39-1-1a


༼ཀཱ༽ ༄༅། ༈ །ཤེར་ཕྱིན་སྣ་ཚོགས་པ་བཞུགས་སོ། །
(黃)  諸般若經一部
39-1-1b


༄༅༅།   །རྒྱ་གར་སྐད་དུ། ཨཱརྱ་པྲཛྙཱ་པཱ་ར་མི་ཏཱ་སཉྩ་ཡ་གཱ་ཐཱ།  བོད་སྐད་དུ། 
འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྡུད་པ་ཚིགས་སུ་བཅད་པ། ། འཕགས་པ་འཇམ་དཔལ་ལ་ཕྱག་འཚལ་ལོ། །དེ་ནས་ཡང་
བཅོམ་ལྡན་འདས་ཀྱིས་འཁོར་བཞི་པོ་དེ་དག་ཡང་དག་པར་རབ་ཏུ་དགའ་བར་མཛད་པའི་ཕྱིར་ཡང་ཤེས་རབ་ཀྱི་ཕ་རོལ་
ཏུ་ཕྱིན་པ་འདི་སྟོན་ཅིང་། དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དགའ་དང་གུས་དང་དད་པའི་མཆོག་
ནི་ཉེར་བཞག་སྟེ། །སྒྲིབ་པ་ཉོན་མོངས་བསལ་ནས་དྲི་མ་ལས་འདས་པ། །སྐབས་དང་པོ་རྣམ་པ་ཐམས་ཅད་མཁྱེན་པ་ཉིད་བསྟན། 
འགྲོ་དོན་མངོན་ཞུགས་དེས་པའི་ཤེས་རབ་ཕ་རོལ་ཕྱིན། །གང་ལ་དཔའ་རྣམས་སྤྱོད་པ་དེ་ནི་མཉན་པར་གྱིས། །
འཛམ་བུའི་གླིང་འདིར་ཆུ་ཀླུང་ཇི་སྙེད་ཅིག་འབབ་ཅིང་། །མེ་ཏོག་འབྲས་ལྡན་སྨན་དང་ནགས་ཚལ་སྐྱེད་བྱེད་པ། །
མ་དྲོས་གནས་པའི་ཀླུ་དབང་ཀླུ་བདག་བརྟེན་གནས་ཏེ། །དེ་ནི་ཀླུ་ཡི་བདག་པོ་དེ་ཡི་མཐུ་དཔལ་ཡིན། །
39-1-2a


རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་དང་། །འཆད་དང་རིགས་པ་དག་དང་ལྡན་པར་བརྗོད་པ་དང་། །མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་
པའི་སྐྱེས་བུའི་མཐུ། །ཅི་ཕྱིར་ཞེ་ན་རྒྱལ་བས་ཆོས་ཚུལ་གང་བསྟན་པ། །དེ་ལ་མི་མཆོག་སློབ་མར་གྱུར་པས་མངོན་བསླབས་ཤིང་། །མངོན་སུམ་བྱས་ནས་བསླབས་པ་ཇི་བཞིན་སྟོན་བྱེད་དེ། །སངས་རྒྱས་མཐུས་
བྱེད་རང་གི་སྟོབས་ཀྱི་མཐུས་མ་ཡིན། །གང་ལ་ཤེས་རབ་ཕ་རོལ་ཕྱིན་མཆོག་མི་དམིགས་ཤིང་། །བྱང་ཆུབ་སེམས་དཔའ་མི་དམིགས་བྱང་ཆུབ་སེམས་མི་དམིགས། །དེ་སྐད་ཐོས་ནས་རྨོངས་པ་མེད་ཅིང་སྐྲག་མེད་པ། །
བྱང་ཆུབ་སེམས་དཔའ་དེ་ནི་བདེ་གཤེགས་ཤེས་རབ་སྤྱོད། །གཟུགས་མེད་ཚོར་བ་མེད་ཅིང་འདུ་ཤེས་སེམས་པ་མེད། །དེ་ལ་རྣམ་ཤེས་གནས་ནི་རྡུལ་ཙམ་ཡོད་མ་ཡིན། །དེ་ཆོས་ཀུན་ལ་མི་གནས་གནས་པ་མེད་པར་སྤྱོད། །
ཡོངས་སུ་གཟུང་མེད་བདེ་གཤེགས་རྣམས་ཀྱི་བྱང་ཆུབ་འཐོབ། །ཇི་ལྟར་ཀུན་དུ་རྒྱུ་བ་བཟོ་སྦྱངས་ཤེས་པ་ཡིས། །དམིགས་མེད་ཕུང་པོ་རྣམ་པར་འཇིག་པ་འབྱུང་བ་ལྟར། །བྱང་ཆུབ་སེམས་དཔའ་གང་ཞིག་དེ་ལྟར་ཆོས་
ཤེས་པ། །མྱ་ངན་འདས་ལ་མི་རེག་དེ་ནི་ཤེས་རབ་གནས། །ཡང་འདི་ཤེས་རབ་འདི་ནི་གང་ཡིན་སུ་ཡི་ཡིན། །གང་ལས་ཡིན་ཞེས་ཆོས་འདི་ཐམས་ཅད་སྟོང་པར་རྟོག །ཉེ་བར་བརྟགས་ནས་ཞུམ་པ་མེད་ཅིང་སྐྲག་མེད་པ། །
བྱང་ཆུབ་སེམས་དཔའ་དེ་ནི་བྱང་ཆུབ་ཉེ་བ་ཡིན། །གལ་ཏེ་མི་ཤེས་བཞིན་དུ་གཟུགས་སུ་འདུ་ཤེས་ཤིང་། །ཚོར་བ་སེམས་པ་རྣམ་ཤེས་ཕུང་པོར་སྤྱོད་བྱེད་ཅིང་། །ཕུང་འདི་སྟོང་ཞེས་རྟོག་ནའང་བྱང་ཆུབ་སེམས་དཔའ་ནི། །
མཚན་མ་ལ་སྤྱོད་སྐྱེ་མེད་གནས་ལ་དད་མ་ཡིན། །གང་ཞིག་གཟུགས་མིན་ཚོར་མིན་འདུ་ཤེས་སེམས་པ་མིན། །རྣམ་པར་ཤེས་ལ་མི་སྤྱོད་གནས་པ་མེད་པར་སྤྱོད། །དེ་ནི་སྤྱོད་ཅེས་བྱ་བར་མི་དམིགས་ཤེས་རབ་
39-1-2b


