར་ཅིང་བྱང་ཆུབ་སེམས་དཔའི་སྤྱད་པ་
ལ་སྤྱོད་པ་མ་ཡིན་ནོ། །རིགས་ཀྱི་བུ་འདི་ལྟ་སྟེ། དཔེར་ན། ཆོས་ཀྱི་དབྱིངས་ལྟར་ཡངས་པའི་ནམ་མཁའི་དབྱིངས་ནམ་མཁའི་གཞིའི་དཀྱིལ་འཁོར་ནི་འཇིག་རྟེན་གྱི་ཁམས་ཐམས་ཅད་འདུ་འམ་
འཇིག་གམ་འདས་པར་གྱུར་ཀྱང་རྣམ་པར་རྟོག་པ་མེད་ཅིང་རང་བཞིན་གྱིས་རྣམ་པར་དག་ལ་ཀུན་ནས་ཉོན་མོངས་པ་མེད་དེ། འཁྲུག་པ་མེད་ཅིང་སྒྲིབ་པ་མེད་ལ་ཕྱི་མའི་མཐའི་དུས་སུ་ཞིང་
ཐམས་ཅད་འཛིན་ཀྱང་ཡོངས་སུ་སྐྱོ་བ་མེད་དོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའི་བསམ་པ་ཡེ་ཤེས་ནམ་མཁའི་དཀྱིལ་འཁོར་ཀྱང་སྨོན་ལམ་ཆེན་པོའི་རླུང་གི་77-1-91a

དཀྱིལ་འཁོར་གྱིས་ཀུན་ནས་བསྐོར་ཅིང་ངན་སོང་གི་གཡང་ས་ཐམས་ཅད་ལས་སེམས་ཅན་ཡོངས་སུ་འཛིན་ཀྱང་ཡོངས་སུ་སྐྱོ་བ་མེད་དོ། །བདེ་བའི་ལམ་ལ་འགོད་པ་བྱེད་
ཀྱང་ཡོངས་སུ་སྒྱིད་ལུག་པ་མེད་དོ། །ཐམས་ཅད་མཁྱེན་པའི་ལམ་ལ་འགོད་ཀྱང་ཞུམ་པར་བྱེད་པ་མེད་དོ། །ཉོན་མོངས་པ་ཐམས་ཅད་ཀྱིས་ཀྱང་འཁྲུག་པ་མེད་དོ། །འཁོར་བའི་ཉེས་པ་
ཐམས་ཅད་ཀྱིས་ཀྱང་ཡོངས་སུ་གཟུང་བ་མེད་དོ། །རིགས་ཀྱི་བུ་འདི་ལྟ་སྟེ་དཔེར་ན། སྒྱུ་མའི་རྣམ་པ་ལས་གྲུབ་པའི་མི་ཡན་ལག་དང་ཉིང་ལག་ཤིན་ཏུ་ཚང་བ་ལ་ལུས་ལ་གནས་པའི་ཆོས་བཅུ་
མེད་དེ། བཅུ་གང་ཞེ་ན། འདི་ལྟ་སྟེ་དབུགས་ནང་དུ་རྒྱུ་བ་འམ། དབུགས་ཕྱིར་རྒྱུ་བ་འམ། གྲང་བ་འམ། དྲོ་བའམ། བཀྲེས་པའམ། སྐོམ་པའམ། དགའ་བའམ། མི་དགའ་བ་འམ། སྐྱེ་བ་
འམ། རྒས་པའམ། ན་བ་འམ། འཆི་བ་དང་། གནོད་པར་འགྱུར་བ་མེད་དོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་ཡེ་ཤེས་སྒྱུ་མའི་རྣམ་པ་ལས་བྱུང་བའི་གཟུགས་དང་ལྡན་པ། ཆོས་ཀྱི་དབྱིངས་
ཐ་མི་དད་པའི་ལུས་དང་ལྡན་པ། སྲིད་པའི་ལམ་གྱི་རྒྱུད་ཐམས་ཅད་དུ་སེམས་ཅན་ཡོངས་སུ་སྨྱིན་པར་བྱེད་པའི་དོན་དུ་སྐྱེས་ཏེ། བསྐལ་པ་ཐམས་ཅད་དུ་གནས་པ་ལ་འང་ཆོས་བཅུ་མེད་དོ། །
བཅུ་གང་ཞེ་ན། འདི་ལྟ་སྟེ་འཁོར་བ་ལ་མངོན་པར་དགའ་བ་འམ། འཁོར་བ་སྲིད་པའི་ལམ་གྱི་རྒྱུད་དུ་སྐྱེ་བས་སྐྱོ་བར་འགྱུར་བ་འམ། ཡུལ་གྱི་དགའ་བ་ལ་འདུན་པ་འམ། ཁོང་ཁྲོ་བའི་སེམས་
སམ། ལོངས་སྤྱོད་པར་འདོད་པ་འམ། ཉོན་མོངས་པ་ཐམས་ཅད་གྱིས་ཡོངས་སུ་གཟུང་བ་འམ། སྡུག་བསྔལ་གྱི་ཚོར་བ་ཉམས་སུ་མྱོང་བ་འམ། ལམ་ཉམ་ང་བར་སྐྱེ་བས་འཇིགས་པ་འམ། 

77-1-91b

སྲིད་པར་མངོན་པར་འདུན་པའམ། མངོན་པར་ཆགས་པ་མེད་དོ། །འོན་ཀྱང་རིགས་ཀྱི་བུ་སངས་རྒྱས་ཀྱི་བྱིན་གྱིས་མ་འོངས་པའི་བྱང་ཆུབ་སེམས་དཔའ་རྣམས་ཀྱང་བྱང་ཆུབ་སེམས་དཔའི་
སྨོན་ལམ་རྒྱ་ཆེན་པོའི་སྟོབས་རྣམ་པར་འཕེལ་བར་བྱ་བའི་ཕྱིར་བསྟན་པར་བྱའོ། །རིགས་ཀྱི་བུ་སྔོན་འདས་པའི་དུས་བསྐལ་པ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་
ཕ་རོལ་དེའི་ཡང་ཕ་རོལ་སྔ་འདས་པར་གྱུར་པ་དེའི་ཚེ་དེའི་དུས་ན། འཇིག་རྟེན་གྱི་ཁམས་རིན་པོ་ཆེའི་འོད་ཅེས་བྱ་བ་ཞིག་བྱུང་སྟེ། རིགས་ཀྱི་བུ་འཇིག་རྟེན་གྱི་ཁམས་རིན་པོ་ཆེའི་འོད་དེ་ལ་བསྐལ་
པ་ནི་འོད་བཟང་པོ་ཞེས་བྱ་བ་བྱུང་ངོ་། །བསྐལ་པ་འོད་བཟང་པོ་ཞེས་བྱ་བ་དེ་ལ་ནི་སངས་རྒྱས་སྟོང་ཕྲག་བཅུ་བྱུང་བར་གྱུར་ཏོ། །རིགས་ཀྱི་བུ་སངས་རྒྱས་སྟོང་ཕྲག་བཅུ་པོ་དེ་དག་ལས་བསྐལ་པའི་དང་
པོ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་པོ་ཞེས་བྱ་བ་མཁྱེན་པ་དང་ཞབས་སུ་ལྡན་པ་བདེ་བར་
གཤེགས་པ་འཇིག་རྟེན་མཁྱེན་པ་བླ་ན་མེད་པ་སྐྱེས་བུ་འདུལ་བའི་ཁ་ལོ་བསྒྱུར་བ། ལྷ་དང་མིའི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེ་ཐམས་ཅད་ཀྱི་ཐོག་མ་ལ་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །རིགས་ཀྱི་བུ་དེ་བཞིན་གཤེགས་པ་དེ་གླིང་བཞི་པའི་དབུས་ན་རྒྱལ་པོའི་གནས་དགའ་བས་བརྒྱན་པ་ཞེས་བྱ་བ་ཡོད་པ་དང་། 
ཚོད་དུ་ཡང་རྒྱང་མི་རིང་བ་ཞིག་བྱུང་སྟེ། རྒྱལ་པོའི་གནས་དགའ་བས་བརྒྱན་པ་དེའི་ཤར་ཕྱོགས་ལོགས་ན། ནགས་ཚལ་འོད་བཟང་པོ་ཞེས་བྱ་བ་ཞིག་ཡོད་དེ། ནགས་ཚལ་འོད་བཟང་པོ་དེར་སྙིང་པོ་

77-1-92a

བྱང་ཆུབ་རིན་པོ་ཆེའི་མེ་ཏོག་གི་སྤྲིན་ཅེས་བྱ་བ་ཞིག་བྱུང་ངོ་། །སྙིང་པོ་བྱང་ཆུབ་རིན་པོ་ཆེའི་སྤྲིན་ཅེས་བྱ་བ་དེར་གདན་སེང་གེའི་ཁྲི་རིན་པོ་ཆེ་རྣམ་པར་སྣང་བའི་སྙིང་པོ་ཅན་བྱུང་སྟེ། དེ་ལ་
བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མའི་རྒྱལ་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །དེའི་ཚེ་མིའི་
ཚེའི་ཚད་ལོ་སྟོང་ཕྲག་བཅུ་ཐུབ་པ་ལས་འཇིག་རྟེན་དུ་སེམས་ཅན་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། རྫུན་དུ་སྨྲ་བ་དང་། ཕྲ་མ་ཟེར་བ་དང་། 
ཞེ་གཅོད་པའི་ཚིག་སྨྲ་བ་དང་། ཚིག་ཁྱལ་པ་ཟེར་བ་དང་། ཆགས་སེམས་དང་ལྡན་པ་དང་། གནོད་སེམས་ཡོད་པ་དང་། ལོག་པར་ལྟ་བ་ཅན་བྱུང་སྟེ། དེ་ལྟར་མི་དགེ་བའི་ལས་ཀྱི་ལམ་བཅུ་རྣམ་
པར་རྒྱས་པར་གྱུར་ནས་རབ་ཏུ་བརྟན་པར་གྱུར་ཏེ། བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་ཀྱི་སྒྲོན་མ་རྒྱལ་པོ་དེས་འཇིག་རྟེན་གྱི་དབང་པོའི་སྔོན་གྱི་རྒྱལ་
བ་ལ་བྱ་བ་བྱས་པ་རྣམས་དང་། འཛམ་བུ་གླིང་གི་མྱི་རྣམས་ཀྱི་དགེ་བའི་རྩ་བ་ཡོངས་སུ་སྨྱིན་པར་བྱ་བའི་ཕྱིར་སྙིང་པོ་བྱང་ཆུབ་མཆོག་ཏུ་གཤེགས་ཏེ། བྱང་ཆུབ་སེམས་དཔའ་རྣམས་ལ་ཆོས་བསྟན་ཏོ། །
དེའི་ཚེ་རྒྱལ་པོའི་གནས་དགའ་བས་བརྒྱན་པ་དེ་ན་རྒྱལ་པོ་རྒྱལ་བའི་འོད་ཅེས་བྱ་བ་འདུག་འདུག་སྟེ། དེས་མི་མ་བྱིན་པར་ལེན་པ། རྐུ་བ་སྡིག་དོ་བྱེད་པ། སྲོག་གཅོད་པ། འདོད་པས་ལོག་པར་གཡེམ་
པ། བརྫུན་ཟེར་བ། ཕྲ་མ་སྨྲ་བ། ཞེ་གཅོད་པའི་ཚིག་དང་ལྡན་པ། ཚིག་ཁྱལ་བ་སྨྲ་བ། ཆགས་སེམས་ཅན་གནོད་སེམས་ཡོད་པ། ལོག་པར་ལྟ་བ། ཆོས་མ་ཡིན་པའི་འདོད་ཆགས་ལ་ཞེན་པ། 

77-1-92b

འདོད་པ་ལ་མི་ཟད་པས་མངོན་པར་ནོན་པ། ལོག་པའི་ཆོས་ཀྱིས་ཀུན་ནས་འཁོར་བ། སྡིག་ཏོ་བྱེད་བྱེད་པ། ཁྲོ་གཏུམ་བྱེད་བྱེད་པ། བསོད་ནམས་མ་བྱས་པ། འཇིགས་པས་བག་ཚ་བ་མེད་པ། 
མར་མི་ཤེས་པ། ཕར་མི་ཤེས་པ། དགེ་སྦྱོང་དུ་བྱ་བ་མེད་པ། བྲམ་ཟེར་བྱ་བ་མེད་པ། ཚུལ་མི་ཤེས་པ་གཡོ་དང་ལྡན་པ་བརྒྱ་སྟོང་དུ་མ་རབ་ཏུ་གདུལ་བར་བྱ་བའི་ཕྱིར་བཙོན་རར་བཙུད་པར་
གྱུར་ཏོ། །རྒྱལ་པོ་རྒྱལ་བའི་འོད་དེ་ལ་བུ་གཟུགས་བཟང་བ་ཤིན་ཏུ་མཛེས་པ་བལྟ་ན་སྡུག་པ། ཁ་དོག་བཟང་པོ་དམ་པ་རྒྱས་པ་དང་ལྡན་པ་མི་ཆེན་པོའི་མཚན་སུམ་བཅུ་རྩ་གཉིས་དང་ལྡན་
པ། རྣམ་པར་རྒྱལ་བ་ཞེས་བྱ་བ་ཞིག་ཡོད་པ། ཁང་པ་གླུ་སྙན་པའི་དབྱངས་ཤེས་བྱ་བའི་སྟེང་དུ་ཕྱིན་ཏེ། བུད་མེད་ཀྱི་འཁོར་མང་པོས་ཡོངས་སུ་བསྐོར་ཅིང་འདུག་འདུག་པ་ལས་བཙོན་ར་ན་
འཁོད་པའི་སེམས་ཅན་བཙོན་སྣ་ཚོགས་ཀྱིས་དམ་དུ་གླགས་པ། དེ་དག་གི་སྒྲ་འཇིགས་འཇིགས་སྐད་དུ་འབོད་པ་ཐོས་པར་གྱུར་ཏོ། །ཐོས་ནས་མི་དགའ་ཞིང་ཤིན་ཏུ་ཉམས་མི་བདེ་བའི་
སེམས་སུ་གྱུར་ཏེ། སྙིང་རྗེ་ཆེན་པོ་སྐྱེས་ནས་ཁང་སྟེང་དེ་ནས་ཤོད་དུ་བབས་ཏེ། བཙོན་ར་དེར་ཕྱིན་ནས་བཙོན་ར་དམ་པོ་ན་འཁོད་པའི་སེམས་ཅན་ཤིང་སྒྲོག་དང་ལྕགས་སྒྲོག་དང་། ཁོང་
སྒྲིལ་དང་། ལྟུང་དང་མདོ་རྟོགས་གྱིས་བསྒྲོགས་ཤིང་བརྟོད་དེ་གཅིག་གི་ལུས་དང་གཅིག་ཏུ་སྦྲེལ་ནས་མུན་པ་མུན་ནག་ཏུ་བཙུད་དེ། དུད་པའི་རབ་རིབ་གྱིས་འགྲིགས་ཤིང་། རླུང་ནད་ཉམས་
སུ་མི་བདེ་བས་ཉམས་ཐག་པར་གྱུར་པ། དབུགས་ཤིན་ཏུ་མི་བདེ་བ་རྒྱུ་བ་བཀྲེས་པ་དང་། སྐོམ་པས་མནར་བ། སྒྲེན་མོ་གོས་མེད་པ་ལུས་ཐམས་ཅད་ཕྱག་དར་དང་རྡུལ་གྱི་ནང་ན་འགྲེ་བ། 

77-1-93a

ལུས་རང་གིས་སྐྲས་ཡོག་པ། བརླ་ཁོང་སྒྲིལ་གྱིས་དམ་དུ་བཅིངས་པ། ཉོན་མོངས་པ་སྣ་ཚོགས་ཀྱིས་ཐོ་བཙམས་པ་སྡུག་བསྔལ་གྱི་ཚོར་བས་ཟིལ་ཀྱིས་མནན་ཏེ། སྡུག་བསྔལ་
ཉམས་སུ་མྱོང་བར་གྱུར་ཏེ། མི་བཟད་པ་སྣ་ཚོགས་ཀྱི་སྨྲེ་སྔགས་ཀྱིས་བླ་ཞིང་འོ་དོད་འབོད་པ་དེ་དག་མཐོང་ནས་སྙིང་རྗེ་ཆེན་པོ་སྐྱེས་ཏེ། སྙིང་རྗེའི་བསམ་པ་རྒྱ་ཆེན་པོ་བྱུང་ནས་གཞན་ལ་
ཕན་པར་བྱ་བའི་སེམས་སྐྱེས་ཏེ། བཙོན་ར་ཐིབས་པོ་ན་འཁོད་པའི་སེམས་ཅན་རྣམས་བཙོན་ར་ནས་ཐར་བར་བྱའོ། །ཞེས་དབུགས་བཏོན་ནས་དེས་སེམས་ཅན་དེ་དག་མི་འཇིགས་པ་
བྱིན་ཏེ། རྒྱལ་པོ་རྒྱལ་བའི་འོད་གང་ན་བ་དེར་སོང་སྟེ། འདི་སྐད་ཅེས་གསོལ་ཏོ། །ལྷའི་ཞལ་སྔ་ནས་མཁྱེན་པར་མཛད་ཏུ་གསོལ། བཙོན་ར་མི་བདེ་བ་ན་མཆིས་པའི་སེམས་ཅན་རྣམས་
ལ་གློ་བ་རྗེས་ནས་བདག་གིས་མི་འཇིགས་པ་བསྩལ་ན་དེ་དག་དགྱེ་བར་ཅི་གནང་ཞེས་ནས། དེ་ནས་རྒྱལ་པོ་རྒྱལ་བའི་འོད་ཀྱིས་བློན་པོ་ལྔ་བརྒྱ་པོ་བསྩོགས་ནས་ཁྱེད་ཇི་སྙམ་དུ་སེམས་ཤེས་
སྨྲས་པ་དང་། དེ་དག་གིས་སྨྲས་པ། བཙོན་འདི་རྣམས་ནི་རྒྱལ་པོའི་ཕྱག་མཛོད་རྐུ་བ། རྒྱལ་པོའི་སྐུ་ལ་དར་བ། བཙུན་མོའི་འཁོར་དུ་ཞུགས་པ་ལས་བཟུང་བ་ཤ་སྟག་སྟེ། དེ་དག་ནི་མི་དགུམ་
དུ་འང་མི་རུང་། དེ་དག་གི་ཆད་པ་ནི་དགུམ་པས་འབྲ་བར་བས་ཏེ། མ་ལགས་ན་འང་བཙོན་རར་གུམ་ན་ཆད་པ་འབྲ་ལགས་གྲང་། དེ་དག་གི་མགོན་སུ་བགྱིད་པ་དེའང་རྒྱལ་པོའི་ཞལ་སྔར་གློ་བ་
རིང་ངོ་། །དེ་ནས་རྒྱལ་པོའི་བུ་རྣམ་པར་རྒྱལ་བའི་སྙིང་རྗེ་ཆེན་པོས་མི་བཟོད་ཅེས་ནས་བློན་པོ་དེ་དག་ལ་སྨྲས་པ་ཁྱོད་ཀྱིས་ཇི་སྐད་དུ་སྨྲས་པ། དེ་ལྟར་ཡང་རུང་སྟེ། ངས་ཁོང་ཏ་འདི་དག་གི་དོན་དུ་

77-1-93b

སྡུག་བསྔལ་ཉམས་སུ་བླངས་པ་ཐམས་ཅད་ཀྱང་བཟོད་པར་བྱ་ན་དེ་དག་ལ་ཁྱོད་གྱིས་ཅི་བྱ། དེ་ང་ལ་གྱིས་ཏེ་ཉེས་པ་ཅན་དེ་དག་ཁྱེ་ཤིག །ངས་དེ་རྣམས་བཙོན་ར་ནས་དགྲོལ་བའི་དོན་དུ་མི་བདེ་
བ་ཐམས་ཅད་ཉམས་སུ་བླངས་ཏེ། ལུས་དང་སྲོག་ཡོངས་སུ་དོར་བར་བྱའོ། །དེ་ཅིའི་ཕྱིར་ཞེ་ན། གལ་ཏེ་ངས་སེམས་ཅན་འདི་ཙམ་ཞིག་ཀྱང་བཙོན་ར་ནས་དགྲོལ་བར་མ་ནུས་ན་ཁམས་གསུམ་
པའི་བཙོན་ར་ན་འཁོད་པའི་སེམས་ཅན་སྲེད་པའི་ཞགས་པས་གླགས་པ། མ་རིག་པའི་ཐིབས་པོ་ན་འཁོད་པ། གཏི་མུག་གི་མུན་པར་བཙུད་པ། ཕོངས་པའི་སྡུག་བསྔལ་གྱིས་མནར་བ་ངན་སོང་གི་
རྒྱུད་ཟབས་སུ་རིང་ཞིང་འབྱུང་བར་དཀའ་བར་ཆུད་པ། དབྱིབས་མི་སྡུག་ལ་མདོག་མི་སྡུག་པ་དང་ལྡན་པ། དབང་པོའི་སྦྱོར་བ་ཐམས་ཅད་དང་བྲལ་བ། ནོར་བའི་ཡིད་དང་ལྡན་པ། འབྱུང་བ་མི་མཐོང་
བ་སྣང་བ་མེད་པ་ཁམས་གསུམ་པ་ལ་མངོན་པར་ཞེན་པ། བསོད་ནམས་དང་། ཡེ་ཤེས་ཀྱི་ཚོགས་མྱེད་པ། ཡེ་ཤེས་ཀྱི་སྐྱེ་མཆེད་དང་བསྐལ་བ། ཉོན་མོངས་པ་སྣ་ཚོགས་གྱིས་སེམས་དྲི་མ་
ཅན་དུ་གྱུར་པ། སྡུག་བསྔལ་གྱི་ཤིང་ཐགས་གྱིས་འཁོར་བ་དང་། བདུད་ཀྱི་དབང་དུ་གྱུར་པ། སྐྱེ་བ་དང་རྒ་བ་དང་། འཆི་བ་དང་མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་ཡིད་མྱི་
བདེ་བ་དང་། འཁྲུག་པས་མནར་བ་རྣམས་ཀྱང་ཇི་ལྟར་ཁྲེལ་བར་བྱ་ཞེས་ནས། རྒྱལ་པོ་གཞོན་ནུ་རྣམ་པར་རྒྱལ་བས་བཙོན་ར་ན་འཁོད་པའི་སེམས་ཅན་དེ་དག་བདག་ཉིད་ཡོངས་སུ་གཏང་བ་དང་། 
རྣམ་པ་ཐམས་ཅད་དུ་ཡོངས་སུ་གཏང་བས། གཡོག་འཁོར་ཐམས་ཅད་དང་། ནོར་གྱི་ཕུང་པོ་ཐམས་ཅད་ཀྱིས་བསླུས་ཏེ། བཙོན་ར་དེ་ནས་ཡོངས་སུ་བཀྱེ་ནས་སེམས་ཅན་དེ་དག་གི་

77-1-94a

སྡུག་བསྔལ་ཉམས་སུ་བླངས་ཏེ། ཕྱིར་ལྡོག་པ་མྱེད་པར་གྱུར་ཏོ། །དེ་ནས་བློན་པོ་ལྔ་བརྒྱ་པོ་དེ་དག་གིས་ལག་པ་གྱེན་དུ་བསྒྲེང་སྟེ། འོ་དོད་བོས་ནས་རྒྱལ་པོ་རྒྱལ་བའི་འོད་གྱི་
གན་དུ་སོང་སྟེ། འདི་སྐད་ཅེས་སྨྲས་སོ། །རྒྱལ་པོའི་ཞལ་སྔ་ནས་མཁྱེན་པར་མཛད་དུ་གསོལ། གཞོན་ནུ་རྣམ་པར་རྒྱལ་བའི་མཆིད་ཐབས་སུ་བགྱིས་པས། རྒྱལ་པོའི་ཆབ་སྲིད་ཀྱང་
སྟོར་བར་འགྱུར། བདག་ཅག་རྣམས་ཀྱང་སྲོག་ལ་འབབ་པར་ཐེ་ཙོམ་འཚལ་ཏེ། ལྷའི་ཞལ་སྔ་ནས་རྒྱལ་པོ་གཞོན་ནུ་རྣམ་པར་རྒྱལ་བ་ལ་བཀའ་ནན་མ་མཛད་ན་ནི། རིང་པོ་ཡང་མྱི་ཐོགས་
པར་ལྷའི་ཞལ་སྔར་སྐུ་རྨ་ལ་དར་བར་འགྱུར་རོ་ཞེས་པ་དང་། དེ་ནས་རྒྱལ་པོ་རྒྱལ་བའི་འོད་ཤིན་ཏུ་ཁྲོས་ནས། རྒྱལ་པོའི་བུ་རྣམ་པར་རྒྱལ་བ་དང་། གཡོགས་དང་ལྡན་པའི་མྱི་དེ་དག་དུ་བཅས་
ཏེ་གསད་པར་བྱས་སོ། །དེ་ནས་དེའི་མ་བསྐྱེད་བསྐྱེད་པས་ཐོས་ནས་མི་དགའ་སྟེ། བུད་མྱེད་ཀྱི་འཁོར་སྟོང་དང་བཅས་ཏེ། སྐྲ་ནི་བཤིག །ལུས་ཀྱི་རྒྱན་ནི་བོར་རང་གི་མཚན་ནི་དྲལ། བྲང་
ནི་རྡུང་མགོ་ནི་ཕྱག་དར་གྱིས་གང་བར་སྙིང་རྗེ་རྗེ་སྐད་ཀྱི་ང་རོར་ངུ་ཞིང་རྒྱལ་པོའི་དྲུང་དུ་ཕྱིན་ནས། འཁོར་དང་བཅས་པས་རྐང་པ་གཉིས་ལ་ཕྱག་འཚལ་ཏེ། འདི་སྐད་དུ་གསོལ་བ་བཏབ་པོ། །
ལྷའི་ཞལ་སྔ་ནས་ཐུགས་ཅི་དགོངས། རྒྱལ་པོ་གཞོན་ནུ་རྣམ་པར་རྒྱལ་བ་གཏང་དུ་གསོལ། རྒྱལ་པོ་གཞོན་ནུ་རྣམ་པར་རྒྱལ་བའི་སྲོག་བསྩལ་དུ་གསོལ་ཞེས་ནས། དེ་ནས་རྒྱལ་པོས་
རྒྱལ་པོ་གཞོན་ནུ་རྣམ་པར་རྒྱལ་བ་མདུན་དུ་བཞག་སྟེ། འདི་སྐད་ཅེས་སྨྲས་སོ། །གཞོན་ནུ་གཡོན་དང་ལྡན་པའི་མྱི་འདི་རྣམས་ཐོང་། དེ་སྟེ་མྱི་གཏོང་ཞིང་དེ་རྣམས་ཀྱི་ལེ་ལན་དུ་

77-1-94b

ཤི་བར་གྱུར་ཏ་རེ་ཞེས་པ་དང་། དེས་ཞུམ་པ་མྱེད་པའི་སེམས་མ་འཁྲུགས་པ་ཐམས་ཅད་མཁྱེན་པ་ཉིད་དུ་དམྱིགས་པར་བརྩོན་པ། གཞན་ལ་ཕན་པར་གཞོལ་བ། སྙིང་
རྗེ་ཆེན་པོ་སྔོན་དུ་འགྲོ་བས་འཆི་བར་ཁས་བླངས་པ་དང་། དེའི་མས་རྒྱལ་པོ་རྒྱལ་བའི་འོད་ལ་ཟླ་བ་ཕྱེད་གཅིག་ཏུ་ཕྲད་པར་གསོལ་བ་བཏབ་པ། དགུང་ཟླ་ཕྱེད་གཅིག་ཏུ་གཞོན་ནུ་འདི་སྦྱིན་
པ་སྩོལ་དུ་ཅི་གནང་། དེ་སླན་ཅད་ནི་སུ་དགྱེས་པ་དེའང་མཛད་པར་གསོལ་ཞེས་པ་དང་། དེ་དེ་ལྟར་གྱིས་ཤིག་ཅེས་རྒྱལ་པོས་གནང་ངོ་། །དེ་ནས་རྒྱལ་པོའི་གནས་དགའ་བས་
བརྒྱན་པ་དེའི་བྱང་ཕྱོགས་ལོགས་ཤིག་ན། སྔོན་མཆོད་སྦྱིན་གྱི་གནས་སུ་བྱ་བའི་བཟའ་ཤིང་གི་ར་བ་ཆེན་པོ་ཉི་མའི་འོད་ཅེས་བྱ་བ་དེར་གཞོན་ནུ་དེ་སོང་ནས། སུ་ཅི་འདོད་པ་དེ་ལ་
དེ་བྱིན་ཏེ། དེས་གཏན་པ་མྱེད་པའི་མཆོད་སྦྱིན་བྱས་ནས་ཟླ་བ་ཕྱེད་དུ་སྦྱིན་པ་རྣམ་པ་སྣ་ཚོགས་བྱིན་ཏེ། ཟས་འདོད་པ་ལ་ཟས་བྱིན་སྐོམ་འདོད་པ་ལ་སྐོམ་བྱིན། བཞོན་པ་འདོད་
པ་གོས་དང་མེ་ཏོག་དང་ཕྱེ་མ་དང་བྱུག་པ་དང་། ཆོས་གོས་དང་གདུགས་དང་། རྒྱལ་མཚན་དང་། བ་དན་དང་རིན་པོ་ཆེའི་རྒྱན་དང་། ཡོ་བྱད་ཐམས་ཅད་དང་། ལྷབ་ལྷུབ་
ཐམས་ཅད་དང་། ཡོ་བྱད་ཀྱི་རྣམ་པ་ཐམས་ཅད་ཀྱང་དེ་དག་འདོད་པ་ལ་ཡོངས་སུ་བཏང་སྟེ། དེ་ནས་ཉི་མ་ཐ་མ་ལ་བབ་པར་གྱུར་པ་དང་། འགྲོ་བ་མང་པོའི་ཚོགས་ཀུན་ནས་འདུས་
ཏེ། རྒྱལ་པོའི་བློན་པོ་དང་། བུད་མྱེད་ཀྱི་ཚོགས་དང་། ཚོང་དཔོན་དང་། ཁྱིམ་བདག་དང་། ལྗོངས་དང་། ཡུལ་གྱི་མྱི་དང་། ཞགས་པ་འཐུབ་པ་ཐམས་ཅད་ཀྱང་ཀུན་ནས་

77-1-95a

འདུས། བཅོམ་ལྡན་འདས་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་པོ་དེ་བཞིན་གཤེགས་པ་དེ་ཡང་། སེམས་ཅན་ཡོངས་སུ་སྨིན་པར་བྱ་བ་དང་། 
གདུལ་བའི་དུས་ཐུགསུ་ཆུད་ནས། མཆོད་སྦྱིན་གྱི་གནས་དེར་གཤེགས་ཏེ། ལྷའི་དབང་པོའི་ཚོགས་གྱིས་ནི་ཡོངས་སུ་བསྐོར། ཀླུའི་དབང་པོས་ནི་རྣམ་པར་དག་པར་མཆོད། 
གནོད་སྦྱིན་གྱི་དབང་པོས་ནི་ལུས་མངོན་པར་བཏུད། དྲི་ཟའི་དབང་པོས་ནི་མངོན་པར་བསྟོད། ལྷ་མ་ཡིན་གྱི་དབང་པོས་ནི་ལུས་ཤིན་ཏུ་བཏུད་ནམ་མཁའ་ལྡིང་གི་དབང་པོ་གཙུག་གི་
རིན་པོ་ཆེས་རྣམ་པར་བརྒྱན་པས་ནི་སེམས་པའི་མཆོད་པའི་རྣམ་པས་རབ་ཏུ་བཀང་། མྱི་འམ་ཅིའི་དབང་པོ་རྣམས་ཀྱིས་ནི་དགའ་བའི་ཡིད་ཀྱིས་ཡོངས་སུ་མཆོད་དེ། བསྟོད་
པའི་གླུའི་དབྱངས་ཀྱིས་ཡོངས་སུ་བསྐུལ། ལྟོ་འཕྱེ་ཆེན་པོའི་དབང་པོ་རྣམས་གྱིས་ནི་ཀུན་ནས་བསྐོར་ཅིང་ཞལ་དུ་བལྟ་བ་དེ། འགྲོ་བའི་ཚོགས་ཆེན་པོ་དང་། རྒྱལ་པོ་
གཞོན་ནུ་རྣམ་པར་རྒྱལ་བས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་
པོ་ཤིན་ཏུ་མཛེས་པ་བལྟ་ན་སྡུག་པ། དབང་པོ་ཞི་བ་ཐུགས་ཞི་བ། ཤིན་ཏུ་དབེན་པ། དབང་པོ་ལས་རྒྱལ་བ། གླང་པོ་ལྟར་ཤིན་ཏུ་དུལ་བ། མཚོ་ལྟར་རབ་ཏུ་དང་ཞིང་གསལ་ལ་རྙོག་པ་མྱེད་
པ། སངས་རྒྱས་ཀྱི་རྣམ་པར་འཕྲུལ་པ་དང་། ཆོ་འཕྲུལ་ཆེན་པོ་དང་། སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་ཆེན་པོས་ནི་རྣམ་པར་མཛེས། སངས་རྒྱས་ཀྱི་བདག་ཉིད་ཆེ་བས་ནི་རབ་ཏུ་འབར། 

77-1-95b

སངས་རྒྱས་ཀྱི་མཚན་དང་དཔེ་བྱད་བཟང་པོའི་རྒྱན་གྱིས་ནི་སྐུ་མཛེས་པར་བརྒྱན། འཇིག་རྟེན་ཐམས་ཅད་ནི་སངས་རྒྱས་གྱི་འོད་གྱི་དཀྱིལ་འཁོར་སྣང་བས་རྒྱས་པར་འགེངས་ཤིང་། སངས་རྒྱས་ཀྱི་འོད་ཟེར་
གྱིས་རབ་ཏུ་སྣང་བ་མཛད། །སྐུའི་བ་སྤུའི་བུ་ག་ཐམས་ཅད་ནས་ནི། སྤོས་རིན་པོ་ཆེའི་ངད་འཕྲོ་བའི་འཁོར་ལོ་རབ་ཏུ་འགྱེད། །སངས་རྒྱས་ཀྱི་ཞིང་རབ་ཏུ་བསྐྱོད་པའི་ཚུལ་དུ་ནི་འཇིག་རྟེན་གྱི་ཁམས་ཐམས་ཅད་
ཡོངས་སུ་བསྐྱོད་པ་མཛད་ཅིང་། རྒྱན་ཐམས་ཅད་སྤྲིན་ཀྱི་ཆར་རབ་ཏུ་འབེས་པའི་སངས་རྒྱས་ཀྱི་རྣམ་པར་གནོན་པ་དང་། སེམས་ཅན་ཐམས་ཅད་ཀྱི་ཉོན་མོངས་པ་སྤོང་བའི་སངས་རྒྱས་ཀྱི་སྤྱོད་ལམ་དང་། སེམས་
ཅན་ཐམས་ཅད་ཀྱི་དགའ་བའི་ཤུགས་རྣམ་པར་འཕེལ་བར་མཛད་པའི་སངས་རྒྱས་ཀྱི་ཞལ་བལྟ་བའི་བྱིན་གྱིས། ཕ་ཟད་གཅིག་ནས་ཚུར་གཤེགས་པ་མཐོང་ནས། དེ་བཞིན་གཤེགས་པ་ལ་སེམས་མངོན་
པར་མོས་པར་གྱུར་ཏོ། །དེ་ནས་རྒྱལ་པོ་གཞོན་ནུ་རྣམ་པར་རྒྱལ་བ་དང་། འགྲོ་བའི་ཚོགས་ཆེན་པོ་དེ་དག་གིས་བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མའི་རྒྱལ་
པོ་དེ། ཕ་ཟད་དུ་བསུ་ནས་མོས་པའི་སེམས་ཀྱིས་ལུས་ཐམས་ཅད་ཀྱིས་ཕབ་སྟེ་ཕྱག་འཚལ་ནས། ཞབས་གཉིས་ལ་སྤྱི་བོས་གཏུགས་ཏེ། མཆོད་པ་རྣམ་པ་སྣ་ཚོགས་ཀྱིས་ཡང་དག་པར་མཆོད་ནས་འདི་
སྐད་དུ་བསྟོད་དོ། །བཅོམ་ལྡན་འདས་ཚུར་གཤེགས་སུ་གསོལ། བདེ་བར་གཤེགས་པ་ཚུར་གཤེགསུ་གསོལ། །དེ་བཞིན་གཤེགས་པས་བདག་ཅག་དགོངས་སོ། །བདེ་བར་གཤེགས་པས་བདག་ཅག་ཡོངསུ་
བཟུང་ངོ་། །དེ་ནས་རྒྱལ་པོ་གཞོན་ནུ་རྣམ་པར་རྒྱལ་བས་བཅོམ་ལྡན་འདས་ལ་གདན་དམ་པས་བསྟབས་ཏེ། འདི་སྐད་ཅེས་གསོལ་ཏོ། །བཅོམ་ལྡན་འདས་གདན་བཏིང་བ་འདིར་བཞུགས་སུ་གསོལ་ཞེས་
77-1-96a

ནས་བཅོམ་ལྡན་འདས་དེ་བཞིན་གཤེགས་པ་དང་གདན་དེ་ཡང་གཙང་སྦྲ་ལྷུར་ལེན་པའི་ལུས་སུ་གཏོགས་པའི་ལྷ་རྣམས་ཀྱིས་སངས་རྒྱས་ཀྱི་བྱིན་གྱིས་རིན་པོ་ཆེ་སྤོས་ཀྱི་རྒྱལ་པོའི་པད་མོའི་
སྙིང་པོ་ཅན་དུ་བྱིན་གྱིས་བརླབས་ནས། གདན་དེ་ལ་བཅོམ་ལྡན་འདས་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་ཀྱི་སྒྲོན་མའི་རྒྱལ་པོ་དེ་བཞིན་གཤེགས་པ་བཞུགས་སོ། །འཁོར་ཀྱི་སྟན་དེ་དག་ལ་
བྱང་ཆུབ་སེམས་དཔའ་རྣམས་འཁོད་དོ། །དེའི་ཞལ་མཐོང་མ་ཐག་ཏུ་འཁོར་དེའི་སེམས་ཅན་ཐམས་ཅད་ཀྱང་། སྒྲིབ་པ་ཐམས་ཅད་དང་བྲལ་ཏེ། ནད་ཐམས་ཅད་ཀྱང་ཞི་བར་གྱུར་ནས། འཕགས་
པའི་ཆོས་ཀྱི་སྣོད་དུ་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མའི་རྒྱལ་པོས་སེམས་ཅན་དེ་སྣོད་དུ་གྱུར་པར་ཐུགས་སུ་ཆུད་
ནས། བསྟན་པ་རིམ་པས་བཀའ་བསྩལ་ཏེ། འདི་ལྟར་རྒྱུའི་དཀྱིལ་འཁོར་རབ་ཏུ་སྣང་བ་ཞེས་བྱ་བའི་མདོ་སྡེ་ཡང་དག་པར་བསྟན་ནས་ཞལ་གྱི་སྒོ་ནས་འགྲོ་བ་ཐམས་ཅད་ཀྱི་སྐད་རྒྱ་མཚོ་དང་། 
ངེས་པའི་ཚིག་དང་། ངག་གིས་དབྱངས་སུ་བརྗོད་པའི་གསུང་དབྱངས་ཀྱི་ཡན་ལག་སྟོང་དང་ལྡན་པ། ཆོས་ཀྱི་ཡན་ལག་ཐམས་ཅད་དང་ལྡན་པ་རབ་ཏུ་བསྒྲགས་པ་དང་། དེའི་མོད་ལ་འཁོར་དེ་ནས་སྲོག་
ཆགས་བྱེ་ཕྲག་བརྒྱ་བཅུ་ནི་རྡུལ་དང་བྲལ་ཏེ། དྲི་མ་མྱེད་པར་གྱུར་ནས། ཆོས་ལ་ཆོས་ཀྱི་མྱིག་སྐྱེས་པར་གྱུར་ཏོ། །སྲོག་ཆགས་བྱེ་བ་མང་ཞིག་གིས་ནི། མྱི་སློབ་པའི་ས་ཐོབ་པར་གྱུར་ཏོ། །སྲོག་
ཆགས་སྟོང་ཕྲག་བཅུ་ནི་ཐེག་པ་ཆེན་པོ་ལ་རྣམ་པར་དུལ་བར་གྱུར་ཏོ། །འདི་ལྟར་བྱང་ཆུབ་སེམས་དཔའི་སྤྱོད་པ་ཀུན་ཏུ་བཟང་པོ་དང་། སྨོན་ལམ་ཆེན་པོ་ཡོངས་སུ་རྫོགས་པའི་ཚུལ་ལ་ཞུགས་

77-1-96b

པར་གྱུར་ཏོ། །དེ་ལྟར་བཅོམ་ལྡན་འདས་དེས་སངས་རྒྱས་ཀྱི་རྣམ་པར་འཕྲུལ་བ་ཆེན་པོས་ཆོས་ཀྱི་འཁོར་ལོ་རབ་ཏུ་བསྐོར་བའི་ཚེ། ཕྱོགས་བཅུའི་སེམས་ཅན་སངས་རྒྱས་ཀྱི་ཞིང་བརྒྱ་
ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་ཐེག་པ་ཆེན་པོ་ལ་རྣམ་པར་དུལ་བར་གྱུར་ཏོ། །ཕྱོགས་བཅུའི་འཇིག་རྟེན་སངས་རྒྱས་ཀྱི་ཞིང་འབྱམ་ཀླས་པ་སྣ་ཚོགས་སུ་གཏོགས་པའི་སེམས་ཅན་མཐའ་
དང་དབུས་མྱེད་པ་དག་གི་ཡང་ངན་སོང་གི་ས་རྣམ་པར་བཟློག་པར་གྱུར་ཏོ། །སེམས་ཅན་གྲངས་ལས་འདས་པ་ཞིག་ནི་མཐོ་རིས་སུ་སྐྱེ་བའི་ལམ་ལ་རབ་ཏུ་བཀོད་པར་གྱུར་ཏོ། །རྒྱལ་པོ་
གཞོན་ནུ་རྣམ་པར་རྒྱལ་བས་ཀྱང་བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨྱིན་པར་བྱས་པས། བསམ་པ་ཇི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་
པར་བསྐུལ་བ་འདི་ཐོབ་པར་གྱུར་ཏོ། །རིགས་ཀྱི་བུ་དེ་ལ་དེའི་ཚེ་དེའི་དུས་ན་རྒྱལ་པོ་གཞོནུ་རྣམ་པར་རྒྱལ་བ་ཞེས་བྱ་བ་བྱུང་སྟེ། རང་གི་ལུས་དང་སྲོག་ཡོངས་སུ་བཏང་ནས། ནོར་གྱི་ཚོགས་
དང་། འཁོར་ཐམས་ཅད་དང་། མྱིའི་འཇིག་རྟེན་ན་འཚོ་བའི་བདེ་བ་ཡོངས་སུ་སྤངས་ནས་བཙོན་ར་ན་འཁོད་པའི་སེམས་ཅན་དེ་དག་ཐར་བར་བྱས་པ། མཆོད་སྦྱིན་ཆེན་པོ་གཏན་པ་མྱེད་
པའི་མཆོད་སྦྱིན་བྱེད་བྱེད་པ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་ཀྱི་སྒྲོན་མའི་རྒྱལ་པོ་
དེ་ལ་བསྙེན་བཀུར་བྱེད་བྱེད་པ་དེ་བཞིན་གཤེགས་པ་དེའི་ཞལ་མཐོང་བའི་མོད་ལ་བླ་ན་མྱེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། བྱང་ཆུབ་སེམས་དཔའི་རྣམ་པར་

77-1-97a

ཐར་པ་སེམས་ཅན་ཐམས་ཅད་ཡོངས་སུ་སྨྱིན་པར་བྱ་བས་བསམ་པ་ཇི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་བསྐུལ་བ་ཡང་ཐོབ་པར་གྱུར་པ་དེ་གཞན་ཞིག་ཡིན་པ་ཙམ་
དུ་སེམས་ན་ནི། རིགས་ཀྱི་བུ་ཁྱོད་ཀྱིས་དེ་ལྟར་མྱི་བལྟ་སྟེ། ཁོ་མོ་ནི་དེའི་ཚེ་དེའི་དུས་ན་རྒྱལ་པོ་གཞོན་ནུ་རྣམ་པར་རྒྱལ་བ་ཞེས་བྱ་བར་གྱུར་ཏོ། །དེ་ལྟར་ཁོ་མོ་རྒྱལ་པོ་གཞོནུ་རྣམ་པར་རྒྱལ་བ་
ཞེས་བྱ་བར་གྱུར་ཏེ། སྙིང་རྗེ་ཆེན་པོས་རབ་ཏུ་མྱི་དགའ་ཞིང་འགྲོ་བ་ཐམས་ཅད་ལ་ཕན་པར་ཞུགས་ཏེ། ཁམས་གསུམ་ལ་མྱི་གནས་པ་དང་། རྣམ་པར་སྨྱིན་པའི་ལན་ལ་རེ་བ་མྱེད་པ་དང་། 
གྲགས་པ་དང་སྙན་པ་དང་། མྱིང་སྨོས་པ་ལ་མངོན་པར་དགའ་བ་མྱེད་པ་དང་། བདག་ལ་བསྟོད་པ་མྱེད་པ་དང་། གཞན་ལ་སྨོད་པ་མྱེད་པ་དང་། དངོས་པོ་ཐམས་ཅད་ལ་མངོན་པར་ཞེན་པ་མྱེད་པ་དང་། 
སྲིད་པའི་འདུ་ཤེས་ལས་གྱེན་དུ་འཕགས་པ་དང་། ཁམས་གསུམ་པ་ལ་མངོན་པར་དགའ་བ་མྱེད་པ་དང་། འཇིག་རྟེན་གྱི་ཡུལ་གྱི་བདེ་བ་ལས་ཕྱིར་ཕྱོགས་པ་དང་། དེ་བཞིན་གཤེགས་པའི་ཡུལ་ལ་
མངོན་ཏུ་གྱུར་པ་དང་། བྱང་ཆུབ་སེམས་དཔའི་བསམ་པ་རྣམ་པར་དག་པ་དང་། ལྷག་པའི་བསམ་པ་རྡོ་རྗེ་ཡོངས་སུ་གྲུབ་པ་དང་། འགྲོ་བ་ཐམས་ཅད་ལ་བྱམས་པ་ཆེན་པོས་ནན་ཏན་དུ་བྱེད་པ་དང་། འགྲོ་
བ་ཐམས་ཅད་ལ་སྙིང་བརྩེ་བས་སྡུག་བསྔལ་རྣམ་པར་ཞི་བར་བྱ་བ་ལ་བརྩོན་པ་དང་། དེ་བཞིན་གཤེགས་པའི་སྟོབས་ལ་བསམ་པ་ཐག་པ་ནས་ལྷག་པར་དམྱིགས་པ་དང་། བྱང་ཆུབ་སེམས་
དཔའི་ལམ་ཡོངས་སུ་སྦྱང་བ་དང་། ཐེག་པ་ཆེན་པོའི་རྒྱན་གྱིས་འབྱུང་བའི་ལམ་རབ་ཏུ་བརྒྱན་པར་བྱ་བ་དང་། ཐམས་ཅད་མཁྱེན་པ་ཉིད་ཀྱི་སྒོ་མངོན་པར་བལྟ་བར་བྱ་བའི་ཚུལ་གྱིས་དེ་དག་དེ་ལྟ་བུར་

77-1-97b

དགའ་བ་དག་ཀྱང་བྱས་པར་གྱུར་ཏོ། །རིགས་ཀྱི་བུ་ཁོ་མོས་ནི་བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨྱིན་པར་བྱ་བས་བསམ་པ་ཇི་ལྟ་བ་བཞིན་དུ་དགེ་བའི་རྩ་བ་
ལ་ཡང་དག་པར་བསྐུལ་བ་འདི་ཡིན་དེ་སྲིད་དུ་རིང་བ་ཞིག་ནས་ཐོབ་པར་གྱུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་རྒྱལ་བའི་འོད་ལ་ལོག་པར་གསོལ་བ་འདེབས་ཤིང་། 
ཁོ་མོ་བསད་པའི་ཕྱིར་གྲོས་སུ་གསོལ་བའི་བློན་པོ་ལྔ་བརྒྱ་པོ་རྣམས་གཞན་དག་ཅིག་ཡིན་པ་ཙམ་དུ་སེམས་ན་ནི། དེ་ལྟར་མྱི་བལྟ་སྟེ། ལྷས་བྱིན་གྱིས་བཅོམ་ལྡན་འདས་དགྲོངས་པའི་ཕྱིར་སྐྱེས་བུ་
ལྔ་བརྒྱ་བཀྱེ་བ་དེ་དག་ཡིན་ཏེ། དེ་དག་ཀྱང་བཅོམ་ལྡན་འདས་ཀྱིས་མ་འོངས་པའི་དུས་བསྐལ་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ན་བསྐལ་པ་འོད་བཟང་པོ་ཞེས་བྱ་བ་གཅིག་ལ་སངས་རྒྱས་ལྔ་བརྒྱ་
སངས་རྒྱས་ཀྱི་ཞིང་གི་ཡོན་ཏན་དང་རྒྱན་སྣ་ཚོགས་དང་ལྡན་པ། རིགས་དང་རྒྱུད་སྣ་ཚོགས་སུ་སྐྱེས་པ། ཕ་དང་མ་སྣ་ཚོགས་སུ་སྨོས་པ་སྐྱེ་བའི་རྣམ་པར་འཕྲུལ་པ་སྣ་ཚོགས་ཡོངས་སུ་སྟོན་པ་མངོན་
པར་འབྱུང་བའི་རྣམ་པར་འཕྲུལ་པ་སྣ་ཚོགས་དང་ལྡན་པ། བྱང་ཆུབ་གྱི་ཤིང་གི་འོད་སྣ་ཚོགས་ཡོངས་སུ་སྟོན་པ། སྙིང་པོ་བྱང་ཆུབ་སྣ་ཚོགས་སུ་ཉེ་བར་འདོང་བའི་སྒོ་སྣ་ཚོགས་དང་ལྡན་པ། བདུད་
ཕམ་པ་སྣ་ཚོགས་ཡོངས་སུ་སྟོན་པ་མངོན་པར་མཚང་རྒྱ་བའི་རྣམ་པར་འཕྲུལ་པ་སྣ་ཚོགས་ཡོངས་སུ་སྟོན་པ། ཆོས་ཀྱི་འཁོར་ལོ་རབ་ཏུ་བསྐོར་བའི་ཚུལ་དང་། མྱིང་དང་ངེས་པའི་ཚིག་སྣ་ཚོགས་
དང་ལྡན་པ། མདོ་སྡེའི་ཚུལ་ཤིན་ཏུ་བསྟན་པ་སྣ་ཚོགས་དང་ལྡན་པ། ཚིག་གི་ལམ་དང་སྐད་སྣ་ཚོགས་རབ་ཏུ་སྟོན་པ། འཁོར་ཀྱི་དཀྱིལ་འཁོར་ཀྱི་རྒྱན་སྣ་ཚོགས་དང་ལྡན་པ། འོད་གྱི་

77-1-98a

དཀྱིལ་འཁོར་ཀྱི་མཐུ་དང་རྒྱན་སྣ་ཚོགས་རབ་ཏུ་འགྱེད་པ། ཚེའི་ཚད་སྣ་ཚོགས་དང་ལྡན་པ། བསྟན་པའི་བྱིན་གྱི་རླབས་སྣ་ཚོགས་དང་ལྡན་པ། བསྟན་པ་རྣམ་པར་དམྱིགས་པ་
སྣ་ཚོགས་དང་ལྡན་པ། མྱིང་སྣ་ཚོགས་དང་ལྡན་པ། སྙིང་རྗེ་ཆེན་པོའི་ལུས་སུ་གྱུར་པ་ཤ་སྟག་ཏུ་གྱུར་པ། དེ་དག་གི་བསྐལ་པའི་དང་པོ་ལ་དེ་བཞིན་གཤེགས་པ་ཐུགས་རྗེ་ཆེན་པོ་མངའ་བ་ཞེས་
བྱ་བ་འཇིག་རྟེན་གྱི་ཁམས་རིན་ཆེན་འོད་དུ་བླ་ན་མྱེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །དེའི་རྗེས་ལ་འཇིག་རྟེན་གྱི་ཁམས་དེ་ཉིད་དུ་དེ་བཞིན་གཤེགས་པ་གཉིས་
པ་འགྲོ་བ་ཐམས་ཅད་ལ་ཕན་པའི་སྨོན་ལམ་ཟླ་བ་ཞེས་བྱ་བ་བྱུང་ངོ་། །དེ་བཞིན་གཤེགས་པ་གསུམ་པ་ཐུགས་རྗེ་ཆེན་པོའི་སེང་གེ་ཞེས་བྱ་བ་འབྱུང་ངོ་། །དེ་བཞིན་གཤེགས་པ་བཞི་པ་
འཇིག་རྟེན་ཐམས་ཅད་ལ་ཕན་པར་མཛད་པ་ཞེས་བྱ་བ་བྱུང་བ་ནས། ཐམས་ཅད་ཀྱི་ཐ་མ་དེ་བཞིན་གཤེགས་པ་སྨན་པའི་རྒྱལ་པོ་ཞེས་བྱ་བ་འབྱུང་བར་འགྱུར་རོ་ཞེས་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་གཡོན་དང་ལྡན་པའི་སེམས་ཀྱིས་རྒྱལ་པོ་ལ་སྙིང་རིང་པར་གྱུར་ཏེ། ཁོ་མོས་
གསོད་མ་མྱིའི་ལག་ཏུ་ཕྱིན་པ་ལས་རང་གིས་ལུས་དང་སྲོག་ཡོངས་སུ་བཏང་སྟེ། བཙོན་ར་དེ་དག་ན་བཀྱེ་བ་དེ་རྣམས་གཞན་དག་གཅིག་ཡིན་པ་ཙམ་དུ་སེམས་ན་ནི། དེ་ལྟར་མྱི་ལྟ་སྟེ། དེ་
བཞིན་གཤེགས་པ་ལོག་པར་དད་སེལ་ལ་སྩོགས་པ་བསྐལ་པ་བཟང་པོའི་དེ་བཞིན་གཤེགས་པ་རྣམས་དང་། དེ་མ་ཡིན་པའི་བྱང་ཆུབ་སེམས་དཔའ་གྲངས་མྱེད་པ་བརྒྱ་སྟོང་ཕྲག་བཅུ་

77-1-98b

དག་སྟེ། བཅོམ་ལྡན་འདས་དེ་བཞིན་གཤེགས་པ་སྟོབས་མཐའ་ཡས་པ་གྲགས་པར་བརྗོད་པའི་དཔལ་ཡང་དག་པར་འབྱུང་བའི་བློ་གྲོས་མཐོང་བར་གྱུར་མ་ཐག་ཏུ་བླ་ན་མྱེད་པ་ཡང་
དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། ད་ལྟར་ཕྱོགས་བཅུ་ན་བྱང་ཆུབ་སེམས་དཔའི་སྤྱད་པ་སྤྱོད་ཅིང་བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་
ཡོངས་སུ་སྨྱིན་པར་བྱ་བས་བསམ་པ་ཇི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་བསྐུལ་བ་འདི་ཡང་སྒོམ་ཞིང་ཤིན་ཏུ་རྒྱས་པར་བྱེད་དོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་
ཚེ་དེའི་དུས་ན་རྒྱལ་པོ་རྒྱལ་བའི་འོད་ཅེས་བྱ་བ་བྱུང་བ་དེ་གཞན་ཞིག་ཡིན་པ་ཙམ་དུ་སེམས་ན་ནི། དེ་ལྟར་མྱི་བལྟ་སྟེ། སྨྲ་བ་ཆེན་པོ་བདེན་པ་ཅན་ནི་དེའི་ཚེ་དེའི་དུས་ན་རྒྱལ་པོ་རྒྱལ་བའི་འོད་
ཅེས་བྱ་བར་གྱུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོའི་འཁོར་དུ་གྱུར་པ་བཙུན་མོའི་འཁོར་དང་། བཙུན་མོའི་གནས་ཀྱི་སྒོ་བ་འམ། འཁོར་བ་ན་
གནས་པ་འམ། རྗེས་སུ་འཆའ་བ་དེ་དག་ཀྱང་གཞན་དག་ཅིག་ཡིན་པ་ཙམ་དུ་སེམས་ན་ནི་དེ་ལྟར་མྱི་བལྟ་སྟེ། ཞགས་པ་འཐུབ་པ་སྟོང་ཕྲག་དྲུག་བཅུ་པོ་སྨྲ་བ་ཆེན་པོ་བདེན་པ་ཅན་གྱིས་སྨྲས་
བའི་རྒྱལ་མཚན་ཡོངས་སུ་གཟུང་བའི་དོན་དུ་བཅོམ་ལྡན་འདས་ལ་རྒོལ་དུ་འགྲོ་བའི་ཚེ། བཅོམ་ལྡན་འདས་ཀྱི་སྤྱན་སྔར་བླགས་ནས་ཀུན་ཀྱང་ཞིང་སྣ་ཚོགས་ཀྱི་རྒྱན་དང་། བསྐལ་པ་སྣ་ཚོགས་
དང་། མྱིང་སྣ་ཚོགས་ཀྱིས་དེ་བཞིན་གཤེགས་པ་འཇིག་རྟེན་དུ་འབྱུང་བར་འགྱུར་རོ་ཞེས་བཅོམ་ལྡན་འདས་ཀྱིས་བླ་ན་མྱེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དག་གོ། །

77-1-99a

རིགས་ཀྱི་བུ་རྒྱལ་པོ་གཞོན་ནུ་རྣམ་པར་རྒྱལ་བ་དེ་ཕ་དང་མས་གནང་ནས། སེམས་ཅན་བཙོན་ར་པ་དེ་དག་ཡོངས་སུ་བཀྲོལ་བའི་འོག་ཏུ་སྲིད་ཤིན་ཏུ་བདེ་བ་དང་། ནོར་དང་དབྱིག་རིན་པོ་
ཆེ་ཕུན་སུམ་ཚོགས་པ་དག་ཀྱང་བོར། བུ་དང་ཆུང་མ་དག་ཀྱང་སྤངས་ནས། བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་ཀྱི་སྒྲོན་མའི་རྒྱལ་པོའི་ཞམ་རིང་
དུ་རབ་ཏུ་བྱུང་ངོ་། །རབ་ཏུ་བྱུང་ནས་ཀྱང་ལོ་སྟོང་ཕྲག་ལྔར་ཚངས་པར་སྤྱོད་པ་སྤྱད་དེ། དེའི་བར་སྐབས་སུ་ཏིང་ངེ་འཛིན་གྱི་སྒོ་སྟོང་ཕྲག་བཅུ་ཡོངས་སུ་བསྒྲུབས་སོ། །གཟུངས་ཀྱི་སྒོ་སྟོང་ཕྲག་བཅུ་
ཡང་རབ་ཏུ་ཐོབ་པོ། །མངོན་པར་ཤེས་པའི་ཚུལ་སྟོང་ཕྲག་བཅུ་ལ་འང་རབ་ཏུ་ཞུགས་སོ། །བྱང་ཆུབ་སེམས་དཔའི་གཏེར་སྟོང་ཕྲག་བཅུ་འང་རབ་ཏུ་ཐོབ་པོ། །ཐམས་ཅད་མཁྱེན་པའི་ཤུགས་སྟོང་
ཕྲག་བཅུ་འང་ཡོངས་སུ་སྐྱེས་སོ། །བཟོད་པའི་སྒོ་སྟོང་ཕྲག་བཅུ་ཡང་ཡོངས་སུ་སྦྱངས་སོ། །སེམས་ངེས་པར་གཞག་པ་སྟོང་ཕྲག་བཅུ་ཡང་དག་པར་བསྒྲུབས་སོ། །བྱང་ཆུབ་སེམས་
དཔའི་སྟོབས་ཀྱི་ལུས་སྟོང་ཕྲག་བཅུ་ཡང་ཡོངས་སུ་སྤེལ་ཏོ། །བྱང་ཆུབ་སེམས་དཔའི་ཡེ་ཤེས་ཀྱི་སྒོ་སྟོང་ཕྲག་བཅུར་ཡང་རབ་ཏུ་ཞུགས་སོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་སྟོང་
ཕྲག་བཅུ་ཡང་ཡོངས་སུ་སྐྱེས་སོ། །སངས་རྒྱས་བལྟ་བའི་ཕྱོགས་ཀྱི་སྒོ་སྟོང་ཕྲག་བཅུ་ཡང་མངོན་དུ་གྱུར་ཏོ། །བྱང་ཆུབ་སེམས་དཔའི་སྨོན་ལམ་སྟོང་ཕྲག་བཅུ་ཡང་མངོན་པར་བསྒྲུབས་སོ། །
དེ་དེ་ལྟ་བུའི་ཆོས་དང་ལྡན་པས་སེམས་ཀྱི་སྐད་ཅིག་རེ་རེ་ལ་ཕྱོགས་བཅུར་སངས་རྒྱས་ཀྱི་ཞིང་སྟོང་ཕྲག་བཅུ་ཡོངས་སུ་གནོན་ཏོ། །འཇིག་རྟེན་གྱི་ཁམས་རེ་རེ་ཞིང་ཡང་སེམས་ཀྱི་སྐད་ཅིག་

77-1-99b

རེ་རེ་ལ་སངས་རྒྱས་སྟོང་ཕྲག་བཅུ་སྔོན་གྱི་མཐའ་དང་ཕྱི་མའི་མཐའ་རྗེས་སུ་དྲན་ནོ། །དེ་བཞིན་གཤེགས་པ་དེ་དག་གི་སངས་རྒྱས་ཀྱི་སྤྲུལ་པ་རྒྱ་མཚོ་སྟོང་ཕྲག་བཅུ་ཕྱོགས་བཅུར་
གཤེགས་པ་དེ་དག་ཀྱང་མཐོང་ཞིང་ཤེས་སོ། །སེམས་ཀྱི་སྐད་ཅིག་རེ་རེ་ལ་ཡང་སངས་རྒྱས་ཀྱི་ཞིང་སྟོང་ཕྲག་བཅུར་གཏོགས་པའི་སེམས་ཅན་འགྲོ་བའི་རྒྱུད་སྣ་ཚོགས་སུ་སྐྱེས་པ་ཤི་འཕོ་
ཞིང་སྐྱེ་བར་འགྱུར་བ་མཐོང་བ་དང་། དམའ་བ་དང་། བདེ་འགྲོའི་ལམ་དུ་ཕྱིན་པ་དང་། ངན་སོང་གི་ལམ་དུ་ཕྱིན་པ་དང་། ཁ་དོག་སྡུག་པ་དང་། ཁ་དོག་མི་སྡུག་པ་ལས་ཇི་བཞིན་དུ་སྐྱེས་པར་
གྱུར་པ་ཐམས་ཅད་ཀྱང་མཐོང་བར་གྱུར་ཏོ། །སེམས་ཅན་དེ་དག་གི་ཤི་འཕོ་དང་སྐྱེ་བ་ཡང་ཁོང་དུ་ཆུད་ཅིང་མཐོང་སྟེ། སེམས་གྱི་རྒྱུད་དང་། སེམས་ཀྱི་མདབ་འབྲེལ་བ་དང་། བསམ་པ་སྣ་
ཚོགས་དང་། དབང་པོ་རྒྱ་མཚོ་དང་། སྦྱོར་བ་འབྱམ་ཀླས་པ་དང་། ལས་མཐར་ཐུག་པ་དང་། ཡོངས་སུ་སྨིན་པར་བྱ་བ་དང་། རྣམ་པར་གདུལ་བའི་དུས་ཀྱང་ཁོང་དུ་ཆུད་ཅིང་མཐོང་ངོ་། །
རིགས་ཀྱི་བུ་རྒྱལ་པོ་གཞོན་ནུ་དེ་དེ་ནས་ཤི་འཕོས་ནས་ཀྱང་འཛམ་བུའི་གླིང་དེ་ཉིད་དུ་རྒྱལ་པོའི་གནས་དགའ་བ་དང་ལྡན་པར་རྒྱལ་པོ་དེ་ཉིད་ཀྱི་རིགས་སུ་སྐྱེས་ནས། འཁོར་ལོས་བསྒྱུར་བའི་
རྒྱལ་སྲིད་ཐོབ་པར་གྱུར་ཏེ། དེ་འཁོར་ལོས་བསྒྱུར་བའི་རྒྱལ་པོར་གྱུར་པས་བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མའི་རྒྱལ་པོ་ཡོངས་སུ་
མྱ་ངན་ལས་འདས་པའི་འོག་ཏུ་དེ་བཞིན་གཤེགས་པ་ཆོས་ཀྱི་ནམ་མཁའི་དཔལ་ཤིན་ཏུ་འཕགས་པའི་རྒྱལ་པོ་བསྙེན་བཀུར་ཏོ། །དེའི་འོག་ཏུ་སྙིང་པོ་བྱང་ཆུབ་དེ་ཉིད་དུ་བརྒྱ་བྱིན་དུ་གྱུར་ཏེ། 

77-1-100a

དེ་བཞིན་གཤེགས་པ་ལྷ་དབང་སྙིང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་རབ་མཚེ་མའི་རྒྱལ་པོར་གྱུར་ཏོ། །དེ་བཞིན་གཤེགས་པའི་
དཔལ་རི་བོའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་ན་རབ་དགའ་ལྡན་གྱི་ལྷའི་རྒྱལ་པོར་གྱུར་ཏོ། །དེ་བཞིན་གཤེགས་པ་ཆོས་ཀྱི་འཁོར་ལོའི་འོད་
རབ་ཏུ་བསྒྲགས་པའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་རབ་འཕྲུལ་དགའི་ལྷའི་རྒྱལ་པོར་གྱུར་ཏོ། །དེ་བཞིན་གཤེགས་པ་ནམ་མཁའ་མཛེས་
པའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་དབང་བསྒྱུར་གྱི་ལྷའི་རྒྱལ་པོར་གྱུར་ཏོ། །དེ་བཞིན་གཤེགས་པ་སྟོབས་ལ་ཐུབ་པ་མྱེད་པའི་དཔལ་ཞེས་བྱ་བ་
བསྙེན་བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་ལྷ་མ་ཡིན་གྱི་དབང་པོར་གྱུར་ཏོ། །དེ་བཞིན་གཤེགས་པ་ཆོས་ཐམས་ཅད་ཀྱི་འབྲུག་སྒྲ་བསྒྲགས་པའི་རྒྱལ་པོ་ཞེས་བྱ་བ་བསྙེན་
བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་ཚངས་པའི་དབང་པོར་གྱུར་ཏོ། །དེ་བཞིན་གཤེགས་པ་ཆོས་ཀྱི་འཁོར་ལོ་སྤྲུལ་པ་ཀུན་ཏུ་སྣང་བའི་དབྱངས་ཤེས་བྱ་བ་བསྙེན་བཀུར་ཏོ། །
རིགས་ཀྱི་བུ་འཇིག་རྟེན་གྱི་ཁམས་རིན་ཆེན་འོད་དེ་ཉིད་དུ་བསྐལ་པ་འོད་བཟང་པོ་དེ་ཉིད་ལ་དེ་བཞིན་གཤེགས་པ་དེ་དག་ལ་སྩོགས་པ། སངས་རྒྱས་སྟོང་ཕྲག་བཅུ་བྱུང་སྟེ། དེ་བཞིན་གཤེགས་
པ་དེ་དག་ཐམས་ཅད་ཀྱང་རྒྱལ་པོ་གཞོན་ནུ་རྣམ་པར་རྒྱལ་བས་བསྙེན་བཀུར་ཏོ། །རིགས་ཀྱི་བུ་བསྐལ་པ་འོད་བཟང་པོ་དེའི་འོག་ཏུ་བསྐལ་པ་འོད་གཟེར་བཟང་པོ་ཞེས་བྱ་བ་བྱུང་སྟེ། བསྐལ་

77-1-100b

པ་འོད་ཟེར་བཟང་པོ་དེ་ལ་ཡང་སངས་རྒྱས་སྟོང་ཕྲག་བཅུ་བྱུང་ངོ་། །ཁོ་མོ་ཡང་བསྐལ་པ་དེ་ལ་རྒྱལ་པོ་བློ་གྲོས་ཆེན་པོ་ཞེས་བྱ་བ་ཞིག་ཏུ་གྱུར་ཏེ། དེའི་ཚེ་ཁོ་མོ་རྒྱལ་པོར་གྱུར་པས་དེ་
བཞིན་གཤེགས་པ་མཚན་གྱི་དཔལ་རི་བོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་ཁྱིམ་བདག་ཅིག་ཏུ་གྱུར་ཏེ། དེ་བཞིན་གཤེགས་པ་ཕུང་པོ་ཡོངས་སུ་གྲུབ་པ་ཞེས་བྱ་བ་བསྙེན་
བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་བློན་པོ་ཞིག་ཏུ་གྱུར་ཏེ། དེ་བཞིན་གཤེགས་པ་དྲི་མ་མེད་པའི་སྲས་ཤེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་ལྷ་མ་ཡིན་གྱིས་
དབང་པོ་ཞིག་ཏུ་གྱུར་ཏེ། དེ་བཞིན་གཤེགས་པ་ཤུགས་མངའ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་ཤིང་གི་ལྷ་མོ་ཞིག་ཏུ་གྱུར་ཏོ། །དེ་བཞིན་གཤེགས་པ་མཚན་ཉིད་
རི་རབ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་དེད་དཔོན་ཞིག་ཏུ་གྱུར་ཏོ། །དེ་བཞིན་གཤེགས་པ་ཕྱག་དྲི་མ་མྱེད་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་
ཉིད་ལ་གྲོང་ཁྱེར་གྱི་ལྷ་མོ་ཞིག་ཏུ་གྱུར་ཏོ། །དེ་བཞིན་གཤེགས་པ་སེང་གེ་རྣམ་པར་གནོན་པས་བཞུད་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་ངལ་བསོས་པོ་ཞིག་ཏུ་གྱུར་ཏེ། 
དེ་བཞིན་གཤེགས་པ་ལྷ་དབང་གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་དྲི་ཟའི་རྒྱལ་པོ་ཞིག་ཏུ་གྱུར་ཏེ། དེ་བཞིན་གཤེགས་པ་གྲགས་པ་ཆོས་ཀྱིས་འཕགས་པ་
ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་གྲུལ་བུམ་གྱི་དབང་པོ་ཞིག་ཏུ་གྱུར་ཏེ། དེ་བཞིན་གཤེགས་པ་སྣང་བའི་ཅོད་པན་ཞེས་བྱ་བ་བསྙེན་བཀུར་ཏོ། །རིགས་ཀྱི་བུ་

77-1-101a

དེ་ལྟར་ཁོ་མོས་དེ་བཞིན་གཤེགས་པ་བཅུ་པོ་དེ་དག་ལ་སྩོགས་པ་བསྐལ་པ་བཟང་པོ་འོད་གཟེར་བཟང་པོ་དེ་ལ་སྐྱེ་བའི་རིགས་སྣ་ཚོགས་སུ་སྐྱེས་ནས། དེ་བཞིན་གཤེགས་པ་བྱེ་བ་
ཕྲག་དྲུག་བཅུ་བསྙེན་བཀུར་ཏེ། ཁོ་མོས་དེ་བཞིན་གཤེགས་པ་དེ་དག་ཐམས་ཅད་ལ་མཆོད་པ་བྱས་སོ། །དེ་བཞིན་གཤེགས་པ་རེ་རེའི་སྤྱན་སྔར་འགྲོ་བའི་ཚེ་འང་སེམས་ཅན་གྱི་ཁམས་
མཐའ་དང་དབུས་མེད་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨྱིན་པར་བྱས་སོ། །དེ་བཞིན་གཤེགས་པ་རེ་རེའི་སྤྱན་སྔར་འགྲོ་བའི་ཚེ་འང་ཏིང་ངེ་འཛིན་གྱི་སྒོ་སྣ་
ཚོགས་རབ་ཏུ་ཐོབ་པར་གྱུར་ཏོ། །གཟུངས་ཀྱི་སྒོ་སྣ་ཚོགས་དང་། མངོན་པར་བསྒྲུབ་པའི་ཚུལ་སྣ་ཚོགས་དང་། སོ་སོ་ཡང་དག་པར་རིག་པ་མངོན་པར་བསྒྲུབ་པའི་ཚུལ་སྣ་ཚོགས་དང་། 
ཐམས་ཅད་མཁྱེན་པ་ཉིད་ཀྱི་ཚུལ་རྗེས་སུ་རྟོགས་པར་བྱ་བ་སྣ་ཚོགས་དང་། ཆོས་སྣང་བའི་སྒོ་ཐོབ་པར་བྱ་བའི་ཚུལ་སྣ་ཚོགས་དང་། ཡེ་ཤེས་ཀྱི་ཚུལ་ཁོང་དུ་ཆུད་པར་བྱེད་པ་སྣ་ཚོགས་
དང་། ཕྱོགས་རྒྱ་མཚོ་ལ་འཇུག་པའི་སྣང་བ་སྣ་ཚོགས་དང་། ཞིང་རྒྱ་མཚོ་སྣ་ཚོགས་ལ་འཇུག་ཅིང་ཁོང་དུ་ཆུད་པར་བྱ་བའི་སྣང་བ་སྣ་ཚོགས་དང་། དེ་བཞིན་གཤེགས་པ་རྒྱ་མཚོ་
མཐོང་བར་བྱ་བ་རྣམ་པར་དམིགས་པའི་སྣང་བ་སྣ་ཚོགས་ཀྱང་རབ་ཏུ་ཐོབ་པོ། །ཡོངས་སུ་གནོན་ཏོ། །རྣམ་པར་དག་གོ། །ཡོངསུ་རྫོགས་སོ། །ཡོངས་སུ་གནས་པར་གྱུར་ཏོ། །
སྐྱེས་སོ། །བྱུང་ངོ་རྣམ་པར་འཕེལ་ཏོ། །རབ་ཏུ་བྱུང་ངོ་། །རྣམ་པར་བྱུང་ངོ་། །བསྐལ་པ་འོད་གཟེར་བཟང་པོ་དེ་ལ་དེ་བཞིན་གཤེགས་པ་རྣམས་ཇི་ལྟར་རིམ་གྲོར་བྱས་པ་

77-1-101b

དེ་བཞིན་དུ་བསྐལ་པ་འཇིག་རྟེན་གྱི་ཁམས་རྒྱ་མཚོ་ཐམས་ཅད་ཀྱི། རྡུལ་ཤིན་ཏུ་ཕྲ་བ་སྙེད་དུ། དེ་བཞིན་གཤེགས་པ་སྙེད་ཅིག་བྱུང་བར་གྱུར་པ་དང་། དེ་བཞིན་གཤེགས་པ་ཇི་སྙེད་ཅིག་འཇིག་
རྟེན་གྱི་ཁམས། གཞན་ནས་དེ་དག་ཏུ་བྱོན་ཏེ། ཆོས་བསྟན་པར་གྱུར་པའི་དེ་བཞིན་གཤེགས་པ་དེ་དག་ཐམས་ཅད་ལས་ཀྱང་ཆོས་བསྟན་པ་ཐོས་ཏེ། ཐོས་ནས་ཀྱང་ཡོངས་སུ་བཟུང་ངོ་། །
དེ་བཞིན་གཤེགས་པ་དེ་དག་ཐམས་ཅད་ཀྱང་། ཁོ་མོས་བསྙེན་བཀུར་ཏོ། །རིམ་གྲོར་བྱས་སོ། །སངས་རྒྱས་བཅོམ་ལྡན་འདས། དེ་དག་གིས་བསྟན་པ་ཡང་ཁོ་མོས་ཡོངས་སུ་བཟུང་ངོ་། །
དེ་བཞིན་གཤེགས་པ་དེ་དག་ཐམས་ཅད་ལས་ཀྱང་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨྱིན་པར་བྱ་བས་བསམ་པ་ཇི་ལྟ་བ་བཞིན་དུ་དགེ་བའི་རྩ་བ་
ལ་ཡང་དག་པར་བསྐུལ་བ་འདི་ཐོབ་པར་བྱ་བའི་ཚུལ་སྣ་ཚོགས་དང་། རྣམ་པར་ཐར་པའི་ཚུལ་གྱི་སྒོ་སྣ་ཚོགས་གྱིས་ཐོབ་པར་གྱུར་ཏོ། །དེ་ནས་མཚན་མོའི་ལྷ་མོ་འགྲོ་བ་ཐམས་
ཅད་བསྲུང་བའི་སྨོན་ལམ་ལ་བརྩོན་པའི་འོད་ཀྱིས། དེའི་ཚེ་རྣམ་པར་ཐར་པའི་ཚུལ་འདི་ཉིད་ཡོངས་སུ་བརྗོད་པ་དང་། ཡོངས་སུ་བསྟན་པའི་ཕྱིར་ཚོང་དཔོན་གྱི་བུ་ནོར་བཟངས་ལ་ཚིགས་
སུ་བཅད་དེ་སྨྲས་པ། བསམ་ཀྱིས་མྱི་ཁྱབ་རྣམ་ཐར་དམ་པ་འདི། །གྲོགས་པོ་ཁྱོད་ཀྱིས་བདག་ལ་གང་དྲིས་པ། །བདེ་བར་གཤེགས་པའི་བྱིན་གྱིས་དེ་བསྟན་ཀྱིས། །
མ་ལུས་ཡང་དག་ཇི་བཞིན་བདག་ལས་ཉོན། །བསྐལ་པ་བསམ་ཡས་ཡངས་པ་མཐའ་ཡས་པ། །རྒྱ་མཚོའི་

77-1-102a

ཞིང་གི་རྡུལ་དང་གྲངས་མཉམ་པ། །དེ་ཀུན་འདས་པའི་སྔ་རོལ་མདངས་དགའ་བའི། །འཇིག་རྟེན་ཁམས་ཤིག་བྱུང་བ་རིན་ཆེན་འོད། །དེ་ཚེ་བསྐལ་པ་བཟང་པོའི་འོད་ཀྱང་བྱུང་། །
དེ་ལ་རྒྱལ་བ་དཔག་ཏུ་མེད་པ་སྐྱེས། །ཐུབ་པའི་དབང་པོ་དེ་དག་ཁོ་མོ་ཡིས། །རྣམ་ཐར་འདི་ལ་བསྒོམ་ཞིང་བསྙེན་བཀུར་ཏོ། །རྒྱལ་པོའི་གནས་རབ་ཡངས་ཤིང་བཟང་བྱུང་བ། །དེ་ཡི་མྱིང་ནི་དགའ་
བས་བརྒྱན་པ་སྟེ། །དེ་ཚེ་སེམས་ཅན་རྣམ་པར་མ་དག་སེམས། །མྱི་བཟང་ངན་དུ་སྤྱོད་པ་དེར་ནི་བྱུང་། །དེ་ནི་རྒྱལ་པོ་རྒྱལ་བའི་འོད་བྱུང་སྟེ། །སེམས་ཅན་དེ་དག་ཆོས་ཀྱིས་བསྐྱང་བ་བྱས། །དེ་ཡི་བུ་ནི་རྣམ་
པར་རྒྱལ་བ་སྟེ། །མཛེས་ཤིང་མཚན་གྱིས་ཡན་ལག་བརྒྱན་པའོ། །གཡོན་ལྡན་སྟོང་ཕྲག་མང་པོ་དེ་དག་ཀྱང་། །དེ་ཚེ་རྒྱལ་པོས་གསད་པར་བྱས་མཐོང་ནས། །གཞོན་ནུ་སྙིང་བརྩེ་མྱི་དགའ་ཀུན་
ནས་འཁོར། །མྱུར་དུ་དགྱེ་བར་རྒྱལ་པོ་དེ་ལ་གསོལ། །རྒྱལ་པོས་ཐོས་དེ་དེ་ཚེ་བློན་པོ་རྣམས། །མ་ལུས་ཀུན་བསྡུས་དེ་ལ་བཀའ་བསྩལ་ནས། །ཀུན་གྱིས་དེ་ལ་ཕྱག་བྱས་ཕྱིར་གསོལ་པ། །
དེ་ནི་རྒྱལ་པོ་ཁྱོད་གྲོངས་ཐབས་གཅིག་ལགས། །རྒྱལ་པོ་དེ་ལྟར་ལོག་པར་ཐུགས་བཅུག་ནས། །སྲས་དེ་གསད་པར་དེ་ཚེ་བྱས་གྱུར་ཀྱང་། །བདག་སྲོག་ཕངས་པར་མ་བརྩིས་ངོམ་ཟུང་མྱེད། །
རྒྱལ་པོའི་སྲས་ཀྱིས་གསད་པར་བྱས་མ་བཏང་། །གསད་པར་བྱས་པ་དེའི་མས་ཐོས་ནས། །རྒྱལ་པོ་དེ་ལ་འཁོར་བཅས་གསོལ་བ་འདེབས། །དགུང་ཟླ་ཕྱེད་ཅིག་སྦྱིན་པ་མ་ལུས་པར། །
འཇིག་རྟེན་སྩོལ་དུ་གཞོན་ནུ་བཏང་བར་གཏོད། །རྒྱལ་པོ་དེས་ཀྱང་དེ་ལྟར་གནང་གྱུར་ནས། །དེས་ནི་ཅི་འདོད་སྦྱིན་པ་ཡོངས་སུ་བཏང་། །

77-1-102b

ཟླ་བ་ཕྱེད་དུ་ཉིན་མཚན་སྦྱིན་བྱས་གནས། །ཉི་མའི་ཐ་མར་ཚོགས་པར་གྱུར་པ་ཡི། །ཞགས་པ་འཐུབ་པ་གང་རྣམས་ཅི་འདོད་པ། །དེ་ལ་དེ་བྱིན་འཆི་བར་སྟ་གོན་གནས། །རྒྱལ་པོའི་གནས་དེར་
འགྲོ་བ་མང་པོ་དག །ཆོ་ངེར་ངུ་ཞིང་ཀུན་ཀྱང་འདུས་པར་གྱུར། །བྱང་ཆུབ་ཤིང་དྲུང་བདེ་གཤེགས་དེའི་ཚེ། །དམ་ཆོས་དབྱངས་མཆོག་སྒྲོན་མའི་རྒྱལ་བཞུགས་པས། །འགྲོ་བའི་དབང་པོ་སྨྱིན་
པར་ཐུགས་ཆུད་ནས། །མཆོད་སྦྱིན་ར་བར་ཐུགས་རྗེ་ཆེན་པོས་བྱོན། །དེ་བཞིན་གཤེགས་པའི་རྣམ་འཕྲུལ་རྣམ་ཕྱེ་བས། །དེ་ཡི་ཁོང་དུ་བདེ་གཤེགས་བྱོན་གྱུར་ནས། །ཆོས་ཀྱི་སྒྲོན་མེའི་
སྤྲིན་གྱི་སྒྲ་སྒྲོགས་པའི། །མདོ་སྡེའི་རྒྱལ་པོ་བདེ་བར་གཤེགས་པས་བཤད། །འགྲོ་བ་མཐའ་དང་དབུས་མེད་རྣམ་བཏུལ་ནས། །དེ་ཚེ་བྱང་ཆུབ་ཏུ་ཡང་ལུང་ཡང་བསྟན། །རྒྱལ་པོའི་སྲས་པོ་
རྣམ་པར་རྒྱལ་བ་ཡང་། །ཤིན་ཏུ་དགའ་བས་བྱང་ཆུབ་མཆོག་ཏུ་ཞུགས། །བདེ་གཤེགས་བསྙེན་བཀུར་མཆོད་པ་རྣམ་ཡངས་པས། །དེ་ལ་མཆོད་བྱས་དགའ་བར་སྨྲས་པ་ནི། །འགྲོ་བ་རྣམ་
འདུལ་སྐྱབས་སུ་བདག་འགྱུར་བགྱི། །མགོན་དང་གནས་དང་དཔུང་དུའང་དེ་བཞིན་ཞེས། །རྒྱལ་བ་དེ་ཡི་ཞམ་རིང་ཐར་བར་ཞུགས། །ཡང་དག་བྱང་ཆུབ་ལམ་ནི་ཡོངས་ཚོལ་ཞིང་། །ཆོས་ཀྱི་
རང་བཞིན་རབ་ཏུ་བརྟག་བྱ་བས། །དེར་གནས་བསྐལ་པ་བརྒྱ་ཕྲག་མང་དུ་སྤྱད། །སྡུག་བསྔལ་རྒྱ་མཚོར་ལྷུང་ཞིང་འདོངས་གྱུར་པའི། །འགྲོ་བ་མགོན་མེད་ཀུན་ལ་སྙིང་བརྩེ་བས། །
ཡང་དག་བྱང་ཆུབ་ལམ་ལ་ཡོངས་བསྒོམས་ནས། །དེ་ཚེ་དེའི་རྣམ་ཐར་འདི་ཐོབ་པོ། །

77-1-103a

བསྐལ་པ་དེ་ལ་བདེ་གཤེགས་གང་འབྱུང་བ། །དེ་དག་ཀུན་ལའང་དགའ་བས་བསྙེན་བཀུར་ནས། །དེ་དག་ཀུན་ལ་མཆོད་པ་ཆེན་པོ་བྱས། །ཆོས་ཀྱི་འཁོར་ལོ་ཡོངས་སུ་བསྐོར་བར་
གྱུར། །དེ་ཡི་འོག་ཏུ་བསྐལ་པ་རྒྱ་མཚོ་རྣམས། །ཞིང་མང་རྒྱ་མཚོ་རྡུལ་སྙེད་ཀུན་ལ་ཡང་། །རྒྱལ་བ་ཇི་སྙེད་སྐྱེས་པར་གྱུར་པ་དག །རབ་ཏུ་མཆོད་དེ་དེ་དག་བསྙེན་བཀུར་བྱས། །རྣམ་
པར་རྒྱལ་ཞེས་བྱ་བ་ཁོ་མོ་ཡིན། །ཉམ་བདེ་བརྩོན་རར་གནས་པའི་བརྩོན་མཐོང་ནས། །དེ་དག་དགྲོལ་ཕྱིར་ལུས་ཀྱང་ཡོངས་སུ་བཏང་། །རྣམ་ཐར་འདི་ཡང་དེ་ཚེ་ཐོབ་པར་གྱུར། །ཞིང་རྣམས་
རྒྱ་མཚོའི་རྡུལ་ཕྲན་རབ་བགྲངས་པའི། །བསྐལ་པ་རྒྱ་མཚོ་མང་པོར་བསྒོམ་པར་བྱས། །ཚུལ་མང་མཐའ་དང་དབུས་མེད་མཉམ་མེད་པས། །སྐད་ཅིག་རེ་རེ་དག་ཏུ་རྣམ་པར་སྤེལ། །ཐུབ་
པའི་བདག་པོ་ཇི་སྙེད་མཐོང་གྱུར་པ། །དེ་དག་སྤྱན་སྔར་སྔན་ཆད་འདི་ཐོབ་སྟེ། །སྒོ་ཚུལ་རྣམ་པ་གཞན་དང་གཞན་དག་གིས། །དེ་དག་གིས་ནི་རྣམ་ཐར་འདི་ཡང་བསྟན། །དེ་དག་
རྣམ་ཐར་མ་ནོར་བསམ་ཡས་ལ། །བསྐལ་པ་བྱེ་བ་མང་པོར་ཁོ་མོས་བསླབས། །དེ་ལ་རྒྱལ་བས་བཀོད་ཅིང་གྲོལ་གྱུར་པ། །དེ་དག་དམ་ཆོས་སྤྲིན་ལས་ཅིག་ཅར་འཐུང་། །ཕྱོགས་
བཅུ་ཀུན་གྱི་ཞིང་རྣམས་ཐམས་ཅད་དུ། །ཐོགས་པ་མེད་པར་ལུས་ཀྱིས་རྒྱས་པར་འགེངས། །སྐད་ཅིག་རེ་རེར་ཞིང་རྒྱུད་བསམ་ཡས་པའི། །དུས་གསུམ་རྒྱུད་རྣམས་ཀུན་ལའང་
རབ་ཏུ་འཇུག །དུས་གསུམ་རྒྱལ་བ་རྒྱ་མཚོ་མ་ལུས་པ། །རེ་རེ་ཀུན་ལའང་མངོན་དུ་རབ་ཏུ་ལྟ། །དེ་དག་ལུས་ཀྱི་གཟུགས་བརྙན་རྒྱལ་བ་ལ། །སྤྲིན་ཏུ་གྱུར་པ་རྣམས་

77-1-103b

ཀྱང་སྤྱན་སྔར་འགྲིམ། །ཕྱོགས་རྣམས་ཀུན་ཏུ་ཉེ་བར་ཕྱིན་འདོང་ཞིང་། །རྒྱལ་བའི་སྤྱན་སྔར་འདོང་བས་ཤིན་ཏུ་མཛེས། །རྒྱན་རྣམས་མ་ལུས་མངོན་པར་ཆར་འབེབས་ཤིང་། །རྒྱལ་
བ་རྣམས་ལ་དེ་དག་མཆོད་པ་བྱེད། །སངས་རྒྱས་རྒྱ་མཚོ་ཆེ་ལ་རྣམ་ཡངས་པའི། །ཞུ་བ་མཐའ་ཡས་ཀུན་ཀྱང་ཞུ་བ་བྱེད། །རྒྱལ་བའི་ཆོས་སྤྲིན་མངོན་པར་ཆར་འབེབས་པ། །
ཀུན་ཀྱང་མ་ལུས་ཡོངས་སུ་འཛིན་པ་བྱེད། །ཕྱོགས་བཅུ་མ་ལུས་ཀུན་ཏུ་དེ་དག་འདོང་། །རྒྱལ་བའི་དཀྱིལ་འཁོར་ཀུན་གྱི་སྤྱན་སྔར་འབེབས། །གཟུགས་མང་རྣམ་པ་སྣ་ཚོགས་
བསྟན་གནས་ཤིང་། །རྣམ་འཕྲུལ་སྣ་ཚོགས་ཉེ་བར་སྟོན་པ་བྱེད། །ཁ་དོག་མཐའ་ཡས་རང་གི་ལུས་གཟུགས་ཀྱིས། །ཕྱོགས་རྣམས་ཐམས་ཅད་རྣམ་པ་སྟོང་དུ་འགེངས། །དེ་དག་
ལུས་གཅིག་ལས་ཀྱང་གཟུགས་ཀྱི་རྣམས། །མཐའ་དང་དབུས་མེད་རྣམ་པར་སྟོན་པར་བྱེད། །བ་སྤུ་རེ་རེའི་སྒོ་ནས་གྲངས་མེད་པའི། །འོད་གཟེར་མང་པོ་རྒྱ་མཚོ་དེ་དག་འགྱེད། །
སྐྱེ་དགུ་ཉོན་མོངས་མྱེ་ཡིས་གདུངས་པ་དག །སྣ་ཚོགས་ཐབས་ཀྱིས་རབ་ཏུ་ཞི་བར་བྱེད། །འདི་ལ་གནས་པ་ལུས་སྤྲུལ་སྤྲིན་མང་བ། །བ་སྤུ་རེ་རེའི་སྒོ་ནས་འགྱེད་བྱེད་ཅིང་། །ངོ་མཚར་
རྨད་ཀྱིས་ཕྱོགས་ཀུན་རྒྱས་བཀང་ནས། །ཆོས་ཆུའི་ཆར་གྱིས་སེམས་ཅན་རྣམ་པར་འདུལ། །ཚུལ་འཇུག་འདི་ནི་བསམ་གྱིས་མི་ཁྱབ་གཟུགས། །རྒྱལ་སྲས་ཀུན་གྱི་གནས་སུ་གྱུར་པ་སྟེ། །
དེ་ལ་གནས་ཤིང་ཕྱི་མཐའི་བསྐལ་པར་ཡང་། །ཞིང་རྣམས་ཀུན་ཏུ་སྤྱད་པ་རབ་ཏུ་སྤྱོད། །བསམ་པ་ཇི་བཞིན་ཆོས་རྣམས་སྟོན་བྱེད་ཅིང་། །དེ་དག་ལྟ་བའི་དྲ་བ་རྣམ་པར་བཟློག །མཐོ་རིས་མྱ་ངན་འདས་ལ་སེམས་ཅན་འགོད། །

77-1-104a

ཐམས་ཅད་མཁྱེན་པའི་ས་ཡང་རྣམ་པར་སྟོན། །འཇིག་རྟེན་སྐྱེ་གནས་ཐམས་ཅད་མ་ལུས་པར། །ཁ་དོག་མཐའ་ཡས་ལུས་མང་བསམ་ཡས་པ། །བསམ་པ་བཞིན་དུ་ཆོས་
རྣམས་རྗོད་བྱེད་དེ། །དེ་དག་སེམས་ཅན་ཀུན་ཀྱི་གཟུགས་བརྙན་གཟུགས། །འདི་དང་གཞན་དག་ཚད་ལས་འདས་པ་ཡི། །ཡོན་ཏན་རྒྱ་མཚོ་དེ་མེད་རྒྱ་མཚོ་ཡི། །རྡུལ་ཕྲན་རབ་སྙེད་བསམ་གྱིས་མྱི་
ཁྱབ་པ། །རྣམ་ཐར་ཞི་བ་འདི་ལྡན་ཐོབ་པར་འགྱུར། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ། སེམས་ཅན་ཐམས་ཅད་ཡོངས་སུ་སྨྱིན་པར་བྱ་བས་བསམ་པ་ཇི་ལྟ་བ་བཞིན་
དུ་དགེ་བའི་རྩ་བ་ལ་ཡང་དག་པར་བསྐུལ་བ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་འཇིག་རྟེན་ཐམས་ཅད་ཀྱི་ལམ་གྱི་རྒྱུད་ལས་འདས་པ། འཇིག་རྟེན་གྱི་སྐྱེ་གནས་ཐམས་ཅད་དུ་
གཟུགས་བརྙན་རབ་ཏུ་འབྱུང་བ། འཇིག་རྟེན་གྱི་ཤེས་པ་ཐམས་ཅད་ལས་ཡང་དག་པར་འདས་པ། ཤེས་བྱའི་སྒྲིབ་པ་ཐམས་ཅད་ཀྱི་རི་རྣམ་པར་འཐོར་བ་ལ་བརྩོན་པ། ཆོས་ཐམས་ཅད་ཀྱི་རང་བཞིན་
དང་། མཚན་ཉིད་རབ་ཏུ་རྟོགས་པ་ཉོན་མོངས་པའི་སྒྲིབ་པ་དང་། མུན་པ་ཐམས་ཅད་རྣམ་པར་སེལ་བ་ལ་བརྩོན་པ། ཆོས་ཐམས་ཅད་རབ་ཏུ་དཔྱོད་པས་མངོན་པར་བསྒྲུབ་པ་ལ་མཁས་པ། བདག་
མྱེད་པའི་ཆོས་མངོན་ཏུ་གྱུར་པ། སེམས་ཅན་ཐམས་ཅད་ཡོངས་སུ་སྨྱིན་པར་བྱ་བ་དང་། གདུལ་བ་རྒྱུན་མྱི་གཅོད་པ། ཆོས་ཀྱི་དབྱིངས་ཀྱི་ཚུལ་གཉིས་སུ་མྱེད་པར་རབ་ཏུ་རྟོགས་པ། དག་གི་ལམ་
གྱི་ཚུལ་རྒྱ་མཚོ་ཐམས་ཅད་ཀྱི་རྗེས་སུ་འབྲང་བའི་བློ་དང་ལྡན་པ། དེ་དག་གི་སྤྱོད་པ་ཤེས་པ་འམ། ཡོན་ཏན་རྒྱ་མཚོ་ལ་འཇུག་པ་འམ། ཡེ་ཤེས་ཀྱི་རྣམ་པར་གནོན་པ་ཡོངས་སུ་ཤེས་པར་

77-1-104b

བྱ་བ་འམ། སེམས་གྱི་གནས་ཁོང་དུ་ཆུད་པར་བྱ་བ་འམ། ཏིང་ངེ་འཛིན་ལ་དབང་བསྒྱུར་བ་རྟོགས་པར་བྱ་བ་འམ། རྣམ་པར་ཐར་པས་རྣམ་པར་འཕྲུལ་པ་ཡོངས་སུ་ཤེས་པར་བྱ་བར་ནུས་
རེ་སྐན། སོང་རིགས་ཀྱི་བུ་འཛམ་བུའི་གླིང་འདི་ཉིད་ཀྱི་ལུམ་བི་ནིའི་ནགས་ཚལ་ན། ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་ཞེས་བྱ་བ་འདུག་གིས། 
དེའི་གན་དུ་སོང་ལ་ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པའི་རིགས་སུ་བྱུང་བ་ཡིན་པ་དང་། ཇི་ལྟར་ན་འཇིག་རྟེན་རྣམས་ལ་སྣང་བར་བྱེད་པར་འགྱུར་བ་དང་། ཇི་ལྟར་ན་ཕྱི་མའི་མཐའི་
བསྐལ་པའི་མུར་ཐུག་པར་བྱང་ཆུབ་སེམས་དཔའི་སྤྱོད་པ་སྤྱད་པས་མྱི་སྐྱོ་བར་འགྱུར་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་གྱིས་མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་
ལ་བརྩོན་པའི་འོད་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་
བྱས་ནས། ཐལ་མོ་སྦྱར་ཏེ་ཕྱིར་ལྟ་ཞིང་མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ཀྱི་དྲུང་ནས་སོང་ངོ་།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོའ། 
བམ་པོ་བདུན་པ། དེ་ནས་ཚོང་དཔོན་གྱི་བུ་ནོར་བཟངས་མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ཀྱི་གདམས་ངག་དེ་རྗེས་སུ་དྲན་པར་བྱེད་ཅིང་། བྱང་ཆུབ་སེམས་དཔའི་
རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨྱིན་པར་བྱ་བས་བསམ་པ་ཅི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་བསྐུལ་བ་དེ་ལ་ཡོངསུ་བསྒོམ་པ་དང་། ཁོང་དུ་ཆུད་པར་བྱ་བ་དང་རྒྱ་ཆེར་བྱེད་ཅིང་མཐར་གྱིས་

77-1-105a

ལུམ་བི་ནིའི་ནགས་ཚལ་གང་ན་བ་དེར་ཕྱིན་ཏེ། ལུམ་བི་ནིའི་ནགས་ཚལ་ལ་གཡས་ཕྱོགས་སུ་བསྐོར་བ་བྱས་ནས། ལུམ་བི་ནིའི་ནགས་ཚལ་ན་རིན་པོ་ཆེའི་ཤིང་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་
དཔལ་ཡོངསུ་ཚོལ་ཚོལ་བ་ལས། ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་ལུམ་བི་ནིའི་ནགས་ཚལ་ན་རིན་པོ་ཆེའི་ཤིང་གི་ཡལ་ག་ཐམས་ཅད་ཀྱི་དཀྱིལ་འཁོར་
གྱི་ཁྱིམ་བརྩེགས་པ་ཞིག་ན། སེངྒེའི་ཁྲི་རིན་པོ་ཆེའི་པདྨོའི་སྙིང་པོ་ཅན་ཞིག་ལ་འདུག་ཅིང་། ནགས་ཚལ་གྱི་ལྷ་མོ་ཁྲག་ཁྲིག་བརྒྱ་སྟོང་ཕྲག་ཉི་ཤུའི་འཁོར་གྱི་ཀུན་ནས་བསྐོར་ཏེ། མདུན་དུ་བྱས་ནས་ཆོས་བསྟན་ཏོ། །
བྱང་ཆུབ་སེམས་དཔའ་ཐམས་ཅད་ཀྱི་སྐྱེ་བ་རྒྱ་མཚོ་ཤིན་ཏུ་བསྟན་པ་ཞེས་བྱ་བའི་མདོ་སྡེ་ཡོངསུ་སྟོན་ཅིང་དེ་བཞིན་གཤེགས་པའི་རིགས་ཀྱི་རྒྱུད་དུ་རིགས་དང་ལྡན་པར་སྐྱེས་པའི་བྱང་ཆུབ་སེམས་དཔའ་རྣམས་
ཀྱི་ཡོན་ཏན་རྒྱ་མཚོའི་ཤུགས་རྣམ་པར་འཕེལ་བར་བྱེད་ཅིང་འདུག་པ་མཐོང་ནས། ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གང་ན་བ་དེར་སོང་སྟེ་ཕྱིན་ནས། 
ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གྱི་རྐང་པ་གཉིས་ལ་སྤྱི་བོས་ཕྱག་འཚལ་ནས། མདུན་དུ་འདུག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་
མ་བདག་གི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་ན་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་རིགས་སུ་བྱུང་བ་ལགས་པའང་མ་འཚལ། ཇི་ལྟར་ན་བྱང་ཆུབ་སེམས་
དཔའ་རྣམས་སྤྱོད་པ་ལ་སྤྱོད་ཅིང་སེམས་ཅན་རྣམས་ལ་སྣང་བ་འབྱིན་པར་འགྱུར་བ་ཡང་མ་འཚལ་ཏོ། །དེ་སྐད་ཅེས་སྨྲས་པ་དང་། ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་

77-1-105b

དཔལ་གྱི་ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྐྱེ་བ་སྟེ། དེ་དག་དང་ལྡན་ན་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་རིགས་
སུ་སྐྱེས་པ་ཡིན་ན། དེ་དག་ལས་བྱུང་ན་བྱང་ཆུབ་སེམས་དཔའ་རྣམས་སེམས་ཀྱི་སྐད་ཅིག་རེ་རེ་ལའང་བྱང་ཆུབ་སེམས་དཔའི་དགེ་བའི་རྩ་བས་རྣམ་པར་འཕེལ་བར་འགྱུར་ཏེ། ཐོགས་པ་མེད་པ་དང་ཞུམ་པ་མེད་པ་དང་། 
ཕྱིར་ལྡོག་པ་མེད་པ་དང་། རྒྱུན་གཅོད་པ་མྱེད་པ་དང་། ཡོངས་སུ་སྐྱོ་བ་མེད་པ་དང་། སྒྱིད་ལུག་པར་འགྱུར་བ་མེད་པ་དང་། ཉམས་པར་འགྱུར་བ་མེད་པ་དང་། ཉམས་དམའ་བར་འགྱུར་བ་མེད་པ་དང་། ཡོངས་སུ་ཡི་ཆད་
པར་འགྱུར་བ་མེད་པ་དང་། ཆུད་ཟ་བར་འགྱུར་བ་མྱེད་པ་དང་། ཐམས་ཅད་མཁྱེན་པ་ཉིད་ཀྱི་རྗེས་སུ་འབྲང་བར་འགྱུར་བ་དང་། ཆོས་ཀྱི་དབྱིངས་ཀྱི་ཚུལ་ལ་ཡོངས་སུ་གཞོལ་བར་འགྱུར་བ་དང་། སངས་རྒྱས་ཀྱི་བྱང་ཆུབ་
ཏུ་ཡོངས་སུ་སྨྱིན་པ་འཐོབ་པར་འགྱུར་བ་དང་། བྱང་ཆུབ་སེམས་དཔའི་སེམས་བསྐྱེད་པ་ཤིན་ཏུ་ཡངས་པར་འགྱུར་བ་དང་། ཕ་རོལ་ཏུ་ཕྱིན་པ་ཐམས་ཅད་ཀྱིས་རྣམ་པར་འཕེལ་བར་འགྱུར་བ་དང་། འཇིག་རྟེན་གྱི་
ལམ་གྱི་རྒྱུད་ཐམས་ཅད་ལས་རྣམ་པར་ལྡོག་པར་འགྱུར་བ་དང་། དེ་བཞིན་གཤེགས་པའི་སར་ཡོངས་སུ་འགྲུབ་པར་འགྱུར་བ་དང་། ཡེ་ཤེས་ཀྱི་མངོན་པར་ཤེས་པ་ཤིན་ཏུ་བྱང་བར་འགྱུར་བ་དང་། སངས་
རྒྱས་ཀྱི་ཆོས་མངོན་དུ་འགྱུར་བ་དང་། ཐམས་ཅད་མཁྱེན་པའི་ཡུལ་གྱི་དོན་དང་ལྡན་པར་འགྱུར་རོ། །བཅུ་གང་ཞེ་ན་འདི་ལྟ་སྟེ། སངས་རྒྱས་ཐམས་ཅད་ལ་བསྙེན་བཀུར་བའི་སྨོན་ལམ་གྱིས་སྦྱོར་བའི་སྙིང་པོ་
ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་དང་པོའོ། །བྱང་ཆུབ་ཀྱི་སེམས་ཀྱི་ཡན་ལག་ཡོངས་སུ་འགྲུབ་པར་འགྱུར་བ་འབྱུང་བའི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་གཉིས་པའོ། །

77-1-106a

ཆོས་ཀྱི་ཚུལ་ལ་ངེས་པར་རྟོགས་པར་གཞག་པའི་སྦྱོར་བའི་ཚུལ་མངོན་དུ་གྱུར་པ་འབྱུང་བའི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་གསུམ་པའོ། །དུས་གསུམ་སྣང་བར་བྱ་བའི་ལྷག་པའི་བསམ་
པ་རྣམ་པར་དག་པའི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་བཞི་པའོ། །ཀུན་ནས་སྣང་བའི་འོད་ཀྱི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་ལྔ་པའོ། །དེ་བཞིན་གཤེགས་པའི་རིགས་ཀྱི་རྒྱུད་དུ་འབྱུང་
བའི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་དྲུག་པའོ། །དེ་བཞིན་གཤེགས་པ་ཐམས་ཅད་ཀྱི་སྟོབས་ཀྱི་འོད་སྣང་བའི་རྒྱན་གྱི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་བདུན་པའོ། །ཡེ་ཤེས་ཀྱི་སྒོ་ཀུན་ནས་
རྣམ་པར་དཔྱད་པས་ཡོངས་སུ་འགྲུབ་པ་འབྱུང་བའི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་བརྒྱད་པའོ། །ཆོས་ཀྱི་དབྱིངས་སྤྲུལ་པས་བརྒྱན་པར་བྱེད་པའི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་དགུ་པའོ། །
དེ་བཞིན་གཤེགས་པའི་ས་ཡོངས་སུ་གནོན་པའི་ཤུགས་དྲག་པོའི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་བཅུ་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་སྐྱེ་བ་དང་པོ་སངས་རྒྱས་ཐམས་ཅད་ལ་བསྙེན་བཀུར་བའི་
སྨོན་ལམ་གྱི་སྦྱོར་བའི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་ཐོག་མར་སངས་རྒྱས་མཆོད་ཅིང་རིམ་གྲོར་བྱ་བ་ལ་འཇུག་སྟེ། དེ་སངས་རྒྱས་བཅོམ་ལྡན་འདས་རྣམས་ལ་རིམ་གྲོ་དང་། 
བཀུར་སྟི་དང་། སྟི་སྟང་དང་། མཆོད་པ་བྱེད་ཅིང་བསྙེན་བཀུར་བྱེད་ཅིང་། དགྱེས་པར་བྱེད་ལ་ཐུགས་བྱུང་བར་མི་བྱེད་པས། དེ་བཞིན་གཤེགས་པའི་ཞལ་བལྟ་བས་མི་ངོམས་པ་སངས་རྒྱས་ལ་རིམ་གྲོར་བྱ་བར་བརྩོན་པས་
སངས་རྒྱས་ལ་དགའ་བའི་ཤུགས་ཀྱིས་རྣམ་པར་སྤེལ་བའི་ཤུགས་དང་ལྡན་པ། དེ་བཞིན་གཤེགས་པ་མཐོང་བས་མོས་པའི་ཤུགས་དྲག་པོ་ཡོངས་སུ་སྐྱེས་པ། དེ་ཕྱིར་མི་ལྡོག་པའི་དད་པས་བསོད་ནམས་

77-1-106b

ཡོངས་སུ་བསྡུད་པའི་ཚེ། དེ་བཞིན་གཤེགས་པ་ཐམས་ཅད་ལ་མཆོད་པའི་ཚོགས་ཡོངས་སུ་བསྡུ་བ་ལ་བརྩོན་ཞིང་སྦྱོར་བ་རྒྱུན་མི་གཅོད་པ་ཡིན་ཏེ། རིགས་ཀྱི་བུ་དེ་ནི་བྱང་ཆུབ་སེམས་དཔའ་རྣམས་ཀྱི་སྐྱེ་བ་དང་པོ། 
སངས་རྒྱས་ཐམས་ཅད་ལ་བསྙེན་བཀུར་བའི་སྨོན་ལམ་གྱི་སྦྱོར་བའི་སྙིང་པོ་ཞེས་བྱ་བ་སྟེ། ཐམས་ཅད་མཁྱེན་པ་ཉིད་ཀྱི་ཚོགས་དགེ་བའི་རྩ་བ་ཡོངས་སུ་འགྲུབ་པ་ཡང་དག་སྡུད་པར་འགྱུར་བའོ། །རིགས་ཀྱི་
བུ་དེ་ལ་བྱང་ཆུབ་སེམས་དཔའི་སྐྱེ་བ་གཉིས་པ། བྱང་ཆུབ་ཀྱི་སེམས་ཀྱི་ཡན་ལག་ཡོངས་སུ་གྲུབ་པར་འགྱུར་བ་འབྱུང་བའི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། འདི་ལྟར་སེམས་ཅན་ཐམས་ཅད་ཡོངས་སུ་སྐྱོབ་པའི་ཕྱིར་སྙིང་རྗེ་ཆེན་པོའི་སེམས་དང་། ཤིན་ཏུ་དགྱེས་པར་བྱ་བའི་ཕྱིར་སངས་རྒྱས་ཐམས་ཅད་
བསྙེན་བཀུར་བའི་སེམས་དང་། དངོས་པོ་ཐམས་ཅད་ལ་འཕངས་པར་མི་བརྩི་བའི་ཕྱིར། སངས་རྒྱས་ཀྱི་ཆོས་ཐམས་ཅད་ཡོངས་སུ་བཙལ་བའི་སེམས་དང་། ཐམས་ཅད་མཁྱེན་པ་ཉིད་མངོན་དུ་འགྱུར་བར་
བྱ་བའི་ཕྱིར་བརྩམས་པ་ཆེན་པོའི་སེམས་དང་། འགྲོ་བ་ཐམས་ཅད་ཡོངས་སུ་བསྡུ་བའི་སྦྱོར་བས་རྒྱས་པར་དགོད་བའི་ཕྱིར་བྱམས་པ་ཆེན་པོའི་སེམས་དང་། ཐམས་ཅད་མཁྱེན་པ་ཉིད་ཀྱི་གོ་ཅ་བརྟན་པར་བྱ་བའི་
ཕྱིར་འགྲོ་བ་ཐམས་ཅད་ཡོངས་སུ་མྱི་གཏོང་བའི་སེམས་དང་། ཡང་དག་པ་ཇི་ལྟ་བ་བཞིན་དུ་ཤེས་པའི་སྣང་བ་རབ་ཏུ་ཐོབ་པར་བྱ་བའི་ཕྱིར་གཡོ་དང་སྒྱུ་མེད་པའི་སེམས་དང་། བྱང་ཆུབ་སེམས་དཔའི་ལམ་
ལ་ནན་ཏན་དུ་བྱ་བའི་ཁ་འོག་ཏུ་ལུས་ཁྲུས་པའི་སེམས་དང་། དེ་བཞིན་གཤེགས་པ་ཐམས་ཅད་ཀྱི་སྨོན་ལམ་དང་། མི་འགལ་བར་བྱ་བའི་ཕྱིར། སངས་རྒྱས་ཐམས་ཅད་ལ་སྐུ་བསླུ་བ་མེད་པའི་སེམས་དང་། 

77-1-107a

ཕྱི་མའི་མཐའི་མུར་ཐུག་པར་སེམས་ཅན་ཐམས་ཅད་ཡོངས་སུ་སྨྱིན་པར་བྱ་བ་དང་། གདུལ་བ་རྒྱུན་མི་གཅོད་པའི་ཕྱིར་ཐམས་ཅད་མཁྱེན་པ་ཉིད་དུ་སྨོན་ལམ་ཆེན་པོ་འདེབས་པའི་སེམས་དང་། དེ་དག་ལ་
སྩོགས་པ་བྱང་ཆུབ་ཀྱི་སེམས་ཀྱི་ཡན་ལག་གི་ཚོགས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་ཡོངས་སུ་རྫོགས་པའི་བྱང་ཆུབ་སེམས་དཔའ་ནི་དེ་བཞིན་གཤེགས་པའི་རིགསུ་སྐྱེས་པ་ཡིན་ཏེ། རིགས་ཀྱི་
བུ་དེ་ནི་བྱང་ཆུབ་སེམས་དཔའི་སྐྱེ་བ་གཉིས་པ། བྱང་ཆུབ་ཀྱི་སེམས་ཀྱི་ཡན་ལག་ཡོངས་སུ་འགྲུབ་པར་འགྱུར་བ་འབྱུང་བའི་སྙིང་པོ་ཞེས་བྱ་བའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་
སེམས་དཔའི་སྐྱེ་བ་གསུམ་པ་ཆོས་ཀྱི་ཚུལ་ལ་ངེས་པར་གཞག་པའི་སྦྱོར་བའི་ཚུལ་མངོན་དུ་གྱུར་པ་འབྱུང་བའི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་ཆོས་ཐམས་ཅད་ཀྱི་ཚུལ་
རྒྱ་མཚོ་ཡོད་དོ་ཆོག་ངེས་པར་རྟོག་པས་མངོན་དུ་བྱ་བའི་སེམས་དང་ལྡན་པ་ཐམས་ཅད་མཁྱེན་པའི་ལམ་གྱི་རྣམ་པ་ཡོངས་སུ་རྫོགས་པར་བྱ་བས་མངོན་དུ་བྱ་བར་གཅིག་ཏུ་སེམས་པའི་སེམས་དང་ལྡན་པ་ཁ་ན་མ་ཐོ་བ་
མེད་པའི་ལས་ལ་ཡང་དག་པར་སྤྱད་པར་སེམས་པའི་སེམས་དང་ལྡན་པ། བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་རྒྱ་མཚོ་ཐམས་ཅད་ཡོངསུ་དག་པར་བྱ་བའི་སེམས་དང་ལྡན་པ་བྱང་ཆུབ་སེམས་དཔའི་ཡོན་ཏན་ཐམས་ཅད་
ལ་ནན་ཏན་དུ་བྱ་བས་ཡོངསུ་གྲུབ་པར་བྱ་བའི་སེམས་དང་ལྡན་པ། བྱང་ཆུབ་སེམས་དཔའི་ལམ་གྱི་རྒྱན་ཐམས་ཅད་མངོན་པར་བསྒྲུབ་པའི་སེམས་དང་ལྡན་པ་ཐམས་ཅད་མཁྱེན་པ་ཉིད་དུ་དམིགས་པའི་ཚོགས་རྒྱ་
མཚོ་ཆེན་པོ་ཡོངསུ་བསྒྲུབ་པ་བསྐལ་པའི་མྱེ་འབར་བས་ཀྱང་། རྒྱུན་མི་གཅོད་པར་བརྩོན་པར་བྱ་བའི་སེམས་དང་ལྡན་པ། འགྲོ་བ་ཐམས་ཅད་ཡོངསུ་སྨྱིན་པར་བྱ་བ་དང་། གདུལ་བ་ལ་རབ་ཏུ་ཞུགས་པས། 

77-1-107b

བྱང་ཆུབ་སེམས་དཔའི་སྤྱོད་པ་ཀུན་ཏུ་བཟང་པོ་མངོན་པར་བསྒྲུབ་པའི་སེམས་དང་ལྡན་པ། ཡོངས་སུ་སྤྱོད་པའི་ཚུལ་ཐམས་ཅད་ལ་ཞུགས་པ་ནི་བྱང་ཆུབ་སེམས་དཔའི་ཡོན་ཏན་ཡོངསུ་རྫོགས་པར་བྱ་བ་ལ་དངོས་པོ་
ཐམས་ཅད་རྣམ་པར་བསྒོམ་པས་དངོས་པོ་མྱེད་པའི་ཚུལ་ལ་ཞུགས་པའི་སེམས་དང་ལྡན་པ་ཡིན་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའི་སྐྱེ་བ་གསུམ་པ་ཆོས་ཀྱི་ཚུལ་ལ་ངེས་པར་རྟོག་པས་གཞག་པའི་
སྦྱོར་བའི་ཚུལ་མངོན་དུ་གྱུར་པ་ལ་འབྱུང་བའི་སྙིང་པོ་ཞེས་བྱ་བའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་སྐྱེ་བ་བཞི་པ་དུས་གསུམ་སྣང་བར་བྱ་བའི་ལྷག་པའི་བསམ་པ་རྣམ་པར་དག་པའི་སྙིང་པོ་ཞེས་བྱ་
བ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའི་ལྷག་པའི་བསམ་པའི་དབྱིངས་ལ་གྱ་ནོམ་པར་ཡོངས་སུ་དག་པ་ཡིན། སངས་རྒྱས་ཀྱི་བྱང་ཆུབ་ལ་སྣང་བ་རབ་ཏུ་ཐོབ་པ་ཡིན་བྱང་ཆུབ་སེམས་དཔའི་ཚུལ་རྒྱ་མཚོ་ལ་
རབ་ཏུ་ཞུགས་པ་ཡིན། བསམ་པ་བརྟན་པ་རྡོ་རྗེའི་ཁམས་ལྟ་བུས་ཡོངསུ་ཟིན་པའི་སེམས་དང་ལྡན་པས་ཤིན་ཏུ་བརྟན་པ་ཡིན། སྲིད་པའི་ལམ་དུ་རྒྱུད་དུ་སྐྱེ་བ་ལས་ཕྱིར་ཕྱོགས་སུ་ཕྱོགས་པ་ཡིན། དེ་བཞིན་
གཤེགས་པ་ཐམས་ཅད་ཀྱི་རྣམ་པར་འཕྲུལ་པ་ཡོངསུ་གྲུབ་པར་བྱ་བ་ལ་མངོན་དུ་གྱུར་པ་ཡིན། བྱང་ཆུབ་སེམས་དཔའི་དབང་པོ་རྣམ་པར་སྤེལ་བ་ལ་ཁྱད་པར་དུ་འབོགས་པ་རབ་ཏུ་ཐོབ་པ་ཡིན། ལྷག་པའི་བསམ་པ་ཤིན་ཏུ་
འོད་གསལ་བར་བྱ་བའི་ཕྱིར་སེམས་ཤིན་ཏུ་དགེ་བ་ཡིན། སྨོན་ལམ་བརྟན་ཞིང་རྒྱ་ཆེ་བ་རྣམ་པར་འཕེལ་བར་བྱ་བ་ལ་མྱི་གཡོ་བ་ཡིན། སྒྲིབ་པ་ཐམས་ཅད་ཀྱི་རི་རྣམ་པར་གཏོར་བའི་ཕྱིར་དེ་བཞིན་གཤེགས་པ་ཐམས་ཅད་ཀྱི་ཡང་དག་པར་དགོངས་
པ་ཡིན། འགྲོ་བ་ཐམས་ཅད་ཉེ་བར་འཚོ་བས་མགོན་དུ་གྱུར་པ་ཡིན་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བཞི་པ་དུས་གསུམ་སྣང་བར་བྱ་བའི་ལྷག་པའི་བསམ་པ་

77-1-108a

རྣམ་པར་དག་པའི་སྙིང་པོ་ཞེས་བྱ་བའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་ལྔ་པ་ཀུན་ནས་སྣང་བའི་འོད་ཀྱི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ་འདི་ལ་
བྱང་ཆུབ་སེམས་དཔའ་འགྲོ་བ་ཐམས་ཅད་ཡོངསུ་སྨྱིན་པར་བྱ་བ་དང་། གདུལ་བ་ལ་རབ་ཏུ་ཞུགས་པས་སྦྱོར་བ་ཕུན་སུམ་ཚོགས་པ་ཡིན། སྦྱིན་པ་ལྷུག་པར་གཏོང་བས་དངོས་པོའི་འདུ་ཤེས་ཐམས་ཅད་ལས་གྱེན་དུ་འཕགས་
པ་ཡིན། ཚུལ་ཁྲིམས་མཐའ་ཡས་པས་མཐའ་ལས་རྒལ་བར་རྣམ་པར་དག་པ་ཡིན། སངས་རྒྱས་ཀྱི་ཆོས་ཐམས་ཅད་ལ་བཟོད་པའི་སྣང་བ་རབ་ཏུ་ཐོབ་པ་ཡིན། དེ་བཞིན་གཤེགས་པའི་ཡུལ་ལ་གནས་པའི་བཟོད་པ་དང་
ལྡན་པ་ཡིན། ཐམས་ཅད་མཁྱེན་པ་ཉིད་དུ་ཡངས་པར་འབྱུང་བ་ལ་ཞུགས་པས་བརྩོན་འགྲུས་ཆེན་པོ་དང་ལྡན་པ་ཡིན། སྒོ་ཀུན་ཏུ་ལྟ་བའི་ཏིང་ངེ་འཛིན་གྱི་ཡེ་ཤེས་ཀྱི་དཀྱིལ་འཁོར་རྣམ་པར་དག་པས་བསམ་གཏན་ལ་རབ་ཏུ་
བརྩོན་པ་ཡིན། ཆོས་སྣང་བ་ཐམས་ཅད་རབ་ཏུ་ཐོབ་པས་ཤེས་རབ་ཀྱི་མཐུའི་འོད་དང་ལྡན་པ་ཡིན། སངས་རྒྱས་བལྟ་བ་རྒྱ་མཚོ་རྣམ་པར་དམིགས་པར་བྱ་བ་ལ་ཞུགས་པས་ཐོགས་པ་མེད་པའི་མིག་དང་ལྡན་པ་ཡིན། 
འཇིག་རྟེན་ཐམས་ཅད་ཡོངསུ་ཚིམ་པར་བྱས་པས། ཆོས་ཐམས་ཅད་ཀྱི་དེ་ཁོ་ན་ཉིད་ལ་དབང་བསྒྱུར་བས་སྨོས་པ་ཡིན། ཆོས་ཀྱི་ཚུལ་ཡང་དག་པ་ཇི་ལྟ་བ་བཞིན་དུ་ཐོབ་པར་བྱ་བ་ལ་རབ་ཏུ་བརྩོན་པ་ཡིན་ཏེ། རིགས་ཀྱི་
བུ་འདི་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་ལྔ་པ་ཀུན་ནས་སྣང་བའི་འོད་ཀྱི་སྙིང་པོ་ཞེས་བྱ་བའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་དྲུག་
པ་དེ་བཞིན་གཤེགས་པའི་རིགས་ཀྱི་རྒྱུད་དུ་བྱུང་བའི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་བཞིན་གཤེགས་པའི་རིགས་སུ་བྱུང་བ་ཡིན། དེ་བཞིན་གཤེགས་པའི་

77-1-108b

རྒྱུད་དུ་སྐྱེས་པ་ཡིན། ཚུལ་གྱི་སྒོ་ཐམས་ཅད་ལ་ཤིན་ཏུ་གྲུབ་པ་ཡིན། འདས་པ་དང་། མ་བྱོན་པ་དང་། ད་ལྟར་བྱུང་བའི་དེ་བཞིན་གཤེགས་པ་རྣམས་ཀྱི་སྨོན་ལམ་ཆེན་པོ་རྣམ་པར་དག་པ་ཡིན། དེ་བཞིན་གཤེགས་
པ་ཐམས་ཅད་ཀྱི་དགེ་བའི་རྩ་བ་ལ་རང་བཞིན་གཅིག་པའི་དགེ་བའི་རྩ་བར་གྱུར་པ་ཡིན། སངས་རྒྱས་ཐམས་ཅད་དང་ལུས་གཅིག་ཏུ་གྱུར་པ་ཡིན། ཆོས་དཀར་པོས་འཇིག་རྟེན་གཞན་དུ་འགྲོ་བ་ཡིན། སངས་
རྒྱས་ཀྱི་བྱིན་གྱིས་རླབས་ཡོངས་སུ་བསྟན་པའི་ཏིང་ངེ་འཛིན་ལ་བདག་ཉིད་ཆེ་བའི་ཆོས་ཀྱི་རྣམ་པར་སྤྱོད་པ་ཡིན། དུས་ལ་ཇི་ལྟར་བབ་པ་བཞིན་དུ་སེམས་ཅན་རྣམ་པར་དག་པར་བྱ་བའི་ཆོས་ལ་ཞུགས་པ་
ཡིན། སངས་རྒྱས་ཀྱི་ཆོས་ཡོངས་སུ་དྲི་བ་ལ་སྤོབས་པ་རྒྱུན་མི་འཆད་པ་ཡིན་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་དྲུག་པ་དེ་བཞིན་གཤེགས་པའི་རིགས་
ཀྱི་རྒྱུད་དུ་འབྱུང་བའི་སྙིང་པོ་ཞེས་བྱ་བའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བདུན་པ་དེ་བཞིན་གཤེགས་པ་ཐམས་ཅད་ཀྱི་སྟོབས་ཀྱི་འོད་སྣང་བའི་རྒྱན་གྱི་
སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་སངས་རྒྱས་ཀྱི་སྟོབས་ལ་འཇུག་པའི་སྣང་བས་སངས་རྒྱས་ཀྱི་ཞིང་དུ་འགྲོ་བ་ལས་ཕྱིར་མི་ལྡོག་གོ། །བྱང་ཆུབ་སེམས་དཔའི་
ཡོན་ཏན་རྒྱ་མཚོ་ལས་ཕྱིར་ལྡོག་པར་འགྱུར་རོ། །ཆོས་ཐམས་ཅད་སྒྱུ་མའི་རྣམ་པ་ལྟར་ཡང་དག་པ་ཇི་ལྟ་བ་བཞིན་དུ་ཤེས་པར་བྱ་བ་ལ་གནས་པས་ཡོངས་སུ་འཆད་པར་མི་འགྱུར་རོ། །འཇིག་རྟེན་ཐམས་
ཅད་རྨི་ལམ་ལྟ་བུར་རབ་ཏུ་རྟོགས་པར་བྱེད་དོ། །གཟུགས་སུ་རྣམ་པར་དམྱིགས་པའི་གནས་ཐམས་ཅད་གཟུགས་བརྙན་ལྟ་བུར་མངོན་པར་བསྒྲུབས་པོ། །མངོན་པར་ཤེས་པས་རྣམ་པར་འཕྲུལ་པ་

77-1-109a

སྤྲུལ་པ་ལྟ་བུ་ལ་དབང་རབ་ཏུ་ཐོབ་པར་བྱེད་དོ། །སྲིད་པ་ཐམས་ཅད་དུ་སྐྱེ་བ་གྲིབ་མ་ལྟ་བུར་གདོད་རབ་ཏུ་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་སྒྲ་བརྙན་ལྟ་བུར་རབ་ཏུ་ཤེས་སོ། །
ཐབས་ཀྱི་ཚུལ་དོན་སྣ་ཚོགས་དང་ལྡན་པ་ལ་རབ་ཏུ་བརྩོན་པས་ཆོས་ཀྱི་དབྱིངས་ཀྱི་ཚུལ་རབ་ཏུ་བསྟན་པ་ལ་ཕ་རོལ་ཏུ་ཕྱིན་པའི་དམ་པ་ཐོབ་པ་ཡིན་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་
བྱང་ཆུབ་སེམས་དཔའི་སྐྱེ་བ་བདུན་པ་དེ་བཞིན་གཤེགས་པ་ཐམས་ཅད་ཀྱི་སྟོབས་ཀྱི་འོད་སྣང་བའི་རྒྱན་གྱི་སྙིང་པོ་ཞེས་བྱ་བའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་
བརྒྱད་པ་ཡེ་ཤེས་ཀྱི་སྒོ་ཀུན་ནས་རྣམ་པར་དཔྱད་པས་ཡོངས་སུ་འགྲུབ་པ་འབྱུང་བའི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་གཞོན་ནུར་གྱུར་ཅིང་བྱང་ཆུབ་སེམས་དཔའི་རྣམ་པར་དགོད་
པ་ལ་རྣམ་པར་གནས་པ་ཡིན་ཏེ། དེ་ལ་གནས་ནས་ཐམས་ཅད་མཁྱེན་པའི་ཡེ་ཤེས་ཀྱི་ཚུལ་ལ་རྣམ་པར་སྤྱོད་དེ། ཡེ་ཤེས་ཀྱི་ཚུལ་གྱི་སྒོ་རེ་རེ་ལ་ཡང་བྱང་ཆུབ་སེམས་དཔའི་སྤྱོད་ཡུལ་ཚད་མྱེད་པ་ཡོངསུ་སྟོན་པས་
བསྐལ་པ་ཚད་མེད་པར་ཟད་པར་འགྱུར་རོ། །བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་ལའང་ཕ་རོལ་ཏུ་ཕྱིན་པའི་དམ་བཅས་པས་དབང་དུ་འགྱུར་ཏེ། སེམས་ཀྱི་སྐད་ཅིག་རེ་རེ་ཞིང་སེམས་ཀྱི་སྐད་ཅིག་ཐམས་
ཅད་ལ་ཡང་ཕྱོགས་བཅུའི་སངས་རྒྱས་ཀྱི་ཞིང་བརྗོད་དུ་མེད་པ་དག་ན་བཞུགས་པའི་དེ་བཞིན་གཤེགས་པ་རྣམས་ཀྱི་ཞབས་ཀྱི་དྲུང་དུ་སྐྱེས་ཏེ། དམིགས་པ་ཐ་མི་དད་པས་ཐ་མི་དད་པའི་ཏིང་ངེ་འཛིན་ལ་སྙོམས་
པར་འཇུག་གོ། །ཐ་མི་དད་པའི་ཆོས་རྣམས་ལ་ཐ་དད་པ་ཡེ་ཤེས་ཀྱི་དབང་ཡོངས་སུ་སྟོན་ཏོ། །དམིགས་པ་བརྗོད་དུ་མེད་པ་དག་ཀྱང་སྒྲིབ་པ་མེད་པའི་དབྱིངས་སུ་ནོན་པར་བྱེད་དོ། །དམིགས་པ་ཆུང་ངུས་ཀྱང་

77-1-109b

མཐའ་ཡས་པར་བསྟན་པའི་ས་ལ་ཡོངས་སུ་འཇུག་གོ། །ཆོས་ཉིད་ཚད་མེད་པ་ཡང་ཆུང་བ་འམ། ཆེ་བར་ཁོང་དུ་ཆུད་པར་བྱེད་དོ། །འཇིག་རྟེན་ཐམས་ཅད་ཀྱང་རྣམ་པར་དམིགས་པ་དང་མཉམ་པར་རབ་ཏུ་རྟོག་
པར་བྱེད་དོ། །ཆོས་ཀྱི་དམིགས་པ་ཐམས་ཅད་དང་། རྣམ་པར་ཤེས་པའི་རྒྱུད་ཐམས་ཅད་ཀྱང་བསྒོམས་པས་ཁོང་དུ་ཆུད་པར་བྱེད་དོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བརྒྱད་
པ་ཡེ་ཤེས་ཀྱི་སྒོ་ཀུན་ནས་རྣམ་པར་དཔྱད་པས་ཡོངསུ་འགྲུབ་པ་འབྱུང་བའི་སྙིང་པོ་ཞེས་བྱ་བའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་དགུ་པ་ཆོས་ཀྱི་དབྱིངས་སྤྲུལ་པས་བརྒྱན་
པར་བྱེད་པའི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་ཀྱི་སྐད་ཅིག་ཐམས་ཅད་ལ་རྒྱན་སྣ་ཚོགས་དང་། རྒྱན་དུ་མར་ལྡན་པའི་སངས་རྒྱས་ཀྱི་ཞིང་བྱིན་གྱི་རློབ་སྟེ། སྤྲུལ་པ་ཐམས་ཅད་
ལ་མི་འཇིགས་པའི་ཕ་རོལ་ཏུ་ཕྱིན་པའི་དམ་པ་ཐོབ་པ་ཡིན། སངས་རྒྱས་ཀྱི་སྤྲུལ་པ་ཐམས་ཅད་ལ་ཤིན་ཏུ་མཁས་པར་གྱུར་པ་ཡིན། ཆོས་ཀྱི་སྤྲུལ་པ་ལ་མི་འཇིག་པ་རྣམ་པར་དག་པ་ཡིན། ཆོས་ཀྱི་དབྱིངས་
དམ་པ་ཆགས་པ་མེད་པའི་སྤྱོད་ཡུལ་དང་ལྡན་པ་ཡིན། བསམ་པ་ཇི་ལྟ་བ་བཞིན་དུ་སེམས་ཅན་གྱི་ལུས་རྣམ་པར་དམིགས་བྱ་བའི་བྱིན་གྱིས་རླབས་ལ་མཁས་པ་ཡིན། སེམས་ཅན་གདུལ་བ་ལ་མཁས་པ་བསམ་གྱིས་
མི་ཁྱབ་པ་དང་ལྡན་པ་ཡིན། སྤྱོད་པ་སྣ་ཚོགས་ཀྱི་མངོན་པར་འཚང་རྒྱ་བ་ཡོངས་སུ་སྟོན་པ་ཡིན། ཐམས་ཅད་མཁྱེན་པ་ཉིད་ཀྱི་ལམ་སྒྲིབ་པ་མེད་པ་མངོན་པར་བསྒྲུབ་པ་ལ་མཁས་པ་ཡིན། དེའི་རྒྱུད་ཀྱི་ཆོས་ཀྱི་
འཁོར་ལོ་བསྐོར་བ་ལ་མཁས་པ་ཡོངས་སུ་སྟོན་པ་ཡིན། སེམས་ཅན་མཐའ་དང་དབུས་མེད་པ་གདུལ་བའི་ཐབས་མངོན་པར་བསྒྲུབ་པ་ལ་མཁས་པ་ཡིན། རྣམ་པར་སྣང་མཛད་ཀྱི་ཡེ་ཤེས་དབྱིག་

77-1-110a

དུ་བྱ་བའི་མཛོད་དང་ལྡན་པས་སེམས་ཅན་གདུལ་བའི་དུས་ལ་བབ་ན་རྟག་ཏུ་སྟ་གོན་དུ་གནས་པ་ཡིན་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་དགུ་པ་
ཆོས་ཀྱི་དབྱིངས་སྤྲུལ་པས་བརྒྱན་པ་བྱེད་པའི་སྙིང་པོ་ཞེས་བྱའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བཅུ་པ་དེ་བཞིན་གཤེགས་པའི་ས་ཡོངསུ་གནོན་པའི་
ཤུགས་དྲག་པོ་ཞེས་བྱ་བ་གང་ཞེ་ན། འདི་ལ་བྱང་ཆུབ་སེམས་དཔའ་དུས་གསུམ་གྱི་དེ་བཞིན་གཤེགས་པ་ཐམས་ཅད་དང་། རང་བཞིན་གཅིག་པའི་ཡུལ་ལ་དབང་བསྐུར་བ་ཡིན་ཏེ། འཇིག་རྟེན་གྱི་ཁམས་
ཐམས་ཅད་མདབ་ཆགས་པའི་ཡུལ་ལ་རབ་ཏུ་འཇུག་པ་ཡིན། སེམས་ཅན་ཐམས་ཅད་ཀྱི་སྔོན་གྱི་མཐའ་དང་ཕྱི་མའི་མཐའི་ཤི་འཕོ་དང་། སྐྱེ་བའི་སེམས་རྒྱུད་ཆགས་པར་འབྱུང་བ་ཡང་རབ་ཏུ་ཤེས་སོ། །
བྱང་ཆུབ་སེམས་དཔའ་ཐམས་ཅད་ཀྱི་ཡེ་ཤེས་མདབ་ཆགས་པའི་ཡུལ་ཡང་རབ་ཏུ་ཤེས་སོ། །འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་ཐམས་ཅད་ཀྱི་མངོན་པར་རྫོགས་པར་འཚང་རྒྱ་བ་
མདབ་ཆགས་པ་ཡང་རབ་ཏུ་ཤེས་སོ། །ཆོས་ཐམས་ཅད་ཀྱི་རྒྱུད་མདབ་ཆགས་པ་ལ་མཁས་པར་བྱ་བ་ཡང་རབ་ཏུ་ཤེས་སོ། །བསྐལ་པ་འཇིག་པ་དང་འདུ་བ་ཐམས་ཅད་ཀྱི་སྔོན་གྱི་མཐའ་དང་ཕྱི་མའི་མཐའ་
དང་ད་ལྟར་བྱུང་བ་རྣམས་ཀྱང་མྱིང་དང་བཅས། ས་ཚིག་དང་བཅས་པར་མདབ་ཆགས་པར་རབ་ཏུ་ཤེས་སོ། །སེམས་ཅན་ཚུལ་ཇི་ལྟ་བུར་ཡོངས་སུ་སྨྱིན་པར་བྱས་པ་དང་། དུས་ལ་གང་དུ་བབ་པ་རྣམས་ལ་
མངོན་པར་རྫོགས་པར་འཚང་རྒྱ་བའི་རྒྱན་དང་། རྣམ་པར་འཚང་རྒྱ་བས་གདུལ་བར་བྱ་བ་ཡོངས་སུ་སྟོན་པའི་བྱིན་གྱིས་རླབས་ཀྱི་ཡེ་ཤེས་ཀྱང་མངོན་པར་བསྒྲུབ་པོ། །སངས་རྒྱས་འབྱུང་བ་ཐམས་ཅད་

77-1-110b

མངོན་པར་འཚང་རྒྱ་བའི་དྲུང་དུ་ཉེ་བར་འགྲོ་ཞིང་ཆོས་ཀྱི་འཁོར་ལོ་བསྐོར་བ་ལ་མཁས་པའི་ཚུལ་མདབ་ཆགས་པ་ཡང་། སེམས་ཅན་གྱི་ཁམས་མཐའ་དང་དབུས་མེད་པ་གདུལ་བའི་ཐབས་མངོན་པར་བསྒྲུབ་པ་ལ་མཁས་པས་
ཡོངས་སུ་སྟོན་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བཅུ་པ་དེ་བཞིན་གཤེགས་པའི་ས་མེད་པའི་ཆོས་ཉིད་རབ་ཏུ་རྟོགས་པ་དང་། མཚན་མ་མེད་པའི་མཐའི་སྒོ་དང་ལྡན་པའི་ཡེ་ཤེས་
མཚན་མ་ཐམས་ཅད་དང་བྲལ་བས་ས་བོན་ལས་མྱུ་གུ་ཆུད་མི་ཟ་བའི་ཆོས་ཉིད་དང་། རྒྱ་ལས་རྒྱའི་གཟུགས་བརྙན་འབྱུང་བའི་ཆོས་ཉིད་དང་། གཟུགས་ལས་གཟུགས་བརྙན་འབྱུང་བའི་ཆོས་ཉིད་དང་། སྒྲ་བསྙན་དང་སྒྲར་མཉམ་
པར་དམིགས་པའི་ཆོས་ཉིད་དང་རྣམ་པར་དཔྱོད་པ་དང་། རྨི་ལམ་དུ་མཉམ་པར་རྣམ་པར་དམིགས་པའི་ཆོས་ཉིད་དང་། སྒྱུ་མའི་རྣམ་པ་ལྟར་ལས་ལས་ཡོངས་སུ་བྱུང་བའི་ཆོས་ཉིད་དང་། སེམས་གཟུགས་མེད་པས་འཇིག་
རྟེན་ཡོངས་སུ་བསྐྱེད་པའི་ཆོས་ཉིད་དང་། རྐྱེན་དང་རྒྱུ་ཇི་ལྟ་བསྩགས་པ་བཞིན་དུ་འབྲས་བུ་འབྱུང་པའི་ཆོས་ཉིད་དང་། ལས་ཇི་ལྟར་བསྩགས་པ་དང་མཉམ་པ་རྣམ་པར་སྦྱིན་པ་འབྱུང་བའི་ཆོས་ཉིད་དང་། 
ཐབས་མཁས་པས་རྣམ་པར་བསྒྲུབ་པའི་ཆོས་ཉིད་དང་། ཆོས་དང་ཆོས་མ་ཡིན་པ་མཉམ་པ་ཉིད་ཀྱི་མངོན་པར་བརླན་པའི་ཆོས་ཉིད་དང་། ཡེ་ཤེས་ཀྱི་རྗེས་སུ་འཇུག་པ་དེ་ལྟ་བུས་མངོན་པར་བསྒྲུབ་པའི་
འདུ་ཤེས་དང་། ཡིད་ལ་བྱ་བས་ཚོང་དཔོན་གྱི་བུ་ནོར་བཟངས་ཀྱི་ཁང་པ་བརྩེགས་པ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོའི་སྒོ་ནས་རྣམ་པ་དེ་ལྟ་བུར་བཏུད་དེ་ཕྱག་འཚལ་ནས། ཡུན་རིང་མོ་
ཞིག་ལོན་པ་དང་། དགེ་བའི་རྩ་བའི་ཤུགས་བསམ་གྱིས་མི་ཁྱབ་པས་མངོན་པར་བརླན་པའི་སེམས་དང་ལྡན་པ། ལུས་དང་སེམས་ཤིན་ཏུ་སིམ་པར་གྱུར་པ་དེ་ཁང་

77-1-111a

པ་བརྩེགས་པའི་སྒོའི་གནས་ནས་ལངས་ཏེ། ཡུད་ཙམ་ཞིག་ཏུ་ཁང་པ་བརྩེགས་པ་ཆེན་པོ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོ་དེ་ལ་མིག་གི་མི་འགེབས་པས་བལྟས་ནས་ཐལ་མོ་སྦྱར་ཏེ་ལན་
བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། དེ་ལྟ་བུའི་འདུ་ཤེས་ཡིད་ལ་བྱ་བས་བསྐུལ་བའི་སེམས་དང་ལྡན་པས་ཚིགས་དུ་བརྗོད་པ། འདི་ནི་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་
གནས་ལ་རྣམ་པར་སྤྱོད་པ་རྣམས་ཀྱི་གནས་སོ། །འདི་ནི་ཆོས་ཐམས་ཅད་ལ་རྣམ་པར་མི་རྟོགས་པའི་གནས་པ་ལ་རྣམ་པར་སྤྱོད་པ་རྣམས་ཀྱི་གནས་སོ། །ཆོས་ཀྱི་དབྱིངས་ཐ་མི་དད་པའི་གནས་ལ་རྣམ་པར་སྤྱོད་པ་སེམས་
ཅན་གྱི་ཁམས་མི་དམིགས་པའི་གནས་ལ་རྣམ་པར་སྤྱོད་པ། ཆོས་ཐམས་ཅད་མི་སྐྱེ་བའི་གནས་ལ་རྣམ་པར་སྤྱོད་པ་འཇིག་རྟེན་ཐམས་ཅད་གནས་མེད་པའི་གནས་ལ་རྣམ་པར་སྤྱོད་པ། འགྲོ་བ་ཐམས་ཅད་ཀྱི་གནས་
གནས་མེད་པའི་གནས་ལ་རྣམ་པར་སྤྱོད་པ། གནས་ཐམས་ཅད་རྣམ་པ་བསྒོམས་པའི་གནས་ལ་རྣམ་པར་སྤྱོད་པ། བརྟེན་པ་ཐམས་ཅད་ལ་མི་བརྟེན་པའི་གནས་ལ་རྣམ་པར་སྤྱོད་པ་ལུས་ཐམས་ཅད་ལ་མི་བརྟེན་པའི་
གནས་ལ་རྣམ་པར་སྤྱོད་པ།  འདུ་ཤེས་ཀྱི་རྣམ་པ་ཐམས་ཅད་བསྩལ་བའི་གནས་ལ་རྣམ་པར་སྤྱོད་པ་རྣམས་ཀྱི་གནས་སོ། །འདི་ནི་ཆོས་ཐམས་ཅད་དང་རང་བཞིན་མེད་པའི་གནས་ལ་རྣམ་པར་སྤྱོད་པ་རྣམས་ཀྱི་
གནས་སོ། །རྟོག་པ་དང་རྣམ་པར་རྟོག་པ་དང་། ཡོངས་སུ་རྟོག་པ་ཐམས་ཅད་རྣམ་པར་མི་རྟོག་པའི་གནས་ལ་རྣམ་པར་སྤྱོད་པའི་འདུ་ཤེས་དང་། སེམས་དང་ཡིད་ཐམས་ཅད་ཀྱིས་རྣམ་པར་དབེན་པའི་གནས་ལ་
སྤྱོད་པ། ལམ་ཐམས་ཅད་བླང་བ་མེད་པ་དང་། དོར་བ་མེད་བའི་གནས་ལ་རྣམ་པར་སྤྱོད་པ། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་འཇུག་པའི་གནས་ལ་རྣམ་པར་སྤྱོད་པའི་སྒོ་ཀུན་ནས་ཆོས་ཀྱི་དབྱིངས་

77-1-111b

རྒྱས་པར་འགེངས་པ་ཐབས་ཀྱི་གནས་ལ་རྣམ་པར་སྤྱོད་པ། ཉོན་མོངས་པ་ཐམས་ཅད་ཞི་ཞིང་ཉེ་བར་ཞི་བའི་གནས་ལ་རྣམ་པར་སྤྱོད་པ། ལྟ་བ་དང་སྲེད་པ་དང་ང་རྒྱལ་ཐམས་ཅད་སྤངས་པའི་ཤེས་རབ་ཤས་ཆེ་བའི་
གནས་ལ་རྣམ་པར་སྤྱོད་པ། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། མངོན་པར་ཤེས་པ་དང་། རིག་པ་བསྐྱེད་པ་ཐམས་ཅད་ལ་རྣམ་པར་རོལ་པའི་གནས་ལ་རྣམ་
པར་སྤྱོད་པ། བྱང་ཆུབ་སེམས་དཔའ་ཐམས་ཅད་ཀྱི་ཏིང་ངེ་འཛིན་གྱི་སྤྱོད་ཡུལ་བསྒོམས་པའི་གནས་ལ་རྣམ་པར་སྤྱོད་པ་རྣམས་ཀྱི་གནས་སོ། །འདི་ནི་སངས་རྒྱས་ཐམས་ཅད་ཡོངས་སུ་གནོན་པའི་ཤུགས་དྲག་པོའི་སྙིང་པོ་
ཞེས་བྱའོ། །རིགས་ཀྱི་བུ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བཅུ་པ་སྒོ་རྣམས་ཏེ། དེ་དག་གིས་བྱང་ཆུབ་སེམས་དཔའ་རྣམས་སྐྱེ་བར་འགྱུར་བའོ། །འབྱུང་བར་འགྱུར་བའོ། །ཡང་དག་པར་
འཕེལ་བར་བྱེད་པའོ། །རབ་ཏུ་རྫོགས་པར་བྱེད་པའོ། །ཡོངས་སུ་གྲུབ་པར་བྱེད་པའོ། །ཞིང་མ་ལུས་པ་ཐམས་ཅད་ཁོང་དུ་ཆུད་པར་བྱ་བའི་ཕྱིར་རྒྱན་གཅིག་གི་ལྷབ་ལྷུབ་ལ་རྒྱན་དང་། 
ལྷབ་ལྷུབ་ཀྱི་རྒྱུད་རྣམ་པ་སྣ་ཚོགས་ཀྱི་བྱིན་གྱིས་རློབས་པའོ། །སེམས་ཅན་གྱི་ཁམས་གདུལ་བ་རྒྱུན་མི་གཅད་པའི་ཕྱིར་ཕྱི་མའི་མཐའི་བསྐལ་པའི་མུར་ཐུག་པར་བྱིན་གྱིས་བརླབས་ཀྱིས་རྒྱུན་
འཆད་པ་མེད་པར་བྱེད་པའོ། །ཆོས་རྒྱ་མཚོ་ཐམས་ཅད་ཀྱི་དམིགས་པ་སྣ་ཚོགས་དང་། ཤིན་ཏུ་བསྟན་པ་གཅིག་ནས་གཅིག་ཏུ་རྒྱུད་པ་སྣ་ཚོགས་དུ་མ་རྣམ་པ་ཐ་དད་པ་དང་། ཆོས་མཐའ་
ཡས་པ་གཅིག་ནས་གཅིག་ཏུ་རྒྱུད་པའི་རྒྱུན་མངོན་པར་འཚང་རྒྱ་བར་བྱེད་པའོ། །སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་བསམ་གྱིས་མི་ཁྱབ་པ་ཆོས་ཀྱི་དབྱིངས་ཀྱི་ཀླས་པ། ནམཁའི་དབྱིངས་

77-1-112a

ཀྱི་མཐས་གཏུགས་པ་ཡོངས་སུ་སྟོན་པའོ། །སེམས་ཅན་ཚད་མེད་པ་སྤྱོད་པ་རྒྱ་མཚོ་སྣ་ཚོགས་དང་ལྡན་པ་ཡོངས་སུ་སྨྱིན་པར་བྱ་བ་དང་། གདུལ་བས་ཡོངས་སུ་འདུལ་བ་རྣམས་ལ་ཆོས་ཀྱི་འཁོར་ལོ་
བསྐོར་བ་ཡོངས་སུ་བསྟན་པའོ། །སེམས་ཅན་གྱི་ཁམས་ཐམས་ཅད་སངས་རྒྱས་འབྱུང་བ་དང་མི་འབྲལ་བར་བྱིན་གྱིས་བརློབ་པའོ། །ཆོས་ཐམས་ཅད་ཀྱི་སྤྲིན་དབྱངས་ཀྱི་ཡན་ལག་རྒྱ་མཚོ་བརྗོད་དུ་མེད་པས་རྣམ་པར་
དག་པ་དམྱིགས་པ་ཐམས་ཅད་ལས་རབ་ཏུ་འབྱུང་བ་རྣམ་པར་དམྱིགས་པར་བྱེད་པའོ། །ཚད་མེད་པར་རྣམ་པར་སྤྱོད་པ་ལ་སྒྲིབ་པ་མེད་པར་རྟོགས་པས་ཁོང་དུ་ཆུད་པ་རྣམས་ཆོས་ཡིད་དུ་འོང་བའི་རྒྱན་ཐམས་ཅད་དང་ལྡན་
པའི་བྱང་ཆུབ་སེམས་དཔའི་དཀྱིལ་འཁོར་བསམ་པ་དང་། མོས་པ་གང་དང་ལྡན་པའི་ཚུལ་བཞིན་དུ་སེམས་ཅན་རྣམས་ལ་ཡོངས་སུ་སྟོན་པའོ། །སངས་རྒྱས་ཀྱི་ས་ཚད་མེད་པའི་རྗེས་སུ་སོང་བ་རྣམས་འཇིག་རྟེན་
ཐམས་ཅད་ཡོངས་སུ་བསྒྲུབ་པའི་དོན་དུ་ཆོས་ཀྱི་མཛོད་མཐའ་དང་དབུས་མེད་པ་རབ་ཏུ་སྟོན་པའོ། །དེ་ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གྱིས། དེའི་ཚེ་བྱང་ཆུབ་སེམས་
དཔའི་ཆོས་དོན་འདི་ཉིད་གསལ་བར་བརྗོད་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། ཚོང་དཔོན་གྱི་བུ་ནོར་བཟངས་ལ་ཚིགས་སུ་བཅད་དེ་སྨྲས་པ། ལྷག་པའི་བསམ་པ་དྲི་མེད་རྙོག་
པ་མེད་པ་ཡིས། །གང་རྣམས་རྒྱལ་བ་བལྟ་བས་ནམ་ཡང་མི་ངོམ་ཤིང་། །རྒྱལ་བ་ཀུན་གྱི་ཕྱི་མའི་མཐའ་ཡི་རྒྱན་སྤྲིན་ལ། །སྨོན་པའི་མཁས་པ་དེ་དག་སྐྱེ་བའི་ཐོག་མ་གནས། །དུས་གསུམ་བྱུང་བའི་འཇིག་རྟེན་མ་ལུས་
ཀུན་བཀང་སྟེ། །ཞིང་དང་སེམས་ཅན་དེ་བཞིན་ཆོས་དང་སངས་རྒྱས་རྣམས། །སེམས་ཅན་དགྲོལ་ཕྱིར་སྨོན་ལམ་འདེབས་པས་བརྒྱན་པའི་སེམས། །དེ་ནི་བསམ་གྱིས་མི་ཁྱབ་རྣམས་ཀྱི་སྐྱེ་བ་གཉིས། །གང་རྣམས་

77-1-112b

ཆོས་ཀྱི་སྤྲིན་འཐུང་ནམ་ཡང་མི་ངོམས་ཤིང་། །ངེས་པར་རྟོགས་པའི་ཡིད་ཀྱིས་དུས་གསུམ་ཆགས་མེད་ལུས། །མཁའ་དབྱིངས་དྲི་མེད་མཉམ་མེད་སེམས་ཀྱི་ལུས་ལྡན་པ། །མཚུངས་པ་མེད་པ་དེ་ནི་དེ་དག་སྐྱེ་བ་གསུམ། །
ལྷག་པའི་བསམ་པ་རི་རབ་རྡོ་རྗེ་མཚུངས་བསྟན་པས། །ཐམས་ཅད་མཁྱེན་ཚུལ་རྒྱ་མཚོར་རྣམ་པར་འཇུག་བྱེད་ཅིང་། །གང་རྣམས་སྙིང་རྗེ་ཆེན་པོའི་གངས་ཆེན་མཚོར་འཇུག་པ། །དེ་ནི་སྐྱེས་བུ་ཁྱུ་མཆོག་
རྣམས་ཀྱི་སྐྱེ་བ་བཞི། །གང་རྣམས་བྱམས་པས་ཕྱོགས་བཅུ་རྒྱས་པར་ཡོངས་བཀང་ཞིང་། །ཕ་རོལ་ཕྱིན་པ་དྲི་མེད་རྒྱ་མཚོ་མངོན་བསྒྲུབས་ཏེ། །ཆོས་ཀྱི་འོད་འགྱེད་འགྲོ་བ་ཡོངས་སུ་སྨྱིན་བྱེད་པ། །དེ་ནི་སྐྱེས་བུ་
ཆེན་པོ་དེ་དག་སྐྱེ་བ་ལྔ། །ཆོས་ཀྱི་རང་བཞིན་རབ་ཏུ་རྟོགས་པས་ཆགས་མེད་སེམས། །དུས་གསུམ་དཔེ་ཟླ་མེད་པའི་སངས་རྒྱས་རིགས་བྱུང་ཞིང་། །གང་རྣམས་ཆོས་དབྱིངས་རྒྱ་མཚོའི་ཚུལ་ལ་འཇུག་བྱེད་པ། །
འདི་ནི་མཁས་པ་རྣམས་ཀྱི་སྐྱེ་བ་ཡངས་པ་དྲུག །གང་རྣམས་ཆོས་ལུས་ཡོངས་དག་ཆགས་པ་མེད་པའི་སེམས། །ཞིང་རྣམས་མ་ལུས་རང་གི་ལུས་ཀྱིས་དབང་བྱས་ཤིང་། །སངས་རྒྱས་སྟོབས་རྣམས་མ་ལུས་ཁོང་དུ་ཆུད་
རྟོགས་པ། །དེ་ནི་མཁས་པ་རྣམས་ཀྱི་སྐྱེ་བ་བསམ་ཡས་བདུན། །གང་རྣམས་ཡེ་ཤེས་རྒྱ་མཚོའི་ཚུལ་ལ་དབང་ལྡན་ཞིང་། །ཐམས་ཅད་མཁྱེན་པའི་སྒོ་ཚུལ་རྣམ་པར་དཔྱོད་བྱེད་ལ། །ཏིང་འཛིན་ཀུན་ཚུལ་གངས་ཆེན་མཚོ་ལ་ཡོངས་
འཇུག་པ། །དེ་ན་དེ་བཞིན་ཉིད་རྟེན་རྣམས་ཀྱི་སྐྱེ་བ་བརྒྱད། །གང་རྣམས་ཞིང་ཀུན་འབྱམ་ཀླས་ཡོངས་སུ་སྤྱོད་བྱེད་ཅིང་། །སེམས་ཅན་ཐམས་ཅད་ཡོངསུ་སྨྱིན་བྱེད་འདུལ་ལ་རབ་བརྩོན་ལ། །སངས་རྒྱས་རྣམ་པར་འཕྲུལ་པའི་རྒྱན་
རྣམས་རྣམ་སྟོན་པ། །དེ་ནི་གྲགས་པ་ཆེན་པོ་རྣམས་ཀྱི་སྐྱེ་བ་དགུ། །གང་རྣམས་རྒྱལ་བའི་སྟོབས་རྣམས་ཇི་བཞིན་རབ་ཞུགས་ཏེ། །ཐམས་ཅད་མཁྱེན་པའི་ཤུགས་དྲག་ཡངས་པ་རྣམ་སྤེལ་ཅིང་། །གང་རྣམས་ཆོས་དབྱིངས་གཞི་

77-1-113a

ཚུལ་ཐ་དད་ཆགས་མེད་པ། །དེ་ནི་རྒྱལ་སྲས་རྣམས་ཀྱི་སྐྱེ་བ་བཅུ་ཡིན་ནོ། །རིགས་ཀྱི་བུ་སྐྱེ་བ་བཅུ་པོ་དེ་དག་གིས་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་རིགས་སུ་སྐྱེ་བོ། 
དེ་ལྟར་ན་འཇིག་རྟེན་ཐམས་ཅད་ལ་སྣང་བར་བྱེད་པ་ཡིན་ནོ། །རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་པར་དམིགས་པ་ཐམས་ཅད་དུ་བྱང་ཆུབ་སེམས་དཔའི་སྐྱེ་བས་རྣམ་
པར་འཕྲུལ་པ་ཡོངས་སུ་སྟོན་པའོ། །སྨྲས་པ་འཕགས་མ་བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་པར་དམིགས་པ་ཐམས་ཅད་དུ་བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་པ་ཡོངས་སུ་བསྟན་
པ་འདིའི་ཡུལ་ཇི་ལྟ་བུ་ཞིག་མཆིས་སྨྲས་པ་རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའ་ཐམས་ཅད་ཀྱི་སྐྱེ་བ་ཡོངས་སུ་ལྟ་ཞིང་ཉེ་བར་འགྲོ་བའི་སྨོན་ལམ་ཡོངསུ་འགྲུབ་པ་སྟེ། རིགས་ཀྱི་བུ་དེ་ལྟར་ཁོ་བོ་ནི་བཅོམ་ལྡན་འདས་རྣམ་
པར་སྣང་མཛད་ཀྱི་སྐྱེ་བ་རྒྱ་མཚོ་ཤིན་ཏུ་ཡངས་པ་ལ་འཇུག་ཅིང་ཁོང་དུ་ཆུད་པ་སྟེ། འདི་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་བྱང་ཆུབ་སེམས་དཔའི་སྐྱེ་བ་ཁོང་དུ་ཆུད་པར་བྱེད་ཅིང་། གླིང་
བཞི་པ་སྐལ་བ་དང་ལྡན་པའི་འཛམ་བུའི་གླིང་དེའི་ལུམ་བི་ནིའི་ནག་ཚལ་དུ་བྱང་ཆུབ་སེམས་དཔའ་འབྱུང་བ་ཡོངསུ་བལྟ་བའི་དོན་དུ་སྔོན་གྱི་སྨོན་ལམ་གྱི་སྐྱེས་ཏེ། ད་ལྟར་ཁོ་མོ་འདི་ན་བྱང་ཆུབ་སེམས་དཔའ་འབྱུང་
བའི་རྗེས་སུ་དྲན་པ་བསྒོས་ཤིང་རྣམ་པར་སྤྱོད་དོ། །ད་ལྟར་ཁོ་མོ་འདི་ནི་གནས་ཏེ། དེ་ཕན་ཆད་ལོ་བརྒྱ་ན་བཅོམ་ལྡན་འདས་དགའ་ལྡན་གྱི་ཕོ་བྲང་ནས་འཕོ་བར་འགྱུར་རོ་ཞེས་བྱ་བའི་ཚེ། ལུམ་བི་ནིའི་ནགས་ཚལ་འདིར་སྔོན་གྱི་བལྟས་བཅུ་
འབྱུང་བར་འགྱུར་ཏེ་བཅུ་གང་ཞེ་ན། འདི་ལྟར་ལུམ་བི་ནིའི་ནགས་ཚལ་འདི་ཐམས་ཅད་མཐོན་དམན་མེད་ལ། ངམ་འགྲོག་དང་གཡང་ས་མེད་ཅིང་མཉམ་པར་གནས་པར་གྱུར་པ་འདི་ནི་སྔོན་གྱི་ལྟས་དང་པོ་བྱུང་བའོ། །ཡང་ལུམ་བི་ནིའི་ནགས་ཚལ་འདི་ཐམས་ཅད་གསེག་

77-1-113b

མ་དང་། གྱོ་མོ་མེད་ལ་སྡོམ་དུམ་དང་ཚེར་མ་དང་བྲལ་ཏེ། སའི་གཞི་རྡོ་རྗེ་ལས་གྲུབ་པར་གྱུར་ནས། རིན་པོ་ཆེ་མང་པོས་ཡོངས་སུ་གང་བར་གནས་པར་གྱུར་པ་འདི་ནི་སྔོན་གྱི་ལྟས་གཉིས་པ་བྱུང་བའོ། །ཡང་ལུམ་བི་ནིའི་
ནགས་ཚལ་འདི་ཐམས་ཅད་རིན་པོ་ཆེ་ཐམས་ཅད་ཀྱི་ཤིང་དང་རྩ་དང་། ཏ་ལའི་ཕྲེང་བས་རྣམ་པར་འཁྲིགས་པས་ཡོངསུ་བརྒྱན་པར་ཀུན་ནས་གནས་པར་གྱུར་པ་འདི་ནི་སྔོན་གྱི་ལྟས་གསུམ་པ་བྱུང་བའོ། །ལུམ་བི་ནིའི་ནགས་ཚལ་འདི་
ཐམས་ཅད་ལྷ་རྫས་ལས་ཀྱང་འདས་པའི་སྤོས་ཀྱི་མྱུ་གུ་ཀུན་ནས་འཐོན་པ་དང་། ཕྱེ་མ་ཐམས་ཅད་ཀྱི་མཛོད་ཀུན་ནས་འཐོན་པ་དང་། རྒྱལ་མཚན་ཐམས་ཅད་གྱི་སྤྲིན་དང་ན་བུན་ཡོངས་སུ་བྱུང་བ་དང་། སྤོས་ཀྱི་རིན་པོ་ཆེའི་གཟུག་
ཀྱི་ཤིང་དྲུང་ཀུན་ནས་འཁོར་ཏེ། རྒྱན་ཡོངས་སུ་སྤྱངས་པར་ཀུན་ནས་གནས་པར་གྱུར་པ་འདི་ནི་སྔོན་གྱི་ལྟས་བཞི་པ་བྱུང་བའོ། །ཡང་ལུམ་བི་ནིའི་ནགས་ཚལ་འདི་ཐམས་ཅད་ལྷ་རྫས་ཀྱི་མེ་ཏོག་དང་། ཕྲེང་བ་དང་། 
ལྷབ་ལྷུབ་སྣ་ཚོགས་ཀྱིས་མཛོད་རྣམ་པ་ཐམས་ཅད་དུ་ཡོངས་སུ་རྒྱས་པ་དང་ལྡན་པར་ཀུན་ནས་གནས་པར་གྱུར་པ་འདི་ནི་སྔོན་གྱི་ལྟས་ལྔ་པ་བྱུང་བའོ། །ཡང་ལུམ་བི་ནིའི་ནགས་ཚལ་འདི་ཐམས་ཅད་ཀྱི་ཤིང་
ཐམས་ཅད་ལ་ནོར་བུ་རིན་པོ་ཆེ་དམ་པའི་མཛོད་མངོན་པར་གྲུབ་པར་གྱུར་པ་འདི་ནི་སྔོན་གྱི་ལྟས་དྲུག་པ་བྱུང་བའོ། །ཡང་ལུམ་བི་ནིའི་ནགས་ཚལ་འདི་ཐམས་ཅད་ཀྱི་པད་མོའི་ཚལ་
ཐམས་ཅད་དུ་ཆུ་ལས་སྐྱེས་པའི་མེ་ཏོག་ཐམས་ཅད་ཀྱང་ཁ་འབུས་ཏེ། སའི་གཞི་ལས་འཐོན་པས། ཆུ་ལས་མངོན་པར་འཕགས་པར་གནས་པ་འདི་ནི་སྔོན་གྱི་ལྟས་བདུན་པ་བྱུང་བའོ། །ཡང་
འཇིག་རྟེན་གྱི་ཁམས་འདི་ནི་འདོད་པ་ལ་སྤྱོད་པ་དང་། གཟུགས་ལ་སྤྱོད་པ་དང་། གཟུགས་ལ་སྤྱོད་པའི་ལྷའི་བུ་རྣམས་དང་། ཀླུ་དང་གནོད་སྦྱིན་དང་། དྲི་ཟ་དང་། ལྷ་མ་ཡིན་དང་ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། 

77-1-114a

འཇིག་རྟེན་གྱི་དབང་པོ་དང་། འགྲོ་བའི་དབང་པོ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་ལུམ་བི་ནིའི་ནགས་ཚལ་འདི་ན་ཐལ་མོ་སྦྱར་ཅིང་འཁོད་པར་གྱུར་ཏེ། འདི་ནི་སྔོན་གྱི་ལྟས་བརྒྱད་པ་བྱུང་བའོ། །
ཡང་འཛམ་བུའི་གླིང་གི་འཇིག་རྟེན་གྱི་ཁམས་འདིའི་ལྷའི་བུ་མོ་འམ། ཀླུའི་བུ་མོ་འམ། གནོད་སྦྱིན་དང་དྲི་ཟ་དང་། ལྷ་མ་ཡིན་དང་ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོའི་བུ་མོ་ཇི་སྙེད་ཅིག་
ཡོད་པ་དེ་དག་ཐམས་ཅད་ཀྱང་རབ་ཏུ་དགའ་བའི་ཡིད་གྱིས་མཆོད་པའི་རྣམ་པ་ཐམས་ཅད་ལག་ན་ཐོགས་ཤིང་བླག་ཤའི་ཡལ་ག་ལ་མངོན་ཏུ་བལྟས་ཏེ། འདུད་ཅིང་ཕྱག་འཚལ་བར་འཁོད་པར་གྱུར་པ་འདི་
ནི་སྔོན་གྱི་ལྟས་དགུ་པ་བྱུང་བའོ། །ཡང་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་སྐུ་ལྟེ་བའི་དཀྱིལ་འཁོར་དག་ནས་བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་པའི་སྒྲོན་མ་ཞེས་
བྱ་བའི་འོད་ཟེར་མང་པོ་འཐོན་ཏེ། ལུམ་བི་ནིའི་ནགས་ཚལ་འདི་ཐམས་ཅད་སྣང་བར་བྱས་ནས་གནས་པར་གྱུར་ཏེ། འོད་ཟེར་གྱི་སྒོའི་དཀྱིལ་འཁོར་དེ་དག་ཐམས་ཅད་ལ་འང་དེ་བཞིན་གཤེགས་པ་དེ་དག་
ཐམས་ཅད་ཀྱི་སྐྱེ་བས་རྣམ་པར་འཕྲུལ་བ་གཟུགས་བརྙན་དུ་གྱུར་པར་སྣང་བ་དང་། ཐོག་མ་བལྟམ་པའི་རྣམ་པར་འཕྲུལ་པ་དང་བཅས་པར་བྱང་ཆུབ་སེམས་དཔའི་ཡོན་ཏན་ཐམས་ཅད་ཀྱང་སངས་རྒྱས་
ཀྱི་གསུང་གི་དབྱངས་དང་ལྡན་པར་འོད་ཟེར་གྱི་སྒོའི་དཀྱིལ་འཁོར་དེ་དག་ལས་སྒྲར་འཐོན་ཅིང་གྲག་པར་གྱུར་པ་འདི་ནི་སྔོན་གྱི་ལྟས་བཅུ་པ་བྱུང་བའོ། །བྱང་ཆུབ་སེམས་དཔའི་སྐྱེ་བའི་དུས་ལ་བབ་པའི་
ཚེ། སྔོན་གྱི་ལྟས་བཅུ་པོ་དེ་དག་བྱུང་བར་གྱུར་ཏེ། དེ་བྱུང་བས་འཇིག་རྟེན་གྱི་དབང་པོ་ཐམས་ཅད་ཀྱིས་ཀྱང་བྱང་ཆུབ་སེམས་དཔའ་འབྱུང་བར་འགྱུར་རོ་ཞེས་བྱ་བར་ཤེས་སོ། །རིགས་ཀྱི་བུ་དེ་ལྟར་ཁོ་མོ་སྔོན་

77-1-114b

གྱི་ལྟས་བཅུ་པོ་དེ་དག་མཐོང་བས་ཀྱང་དགའ་བའི་ཤུགས་བསམ་གྱིས་མི་ཁྱབ་པ་རབ་ཏུ་ཐོབ་པོ། །རིགས་ཀྱི་བུ་གཞན་ཡང་ལྷ་མོ་སྒྱུ་མ་གྲོང་ཁྱེར་ཆེན་པོ་སེར་སྐྱའི་གནས་ནས་བྱུང་བའི་ཚེ། ལུམ་བི་ནིའི་
ནགས་ཚལ་འདིར་སྔོན་གྱི་ལྟས་སྣང་བ་ཆེན་པོ་བཅུ་བྱུང་བར་གྱུར་ཏེ། དེ་དག་བྱུང་བས་སེམས་ཅན་ཚད་མེད་པ་རྣམས་ཐམས་ཅད་མཁྱེན་པའི་ཆོས་ཀྱི་སྣང་བས་དགའ་བའི་ཤུགས་རྣམ་པར་འཕེལ་བར་གྱུར་
ཏོ། །བཅུ་གང་ཞེ་ན་འདི་ལྟ་སྟེ། སའི་སྟེང་ན་གནས་པའི་རིན་པོ་ཆེའི་ཁང་པ་བརྩེགས་པ་ཐམས་ཅད་དུ་སྣང་བ་རབ་ཏུ་བྱུང་ངོ་། །རིན་པོ་ཆེའི་པད་མོ་ཁ་མ་བྱེ་བ་ཁ་བྱེ་བར་གྱུར་པའི་འདབས་མ་ཐམས་ཅད་ལས་
སྣང་བ་རབ་ཏུ་བྱུང་སྟེ། བལྟམ་པ་ལེགས་པར་བལྟམ་མོ་ཞེས་བྱ་བའི་སྒྲ་སྙན་པ་ཡང་དེ་དག་ལས་བྱུང་བར་གྱུར་ཏོ། །ཕྱོགས་བཅུའི་བྱང་ཆུབ་སེམས་དཔའ་རྣམས་ཀྱིས་ཐོག་མ་སེམས་བསྐྱེད་པའི་སྣང་
བ་ཇི་སྙེད་ཅིག་ཡོད་པ་དེ་དག་ཀྱང་། ལུམ་བི་ནིའི་ནགས་ཚལ་འདིར་སྣང་བར་བྱས་ཏེ་མངོན་པར་ཤར་ཏོ། །ཕྱོགས་བཅུའི་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་ས་ཐམས་ཅད་ཡོངས་སུ་གནོན་
པའི་སྣང་བ་རྣམ་པར་འཕྲུལ་བ་ཇི་སྙེད་ཅིག་ཡོད་པ་དེ་དག་ཀྱང་ལུམ་བི་ནིའི་ནགས་ཚལ་འདིར་བྱུང་ངོ་། །ཕྱོགས་བཅུའི་བྱང་ཆུབ་སེམས་དཔའ་རྣམས་ཕ་རོལ་ཏུ་ཕྱིན་པ་ཐམས་ཅད་ཡོངས་སུ་བསྒྲུབ་ཅིང་། 
ཡེ་ཤེས་ཁོང་དུ་ཆུད་པའི་སྣང་བ་འོད་ཇི་སྙེད་ཅིག་ཡོད་པ་དེ་དག་ཀྱང་ལུམ་བི་ནིའི་ནགས་ཚལ་འདིར་བྱུང་བར་གྱུར་ཏོ། །ཕྱོགས་བཅུའི་བྱང་ཆུབ་སེམས་དཔའ་རྣམས་སྨོན་ལམ་ཐམས་ཅད་ལ་དབང་སྒྱུར་
བའི་ཡེ་ཤེས་སྣང་བའི་འོད་ཇི་སྙེད་ཅིག་ཡོད་པ་དེ་དག་ཀྱང་ལུམ་བི་ནིའི་ནགས་ཚལ་འདིར་བྱུང་བར་གྱུར་ཏོ། །ཕྱོགས་བཅུའི་བྱང་ཆུབ་སེམས་དཔའ་རྣམས་སྨོན་ལམ་རྒྱ་ཆེན་པོ་མངོན་པར་བསྒྲུབ་པའི་

77-1-115a

ཡེ་ཤེས་སྣང་བའི་འོད་ཇི་སྙེད་ཅིག་ཡོད་པ་དེ་དག་ཀྱང་ལུམ་བི་ནིའི་ནགས་ཚལ་འདིར་བྱུང་བར་གྱུར་ཏོ། །ཕྱོགས་བཅུའི་བྱང་ཆུབ་སེམས་དཔའ་རྣམས་སེམས་ཅན་ཡོངས་སུ་སྨིན་པར་བྱ་བ་དང་། གདུལ་བར་
བྱེད་པའི་ཡེ་ཤེས་སྣང་བའི་འོད་ཇི་སྙེད་ཅིག་ཡོད་པ་དེ་དག་ཀྱང་ལུམ་བི་ནིའི་ནགས་ཚལ་འདིར་བྱུང་བར་གྱུར་ཏོ། །ཕྱོགས་བཅུའི་བྱང་ཆུབ་སེམས་དཔའ་ཐམས་ཅད་ཀྱིས་ཆོས་ཀྱི་དབྱིངས་ཀྱི་ཚུལ་
གྱི་ཡེ་ཤེས་ཁོང་དུ་ཆུད་པའི་སྣང་བ་ཇི་སྙེད་ཅིག་ཡོད་པ་དེ་དག་ཀྱང་ལུམ་བི་ནིའི་ནགས་ཚལ་འདིར་བྱུང་བར་གྱུར་ཏོ། །ཕྱོགས་བཅུའི་བྱང་ཆུབ་སེམས་དཔའ་ཐམས་ཅད་སངས་རྒྱས་ཐམས་ཅད་ཀྱི་རྣམ་
པར་འཕྲུལ་བ་དང་། སྐྱེ་བ་དང་མངོན་པར་འབྱུང་བ་དང་། བྱང་ཆུབ་ཏུ་རྣམ་པར་འཚང་རྒྱ་བ་དང་། ཡེ་ཤེས་ཐུགས་སུ་ཆུད་པར་མཛད་པའི་སྣང་བའི་འོད་ཇི་སྙེད་ཅིག་ཡོད་པ་དེ་དག་ཀྱང་ལུམ་བི་ནིའི་ནགས་
ཚལ་འདིར་བྱུང་བར་གྱུར་ཏོ། །སྔོན་གྱི་ལྟས་སྣང་བ་ཆེན་པོ་བཅུ་པོ་དེ་དག་རབ་ཏུ་བྱུང་བར་གྱུར་ཏེ། དེ་དག་གིས་སེམས་ཅན་མཐའ་དང་དབུས་མེད་པའི་སེམས་དང་། བསམ་པའི་མུན་པ་ཐིབས་པོ་
ཐམས་ཅད་ཀྱང་རབ་ཏུ་སྣང་བར་བྱསོ། །རིགས་ཀྱི་བུ་དེ་ལ་ལྷ་མོ་སྒྱུ་མ་ཤིང་བླག་ཤའི་ནགས་སུ་ཕྱིན་པའི་ཚེ། འཇིག་རྟེན་གྱི་དབང་པོ་འདུས་པ་ཐམས་ཅད་དང་། འདོད་པའི་ཁམས་ཀྱི་ལྷའི་བུ་ལྷའི་མོའི་
ཚོགས་དང་། ལྷའི་བུ་མོ་འཁོར་དང་བཅས་ཏེ་འདུས་པ་ཐམས་ཅད་དང་། གཟུགས་ལ་སྤྱོད་པའི་ལྷའི་བུ་དྲི་ང་བ་མེད་པ་ཐམས་ཅད་དང་། ཀླུ་དང་གནོད་སྦྱིན་དང་། དྲི་ཟ་དང་ལྷ་མ་ཡིན་དང་། ནམ་མཁའ་
ལྡིང་དང་མི་འམ་ཅི་དང་། ལྟོ་འཕྱེ་ཆེན་པོ་འཁོར་དང་བཅས་ཏེ་ཚོགས་པ་བྱང་ཆུབ་སེམས་དཔའ་ལ་མཆོད་པར་བརྩོན་པ་ཐམས་ཅད་ཀྱི་ལུས་དང་། མཆོད་པའི་ཚོགས་ཐམས་ཅད་ཀྱང་ལྷ་མོ་སྒྱུ་མའི་

77-1-115b

གཟི་བརྗིད་དང་དཔལ་དང་ཁ་དོག་དང་གཟུགས་ཀྱིས་རབ་ཏུ་སྣང་བར་བྱས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་འོད་གང་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་ཟིལ་དུ་རླག་པར་
གྱུར་ཏེ་ཟིལ་གྱིས་མནོན་ཏོ། །ལྷ་མོ་སྒྱུ་མའི་བ་སྤུའི་སྒོ་ཐམས་ཅད་ནས་བྱུང་བའི་འོད་དང་སྣང་བ་དག་ནི་འོད་གཞན་གྱིས་ཉམས་པར་གྱུར་པ་མེད། བསྒྲིབས་པར་གྱུར་པ་མེད། ཆོད་པར་གྱུར་པ་མེད་ཐོགས་པར་
གྱུར་པ་མེད་དེ། དེས་ཕྱོགས་ཐམས་ཅད་རྒྱས་པར་བཀང་ནས་སེམས་ཅན་དམྱལ་བའི་སྡུག་བསྔལ་ཐམས་ཅད་དང་། བྱོལ་སོང་གི་སྐྱེ་གནས་གྱི་སྡུག་བསྔལ་ཐམས་ཅད་དང་། གཤིན་རྗེའི་འཇིག་
རྟེན་གྱི་སྡུག་བསྔལ་ཐམས་ཅད་དང་། སྲིད་པའི་ལམ་གྱི་རྒྱུད་དུ་གཏོགས་པའི་སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་དང་། ཉོན་མོངས་པ་ཐམས་ཅད་རབ་ཏུ་ཞི་བར་བྱས་ཏེ། ལྷག་
གེ་ལྷམ་མེ་ལྷང་ངེར་གནས་པར་གྱུར་ཏོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ། ལུམ་བི་ནིའི་ནགས་ཚལ་དུ་བྱུང་བ་དང་པོའོ། །རིགས་ཀྱི་བུ་གཞན་ཡང་གང་གི་ཚེ་
ལྷ་མོ་སྒྱུ་མའི་ལུས་སུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཚུད་ཅིང་གཟུགས་བརྙན་འབྱུང་བ་སྣང་བར་གྱུར་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་གླིང་
བཞི་པའི་འཇིག་རྟེན་གྱི་ཁམས་བྱེ་བ་ཕྲག་བརྒྱའི་འཛམ་བུའི་གླིང་ཐམས་ཅད་ཀྱི་རྒྱལ་པོའི་གནས་མིང་སྣ་ཚོགས་དང་ལྡན་པ་ཤ་སྟག་དང་། ནགས་ཚལ་གྱི་མིང་སྣ་ཚོགས་དང་ལྡན་པ་ཤ་སྟག་
དང་། ཤིང་དྲུང་རྣམ་པ་ཐ་དད་པ་དག་དུ་འང་ལྷ་མོ་སྒྱུ་མ་ཕྱིན་ཅིང་། འཇིག་རྟེན་གྱི་དབང་པོ་ཐམས་ཅད་ཀྱིས་ཡོངས་སུ་བསྐོར་ཏེ། བྱང་ཆུབ་སེམས་དཔའི་སྐྱེ་བ་ལ་སྟ་གོན་དུ་སྡོད་ཅིང་། 

77-1-116a

བྱང་ཆུབ་སེམས་དཔའ་ཡུམ་གྱི་ཡེ་ཤེས་ཀྱི་རྣམ་པར་འཕྲུལ་པ་བསམ་གྱིས་མི་ཁྱབ་པས་རྣམ་པ་འདི་བཞིན་དུ་སྣང་བར་གྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ལུམ་བི་
ནིའི་ནགས་ཚལ་དུ་བྱུང་བ་གཉིས་པའོ། །རིགས་ཀྱི་བུ་གཞན་ཡང་ལྷ་མོ་སྒྱུ་མའི་བ་སྤུའི་བུ་ག་ཐམས་ཅད་ཀྱི་བ་སྤུའི་སྒོ་རེ་རེ་ལ་ཡང་སྔོན་གྱི་བྱང་ཆུབ་སེམས་དཔའི་སྤྱོད་པ་མངའ་བའི་ཚེ། བཅོམ་ལྡན་འདས་ཀྱི་དེ་
བཞིན་གཤེགས་པ་ཇི་སྙེད་ཅིག་བསྙེན་བཀུར་ཏེ། རིམ་གྲོར་མཛད་པ་དང་། སྟི་སྟང་དང་བཀུར་སྟིར་མཛད་དེ་མཆོད་པ་དེ་དག་ཐམས་ཅད་ཀྱང་ཡོངས་སུ་སྣང་བར་གྱུར་ཏོ། །དེ་བཞིན་གཤེགས་པ་དེ་དག་གི་ཆོས་ཇི་སྙེད་
ཅིག་བསྟན་པ་དེ་དག་ཐམས་ཅད་ཀྱང་བ་སྤུའི་བུ་ག་དེ་དག་ནས་སངས་རྒྱས་ཀྱི་གསུང་གི་ཡན་ལག་དང་ལྡན་པར་མ་ལུས་པར་གྲགས་པར་གྱུར་ཏེ། དཔེར་ན་ཆུའི་ཕུང་པོའི་ནང་དུ་རྡུལ་ཆུང་ངུ་འམ་གསེར་གྱི་རྡུལ་ཕྲ་མོ་འམ། 
མེ་ལོང་གི་དཀྱིལ་འཁོར་ཤིན་ཏུ་གསལ་བ་འམ། ཆུ་ཤིན་དུ་དང་བ་ལ་ནམ་མཁའི་དཀྱིལ་འཁོར་ཉི་ཟླ་དང་། གཟའ་སྐར་གྱི་ཚོགས་ཀྱིས་རབ་ཏུ་བརྒྱན་པ་དང་། སྤྲིན་གྱི་ཚོགས་འབྲུག་སྒྲ་ཟབ་མོ་འབྱིན་པ་ཅན་ཡང་
གཟུགས་རྙན་དུ་གྱུར་པར་སྣང་ངོ་། །རིགས་ཀྱི་བུ་དེ་བཞིན་དུ་ལྷ་མོ་སྒྱུ་མའི་བ་སྤུའི་སྒོའི་དཀྱིལ་འཁོར་ཐམས་ཅད་ལ་འང་། སྔོན་གྱི་དེ་བཞིན་གཤེགས་པའི་རྣམ་པར་འཕྲུལ་པ་རྣམས་ཀྱང་ཡོངས་སུ་སྣང་། ཆོས་
བསྟན་པའི་སྒྲ་ཐམས་ཅད་ཀྱང་གྲག་པར་གྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ལུམ་བི་ནིའི་ནགས་ཚལ་དུ་བྱུང་བ་གསུམ་པའོ། །རིགས་ཀྱི་བུ་གཞན་ཡང་ལྷ་མོ་
སྒྱུ་མའི་ལུས་ཐམས་ཅད་དང་བ་སྤུའི་སྒོའི་དཀྱིལ་འཁོར་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་ཞིང་ཇི་སྙེད་ཅིག་དང་། འཇིག་རྟེན་གྱི་ཁམས་རྒྱ་མཚོ་ཇི་སྙེད་ཅིག་དང་། འཇིག་རྟེན་གྱི་ཁམས་འབྱམ་ཀླས་

77-1-116b

པ་ཇི་སྙེད་ཅིག་དང་། འཇིག་རྟེན་གྱི་ཁམས་གྱི་རྒྱུད་ཇི་སྙེད་ཅིག་དང་། འཇིག་རྟེན་གྱི་མྱིང་དུ་བྱ་བ་ཇི་སྙེད་ཅིག་ཏུ་བཅོམ་ལྡན་འདས་ཀྱིས་སྔོན་བྱང་ཆུབ་སེམས་དཔའི་སྤྱོད་པ་མཛད་དེ། ཞིང་གི་གཞི་ཇི་ལྟ་བུ་ཞིག་
དང་ལྡན་པར་གྱུར་པ་དང་། དབྱིབས་ནི་ཅི་འདྲ་བ་དང་། རྒྱན་ནི་ཇི་ལྟ་བུ་ཞིག་དང་ལྡན་པར་གྱུར་པ་དང་། ལྷུན་ནི་ཇི་ལྟ་བུ་ཞིག་དང་ལྡན་པར་གྱུར་པ་དང་། རིའི་རྒྱན་ནི་ཇི་ལྟ་བུ་དག་ཅིག་ཡོད་པར་གྱུར་པ་དང་། གྲོང་དང་། 
གྲོང་ཁྱེར་དང་། ཡུལ་དང་ལྗོངས་དང་གྲོང་རྡལ་གྱི་རྒྱན་ནི་ཇི་ལྟ་བུ་དག་ཅིག་གནས་པ་དང་། བཟའ་ཤིང་གི་ར་བ་དང་། མཚོ་དང་ལུ་མ་དང་རྒྱ་མཚོའི་རྒྱན་ནི་ཇི་ལྟ་བུ་ཞིག་དང་ལྡན་པར་གྱུར་པ་དང་། ནམ་མཁའ་དང་སྤྲིན་གྱི་
རྒྱན་ནི་ཇི་ལྟ་བུ་ཞིག་དང་ལྡན་པར་གྱུར་པ་དང་། སེམས་ཅན་གྱི་གནས་ནི་ཇི་ལྟ་བུ་ཞིག་ཡོད་པར་གྱུར་པ་དང་། ཐེག་པ་བསྟན་པ་ནི་གང་དང་ཡང་ལྡན་པར་གྱུར་པ་དང་། བསྐལ་པའི་མྱིང་དང་གྲངས་ཇི་སྙེད་ཅིག་ཅེས་
བྱ་བར་གྱུར་པ་དང་། སངས་རྒྱས་སྐྱེ་བ་ནི་ཇི་སྙེད་ཅིག་བྱུང་བར་གྱུར་པ་དང་། རྣམ་པར་དག་པ་ནི་གང་དུ་འདུ་བར་གྱུར་པ་དང་། སེམས་ཅན་གྱི་ཚེའི་ཚད་ནི་ཇི་ཙམ་ཞིག་དང་ལྡན་པར་གྱུར་པ་དང་། འཇིག་རྟེན་
གྱི་སྐྱེ་གནས་ནི་གང་དུ་སྐྱེས་པར་གྱུར་པ་དང་། སེམས་ཅན་ཇི་ལྟ་བུ་ཞིག་དང་འགྲོགས་འགྲོགས་པ་དང་། དགེ་བའི་བཤེས་གཉེན་ནི་ཇི་ལྟ་བུ་ཞིག་ལ་བརྟེན་བརྟེན་པ་དང་། དགེ་བའི་ཆོས་ནི་ཇི་ལྟ་བུ་ཞིག་ལ་
བརྩོན་པར་སྤྱོད་སྤྱོད་པ་དང་། ཆོས་ཀྱི་ནན་ཏན་ནི་ཇི་ལྟ་བུ་ཞིག་ལ་བརྩོན་པར་བྱས་ཏེ། བྱང་ཆུབ་སེམས་དཔའི་སྤྱོད་པ་སྤྱོད་སྤྱོད་པའི་སངས་རྒྱས་ཀྱི་ཞིང་དེ་དག་ཐམས་ཅད་ཀྱང་ཡོངས་སུ་སྣང་བར་གྱུར། 
བཅོམ་ལྡན་འདས་ཀྱིས་ཕྱིར་མི་ལྡོག་པའི་གནས་བརྙེས་ནས། སྔོན་སྐུ་ནི་ཇི་སྙེད་ཅིག་རྣམ་པར་སྤྱོད་པ་ཇི་ལྟ་བུ་ཞིག །ཆ་བྱད་ནི་ཇི་ལྟ་བུ་ཞིག །ལོངས་སྤྱོད་པ་ནི་ཅི་དང་ལྡན། བདེ་བ་དང་སྡུག་བསྔལ་ནི་

77-1-117a

ཇི་ལྟ་བུ་ཞིག་སྐུ་ཉམས་སུ་བཞེས། སྐུ་ཚེའི་རྒྱུད་ནི་ཇི་ལྟ་བུ་ཞིག་དང་ལྡན་པར་གྱུར་ཏེ། སྔོན་བྱང་ཆུབ་སེམས་དཔའི་སྤྱོད་པ་སྤྱད་པར་གྱུར་པ་དེ་དག་ཐམས་ཅད་ཀྱང་བ་སྤུའི་སྒོ་ཐམས་ཅད་ནས་ཡོངས་
སུ་སྣང་བར་གྱུར་ཏོ། །སངས་རྒྱས་ཀྱི་ཞིང་དེ་དག་ཐམས་ཅད་ཀྱི་སྐྱེ་གནས་དེ་དང་། དེ་དག་ཏུ་ལྷ་མོ་སྒྱུ་མ་བྱང་ཆུབ་སེམས་དཔའི་ཡུམ་དུ་གྱུར་པ་དང་། བྱང་ཆུབ་སེམས་དཔའི་སྐུ་དེ་དག་ཐམས་ཅད་ཀྱང་། 
ལྷ་མོ་སྒྱུ་མའི་བ་སྤུའི་སྒོ་ཐམས་ཅད་དུ་རྣམ་པར་འཕྲུལ་པའི་གཟུགས་བརྙན་བྱུང་བར་གྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ། ལུམ་བི་ནིའི་ནགས་ཚལ་
དུ་བྱུང་བ་བཞི་པའོ། །རིགས་ཀྱི་བུ་གཞན་ཡང་བཅོམ་ལྡན་འདས་ཀྱི་སྔོན་སྐུ་ནི་ཇི་སྙེད་ཅིག་གིས་བྱང་ཆུབ་སེམས་དཔའི་སྤྱོད་པ་སྤྱད་པ་དང་། ཁ་དོག་ནི་ཇི་ལྟ་བུ་ཞིག་དབྱིབས་ནི་ཅི་འདྲ་བ་ཞིག །
ཆ་བྱད་ནི་ཇི་ལྟ་བུ་ཞིག །ང་རོ་ནི་ཇི་ལྟ་བུ་ཞིག །ལོངས་སྤྱོད་ནི་ཅི་དང་ལྡན། བདེ་བ་དང་སྡུག་བསྔལ་ནི་ཇི་ལྟ་བུ་ཞིག་སྐུ་ཉམས་སུ་བཞེས། སྐུ་ཚེའི་རྒྱུད་ནི་ཇི་ལྟ་བུ་ཞིག་དང་ལྡན་པར་གྱུར་པ་དེ་དག་
ཐམས་ཅད་ཀྱང་ལྷ་མོ་སྒྱུ་མའི་ལུས་ཀྱི་བ་སྤུའི་སྒོ་ཐམས་ཅད་ལས་གཟུགས་རྙན་དུ་སྣང་བར་གྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བ་རྣམ་པར་འཕྲུལ་པ་ལུམ་བི་ནིའི་ནགས་ཚལ་
དུ་བྱུང་བ་ལྔ་པའོ། །རིགས་ཀྱི་བུ་གཞན་ཡང་བཅོམ་ལྡན་འདས་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ། གཏང་བར་དཀའ་བ་ཡོངས་སུ་བཏང་བ་འམ། ཞབས་དང་ཕྱག་ཡོངས་སུ་བཏང་བ་
འམ། སྙན་དང་ཤངས་ཡོངས་སུ་བཏང་བ་འམ། ལྗགས་དང་ཚེམས་ཡོངས་སུ་བཏང་བ་འམ། སྤྱན་དང་དབུ་ཡོངས་སུ་བཏང་བ་འམ། ཤ་དང་ཁྲག་ཡོངས་སུ་བཏང་བ་འམ། རུས་པ་དང་རྐང་ཡོངས་སུ་

77-1-117b

བཏང་བ་འམ། མཁལ་མ་དང་ཐུགས་ཡོངས་སུ་བཏང་བ་འམ། པགས་པ་དང་ཕྲི་ཡོངས་སུ་བཏང་བ་འམ། ཕྱི་ནང་གི་དངོས་པོ་ཡོངས་སུ་བཏང་བ་འམ། སྲས་པོ་དང་སྲས་མོ་ཡོངསུ་བཏང་བ་འམ། 
སྐུ་ཡོངས་སུ་བཏང་བ་འམ། ལོངས་སྤྱོད་རིན་པོ་ཆེ་ཡོངས་སུ་བཏང་བ་འམ། གྲོང་དང་གྲོང་ཁྱེར་དང་ལྗོངས་དང་། ཡུལ་དང་ཁམས་དང་། རྒྱལ་པོའི་གནས་ཡོངས་སུ་བཏང་བ་འམ། ནོར་དང་འབྲུ་
དང་མཛོད་དང་བང་བ་ཡོངས་སུ་བཏང་བ་འམ། ནོར་བུ་དང་མུ་ཏིག་དང་། བཻ་ཌཱུརྱ་དང་དུང་དང་། མན་ཤེལ་དང་བྱི་རུ་དང་གསེར་དང་དངུལ་ཡོངས་སུ་བཏང་བ་འམ། རིན་པོ་ཆེའི་རྒྱན་སྣ་ཚོགས་ཡོངས་སུ་བཏང་
བ་འམ། མལ་ཆ་ཡོངས་སུ་བཏང་བ་འམ། ཁང་པ་དང་གཞལ་མེད་ཁང་ཡོངས་སུ་བཏང་བ་འམ། ཡོ་བྱད་ཡོངས་སུ་བཏང་བ་འམ། དེ་ལྟར་གཏོང་བའི་བྱང་ཆུབ་སེམས་དཔའི་སྐུ་གཟུགས་དང་། 
རྣམ་པ་ཇི་ལྟ་བུར་ཡོངས་སུ་བཏང་བར་གྱུར་པ་དང་། ལེན་པ་དེ་དག་ཀྱང་རྣམ་པ་ཇི་ལྟ་བུས་ལེན་པར་གྱུར་པ་དང་། སྦྱིན་པའི་དངོས་པོ་རྣམ་པ་ཇི་ལྟ་བུ་དག་ཡོངས་སུ་བཏང་བར་གྱུར་པ་དང་། ཡུལ་གྱི་
ཕྱོགས་གང་དག་ཏུ་ཡོངས་སུ་བཏང་བར་གྱུར་པ་དང་། དེའི་ཚེ་བྱང་ཆུབ་སེམས་དཔའི་འཁོར་དུ་གྱུར་པ་དེ་དག་ཐམས་ཅད་ཀྱང་། ལྷ་མོ་སྒྱུ་མའི་བ་སྤུའི་སྒོ་ཐམས་ཅད་ལས་གཟུགས་བརྙན་དུ་སྣང་བར་གྱུར་ཏོ། །
སློངས་མོ་བའི་སྒྲ་དེ་དག་ཀྱང་གྲག་པར་གྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ལུམ་བི་ནིའི་ནགས་ཚལ་དུ་བྱུང་བ་དྲུག་པའོ། །རིགས་ཀྱི་བུ་གཞན་ཡང་སྔོན་གྱི་
མཐའི་རྒྱུད་དུ་བྱུང་བའི་དེ་བཞིན་གཤེགས་པ་རྣམས་ཡུམ་གྱི་སྐུ་ནས་བལྟམས་པར་གྱུར་པའི་ཚེ། སངས་རྒྱས་ཀྱི་ཞིང་གི་རྒྱན་དང་། ལྷབ་ལྷུབ་ཇི་སྙེད་ཅིག་བྱུང་བར་གྱུར་པ་དང་། སེམས་ཅན་གྱི་རྒྱན་

77-1-118a

རྣམ་པར་ཕྱེ་བ་དང་། བཟའ་ཤིང་གི་རྒྱན་རྣམ་པར་ཕྱེ་བ་དང་། མེ་ཏོག་དང་བདུག་པ་དང་། སྤོས་དང་ཕྲེང་བ་དང་བྱུག་པ་དང་ཕྱེ་མ་དང་། ན་བཟའ་དང་གདུགས་དང་རྒྱལ་མཚན་དང་། བ་དན་གྱི་རྒྱན་རྣམ་
པར་ཕྱེ་བ་དང་། རིན་པོ་ཆེའི་རྒྱལ་པོ་ཐམས་ཅད་འཕྲུལ་པའི་རྒྱན་རྣམ་པར་ཕྱེ་བ་དང་། རོལ་མོ་དང་གླུ་དང་། བསྟོད་པ་དང་སིལ་སྙན་གྱི་སྒྲ་ཇི་སྙེད་ཅིག་བྱུང་བར་གྱུར་པ་དེ་དག་ཐམས་ཅད་ཀྱང་། ལྷ་མོ་སྒྱུ་མ་ལུམ་བི་
ནིའི་ནགས་ཚལ་དུ་ཕྱིན་པའི་ཚེ། ལུམ་བི་ནིའི་ནགས་ཚལ་འདིར་ཡོངས་སུ་བྱུང་བར་གྱུར་ཏོ། །མངོན་པར་སྐྱེས་སོ། །འགྲོ་བས་རྣམ་པར་དམྱིགས་སུ་ཡོད་པར་བྱུང་བར་གྱུར་ཏེ། རིགས་ཀྱི་བུ་འདི་ནི་བྱང་ཆུབ་
སེམས་དཔའ་སྐྱེ་བའི་རྣམ་པར་འཕྲུལ་པ་ལུམ་བི་ནིའི་ནགས་ཚལ་དུ་བྱུང་བ་བདུན་པའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་ལོངས་སྤྱོད་ལྷའི་དབང་པོ་ཐམས་ཅད་ཀྱི་གནས་ཀྱི་རྒྱན་གྱི་ལོངས་
སྤྱོད་ལས་ཡོངས་སུ་འདས་པ་དང་། ཀླུ་དང་གནོད་སྦྱིན་དང་། དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་། མི་འམ་ཅི་དང་ལྟོ་འཕྱེ་ཆེན་པོ་དང་། མིའི་དབང་པོ་ཐམས་ཅད་ཀྱི་གནས་ཀྱི་རྒྱན་གྱི་ལོངས་སྤྱོད་ལས་
འདས་པ་འདི་ལྟ་སྟེ། རིན་པོ་ཆེའི་རྒྱལ་པོ་ཐམས་ཅད་ཀྱི་ཁང་པ་བརྩེགས་པའི་ལོངས་སྤྱོད་དམ། རིན་པོ་ཆེའི་རྒྱལ་པོའི་གཞལ་མེད་ཁང་གི་ལོངས་སྤྱོད་དམ། རིན་པོ་ཆེའི་རྒྱལ་པོའི་འབྲུའི་ལོངས་སྤྱོད་
དམ། རིན་པོ་ཆེའི་རྒྱལ་པོའི་གཟུགས་ཀྱི་ལོངས་སྤྱོད་དམ། རིན་པོ་ཆེའི་རྒྱན་ཐམས་ཅད་ཀྱི་ལོངས་སྤྱོད་དམ། སྤོས་ཀྱི་རྒྱལ་པོ་ཐམས་ཅད་ཀྱི་ལོངས་སྤྱོད་དམ། དམྱིགས་པ་ཐམས་ཅད་བཟང་ཞིང་འཐུན་པའི་
ལོངས་སྤྱོད་ཀྱང་རུང་སྟེ། དེ་དག་ཐམས་ཅད་ལྷ་མོ་སྒྱུ་མའི་རུམ་ནས་མ་འདྲེས་པར་ཐོན་ཏེ། ལུམ་བི་ནིའི་ནགས་ཚལ་འདི་ཡོངས་སུ་བརྒྱན་ཅིང་ཀུན་ནས་གནས་པར་གྱུར་ཏེ། རིགས་ཀྱི་བུ་འདི་ནི་བྱང་ཆུབ་

77-1-118b

སེམས་དཔའ་སྐྱེ་བ་རྣམ་པར་འཕྲུལ་པ་ལུམ་བི་ནིའི་ནགས་ཚལ་དུ་བྱུང་བ་བརྒྱད་པའོ། །རིགས་ཀྱི་བུ་གཞན་ཡང་ལྷ་མོ་སྒྱུ་མའི་ལུས་ལས་བྱང་ཆུབ་སེམས་དཔའ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་
ཁྲག་ཁྲིག་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད། བཅོམ་ལྡན་འདས་རྣམ་པར་སྣང་མཛད་སྐུ་གཟུགས་དང་སྐུ་མདོག་དང་། དབྱིབས་འདྲ་བ་མཚན་དང་དཔེ་བྱད་བཟང་པོའི་རྒྱན་གྱི་མངོན་པར་བརྒྱན་པ་
དང་། འོད་འདྲ་བ་དང་། འོད་ཟེར་འདྲ་བ་རབ་ཏུ་འགྱེད་པ། ཚུལ་དང་འགྲོས་སྟབས་འདྲ་བ། རྩལ་དང་མཐུ་འདྲ་བ་རྣམ་པར་སྣང་བའི་རྣམ་པར་འཕྲུལ་བ་དང་འཐུན་པ། འཁོར་འདྲ་བ་རྒྱན་མཚུངས་པ་མང་པོ་
ཡང་བཅོམ་ལྡན་འདས་རྣམ་པར་སྣང་མཛད་ཀྱི་ལེགས་པ་རྒྱ་མཚོ་ཡོངས་སུ་བརྗོད་ཅིང་འཐུན་པར་གྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ལུམ་བི་ནིའི་ནགས་
ཚལ་དུ་བྱུང་བ་དགུ་པའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་བལྟམས་པར་གྱུར་པའི་དུས་ལ་བབ་པ་དང་། ལྷ་མོ་སྒྱུ་མའི་མདུན་དུ་འོག་གི་རྡོ་རྗེའི་གཞི་ལས་ས་ཆེན་པོ་མངོན་པར་བརྟོལ་ཏེ། 
རིན་པོ་ཆེའི་རྒྱལ་པོ་པད་མོ་ཆེན་པོ་རིན་པོ་ཆེ་ཐམས་ཅད་ཀྱི་རྒྱན་གྱི་དམ་པ་ཞེས་བྱ་བ་ཆུ་བ་རིན་པོ་ཆེའི་རྒྱལ་པོ་གཞན་གྱིས་མི་ཐུབ་པའི་རྡོ་རྗེ་ཆེན་པོ་ལས་གྲུབ་པ། རིན་པོ་ཆེའི་རྒྱལ་པོ་འགྲོ་བ་རྒྱ་མཚོའི་
ནང་རིམ་དང་ལྡན་པ། ཟེ་བའི་རྩེ་མོ་རིན་པོ་ཆེའི་རྒྱལ་པོ་ཐམས་ཅད་ཀྱིས་རྒྱན་པ། འདབ་མའི་ཕྲེང་བ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བརྒྱན་ཅིང་ཤིན་ཏུ་རྣམ་པར་ཕྱེ་བ། ལོ་མའི་དཀྱིལ་
འཁོར་རིན་པོ་ཆེའི་རྒྱལ་པོ་སྣ་ཚོགས་ཀྱིས་བྱས་པ། སྙིང་པོ་མཛེས་པ་རིན་པོ་ཆེ་ཡིད་བཞིན་གྱིས་རྣམ་པར་དག་པ་དང་ལྡན་པ། ཟེ་བའི་ཕྲེང་བ་རྣམ་པར་ཕྱེ་བ་དང་། རིན་པོ་ཆེ་ཐམས་ཅད་ཀྱི་ཁ་དོག་ཚད་

77-1-119a

མེད་པ་དང་ལྡན་པ། རིན་པོ་ཆེའི་རྒྱལ་པོ་གྲངས་མེད་པའི་དྲ་བ་རྒྱན་དང་ལྡན་པས་ཡོངས་སུ་གཡོགས་པ་རིན་པོ་ཆེའི་རྒྱལ་པོ་རྡོ་རྗེ་མཐུ་བོ་ཆེས་མི་ཤིགས་པས་ལྷུན་ཀུན་ནས་བཀབ་པ། ལྷའི་
རིས་ཐམས་ཅད་ཀྱི་ཀུན་ནས་བསྐོར་བ། ཀླུའི་དབང་པོ་ཐམས་ཅད་ཀྱི་སྤོས་ཀྱི་ཆུའི་སྤྲིན་གྱི་ཆར་མངོན་པར་འབབ་པ། གནོད་སྦྱིན་གྱི་དབང་པོ་ཐམས་ཅད་ཀྱིས་ཀུན་ནས་བསྐོར་ཅིང་ལྷ་རྫས་ཀྱི་མེ་ཏོག་སྙིམ་
པ་ནས་གཏོར་བ། དྲི་ཟའི་དབང་པོ་ཐམས་ཅད་ཀྱི་སྔོན་གྱི་སངས་རྒྱས་ལ་རིམ་གྲོར་བྱས་པའི་གླུའི་དབྱངས་སྙན་ཅིང་ཡིད་དུ་འོང་བའི་ང་རོ་དང་སྦྱར་ཏེ་བསྟོད་པའི་སྤྲིན་གྱིས་མངོན་པར་བསྟོད་པ། ལྷ་མ་ཡིན་
གྱི་དབང་པོ་ཐམས་ཅད་ཀྱི་ང་རྒྱལ་དང་རློམ་པ་དང་དྲེགས་པ་ཐམས་ཅད་བཏང་ཞིང་ཤིན་ཏུ་བཏུད་དེ་ཕྱག་བྱ་བ། ནམ་མཁའ་ལྡིང་གི་དབང་པོ་ཐམས་ཅད་ཀྱི་རིན་པོ་ཆེའི་སྣམ་བུ་ཀུན་ཏུ་སྤྱངས་ཏེ། ནམ་མཁའ་
ཀུན་ནས་བརྒྱན་པར་བྱ་བ། མི་འམ་ཅིའི་དབང་པོ་ཐམས་ཅད་གྱི་བྱང་ཆུབ་སེམས་དཔའི་ཡོན་ཏན་ཡོངས་སུ་བརྗོད་ཅིང་རོལ་མོ་དང་གླུའི་དབྱངས་ལ་བརྩོན་པ་དང་། ཉམས་རབ་ཏུ་བདེ་བས་ཀུན་ནས་བལྟ་
བ། ལྟོ་འཕྱེ་ཆེན་པོའི་དབང་པོ་ཐམས་ཅད་ཀྱིས་ཤིན་ཏུ་དགའ་བ་དང་། མོས་པ་སྐྱེས་པས་ཡོངས་སུ་བལྟ་ཞིང་སྒྲ་སྙན་པ་ཕྱུང་སྟེ། རྒྱན་གྱི་སྤྲིན་ཐམས་ཅད་ཀྱི་ཆར་མངོན་པར་དབབ་པ་བྱུང་བར་གྱུར་
ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་བ་ལུམ་བི་ནིའི་ནགས་ཚལ་དུ་བྱུང་བ་བཅུ་པའོ། །རིགས་ཀྱི་བུ་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་བཅུ་པོ་དེ་དག་
ལུམ་བི་ནིའི་ནགས་ཚལ་དུ་བྱུང་བར་གྱུར་ནས་དེའི་རྗེས་ལ་བྱང་ཆུབ་སེམས་དཔའ་འོད་ཚད་མེད་བསམ་གྱིས་མི་ཁྱབ་པ་མངའ་བ། བལྟ་ན་གཏང་མྱི་བྲ་བ་ཞིག་ལྷ་མོ་སྒྱུ་མའི་རུམ་ནས་བལྟམས་སྟེ། 

77-1-119b

ནམ་མཁའི་དབྱིངས་ནུབ་ནས་ཉི་མའི་དཀྱིལ་འཁོར་ཤར་བ་ལྟར། སྤྲིན་གྱི་ཚོགས་རུམ་ནས་གློག་གི་ཕྲེང་བ་འགྱུ་བ་ལྟར། རི་ཆེན་པོའི་སྤོ་རུམ་ནས་ཉི་མ་ཤར་ཀའི་སྤྲིན་ཀོ་ལྟ། མུན་པ་སྟུག་པོའི་རུམ་ནས་
སྒྲོན་མ་ཆེན་པོ་བྱུང་བ་ལྟ་སྟེ་མངོན་པར་བལྟམས་པར་གྱུར་ཏོ། །དེ་ལྟར་བྱང་ཆུབ་སེམས་དཔའ་ལྷ་མོ་སྒྱུ་མའི་ལུས་ལས་གཟུགས་བརྙན་ལྟར་བསྟན་པའི་ཆོས་ཉིད་དང་། རྨི་ལམ་ལྟར་བསྟན་པའི་
ཆོས་ཉིད་དང་། སྒྱུ་མའི་རྣམ་པའི་གཟུགས་རྣམ་པར་དམྱིགས་པ་ལྟར་བསྟན་པའི་ཆོས་ཉིད་དང་། འགྲོ་བ་དང་འོང་བ་མེད་པའི་ཆོས་ཉིད་དང་། སྐྱེ་བ་མེད་པ་དང་འགག་པ་མེད་པའི་འོད་རྣམ་པར་
དམྱིགས་པ་ཡོངས་སུ་བསྟན་པའི་ཆོས་ཉིད་ཀྱི་མངོན་པར་འབྱུང་བ་ཡོངས་སུ་བསྟན་ཏོ། །རིགས་ཀྱི་བུ་དེ་ལྟར་ཁོ་མོ་ཅག་ནི་ལུམ་བི་ནིའི་ནགས་ཚལ་འདི་ན་གནས་ཤིང་བཅོམ་ལྡན་འདས་རྣམ་པར་སྣང་
མཛད་ཀྱི་སྐུ་ཚེའི་རྣམ་པར་འཕྲུལ་པ་རྒྱ་མཚོ་ལ་ལྟ་ཞིང་ཁོང་དུ་ཆུད་པར་བྱེད་དེ། རིགས་ཀྱི་བུ་ཁོ་མོ་གླིང་བཞི་པ་བསྐལ་པ་དང་ལྡན་པ་འདི་ལ་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ཚེའི་རྣམ་
པར་འཕྲུལ་པ་ལ་ལྟ་ཞིང་ཁོང་དུ་ཆུད་པར་བྱ་བར་གནས་པ་དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་ཐམས་ཅད་ཀྱི་འཛམ་བུའི་གླིང་བྱེ་བ་ཕྲག་བརྒྱ་
ཐམས་ཅད་ན་འང་། བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ཚེའི་རྣམ་པར་འཕྲུལ་པ་བྱེ་བ་ཕྲག་བརྒྱ་ལ་ལྟ་ཞིང་ཁོང་དུ་ཆུད་པར་བྱེད་དོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
ཁམས་ཐམས་ཅད་དུ་འདུས་པའི་རྡུལ་ཤིན་ཏུ་ཕྲ་བའི་ཁོངས་སུ་ཆུད་པའི་སངས་རྒྱས་ཀྱི་ཞིང་ཐམས་ཅད་རྡུལ་ཤིན་ཏུ་ཕྲ་བ་ལ་འཇུག་པའི་ཡེ་ཤེས་ཀྱི་ཁོང་དུ་ཆུད་པ་དག་དུ་ཡང་སེམས་ཀྱི་སྐད་

77-1-120a

ཅིག་རེ་རེ་ལ་སེམས་ཀྱི་ཁོང་དུ་ཆུད་པར་བྱ་བ་རེ་རེས་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ཚེའི་རྣམ་པར་འཕྲུལ་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ལ་བལྟ་ཞིང་ཁོང་
དུ་ཆུད་པར་བྱེད་དོ། །དེའི་འོག་མའི་སེམས་ཀྱིས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་རྣམས་ཀྱི་ཁོངས་སུ་ཆུད་པའི་སངས་རྒྱས་ཀྱི་ཞིང་དེ་དག་ལས་སངས་རྒྱས་ཀྱི་ཞིང་རེ་རེར་ཡང་དེ་དང་མཉམ་པའི་
བྱང་ཆུབ་སེམས་དཔའི་སྐྱེ་བའི་རྣམ་པར་འཕྲུལ་པ་ལ་ལྟ་ཞིང་ཁོང་དུ་ཆུད་པར་བྱེད་དེ། ཚུལ་དེ་ལྟ་བུས་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བའི་ཁོངས་སུ་ཆུད་པའི་སངས་རྒྱས་
ཀྱི་ཞིང་རེ་རེ་དག་ཏུ་ཡང་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ཐམས་ཅད་ལ་བལྟ་ཞིང་ཁོང་དུ་ཆུད་པར་བྱེད་ཀྱང་། རྡུལ་ཤིན་ཏུ་ཕྲ་བ་ཐམས་ཅད་ཀྱི་རྡུལ་རེ་རེ་ལ་ཞིང་གཅིག་ནས་
གཅིག་ཏུ་བརྒྱུད་པའི་མཐའ་རྙེད་པར་མི་རུང་ངོ་། །ཞིང་ཐམས་ཅད་ཀྱི་ཞིང་རེ་རེར་བྱང་ཆུབ་སེམས་དཔའ་སྐྱེ་བ་གཅིག་ནས་གཅིག་ཏུ་བརྒྱུད་པ་ཡང་མུ་རྙེད་པར་མ་རུང་ངོ་། །ཇི་ལྟར་ཁོ་མོས་
འཇིག་རྟེན་གྱི་ཁམས་འདི་བྱང་ཆུབ་སེམས་དཔའ་སྐྱེ་བ་རྣམ་པར་འཕྲུལ་པ་ཐམས་ཅད་ལ་བལྟ་ཞིང་ཁོང་དུ་ཆུད་པར་བྱེད་པ། དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་མཐའ་དང་དབུས་མེད་པ་
དང་། རྡུལ་ཤིན་ཏུ་ཕྲ་བ་ཐམས་ཅད་ལའང་སེམས་ཀྱི་སྐད་ཅིག་རེ་རེའི་སེམས་ཀྱི་ཁོང་དུ་ཆུད་པར་བྱ་བ་རེ་རེ་ལ་བྱིན་གྱིས་བརླབས་རྒྱུན་མི་ཆད་པའི་ཚུལ་གྱིས་བྱང་ཆུབ་སེམས་དཔའ་སྐྱེ་བའི་རྣམ་པར་
འཕྲུལ་པ་ཐམས་ཅད་ལ་བལྟ་ཞིང་ཁོང་དུ་ཆུད་པར་བྱེད་དོ། །དེ་སྐད་ཅེས་སྨྲས་པ་དང་། ཚོང་དཔོན་གྱི་བུ་ནོར་བཟངས་ཀྱིས་ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་

77-1-120b

བའི་དཔལ་ལ་འདི་སྐད་ཅེས་སྨྲས་སོ། །འཕགས་མ་ཁྱོད་ཀྱིས་བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་པར་དམྱིགས་པ་ཐམས་ཅད་དུ་བྱང་ཆུབ་སེམས་དཔའི་སྐྱེ་བ་རྣམ་པར་
འཕྲུལ་པ་ཡོངས་སུ་སྟོན་པ་འདི་རྙེད་ནས་ཡུན་ཇི་སྲིད་ཅིག་ལགས། སྨྲས་པ་རིགས་ཀྱི་བུ་སྔོན་འདས་པའི་དུས་བསྐལ་པ་སངས་རྒྱས་ཀྱི་ཞིང་བྱེ་བའི་རྡུལ་ཤིན་ཏུ་ཕྲ་བ་སྙེད་འདས་པའི་ཕ་རོལ་དེའི་
ཡང་ཕ་སྔ་ཞིག་ཏུ་འཇིག་རྟེན་གྱི་ཁམས་ཀུན་ནས་རིན་པོ་ཆེ་ཞེས་བྱ་བར་བསྐལ་པ་མཉམ་པར་བཞག་པ་ཞེས་བྱ་བ་སངས་རྒྱས་བྱེ་བ་ཁྲག་ཁྲིག་ཕྲག་བརྒྱད་བཅུ་བྱུང་བ་ལ་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་ཕྱུག་གི་ཡོན་ཏན་གཞན་གྱིས་མི་ཐུབ་པའི་རྒྱལ་མཚན་ཞེས་བྱ་བ་མཁྱེན་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་
མཁྱེན་པ་བླ་ན་མེད་པ་སྐྱེས་བུ་འདུལ་བའི་ཁ་ལོ་བསྒྱུར་བ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ་། །རིགས་ཀྱི་བུ་འཇིག་རྟེན་གྱི་ཁམས་ཀུན་ནས་རིན་པོ་ཆེ་
ཞེས་བྱ་བ་དེར་གླིང་བཞི་པ་དབུ་མ་རྒྱན་སྣ་ཚོགས་ཀྱི་འོད་ཅེས་བྱ་བ་བྱུང་སྟེ། གླིང་བཞི་པ་དེའི་འཛམ་བུའི་གླིང་གི་དབུས་སུ་རྒྱལ་པོའི་གནས་རི་རབ་རྣམ་པར་དག་པའི་རྒྱན་གྱི་རྒྱལ་མཚན་ཞེས་བྱ་བ་
བྱུང་སྟེ། རྒྱལ་པོའི་གནས་དེར་རྒྱལ་པོ་རིན་པོ་ཆེ་འོད་འཕྲོ་བའི་མིག་གི་འོད་ཅེས་བྱ་བ་བྱུང་ངོ་། །རྒྱལ་པོ་རིན་པོ་ཆེའི་འོད་འཕྲོ་བའི་མིག་གི་འོད་དེ་ལ་བཙུན་མོ་རབ་ཏུ་དགའ་བའི་འོད་ལ་དབང་བསྒྱུར་བ་
ཞེས་བྱ་བ་མངའོ། །རིགས་ཀྱི་བུ་དཔེར་ན། གླིང་བཞི་པ་བསྐལ་པ་དང་ལྡན་པ་འདིའི་འཛམ་བུའི་གླིང་དུ་ལྷ་མོ་སྒྱུ་མ་བཅོམ་ལྡན་འདས་རྣམ་པར་སྣང་མཛད་ཀྱི་ཡུམ་དུ་གྱུར་པ་དེ་བཞིན་དུ་དེའི་ཚེ། 

77-1-121a

དེའི་དུས་ན་གླིང་བཞི་པ་རྒྱན་སྣ་ཚོགས་ཀྱི་འོད་ཀྱི་འཛམ་བུའི་གླིང་དུ་འང་རབ་ཏུ་དགའ་བའི་འོད་ལ་དབང་བསྒྱུར་བ་ཞེས་བྱ་བ་ཡང་བཅོམ་ལྡན་འདས་དེ་བཞིན་གཤེགས་པ་དབང་
ཕྱུག་གི་ཡོན་ཏན་གཞན་གྱིས་མི་ཐུབ་པའི་རྒྱལ་མཚན་གྱི་ཡུམ་དུ་གྱུར་ཏེ། སངས་རྒྱས་བྱེ་བ་ཁྲག་ཁྲིག་ཕྲག་བརྒྱད་བཅུ་བསྐལ་པའི་དང་པོ་ལ་བྱུང་སྟེ། ཐོག་མར་བྱུང་བའི་བཅོམ་ལྡན་འདས་
དེ་བཞིན་གཤེགས་པ་དབང་ཕྱུག་གི་ཡོན་ཏན་གཞན་གྱིས་མི་ཐུབ་པའི་རྒྱལ་མཚན་གྱི་ཡུམ་དུ་གྱུར་ཏོ། །རིགས་ཀྱི་བུ་ལྷ་མོ་རབ་ཏུ་དགའ་བའི་འོད་ལ་དབང་བསྒྱུར་བ་དེ་བྱང་ཆུབ་སེམས་
དཔའ་སྐྱེ་བའི་དུས་ལ་བབ་པ་དང་། བུད་མེད་ཁྲག་ཁྲིག་བརྒྱ་སྟོང་ཕྲག་ཉི་ཤུ་དང་ལྷན་ཅིག་ཏུ་བཟའ་ཤིང་གི་ར་བ་ཆེན་པོ་འོད་ཀྱི་དཀྱིལ་འཁོར་གསེར་གྱི་མེ་ཏོག་ཅེས་བྱ་བ་དེར་ཕྱིན་ཏེ། དབང་ཕྱུག་གི་
ཡོན་ཏན་གཞན་གྱིས་མི་ཐུབ་པའི་རྒྱལ་མཚན་གཞོན་ནུ་དེ་ཡང་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་བསམ་གྱིས་མི་ཁྱབ་པས་དེ་ལྟར་བལྟམས་སོ། །དེའི་ཚེ་བཟའ་ཤིང་གི་ར་བ་
ཆེན་པོའི་འོད་ཀྱི་དཀྱིལ་འཁོར་གསེར་གྱི་མེ་ཏོག་ཅེས་བྱ་བ་དེའི་དབུས་སུ་ཕོ་བྲང་བརྩེགས་པ་རིན་པོ་ཆེ་སྣ་ཚོགས་བཟང་པོ་ལས་བརྩེགས་པ་ཞེས་བྱ་བ་བྱུང་སྟེ། ཕོ་བྲང་བརྩེགས་པ་དེའི་ནང་དུ་ཤིང་
འདོད་པ་ཐམས་ཅད་འབྱིན་པའི་ཡལ་ག་ལ་འཇུས་ཏེ། ལྷ་མོ་རབ་ཏུ་དགའ་བའི་འོད་ལ་དབང་བསྒྱུར་བ་ལས་བཅོམ་ལྡན་འདས་དེ་བཞིན་གཤེགས་པ་དབང་ཕྱུག་གི་ཡོན་ཏན་གཞན་གྱིས་མི་ཐུབ་
པའི་རྒྱལ་མཚན་བལྟམས་སོ། །དེའི་ཚེ་བཅོམ་ལྡན་འདས་དེ་བལྟམས་པའི་འཁོར་མ་མ་དྲི་མ་མེད་པ་བསྐྱེད་པའི་འོད་ཅེས་བྱ་བ་སྟ་གོན་དུ་གནས་ཏེ། བྱང་ཆུབ་སེམས་དཔའ་དེ་བལྟམས་པར་གྱུར་

77-1-121b

མ་ཐག་ཏུ་འཇིག་རྟེན་གྱི་དབང་པོ་རྣམས་ཀྱིས་སྤོས་དྲི་ཤིན་ཏུ་ཞིམ་པའི་སྤོས་ཆུའི་བུམ་པ། མེ་ཏོག་དྲི་ཞིམ་ཞིང་ཡིད་དུ་འོང་བ་སྣ་ཚོགས་མངོན་པར་འཐོར་བས་སྐུ་བསིལ་ཏེ། དེ་ལ་ཚུལ་དང་འཐུན་
པའི་མཆོད་པ་བསམ་གྱིས་མི་ཁྱབ་ལ་གྲངས་མེད་པ་མཆོག་ཏུ་བྱ་བས་མཆོད་ནས་མ་མ་དྲི་མ་མེད་པ་བསྐྱེད་པའི་འོད་ཀྱི་པང་དུ་བཞག་གོ། །མ་མ་དེས་བྱང་ཆུབ་སེམས་དཔའ་སྤང་དུ་བླངས་
མ་ཐག་དུ། དེའི་མོད་ལ་མ་མ་དེ་དགའ་བ་དང་མོས་པའི་ཤུགས་ཆེན་པོ་ཐོབ་པར་གྱུར་ནས། བྱང་ཆུབ་སེམས་དཔའི་ཏིང་ངེ་འཛིན་ཡུལ་ཀུན་ཏུ་བལྟམས་པ་ཞེས་བྱ་བ་ཐོབ་པར་གྱུར་ཏོ། །དེ་
ཐོབ་པར་གྱུར་མ་ཐག་དུ་དེས་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་དེ་བཞིན་གཤེགས་པ་ཚད་མེད་པ་དེ་དག་ཐམས་ཅད་ཀྱང་མཐོང་བར་གྱུར་ཏོ། །བྱང་ཆུབ་སེམས་དཔའི་རྣམ་
པར་ཐར་པ་བསྐལ་པ་ཚད་མེད་པར་དམྱིགས་པ་ཐམས་ཅད་དུ་བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་བ་ཡོངས་སུ་སྟོན་པ་འདི་ལ་འང་ཤིན་ཏུ་ཕྲ་བའི་ཚུལ་གྱིས་ཞུགས་པར་གྱུར་ཏེ། 
དེ་ནི་དཔེར་ན་མའི་མངལ་དུ་ཞུགས་མ་ཐག་པའི་རྣམ་པར་ཤེས་པ་ལྟ་བུའོ། །རྣམ་པར་ཐར་པ་དེ་ཐོབ་པར་གྱུར་པས་ཀྱང་། དེས་དེ་བཞིན་གཤེགས་པ་ཐམས་ཅད་སྐྱེ་བའི་རྣམ་པར་འཕྲུལ་པ། 
ཡང་དག་པར་བལྟམས་པའི་སྨོན་ལམ་ཆེན་པོ་ཡང་མངོན་པར་བསྒྲུབས་སོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའི་མ་མ་དྲི་མ་མེད་པས་བསྐྱེད་པའི་
འོད་ཅེས་བྱ་བ་བྱུང་བར་གྱུར་པ་དེ་གཞན་ཞིག་ཡིན་པ་ཙམ་དུ་སེམས་ན་ནི་ཁྱོད་ཀྱིས་དེ་ལྟར་མི་བལྟ་སྟེ། ཁོ་མོ་ནི་དེའི་ཚེ་དེའི་དུས་ན་བྱང་ཆུབ་སེམས་དཔའི་མ་མ་དྲི་མ་མེད་པ་བསྐྱེད་པའི་འོད་

77-1-122a

ཅེས་བྱ་བར་གྱུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་བུད་མེད་ཁྲག་ཁྲིག་བརྒྱ་སྟོང་ཕྲག་ཉི་ཤུ་བྱུང་བར་གྱུར་པ་དེ་དག་གཞན་དག་ཅིག་ཡིན་པ་ཙམ་དུ་སེམས་
ན་ཡང་དེ་ལྟར་མི་བལྟ་སྟེ། ལྷ་མོ་ཁྲག་ཁྲིག་བརྒྱ་སྟོང་ཕྲག་ཉི་ཤུ་པོ་ལུམ་བི་ནིའི་ནགས་ཚལ་ན་གནས་པ་ཁོ་མོའི་འཁོར་དུ་གྱུར་པ་འདི་དག་ཡིན་ནོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་
ཚེ་དེའི་དུས་ན་དབང་ཕྱུག་གི་ཡོན་ཏན་གཞན་གྱིས་མི་ཐུབ་པའི་རྒྱལ་མཚན་གཞོན་ནུའི་ཡུམ་རབ་ཏུ་དགའ་བའི་འོད་ལ་དབང་བསྒྱུར་བ་ཞེས་བྱ་བ་བྱུང་བ་དེ་གཞན་ཞིག་ཡིན་པ་ཙམ་དུ་སེམས་ན་འང་
དེ་ལྟར་མི་བལྟ་སྟེ། ལྷ་མོ་སྒྱུ་མ་འདི་ནི་དེའི་ཚེ་དེའི་དུས་ན་རབ་ཏུ་དགའ་བའི་འོད་ལ་དབང་བསྒྱུར་བ་ཞེས་བྱ་བའི་ལྷ་མོར་གྱུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་
རྒྱལ་པོ་རིན་པོ་ཆེའི་འོད་འཕྲོ་བའི་མིག་གི་འོད་ཅེས་བྱ་བ་བྱུང་བ་དེ་གཞན་ཞིག་ཡིན་པ་ཙམ་དུ་སེམས་ན་ཡང་དེ་ལྟར་མི་ལྟ་སྟེ། རྒྱལ་པོ་ཟས་གཙང་མ་འདི་ནི་དེའི་ཚེ་དེའི་དུས་ན་རྒྱལ་པོ་རིན་པོ་
ཆེ་འོད་འཕྲོ་བའི་མྱིག་གི་འོད་ཅེས་བྱ་བར་གྱུར་ཏོ། །རིགས་ཀྱི་བུ་དེ་ལྟར་ཁོ་མོ་ནི་དེ་ཕྱིན་ཅད་དུ་བཅོམ་ལྡན་འདས་རྣམ་པར་སྣང་མཛད་ཀྱི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་རྒྱ་
མཚོ་ལ་ལྟ་ཞིང་ཁོང་དུ་ཆུད་པར་བྱེད་པ་དང་། སེམས་ཅན་རྣམ་པར་འདུལ་བའི་ཁྱུ་མཆོག་གི་མཐུས་རྣམ་པར་འཕྲུལ་པ་རྒྱ་མཚོ་ལ་ལྟ་ཞིང་ཁོང་དུ་ཆུད་པར་བྱེད་པ་དང་། སྐད་ཅིག་ཐམས་ཅད་དུ་
བྲལ་བར་མ་གྱུར་ཏོ། །རིགས་ཀྱི་བུ་ཁོ་མོ་ནི་མི་མཇེད་ཀྱི་འཇིག་རྟེན་གྱི་ཁམས་འདི་ན་བཅོམ་ལྡན་འདས་རྣམ་པར་སྣང་མཛད་ཀྱི་སྨོན་ལམ་རྒྱ་མཚོ་འབྱམ་ཀླས་པ་ལས་བྱུང་བའི་དེ་བཞིན་

77-1-122b

གཤེགས་པ་རྣམས་ཀྱི་ཞིང་རྒྱ་མཚོ་ཤིན་ཏུ་ཕྲ་བ་ཐམས་ཅད་ཡོད་པ་ལ་སེམས་ཀྱི་སྐད་ཅིག་ཐམས་ཅད་དུ་རྡུལ་ཤིན་ཏུ་ཕྲ་བ་ཐམས་ཅད་ལ་ཡོངས་སུ་འདལ་བའི་ཡེ་ཤེས་ཀྱི་མིག་གིས་ལྟ་
ཞིང་ཁོང་དུ་ཆུད་པར་བྱེད་དེ། སངས་རྒྱས་ཀྱི་ཞིང་དེ་དག་དུ་དེ་བཞིན་གཤེགས་པ་བྱུང་བ་རྒྱ་མཚོ་དག་ཀྱང་ལྟ་ཞིང་ཁོང་དུ་ཆུད་པར་བྱེད་ལ་དེ་བཞིན་གཤེགས་པ་དེ་དག་གི་བྱང་ཆུབ་སེམས་དཔའ་སྐྱེ་
བའི་རྣམ་པར་འཕྲུལ་པ་རྒྱ་མཚོ་ཆེན་པོ་དག་ལ་ཡང་ལྟ་ཞིང་ཁོང་དུ་ཆུད་པར་བྱེད་པ་དེ་བཞིན་དུ་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་སེམས་དཔའི་སྐྱེ་བའི་རྣམ་པར་འཕྲུལ་པ་
རྒྱ་མཚོ་དང་སེམས་ཅན་རྣམ་པར་གདུལ་བའི་ཁྱུ་མཆོག་གི་མཐུ་ཕྱུང་བས། རྣམ་པར་འཕྲུལ་པ་རྒྱ་མཚོ་ཐམས་ཅད་ལ་འང་། སེམས་ཀྱི་སྐད་ཅིག་ཐམས་ཅད་དུ་ལྟ་ཞིང་ཁོང་དུ་ཆུད་པར་བྱེད་དོ། །
ཇི་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་རྡུལ་ཤིན་ཏུ་ཕྲ་བ་འབྱམ་ཀླས་པ་ཐམས་ཅད་གཅིག་ནས་གཅིག་ཏུ་རྒྱུད་པ་ལ་འཇུག་པས་བྱང་ཆུབ་སེམས་དཔའ་སྐྱེ་བ་མ་
ནོར་བར་མངོན་དུ་གྱུར་ཏེ། སངས་རྒྱས་ཀྱི་ཡོན་ཏན་ལ་ཞུགས་པར་གྱུར་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་
བཅུའི་རྡུལ་ཤིན་ཏུ་ཕྲ་བ་སྙེད་ཀྱི་རྡུལ་ཤིན་ཏུ་ཕྲ་བ་འབྱམ་ཀླས་པ་ཐམས་ཅད་ཀྱི་ཁོངས་སུ་ཆུད་པའི་ཞིང་རྒྱ་མཚོ་ཐམས་ཅད་ལ་འང་འཇུག་སྟེ། དེ་དག་དུ་འང་སངས་རྒྱས་རྒྱ་མཚོ་ཤིན་ཏུ་
ཡངས་པ་ལ་འཇུག་གོ། །སངས་རྒྱས་བཅོམ་ལྡན་འདས་དེ་དག་བྱང་ཆུབ་སེམས་དཔར་གྱུར་པའི་བྱང་ཆུབ་སེམས་དཔའ་འབྱུང་བའི་རྣམ་པར་འཕྲུལ་པ་རྣམས་ཀྱང་མངོན་དུ་གྱུར་པར་ལྟའོ། །

77-1-123a

དེ་བཞིན་གཤེགས་པར་གྱུར་ནས་ཀྱང་མཆོད་པ་བྱེད་དོ། །དེ་བཞིན་གཤེགས་པ་དེ་དག་ལས་ཀྱང་ཆོས་བསྟན་པ་ཉན་ཏོ། །ཆོས་ལ་ཡང་གཉེར་བའི་ཆོས་ཀྱི་ནན་ཏན་དུ་བྱེད་དོ། །དེ་ནས་
ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གྱི་དེའི་ཚེ། བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་པར་དམིགས་པ་ཐམས་ཅད་དུ་
བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་པ་ཡོངས་སུ་སྟོན་པ་འདི་གསལ་བར་བསྟན་པའི་ཕྱིར་སངས་རྒྱས་ཀྱི་བྱིན་གྱི་བརླབས་ཀྱི་ཕྱོགས་བཅུར་རྣམ་པར་བལྟས་ཏེ། ཚིགས་སུ་བཅད་པ་འདི་དག་
སྨྲས་སོ། །རིམ་གྲོ་བསྐྱེད་ཅིང་ང་ལ་གང་འདྲི་བ། །དེ་དག་བདག་ལས་རྒྱལ་བའི་སྲས་ཉོན་ཅིག །རྒྱལ་བའི་སྤྱོད་ཡུལ་བལྟ་དཀའ་ཞི་བ་སྟེ། །རྒྱུ་དང་རྐྱེན་གྱི་ཚུལ་གྱིས་རྣམ་པར་བསྟན། །ཞིང་རྣམས་
བྱེ་བའི་རྡུལ་ཕྲན་རབ་སྙེད་ཀྱི། །སྔོན་གྱི་བསྐལ་པ་བསམ་གྱིས་མི་ཁྱབ་དྲན། །བསྐལ་པའི་མིང་ནི་སྔ་ཕྱི་མཉམ་ཞེས་བྱ། །དེ་ལ་རྒྱལ་བ་བྱེ་བ་བརྒྱད་བཅུ་བྱུང་། །བསྐལ་པའི་དང་པོར་དེ་བཞིན་
གཤེགས་བྱུང་བ། །དབང་ཕྱུག་ཡོན་ཏན་མི་ཐུབ་རྒྱལ་མཚན་ནོ། །ནགས་ཚལ་དམ་པ་གསེར་མདོག་མེ་ཏོག་ཏུ། །མགོན་པོ་དེ་འཁྲུངས་བདག་གིས་མཐོང་བར་གྱུར། །མིང་དུ་དྲི་མེད་བསྐྱེད་
པའི་འོད་ཅེས་བྱ། །དེའི་མ་མ་མཁས་པར་བདག་གྱུར་ཏེ། །བལྟམས་མ་ཐག་ཏུ་གསེར་མདོག་དམ་པའི་འོད། །འཇིག་རྟེན་དབང་པོ་བདག་གིས་དཔང་དུ་བཞག །གང་ཟག་དམ་པ་པང་དུ་བཞག་
ཚེ་ཡང་། །དེ་ཡི་སྤྱི་གཙུག་བལྟ་བར་མི་ནུས་ཏེ། །བསམ་ཡས་དེ་ལ་གཡས་དང་གཡོན་དུ་ཡང་། །བལྟས་ཤིང་མཐའ་རྙེད་མཐོང་བར་མ་གྱུར་ཏོ། །མཚན་རབ་བཟང་པོས་དེ་ནི་ཡོངས་སུ་

77-1-123b

བརྒྱན། །དྲི་མེད་དེ་སྐུ་བལྟ་ན་རབ་སྡུག་སྟེ། །རིན་ཆེན་གཟུགས་འདྲ་བདག་གིས་མཐོང་གྱུར་ནས། །དགའ་བའི་ཤུགས་དྲག་མཚུངས་མྱེད་རྣམ་པར་འཕེལ། །དེ་ཡི་ཡོན་ཏན་དཔག་ཡས་
སེམས་སེམས་ནས། །ཁོ་མོའི་བསོད་ནམས་རྒྱ་མཚོ་དཔག་མེད་འཕེལ། །དེ་ཡི་རྣམ་འཕྲུལ་རྒྱ་མཚོ་མཐོང་གྱུར་ནས། །རྒྱ་ཆེན་བྱང་ཆུབ་སེམས་ཀྱང་སྐྱེས་པར་གྱུར། །རྒྱལ་བའི་ལེགས་
པ་རྒྱ་མཚོ་དགའ་སྨོན་ནས། །སྨོན་ལམ་རྒྱ་མཚོ་བདག་གིས་རབ་ཏུ་བསྐྱེད། །འབྱམ་ཀླས་ཞིང་རྣམས་ཐམས་ཅད་རབ་སྦྱངས་ནས། །ངན་སོང་ལམ་རྣམས་ཀུན་ཀྱང་རྣམ་པར་བཟློག །ཞིང་རྣམས་
འབྱམ་ཀླས་ཀུན་གྱི་བདེ་གཤེགས་རྣམས། །མ་བྱོན་བསམ་གྱིས་མི་ཁྱབ་མཆོད་པ་དང་། །སེམས་ཅན་སྡུག་བསྔལ་རྣམ་པར་དགྲོལ་བའི་ཕྱིར། །སྨོན་ལམ་རྒྱ་མཚོ་ཁོ་མོས་བཏབ་པར་
གྱུར། །མགོན་པོ་དེ་ལས་བདག་གིས་ཆོས་ཐོས་ནས། །རྣམ་ཐར་དམ་པའི་དཀྱིལ་འཁོར་འདི་ཡང་ཐོབ། །བསྐལ་པ་ཞིང་རྣམས་བྱེ་བའི་རྡུལ་སྙེད་དུ། །སྤྱད་པ་སྤྱོད་པ་དེ་ཡང་རྣམ་པར་སྦྱངས། །
དེ་ལ་མགོན་པོ་ཇི་སྙེད་བྱུང་གྱུར་པ། །དེ་དག་མ་ལུས་བདག་གིས་ཀུན་ཀྱང་མཆོད། །རྣམ་ཐར་རྒྱ་མཚོ་འདི་ནི་སྦྱོང་བྱེད་ཅིང་། །དེ་དག་བསྟན་པ་ཁོ་མོས་ཡོངས་སུ་བཟུང་། །ཞིང་རྣམས་བྱེ་བའི་
རྡུལ་ཕྲན་རབ་སྙེད་ཀྱི། །སྟོབས་བཅུ་མངའ་བ་ཇི་སྙེད་འདས་བྱུང་བ། །དེ་དག་ཆོས་ཀྱི་འཁོར་ལོ་ཁོ་མོས་བཟུང་། །རྣམ་ཐར་དཀྱིལ་འཁོར་འདི་ཡང་རབ་ཏུ་བསྒོམས། །སངས་རྒྱས་ཞིང་གི་
རྡུལ་ཕྲན་ཇི་སྙེད་པ། །རྡུལ་རྩེ་འབྱམ་ཀླས་ཀུན་ལ་རྣམ་པར་མཐོང་། །རྡུལ་ཕྲན་རེ་རེ་ལ་ཡང་རྒྱ་མཚོའི་ཞིང་། །སྔོན་ཆད་རྒྱལ་བས་སྦྱངས་པ་རབ་ཏུ་མཐོང་། །ཞིང་རྣམས་འབྱམ་ཀླས་དེ་དག་

77-1-124a

ཀུན་ཏུ་ཡངས། །མགོན་པོ་ཐུགས་རྒྱུད་གཅིག་ལ་བསམ་ཡས་པའི། །རྣམ་འཕྲུལ་ཡངས་པ་ཡོངས་སུ་སྟོན་མཛད་ཅིང་། །ནགས་ཚལ་མཆོག་ཏུ་འཁྲུངས་གྱུར་བདག་གིས་
མཐོང་། །རྒྱལ་བ་ཀུན་གྱི་ཞིང་རྣམས་ལ་ལ་ན། །བྱང་ཆུབ་དམ་པར་འཚང་རྒྱ་ཐུགས་དགོངས་ཤིང་། །དགའ་ལྡན་འཇིག་རྟེན་ཉིད་ན་བཞུགས་པ་ཡང་། །ཞིང་རྣམས་བྱེ་བ་བསམ་གྱིས་
མི་ཁྱབ་པོ། །ཞིང་རྣམས་རྒྱ་མཚོའི་དབྱིངས་སུ་རྣམ་འཕྲུལ་པ། །ཤིན་ཏུ་ཡངས་པ་སྐྱེ་བ་འང་བདག་གིས་མཐོང་། །ན་ཆུང་དམ་པའི་ཚོགས་ཀྱི་དབུས་བཞུགས་ཤིང་། །མགོན་པོ་ཆོས་
རྣམས་སྟོན་པ་དེ་བཞིན་མཐོང་། །ཞིང་རྣམས་བྱེ་བའི་རྡུལ་ཕྲན་རབ་སྙེད་ཀྱི། །དཔའ་བོ་སེམས་ཀྱི་སྐད་ཅིག་རེ་རེ་ལ། །མངོན་པར་འབྱུང་ཞིང་ཤིང་རྒྱལ་དྲུང་གཤེགས་དང་། །སངས་རྒྱས་
སྤྱོད་ཡུལ་ཡངས་པ་སྟོན་པ་མཐོང་། །ཞིང་གཅིག་རྡུལ་ལ་བསམ་གྱིས་མི་ཁྱབ་པར། །ཡུལ་རྣམས་གཞན་དང་གཞན་དག་སྟོན་མཛད་པས། །འགྲོ་རྒྱུད་སེམས་ཅན་སྡུག་བསྔལ་སྒྲོལ་
མཛད་ཅིང་། །མི་གཙོ་རྣམ་པར་འཚང་རྒྱ་བདག་གིས་མཐོང་། །རྡུལ་ཕྲན་རེ་རེའི་རྩེ་ལ་མི་ཟད་པའི། །རང་འབྱུང་འཁོར་ལོ་རབ་ཏུ་བསྐོར་མཛད་ཅིང་། །དབྱངས་རྣམས་རྒྱ་མཚོ་མི་ཟད་སྒྲོགས་མཛད་
པ། །ཆོས་སྤྲིན་རྒྱ་ཆེན་ཆར་འབེབས་མཛད་པ་མཐོང་། །འགྲོ་བ་ཀུན་ལ་རྣམ་པ་དུ་མར་ཡང་། །སྐད་ཅིག་རེ་རེར་མྱ་ངན་འདས་སྟོན་པ། །ཞིང་རྣམས་བྱེ་བའི་རྡུལ་ཕྲན་རབ་སྙེད་ཀྱི། །སངས་རྒྱས་ཞིང་
གཅིག་རྡུལ་ལས་བདག་གིས་མཐོང་། །རྡུལ་གཅིག་བལྟས་ཀྱང་ཞིང་རྣམས་རྒྱ་མཚོ་དང་། །རྒྱལ་བ་འབྱུང་བ་ཇི་སྙེད་ཀུན་ཀྱང་མཐོང་། །ཚེ་རབས་ཀུན་ཏུ་ལུས་མང་ཁྲག་ཁྲིག་གིས། །དེ་དག་མཆོད་པའི་

77-1-124b

དོན་དུ་ཉེ་བར་ཕྱིན། །ཞིང་ཚུལ་རྒྱ་མཚོ་བསམ་གྱིས་མི་ཁྱབ་པའི། །འགྲོ་རྒྱུད་མི་ཟད་ཇི་སྙེད་ཡོད་པ་ཡི། །འགྲོ་བ་ཀུན་ལ་མངོན་དུ་ཁོ་མོ་ནི། །ཆོས་སྤྲིན་ཡངས་པའི་ཆར་ཡང་རབ་ཏུ་འབེབས། །རྒྱལ་
སྲས་ཁོ་མོས་བསམ་གྱིས་མི་ཁྱབ་པའི། །རྣམ་ཐར་དཀྱིལ་འཁོར་དམ་པ་འདི་ཤེས་ཀྱི། །བསྐལ་པ་བྱེ་བ་ཁྲག་ཁྲིག་བསམ་ཡས་སུ། །ཐམས་ཅད་བསྟན་པ་ཁོ་མོས་ནུས་རེ་སྐན། །རིགས་
ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་པར་དམྱིགས་པ་ཐམས་ཅད་དུ་བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་པ་ཡོངས་སུ་སྟོན་པ་འདི་ཤེས་པར་
ཟད་ན། ཁོ་མོས་བྱང་ཆུབ་སེམས་དཔའ་སེམས་ཀྱི་སྐད་ཅིག་རེ་རེ་ལ་བསྐལ་པ་ཐམས་ཅད་དུ་ཞུགས་པའི་མངལ་ནས་ཡོངས་སུ་བྱུང་བའི་སེམས་དང་ལྡན་པ། ཆོས་ཀྱི་ཚུལ་ཐམས་ཅད་ངེས་པར་
རྟོགས་པའི་སྐྱེ་བ་རབ་ཏུ་སྟོན་པ། དེ་བཞིན་གཤེགས་པ་ཐམས་ཅད་མཆོད་པའི་སྨོན་ལམ་གྱི་བསམ་པ་ཡོངས་སུ་བསྐྱེད་པ་སངས་རྒྱས་ཀྱི་ཆོས་ཐམས་ཅད་མངོན་པར་རྫོགས་པར་འཚང་རྒྱ་བར་
བྱ་བ་ལ་རབ་ཏུ་གཞོལ་བ། སེམས་ཅན་ཐམས་ཅད་ཀྱི་རིགས་དང་རྒྱུད་ཀྱི་ལམ་ཡོངས་སུ་བསྟན་པ་ལ་གཟུགས་བརྙན་ལྟ་བུར་གྱུར་པ། དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་པད་
མོའི་ནང་ནས་སྐྱེ་བ་འགྲོ་བ་ཐམས་ཅད་ཡོངས་སུ་སྨིན་པར་བྱ་བའི་དུས་ལ་མཁས་པ། སེམས་ཅན་ཐམས་ཅད་གདུལ་བ་ལ་མངོན་པར་མོས་ཤིང་ཆེར་སྐྱེ་བས་རྣམ་པར་འཕྲུལ་པ་ཡོངས་
སུ་སྟོན་པ། ཞིང་འབྱམ་ཀླས་པ་ཐམས་ཅད་དུ་རྣམ་པར་འཕྲུལ་པའི་སྤྲིན་ཡོངས་སུ་སྟོན་པ། འགྲོ་བ་ཐམས་ཅད་ཀྱི་ལམ་གྱི་རྒྱུད་དུ་སྐྱེ་བ་དང་། རིགས་སུ་གཟུགས་རྙན་བྱུང་བར་གྱུར་པ་

77-1-125a

དེ་དག་གི་སྤྱོད་པ་ཤེས་པ་འམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ་གྲོང་ཁྱེར་ཆེན་པོ་སེར་སྐྱའི་གནས་འདི་ན་ཤཱཀྱའི་བུ་མོ་གོ་པ་ཞེས་བྱ་བ་འདུག་གིས་དེའི་གན་
དུ་སོང་ལ། ཇི་ལྟར་བྱང་ཆུབ་སེམས་དཔའ་སེམས་ཅན་ཡོངས་སུ་སྨིན་པར་བྱ་བའི་ཕྱིར། འཁོར་བར་འཁོར་བར་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་གྱིས་ལུམ་བི་ནིའི་
ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་
བཟང་པོས་དགའ་བའི་དཔལ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་
དགའ་བའི་དཔལ་གྱི་དྲུང་ནས་སོང་ངོ་།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བརྒྱད་པ། དེ་ནས་ཚོང་དཔོན་གྱི་བུ་ནོར་བཟངས་ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་
དགའ་བའི་དཔལ་གྱི་དྲུང་ནས་སོང་སྟེ། གྲོང་ཁྱེར་ཆེན་པོ་སེར་སྐྱའི་གནས་གང་ན་བ་དེར་ཕྱིན་ནས། བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་པར་དམྱིགས་པ་ཐམས་ཅད་དུ་བྱང་ཆུབ་
སེམས་དཔའི་སྐྱེ་བས་རྣམ་པར་འཕྲུལ་པ་ཡོངས་སུ་སྟོན་པ་དེ་ཉིད་བསྒོམ་པ་དང་། ཁོང་དུ་ཆུད་པར་བྱ་བ་དང་། རྒྱ་ཆེར་བྱ་བ་དང་། ནན་ཏན་དུ་བྱ་བ་དང་། ཤིན་ཏུ་སྦྱང་བ་དང་། ཡོངས་སུ་བསམ་
པ་དང་། རྣམ་པར་དབྱེ་བ་བྱེད་ཅིང་། བྱང་ཆུབ་སེམས་དཔའ་ཡང་དག་པར་འགྲོ་བའི་ཁོངས་ལ་ཆོས་ཀྱི་དབྱིངས་རབ་ཏུ་སྣང་བའི་འོད་གང་ན་བ་དེར་སོང་ངོ་། །དེར་འགྲོ་བའི་ཚེ་བྱང་ཆུབ་སེམས་

77-1-125b

དཔའ་ཡོངས་སུ་འགྲོ་བའི་ཁང་པའི་ལྷ་མོ་མྱ་ངན་མེད་པའི་དཔལ་ཞེས་བྱ་བ་ཁྱིམ་གྱི་ལྷ་མོ་སྟོང་ཕྲག་བཅུ་དང་བཅས་པས་བསུས་ནས། ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །
སྐྱེས་བུ་ཆེན་པོ་ཤེས་རབ་དང་ཡེ་ཤེས་ཆེན་པོས་རྣམ་པར་གནོན་པ་བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པ་སྒོམ་པ་ལ་ལྷག་པར་དམྱིགས་པའི་སྨོན་ལམ་གྱི་སེམས་དང་
ལྡན་པ། ཆོས་ཡངས་པའི་གཞལ་མེད་ཁང་གི་སྤྱོད་ཡུལ་ལ་སྤྱོད་པ། ཆོས་ཀྱི་གྲོང་ཁྱེར་དུ་མངོན་པར་གཞོལ་བ། བྱང་ཆུབ་སེམས་དཔའི་ཐབས་གྱི་ཚུལ་མཐའ་ཡས་པས་སེམས་ཅན་གདུལ་བ་
ལ་འཇུག་པ་རྒྱུན་མི་གཅོད་པ། དེ་བཞིན་གཤེགས་པའི་ཡོན་ཏན་རྒྱ་མཚོ་སྣང་བ་རབ་ཏུ་ཐོབ་པ། འགྲོ་བ་ཐམས་ཅད་རྣམ་པར་གདུལ་བ་ལ་རབ་ཏུ་སྣང་བའི་སྤོབས་པ་དང་། ཡེ་ཤེས་མངོན་དུ་གྱུར་
པས་ཐམས་ཅད་ཀྱི་སྤྱོད་པ་ཤེས་པའི་ལུས་ཀྱིས་འགྲོ་ཞིང་རྗེས་སུ་འབྲང་བར་བྱ་བའི་སྤྱོད་པ་ལ་མངོན་དུ་གྱུར་པའི་སེམས་དང་ལྡན་པ། འགྲོ་བ་ཐམས་ཅད་ཀྱི་སེམས་ཀྱི་དགའ་བ་རྒྱ་མཚོའི་
ཤུགས་རྣམ་པར་འཕེལ་བར་བྱ་བའི་སྨོན་ལམ་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་ཆོས་ཁོང་དུ་ཆུད་པར་བྱ་བའི་ལམ་དུ་ཞུགས་པ། ཁྱོད་བྱོན་པ་ལེགས་སོ། །མིག་ཕྱིར་བླན་པ་
མེད་པས་སྤྱོད་པ་དང་། སྤྱོད་ལམ་ཟབ་ཅིང་རྣམ་པར་དག་པའི་སྤྱོད་ཡུལ་ཅན་ཁྱོད་ལ་བལྟས་ན། ཁྱོད་ནི་རིང་པོ་མྱི་ཐོགས་པར་དེ་བཞིན་གཤེགས་པའི་སྐུ་དང་། གསུང་དང་། ཐུགས་ཀྱི་རྒྱན་རྣམ་
པར་དག་པ་བླ་ན་མེད་པ་རབ་ཏུ་ཐོབ་སྟེ། མཚན་དང་དཔེ་བྱད་བཟང་པོས་རབ་ཏུ་བརྒྱན་པའི་ལུས་དང་སྟོབས་བཅུའི་ཡེ་ཤེས་སྣང་བས་བརྒྱན་པའི་སེམས་ཀྱིས་འཇིག་རྟེན་དུ་རྣམ་པར་སྤྱོད་པར་

77-1-126a

འགྱུར་རོ། །ཁྱོད་ཀྱི་བརྩོན་འགྲུས་དང་རྣམ་པར་གནོན་པ་ལས་བལྟས་ན། ཁྱོད་ནི་རིང་པོ་མི་ཐོགས་པར་དུས་གསུམ་གྱི་དེ་བཞིན་གཤེགས་པ་མངོན་དུ་གྱུར་པར་མཐོང་བ་དང་ལྡན་ཞིང་། 
དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྤྲིན་ཡོངས་སུ་འཛིན་པ་དང་། བྱང་ཆུབ་སེམས་དཔའི་བསམ་གཏན་དང་རྣམ་པར་ཐར་པ་དང་ཏིང་ངེ་འཛིན་དང་སྙོམས་པར་འཇུག་པའི་ཆོས་
ཞི་བ་དང་ལྡན་པའི་གཞལ་མེད་ཁང་གི་དགའ་བ་མེད་པ་དང་། སངས་རྒྱས་ཀྱི་རྣམ་པར་ཐར་པ་ཟབ་མོར་ཆུད་པར་འགྱུར་རོ། །དེ་ཡང་དེ་ལྟར་ཁྱོད་དགེ་བའི་བཤེས་གཉེན་གྱི་དྲུང་དུ་འགྲོ་བ་
དང་། བལྟ་བ་དང་བསྙེན་བཀུར་བ་དང་། གདམས་ངག་མ་ནོར་པར་བླང་བ་དང་། དེའི་ཡོན་ཏན་ལ་ནན་ཏན་དུ་བྱ་བའི་ཚུལ་ལ་བརྩོན་པར་བྱེད་པས་ཡོངས་སུ་མི་སྐྱོ། ཕྱིར་མི་ལྡོག །སྒྱིད་ལུག་
པར་མི་འགྱུར་ཏེ། ཁྱོད་ལ་བགེགས་སམ། བར་དུ་གཅོད་པ་འམ། སྒྲིབ་པ་གང་གིས་ཀྱང་མི་ཚུགས་ཏེ། བདུད་དམ་བདུད་ཀྱི་རིས་སུ་གཏོགས་པའི་ལྷ་རྣམས་ཀྱང་མདུན་ན་གནས་པ་མེད་
པས་དེའི་ཕྱིར་ཁྱོད་ནི་རིང་པོར་མི་ཐོགས་པར་སེམས་ཅན་ཐམས་ཅད་དགའ་བར་བྱེད་པར་འགྱུར་རོ། །དེ་སྐད་ཅེས་སྨྲས་པ་དང་། ཚོང་དཔོན་གྱི་བུ་ནོར་བཟངས་གྱིས་བྱང་ཆུབ་སེམས་དཔའ་ཡོངས་
སུ་འགྲོ་བའི་ཁང་པའི་ལྷ་མོ་མྱ་ངན་མེད་པའི་དཔལ་ལ་འདི་སྐད་ཅེས་སྨྲས་སོ། །ལྷ་མོ་ཁྱོད་ཀྱིས་ཇི་སྐད་དུ་སྨྲས་པ་དེ་ལྟར་འགྱུར་རོ། །ལྷ་མོ་ཁོ་མོ་ནི་སེམས་ཅན་ཐམས་ཅད་ཀྱི་ཉོན་མོངས་
པའི་གདུང་བ་རྣམ་པར་ཞི་བས་དགའ་བར་གྱུར་ཏེ། སེམས་ཅན་ཐམས་ཅད་ཀྱི་ལས་ཉམ་ང་བའི་རྣམ་པར་སྨིན་པའི་ཕྱིར་ལྡོག་པ་དང་། སེམས་ཅན་ཐམས་ཅད་ཀྱི་བདེ་བ་འགྲུབ་པ་

77-1-126b

དང་། སེམས་ཅན་ཐམས་ཅད་ཁ་ན་མ་ཐོ་བ་མེད་པའི་ལས་ལ་ནན་ཏན་ཏུ་བྱེད་པས་དགའ་བ་དམ་པ་ཉམས་སུ་ཚོར་བར་འགྱུར་རོ། །ནམ་སེམས་ཅན་དེ་དག་ལས་དང་ཉོན་མོངས་པ་
རྣམ་པ་སྣ་ཚོགས་མི་བདེ་བའི་སྦྱོར་བས་སེམས་རྣམ་པར་འཁྲུགས་ཤིང་ངན་སོང་དུ་ལྟུང་བར་གྱུར་པ་འམ། བདེ་བའི་རྒྱུད་ན་གནས་ཀྱང་ལུས་དང་སེམས་ཀྱི་སྡུག་བསྔལ་དང་ཡིད་མྱི་
བདེ་བ་སྣ་ཚོགས་ཉམས་སུ་མྱོང་བར་གྱུར་ཅིང་། མི་དགའ་བར་གནས་པ་དེའི་ཚེ། བྱང་ཆུབ་སེམས་དཔའ་རྣམས་ཀྱང་ཤིན་ཏུ་ཡིད་མི་བདེ་བར་འགྱུར་རོ། །ལྷ་མོ་འདི་ལྟ་སྟེ་དཔེར་ན་མི་ཤིན་
ཏུ་ངང་གིས་བྱམས་པ་ཞིག་ལ་བུ་གཅིག་པ་སྡུག་ཅིང་ཡིད་དུ་འོང་བ་ཞིག་བདོག་པར་གྱུར་ལ། དེའི་ཡན་ལག་དང་ཉིང་ལག་བཅད་པ་ཞིག་མཐོང་ན་ཤིན་ཏུ་ངང་གིས་བྱམས་པའི་ཕྱིར་རབ་ཏུ་ཡིད་
མི་བདེ་ཞིང་མི་དགའ་བར་འགྱུར་རོ། །ལྷ་མོ་དེ་བཞིན་དུ་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་འང་སེམས་ཅན་རྣམས་ལས་དང་། ཉོན་མོངས་པའི་དབང་གིས་
ངན་སོང་གསུམ་གྱི་རྒྱུད་དུ་ལྷུང་བ་ཞིག་མཐོང་ན་རབ་ཏུ་མི་དགའ་ལ་ཤིན་ཏུ་ཉམས་མི་བདེ་བར་འགྱུར་རོ། །གང་གི་ཚེ་སེམས་ཅན་རྣམས་ལུས་དང་ངག་དང་ཡིད་གྱིས་ལེགས་པར་སྤྱད་པ་ཡང་
དག་པར་ལེན་པའི་རྒྱུས་ལུས་ཞིག་ནས་བདེ་བའི་རྒྱུད་མཐོ་རིས་ཀྱི་འཇིག་རྟེན་དུ་སྐྱེ་བར་གྱུར་ཏམ། ལྷ་དང་མིའི་ལམ་གྱི་རྒྱུད་དུ་ལུས་དང་སེམས་ཀྱི་བདེ་བ་ཉམས་སུ་མྱོང་བ་ཞིག་དུ་གྱུར་ན། དེའི་
ཚེ་བྱང་ཆུབ་སེམས་དཔའ་ཤིན་ཏུ་བདེ་བ་དང་ལྡན་ཞིང་། ཉམས་བདེ་བ་དང་ཡིད་དགའ་བ་དང་། རབ་ཏུ་སྤྲོ་བ་དང་། དགའ་བའི་ཡིད་ཉམས་སུ་བདེ་བ་དང་ལྡན་པར་འགྱུར་རོ། །ལྷ་མོ་བྱང་ཆུབ་

77-1-127a

སེམས་དཔའ་རྣམས་ནི་བདག་གི་དོན་ཀྱི་ཕྱིར་ཐམས་ཅད་མཁྱེན་པ་ཉིད་དུ་སྨོན་ཅིང་དོན་དུ་གཉེར་བ་མ་ཡིན་ཏེ། འཁོར་བའི་དགའ་བ་དང་བདེ་བ་སྣ་ཚོགས་ཉམས་སུ་མྱོང་བར་
བྱ་བའི་ཕྱིར་མ་ཡིན། འདོད་པའི་ཁམས་སུ་གཏོགས་པའི་དགའ་བ་རྣམ་པ་ཐ་དད་པར་སྣ་ཚོགས་དོན་དུ་གཉེར་བས་མ་ཡིན། འདུ་ཤེས་དང་སེམས་དང་ལྟ་བ་ཕྱིན་ཅི་ལོག་ཏུ་གྱུར་པའི་
དབང་གིས་མ་ཡིན། ཀུན་ཏུ་སྦྱོར་བ་དང་། འཆིང་བ་དང་། བག་ལ་ཉལ་བ་དང་། ཀུན་ནས་འཁོར་བའི་དབང་དུ་གྱུར་པས་མ་ཡིན། སྲེད་པ་དང་ལྟ་བའི་དབང་དུ་གྱུར་པས་མ་ཡིན། སེམས་ཅན་སྣ་
ཚོགས་དང་འདུ་འཛིའི་དགའ་བའི་འདུ་ཤེས་གྱིས་སེམས་རྣམ་པར་འཕེལ་བས་མ་ཡིན། བསམ་གཏན་གྱི་དགའ་བ་དང་བདེ་བ་མྱོང་བ་ཡོངས་སུ་ཆགས་པས་མ་ཡིན། སྒྲིབ་པ་སྣ་
ཚོགས་གྱིས་བསྒྲིབས་ཤིང་འཁོར་བའི་རྒྱུད་ན་འགྲེ་ལྡོག་པ་མ་ཡིན་གྱི། ལྷ་མོ་བྱང་ཆུབ་སེམས་དཔའ་རྣམས་ནི་སེམས་ཅན་འཁོར་བའི་རྒྱ་མཚོ་ན་འཁོད་ཅིང་སྡུག་བསྔལ་དཔག་ཏུ་
མེད་པས་ཤིན་ཏུ་མནར་བ་རྣམས་ལ་སྙིང་རྗེ་ཆེན་པོ་བསྐྱེད་ཅིང་། འགྲོ་བ་ཐམས་ཅད་ཡོངས་སུ་བསྡུ་བའི་སྨོན་ལམ་ཆེན་པོ་མངོན་པར་བསྒྲུབས་སྟེ། དེ་དག་སྙིང་རྗེ་ཆེན་པོས་སྨོན་ལམ་
མངོན་པར་བསྒྲུབ་པའི་ཤུགས་གྱིས་སེམས་ཅན་ཡོངས་སུ་སྨིན་པར་བྱ་བ་དང་། གདུལ་བ་ལ་བརྩོན་ཞིང་འཁོར་བ་ན་བྱང་ཆུབ་སེམས་དཔའི་སྤྱད་པ་སྤྱོད་པར་སྣང་ངོ་། །དེ་དག་ནི་སེམས་
ཅན་ཐམས་ཅད་ཀྱི་སྒྲིབ་པ་ཐམས་ཅད་རྣམ་པར་བཟློག་པའི་དོན་དུ་ཐམས་ཅད་མཁྱེན་པའི་ཡེ་ཤེས་སྒྲིབ་པ་མེད་པ་ཡོངས་སུ་ཚོལ་ཞིང་དེ་བཞིན་གཤེགས་པ་ཐམས་ཅད་མཆོད་པ་དང་། 

77-1-127b

བསྙེན་པའི་སྨོན་ལམ་མངོན་པར་བསྒྲུབ་པོ། །དེ་དག་དེ་བཞིན་གཤེགས་པ་མཆོད་ཅིང་རིམ་གྲོར་བྱ་བའི་སྨོན་ལམ་གྱི་དབང་གིས་བྱང་ཆུབ་སེམས་དཔའི་སྤྱོད་པས་ཡོངས་སུ་སྐྱོ་བ་མེད་དེ། 
དེ་དག་བྱང་ཆུབ་སེམས་དཔའི་སྤྱད་པ་ལ་སྤྱོད་པའི་ཚེ། ཀུན་ནས་ཉོན་མོངས་པའི་ཞིང་མཐོང་ན། སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་བྱ་བའི་སྨོན་ལམ་མངོན་པར་བསྒྲུབ་བོ། །
ཀུན་ནས་ཉོན་མོངས་པའི་ཞིང་ཡོངས་སུ་སྦྱོང་ཞིང་སེམས་ཅན་ཐམས་ཅད་ཀྱི་སྐྱེ་མཆེད་སྣ་ཚོགས་མཐོང་བར་གྱུར་པའི་ཚེ། ཆོས་ཀྱི་སྐུ་ཐ་དད་པ་མེད་ཅིང་བླ་ན་མེད་པ་ཡོངས་སུ་དག་པར་བྱ་བའི་
ཕྱིར་སྨོན་ལམ་མངོན་པར་བསྒྲུབ་པོ། །སེམས་ཅན་རྣམས་ཀྱི་ལུས་དང་ངག་དང་སེམས་ཀུན་ནས་ཉོན་མོངས་པ་དང་ལྡན་པར་མཐོང་ན། སེམས་ཅན་ཐམས་ཅད་ཀྱི་ལུས་དང་། ངག་དང་། 
སེམས་ཀྱི་རྒྱན་ཡོངས་སུ་དག་པར་བྱ་བའི་ཕྱིར་སྨོན་ལམ་མངོན་པར་བསྒྲུབ་པོ། །སེམས་ཅན་སྐྱེ་མཆེད་མ་ཚང་བ་དང་། སེམས་ཡོངས་སུ་མ་དག་མ་མཐོང་ན། སེམས་ཅན་ཐམས་ཅད་ཀྱི་
སེམས་དང་། སྤྱོད་པ་ཡོངས་སུ་སྦྱོང་ཞིང་བྱང་ཆུབ་སེམས་དཔའི་སྤྱད་པ་ལ་སྤྱོད་པས་ཡོངས་སུ་སྐྱོ་བ་མེད་དོ། །ལྷ་མོ་དེ་ལྟར་བྱང་ཆུབ་སེམས་དཔའ་རྣམས་ནི་ཡོངས་སུ་སྐྱོ་བ་མེད་པའི་སེམས་
ཀྱིས་བྱང་ཆུབ་སེམས་དཔའི་སྤྱོད་པ་མཐའ་དང་དབུས་མེད་པ་ལ་སྤྱོད་དོ། །དེ་ལྟར་སྤྱོད་པ་ནི་ལྷ་དང་མིའི་ཕུན་སུམ་ཚོགས་པ་ཡོངས་སུ་བསྐྱེད་པས་ལྷ་དང་བཅས་པའི་འཇིག་རྟེན་གྱི་རྒྱན་དུ་
གྱུར་པ་ཡིན། བྱང་ཆུབ་ཏུ་སེམས་བསྐྱེད་པ་ལ་རབ་ཏུ་འགོད་པའི་ཕྱིར་ཕ་དང་མར་གྱུར་པ་ཡིན། བྱང་ཆུབ་སེམས་དཔའི་ལམ་དུ་འཛུད་པས་མ་མ་ལྟ་བུར་གྱུར་པ་ཡིན། ངན་སོང་གི་གཡང་སའི་

77-1-128a

འཇིགས་པ་ལས་བསྲུང་བའི་ཕྱིར་ལྷན་ཅིག་སྐྱེས་པའི་ལྷ་རྟག་ཏུ་ཕྱི་བཞིན་འབྲང་བ་ལྟ་བུར་གྱུར་པ་ཡིན། འཁོར་བའི་རྒྱ་མཚོ་ལས་སྒྲོལ་བའི་ཕྱིར་མཉན་པ་ཆེན་པོ་ལྟ་བུར་གྱུར་
པ་ཡིན། བདུད་དང་ཉོན་མོངས་པའི་འཇིག་པ་ཐམས་ཅད་རྣམ་པར་བཟློག་པའི་ཕྱིར་སྐྱབསུ་གྱུར་པ་ཡིན། ཤིན་ཏུ་བསིལ་བའི་རང་བཞིན་ཉེ་བར་སྟོབ་པས་གནས་སུ་གྱུར་པ་ཡིན། སངས་
རྒྱས་རྒྱ་མཚོ་ཐམས་ཅད་དུ་འཇུག་པར་བྱེད་པས་མུ་སྟེགས་སུ་གྱུར་པ་ཡིན། ཆོས་རིན་པོ་ཆེའི་གླིང་དུ་སྐྱེལ་བས་མགོན་མེད་པར་གྱུར་པ་ཡིན། སངས་རྒྱས་ཀྱི་ཡོན་ཏན་ཐམས་ཅད་ཀྱི་མེ་ཏོག་
གིས་སེམས་ཡོངས་སུ་རྒྱས་པར་བྱེད་པས་མེ་ཏོག་ཏུ་གྱུར་པ་ཡིན། བསོད་ནམས་དང་ཡེ་ཤེས་ཀྱི་འོད་ཡངས་པ་རབ་ཏུ་འགྱེད་པས་རྒྱན་དུ་གྱུར་པ་ཡིན། ཀུན་ནས་མཛེས་པས་དགའ་བ་དང་བདེ་
བ་དམ་པ་བྱེད་པ་ཡིན། ཁ་ན་མ་ཐོ་བ་མེད་པའི་ལས་ལ་ནན་ཏན་དུ་བྱེད་པས་ཕྲད་ན་ལེགས་པ་ཡིན། ཡན་ལག་དམ་པ་རྣམ་པ་ཐམས་ཅད་དུ་ཡོངས་སུ་ཚང་བའི་ལུས་དང་ལྡན་པས་ཀུན་ཏུ་
བཟང་བ་ཡིན། བལྟ་ན་མི་འཐུན་པ་མེད་པས་གཏང་མི་བྲ་བའི་གཟུགས་དང་ལྡན་པ་ཡིན། ཡེ་ཤེས་ཀྱི་འོད་གཟེར་རབ་ཏུ་འགྱེད་པའི་ཕྱིར་འོད་བྱེད་པ་ཡིན། ཆོས་ཀྱི་སྒྲོན་མ་འཛིན་པའི་
ཕྱིར་སྣང་བ་བྱེད་པ་ཡིན། བྱང་ཆུབ་ཀྱི་བསམ་པ་ཡོངས་སུ་དག་པར་བྱེད་པའི་ཕྱིར་གསལ་བར་བྱེད་པ་ཡིན། བདུད་ཀྱི་ལས་རྣམ་པར་བཟློག་པའི་ཕྱིར་དམག་དཔོན་དུ་གྱུར་པ་ཡིན། ཤེས་
རབ་ཀྱི་འོད་གཟེར་གྱི་དྲ་བ་རབ་ཏུ་སྣང་བ་འགྱེད་པའི་ཕྱིར་ཉི་མར་གྱུར་པ་ཡིན། ཆོས་ཀྱི་ནམ་མཁའ་ལ་བློའི་ཟླ་བ་འཆར་བར་བྱེད་པས་ཟླ་བར་གྱུར་པ་ཡིན། འགྲོ་བ་ཐམས་ཅད་དུ་ཆོས་

77-1-128b

ཀྱི་སྤྲིན་ཆེན་པོའི་ཆར་འབབས་པས་སྤྲིན་དུ་གྱུར་པ་ཡིན་ཏེ། ལྷ་མོ་དེ་ལྟར་ནན་ཏན་དུ་བྱེད་པའི་བྱང་ཆུབ་སེམས་དཔའ་རྣམས་ནི་སེམས་ཅན་ཐམས་ཅད་ཀྱི་ཡིད་དུ་འོང་བ་ཡིན་ནོ། །དེ་
ནས་བྱང་ཆུབ་སེམས་དཔའ་ཡོངས་སུ་འགྲོ་བའི་ཁང་པའི་ལྷ་མོ་མྱ་ངན་མེད་པའི་དཔལ་ཁྱིམ་གྱི་ལྷ་མོ་སྟོང་ཕྲག་བཅུ་དང་བཅས་པས། ཚོང་དཔོན་གྱི་བུ་ནོར་བཟངས་ལ་ལྷ་རྫས་ལས་ཀྱང་
འདས་པའི་མེ་ཏོག་དང་ཕྲེང་བ་དང་། བདུག་སྤོས་དང་། ཕྱེ་མ་དང་བྱུག་པ་དང་། རིན་པོ་ཆེའི་རྒྱན་གྱི་ཆར་ཡིད་ཀྱི་རང་བཞིན་མངོན་པར་ཕབ་སྟེ། ཀུན་ནས་བསྐོར་ཅིང་རྗེས་སུ་འབྲངས་ནས་
བྱང་ཆུབ་སེམས་དཔའི་ཁང་པར་འགྲོ་བའི་ཚེ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །བྱང་ཆུབ་རྫོགས་པར་ཐུགས་བསྐྱེད་ཅིང་། །སེམས་ཅན་ཀུན་ལ་ཐུགས་བརྩེ་
བས། །རྒྱལ་བའི་ཡེ་ཤེས་ཉི་མ་རྣམས། །བར་འགའ་ཞིག་ན་འཇིག་རྟེན་འབྱུང་། །བསྐལ་པ་བྱེ་བ་མང་བས་ཀྱང་། །ཁྱོད་ཀྱི་ཞལ་མཐོང་ཤིན་ཏུ་དཀའ། །འཇིག་རྟེན་མ་རིག་མདོངས་པ་
ལ། ཁྱོད་ཀྱི་ཡེ་ཤེས་ཉི་ཆེན་ཡིན། །མྱི་ཤེས་རབ་རིབ་བསྒྲིབས་པ་ཡི། །འཇིག་རྟེན་ཕྱིན་ཅི་ལོག་གཟིགས་ནས། །ཐུགས་རྗེ་ཆེན་པོ་རབ་བསྐྱེད་དེ། །ཁྱོད་ནི་རང་བྱུང་ཉིད་དུ་ཞུགས། ཁྱོད་
ཀྱི་དགོངས་པ་རྣམ་དག་པས། །སངས་རྒྱས་བྱང་ཆུབ་དོན་དུ་བརྩོན། །དགེ་བཤེས་བསྙེན་བཀུར་བསྟེན་མཛད་ཅིང་། །ལུས་སྲོག་ཕངས་པར་མཛད་མི་མངའ། །ཁྱོད་ནི་འཇིག་རྟེན་རྟེན་མི་མངའ། 
འདུ་འཛི་མི་མངའ་གནས་མི་མངའ། །འདྲེས་པ་མ་མཆིས་མི་རྟེན་པས། །དགོངས་པ་ཐོགས་མེད་ནམ་མཁའ་བཞིན། །བྱང་ཆུབ་སེམས་དཔའི་སྤྱོད་མཛད་ཅིང་། །བསོད་ནམས་

77-1-129a

དཀྱིལ་འཁོར་འོད་བཟངས་སོ། །ཡེ་ཤེས་སྒྲོན་མ་རབ་འགྱེད་པ། །འཇིག་རྟེན་ཚད་མེད་ཀུན་ཏུ་འཆར། །འཇིག་རྟེན་ནས་ཀྱང་འཕགས་མི་མཛད། །འཇིག་རྟེན་ཆོས་ཀྱིས་ཡོང་མི་
གོས། །ཆགས་པ་མེད་པར་འཇིག་རྟེན་སྤྱོད། །མཁའ་ལ་སེར་བུ་ཇི་བཞིན་ནོ། །བསྐལ་པའི་མེ་འབར་མེ་བཞིན་དུ། །རྟག་ཏུ་འབར་བས་རབ་ཏུ་བརྩོན། །མེ་ལྟ་བུ་ཡིས་བརྩོན་འགྲུས་
ཀྱི། །བྱང་ཆུབ་སྤྱད་པ་སྤྱོད་པར་མཛད། །སེང་གེ་བཞིན་དུ་ཤིན་ཏུ་དཔའ། །བརྩོན་འགྲུས་རྣམ་པར་གནོན་པ་བསྟན། །ཡེ་ཤེས་རྣམ་པར་གནོན་དང་ལྡན། །གཞན་གྱིས་ཐུབ་པ་མེད་པར་
སྤྱོད། །ཆོས་དབྱིངས་རྒྱ་མཚོ་འདི་དག་ན། །རྒྱ་མཚོའི་ཚུལ་རྣམས་ཇི་སྙེད་པ། །དེར་ཡང་དགེ་བཤེས་བསྙེན་བཀུར་བས། །དཔའ་བོ་ཁྱོད་ནི་འཇུག་པར་འགྱུར། །དེ་ནས་བྱང་ཆུབ་སེམས་
དཔའ་ཡང་དག་འགྲོ་བའི་ཁང་པའི་ལྷ་མོ་མྱ་ངན་མེད་པའི་དཔལ་གྱིས། ཚོང་དཔོན་གྱི་བུ་ནོར་བཟངས་ལ་ཚིགསུ་བཅད་པ་དེ་དག་གིས་མངོན་པར་བསྟོད་དེ། དེ་འགྲོ་བའི་ཕྱི་བཞིན་ཆོས་འདོད་
པའི་དོན་དུ་འབྲང་བར་གྱུར་ཏོ། །དེ་ནས་ཚོང་དཔོན་གྱི་བུ་ནོར་བཟངས་བྱང་ཆུབ་སེམས་དཔའ་ཡང་དག་པར་འགྲོ་བའི་ཁང་པ་ཆོས་ཀྱི་དབྱིངས་རབ་ཏུ་སྣང་བའི་འོད་དུ་ཕྱིན་ཏེ། ནང་དུ་སོང་ནས་
ཤཱཀྱའི་བུ་མོ་གོ་བ་མཐོང་བར་འདོད་དེ་ཀུན་ཏུ་བལྟས་ན་ཤཀྱའི་བུ་མོ་གོ་བ་བྱང་ཆུབ་སེམས་དཔའ་ཡང་དག་པར་བགྲོ་བའི་ཁང་པ་ཆོས་ཀྱི་དབྱིངས་རབ་ཏུ་སྣང་བའི་འོད་ཀྱི་དབུས་ན། སྟན་རིན་
པོ་ཆེ་བྱང་ཆུབ་སེམས་དཔའ་ཐམས་ཅད་ཀྱི་གནས་སྣང་བར་བྱེད་པའི་གཟུགས་བརྙན་གྱི་པད་མོའི་སྙིང་པོ་ཅན་ཞིག་ལ་བུད་མེད་རྒྱལ་པོའི་རིགས་སུ་བྱུང་བ། སྔོན་བྱང་ཆུབ་སེམས་

77-1-129b

དཔའི་སྤྱོད་པ་ལ་དགེ་བའི་རྩ་བའི་སྐལ་པ་མཉམ་པ། སྔོན་སྦྱིན་པའི་ཡོངས་སུ་བསྡུ་བས་ཤིན་ཏུ་བསྡུས་པ། ཚིག་སྙན་ཅིང་འཇམ་པར་སྨྲ་བའི་ངང་ཚུལ་དང་ལྡན་པ། ཐམས་ཅད་
མཁྱེན་པ་ཉིད་དུ་དོན་མངོན་ཏུ་བྱ་བས་ཤིན་ཏུ་བསྡུས་པ། སངས་རྒྱས་དང་བྱང་ཆུབ་སེམས་དཔའི་ཡང་དག་པར་བསྒྲུབ་པ་ལ་དོན་འཐུན་པས་ཤིན་ཏུ་བཟུང་བ། སྙིང་རྗེ་ཆེན་པོ་སྔོན་དུ་འགྲོ་
བས་བུ་དང་བུ་མོ་ཡོངས་སུ་བཟུང་བའི་ཚུལ་བཅངས་པ། བྱམས་པ་ཆེན་པོ་དང་ལྡན་པའི་རང་གི་ཁྱིམ་ཐབ་གྱི་རྗེས་སུ་འབྲང་བ་ཡོངས་སུ་དག་པར་བྱས་པ། སྔོན་བྱང་ཆུབ་སེམས་དཔའི་
ཐབས་མཁས་པ། བསམ་གྱིས་མི་ཁྱབ་པས་ཡོངས་སུ་སྨིན་པར་བྱས་པ་སྟོང་ཕྲག་བརྒྱད་བཅུ་རྩ་བཞིའི་འཁོར་ཀྱིས་ཀུན་ནས་བསྐོར་ཅིང་འདུག་པ་མཐོང་ངོ་། །བུད་མེད་སྟོང་ཕྲག་བརྒྱ་ཅུ་
རྩ་བཞི་པོ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་བྱང་ཆུབ་སེམས་དཔའི་ཕ་རོལ་ཏུ་ཕྱིན་པའི་ཚུལ་ལ་ཞུགས་པ། བྱང་ཆུབ་སེམས་དཔའི་བསླབ་པ་
ལ་གཞན་གྱིས་དྲིང་མི་འཇོག་པ། ཆགས་པ་ཐམས་ཅད་དང་བྲལ་བའི་སེམས་དང་ལྡན་པ། འཁོར་ཀྱི་དགའ་བ་ཐམས་ཅད་ཀྱིས་སྐྱོ་བའི་ཡིད་དང་ལྡན་པ། ཆོས་ཀྱི་དབྱིངས་ཀྱི་ཚུལ་ཆགས་པ་མེད་
པས་ཡོངས་སུ་དག་པ་ཐམས་ཅད་མཁྱེན་པ་ཉིད་མངོན་ཏུ་བྱ་བའི་སེམས་ཀྱི་ཤུགས་དང་ལྡན་པ། སྒྲིབ་པ་དང་བར་དུ་གཅོད་པའི་དྲ་བ་དང་བྲལ་བ། ཆགས་པའི་ལམ་ཐམས་ཅད་ལས་ཤིན་ཏུ་
འདས་པ། ཆོས་ཀྱི་སྐུ་ལ་ལེགས་པར་སྤྲུལ་པས་རྣམ་པར་སྤྱོད་པ་འཇིག་རྟེན་ཐམས་ཅད་ཡོངསུ་སྨིན་པར་བྱ་བ་དང་། གདུལ་བ་ལ་མངོན་པར་ཕྱོགས་པ། བསོད་ནམས་རྒྱ་མཚོའི་དྲི་མ་

77-1-130a

མེད་པས་ཡོངས་སུ་བྱུང་བའི་སེམས་དང་ལྡན་པ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨོན་ལམ་གྱིས་ཤིན་ཏུ་བྱུང་བ། བྱང་ཆུབ་སེམས་དཔའི་སྟོབས་ཀྱི་
ཤུགས་ཡངས་པས་ཡེ་ཤེས་ཀྱི་ཉི་མའི་དཀྱིལ་འཁོར་གྱིས་སེམས་རབ་ཏུ་སྣང་བ་ཡང་དག་པར་བསྐྱེད་པ་ཤ་སྟག་གོ། །དེ་ནས་ཚོང་དཔོན་གི་བུ་ནོར་བཟངས་ཤཱཀྱའི་བུ་མོ་གོ་བ་གང་ན་བ་དེར་
ཕྱིན་ནས། ཤཱཀྱའི་བུ་མོ་གོ་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ལངས་ནས་མདུན་དུ་འདུག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་མ་བདག་གིས་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་དུ་སེམས་བསྐྱེད་ན་ཇི་ལྟར་ན་བྱང་ཆུབ་སེམས་དཔའ་རྣམས་འཁོར་ཡང་འཁོར་བའི་སྐྱོན་གྱིས་མི་གོས་པ་དང་། ཆོས་ཐམས་ཅད་
མཉམ་པ་ཉིད་ཀྱི་རང་བཞིན་ཡང་ཁོང་དུ་ཆུད་ལ་ཉན་ཐོས་དང་རང་སངས་རྒྱས་ཀྱི་ས་ལ་ཡང་མི་གནས་པ་དང་། སངས་རྒྱས་ཀྱི་ཆོས་སྣང་བ་ཡང་རབ་ཏུ་ཐོབ་ལ་བྱང་ཆུབ་སེམས་དཔའི་སྤྱོད་
པ་ཡང་རྒྱུན་མི་གཅོད་པ་དང་། བྱང་ཆུབ་སེམས་དཔའི་ས་ལ་ཡང་རབ་ཏུ་གནས་ལ་དེ་བཞིན་གཤེགས་པའི་ཡུལ་ཡང་ཡོངས་སུ་སྟོན་པ་དང་། འཇིག་རྟེན་གྱི་ལམ་གྱི་རྒྱུད་ཐམས་ཅད་ལས་
ཀྱང་ཡོངས་སུ་འདས་ལ། འཇིག་རྟེན་གྱི་ལམ་རྒྱུད་ཐམས་ཅད་དུ་ཡང་ཉེ་བར་སྤྱོད་པ་དང་། ཆོས་ཀྱི་ལུས་ཡོངསུ་གྲུབ་པ་དང་ལྡན་ཡང་། གཟུགས་ཀྱི་ལུས་ཁ་དོག་མཐའ་ཡས་པ་འང་མངོན་པར་
བསྒྲུབ་པ་དང་། མཚན་མ་མེད་པའི་ཆོས་ཀྱི་སྐུ་ལ་ཡང་རབ་ཏུ་གཞོལ་ལ་འགྲོ་བ་ཐམས་ཅད་ཀྱི་ཁ་དོག་དང་དབྱིབས་གྱི་ལུས་ཀྱང་ཡོངས་སུ་སྟོན་པ་དང་། ཆོས་ཐམས་ཅད་བརྗོད་དུ་མ་མཆིས་

77-1-130b

པར་ཡང་དག་པར་རྟོགས་ལ། ངག་གི་ལམ་དང་ངེས་པའི་ཚིག་ཐམས་ཅད་བརྗོད་པས་ཀྱང་སེམས་ཅན་རྣམས་ལ་ཆོས་སྟོན་པ་དང་། སེམས་ཅན་ཐམས་ཅད་སེམས་ཅན་མེད་པར་ཡང་རབ་ཏུ་
ཤེས་ལ། སེམས་ཅན་གྱི་ཁམས་གདུལ་བའི་ཚུལ་ལས་ཀྱང་མི་ལྡོག་པ་དང་། ཆོས་ཐམས་ཅད་མ་སྐྱེས་པ་དང་། མ་འགགས་པར་ཡང་ཁོང་དུ་ཆུད་ལ་དེ་བཞིན་གཤེགས་པ་ཐམས་ཅད་ལ་
མཆོད་ཅིང་རིམ་གྲོར་བྱ་བའི་སྦྱོར་བ་ལས་ཀྱང་ཕྱིར་མི་ལྡོག་པ་དང་། ཆོས་ཐམས་ཅད་ལ་ལས་དང་རྣམ་པར་སྨིན་པ་མ་མཆིས་པར་ཡང་རྟོགས་ལ། དགེ་བའི་ལས་མངོན་པར་འདུ་བྱ་བའི་སྦྱོར་བ་ལས་
ཀྱང་ཕྱིར་མི་ལྡོག་པ་མ་འཚལ་ཏོ། །དེ་སྐད་ཅེས་སྨྲས་པ་དང་། ཤཱཀྱའི་བུ་མོ་གོ་བས་ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་དེ་ལྟར་བྱང་ཆུབ་སེམས་དཔའི་སྤྱོད་
པའི་ཆོས་ཉིད་རྣམ་པ་དེ་ལྟ་བུས་དྲི་བར་སེམས་པ་ལེགས་སོ་ལེགས་སོ། །དྲི་བ་བརྗོད་པ་དེ་དག་ཀྱང་ཀུན་ཏུ་བཟང་པོའི་སྨོན་ལམ་དང་སྤྱོད་པ་ལ་མངོན་ཏུ་གྱུར་པའི་ཚིག་གོ། །རིགས་ཀྱི་བུ་དེ་བས་
ན་ལེགས་པར་ཉོན་ལ་ཤིན་ཏུ་ཡིད་ལ་ཟུང་ཤིག་དང་། སངས་རྒྱས་ཀྱི་བྱིན་གྱིས་བསྟན་པར་བྱའོ། །རིགས་ཀྱི་བུ་ཆོས་བཅུ་དང་ལྡན་པའི་བྱང་ཆུབ་སེམས་དཔའ་རྣམས་ནི་བྱང་ཆུབ་སེམས་དཔའི་
སྤྱོད་པ་རྣམ་པ་འདི་ལྟ་བུ་མིག་འཕྲུལ་གྱི་གཞིའི་དཔེ་དང་འདྲ་བ། ཡེ་ཤེས་ཀྱི་འོད་ཀུན་ཏུ་འབྱུང་བ་ཡོངས་སུ་རྫོགས་པར་བྱེད་དོ། །བཅུ་གང་ཞེ་ན་འདི་ལྟ་སྟེ། དགེ་བའི་བཤེས་གཉེན་རླབས་པོ་ཆེ་
ལ་བརྟེན་པ་དང་། མོས་པ་རྒྱ་ཆེན་པོ་རབ་ཏུ་ཐོབ་པ་དང་། དགེ་བའི་བསམ་པ་རླབས་པོ་ཆེ་རྣམ་པར་དག་པ་དང་། བསོད་ནམས་དང་ཡེ་ཤེས་རྒྱ་མཚོ་ཡངས་པས་རབ་ཏུ་བརྟེན་པའི་སེམས་

77-1-131a

དང་། སངས་རྒྱས་སྐྱེ་བ་འབྱུང་བའི་ཆོས་བསྟན་པ་ཆེན་པོ་ཐོས་པ་རབ་ཏུ་ཐོབ་པ་དང་། དུས་གསུམ་གྱི་དེ་བཞིན་གཤེགས་པ་ལ་མོས་པའི་སེམས་ཀྱིས་གནས་པ་དང་། བྱང་ཆུབ་སེམས་
དཔའི་སྤྱོད་པའི་དཀྱིལ་འཁོར་ཐམས་ཅད་མཉམ་པ་ཉིད་དུ་ཁོང་དུ་ཆུད་པ་དང་། དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་རླབས་རབ་ཏུ་ཐོབ་པ་དང་། རང་བཞིན་གྱིས་སྙིང་རྗེ་ཆེན་པོའི་ལྷག་པའི་
བསམ་པ་རྣམ་པར་དག་པ་དང་། འཁོར་བའི་འཁོར་ལོ་ཐམས་ཅད་རབ་ཏུ་གཅད་པའི་སེམས་ཀྱི་སྟོབས་ཤུགས་དྲག་པོ་དང་ལྡན་པ་རབ་ཏུ་ཐོབ་པ་སྟེ། རིགས་ཀྱི་བུ་ཆོས་བཅུ་པོ་དེ་དག་དང་ལྡན་པའི་
བྱང་ཆུབ་སེམས་དཔའི་སྤྱོད་པ་རྣམ་པ་འདི་ལྟ་བུ་མིག་འཕྲུལ་གྱི་གཞིའི་དཔེ་དང་འདྲ་བ་འོད་ཀུན་ཏུ་འབྱུང་བ་ཡོངས་སུ་རྫོགས་པར་བྱེད་དོ། །རིགས་ཀྱི་བུ་དེ་ལ་བརྩོན་འགྲུས་ཕྱིར་མི་ལྡོག་པ་དང་
ལྡན་པའི་བྱང་ཆུབ་སེམས་དཔའ་རྣམས་ནི་ཆོས་དེ་དག་ཐོབ་པར་གྱུར་ནས་ཀྱང་མི་ཟད་པའི་ཚུལ་དུ་མངོན་པར་བསྒྲུབ་ཅིང་། བསྒོམ་པ་དང་ཤིན་ཏུ་རྒྱ་ཆེ་བར་བྱ་བའི་ཕྱིར་དགེ་བའི་བཤེས་གཉེན་
བསྙེན་བཀུར་ཅིང་རྣམ་པ་བཅུས་མངོན་པར་དགའ་བར་བྱེད་དོ། །བཅུ་གང་ཞེ་ན་འདི་ལྟ་སྟེ། ལུས་དང་སྲོག་ལ་ཕོངས་པར་མི་བརྩི་བ་དང་། འཁོར་བའི་ཡོ་བྱད་དོན་དུ་མི་གཉེར་བ་དང་། ཆོས་ཐམས་
ཅད་ཀྱི་རང་བཞིན་མཉམ་པ་ཉིད་ཁོང་དུ་ཆུད་པ་དང་། ཐམས་ཅད་མཁྱེན་པའི་སྨོན་ལམ་ལས་ཕྱིར་མི་ལྡོག་པ་དང་། ཆོས་ཀྱི་དབྱིངས་ཀྱི་ཚུལ་ཐམས་ཅད་ལ་རྣམ་པར་བལྟ་བ་དང་། སྲིད་པའི་རྒྱ་མཚོ་
ཐམས་ཅད་ལས་གྱེན་དུ་འཕགས་པའི་ཡིད་དང་། གནས་མེད་པའི་ཆོས་ཀྱི་ནམ་མཁའ་ལ་མི་གནས་མི་རྟེན་པ་དང་། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་ལ་སྒྲིབ་པ་མེད་པ་དང་། 

77-1-131b

ཞིང་རྒྱ་མཚོ་ཐམས་ཅད་དུ་རབ་ཏུ་འདལ་བ་དང་། བྱང་ཆུབ་སེམས་དཔའི་ཡེ་ཤེས་ཀྱི་དཀྱིལ་འཁོར་སྒྲིབ་པ་མེད་པ་ཤིན་ཏུ་སྦྱངས་པ་སྟེ། རིགས་ཀྱི་བུ་ཆོས་བཅུ་པོ་དེ་དག་དང་ལྡན་པའི་བྱང་ཆུབ་
སེམས་དཔའ་རྣམས་དགེ་བའི་བཤེས་གཉེན་བསྙེན་བཀུར་ཅིང་མངོན་པར་བྱེད་དོ། །དེ་ནས་ཤཱཀྱའི་བུ་མོ་གོ་བས་དོན་དེ་ཉིད་ཡོངས་སུ་བསྟན་པར་བྱ་བའི་ཕྱིར། སངས་རྒྱས་ཀྱི་བྱིན་གྱིས་ཕྱོགས་བཅུ་
བལྟས་ཏེ། དེའི་ཚེ་ཚིགསུ་བཅད་པ་འདི་དག་སྨྲས་སོ། །རླབས་ཆེན་དྲི་མེད་བློ་ལྡན་གཞན་གྱི་དོན་ཞུགས་ཤིང་། །དགེ་བཤེས་དམ་པ་བསྙེན་བརྩོན་གཡོ་དང་སྒྱུ་མེད་པ། །སྟོན་པའི་འདུ་
ཤེས་ཐོབ་ཅིང་སྐྱོ་མེད་བརྩོན་འགྲུས་ཅན། །དེ་དག་སྤྱོད་པ་འཇིག་རྟེན་མི་འཕྲུལ་འདྲ་འདི་ཡིན། །གང་རྣམས་མོས་པ་རླབས་ཆེན་མཁའ་དང་འདྲ་ལྡན་ཞིང་། །དེའི་ཁོངས་སུ་དུས་གསུམ་
འཇིག་རྟེན་ཆུད་པ་དང་། །ཞིང་དང་སེམས་ཅན་ཆོས་དང་སངས་རྒྱས་དེ་བཞིན་པ། །ཡེ་ཤེས་འོད་བྱེད་སྤྱོད་པ་དེ་དག་འདི་ཡིན་ནོ། །གང་རྣམས་བསམ་པ་མཁའ་འདྲ་མཐའ་དང་དབུས་མེད་ལ། །
ཀུན་ནས་ཉོན་མོངས་དྲི་མས་མ་གོས་རབ་དག་ཅིང་། །དེ་བཞིན་གཤེགས་པ་ཀུན་ཀྱི་ཡོན་ཏན་བྱུང་གྱུར་པ། །དེ་དག་སྤྱོད་པ་མིག་འཕྲུལ་གཞི་ཡིའི་རྣམ་པ་འདྲ། །ཀུན་མཁྱེན་ཡེ་ཤེས་རྣམ་ཡངས་
ཚད་མེད་བསམ་ཡས་དག །ཡོན་ཏན་རྒྱ་མཚོས་ཡིད་གསལ་ལྡན་པ་ཉེར་བརྟན་པ། །དེ་དག་བསོད་ནམས་རྒྱ་མཚོའི་ལུས་དང་སྙིང་པོ་སྟེ། །འཇིག་རྟེན་སྤྱོད་ཀྱང་འཇིག་རྟེན་དྲི་མས་གོས་མི་
འགྱུར། །རྒྱལ་བའི་གསུང་གི་ཡན་ལག་སྒྲ་སྐད་ཚུལ་ཀུན་གྱིས། །ཆོས་ཀྱི་འབྲུག་སྒྲ་ཉན་ཀྱང་གང་རྣམས་མི་ངོམས་ཤིང་། །ཆོས་ཚུལ་རྗེས་སུ་སྙེག་པའི་ཤེས་རབ་འོད་ཀྱི་སྒྲོན། །དེ་དག་འགྲོ་བར་

77-1-132a

འོད་གསལ་བྱེད་པའི་སྤྱོད་འདི་ཡིན། །གང་རྣམས་ཕྱོགས་བཅུའི་དེ་བཞིན་གཤེགས་པ་ཚད་མེད་པ། །གཞན་དང་གཞན་དག་སེམས་ཀྱི་སྐད་ཅིག་ཀུན་སེམས་ཤིང་། །བདེ་གཤེགས་
རྒྱ་མཚོ་ཐམས་ཅད་བལྟ་ཞིང་ཤེས་བྱེད་པ། །སངས་རྒྱས་སེམས་ལྡན་དེ་དག་སྤྱོད་ཡུལ་འདི་ཡིན་ནོ། །རྒྱལ་བ་རྣམས་ཀྱི་རྣམ་པར་ཡངས་པའི་འཁོར་མཐོང་ཞིང་། །དེ་དག་ཏིང་ངེ་འཛིན་ཚུལ་རྒྱ་
མཚོ་མང་པོ་དང་། །སྨོན་ལམ་རྒྱ་མཚོ་མཐའ་དང་དབུས་མེད་ཚུལ་འཇུག་པ། །མིག་འཕྲུལ་ལྟ་བུ་དེ་དག་སྤྱོད་པ་འདི་ཡིན་ནོ། །ཕྱོགས་བཅུའི་རྒྱལ་བ་མ་ལུས་ཀུན་ཀྱིས་བྱིན་རླབས་ཏེ། །ཕྱི་མཐའི་
སྐལ་པར་སྤྱོད་བྱེད་ཀུན་ཏུ་བཟང་པོ་རྣམས། །ཞིང་རྣམས་འབྱམ་ཀླས་ཀུན་ཏུ་གཟུགས་བརྙན་བྱུང་གྱུར་པ། །ཆོས་འོད་བྱེད་པ་དེ་དག་སྤྱོད་པ་འདི་ཡིན་ནོ། །གང་རྣམས་ཡེ་ཤེས་ཉི་མའི་སྙིང་རྗེའི་
དཀྱིལ་འཁོར་ཅན། །འགྲོ་བ་ཉམ་ཉེས་མཐོང་ཞིང་ཆོས་ཀྱི་འོད་སྣང་བས། །འགྲོ་བའི་མུན་པ་བསྩལ་ཅིང་བསྟན་པ་འཆར་འབྱུང་བ། །ཉི་མ་ལྟ་བུར་དེ་དག་སྤྱོད་པ་འདི་ཡིན་ནོ། །སྐྱེ་དགུ་སྲིད་པའི་
རྒྱུད་ན་འགྲོ་ལྡོག་མཐོང་གྱུར་ནས། །ཡིད་གསལ་འཁོར་བ་རྣམས་ཕྱིར་ཟློག་ལ་རབ་གནས་ཤིང་། །ཆོས་ཀྱི་འཁོར་ལོ་ཀུན་ནས་ཡོངས་སུ་སྒྲུབ་བྱེད་པ། །སྤྱོད་པ་ཀུན་བཟང་དམ་པའི་བློ་ཅན་རབ་ཏུ་
སྤྱོད། །ཚུལ་འདིར་བསླབས་པ་དེ་དག་མཐའ་དང་དབུས་མེད་པའི། །ལུས་རྣམས་བསམ་པ་ཇི་བཞིན་འགྲོ་བར་ཉེར་བསྟན་ཏེ། །གཟུགས་བརྙན་མིག་ཡོར་འདྲ་བའི་རང་ལུས་ཚད་མེད་པས། །
སྲིད་པའི་རྒྱ་མཚོ་དག་ན་འགྲོ་མང་ཡོངས་སྨིན་བྱེད། །བྱམས་ཚུལ་ཤིན་ཏུ་ཡངས་པས་འགྲོ་མང་རྒྱས་བཀང་སྟེ། །མོས་པ་སྣ་ཚོགས་འགྲོ་ལ་རྣམ་པར་སྤྱོད་བསྟན་ནས། །འགྲོ་ལ་བསམ་པ་ཇི་

77-1-132b

བཞིན་ཆོས་ཀྱི་ཆར་འབེབས་ཤིང་། །བརྟན་པ་བྱང་ཆུབ་དོན་དུ་སེམས་ཅན་ཁྲག་ཁྲིག་འདུལ། །དེ་ནས་ཤཀྱའི་བུ་མོ་གོ་བས་ཚིགསུ་བཅད་པ་དེ་དག་སྨྲས་ནས། ཚོང་དཔོན་གྱི་བུ་ནོར་བཟངས་
ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁོ་མོས་ནི་བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་རྒྱ་མཚོའི་ཚུལ་ཐམས་ཅད་ལ་རྣམ་པར་བལྟ་བའི་ཡུལ་
ཐོབ་པའོ། །ནོར་བཟངས་གྱིས་སྨྲས་པ། འཕགས་མ་བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་རྒྱ་མཚོའི་ཚུལ་རྣམ་པར་ལྟ་བའི་ཡུལ་དེ་ཇི་
ལྟ་བུ་ཞིག་མཆིས། སྨྲས་པ་རིགས་ཀྱི་བུ་ཁོ་མོ་བྱང་ཆུབ་སེམས་དཔའི་རྣམ་པར་ཐར་པ་འདི་ལ་སྙོམས་པར་ཞུགས་ན། འཇིག་རྟེན་གྱི་ཁམས་འདིའི་བསྐལ་པ། སངས་རྒྱས་ཀྱི་ཞིང་
བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་མཐོང་ཞིང་ཁོང་དུ་ཆུད་པར་བྱེད་དོ། །བསྐལ་པ་དེ་དག་གི་སེམས་ཅན་ལམ་གྱི་རྒྱུད་ཐམས་ཅད་དུ་གཏོགས་པ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་
སོ། །སེམས་ཅན་དེ་དག་གི་ཤི་འཕོ་དང་སྐྱེ་བའི་སྒོ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །མངོན་པར་འགྲུབ་པའི་སྒོ་ཇི་སྙེད་ཅིག་ཡོད་པ་དང་། ལས་དང་མངོན་པར་འདུ་བྱེད་པ་ཡོངས་སུ་
བསྒྲུབ་པ་ཇི་སྙེད་ཅིག་ཡོད་པ་དང་། ལས་རྣམ་པར་སྨིན་པ་སྣ་ཚོགས་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །དེ་དག་གི་ལས་ཡོངས་སུ་བླངས་པ་དགེ་བ་ཡང་རབ་ཏུ་ཤེས་སོ། །མི་
དགེ་བ་དང་འབྱུང་བ་དང་མི་འབྱུང་བ་དང་། ངེས་པ་དང་མ་ངེས་པ་དང་། ལོག་པར་ངེས་པ་དང་། བག་ལ་ཉལ་བ་དང་བཅས་པ་དང་། བག་ལ་ཉལ་བ་མེད་པ་དང་། དགེ་བའི་རྩ་བ་ཕུན་སུམ་ཚོགས་

77-1-133a

པ་དང་། དགེ་བའི་རྩ་བ་རྒུད་པར་གྱུར་པ་དང་། དགེ་བའི་རྩ་བ་ཡོངས་སུ་ཟིན་པ་དང་། མི་དགེ་བའི་རྩ་བ་ཡོངས་སུ་ཟིན་པ་དང་། དགེ་བ་དང་མི་དགེ་བ་ཡོངས་སུ་ཟིན་པ་དང་། དེ་
དག་གི་དགེ་བའི་ཆོས་ཡོངས་སུ་འདུས་པ་དང་། སྡིག་ཏོའི་ཆོས་ཡོངས་སུ་འདུས་པའི་ལས་ཡོངས་སུ་བླངས་པ་ཡང་རབ་ཏུ་ཤེས་སོ། །བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་
རྡུལ་ཤིན་ཏུ་ཕྲ་བ་སྙེད་པོ་དེ་དག་ལ་སངས་རྒྱས་བཅོམ་ལྡན་འདས་ཇི་སྙེད་ཅིག་བྱུང་བ་དེ་དག་གི་མཚན་རྒྱ་མཚོ་ཡང་ཤེས་ཤིང་ཁོང་དུ་ཆུད་དོ། །སངས་རྒྱས་བཅོམ་ལྡན་འདས་དེ་དག་གི་
ཐུགས་དང་པོ་བསྐྱེད་པ་རྒྱ་མཚོ་ཡང་རབ་ཏུ་ཤེས་སོ། །ཐམས་ཅད་མཁྱེན་པ་ཉིད་དུ་ཞུགས་པའི་ཚུལ་རྒྱ་མཚོ་ཡང་རབ་ཏུ་ཤེས་སོ། །སྨོན་ལམ་རྒྱ་མཚོ་ཐམས་ཅད་མངོན་པར་བསྒྲུབ་
པ་ཡང་རབ་ཏུ་ཤེས་སོ། །སྔོན་གྱི་སངས་རྒྱས་བྱུང་བ་རྣམས་ཀྱི་དྲུང་དུ་གཤེགས་པ་རྒྱ་མཚོ་ཡང་རབ་ཏུ་ཤེས་སོ། །སྔོན་གྱི་སངས་རྒྱས་ལ་མཆོད་ཅིང་རིམ་གྲོར་མཛད་པའི་སྦྱོར་བ་རྒྱ་
མཚོ་ཡང་རབ་ཏུ་ཤེས་སོ། །སྔོན་གྱི་བྱང་ཆུབ་སེམས་དཔའི་སྤྱོད་པ་ཡོངས་སུ་རྫོགས་པར་མཛད་པ་རྒྱ་མཚོ་ཡང་རབ་ཏུ་ཤེས་སོ། །འབྱུང་བའི་རྒྱན་རྒྱ་མཚོ་ཡང་རབ་ཏུ་ཤེས་སོ། །སངས་
རྒྱས་བཅོམ་ལྡན་འདས་དེ་དག་གིས་སེམས་ཅན་ཡོངས་སུ་སྨིན་པར་མཛད་པ་དང་། བཏུལ་བ་རྒྱ་མཚོ་ཡང་རབ་ཏུ་ཤེས་སོ། །མངོན་པར་འཚང་རྒྱ་བར་མཛད་པ་རྒྱ་མཚོ་ཡང་རབ་ཏུ་ཤེས་སོ། །
ཆོས་ཀྱི་འཁོར་ལོ་བསྐོར་བའི་ཁྱུ་མཆོག་གི་མཐུ་དང་རྣམ་པར་འཕྲུལ་པ་ཡང་རབ་ཏུ་ཤེས་སོ། །སངས་རྒྱས་ཀྱི་རྣམ་པར་འཕྲུལ་པ་རྒྱ་མཚོ་ཐམས་ཅད་ཀྱང་རབ་ཏུ་ཤེས་སོ། །སངས་རྒྱས་

77-1-133b

བཅོམ་ལྡན་འདས་དེ་དག་གི་འཁོར་གྱི་དཀྱིལ་འཁོར་རྣམ་པར་ཕྱེ་བ་དག་ཀྱང་རབ་ཏུ་ཤེས་སོ། །འཁོར་ཀྱི་དཀྱིལ་འཁོར་དེ་དག་ན་ཉན་ཐོས་ཇི་སྙེད་ཅིག་འཁོད་པ་དེ་དག་གི་འབྱུང་བའི་ཚུལ་ཡང་
རབ་ཏུ་ཤེས་སོ། །སྔོན་གྱི་དགེ་བའི་རྩ་བ་ཡང་རབ་ཏུ་ཤེས་སོ། །ལམ་བསྒོམས་པ་སྣ་ཚོགས་ཀྱང་རབ་ཏུ་ཤེས་སོ། །ཡེ་ཤེས་ཐོབ་པར་བྱ་བ་ཕུན་སུམ་ཚོགས་ཤིང་རྣམ་པར་དག་པའི་
བྱེ་བྲག་ཀྱང་རབ་ཏུ་ཤེས་སོ། །དེ་བཞིན་གཤེགས་པ་དེ་དགིས་སེམས་ཅན་ཇི་སྙེད་ཅིག་རང་སངས་རྒྱས་ཀྱི་བྱང་ཆུབ་ལ་བཀོད་པ་དེ་དག་ཀྱང་རབ་ཏུ་ཤེས་སོ། །རང་སངས་རྒྱས་དེ་དག་གིས་སྔོན་
གྱི་དགེ་བའི་རྩ་བ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །རང་སངས་རྒྱས་ཀྱི་བྱང་ཆུབ་ཁོང་དུ་ཆུད་པ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །རང་སངས་རྒྱས་དེ་དག་གི་ཞི་བའི་རྣམ་
པར་སྤྱོད་པ་ལ་རྣམ་པར་རྩེ་བའི་རྣམ་པར་ཐར་པའི་སྒོ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །རང་སངས་རྒྱས་དེ་དག་གི་རྫུ་འཕྲུལ་གྱི་རྣམ་པར་འཕྲུལ་པ་ཇི་སྙེད་ཅིག་ཡོད་པ་དེ་དག་
ཀྱང་རབ་ཏུ་ཤེས་སོ། །རང་སངས་རྒྱས་དེ་དག་གི་སེམས་ཅན་ཇི་སྙེད་ཅིག་ཡོངས་སུ་སྨིན་པར་བྱས་པ་དེ་དག་ཀྱང་རབ་ཏུ་ཤེས་སོ། །རང་སངས་རྒྱས་དེ་དག་གིས་ཆོས་བསྟན་པ་ཇི་སྙེད་ཅིག་བརྗོད་
པ་དེ་དག་ཀྱང་རབ་ཏུ་ཤེས་སོ། །རང་སངས་རྒྱས་དེ་དག་གི་ཏིང་ངེ་འཛིན་མཐའ་ཡས་པ་ལ་རྣམ་པར་སྤྱོད་ཅིང་རྣམ་པར་ཐར་པའི་སྒོ་རྣམ་པ་སྣ་ཚོགས་ཀྱིས་རྣམ་པར་བརྩེ་བ་ཇི་སྙེད་ཅིག་ཡོད་པ་དེ་
དག་ཀྱང་རབ་ཏུ་ཤེས་སོ། །སངས་རྒྱས་བཅོམ་ལྡན་འདས་དེ་དག་གི་ཡོངས་སུ་མྱ་ངན་ལས་འདའ་བ་ཇི་སྙེད་པ་དེ་དག་ཀྱང་རབ་ཏུ་ཤེས་སོ། །སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་

77-1-134a

སེམས་དཔའི་འཁོར་ཀྱི་དཀྱིལ་འཁོར་རྒྱ་མཚོ་ཇི་སྙེད་པ་དེ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའ་དེ་དག་གིས་ཐོག་མ་དགེ་བའི་རྩ་བ་བསྐྱེད་པ་དག་ཀྱང་རབ་ཏུ་ཤེས་སོ། །ཐོག་མ་
སེམས་བསྐྱེད་པའི་སྨོན་ལམ་དག་ཀྱང་རབ་ཏུ་ཤེས་སོ། །སྨོན་ལམ་རྣམ་པ་ཐ་དད་པ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་སྤྱོད་པས་བྱུང་བའི་རྒྱན་ཐམས་ཅད་མངོན་པར་བསྒྲུབ་པ་
རྣམ་པ་ཐ་དད་པ་རབ་ཏུ་ཤེས་སོ། །ཕ་རོལ་ཏུ་ཕྱིན་པའི་ལམ་གྱི་ཡན་ལག་གི་ཚོགས་རྣམ་པར་དག་པར་བྱ་བ་རྣམ་པ་ཐ་དད་པ་ཡང་རབ་ཏུ་ཤེས་སོ། །བྱང་ཆུབ་སེམས་དཔའི་ལམ་ལ་ནན་ཏན་དུ་བྱ་བའི་
རྒྱན་རྣམ་པ་ཐ་དད་པ་ཡང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་གནོན་པའི་ཚོགས་རྣམ་པ་ཐ་དད་པ་ཡང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་གནོན་པའི་
ཤུགས་དྲག་པོ་རྣམ་པ་ཐ་དད་པ་ཡང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ལ་བཟོད་པའི་མཐུ་དང་ལྡན་པའི་ཏིང་ངེ་འཛིན་ཀྱི་དཀྱིལ་འཁོར་རྣམ་པ་ཐ་དད་པ་ཡང་རབ་ཏུ་ཤེས་སོ། །བྱང་ཆུབ་
སེམས་དཔའི་ས་ཡོངས་སུ་གནོན་པས་རྣམ་པར་རྩེ་བ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་གནོན་པའི་རྣམ་པར་སྤྱོད་པ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་
དཔའི་ས་ལ་རབ་ཏུ་གནས་པ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་བསྒོམ་པའི་རྒྱུད་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་སྦྱངས་པའི་ཚུལ་དག་
ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ལ་ཡང་དག་པར་གནས་པར་བྱ་བ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་སའི་མཚན་མ་དག་ཀྱང་རབ་ཏུ་ཤེས་སོ། །བྱང་ཆུབ་

77-1-134b

སེམས་དཔའི་སའི་དབང་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ནས་སར་འཕར་བའི་ཡེ་ཤེས་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་བསྡུ་བའི་ཡེ་ཤེས་དག་ཀྱང་
རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་སྨིན་པར་བྱ་བའི་ཡེ་ཤེས་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་རྣམ་པར་དགོད་པ་ལ་ཡང་དག་པར་གནས་པར་བྱ་བ་ཡང་
རབ་ཏུ་ཤེས་སོ། །བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་གྱི་རྒྱ་ཡང་རབ་ཏུ་ཤེས་སོ། །བྱང་ཆུབ་སེམས་དཔའི་སྤྱོད་པའི་རྣམ་པར་རྩེ་བ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་
དཔའི་ཏིང་ངེ་འཛིན་རྒྱ་མཚོ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་རྣམ་པར་ཐར་པའི་ཚུལ་རྒྱ་མཚོ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའ་དེ་དག་སེམས་ཀྱི་སྐད་
ཅིག་རེ་རེ་ལ་ཏིང་ངེ་འཛིན་རྒྱ་མཚོ་སྣ་ཚོགས་ཐོབ་པར་བྱེད་པ་དག་ཀྱང་རབ་ཏུ་ཤེས་སོ། །ཐམས་ཅད་མཁྱེན་པ་ཉིད་ཀྱི་སྣང་བའི་ཚུལ་ཐོབ་པར་བྱེད་པ་དག་ཀྱང་རབ་ཏུ་ཤེས་སོ། །ཐམས་ཅད་
མཁྱེན་པ་ཉིད་ཀྱི་གློག་གི་སྣང་བའི་སྤྲིན་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་བཟོད་པ་ཐོབ་པའི་ཚུལ་དག་ཀྱང་རབ་ཏུ་ཤེས་སོ། །ཐམས་ཅད་མཁྱེན་པ་ཉིད་དུ་འཇུག་པའི་ཡེ་
ཤེས་གྱི་རྣམ་པར་གནོན་པ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའ་རྣམས་ཞིང་རྒྱ་མཚོར་རྗེས་སུ་འགྲོ་བར་བྱེད་པ་དག་ཀྱང་རབ་ཏུ་ཤེས་སོ། །ཆོས་རྒྱ་མཚོ་ལ་འཇུག་པ་དག་ཀྱང་
རབ་ཏུ་ཤེས་སོ། །སེམས་ཅན་རྒྱ་མཚོ་ལ་འཇུག་པ་དག་ཀྱང་རབ་ཏུ་ཤེས་སོ། །སེམས་ཅན་རྒྱ་མཚོའི་མཚན་ཉིད་ཐ་དད་པ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་རྣམ་པར་

77-1-135a

སྤྱོད་པའི་ཚུལ་ཐམས་ཅད་ཀྱི་རྣམ་པར་འཕྲུལ་པ་དག་ཀྱང་རབ་ཏུ་ཤེས་སོ། །སྨོན་ལམ་གྱི་ཚུལ་སྣ་ཚོགས་རྒྱ་མཚོ་དག་ཀྱང་རབ་ཏུ་ཤེས་སོ། །རྫུ་འཕྲུལ་གྱིས་རྣམ་པར་འཕྲུལ་པ་སྣ་
ཚོགས་རྒྱ་མཚོ་རྣམ་པ་ཐ་དད་པ་དག་ཀྱང་རབ་ཏུ་ཤེས་སོ། །རིགས་ཀྱི་བུ་ཁོ་མོས་ནི་ཇི་ལྟར་མི་འཇེད་ཀྱི་འཇིག་རྟེན་གྱི་ཁམས་འདིའི་འདས་པ་དང་། ད་ལྟར་བྱུང་བའི་བསྐལ་པ་སྣ་ཚོགས་རྒྱ་
མཚོ་ལ་ཞུགས་ཏེ། ཁོང་དུ་ཆུད་པ་དེ་བཞིན་དུ་ཕྱི་མའི་མཐའ་གཅིག་ནས་གཅིག་ཏུ་རྒྱུད་དེ། རྒྱུན་མི་འཆད་པའི་མ་འོངས་པའི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །མི་མཇེད་ཀྱི་འཇིག་
རྟེན་གྱི་ཁམས་ཀྱི་བསྐལ་པ་རྒྱ་མཚོ་ཇི་ལྟར་ཤེས་པ་དེ་བཞིན་དུ་མི་མཇེད་ཀྱི་འཇིག་རྟེན་གྱི་ཁམས་སུ་གཏོགས་པའི་འཇིག་རྟེན་གྱི་ཁམས་གཅིག་ནས་གཅིག་ཏུ་རྒྱུད་པ་ཐམས་ཅད་ཀྱི་བསྐལ་པ་
རྒྱ་མཚོ་དག་ཀྱང་རབ་ཏུ་ཤེས་སོ། །མི་མཇེད་ཀྱི་འཇིག་རྟེན་གྱི་ཁམས་སུ་གཏོགས་པའི་འཇིག་རྟེན་གྱི་ཁམས་གཅིག་ནས་གཅིག་ཏུ་རྒྱུད་པ་ཐམས་ཅད་ཀྱི་བསྐལ་པ་རྒྱ་མཚོ་ཇི་ལྟར་ཤེས་པ་
དེ་བཞིན་དུ་མི་མཇེད་གྱི་འཇིག་རྟེན་གྱི་ཁམས་གྱི་རྡུལ་ཤིན་ཏུ་ཕྲ་བའི་ཁོངས་སུ་ཆུད་པའི་འཇིག་རྟེན་གྱི་ཁམས་གཅིག་ནས་གཅིག་ཏུ་རྒྱུད་པ་ཐམས་ཅད་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་
ཤེས་སོ། །མི་མཇེད་གྱི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བའི་ཁོངས་སུ་ཆུད་པའི་འཇིག་རྟེན་གྱི་ཁམས་གཅིག་ནས་གཅིག་ཏུ་རྒྱུད་པ་ཐམས་ཅད་ཀྱི་བསྐལ་པ་རྒྱ་མཚོ་རྣམས་ཇི་ལྟར་
ཤེས་པ་དེ་བཞིན་དུ་མི་མཇེད་ཀྱི་འཇིག་རྟེན་གྱི་ཁམས་ཕྱོགས་བཅུར་མདབ་ཆགས་སུ་གནས་པའི་འཇིག་རྟེན་གྱི་ཁམས་ཐམས་ཅད་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །མི་མཇེད་

77-1-135b

ཀྱི་འཇིག་རྟེན་གྱི་ཁམས་ཕྱོགས་བཅུར་མདབ་ཆགས་སུ་གནས་པའི་འཇིག་རྟེན་གྱི་ཁམས་ཐམས་ཅད་གྱི་བསྐལ་པ་རྒྱ་མཚོ་རྣམས་ཇི་ལྟར་ཤེས་པ་དེ་བཞིན་དུ་མི་མཇེད་ཀྱི་འཇིག་རྟེན་གྱི་ཁམས་
ཕྱོགས་བཅུར་མདབ་ཆགས་སུ་གནས་པ་གཅིག་ནས་གཅིག་ཏུ་རྒྱུད་པ་དག་ན་གནས་པའི་འཇིག་རྟེན་གྱི་ཁམས་ཐམས་ཅད་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །མི་མཇེད་ཀྱི་འཇིག་རྟེན་
གྱི་ཁམས་ཕྱོགས་བཅུར་མདབ་ཆགས་སུ་གཅིག་ནས་གཅིག་ཏུ་རྒྱུད་པར་གནས་པའི་འཇིག་རྟེན་གྱི་ཁམས་ཐམས་ཅད་ཀྱི་བསྐལ་པ་རྒྱ་མཚོ་རྣམས་ཇི་ལྟར་ཤེས་པ་དེ་བཞིན་དུ་ཕྱོགས་བཅུ་ཀུན་ཏུ་
འོད་རྣམ་པར་སྣང་བའི་འཇིག་རྟེན་གྱི་ཁམས་གྱི་རྒྱུད་དུ་གཏོགས་པའི་འཇིག་རྟེན་གྱི་ཁམས་ཐམས་ཅད་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །ཕྱོགས་ཀུན་ཏུ་འོད་རྣམ་པར་སྣང་བའི་
འཇིག་རྟེན་གྱི་ཁམས་ཀྱི་རྒྱུད་དུ་གཏོགས་པའི་འཇིག་རྟེན་གྱི་ཁམས་ཐམས་ཅད་ཀྱི་བསྐལ་པ་རྒྱ་མཚོ་ཇི་ལྟར་ཤེས་པ་དེ་བཞིན་དུ་ཕྱོགས་བཅུ་ཀུན་ཏུ་འོད་རྣམ་པར་སྣང་བའི་འཇིག་རྟེན་གྱི་
ཁམས་ཀྱི་རྒྱུད་ཕྱོགས་བཅུར་མདབ་ཆགས་སུ་གཅིག་ནས་གཅིག་ཏུ་རྒྱུད་པ་དག་ལ་གནས་པའི་འཇིག་རྟེན་གྱི་ཁམས་ཀྱི་རྒྱུད་གཅིག་ནས་གཅིག་ཏུ་རྒྱུད་པ་རྣམས་ཀྱི་བསྐལ་པ་རྒྱ་མཚོ་དག་ཀྱང་
རབ་ཏུ་ཤེས་སོ། །ཕྱོགས་ཀུན་ཏུ་འོད་རྣམ་པར་སྣང་བའི་འཇིག་རྟེན་གྱི་ཁམས་གྱི་རྒྱུད་ཕྱོགས་བཅུར་མདབ་ཆགས་སུ་གཅིག་ནས་གཅིག་ཏུ་རྒྱུད་པ་དག་ལ་གནས་པའི་འཇིག་རྟེན་གྱི་ཁམས་
ཐམས་ཅད་ཀྱི་བསྐལ་པ་རྒྱ་མཚོ་རྣམས་རབ་ཏུ་ཤེས་པ་དེ་བཞིན་དུ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པའི་འཇིག་རྟེན་གྱི་ཁམས་རྒྱ་མཚོ་འདིར་གཏོགས་པའི་འཇིག་རྟེན་གྱི་

77-1-136a

ཁམས་འབྱམ་ཀླས་པ་རྣམས་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །དེ་བཞིན་དུ་འཇིག་རྟེན་གྱིས་ཁམས་ཚུལ་དུ་བྱ་བ་རྣམས་དང་། དེ་བཞིན་དུ་འཇིག་རྟེན་གྱི་ཁམས་ཀྱི་
དཀྱིལ་འཁོར་དུ་བྱ་བ་རྣམས་དང་། འཇིག་རྟེན་གྱི་ཁམས་ཀྱི་དཀྱིལ་འཁོར་རྣམས་དང་། འཇིག་རྟེན་ཀྱི་ཁམས་ཀྱི་བྱེ་བྲག་རྣམས་དང་། འཇིག་རྟེན་གྱི་ཁམས་ཀྱི་ཆུ་ཀླུང་རྣམས་དང་། འཇིག་རྟེན་གྱི་
ཁམས་ཀྱི་གློང་རྣམས་དང་། འཇིག་རྟེན་གྱི་ཁམས་ཡོངས་སུ་འཁྱིལ་བ་དང་། འཇིག་རྟེན་གྱི་ཁམས་རི་རབ་དང་། འཇིག་རྟེན་གྱི་ཁམས་ཡོངས་སུ་འབྱུང་བ་དང་། འཇིག་རྟེན་གྱི་ཁམས་པད་མོ་དང་། 
འཇིག་རྟེན་གྱི་ཁམས་སྡོང་པོ་དང་། འཇིག་རྟེན་གྱི་ཁམས་རྟ་བབས་དང་། འཇིག་རྟེན་གྱི་མིང་དུ་བྱ་བ་རྣམས་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །འཇིག་རྟེན་གྱི་ཁམས་རྒྱ་མཚོ་གཞི་དང་
སྙིང་པོ་མེ་ཏོག་གིས་རྒྱན་གྱིས་བརྒྱན་པ། འདི་ཇི་ལྟར་ཤེས་པར་གྱུར་པ་དེ་བཞིན་དུ། ཕྱོགས་བཅུ་མཐའ་ཡས་མུ་མེད་པའི་འཇིག་རྟེན་གྱི་ཁམས་རྒྱ་མཚོ་ཆོས་ཀྱི་དབྱིངས་ཀྱིས་ཀླས་པ། 
ནམ་མཁའི་མཐས་གཏུགས་པ་དག་གི་བཅོམ་ལྡན་འདས་རྣམ་པར་སྣང་མཛད་ཀྱི་སྔོན་གྱི་སྨོན་ལམ་རྒྱ་མཚོ་དག་ཀྱང་རབ་ཏུ་ཤེས་སོ། །རྗེས་སུ་དྲན་ནོ། །སྔོན་གྱི་སྦྱོར་བ་རྒྱ་མཚོ་དག་ལ་འང་ཤེས་
ཤིང་། ཁོང་དུ་ཆུད་དོ། །སྔོན་ཡོངས་སུ་བསྒྲུབས་པའི་ཚུལ་རྒྱ་མཚོ་དག་ལ་འང་ཤེས་ཤིང་ཁོང་དུ་ཆུད་དོ། །སྐལ་པ་མཐའ་དང་དབུས་མེད་པར་བྱང་ཆུབ་སེམས་དཔའི་སྤྱོད་པ་ལ་ཡང་དག་པར་བཞུགས་པ་མཛད་
པ་དག་ཀྱང་ཤེས་ཤིང་ཁོང་དུ་ཆུད་དོ། །ཞིང་ཡོངས་སུ་དག་པར་མཛད་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །སེམས་ཅན་ཡོངས་སུ་སྨིན་པར་མཛད་པའི་ཐབས་ཀྱི་ཚུལ་དག་ཀྱང་ཤེས་ཤིང་

77-1-136b

ཁོང་དུ་ཆུད་དོ། །སྔོན་གྱི་དེ་བཞིན་གཤེགས་པ་རྣམས་ལ་བསྙེན་བཀུར་མཛད་ཅིང་གཤེགས་པའི་རྣམ་པར་འཕྲུལ་པ་དག་ཀྱང་ཤེས་ཤིང་ཁོང་དུ་ཆུད་དོ། །སྔོན་ཀྱི་དེ་བཞིན་གཤེགས་པ་
ལ་མཆོད་ཅིང་རིམ་གྲོར་མཛད་པའི་སྦྱོར་བའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །སྔོན་གྱི་དེ་བཞིན་གཤེགས་པ་དག་གི་ཆོས་བསྟན་པ་ཡོངས་སུ་བཟུང་བའི་ཚུལ་དག་ཀྱང་ཤེས་
ཤིང་ཁོང་དུ་ཆུད་དོ། །སྔོན་བྱང་ཆུབ་སེམས་དཔའ་ཏིང་ངེ་འཛིན་རབ་ཏུ་བརྙེས་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །ཡོ་བྱད་ལ་དབང་བསྒྱུར་བ་རབ་ཏུ་བརྙེས་པའི་ཚུལ་དག་ཀྱང་
ཤེས་ཤིང་ཁོང་དུ་ཆུད་དོ། །སྔོན་གྱི་དེ་བཞིན་གཤེགས་པའི་ཡོན་ཏན་རྒྱ་མཚོ་ལ་ནན་ཏན་དུ་མཛད་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །སྦྱིན་པའི་ཕ་རོལ་ཏུ་ཕྱིན་པའི་ཚུལ་
རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །བྱང་ཆུབ་སེམས་དཔའི་ཚུལ་ཁྲིམས་དང་བརྟུལ་ཞུགས་ཀྱི་དཀྱིལ་འཁོར་ཡོངས་སུ་དག་པ་མངོན་པར་བསྒྲུབ་པ་མཛད་པའི་ཚུལ་དག་
ཀྱང་ཤེས་ཤིང་ཁོང་དུ་ཆུད་དོ། །བྱང་ཆུབ་སེམས་དཔའི་བཟོད་པ་བརྙེས་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །བྱང་ཆུབ་སེམས་དཔའི་བརྩོན་འགྲུས་གྱི་ཤུགས་དྲག་
བརྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །བསམ་གཏན་གྱི་ཡན་ལག་ཐམས་ཅད་ཡོངས་སུ་རྫོགས་པར་མཛད་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །
ཤེས་རབ་ཀྱི་དཀྱིལ་འཁོར་ཡོངས་སུ་དག་པར་མཛད་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །འཇིག་རྟེན་གྱི་ཁམས་ཀྱི་སྐྱེ་གནས་ཐམས་ཅད་དུ་སྐུའི་གཟུགས་བརྙེན་

77-1-137a

ཡོངས་སུ་བསྟན་པ་མཛད་པའི་ཐབས་ཀྱི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །ཀུན་ཏུ་བཟང་པོའི་སྤྱོད་པ་དང་སྨོན་ལམ་གྱི་དཀྱིལ་འཁོར་ཡོངས་སུ་དག་པར་
མཛད་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །ཞིང་རྒྱ་མཚོ་ཐམས་ཅད་ཡོངས་སུ་རྒྱས་པར་མཛད་པ་དག་ཀྱང་ཤེས་ཤིང་ཁོང་དུ་ཆུད་དོ། །སངས་རྒྱས་ཀྱི་ཞིང་ཐམས་ཅད་
ཡོངས་སུ་དག་པར་མཛད་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །དེ་བཞིན་གཤེགས་པ་ཐམས་ཅད་ལས་ཡེ་ཤེས་སྣང་བར་གྱུར་པ་རྒྱ་མཚོ་དག་ཀྱང་ཁོང་དུ་ཆུད་དོ། །
སངས་རྒྱས་ཐམས་ཅད་ཀྱི་བྱང་ཆུབ་ཡོངས་སུ་གནས་པ་མཛད་པའི་རྣམ་པར་འཕྲུལ་པ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །དེ་བཞིན་གཤེགས་པའི་ཡེ་
ཤེས་སྣང་བ་རབ་ཏུ་བརྙེས་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །ཐམས་ཅད་མཁྱེན་པ་ཉིད་དུ་ཞུགས་ཏེ་ཐུགས་སུ་ཆུད་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་
དོ། །མངོན་པར་རྫོགས་པར་འཚང་རྒྱ་བའི་རྣམ་པར་འཕྲུལ་པ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །ཆོས་ཀྱི་འཁོར་ལོ་བསྐོར་བའི་ཁྱུ་མཆོག་གི་མཐུ་དང་རྣམ་པར་རོལ་
བའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །འཁོར་ཀྱི་དཀྱིལ་འཁོར་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །འཁོར་ཀྱི་དཀྱིལ་འཁོར་དེ་དག་གི་བྱང་ཆུབ་སེམས་དཔའ་
ཐམས་ཅད་ཀྱི་སྔོན་གྱི་དགེ་བའི་རྩ་བ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །ཐོག་མའི་སྨོན་ལམ་གྱི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །སེམས་ཅན་

77-1-137b

ཡོངས་སུ་སྨིན་པར་བྱེད་པ་དང་། གདུལ་བའི་ཐབས་ཀྱི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །བཅོམ་ལྡན་འདས་ཀྱིས་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ། 
སེམས་ཅན་རྒྱ་མཚོ་ཡོངས་སུ་སྨིན་པར་མཛད་པ་དེ་དག་ཀྱང་ཤེས་ཤིང་ཁོང་དུ་ཆུད་དོ། །སེམས་ཅན་དེ་དག་གི་སེམས་ཀྱི་སྐད་ཅིག་རེ་རེའི་དགེ་བའི་རྩ་བ་རྣམ་པར་འཕེལ་བའི་
ཐབས་ཀྱི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །ཏིང་ངེ་འཛིན་རབ་ཏུ་ཐོབ་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །གཟུངས་ཀྱི་སྒོ་རབ་ཏུ་ཐོབ་པའི་ཚུལ་རྒྱ་མཚོ་
དག་ཀྱང་ཤེས་ཤིང་ཁོང་དུ་ཆུད་དོ། །སྤོབས་པའི་ཡེ་ཤེས་ཀྱི་དཀྱིལ་འཁོར་རྣམ་པར་དག་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །བྱང་ཆུབ་སེམས་དཔའི་ས་ཐམས་
ཅད་ཡོངས་སུ་གནོན་པའི་རྣམ་པར་འཕྲུལ་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །སྤྱོད་པའི་དྲ་བ་མངོན་པར་བསྒྲུབས་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །
མཐར་གྱིས་ཡོངས་སུ་བསྒྲུབས་པའི་ཕྱོགས་ལ་འཇུག་པའི་ཡེ་ཤེས་ཀྱི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །དེ་དག་གི་དབང་པོ་དང་སྟོབས་དང་། བྱང་ཆུབ་གྱི་ཡན་ལག་དང་། 
བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པའི་རྣམ་པར་འཕྲུལ་པ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །ཇི་ལྟར་བཅོམ་ལྡན་འདས་
རྣམ་པར་སྣང་མཛད་ཀྱི་སངས་རྒྱས་དང་། བྱང་ཆུབ་སེམས་དཔའི་སྤྱོད་པ་རྒྱ་མཚོའི་ཆོས་ཀྱི་དབྱིངས་ཐམས་ཅད་དུ་བྱུང་བ་ཤེས་ཤིང་ཁོང་དུ་ཆུད་དོ། །མངོན་པར་བསྒྲུབ་པ་

77-1-138a

དེ་བཞིན་དུ་དེ་བཞིན་གཤེགས་པ་ཐམས་ཅད་ཀྱི་སངས་རྒྱས་དང་། བྱང་ཆུབ་སེམས་དཔའི་སྤྱོད་པ་རྒྱ་མཚོ་དང་ཡེ་ཤེས་ཀྱི་སྒྱུ་མའི་དྲ་བ་མཐའ་ཡས་པ་ལ་འཇུག་པ། 
ཆོས་ཀྱི་དབྱིངས་མཐའ་ཡས་པ་རྒྱས་པར་འགེངས་པ། སྒོ་མཐའ་ཡས་པ་ནས་ཤིན་ཏུ་བསྟན་པར་བྱ་བ། ཕྱི་མའི་མཐའི་བསྐལ་པར་གནས་པ་ལ་འཇུག་པས་བསྟན་པར་
བྱ་བ། ཕྱོགས་བཅུའི་འཇིག་རྟེན་གྱི་ཁམས་རྒྱ་མཚོ་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པར་བྱུང་བ་ཐམས་ཅད་ཀྱང་མ་འདྲེས་པར་ཤེས་ཤིང་ཁོང་དུ་ཆུད་
པ་དེ་མངོན་པར་བསྒྲུབ་པོ། །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔའི་རྣམ་པར་ཐར་པ། བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་རྒྱ་མཚོ་ཐམས་ཅད་ལ་རྣམ་
པར་ལྟ་བའི་ཡུལ་གྱི་ཡུལ་ནི་དེ་ལྟ་བུ་སྟེ། དེའི་ཕྱིར་དེ་ལ་སྙོམས་པར་ཞུགས་ན་སེམས་ཅན་ཐམས་ཅད་ཀྱི་སེམས་དང་སྤྱོད་པའི་ཚུལ་རབ་ཏུ་ཤེས་སོ། །སེམས་ཅན་ཐམས་ཅད་
ཀྱི་དགེ་བའི་ཚོགས་ཀྱང་རབ་ཏུ་ཤེས་སོ། །སེམས་ཅན་ཐམས་ཅད་ཀྱི་ཀུན་ནས་ཉོན་མོངས་པ་དང་། རྣམ་པར་བྱང་བའི་ཡེ་ཤེས་ཀྱི་ཚུལ་རྣམས་ཀྱང་རབ་ཏུ་ཤེས་སོ། །སེམས་ཅན་
ཐམས་ཅད་ཀྱི་ལས་སྣ་ཚོགས་ཀྱང་རབ་ཏུ་ཤེས་སོ། །ཉན་ཐོས་ཐམས་ཅད་ཀྱི་ཏིང་ངེ་འཛིན་སྒོ་རྣམས་ཀྱང་རབ་ཏུ་ཤེས་སོ། །ཉན་ཐོས་ཐམས་ཅད་ཀྱི་ཏིང་ངེ་འཛིན་ཀྱི་ས་ཡང་རབ་ཏུ་
ཤེས་སོ། །རང་སངས་རྒྱས་ཐམས་ཅད་ཀྱི་རྣམ་པར་ཐར་པ་ཞི་བས་རྣམ་པར་འཕྲུལ་པ་ཡང་ཤེས་ཤིང་ཁོང་དུ་ཆུད་དོ། །བྱང་ཆུབ་སེམས་དཔའ་ཐམས་ཅད་ཀྱི་ཏིང་ངེ་འཛིན་རྒྱ་མཚོའི་

77-1-138b

ཚུལ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་ཐར་པའི་ཚུལ་རྒྱ་མཚོ་ལ་འཇུག་པ་ཡང་རབ་ཏུ་ཤེས་སོ། །དེ་བཞིན་གཤེགས་པ་ཐམས་ཅད་ཀྱི་རྣམ་
པར་ཐར་པའི་ཚུལ་རྒྱ་མཚོ་ལ་འཇུག་པ་ཡང་རབ་ཏུ་ཤེས་སོ། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་ཤཱཀྱའི་བུ་མོ་གོ་བ་ལ་འདི་སྐད་ཅེས་སྨྲས་སོ། །འཕགས་མ་ཁྱོད་ཀྱིས་བྱང་ཆུབ་
སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་རྒྱ་མཚོ་ཐམས་ཅད་ལ་རྣམ་པར་ལྟ་བའི་ཡུལ་འདི་བརྙེས་ནས་ཇི་སྲིད་ཅིག་ལགས། སྨྲས་པ་རིགས་ཀྱི་
བུ་སྔོན་འདས་པའི་དུས་སངས་རྒྱས་ཀྱི་ཞིང་བརྒྱའི་རྡུལ་ཤིན་ཏུ་ཕྲ་བ་སྙེད་ཀྱི་བསྐལ་པ་འདས་པའི་ཕ་རོལ་གཅིག་ཏུ་འཇིག་རྟེན་གྱི་ཁམས་མི་འཇིགས་པ་བྱེད་པ་ཞེས་བྱ་བ་བྱུང་སྟེ། 
འཇིག་རྟེན་གྱི་ཁམས་དེའི་བསྐལ་པ་འགྲོ་བའི་མཆོག་ཅེས་བྱ་བར་གྱུར་ཏོ། །འཇིག་རྟེན་གྱི་ཁམས་དེའི་དབུས་སུ་གླིང་བཞི་པ་བདེ་བ་ཡོད་པ་ཞེས་བྱ་བ་བྱུང་སྟེ། གླིང་བཞི་པ་
དེའི་འཛམ་བུའི་གླིང་གི་དབུས་སུ་རྒྱལ་པོའི་གནས་སྡོང་པོ་རི་བོའི་དཔལ་ཞེས་བྱ་བ་གྲོང་རྡལ་སྟོང་ཕྲག་བརྒྱད་བཅུ་རྩ་བཞིའི་ཕུལ་དུ་བྱ་བ་བྱུང་བ་སྟེ། རྒྱལ་པོའི་གནས་སྡོང་པོ་རི་བོའི་
དཔལ་དེ་དང་གྲོང་རྡལ་སྟོང་ཕྲག་བརྒྱད་བཅུ་རྩ་བཞི་པོ་དེ་དག་ཀྱང་སོ་སོ་ནས་སའི་གཞི་བཻ་ཌཱུཪྻ་སྔོན་པོ་ལས་གྲུབ་པ་ལ་གནས་པ། རིན་པོ་ཆེ་བདུན་ལས་བྱས་པའི་ར་བས་ཀུན་ནས་བསྐོར་བ། 
འོབས་སྤོས་ཆུས་ཡོངས་སུ་གང་བ་གཞི་གསེར་གྱི་བྱེ་མ་བདལ་བ། ཨུད་པ་ལ་དང་། པད་མོ་དང་། ཀུ་མུ་ཏ་དང་། མེ་ཏོག་པུན་ད་རི་ཀ་ཤིང་རྟའི་འཁོར་ལོ་ཙམ་ཁ་དོག་དང་འོད་ཀྱི་དྲ་བ་

77-1-139a

སྣ་ཚོགས་ཤིང་དྲི་ཤིན་ཏུ་ཞིམ་པས་ཀུན་ནས་ཁྱབ་པ་བདུན་གྱིས་ཡོངས་སུ་བསྐོར་བ། རིན་པོ་ཆེ་ལས་བྱས་པའི་སྟེགས་བུའི་ཁྲི་འཕང་བདུན་ལས་ཏ་ལའི་ཕྲེང་བ་རིམ་པ་བདུན་གྱིས་
ཀུན་ནས་དགྲིགས་པ། རིན་པོ་ཆེ་སྣ་བདུན་གྱི་ཤིང་གི་ནགས་ཚལ་གྱི་ཕྲེང་བ་དགྲིགས་པས་ཀུན་ནས་བསྐོར་བ་སྟེ། སྟེང་ནས་གསེར་གྱི་དྲ་བ་བྲེས་པ་རིན་པོ་ཆེ་སྣ་ཚོགས་ཀྱིས་
རྣམ་པར་ཕྱེ་བའི་མིག་མངས་རིས་མཛེས་པར་རྣམ་པར་བྲེས་པས་སའི་གཞི་ཤིན་ཏུ་སྤ་བར་གྱུར་པ། དངོས་གྲུབ་ཅན་གྱི་ཚོགས་རྣམ་པར་རྒྱུ་བ། བྱ་བཙུན་པའི་ཁྱུས་སྒྲ་སྐད་
ཡིད་དུ་འོང་བའི་དབྱངས་སྙན་པ་ཕྱུང་བ། བཟའ་ཤིང་གི་ར་བ་བྱེ་བ་བརྒྱ་སྟོང་གིས་མཛེས་པར་བྱས་པ་ཤིན་ཏུ་སྐྱིད་ཅིང་ཕུན་སུམ་ཚོགས་པར་གནས་པ་སྐྱེས་པ་དང་། བུད་མེད་
བརྒྱ་སྟོང་རབ་ཏུ་དགའ་བས་གང་བ། སེར་བུ་བདེ་ཞིང་ཡིད་དུ་འོང་བས་བསྐྱེད་དེ། མེ་ཏོག་གི་ཆར་མང་པོ་རྒྱུན་མི་འཆད་པར་རབ་ཏུ་འཕྲུལ་བ། སའི་བདག་པོ་དམ་པ་བརྒྱ་ཕྲག་
སྟོང་གི་གནས་སུ་གྱུར་པ་དག་སྟེ། གྲོང་རྡལ་ཆེན་པོ་དེ་དག་གི་རིན་པོ་ཆེའི་ཤིང་ཐམས་ཅད་དང་། གསེར་གྱི་དྲ་བའི་རྒྱན་ལ་སྩོགས་པ་རླུང་གིས་བསྐྱོད་དེ། རོལ་མོ་མང་པོའི་སྒྲ་དང་
མཉམ་པའི་སྒྲ་སྐད་བྱུང་བ་དག་ལས་ཡིད་དུ་འོང་བའི་ཚིག་འདི་སྐད་འབྱུང་ངོ་། །གསོལ་ཅིག་མནོབས་ཤིག་ཆོས་ལ་སྤྱོད་ཅིག །བྱང་ཆུབ་ཏུ་སེམས་བསྐྱེད་ཅིག །ཕྱིར་མི་ལྡོག་
པའི་ས་ལ་མངའ་ཐོབ་པར་མཛོད་ཅིག །ཁྱེད་རྣམས་བདེ་བར་གྱུར་ཅིག་ཅེས་ཟེར་རོ། །རྒྱལ་པོའི་གནས་སྡོང་པོ་རི་བོའི་དཔལ་དེར་རྒྱལ་པོ་ནོར་གྱི་བདག་པོ་ཞེས་བྱ་བ་བྱུང་སྟེ། 

77-1-139b

དེ་ལ་བཙུན་མོའི་འཁོར་བུད་མེད་སྟོང་ཕྲག་བརྒྱད་བཅུ་རྩ་བཞི་ཡོད་དོ། །བློན་པོ་བརྒྱ་ཕྲག་ལྔ་ཡོད་པར་གྱུར་ཏེ། རྒྱལ་པོ་ནོར་གྱི་བདག་པོ་དེ་ལ་བུ་ལྔ་བརྒྱ་ཡོད་པ་དེ་ཐམས་ཅད་
ཀྱང་དཔའ་བོ་རྟུལ་ཕོད་པ་ཡན་ལག་དམ་པའི་གཟུགས་དང་ལྡན་པ། གཞན་གྱི་སྡེ་རབ་ཏུ་མཇོམས་པ་ཤིན་ཏུ་མཛེས་པ། བལྟ་ན་སྡུག་པ། ཁ་དོག་བཟང་པོའི་མཆོག་ཤིན་ཏུ་རྒྱས་
པ་དང་ལྡན་པ་ཤ་སྟག་གོ། །རྒྱལ་པོ་ནོར་གྱི་བདག་པོ་དེའི་བཙུན་མོ་དམ་པ་ནི་པད་མོའི་དཔལ་དམ་པ་འབྱུང་བ་ཞེས་བྱ་བ་སྟེ། བུད་མེད་སྟོང་ཕྲག་བརྒྱ་བཅུ་རྩ་བཞི་པོ་དེ་དག་གི་ནང་ནས་
གཙོ་མོར་བྱ་བའོ། །དེའི་བུ་གཟི་བརྗིད་ཀྱི་དབང་པོ་ཞེས་བྱ་བ་གཟུགས་བཟང་བ་ཤིན་ཏུ་མཛེས་པ་བལྟ་ན་སྡུག་པ་མི་ཆེན་པོའི་མཚན་སུམ་བཅུ་རྩ་གཉིས་ཀྱིས་རབ་ཏུ་བརྒྱན་པའི་
ལུས་དང་ལྡན་པ་ཞིག་ཡོད་པར་གྱུར་ཏེ། དེ་ལ་མི་ཆེན་པོའི་མཚན་སུམ་བཅུ་རྩ་གཉིས་པོ་འདི་དག་ཡོད་པར་གྱུར་ཏོ། །དེ་འང་འདི་ལྟར་རྒྱལ་པོ་གཞོན་ནུ་གཟི་བརྗིད་ཀྱི་བདག་པོ་དེ་རྐང་
པའི་མཐིལ་ཤིན་ཏུ་གནས་པ་དང་ལྡན་ཏེ། ས་ཆེན་པོ་ལ་རྐང་པའི་མཐིལ་འདོར་ན་མཉམ་པར་འདོར་ལ། འདེག་ན་མཉམ་པར་འདེག་སྟེ། གཞོག་ན་རྐང་པའི་མཐིལ་ཀུན་ཀྱིས་
ས་ཆེན་པོ་ལ་མཉམ་པར་རེག་གོ། །དེའི་རྐང་པའི་མཐིལ་གཉིས་ལ་འཁོར་ལོ་རྩིབས་སྟོང་དང་ལྡན་པ། ལྟེ་བ་དང་བཅས་པ་མུ་ཁྱུད་དང་བཅས་པ། རྣམ་པ་ཐམས་ཅད་དུ་ཤིན་ཏུ་
ཚང་བ་ཤིན་ཏུ་མཛེས་པ་བལྟ་ན་སྡུག་པ་དག་ཀྱང་བྱུང་བར་གྱུར་ཏོ། །དེའི་རྐང་པའི་བོལ་གཉིས་ཀྱང་ཤིན་ཏུ་རྒྱས་པར་གྱུར་ཏོ། །རྐང་པའི་སྟེང་གི་མདོག་ཤིན་ཏུ་གསལ་ལ། 

77-1-140a

ཤིན་ཏུ་མཛེས་ཏེ། མེ་ཏོག་དམ་པ་བས་ཀྱང་ལྷག་པར་མདོག་བཟང་ཞིང་གསལ་བར་གྱུར་ཏེ། དེའི་རྐང་ལག་གི་སོར་མོ་དྲ་བར་འབྲེལ་པར་གྱུར་ཏེ། ཤིན་ཏུ་མཛེས་
པ་རྣམ་པར་ཕྱེ་བ། བུ་ག་མེད་པས་ཟག་པ་མེད་པ་ནི་དཔེར་ན་ངང་པའི་རྒྱལ་པོ་གནས་སྲུང་ལྟ་བུར་གྱུར་ཏོ། །དེའི་རྐང་པའི་རྟིང་པ་ཡངས་པ་ཤིན་ཏུ་དག་ལ་ཤིན་ཏུ་གསལ་བ་རིན་པོ་ཆེ་
ཐམས་ཅད་ཀྱི་འོད་རབ་ཏུ་འགྱེད་པར་གྲུབ་པ་དང་ལྡན་པར་གྱུར་ཏོ། །དེའི་སོར་མོ་རྣམས་ཀྱང་རིང་ཞིང་ཟླུམ་ལ་ཚིགས་བར་མཉམ་ཞིང་ཡངས་པ་དང་ལྡན་པར་གྱུར་ཏེ། དེ་དག་མཉམ་
པར་ས་ལ་འཇོག་གོ། །མཉམ་པར་ས་ལས་འདེག་གོ། །དེའི་རྐང་པ་དང་ལག་པའི་མཐིལ་ཡང་ཀ་ཙ་ལིནྡི་བས་ཀྱང་ལྷག་པར་རེག་ན་བདེ་བར་གྱུར་ཏེ། དེས་སྐྱེས་པའམ་བུད་མེད་
དམ། ཁྱེའུ་དང་བུ་མོ་གང་ལ་རེག་ཀྱང་རུང་སྟེ། དེ་དག་ཐམས་ཅད་ཀྱང་བདེ་བ་དང་། ཡིད་དགའ་བའི་དམ་པས་ཚིམ་ཞིང་ཡིད་ཤིན་ཏུ་བདེ་བར་འགྱུར་རོ། །དེའི་བྱིན་པ་རི་དགས་ཨེ་ན་
ཡའི་བྱིན་པ་ལྟར་འདུག་པར་གྱུར་ཏེ། རིམ་གྱིས་གཞོལ་བ་དང་། ཤིན་ཏུ་མཛེས་པ་དང་། ལེགས་པར་གྲུབ་པར་གྱུར་པས། རི་དགས་ཀྱི་རྒྱལ་པོ་ཨེ་ན་ཡ་ལྟར་དེ་ལ་སུས་ཀྱང་
བསྙག་པ་འམ། སླེབས་པར་མི་ནུས་ཏེ། འགྲོ་བས་ངལ་ཞིང་དུབ་པར་མི་འགྱུར་རོ། །རྒྱལ་བུ་གཞོན་ནུ་གཟི་བརྗིད་གྱི་དབང་པོ་དེ་བདུན་ཤིན་ཏུ་མཐོ་བ་དང་ལྡན་པར་གྱུར་ཏེ། 
དེའི་རྐང་པ་གཉིས་ལ་ཤིན་ཏུ་མཐོ་བ་ཟླུམ་ལ་ཤིན་ཏུ་ལེགས་པ་དང་། ཤིན་ཏུ་རྒྱས་པ་དང་། ཚིགས་མི་སྣང་བ་དང་། ཤིན་ཏུ་ཡིད་དུ་འོང་བ་དང་། བལྟ་ན་སྡུག་པ་གཉིས་སུ་

77-1-140b

གྲུབ་པར་གྱུར་ཏོ། །ལག་པ་གཉིས། ཐལ་གོང་གི་ལྷུན་གཉིས། ལྟག་པ་ལ་གཅིག་སྟེ་དེ་ལྟར་བདུན་ནོ། །དེའི་མཚན་གསང་བའི་སྦུབས་ན་འདུག་པར་གྲུབ་པར་གྱུར་ཏེ། 
དེའི་གསང་བའི་གནས་སྦུབས་ན་འདུག་པ་ཤིན་ཏུ་མི་མངོན་ལ་ནང་དུ་ནུབ་ཅིང་ཀུན་ནས་ཡོག་པར་འདུག་པ་སྟེ། དཔེར་ན་གླང་པོ་ཅང་ཤེས་སམ། རྟ་ཅང་ཤེས་ལྟར་འདུག་པས་
དེ་གོས་མ་གྱོན་པར་འདུག་ཀྱང་བུད་མེད་དམ། སྐྱེས་པ་འམ། ཁྱེའུ་འམ། བུ་མོ་འམ། རྒན་པ་འམ། དར་ལ་བབ་པ་འམ། བླ་མ་འམ། བླ་མར་བྱ་བ་རྣམས་ཀྱིས་
ཀྱང་མི་མཐོང་སྟེ། གཞན་དུ་ན་བདག་ལོངས་སྤྱོད་པ་འམ། ཚད་དུ་བསྟན་པར་བྱས་ཏེ། འདོད་པས་སྤྱད་པ་ནི་མ་གཏོགས་སོ། །རྒྱལ་བུ་གཞོན་ནུ་གཟི་བརྗིད་གྱི་བདག་པོ་དེ་
རོ་སྟོད་སེང་གེ་ལྟར་འདུག་པ་དང་ལྡན་པར་གྱུར་ཏེ། ལུས་རིམ་པས་རྒྱས་ལ་རོ་སྟོད་ཤིན་ཏུ་ཡངས་ཤིང་རྫོགས་པས་རི་དགས་ཀྱི་རྒྱལ་པོ་བས་ཀྱང་མཛེས་པར་དབྱིབས་ཤིན་
ཏུ་ལེགས་པའི་རོ་སྟོད་དང་ལྡན་པར་གྱུར་ཏོ། །དེའི་ཐལ་གོང་རྒྱས་ཤིང་ལུས་ཤིན་ཏུ་རྒྱས་པ་ལུས་རྣམ་པར་ཕྱེ་བ། ལུས་ཀྱི་ཆ་ཐམས་ཅད་རྐྱེན་དུ་འབབ་པར་མཉམ་པ། 
ལུས་ལ་དམའ་བ་མེད་པ། ལུས་ལ་མཐོ་བ་མེད་པ། ལུས་ལ་ཞུམ་པ་མེད་པ། ལུས་ལ་དགུ་བ་མེད་པ། ལུས་རིན་པོ་ཆེའི་གཏན་པ་ཤིན་ཏུ་ཕྱིས་པ་བས་ཀྱང་ལྷག་
པར་གསལ་བར་གྱུར་ཏོ། །དེའི་དཔུང་མགོ་ཤིན་ཏུ་ཟླུམ་ཞིང་ཤ་རྒྱས་ལ་ཤིན་ཏུ་མཛེས་པར་གང་བ་དང་ལྡན་པར་གྱུར་ཏོ། །དེས་མི་ཆེན་པོའི་མཚན་ལག་པ་ཤིན་ཏུ་

77-1-141a

རིང་བ་ཐོབ་པར་གྱུར་པ་དེས་ལུས་མ་བཏུད་ཏེ། ལུས་དྲང་པོར་འདུག་ཀྱང་པུས་མོའི་ལྷ་ང་གཉིས་ལ་ཉུག་ཅིང་རེག་གོ། །དེས་མི་ཆེན་པོའི་མཚན་ལུས་ཆེ་ཞིང་དྲང་བ་
འང་ཐོབ་པར་གྱུར་ཏེ། རྣམ་པ་ཐམས་ཅད་དུ་མཆོག་ཏུ་གྱུར་པ་དང་ལྡན་ལ་ལུས་ཚུལ་དང་འདྲ་བར་མཉམ་པ་དང་། ལུས་རབ་ཏུ་གཉེན་པ་དང་། ལུས་ཤིན་ཏུ་ལྗི་བ་དང་། ལུས་རབ་
ཏུ་གསལ་བ་དང་། ལུས་ཤིན་ཏུ་སིམ་པར་བྱེད་པ་དང་ལྡན་པར་གྱུར་ཏོ། །དེས་མི་ཆེན་པོའི་མཚན་མགུལ་དུང་ལྟ་བུ་ཡང་ཐོབ་པར་གྱུར་ཏེ། མི་དམའ་བའི་མགུལ་དང་། དེའི་
མགུལ་གྱི་འཁོར་ཐམས་ཅད་དང་། བཞིན་གྱི་འཁོར་ཐམས་ཅད་ན་རྩ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་ཤིན་ཏུ་མཉམ་པར་གྱུར་ཏེ། ཀུན་ཀྱང་རབ་ཏུ་ཚང་བར་གྱུར་ཏོ། །
མི་ཆེན་པོའི་མཚན་སེང་གེའི་འགྲམ་པ་ལྟ་བུ་ཡང་ཐོབ་པར་གྱུར་ཏེ། ཟ་འགྲམ་ཤིན་ཏུ་འཁྲེགས་པ་དང་། བཞིན་གྱི་དཀྱིལ་འཁོར་ཤིན་ཏུ་རྒྱས་པ་དང་། བཞིན་གྱི་དཀྱིལ་འཁོར་ཤིན་
ཏུ་ལེགས་ཤིང་ཡོངས་སུ་དག་པ་དང་། ཁའི་སྒོ་ཤིན་ཏུ་ཡངས་པ་དང་ལྡན་པར་གྱུར་ཏོ། །མི་ཆེན་པོའི་མཚན་སོ་མཉམ་པ་བཞི་བཅུ་དང་ཡང་ལྡན་པར་གྱུར་ཏེ། སོ་མ་ཚང་བ་མེད་
ལ་ཟས་ཤིག་ཟ་ན་ཡང་ལན་གཅིག་ལྡང་བས་ཆུང་ངུ་ན་འབྲས་ཆན་གྱི་འབྲུ་འགའ་ཡང་མ་ཞིབ་པར་ཟ་བ་མེད་དོ། །སོ་ཐགས་བཟང་ཞིང་མཉམ་པ་རབ་ཏུ་ཐོབ་སྟེ། མཚམས་
ཆུ་སྒོ་མེད་པ་དང་། ཤིན་ཏུ་མཉམ་པ་དང་། རྐྱེན་ཏུ་ཤིན་ཏུ་མཛེས་པ་སྟེ། དེ་ཁ་ཟས་ཤིག་ཟ་ན་ཡང་འགྲོ་བ་དང་འཆགས་པ་དང་། ཞེན་པ་དང་། ལྗན་ལྗིན་དུ་འགྱུར་བ་འམ། ཐོགས་པར་འགྱུར་

77-1-141b

བ་འམ། གསེབ་འགང་བར་འགྱུར་བ་མེདོ། །མི་ཆེན་པོའི་མཚན་སོ་མཉམ་པ་རབ་ཏུ་ཐོབ་པར་གྱུར་ཏེ། སོ་མཉམ་ཞིང་རྡ་རྡོ་མེད་པ་དང་། སོ་ལྷག་མེད་པ་དང་། སོ་ཞུམ་པ་མེད་པ་དང་། སོ་གྱེས་པ་མེད་པ་
དང་། སོ་ཐོག་དྲུང་མཉམ་པ་དང་། སོ་རྡོ་བ་མེད་པར་གྱུར་ཏོ། །གཞོན་ནུ་དེའི་མཆེ་བ་ཤིན་ཏུ་དཀར་བར་གྱུར་ཏེ། མཆེ་བ་སྐྱོན་མེད་པ། མཆེ་བ་ཤིན་ཏུ་གསལ་བ། མཆེ་བ་ཤིན་ཏུ་དག་པ། མཆེ་བ་ཤིན་ཏུ་
བརྟན་པར་གྱུར་ཏོ། །མི་ཆེན་པོའི་མཚན་ལྕེ་ཤིན་ཏུ་ཡངས་པ་ཡང་རབ་ཏུ་ཐོབ་པར་གྱུར་ཏེ། དེའི་ལྕེ་ནི་ཤིན་ཏུ་ཡངས་ལ་སྲབ་ཅིང་མཉེན་ཏེ། ཤིན་ཏུ་འཇམ་པ་དང་། ལས་སུ་རུང་བ་དང་། ཡིད་དུ་འོང་
བ་དང་བསྒྱུར་ན་བདེ་བ་དང་། གདོང་གི་དཀྱིལ་འཁོར་ཀུན་ཏུ་འགེབས་པ་དང་། བདེན་ཞིང་ཕན་པར་འགྱུར་བའི་དོན་དང་། ཡི་གེ་དང་ངག་དང་ངེས་པའི་ཚིག་ཐོགས་པ་མེད་པར་བརྗོད་པར་གྱུར་ཏོ། །
གཞོན་ནུ་དེ་ཚངས་པའི་དབྱངས་དང་ལྡན་པར་གྱུར་ཏེ། དབྱངས་ཡིད་དུ་འོང་བ་དང་། རོལ་མོའི་སྒྲ་དང་། གླུའི་ང་རོ་དང་། སིལ་སྙན་ཀྱི་དབྱངས་དང་། སྒྲ་སྐད་དང་བརྗོད་ཅིང་སྨྲ་བའི་ཚིག་གི་ལས་
ཡིད་དུ་འོང་བ་བརྗོད་པས་ངག་གི་ལས་མངོན་པར་དགའ་བ་སྐྱེད་པ། འཇིག་རྟེན་ཐམས་ཅད་མངོན་པར་འདུན་པར་འགྱུར་བར་ཚངས་པ་ལས་ཀྱང་ལྷག་པའི་དབྱངས་ཀྱི་ངག་བརྗོད་དེ། འཁོར་གྱི་
དཀྱིལ་འཁོར་ལས་ཀྱང་གུད་དུ་མི་འདའ་བར་ཐམས་ཅད་ཀྱི་ཡིད་དང་འཐུན་པར་བྱེད་པ་དང་ལྡན་པར་གྱུར་ཏོ། །གཞོན་ནུ་དེ་ནི་མིག་དཀར་ནག་འབྱེས་པར་གྱུར་ཏེ། མིག་ཤིན་ཏུ་དང་བ་དང་། མིག་ཡོངསུ་དག་པ་དང་། 
མིག་ལ་འོད་ཆགས་པ་དང་། མིག་རྣམ་པར་གསལ་བ་དང་། མིག་མངོན་པར་མཛེས་པ་དང་། མིག་བལྟ་ན་སྡུག་པ་དང་། མིག་ཡིད་དུ་འོང་བ་དང་། མིག་འཛུམ་པ་དང་ལྡན་པར་གྱུར་ཏོ། །གཞོན་ནུ་དེ་ནི་རྫི་མ་བའི་རྫི་མ་ལྟ་བུ་དང་ལྡན་པར་གྱུར་

77-1-142a

ཏེ། མིག་གི་སྐྱེ་མཆེད་རིན་པོ་ཆེ་པདྨ་ར་ག་ལྟར་ཤིན་ཏུ་དག་པ། མིག་གི་སྤྲིན་མཉམ་པ། མིག་གི་སྤྲིན་མཚུངས་པ། མིག་གི་སྤྲིན་ལེགས་པ། མིག་གི་སྤྲིན་ཡངས་པ། མིག་གི་སྤྲིན་རྫོགས་པ། མིག་གི་སྤྲིན་
ཤིན་ཏུ་བརྟན་པར་གྱུར་ཏོ། །དེའི་སྨྱིན་མཚམས་སུ་མཛོད་སྤུ་སྐྱེས་པར་གྱུར་ཏེ། འཇམ་པ་ལས་སུ་རུང་བ། ཤིན་དུ་མཉེན་པ། ཤིང་བལ་ལྟར་རེག་ན་བདེ་བ་དང་། དང་བ། གསལ་བ་འོད་ཡོད་པ། 
ཆབ་བྲོམ་ལྟ་བུ་ཁ་བའི་ཁ་དོག་ལྟར་འདུག་པ། འོད་ཟེར་དཀར་པོའི་དཀྱིལ་འཁོར་གྱི་འོད་རབ་ཏུ་སྣང་བ་དང་ལྡན་པར་གྱུར་ཏེ། དེའི་སྤྱི་བོ་ལ་གཙུག་ཏོར་མངོན་པར་གྲུབ་པར་གྱུར་ཏེ། ཤིན་ཏུ་
ལེགས་པ། ཀུན་ནས་ཟླུམ་པ་དང་། དབུས་སུ་བབ་པ། སྐྲའི་རྒྱན་དུ་གྱུར་པ། རིན་པོ་ཆེའི་པད་མོ་མདབ་མ་བྱེ་བ་བརྒྱ་ཕྲག་སྟོང་དང་ལྡན་པ་ལྟར་སྣང་བ། ཀུན་ནས་ཆ་མཉམ་པར་གནས་པ། 
རིན་ཐང་གདབ་དུ་མེད་པས་གཙེས་པའི་གཙུག་ཏུ་གྱུར་པ་དང་ལྡན་པར་གྱུར་ཏོ། །གཞོན་ནུ་དེ་ནི་པགས་པ་ཤིན་ཏུ་འཇམ་པ་དང་ལྡན་པར་གྱུར་ཏེ། དེའི་ལུས་ལ་རྡུལ་ལམ། དྲི་མ་འམ། རྔུལ་
ལམ། སེར་ག་འམ། གཉེར་མའམ། ལྷོད་པ་འམ། འཁུམས་པ་འམ། འཕྱུང་བ་འམ། སློང་བག་ཏུ་གནས་པ་མེད་པར་གྱུར་ཏོ། །གཞོན་ནུ་དེ་ནི་མདོག་གསེར་གྱི་ཁ་དོག་ལྟ་བུ་དང་
ལྡན་པར་གྱུར་ཏོ། །འཛམ་བུ་ཆུ་ཀླུང་གི་གསེར་གྱི་མདོག་ལྟ་བུ་དང་ལྡན་ཞིང་འོད་ཀུན་ཏུ་འདོམ་གང་བ་དང་། གསེར་ལྟར་གཅིག་ཏུ་འབར་བའི་འོད་ཀྱི་དཀྱིལ་འཁོར་གྱིས་མཛེས་པར་བརྒྱན་
པ་དང་། བ་སྤུའི་བུ་ག་ཐམས་ཅད་ནས་དྲི་ཞིམ་པོའི་འོད་ཟེར་འབྱུང་བས་ལུས་ཀྱི་རྒྱན་རབ་རིབ་མེད་ཅིང་འོད་གསལ་བ་དང་ལྡན་པར་གྱུར་ཏོ། །གཞོན་ནུ་དེ་ནི་བ་སྤུ་རེ་རེར་བྱུང་བ་དང་ལྡན་པར་

77-1-142b

གྱུར་ཏེ། བ་སྤུའི་བུ་ག་རེ་རེ་ནས་བ་སྤུ་རེ་རེ་སྐྱེས་པར་གྱུར་པ། བཻ་ཌཱུཪྻ་སྔོན་པོའི་ཁ་དོག་ལྟ་བུ་གཡས་ཕྱོགས་སུ་འཁྱིལ་པ། ལེགས་པར་སྐྱེས་པ། མཐང་ལ་ཞ་བར་འདུག་པ་ཤིན་ཏུ་ལེགས་
པར་གནས་པ་དང་ལྡན་པར་གྱུར་ཏོ། །གཞོན་ནུ་དེའི་སྤུ་ཡན་ལག་གྱེན་དུ་འཁྱིལ་བར་གྱུར་ཏེ། ཕྱིར་མི་ཟློགས་པའི་སྤུ་དང་། མི་ལྡོག་པའི་སྤུ་དང་། མ་འདྲེས་པའི་སྤུ་དང་ལྡན་པར་གྱུར་
ཏོ། །གཞོན་ནུ་དེ་མི་ཆེན་པོའི་མཚན་སྐྲ་མཐོན་ཏིང་དུ་འདུག་པ་ཐོབ་པར་གྱུར་ཏེ། དེའི་སྐྲ་ནོར་བུ་རིན་པོ་ཆེ་རྣམ་པར་སྣང་བའི་མདོག་ལྟར་མཐོན་ཏིང་དུ་འདུག་པ། འཇམ་པ་སྣུམ་པ། ལེགས་
པར་འཁྱིལ་པ། གཡས་ཕྱོགས་སུ་འཁྱིལ་པ། དྲུང་ཤིན་ཏུ་རན་པ། ཟང་ཟིང་མེད་པ། འཇམ་འཇམ་ལྟར་འདུག་པ། མི་འཛིང་པ། དབྱིབས་མཉམ་ཞིང་འཐུན་པར་གནས་པ་དང་ལྡན་
པར་གྱུར་ཏོ། །རྒྱལ་བུ་གཞོན་ནུ་དེ་ཤིང་ནྱ་གྲོ་དྷ་ལྟར་ཆུ་ཞེང་གབ་པའི་མི་ཆེན་པོའི་མཚན་རབ་ཏུ་ཐོབ་པར་གྱུར་ཏེ། ཀུན་ནས་རྐྱེན་དུ་རན་པ་དང་། ཀུན་ཏུ་བཟང་བ་དང་། ཀུན་ཏུ་མཛེས་པ་དང་ལྡན་པར་གྱུར་ཏེ། 
དེ་ནི་མདུན་ནས་བལྟས་ནའང་ངོམས་མི་ཤེས་ཤིང་བལྟ་ན་ཡིད་དུ་འོང་བ་རྒྱབ་དང་གཡས་གཡོན་དང་། འགྲོ་བ་དང་འདུག་པ་དང་འགྲེང་བ་དང་ཉལ་བ་དང་། སྨྲ་བ་དང་། མི་སྨྲ་བར་འདུག་པ་ལ་བལྟས་ན། ཡང་
ངོམས་མི་ཤེས་ཤིང་ཡིད་དུ་འོང་ལ་བལྟ་ན་སྡུག་པར་གྱུར་ཏོ། །རིགས་ཀྱི་བུ་རྒྱལ་པོ་གཞོན་ནུ་གཟི་བརྗིད་ཀྱི་བདག་པོ་དེ་མི་ཆེན་པོའི་མཚན་སུམ་བཅུ་རྩ་གཉིས་པོ་འདི་དག་གིས་ཡོངས་སུ་བརྒྱན་པའི་
ལུས་དང་ལྡན་པར་གྱུར་ཏེ། སེམས་ཅན་ཐམས་ཅད་ཀྱིས་བལྟ་ན་ཡིད་དུ་མི་འོང་བའི་བག་མེད་བལྟ་ན་བསམ་པ་ཐམས་ཅད་ཡོངས་སུ་རྫོགས་པར་བྱེད་པ། བལྟ་ན་སེམས་ཅན་ཐམས་ཅད་ཀྱི་དགའ་

77-1-143a

བ་ཡོངས་སུ་འབྱུང་བ་དང་། དེ་ལྟ་བུ་ཞིག་སྐྱེས་པར་གྱུར་ཏོ། །རིགས་ཀྱི་བུ་དེ་ནས་ལན་གཅིག་རྒྱལ་པོ་གཞོན་ནུ་གཟི་བརྗིད་ཀྱི་བདག་པོ་དེ་ཡབ་ཀྱིས་གནང་ནས་རྒྱལ་པོའི་གནས་སྡོང་པོའི་རི་བོའི་
དཔལ་གྱི་བཟའ་ཤིང་གི་ར་བ་སྤོས་ཀྱི་མྱུ་གུའི་རྩེ་མོ་ལས་འོད་ཀྱི་སྤྲིན་འབྱུང་བ་ཞེས་བྱ་བ་དེར་ས་བཟང་པོ་ལྟ་བའི་ཕྱིར་བུ་མོ་སྟོང་ཕྲག་ཉི་ཤུ་དང་ལྷན་གཅིག་ཏུ་བསོད་ནམས་ཀྱི་གཟི་བརྗིད་དང་དཔལ་གྱི་
བསྐལ་པ་བཟང་པོའི་རྣམ་པར་འཕྲུལ་པའི་རྒྱན་གྱིས་བྱུང་ནས་སྐྱེས་པ་དང་། བུད་མྱེད་ཀྱི་ཚོགས་ཀྱིས་ཀུན་ནས་དགའ་བར་བྱ་ཞིང་། འཛམ་བུ་ཆུ་ཀླུང་གི་གསེར་གྱི་ཤིང་རྟ་རྡོ་རྗེ་རིན་པོ་ཆེའི་འཁོར་ལོ་ཆེན་པོ་
བཞི་དང་ལྡན་པ། རྡོ་རྗེ་མཐུ་བོ་ཆེའི་སྲོག་ཤིང་གི་རྩ་བ་ཅན་ཙན་དན་དམ་པ་ལས་གྲུབ་པའི་ཡུ་བ་བཟང་པོ་དང་ལྡན་པ། རིན་པོ་ཆེའི་རྒྱལ་པོ་སྤོས་སྣ་ཚོགས་ཀྱི་ཤིང་ཐགས་རྣམ་པར་བཀྱེ་བ། རིན་པོ་ཆེ་ཐམས་
ཅད་ཀྱི་མེ་ཏོག་སྣ་ཚོགས་ཀྱིས་རབ་ཏུ་མཛེས་པར་བྱས་པ། རིན་པོ་ཆེ་ཐམས་ཅད་ཀྱི་དྲ་བས་ཀུན་ནས་ཡོགས་པའི་རྒྱན་དང་ལྡན་པ། སེང་གེའི་ཁྲི་རིན་པོ་ཆེ་དམ་པའི་དྲ་བའི་རྒྱན་གྱི་སྙིང་པོ་ཅན་དབུས་
སུ་བཤམས་པ། བུ་མོ་ལྔ་བརྒྱས་རིན་པོ་ཆེའི་སྲད་བུའི་ལྡ་ལྡི་ནས་ཡོངས་སུ་གཟུང་བ། ནམ་མཁའ་ལ་ཆགས་པ་མྱེད་པའི་རླུང་ལྟར་མགྱོགས་པའི་རྟ་ཅང་ཤེས་སྟོང་དང་བཅས་པ་ལ་ཞོན་ནས་
གདུགས་ཆེན་པོ་རིམ་གྱིས་གཞོལ་ཞིང་བལྟ་ན་སྡུག་པ། སྟེང་ཡོགས་རིན་པོ་ཆེའི་རྒྱལ་པོ་བཻ་ཌཱུརྱ་དཀར་པོ་ལས་བྱས་པ། འོད་དྲི་མ་མྱེད་པ་ཚད་མེད་པ་འབྱུང་བ། རིན་པོ་ཆེ་བསམ་གྱིས་མི་ཁྱབ་པ་རྨད་
དུ་བྱུང་བ་སྣ་ཚོགས་ཐམས་ཅད་ཀྱིས་སྤ་བར་སྤྲས་ཏེ། རྣམ་པ་ཐམས་ཅད་དུ་མཛེས་པར་བརྒྱན་པ། ཡུ་བ་རིན་པོ་ཆེའི་རྒྱལ་པོ་བཻ་ཌཱུརྱ་སྔོན་པོ་ལས་བསྒྲེང་བས་ནི་བསྐྱབས། སྲོག་ཆགས་བརྒྱ་སྟོང་མང་པོས་

77-1-143b

ནི་ཡོངས་སུ་བསྐོར། རོལ་མོ་བརྒྱ་སྟོང་མང་པོ་ལྷ་རྫས་ཀྱི་དབྱངས་ཡིད་དུ་འོང་བ་སྙན་པ་དང་ལྡན་པ་དག་ནི་རབ་ཏུ་བླངས། མེ་ཏོག་གི་ཆར་ཆེན་པོ་ནི་མངོན་པར་བབ། ལྷ་རྫས་ཀྱི་སྤོས་དྲི་ཞིམ་པའི་བདུག་སྤོས་ཀྱི་སྣོད་
བྱེ་བ་ཁྲག་ཁྲིག་བརྒྱ་སྟོང་གིས་ནི་རབ་ཏུ་བདུག་ཅིང་འགྲོ་བར་གྱུར་ཏོ། །དེ་དེ་ལྟར་འགྲོ་བའི་ཚེ་ལམ་ཡང་རྒྱུད་བརྒྱད་དང་ལྡན་པར་གྱུར་ཏེ། མཐོན་དམན་མྱེད་པ་དང་། གསེག་མ་དང་གྱོ་མོ་མྱེད་པ་དང་། གསེར་དངུལ་དང་
རིན་པོ་ཆེའི་རྒྱལ་པོ་སྣ་ཚོགས་ཀྱི་ཁམས་ཀྱིས་སའི་གཞི་རབ་ཏུ་སྒྲུབས་པ་དང་། གསེར་གྱི་བྱེ་མ་བཀྲམ་པ་དང་། རིན་པོ་ཆེ་སྣ་ཚོགས་ཀྱི་མེ་ཏོག་སིལ་མས་ཆལ་བར་གང་བ་དང་། གཡས་གཡོན་ནས་རིན་པོ་
ཆེའི་ཤིང་གི་ཕྲེང་བས་དཀྲིགས་པ་དང་། རིན་པོ་ཆེ་སྣ་ཚོགས་ཀྱི་ཁ་རན་བཀྱེ་བ་དང་། སྟེང་ནས་རིན་པོ་ཆེའི་དྲིལ་བུ་དྲ་བ་བྲེས་པ་དང་། རིན་པོ་ཆེའི་གནས་ལ་སྣ་ཚོགས་ཀྱིས་བཀབ་པ་དང་། རིན་པོ་ཆེའི་
རྒྱལ་མཚན་དང་། བ་དན་དང་། སྣམ་བུ་བརྒྱ་སྟོང་རབ་ཏུ་བརྒྱན་པ་དུ་མ་བསྒྲེང་ཞིང་སྤྱངས་པས་མཛེས་པར་བརྒྱན་པ་དང་། གཡས་གཡོན་ནས་རིན་པོ་ཆེའི་སྟེགས་བུའི་ཕྲེང་བ་རྣམ་པར་བཀོད་
པས་རྣམ་པར་བརྒྱན་པ་སྟེ། རིན་པོ་ཆེའི་སྟེགས་བུ་ལ་ལ་ལ་ནི་སློངས་མོ་བའི་ཚོགས་ལ་ཡོངས་སུ་སྟབས་པའི་དོན་དུ་རིན་པོ་ཆེའི་སྣོད་སྣ་ཚོགས། རིན་པོ་ཆེ་སྣ་ཚོགས་ཀྱིས་ཡོངས་སུ་བཀང་བ་
བཀོད། སྟེགས་བུ་ལ་ལ་ལ་ནི་རྒྱན་འདོད་པའི་སློངས་མོ་བ་རྣམས་བརྒྱན་པའི་དོན་དུ་རིན་པོ་ཆེ་ཐམས་ཅད་ཀྱི་རྒྱན་གྱི་རྣམ་པ་ཡོངས་སུ་བཀོད། སྟེགས་བུ་ལ་ལ་ལ་ནི་སེམས་ཅན་ཐམས་
ཅད་ཀྱི་བསམ་པ་ཡོངས་སུ་རྫོགས་པར་བྱ་བའི་ཕྱིར་ཡིད་བཞིན་གྱི་ནོར་བུ་རིན་པོ་ཆེ་བཀོད། སྟེགས་བུ་ལ་ལ་ལ་ནི་སུ་ཅི་འདོད་པ་དེ་དག་ལ་དེ་སྦྱིན་པའི་དོན་དུ་ཁ་ཟས་དང་བཏུང་བ་དང་། བྲོ་བ་སྣ་

77-1-144a

ཚོགས་ཀྱིས་ཡོངས་སུ་བཀང་བའི་སྣོད་མང་པོ་བཀོད། སྟེགས་བུ་ལ་ལ་ལ་ནི་རྣམ་པ་ཐམས་ཅད་དུ་མཆོག་ཏུ་ཞིམ་པའི་རོ་དང་། ཁ་དོག་དང་དྲི་དང་། བྲོ་དང་། རེག་ཡིད་དུ་འོང་བ་དང་ལྡན་པའི་ལྷ་རྫས་ཀྱི་ཁ་
ཟས་ཀྱི་རྣམ་པ་བཀོད། སྟེགས་བུ་ལ་ལ་ལ་ནི་རོ་བྲོ་བ་སྣ་ཚོགས་དང་ལྡན་པའི་ལྷ་རྫས་ཀྱི་ཤིང་ཏོག་སྣ་ཚོགས་ཐམས་ཅད་སྤུངས། སྟེགས་བུ་ལ་ལ་ལ་ནི་གོས་འདོད་པ་རྣམས་ཡིད་བཞིན་དུ་སྤྱོད་དུ་
གཟུང་བའི་ཕྱིར་ལྷ་རྫས་ཀྱི་གོས་རིན་པོ་ཆེ་ཁ་དོག་སྣ་ཚོགས་དང་ལྡན་པ་མདོག་བཟང་པོ་རྣམ་པ་སྣ་ཚོགས་དག་དང་རི་མོ་སྣ་ཚོགས་ཤིན་ཏུ་སྤ་བར་རྣམ་པར་ཕྱེ་བ་ཤིན་ཏུ་བཙུན་པ་ལ་འོས་པ་ཤིན་ཏུ་
ཕྲ་བ། རབ་ཏུ་འཇམ་པ། ཐགས་སུ་མ་བཏགས་པ། བྱེ་བ་བརྒྱ་ཕྲག་སྟོང་སྙེད་ཡོངས་སུ་བཀོད་པར་གྱུར་ཏོ། །སྟེགས་བུ་ལ་ལ་ལ་ནི་བྱུག་པ་འདོད་པའི་སེམས་ཅན་རྣམས་བསམ་པ་ཇི་ལྟ་བ་
བཞིན་དུ་ཡོངས་སུ་སྤྱོད་དུ་གཟུང་བའི་ཕྱིར། ལྷ་རྫས་ཀྱི་སྤོས་ཀྱི་རྣམ་པ་ཁ་དོག་དང་། དྲི་རྣམ་པ་སྣ་ཚོགས་ཐམས་ཅད་དང་ལྡན་པ་དག་ཀྱང་བཀོད་པར་གྱུར་ཏོ། །སྟེགས་བུ་ལ་ལ་ལ་ནི་སེམས་ཅན་
རྣམས་བསམ་པ་ཇི་ལྟ་བ་བཞིན་དུ་ཡོངས་སུ་སྤྱོད་དུ་གཟུང་བའི་ཕྱིར་ཡོ་བྱད་ཐམས་ཅད་ཀྱི་ཕུང་པོ་དག་ཀྱང་བཀོད་པར་གྱུར་ཏོ། །སྟེགས་བུ་ལ་ལ་ལ་ནི་ན་ཆུང་གཟུགས་བཟང་བ་རབ་ཏུ་མཛེས་པ་ཤིན་ཏུ་
སྡུག་པ། ཆ་ལུགས་སྡུགུ་སྣ་ཚོགས་དང་ལྡན་པ་ཡིད་དུ་འོང་བའི་གོས་སྣ་ཚོགས་གྱོན་པ། རྒྱན་ཐམས་ཅད་ཀྱིས་མཛེས་པར་བརྒྱན་པ། བྱུག་པ་སྣ་ཚོགས་ཀྱིས་ཚུལ་སྡུག་གུར་བརྒྱན་ཅིང་
མཛེས་པར་བྱས་པའི་ལུས་དང་ལྡན་པ། བུད་མྱེད་ཀྱི་བཟོ་དང་སྒྱུ་དང་། བཤེས་གཉེན་གྱི་ཚུལ་ལ་མཁས་པ་དག་ཀྱང་བཀོད་པར་གྱུར་ཏོ། །དེའི་ཚེ་རྒྱལ་པོའི་གནས་སྡོང་པོ་རི་བོའི་དཔལ་དེ་ཉིད་ན་སྦྲུལ་

77-1-144b

འཚོང་མའི་དམ་པ་རྒྱལ་པོའི་ལོངས་སྤྱོད་དུ་འོས་པ། བལྟ་ན་མཛེས་པ་ཞེས་བྱ་བ་ཞིག་ཡོད་པ། དེའི་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ཞེས་བྱ་བ་གཟུགས་བཟང་ཞིང་ཤིན་ཏུ་མཛེས་པ། བལྟ་ན་
སྡུག་པ་ཧ་ཅང་ཡང་མི་རིང་ཧ་ཅང་ཡང་མི་ཐུང་། ཧ་ཅང་ཡང་མི་སྦོམ། ཧ་ཅང་ཡང་མི་ཕྲ། ཧ་ཅང་ཡང་མི་དཀར། ཧ་ཅང་ཡང་མི་སྔོ་བ། སྐྲ་མཐོན་ཏིང་དུ་འདུག་པ། མྱིག་དཀར་ནག་འབྱེས་པ། བཞིན་
ཡིད་དུ་འོང་བ། ཚངས་པའི་དབྱངས་དང་ལྡན་པ། འཇམ་ཞིང་སྙན་པར་སྨྲ་བ། ཤེས་རབ་དང་ལྡན་པ། བཤེས་གཉེན་གྱི་ཚུལ་ཐམས་ཅད་ལ་མཁས་པ་གཙུག་ལག་ཐམས་ཅད་ལ་ཤེས་པ། བརྩོན་
པ་ལེ་ལོ་མྱེད་པ། རིམ་འགྲོ་ཡོད་པ། མོས་པ་དང་ལྡན་པ། བྱམས་པའི་སེམས་འདོགས་པ། ཁོང་ཁྲོ་བ་མྱི་མངའ་བ། བལྟ་ན་མི་ངོམས་ཤིང་ཡིད་དུ་འོང་བ། འདོད་ཆགས་དང་ཞེ་སྡང་དང་། གཏི་མུག་
ཆུང་བ། ངོ་ཚ་ཤེས་ཤིང་ཁྲེལ་ཡོད་པ། དྲང་ཞིང་མཉེན་པ། གཡོ་དང་སྒྱུ་མེད་པ་ཞིག་ཡོད་དེ། དེ་དང་ལྷན་གཅིག་ཏུ་བུ་མོ་དུ་མ་ཞིག་གིས་ཡོངསུ་བསྐོར་ཏེ། རིན་པོ་ཆེའི་ཤིང་རྟ་ལ་ཞོན་ནས་རྒྱལ་
པོའི་གནས་སྡོང་པོའི་རི་བོའི་དཔལ་ནས་བྱུང་སྟེ། རྒྱལ་པོས་བཀའ་བསྩལ་ནས། རྒྱལ་བུ་གཞོན་ནུ་གཟི་བརྗིད་ཀྱི་བདག་པོའི་མདུན་ནས་རྒྱལ་བུ་གཞོན་ནུ་དེ་གླུ་ལེན་ཞིང་འདོང་འདོང་བ་
ལས། རྒྱལ་བུ་གཞོན་ནུ་གཟི་བརྗིད་ཀྱི་བདག་པོ་མཐོང་ནས། འདོད་ཆགས་ཀྱི་སེམས་ཤིན་ཏུ་མི་བཟེད་པ་ཞིག་གཡོས་ཏེ། རྒྱལ་བུ་གཞོན་ནུ་གཟི་བརྗིད་ཀྱི་བདག་པོ་ཤིན་ཏུ་ཡིད་དུ་འོང་ཆེས་
ནས་རྗེས་སུ་འབྲང་ཞིང་སེམས་ལ་རང་དབང་མེད་པས། བལྟ་ན་སྡུག་པ་ལ་འདི་སྐད་ཅེས་སྨྲས་སོ། །མ་འདི་ལྟར་མཁྱེན་པར་མཛོད་གཅིག །གལ་ཏེ་བདག་རྒྱལ་བུ་གཞོན་ནུ་གཟི་བརྗིད་ཀྱི་བདག་

77-1-145a

པོ་ལ་མ་གཏང་ན་ནི་འགུམ་པའམ། སྲོག་ལ་འབབ་པའི་སྡུག་བསྔལ་གཅིག་ཏུ་འགྱུར་རོ། །དེས་སྨྲས་པ། བུ་མོ་དེ་ལྟ་བུའི་སེམས་མ་བསྐྱེད་གཅིག །གཞོན་ནུ་འདི་ནི་འཁོར་ལོས་བསྒྱུར་བའི་
མཚན་དང་ལྡན་པ་སྟེ། དེའི་ཡབ་ནོར་གྱི་བདག་པོ་མི་བཞུགས་པར་གྱུར་ན། འཁོར་ལོས་བསྒྱུར་བའི་རྒྱལ་སྲིད་ལ་གནས་པར་འགྱུར་བའི་གནས་ཡོད་དོ། །དེ་འཁོར་ལོས་བསྒྱུར་བའི་རྒྱལ་པོར་འགྱུར་བས། 
དེའི་བུད་མེད་རིན་པོ་ཆེ་ནམ་མཁའ་ལས་འགྲོ་བ་འབྱུང་བར་འགྱུར་ལ། བུ་མོ་བདག་ཅག་ཀྱང་། སྨད་འཚོང་མ་དག་གཅིག་སྟེ། འཇིག་རྟེན་ཐམས་ཅད་དགའ་བར་བྱེད་པ་ཡིན་གྱི། ཡུ་བུས་སེམས་ཅན་འགའ་
ཞིག་ལ་ནམ་མཚོའི་བར་དུ་བསྙེན་བཀུར་མྱི་བྱར་མྱི་རུང་བའང་མྱེད་དེ། ཡུ་བུ་ནི་རྒྱལ་པོ་ནོར་གྱི་བདག་པོའི་བཀས་རྒྱལ་བུ་གཞོན་ནུ་གཟི་བརྗིད་ཀྱི་བདག་པོའི་རིམ་འགྲོར་འདོད་འདོད་པར་ཟད་ཀྱིས་དེ་
ལྟ་བུའི་སེམས་བརྟན་པར་མ་བྱེད་གཅིག །གནས་དེ་ནི་ཐོབ་པར་ཡང་ཤིན་ཏུ་དཀའོ། །དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐུ་ཉི་མ་དམ་པ་
ཞེས་བྱ་བ་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ་བླ་ན་མྱེད་པ། སྐྱེས་བུ་འདུལ་བའི་ཁ་ལོ་བསྒྱུར་བ་ལྷ་དང་། མི་རྣམས་ཀྱི་སྟོན་པ། སངས་རྒྱས་
བཅོམ་ལྡན་འདས་འཇིག་རྟེན་དུ་བྱུང་སྟེ། དེའི་སྙིང་པོ་བྱང་ཆུབ་ཆོས་ཀྱི་སྤྲིན་ཤིན་ཏུ་སྡུག་པའི་འོད་ཅེས་བྱ་བ་ཡང་བཟའ་ཤིང་གི་ར་བ་སྤོས་ཀྱི་མྱུ་གུའི་རྩེ་མོ་ལས་འོད་ཀྱི་སྤྲིན་འབྱུང་བ་ཞེས་བྱ་བ་
དེའི་ནང་དུ་བྱུང་སྟེ། དེར་བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པ་ཐོག་མར་མངོན་པར་རྫོགས་པར་སངས་རྒྱས་ནས། ཞག་བདུན་ལོན་པ་དེ་བུ་མོ་དེ་ཤིང་རྟ་ལ་ཞོན་བཞིན་དུ་ཡུར་ཞིང་

77-1-145b

འཆོག་འཆོག་པའི་རྨྱི་ལམ་དུ་མཐོང་ནས་སད་པར་གྱུར་པ་དང་། སྔོན་གཉེན་བཤེས་སུ་གྱུར་པའི་ལྷ་མོ་ཞིག་གིས་བསྟན་པ། བུ་མོ་དེ་བཞིན་གཤེགས་པའི་སྐུ་ཉི་མ་དམ་པ་དེ་ནི་སྙིང་པོ་བྱང་ཆུབ་ཆོས་ཀྱི་སྤྲིན་ཤིན་
ཏུ་སྡུག་པའི་འོད་ཅེས་བྱ་བ་ན་རྣམ་པར་སྤྱོད་ཅིང་ཐོག་མ་མངོན་པར་རྫོགས་པར་སངས་རྒྱས་ནས་ཞག་བདུན་ལོན་ཏེ། བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཅིང་། ལྷ་དང་། ཀླུ་དང་། གནོད་སྦྱིན་
དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་ཕྱེ་ཆེན་པོ་དང་། ཚངས་པ་དང་། གྱ་ནོམ་སྣང་བ་དང་། འོག་མྱིན་གྱི་ལྷའི་ཚོགས་ཀྱིས་མདུན་དུ་བྱས་ཤིང་བཞུགས་སྟེ། དེར་སའི་ལྷ་མོ་
ཐམས་ཅད་ཀྱང་ཀུན་ནས་འདུས། ཆུའི་ལྷ་མོ་དང་། མྱེའི་ལྷ་མོ་དང་། རླུང་གི་ལྷ་མོ་དང་། རྒྱ་མཚོའི་ལྷ་མོ་དང་། ཆུ་ཀླུང་གི་ལྷ་མོ་དང་། རིའི་ལྷ་མོ་དང་། མཚན་མོའི་ལྷ་མོ་དང་། སྐྱ་རེངས་འཆར་བའི་ལྷ་མོ་དང་། 
ནགས་ཚལ་གྱི་ལྷ་མོ་དང་། ཤིང་གི་ལྷ་མོ་དང་། སྨན་གྱི་ལྷ་མོ་དང་། ལོ་ཐོག་གི་ལྷ་མོ་དང་། གྲོང་ཁྱེར་གྱི་ལྷ་མོ་དང་། རྐང་གིས་འགྲོ་བའི་ལྷ་མོ་དང་། སྙིང་པོ་བྱང་ཆུབ་ཀྱི་ལྷ་མོ་དང་། ལུས་ཀྱི་འོད་གཟེར་གྱི་
ལྷ་མོ་དང་། སེམས་ཅན་གྱི་རིས་ཀྱི་ལྷ་མོ་དང་། ནམ་མཁའི་ལྷ་མོ་དང་། ཕྱོགས་ཐམས་ཅད་ཀྱི་ལྷ་མོ་དག་ཀྱང་བཅོམ་ལྡན་འདས་སྐུ་ཉི་མ་དམ་པའི་ཞལ་བལྟ་བའི་ཕྱིར་ཀུན་ནས་འདུས་སོ་ཞེས་ནས། དེ་ལྟར་
དེས་དེ་བཞིན་གཤེགས་པ་མཐོང་བ་དང་། དེ་བཞིན་གཤེགས་པའི་ཡོན་ཏན་ཐོས་པས་བག་ཚ་མྱེད་པར་གྱུར་ཏེ། སྐབས་སུ་བབ་ནས་རྒྱལ་བུ་གཞོན་ནུ་གཟི་བརྗིད་ཀྱི་བདག་པོའི་མདུན་དུ་དེའི་ཚེ་ཚིགས་
སུ་བཅད་པ་འདི་དག་སྨྲས་སོ། །གཟུགས་ཀྱི་མཆོག་གིས་འཇིག་རྟེན་ཁྱད་པར་འཕགས། །ཡོན་ཏན་རྣམས་ཀྱིས་ཐམས་ཅད་ཕྱོགས་སུ་གྲགས། །ཤེས་རབ་སྟོབས་ཀྱིས་བདག་དང་འདྲ་

77-1-146a

མ་མཆིས། །སྒྱུ་རྩལ་དགའ་བ་སྒྱུ་མའི་ཚུལ་ཀུན་འཚལ། །སྲོག་ཆགས་མང་པོ་སྟོང་ཕྲག་དུ་མ་ཡིས། །འདོད་ཆགས་དབང་གིས་བདག་ལ་རབ་བལྟས་ཀྱང་། །གཞོན་ནུ་བདག་ནི་འཇིག་རྟེན་གང་ལ་ཡང་། །
གློ་བ་ཆགས་པར་གྱུར་པ་གཅིག་མ་མཆིས། །སེམས་ཅན་གང་ལ་ཡང་ཞེན་པར་གྱུར་པ་འམ། །གང་ལ་འང་ཁོང་ཁྲོར་བདག་གི་སེམས་མ་གྱུར། །གང་ལ་འང་དགྲ་མྱི་བགྱིད་དེ་ཞེ་མྱི་སྡང་། །བདག་ནི་
སེམས་ཅན་སྨན་པར་དགའ་བ་ལགས། །སྐུ་གཞན་སྐུ་མཆོག་ཡོན་ཏན་རབ་མངའ་ཁྱོད། །གང་ཚེ་བདག་གིས་གསལ་བར་མཐོང་གྱུར་པ། །དེ་ཚེ་དབང་པོ་ཀུན་ཀྱང་ཉམས་སུ་བདེ། །རྒྱ་ཆེ་ཡངས་
པར་ཤིན་ཏུ་དགའ་བར་གྱུར། །ཁྱོད་ཀྱི་དབུ་བཟང་ལྕང་ལོ་འཁྲིལ་བ་ན། །རིན་ཆེན་རྣམ་སྣང་མདོག་ཏུ་མཐོན་ཏིང་གསལ། །ཞལ་གྱི་སྨིན་སྡུག་འཕྲལ་བ་ཤངས་སུ་མཛེས། །ཁྱོད་ཀྱི་ཞལ་སྔར་ལུས་བདེ་
བདག་འབུལ་ལོ། །མཚན་གྱི་རབ་འཆང་གཟི་བརྗིད་ཆེ་མངའ་བ། །སྐུ་གཟུགས་གསེར་གྱི་རི་བོ་བཟང་པོ་འདྲ། །ཁྱོད་ཀྱི་སྤྱན་སྔར་བདག་ལྟ་མི་མཛེས་ཏེ། །ཟིལ་དུ་རླག་པས་སྣག་ཚའི་གཟུགས་
ཀྱང་འདྲ། །སྤྱན་གསལ་རང་ལ་དཀར་ནག་འབྱེས་པས་མཛེས། །ཤིན་ཏུ་ཞལ་རྒྱས་སེང་གེའི་ཟ་འགྲམ་ཅན། །ཁྱོད་ཀྱི་གསུང་ནི་ཐོགས་པ་མ་མཆིས་ན། །གསུང་མཆོག་མངའ་བས་བདག་ནི་
གཟུང་དུ་གསོལ། །ཁྱོད་ཀྱི་ཞལ་ནི་ལྗགས་ཡངས་མངའ་བ་ན། །མདོག་དམར་ཡངས་པ་རིན་ཆེན་མཆོག་གི་འོད། །ཚངས་དབྱངས་ཡན་ལག་མཆོག་གི་གསུང་མངའ་བས། །གསུང་ཞིང་
འགྲོ་བ་རབ་ཏུ་དགའ་བ་མཛད། །ཁྱོད་ཀྱི་ཞལ་ནི་ཐགས་བཟང་ཚེམས་མངའ་བ། །དུང་ལྟར་དྲི་མེད་ཤིན་ཏུ་རྣམ་པར་གསལ། །འཛུམ་ཞིང་བཞད་པ་རྣམ་པར་སྟོན་མཛད་ཀྱང་། །སྐྱེས་བུ་དཔལ་

77-1-146b

ཁྱོད་འགྲོ་བ་དགའ་བར་མཛད། །ཁྱོད་ཀྱི་སྐུ་ལ་མཚན་རབ་མཛེས་པ་རྣམས། །སུམ་བཅུ་རྩ་གཉིས་དག་ཅིང་འོད་ཀྱང་གསལ། །སྐུ་གཟུགས་བཟང་པོ་ཡོངས་སུ་དེས་བརྒྱན་པས། །མིའི་དབང་པོ་འཁོར་ལོས་
སྒྱུར་བ་བྱོན་དེ་ནས་རྒྱལ་བུ་གཟི་བརྗིད་ཀྱི་བདག་པོས། བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ལ་འདི་སྐད་ཅེས་སྨྲས་སོ། །བུ་མོ་ཁྱོད་སུའི་ཁྱོད་ལ་ཡོངས་སུ་སྲུང་བ་ནི་གང་ཞིག་ཡོད། 
བུ་མོ་ང་ལ་ནི་གཞན་གྱིས་ཡོངས་སུ་གཟུང་བའི་བུད་མེད་བདག་གིར་བྱར་མི་རུང་ངོ་ཞེས་ནས། །དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །བལྟ་སྡུག་གཟུགས་ཀྱི་ཡོན་ཏན་ལེགས་ལྡན་
པ། །མཚན་བཟང་བསོད་ནམས་རྣམ་པར་དག་པའི་ལུས། །ཁྱོད་ལ་དྲི་བའི་དོན་འདི་ང་ལ་སྨྲོས། །ལུས་མཆོག་ཁྱོད་ནི་སུ་ཡིས་ཡོངས་སུ་བཟུང་། །ཁྱོད་ལ་ཕ་དང་མ་ནི་ཡོད་དམ་མྱེད། །ཁྱིམ་ཐབ་
མྱེད་དམ་ཁྱོད་ནི་སུ་ཞིག་དབང་། །གཟུགས་མཛེས་ཁྱོད་ལ་སེམས་ཅན་གཞན་ནམ་གཅིག །བདག་གི་ཡིན་པར་འདུ་ཤེས་བྱེད་མྱེད་དམ། །ཁྱོད་ཀྱི་ཡིད་ནི་གསོད་ལ་མྱི་དགའ་གྲང་། །གཞན་
ལས་མ་བྱིན་ཕྲོགས་པར་མི་བྱེད་དམ། །འདོད་པས་ལོག་པར་གཡེམ་ལ་མྱི་དགའ་གྲང་། །བརྫུན་དུ་བརྗོད་སྨྲར་ཡིད་ནི་མི་མོས་སམ། །ཁྱོད་ཀྱི་བློ་གྲོས་མཛའ་འབྱེད་མི་འཇུག་གམ། །ཚིག་རླང་
གཞན་ལ་གནོད་པར་མྱི་སྨྲ་གྲང་། །གཞན་གྱི་ནོར་ལ་ཆགས་པར་སེམས་མྱེད་དམ། །འགྲོ་བ་རྣམས་ལ་གནོད་པར་མི་སེམས་གྲང་། །བལྟ་བའི་འབྲོག་དགོན་ལམ་དུ་མ་ཞུགས་གྲངས། །ལས་ཀྱི་རྒྱུད་
ལ་ཡི་དམ་སེམས་མྱེད་དམ། །གཡོ་མདོག་སྒྱུའི་དབང་དུ་མི་འགྲོ་འམ། །མི་འཐད་འཇིག་རྟེན་གནོད་པར་མི་བྱེད་གྲང་། །ཕ་མ་གཉེན་དང་མཛའ་བཤེས་བླ་མ་ལ། །སྲི་ཞུ་རིམ་གྲོར་བྱ་བའི་ཚུལ་འཆང་

77-1-147a

ངམ། །ཕོངས་པར་གྱུར་པ་ཡོངས་སུ་བསྡུ་དོན་དུ། །ཁྱེད་ཀྱི་ཡིད་ལ་བྱིན་པར་སེམས་ཡོད་དམ། །ཆོས་དང་འཐུན་པར་དུས་སུ་འདོམས་བྱེད་ཅིང་། །ལུས་དང་སེམས་ཡིད་ཡོངས་སུ་དག་བྱེད་ལ། །
ཡང་དག་ལས་སུ་རུང་བ་བསྐྱེད་བྱེད་པའི། །དགེ་བཤེས་རྣམས་ལ་དགའ་བར་སེམས་ཡོད་དམ། །སངས་རྒྱས་རྣམས་ལ་རིམ་གྲོར་བྱེད་ལྡན་ནམ། །སངས་རྒྱས་སྲས་ལ་དགའ་མཆོག་ཡོད་དམ་མྱེད། །
གང་ལས་བདེ་གཤེགས་སྲས་རྣམས་སྐྱེར་འགྱུར་བའི། །ཆོས་ཀྱི་དམ་པ་དེ་ནི་ཤེས་མི་ཤེས། །ཆོས་ཡིད་མཆོག་ལ་གནས་པར་ཁྱོད་བྱེད་གྲང་། །ཆོས་མིན་སྤྱད་པའི་བློ་གྲོས་མེད་གྲང་དེ། །ལེགས་
པ་མཐའ་ཡས་ཡོན་ཏན་རྒྱ་མཚོ་ལ། །གུས་པའི་སྲི་ཞུ་དགའ་སེམས་མཆོག་ཡོད་དམ། །སྐྱེ་བོ་མགོན་མེད་ཕོངས་པར་གྱུར་པ་ཡི། །འདྲེན་པ་རྣམས་ལ་བྱམས་པའི་ཡིད་ཡོད་དམ། །དེར་སོང་འགྲོ་བའི་
ལམ་ལ་ཞུགས་པ་ཡི། །ཤིན་ཏུ་ཉམས་ཐག་སྙིང་རྗེ་སེམས་གྲང་ངོ་། །གཞན་གྱི་ཕུན་སུམ་ཚོགས་པ་མཐོང་གྱུར་ན། །ཁྱོད་ནི་དགའ་བ་མཆོག་དང་ལྡན་འགྱུར་རམ། །སྐྱེ་བོ་ཉོན་མོངས་རྣམས་ཀྱིས་
འཁོལ་གྱུར་ལ། །ཤེས་རབ་མཐུ་བསྐྱེད་བཏང་སྙོམས་བྱེད་མི་བྱེད། །མྱི་ཤེས་གཉིད་ལོག་སྐྱེ་བོ་མང་མཐོང་ན། །བྱང་ཆུབ་དམ་པར་སྨོན་ལམ་འདེབས་བྱེད་གྲང་། །བསྐལ་པ་མཐའ་ཡས་སྤྱད་པ་སྤྱོད་
བྱེད་ན། །སྨོན་ལམ་དམ་པས་སྐྱོ་བར་མི་འགྱུར་གྲང་། །དེ་ནས་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་མ་སྨད་འཚོང་མའི་གཙོ་མ་བལྟ་ན་སྡུག་པས་རྒྱལ་བུ་གཞོན་ནུ་གཟི་བརྗིད་ཀྱི་
བདག་པོ་ལ་འདི་སྐད་ཅེས་སྨྲས་སོ། །གཞོན་ནུ་བདག་གི་བུ་མོ་འདི་ནི་རྫུས་ཏེ་བྱུང་བ། པད་མོའི་ནང་ནས་སྐྱེས་པ་སྟེ། སྔན་ཆད་ཁྱིམ་གྱི་ནང་ནས་ཕྱི་རོལ་ཏུ་མ་བྱུང་ངོ་ཞེས་ནས། དེའི་ཚེ་ཚིགས་

77-1-147b

སུ་བཅད་པ་འདི་དག་སྨྲས་སོ། །བུ་མོ་འདི་ལ་ཁྱོད་ཀྱིས་གང་སྨྲས་པ། །དེ་ནི་བདག་གིས་ཁྱོད་ལ་རིམ་པར་བརྗོད། །ཇི་ལྟར་བུ་མོ་འདི་སྐྱེས་བསྐྱེད་བསྐྱེད་པ། །བདག་གིས་ཁྱོད་ལ་གསོལ་གྱིས་གསན་དུ་གསོལ། །
གང་ཚེ་དགུང་སངས་ཁྱོད་ནི་བལྟམ་གྱུར་པ། །དེ་ཚེ་བདག་གི་བུ་མོ་འདི་སྐྱེས་ཏེ། །རྫུས་ཏེ་དྲི་མེད་པད་མའི་སྦུབས་ནས་བྱུང་། །ཡན་ལག་ཀུན་ཚང་མྱིག་ཡངས་འདི་ཡང་སྐྱེས། །དུས་ཀྱི་ནང་ན་སོས་ཀ་དུས་
མཆོག་ལ། །སྨན་དང་ལོ་ཐོག་མྱུ་གུ་འཐོན་པའི་ཚེ། །སྩ་ལའི་ར་བ་བཟའ་ཤིང་རབ་མཆོག་ཏུ། །བདག་ནི་རྩེ་དགའ་དེ་ཁྲོད་མཆི་མཆི་སྟེ། །སྣ་ཚོགས་ཡལ་གའི་ལོ་མ་རྒྱས་གྱུར་ཅིང་། །ཞུགས་
ཤིང་མེ་ཏོག་སྡུག་རྒྱས་སྤྲིན་གྱི་མདོག །བྱ་བྲན་སྣ་ཚོགས་སྒྲ་སྙན་ཞུགས་ཤིང་ནང་། །ནགས་ཁྲོད་མྱ་ངམ་མ་མཆིས་དགར་མཆིས་མཆིས། །རྒྱན་དང་ལྡན་ཞིང་ཤིན་ཏུ་ཡིད་འོང་ལ། །རིན་
ཆེན་རང་བ་སྣ་ཚོགས་འཚལ་པ་རྣམས། །རོལ་མོ་གླུ་ལ་ཤིན་ཏུ་བསླབས་པ་ཡི། །བུ་མོ་བརྒྱ་ཕྲག་བརྒྱད་དང་བདག་ཀྱང་ལྡན། །སྤོས་མཆོག་ལྡན་པའི་པུན་ད་རི་ཀ་དང་། །རྫིང་འགྲམ་མེ་
ཏོག་སིལ་མས་བལྟམས་པ་ཡི། །ས་ཕྱོགས་དེ་ན་བུད་མྱེད་མང་པོ་དང་། །བདག་ཅག་དེ་ན་དགའ་བར་མཆིས་མཆིས་ན། །ཆབ་དབུས་དེ་ནས་རིན་ཆེན་པད་མོའི་མཆོག །འདབ་མ་སྟོང་དང་ལྡན་པ་
བྱུང་བར་གྱུར། །ལོ་མ་རིན་ཆེན་ཡུ་བ་བཻ་ཌཱུརྱ། །སྙིང་པོ་འཛམ་བུ་ཆུ་ཀླུང་གསེར་ལས་བགྱིས། །སྤོས་མཆོག་རིན་ཆེན་དམ་པའི་ཟེ་བ་ཅན། །འོད་ཆེན་འཛམ་བུའི་རྒྱལ་མཚན་ཀུན་ཏུ་འཕྲོ། །
དེ་ཚེ་དགུང་ལ་གདུགས་ཤིག་ཤར་ཏམ་ཞེས། །སྐྱེ་བོ་ཀུན་ཀྱང་ཡིད་གཉིས་འཚལ་བར་གྱུར། །དགུང་སངས་གྱུར་ནས་པད་མོ་ཆེན་པོ་དེ། །གདུགས་ཀྱི་འོད་ཀྱིས་རབ་ཏུ་རྒྱས་བགྱིས་ནས། །

77-1-148a

སྣང་བ་དེ་དང་སྒྲ་སྙན་རབ་ཀྱང་བཀྱེ། །འདི་འབྱུང་དེ་ནི་སྔོན་གྱི་ལྟས་སུ་བྱུང་། །བུད་མྱེད་རིན་ཆེན་འདི་འདྲ་འཇིག་རྟེན་དུ། །ཚུལ་ཁྲིམས་དམ་པ་རྣམ་པར་དག་པས་བྱུང་། །སུག་ལས་
བགྱིས་པ་ཆབ་འཚལ་མི་འགྱུར་བས། །འདི་ནི་སྔོན་ཅད་ལེགས་པར་སྤྱད་པའི་འབྲས། །སྐྲ་ནི་མཐོན་ཏིང་མིག་ཡངས་ཨུད་པ་ལ། །ཚངས་པའི་དབྱངས་ལྡན་ཁ་དོག་རྣམ་དག་ལྡན། །ཕྲེང་བ་རྒྱན་མཆོག་
ཆ་ལུགས་དབྱིབས་སུ་ཤིས། །དཔལ་ལྟར་དྲི་མྱེད་པད་མོའི་མཆོག་ལས་སྐྱེས། །ལུས་ནི་རྣམ་དག་ཡན་ལག་རྒྱན་དུ་མཉམ། །ལུས་ཀྱི་དབྱིབས་ལེགས་ཡན་ལག་ཡོངས་སུ་ཚང་། །གསེར་གྱི་
གཟུགས་ལ་ནོར་བུས་སྤྲས་པ་འདྲ། །ཕྱོགས་ཀུན་འོད་ཀྱིས་རྣམ་པར་གདོང་བར་གསལ། །ལུས་ལས་ཙན་དན་རྒྱལ་པོའི་སྤོས་ཀྱི་དྲི། །ཕྱོགས་སུ་རྒྱས་པར་འདིའི་ལུས་ལས་འབྱུང་། །སྒྲ་སྙན་
ལྷ་རྫས་ཡིད་དུ་འོང་བརྗོད་ཚེ། །ཁ་ནས་ཨུད་པ་ལའི་ངད་ཀྱིས་ལྡང་། །འདི་ནི་གང་ཚེ་འཛུམ་ཞིང་རྒོད་པའི་ཚེ། །རོལ་མོའི་སྒྲ་སྙན་དེ་ཚེ་འབྱུང་བར་འགྱུར། །བུད་མེད་རིན་ཆེན་འཇིག་རྟེན་འདིར་
བྱུང་སྟེ། །ཐ་མལ་ཀུན་གྱི་དབང་དུ་གྱུར་མ་ལགས། །ཁྱོད་མ་གཏོགས་པར་མིའི་འཇིག་རྟེན་ན། །འདིའི་བདག་པོ་གཞན་ནི་གཅིག་མ་མཆིས། །མཚན་རབ་བརྒྱན་པའི་སྐུ་གཟུགས་མཛེས་མངའ་
བ། །ཁྱོད་ཀྱི་ཞལ་སྔར་བུ་མོ་འདི་བཞེས་གསོལ། །འདི་ནི་ཧ་ཅང་མི་རིང་མི་ཐུང་སྟེ། །ཧ་ཅང་མི་སྦོམ་ཧ་ཅང་མི་ཕྲ་ལགས། །ལྟོ་ནི་གཞུ་འདྲ་ནུ་མ་ཤས་ཀྱང་རྒྱས། །ཡན་ལག་སྐྱོན་བྲལ་འདི་ནི་
ཁྱོད་ལ་འོས། །གྲངས་དང་ཡི་གེ་ཤེས་བགྱི་ཚུལ་རྣམས་དང་། །ལག་བརྡའི་ཚུལ་དང་གཙུག་ལག་ཚུལ་ལ་མཁས། །འཇིག་རྟེན་ཀུན་ན་བཟོ་རྣམས་ཇི་སྙེད་པ། །མ་ལུས་དེ་ལ་འདི་ནི་ཕ་རོལ་ཕྱིན། །

77-1-148b

མདའ་གཞུའི་ཚུལ་ལའང་རྣམ་པ་རྒྱུས་སུ་མཁས། །འཕོང་གི་ཆོ་ག་རྣམ་པར་ངེས་པར་རྟོགས། །དགྲ་ཡིད་གཞུང་ཞིང་དབབ་པ་ཀུན་ལ་ཡང་། །འདི་ནི་མཆོག་ཏུ་ཕ་རོལ་ཕྱིན་པར་གྱུར། །ལུས་རྣམས་ཀུན་
ལ་རིན་ཆེན་རྣམ་དག་པའི། །འོད་མཆོག་འཁོར་གྱིས་ཤིན་ཏུ་མཛེས་པ་སྟེ། །སྔོན་བགྱིས་ལེགས་པས་ཤིན་ཏུ་སྡུག་པར་བརྒྱན། །འདི་ནི་ཁྱོད་ཀྱི་ཕྱག་རྗེད་ཁྱོད་ལ་འོས། །མིའི་འཇིག་རྟེན་གནས་
རྣམས་ཇི་སྙེད་པ། །དེ་དག་གསོ་བའི་ཚུལ་གྱི་ཆོ་ག་འཚལ། །དེ་དག་མ་ལུས་ཐམས་ཅད་ཞིར་བགྱི་ནའང་། །མ་ནོར་སྨན་གྱི་ཚོགས་གསོ་བ་ལ་མཁས། །འཛམ་བུའི་རྒྱལ་མཚན་སྐད་རྣམས་ཐམས་
ཅད་དང་། །སྐྱེ་བོའི་ངེས་ཚིག་མ་ལུས་བྱེ་བྲག་དང་། །འཇིག་རྟེན་ཐ་སྙད་བརྗོད་པའི་མཚམས་སྦྱར་བ། །སྣ་ཚོགས་ཀུན་ལའང་འདི་ནི་ཕ་རོལ་ཕྱིན། །དབྱངས་ཀྱི་ཡན་ལག་མངོན་པར་སྒྲུབ་པའི་ཚུལ། །
དེ་དག་བྱེ་བྲག་ཚུལ་ལའང་རབ་ཏུ་ཞུགས། །འཇིག་རྟེན་གླུ་གར་རྣམ་པ་ཇི་སྙེད་པ། །མ་ལུས་དེ་རྣམས་ཀུན་གྱི་ཚུལ་ལའང་འཚལ། །རོལ་མོ་སིལ་སྙན་དག་གི་ཐབས་རྣམས་དང་། །བཞད་གད་
རོལ་མོའི་ཚུལ་ལ་རྣམ་པར་མཁས། །ཆགས་དང་མ་ཆགས་མི་རྣམས་མངོན་འཚལ་ཀྱང་། །ཁོང་ཁྲོ་ཆགས་པར་འགྱུར་བ་མ་མཆིས་སོ། །འཇིག་རྟེན་བུད་མེད་སྒྲ་རྣམས་ཇི་སྙེད་པ། །ཁྱད་པར་
ནང་དུ་དེ་ལ་མ་ལུས་འཚལ། །བུད་མྱེད་སྐྱེ་བོའི་སྐྱོན་དུ་བགྱི་བ་རྣམས། །གྲངས་མེད་དེ་དག་འདི་ལ་གཅིག་མ་མཆིས། །ཐིལ་གྱིས་བལྟ་དང་ཟུར་གྱིས་བལྟ་བ་དང་། །ཡན་ལག་སྟབས་དང་ཡན་ལག་
རྣམས་བསྟན་དང་། །བཤེས་གཉེན་ཀུན་ལ་མཁས་པའི་མཐར་ཕྱིན་ཏེ། །ཁྱོད་ཀྱི་དགོངས་པ་ཡོངས་སུ་རྫོགས་པར་བགྱིད། །འདི་ནི་ཕྲག་དོག་སེར་སྣ་མ་མཆིས་ཏེ། །འདོད་པ་ཞེང་དུ་མི་སྡང་སྡིག་མི་

77-1-149a

བགྱིད། །བཟོད་ཅིང་དྲང་ལ་མཉེན་ཞིང་ངེས་པ་སྟེ། །མི་ཁྲོ་མི་བརླང་ཤིན་ཏུ་མཁས་པ་ལགས། །ལྡང་བའི་དང་ཚུལ་ཡིད་དུ་འོང་བའི་ངག །རྟག་ཏུ་བླ་མའི་ཐུགས་དང་སྦྱོར་བ་སྟེ། །སྐུ་ཉམས་གར་
བདེ་ལྟ་ཞིང་སྲིད་ཞུ་ཆེ། །ཁྱོད་ཀྱི་སྤྱོད་འཐུན་རྗེས་སྙེགས་ཚུལ་དང་འཐུན། །རྒས་ཤིང་གཏུགས་དང་ནད་དང་ལྡན་པ་དང་། །ཕོངས་པ་ཤིན་ཏུ་སྡུག་བསྔལ་གྱུར་པ་དང་། །མྱིག་དང་བྲལ་ཞིང་མགོན་སྐྱབས་
མ་མཆིས་ལ། །འདི་ནི་སྙིང་བརྩེ་རྟག་ཏུ་བསྐྱེད་པ་ལགས། །འདི་ནི་རྟག་ཏུ་གཞན་དོན་སེམས་ལ་བརྩོན། །བདག་ལ་སྨན་པ་སེམས་པར་བགྱིད་མ་མཆིས། །འཇིག་རྟེན་ཀུན་ལ་སྨན་པར་དགའ་
བ་སྟེ། །རླབས་ཆེན་སེམས་ཀྱི་ཡོན་ཏན་ཀུན་གྱིས་བརྒྱན། །མཆིས་སམ་ཉལ་ལམ་མཆེ་འམ་འགྲེང་ཡང་རུང་། །སྨྲ་འམ་མི་སྨྲ་འཛུམ་ཞིང་རྒོད་ཀྱང་རུང་། །རྟག་ཏུ་བག་མཆིས་དྲན་པ་
ཤེས་བཞིན་ཏེ། །འདི་ནི་འཇིག་རྟེན་ཀུན་གྱིས་རྟག་ཏུ་བསྔགས། །བསོད་ནམས་ལྡན་པས་ཀུན་ཏུ་རྣམ་པར་སྣང་། །འགྲོ་བ་ཀུན་ཀྱང་རྟག་ཏུ་དགའ་བ་སྟེ། །འདི་ལ་ལྟ་བས་འཇིག་རྟེན་
ངོམས་མྱི་འགྱུར། །འདི་ནི་གང་ལ་འང་ཆགས་པར་མ་མཆིས་ལགས། །དགེ་བཤེས་རྣམས་ལ་སྲིད་ཞུ་འདི་ཆེ་སྟེ། །དེ་དག་མཐོང་བར་རྟག་པར་རབ་ཏུ་དགའ། །རྗེས་སུ་ཅི་འབྱུང་ལྟ་ཞིང་
སྐྱོན་མེད་ཚུལ། །སེམས་ནི་རྟག་ཏུ་བསྟན་པ་རི་དང་འདྲ། །འདི་ནི་བསོད་ནམས་མཆོག་གིས་རྟག་ཏུ་བརྒྱན། །མི་མཛའ་དགྲར་ལེན་འདི་ལ་ཡོང་མ་མཆིས། །འདིའི་ཤེས་འདྲ་བུད་མྱེད་གཅིག་
མ་མཆིས། །རྒྱལ་སྲས་ཁྱོད་ལ་འདི་ནི་ཚུལ་དང་འཐུན།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་དགུ་པ། དེ་ནས་རྒྱལ་བུ་གཟི་བརྗིད་ཀྱི་བདག་པོ་བཟའ་ཤིང་གི་ར་བ་སྤོས་ཀྱི་མྱུ་གུའི་རྩེ་མོ་ལས་འོད་

77-1-149b

ཀྱི་སྤྲིན་འབྱུང་བར་ཕྱིན་ཏེ། བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པའི་མ་སྨད་འཚོང་མའི་གཙོ་མོ་བལྟ་ན་སྡུག་པའི་མདུན་དུ། བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ལ་འདི་སྐད་ཅེས་
སྨྲས་སོ། །བུ་མོ་ང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་པ་ཡིན་ཏེ། དེ་བས་ན་ངས་ཐམས་ཅད་མཁྱེན་པའི་ཚོགས་ནི་ཚད་མྱེད་པ་ཞིག་བསྩགས་པར་བྱ་དགོས། བསྐལ་
པ་མཐའ་དང་དབུས་མྱེད་པ་ཞིག་ཏུ་བྱང་ཆུབ་སེམས་དཔའི་སྤྱད་པ་སྤྱོད་དེ། ཕ་རོལ་ཏུ་ཕྱིན་པ་ཐམས་ཅད་ནི་ཡོངས་སུ་རྫོགས་པར་བྱ་དགོས། ཕྱི་མའི་མཐའི་བསྐལ་པའི་མུར་ཐུག་པར་ནི་དེ་
བཞིན་གཤེགས་པ་ཐམས་ཅད་མཆོད་པར་བྱ་དགོས་ཏེ། སངས་རྒྱས་ཐམས་ཅད་ཀྱི་བསྟན་པ་ནི་ཡོངས་སུ་གཟུང་བར་བྱ། སངས་རྒྱས་ཀྱི་ཞིང་ཐམས་ཅད་ནི་ཡོངས་སུ་སྦྱང་བར་བྱ། དེ་བཞིན་
གཤེགས་པ་ཐམས་ཅད་ཀྱི་རིགས་ནི་མི་གཅད་པར་བྱ། སེམས་ཅན་གྱི་རྒྱུད་ཐམས་ཅད་ནི་ཡོངས་སུ་སྨྱིན་པར་བྱ། སེམས་ཅན་ཐམས་ཅད་ཀྱི་འཁོར་བའི་སྡུག་བསྔལ་ནི་རྣམ་པར་བཟློག་
པར་བྱ། མཐའ་ལས་རྒལ་བར་བདེ་བར་ལ་ནི་སེམས་ཅན་རབ་ཏུ་དགོད་པར་བྱ། སེམས་ཅན་ཐམས་ཅད་ཀྱི་ཡེ་ཤེས་ཀྱི་མྱིག་ནི་ཡོངས་སུ་དག་པར་བྱ། བྱང་ཆུབ་སེམས་དཔའ་ཐམས་ཅད་ཀྱིས་སྒྲུབ་
པ་ལ་ནི་བརྩོན་པར་བྱ། བྱང་ཆུབ་སེམས་དཔའ་ཐམས་ཅད་ཀྱི་མཉམ་པ་ཉིད་ལ་ནི་གནས་པར་བྱ། བྱང་ཆུབ་སེམས་དཔའ་ཐམས་ཅད་ཀྱི་ས་ནི་ཡོངས་སུ་སྒྲུབ་པར་བྱ། སེམས་ཅན་གྱི་ཁམས་ཐམས་ཅད་ནི་
ཡོངས་སུ་སྦྱང་བར་བྱ། སེམས་ཅན་ཐམས་ཅད་ཀྱི་ཕོངས་པ་ཡོངས་སུ་གཅད་པའི་ཕྱིར་བདག་གི་ནོར་ཐམས་ཅད་ནི་གཏང་བར་བྱ། ཕྱི་མའི་མཐའི་མུར་ཐུག་པའི་བསྐལ་པར་སྦྱིན་པའི་ཕ་རོལ་ཏུ་ཕྱིན་པ་

77-1-150a

ལ་སྤྱོད་པའི་ཚེ། ཁ་ཟས་དང་ནི་སེམས་ཅན་ཡོངས་སུ་ཚིམ་པར་བྱ། ཡོ་བྱད་ཀྱི་དངོས་པོ་ཐམས་ཅད་ཡོངས་སུ་གཏང་བས་ནི་སློང་བའི་ཚོགས་ཐམས་ཅད་ཡོངས་སུ་ཚིམ་པར་བྱ་དགོས་ཏེ། དེ་ལྟར་
བདོག་པ་ཐམས་ཅད་ཡོངས་སུ་གཏོང་བ་ལ་ནན་ཏན་ཉམས་སུ་ལེན་པའི་ཚེ། ཕྱི་ནང་གི་དངོས་པོ་གང་ཅི་འང་རུང་སྟེ། ཡོངས་སུ་མི་གཏང་བ་དེ་ལྟ་བུ་མེད་པས་དེ་ལྟར་ངས་བུ་དང་བུ་མོ་དང་། ཆུང་མ་ཡང་སྦྱིན་པར་
བྱ་དགོས། མྱིག་དང་མགོ་དང་རྐང་ལག་དང་། ཡན་ལག་དང་ཉིང་ལག་ཐམས་ཅད་ཡོངས་སུ་གཏང་དགོས་ན། དེའི་ཚེ་ཁྱོད་གཞན་བྱིན་ན། ངའི་སྦྱིན་པའི་བགེགས་སུ་འགྱུར་རོ། །བུ་ཡིད་དུ་འོང་བ་ཡོངས་
སུ་གཏང་ན་ཡིད་མི་དགའ་བར་འགྱུར་རོ། །ལུས་དང་སེམས་ཀྱི་སྡུག་བསྔལ་ཡང་མང་པོ་ཞིག་ཉམས་སུ་མྱོང་བར་འགྱུར་རོ། །ང་ལ་བདོག་པ་ཐམས་ཅད་ཡོངས་སུ་གཏང་བར་བྱས་ན་སེར་སྣའི་སེམས་སུ་
འགྱུར་རོ། །ངའི་ཡན་ལག་དང་ཉིང་ལག་གཏུབས་ཤིང་སློངས་མོ་བ་རྣམས་ལ་གཏོང་བའི་ཚེ། ཡིད་མི་དགའ་བར་ཡང་འགྱུར་རོ། །ནམ་ཞིག་ན་ངས་ཁྱོད་བོར་ཏེ་དེ་བཞིན་གཤེགས་པའི་བསྟན་པ་
ལ་རབ་ཏུ་འབྱུང་བར་འགྱུར་བ་དེ་ལྟ་བུའི་དུས་ཀྱང་ཡོད་དེ། དེའི་ཚེའང་ཁྱོད་ཡིད་མྱི་དགའ་བར་འགྱུར་རོ། །ཞེས་ནས་རྒྱལ་བུ་གཟི་བརྗིད་ཀྱི་བདག་པོས་དེའི་ཚེ། བུ་མོ་དགའ་བའི་འོད་ཀྱི་དཔལ་
ཤིན་ཏུ་སྦྱངས་པ་ལ་ཚིགས་སུ་བཅད་དེ་སྨྲས་པ། ངས་ནི་འགྲོ་ཀུན་སྙིང་རྗེ་རབ་བསྐྱེད་དེ། །ཡུན་རིང་མཆོག་ནས་བྱང་ཆུབ་རབ་ཞུགས་པས། །ཡང་དག་བྱང་ཆུབ་ཚོགས་ཆེན་རྒྱ་མཚོ་རྣམས། །
ཚད་མེད་ཐམས་ཅད་ཡོངས་སུ་རྫོགས་བྱ་དགོས། །བསྐལ་པ་རྒྱ་མཚོ་མཐའ་དང་དབུས་མྱེད་པར། །མཁའ་ལྟར་ཚད་མྱེད་སྨོན་ལམ་རྣམ་སྦྱངས་ཤིང་། །དེ་བཞིན་གཤེགས་པ་བཞུགས་པའི་ས་ཡི་

77-1-150b

རྣམས་བསྐལ་པ་མཐའ་ཡས་ཡོངས་སུ་སྦྱང་ཡང་དགོས། །རྒྱལ་བ་དུས་གསུམ་འབྱུང་བ་ཐམས་ཅད་ཀྱི། །ཕ་རོལ་ཕྱིན་པའི་ལམ་ལ་ངས་བསླབས་ཏེ། །ཡེ་ཤེས་བླ་ན་མེད་པའི་ཚུལ་ཆེན་གྱིས། །བྱང་ཆུབ་
ལམ་མཆོག་རྣམ་པར་སྦྱང་ཡང་དགོས། །ཕྱོགས་རྣམས་ཀུན་གྱི་ཞིང་རྣམས་ཐམས་ཅད་ཀྱང་། །ཀུན་ནས་ཉོན་མོངས་རྣམ་པར་སྦྱང་བར་བྱ། །འཇིག་རྟེན་ཀུན་གྱི་མི་ཁོམ་ཐམས་ཅད་དང་། །ངན་སོང་ཀུན་
ཀྱང་རྣམ་པར་བཟློག་དགོས་སོ། །ཉོན་མོངས་སྒྲིབས་ཤིང་གཏི་མུག་མུན་འཐོམས་པའི། །སེམས་ཅན་ཀུན་ཀྱང་མ་ལུས་རྣམ་སྦྱང་དགོས། །སྣ་ཚོགས་ཐབས་ཀྱིས་ཡོངས་སུ་སྦྱང་བྱས་ཏེ། །
ཐམས་ཅད་མཁྱེན་གྱི་ཚུལ་ལ་དགོད་ཀྱང་དགོས། །ཆགས་མེད་ས་རྣམས་ཀུན་ཀྱང་ངས་སྦྱངས་ཏེ། །བསྐལ་པ་རྒྱ་མཚོར་རྒྱལ་བ་མཆོད་པར་བྱ། །འགྲོ་བ་མ་ལུས་ཀུན་ལ་བྱམས་བསྐྱེད་དེ། །
འཇིག་རྟེན་དག་ཏུ་མ་ལུས་སྦྱིན་གཏང་དགོས། །སློང་བ་ཀུན་ནས་འདུས་ཤིང་འོངས་མཐོང་ནས། །ཐམས་ཅད་གཏང་བར་རྟག་ཏུ་བརྩོན་གྱུར་ན། །དེ་ཚེ་ཁྱོད་ནི་ང་སེམས་མི་འཐུན་ཏེ། །ཞུམ་ཞིང་དམའ་ལ་
འཇུངས་པར་མི་འགྱུར་རམ། །ངའི་མགོ་འདོད་འོངས་པ་ངས་མཐོང་སྟེ། །བྱང་ཆུབ་སེམས་དཔའི་སྤྱད་པ་སྤྱོད་གྱུར་ན། །དེ་ཚེ་ཁྱོད་ནི་སྡུག་བསྔལ་གདུངས་གྱུར་གྱིས། །འདི་འདྲའི་དོན་ཐོས་རབ་
ཏུ་བསྟན་པར་གྱིས། །ངའི་རྐང་ལག་གཏུབས་པ་མཐོང་གྱུར་ན། །ཁྱོད་ནི་མི་དགའ་དེ་ཚེ་སློང་བ་ལ། །བུད་མྱེད་རང་གིས་ཚིག་དྲག་མི་བཟོད་སྨྲ། །དོན་འདི་ཐོས་ཤིང་སེམས་ལ་ཡོངས་སུ་སོམས། །
འཕགས་པའི་དངོས་དང་དེ་བཞིན་བུ་རྣམས་དང་། །ཁྱོད་ཀྱང་སློང་བའི་ཚོགས་ལ་སྦྱིན་དགོས་ཀྱིས། །དོན་འདི་ཐོས་ཏེ་མི་དགའ་མྱེད་ན་ལྟ། །ཁྱོད་དགའ་ཐམས་ཅད་དེ་བཞིན་བྱ་ལ་རག །དེ་སྐད་ཅེས་

77-1-151a

སྨྲས་པ་དང་། བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པས། རྒྱལ་བུ་གཟི་བརྗིད་ཀྱི་བདག་པོ་ལ་འདི་སྐད་ཅེས་སྨྲས་སོ། །གཞོན་ནུ་ཇི་སྐད་གསུངས་པ་དེ་ལྟར་བགྱིའོ། །བདག་ནི་ཁྱོད་
ཅི་དགྱེས་པ་དང་། ཅི་བཞེད་པར་ལོངས་སྤྱོད་པ་དང་། གང་དུ་དགྱེས་པར་མཆི་བ་དང་། ཐམས་ཅད་དུ་ཡང་སླད་ན་མ་ལུས་པར་རྗེས་སུ་འབྲང་བ་དང་། རྟག་ཏུ་ཞམ་རིང་སླེབས་པ་དང་། དོན་ཐམས་ཅད་ལ་བརྩོན་
པ་དང་། ཐུགས་དང་འཐུན་པར་སྤྱད་པ་དང་། མང་བར་ཉམསུ་བླང་བ་དང་། མི་འཐུན་པ་མ་མཆིས་པར་ནན་ཏན་དུ་བགྱི་བའི་ཚུལ་ལ་སྤྱད་པར་བགྱིའོ། །ཞེས་ནས་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་
པས། རྒྱལ་པོའི་སྲས་གཟི་བརྗིད་ཀྱི་བདག་པོ་ལ་ཚིགས་སུ་བཅད་དེ་སྨྲས་པ། བདག་གི་ལུས་འདི་སེམས་ཅན་དམྱལ་བ་ཡི། །ཞུགས་ཀྱིས་ཡོངས་གདུངས་ཞུ་བར་གྱུར་ཀྱང་རུང་། །ཁྱོད་སྤྱོད་
སྐལ་བ་མཉམ་པའི་ཕྱག་རྗེད་དུ། །ཚེ་རབས་རྒྱ་མཚོར་བདག་གིས་སྤྲོ་བར་བགྱི། །ཚེ་རབས་མཐའ་ཡས་སྐྱེས་པ་རེ་རེ་ཞིང་། །བདག་གི་ལུས་ནི་ཤིན་ཏུ་གཏུབས་གཤེགས་ཀྱང་། །
བསྟན་དམ་སེམས་ཀྱིས་རབ་ཏུ་སྤྲོ་བར་བགྱིས། །དད་དགེ་ཁྱོད་ཀྱིས་བདག་གི་ཁྱིམ་ཐབས་མཛོད། །འཁོར་ཡུག་རི་ཡིས་བསྐལ་པ་མཐའ་ཡས་སུ། །བདག་གི་མགོ་ནི་ཡོངས་སུ་
བཏངས་གྱུར་ཀྱང་། །སེམས་ལ་མི་བདེ་མ་མཆིས་དད་པར་བགྱིད། །ཁྱོད་ཀྱིས་རྟག་པར་བདག་གི་ཁྱིམ་ཐབས་མཛོད། །ཁྱོད་ཀྱིས་ཚེ་རབས་གྲངས་མེད་ཐམས་ཅད་དུ། །བདག་ལ་
ཐུགས་བསྟན་ཐུགས་ཀྱིས་མངའ་མཛད་དེ། །ཡན་ལག་ཤ་གཏུབས་གཞན་ལ་སྩལ་བར་མཛོད། །ཁྱོད་ཀྱི་ཆོས་ལ་བདག་ཀྱང་བསྟན་གཞོལ་གསོལ། །བདག་གི་ལུས་ནི་སླད་ན་

77-1-151b

མ་ལུས་པར། །སྐྱེས་བུ་ལྷའི་སྲས་པོ་ཁྱོད་ལ་འབུལ། །བསྐལ་པ་རྒྱ་མཚོར་སྤྱོད་པ་མཛད་པའི་ཚེ། །སྐྱེ་བོ་སློང་བ་རྣམས་ལ་དགྱེས་པར་གསོལ། །སེམས་ཅན་ཀུན་ལ་ཐུགས་རྗེ་མཐའ་
ཡས་པ། །བསྐྱེད་དེ་སེམས་ཅན་རྒྱ་མཚོ་བསྡུ་སླད་དུ། །བྱང་ཆུབ་དམ་པ་མཆོག་ཏུ་ཁྱོད་བཞུགས་པས། །དེ་སླད་བདག་ཀྱང་ཐུགས་རྗེས་གཟུང་བ་མཛོད། །ལོངས་སྤྱོད་དོན་དང་ནོར་གྱི་དོན་མ་
ལགས། །འདོད་སྤྱོད་དགའ་བ་བསྐྱེད་པའི་དོན་སླད་དུ། །སེམས་ཅན་མཆོག་ཁྱོད་ཁྱོད་འཚལ་མ་ལགས་ཀྱི། །ཁྱོད་དང་སྤྱོད་པ་འཐུན་པར་སྤྱོད་སླད་དུ། །སྤྱན་གསལ་མཛེས་ཤིང་བྱམས་
པའི་ཐུགས་མངའ་བ། །ཁྱོད་ནི་འཇིག་རྟེན་གཟིགས་པ་ཅི་ཚུལ་ལགས། །ཐུགས་རྗེ་ཆེ་ཡི་འདོད་ཆགས་ཐུགས་མི་མངའ། དེ་ལ་ཐུབ་དབང་འགྱུར་བ་གདོན་མི་འཚལ། །ཁྱོད་ཀྱི་ཞབས་
ཀྱིས་བཅགས་པའི་ས་རྣམས་ཀྱང་། །དྲི་མེད་རིན་ཆེན་འོད་དུ་གནས་པ་ལས། །ཁམས་གསུམ་ཀུན་ཏུ་འཁོར་ལོས་བསྒྱུར་བར་ཡང་། །མཚན་རབ་ཡོངས་ཀྱིས་བརྒྱན་བྱོན་གདོན་མི་འཚལ། །
བདག་གིས་གཡར་ལ་མ་མཐོང་དགུང་ཞིག་ལ། །ཆོས་བཟང་སྤྲིན་འོད་བྱང་ཆུབ་སྙིང་པོ་ཡི། །ཤིང་དབང་དྲུང་ན་དེ་བཞིན་གཤེགས་པ་བཞུགས། །སངས་རྒྱས་མང་པོ་དུ་མས་མདུན་དུ་བདར། །
རྒྱལ་བའི་དབང་པོ་སྐུ་མཆོག་ཉི་མ་དེ། །འཛམ་བུ་ཆུ་ཀླུང་རིན་ཆེན་འཚེར་བ་འདྲ། །གཡར་ལམ་མཐོང་བར་ཕྱག་གིས་བདག་མགོ་བྱུགས། །དེ་ནས་སང་ནས་གློ་བ་རབ་ཏུ་དགའ། །དགའ་
བའི་འོད་ཅེས་བགྱི་བ་རྣམ་དག་ལུས། །སྔན་ཆད་གཉེན་བཤེས་གྱུར་པའི་ལྷ་མོ་ཡིས། །བདག་ལ་བསྟན་པ་བདེ་གཤེགས་དེ་ཉིད་ནི། །སྙིང་པོ་ཡང་དག་བྱང་ཆུབ་ཡོངས་ལ་བཞུགས། །སྔོན་

77-1-152a

ཡང་གཞོན་ནུ་གཟི་བརྗིད་ཁྱོད་བལྟ་ཞེས། །བདག་གིས་སེམས་བསྐྱེད་དེ་ལྟར་བསམ་པར་གྱུར། །མདང་སུམ་དགུང་ལ་ལྷ་མོ་དགེ་བ་ཡིས། །གཞོན་ནུ་དེ་ནི་མཐོང་བར་འགྱུར་ཞེས་བསྟན། །
བདག་གི་བདེ་གཤེགས་གཡར་ལམ་རྨྱི་པས་མཐོང་། །ཡོངས་སུ་དག་པའི་སེམས་ཅན་ཁྱོད་ཀྱང་མཐོང་། །ཡིད་བཞིན་བསམ་གྲུབ་ཁྱོད་དང་བདག་བཅས་པས། །དེ་རིང་རྒྱལ་བ་དེ་ལ་མཆོད་པར་
བགྱི། །དེ་ནས་རྒྱལ་པོའི་བུ་གཟི་བརྗིད་ཀྱི་བདག་པོས། དེ་བཞིན་གཤེགས་པ་སྐུ་ཉི་མ་དམ་པའི་མཚན་ཐོས་ཏེ། སངས་རྒྱས་བལྟ་བའི་སྐབས་བྱུང་ནས་དགའ་བ་དང་མོས་པའི་ཤུགས་ཆེན་
པོ་སྐྱེས་ཏེ། བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ལ་ནོར་བུ་རིན་པོ་ཆེ་ལྔ་བརྒྱས་མངོན་པར་གཏོར་ནས། གཙུག་གི་རིན་པོ་ཆེ་དཔལ་གྱི་འོད་འབར་བ་ཞེས་བྱ་བ་ཡང་དེ་ལ་བྱིན་ནོ། །མྱེའི་
མདོག་ལྟར་འདུག་པ། ནོར་བུ་རིན་པོ་ཆེ་དམ་པས་བརྒྱན་པའི་གོས་རིན་པོ་ཆེས་ཀྱང་དེ་བཀབ་བོ། །དེ་ལྟར་རིམ་གྲོར་བྱས་ཀྱང་དགའ་བར་གྱུར་པའམ། ཉམས་བདེ་བར་གྱུར་པ་ལྟ་བུའང་མེད་ལ། དགའ་བ་
དང་མོས་པར་ཡང་མི་འགྱུར་གྱི། གཞན་དུ་ན་ཐལ་མོ་སྦྱར་ཅིང་མྱིག་མི་འགེབས་པར་གཞོན་ནུ་གཟི་བརྗིད་ཀྱི་བདག་པོའི་གདོང་དུ་བལྟ་ཞིང་གནས་པར་གྱུར་ཏོ། །དེ་ནས་སྨད་འཚོང་མའི་གཙོ་མོ་བལྟ་ན་སྡུག་
པས། རྒྱལ་བུ་གཞོན་ནུ་གཟི་བརྗིད་ཀྱི་བདག་པོ་ལ་ཚིགས་སུ་བཅད་དེ་སྨྲས་པ། བུ་མོ་འདི་ནི་ཁྱོད་གསལ་བགྱི་སྙམ་ནས། །ཡུན་རིང་སྔ་ནས་བདག་གིས་བསམ་བསམས་སྟེ། །གཟུགས་
མཛེས་དེ་ཡང་དེ་རིང་ཁྱོད་ལ་ཕུལ། །བསོད་ནམས་ལེགས་བརྒྱན་ཡོན་ཏན་རབ་དང་ལྡན། །ཚུལ་ཁྲིམས་བློ་དང་ཡོན་ཏན་གཞན་གྱིས་ཀྱང་། །བུ་མོ་དམ་པ་འདི་དང་འདྲ་བ་ནི། །མིའི་འཇིག་རྟེན་གང་ནའང་

77-1-152b

མ་མཆིས་ཏེ། །འཇིག་རྟེན་ཀུན་གྱི་བུད་མེད་ནང་ན་མཆོག །པད་མོའི་སྦུབས་ནས་སྐྱེས་པས་རིགས་སྨོས་པ། །སྐྱོན་གྱི་དྲི་མས་མ་གོས་འཐད་མ་ལགས། །མ་ལུས་སྐྱོན་གྱིས་མ་གོས་སེམས་དང་
ལྡན། །རྟག་པར་ཁྱོད་ཀྱི་སྤྱོད་ཚུལ་འཐུན་པར་འགྱུར། །རེག་ན་བདེ་ལ་ཀུན་ནས་འཕགས་པས་ན། །འདིའི་ལུས་ནི་ཤིན་ཏུ་འཇམ་པ་སྟེ། །བྲོ་འཚལ་ནད་པ་གང་ལ་རེག་གྱུར་ཀྱང་། །དེའི་མོད་ལ་བྲོ་དང་
བྲལ་བར་འགྱུར། །འདིའི་ལུས་ལས་སྤོས་ཀྱི་ངད་འབྱུང་བ། །སྤོས་མཆོག་གཞན་རྣམས་མངོན་པར་ཟིལ་གྱིས་གནོན། །དེའི་དྲི་ཞིམ་ཚོར་བ་རྣམ་དག་པའི། །ཚུལ་ཁྲིམས་གནས་པར་མི་རྣམས་
ཀུན་ཀྱང་འགྱུར། །འདིའི་ལུས་ནི་གསེར་གྱི་མདོག་འདྲ་སྟེ། །པད་མོའི་མཆོག་ལྟར་རྣམ་པར་རབ་ཏུ་གསལ། །ཁྲོས་པས་བལྟས་ན་བྱམས་པའི་སེམས་ལྡན་པར། །སེམས་ཅན་མ་ལུས་ཀུན་
ཀྱང་རབ་ཏུ་འགྱུར། །འདིའི་ཚིག་སྙན་ཡིད་དུ་འོང་བ་སྟེ། །ཉམས་སུ་བདེ་བས་འགྲོ་བ་ཉན་པར་དགའ། །ཐོས་ན་དེ་རྒྱུས་སྐྱོན་གྱི་མུན་པ་དང་། །མི་དགེ་སུག་ལས་བགྱིད་པར་མོས་མི་འགྱུར། །འདི་ནི་
བསམ་དག་ཡིད་ལ་དྲི་མེད་དེ། །འདི་ལ་ཀུན་ཏུ་གཡོ་དང་སྒྱུ་མ་མཆིས། །ཇི་སྨྲ་དེ་དག་ཡིད་ལའང་དེ་བཞིན་ཏེ། །ཚིག་དབྱངས་དེས་ནི་འགྲོ་བ་ཚིམ་པར་བགྱིད། །སྒྱུ་ཡིས་སེམས་ཅན་འདྲིད་པར་མི་བགྱིད་དེ། །
ནོར་གྱི་དོན་དུ་འགྲོ་བ་ཡོངས་མི་སླུ། །ཡིད་སེམས་ཁྲེལ་གྱི་འཛེམ་དང་ལྡན་པ་སྟེ། །རྒན་ནམ་གཞོན་ལའང་སྲིད་ཞུས་སྤྱོད། །རིགས་རྒྱུད་གཟུགས་ཀྱིས་དྲེགས་པ་མ་མཆིས་ཏེ། །འདི་ནི་
འཁོར་གྱིས་དྲེགས་པའང་ཡོང་མ་མཆིས། །ང་རྒྱལ་རློམ་སེམས་ཡོངས་དང་བྲལ་བ་སྟེ། །འགྲོ་བ་རྣམས་ལ་རྟག་ཏུ་གུས་པར་འདུད། །དེ་ནས་རྒྱལ་པོའི་བུ་གཟི་བརྗིད་ཀྱི་བདག་པོ་བུ་མོ་དགའ་

77-1-153a

བའི་འོད་ཀྱི་དཔལ་ཤིན་ཏུ་སྦྱངས་པ་འཁོར་དང་བཅས་པ་དང་། བུ་མོ་སྟོང་ཕྲག་ཉི་ཤུ་དང་། འཁོར་ཐམས་ཅད་དང་བཅས་པར་བཟའ་ཤིང་གི་ར་བ་སྤོས་ཀྱི་མྱུ་གུའི་རྩེ་མོ་ནས་འོད་ཀྱི་སྤྲིན་འབྱུང་བ་དེ་
ནས་བྱུང་སྟེ། སྙིང་པོ་བྱང་ཆུབ་ཆོས་ཀྱིས་འཕགས་པའི་འོད་གང་ན་བ་དང་། བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པ་གང་ན་བ་དེར་བཅོམ་ལྡན་འདས་དེ་བཞིན་གཤེགས་པ་སྐུ་ཉི་
མ་དམ་པའི་ཞལ་བལྟ་བ་དང་། དེ་ལ་ཕྱག་འཚལ་བ་དང་། མཆོད་པ་དང་བསྙེན་བཀུར་བྱ་བའི་ཕྱིར་དོང་སྟེ། དེ་རྟ་བབས་སའི་བར་དུ་བཞོན་པས་སོང་ནས་བབས་ཏེ་རྐང་པས། བཅོམ་ལྡན་འདས་
དེ་བཞིན་གཤེགས་པ་སྐུ་ཉི་མ་དམ་པའི་སྤྱན་སྔར་སོང་ངོ་། །དེ་ནས་རྒྱལ་པོའི་བུ་གཞོན་ནུ་གཟི་བརྗིད་ཀྱི་བདག་པོས་རྒྱང་རིང་ཞིག་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་རབ་ཏུ་བཟང་བ་བལྟ་ན་སྡུག་པ་དབང་པོ་ཞི་བ་ཐུགས་ཞི་བ། དབང་པོ་བསྡམས་པ། གླང་པོ་ལྟར་ཤིན་ཏུ་དུལ་བ། མཚོ་ལྟར་དང་ཞིང་རྙོག་པ་མེད་ལ་རྣམ་པར་
གསལ་བ་མཐོང་ངོ་། །དེ་ལྟར་མཐོང་ནས་དེའི་སེམས་མངོན་པར་མོས་པར་གྱུར་ནས་སངས་རྒྱས་མཐོང་བའི་དགའ་བ་དང་། མོས་པའི་ཤུགས་ཆེན་པོ་རྣམ་པར་སྤེལ་ཏེ། དགའ་བ་དང་མོས་པ་དང་། སྤྲོ་བ་
ཆེན་པོས་ཡོངས་སུ་རྒྱས་པའི་སེམས་ཀྱིས་བཅོམ་ལྡན་འདས་དེ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ལ་སྩོགས་པ་འཁོར་
ཐམས་ཅད་དང་བཅས་པས། བཅོམ་ལྡན་འདས་དེའི་ཞབས་ལ་སྤྱི་བོས་ཕྱག་འཚལ་ཏེ། རིན་པོ་ཆེ་དམ་པའི་པད་མོ་སྟོང་ཕྲག་ལྔ་བརྒྱས་བཅོམ་ལྡན་འདས་དེ་ལ་མངོན་པར་གཏོར་ཏེ། བཅོམ་ལྡན་འདས་

77-1-153b

དེའི་གཙུག་ལག་ཁང་ལྔ་བརྒྱ་ནོར་བུ་རིན་པོ་ཆེའི་རྒྱལ་པོ་སྤོས་སྣ་ཚོགས་ལས་བྱས་པ་རིན་པོ་ཆེའི་རྒྱལ་པོ་སྣ་ཚོགས་ཀྱིས་རབ་ཏུ་བརྒྱན་པ། ལྔ་བརྒྱ་བརྩིགས་སོ། །གཙུག་ལག་ཁང་རེ་རེ་ཞིང་ཡང་
ནོར་བུ་རིན་པོ་ཆེའི་རྒྱལ་པོ་སྟོང་ཕྲག་ལྔ་བརྒྱས་རབ་ཏུ་བརྒྱན་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པས་གཞོན་ནུ་གཟི་བརྗིད་ཀྱི་བདག་པོའི་བསམ་པ་ཐུགས་སུ་ཆུད་
ནས་མདོ་སྡེ་སྒོ་ཀུན་ཏུ་བལྟ་བའི་སྒྲོན་མ་ཞེས་བྱ་བ་ཡང་དག་པར་བསྟན་ཏོ། །དེ་ཐོས་ནས་ཆོས་ཐམས་ཅད་ཀྱི་ཚུལ་ལ་ཏིང་ངེ་འཛིན་གྱི་སྒོ་རྒྱ་མཚོ་ཕྲག་བཅུ་ཐོབ་པར་གྱུར་ཏེ། འདི་ལྟར་དེ་བཞིན་
གཤེགས་པ་ཐམས་ཅད་ཀྱི་སྨོན་ལམ་རྒྱ་མཚོ་ཡང་དག་པར་འབྱུང་བ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །དུས་གསུམ་སྣང་བའི་སྙིང་པོ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་པོ། །
སངས་རྒྱས་ཐམས་ཅད་ཀྱི་དཀྱིལ་འཁོར་མངོན་དུ་གྱུར་པར་འབྱུང་བ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་པོ། །སེམས་ཅན་འབྱམ་ཀླས་པ་ཐམས་ཅད་རབ་ཏུ་སྣང་བར་བྱ་བ་ལ་འཇུག་པ་ཞེས་
བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་པོ། །འཇིག་རྟེན་ཐམས་ཅད་དུ་འབྱུང་བའི་ཡེ་ཤེས་ཀྱི་སྣང་བ་ལ་ཞུགས་པ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་པོ། །སེམས་ཅན་ཐམས་ཅད་
ཀྱི་དབང་པོ་རྒྱ་མཚོ་ལ་འཇུག་པ་སྣང་བའི་སྒྲོན་མ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་པོ། །འགྲོ་བ་ཐམས་ཅད་ཡོངས་སུ་བསྐྱབ་པའི་ཡེ་ཤེས་ཀྱི་སྤྲིན་ཅེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་
ཐོབ་པོ། །འགྲོ་བ་ཐམས་ཅད་ཡོངས་སུ་སྨྱིན་པར་བྱ་བ་དང་། གདུལ་བ་ལ་མངོན་དུ་གྱུར་པའི་སྒྲོན་མ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་པོ། །དེ་བཞིན་གཤེགས་པ་ཐམས་ཅད་ཀྱི་

77-1-154a

ཆོས་ཀྱི་འཁོར་ལོའི་སྒྲ་རྣམས་དམྱིགས་པར་བྱེད་པ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་པོ། །ཀུན་ཏུ་བཟང་པོའི་སྤྱོད་པའི་དཀྱིལ་འཁོར་ཡོངས་སུ་དག་པར་བྱེད་པའི་སྨོན་
ལམ་གྱི་སྤྲིན་ཅེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་སྟེ། ཏིང་ངེ་འཛིན་གྱི་སྒོ་བཅུ་པོ་འདི་དག་ལ་སྩོགས་པ་ཆོས་ཀྱི་ཚུལ་ཐམས་ཅད་ལ་ཏིང་ངེ་འཛིན་གྱི་སྒོ་རྒྱ་མཚོ་ཕྲག་བཅུ་རབ་ཏུ་ཐོབ་པར་
གྱུར་ཏོ། །བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པས་ཀྱང་ཡེ་ཤེས་ཐོབ་པར་དཀའ་བ་རྒྱ་མཚོའི་སྙིང་པོ་ཞེས་བྱ་བའི་སེམས་ངེས་པར་བཞག་པ་རབ་ཏུ་ཐོབ་པར་གྱུར་ཏེ། བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ལས་ཕྱིར་མྱི་ལྡོག་པར་གྱུར་ཏོ། །དེ་ནས་རྒྱལ་པོའི་བུ་གཟི་བརྗིད་ཀྱི་བདག་པོས། བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པའི་ཞབས་གཉིས་
ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་ལ་ལན་བརྒྱ་སྟོང་དུ་མར་གཡས་སུ་བསྐོར་བ་བྱས་ནས། བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་དང་། འཁོར་ཐམས་ཅད་དང་
བཅས་ཏེ། བཅོམ་ལྡན་འདས་དེའི་སྤྱན་སྔ་ནས་དོང་ངོ་། །དེ་ནས་རྒྱལ་པོའི་གནས་སྡོང་པོའི་རི་བོའི་དཔལ་གང་ན་བ་དང་། རྒྱལ་པོ་ཡབ་ནོར་གྱི་བདག་པོ་གང་ན་བ་དེར་དོང་སྟེ། དྲུང་དུ་ཕྱིན་ནས། 
རྒྱལ་པོ་ཡབ་ནོར་གྱི་བདག་པོའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དོན་འདི་བརྗོད་དོ། །ལྷའི་ཞལ་སྔ་ནས་མཁྱེན་པར་མཛད་དུ་གསོལ། དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་སྐུ་ཉི་མ་དམ་པ་ཞེས་བགྱི་བ་མཁྱེན་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་བླ་ན་མེད་པ་སྐྱེས་བུ་འདུལ་བ་ཁ་ལོ་བསྒྱུར་བ། ལྷ་དང་མི་

77-1-154b

རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་ཏུ་བྱུང་སྟེ། ཁྱོད་ཀྱི་ཁམས་འདི་ཉིད་ཀྱི་སྙིང་པོ་བྱང་ཆུབ་ཆོས་ཀྱི་སྤྲིན་ཤིན་ཏུ་སྡུག་པའི་འོད་ནི་རྣམ་པར་སྤྱོད་དེ། མངོན་པར་སངས་རྒྱས་ནས་
རིང་པོ་མ་ལགས་སོ། །དེ་ནས་རྒྱལ་པོ་ནོར་གྱི་བདག་པོས། གཞོན་ནུ་གཟི་བརྗིད་ཀྱི་བདག་པོ་ལ་འདི་སྐད་ཅེས་སྨྲས་སོ། །གཞོན་ནུ་ཁྱོད་ལ་དོན་འདི་ལྷ་འམ་མི་འམ་སུ་ཞིག་གིས་སྦྲན། དེས་
སྨྲས་པ། བདག་ལ་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པས་སྦྲན་ཏོ། །དེ་ནས་རྒྱལ་པོ་ནོར་གྱི་བདག་པོས་སངས་རྒྱས་བྱུང་བ་ཐོས་ནས། སངས་རྒྱས་སྐྱེ་བ་ལ་ནི་གཏེར་རབ་ཏུ་
ཐོབ་པ་ཙམ་དུ་སེམས། སངས་རྒྱས་རིན་པོ་ཆེ་དང་ཕྲད་པར་ནི་དཀའ་བར་སེམས། དེ་བཞིན་གཤེགས་པ་མཐོང་བས་ནི་ངན་སོང་གི་གཡང་སའི་འཇིགས་པ་ཐམས་ཅད་ཀྱང་རྣམ་པར་ལྡོག་པར་
སེམས། ཉོན་མོངས་པའི་ནད་ཆེན་པོ་རབ་ཏུ་ཞི་བར་བྱ་བ་ལ་ནི་སྨན་པའི་རྒྱལ་པོ་དང་ཕྲད་པ་ཙམ་དུ་སེམས། འཁོར་བའི་སྡུག་བསྔལ་ཐམས་ཅད་ལས་ནི་ཡོངས་སུ་འབྲེལ་བ་ཡིན་པར་སེམས། 
ཤིན་ཏུ་བདེ་ཞིང་ལྡན་པ་ལ་ནི་རབ་ཏུ་གཞོག་པར་སེམས། རབ་རིབ་མེད་པའི་ཡེ་ཤེས་ཀྱི་སྣང་བ་ནི་ཡང་དག་པར་སྟོན་པར་སེམས། མ་རིག་པའི་མུན་པ་བསྩལ་བ་ལ་ནི་སྒྲོན་མ་ཆེན་པོ་བྱུང་བ་ཙམ་དུ་སེམས། 
འཇིག་རྟེན་མགོན་མེད་པ་ལས་ནི་ཆོས་ཀྱི་ཚུལ་གྱི་མགོན་དང་ཕྲད་པར་སེམས། འཇིག་རྟེན་འདྲེན་པ་མེད་པ་ལས་ནི་ཐམས་ཅད་མཁྱེན་པ་ཉིད་ཀྱིས་ཐེག་པས་འདྲེན་པ་སྐྱེས་པར་སེམས་ཤིང་སངས་
རྒྱས་བྱུང་བར་ཐོས་པས་མོས་པ་དང་། སྤྲོ་བ་ཆེན་པོ་སྐྱེས་ནས་རྒྱལ་རིགས་དང་བྲམ་ཟེ་དང་ལྗོངས་ཀྱི་མི་དང་། ཡུལ་གྱི་མི་དང་། བློན་པོ་དང་ཞམ་རིང་བ་དང་། གཞོན་ནུ་དང་རྒྱལ་ཕྲན་དང་། ཁམས་

77-1-155a

ཀྱི་བདག་པོ་དང་། འཁོར་ཐམས་ཅད་ཀྱང་ཀུན་ནས་བསྡུས་ནས། སངས་རྒྱས་བྱུང་བར་སྒྲ་སྙན་པ་སྒྲོག་པའི་གཞོན་ནུ་གཟི་བརྗིད་ཀྱི་བདག་པོ་ལ་རྒྱལ་པོའི་སྲིད་དེ་ཡང་ཆོས་ཀྱི་དགའ་བར་བྱིན་ནོ། །དེ་ལྟར་
གཞོན་ནུ་དེ་རྒྱལ་སྲིད་ལ་དབང་བསྐུར་ནས། སྲོག་ཆགས་སྟོང་ཕྲག་བཅུ་དང་ལྷན་གཅིག་ཏུ། བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པ་གང་ན་བ་དེར་སོང་སྟེ། སྤྱན་སྔར་ཕྱིན་ནས། 
བཅོམ་ལྡན་འདས་དེའི་ཞབས་གཉིས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་དེ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། བཅོམ་ལྡན་འདས་དེའི་སྤྱན་སྔར་རང་གི་འཁོར་
དང་བཅས་ཏེ་འཁོད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པས། རྒྱལ་པོ་ནོར་གྱི་བདག་པོ་དང་། འཁོར་གྱི་དཀྱིལ་འཁོར་ཐམས་ཅད་ལ་གཟིགས་ནས། དེའི་ཚེ་མཛོད་སྤུ་
ནས་འོད་གཟེར་འགྲོ་བ་ཐམས་ཅད་ཀྱི་སེམས་ཀྱི་སྒྲོན་མ་ཞེས་བྱ་བ་རབ་ཏུ་བཀྱེའོ། །དེས་ཕྱོགས་བཅུའི་འཇིག་རྟེན་གྱི་ཁམས་སྣང་བར་བྱས་ཏེ། འཇིག་རྟེན་གྱི་དབང་པོ་ཐམས་ཅད་མངོན་སུམ་དུ་
བཀོད་ནས། སངས་རྒྱས་ཀྱི་རྣམ་པར་འཕྲུལ་པ་བསམ་གྱིས་མི་ཁྱབ་པ་ཡོངས་སུ་བསྟན་ཏེ། སངས་རྒྱས་ཀྱི་འདུལ་བའི་སེམས་ཅན་རྣམས་ཀྱི་བསམ་པ་དང་། ལྷག་པའི་བསམ་པ་རྣམ་པར་
སྦྱངས་ནས། དེའི་ཚེ་སངས་རྒྱས་ཀྱི་བྱིན་བསམ་གྱིས་མི་ཁྱབ་པའི་མཐུས་སངས་རྒྱས་ཀྱི་སྐུ་འཇིག་རྟེན་ཐམས་ཅད་ལས་མངོན་པར་འཕགས་པ་དང་། སངས་རྒྱས་ཀྱི་གསུང་དབྱངས་ཀྱི་
ཡན་ལག་རྒྱ་མཚོ་ཐམས་ཅད་དང་ལྡན་པས། གཟུངས་ཀྱི་སྒོ་ཆོས་ཐམས་ཅད་ལ་རབ་རིབ་མེད་པའི་དོན་གྱི་སྒྲོན་མ་ཞེས་བྱ་བ་གཟུངས་ཀྱི་སྒོ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དང་བཅས་

77-1-155b

པར་ཡང་དག་པར་བསྟན་ཏོ། །དེ་ནས་རྒྱལ་པོ་ནོར་གྱི་བདག་པོས་གཟུངས་ཀྱི་སྒོ་དེ་ཐོས་ནས་ཆོས་ཐམས་ཅད་ལ་ཆོས་ཀྱི་སྣང་བ་ཆེན་པོ་སྐྱེས་པར་གྱུར་ཏོ། །འཁོར་དེའི་བྱང་ཆུབ་སེམས་དཔའ་འཛམ་
བུ་གླིང་གི་རྡུལ་ཤིན་ཏུ་ཕྲ་བ་སྙེད་ཀྱིས་ཀྱང་ཆོས་ཐམས་ཅད་ལ་རབ་རིབ་མེད་པའི་དོན་གྱི་སྒྲོན་མའི་གཟུངས་རབ་ཏུ་ཐོབ་པར་གྱུར་ཏོ། །ཁྲག་ཁྲིག་དྲུག་བཅུས་ནི་ཉེ་བར་ལེན་པ་མེད་པར་ཟག་པ་ལས་
སེམས་རྣམ་པར་གྲོལ་ལོ། །སྲོག་ཆགས་སྟོང་ཕྲག་བཅུ་ནི་ཆོས་རྣམས་ལ་ཆོས་ཀྱི་མིག་རྡུལ་དང་བྲལ་ཞིང་དྲི་མ་མེད་པར་རྣམ་པར་དག་པར་གྱུར་ཏོ། །སེམས་ཅན་གྲངས་མེད་པ་ཞིག་གིས་ནི་
སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ཡོངས་སུ་བསྐྱེད་དེ། །ཕྱོགས་བཅུར་ཡང་སངས་རྒྱས་ཀྱི་རྣམ་པར་འཕྲུལ་པ་བསམ་གྱིས་མི་ཁྱབ་པ་ཡོངས་སུ་བསྟན་པ་དེས་
སེམས་ཅན་གྱི་ཁམས་མཐའ་དང་དབུས་མེད་པ་ཐེག་པ་གསུམ་གྱིས་དུལ་བར་གྱུར་ཏོ། །དེ་ནས་རྒྱལ་པོ་ནོར་གྱི་བདག་པོ་ཆོས་ཀྱི་སྣང་བ་རབ་ཏུ་ཐོབ་པ་དེའི་ཡིད་ལ་འདི་སྙམ་སྟེ། ཁྱིམ་ན་གནས་པས་ནི་
རྣམ་པ་འདི་ལྟ་བུའི་ཆོས་ཀྱང་ཁོང་དུ་ཆུད་པར་མི་ནུས་ལ་ཡེ་ཤེས་རྣམ་པ་འདི་ལྟ་བུ་ཡང་སྒྲུབ་པར་མི་ནུས་ཀྱིས་བདག་ནི་བཅོམ་ལྡན་འདས་ཀྱི་ཞམ་རིང་དུ་རབ་ཏུ་འབྱུང་ངོ་སྙམ་ནས། བརྒྱལ་པོ་ནོར་
གྱི་བདག་པོས། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་བཅོམ་ལྡན་འདས་ཀྱི་ཞམ་རིང་དུ་རབ་ཏུ་འབྱུང་ཞིང་བསྙེན་པར་རྫོགས་པའི་དགེ་སློང་གི་ཚུལ་ལ་མཆིས་པར་ཅི་གནང་
ཞེས་ནས། བཅོམ་ལྡན་འདས་དེས་བཀའ་བསྩལ་པ། རྒྱལ་པོ་ཆེན་པོ་དེའི་དུས་ལ་བབ་པར་ཤེས་ན་རུང་ངོ་། །དེ་ནས་རྒྱལ་པོ་ནོར་གྱི་བདག་པོ་སྲོག་ཆགས་སྟོང་ཕྲག་བཅུ་དང་ལྷན་གཅིག་ཏུ་

77-1-156a

དེ་བཞིན་གཤེགས་པ་སྐུ་ཉི་མ་དམ་པའི་ཞམ་རིང་དུ་རབ་ཏུ་བྱུང་ངོ་། །དེ་ལྟར་རབ་ཏུ་བྱུང་ནས་རིང་པོ་མ་ལོན་པར་གཟུངས་ཀྱི་སྒོ་ཆོས་ཐམས་ཅད་ལ་རབ་རིབ་མེད་པའི་དོན་གྱི་སྒྲོན་མ་ཞེས་བྱ་བ་དེ་
འཁོར་དང་བཅས་པར་ཡོངས་སུ་བསྒྲུབས་སོ། །བསྒོམས་སོ། །ཤིན་ཏུ་བསྒོམས་སོ། །དེ་སྙེད་ཀྱི་ཏིང་ངེ་འཛིན་གྱི་སྒོ་ཡང་རབ་ཏུ་ཐོབ་པར་གྱུར་ཏོ། །བྱང་ཆུབ་སེམས་དཔའི་མངོན་པར་ཤེས་པ་
བཅུ་ཡང་རབ་ཏུ་ཐོབ་བོ། །སོ་སོ་ཡང་དག་པར་རིག་པའི་ཚུལ་རྒྱ་མཚོ་ལ་ཡང་དག་པར་ཞུགས་པར་གྱུར་ཏོ། །ཕྱོགས་བཅུའི་དེ་བཞིན་གཤེགས་པའི་དྲུང་དུ་འགྲོ་བར་ཐོགས་པ་མེད་པའི་སྤྱོད་ཡུལ་
ཞེས་བྱ་བའི་ལུས་ཡོངས་སུ་དག་པ་ཡང་རབ་ཏུ་ཐོབ་སྟེ། དེས་བཅོམ་ལྡན་འདས་དེའི་ཆོས་གྱི་འཁོར་ལོ་ཡང་དག་པར་བླངས་སོ། །ཡོངས་སུ་བཟུངས་ངོ་། །གཏམ་གྱི་སྐྱེས་བུ་ཡང་བྱས་
སོ། །ཆོས་སྨྲ་བ་ཆེན་པོ་ཡང་བྱས་སོ། །བསྟན་པ་ཡོངས་སུ་གཟུང་བ་ཡང་བྱས་སོ། །མངོན་པར་ཤེས་པ་ཐོབ་པའི་སྟོབས་ཀྱིས་ཀྱང་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ། 
བསམ་པ་ཇི་ལྟ་བ་བཞིན་དུ་སེམས་ཅན་རྣམས་ལ་ལུས་ཡོངས་སུ་བསྟན་ནས། སངས་རྒྱས་བྱུང་བ་དེ་རབ་ཏུ་བརྗོད་པ་དང་། སྔོན་གྱི་དེ་བཞིན་གཤེགས་པས་ཡོངས་སུ་བསྒྲུབ་པའི་ཆོས་
ཉིད་མངོན་པར་བརྗོད་པ་དང་། སྔོན་གྱི་སྦྱོར་བ་ཕུན་སུམ་ཚོགས་པ་དེ་དག་ཡོངས་སུ་བརྗོད་པ་དང་། སངས་རྒྱས་ཀྱི་རྣམ་པར་འཕྲུལ་པའི་མཐུ་དེ་དག་ཡོངས་སུ་བརྗོད་པར་བྱ་བས་བསྟན་
པ་ཡོངས་སུ་གཟུང་བ་བྱས་སོ། །རྒྱལ་པོའི་སྲས་གཟི་བརྗིད་ཀྱི་བདག་པོས་ཀྱང་དེའི་ཉིན་པར་ཟླ་བ་ཉ་སྟེ། རྒྱས་པའི་ཚེ་རིན་པོ་ཆེ་བདུན་ལ་ཡང་རབ་ཏུ་ཐོབ་པར་གྱུར་ཏེ། དེ་ཁང་པའི་སྟེང་ན་བུད་མེད་ཀྱི་

77-1-156b

ཚོགས་ཀྱིས་བསྐོར་ཅིང་འདུག་པའི་མདུན་དུ་འཁོར་ལོ་རིན་པོ་ཆེ་ཆེན་པོ་ཤུགས་ལ་ཐོགས་པ་མེད་པ་ཞེས་བྱ་བ་རྩིབས་སྟོང་ཕྲག་བརྒྱ་དང་ལྡན་པ་རིན་པོ་ཆེ་ཐམས་ཅད་ཀྱིས་བརྒྱན་པ། ལྷ་རྫས་ཀྱི་
འཛམ་བུ་ཆུ་ཀླུང་གི་གསེར་ལས་གྲུབ་པ། འོད་ཀུན་ཏུ་འབྱུང་བ་རྣམ་པའི་མཆོག་ཐམས་ཅད་དང་ལྡན་པ་བྱུང་བར་གྱུར་ཏོ། །གླང་པོ་རིན་པོ་ཆེ་ཆེན་པོ་རྡོ་རྗེ་རིན་པོ་ཆེའི་རིའི་གཟི་བརྗིད་ཅེས་བྱ་བ་བྱུང་བར་གྱུར་ཏོ། །
རྟ་རིན་པོ་ཆེ་རི་སྔོ་རླུང་གི་ཤུགས་ཤེས་བྱ་བ་བྱུང་བར་གྱུར་ཏོ། །ནོར་བུ་རིན་པོ་ཆེ་ཆེན་པོའི་ཉི་མའི་སྙིང་པོ་འོད་སྤྲིན་རྒྱལ་པོ་ཞེས་བྱ་བ་བྱུང་བར་གྱུར་ཏོ། །བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་དེ་ཡང་
བུད་མེད་རིན་པོ་ཆེར་བྱུང་བར་གྱུར་ཏོ། །ཁྱིམ་བདག་རིན་པོ་ཆེ་ནོར་གྱི་ཕུང་པོ་མང་པོ་ཞེས་བྱ་བ་བྱུང་བར་གྱུར་ཏོ། །བློན་པོ་རིན་པོ་ཆེ་མིག་དྲི་མ་མེད་པ་ཞེས་བྱ་བ་ཡང་བྱུང་བར་གྱུར་ཏོ། །དེ་ལྟར་བདུན་ནོ་དེ་དེ་ལྟར་རིན་
པོ་ཆེ་བདུན་དང་ལྡན་པའི་རྒྱལ་པོ་འཁོར་ལོས་བསྒྱུར་བ་གླིང་བཞི་ལ་དབང་བ་ཆོས་དང་ལྡན་པ། ཆོས་ཀྱི་རྒྱལ་པོ་རྣམ་པར་རྒྱལ་བ་དང་ལྡན་པ་ཡུལ་གྱི་མཐུ་དང་བརྩོན་འགྲུས་སུ་ལྡན་པར་གྱུར་ཏེ། 
དེ་ལ་བུ་དཔའ་ལ་བརྟུལ་ཕོད་ཅིང་ཡན་ལག་དམ་པའི་གཟུགས་དང་ལྡན་པ་ཕ་རོལ་གྱི་སྡེ་རབ་ཏུ་འཇོམས་པ་སྟོང་ཡོད་པར་གྱུར་ཏེ། དེས་ས་ཆེན་པོ་འདི་སྐྱོན་མེད་པ་དང་། དགྲ་མེད་པ་དང་གནོད་པ་མེད་
པ་དང་། འཚེ་བ་མེད་པ་དང་། སྐྱིད་པ་དང་ཕུན་སུམ་ཚོགས་པ་དང་། བདེ་བ་དང་ལོ་ལེགས་པ་དང་མདང་དགའ་བ་དང་། སྐྱེ་བོའི་མི་མང་པོས་ཡོངསུ་གང་བ་ཡང་རི་དང་རྒྱ་མཚོའི་མཐས་ཀླས་པར་
ཆོས་ཀྱི་མངོན་པར་བརྒྱན་ཏེ། གནས་པར་བྱས་སོ། །དེས་འཛམ་བུའི་གླིང་དེའི་རྒྱལ་པོའི་གནས་སྟོང་ཕྲག་བརྒྱད་བཅུ་རྩ་བཞི་དག་ཏུ་ཡང་རྒྱལ་པོའི་གནས་རེ་རེར་གཙུག་ལག་ཁང་ལྔ་བརྒྱ་

77-1-157a

བྱེད་དུ་བཅུག་སྟེ། ཐམས་ཅད་ཀྱང་རྣམ་པའི་མཆོག་ཐམས་ཅད་དང་ལྡན་པ་ཤ་སྟག་གོ། །ལོངས་སྤྱོད་དང་ཡོ་བྱད་ཀྱི་རྣམ་པ་ཐམས་ཅད་ཕུན་སུམ་ཚོགས་པ་ཤ་སྟག་གོ། །བཟའ་ཤིང་གི་ར་བ་དང་། ཁང་པ་
དང་འཆག་ས་དང་། དུས་ཐམས་ཅད་དུ་བདེ་བར་སྤྱད་པའི་ནགས་ཚལ་གྱི་ཕྲེང་བས་རྣམ་པར་བརྒྱན་པ་ཤ་སྟག་གོ། །གཙུག་ལག་ཁང་རེ་རེ་ཞིང་ཡང་དེ་བཞིན་གཤེགས་པའི་མཆོད་བརྟེན་བརྩིགས་པ་ནི་
ལྷུན་གྱི་རྒྱ་ཤིན་ཏུ་ཆེ་བར་བྱས་པ་སྟེ། ནང་རིན་པོ་ཆེ་རྣམ་པ་མང་པོས་བརྒྱན་པ། རིན་པོ་ཆེའི་རྒྱལ་པོ་སྣ་ཚོགས་ཀྱིས་རྣམ་པར་སྤྲས་པ་ཤ་སྟག་སྟེ། རྒྱལ་པོའི་གནས་དེ་ཐམས་ཅད་དུའང་བཅོམ་
ལྡན་འདས་དེ་བཞིན་གཤེགས་པ་སྐུ་ཉི་མ་དམ་པ་འཁོར་དང་བཅས་པ། གྲོང་ཁྱེར་དུ་གཤེགས་པར་བྱ་བའི་ཕྱིར་སྤྱན་དྲངསོ། །རྒྱལ་པོའི་གནས་དེ་དག་ཀུན་ཏུ་ཡང་དེ་བཞིན་གཤེགས་པ་
དེ་ལ་དེ་བཞིན་གཤེགས་པའི་མཆོད་པ་རྣམ་པ་ཐམས་ཅད་དུ་བསམ་གྱིས་མི་ཁྱབ་པས་མཆོད་དེ། སངས་རྒྱས་གྲོང་ཁྱེར་དུ་གཤེགས་པའི་ཆོ་འཕྲུལ་དང་། རྣམ་པར་འཕྲུལ་པས་སེམས་
ཅན་ཚད་མེད་པའི་དགེ་བའི་རྩ་བ་ཡོངས་སུ་བསྐྱེད་པའི་ཕྱིར་གཤེགས་སུ་གསོལ་ཏོ། །དེར་ཡང་སེམས་ཅན་མ་དད་པའི་སེམས་དང་ལྡན་པ་རྣམས་ནི་དད་པ་ཐོབ་པར་གྱུར་ཏོ། །དད་པ་དང་ལྡན་པའི་སེམས་
ཅན་རྣམས་ནི་སངས་རྒྱས་མཐོང་བས་དགའ་བའི་ཤུགས་རྣམ་པར་འཕེལ་བར་གྱུར་ཏོ། །དགའ་བའི་ཤུགས་རྣམ་པར་འཕེལ་བའི་སེམས་ཅན་རྣམས་ནི་བྱང་ཆུབ་ཀྱི་བསམ་པ་རྣམ་པར་དག་པ་
ཐོབ་པར་གྱུར་ཏོ། །བྱང་ཆུབ་ཀྱི་བསམ་པ་རྣམ་པར་དག་པའི་སེམས་ཅན་རྣམས་ནི་སྙིང་རྗེ་ཆེན་པོའི་སེམས་སྐྱེས་པར་གྱུར་ཏོ། །སེམས་ཅན་ལ་ཕན་པར་ཞུགས་པའི་སེམས་ཅན་རྣམས་ནི་

77-1-157b

སངས་རྒྱས་ཀྱི་ཆོས་ཐམས་ཅད་ཡོངས་སུ་བཙལ་བ་ལ་བརྩོན་པར་གྱུར་ཏོ། །སངས་རྒྱས་ཀྱི་ཆོས་ཀྱི་ཚུལ་རྣམ་པ་ལ་མཁས་པའི་སེམས་ཅན་རྣམས་ནི་ཆོས་ཐམས་ཅད་ཀྱི་རང་བཞིན་ངེས་པར་ཁོང་དུ་
ཆུད་པར་བྱ་བའི་ཕྱིར་སེམས་མངོན་པར་གཞོལ་བར་གྱུར་ཏོ། །ཆོས་མཉམ་པ་ཉིད་ལ་ཞུགས་པའི་སེམས་ཅན་རྣམས་ནི་དུས་གསུམ་མཉམ་པ་ཉིད་ལ་འཇུག་པའི་ཕྱིར། སེམས་མངོན་པར་གཞོལ་བར་
གྱུར་ཏོ། །དུས་གསུམ་གྱི་ཡེ་ཤེས་སྣང་བ་ཐོབ་པའི་སེམས་ཅན་རྣམས་ནི་སངས་རྒྱས་གཅིག་ནས་གཅིག་ཏུ་བརྒྱུད་པ་རྣམ་པར་དམྱིགས་པར་བྱ་བའི་དོན་དུ་ཡེ་ཤེས་སྣང་བ་ལ་ཞུགས་པར་གྱུར་ཏོ། །དེ་བཞིན་
གཤེགས་པ་སྣ་ཚོགས་རྣམ་པར་དམྱིགས་པར་བྱ་བ་ལ་ཞུགས་པའི་སེམས་ཅན་རྣམས་ནི་འགྲོ་བ་ཐམས་ཅད་ཡོངས་སུ་བསྡུ་བའི་དོན་དུ་སེམས་མངོན་པར་གཞོལ་བར་གྱུར་ཏོ། །འགྲོ་བ་ཐམས་ཅད་
ཡོངས་སུ་བསྡུ་བ་ལ་བརྩོན་པའི་སེམས་ཅན་རྣམས་ནི་བྱང་ཆུབ་སེམས་དཔའི་ལམ་རྣམ་པར་དག་པར་བྱ་བའི་ཕྱིར་སྨོན་ལམ་བསྐྱེད་པར་གྱུར་ཏོ། །ལམ་གྱི་མཉམ་པ་ཉིད་ལ་ཞུགས་པའི་སེམས་ཅན་
རྣམས་ནི་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་མངོན་པར་སྒྲུབ་པའི་ཕྱིར་ཡེ་ཤེས་སྣང་བ་བསྐྱེད་པར་གྱུར་ཏོ། །ཆོས་རྒྱ་མཚོ་རྣམ་པར་དབྱེ་བ་ལ་མངོན་པར་མོས་པའི་སེམས་
ཅན་རྣམས་ནི་ཞིང་གི་དྲ་བ་ཐམས་ཅད་རང་གི་ལུས་ཀྱིས་རྒྱས་པར་གང་བའི་དོན་དུ་སེམས་མངོན་པར་གཞོལ་བར་གྱུར་ཏོ། །ཞིང་མཉམ་པ་ཉིད་ལ་ཞུགས་པའི་སེམས་ཅན་རྣམས་ནི་སེམས་
ཅན་ཐམས་ཅད་གྱི་དབང་པོ་རྒྱ་མཚོ་ཡོངས་སུ་ཤེས་པར་བྱ་བའི་ཕྱིར་སྨོན་ལམ་འདེབས་པར་གྱུར་ཏོ། །འགྲོ་བ་ཐམས་ཅད་ཀྱི་དབང་པོ་དང་མོས་པ་ཇི་ལྟ་བ་བཞིན་དུ་རྣམ་པར་དཔྱད་པ་ལ་བརྩོན་པའི་

77-1-158a

སེམས་ཅན་རྣམས་ནི་ཐམས་ཅད་མཁྱེན་པ་ཉིད་ཁོང་དུ་ཆུད་པར་བྱ་བའི་ཕྱིར་བསམ་པ་རྣམ་པར་དག་པར་གྱུར་ཏོ། །སེམས་ཅན་རྣམ་པ་དེ་ལྟ་བུ་དག་གི་དོན་རྣམ་པ་དེ་ལྟ་བུ་དེ་དག་འགྲུབ་པར་འགྱུར་
བ་མཐོང་ནས། རྒྱལ་པོ་གཟི་བརྗིད་ཀྱི་བདག་པོས་སངས་རྒྱས་ཀྱི་རྣམ་པར་འཕྲུལ་བ་དང་། ཆོ་འཕྲུལ་བསམ་གྱིས་མི་ཁྱབ་པ་བསྟན་པས་སེམས་ཅན་དེ་དག་ཡོངས་སུ་སྨིན་པར་བྱ་བ་དང་། གདུལ་
བའི་དོན་དུ་རྒྱལ་པོའི་གནས་དེ་དག་ཐམས་ཅད་དུ་དེ་བཞིན་གཤེགས་པ་སྐུ་ཉི་མ་དམ་པ་གཤེགས་སུ་གསོལ་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོའི་བུ་གཟི་བརྗིད་
ཀྱི་བདག་པོ་ཞེས་བྱ་བར་གྱུར་པ་དེ་གཞན་ཞིག་ཡིན་པ་ཙམ་དུ་སེམས་ན་ནི། ཁྱོད་ཀྱིས་དེ་ལྟར་མི་ལྟ་སྟེ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་འདི་ནི་དེའི་ཚེ་དེའི་དུས་ན། རྒྱལ་པོའི་བུ་
གཟི་བརྗིད་ཀྱི་བདག་པོ་ཞེས་བྱ་བ་འཁོར་ལོས་བསྒྱུར་བའི་རྒྱལ་སྲིད་ལ་དབང་བ་དེ་བཞིན་གཤེགས་པ་སྐུ་ཉི་མ་དམ་པ་ལ་བསྙེན་བཀུར་བྱེད་བྱེད་པ་དེ་ཡིན་ནོ། །རིགས་ཀྱི་བུ་དེ་ལ་ཇི་སྙམ་དུ་
སེམས། དེའི་ཚེ་དེའི་དུས་ན་རྒྱལ་པོ་ནོར་གྱི་བདག་པོ་གཞོན་ནུ་གཟི་བརྗིད་ཀྱི་བདག་པོའི་ཡབ་དུ་གྱུར་པ་དེ་གཞན་ཞིག་ཡིན་པ་ཙམ་དུ་སེམས་ན་ནི་དེ་ལྟར་མི་བལྟ་སྟེ། དེ་བཞིན་གཤེགས་པ་རིན་པོ་ཆེའི་
མེ་ཏོག་གི་འོད་ཅེས་བྱ་བ་ནི་དེའི་ཚེ་དེའི་དུས་ན་རྒྱལ་པོ་ནོར་གྱི་བདག་པོ་ཞེས་བྱ་བར་གྱུར་པ་སྟེ། དེ་ལྟར་ཤར་ཕྱོགས་སུ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་རྒྱ་
མཚོའི་ཕ་རོལ་གྱི་འཇིག་རྟེན་གྱི་ཁམས་རྒྱ་མཚོ་ཆོས་ཀྱི་དབྱིངས་ནམ་མཁའི་གཟུགས་བརྙན་གྱི་སྤྲིན་ཅེས་བྱ་བ་ན། འཇིག་རྟེན་གྱི་ཁམས་ཀྱི་རྒྱུད་དབུ་མ་དུས་གསུམ་རབ་ཏུ་སྣང་བའི་རིན་པོ་ཆེའི་རྒྱལ་

77-1-158b

པོ་ཡོངས་སུ་འབྱུང་བའི་དབྱིངས་ཤེས་བྱ་བའི་འཇིག་རྟེན་གྱི་ཁམས་སངས་རྒྱས་ཀྱི་འོད་ཀྱི་དཀྱིལ་འཁོར་དཔལ་གྱི་སྒྲོན་མ་ཞེས་བྱ་བ་ན། སྙིང་པོ་བྱང་ཆུབ་ཐམས་ཅད་ལ་དབང་བའི་ལུས་རབ་ཏུ་སྣང་བ་ཞེས་བྱ་བར་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཏེ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་དཔའི་འཁོར་གྱིས་བསྐོར་ཅིང་ཆོས་སྟོན་ཏོ། །
བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་མེ་ཏོག་ཅེས་བྱ་བ་དེས་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ། འཇིག་རྟེན་གྱི་ཁམས་རྒྱ་མཚོ་ཆོས་ཀྱི་དབྱིངས་ནམ་མཁའི་གཟུགས་བརྙན་དུ་སྣང་
བའི་སྤྲིན་ཡོངས་སུ་དག་པར་མཛད་དེ། འཇིག་རྟེན་གྱི་ཁམས་རྒྱ་མཚོ་དེར་དེ་བཞིན་གཤེགས་པ་ཇི་སྙེད་གཅིག་བྱུང་བར་གྱུར་པ་དང་། འབྱུང་བ་དང་འབྱུང་བར་འགྱུར་བ་དེ་དག་ཐམས་ཅད་ཀྱང་བཅོམ་ལྡན་འདས་
དེ་བཞིན་གཤེགས་པ་རིན་པོ་ཆེའི་མེ་ཏོག་གི་འོད་དེས་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨྱིན་པར་མཛད་པ་ཤ་སྟག་གོ། །རིགས་ཀྱི་བུ་
དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོའི་བཙུན་མོ་པད་མོ་དཔལ་གྱི་སྙིང་པོ་འབྱུང་བ་ཞེས་བྱ་བ་བྱུང་སྟེ། གཞོན་ནུ་གཟི་བརྗིད་ཀྱི་བདག་པོའི་ཡུམ་དུ་གྱུར་པ་བུད་མེད་སྟོང་ཕྲག་བརྒྱ་
བཅུ་རྩ་བཞིའི་གཙོ་མོར་གྱུར་པ་དེ་གཞན་ཞིག་ཡིན་པ་ཙམ་དུ་སེམས་ན་ནི། དེ་ལྟར་མི་བལྟ་སྟེ། རིགས་ཀྱི་བུ་བཅོམ་ལྡན་འདས་ཀྱི་ཡུམ་ལྷ་མོ་སྒྱུ་མ་བྱང་ཆུབ་སེམས་དཔའ་བསྐྱེད་བསྐྱེད་པ་རྣམ་
པར་ཐར་པ་ཀུན་ཏུ་སྣང་ཞིང་སྒྲིབ་པ་མེད་པ་ལ་རབ་ཏུ་གནས་པ། སྔོན་དེ་བཞིན་གཤེགས་པས་ཡོངས་སུ་སྒྲུབས་པ་མངོན་དུ་གྱུར་པ། བྱང་ཆུབ་སེམས་དཔའི་སྐྱེ་བ་ཐམས་ཅད་ཡོངས་སུ་བསྟན་

77-1-159a

པའི་ཚུལ་ལ་མཁས་པ་འདི་ནི་དེའི་ཚེ་དེའི་དུས་ན་རྒྱལ་པོ་ནོར་གྱི་བདག་པོའི་བཙུན་མོ་དམ་པ་པད་མོ་དཔལ་གྱི་སྙིང་པོ་འབྱུང་བ་ཞེས་བྱ་བར་གྱུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། 
དེའི་ཚེ་དེའི་དུས་ན་སྨད་ཚོང་མའི་གཙོ་མོ་བལྟ་ན་སྡུག་པ་ཞེས་བྱ་བ་བྱུང་བ་དེ་གཞན་ཞིག་ཡིན་པ་ཙམ་དུ་སེམས་ན་ནི་དེ་ལྟར་མི་བལྟ་སྟེ། ཤཱཀྱ་ལག་ན་ཁར་བའི་ཆུང་མ་ཁོ་མོའི་མ་མིག་མཛེས་
ཤེས་བྱ་བ་འདི་ནི་དེའི་ཚེ་དེའི་དུས་ན་སྨད་འཚོང་མའི་གཙོ་མོ་བལྟ་ན་སྡུག་པ་ཞེས་བྱ་བར་གྱུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ། 
ཞེས་བྱ་བར་གྱུར་པ་དེ་གཞན་ཞིག་ཡིན་པ་ཙམ་དུ་སེམས་ན་ནི་དེ་ལྟར་མི་བལྟ་སྟེ། ཁོ་མོ་ནི་དེའི་ཚེ་དེའི་དུས་ན། སྨད་འཚོང་མའི་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ཞེས་བྱ་བར་གྱུར་ཏོ། །རིགས་
ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་གཟི་བརྗིད་ཀྱི་བདག་པོའི་འཁོར་དུ་གྱུར་པ་དེ་རྣམས་གཞན་ཞིག་ཡིན་པ་ཙམ་དུ་སེམས་ན་ནི། རིགས་ཀྱི་བུ་དེ་ནི་དེ་ལྟར་མི་ལྟ་སྟེ། བཅོམ་
ལྡན་འདས་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་ཡོངས་སུ་རྫོགས་པར་བྱ་བ་ལ་དགོད་དགོད་པའི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་འདི་ཉིད་ན་འཁོད་ཅིང་། 
འཇིག་རྟེན་གྱི་ཁམས་ཐམས་ཅད་དུ་གཟུགས་རྙན་རབ་ཏུ་འབྱུང་བའི་ལུས་དང་། བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་ལ་རྣམ་པར་སྤྱོད་པ་ལས་མ་ཉམས་པའི་སེམས་དང་། དེ་བཞིན་
གཤེགས་པ་ཐམས་ཅད་ཀྱི་ཞལ་མངོན་དུ་མཐོང་བར་རྣམ་པར་དམྱིགས་པའི་མིག་དང་དེ་བཞིན་གཤེགས་པ་ཐམས་ཅད་ཀྱི་གསུང་གི་ཡན་ལག་གི་སྤྲིན་ནམ་མཁའ་དང་མཉམ་པའི་འཁོར་ལོ་རབ་ཏུ་བསྒྲགས་

77-1-159b

པའི་དབྱངས་རྣམ་པར་དམྱིགས་པའི་རྣ་བ་དང་། ཆོས་ཐམས་ཅད་ལ་རྣམ་པར་སྤྱད་པར་དབང་བསྒྱུར་བའི་དབུགས་ཕྱི་ནང་དུ་རྒྱུ་བ་དང་། སངས་རྒྱས་ཀྱི་ཞིང་ཐམས་ཅད་དུ་རྗེས་སུ་གྲགས་པའི་མིང་གི་སྒྲ་དང་། དེ་བཞིན་གཤེགས་
པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་ཉེ་བར་འགྲོ་བ་རྒྱུན་མི་གཅོད་པའི་བྱང་ཆུབ་སེམས་དཔའི་ལུས་དང་སེམས་ཅན་ཐམས་ཅད་ལ་བསམ་པ་ཇི་ལྟ་བ་བཞིན་དུ་མངོན་པར་སྟོན་པའི་ལུས་ཡོངས་སུ་སྨྱིན་པར་བྱ་བ་དང་། 
གདུལ་བ་ལ་རྗེས་སུ་འཐུན་པ་མངོན་པར་སྒྲུབ་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་ཡོངས་སུ་རྫོགས་པར་བྱ་བ་དང་། ཡང་དག་པར་སྒྲུབ་པ་ཕྱོགས་ཀྱི་དྲ་བ་མ་ལུས་པ་ཐམས་ཅད་དུ་
འདལ་ཏེ། མ་འོངས་པའི་བསྐལ་པ་ཐམས་ཅད་དུ་རྒྱུན་མི་འཆད་པ་དང་ལྡན་པ་ཤ་སྟགོ་བཅོམ་ལྡན་འདས་ཀྱི་འཁོར་གྱི་དཀྱིལ་འཁོར་ན་འཁོད་པ་འདི་དག་ཡིན་ནོ། །རིགས་ཀྱི་བུ་དེ་བཞིན་གཤེགས་པ་སྐུ་ཉི་མ་དམ་པ་དེ་ནི་
འཁོར་ལོས་བསྒྱུར་བ་གཟི་བརྗིད་ཀྱི་བདག་པོ་དང་། ཁོ་མོས་ནམ་བཞུགས་ཀྱི་བར་དུ་ན་བཟའ་དང་བཤོས་དང་། གཟིམས་ཆ་དང་། སྙུན་གྱི་རྐྱེན་སྨན་དང་ཡོ་བྱད་ཀྱིས་བསྙེན་བཀུར་ཏོ། །རིགས་ཀྱི་བུ་དེ་བཞིན་
གཤེགས་པ་སྐུ་ཉི་མ་དམ་པ་ཡོངས་སུ་མྱ་ངན་ལས་འདས་པའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་དེ་བཞིན་གཤེགས་པ་སྐུ་ཤིན་ཏུ་དང་བ་ཞེས་བྱ་བ་འཇིག་རྟེན་དུ་བྱུང་སྟེ། དེ་ཡང་ཁོ་མོ་ཅག་གིས་བསྙེན་
བཀུར་ཏོ། །རིམ་གྲོར་བྱས་སོ། །སྟི་སྟང་དུ་བྱས་སོ། །ཕུ་དུད་དུ་བྱས་སོ། །མཆོད་དོ། །དེའི་འོག་ཏུ་དེ་བཞིན་གཤེགས་པ་སྐུ་ཐམས་ཅད་ལ་ཡེ་ཤེས་ཀྱི་གཟུགས་རྙན་གྱི་ཟླ་བ་སྣང་བ་ཞེས་བྱ་བ་འཇིག་རྟེན་དུ་
བྱུང་སྟེ། དེ་ཡང་ཁོ་མོ་ཅག་གིས་ལྷའི་དབང་པོར་གྱུར་ཏེ། བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འཛམ་བུ་ཆུ་ཀླུང་གི་གཟི་བརྗིད་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་

77-1-160a

གཤེགས་པ་སྐུ་མཚན་གྱིས་རྣམ་པར་བརྒྱན་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་གཟེར་སྣ་ཚོགས་འབར་བའི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་
གཤེགས་པ་ཤིན་ཏུ་རྣམ་པར་གཟིགས་པའི་ཡེ་ཤེས་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཆེན་པོའི་འོད་གཟེར་ཤིན་ཏུ་ཡངས་པའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་
འོག་ཏུ་དེ་བཞིན་གཤེགས་པ་རྡོ་རྗེ་མཐུ་བོ་ཆེའི་བརྩོན་འགྲུས་ཤེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་གཞན་གྱིས་མི་ཐུབ་པའི་མཐུ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་
གཤེགས་པ་ཀུན་ཏུ་རྣམ་པར་གཟིགས་པའི་ཡེ་ཤེས་ཤེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་དྲི་མ་མེད་པ་ཕུན་སུམ་ཚོགས་པའི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་
དེ་བཞིན་གཤེགས་པ་སེང་གེ་རྣམ་པར་སྒྱིངས་པའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཟེར་འབར་བའི་གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་
ཡོན་ཏན་འོད་གཟེར་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཉི་མའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྐུ་རིན་པོ་ཆེའི་པད་མོ་ཤིན་ཏུ་
རྒྱས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་བསོད་ནམས་སྒྲོན་མའི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་འོད་གཟེར་གྱི་སྤྲིན་གྱི་འོད་ཅེས་བྱ་བ་བསྙེན་
བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཀུན་ཏུ་རྣམ་པར་སྣང་བའི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རྒྱན་དང་གདུགས་ཀྱི་དབྱངས་ཀྱི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་

77-1-160b

དེ་བཞིན་གཤེགས་པ་ཡེ་ཤེས་སྣང་བས་རྣམ་པར་གནོན་པའི་སེང་གེ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་དབྱིངས་ཀྱི་ཡུལ་གྱི་བློ་གྲོས་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་
པ་སེམས་ཅན་ནམ་མཁའི་སེམས་སྣང་བའི་གཟུགས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རབ་ཏུ་ཞི་བའི་སྤོས་ཀྱི་གཙུག་བཟང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཞི་
བའི་དབྱངས་ཀུན་ཏུ་བསྒྲགས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་རབ་ཏུ་བསྟན་པའི་འོད་གཟེར་གྱི་དྲ་བའི་གཟུགས་ཀྱི་ཕུང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་
པ་བདུད་རྩིའི་རི་བོའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་རྒྱ་མཚོའི་འབྲུག་སྒྲ་སྒྲོགས་པའི་དབྱངས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སངས་རྒྱས་ནམ་མཁའ་
སྣང་བ་གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་གཟེར་ཟླ་བ་མཛོད་སྤུའི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀྱི་ཞལ་ཤིན་ཏུ་རྒྱས་པ་ཞེས་
བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཤིན་ཏུ་རྣམ་པར་དག་པའི་མེ་ཏོག་སྣང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་ཆེན་འོད་འཕྲོ་བའི་རི་བོ་དཔལ་གྱི་གཟི་བརྗིད་
རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡོན་ཏན་རྒྱ་ཆེན་གཟི་བརྗིད་ཀྱི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཏིང་ངེ་འཛིན་གྱི་རི་རབ་མངོན་པར་འཕགས་པའི་ཡེ་ཤེས་
ཤེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་པོ་ཆེ་ཟླ་བའི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྐུ་འོད་འཕྲོ་བའི་དཀྱིལ་འཁོར་ཞེས་བྱ་བ་བསྙེན་བཀུར་ཏོ། །

77-1-161a

དེའི་འོག་ཏུ་དེ་བཞིན་གཤེགས་པ་རིན་ཆེན་མཆོག་གི་འོད་ཀྱི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀྱི་སྤྱོད་པ་ཀུན་ཏུ་ཐོགས་པ་མེད་པ་ཞེས་བྱ་བ་བསྙེན་བཀུར་ཏོ། །
དེའི་འོག་ཏུ་དེ་བཞིན་གཤེགས་པ་འོད་འཕྲོ་རྒྱ་མཚོའི་སྒོའི་སྒྲོན་མ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་ཆེན་ཟླ་བའི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་
པ་ཆོས་ཀྱི་གཞལ་མེད་ཁང་གི་དབྱངས་ཀྱི་རྒྱན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡོན་ཏན་མི་མཚུངས་གྲགས་པའི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་
པ་ཕྱག་རབ་ཏུ་བརྐྱང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྔོན་གྱི་སྨོན་ལམ་གྱི་འཕྲུལ་པའི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ནམ་མཁའི་ཡེ་ཤེས་དོན་གྱི་
སྒྲོན་མ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱིས་འཕགས་པའི་ནམ་མཁའི་དབང་ཕྱུག་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རྣམ་པར་སྣང་མཛད་དཔལ་གྱི་
སྙིང་པོ་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་མཐུ་བོ་ཆེའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་དཔལ་ཞེས་བྱ་བ་བསྙེན་བཀུར་ཏོ། །
དེའི་འོག་ཏུ་དེ་བཞིན་གཤེགས་པ་ཆོས་རྒྱ་མཚོའི་པད་མོ་ཞེས་བྱ་བ་བསྙེན་བཀུར་ཏོ། །རིགས་ཀྱི་བུ་དེ་ལྟར་དེ་བཞིན་གཤེགས་པ་དེ་དག་ལ་སྩོགས་པ་འཇིག་རྟེན་གྱི་ཁམས་དེར་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་
ཕྲག་དྲུག་བཅུ་བྱུང་སྟེ། དེ་དག་ཐམས་ཅད་ཁོ་མོ་ཅག་གིས་ན་བཟའ་དང་། བཤོས་དང་། གཟིམས་ཆ་དང་། སྙུན་གྱི་རྐྱེན་སྨན་དང་། ཡོ་བྱད་ཀྱིས་བསྙེན་བཀུར་ཏོ། །རིམ་གྲོར་བྱས་སོ། །སྟི་སྟང་དུ་བྱས་སོ། །ཕུ་དུད་དུ་བྱས་སོ་མཆོད་དོ། །

77-1-161b

རིགས་ཀྱི་བུ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་བཅུ་པོ་དེ་དག་ཐམས་ཅད་ཀྱི་ཐ་མར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་ཆེན་པོ་ལ་མོས་པ་ཡང་དག་པར་འབྱུང་བའི་
གཟི་བརྗིད་ཅེས་བྱ་བ་བྱུང་སྟེ། བཅོམ་ལྡན་འདས་དེ་གྲོང་ཁྱེར་དུ་གཤེགས་པ་ལ་ཁོ་མོ་རྒྱལ་པོའི་ཆུང་མར་གྱུར་ཏེ། ཁྱིམ་ཐབ་དང་བཅས་པས་དེ་བཞིན་གཤེགས་པ་མཆོད་པའི་སྒོ་རྣམ་པ་ཐམས་ཅད་དུ་
བཤམས་པས་མཆོད་པ་བྱས་ནས་བཅོམ་ལྡན་འདས་དེ་ལས་ཆོས་ཀྱི་རྣམ་གྲངས་དེ་བཞིན་གཤེགས་པ་ཐམས་ཅད་སྐྱེ་བ་འབྱུང་བའི་སྒྲོན་མ་ཞེས་བྱ་བ་ཐོས་སོ། །དེ་ཐོས་ནས་ཁོ་མོས་ཡེ་ཤེས་ཀྱི་མིག་རབ་ཏུ་ཐོབ་སྟེ། 
བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་རྒྱ་མཚོ་ཐམས་ཅད་ལ་རྣམ་པར་ལྟ་བའི་ཡུལ་འདི་ཡང་རབ་ཏུ་ཐོབ་པར་གྱུར་ཏེ། རིགས་ཀྱི་བུ་དེ་ལྟར་ཁོ་མོ་རྣམ་པར་ཐར་པ་འདི་
ལ་སྒོམ་ཞིང་བྱང་ཆུབ་སེམས་དཔའ་དང་ལྷན་གཅིག་ཏུ་བྱང་ཆུབ་སེམས་དཔའི་སྤྱོད་པ་སྤྱོད་ཅིང་བསྐལ་པ་སངས་རྒྱས་ཀྱི་ཞིང་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་གཅིག་ཏུ་རྒྱུ་རྒྱུ་སྟེ། སངས་རྒྱས་ཀྱི་ཞིང་དེ་
སྙེད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་བསྐལ་པ་དེ་དག་ལ་དེ་བཞིན་གཤེགས་པ་མཐའ་དང་དབུས་མེད་པ་ཞིག་བསྙེན་བཀུར་ནས། བསྐལ་པ་ལ་ལ་ལ་ནི་དེ་བཞིན་གཤེགས་པ་བསྐལ་པར་བཞུགས་པ་གཅིག་ཀྱང་
བསྙེན་བཀུར་ཏོ། །བསྐལ་པ་ལ་ལ་ལ་ནི་དེ་བཞིན་གཤེགས་པ་གཉིས་ཀྱང་བསྙེན་བཀུར་ཏོ། །བསྐལ་པ་ལ་ལ་ལ་ནི་དེ་བཞིན་གཤེགས་པ་བརྗོད་དུ་མེད་པའི་བར་དག་ཀྱང་བསྙེན་བཀུར་ཏོ། །བསྐལ་པ་ལ་ལ་ལ་
ནི་དེ་བཞིན་གཤེགས་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱང་བསྙེན་བཀུར་ཏེ། དེ་སྲིད་དུ་ཁོ་མོས་བྱང་ཆུབ་སེམས་དཔའི་སྐུ་ཡང་ཚད་ནི་ཇི་ཙམ་ཞིག །དབྱིབས་ནི་ཇི་ལྟ་བུ་ཞིག །སྐུ་མདོག་ནི་ཅི་འདྲ་བ་ཞིག་

77-1-162a

ཡིན་པ་ཁོང་དུ་མ་ཆུད་དོ། །སྐུའི་ཕྲིན་ལས་ཀྱང་ཁོང་དུ་མ་ཆུད། གསུང་གི་ཕྲིན་ལས་དང་ཐུགས་ཀྱི་ཕྲིན་ལས་ཀྱང་ཁོང་དུ་མ་ཆུད་དོ། །ཡེ་ཤེས་ཀྱིས་གཟིགས་པ་དང་། ཡེ་ཤེས་ཀྱི་སྤྱོད་ཡུལ་དང་། ཡེ་ཤེས་ཀྱི་ཏིང་ངེ་
འཛིན་གྱི་ཡུལ་ཡང་ཁོང་དུ་མ་ཆུད་དོ། །རིགས་ཀྱི་བུ་བྱང་ཆུབ་སེམས་དཔའ་ཇི་སྙེད་གཅིག་གིས་བྱང་ཆུབ་སེམས་དཔའི་སྤྱོད་པ་མཛད་པ་མཐོང་ནས། བྱང་ཆུབ་སེམས་དཔའ་ལ་དགའ་བའི་སེམས་སྐྱེས་ཏེ། 
བརྡ་སྣ་ཚོགས་དང་བསྙེན་པ་སྣ་ཚོགས་ཀྱིས་མོས་པ་བསྐྱེད་པར་གྱུར་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའ་འཇིག་རྟེན་དང་འཇིག་རྟེན་ལས་འདས་པའི་ཐབས་སྣ་ཚོགས་ཀྱིས་ཡོངས་སུ་བཟུང་སྟེ། བྱང་ཆུབ་
སེམས་དཔའི་འཁོར་དུ་གྱུར་ཏོ། །དེ་དག་ཀྱང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་མཛད་པའི་ཚེ་འཁོར་དུ་འགྲོགས་འགྲོགས་པས་བླ་ན་མྱེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་
མྱི་ལྡོག་པར་གྱུར་ཏོ། །རིགས་ཀྱི་བུ་དེ་ལྟར་ཁོ་མོས་དེ་བཞིན་གཤེགས་པ་ཆོས་རྒྱ་ཆེན་པོ་ལ་མོས་པ་ཡང་དག་པར་འབྱུང་བའི་གཟི་བརྗིད་ཀྱི་ཞལ་མཐོང་མ་ཐག་ཏུ་བྱང་ཆུབ་སེམས་དཔའི་རྣམ་པར་ཐར་པ་
བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་རྒྱ་མཚོ་ལ་རྣམ་པར་ལྟ་བའི་ཡུལ་འདི་ཐོབ་ནས། རྣམ་པར་ཐར་པ་འདི་བསྒོམ་ཞིང་བྱང་ཆུབ་སེམས་དཔའ་དང་བསྐལ་པ་སངས་རྒྱས་ཀྱི་ཞིང་བརྒྱ་ཕྲག་སྟོང་གི་
རྡུལ་ཤིན་ཏུ་ཕྲ་བ་སྙེད་གཅིག་ཏུ་འགྲོགས་འགྲོགས་ཏེ། བསྐལ་པ་སངས་རྒྱས་ཀྱི་ཞིང་བརྒྱའི་རྡུལ་ཤིན་ཏུ་ཕྲ་བ་སྙེད་པོ་དེ་དག་ལ་དེ་བཞིན་གཤེགས་པ་ཇི་སྙེད་གཅིག་བྱུང་བར་གྱུར་པ་དེ་དག་ཐམས་ཅད་ཀྱང་
ཁོ་མོས་བསྙེན་བཀུར་ཏོ། །མཆོད་དོ་རིམ་གྲོར་བྱས་སོ། །དེ་བཞིན་གཤེགས་པ་དེ་དག་ཐམས་ཅད་ལས་ཀྱང་ཁོ་མོས་ཆོས་བསྟན་པ་ཐོས་ཏེ། ཡོངས་སུ་བླངས་སོ། །ཡང་དག་པར་བཟུང་ངོ་། །སངས་རྒྱས་

77-1-162b

བཅོམ་ལྡན་འདས་དེ་དག་ཐམས་ཅད་ལས་ཀྱང་ཁོ་མོས་རྣམ་པར་ཐར་པ་འདི་ཚུལ་སྣ་ཚོགས་དང་། མདོ་སྡེའི་ཚུལ་གྱི་གསུང་སྣ་ཚོགས་དང་། རྣམ་པར་ཐར་པའི་རང་བཞིན་སྣ་ཚོགས་དང་། རྣམ་པར་ཐར་པའི་སྒོ་སྣ་
ཚོགས་དང་། རྣམ་པར་ཐར་པའི་རྒྱུད་སྣ་ཚོགས་དང་། དུས་ལ་འཇུག་པ་སྣ་ཚོགས་དང་། ཞིང་རྒྱ་མཚོ་ལ་འཇུག་པ་སྣ་ཚོགས་དང་། སངས་རྒྱས་བལྟ་བ་རྒྱ་མཚོ་རྣམ་པར་དམྱིགས་པར་བྱ་བ་སྣ་ཚོགས་དང་། 
དེ་བཞིན་གཤེགས་པའི་འཁོར་གྱི་དཀྱིལ་འཁོར་དུ་འཇུག་པ་སྣ་ཚོགས་དང་། བྱང་ཆུབ་སེམས་དཔའི་སྨོན་ལམ་རྒྱ་མཚོའི་ཚུལ་གྱི་ལམ་སྣ་ཚོགས་དང་། བྱང་ཆུབ་སེམས་དཔའི་སྤྱོད་པ་མངོན་པར་བསྒྲུབ་པ་
སྣ་ཚོགས་དང་། བྱང་ཆུབ་སེམས་དཔའི་རྣམ་པར་ཐར་པ་འབྱམ་ཀླས་པ་སྣ་ཚོགས་ཀྱིས་ཐོབ་པར་གྱུར་ཀྱང་། བྱང་ཆུབ་སེམས་དཔའི་རྣམ་པར་ཐར་པ་ཀུན་ཏུ་བཟང་པོའི་ཚུལ་ནི་ཁོང་དུ་མ་ཆུད་དོ། །
དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ཀུན་ཏུ་བཟང་པོ་རྣམས་ཀྱི་རྣམ་པར་ཐར་པའི་ཚུལ་ནི་ནམ་མཁའི་དབྱིངས་ཀྱིས་ཀླས་པར་ཚད་མྱེད་དོ། །སེམས་ཅན་གྱི་མིང་དུ་བྱ་བ་ཐམས་ཅད་ཀྱི་དབྱིངས་ལྟར་
ཚད་མྱེད་དོ། །དུས་གསུམ་གྱི་རྒྱུད་རྒྱ་མཚོའི་དབྱིངས་ལྟར་ཚད་མེད་དོ། །ཕྱོགས་རྒྱ་མཚོའི་དབྱིངས་ལྟར་ཚད་མེད་དོ། །ཆོས་ཀྱི་དབྱིངས་ཀྱི་ཚུལ་རྒྱ་མཚོའི་དབྱིངས་ལྟར་ཚད་མེད་དོ། །རིགས་ཀྱི་བུ་བྱང་ཆུབ་སེམས་དཔའ་
ཀུན་ཏུ་བཟང་པོ་རྣམས་ཀྱི་རྣམ་པར་ཐར་པའི་ཚུལ་གྱིས་ལུས་ནི་དེ་བཞིན་གཤེགས་པའི་ཡུལ་དང་མཉམ་པའོ། །དེ་ལྟར་རིགས་ཀྱི་བུ་ཁོ་མོས་བསྐལ་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་གཅིག་ཏུ་བྱང་ཆུབ་
སེམས་དཔའི་སྐུ་ལ་ལྟ་ལྟ་ཡང་བལྟ་བས་མ་ངོམས་ཏེ། རིགས་ཀྱི་བུ་འདི་ལྟ་སྟེ་དཔེར་ན། གཅིག་ཏུ་འདོད་ཆགས་ལ་སྤྱོད་པའི་སྐྱེས་པ་དང་བུད་མེད་ཕན་ཚུན་ནས་ཕྲད་པར་དུས་བྱས་པ་གཉིས་ལ་ནི་སེམས་ཀྱི་རྒྱུད་ཚུལ་བཞིན་ན་

77-1-163a

མ་ཡིན་པ་ཡིད་ལ་བྱེད་པ་ལས་བྱུང་བ་གཅུགས་པའི་འདུ་ཤེས་དང་། རྣམ་པར་རྟོག་པས་མྱོས་པ་ལས་བྱུང་བ་ཚད་མྱེད་པ་ཞིག་སྐྱེའོ། །རིགས་ཀྱི་བུ་དེ་བཞིན་དུ་ཁོ་མོས་བྱང་ཆུབ་སེམས་དཔའི་སྐུ་ལ་ལྟ་ན་བ་སྤུའི་
སྒོ་རེ་རེ་ནས་ཀྱང་འཇིག་རྟེན་གྱི་ཁམས་ཀྱི་རྒྱུད་འབྱམ་ཀླས་པ་མཐའ་དང་དབུས་མེད་པར་ཤིན་ཏུ་བསྟན་པ་གཞི་སྣ་ཚོགས་དང་ལྡན་པ་མཚམས་ཀྱི་རྒྱན་སྣ་ཚོགས་དང་ལྡན་པ་དབྱིབས་སྣ་ཚོགས་དང་ལྡན་པ་རིའི་རྒྱལ་པོ་སྣ་ཚོགས་ཀྱིས་
བརྒྱན་པ་སའི་གཞིའི་རྒྱན་སྣ་ཚོགས་བསྟན་དུ་ཡོད་པ་སྤྲིན་སྣ་ཚོགས་དང་ལྡན་པའི་ནམ་མཁའ་ཀུན་ནས་ཁྱབ་པའི་རྒྱན་དང་ལྡན་པ། ཚུལ་དང་མྱིང་དང་གྲངས་སྣ་ཚོགས་སུ་བརྗོད་པ་སངས་རྒྱས་འབྱུང་བ་དང་དེ་བཞིན་གཤེགས་
པའི་རྒྱུད་སྣ་ཚོགས་འབྱུང་བ་སྙིང་པོ་བྱང་ཆུབ་ཀྱི་རྒྱན་སྣ་ཚོགས་ཀྱིས་བརྒྱན་པ། དེ་བཞིན་གཤེགས་པའི་ཆོས་ཀྱི་འཁོར་ལོ་བསྐོར་བའི་རྣམ་པར་འཕྲུལ་པ་སྣ་ཚོགས་དང་ལྡན་པ་དེ་བཞིན་གཤེགས་པའི་འཁོར་གྱི་
དཀྱིལ་འཁོར་གྱི་རྒྱན་སྣ་ཚོགས་དང་ལྡན་པ། མདོ་སྡེའི་ཚུལ་སྣ་ཚོགས་ཤིན་ཏུ་བསྟན་པའི་སྒྲ་འབྱུང་བ། ཐེག་པའི་ཚུལ་སྣ་ཚོགས་མངོན་པར་བསྒྲུབ་པ་འབྱུང་བ་དང་ལྡན་པ། ཡོངས་སུ་དག་པའི་འོད་དང་སྣང་བ་སྣ་
ཚོགས་ཀྱི་རབ་ཏུ་སྣང་བ་མཚན་མ་སྔན་ཅད་མ་མཐོང་བ་དག་སེམས་ཀྱི་སྐད་ཅིག་རེ་རེ་ཞིང་མྱིག་ལམ་དུ་སྣང་ངོ་། །བ་སྤུའི་སྒོ་རེ་རེ་ནས་ཀྱང་སངས་རྒྱས་རྒྱ་མཚོ་མཐའ་དང་དབུས་མེད་པ་སྙིང་པོ་བྱང་ཆུབ་ཀྱི་རྒྱན་སྣ་
ཚོགས་མངའ་བ་ཆོས་ཀྱི་འཁོར་ལོ་བསྐོར་བའི་རྣམ་པར་འཕྲུལ་པ་སྣ་ཚོགས་དང་ལྡན་པ་མདོ་སྡེའི་ཚུལ་སྣ་ཚོགས་སྒྲོག་པའི་རྣམ་པར་འཕྲུལ་བ་དང་ལྡན་པ་དག་ཀྱང་རྒྱུན་མི་འཆད་པའི་ཚུལ་དུ་སེམས་ཀྱི་
སྐད་ཅིག་རེ་རེ་ལ་མྱིག་ལམ་དུ་སྣང་ངོ་། །བ་སྤུའི་སྒོ་རེ་རེ་ནས་ཀྱང་སེམས་ཅན་རྒྱ་མཚོ་མཐའ་དང་དབུས་མེད་པ་ཁྱིམ་དང་ཀུན་དགའི་ར་བ་དང་རི་དང་གཞལ་མེད་ཁང་དང་ཆུ་ཀླུང་དང་རྒྱ་མཚོ་ལ་གནས་པ་

77-1-163b

གཟུགས་དང་ལུས་སྣ་ཚོགས་ཅན་ལོངས་སྤྱོད་ཀྱི་ཡུལ་སྣ་ཚོགས་དང་ལྡན་པ་སྤྱོད་པ་དང་སྤྱོད་ཡུལ་དང་སྦྱོར་བ་སྣ་ཚོགས་དང་ལྡན་པ། དབང་པོ་སྣ་ཚོགས་སུ་འགྲུབ་པའི་ཚུལ་དང་ལྡན་པ་དག་ཀྱང་སེམས་ཀྱི་སྐད་ཅིག་རེ་རེ་ལ་
མྱིག་ལམ་དུ་སྣང་ངོ་། །བ་སྤུའི་སྒོ་རེ་རེ་ནས་ཀྱང་དུས་གསུམ་རྒྱ་མཚོ་ལ་འཇུག་པའི་ཚུལ་མཐའ་དང་དབུས་མེད་པ་ཞིག་རྨི་ལམ་དུ་སྣང་ངོ་། །བྱང་ཆུབ་སེམས་དཔའི་སྨོན་ལམ་རྒྱ་མཚོ་མཐའ་དང་དབུས་མེད་པ་ཞིག་ནི་རྣམ་པར་
དག་པར་འགྱུར་རོ། །བྱང་ཆུབ་སེམས་དཔའི་སའི་སྤྱོད་པ་རྣམ་པ་ཐ་དད་པ་རྒྱ་མཚོ་མཐའ་དང་དབུས་མེད་པ་དག་ཀྱང་ཡོངས་སུ་སྣང་ངོ་། །བྱང་ཆུབ་སེམས་དཔའི་ཕ་རོལ་ཏུ་ཕྱིན་པའི་ཚུལ་རྒྱ་མཚོ་ཡོངས་སུ་དག་པ་མཐའ་དང་
དབུས་མེད་པ་དག་ཀྱང་ཡོངས་སུ་སྣང་ངོ་། །བྱང་ཆུབ་སེམས་དཔའི་སྔོན་གྱི་སྦྱོར་བ་རྒྱ་མཚོ་མཐའ་དང་དབུས་མེད་པ་དག་ཀྱང་ཡོངས་སུ་སྣང་ངོ་། །སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་ཚུལ་རྒྱ་མཚོ་མཐའ་དང་དབུས་
མེད་པ་དག་ཡོངས་སུ་སྣང་ངོ་། །བྱང་ཆུབ་སེམས་དཔའི་བྱམས་པ་ཆེན་པོའི་ཚུལ་རྒྱ་མཚོ་མཐའ་དང་དབུས་མེད་པ་དག་ཀྱང་ཡོངས་སུ་སྣང་ངོ་། །སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་གདུལ་བའི་མཐུ་དང་ཐབས་རྒྱ་
མཚོ་དག་ལ་འང་འཇུག་ཅིང་ཁོང་དུ་ཆུད་དོ། །བྱང་ཆུབ་སེམས་དཔའི་སྙིང་རྗེ་ཆེན་པོའི་སྤྲིན་གྱི་ཚུལ་རྒྱ་མཚོ་མཐའ་དང་དབུས་མེད་པ་དག་ཀྱང་ཡོངས་སུ་འགྲུབ་བོ། །བྱང་ཆུབ་སེམས་དཔའི་དགའ་བའི་ཤུགས་ཆེན་པོ་རྒྱ་མཚོ་
མཐའ་དང་དབུས་མེད་པ་དག་ཀྱང་རྣམ་པར་འཕེལ་ཏེ། སེམས་ཀྱི་སྐད་ཅིག་རེ་རེ་ལ་ཡང་སེམས་ཅན་ཐམས་ཅད་ཡོངས་སུ་བསྡུ་བའི་ཚུལ་རྒྱ་མཚོ་མཐའ་དང་དབུས་མེད་པ་དག་ཀྱང་རབ་ཏུ་འགྲུབ་པོ་རིགས་
ཀྱི་བུ་དེ་ལྟར་ཁོ་མོ་བསྐལ་པ་སངས་རྒྱས་ཀྱི་ཞིང་བརྒྱའི་རྡུལ་ཤིན་ཏུ་ཕྲ་བ་སྙེད་དག་ཏུ་བྱང་ཆུབ་སེམས་དཔའི་བ་སྤུའི་སྒོ་རེ་རེ་ཞིང་སེམས་ཀྱི་སྐད་ཅིག་རེ་རེ་ལ་ཆོས་ཀྱི་ཚུལ་རྒྱ་མཚོ་མཐའ་དང་དབུས་མེད་པ་

77-1-164a

ལ་ཞུགས་སྟེ། ཁོང་དུ་ཆུད་པར་བྱས་ཀྱང་མཐར་ཐུག་པར་མ་གྱུར་ཏེ་སྔོན་ཁོང་དུ་ཆུད་པ་ལ་བསླབས་ཏེ། ཁོང་དུ་ཆུད་པར་བྱས་པའང་མེད་དོ་སྔོན་ཐོས་པ་ལ་བསློབས་ཏེ། ཐོས་པར་བྱ་བའང་མེད་དོ། །རིགས་
ཀྱི་བུ་དེ་ལྟར་ཐམས་ཅད་གྲུབ་པོ་བཙུན་མོའི་འཁོར་གྱི་ནང་ན་བཞུགས་ཤིང་བུད་མེད་ཀྱི་ཚོགས་ཀྱིས་ཡོངས་སུ་བསྐོར་བར་བཞུགས་པའི་ཚེ་འང་ཁོ་མོ་ནི་བ་སྤུའི་སྒོ་རེ་རེ་ནས་ཀྱང་དུས་གསུམ་གྱི་ཚུལ་རྒྱ་མཚོ་མཐའ་དང་
དབུས་མེད་པ་ལ་ཆོས་ཀྱི་དབྱིངས་ལ་འཇུག་པའི་ཚུལ་རྒྱ་མཚོ་ཁོང་དུ་ཆུད་པར་བྱ་བས་ཡོངས་སུ་འཇུག་གོ། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་
རྒྱ་མཚོ་ཐམས་ཅད་ལ་རྣམ་པར་བལྟ་བའི་ཡུལ་འདི་ཤེས་ཏེ། མཉམ་པར་གཞོག་པར་ཟད་ན་ཁོ་མོས་བྱང་ཆུབ་སེམས་དཔའ་ཐབས་ཀྱི་ཚུལ་རྒྱ་མཚོ་མཐའ་དང་དབུས་མེད་པ་ལ་ཞུགས་པ་སེམས་ཅན་ཐམས་ཅད་
དང་མཉམ་ཞིང་འདྲ་བའི་དབྱིངས་སུ་གནས་པའི་ལུས་རྣམ་པར་དམིགས་པ་ཡོངས་སུ་སྟོན་པ་འགྲོ་བ་ཐམས་ཅད་ཀྱི་བསམ་པ་དང་འཐུན་པར་སྤྱོད་པ་ཡོངས་སུ་སྟོན་པ་བ་སྤུའི་སྒོ་ཐམས་ཅད་ནས་ཁ་དོག་མཐའ་ཡས་
པའི་སྤྲུལ་པ་རབ་ཏུ་འགྱེད་པ་ལུས་མེད་པའི་ཆོས་ཉིད་ཀྱི་ངོ་བོ་ཉིད་ཀྱི་རང་བཞིན་ཤིན་ཏུ་རྣམ་པར་དག་པ་ནམ་མཁའི་མཚན་ཉིད་དུ་འགྲོ་བའི་རང་བཞིན་ཁོང་དུ་ཆུད་པས་རྣམ་པར་རྟོག་པ་མེད་པ་ཐམས་ཅད་དུ་རྗེསུ་
སོང་བའི་བློ་རྣམ་པར་གདོན་མི་ཟ་བས་དེ་བཞིན་གཤེགས་པ་དང་མཉམ་པ་རྣམ་པར་འཕྲུལ་པ་ལ་བརྩོན་པ་རྣམ་པར་ཐར་པའི་ཡུལ་མཐའ་དང་དབུས་མེད་པས་རྣམ་པར་འཕྲུལ་པ་ལ་ཞུགས་པ་ཆོས་ཀྱི་
དབྱིངས་ཤིན་ཏུ་རྒྱ་ཆེན་པོར་སེམས་བསྐྱེད་པས་འཇུག་པ་ལ་རྣམ་པར་སྤྱོད་ཅིང་དབང་བསྒྱུར་བ་ཆོས་གྱི་གནས་སྒོ་ཐམས་ཅད་དང་ལྡན་པའི་རྣམ་པར་ཐར་པ་རྒྱ་མཚོ་ལ་རྣམ་པར་བརྩེ་བ་དེ་དག་གི་སྤྱོད་པ་ཤེས་པ་

77-1-164b

འམ་ཡོན་ཏན་གྱི་གཏེར་མ་ལུས་པར་བསྟན་པར་ནུས་རེ་སྐན། །སོང་རིགས་ཀྱི་བུ་བཅོམ་ལྡན་འདས་རྣམ་པར་སྣང་མཛད་ཀྱི་ཞབས་ཀྱི་དྲུང་འདི་ཉིད་ན་ཁྲི་རིན་པོ་ཆེ་སྣ་ཚོགས་ཀྱི་རྒྱན་དང་ལྡན་པ་ནོར་བུ་རིན་པོ་ཆེའི་
རྒྱལ་པོའི་པད་མོའི་སྙིང་པོ་ཅན་ལ་བྱང་ཆུབ་སེམས་དཔའི་ཡུམ་ལྷ་མོ་སྒྱུ་མ་ཞེས་བྱ་བ་འདུག་གིས་དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔའི་སྤྱད་པ་ལ་སྤྱོད་པའི་བྱང་ཆུབ་སེམས་དཔའ་རྣམས་འཇིག་རྟེན་གྱི་
ཆོས་ཀྱི་དྲི་མ་ཐམས་ཅད་གྱི་མི་གོས་པ་ཡིན་པ་དང་དེ་བཞིན་གཤེགས་པ་མཆོད་པའི་ནན་ཏན་ལ་རྒྱུན་མི་ཆད་པ་ཡིན་པ་དང་བྱང་ཆུབ་སེམས་དཔའི་ལས་ཀྱི་མཐའ་ཐམས་ཅད་ལས་ཕྱིར་མི་ལྡོག་པ་ཡིན་པ་དང་བྱང་ཆུབ་
སེམས་དཔའི་རྣམ་པར་ཐར་པ་ལ་འཇུག་པ་ལ་སྒྲིབ་པ་ཐམས་ཅད་དང་བྲལ་བར་འགྱུར་བ་ཡིན་པ་དང་བྱང་ཆུབ་སེམས་དཔའི་རྣམ་པར་སྤྱོད་པ་ཐམས་ཅད་ལ་གཞན་གྱི་དྲིང་མི་འཇོག་པ་ཡིན་པ་དང་དེ་བཞིན་གཤེགས་པ་ཐམས་ཅད་
དང་མངོན་དུ་གྱུར་པར་གནས་པ་ཡིན་པ་དང་སེམས་ཅན་ཐམས་ཅད་ཡོངས་སུ་བསྡུ་བའི་ནན་ཏན་ལས་ཕྱིར་མི་ལྡོག་པ་ཡིན་པ་དང་ཕྱི་མའི་མཐའི་མུར་ཐུག་པའི་བསྐལ་པར་བྱང་ཆུབ་སེམས་དཔའི་སྤྱོད་པ་ཐམས་ཅད་ལ་གནས་
པར་བྱ་བ་ལས་ཕྱིར་མི་ལྡོག་པ་ཡིན་པ་དང་ཐེག་པ་ཆེན་པོའི་སྨོན་ལམ་ལས་ཕྱིར་མི་ཟློགས་པ་ཡིན་པ་དང་འགྲོ་བ་ཐམས་ཅད་ཀྱི་དགེ་བའི་རྩ་བ་ཡོངས་སུ་གཟུང་བ་དང་རྣམ་པར་སྤེལ་བ་ལ་སྒྱིད་ལུག་པར་མི་འགྱུར་
བ་ཡིན་པ་དྲིས་ཤིག །དེ་ནས་ཤཱཀྱའི་བུ་མོ་གོ་བས་རྣམ་པར་ཐར་པའི་སྒོའི་ཚུལ་འདི་ཉིད་ཡོངས་སུ་བསྟན་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཡང་དག་བྱང་ཆུབ་སྤྱོད་ལ་བརྩོན་པ་ཡི། །
སེམས་ཅན་དམ་པ་སེམས་ཅན་སུ་མཐོང་བ། །མོས་པའི་སེམས་སམ་ཁོང་ཁྲོ་ལྡན་ཡང་རུང་། །དེ་ཡི་བསྡུ་བས་ཀུན་ཀྱང་ཡོངས་སུ་འདུ། །ཞིང་རྒྱའི་རྡུལ་ཕྲན་རབ་ཏུ་ཕྲ་སྙེད་ཀྱི། །བསྐལ་པ་མང་པོ་ཁོ་མོས་འདི་ནས་དྲན། །འཇིག་རྟེན་ཁམས་རབ་རི་

77-1-165a

བོའི་འོད་བྱུང་ངོ་། །དེ་ལ་ཐུབ་པ་སྟོང་ཕྲག་བགྲངས་པ་ནི། །བྱེ་བ་ཁྲག་ཁྲིག་སུམ་ཅུ་དྲུག་བྱུང་སྟེ། །དེ་ཀུན་ཐ་མར་ཐུབ་དབང་བྱུང་བ་ནི། །འགྲོ་བའི་སྒྲོན་མ་ཆོས་ཀྱི་རྒྱ་མཚན་ནོ། །དེ་ཚེ་རྒྱལ་པོ་
དཔལ་གྱི་གཟི་བརྗིད་བྱུང་། །ཐུབ་དབང་དེ་ནི་མྱ་ངན་ཡོངས་འདས་ནས། །དགྲ་ཡི་འཁོར་བཅོམ་འཛམ་བུའི་རྒྱལ་མཚན་འདིར། །བཀའ་ལ་ཐོགས་མེད་མངའ་བདག་དམ་པར་གྱུར། །དེ་ལ་བུ་ནི་བརྒྱ་ཕྲག་ལྔ་
ཡོད་དེ། །ཀུན་ཀྱང་འབར་ཞིང་བརྟུལ་ཕོད་གཟུགས་དང་ལྡན། །ཡན་ལག་ཀུན་རྫོགས་རྣམ་པར་དག་པའི་ལུས། །གོང་ན་མེད་པའི་དཔལ་གྱིས་རབ་ཏུ་བརྒྱན། །རྒྱལ་པོ་སྲས་བཅས་བདེ་གཤེགས་འདུན་
པར་གྱུར། །རྒྱལ་བའི་མཆོད་པ་རྒྱ་ཆེན་རབ་ཀྱང་བྱས། །ད་ནི་རྟག་ཏུ་དམ་ཆོས་ཡོངས་བཟུང་བའི། །ཆོས་ལ་མངོན་བརྩོན་རབ་ཏུ་བརྟན་པར་གྱུར། །རྒྱལ་པོ་དེ་སྲས་འོད་གཟེར་བཟང་པོ་ནི། །སེམས་
ཅན་རྣམ་དག་གཞོན་ནུ་འཁྲུལ་གྱུར་པ། །ཤིན་ཏུ་བལྟ་མཛེས་ཡིད་འོང་གཟུགས་ལྡན་ཏེ། །ཡན་ལག་མཚན་རབ་སུམ་ཅུ་གཉིས་ཀྱིས་བརྒྱན། །རྒྱལ་སྲིད་ཡོངས་སུ་སྤངས་ནས་མི་ཡི་འཁོར། །བྱེ་བ་
ལྔས་བསྐོར་དེ་ཚེ་རབ་ཏུ་བྱུང་། །རབ་ཏུ་བྱུང་ནས་བརྩོན་འགྲུས་བརྟན་ལྡན་ཏེ། །རྒྱལ་བའི་ཆོས་ཀྱང་ཡོངས་སུ་གཟུང་བར་གྱུར། །ཕོ་བྲང་དམ་པ་སྡོང་པོ་ལྡན་པ་ནི། །གྲོང་མཆོག་བྱེ་བ་སྟོང་གིས་ཀུན་ནས་
བསྐོར། །ནགས་ཚལ་ཡལ་ག་སྣ་ཚོགས་དེར་བྱུང་བ། །རབ་ཏུ་སྒྲ་ཞི་བླ་ན་མེད་པའི་དཔལ། །དེ་ན་འོད་བཟང་བརྟུལ་ཞུགས་རབ་ལྡན་པ། །འཇིགས་མེད་ཤེས་རབ་སྤོབས་དང་ལྡན་པ་བཞུགས། །དེས་
ནི་སེམས་ཅན་ཉོན་མོངས་སྦྱངས་པའི་ཕྱིར། །རྒྱལ་བའི་ཆོས་ཀྱང་ཡོངས་སུ་བསྟན་པ་མཛད། །ཤེས་རབ་ལྡན་པ་དེ་ནི་བསོད་ནམས་ལ། །སྤྱོད་ལམ་མཛེས་ཤིང་ཆ་བྱད་ཞི་བ་དང་། །མི་

77-1-165b

གཡེང་སྤྱན་གྱིས་དགོངས་པ་མཁྱེན་བཞིན་དུ། །ཚུལ་ཟབ་བརྟན་པར་བརྟན་པས་གྲོང་དུ་བྱོན། །གྲོང་མཆོག་དགའ་བཞི་རྒྱལ་མཚན་ཞེས་བྱ་བར། །ཚོང་དཔོན་ལེགས་པ་སྙན་གྲགས་དེར་བྱུང་སྟེ། །ཁོ་
མོ་དེའི་བུ་མོ་ཡིད་འོང་གྱུར། །གཟུགས་མཛེས་ལྡན་ཏེ་ཉི་མའི་འོད་ཅེས་བྱ། །ཁྱིམ་གྱི་དམ་པ་དེ་ཡི་སྒོ་ནས་སུ། །འོད་གཟེར་བཟང་པོ་འཁོར་བཅས་ཁོ་མོས་མཐོང་། །ཡན་ལག་མཚན་བརྒྱན་ཤིན་ཏུ་མཛེས་པ་
སྟེ། །དེ་ལ་ཁོ་མོ་མོས་པ་མཆོག་གཅིག་སྐྱེས། །དེ་ནི་ཁོ་མོའི་ཁྱིམ་གྱི་སྒོར་བྱོན་ནས། །ནོར་བུ་དེ་ཡི་ལྷུང་བཟེད་ནང་དུ་གསོལ། །རྒྱན་རྣམས་ཀུན་ཀྱང་བཀྲོལ་ཏེ་མོས་སེམས་ཀྱིས། །ཤིན་ཏུ་འདུད་པར་དེ་
ལ་བདག་གིས་ཕུལ། །བདེ་གཤེགས་སྲས་པོ་འོད་གཟེར་བཟང་དཔལ་ལ། །འདོད་ཆགས་སེམས་ཀྱིས་མཆོད་པ་རྣམས་བསྒྲུབ་པས། །བསྐལ་པའི་དམ་པ་ཉིས་བརྒྱ་ལྔ་བཅུར་ཡང་། །ངན་སོང་གང་
དུའང་སོང་བར་མ་གྱུར་ཏོ། །ལྷ་ཡི་ཡུལ་དུ་ལྷ་རིགས་ལྡན་པར་སྐྱེས། །མི་ཡི་ཡུལ་དུ་རྒྱལ་པོའི་སྲས་མོར་གྱུར། །ཁ་དོག་མཐའ་ཡས་སྐུའི་མདོག་མངའ་བས། །ཀུན་ཏུ་ཁོ་མོ་མངོན་པར་ཞལ་ཡང་བསྟན། །
བསྐལ་པ་ཉིས་བརྒྱ་ལྔ་བཅུ་འདས་གྱུར་ནས། །སྨད་འཚོང་གཙོ་མོ་བལྟ་ན་སྡུག་པ་སྟེ། །མི་འཇིགས་བྱེད་པའི་བུ་མོར་སྐྱེས་པར་གྱུར། །དེ་ཚེ་ཤིན་ཏུ་སྦྱངས་ཤེས་བྱ་བ་ནི། །རྒྱལ་བུ་གཟི་བརྗིད་འོད་ཀྱི་བདག་མཐོང་
ནས། །ཁོ་མོས་དེ་ལ་དགའ་བས་མཆོད་པ་བྱས། །བདག་ཉིད་དེ་ལ་ཡོངས་སུ་དབུལ་བྱས་ནས། །ཁོ་མོ་དེ་ཡི་དབང་གྱུར་ཆུང་མར་གྱུར། །དྲང་སྲོང་ཆེན་པོའི་སྐུ་མཆོག་ཉི་མ་ལའང་། །བདག་ཅག་བསྡོམས་ཏེ་ལེགས་
པར་མཆོད་པ་བྱས། །མོས་པས་སངས་རྒྱས་དེའི་ཞལ་བལྟས་ནས། །བདག་གིས་བྱང་ཆུབ་མཆོག་ཏུ་སེམས་ཀྱང་བསྐྱེད། །བསྐལ་པ་བྱེ་བ་དྲུག་ཅུ་ཚང་བ་ཡང་། །བསྐལ་པ་དེ་ལ་ཁོ་མོས་རིམ་གྲོ་

77-1-166a

བྱས། །རྒྱལ་བ་དེ་དག་ཐ་མའི་དུས་ཀྱི་ཚེ། །སངས་རྒྱས་མོས་པའི་གཟི་བརྗིད་བྱུང་བར་གྱུར། །དེར་ནི་ཁོ་མོའི་ཆོས་མྱིག་རྣམ་པར་དག །ཆོས་ཀྱི་རང་བཞིན་བདག་གིས་ཁོང་དུ་ཆུད། །ཚུལ་
མྱིན་རྣམ་རྟོག་རབ་ཏུ་ཞི་བར་གྱུར། །དེ་ཚེ་ཚུན་ཆད་ཁོ་མོས་སྣང་བ་ཐོབ། །རྒྱལ་སྲས་རྣམས་ཀྱི་ཏིང་ངེ་འཛིན་གྱི་ཡང་། །དེ་ཕྱི་ཚུན་ཆད་རྣམ་པར་མཐོང་བར་གྱུར། །སེམས་ཀྱི་སྐད་ཅིག་གཅིག་གིས་རྒྱ་མཚོའི་
ཞིང་། །བསམ་ལས་རྣམ་འདས་ཕྱོགས་སུ་ཁོ་མོ་འཇུག །ཕྱོགས་རྣམས་ཀུན་གྱི་སྣ་ཚོགས་རྣམ་དག་པའི། །ཞིང་རྣམས་ཚད་མེད་རྨད་བྱུང་ཁོ་མོས་མཐོང་། །མཐོང་ཡང་དེ་དག་ལ་ནི་ཆགས་པ་མེད། །ཉོན་
མོངས་བཅས་ལ་འང་ཁོང་ཁྲོ་སྡང་བ་མེད། །ཞིང་རྣམས་དེ་དག་མ་ལུས་ཐམས་ཅད་ཀྱི། །སྙིང་པོ་བྱང་ཆུབ་སངས་རྒྱས་མ་ལུས་མཐོང་། །དེ་དག་འོད་ཀྱི་རྒྱ་མཚོ་ཚད་མེད་པའང་། །སེམས་ཀྱི་སྐད་ཅིག་གཅིག་
གིས་རྣམ་པར་བལྟ། །དེ་དག་འཁོར་ཀྱི་དཀྱིལ་འཁོར་རྒྱ་མཚོ་ཡང་། །སེམས་གཅིག་ཐོགས་པ་མེད་པས་ཁོང་དུ་ཆུད། །རྣམ་པར་ཐར་པ་ཚད་མེད་ཐམས་ཅད་དང་། །དེ་དག་ཏིང་འཛིན་མ་ལུས་དེ་བཞིན་ཤེས། །དེ་
དག་སྤྱོད་པ་ཡངས་པ་འང་ཁོང་དུ་ཆུད། །ས་ཚུལ་མ་ལུས་ཀུན་ཀྱང་ཁོ་མོས་ཤེས། །སྨོན་ལམ་གྲངས་མེད་རྒྱ་མཚོ་ཆེན་པོ་ཡང་། །སྐད་ཅིག་རེ་རེས་མཐའ་ཡས་ཁོང་དུ་ཆུད། །བསྐལ་པ་མཐའ་ཡས་སྤྱད་
པ་སྤྱོད་བྱེད་ཅིང་། །སྐྱེས་བུ་དམ་པའི་སྐུ་ལ་ལྟ་ལྟ་སྟེ། །དེ་ཡི་བ་སྤུ་རེ་རེའི་འཕྲུལ་པ་ཡང་། །ནམ་ཡང་མུར་ཕྱིན་བདག་གིས་མ་ནུས་སོ། །དེ་ཡི་བ་སྤུ་གཅིག་གི་རྩེ་ལ་ཡང་། །ཞིང་མང་རྒྱ་མཚོ་གྲངས་ལས་འདས་
པ་མཐོང་། །རླང་གི་ཕུང་པོ་ཆུ་བོ་ཆེན་པོ་དང་། །ས་ཡི་ལྷུན་རྣམས་མེ་ཡིས་ཡོངས་གང་མཐོང་། །གཞི་རྣམས་སྣ་ཚོགས་རྣམ་ཕྱེའི་གཟུགས་ལྡན་ཞིང་། །དབྱིབས་དང་ལུས་ཀྱི་རྣམ་པས་སྣ་ཚོགས་ཤིང་། །

77-1-166b

ལུས་དང་རྣམ་པ་མཐའ་ཡས་གཟུགས་ལྡན་པའི། །བརྗོད་ཡས་ཁམས་རྣམས་ཞིང་རྣམས་རྒྱ་མཚོ་དག །ཚད་མེད་རྣམས་སུ་ཐ་དད་གསལ་བར་མཐོང་། །ཆོས་ཀྱི་གསུང་གིས་འགྲོ་བ་གདུལ་དོན་དུ། །བརྩོན་
པའི་རྒྱལ་བ་དེ་ཉིད་བཞུགས་པ་མཐོང་། །བསྐལ་པར་སྤྱོད་པ་ཡངས་པ་སྤྱོད་པའི་ཚེ། །སྐུ་ཡི་ཕྲིན་ལས་ཁོ་མོས་དེ་མ་ཤེས། །གསུང་དང་ཐུགས་མིན་དེ་གཉིས་ཕྲིན་ལས་མིན། །རྫུ་འཕྲུལ་རྣམ་འཕྲུལ་ཐ་དད་
ཚུལ་མ་ཤེས། །དེ་ནས་ཚོང་དཔོན་གྱི་བུ་ནོར་བཟངས་གྱིས་ཤཱཀ་ཀྱའི་བུ་མོ་གོ་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ཤཱཀ་ཀྱའི་བུ་མོ་གོ་པ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། 
ཡང་དང་ཡང་བལྟས་ཏེ། ཤཱཀྱའི་བུ་མོ་གོ་པའི་དྲུང་ནས་སོང་ངོ་།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་པ། །དེ་ནས་ཚོང་དཔོན་གྱི་བུ་ནོར་བཟངས་ལྷ་མོ་སྒྱུ་མའི་གན་དུ་འགྲོ་བར་མངོན་ཏུ་ལངས་ནས། 
སངས་རྒྱས་ཀྱི་སྤྱོད་ཡུལ་གྱི་རྒྱུད་ཀྱི་ཡེ་ཤེས་ལ་ཞུགས་པ་དེས་འདི་སྙམ་དུ་བསམས་སོ། །བདག་གི་དགེ་བའི་བཤེས་གཉེན་འཇིག་རྟེན་ཐམས་ཅད་ལས་གྱེན་དུ་འཕགས་པའི་སྐྱེ་མཆེད་དྲུག་དང་ལྡན་པ། གནས་
མེད་པ་ལ་རབ་ཏུ་གནས་པ། ཆགས་པ་ཐམས་ཅད་ལས་ཡང་དག་པར་འདས་པའི་ལུས་དང་ལྡན་པ། ཆགས་པ་མེད་པར་འགྲོ་བའི་ལམ་དུ་ཞུགས་པ་ཆོས་ཀྱི་ལུས་ཤིན་ཏུ་རྣམ་པར་དག་པ། ལུས་ཀྱི་
ལས་སྒྱུ་མས་ལེགས་པར་སྤྲུལ་པའི་ལུས་དང་ལྡན་པ། ཡེ་ཤེས་སྒྱུ་མའི་རྣམ་པས་འཇིག་རྟེན་ན་རྣམ་པར་སོང་བ། སྨོན་ལམ་སྒྱུ་མའི་གཟུགས་དང་ལུས་སུ་ལྡན་པ། སངས་རྒྱས་ཀྱི་བྱིན་གྱི་རླབས་ཀྱི་
ཡིད་ཀྱི་རང་བཞིན་གྱི་ལུས་དང་ལྡན་པ། མ་སྐྱེས་མ་འགགས་པའི་ལུས་དང་ལྡན་པ། འོངས་པ་མེད་པའི་ལུས་དང་ལྡན་པ། བདེན་པ་མེད་པ་དང་། བརྫུན་པ་མེད་པའི་ལུས་དང་ལྡན་པ། མ་འཕོས་མ་ཞིག་

77-1-167a

པའི་ལུས་དང་ལྡན་པ། མ་བྱུང་མི་འཇིག་པའི་ལུས་དང་ལྡན་པ། མཚན་ཉིད་མེད་པར་མཚན་ཉིད་གཅིག་པའི་ལུས་དང་ལྡན་པ། གཉིས་ལ་ཆགས་པ་དང་བྲལ་བའི་ལུས་དང་ལྡན་པ། ཀུན་གཞི་
མེད་པ་ལ་གནས་པའི་ལུས་དང་ལྡན་པ། མི་ཟད་ཅིང་ཉམས་པ་མེད་པའི་ལུས་དང་ལྡན་པ། གཟུགས་བརྙན་ལྟར་རྣམ་པར་རྟོག་པ་མེད་པའི་ལུས་དང་ལྡན་པ། རྨི་ལམ་དང་མཉམ་པར་རྣམ་པར་རྒྱུ་བའི་ལུས་དང་ལྡན་
པ། མེ་ལོང་གི་དཀྱིལ་འཁོར་ལྟར་འཕོ་བ་མེད་པའི་ལུས་དང་ལྡན་པ་ཕྱོགས་མེད་པ་ལྟར་རབ་ཏུ་ཞི་བར་ཁོང་དུ་ཆུད་པའི་ལུས་དང་ལྡན་པ། ཕྱོགས་ཀུན་ཏུ་རྒྱས་པར་འགེངས་པའི་ལུས་དང་ལྡན་པ། དུས་གསུམ་
དུ་ཐ་མི་དད་པའི་ལུས་དང་ལྡན་པ། ལུས་མེད་པའི་སེམས་ཀྱི་ལུས་རྣམ་པར་མི་རྟོག་པའི་ལུས་དང་ལྡན་པ། འཇིག་རྟེན་ཐམས་ཅད་ཀྱི་མྱིག་གི་ལམ་ལས་ཡོངས་སུ་འདས་པའི་ལུས་དང་ལྡན་པ། ཀུན་ཏུ་བཟང་
པོའི་མྱིག་གི་རྒྱུད་ཀྱིས་རྣམ་པར་ཤེས་པར་བྱ་བས་འདུལ་བའི་ལུས་དང་ལྡན་པ། ཆགས་པ་མེད་པས། ནམ་མཁའི་སྤྱོད་ཡུལ་དང་ལྡན་པ་རྣམས་མཐོང་བར་བྱ་བ་འམ། བསྙེན་བཀུར་བར་བྱ་བ་འམ། མངོན་
གསུམ་དུ་ཕྲད་པར་བྱ་བ་འམ་འགྲོགས་པར་བྱ་བ་འམ། མཚན་མ་གཟུང་བར་བྱ་བ་འམ། དབྱངས་ཀྱི་དཀྱིལ་འཁོར་རྣམ་པར་རིག་པར་ཤེས་པར་བྱ་བ་འམ། ཚིག་གི་རྒྱུད་ཡོངས་སུ་ཤེས་པར་བྱ་བ་འམ། 
གདམས་ངག་ཡོངས་སུ་གཟུང་བར་བྱ་བར་ཐབས་ཇི་ལྟ་བུ་ཞིག་ཏུ་ནུས་པར་འགྱུར་སྙམ་ནས། དེ་ལྟར་སེམས་ཤིང་ཡིད་ལ་བྱེད་པ་ལ་བརྩོན་པར་གནས་པའི་ཚེ། གྲོང་ཁྱེར་གྱི་ལྷ་མོ་རིན་ཅེན་མྱིག་ཅེས་བྱ་བ་ནམ་
མཁའི་ལྷ་མོའི་ཚོགས་ཀྱིས་ཡོངས་སུ་བསྐོར་བ་ཞིག་གིས། བདག་གི་ལུས་རྒྱན་སྣ་ཚོགས་ཀྱིས་ཡོངས་སུ་བརྒྱན་པ། བདག་གི་ལུས་རྒྱན་གྱིས་རྣམ་པར་ཀླུབས་པར་ནམ་མཁའ་ལ་འདུག་པར་

77-1-167b

ཉེ་བར་བསྟན་ནས། ལྷ་རྫས་ཀྱི་མེ་ཏོག་རྣམ་པ་དང་། ཁ་དོག་དུ་མ་ཅན་སྙིམ་པ་ནས་མངོན་པར་གཏོར་ཏེ། ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་འཁོར་བའི་ཡུལ་
ལ་དགའ་བར་མི་གནས་པས་སེམས་ཀྱི་གྲོང་ཁྱེར་ཡོངས་སུ་བསྲུང་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པའི་སྟོབས་བཅུ་ལ་དམིགས་པས་སེམས་ཀྱི་གྲོང་ཁྱེར་བརྒྱན་པ་ལ་
བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་ཕྲག་དོག་དང་། སེར་སྣ་དང་གཡོ་དང་བྲལ་བས་སེམས་ཀྱི་གྲོང་ཁྱེར་ཡོངས་སུ་སྦྱང་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་ཆོས་ཐམས་ཅད་
ཀྱི་རང་བཞིན་ངེས་པར་རྟོགས་པར་བྱ་བས་སེམས་ཀྱི་གྲོང་ཁྱེར་གྱིས་ཡོངས་སུ་གདུང་བ་རབ་ཏུ་ཞི་བར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་ཐམས་ཅད་མཁྱེན་པ་ཉིད་ཀྱི་ཚོགས་ལ་བརྩོན་
འགྲུས་ཆེན་པོའི་ཤུགས་རྣམ་པར་སྤེལ་བས་སེམས་ཀྱི་གྲོང་ཁྱེར་རྣམ་པར་སྤེལ་བ་ལ་བརྩོན་པར་གྱི་ཤིག །རིགས་ཀྱི་བུ་ཁྱོད་ཀྱིས་ཏིང་ངེ་འཛིན་དང་། སྙོམས་པར་འཇུག་པ་དང་། བསམ་གཏན་དང་། 
རྣམ་པར་ཐར་པ་དང་། ཆོས་ཀྱི་གཞལ་མེད་ཁང་ཡངས་པའི་རྣམ་པར་སྤྱོད་པ་ལ་དབང་བསྒྱུར་བས་སེམས་ཀྱི་གྲོང་ཁྱེར་དང་། གནས་ཀྱི་མཛོད་བརྒྱན་པ་དང་། སྲུང་བ་ལ་བརྩོན་པར་གྱི་ཤིག །རིགས་
ཀྱི་བུ་ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་ཡང་དག་པར་བསྒྲུབ་པའི་ས་ཐམས་ཅད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་རབ་ཏུ་ཐོབ་པར་འཚལ་བ་སེམས་ཀྱི་གྲོང་ཁྱེར་སྣང་བར་
བྱ་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པ་ཐམས་ཅད་ཡང་དག་པར་བྱུང་བའི་ཐབས་ཀྱི་ལམ་གྱིས་རང་གི་སེམས་ཀྱི་གྲོང་ཁྱེར་དུ་གཞོལ་བར་བྱ་བས་སེམས་ཀྱི་

77-1-168a

གྲོང་ཁྱེར་ཉེ་བར་བརྟན་པ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨོན་ལམ་མངོན་པར་བསྒྲུབ་པའི་སེམས་རྣམ་པར་དག་པས་
སེམས་ཀྱི་གྲོང་ཁྱེར་གྱི་ར་བ་བརྟན་པ་མངོན་པར་བསྒྲུབ་པར་གྱིས་ཤིག །རིགས་ཀྱི་བུ་ཁྱོད་ཀྱིས་ཉོན་མོངས་པ་དང་། བདུད་ཀྱི་རིས་ཀྱི་སྡིག་ཏོའི་གྲོགས་པོ་དང་། བདུད་ཀྱི་འཁོར་ཀྱིས་མི་ཆོམས་པར་བྱ་བས་སེམས་
ཀྱི་གྲོང་ཁྱེར་བརྒལ་དཀའ་བ་དང་། ཤིགས་པར་དཀའ་བ་མངོན་པར་བསྒྲུབ་པ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་སེམས་ཅན་ཐམས་ཅད་དེ་བཞིན་གཤེགས་པའི་ཡེ་ཤེས་སྣང་བས་ཁོང་དུ་ཆུད་པར་བྱ་བའི་
ཕྱིར་སེམས་ཀྱི་གྲོང་ཁྱེར་སྣང་བར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྤྲིན་གྱི་ཆར་ཡོངས་སུ་གཟུང་བར་སེམས་ཀྱི་གྲོང་ཁྱེར་མངོན་པར་བརླན་པ་ལ་བརྩོན་
པར་གྱིས་ཤིག །རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་བསོད་ནམས་རྒྱ་མཚོ་རང་གི་སེམས་ཀྱིས་ཡང་དག་པར་བླང་བས་སེམས་ཀྱི་གྲོང་ཁྱེར་བརྟན་པ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་
ཀྱིས་བྱམས་པ་ཆེན་པོས་འགྲོ་བ་ཐམས་ཅད་རྒྱས་པར་གང་བས་སེམས་ཀྱི་གྲོང་ཁྱེར་རབ་ཏུ་རྒྱས་པར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་མི་དགེ་བའི་ཆོས་ཀྱི་གདུགས་ཡངས་པ་བསྒྲུབ་པས་
སེམས་ཀྱི་གྲོང་ཁྱེར་ཡོངས་སུ་དག་པ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་སྙིང་རྗེ་ཆེན་པོ་ཤིན་ཏུ་ཡངས་པས་འགྲོ་བ་ཐམས་ཅད་ཀྱི་དོན་དུ་སེམས་གཡོ་བར་བྱ་བས་སེམས་ཀྱི་གྲོང་ཁྱེར་གྱི་རབ་བརྒྱན་པ་ལ་
བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་ཕྱི་ནང་གི་དངོས་པོ་འགྲོ་བ་ཐམས་ཅད་ལ་ཡོངས་སུ་བསྟབས་པའི་ཕྱིར་སེམས་ཀྱི་གྲོང་ཁྱེར་གྱི་སྒོ་དབྱེ་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་འཁོར་

77-1-168b

བའི་ཡུལ་ཐམས་ཅད་ལ་དགའ་བ་ལ་ཕྱིར་ཕྱོགས་སུ་བལྟ་བས་སེམས་ཀྱི་གྲོང་ཁྱེར་རྣམ་པར་དག་པར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་མི་དགེ་བའི་ཆོས་ཀྱི་རྒྱུད་ཐམས་ཅད་མི་སྲིད་པར་བྱ་བས་སེམས་ཀྱི་གྲོང་
ཁྱེར་གྱི་སྲོག་རབ་ཏུ་མཁྲང་བ་མངོན་པར་བསྒྲུབ་པ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་ཐམས་ཅད་མཁྱེན་པ་ཉིད་ཀྱི་ཚོགས་ཡང་དག་པར་བསྒྲུབ་པའི་བརྩོན་འགྲུས་ལས་ཕྱིར་མི་ལྡོག་པར་བྱ་བས་སེམས་ཀྱི་གྲོང་
ཁྱེར་བརྟན་པར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་དུས་གསུམ་གྱི་དེ་བཞིན་གཤེགས་པའི་དཀྱིལ་འཁོར་ཐམས་ཅད་དྲན་པ་ཤིན་ཏུ་སྣང་བར་བྱ་བས་སེམས་ཀྱི་གྲོང་ཁྱེར་རབ་ཏུ་གསལ་བར་བྱ་བ་ལ་བརྩོན་པར་གྱིས་ཤིག །རིགས་
ཀྱི་བུ་ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་མདོ་སྡེ་སྣ་ཚོགས་ཀྱི་ཆོས་ཀྱི་སྒོ་རབ་ཏུ་དབྱེ་བའི་ཡེ་ཤེས་ལ་མངོན་པར་མཁས་པར་བྱ་བས་སེམས་ཀྱི་གྲོང་ཁྱེར་རྣམ་པར་དབྱེ་བའི་ཚུལ་ལ་མཁས་པར་གྱིས་
ཤིག །རིགས་ཀྱི་བུ་ཁྱོད་ཀྱིས་འགྲོ་བ་ཐམས་ཅད་དང་མངོན་སུམ་དུ་གནས་པའི་ཐམས་ཅད་མཁྱེན་པའི་སྒོ་དང་། ལམ་གྱི་ཚུལ་ཡོངས་སུ་བསྟན་པའི་ཕྱིར་སེམས་ཀྱི་གྲོང་ཁྱེར་དམིགས་པར་བྱ་བ་ལ་བརྩོན་པར་གྱིས་ཤིག །
རིགས་ཀྱི་བུ་ཁྱོད་ཀྱིས་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྨོན་ལམ་དུ་མངོན་པར་བསྒྲུབ་པ་རྣམ་པར་དག་པར་བྱ་བའི་ཕྱིར། སེམས་ཀྱི་གྲོང་ཁྱེར་བྱིན་གྱིས་བརླབ་པའི་ཚུལ་ལ་མཁས་པར་གྱིས་ཤིག །
རིགས་ཀྱི་བུ་ཁྱོད་ཀྱིས་ཆོས་ཀྱི་དབྱིངས་ཐམས་ཅད་དུ་བསོད་ནམས་དང་ཡེ་ཤེས་ཀྱི་ཚོགས་རྒྱ་ཆེན་པོ་རྣམ་པར་སྤེལ་བས་སེམས་ཀྱི་གྲོང་ཁྱེར་གྱི་ཚོགས་ཀྱི་མཐུ་རྣམ་པར་འཕེལ་བར་བྱ་བའི་ཐབས་ལ་མཁས་པར་གྱིས་ཤིག །
རིགས་ཀྱི་བུ་ཁྱོད་ཀྱིས་སེམས་ཅན་ཐམས་ཅད་ཀྱི་སེམས་དང་བསམ་པ་དང་། དབང་པོ་དང་མོས་པ་དང་། ཀུན་ནས་ཉོན་མོངས་པ་དང་། རྣམ་པར་བྱང་བར་ཤེས་པར་བྱ་བས་སེམས་ཀྱི་གྲོང་ཁྱེར་ནས་འོད་ཀུན་ཏུ་དགྱེ་

77-1-169a

བའི་ཐབས་ལ་མཁས་པར་གྱིས་ཤིག །རིགས་ཀྱི་བུ་ཁྱོད་ཀྱིས་ཆོས་ཀྱི་དབྱིངས་ཀྱི་ཚུལ་ཐམས་ཅད་ཡང་དག་པར་བསྒྲུབ་པས་སེམས་ཀྱི་གྲོང་ཁྱེར་དུ་དབང་བསྒྱུར་བའི་ཚུལ་ལ་མཁས་པར་གྱིས་ཤིག །
རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པ་ཐམས་ཅད་དྲན་ཞིང་སྣང་བར་བྱ་བས་སེམས་ཀྱི་གྲོང་ཁྱེར་འོད་གསལ་བར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་ལུས་མེད་པའི་ཆོས་ཀྱི་ཚུལ་ཐམས་ཅད་ཁོང་དུ་
ཆུད་པར་བྱ་བས་སེམས་ཀྱི་གྲོང་ཁྱེར་གྱི་རང་བཞིན་ཡོངས་སུ་ཤེས་པར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་ཐམས་ཅད་མཁྱེན་པའི་ཆོས་ཀྱི་གྲོང་ཁྱེར་དུ་འགྲོ་བར་བྱ་བས་སེམས་ཀྱི་གྲོང་ཁྱེར་སྒྱུ་མ་
ལྟ་བུར་བརྟག་པ་ལ་བརྩོན་པར་གྱིས་ཤིག་དང་། རིགས་ཀྱི་བུ་དེ་ལྟར་སེམས་ཀྱི་གྲོང་ཁྱེར་ཡོངས་སུ་སྦྱང་བ་ལ་བརྩོན་པའི་བྱང་ཆུབ་སེམས་དཔས་དགེ་བའི་རྩ་བ་ཐམས་ཅད་ཡོངས་སུ་བསྒྲུབ་པ་ཐོབ་པར་ནུས་སོ། །དེ་ཅིའི་
ཕྱིར་ཞེ་ན། དེ་ལྟར་སེམས་ཀྱི་གྲོང་ཁྱེར་ཡོངས་སུ་དག་པའི་བྱང་ཆུབ་སེམས་དཔའ་དེའི་མདུན་ན་ནི་སངས་རྒྱས་མཐོང་བར་བྱ་བ་ལ་སྒྲིབ་པ་འམ། ཆོས་མཉན་པར་བྱ་བ་ལ་སྒྲིབ་པ་འམ། དེ་བཞིན་གཤེགས་པ་
མཆོད་ཅིང་རིམ་གྲོར་བྱ་བ་ལ་སྒྲིབ་པ་འམ། སེམས་ཅན་ཡོངས་སུ་བསྡུ་བའི་སྦྱོར་བ་ལ་སྒྲིབ་པ་དང་། སངས་རྒྱས་ཀྱི་ཞིང་ཡོངས་སུ་དག་པར་བྱ་བ་ལ་སྒྲིབ་པ་ཡང་རུང་སྟེ། སྒྲིབ་པ་ཐམས་ཅད་མི་གནས་སོ། །
རིགས་ཀྱི་བུ་སྒྲིབ་པ་ཐམས་ཅད་དང་བྲལ་བའི་སེམས་དང་། ལྷག་པའི་བསམ་པས་དགེ་བའི་བཤེས་གཉེན་ཡོངས་སུ་བརྩལ་བ་ལ་མངོན་པར་བརྩོན་པའི་བྱང་ཆུབ་སེམས་དཔས་ནི་ལས་གྲོན་ཆུ་ངུས་དགེ་བའི་
བཤེས་གཉེན་མཐོང་བར་འགྱུར་ཏེ། རིགས་ཀྱི་བུ་དགེ་བའི་བཤེས་གཉེན་ལ་རག་ལས་པ་ཡང་བྱང་ཆུབ་སེམས་དཔའ་རྣམས་ཀྱི་ཐམས་ཅད་མཁྱེན་པ་ཉིད་དོ། །དེ་ནས་ལུས་ཀྱི་རིས་སུ་གཏོགས་པའི་ལྷ་མོ་

77-1-169b

ཚོགས་ཀྱི་པད་མོ་དཔལ་གྱི་དཀྱིལ་འཁོར་ཅེས་བྱ་བ་དང་ངོ་ཚ་ཤེས་པའི་དཔལ་གྱི་དོག་པའི་འོད་ཅེས་བྱ་བ་གཉིས་ཤིག་ལྷ་མོའི་ཚོགས་ཚད་མེད་པས་ཡོངས་སུ་བསྐོར་ནས། ལྷ་མོ་སྒྱུ་མའི་ལེགས་པ་བརྗོད་ཅིང་སྙིང་པོ་བྱང་
ཆུབ་ནས་འཐོན་ཏེ། ཚོང་དཔོན་གྱི་བུ་ནོར་བཟངས་ཀྱི་མདུན་གྱི་ནམ་མཁའ་ལ་འཁོད་ནས། རང་རང་གི་རིན་པོ་ཆེའི་རྣ་ཆ་ལས་འོད་གཟེར་གྱི་དྲ་བ་རིན་པོ་ཆེའི་ཁ་དོག་དུ་འདུག་པ་དུ་མ་དང་། སྤོས་དང་། བདུག་པ་དྲི་མ་མེད་
པ་འོད་འཕྲོ་བའི་ཁ་དོག་དུ་འདུག་པ་དུ་མ་དང་། སེམས་དང་བསམ་པ་མོས་པར་བྱེད་པའི་ཁ་དོག་དང་། སེམས་ཀྱི་དགའ་བའི་ཤུགས་རྣམ་པར་འཕེལ་བར་བྱེད་པའི་ཁ་དོག་དང་། ལུས་ཀྱི་གདུང་བ་སེམས་པར་བྱེད་པའི་
ཁ་དོག་དང་། ལུས་རྣམ་པར་དག་པ་ཡོངས་སུ་སྟོན་པའི་ཁ་དོག་དང་། ལུས་ཀྱི་མཐུ་ཐོགས་པ་མེད་པར་འབྱུང་བའི་ཡུལ་དང་ལྡན་པའི་འོད་གཟེར་གྱི་དྲ་བ་མང་པོ་བཀྱེ་བས། ཞིང་རྒྱ་ཆེན་པོ་སྣང་བར་བྱས་ནས། 
ཚོང་དཔོན་གྱི་བུ་ནོར་བཟངས་ལ་དེ་བཞིན་གཤེགས་པ་ཐམས་ཅད་ཀྱི་སྐུ་ཐམས་ཅད་དུ་ཁྱབ་པ། ཐམས་ཅད་ལ་མངོན་དུ་གྱུར་པ་ཡོངས་སུ་བསྟན་ནས། འཇིག་རྟེན་ཐམས་ཅད་ལ་གཡས་ཕྱོགས་སུ་བསྐོར་བ་
བྱས་ཏེ། ཚོང་དཔོན་གྱི་བུ་ནོར་བཟངས་ཀྱི་སྤྱི་བོའི་གཙུག་དུ་ཤར་ནས། སྤྱི་བོའི་གཙུག་མན་ཆད་བ་སྤུའི་བུ་ག་ཐམས་ཅད་དུ་ཞུགས་ཏེ་ལུས་ཀུན་ཏུ་ཁྱབ་པར་གྱུར་ཏོ། །དེ་ལྟར་ལྷ་མོ་དེ་དག་གི་འོད་གཟེར་གྱིས། 
ཚོང་དཔོན་གྱི་བུ་ནོར་བཟངས་ལ་ཕོག་མ་ཐག་ཏུ་དེའི་མོད་ལ་མུན་པ་ཐམས་ཅད་དང་། མི་གནས་པའི་མྱིག་རྡུལ་དང་བྲལ་བའི་འོད་སྣང་བ་ཞེས་བྱ་བ་ཐོབ་པར་གྱུར་ཏོ། །སེམས་ཅན་གྱི་རང་བཞིན་ཁོང་དུ་
ཆུད་པར་བྱེད་པའི་མིག་རབ་རིབ་དང་བྲལ་བ་ཞེས་བྱ་བ་ཐོབ་པར་གྱུར་ཏོ། །ཆོས་ཐམས་ཅད་ཀྱི་རང་བཞིན་གྱི་དཀྱིལ་འཁོར་ལ་རྣམ་པར་ལྟ་བའི་མྱིག་རྡུལ་དང་བྲལ་བས་དབང་བསྒྱུར་བ་ཞེས་བྱ་བ་ཐོབ་པར་

77-1-170a

གྱུར་ཏོ། །ཞིང་ཐམས་ཅད་ལ་རྣམ་པར་བལྟ་བའི་མིག་རྣམ་པར་དག་པ་ལ་དབང་བསྒྱུར་བ་ཞེས་བྱ་བ་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྐུ་ལ་རྣམ་པར་ལྟ་བའི་
མིག་རྣམ་པར་སྣང་བ་ཞེས་བྱ་བ་ཐོབ་པར་གྱུར་ཏོ། །དེ་བཞིན་གཤེགས་པའི་གཟུགས་ཀྱི་སྐུ་ཡོངས་སུ་གྲུབ་པ་རྣམ་པར་ཕྱེ་བ་བསམ་གྱིས་མི་ཁྱབ་པ་ལ་རྣམ་པར་ལྟ་བའི་མིག་རྣམ་པར་དག་པའི་བློ་གྲོས་ཤེས་
བྱ་བ་ཐོབ་པར་གྱུར་ཏོ། །ཞིང་རྒྱ་མཚོ་འབྱམ་ཀླས་པ་ཐམས་ཅད་ཀྱི་འཇིག་རྟེན་གྱི་ཁམས་འབྱུང་བ་དང་། འཇིག་པ་རྣམ་པར་ཕྱེ་བ་ལ་རྣམ་པར་ལྟ་བའི་མིག་ཆགས་པ་མེད་པའི་འོད་ཅེས་བྱ་བ་ཐོབ་པར་གྱུར་ཏོ། །
དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་མདོ་སྡེའི་ཚུལ་མངོན་པར་བསྒྲུབ་པའི་ཕྱོགས་ལ་རྣམ་པར་བལྟ་བའི་མིག་ཀུན་ཏུ་སྣང་བ་ཞེས་བྱ་བ་ཐོབ་པར་གྱུར་ཏོ། །སངས་རྒྱས་ཀྱི་རྣམ་པར་འཕྲུལ་པ་
དང་། སེམས་ཅན་འདུལ་བའི་བྱིན་གྱི་རླབས་ལ་རྣམ་པར་ལྟ་བའི་མྱིག་ཀུན་ནས་ཡུལ་དུ་འགྱུར་བ་ཞེས་བྱ་བ་ཐོབ་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་དུ་བྱུང་བའི་སངས་རྒྱས་སྐྱེས་པ་ལ་རྣམ་པར་ལྟ་
བའི་མིག་ཀུན་ཏུ་བལྟ་བ་ཞེས་བྱ་བ་ཐོབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་ཡང་དག་པར་འགྲོ་བའི་ཁང་པའི་སྒོ་སྲུང་སྲིན་པོའི་དབང་པོ་སྲིན་པོ་སྟོང་ཕྲག་བཅུའི་གཙོ་བོ་མྱིག་བཟངས་ཤེས་བྱ་བ་ཆུང་
མར་བཅས་བུ་དང་བཅས། རང་གི་གཉེན་བཤེས་དང་འཁོར་དུ་བཅས་པས། ཚོང་དཔོན་གྱི་བུ་ནོར་བཟངས་ལ་མེ་ཏོག་ཁ་དོག་སྣ་ཚོགས་ཡིད་དུ་འོང་བས་མངོན་པར་གཏོར་ཏེ། འདི་སྐད་ཅེས་སྨྲས་སོ། །རིགས་
ཀྱི་བུ་ཆོས་བཅུ་དང་ལྡན་པའི་བྱང་ཆུབ་སེམས་དཔས་ནི་དགེ་བའི་བཤེས་གཉེན་ཐམས་ཅད་དང་ཉེ་བར་བསྙེན་པ་ཡིན་ཏེ། བཅུ་གང་ཞེ་ན་འདི་ལྟར་བསམ་པ་ཡོངས་སུ་དག་པ། གཡོ་དང་སྒྱུ་མེད་པ་དང་། 

77-1-170b

འགྲོ་བ་ཐམས་ཅད་ཡོངས་སུ་སྡུད་པ་ལ་ཐ་མི་དད་པའི་སྙིང་རྗེ་ཆེན་པོ་དང་། སེམས་ཅན་ཐམས་ཅད་ལ་སེམས་ཅན་མེད་པའི་རང་བཞིན་ངེས་པར་རྟོགས་པའི་རབ་ཏུ་རྟོག་པ་དང་། ལྷག་པའི་བསམ་པའི་སྟོབས་ཐམས་ཅད་མཁྱེན་པར་
འགྲོ་བ་ལས་ཕྱིར་མི་ལྡོག་པ་དང་། དེ་བཞིན་གཤེགས་པའི་དཀྱིལ་འཁོར་ལ་མངོན་པར་འདུན་པའི་མོས་པའི་སྟོབས་དང་། ཆོས་ཐམས་ཅད་ཀྱི་རང་བཞིན་དྲི་མ་མེད་པས་རྣམ་པར་དག་པའི་མྱིག་དང་། སེམས་ཅན་གྱི་དཀྱིལ་
འཁོར་ཐམས་ཅད་ལ་ཐ་མི་དད་པའི་བྱམས་པ་ཆེན་པོ་དང་། སྒྲིབ་པ་ཐམས་ཅད་རྣམ་པར་འཐོར་བའི་ཡེ་ཤེས་ཀྱི་སྣང་བ་དང་། འཁོར་བའི་སྡུག་བསྔལ་ཐམས་ཅད་ཀྱི་གཉེན་པོ་གདུགས་སུ་གྱུར་པའི་ཆོས་ཀྱི་སྤྲིན་ཆེན་པོ་དང་། ཆོས་
ཀྱི་དབྱིངས་ཀྱི་རྒྱུད་ཐམས་ཅད་ལ་རབ་ཏུ་ཞུགས་ཤིང་། དགེ་བའི་བཤེས་གཉེན་གྱི་རྗེས་སུ་འབྲང་བ་མངོན་དུ་གྱུར་པའི་ཡེ་ཤེས་ཀྱི་མྱིག་སྟེ། རིགས་ཀྱི་བུ་ཆོས་བཅུ་པོ་དེ་དག་དང་ལྡན་པའི་བྱང་ཆུབ་སེམས་དཔའ་ནི་དགེ་བའི་
བཤེས་གཉེན་ཐམས་ཅད་དང་ཉེ་བར་བསྙེན་པ་ཡིན་ནོ། །ཏིང་ངེ་འཛིན་ལ་ངེས་པར་གཞག་པའི་སྒོ་བཅུས་རྣམ་པར་ལྟ་བའི་བྱང་ཆུབ་སེམས་དཔའ་ནི་དགེ་བའི་བཤེས་གཉེན་ཐམས་ཅད་དང་མངོན་ཏུ་གྱུར་པ་ཐོབ་པ་ཡིན་ཏེ། 
བཅུ་གང་ཞེ་ན། ཏིང་ངེ་འཛིན་ལ་ངེས་པར་གཞག་པའི་སྒོ་ཆོས་ཐམས་ཅད་ནམ་མཁའ་ལྟར་རྡུལ་དང་བྲལ་བར་རྣམ་པར་དཔྱོད་པའི་དཀྱིལ་འཁོར་དང་། ཏིང་ངེ་འཛིན་ལ་ངེས་པར་གཞག་པའི་སྒོ་ཕྱོགས་རྒྱ་མཚོ་
ཐམས་ཅད་མངོན་དུ་གྱུར་པའི་མྱིག་དང་། ཏིང་ངེ་འཛིན་ལ་ངེས་པར་གཞག་པའི་སྒོ་དམྱིགས་པ་ཐམས་ཅད་ལ་རྣམ་པར་མི་རྟོག་རྣམ་པར་མི་དཔྱོད་པ་དང་། ཏིང་ངེ་འཛིན་ལ་ངེས་པར་གཞག་པའི་སྒོ་ཕྱོགས་ཐམས་ཅད་དུ་དེ་
བཞིན་གཤེགས་པའི་སྤྲིན་ཡོངས་སུ་འབྱུང་བ་དང་། ཏིང་ངེ་འཛིན་ལ་ངེས་པར་གཞག་པའི་སྒོ་ཐམས་ཅད་མཁྱེན་པའི་ཡེ་ཤེས་དང་། བསོད་ནམས་རྒྱ་མཚོ་སྩོགས་པའི་སྙིང་པོ་དང་། ཏིང་ངེ་འཛིན་ལ་ངེས་པར་

77-1-171a

གཞག་པའི་སྒོ་སེམས་བསྐྱེད་པ་ཐམས་ཅད་ལ་དགེ་བའི་བཤེས་གཉེན་འབྱུང་བ་དང་། འབྲལ་བ་མེད་ཅིང་ཉེ་བར་གྱུར་པ་དང་། ཏིང་ངེ་འཛིན་ལ་ངེས་པར་གཞག་པའི་སྒོ་དེ་བཞིན་གཤེགས་པ་ཐམས་
ཅད་ཀྱི་ཡོན་ཏན་དགེ་བའི་བཤེས་གཉེན་གྱིས་ཁར་ལས་པས་ཡོངས་སུ་གྲུབ་པ་དང་། ཏིང་ངེ་འཛིན་ལ་ངེས་པར་གཞག་པའི་སྒོ་དགེ་བའི་བཤེས་གཉེན་ཐམས་ཅད་དང་ཡོངས་སུ་མི་འབྲལ་བ་དང་། ཏིང་ངེ་འཛིན་
ལ་ངེས་པར་གཞག་པའི་སྒོ་དགེ་བའི་བཤེས་གཉེན་ཐམས་ཅད་མཉམ་པ་ཉིད་ཀྱིས་རྟག་པར་ཀུན་ཏུ་ཉེ་བར་འགྲོ་བའི་སྦྱོར་བ་དང་། ཏིང་ངེ་འཛིན་ལ་ངེས་པར་གཞག་པའི་སྒོ་དགེ་བའི་བཤེས་གཉེན་གྱི་ཐབས་ཀྱི་སྤྱོད་
པ་ཐམས་ཅད་ཀྱིས་དུབ་པ་མེད་པའི་སྦྱོར་བ་སྟེ། རིགས་ཀྱི་བུ་ཏིང་ངེ་འཛིན་ལ་ངེས་པར་གཞག་པའི་སྒོ་བཅུ་པོ་དེ་དག་དང་ལྡན་པའི་བྱང་ཆུབ་སེམས་དཔའ་ནི་དགེ་བའི་བཤེས་གཉེན་ཐམས་ཅད་དང་། མངོན་ཏུ་
གྱུར་པ་ཐོབ་པ་ཡིན་ཏེ། ཏིང་ངེ་འཛིན་གྱི་རྣམ་པར་ཐར་པ་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་དགེ་བའི་བཤེས་གཉེན་གྱི་ཁ་ནས་གྲགས་པ་ཞེས་བྱ་བ་ཡང་ཐོབ་པས་དེ་ལ་ཞུགས་པའི་བྱང་
ཆུབ་སེམས་དཔའ་ནི་སངས་རྒྱས་ཐམས་ཅད་ཐ་མི་དད་ཅིང་མཉམ་པ་ཉིད་དུ་འགྱུར་བ་ཡང་རབ་ཏུ་འཐོབ་པོ། །དགེ་བའི་བཤེས་གཉེན་ཐ་མི་དད་ཅིང་ཐམས་ཅད་དུ་ཁྱབ་པའང་རབ་ཏུ་ཐོབ་པར་འགྱུར་རོ། །སྲིན་
པོའི་དབང་པོ་མིག་བཟངས་ཀྱིས་དེ་སྐད་ཅེས་སྨྲས་པ་དང་། ཚོང་དཔོན་གྱི་བུ་ནོར་བཟངས་ཀྱིས་ནམ་མཁའི་དབྱིངས་ལ་བལྟས་ཏེ་འདི་སྐད་ཅེས་སྨྲས་སོ། །འཕགས་པ་བདག་ལ་ཐུགས་བརྩེ་བར་མཛད་དེ། 
དགེ་བའི་བཤེས་གཉེན་བསྟན་པས་སྨན་ཡོན་བཏགས་པ་མ་ནོངས་སོ། །ད་དུང་ཡང་དགེ་བའི་བཤེས་གཉེན་བལྟ་བའི་སླད་དུ། ཇི་ལྟར་བརྩོན་པར་བགྱི་བ་དང་། ཕྱོགས་གང་ལོགས་སུ་མཆི་བར་བགྱི་བ་

77-1-171b

དང་། གནས་གང་ཞིག་དུ་ཡོངསུ་བཙལ་བ་དང་། དམིགས་པ་གང་ཞིག་བསམ་པར་བགྱི་བའི་ཐབས་ཀྱི་སྒོ་མ་ནོར་བར་བསྟན་དུ་གསོལ། སྨྲས་པ་རིགས་ཀྱི་བུ་དེ་བས་ན་ཕྱོགས་ཀུན་ཏུ་རབ་ཏུ་འདུད་པའི་ལུས་དང་། 
དམིགས་པ་ཐམས་ཅད་དུ་དགེ་བའི་བཤེས་གཉེན་དྲན་པ་དང་། འབྲེལ་པའི་བསམ་པ་དང་། ཀུན་ཏུ་འགྲོ་བའི་ཏིང་ངེ་འཛིན་གྱི་རྗེས་སུ་འབྲང་བ་དང་། སེམས་ཀྱི་ཤུགས་རྨི་ལམ་ལྟ་བུ་དང་། ཡིད་ཀྱི་ལུས་གཟུགས་
བརྙན་ལྟ་བུས་རྣམ་པར་རྒྱུ་སྟེ། འགྲོ་བས་དགེ་བའི་བཤེས་གཉེན་གྱི་གན་དུ་སོང་ཤིག །དེ་ནས་ཚོང་དཔོན་གྱི་བུ་ནོར་བཟངས་གྱིས་སྲིན་པོའི་དབང་པོ་མིག་བཟངས་ཀྱིས་ཇི་སྐད་དུ་གཏམས་པ་དེ་ལྟར་ནན་ཏན་དུ་
བྱས་པ་དང་། མདུན་གྱི་སའི་ནང་ནས་པད་མོ་ཆེན་པོ་རྡོ་རྗེ་རིན་པོ་ཆེ་ཐམས་ཅད་ལས་གྲུབ་པའི་ཆུ་བ་ཅན། ནང་རིམ་རིན་པོ་ཆེའི་རྒྱལ་པོ་འགྲོ་བ་རྒྱ་མཚོ་སྣ་ཚོགས་ལས་བྱས་པ། རིན་པོ་ཆེའི་རྒྱལ་པོ་ཐམས་
ཅད་ལ་མེད་པ་མིའི་ཕྲེང་བ་གྲུབ་པ། རིན་པོ་ཆེའི་རྒྱལ་པོ་རྣམ་པར་སྣང་བའི་སྙིང་པོ་ཅན་སྤོས་ཀྱི་རིན་པོ་ཆེའི་རྒྱལ་པོ་རིན་པོ་ཆེ་ཐམས་ཅད་ཀྱི་མདོག་གི་ཟེ་བ་དང་ལྡན་པ། རིན་པོ་ཆེའི་དྲ་བ་གྲངས་མེད་པས་ཀུན་
ནས་ཡོག་པ་བྱུང་བ་མཐོང་ངོ་། །རིན་པོ་ཆེའི་རྒྱལ་པོའི་པད་མོ་ཆེན་པོ་དེའི་སྙིང་པོ་ལའང་། ཁང་པ་བརྩེགས་པ་ཆོས་ཀྱི་ཕྱོགས་སུ་ཡང་དག་པར་གཞོལ་བའི་སྙིང་པོ་ཞེས་བྱ་བ་ཤིན་ཏུ་སྤེལ་བ་ལྟ་ན་སྡུག་པ་སའི་
གཞི་རྣམ་པར་སྣང་བའི་དབྱིབས་དང་ལྡན་པ། རིན་པོ་ཆེའི་རྒྱལ་པོ་ཐམས་ཅད་ལས་བྱས་པའི་ཀ་བ་སྡོང་ཚང་བས་མཛེས་པར་བརྒྱན་པ། རྒྱན་ཐམས་ཅད་དུ་རིན་པོ་ཆེ་ཐམས་ཅད་བཀྲམ་པ་འཛམ་
བུ་ཆུ་ཀླུང་གི་གསེར་དྲི་མ་མེད་པའི་ལྷ་རྫས་ཀྱི་གཞི་གཏིང་བ། མུ་ཏིག་གི་ཕྲེང་བ་སྣ་ཚོགས་ཀྱི་དྲ་བ་གྲངས་མེད་པ་ཀུན་ནས་བྲེས་པ། རིན་པོ་ཆེའི་རྒྱལ་པོ་སྣ་ཚོགས་རབ་ཏུ་སྤ་བར་སྤེལ་བས་བརྒྱན་པ། 

77-1-172a

འཛམ་བུ་ཆུ་ཀླུང་གི་ནོར་བུ་རིན་པོ་ཆེས་ཀུན་ནས་རྣམ་པར་ཕྱེ་བ། རིན་པོ་ཆེའི་ཁྲི་འཕང་གྲངས་མེད་པས་ཀུན་ནས་བསྐོར་བ། ཕྱོགས་ཐམས་ཅད་ནས་རིན་པོ་ཆེའི་རྒྱལ་པོའི་ཐེམ་སྐས་མཛེས་པར་བཀྱེ་
བ་གནས་པར་མཐོང་ངོ་། །ཁང་པ་བརྩེགས་པ་དེའི་དབུས་ན་ཡང་ཁྲི་ནོར་བུ་རིན་པོ་ཆེ་ཡིད་བཞིན་གྱི་པད་མོའི་སྙིང་པོ་ཅན། ནོར་བུ་རིན་པོ་ཆེའི་གཟུགས་འཇིག་རྟེན་གྱི་དབང་པོའི་དབྱིབས་ལྟ་བུའི་རྟེན་གྱིས་བཟུང་བ། 
ནོར་བུ་རིན་པོ་ཆེའི་འབྲུ་ཐམས་ཅད་ཀྱི་ཁ་དོག་དུ་འདུག་པ། དབང་པོའི་རྒྱལ་མཚན་རབ་ཏུ་སྣང་བའི་དབྱིབས་སུ་འདུག་པ། རྡོ་རྗེ་རིན་པོ་ཆེའི་འཁོར་ལོའི་ས་ལ་རྟེན་པ། རིན་པོ་ཆེའི་རྒྱལ་པོ་སྣ་ཚོགས་ཀྱི་
ཕྲེང་བས་བརྒྱན་པ། རིན་པོ་ཆེའི་ཁྲི་འཕང་དུ་མ་ལས་བླངས་པ། རིན་པོ་ཆེའི་རྒྱལ་པོ་སྣང་བའི་རྒྱལ་མཚན་གྱིས་རབ་ཏུ་སྨྲས་པ། རིན་པོ་ཆེ་སྣ་ཚོགས་ཀྱི་རྒྱན་གྱིས་ཤིན་ཏུ་བརྒྱན་པ། རིན་པོ་ཆེའི་
རྒྱལ་པོའི་སྟན་ལྷ་རྫས་ལས་འདས་པ་ལེགས་པར་བཏིང་བ། གོས་རིན་པོ་ཆེ་ཁ་དོག་མཐའ་ཡས་པ་སྣ་ཚོགས་ཀྱི་གཞི་ཐམས་ཅད་དུ་བཀྲམ་པ། རིན་པོ་ཆེའི་གོས་ཐམས་ཅད་ཀྱི་གནམ་ཡོལ་བྲེས་
པས། ནམ་མཁའ་རབ་ཏུ་བརྒྱན་པ། རིན་པོ་ཆེ་ཐམས་ཅད་ཀྱི་དྲ་བ་ཀུན་ཏུ་བྲེས་པ། ཕྱོགས་ཀུན་ནས་རིན་པོ་ཆེའི་རྒྱལ་མཚན་དགྲིགས་པའི་སྒྲ་འབྱུང་བ། རིན་པོ་ཆེ་ཐམས་ཅད་ཀྱི་སྣམ་བུའི་
རྒྱལ་མཚན་ཕུར་ལབ་དུ་ལྡིང་བ། སྤོས་ཀྱི་རིན་པོ་ཆེ་ཐམས་ཅད་ཀྱི་རྒྱལ་མཚན་རྣམ་པར་བྲེས་པས་ཀུན་ནས་བརྒྱན་པ། མེ་ཏོག་ཐམས་ཅད་ཀྱི་རྒྱལ་མཚན་ལས་མེ་ཏོག་གི་གློང་སྣ་ཚོགས་ཆར་དུ་མངོན་
པར་འཕྲུལ་བ། རིན་པོ་ཆེའི་དྲིལ་བུའི་རྒྱལ་མཚན་འཁྲོལ་བའི་སྒྲ་ཡིད་བདེ་བའི་དབྱངས་སྙན་པར་གྲག་པ། ཁང་པའི་ཁ་ཐམས་ཅད་ནས་རིན་པོ་ཆེ་སྣ་ཚོགས་ཀྱི་ཕྲེང་བ་རབ་ཏུ་སྤྱངས་པ། རིན་པོ་

77-1-172b

ཆེའི་གཟུགས་སྣ་ཚོགས་ཀྱི་ཁ་ནས་སྤོས་ཆུ་ཁ་དོག་དུ་མ་དང་ལྡན་པའི་ཆར་འབབ་པ། ནོར་བུ་རིན་པོ་ཆེའི་རྒྱལ་པོ་རྣམ་པར་སྣང་བ་ལས་གླང་པོ་དམ་པའི་གཟུགས་སུ་བྱས་པའི་ཁ་ནས་པད་མོའི་དྲ་བ་འབྱུང་བ་དང་ལྡན་པ། 
རྡོ་རྗེ་སྣ་ཚོགས་ཀྱི་སེང་གེའི་ཁ་ནས་སྤོས་ཀྱི་སྤྲིན་ཁ་དོག་མཐའ་ཡས་པ་རབ་ཏུ་འབྱུང་བ། རིན་པོ་ཆེའི་རྒྱལ་པོ་རྣམ་པར་སྣང་བ། ཚངས་པའི་གཟུགས་སུ་འདུག་པའི་ཁ་ནས་བྱམས་པ་ཆེན་པོའི་ཚུལ་ཚངས་
པའི་དབྱངས་ཀྱི་ང་རོ་སྒྲོག་པ་དང་ལྡན་པ། རིན་པོ་ཆེ་སྣ་ཚོགས་ཤིན་ཏུ་མཛེས་པའི་གཟུགས་ཀྱི་ཁ་ནས་དཀར་པོའི་ཕྱོགས་ཀྱི་ལེགས་པ་རབ་ཏུ་བརྗོད་པའི་ང་རོ་འབྱུང་བ་དུས་གསུམ་གྱི་སངས་རྒྱས་ཀྱི་མཚན་གསེར་
གྱི་དྲིལ་གྱི་ཕྲེང་བ་ལས་སྒྲ་སྙན་པའི་དབྱངས་སུ་འབྱུང་བ་དང་ལྡན་པ། ནོར་བུ་རིན་པོ་ཆེ་དམ་པའི་དྲིལ་གྱིས་ཕྲེང་བ་ལས་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོའི་སྒྲ་ཡིད་དུ་འོང་བ་འབྱུང་བ། རྡོ་རྗེའི་དྲིལ་སྣ་
ཚོགས་ལས་བྱང་ཆུབ་སེམས་དཔའི་སྨོན་ལམ་ཐམས་ཅད་ཀྱི་སྒྲ་རབ་ཏུ་འབྱུང་བ། རིན་པོ་ཆེའི་རྒྱལ་པོ་ཟླ་བའི་རྒྱལ་མཚན་གྱི་ཕྲེང་བས་སངས་རྒྱས་ཐམས་ཅད་ཀྱི་གཟུགས་བརྙན་རབ་ཏུ་འབྱུང་བའི་དབྱངས་
སྣ་ཚོགས་རབ་ཏུ་བསྒྲུབ་པ། ནོར་བུ་རིན་པོ་ཆེའི་རྒྱལ་པོ་སྙིང་པོ་དག་པའི་ཕྲེང་བས་དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ཀྱི་སྐུ་ཚེ་གཅིག་ནས་གཅིག་ཏུ་བརྒྱུད་པའི་གཟུགས་བརྙན་
རྣམ་པར་དམིགས་པར་བྱ་བ། རིན་པོ་ཆེའི་རྒྱལ་པོ་ཉི་མའི་སྙིང་པོའི་ཕྲེང་བས་ནམ་མཁའི་དབྱིངས་ཀྱི་མཐས་ཀླས་པའི་ཕྱོགས་བཅུའི་སངས་རྒྱས་ཀྱི་ཞིང་སྣ་ཚོགས་ཀྱི་དབྱིངས་སུ་འོད་གཟེར་ཡོངས་སུ་བསྟན་
པ། རིན་པོ་ཆེའི་རྒྱལ་པོ་སྣང་བའི་རྒྱལ་མཚན་གྱི་ཕྲེང་བས་དེ་བཞིན་གཤེགས་པ་ཐམས་ཅད་ཀྱི་འོད་ཀྱི་དཀྱིལ་འཁོར་སྣང་བ་རབ་ཏུ་བཀྱེ་བ། ནོར་བུ་རིན་པོ་ཆེའི་རྒྱལ་པོ་རྣམ་པར་སྣང་བའི་ཕྲེང་བས་

77-1-173a

སྤྲུལ་པའི་སྤྲིན་འགྲོ་བ་ཐམས་ཅད་ཀྱི་དབང་པོ་ལྟ་བུ་དེ་བཞིན་གཤེགས་པ་ལ་མཆོད་ཅིང་རིམ་གྲོ་བྱེད་པའི་འོད་རབ་ཏུ་དགྱེ་བ། རིན་པོ་ཆེའི་རྒྱལ་པོ་ཡིད་བཞིན་གྱི་ཕྲེང་བས། བྱང་ཆུབ་སེམས་
དཔའ་ཀུན་ཏུ་བཟང་པོའི་རྣམ་པར་འཕྲུལ་པས་སྐད་ཅིག་རེ་རེ་ལ་ཆོས་ཀྱི་དབྱིངས་སུ་རྒྱས་པར་དགང་བ། རིན་པོ་ཆེའི་རྒྱལ་པོ་རི་བོའི་རྒྱལ་མཚན་གྱི་ཕྲེང་བས། ལྷའི་དབང་པོ་ཐམས་ཅད་ཀྱི་ཁྱིམ་གྱི་ལྷ་མོའི་དབྱངས་སྙན་
པ་རབ་ཏུ་བསྒྲག་པ་དང་ལྡན་ཞིང་ཁྲི་དེ། དམིགས་པ་ཐམས་ཅད་དུ་དེ་བཞིན་གཤེགས་པ་ལ་བསྟོད་པའི་སྤྲིན་འགྱེད་པས་ཡོན་ཏན་དང་། ལེགས་པ་བསམ་གྱིས་མི་ཁྱབ་པ་བརྗོད་དུ་ཡོད་པ་དང་། རིན་པོ་ཆེའི་རྒྱན་གྲངས་
མེད་པའི་འཁོར་གྱི་སྟན་གྱིས་བསྐོར་བར་མཐོང་ངོ་། །ཁྲི་དེ་ལ་ལྷ་མོ་སྒྱུ་མ་འཇིག་རྟེན་གསུམ་ལས་ཡང་དག་པར་འདས་པའི་གཟུགས་འཇིག་རྟེན་ཐམས་ཅད་ལ་མངོན་པར་གནས་པ་དང་། སྲིད་པའི་རྒྱུད་ཐམས་ཅད་ལས་གྱེན་
དུ་འཕགས་པའི་གཟུགས་འགྲོ་བ་ཐམས་ཅད་ཀྱིས་རྣམ་པར་དམིགས་སུ་ཡོད་པ་དང་། འཇིག་རྟེན་ཐམས་ཅད་ཀྱིས་མ་གོས་པའི་གཟུགས་བསོད་ནམས་ཡངས་པས་བྱུང་བ་དང་། འགྲོ་བ་ཐམས་ཅད་དང་མཉམ་ཞིང་འདྲ་
བའི་གཟུགས་སེམས་ཅན་ཐམས་ཅད་ལ་རང་བཞིན་མངོན་པར་སྟོན་པ་དང་། འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བར་འཐུན་པའི་གཟུགས་སེམས་ཅན་ཐམས་ཅད་དང་མངོན་སུམ་དུ་བདལ་བ་དང་། 
དུས་གསུམ་ཐམས་ཅད་དུ་འགྲོ་བ་ནམ་མཁའ་ལ་རྣམ་པར་དམིགས་པ་ཐ་མི་དད་པའི་གཟུགས་འགྲོ་བ་ཐམས་ཅད་ཀྱིས་མཐས་ཀླས་པར་དམིགས་སུ་ཡོད་པར་བྱིན་གྱིས་རློབ་པ་དང་། འགྲོ་བ་མེད་པའི་གཟུགས་འཇིག་
རྟེན་གྱི་ལམ་གྱི་རྒྱུད་ཐམས་ཅད་འགག་པ་དང་འོང་བ་མེད་པའི་གཟུགས་འགྲོ་བ་ཐམས་ཅད་དུ་མ་བྱུང་བ་དང་། མ་སྐྱེས་པའི་གཟུགས་མི་སྐྱེ་བར་མཉམ་པའི་ཆོས་ལ་བརྩོན་པ་དང་། མ་འགགས་པའི་གཟུགས་

77-1-173b

འཇིག་རྟེན་གྱི་རྣམ་པར་སྤྱོད་པ་ཐམས་ཅད་ལ་གཞོལ་བ་དང་། ཡང་དག་པར་དམིགས་པའི་གཟུགས་བདེན་པ་མེད་པ་དང་། འཇིག་རྟེན་གྱིས་རྣམ་པར་དམིགས་པའི་གཟུགས་བརྫུན་པ་མེད་པ་དང་འཕོ་བ་མེད་པའི་གཟུགས་ཤི་འཕོ་བ་དང་། 
སྐྱེ་བ་ལས་འདས་པ་དང་། མི་འཇིག་པའི་གཟུགས་ཆོས་ཀྱི་དབྱིངས་ཀྱི་རང་བཞིན་གྱིས་འཇིག་པ་མེད་པ་དང་། མཚན་ཉིད་མེད་པའི་གཟུགས་དུས་གསུམ་ཚིག་གི་ལམ་དུ་གཞོལ་བ་དང་། མཚན་ཉིད་གཅིག་པའི་གཟུགས་མཚན་ཉིད་མེད་པས་
བྱུང་བ་དང་། གཟུགས་རྙན་ལྟ་བུའི་གཟུགས་འགྲོ་བ་ཐམས་ཅད་ཀྱི་སེམས་དང་བསམ་པ་ཇི་ལྟ་བ་བཞིན་དུ་དམིགས་པ་དང་། སྒྱུ་མ་ལྟ་བུའི་གཟུགས་ཡེ་ཤེས་སྒྱུ་མས་ཡོངས་སུ་གྲུབ་པ་དང་། སྨིག་རྒྱུ་ལྟ་བུའི་གཟུགས་འགྲོ་བའི་འདུ་ཤེས་
བཞིན་དུ་བྱིན་གྱིས་རློབ་པ་ལ་གཞོལ་བ་དང་། གྲིབ་མ་ལྟ་བུའི་གཟུགས་སྔོན་གྱི་སྨོན་ལམ་གྱིས་འགྲོ་བ་ཐམས་ཅད་ཀྱི་རྗེས་སུ་འབྲང་བ་དང་། རྨི་ལམ་ལྟ་བུའི་གཟུགས་བསམ་པ་ཇི་ལྟ་བ་བཞིན་དུ་འགྲོ་བས་དམིགས་པ་ལ་མ་འདྲེས་
པ་དང་། ཆོས་ཀྱི་དབྱིངས་ཐམས་ཅད་དུ་གཞོལ་བའི་གཟུགས་ནམ་མཁའི་དབྱིངས་ལྟར་རང་བཞིན་ཡོངས་སུ་དག་པ་དང་། སྙིང་རྗེ་ཆེན་པོས་བྱུང་བའི་གཟུགས་སེམས་ཅན་གྱི་རྒྱུད་ཐམས་ཅད་ཡོངས་སུ་བསྐྱང་བ་ལ་བརྩོན་པ་དང་། ཆགས་
པ་མེད་པའི་སྒོས་བྱུང་བའི་གཟུགས་སྐད་ཅིག་རེ་རེས་ཆོས་ཀྱི་དབྱིངས་རྒྱས་པར་འགེངས་པ་དང་། མཐའ་དང་དབུས་མེད་པའི་གཟུགས་རྙོག་པ་མེད་པར་འགྲོ་བ་ཐམས་ཅད་ལ་རྟེན་པ་དང་། ཚད་མེད་པའི་གཟུགས་ཚིག་གི་ལམ་ཐམས་
ཅད་ལས་ཡང་དག་པར་འདས་པ་དང་། མི་གནས་པའི་གཟུགས་འགྲོ་བ་ཐམས་ཅད་གདུལ་བའི་བྱིན་གྱི་རླབས་ཀྱིས་གྲུབ་པ་དང་། བྱིན་གྱིས་མ་བརླབས་པའི་གཟུགས་བྱིན་གྱིས་རླབས་ཀྱི་འགྲོ་བའི་དོན་ལ་བརྩོན་པ་དང་། མ་བྱོན་པའི་
གཟུགས་སྨོན་ལམ་སྒྱུས་མས་ཡོངས་སུ་གྲུབ་པ་དང་། ཟིལ་གྱིས་མི་ནོན་པའི་གཟུགས་འཇིག་རྟེན་ཐམས་ཅད་ལས་མངོན་པར་འཕགས་པ་དང་། ཡང་དག་པ་མ་ཡིན་པའི་གཟུགས་ཞི་གནས་གྱི་སྣང་བས་རྣམ་པར་དམིགས་པ་དང་། 

77-1-174a

མི་འབྱུང་བའི་གཟུགས་འགྲོ་བའི་ལས་ཇི་ལྟ་བ་བཞིན་དུ་རྗེས་སུ་འབྲང་བ་དང་། རིན་པོ་ཆེ་ཡིད་བཞིན་གྱི་རྒྱལ་པོ་ལྟར་བསམ་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱ་བའི་སྨོན་ལམ་
ཡོངས་སུ་གྲུབ་པ་དང་། རྣམ་པར་མི་རྟོག་པའི་གཟུགས་འགྲོ་བ་ཐམས་ཅད་ཀྱི་ཡོངས་སུ་རྟོག་པ་བཞིན་དུ་ཉེ་བར་གནས་པ་དང་། མི་རྟོག་པས་རྟོག་པ་མེད་པའི་གཟུགས་འགྲོ་བ་ཐམས་ཅད་ཀྱིས་རྣམ་པར་དམིགས་པ་དང་། ཐོགས་པ་མེད་
པའི་གཟུགས་འཁོར་བ་ལས་བཟློག་པ་ལ་རབ་ཏུ་བརྩོན་པ་དང་། རྣམ་པར་དག་པའི་གཟུགས་དེ་བཞིན་ཉིད་དང་། མཉམ་པར་རྣམ་པར་མི་རྟོག་པ་དང་། རྣམ་པ་དེ་ལྟ་བུའི་གཟུགས་གཟུགས་མེད་པར་གཟུགས་སུ་སྣང་བ་དང་། ཚོར་བ་མེད་པའི་
གཟུགས་ཀྱིས་འཇིག་རྟེན་གྱི་སྡུག་བསྔལ་གྱི་ཚོར་བ་རབ་ཏུ་ཞི་བར་བྱ་བ་ལ་བརྩོན་པ་དང་། འདུ་ཤེས་ཀྱི་རྣམ་པ་ཐམས་ཅད་ལས་གྱེན་དུ་འཕགས་པའི་གཟུགས་སེམས་ཅན་ཐམས་ཅད་ཀྱི་འདུ་ཤེས་ཀྱི་རྣམ་པས་རྣམ་པར་དམིགས་པ་དང་། 
མངོན་པར་འདུ་བྱ་བ་མེད་པའི་ཆོས་ཉིད་ཀྱིས་བྱུང་བའི་གཟུགས་ཆོས་སྒྱུ་མའི་རྣམ་པས་གྲུབ་པ་དང་། རྣམ་པར་ཤེས་པའི་ཡུལ་ལས་ཡོངས་སུ་འདས་པའི་གཟུགས་བྱང་ཆུབ་སེམས་དཔའི་སྨོན་ལམ་གྱི་ཡེ་ཤེས་ལས་བྱུང་བ་དང་། 
རང་བཞིན་མེད་པའི་གཟུགས་འགྲོ་བ་ཐམས་ཅད་ཀྱི་ཚིག་གི་ལམ་ལ་གཞོལ་བ་དང་། གདུང་བ་ཡོངས་སུ་བསྩལ་བའི་གཟུགས་ཆོས་ཀྱི་སྐུ་བསིལ་བའི་དམ་པ་དང་ལྡན་པས། ལྷ་མོ་སྒྱུ་མའི་བསམ་པ་ཇི་ལྟ་བ་བཞིན་དུ་འགྲོ་བའི་
གཟུགས་ཀྱི་ལུས་ཡོངས་སུ་སྟོན་པ་དང་། སེམས་ཅན་གྱི་བསམ་པའི་དབང་དུ་འགྲོ་བ་ཐམས་ཅད་དང་མཉམ་ཞིང་འདྲ་བའི་གཟུགས་ཀྱི་ལུས་འགྲོ་བ་ཐམས་ཅད་ཀྱི་གཟུགས་ཀྱི་ལུས་ལས་འཕགས་པ་སྟོན་ཅིང་འདུག་པ་མཐོང་ངོ་། །
དེ་ལ་སེམས་ཅན་ལ་ལས་ནི་ལྷ་མོ་སྒྱུ་མ་དེ་བདུད་ཀྱི་བུ་མོའི་གཟུགས་སུ་འདུག་ལ་བདུད་ཀྱི་བུ་མོའི་གཟུགས་པས་ཀྱང་ལྷག་པར་མཐོང་ངོ་། །ལ་ལས་ནི་དབང་བསྒྱུར་གྱི་ལྷའི་བུ་མོའི་གཟུགས་པས་ཀྱང་ལྷག་པར་མཐོང་ངོ་། །ལ་ལས་ནི་

77-1-174b

རབ་འཕྲུལ་དགའི་ལྷའི་བུ་མོའི་གཟུགས་བས་ཀྱང་ལྷག་པར་མཐོང་ངོ་། །ལ་ལས་ནི་རབ་དགའ་ལྡན་གྱི་ལྷའི་བུ་མོའི་གཟུགས་བས་ཀྱང་ལྷག་པར་མཐོང་ངོ་། །ལ་ལས་ནི་རབ་མཚེ་མའི་ལྷའི་བུ་མོའི་གཟུགས་པས་ཀྱང་ལྷག་པར་མཐོང་ངོ་། །ལ་
ལས་ནི་སུམ་ཅུ་རྩ་གསུམ་གྱི་ལྷའི་བུ་མོའི་གཟུགས་བས་ཀྱང་ལྷག་པར་མཐོང་ངོ་། །ལ་ལས་ནི་རྒྱལ་པོ་ཆེན་པོ་བཞིའི་རིས་གྱི་ལྷའི་བུ་མོའི་གཟུགས་པས་ཀྱང་ལྷག་པར་མཐོང་ངོ་། །ལ་ལས་ནི་གྲུལ་བུམ་གྱི་བུ་མོའི་གཟུགས་བས་ཀྱང་
ལྷག་པར་མཐོང་ངོ་། །ལ་ལས་ནི་ལྟོ་འཕྱེ་ཆེན་པོའི་དབང་པོའི་བུ་མོའི་གཟུགས་བས་ཀྱང་ལྷག་པར་མཐོང་ངོ་། །སེམས་ཅན་ལ་ལས་ནི་ལྷ་མོ་སྒྱུ་མ་དེ་མིའི་དབང་པོའི་བུ་མོའི་གཟུགས་བས་ཀྱང་ལྷག་པར་མཐོང་ངོ་། །དེ་ནས་ཚོང་དཔོན་
གྱི་བུ་ནོར་བཟངས་འགྲོ་བ་ཐམས་ཅད་ཀྱི་གཟུགས་ཀྱི་འདུ་ཤེས་དང་བྲལ་ཡང་སེམས་ཅན་ཕ་རོལ་གྱི་བསམ་པ་ལ་འཇུག་པ་དེས་སེམས་ཅན་ཐམས་ཅད་ཀྱི་བསམ་པའི་རྣམ་པ་ལ་ལྷ་མོ་སྒྱུ་མ་འགྲོ་བ་ཐམས་ཅད་ཉེ་བར་འཚོ་བའི་བསོད་
ནམས་དང་ལྡན་པ། ཐམས་ཅད་མཁྱེན་པ་ཉིད་ཀྱི་བསོད་ནམས་ཀྱིས་བསྒྲུབ་པའི་ལུས་དང་ལྡན་པ། སྦྱིན་པའི་ཕ་རོལ་ཏུ་ཕྱིན་པའི་སྦྱོར་བ་ཐ་མི་དད་པ་དང་ལྡན་པ། འགྲོ་བ་ཐམས་ཅད་ལ་མཉམ་པ་ཉིད་ཀྱི་ཞུགས་པ། སྙིང་རྗེ་ཆེན་
པོའི་ལྷས་སུ་སེམས་ཅན་ཐམས་ཅད་ཡོངས་སུ་སྡུད་པ། དེ་བཞིན་གཤེགས་པའི་ཡོན་ཏན་ཐམས་ཅད་ལ་ནན་ཏན་དུ་བྱས་པས་བྱུང་བ། བཟོད་པ་ཐམས་ཅད་ཀྱི་ཚུལ་རྒྱ་མཚོ་ལ་ཞུགས་པ། ཐམས་ཅད་མཁྱེན་པ་ཉིད་ཀྱི་བརྩོན་
འགྲུས་ཀྱི་ཤུགས་ཀྱིས་སེམས་ཀྱི་རྣམ་པར་སྤེལ་བ། ཆོས་ཀྱི་དཀྱིལ་འཁོར་ཐམས་ཅད་ཡོངས་སུ་དག་པར་བྱ་བ་ལ་ཕྱིར་མི་ལྡོག་པའི་བརྩོན་འགྲུས་དང་ལྡན་པ། ཆོས་ཐམས་ཅད་ཀྱི་རང་བཞིན་ངེས་པར་ཏོགས་པས་བྱུང་བ། 
བསམ་གཏན་གྱི་ཡན་ལག་དང་ཚུལ་ཐམས་ཅད་ལས་ཡོངས་སུ་གྲུབ་པའི་སེམས་དང་ལྡན་པ། བསམ་གཏན་གྱི་ཡན་ལག་ཐ་མི་དད་པའི་ཡུལ་ཡོངས་སུ་འཛིན་པའི་དེ་བཞིན་གཤེགས་པའི་བསམ་གཏན་གྱི་དཀྱིལ་

77-1-175a

འཁོར་སྣང་བ་རབ་ཏུ་ཐོབ་པ། སེམས་ཅན་ཐམས་ཅད་ཀྱི་ཉོན་མོངས་པ་རྒྱ་མཚོ་བསྐམ་པ་ལ་ཤིན་ཏུ་གདོན་མི་ཟ་བར་བྱས་པའི་ངེས་པར་རྟོག་པ་སྣ་ཚོགས་ལ་གནས་པ། དེ་བཞིན་གཤེགས་པ་ཐམས་ཅད་ཀྱི་
ཆོས་ཀྱི་འཁོར་ལོ་རྣམ་པར་དབྱེ་བའི་ཚུལ་ལ་མཁས་པ། ཆོས་ཐམས་ཅད་ཀྱི་ཚུལ་རྒྱ་མཚོ་རྣམ་པར་དཔྱད་པའི་ཤེས་རབ་དང་ལྡན་པ། དེ་བཞིན་གཤེགས་པ་ཐམས་ཅད་མཐོང་བས་མ་ངོམས་པ། དུས་གསུམ་
གྱི་དེ་བཞིན་གཤེགས་པ་གཅིག་ནས་གཅིག་ཏུ་བརྒྱུད་པ་ལ་རྣམ་པར་ལྟ་བའི་རྒྱུན་མི་གཅོད་པ། སངས་རྒྱས་ཐམས་ཅད་བལྟ་བའི་སྒོ་ལ་མངོན་ཏུ་གྱུར་པ། དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་བསྒྲུབ་པའི་
ལམ་ཡོངས་སུ་དག་པར་བྱ་བ་རྣམ་པ་ཐ་དད་པའི་ཚུལ་ལ་མཁས་པ། དེ་བཞིན་གཤེགས་པ་ཐམས་ཅད་ཀྱི་སྤྱོད་ཡུལ་ནམ་མཁའ་དང་མཉམ་པ་སེམས་ཅན་ཐམས་ཅད་ཡོངས་སུ་བསྡུ་བའི་ཐབས་ཀྱི་ཚུལ་ལ་མཁས་པ། འགྲོ་
བ་མཐའ་དང་དབུས་མེད་པ། བསམ་པ་ཇི་ལྟ་བ་བཞིན་དུ་ཡོངས་སུ་སྨིན་པར་བྱ་བ་དང་། གདུལ་བའི་སྣང་བ་རབ་ཏུ་ཐོབ་པ། སངས་རྒྱས་ཐམས་ཅད་ཀྱི་སྐུ་རྣམ་པར་དག་པ་རྣམ་པ་ཐ་དད་པ་ལ་ཞུགས་པ། ཞིང་རྒྱ་མཚོ་
ཐམས་ཅད་ཡོངས་སུ་དག་པར་བྱ་བའི་སྨོན་ལམ་དང་ལྡན་པ། སེམས་ཅན་གྱི་ཁམས་ཐམས་ཅད་རྣམ་པར་གདུལ་བའི་བྱིན་གྱིས་རླབས་མཐར་ཐུག་པར་བྱ་བའི་སྨོན་ལམ་ཡོངས་སུ་དག་པ། དེ་བཞིན་གཤེགས་པའི་
ཡུལ་ཐམས་ཅད་མཆོད་པས་རྒྱས་པར་གང་བའི་སེམས་དང་ལྡན་པ། བྱང་ཆུབ་སེམས་དཔའི་རྣམ་པར་འཕྲུལ་པ་ཐམས་ཅད་ལ་བརྩོན་པས་བྱུང་བ། ཆོས་ཀྱི་སྐུ་བླ་ན་མེད་པ་ཡོངས་སུ་དག་པ་དང་ལྡན་པ། གཟུགས་ཀྱི་
ལུས་མཐའ་ཡས་པ་ཡོངས་སུ་སྟོན་པ། བདུད་ཀྱི་དཔུང་ཐམས་ཅད་རབ་ཏུ་འཇོམས་པ། དགེ་བའི་རྩ་བ་ཤིན་ཏུ་རྒྱ་ཆེན་པོའི་སྟོབས་དང་ལྡན་པ། ཆོས་ཀྱི་སྟོབས་རབ་ཏུ་སྐྱེས་པའི་བློ་ཅན། སངས་རྒྱས་ཀྱི་སྟོབས་

77-1-175b

སྣང་བ་རབ་ཏུ་ཐོབ་པ། བྱང་ཆུབ་སེམས་དཔའི་དབང་ཐམས་ཅད་ཀྱི་སྟོབས་ཡོངས་སུ་རྫོགས་པ། ཐམས་ཅད་མཁྱེན་པ་ཉིད་ཀྱི་ཤུགས་ཀྱི་སྟོབས་ཡོངས་སུ་སྐྱེས་པ། དེ་བཞིན་གཤེགས་པའི་ཡེ་ཤེས་
གློག་གིས་ཤེས་རབ་སྣང་བར་བྱས་པ། སེམས་ཅན་མཐའ་དང་དབུས་མེད་པའི་སེམས་རྒྱ་མཚོ་རྣམ་པར་དཔྱད་པ་ལ་མཁས་པ། འགྲོ་བ་ཤིན་ཏུ་མང་བའི་བསམ་པ་ལ་ཞུགས་པ། སེམས་ཅན་ཕ་རོལ་
གྱི་དབང་པོ་རྣམ་པ་ཐ་དད་པ་ཤེས་པར་བྱ་བའི་ཚུལ་ལ་མཁས་པ། སེམས་ཅན་མཐའ་ཡས་པའི་མོས་པ་རྣམ་པ་ཐ་དད་པའི་ཚུལ་ལ་མཁས་པར་ཁོང་དུ་ཆུད་པ། ཕྱོགས་བཅུའི་ཞིང་རྒྱ་མཚོ་ཚད་མེད་པ་ལུས་
ཀྱིས་རྒྱས་པར་འགེངས་པ། འཇིག་རྟེན་གྱི་ཁམས་རྣམ་པ་ཐ་དད་པ་ཐམས་ཅད་ཤེས་པར་བྱ་བའི་ཚུལ་དང་། རྣམ་པ་ལས་མཁས་པ། ཞིང་ཐ་དད་པའི་ཚུལ་ཐམས་ཅད་ཤེས་པར་བྱ་བའི་ཚུལ་ལ་
མཁས་པའི་རྗེས་སུ་སོང་བ། ཡེ་ཤེས་ཀྱི་ལྟ་བ་ཕྱོགས་རྒྱ་མཚོ་ཐམས་ཅད་དུ་རབ་ཏུ་བདལ་བ། དུས་རྒྱ་མཚོ་ཐམས་ཅད་དུ་ཁྱབ་པའི་བློ་དང་ལྡན་པ། སངས་རྒྱས་རྒྱ་མཚོ་ཐམས་ཅད་ལ་མངོན་སུམ་
དུ་འདུད་པའི་ལུས་ཅན། ཆོས་ཀྱི་སྤྲིན་རྒྱ་མཚོའི་ཆར་ཐམས་ཅད་ཡང་དག་པར་འཐུང་བ་ལ་མངོན་ཏུ་གྱུར་པའི་སེམས་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་ཡོན་ཏན་རབ་ཏུ་རྫོགས་པར་བྱ་བའི་ནན་
ཏན་གྱིས་འབྱུང་བ་ལ་རབ་ཏུ་བརྩོན་པ། བྱང་ཆུབ་སེམས་དཔའི་ཚོགས་ཐམས་ཅད་ཡོངས་སུ་བསྒྲུབ་པ་ལ་རབ་ཏུ་ཞུགས་པའི་བློ་དང་ལྡན་པ། བྱང་ཆུབ་སེམས་དཔའ་ཐམས་ཅད་ཀྱི་རབ་ཏུ་འཇུག་པ་ལ་རྣམ་པར་
དཔྱོད་པའི་མཐུ་ཡོད་པ། བྱང་ཆུབ་ཀྱི་སེམས་ཀྱི་ཡན་ལག་ཐམས་ཅད་ཡོངསུ་གྲུབ་པ། བྱང་ཆུབ་སེམས་དཔའ་ཐམས་ཅད་ཡོངས་སུ་སྦྱང་བ་ལ་རབ་ཏུ་བརྩོན་པ། སངས་རྒྱས་ཐམས་ཅད་ཀྱི་ལེགས་

77-1-176a

པའི་སྤྲིན་ཀུན་ཏུ་སྣང་བ་རབ་ཏུ་སྟོན་པ། བྱང་ཆུབ་སེམས་དཔའ་དང་རྒྱལ་བ་ཐམས་ཅད་སྐྱེད་པའི་སྨོན་ལམ་གྱིས་བྱུང་བ་དང་། དེ་དག་ལ་སྩོགས་པ་མཐོང་བའི་ཚུལ་འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་
ཀྱིས་ལྷ་མོ་སྒྱུ་མ་ཚོང་དཔོན་གྱི་བུ་ནོར་བཟངས་ཀྱིས་མཐོང་བར་གྱུར་ཏོ། །དེས་དེ་མཐོང་ནས་ལྷ་མོ་སྒྱུ་མ་ཇི་སྙེད་ཡོད་པ་དེ་སྙེད་དུ་བདག་གི་ལུས་བྱིན་གྱིས་བརླབས་ནས། ཕྱོགས་ཐམས་ཅད་ལ་མངོན་ཏུ་བལྟས་པའི་ལྷ་མོ་སྒྱུ་མ་ལ་
ཐམས་ཅད་དུ་ཁྱབ་པའི་ལུས་ཀྱིས་ཕྱག་བྱས་སོ། །དེས་དེ་ལྟར་ཕྱག་བྱས་མ་ཐག་ཏུ་ཏིང་ངེ་འཛིན་གྱི་སྒོ་མཐའ་དང་དབུས་མེད་པ་ཐོབ་པར་གྱུར་ཏེ། དེས་ཏིང་ངེ་འཛིན་གྱི་སྒོ་དེ་དག་ལ་རྣམ་པར་བལྟས་ནས། མཚན་མར་
བྱ་བ་དང་། བསྒོམ་པ་དང་ལྷུར་བླང་བ་དང་། རྗེས་སུ་དྲན་པར་བྱ་བ་དང་། རྒྱས་པར་དགང་བ་དང་། རབ་ཏུ་རྒྱ་ཆེར་བྱ་བ་དང་། བལྟ་བ་དང་། རྣམ་པར་སྤེལ་བ་དང་། མངོན་པར་བསྒྲུབ་པ་དང་། རྒྱས་གདབ་པར་བྱས་ཏེ། 
ཏིང་ངེ་འཛིན་གྱི་སྒོ་དེ་དག་ལས་ལངས་ནས་ལྷ་མོ་སྒྱུ་མ་འཁོར་དང་བཅས། གནས་དང་བཅས། སྟན་དང་བཅས་པ་ལ་གཡས་ཕྱོགས་སུ་བསྐོར་བ་བྱས་ཏེ། མདུན་དུ་འདུག་ནས་ཐལ་མོ་སྦྱར་ཏེ། འདི་སྐད་ཅེས་སྨྲས་
སོ། །འཕགས་མ་བདག་ནི་འཇམ་དཔལ་གཞོན་ནུར་གྱུར་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དགེ་བའི་བཤེས་གཉེན་བསྙེན་བཀུར་བ་ལ་ཡོངས་སུ་བསྐུལ་བ་བགྱིས་སྟེ། དེ་ལྟར་
བདག་དགེ་བའི་བཤེས་གཉེན་ནས་དགེ་བའི་བཤེས་གཉེན་དུ་བསྙེན་བཀུར་བགྱིད་ཅིང་མཐར་གྱིས་ཁྱོད་ཀྱི་ཞབས་ཀྱི་དྲུང་འདིའི་བར་དུ་མཆིས་པ་ལགས་ན། འཕགས་མ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་
དཔའི་སྤྱོད་པ་ལ་བསླབས་ནས། ཐམས་ཅད་མཁྱེན་པ་ཉིད་དུ་འགྲུབ་པ་ལགས། དེས་སྨྲས་པ་རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་སྨོན་ལམ་ཆེན་པོའི་ཡེ་ཤེས་སྒྱུ་མའི་རྣམ་པས་རྣམ་པར་བརྒྱན་

77-1-176b

པ་ཐོབ་པ་སྟེ། རིགས་ཀྱི་བུ་ཁོ་མོས་རྣམ་པར་ཐར་པ་དེ་དང་ལྡན་པས་འཇིག་རྟེན་གྱི་ཁམས་རྒྱ་མཚོ་འདིའི་འཇིག་རྟེན་གྱི་ཁམས་ཐམས་ཅད་ཀྱི་འཛམ་བུའི་གླིང་ཐམས་ཅད་ན་བཅོམ་ལྡན་འདས་རྣམ་པར་སྣང་མཛད་ཀྱི་བྱང་ཆུབ་
སེམས་དཔའ་སྲིད་པའི་ཐ་མས་སྐྱེ་བ་རྣམ་པར་འཕྲུལ་པ་ཇི་སྙེད་ཅིག་ཡོད་པའི་བྱང་ཆུབ་སེམས་དཔའི་སྲིད་པའི་ཐ་མ་པ་དེ་དག་ཐམས་ཅད་སོ་སོའི་མར་གྱུར་པ་སྟེ། བྱང་ཆུབ་སེམས་དཔའ་དེ་དག་ཐམས་ཅད་ཀྱང་ཁོ་
མོའི་ལྟོ་ན་གནས་པ་ཁོ་མོའི་ལྟོ་གཡས་པ་ནས་འབྱུང་ངོ་། །རིགས་ཀྱི་བུ་བསྐལ་པ་དང་ལྡན་པའི་གླིང་བཞི་པ་འདི་ཉིད་ཀྱི་གྲོང་ཁྱེར་ཆེན་པོ་སེར་སྐྱའི་གནས་སུ་ཡང་། རྒྱལ་པོ་ཟས་གཙང་མའི་བཙུན་མོའི་རིགས་
དང་ལྡན་པའི་ཚུལ་གྱིས་བྱང་ཆུབ་སེམས་དཔའ་དོན་གྲུབ། བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་རྒྱ་ཆེན་པོ་བསམ་གྱིས་མི་ཁྱབ་པས་བསྐྱེད་དོ། །རིགས་ཀྱི་བུ་དེ་ལྟར་ཁོ་མོ་རྒྱལ་པོ་ཟས་
གཙང་མའི་ཕོ་བྲང་ན་འདུག་འདུག་པ་ལས་བྱང་ཆུབ་སེམས་དཔའ་དགའ་ལྡན་གྱི་ཕོ་བྲང་ནས་འཕོ་བའི་དུས་ལ་བབ་པ་དང་། བ་སྤུའི་སྒོ་ཐམས་ཅད་ཀྱི་བ་སྤུའི་སྒོ་རེ་རེ་ནས་ཀྱང་འོད་གཟེར་དེ་བཞིན་གཤེགས་པ་ཐམས་
ཅད་ཀྱི་ཡུམ་གྱི་ཡོན་ཏན་གྱི་དཀྱིལ་འཁོར་ལས་བྱུང་བའི་སྣང་བ་ཞེས་བྱ་བ་མང་པོ་བྱང་ཆུབ་སེམས་དཔའ་ཐམས་ཅད་ཀྱི་ཡུམ་གྱི་ཡོན་ཏན་གྱི་རྒྱན་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་འཐོན་ནས། 
འཇིག་རྟེན་གྱི་ཁམས་ཐམས་ཅད་སྣང་བར་བྱས་ཏེ། ཁོ་མོའི་ལུས་ལ་ཤར་ནས། སྤྱི་བོ་མན་ཆད་བ་སྤུའི་བུ་ག་ཐམས་ཅད་དུ་འཕྲོས་པར་གྱུར་ཏོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའི་
འོད་ཟེར་མིང་གཅིག་ལ། བྱང་ཆུབ་སེམས་དཔའི་ཡུམ་གྱི་རྣམ་པར་འཕྲུལ་བ་ནས། རྒྱན་དང་རྣམ་པར་ཐར་པ་སྣ་ཚོགས་རབ་ཏུ་འགྱེད་པ་དེ་དག་ཁོ་མོའི་ལུས་སུ་དོང་མ་ཐག་ཏུ་དེའི་མོད་ལ་ཁོ་མོའི་

77-1-177a

ལུས་སུ་བྱང་ཆུབ་སེམས་དཔའི་འོད་གཟེར་གྱི་སྒོའི་དཀྱིལ་འཁོར་གྱིས་རྣམ་པར་དམིགས་པར་བྱས་ཏེ། བྱང་ཆུབ་སེམས་དཔའི་སྐྱེ་བའི་རྣམ་པར་འཕྲུལ་པའི་ཚུལ་དང་རྒྱན་ཐམས་ཅད་ཡོངས་སུ་སྣང་
བར་གྱུར་ཏོ། །ཁྱིམ་དང་འཁོར་ལ་ཡང་དེ་བཞིན་དུ་སྣང་བར་གྱུར་ཏོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའི་འོད་གཟེར་དེ་དག་ཁོ་མོའི་ལུས་སུ་དོང་མ་ཐག་ཏུ་དེའི་མོད་ལ་བྱང་ཆུབ་སེམས་དཔའི་འོད་གཟེར་གྱི་སྒོའི་
དཀྱིལ་འཁོར་དེ་དག་གིས་བྱང་ཆུབ་སེམས་དཔའ་གང་དག་གི་སྐྱེ་བའི་ཚུལ་དང་། རྣམ་པར་འཕྲུལ་པ་རྣམ་པར་དམིགས་པར་བྱས་པ་དེ་དག་ཐམས་ཅད་ཀྱང་ཁོ་མོས་མཐོང་བར་གྱུར་ཏེ། དེ་དག་ཐམས་ཅད་སྙིང་
པོ་བྱང་ཆུབ་ཏུ་གཤེགས་ནས། སེང་གེའི་གདན་ལ་བཞུགས་ཤིང་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་གྱིས་བསྐོར་ཏེ། འཇིག་རྟེན་གྱི་དབང་པོ་རྣམས་ཀྱིས་བསྐོར་ཅིང་། ཆོས་
ཀྱི་འཁོར་ལོ་བསྐོར་བ་མང་པོ་མཐོང་ངོ་། །དེ་བཞིན་གཤེགས་པ་དེ་དག་གིས་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ། དེ་བཞིན་གཤེགས་པ་ཇི་སྙེད་ཅིག་བསྙེན་བཀུར་བ་དེ་དག་ཐམས་
ཅད་ཀྱང་ཁོ་མོས་དང་པོ་ཐུགས་བསྐྱེད་པ་དང་། སྐྱེ་བའི་རྣམ་པར་འཕྲུལ་པ་དང་བཅས་མངོན་པར་རྫོགས་པར་བྱང་ཆུབ་པ་དང་། ཆོས་ཀྱི་འཁོར་ལོ་བསྐོར་བ་དང་། མྱ་ངན་ལས་འདའ་བའི་རྣམ་
པར་འཕྲུལ་བ་དང་བཅས། སངས་རྒྱས་ཀྱི་ཞིང་ཡོངས་སུ་དག་པའི་རྒྱན་དང་བཅས་པར་མཐོང་ངོ་། །དེ་བཞིན་གཤེགས་པ་དེ་དག་གི་སྤྲུལ་པའི་དཀྱིལ་འཁོར་སེམས་ཀྱི་སྐད་ཅིག་རེ་རེ་ལ་ཆོས་ཀྱི་དབྱིངས་ཐམས་ཅད་རྒྱས་
པར་འགེངས་པ་དེ་དག་ཐམས་ཅད་ཀྱང་ཁོ་མོས་མཐོང་བར་གྱུར་ཏོ། །རིགས་ཀྱི་བུ་དེ་ལྟར་ཁོ་མོའི་ལུས་སུ་བྱང་ཆུབ་སེམས་དཔའི་འོད་གཟེར་དེ་དག་དོང་མ་ཐག་ཏུ་ཁོ་མོའི་ལུས་ཀྱང་འགྲོ་བ་ཐམས་ཅད་ལས་མངོན་པར་འཕགས་

77-1-177b

པར་གྱུར་ཏེ། རུམ་ནམ་མཁའི་དབྱིངས་ལྟར་ཡངས་པར་གྱུར་ཀྱང་མིའི་ལུས་ལས་ལྷག་པར་ཡང་མི་སྣང་ངོ་། །ཕྱོགས་བཅུ་ན་བྱང་ཆུབ་སེམས་དཔའི་མངལ་གྱི་གནས་དང་། ཁང་ཁྱིམ་དང་རྒྱན་ཇི་སྙེད་ཅིག་
ཡོད་པ་དེ་དག་ཐམས་ཅད་ཀྱང་ཁོ་མོའི་ལུས་ཀྱི་ཁོངས་སུ་ཆུད་པ་དང་། ཁོ་མོའི་ལུས་སུ་ཤོང་བར་གྱུར་པར་སྣང་བར་གྱུར་ཏོ། །རིགས་ཀྱི་བུ་དེ་ལྟར་ཁོ་མོའི་ལུས་སུ་བྱང་ཆུབ་སེམས་དཔའི་མངལ་གྱི་གནས་དང་། ཁང་
ཁྱིམ་དང་རྒྱན་དང་ལོངས་སྤྱོད་བྱུང་བར་གྱུར་པ་དང་། དེའི་མོད་ལ་བྱང་ཆུབ་སེམས་དཔའ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་དཔའ་སྨོན་ལམ་གཅིག་པ་སྐལ་བ་མཉམ་པར་སྤྱོད་སྤྱོད་པ། 
དགེ་བའི་རྩ་བ་གཅིག་པ་རྒྱན་གཅིག་པ། རྣམ་པར་ཐར་པ་གཅིག་ལ་རྣམ་པར་སྤྱོད་པ། ཡེ་ཤེས་ཀྱི་ས་གཅིག་ལ་གནས་པ། རྣམ་པར་འཕྲུལ་པ་གཅིག་གིས་བྱུང་བ། སྨོན་ལམ་གཅིག་གིས་གྲུབ་པ། སྤྱོད་
པ་གཅིག་གིས་བྱུང་བ། ཆོས་ཀྱི་ལུས་ཡོངས་སུ་དག་པ། གཟུགས་ཀྱི་ལུས་མཐའ་དང་དབུས་མེད་པའི་བྱིན་གྱིས་རླབས་དང་ལྡན་པ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་དང་
རྣམ་པར་འཕྲུལ་པས་བྱུང་བ་དག་དང་། རིན་པོ་ཆེའི་ཀླུའི་དབང་པོའི་སྙིང་པོའི་ཁང་པ་བརྩེགས་པ་ན་འཁོད་ཅིང་། ཀླུའི་རྒྱལ་པོ་གངས་ཆེན་མཚོ་ལ་སྩོགས་པ་ཀླུའི་དབང་པོ་སྟོང་ཕྲག་བརྒྱད་ཅུ་དང་། འཇིག་རྟེན་གྱི་
དབང་པོ་ཐམས་ཅད་ཀྱིས་ཀྱང་མངོན་པར་མཆོད་ཅིང་། བྱང་ཆུབ་སེམས་དཔའི་རྣམ་པར་འཕྲུལ་པ་དགའ་ལྡན་གྱི་ཕོ་བྲང་ཐམས་ཅད་ནས་ཤི་འཕོ་ཡོངས་སུ་སྟོན་པས། དགའ་ལྡན་གྱི་གནས་རེ་རེ་ནས་ཀྱང་འཇིག་རྟེན་
གྱི་ཁམས་ཐམས་ཅད་དུ་འདུལ་བའི་གླིང་བཞི་པར་སྐྱེ་བ་ལེན་པ་ཡོངས་སུ་སྟོན་པ། སེམས་ཅན་ཡོངས་སུ་སྨིན་པར་བྱ་བའི་ཐབས་ཀྱི་ཚུལ་བསམ་གྱིས་མི་ཁྱབ་པ་ལ་མཁས་པའི་རྗེས་སུ་སོང་བ་དང་

77-1-178a

སེམས་ཅན་བག་མེད་པ་ཐམས་ཅད་ཡོངས་སུ་བསྐུལ་ཞིང་མངོན་པར་ཞེན་པ། ཐམས་ཅད་ལས་གྱེན་དུ་བསྐྱོད་པ་དང་། འོད་གཟེར་གྱི་དྲ་བ་ཆེན་པོ་རབ་ཏུ་དགྱེ་བས་འཇིག་རྟེན་གྱི་མུན་
པ་ཐམས་ཅད་རྣམ་པར་སེལ་བ་དང་། ངན་སོང་ཐམས་ཅད་ཀྱི་སྡུག་བསྔལ་ཞི་བར་བྱེད་པ་དང་། སེམས་ཅན་དམྱལ་བའི་ལམ་གྱི་རྒྱུད་ཐམས་ཅད་ནས་རྣམ་པར་ཟློག་པ་དང་། སེམས་ཅན་ཐམས་ཅད་ཀྱི་སྔོན་
གྱི་ལས་ཡོངས་སུ་བསྐུལ་བ་དང་། སེམས་ཅན་གྱི་ཁམས་ཐམས་ཅད་ཡོངས་སུ་སྐྱོབ་པ་དང་། སེམས་ཅན་ཐམས་ཅད་ལ་ལུས་མངོན་པར་སྟོན་པས་དགའ་ལྡན་གྱི་ཕོ་བྲང་ནས་འཕོས་ཏེ། འཁོར་དང་བཅས་པར་
ཁོ་མོའི་ལུས་སུ་ཞུགས་ནས་དེ་དག་ཐམས་ཅད་ཀྱང་ཁོ་མོའི་འཁོར་ན་གོམ་པ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཙམ་དུ་ཡངས་པ་ནས་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་
ཏུ་ཕྲ་བ་སྙེད་དུ་ཡངས་པའི་འགྲོས་ཀྱིས་རྒྱུ་ཞིང་སྤྱོད་དོ། །ཕྱོགས་བཅུའི་འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་ཀྱི་དེ་བཞིན་གཤེགས་པའི་ཞབས་ཀྱི་དྲུང་གི་བྱང་ཆུབ་སེམས་དཔའི་འཁོར་གྱི་དཀྱིལ་
འཁོར་བརྗོད་དུ་མེད་པ་དག་ཀྱང་སེམས་ཀྱི་སྐད་ཅིག་རེ་རེ་ལ་བྱང་ཆུབ་སེམས་དཔའི་མངལ་གྱི་གནས་དང་། །རྣམ་པར་འཕྲུལ་པ་ལྟ་བའི་ཕྱིར་ཁོ་མོའི་ཁོང་དུ་འདོང་ངོ་། །རྒྱལ་པོ་ཆེན་པོ་བཞི་དང་། 
བརྒྱ་བྱིན་དང་རབ་མཚེ་མ་དང་རབ་དགའ་ལྡན་དང་། །རབ་འཕྲུལ་དགའ་དང་། དབང་བསྒྱུར་གྱི་ལྷའི་དབང་པོ་རྣམས་དང་། ཚངས་པ་རྣམས་ཀྱང་མངལ་གྱི་གནས་ན་བཞུགས་པའི་བྱང་ཆུབ་སེམས་
དཔའ་ལ་བལྟ་བ་དང་ཕྱག་བྱ་བ་དང་། །བསྙེན་བཀུར་བ་དང་། །ཆོས་མཉན་པའི་གཏམ་ཉམས་སུ་མྱོང་བར་བྱ་བའི་ཕྱིར་ཉེ་བར་དོང་ཡང་ཁོ་མོའི་རུམ་འདིས་དེ་སྙེད་ཀྱི་འཁོར་གྱི་དཀྱིལ་འཁོར་གཅིག་ཡོངས་སུ་

77-1-178b

བཟུང་ཡང་ཡངས་པར་གྱུར་པ་ཡང་མེད། མིའི་ལུས་ཐ་མལ་པ་ལས་ཁོ་མོའི་ལུས་ཁྱད་པར་ཅན་དུ་གྱུར་པ་ཡང་མེད་མོད་ཀྱི། འཁོར་གྱི་དཀྱིལ་འཁོར་དེ་སྙེད་ཀྱང་ཡོངས་སུ་བཟུང་ངོ་། །ལྷ་
དང་མི་དེ་དག་ཐམས་ཅད་ཀྱིས་ཀྱང་བྱང་ཆུབ་སེམས་དཔའི་ལོངས་སྤྱོད་སྣ་ཚོགས་དང་། རྒྱན་ཡོངས་སུ་དག་པ་ཡང་མཐོང་བར་གྱུར་ཏོ། །དེ་ཅིའི་ཕྱིར་ཞེ་ན། དེ་ནི་བྱང་ཆུབ་སེམས་དཔའི་རྣམ་པར་
ཐར་པ་སྨོན་ལམ་ཆེན་པོའི་ཡེ་ཤེས་སྒྱུ་མའི་རྣམ་པ་འདི་ཉིད་ཤིན་ཏུ་བསྒོམས་པའི་ཕྱིར་རོ། །རིགས་ཀྱི་བུ་ཇི་ལྟར་ཁོ་མོ་བསྐལ་པ་དང་ལྡན་པའི་གླིང་བཞི་པ་འདིའི་འཛམ་བུའི་གླིང་ན་བྱང་ཆུབ་སེམས་དཔའ་
ཁོང་ན་ཡོངས་སུ་འཛིན་པ་དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་གླིང་བཞི་པ་ཐམས་ཅད་ཀྱི་འཛམ་བུའི་གླིང་དག་ན་ཡང་རྣམ་པར་འཕྲུལ་པའི་རྒྱན་གྱི་ཚུལ་འདི་ཉིད་ཀྱིས་ཡོངས་སུ་
འཛིན་པར་བྱེད་དེ། བྱང་ཆུབ་སེམས་དཔའི་རྣམ་པར་ཐར་པ་སྨོན་ལམ་ཆེན་པོའི་ཡེ་ཤེས་སྒྱུ་མའི་རྣམ་པ་འདི་ཉིད་ཤིན་ཏུ་བསྒོམས་པའི་ཕྱིར་ཁོ་མོའི་ལུས་འདི་གཉིས་སུ་གྱུར་པའང་མེད། མི་གཉིས་
པའང་མེད་དོ། །གཅིག་ལ་གནས་པ་ཡང་མེད། མང་པོ་ལ་གནས་པ་ཡང་མེད་དོ། །རིགས་ཀྱི་བུ་ཇི་ལྟར་ཁོ་མོ་བཅོམ་ལྡན་འདས་རྣམ་པར་སྣང་མཛད་འདིའི་ཡུམ་དུ་གྱུར་པ་དེ་བཞིན་དུ་སྔོན་གྱི་དེ་བཞིན་
གཤེགས་པ་མཐའ་དང་དབུས་མེད་པ་དག་གི་ཡང་ཡུམ་དུ་གྱུར་ཏོ། །ལ་ལ་ཞིག་ཏུ་བྱང་ཆུབ་སེམས་དཔའ་པད་མོའི་སྦུབས་ནས་རྫུས་ཏེ་སྐྱེ་བ་ཞིག་དུ་གྱུར་ན་ཡང་པད་མོའི་ཚལ་གྱི་ལྷ་མོར་གྱུར་ཅིང་ཁོ་
མོ་བྱང་ཆུབ་སེམས་དཔའ་ལེན་ཏེ། འཇིག་རྟེན་རྣམས་ཀྱིས་ཀྱང་ཁོ་མོ་ནི་བྱང་ཆུབ་སེམས་དཔའི་ཡུམ་ཡིན་པར་ཤེས་སོ། །ལ་ལ་ཞིག་ཏུ་ཐུ་བར་སྐྱེ་བར་གྱུར་ན་ཡང་དེ་དག་ཏུ་ཡང་ཁོ་མོས་ཐུ་བར་

77-1-179a

བླངས་ཏེ། བྱང་ཆུབ་སེམས་དཔའི་ཡུམ་དུ་གྱུར་ཏོ། །ལ་ལ་ཞིག་ཏུ་སངས་རྒྱས་ཀྱི་ཞིང་དུ་དེ་བཞིན་འབྱུང་བར་གྱུར་ན་ཡང་དེ་དག་ཏུ་འང་ཁོ་མོ་སྙིང་པོ་བྱང་ཆུབ་ཀྱི་ལྷ་མོར་གནས་གནས་སོ། །རིགས་ཀྱི་
བུ་ཐབས་ཀྱི་སྒོ་ཇི་སྙེད་ཅིག་གིས་བྱང་ཆུབ་སེམས་དཔའ་སྲིད་པའི་ཐ་མ་པ་འཇིག་རྟེན་དུ་འབྱུང་བ་ཡོངས་སུ་སྟོན་པ་དེ་སྙེད་ཀྱི་ཐབས་ཀྱི་སྒོས་ཁོ་མོ་བྱང་ཆུབ་སེམས་དཔའི་ཡུམ་དུ་གྱུར་ཏེ། རིགས་ཀྱི་བུ་
ཁོ་མོ་འཇིག་རྟེན་གྱི་ཁམས་འདི་ན་བཅོམ་ལྡན་འདས་རྣམ་པར་སྣང་མཛད་ཀྱི་བྱང་ཆུབ་སེམས་དཔའི་སྐྱེ་བའི་རྣམ་པར་འཕྲུལ་པ་ཡོངས་སུ་བསྟན་པ་དག་ཏུ་ཡུམ་དུ་གྱུར་པ། དེ་བཞིན་དུ་བཅོམ་ལྡན་
འདས་དེ་བཞིན་གཤེགས་པ་ལོག་པ་དད་སེལ་དང་། གསེར་ཐུབ་དང་བསོད་སྐྱབས་ཀྱི་ཡུམ་དུ་ཡང་གྱུར་ཏོ། །དེ་བཞིན་དུ་མ་བྱོན་པའི་དེ་བཞིན་གཤེགས་པ་བསྐལ་པ་བཟང་པོ་རྣམས་ཀྱི་ཡང་
ཡུམ་དུ་འགྱུར་ཏེ། འདི་ལྟར་བྱང་ཆུབ་སེམས་དཔའ་བྱམས་པ་དགའ་ལྡན་གྱི་གནས་ན་བཞུགས་ཤིང་ཤི་འཕོ་ཡོངས་སུ་སྟོན་པའི་དུས་ལ་བབ་པ་དང་། འོད་གཟེར་བྱང་ཆུབ་སེམས་དཔའ་ཐམས་ཅད་
སྐྱེ་བར་འབྱུང་ཞིང་མངལ་ན་བཞུགས་པའི་རྣམ་པར་འཕྲུལ་པ་ཡོངས་སུ་སྟོན་པའི་འོད་བཀྱེ་ནས་ཆོས་ཀྱི་དབྱིངས་ཐམས་ཅད་ཀྱི་ཚུལ་དང་གཞི་རབ་ཏུ་སྣང་བར་བྱས་ཏེ། ཆོས་ཀྱི་དབྱིངས་གྱི་ཚུལ་
གཞི་ཇི་སྙེད་ཅིག་ཏུ་བྱང་ཆུབ་སེམས་དཔའ་བྱམས་པས་མྱིའི་འཇིག་རྟེན་གྱི་མིའི་དབང་པོའི་རིགས་སུ་ཆེར་སྐྱེ་བ་ཡོངས་སུ་བསྟན་པས་སེམས་ཅན་གདུལ་བར་བྱ་བ་ཇི་སྙེད་ཅིག་ཡོད་པ་དེ་དག་ཐམས་
ཅད་དུ་འང་ཁོ་མོ་བྱང་ཆུབ་སེམས་དཔའི་ཡུམ་དུ་འགྱུར་རོ། །བྱང་ཆུབ་སེམས་དཔའ་བྱམས་པའི་ཡུམ་དུ་ཇི་ལྟར་འགྱུར་བ་དེ་བཞིན་དུ་བྱམས་པའི་འོག་ཏུ་བླ་ན་མེད་པ་ཡང་དག་པར་རྫོགས་

77-1-179b

པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བ། སེང་གེ་དང་དེ་བཞིན་དུ་རབ་ཏུ་སྣང་བ་དང་། དཔལ་དང་སྤྱན་བཟང་པོ་དང་། མེ་ཏོག་དང་། མེ་ཏོག་དཔལ་དང་། རྒྱས་པ་དང་། རྒྱལ་
དང་། ཐུགས་བཟང་པོ་དང་། རྡོ་རྗེ་དང་རྡུལ་དང་བྲལ་བ་དང་། ཟླ་བ་སྒྲོན་མ་འཛིན་པ་དང་། གྲགས་པ་དང་རྡོ་རྗེ་དག་པ་དང་། དོན་གཅིག་ཏུ་སྟོན་པ་དང་། མི་དཀར་ཡན་ལག་དང་། ཕ་རོལ་ཏུ་ཕྱིན་པ་
དང་། རིན་པོ་ཆེ་འོད་འཕྲོ་བའི་རི་བོ་དང་། སྒྲོན་མ་ཆེན་པོ་འཛིན་པ་དང་། པད་མོ་དམ་པ་དང་། སྒྲ་རྣམ་པར་གྲག་པ་དང་། ཡོན་ཏན་དཔག་ཏུ་མེད་པ་མངའ་བ་དང་། མར་མེའི་དཔལ་དང་། 
ཡན་ལག་རྣམ་པར་བརྒྱན་པ་དང་། ལེགས་པར་བཞུད་པ་དང་། བྱམས་པའི་དཔལ་དང་། སྤྲུལ་པ་བཟང་པོ་དང་། གནས་དང་བྲལ་བ་དང་། གཟི་བརྗིད་འབར་བ་དང་། གསུང་མཐའ་ཡས་
པ་དང་། ལེན་པ་མེད་པའི་སྤྱན་དང་། ལེན་པ་མེད་པའི་མུ་ཁྱུད་དང་། ཡིད་གཉིས་རྣམ་པར་སེལ་བ་དང་། ཡོངས་སུ་དག་པ་དང་། འོད་ཤིན་ཏུ་ཡངས་པ་དང་། གྲགས་པ་དག་པས་བྱུང་བ་དང་། 
སྤྲིན་གྱི་དཔལ་དང་། གཙུག་ཕུད་རྣམ་པར་མཛེས་པ་དང་། ཤིང་གི་རྒྱལ་པོ་དང་། རིན་པོ་ཆེའི་དཀྱིལ་འཁོར་རིན་པོ་ཆེ་ཐམས་ཅད་ཀྱིས་རྣམ་པར་བརྒྱན་པའི་ཁ་དོག་དང་། བློ་གྲོས་རྒྱ་མཚོ་དང་། རིན་པོ་ཆེ་
བཟང་པོ་དང་། སྟོབས་ལ་ཐུབ་པ་མེད་པ་དང་། དགོངས་པ་ཡོངས་སུ་རྫོགས་པ་དང་། དབང་ཕྱུག་ཆེན་པོ་དང་། དབང་པོའི་དཔལ་དང་། མེའི་དཔལ་དང་། མཆོག་གི་དཔལ་དང་། ཙན་
དན་གྱི་སྤྲིན་དང་། མི་དཀར་རིངས་ཀྱི་སྤྱན་དང་། བློ་གྲོས་དམ་པ་དང་། བློ་གྲོས་རྣམ་པར་བསྒོམ་པ་དང་། སྒྲུབ་པའི་རྒྱལ་པོ་དང་། སྤྱོད་པའི་རྒྱལ་པོ་དང་། རྡོ་རྗེ་བློ་གྲོས་དང་། 

77-1-180a

རྣམ་པར་བརྒྱན་པ་དང་། ཕུན་སུམ་སྣ་ཚོགས་དང་། ཟེ་བ་དགའ་བ་དང་། དབང་ཕྱུག་ལྷ་དང་། གཙུག་གཏོར་དཔལ་དང་། ཡེ་ཤེས་རྡོ་རྗེའི་རི་བོ་དང་། དཔལ་གྱི་སྙིང་པོ་དང་། 
གསེར་གྱི་དྲ་བས་སྐུ་རྣམ་པར་བརྒྱན་པ་དང་། ཤིན་ཏུ་རྣམ་པར་ཕྱེ་བ་དང་། དབང་ཕྱུག་ལྷ་དང་། དབང་ཆེན་ལྷ་དང་། མི་དམིགས་པའི་དཔལ་དང་། རྣམ་པར་དག་པས་དགྱེས་པ་དང་། 
འོད་འཕྲོ་མངའ་བ་དང་། ཆུའི་དཔལ་དང་། རྣམ་དག་བློ་གྲོས་དང་། ཐེག་པ་དམ་པ་དང་། མ་ཉམས་པའི་ཡོན་ཏན་འབྱུང་བ་དང་། དགྲ་ལས་དབེན་པ་དང་། གསུང་སྒྲོག་པ་དང་། 
དབང་དུ་གྱུར་པའི་ཡོན་ཏན་གཟི་བརྗིད་དང་། རྣམ་པར་སྣང་མཛད་དཔལ་དང་། དྲི་ཞིམ་པོའི་ལོངས་སྤྱོད་དང་། དྲི་ཞིམ་པོ་རྣམ་པར་ཕྱེ་བ་དང་། ཡན་ལག་རྣམ་པར་ཕྱེ་བ་དང་། ས་ག་
བཟང་པོ་དང་། ཞལ་ནས་སྤོས་ཐམས་ཅད་འོད་དུ་འཕྲོ་བ་དང་། རྡོ་རྗེ་རིན་པོ་ཆེས་རྣམ་པར་བརྒྱན་པ་དང་། རབ་ཏུ་བཞད་པའི་སྤྱན་པ་དང་། འདོད་ཆགས་རྡུལ་བཅོམ་དང་། སྐུ་
མཆོག་ཏུ་འཁྲུངས་པ་དང་། ལྷའི་དབྱིག་དང་། རླབས་ཆེན་ལྷ་དང་། འགོག་པར་གཞོལ་བ་དང་། ཐུགས་རྣམ་པར་སངས་རྒྱས་པ་དང་། རྡུལ་རྣམ་པར་བསྩལ་པ་དང་། འོད་འཕྲོ་
མངའ་ཆེན་དང་། ཉེ་བར་ཞི་བ་མངའ་བ་དང་། ས་གའི་ལྷ་དང་། རྡོ་རྗེ་རི་བོ་དང་། ཡེ་ཤེས་འོད་འཕྲོ་འབར་བའི་སྐུ་དང་། བདེ་བ་མཛད་པ་དང་། བསྐྲུན་པའི་སྟག་དང་། དགེ་བ་ཡོངས་སུ་
རྫོགས་པ་དང་། གྲགས་པ་ཡིད་དུ་འོང་བས་བཟང་བ་དང་། མཐུས་རྣམ་པར་གནོན་པ་དང་། དོན་དམ་པ་རྣམ་པར་གནོན་པ་དང་། ཞི་བའི་འོད་གཟེར་དང་། གཅིག་ཏུ་འཕགས་པ་དང་། དབྱངས་ཟབ་

77-1-180b

མོ་དང་། སའི་བདག་པོ་དང་། དཔག་ཏུ་མེད་པ་དང་། དབྱངས་ཀྱི་དཔལ་དང་། རྣམ་པར་གྲགས་པ་དང་། ལོངས་སྤྱོད་འཕྲུལ་པ་དང་། ལོངས་སྤྱོད་ཚོགས་པ་དང་། སྨན་པའི་དམ་པ་དང་། 
ཡོན་ཏན་ཟླ་བ་དང་། གཞན་པའི་གཟི་བརྗིད་དང་། ཡོན་ཏན་བསྩགས་པ་དང་། ཟླ་བ་འཕགས་པ་དང་། ཉི་མའི་ལྷ་དང་། འཇིགས་པར་གྲགས་པ་དང་། འོད་ཟེར་གྱི་ཞལ་དང་། སྩ་ལའི་དབང་པོའི་
ལྷུན་དང་། གྲགས་པ་དང་། སྨན་གྱི་རྒྱལ་པོ་དང་། རིན་ཅེན་མཆོག་དང་། བློ་གྲོས་རྡོ་རྗེ་དང་། དཀར་པོའི་དཔལ་དང་། གཞི་ཤིན་ཏུ་སྦྱངས་པ་དང་། རིན་ཅེན་རྒྱལ་པོ་དང་། གྲགས་པ་ཆེན་པོ་དང་། 
ཤུགས་དྲག་འཛིན་པ་དང་། མི་དཔོག་འོད་དང་། འོད་འཕྲོ་ཆེན་པོས་བཞུགས་པ་དང་། དོན་ཡོད་པའི་ཆོས་ལ་མངའ་བ་དང་། བརྩོན་འགྲུས་མ་ཉམས་པ་དང་། ལྷག་པའི་ལྷ་དང་། འོད་བརྟན་
པ་དང་། ཀུན་ཀྱི་བཤེས་གཉེན་དང་། རྣམ་པར་གྲོལ་བའི་དབྱངས་དང་། རྣམ་པར་བསྒྲགས་པའི་རྒྱལ་པོ་དང་། ཚིག་གཅོད་པ་དང་། ཙམ་པ་ཀ་དྲི་མ་མེད་པའི་འོད་དང་། ཁ་ན་མ་ཐོ་བ་མི་མངའ་
བ་དང་། ཟླ་བ་རྣམ་པར་འཕགས་པ་དང་། སྒྲོན་མ་འཛིན་པ་དང་། སྐུ་རྣམ་པར་མཛེས་པ་དང་། བརྗོད་དུ་མེད་པར་འཕགས་པ་དང་། འགྲོ་བའི་བཤེས་གཉེན་དང་། འོད་གཟེར་མང་པོ་དང་། དབྱངས་ཀྱི་ཡན་
ལག་དཔའ་བོ་དང་། ཆུའི་ལྷའི་སྤྱན་དང་། མོས་པའི་བློ་གྲོས་མངའ་བའི་གཟི་བརྗིད་དང་། མེ་ཏོག་ཀུན་དའི་དཔལ་དང་། མཆོད་པའི་ཟླ་བ་དང་། བློ་མི་མངའ་བ་དང་། ཆགས་པ་མི་མངའ་བ་དང་། མི་དམིགས་པའི་
བློ་གྲོས་དང་། ཕུང་པོ་བསྩགས་པ་དང་། ངན་སོང་རབ་ཏུ་འཇོམས་པ་དང་། མེ་ཏོག་དམ་པ་དང་། སེང་གེ་རྣམ་པར་སྒྲོག་པ་དང་། དོན་མི་དམའ་བ་དང་། སྒྲིབ་པ་མེད་པར་གཟིགས་པ་དང་། ཕ་རོལ་གྱི་ཚོགས་

77-1-181a

འཇོམས་པ་དང་། རླུང་གི་མུ་ཁྱུད་དང་། སྙིང་པོ་མི་གཡོ་བ་དང་། སྙིང་པོ་བཟང་པོ་དང་། གཞན་གྱིས་མི་ཐུབ་པའི་རི་བོ་དང་། མི་གནས་ཡེ་ཤེས་དང་། མཐའ་ཡས་བཞུགས་པ་དང་། གཡུལ་དུ་
བརྟན་པ་དང་། སྤྱོད་པས་གྲུབ་པ་དང་། བླ་མས་བོན་པ་དང་། མཆོག་ཏུ་དགའ་བ་དང་། རྗེས་སུ་འཛིན་པའི་ཟླ་བ་དང་། ལྷུན་མི་གཡོ་བ་དང་། ཐུགས་དྲག་པོ་དང་། ཐུགས་བརྩེ་བའི་བློ་གྲོས་དང་། ཤིན་ཏུ་མཐོ་འཛིན་དང་། 
འོད་གཟེར་མུ་ཁྱུད་དང་། མཚན་དཔེ་མེད་པ་དང་། གཟི་བརྗིད་མཉམ་པ་དང་། ཐམས་ཅད་ཁ་དོག་དང་། མཚན་མ་མེད་པའི་ཤེས་རབ་དང་། མི་གཡོ་བའི་ལྷ་དང་། བསམ་གྱིས་མི་ཁྱབ་པའི་དཔལ་དང་། རྣམ་པར་
ཐར་པའི་ཟླ་བ་དང་། བླ་ན་མེད་པའི་རྒྱལ་པོ་དང་། ཟླ་བའི་ཕུང་པོ་དང་། མཆོད་པའི་ཚངས་པ་དང་། སྤྱན་མི་འགྱུར་བ་དང་། བྱམས་པའི་རིགས་དང་། ཕྲིན་ལས་འཕགས་པ་དང་། གཉེར་བའི་ཆོས་ཀྱི་
བློ་གྲོས་དང་། བླ་ན་མེད་པའི་དཔལ་དང་ཚངས་པའི་ལྷ་དང་། ཡོན་ཏན་བསམ་གྱིས་མི་ཁྱབ་པའི་འོད་དང་། བླ་ན་མེད་པའི་ཆོས་ཀྱི་སྤྱོད་ཡུལ་དང་། མཐའ་ཡས་བཟང་པོ་དང་། ཚུལ་དང་འདྲ་བའི་གཟུངས་དང་། 
བྱང་ཆུབ་སེམས་དཔའ་ཤིན་ཏུ་མཐོ་བའི་ལྷ་དག་སྟེ། རིགས་ཀྱི་བུ་དེ་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་མ་བྱོན་པའི་དེ་བཞིན་གཤེགས་པ་བྱམས་པ་ལ་སྩོགས་ཏེ། སྨོན་པ་འདི་དག་ལ་སྩོགས་
པ་བསྐལ་པ་བཟང་པོའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱི་ཡུམ་དུའང་ཁོ་མོ་ཉིད་འགྱུར་རོ། །འཇིག་རྟེན་གྱི་ཁམས་འདིར་ཇི་ལྟ་བ་དེ་བཞིན་དུ་ཕྱོགས་
བཅུའི་འཇིག་རྟེན་གྱི་ཁམས་ཚད་མེད་པའི་ཆོས་ཀྱི་དབྱིངས་ཀྱི་ཚུལ་མཐའ་དང་དབུས་མེད་པ་ལ་ཞུགས་ཏེ། ཇི་ལྟར་དེ་བཞིན་གཤེགས་པ་བྱམས་པའི་ཡུམ་དུ་ཡོན་ཏན་གྱི་ཁྱད་པར་བརྗོད་དུ་མེད་པས་

77-1-181b

འགྱུར་བ་དེ་བཞིན་དུ་ཡོན་ཏན་གྱི་ཁྱད་པར་བརྗོད་དུ་མེད་པའི་ཡང་བརྗོད་དུ་མེད་པས་དེ་བཞིན་གཤེགས་པ་སེང་གེ་ནས་དེ་བཞིན་གཤེགས་པ་སྣང་བའི་བར་གྱི་ཡུམ་དུ་འགྱུར་རོ། །ཇི་ལྟར་དེ་བཞིན་གཤེགས་པ་བསྐལ་
པ་བཟང་པོ་བ་རྣམས་ཀྱི་ཡུམ་དུའང་འགྱུར་བ་དེ་བཞིན་དུ་འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ་འདི་ཐམས་ཅད་ཀྱི་འཇིག་རྟེན་གྱི་ཁམས་ཀྱི་རྒྱུད་ཐམས་ཅད་དང་། འཇིག་
རྟེན་གྱི་ཁམས་འབྱམ་ཀླས་པ་ཐམས་ཅད་ཀྱི་འཇིག་རྟེན་གྱི་ཁམས་ཐམས་ཅད་ན་འཛམ་བུ་གླིང་ཡོད་པ་ཐམས་ཅད་དུ་ཕྱི་མའི་མཐའི་མུར་ཐུགས་པའི་བསྐལ་པར་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱད་
པ་སྤྱོད་ཅིང་བསྐལ་པ་ཐམས་ཅད་དུ་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བར་བྱིན་གྱིས་བརླབས་ཏེ། མ་བྱོན་པའི་དེ་བཞིན་གཤེགས་པ་བྱང་ཆུབ་སེམས་དཔར་འགྱུར་བ་ཐམས་
ཅད་ཀྱི་ཡུམ་དུ་ཡང་འགྱུར་རོ། །དེ་སྐད་ཅེས་སྨྲས་པ་དང་། ཚོང་དཔོན་གྱི་བུ་ནོར་བཟངས་ཀྱིས་ལྷ་མོ་སྒྱུ་མ་ལ་འདི་སྐད་ཅེས་སྨྲས་སོ། །འཕགས་མ་ཁྱོད་ཀྱིས་བྱང་ཆུབ་སེམས་དཔའི་རྣམ་པར་ཐར་པ་སྨོན་
ལམ་ཆེན་པོའི་ཡེ་ཤེས་སྒྱུ་མའི་རྣམ་པས་རྣམ་པར་བརྒྱན་པ་འདི་བརྙེས་ནས་ཇི་སྲིད་ཅིག་ལགས། སྨྲས་པ། རིགས་ཀྱི་བུ་སྔོན་འདས་པའི་དུས་བསྐལ་པ་བསམ་གྱིས་མི་ཁྱབ་པ། སེམས་ཀྱི་
ཡུལ་ལས་འདས་པ་རིགས་དང་ལྡན་པའི་བྱང་ཆུབ་སེམས་དཔའི་མིག་གི་ལམ་གྱིས་རྣམ་པར་དམིགས་པ་རྣམ་པར་ཤེས་པས་བགྲང་བ་ལས་ཡོངས་སུ་འདས་པའི་ཕ་རོལ་གཅིག་ཏུ་བསྐལ་པ་དགེ་བའི་
འོད་ཅེས་བྱ་བ་ཞིག་བྱུང་སྟེ། བསྐལ་པ་དགེ་བའི་འོད་དེ་ལ་འཇིག་རྟེན་གྱི་ཁམས་རི་བོ་ཤིན་ཏུ་མཐོ་བའི་དཔལ་ཞེས་བྱ་བ་རྣམ་པར་དག་ལ་ཀུན་ནས་ཉོན་མོངས་པ་རིན་པོ་ཆེ་དུ་མ་ལས་གྲུབ་

77-1-182a

པ་འཁོར་ཡུག་དང་བཅས་པ་རི་རབ་དང་རྒྱ་མཚོར་བཅས་པ། འགྲོ་བ་ལྔའི་རྒྱུད་དང་བཅས་པ། སྣ་ཚོགས་བལྟ་ན་མཛེས་པ་ཞིག་བྱུང་སྟེ། འཇིག་རྟེན་གྱི་ཁམས་རི་བོ་ཤིན་ཏུ་མཐོ་བའི་
དཔལ་དེར་གླིང་བཞི་པ་བྱེ་བ་བརྒྱ་ཕྲག་བཅུ་བྱུང་སྟེ། གླིང་བཞི་པ་བྱེ་བ་བརྒྱ་ཕྲག་བཅུ་པོ་དེ་དག་གི་དབུས་ན་གླིང་བཞི་པ་དབུ་མ་སེང་གེ་རྒྱལ་མཚན་དམ་པའི་གཟི་བརྗིད་ཅེས་བྱ་བ་ཞིག་ཡོད་པར་གྱུར་ཏེ། 
གླིང་བཞི་པ་དེར་རྒྱལ་པོའི་གནས་བྱེ་བ་བརྒྱ་ཕྲག་བརྒྱད་ཅུ་བྱུང་བར་གྱུར་ཏོ། །རྒྱལ་པོའི་གནས་བྱེ་བ་བརྒྱ་ཕྲག་བརྒྱད་བཅུ་པོ་དེ་དག་གི་དབུས་སུ་རྒྱལ་པོའི་གནས་དབུ་མ་རྒྱལ་མཚན་གྱི་དམ་པ་དང་ལྡན་པ་
ཞེས་བྱ་བ་བྱུང་སྟེ། དེར་འཁོར་ལོས་བསྒྱུར་བའི་རྒྱལ་པོ་གཟི་བརྗིད་ཆེན་པོའི་མཐུ་ཞེས་བྱ་བ་བྱུང་ངོ་། །རྒྱལ་པོའི་གནས་རྒྱལ་མཚན་གྱི་དམ་པ་དང་ལྡན་པ་དེར་སྙིང་པོ་བྱང་ཆུབ་ཡལ་ག་སྣ་ཚོགས་
ཀྱི་འོད་ཅེས་བྱ་བ་ཞིག་བྱུང་སྟེ། དེ་ན་སྙིང་པོ་བྱང་ཆུབ་ཀྱི་ལྷ་མོ་མིག་གི་དཔལ་ཞེས་བྱ་བ་འདུག་འདུག་གོ། །སྙིང་པོ་བྱང་ཆུབ་ཡལ་ག་སྣ་ཚོགས་ཀྱི་འོད་དེ་ལ་བྱང་ཆུབ་སེམས་དཔའ་རྒྱལ་མཚན་དྲི་མ་
མེད་པ་ཞེས་བྱ་བ་ཞིག་ཐམས་ཅད་མཁྱེན་པ་ཉིད་ཀྱི་ཆོས་ཁོང་དུ་ཆུད་པར་བྱ་བའི་ཕྱིར་འདུག་པ་ལས་དེའི་ཐམས་ཅད་མཁྱེན་པ་ཉིད་ཀྱི་ཆོས་ཁོང་དུ་ཆུད་པར་བྱ་བ་ལ་བར་ཆད་བྱ་བའི་ཕྱིར་བདུད་ཁ་དོག་བཟང་
པོའི་འོད་ཅེས་བྱ་བ་བདུད་ཀྱི་སྡེ་ཆེན་པོའི་འཁོར་དང་ལྡན་པ་ཞིག་ལུས་མི་སྣང་བར་མ་བྱས་པར་དྲུང་དུ་ཕྱིན་པར་གྱུར་ཏོ། །འཁོར་ལོས་བསྒྱུར་བ་གཟི་བརྗིད་ཆེན་པོའི་མཐུ་དེ་ཡང་བྱང་ཆུབ་སེམས་དཔའི་དབང་
ཐོབ་པའི་རྫུ་འཕྲུལ་ཆེན་པོའི་རྣམ་པར་འཕྲུལ་པས་བྱུང་བ་ཞིག་སྟེ། དེས་བདུད་ཀྱི་སྡེ་དེ་བས་ཀྱང་འཕགས་ལ་ཆེས་མང་བའི་དཔུང་གི་ཚོགས་ཆེན་པོ་མངོན་པར་སྤྲུལ་ཏེ། བདུད་ཀྱི་སྡེ་ཕམ་

77-1-182b

པར་བྱ་བའི་ཕྱིར་སྙིང་པོ་བྱང་ཆུབ་དེའི་འཁོར་ཀུན་ནས་ཡོངས་སུ་བསྐོར་བ་དང་། དེས་བདུད་ཀྱི་སྡེ་ཆེན་པོ་དེ་ཡང་རྣམ་པར་གཏོར་བར་གྱུར་ཏེ། བཅོམ་ལྡན་འདས་དེ་བཞིན་གཤེགས་པ་རྒྱལ་མཚན་དྲི་མ་
མེད་པ་དེས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །དེ་ནས་སྙིང་པོ་བྱང་ཆུབ་ཀྱི་ལྷ་མོ་མིག་གི་དཔལ་གྱིས་འཁོར་ལོས་བསྒྱུར་བའི་རྒྱལ་པོ་གཟི་བརྗིད་
ཆེན་པོའི་མཐུ་ལ་བུའི་འདུ་ཤེས་བསྐྱེད་ནས། དེ་བཞིན་གཤེགས་པ་དེའི་ཞབས་གཉིས་ལ་ཕྱག་འཚལ་ནས་སྨོན་ལམ་བཏབ་དེ། བཅོམ་ལྡན་འདས་བདག་གང་དང་གང་དུ་སྐྱེས་པ་དེ་དང་དེར་འཁོར་ལོས་
བསྒྱུར་བ་གཟི་བརྗིད་ཆེན་པོའི་མཐུ་འདི་བདག་གི་བུར་གྱུར་ཅིག །ནམ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར་བ་དེའི་ཚེའང་། བདག་ཉིད་དེའི་མར་གྱུར་ཅིག་ཅེས་ནས་
དེས་སྨོན་ལམ་དེ་སྐད་དུ་བཏབ་སྟེ། སྙིང་པོ་བྱང་ཆུབ་ཡལ་ག་སྣ་ཚོགས་ཀྱི་འོད་དེ་ཉིད་ལ་གནས་ཤིང་བསྐལ་པ་འོད་བཟང་པོ་དེ་ཉིད་ལ་དེ་བཞིན་གཤེགས་པ་ཁྲག་ཁྲིག་ཕྲག་བཅུ་བསྙེན་བཀུར་ཏོ། །རིགས་
ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་སྙིང་པོ་བྱང་ཆུབ་ཀྱི་ལྷ་མོ་མིག་གི་དཔལ་ཞེས་བྱ་བར་གྱུར་པ་དེ་གཞན་ཞིག་ཡིན་པ་ཙམ་དུ་སེམས་ན་རིགས་ཀྱི་བུ་ཁྱོད་ཀྱིས་དེ་ལྟར་མི་བལྟ་སྟེ། ཁོ་མོ་ནི་དེའི་
ཚེ་དེའི་དུས་ན་སྙིང་པོ་བྱང་ཆུབ་ཀྱི་ལྷ་མོ་མིག་གི་དཔལ་ཞེས་བྱ་བར་གྱུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་འཁོར་ལོས་བསྒྱུར་བ་གཟི་བརྗིད་ཆེན་པོའི་མཐུ་ཞེས་བྱ་བ་བྱང་ཆུབ་
སེམས་དཔའི་དབང་ཐོབ་པ། རྫུ་འཕྲུལ་ཆེན་པོའི་རྣམ་པར་འཕྲུལ་པས་བྱུང་བ་བདུད་ཀྱི་སྡེ་ཆེན་པོ་རྣམ་པར་འཐོར་བར་བྱེད་བྱེད་པ་དེ་གཞན་ཞིག་ཡིན་པ་ཙམ་དུ་སེམས་ན་ནི་དེ་ལྟར་མི་བལྟ་སྟེ། བཅོམ་ལྡན་

77-1-183a

འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་འདི་ནི་དེའི་ཚེ་དེའི་དུས་ན་འཁོར་ལོས་བསྒྱུར་བའི་རྒྱལ་པོ་གཟི་བརྗིད་ཆེན་པོའི་མཐུ་ཞེས་བྱ་
བར་གྱུར་ཏོ། །རིགས་ཀྱི་བུ་དེ་ལྟར་ཁོ་མོ་དེ་ནས་ཉེ་བར་བཟུང་ནས་གང་དང་གང་དུ་སྐྱེས་པ་དེ་དག་ཐམས་ཅད་དུའང་འདི་ནི་ཁོ་མོའི་བུར་གྱུར་ཏེ། སངས་རྒྱས་ཀྱི་ཞིང་ཐམས་ཅད་དུ་བྱང་ཆུབ་སེམས་དཔའི་སྤྱད་
པ་སྤྱོད་ཅིང་འགྲོ་བའི་རྒྱུད་ཀྱི་སྒོ་ཐམས་ཅད་དང་། སྐྱེ་གནས་ཀྱི་སྒོ་ཐམས་ཅད་དང་། དགེ་བའི་རྩ་བའི་སྒོ་ཐམས་ཅད་དང་། བྱང་ཆུབ་སེམས་དཔའི་རྒྱུད་ཀྱི་ཚུལ་ཐམས་ཅད་དང་། སྐྱེས་པའི་རབས་
ཀྱི་ཚུལ་ཐམས་ཅད་དང་། ལྷའི་དབང་པོའི་ཚེ་ཐམས་ཅད་དང་། འཇིག་རྟེན་གྱི་དབང་པོའི་འགྲོ་བའི་རྒྱུད་ཐམས་ཅད་དང་། དབང་ཕྱུག་གི་ས་ཐམས་ཅད་དང་། འགྲོ་བའི་རྒྱུད་དུ་སྣང་བ་ཐམས་ཅད་
གང་དང་གང་སེམས་ཅན་ཡོངས་སུ་སྨིན་པར་བྱ་བའི་དོན་དུ་སྐྱེས་པར་གྱུར་པ་དེ་དག་ཐམས་ཅད་དུ་ཡང་ཁོ་མོ་ཉིད་འདིའི་ཡུམ་དུ་གྱུར་ཏེ། སྲིད་པ་ཐམས་ཅད་དུ་ཡང་ཁོ་མོ་ཉིད་དང་འབྲལ་བ་མེད་པར་
ཡུམ་དུ་གྱུར་ཏོ། །བྱང་ཆུབ་སེམས་དཔའི་སྐྱེ་བའི་སྒོ་ཐམས་ཅད་དུ་སྐད་ཅིག་སྐད་ཅིག་བྱང་ཆུབ་སེམས་དཔའི་སྐྱེ་བའི་རྣམ་པར་འཕྲུལ་པ་བསྟན་པར་གྱུར་པ་དེ་དག་ཐམས་ཅད་དུའང་ཁོ་མོ་ཉིད་འདིའི་
ཡུམ་དུ་གྱུར་ཏོ། །འདས་པའི་དེ་བཞིན་གཤེགས་པ་མཐའ་དང་དབུས་མེད་པ་ཚད་མེད་པ་དག་གི་ཡུམ་དུ་ཁོ་མོ་གྱུར་ཏེ། ཕྱོགས་བཅུའི་དེ་བཞིན་གཤེགས་པ་ད་ལྟར་བྱུང་བ་མཐའ་དང་དབུས་
མེད་པ་ཚད་མེད་པ་དག་གི་ཡུམ་དུ་ཡང་ཁོ་མོ་གྱུར་ཏེ། དེ་བཞིན་གཤེགས་པ་ཇི་སྙེད་ཅིག་གི་སྲིད་པ་ཐ་མ་ལ་ཁོ་མོ་བྱང་ཆུབ་སེམས་དཔའི་ཡུམ་དུ་གྱུར་པའི་དེ་བཞིན་གཤེགས་པ་དེ་དག་

77-1-183b

ཐམས་ཅད་ཀྱི་སྐུ་ལྟེ་བའི་དཀྱིལ་འཁོར་ནས་འོད་གཟེར་མང་པོ་བྱུང་ཞིང་ཁོ་མོའི་ལུས་དང་སེམས་རབ་ཏུ་སྣང་བར་མཛད་དོ། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་སྨོན་ལམ་
ཆེན་པོའི་ཡེ་ཤེས་སྒྱུ་མའི་རྣམ་པས་རྣམ་པར་བརྒྱན་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའི་སྙིང་རྗེ་ཆེན་པོའི་སྙིང་པོ་དང་ལྡན་པ་ཐམས་ཅད་མཁྱེན་པ་ཉིད་དུ་ཡོངས་སུ་སྨིན་པར་བྱ་བ་དང་། 
གདུལ་བས་མི་ངོམས་པའི་ལྟོ་ཅན་དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ། བ་སྤུའི་རྩེ་མོ་ལས་འབྱུང་བར་སྟོན་པ་ལ་དབང་བསྒྱུར་བ་དེ་དག་གི་སྤྱོད་པ་ཤེས་པ་འམ། ཡོན་ཏན་བརྗོད་
པར་ནུས་རེ་སྐན། སོང་རིགས་ཀྱི་བུ་སུམ་ཅུ་རྩ་གསུམ་གྱི་དབང་པོའི་གནས་དེ་ཉིད་ན་ལྷའི་བུ་དྲན་པ་དང་ལྡན་པའི་བུ་མོ་ལྷ་དབང་འོད་ཅེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་
དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིགས། དེ་ནས་ཚོང་དཔོན་གྱི་བུ་ནོར་བཟངས་ཀྱིས་ལྷ་མོ་སྒྱུ་མའི་རྐང་པ་གཉིས་ལ་སྤྱི་བོས་ཕྱག་འཚལ་
ཏེ། ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ་ལྷ་མོ་སྒྱུ་མའི་དྲུང་ནས་སོང་ངོ་།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་གཅིག་པ། དེ་ནས་ཚོང་དཔོན་གྱི་བུ་
ནོར་བཟངས་སུམ་ཅུ་རྩ་གསུམ་གྱི་དབང་པོའི་གནས་གང་ན་བ་དང་། ལྷའི་བུ་དྲན་པ་དང་ལྡན་པའི་བུ་མོ་ལྷ་དབང་འོད་གང་ན་བ་དེར་སོང་སྟེ་ཕྱིན་ནས། ལྷའི་བུ་མོ་ལྷ་དབང་འོད་ཀྱི་རྐང་པ་གཉིས་ལ་སྤྱི་
བོས་ཕྱག་འཚལ་ཏེ། ལྷའི་བུ་མོ་ལྷ་དབང་འོད་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ལྷའི་བུ་མོ་ལྷ་དབང་འོད་ཀྱི་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་

77-1-184a

ཅེས་སྨྲས་སོ། །འཕགས་མ་ལྷ་མོ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་
བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་མ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ་ཞེས་བདག་གིས་ཐོས་ན། འཕགས་མ་ལྷ་མོ་ཇི་ལྟར་བྱང་
ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བསྟན་དུ་གསོལ། དེ་སྐད་ཅེས་སྨྲས་པ་དང་། ལྷའི་བུ་མོ་ལྷ་དབང་འོད་ཀྱིས་ཚོང་དཔོན་གྱི་བུ་ནོར་བཟངས་ལ་འདི་
སྐད་ཅེས་སྨྲས་སོ། །རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་དྲན་པ་ཐོགས་པ་མེད་ལ་རྣམ་པར་དག་པས་བརྒྱན་པ་ཞེས་བྱ་བ་ཐོབ་པ་སྟེ། རིགས་ཀྱི་བུ་ཁོ་མོས་མངོན་པར་དྲན་པ་བསྐལ་པ་ཨུད་པ་ལ་ཞེས་
བྱ་བ་ཞིག་བྱུང་བ་ལ་ཁོ་མོས་དེ་བཞིན་གཤེགས་པ་ཆུ་ཀླུང་གང་གཱའི་བྱེ་མ་སྙེད་ཅིག་བསྙེན་བཀུར་ཏེ། དེ་དག་མངོན་པར་བྱུང་བའི་ཚེའང་ཡོངས་སུ་བསྲུང་བ་བྱས་སོ། །མཆོད་པ་བྱས་སོ། །ལོངས་སྤྱོད་པའི་དོན་དུ་བཟའ་ཤིང་གི་ར་བ་གསོལ་
ཏོ། །སངས་རྒྱས་བཅོམ་ལྡན་འདས་དེ་དག་བྱང་ཆུབ་སེམས་དཔར་གྱུར་ཏེ། ཡུམ་གྱི་སྐུ་ནི་བཞུགས་པ་དང་། བལྟམས་པ་དང་གཤེགས་སྟབས་བདུན་དུ་བཞུད་པ་དང་། སེང་གེའི་ང་རོ་ཆེན་པོ་བསྒྲགས་པ་དང་། གཞོན་ནུའི་ས་ལ་བཞུགས་པ་དང་། 
བཙུན་མོའི་འཁོར་གྱི་ནང་ན་བཞུགས་པ་འམ། མངོན་པར་འབྱུང་བ་འམ། བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་འམ། ཆོས་ཀྱི་འཁོར་ལོ་བསྐོར་བ་འམ། སངས་རྒྱས་ཀྱི་རྣམ་པར་འཕྲུལ་པ་ཐམས་ཅད་ཡོངས་སུ་སྟོན་པ་
མཛད་པའི་ཚེ། སེམས་ཅན་ཡོངས་སུ་སྨིན་པ་དང་། རྣམ་པར་གདུལ་བ་མཛད་པ་དེ་དག་ཐམས་ཅད་ཀྱང་ཐུགས་དང་པོ་བསྐྱེད་པ་ནས་ཉེ་བར་བཟུང་བ་ཚུན་ཅད་དམ་པའི་ཆོས་མཐར་ཐུག་པར་ཟད་ཀྱི་བར་དུ་ཁོ་མོས་ཤེས་སོ། །དྲན་ནོ་རྗེས་སུ་དྲན་ནོ། །

77-1-184b

བཟུང་ངོ་ཡོངས་སུ་བཟུང་ངོ་། །ཉེ་བར་བཟུང་ངོ་། །རྗེས་སུ་འབྲང་བར་བྱེད་དོ། །བསྐལ་པ་བཟང་པོ་ཞེས་བྱ་བ་ཞིག་བྱུང་བ་དེ་ལ། ཁོ་མོས་དེ་བཞིན་གཤེགས་པ་ཆུ་ཀླུང་གངྒཱ་བཅུའི་བྱེ་མ་སྙེད་ཅིག་བསྙེན་བཀུར་ཏོ། །བསྐལ་པ་གྲགས་པ་
བཟང་པོ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཅིག་བསྙེན་བཀུར་ཏོ། །བསྐལ་པ་དམིགས་སུ་མེད་པ་ཞེས་བྱ་བ་ཞིག་བྱུང་བ་དེ་ལ་ཁོ་མོས་སངས་རྒྱས་བྱེ་བ་ཁྲག་ཁྲིག་
བརྒྱ་སྟོང་ཕྲག་བརྒྱད་ཅུ་རྩ་བཞི་བསྙེན་བཀུར་ཏོ། །བསྐལ་པ་འོད་བཟང་པོ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་ཅིག་བསྙེན་བཀུར་ཏོ། །བསྐལ་པ་འོད་གཞལ་དུ་མེད་པ་ཞེས་བྱ་བ་ཞིག་
བྱུང་བ་དེ་ལ་ཁོ་མོས་དེ་བཞིན་གཤེགས་པ་ཆུ་ཀླུང་གངྒཱ་ཉི་ཤུའི་བྱེ་མ་སྙེད་ཅིག་བསྙེན་བཀུར་ཏོ། །བསྐལ་པ་དཔལ་ཤིན་ཏུ་འབར་བ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་ཆུ་ཀླུང་གང་གཱའི་བྱེ་མ་སྙེད་ཅིག་བསྙེན་བཀུར་
ཏོ། །བསྐལ་པ་སྙིང་རྗེ་བཟང་པོ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་ཆུ་ཀླུང་གངྒཱ་བརྒྱད་ཅུའི་བྱེ་མ་སྙེད་ཅིག་བསྙེན་བཀུར་ཏོ། །བསྐལ་པ་རྒྱལ་བར་གྱུར་པ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་
པ་ཆུ་ཀླུང་གངྒཱ་དྲུག་བཅུའི་བྱེ་མ་སྙེད་ཅིག་བསྙེན་བཀུར་ཏོ། །བསྐལ་པ་ཟླ་བ་བཟང་པོ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་ཆུ་ཀླུང་གངྒཱ་བདུན་ཅུའི་བྱེ་མ་སྙེད་ཅིག་བསྙེན་བཀུར་ཏོ། །རིགས་ཀྱི་བུ་དེ་ལྟར་ཚུལ་
དེ་བཞིན་དུ་ཁོ་མོ་རྟག་ཏུ་རྒྱུན་མི་ཆད་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་བྲལ་བར་མ་གྱུར་པ་ནི་བསྐལ་པ་ཆུ་ཀླུ་གངྒཱའི་བྱེ་མ་སྙེད་ཅིག་དྲན་ཏེ། ཁོ་མོས་དེ་བཞིན་
གཤེགས་པ་དེ་དག་ཐམས་ཅད་ལས་བྱང་ཆུབ་སེམས་དཔའི་རྣམ་པར་ཐར་པ་དྲན་པ་ཐོགས་པ་མེད་ལ་རྣམ་པར་དག་པས་བརྒྱན་པ་འདི་ཐོས་སོ། །ཐོས་ནས་ཀྱང་ཡོངས་སུ་བཟུང་ངོ་། །ཇི་སྐད་དུ་གསུངས་པ་བཞིན་

77-1-185a

དུ་ཁོང་དུ་ཆུད་དོ། །རྣམ་པར་ཐར་པ་འདི་ཉིད་ལ་ཁོ་མོས་རྟག་ཏུ་རྒྱུན་མ་ཆད་པར་རྗེས་སུ་ཞུགས་པར་གནས་གནས་ཏེ། དེ་བཞིན་གཤེགས་པ་དེ་དག་གི་བྱང་ཆུབ་སེམས་དཔའི་ས་ཉེ་བར་བཟུང་བ་ནས་དམ་པའི་
ཆོས་གནས་པ་ཟད་པའི་མཐར་ཐུག་གི་བར་གྱི་སངས་རྒྱས་ཀྱི་རྣམ་པར་འཕྲུལ་པ་ཇི་སྙེད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་རྣམ་པར་ཐར་པ་དྲན་པ་ཐོགས་པ་མེད་ལ་རྣམ་པར་དག་པས་བརྒྱན་པ་འདི་དྲན་ནོ། །
རྗེས་སུ་དྲན་ནོ། །བཟུང་ངོ་། །ཡོངས་སུ་བཟུང་ངོ་། །ཉེ་བར་བཟུང་ངོ་། །རྗེས་སུ་འབྲང་བར་བྱེད་དོ། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་མུན་པའི་མུན་ནག་དང་
བྲལ་བ། འཁོར་བའི་ནམ་ནངས་པ། སྒྲིབ་པ་དང་བྲལ་བ། གཉིད་མེད་པ་ལ་མོས་ཤིང་། དགའ་བ་སྙོམས་པ་དང་། ལེ་ལོ་རྣམ་པར་སྤངས་པ། ལུས་ཀྱི་འདུ་བྱེད་ཤིན་ཏུ་བྱུང་བ། རྟག་པར་ཆོས་ཐམས་ཅད་ཀྱི་རང་བཞིན་ཁོང་
དུ་ཆུད་པས་ཤིན་ཏུ་དག་པ། སྟོབས་བཅུ་རྣམ་པར་དག་པ་ཁོང་དུ་ཆུད་པ། དེ་དག་གི་སྤྱོད་པ་ཤེས་པ་འམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་གྲོང་ཁྱེར་ཆེན་པོ་སེར་སྐྱའི་གནས་ན་བྱིས་པའི་སློབ་དཔོན་ཀུན་
གྱི་བཤེས་གཉེན་ཞེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་
དགའ་རངས་ཏེ། མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས། དགེ་བའི་རྩ་བ་བསམ་གྱིས་མི་ཁྱབ་པའི་ཤུགས་དྲག་པོ་རྣམ་པར་འཕེལ་བས། ལྷའི་བུ་མོ་ལྷ་དབང་འོད་ཀྱིས་རྐང་པ་གཉིས་ལ་སྤྱི་བོས་
ཕྱག་འཚལ་ཏེ། ལྷའི་བུ་མོ་ལྷ་དབང་འོད་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། ལྷའི་བུ་མོ་ལྷ་དབང་འོད་ཀྱི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་

77-1-185b

སུམ་ཅུ་རྩ་གསུམ་གྱི་དབང་པོའི་གནས་ནས་བབས་ཏེ། མཐར་གྱིས་གྲོང་ཁྱེར་ཆེན་པོ་སེར་སྐྱའི་གནས་སུ་བྱིས་པའི་སློབ་དཔོན་ཀུན་གྱི་བཤེས་གཉེན་གང་ན་བ་དེར་སོང་སྟེ། ཕྱིན་ནས་བྱིས་པའི་སློབ་དཔོན་ཀུན་གྱི་བཤེས་
གཉེན་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། བྱིས་པའི་སློབ་དཔོན་ཀུན་གྱི་བཤེས་གཉེན་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། བྱིས་པའི་སློབ་དཔོན་ཀུན་གྱི་བཤེས་གཉེན་གྱི་
མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་པ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་
པ་ལ་བསླབ་པར་བགྱི་བ་དང་། ཇི་ལྟར་ནན་ཏན་ཏུ་བགྱི་བ་མ་འཚལ་ཏེ། འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ་ཞེས་བདག་གིས་ཐོས་ནས། ཇི་ལྟར་བྱང་ཆུབ་སེམས་
དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་ཏུ་བགྱི་བ་འཕགས་པས་བདག་ལ་བཀའ་སྩལ་དུ་གསོལ། དེ་སྐད་ཅེས་སྨྲས་པ་དང་། བྱིས་པའི་སློབ་དཔོན་ཀུན་གྱི་བཤེས་གཉེན་གྱིས་ཚོང་དཔོན་
གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཚོང་དཔོན་གྱི་བུ་བཟོ་མངོན་པར་ཤེས་པ་ཞེས་བྱ་བ་འདི་ནི་བྱང་ཆུབ་སེམས་དཔའ་ལས་ཡི་གེའི་ཤེས་པ་སློབ་སློབ་པ་ཡིན་གྱིས་འདིའི་གན་དུ་སོང་སྟེ་དྲིས་དང་། 
འདི་ནི་ཁྱོད་ལ་ཇི་ལྟར་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་ཏུ་བྱ་བ་སྟོན་པར་འགྱུར་རོ་ཞེས་ནས། ཚོང་དཔོན་གྱི་བུ་ནོར་བཟངས། ཚོང་དཔོན་གྱི་བུ་བཟོ་
མངོན་པར་ཤེས་པ་གང་ན་བ་དེར་སོང་སྟེ། ཚོང་དཔོན་གྱི་བུ་བཟོ་མངོན་པར་ཤེས་པའི་རྐང་པ་གཉིས་ལ་སྤྱི་བོས་ཕྱག་འཚལ་ནས། ཚོང་དཔོན་གྱི་བུ་བཟོ་མངོན་པར་ཤེས་པའི་མདུན་དུ་འདུག་སྟེ། ཐལ་མོ་སྦྱར་ནས་འདི་

77-1-186a

སྐད་ཅེས་སྨྲས་སོ། །འཕགས་པ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་ན། ཇི་ལྟར་བྱང་ཆུབ་སེམས་དཔའ་བྱང་ཆུབ་སེམས་དཔའི་
སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་ཏུ་བགྱི་བ་མ་འཚལ་ཏེ། འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ། །ཞེས་བདག་གིས་ཐོས་
ན། ཇི་ལྟར་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་ཏུ་བགྱི་བ་འཕགས་པས་བདག་ལ་བཀའ་སྩལ་དུ་གསོལ། དེས་སྨྲས་པ་རིགས་ཀྱི་བུ་
ཁོ་བོ་ནི་བྱང་ཆུབ་སེམས་དཔའི་རྣམ་པར་ཐར་པ་བཟོ་མངོན་པར་ཤེས་པ་དང་ལྡན་པ་ཐོབ་པ་སྟེ། རིགས་ཀྱི་བུ་དེ་ལྟར་ཁོ་བོ་ཡི་གེའི་མ་མོ་སློབ་པའི་ཚེ་ཡི་གེ་ཨ་བརྗོད་པ་དང་། བྱང་ཆུབ་སེམས་དཔའི་
མཐུས་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཡུལ་ཐ་མི་དད་པ་ཞེས་བྱ་བ་ཁོང་དུ་ཆུད་དོ། །ར་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་གཞིའི་བྱེ་བྲག་མཐའ་ཡས་པ་ཞེས་བྱ་བ་ཁོང་དུ་ཆུད་དོ། །པ་
ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཆོས་ཀྱི་དབྱིངས་ཀྱི་གཞི་ཡང་དག་པར་འདྲེན་པ་ཞེས་བྱ་བ་ཁོང་དུ་ཆུད་དོ། །ཙ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་འཁོར་ལོ་
རྣམ་པར་ཕྱེ་བ་ཀུན་ནས་གཅོད་པ་ཞེས་བྱ་བ་ཁོང་དུ་ཆུད་དོ། །ན་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་གནས་མྱེད་པས་གཞི་ཐུག་པ་མེད་པ་ཞེས་བྱ་བ་ཁོང་དུ་ཆུད་དོ། །ལ་ཞེས་བྱ་བ་བརྗོད་པ་
དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་མྱིང་དང་བྲལ་ཏེ། གནས་མྱེད་པས་དྲི་མ་མྱེད་པ་ཞེས་བྱ་བ་ཁོང་དུ་ཆུད་དོ། །ད་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སྦྱོར་བ་ཕྱིར་མྱི་ལྡོག་པ་

77-1-186b

ཞེས་བྱ་བ་ཁོང་དུ་ཆུད་དོ། །བ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་རྡོ་རྗེའི་དཀྱིལ་འཁོར་ཞེས་བྱ་བ་ཁོང་དུ་ཆུད་དོ། །ཊ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཀུན་ཏུ་འཁོར་
ལོ་ཞེས་བྱ་བ་ཁོང་དུ་ཆུད་དོ། །ཤ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་རྒྱ་མཚོའི་སྙིང་པོ་ཞེས་བྱ་བ་ཁོང་དུ་ཆུད་དོ། །བ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཀུན་ནས་
རྣམ་པར་འཕེལ་བར་རྣམ་པར་བསྒྲུབ་པ་ཞེས་བྱ་བ་ཁོང་དུ་ཆུད་དོ། །ཏ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སྐར་མའི་དཀྱིལ་འཁོར་ཞེས་བྱ་བ་ཁོང་དུ་ཆུད་དོ། །ཡ་ཞེས་བྱ་བ་བརྗོད་པ་དང་། ཤེས་
རབ་ཀྱི་ཕ་རོལ་ཏུ་ཕྱིན་པའི་སྒོ་ཕུང་པོ་ཐ་མྱི་དད་པ་ཞེས་བྱ་བ་ཁོང་དུ་ཆུད་དོ། །ཤྟ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་གདུང་བ་ཀུན་ནས་ཞི་བར་བྱས་པའི་འོད་ཅེས་བྱ་བ་ཁོང་དུ་ཆུད་དོ། །ཀ་ཞེས་བྱ་
བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སྤྲིན་ཐ་མྱི་དད་པ་ཞེས་བྱ་བ་ཁོང་དུ་ཆུད་དོ། །ས་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཆར་མངོན་པར་འབབ་པས་ཁྱབ་པ་ཞེས་བྱ་བ་ཁོང་
དུ་ཆུད་དོ། །མ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཤུགས་ཆེན་པོས་བརྒྱན་པའི་རྩེ་མོ་ཞེས་བྱ་བ་ཁོང་དུ་ཆུད་དོ། །ག་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཀུན་ནས་
རྣམ་པར་བསྒྲུབ་པ་ཞེས་བྱ་བ་ཁོང་དུ་ཆུད་དོ། །ཐ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་དེ་བཞིན་ཉིད་ཐ་མྱི་དད་པའི་སྙིང་པོ་ཞེས་བྱ་བ་ཁོང་དུ་ཆུད་དོ། །ཛ་ཞེས་བྱ་བ་བརྗོད་པ་དང་། ཤེས་
རབ་ཀྱི་ཕ་རོལ་ཏུ་ཕྱིན་པའི་སྒོ་འགྲོ་བའི་འཁོར་བ་རྣམ་པར་དག་པ་ལ་འཇུག་པ་ཞེས་བྱ་བ་ཁོང་དུ་ཆུད་དོ། །སྭ་ཞེས་བྱ་བ་རྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སངས་རྒྱས་ཐམས་ཅད་དྲན་པའི་བརྒྱན་པ་

77-1-187a

ཞེས་བྱ་བ་ཁོང་དུ་ཆུད་དོ། །དྷ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཆོས་ཀྱི་དཀྱིལ་འཁོར་རྣམ་པར་བྱུང་བ་རྣམ་པར་འབྱེད་པ་ཞེས་བྱ་བ་ཁོང་དུ་ཆུད་དོ། །ཤ་ཞེས་བྱ་བརྗོད་པ་
དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སངས་རྒྱས་ཐམས་ཅད་ཀྱི་གདམས་ངག་གི་འཁོར་ལོ་སྣང་བ་ཞེས་བྱ་བ་ཁོང་དུ་ཆུད་དོ། །ཁ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་
མངོན་པར་འདུ་བྱ་བའི་རྒྱུ་དང་སའི་ཡེ་ཤེས་ཀྱི་སྙིང་པོ་ཞེས་བྱ་བ་ཁོང་དུ་ཆུད་དོ། །ཀྴ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ལས་ཞི་བ་རྒྱ་མཚོའི་མཛོད་རྣམ་པར་འབྱེད་པ་ཞེས་བྱ་བ་ཁོང་
དུ་ཆུད་དོ། །སྟ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཉོན་མོངས་པ་ཐམས་ཅད་རྣམ་པར་འཐོར་བས་རྣམ་པར་དག་པའི་སྙིང་པོ་ཞེས་བྱ་བ་ཁོང་དུ་ཆུད་དོ། །ཉ་ཞེས་བྱ་བ་བརྗོད་པ་དང་། 
ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་འཇིག་རྟེན་འབྱུང་བ་རྣམ་པར་དམྱིགས་པ་ཞེས་བྱ་བ་ཁོང་དུ་ཆུད་དོ། །ཕ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་འཁོར་བ་དང་མྱི་མཐུན་པའི་འཁོར་
ལོའི་ཡེ་ཤེས་དཀྱིལ་འཁོར་ཅེས་བྱ་བ་ཁོང་དུ་ཆུད་དོ། །བྷ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་གནས་ཀྱི་དཀྱིལ་འཁོར་ཐམས་ཅད་རྣམ་པར་དམྱིགས་པར་བརྒྱན་པ་ཞེས་བྱ་བ་
ཁོང་དུ་ཆུད་དོ། །ཚ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་བསྩགས་པ་དམ་པའི་ཐབས་ཀྱི་སྤྱོད་པའི་གདུགས་ཀྱི་དཀྱིལ་འཁོར་ཐ་དད་པ་ཞེས་བྱ་བ་ཁོང་དུ་ཆུད་དོ། །སྨ་ཞེས་བྱ་བ་
བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སངས་རྒྱས་ཐམས་ཅད་ལྟ་བའི་ཕྱོགས་ལ་མངོན་དུ་གྱུར་པ་ཞེས་བྱ་བ་ཁོང་དུ་ཆུད་དོ། །ཧཱ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་

77-1-187b

སེམས་ཅན་ཐམས་ཅད་ཀྱི་མདོག་ལ་རྣམ་པར་ལྟ་བའི་སྟོབས་ཤིན་ཏུ་སྐྱེས་པ་རྒྱ་མཚོའི་སྙིང་པོ་ཞེས་བྱ་བ་ཁོང་དུ་ཆུད་དོ། །ཡས་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཡོན་
ཏན་རྒྱ་མཚོ་ཐམས་ཅད་ཀྱི་ནན་ཏན་རྟོགས་པར་འཇུག་པ་ཞེས་བྱ་བ་ཁོང་དུ་ཆུད་དོ། །གྷ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཆོས་ཐམས་ཅད་ཀྱི་སྤྲིན་ཡོངས་སུ་འཛིན་པའི་
རྒྱ་མཚོ་བརྟན་པ་ཞེས་བྱ་བ་ཁོང་དུ་ཆུད་དོ། །ཏ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སངས་རྒྱས་ཐམས་ཅད་ཀྱི་སྨོན་ལམ་གྱི་ཕྱོགས་སུ་མངོན་པར་འགྲོ་བ་ཞེས་བྱ་བ་ཁོང་
དུ་ཆུད་དོ། །ན་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཡི་གེ་འཁོར་ལོ་མྱི་ཟད་པའི་མཐའ་རྣམ་པར་འབྱེད་པ་ཞེས་བྱ་བ་ཁོང་དུ་ཆུད་དོ། །སྤ་ཞེས་བྱ་བ་བརྗོད་པ་དང་། ཤེས་རབ་ཀྱི་
ཕ་རོལ་ཏུ་ཕྱིན་པའི་སྒོ་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་མཐར་ཕྱིན་པའི་དཀྱིལ་འཁོར་ཅེས་བྱ་བ་ཁོང་དུ་ཆུད་དོ། །སྐ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སྙིང་པོ་སོ་
སོ་ཡང་དག་པར་རིགས་པ་ཐོགས་པ་མྱེད་པར་སྣང་བས་འཁོར་ལོ་རྒྱས་པར་འགེངས་པ་ཞེས་བྱ་བ་ཁོང་དུ་ཆུད་དོ། །ཡྨ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སངས་རྒྱས་ཐམས་ཅད་
ཀྱི་ཆོས་ཤིན་ཏུ་བསྟན་པའི་ཡུལ་ཞེས་བྱ་བ་ཁོང་དུ་ཆུད་དོ། །ཤྩ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སེམས་ཅན་གྱི་ནམ་མཁའ་ལས་ཆོས་ཀྱི་སྤྲིན་གྱི་འབྲུག་སྒྲ་བྱུང་བས་རྒྱས་པར་
འགེངས་པ་ཞེས་བྱ་བ་ཁོང་དུ་ཆུད་དོ། །ཐ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སེམས་ཅན་གྱི་དོན་བདག་མྱེད་པའི་དགོས་པ་མཐར་ཕྱིན་པར་ཟིན་པའི་སྒྲོན་མ་ཞེས་བྱ་བ་ཁོང་དུ་ཆུདོ། །

77-1-188a

དྷ་ཞེས་བྱ་བ་བརྗོད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཆོས་ཀྱི་འཁོར་ལོ་ཐ་མི་དད་པའི་སྙིང་པོ་ཞེས་བྱ་བ་ཁོང་དུ་ཆུད་དོ། །རིགས་ཀྱི་བུ་ཁོ་བོ་དེ་ལྟར་ཡི་གེའི་མ་མོ་སློབ་པའི་ཚེ། 
ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་དེ་དག་ལ་སྩོགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཚད་མེད་གྲངས་མེད་པ་ཞིག་ཁོང་དུ་ཆུད་དེ། རིགས་ཀྱི་བུ་དེ་ལྟར་ཁོ་བོ་ནི་བྱང་ཆུབ་སེམས་དཔའི་རྣམ་པར་ཐར་པ་
བཟོ་མངོན་པར་ཤེས་པ་དང་ལྡན་པ་འདི་ཐོབ་པ་སྟེ། རིགས་ཀྱི་བུ་ཁོ་བོས་དེ་ཤེས་པར་ཟད་ན། ཁོ་བོས་བྱང་ཆུབ་སེམས་དཔའི་འཇིག་རྟེན་དང་། འཇིག་རྟེན་ལས་འདས་པའི་བཟོའི་གནས་ཐམས་ཅད་
ཀྱི་ཕ་རོལ་ཏུ་ཕྱིན་པའི་མཆོག་ཐོབ་པ། བཟོའི་གནས་ཐམས་ཅད་ལ་འཇུག་པ་དང་། ཡི་གེ་དང་གྲངས་དང་རྩིས་དང་ཤོ་ཐམས་ཅད་ཁོང་དུ་ཆུད་པར་བྱ་བ་དང་། སྔགས་དང་སྨན་ཐམས་ཅད་ཀྱི་ཚུལ་ལ་
མཁས་པ་རབ་ཏུ་ཐོབ་པར་བྱ་བ་དང་། འབྱུང་པོ་དང་། གཟའ་དང་སྐར་མ་དང་། བརྗེད་བྱེད་དང་། བྱད་སྟེམས་དང་། རོ་ལངས་ཀྱི་གདོན་ཐམས་ཅད་གསོ་བ་དང་། སེམས་ཅན་གྱི་ཁམས་གསོ་བར་
བྱ་བའི་སྨན་དང་ཐབས་ཀྱི་རྒྱུས་དང་། ཁམས་ཀྱི་ཐབས་ཡོངས་སུ་བསྡུ་བའི་ཆོ་ག་དང་། གསེར་དང་ནོར་བུ་དང་མུ་ཏིག་དང་བཻ་ཌཱུརྱ་དང་། དུང་དང་མན་ཤེལ་དང་། བྱི་རུ་དང་། མུ་ཏིག་དམར་པོ་དང་། 
མུ་ས་ར་གལ་བ་དང་། ཀེ་ས་ར་དང་། དཔལ་གྱི་སྙིང་པོ་དང་། རིན་པོ་ཆེ་ཐམས་ཅད་འབྱུང་ཞིང་སྐྱེ་བ་དང་། རིགས་དང་འབྱུང་ཁུངས་དང་། རིན་ཐང་གི་རྒྱུས་ཤེས་པར་བྱ་བ་དང་། བཟའ་ཤིང་གི་
ར་བ་དང་། དཀའ་ཐུབ་ཀྱི་ནགས་ཚལ་དང་། གྲོང་དང་གྲོང་ཁྱེར་དང་། ལྗོངས་དང་ཁམས་དང་། རྒྱལ་པོའི་གནས་མངོན་པར་བསྒྲུབ་པ་དང་། རི་དགས་དང་། འཁོར་ལོ་དང་། མཚན་མ་བལྟ་བ་དང་། 

77-1-188b

སེམས་ཅན་གྱི་མཚན་གྱི་ལྟས་དང་། ས་གཡོ་བ་དང་། ཕྱོགས་ཚིག་པ་དང་། སྐར་མདའ་ལྷུང་བ་དང་། དགེ་མྱི་དགེ་དང་། མུ་གེ་དང་ལོ་ལེགས་པ་ལ་སྩོགས་པ་འཇིག་རྟེན་གྱི་ཡན་ལག་ཐམས་ཅད་ཀྱི་རྒྱུས་
ཁོང་དུ་ཆུད་པར་བྱ་བ་དང་། འཇིག་རྟེན་ལས་འདས་པའི་ཆོས་རྣམ་པར་ཕྱེ་བ་ཐམས་ཅད་བརྗོད་ཅིང་བསྟན་པ་དང་། ཁོང་དུ་ཆུད་པར་བྱ་བ་དང་། ཡང་དག་པ་ཉིད་རྗེས་སུ་རིག་པར་བྱ་བའི་རྒྱུས་ལ་སྒྲིབ་པའམ། 
ཐེ་ཙོམ་མམ། ཡིད་གཉིས་སམ། ནེམ་ནུར་རམ། ཚམ་ཚོམ་མམ། མགོ་རྨོངས་པ་འམ། འཁོར་བ་འམ། མྱི་བདེ་བ་འམ། སྒྱིད་ལུག་པ་འམ། མྱི་ཤེས་པ་འམ། ཁོང་དུ་མི་ཆུད་པ་མྱེད་པ་དེ་དག་
གི་སྤྱོད་པ་ཤེས་པ་འམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ་ཡུལ་མ་ག་ཏ་འདི་ཉིད་ཀྱི་ལྗོངས་དག་པ་ཞེས་བྱ་བའི་གྲོང་ཁྱེར་འཚོ་བ་ཞེས་བྱ་བ་ན་དགེ་སྙེན་མ་བཟང་མོའི་མཆོག་ཅེས་བྱ་བ་འདུག་
གིས་དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་ཏུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་གྱིས་ཚོང་དཔོན་
གྱི་བུ་བཟོ་མངོན་པར་ཤེས་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ཚོང་དཔོན་གྱི་བུ་བཟོ་མངོན་པར་ཤེས་པ་ལ་ལན་བརྒྱ་སྟོང་དུ་མར་གཡས་ཕྱོགས་སུ་སྐོར་བ་བྱས་ནས་ཡང་དང་ཡང་བལྟས་ཏེ། ཚོང་
དཔོན་གྱི་བུ་བཟོ་མངོན་པར་ཤེས་པའི་དྲུངས་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ལྗོངས་དག་པའི་གྲོང་ཁྱེར་འཚོ་བ་གང་ན་བ་དང་། དགེ་བསྙེན་མ་བཟང་མོའི་མཆོག་གང་ན་བ་དེར་སོང་སྟེ་ཕྱིན་ནས། དགེ་
བསྙེན་མ་བཟང་མོའི་མཆོག་གི་རྐང་པ་གཉིས་ལ་སྤྱི་བོས་ཕྱག་འཚལ་ནས། དགེ་བསྙེན་མ་བཟང་མོའི་མཆོག་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ཏེ། དགེ་བསྙེན་མ་བཟང་མོའི་

77-1-189a

མཆོག་གི་མདུན་དུ་འདུག་ནས་ཐལ་མོ་སྦྱར་སྟེ། འདི་སྐད་ཅེས་སྨྲས་སོ། །འཕགས་མ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་
དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་ཏུ་བགྱི་བ་མ་འཚལ་ཏེ། འཕགས་མ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ། །ཞེས་
བདག་གིས་ཐོས་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་ཏུ་བགྱི་བ་འཕགས་མ་བདག་ལ་བསྟན་དུ་གསོལ། དེས་སྨྲས་པ་རིགས་ཀྱི་
བུ་ཁོ་མོ་ནི་ཆོས་ཀྱི་རྣམ་གྲངས་གནས་མྱེད་པའི་དཀྱིལ་འཁོར་ཅེས་བྱ་བ་ཤེས་ཤིང་སྟོན་པ་སྟེ། ཁོ་མོ་ཐོགས་པ་མྱེད་པ་ཞེས་བྱ་བའི་ཏིང་ངེ་འཛིན་ཀྱང་ཐོབ་པོ། །ཏིང་ངེ་འཛིན་དེ་ནི་ཆོས་གང་ལ་ཡང་ཐོགས་པ་མྱེད་དེ། 
དེ་ལ་གནས་ན་ཐམས་ཅད་མཁྱེན་པ་ཉིད་དུ་མྱིག་ཐོགས་པ་མྱེད་པ་ལ་འཇུག་གོ། །ཐམས་ཅད་མཁྱེན་པ་ཉིད་དུ་རྣ་བ་ཐོགས་པ་མྱེད་པ་དང་། ཐམས་ཅད་མཁྱེན་པ་ཉིད་དུ་སྣ་ཐོགས་པ་མེད་པ་དང་། ཐམས་
ཅད་མཁྱེན་པ་ཉིད་དུ་ལྕེ་ཐོགས་པ་མེད་པ་དང་། ཐམས་ཅད་མཁྱེན་པ་ཉིད་དུ་ལུས་ཐོགས་པ་མེད་པ་དང་། ཐམས་ཅད་མཁྱེན་པ་ཉིད་དུ་ཡིད་ཐོགས་པ་མེད་པ་ཡང་རབ་ཏུ་འཇུག་གོ། །ཐམས་ཅད་
མཁྱེན་པ་ཉིད་ཀྱི་རླབས་ཐོགས་པ་མྱེད་པ་དང་། ཐམས་ཅད་མཁྱེན་པ་ཉིད་དུ་སྣང་བ་ཐོགས་པ་མྱེད་པ་དང་། ཐམས་ཅད་མཁྱེན་པ་ཉིད་དུ་ཤུགས་ཐོགས་པ་མྱེད་པ་འགྲོ་བ་རབ་ཏུ་སྣང་བའི་དཀྱིལ་
འཁོར་དག་ཀྱང་རབ་ཏུ་འཇུག་གོ། །རིགས་ཀྱི་བུ་ཁོ་མོ་ནི་ཆོས་ཀྱི་རྣམ་གྲངས་གནས་མེད་པའི་དཀྱིལ་འཁོར་འདི་ཤེས་ཤིང་ཁོང་དུ་ཆུད་པར་ཟད་ན། ཁོ་མོས་བྱང་ཆུབ་སེམས་དཔའི་སྤྱོད་པ་ཆགས་པ་མྱེད་

77-1-189b

པ་རྣམས་རིལ་གྱིས་ཤེས་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་ན་གྲོངས་ཁྱེར་རྒྱས་པའི་འགྲམ་ཞེས་པ་ཡོད་དེ། དེ་ན་གསེར་འཚོང་གཅེས་པ་གཏོང་བ་ཞེས་བྱ་བ་འདུག་གིས་དེའི་གན་
དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་དགེ་བསྙེན་མ་བཟང་མོའི་
མཆོག་གི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དགེ་བསྙེན་མ་བཟང་མོའི་མཆོག་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། དགེ་བསྙེན་
མ་བཟང་མོའི་མཆོག་གི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་མཐར་གྱིས་ལྷོ་ཕྱོགས་ཀྱི་རྒྱུད་དུ་སོང་སྟེ། གྲོང་ཁྱེར་རྒྱས་པའི་འགྲམ་དུ་གསེར་འཚོང་གཅེས་པ་གཏོང་བ་གང་ན་བ་དེར་
ཕྱིན་ཏེ། གསེར་འཚོང་གཅེས་པ་གཏོང་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མདུན་དུ་འདུག་ནས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །འཕགས་པ་བདག་གིས་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་ཏུ་བགྱི་བ་མ་ཚལ་ཏེ། 
འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ། །ཞེས་བདག་གིས་ཐོས་ནས། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་
པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་འཕགས་པས་བདག་ལ་བཀའ་བསྩལ་དུ་གསོལ། དེས་སྨྲས་པ་རིགས་ཀྱི་བུ་ཁོ་བོ་ནི་བྱང་ཆུབ་སེམས་དཔའི་རྣམ་པར་ཐར་པ་དྲན་པ་ཐོགས་

77-1-190a

པ་མྱེད་པ་ལ་རྣམ་པར་དག་པས་རྣམ་པར་བརྒྱན་པ་ཞེས་བྱ་བ་ཤེས་སྟེ། ཁོ་བོས་ནི་ཕྱོགས་བཅུའི་དེ་བཞིན་གཤེགས་པ་རྣམས་ཀྱི་ཞབས་ཀྱི་དྲུང་ན་ཆོས་ཡོངས་སུ་ཚོལ་བ་རྒྱུན་མི་
གཅོད་པའོ། །རིགས་ཀྱི་བུ་ཁོ་བོས་བྱང་ཆུབ་སེམས་དཔའི་རྣམ་པར་ཐར་པ་དྲན་པ་ཐོགས་པ་མྱེད་པ་ལ་རྣམ་པར་དག་པས་རྣམ་པར་བརྒྱན་པ་འདི་ཤེས་པར་ཟད་ན་ཁོ་བོས་བྱང་ཆུབ་སེམས་དཔའ་བག་ཚ་
བ་མྱེད་པར་སེང་གེའི་ང་རོ་སྒྲོག་པས་བསོད་ནམས་དང་ཡེ་ཤེས་ཆེན་པོ་ལ་གནས་པ་དེ་དག་གི་སྤྱོད་པ་ཤེས་པ་འམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་རྒྱས་པའི་འགྲམ་གྱིས་གྲོང་
ཁྱེར་འདི་ཉིད་ན་ཁྱིམ་བདག་ཟླ་བ་བཟང་པོ་ཞེས་བྱ་བ་རྟག་ཏུ་ཁྱིམ་སྣང་བར་གྱུར་པ་དང་ལྡན་པ་ཞིག་འདུག་གིས་དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་
བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་གསེར་འཚོང་གཅེས་པ་གཏོང་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། གསེར་འཚོང་
གཅེས་པ་གཏོང་བ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། གསེར་འཚོང་གཅེས་པ་གཏོང་བའི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་
ཁྱིམ་བདག་ཟླ་བ་བཟང་པོ་གང་ན་བ་དེར་སོང་སྟེ། ཁྱིམ་བདག་ཟླ་བ་བཟང་པོའི་རྐང་པ་གཉིས་ལ་སྤྱི་བོས་ཕྱག་འཚལ་ནས་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་
པ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་

77-1-190b

བ་མ་འཚལ་ཏེ། འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ། །ཞེས་བདག་གི་ཐོས་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་
དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་འཕགས་པ་བདག་ལ་བསྟན་དུ་གསོལ། སྨྲས་པ་རིགས་ཀྱི་བུ་ཁོ་བོས་ནི་རྣམ་པར་ཐར་པ་ཡེ་ཤེས་དྲི་མ་མྱེད་པའི་འོད་ཅེས་
བྱ་བ་ཐོབ་སྟེ། རིགས་ཀྱི་བུ་ཁོ་བོས་བྱང་ཆུབ་སེམས་དཔའི་རྣམ་པར་ཐར་པ་ཡེ་ཤེས་དྲི་མ་མྱེད་པའི་འོད་འདི་ཤེས་པར་ཟད་ན། ཁོ་བོས་བྱང་ཆུབ་སེམས་དཔའི་རྣམ་པར་ཐར་པ་ཚད་མེད་པ་ཐོབ་པ་
རྣམས་ཀྱི་སྤྱོད་པ་ཤེས་པ་འམ་ཡོན་ཏན་བརྗོད་པར་ནུས་རེས་སྐན། སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་གྲོང་ཁྱེར་རི་དགས་གནས་ཤེས་བྱ་བ་ཡོད་དེ། དེ་ན་ཁྱིམ་བདག་མྱི་ཕམ་སྡེ་
ཞེས་བྱ་བ་འདུག་གིས་དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་
བཟང་གི་ཁྱིམ་བདག་ཟླ་བ་བཟང་པོའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ཁྱིམ་བདག་ཟླ་བ་བཟང་པོ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་
བལྟས་ཏེ། ཁྱིམ་བདག་ཟླ་བ་བཟང་པོའི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་མཐར་གྱི་གྲོང་ཁྱེར་རི་དགས་ཀྱི་གནས་གང་ན་བ་དེར་སོང་སྟེ། ཁྱིམ་བདག་མི་ཕམ་སྡེ་གང་ན་བ་དེར་ཕྱིན་
ནས། ཁྱིམ་བདག་མི་ཕམ་སྡེའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མདུན་དུ་འདུག་ནས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །འཕགས་པ་བདག་གིས་བླ་ན་མེད་པ་ཡང་དག་པར་

77-1-191a

རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། 
འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ། །ཞེས་བདག་གིས་ཐོས་ནས། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་
བསླབ་པར་བགྱི་བ་དང་། ཇི་ལྟར་ནན་ཏན་ཏུ་བགྱི་བ་བདག་ལ་བཀའ་སྩལ་དུ་གསོལ། སྨྲས་པ་རིགས་ཀྱི་བུ་ཁོ་བོས་ནི་བྱང་ཆུབ་སེམས་དཔའི་རྣམ་པར་ཐར་པ་མྱི་ཟད་པའི་མཚན་ཉིད་ཅེས་
བྱ་བ་ཐོབ་པས་ནི། སངས་རྒྱས་མྱི་ཟད་པ་མཐོང་བའི་གཏེར་རབ་ཏུ་འཐོབ་པར་གྱུར་ཏོ། །སོང་རིགས་ཀྱི་བུ་ལྷོ་ཕྱོགས་ཀྱི་བརྒྱུད་འདི་ཉིད་ཀྱི་ཆོས་ཀྱི་ཡུལ་གྲུ་ན་བྲམ་ཟེ་ཞི་འཛིན་མཆོག་ཅེས་བྱ་བ་ཞིག་འདུག་
གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་སླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་ཁྱིམ་བདག་མྱི་ཕམ་
སྡེའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ཁྱིམ་བདག་མི་ཕམ་སྡེ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བསྟས་ཏེ། ཁྱིམ་བདག་མྱི་ཕམ་སྡེའི་དྲུང་ནས་སོང་ངོ་། །
དེ་ནས་ཚོང་དཔོན་གྱི་བུ་ནོར་བཟངས་མཐར་གྱིས་ཆོས་ཀྱི་ཡུལ་གྲུར་སོང་ནས། བྲམ་ཟེ་ཞི་འཛིན་མཆོག་གང་ན་བ་དེར་ཕྱིན་ཏེ། བྲམ་ཟེ་ཞི་འཛིན་མཆོག་གིས་རྐང་པ་གཉིས་པ་ལ་སྤྱི་བོས་ཕྱག་འཚལ་
ནས་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨས་སོ། །འཕགས་པ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་

77-1-191b

དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་ཏུ་བགྱི་བ་མ་འཚལ་ཏེ། འཕགས་པ་དག་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་
དོ། །ཞེས་བདག་གིས་ཐོས་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་འཕགས་པས་བདག་ལ་བཀའ་བསྩལ་དུ་གསོལ། དེ་
སྨྲས་པ་རིགས་ཀྱི་བུ་ཁོ་བོས་ནི་བདེན་པའི་བྱིན་གྱི་རླབས་ཀྱིས་སྤྱོད་པ་སྟེ། བདེན་པའི་ཚིག་གང་གིས་དུས་གསུམ་དུ་བྱང་ཆུབ་སེམས་དཔའ་གང་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ལས་ཕྱིར་མི་ལྡོག་ལྡོག་པར་མི་འགྱུར་ཞེ་ན། བདེན་པའི་ཚིག་གིས་བྱིན་གྱི་རླབས་དེས་བདག་གི་དགོས་པ་འདི་དང་འདི་ཞིག་གྲུབ་པར་ཤོག་ཤིག་ཅེས་བྱས་ན་ཡང་དེ་ཁོ་བོའི་བསམ་པ་ཐམས་ཅད་དེ་
བཞིན་དུ་འགྲུབ་པོ། །རིགས་ཀྱི་བུ་ཁོ་བོ་ནི་བདེན་པའི་བྱིན་གྱིས་རླབས་དེ་ལྟ་བུ་དགོས་པ་ཐམས་ཅད་གྲུབ་སྟེ། རིགས་ཀྱི་བུ་ཁོ་བོས་བདེན་པའི་བྱིན་གྱིས་རླབས་འདི་ཤེས་པར་ཟད་ན། ཁོ་བོས་བྱང་
ཆུབ་སེམས་དཔའ་བདེན་པའི་རྗེས་སུ་འབྲང་བའི་ཚིག་རབ་ཏུ་ཐོབ་པ་རྣམས་ཀྱི་སྤྱོད་པ་ཤེས་པ་འམ། ཡོན་ཏན་བརྗོད་པ་ནུ་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་གྲོང་ཁྱེར་ཡིད་
བཟང་པོའི་སྒོ་ཞེས་བྱ་བ་ཡོད་དེ། དེ་ན་ཁྱེའུ་དཔལ་འབྱུང་བ་ཞེས་བྱ་བ་དང་། བུ་མོ་དཔལ་གྱི་བློ་གྲོས་མ་ཞེས་བྱ་བ་གཉིས་ཤིག་འཁོད་ཀྱིས་དེའི་གན་དུ་སོང་ལ། ཇི་ལྟར་བྱང་ཆུབ་སེམས་དཔས་
བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟང་ཀྱི་ཆོས་ཀྱི་རིམ་གྲོ་ཆེར་བསྐྱེད་དེ། བྲམ་ཟེ་ཞི་འཛིན་མཆོག་གི་རྐང་པ་

77-1-192a

གཉིས་ལ་སྤྱི་བོས་ཕྱག་འཚལ་ནས། བྲམ་ཟེ་ཞི་འཛིན་མཆོག་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ཏེ། ཡང་དང་ཡང་བལྟས་ནས། བྲམ་ཟེ་ཞི་
འཛིན་མཆོག་གི་དྲུང་དུ་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་མཐར་གྱི་གྲོང་ཁྱེར་ཡིད་བཟང་པོའི་སྒོར་སོང་སྟེ། ཁྱེའུ་དཔལ་འབྱུང་བ་དང་། བུ་མོ་དཔལ་གྱི་བློ་གྲོས་མ་གང་ན་བ་དེར་ཕྱིན་
ནས་དེ་གཉིས་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མདུན་དུ་འདུག་ནས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །འཕགས་པ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་པ་བདག་ནི་བྱང་ཆུབ་
རྣམས་ལ་གདམས་ངག་དང་རྗེས་སུ་བསྟན་པ་མཛད་དོ། །ཞེས་བདག་གིས་ཐོས་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་
ནན་ཏན་དུ་བགྱི་བ་འཕགས་པ་དག་གིས་བདག་ལ་བཀའ་བསྩལ་དུ་གསོལ། དེ་ནས་ཁྱེའུ་དཔལ་འབྱུང་བ་དང་། བུ་མོ་དཔལ་གྱི་བློ་གྲོས་མས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲསོ། །
རིགས་ཀྱི་བུ་བདག་ཅག་གཉིས་ཀྱི་ནི་བྱང་ཆུབ་སེམས་དཔའི་རྣམ་པར་ཐར་པ་སྒྱུ་མའི་རྣམ་པ་ཞེས་བྱ་བ་ཐོབ་སྟེ། མངོན་དུ་བྱས་སོ་རིགས་ཀྱི་བུ་དེ་ལྟར་ཁོ་བོ་ཅག་རྣམ་པར་ཐར་པ་འདི་དང་ལྡན་པས། 
འཇིག་རྟེན་ཐམས་ཅད་སྒྱུ་མའི་རྣམ་པར་རྒྱུ་རྐྱེན་སྒྱུ་མ་ལས་བྱུང་བར་མཐོང་ངོ་། །ལས་དང་ཉོན་མོངས་པ་སྒྱུ་མར་ཤེས་པས། སེམས་ཅན་ཐམས་ཅད་ཀྱང་སྒྱུ་མའི་རྣམ་པར་ཤེས་སོ། །མ་རིགས་པ་དང་། 

77-1-192b

སྲིད་པ་དང་། སྲེད་པའི་རྒྱུ་ལས་བྱུང་བས་འགྲོ་བ་ཐམས་ཅད་ཀྱང་སྒྱུ་མའི་རྣམ་པར་མཐོང་ངོ་། །ཕན་ཚུན་གྱི་རྐྱེན་གྱི་རྒྱུ་ལས་བྱུང་བས་ཆོས་ཐམས་ཅད་ཀྱང་སྒྱུ་མའི་རྣམ་པར་མཐོང་ངོ་། །ཕྱིན་ཅི་ལོག་
གི་རྒྱུ་ལས་བྱུང་བས་ཁམས་གསུམ་ཐམས་ཅད་ཀྱང་སྒྱུ་མའི་རྣམ་པར་མཐོང་ངོ་། །ཡང་དག་པ་མ་ཡིན་པའི་རྟོག་པའི་རྒྱུས་བསྐྱེད་པས་སེམས་ཅན་ཐམས་ཅད་ཀྱི་ཤི་འཕོ་དང་། འབྱུང་བ་དང་། སྐྱེ་
བ་དང་། རྒ་ཤི་དང་། མྱ་ངན་དང་། སྨྲེག་སྔགས་འདོན་པ་དང་། སྡུག་བསྔལ་བ་དང་། འཁྲུག་པ་རྣམས་ཀྱང་སྒྱུ་མའི་རྣམ་པར་མཐོང་ངོ་། །འདུ་ཤེས་དང་སེམས་དང་ལྟ་བ་ཕྱིན་
ཅི་ལོག་གི་རྒྱུ་ལས་དངོས་པོ་མྱེད་པའི་འདུ་ཤེས་ཀྱིས་རྨོངས་ཏེ། བྱུང་བས་ཞིང་ཐམས་ཅད་ཀྱང་སྒྱུ་མའི་རྣམ་པར་མཐོང་ངོ་། །ཡེ་ཤེས་ཀྱིས་སྤོང་བའི་རྒྱུ་ལས་བརྟགས་ཏེ། བསྐྱེད་པས་ཉན་ཐོས་
དང་རང་སངས་རྒྱས་ཐམས་ཅད་ཀྱང་སྒྱུ་མའི་རྣམ་པར་མཐོང་ངོ་། །སྒྱུ་མར་མངོན་པར་བསྒྲུབ་པ་ལས་གྲུབ་སྟེ། སྤྲུལ་པའི་སྤྱོད་པ་དང་། འདུལ་བའི་སྒྱུ་མའི་རང་བཞིན་ལས་བྱང་ཆུབ་
སེམས་དཔའི་སྤྱོད་པ་དང་། སྨོན་ལམ་གྱི་སེམས་ཅན་ཡོངས་སུ་སྨིན་པར་བྱ་བ་དང་། གདུལ་བ་གཅིག་ནས་གཅིག་ཏུ་བརྒྱུད་པ་ཡང་སྒྱུ་མའི་རྣམ་པ་ལྟ་བུར་ཤེས་སོ། །སྨོན་ལམ་དང་ཡེ་ཤེས་
སྒྱུ་མའི་མངོན་པར་བསྒྲུབ་ཏེ། ཡུལ་བསམ་གྱིས་མི་ཁྱབ་པ་སྒྱུ་མའི་རང་བཞིན་ལས་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་གྱི་དཀྱིལ་འཁོར་ཡང་སྒྱུ་མར་མཐོང་ངོ་། །རིགས་
ཀྱི་བུ་བདག་ཅག་གཉིས་ཀྱིས་ནི་བྱང་ཆུབ་སེམས་དཔའི་རྣམ་པར་ཐར་པ་སྒྱུ་མའི་རང་བཞིན་འདི་ཤེས་པར་ཟད་ན། ཁོ་བོ་ཅག་གིས་བྱང་ཆུབ་སེམས་དཔའ་ལས་སྒྱུ་མ་མཐའ་ཡས་པས་རྣམ་པར་

77-1-193a

སྒྲུབ་པའི་དྲ་བ་ཁོང་དུ་ཆུད་པ་རྣམས་ཀྱི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། དེ་ནས་ཁྱེའུ་དཔལ་འབྱུང་བ་དང་། བུ་མོ་དཔལ་གྱི་བློ་གྲོས་མས་ཚོང་དཔོན་གྱི་བུ་ནོར་
བཟངས་དགེ་བའི་རྩ་བ་ཤུག་དྲག་པོ་བསམ་གྱི་མི་ཁྱབ་པས་མངོན་པར་བརླན་ནས་རང་གི་རྣམ་པར་ཐར་པའི་ཡུལ་བསྟན་ཏེ། འདི་སྐད་ཅེས་སྨྲས་སོ། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ཀྱི་ཕྱོགས་ཀྱི་
སྒོའི་གནས་རྒྱ་མཚོའི་འགྲམ་ཞེས་བྱ་བ་དེ་ན་བཟའ་ཤིང་གི་ར་བ་རྒྱན་ཆེན་པོ་ཞེས་བྱ་བ་ཡོད་དེ། དེའི་ནང་ན་ཁང་པ་བརྩེགས་པ་ཆེན་པོ་རྣམ་པར་སྣང་མཛད་ཀྱི་རྒྱན་གྱི་བརྒྱན་པའི་སྙིང་པོ་ཞེས་བྱ་བ་བྱང་ཆུབ་སེམས་དཔའི་
དགེ་བའི་རྩ་བ་རྣམ་པར་སྨིན་པ་ལས་མངོན་པར་གྲུབ་པ། བྱང་ཆུབ་སེམས་དཔའི་སེམས་དང་ཡིད་ལ་བྱ་བ་ལས་བྱུང་བ། བྱང་ཆུབ་སེམས་དཔའི་སྨོན་ལམ་ལས་མངོན་པར་སྐྱེས་པ། བྱང་ཆུབ་སེམས་དཔའི་དབང་ལས་
བྱུང་བ། བྱང་ཆུབ་སེམས་དཔའི་མངོན་པར་ཤེས་པའི་ཡེ་ཤེས་ཀྱི་སྟོབས་ཀྱི་སྤྲུལ་པ། བྱང་ཆུབ་སེམས་དཔའི་ཐབས་མཁས་པ་ལས་བྱུང་བ། བྱང་ཆུབ་སེམས་དཔའི་བསོད་ནམས་དང་ཡེ་ཤེས་ཀྱི་སྟོབས་ཀྱིས་
རྫོགས་པ། བྱང་ཆུབ་སེམས་དཔའི་སྙིང་རྗེ་ཆེན་པོས་སེམས་ཅན་རྣམ་པར་གདུལ་བའི་དོན་དུ་བསྟན་པ། བྱང་ཆུབ་སེམས་དཔའི་བྱིན་གྱི་རླབས་རྣམ་པར་ཕྱེ་བས་བསྒྲུབ་པ། བྱང་ཆུབ་སེམས་དཔའི་རྣམ་པར་
ཐར་པ་བསམ་གྱི་མི་ཁྱབ་པའི་གནས་ལ་འཇུག་པའི་རྒྱན་གྱི་བརྒྱན་པ་ཡོད་དེ། དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཞེས་བྱ་བ་སྐྱེ་བའི་ས་ལ་གནས་པའི་མྱི་རྣམས་རྗེས་སུ་
བཟུང་བ་དང་། ཕ་དང་མ་དང་ཉེ་དུར་གྱུར་པ་རྣམས་ཡོངས་སུ་སྨིན་པར་བྱེད་པ་དང་། དེར་སྐྱེས་པའི་བྱང་ཆུབ་སེམས་དཔའ་སྐལ་བ་མཉམ་པ་རྣམས་ཀྱི་ཐེག་པ་ཆེན་པོ་རབ་ཏུ་བསྟན་པར་བྱ་བ་དང་། དེ་མ་ཡིན་པའི་སེམས་ཅན་

77-1-193b

གཞན་རྣམས་ཀྱང་གར་འོས་པའི་སར་དགེ་བའི་རྩ་བས་ཡོངས་སུ་སྨིན་པར་བྱ་བ་དང་། རང་གི་རྣམ་པར་ཐར་པའི་ཚུལ་ལ་འཇུག་པར་བྱ་བ་ཡོངས་སུ་བསྟན་པ་དང་བྱང་ཆུབ་སེམས་དཔའི་སྐྱེ་བ་ལ་དབང་
བསྒྱུར་བ་ཐམས་ཅད་ཀྱི་རྗེས་སུ་སོང་བ་རབ་ཏུ་བརྗོད་པ་དང་། སེམས་ཅན་ཐམས་ཅད་ཀྱི་སྐྱེ་བ་ཡོངས་སུ་བསྟན་པ་ལ་མངོན་པར་གཞོལ་བར་བྱ་བས་སེམས་ཅན་ཡོངས་སུ་སྨིན་པར་བྱ་བ་མི་གཏང་བ་དང་། འགྲོ་
བ་ཐམས་ཅད་ཡོངསུ་གཟུང་བ་མྱི་སྨན་པས་བྱང་ཆུབ་སེམས་དཔའི་སྙིང་རྗེ་ཆེན་པོའི་སྟོབས་བསྟན་པར་བྱ་བ་དང་། བྱང་ཆུབ་སེམས་དཔའ་གནས་གཞི་རྟེན་ཐམས་ཅད་ལས་གྱེན་དུ་འཕགས་པ་ཁོང་དུ་ཆུད་པར་བྱ་བ་དང་
གནས་མེད་པ་ལ་གཞོལ་བར་སྲིད་པར་སྐྱེ་བ་ཐམས་ཅད་ན་གནས་པར་ཡོངས་སུ་བསྟན་པའི་དོན་དུ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ཡོངསུ་དྲི་བ་དང་། 
ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་ལམ་ཡོངས་སུ་དག་པར་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་བསླབ་པ་ལ་ནན་ཏན་དུ་བྱ་བ་དང་། ཇི་ལྟར་བྱང་ཆུབ་སེམས་
དཔས་བྱང་ཆུབ་ཀྱི་སེམས་ཡོངསུ་སྦྱང་བར་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྨོན་ལམ་མངོན་པར་བསྒྲུབ་པར་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་
ཚོགས་ཡོངསུ་བསག་པར་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་ས་ཡོངས་སུ་གནོན་པར་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ཡོངས་སུ་
རྫོགས་པར་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་བཟོད་པ་ལ་འཇུག་པར་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་ནན་ཏན་གྱི་ཡོན་ཏན་ལ་གནས་པར་བྱ་

77-1-194a

བ་དང་། ཇི་ལྟར་བྱང་ཆུབ་སེམས་དཔས་དགེ་བའི་བཤེས་གཉེན་བསྙེན་བཀུར་བར་བྱ་བ་དྲིས་ཤིག །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔའ་བྱམས་པ་ཞེས་བྱ་བ་དེ་ནི། བྱང་ཆུབ་སེམས་དཔའི་
སྤྱོད་པ་ཐམས་ཅད་ལ་ཞུགས་པའོ། །དེ་ནི་སེམས་ཅན་ཐམས་ཅད་ཀྱི་སེམས་དང་བསམ་པ་རྟོགས་པར་ཁོང་དུ་ཆུད་པའོ། །དེ་ནི་སེམས་ཅན་ཐམས་ཅད་ཀྱི་སྤྱོད་པ་ལ་རྗེས་སུ་ཞུགས་པའོ། །དེ་ནི་སེམས་ཅན་ཐམས་
ཅད་ཡོངས་སུ་སྨིན་པར་བྱ་བ་དང་། གདུལ་བ་ལ་མངོན་དུ་གྱུར་པའོ། །དེ་ནི་ཕ་རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་པར་བྱས་པའོ། །དེ་ནི་བྱང་ཆུབ་སེམས་དཔའི་ས་ཐམས་ཅད་ལ་རབ་ཏུ་གནས་
པའོ། །དེས་ནི་བྱང་ཆུབ་སེམས་དཔའི་བཟོད་པ་ཐམས་ཅད་རབ་ཏུ་ཐོབ་པའོ། །དེ་ནི་བྱང་ཆུབ་སེམས་དཔའི་སྐྱོན་མེད་པར་ཞུགས་པའོ། །དེ་ནི་ལུང་བསྟན་པ་ཐམས་ཅད་ཡང་དག་པར་བླང་བའོ། །དེ་ནི་བྱང་
ཆུབ་སེམས་དཔའི་རྣམ་པར་ཐར་པ་ཐམས་ཅད་ལ་རྣམ་པར་བརྩེ་བའོ། །དེ་ནི་སངས་རྒྱས་ཀྱི་བྱིན་གྱིས་རླབས་ཐམས་ཅད་ཡོངས་སུ་བླང་བའོ། །དེ་ནི་དེ་བཞིན་གཤེགས་པ་ཐམས་ཅད་ཀྱི་ཐམས་ཅད་མཁྱེན་
པའི་ཡེ་ཤེས་ཀྱི་ཡུལ་ལ་དབང་བསྐུར་བས་མངོན་པར་དབང་བསྐུར་བའོ། །རིགས་ཀྱི་བུ་དགེ་བའི་བཤེས་གཉེན་དེ་ཁྱོད་ལ་དགེ་བའི་རྩ་བ་ཐམས་ཅད་ཀྱི་ནི་མངོན་པར་བརླན་པར་བྱེད་དོ། །བྱང་ཆུབ་ཏུ་སེམས་སྐྱེད་
པ་ནི་རྣམ་པར་འཕེལ་བར་བྱེད་དོ། །ལྷག་པའི་བསམ་པའི་དབྱིངས་ནི་རབ་ཏུ་བརྟན་པར་བྱེད་དོ། །དགེ་བའི་རྩ་བ་ཐམས་ཅད་ནི་ཤིན་ཏུ་བྱང་བར་བྱེད་དོ། །བྱང་ཆུབ་སེམས་དཔའི་དབང་པོའི་ཤུགས་ནི་ཡང་དག་པར་འཕེལ་
བར་བྱེད་དོ། །ཆོས་ཀྱི་ཕྱོགས་སྒྲིབ་པ་མེད་པ་ནི་ཡོངས་སུ་སྟོན་པར་བྱེད་དོ། །གཞི་ཀུན་ཏུ་ཟུག་པའི་ས་ཁོང་དུ་ཆུད་པར་བྱ་བ་ནི་རྟོགས་པར་བྱེད་དོ། །བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་གྱི་སར་འབྱུང་

77-1-194b

བའི་སྒོ་ལ་ནི་གཞོག་པར་བྱེད་དོ། །བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པ་དང་། སྨོན་ལམ་གྱིས་ཡོན་ཏན་ཡོངས་སུ་འགྲུབ་པ་ནི་ཡང་དག་པར་རྗོད་པར་འགྱུར་རོ། །བྱང་ཆུབ་སེམས་དཔའ་ཀུན་དུ་བཟུང་
པོའི་སྤྱོད་པ་ཐོབ་པར་བྱ་བའི་སྐྱེ་བའི་སྒོ་ནི་ཡོངས་སུ་སྟོན་པར་འགྱུར་གྱིས། རིགས་ཀྱི་བུ་ཁྱོད་དགེ་བའི་རྩ་བ་གཅིག་ལ་ཆགས་པར་མ་བྱེད་གཅིག་ཀུན་ལ་ཆོས་ཀྱི་སྒོའི་འོད་སྣང་བ་གཅིག་ལ་གཞོལ་བར་
མ་བྱེད་གཅིག །སྤྱོད་པ་གཅིག་ཡོངས་སུ་རྫོགས་པས་ཆོག་པར་མ་སེམས་ཤིག །སྨོན་ལམ་ཅིག་པུ་མངོན་པར་བསྒྲུབ་པ་ལྷུར་མ་ལེན་ཅིག །ལུང་བསྟན་པ་གཅིག་གིས་མཐར་ཐུག་པས་རྒྱུན་གཅད་པར་
མ་བྱེད་ཅིག །གཟོད་པ་གསུམ་ལ་འཇུག་པས་ཆོག་པར་བྱ་བའི་འདུ་ཤེས་སུ་མ་བྱེད་ཅིག །ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱ་བ་རྒྱུན་མ་གཅོད་ཅིག །ས་བཅུ་ཐོབ་པས་མཐར་ཐུག་པར་མ་
བྱེད་ཅིག །སངས་རྒྱས་ཀྱི་ཞིང་ཚད་ཡོད་པ་ཡོངསུ་བཟུང་བ་དང་། ཡོངས་སུ་དག་པར་བྱ་བར་མ་སྨོན་ཅིག །དགེ་བའི་བཤེས་གཉེན་ཚད་ཡོད་པ་དགའ་བར་བྱ་བ་དང་། བསྙེན་བཀུར་བས་ངོམས་པར་མ་བྱེད་
ཅིག །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔའ་ནི་དགེ་བའི་རྩ་བ་ཚད་མེད་པ་ཡོངས་སུ་བསྡུ་བར་བྱ་དགོས་སོ། །བྱང་ཆུབ་སེམས་དཔའི་ཚོགས་ཚད་མེད་པ་ཤིན་ཏུ་བསྒྲུབ་དགོས་སོ། །བྱང་
ཆུབ་སེམས་དཔའི་སེམས་ཀྱི་རྒྱུ་ཚད་མེད་པ་ཡོངས་སུ་བསྩགས་དགོས་སོ། །ཡོངས་སུ་བསྔོ་བའི་ཚུལ་ཚད་མེད་པ་ལ་བསླབ་པར་བྱ་དགོས་སོ། །སེམས་ཅན་གྱི་ཁམས་ཚད་མེད་པ་ཡོངས་སུ་སྨིན་པར་བྱ་
དགོས་སོ། །སེམས་ཅན་གྱི་བསམ་པའི་ཁམས་ཚད་མེད་པ་ལ་ཡོངས་སུ་འཇུག་པར་བྱ་དགོས་སོ། །སེམས་ཅན་གྱི་དབང་པོ་ཚད་མེད་པ་ཡོངས་སུ་ཤེས་པར་བྱ་དགོས་སོ། །སེམས་ཅན་གྱི་མོས་པ་ཚད་མེད་

77-1-195a

པའི་རྗེས་སུ་འབྲང་བར་བྱ་དགོས་སོ། །སེམས་ཅན་གྱི་སྤྱོད་པ་ཚད་མྱེད་པ་ཁོང་དུ་ཆུད་པར་བྱ་དགོས་སོ། །སེམས་ཅན་ཚད་མེད་པ་གདུལ་བར་བྱ་དགོས་སོ། །ཉོན་མོངས་པ་དང་བག་ལ་ཉལ་བ་ཚད་
ད་མེད་པ་ཡང་དག་པར་གཞོམ་དགོས་སོ། །ལས་ཀྱི་སྒྲིབ་པ་ཚད་མེད་པ་ཡོངས་སུ་སྦྱང་དགོས་སོ། །ལྟ་བའི་རྣམ་པ་ཚད་མེད་པ་རྣམ་པར་བཟློག་དགོས་སོ། །སེམས་ཀྱི་ཀུན་ནས་ཉོན་མོངས་པ་ཚད་མེད་པ་སྩལ་
བར་བྱ་དགོས་སོ། །སེམས་རྣམ་པར་དག་པ་ཚད་མེད་པ་བསྐྱེད་པར་བྱ་དགོས་སོ། །སྡུག་བསྔལ་གྱི་ཟུག་རྔུ་ཚད་མེད་པ་ཡང་དག་པར་འབྱུང་དགོས་སོ། །སྲིད་པའི་རྒྱ་མཚོ་ཚད་མེད་པ་ཡོངས་སུ་བསྐམ་པར་
བྱ་དགོས་སོ། །མ་རིག་པའི་མུན་པ་ཚད་མེད་པ་རྣམ་པར་བསལ་དགོས་སོ། །ང་རྒྱལ་གྱི་རི་ཚད་མེད་པ་རབ་ཏུ་བསྙིལ་དགོས་སོ། །འཁོར་བའི་བཅིངས་པ་ཚད་མེད་པ་ཤིན་ཏུ་གཏུབ་དགོས་སོ། །སྲིད་པའི་ཆུ་བོ་ཚད་
མེད་པ་བརྒལ་དགོས་སོ། །ཚོར་བའི་རྒྱ་མཚོ་ཚད་མེད་པ་བསྐམ་དགོས་སོ། །སེམས་ཅན་འདོད་པའི་འདམ་དུ་ཐོགས་པ་ཚད་མེད་པ་ཡོངས་སུ་དགྲོལ་དགོས་སོ། །སེམས་ཅན་ཁམས་གསུམ་གྱི་ཁྱིམ་དུ་ཐོགས་
པ་ཚད་མེད་པ་གདོན་པར་བྱ་དགོས་སོ། །སེམས་ཅན་ཚད་མེད་པ་འཕགས་པའི་ལམ་ལ་དགོད་དགོས་སོ། །འདོད་ཆགས་དང་ཞེ་སྡང་དང་གཏི་མུག་གི་སྤྱོད་པ་ཚད་མེད་པ་རབ་ཏུ་ཞི་བར་བྱ་དགོས་སོ། །བདུད་ཀྱིས་
ཞགས་པ་ཚད་མེད་པ་ལས་ཡང་དག་པར་འདའ་བར་བྱ་དགོས་སོ། །བདུད་ཀྱི་ལས་ཚད་མེད་པ་རྣམ་པར་བཟློག་དགོས་སོ། །བྱང་ཆུབ་སེམས་དཔའི་ལྷག་པའི་བསམ་པའི་ཁམས་ཚད་མྱེད་པ་ཡོངསུ་སྤྱད་དགོས་སོ། །བྱང་
ཆུབ་སེམས་དཔའི་སྦྱོར་བ་ཚད་མེད་པ་རྣམ་པར་འཕེལ་བར་བྱ་དགོས་སོ། །བྱང་ཆུབ་སེམས་དཔའི་དབང་པོ་ཚད་མེད་པ་ཡོངས་སུ་བསྐྱེད་དགོས་སོ། །བྱང་ཆུབ་སེམས་དཔའི་མོས་པ་ཚད་མེད་པ་ཡོངསུ་སྦྱང་དགོས་སོ། །

77-1-195b

བྱང་ཆུབ་སེམས་དཔའི་མཉམ་པ་ཉིད་ཚད་མེད་པ་ལ་འཇུག་པར་བྱ་དགོས་སོ། །བྱང་ཆུབ་སེམས་དཔའི་སྤྱོད་པའི་ཁྱད་པར་ཚད་མེད་པའི་རྗེས་སུ་འབྲང་བར་བྱ་དགོས་སོ། །བྱང་ཆུབ་སེམས་དཔའི་ཡོན་ཏན་ཚད་མེད་པ་
ཡོངས་སུ་དག་པར་བྱ་དགོས་སོ། །བྱང་ཆུབ་སེམས་དཔས་བྱ་བའི་སྤྱོད་པ་ཚད་མེད་པ་ཡོངས་སུ་རྫོགས་པར་བྱ་དགོས་སོ། །འཇིག་རྟེན་གྱི་སྤྱོད་པ་ཚད་མེད་པའི་རྗེས་སུ་འབྲང་བར་བྱ་དགོས་སོ། །འཇིག་རྟེན་
གྱི་རྗེས་སུ་འབྲང་བ་ཚད་མྱེད་པ་ཡོངས་སུ་བསྟན་དགོས་སོ། །དད་པའི་སྟོབས་ཚད་མེད་པ་ཡོངས་སུ་བསྐྱེད་དགོས་སོ། །བརྩོན་འགྲུས་ཀྱི་སྟོབས་ཚད་མེད་པ་ཉེ་བར་བརྟན་དགོས་སོ། །དྲན་པའི་སྟོབས་ཚད་མྱེད་
པ་ཡོངས་སུ་དག་པར་བྱ་དགོས་སོ། །ཏིང་ངེ་འཛིན་གྱི་སྟོབས་ཚད་མེད་པ་ཡོངས་སུ་རྫོགས་པར་བྱ་དགོས་སོ། །ཤེས་རབ་ཀྱི་སྟོབས་ཚད་མེད་པ་བསྐྱེད་པར་བྱ་དགོས་སོ། །མོས་པའི་སྟོབས་ཚད་མེད་པར་བསྟན་
པ་བྱ་དགོས་སོ། །བསོད་ནམས་ཀྱི་སྟོབས་ཚད་མེད་པ་ཡང་དག་པར་བསྒྲུབ་དགོས་སོ། །ཡེ་ཤེས་ཀྱི་སྟོབས་ཚད་མེད་པ་རྣམ་པར་སྤེལ་དགོས་སོ། །བྱང་ཆུབ་སེམས་དཔའི་སྟོབས་ཚད་མེད་པ་ཡང་དག་
པར་བསྒྲུབ་དགོས་སོ། །སངས་རྒྱས་ཀྱི་སྟོབས་ཚད་མྱེད་པ་ཡོངས་སུ་རྫོགས་པར་བྱ་དགོས་སོ། །ཆོས་ཀྱི་སྒོ་ཚད་མེད་པ་རབ་ཏུ་དབྱེ་དགོས་སོ། །ཆོས་ཀྱི་ཕྱོགས་ཚད་མེད་པ་ལ་འཇུག་པར་བྱ་དགོས་སོ། །
ཆོས་ཀྱི་སྒོ་ཚད་མེད་པ་ཡོངས་སུ་སྦྱང་དགོས་སོ། །ཆོས་ཀྱི་སྣང་བ་ཚད་མེད་པ་ཡང་དག་པར་བསྐྱེད་དགོས་སོ། །ཆོས་ཀྱི་བསྩལ་བ་ཚད་མེད་པ་རབ་ཏུ་བྱ་དགོས་སོ། །དབང་པོའི་རྒྱུད་ཚད་མེད་པ་སྣང་བར་བྱ་
དགོས་སོ། །ཉོན་མོངས་པའི་ནད་ཚད་མེད་པ་ཡོངས་སུ་ཤེས་པར་བྱ་དགོས་སོ། །ཆོས་ཀྱི་སྨན་ཚད་མེད་པ་ཡང་དག་པར་བསྡུ་དགོས་སོ། །ཉོན་མོངས་པའི་ནད་ཀྱིས་བཏབ་པའི་སེམས་ཅན་གྱི་ཁམས་ཚད་མེད་པ་

77-1-196a

གསོ་དགོས་སོ། །བདུད་རྩིའི་ཚོགས་ཚད་མེད་པ་ཡང་དག་པར་བསྡུ་བར་བྱ་དགོས་སོ། །སངས་རྒྱས་ཀྱི་ཞིང་ཚད་མེད་པ་འདའ་བར་བྱ་དགོས་སོ། །དེ་བཞིན་གཤེགས་པ་ཚད་མེད་པ་མཆོད་པར་
བྱ་དགོས་སོ། །བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཚད་མེད་པར་འཇུག་པར་བྱ་དགོས་སོ། །དེ་བཞིན་གཤེགས་པའི་བསྟན་པ་ཚད་མེད་པ་ཡོངསུ་གཟུང་བར་བྱ་དགོས་སོ། །སེམས་ཅན་གྱི་
གནོད་པ་ཚད་མེད་པ་བཟོད་པར་བྱ་དགོས་སོ། །མི་ཁོམ་པ་དང་། ངན་སོང་གི་ལམ་ཚད་མེད་པ་ཡོངས་སུ་གཅད་དགོས་སོ། །སེམས་ཅན་གྱི་བདེ་བ་ཚད་མེད་པ་ཉེ་བར་བསྒྲུབ་དགོས་སོ། །སེམས་ཅན་
བསྡུ་བ་ཚད་མེད་པ་བྱེད་དགོས་སོ། །གཟུངས་ཀྱི་སྒོ་ཚད་མེད་པ་ཡོངསུ་སྦྱང་དགོས་སོ། །སྨོན་ལམ་གྱི་སྒོ་ཚད་མེད་པ་མངོན་པར་བསྒྲུབ་དགོས་སོ། །བྱམས་པ་ཆེན་པོ་དང་། སྙིང་རྗེ་ཆེན་པོའི་སྟོབས་
ཚད་མེད་པ་ཡོངསུ་སྒོམ་དགོས་སོ། །ཆོས་ཡོངས་སུ་བརྩལ་བ་ལ་བརྩོན་པར་བྱ་བ་ཚད་མེད་པ་རྒྱུན་མི་གཅད་པར་བྱ་དགོས་སོ། །ངེས་པར་རྟོགས་པའི་སྟོབས་ཚད་མྱེད་པའི་རྗེས་སུ་འཇུག་དགོས་སོ། །མངོན་
པར་ཤེས་པ་མངོན་དུ་བསྒྲུབ་པ་ཚད་མེད་པ་བསྐྱེད་དགོས་སོ། །རིགས་པ་དང་ཡེ་ཤེས་ཀྱི་སྣང་བ་ཚད་མེད་པ་རྣམ་པར་དག་པར་བྱ་དགོས་སོ། །སེམས་ཅན་གྱི་རྒྱུད་ཚད་མེད་པའི་རྗེས་སུ་འགྲོ་བར་བྱ་དགོས་སོ། །
སྲིད་པར་སྐྱེ་བ་ཚད་མེད་པ་ཡོངསུ་གཟུང་དགོས་སོ། །ལུས་རྣམ་པར་ཕྱེ་བ་ཚད་མེད་པ་ཡོངས་སུ་བསྟན་དགོས་སོ། །སྐད་རྣམ་པར་ཕྱེ་བ་ཚད་མེད་པ་ཡོངས་སུ་ཤེས་པར་བྱ་དགོས་སོ། །སེམས་ཅན་གྱི་སེམས་
རྣམ་པ་ཐ་དད་པ་ཚད་མེད་པ་ཁོང་དུ་ཆུད་པར་བྱ་དགོས་སོ། །བྱང་ཆུབ་སེམས་དཔའི་སྤྱོད་ཡུལ་རྒྱ་ཆེན་པོའི་རྗེས་སུ་འཇུག་པར་བྱ་དགོས་སོ། །བྱང་ཆུབ་སེམས་དཔའི་གནས་ཤིན་ཏུ་ཡངས་པར་རྗེས་སུ་སྤྱད་

77-1-196b

དགོས་སོ། །བྱང་ཆུབ་སེམས་དཔའི་རྣམ་པར་སྤྱོད་པ་ཟབ་མོ་ལ་རྣམ་པར་བལྟ་དགོས་སོ། །བྱང་ཆུབ་སེམས་དཔའི་ཡུལ་རྟོགས་པར་དཀའ་བ་ཁོང་དུ་ཆུད་པར་བྱ་དགོས་སོ། །བྱང་ཆུབ་སེམས་དཔའི་
ལམ་བགྲོད་པར་དཀའ་བ་དགྲོད་པར་བྱ་དགོས་སོ། །བྱང་ཆུབ་སེམས་དཔའི་ཤུགས་བསྒྲུབ་པར་དཀའ་བ་ཡོངས་སུ་གཟུངས་དགོས་སོ། །བྱང་ཆུབ་སེམས་དཔའི་སྐྱོན་མེད་པ་འཇུག་པར་དཀའ་བ་ལ་འཇུག་པར་བྱ་
དགོས་སོ། །བྱང་ཆུབ་སེམས་དཔའི་སྤྱོད་པ་རྣམ་པ་སྣ་ཚོགས་ཁོང་དུ་ཆུད་པར་བྱ་དགོས་སོ། །བྱང་ཆུབ་སེམས་དཔའི་རྣམ་པར་འཕྲུལ་པ་ཐམས་ཅད་དུ་ཁྱབ་པ་ཀུན་ཏུ་བསྟན་དགོས་སོ། །བྱང་ཆུབ་སེམས་དཔའི་ཆོས་ཀྱི་
སྤྲིན་ཡོངསུ་གཟུང་དགོས་སོ། །བྱང་ཆུབ་སེམས་དཔའི་སྤྱོད་པའི་དྲ་བ་མཐའ་དང་དབུས་མེད་པ་རབ་ཏུ་རྒྱས་པར་བྱ་དགོས་སོ། །བྱང་ཆུབ་སེམས་དཔས་ཕ་རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་པར་བྱ་དགོས་སོ། །
བྱང་ཆུབ་སེམས་དཔས་ལུང་བསྟན་པ་ཚད་མེད་པར་ཡང་དག་པར་གནོན་དགོས་སོ། །བྱང་ཆུབ་སེམས་དཔའ་བཟོད་པའི་སྒོ་དཔག་ཏུ་མེད་པ་ལ་འཇུག་པར་བྱ་དགོས་སོ། །བྱང་ཆུབ་སེམས་དཔའ་གྲངས་མྱེད་པ་ཡོངས་
སུ་སྦྱང་བར་བྱ་དགོས་སོ། །བྱང་ཆུབ་སེམས་དཔས་ཆོས་ཀྱི་སྒོ་དཔག་ཏུ་མེད་པ་ཡོངས་སུ་དག་པར་བྱ་དགོས་སོ། །བྱང་ཆུབ་སེམས་དཔས་སངས་རྒྱས་ཀྱི་ཞིང་བརྗོད་དུ་མེད་པ་ཡོངས་སུ་སྦྱང་དགོས་སོ། །བྱང་ཆུབ་སེམས་
དཔས་བསྐལ་པ་མཐའ་ཡས་པར་གོ་ཆ་བགོ་དགོས་སོ། །བྱང་ཆུབ་སེམས་དཔས་དེ་བཞིན་གཤེགས་པ་དཔག་ཏུ་མེད་པ་མཆོད་པར་བྱ་དགོས་སོ། །བྱང་ཆུབ་སེམས་དཔའ་སྨོན་ལམ་མངོན་པར་བསྒྲུབ་པ་བསམ་གྱི་མི་
ཁྱབ་པ་མངོན་པར་བསྒྲུབ་དགོས་སོ། །རིགས་ཀྱི་བུ་མདོར་ན་སེམས་ཅན་ཐམས་ཅད་ཡོངས་སུ་སྨིན་པར་བྱེད་པས་བྱང་ཆུབ་སེམས་དཔའ་རྣམས་ཀྱི་སྤྱོད་པ་ནི་སེམས་ཅན་ཐམས་ཅད་དང་མཉམ་པར་བསྟན་ཏོ། །

77-1-197a

བསྐལ་པ་ཐམས་ཅད་དུ་གནས་པས་བསྐལ་པ་ཐམས་ཅད་དང་མཉམ་པར་བསྟན་ཏོ། །ཐམས་ཅད་དུ་སྐྱེ་བ་ཡོངས་སུ་སྟོན་པས་སྐྱེ་བ་ཐམས་ཅད་དང་མཉམ་པར་བསྟན་ཏོ། །དུས་གསུམ་
གྱི་ཡེ་ཤེས་ཁོང་དུ་ཆུད་པར་བྱ་བའི་ཕྱིར་དུས་ཐམས་ཅད་དང་མཉམ་པར་བསྟན་ཏོ། །ཆོས་ཐམས་ཅད་ལ་ནན་ཏན་དུ་བྱེད་པས་ཆོས་ཐམས་ཅད་མཉམ་པར་བསྟན་ཏོ། །ཞིང་ཐམས་ཅད་ཡོངས་སུ་དག་པར་
བྱེད་པས་ཞིང་ཐམས་ཅད་མཉམ་པར་བསྟན་ཏོ། །སྨོན་ལམ་ཐམས་ཅད་ཡོངས་སུ་རྫོགས་པར་བྱེད་པས། སྨོན་ལམ་ཐམས་ཅད་དང་མཉམ་པར་བསྟན་ཏོ། །སངས་རྒྱས་ཐམས་ཅད་མཆོད་པ་མངོན་
པར་བསྒྲུབ་པས་སངས་རྒྱས་ཐམས་ཅད་དང་མཉམ་པར་བསྟན་ཏོ། །བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་དང་གཅིག་དུ་འགྱུར་བའི་ཕྱིར་བྱང་ཆུབ་སེམས་དཔའ་ཐམས་ཅད་དང་མཉམ་པར་བསྟན་ཏོ། །
དགེ་བའི་བཤེས་གཉེན་ཐམས་ཅད་ལ་བསྙེན་བཀུར་བྱེད་པའི་ཕྱིར་བྱང་ཆུབ་སེམས་དཔའ་རྣམས་ཀྱི་སྤྱོད་པ་ནི་དགེ་བའི་བཤེས་གཉེན་ཐམས་ཅད་དང་མཉམ་པར་བསྟན་ཏོ། །རིགས་ཀྱི་བུ་དེ་བས་ན་ཁྱོད་ཀྱི་དགེ་བའི་
བཤེས་གཉེན་ཡོངས་སུ་བཙལ་བ་ལ་སྐྱོ་བར་མི་བྱའོ། །དགེ་བའི་བཤེས་གཉེན་མཐོང་བས་ངོམས་པ་བསྐྱེད་པར་མི་བྱའོ། །དགེ་བའི་བཤེས་གཉེན་ལ་ཡོངས་སུ་དྲིས་པས་ཆོག་ཤེས་པར་མི་བྱའོ། །དགེ་
བའི་བཤེས་གཉེན་དང་འགྲོགས་པ་ལས་བསམ་པ་ཕྱིར་ལྡོག་པར་མི་བྱའོ། །དགེ་བའི་བཤེས་གཉེན་ལ་ཕུ་དུད་དང་། རིམ་གྲོའི་སྦྱོར་བ་རྒྱུན་གཅད་པར་མི་བྱའོ། །དགེ་བའི་བཤེས་གཉེན་གྱི་གདམས་ངག་དང་། 
རྗེས་སུ་བསྟན་པ་ལ་ལོག་པར་གཟུང་བར་མི་བྱའོ། །དགེ་བའི་བཤེས་གཉེན་གྱི་ཡོན་ཏན་ཐོབ་པར་འགྱུར་བ་ལ་ཐེ་རྩོམ་མི་བསྐྱེད་དོ། །དགེ་བའི་བཤེས་གཉེན་གྱི་འབྱུང་བའི་སྒོ་བསྟན་པ་ལ་ཡིད་གཉིས་སུ་མི་བྱའོ། །

77-1-197b

དགེ་བའི་བཤེས་གཉེན་གྱི་ཐབས་ཀྱི་བསམ་པ་དང་། འཇིག་རྟེན་གྱི་རྗེས་སུ་འབྲང་བར་བྱ་བའི་རྒྱུད་ལ་ཞེ་སྡང་སྐྱེད་པར་མི་བྱའོ། །དགེ་བའི་བཤེས་གཉེན་ལ་མོས་པ་རྣམ་པར་བསྐྱེད་པས་ལུས་དང་སེམས་
རྣམ་པར་ལྡོག་པར་མི་བྱའོ། །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔའི་སྤྱོད་པ་ཐམས་ཅད་ཐོས་པ་ནི་དགེ་བའི་བཤེས་གཉེན་ལ་རག་ལས་པའོ། །བྱང་ཆུབ་སེམས་དཔའི་ཡོན་ཏན་
ཡོངས་སུ་རྫོགས་པར་བྱ་བ་ཐམས་ཅད་ནི་དགེ་བའི་བཤེས་གཉེན་ལས་བྱུང་བའོ། །བྱང་ཆུབ་སེམས་དཔའི་སྨོན་ལམ་གྱི་རྒྱུན་ཐམས་ཅད་ནི་དགེ་བའི་བཤེས་གཉེན་ལས་བྱུང་བའོ། །བྱང་ཆུབ་སེམས་
དཔའི་དགེ་བའི་རྩ་བ་ཐམས་ཅད་ནི་དགེ་བའི་བཤེས་གཉེན་གྱི་བསྐྱེད་པའོ། །བྱང་ཆུབ་སེམས་དཔའི་ཚོགས་ཐམས་ཅད་ནི་དགེ་བའི་བཤེས་གཉེན་གྱིས་བསྒྲུབ་པའོ། །བྱང་ཆུབ་སེམས་དཔའི་
ཆོས་ཀྱི་སྒོ་སྣང་བ་ཐམས་ཅད་ནི་དགེ་བའི་བཤེས་གཉེན་ལས་བྱུང་བའོ། །བྱང་ཆུབ་སེམས་དཔའི་འབྱུང་བའི་སྒོ་རྣམ་པར་དག་པ་ཐམས་ཅད་ནི་དགེ་བའི་བཤེས་གཉེན་ལས་བྱུང་བའོ། །བྱང་ཆུབ་སེམས་
དཔའི་བསླབ་པ་ལ་ནན་ཏན་དུ་བྱ་བ་ཐམས་ཅད་ནི་དགེ་བའི་བཤེས་གཉེན་ལ་རག་ལས་པའོ། །བྱང་ཆུབ་སེམས་དཔའི་ཡོན་ཏན་གྱི་ཚོགས་ཐམས་ཅད་ནི་དགེ་བའི་བཤེས་གཉེན་ལ་གནས་པའོ། །
བྱང་ཆུབ་སེམས་དཔའི་ལྷག་པའི་བསམ་པ་ཡོངས་སུ་དག་པ་ཐམས་ཅད་ནི་དགེ་བའི་བཤེས་གཉེན་རྩ་བར་གྱུར་པའོ། །བྱང་ཆུབ་སེམས་དཔའི་སེམས་བསྐྱེད་པ་བསྟན་པ་ཐམས་ཅད་ནི་དགེ་
བའི་བཤེས་གཉེན་ལས་བསྐྱེས་པའོ། །བྱང་ཆུབ་སེམས་དཔའི་གཟུངས་དང་སྤོབས་པའི་སྒོ་སྣང་བ་ཐམས་ཅད་དུ་འཁྲིད་པ་ནི་དགེ་བའི་བཤེས་གཉེན་ནོ། །བྱང་ཆུབ་སེམས་དཔའི་རྣམ་པར་

77-1-198a

དག་པའི་སྒོའི་མཛོད་ཐམས་ཅད་ནི་དགེ་བའི་བཤེས་གཉེན་གྱིས་ཡོངས་སུ་བཟུང་བའོ། །བྱང་ཆུབ་སེམས་དཔའི་ཡེ་ཤེས་སྣང་བ་ཐམས་ཅད་ནི་དགེ་བའི་བཤེས་གཉེན་གྱིས་
ཡང་དག་པར་བསྐྱེད་པའོ། །བྱང་ཆུབ་སེམས་དཔའི་སྨོན་ལམ་ཁྱད་པར་ཅན་ཐམས་ཅད་ནི་དགེ་བའི་བཤེས་གཉེན་གྱི་ལག་ན་འདུག་པའོ། །བྱང་ཆུབ་སེམས་དཔའི་སྨོན་ལམ་ཚུལ་གྱི་རྒྱུད་
གཅིག་ཏུ་གྱུར་པ་ཐམས་ཅད་ནི་དགེ་བའི་བཤེས་གཉེན་ལ་བརྟན་པའོ། །བྱང་ཆུབ་སེམས་དཔའི་ཡང་དག་པར་བསྒྲུབ་པ་ཁྱད་པར་ཅན་མཉམ་པ་ཐམས་ཅད་ནི་དགེ་བའི་བཤེས་གཉེན་གྱི་རྒྱུད་
ལས་བྱུང་བའོ། །བྱང་ཆུབ་སེམས་དཔའི་གསང་བའི་གནས་ཐམས་ཅད་ནི་དགེ་བའི་བཤེས་གཉེན་གྱི་མཛོད་ན་འདུག་པའོ། །བྱང་ཆུབ་སེམས་དཔའི་ཆོས་ཐམས་ཅད་ནི་དགེ་བའི་བཤེས་
གཉེན་གྱི་འབྱུང་གནས་ནས་བྱུང་བའོ། །བྱང་ཆུབ་སེམས་དཔའི་དབང་པོའི་ཤུགས་ཀྱི་མྱུ་གུ་ཐམས་ཅད་ནི་དགེ་བའི་བཤེས་གཉེན་གྱི་རྣམ་པར་སྤེལ་བའོ། །བྱང་ཆུབ་སེམས་དཔའི་ཡེ་
ཤེས་རྒྱ་མཚོ་ཐམས་ཅད་ནི་དགེ་བའི་བཤེས་གཉེན་གྱིས་ཡང་དག་པར་སྤེལ་བའོ། །བྱང་ཆུབ་སེམས་དཔའི་གཏེར་གྱི་མཛོད་ཐམས་ཅད་ནི་དགེ་བའི་བཤེས་གཉེན་གྱིས་ཡོངས་སུ་
བསྐྱངས་པའོ། །བྱང་ཆུབ་སེམས་དཔའི་བསོད་ནམས་བསྩགས་པ་ཐམས་ཅད་ནི་དགེ་བའི་བཤེས་གཉེན་གྱིས་བསྲུངས་པའོ། །བྱང་ཆུབ་སེམས་དཔའི་ཚེ་རྣམ་པར་དག་པ་
ཐམས་ཅད་ནི་དགེ་བའི་བཤེས་གཉེན་གྱིས་བསྐྱེད་པའོ། །བྱང་ཆུབ་སེམས་དཔའི་ཆོས་མཉན་པའི་སྤྲིན་ཐམས་ཅད་ནི་དགེ་བའི་བཤེས་གཉེན་གྱི་ཁ་ནས་བྱུང་བའོ། །བྱང་ཆུབ་སེམས་

77-1-198b

དཔའ་འབྱུང་བའི་ལམ་ལ་འཇུག་པ་ཐམས་ཅད་ནི་དགེ་བའི་བཤེས་གཉེན་གྱི་ཁོང་ན་ཡོད་པའོ། །སངས་རྒྱས་ཐམས་ཅད་ཀྱི་བྱང་ཆུབ་ནི་དགེ་བའི་བཤེས་གཉེན་ལ་རིམ་གྲོ་བྱས་པས་ཐོབ་པའོ། །
བྱང་ཆུབ་སེམས་དཔའི་སྤྱོད་པ་ཐམས་ཅད་ནི་དགེ་བའི་བཤེས་གཉེན་གྱིས་ཡོངས་སུ་གཟུང་བའོ། །བྱང་ཆུབ་སེམས་དཔའི་ཡོན་ཏན་བརྗོད་པ་ཐམས་ཅད་ནི་དགེ་བའི་བཤེས་གཉེན་
གྱིས་བསྟན་པའོ། །བྱང་ཆུབ་སེམས་དཔའི་ཆོས་ཀྱི་ཕྱོགས་ཀྱི་རྗེས་སུ་འབྲང་བ་ཐམས་ཅད་ནི་དགེ་བའི་བཤེས་གཉེན་གྱིས་ཡོངས་སུ་བསྟན་པའོ། །བྱང་ཆུབ་སེམས་དཔའི་སེམས་
དང་ལྷག་པའི་བསམ་པའི་བདག་ཉིད་ཆེ་བ་ནི་དགེ་བའི་བཤེས་གཉེན་གྱིས་ཡང་དག་པར་བརྗོད་པའོ། །བྱང་ཆུབ་སེམས་དཔའ་རྣམས་ཀྱི་བྱམས་པ་ཆེན་པོའི་སྟོབས་ནི་དགེ་བའི་བཤེས་གཉེན་
ལས་བྱུང་བའོ། །བྱང་ཆུབ་སེམས་དཔའ་རྣམས་ཀྱི་སྙིང་རྗེ་ཆེན་པོའི་སྟོབས་ནི་དགེ་བའི་བཤེས་གཉེན་གྱིས་བསྐྱེད་པའོ། །བྱང་ཆུབ་སེམས་དཔའི་དབང་ཐམས་ཅད་ནི་དགེ་བའི་བཤེས་གཉེན་གྱིས་
ཡོངས་སུ་བཟུང་བའོ། །བྱང་ཆུབ་སེམས་དཔའ་རྣམས་ཀྱི་ཡན་ལགས་ཐམས་ཅད་ནི་དགེ་བའི་བཤེས་གཉེན་གྱིས་བསྐྱེད་པའོ། །བྱང་ཆུབ་སེམས་དཔའི་ཕན་པ་ཉེ་བར་བསྒྲུབ་པ་ཐམས་ཅད་ནི་དགེ་བའི་བཤེས་
གཉེན་ལས་བྱུང་བའོ། །རིགས་ཀྱི་བུ་དགེ་བའི་བཤེས་གཉེན་གྱིས་ཡང་དག་པར་ཟིན་པའི་བྱང་ཆུབ་སེམས་དཔའ་རྣམས་ནི་ངན་སོང་དུ་མི་ལྟུང་ངོ་། །དགེ་བའི་བཤེས་གཉེན་གྱིས་ཡོངས་སུ་བཟུང་བའི་བྱང་ཆུབ་སེམས་
དཔའ་རྣམས་ནི་ཐེག་པ་ཆེན་པོ་ལས་མྱི་ལྡོག་གོ། །དགེ་བའི་བཤེས་གཉེན་གྱིས་ཡོངས་སུ་བསམས་པའི་བྱང་ཆུབ་སེམས་དཔའ་རྣམས་ནི་བྱང་ཆུབ་སེམས་དཔའི་བསླབ་པ་དང་འགལ་བར་མྱི་བྱེད་དོ། །དགེ་བའི་བཤེས་

77-1-199a

གཉེན་གྱི་ཤིན་ཏུ་བསྲུངས་པའི་བྱང་ཆུབ་སེམས་དཔའ་རྣམས་ནི་སྡིག་པའི་གྲོགས་པོའི་ལག་ཏུ་མྱི་གཏོང་ངོ་། །དགེ་བའི་བཤེས་གཉེན་གྱིས་ཡོངས་སུ་བསྐྱངས་པའི་བྱང་ཆུབ་སེམས་དཔའ་རྣམས་
ནི་བྱང་ཆུབ་སེམས་དཔའི་ཆོས་ལས་ཉམས་པར་མི་འགྱུར་རོ། །དགེ་བའི་བཤེས་གཉེན་གྱིས་ཡང་དག་པར་ཟིན་པའི་བྱང་ཆུབ་སེམས་དཔའ་རྣམས་ནི་སོ་སོའི་སྐྱེ་བོའི་ས་ལས་ཡོངས་སུ་འདའ་འོ། །དགེ་བའི་བཤེས་
གཉེན་གྱིས་ཡོངས་སུ་བསྲུངས་པའི་བྱང་ཆུབ་སེམས་དཔའ་རྣམས་ནི་ཉན་ཐོས་དང་རང་སངས་རྒྱས་ཀྱི་སྐྱོན་མེད་པར་མི་འཇུག་གོ། །དགེ་བའི་བཤེས་གཉེན་གྱིས་བསྐྱངས་པའི་བྱང་ཆུབ་སེམས་དཔའ་རྣམས་
ནི་འཇིག་རྟེན་ལས་མངོན་པར་འཕགས་པ་ཡིན་ནོ། །དགེ་བའི་བཤེས་གཉེན་གྱིས་ཡང་དག་པར་སྐྱེད་པའི་བྱང་ཆུབ་སེམས་དཔའ་རྣམས་ནི་འཇིག་རྟེན་གྱི་ཆོས་ཀྱིས་མྱི་གོས་པ་ཡིན་ནོ། །དགེ་བའི་བཤེས་གཉེན་སྙེན་བཀུར་
བའི་བྱང་ཆུབ་སེམས་དཔའ་རྣམས་ནི་སྤྱོད་པ་ཐམས་ཅད་ལ་མི་འཁྲུལ་པར་སྤྱོད་པར་ཡིན་ནོ། །དགེ་བའི་བཤེས་གཉེན་གྱིས་བསྒྲུབ་པའི་བྱང་ཆུབ་སེམས་དཔའ་རྣམས་ནི་རྩ་བ་ཐམས་ཅད་ལས་ཕྱིར་མི་ལྡོག་གོ། །
དགེ་བའི་བཤེས་གཉེན་གྱིས་ཡོངས་སུ་བཟུང་བའི་བྱང་ཆུབ་སེམས་དཔའ་རྣམས་ནི་ལས་དང་ཉོན་མོངས་པས་ཐུབ་པར་དཀའ་བ་ཡིན་ནོ། །དགེ་བའི་བཤེས་གཉེན་གྱི་སྟོབས་ཀྱིས་བརྟེན་པའི་བྱང་ཆུབ་སེམས་དཔའ་
རྣམས་ནི་བདུད་ཐམས་ཅད་ཀྱིས་མི་ཐུབ་པ་ཡིན་ནོ། །དགེ་བའི་བཤེས་གཉེན་གྱི་རྟེན་ལ་གནས་པའི་བྱང་ཆུབ་སེམས་དཔའ་རྣམས་ནི་བྱང་ཆུབ་གྱི་ཡན་ལག་ཐམས་ཅད་ཀྱི་རྣམ་པར་འཕེལ་ལོ། །དེ་ཅིའི་ཕྱིར་ཞེ་ན། 
རིགས་ཀྱི་བུ་དགེ་བའི་བཤེས་གཉེན་ནི་སྒྲིབ་པར་འགྱུར་བའི་ཆོས་ཐམས་ཅད་ལས་རྣམ་པར་སྦྱོང་བའོ། །དགེ་བའི་བཤེས་གཉེན་ནི་སྡིག་ཏོ་ལས་རྣམ་པར་བཟློག་པའོ། །དགེ་བའི་བཤེས་གཉེན་ནི་མི་བྱ་བ་རྣམས་

77-1-199b

ཁོང་དུ་ཆུད་པར་བྱེད་པའོ། །བག་མེད་པའི་གནས་ལས་ཡང་དག་པར་བཟློག་པའོ། །མ་རིག་པའི་མུན་པ་རྣམ་པར་སེལ་བའོ། །ལྟ་བའི་འཆིང་བ་འཐུག་པོའི། འཁོར་བའི་གྲོང་ཁྱེར་ནས་འདོན་པའོ། །འཇིག་
རྟེན་གྱི་གནས་འདོར་བར་བྱེད་པའོ། །བདུད་ཀྱི་ཞགས་པ་ལས་ཐར་བར་བྱེད་པའོ། །སྡུག་བསྔལ་གྱི་ཟུག་རྔུ་འབྱིན་པར་བྱེད་པའོ། །མྱི་ཤེས་པའི་ཐིབས་པོ་ལས་ཐར་བར་བྱེད་པའོ། །ལྟ་བའི་མྱ་ངན་ལས་
ཡོངས་སུ་ཟློ་བའོ། །སྲིད་པའི་ཆུ་བོ་ལས་སྒྲོལ་བའོ། །འདོད་པའི་འདམ་ནས་འབྱིན་པའོ། །ལམ་གྱི་བདེ་བ་ནས་རྣམ་པར་བཟློག་པའོ། །བྱང་ཆུབ་སེམས་དཔའི་ལམ་ཡང་དག་པར་སྟོན་པའོ། །
བྱང་ཆུབ་སེམས་དཔའི་ཡི་དམ་ལ་གཞོག་པའོ། །ནན་ཏན་ལ་རབ་ཏུ་འགོད་པའོ། །ཐམས་ཅད་མཁྱེན་པ་ཉིད་དུ་འགྲོ་བའི་ཕྱོགས་རབ་ཏུ་སྟོན་པའོ། །ཤེས་རབ་ཀྱི་མྱིག་རབ་ཏུ་སྤྱོད་པའོ། །བྱང་
ཆུབ་ཀྱི་སེམས་རྣམ་པར་འཕེལ་བར་བྱེད་པའོ། །སྙིང་རྗེ་ཆེན་པོ་ཡང་དག་པར་བསྐྱེད་པའོ། །བྱང་ཆུབ་ཀྱིས་སེམས་རྣམ་པར་བསྐྱེད་པའོ། །སྤྱོད་པ་ཡོངས་སུ་སྟོན་པའོ། །ཕ་རོལ་ཏུ་ཕྱིན་པའི་གདམས་ངག་རབ་ཏུ་སྟོན་པའོ། །ས་ལ་རབ་ཏུ་འགོད་
པའོ། །བཟོད་པ་རྣམ་པར་འབྱེད་པའོ། །དགེ་བའི་རྩ་བ་ཐམས་ཅད་ཡོངས་སུ་འགྲུབ་པ་བྱེད་པའོ། །ཚོགས་ཐམས་ཅད་བསྐྱེད་པར་བྱེད་པའོ། །བྱང་ཆུབ་སེམས་དཔའི་ཡོན་
ཏན་ཐམས་ཅད་སྟོབ་པའོ། །སངས་རྒྱས་ཐམས་ཅད་ཀྱི་ཞབས་ཀྱི་དྲུང་དུ་ཕྱིན་པར་བྱེད་པའོ། །ཡོན་ཏན་ཐམས་ཅད་ཡོངས་སུ་སྟོན་པའོ། །དོན་ཐམས་ཅད་ཡང་དག་པར་ལེན་དུ་འཇུག་
པའོ། །ནན་ཏན་ལ་གཟེངས་བསྟོད་པའོ། །འབྱུང་བའི་སྒོ་སྟོན་པའོ། །ལམ་གོལ་བ་ལས་ཡོངས་སུ་བསྲུངས་བའོ། །ཆོས་སྣང་བའི་སྒོ་སྣང་བར་བྱེད་པའོ། །ཆོས་ཀྱི་སྒོ་མངོན་པར་བརླན་པར་བྱེད་པའོ། །

77-1-200a

ཆོས་ཐོས་པར་བྱ་བའི་སྤྲིན་གྱི་ཆར་རབ་ཏུ་འབེབས་པའོ། །ཉོན་མོངས་པ་ཐམས་ཅད་ཞི་བར་བྱེད་པའོ། །ལྟ་བའི་རྣམ་པ་ཐམས་ཅད་ལས་རྣམ་པར་ཟློགས་པའོ། །སངས་རྒྱས་
ཀྱི་ཆོས་ཐམས་ཅད་ལ་གནས་པར་བྱེད་པའོ། །འདི་ལྟར་ཡང་རིགས་ཀྱི་བུ་དགེ་བའི་བཤེས་གཉེན་ནི་སངས་རྒྱས་ཀྱི་རིགས་སུ་སྐྱེས་པས་མ་ལྟ་བུའོ། །དགེ་བའི་བཤེས་གཉེན་ནི་ཕན་པ་རྒྱ་ཆེན་པོ་
བསྒྲུབ་པས་ཕ་ལྟ་བུའོ། །དགེ་བའི་བཤེས་གཉེན་ནི་སྡིག་པ་ཐམས་ཅད་ལས་བསྲུང་བས་མ་ལྟ་བུའོ། །དགེ་བའི་བཤེས་གཉེན་ནི་བྱང་ཆུབ་སེམས་དཔའི་བསླབ་པ་ཁོང་དུ་ཆུད་པར་བྱེད་པས་སློབ་དཔོན་
ལྟ་བུའོ། །དགེ་བའི་བཤེས་གཉེན་ནི་ཡེ་ཤེས་སྨན་པའི་ལམ་དུ་མཛུད་པས་ལམ་མཁན་ལྟ་བུའོ། །དགེ་བའི་བཤེས་གཉེན་ནི་ཉོན་མོངས་པའི་ནད་ལས་ཐར་བར་བྱེད་པས་སྨན་པ་ལྟ་བུའོ། །དགེ་བའི་བཤེས་
གཉེན་ནི་ཡེ་ཤེས་ཀྱི་སྨན་རྣམ་པར་འཕེལ་བར་བྱེད་པས་གངས་རི་ལྟ་བུའོ། །དགེ་བའི་བཤེས་གཉེན་ནི་འཇིགས་པ་ཐམས་ཅད་ལས་སྲུང་བས་དཔའོ་ལྟ་བུའོ། །དགེ་བའི་བཤེས་གཉེན་ནི་འཁོར་བའི་ཆུ་བོ་
ཆེན་པོ་ལས་སྒྲོལ་བས་མཉན་པ་ལྟ་བུའོ། །དགེ་བའི་བཤེས་གཉེན་ནི་ཐམས་ཅད་མཁྱེན་པའི་ཡེ་ཤེས་རིན་པོ་ཆེའི་གླིང་དུ་ཕྱིན་པར་བྱེད་པས་སྐྱ་བ་འཛིན་པ་ལྟ་བུའོ། །རིགས་ཀྱི་བུ་དེ་ལྟ་བས་ན་དེ་ལྟར་ཡིད་
ལ་བྱ་བ་རྒྱུན་མྱི་ཆད་པས་ཁྱོད་ཀྱིས་དགེ་བའི་བཤེས་གཉེན་བསྙེན་པར་གྱིས་ཤིག །ཁུར་ཐམས་ཅད་བཀུར་བས་ཡོངསུ་མི་སྐྱོ་བའི་ཕྱིར་ས་ལྟ་བུའི་སེམས་དང་། མི་ཕྱེད་པའི་ཕྱིར་རྡོ་རྗེ་ལྟ་བུའི་
སེམས་དང་སྡུག་བསྔལ་ཐམས་ཅད་ཀྱིས་མི་བསྐུལ་བའི་ཕྱིར་འཁོར་ཡུག་ལྟ་བུའི་སེམས་དང་། ཅི་དགའ་བར་བཀའ་ཉན་པས་བྲན་ལྟ་བུའི་སེམས་དང་། ངག་ཐམས་ཅད་མི་གཅག་པས་

77-1-200b

སློབ་མ་ལྟ་བུའི་སེམས་དང་། ལས་ཐམས་ཅད་ཉམས་སུ་བླང་བ་ལ་མྱི་སྨད་པས་འཇིག་རྟེན་གྱི་བྲན་ལྟ་བུའི་སེམས་དང་། ཉོན་མོངས་པ་ཐམས་ཅད་ཀྱིས་མི་སྐྱོ་བའི་ཕྱིར་མ་མ་ལྟ་བུའི་
སེམས་དང་། བྱའོ་ཅོག་ལ་འཐུན་པར་གཟུང་བས་གཡོག་ལྟ་བུའི་སེམས་དང་། ང་རྒྱལ་དང་མཐོ་བའི་ང་རྒྱལ་སྤོང་བས་ཕྱག་དར་བ་ལྟ་བུའི་སེམས་དང་། དུས་དང་དུས་མ་ཡིན་པར་མཐོན་དམན་
དུ་འགྱུར་བས་ཟླ་བ་ཉ་བ་ལྟ་བུའི་སེམས་དང་། མྱི་བསྲུན་པ་ཐམས་ཅད་རྣམ་པར་སྤངས་པས་རྟ་ཅང་ཤེས་ལྟ་བུའི་སེམས་དང་། ཁུར་ལྕི་བ་བཀུར་བས་ཐེག་པ་ལྟ་བུའི་སེམས་དང་། དུལ་བ་དང་ཅང་
ཤེས་ཀྱི་བསམ་པས་གླང་པོ་ལྟ་བུའི་སེམས་དང་། མྱི་སྒུལ་མྱི་བསྐྱོད་པས་རི་བོ་ལྟ་བུའི་སེམས་དང་། མི་ཁྲོ་བས་ཁྱི་ལྟ་བུའི་སེམས་དང་། ང་རྒྱལ་དང་དུས་མེད་པས་གདོལ་པ་ལྟ་བུའི་སེམས་དང་། 
དྲེགས་པ་ཐམས་ཅད་མྱེད་པས་ཁྱུ་མཆོག་རྭ་བཅད་པ་ལྟ་བུའི་སེམས་དང་། རློམ་སེམས་མེད་པའི་མཚན་བུ་ལྟ་བུའི་སེམས་དང་། འགྲོ་ཞིང་འོང་བས་མི་སྐྱོ་བས་གྲུ་ལྟ་བུའི་སེམས་དང་། དགེ་བའི་
བཤེས་གཉེན་གྱི་ངག་གི་མཐར་ཕྱིན་པར་བྱེད་པས་ཟམ་པ་ལྟ་བུའི་སེམས་དང་། དགེ་བའི་བཤེས་གཉེན་གྱི་ངོར་བལྟ་བས་བུ་འཛངས་པ་ལྟ་བུའི་སེམས་དང་། ཆོས་ཀྱི་རྒྱལ་པོའི་བཀའ་ལས་
མི་འགལ་བར་བྱ་བས་རྒྱལ་པོ་གཞོན་ནུ་ལྟ་བུའི་སེམས་ཀྱི་དགེ་བའི་བཤེས་གཉེན་ལ་བསྙེན་པར་བྱའོ། །རིགས་ཀྱི་བུ་ཁྱོད་ཀྱི་བདག་ལ་ནི་ནད་པར་འདུ་ཤེས་བསྐྱེད་དོ། །དགེ་བའི་བཤེས་གཉེན་ལ་
ནི་སྨན་པའི་འདུ་ཤེས་དང་། གདམས་ངག་ལ་ནི་སྨན་གྱི་འདུ་ཤེས་དང་། ནན་ཏན་ཉམས་སུ་བླང་བ་ལ་ནི་ནད་འཚོ་བའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་འགྲོན་པོའི་

77-1-201a

འདུ་ཤེས་བསྐྱེད་པར་བྱའོ། དགེ་བའི་བཤེས་གཉེན་ལ་ནི་ལམ་མཚོན་པའི་འདུ་ཤེས་དང་། གདམས་ངག་ལ་ནི་ལམ་གྱི་འདུ་ཤེས་དང་། ནན་ཏན་ལ་ནི་ཕྱོགས་བདེ་བར་
འགྲོ་བའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱི་བདག་ལ་ནི་ཕ་རོལ་ཏུ་འགྲོ་བའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་མཉན་པའི་འདུ་ཤེས་དང་། རྗེས་སུ་བསྟན་པ་ལ་
མུ་སྟེགས་ཀྱི་འདུ་ཤེས་དང་། ནན་ཏན་ལ་ནི་གྲུའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་ཞིང་པའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་ཀླུའི་དབང་པོ་
འི་འདུ་ཤེས་དང་། གདམས་ངག་ལ་ནི་ཆར་པའི་འདུ་ཤེས་དང་། ནན་ཏན་ལ་ནི་ལོ་ཏོག་འགྲུབ་པའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་དབུལ་པོའི་འདུ་ཤེས་བསྐྱེད་པར་བྱའོ། །དགེ་
བའི་བཤེས་གཉེན་ལ་ནི་ངལ་བསོས་པོའི་འདུ་ཤེས་དང་། གདམས་ངག་ལ་ནི་ནོར་དང་དོན་གྱི་འདུ་ཤེས་དང་། ནན་ཏན་ལ་ནི་དབུལ་བ་སེལ་བའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱི་བདག་
ལ་ནི་སློབ་མའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་སློབ་དཔོན་གྱི་འདུ་ཤེས་དང་། གདམས་ངག་ལ་ནི་བཟོའི་འདུ་ཤེས་དང་། ནན་ཏན་ལ་ནི་བཟོ་ཁོང་དུ་ཆུད་པའི་འདུ་ཤེས་
བསྐྱེད་པར་བྱའོ། །རིགས་ཀྱི་བུ་ཁྱོད་ཀྱི་བདག་ལ་ནི་འཇིགས་པའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་དཔའ་བོའི་འདུ་ཤེས་དང་། གདམས་ངག་ལ་ནི་མཚོན་ཆའི་འདུ་ཤེས་དང་། ནན་ཏན་ལ་
ནི་དགྲ་སེལ་བའི་འདུ་ཤེས་སྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་ཚོང་པའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་སྐྱ་བ་འཛིན་པའི་འདུ་ཤེས་དང་། གདམས་ངག་ལ་ནི་རིན་པོ་

77-1-201b

ཆེའི་འདུ་ཤེས་དང་། ནན་ཏན་ལ་ནི་རིན་པོ་ཆེ་སྡུད་པའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱི་བདག་ལ་ནི་བུ་དམ་པའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་ཕ་མའི་འདུ་
ཤེས་དང་། རྗེས་སུ་བསྟན་པ་ལ་ནི་རིགས་ཀྱི་བུའི་ཚུལ་གྱི་འདུ་ཤེས་དང་། ནན་ཏན་ལ་ནི་ཚུལ་མ་ཉམས་པའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་རྒྱལ་པོ་གཞོན་ནུའི་འདུ་ཤེས་
བསྐྱེད་པར་བྱའོ། །དགེ་བའི་བཤེས་གཉེན་ལ་ནི་ཆོས་ཀྱི་རྒྱལ་པོ་དང་བློན་པོ་དམ་པའི་འདུ་ཤེས་དང་། གདམས་ངག་ལ་ནི་རྒྱལ་པོའི་ཁྲིམས་ཀྱི་འདུ་ཤེས་དང་། ནན་ཏན་ལ་ནི་ཡེ་ཤེས་ཀྱི་རྒྱལ་པོའི་
ཅོད་པན་དང་རྒྱན་དང་། ཆོས་ཀྱི་ཐབས་མགོ་ལ་འཆིང་བ་དང་། ཆོས་ཀྱི་རྒྱལ་པོའི་གྲོང་ཁྱེར་ལ་རྣམ་པར་ལྟ་བའི་འདུ་ཤེས་བསྐྱེད་པར་བྱས་ཏེ། རིགས་ཀྱི་བུ་ཁྱོད་ཀྱི་དེ་ལྟ་བུའི་འདུ་ཤེས་ཡིད་ལ་བྱ་བ་
ཡོངས་སུ་བསྒོམས་ཏེ། དགེ་བའི་བཤེས་གཉེན་རྣམས་ལ་ཉེ་བར་བསྙེན་པར་གྱིས་ཤིག །དེ་ཅིའི་ཕྱིར་ཞེ་ན། རིགས་ཀྱི་བུ་དེ་ལྟར་དགེ་བའི་བཤེས་གཉེན་ལ་ལྷག་པའི་བསམ་པ་ཡོངས་སུ་དག་པའི་བྱང་ཆུབ་
སེམས་དཔའ་རྣམས་ནི་དགེ་བའི་བཤེས་གཉེན་གྱི་ངག་ཐམས་ཅད་ཉམས་སུ་ལེན་པའི་ཚེ། གངས་ཀྱི་རི་ལ་རྟེན་པའི་རྩྭ་དང་གེལ་བ་དང་། སྨན་ནགས་ཚལ་ལྟ་བུར་དགེ་བའི་རྩ་བ་ཐམས་ཅད་ཀྱིས་རྣམ་
པར་འཕེལ་ལོ། །རྒྱ་མཚོ་ཆེན་པོ་ཆུའི་སྣོད་དུ་གྱུར་པ་ལྟར་ཆོས་ཐམས་ཅད་ཀྱི་སྣོད་དུ་འགྱུར་རོ། །གངས་ཆེན་མཚོ་ཆེན་པོ་རིན་པོ་ཆེ་མང་པོའི་འབྱུང་གནས་སུ་གྱུར་པ་ལྟར་ཡོན་ཏན་ཐམས་ཅད་
ཀྱི་འབྱུང་གནས་སུ་འགྱུར་རོ། །མྱེའི་དྲོད་ཀྱི་གསེར་ཡོངས་སུ་འབྱུང་བ་ལྟར་བྱང་ཆུབ་ཀྱི་སེམས་ཡོངས་སུ་འབྱུང་བར་འགྱུར་རོ། །རྒྱ་མཚོ་ཆེན་པོ་ལས་འཕགས་པའི་རི་རབ་ལྟར་འཇིག་རྟེན་ལས་

77-1-202a

མངོན་པར་འཕགས་པར་འགྱུར་རོ། །པད་མོ་ལ་ཆུས་མྱི་ཆགས་པ་ལྟར་འཇིག་རྟེན་གྱི་ཆོས་ཀྱིས་མྱི་གོས་པར་འགྱུར་རོ། །རྒྱ་མཚོ་ཆེན་པོ་རོ་རུལ་བ་དང་མི་འགྲོགས་པ་ལྟར། སྤྱོད་
པ་ངན་པ་ཐམས་ཅད་དང་མི་འགྲོགས་སོ། །ཡར་གྱི་ཟླ་བ་ལྟར་ཆོས་དཀར་པོས་རྣམ་པར་འཕེལ་བར་འགྱུར་རོ། །འཛམ་བུའི་གླིང་སྣང་བར་བྱེད་པའི་ཉི་མ་ལྟར་ཆོས་ཀྱི་དབྱིངས་སུ་སྣང་བར་འགྱུར་རོ། །
ཕ་མ་དང་འགྲོགས་པའི་བུ་ལྟར་བྱང་ཆུབ་སེམས་དཔའི་སྨོན་ལམ་གྱི་ལུས་ཐམས་ཅད་ཡང་དག་པར་སྐྱེ་བར་འགྱུར་རོ། །དེ་ལྟར་མདོར་ན་རིགས་ཀྱི་བུ་དགེ་བའི་བཤེས་གཉེན་གྱི་གདམས་ངག་ལ་ཞུགས་པའི་
བྱང་ཆུབ་སེམས་དཔའ་རྣམས་ནི་ཡོན་ཏན་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུ་ནི་འཛིན་པར་འགྱུར་རོ། །དེའི་ལྷག་པའི་བསམ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ནི་ཡོངས་སུ་སྦྱོང་
བར་འགྱུརོ། །བྱང་ཆུབ་སེམས་དཔའི་དབང་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ནི་རབ་ཏུ་འཕེལ་བར་འགྱུར་རོ། །བྱིན་གྱིས་རླབས་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ནི་རྣམ་པར་སྤྱོད་པར་འགྱུར་རོ། །སྒྲིབ་པའི་
ཆོས་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ནི་རྣམ་པར་སྤྱོད་བར་འགྱུར་རོ། །སྒྲིབ་པའི་ཆོས་གྲངས་མེད་པ་བརྒྱ་སྟོང་ཕྲག་བཅུ་ནི་ཡོངས་སུ་དག་པར་འགྱུར་རོ། །བདུད་གྲངས་མེད་པ་བརྒྱ་སྟོང་ཕྲག་བཅུ་ལས་ནི་
ཡང་དག་པར་འདས་པར་འགྱུར་རོ། །ཆོས་ཀྱི་སྒོ་གྲངས་མྱེད་པ་བརྒྱ་སྟོང་ཕྲག་བཅུ་ལ་ནི་རབ་ཏུ་འཇུག་པར་འགྱུར་རོ། །ཚོགས་རྣམ་པར་དག་པའི་སྒོ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ནི་ཡོངས་
སུ་རྫོགས་པར་འགྱུར་རོ། །སྤྱོད་པ་གྲངས་མྱེད་པ་བརྒྱ་སྟོང་ཕྲག་བཅུ་ནི་ཀུན་ནས་དག་པར་འགྱུར་རོ། །སྨོན་ལམ་ཆེན་པོ་གྲངས་མེད་པ་བརྒྱ་སྟོང་ཕྲག་བཅུ་ནི་མངོན་པར་གྲུབ་པར་འགྱུར་རོ། །རིགས་

77-1-202b

ཀྱི་བུ་དེ་ལྟར་མདོར་ན་བྱང་ཆུབ་སེམས་དཔའི་སྤྱད་པ་ཐམས་ཅད་དང་། བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ཐམས་ཅད་དང་། བྱང་ཆུབ་སེམས་དཔའི་ས་ཐམས་ཅད་དང་། བྱང་ཆུབ་སེམས་
དཔའི་བཟོད་པ་ལ་འཇུག་པ་ཐམས་ཅད་དང་། བྱང་ཆུབ་སེམས་དཔའི་ཏིང་ངེ་འཛིན་གྱི་སྒོ་ཐམས་ཅད་དང་། བྱང་ཆུབ་སེམས་དཔའི་མངོན་པར་ཤེས་པའི་ཡེ་ཤེས་ཀྱིས་རྣམ་པར་འཕྲུལ་པ་ཐམས་ཅད་དང་། 
བྱང་ཆུབ་སེམས་དཔའི་གཟུངས་དང་སྤོབས་པའི་སྣང་བ་ཐམས་ཅད་དང་། བྱང་ཆུབ་སེམས་དཔའི་བསྔོ་བའི་ཡེ་ཤེས་དང་མངོན་པར་ཤེས་པ་ཚད་མེད་པ་ཐམས་ཅད་དང་། བྱང་ཆུབ་སེམས་དཔའི་
སྨོན་ལམ་མངོན་པར་བསྒྲུབ་པ་ཐམས་ཅད་དང་། སངས་རྒྱས་ཀྱི་ཆོས་ཐམས་ཅད་རབ་ཏུ་ཐོབ་ཅིང་ཡོངས་སུ་གྲུབ་པ་རྣམས་ནི་དགེ་བའི་བཤེས་གཉེན་ལ་རག་ལས་པ་དག་གོ། །དགེ་བའི་བཤེས་གཉེན་རྩ་བར་གྱུར་
པ་དག་གོ། །དགེ་བའི་བཤེས་གཉེན་ལས་བྱུང་བ་དག་གོ། །དགེ་བའི་བཤེས་གཉེན་སྐྱེ་གནས་སུ་གྱུར་པ་དག་གོ། །དགེ་བའི་བཤེས་གཉེན་སྐྱེ་མཆེད་དུ་གྱུར་པ་དག་གོ། །དགེ་བའི་བཤེས་གཉེན་ལས་ཡོངས་
སུ་སྐྱེས་པ་དག་གོ། །དགེ་བའི་བཤེས་གཉེན་གྱི་སྤེལ་བ་དག་གོ། །དགེ་བའི་བཤེས་གཉེན་ལ་རབ་ཏུ་རྟེན་པ་དག་གོ། །དགེ་བའི་བཤེས་གཉེན་རྒྱུར་གྱུར་པའོ། །དགེ་བའི་བཤེས་གཉེན་ལས་རབ་ཏུ་སྐྱེས་
པ་དག་གོ། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་རྣམ་པ་དེ་ལྟ་བུའི་དགེ་བའི་བཤེས་གཉེན་གྱི་ཡོན་ཏན་དང་། བསྔགས་པའི་རྗེས་སུ་བསྟན་པ་དང་། བྱང་ཆུབ་སེམས་དཔའི་སྤྱོད་པ་ཚད་མེད་
པ་དང་། སངས་རྒྱས་ཀྱི་ཆོས་རྒྱ་ཆེན་པོ་ཐོས་ནས་དགའ་རངས་ཏེ། མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས། ཁྱེའུ་དཔལ་འབྱུང་བ་དང་། བུ་མོ་དཔལ་གྱི་བློ་གྲོས་མ་

77-1-203a

གཉིས་ཀྱི་རྐང་པ་ལ་སྤྱི་བོས་ཕྱག་འཚལ་ཏེ། ཁྱེའུ་དཔལ་འབྱུང་བ་དང་། བུ་མོ་དཔལ་གྱི་བློ་གྲོས་མ་གཉིས་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། 
ཁྱེའུ་དཔལ་འབྱུང་བ་དང་། བུ་མོ་དཔལ་གྱི་བློ་གྲོས་མའི་དྲུང་ནས་སོང་ངོ་།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་གཉིས་པ། དེ་ནས་ཚོང་དཔོན་གྱི་བུ་ནོར་བཟངས་དགེ་བའི་བཤེས་གཉེན་གྱི་གདམས་ངག་གིས་
སེམས་མངོན་པར་བརླན་པ་དེ་བྱང་ཆུབ་སེམས་དཔའི་སྤྱོད་པ་རྗེས་སུ་བསྟན་པ་དེ་ནི་རྗེས་སུ་རྣམ་པར་སེམས། སྔོན་གྱི་མཐའི་ལུས་མང་པོ་ཡང་དག་པར་སྤྱོད་པ་ཉམས་སུ་མ་བླངས་པར་ཆུད་
ཟོས་པ་ལ་བསམས་པས་ན་ལུས་ཀྱི་སྟོབས་རབ་ཏུ་བརྟན་པར་བྱེད། སྔོན་གྱི་མཐའི་མུར་ཐུག་པའི་ལུས་དང་སེམས་ཡོངས་སུ་དག་ཀྱང་དོན་མེད་པར་འཁོར་བའི་སེམས་ཀྱི་རྒྱུད་དུ་གྱུར་པ་ལ་བསམས་
པས་ནི་སེམས་དང་ཡིད་ལ་བྱ་བ་རབ་ཏུ་སྤྱོད། སྔོན་གྱི་མཐའི་མུར་ཐུག་པའི་ལས་ཡང་དག་པ་མ་ཡིན་པས་འཇིག་རྟེན་གྱི་དོན་དུ་གཡེན་སྤྱོ་སྟེ། མི་གཅེས་པར་ཤ་ཐང་བ་ལ་བསམ་པས་ནི་ད་ལྟར་བྱུང་བའི་
དོན་ཤིན་ཏུ་གཅེས་པ་ལ་ལེགས་པར་བསྒྲུབ་པ་རྣམ་པར་སེམས། སྔོན་གྱི་མཐའི་མུར་ཐུག་པའི་ཡོངས་སུ་རྟོག་པ་ཡང་དག་པ་མ་ཡིན་པར་རྣམ་པར་བརྟགས་པ་ལས་བྱུང་བ་ཕྱིན་ཅི་ལོག་གིས་ཡིད་ལ་
བྱ་བ་ཀུན་ནས་གླགས་པ་ལས་བསམས་པས་ནི། བྱང་ཆུབ་སེམས་དཔའི་སྤྱོད་པ་ཐམས་ཅད་ཡང་དག་པའི་རྟོགས་པས་མངོན་པར་འདུ་བྱ་བའི་སྟོབས་ཡང་དག་པར་བསྐྱེད། འདས་པའི་དུས་ལུས་
གྱི་བདག་གི་དོན་གྱི་སྦྱོར་བ་ལ་རྩོམ་རྩོམ་པའི་ཡུལ་ལ་ཡོངས་སུ་བསམས་པས་ནི། སེམས་ཅན་ཐམས་ཅད་ཀྱི་སྦྱོར་བ་ལས་ཁྱད་པར་དུ་འཕགས་པར་ལྷག་པའི་བསམ་པའི་སྟོབས་རབ་ཏུ་བརྟན་པར་བྱེད། 

77-1-203b

སྔོན་འདོད་པ་ཡོངས་སུ་ཚོལ་ཚོལ་བའི་སྤྱོད་པར་རོ། །མྱེད་པ་ལ་ཡོངས་སུ་བསམ་པ་ནི་སངས་རྒྱས་ཀྱི་ཆོས་ཐམས་ཅད་འཐོབ་པའི་སྦྱོར་བ་དབུགས་ཕྱིན་པ་ཆེན་པོ་འཐོབ་པའི་དབང་པོའི་ཤུགས་དྲག་པོ་རྣམ་པར་
འཕེལ་བར་བྱེད། འདས་པའི་དུས་ཀྱི་ལྷག་པའི་བསམ་པ་ཕྱིན་ཅི་ལོག་དང་ལྡན་པའི་སྦྱོར་བ་ལ་ཡོངས་སུ་བསམས་པས་ནི། ད་ལྟར་བྱུང་བའི་དུས་སུ་ཕྱིན་ཅི་ལོག་མེད་པ་དང་ལྡན་པའི་ཡང་དག་པའི་ལྟ་བ་དང་། 
བྱང་ཆུབ་སེམས་དཔའི་སྨོན་ལམ་ལ་ཡི་དམ་བཅའ་བས་སེམས་ཀྱི་རྒྱུད་ཡོངས་སུ་རྒྱས་པར་བྱེད། སྔོན་གྱི་མཐའི་བརྩོན་འགྲུས་བརྩམས་པ་མི་ཚོལ་བ་དོན་མ་ཡིན་པ་དང་། ཡོངས་སུ་མ་གྲུབ་
པའི་བརྩོན་འགྲུས་ཉམས་སུ་བླངས་པ་ལ་ཡོངས་སུ་བསམ་པས་ནི། ད་ལྟར་བྱུང་བའི་དུས་སུ་སངས་རྒྱས་ཀྱི་ཆོས་ཡོངས་སུ་བསྡུ་བ་ལ་སྟ་གོན་དུ་གནས་པའི་བརྩོན་འགྲུས་ཆེན་པོ་རྩོམ་པའི་རྣམ་པར་
གནོད་པས་ལུས་དང་སེམས་ཀྱི་གཟེངས་མཐོ་བ་ཡང་དག་པར་བསྐྱེད། སྔོན་གྱི་མཐའི་མུར་ཐུག་པའི་འགྲོ་བ་ལྔའི་རྒྱུད་ཀྱི་ངན་སོང་དུ་བདག་དང་གཞན་བོར་བ་ལ་བརྟགས་པས་ལུས་འཆི་བ་མེད་པ་
ཡོངས་སུ་བཟུང་བ་ལ་ཡང་དག་པར་བསམས་པས་ནི། སངས་རྒྱས་ཀྱི་ཆོས་ཐམས་ཅད་ཡོངས་སུ་བསྒྲུབ་པ་དང་། འགྲོ་བ་ཐམས་ཅད་ཉེ་བར་འཚོ་བ་དང་། དགེ་བའི་བཤེས་གཉེན་ཐམས་ཅད་བསྙེན་
བཀུར་བར་ནུས་པའི་ལུས་ཡོངས་སུ་བཟུང་བས་དགའ་བ་དང་མོས་པའི་ཤུགས་དྲག་པོ་ཆེན་པོ་རྣམ་པར་འཕེལ་བར་བྱེད། ད་ལྟར་བྱུང་བའི་ཚེ་མངོན་པར་བསྒྲུབ་ཀྱང་རྒ་བ་དང་ན་བ་དང་འཆི་བ་དང་མྱ་ངན་གྱི་འབྱུང་གནས་
སུ་གྱུར་ཏེ་འདུ་བ་དང་འབྲལ་བ་དང་། གཏེར་ཏུ་གྱུར་པའི་ལུས་ཀྱང་ཕྱི་མའི་མཐའི་བསྐལ་པའི་མུར་ཐུག་པར་བྱང་ཆུབ་སེམས་དཔའི་སྤྱད་པ་སྤྱོད་པ་ལ་བརྩོན་པ་དང་། སེམས་ཅན་ཡོངས་སུ་སྨིན་པར་བྱ་བ་དང་། 

77-1-204a

སངས་རྒྱས་ཀྱི་ཆོས་ཡོངས་སུ་བསྡུ་བ་ལ་བརྩོན་པ་དང་། དེ་བཞིན་གཤེགས་པའི་ཞལ་བལྟ་ཞིང་ཞིང་ཐམས་ཅད་དུ་རྒྱུ་བ་དང་། ཆོས་སྨྲ་བ་ཐམས་ཅད་ལ་རིམ་གྲོ་བྱ་བ་དང་། དེ་བཞིན་
གཤེགས་པ་ཐམས་ཅད་ཀྱི་བསྟན་པ་ཡོངས་སུ་གཟུང་བ་ལ་བརྩོན་པ་དང་། ཆོས་ཐམས་ཅད་ཡོངས་སུ་བཙལ་བའི་གྲོགས་སུ་གྱུར་པ་དང་། དགེ་བའི་བཤེས་གཉེན་ཐམས་ཅད་མཐོང་བར་བྱ་བ་དང་། 
སངས་རྒྱས་ཀྱི་ཆོས་ཐམས་ཅད་ཡང་དག་པར་བསྡུ་བ་ལ་བརྩོན་པའི་བྱང་ཆུབ་སེམས་དཔའི་སྨོན་ལམ་དང་། ཡེ་ཤེས་ཀྱི་ལུས་ཀྱི་རྒྱུ་དང་རྐྱེན་དུ་གྱུར་པ་ལ་བལྟས་ཤིང་དགེ་བའི་རྩ་བའི་དབང་པོ་དང་ཤུགས་
བསམ་གྱིས་མི་ཁྱབ་པ་རྣམ་པར་འཕེལ་བར་བྱེད་ཅིང་དེ་ལྟ་བུའི་སེམས་དང་། དེ་ལྟ་བུའི་ཡིད་ལ་བྱ་བ་དང་། ཚུལ་བཞིན་དེ་ལྟ་བུ་ལ་རབ་ཏུ་བརྩོན་པ་དང་། བྱང་ཆུབ་སེམས་དཔའ་
ཐམས་ཅད་ཀྱི་མོས་པས་ཡང་དག་པར་བསྒྲུབ་པའི་དབང་པོ་དང་། བྱང་ཆུབ་སེམས་དཔའ་ཐམས་ཅད་ཀྱི་བསམ་པ་ཡོངས་སུ་བསྒྲུབ་པའི་ཉེ་བར་སེམས་པ་དང་། བྱང་ཆུབ་སེམས་དཔའ་
ཐམས་ཅད་ཀྱི་ལྷག་པའི་བསམ་པས་སྒྲོ་བཏགས་པའི་རིམ་གྲོ་དང་། བྱང་ཆུབ་སེམས་དཔའ་ཐམས་ཅད་ཀྱི་དབང་པོ་འདོད་པར་སྒྲོ་བརྟགས་པའི་ཕུ་དུད་དང་། བྱང་ཆུབ་སེམས་དཔའ་ཐམས་
ཅད་ཀྱི་སྟོན་པ་ལ་མོས་པས་ཡང་དག་པར་བསྒྲུབ་པའི་དབང་པོ་འདོད་པའི་ཤུགས་དང་། བྱང་ཆུབ་སེམས་དཔའ་ཐམས་ཅད་ལ་རིམ་གྲོ་བྱུང་བའི་སེམས་ཀྱི་མོས་པ་དང་། བྱང་ཆུབ་སེམས་དཔའ་
ཐམས་ཅད་ཀྱི་དད་པ་ལས་ཡོངས་སུ་བྱུང་བའི་དགེ་བའི་རྩ་བའི་ཚོགས་དང་། བྱང་ཆུབ་སེམས་དཔའི་མངོན་པར་འདུ་བྱ་བ་ཐམས་ཅད་ལས་ཡོངས་སུ་གྲུབ་པའི་མཆོད་པ་རྣམ་པ་ཐ་དད་པ་དང་། བྱང་

77-1-204b

ཆུབ་སེམས་དཔའ་ཐམས་ཅད་དང་མཉམ་པའི་ལུས་ཀྱི་ཐལ་མོ་སྦྱར་བ་དང་། འགྲོ་བའི་ལུས་ཐམས་ཅད་དུ་ཡོངས་སུ་བྱུང་བའི་མིག་རྣམ་པ་སྣ་ཚོགས་ཀྱི་བལྟ་བ་དང་། འགྲོ་བར་མྱིང་བཏགས་
པ་ཐམས་ཅད་དུ་སྒྲོ་བཏགས་པའི་བྱང་ཆུབ་སེམས་དཔའ་ཐམས་ཅད་ཀྱི་ཆོས་མཉམ་པ་ཉིད་རྣམས་དང་། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་གྱི་སྤྲུལ་པ་ལས་བྱུང་བར་སྒྲོ་བཏགས་པའི་
ལུས་ཀྱིས་བཏུད་ཅིང་ཕྱག་བྱ་བ་ཚད་མེད་པ་དང་། བྱང་ཆུབ་སེམས་དཔའ་ཐམས་ཅད་ཀྱི་དབྱངས་ཀྱི་ཡན་ལག་རྣམ་པར་དག་པ་ལས་བྱུང་བའི་ལེགས་པར་བརྗོད་པའི་རྒྱན་མངོན་པར་བསྒྲུབ་པ་
དང་། སྔོན་གྱི་མཐའ་དང་ད་ལྟར་བྱུང་བའི་བྱང་ཆུབ་སེམས་དཔའ་གནས་ཐམས་ཅད་ཡོངས་སུ་རྒྱས་པའི་དེ་བཞིན་གཤེགས་པའི་ཕོ་བྲང་མངོན་དུ་བྱས་པའི་འདུ་ཤེས་ཀྱི་རྣམས་པ་དང་། དེ་བཞིན་གཤེགས་
པ་དང་། བྱང་ཆུབ་སེམས་དཔའི་རྣམ་པར་འཕྲུལ་པས་མངོན་པར་རྫོགས་པར་འཚང་རྒྱ་བ་ཐམས་ཅད་དུ་ཁྱབ་པ་དང་། སྐྲའི་རྩེ་མོ་གཅིག་ལས་ཀྱང་ལྷག་པ་མེད་པར་བྱང་ཆུབ་སེམས་དཔའ་ཐམས་ཅད་
ཀྱི་ལུས་ཀྱི་རྒྱས་པར་འགེང་བའི་རྗེས་སུ་སོང་བ་དང་། བྱང་ཆུབ་སེམས་དཔའ་ཐམས་ཅད་ཀྱི་མྱིག་གིས་ལམ་རྣམ་པར་དག་པར་སྒྲོ་བཏགས་པའི་མངོན་པར་ཤེས་པ་སྣང་བས་རྣམ་པར་དམྱིགས་པ་
དང་། ཕྱོགས་ཀྱི་དྲ་བ་ཐ་དད་པ་ཐམས་ཅད་ཀྱི་རྗེས་སུ་སོང་བའི་ཡིད་ཀྱི་སྐྱེ་མཆེད་དང་། ཆོས་ཀྱི་དབྱིངས་ཀྱི་གཞི་ཐ་དད་པ་རྒྱས་པར་འགེང་པའི་སྨོན་ལམ་མངོན་པར་བསྒྲུབ་པའི་སྟོབས་དང་། 
ཆོས་ཐམས་ཅད་ལ་འཇུག་པའི་སྒོ་ནམ་མཁའི་དབྱིངས་ཀྱིས་ཀླས་ཏེ། མཐས་གཏུགས་པ་ཐམས་ཅད་དུ་ཁྱབ་པ་ལ། དུས་གསུམ་དུ་ཐ་མི་དད་ཅིང་རྒྱུན་མི་འཆད་པ་དང་། ཐ་དད་པ་དང་མོས་

77-1-205a

པ་ལས་འཇུག་པའི་སྟོབས་དགེ་བའི་བཤེས་གཉེན་གྱི་གདམས་ངག་སྣང་བའི་ཕྱོགས་ལ་ཞུགས་པས་ཡུལ་རྒྱ་མཚོའི་འགྲམ་གང་ན་བ་དེར་ཕྱིན་ཏེ། དེ་ལྟར་ཚོང་དཔོན་གྱི་བུ་ནོར་བཟང་
རིམ་གྲོ་དང་ཕུ་དུད་དང་། མཆོད་པ་དང་། སྟོབས་དང་། ཕྱག་བྱ་བ་དང་། བལྟ་བའི་བྱིན་གྱི་རླབས་དང་། སྨོན་ལམ་དང་། འདུ་ཤེས་ཀྱི་རྗེས་སུ་སོང་བ་དེ་ལྟ་བུའི་ཡིད་དང་ལྡན་པ་དང་། ཡེ་
ཤེས་ཀྱི་སྤྱོད་ཡུལ་ཚད་མེད་པའི་ས་དེ་ལྟ་བུ་ལ་ཞུགས་པའི་ཡེ་ཤེས་ཀྱི་མྱིག་གིས་ཁང་པ་བརྩེགས་པ་ཆེན་པོ་རྣམ་པར་སྣང་མཛད་གྱི་རྒྱན་གྱིས་བརྒྱན་པའི་སྙིང་པོའི་སྒོ་ནས་ལུས་ཐམས་ཅད་གྱི་ཕབ་
སྟེ། ཕྱག་བྱས་སོ། །དེས་རྣམ་པ་དེ་ལྟ་བུའི་མངོན་པར་བསྒྲུབ་པའི་ཚུལ་ཡིད་ཙམ་ཏུ་རྣམ་པར་བྱེད་དེ་མོས་པ་དང་དད་པ་ལས་བྱུང་བའི་ལྷག་པའི་བསམ་པ་དང་། སྨོན་ལམ་གྱིས་མངོན་པར་བསྒྲུབ་པའི་མཐུ་
དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་བདག་ཉིད་རྒྱུན་མི་འཆད་པར་བྱིན་གྱིས་བརླབས་སོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་དང་མངོན་སུམ་དུ་གནས་པ་དང་། 
དགེ་བའི་བཤེས་གཉེན་གྱི་གནས་ཐམས་ཅད་དང་། དེ་བཞིན་གཤེགས་པའི་མཆོད་རྟེན་ཐམས་ཅད་དང་། དེ་བཞིན་གཤེགས་པའི་སྐུ་གཟུགས་ཐམས་ཅད་དང་། སངས་རྒྱས་དང་བྱང་ཆུབ་སེམས་
དཔའི་ཕོ་བྲང་ཐམས་ཅད་དང་། ཆོས་རིན་པོ་ཆེའི་གནས་ཐམས་ཅད་དང་། ཉན་ཐོས་དང་རང་སངས་རྒྱས་ཐམས་ཅད་ཀྱི་གནས་དང་མཆོད་རྟེན་ཐམས་ཅད་དང་། མངོན་སུམ་དུ་གནས་པ་ནས། འཕགས་
པའི་ཚོགས་དང་སྦྱིན་པའི་གནས་དང་། བླ་མ་དང་ཕ་མ་ཐམས་ཅད་ཀྱི་བར་གྱི་འགྲོ་ཚོགས་ཐམས་ཅད་དང་། མངོན་སུམ་དུ་གནས་པའི་རྒྱུན་མི་འཆད་པར་ཡེ་ཤེས་ཀྱི་ལུས་ཐ་མི་དད་པའི་ཚུལ་ལ་འཇུག་

77-1-205b

པ་ཐམས་ཅད་ཀྱི་རྗེས་སུ་སོང་བ་དང་། འདུ་ཤེས་ཀྱི་བྱིན་གྱིས་རླབས་དང་། ཡེ་ཤེས་ཡིད་ལ་བྱ་བས་བྱིན་གྱི་རླབས་སོ། །ཁང་པ་བརྩེགས་པ་ཆེན་པོ་རྣམ་པར་སྣང་མཛད་གྱི་རྒྱན་གྱིས་བརྒྱན་པའི་སྙིང་པོའི་
སྒོ་ནས་ཇི་ལྟ་བ་དེ་བཞིན་དུ་གོང་དུ་བརྗོད་པའི་དམིགས་པ་ཐམས་ཅད་ལ་ཡང་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པས་འདུད་ཅིང་ཕྱག་བྱ་བར་བྱིན་གྱིས་བརློབས་སོ། །དེ་བཞིན་དུ་ཕྱི་མའི་མཐའི་མུར་
ཐུག་པར་རྒྱུན་འཆད་པ་མྱེད་པར་བྱིན་གྱིས་རླབས་ཏེ། ནམ་མཁའི་དབྱིངས་ཚད་མེད་པ་དང་མཉམ་པ་ཉིད་དང་། ཆོས་ཀྱིས་དབྱིངས་སྒྲིབ་པ་མྱེད་པ་དང་མཉམ་པ་ཉིད་དང་། ཡང་དག་པའི་མཐའ་ཐམས་ཅད་
ཀྱི་རྗེས་སུ་སོང་བ་དང་། མཉམ་པ་ཉིད་དང་། དེ་བཞིན་ཉིད་རྣམ་པར་མི་རྟོག་པ་དང་མཉམ་པ་ཉིད་དང་། གྲིབ་མ་ལྟ་བུའི་ཡེ་ཤེས་དང་། འདུ་ཤེས་ཀྱི་རྒྱས་པར་དགོད་པ་མཉམ་པ་ཉིད་དང་། རྨི་ལམ་
ལྟ་བུའི་རྣམ་པར་སྤྱོད་པ་དང་། མཉམ་པ་ཉིད་དང་། གཟུགས་རྙན་ལྟ་བུའི་འཇིག་རྟེན་དང་། འགྲོ་བ་ཐམས་ཅད་རྣམ་པར་དམིགས་པའི་མཉམ་པ་ཉིད་དང་། རྒྱུ་དང་རྐྱེན་ལས་བྱུང་བའི་སྒྲ་རྙན་ལྟ་བུའི་མཉམ་པ་
ཉིད་དང་། འབྱུང་བ་དང་འཇིག་པ་མི་སྐྱེ་བ་དང་། མཉམ་པའི་མཉམ་པ་ཉིད་དང་། རྐྱེན་དང་རྟེན་པའི་རྒྱུད་དངོས་པོ་མེད་པའི་རང་བཞིན་དང་མཉམ་པའི་མཉམ་པ་ཉིད་ཀྱིས་ལས་ཇི་ལྟ་བ་བཞིན་དུ་ཡོངས་
སུ་བྱུང་བའི་རྣམ་པར་སྨིན་པ་ལ་ནི་མོས་པར་བྱེད། རྒྱུ་ཇི་ལྟ་བ་བཞིན་ཏུ་ཡོངས་སུ་བྱུང་བའི་འབྲས་བུ་ལ་ནི་མོས་པར་བྱེད། བརྩེགས་པ་ཇི་ལྟ་བ་བཞིན་དུ་ཡོངས་སུ་བྱུང་བའི་བྱ་བ་ཐམས་ཅད་ལ་ནི་མོས་
པར་བྱེད། དད་པ་ལས་ཡོངས་སུ་བྱུང་བའི་དེ་བཞིན་གཤེགས་པ་འབྱུང་བ་ཐམས་ཅད་ལ་ནི་མོས་པར་བྱེད། མོས་པ་ཇི་ལྟ་བ་བཞིན་དུ་ཡོངས་སུ་བྱུང་བའི་སངས་རྒྱས་མཆོད་པའི་སྤྲུལ་པ་ཐམས་ཅད་ལ་

77-1-206a

ནི་མོས་པ་བྱེད། རིམ་གྲོ་ལས་བྱུང་བའི་དེ་བཞིན་གཤེགས་པའི་སྤྲུལ་པ་ཐམས་ཅད་ལ་ནི་མོས་པར་བྱེད། དགེ་བའི་རྩ་བའི་ཚོགས་ལས་ཡོངས་སུ་བྱུང་བའི་སངས་རྒྱས་ཐམས་
ཅད་ཀྱི་ཆོས་ཉིད་ལ་ནི་མོས་པར་བྱེད། ཤེས་རབ་དང་ཐབས་ལས་ཡོངས་སུ་བྱུང་བའི་རྒྱན་ཡིད་བཞིན་ཏུ་བསྒྲུབ་པ་ཐམས་ཅད་ལ་ནི་མོས་པར་བྱེད། སྨོན་ལམ་ལས་ཡོངས་སུ་བྱུང་བའི་སངས་
རྒྱས་ཀྱི་ཆོས་ཐམས་ཅད་ལ་ནི་མོས་པར་བྱེད། བསྔོ་བ་ལས་ཡོངས་སུ་བྱུང་བའི་བྱང་ཆུབ་སེམས་དཔའི་སྤྱོད་པ་ཐམས་ཅད་དང་། ཆོས་ཀྱི་དབྱིངས་ཐམས་ཅད་མཁྱེན་པའི་ཡུལ་དུ་གྱུར་བའི་
རྣམ་པར་བསྒྲུབ་པ་རྒྱས་པར་འགེང་བའི་རྒྱན་ལ་ནི་མོས་པར་བྱེད་ཅིང་ཡོངས་སུ་བསྔོ་བའི་ཡེ་ཤེས་ཆད་པའི་འདུ་ཤེས་དང་བྲལ་བ་དང་། སྐྱེ་བ་མེད་པའི་ཡེ་ཤེས་རྟག་པའི་འདུ་ཤེས་དང་བྲལ་བ་དང་། ཡང་
དག་པའི་སྤྱོད་པ་ལ་འཇུག་ཅིང་རྒྱུ་ཉེ་བར་སྩོགས་པའི་ཡེ་ཤེས་རྒྱུ་དང་བྱ་བའི་ལྟ་བ་མེད་པ་དང་། ཕྱིན་ཅི་ལོག་མེད་པའི་ཡེ་ཤེས་ཕྱིན་ཅི་ལོག་གི་ལྟ་བ་དང་བྲལ་བ་དང་། གཞན་གྱི་དྲིང་མི་འཇོག་པའི་
ཡེ་ཤེས་དབང་ཕྱུག་དུ་ལྟ་བ་མེད་པ་དང་། རྟེན་པ་འཇུག་པའི་ཡེ་ཤེས་དེ་དག་དང་ཕ་རོལ་གྱི་འདུ་ཤེས་ཀྱི་ལྟ་བ་དང་། བྲལ་བ་དང་། ཆོས་ཀྱི་དབྱིངས་མཐའ་དང་དབུས་མེད་པ་ལ་འཇུག་པའི་ཡེ་ཤེས་
མཐར་འཛིན་པའི་ལྟ་བ་དང་བྲལ་བ་དང་། གཟུགས་བརྙན་ལྟ་བུར་མངོན་པར་བསྒྲུབ་པའི་ཡེ་ཤེས་འཕོ་བའི་ལྟ་བ་མེད་པ་དང་། མི་སྐྱེ་མི་འགག་པའི་ཡེ་ཤེས་སྐྱེ་བ་དང་། སྟོང་པ་ཉིད་ཀྱིས་མི་སྐྱེ་
བའི་ཡེ་ཤེས་བལྟ་བའི་རྣམ་པ་ཐམས་ཅད་དང་བྲལ་བ་དང་། སྨོན་ལམ་མངོན་པར་བསྒྲུབ་པའི་ཡེ་ཤེས་ཀྱི་སྟོབས་དབང་ཕྱུག་མེད་པའི་ཆོས་ཉིད་རབ་ཏུ་རྟོགས་པ་དང་། མཚན་མ་མེད་པའི་མཐའི་སྒོ་དང་ལྡན་

77-1-206b

པའི་ཡེ་ཤེས་མཚན་མ་ཐམས་ཅད་དང་བྲལ་བས་ས་བོན་ལས་མྱུ་གུ་ཆུད་མི་ཟ་བའི་ཆོས་ཉིད་དང་། རྒྱ་ལས་རྒྱའི་གཟུགས་བརྙན་འབྱུང་བའི་ཆོས་ཉིད་དང་། གཟུགས་ལས་གཟུགས་བརྙན་འབྱུང་བའི་
ཆོས་ཉིད་དང་། སྒྲ་བརྙན་དང་བསྒྲ་མཉམ་པ་རྣམ་པར་དམིགས་པའི་ཆོས་ཉིད་དང་རྣམ་པར་དཔྱོད་པ་དང་། རྨི་ལམ་དུ་མཉམ་པར་རྣམ་པར་དམིགས་པའི་ཆོས་ཉིད་དང་། སྒྱུ་མའི་རྣམ་པ་ལྟར་ལས་ལས་
ཡོངས་སུ་འབྱུང་བའི་ཆོས་དང་། སེམས་གཟུགས་མེད་པས་འཇིག་རྟེན་ཡོངས་སུ་བསྐྱེད་པའི་ཆོས་ཉིད་དང་། རྐྱེན་དང་རྒྱུ་དང་ཇི་ལྟ་བ་བརྩགས་པ་བཞིན་དུ། འབྲས་བུ་འབྱུང་བའི་ཆོས་ཉིད་དང་ལས་
ཇི་ལྟར་བསྩགས་པ་དང་། མཉམ་པར་རྣམ་པར་སྨིན་པ་འབྱུང་བའི་ཆོས་ཉིད་དང་། ཐབས་མཁས་པས་རྣམ་པར་བསྒྲུབ་པའི་ཆོས་ཉིད་དང་། ཆོས་མ་ཡིན་པ་མཉམ་པ་ཉིད་ཀྱི་མངོན་པར་བརླན་པའི་
ཆོས་ཉིད་དང་། ཡེ་ཤེས་ཀྱི་རྗེས་སུ་འཇུག་པ་དེ་ལྟ་བུ་མངོན་པར་བསྒྲུབ་པའི་འདུ་ཤེས་དང་། ཡིད་ལ་བྱ་བས་ཚོང་དཔོན་གྱི་བུ་ནོར་བཟངས་གྱིས་ཁང་པ་རྩེགས་པ་རྣམ་པར་སྣང་མཛད་ཀྱི་རྒྱན་གྱི་
བརྒྱན་པའི་སྙིང་པོ་དེའི་སྒོ་ནས་རྣམ་པ་དེ་ལྟ་བུར་བཏུད་དེ། ཕྱག་འཚལ་ནས་ཡུན་རིང་མོ་ཞིག་ལོན་པ་དང་། དགེ་བའི་རྩ་བའི་ཤུགས་བསམ་གྱིས་མི་ཁྱབ་པས་མངོན་པར་བརླན་པའི་
སེམས་དང་ལྡན་པ་ལུས་དང་སེམས་ཤིན་ཏུ་སིམ་པར་གྱུར་པ་དེ། ཁང་པ་བརྩེགས་པའི་གནས་ནས་ལངས་ཏེ། ཡིད་ཙམ་ཞིག་ནས་ཁང་པ་བརྩེགས་པ་ཆེན་པོ་རྣམ་པར་སྣང་མཛད་ཀྱི་རྒྱན་གྱིས་བརྒྱན་
པའི་སྙིང་པོ་དེ་ལ་མིག་མི་འགོག་པས་བལྟས་ནས། ཐལ་མོ་སྦྱར་ཏེ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། དེ་ལྟ་བུའི་འདུ་ཤེས་དང་། ཡིད་ལ་བྱ་བས་བསྐུལ་བའི་སེམས་

77-1-207a

དང་ལྡན་པས། ཚིག་དུ་བརྗོད་པ་འདི་ནི་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་གནས་ལ་རྣམ་པར་སྤྱོད་པ་རྣམས་ཀྱི་གནས་སོ། །ཆོས་ཀྱི་
དབྱིངས་ཐ་དད་པའི་གནས་ལ་རྣམ་པར་སྤྱོད་པའི་སེམས་ཅན་གྱི་ཁམས་མི་དམིགས་པའི་གནས་ལ་རྣམ་པར་སྤྱོད་པ། ཆོས་ཐམས་ཅད་མི་སྐྱེ་བའི་གནས་ལ་རྣམ་པར་སྤྱོད་པར། འཇིག་
རྟེན་ཐམས་ཅད་གནས་མེད་པའི་གནས་ལ་རྣམ་པར་སྤྱོད་པ། འགྲོ་བ་ཐམས་ཅད་ཀྱི་གནས་གནས་མྱེད་པའི་གནས་ལ་རྣམ་པར་སྤྱོད་པ། གནས་ཐམས་ཅད་རྣམ་པར་བསྒོམས་
པའི་གནས་ལ་རྣམ་པར་སྤྱོད་པ། རྟེན་པ་ཐམས་ཅད་ལ་མི་རྟེན་པའི་གནས་ལ་རྣམ་པར་སྤྱོད་པ། ལུས་ཐམས་ཅད་ལ་མྱི་རྟེན་པའི་གནས་ལ་རྣམ་པར་སྤྱོད། འདུ་ཤེས་
ཀྱི་རྣམ་པ་ཐམས་ཅད་བསྩལ་བའི་གནས་ལ་རྣམས་པར་སྤྱོད་པ་རྣམས་ཀྱི་གནས་སོ། །འདི་ནི་ཆོས་ཐམས་ཅད་རང་བཞིན་མེད་པའི་གནས་ལ་རྣམ་པར་སྤྱོད་པ་རྣམས་གྱི་གནས་
སོ། །རྟོག་པ་དང་རྣམ་པར་རྟོག་པ་དང་། ཡོངསུ་རྟོག་པ་ཐམས་ཅད་དུ། རྣམ་པར་རྟོག་པའི་གནས་ལ་རྣམ་པར་སྤྱོད་པ། འདུ་ཤེས་དང་སེམས་དང་། ཡིད་ཐམས་ཅད་
ཀྱིས་རྣམ་པར་དབེན་པའི་གནས་ལ་སྤྱོད་པ། ལམ་ཐམས་ཅད་བླང་བ་མེད་པ་དང་། དོར་བ་མེད་པའི་གནས་ལ་རྣམ་པར་སྤྱོད་པ། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་འཇུག་
པའི་གནས་ལ་རྣམ་པར་སྤྱོད་པ། སྒོ་ཀུན་ནས་ཆོས་ཀྱི་དབྱིངས་རྒྱས་པར་འགེངས་པ་ཐབས་ཅད་ཀྱི་གནས་ལ་རྣམ་པར་སྤྱོད་པ། ཉོན་མོངས་པ་ཐམས་ཅད་ཞི་ཞིང་ཉེ་བར་གནས་ལ་

77-1-207b

རྣམ་པར་སྤྱོད་པ། ལྟ་བ་དང་སྲིད་པ་དང་། ང་རྒྱལ་ཐམས་ཅད་སྤོང་པའི་ཤེས་རབ་ཤས་ཆེ་བའི་གནས་ལ་རྣམ་པར་སྤྱོད་པ། བསམ་གཏན་དང་། རྣམ་པར་ཐར་པ་དང་། ཏིང་ངེ་
འཛིན་དང་། སྙོམས་པར་འཇུག་པ་དང་། མངོན་པར་ཤེས་པ་དང་། རིག་པ་བསྐྱེད་པ་ཐམས་ཅད་ལ་རྣམ་པར་རོལ་བའི་གནས་ལ་རྣམ་པར་སྤྱོད་པ། བྱང་ཆུབ་སེམས་
དཔའ་ཐམས་ཅད་ཀྱི་ཏིང་ངེ་འཛིན་གྱི་སྤྱོད་ཡུལ་བསྒོམ་པའི་གནས་ལ་རྣམ་པར་སྤྱོད་པ་རྣམས་ཀྱི་གནས་སོ། །འདི་ནི་སངས་རྒྱས་ཐམས་ཅད་ཀྱི་ཞབས་ཀྱི་དྲུང་ན་ཉེ་བར་གནས་
པའི་གནས་ལ་རྣམ་པར་སྤྱོད་པ་རྣམས་ཀྱི་གནས་སོ། །འདི་ནི་གང་དེ་དག་བསྐལ་པ་གཅིག་ལ་བསྐལ་པ་ཐམས་ཅད་དང་། བསྐལ་པ་ཐམས་ཅད་ཀྱི་བསྐལ་པ་གཅིག་ཏུ་འཇུག་
པའི་གནས་ལ་རྣམ་པར་སྤྱོད་པ། གང་དེ་དག་ཞིང་གཅིག་དང་ཞིང་ཐམས་ཅད་དང་། ཞིང་ཐམས་ཅད་དང་ཞིང་གཅིག་ཏུ་ཐ་མྱི་དད་པའི་གནས་ལ་རྣམ་པར་སྤྱོད་པ། གང་དེ་
དག་ཆོས་གཅིག་དང་ཆོས་ཐམས་ཅད་དུ། ཆོས་ཐམས་ཅད་དང་། ཆོས་གཅིག་ཏུ་མྱི་འགལ་བའི་གནས་ལ་རྣམ་པར་སྤྱོད་པ། གང་དེ་དག་སེམས་ཅན་གཅིག་དང་། །
སེམས་ཅན་ཐམས་ཅད་དུ་སེམས་ཅན་ཐམས་ཅད་དང་། སེམས་ཅན་གཅིག་ཏུ་ཐ་མྱི་དད་པའི་གནས་ལ་རྣམ་པར་སྤྱོད་པ། གང་དེ་དག་སངས་རྒྱས་གཅིག་དང་། སངས་རྒྱས་
ཐམས་ཅད་དུ་སངས་རྒྱས་ཐམས་ཅད་དང་། སངས་རྒྱས་གཅིག་ཏུ་མྱི་གཉིས་པའི་གནས་ལ་རྣམ་པར་སྤྱོད་པ། གང་དེ་དག་དུས་ཐམས་ཅད་ལ་སྐད་ཅིག་གཅིག་གིས་འཇུག་

77-1-208a

པའི་གནས་ལ་རྣམ་པར་སྤྱོད་པ། གང་དེ་དག་སེམས་བསྐྱེད་པ་གཅིག་གིས་ཞིང་ཐམས་ཅད་དུ་འགྲོ་བའི་གནས་ལ་རྣམ་པར་སྤྱོད་པ། གང་དེ་དག་སེམས་ཅན་
ཐམས་ཅད་ཀྱི་གནས་སུ་གཟུགས་རྙན་སྣང་བའི་གནས་ལ་རྣམ་པར་སྤྱོད་པ། གང་དེ་དག་འཇིག་རྟེན་ཐམས་ཅད་ལ་ཕན་པ་དང་བདེ་བའི་སེམས་ཀྱི་གནས་ལ་རྣམ་པར་སྤྱོད་པ། གང་
དེ་དག་ཐོབ་པར་བྱ་བ་ཐམས་ཅད་རང་ལ་རག་ལས་པའི་གནས་ལ་རྣམ་པར་སྤྱོད་པ་དེ་དག་གི་གནས་སོ། །འདི་ནི་གང་དེ་དག་འཇིག་རྟེན་གྱི་གནས་ཐམས་ཅད་ལས་གྱེན་ཏུ་འཕགས་ཀྱང་
སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་འགྲོ་བ་ཐམས་ཅད་ཀྱི་གནས་ན་སྣང་བ་དང་། གང་དེ་དག་ཞིང་ཐམས་ཅད་ལ་མི་གནས་ཀྱང་། དེ་བཞིན་གཤེགས་པ་ཐམས་
ཅད་ལ་མཆོད་པ་བྱ་བའི་ཕྱིར་ཞིང་ཐམས་ཅད་དུ་རྗེས་སུ་སྤྱོད་པ་དང་། གང་དེ་དག་སངས་རྒྱས་ཀྱི་ཞིང་ཐམས་ཅད་ཀྱི་རྒྱན་ཡོངས་སུ་བཟུང་བའི་ཕྱིར་ཞིང་ཐམས་ཅད་དུ་རྗེས་སུ་སྤྱོད་ཀྱང་གནས་
ནས་གཡོ་བ་མེད་པ་དང་། གང་དེ་དག་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་འདུག་ཀྱང་སངས་རྒྱས་ཀྱི་འདུ་ཤེས་སུ་མངོན་པར་ཞེན་པ་དང་བྲལ་བ་དང་། གང་དེ་དག་དགེ་
བའི་བཤེས་གཉེན་ཐམས་ཅད་ལ་རྗེན་པའི་གནས་ལ་རྣམ་པར་སྤྱོད་ཀྱང་འགྲོ་བ་ཐམས་ཅད་ན་དེའི་ཡེ་ཤེས་ལ་མཉམ་ཞིང་འདྲ་བ་མྱེད་པ་དང་། གང་དེ་དག་བདུད་ཀྱི་གནས་
ཐམས་ཅད་ན་སྤྱོད་ཀྱང་འདོད་པའི་ཡོན་ཏན་གྱི་དགའ་བ་དང་བྲལ་བ་དང་། གང་དེ་དག་འདུ་ཤེས་ཀྱི་རྣམ་པའི་གནས་ཐམས་ཅད་ལ་རྣམ་པར་སྤྱོད་ཀྱང་འདུ་ཤེས་ཀྱི་རྣམ་པ་ཐམས་ཅད་

77-1-208b

རྣམ་པར་བསྩལ་བའི་ཡིད་དང་ལྡན་པ་དང་། གང་དེ་དག་འགྲོ་བ་ཐམས་ཅད་དུ་ཁྱབ་པའི་ལུས་དང་ལྡན་ཡང་བདག་དང་སེམས་ཅན་དུ་གཉིས་སུ་བྱ་བར་མི་སྤྱོད་པ་དང་། གང་དེ་དག་
འཇིག་རྟེན་གྱི་ཁམས་ཐམས་ཅད་ཀྱི་ཁོངསུ་ཆུད་པའི་ལུས་དང་ལྡན་ཡང་། ཆོས་ཀྱི་དབྱིངས་ཐ་དད་དུ་བྱ་བའི་གནས་ལ་རྣམ་པར་མྱི་སྤྱོད་པ་དང་། གང་དེ་དག་མ་འོངས་པའི་
བསྐལ་པ་ཐམས་ཅད་དུ་གནས་པར་བྱ་བའི་སྨོན་ལམ་དང་ལྡན་ཡང་། བསྐལ་པ་རིང་བ་དང་། ཐུང་བའི་འདུ་ཤེས་ཀྱི་རྣམ་པར་མི་སྤྱོད་པ་དང་། གང་དེ་དག་སྐྲའི་རྩེ་མོ་གཅིག་
ནས་མི་གཡོ་ཡང་འཇིག་རྟེན་གྱི་ཁམས་ཐམས་ཅད་དུ་སྣང་བ་དེ་ལྟ་བུ་བསྒྲུབ་དཀའ་བའི་ཆོས་ཀྱི་ཕྱོགས་ལ་འཇུག་པ་རྣམ་པར་སྤྱོད་པ་དེ་དག་གིས་གནས་སོ། །འདི་ནི་ཟབ་མོའི་
གནས་ལ་རྣམ་པར་སྤྱོད་པ་མི་གཉིས་པའི་གནས་ལ་རྣམ་པར་སྤྱོད་པ། མཚན་ཉིད་མེད་པའི་གནས་ལ་རྣམ་པར་སྤྱོད་པ། གཉེན་པོ་མེད་པའི་གནས་ལ་རྣམ་པར་
སྤྱོད་པ། མི་དམྱིགས་པའི་གནས་ལ་རྣམ་པར་སྤྱོད་པ། སྤྲོས་པ་མྱེད་པའི་གནས་ལ་རྣམ་པར་སྤྱོད་པ། བྱམས་པ་ཆེན་པོ་དང་། སྙིང་རྗེ་ཆེན་པོའི་གནས་
ལ་རྣམ་པར་སྤྱོད་པ། ཉན་ཐོས་དང་། རང་སངས་རྒྱས་ཐམས་ཅད་ཀྱི་ཆུད་པར་དཀའ་བའི་གནས་ལ་རྣམ་པར་སྤྱོད་པ། བདུད་ཀྱི་ཡུལ་ཐམས་ཅད་ལས་ཡང་དག་པར་འདས་པའི་གནས་
ལ་རྣམ་པར་སྤྱོད་པ། འཇིག་རྟེན་གྱི་ཡུལ་ཐམས་ཅད་ཀྱི་མ་གོས་པའི་གནས་ལ་རྣམ་པར་སྤྱོད་པ། བྱང་ཆུབ་སེམས་དཔའ་ཐམས་ཅད་ཀྱི་གནས་ཀྱི་ཕ་རོལ་ཏུ་ཕྱིན་པའི་གནས་ལ་རྣམ་པར་སྤྱོད་པ། སངས་

77-1-209a

རྒྱས་ཐམས་ཅད་ཀྱི་གནས་དང་འཐུན་པའི་གནས་ལ་རྣམ་པར་སྤྱོད་པ་རྣམས་ཀྱི་གནས་སོ། །གང་དེ་དག་མཚན་མ་ཐམས་ཅད་དང་བྲལ་བའི་གནས་ལ་རྣམ་པར་སྤྱོད་ཀྱང་ཉན་ཐོས་ཀྱི་སྐྱོན་
མེད་པར་མི་འཇུག་པ་དང་། གང་དེ་དག་ཆོས་ཐམས་ཅད་སྐྱེ་བ་མེད་པའི་གནས་ལ་རྣམ་པར་སྤྱོད་ཀྱང་མི་སྐྱེ་བའི་ཆོས་ཉིད་དུ་མི་ལྟུང་བ་དང་། གང་དེ་དག་མི་སྡུག་པའི་གནས་ལ་རྣམ་པར་སྤྱོད་ཀྱང་འདོད་ཆགས་དང་
བྲལ་བའི་ཆོས་ཉིད་མངོན་དུ་མི་བྱེད་དེ་འདོད་ཆགས་ཀྱི་ཆོས་དང་ཡང་ལྷན་གཅིག་ཏུ་མི་གནས་པ་དང་། གང་དེ་དག་བྱམས་པའི་གནས་ལ་རྣམ་པར་སྤྱོད་ཀྱང་ཞེ་སྡང་གི་དྲི་མའི་རྗེས་སུ་སོང་བའི་སེམས་མེད་
པ་དང་། གང་དེ་དག་རྟེན་ཅིང་འབྲེལ་བའི་གནས་ལ་རྣམ་པར་སྤྱོད་ཀྱང་ཆོས་ཐམས་ཅད་ལ་ཤིན་ཏུ་རྨོངས་པ་མེད་པ་དང་། གང་དེ་དག་བསམ་གཏན་བཞིའི་གནས་ལ་རྣམ་པར་སྤྱོད་ཀྱང་བསམ་གཏན་གྱི་
དབང་གིས་མི་སྐྱེ་བ་དང་། གང་དེ་དག་ཚད་མེད་པ་བཞིའི་གནས་ལ་རྣམ་པར་སྤྱོད་ཀྱང་སེམས་ཅན་ཡོངས་སུ་སྨྱིན་པར་བྱ་བའི་དོན་དུ་གཟུགས་ཀྱི་ཁམས་ཀྱི་ལམ་གྱི་རྒྱུད་དུ་མི་འདོང་བ་དང་། གང་དེ་དག་
གཟུགས་མེད་པའི་སྙོམས་པར་འཇུག་པ་བཞིའི་གནས་ལ་རྣམ་པར་སྤྱོད་ཀྱང་སྙིང་རྗེ་ཆེན་པོས་ཡོངས་སུ་ཟིན་པས་གཟུགས་མེད་པའི་ཁམས་ཀྱི་ལམ་གྱི་རྒྱུད་དུ་མི་འདོང་བ་དང་། གང་དེ་དག་
ཞི་གནས་དང་ལྷག་མཐོང་གིས་གནས་ལ་རྣམ་པར་སྤྱོད་ཀྱང་སེམས་ཅན་ཡོངས་སུ་སྨིན་པར་བྱ་བའི་ཕྱིར། བདག་གིས་རིག་པའི་རྣམ་པར་གྲོལ་བ་མངོན་ཏུ་མི་བྱེད་པ་དང་། གང་དེ་དག་བཏང་སྙོམས་
ཆེན་པོའི་གནས་ལ་རྣམ་པར་སྤྱོད་ཀྱང་སེམས་ཅན་གྱི་ཁམས་ཡོངས་སུ་མི་གཏོང་བ་དང་། གང་དེ་དག་སྟོང་པ་ཉིད་ཀྱི་གནས་ལ་རྣམ་པར་སྤྱོད་ཀྱང་ལྟ་བའི་རྣམ་པ་ལ་མི་གནས་པ་དང་། གང་དེ་དག་

77-1-209b

མཚན་མ་མེད་པའི་སྤྱོད་ཡུལ་དང་ལྡན་ཡང་མཚན་མ་ལ་སྤྱོད་པའི་སེམས་ཅན་རྣམ་པར་གདུལ་བ་ལ་བརྩོན་པ་དང་། གང་དེ་དག་སྨོན་ལམ་ཐམས་ཅད་དང་བྲལ་བ་ཡིན་ཡང་བྱང་ཆུབ་སེམས་དཔའི་
སྤྱོད་པའི་སྨོན་ལམ་གྱི་རྒྱུན་མི་འཆད་པ་དང་། གང་དེ་དག་ལས་དང་ཉོན་མོངས་པ་ཐམས་ཅད་ལ་དབང་བསྒྱུར་ཡང་སེམས་ཅན་ཡོངས་སུ་སྨྱིན་པའི་དོན་དུ་ལས་དང་ཉོན་མོངས་པའི་རྗེས་སུ་འབྲང་བར་
སྣང་བ་དང་། གང་དེ་དག་ཤི་འཕོ་དང་སྐྱེ་བ་ཡོངས་སུ་ཤེས་ཀྱང་ཚེའི་ཤི་འཕོ་དང་སྐྱེ་བ་ཡོངས་སུ་སྟོན་པ་དང་། གང་དེ་དག་འགྲོ་བ་ཐམས་ཅད་ལས་རྣམ་པར་ལོག་ཀྱང་སེམས་ཅན་གདུལ་བའི་དབང་
གིས་འགྲོ་བ་ཐམས་ཅད་དུ་འདོང་བ་དང་། གང་དེ་དག་བྱམས་པ་ལ་རྣམ་པར་སྤྱོད་ཀྱང་གང་ལ་ཡང་ཆགས་པར་རྣམ་པར་སྤྱོད་པ་མེད་པ་དང་། གང་དེ་དག་སྙིང་རྗེ་ལ་རྣམ་པར་སྤྱོད་ཀྱང་གང་ལ་ཡང་ཆགས་
པར་རྣམ་པར་ལྟ་བས་རྣམ་པར་སྤྱོད་པ་མ་ཡིན་པ་དང་། གང་དེ་དག་དགའ་བ་ལ་རྣམ་པར་སྤྱོད་ཀྱང་སེམས་ཅན་སྡུག་བསྔལ་བ་ལ་རྣམ་པར་ལྟ་བས་རྟག་ཏུ་མི་དགའ་བ་དང་། གང་དེ་དག་བཏང་སྙོམས་ལ་རྣམ་
པར་སྤྱོད་ཀྱང་གཞན་གྱི་དོན་ལ་རྟག་ཏུ་འབད་པ་དང་། གང་དེ་དག་མཐར་གྱིས་གནས་པའི་སྙོམས་པར་འཇུག་པ་དགུ་ལ་རྣམ་པར་སྤྱོད་ཀྱང་འདོད་པའི་ཁམས་སུ་སྐྱེ་བ་ལ་མི་སྤྱོད་པ་དང་། གང་དེ་དག་
སྐྱེ་བ་ཐམས་ཅད་ལ་མི་གནས་པར་རྣམ་པར་སྤྱོད་ཀྱང་ཡང་དག་པའི་མཐའ་མངོན་དུ་བྱ་བ་ལ་རྣམ་པར་མི་སྤྱོད་པ་དང་། གང་དེ་དག་རྣམ་པར་ཐར་པ་གསུམ་ལ་རྣམ་པར་སྤྱོད་ཀྱང་ཉན་ཐོས་ཀྱི་རྣམ་པར་ཐར་
པ་ཐོབ་པར་བྱ་བ་ལ་རྣམ་པར་མི་སྤྱོད་པ་དང་། གང་དེ་དག་འཕགས་པའི་བདེན་པ་བཞིའི་རྣམ་པར་ལྟ་བ་ལ་རྣམ་པར་སྤྱོད་ཀྱང་འབྲས་བུ་མངོན་ཏུ་བྱ་བའི་ཕྱིར་མི་སྤྱོད་པ་དང་། གང་དེ་དག་རྟེན་ཅིང་འབྲེལ་

77-1-210a

པར་འབྱུང་བ་ཟབ་མོ་བརྟག་པ་ལ་རྣམ་པར་སྤྱོད་ཀྱང་ཤིན་ཏུ་འགོག་པར་ལྟུང་བར་རྣམ་པར་མི་སྤྱོད་པ་དང་། གང་དེ་དག་འཕགས་པའི་ལམ་གྱི་ཡན་ལག་བརྒྱད་བསྒོམ་པ་ལ་རྣམ་པར་སྤྱོད་ཀྱང་ཤིན་
ཏུ་འབྱུང་བ་ལ་རྣམ་པར་མི་སྤྱོད་པ་དང་། གང་དེ་དག་སོ་སོའི་སྐྱེ་བོའི་ས་ལས་ཤིན་ཏུ་འདས་པར་རྣམ་པར་སྤྱོད་ཀྱང་ཉན་ཐོས་དང་། རང་སངས་རྒྱས་ཀྱི་སར་ལྟུང་བ་ལ་རྣམ་པར་མི་སྤྱོད་པ་དང་། གང་དེ་
དག་ཉེ་བར་ལེན་པའི་ཕུང་པོ་ལྔ་ཡོངས་སུ་ཤེས་པ་ལ་རྣམ་པར་སྤྱོད་ཀྱང་ཕུང་པོ་ཤིན་ཏུ་འགོག་པར་ལྟུང་བ་ལ་རྣམ་པར་མི་སྤྱོད་པ་དང་། གང་དེ་དག་བདུད་ཀྱི་ལས་བཞི་ལས་ཤིན་ཏུ་འདས་པར་རྣམ་པར་
སྤྱོད་ཀྱང་བདུད་དུ་རྟོག་པ་ལ་རྣམ་པར་མི་སྤྱོད་པ་དང་། གང་དེ་དག་སྐྱེ་མཆེད་དྲུག་ལས་ཤིན་ཏུ་འདས་པར་རྣམ་པར་སྤྱོད་ཀྱང་ཤིན་ཏུ་མངོན་པར་བསྒྲུབ་པ་ལ་རྣམ་པར་མི་སྤྱོད་པ་དང་། གང་དེ་དག་དེ་བཞིན་
ཉིད་ལ་རྣམ་པར་སྤྱོད་ཀྱང་ཡང་དག་པའི་མཐར་ལྟུང་བ་ལ་རྣམ་པར་མི་སྤྱོད་པ་དང་། གང་དེ་དག་ཐེག་པ་ཐམས་ཅད་ལས་འབྱུང་བ་ཡོངས་སུ་སྟོན་པ་ལ་རྣམ་པར་སྤྱོད་ཀྱང་ཐེག་པ་ཆེན་པོ་ལས་ཉམས་པ་
ལ་རྣམ་པར་མི་སྤྱོད་པ་དེ་དག་དེ་ལྟ་བུར་ཡོན་ཏན་གྱི་གནས་ཐམས་ཅད་ལ་རྣམ་པར་སྤྱོད་པ་རྣམས་ཀྱི་གནས་སོ། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །
འདི་ལ་ཐུགས་རྗེ་ཆེན་པོ་བརྙེས་པས་རྣམ་དག་པ། །བྱམས་པ་བཤེས་གཉེན་དཔལ་ཆེན་འཇིག་རྟེན་ཕན་བརྩོན་པ། །དབང་བསྐུར་ས་གནས་རྒྱལ་བའི་སྲས་ཀྱི་ཐུ་བོ་སྟེ། །སངས་རྒྱས་ཡུལ་ལ་
རྗེས་སུ་དགོངས་ཤིང་རྣམ་པར་སྤྱོད། །རྒྱལ་བའི་སྲས་པོ་གྲགས་པ་ཆེན་པོ་མངའ་བ་རྣམས། །ཡེ་ཤེས་ཆེན་པོའི་སྤྱོད་ཡུལ་རྣམ་ཐར་བཞུགས་པ་དག །གང་རྣམས་ཆོས་དབྱིངས་ཀུན་ཏུ་ཐོགས་

77-1-210b

མེད་རྣམ་རྒྱུ་བ། །དཔེ་ཟླ་མེད་པ་དེ་དག་གནས་ནི་འདི་འདྲ་ཡིན། །དུལ་བའི་ཚུལ་ཁྲིམས་བཟོད་པ་བརྩོན་འགྲུས་སྟོབས་ཀྱིས་འཕགས། །བསམ་གཏན་མངོན་ཤེས་སྟོབས་ཀྱི་མཐར་ཕྱིན་ཤེས་
རྟོགས་པ། །ཤེས་རབ་ཐབས་དང་སྨོན་ལམ་སྟོབས་ལ་གནས་པ་རྣམས། །ཐེག་ཆེན་ཕ་རོལ་ཕྱིན་པ་རྣམས་ཀྱི་གནས་འདི་ཡིན། །འདི་ནི་ཆགས་མེད་བློ་གྲོས་བསམ་པ་རྒྱ་ཆེན་ཏེ། །ནམ་མཁའི་
སྤྱོད་ཡུལ་ལྡན་པ་མི་གནས་མི་རྟེན་པ། །དུས་གསུམ་ཐམས་ཅད་རྒྱས་འགེངས་སྒྲིབ་པ་མེད་པའི་གནས། །སྲིད་ཀུན་དངོས་པོ་རྣམ་པར་བསྒོམས་པ་རྣམས་ཀྱི་གནས། །གང་རྣམས་ཆོས་
ཀུན་མི་སྐྱེ་ཚུལ་ལ་བཞུགས་པ་རྣམས། །ཆོས་ཀྱི་རང་བཞིན་ནམ་མཁའི་དངོས་ཉིད་རྟོགས་མཛད་ལ། །ཅི་ལའང་གནས་པ་མི་མཛད་ནམ་མཁའི་བྱ་བཞིན་ཏེ། །མཁྱེན་པས་སྙེངས་པ་མི་མངའ་དེ་དག་
གནས་འདི་ཡིན། །གང་རྣམས་འདོད་ཆགས་ཞེ་སྡང་གཏི་མུག་རང་བཞིན་དངོས། །རྟོག་པའི་རྒྱུས་བསྐྱེད་ཕྱིན་ཅི་ལོག་ལས་བྱུང་མཁྱེན་ནས། །འདོད་ཆགས་བྲལ་བའང་རྣམ་པར་རྟོག་པ་མི་མཛད་
པ། །ཞི་དང་ཉེ་བར་ཞི་ལྡན་དེ་དག་གནས་འདི་ཡིན། །གང་རྣམས་རྣམ་པར་ཐར་དང་བདེན་ཚུལ་འཕགས་ལམ་དང་། །ཕུང་པོ་དེ་བཞིན་ཁམས་དང་སྐྱེ་མཆེད་རྟེན་པའི་དངོས། །ཡོངས་སུ་རྟོགས་མཛད་
མཁས་པ་ཞི་བར་མི་ལྟུང་བ། །ཤེས་རབ་ཐབས་མཁས་གནས་པ་དེ་དག་གནས་འདི་ཡིན། །གང་རྣམས་སྒྲིབ་པ་མེད་པའི་ཡེ་ཤེས་ཕྱོགས་ཞུགས་ཤིང་། །རྒྱལ་བའི་ཞིང་ལ་ཡོངས་རྟོག་རྣམ་རྟོག་ཀུན་
ཞི་ལ། །ཆོས་རྣམས་དངོས་པོའི་རང་བཞིན་མེད་པར་རྟོགས་མཛད་པ། །ཞི་བར་གཞོལ་བ་དེ་དག་གནས་ནི་འདི་འདྲའོ། །གང་རྣམས་ཆགས་མེད་སྤྱོད་པས་ཆོས་དབྱིངས་འདི་དག་ཏུ། །དངོས་དང་བྲལ་བར་རྣམ་

77-1-211a

སྤྱོད་མཁའ་ཡི་རླུང་འདྲ་བ། །དངོས་པོ་ཀུན་དང་བྲལ་ཞིང་དངོས་མེད་རྣམ་སྤྱོད་པ། །མི་གནས་བློ་མངའ་དེ་དག་གནས་ནི་འདི་ཡང་འདྲ། །གང་རྣམས་ངན་སོང་རྒྱུད་དུ་འགྲོ་བ་གོལ་བར་གྱུར། །སྡུག་
བསྔལ་ནད་པ་མི་བདེ་ཉམས་སུ་མྱོང་གཟིགས་ཤིང་། །བྱམས་པའི་འོད་ཀྱིས་ངན་སོང་ཐམས་ཅད་ཞི་མཛད་པ། །བྱམས་དང་ཐུགས་རྗེའི་ཐུགས་མངའ་དེ་དག་གནས་འདི་ཡིན། །ཉམ་ངའི་འཁོར་ན་
གནས་ཤིང་འཕགས་ལམ་གོལ་གྱུར་ཏེ། །འདྲོན་པ་དམུས་ལོང་དམྱིགས་དང་བྲལ་བར་འགྱུར་འདྲ་བའི། །འཇིག་རྟེན་གཟིགས་ཤིང་ཐར་ལམ་རབ་ལ་འགོད་མཛད་པ། །འདྲོན་པོའི་བསེལ་རབ་འདྲ་བ་དེ་
དག་གནས་འདི་ཡིན། །གང་རྣམས་སྐྱེ་དང་མྱ་ངན་རྒ་ཤི་དབང་གྱུར་པའི། །འགྲོ་བ་བདུད་ཀྱི་ཞགས་པས་ཡོངས་སུ་བཅིངས་གཟིགས་ཤིང་། །རྣམ་པར་བཀྲོལ་ནས་མི་འཇིགས་ཕྱོགས་བདེར་འདོན་
མཛད་པ། །དཔའ་བོ་དེ་དག་ཐུབ་པར་དཀའ་བའི་གནས་འདི་ཡིན། །ཉོན་མོངས་ནད་པའི་འགྲོ་མང་གང་གིས་གཟིགས་གྱུར་ཅིང་། །ཡེ་ཤེས་བདུད་རྩི་སྨན་ཆེན་ཡོངས་སུ་བསྡུད་མཛད་ནས། །ཐུགས་རྗེ་ཆེན་པོ་
བསྐྱེད་ཅིང་ཡོངས་སུ་འགྲེལ་མཛད་པ། །སྨན་པའི་རྒྱལ་པོ་ཆེན་པོ་འདྲ་བའི་གནས་འདི་ཡིན། །གང་གིས་འགྲོ་མང་སྡུག་བསྔལ་མགོན་མེད་གྱུར་པ་རྣམས། །ཉོན་མོངས་གཏོགས་སུ་ལྷུང་སྟེ་ཚམ་གྱི་མཚོར་ལྷུང་
བ། །གཟིགས་ཤིང་དགེ་བའི་ཆོས་ཀྱི་གྲུ་ཆེན་ཡོངས་སྦྱངས་ཏེ། །སྒྲོལ་མཛད་མཉན་པའི་བུ་འདྲ་དེ་དག་གནས་འདི་ཡིན། །གང་གིས་ཉོན་མོངས་རྒྱ་མཚོ་སྤྱོད་པའི་འགྲོ་གཟིགས་ཤིང་། །ཐམས་ཅད་མཁྱེན་
ཐུགས་རི་ཆེན་དགོངས་དག་སེམས་ཅན་མཆོག །སྲིད་པའི་རྒྱ་མཚོར་གཤེགས་ཤིང་མངོན་པར་འདྲེན་མཛད་པ། །མཉན་པའི་བུ་ལྟར་སྤྱོད་པ་དེ་དག་གནས་འདི་ཡིན། །སྨོན་ལམ་གནས་ན་བཞུགས་ཤིང་

77-1-211b

ཐུགས་རྗེ་བྱམས་སྤྱན་གྱིས། །གང་རྣམས་སེམས་ཅན་གནས་སུ་རྣམ་པར་གཟིགས་མཛད་ཅིང་། །སྲིད་པའི་རྒྱ་མཚོ་གནས་པའི་འགྲོ་མང་མངོན་འདོན་པ། །མཁའ་ལྡིང་གཞོན་འདྲ་དེ་དག་གནས་ནི་འདི་འདྲའོ། །
གང་རྣམས་ཆོས་དབྱིངས་མཁའ་ལ་ཉི་ཟླ་འདྲ་ཚུལ་དུ། །སེམས་ཅན་གནས་སུ་འོད་ཀྱིས་ཁྱབ་པར་རྣམ་སྤྱོད་པ། །སྨོན་ལམ་དཀྱིལ་འཁོར་ཡེ་ཤེས་དྲི་མེད་བཟང་པོའི་འོད། །འཇིག་རྟེན་སྣང་བར་མཛད་པ་
དེ་དག་གནས་འདི་ཡིན། །གང་རྣམས་སེམས་ཅན་གཅིག་ནི་ཡོངས་སུ་སྨིན་བྱའི་ཕྱིར། །ཕྱི་མཐའི་བསྐལ་པ་བྱེ་བ་ཟད་དུ་བརྟན་གནས་ལ། །སེམས་ཅན་གཅིག་ལ་ཇི་བཞིན་དེ་བཞིན་འགྲོ་བ་ཀུན། །
འཇིག་རྟེན་མགོན་དུ་གྱུར་པ་དེ་དག་གནས་འདི་ཡིན། །གང་རྣམས་འབྱམ་ཀླས་ཞིང་གཅིག་ཕྱི་མཐའི་བསྐལ་པར་ཡང་། །འགྲོ་དོན་བརྩོན་འགྲུས་སྐྱོ་མེད་སྤྱོད་པ་རྣམ་སྤྱོད་པ། །ཞིང་གཅིག་ཇི་བཞིན་
ཕྱོགས་རྣམས་ཀུན་ཏུ་སྟེ། །བསམ་པ་རྡོ་རྗེ་བཞིན་བརྟན་དེ་དག་གནས་འདི་ཡིན། །གང་རྣམས་ཕྱོགས་བཅུའི་བདེ་གཤེགས་རྣམས་ཀྱི་ཆོས་སྤྲིན་ལ། །སྟན་གཅིག་གནས་བཞིན་རྨོངས་པ་མེད་པར་
འཐུན་བྱེད་ཀྱང་། །ཕྱི་མཐའི་བསྐལ་པ་ཁྲག་ཁྲིག་བགྲངས་བར་མི་ངོམས་སེམས། །བློ་ཆེན་རྒྱ་མཚོ་ལྟ་བུའི་གནས་ནི་འདི་འདྲའོ། །གང་རྣམས་ཞིང་མང་རྒྱ་མཚོ་བརྗོད་དུ་མེད་འདོང་ཞིང་། །མགོན་
པོའི་འཁོར་རྣམས་རྒྱ་མཚོར་ཡོངས་སུ་འཇུག་བྱེད་ལ། །རྒྱལ་བའི་མཆོད་པ་སྣ་ཚོགས་རྒྱ་མཚོ་རབ་བྱེད་པ། །ཆགས་མེད་སྤྱོད་ཡུལ་མངའ་བ་དེ་དག་གནས་འདི་ཡིན། །བརྟན་པ་གྲངས་རྣམས་
སྨོན་ལམ་རྒྱ་མཚོར་འཇུག་བྱེད་ཅིང་། །སྤྱོད་པ་རྒྱ་མཚོ་མཐའ་དང་དབུས་མེད་ཞུགས་གྱུར་ཏེ། །འགྲོ་ལ་ཕན་ཕྱིར་བསྐལ་པ་རྒྱ་མཚོ་མང་སྤྱོད་པ། །ཡོན་ཏན་འབྱུང་གནས་དེ་དག་གནས་ནི་འདི་འདྲའོ། །

77-1-212a

གང་རྣམས་སྐྲ་རྩེ་གཅིག་ཏུ་ཞིང་རྣམས་ཐམས་ཅད་དང་། །སངས་རྒྱས་ཐམས་ཅད་བསྐལ་པ་མཐའ་དང་དབུས་མེད་པ། །འཛུད་ཅིང་དེ་ཡི་ཚུལ་ལ་འཇུག་ཀྱང་རྨོངས་བྱེད་པ། །ཆགས་པ་མེད་
པའི་མིག་ཅན་རྣམས་ཀྱི་གནས་འདི་ཡིན། །གང་རྣམས་སེམས་ཀྱི་སྐད་ཅིག་གཅིག་ལ་རྒྱ་མཚོ་ཡི། །བསྐལ་པ་འཛུད་བྱེད་ཞིང་དང་སངས་རྒྱས་འགྲོ་བ་རྣམས། །དེ་བཞིན་འཛུད་བྱེད་སྒྲིབ་མེད་ཡེ་ཤེས་
དྲན་གནས་པ། །ཡོན་ཏན་མཐར་ཕྱིན་དེ་དག་གནས་ནི་འདི་འདྲའོ། །གང་རྣམས་ཞིང་མང་ཐམས་ཅད་རྡུལ་དུ་བགྲང་བྱས་ཤིང་། །ཆུ་བོ་མ་ལུས་ཐམས་ཅད་ཐིགས་པས་ཚད་བཟུང་སྟེ། །དེ་སྙེད་གྲངས་
སུ་སྨོན་ལམ་མངོན་པར་བསྒྲུབ་བྱེད་པ། །ཆགས་མེད་བགྲང་བ་དེ་དག་གནས་ནི་འདི་འདྲའོ། །སྨོན་ལམ་གཟུངས་དང་ཏིང་འཛིན་སྒོ་ལ་འཇུག་བྱ་བ། །བསམ་གཏན་རྣམ་ཐར་སྨོན་ལམ་སྒོ་རྣམས་དེ་
བཞིན་ཏེ། །བསྐལ་པ་མཐའ་ཡས་མངོན་པར་བསྒྲུབ་ཅིང་རྣམ་སྤྱོད་པ། །བདེ་གཤེགས་སྲས་པོ་དགོངས་ལྡན་དེ་དག་འདིར་འོང་ངོ་། །འདི་ན་གནས་པ་རྒྱལ་སྲས་རྣམ་པ་སྣ་ཚོགས་ཏེ། །ཚིག་དང་དོན་
ལྡན་གཙུག་ལག་མང་པོ་མངོན་པར་བསྒྲུབ། །འགྲོ་ལ་བདེར་འགྱུར་བཟོ་ཡི་གནས་སུ་བྱ་བ་དག །རྗེས་སུ་སེམས་ཤིང་དམ་པའི་གནས་ན་རྣམ་པར་སྤྱོད། །འདི་ན་གནས་པ་མངོན་ཤེས་ཐབས་དང་ཡེ་ཤེས་
ཀྱིས། །ཕྱོགས་བཅུའི་སེམས་ཅན་འགྲོ་རྒྱུད་སྣ་ཚོགས་ཇི་སྙེད་པ། །ཀུན་ཏུ་སྐྱེ་ཞིང་འཆི་བའི་ཁྱད་པར་རྣམ་པར་སྟོན། །རྣམ་ཐར་སྒྱུ་མའི་ཚུལ་གནས་ཆགས་མེད་སྤྱོད་དང་ལྡན། །འདི་ན་གནས་
པ་ཐོག་མར་སེམས་བསྐྱེད་ཉེར་བཟུང་ཞིང་། །ཆོས་བཟང་མཐར་ཐུག་ཆོས་ཀྱི་སྤྱོད་པ་ཡོངས་སུ་སྟོན། །སྤྲུལ་པའི་སྤྲིན་གྱིས་ཆོས་དབྱིངས་ཡོངས་སུ་རྒྱས་བཀང་ཞིང་། །དེ་བཞིན་རྣམ་འཕྲུལ་བརྒྱ་

77-1-212b

མང་ཀུན་ཀྱང་ཉེ་བར་སྟོན། །གང་རྣམས་སེམས་ཀྱི་ཆ་གཅིག་བྱང་ཆུབ་རྣམ་སངས་རྒྱས། །ཡེ་ཤེས་བློ་གྲོས་མཐའ་དང་དབུས་མེད་ལས་འཇུག་པ། །ཐོས་ཏེ་རྣམ་པར་བསམས་ན་འཇིག་རྟེན་རྨོས་སུ་
རུང་། །ཐུབ་པར་དཀའ་བ་དེ་དག་གནས་ནི་འདི་འདྲའོ། །འདི་ནི་ཆགས་མེད་བློ་གྲོས་རྣམས། །ཆོས་དབྱིངས་སྒྲིབ་པ་མེད་པའི་རྣམ་པར་སྤྱོད་བྱེད་པ། །དམྱིགས་པ་མེད་པའི་སྤྱོད་ཡུལ་ཅན། ། དྲི་མེད་བསམ་པའི་བློ་གྲོས་གནས་ཡིན་ནོ།  །
གང་རྣམས་ཆགས་པ་མེད་སྤྱོད་ཅིང་། །ཞིང་རྣམས་ཀུན་ཏུ་གནས་པ་མེད་པར་རྣམ་སྤྱོད་པ། །མི་གཉིས་ཡེ་ཤེས་དེ་ལ་སྤྱོད་པ་ཡི། །མཉམ་པ་མེད་པ་དེ་དག་གནས་འདི་ཡིན། །གང་རྣམས་ནམ་
མཁའི་རང་བཞིན་དང་། །མཉམ་པའི་ཆོས་རྣམས་གནས་མེད་ཞི་བ་རྟོགས་གྱུར་ཏེ། །གང་རྣམས་མཁའ་ཡུལ་རྣམ་སྤྱོད་པ། །རྡུལ་དང་བྲལ་བ་དེ་དག་གནས་འདི་ཡིན། །འདི་ན་སྙིང་རྗེའི་སེམས་
ལྡན་པ། །གནས་ཤིང་འགྲོ་བ་སྡུག་བསྔལ་གཟིར་བ་མཐོང་གྱུར་ནས། །འཇིག་རྟེན་ཕན་པར་བསམ་བརྩོན་ཏེ། །སྙིང་རྗེ་ཆེན་པོ་བརྙེས་པ་རྣམ་པར་སྤྱོད། །འདི་ནས་མི་སྣང་མེད་གསལ་བར། །
སེམས་ཅན་ཀུན་གནས་ཐོགས་པ་མེད་པར་སྣང་། །ཉི་མ་ཟླ་བའི་དཀྱིལ་འཁོར་བཞིན། །འཁོར་བའི་ཞགས་པ་ཀུན་ལས་རྣམ་པར་གྲོལ། །རྒྱལ་སྲས་དེ་དག་འདི་ན་གནས། །རྒྱལ་བ་
རྣམས་ཀྱི་ཞབས་དྲུང་ཐམས་ཅད་ཀུན། །ནམ་ཡང་ཞིང་རྣམས་ཀུན་ཏུ་རབ་ཏུ་སྣང་། །མཐའ་ཡས་བསྐལ་པ་རྣམས་ཀྱང་ཟད་པར་མཛད། །འདི་ནས་འགྲོ་བའི་ལུས་མཉམ་དང་། །རྒྱལ་སྲས་ཀུན་གྱི་
ལུས་དང་གྲངས་མེད་མཉམ་པ་ཡི། །སྤྲུལ་པའི་སྤྲིན་གྱིས་ཕྱོགས་ཀྱི་རྣམས། །མ་ལུས་ཐམས་ཅད་རྒྱས་པར་འགེངས་པ་མཛད། །འདི་ནས་འགྲོ་བའི་ལུས་མཉམ་དང་། རྒྱལ་སྲས་ཀུན་གྱི་ལུས་དང་གྲངས་མང་མཉམ་པ་ཡི། སྤྲུལ་པའི་སྤྲིན་ཀྱི་ཕྱོགས་ཀྱི་རྣམས། མ་ལུས་ཐམས་ཅད་རྒྱས་པར་འགེངས་མཛད་པ། འདི་ན་བཞུགས་པའི་དཔའ་བོ་རྣམས།  །རྒྱལ་བའི་སྤྱོད་ཡུལ་

77-1-213a

ཐམས་ཅད་ཡོངས་སུ་འཇལ་མཛད་ཅིང་། །བསྐལ་པ་བྱེ་བར་རྣམ་པར་སྤྱོད་བྱེད་ཀྱང་། །ཡོངས་སུ་ངོམས་པར་འགྱུར་བའི་དུས་མེད་དོ། །འདིར་ནི་ཏིང་འཛིན་བྱེ་བ་རྣམས། །བརྗོད་དུ་མེད་པའི་
སྐད་ཅིག་རེ་རེ་རྟོགས་བྱས་ཤིང་། །ཏིང་ངེ་འཛིན་གྱི་ཚུལ་བཞིན་དུ། །སངས་རྒྱས་ཡུལ་རྣམས་རྣམ་པར་སྟོན་པ་མཛད། །འདིར་ནི་སྐད་ཅིག་བརྗོད་མེད་པའི། །བསྐལ་པ་ཞིང་རྣམས་སངས་རྒྱས་
མཚན་ལ་རབ་བཞུགས་ཏེ། །ཤིན་ཏུ་ཡངས་པའི་བློ་ལྡན་པ། །བསྐལ་པ་དཔག་ཏུ་མེད་པའི་མཐར་ཡང་འབྱིན། །འདི་ན་གནས་ཤིང་ཚད་མེད་པའི། །བསྐལ་པར་སེམས་རྒྱུད་གཅིག་གིས་རབ་ཏུ་
འཇུག་པ་བྱེད། །ཡོངས་རྟོགས་འདུ་ཤེས་མི་འབྲལ་ཡང་། །འགྲོ་བའི་འདུ་ཤེས་དབུལ་དུ་སྟོན་པ་བྱེད། །དེ་དག་ཏིང་འཛིན་འདི་ནས་སུ། །ཞུགས་ཀྱང་དུས་གསུམ་ཐམས་ཅད་གསལ་བར་མངོན་
དུ་མཐོང་། །སྐད་ཅིག་ཡུད་ལ་གནས་བརྟེན་ཅིང་། །རྣམ་ཐར་གནས་ལ་རྣམ་པར་སྤྱོད་པ་མཛད། །དེ་དག་རྣམ་སྤྱོད་གནས་འདི་ན། །མ་གཡོས་ལུས་ཀྱི་སྐྱིལ་མོ་གྲུང་དུ་འཁོད་བཞིན་དུ། །ཞིང་
རྣམས་ཐམས་ཅད་ཀུན་ཏུ་ཡང་། །ཐམས་ཅད་ཁྱབ་པར་གཅིག་ཆར་ཡོངས་སུ་སྣང་། །ཁྱུ་མཆོག་དེ་དག་འདི་ན་གནས། །བདེ་གཤེགས་རྣམས་ལས་ཆོས་ཀྱི་རྒྱ་མཚོ་ཡང་དག་འཐུང་། །
ཡེ་ཤེས་རྒྱ་མཚོར་རབ་ཏུ་ཞུགས། །མི་ཟད་ཡོན་ཏན་རྣམས་ཀྱི་ཕ་རོལ་ཕྱིན། །འདི་ན་ཞིང་རྣམས་ཀུན་གྲངས་དང་། །བསྐལ་པའི་གྲངས་དང་དེ་བཞིན་ཆོས་ཀྱི་གྲངས་རྣམས་དང་། །རྒྱལ་
བ་ཀུན་གྱི་མཚན་གྱི་གྲངས། །སྒྲིབ་མེད་སེམས་དཔའ་རྣམ་པར་དགོངས་པ་འཛིན། །རྒྱལ་སྲས་དེ་དག་འདི་ནི་གནས། །དུས་གསུམ་ཞིང་མང་གྲངས་པ་ཐམས་ཅད་མ་ལུས་པར། །དེ་དག་

77-1-213b

སྐད་ཅིག་གཅིག་གིས་ཀྱང་། །ཡོངས་སུ་འབྱུང་དང་འཇིག་པ་རྣམ་པར་འབྱེད། །རྒྱལ་སྲས་དེ་དག་འདི་ན་གནས། །རྒྱལ་བའི་སྤྱོད་པ་སྨོན་ལམ་འགྲོ་བའི་དབང་པོ་རྣམས། །གནས་ན་རྣམ་པར་སྤྱོད་བྱེད་ཀྱང་། 
རྒྱལ་སྲས་བློ་ལ་ཐོགས་པ་མེད་པས་མཐོང་། །རྡུལ་ཕྲན་གཅིག་ལ་གང་ཡོད་པའི། །འཁོར་རྣམས་རྒྱ་མཚོ་ཞིང་མང་སེམས་ཅན་དེ་བཞིན་དུ། །བསྐལ་པ་རྡུལ་ཕྲན་ཀུན་མཉམ་པ། །སྒྲིབ་པ་མེད་པར་
མཐོང་བ་རྣམས་ཀྱིས་མཐོང་། །རྡུལ་ཕྲན་ཀུན་རྩེར་དེ་བཞིན་དུ། །འཁོར་དང་ཞིང་དང་བསྐལ་པ་ཐམས་ཅད་མ་ལུས་པར། །ཀུན་ཀྱང་གཟུགས་བརྙན་ཐབས་ཚུལ་དུ། །ཤིན་ཏུ་རྣམ་ཕྱེ་ཡོངས་སུ་
མཐོང་བ་ཡིན། །འདི་ནས་དེ་དག་ཆོས་རྣམས་ཀྱི། །རང་བཞིན་ཞིང་རྣམས་ཀུན་དང་དུས་དང་བསྐལ་པ་དང་། །ཡང་དག་སངས་རྒྱས་དེ་བཞིན་ཏེ། །རང་བཞིན་དངོས་བྲལ་འབྱུང་ཚུལ་མཁྱེན། །འདི་
གནས་སེམས་ཅན་མཉམ་ཉིད་དང་། །ཆོས་རྣམས་མཉམ་པ་ཉིད་དང་སངས་རྒྱས་མཉམ་ཉིད་དང་། །ཞིང་དང་སྨོན་ལམ་མཉམ་པ་ཉིད། །དུས་གསུམ་མཉམ་པ་ཉིད་ལའང་དེ་བཞིན་འཇུག །སེམས་ཅན་
ཁྲག་ཁྲིག་རྣམ་པར་འདུལ། །སངས་རྒྱས་ཁྲག་ཁྲིག་རྣམས་ཀྱང་དེ་བཞིན་གཞན་མཆོད་བྱེད། །གཞན་རྣམས་ཆོས་ལ་རྣམ་པར་རྟོག །འོན་ཀྱང་བརྟན་པ་གནས་མཆོག་འདི་ན་འཁོད། །བསྐལ་པ་
ཁྲག་ཁྲིག་མང་པོས་ཀྱང་། །དེ་དག་སྨོན་ལམ་ཡེ་ཤེས་བློ་ཡི་རྣམ་པར་དག །བདག་གིས་བརྗོད་པར་མི་ནུས་ཏེ། །མཐའ་ཡས་བློ་མངའ་རྣམས་ཀྱི་ཤིན་ཏུ་ཡངས། །དེ་དག་སྨད་པ་མི་མངའ་བ། །
སྒྲིབ་མེད་སྤྱོད་ཡུལ་ཤིན་ཏུ་དགྱེས་པ་ཡི། །ཕོ་བྲང་འདི་ལ་ཐལ་སྦྱར་ཏེ། །བདག་ཀྱང་ལུས་བཏུད་གུས་པར་ཕྱག་འཚལ་ལོ། །རྒྱལ་བའི་སྲས་ཀྱི་ཐུ་བོ་སྟེ། །སྒྲིབ་མེད་སྤྱོད་པ་མངའ་བ་

77-1-214a

འཕགས་པ་བྱམས་པ་དེ། །རྣམ་དག་བློ་མངའ་དཔེ་མེད་ལ། །དེ་ཡི་རྗེས་སུ་བསམས་ཏེ་ཕྱག་འཚལ་ལོ། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་ཁང་པ་བརྩེགས་པ་ཆེན་པོ་རྣམ་པར་
སྣང་མཛད་ཀྱིས་བརྒྱན་པའི་སྙིང་པོ་ན་འཁོད་པའི་བྱང་ཆུབ་སེམས་དཔའ་རྣམས་ལ། དེ་དག་དང་བྱང་ཆུབ་སེམས་དཔའི་བསྟོད་པ་གཞན་ཚད་མེད་པ་དག་གིས་ཀྱང་། མངོན་པར་བསྟོད་དེ་ཤིན་ཏུ་བཏུད་
ནས་ཕྱག་འཚལ་ཏེ། རབ་ཏུ་གུས་པར་བལྟས་ནས་རིམ་གྲོར་བྱས་ཏེ། མངོན་དུ་བྱས་ནས་མཆོད་དེ་ཁང་པ་བརྩེགས་པ་ཆེན་པོ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོའི་སྒོ་ན། 
བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་བལྟ་བར་ནི་མོས། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་ནི་ཕྲད་པར་དགའ་ཞིང་སྡོད་པ་ལས་དེས་བྱང་ཆུབ་
སེམས་དཔའ་བྱམས་པ་ཁང་པ་བརྩེགས་པ། དེའི་ཕྱི་རོལ་གྱི་ཕྱོགས་གཞན་ཞིག་ནས་སྲོག་ཆགས་བརྒྱ་སྟོང་དུ་མའི་འཁོར་དང་། ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། 
ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོའི་དབང་པོ་དུ་མས་མདུན་དུ་བྱས་ཏེ། གཡས་ཕྱོགས་ནས་བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོ་རྣམས་ཀྱི་ཕྱག་བྱ་ཞིང་
ཡུལ་ན་གནས་པ་གཉེན་བཤེས་སུ་འོང་བའི་བྲམ་ཟེ་བརྒྱ་སྟོང་མང་པོས་བསྐོར་ཅིང་མདུན་དུ་བྱས་ཏེ། ཁང་པ་བརྩེགས་པ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོ་ལོགསུ་འོང་བ་མཐོང་
ནས་དགའ་རངས་ཏེ། མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས། བྱང་ཆུབ་སེམས་དཔའ་བྱམས་པ་གང་ན་བ་དེར་ལོགས་སུ་མངོན་དུ་བལྟས་ཏེ། ཐག་རིང་པོ་ནས་བྱང་ཆུབ་སེམས་དཔའ་

77-1-214b

བྱམས་པ་ལ་ལུས་ཐམས་ཅད་ཀྱིས་ཕབ་སྟེ་ཕྱག་བྱས་སོ། །དེ་ནས་བྱང་ཆུབ་སེམས་དཔའ་བྱམས་པས་ཚོང་དཔོན་གྱི་བུ་ནོར་བཟངས་ལ་བལྟས་ཏེ། འཁོར་ཀུན་ལ་ལག་པ་གཡས་པས་བསྟན་ནས་
ཡང་དག་པའི་ཡོན་ཏན་གྱིས་བསྔགས་ཏེ་ཚིགས་སུ་བཅད་པ་འདི་དག་སྨྲས་སོ། །ལྟོས་ཤིག་བསམ་པ་ཡོངས་སུ་དག་པ་འདི། །ནོར་བཟངས་ནོར་རྣམས་རབ་ཏུ་བརྟན་པའི་བུ། །བྱང་ཆུབ་སྤྱོད་
པ་དམ་པ་ཡོངས་ཚོལ་ཞིང་། །མཁས་པ་ངའི་དྲུང་དུ་ཉེ་བར་འོངས། །ལེགས་པར་འོང་སམ་སྙིང་རྗེ་བྱམས་བྱུང་ཁྱོད། །བྱམས་པའི་དཀྱིལ་འཁོར་ཡངས་པ་ལེགས་འོངས་སམ། །ལེགས་
པར་འོངས་སམ་བལྟ་ན་རབ་ཞི་བ། །སྤྱད་པ་སྤྱོད་ཚེ་དུབ་པར་མ་གྱུར་ཏམ། །རྣམ་དག་བསམ་ལྡན་ཚུར་ཤོག་འོངས་པ་ལེགས། །སྐྱོན་མེད་ཡིད་ལྡན་ཚུར་ཤོག་འོངས་པ་ལེགས། །དབང་པོ་མ་ཞུམ་
ཚུར་ཤོག་འོངས་པ་ལེགས། །མཁས་པ་སྤྱོད་ཚེ་དུབ་པ་མེད་གྲང་ངོ་། །ཆོས་རྣམས་ཐམས་ཅད་རྣམ་ཕྱེའི་དོན་བྱུང་བ། །འགྲོ་བ་ཐམས་ཅད་རྣམ་གདུལ་རབ་བརྩོན་པ། །བཤེས་གཉེན་ཐམས་ཅད་
བསྙེན་བཀུར་རབ་ཞུགས་པ། །བརྟུལ་ཞུགས་མི་གཡོ་བརྟན་པ་ཁྱོད་འོངས་ལེགས། །དགེ་བའི་ལམ་གྱིས་འོངས་པ་བདེར་འོངས་སམ། །ཡོན་ཏན་ལམ་ལ་གནས་པ་བདེར་འོངས་སམ། །
རྒྱལ་བའི་ལམ་ལ་ཞུགས་པ་བདེར་འོངས་སམ། །ལམ་རྣམས་གང་དུའང་ངལ་བར་མ་གྱུར་ཏམ། །ཡོན་ཏན་རང་བཞིན་ཚུར་ཤོག་བདེར་འོངས་སམ། །དགེ་བས་མངོན་བརླན་ཚུར་ཤོག་བདེར་འོངས་
སམ། །མཐའ་ཡས་སྤྱོད་ཡུལ་ལེགས་པར་བདེར་འོངས་སམ། །འགྲོ་བ་ཀུན་གྱི་ཁྱོད་མཐོང་ཤིན་ཏུ་དཀོན། །ཐོབ་དང་མ་ཐོབ་མཉམ་པའི་ཡིད་ལྡན་པ། །སྨད་དང་སྡུག་བསྔལ་མ་གྲགས་རྣམ་པར་

77-1-215a

སྤངས། །འཇིག་རྟེན་ཆོས་ལ་ཨུད་དཔལ་པད་མོ་བཞིན། །ཡིད་ལ་འཁྲུལ་མེད་ལེགས་པར་བདེར་འོངས་སམ། །གཡོ་དང་སྒྱུ་བྲལ་བསམ་པ་དགེ་ལྡན་པ། །ང་རྒྱལ་དྲེགས་མེད་སྣོད་ཀྱི་དམ་པ་པོ། །
ཁྲོ་དང་འཚིག་མེད་ཁེངས་ཤིང་འགྱིང་བ་མེད། །བལྟ་ན་སྡུག་པ་ཁྱོད་མཐོང་ལེགས་པ་ཡིན། །ཚུར་ཤོག་ཕྱོགས་ཀུན་སྤྱོད་ཡུལ་མངོན་གྱུར་པ། །ཚུར་ཤོག་རྒྱལ་བའི་མཛོད་རྣམས་བསྒྲུབ་
བྱེད་པ། །ཚུར་ཤོག་རྒྱལ་བའི་མཛོད་རྣམས་འཕེལ་བྱེད་པ། །ཡིད་ལ་དུབ་མེད་ལེགས་པར་ཁྱོད་འོངས་སམ། །ཚུར་ཤོག་དུས་གསུམ་ཡུལ་ལྡན་འོངས་པ་ལེགས། །ཆོས་ཀྱི་དབྱིངས་ལ་མོས་
པའི་དཀྱིལ་འཁོར་ལྡན། །སངས་རྒྱས་ཀུན་གྱི་ཡོན་ཏན་སྙིང་པོར་བྱུང་། །མཁས་པ་ལེགས་པར་འོངས་སམ་མི་ངལ་ལམ། །ཚུར་ཤོག་འཇམ་དཔལ་ཡེ་ཤེས་པད་མོའི་མཆོག །ཚུར་ཤོག་
སྤྲིན་དཔལ་ཆར་པས་རྣམ་སྤེལ་བ། །རྒྱལ་བ་ཀུན་གྱི་སྲས་པོས་བཏང་བ་ཚུར། །ཁྱོད་ལ་སྒྲིབ་པ་མེད་པའི་ཕྱོགས་ཀྱང་བསྟན། །ལྟོས་ཤིག་སྨོན་ལམ་དྲ་བ་ཅི་འདྲ་བ། །ཆོས་དབྱིངས་རྒྱས་
འགེངས་བསམ་གྱིས་མི་ཁྱབ་སྟེ། །བྱང་ཆུབ་སེམས་དཔའི་སྤྱོད་ལ་ལམ་བསྒྲུབས་པ། །རྒྱ་ཆེ་ཡང་བྱེད་ནོར་བཟངས་འདིར་འོངས་སོ། །བདེ་བར་གཤེགས་པའི་སྤྱོད་ཡུལ་ཚོལ་བྱེད་ཅིང་། །རྡུལ་
དང་བྲལ་བའི་སྤྱོད་པ་བཀྲོལ་བའི་ཕྱིར། །སྨོན་ལམ་བརླབས་ཆེན་ཡོངས་སུ་འདྲི་བྱེད་ཅིང་། །སྐྱོ་བའི་ཡིད་མེད་འདི་ནི་འདིར་འོངས་སོ། །འདས་པའི་མགོན་པོས་གང་ལ་བསླབས་མཛད་དེ། །དེ་
བཞིན་མ་བྱོན་རྣམས་ཀྱང་སློབ་འགྱུར་ལ། །བདེ་གཤེགས་བཞུགས་པའི་སྤྱོད་པར་བྱ་བ་རྣམས། །ཡོངས་སུ་དྲིས་ཕྱིར་འདི་ནི་འདིར་འོངས་སོ། །འདི་ནི་བདག་གིས་དགེ་བཤེས་ཆོས་སྨྲས་པ། །

77-1-215b

ཆོས་ཀུན་ནན་ཏན་ཡོངས་སུ་སྟོན་བྱེད་པ། །བྱང་ཆུབ་སེམས་དཔའི་སྤྱོད་ལམ་ཡོངས་སྟོན་པ། །ཡིན་ཞེས་སེམས་གཅིག་བསམ་ནས་འདིར་འོངས་སོ། །བྱང་ཆུབ་སེམས་དཔའ་བདག་གིས་བློ་བསྐྱེད་པ། །
སངས་རྒྱས་སྲས་པོ་བྱང་ཆུབ་བསྐྱེད་བྱེད་པ། །འདི་དག་བདག་བཤེས་སངས་རྒྱས་བསྔགས་པ་ཞེས། །དེ་ལྟར་དགེ་བའི་སེམས་ཀྱིས་འདིར་འོངས་སོ། །འདི་དག་བསྐྱེད་པས་བདག་གི་མ་ལྟ་བུ། །
ཡོན་ཏན་འོ་མ་ལྡུད་པས་མ་མ་འདྲ། །བྱང་ཆུབ་ཡན་ལག་ཡོངས་སུ་སྐྱོང་བ་ཡིན། །དགེ་བཤེས་འདི་དག་གནོད་པ་རྣམ་པར་བཟློག །རྒ་ཤི་མཐར་བྱེད་སྨན་པ་ལྟ་བུ་སྟེ། །བདུད་རྩིའི་ཆར་འབེབས་
བརྒྱ་བྱིན་ལྷ་དབང་འདྲ། །ཟླ་བ་ལྟ་བུའི་དཀར་པོའི་ཕྱོགས་ཀྱིས་རྒྱས། །ཞི་བའི་ཕྱོགས་སྟོབས་ཉི་མ་གསལ་བ་འདྲ། །དགྲ་དང་འགྲོགས་ལ་རི་བོ་འདྲ་བ་སྟེ། །རྒྱ་མཚོ་བཞིན་དུ་མི་འཁྲུག་
སེམས་དང་ལྡན། །ཡོངས་སུ་སྐྱོང་དང་མཉན་པ་འདྲ་བ་ཞེས། །དེ་འདྲའི་སེམས་ཀྱིས་ནོར་བཟངས་འདིར་འོངས་སོ། །འཇིགས་མེད་སྐྱོབ་པས་དཔའ་བོ་ལྟ་བུ་སྟེ། །དེད་དཔོན་མགོན་དང་སྐྱབས་
སུ་གྱུར་པ་ཡིན། །འདི་དག་བདག་ལ་བདེ་སྟོབས་དམྱིགས་ཡིན་ཞེས། །དེ་འདྲའི་སེམས་ཀྱིས་དགེ་བཤེས་བསྙེན་བཀུར་བྱེད། །ཆོས་ཀྱི་ཕྱོགས་རྣམས་རྟག་ཏུ་སྟོན་པ་སྟེ། །སངས་རྒྱས་ཡོན་ཏན་
ཡེ་ཤེས་སྟོན་པ་ཡིན། །ངན་སོང་ངན་འགྲོ་ཐམས་ཅད་སྦྱོང་བར་བྱེད། །དགེ་བཤེས་འདི་དག་བདག་ལ་དགེ་བ་སྟོན། །འདི་དག་རྒྱལ་བའི་མཛོད་ཀུན་སྟོབ་པ་ཡིན། །འདི་དག་རྒྱལ་བ་ཀུན་གྱི་མཛོད་སྲུང་
སྟེ། །འདི་དག་རྒྱལ་བ་ཀུན་གྱི་གསང་འཛིན་ཅེས། །དེ་ལྟར་མཁས་པ་འདི་ནི་དགེ་བཤེས་སྙེན། །ཡེ་ཤེས་ཕུན་ལྡན་འདི་ལས་རྣམ་པར་བདག །གཟུགས་དང་ལོངས་སྤྱོད་ཆོ་རིགས་ཕུན་སུམ་ཚོགས། །

77-1-216a

འདི་ལས་ཕུན་སུམ་ཚོགས་ཀུན་དཀོན་པ་མིན། །བསམ་པ་དེ་འདྲས་འདི་ནི་འདིར་འོངས་སོ། །བསམ་པ་རླབས་ཆེན་འདི་ལ་ཀུན་ཀྱང་ལྟོས། །མཁས་པའི་དགེ་བཤེས་རྣམས་ལ་འདི་སྟོན་
ཅིང་། །མཁས་པ་འདི་བློ་ཅི་འདྲ་བསྐྱེད་པ་ལྟོས། །ཁྱོད་ཀྱིས་རྟག་ཏུ་དེ་ལྟར་བསླབ་པར་བྱ། །འདི་ནི་སྔོན་གྱི་བསོད་ནམས་དགེ་བའི་རྒྱུས། །བྱང་ཆུབ་ཞུགས་ཏེ་འཇམ་དཔལ་མཐོང་གྱུར་ནས། །
དེ་ཡི་གདམས་ངག་རྗེས་སུ་མཐུན་སྤྱོད་ཅིང་། །སྐྱོ་བ་མེད་པར་རྒྱུ་བ་འདི་ལ་ལྟོས། །འདི་ནི་དགའ་བདེ་ཐམས་ཅད་ཀུན་སྤངས་ཏེ། །ལྷ་རྫས་ལྟ་བུའི་ཁྱིམ་ཡང་ཡོངས་སུ་སྤངས། །ཕ་མ་མ་མ་བསྐྱེད་
པ་རྒྱ་ཆེན་ཀུན། །ཡོངས་སུ་སྤངས་ཤིང་བྲན་ལྟར་བཤེས་གཉེན་བསྟེན། །མཁས་པ་འདི་ནི་བསམ་པ་རྣམ་སྦྱངས་ཏེ། །བདག་གིས་མི་ལུས་ཡོངས་སུ་སྤངས་བྱས་ནས། །སངས་རྒྱས་ཀུན་གྱི་ཕོ་བྲང་
འགྲོ་བར་འགྱུར། །དེ་ཕྱིར་འབྲས་བུ་དེ་འདྲའང་ཐོབ་པར་གྱུར། །འདི་ནི་རྒ་དང་ནད་ཀྱིས་མནར་བ་ཡི། །སྲོག་ཆགས་སྡུག་བསྔལ་བརྒྱ་ཡིས་གཙེས་པ་རྣམས། །སྐྱེ་ཤི་མྱ་ངན་འཇིགས་པས་གདུངས་མཐོང་
ནས། །དེ་དག་དོན་དུ་སྙིང་རྗེའི་སེམས་ཀྱིས་སྤྱོད། །འགྲོ་རྒྱུད་ལྔ་ཡི་འཁོར་ལོའི་དཀྱིལ་འཁོར་དུ། །སྡུག་བསྔལ་འཁྲུལ་འཁོར་བཙིར་བའི་འགྲོ་མཐོང་ནས། །སྡུག་བསྔལ་འཁྲུལ་འཁོར་འཁོར་ལོ་
འཇོམས་པ་ཡི། །ཡེ་ཤེས་རྡོ་རྗེ་སྲ་བ་འདི་ཚོལ་ལོ། །འདོད་ཆགས་ཞེ་སྡང་རྩྭ་སྡོང་ཚེར་མ་ཅན། །ལྟ་ཆགས་རྩ་མང་ཡོངས་སུ་འཛིངས་པ་ཡི། །སེམས་ཅན་ཞིང་ནི་ཡོངས་སུ་སྦྱང་བའི་ཕྱིར། །ཤེས་རབ་
གཤོལ་བསྟན་བཟང་པོ་འདི་ཚོལ་ལོ། །གཏི་མུག་མ་རིག་ཐིབས་པོའི་བསམ་པ་ཅན། །འགྲོ་བ་ཤེས་རབ་མིག་སྟོར་དམྱིགས་མེད་པ། །དེ་ལ་ཕྱོགས་བདེ་སྟོན་པའི་མཐུ་ཡོད་པའི། །འགྲོ་བའི་དེད་དཔོན་

77-1-216b

བཟང་པོར་འདི་འགྱུར་རོ། །བཟོད་པའི་གོ་བགོས་རྣམ་ཐར་བཞོན་པ་ཞོན། །ཡེ་ཤེས་རལ་གྲིས་མྱ་ངན་དགྲ་འཇོམས་པས། །མི་འཇིགས་སྟོབ་པའི་དཔའ་བོར་གྱུར་པ་འདི། །འགྲོ་བ་རྣམས་ཀྱི་ལམ་སྟོན་
འགྱུར་བ་ཡིན། །འདི་ནི་ཆོས་ཀྱི་གྲུ་རབ་སྦྱོར་བ་སྟེ། །ཡེ་ཤེས་རྒྱ་མཚོའི་ལམ་ལ་བསླབས་པའོ། །ཞི་བ་རིན་ཆེན་མཆོག་གིས་གླིང་སྐྱེལ་བ། །འདི་ནི་ཁམས་གསུམ་མཚོའི་སྐྱ་བ་འཛིན། །ཡེ་ཤེས་འོད་ཟེར་
སྨོན་ལམ་དཀྱིལ་འཁོར་ཅན། །སེམས་ཅན་ཀུན་གྱི་གནས་སུ་སྣང་བྱེད་པའི། །ཆོས་དབྱིངས་མཁའ་ལ་འོད་ཆེན་རབ་ལྡན་པར། །འདི་ནི་སངས་རྒྱས་ཉི་མར་འཆར་བར་འགྱུར། །བྱམས་པའི་དགའ་ལྡན་
ཏིང་འཛིན་བསིལ་བ་ཡི། །སེམས་ཅན་ཀུན་ལ་སྙོམས་སེམས་འོད་བཟང་བ། །དཀར་པོའི་ཆོས་ཀྱིས་དཀྱིལ་འཁོར་ཡོངས་རྒྱས་པའི། །སངས་རྒྱས་ཟླ་བ་འདི་ནི་འཆར་བར་འགྱུར། །བསམ་པའི་
གཞི་རྟེན་བརྟན་ལ་རབ་གནས་པ། །བྱང་ཆུབ་སྤྱོད་པས་རིམ་གྲིས་འཕགས་པ་སྟེ། །ཆོས་ཀུན་རིན་ཆེན་འབྱུང་གནས་ལྡན་པ་ཡི། །ཡེ་ཤེས་རྒྱ་མཚོའི་མཆོག་ཏུ་འདི་འགྱུར་རོ། །བྱང་ཆུབ་སེམས་ཀྱི་
ཀླུ་ཡི་དབང་གིས་ཕྱུང་། །ཆོས་ཀྱི་དབྱིངས་ཀྱི་མཁའ་ལ་མངོན་པར་འཕགས། །དཀར་པོའི་འབྲས་བུའི་ལོ་ཏོག་འཕེལ་བྱེད་པའི། །འདི་ནི་འགྲོ་བར་ཆོས་སྤྲིན་ཆར་འབེབས་འགྱུར། །དག་པའི་སྙིང་
པོའི་དྲི་གསུམ་མུན་སེལ་བ། །བྱམས་པའི་སྣུམ་ཡོད་དྲན་པའི་སྣོད་བརྟན་ལ། །དྲི་མེད་བྱང་ཆུབ་སེམས་མེ་འོད་བཟང་པོའི། །ཆོས་ཀྱི་མར་མེ་འདི་ནི་འབར་བྱེད་འགྱུར། །བྱང་ཆུབ་སེམས་ནི་མ་མ་སྙིང་རྗེའི་
སྐུ། བྱམས་པ་རྡུལ་པ་མི་གཡོ་བསམ་པ་འཁྲུངས། །བྱང་ཆུབ་ཡན་ལག་མཐར་གྱིས་འབྱུང་བ་ཡི། །སངས་རྒྱས་སྲས་སུ་འདི་ནི་ཡང་དག་སྐྱེ། །བསོད་ནམས་སྙིང་པོ་མངོན་པར་འཕེལ་བར་

77-1-217a

བྱེད། །ཡེ་ཤེས་སྙིང་པོ་ཡོངས་སུ་སྤྱོད་པར་འགྱུར། །འདི་ནི་ཤེས་པའི་སྙིང་པོ་འཆར་བར་བྱེད། །སྨོན་ལམ་ཅི་བཞིན་སྙིང་པོ་ཡང་དག་བྱུང་། །སྙིང་རྗེ་བྱམས་པས་སྤྲུལ་པ་འདི་འདྲ་བ། །
སེམས་ཅན་དགྲོལ་བློ་ཕན་པའི་བསམ་ལྡན་པ། །རྣམ་དག་ཡིད་ཅན་འདི་ནི་ཅི་འདྲ་བ། །དེ་འདྲའི་འགྲོ་བ་ལྷ་དང་མིར་བཅས་དཀོན། །འདི་འདྲའི་བསམ་པ་རབ་ཏུ་རྩ་བརྟན་ལ། །འདི་འདྲའི་སྦྱོར་བ་བརྟན་
པས་རྣམ་འཕེལ་ཅིང་། །སྲིད་གསུམ་གཡོག་པར་བྱེད་པ་འདི་འདྲ་བའི། །ཡེ་ཤེས་ཤིང་ཆེན་འབྲས་བུ་འབྱུང་བ་དཀོན། །འདི་ནི་ཡོན་ཏན་ཀུན་གྲུབ་དོན་དུ་གཉེར། །ཆོས་རྣམས་ཐམས་ཅད་ཡོངས་སུ་དྲི་
བར་མོས། །ཐེ་ཙོམ་ཐམས་ཅད་རྣམ་པར་གསལ་དོན་དུ། །ལེ་ལོ་མེད་པར་བཤེས་གཉེན་ཐམས་ཅད་སྟེ། །འདི་ནི་བདུད་ཀྱི་དཀྲུགས་མ་ཉོན་མོངས་འཇོམས། །འདི་ནི་ལྟ་བའི་དྲི་མ་མེད་པར་སེལ། །
འདི་ནི་འགྲོ་བ་ཐམས་ཅད་དགྲོལ་ལ་བརྩོན། །མཁས་པ་འདི་ནི་རྟག་ཏུ་ཁྱད་པར་ཚོལ། །ཡོན་ཏན་ལམ་ལ་མ་ནོར་འདི་གནས་པས། །འདི་ནི་ངན་སོང་ཐམས་ཅད་སྦྱོང་བར་འགྱུར། །མཐོ་རིས་ལམ་
ཡང་ཉེ་བར་སྟོན་པར་འགྱུར། །ཐར་པའི་ལམ་དུ་འགྲོ་བ་འཛུད་པར་འགྱུར། །འདི་ནི་འགྲོ་རྒྱུད་ཀུན་གྱི་སྡུག་བསྔལ་སེལ། །འདི་ནི་འགྲོ་རྒྱུད་ཀུན་གྱི་བདེ་བ་སྟོབ། །འདི་ནི་སྲིད་པ་ཀུན་གྱི་ཞགས་པ་ཐུབ། །
སྲིད་པའི་འགྲོ་རྒྱུད་ཐམས་ཅད་སེལ་བར་འགྱུར། །ལྟ་བ་དོགས་པ་རྣམ་པར་འབྱེད་པར་འགྱུར། །སྲིད་པའི་འཁྲི་ཤིང་དྲ་བ་གཅོད་པར་འགྱུར། །ཆགས་པའི་འདོད་ཆགས་ཉེ་བར་སྦྱོང་བར་འགྱུར། །སྲིད་
གསུམ་ལམ་ཡང་ཡོངས་སུ་སྟོན་པར་འགྱུར། །འདི་ནི་འཇིག་རྟེན་མགོན་དང་སྐྱབས་ཡིན་ཏེ། །འདི་ནི་འགྲོ་བ་ཀུན་ལ་འོད་བྱེད་པའོ། །རྣམ་པ་ཀུན་ཏུ་སྲིད་པ་སེལ་ལ་མཁས། །ས་གསུམ་ཀུན་གྱི་འདྲེན་པ་

77-1-217b

འདི་འགྱུར་རོ། །ཉོན་མོངས་གཉིད་ལོག་འགྲོ་བ་སད་པར་བྱེད། །འདོད་པའི་འདམ་ལས་མཁས་པ་འདི་སྒྲོལ་ཏེ། །འདུ་ཤེས་ཆགས་ལས་ཡོངས་སུ་འདི་ཡང་འགྲེལ། །བཅིངས་པ་ཀུན་ལས་ཐར་པར་བྱེད་པར་
འགྱུར། །ཆོས་དབྱིངས་གཞི་ཡི་བྱེ་བྲག་སྣང་བར་བྱེད། །འཇིག་རྟེན་ཁམས་ཀྱི་བྱེ་བྲག་སྦྱོང་བར་འགྱུར། །ཆོས་ཀུན་གཞི་ཡི་བྱེ་བྲག་ཕ་རོལ་ཕྱིན། །ནོར་བཟངས་ཁྱོད་ནི་དགའ་བ་བསྐྱེད་པར་འགྱུར། །
མཁས་པ་ཁྱོད་ཀྱིས་སྦྱོར་བའི་ཚུལ་དག་དང་། །དག་ཅིང་ཁྱོད་ལ་སྨད་པ་མེད་ཚུལ་དང་། །ཁྱོད་ཀྱི་བསམ་པ་ཡོན་ཏན་ལྡན་ཚུལ་ལས། །བསམ་པ་ཐམས་ཅད་ཡོངས་སུ་རྫོགས་པར་འགྱུར། །ཁྱོད་ཀྱིས་
བདག་ཉིད་དགེ་བར་བྱས་ཚུལ་གྱིས། །རིང་པོར་མི་ཐོགས་སངས་རྒྱས་ཀུན་མཐོང་འགྱུར། །རིང་པོར་མི་ཐོགས་ཞིང་རྣམས་ཀུན་འགྲོར་འགྱུར། །ཆོས་ཀུན་རིང་པོར་མི་ཐོགས་ཤེས་པར་འགྱུར། །ཞིང་
རྣམས་རྒྱ་མཚོ་རྣམ་པར་སྦྱོང་བར་འགྱུར། །སེམས་ཅན་རྒྱ་མཚོ་རྣམ་པར་འགྲེལ་བར་འགྱུར། །སྤྱོད་པ་རྒྱ་མཚོ་ཡོངས་སུ་རྫོགས་པར་འགྱུར། །ཁྱོད་ཀྱི་ཡོན་ཏན་རྒྱ་མཚོ་དེ་འདྲའོ། །ཁྱོད་ཀྱི་མོས་
པའི་དཀྱིལ་འཁོར་ཚུལ་ལས་ནི། །ཁྱོད་ནི་ཡོན་ཏན་རྣམས་ཀྱི་སྣོད་དུ་འགྱུར། །ཁྱོད་ནི་དགེ་བ་ཡང་དག་འབྱུང་གནས་འགྱུར། །ཁྱོད་ནི་རྒྱལ་བའི་སྲས་དང་མཉམ་པར་འགྱུར། །ཁྱོད་ཀྱི་སྨོན་ལམ་དཀྱིལ་འཁོར་
ཚུལ་ལས་ན། །ཁྱོད་ཀྱི་བདུད་ཀྱི་དཀྱིལ་འཁོར་ཕམ་པར་བྱེད། །ཁྱོད་ཀྱིས་ལས་ཀྱི་དཀྱིལ་འཁོར་རྣམ་པར་སྦྱངས། །ཉོན་མོངས་དཀྱིལ་འཁོར་ཁྱོད་ཀྱིས་དག་པར་བྱས། །ཡེ་ཤེས་རྒྱུད་ནི་རྣམ་པར་སྦྱོང་བར་འགྱུར། །
ཆོས་ཀྱི་རྒྱུད་ནས་རབ་ཏུ་བརྗོད་པར་འགྱུར། །ལས་དང་ཉོན་མོངས་སྡུག་བསྔལ་འཁྲུལ་འཁོར་རྒྱུད། །རིང་པོ་མི་ཐོགས་རྣམ་པར་ཟློག་པར་འགྱུར། །འཇིག་རྟེན་འཁོར་ལོ་སྲིད་པའི་འཁོར་ལོ་བརྟེན། །

77-1-218a

ཤུ་བའི་ལམ་རྒྱུད་ལྔ་ཡི་འཁོར་ལོར་རྨོངས། །འགྲོ་ཀུན་སྡུག་བསྔལ་འཁོར་ལོ་གཅོད་པ་ཡི། །ཆོས་ཀྱི་འཁོར་ལོ་དམ་པ་བསྐོར་བར་འགྱུར། །སངས་རྒྱས་རིགས་ནི་རྗེས་སུ་འཛིན་པར་འགྱུར། །ཆོས་
ཀྱི་རིགས་ནི་ཡོངས་སུ་སྦྱོང་བར་འགྱུར། །དགེ་འདུན་རིགས་ནི་ཡོངས་སུ་བསྡུད་པར་འགྱུར། །རིན་ཆེན་འབྱུང་བའི་འབྱུང་གནས་ཁྱོད་འགྱུར་རོ། །སྲིད་པའི་དྲ་བ་རྣམ་པར་ཟློག་པར་འགྱུར། །ལྟ་བའི་དྲ་བ་
ཐིབས་པོ་དེ་བཞིན་ཏེ། །འགྲོ་བའི་སྡུག་བསྔལ་དྲ་བ་འགྲེལ་བར་འགྱུར། །སྨོན་ལམ་དྲ་བ་དེ་འང་ཁྱོད་ཀྱིས་སྦྱངས། །སེམས་ཅན་ཁམས་ནི་ཡོངས་སུ་སྨིན་བྱེད་འགྱུར། །འཇིག་རྟེན་ཁམས་ནི་ཡོངས་སུ་
སྦྱོང་བར་འགྱུར། །ཡེ་ཤེས་ཁམས་ནི་ཤིན་ཏུ་དག་བྱེད་འགྱུར། །ཁྱོད་ཀྱི་བསམ་པའི་ཁམས་ནི་དེ་འདྲའོ། །ནོར་བཟངས་དགའ་བ་འཕེལ་བར་བྱེད་པ་ཁྱོད། །སེམས་ཅན་ཀུན་ལ་ཕན་བདེ་དགའ་བྱེད་
འགྱུར། །བྱང་ཆུབ་སེམས་དཔའ་རིགས་རྒྱུད་དགའ་བྱེད་ཅིང་། །སངས་རྒྱས་ཐམས་ཅད་སྨོན་ལམ་དགའ་བྱེད་འགྱུར། །སེམས་ཅན་ཀུན་གྱི་འགྲོ་བའི་གནས་སྟོན་པས། །ཞིང་རྣམས་ཐམས་ཅད་
གཟུགས་བརྙན་སྣང་སྟོན་པ། །ཆོས་རྣམས་ཐམས་ཅད་སྣང་བ་རབ་སྟོན་པའི། །ལྟ་ན་བཟང་བའི་རྒྱལ་བར་ཁྱོད་འགྱུར་རོ། །ཆོས་དབྱིངས་སྣང་བར་བྱེད་པའི་འོད་ལྡན་པ། །སེམས་ཅན་ཁམས་རྣམས་
བདེ་བྱེད་འོད་ལྡན་པ། །ངན་སོང་ཐམས་ཅད་ཞི་བྱེད་འོད་ལྡན་པ། །སྲིད་གསུམ་སྡུག་བསྔལ་ཞི་བར་བྱེད་པར་འགྱུར། །མཐོ་རིས་ལམ་ནི་ཉེ་བར་སྟོན་པར་འགྱུར། །སངས་རྒྱས་ལམ་ནི་འགྲོ་བ་འབྱེད་པར་
འགྱུར། །ཐར་པའི་ལམ་དུ་འགྲོ་བ་འཁྲིད་པར་འགྱུར། །དེ་འདྲའི་ལམ་ནི་ཁྱོད་ཀྱིས་རྣམ་པར་སྦྱངས། །ལོག་པའི་ལམ་ནི་རྣམ་པར་ཟློག་པར་འགྱུར། །སྐྱེ་བོ་འཕགས་པའི་ལམ་ལ་འདུལ་བར་འགྱུར། །

77-1-218b

བརྟན་པའི་བློ་གྲོས་ལེ་ལོ་མེད་པ་ཁྱོད། །མིག་ཡངས་བྱང་ཆུབ་ལམ་ནི་དེ་ལྟར་ཚུལ། །སྲིད་པའི་རྒྱ་མཚོ་གནས་པའི་ལུས་ཅན་རྣམས། །སྡུག་བསྔལ་མཐར་ཕྱིན་བྱ་བར་ཁྱོད་བརྩོན་པ། །འགྲོ་བ་སྲིད་
པའི་མཚོ་ལས་སྒྲོལ་བར་འགྱུར། །ཁྱོད་ཀྱི་ཡོན་ཏན་མཚོ་ཆེན་དེ་འདྲའོ། །ཡེ་ཤེས་ཉི་མ་མཆོག་གིས་འོད་གཟེར་གྱིས། །ལུས་ཅན་ཉོན་མོངས་རྒྱ་མཚོ་ཡོངས་སྐམས་ཤིང་། །དེ་དག་ནན་ཏན་མཚོ་ལ་དགོད་བྱས་
ནས། །ཡེ་ཤེས་རྒྱ་མཚོ་རབ་ཏུ་དགོད་པར་འགྱུར། །བློ་གྲོས་རྒྱ་མཚོ་རྣམ་པར་འཕེལ་བར་འགྱུར། །སྤྱོད་པ་རྒྱ་མཚོ་རྣམ་པར་སྤྱད་པར་འགྱུར། །སངས་རྒྱས་ཀུན་གྱི་སྨོན་ལམ་རྒྱ་མཚོ་ལ། །རིང་པོར་མི་
ཐོགས་ཡོངས་སུ་འཇུག་པར་འགྱུར། །མཁས་པ་ཁྱོད་ནི་བློ་གྲོས་རྒྱ་མཚོའི་མཐུས། །ཞིང་རྣམས་རྒྱ་མཚོ་མང་པོར་ཕྱིན་པར་འགྱུར། །འཁོར་རྣམས་རྒྱ་མཚོ་མང་པོ་མཐོང་བར་འགྱུར། །ཆོས་
མང་རྒྱ་མཚོ་ཡོངས་སུ་འཐུང་བར་འགྱུར། །སངས་རྒྱས་སྤྲིན་མང་ཁྲག་ཁྲིག་མཐོང་བར་འགྱུར། །མཆོད་སྤྲིན་ཤིན་ཏུ་རྒྱ་ཆེན་བྱེད་པར་འགྱུར། །ཆོས་ཀྱི་སྤྲིན་མང་ཁྲག་ཁྲིག་ཐོས་པར་འགྱུར། །ཁྱོད་
ནི་སྨོན་ལམ་དེ་འདྲའི་སྤྲིན་ཀྱང་བྱེད། །སེམས་ཅན་ཐམས་ཅད་གནས་མང་རྒྱས་འགེངས་འགྱུར། །ཞིང་རྣམས་ཀུན་གྱི་གནས་སུ་འགྲོ་བར་འགྱུར། །སངས་རྒྱས་ཀུན་གྱི་གནས་སུ་ཕྱིན་པར་འགྱུར། །
ཁྱོད་ནི་དེ་འདྲའི་ཕྱོགས་སུ་ཞུགས་པ་ཡིན། །ཁྱོད་ནི་ཏིང་འཛིན་གནས་སུ་འཇུག་པར་འགྱུར། །ཁྱོད་ཀྱི་རྣམ་ཐར་གནས་རྣམས་ཐོབ་པར་འགྱུར། །ཁྱོད་ནི་མངོན་ཤེས་གནས་ལ་སྤྱོད་པར་འགྱུར། །ཆོས་
ཀྱི་དབྱིངས་ཀྱི་གནས་ལ་རབ་ཏུ་གནས། །ཉི་ཟླའི་གཟུགས་རྣམས་རབ་ཏུ་སྣང་བ་ལྟར། །སེམས་ཅན་ཀུན་གྱི་གནས་སུ་འཆར་བར་འགྱུར། །རྒྱལ་བ་རྣམས་ཀྱི་སྤྱན་སྔར་མངོན་འབྱུང་འགྱུར། །

77-1-219a

ཁྱོད་ཀྱིས་འབྱུང་བའི་ལམ་ཆེན་དེ་འདྲའོ། །འཇིག་རྟེན་ཀུན་ལ་མི་གནས་སྤྱོད་ཡུལ་དང་། །ནམ་མཁའི་སྤྱོད་ཡུལ་བཟང་པོར་ཁྱོད་སྤྱོད་འགྱུར། །ཁྱོད་ཀྱི་སྤྱོད་ཡུལ་རབ་ཏུ་ཞི་བར་འགྱུར། །
ཁྱོད་ཀྱི་མངོན་ཤེས་སྤྱོད་ཡུལ་དེ་འདྲའོ། །མིག་འཕྲུལ་འདྲ་བའི་བྱེ་བྲག་གཞི་མཁས་ཁྱོད། །ཞིང་གིས་དྲ་བའི་བྱེ་བྲག་ཇི་སྙེད་གཞི། །སེར་བུ་མཁའ་ལ་ཆགས་པ་མེད་པ་ལྟར། །རིང་པོར་མི་ཐོགས་
རྒྱས་པར་འགེངས་པར་འགྱུར། །ཆོས་དབྱིངས་འབྱམ་ཀླས་ཁོང་དུ་ཆུད་པར་འགྱུར། །འབྱམ་ཀླས་འཇིག་རྟེན་ཁམས་སུ་འགྲོ་བར་འགྱུར། །དུས་གསུམ་གཤེགས་པའི་སངས་རྒྱས་འབྱམ་
ཀླས་ཀུན། །མཐོང་བར་འགྱུར་གྱིས་ནོར་བཟངས་དགའ་བར་གྱིས། །ཁྱོད་ཀྱིས་དེ་འདྲའི་རྣམ་ཐར་དེ་ལྟ་བུ། །མཐོང་ལ་མཐོང་ཞིང་ད་དུང་མཐོང་བར་འགྱུར། །དེ་བས་མཁས་པ་སྐྱོ་བར་མ་བྱེད་ཅིག །
དགའ་ཡངས་ཟང་ཟིང་མེད་པ་ཉམས་སུ་ལོང་། །ནོར་བཟངས་ཁྱོད་ནི་ཡོན་ཏན་སྣོད་བཟང་སྟེ། །ཁྱོད་ནི་རྒྱལ་བ་རྣམས་ཀྱི་གདམས་ངག་འཐུང་། །ཁྱོད་ཀྱིས་ཚུལ་འདི་ཡོངས་སུ་གཟུང་བར་ནུས། །
དེ་བས་རྣམ་པར་འཕྲུལ་པ་དེ་དག་མཐོང་། །སངས་རྒྱས་སྲས་པོ་གནས་མེད་སྤྱོད་ཡུལ་ཅན། །གང་རྣམས་མཐོང་བར་བསྐལ་པ་ཁྲག་ཁྲིག་དུ། །ཤིན་ཏུ་དགའ་ན་ལེགས་བརྗོད་མི་སྨོས་པ། །
དེ་དག་སྤྱོད་ལགས་སྤྱད་ཆ་ཁྱོད་ཀྱིས་མཐོང་། །དེ་ལྟར་འཇམ་དཔལ་མངོན་དུ་མཐོང་གྱུར་ཏེ། །དེ་འདྲའི་ཡོན་ཏན་སྣོད་དུ་གྱུར་བྱས་པ། །ཁྱོད་ཀྱིས་ཐོབ་པ་རྒྱ་ཆེ་བསམ་མི་ཁྱབ། །
མི་ཡི་སྲིད་པར་ཁྱོད་ནི་ལེགས་པར་འོངས། །ངན་སོང་ལམ་རྣམས་ཐམས་ཅད་རྣམ་པར་བཟློག །མི་ཁོམ་ངན་འགྲོ་ཐམས་ཅད་རྣམ་པར་སྦྱངས། །སྡུག་བསྔལ་ཆོས་རྣམས་ཁྱོད་ཀྱིས་ཐམས་

77-1-219b

ཅད་བོར། །མི་དགའ་ཐམས་ཅད་ཡོངས་སུ་སྤང་བར་གྱིས། །བྱིས་པའི་ས་ནི་ཁྱོད་ཀྱིས་རྣམ་པར་བཟློག །བྱང་ཆུབ་སེམས་དཔའི་ཡོན་ཏན་ས་ལ་གནས། །ཡེ་ཤེས་ས་ཡི་དམ་པ་ཡོངས་
བསྐང་ཞིང་། །སངས་རྒྱས་ས་རབ་རིང་པོར་མི་ཐོགས་ཐོབ། །བྱང་ཆུབ་སེམས་དཔའི་སྤྱོད་པ་རྒྱ་མཚོ་སྙེད། །སངས་རྒྱས་ཡེ་ཤེས་ནམ་མཁའི་མཛོད་དང་མཚུངས། །དེ་ཡི་ཚད་ཀྱི་
སྨོན་ལམ་གངས་ཆེན་མཚོ། །ཁྱོད་ཀྱིས་བརྩལ་ཟིན་ཤིན་ཏུ་དགའ་བར་གྱིས། །དེ་ལྟར་དབང་པོ་ཡོངས་སུ་མི་སྐྱོ་ལ། །བསམ་པ་བརྟན་ཞིང་སྦྱོར་བ་ངེས་པ་རྣམས། །གང་དག་འདི་
འདྲའི་བཤེས་གཉེན་བསྟེན་བྱེད་པ། །དེ་དག་རིང་པོར་མི་ཐོགས་མགོན་པོར་འགྱུར། །ཁྱོད་ཀྱི་བྱང་ཆུབ་སྤྱོད་པ་སྣ་ཚོགས་ཀྱིས། །སེམས་ཅན་མང་པོ་དུལ་བར་གྱུར་མངོན་པའི། །ཆོས་
ཀུན་སྒོ་ཡི་བྱང་ཆུབ་སྤྱོད་པ་ལ། །ནམ་ཡང་ཡིད་གཉིས་བྱེད་པར་མ་གྱུར་ཅིག །དེ་ལྟར་ཕུན་སུམ་ཚོགས་པ་འདི་འདྲ་འདི། །སངས་རྒྱས་སྲས་པོས་དེ་རིང་འདིར་མཐོང་བ། །དོན་ཆོས་ཡོན་
ཏན་དང་བ་ཕུན་སུམ་ཚོགས། །ཁྱོད་ཀྱི་བསོད་ནམས་ཕུན་ལྡན་བསམ་མི་ཁྱབ། །དེ་ལྟར་རྒྱལ་སྲས་རྣམས་ཀྱི་རྒྱུན་འབྲེལ་བར། །རང་རང་སོ་སོའི་སྨོན་ལམ་བསྟན་བྱས་ཏེ། །ཁྱོད་ཀྱི་དེ་
དག་མ་ལུས་འཐུན་རྟོགས་པ། །ཁྱོད་མཐོང་ཐོབ་པ་ཆེན་པོ་ཅི་འདྲ་ལྟོས། །བྱང་ཆུབ་སེམས་དཔའི་སྤྱོད་པའི་སྣོད་གྱུར་པ། །དེ་འདྲ་སྲིད་པར་རྒྱལ་ཀྱང་དཀོན་པས་ན། །དེ་ཕྱིར་རྒྱལ་སྲས་
དེ་དག་རྒྱུན་འབྲེལ་བར། །ཁྱོད་ལ་རྣམ་ཐར་ཚུལ་རྣམས་ཡོངས་སུ་སྟོན། །བསྐལ་པ་ཁྲག་ཁྲིག་བྱེ་བར་འགྲོ་བ་གང་། །བདེ་གཤེགས་སྲས་དང་ལྷན་ཅིག་འགྲོགས་འགྱུར་པ། །དེ་དག་

77-1-220a

དེ་རྣམས་སྤྱོད་ཡུལ་མི་ཤེས་ཏེ། །དེ་དག་ཡོན་ཏན་སྣོད་དུ་བདག་མ་བྱས། །ཁྱོད་ཀྱིས་འདི་འདྲའི་ཚུལ་འདི་ཐོས་པར་འགྱུར། །བྱང་ཆུབ་སེམས་དཔའ་ཆེན་པོའི་རྣམ་འཕྲུལ་བ། །
འགྲོ་བ་ཀུན་ན་དཀོན་པ་ཁྱོད་ཀྱིས་མཐོང་། །དེ་ལྟར་ནོར་བཟངས་དགའ་བའི་ཡིད་དུ་གྱིས། །ཁྱོད་ལ་སངས་རྒྱས་ཐམས་ཅད་དགོངས་པ་མཛད། །བྱང་ཆུབ་སེམས་དཔའ་ཁྱོད་གཟུང་ཕྱིར་
ཡང་གནས། །ཁྱོད་ཀྱང་དེ་དག་རྗེས་སུ་བསྟན་ལ་གནས། །ལེགས་སོ་ནོར་བཟངས་ཁྱོད་ཀྱི་འཚོ་བ་དགེ། །བྱང་ཆུབ་སེམས་དཔའི་རིགས་ཀྱི་ཆོས་ལ་གནས། །ཁྱོད་ནི་རྒྱལ་སྲས་ཡོན་ཏན་
རྣམས་ལ་སློབ། །བདེ་བར་གཤེགས་རིགས་རྣམ་པར་འཕེལ་བྱེད་འགྱུར། །ནོར་བཟངས་དགའ་བ་རྒྱ་ཆེན་ཉམས་སུ་ལོང་། །སངས་རྒྱས་མཉམ་མེད་ཐམས་ཅད་ཁྱོད་ཀྱི་ཕ། །བྱང་ཆུབ་
སེམས་དཔའ་ཐམས་ཅད་ཁྱོད་དང་སྤུན། །བྱང་ཆུབ་ཡན་ལག་ཐམས་ཅད་ཁྱོད་ཀྱི་གཉེན། །ཁྱོད་ནི་བདེ་གཤེགས་ཐུགས་ལས་སྐྱེས་པའི་སྲས། །ཆོས་ཀྱི་རྒྱལ་པོ་ཆེན་པོའི་རིགས་འཛིན་པ། །
བྱང་ཆུབ་སེམས་དཔའི་རིགས་རྒྱུད་འཕེལ་བར་བྱེད། །རིང་པོར་མི་ཐོགས་ཆོས་རྒྱལ་ཐོབ་འགྱུར་གྱིས། །ནོར་བཟངས་དབང་པོ་ཚིམ་ཞིང་དགའ་བར་གྱིས། །སངས་རྒྱས་ཀུན་གྱི་དབང་བསྐུར་
དམ་པ་ཡང་། །རིང་པོར་མི་ཐོགས་རྨད་བྱུང་ཐོབ་པར་འགྱུར། །རྒྱལ་བའི་སྲས་དང་མཚུངས་ཤིང་མཉམ་པར་འགྱུར། །ཁྱོད་ཀྱི་སྤྱོད་པའི་ཚུལ་མཐུན་དེ་འདྲའོ། །མི་གང་ཅི་འདྲའི་ས་བོན་
འདེབས་བྱེད་པ། །དེ་ནི་དེ་འདྲའི་འབྲས་བུ་ཐོབ་པར་འགྱུར། །དགའ་བ་རྒྱ་ཆེན་བསམ་ཡས་ཉམས་སུ་ལོང་། །ངས་ནི་དེ་རིང་ཁྱོད་ཀྱི་དབུགས་ཀྱང་དབྱུང་། །ཚེ་གཅིག་ཁྱོད་ཀྱིས་གང་

77-1-220b

རྣམས་ཐོབ་གྱུར་པ། །བྱང་ཆུབ་སེམས་དཔའ་ཁྲག་ཁྲིག་བསམ་ཡས་པ། །བསྐལ་པ་ཁྲག་ཁྲིག་བྱང་ཆུབ་སྤྱད་སྤྱོད་པ། །དེ་དག་གིས་ཀྱང་ཕུན་སུམ་འདི་མ་རྙེད། །འདི་རྣམས་ཐམས་ཅད་
མོས་པའི་འབྲས་བུ་སྟེ། །བརྩོན་འགྲུས་བསམ་པ་དག་གི་དེ་བཞིན་ནོ། །གང་ཞིག་སྤྱོད་པ་འདི་འདྲ་དཀའ་བ་ཡང་། །ནོར་བཟངས་སྤྱོད་པ་གང་ཡིན་དེ་ལ་སྤྱོད། །སྤྱོད་པ་ཐམས་ཅད་སྨོན་ལམ་བྱུང་བ་ཡིན། །
ཆོས་རྣམས་ཐམས་ཅད་མོས་ལས་ཡོངས་སུ་བྱུང་། །ནོར་བཟངས་དེ་ལྟར་ཁྱོད་ཀྱིས་ཡོངས་སུ་བསྒྲུབས། །རྟག་ཏུ་ཁྱད་པར་སྤྱོད་པ་བརྩལ་བར་གྱིས། །ཀླུ་ཡི་བསམ་པ་ཇི་སྙེད་བྱུང་གྱུར་པ། །དེ་སྙེད་
ཆར་པ་ཡོངས་སུ་འབབ་པར་འགྱུར། །སྨོན་ལམ་ཡེ་ཤེས་སྤྱོད་ཡུལ་ཇི་སྙེད་པ། །དེ་སྙེད་བྱང་ཆུབ་སྤྱོད་པས་རྒྱས་པར་འགྱུར། །ནོར་བཟངས་བཟང་པོའི་སྤྱོད་ཅེས་བྱ་བ་འདི། །ཚུལ་ནི་ཁྱོད་ལ་བསྟན་
པ་འདི་ཡིན་གྱིས། །དེ་ཤེས་གྱིས་ལ་དགེ་བཤེས་རང་བཞིན་གྱིས། །བསྙེན་བཀུར་བྱེད་ཚེ་འཇུག་པར་མ་བྱེད་ཅིག །ལུས་རྣམས་བྱེ་བ་སྔན་ཅད་ཁྱོད་ཀྱིས་ཀྱང་། །འདོད་པའི་དོན་དུ་དོན་མེད་ཟད་
བྱས་སེམས། །དེ་ནི་བྱང་ཆུབ་ཡོངས་སུ་ཚོལ་གྱུར་ན། །བརྟུལ་ཤུགས་བཟང་པོ་བཏུལ་བས་ཞིག་གོ་འདའ། །ཁྱོད་ཀྱིས་བསྐལ་པ་བྱེ་བ་འདས་བྱས་ཏེ། །འདུས་བྱས་སྡུག་བསྔལ་ཐམས་ཅད་ཉམས་
སུ་མྱོང་། །གང་གཱའི་བྱེ་སྙེད་སངས་རྒྱས་མཉེས་མ་བྱས། །འདི་འདྲའི་ཚུལ་ཡང་ཐོས་པར་མ་གྱུར་ཏོ། །དེ་ལས་ད་ནི་ཁོམ་པར་མིར་ཡང་སྐྱེ། །སངས་རྒྱས་འབྱུང་མཐོང་དགེ་བཤེས་འདི་འདྲ་སྟེ། །
བྱང་ཆུབ་མཆོག་གི་སྤྱོད་འདི་ཐོས་པར་འགྱུར། །རྣམ་དག་སེམས་སུ་དེ་གོ་ཅིར་མི་འགྱུར། །བདེ་བར་གཤེགས་པ་ཡང་དུ་བྱུང་བར་འགྱུར། །དགེ་བཤེས་དེ་བཞིན་ཆོས་མཉན་ཐོས་པར་

77-1-221a

འགྱུར། །གལ་ཏེ་བསམ་པ་ཡོངས་སུ་མ་སྦྱངས་ན། །ཚུལ་འདི་ཕྱིན་ཆད་ཐོས་པར་དཀའ་བ་ཡིན། །དེ་བས་དད་དང་མོས་དང་བསམ་པ་རྣམས། །ཡོངས་སུ་བསྐྱེད་ལ་བླ་མ་ཕུ་དུད་
གྱིས། །ཐེ་ཙོམ་ལྟ་བ་ཡོངས་སུ་སྐྱོ་སྤོངས་ལ། །ཡང་དང་ཡང་དུ་འདི་འདྲའི་ཚུལ་ཉོན་ཅིག །གང་གིས་སྤྱོད་ལ་འཇུག་པ་འདི་འདྲ་འདི། །ཐོས་ནས་དེ་འདྲའི་སྨོན་ལམ་མངོན་བསྒྲུབས་པ། །དེ་དག་
ཐོབ་པ་དམ་པ་བསམ་མི་ཁྱབ། །དེ་དག་མི་ཡི་སྲིད་པར་ལེགས་པར་འོངས། །གང་གིས་དེ་འདྲའི་མོས་པ་སྦྱངས་པ་ནི། །དེ་ལ་བདེ་གཤེགས་ཐམས་ཅད་མི་དཀོན་ནོ། །དེ་ནི་རྒྱལ་བ་རྣམས་ཀྱི་
སྲས་དང་སྤུན། །དེ་ལ་ཕྱིན་ཆད་བྱང་ཆུབ་ཐེ་ཙོམ་མེད། །གང་ཞིག་འདི་འདྲའི་ཚུལ་འདིར་ཞུགས་གྱུར་པ། །དེས་ནི་ལོག་པར་ལྟུང་བ་ཐམས་ཅད་སྤངས། །དེས་ནི་སྡུག་བསྔལ་ཆོས་རྣམས་
ཐམས་ཅད་བསྩལ། །དེས་ན་ཡོན་ཏན་ཐམས་ཅད་བསྡུ་བ་བྱས། །ལུས་ནི་བོར་ནས་རིང་པོར་མི་ཐོགས་སུ། །ཡོངས་སུ་དག་པའི་སངས་རྒྱས་ཞིང་དུ་འགྲོ། །བྱང་ཆུབ་སེམས་དཔའི་གནས་
སུ་འཇུག་པར་འགྱུར། །ཕྱོགས་བཅུའི་དེ་བཞིན་གཤེགས་པ་མཐོང་བར་འགྱུར། །ནོར་བཟངས་ཁྱོད་ཀྱིས་སྔོན་གྱི་རྒྱུ་སྟུག་པས། །ད་ལྟར་བྱུང་ལ་མོས་པ་ངེས་པ་ཡིས། །ཁྱད་པར་དོན་གཉེར་
དགེ་བཤེས་བསྟེན་བྱས་པ། །ཆུ་ལས་ཨུད་པ་ལ་བཞིན་དེ་ཕྱིར་འཕེལ། །དགེ་བཤེས་ཐམས་ཅད་ཕུ་དུད་བསམ་པ་དང་། །སངས་རྒྱས་ཐམས་ཅད་དགྱེས་བྱའི་བསམ་པ་དང་། །ཆོས་ཀུན་
ཡོངས་སུ་དྲི་བའི་བསམ་པ་ཅན། །བརྟུལ་ཞུགས་བཟང་པོ་ལྡན་པ་དལ་གྱིས་ལོངས། །ཆོས་ཀྱི་ནན་ཏན་ཀུན་ལ་རབ་གནས་པ། །ལམ་རྣམས་རྗེས་སུ་ཀུན་ཚོལ་རབ་གནས་པ། །སངས་རྒྱས་

77-1-221b

སྲས་ཀྱི་སྨོན་ལམ་རབ་གནས་པ། །ཡོན་ཏན་ཆོས་རྣམས་ཀུན་གྱི་སྣོད་ཁྱོད་ལོངས། །མོས་པ་ཕུན་སུམ་ཚོགས་པ་ཅི་འདྲ་བས། །ཁྱོད་ཀྱིས་ང་ལ་ཕྱག་འདི་བྱས་པ་ནི། །སངས་རྒྱས་ཐམས་
ཅད་འཁོར་དུ་མངོན་སུམ་དུ། །རིང་པོ་མི་ཐོགས་ཡོངས་སུ་འབྱུང་བར་འགྱུར། །སྐྱོ་བའི་ཡིད་མེད་ནོར་བཟངས་ལེགས་པ་ཡིན། །སངས་རྒྱས་ཀུན་གྱི་སྨོན་ལམ་སེམས་ལྡན་པ། །བརྟུལ་ཞུགས་བརྟན་
ཁྱོད་རིང་པོར་མི་ཐོགས་པར། །སངས་རྒྱས་ཀུན་གྱི་ཡོན་ཏན་མཐར་ཕྱིན་འགྱུར། །ཡེ་ཤེས་སྤྱོད་ཡུལ་རྣམ་པར་ཕྱིན་པ་ཡི། །འཇམ་དཔལ་གན་དུ་ནོར་བཟངས་ཁྱོད་སོང་སྟེ། །བཟང་པོ་སྤྱོད་པ་
དམ་པ་མཆོག་དྲིས་ཤིག །དེ་ཚུལ་ཁྱོད་འཇུག་དེ་ནས་བྱེད་པར་འགྱུར། །དེ་ལྟར་བྱམས་པ་ཆགས་མེད་སྤྱོད་ཡུལ་གྱིས། །ནོར་བཟངས་ཡང་དག་ལེགས་པས་འཕགས་མཐོང་ནས། །འཁོར་རྣམས་ཀུན་ལ་
མངོན་པར་བསྟན་བྱས་ཏེ། །དེ་ཡི་ཡོན་ཏན་ལེགས་མཛོད་འདི་བརྗོད་དོ། །འདི་འདྲའི་རྗེས་སུ་བསྟན་པ་དམ་པ་དང་། །གདམས་ངག་དེ་འདྲ་ནོར་བཟངས་ཐོས་གྱུར་ནས། །དགའ་བའི་ཤུགས་ཀྱིས་
དབང་པོ་མངོན་བརླན་པས། །མཆི་མའི་རྒྱུད་མང་རབ་ཏུ་དེས་ཀྱང་བླགས། །དགའ་བའི་ཉམས་ཆེན་ཉམས་སུ་མྱོང་བར་འགྱུར། །དབང་པོ་ཚིམ་ནས་ཤུགས་ཀྱིས་དབུགས་ཀྱང་ཕྱུང་། །ནོར་བཟངས་
ལངས་ཏེ་ཐལ་མོ་རབ་སྦྱར་ནས། །བྱམས་པ་དེ་ལ་བསྐོར་བ་རབ་ཏུ་བྱས། །དེ་ཡི་ལག་ཏུ་འཇམ་དཔལ་སེམས་དབང་གིས། །མེ་ཏོག་ཕྲེང་བ་རིན་ཆེན་མཛེས་པ་དག །བྱང་ཆུབ་སེམས་དཔའི་སྨོན་
པས་མངོན་མཐོན་པ། །ཡིད་དུ་འོང་བ་མང་པོ་བྱུང་བར་གྱུར། །ནོར་བཟངས་དེ་ཚེ་རབ་ཏུ་དགའ་གྱུར་ནས། །དགའ་བར་དེ་དག་བྱམས་པ་དེ་ལ་གཏོར། །དེ་ཚེ་དེ་ཡི་མགོ་ལ་ཀུན་ནས་བྱུགས། །

77-1-222a

བྱམས་པས་ཚིགས་སུ་བཅད་པ་འདི་དག་སྨྲས། །རྒྱལ་བའི་སྲས་པོ་ནོར་བཟངས་ལེགས་སོ་ལེགས། །དེ་ལྟར་ཁྱོད་ནི་ཡོངས་སུ་མི་སྐྱོ་བས། །དེ་དང་འཇམ་དཔལ་ཅི་འདྲ་ཅི་བཞིན་དུ། །
ཡོན་ཏན་སྣོད་དུ་ཁྱོད་ནི་མྱུར་དེ་འགྱུར། །ཐོས་ནས་ནོར་བཟངས་དགའ་བའི་ཚིག་བརྗོད་པ། །འདི་འདྲའི་དགེ་བཤེས་བདག་དང་ཕྲད་པ་ནི། །སྲིད་པ་བརྒྱ་ཕྲག་བགྲངས་པར་ཤིན་ཏུ་དཀོན། །
བདག་གིས་དེ་རིང་འདིར་ཕྱིན་ཤིན་ཏུ་ལེགས། །ཡོན་ཏན་ཀུན་གྱི་ཕ་རོལ་ཕྱིན་གྱུར་པ། །འཇམ་དཔལ་ཁྱོད་ཀྱི་བྱིན་བརླབས་བཟང་པོ་ཡིས། །བདག་གིས་བཤེས་གཉེན་འདི་དག་དཀོན་
པ་རྙེད། །ཁྱོད་དང་བདག་དུ་མྱུར་དུ་འགྲོགས་པར་རོ།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་གསུམ་པ། དེ་ནས་ཚོང་དཔོན་གྱི་བུ་ནོར་བཟངས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་
མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་པ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ན་ཇི་ལྟར་བྱང་ཆུབ་སེམས་དཔས་བྱང་
ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་པ་བྱམས་པ་ནི་དེ་བཞིན་གཤེགས་པ་ཐམས་ཅད་ཀྱིས་སྐུ་ཚེ་གཅིག་གིས་ཐོགས་པར་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་སྟེ། གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐུ་ཚེ་གཅིག་གིས་ཐོགས་པ་དེ་ནི་བྱང་ཆུབ་སེམས་དཔའི་རྣམ་པར་འགོད་
པ་ཐམས་ཅད་ལས་ཡང་དག་པར་འདས་པ་ལགས། དེ་ནི་བྱང་ཆུབ་སེམས་དཔའི་སྐྱོན་མེད་པར་རབ་ཏུ་ཞུགས་པ་ལགས། དེ་ནི་ཕ་རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་པ་ལགས། 

77-1-222b

དེ་ནི་བཟོད་པའི་སྒོ་ཐམས་ཅད་དུ་ཞུགས་པ་ལགས། དེས་ནི་བྱང་ཆུབ་སེམས་དཔའི་ས་ཐམས་ཅད་རབ་ཏུ་བརྙེས་པ་ལགས། དེ་ནི་བྱང་ཆུབ་སེམས་དཔའི་རྣམ་པར་ཐར་པའི་སྒོ་ཐམས་ཅད་ལ་
རྣམ་པར་རོལ་པ་ལགས། དེས་ནི་ཏིང་ངེ་འཛིན་ཐམས་ཅད་ཡོངས་སུ་བསྒྲུབས་པ་ལགས། དེས་ནི་བྱང་ཆུབ་སེམས་དཔའི་རྒྱུད་ཐམས་ཅད་རྟོགས་པར་ཐུགས་སུ་ཆུད་པ་ལགས། དེས་ནི་གཟུངས་
དང་སྤོབས་པ་སྣང་བའི་ཚུལ་ཐམས་ཅད་ལ་རབ་ཏུ་བརྙེས་པ་ལགས། དེས་ནི་བྱང་ཆུབ་སེམས་དཔའི་དབང་ཐམས་ཅད་ལ་མངའ་ཐོབ་པ་ལགས། དེས་ནི་བྱང་ཆུབ་སེམས་དཔའི་ཚོགས་
ཐམས་ཅད་ཤིན་ཏུ་བསྩགས་པ་ལགས། དེ་ནི་ཤེས་རབ་དང་ཐབས་མཁས་པའི་ཚུལ་ལ་རྣམ་པར་རོལ་པ་ལགས། དེས་ནི་མངོན་པར་ཤེས་པ་ཆེན་པོ་དང་། རིག་པ་དང་ཡེ་ཤེས་སྣང་བའི་ཚུལ་
བསྐྱེད་པ་ལགས། དེ་ནི་བསླབ་པ་ཐམས་ཅད་ལས་བྱུང་བ་ལགས། དེས་ནི་བྱང་ཆུབ་སེམས་དཔའི་སྤྱོད་པ་ཡོངས་སུ་སྦྱངས་པ་ལགས། དེས་ནི་སྨོན་ལམ་གྱིས་འབྱུང་བའི་སྒོ་ཐམས་ཅད་
མངོན་པར་བསྒྲུབས་པ་ལགས། དེས་ནི་དེ་བཞིན་གཤེགས་པ་ཐམས་ཅད་ཀྱི་ལུང་བསྟན་པ་རབ་ཏུ་བླངས་པ་ལགས། དེ་ནི་ཐེག་པ་ཐམས་ཅད་ཀྱིས་འབྱུང་བའི་སྒོ་ལ་མཁས་པ་ལགས། 
དེས་ནི་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་ཡང་དག་པར་བླངས་པ་ལགས། དེས་ནི་སངས་རྒྱས་ཐམས་ཅད་ཀྱི་བྱང་ཆུབ་ཡོངས་སུ་བཟུང་བ་ལགས། དེས་ནི་དེ་བཞིན་
གཤེགས་པ་ཐམས་ཅད་ཀྱི་ཆོས་ཀྱི་མཛོད་བཟུང་བ་ལགས། དེ་ནི་དེ་བཞིན་གཤེགས་པ་ཐམས་ཅད་ཀྱི་གསང་བའི་མཛོད་འཛིན་པ་ལགས། དེས་ནི་བྱང་ཆུབ་སེམས་དཔའ་ཐམས་ཅད་ཀྱི་

77-1-223a

གསང་བའི་དཀྱིལ་འཁོར་ཐམས་ཅད་ཀྱི་སྤྱི་བོར་ཕྱིན་པ་ལགས། དེ་ནི་ཉོན་མོངས་པའི་དཔུང་ཐམས་ཅད་རྣམ་པར་དཀྲུགས་པ་ལ་ཤིན་ཏུ་དཔའ་བ་ལགས། དེ་ནི་འཁོར་བའི་འབྲོག་
དགོན་པར་ལུས་པ་རྣམས་ཀྱི་ལམ་སྟོན་པ་ལགས། དེ་ནི་ཉོན་མོངས་པའི་ནད་ཀྱིས་ཐེབས་པ་རྣམས་ཀྱི་སྨན་པར་གྱུར་པ་ལགས། དེ་ནི་སེམས་ཅན་ཐམས་ཅད་ཀྱི་ཕུལ་དུ་ཕྱིན་པ་ལགས། 
དེ་ནི་འཇིག་རྟེན་གྱི་དབང་པོ་ཐམས་ཅད་ཀྱི་དབང་པོ་ལགས། དེ་ནི་འཕགས་པའི་གང་ཟག་ཐམས་ཅད་ཀྱི་མཐུ་བོ་ལགས། དེ་ནི་ཉན་ཐོས་དང་རང་སངས་རྒྱས་ཐམས་ཅད་ཀྱི་གཙོ་བོ་ལགས། 
དེ་ནི་འཁོར་བའི་རྒྱ་མཚོ་ལ་རྒྱུ་བ་རྣམས་ཀྱི་སྐྱ་བ་འཛིན་པ་ལགས། དེ་ནི་སེམས་ཅན་གདུལ་བའི་ཐབས་ཀྱི་རྒྱ་མཚོ་ཆེན་པོ་བཤད་པ་ལགས། དེ་ནི་འགྲོ་བ་ཡོངས་སུ་སྨིན་པ་རྣམས་ཀྱི་
དབང་པོ་རྣམ་པར་གཟིགས་པ་ལགས། དེ་ནི་སེམས་ཅན་ཐམས་ཅད་ཡོངས་སུ་བསྡུ་བ་ལ་བརྩོན་པ་ལགས། དེ་ནི་བྱང་ཆུབ་སེམས་དཔའ་ཐམས་ཅད་ལ་ཡོངས་སུ་བསྐྱང་བ་ལ་བརྩོན་པ་
ལགས། དེ་ནི་བྱང་ཆུབ་སེམས་དཔའི་བྱ་བ་ཐམས་ཅད་ལ་ཡང་དག་པར་འགྲོ་བར་བརྩོན་པ་ལགས། དེ་ནི་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་གནས་པ་ལགས། དེ་ནི་
འཁོར་གྱི་དཀྱིལ་འཁོར་ཐམས་ཅད་དུ་མངོན་པར་འཕགས་པ་ལགས། དེ་ནི་འགྲོ་བ་ཐམས་ཅད་ཀྱི་གནས་སུ་གཟུགས་བརྙན་སྣང་བ་ལགས། དེ་ནི་འཇིག་རྟེན་གྱི་ཆོས་ཐམས་ཅད་ཀྱིས་མ་གོས་
པ་ལགས། དེ་ནི་བདུད་ཀྱི་ཡུལ་ཐམས་ཅད་ལས་ཡང་དག་པར་འདས་པ་ལགས། དེ་ནི་སངས་རྒྱས་ཀྱི་ཡུལ་ཐམས་ཅད་ཀྱི་རྗེས་སུ་བཞུད་པ་ལགས། དེ་ནི་བྱང་ཆུབ་སེམས་དཔའི་ཡུལ་

77-1-223b

ཐམས་ཅད་ལ་སྒྲིབ་པ་མེད་པ་བརྙེས་པ་ལགས། དེ་ནི་དེ་བཞིན་གཤེགས་པ་ཐམས་ཅད་ལ་མཆོད་པར་བརྩོན་པ་ལགས། དེ་ནི་སངས་རྒྱས་ཀྱི་ཆོས་ཐམས་ཅད་ལ་རྒྱུད་ཀྱི་ཚུལ་གཅིག་ཏུ་
གྱུར་པ་ལགས། དེ་ནི་དབང་བསྐུར་བའི་ཐབས་ཐོབ་པ་ལགས། དེ་ནི་ཆོས་ཀྱི་རྒྱལ་སྲིད་ཆེན་པོ་ལ་གནས་པར་འགྱུར་བ་ལགས། དེ་ནི་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལ་དབང་
བསྐུར་བ་ལགས། དེ་ནི་སངས་རྒྱས་ཀྱི་ཆོས་ཐམས་ཅད་རབ་ཏུ་འབྱུང་བ་ལགས། དེ་ནི་ཐམས་ཅད་མཁྱེན་པའི་ཡེ་ཤེས་ལ་དབང་བསྐུར་བའི་མཐར་ཕྱིན་པ་ལགས་ན། འཕགས་པ་
ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་ཇི་ལྟར་ནན་ཏན་ཏུ་བགྱི་བ་དང་། ཇི་ལྟར་བྱང་ཆུབ་སེམས་དཔས་ནན་ཏན་དུ་བགྱིས་ན། སངས་
རྒྱས་ཀྱི་ཆོས་ཐམས་ཅད་ཐོབ་པར་འགྱུར་བ་དང་། སེམས་ཅན་གྱི་ཁམས་ཇི་ལྟར་གཉེར་བའི་ཚུལ་བཞིན་དུ་རིམ་གྲོར་བགྱིད་པར་འགྱུར་བ་དང་། ཡི་དམ་ཇི་ལྟར་བཅས་པའི་ཚུལ་བཞིན་དུ་
མཐར་ཕྱིན་པར་འགྱུར་བ་དང་། བྱང་ཆུབ་སེམས་དཔའི་སྤྱོད་པ་ཆེན་པོ་བརྩམས་པ་གྲུབ་པར་འགྱུར་བ་དང་། ལྷ་དང་བཅས་པའི་འཇིག་རྟེན་དབུགས་འབྱིན་པར་འགྱུར་བ་དང་། བདག་དང་སེམས་
ཅན་དང་སངས་རྒྱས་དང་ཆོས་དང་དགེ་འདུན་བསླུ་བར་མི་འགྱུར་བ་དང་སངས་རྒྱས་ཀྱི་རིགས་རྒྱུན་མི་གཅོད་པ་དང་། བྱང་ཆུབ་སེམས་དཔའི་རིགས་སྟོང་བར་མི་འབྱིན་པ་དང་། དེ་བཞིན་གཤེགས་
པའི་རིགས་ཡོངས་སུ་འཛིན་པར་འགྱུར་བ་བདག་ལ་བཀའ་བསྩལ་དུ་གསོལ། དེ་ནས་བྱང་ཆུབ་སེམས་དཔའ་བྱམས་པས་འཁོར་གྱི་དཀྱིལ་འཁོར་དེ་དག་ཐམས་ཅད་ལ་བལྟས་ཏེ། 

77-1-224a

ཚོང་དཔོན་གྱི་བུ་ནོར་བཟངས་ལ་ཉེ་བར་བསྟན་ནས་འདི་སྐད་ཅེས་སྨྲས་སོ། །རིགས་ཀྱི་བུ་དག་ཚོང་དཔོན་གྱི་བུ་འདི་འདི་ལྟར་ང་ལ་བྱང་ཆུབ་སེམས་དཔའི་སྤྱོད་པ་དང་ཡོན་ཏན་ཡོངས་སུ་བསྒྲུབ་
པ་འདྲི་བ་ལ་ལྟོས་བཟོད་པ་ཅན་དག་ཚོང་དཔོན་གྱི་བུ་འདི་ནི་བརྩོན་འགྲུས་བརྩམས་པ་འདི་ལྟ་བུ་དང་དོན་དུ་གཉེར་བ་འདི་ལྟ་བུ་དང་མོས་པའི་ཡི་དམ་འདི་ལྟ་བུ་དང་། ལྷག་པའི་བསམ་པ་བརྟན་པ་འདི་
ལྟ་བུ་དང་བརྩོན་འགྲུས་མི་ཟློག་པ་འདི་ལྟ་བུ་དང་། སངས་རྒྱས་ཀྱི་ཆོས་ཀྱིས་མི་ངོམས་པར་འདི་ལྟ་བུ་དང་ཁྱད་པར་ཡོངས་སུ་བཙལ་བ་འདི་ལྟ་བུ་དང་མགོའི་ཐོད་ལ་མེ་འབར་བ་ལྟ་བུར་སྤྱོད་པ་འདི་ལྟ་
བུ་དང་དགེ་བའི་བཤེས་གཉེན་མཐོང་བར་འདོད་པ་འདི་ལྟ་བུ་དང་དགེ་བའི་བཤེས་གཉེན་བསྙེན་བཀུར་བར་སྐྱོ་བ་མེད་པ་འདི་ལྟ་བུས་དགེ་བའི་བཤེས་གཉེན་ཐམས་ཅད་ཡོངས་སུ་ཚོལ་ཞིང་ཡོངས་སུ་
དྲི་བ་དང་བསྙེན་བཀུར་བ་བྱེད་ཅིང་འཇམ་དཔལ་གཞོན་ནུར་གྱུར་པས་བཏང་ནས་གྲོང་ཁྱེར་དཔལ་གྱི་འབྱུང་གནས་ཉེ་བར་བཟུང་བ་ནས་ལྷོ་ཕྱོགས་ཀྱི་རྒྱུད་ཐམས་ཅད་དུ་རྒྱུས་ཏེ་དགེ་བའི་བཤེས་གཉེན་བརྒྱ་
རྩ་བཅུ་ལ་ཡོངས་སུ་དྲི་བ་བྱེད་ཅིང་ཐ་མ་ངའི་དྲུང་འདིའི་བར་དུ་སྐྱོ་བ་ཐམས་ཅད་དང་བྲལ་བའི་ལྷག་པའི་བསམ་པས་ཕྱིན་ཏེ། རིགས་ཀྱི་བུ་དག་རྣམ་པ་འདི་ལྟ་བུར་ཐེག་པ་ཆེན་པོ་ལ་ཡང་དག་
པར་ཞུགས་པ་ཡི་དམ་ཆེན་པོ་ལ་ཡང་དག་པར་གནས་པ། བསམ་པ་ཆེན་པོ་ལ་རབ་ཏུ་རྟུལ་བའི་ཡིད་དང་ལྡན་པ་སྙིང་རྗེ་ཆེན་པོའི་གོ་བགོས་པའི་ངད་དང་ལྡན་པ་བྱམས་པ་ཆེན་པོས་སེམས་ཅན་ཐམས་ཅད་
ཡོངས་སུ་སྐྱོབ་པའི་བློ་གྲོས་ཅན་བརྩོན་འགྲུས་ཆེན་པོའི་ཕ་རོལ་ཏུ་ཕྱིན་པ་ལ་རབ་ཏུ་བརྩོན་པ། སེམས་ཅན་གྱི་ལམ་གྲོགས་མང་པོ་ཡོངས་སུ་བསྐྱེད་པ་ལ་མངོན་པར་བརྩོན་པ། འཁོར་བའི་རྒྱ་མཚོ་

77-1-224b

ཆེན་པོ་ལས་སེམས་ཅན་བསྒྲལ་བ་ལ་ཞུགས་པ་ཐམས་ཅད་མཁྱེན་པ་ཉིད་ཀྱི་ལམ་ཆེན་པོ་ལ་ཞུགས་པ། ཆོས་ཀྱི་གྲུ་ཆེན་པོ་ཡང་དག་པར་བཤམས་པ་ལ་བརྩོན་པ། ཆོས་ཆེན་པོ་དང་བསོད་ནམས་
རིན་པོ་ཆེ་ཡོངས་སུ་བསྡུ་བ་ལ་རབ་ཏུ་བརྟུལ་བ། ཆོས་ཀྱི་མཆོད་སྦྱིན་ཆེན་པོའི་ཚོགས་བསྩགས་པ་ལ། བརྩོན་པ་རྣམས་ཀྱི་མིང་ཐོས་པ་འམ། གཟུགས་ཀྱི་ལུས་མཐོང་བ་འམ་སྤྱོད་ཡུལ་དུ་འགྲོགས་
པ་འམ། སྤྱོད་པ་དང་སྐལ་བ་མཉམ་པ་ནི་ཤིན་ཏུ་དཀོན་ནོ། །དེ་ཅིའི་ཕྱིར་ཞེ་ན། རིགས་ཀྱི་བུ་སྐྱེས་བུ་དམ་པ་འདི་ནི་འགྲོ་བ་ཐམས་ཅད་ཡོངས་སུ་སྐྱོབ་པའི་དོན་དུ་བྱུང་སྟེ། སེམས་ཅན་ཐམས་ཅད་
སྡུག་བསྔལ་ལས་ཡོངས་སུ་ཐར་བར་བྱ་བ་དང་། ངན་སོང་ཐམས་ཅད་ཡང་དག་པར་བསྩལ་པ་དང་། མི་ཁོམ་པའི་ལམ་ཐམས་ཅད་རྣམ་པར་བཟློག་པ་དང་། ལམ་ཉམ་ང་བ་ཐམས་ཅད་ཡོངས་
སུ་སྤང་བ་དང་། མི་ཤེས་པའི་མུན་པ་ནག་པོ་ཐམས་ཅད་རྣམ་པར་བསྩལ་བ་དང་། འཁོར་བའི་འབྲོག་དགོན་པ་ཐམས་ཅད་ལས་ཡང་དག་པར་ཟླ་བ་དང་། འགྲོ་བའི་རྒྱུད་ཀྱི་འཁོར་ལོ་ཐམས་ཅད་རྣམ་
པར་བཟློག་པ་དང་། བདུད་ཀྱི་ཡུལ་ཐམས་ཅད་ལས་ཡང་དག་པར་ཟླ་བ་དང་། གནས་ཀྱི་རྟེན་ཐམས་ཅད་ལས་གྱེན་དུ་བསྐྱོད་པ་དང་། རྟེན་གྱི་གཞི་ཐམས་ཅད་ལས་བསྐུལ་བ་དང་། འགྲོ་བའི་
རྒྱུད་ཐམས་ཅད་དུ་མི་གནས་པར་བྱ་བ་དང་། འདོད་པའི་འདམ་ནས་ཡང་དག་པར་འདོན་པ་དང་། དགའ་བའི་འདོད་ཆགས་སྤང་བ་དང་། ལྟ་བའི་བཅིངས་པ་གཏུབ་པ་དང་། འཇིག་ཚོགས་ལ་མངོན་པར་
ཞེན་པ་རྣམ་པར་བཟློག་པ་དང་། འདུ་ཤེས་ཀྱི་ཞགས་པ་ཡང་དག་པར་བཅད་པ་དང་། ཕྱིན་ཅི་ལོག་གི་ལམ་ནས་རྣམ་པར་བཟློག་པ་དང་། ང་རྒྱལ་གྱི་རྒྱལ་མཚན་བསྙིལ་བ་དང་། བག་ལ་ཉལ་བའི་

77-1-225a

ཟུག་རྔུ་ཡང་དག་པར་འབྱུང་བ་དང་། སྒྲིབ་པའི་སྒོ་གླེགས་གཞོམ་པ་དང་། སྒྲིབ་པའི་རི་རྣམ་པར་གཏོར་བ་དང་། སྲེད་པའི་དྲ་བ་ནས་གདོན་པ་དང་མ་རིག་པའི་ཀུན་ཏུ་སྦྱོར་བ་ལས་དབྱེ་བ་དང་། 
སྲིད་པའི་ཆུ་བོ་ལས་བསྒྲལ་བ་དང་། གཡོ་དང་སྒྱུ་སྤང་བ་དང་སེམས་ཀྱི་རྙོག་པ་གདང་བ་དང་། ཐེ་ཙོམ་དང་ཡིད་གཉིས་དང་ནེམ་ནུར་བསྩལ་བ་དང་། མི་ཤེས་པའི་ཆུ་བོ་ཆེན་པོ་ལས་བསྒྲལ་བ་དང་། 
འཁོར་བའི་སྐྱོན་ཐམས་ཅད་རྣམ་པར་སྨད་པའི་ཕྱིར་རབ་ཏུ་ཞུགས་པའོ། །རིགས་ཀྱི་བུ་སྐྱེས་བུ་དམ་པ་འདི་ནི་སེམས་ཅན་རྣམས་ཆུ་བོ་བཞི་ལས་ཡོངས་སུ་བསྒྲལ་བའི་ཕྱིར་ཆོས་ཀྱི་གྲུ་ཆེན་པོ་ཡང་
དག་པར་བཤམ་པར་འདོད་པའོ། །ལྟ་བའི་འདམ་དུ་བྱིང་བ་རྣམས་ཆོས་ཀྱི་རྐང་སྟེགས་ཆེན་པོ་དགོད་པར་འདོད་པའོ། །གཏི་མུག་གི་མུན་པར་འཐོམས་པ་རྣམས་ལ་ཡེ་ཤེས་ཀྱི་སྣང་བ་དབྱུང་བར་
འདོད་པའོ། །འཁོར་བའི་མྱ་ངན་དུ་འཁྱམས་པ་རྣམས་ལ་འཕགས་པའི་ལམ་བསྟན་པར་འདོད་པའོ། །ཉོན་མོངས་པའི་ནད་ཆེན་པོས་གཟིར་བ་རྣམས་ལ་ཆོས་ཀྱི་སྨན་སྦྱིན་པར་འདོད་པའོ། །སྐྱེ་བ་དང་
རྒ་བ་དང་འཆི་བས་གཙེས་པ་རྣམས་ལ་འཆི་བ་མེད་པའི་དབྱིངས་སྦྱིན་པར་འདོད་པའོ། །མེ་གསུམ་རབ་ཏུ་འབར་བ་རྣམས་ལ་ཞི་གནས་ཀྱི་ཆུས་རབ་ཏུ་ཞི་བར་འདོད་པའོ། །མྱ་ངན་དང་སྨྲེ་སྔགས་འདོན་པ་དང་ཡིད་
མི་བདེ་བ་དང་འཁྲུག་པས་གདུངས་པ་རྣམས་ལ་དབུགས་ཕྱིན་པ་ཆེན་པོ་སྦྱིན་པར་འདོད་པའོ། །སྲིད་པའི་བརྩོན་རས་འཁོར་བ་རྣམས་ལ་ཡེ་ཤེས་ཀྱི་མཚོན་ཆ་སྦྱིན་པར་འདོད་པའོ། །ལྟ་བའི་བཅིངས་པས་
གླགས་པ་རྣམས་ལ་ཤེས་རབ་ཀྱི་མཚོན་ཆས་བསྡུད་པར་འདོད་པའོ། །ཁམས་གསུམ་གྱི་གྲོང་ཁྱེར་གྱི་འཁོར་བ་རྣམས་ལ་ཐར་པའི་སྒོ་བསྟན་པར་འདོད་པའོ། །ཕྱོགས་མི་བདེ་བར་མངོན་པར་གཞོལ་

77-1-225b

བ་རྣམས་ལ་བདེ་བའི་ཕྱོགས་བསྟན་པར་འདོད་པའོ། །ཉོན་མོངས་པའི་ཆོམ་པོས་གཙེས་པ་རྣམས་ལ་དབུགས་ཕྱིན་པ་ཆེན་པོ་སྦྱིན་པར་འདོད་པའོ། །ངན་སོང་གི་གཡང་སས་འཇིགས་ཤིང་སྐྲག་པ་རྣམས་
ལ་འཇུ་སའི་ལག་པ་རྐྱང་བར་འདོད་པའོ། །ཕུང་པོའི་གཤེད་མས་གཙེས་པ་རྣམས་ལ་མྱ་ངན་ལས་འདས་པའི་གྲོང་ཁྱེར་བསྟན་པར་འདོད་པའོ། །ཁམས་ཀྱི་སྦྲུལ་གྱིས་ཀུན་ནས་འཁོར་བ་རྣམས་ལ་
འཕགས་པའི་ལམ་གྱི་འབྱུང་བ་བསྟན་པར་འདོད་པའོ། །སྐྱེ་མཆེད་ཀྱི་གྲོང་ཁྱེར་སྟོང་པ་ན་གནས་པ་རྣམས་ལ་ཤེས་རབ་ཀྱི་སྣང་བས་གདོན་པར་འདོད་པའོ། །མུ་སྟེགས་ངན་པ་ལ་ཞུགས་པའི་སེམས་
ཅན་རྣམས་ཡང་དག་པའི་མུ་སྟེགས་སུ་བཟུད་པར་འདོད་པའོ། །བཤེས་གཉེན་མ་ཡིན་པའི་ལག་ཏུ་ལྟུང་བ་རྣམས་ལ་ཡང་དག་པའི་བཤེས་གཉེན་བསྟན་པར་འདོད་པའོ། །བྱིས་པའི་ཆོས་ཀྱི་སྤྱོད་
ཡུལ་ལ་མངོན་པར་མོས་པ་རྣམས་འཕགས་པའི་ཆོས་ལ་རབ་ཏུ་འགོད་པར་འདོད་པའོ། །འཁོར་བའི་ཁྱིམ་ལ་མངོན་པར་དགའ་བ་རྣམས་གྱེན་དུ་བསྐྱོད་དེ་ཐམས་ཅད་མཁྱེན་པའི་ཕོ་བྲང་དུ་གཟུད་པར་འདོད་པའོ། །
རིགས་ཀྱི་བུ་དག་དེ་ལྟར་སྐྱེས་བུ་དམ་པ་འདི་ནི་སེམས་ཅན་ཡོངས་སུ་སྐྱོབ་པའི་བློ་གྲོས་དེ་ལྟ་བུས་བྱང་ཆུབ་ཏུ་སེམས་བསྐྱེད་པ་རྣམ་པར་དག་པར་བྱ་བ་ཡོངས་སུ་བཙལ་བ་ལ་རྒྱུན་མི་འཆད་པའོ། །ཐེག་པ་ཆེན་
པོ་ཡོངས་སུ་བསྒྲུབ་པའི་ཕྱིར་ཡོངས་སུ་སྐྱོ་བ་མེད་པའོ། །ཆོས་ཀྱི་སྤྲིན་ཐམས་ཅད་ལས་འཐུང་བས་མི་ངོམས་པའོ། །ཚོགས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་རྟག་ཏུ་བརྩོན་པའོ། །ཆོས་ཀྱི་
སྒོ་ཐམས་ཅད་ཡོངས་སུ་སྦྱང་བའི་ཕྱིར་མི་གཏོང་བ་ལ་བརྩོན་པའོ། །བྱང་ཆུབ་སེམས་དཔའི་སྤྱོད་པ་ཐམས་ཅད་སྤྱད་པའི་ཕྱིར་བརྩོན་འགྲུས་མི་གཏོང་བའོ། །སྨོན་ལམ་ཐམས་ཅད་མངོན་པར་བསྒྲུབ་

77-1-226a

པའི་ཕྱིར་ཕྱིར་མི་ལྡོག་པའི་སྤྱོད་པ་དང་ལྡན་པའོ། །དགེ་བའི་བཤེས་གཉེན་ཐམས་ཅད་མཐོང་བར་བྱ་བས་མི་ངོམས་པའོ། །དགེ་བའི་བཤེས་གཉེན་ཐམས་ཅད་བསྙེན་བཀུར་བས་དུབ་པར་མེད་པར་
གྱུར་པའོ། །དགེ་བའི་བཤེས་གཉེན་ཐམས་ཅད་ཀྱི་གདམས་ངག་རྗེས་སུ་བསྟན་པ་ལ་འཐུན་པར་འཛིན་པ་སྟེ། རིགས་ཀྱི་བུ་དག་སེམས་ཅན་ཀྱི་འཇིག་རྟེན་ན་སེམས་ཅན་གྲངས་མེད་པ་ཡང་དག་
པར་རྫོགས་པའི་བྱང་ཆུབ་ཏུ་སྨོན་ལམ་འདེབས་པ་དེ་ལྟ་བུའི་སེམས་ཅན་དཀོན་ནོ། །དེ་བས་ཀྱང་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ཏེ། བརྩོན་འགྲུས་བརྩམས་
པའི་ཚུལ་འདི་ལྟ་བུས་སངས་རྒྱས་ཀྱི་ཆོས་ཡོངས་སུ་བསྡུད་པ་དང་། མོས་པ་དྲག་པོ་འདི་ལྟ་བུས་བྱང་ཆུབ་སེམས་དཔའི་ལམ་ཡོངས་སུ་ཚོལ་བ་དང་། དོན་དུ་གཉེར་བ་འདི་ལྟ་བུས་བྱང་ཆུབ་སེམས་དཔའི་
སྤྱོད་ཡུལ་ཡོངས་སུ་དག་པར་བྱ་བ་དང་། ཉོན་མོངས་པ་འདི་ལྟ་བུས་དགེ་བའི་བཤེས་གཉེན་བསྙེན་བཀུར་བྱེད་པ་དང་། མགོའི་ཐོད་ལ་མེ་འབར་བ་ལྟར་སྤྱོད་པ་འདི་ལྟ་བུས་དགེ་བའི་བཤེས་གཉེན་གྱི་
གདམས་ངག་དང་འགལ་བར་མི་བྱེད་པ་དང་། ལྷག་པའི་བསམ་པ་བརྟན་པས་ནན་ཏན་ཏུ་བྱེད་པ་འདི་ལྟ་བུས་དགེ་བའི་བཤེས་གཉེན་གྱི་གདམས་ངག་ལ་ནན་ཏན་དུ་བྱེད་པ་དང་འཐུན་པར་ལེན་པ་འདི་ལྟ་བུས་
བྱང་ཆུབ་ཀྱི་ཡན་ལག་ཡོངས་སུ་བསྒྲུབ་པ་དང་། ཁེ་དང་བཀུར་སྟི་དང་སྙན་པ་དོན་དུ་མི་གཉེར་བ་འདི་ལྟ་བུས་བྱང་ཆུབ་སེམས་དཔའི་བསམ་པའི་ཁམས་དང་འགལ་བར་མི་བྱེད་པ་དང་། ཁྱིམ་
དང་ལོངས་སྤྱོད་དང་འདོད་པའི་དགའ་བ་དང་བདེ་བ་དང་། ཕ་མ་དང་གཉེན་བཤེས་དང་། དངོས་པོ་ཐམས་ཅད་ལ་ལྟོས་པ་མེད་པར་ཡོངས་སུ་བཏང་བ་འདི་ལྟ་བུས་བྱང་ཆུབ་སེམས་དཔའི་གྲོགས་པོ་ཡོངས་

77-1-226b

སུ་ཚོལ་བ་དང་། ལུས་དང་སྲོག་ལ་འཕངས་པར་མི་བརྩི་བ་འདི་ལྟ་བུས་ཐམས་ཅད་མཁྱེན་པ་ཉིད་ལ་མངོན་པར་མོས་པར་བྱེད་པ་དེ་ལྟ་བུའི་སེམས་ཅན་ནི་ཆེས་དཀོན་ནོ། །རིགས་ཀྱི་བུ་དག་འདིས་ཇི་ལྟར་
ཆེར་སྐྱེས་པ་འདི་གཅིག་ལ་ཇི་སྙེད་གཅིག་ཐོབ་པ་དང་། ཁོང་དུ་ཆུད་པ་དེ་ནི་བྱང་ཆུབ་སེམས་དཔའ་དེ་མ་ཡིན་པ་གཞན་ཞིག་བསྐལ་པ་བྱེ་བ་ཁྲག་ཁྲིག་བརྒྱ་ཕྲག་སྟོང་གི་ཀྱང་བྱང་ཆུབ་སེམས་དཔའི་སྤྱོད་
པ་དང་། སྨོན་ལམ་ཡོངས་སུ་རྫོགས་པར་བྱ་བ་ཐོབ་པ་དང་། དེ་ཁོང་དུ་ཆུད་པ་འམ། སངས་རྒྱས་ཀྱི་བྱང་ཆུབ་ཏུ་ཉེ་བར་འགྱུར་བ་འམ། སངས་རྒྱས་ཀྱི་ཞིང་ཡོངས་སུ་དག་པར་བྱ་བ་འམ་སེམས་
ཅན་ཡོངས་སུ་སྨིན་པར་བྱ་བ་དང་། གདུལ་བ་འམ། ཆོས་ཀྱི་དབྱིངས་ཀྱི་ཡེ་ཤེས་ལ་འཇུག་པ་དང་། ཕ་རོལ་ཏུ་ཕྱིན་པ་ཡང་དག་པར་བསྒྲུབ་པ་འམ། སྤྱོད་པའི་དྲ་བ་རྒྱ་ཆེར་བྱ་བ་འམ་སྨོན་ལམ་མངོན་
པར་བསྒྲུབ་པ་ཡོངས་སུ་རྫོགས་པར་བྱ་བ་འམ། བདུད་ཀྱི་ལས་ཡང་དག་པར་འདའ་བར་བྱ་བ་འམ། དགེ་བའི་བཤེས་གཉེན་བསྙེན་བཀུར་བ་འམ། བྱང་ཆུབ་སེམས་དཔའི་སྤྱོད་པ་ཐམས་ཅད་
མངོན་པར་བསྒྲུབ་པར་བྱ་བ་དང་ཡོངསུ་དག་པར་བྱ་བ་འམ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་མངོན་པར་བསྒྲུབ་པའི་སྟོབས་ཡོངས་སུ་རྫོགས་པར་བྱ་བ་ལ་ཡང་དག་པར་འབྱུང་བ་མེད་དོ། །
དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ཚོང་དཔོན་གྱི་བུ་ནོར་བཟངས་ཀྱི་ཡོན་ཏན་དང་ལེགས་པ་ཡང་དག་པར་ཡོངསུ་བརྗོད་པ་བྱས་ནས། དེ་ལས་བརྟེན་ཏེ་སྲོག་ཆགས་བརྒྱ་ཕྲག་སྟོང་གི་
བྱང་ཆུབ་ཀྱི་ཡན་ལག་གི་བསམ་པ་བརྟན་པར་བྱས་ནས། ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་དེ་ལྟར་ཁྱོད་ཀྱིས་འཇིག་རྟེན་ཐམས་ཅད་ལ་ཕན་པ་དང་བདེ་བའི་ཕྱིར་སེམས་ཅན་གྱི་ཁམས་

77-1-227a

ཐམས་ཅད་ཡོངས་སུ་སྐྱོབ་པའི་དོན་དུ་སངས་རྒྱས་གྱི་ཆོས་ཐམས་ཅད་རབ་ཏུ་ཐོབ་པར་བྱ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ལེགསོ་ལེགསོ། །རིགས་ཀྱི་བུ་ཁྱོད་ཀྱིས་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དེ་ལྟར་སེམས་བསྐྱེད་པ་ནི་ཁྱོད་ཀྱིས་ཐོབ་པར་བྱ་བ་ལེགས་པར་ཐོབ་པོ། །ཁྱོད་ཀྱིས་མིའི་ལུས་ལེགས་པར་ཐོབ་པོ། །འཚོ་བའི་འཇིག་རྟེན་དུ་ཁྱོད་ལེགས་པར་
འཚོས་སོ། །ཁྱོད་ཀྱིས་སངས་རྒྱས་འབྱུང་བ་དགྱེས་པར་བྱས་སོ། །ཁྱོད་ཀྱིས་དགེ་བའི་བཤེས་གཉེན་འཇམ་དཔལ་ལེགས་པར་མཐོང་ངོ་། །ཁྱོད་ཀྱི་བསམ་པའི་རྒྱུད་སྣོད་བཟང་པོར་གྱུར་ཏོ། །ཁྱོད་ནི་དགེ་བའི་རྩ་བས་མངོན་པར་
བརླན་ཏོ། །ཁྱོད་ནི་དཀར་པོའི་ཆོས་ཀྱིས་ལེགས་པར་བརྟེན་ཏོ། །ཁྱོད་ཀྱིས་མོས་པ་རླབས་ཆེན་པོ་དང་དགེ་བའི་བསམ་པ་ལེགས་པར་ཤིན་ཏུ་སྦྱངསོ། །ཁྱོད་སངས་རྒྱས་ཐམས་ཅད་ཀྱིས་ལེགས་པར་དགོངས་སོ། །རིགས་ཀྱི་
བུ་ཁྱོད་ནི་དགེ་བའི་བཤེས་གཉེན་གྱིས་ལེགས་པར་བཟུང་ངོ་། །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ། །འགྲོ་བ་ཐམས་ཅད་ཀྱི་ཆོས་དཀར་པོ་རྣམ་པར་
འཕེལ་བར་བྱེད་པས་ཞིང་ལྟ་བུའོ། །འཇིག་རྟེན་ཐམས་ཅད་རབ་ཏུ་བརྟེན་པས་ས་ལྟ་བུའོ། །ཉོན་མོངས་པའི་དྲི་མ་ཐམས་ཅད་དག་པར་བྱེད་པས་ཆུ་ལྟ་བུའོ། །འཇིག་རྟེན་ཐམས་ཅད་ལ་རྟེན་པ་མེད་པས་རླུང་ལྟ་བུའོ། །ལྟ་བའི་ཉེ་
བར་ལེན་པའི་རྩ་བ་ཐམས་ཅད་རབ་ཏུ་སྲེག་པས་མེ་ལྟ་བུའོ། །སེམས་ཅན་ཐམས་ཅད་ཀྱི་གནས་སྣང་བར་བྱེད་པས་ཉི་མ་ལྟ་བུའོ། །ཆོས་དཀར་པོའི་དཀྱིལ་འཁོར་ཡོངས་སུ་རྒྱས་པར་བྱེད་པས་ཟླ་བ་ལྟ་བུའོ། །ཆོས་ཀྱི་སྣང་
བ་བྱེད་པས་སྒྲོན་མ་ལྟ་བུའོ། །མཉམ་པ་དང་མི་མཉམ་པ་ཡོངས་སུ་མཐོང་བར་བྱེད་པས་མྱིག་ལྟ་བུའོ། །ཐམས་ཅད་མཁྱེན་པ་ཉིད་ཀྱི་གྲོང་ཁྱེར་དུ་ཕྱིན་པར་བྱེད་པས་ལམ་ལྟ་བུའོ། །མུ་སྟེགས་ངན་པ་ཐམས་ཅད་རྣམ་པར་སྤོང་

77-1-227b

བས་མུ་སྟེགས་ལྟ་བུའོ། །བྱང་ཆུབ་སེམས་དཔའ་ཐམས་ཅད་མངོན་པར་གནས་པས་གཞོན་པ་ལྟ་བུའོ། །བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་སྒོར་འཇུག་པར་བྱེད་པས་སྒོ་ལྟ་བུའོ། །ཏིང་ངེ་འཛིན་གྱི་ཁང་པ་ན་གནས་
པར་བྱེད་པས་གཞལ་མེད་ཁང་ལྟ་བུའོ། །ཆོས་ཀྱི་དགའ་བ་དང་མོས་པ་ཉམས་སུ་མྱོང་བར་བྱེད་པས་བཟའ་ཤིང་གི་ར་བ་ལྟ་བུའོ། །འགྲོ་བ་ཐམས་ཅད་ཡོངསུ་སྐྱོབ་པས་གནས་ལྟ་བུའོ། །འཇིག་རྟེན་ཐམས་ཅད་ལ་ཕན་པ་བསྐྱེད་
པས་རྟེན་ལྟ་བུའོ། །བྱང་ཆུབ་སེམས་དཔའི་སྤྱོད་པ་ཐམས་ཅད་སྤྱོད་པར་བྱེད་པས་གཞི་ལྟ་བུའོ། །བྱང་ཆུབ་སེམས་དཔའ་ཐམས་ཅད་ཡོངསུ་སྲུང་བས་ཕ་ལྟ་བུའོ། །བྱང་ཆུབ་སེམས་དཔའ་ཆེན་པོ་ཐམས་ཅད་ཀྱི་མ་ལྟ་བུའོ། །
ཐམས་ཅད་ལས་ཡོངས་སུ་སྐྱོང་བས་མ་མ་ལྟ་བུའོ། །སློབ་པ་དང་མི་སློབ་པ་དང་རང་སངས་རྒྱས་ཐམས་ཅད་ཀྱི་སེམས་ཟིལ་གྱིས་གནོན་པས་རྒྱལ་པོ་ལྟ་བུའོ། །སྨོན་ལམ་ཐམས་ཅད་ཀྱིས་ཁྱད་པར་དུ་འཕགས་པས་དབང་པོ་ལྟ་བུ་
འོ། །ཡོན་ཏན་ཐམས་ཅད་ཡང་དག་པར་འདུ་བས་རྒྱ་མཚོ་ཆེན་པོ་ལྟ་བུའོ། །སེམས་ཅན་ཐམས་ཅད་ལ་སེམས་མཉམ་པས་རིན་པོ་ཆེ་ལྟ་བུའོ། །འཇིག་རྟེན་ཐམས་ཅད་རྟེན་པས་འཁོར་ཡུག་ལྟ་བུའོ། །ཡེ་ཤེས་ཀྱི་སྨན་རྣམ་
པར་འཕེལ་བར་བྱེད་པས་གངས་ཀྱི་རི་ལྟ་བུའོ། །ཡོན་ཏན་གྱི་སྤོས་ཐམས་ཅད་ཀྱི་གནས་སུ་གྱུར་པས་སྤོས་ཀྱི་ངད་ལྡང་བ་ལྟ་བུའོ། །ཡོན་ཏན་རྒྱ་ཆེ་བས་ནམ་མཁའ་ལྟ་བུའོ་འཇིག་རྟེན་གྱི་ཆོས་ཐམས་ཅད་ཀྱིས་མི་གོས་པས་
པདྨོ་ལྟ་བུའོ། །སེམས་དུལ་ཞིང་ཅང་ཤེས་པས་གླང་པོ་ལྟ་བུའོ། །རྒོད་པ་ཐམས་ཅད་དང་བྲལ་བས་རྟ་ཅང་ཤེས་ལྟ་བུའོ། །ཐེག་པ་ཆེན་པོ་ཡོངསུ་སྐྱོང་བའི་སྔོན་དུ་འགྲོ་བས་ཁ་ལོ་བསྒྱུར་བ་ལྟ་བུའོ། །ཉོན་མོངས་པའི་ནད་སོས་པར་
བྱེད་པས་སྨན་པ་ལྟ་བུའོ། །མི་དགེ་བའི་ཆོས་ཐམས་ཅད་ཟད་པར་བྱེད་པས་སའི་འོག་ལྟ་བུའོ། །ཆོས་ཐམས་ཅད་ངེས་པར་ཁོང་དུ་ཆུད་པར་བྱེད་པས་རྡོ་རྗེ་ལྟ་བུའོ། །ཡོན་ཏན་གྱི་དྲི་ཞིམ་པར་བྱེད་པས་སྤོས་ཀྱི་སྣོད་ལྟ་བུའོ། །འཇིག་

77-1-228a

རྟེན་ཐམས་ཅད་ཀྱི་བལྟ་ན་མངོན་པར་དགའ་བས་མེ་ཏོག་དམ་པ་ལྟ་བུའོ། །འདོད་ཆགས་ཀྱི་གདུང་བ་བསྩལ་བར་བྱེད་པས་ཁ་བའི་ཙན་དན་ལྟ་བུའོ། །ཆོས་ཀྱི་དབྱིངས་ཐམས་ཅད་རྒྱས་པར་འགེངས་པས་ཨ་ག་རུ་ནག་པོ་ལྟ་
བུའོ། །ཉོན་མོངས་པའི་ནད་ཐམས་ཅད་འཇོམས་པས་སྨན་གྱི་རྒྱལ་པོ་བལྟ་ན་སྡུག་པ་ལྟ་བུའོ། །བག་ལ་ཉལ་བའི་ཟུག་རྔུ་ཐམས་ཅད་ཡང་དག་པར་འབྱིན་པས་འབྲལ་བར་བྱེད་པའི་སྨན་ལྟ་བུའོ། །དབང་པོ་ཐམས་ཅད་ལ་དབང་
བསྒྱུར་བས་དབང་པོ་ལྟ་བུའོ། །དབུལ་བ་ཐམས་ཅད་ཡོངསུ་སེལ་བས་ངལ་བསོ་བ་ལྟ་བུའོ། །ཡོན་ཏན་ཐམས་ཅད་ཀྱི་རྒྱན་གྱིས་བརྒྱན་པར་བྱེད་པས་དཔལ་ལྟ་བུའོ། །བྱང་ཆུབ་སེམས་དཔའ་ཐམས་ཅད་མཛེས་པར་བྱེད་པས་ལྷབ་ལྷུབ་ལྟ་
བུའོ། །ཉེས་བྱས་ཐམས་ཅད་སྲེག་པས་བསྐལ་པས་ཚིག་པའི་མེ་ལྟ་བུའོ། །སངས་རྒྱས་ཀྱི་ཆོས་ཐམས་ཅད་རྣམ་པར་འཕེལ་བར་བྱེད་པས་རྩ་བ་མ་གྲུབ་པའི་སྨན་གྱི་རྒྱལ་པོ་ཆེན་པོ་ལྟ་བུའོ། །ཉོན་མོངས་པའི་དུག་ཐམས་ཅད་རྣམ་པར་
སེལ་བས་ཀླུའི་རིན་པོ་ཆེ་ལྟ་བུའོ། །རྙོག་པ་ཐམས་ཅད་སེལ་བས་ནོར་བུ་རིན་པོ་ཆེ་ཆུ་དང་ལྟ་བུའོ། །དོན་ཐམས་ཅད་ཡོངས་སུ་བསྒྲུབ་པས་ཡིད་བཞིན་གྱི་རིན་པོ་ཆེའི་རྒྱལ་པོ་ལྟ་བུའོ། །བསམ་པ་ཐམས་ཅད་ཡོངསུ་རྫོགས་པར་
བྱེད་པས་བུམ་པ་བཟང་པོ་ལྟ་བུའོ། །ཡོན་ཏན་ཐམས་ཅད་ཀྱི་རྒྱན་གྱི་ཆར་མངོན་པར་འབེབས་པས་འདོད་སྦྱིན་གྱི་ཤིང་ལྟ་བུའོ། །འཁོར་བའི་སྐྱོན་ཐམས་ཅད་དང་མ་འདྲེས་པས་གོས་དང་རིན་ཆེན་ལྟ་བུའོ། །རང་བཞིན་གྱིས་འོད་གསལ་
བས་ཤིང་བལ་གྱི་རྒྱུད་ལྟ་བུའོ། །སེམས་ཅན་གྱི་བསམ་པའི་ཞིང་རྣམ་པར་སྤྱོད་པས་གཤོལ་ལྟ་བུའོ། །འཇིག་ཚོགས་ཀྱི་གོ་ཅ་རྟོལ་བས་མདེའུ་ཐུང་ལྟ་བུའོ། །སྡུག་བསྔལ་གྱི་འབེན་ངེས་པར་འབིགས་པས་མདའ་ལྟ་བུའོ། །ཉོན་མོངས་
པའི་དགྲ་ལས་རྣམ་པར་རྒྱལ་བར་བྱེད་པས་མདུང་ལྟ་བུའོ། །ཚུལ་བཞིན་མ་ཡིན་པ་ཡིད་ལ་བྱེད་པ་འགེབས་པས་གོ་ཅ་ལྟ་བུའོ། །ཉོན་མོངས་པའི་གླད་འགེམས་པས་རལ་གྲི་ལྟ་བུའོ། །ང་རྒྱལ་དང་དྲེགས་པ་དང་རློམ་པའི་གོ་ཅ་འབྲལ་བས་རལ་གྲིའི་

77-1-228b

སོ་ལྟ་བུའོ། །བག་ལ་ཉལ་གྱི་གོ་ཆ་གཤོག་པས་མདའ་སྟེའུ་ཀ་ལྟ་བུའོ། །ང་རྒྱལ་གྱི་རྒྱལ་མཚན་བསྙོལ་བས་དཔའ་བོའི་རུ་མཚོན་ལྟ་བུའོ། །མི་ཤེས་པའི་ཤིང་སྒྱེལ་བར་བྱེད་པས་ལག་ཆ་ལྟ་བུའོ། །སྡུག་བསྔལ་གྱི་ཤིང་རབ་ཏུ་གཅོད་པས་སྟ་རེ་ལྟ་བུ་
འོ། །གནོད་པ་ཐམས་ཅད་ལས་ཡོངས་སུ་སྐྱོབ་པས་མཚོན་ཆ་ལྟ་བུའོ། །ཕ་རོལ་ཏུ་ཕྱིན་པའི་ལུས་ཡོངསུ་སྲུང་བས་ལག་པ་ལྟ་བུའོ། །ཡོན་ཏན་ཐམས་ཅད་ལ་སོ་སོར་འགོད་པས་རྐང་པ་ལྟ་བུའོ། །མ་རིག་པའི་པྲིའི་ལིང་ཏོག་ཡོངསུ་སེལ་བས་མིག་མཁན་ལྟ་བུའོ། །
འཇིག་ཚོགས་ཀྱི་ཟུག་རྔུ་ཡང་དག་པར་འབྱིན་པས་སྐམ་པ་ལྟ་བུའོ། །བག་ལ་ཉལ་གྱི་ཚེར་མ་འབྱིན་པས་ཚེར་ཟུངས་ལྟ་བུའོ། །འཁོར་བའི་བཅིང་པ་ལས་ཡོངསུ་འགྲེལ་པས་མཛའ་བོ་ལྟ་བུའོ། །གནོད་པ་ཐམས་ཅད་སེལ་བས་ནོར་བུ་ལྟ་བུའོ། །བྱང་ཆུབ་སེམས་དཔའི་སྤྱོད་པ་
ཐམས་ཅད་ཀྱི་འབྱུང་བའི་ལམ་མངོན་པར་ཤེས་པར་བྱེད་པས་གཙུག་ལག་ལྟ་བུའོ། །བསོད་ནམས་མི་ཟད་པས་གཏེར་ལྟ་བུའོ། །ཡེ་ཤེས་མི་ཟད་པས་ཆུ་མིག་ལྟ་བུའོ། །ཆོས་ཐམས་ཅད་ཀྱི་གདོང་གི་གཟུགས་བརྙན་སྟོན་པས་མེ་ལོང་གི་དཀྱིལ་འཁོར་ལྟ་བུའོ། །
འགོ་བ་མེད་པས་མེ་ཏོག་པུན་ད་རི་ཀ་ལྟ་བུའོ། །ཕ་རོལ་ཏུ་ཕྱིན་པ་དང་བསྡུ་བའི་དངོས་པོ་རྒྱུན་ཏུ་འབབ་པས་ཆུ་ཀླུང་ཆེན་པོ་ལྟ་བུའོ། །ཆོས་ཀྱི་སྤྲིན་གྱི་ཆར་མངོན་པར་འབེབ་པས་ཀླུའི་རྒྱལ་པོ་ཆེན་པོ་ལྟ་བུའོ། །བྱང་ཆུབ་སེམས་དཔའ་ཐམས་ཅད་ཀྱི་སྙིང་
རྗེ་ཆེན་པོ་ཡོངསུ་འཛིན་པས་འཚོ་བའི་དབང་པོ་ལྟ་བུའོ། །འཆི་བ་མེད་པའི་དབྱིངས་སུ་ཕྱིན་པར་བྱེད་པས་བདུད་རྩི་ལྟ་བུའོ། །འདུལ་བའི་སེམས་ཅན་ཐམས་ཅད་ཡོངསུ་སྡུད་ཅིང་འདྲེན་པས་ཀུན་ནས་འཁོར་བའི་སྙིང་ལྟ་བུའོ། །འཁོར་བའི་ཆུ་ལ་རྒྱུ་བ་མངོན་པར་
འདོན་པས་མཆིལ་པ་ལྟ་བུའོ། །ཡོན་ཏན་ཐམས་ཅད་ཀྱི་དྲི་ཞིམ་པོ་འཛིན་པས་སྤོས་ཀྱི་སྣོད་ལྟ་བུའོ། །ཤིན་ཏུ་ནད་མེད་པར་བྱེད་པས་དུག་སྨན་ལྟ་བུའོ། །འདོད་པས་དགའ་བའི་དུག་མེད་པར་བྱེད་པས་དུག་གི་གཉེན་པོ་ལྟ་བུའོ། །ཚུལ་བཞིན་མ་ཡིན་པའི་
དུག་ཐམས་ཅད་འབྱང་བར་བྱེད་པས་སྔགས་དང་གཟུངས་ལྟ་བུའོ། །སྒྲིབ་པ་དང་བར་ཆད་ཀྱི་རྩྭ་ཐམས་ཅད་རྣམ་པར་འཐོར་བས་རླུང་གི་དཀྱིལ་འཁོར་ལྟ་བུའོ། །བྱང་ཆུབ་ཀྱི་ཕྱོགས་ཀྱི་ཆོས་རིན་པོ་ཆེ་ཐམས་ཅད་ཀྱི་འབྱུང་གནས་སུ་གྱུར་

77-1-229a

པས་རིན་པོ་ཆེའི་གླིང་ལྟ་བུའོ་ཆོས་དཀར་པོ་ཐམས་ཅད་འབྱུང་བས་རིགས་ལྟ་བུའོ། །ཡོན་ཏན་གྱི་ཆོས་ཐམས་ཅད་སྐྱེ་བའི་སྒོར་གྱུར་པས་འབྱུང་གནས་ལྟ་བུའོ། །བྱང་ཆུབ་སེམས་དཔའི་ཚོང་པ་ཐམས་ཅད་ཀྱིས་སྤྱོད་པས་ཚོང་དུས་ལྟ་བུའོ། །
ལས་དང་ཉོན་མོངས་པའི་སྒྲིབ་པ་དང་དྲི་མ་ཐམས་ཅད་ཡོངས་སུ་སྦྱོང་བས་ཆུའི་ཁམས་ལྟ་བུའོ། །ཐམས་ཅད་མཁྱེན་པ་ཉིད་ཀྱི་ཚོགས་ཡོངསུ་རྫོགས་པར་བྱེད་པས་སྦྲང་རྩིའི་གནས་ལྟ་བུའོ། །བྱང་ཆུབ་སེམས་དཔའ་ཐམས་ཅད་ཐམས་ཅད་མཁྱེན་པའི་ཕོ་
བྲང་དུ་ཕྱིན་པར་བྱེད་པས་ལམ་ལྟ་བུའོ། །ཆོས་དཀར་པོ་ཐམས་ཅད་ཡོངས་སུ་འཛིན་པས་སྣོད་ལྟ་བུའོ། །ཉོན་མོངས་པའི་རྡུལ་ཐམས་ཅད་མི་ལྡང་བར་བྱེད་པས་ཆར་པ་ལྟ་བུའོ། །བྱང་ཆུབ་སེམས་དཔའི་རྣམ་པར་དགོད་པ་ཐམས་ཅད་སྟོན་པས་
གནས་ལྟ་བུའོ། །ཉན་ཐོས་ཀྱི་རྣམ་པར་གྲོལ་བ་དང་མི་འདྲེ་བས་རྡོ་བ་ཁབ་ལོང་ལྟ་བུའོ། །རང་བཞིན་གྱིས་དྲི་མ་མེད་པས་བཻ་ཌཱུརྱ་ལྟ་བུའོ། །ཉན་ཐོས་དང་རང་སངས་རྒྱས་ཐམས་ཅད་དང་འཇིག་རྟེན་ཤེས་པ་ཐམས་ཅད་ཟིལ་དུ་བརླག་པ་དང་། 
ཟིལ་གྱིས་ནོན་པར་བྱེད་པས་ཨིནྡྲ་ནཱི་ལ་ལྟ་བུའོ། །ཉོན་མོངས་པའི་གཉིད་ཀྱིས་ལོག་པའི་སེམས་ཅན་སད་པར་བྱེད་པས་ཐོ་རེས་ཀྱི་རྔ་ལྟ་བུའོ། །རྙོག་པ་མེད་པས་ཆུ་དང་བ་ལྟ་བུའོ། །འདུས་བྱས་དང་འདུས་མ་བྱས་ལ་སྤྱོད་པའི་དགེ་བའི་རྩ་བའི་
ཚོགས་ཟིལ་གྱི་བརླག་པར་བྱེད་པས་འཛམ་བུ་ཆུ་ཀླུང་གི་གསེར་གྱི་རྒྱན་ལྟ་བུའོ། །འཇིག་རྟེན་གསུམ་ལས་མངོན་པར་འཕགས་པས་རིའི་རྒྱལ་པོ་ཆེན་པོ་ལྟ་བུའོ། །སྐྱབས་ཚོལ་བ་ཡོངས་སུ་མི་གཏོང་བས་སྐྱབས་ལྟ་བུའོ། །དོན་མ་ཡིན་པ་
འཇོམས་པས་དོན་ལྟ་བུའོ། །སྙིང་དགའ་བར་བྱེད་པས་དབྱིག་ལྟ་བུའོ། །འགྲོ་བ་ཐམས་ཅད་ཡོངས་སུ་ཚིམ་པར་བྱེད་པས་མཆོད་སྦྱིན་གྱི་ཡོ་བྱད་ལྟ་བུའོ། །འགྲོ་བ་ཐམས་ཅད་ཀྱི་སེམས་ཀྱི་གཙོ་བོ་དང་ཐུ་བོར་གྱུར་པས་རྒན་པ་ལྟ་
བུའོ། །སངས་རྒྱས་ཀྱི་ཆོས་ཐམས་ཅད་འཛིན་པས་གླིང་བཞི་ལྟ་བུའོ། །བྱང་ཆུབ་སེམས་དཔའི་སྤྱོད་པ་དང་སྨོན་ལམ་ཐམས་ཅད་བསྡུད་པས་མདོ་ལྟ་བུའོ། །འཇིག་རྟེན་ཐམས་ཅད་སྐྱོང་བས་རྫི་ལྟ་བུའོ། །སྡིག་ཏོ་ཐམས་ཅད་ལས་རྣམ་

77-1-229b

པར་ཟློག་པས་བསྲུངས་མ་ལྟ་བུའོ། །ཉོན་མོངས་པའི་ལྷ་མ་ཡིན་འདྲེན་པས་དབང་པོའི་མིག་འཕྲུལ་ལྟ་བུའོ། །འདུལ་བ་འདྲེན་པས་ཆུའི་ཞགས་པ་ལྟ་བུའོ། །བག་ཆགས་དང་བག་ལ་ཉལ་བ་དང་ཉོན་མོངས་པ་ཐམས་ཅད་གཞོབ་དུ་
ཀློག་པས་དབང་པོའི་མེ་ལྟ་བུའོ། །ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་རྣམས་ལ་མཆོད་རྟེན་ལྟ་བུའོ། །རིགས་ཀྱི་བུ་དེ་ལྟར་བྱང་ཆུབ་ཀྱི་སེམས་ནི་ཡོན་ཏན་དེ་དག་དང་ཡོན་ཏན་གྱི་ཁྱད་པར་གཞན་དག་ཀྱང་ཚད་མེད་པ་
དང་ལྡན་པ་སྟེ། རིགས་ཀྱི་བུ་མདོར་ན་སངས་རྒྱས་ཀྱི་ཆོས་ཐམས་ཅད་དང་། སངས་རྒྱས་ཀྱི་ཡོན་ཏན་ཇི་སྙེད་དུ་བྱང་ཆུབ་ཀྱི་སེམས་ལ་ཡོན་ཏན་དང་ལེགས་པ་ཡོད་པར་བལྟའོ། །དེ་ཅིའི་ཕྱིར་ཞེ་ན། འདི་ལས་ནི་བྱང་ཆུབ་སེམས་
དཔའ་ཐམས་ཅད་ཀྱི་སྤྱོད་པའི་དཀྱིལ་འཁོར་རབ་ཏུ་འབྱུང་སྟེ། འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་ཀྱང་འདི་ལས་བྱུང་ངོ་། །རིགས་ཀྱི་བུ་དེ་བས་ན་གང་གིས་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་སེམས་བསྐྱེད་པ་དེ་ནི་ཐམས་ཅད་མཁྱེན་པ་ཉིད་ཀྱི་སེམས་དང་། ལྷག་པའི་བསམ་པས་ཤིན་ཏུ་བཟུང་བས་ཡོན་ཏན་ཚད་མེད་པ་ཕུན་སུམ་ཚོགས་པ་ཡིན་ནོ། །རིགས་ཀྱི་བུ་འདི་ལྟ་སྟེ་དཔེར་ན་འཇིགས་པ་མེད་
པ་ཞེས་བྱ་བའི་རྩི་ཡོད་དེ། དེ་འཆངས་ན་འཇིགས་པ་ལྔ་མི་འབྱུང་སྟེ། འདི་ལྟར་མེས་མི་ཚིག་གོ། །དུག་གིས་མི་ཚུགས་སོ། །མཚོན་གྱིས་མི་ཆོད་དོ། །ཆུས་མི་ཁྱེར་རོ། །དུ་བས་མི་འཆིའོ། །རིགས་ཀྱི་བུ་དེ་བཞིན་དུ་ཐམས་ཅད་མཁྱེན་པའི་སེམས་
ཀྱི་རྩི་འཆང་བའི་བྱང་ཆུབ་སེམས་དཔའ་ཡང་འདོད་ཆགས་ཀྱི་མེས་མི་ཚིག་གོ། །ཡུལ་གྱི་དུག་གིས་མི་ཚུགས་སོ། །ཉོན་མོངས་པའི་མཚོན་གྱིས་མི་ཆོད་དོ། །སྲིད་པའི་ཆུས་མི་ཁྱེར་རོ། །ཡོངས་སུ་རྟོག་པའི་འདུ་ཤེས་ཀྱིས་མི་འཆིའོ། །
རིགས་ཀྱི་བུ་འདི་ལྟ་སྟེ་དཔེར་ན། རྣམ་པར་མི་གཏོང་བ་ཞེས་བྱ་བའི་རྩི་ཡོད་དེ། དེ་འཆངས་ན་གཞན་གྱིས་གནོད་པར་བྱ་བའི་འཇིགས་པ་ཐམས་ཅད་མི་འབྱུང་ངོ་། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཀྱི་སེམས་ཀྱི་ཡེ་ཤེས་

77-1-230a

ཀྱི་རྩི་འཆང་བ་ལའང་འཁོར་བའི་གནོད་པའི་འཇིགས་པ་ཐམས་ཅད་མི་འབྱུང་ངོ་། །རིགས་ཀྱི་བུ་འདི་ལྟ་སྟེ་དཔེར་ན་མཆུ་ཞེས་བྱ་བའི་རྩི་ཡོད་དེ། དེ་འཆངས་ན་དྲི་ཚོར་བ་ཙམ་གྱིས་སྦྲུལ་ཐམས་ཅད་འབྱེར་རོ། །དེ་བཞིན་དུ་
བྱང་ཆུབ་སེམས་དཔའ་བྱང་ཆུབ་ཀྱི་སེམས་ཀྱི་རྩི་འཆང་བའི་ཡོན་ཏན་གྱི་དྲི་ཙམ་གྱིས་ཀྱང་ཉོན་མོངས་པའི་སྦྲུལ་ཐམས་ཅད་འབྱེར་བར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། སྐྱེས་བུ་གཞན་གྱིས་མི་ཐུབ་པའི་རྩི་འཆང་བ་ནི་དགྲ་
ཡི་དཀྱིལ་འཁོར་ཐམས་ཅད་ཀྱིས་མི་ཚུགས་སོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་ཀྱི་སེམས་གཞན་གྱིས་མི་ཐུབ་པའི་རྩི་འཆང་བ་ཡང་བདུད་དང་ཕྱིར་རྒོལ་བའི་དཀྱིལ་འཁོར་ཐམས་ཅད་ཀྱིས་ཐུབ་པར་དཀའོ། །
རིགས་ཀྱི་བུ་འདི་ལྟ་སྟེ་དཔེར་ན། རྣམ་པར་སེལ་བ་ཞེས་བྱ་བའི་རྩི་ཡོད་དེ། དེ་བཅངས་ན་ཟུག་རྔུ་ཐམས་ཅད་འབྱུང་བར་འགྱུརོ། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཀྱི་སེམས་རྣམ་པར་སེལ་བ་འཆང་བ་ནི་འདོད་ཆགས་དང་ཞེ་སྡང་དང་
གཏི་མུག་གི་ཟུག་རྔུ་ཐམས་ཅད་འབྱུང་ངོ་། །རིགས་ཀྱི་བུ་འདི་ལྟ་སྟེ་དཔེར་ན་རྩིའི་རྒྱལ་པོ་ཆེན་པོ་བལྟ་ན་སྡུག་པ་ཞེས་བྱ་བ་ཡོད་དེ། དེ་བཅངས་ན་ནད་ཐམས་ཅད་སེལ་བར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཀྱི་སེམས་
རྩིའི་རྒྱལ་པོ་ཆེན་པོ་བལྟ་ན་སྡུག་པ་འཆང་བ་ཡང་ཉོན་མོངས་པ་དང་མི་ཤེས་པའི་ནད་ཐམས་ཅད་རབ་ཏུ་སེལ་བར་འགྱུརོ། །རིགས་ཀྱི་བུ་འདི་ལྟ་སྟེ་དཔེར་ན། རྩིའི་ཤིང་ཆེན་པོ་སྦྱོར་བ་ཞེས་བྱ་བ་ཡོད་དེ། དེའི་ཤུན་པས་རྨ་ལ་རེག་
མ་ཐག་ཏུ་རྨ་ཐམས་ཅད་འཚོ་བར་འགྱུར། །གང་ནས་བཤུས་པ་དེའི་ཤུན་ཕྲགས་ཀྱང་མི་སྐྱེའོ། །དེ་བཞིན་དུ་བྱང་ཆུབ་ཀྱི་སེམས་ཀྱི་ས་བོན་ལས་སྐྱེས་པའི་ཤིང་ཐམས་ཅད་མཁྱེན་པ་ཉིད་དུ་སྦྱོར་བ་ཡང་མཐོང་མ་ཐག་ཏུ་འང་རིགས་
ཀྱི་བུ་དད་པ་རྣམས་ཀྱི་ལས་དང་ཉོན་མོངས་པའི་རྨ་ཡོངས་སུ་འཚོ་བར་འགྱུརོ། །ཐམས་ཅད་མཁྱེན་པ་ཉིད་ཀྱི་ཤིང་དེ་ལ་ཡང་འཇིག་རྟེན་ཐམས་ཅད་ཀྱིས་རྨ་དབྱུང་བ་འམ་ཉམས་པར་མི་འགྱུརོ། །རིགས་ཀྱི་བུ་འདི་ལྟ་སྟེ་དཔེར་ན། 

77-1-230b

རྩི་ཆེན་པོ་རྣམ་པ་རྩ་བ་མ་གྲུབ་པ་ཞེས་བྱ་བ་ཡོད་དེ། དེའི་མཐུས་འཛམ་བུའི་གླིང་གི་ཤིང་ཐམས་ཅད་ཀྱང་ཡན་ལག་ཐམས་ཅད་དུ་རྣམ་པར་འཕེལ་ལོ། །འདི་ལྟ་སྟེ་དཔེར་ན་དགའ་བ་ཐོབ་པ་ཞེས་བྱ་བའི་རྩི་ཡོད་དེ། དེ་སུའི་ལུས་ལ་
ཐོགས་པ་དེའི་ལུས་དང་སེམས་ནད་མེད་པར་འགྱུར་རོ། །དེ་བཞིན་དུ་ཐམས་ཅད་མཁྱེན་པ་ཉིད་ཀྱི་སེམས་དགའ་བ་ཐོབ་པར་བྱེད་པའི་རྩི་ཡང་བྱང་ཆུབ་སེམས་དཔའ་ཐམས་ཅད་ཀྱི་ལུས་དང་སེམས་ནད་མེད་པ་ཡོངས་སུ་བསྐྱེད་དོ། །
རིགས་ཀྱི་བུ་འདི་ལྟ་སྟེ་དཔེར་ན་དྲན་པ་ཐོབ་པ་ཞེས་བྱ་བའི་རྩི་ཡོད་དེ། དེ་བཅངས་ན་སེམས་ཀྱི་དྲན་པ་རྣམ་པར་དག་པར་འགྱུར་རོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་དྲན་པ་ཐོབ་པར་བྱེད་པའི་རྩི་ཡང་བྱང་
ཆུབ་སེམས་དཔའི་ནད་པ་རྣམས་ཀྱིས་སངས་རྒྱས་ཀྱི་ཆོས་ཐམས་ཅད་ལ་སྒྲིབ་པ་མེད་པའི་དྲན་པ་རྣམ་པར་དག་པར་བྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན། པདྨོ་ཆེན་པོ་ཞེས་བྱ་བའི་རྩི་ཡོད་དེ། དེ་ཟོས་པ་ཙམ་གྱིས་
ཚེའི་ཚད་བསྐལ་པར་འགྱུར་རོ། །དེ་བཞིན་དུ་བྱང་ཆུབ་ཀྱི་སེམས་ཀྱི་པདྨོ་ཆེན་པོའི་རྩི་ཟོས་པའི་བྱང་ཆུབ་སེམས་དཔའ་ཡང་བསྐལ་པ་གྲངས་མེད་པའི་ཚེ་ལ་དབང་གི་ཕ་རོལ་ཏུ་ཕྱིན་པ་ཐོབ་པར་འགྱུར་རོ། །རིགས་ཀྱི་བུ་འདི་ལྟ་
སྟེ་དཔེར་ན། མི་སྣང་བ་ཞེས་བྱ་བའི་རྩི་ཡོད་དེ། དེ་བཅངས་ན་མི་དང་མི་མ་ཡིན་པ་ཐམས་ཅད་ཀྱིས་མི་མཐོང་ངོ་། །དེ་བཞིན་དུ་བྱང་ཆུབ་ཀྱི་སེམས་ཀྱི་རྩི་མི་སྣང་བར་འགྱུར་བ་བཅངས་ཏེ་འདྲེས་པ་རྣམ་པར་སྤྱོད་པའི་བྱང་ཆུབ་
སེམས་དཔའ་ཡང་བདུད་ཀྱི་ཡུལ་ཐམས་ཅད་དུ་མི་སྣང་ངོ་། །རིགས་ཀྱི་བུ་འདི་ལྟ་སྟེ་དཔེར་ན་རྒྱ་མཚོ་ཆེན་པོའི་ནང་ན་ནོར་བུ་རིན་པོ་ཆེའི་རྒྱལ་པོ་ཆེན་པོ་རིན་པོ་ཆེ་ཐམས་ཅད་ཡོངས་སུ་བསྡུད་པ་ཞེས་བྱ་བ་ཡོད་དེ། དེ་འཇིག་རྟེན་
གྱི་ཁམས་གཞན་དུ་མ་འཕོས་ན་རྒྱ་མཚོ་ཆེན་པོ་ལ་བསྐལ་པས་ཚིག་པའི་མེ་ཐམས་ཅད་ཀྱིས་ཀྱང་ཏ་ལ་ཙམ་ཡང་བསྐམ་པར་ནུས་པའི་གནས་མེད་སྐབས་མེད་དོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་

77-1-231a

མཁྱེན་པ་ཉིད་དུ་སེམས་བསྐྱེད་པ་ནོར་བུ་རིན་པོ་ཆེའི་རྒྱལ་པོ་ཆེན་པོ་བསམ་པ་དང་། སེམས་ཀྱི་རྒྱུད་ལ་ཡོད་པ་རྣམས་ཀྱི་དགེ་བའི་རྩ་བ་ཐམས་ཅད་མཁྱེན་པ་ཉིད་དུ་བསྔོས་པ་འགའ་ཞིག་རྣམ་པར་ཆུད་ཟ་བར་
འགྱུར་བ་དེ་ལྟ་བུའི་གནས་མེད་སྐབས་མེད་དེ། དེ་ནི་མི་སྲིད་དེ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ཡོངསུ་གཏང་བ་ཞིག་ཏུ་གྱུར་ན་ནི་དགེ་བའི་རྩ་བ་ཐམས་ཅད་ཀྱང་སྐམ་པར་འགྱུར་རོ། །རིགས་ཀྱི་བུ་འདི་ལྟ་སྟེ་
དཔེར་ན་ནོར་བུ་རིན་པོ་ཆེ་ཆེན་པོ་འོད་ཐམས་ཅད་ཡོངསུ་འདུས་པ་ཞེས་བྱ་བ་ཡོད་དེ། དེ་མགུལ་དུ་བཏགས་ན་ནོར་བུ་རིན་པོ་ཆེའི་རྒྱན་ཐམས་ཅད་ཀྱང་ཟིལ་གྱིས་ནོན་པར་འགྱུར་རོ། །དེ་བཞིན་དུ་བྱང་ཆུབ་ཀྱི་སེམས་འོད་ཐམས་ཅད་ཡོངསུ་
འདུས་པའི་རིན་པོ་ཆེ་ཆེན་པོ་བསམ་པའི་རྒྱན་དུ་ཐོགས་པའི་བྱང་ཆུབ་སེམས་དཔའ་ཡང་ཉན་ཐོས་དང་རང་སངས་རྒྱས་སུ་སེམས་བསྐྱེད་པའི་རིན་པོ་ཆེའི་རྒྱན་ཐམས་ཅད་ཟིལ་གྱིས་གནོན་ཏོ། །རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་
ཆེན་པོ་ཆུ་འདང་བ་ཞེས་བྱ་བ་ཡོད་དེ། དེ་ཆུར་བཅུག་ན་འདམ་དང་རྙོག་པ་ཐམས་ཅད་རབ་ཏུ་དང་བར་བྱེད་དོ། །དེ་བཞིན་དུ་བྱང་ཆུབ་ཀྱི་སེམས་ཆུ་འདང་གི་ནོར་བུ་རིན་པོ་ཆེ་ཡང་ཉོན་མོངས་པའི་འདམ་དང་རྙོག་པ་ཐམས་ཅད་རབ་ཏུ་དང་བར་བྱེད་དོ། །
རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་ཆེན་པོ་ཆུ་དང་འགྲོགས་པ་ཞེས་བྱ་བ་ཐོགས་པའི་ཉ་པ་ནི་ཆུར་མི་འཆིའོ། །དེ་བཞིན་དུ་ཐམས་ཅད་མཁྱེན་པ་ཉིད་ཀྱི་སེམས་ཆུ་དང་འགྲོགས་པའི་ནོར་བུ་རིན་པོ་ཆེ་ཆེན་པོ་ཐོགས་པའི་བྱང་ཆུབ་
སེམས་དཔའ་ཡང་འཁོར་བའི་རྒྱ་མཚོ་ཐམས་ཅད་དུ་མི་འཆིའོ། །རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་ཀླུའི་ནོར་བུའི་གོ་ཆ་ཞེས་བྱ་བ་ཡོད་དེ། དེ་ལག་ན་འདུག་ན་ཉ་པ་ལ་སྩོགས་པས་ཆུ་ལས་འཚོ་བ་རྣམས་ཀླུའི་
གནས་ཐམས་ཅད་དུ་འདོང་ཡང་ཀླུའི་སྦྲུལ་ཐམས་ཅད་ཀྱིས་མི་ཚུགསོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ཡེ་ཤེས་ཀླུའི་ནོར་བུ་འཆང་བའི་བྱང་ཆུབ་སེམས་དཔའ་ཡང་འདོད་པའི་གནས་ཀྱི་ཁམས་ཐམས་

77-1-231b

ཅད་དུ་འགྲོ་བ་ཡང་ཉམས་པར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་བརྒྱ་བྱིན་མངོན་པར་ཆགས་པ་ཐོགས་པའི་ལྷའི་རྒྱལ་པོ་བརྒྱ་བྱིན་ནི། ལྷའི་ཚོགས་ཐམས་ཅད་ཟིལ་གྱིས་གནོན་ཏོ། །དེ་བཞིན་དུ་ཐམས་ཅད་མཁྱེན་
པ་ཉིད་ཀྱི་སེམས་བརྒྱ་བྱིན་མངོན་པར་ཆགས་པའི་ནོར་བུ་རིན་པོ་ཆེའི་རྒྱལ་པོ་ཆེན་པོ་སྨོན་ལམ་གྱི་གཅོད་པན་ཐོགས་པའི་བྱང་ཆུབ་སེམས་དཔའ་ཡང་ཁམས་གསུམ་པ་ཐམས་ཅད་ཟིལ་གྱིས་གནོན་ཏོ། །རིགས་ཀྱི་བུ་འདི་ལྟ་སྟེ་
དཔེར་ན་ནོར་བུ་རིན་པོ་ཆེ་ཆེན་པོ་ཡིད་བཞིན་གྱི་རྒྱལ་པོ་ཐོགས་པའི་མི་ནི་ཕོངས་པ་ཐམས་ཅད་ཀྱི་མི་འཇིགསོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ཡིད་བཞིན་གྱི་རྒྱལ་པོའི་ནོར་བུ་རིན་པོ་ཆེ་ཆེན་པོ་ཐོགས་
པའི་བྱང་ཆུབ་སེམས་དཔའ་ཡང་ཡོ་བྱད་དང་འཚོ་བས་བག་ཚ་བ་ཐམས་ཅད་ཀྱིས་མི་འཇིགསོ། །རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་ཉི་མས་མཛེས་པ་ནི་ཉི་མ་ལ་བསྟན་ན་མི་འབྱུང་ངོ་། །དེ་བཞིན་དུ་ཐམས་ཅད་མཁྱེན་པ་
ཉིད་དུ་སེམས་བསྐྱེད་པ་ཉི་མས་མཛེས་པའི་ནོར་བུ་རིན་པོ་ཆེ་ཡང་ཤེས་རབ་ཀྱི་འོད་ཟེར་གྱིས་ཕོག་ན་ཡེ་ཤེས་ཀྱི་མེ་འབྱིན་ཏེ། རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་ཟླ་བས་མཛེས་པ་ཞེས་བྱ་བ་ལ་ཟླ་བའི་འོད་ཀྱིས་ཕོག་ན་ཆུའི་
རྒྱུན་འབྱིན་ཏོ། །དེ་བཞིན་དུ་བྱང་ཆུབ་ཏུ་སེམས་བསྐྱེད་པ་ཟླ་བས་མཛེས་པའི་རིན་པོ་ཆེ་ཆེན་པོ་ཡང་དགེ་བའི་རྩ་བ་ཡོངསུ་བསྔོས་པའི་ཟླ་བའི་འོད་ཀྱིས་ཕོག་ན་དགེ་བའི་རྩ་བ་ཐམས་ཅད་ཀྱི་སྨོན་ལམ་གྱི་ཆུའི་རྒྱུན་འབྱིན་ཏོ། །
རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་ཡིད་བཞིན་གྱི་རྒྱལ་པོའི་ཅོད་པན་ཐོགས་པའི་ཀླུའི་རྒྱལ་པོ་ཆེན་པོ་རྣམས་ལ་གཞན་གྱིས་གནོད་པར་བྱ་བའི་འཇིགས་པ་མེད་དོ། །དེ་བཞིན་དུ་བྱང་ཆུབ་གྱི་སེམས་སྙིང་རྗེ་ཆེན་པོའི་
ནོར་བུ་རིན་པོ་ཆེ་ཡིད་བཞིན་གྱི་རྒྱལ་པོ་ཐོགས་པའི་བྱང་ཆུབ་སེམས་དཔའ་རྣམས་ལའང་ངན་སོང་དང་ངན་འགྲོས་གནོད་པར་བྱ་བའི་འཇིགས་པ་མེད་དོ། །རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་ཆེན་

77-1-232a

པོ་འགྲོ་བའི་རྒྱན་དམ་པ་ཞེས་བྱ་བ་ནི་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱ་བས་ནམ་ཡང་བྱང་བར་མི་འགྱུར་རོ། །དེ་བཞིན་དུ་བྱང་ཆུབ་ཏུ་སེམས་བསྐྱེད་པ་འགྲོ་བ་ཐམས་ཅད་ཀྱི་དམ་
པའི་ནོར་བུ་རིན་པོ་ཆེ་ཆེན་པོ་ཡང་སེམས་ཅན་ཐམས་ཅད་ཀྱི་བསམ་པ་དང་བྱང་ཆུབ་སེམས་དཔའི་སྨོན་ལམ་ཡོངས་སུ་རྫོགས་པར་བྱ་བས་ནམ་ཡང་བྱང་བར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། རྒྱལ་པོ་
འཁོར་ལོས་བསྒྱུར་བའི་ནོར་བུ་རིན་པོ་ཆེ་ཆེན་པོ་ནི་མུན་པ་ཐམས་ཅད་ཡོངས་སུ་སེལ་ཅིང་འགྲོ་སྟེ། ཁྱིམ་གྱི་ནང་ན་གནས་ན་ཡང་རབ་ཏུ་སྣང་བར་བྱེད་དོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་འཁོར་
ལོས་བསྒྱུར་བའི་ནོར་བུ་རིན་པོ་ཆེ་ཡང་མ་རིག་པའི་མུན་པ་ཐམས་ཅད་སེལ་ཅིང་འགྲོ་བའི་རྒྱུད་ཐམས་ཅད་དུ་འགྲོ་སྟེ། འདོད་པའི་ཁམས་ན་གནས་ན་ཡང་ཡེ་ཤེས་ཀྱི་སྣང་བ་ཆེན་པོ་རབ་ཏུ་འགྱེད་དོ། །རིགས་ཀྱི་བུ་འདི་
ལྟ་སྟེ་དཔེར་ན། གང་ཅི་ཡང་རུང་སྟེ་ནོར་བུ་རིན་པོ་ཆེ་ཆེན་པོ་ཨིན་དྲ་ནཱི་ལའི་འོད་ཀྱིས་ཕོགས་པ་དེ་དག་ཐམས་ཅད་ནི་ནོར་བུ་རིན་པོ་ཆེ་ཆེན་པོ་ཨིནྡྲ་ནཱི་ལའི་ཁ་དོག་དུ་འགྱུར་རོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་
སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་ཨིནྡྲ་ནཱི་ལ་ཡང་ཆོས་གང་དང་གང་ལ་རྣམ་པར་སྤྱད་པ་དང་། ཡོངས་སུ་བཏང་བ་དང་། དགེ་བའི་རྩ་བ་གང་ཅི་ཡང་རུང་སྟེ། ཐམས་ཅད་མཁྱེན་པ་ཉིད་དུ་སེམས་བསྐྱེད་པས་ཡོངས་སུ་
བསྔོ་བ་དེ་དག་ཐམས་ཅད་ཀྱང་ཐམས་ཅད་མཁྱེན་པ་ཉིད་ཀྱི་ནོར་བུ་རིན་པོ་ཆེའི་ཁ་དོག་ཏུ་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་བཻ་ཌཱུརྱ་ནི་ལོ་བརྒྱ་ཕྲག་སྟོང་དུ་མི་གཙང་བའི་ནང་ཞིག་ན་འདུག་ཀྱང་དྲི་
མི་ཞིམ་པ་ཐམས་ཅད་དང་ལྷན་ཅིག་མྱི་གནས་ཏེ། དེའི་རང་བཞིན་འོད་གསལ་བ་ནི་དེ་བཞིན་དུ་གསལ་ཞིང་ཤིན་ཏུ་དྲི་མ་མེད་དོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ནོར་བུ་རིན་པོ་ཆེ་བཻ་ཌཱུརྱ་

77-1-232b

ཡང་བསྐལ་པ་བརྒྱ་ཕྲག་སྟོང་ཞིག་ཏུ་འདོད་པའི་ཁམས་ཐམས་ཅད་དུ་གནས་ཀྱང་འདོད་པའི་ཁམས་ཀྱི་སྐྱོན་ཐམས་ཅད་ཀྱི་ཀུན་ནས་ཉོན་མོངས་པར་མི་འགྱུར་ཏེ། ཆོས་ཀྱི་དབྱིངས་ཀྱི་རང་བཞིན་འོད་གསལ་
བ་ནི་དེ་བཞིན་དུ་ཤིན་ཏུ་དག་པར་གནས་སོ། །རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་ཆེན་པོ་དྲི་མ་མྱེད་པས་རྣམ་པར་དག་པའི་འོད་ཅེས་བྱ་བ་ནི་རིན་པོ་ཆེའི་འབྱུང་གནས་ཐམས་ཅད་ཟིལ་གྱིས་གནོན་
ཏོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་དྲི་མ་མྱེད་པས་རྣམ་པར་དག་པའི་འོད་ཀྱང་སོ་སོའི་སྐྱེ་བོ་དང་། སློབ་པ་དང་མི་སློབ་པ་དང་། རང་སངས་རྒྱས། 
ཐམས་ཅད་ཀྱི་ཡོན་ཏན་རིན་པོ་ཆེའི་འབྱུང་གནས་ཟིལ་གྱིས་གནོན་ཏོ། །རིགས་ཀྱི་བུ་འདི་ལྟ་སྟེ་དཔེར་ན། རིན་པོ་ཆེ་ཆེན་པོ་མྱི་འབྱུང་བ་ཞེས་བྱ་བ་ནི་གཅིག་པུ་གནས་ཀྱང་མུན་པ་ཐམས་ཅད་རྣམ་པར་
སེལ་ཏོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ནོར་བུ་རིན་པོ་ཆེ་མྱེ་ལྕེ་འབྱུང་བ་ལྷག་མཐོང་དང་ལྡན་པ་གཅིག་པུ་ཡང་ཚུལ་བཞིན་ཡིད་ལ་བྱ་བས་མི་ཤེས་པའི་མུན་པ་ཐམས་ཅད་
རྣམ་པར་སེལ་ཏོ། །རིགས་ཀྱི་བུ་འདི་ལྟ་སྟེ་དཔེར་ན། རྒྱ་མཚོ་ཆེན་པོ་ནས་གྲུར་བླངས་པའི་ནོར་བུ་རིན་པོ་ཆེ་རིན་ཐང་མེད་པ་ཚོང་པའི་ལག་དུ་འོང་བ་ནི་གྲོང་ཁྱེར་དུ་ཕྱིན་ན་ནོར་བུ་འཆིང་བུ་བརྒྱ་
ཕྲག་སྟོང་ཡང་ཁ་དོག་དང་རིན་ཐང་གིས་ཟིལ་གྱིས་གནོན་ཏོ། །དེ་བཞིན་དུ་འཁོར་བའི་རྒྱ་མཚོ་ཆེན་པོ་ན་གནས་ཀྱང་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་རིན་ཐང་མྱེད་
པ་སྨོན་ལམ་གྲུར་བཅུག་པ་ནི་བྱང་ཆུབ་སེམས་དཔའ་སེམས་དང་པོ་བསྐྱེད་པས་ལྷག་པའི་བསམ་པའི་རྒྱུད་ལ་འདུག་སྟེ་ཐམས་ཅད་མཁྱེན་པའི་གྲོང་ཁྱེར་དུ་མ་ཕྱིན་ཀྱང་རྣམ་པར་གྲོལ་བའི་གྲོང་ཁྱེར་དུ་

77-1-233a

ཕྱིན་ན་ཉན་ཐོས་དང་རང་སངས་རྒྱས་ནོར་བུ་མཆིང་བུ་ལྟ་བུ་ཐམས་ཅད་ཟིལ་གྱིས་གནོན་ཏོ། །རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་ཆེན་པོ་དབང་གི་རྒྱལ་པོ་ཞེས་བྱ་བ་ཡོད་དེ། དེ་ནི་
འཛམ་བུའི་གླིང་ན་གནས་ཀྱང་དཔག་ཚད་སྟོང་ཕྲག་བཞི་བཅུ་ན་གནས་པའི་ཉི་ཟླའི་དཀྱིལ་འཁོར་གྱི་ཁྱིམ་གྱི་གཞལ་མེད་ཁང་གི་གཟུགས་བརྙན་གྱི་རྒྱན་ཡོངས་སུ་སྟོན་ཏོ། །དེ་བཞིན་དུ་ཡོན་ཏན་ཐམས་ཅད་ཡོངས་སུ་
སྦྱངས་པའི་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་དབང་གི་རྒྱལ་པོ་ཡང་འཁོར་བའི་གནས་ན་འདུག་བཞིན་དུ། ཆོས་ཀྱི་དབྱིངས་ཀྱི་ནམ་མཁའི་སྤྱོད་ཡུལ་ལས་རྒྱུ་བའི་དེ་
བཞིན་གཤེགས་པའི་ཡེ་ཤེས་ཆེན་པོའི་ཉི་ཟླ་དང་སངས་རྒྱས་ཀྱི་ཡུལ་གྱི་དཀྱིལ་འཁོར་ཐམས་ཅད་ཀྱི་གཟུགས་བརྙན་གྱི་བརྒྱན་ཡོངས་སུ་སྟོན་ཏོ། །རིགས་ཀྱི་བུ་འདི་ལྟ་སྟེ་དཔེར་ན། ཇི་སྲིད་དུ་ཉི་ཟླའི་
དཀྱིལ་འཁོར་འོད་ཀྱིས་སྣང་བར་བྱེད་པ་དེ་སྲིད་དུ་ནོར་དང་འབྲུ་དང་། རིན་པོ་ཆེའི་རྣམ་པ་དང་། གསེར་དང་དངུལ་དང་མྱེ་ཏོག་དང་སྤོས་དང་འཕྲེང་བ་དང་གོས་དང་། ལོངས་སྤྱོད་གང་ཇི་སྙེད་པ་དེ་དག་ཐམས་ཅད་
ཀྱིས་ནོར་བུ་རིན་པོ་ཆེ་ཆེན་པོ་དབང་གིས་རྒྱལ་པོའི་རིན་དུ་མི་ཆོག་གོ། །དེ་བཞིན་དུ་ཇི་སྲིད་དུ་དུས་གསུམ་ལ་ཐམས་ཅད་མཁྱེན་པའི་ཡེ་ཤེས་ཆོས་ཀྱི་དབྱིངས་ཀྱི་ཡུལ་སྣང་བར་མཛད་པ་དེ་སྲིད་དུ་ལྷ་དང་མྱི་
དང་། ཉན་ཐོས་དང་རང་སངས་རྒྱས་ཐམས་ཅད་ཀྱི་དགེ་བའི་རྩ་བ་ཟག་པ་ཡོད་པ་འམ། ཟག་པ་མེད་པ་གང་ཇི་སྙེད་པ་དེ་དག་ཐམས་ཅད་ཀྱིས་ཀྱང་བྱང་ཆུབ་ཏུ་སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་
དབང་གི་རྒྱལ་པོའི་རིན་དུ་མི་ཆོག་གོ། །རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་ཆེན་པོ་རྒྱ་མཚོའི་རྒྱན་གྱི་དམ་པ་ཞེས་བྱ་བ་ཡོད་དེ། དེ་ནས་རྒྱ་མཚོའི་རྒྱན་ཐམས་ཅད་ཡོངས་སུ་སྟོན་ཏོ། །

77-1-233b

དེ་བཞིན་དུ་བྱང་ཆུབ་ཏུ་སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་རྒྱ་མཚོའི་རྒྱན་གྱི་དམ་པ་ཡང་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་རྒྱ་མཚོའི་རྒྱན་ཐམས་ཅད་ཡོངས་སུ་སྟོན་ཏོ། །རིགས་ཀྱི་བུ་འདི་ལྟ་
སྟེ་དཔེར་ན། ནོར་བུ་རིན་པོ་ཆེ་ཆེན་པོ་ཡིད་བཞིན་ཀྱི་རྒྱལ་པོ་མ་གཏོགས་པར་ལྷ་རྫས་ཀྱི་འཛམ་བུ་ཆུ་ཀླུང་གི་གསེར་ལས་ལྷག་པར་འཕགས་པ་གང་ཡང་མེད་དོ། །དེ་བཞིན་དུ་ཐམས་ཅད་མཁྱེན་
པའི་ཡེ་ཤེས་ནོར་བུ་རིན་པོ་ཆེ་ཆེན་པོ་ཡིད་བཞིན་གྱིས་རྒྱལ་པོ་མ་གཏོགས་པར་བྱང་ཆུབ་ཏུ་སེམས་བསྐྱེད་པའི་ལྷ་རྫས་ཀྱི་འཛམ་བུ་ཆུ་ཀླུང་གི་གསེར་ལས་ལྷག་པར་དུ་འཕགས་པ་གང་ཡང་མེད་དོ། 
རིགས་ཀྱི་བུ་འདི་ལྟ་སྟེ་དཔེར་ན། ཀླུའི་ཚོགས་གྲུབ་པར་གྱུར་པའི་སྦྲུལ་འདུལ་བ་ནི་ཀླུ་དང་སྦྲུལ་ཐམས་ཅད་ལ་དབང་བསྒྱུར་རོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ནན་ཏན་གྱི་
ཀླུའི་དཀྱིལ་འཁོར་གྲུབ་པའི་བྱང་ཆུབ་སེམས་དཔའ་སྦྲུལ་འདུལ་བ་ཡང་ཉོན་མོངས་པའི་ཀླུ་དང་། སྦྲུལ་ཐམས་ཅད་ལ་དབང་བསྒྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། དཔའ་བོ་ལག་ཆ་དང་ལྡན་པ་ནི་
དགྲའི་འཁོར་གྱིས་ཚུགས་པར་དཀའོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ལག་ཆ་དང་ལྡན་པའི་བྱང་ཆུབ་སེམས་དཔའ་ཐམས་ཅད་ཀྱང་ཉོན་མོངས་པའི་དགྲའི་དཀྱིལ་འཁོར་ཐམས་ཅད་ཀྱི་ཐུབ་
པར་དཀའོ། །རིགས་ཀྱི་བུ་འདི་ལྟ་སྟེ་དཔེར་ན། ལྷ་རྫས་ཀྱི་ཙན་དན་སྦྲུལ་གྱི་སྙིང་པོའི་ཕྱེ་མ་སྲང་གཅིག་གིས་ནི་སྟོང་གི་འཇིག་རྟེན་གྱི་ཁམས་དྲི་ཞིམ་པོས་རྒྱས་པར་འགེངས་ཏེ་དེ་ཞོ་ཅིག་ཙམ་ལ་ཡང་
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེས་ཡོངས་སུ་གང་བ་རིན་དུ་མི་ཆོག་གོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ལྷ་རྫས་ཀྱི་ཙན་དན་སྦྲུལ་གྱི་སྙིང་པོས་

77-1-234a

ལྷག་པའི་བསམ་པ་གཅིག་ལ་གནས་པའི་ཁམས་ཀྱང་ཆོས་ཀྱི་དབྱིངས་ཐམས་ཅད་ཡོན་ཏན་གྱི་དྲི་ཞིམ་པོར་རྒྱས་པར་འགེངས་ཏེ་སློབ་པ་དང་། མི་སློབ་པ་དང་ཉན་ཐོས་དང་རང་སངས་རྒྱས་ཐམས་
ཅད་ཀྱི་སེམས་ཀྱང་ཟིལ་གྱིས་གནོན་ཏོ། །རིགས་ཀྱི་བུ་འདི་ལྟ་སྟེ་དཔེར་ན། ཙན་དན་རིན་པོ་ཆེ་ཆེན་པོ་ཁ་བ་ཅན་ཞེས་བྱ་བ་ནི་གདུང་བ་ཐམས་ཅད་རབ་ཏུ་ཞི་བར་བྱེད་དེ། ལུས་ཐམས་ཅད་ཀྱང་རབ་ཏུ་བསིལ་
བར་བྱེད་དོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ཁ་བའི་ཙན་དན་རིན་པོ་ཆེ་ཡང་ཉོན་མོངས་པའི་ཀུན་ཏུ་རྟོག་པ་དང་། འདོད་ཆགས་དང་ཞེ་སྡང་དང་གཏི་མུག་གིས་གདུང་བ་ཐམས་
ཅད་རབ་ཏུ་སེལ་ཏོ། །ཡེ་ཤེས་ཀྱི་ལུས་ཀྱང་རབ་ཏུ་སྨིན་པར་བྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན། རིའི་རྒྱལ་པོ་རི་རབ་ཀྱི་དྲུང་དུ་ཇི་སྙེད་ཅིག་ཉེ་བར་འདོང་བ་དེ་དག་ཐམས་ཅད་གསེར་གྱི་ཁ་དོག་ཏུ་ཁ་དོག་
གཅིག་ཏུ་འགྱུར་རོ། །དེ་བཞིན་དུ་གང་སུ་ཡང་རུང་སྟེ། ཐམས་ཅད་མཁྱེན་པ་ཉིད་དུ་སེམས་བསྐྱེད་པ་དང་ལྡན་པའི་བྱང་ཆུབ་སེམས་དཔའི་དྲུང་དུ་ཉེ་བར་འོངས་པ་དེ་དག་ཐམས་ཅད་ཀྱང་ཐམས་ཅད་མཁྱེན་པ་
ཉིད་ཀྱི་ཁ་དོག་ཏུ་ཁ་དོག་གཅིག་པར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། ཤིང་སུས་ཀྱང་མི་ཚུགས་པ་དང་། ཀུན་ནས་འདུ་བའི་ཤུན་ཕྲགས་ཀྱི་དྲི་ཞིམ་པོ་འབྱུང་བ་དེ་ལྟ་བུ་ནི་འཛམ་བུ་གླིང་གི་
མེ་ཏོག་པར་ཤི་ཀ་དང་། མེ་ཏོག་ཛ་ཏི་དང་། མེ་ཏོག་སུ་མ་ན་ལ་སྩོགས་པ་མེ་ཏོག་གི་རྣམ་པ་ཐམས་ཅད་ལ་ཡང་མྱེད་དོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་
བསྐྱེད་པའི་ས་བོན་ལས་བྱུང་བའི་སྨོན་ལམ་གྱི་ཤིང་གི་ཡོན་ཏན་དང་ཡེ་ཤེས་ཀྱི་ཤུན་ཕྲགས་ཀྱི་དྲི་ཞིམ་པོའི་ངད་འབྱུང་བ་འདི་ལྟ་བུ་ནི་དགེ་བའི་རྩ་བ་དམའ་བ་དང་ལྡན་པ་ཐམས་ཅད་དང་། ཉན་ཐོས་དང་། 

77-1-234b

རང་སངས་རྒྱས་ཀྱི་མེ་ཏོག་པར་ཤི་ཀ་དང་། མེ་ཏོག་ཛ་ཏི་དང་། མེ་ཏོག་སུ་མ་ནའི་ཚུལ་ཁྲིམས་དང་། ཏིང་ངེ་འཛིན་དང་ཤེས་རབ་དང་རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་
ཟག་པ་མྱེད་པ་དང་ལྡན་པ་ཐམས་ཅད་ལ་ཡང་མྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན། ཤིང་སུས་ཀྱང་མི་ཐུབ་པ་དང་། ཀུན་ནས་འདུ་བ་ཁ་འབུས་པར་གྱུར་ན། མེ་ཏོག་སྟོང་ཕྲག་མང་པོའི་འབྱུང་
གནས་སུ་གྱུར་པར་ཤེས་པར་བྱའོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ཤིང་ཀུན་ནས་འདུ་བ་དགེ་བའི་རྩ་བས་ཁ་འབུས་པར་གྱུར་ན། ལྷ་དང་མྱི་གྲངས་མྱེད་པའི་བྱང་ཆུབ་ཀྱི་མེ་ཏོག་
ཟག་པ་དང་བཅས་པ་དང་། ཟག་པ་མེད་པའི་སྐྱེ་གནས་སུ་འགྱུར་བར་ཤེས་པར་བྱའོ། །རིགས་ཀྱི་བུ་འདི་ལྟ་སྟེ་དཔེར་ན། ཤིང་ཀུན་ནས་འདུག་པའི་མེ་ཏོག་གིས་ཉི་མ་གཅིག་ཏུ་བསྒོས་པའི་གོས་སམ། 
ཏིལ་མར་ལས་དྲི་ཞིམ་པོའི་ངད་འབྱུང་བ་དེ་ལྟ་བུ་ཡང་མེ་ཏོག་ཙམ་པ་ཀ་དང་། མེ་ཏོག་སུ་མ་ནས་ཉི་མ་བརྒྱ་ཕྲག་སྟོང་དུ་བསྒོས་པའི་གོས་སམ་ཏིལ་མར་ལས་ཀྱང་མི་འབྱུང་ངོ་། །དེ་བཞིན་དུ་ཐམས་
ཅད་མཁྱེན་པ་ཉིད་ཀྱི་སེམས་ཀྱི་རྒྱུད་ཚེ་གཅིག་ཏུ་ཡོངས་སུ་བསྒོམས་པའི་བྱང་ཆུབ་སེམས་དཔའི་ཡོན་ཏན་དང་ཡེ་ཤེས་ཀྱི་དྲི་ཞིམ་པོའི་ངད་ཕྱོགས་ཅུའི་སངས་རྒྱས་ཀྱི་ཞབས་ཀྱི་དྲུང་དུ་ལྡང་བ་དེ་ལྟ་བུ་ནི་
བསྐལ་པ་བརྒྱ་ཕྲག་སྟོང་དུ་བསྒོམས་པའི་ཉན་ཐོས་དང་རང་སངས་རྒྱས་ཐམས་ཅད་ཀྱི་སེམས་ལས་ཀྱང་ཟག་པ་མེད་པའི་དགེ་བའི་རྩ་བ་དང་། ཆོས་ཀྱི་ཡེ་ཤེས་ཀྱི་དྲི་ཞིམ་པོ་མི་འབྱུང་ངོ་། །རིགས་
ཀྱི་བུ་འདི་ལྟ་སྟེ་དཔེར་ན། ཤིང་གི་རིགས་ན་ལི་ཀི་རི་ཞེས་བྱ་བ་རྒྱ་མཚོ་གནོད་པ་དང་བྲལ་བ་ནས་སྐྱེ་བ་ཡོད་དེ། དེའི་རྩ་བ་ཡན་ཆད་མེ་ཏོག་གི་བར་དུ་ཡང་དུས་ཐམས་ཅད་དུ་ནམ་ཡང་

77-1-235a

སེམས་ཅན་རྣམས་ཀྱི་ཉེ་བར་འཚོ་བར་མི་འགྱུར་བ་མེད་དོ། །དེ་བཞིན་དུ་སྙིང་རྗེ་ཆེན་པོ་དང་སྨོན་ལམ་གྱི་རྩ་བས་ཡང་དག་པར་སྐྱེས་པའི་བྱང་ཆུབ་སེམས་དཔའ་ཡང་ཐོག་མ་ཐམས་ཅད་མཁྱེན་
པ་ཉིད་དུ་སེམས་བསྐྱེད་པ་ནས་ཉེ་བར་བཟུང་བ་ཕྱིན་ཆད་དམ་པའི་ཆོས་གནས་པའི་མཐར་ཐུག་གི་བར་དུ་ནམ་ཡང་ལྷ་དང་བཅས་པའི་འཇིག་རྟེན་གྱི་ཉེ་བར་འཚོ་བར་མི་འགྱུར་བ་མྱེད་དོ། །རིགས་ཀྱི་
བུ་འདི་ལྟ་སྟེ་དཔེར་ན། དངུལ་ཆུའི་རིགས་གསེར་དུ་སྣང་བ་ཞེས་བྱ་བ་ཡོད་དེ། དེ་ནི་སྲང་གཅིག་གིས་ཀྱང་དེའི་སྲང་སྟོང་གསེར་དུ་འགྱུར་རོ། །དངུལ་ཆུ་སྲང་གཅིག་པོ་དེ་ནི་ལྕགས་སྲང་སྟོང་པོ་དེ་ཟད་པར་
བྱ་བ་འམ་ལྕགས་སུ་བསྒྱུར་བར་མི་ནུས་སོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རོའི་ཁམས་དགེ་བའི་རྩ་བ་ཡོངས་སུ་བསྔོ་བའི་ཡེ་ཤེས་ཀྱིས་བཟུང་བ་ནི་ལས་དང་ཉོན་མོངས་
པའི་སྒྲིབ་པའི་ལྕགས་ཐམས་ཅད་ཟད་པར་བྱས་ཏེ། ཆོས་ཐམས་ཅད་མཁྱེན་པ་ཉིད་ཀྱི་ཁ་དོག་དུ་བྱེད་ཀྱང་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རོའི་ཁམས་གཅིག་པོ་དེ་ནི་ལས་དང་
ཉོན་མོངས་པའི་ལྕགས་ཐམས་ཅད་ཀྱིས་ཀྱང་ཀུན་ནས་ཉོན་མོངས་པར་བྱ་བ་འམ། ཟད་པར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན། མེ་ནི་ཇི་ཙམ་དུ་ཆུང་དུ་ཟིན་ཀྱང་རྐྱེན་ཇི་ཙམ་དང་ཕྲད་པ་
དེ་ཙམ་གྱི་མྱེ་ལྕེ་ཡོངས་སུ་བསྐྱོད་དོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་མྱེ་ཅི་ཙམ་དུ་ཆུང་དུ་ཟིན་ཀྱང་དམྱིགས་པ་རྒྱ་ཆེན་པོའི་ཚོགས་ཀྱི་རྐྱེན་ཇི་ཙམ་དང་ཕྲད་པ་དེ་ཙམ་དུ་ཡེ་ཤེས་
ཀྱི་འོད་འཕྲོ་བ་རབ་ཏུ་དགེ་བས་རྣམ་པར་འཕེལ་བར་བྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན། མྱེ་མར་གཅིག་ལས་མྱེ་མར་བྱེ་བ་བརྒྱ་ཕྲག་སྟོང་ཞིག་བུས་ཀྱང་མྱེ་མར་དེ་ནི་མྱེ་མར་

77-1-235b

དེ་སྙེད་བྱུང་བས་མི་ཟད་དེ་མཐར་ཐུག་པ་མེད་དོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་མྱེ་མར་གཅིག་ལས་འདས་པ་དང་། མ་བྱོན་པ་དང་ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་
ཀྱི་ཐམས་ཅད་མཁྱེན་པ་ཉིད་དུ་ཐུགས་བསྐྱེད་པའི་མྱེ་མར་མང་པོ་འབར་ཡང་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་མྱེ་མར་གཅིག་པོ་དེ་ནི་དེ་སྙེད་ཀྱི་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་
མྱེ་མར་འབྱུང་བས་མི་ཟད་དེ་མཐར་ཐུག་པ་མེད་དོ། །རིགས་ཀྱི་བུ་འདི་ལྟ་སྟེ་དཔེར་ན། མྱེ་མར་གཅིག་ཅིག་ཁྱིམ་འམ་ཁང་བུ་ཇི་ལྟ་བུར་བཅུག་ཀྱང་རུང་སྟེ། བཅུག་མ་ཐག་ཏུ་ལོ་སྟོང་དུ་བསགས་བསགས་
པའི་མུན་པ་ཡང་རྣམ་པར་སེལ་ཅིང་སྣང་བར་བྱེད་དོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་གཅིག་ཀྱང་སེམས་ཅན་གྱི་བསམ་པའི་ཁྱིམ་ཐིབས་པོ་མ་རིག་པའི་མུན་པ་དང་ལྡན་
པ་ཇི་ལྟ་བུ་ཡང་རུང་སྟེ། དེའི་རྒྱུད་དུ་ཕྱིན་ན་དེ་ཕྱིན་མ་ཐག་ཏུ་བསྐལ་པ་བརྒྱ་སྟོང་བརྗོད་དུ་མེད་པར་བསྩགས་པའི་ལས་དང་ཉོན་མོངས་པའི་སྒྲིབ་པ་དང་། མུན་པ་ཐམས་ཅད་རྣམ་པར་སེལ་ཅིང་ཡེ་ཤེས་
ཀྱི་སྣང་བ་ཡོངས་སུ་བསྐྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན། མྱེ་མར་ནི་སྙིང་པོ་ཇི་ཙམ་པ་དེའི་རྐྱེན་ཙམ་དུ་སྣང་བར་བྱེད་དེ། མར་གྱི་ཚོགས་ཇི་སྲིད་དུ་གནས་པ་དེ་སྲིད་དུ་འབར་རོ། །དེ་བཞིན་
དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་མྱེ་མར་ཡང་བྱང་ཆུབ་སེམས་དཔའི་སྨོན་ལམ་གྱི་སྙིང་པོའི་ཁྱད་པར་ཅི་འདྲ་བ་དེ་ལྟ་བུར་ཆོས་ཀྱི་དབྱིངས་ཡོངས་སུ་སྣང་བར་བྱེད་དེ། 
སྙིང་རྗེ་ཆེན་པོས་སྤྱོད་པའི་མར་གྱི་ཚོགས་ཅི་སྲིད་དུ་གནས་པ་དེ་སྲིད་དུ་སེམས་ཅན་གདུལ་བ་དང་། ཞིང་ཡོངས་སུ་དག་པར་བྱ་བ་དང་། སངས་རྒྱས་ཀྱི་སྐུ་དོན་སྒྲུབ་པ་ལ་ཡོངས་སུ་འབར་

77-1-236a

བར་གནས་སོ།། །།ཤིན་ཏུ་རྒྱས་པ་ཆེན་པོའི་མདོ་སངས་རྒྱས་རྨད་ག་ཅད་ཅེས་བྱ་བ། བམ་པོ་བཅུ་བཞི་པ། རིགས་ཀྱི་བུ་འདི་ལྟ་སྟེ་དཔེར་ན། ལྷ་རྫས་ཀྱི་འཛམ་བུ་ཆུ་
ཀླུང་གིས་གསེར་གྱི་རྒྱན་ལྷའི་རྒྱལ་པོ་དབང་བསྒྱུར་གྱི་མགོ་ལ་ཐོགས་པ་ནི་འདོད་པ་ལ་སྤྱོད་པའི་ལྷའི་བུ་ཐམས་ཅད་ཀྱིས་མྱི་འཕྲོགས་སོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ལྷ་རྫས་ཀྱི་འཛམ་
བུ་ཆུ་ཀླུང་གི་གསེར་གྱི་རྒྱན་ནན་ཏན་དང་ཡོན་ཏན་ལ་རབ་ཏུ་གནས་པ་བྱང་ཆུབ་སེམས་དཔའ་ཕྱིར་མྱི་ལྡོག་པ་རྣམས་ཀྱི་སྨོན་ལམ་ཆེན་པོའི་མགོ་ལ་ཐོག་པ་ནི་བྱིས་པ་ཐ་དད་པའི་སྐྱེ་བོ་དང་། སློབ་པ་དང་། མི་
སློབ་པ་དང་། རང་སངས་རྒྱས་ཐམས་ཅད་ཀྱི་མི་འཕྲོགས་སོ། །རིགས་ཀྱི་བུ་འདི་ལྟ་སྟེ་དཔེར་ན། རི་དགས་ཀྱི་རྒྱལ་པོ་སེང་གེའི་ང་རོས་ནི་སེང་གེའི་ཕྲུ་གུ་སྐྱེས་ནས། རིང་པོར་མ་ལོན་པའང་ཉམས་སུ་བདེ་
ཞིང་རྟའི་རི་དགས་ཐམས་ཅད་ནི་ཀུན་ཏུ་འབྱེར་བར་འགྱུར་རོ། །དེ་བཞིན་དུ་དེ་བཞིན་གཤེགས་པས་སྐྱེ་བུའི་སེང་གེ་ཆེན་པོ་ཐམས་ཅད་མཁྱེན་པ་ཉིད་ཀྱི་ང་རོ་བྱང་ཆུབ་ཀྱི་སེམས་ཡོངས་སུ་བརྗོད་པ་ཕྱུང་བས་ནི་
ལས་དང་པོ་བའི་བྱང་ཆུབ་སེམས་དཔའ་སེང་གེའི་ཕྲུ་གུ་རྣམས་སངས་རྒྱས་ཀྱི་ཉམས་སུ་བདེ་ཞིང་རྟའི་དམིགས་པ་ལ་གནས་པའི་སེམས་ཅན་ཐམས་ཅད་ནི་ཀུན་ཏུ་འབྱེར་རོ། །རིགས་ཀྱི་བུ་འདི་ལྟ་སྟེ་དཔེར་ན། 
སེང་གེའི་རྒྱུས་པ་ལས་རྒྱུད་དུ་བྱས་པའི་པི་བང་གི་སྒྲས་ནི་པི་བང་ཐམས་ཅད་ཀྱི་རྒྱུད་ཡོངས་སུ་འཆད་དོ། །དེ་བཞིན་དུ་དེ་བཞིན་གཤེགས་པ་སེང་གེ་ཕ་རོལ་ཏུ་ཕྱིན་པའི་སྐུ་མངའ་བའི་བྱང་ཆུབ་ཏུ་སེམས་
བསྐྱེད་པའི་རྒྱུས་པའི་ཡོན་ཏན་བརྗོད་པའི་སྒྲས་འདོད་པའི་རྒྱུད་ཀྱི་དགའ་བའི་པི་བང་ཐམས་ཅད་ཀྱི་རྒྱུད་ཡོངས་སུ་འཆད་པར་འགྱུར་རོ། །ཉན་ཐོས་དང་རང་སངས་རྒྱས་ཀྱི་སྤྱོད་པ་དང་། ཡོན་ཏན་གྱི་གཏམ་ཐམས་

77-1-236b

ཅད་ཀྱང་ཡོངས་སུ་འགལ་བར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། རྒྱ་མཚོ་ཆེན་པོ་བ་དང་། མ་ཧེ་དང་། རའི་འོ་མས་ཡོངས་སུ་གང་བའི་ནང་དུ་སེང་གེའི་འོ་མ་ཐིགས་པ་གཅིག་བླུགས་པས་འོ་མ་དེ་
དག་ཐམས་ཅད་འགྱེས་པར་འགྱུར་ཏེ་འདུར་མི་གཏུབ་བོ། །དེ་བཞིན་དུ་བསྐལ་པ་བརྒྱ་ཕྲག་སྟོང་དུ་བསྩགས་པའི་ཉོན་མོངས་པ་ཀུན་གྱི་འོ་མའི་རྒྱ་མཚོ་ཡང་དེ་བཞིན་གཤེགས་པ་སྐྱེ་བུའི་སེང་གེ་ཆེན་པོའི་ཐམས་
ཅད་མཁྱེན་པ་ཉིད་དུ་སེམས་བསྐྱེད་པའི་འོ་མ་ཐིགས་པ་གཅིག་བླུགས་པས་ཐམས་ཅད་མ་ལུས་པར་ཟད་པར་འགྱུར་ཏེ། ཉན་ཐོས་དང་རང་སངས་རྒྱས་ཐམས་ཅད་ཀྱི་རྣམ་པར་ཐར་པ་རྣམས་ཀྱང་མི་གནས་མི་འདུའོ། །
རིགས་ཀྱི་བུ་འདི་ལྟ་སྟེ་དཔེར་ན། བྱ་ཀ་ལ་པིང་ཀའི་ཕྲུ་གུ་སྒོ་ངའི་སྦུབས་ནས་མ་བྱུང་བ་ལ་ང་རོའི་མཐུའི་ཁྱད་པར་ཡོད་པ་དེ་ལྟ་བུ་ནི་རི་ལ་གནས་པའི་བྱའི་ཚོགས་མཐུ་དང་ཤུགས་ཐམས་ཅད་ཡོངས་སུ་རྫོགས་པ་
ཐམས་ཅད་ལ་ཡང་མེད་དོ། །དེ་བཞིན་དུ་བྱང་ཆུབ་སེམས་དཔའ་ཀ་ལ་པིང་ཀའི་ཕྲུ་གུ་ལས་དང་པོ་བ་འཁོར་བའི་སྒོ་ངའི་སྦུབས་ན་འདུག་པ་ལ་སྙིང་རྗེ་ཆེན་པོ་དང་བྱང་ཆུབ་ཀྱི་སེམས་ཀྱི་ང་རོ་མཐུའི་ཁྱད་པར་ཡོད་པ་དེ་
ལྟ་བུ་ནི་ཉན་ཐོས་དང་རང་སངས་རྒྱས་ཐམས་ཅད་ལ་མྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན། ནམ་མཁའ་ལྡིང་ཆེན་པོའི་ཕྲུ་གུ་སྐྱེས་ནས་རིང་པོ་མ་ལོན་པ་ལ་གཤོག་པའི་རླུང་གི་སྟོབས་དང་མཐུ་བདོག་
པ་དང་། མྱིག་ཡོངས་སུ་དག་པའི་ཡོན་ཏན་ཡོད་པ་དེ་ལྟ་བུ་ནི་དེ་མ་ཡིན་པའི་བྱ་ལུས་ཚད་དུ་ཕྱིན་པ་གཞན་ཐམས་ཅད་ལ་ཡང་མེད་དོ། །དེ་བཞིན་དུ་དེ་བཞིན་གཤེགས་པ་ནམ་མཁའ་ལྡིང་ཆེན་པོའི་རིགས་
དང་རྒྱུད་དུ་བྱུང་བའི་བྱང་ཆུབ་སེམས་དཔའ་ནམ་མཁའ་ལྡིང་ཆེན་པོའི་ཕྲུ་གུ་སེམས་དང་པོ་བསྐྱེད་པ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་གཤོག་པའི་རླུང་གི་སྟོབས་དང་ཤུགས་བདོག་པ་དང་། སྙིང་

77-1-237a

རྗེ་ཆེན་པོ་དང་ལྷག་པའི་བསམ་པའི་མྱིག་ཡོངས་སུ་དག་པའི་ཡོན་ཏན་ཡོད་པ་ནི་ཉན་ཐོས་དང་རང་སངས་རྒྱས་བསྐལ་པ་བརྒྱ་སྟོང་ཚང་བས་བྱུང་བ་ཐམས་ཅད་ལ་མྱེད་དོ། །རིགས་ཀྱི་བུ་འདི་ལྟ་སྟེ་
དཔེར་ན། སྐྱེ་བུ་ཆེན་པོའི་ལག་ནས་སྤྱད་པའི་མདེའུ་ཐུང་གིས་ནི་གོ་ཅ་ཇི་ཙམ་དུ་སྲ་ཡང་རྟོལ་ཏོ། །དེ་བཞིན་དུ་བྱང་ཆུབ་སེམས་དཔའ་བརྩོན་འགྲུས་བརྟན་པོ་དང་ལྡན་པའི་ལག་ནས་སྤྱད་པའི་ཐམས་ཅད་
མཁྱེན་པ་ཉིད་དུ་སེམས་བསྐྱེད་པའི་མདེའུ་ཐུང་གིས་ཀྱང་ལྟ་བ་དང་བག་ལ་ཉལ་བའི་གོ་ཅ་ཐམས་ཅད་མི་རྟོལ་བ་མེད་དོ། །རིགས་ཀྱི་བུ་འདི་ལྟ་སྟེ་དཔེར་ན། མཐུ་བོ་ཆེ་ཆེན་པོ་ཁྲོས་ཏེ་རྔམ་པའི་འཕྲལ་བ་ལ་
ཐོར་བུ་ཇི་སྲིད་དུ་གནས་པ་དེ་སྲིད་དུ་འཛམ་བུའི་གླིང་གི་མྱི་ཐམས་ཅད་ཀྱིས་ཀྱང་མི་ཐུབ་པོ། །དེ་བཞིན་དུ་བྱང་ཆུབ་སེམས་དཔའ་མཐུ་བོ་ཆེ་ཆེན་པོ་སྙིང་རྗེ་ཆེན་པོས་རྔམ་པའི་ལྷག་པའི་བསམ་པའི་གདོང་ལ་
ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ཐོར་བུ་ཇི་སྲིད་དུ་གནས་པ་དེ་སྲིད་དུ་འཇིག་རྟེན་གྱི་ཁམས་ཐམས་ཅད་དུ་གཏོགས་པའི་བདུད་ཐམས་ཅད་དང་བདུད་ཀྱི་ལས་ཐམས་ཅད་ཀྱིས་ཀྱང་མི་ཐུབ་པོ། །
རིགས་ཀྱི་བུ་འདི་ལྟ་སྟེ་དཔེར་ན། འཕོང་གི་སློབ་དཔོན་གྱི་མཆན་བུ་མ་བྱང་བ་འཕོང་གི་ཐབས་ལ་མ་གོམས་པ་ལ་འཕོང་གི་གནས་དང་ཐབས་ཀྱི་མཐུ་དང་ཁྱད་པར་བདོག་པ་དེ་ལྟ་བུ་ནི་ཐམས་ཅད་ལ་
ཡང་འཕོང་མི་ཤེས་པ་རྣམས་ལ་མེད་དོ། །དེ་བཞིན་དུ་བྱང་ཆུབ་སེམས་དཔའ་ཅང་ཤེས་ལས་དང་པོ་བ་ཐམས་ཅད་མཁྱེན་པ་ཉིད་ཀྱི་ས་ལ་མ་གོམས་པ་ལ་སྨོན་ལམ་གྱི་ཡེ་ཤེས་དང་། མོས་པས་བསྐྱོད་
པའི་མཐུ་ཁྱད་པར་ཅི་བདོག་པ་དེ་ལྟ་བུ་ནི་བྱང་ཆུབ་ཏུ་སེམས་བསྐྱེད་པའི་སེམས་ཅན་ཐམས་ཅད་དང་སློབ་པ་དང་། མི་སློབ་པ་དང་། ཉན་ཐོས་དང་། རང་སངས་རྒྱས་ཐམས་ཅད་ལ་མེད་དོ། །རིགས་ཀྱི་བུ་འདི་

77-1-237b

ལྟ་སྟེ་དཔེར་ན། འཕོང་སློབ་པའི་འཕོང་གི་རྒྱུས་ཐམས་ཅད་ལ་ནི་དང་པོར་རྐང་པའི་སྟངས་ལ་གོམས་པར་བྱ་བ་སྔོན་དུ་འགྲོའོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་ཀྱི་ས་ལ་སློབ་
པས་སངས་རྒྱས་ཀྱི་ཆོས་ཐམས་ཅད་ཁོང་དུ་ཆུད་པར་བྱ་བ་ལ་ཡང་དང་པོར་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ལྷག་པའི་བསམ་པ་ལ་ཡང་དག་པར་གནས་པ་སྔོན་དུ་འགྲོའོ། །རིགས་ཀྱི་བུ་འདི་ལྟ་སྟེ་
དཔེར་ན། སྒྱུ་མའི་མཁན་པོ་སྒྱུ་མའི་རྣམ་པ་དང་ཡུལ་ཐམས་ཅད་ཡོངས་སུ་སྟོན་པའི་བྱ་བ་ཐམས་ཅད་ནི་དང་པོར་སྔགས་ཀྱི་དངོས་གྲུབ་མངོན་པར་བསྒྲུབ་པ་ཡིད་ལ་བྱས་ན་འགྲུབ་པར་འགྱུར་རོ། །དེ་བཞིན་དུ་
བྱང་ཆུབ་སེམས་དཔའི་ཡུལ་དང་རྣམ་པར་འཕྲུལ་པ་ཐམས་ཅད་ཡོངས་སུ་སྟོན་པའི་སངས་རྒྱས་དང་བྱང་ཆུབ་སེམས་དཔའི་ཡུལ་ཐམས་ཅད་ལ་ཡང་དང་པོ་སེམས་བསྐྱེད་པའི་སྨོན་ལམ་མངོན་པར་བསྒྲུབ་པ་
ནི་ཡོངས་སུ་བསྒྲུབ་པ་ཡིན་ནོ། །རིགས་ཀྱི་བུ་འདི་ལྟ་སྟེ་དཔེར་ན། སྒྱུ་མའི་སྔགས་དང་རིགས་སྔགས་ཐམས་ཅད་ནི་གཟུགས་མེད་པ་ལ་བསྟན་དུ་མྱེད་པ་ཡིན་ཡང་སེམས་བསྐྱེད་པས་སྒྱུ་མའི་སྤྲུལ་པ་དང་
གཟུགས་ཀྱི་རྣམ་པ་ཐམས་ཅད་ཡོངས་སུ་སྟོན་ཏོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ཡང་གཟུགས་མྱེད་དེ་བསྟན་དུ་མེད་དོ། །ཆོས་ཀྱི་དབྱིངས་ཐམས་ཅད་སེམས་བསྐྱེད་པ་ལ་དབང་
བསྒྱུར་བ་ཙམ་གྱི་ཆོས་ཀྱི་དབྱིངས་ཐམས་ཅད་ཡོན་ཏན་གྱི་རྒྱན་རྣམ་པར་ཕྱེ་བ་ཐམས་ཅད་ཀྱིས་རྣམ་པར་བསྒྲུབ་བོ། །རིགས་ཀྱི་བུ་འདི་ལྟ་སྟེ་དཔེར་ན། བྱི་ལའི་མིག་གིས་ལྟས་པ་ཙམ་གྱི་བྱི་བ་ཐམས་
ཅད་ཀུན་ཏུ་འབྱེར་རོ། །དེ་བཞིན་དུ་བྱང་ཆུབ་སེམས་དཔའི་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ལྷག་པའི་བསམ་པའི་སྦྱོར་བ་ཙམ་གྱིས་ལས་དང་ཉོན་མོངས་པ་ཐམས་ཅད་འབྱེར་བར་འགྱུར་རོ། །

77-1-238a

རིགས་ཀྱི་བུ་འདི་ལྟ་སྟེ་དཔེར་ན། འཛམ་བུ་ཆུ་ཀླུང་གི་གསེར་གྱི་རྒྱན་བརྟགས་ན་རྒྱན་ཐམས་ཅད་ཟིལ་གྱི་གནོན་ཏོ། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཀྱི་སེམས་འཛམ་བུ་ཆུ་ཀླུང་
གི་གསེར་གྱི་རྒྱན་ཐོགས་པ་ཡང་ཉན་ཐོས་དང་རང་སངས་རྒྱས་ཐམས་ཅད་ཀྱི་ཡོན་ཏན་གྱི་རྒྱན་ཟིལ་གྱིས་གནོན་ཏོ། །ཟིལ་གྱིས་རླག་པར་བྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་བ་ཁབ་ལོང་གྱི་རྒྱལ་པོའི་ཁམས་
ཇི་ཙམ་དུ་ཆུང་ཡང་ལྕགས་སྒྲོག་སྲ་བ་ཐམས་ཅད་ཞིག་པར་བྱེད་དོ། །དེ་བཞིན་དུ་སེམས་ཐག་པ་ནས་བསྐྱེད་པའི་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ཁམས་ཇི་ཙམ་དུ་ཆུང་ཡང་ལྟ་བའི་རྣམ་པ་དང་། 
མ་རིག་པ་དང་སྲེད་པའི་སྒྲོག་ཐམས་ཅད་ཞིག་པར་བྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་བ་ཁབ་ལོང་གི་ཁམས་ནི་གང་དང་གང་དུ་བཞག་པ་དེ་དང་དེར་ལྕགས་ཕལ་པ་ཐམས་ཅད་འགྱེས་ཤིང་མི་
གནས་ལ་མི་འདུའོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ཁམས་ཀྱང་ལས་དང་ཉོན་མོངས་པ་འམ། ཉན་ཐོས་དང་རང་སངས་རྒྱས་ཀྱི་རྣམ་པར་གྲོལ་བ་གང་དང་གང་དུ་བྱུང་བ་དེ་
དང་དེ་དག་གི་ལས་དང་ཉོན་མོངས་པ་ཐམས་ཅད་དང་ཉན་ཐོས་དང་རང་སངས་རྒྱས་ཀྱི་རྣམ་པར་ཐར་པ་ཐམས་ཅད་ཀྱང་འབྱེར་ཞིང་མི་འཁོད་མི་འདུའོ། །རིགས་ཀྱི་བུ་འདི་ལྟ་སྟེ་དཔེར་ན། ཆུ་སྲིན་གྱི་ཚུལ་
གྱི་ཟེགས་མ་གཅིག་ཟོས་པའི་ཉ་པ་ནི་ཆུའི་སྲོག་ཆགས་ཐམས་ཅད་ཀྱི་འཇིགས་པ་དང་བྲལ་བ་ཡིན་ཏེ། ཆུ་སྲིན་གྱིས་སོས་བཏབ་ཀྱང་ལུས་ལ་མི་ཚུགས་སོ། །དེ་བཞིན་དུ་ལྷག་པའི་བསམ་པས་
བྱང་ཆུབ་ཀྱི་སེམས་ཀྱི་ཆ་གཅིག་ཟོས་པའི་བྱང་ཆུབ་སེམས་དཔའ་ཡང་འཁོར་བའི་ལས་དང་ཉོན་མོངས་པའི་འཇིགས་པ་དང་བྲལ་བ་ཡིན་ཏེ། ཉན་ཐོས་དང་རང་སངས་རྒྱས་ཐམས་ཅད་ཀྱི་མངོན་

77-1-238b

པར་ཁོང་དུ་ཆུད་པར་བྱ་བའི་ནང་ན་འདུག་ཀྱང་ཡང་དག་པའི་མཐའ་མངོན་དུ་བྱ་བའི་ལམ་གོལ་བར་ལྟུང་བས་གནོད་པར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། བདུད་རྩིའི་ཆུ་འཐུངས་པའི་སྐྱེ་བུ་ནི་
གཞན་གྱིས་གནོད་པར་བྱ་བ་ཐམས་ཅད་ཀྱི་མི་འཆིའོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་བདུད་རྩིའི་ཆུ་འཐུངས་པ་ཡང་ཉན་ཐོས་དང་རང་སངས་རྒྱས་
ཐམས་ཅད་ཀྱི་སར་མི་འཆིའོ། །བྱང་ཆུབ་སེམས་དཔའི་སྙིང་རྗེ་ཆེན་པོའི་སྨོན་ལམ་ལས་ཀྱང་རྒྱུན་འཆད་པར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། བསྐུ་བ་གྲུབ་པའི་སྐྱེ་བུ་ནི་མྱིའི་
གནས་ཐམས་ཅད་ན་རྣམ་པར་སྤྱོད་ཀྱང་མྱི་ཀུན་གྱི་མི་མཐོང་ངོ་། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཏུ་སེམས་བསྐྱེད་པའི་ཤེས་རབ་དང་སྨོན་ལམ་གྱིས་ཉེ་བར་བསྟན་པ་བདུད་ཀྱི་ཡུལ་ཐམས་
ཅད་རྣམ་པར་སྤྱོད་ཀྱང་བདུད་ཐམས་ཅད་ཀྱི་མི་མཐོང་ངོ་། རིགས་ཀྱི་བུ་འདི་ལྟ་སྟེ་དཔེར་ན། རྒྱལ་པོ་ཆེན་པོ་ལ་རྟེན་པའི་སྐྱེས་བུ་ནི་སྐྱེ་བོ་མ་རབས་ཐམས་ཅད་ཀྱི་མི་འཇིགས་སོ། །དེ་བཞིན་དུ་བྱང་ཆུབ་
སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ཆོས་ཀྱི་རྒྱལ་པོ་ཆེན་པོ་ལ་རྟེན་པ་ཡང་སྒྲིབ་པ་དང་བར་ཆད་དང་ངན་སོང་ཐམས་ཅད་ཀྱིས་མི་འཇིགས་སོ། །རིགས་ཀྱི་བུ་འདི་ལྟ་སྟེ་དཔེར་ན། ས་
ཕུག་གི་ཁྱིམ་ན་གནས་ན་སའི་གས་པ་ཐམས་ཅད་རླན་གྱིས་ཡོངས་སུ་གང་བས་མྱེའི་འཇིགས་པ་མེད་དོ། །དེ་བཞིན་དུ་བྱང་ཆུབ་སེམས་དཔའ་སེམས་ཀྱི་རྒྱུད་བྱང་ཆུབ་ཀྱི་སེམས་ཀྱི་དགེ་བའི་རྩ་
བས་མངོན་པར་བརླན་པ་ལ་འདི་ཉན་ཐོས་དང་རང་སངས་རྒྱས་ཀྱི་རྣམ་པར་གྲོལ་བའི་མྱེས་འཇིགས་པ་མེད་དོ། །རིགས་ཀྱི་བུ་འདི་ལྟ་སྟེ་དཔེར་ན། དཔའ་བོ་ལ་རྟེན་པའི་མྱི་ནི་དགྲ་ཐམས་ཅད་ཀྱིས་མི་

77-1-239a

འཇིགས་སོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་དཔའ་བོ་ལ་རྟེན་པ་ཡང་སྤྱོད་པ་ངན་པའི་དགྲ་ཐམས་ཅད་ཀྱིས་མི་འཇིགས་སོ། །རིགས་ཀྱི་
བུ་འདི་ལྟ་སྟེ་དཔེར་ན། ལྷའི་དབང་པོ་བརྒྱ་བྱིན་རྡོ་རྗེའི་ལག་ཆ་ཐོགས་པ་ནི་ལྷ་མ་ཡིན་གྱི་ཚོགས་ཐམས་ཅད་རབ་ཏུ་འཇོམས་སོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་
བསྐྱེད་པ་བརྟན་པའི་ལྷག་པའི་བསམ་པ་རྡོ་རྗེའི་ལག་ཆ་ཐོགས་པ་ཡང་བདུད་དང་ཕས་ཀྱིས་རྒོལ་བའི་ལྷ་མ་ཡིན་གྱི་ཚོགས་ཐམས་ཅད་རབ་ཏུ་འཇོམས་སོ། །རིགས་ཀྱི་བུ་འདི་ལྟ་སྟེ་དཔེར་ན། རྩི་རོའི་
བཅུད་འཐུངས་པའི་སྐྱེས་བུ་ནི་ཚེ་ཤིན་ཏུ་རིང་བར་གནས་སོ། །ཉམས་དམའ་བར་མི་འགྱུར་རོ། །རྒ་བར་མི་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་
པའི་རོའི་བཅུད་ཀྱི་ཚོགས་མཐུངས་པ་ཡང་བསྐལ་པ་གྲངས་མེད་པར་འཁོར་བ་ན་འཁོར་ཡང་ཡོངས་སུ་སྐྱོ་བ་མེད་ལ་འཁོར་བའི་སྐྱོན་གྱིས་མི་གོས་སོ། །རིགས་ཀྱི་བུ་འདི་ལྟ་སྟེ་དཔེར་ན། སྨན་གྱི་རོ་སྦྱར་
རོ་ཆོག་ཐམས་ཅད་དུ་ཆུ་ནི་སྔོན་དུ་འགྲོ་བ་སྟེ། གང་ལའང་སྐྱོན་དུ་མི་འགྱུར་རོ། །དེ་བཞིན་དུ་བྱང་ཆུབ་སེམས་དཔའི་སྤྱོད་པ་དང་། སྨོན་ལམ་གྱི་ཚོགས་སྦྱར་བ་ཐམས་ཅད་དུ་ཐམས་ཅད་མཁྱེན་པ་
ཉིད་དུ་སེམས་བསྐྱེད་པ་ནི་སྔོན་དུ་འགྲོ་བ་སྟེ། གང་ལ་ཡང་སྐྱོན་དུ་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། མྱིའི་དོན་དུ་བྱ་བ་ཐམས་ཅད་ལ་ནི་སྲོག་གི་དབང་པོ་སྔོན་དུ་འགྲོའོ། །དེ་བཞིན་དུ་བྱང་ཆུབ་
སེམས་དཔའ་སངས་རྒྱས་ཀྱི་ཆོས་ཐམས་ཅད་ཡང་དག་པར་བླང་བ་ལའང་བྱང་ཆུབ་ཀྱི་སེམས་སྔོན་དུ་འགྲོའོ། །རིགས་ཀྱི་བུ་འདི་ལྟ་སྟེ་དཔེར་ན། སྐྱེས་བུ་སྲོག་གི་དབང་པོ་དང་བྲལ་བ་ནི་ལས་ཐམས་

77-1-239b

ཅད་ལ་མཐུ་མྱེད་པས་ཕ་མ་དང་གཉེན་བཤེས་ཀྱི་ཚོགས་ཀྱིས་ཀྱང་ཉེ་བར་འཚོ་བར་བྱར་མྱེད་དོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་དང་བྲལ་ཡང་། སངས་
རྒྱས་ཀྱི་ཡེ་ཤེས་ཐོབ་པར་བྱ་བ་ལ་མཐུ་མེད་པས་སེམས་ཅན་ཐམས་ཅད་ཀྱིས་ཀྱང་ཐམས་ཅད་མཁྱེན་པ་ཉིད་ཀྱི་ཡོན་ཏན་གྱིས་ཉེ་བར་འཚོ་བར་བྱར་མེད་དོ། །རིགས་ཀྱི་བུ་འདི་ལྟ་སྟེ་དཔེར་ན། རྒྱ་
མཚོ་ཆེན་པོ་ནི་དུག་ཐམས་ཅད་ཀྱིས་གདུག་པར་མི་ནུས་སོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རྒྱ་མཚོ་ཆེན་པོ་ཡང་ལས་དང་ཉོན་མོངས་པ་དང་། ཉན་ཐོས་དང་རང་སངས་རྒྱས་སུ་
སེམས་བསྐྱེད་པའི་དུག་ཐམས་ཅད་ཀྱི་གདུག་པར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན། ཉི་མའི་དཀྱིལ་འཁོར་ནི་སྐར་མ་ཐམས་ཅད་ཀྱི་འོད་ཀྱིས་ཐུབ་པར་མི་ནུས་སོ། །དེ་བཞིན་དུ་
ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ཉི་མའི་དཀྱིལ་འཁོར་ཡང་ཉན་ཐོས་དང་རང་སངས་རྒྱས་ཀྱི་སྐར་མ་ཐམས་ཅད་ཀྱི་ཡོན་ཏན་ཟག་པ་མེད་པའི་འོད་ཀྱིས་མི་ཐུབ་པོ། རིགས་ཀྱི་བུ་
འདི་ལྟ་སྟེ་དཔེར་ན། རྒྱལ་པོའི་བུ་སྐྱེས་ནས་ཡུན་རིང་དུ་མ་ལོན་པ་ཡང་བློན་པོའི་མཆོག་ཏུ་བྱ་བ་ནས་རྒན་པ་ཐམས་ཅད་རིགས་སུ་རིགས་དང་ལྡན་པར་སྐྱེས་པ་དང་དབང་གིས་ཟིལ་གྱི་གནོན་ཏོ། །
དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཏུ་སེམས་བསྐྱེད་ནས་རིང་པོ་མ་ལོན་པ་ཆོས་ཀྱི་རྒྱལ་པོ་དེ་བཞིན་གཤེགས་པའི་རིགས་སུ་སྐྱེས་པ་ལས་དང་པོ་བ་ཡང་ཡུན་རིང་པོ་ནས་ཚངས་པར་
སྤྱོད་སྤྱོད་པའི་ཉན་ཐོས་ནས་རྒན་པ་ཐམས་ཅད་བྱང་ཆུབ་ཀྱི་སེམས་ཀྱི་སྙིང་རྗེ་ཆེན་པོའི་དབང་གིས་ཟིལ་གྱིས་གནོན་ཏོ། །རིགས་ཀྱི་བུ་འདི་ལྟ་སྟེ་དཔེར་ན། བློན་པོ་ཇི་ཙམ་དུ་རྒན་པས་ཀྱང་

77-1-240a

རྒྱལ་བུ་གཞོན་ནུ་ཇི་ཙམ་དུ་ཆུང་བ་ལ་ཡང་ཕྱག་བྱ་དགོས་སོ། །རྒྱལ་པོའི་བུས་ཀྱང་བློན་པོ་རྒན་པོ་ལ་རིམ་གྲོར་མི་བྱ་བ་མ་ཡིན་ནོ། །དེ་བཞིན་དུ་ཉན་ཐོས་དང་རང་སངས་རྒྱས་ཇི་ཙམ་དུ་རྒན་
ལ་ཇི་ཙམ་དུ་ཚངས་པའི་སྤྱོད་པ་རིང་དུ་སྤྱོད་སྤྱོད་པ་རྣམས་ཀྱིས་ཀྱང་བྱང་ཆུབ་སེམས་དཔའ་ལས་དང་པོ་བ་ལ་འདུད་པར་བྱའོ། །བྱང་ཆུབ་སེམས་དཔས་ཀྱང་ཉན་ཐོས་དང་རང་སངས་རྒྱས་རྣམས་ལ་རིམ་
གྲོ་མེད་པར་བྱ་བ་མ་ཡིན་ནོ། །རིགས་ཀྱི་བུ་འདི་ལྟ་སྟེ་དཔེར་ན། རྒྱལ་པོའི་བུ་ཐམས་ཅད་ཀྱིས་མི་དགོས་པར་བྱ་ཞིག་ནའང་རྒྱལ་པོའི་མཚན་དང་ལྡན་ན་རིགས་ཀྱི་བཙུན་པས་རྒྱལ་པོའི་བློན་པོ་དམ་པར་བྱ་བ་
ཐམས་ཅད་དང་ཡང་མི་མཉམ་མོ། །དེ་བཞིན་དུ་བྱང་ཆུབ་སེམས་དཔའ་ལས་དང་པོ་བ་ལས་དང་ཉོན་མོངས་པའི་ཉེ་བར་ལེན་པ་ཐམས་ཅད་ཀྱིས་ནོན་པ་ཡང་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་
མཚན་དང་ལྡན་ན། སངས་རྒྱས་ཀྱི་རིགས་ཀྱིས་བཙུན་ཞིང་ཆེ་བའི་ཉན་ཐོས་དང་རང་སངས་རྒྱས་མཆོག་ཏུ་ཕྱིན་པ་ཐམས་ཅད་དང་ཡང་མི་མཉམ་མོ། །རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་
ཡོངས་སུ་དག་པ་ནི་མྱིག་ལ་རབ་རིབ་ཀྱི་སྐྱོན་ཡོད་ན་ཡོངས་སུ་མ་དག་པར་སྣང་ངོ་། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རིན་པོ་ཆེ་རང་བཞིན་གྱིས་ཡོངས་སུ་དག་པ་ཡང་སེམས་ཅན་དད་
པའི་མྱིག་མི་ཤེས་པའི་རབ་རིབ་ཀྱི་སྐྱོན་དང་ལྡན་པ་རྣམས་ལ་ཡོངས་སུ་མ་དག་པར་སྣང་ངོ་། །རིགས་ཀྱི་བུ་འདི་ལྟ་སྟེ་དཔེར་ན། རྩིའྀ་གཟུངས་སྔགས་དང་རྩི་ཐམས་ཅད་བསྡུས་ཏེ་བྱས་པ་ནི། རེག་གམ་
མཐོང་ངམ། འགྲོགས་ན་ཡང་སེམས་ཅན་གྱི་ནད་རབ་ཏུ་ཞི་བར་བྱེད་དོ། །དེ་བཞིན་དུ་བྱང་ཆུབ་ཀྱི་སེམས་ཀྱི་སྨོན་ལམ་དང་ཡེ་ཤེས་ཀྱི་ལུས་དགེ་བའི་རྩ་བའི་ཚོགས་དང་ཤེས་རབ་དང་ཐབས་ཀྱི་སྔགས་དང་

77-1-240b

རྩི་ཐམས་ཅད་ལས་བསྒྲུབས་པ་བྱང་ཆུབ་ཀྱི་སེམས་དང་ལྡན་པ་ནི་ཐོས་སམ་མཐོང་ངམ། འགྲོགས་སམ་རྗེས་སུ་དྲན་པའི་ཚུལ་གྱིས་ཀྱང་སེམས་ཅན་གྱི་ཉོན་མོངས་པའི་ནད་རབ་ཏུ་ཞི་བར་བྱེད་
དོ། །རིགས་ཀྱི་བུ་འདི་ལྟ་སྟེ་དཔེར་ན། གོས་དང་བའི་མཚན་ཉིད་ཅན་ནི་འདམ་གྱི་ཉེས་པ་ཐམས་ཅད་ཀྱིས་མི་གོས་སོ། །དེ་བཞིན་དུ་བྱང་ཆུབ་ཀྱི་སེམས་གོས་དང་བའི་མཚན་ཉིད་ཅན་ནི་འཁོར་བའི་
ཉོན་མོངས་པའི་འདམ་གྱི་སྐྱོན་ཐམས་ཅད་ཀྱིས་ཀུན་ནས་ཉོན་མོངས་པར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། ཤིང་གི་གཟུགས་མགོ་གཟེར་གྱིས་བཏབ་པ་ནི་ཡོངས་སུ་འགྱེས་པར་
མི་འགྱུར་ཏེ། བྱ་བ་ཐམས་ཅད་ཀྱང་བྱེད་དོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སྨོན་པའི་ཡེ་ཤེས་ཀྱི་ལུས་ཀྱི་སྤྱི་བོར་བྱང་ཆུབ་ཏུ་སེམས་བསྐྱེད་པའི་སྨོན་ལམ་གྱིས་གཟེར་གྱི་བཏབ་པ་ཡང་བྱང་ཆུབ་
སེམས་དཔའི་བྱ་བ་ཐམས་ཅད་ལ་མཐུ་ཡོད་དེ། ཐམས་ཅད་མཁྱེན་པ་ཉིད་ཀྱི་སྨོན་ལམ་གྱི་ཡེ་ཤེས་ལས་ལུས་སུ་གྲུབ་པ་ཡིན་པས་ཡོངས་སུ་འགྱེས་པར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན་
གཟེར་དང་མི་ལྡན་པའི་འཁྲུལ་འཁོར་ནི་ཤིང་གི་ཡན་ལག་དེ་ཉིད་ཡིན་ཡང་དགོས་པ་བྱ་བའི་མཐུ་མེད་དོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ལྷག་པའི་བསམ་
པ་དང་མྱི་ལྡན་ན། བྱང་ཆུབ་ཀྱི་ཡན་ལག་གི་ཚོགས་དེ་ཉིད་ཡིན་ཡང་སངས་རྒྱས་ཀྱི་ཆོས་བསྒྲུབ་པ་ལ་མཐུ་མེད་དོ། །རིགས་ཀྱི་བུ་འདི་ལྟ་སྟེ་དཔེར་ན། འཁོར་ལོས་བསྒྱུར་བའི་རྒྱལ་པོ་ལ་རིན་པོ་ཆེའི་ཨ་ག་
རུ་ནག་པོ་གླང་པོའི་སྙིང་པོ་ཞེས་བྱ་བ་ཡོད་པ་དེས་བདུགས་མ་ཐག་ཏུ་རྒྱལ་པོའི་འཁོར་ལོས་བསྒྱུར་བའི་ཡན་ལག་བཞིའི་དཔུང་གིས་ཚོགས་ཐམས་ཅད་ཀྱང་ནམ་མཁའ་ལ་གནས་པར་འགྱུར་རོ། །དེ་བཞིན་དུ་

77-1-241a

ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ཨ་ག་རུ་བདུག་པའི་བྱང་ཆུབ་སེམས་དཔའི་དགེ་བའི་རྩ་བ་ཐམས་ཅད་ཀྱང་ཁམས་གསུམ་པ་ཐམས་ཅད་ལས་རྣམ་པར་འདས་ཏེ། དེ་བཞིན་
གཤེགས་པའི་ཡེ་ཤེས་ནམ་མཁའི་སྤྱོད་ཡུལ་འདུས་མ་བྱས་པ་ཐམས་ཅད་ཀྱི་མཐར་ཐུག་པར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་ནི་རིན་པོ་ཆེ་མ་རབས་ཀྱི་འབྱུང་ཁུང་ནས་མི་འབྱུང་
གི་རྡོ་རྗེའི་འབྱུང་ཁུངས་ངམ་གསེར་གྱི་འབྱུང་ཁུང་ནས་འབྱུང་ངོ་། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རྡོ་རྗེ་ལྟ་བུར་འང་སེམས་ཅན་གྱི་བསམ་པའི་དགེ་བའི་རྩ་བ་མ་རབས་ཀྱི་རིན་པོ་
ཆེའི་འབྱུང་གནས་ནས་མི་སྐྱེ་སྟེ་གཞན་དུ་ན་སེམས་ཅན་ཡོངས་སུ་སྐྱོབ་པའི་སྙིང་རྗེ་ཆེན་པོའི་རྡོ་རྗེའི་འབྱུང་ཁུངས་དེ་ཐམས་ཅད་མཁྱེན་པའི་ཡེ་ཤེས་ལ་ལྷག་པར་དམིགས་པའི་གསེར་གྱི་འབྱུང་ཁུངས་
ཆེན་པོ་ནས་འབྱུང་ངོ་། །རིགས་ཀྱི་བུ་འདི་ལྟ་སྟེ་དཔེར་ན། ཤིང་གིས་རིགས་རྩ་བ་མེད་པ་ཞེས་བྱ་བ་ཡོད་དེ། དེའི་རྩ་བ་མཐར་ཐུག་པ་མི་དམིགས་མོད་ཀྱི་ཤིང་རྣམས་ལ་ཡལ་ག་དང་ལོ་མ་དང་འདབ་
མ་དང་མེ་ཏོག་ཤིན་ཏུ་རྒྱས་པ་དྲ་བ་ལྟ་བུར་གྱུར་པ་ཡང་སྣང་ངོ་། དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་དགེ་བའི་རྩ་བའི་མཐར་ཐུག་པའང་མི་དམིགས་མོད་ཀྱི་འཇིག་རྟེན་གྱི་སྐྱེ་
གནས་ཐམས་ཅད་དུ་ཡང་ཐམས་ཅད་མཁྱེན་པ་ཉིད་ཀྱི་བསོད་ནམས་དང་ཡེ་ཤེས་དང་མངོན་པར་ཤེས་པའི་མེ་ཏོག་ཤིན་ཏུ་རྒྱས་པ་སྨོན་ལམ་ཆེན་པོའི་དྲ་བར་གྱུར་པ་ཡང་ཡོངས་སུ་སྣང་ངོ་། །རིགས་
ཀྱི་བུ་འདི་ལྟ་སྟེ་དཔེར་ན། རྡོ་རྗེ་ནི་སྣོད་ངན་པའི་གཞི་ལ་འདུག་ན་མཛེས་པར་མི་སྣང་ངོ་། །སྣོད་མ་རྡོལ་བ་མ་གཏོག་པར་སྣོད་རྡོལ་བ་དང་། བུ་ག་ཅན་གྱིས་གཟུང་བར་མི་ནུས་སོ། །དེ་བཞིན་དུ་ཐམས་

77-1-241b

ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེ་ཆེན་པོ་ཡང་སེམས་ཅན་མོས་པ་ཞན་པའི་སྣོད་དང་། སེར་སྣ་ཅན་ནམ་ཚུལ་ཁྲིམ་ངན་ནམ་གནོད་སེམས་ཅན་ནམ། ལེ་ལོ་ཅན་ནམ། དྲན་པ་འཁྲུག་
པ་འམ། ཤེས་རབ་འཆལ་པ་ཅན་རྣམས་ལ་མི་མཛེས་ཏེ། བྱང་ཆུབ་སེམས་དཔའི་ལྷག་པའི་བསམ་པ་རིན་པོ་ཆེའི་སྣོད་མ་གཏོག་པར་སེམས་ཅན་ལྷག་པའི་བསམ་པ་ལོག་པ་ལ་ཞུགས་པ་
བློ་མི་བརྟན་པའི་སྣོད་ཀྱིས་ཀྱང་གཟུང་བར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་ནི་རིན་པོ་ཆེ་ཐམས་ཅད་འབུགས་སོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེ་
ཡང་སངས་རྒྱས་ཀྱི་ཆོས་རིན་པོ་ཆེ་ཐམས་ཅད་ཕུགས་པར་ཁོང་དུ་ཆུད་པར་བྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་ནི་བྲག་ཐམས་ཅད་ཤིགས་པར་འཇོམས་སོ། །དེ་བཞིན་དུ་ཐམས་ཅད་
མཁྱེན་པ་ཉིད་དུ་སེམས་བསྐྱེད་པའི། རྡོ་རྗེ་ཡང་ལྟ་བའི་རྣམ་པ་ཐམས་ཅད་ཀྱི་བྲག་ཤིགས་པར་འཇོམས་སོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་རིན་པོ་ཆེ་ནི་ཆག་ཀྱང་ཐམས་ཅད་ལས་ཁྱད་
པར་དུ་འཕགས་པའི་གསེར་གྱི་རྒྱན་ཟིལ་གྱི་གནོན་ཏོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རྡོ་རྗེ་རིན་པོ་ཆེ་བསམ་པ་ལོག་པར་ཞུགས་པས་ཆག་པར་གྱུར་ཀྱང་ཉན་ཐོས་དང་
རང་སངས་རྒྱས་ཐམས་ཅད་ཀྱི་ཡོན་ཏན་གྱི་གསེར་གྱི་རྒྱན་ཟིལ་གྱི་གནོན་ཏོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་རིན་པོ་ཆེ་ནི་ཆགས་ཀྱང་ཕོངས་པ་ཐམས་ཅད་རྣམ་པར་སེལ་ཏོ། །དེ་བཞིན་དུ་
ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རྡོ་རྗེ་རིན་པོ་ཆེ་ནན་ཏན་མེད་པས་ཆག་པར་གྱུར་ཀྱང་། འཁོར་བའི་འཕོངས་པ་ཐམས་ཅད་རྣམ་པར་སེལ་ཏོ། །རིགས་ཀྱི་བུ་འདི་ལྟ་སྟེ་དཔེར་ན། །

77-1-242a

རྡོ་རྗེའི་ཁམས་ནི་ཇི་ཙམ་ཞིག་ཏུ་ཆུང་ཡང་ནོར་བུ་དང་རྡོ་ཐམས་ཅད་གཅོག་པའི་མཚན་ཉིད་དོ། །དེ་བཞིན་དུ་དམྱིགས་པ་ཇི་ཙམ་དུ་ཆུང་བ་ལ་ཞུགས་ཀྱང་ཐམས་ཅད་མཁྱེན་པ་ཉིད་དུ་སེམས་བསྐྱེད་
པ་རྡོ་རྗེའི་ཁམས་ནི་མི་ཤེས་པ་ཐམས་ཅད་འཇིག་པར་བྱེད་པའི་མཚན་ཉིད་དོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་རིན་པོ་ཆེ་ནི་སྐྱེ་བོ་མ་རབས་ཀྱི་ལག་ཏུ་ཕྱིན་པར་མི་འགྱུར་རོ། །དེ་བཞིན་དུ་ཐམས་
ཅད་མཁྱེན་པ་ཉིད་དུ་སེམས་བསྐྱེད་པ། རྡོ་རྗེ་རིན་པོ་ཆེ་ཡང་མ་རབས་ཀྱི་བསམ་པ་དང་ལྡན་པའི་དགེ་བའི་རྩ་བ་ངན་ངོན་ཅན་གྱི་ལྷ་དང་མྱིའི་ལག་ཏུ་ཕྱིན་པར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། 
རིན་པོ་ཆེ་ཡོངས་སུ་བརྟག་པ་ལ་མི་མཁས་པའི་སྐྱེས་བུ་ནི་རྡོ་རྗེ་རིན་པོ་ཆེའི་ཡོན་ཏན་མི་ཤེས་པས་དེའི་ཡོན་ཏན་ཉམས་སུ་མྱོང་བར་མྱི་འགྱུར་རོ། །དེ་བཞིན་དུ་ཤེས་རབ་འཆལ་པའི་ངང་ཚུལ་དང་ལྡན་
པའི་སྐྱེས་བུ་གང་ཟག་ཀྱང་བྱང་ཆུབ་ཀྱི་སེམས་རྡོ་རྗེ་རིན་པོ་ཆེ་ཆེན་པོའི་ཡོན་ཏན་ལ་མི་མཁས་པས་ཀྱང་དེའི་ཡོན་ཏན་གྱི་ཁྱད་པར་ཉམས་སུ་མྱོང་བར་མྱི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་
ནི་ཞུ་བར་མི་ནུས་སོ། །དེ་བཞིན་དུ་ཐམས་ཅད་མཁྱེན་པ་ཉིད་ཀྱི་རྒྱུར་གྱུར་པའི་བྱང་ཆུབ་ཏུ་སེམས་བསྐྱེད་པ་རྡོ་རྗེ་ཡང་ཞུ་བར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེའི་ལག་ཆ་ཆེན་
པོ་ནི་གཞན་དུ་ན་མཐུ་བོ་ཆེ་ཆེན་པོའི་སྟོབས་ལྟར་ཁྱད་པར་དུ་འཕགས་པའི་མཐུ་སྟོབས་ཀྱི་ཤུགས་དྲག་པོ་མ་གཏོག་པར་སྟོབས་པོ་ཆེན་པོས་ཀྱང་གཟུང་བར་མི་ནུས་སོ། །དེ་བཞིན་དུ་ཐམས་ཅད་མཁྱེན་
པ་ཉིད་དུ་སེམས་བསྐྱེད་པའི་རྡོ་རྗེའི་ལག་ཆ་ཆེན་པོ་ཡང་གཞན་དུ་ན་བྱང་ཆུབ་སེམས་དཔའ་ཆེན་པོ་ཐམས་ཅད་མཁྱེན་པ་ཉིད་ཀྱི་རྒྱུའི་སྟོབས་ཀྱི་བརྟན་པ་དགེ་བའི་རྩ་བ་ཚད་མེད་པའི་མཐུ་བོ་ཆེ་ཆེན་

77-1-242b

པོའི་སྟོབས་ལྟར་ཁྱད་པར་དུ་འཕགས་པ་སྟོབས་ཀྱི་ཤུགས་ཆེན་པོ་རབ་ཏུ་ཐོབ་པ་མ་གཏོགས་པར་ཉན་ཐོས་དང་རང་སངས་རྒྱས་སྟོབས་ཆེན་པོ་ཆེ་ཐམས་ཅད་ཀྱིས་ཀྱང་ཡོངས་སུ་གཟུང་བར་མི་ནུས་སོ། །རིགས་
ཀྱི་བུ་འདི་ལྟ་སྟེ་དཔེར་ན། མཚོན་ཆ་ཐམས་ཅད་ཀྱིས་མི་ཚུགས་པ་གང་དུ་ཡང་རྡོ་རྗེ་མི་ཚུགས་པ་མེད་པ་དེ་ཁ་མི་འབབ་པོ། །དེ་བཞིན་དུ་སེམས་ཅན་ཡོངས་སུ་སྨིན་པར་བྱ་བ་དང་། དུལ་བ་འམ། དུས་གསུམ་གྱི་
བསྐལ་པར་སྤྱད་པའི་སྡུག་བསྔལ་དང་འགྲོགས་པར་བྱ་བ་གང་དུ་ཉན་ཐོས་དང་རང་སངས་རྒྱས་ཀྱི་སྨོན་ལམ་དང་ཡེ་ཤེས་ཀྱི་མཚོན་ཆས་བདུག་པ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེའི་
མཚོན་ཆ་ཆེན་པོ་ཐོགས་པའི་བྱང་ཆུབ་སེམས་དཔའ་ཡོངས་སུ་སྐྱོ་བའི་ཡིད་མྱེད་པས་ནི་མི་བཟོད་པ་མེད་དེ། ཁ་མི་འབབ་པོ། རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་ནི་གཞན་དུ་ན་རྡོ་རྗེ་ཉིད་ལས་
གྱུར་པའི་གཞི་མ་གཏོགས་པར་སའི་ཕྱོགས་གང་གིས་ཀྱང་གཟུང་བར་མི་ནུས་སོ། །དེ་བཞིན་དུ་བྱང་ཆུབ་སེམས་དཔའི་འབྱུང་བའི་སྨོན་ལམ་གྱི་ཚོགས་རྡོ་རྗེ་ནི་གཞན་དུ་ན་ལྷག་པའི་བསམ་པས་བྱང་
ཆུབ་ཏུ་སེམས་བསྐྱེད་པ་རྡོ་རྗེ་བརྟན་པའི་སའི་གཞི་མ་གཏོགས་པར་ཉན་ཐོས་དང་རང་སངས་རྒྱས་ཐམས་ཅད་ཀྱིས་གཟུང་བར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན། རྒྱ་མཚོ་ཆེན་པོའི་
སྣོད་རྡོ་རྗེའི་གཞི་སྲ་ཞིང་གསེབ་མེད་པས་ཆུ་གསེང་དུ་འཛག་པར་མི་འགྱུར་རོ། །དེ་བཞིན་དུ་བྱང་ཆུབ་སེམས་དཔའི་དགེ་བའི་རྩ་བ་བྱང་ཆུབ་ཀྱི་སེམས་རྡོ་རྗེ་གསེབ་མྱེད་པ་ཡོངས་སུ་བསྔོས་པའི་གཞི་ཅན་
ལ་གནས་པ་ཡང་སྲིད་པར་སྐྱེས་པ་ཐམས་ཅད་ཀྱིས་ཟད་པར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེའི་གཞི་ལ་བརྟེན་པའི་ས་ཆེན་པོ་ནི་འཇིག་པར་མི་འགྱུར་རོ། །དམའ་བར་མི་འགྱུར་རོ། །

77-1-243a

དེ་བཞིན་དུ་བྱང་ཆུབ་ཏུ་སེམས་བསྐྱེད་པ་རྡོ་རྗེ་སྲ་བའི་གཞི་ལ་རྟེན་པའི་བྱང་ཆུབ་སེམས་དཔའི་སྨོན་ལམ་རྣམས་ཀྱང་ཁམས་གསུམ་ཐམས་ཅད་དུ་འཇིག་པར་མི་འགྱུར། དམའ་བར་མི་འགྱུར་རོ། །
རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་ནི་ཆུས་བངས་པ་འམ། རུལ་བར་མི་འགྱུར་རོ། །དེ་བཞིན་དུ་བྱང་ཆུབ་ཏུ་སེམས་བསྐྱེད་པ་རྡོ་རྗེ་ཡང་ལས་དང་ཉོན་མོངས་པ་ཐམས་ཅད་ཀྱི་ཆུར་བསྐལ་པར་གནས་
ཀྱང་རུལ་བར་མི་འགྱུར། བངས་པར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་ནི་མྱེ་ཐམས་ཅད་ཀྱིས་དྲོད་ཀྱིས་ཀྱང་ཚིག་པར་མི་འགྱུར། ཡོངས་སུ་གདུང་བར་ཡང་མི་འགྱུར་རོ། །དེ་བཞིན་
དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རྡོ་རྗེ་ཡང་འཁོར་བ་ཐམས་ཅད་ཀྱི་སྡུག་བསྔལ་གྱི་མྱེའི་དྲོད་ཐམས་ཅད་ཀྱིས་མི་ཚིག་གོ། །ཉོན་མོངས་པ་ཐམས་ཅད་ཀྱི་མྱེའི་གདུང་བས་ཚིག་པར་མི་འགྱུར་རོ། །
རིགས་ཀྱི་བུ་འདི་ལྟ་སྟེ་དཔེར་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྙིང་པོ་བྱང་ཆུབ་ལ་བཞུགས་ཤིང་། བདུད་རྒོལ་ཏུ་བཞུག་པར་མཛད་པ་དང་། ཐམས་ཅད་མཁྱེན་
པ་ཉིད་དུ་མངོན་པར་རྫོགས་པར་འཚང་རྒྱ་བ་རྣམས་ཀྱི་གདན་ནི་གཞན་དུ་ན་སྟོང་གསུམ་གྱིས་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡོ་རྗེའི་ལྟེ་བའི་སའི་གཞི་མ་གཏོག་པར་སའི་ཕྱོགས་གཞན་
གྱིས་གཟུང་བར་མི་ནུས་སོ། །དེ་བཞིན་དུ་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་འདེབས་པ་དང་། སྤྱད་པ་སྤྱོད་པ་དང་། ཕ་རོལ་ཏུ་ཕྱིན་པ་ཡོངས་སུ་རྫོགས་པར་
བྱེད་པ་དང་། བཟོད་པ་ལ་འཇུག་པ་དང་། ས་ཐོབ་པར་བྱེད་པ་དང་། དགེ་བའི་རྩ་བ་ཡོངས་སུ་རྫོགས་པར་བྱེད་པ་དང་། ལུང་བསྟན་པ་ཡོངས་སུ་ནོད་པ་དང་། བྱང་ཆུབ་སེམས་དཔའི་ལམ་གྱི་ཚོགས་

77-1-243b

ཐམས་ཅད་ཉེ་བར་སྟོན་པ་དང་། དེ་བཞིན་གཤེགས་པ་ཐམས་ཅད་ལ་མཆོད་པ་བྱེད་པ་དང་། ཆོས་ཀྱི་སྤྲིན་ཆེན་པོ་ཡོངས་སུ་འཛིན་པ་རྣམས་ཀྱི་དགེ་བའི་རྩ་བའི་སྟོབས་དང་། ཤུགས་དང་དྲག་
ཤུལ་དང་དེ་དག་ཀྱང་གཞན་དུ་ན་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་སྨོན་ལམ་ཐམས་ཅད་ཀྱིས་ཡེ་ཤེས་རྡོ་རྗེ་སྲ་བའི་ལྟེ་བ་ཅན་མ་གཏོགས་པར་སེམས་ཅན་གཞན་གྱི་ཡོངས་སུ་གཟུང་བར་
མི་ནུས་སོ། །རིགས་ཀྱི་བུ་དེ་ལྟར་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ནི་ཡོན་ཏན་དེ་དག་དང་གཞན་ཚད་མྱེད་པ་ནས། ཡོན་ཏན་གྱིས་ཁྱད་པར་བརྗོད་དུ་མེད་པའི་ཡང་བརྗོད་དུ་མེད་པ་དང་
ལྡན་པ་སྟེ། སེམས་ཅན་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་དག་ཀྱང་ཡོན་ཏན་གྱི་ཆོས་དེ་ལྟ་བུ་དང་ལྡན་པར་གྱུར་ཏོ། །ལྡན་པར་འགྱུར་རོ། །དེ་བས་ན་རིགས་
ཀྱི་བུ་དེ་ལྟར་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། ཡོན་ཏན་འདི་དག་རབ་ཏུ་ཐོབ་པར་བྱ་བའི་ཕྱིར་བྱང་ཆུབ་སེམས་དཔའི་སྤྱོད་པ་ཡོངས་སུ་ཚོལ་བ་ནི་ཁྱོད་ཀྱིས་
ཐོབ་པར་བྱ་བ་ལེགས་པར་ཐོབ་པོ། །རིགས་ཀྱི་བུ་ཁྱོད་དེ་ཇི་ལྟར་བྱང་ཆུབ་སེམས་དཔའི་སྤྱོད་པ་ལ་སྤྱད་པར་བྱ། ཇི་ལྟར་ནན་ཏན་དུ་བྱ་ཞེས་ཟེར་ན། རིགས་ཀྱི་བུ་ཁང་པ་བརྩེགས་པ་ཆེན་པོ་རྣམ་པར་
སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོ་འདི་ཉིད་ཀྱི་ནང་དུ་སོང་སྟེ་ལྟོས་ཤིག་དང་། དེར་ཁྱོད་ཀྱིས་ཇི་ལྟར་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་ལ་སླབ་པར་བྱ་བ་དང་། བསླབས་ནས་
ཀྱང་ཡོན་ཏན་ཇི་ལྟ་བུ་ཡོངས་སུ་འགྲུབ་པར་འགྱུར་བ་ཤེས་པར་འགྱུར་རོ། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་བྱང་ཆུབ་སེམས་དཔའ་བྱམས་པ་ལ་གཡས་ཕྱོགས་སུ་བསྐོར་བ་བྱས་ཏེ་འདི་སྐད་

77-1-244a

ཅེས་སྨྲས་སོ། །འཕགས་པ་ཕོ་བྲང་བརྩེགས་པའི་ཆབ་སྒོ་དབྱེར་གསོལ་ནང་དུ་མཆིའོ། །དེ་ནས་བྱང་ཆུབ་སེམས་དཔའ་བྱམས་པས་ཁང་པ་བརྩེགས་པ་རྣམ་པར་སྣང་མཛད་ཀྱི་རྒྱན་གྱི་
བརྒྱན་པའི་སྙིང་པོའི་སྒོ་དྲུང་དུ་ཕྱིན་ཏེ། ལག་པ་གཡས་པའི་སེ་གོལ་གཏོག་ཏེ། སྒྲ་ཕྱུང་བ་དང་། དེའི་སྒོ་དེ་ཡང་རང་བྱེ་བར་གྱུར་པ་དང་། དེས་སྨྲས་པ། རིགས་ཀྱི་བུ་དེ་ཁང་པ་བརྩེགས་པ་འདིར་སོང་
ཤིག །དེ་ནས་ཚོང་དཔོན་གྱི་བུ་ནོར་བཟངས་ངོ་མཚར་ཆེན་པོ་ཐོབ་པར་གྱུར་ཏེ། ཁང་པ་བརྩེགས་པ་དེའི་ནང་དུ་ཕྱིན་པ་དང་། ཕྱིན་མ་ཐག་ཏུ་སྒོ་དེ་ཡང་རང་ཆད་པར་གྱུར་ཏོ། །དེས་མཐོང་བ་ཁང་པ་བརྩེགས་
པ་ཤིན་ཏུ་རྒྱ་ཆེ་ཞིང་ཡངས་ལ་རྒྱར་དཔག་ཚད་བརྒྱ་སྟོང་མང་པོ་དང་ལྡན་པ། ནམ་མཁའི་དབྱིངས་ཀྱི་ཚད་ཀྱིས་གཞལ་བ། འཁོར་ཐམས་ཅད་དུ་ནམ་མཁའི་དབྱིངས་ལྟར་ཡངས་པ། གདུགས་
དང་རྒྱལ་མཚན་དང་བ་དན་གྱི་རྒྱ་ནི་གྲངས་མེད་པས་བརྒྱན་པ་རིན་པོ་ཆེ་གྲངས་མེད་པའི་རྒྱན་གྱིས་བརྒྱན་པ། མུ་ཏིག་གི་ཕྲེང་བ་གྲངས་མེད་པ་རབ་ཏུ་སྤྱངས་པའི་རྒྱན་གྱིས་བརྒྱན་པ། རིན་པོ་ཆེའི་
ཕྲེང་བ་གྲངས་མེད་པ་རབ་ཏུ་སྤྱངས་པའི་རྒྱན་གྱིས་བརྒྱན་པ། མུ་ཏིག་དམར་པོའི་ཕྲེང་བ་གྲངས་མེད་པ་རབ་ཏུ་སྦྱངས་པའི་རྒྱན་གྱིས་བརྒྱན་པ། སེང་གེའི་མུ་ཏིག་གི་ཕྲེང་བ་གྲངས་མེད་པ་རབ་ཏུ་
སྤྱངས་པའི་རྒྱན་གྱིས་བརྒྱན་པ། སེང་གེའི་རྒྱལ་མཚན་གྲངས་མེད་པའི་རྒྱན་གྱི་བརྒྱན་པ། ཟླ་བ་དང་ཟླ་གམ་གྲངས་མེད་པའི་རྒྱན་གྱིས་བརྒྱན་པ། དར་གྱི་ལྡ་ལྡི་སྣ་ཚོགས་གྲངས་མེད་པ་རབ་ཏུ་
སྤྱངས་པའི་རྒྱན་གྱིས་བརྒྱན་པ། དར་གྱི་བ་དན་སྣ་ཚོགས་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེ་མང་པོ་གྲངས་མེད་པའི་འོད་ཀྱི་རྒྱན་གྱིས་བརྒྱན་པ། གསེར་གྱི་དྲ་བ་གྲངས་མེད་པའི་

77-1-244b

རྒྱན་གྱིས་བརྒྱན་པ། རིན་པོ་ཆེའི་སྣམ་བུ་གྲངས་མེད་པའི་རྒྱན་གྱིས་བརྒྱན་པ། གསེར་གྱི་ལྕགས་ཕོད་རིན་པོ་ཆེས་སྤྲས་པ་གྲངས་མེད་པའི་བརྒྱན་གྱི་བརྒྱན་པ། དྲིལ་བུ་སྒྲ་སྙན་པ་འབྱུང་
བ་གྲངས་མེད་པའི་རྒྱན་གྱི་བརྒྱན་པ། རིན་པོ་ཆེའི་དྲིལ་བུ་གཡེར་ཁའི་དྲ་བ་བསྐྱོད་ན་ཡིད་དུ་འོང་བའི་སྒྲ་འབྱུང་བ། གྲངས་མེད་པའི་རྒྱན་གྱིས་བརྒྱན་པ། ལྷ་རྫས་ཀྱི་མེ་ཏོག་མང་པོའི་ཆར་མངོན་
པར་འབབ་པ། གྲངས་མེད་པའི་རྒྱན་གྱིས་བརྒྱན་པ། ལྷ་རྫས་ཀྱི་ཕྲེང་བའི་ལྡ་ལྡི་མངོན་པར་སྤྱངས་པ་གྲངས་མེད་པའི་རྒྱན་གྱིས་བརྒྱན་པ། གམ་ཡོ་ནས་སྤོས་ཀྱི་སྣོད་ནས་བདུག་སྤོས་ཀྱིས་
འཐུལ་བའི་ཡོ་བྱད་གྲངས་མེད་པའི་རྒྱན་གྱིས་བརྒྱན་པ། གསེར་ཕྱེ་མའི་ཆར་རབ་ཏུ་འབབ་པ་གྲངས་མེད་པའི་རྒྱན་གྱིས་བརྒྱན་པ། པུ་ཤུའི་དྲ་བ་གྲངས་མེད་པའི་རྒྱན་གྱིས་བརྒྱན་པ། སྐར་
ཁུང་གྲངས་མེད་པའི་རྒྱན་གྱིས་བརྒྱན་པ། རྟ་བབ་གྲངས་མེད་པའི་རྒྱན་གྱིས་བརྒྱན་པ། བ་གམ་གྲངས་མེད་པའི་རྒྱན་གྱིས་བརྒྱན་པ། མྱེ་ལོང་གི་དཀྱིལ་འཁོར་གྲངས་མེད་པའི་རྒྱན་གྱིས་བརྒྱན་པ། 
རིན་པོ་ཆེའི་ཕ་གུ་གྲངས་མེད་པས་གཏམས་པའི་རྒྱན་གྱིས་བརྒྱན་པ། རིན་པོ་ཆེའི་རྩིག་པ་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་ཀ་བ་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་
གོས་ཀྱི་སྤྲིན་གྲངས་མེད་པའི་རྒྱན་གྱི་བརྒྱན་པ། རིན་པོ་ཆེའི་ཤིང་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་ཁྲི་འཕངས་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་ལམ་གྲངས་མེད་
པའི་རྒྱན་གྱིས་བརྒྱན་པ། རིན་པོ་ཆེ་གྲངས་མེད་པའི་བད་ཀྱི་རྒྱན་གྱིས་བརྒྱན་པ། སའི་གཞི་རྒྱན་སྣ་ཚོགས་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེ་གྲངས་མེད་པ་ལས་བརྩེགས་པའི་རྒྱན་

77-1-245a

གྱིས་བརྒྱན་པ། རིན་པོ་ཆེའི་ཁྲི་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་བུ་མོ་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་སྣམ་བུ་གྲངས་མེད་པ་བཏིང་བའི་འཆག་སའི་རྒྱན་
གྱིས་བརྒྱན་པ། འཛམ་བུ་ཆུ་ཀླུང་གི་གསེར་གྱི་ཆུ་ཤིང་གི་ཀ་བ་ཤིན་ཏུ་རྣམ་པར་ཕྱེ་བ་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེ་ཐམས་ཅད་ཀྱི་གཟུགས་གྲངས་མེད་པའི་རྒྱན་གྱིས་བརྒྱན་པ། བྱང་
ཆུབ་སེམས་དཔའི་ལུས་གྲངས་མེད་པའི་རྒྱན་གྱིས་བརྒྱན་པ། བྱའི་ཚོགས་སྣ་ཚོགས་ཡིད་དུ་འོང་བའི་སྒྲ་འབྱིན་པ་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་པད་མོ་གྲངས་མེད་པའི་རྒྱན་གྱིས་
བརྒྱན་པ། རིན་པོ་ཆེའི་སྲོག་ཤིང་འཛིན་པ་གྲངས་མེད་པའི་རྒྱན་གྱིས་བརྒྱན་པ། རྫིང་བུ་གྲངས་མེད་པའི་རྒྱན་གྱིས་བརྒྱན་པ། མེ་ཏོག་པུན་ད་རི་ཀ་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་
ཐེམ་སྐས་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་སྟེགས་བུ་རྣམ་པར་བཀོད་པ་གྲངས་མེད་པའི་རྒྱན་གྱིས་བརྒྱན་པ། ས་རིན་པོ་ཆེ་སྣ་ཚོགས་གྲངས་མེད་པས་སྤྲས་པའི་རྒྱན་གྱིས་བརྒྱན་པ། 
ནོར་བུ་རིན་པོ་ཆེ་ཆེན་པོའི་འོད་གྲངས་མེད་པ་རབ་ཏུ་འགྱེད་པའི་རྒྱན་གྱིས་བརྒྱན་པ། རིན་པོ་ཆེ་ཐམས་ཅད་རྣམ་པར་ཕྱེ་བ་གྲངས་མེད་པའི་རྒྱན་གྱིས་བརྒྱན་པ། ཡོན་ཏན་དང་ལེགས་པ་ཕུན་སུམ་ཚོགས་
པ་གྲངས་མེད་པའི་རྒྱན་གྱིས་བརྒྱན་པར་འདུག་པ་མཐོང་སྟེ། ཁང་པ་བརྩེགས་པ་དེའི་ནང་ན་ཡང་ཁང་པ་བརྩེགས་པ་གཞན་བརྒྱ་སྟོང་འདི་ལྟ་བུའི་རྒྱན་དང་ལྷབ་ལྷུབ་ཀྱིས་བརྒྱན་པ། རིན་པོ་ཆེའི་གདུགས་དང་། 
རྒྱལ་མཚན་དང་། ལྷའི་བ་དན་གྲངས་མེད་པའི་རྒྱན་གྱིས་བརྒྱན་པ་ནས། ཡོན་ཏན་དང་ལེགས་པ་ཕུན་སུམ་ཚོགས་པ་གྲངས་མེད་པའི་བར་གྱིས་རྒྱན་གྱིས་བརྒྱན་པས་གང་བར་མཐོང་ངོ་། །ཁང་པ་

77-1-245b

བརྩེགས་པ་དེ་དག་ཐམས་ཅད་ཀྱང་དེ་ལྟར་རྒྱ་ཆེ་ཞིང་ཡངས་ལ་དེ་ལྟར་ཚད་མེད་དེ། ནམ་མཁའི་མཛོད་དུ་གྱུར་པ། ཀུན་ནས་ཤིན་ཏུ་སྤ་བར་འཁོད་པར་མཐོང་ངོ་། །དེས་ཁང་པ་བརྩེགས་པ་རྣམ་པར་ཕྱེ་བ་
དེ་དག་ཐམས་ཅད་ཀྱང་དམིགས་པ་གཅིག་ལ་ཕན་ཚུན་མ་འདྲེས་པ་དང་། ཕན་ཚུན་མ་འཛིངས་པ་དང་། ཕན་ཚུན་སལ་སལ་པོར་འདུག་པར་གཟུགས་བརྙན་གྱི་ཚུལ་དུ་དེ་ལ་སྣང་བར་གྱུར་ཏེ། དམྱིགས་
པ་གཅིག་ལ་ཇི་ལྟ་བ་དེ་བཞིན་དུ་དམྱིགས་པ་མ་ལུས་པ་དེ་དག་ཐམས་ཅད་ལ་ཡང་སྣང་བར་མཐོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་ཁང་པ་བརྩེགས་པ་ཆེན་པོ་རྣམ་པར་སྣང་མཛད་ཀྱིས་རྒྱན་
གྱིས་བརྒྱན་པའི་སྙིང་པོའི་ཡུལ་དང་། རྣམ་པར་འཕྲུལ་པ་བསམ་གྱིས་མི་ཁྱབ་པ་རྣམ་པ་དེ་ལྟ་བུ་དག་མཐོང་ནས་དགའ་བའི་ཤུགས་དཔག་ཏུ་མེད་པ་རྣམ་པར་འཕེལ་བའི་སྤྲོ་བ་དང་། མོས་པ་ཆེན་པོས་ལུས་
དང་སེམས་མངོན་པར་བརླན་པ་དང་། འདུ་ཤེས་ཀྱི་རྣམ་པ་ཐམས་ཅད་རྣམ་པར་བསིལ་བའི་ཡིད་དང་། སྒྲིབ་པ་ཐམས་ཅད་རྣམ་པར་ཟློག་པའི་སེམས་དང་། རྨོངས་པ་ཐམས་ཅད་རྣམ་པར་གྲོལ་བ་དང་། 
འཁྲུག་པ་མེད་པའི་ཕྱོགས་ལ་རབ་ཏུ་གཞོལ་བ་དང་། སྒྲ་ཐམས་ཅད་ལ་ཐོགས་པ་མེད་པའི་དྲན་པས་རྣམ་པར་དམིགས་པའི་རྣ་བ་དང་ལྡན་པ་དང་། ཡིད་ལ་བྱ་བའི་རྣམ་པར་འཁྲུག་པ་ཐམས་ཅད་དང་
བྲལ་བ་དང་། རྣམ་པར་ཐར་པ་སྒྲིབ་པ་མེད་པའི་ཚུལ་གྱི་རྗེས་སུ་འབྲང་བའི་བློ་དང་། དམིགས་པ་ཐམས་ཅད་ལ་སྒྲིབ་པ་མེད་པར་མྱིག་རབ་ཏུ་འགྲོ་བར་གྱུར་ནས་ཕྱོགས་ཀྱི་རྒྱུད་ཐམས་ཅད་ལ་མངོན་དུ་བལྟས་པའི་
ལུས་ཀྱིས་ཕྱག་བྱ་བར་མངོན་པར་བསྒྲུབ་པའི་སྟོབས་ཐམས་ཅད་དུ་ཁྱབ་པ་དང་ལྡན་པའི་ལུས་ཐམས་ཅད་ཀྱིས་ཕབ་སྟེ། ཕྱག་བྱས་སོ། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་ཕྱག་བྱས་མ་ཐག་ཏུ་བྱང་

77-1-246a

ཆུབ་སེམས་དཔའ་བྱམས་པའི་བྱིན་གྱི་བརླབས་ཀྱིས་མཐུས་ཁང་པ་བརྩེགས་པ་དེ་དག་ཐམས་ཅད་ཀྱི་ནང་དུ་བདག་ཉིད་ཕྱིན་པར་ཤེས་པར་གྱུར་ཏོ། །ཁང་པ་བརྩེགས་པ་དེ་དག་ཐམས་ཅད་དུ་ཡང་
རྣམ་པར་འཕྲུལ་པ་བསམ་གྱིས་མི་ཁྱབ་པའི་ཡུལ་ཅན་རྣམ་པ་སྣ་ཚོགས་རྣམ་པ་ཐ་དད་པ་མང་པོ་ཡང་མཐོང་བར་གྱུར་ཏེ། ཁང་པ་བརྩེགས་པ་ལ་ལར་ནི་བྱང་ཆུབ་སེམས་དཔའ་བྱམས་པས་ཐོག་མ་
རིགས་ནི་གང་དུ་སྐྱེས་སྟེ། མྱིང་ནི་ཅི་ཞེས་བྱ་བར་གྱུར་པ་ཞིག་གི་དགེ་བའི་རྩ་བ་གང་དང་ཡོངས་སུ་བསྐུལ་བ་དང་། དགེ་བའི་བཤེས་གཉེན་གང་གི་ཡང་དག་པར་བསྐུལ་བ་དང་ཚེའི་ཚད་ནི་ཅི་ཙམ་ཞིག་དུ། 
བསྐལ་པའི་མིང་ནི་ཅི་ཞེས་བྱ་བར་དེ་བཞིན་གཤེགས་པ་ནི་གང་ལ་རྒྱན་ནི་ཇི་ལྟ་བུ་ཞིག་དང་ལྡན་པའི་ཞིང་དུ་འཁོར་ནི་ཇི་ལྟ་བུ་ཞིག་དུ་སྨོན་ལམ་གྱིས་ཁྱད་པར་ནི་ཇི་ལྟ་བུ་ཞིག་མངོན་པར་བསྒྲུབས་ཏེ། བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་གྱིས་སེམས་བསྐྱེད་པ་དེ་དག་ཐམས་ཅད་ཀྱང་མཐོང་བར་གྱུར་ཏོ། །ཤེས་པར་གྱུར་ཏོ། །ཁོང་དུ་ཆུད་པར་གྱུར་ཏོ། །དེའི་ཚེ་སེམས་ཅན་དེ་དག་
དང་དེ་བཞིན་གཤེགས་པ་དེའི་སྐུ་ཚེའི་ཚད་ཇི་སྲིད་གཅིག་ཏུ་གྱུར་པ་དེ་ཙམ་གྱི་དུས་སུ། དེ་བཞིན་གཤེགས་པ་དེའི་ཞབས་ཀྱི་དྲུང་ན་བདག་ཉིད་འདུག་པར་ཡང་ཤེས་པར་གྱུར་ཏེ། བྱ་བ་དེ་དག་ཐམས་
ཅད་ཀྱང་མཐོང་བར་གྱུར་ཏོ། །ཁང་པ་བརྩེགས་པ་ལ་ལར་ནི་བྱང་ཆུབ་སེམས་དཔའ་བྱམས་པས་ཐོག་མ་གང་དུ་བྱམས་པའི་ཏིང་ངེ་འཛིན་ཐོབ་པར་གྱུར་པ་དང་། དུས་གང་ནས་གཟུངས་ཏེ་དེའི་
མྱིང་བྱམས་པ་ཞེས་བྱ་བར་གྱུར་པ་དེ་དག་མཐོང་བར་གྱུར་ཏོ། །ལ་ལར་ནི་གང་དུ་སྤྱོད་པ་སྤྱད་པ་དང་། ལ་ལར་ནི་གང་དུ་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱས་པ་དང་། ལ་ལར་ནི་གང་དུ་

77-1-246b

བཟོད་པ་ལ་ཞུགས་པ་དང་། ལ་ལར་ནི་གང་དུ་ས་ནོན་པ་དང་། ལ་ལར་ནི་གང་དུ་སངས་རྒྱས་ཀྱི་ཞིང་གིས་རྒྱན་ཡོངས་སུ་བཟུང་བ་དང་། ལ་ལར་ནི་གང་དུ་དེ་བཞིན་གཤེགས་པའི་བསྟན་པ་ཡོངས་སུ་
བཟུང་བ་དང་། ལ་ལར་ནི་གང་དུ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་པ་དང་། ལ་ལར་ནི་གང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དང་། རྣམ་པ་ནི་ཇི་ལྟ་བུ་ཞིག་
ཏུ་ལུང་བསྟན་པ་དང་། ལུང་ནི་སུས་བསྟན་པ་དང་། ཡུན་ནི་ཇི་སྲིད་ཅིག་གིས་ལུང་བསྟན་པ་དེ་དག་ཐམས་ཅད་ཀྱང་མཐོང་བར་གྱུར་ཏོ། །ཁང་པ་བརྩེགས་པ་ལ་ལར་ནི་བྱང་ཆུབ་སེམས་དཔའ་བྱམས་
པས་འཁོར་ལོས་བསྒྱུར་བའི་རྒྱལ་པོར་གྱུར་ཏེ། སེམས་ཅན་རྣམས་དགེ་བ་བཅུའི་ལས་ཀྱི་ལམ་ལ་རབ་ཏུ་འགོད་པ་མཐོང་བར་གྱུར་ཏོ། །ལ་ལར་ནི་འཇིག་རྟེན་མགོན་པོར་གྱུར་ཏེ། འཇིག་རྟེན་
གྱིས་ཕན་པ་དང་བདེ་བ་ཐམས་ཅད་ཀྱིས་སེམས་ཅན་རྣམས་ལ་ཉེ་བར་སྡུད་པ་དང་། ལ་ལར་ནི་བརྒྱ་བྱིན་དུ་གྱུར་ཏེ། འདོད་པའི་ཡོན་ཏན་གྱི་དགའ་བ་ལས་སེམས་ཅན་རྣམས་རྣམ་པར་བཟློག་པ་དང་། ལ་
ལར་ནི་ཚངས་པར་གྱུར་ཏེ། བསམ་གཏན་དང་ཚད་མེད་པའི་དགའ་བ་སེམས་ཅན་རྣམས་ལ་ཡོངས་སུ་བརྗོད་པ་དང་། ལ་ལར་ནི་ལྷའི་དབང་པོ་རབ་མཚེ་མར་གྱུར་ཏེ། ཚད་མེད་པའི་ཡོན་ཏན་སེམས་
ཅན་རྣམས་ལ་ཡོངས་སུ་བརྗོད་པ་དང་། ལ་ལར་ནི་ལྷའི་དབང་པོ་རབ་དགའ་ལྡན་དུ་གྱུར་ཏེ། བྱང་ཆུབ་སེམས་དཔའ་ཚེ་གཅིག་གིས་ཐོགས་པའི་ཡོན་ཏན་བརྗོད་པ་དང་། ལ་ལར་ནི་ལྷའི་རྒྱལ་པོ་རབ་
འཕྲུལ་དགར་གྱུར་ཏེ། ལྷའི་འཁོར་དུ་བྱང་ཆུབ་སེམས་དཔའ་ཐམས་ཅད་ཀྱི་སྤྲུལ་པའི་རྒྱན་ཡོངས་སུ་སྟོན་པ་དང་། ལ་ལར་ནི་ལྷའི་དབང་པོ་དབང་བསྒྱུར་དུ་གྱུར་ཏེ། ལྷ་རྣམས་ལ་ཆོས་ཐམས་ཅད་

77-1-247a

ལ་དབང་བསྒྱུར་བ་ཡང་དག་པར་སྟོན་པ་དང་། ལ་ལར་ནི་བདུད་དུ་གྱུར་ཏེ། ལྷ་རྣམས་ལ་ཕུན་སུམ་ཚོགས་པ་ཐམས་ཅད་མི་རྟག་པར་སྟོན་པ་དང་། ལ་ལར་ནི་ལྷ་མ་ཡིན་གྱི་དབང་པོའི་གནས་སུ་
སྐྱེས་སྟེ། ལྷ་མ་ཡིན་གྱིས་འཁོར་ན་ང་རྒྱལ་དང་དྲེགས་པ་དང་། རློམ་པ་ཐམས་ཅད་རབ་ཏུ་སྤང་བ་དང་། ཡེ་ཤེས་ཀྱི་རྒྱ་མཚོ་ཆེན་པོར་འཇུག་པར་བྱ་བ་དང་། ཆོས་ཀྱི་ཡེ་ཤེས་ཀྱི་སྒྱུ་ཐོབ་པར་བྱ་བའི་
ཕྱིར་ཆོས་སྟོན་པ་མཐོང་ངོ་། །ཁང་པ་བརྩེགས་པ་ལ་ལར་ནི་གཤིན་རྗེའི་འཇིག་རྟེན་མཐོང་བར་གྱུར་ཏེ། དེ་ན་བྱང་ཆུབ་སེམས་དཔའ་བྱམས་པ་འོད་ཀྱིས་སེམས་ཅན་དམྱལ་བ་ཐམས་ཅད་སྣང་བར་བྱེད་
ཅིང་སེམས་ཅན་དམྱལ་བར་སྐྱེ་བའི་སེམས་ཅན་རྣམས་ཀྱི་སེམས་ཅན་དམྱལ་བའི་སྡུག་བསྔལ་ཐམས་ཅད་རབ་ཏུ་ཞི་བར་བྱེད་པ་མཐོང་ངོ་། །ཁང་པ་བརྩེགས་པ་ལ་ལར་ནི་ཡི་དགས་ཀྱི་གནས་མཐོང་བར་
གྱུར་ཏེ། དེ་ན་བྱང་ཆུབ་སེམས་དཔའ་བྱམས་པ་སེམས་ཅན་ཡི་དགས་ཀྱི་གནས་སུ་སྐྱེས་པ་རྣམས་ལ་ཁ་ཟས་དང་བཏུང་བ་མང་པོ་ཉེ་བར་བསྒྲུབ་ཅིང་བཀྲེས་པ་དང་། སྐོམ་པ་རབ་ཏུ་ཞི་བར་བྱེད་པ་མཐོང་
ངོ་། །ཁང་པ་བརྩེགས་པ་ལ་ལར་ནི་བྱོལ་སོང་གི་སྐྱེ་གནས་ན་སྐྱེ་བའི་སྐྱེ་མཆེད་རྣམ་པ་ཐ་དད་པ་སྣ་ཚོགས་ཀྱི་བྱོལ་སོང་གི་སྐྱེ་གནས་སུ་གཏོགས་པའི་སེམས་ཅན་མང་པོ་འདུལ་བར་མཐོང་ངོ་། །ཁང་པ་
བརྩེགས་པ་ལ་ལར་ནི་རྒྱལ་པོ་ཆེན་པོའི་ཁམས་སུ་གཏོགས་པའི་ལྷའི་འཁོར་ན་འཇིག་རྟེན་གྱི་མགོན་པོ་རྣམས་ལ་ཆོས་སྟོན་པ་མཐོང་ངོ་། །ལ་ལར་ནི་ལྷའི་དབང་པོ་བརྒྱ་བྱིན་གྱི་འཁོར་ན་ལ་ལར་ནི་ལྷའི་རྒྱལ་པོ་རབ་
མཚེ་མའི་འཁོར་ན་ལ་ལར་ནི་ལྷའི་རྒྱལ་པོ་རབ་དགའ་ལྡན་གྱིས་འཁོར་ན་ལ་ལར་ནི་ལྷའི་རྒྱལ་པོ་རབ་འཕྲུལ་དགའི་འཁོར་ན། ལ་ལར་ནི་ལྷའི་རྒྱལ་པོ་དབང་བསྒྱུར་གྱི་འཁོར་ན། ལ་ལར་ནི་བདུད་ཀྱི་འཁོར་ན། ཁང་པ་

77-1-247b

བརྩེགས་པ་ལ་ལར་ནི་ཚངས་པའི་དབང་པོའི་འཁོར་ན། བྱང་ཆུབ་སེམས་དཔའ་བྱམས་པ་ཆོས་སྟོན་པ་མཐོང་ངོ་། །ལ་ལར་ནི་ཀླུ་དང་ལྟོ་ཕྱེ་ཆེན་པོའི་འཁོར་ན། ལ་ལར་ནི་གནོད་སྦྱིན་དང་སྲིན་ཕོའི་འཁོར་ན། 
ལ་ལར་ནི་དྲི་ཟ་དང་མི་འམ་ཅིའི་འཁོར་ན། ལ་ལར་ནི་ལྷ་མ་ཡིན་དང་གསོད་འཕྲོག་གི་དབང་པོའི་འཁོར་ན། ལ་ལར་ནི་ནམ་མཁའ་ལྡིང་གི་དབང་པོ་ཆེན་པོའི་འཁོར་ན། ལ་ལར་ནི་མིའི་འཁོར་ན། ཁང་པ་
བརྩེགས་པ་ལ་ལར་ནི་ལྷ་དང་ཀླུ་དང་། གནོད་སྦྱིན་དང་དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་ཕྱེ་ཆེན་པོ་དང་། མྱི་དང་མི་མ་ཡིན་པའི་འཁོར་ན། བྱང་ཆུབ་སེམས་དཔའ་
བྱམས་པ་ཆོས་སྟོན་པ་མཐོང་ངོ་། །ལ་ལར་ནི་ཉན་ཐོས་ཀྱི་འཁོར་ན། ལ་ལར་ནི་རང་སངས་རྒྱས་ཀྱི་འཁོར་ན། ལ་ལར་ནི་བྱང་ཆུབ་སེམས་དཔའི་འཁོར་ན། ཁང་པ་བརྩེགས་པ་ལ་ལར་ནི་བྱང་ཆུབ་སེམས་དཔའ་སེམས་ཐོག་མ་བསྐྱེད་པ་ལས་
དང་པོ་པ་རྣམས་ལ་བྱང་ཆུབ་སེམས་དཔའ་བྱམས་པ་ཆོས་སྟོན་པ་མཐོང་ངོ་། །ལ་ལར་ནི་སྤྱོད་པ་ལ་ཞུགས་པ་རྣམས་ལ། ལ་ལར་ནི་བཟོད་པ་ཐོབ་ཅིང་ཕྱིར་མི་ལྡོག་པ་རྣམས་ལ། ལ་ལར་ནི་ཚེ་
གཅིག་གིས་ཐོགས་ཤིང་དབང་བསྐུར་བ་རྣམས་ལ། ཁང་པ་བརྩེགས་པ་ལ་ལར་ནི་བྱང་ཆུབ་སེམས་དཔའ་ས་དང་པོ་ལ་གནས་པ་རྣམས་ལ་སའི་ཁྱད་པར་ཡོངས་སུ་བརྗོད་པ་མཐོང་ངོ་། །ལ་ལར་ནི་ས་
བཅུ་ལ་གནས་པའི་བར་གྱི་བྱང་ཆུབ་སེམས་དཔའ་རྣམས་དང་ལྷན་གཅིག་ཏུ་བྱང་ཆུབ་སེམས་དཔའ་བྱམས་པས་ཐམས་ཅད་ཀྱི་ཁྱད་པར་ཡང་དག་པར་འགྲོ་བར་བྱེད་པ་མཐོང་ངོ་། །ལ་ལར་ནི་ཕ་རོལ་ཏུ་
ཕྱིན་པ་ཐམས་ཅད་ཡོངས་སུ་རྫོགས་པར་བྱ་བ་དང་། ལ་ལར་ནི་བསླབ་པ་ཐམས་ཅད་ལ་མངོན་དུ་འཇུག་པར་བྱ་བ་ཀུན་ཏུ་མཐའ་ཡས་པ་དང་། ལ་ལར་ནི་ཏིང་ངེ་འཛིན་གྱི་སྒོ་ལ་འཇུག་པ་རྒྱ་ཆེན་པོ་

77-1-248a

དང་། ལ་ལར་ནི་རྣམ་པར་ཐར་པའི་ཚུལ་ཟབ་མོ་དང་། ལ་ལར་ནི་བསམ་གཏན་དང་། ཏིང་ངེ་འཛིན་དང་། སྙོམ་པར་འཇུག་པ་དང་། མངོན་པར་ཤེས་པ་ཞི་བའི་ཡུལ་གྱི་རྒྱས་པར་དགང་
བ་དང་། ལ་ལར་ནི་བྱང་ཆུབ་སེམས་དཔའི་སྤྱོད་པ་དང་། འདུལ་བ་དང་། ཐབས་ཀྱི་སྒོ་ལ་འཇུག་པ་དང་། ལ་ལར་ནི་སྨོན་ལམ་མངོན་པར་བསྒྲུབ་པ་རྒྱ་ཆེ་བ་དང་། ཁང་པ་བརྩེགས་པ་ལ་ལར་ནི་བྱང་ཆུབ་
སེམས་དཔའ་བྱམས་པ་བསྐལ་པ་འཐུན་པར་སྤྱོད་པའི་བྱང་ཆུབ་སེམས་དཔའ་རྣམས་དང་འགྲོགས་ཤིང་། འཇིག་རྟེན་ལ་ཕན་པར་བྱ་བའི་དོན་དུ་བཟོའི་གནས་སྣ་ཚོགས་དང་། གཙུག་ལག་གི་
ཁྱད་པར་སེམས་ཅན་ལ་ཕན་པ་དང་བདེ་བར་འགྱུར་བ་དང་། འབྱོར་བ་རྣམས་ཡང་དག་པར་འགྲོ་བ་མཐོང་ངོ་། །ལ་ལར་ནི་བྱང་ཆུབ་སེམས་དཔའ་ཚེ་གཅིག་གིས་ཐོགས་པ་རྣམས་དང་འགྲོགས་
ཤིང་སངས་རྒྱས་ཐམས་ཅད་ཀྱི་ཡེ་ཤེས་ལ་དབང་བསྐུར་བའི་སྒོ་ཡང་དག་པར་འགྲོ་བ་མཐོང་ངོ་། །ཁང་པ་བརྩེགས་པ་ལ་ལར་ནི་བྱང་ཆུབ་སེམས་དཔའ་བྱམས་པ་ཆགས་པ་མྱེད་ཅིང་། ལོ་བརྒྱ་
སྟོང་དུ་མར་མི་གཏོང་བ་ལ་བརྩོན་པ་མཐོང་ངོ་། །ལ་ལར་ནི་ལུང་དབོག་པ་དང་། ཁ་ཏོན་བྱ་བ་ལ་བརྩོན་པར། ལ་ལར་ནི་ཆོས་ཀྱི་སྒོ་རབ་ཏུ་བརྟག་པ་ལ་བརྩོན་པར། ལ་ལར་ནི་དམ་པའི་ཆོས་
འགྲོ་བ་ལ་བརྩོན་པར། ལ་ལར་ནི་དམ་པའི་ཆོས་བྲི་བ་ལ་བརྩོན་པར། ལ་ལར་ནི་བྱམས་པ་ལ་མཉམ་པར་བཞག་པར། ལ་ལར་ནི་བསམ་གཏན་དང་ཚད་མེད་པ་ཐམས་ཅད་ལ་མཉམ་
པར་བཞག་པར། ལ་ལར་ནི་རྒྱས་པའི་སྐྱེ་མཆེད་དང་། རྣམ་པར་ཐར་པ་ཐམས་ཅད་ལ་མཉམ་པར་བཞག་པར། ཁང་པ་བརྩེགས་པ་ལ་ལར་ནི་བྱང་ཆུབ་སེམས་དཔའ་བྱམས་པ། 

77-1-248b

བྱང་ཆུབ་སེམས་དཔའི་མངོན་པར་ཤེས་པ་བསྒྲུབ་པའི་ཐབས་ཀྱི་ཏིང་ངེ་འཛིན་ལ་མཉམ་པར་བཞག་པར་མཐོང་ངོ་། །ཁང་པ་བརྩེགས་པ་ལ་ལར་ནི་བྱང་ཆུབ་སེམས་དཔའི་ཏིང་ངེ་འཛིན་སྤྲུལ་པ་ཡོད་
པ་ལ་མཉམ་པར་བཞག་པའི་བྱང་ཆུབ་སེམས་དཔའ་མང་པོ་མཐོང་སྟེ། དེ་དག་གི་ལུས་ཐམས་ཅད་དང་། བ་སྤུའི་སྒོ་ཐམས་ཅད་ནས་སྤྲུལ་པ་ཐམས་ཅད་ཀྱི་སྤྲིན་མང་པོ་འབྱུང་བ་མཐོང་ངོ་། །
ལ་ལའི་ལུས་དང་བ་སྤུའི་སྒོ་ཐམས་ཅད་ནས་ནི་ལྷའི་རིས་ཀྱི་སྤྲིན་མང་པོ་འབྱུང་བ་མཐོང་ངོ་། །ལ་ལའི་ལུས་དང་བ་སྤུའི་སྒོ་ཐམས་ཅད་ནས་ནི་ཀླུ་དང་གནོད་སྦྱིན་དང་། དྲི་ཟ་དང་ལྷ་མ་ཡིན་དང་། ནམ་
མཁའ་ལྡིང་དང་། མྱི་འམ་ཅི་དང་ལྟོ་ཕྱེ་ཆེན་པོ་དང་། ཚངས་པ་དང་། བརྒྱ་བྱིན་དང་། འཇིག་རྟེན་གྱི་མགོན་པོ་དང་། འཁོར་ལོས་བསྒྱུར་བའི་སྤྲིན་མང་པོ་འབྱུང་བ་དང་། ལ་ལའི་ལུས་དང་བ་སྤུའི་
སྒོ་ཐམས་ཅད་ནས་ནི་ཁམས་ཀྱི་རྒྱལ་པོའི་སྤྲིན་མང་པོ་འབྱུང་བ་དང་། ལ་ལའི་ལུས་དང་བ་སྤུའི་སྒོ་ཐམས་ཅད་ནས་ནི་རྒྱལ་བུ་གཞོན་ནུའི་སྤྲིན་མང་པོ་འབྱུང་བ་དང་། ལ་ལའི་ལུས་དང་བ་སྤུའི་སྒོ་ཐམས་
ཅད་ནས་ནི་ཚོང་དཔོན་དང་། བློན་པོ་དང་ཁྱིམ་བདག་གི་སྤྲིན་མང་པོ་དང་། ལ་ལའི་ལུས་དང་བ་སྤུའི་སྒོ་ཐམས་ཅད་ནས་ནི་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའི་སྤྲིན་མང་པོ་དང་། ལ་ལའི་
ལུས་དང་བ་སྤུའི་སྒོ་ཐམས་ཅད་ནས་ནི་དེ་བཞིན་གཤེགས་པའི་སྐུའི་སྤྲིན་མང་པོ་དང་། ལ་ལའི་ལུས་དང་བ་སྤུའི་སྒོ་ཐམས་ཅད་ནས་ནི་སེམས་ཅན་ཐམས་ཅད་དུ་སྤྲུལ་པའི་སྤྲིན་ཚད་མེད་པ་འབྱུང་བ་
མཐོང་ངོ་། །ལ་ལའི་ལུས་དང་བ་སྤུའི་སྒོ་ཐམས་ཅད་ནས་ནི་ཆོས་ཀྱི་སྒོ་རྣམ་པ་སྣ་ཚོགས་འབྱུང་བ་ཐོས་པར་འགྱུར་ཏེ། འདི་ལྟར་བྱང་ཆུབ་སེམས་དཔའི་ཡོན་ཏན་བསྔགས་པའི་སྒོ་དང་། སྦྱིན་

77-1-249a

པའི་ཕ་རོལ་ཏུ་ཕྱིན་པའི་སྒོ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཐབས་དང་སྨོན་ལམ་དང་སྟོབས་དང་ཡེ་ཤེས་ཀྱི་ཕ་རོལ་ཏུ་
ཕྱིན་པའི་སྒོ་དང་། བསྡུ་བའི་དངོས་པོ་དང་། བསམ་གཏན་དང་། ཚད་མེད་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། མངོན་པར་ཤེས་པ་དང་། རིག་པ་དང་གཟུངས་དང་སྤོབས་པ་དང་བདེན་
པ་དང་། སོ་སོ་ཡང་དག་པར་རིག་པ་དང་། ཞི་གནས་དང་ལྷག་མཐོང་དང་། རྣམ་པར་ཐར་པའི་སྒོ་དང་། རྟེན་ཅིང་འབྲེལ་བར་འབྱུང་བ་དང་། རྟེན་པ་དང་། ཆོས་ཀྱི་མདོ་དང་། དྲན་པ་ཉེ་བར་བཞག་པ་
དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ལམ་དང་ཉན་ཐོས་ཀྱི་ཐེག་པའི་གཏམ་དང་། རང་སངས་རྒྱས་ཀྱི་ཐེག་པའི་
གཏམ་དང་། ཐེག་པ་ཆེན་པོའི་གཏམ་དང་། ས་དང་བཟོད་པ་དང་། སྤྱོད་པ་དང་། སྨོན་ལམ་གྱི་སྒོ་དང་། དེ་བཞིན་དུ་ཆོས་ཐམས་ཅད་ཀྱི་སྒོར་འཇུག་པའི་སྒྲ་མང་པོ་འབྱུང་བ་ཐོས་སོ་ཁང་པ་བརྩེགས་
པ་ལ་ལར་ནི་དེ་བཞིན་གཤེགས་པའི་འཁོར་གྱི་དཀྱིལ་འཁོར་དུ་ཀུན་ནས་འདུས་པར་མཐོང་སྟེ། དེ་བཞིན་གཤེགས་པ་དེ་དག་གི་རྣམ་པ་ཐ་དད་པ་སྣ་ཚོགས་སྐྱེ་བ་དང་རིགས་རྣམ་པ་ཐ་དད་པ་དང་། སྐུ་རྣམ་
པར་ཕྱེ་བ་ཚད་མེད་པ་རྣམ་པ་ཐ་དད་པ་དང་། སྐུའི་ཚེ་རྣམ་པ་ཐ་དད་པ་དང་། ཞིང་རྣམ་པ་ཐ་དད་པ་དང་། བསྐལ་པ་རྣམ་པ་ཐ་དད་པ་དང་། ཆོས་བསྟན་པ་རྣམ་པ་ཐ་དད་པ་དང་། འབྱུང་བའི་སྒོ་རྣམ་
པ་ཐ་དད་པ་དང་། དམ་པའི་ཆོས་གནས་པ་རྣམ་པ་ཐ་དད་པ་ནས་འཁོར་གྱི་དཀྱིལ་འཁོར་རྣམ་པ་ཐམས་ཅད་དུ་རྣམ་པ་ཐ་དད་པ་དག་ཀྱང་མ་ལུས་པར་མཐོང་བར་གྱུར་ཏོ། །ཁང་པ་བརྩེགས་པ་ཆེན་

77-1-249b

པོ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོ་དེའི་དབུས་སུ་ཁང་པ་བརྩེགས་པ་གཅིག་གཅིག་གཞན་པས་ཆེ་ལ་ཡངས་ཤིང་། ཁང་པ་བརྩེགས་པ་གཞན་ཐམས་ཅད་ཀྱི་རྒྱན་མ་ལུས་པ་ཐམས་ཅད་
པས་ཀྱང་ཆེས་ལྷག་པར་འཕགས་པའི་རྒྱན་གྱིས་ཡང་དག་པར་བརྒྱན་པ་ཞིག་འདུག་པར་མཐོང་སྟེ། ཁང་པ་བརྩེགས་པ་དེའི་ནང་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདུག་པ་མཐོང་ངོ་། །སྟོང་གསུམ་
གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ན་ཡང་གླིང་བཞི་པ་བྱེ་བ་ཕྲག་བརྒྱ་དང་། འཛམ་བུའི་གླིང་བྱེ་བ་ཕྲག་བརྒྱ་དང་། དགའ་ལྡན་གྱི་གནས་བྱེ་བ་ཕྲག་བརྒྱ་འཁོད་པར་མཐོང་ངོ་། །འཛམ་བུའི་གླིང་དེ་དག་ཐམས་ཅད་ན་
ཡང་བྱང་ཆུབ་སེམས་དཔའ་བྱམས་པ་པད་མོའི་ནང་དུ་སྐྱེ་བ་དང་། བརྒྱ་བྱིན་དང་། ཚངས་པས་ཡོངས་སུ་བླངས་པ་དང་། གོམ་པ་བདུན་དུ་འགྲོ་བ་དང་། ཕྱོགས་བཅུར་རྣམ་པར་བལྟས་པ་དང་། སེང་གེའི་ང་རོ་ཆེན་པོ་སྒྲོག་པ་དང་། 
གཞོན་ནུའི་ས་ཐམས་ཅད་ཡོངས་སུ་སྟོན་པ་དང་། བཙུན་མོའི་འཁོར་གྱི་ནང་ན་གནས་པ་དང་། བཟའ་ཤིང་གིས་ར་བར་འགྲོ་བ་དང་། ཐམས་ཅད་མཁྱེན་པ་ཉིད་ལ་མངོན་དུ་ཕྱོགས་ཏེ། མངོན་པར་བྱུང་ནས་རབ་ཏུ་འབྱུང་བ་དང་། 
དཀའ་བའི་སྤྱོད་པ་ཡོངས་སུ་སྟོན་པ་དང་། ཟས་ཟ་བ་དང་། སྙིང་པོ་བྱང་ཆུབ་ཏུ་འགྲོ་བ་དང་། བདུད་རྒོལ་དུ་འཇུག་པ་དང་། བྱང་ཆུབ་ཏུ་རྣམ་པར་འཚང་རྒྱ་བ་དང་། བྱང་ཆུབ་ཀྱི་ཤིང་ལ་མྱིག་མྱི་འགེབས་པས་ལྟ་བ་དང་། 
ཚངས་པ་ཆེན་པོས་གསོལ་བ་གདབ་པ་དང་། མངོན་པར་རྫོགས་པར་སངས་རྒྱས་ཏེ། ཆོས་ཀྱི་འཁོར་ལོ་བསྐོར་བའི་ཡུལ་སྣ་ཚོགས་ཡོངས་སུ་བསྟན་པ་དང་། རྣམ་པ་ཐ་དད་པ་དང་། ཚུལ་དང་མྱིང་རྣམ་པ་སྣ་
ཚོགས་བསྟན་པ་རྣམ་པ་ཐ་དད་པ་དང་། ཚེའི་ཚད་སྣ་ཚོགས་རྣམ་པ་ཐ་དད་པ་དང་། འཁོར་གྱི་དཀྱིལ་འཁོར་གྱི་རྒྱན་སྣ་ཚོགས་ཐ་དད་པ་དང་། སངས་རྒྱས་ཀྱི་ཞིང་རྣམ་པར་དག་པའི་ཚུལ་བསྟན་པ་སྣ་ཚོགས་རྣམ་པ་

77-1-250a

ཐ་དད་པ་དང་། སྤྱོད་པ་དང་སྨོན་ལམ་བརྗོད་པ་སྣ་ཚོགས་རྣམ་པ་ཐ་དད་པ་དང་། ཆོས་བསྟན་པའི་རྣམ་པར་དགོད་པ་དང་། སེམས་ཅན་ཡོངས་སུ་སྨྱིན་པར་བྱ་བའི་ཐབས་སྣ་ཚོགས་རྣམ་པ་ཐ་དད་པ་དང་། 
རིང་བསྲེལ་བགོ་བ་དང་། བསྟན་པ་གནས་པའི་བྱིན་གྱིས་རླབས་ཡོངས་སུ་བསྟན་པ་སྣ་ཚོགས་རྣམ་པ་ཐ་དད་པས་ཆོས་ཀྱི་འཁོར་ལོ་བསྐོར་ཞིང་ལྷའི་གནས་སུ་འགྲོ་བ་མཐོང་སྟེ། དེ་དག་ཐམས་ཅད་ནའང་ཚོང་དཔོན་
གྱིས་བུ་ནོར་བཟངས་ཉིད་རྐང་པའི་དྲུང་ན་འདུག་པར་རང་རང་གིས་ཤེས་པར་གྱུར་ཏོ། །དེའི་འཁོར་གྱི་དཀྱིལ་འཁོར་ཐམས་ཅད་དང་། བྱ་བ་ཐམས་ཅད་ཡོངས་སུ་བསྟན་པ་དང་། ཚེའི་ཚད་རྣམ་པ་ཐ་དད་པ་ཐམས་ཅད་ལ་དྲན་
པ་མ་ཉམས་པའི་བྱིན་གྱི་རླབས་ཀྱི་འདུ་ཤེས་ཀྱི་རྣམས་པ་ཐམས་ཅད་ཁོང་དུ་ཆུད་པའི་ཡེ་ཤེས་ཀྱི་ས་ལ་གནས་པས། ཁང་པ་བརྩེགས་པ་དེ་དག་གི་དྲིལ་བུ་དང་། དྲིལ་བུ་གཡེར་ཀའི་དྲ་བ་དང་། རོལ་མོ་དང་། གླུ་ལ་སྩོགས་པའི་
དམྱིགས་པ་ཅི་སྙེད་པ་དེ་དག་ཐམས་ཅད་ལས་ཆོས་ཀྱི་སྤྲིན་གྱི་འབྲུག་སྒྲ་བསམ་གྱིས་མི་ཁྱབ་པ་འབྱུང་བ་ཐོས་པར་གྱུར་ཏེ། ལ་ལ་ལས་ནི་བྱང་ཆུབ་ཀྱི་སེམས་རྣམ་པ་ཐ་དད་པ་དང་། ལ་ལ་ལས་ནི་ཕ་རོལ་ཏུ་ཕྱིན་པའི་
སྤྱོད་པ་དང་། སྨོན་ལམ་རྣམ་པ་ཐ་དད་པ་དང་། ལ་ལ་ལས་ནི་ས་ཚད་མེད་པ་རྣམ་པ་ཐ་དད་པ་དང་། ལ་ལ་ལས་ནི་མངོན་པར་ཤེས་པ་བསམ་གྱིས་མི་ཁྱབ་པས་རྣམ་པར་འཁྲུལ་པ་རྣམ་པ་ཐ་དད་པ་དང་། ལ་ལ་ལས་ནི་
དེ་བཞིན་གཤེགས་པའི་མཆོད་པ་སྣ་ཚོགས་རྣམ་པ་ཐ་དད་པ་དང་། ལ་ལ་ལས་ནི་སངས་རྒྱས་ཀྱི་ཞིང་གི་རྒྱན་རྣམ་པ་ཐ་དད་པ་དང་། ལ་ལ་ལས་ནི་དེ་བཞིན་གཤེགས་པའི་ཆོས་ཀྱི་སྤྲིན་ཚད་མེད་པ་རྣམ་པ་ཐ་དད་པ་དང་། 
དེ་བཞིན་དུ་ཆོས་ཐམས་ཅད་ཀྱི་སྒྲ་གོང་དུ་ཇི་སྐད་དུ་བརྗོད་པ་ཐམས་ཅད་ཐོས་པར་གྱུར་ཏོ། །ལ་ལ་ལས་ནི་ཐམས་ཅད་མཁྱེན་པ་ཉིད་དུ་འཇུག་པའི་སྒྲ་ཐོས་ཏེ། འཇིག་རྟེན་གྱི་ཁམས་ཆེ་གེ་མོ་ཞིག་ཅེས་བྱ་བར་

77-1-250b

བྱང་ཆུབ་སེམས་དཔའི་མྱིང་དང་། ཆེ་གེ་མོ་ཞིག་གི་ཆོས་ཀྱི་སྒོ་ནི་ཆེ་གེ་མོ་ཞིག་ཅེས་བྱ་བ་ཐོས། དགེ་བའི་བཤེས་གཉེན་ནི་ཆེ་གེ་མོ་ཞིག་གི་ཡང་དག་པར་བསྐུལ། དེ་བཞིན་གཤེགས་པ་ནི་ཆེ་གེ་མོ་ཞིག་
གི་ཞབས་ཀྱི་དྲུང་དུ་བསྐལ་པའི་མིང་ནི་འདི་ཞེས་བྱ་བར་སངས་རྒྱས་ཀྱི་ཞིང་ནི་འདི་ལྟ་བུ་ཞིག་ཏུ་འཁོར་གྱི་དཀྱིལ་འཁོར་ནི་འདི་ལྟ་བུ་ཞིག་ན་འདུག་འདུག་སྟེ། དགེ་བའི་རྩ་བ་ནི་འདི་ལྟ་བུ་ཞིག་བསྐྱེད་ནས། 
དེ་བཞིན་གཤེགས་པའི་ཡོན་ཏན་ནི་འདི་ལྟ་བུ་དག་ཅིག་ཐོས་ཏེ། ལྷག་པའི་བསམ་པ་ནི་འདི་ལྟ་བུ་དང་། སྨོན་ལམ་གྱི་རྣམ་པ་ནི་འདི་འདྲ་བ་ཞིག་གིས་བྱང་ཆུབ་ཏུ་སེམས་བསྐྱེད་པས། དེས་བསྐལ་
པ་ནི་འདི་སྙེད་ཅིག་ཏུ་བྱང་ཆུབ་སེམས་དཔའི་སྤྱོད་པ་སྤྱད་དེ། བསྐལ་པ་འདི་སྙེད་ཅིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །མཚན་ནི་འདི་
ཞེས་བྱ། སྐུ་ཚེའི་ཚད་ནི་འདི་ཙམ་ཞིག་སྟེ། སངས་རྒྱས་ཀྱི་ཞིང་གི་ཡོན་ཏན་དང་། རྒྱན་ཕུན་སུམ་ཚོགས་པ་འདི་འདྲ་བ་དང་། སྨོན་ལམ་གྱི་ཁྱད་པར་འདི་ལྟ་བུ་ཞིག་དང་། སེམས་ཅན་རྣམ་པར་གདུལ་བ་
འདི་འདྲ་བ་ཞིག་དང་། ཉན་ཐོས་དང་། རང་སངས་རྒྱས་ཀྱི་འཁོར་ཀུན་ནས་འདུས་པ་འདི་འདྲ་བ་ཞིག་གོ། །དེ་ཡོངས་སུ་མྱ་ངན་ལས་འདས་ནས་ཀྱང་བསྐལ་པ་འདི་སྙེད་ཅིག་ཏུ་དམ་པའི་ཆོས་གནས་པར་འགྱུར་རོ། །
སེམས་ཅན་གྱི་དོན་ནི་འདི་ཙམ་ཞིག་ཏུ་འགྱུར་རོ། །ཞེས་བྱ་བའི་སྒྲ་ཐོས་སོ། །ལ་ལ་ལས་ནི་འཇིག་རྟེན་གྱི་ཁམས་ཆེ་གེ་མོ་ཞིག་ན། བྱང་ཆུབ་སེམས་དཔའི་མྱིང་ཆེ་གེ་མོ་ཞིག་སྦྱིན་པའི་ཕ་རོལ་ཏུ་ཕྱིན་
པ་ལ་སྤྱོད་ན་གཏང་བར་དཀའ་བ་འདི་ལྟ་བུའི་ཡོངས་སུ་གཏོང་བ་བརྒྱ་ནི་བྱེད་དོ། །བྱང་ཆུབ་སེམས་དཔའ་ཆེ་གེ་མོ་ཞིག་ནི་ཚུལ་ཁྲིམས་སྲུང་ངོ་། །བཟོད་པ་བསྒོམ་མོ། །བརྩོན་འགྲུས་བརྩོམ་མོ། །བསམ་

77-1-251a

གཏན་ལ་སྙོམས་པར་འཇུག་གོ། །ཤེས་རབ་ཀྱི་རྣམ་པར་དབྱེ་བ་ལ་བརྩོན་ནོ། །བྱང་ཆུབ་སེམས་དཔའ་ཆེ་གེ་མོ་ཞིག་ནི་དམ་པའི་ཆོས་ཡོངས་སུ་བཙལ་བའི་དོན་དུ་རྒྱལ་པོའི་སྲིད་ཡོངས་སུ་གཏོང་བར་
བྱེད་དོ། །རིན་པོ་ཆེ་ཡོངས་སུ་གཏོང་བ་དང་། བུ་ཡོངས་སུ་གཏོང་བ་དང་། ཆུང་མ་ཡོངས་སུ་གཏོང་བ་དང་། རྐ་ལག་དང་མྱིག་དང་མགོ་ཡོངས་སུ་གཏོང་བ་བྱེད་དོ། །མྱེར་འཆོང་བ་བྱེད་དོ། །བྱང་ཆུབ་སེམས་དཔའ་མྱིང་ཆེ་
གེ་མོ་ཞིག་གི་ནི་དེ་བཞིན་གཤེགས་པའི་བསྟན་པ་བཟུང་སྟེ། ཆོས་སྨྲ་བར་བྱེད་དོ། །ཆོས་ཀྱི་སྦྱིན་པ་གཏོང་ངོ་། །ཆོས་ཀྱི་མཆོད་སྦྱིན་བྱེད་དོ། ཆོས་ཀྱི་རྒྱལ་མཚན་བསྒྲེང་ངོ་། །ཆོས་ཀྱི་རྔ་བརྡུང་ངོ་། །ཆོས་
ཀྱི་དུང་འབུད་དོ། །ཆོས་ཀྱི་ཆར་འབེབས་སོ། །དེ་བཞིན་གཤེགས་པའི་བསྟན་པ་འཛིན་ཏོ། །དེ་བཞིན་གཤེགས་པའི་མཆོད་སྦྱིན་བརྒྱན་པར་བྱེད་དོ། །དེ་བཞིན་གཤེགས་པའི་སྐུ་གཟུགས་བརྒྱན་པ་བྱེད་དོ། 
སེམས་ཅན་ལ་བདེ་བའི་ཡོ་བྱད་ཀྱིས་སྟུད་དོ། །དམ་པའི་ཆོས་ཀྱི་མཛོད་སྲུང་ངོ་ཞེས་བྱ་བའི་སྒྲ་ཐོས་སོ། །ལ་ལ་ལས་ནི་འཇིག་རྟེན་གྱིས་ཁམས་ཆེ་གེ་མོ་ཞིག་ཅེས་བྱ་བ་ན། དེ་བཞིན་གཤེགས་
པ་མཚན་ཆེ་གེ་མོ་ཞེས་དབང་བསྐུར་བ་མྱིང་དང་ཆེ་གེ་མོ་ཞིག་གིས་འཁོར་འདི་ལྟ་བུ་ཞིག་ན་སངས་རྒྱས་ཀྱི་ཞིང་འདི་ལྟ་བུ་ཞིག་དང་། བསྐལ་པ་འདི་ལྟ་བུ་ཞིག་ལ་སྐུ་ཚེའི་ཚད་འདི་ཙམ་ཞིག་དང་ཆོས་
བསྟན་པ་འདི་ལྟ་བུ་དང་། སེམས་ཅན་གདུལ་བ་འདི་འདྲ་བ་དང་། འདི་ལྟ་བུའི་སྨོན་ལམ་གྱི་མངོན་པར་འཚང་རྒྱ་བས་ད་ལྟར་བཞུགས་ཤིང་འཚོ་སྐྱོང་ངོ་ཞེས་བྱ་བ་ན། དེ་བཞིན་དུ་དྲིལ་དང་དྲིལ་བུ་གཡེར་ཀའི་
དྲ་བ་དང་། རོལ་མོ་ལ་སྩོགས་པའི་དམིགས་པ་ཐམས་ཅད་ལས་ཆོས་ཀྱི་སྒོ་རྣམ་པ་ཐ་དད་པ་ཚད་མེད་པའི་སྒྲ་ཐོས་པར་གྱུར་ཏེ། སྒྲ་དེ་དག་ཐམས་ཅད་ཐོས་པས་ཚོང་དཔོན་གྱི་བུ་ནོར་

77-1-251b

བཟངས་དགའ་བའི་ཤུགས་རྒྱ་ཆེན་པོས་མངོན་པར་བརླན་པའི་སེམས་ཀྱི་ཆོས་ཀྱི་སྒོ་དེ་དག་ཐོས་ནས་ལ་ལར་ནི་གཟུངས་ཀྱི་སྒོ་མང་པོ་ཐོབ་པར་གྱུར་ཏོ། །ལ་ལར་ནི་སྤོབས་པའི་སྒོ་མང་པོ་ཐོབ་པར་གྱུར་ཏོ། །ལ་
ལར་ནི་བཟོད་པའི་སྒོ་མང་པོ་ཐོབ་པར་གྱུར་ཏོ། །ལ་ལར་ནི་སྤྱོད་པའི་སྒོ་མང་པོ་ཐོབ་པར་གྱུར་ཏོ། །ལ་ལར་ནི་སྨོན་ལམ་གྱི་སྒོ་མང་པོ་ཐོབ་པར་གྱུར་ཏོ། །ལ་ལར་ནི་ཕ་རོལ་ཏུ་ཕྱིན་པའི་སྒོ་མང་པོ་ཐོབ་པར་གྱུར་ཏོ། །
ལ་ལར་ནི་མངོན་པར་ཤེས་པའི་སྒོ་མང་པོ་ཐོབ་པར་གྱུར་ཏོ། །ལ་ལར་ནི་རིག་པ་དང་ཡེ་ཤེས་སྣང་བའི་སྒོ་མང་པོ་ཐོབ་པར་གྱུར་ཏོ། །ལ་ལར་ནི་རྣམ་པར་ཐར་པའི་སྒོ་མང་པོ་ཐོབ་པར་གྱུར་ཏོ། །ལ་ལར་ནི་ཏིང་ངེ་
འཛིན་གྱི་སྒོར་འཇུག་པ་མང་པོ་ཐོབ་པར་གྱུར་ཏོ།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅྭོ་ལྔ་པ། མྱེ་ལོང་གི་དཀྱིལ་འཁོར་དེ་དག་ལས་ཀྱང་གཟུགས་རྙན་གྱི་རྒྱན་རྣམ་པར་དམིགས་པ་ཚད་མྱེད་
པ་མཐོང་བར་གྱུར་ཏེ། ལ་ལར་ནི་དེ་བཞིན་གཤེགས་པའི་འཁོར་གྱི་དཀྱིལ་འཁོར་གྱི་གཟུགས་རྙན་རྣམ་པར་དམྱིགས་པ་མཐོང་ངོ་། །ལ་ལར་ནི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་གྱི་གཟུགས་
རྙན་རྣམ་པར་དམིགས་པ་དང་། ལ་ལར་ནི་ཉན་ཐོས་ཀྱི་འཁོར་གྱི་དཀྱིལ་འཁོར་གྱི་གཟུགས་རྙན་རྣམ་པར་དམིགས་པ་དང་། ལ་ལར་ནི་རང་སངས་རྒྱས་ཀྱི་འཁོར་གྱི་དཀྱིལ་འཁོར་གྱི་གཟུགས་རྙན་རྣམ་པར་
དམིགས་པ་དང་། ལ་ལར་ནི་དེ་བཞིན་གཤེགས་པའི་འཁོར་གྱི་དཀྱིལ་འཁོར་གྱི་གཟུགས་རྙན་རྣམ་པར་དམིགས་པ་དང་། ལ་ལར་ནི་ཀུན་ནས་ཉོན་མོངས་པའི་ཞིང་གི་གཟུགས་རྙན་རྣམ་པར་དམྱིགས་པ་དང་། 
ལ་ལར་ནི་རྣམ་པར་དག་པའི་ཞིང་གི་གཟུགས་རྙན་རྣམ་པར་དམྱིགས་པ་དང་། ལ་ལར་ནི་ཀུན་ནས་ཉོན་མོངས་ཤིང་རྣམ་པར་དག་པའི་ཞིང་གིས་གཟུགས་བརྙན་རྣམ་པར་དམྱིགས་པ་དང་། ལ་ལར་ནི་རྣམ་པར་

77-1-252a

དག་ཅིང་ཀུན་ནས་ཉོན་མོངས་པའི་ཞིང་གི་གཟུགས་རྙན་རྣམ་པར་དམིགས་པ་དང་། ལ་ལར་ནི་སངས་རྒྱས་དང་བཅས་པའི་འཇིག་རྟེན་གྱི་ཁམས་ཀྱི་གཟུགས་རྙན་རྣམ་པར་དམིགས་པ་དང་། ལ་
ལར་ནི་སངས་རྒྱས་མི་བཞུགས་པའི་འཇིག་རྟེན་གྱི་ཁམས་ཀྱི་གཟུགས་བརྙན་རྣམ་པར་དམིགས་པ་དང་། ལ་ལར་ནི་ཆུང་བའི་འཇིག་རྟེན་གྱི་གཟུགས་རྙན་རྣམ་པར་དམིགས་པ་དང་། ལ་ལར་ནི་ཆེ་བའི་འཇིག་རྟེན་
གྱི་ཁམས་ཀྱི་གཟུགས་བརྙན་རྣམ་པར་དམིགས་པ་དང་། ལ་ལར་ནི་ཕྲ་བའི་འཇིག་རྟེན་གྱི་ཁམས་ཀྱི་གཟུགས་བརྙན་རྣམ་པར་དམིགས་པ་དང་། ལ་ལར་ནི་རྒྱ་ཆེ་བའི་འཇིག་རྟེན་གྱི་ཁམས་ཀྱི་གཟུགས་བརྙན་
རྣམ་པར་དམིགས་པ་དང་། ལ་ལར་ནི་མྱིག་འཕྲུལ་གྱི་འཇུག་པའི་འཇིག་རྟེན་གྱི་ཁམས་ཀྱི་གཟུགས་བརྙན་རྣམ་པར་དམིགས་པ་དང་། ལ་ལར་ནི་སྣྲེལ་གཞིའི་འཇིག་རྟེན་གྱི་ཁམས་ཀྱི་གཟུགས་བརྙན་
རྣམ་པར་དམིགས་པ་དང་། ལ་ལར་ནི་སྤྱིའུ་ཚུགས་ཀྱི་འཇིག་རྟེན་གྱི་ཁམས་ཀྱི་གཟུགས་བརྙན་རྣམ་པར་དམིགས་པ་དང་། ལ་ལར་ནི་སའི་གཞི་མཉམ་པར་འཇུག་པའི་འཇིག་རྟེན་གྱི་ཁམས་ཀྱི་གཟུགས་
བརྙན་རྣམ་པར་དམིགས་པ་དང་། ལ་ལར་ནི་སེམས་ཅན་དམྱལ་བ་དང་། བྱོལ་སོང་དང་། ཡི་དགས་ཀྱི་གནས་ཀྱི་འཇིག་རྟེན་གྱི་ཁམས་ཀྱི་གཟུགས་བརྙན་རྣམ་པར་དམིགས་པ་དང་། ལ་ལར་ནི་ལྷ་དང་མྱི་
གང་གིས་འཇིག་རྟེན་གྱི་ཁམས་ཀྱི་གཟུགས་བརྙན་རྣམ་པར་དམིགས་པ་མཐོང་བར་གྱུར་ཏོ། །འཆག་ས་དེ་དག་དང་། གནས་དེ་དག་དང་། ས་ཆེན་དེ་དག་ལ་བྱང་ཆུབ་སེམས་དཔའ་གྲངས་མེད་པ་དགོས་པ་
སྣ་ཚོགས་ལ་བརྩོན་པ་དག་ཀྱང་མཐོང་བར་གྱུར་ཏེ། ལ་ལར་ནི་འཆག་པ་དང་། ལ་ལར་ནི་བསམ་གཏན་བྱེད་པ་དང་། ལ་ལར་ནི་ལྟ་བ་དང་། ལ་ལར་ནི་སེམས་ཅན་རྣམས་ལ་སྙིང་རྗེ་ཆེན་པོས་རྒྱས་པར་

77-1-252b

འགེངས་པ་དང་། ལ་ལར་ནི་གཙུག་ལག་གི་ཚུལ་སྣ་ཚོགས་འཇིག་རྟེན་གྱི་དོན་དུ་འགྱུར་བ་བསྒྲུབ་པ་དང་། ལ་ལར་ནི་ལུང་ནོད་པ་དང་། ལ་ལར་ནི་ཁ་ཏོན་བྱེད་པ་དང་། ལ་ལར་ནི་ཡི་གེར་འདྲི་བ་དང་། ལ་ལར་ནི་
དྲི་བ་ཡོངས་སུ་འདྲི་བ་དང་། ལ་ལར་ནི་ཕུང་པོ་གསུམ་པའི་བཤགས་པ་དང་། ཡོངས་སུ་བསྔོ་བ་ལ་བརྩོན་པ་དང་། ལ་ལར་ནི་སྨོན་ལམ་མངོན་པར་བསྒྲུབ་པ་བྱེད་པ་མཐོང་ངོ་། །ཀ་བ་དེ་དག་ལས་ཀྱང་རིན་པོ་ཆེ་
འི་རྒྱལ་པོ་ཐམས་ཅད་ཀྱི་འོད་ཀྱི་དྲ་བ་མང་པོ་འབྱུང་བ་མཐོང་སྟེ། ལ་ལ་ལས་ནི་ཁ་དོག་སྔོན་པོ་དང་། ལ་ལ་ལས་ནི་ཁ་དོག་སེར་པོ་དང་། ལ་ལ་ལས་ནི་ཁ་དོག་དམར་པོ་དང་། ལ་ལ་ལས་ནི་ཁ་དོག་དཀར་པོ་དང་། 
ལ་ལ་ལས་ནི་ཤེལ་གྱི་ཁ་དོག་དང་། ལ་ལ་ལས་ནི་གསེར་གྱི་ཁ་དོག་དང་། ལ་ལ་ལས་ནི་ཨིན་དྲ་ནཱི་ལའི་ཁ་དོག་དང་། ལ་ལ་ལས་ནི་འཇའི་ཁ་དོག་དང་། ལ་ལ་ལས་ནི་འཛམ་བུ་ཆུ་ཀླུང་གི་གསེར་གྱི་ཁ་དོག་
དང་། ལ་ལ་ལས་ནི་འོད་ཐམས་ཅད་དུ་སྣང་བའི་ཁ་དོག་དང་། ལུས་དང་སེམས་ཀྱི་བདེ་བ་བསྐྱེད་པ་ལྟ་ན་མཆོག་ཏུ་མཛེས་པ་མཐོང་བར་གྱུར་ཏོ། །འཛམ་བུ་ཆུ་ཀླུང་གི་གསེར་གྱི་ཆུ་ཤིང་གི་ཀ་བ་དེ་དག་དང་། རིན་
པོ་ཆེ་ཐམས་ཅད་ཀྱི་གཟུགས་དེ་དག་ཀྱང་ལག་ནས་མེ་ཏོག་གི་སྤྲིན་མངོན་པར་སྤྱོད་པ་མཐོང་སྟེ། ལག་ནས་ཕྲེང་བའི་ལྡ་ལྡི་དང་། ལག་ནས་གོས་དང་། ལག་ནས་གདུགས་དང་། རྒྱལ་མཚན་དང་། བ་དན་དང་ལག་
ནས་སྤོས་དང་བདུག་སྤོས་དང་། བྱུག་པ་དང་། ལག་ནས་ནོར་བུ་རིན་པོ་ཆེའི་དྲ་བ་དང་། ལག་ནས་རིན་པོ་ཆེ་སྣ་ཚོགས་དང་། གསེར་གྱི་ལྕག་ཕོད་སྣ་ཚོགས་དང་། ལག་ནས་མུ་ཏིག་སྣ་ཚོགས་ཀྱི་སེ་མོ་དོ་དང་། ལག་ནས་
རིན་པོ་ཆེ་སྣ་ཚོགས་ཀྱི་སེ་མོ་དོ་མངོན་པར་སྤྱོད་པ་དང་། ལག་ན་རྒྱན་ཐམས་ཅད་ཐོགས་པར་མཐོང་ངོ་། །ལ་ལ་ནི་གཙུག་གི་རིན་པོ་ཆེ་དང་ཅོད་པན་གྱི་འདུད་ཅིང་མྱིག་མྱི་འགེབས་པར་བལྟ་བ་དང་། ཐལ་མོ་སྦྱར་ཞིང་

77-1-253a

ཕྱག་འཚལ་བར་མཐོང་ངོ་། །མུ་ཏིག་གི་ཕྲེང་བ་དེ་དག་ལས་ཀྱང་སྤོས་སྣ་ཚོགས་ཀྱིས་དྲི་ཞིམ་པོས་བྱས་པའི་ཆུ་ཡན་ལག་བརྒྱད་དང་ལྡན་པའི་ཆར་གྱི་རྒྱན་ཕྲ་མོ་འབབ་པར་མཐོང་ངོ་། །རིན་པོ་
ཆེ་བཻ་ཌཱུརྱའི་ཕྲེང་བའི་དྲ་བ་དེ་དག་ལས་ཀྱང་མར་མྱེའི་ཕྲེང་བ་རབ་ཏུ་འབར་བ་མང་པོ་མཐོང་བར་གྱུར་ཏོ། །རིན་པོ་ཆེའི་གདུགས་དེ་དག་ཀྱང་རྒྱན་དང་། ལྷབ་ལྷུབ་ཐམས་ཅད་ཀྱིས་མཛེས་པར་བརྒྱན་ཏོ། རིན་པོ་ཆེའི་
དྲིལ་དང་དྲིལ་བུ་གཡེར་ཁའི་དྲ་བ་དང་། དར་གྱི་ལྡ་ལྡི་དང་། ཆུན་པོ་དང་། རིན་པོ་ཆེའི་ཤར་བུ་དང་། ནོར་བུ་རིན་པོ་ཆེ་སྣ་ཚོགས་ཀྱིས་བསྐྱོད་ལས་ཡོངས་སུ་བརྒྱན་པའི་སྙིང་པོ་དང་ལྡན་པ་མཐོང་ངོ་། །རྫིང་དེ་དག་ནས་
ཀྱང་རིན་པོ་ཆེའི་མེ་ཏོག་པད་མོ་དང་། ཨུད་པ་ལ་དང་། ཀུ་མུ་ད་དང་། པུན་ད་རི་ཀ་གྲངས་མེད་པ་མངོན་པར་འཐོན་པར་མཐོང་སྟེ། ལ་ལ་ནི་མཐོ་གང་འཁོར་བ་ཙམ། ལ་ལ་ནི་འདོམ་གང་འཁོར་བ་ཙམ། 
ལ་ལ་ནི་ཤིང་རྟའི་འཁོར་ལོ་ཙམ་སྟེ། དེ་དག་ལ་ཡང་གཟུགས་སྣ་ཚོགས་ཀྱི་རྒྱན་མང་པོ་འཁོད་པར་མཐོང་སྟེ། འདི་ལྟར་བུད་མེད་ཀྱི་གཟུགས་དང་། སྐྱེས་པའི་གཟུགས་དང་། ཁྱེའུའི་གཟུགས་དང་། 
བུ་མོའི་གཟུགས་དང་། བརྒྱ་བྱིན་གྱིས་གཟུགས་དང་། ཚངས་པའི་གཟུགས་དང་། འཇིག་རྟེན་གྱི་མགོན་པོའི་གཟུགས་དང་། ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་
མི་འམ་ཅི་དང་། ལྟོ་འཕྱེ་ཆེན་པོའི་གཟུགས་དང་། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའི་གཟུགས་དང་། འགྲོ་བ་ཐམས་ཅད་ཀྱི་གཟུགས་ཀྱི་དབྱིབས་སུ་འདུག་པའི་ལུས་ཁ་
དོག་སྣ་ཚོགས་རྣམ་པ་དུ་མ་དང་ལྡན་པ་མང་པོ་ཐལ་མོ་སྦྱར་ཏེ། ལུས་འདུད་ཅིང་ཕྱག་འཚལ་བར་འཁོད་པར་མཐོང་ངོ་། །དེ་བཞིན་གཤེགས་པའི་སྐུ་གཟུགས་མྱི་ཆེན་པོའི་མཚན་སུམ་བཅུ་རྩ་གཉིས་

77-1-253b

ཀྱིས་བརྒྱན་པ་བསྐྱིལ་མོ་དྲུང་དུ་བཅས་ཏེ་བཞུགས་པ་དག་མཐོང་ངོ་། །ས་ཆེན་པོའི་གཞི་བཻ་ཌཱུརྱ་ལས་གྲུབ་པ། མྱིག་མངས་རིས་སུ་འདུག་པའི་མྱིག་མངས་རིས་རེ་རེ་ནས་ཀྱང་གཟུགས་རྙན་རྣམ་པར་དམྱིགས་པ་
བསམ་གྱི་མི་ཁྱབ་པ་མང་པོ་མཐོང་བར་གྱུར་ཏེ། ཁང་པ་བརྩེགས་པ་ལ་ལ་ལས་ནི་ཞིང་གི་གཟུགས་རྙན་རྣམ་པར་དམིགས་པ། ལ་ལ་ལས་ནི་བྱང་ཆུབ་སེམས་དཔའི་གཟུགས་རྙན་རྣམ་པར་དམིགས་པ། ལ་
ལ་ལས་ནི་སངས་རྒྱས་ཀྱི་གཟུགས་རྙན་རྣམ་པར་དམིགས་པ་མཐོང་བར་གྱུར་ཏེ། ཁང་པ་བརྩེགས་པ་དེ་དག་གི་རྒྱན་དང་། ལྷབ་ལྷུབ་ཇི་སྙེད་པ་དེ་དག་ཐམས་ཅད་ཀྱང་མྱིག་མངས་རིས་རེ་རེ་ལ་གཟུགས་བརྙན་
སྣང་བར་མཐོང་ངོ་། །རིན་པོ་ཆེའི་ཤིང་རིན་པོ་ཆེའི་མེ་ཏོག་དང་འབྲས་བུའི་མཛོད་སྣ་ཚོགས་དང་ལྡན་པ་དེ་དག་ཐམས་ཅད་ལས་ཀྱང་ལུས་ཕྱེད་ཙམ་བྱུང་བའི་གཟུགས་དབྱིབས་སྣ་ཚོགས་དང་ཁ་དོག་སྣ་ཚོགས་སུ་
འདུག་པ་མང་པོ་འཐོན་པར་མཐོང་སྟེ། ལ་ལ་ལས་ནི་སངས་རྒྱས་ཀྱིས་སྐུ་ཕྱེད་བྱུང་བ་དང་། ལ་ལ་ལས་ནི་བྱང་ཆུབ་སེམས་དཔའི་ལུས་ཕྱེད་ཙམ་བྱུང་བ་དང་། ལ་ལ་ལས་ནི་ལྷ་དང་ཀླུ་དང་། གནོད་སྦྱིན་དང་། དྲི་
ཟ་དང་ལྷ་མ་ཡིན་དང་། ནམ་མཁའ་ལྡིང་དང་། མྱི་འམ་ཅི་དང་། ལྟོ་འཕྱེ་ཆེན་པོའྀ་ལུས་ཕྱེད་ཙམ་བྱུང་བ་དང་། ལ་ལ་ལས་ནི་བརྒྱ་བྱིན་དང་ཚངས་པ་དང་། འཇིག་རྟེན་གྱི་མགོན་པོའི་ལུས་ཕྱེད་ཙམ་བྱུང་བ་དང་། ལ་ལ་ལས་
ནི་འཁོར་ལོས་བསྒྱུར་བ་དང་། མྱིའི་དབང་པོའི་ལུས་ཕྱེད་ཙམ་བྱུང་བ་མཐོང་སྟེ། ལ་ལ་ལས་ནི་རྒྱལ་བུ་གཞོན་ནུ་དང་། ཚོང་དཔོན་དང་ཁྱིམ་བདག་དང་བློན་པོ་དང་། སྐྱེས་པ་དང་བུད་མེད་དང་ཁྱེའུ་དང་བུ་མོ་དང་དགེ་སློང་དང་། 
དགེ་སློང་མ་དང་། དགེ་བསྙེན་དང་། དགེ་བསྙེན་མའི་ལུས་ཕྱེད་ཙམ་བྱུང་བ་མཐོང་སྟེ། ལ་ལའི་ལག་ནས་མེ་ཏོག་གི་ཕྲེང་བ་སྤྱོད་པ་དང་། ལ་ལའི་ལག་ནས་ནི་རིན་པོ་ཆེའི་ཕྲེང་བ་མངོན་པར་སྤྱོད་པ་དང་། ལ་ལའི་ལག་

77-1-254a

ནས་ནི་རྒྱན་ཐམས་ཅད་མངོན་པར་ཐོགས་པ་དང་། ལ་ལ་ནི་ལུས་འདུད་ཅིང་ཐལ་མོ་སྦྱར་ཏེ་མྱིག་མི་འགེབས་པར་ལྟ་ཞིང་ཕྱག་འཚལ་བ་དང་། ལ་ལ་ནི་མངོན་པར་བསྟོད་པ་དང་། ལ་ལ་ནི་མཉམ་པར་
བཞག་པ་དང་། ལ་ལ་ནི་གསེར་གྱི་ཁ་དོག་ཏུ་འདུག་པ་དང་། ལ་ལ་ནི་དངུལ་གྱི་ཁ་དོག་ཏུ་འདུག་པ་དང་། ལ་ལ་ནི་བྱི་རུའི་ཁ་དོག་དུ་འདུག་པ་དང་། ལ་ལ་ནི་རིན་པོ་ཆེ་བཻ་ཌཱུརྱ་སྔོན་པོའི་ཁ་དོག་དུ་འདུག་པ་དང་། ལ་ལ་ནི་རིན་པོ་
ཆེ་ཨིན་དྲ་ནཱ་ལའི་ཁ་དོག་དུ་འདུག་པ་དང་། ལ་ལ་ནི་ནོར་བུ་རིན་པོ་ཆེ་རྣམ་པར་སྣང་བའི་ཁ་དོག་ཏུ་འདུག་པ་དང་། ལ་ལ་ནི་རིན་པོ་ཆེ་ཐམས་ཅད་ཀྱི་ཁ་དོག་དུ་འདུག་པ་དང་། ལ་ལ་ནི་མེ་ཏོག་ཙམ་པ་ཀའི་ཁ་དོག་དུ་
འདུག་པ་དང་། ལ་ལ་ནི་འོད་ཀྱི་ལུས་དང་། ལ་ལ་ནི་མཚན་གྱི་རྣམ་པར་བྲིས་པའི་ལུས་སུ་མཐོང་བར་གྱུར་ཏོ། །ཟླ་གམ་དེ་དག་ལས་ཀྱང་ཉི་ཟླ་དང་གཟའ་སྐར་གྱི་གཟུགས་རྙན་གྲངས་མེད་པ་མང་པོ་འཐོན་ཏེ། 
ཕྱོགས་བཅུ་སྣང་བར་བྱེད་པ་མཐོང་བར་གྱུར་ཏོ། །ཁང་པ་དང་གཞལ་མེད་ཁང་དང་ཁང་པ་བརྩེགས་པའི་རྩིག་ངོས་དེ་དག་ཐམས་ཅད་ཀྱང་རིན་པོ་ཆེ་ཐམས་ཅད་ཀྱིས་མྱིག་མངས་རིས་སུ་བྲིས་པར་མཐོང་སྟེ། 
རིན་པོ་ཆེའི་མྱིག་མངས་རིས་དེ་དག་ཐམས་ཅད་ལས་ཀྱང་བྱང་ཆུབ་སེམས་དཔའ་བྱམས་པས་བྱང་ཆུབ་སེམས་དཔའི་སྤྱོད་པ་རིམ་པས་ཇི་ལྟར་སྤྱད་པའི་བྱང་ཆུབ་སེམས་དཔའི་སྤྱོད་པ་ཐམས་ཅད་
རིམ་པས་མཐོང་བར་གྱུར་ཏེ། མྱིག་མངས་རིས་ལ་ལ་ལས་ནི་བྱང་ཆུབ་སེམས་དཔའ་བྱམས་པས་མགོ་བྱིན་པ་མཐོང་ངོ་། །ལ་ལ་ལས་ནི་མྱིག་བྱིན་པ་དང་། ལ་ལ་ལས་ནི་ལག་པ་བྱིན་པ་དང་། ལ་ལ་ལས་
ནི་གཙུག་གི་རིན་པོ་ཆེ་བྱིན་པ་དང་། ལ་ལ་ལས་ནི་ཐོར་པག་དང་བཅས་པའི་གཙུག་གི་རིན་པོ་ཆེ་བྱིན་པ་དང་། ལ་ལ་ལས་ནི་སོ་བྱིན་པ་དང་། ལ་ལ་ལས་ནི་ལྕེ་བྱིན་པ་དང་། ལ་ལ་ལས་ནི་རྣ་བ་དང་སྣ་བྱིན་པ་དང་། 

77-1-254b

ལ་ལ་ལས་ནི་སྙིང་བྱིན་པ་དང་། ལ་ལ་ལས་ནི་ཤ་དང་རྐང་བྱིན་པ་དང་། ལ་ལ་ལས་ནི་ཁྲག་བྱིན་པ་དང་། ལ་ལ་ལས་ནི་ལྤགས་པ་དང་པྲི་བྱིན་པ་དང་། ལ་ལ་ལས་ནི་སེན་མོ་ཤ་དང་བཅས་པར་བྱིན་པ་དང་། ལ་ལ་
ལས་ནི་དྲ་བར་འབྲེལ་བ་དང་། བཅས་པའི་སོར་མོ་བྱིན་པ་དང་། ལ་ལ་ལས་ནི་བུ་དང་བུ་མོ་དང་ཆུང་མ་བྱིན་པ་དང་། ལ་ལ་ལས་ནི་རིན་པོ་ཆེའི་ཕུང་པོ་བྱིན་པ་དང་། ལ་ལ་ལས་ནི་གྲོང་དང་གྲོང་ཁྱེར་དང་། ལྗོངས་
དང་ཡུལ་དང་ཁམས་དང་། རྒྱལ་པོའི་གནས་བྱིན་པ་དང་། ལ་ལ་ལས་ནི་འཛམ་བུའི་གླིང་བྱིན་པ་དང་། ལ་ལ་ལས་ནི་གླིང་བཞི་བྱིན་པ་དང་། ལ་ལ་ལས་ནི་རྒྱལ་སྲིད་ཀྱི་དབང་ཕྱུག་བྱིན་པ་དང་། ལ་ལ་ལས་ནི་
རྒྱལ་པོའི་ཁྲི་བྱིན་པ་དང་། ལ་ལ་ལས་ནི་བྲན་ཕོ་མོས་བྱིན་པ་དང་། ལ་ལ་ལས་ནི་བཙུན་མོའི་འཁོར་བྱིན་པ་དང་། ལ་ལ་ལས་ནི་བཟའ་ཤིང་གི་ར་བ་དང་། དཀའ་ཐུབ་ཀྱི་ནགས་ཚལ་བྱིན་པ་དང་། ལ་ལ་
ལས་ནི་གདུགས་དང་རྒྱལ་མཚན་དང་བ་དན་བྱིན་པ་དང་། ལ་ལ་ལས་ནི་མེ་ཏོག་དང་ཕྲེང་བ་དང་། བྱུག་པ་བྱིན་པ་དང་། ལ་ལ་ལས་ནི་ནད་ཀྱི་རྩི་བྱིན་པ་དང་། ལ་ལ་ལས་ནི་ཁ་ཟས་དང་སྐོམ་གྱི་རྣམ་
པ་མང་པོ་བྱིན་པ་དང་། ལ་ལ་ལས་ནི་ཡོ་བྱད་ཐམས་ཅད་བྱིན་པ་དང་། ལ་ལ་ལས་ནི་གནས་ཐམས་ཅད་བྱིན་པ་དང་། ལ་ལ་ལས་ནི་གཞལ་བའི་སྣོད་རིན་པོ་ཆེས་གང་བ་བྱིན་པ་དང་། ལ་ལ་ལས་
ནི་རིན་པོ་ཆེའི་ཤིང་རྟ་བྱིན་པ་དང་། ལ་ལ་ལས་ནི་བཙོན་ར་ན་འཁོད་པ་ཐར་བར་བྱེད་པ་དང་། ལ་ལ་ལས་ནི་གསད་པར་ཆད་པ་ལས་ཐར་བར་བྱེད་པ་དང་། ལ་ལ་ལས་ནི་བྱིས་པ་གསོ་བ་བྱེད་པ་དང་། ལ་
ལ་ལས་ནི་ལམ་སྟོར་བ་ལ་ལམ་སྟོན་པ་དང་། ལ་ལ་ལས་ནི་མཉན་པར་གྱུར་ཏེ། ཆུ་ཀླུང་གི་རྒྱུད་ལ་གྲུ་འདོར་བ་དང་། ལ་ལ་ལས་ནི་རྟའི་རྒྱལ་པོ་སྟོབས་ཀྱིས་སྒྲོལ་བར་གྱུར་ཏེ། རྒྱ་མཚོ་ཆེན་

77-1-255a

པོའི་སྲིན་མོའི་གླིང་དུ་ཕྱིན་པར་གྱུར་པའི་སེམས་ཅན་ཡོངས་སུ་སྐྱོབ་པ་དང་། ལ་ལ་ལས་ནི་དྲང་སྲོང་ཆེན་པོར་གྱུར་ཏེ། བསྟན་པ་མངོན་པར་བསྒྲུབ་པ་དང་། ལ་ལ་ལས་ནི་འཁོར་ལོས་བསྒྱུར་
བར་གྱུར་ཏེ། སེམས་ཅན་དགེ་བ་བཅུའི་ལས་ཀྱི་ལམ་ལ་འགོད་པ་དང་། ལ་ལ་ལས་ནི་སྨན་པར་གྱུར་ཏེ། ན་བའི་གསོས་སྨན་དང་ལ་ལ་ལས་ནི་ཕ་མ་ལ་ཕུ་དུད་བྱེད་པ་དང་། ལ་ལ་ལས་ནི་དགེ་བའི་
བཤེས་གཉེན་ལ་རིམ་གྲོ་བྱེད་པ་དང་། ལ་ལ་ལས་ནི་ཉན་ཐོས་ཀྱི་ཁ་དོག་དང་། གཟུགས་ཀྱིས་སེམས་འདུལ་བ་ལ་བརྩོན་པ་དང་། ལ་ལ་ལས་ནི་རང་སངས་རྒྱས་ཀྱི་ཁ་དོག་དང་། གཟུགས་ཀྱི་སེམས་ཅན་
འདུལ་བ་ལ་བརྩོན་པ་དང་། ལ་ལ་ལས་ནི་བྱང་ཆུབ་སེམས་དཔའི་ཁ་དོག་དང་། གཟུགས་ཀྱི་སེམས་ཅན་འདུལ་བ་ལ་བརྩོན་པ་དང་། ལ་ལ་ལས་ནི་སངས་རྒྱས་ཀྱི་སྐུ་མདོག་དང་སྐུ་གཟུགས་ཀྱིས་
སེམས་ཅན་འདུལ་བ་ལ་བརྩོན་པར་བྱ་བ་དང་། ལ་ལ་ལས་ནི་སྐྱེས་པའི་རབས་ཀྱི་ཁྱད་པར་ཐམས་ཅད་ཀྱི་སྐྱེ་བ་ཡོངས་སུ་བསྟན་ཏེ། སེམས་ཅན་ཡོངས་སུ་སྨྱིན་པར་བྱ་བ་དང་། ལ་ལ་ལས་ནི་
ཆོས་སྨྲ་བའི་གཟུགས་ཀྱི་དེ་བཞིན་གཤེགས་པའི་བསྟན་པ་ལ་ཞུགས་ཏེ། ལུང་འབོགས་པ་དང་། ཁ་ཏོན་བྱ་བ་དང་ཚུལ་བཞིན་དུ་དཔྱོད་པར་བྱ་བ་ལ་བརྩོན་པ་དང་། དེ་བཞིན་གཤེགས་པའི་མཆོད་
རྟེན་ལ་རྒྱན་གྱི་བརྒྱན་པར་བྱེད་པ་དང་། དེ་བཞིན་གཤེགས་པའི་སྐུ་གཟུགས་བྱེད་དུ་འཇུག་པ་དང་། སངས་རྒྱས་མཆོད་པ་ལ་སེམས་ཅན་ཡོངས་སུ་འདུལ་བ་དང་། སྤོས་དང་བྱུག་པ་གསོལ་ཞིང་
འབྲུ་མར་དྲི་ཞིམ་པོས་བྱུག་པ་དང་། དྲིལ་བུ་དང་། མེ་ཏོག་གི་ཕྲེང་བ་གསོལ་བ་ལ་སྩོགས་པ། སངས་རྒྱས་ཀྱི་མཆོད་པ་རྣམ་པ་ཐམས་ཅད་ལ་བརྩོན་པ་དང་། དགེ་བ་བཅུའི་ལས་ཀྱི་ལམ་ལ་སེམས་

77-1-255b

ཅན་རབ་ཏུ་འགོད་པ་དང་། བསླབ་པའི་གནས་ལྔ་དང་། གསོ་སྦྱིན་གྱི་ཡན་ལག་བརྒྱད་དང་། སངས་རྒྱས་དང་ཆོས་དང་དགེ་འདུན་ལ་སྐྱབས་བཙལ་བ་དང་། རབ་ཏུ་འབྱུང་བ་དང་། ཆོས་མཉན་པ་དང་ལུང་
མནོད་པ་དང་། ཁ་ཏོན་བྱ་བ་དང་། ཚུལ་བཞིན་ཡིད་ལ་བྱ་བ་ལ་སེམས་ཅན་འགོད་པར་བྱེད་པ་དང་། ཆོས་ཀྱི་གཏམ་བྱ་བའི་ཕྱིར་སེང་གེའི་སྟན་ལ་འདུག་ཅིང་སངས་རྒྱས་ཀྱི་བྱང་ཆུབ་རྣམ་པར་འགྲེལ་
བ་དང་། དེ་ལྟར་བྱང་ཆུབ་སེམས་དཔའ་བྱམས་པས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པར་ཕ་རོལ་ཏུ་ཕྱིན་པ་དྲུག་ལ་སྤྱད་པ་དེ་དག་ཐམས་ཅད་ཚོང་དཔོན་གྱི་བུ་ནོར་བཟངས་ཀྱིས་མྱིག་མངས་རིས་
དེ་དག་ལས་རྣམ་པ་གཞན་དང་གཞན་དུ་མཐོང་བར་གྱུར་ཏོ། །དེས་ཁང་པ་བརྩེགས་པ་ལ་ལར་ནི་བྱང་ཆུབ་སེམས་དཔའ་བྱམས་པས་དགེ་བའི་བཤེས་གཉེན་ཇི་སྙེད་ཅིག་བསྙེན་བཀུར་བ་དེ་དག་ཐམས་
ཅད་ཀྱི་རྣམ་པར་འཕྲུལ་པའི་རྒྱན་ཐམས་ཅད་ཀྱང་མཐོང་བར་གྱུར་ཏེ། དགེ་བའི་བཤེས་གཉེན་དེ་དག་ཐམས་ཅད་ཀྱི་དྲུང་དུ་བདག་ཉིད་ཕྱིན་ཅིང་། ཚུར་ཤོག་ནོར་བཟངས་ལེགས་པར་འོངས་སམ་
མི་ངལ་ལམ། འདིར་བྱང་ཆུབ་སེམས་དཔའ་བསམ་གྱིས་མི་ཁྱབ་པ་འདི་དག་ལ་ལྟོས་ཤིག །ཅེས་བསྒོ་ཞིང་གཏམ་བྱེད་པར་གྱུར་ཏེ། དེ་ལྟར་ཚོང་དཔོན་གྱི་བུ་ནོར་བཟངས་ཀྱི་ཁང་པ་བརྩེགས་
པ་དེ་དག་རེ་རེ་དང་། དམིགས་པ་དེ་དག་རེ་རེ་ལས་ཀྱང་བསམ་གྱིས་མི་ཁྱབ་པའི་རྒྱན་དང་། ཡུལ་རྣམ་པར་སྤྲུལ་པ་འདི་དག་དང་གཞན་དག་ཀྱང་གྲངས་མེད་པ་མང་པོ་མཐོང་བར་གྱུར་ཏེ། དྲན་པའི་
མཐུ་ཉམས་པ་མེད་པ་དང་། མིག་ཡོངས་སུ་དག་པ་ཕྱོགས་ཀུན་ཏུ་རྣམ་པར་བལྟ་བ་དང་། ལྷག་མཐོང་ལ་ལྟ་བའི་ཡེ་ཤེས་སྒྲིབ་པ་མེད་པ་དང་། བྱང་ཆུབ་སེམས་དཔའི་ཡེ་ཤེས་དང་། བྱིན་གྱི་

77-1-256a

རླབས་ཀྱི་དབང་རབ་ཏུ་ཐོབ་པ་དང་། བྱང་ཆུབ་སེམས་དཔའི་འདུ་ཤེས་ཀྱི་རྣམ་པ་ལ་ཞུགས་པའི་ཡེ་ཤེས་ཀྱི་ས་ལ་གནས་ཏེ་མཐའ་ཡས་པའི་རྒྱན་དང་། ཡུལ་རྣམ་པར་སྤྲུལ་པ་དེ་དག་ཐམས་
ཅད་མཐོང་བར་གྱུར་ཏོ། །འདི་ལྟ་སྟེ་དཔེར་ན། སྐྱེས་བུ་གཉིད་ཀྱིས་ལོག་པའི་རྨི་ལམ་དུ་གཟུགས་ཀྱི་དམིགས་པའི་ཁྱད་པར་སྣ་ཚོགས་མང་པོ་ཞིག་མཐོང་བར་གྱུར་ཏེ། འདི་ལྟར་ཁྱིམ་དང་གཞལ་མེད་ཁང་
མདངས་དགའ་བ་འམ། གྲོང་དང་གྲོང་ཁྱེར་དང་། ལྗོངས་དང་ཡུལ་མདངས་དགའ་བ་འམ། བཟའ་ཤིང་གི་ར་བ་དང་། ཀུན་དགའ་ར་བ་དང་། དཀའ་ཐུབ་ཀྱི་ནགས་ཚལ་མདངས་དགའ་བ་དང་། ཤིང་དང་ཆུ་
ཀླུང་དང་རྫིང་དང་རི་མདངས་དགའ་བ་འམ། གོས་དང་ཁ་ཟས་དང་། བཏུང་བའི་ལོངས་སྤྱོད་ཉམས་སུ་བདེ་བ་འམ། གླུ་དང་སིལ་སྙན་དང་། རོལ་མོའི་སྒྲ་སྙན་པ་སྣ་ཚོགས་ཀྱིས་རྩེ་བ་ཉམས་སུ་དགའ་བ་
ཞིག་མཐོང་ངམ། ཕ་མ་དང་གཉེན་བཤེས་དང་བདག་ཉིད་འགྲོགས་པར་ཤེས་པར་གྱུར་པ་འམ། རྒྱ་མཚོ་ཆེན་པོ་དང་། རིའི་རྒྱལ་པོ་རི་རབ་དང་། ལྷའི་གནས་ཐམས་ཅད་དང་། འཛམ་བུའི་གླིང་དག་ན་
དཔག་ཚད་བརྒྱ་སྟོང་ཕྲག་དུ་མར་གནས་པར་ཤེས་པ་འགྱུར་བ་ལ། ཁྱིམ་འམ་གནས་དེ་ཡང་ཤིན་ཏུ་ཡངས་ཤིང་ཡོན་ཏན་དང་རྒྱན་ཐམས་ཅད་ཀྱིས་ཡོངས་སུ་བརྒྱན་པར་མཐོང་སྟེ། ཉིན་པར་ཅིག་ཡིན་
པར་ཤེས་ཀྱང་ནམ་དེ་ཡང་རིང་བ་དང་། ཐུང་བར་བྱེ་བྲག་མི་འབྱེད་ལ་རྨི་ལམ་ཡིན་པ་ཙམ་དུའང་མི་ཤེས་སོ། །བདག་ཉིད་བདེ་བའི་ཡོ་བྱད་ཐམས་ཅད་དང་ལྡན་ཞིང་ལུས་ཀྱི་འདུ་བྱེད་ཟོ་མདོག་བདེ་ལ་སྙོམས་
པ་དང་གཉིད་མེད་དེ་མི་དགའ་བ་ཐམས་ཅད་ཡོངས་སུ་བསྩལ་བས་དགའ་བ་དང་། བདེ་བ་རྒྱ་ཆེན་པོ་ཉམས་སུ་མྱོང་སྟེ། ཡུན་ཀྱང་རིང་མོ་ཞིག་ལོན་པ་སྙམ་ནས། ཉིན་ཅིག་གམ། ཉིན་བདུན་ནམ། ཟླ་

77-1-256b

བ་ཕྱེད་དམ་ཟླ་བ་གཅིག་གམ། ལོ་གཅིག་གམ། ལོ་བརྒྱ་འམ། དེ་བས་ཀྱང་རིང་བ་ཞིག་ལོན་པ་ཙམ་དུ་ཤེས་པར་གྱུར་ནས་སད་ན་དེ་ཐམས་ཅད་ཀྱང་རྗེས་སུ་དྲན་ནོ། །དེ་བཞིན་དུ་ཚོང་དཔོན་གྱི་
བུ་ནོར་བཟངས་ཀྱིས་ཀྱང་བྱང་ཆུབ་སེམས་དཔའི་བྱིན་གྱིས་རླབས་དང་། ཁམས་གསུམ་ཐམས་ཅད་རྨི་ལམ་ལྟ་བུར་ཡང་དག་པར་གཞོལ་བའི་ཡེ་ཤེས་ཀྱིས་ཆུང་བའི་འདུ་ཤེས་འགགས་པའི་སེམས་དང་
ལྡན་པར་གྱུར་ཏེ། བྱང་ཆུབ་སེམས་དཔའི་འདུ་ཤེས་གྱི་རྣམ་པ་ཡངས་ཤིང་རྒྱ་ཆེ་བ་དང་། སྒྲིབ་པ་མེད་པ་ལ་གནས་ཤིང་། བྱང་ཆུབ་སེམས་དཔའི་རྒྱན་གྱི་ཡུལ་ཁོང་དུ་ཆུད་ལ། བྱང་ཆུབ་སེམས་
དཔའི་ཚུལ་ལ་འཇུག་པ་བསམ་གྱིས་མི་ཁྱབ་པའི་རྗེས་སུ་འབྲང་བའི་བློ་དང་ལྡན་པས་རྒྱན་རྣམ་པར་སྤྲུལ་པ་དེ་དག་ཐམས་ཅད་ཀྱང་མཐོང་བར་གྱུར་ཏོ། །ཤེས་པར་གྱུར་ཏོ། །ཉམས་སུ་མྱོང་བར་
གྱུར་ཏོ། །རྣམ་པར་བྱང་བར་གྱུར་ཏོ། །མཚན་མར་བྱས་པར་གྱུར་ཏོ། །དམིགས་ཀྱིས་རྟོགས་པར་གྱུར་ཏོ། །བདག་ཉིད་ཀྱང་དེ་དག་ན་འདུག་པར་ཤེས་པར་གྱུར་ཏོ། །འདི་ལྟ་སྟེ་དཔེར་ན། མི་ནད་པ་སེམས་
ཀྱི་རྒྱུད་ཐ་མ་བྱུང་བར་གྱུར་ཏེ། དེ་མ་ཐག་ཏུ་སྐྱེ་བའི་སེམས་ཉེ་བར་གནས་ནས་ལས་ཀྱི་སྲིད་པ་མངོན་དུ་གྱུར་ན་ལས་ཇི་ལྟ་བུར་བྱས་ཤིང་བསགས་པའི་རྣམ་པར་སྨྱིན་པ་ལས་མི་དགེ་བའི་རྐྱེན་གྱིས་
ནི་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། ཡི་དགས་ཀྱི་ཡུལ་ལམ། གཤིན་རྗེའི་མྱི་ལག་ཆ་གཉིས་པ་ཐོགས་པ་གཤེ་ཞིང་ཁྲོ་བ་དག་ཀྱང་མཐོང་བར་འགྱུར། སེམས་ཅན་
དམྱལ་བའི་ངུད་པོ་དང་། འོ་དོད་ཀྱི་སྒྲ་ཡང་ཐོས་པར་གྱུར་ལ་བ་ཚའི་ཆུ་དེ་དག་ཀྱང་མཐོང་སྟེ། སྤུ་གྲིའི་སོ་གཤིབས་པའི་རི་དེ་དག་དང་། ལྕགས་ཀྱི་ཤལ་མ་རིའི་སྡོང་པོ་དེ་དག་དང་། རལ་གྲིའི་སོ་

77-1-257a

ནགས་ཚལ་དེ་དག་ཀྱང་མཐོང་བར་གྱུར་ཏམ། སེམས་ཅན་དམྱལ་བ་དེ་དག་ཀྱང་ཀུན་ནས་འབར་ཞིང་ཡོངས་སུ་འབར་བ་དང་། རབ་ཏུ་འབར་བ་དང་། ལྕགས་ཀྱི་བུམ་པ་གཅིག་ཏུ་
འབར་བ་དེ་དག་ཀྱང་མཐོང་བར་གྱུར་ལ་གནོད་པ་དེ་དག་ཐམས་ཅད་ཀྱིས་ཀྱང་གནོད་པར་བྱ་ཞིང་ཚོར་བ་དེ་དག་ཀྱང་ཉམས་སུ་མྱོང་བ་ཙམ་དུ་ཤེས་པར་གྱུར་ཏེ། སེམས་ཅན་དམྱལ་བ་པ་དེ་དག་ཀྱང་
མེའི་གདུང་བས་སྡུག་བསྔལ་བ་ཞིག་ཏུ་མཐོང་ངམ། བདག་གིས་མྱོང་བར་གྱུར་ཏམ། ལས་དགེ་བའི་ཚོགས་ཀྱིས་ལྷའི་ཁང་པ་དང་གནས་ཤིག་མཐོང་བར་གྱུར་ཏམ། ལྷའི་འཁོར་དང་། ལྷ་
མོའི་ཚོགས་དང་རྒྱན་རྣམ་པར་ཕྱེ་བ་ཐམས་ཅད་ཀྱང་མཐོང་བར་གྱུར་ཏེ། བཟའ་ཤིང་གི་ར་བ་དང་། དཀའ་ཐུབ་ཀྱི་ནགས་ཚལ་དང་། ཆུ་ཀླུང་དང་རྫིང་དང་། རིན་པོ་ཆེའི་རི་དང་། ཡིད་བཞིན་གྱི་ཤིང་
དང་། ལོངས་སྤྱོད་མང་པོ་མཐོང་ངོ་། །ཉམས་སུ་མྱོང་བར་གྱུར་ཏེ། ཚེའི་ཡུན་ཀྱང་དེ་དང་མཉམ་པར་ཤེས་པར་གྱུར་ན། དེ་ནི་འདི་ནས་ཀྱང་འཕོས་པ་མེད། དེར་ཡང་སྐྱེས་པ་མེད་དེ་མི་སྣང་བར་
མ་གྱུར་བཞིན་དུ་ལས་ཀྱི་ཡུལ་བསམ་གྱིས་མྱི་ཁྱབ་པས་བྱ་བའི་རྣམ་པ་དེ་ལྟ་བུ་དག་ཤེས་ཤིང་མཐོང་ལ་ཉམས་སུ་མྱོང་བར་རུང་ངོ་། དེ་བཞིན་དུ་ཚོང་དཔོན་གྱི་བུ་ནོར་བཟངས་ཀྱིས་བྱང་ཆུབ་སེམས་
དཔའི་ལས་གྱི་ཡུལ་བསམ་གྱིས་མི་ཁྱབ་པའི་ཕྱིར་རྒྱན་རྣམ་པར་སྤྲུལ་པ་དེ་དག་ཐམས་ཅད་ཀྱང་མཐོང་བར་གྱུར་ཏོ། །འདི་ལྟ་སྟེ་དཔེར་ན་སྐྱེས་བུ་འབྱུང་པོའི་གདོན་གྱིས་ནོན་པས་ནི་གཟུགས་ཀྱི་
རྣམ་པ་སྣ་ཚོགས་མང་པོ་མཐོང་སྟེ། ཅི་དྲིས་པ་དེ་དག་གི་ལུང་ཡང་སྟོན་ཏོ། །དེ་བཞིན་དུ་ཚོང་དཔོན་གྱི་བུ་ནོར་བཟངས་ཀྱིས་བྱང་ཆུབ་སེམས་དཔའི་ཡེ་ཤེས་དང་བྱིན་གྱིས་རླབས་ཀྱི་མཐུས་རྒྱན་དེ་དག་

77-1-257b

ཐམས་ཅད་ཀྱང་མཐོང་བར་གྱུར་ཏོ། །འདི་ལྟ་སྟེ་དཔེར་ན། ཀླུའི་ཁང་པར་ཕྱིན་པའི་སྐྱེས་བུ་ནི་ཀླུའི་འདུ་ཤེས་ཀྱི་རྣམ་པ་ལ་ཞུགས་པས། ཉི་མ་གཅིག་གམ་ཉི་མ་བདུན་ནམ། ཟླ་བ་ཕྱེད་དམ་ཟླ་བ་
གཅིག་གམ། ལོ་གཅིག་གམ། ལོ་བརྒྱར་ཡང་འདུ་ཤེས་ཀྱི་རྣམ་པར་ཤེས་ཏེ། ཀླུའི་འདུ་ཤེས་ཀྱི་རྣམ་པ་དང་བྲལ་ནས། མིའི་འདུ་ཤེས་ཀྱིས་རྣམ་པར་ན་ཡིད་ཙམ་ལས་མ་ལོན་པར་མཐོང་ངོ་། །དེ་
བཞིན་དུ་ཚོང་དཔོན་གྱི་བུ་ནོར་བཟངས་ཀྱིས་བྱང་ཆུབ་སེམས་དཔའི་འདུ་ཤེས་ཀྱི་རྣམ་པས་མ་བཏང་བའི་བློ་དང་ལྡན་པས་ཀྱང་བྱང་ཆུབ་སེམས་དཔའ་བྱམས་པའི་བྱིན་གྱིས་རླབས་ཀྱིས་ཡུད་ཙམ་གཅིག་པོ་དེ་
ཡང་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོར་ཤེས་པར་གྱུར་ཏོ། །འདི་ལྟ་སྟེ་དཔེར་ན། ཚངས་པ་ཆེན་པོའི་གཞལ་མེད་ཁང་འགྲོ་བ་ཐམས་ཅད་ན་རྒྱན་གྱི་དམ་པ་ཕུལ་ཞེས་བྱ་བ་ཡོད་དེ། དེའི་ནང་དུ་
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱང་གཟུགས་བརྙན་གྱི་ཚུལ་དུ་དམིགས་པ་ཐམས་ཅད་དང་མ་འདྲེས་པར་གསལ་བར་སྣང་ངོ་། །དེ་བཞིན་དུ་ཚོང་དཔོན་གྱི་བུ་ནོར་
བཟངས་ཀྱིས་ཀྱང་རྒྱན་དེ་དག་ཐམས་ཅད་དམིགས་པ་ཐམས་ཅད་དུ་ཕན་ཚུན་མ་འདྲེས་པ་དང་། ཕན་ཚུན་མ་འཛིངས་པར་གཟུགས་བརྙན་རབ་ཏུ་འབྱུང་བ་སྣང་ངོ་། །འདི་ལྟ་སྟེ་དཔེར་ན། རྒྱས་
པའི་སྐྱེ་མཆེད་ཀྱིས་སྙོམས་པར་འཇུག་པ་ལ་རྣམ་པར་སྤྱོད་པ་ལ་རྣམ་པར་སྤྱོད་པའི་དགེ་སློང་གཅིག་པུ་གཉིས་སུ་མེད་པར་ཁང་བུ་འམ། འཆག་ས་དང་། འདུག་པའི་གནས་ན་འདུག་གམ། འགྲེང་
བར་ཡང་རུང་སྟེ། འཇིག་རྟེན་ཐམས་ཅད་རྒྱས་པའི་སྐྱེ་མཆེད་གང་ལ་སྙོམས་པར་ཞུགས་པའི་ཡུལ་བཞིན་དུ་བསམ་གཏན་པའི་ཡུལ་བསམ་གྱི་མི་ཁྱབ་པར་མཐོང་ཞིང་ཉམས་སུ་མྱོང་ངོ་། །དེ་བཞིན་དུ་

77-1-258a

ཚོང་དཔོན་གྱི་བུ་ནོར་བཟངས་ཀྱིས་ཀྱང་ཡུལ་གང་ལ་ཞུགས་པའི་ཚུལ་བཞིན་དུ་རྒྱན་དེ་དག་ཐམས་ཅད་མཐོང་ཞིང་ཤེས་ཏེ། ཉམས་སུ་མྱོང་བར་གྱུར་ཏོ། །འདི་ལྟ་སྟེ་དཔེར་ན། དྲི་ཟའི་གྲོང་ཁྱེར་རྣམས་
ཀྱི་རྒྱན་དང་ལྷབ་ལྷུབ་ཐམས་ཅད་ནམ་མཁའི་དབྱིངས་ལས་བྱུང་བ་ནི་ཡོངས་སུ་སྣང་ཡང་ཅི་ལ་ཡང་སྒྲིབ་པར་མི་འགྱུར་རོ། །འདི་ལྟ་སྟེ་དཔེར་ན། གནོད་སྦྱིན་གྱི་གཞལ་མེད་ཁང་མིའི་ཁང་པ་ན་འདུག་པ་འམ། མིའི་
ཁང་པ་གནོད་སྦྱིན་གྱིས་ཁང་པའི་ཁོངས་ན་འདུག་པ་ནི་ཕན་ཚུན་ཐ་མི་དད་པའི་ལས་ཀྱི་ཡུལ་རྣམ་པ་ཇི་ལྟར་དག་པའི་ཚུལ་བཞིན་དུ་སྣང་ངོ་། །འདི་ལྟ་སྟེ་དཔེར་ན། རྒྱ་མཚོ་ཆེན་པོ་ལ་སྟོང་གསུམ་གྱི་སྟོང་ཆེན་
པོའི་འཇིག་རྟེན་གྱི་ཁམས་ཐམས་ཅད་ཀྱང་རྒྱའི་གཟུགས་བརྙན་ལྟར་སྣང་ངོ་། །འདི་ལྟ་སྟེ་དཔེར་ན། སྒྱུ་མའི་མཁན་པོ་ནི་སྔགས་དང་རིགས་སྔགས་དང་། རྩིའི་མཐུ་དང་བྱིན་གྱིས་རླབས་ཀྱིས་གཟུགས་ཀྱིས་
རྣམ་པ་ཐམས་ཅད་དང་བྱ་བ་ཐམས་ཅད་ཀྱང་ཡོངས་སུ་སྟོན་ཏོ། །དེ་བཞིན་དུ་ཚོང་དཔོན་གྱི་བུ་ནོར་བཟངས་ཀྱིས་ཀྱང་བྱང་ཆུབ་སེམས་དཔའ་བྱམས་པའི་བྱིན་གྱིས་རླབས་དང་། ཡེ་ཤེས་སྒྱུ་མ་བསམ་གྱིས་མི་ཁྱབ་པ་ལ་
ཞུགས་པས་བྱང་ཆུབ་སེམས་དཔའི་དབང་དང་བྱིན་གྱིས་རླབས་ཀྱི་ཡེ་ཤེས་ཆོས་ཐམས་ཅད་ཤེས་པ་སྒྱུ་མའི་སྟོབས་ཀྱི་མངོན་པར་བསྒྲུབ་པའི་མཐུས་རྒྱན་གྱི་ཡུལ་རྣམ་པར་སྤྲུལ་པ་དེ་དག་ཐམས་ཅད་མཐོང་བར་གྱུར་
ཏོ། །དེ་ནས་བྱང་ཆུབ་སེམས་དཔའ་བྱམས་པས་ཁང་པ་བརྩེགས་པ་དེའི་ནང་དུ་སོང་སྟེ། བྱིན་གྱིས་རླབས་དེ་དག་བརྟུལ་ནས། ཚོང་དཔོན་གྱི་བུ་ནོར་བཟངས་ལ་སེ་གོལ་གྱི་སྒྲ་བྱས་ཏེ། འདི་སྐད་ཅེས་སྨྲས་སོ། །
རིགས་ཀྱི་བུ་འདི་ནི་ཆོས་རྣམས་ཀྱི་ཆོས་ཉིད་ཡིན་གྱི་ལོངས། རིགས་ཀྱི་བུ་ཆོས་ཐམས་ཅད་ནི་རྣམ་པར་བསྒྲུབས་ན་ཉེ་བར་འགྲུབ་པའི་མཚན་ཉིད་དེ། བྱང་ཆུབ་སེམས་དཔའི་ཡེ་ཤེས་ཀྱི་བྱིན་གྱིས་རླབས་པའོ། །རང་བཞིན་

77-1-258b

དེ་ལྟ་བུ་སྟེ་ཡོངས་སུ་མ་གྲུབ་པའོ། །སྒྱུ་མ་དང་རྨི་ལམ་དང་གཟུགས་བརྙན་ལྟ་བུའོ། །དེ་ནས་ཚོང་དཔོན་གྱི་བུ་ནོར་བཟངས་སེ་གོལ་གྱི་སྒྲ་དེས་ཏིང་ངེ་འཛིན་དེ་ལས་ལངས་པར་གྱུར་པ་དང་། དེ་ལ་བྱང་ཆུབ་སེམས་དཔའ་བྱམས་
པས་སྨྲས་པ། རིགས་ཀྱི་བུ་ཁྱོད་ཀྱིས་བྱང་ཆུབ་སེམས་དཔའི་བྱིན་གྱིས་རླབས་རྣམ་པར་འཕྲུལ་པ་མཐོང་མོད། ཁྱོད་ཀྱིས་བྱང་ཆུབ་སེམས་དཔའི་ཚོགས་ཀྱི་མཐུ་དང་རྒྱུ་མཐུན་པ་མཐོང་མོད། ཁྱོད་ཀྱིས་བྱང་ཆུབ་
སེམས་དཔའི་སྨོན་ལམ་གྱི་ཡེ་ཤེས་ཀྱིས་རྣམ་པར་བསྒྲུབ་པ་མཐོང་མོད། ཁྱོད་ཀྱི་བྱང་ཆུབ་སེམས་དཔའི་གནས་མདངས་དགའ་བ་མཐོང་མོད། ཁྱོད་ཀྱིས་བྱང་ཆུབ་སེམས་དཔའ་ཡོངས་སུ་བསྡུ་བ་མཐོང་མོད། 
ཁྱོད་ཀྱིས་བྱང་ཆུབ་སེམས་དཔའི་འབྱུང་བའི་སྒོ་མཐོང་མོད། ཁྱོད་ཀྱིས་སངས་རྒྱས་ཀྱི་ཞིང་གི་ཡོན་ཏན་དང་རྒྱན་ཚད་མེད་པ་མཐོང་མོད། ཁྱོད་ཀྱིས་དེ་བཞིན་གཤེགས་པའི་སྨོན་ལམ་རྣམ་པ་ཐ་དད་པའི་ཁྱད་པར་མཐོང་
མོད། ཁྱོད་ཀྱིས་བྱང་ཆུབ་སེམས་དཔའི་རྣམ་པར་ཐར་པ་བསམ་གྱི་མི་ཁྱབ་པའི་རྗེས་སུ་འབྲང་བར་བྱས་མོད། ཁྱོད་ཀྱིས་བྱང་ཆུབ་སེམས་དཔའི་ཏིང་ངེ་འཛིན་གྱི་དགའ་བ་དང་བདེ་བ་མྱོང་མོད། ནོར་བཟངས་ཀྱི་
སྨྲས་པ། འཕགས་པ་དགེ་བའི་བཤེས་གཉེན་གྱི་བྱིན་གྱིས་རླབས་དང་། དགེ་བའི་བཤེས་གཉེན་གྱི་དགོངས་པ་དང་། དགེ་བའི་བཤེས་གཉེན་གྱི་མཐུས་མཐོང་ངོ་། །འཕགས་པ་རྣམ་པར་ཐར་པ་འདིའི་མིང་ཅི་
ཞེས་བགྱི་སྨྲས་པ། རིགས་ཀྱི་བུ་རྣམ་པར་ཐར་པ་འདི་ནི་དུས་གསུམ་གྱི་དམིགས་པ་ཐམས་ཅད་ལ་ཤེས་པ་རབ་ཏུ་ཞུགས་པའི་དྲན་པ་ཉམས་པ་མེད་པས་བརྒྱན་པའི་སྙིང་པོ་ཞེས་བྱ་བ་སྟེ། རིགས་ཀྱི་བུ་རྣམ་པར་ཐར་
པ་འདི་ལྟ་བུ་བརྗོད་དུ་མེད་པའི་ཡང་བརྗོད་དུ་མེད་པ་དག་ནི་ཚེ་གཅིག་གིས་ཐོས་པའི་བྱང་ཆུབ་སེམས་དཔའ་ཐོབ་བོ། །ནོར་བཟངས་ཀྱིས་སྨྲས་པ་འཕགས་པ་རྒྱན་དེ་དག་གང་དུ་མཆིས། སྨྲས་པ་གང་ནས་འོང་བ་དེར་

77-1-259a

རོ། །ནོར་བཟངས་ཀྱིས་སྨྲས་པ་གང་ནས་མཆིས་སྨྲས་པ། བྱང་ཆུབ་སེམས་དཔའི་ཡེ་ཤེས་ཀྱི་བྱིན་གྱིས་རླབས་མངོན་པར་བསྒྲུབས་པ་ལས་འོངས་སོ། །དེ་ནི་བྱིན་གྱིས་རླབས་དེ་ཉིད་ལ་གནས་ཤིང་
གང་ཡང་སོང་བ་མེད་ལ་འཕོས་པ་མེད་དོ། །ཕུང་པོར་གྱུར་པ་མེད་དོ། །ཚོགས་སུ་གྱུར་པ་མེད་དོ། །བརྩེགས་པར་གནས་པ་མེད་དོ། །དངོས་པོར་གནས་པ་མེད་དོ། །ཡུལ་ན་གནས་པ་མ་ཡིན་ནོ། །ཕྱོགས་
ན་གནས་པ་མ་ཡིན་ནོ། །རིགས་ཀྱི་བུ་འདི་ལྟ་སྟེ་དཔེར་ན། ཀླུ་རྣམས་ཀྱི་སྤྲིན་གྱི་དྲ་བ་ནི་ལུས་ལ་ཡང་མི་གནས། སེམས་ལ་ཡང་མི་གནས་ནང་ལ་ཡང་མི་གནས་མོད་ཀྱི་ཀླུའི་སེམས་ཀྱི་དབང་དང་ཀླུའི་དབང་
བསམ་གྱིས་མི་ཁྱབ་པས་ཆར་གྱི་རྒྱུན་ཚད་མེད་པ་དཀྱེ་བ་ནི་མེད་པ་མ་ཡིན་ཏེ། སྣང་ངོ་། །རིགས་ཀྱི་བུ་དེ་བཞིན་དུ་རྒྱན་དེ་དག་ཀྱང་ནང་ནའང་གནས་པ་མ་ཡིན། ཕྱི་རོལ་ན་གནས་པ་ཡང་མ་ཡིན་ཏེ། བྱང་
ཆུབ་སེམས་དཔའི་བྱིན་གྱིས་རླབས་ཀྱི་དབང་དང་། ཁྱོད་ཀྱི་སྣོད་བཟང་པོའི་ཕྱིར་མི་སྣང་བར་ཡང་མ་ཡིན་ནོ། །རིགས་ཀྱི་བུ་འདི་ལྟ་སྟེ་དཔེར་ན། སྒྱུ་མའི་མཁན་པོས་ནི་སྒྱུ་མའི་ཡན་ལག་ཐམས་
ཅད་ཡོངས་སུ་བསྟན་ཀྱང་གང་ནས་འོངས་པ་མེད། བཤིག་ཀྱང་གང་དུ་ཡང་འགྲོ་བ་མྱེད་དེ། དེ་འཕོ་བ་མྱེད་མོད་ཀྱི་སྔགས་དང་རྩིའི་མཐུས་ཡོངས་སུ་མི་སྣང་བ་མ་ཡིན་ནོ། །རིགས་ཀྱི་བུ་དེ་བཞིན་དུ་རྒྱན་
དེ་དག་ཀྱང་གང་དུ་ཡང་སོང་བ་མེད། གང་ནས་ཀྱང་འོངས་པ་མེད་ལ་གང་དུའང་ཕུང་པོར་གྱུར་པ་མྱེད་མོད་ཀྱི། བྱང་ཆུབ་སེམས་དཔའི་ཡེ་ཤེས་སྒྱུ་མ་བསམ་གྱི་མི་ཁྱབ་པ་ལ་ཤིན་ཏུ་བསླབས་པ་དང་། 
སྔོན་གྱི་སྨོན་ལམ་གྱིས་བྱིན་རླབས་དང་། ཡེ་ཤེས་ཀྱི་དབང་གིས་ཡོངས་སུ་མི་སྣང་བ་མ་ཡིན་ནོ། །ནོར་བཟངས་ཀྱི་སྨྲས་པ། འཕགས་པ་ཤུལ་ཇི་སྲྀད་ཅིག་ནས་གཤེགས་སྨྲས་པ། རིགས་ཀྱི་བུ་བྱང་

77-1-259b

ཆུབ་སེམས་དཔའ་རྣམས་འགྲོ་བ་ནི་འོང་བ་མེད་པར་འགྲོའོ། །གཡོ་བ་དང་གནས་པ་མེད་པར་འགྲོའོ། །གནས་དང་བརྟེན་མེད་པར་འགྲོའོ། །ཤི་འཕོ་དང་སྐྱེ་བ་མེད་པར་འགྲོའོ། །གནས་དང་འཕོ་བ་མེད་པར་
འགྲོའོ། །གཡོ་བ་དང་ལྡན་པ་མེད་པར་འགྲོའོ། །ལྟོས་པ་དང་གནས་མེད་པར་འགྲོའོ། །ལས་དང་རྣམ་པར་སྨིན་པ་མེད་པར་འགྲོའོ། །མྱི་སྐྱེ་བ་དང་མི་འགག་པར་འགྲོའོ། །རྟག་པ་མྱེད་པ་དང་ཆད་པ་མེད་པར་འགྲོ་
འོ། །གཞན་ཡང་རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་འགྲོ་བ་ནི་འདུལ་བས་སེམས་ཅན་ལ་ལྟ་བས་སྙིང་རྗེ་ཆེན་པོའོ། །བྱང་ཆུབ་སེམས་དཔའ་རྣམས་ཀྱི་འགྲོ་བ་ནི་སྡུག་བསྔལ་བའི་
སེམས་ཅན་ཡོངས་སུ་སྐྱོབ་པས་བྱམས་པའོ། །བྱང་ཆུབ་སེམས་དཔའ་རྣམས་ཀྱི་འགྲོ་བ་ནི་གང་དུ་དགའ་བར་སྐྱེ་བས་ཚུལ་ཁྲིམས་སོ། །བྱང་ཆུབ་སེམས་དཔའ་རྣམས་ཀྱི་འགྲོ་བ་ནི་སྔོན་གྱི་བྱིན་
གྱིས་རླབས་ཀྱི་སྨོན་ལམ་མོ། །བྱང་ཆུབ་སེམས་དཔའ་རྣམས་ཀྱི་འགྲོ་བ་ནི་ཐམས་ཅད་དུ་བཞིན་ཡོངས་སུ་སྟོན་པས་མངོན་པར་ཤེས་པའོ། །བྱང་ཆུབ་སེམས་དཔའ་རྣམས་ཀྱི་འགྲོ་བ་ནི་དེ་བཞིན་
གཤེགས་པ་ཐམས་ཅད་ཀྱི་ཞབས་ཀྱི་དྲུང་ནས་གཡོ་བ་མེད་པས་མངོན་པར་འདུ་བྱ་བ་མེད་པའོ། །བྱང་ཆུབ་སེམས་དཔའ་རྣམས་ཀྱི་འགྲོ་བ་ནི་ལུས་དང་སེམས་ཡོངས་སུ་མི་གཏོང་བས་ལེན་པ་དང་འདོར་བ་མེད་པའོ། །
བྱང་ཆུབ་སེམས་དཔའ་རྣམས་ཀྱི་འགྲོ་བ་ནི་སེམས་ཅན་ཐམས་ཅད་ཀྱི་རྗེས་སུ་འབྲང་བས། ཤེས་རབ་དང་ཐབས་སོ་བྱང་ཆུབ་སེམས་དཔའ་རྣམས་ཀྱི་འགྲོ་བ་ནི་མིག་ཡོར་དང་གཟུགས་བརྙན་དང་། སྤྲུལ་པ་ལྟ་
བུ་ཡིན་པས་སྤྲུལ་པ་ཡོངས་སུ་སྟོན་པའོ། །རིགས་ཀྱི་བུ་གཞན་ཡང་ཁྱོད་ལམ་ཇི་སྲིད་གཅིག་ནས་འོངས་ཤེས་ཁྱོད་ཀྱིས་སྨྲས་པ་ནི། རིགས་ཀྱི་བུ་ང་ནི་ཚེའི་ས་ཡུལ་ཕྲེང་བ་སྟོབས་ཀྱི་གྲོང་རྡལ་ཁང་ཁྱིམ་

77-1-260a

ཅན་ཞེས་བྱ་བ་དེ་ན་ཚོང་དཔོན་ས་སྐྱོང་ཞེས་བྱ་བ་ཞིག་ཡོད་དེ། དེ་སངས་རྒྱས་ཀྱི་ཆོས་ལ་བཞག་ནས་ཚེའི་སའི་མི་རྣམས་ལ་སྣོད་ཀྱི་ཚུལ་བཞིན་དུ་ཆོས་བསྟན་པ་བྱས་ཏེ། ཕ་མ་དང་བྲམ་ཟེ་
དང་ཁྱིམ་བདག་དང་གཉེན་བཤེས་སུ་འོང་བ་རྣམས་ཐེག་པ་ཆེན་པོ་ལ་ཡང་དག་པར་བསྐུལ་ནས་འདིར་འོངས་སོ། །ནོར་བཟངས་ཀྱིས་སྨྲས་པ་འཕགས་པ་བྱང་ཆུབ་སེམས་དཔའ་རྣམས་ཀྱི་ཚེའི་ས་གང་ལགས། སྨྲས་པ་
རིགས་ཀྱི་བུ་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཚེའི་ས་སྟེ། བཅུ་གང་ཞེ་ན་འདི་ལྟ་སྟེ། བྱང་ཆུབ་ཀྱི་སེམས་ནི་བྱང་ཆུབ་སེམས་དཔའི་རིགས་སུ་བསྐྱེད་པས་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །
ལྷག་པའི་བསམ་པ་ནི་དགེ་བའི་བཤེས་གཉེན་གྱི་རིགས་སུ་བསྐྱེད་པས་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །ས་ལ་གནས་པ་ནི་ཕ་རོལ་ཏུ་ཕྱིན་པའི་རིགས་སུ་བསྐྱེད་པས་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །
སྨོན་ལམ་མངོན་པར་བསྒྲུབ་པ་ནི་སྤྱོད་པའི་རིགས་སུ་བསྐྱེད་པས་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །སྙིང་རྗེ་ཆེན་པོ་ནི་བསྡུ་བའི་དངོས་པོ་ཐམས་ཅད་ཀྱི་རིགས་སུ་བསྐྱེད་པས་བྱང་ཆུབ་སེམས་དཔའ་རྣམས་
ཀྱི་ཚེའི་སའོ། །ཡང་དག་པ་ཇི་ལྟ་བ་བཞིན་དུ་ཆོས་རྟོགས་པར་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རིགས་སུ་བསྐྱེད་པས་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །ཐེག་པ་ཆེན་པོ་ནི་ཐབས་མཁས་པའི་རིགས་
སུ་བསྐྱེད་པས་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །སེམས་ཅན་ཡོངས་སུ་སྨིན་པར་བྱ་བ་ནི་མངོན་པར་རྫོགས་པར་འཚང་རྒྱ་བའི་རིགས་སུ་བསྐྱེད་པས་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །ཐབས་
དང་ཤེས་རབ་གཉིས་ནི་མི་སྐྱེ་བའི་ཆོས་ཀྱི་བཟོད་པའི་རིགས་སུ་བསྐྱེད་པས་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །རིགས་ཀྱི་བུ་ཆོས་ཐམས་ཅད་ཀྱི་ནན་ཏན་ནི་འདས་པ་དང་མ་བྱོན་པ་དང་། ད་ལྟར་

77-1-260b

བྱུང་བའི་དེ་བཞིན་གཤེགས་པ་ཐམས་ཅད་ཀྱི་རིགས་སུ་བསྐྱེད་པས་བྱང་ཆུབ་སེམས་དཔའ་རྣམས་ཀྱི་ཚེའི་ས་སྟེ། རིགས་ཀྱི་བུ་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །རིགས་ཀྱི་བུ་
ཐབས་མཁས་པ་ནི་བྱང་ཆུབ་སེམས་དཔའ་རྣམས་ཀྱི་ཕའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི་མའོ། །སྦྱིན་པའི་ཕ་རོལ་ཏུ་ཕྱིན་པ་ནི་མའོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ནི་མའོ། །བཟོད་པའི་ཕ་རོལ་ཏུ་
ཕྱིན་པ་ནི་ལྷབ་ལྷུབ་དང་རྒྱན་ཏོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནི་བསྐྱེད་པའོ། །བསམ་གཏན་གྱི་ཕ་རོལ་ཏུ་ཕྱིན་པ་ནི་སྤྱོད་པ་རྣམ་པར་དག་པར་བྱེད་པའོ། །དགེ་བའི་བཤེས་གཉེན་རྣམས་ནི་བསླབས་པ་ལ་
སྤྱོད་དུ་འཇུག་པའོ། །བྱང་ཆུབ་ཀྱི་ཡན་ལག་ཐམས་ཅད་ནི་འགྲོགས་པའོ། །དགེ་བའི་རྩ་བའི་ཆོས་ཐམས་ཅད་ནི་གཉེན་བཤེས་སོ། །བྱང་ཆུབ་སེམས་དཔའ་ཐམས་ཅད་ནི་ཕུ་ནུའོ། །བྱང་ཆུབ་ཀྱི་སེམས་
ནི་རིགས་སོ། །ནན་ཏན་ནི་རིགས་ཀྱི་ཆོས་སོ། །སའི་གནས་ནི་རིགས་ཀྱི་གནས་སོ། །བཟོད་པ་ཐོབ་པ་ནི་རིགས་སུ་རིགས་དང་ལྡན་པར་སྐྱེས་པའོ། སྨོན་ལམ་མངོན་པར་བསྒྲུབ་པ་ནི་རིགས་ཀྱི་གཞུང་ཐོབ་པའོ། །
སྤྱོད་པ་རྣམ་པར་དག་པ་ནི་རིགས་ཀྱི་ཆོས་ཀྱི་རྗེས་བསྙེག་པའོ། །ཐེག་པ་ཆེན་པོ་ལ་ཡང་དག་པར་བསྐུལ་བ་ནི་རིགས་ཀྱི་རྒྱུན་མི་གཅོད་པའོ། །དབང་བསྐུར་ནས་ཚེ་གཅིག་གིས་ཐོགས་པ་ནི་ཆོས་ཀྱི་རྒྱལ་
པོའི་སྲས་ཀྱི་ཐུ་བོའོ། །དེ་བཞིན་གཤེགས་པ་ཉིད་དུ་ཡང་དག་པར་བསྒྲུབ་པ་ནི་རིགས་ཀྱི་རྒྱུད་ཡོངས་སུ་དག་པ་སྟེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་བྱིས་པ་ཐ་དད་པའི་སྐྱེ་བོའི་ས་ལས་ཤིན་
ཏུ་འདས་པ་ཡིན། བྱང་ཆུབ་སེམས་དཔའི་སྐྱོན་མེད་པར་ཞུགས་པ་ཡིན་དེ་བཞིན་གཤེགས་པའི་རིགས་སུ་ཡང་དག་པར་བྱུང་བ་ཡིན། དེ་བཞིན་གཤེགས་པའི་རྒྱུད་ལ་རབ་ཏུ་གནས་པ་ཡིན། དཀོན་མཆོག་

77-1-261a

གསུམ་གྱི་རིགས་རྒྱུན་མི་གཅད་པ་ལ་ཞུགས་པ་ཡིན། བྱང་ཆུབ་སེམས་དཔའི་རིགས་ཡོངས་སུ་བསྡུ་བ་ལ་མངོན་པར་བརྩོན་པ་ཡིན། རིགས་དང་རུས་ཀྱི་ཡོངས་སུ་དག་པ་ཡིན། མནད་ཀྱི་རྒྱུད་ཀྱི་
སྨད་དུ་མེད་པ་ཡིན། ལྷ་དང་བཅས་པའི་འཇིག་རྟེན་དང་། བདུད་དང་བཅས་པ་དང་། ཚངས་པ་དང་བཅས་པ་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུའི་ནང་ན་རིགས་ལ་སྨོས་པའི་སྐྱོན་ཐམས་ཅད་ཀྱི་ཁ་ན་མ་
ཐོ་བ་མྱེད་པ་ཡིན་ཏེ། སངས་རྒྱས་ཀྱི་རིགས་དམ་པར་སྐྱེས་ལ་སྨོན་ལམ་ཆེན་པོའི་ལུས་དང་ལྡན་པས་རིགས་ཀྱིས་བཙུན་པ་ཡིན་ནོ། །རིགས་ཀྱི་བུ་རྒྱུད་ཀྱི་རིགས་དེ་ལྟ་བུ་དང་ལྡན་པའི་བྱང་ཆུབ་སེམས་དཔའ་
རྣམས་ནི་ཆོས་ཐམས་ཅད་གཟུགས་བརྙན་ལྟ་བུར་ཡོངས་སུ་ཤེས་པས་འཇིག་རྟེན་གྱི་སྐྱེ་གནས་ཐམས་ཅད་དུ་སྨད་པ་མེད་པ་ཡིན་ཏེ། སྲིད་པའི་སྐྱེ་གནས་ཐམས་ཅད་སྤྲུལ་པ་ལྟ་བུར་ཡོངས་སུ་ཤེས་པས་
སྲིད་པའི་ལམ་གྱི་རྒྱུད་དུ་སྐྱེ་ཞིང་གནས་པ་ཐམས་ཅད་ཀྱིས་ཀུན་ནས་ཉོན་མོངས་པར་མི་འགྱུར་རོ། །ཆོས་ཐམས་ཅད་ལ་བདག་མེད་པར་ཁོང་དུ་ཆུད་པའི་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་
དང་། གདུལ་བས་ཡོངས་སུ་མི་སྐྱོ་བོ། །བྱམས་པ་ཆེན་པོ་དང་། སྙིང་རྗེ་ཆེན་པོའི་ལུས་དང་ལྡན་པའི་ཕྱིར་སེམས་ཅན་ཐམས་ཅད་ལ་ཕན་འདོག་པའི་ངལ་བར་མི་འགྱུར་རོ། །འཁོར་བ་ཐམས་ཅད་རྨི་ལམ་
ལྟ་བུར་ཡོངས་སུ་རྟོགས་པས་བསྐལ་པ་ཐམས་ཅད་དུ་གནས་པས་སྒྱིད་ལུག་པར་མི་འགྱུར་རོ། །ཕུང་པོ་ཐམས་ཅད་སྒྱུ་མ་ལྟ་བུར་ཡོངས་སུ་ཤེས་པས་སྐྱེ་བ་དང་ཤི་འཕོ་བ་དང་འཆི་བ་ཡོངས་སུ་བསྟན་པ་ཐམས་
ཅད་ཀྱིས་དུབ་པར་མི་འགྱུར་རོ། །ཁམས་དང་སྐྱེ་མཆེད་ཆོས་ཀྱི་དབྱིངས་ཀྱི་རང་བཞིན་དུ་རབ་ཏུ་རྟོགས་པས་ཡུལ་ཐམས་ཅད་ཀྱི་རྨི་ལམ་འབྱུང་ངོ་། །འདུ་ཤེས་ཀྱི་རྣམ་པ་སྨྱིག་རྒྱུ་ལྟ་བུར་ཤིན་ཏུ་སྒོམས་པས་འཁོར་བའི་དགའ་

77-1-261b

བ་ཐམས་ཅད་ཀྱིས་མོས་པར་མི་འགྱུར་རོ། །སྒྱུ་མ་ལྟ་བུའི་ཆོས་ཐམས་ཅད་ལ་རྣམ་པར་བརྩེ་བས་བདུད་ཀྱི་ཡུལ་ཐམས་ཅད་ཀྱི་མི་གོས་སོ། །ཆོས་ཀྱི་ལུས་སུ་བྱུང་བས་ཉོན་མོངས་པ་ཐམས་ཅད་དུ་སྨོས་སུ་མྱེད་དོ། །སྐྱེ་བ་
ལ་དབང་རབ་ཏུ་ཐོབ་པས་འགྲོ་བའི་རྒྱུད་ཐམས་ཅད་རྟོགས་པར་ཁོང་དུ་ཆུད་པ་ཡིན་ནོ། །རིགས་ཀྱི་བུ་དེ་ལྟར་ང་ནི་འཇིག་རྟེན་གྱི་ཁམས་ཐམས་ཅད་ཀྱི་སྐྱེ་གནས་ཀྱི་ཁོངསུ་ཆུད་པའི་ལུས་དང་འགྲོ་བ་ཐམས་ཅད་ཀྱི་
གཟུགས་དང་མཉམ་པའི་ཁ་དོག་གི་ཁྱད་པར་དང་སེམས་ཅན་ཐམས་ཅད་དང་མཉམ་པའི་ངེས་པའི་ཚིག་གི་བྱེ་བྲག་དང་། འགྲོ་བ་ཐམས་ཅད་དང་མཉམ་པའི་མྱིང་རྣམ་པ་ཐ་དད་པ་དང་། སེམས་ཅན་ཐམས་ཅད་ཀྱི་
མོས་པ་དང་མཉམ་པའི་སྤྱོད་ལམ་དང་འགྲོ་བ་རྣམ་པར་གདུལ་བ་ཐམས་ཅད་དང་མཉམ་པའི་འཇིག་རྟེན་གྱི་རྗེས་སུ་འབྲང་བ་དང་། སེམས་ཅན་རྣམ་པར་དག་པར་བྱ་བ་ཐམས་ཅད་དང་མཉམ་པའི་ཚེ། རིགས་
ཀྱི་བུ་སྐྱེ་བ་ཡོངས་སུ་སྟོན་པ་དང་། བྱིས་པའི་སྤྱོད་པ་ཐམས་ཅད་དང་མཉམ་པའི་བྱ་བ་ལ་འཇུག་པའི་སྒོ་དང་། སེམས་ཅན་གྱི་འདུ་ཤེས་ཀྱི་རྣམ་པ་ཐམས་ཅད་དང་མཉམ་པའི་ཡོངས་སུ་ཤེས་པར་བྱ་བ་ལ་འཇུག་པ་
དང་། བྱང་ཆུབ་སེམས་དཔའི་སྨོན་ལམ་གྱི་སྤྲུལ་པ་ཐམས་ཅད་དང་མཉམ་པའི་ལུས་ཡོངས་སུ་བསྟན་ཅིང་བརྗོད་པས་ཆོས་ཀྱི་དབྱིངས་ཐམས་ཅད་རྒྱས་པར་བཀང་སྟེ། སྔོན་བསྐལ་པ་མཉམ་པར་སྤྱོད་སྤྱོད་
པའི་སེམས་ཅན་བྱང་ཆུབ་ཀྱི་སེམས་སྟོར་བར་གྱུར་པ་རྣམས་ཡོངས་སུ་སྨྱིན་པར་བྱ་བ་དང་། འཛམ་བུའི་གླིང་དུ་སྐྱེས་པའི་ཚེ་ཡོངས་སུ་བསྟན་པ་དང་། ལྷོ་ཕྱོགས་ཀྱིས་རྒྱུད་འདིའི་ཡུལ་ཕྲེང་བ་སྟོབས་ཀྱི་
གྲོང་རྡལ་ཁང་ཁྱིམ་དང་ལྡན་པ་ཞེས་བྱ་བ་འདིའི་བྲམ་ཟེའི་རིགས་སུ་སྐྱེས་པ་རྣམས་དང་། ཕ་མ་དང་གཉེན་བཤེས་སུ་འོང་བ་རྣམས་རྣམ་པར་གདུལ་བ་དང་། 

77-1-262a

བྲམ་ཟེའི་རིགས་དང་། རྒྱུད་ཀྱི་ཁྱད་པར་གྱིས་རིགས་ཀྱི་ང་རྒྱལ་ཅན་དུ་གྱུར་པ་འདི་དག་ང་རྒྱལ་མྱེད་པར་བྱས་ཏེ། དེ་བཞིན་གཤེགས་པའི་རིགས་སུ་བསྐྱེད་པའི་དོན་དུ་འདིར་སྐྱེས་སོ། །རིགས་ཀྱི་བུ་དེ་ལྟར་ང་ལྷོ་ཕྱོགས་ཀྱི་རྒྱུད་འདི་ན་ཐབས་
རྣམ་པ་འདི་ལྟ་བུས་སེམས་ཅན་བསམ་པའི་ཚུལ་ཇི་ལྟ་བུ་དང་ལྡན་པ་དང་། རྣམ་པ་ཇི་ལྟ་བུར་འདུལ་བ་རྣམས་ཡོངས་སུ་སྨྱིན་པར་བྱ་བ་དང་། གདུལ་བ་བྱེད་ཅིང་ཁང་པ་བརྩེགས་པ་ཆེན་པོ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོ་འདི་
ན་འདུག་གོ། །འདི་ནས་ང་ཤི་འཕོས་ནས་ཀྱང་བསམ་པའི་ཚུལ་ཇི་ལྟ་བ་བཞིན་དུ་སེམས་ཅན་རྣམས་ཀྱི་རྗེསུ་འབྲང་བར་བྱ་བ་དང་། དགའ་ལྡན་གྱི་རིགས་སུ་གཏོགས་པའི་ལྷའི་བུ་བསྐལ་པ་མཉམ་པར་སྤྱོད་སྤྱོད་པ་རྣམས་ཡོངས་སུ་སྨྱིན་པར་བྱ་བ་དང་འདོད་
པའི་ཁམས་ནས་ཡོངས་སུ་འདས་པ་ཐམས་ཅད་ལའང་བྱང་ཆུབ་སེམས་དཔའི་བསོད་ནམས་དང་ཡེ་ཤེས་དང་། སྤྲུལ་པའི་རྒྱན་ཡོངས་སུ་བསྟན་པ་དང་། འདོད་པའི་དགའ་བའི་སྲེད་པ་ལས་རྣམ་པར་བཟློག་པ་དང་། འདུ་བྱེད་ཐམས་ཅད་
མྱི་རྟག་པ་ཉིད་དུ་བསྟན་པ་དང་། ལྷར་སྐྱེས་པ་ཐམས་ཅད་ཀྱང་མཐར་གུད་པར་གྱུར་པ་ཡོངས་སུ་བསྟན་པ་དང་། ཡེ་ཤེས་ཆེན་པོའི་ཆོས་ཀྱི་སྒོ་འཆི་འཕོའི་རྣམ་པ་ཞེས་བྱ་བ་ཚེ་གཅིག་གིས་ཐོགས་པའི་བྱང་ཆུབ་སེམས་དཔའ་རྣམས་
དང་ཡང་དག་པར་འགྲོ་བར་བྱ་བ་དང་། ལྷན་གཅིག་ཡོངས་སུ་སྨིན་པར་གྱུར་པ་རྣམས་དེར་སྐྱེ་བར་ཡོངས་སུ་བསྡུ་བ་དང་། དེ་བཞིན་གཤེགས་པ་ཤཱཀྱ་ཐུབ་པས་བཀྱེ་བའི་འདུལ་བའི་པད་མོ་རྣམས་ཀྱང་ཁ་དབྱེ་བའི་ཕྱིར་དགའ་ལྡན་
གྱི་གནས་སུ་སྐྱེ་བ་ཡོངས་སུ་སྟོན་ཏེ། དུས་ལ་བབ་པ་ལ་བསམ་པ་ཡོངསུ་རྫོགས་ནས་ནི་ཐམས་ཅད་མཁྱེན་པ་ཉིད་ཀྱང་ཐོབ་པར་བྱེད་ཀྱིས། ངས་བྱང་ཆུབ་ཐོབ་ནས་ཀྱང་རིགས་ཀྱི་བུ་ཁྱོད་དང་། འཇམ་དཔལ་གཞོན་ནུར་གྱུར་པར་
བཅས་པའང་ད་དུང་ཡང་མཐོང་བར་འགྱུར་རོ། །སོང་རིགས་ཀྱི་བུ་ཡང་འཇམ་དཔལ་གཞོན་ནུར་གྱུར་པའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ཀུན་ཏུ་

77-1-262b

བཟང་པོའི་སྤྱོད་པའི་དཀྱིལ་འཁོར་ལ་འཇུག་པར་བྱ་བ་དང་། ཇི་ལྟར་མངོན་པར་བསྒྲུབ་པ་དང་། ཇི་ལྟར་སྨོན་པར་བྱ་བ་དང་། ཇི་ལྟར་རྒྱས་པར་བྱ་བ་དང་། ཇི་ལྟར་རྗེས་སུ་འབྲང་བར་བྱ་བ་དང་། ཇི་ལྟར་ཡོངསུ་རྫོགས་
པར་སྦྱང་བར་བྱ་བ་དང་། ཇི་ལྟར་ཡོངསུ་རྫོགས་པར་བྱ་བ་དྲིས་ཤིག་དང་། དགེ་བའི་བཤེས་གཉེན་དེས་ཁྱོད་ལ་སྟོན་པར་འགྱུར་རོ། །དེ་ཅིའི་ཕྱིར་ཞེ་ན། འཇམ་དཔལ་གཞོན་ནུར་གྱུར་པས་སྤྱོད་པ་མངོན་པར་བསྒྲུབ་
པ་དེ་ལྟ་བུའི་སྨོན་ལམ་གྱི་ཁྱད་པར་ནི་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་ཕྲག་སྟོང་ལ་ཡང་མེད་དོ། །འཇམ་དཔལ་གཞོན་ནུར་གྱུར་པའི་སྨོན་ལམ་མངོན་པར་བསྒྲུབ་པ་ནི་ཚད་མེད་དོ། །འཇམ་དཔལ་གཞོན་ནུར་
གྱུར་པའི་བྱང་ཆུབ་སེམས་དཔའི་ཡོན་ཏན་གྱི་ཁྱད་པར་ཚད་མེད་དོ། ཐམས་ཅད་བསྒྲུབ་པ་ནི་ཚད་མེད་དོ། །འཇམ་དཔལ་གཞོན་ནུར་གྱུར་པ་ནི་སངས་རྒྱས་བྱེ་བ་ཁྲག་ཁྲིག་བརྒྱ་ཕྲག་སྟོང་གི་ཡུམ་ལྟ་བུའོ། །འཇམ་དཔལ་གཞོན་ནུར་གྱུར་པ་
ནི་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་ཕྲག་སྟོང་ལ་གདམས་ངག་སྟོན་པའོ། །འཇམ་དཔལ་གཞོན་ནུར་གྱུར་པ་ནི་སེམས་ཅན་གྱི་ཁམས་ཐམས་ཅད་ཡོངསུ་སྨིན་པར་བྱ་བ་དང་། གདུལ་བ་ལ་རབ་ཏུ་བརྩོན་པའོ། །འཇམ་དཔལ་གཞོན་
ནུར་གྱུར་པ་ནི་ཕྱོགས་བཅུའི་འཇིག་རྟེན་གྱི་ཁམསུ་མྱིང་གི་འཁོར་ལོས་རྣམ་པར་རྒྱས་པར་གྱུར་པའོ། །འཇམ་དཔལ་གཞོན་ནུར་གྱུར་པ་ནི། དེ་བཞིན་གཤེགས་པའི་འཁོར་གྱི་དཀྱིལ་འཁོར་ཐམས་ཅད་དུ་གཏམ་གྱི་སྐྱེ་བུར་གྱུར་པའོ། །འཇམ་
དཔལ་གཞོན་ནུར་གྱུར་པ་ནི། དེ་བཞིན་གཤེགས་པ་ཐམས་ཅད་ཀྱི་བསྔགས་ཤིང་བསྟོད་པའོ། །འཇམ་དཔལ་གཞོན་ནུར་གྱུར་པ་ནི་ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་མཐོང་བ་སྟེ། ཆོས་ཟབ་མོའི་ཡེ་ཤེས་ལ་རྣམ་པར་སྤྱོད་
པའོ། །འཇམ་དཔལ་གཞོན་ནུར་གྱུར་པའི་རྣམ་པར་ཐར་པ་ཐམས་ཅད་ཀྱི་ཚུལ་ཐམས་ཅད་ལ་རིང་དུ་སོང་བའི་སྤྱོད་ཡུལ་དང་ལྡན་པ་སྟེ། བྱང་ཆུབ་སེམས་དཔའི་སྤྱོད་པ་ཀུན་ཏུ་བཟང་པོ་ལ་ཞུགས་པའོ། །རིགས་ཀྱི་བུ་དགེ་བའི་བཤེས་

77-1-263a

གཉེན་དེ་ནི་ཁྱོད་དེ་བཞིན་གཤེགས་པའི་རིགས་སུ་བསྐྱེད་པའོ། །དགེ་བའི་རྩ་བ་ཐམས་ཅད་ཡོངས་སུ་འཕེལ་བར་བྱེད་པའོ། །བྱང་ཆུབ་སེམས་དཔའི་ཚོགས་མང་པོ་རབ་ཏུ་སྒྲུབ་པའོ། །ཡང་དག་པའི་དགེ་བའི་བཤེས་གཉེན་སྟོན་པའོ། །
ཡོན་ཏན་ཐམས་ཅད་ལ་ཡང་དག་པར་བསྐུལ་བའོ། །སྨོན་ལམ་ཆེན་པོའི་དྲ་བ་ཐམས་ཅད་དུ་འཇུག་པའོ། །སྨོན་ལམ་མངོན་པར་བསྒྲུབ་པ་ཐམས་ཅད་ལ་རབ་ཏུ་གཞོག་པའོ། །བྱང་ཆུབ་སེམས་དཔའ་ཐམས་ཅད་ཀྱི་གསང་བ་
ཐོས་པར་བྱེད་པའོ། །བྱང་ཆུབ་སེམས་དཔའི་བསམ་གྱིས་མི་ཁྱབ་པ་ཐམས་ཅད་ཡང་དག་པར་སྟོན་པའོ། །སྔོན་གྱི་ཚེའི་གནས་སུ་སྐལ་བ་འཐུན་པར་སྤྱད་པའོ། །རིགས་ཀྱི་བུ་དེ་བས་ན་ཁྱོད་ད་ལྟར་ཡང་འཇམ་དཔལ་གྱི་
རྐང་པའི་དྲུང་ན་འདུག་གིས་ཡོན་ཏན་གྱི་གདམས་ངག་ཐམས་ཅད་ཐོབ་པར་བྱ་བ་ལ་ཡོངས་སུ་སྐྱོ་བ་མ་བསྐྱེད་ཅིག་ཡོངས་སུ་སྒྱིད་ལུག་པར་མ་བྱེད་ཅིག །དེ་ཅིའི་ཕྱིར་ཞེ་ན། ནོར་བཟངས་ཁྱོད་ཀྱིས་དགེ་བའི་བཤེས་གཉེན་ཇི་
སྙེད་ཅིག་མཐོང་བ་དང་། སྤྱོད་པའི་སྒོ་ཇི་སྙེད་ཅིག་ཐོས་པ་དང་། རྣམ་པར་ཐར་པའི་ཚུལ་ཇི་སྙེད་ཅིག་ལ་ཞུགས་པ་དང་། སྨོན་ལམ་གྱི་ཁྱད་པར་ཇི་སྙེད་ཅིག་ཁོང་དུ་ཆུད་པ་དེ་དག་ཐམས་ཅད་ཀྱང་འཇམ་དཔལ་གཞོན་
ནུར་གྱུར་པའི་མཐུ་དང་བྱིན་གྱི་རླབསུ་བལྟ་སྟེ། འཇམ་དཔལ་གཞོན་ནུར་གྱུར་པ་ནི་ཐམས་ཅད་ལའང་ཕ་རོལ་ཏུ་ཕྱིན་པའི་མཆོག་ཐོབ་པའོ། །དེ་ནས་ཚོང་དཔོན་གྱི་བུ་ནོར་བཟངས་ཀྱིས། བྱང་ཆུབ་
སེམས་དཔའ་སེམས་དཔའ་ཆེན་པོ་བྱམས་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། བྱང་ཆུབ་སེམས་དཔའ་
བྱམས་པའི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་གྲོང་ཁྱེར་བརྒྱ་རྩ་བཅུ་ཀུན་ཏུ་རྒྱུས་ཏེ། ཕྱོགས་ཀྱི་གནས་ཡིད་བདེ་བ་མངོན་དུ་འགྱུར་བ་ཞེས་བྱ་བ་ཞིག་ན་འཇམ་དཔལ་གཞོན་ནུར་གྱུར་པ་ལ་

77-1-263b

སེམས་ཤིང་རྣམས་པར་ལྟ་བས་འཇམ་དཔལ་གཞོན་ནུར་གྱུར་པ་མཐོང་བར་མོས་ཤིང་། སྨོན་ལ་ཕྲད་པར་དགའ་བས་སྡོད་ཅིང་འདུག་པ་དང་། དེ་ནས་འཇམ་དཔལ་གཞོན་ནུར་གྱུར་པས། དཔག་ཚད་བརྒྱ་རྩ་བཅུའི་
ཕ་རོལ་ནས་ལག་པ་བརྐྱང་སྟེ། ཚོང་དཔོན་གྱི་བུ་ནོར་བཟངས་གྲོང་ཁྱེར་ཡིད་བདེ་བ་མངོན་དུ་འགྱུར་བ་ན་འདུག་པའི་སྤྱི་བོར་བཞག་སྟེ། འདི་སྐད་ཅེས་སྨྲས་སོ། །རིགས་ཀྱི་བུ་ལེགས་སོ་ལེགས་སོ། །དད་པའི་དབང་
པོ་དང་མྱི་ལྡན་པ་སེམས་སྐྱོ་བ་ཅན། བསམ་པ་ཞུམ་པ་ཅན་སྦྱོར་བ་བོར་བ། བརྩོན་འགྲུས་ལྡོག་པ། ཡོན་ཏན་ཆུང་ཟད་ཀྱིས་དགའ་བར་རྩི་བ། དགེ་བའི་རྩ་བ་གཅིག་ལ་ཞེན་པར་གནས་པ། སྤྱོད་པ་དང་སྨོན་ལམ་མངོན་
པར་བསྒྲུབ་པ་ལ་མྱི་མཁས་པ། དགེ་བའི་བཤེས་གཉེན་གྱིས་ཡོངསུ་མ་བཟུངས་བ། སངས་རྒྱས་ཀྱིས་མ་དགོངས་པ་རྣམས་ཀྱིས་ནི་ཆོས་ཉིད་འདི་ལྟ་བུ་ཡོངས་སུ་ཤེས་པར་བྱ་བ་དང་ཚུལ་འདི་ལྟ་བུ་དང་། སྤྱོད་ཡུལ་
འདི་ལྟ་བུ་དང་། གནས་འདི་ལྟ་བུ་ཡོངས་སུ་ཤེས་པར་བྱ་བ་འམ། རྣམ་པར་ཤེས་པར་བྱ་བ་འམ། ཁོང་དུ་ཆུད་པར་བྱ་བ་འམ། འཇུག་པར་བྱ་བ་འམ། ཡིད་ཆེས་པར་བྱ་བ་འམ། བརྟག་པར་བྱ་བ་འམ། རྟོགས་
པར་བྱ་བ་འམ། ཐོབ་པར་བྱ་བར་མྱི་ནུས་སོ། །ཞེས་ཏེ་དེས་དེ་ལ་ཆོས་ཀྱི་གཏམ་གྱིས་ཡང་དག་པར་བསྟན་པ་དང་། ཡང་དག་པར་བསྐུལ་བ་དང་། གཟེངས་བསྟོད་པ་དང་། དགའ་བར་བྱས་ཏེ་ཆོས་ཀྱི་སྒོ་གྲངས་མྱེད་པ་དང་
ལྡན་པར་བྱས་ནས་ཡེ་ཤེས་མཐའ་ཡས་པའི་སྣང་བ་ཆེན་པོ་ཐོབ་པར་བྱས་ཏེ། བྱང་ཆུབ་སེམས་དཔའི་གཟུངས་དང་། སྤོབས་པ་དང་། ཏིང་ངེ་འཛིན་དང་། མངོན་པར་ཤེས་པ་དང་། ཡེ་ཤེས་མཐའ་ཡས་པའི་བྱིན་གྱིས་རླབས་
པར་བྱས་ཏེ། ཀུན་ཏུ་བཟང་པོའི་སྤྱོད་པའི་དཀྱིལ་འཁོར་ལ་བཞག་ནས། བདག་གི་ཡུལ་ལའང་རབ་ཏུ་བཞག་སྟེ། ཚོང་དཔོན་གྱི་བུ་ནོར་བཟངས་ཀྱི་དྲུང་ནས་སོང་ངོ་། །

77-1-264a

ཤིན་ཏུ་རྒྱས་པ་ཆེན་པོའི་མདོ། སངས་རྒྱས་རྨད་ག་ཅད་ཅེས་བྱ་བ་ལས་སྡོང་པོས་བརྒྱན་པའི་ལེའུ་སྟེ། བཞི་བཅུ་རྩ་ལྔ་པའོ།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་
པོའི་མདོ། བམ་པོ་བཅུ་དྲུག་པ། དེ་ནས་ཚོང་དཔོན་གྱི་བུ་ནོར་བཟངས་དགེ་བའི་བཤེས་གཉེན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་བསྙེན་བཀུར་བ། ཐམས་
ཅད་མཁྱེན་པ་ཉིད་དུ་ཚོགས་བསགས་པའི་སེམས་དང་ལྡན་པ། དགེ་བའི་བཤེས་གཉེན་ཐམས་ཅད་ཀྱི་གདམས་ངག་དང་རྗེས་སུ་བསྟན་པ་ལ་འཐུན་པར་འཛིན་པས་ཞུགས་པ། དགེ་བའི་བཤེས་གཉེན་ཐམས་ཅད་ཀྱི་
དྲུང་དུ་བསམ་པ་མཉམ་པ་སྟེ། དགེ་བའི་བཤེས་གཉེན་ཐམས་ཅད་དགའ་བར་བྱ་བ་སྟེ། ཡིད་མི་འབྱུང་བའི་བློ་དང་ལྡན་པ། དགེ་བའི་བཤེས་གཉེན་ཐམས་ཅད་ཀྱི་གདམས་ངག་དང་རྗེས་སུ་བསྟན་པའི་ཚུལ་རྒྱ་མཚོའི་
རྗེས་སུ་སོང་བ་སྙིང་རྗེ་ཆེན་པོའི་བསམ་པ་རྒྱ་མཚོ་ལས་ཡང་དག་པར་བྱུང་བའི་སྙིང་པོ་དང་ལྡན་པ། བྱམས་པ་ཆེན་པོའི་ཚུལ་གྱི་སྤྲིན་གྱིས་འགྲོ་བ་ཐམས་ཅད་རྣམ་པར་སྣང་བར་བྱས་པ། དགའ་བ་ཆེན་པོའི་ཤུགས་རྣམ་
པར་འཕེལ་བའི་ལུས་དང་ལྡན་པ། བྱང་ཆུབ་སེམས་དཔའི་རྣམ་པར་ཐར་པ་རྒྱ་ཆེན་པོ་ལ་རབ་ཏུ་ཞི་བར་རྣམ་པར་དཔྱོད་པ། སྒོ་ཐམས་ཅད་ནས་ལྷུག་པར་འཕྲོ་བའི་གཏོང་བའི་མྱིག་དང་ལྡན་པ། དེ་བཞིན་གཤེགས་པ་
ཐམས་ཅད་ཀྱི་ཡོན་ཏན་རྒྱ་མཚོའི་ནན་ཏན་རབ་ཏུ་རྫོགས་པ། དེ་བཞིན་གཤེགས་པ་ཐམས་ཅད་ཀྱི་མོས་པའི་ལམ་དུ་ཞུགས་པ་ཐམས་ཅད་མཁྱེན་པ་ཉིད་ཀྱི་ཚོགས་ལ་བརྩོན་འགྲུས་ཀྱི་ཤུགས་རྣམ་པར་འཕེལ་བ་
བྱང་ཆུབ་སེམས་དཔའ་ཐམས་ཅད་ཀྱི་སེམས་དང་བསམ་པས་ཤིན་ཏུ་སྦྱངས་པའི་བློ་དང་ལྡན་པ། དུས་གསུམ་གྱི་དེ་བཞིན་གཤེགས་པ་ཐམས་ཅད་གཅིག་ནས་གཅིག་ཏུ་བརྒྱུད་པ་ལ་ཞུགས་པ་སངས་རྒྱས་

77-1-264b

ཐམས་ཅད་ཀྱི་ཆོས་ཀྱི་ཚུལ་རྒྱ་མཚོ་ཁོང་དུ་ཆུད་པ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་ཚུལ་རྒྱ་མཚོའི་རྗེས་སུ་སོང་བ། འཇིག་རྟེན་གྱི་སྐྱེ་གནས་ཐམས་ཅད་དུ་གཟུགས་བརྙེན་ཡོངས་སུ་སྟོན་པའི་
སྤྱོད་ཡུལ་དང་ལྡན་པ། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་གྱི་ཚུལ་རྒྱ་མཚོ་ལ་ཞུགས་པ། བསྐལ་པ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་ལ་རབ་ཏུ་ཞུགས་པ། ཐམས་ཅད་མཁྱེན་པ་ཉིད་ཀྱི་ཡུལ་སྣང་བ་
རབ་ཏུ་ཐོབ་པ། བྱང་ཆུབ་སེམས་དཔའི་དབང་པོ་ཐམས་ཅད་རྣམ་པར་འཕེལ་བ། ཐམས་ཅད་མཁྱེན་པའི་ལམ་སྣང་བ་རབ་ཏུ་ཐོབ་པ། ཕྱོགས་ཐམས་ཅད་དུ་སྒྲིབ་པ་མེད་པའི་སྣང་བ་རབ་ཏུ་ཐོབ་པ། ཆོས་ཀྱི་དབྱིངས་ཐམས་ཅད་ཀྱི་ཚུལ་
ལ་རབ་ཏུ་ཞུགས་པའི་བློ་དང་ལྡན་པ། ཞིང་གི་ཚུལ་ཐམས་ཅད་ལ་སྣང་བ་རབ་ཏུ་གྲུབ་པ་སེམས་ཅན་འབྱམ་ཀླས་པ་ཐམས་ཅད་ཀྱི་དོན་བྱ་བ་ལ་རྒྱུད་དང་མི་འཐུན་པ་མྱེད་པ་རྗེས་སུ་སོང་ངོ་། །སྒྲིབ་པའི་གཡང་སའི་རི་ཐམས་ཅད་རྣམ་པར་
འཐོར་བ། སྒྲིབ་པ་མེད་པའི་ཆོས་ཉིད་ཀྱི་རྗེས་སུ་སོང་བ། བྱང་ཆུབ་སེམས་དཔའི་རྣམ་པར་ཐར་པ་སའི་གཞི་ཀུན་ཏུ་གནས་པའི་ཆོས་ཀྱི་དབྱིངས་ཀྱི་སྙིང་པོ་ཅན་ལ་རབ་ཏུ་ཞི་བར་རྣམ་པར་དཔྱོད་པ། དེ་བཞིན་གཤེགས་པ་ཐམས་ཅད་ཀྱི་སྤྱོད་
ཡུལ་རྗེས་སུ་ཚོལ་བ། དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་རླབས་པ་དེ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་ཡུལ་ལ་རྣམ་པར་དཔྱོད་ཅིང་འདུག་པར་གྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་
པོའི་མྱིང་ཐོས་པ་དང་། བྱང་ཆུབ་སེམས་དཔའི་སྤྱོད་པ་ཐོས་པ་དང་། སྨོན་ལམ་གྱི་ཁྱད་པར་ཐོས་པ་དང་། ཚོགས་ཡོངས་སུ་བསྒྲུབ་པ་ལ་འཇུག་པ་དང་གནས་པའི་ཁྱད་པར་ཐོས་པ་དང་། མངོན་པར་བསྒྲུབ་པ་དང་། འབྱུང་བའི་ལམ་
གྱི་ཁྱད་པར་ཐོས་པ་དང་། ཀུན་ཏུ་བཟང་པོའི་སའི་ཚུལ་གྱི་རྒྱུད་ཐོས་པ་དང་། སའི་ཚོགས་ཐོས་པ་དང་། ས་ཐོབ་པར་བྱེད་པའི་ཤུགས་ཐོས་པ་དང་། ས་ཡོངས་སུ་གནོན་པ་ཐོས་པ་དང་། ས་ལ་གནས་པ་ཐོས་པ་དང་། ས་སྔོན་དུ་

77-1-265a

འདོར་བས་རྣམ་པར་གནོན་པ་ཐོས་པ་དང་། སའི་སྤྱོད་ཡུལ་ཐོས་པ་དང་། སའི་བྱིན་གྱིས་རླབས་ཐོས་པ་དང་། ས་ལ་ཡང་དག་པར་གནས་པ་ཐོས་ནས། བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་དགའ་ཞིང་སྒོམ་སྟེ། 
ནམ་མཁའི་དབྱིངས་ལྟར་ཤིན་ཏུ་ཡངས་པའི་སེམས་མངོན་པར་ཞེན་པ་ཐམས་ཅད་ལས་གྱེན་དུ་འཕགས་པ་དང་། ཞིང་གི་འདུ་ཤེས་ཤིན་ཏུ་བསྒོམ་པ་དང་། ཆགས་པ་ཐམས་ཅད་ལས་ཡང་དག་པར་འདས་པའི་སེམས་ཆོས་ཐམས་
ཅད་ལས་སྒྲིབ་པ་མེད་པའི་སྤྱོད་ཡུལ་ཅན་དང་། ཐོགས་པ་མྱེད་པའི་སེམས་ཕྱོགས་རྒྱ་མཚོ་ཐམས་ཅད་རྒྱས་པར་འགེངས་པ་དང་། སྒྲིབ་པ་མེད་པའི་སེམས་ཐམས་ཅད་མཁྱེན་པ་ཉིད་ཀྱི་ཡུལ་ཡོངས་སུ་གནོན་པ་དང་། ཤིན་ཏུ་རྣམ་པར་དག་
པའི་སེམས་སྙིང་པ་བྱང་ཆུབ་ཀྱི་རྒྱན་ལྷག་མཐོང་གིས་ཡོངས་སུ་དག་པ་དང་། ཤིན་ཏུ་རྣམ་པར་ཕྱེ་བའི་སེམས་སངས་རྒྱས་ཀྱི་ཆོས་རྒྱ་མཚོ་ལ་ཞུགས་པ་དང་། ཤིན་ཏུ་ཡངས་པའི་སེམས་སེམས་ཅན་གྱི་ཁམས་ཐམས་ཅད་ཡོངས་
སུ་སྨིན་པར་བྱ་བ་དང་། གདུལ་བ་རྒྱས་པར་འགེངས་པ་དང་། ཤིན་ཏུ་ཕྱེ་བའི་སེམས་སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་བྱེད་པ་དང་། ཚད་མེད་པའི་སེམས་སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་དུ་གཟུགས་བརྙན་རབ་ཏུ་འབྱུང་
བ་དང་། བསྐལ་པ་ཐམས་ཅད་དུ་གནས་པས་མྱི་ཟད་ཅིང་མཐར་ཐུག་པ་མེད་པའི་སེམས་དེ་བཞིན་གཤེགས་པ་ཐམས་ཅད་ཀྱི་སྟོབས་དང་མི་སྙིངས་པ་དང་། སངས་རྒྱས་ཀྱི་ཆོས་མ་འདྲེས་པའི་མཐར་ཐུག་པས། སྙིང་པོ་བྱང་ཆུབ་རྡོ་རྗེ་དམ་པའི་
སྙིང་པོ་ཅན་དེ་ལ་པད་མོའི་སྟན་རིན་པོ་ཆེ་ཐམས་ཅད་ཀྱི་ལྷུན་ཅན་ཞིག་ལ་དེ་བཞིན་གཤེགས་པའི་གདན་སེང་གེའི་ཁྲི་ལ་མངོན་པར་བལྟས་ཏེ་འདུག་གོ། །དེ་ལྟར་ཚོང་དཔོན་གྱི་བུ་ནོར་བཟངས་དེ་ལྟ་བུའི་བསམ་པ་དང་། ཡིད་ལ་བྱ་བ་ལ་བརྩོན་
པར་གནས་པའི་སྔོན་གྱི་དགེ་བའི་རྩ་བའི་རླན་དང་། དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་དང་། བྱང་ཆུབ་སེམས་དཔའ་ཀུན་ཏུ་བཟང་པོ་དང་སྔོན་གྱི་དགེ་བའི་རྩ་བའི་བསྐལ་པ་འཐུན་པས་བྱང་ཆུབ་སེམས་དཔའ་ཀུན་

77-1-265b

ཏུ་བཟང་པོ་མཐོང་བར་འགྱུར་བར་སྔོན་གྱི་ལྟས་བཅུ་བྱུང་ངོ་། །བཅུ་གང་ཞེ་ན། འདི་ལྟ་སྟེ། སངས་རྒྱས་ཀྱི་ཞིང་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་སྙིང་པོ་བྱང་ཆུབ་ཀྱི་རྒྱན་རྣམ་པར་དག་པས་རྣམ་པར་དག་པར་འགྱུར་རོ། སངས་
རྒྱས་ཀྱི་ཞིང་ཐམས་ཅད་མི་ཁོམ་པ་དང་། ངན་སོང་དང་། ངན་འགྲོའི་ལམ་ཐམས་ཅད་རྣམ་པར་བསྩལ་བས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་པད་མོའི་ཚུལ་གྱི་རྒྱན་ལྟར་སངས་རྒྱས་ཀྱི་ཞིང་རྣམ་པར་དག་པས་རྣམ་
པར་དག་པར་གྱུར་ཏོ། སངས་རྒྱས་ཀྱི་ཞིང་ཐམས་ཅད་སེམས་ཅན་ཐམས་ཅད་ཀྱི་ལུས་དང་སེམས་དགའ་ཞིང་སིམ་པར་བྱེད་པས། རྣམ་པར་དག་པར་གྱུར་ཏོ། སངས་རྒྱས་ཀྱི་ཞིང་ཐམས་ཅད་རིན་པོ་ཆེ་ཐམས་ཅད་ཀྱི་རང་བཞིན་དུ་གནས་
པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་སེམས་ཅན་གྱི་ཁམས་ཀུན་མཚན་དང་དཔེ་བྱད་བཟང་པོས་རབ་ཏུ་བརྒྱན་པར་ཀུན་ནས་གནས་པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་རྒྱན་དང་ལྷབ་ལྷུབ་
ཀྱི་སྤྲིན་གྱིས་ཀུན་ཏུ་ཁེབས་པར་ཀུན་ནས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་སེམས་ཅན་གྱི་ཁམས་ཐམས་ཅད་ཕན་ཚུན་བྱམས་པའི་སེམས་དང་། གནོད་སེམས་མེད་པའི་སེམས་དང་ལྡན་པར་ཀུན་ནས་
གནས་པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་སྙིང་པོ་བྱང་ཆུབ་ཀྱི་རྒྱན་གྱིས་བརྒྱན་པར་ཀུན་ནས་གནས་པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་སེམས་ཅན་ཐམས་ཅད་སངས་
རྒྱས་རྗེས་སུ་དྲན་པར་ཡིད་ལ་བྱ་བ་ལ་བརྩོན་པར་ཀུན་ནས་གནས་པས་རྣམ་པར་དག་པར་གྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་མཐོང་བར་གྱུར་ཏོ། །སྔོན་གྱི་ལྟས་བཅུ་པོ་དེ་དག་བྱུང་བར་གྱུར་ཏོ། །
གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་མཐོང་བར་འགྱུར་བའི་སྔོན་གྱི་ལྟས་སྣང་བ་ཆེན་པོ་བཅུ་བྱུང་བར་གྱུར་ཏེ། བཅུ་གང་ཞེ་ན་འདི་ལྟ་སྟེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་

77-1-266a

ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ཞིང་ཡང་དེ་བཞིན་གཤེགས་པ་ཐམས་ཅད་ཀྱི་འོད་ཟེར་གྱི་དྲ་བ་མང་པོ་རྣམ་པར་སྣང་བར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་
ལས་ཀྱང་སངས་རྒྱས་ཐམས་ཅད་ཀྱི་དཀྱིལ་འཁོར་མང་པོ་འཐོན་ཏེ། ཁ་དོག་གཅིག་པ་དང་ཁ་དོག་སྣ་ཚོགས་དང་ཁ་དོག་བརྒྱ་སྟོང་དུ་མར་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་རྡུལ་ཤིན་ཏུ་
ཕྲ་བ་རྣམས་ལས། རྡུལ་ཤིན་ཏུ་ཕྲ་བ་རེ་རེ་ལས་ཀྱང་རིན་པོ་ཆེ་ཐམས་ཅད་ཀྱི་སྤྲིན་དེ་བཞིན་གཤེགས་པ་ཐམས་ཅད་ཀྱི་གཟུགས་བརྙན་རྣམ་པར་དམྱིགས་པར་བྱེད་པ་མང་པོ་འཐོན་ཏེ། ཆོས་ཀྱི་དབྱིངས་ཐམས་ཅད་རྒྱས་པར་འགེངས་
པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་དེ་བཞིན་གཤེགས་པ་ཐམས་ཅད་ཀྱི་འོད་འཕྲོ་བའི་འཁོར་ལོ་དང་དཀྱིལ་འཁོར་གྱི་སྤྲིན་མང་པོ་འཐོན་ཏེ། ཆོས་ཀྱི་
དབྱིངས་ཐམས་ཅད་རྒྱས་པར་འགེངས་པར་གྱུར་ཏེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་སྤོས་དང་། མེ་ཏོག་དང་ཕྲེང་བ་དང་བྱུག་པ་དང་བདུག་པའི་སྤྲིན་མང་པོ་
འཐོན་ཏེ། བྱང་ཆུབ་སེམས་དཔའ་ཀུན་ཏུ་བཟང་པོའི་ཡོན་ཏན་གྱི་ཆོས་རྒྱ་མཚོའི་སྤྲིན་ཐམས་ཅད་ཀྱི་འབྲུག་སྒྲ་རབ་ཏུ་སྒྲོག་ཅིག་ཕྱོགས་བཅུའི་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་
ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་ཉི་མ་དང་ཟླ་བ་དང་སྐར་མའི་སྤྲིན་མང་པོ་འཐོན་ཏེ། བྱང་ཆུབ་སེམས་དཔའ་ཀུན་ཏུ་བཟང་པོའི་འོད་རབ་ཏུ་འགྱེད་ཅིང་། ཆོས་ཀྱི་དབྱིངས་ཐམས་ཅད་རྒྱས་པར་
འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་ལུས་ཐམས་ཅད་ཀྱི་དབྱིབས་ལྟར་འདུག་པའི་མར་མྱེའི་སྤྲིན་མང་པོ་འཐོན་ནས། སངས་རྒྱས་ཀྱི་འོད་

77-1-266b

གཟེར་ལྟར་རབ་ཏུ་སྣང་བར་བྱེད་ཅིང་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་ནོར་བུ་རིན་པོ་ཆེའི་གཟུགས་དེ་བཞིན་
གཤེགས་པ་ཐམས་ཅད་ཀྱི་སྐུར་སྣང་བའི་སྤྲིན་མང་པོ་འཐོན་ནས། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་
རེ་རེ་ལས་ཀྱང་འོད་གཟེར་གྱི་གཟུགས་དེ་བཞིན་གཤེགས་པ་ཐམས་ཅད་ཀྱི་སྐུའི་དབྱིབས་སུ་སྣང་བའི་སྤྲིན་མང་པོ་འཐོན་ཏེ་སངས་རྒྱས་ཐམས་ཅད་ཀྱི་བྱིན་གྱི་རླབས་དང་སྨོན་ལམ་གྱི་སྤྲིན་གྱི་ཆར་མངོན་པར་འབེབས་ཤིང་། ཆོས་
ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏེ། འཇིག་རྟེན་གྱི་ཁམས་ཐམས་ཅད་ཀྱིས་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་བྱང་ཆུབ་སེམས་དཔའི་ལུས་ཀྱི་གཟུགས་བརྙན་གཟུགས་ཀྱི་རྣམ་པ་
ཐམས་ཅད་ཀྱི་ཁ་དོག་དུ་སྣང་བའི་སྤྲིན་རྒྱ་མཚོ་སེམས་ཅན་ཐམས་ཅད་གདོན་པའི་སྦྱོར་བ་དང་ལྡན་པ་སེམས་ཅན་ཐམས་ཅད་ཀྱི་ཆོས་ཀྱི་བསམ་པ་ཡོངས་སུ་རྫོགས་པའི་བསྒྲུབ་པ་མང་པོ་འཐོན་ཏེ། ཆོས་ཀྱི་དབྱིངས་
ཐམས་ཅད་རྒྱས་པར་འགེངས་པར་གྱུར་ཏོ། །བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་གྱུར་བའི་སྔོན་གྱི་ལྟས་སྣང་བ་ཆེན་པོ་བཅུ་པོ་དེ་དག་བྱུང་བར་གྱུར་ཏོ། །དེ་ནས་ཚོང་དཔོན་གྱི་བུ་ནོར་བཟངས་གྱིས་སྔོན་གྱི་ལྟས་སུ་
སྣང་བ་བཅུ་པོ་དེ་དག་མཐོང་ནས་བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་གྱུར་པའི་སྐབས་ནི་བྱེ། རང་གི་དགེ་བའི་རྩ་བས་ནི་བརྟན་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་ནི་རླབས། སངས་རྒྱས་ཐམས་ཅད་ཀྱི་
ཆོས་ཀྱི་སྣང་བ་ནི་ཡང་དག་པར་སྐྱེས། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་ནི་མངོན་དུ་གྱུར། བྱང་ཆུབ་སེམས་དཔའ་ཀུན་ཏུ་བཟང་པོའི་སྨོན་ལམ་གྱི་བྱིན་གྱིས་ནི་བྱིན་དུ་བརླབས། དེ་བཞིན་གཤེགས་པ་

77-1-267a

ཐམས་ཅད་ཀྱི་སྤྱོད་ཡུལ་ལ་ནི་མངོན་པར་མོས། བྱང་ཆུབ་སེམས་དཔའི་སྤྱོད་ཡུལ་རླབས་པོ་ཆེ་ལ་ཤིན་ཏུ་ངེས་པའི་སྟོབས་དང་། ཤུགས་ནི་རབ་ཏུ་ཐོབ། བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་ན། ཐམས་ཅད་
མཁྱེན་པ་ཉིད་ཐོབ་པ་དང་འདྲ་བར་ནི་སེམས། བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་བྱ་བ་ལ་དབང་པོ་ནི་མངོན་དུ་གྱུར། བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་བྱ་བ་ལ་བརྩོན་འགྲུས་ཀྱི་ཤུགས་ཆེན་པོ་ནི་ཐོབ། བྱང་
ཆུབ་སེམས་དཔའ་ཀུན་ཏུ་བཟང་པོ་ཡོངསུ་བཙལ་བ་ལ་བརྩོན་འགྲུས་ཕྱིར་མི་ལྡོག་པའི་སྦྱོར་བ་དང་ནི་ལྡན། ཕྱོགས་ཐམས་ཅད་དུ་མངོན་དུ་གྱུར་པའི་འཁོར་ལོ་དང་། ཀུན་ཏུ་ལྟ་བས་ཡུལ་ཡོངས་སུ་གནོན་པའི་བྱང་ཆུབ་སེམས་
དཔའི་ལུས་དང་སངས་རྒྱས་མ་ལུས་པའི་ཞབས་ཀྱི་དྲུང་ན་བྱང་ཆུབ་སེམས་དཔའ་ཀུན་ཏུ་བཟང་པོ་འདུག་པའི་རྗེས་སུ་འབྲང་བའི་སེམས་དེ་བཞིན་གཤེགས་པ་ཐམས་ཅད་དམྱིགས་པར་བྱ་བ་ལ་ཡང་དག་པར་བཏང་བ་དང་། བྱང་ཆུབ་
སེམས་དཔའ་ཀུན་ཏུ་བཟང་པོའི་དམིགས་པ་ཡོངས་སུ་བཙལ་བ་དང་མི་འབྲལ་བའི་བསམ་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་བྱ་བའི་འདུ་ཤེས་ཀྱི་རྣམ་པའི་སྙིང་པོ་དང་ལྡན་པའི་ཡེ་ཤེས་ཀྱི་མྱིག་བྱང་ཆུབ་སེམས་དཔའ་
ཀུན་ཏུ་བཟང་པོའི་ལམ་ལ་ཞུགས་པ་དང་། ནམ་མཁའི་དབྱིངས་ལྟར་ཡངས་པའི་བསམ་པ་དང་། སྙིང་རྗེ་ཆེན་པོའི་རྡོ་རྗེ་ཐོགས་པའི་བསམ་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་རྗེས་སུ་འབྲང་བར་སྨོན་པ། ཕྱི་མའི་མཐའི་བསྐལ་པའི་
མུར་ཐུག་པར་བྱིན་གྱིས་བསླབས་པ་དང་། ཡོངས་སུ་གནོན་པའི་རྩལ་རྣམ་པར་དག་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་མཉམ་པ་ཉིད་ཀྱི་རྗེས་སུ་སོང་བ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་ས་ལ་གནས་པའི་ཡེ་
ཤེས་ལ་རྣམ་པར་དཔྱོད་པ། དེ་བཞིན་གཤེགས་པ་ཐམས་ཅད་ཀྱི་ཡུལ་ལ་ཡང་དག་པར་གནས་པ་དང་མི་ལྡན་པ་དེས་བྱང་ཆུབ་སེམས་དཔའ་ཀུན་ཏུ་བཟང་པོ་དེ་བཞིན་གཤེགས་པ་ཐམས་ཅད་དང་མཉམ་པ་ཉིད་རྗེས་སུ་ཐོབ་པ། དུས་གསུམ་

77-1-267b

མཉམ་པ་ཉིད་ཀྱི་རྗེས་སུ་སོང་བ། བསམ་གྱི་མི་ཁྱབ་པའི་ཡུལ་དང་ལྡན་པ། མི་འཕྲོགས་པའི་སྤྱོད་ཡུལ་ཅན། མུ་མེད་པའི་ཡེ་ཤེས་ཀྱི་ཡུལ་དང་ལྡན་པ། བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་ལྟ་བ། འཇིག་རྟེན་ཐམས་ཅད་ཀྱི་
ཟིལ་གྱིས་མ་ནོན་པ། འཁོར་གྱི་དཀྱིལ་འཁོར་ཐམས་ཅད་ཀྱི་རྗེས་སུ་འབྲང་བ། མངོན་པར་འཕགས་པའི་ཡུལ་དང་ལྡན་པ་དེ། བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱི་སྤྱན་སྔར་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་
རྒྱ་མཚོ་ན་ནི་འདུག །བྱང་ཆུབ་སེམས་དཔའི་ཚོགས་ཀྱིས་ནི་ཡོངསུ་བསྐོར། བྱང་ཆུབ་སེམས་དཔའི་དགེ་འདུན་གྱིས་ནི་མདུན་ནི་བྱས་ཤིང་། སེང་གེའི་ཁྲི་རིན་པོ་ཆེའི་པད་མོ་ཆེན་པོའི་སྙིང་པོ་ཅན་ཞིག་ལ་འདུག་པ་མཐོང་སྟེ། 
དེས་དེའི་བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འོད་ཟེར་གྱི་སྤྲིན་མང་པོ་འཐོན་ནས། འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ་
ནམ་མཁའི་མཐས་གཏུག་པ། ཐམས་ཅད་རབ་ཏུ་སྣང་བར་བྱས་ནས། སེམས་ཅན་རྣམས་ཀྱི་སྡུག་བསྔལ་རབ་ཏུ་ཞི་བར་བྱེད་པ་མཐོང་ངོ་། །དེས་དེའི་ལུས་ལས་འོད་ཀྱི་དཀྱིལ་འཁོར་སངས་རྒྱས་ཀྱི་ཞིང་ཐམས་ཅད་
ཀྱི་རྡུལ་ཤིན་ཏུ་ཕྲ་བ་སྙེད་ཀྱི་སྤྲིན་མང་པོ་ཁ་དོག་སྣ་ཚོགས་ཅན་མང་པོ་འཐོན་ཏེ། བྱང་ཆུབ་སེམས་དཔའ་ཐམས་ཅད་ཀྱི་དགའ་བ་དང་། མོས་པའི་ཤུགས་རྒྱ་ཆེན་པོ་རྣམ་པར་འཕེལ་བར་བྱེད་པ་མཐོང་ངོ་། །སྤྱི་བོ་དང་
ཕྲག་པའི་ལྷུན་གཉིས་ལས་བ་སྤུའི་སྒོ་ཐམས་ཅད་ནས་ཀྱང་སྤོས་འོད་འཕྲོ་བའི་སྤྲིན་གྱི་ཆར་ཁ་དོག་སྣ་ཚོགས་སུ་འདུག་པ་མང་པོ་མངོན་པར་འཐོན་ནས། དེ་བཞིན་གཤེགས་པ་ཐམས་ཅད་ཀྱི་འཁོར་རྒྱས་པར་བཀང་སྟེ་
མངོན་པར་འབབ་པ་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་མེ་ཏོག་ཐམས་ཅད་ཀྱི་སྤྲིན་གྱི་ཆར་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མང་པོ་མངོན་པར་འཐོན་ནས། 

77-1-268a

དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་རྒྱས་པར་བཀང་སྟེ། མངོན་པར་འབབ་པ་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་སྤོས་སྣ་ཚོགས་ཀྱི་ཤིང་གི་སྤྲིན་མང་པོ་སངས་
རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་ནས། ཆོས་ཀྱི་དབྱིངས་ནམ་མཁའི་དབྱིངས་ཀྱིས་མཐས་ཀླས་པ་ཐམས་ཅད་རྒྱས་པར་བཀང་ནས། སྤོས་ཀྱི་ཤིང་གི་སྤྲིན་གྱི་རྒྱན་གྱིས་བརྒྱན་པར་བྱས་ཏེ། སྤོས་དང་
ཕྱེ་མ་དང་བདུག་པའི་མཛོད་ཟད་མི་ཤེས་པའི་ཆར་རབ་ཏུ་འགྱེད་ཅིང་། དེ་བཞིན་གཤེགས་པ་ཐམས་ཅད་ཀྱི་འོད་ཀྱིས་འཁོར་གྱི་དཀྱིལ་འཁོར་རྒྱས་པར་བཀང་སྟེ། མངོན་པར་འབབ་པར་བྱེད་པ་མཐོང་ངོ་། །བ་སྤུའི་སྒོ་ཐམས་ཅད་ལས་བ་སྤུའི་
སྒོ་རེ་རེ་ནས་ཀྱང་གོས་སྣ་ཚོགས་ཀྱི་སྤྲིན་མང་པོ་མངོན་པར་འཐོན་ཏེ། ཆོས་ཀྱི་དབྱིངས་ནམ་མཁའི་དབྱིངས་ཀྱི་མཐས་ཀླས་པ་ཐམས་ཅད་ཀུན་ནས་ཡོག་པར་བྱས་ནས་བརྒྱན་པར་མཐོང་ངོ་། །བ་སྤུའི་བུ་ག་ཐམས་ཅད་ནས་བ་སྤུའི་སྒོ་རེ་རེ་ནས་
ཀྱང་དར་སྣ་ཚོགས་ཀྱི་ལྡ་ལྡིའི་སྤྲིན་དང་། ཕྲེང་བ་སྣ་ཚོགས་ཀྱི་སྤྲིན་དང་། མུ་ཏིག་སྣ་ཚོགས་ཀྱི་སྤྲིན་དང་། ནོར་བུ་རིན་པོ་ཆེ་ཡིད་བཞིན་གྱི་སྤྲིན་གྱི་ཆར་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མཐོན་ནས། དེ་བཞིན་
གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་རྒྱས་པར་བཀང་སྟེ། མངོན་པར་འབབ་པ་མཐོང་ངོ་། །བ་སྤུའི་བུ་ག་ཐམས་ཅད་ནས་བ་སྤུའི་སྒོ་རེ་རེ་ནས་ཀྱང་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་
བསྒྲུབ་པའི་ཕྱིར། རིན་པོ་ཆེའི་ཤིང་གི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་ཏེ། ཆོས་ཀྱི་དབྱིངས་ནམ་མཁའི་མཐས་ཀླས་པ་ཐམས་ཅད་རྒྱས་པར་བཀང་ནས། རིན་པོ་ཆེའི་ཤིང་
ལས་རིན་པོ་ཆེའི་མཛོད་རྣམ་པར་འཕྲོ་བའི་རྒྱན་གྱིས་བརྒྱན་པར་བྱས་ཏེ། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དག་ཏུ་རིན་པོ་ཆེའི་ཆར་ཆེན་པོ་མངོན་པར་འབབ་པར་བྱེད་པ་མཐོང་ངོ་། །

77-1-268b

བ་སྤུའི་སྒོ་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་གཟུགས་ཀྱི་ཁམས་ཀྱི་ལྷའི་རིས་ཀྱི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་ནས། བྱང་ཆུབ་སེམས་དཔའ་ལ་ཡང་
དག་པར་བསྔགས་པ་བྱེད་ཅིང་སངས་རྒྱས་ཀྱི་ཞིང་ཐམས་ཅད་རྒྱས་པར་འགེངས་པ་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་ཚངས་པའི་རྒྱུད་དུ་གཏོགས་པའི་ལྷའི་རིས་ཐམས་ཅད་དུ་
སྤྲུལ་པའི་སྤྲིན་མང་པོ་མངོན་པར་འཐོན་ཏེ། མངོན་པར་སངས་རྒྱས་པའི་དེ་བཞིན་གཤེགས་པ་རྣམས་ལ་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པར་མཐོང་ངོ་། །བ་སྤུའི་བུ་ག་ཐམས་ཅད་ཀྱི་བ་
སྤུའི་སྒོ་རེ་རེ་ནས་ཀྱང་འདོད་པའི་ཁམས་ཐམས་ཅད་དུ་གཏོགས་པའི་ལྷའི་དབང་པོའི་ལུས་ཀྱི་སྤྲིན་མང་པོ་མངོན་པར་འཐོན་ཏེ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་མང་པོ་ཡང་དག་པར་འཛིན་པར་
མཐོང་ངོ་། །བ་སྤུའི་བུ་ག་ཐམས་ཅད་ཀྱི་བ་སྤུའི་སྒོ་རེ་རེ་ནས་ཀྱང་སེམས་ཀྱི་སྐད་ཅིག་རེ་རེ་ལ་ཡང་སངས་རྒྱས་ཀྱི་ཞིང་གི་སྤྲིན་དུས་གསུམ་དུ་གཏོགས་པའི་སངས་རྒྱས་ཀྱི་ཞིང་ཐམས་ཅད་དང་འདྲ་བ། སངས་རྒྱས་ཀྱི་
ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་ནས། ཆོས་ཀྱི་དབྱིངས་ནམ་མཁའི་མཐས་ཀླས་པ། ཐམས་ཅད་རྒྱས་པར་བཀང་སྟེ། སེམས་ཅན་གནས་མེད་པ། སྐྱབས་མྱེད་པ་དང་རྟེན་མྱེད་
པ་རྣམས་ཀྱི་གནས་དང་། སྐྱབས་དང་རྟེན་དུ་གྱུར་པར་མཐོང་ངོ་། །བ་སྤུའི་བུ་ག་ཐམས་ཅད་ཀྱི་བ་སྤུའི་སྒོ་རེ་རེ་ནས་ཀྱང་། སེམས་ཀྱི་སྐད་ཅིག་རེ་རེ་ལ་སངས་རྒྱས་ཀྱི་ཞིང་ཡོངས་སུ་དག་པ། སངས་རྒྱས་
བྱུང་བ་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་ཀྱིས་ཡོངས་སུ་གང་བའི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་ནས། ཆོས་ཀྱི་དབྱིངས་ནམ་མཁའི་མཐས་ཀླས་

77-1-269a

པ་ཐམས་ཅད་རྒྱས་པར་བཀང་ཏེ། སེམས་ཅན་མོས་པ་རླབས་པོ་ཆེ་རྣམས་ཡོངས་སུ་དག་པར་སྒྲུབ་པ་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་སེམས་
ཀྱི་སྐད་ཅིག་རེ་རེ་ལ་སངས་རྒྱས་ཀྱི་ཞིང་རྣམ་པར་དག་ལ། ཀུན་ནས་ཉོན་མོངས་པ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་དུ་ཕྲ་བ་སྙེད་ཀྱི་སྤྲིན་མང་པོ་མངོན་པར་འཐོན་ནས། ཆོས་ཀྱི་དབྱིངས་ནམ་མཁའི་དབྱིངས་
ཀྱི་མཐས་ཀླས་པ་ཐམས་ཅད་རྒྱལ་པར་བཀང་སྟེ། ཀུན་ནས་ཉོན་མོངས་པའི་སེམས་ཅན་རྣམས་རྣམ་པར་སྒྲུབ་པ་མཐོང་ངོ་། །བ་སྤུའི་བུ་ག་རེ་རེའི་བ་སྤུའི་སྒོ་ཐམས་ཅད་ལས་སེམས་ཀྱི་སྐད་ཅིག་རེ་རེ་ལ་སངས་
རྒྱས་ཀྱི་ཞིང་ཀུན་ནས་ཉོན་མོངས་ལ་རྣམ་པར་དག་པ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་སྤྲིན་མང་པོ་མངོན་པར་འཐོན་ནས། ཆོས་ཀྱི་དབྱིངས་ནམ་མཁའི་དབྱིངས་ཀྱི་
ཀླས་པ། ཐམས་ཅད་རྒྱས་པར་བཀང་སྟེ། སེམས་ཅན་གཅིག་ཏུ་ཀུན་ནས་ཉོན་མོངས་པ་རྣམས་རྣམ་པར་དག་པར་བསྒྲུབ་པ་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་
ཀྱང་སེམས་ཅན་ཐམས་ཅད་ཀྱི་ལུས་ཀྱི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་ཏེ། སེམས་ཅན་གྱི་ཁམས་ནམ་མཁའི་དབྱིངས་ཀྱིས་ཀླས་པ་ཐམས་ཅད་རྒྱས་
པར་བཀང་ནས། སེམས་ཅན་ཐམས་ཅད་ཀྱི་སྤྱོད་པའི་རྗེས་སུ་འབྲང་བར་བྱེད་ཅིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་ཅན་ཐམས་ཅད་ཡོངས་སུ་སྨིན་པར་བྱེད་པ་མཐོང་
ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་སེམས་ཀྱི་སྐད་ཅིག་རེ་རེ་ལ་བྱང་ཆུབ་སེམས་དཔའི་ལུས་ཀྱི་སྤྲིན་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་

77-1-269b

མངོན་པར་མཐོན་ནས། ཆོས་ཀྱི་དབྱིངས་ནམ་མཁའི་དབྱིངས་ཀྱི་ཀླས་པ། ཐམས་ཅད་རྒྱས་པར་བཀང་སྟེ། སེམས་ཅན་ཐམས་ཅད་ཀྱི་དགེ་བའི་རྩ་བ་རྣམ་པར་འཕེལ་བར་བྱ་བའི་ཕྱིར་སངས་རྒྱས་
ཐམས་ཅད་ཀྱི་མཚན་མང་པོ་བརྗོད་པར་བྱེད་པ་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་བྱང་ཆུབ་སེམས་དཔའི་ལུས་ཀྱི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་
ཤིན་ཏུ་ཕྲ་བ་སྙེད་མངོན་པར་འཐོན་ཏེ། ཆོས་ཀྱི་དབྱིངས་ནམ་མཁའི་དབྱིངས་ཀྱིས་ཀླས་པ་ཐམས་ཅད་རྒྱས་པར་བཀང་ནས་སངས་རྒྱས་ཀྱི་ཞིང་འབྱམ་ཀླས་པ་ཐམས་ཅད་དུ་བྱང་ཆུབ་སེམས་དཔའ་
ཐམས་ཅད་ཀྱི་སེམས་དང་པོ་བསྐྱེད་པ་ནས་ཉེ་བར་བཟུང་བའི་དགེ་བའི་རྩ་བ་ཐམས་ཅད་མངོན་པར་བསྒྲུབ་པ་ཉེ་བར་བསྒྲུབ་པ་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་
བྱང་ཆུབ་སེམས་དཔའི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་ཏེ། སངས་རྒྱས་ཀྱི་ཞིང་ཐམས་ཅད་དུ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་རྣམ་པར་
དག་པར་བྱ་བའི་ཕྱིར་བྱང་ཆུབ་སེམས་དཔའི་སྨོན་ལམ་རྒྱ་མཚོ་ཐམས་ཅད་མངོན་པར་བརྗོད་པ་མཐོང་ངོ་། བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་སེམས་ཅན་ཐམས་ཅད་ཀྱི་བསམ་
པ་ཡོངསུ་རྫོགས་པར་བྱ་བའི་དོན་དུ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་སྤྲིན་ཐམས་ཅད་ཁྱེན་པ་ཉིད་དུ་ཡང་དག་པར་འབྱུང་བས་དགའ་བའི་ཤུགས་རྣམ་པར་འཕེལ་བར་བྱེད་པ། སངས་རྒྱས་
ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ཆར་མངོན་པར་འཐོན་ནས་མངོན་པར་འབབ་པ་མཐོང་ངོ་། །དེས་དེའི་བ་སྤུའི་བུ་ག་ཐམས་ཅད་ནས་བ་སྤུའི་སྒོ་ཐམས་ཅད་ལས་བ་སྤུའི་སྒོ་རེ་

77-1-270a

རེ་ནས་ཀྱང་མངོན་པར་རྫོགས་པར་འཚང་རྒྱ་བའི་སྤྲིན་སངས་རྒྱས་ཀྱི་ཞིང་ཐམས་ཅད་དུ་མངོན་པར་རྫོགས་པར་འཚང་བརྒྱ་བ་སྟོན་པ། ཐམས་ཅད་མཁྱེན་པ་ཉིད་དུ་ཡང་དག་པར་འབྱུང་བའི་
ཆོས་ཀྱི་སྤྲིན། ཆེན་པོ་རྣམ་པར་འཕེལ་བར་བྱེད་པ། སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་མཐོན་པ་མཐོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་
གྱིས་བྱང་ཆུབ་སེམས་དཔའ་ཀུན་ཏུ་བཟང་པོའི་རྫུ་འཕྲུལ་གྱི་ཡུལ་དེ་ལྟ་བུ་མཐོང་ནས་ནས། དགའ་རངས་ཏེ་མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེད། དེ་བས་ཀྱང་ཤས་ཆེར་བྱང་
ཆུབ་སེམས་དཔའ་ཀུན་ཏུ་བཟང་པོའི་ལུས་ལ་སེམས་སེམས་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་ཡན་ལག་རེ་རེ་དང་། ཡན་ལག་རྣམ་པར་ཕྱེ་བ་རེ་རེ་དང་། ལུས་ཀྱི་ཆ་རེ་རེ་དང་། 
ལུས་ཀྱི་ཆ་རྣམ་པར་ཕྱེ་བ་རེ་རེ་དང་། ཡན་ལག་གི་ཕྱོགས་རེ་རེ་དང་། ཡན་ལག་གི་ཕྱོགས་རྣམ་པར་ཕྱེ་བ་རེ་རེ་དང་། ལུས་རེ་རེ་དང་། ལུས་རྣམ་པར་ཕྱེ་བ་རེ་རེ་དང་། བ་སྤུའི་བུ་ག་རེ་རེ་དང་
བ་སྤུའི་བུ་ག་རྣམ་པར་ཕྱེ་བ་རེ་རེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རླུང་གི་ཕུང་པོ་དང་བཅས། ཆུའི་ཕུང་པོ་དང་བཅས་སའི་ཕུང་པོ་དང་བཅས། མྱེའི་ཕུང་པོ་དང་
བཅས། རྒྱ་མཚོ་དང་བཅས་གླིང་དང་བཅས་ཆུ་ཀླུང་དང་བཅས། རིན་པོ་ཆེའི་རི་དང་བཅས་རི་རབ་དང་བཅས། འཁོར་ཡུག་དང་བཅས། གྲོང་དང་གྲོང་ཁྱེར་དང་། ལྗོངས་དང་ཡུལ་དང་ཁམས་
དང་རྒྱལ་པོའི་གནས་དང་བཅས། ནགས་ཚལ་དང་བཅས། ཁང་ཁྱིམ་དང་བཅས། སྐྱེ་བོའི་ཚོགས་དང་བཅས། སེམས་ཅན་དམྱལ་བའི་འཇིག་རྟེན་གྱི་ཁམས་དང་བཅས། བྱོལ་སོང་གིས་སྐྱེ་

77-1-270b

གནས་དང་བཅས། གཤིན་རྗེའི་འཇིག་རྟེན་གྱི་ཁམས་དང་བཅས། ལྷ་མ་ཡིན་གྱི་འཇིག་རྟེན་དང་བཅས། ཀླུའི་འཇིག་རྟེན་དང་བཅས། ནམ་མཁའ་ལྡིང་གི་འཇིག་རྟེན་དང་བཅས། མྱིའི་
འཇིག་རྟེན་དང་བཅས། ལྷའི་འཇིག་རྟེན་དང་བཅས། ཚངས་པའི་འཇིག་རྟེན་དང་བཅས། འདོད་པའི་ཁམས་ཀྱི་ཡུལ་དང་བཅས་གཟུགས་ཀྱི་ཁམས་ཀྱི་ཡུལ་དང་བཅས། གཟུགས་མེད་པའི་ཁམས་
ཀྱི་ཡུལ་དང་བཅས། གཞི་དང་བཅས། རྟེན་དང་བཅས། དབྱིབས་དང་བཅས། སྤྲིན་དང་བཅས། གློག་དང་བཅས། སྐར་མ་དང་བཅས། ཉིན་ཞག་དང་བཅས། ཟླ་བ་ཕྱེད་དང་བཅས། ཟླ་བ་གཅིག་དང་བཅས། 
དུས་དང་བཅས། ལོ་དང་བཅས། བསྐལ་པ་བར་མ་དང་བཅས་བསྐལ་པ་དང་བཅས་པར་གཟུགས་རྙན་གྱི་ཚུལ་དུ་མཐོང་ངོ་། །འཇིག་རྟེན་གྱི་ཁམས་འདི་ལ་ཇི་ལྟ་བ་དེ་བཞིན་དུ། ཤར་ཕྱོགས་ཀྱི་འཇིག་
རྟེན་གྱི་ཁམས་ཐམས་ཅད་ཀྱང་མཐོང་བར་གྱུར་ཏེ། ཤར་ཕྱོགས་ལ་ཇི་ལྟ་བ་དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། བྱང་ཤར་གྱི་ཕྱོགས་འཚམས་དང་། ཤར་ལྷོའི་
ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་སྟེང་གི་ཕྱོགས་ཐམས་ཅད་ཀྱི་འཇིག་རྟེན་གྱི་ཁམས་ཐམས་ཅད་ཀྱང་སངས་རྒྱས་བྱུང་བ་
དང་བཅས། བྱང་ཆུབ་སེམས་དཔའི་འཁོར་ཀྱི་དཀྱིལ་འཁོར་དང་བཅས་པར་གཟུགས་བརྙན་གྱི་ཚུལ་དུ་མཐོང་བར་གྱུར་ཏོ། །དེ་ནས་མི་མཇེད་གྱི་འཇིག་རྟེན་གྱི་ཁམས་འདིའི་སྔོན་གྱི་མཐའི་མུར་ཐུག་
པའི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ། ཇི་སྙེད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའ་ཀུན་ཏུ་བཟང་པོའི་མྱི་ཆེན་པོའི་མཚན་རེ་རེ་ལས་སངས་རྒྱས་

77-1-271a

བྱུང་བ་དང་བཅས། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་ཐམས་ཅད་དང་བཅས། སེམས་ཅན་དང་བཅས། ཁང་ཁྱིམ་དང་བཅས། ཉིན་ཞག་དང་བཅས། བསྐལ་པ་དང་བཅས་པར་མཐོང་
བར་གྱུར་ཏོ། །དེ་བཞིན་ཏུ་ཕྱི་མའི་མཐའི་མུར་ཐུག་པའི་སངས་རྒྱས་ཀྱི་ཞིང་འབྱམ་ཀླས་པར་ཐམས་ཅད་ཀྱང་མཐོང་བར་གྱུར་ཏོ། །ཇི་ལྟར་འཇིག་རྟེན་གྱི་ཁམས་འདི་སྔོན་གྱི་མཐའ་དང་ཕྱི་མའི་མཐའི་མུར་ཐུགས་
པའི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་ཐམས་ཅད་ཀྱང་མཐོང་བར་གྱུར་པ་དེ་བཞིན་ཏུ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སྔོན་གྱི་མཐའ་དང་། ཕྱི་མའི་མཐའི་
མུར་ཐུག་པའི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་ཐམས་ཅད་ཀྱང་བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་དང་། མྱི་ཆེན་པོའི་མཚན་རེ་རེ་དང་། བ་སྤུའི་བུ་ག་རེ་རེ་
ནས་ཤིན་ཏུ་རྣམ་པར་ཕྱེ་བ་དང་། ཕན་ཚུན་མ་འདྲེས་པར་མཐོང་བར་གྱུར་ཏོ། །བྱང་ཆུབ་སེམས་དཔའ་ཀུན་ཏུ་བཟངས་པོ་ཡང་ཇི་ལྟར་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་
ཀྱི་སྤྱན་སྔ་ན་སེང་གེའི་ཁྲི་རིན་པོ་ཆེའི་པད་མོ་ཆེན་པོའི་སྙིང་པོ་ཅན་ལ་འདུག་ཅིང་རྣམ་པར་བརྩེ་བ་འདི་ལྟ་བུ་ཡོངས་སུ་སྟོན་པར་མཐོང་བ་དེ་བཞིན་དུ་ཤར་ཕྱོགས་ནའང་བཅོམ་ལྡན་འདས་དེ་བཞིན་
གཤེགས་པ་ཀུན་ཏུ་བཟང་པོའི་དཔལ་གྱིས་འཇིག་རྟེན་གྱི་ཁམས་པད་མོའི་དཔལ་ན་རྣམ་པར་རྩེ་བ་འདི་ཉིད་ཡོངས་སུ་སྟོན་ཅིང་འདུག་པར་མཐོང་ངོ་། །ཤར་ཕྱོགས་ན་ཇི་ལྟ་བ་དེ་བཞིན་དུ་
ཕྱོགས་དང་ཕྱོགས་མཚམས་ཀུན་ཏུ་འཇིག་རྟེན་གྱི་ཁམས་ཐམས་ཅད་ཀྱི་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་བྱང་ཆུབ་སེམས་དཔའ་ཀུན་ཏུ་བཟང་པོ་སེང་གེའི་ཁྲི་རིན་པོ་ཆེའི་པད་

77-1-271b

མོ་ཆེན་པོའི་སྙིང་པོ་ཅན་ལ་འདུག་ཅིང་རྣམ་པར་རྩེ་བ་འདི་ཉིད་ཡོངས་སུ་སྟོན་པ་མཐོང་ངོ་། །ཇི་ལྟར་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་དེ་བཞིན་གཤེགས་པ་ཐམས་ཅད་ཀྱི་ཞབས་
ཀྱི་དྲུང་ན་སེང་གེའི་ཁྲི་རིན་པོ་ཆེའི་པད་མོ་ཆེན་པོའི་སྙིང་པོ་ཅན་ལ་འདུག་ཅིང་རྣམ་པར་རྩེ་བ་འདི་ཉིད་ཡོངས་སུ་སྟོན་པར་མཐོང་བ་དེ་བཞིན་དུ། ཕྱོགས་བཅུའི་ཀུན་གྱི་འཇིག་རྟེན་སངས་རྒྱས་
ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་དག་ལ་རྡུལ་ཤིན་ཏུ་ཕྲ་བ་རེ་རེའི་སངས་རྒྱས་ཀྱི་འཁོར་གྱི་དཀྱིལ་འཁོར་ཆོས་ཀྱི་དབྱིངས་ལྟར་རྒྱ་ཆེ་བ་དག་ནི་བྱང་ཆུབ་སེམས་དཔའ་ཀུན་ཏུ་བཟང་པོ་དེ་
བཞིན་གཤེགས་པ་ཐམས་ཅད་ཀྱིས་ཞབས་ཀྱི་དྲུང་ན་སེང་གེའི་ཁྲི་རིན་པོ་ཆེའི་པད་མོ་ཆེན་པོའི་སྙིང་པོ་ཅན་ལ་འདུག་ཅིང་རྣམ་པར་རྩེ་བ་འདི་ཉིད་ཡོངས་སུ་སྟོན་པ་མཐོང་ངོ་། །དེའི་ལུས་རེ་རེ་
ལས་ཀྱང་དུས་གསུམ་དུ་བྱུང་བའི་དམིགས་པ་ཐམས་ཅད་གཟུགས་བརྙན་གྱི་ཚུལ་དུ་རྣམ་པར་དམིགས་པར་མངོན་པར་བསྟན་པ་མཐོང་ངོ་། །ཞིང་ཐམས་ཅད་དང་སེམས་ཅན་ཐམས་ཅད་དང་
སངས་རྒྱས་བྱུང་བ་ཐམས་ཅད་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་ཀྱང་གཟུགས་བརྙན་གྱི་ཚུལ་དུ་རྣམ་པར་དམིགས་པར་མངོན་ཏུ་བསྟན་པ་མཐོང་ངོ་། 
སེམས་ཅན་ཐམས་ཅད་ཀྱི་སྒྲ་དང་། སངས་རྒྱས་ཐམས་ཅད་ཀྱི་དབྱངས་དང་། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་དང་གདམས་ངག་ཡོངས་སུ་བསྟན་པའི་ཆོ་འཕྲུལ་
ཐམས་ཅད་དང་། བྱང་ཆུབ་སེམས་དཔའི་ཡང་དག་པར་བསྡུ་བ་ཐམས་ཅད་དང་། སངས་རྒྱས་ཐམས་ཅད་ཀྱི་རྣམ་པར་རོལ་པ་དག་ཀྱང་ཐོས་པར་གྱུར་ཏོ། །དེས་དེ་

77-1-272a

ལྟར་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་རྩེ་བ་དེ་ལྟ་བུ་དག་མཐོང་སྟེ། ཐོས་ནས་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་བཅུ་ཐོབ་པར་གྱུར་ཏོ། །བཅུ་གང་ཞེ་
ན། འདི་ལྟ་སྟེ་སེམས་ཀྱི་སྐད་གཅིག་ཅིག་ལ་སངས་རྒྱས་ཀྱི་ཞིང་ཐམས་ཅད་ལུས་ཀྱི་རྒྱས་པར་དགང་བའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །དེ་བཞིན་གཤེགས་
པ་ཐམས་ཅད་ཀྱི་ཞབས་ཀྱི་དྲུང་དུ་འགྲོ་བ་ལ་ཐ་མི་དད་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་མཆོད་ཅིང་རིམ་གྲོར་བྱ་
བའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་ལས་དེ་བཞིན་གཤེགས་པ་རེ་རེ་ལས་ཀྱང་སངས་རྒྱས་ཀྱི་ཆོས་ཐམས་ཅད་ཡོངས་
སུ་ཞུགས་པ་རབ་ཏུ་བླང་བའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་ངེས་པར་རྟོགས་པར་བྱ་བའི་ཡེ་ཤེས་
ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །སངས་རྒྱས་ཀྱི་རྣམ་པར་འཕྲུལ་པ་བསམ་གྱི་མི་ཁྱབ་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །སོ་
སོ་ཡང་དག་པར་རིག་པ་ཟད་མི་ཤེས་པའི་ཕྱི་མའི་མཐའི་མུར་ཐུག་པའི་བསྐལ་པར་བྱིན་ཀྱིས་རླབས་ཏེ། ཆོས་ཀྱི་ཚིག་གཅིག་ཤིན་ཏུ་བསྟན་པའི་ཡེ་ཤེས་ཀྱིས་ཕ་རོལ་ཏུ་ཕྱིན་པ་ལ་
རྣམ་པར་སྤྱོད་པ་ཐོབ་པར་གྱུར་ཏོ། །ཆོས་ཀྱི་རྒྱ་མཚོ་ཐམས་ཅད་མངོན་སུམ་དུ་རབ་ཏུ་ཤེས་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །ཆོས་ཀྱི་དབྱིངས་

77-1-272b

ཀྱི་ཚུལ་རྒྱ་མཚོ་ཐམས་ཅད་ཀྱི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །སེམས་ཅན་ཐམས་ཅད་ཀྱི་འདུས་ཤེས་ཀྱི་རྣམ་པ་ཡོངས་སུ་སྒྲུབ་པའི་ཡེ་ཤེས་ཀྱི་ཕ་
རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །སྐད་ཅིག་གཅིག་ལ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་མངོན་སུམ་དུ་རབ་ཏུ་ཤེས་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་
ལ་རྣམ་པར་སྤྱོད་པ་ཐོབ་པར་གྱུར་ཏོ། །དེ་ལྟར་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་དང་ལྡན་པའི་ཚོང་དཔོན་གྱི་བུ་ནོར་བཟངས་ཀྱི་སྤྱི་བོར་བྱང་ཆུབ་སེམས་དཔའ་ཀུན་ཏུ་བཟང་པོས་ལག་པ་
གཡས་པ་བརྐྱང་སྟེ་བཞག་པར་གྱུར་ཏོ། །དེ་ལྟར་ཚོང་དཔོན་གྱི་བུ་ནོར་བཟངས་ཀྱི་སྤྱི་བོ་ལ་བྱང་ཆུབ་སེམས་དཔའ་ཀུན་ཏུ་བཟང་པོས་ལག་པ་བཞག་མ་ཐག་ཏུ་དེའི་མོད་ལ་དེས་ཏིང་ངེ་འཛིན་གྱི་སྒོ་སངས་རྒྱས་ཀྱི་ཞིང་
ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ལ་ཞུགས་པར་གྱུར་ཏེ། ཏིང་ངེ་འཛིན་རེ་རེ་ལས་ཀྱང་འཇིག་རྟེན་གྱིས་ཁམས་རྒྱ་མཚོ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་སྔན་ཆད་མ་མཐོང་བ་དག་ལའང་
ཞུགས་པར་གྱུར་ཏོ། །དེའི་ཐམས་ཅད་མཁྱེན་པ་ཉིད་ཀྱི་ཚོགས་སངས་རྒྱས་ཀྱི་རྡུལ་ཤིན་ཏུ་ཕྲ་བ་སྙེད་ཀྱང་ཚོགས་སུ་གྱུར་ཏོ། །དེའི་ཐམས་ཅད་མཁྱེན་པ་ཉིད་ཀྱི་ཆོས་ཀྱི་ཚོགས་སངས་རྒྱས་ཀྱི་ཞིང་ཐམས་
ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱང་རབ་ཏུ་བྱུང་བར་གྱུར་ཏོ། །ཐམས་ཅད་མཁྱེན་པ་ཉིད་ལ་རབ་ཏུ་གནས་པར་བྱ་བ་ཆེན་པོ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་མངོན་པར་
འཕགས་པར་གྱུར་ཏོ། །སྨོན་ལམ་རྒྱ་མཚོ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ལའང་ཞུགས་པར་གྱུར་ཏོ། །ཐམས་ཅད་མཁྱེན་པ་ཉིད་དུ་འབྱུང་བའི་ལམ་སངས་རྒྱས་

77-1-273a

ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་ཀྱང་བྱུང་བར་གྱུར་ཏོ། །བྱང་ཆུབ་སེམས་དཔའི་སྤྱོད་པ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ལའང་རབ་ཏུ་ཞུགས་པར་གྱུར་ཏོ། ཐམས་
ཅད་མཁྱེན་པ་ཉིད་ཀྱིས་ཤུགས་དྲག་པོ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་ཀྱང་རྣམ་པར་འཕེལ་བར་གྱུར་ཏོ། །སངས་རྒྱས་ཐམས་ཅད་ཀྱི་ཡེ་ཤེས་སྣང་བ་སངས་རྒྱས་ཀྱི་ཞིང་
ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་ཀྱང་རབ་ཏུ་སྣང་བར་གྱུར་ཏོ། །ཇི་ལྟར་མི་མཇེད་ཀྱི་འཇིག་རྟེན་གྱི་ཁམས་འདིར་བྱང་ཆུབ་སེམས་དཔའ་ཀུན་ཏུ་བཟང་པོ་བཅོམ་ལྡན་འདས་དེ་བཞིན་གཤེགས་
པ་རྣམ་པར་སྣང་མཛད་ཀྱི་སྤྱན་སྔ་ན་འདུག་པས་ལག་པ་གཡས་པ་བརྐྱང་ཏེ། ཚོང་དཔོན་གྱི་བུ་ནོར་བཟངས་ཀྱི་སྤྱི་བོར་བཞག་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་དེ་བཞིན་གཤེགས་
པའི་ཞབས་ཀྱི་དྲུང་ན་འདུག་པའི་བྱང་ཆུབ་སེམས་དཔའ་ཀུན་ཏུ་བཟང་པོས་ཀྱང་ལག་པ་གཡས་པ་བརྐྱང་ཞིང་ཚོང་དཔོན་གྱི་བུ་ནོར་བཟངས་ཀྱི་སྤྱི་བོ་ལ་བཞག་པར་གྱུར་ཏོ། །དེ་བཞིན་དུ་ཕྱོགས་དང་ཕྱོགས་
མཚམས་ཐམས་ཅད་ཀུན་གྱི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བའི་ཁོངས་སུ་ཆུད་པའི་འཇིག་རྟེན་གྱིས་ཁམས་དག་གིས་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་འདུག་པའི་བྱང་
ཆུབ་སེམས་དཔའ་ཀུན་ཏུ་བཟང་པོས་ཀྱང་ལག་པ་གཡས་པ་བརྐྱང་ཞིང་ཚོང་དཔོན་གྱི་བུ་ནོར་བཟངས་ཀྱི་སྤྱི་བོ་ལ་བཞག་པར་གྱུར་ཏོ། །ཇི་ལྟར་བཅོམ་ལྡན་འདས་རྣམ་པར་སྣང་མཛད་ཀྱི་ཞབས་
ཀྱི་དྲུང་ན་འདུག་པའི་བྱང་ཆུབ་སེམས་དཔའ་ཀུན་ཏུ་བཟངས་པོའི་ལག་པ་གཡས་པས་རེག་སྟེ། ཚོང་དཔོན་གྱི་བུ་ནོར་བཟངས་ཀྱི་ཆོས་ཀྱི་སྒོ་མང་པོ་ལ་ཞུགས་པར་གྱུར་པ་དེ་བཞིན་དུ་ཀུན་ཏུ་བཟང་

77-1-273b

པོའི་ལུས་ཐམས་ཅད་ལས་འཕྲོས་པའི་ལག་པའི་སྤྲིན་མང་པོས་རེག་པའི་ཚོང་དཔོན་གྱི་བུ་ནོར་བཟངས་ཀྱིས་ཀྱང་ཆོས་ཀྱི་སྒོ་མང་པོ་ལ་ཚུལ་སྣ་ཚོགས་ཀྱིས་ཞུགས་པར་གྱུར་ཏོ། །དེ་ནས་བྱང་ཆུབ་སེམས་
དཔའ་སེམས་དཔའ་ཆེན་པོ་ཀུན་ཏུ་བཟང་པོས་ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་ངའི་རྣམ་པར་འཕྲུལ་པ་མཐོང་མོད། སྨྲས་པ་འཕགས་པ་མཐོང་ནི་མཐོང་
ན་དེ་ཙམ་དུ་བསམ་གྱིས་མི་ཁྱབ་པའི་རྣམ་པར་ཐར་པ་དེ་ནི་དེ་བཞིན་གཤེགས་པས་མཁྱེན་ན་མཁྱེན་གྲང་ངོ་། །དེས་སྨྲས་པ། རིགས་ཀྱི་བུ་ངས་ནི་ཐམས་ཅད་མཁྱེན་པ་ཉིད་ཀྱི་སེམས་མངོན་པར་འདོད་ཅིང་
བསྐལ་པ་སངས་རྒྱས་ཀྱི་ཞིང་བརྗོད་དུ་མྱེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཅིག་ཏུ་རྣམ་པར་སྤྱད་དེ། བསྐལ་པ་ཆེན་པོ་དེ་དག་རེ་རེ་ལ་ཡང་བྱང་ཆུབ་ཀྱི་སེམས་ཡོངས་སུ་སྤྱོད་པ་བྱེད་ཅིང་
ངས་དེ་བཞིན་གཤེགས་པ་སངས་རྒྱས་ཀྱི་ཞིང་བརྗོད་དུ་མྱེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཅིག་བསྙེན་བཀུར་ཏོ། །བསྐལ་པ་ཆེན་པོ་དེ་དག་རེ་རེ་ལ་ཡང་། ཐམས་ཅད་མཁྱེན་པ་
ཉིད་ཀྱི་བསོད་ནམས་ཡོངས་སུ་སྡུད་པ་བྱེད་ཅིང་མཆོད་སྦྱིན་ཆེན་པོ་བཏང་བ་ཐམས་ཅད་དང་སྦྱར་བ། འཇིག་རྟེན་ཐམས་ཅད་དུ་རྣམ་པར་གྲགས་པ། སེམས་ཅན་ཐམས་ཅད་ལ་བསྟབས་པ་དག་ཀྱང་
མཆོད་སྦྱིན་ཏུ་བྱས་སོ། །བསྐལ་པ་ཆེན་པོ་དེ་དག་རེ་རེ་ལ་ཡང་ཐམས་ཅད་མཁྱེན་པ་ཉིད་ཀྱི་ཆོས་ལ་མངོན་པར་སྨོན་ཅིང་བཏང་བ་དང་། གཏང་བ་ཆེན་པོ་དང་། ཤིན་ཏུ་གཏང་བ་སངས་རྒྱས་ཀྱི་ཞིང་བརྗོད་དུ་མེད་པའི་
རྡུལ་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཅིག་བྱས་སོ། །བསྐལ་པ་ཆེན་པོ་དེ་དག་རེ་རེ་ལ་ཡང་ལུས་དང་སྲོག་ཕངས་པར་བྱ་བ་མྱེད་པར་སངས་རྒྱས་ཀྱི་ཆོས་གཅེས་པར་བྱ་བས་ལུས་བརྗོད་དུ་མྱེད་

77-1-274a

པའི་ཡང་བརྗོད་དུ་མེད་པ་ཞིག་ཡོངས་སུ་བཏང་ངོ་། །རྒྱལ་པོའི་སྲིད་ཆེན་པོ་ཡང་ཡོངས་སུ་བཏང་ངོ་། །གྲོང་དང་གྲོང་ཁྱེར་དང་། ལྗོངས་དང་ཡུལ་དང་། ཁམས་དང་། རྒྱལ་པོའི་གནས་དག་ཀྱང་ཡོངས་སུ་བཏང་
ངོ་། །སྡུག་ཅིང་ཡིད་དུ་འོང་ལ་བཏང་མི་བྲ་བའི་འཁོར་གྱི་ཚོགས་དག་ཀྱང་ཡོངས་སུ་བཏང་ངོ་། །བུ་དང་བུ་མོ་དང་ཆུང་མ་དག་ཀྱང་ཡོངས་སུ་བཏང་ངོ་། །རང་གི་ལུས་དང་། ཤ་དག་ཀྱང་ཡོངས་སུ་བཏང་ངོ་། །
བདག་གི་ལུས་ལས་ཁྲག་དག་ཀྱང་སློང་བ་རྣམས་ལ་ཡོངས་སུ་བཏང་ངོ་། །རུས་པ་དང་རྐང་དག་ཀྱང་ཡོངསུ་བཏང་ངོ་། །རྐང་པ་དང་ལག་པ་དག་ཀྱང་ཡོངསུ་བཏང་ངོ་། །ཡན་ལག་དང་ཉིང་ལག་དག་ཀྱང་ཡོངསུ་
བཏང་ངོ་། །སྣ་དང་རྣ་བ་དག་ཀྱང་ཡོངས་སུ་བཏང་ངོ་། །མྱིག་དག་ཀྱང་ཡོངསུ་བཏང་ངོ་། །རང་གི་ཁ་ནས་ལྕེའི་དབང་པོ་དག་ཀྱང་ཡོངསུ་བཏང་ངོ་། །བསྐལ་པ་ཆེན་པོ་དེ་དག་རེ་རེ་ལ་ཡང་འཇིག་རྟེན་ཐམས་ཅད་ལས་མངོན་པར་
འཕགས་ཤིང་བླ་ན་མེད་པར་གྱུར་པ་ཐམས་ཅད་མཁྱེན་པ་ཉིད་ཀྱི་དབུ་ལ་མངོན་པར་སྨོན་ཅིང་། རང་གིས་མགོ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཅིག་ཡོངསུ་བཏང་
ངོ་། །བསྐལ་པ་ཆེན་པོ་རེ་རེ་ལས་ཇི་ལྟ་བ་དེ་བཞིན་དུ་བསྐལ་པ་ཆེན་པོ་རྒྱ་མཚོ་སངས་རྒྱས་གྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ལས་བསྐལ་པ་རྒྱ་མཚོ་རེ་རེ་ལ་ཡང་དེ་བཞིན་
གཤེགས་པ་སངས་རྒྱས་ཀྱི་ཞིང་རྒྱ་མཚོ་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་གཅིག་ལ་དབང་པོ་དམ་པར་གྱུར་ཏོ། །རིམ་གྲོར་བྱས་སོ། །བཀུར་སྟིར་བྱས་སོ། །ཕུ་དུད་བྱས་སོ། །མཆོད་པ་བྱས་སོ། །ན་བཟའ་
དང་། བཤོས་དང་། གཟིམས་ཆ་དང་། སྙུམ་གྱི་རྐྱེན་སྨན་དང་། ཡོ་བྱད་དག་ཀྱང་དབུལ་བ་བྱས་སོ། དེ་བཞིན་གཤེགས་པ་དེ་དག་གི་བསྟན་པ་ལ་ཡང་རབ་ཏུ་བྱུང་སྟེ། སངས་རྒྱས་ཀྱི་གདམས་

77-1-274b

ངག་ཐམས་ཅད་ལ་ཡང་རབ་ཏུ་ཞུགས་སོ། །དེ་དག་གི་བསྟན་པ་ཡང་ཡོངས་སུ་གཟུང་སྟེ། རིགས་ཀྱི་བུ་དེ་སྙེད་ཀྱི་བསྐལ་པ་རྒྱ་མཚོ་ཡང་དེ་བཞིན་གཤེགས་པའི་བསྟན་པ་ལ་སེམས་བསྐྱེད་པ་འགའ་ཙམ་གྱི་
ཀྱང་མི་འཐུན་པའི་སེམས་བསྐྱེད་དུ་མི་དྲན་ནོ། །དེ་སྙེད་ཀྱི་བསྐལ་པ་རྒྱ་མཚོར་སེམས་བསྐྱེད་པ་འགའ་ཙམ་གྱི་ཀྱང་ཁོང་ཁྲོ་བ་དང་ལྡན་པའི་སེམས་བསྐྱེད་པ་འམ། བདག་ཏུ་འཛིན་པའི་སེམས་སམ། །
བདག་ཡོངས་སུ་བསྐྱོང་བའི་ཡོངས་སུ་གཟུང་བའི་སེམས་སམ། བདག་དང་གཞན་དུ་བྱེ་བའི་སེམས་སམ། བྱང་ཆུབ་ཀྱི་ལམ་དང་བྲལ་བར་བྱ་བའི་སེམས་སམ། འཁོར་བ་ན་གནས་པའི་ཡོངས་
སུ་སྐྱོ་བའི་སེམས་སམ། ཞུམ་པའི་སེམས་སམ། སྒྲིབ་པས་མགོ་རྨོང་པའི་སེམས་བསྐྱེད་དུ་མི་དྲན་ཏེ། གཞན་དུ་ན་ཐམས་ཅད་མཁྱེན་པ་ཉིད་ཀྱི་ཚོགས་བསྩགས་པའི་ཕྱིར་བྱང་ཆུབ་ཀྱི་སེམས་
ཡེ་ཤེས་གཞན་གྱི་མི་ཐུབ་ཅིང་རྒྱལ་བར་དཀའ་བའི་སྙིང་པོ་དང་ལྡན་པ་བསྐྱེད་དོ། །རིགས་ཀྱི་བུ་འདི་ལྟ་སྟེ་ངའི་སྔོན་གྱི་སྦྱོར་བ་ཕུན་སུམ་ཚོགས་པ། སངས་རྒྱས་ཀྱི་ཞིང་ཡོངས་སུ་དག་པར་
བྱས་པའི་སྦྱོར་བ་དང་། དེས་སྙིང་རྗེ་ཆེན་པོའི་སེམས་རབ་ཏུ་ཐོབ་སྟེ། སེམས་ཅན་ཡོངས་སུ་བསྐྱབ་པ་དང་། ཡོངས་སུ་སྨིན་པར་བྱ་བ་དང་། ཡོངས་སུ་སྦྱང་བར་བྱས་པའི་སྦྱོར་བ་
དག་དང་། སངས་རྒྱས་མཆོད་ཅིང་བསྙེན་བཀུར་བའི་སྦྱོར་བ་དག་དང་། དམ་པའི་ཆོས་ཡོངས་སུ་བཙལ་བའི་དོན་དུ་བླ་མ་ལ་རིམ་གྲོར་བྱས་པའི་སྦྱོར་བ་དག་དང་། དམ་པའི་ཆོས་ཡོངས་སུ་
བཟུང་བའི་དོན་དུ་ལུས་ཡོངསུ་བཏང་བའི་སྦྱོར་བ་དག་དང་། དམ་པའི་ཆོས་ཡོངས་སུ་བསྲུང་བའི་དོན་དུ་རང་གིས་སྲོག་ཡོངསུ་བཏང་བའི་སྦྱོར་བ་དེ་དག་ནི་བསྟན་པར་བྱ་ན་བསྐལ་པ་རྒྱ་མཚོ་ཐམས་ཅད་ཀྱང་

77-1-275a

ཟད་པར་འགྱུར་རོ། །རིགས་ཀྱི་བུ་ངས་ནི་ཆོས་རྒྱ་མཚོ་སྙེད་ཅིག་ལས་ཀྱང་ཚིག་དང་ཡི་གེ་འགའ་ཙམ་ཡང་སེམས་ཅན་ཐམས་ཅད་ཡོངས་སུ་བསྐྱོབ་པ་ལ་བརྩོན་པ་དང་། རང་གི་སེམས་ཀྱི་རྒྱུད་ངེས་པར་ཤེས་པར་བྱ་བ་ལ་བཙོན་
པ་དང་། ཕ་རོལ་གྱིས་ཆོས་མངོན་དུ་ཐོས་པར་བྱ་བ་ལ་བརྩོན་པ་དང་། འཇིག་རྟེན་པའི་ཡེ་ཤེས་སྣང་བ་ཐམས་ཅད་རབ་ཏུ་བརྗོད་པ་ལ་བརྩོན་པ་དང་། འཇིག་རྟེན་ལས་འདས་པའི་ཡེ་ཤེས་ཐམས་ཅད་རབ་ཏུ་བརྗོད་པ་ལ་བརྩོན་པ་དང་། །
སེམས་ཅན་ཐམས་ཅད་ཀྱི་འཁོར་བའི་བདེ་བ་ཡོངས་སུ་བསྐྱེད་པ་ལ་བརྩོན་པ་དང་། དེ་བཞིན་གཤེགས་པ་ཐམས་ཅད་ཀྱི་ཡོན་ཏན་ཡང་དག་པར་བསྔགས་པ་ལ་བརྩོན་པས་འཁོར་ལོས་སྒྱུར་བའི་རྒྱལ་སྲིད་ཡོངས་སུ་བཏང་བས་
སྙམས་པ་འམ། བདོག་པ་ཐམས་ཅད་ཡོངས་སུ་གཏང་སྙམས་པ་གང་ཡང་མེད་དེ། དེ་ལྟར་ང་ཉིད་ཀྱི་སྦྱོར་བ་ཕུན་སུམ་ཚོགས་པ་བསྟན་པར་བྱས་ན། བསྐལ་པ་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་
དུ་མེད་པའི་རྡུལ་ཤིན་ཏུ་ཕྲ་བ་སྙེད་ཟད་པར་འགྱུར་རོ། །རིགས་ཀྱི་བུ་དེ་ལྟར་ངས་རྣམ་པ་དེ་ལྟ་བུའི་ཚོགས་ཀྱི་སྟོབས་དང་། དགེ་བའི་རྩ་བ་བསྩགས་པའི་སྟོབས་དང་། མོས་པ་རྒྱ་ཆེན་པོའི་སྟོབས་དང་། 
ཡོན་ཏན་ལ་ནན་ཏན་དུ་བྱ་བའི་སྟོབས་དང་། ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པར་བྱ་བའི་སྟོབས་དང་། ཤེས་རབ་ཀྱི་མིག་གི་སྟོབས་དང་། དེ་བཞིན་གཤེགས་པའི་བྱིན་གྱི་
རླབས་ཀྱི་སྟོབས་དང་། སྨོན་ལམ་ཆེན་པོའི་སྟོབས་དང་། སྙིང་རྗེ་ཆེན་པོའི་སྟོབས་དང་། ཤིན་ཏུ་སྦྱངས་པའི་མངོན་པར་ཤེས་པའི་སྟོབས་དང་། དགེ་བའི་བཤེས་གཉེན་གྱིས་ཡོངས་སུ་
བཟུང་བའི་སྟོབས་ཀྱིས་ཆོས་ཀྱི་ལུས་ཡོངས་སུ་དག་པ་དུས་གསུམ་དུ་ཐ་མི་དད་པ་ཐོབ་པར་གྱུར་ཏོ། །བླ་ན་མེད་པའི་གཟུགས་ཀྱི་ལུས་འཇིག་རྟེན་ཐམས་ཅད་ལས་མངོན་པར་འཕགས་པ། 

77-1-275b

འགྲོ་བ་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་རྣམ་པར་དམིགས་པ་ཐམས་ཅད་དུ་རྗེས་སུ་སོང་བ་སངས་རྒྱས་ཀྱི་ཞིང་ཐམས་ཅད་དུ་རབ་ཏུ་གཞོལ་བ། ཐམས་ཅད་དུ་རབ་ཏུ་གནས་པ་རྣམ་པར་འཕྲུལ་
པ་ཐམས་ཅད་རྣམ་པ་ཐམས་ཅད་དུ་སྟོན་པ་འགྲོ་བ་ཐམས་ཅད་ཀྱི་ཡིད་དུ་འོང་བ་ཡང་ཡོངས་སུ་སྦྱངས་སོ། །རིགས་ཀྱི་བུ་ངས་ལུས་ཐོབ་པ་ཕུན་སུམ་ཚོགས་པ། བསྐལ་པ་རྒྱ་མཚོ་མཐའ་ཡས་པས་ཡོངས་
སུ་གྲུབ་པ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོས་འབྱུང་བར་དཀའ་བ་མཐོང་བར་དཀའ་བ་འདི་ལ་ལྟོས། རིགས་ཀྱི་བུ་ང་ནི་དགེ་བའི་རྩ་བ་མ་བསྐྱེད་པའི་སེམས་ཅན་རྣམས་ཀྱི་རྣ་ལམ་དུ་ཡང་མི་འོང་ན། མཐོང་བར་
ལྟ་ཅི་ཞིག་སྨོས། རིགས་ཀྱི་བུ་སེམས་ཅན་གང་དག་ངའི་མིང་ཐོས་པ་ཙམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་ཡོད་དོ། །མཐོང་བ་ཙམ་དང་རེག་པ་ཙམ་དང་། བསྐྱལ་བ་ཙམ་དང་རྗེས་སུ་འབྲང་བ་
ཙམ་དང་། རྨི་ལམ་དུ་མཐོང་བ་ཙམ་དང་། རྨི་ལམ་དུ་མིང་ཐོས་པ་ཙམ་གྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་ཡོད་དོ། །སེམས་ཅན་ལ་ལས་ནི་ང་ཉིན་ཞག་གཅིག་ཏུ་དྲན་པར་བྱས་ན་ཡོངས་སུ་
སྨིན་པར་འགྱུར་རོ། །ལ་ལས་ནི་ཞག་བདུན་དང་། ལ་ལས་ནི་ཟླ་བ་ཕྱེད་དང་། ལ་ལས་ནི་ཟླ་བ་གཅིག་དང་། ལ་ལས་ནི་ལོ་གཅིག་དང་། ལ་ལས་ནི་ལོ་བརྒྱ་དང་། ལ་ལས་ནི་བསྐལ་པ་གཅིག་དང་། ལ་ལས་ནི་བསྐལ་པ་བརྒྱ་ནས། བསྐལ་པ་སངས་
རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དུ་ང་རྗེས་སུ་དྲན་པར་བྱས་ན། ཡོངས་སུ་སྨིན་པར་འགྱུར་རོ། །ལ་ལས་ནི་ཚེ་གཅིག་ཏུ་རྗེས་སུ་དྲན་པར་བྱས་ན་ཡོངས་སུ་སྨིན་པར་འགྱུར་རོ། །ལ་ལས་ནི་ཚེའི་
རྒྱུད་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཡོངས་སུ་སྨིན་པར་འགྱུར་རོ། །སེམས་ཅན་ལ་ལས་ནི་ངའི་འོད་མཐོང་བས་ཡོངས་སུ་སྨིན་པར་འགྱུར་རོ། ལ་ལས་ནི་འོད་ཟེར་བཀྱེ་བ་མཐོང་བས། 

77-1-276a

ལ་ལས་ནི་ཞིང་བསྐྱོད་པས་ལ་ལས་ནི་གཟུགས་གྱི་ལུས་བསྟན་པས། ལ་ལ་དགའ་བར་བྱས་པས་ཡོངསུ་སྨིན་པར་འགྱུར་ཏེ། རིགས་ཀྱི་བུ་དེ་ལྟར་ཐབས་ཀྱི་ཚུལ་སངས་རྒྱས་གྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱིས་
སེམས་ཅན་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །རིགས་ཀྱི་བུ་སེམས་ཅན་གང་གིས་ངའི་སངས་རྒྱས་ཀྱི་ཞིང་ཡོངསུ་དག་པ་ཐོབ་པ་དེ་དག་ནི་སངས་རྒྱས་ཀྱི་ཞིང་ཡོངསུ་
དག་པར་སྐྱེའོ། །གང་གིས་ངའི་ལུས་ཡོངསུ་དག་པ་མཐོང་བར་གྱུར་པ་དེ་དག་ནི་ངའི་ལུས་ལྟ་བུར་སྐྱེ་བར་འགྱུར་གྱིས་རིགས་ཀྱི་བུ་ངའི་ལུས་རྣམ་པར་དག་པ་འདི་ལ་ལྟོས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་བྱང་
ཆུབ་སེམས་དཔའ་ཀུན་ཏུ་བཟང་པོའི་ལུས་ལ་བསམ་པ་དང་། བ་སྤུ་རེ་རེ་ལ་ཡང་སངས་རྒྱས་ཀྱི་ཞིང་རྒྱ་མཚོ་བརྗོད་དུ་མེད་པའི་ཡང་བརྗོད་དུ་མེད་པའི་སངས་རྒྱས་སྐྱེ་བས་ཡོངསུ་གང་བ་མཐོང་ངོ་། །ཞིང་རྒྱ་མཚོ་རེ་རེ་ན་ཡང་དེ་བཞིན་གཤེགས་
པ་བྱང་ཆུབ་སེམས་དཔའི་འཁོར་རྒྱ་མཚོས་ཀུན་ནས་བསྐོར་བ་མང་པོ་བཞུགས་པ་མཐོང་ངོ་། །ཞིང་རྒྱ་མཚོ་དེ་དག་ཐམས་ཅད་ཀྱང་གཞི་སྣ་ཚོགས་དང་དབྱིབས་སྣ་ཚོགས་དང་། རྒྱན་སྣ་ཚོགས་དང་འཁོར་ཡུག་སྣ་ཚོགས་དང་། སྤྲིན་སྣ་ཚོགས་
དང་ནམ་མཁའ་སྣ་ཚོགས་ཀྱིས་ཀུན་ནས་ཁེབས་པ་དང་། སངས་རྒྱས་འབྱུང་བ་སྣ་ཚོགས་དང་ཆོས་ཀྱི་འཁོར་ལོ་སྣ་ཚོགས་ཀྱི་དབྱངས་དང་ལྡན་པར་མཐོང་ངོ་། །བ་སྤུའི་བུ་ག་རེ་རེ་ལ་ཇི་ལྟ་བ་བཞིན་དུ་བ་སྤུའི་བུ་ག་མ་ལུས་པ་
ཐམས་ཅད་དང་། མཚན་ཐམས་ཅད་དང་། དཔེ་བྱད་བཟང་པོ་ཐམས་ཅད་དང་། ཡན་ལག་དང་ཉིང་ལག་ཐམས་ཅད་ལ་ཡང་དེ་བཞིན་ཏེ། ཞིང་རྒྱ་མཚོ་རེ་རེ་ནས་ཀྱང་སངས་རྒྱས་ཀྱི་སྐུ་སྤྲུལ་པའི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་
ཕྲ་བ་སྙེད་བྱེད་ནས་ཕྱོགས་བཅུར་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་ཅན་ཡོངསུ་སྨིན་པར་མཛད་པ་མཐོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་

77-1-276b

བྱང་ཆུབ་སེམས་དཔའ་ཀུན་ཏུ་བཟང་པོའི་གདམས་ངག་དང་རྗེས་སུ་བསྟན་པས་རྗེས་སུ་བསྟན་ནས། བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་ཀྱི་ཁོངསུ་གཏོགས་པའི་འཇིག་རྟེན་གྱི་ཁམས་ཐམས་ཅད་དུ་ཞུགས་ཏེ། སེམས་ཅན་
ཡོངས་སུ་སྨིན་པར་བྱེད་པར་གྱུར་ཏོ། །དེ་ལྟར་ཚོང་དཔོན་གྱི་བུ་ནོར་བཟངས་ཀྱིས་དགེ་བའི་བཤེས་གཉེན་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་གཅིག་གི་དྲུང་དུ་ཕྱིན་ཏེ། མཐོང་བ་དང་བསྙེན་བཀུར་བས་ཡེ་ཤེས་ཀྱི་སྣང་བ་དང་། དགེ་
བའི་རྩ་བ་བསྩགས་པ་དེ་དག་གིས་བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་སྟེ། དགེ་བའི་རྩ་བ་བསྩགས་པར་གྱུར་པ་དེའི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆར་ཡང་མ་ཡིན་བརྒྱ་སྟོང་གི་ཆར་ཡང་མ་ཡིན། བྱེ་བ་བརྒྱ་སྟོང་གི་
ཆར་ཡང་མ་ཡིན་ཏེ། གྲངས་དང་ཆ་དང་བགྲང་བ་དང་དཔེར་བྱ་བ་དང་། རྒྱུར་བྱ་བ་ཡང་མི་ཕོད་དོ། །དེས་དང་པོ་སེམས་བསྐྱེད་པ་ནས་ཉེ་བར་བཟུང་ནས། བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བའི་བར་དེར་སངས་རྒྱས་ཀྱི་ཞིང་རྒྱ་མཚོ་
གཅིག་ནས་གཅིག་ཏུ་བརྒྱུད་པ་ཇི་སྙེད་གཅིག་ལ་ཞུགས་པར་གྱུར་པ་དེ་དག་པས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་བར་དུ་བྱང་ཆུབ་སེམས་དཔའ་ཀུན་ཏུ་བཟང་པོའི་བ་སྤུའི་བུ་ག་རེ་རེས་སངས་
རྒྱས་ཀྱི་ཞིང་རྒྱ་མཚོ་གཅིག་ནས་གཅིག་ཏུ་བརྒྱུད་པ་མང་པོ་ལ་སེམས་ཀྱི་སྐད་ཅིག་གཅིག་གིས་ཞུགས་པར་གྱུར་ཏེ། བ་སྤུའི་བུ་ག་རེ་རེར་ཇི་ལྟ་བ་དེ་བཞིན་དུ་བ་སྤུའི་བུ་ག་མ་ལུས་པ་ཐམས་ཅད་ལ་ཡང་སེམས་ཀྱི་སྐད་ཅིག་རེ་རེ་ལ་
འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་རྣམ་པར་གནོན་པ་ཕྱི་མའི་མཐའི་མུར་ཐུག་པའི་བསྐལ་པར་བྱིན་གྱིས་བརླབས་པ། འཇིག་རྟེན་གྱི་ཁམས་རྒྱས་པར་འགེངས་པས་
ཞུགས་ཀྱང་། ཞིང་རྒྱ་མཚོ་གཅིག་ནས་གཅིག་ཏུ་བརྒྱུད་པའི་མཐར་ཕྱིན་པར་མ་གྱུར་ཏེ། ཞིང་རྒྱ་མཚོའི་ལྷུན་དང་། ཞིང་རྒྱ་མཚོའི་བྱེ་བྲག་དང་། ཞིང་རྒྱ་མཚོ་ཡོངས་སུ་བསྡུ་བ་དང་། ཞིང་རྒྱ་མཚོ་ཡོངས་སུ་

77-1-277a

འགྲུབ་པ་དང་། ཞིང་རྒྱ་མཚོ་འཇིག་པ་དང་། ཞིང་རྒྱ་མཚོ་རྣམ་པར་ཕྱེ་བ་དང་། སངས་རྒྱས་བྱུང་བ་རྒྱ་མཚོ་གཅིག་ནས་གཅིག་ཏུ་རྒྱུད་པ་དང་། སངས་རྒྱས་བྱུང་བ་རྒྱ་མཚོའི་སྐུ་དང་། སངས་རྒྱས་བྱུང་
བ་རྒྱ་མཚོའི་བྱེ་བྲག་དང་། སངས་རྒྱས་བྱུང་བ་རྒྱ་མཚོ་ཡོངས་སུ་བསྡུད་པ་དང་། སངས་རྒྱས་བྱུང་བ་རྒྱ་མཚོ་ཡོངས་སུ་འབྱུང་བ་དང་། སངས་རྒྱས་བྱུང་བ་རྒྱ་མཚོ་ཡོངས་སུ་འཇིག་པ་དང་། བྱང་ཆུབ་སེམས་
དཔའི་འཁོར་གྱི་དཀྱིལ་འཁོར་རྒྱ་མཚོ་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་གཅིག་ནས་གཅིག་ཏུ་བརྒྱུད་པ་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོའི་ལུས་དང་། 
བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོའི་བྱེ་བྲག་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་ཡོངས་སུ་བསྡུ་བ་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་ཡོངས་སུ་
འབྱུང་བ་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་ཡོངས་སུ་འཇིག་པ་དང་། སེམས་ཅན་གྱི་ཁམས་ལ་འཇུག་པ་དང་། སྐད་ཅིག་རེ་རེས་སེམས་ཅན་གྱི་དབང་པོ་ཤེས་པ་ལ་འཇུག་པ་དང་། 
སེམས་ཅན་གྱི་དབང་པོ་ཤེས་པ་ཁོང་དུ་ཆུད་པར་བྱ་བ་དང་། སེམས་ཅན་ཡོངས་སུ་སྨིན་པར་བྱ་ཞིང་གདུལ་བ་དང་། བྱང་ཆུབ་སེམས་དཔའ་རྣམ་པར་འཕྲུལ་པ་ཟབ་མོ་ལ་རྣམ་པར་གནས་པ་དང་། བྱང་ཆུབ་
སེམས་དཔའི་ས་ཡོངས་སུ་གནན་པའི་རྣམ་པར་གནོན་པ་རྒྱ་མཚོའི་མཐར་ཡང་ཕྱིན་པར་མ་གྱུར་ཏེ། དེ་ཞིང་ལ་ལར་ནི་བསྐལ་པར་རྣམ་པར་སྤྱོད་པར་གྱུར་ཏོ། །ཞིང་ལ་ལར་ནི་བསྐལ་པ་སངས་རྒྱས་ཀྱི་
ཞིང་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་སྤྱད་པར་གྱུར་ཏེ། ཞིང་དེ་དག་ནས་ཀྱང་གཡོས་པ་མེད་དོ། །སེམས་ཀྱི་སྐད་ཅིག་རེ་རེ་ལ་ཡང་ཞིང་རྒྱ་མཚོ་མཐའ་དང་དབུས་མེད་པ་ལ་འཇུག་ཅིང་

77-1-277b

སེམས་ཅན་རྣམས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱེད་པར་གྱུར་ཏེ། དེས་དེ་ལྟར་མཐར་གྱིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨོན་ལམ་རྒྱ་མཚོ་
མཉམ་པ་ཉིད་ཀྱི་བར་དུའང་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་དང་མཉམ་པ་ཉིད་དང་། ཞིང་ཐམས་ཅད་ལུས་ཀྱིས་རྒྱས་པར་དགང་བ་མཉམ་པ་ཉིད་དང་། སྤྱོད་པ་ཡོངས་སུ་རྫོགས་པར་རྒྱས་
པར་དགང་བ་མཉམ་པ་ཉིད་དང་། མངོན་པར་རྫོགས་པར་འཚང་རྒྱ་བའི་རྣམ་པར་འཕྲུལ་པ་ཡོངསུ་བསྟན་པས་རྒྱས་པར་དགང་བ་མཉམ་པ་ཉིད་དང་། ཆོས་ཀྱི་འཁོར་ལོ་བསྐོར་བ་མཉམ་པ་ཉིད་དང་། སོ་སོ་ཡང་དག་
པར་རིག་པ་རྣམ་པར་དག་པ་མཉམ་པ་ཉིད་དང་། དབྱངས་བརྗོད་པ་མཉམ་པ་ཉིད་དང་། དབྱངས་ཀྱི་ཡན་ལག་རྒྱ་མཚོ་ཐམས་ཅད་ཀྱི་སྦྱོར་བ་མཉམ་པ་ཉིད་དང་། སྟོབས་དང་མི་འཇིགས་པ་མཉམ་པ་ཉིད་དང་། སངས་
རྒྱས་ཀྱི་རྣམ་པར་སྤྱོད་པ་མཉམ་པ་ཉིད་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་མཉམ་པ་ཉིད་དང་། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པའི་རྣམ་པར་འཕྲུལ་པ་མཉམ་པ་ཉིད་ཀྱང་
རྗེས་སུ་ཐོབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་བསྐལ་པ་དང་། བསྐལ་པ་འཇམ་ཀླས་པ་དང་། འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་
སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་པོ་དེ་དག་གནན་ཏེ། མངོན་པར་བརྗོད་པའི་ཕྱིར་ཚིགསུ་བཅད་པའི་དབྱངས་ཀྱིས་སྨོན་ལམ་བཏབ་པ། ཇི་སྙེད་སུ་དག་ཕྱོགས་
བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་

77-1-278a

ཡིད་ཀྱིས་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་
དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པར། །ཐམས་ཅད་རྒྱལ་བ་དག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་
མཚོ་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། །བདེ་བར་གཤེགས་པ་ཐམས་ཅད་བདག་གིས་བསྟོད། །མེ་ཏོག་དམ་པ་ཕྲེང་བ་དམ་པ་དང་། །སིལ་སྙན་རྣམས་དང་བྱུག་པའི་གདུགས་མཆོག་
དང་། །མར་མེ་མཆོག་དང་བདུག་པ་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མའི་ཕུར་མ་རི་རབ་མཉམ་པ་དང་། །ཁྱད་པར་ཅན་གྱི་རྒྱན་མཆོག་ཐམས་ཅད་
ཀྱིས། །རྒྱལ་བ་དེ་དག་ལ་ནི་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་
པར་བགྱི། །འདོད་ཆགས་ཞེ་སྡང་གཏི་མུག་དབང་གིས་ན། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །ཕྱོགས་བཅུའི་
རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་རྣམས་ཀྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རང་། །གང་རྣམས་ཕྱོགས་བཅུའི་འཇིག་རྟེན་
སྒྲོན་མ་དག །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པ་བསྐོར་བར་བསྐུལ། །མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་

77-1-278b

ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་བཞུགས་པར་ཡང་། །བདག་གིས་ཐལ་མོ་རབ་སྦྱར་གསོལ་བར་བགྱི། །ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡིད་རང་བསྐུལ་ཞིང་
གསོལ་བ་ཡི། །དགེ་བ་ཅུང་ཟད་བདག་གིས་ཅི་བསྩགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོ་འོ། །འདས་པའི་སངས་རྒྱས་རྣམས་དང་ཕྱོགས་བཅུ་ཡི། །འཇིག་རྟེན་དག་ན་གང་བཞུགས་མཆོད་པར་
གྱུར། །གང་ཡང་མ་བྱོན་དེ་དག་རབ་མྱུར་བར། །བསམ་རྫོགས་བྱང་ཆུབ་རིམ་པར་སངས་རྒྱས་སྤྱོན། །ཕྱོགས་བཅུ་ག་ལའི་ཞིང་རྣམས་ཇི་སྙེད་པ། །དེ་དག་རྒྱ་ཆེར་ཡོངསུ་དག་པར་གྱུར། །བྱང་ཆུབ་ཤིང་དབང་དྲུང་
གཤེགས་རྒྱལ་བ་དང་། །སངས་རྒྱས་སྲས་ཀྱིས་རབ་ཏུ་གང་བར་ཤོག །ཕྱོགས་བཅུའི་སེམས་ཅན་གང་རྣམས་ཇི་སྙེད་པ། །དེ་དག་རྟག་ཏུ་ནད་མེད་བདེ་བར་གྱུར། །འགྲོ་བ་ཀུན་གྱི་ཆོས་ཀྱི་དོན་རྣམས་ནི། །འཐུན་པར་
གྱུར་ཅིང་རེ་བའང་གྲུབ་པར་ཤོག །བྱང་ཆུབ་སྤྱོད་པ་དག་ནི་བདག་སྤྱོད་ཅིང་། །འགྲོ་བ་ཀུན་ཏུ་སྐྱེ་བ་དྲན་པར་འགྱུར། །ཚེ་རབས་ཀུན་ཏུ་འཆི་འཕོ་སྐྱེ་བ་ན། །རྟག་ཏུ་བདག་ནི་རབ་ཏུ་འབྱུང་བར་ཤོག །རྒྱལ་བ་
ཀུན་གྱི་རྗེས་སུ་སློབ་གྱུར་ཏེ། །བཟང་པོ་སྤྱོད་པ་ཡོངས་སུ་རྫོགས་བྱེད་ཅིང་། །ཚུལ་ཁྲིམས་སྤྱོད་པ་དྲི་མེད་ཡོངས་དག་པར། །རྟག་ཏུ་མ་ཉམས་སྐྱོན་མེད་སྤྱོད་པར་ཤོག །ལྷ་ཡི་སྐད་དང་ཀླུ་དང་གནོད་
སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་རྣམས་ཇི་ཙམ་པར། །ཐམས་ཅད་སྐད་དུ་བདག་གིས་ཆོས་སྟོན་ཏོ། །དེས་ཤིང་ཕ་རོལ་ཕྱིན་ལ་རབ་བརྩོན་ཏེ། །བྱང་ཆུབ་
སེམས་ནི་ནམ་ཡང་བརྗེད་མ་གྱུར། །སྡིག་པ་གང་རྣམས་སྒྲིབ་པར་འགྱུར་བ་དག །དེ་དག་མ་ལུས་ཡོངསུ་བྱང་བར་ཤོག །ལས་དང་ཉོན་མོངས་བདུད་ཀྱི་ལས་རྣམས་ལས། །གྲོལ་ཞིང་འཇིག་རྟེན་འགྲོ་བ་རྣམསུ་ཡང་། །

77-1-279a

ཇི་ལྟར་པད་མོ་ཆུས་མྱི་ཆགས་པ་བཞིན། །ཉི་ཟླ་ནམ་མཁར་ཐོགས་པ་མེད་ལྟར་སྤྱད། །ཞིང་གི་ཁྱོན་དང་ཕྱོགས་རྣམས་ཇི་ཙམ་པར། །ངན་སོང་སྡུག་བསྔལ་རབ་ཏུ་ཞི་བར་བྱེད། །བདེ་བ་དག་ལ་
འགྲོ་བ་ཀུན་འགོད་ཅིང་། །འགྲོ་བ་ཐམས་ཅད་ལ་ནི་ཕན་པར་སྤྱད། །བྱང་ཆུབ་སྤྱོད་པ་ཡོངས་སུ་རྫོགས་བྱེད་ཅིང་། །སེམས་ཅན་དག་གི་སྤྱོད་དང་འཐུན་པར་འཇུག །བཟང་པོ་སྤྱོད་པ་དག་ནི་རབ་སྟོན་ཅིང་། །མ་འོངས་བསྐལ་པ་
ཀུན་དུ་སྤྱོད་པར་འགྱུར། །བདག་གི་སྤྱོད་དང་མཚུངས་པར་གང་སྤྱོད་པ། །དེ་དག་དང་ནི་རྟག་ཏུ་འགྲོགས་པར་ཤོག །ལུས་དང་ངག་རྣམས་དང་ནི་སེམས་ཀྱིས་ཀྱང་། །སྤྱོད་པ་དག་དང་སྨོན་ལམ་གཅིག་ཏུ་སྤྱད། །བདག་ལ་ཕན་པར་
འདོད་པའི་གྲོགས་པོ་དག །བཟང་པོ་སྤྱོད་པ་རབ་ཏུ་སྟོན་པ་རྣམས། །དེ་དག་དང་ཡང་རྟག་ཏུ་ཕྲད་པར་ཤོག །དེ་དག་བདག་གིས་ནམ་ཡང་ཡིད་མྱི་དབྱུང་། །སངས་རྒྱས་སྲས་ཀྱིས་བསྐོར་བའི་མགོན་པོ་རྣམས། །མངོན་
སུམ་རྟག་ཏུ་བདག་གིས་རྒྱལ་བ་ལྟ། །མ་འོངས་བསྐལ་པ་ཀུན་ཏུ་མྱི་སྐྱོ་བར། །དེ་དག་ལ་ཡང་མཆོད་པ་རྒྱ་ཆེར་བགྱི། །རྒྱལ་བ་རྣམས་ཀྱི་དམ་པའི་ཆོས་འཛིན་ཅིང་། །བྱང་ཆུབ་སྤྱོད་པ་ཀུན་ཏུ་སྣང་བར་བྱེད། །བཟང་པོ་
སྤྱོད་པ་རྣམ་པར་སྦྱངས་པ་ཡང་། །མ་འོངས་བསྐལ་པ་ཀུན་ཏུ་སྤྱད་པར་བགྱི། །སྲིད་པ་ཐམས་ཅད་དུ་ཡང་འཁོར་བ་ན། །བསོད་ནམས་ཡེ་ཤེས་དག་ནི་མི་ཟད་བརྙེས། །ཐབས་དང་ཤེས་རབ་ཏིང་འཛིན་རྣམ་ཐར་དང་། །
ཡོན་ཏན་ཀུན་གྱི་མི་ཟད་མཛོད་དུ་གྱུར། །རྡུལ་ཅིག་སྟེང་ན་རྡུལ་སྙེད་ཞིང་རྣམས་ཏེ། །ཞིང་དེར་བསམ་གྱིས་མི་ཁྱབ་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་ལ། །བྱང་ཆུབ་སྤྱོད་པ་སྤྱོད་ཅིང་བལྟ་
བར་བགྱི། །དེ་དག་མ་ལུས་ཐམས་ཅད་ཕྱོགས་སུ་ཡང་། །སྐྲ་ཙམ་ཁྱོན་ལ་དུས་གསུམ་ཚད་སྙེད་ཀྱི། །སངས་རྒྱས་རྒྱ་མཚོ་ཞིང་རྣམས་རྒྱ་མཚོ་དང་། །བསྐལ་པ་རྒྱ་མཚོར་སྤྱོད་ཅིང་རབ་ཏུ་འཇུག །གསུང་གཅིག་ཡན་ལག་རྒྱ་

77-1-279b

མཚོའི་སྒྲ་སྐད་ཀྱིས། །རྒྱལ་བ་ཀུན་དབྱངས་ཡན་ལག་རྣམ་དག་པ། །འགྲོ་བ་ཀུན་གྱི་བསམ་པ་ཇི་བཞིན་དབྱངས། །སངས་རྒྱས་གསུང་ལ་རྟག་ཏུ་འཇུག་པར་བགྱི། །དུས་གསུམ་གཤེགས་པ་རྒྱལ་བ་ཐམས་ཅད་
དག །འཁོར་ལོའི་ཚུལ་རྣམས་རབ་ཏུ་བསྐོར་བ་ཡིས། །དེ་དག་གི་ཡང་གསུང་དབྱངས་མྱི་ཟད་ལ། །བློ་ཡི་སྟོབས་ཀྱིས་བདག་ཀྱང་རབ་ཏུ་འཇུག །མ་འོངས་བསྐལ་པ་ཐམས་ཅད་འཇུག་པར་ཡང་། །སྐད་ཅིག་གཅིག་
གིས་བདག་ཀྱང་འཇུག་པར་བགྱི། །གང་ཡང་བསྐལ་པ་དུས་གསུམ་ཚད་དེ་དག །སྐད་ཅིག་ཆ་ཤས་ཀྱི་ནི་ཞུགས་པར་སྤྱད། །དུས་གསུམ་གཤེགས་པ་མི་ཡི་སེང་གེ་དག །དེ་དག་སྐད་ཅིག་གཅིག་ལ་
བདག་གིས་བལྟ། །རྟག་ཏུ་དེ་དག་གི་ནི་སྤྱོད་ཡུལ་ལ། །སྒྱུ་མར་གྱུར་པའི་རྣམ་ཐར་སྟོབས་ཀྱིས་འཇུག །གང་ཡང་དུས་གསུམ་དག་གི་ཞིང་བཀོད་པ། །དེ་དག་རྡུལ་ཅིག་སྟེང་དུ་མངོན་པར་བསྒྲུབ། །དེ་ལྟར་མ་ལུས་
ཕྱོགས་རྣམས་ཐམས་ཅད་དུ། །རྒྱལ་བ་རྣམས་ཀྱི་ཞིང་གི་རྒྱན་ལ་འཇུག །གང་ཡང་མ་བྱོན་འཇིག་རྟེན་སྒྲོན་མ་རྣམས། །དེ་དག་རིམ་པར་སངས་རྒྱས་འཁོར་ལོ་བསྐོར། །མྱ་ངན་འདས་པ་རབ་ཏུ་ཞི་མཐའ་སྟོན། །མགོན་པོ་ཀུན་
གྱི་དྲུང་དུ་བདག་མཆི་འོ། །ཀུན་ཏུ་མྱུར་བའི་རྫུ་འཕྲུལ་སྟོབས་རྣམས་དང་། །ཀུན་ནས་སྒོའི་ཐེག་པའི་སྟོབས་དག་དང་། །ཀུན་ཏུ་ཡོན་ཏན་སྤྱོད་པའི་སྟོབས་རྣམས་དང་། །ཀུན་དུ་ཁྱབ་པ་བྱམས་པ་དག་གི་སྟོབས། །ཀུན་ཏུ་དགེ་བའི་
བསོད་ནམས་སྟོབས་རྣམས་དང་། །ཆགས་པ་མྱེད་པར་འགྱུར་བའི་ཡེ་ཤེས་སྟོབས། །ཤེས་རབ་ཐབས་དང་ཏིང་འཛིན་སྟོབས་དག་གིས། །བྱང་ཆུབ་སྟོབས་རྣམས་ཡང་དག་བསྒྲུབ་པར་བྱེད། །ལས་ཀྱི་སྟོབས་རྣམས་ཡོངས་
སུ་དག་བྱེད་ཅིང་། །ཉོན་མོངས་སྟོབས་རྣམས་ཀུན་ཏུ་འཇོམས་པར་བྱེད། །བདུད་ཀྱི་སྟོབས་རྣམས་སྟོབས་མྱེད་རབ་བྱེད་ཅིང་། །བཟང་པོ་སྤྱོད་པའི་སྟོབས་ནི་རྫོགས་པར་བགྱི། །ཞིང་རྣམས་རྒྱ་མཚོ་རྣམ་པར་དག་བྱེད་ཅིང་། །

77-1-280a

སེམས་ཅན་རྒྱ་མཚོ་དག་ནི་རྣམ་པར་སྒྲོལ། །ཆོས་རྣམས་རྒྱ་མཚོ་རབ་ཏུ་མཐོང་བྱེད་ཅིང་། །ཡེ་ཤེས་རྒྱ་མཚོ་རབ་ཏུ་རྟོགས་པར་བྱེད། །སྤྱོད་པ་རྒྱ་མཚོ་རྣམ་པར་དག་བྱེད་ཅིང་། །སྨོན་ལམ་རྒྱ་མཚོ་རབ་ཏུ་རྫོགས་པར་
བྱེད། །སངས་རྒྱས་རྒྱ་མཚོ་རབ་ཏུ་མཆོད་བྱེད་ཅིང་། །བསྐལ་པ་རྒྱ་མཚོར་མི་སྐྱོ་སྤྱད་པར་བགྱི། །གང་ཡང་དུས་གསུམ་གཤེགས་པ་རྒྱལ་བ་ཡི། །བྱང་ཆུབ་སྤྱོད་པའི་སྨོན་ལམ་བྱེ་བྲག་རྣམས། །བཟང་པོ་སྤྱོད་པས་བྱང་
ཆུབ་སངས་རྒྱས་ནས། །དེ་ཀུན་བདག་གིས་མ་ལུས་རྫོགས་པར་བགྱི། །རྒྱལ་བ་ཀུན་གྱི་སྲས་ཀྱི་ཐུ་བོ་པ། །གང་གི་མིང་ནི་ཀུན་ཏུ་བཟང་ཞེས་བྱ། །མཁས་པ་དེ་དང་མཚུངས་པར་སྤྱད་པའི་ཕྱིར། །དགེ་བ་འདི་དག་ཐམས་
ཅད་རབ་ཏུ་བསྔོ། །ལུས་དང་ངག་དང་ཡིད་ཀྱང་རྣམ་དག་ཅིང་། །སྤྱོད་པ་རྣམ་དག་ཞིང་རྣམས་ཡོངས་དག་དང་། །བསྔོ་བ་བཟང་པོ་མཁས་པ་ཅི་འདྲ་བར། །དེ་འདྲར་བདག་ཀྱང་དེ་དང་མཚུངས་པར་ཤོག །ཀུན་ནས་དགེ་བ་བཟང་
པོ་སྤྱོད་པའི་ཕྱིར། །འཇམ་དཔལ་གྱིས་ནི་སྨོན་ལམ་སྤྱད་པར་བགྱི། །མ་འོངས་བསྐལ་པ་ཀུན་ཏུ་མི་སྐྱོ་བར། །དེ་ཡི་བྱ་བ་མ་ལུས་རྫོགས་པར་བགྱི། །སྤྱོད་པ་དག་ནི་ཚད་ཡོད་མ་གྱུར་ཅིག །ཡོན་ཏན་རྣམས་ཀྱང་ཚད་
གཟུང་མེད་པར་ཤོག །སྤྱོད་པ་ཚད་མེད་པ་ལ་གནས་ནས་ཀྱང་། །དེ་དག་འཕྲུལ་པ་ཐམས་ཅད་འཚལ་བར་བགྱི། །ནམ་མཁའི་མཐར་ཐུག་གྱུར་པ་ཇི་ཙམ་པར། །སེམས་ཅན་མ་ལུས་མཐའ་ཡང་དེ་བཞིན་ཏེ། །
ཅི་ཙམ་ལས་དང་ཉོན་མོངས་མཐར་གྱུར་པ། །བདག་གི་སྨོན་ལམ་མཐའ་ཡང་དེ་ཙམ་མོ། །གང་ཡང་ཕྱོགས་བཅུའི་ཞིང་རྣམས་མཐའ་ཡས་པ། །རིན་ཆེན་བརྒྱན་ཏེ་རྒྱལ་བ་རྣམས་ལ་ཕུལ། །ལྷ་དང་མི་ཡི་བདེ་བ་
མཆོག་རྣམས་ཀྱང་། །ཞིང་གི་རྡུལ་སྙེད་བསྐལ་པར་ཕུལ་བ་བས། །གང་གིས་བསྔོ་བའི་རྒྱལ་པོ་འདི་ཐོས་ནས། །བྱང་ཆུབ་མཆོག་གི་རྗེས་སུ་རབ་མོས་ཤིང་། །ལན་ཅིག་ཙམ་ཡང་དད་པ་བསྐྱེད་པས་ནི། །

77-1-280b

བསོད་ནམས་དམ་པའི་མཆོག་ཏུ་འདི་འགྱུར་རོ། །གང་གིས་བཟང་སྤྱོད་སྨོན་ལམ་འདི་བཏབ་པ། །དེས་ནི་ངན་སོང་ཐམས་ཅད་སྤོང་བར་འགྱུར། །དེས་ནི་གྲོགས་པོ་ངན་པ་སྤངས་པ་ཡིན། །སྣང་བ་མཐའ་ཡས་དེ་ཡང་དེས་མྱུར་
མཐོང་། །དེ་དག་རྙེད་པ་རབ་རྙེད་བདེ་བར་འཚོ། །མི་ཚེ་འདིར་ཡང་དེ་དག་ལེགས་པར་འོང་། །ཀུན་ཏུ་བཟང་པོ་དེ་ཡང་ཇི་འདྲ་བར། །དེ་དག་རིང་པོར་མི་ཐོགས་དེ་བཞིན་འགྱུར། །མཚམས་མེད་ལྔ་པོ་དག་གི་སྡིག་པ་རྣམས། །གང་
གིས་མི་ཤེས་དབང་གིས་བྱས་པ་དག །དེ་ཡིས་བཟང་པོ་སྤྱོད་པ་འདི་བརྗོད་ན། །མྱུར་དུ་མ་ལུས་ཡོངས་སུ་བྱང་བར་འགྱུར། །ཡེ་ཤེས་དང་ནི་གཟུགས་དང་མཚན་རྣམས་དང་། །རིགས་དང་ཁ་དོག་རྣམས་དང་ལྡན་པར་འགྱུར། །བདུད་
དང་མུ་སྟེགས་མང་པོས་དེ་མྱི་ཐུབ། །འཇིག་རྟེན་གསུམ་པོ་ཀུན་ནའང་མཆོད་པར་འགྱུར། །བྱང་ཆུབ་ཤིང་དབང་དྲུང་དུ་དེ་མྱུར་འགྲོ། །སོང་ནས་སེམས་ཅན་ཕན་ཕྱིར་དེར་འདུག་སྟེ། །བྱང་ཆུབ་སངས་རྒྱས་འཁོར་ལོ་རབ་ཏུ་
བསྐོར། །བདུད་རྣམས་སྡེ་དང་བཅས་པ་ཐམས་ཅད་བཏུལ། །གང་ཡང་བཟང་པོ་སྤྱོད་པའི་སྨོན་ལམ་འདི། །འཆང་བ་དང་ནི་གློག་གམ་སྟོན་པ་ཡི། །དེ་ཡི་རྣམ་པར་སྨྱིན་པ་སངས་རྒྱས་མཁྱེན། །བྱང་ཆུབ་མཆོག་ལ་
སོམ་ཉི་མ་བྱེད་ཅིག །འཇམ་དཔལ་ཇི་ལྟར་མཁྱེན་ཅིང་དཔའ་བ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་གི་ནི་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་རབ་ཏུ་བསྔོ། །དུས་གསུམ་གཤེགས་
པ་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གིས་དགེ་བའི་རྩ་བ་འདི་ཀུན་ཀྱང་། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །བདག་ནི་འཆི་བའི་དུས་བྱེད་གྱུར་པ་ན། །སྒྲིབ་པ་ཐམས་
ཅད་དག་ནི་ཕྱིར་བསྩལ་ཏེ། །མངོན་སུམ་སྣང་བ་མཐའ་ཡས་དེ་མཐོང་ནས། །བདེ་བ་ཅན་གྱི་ཞིང་དེར་རབ་ཏུ་འགྲོ། །དེར་སོང་ནས་ནི་སྨོན་ལམ་འདི་དག་ཀྱང་། །ཐམས་ཅད་མ་ལུས་མངོན་ཏུ་གྱུར་བར་ཤོག །དེ་

77-1-281a

དག་མ་ལུས་བདག་གིས་ཡོངས་སུ་བསྐང་། །འཇིག་རྟེན་ཇི་སྲིད་སེམས་ཅན་ཕན་པར་བགྱི། །རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པད་མོ་དམ་པ་ཤིན་ཏུ་མཛེས་ལས་སྐྱེས། །སྣང་
བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ཡང་བདག་གིས་དེར་ཐོབ་ཤོག །དེར་ནི་བདག་གིས་ལུང་བསྟན་རབ་ཐོབ་ནས། །སྤྲུལ་པ་མང་པོ་བྱེ་བ་ཕྲག་བརྒྱ་ཡིས། །བློ་ཡི་སྟོབས་ཀྱིས་ཕྱོགས་བཅུ་
རྣམས་སུ་ཡང་། །སེམས་ཅན་རྣམས་ལ་ཕན་པ་མང་པོ་བགྱི། །གང་གིས་བཟང་པོ་སྤྱོད་པ་སྟོན་པ་ཡིས། །དགེ་བ་ཅུང་ཟད་བདག་གིས་ཅི་བསྩགས་པ། །དེས་ནི་འགྲོ་བའི་སྨོན་ལམ་དགེ་བ་རྣམས། །སྐད་
ཅིག་གཅིག་གིས་ཐམས་ཅད་འབྱོར་བར་ཤོག །གང་ཡང་བཟང་པོ་སྤྱོད་པ་བསྔོས་པ་ཡིས། །བསོད་ནམས་མཐའ་ཡས་དམ་པ་ཐོབ་པ་དེས། །འགྲོ་བ་སྡུག་བསྔལ་ཆུ་བོར་བྱིང་བ་རྣམས། །འོད་དཔག་མེད་
པའི་གནས་རབ་འགྲོ་བར་ཤོག །ཤིན་ཏུ་རྒྱས་པ་ཆེན་པོའི་མདོ། །སངས་རྒྱས་ཕལ་པོ་ཆེ་ཞེས་བྱ་བ་ལས། བྱང་ཆུབ་སེམས་དཔའི་སྡེ་སྣོད་ཀྱི་ནང་། སྡོང་པོས་བརྒྱན་པ་ཞེས་
བྱ་བ་ཆོས་ཀྱི་རྣམ་གྲངས་ཆེན་པོ་ལས། ནོར་བཟངས་ཀྱིས་དགེ་བའི་བཤེས་གཉེན་བསྙེན་བཀུར་བའི་སྤྱོད་པ་ཕྱོགས་གཅིག་སྟེ་ཅི་སྙེད་པ་རྫོགས་སྷོ།། །།
ཡེ་དྷ་རྨྨཱ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་དཏ། ཏེ་ཥཱ་ཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎཿ། །

78-1-1a