བརྟོན། །སྐྱེ་མེད་བློ་ལྡན་ཏིང་འཛིན་ཞི་བ་མཆོག་ལ་རེག །བྱང་ཆུབ་སེམས་གང་དེ་ལྟར་འདིར་བདག་ཞིར་གནས་པ། །དེ་ནི་སྔོན་གྱི་དེ་བཞིན་གཤེགས་པས་ལུང་བསྟན་ཡིན། །བདག་ནི་མཉམ་པར་བཞག་ཅེ་འམ་ལངས་ཤེས་རློམ་
སེམས་མེད། །ཅི་ཕྱིར་ཞེ་ན་ཆོས་ཀྱི་རང་བཞིན་ཡོངས་ཤེས་ཕྱིར། །དེ་ལྟར་སྤྱོད་ན་བདེ་གཤེགས་རྣམས་ཀྱི་ཤེས་རབ་སྤྱོད། །དེས་ནི་སྤྱོད་མེད་སྤྱོད་པ་ཡིན་པར་རབ་ཤེས་ཕྱིར། །ཆོས་གང་སྤྱོད་པ་དེ་ཡང་དམིགས་པར་མི་འགྱུར་ཏེ། །
འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །གང་ཞིག་ཡོད་པ་མ་ཡིན་དེ་ནི་མེད་ཅེས་བྱ། །བྱིས་པ་རྣམས་ཀྱིས་དེ་བརྟགས་ཡོད་པར་མེད་པར་བྱེད། །ཡོད་དང་མེད་པ་འདི་གཉིས་མེད་པའི་ཆོས་ཡིན་ཏེ། །བྱང་ཆུབ་སེམས་
དཔའ་གང་གིས་འདི་ཤེས་ངེས་པར་འབྱུང་། །གང་འདིར་ཕུང་པོ་ལྔ་དག་སྒྱུ་མ་འདྲར་ཤེས་ཤིང་། །སྒྱུ་མ་གཞན་དང་ཕུང་པོ་གཞན་དུ་མི་བྱེད་ལ། །སྣ་ཚོགས་འདུ་ཤེས་བྲལ་ཞིང་ཉེ་བར་ཞི་སྤྱོད་པ། །འདི་ནི་ཤེས་རབ་ཕ་རོལ་ཕྱིན་མཆོག་
སྤྱོད་པ་ཡིན། །དགེ་བའི་བཤེས་དང་ལྡན་ཞིང་ལྷག་མཐོང་ལྡན་གྱུར་པ། །རྒྱལ་བ་རྣམས་ཀྱི་ཡུམ་ཐོས་སྐྲག་པར་ཡོང་མི་འགྱུར། །གང་ཞིག་སྡིག་པའི་གྲོགས་ལྡན་གཞན་གྱི་དྲིང་འཇོག་པ། །དེ་ནི་སྣོད་སོ་མ་བཏང་ཆུས་རེག་ཞིག་
པ་བཞིན། །ཅི་ཕྱིར་འདི་ནི་བྱང་ཆུབ་སེམས་དཔའ་བྱ་ཞེ་ན། །ཆགས་པ་གཅོད་བྱེད་ཀུན་ལ་ཆགས་པ་ཟད་པར་འདོད། །རྒྱལ་བ་རྣམས་ཀྱི་བྱང་ཆུབ་ཆགས་མེད་གྱུར་ལ་རེག །དེས་ན་འདི་ནི་བྱང་ཆུབ་སེམས་དཔའི་མིང་ཐོབ་བོ། །
ཅི་ཕྱིར་འདི་ནི་སེམས་དཔའ་ཆེ་ཞེས་བྱ་ཞེ་ན། །སེམས་ཅན་ཚོགས་རྣམས་མང་པོའི་མཆོག་ཏུ་གྱུར་པ་དང་། །སེམས་ཅན་ཁམས་ཀྱི་ལྟ་རྣམས་ཆེན་པོ་གཅོད་པ་སྟེ། །དེ་ཕྱིར་སེམས་དཔའ་ཆེན་པོ་ཞེས་ནི་རབ་བརྗོད་དོ། །གཏོང་བ་ཆེ་
དང་བློ་ཆེ་བ་དང་མཐུ་ཆེ་དང་། །རྒྱལ་བ་རྣམས་ཀྱི་ཐེག་ཆེན་མཆོག་ལ་ཞུགས་པ་དང་། །གོ་ཆ་ཆེན་པོ་བགོས་ཤིང་བདུད་ཀྱི་སྒྱུ་འདུལ་བ། །དེ་ཡི་ཕྱིར་ན་སེམས་དཔའ་ཆེ་ཞེས་རབ་ཏུ་བརྗོད། །དཔེར་ན་སྒྱུ་མ་མཁན་གྱིས་བཞི་མདོར་སྤྲུལ་བྱས་ཏེ། །
39-1-3a


སྐྱེ་བོ་ཕལ་ཆེན་མགོ་མང་བྱེ་བ་གཅོད་བྱེད་པའི། །གསད་བྱ་དེ་དག་ཅི་འདྲ་དེ་ལྟར་བྱང་ཆུབ་སེམས། །འགྲོ་ཀུན་སྤྲུལ་འདྲ་རབ་ཤེས་དེ་ལ་འཇིགས་པ་མེད། །གཟུགས་དང་འདུ་ཤེས་ཚོར་བ་དང་ནི་སེམས་པ་དང་། །རྣམ་པར་
ཤེས་པ་མ་བཅིངས་མ་གྲོལ་ཡོད་པ་མིན། །དེ་ལྟར་བྱང་ཆུབ་ལ་འཇུག་ཞུམ་པའི་སེམས་མེད་པ། །འདི་ནི་གང་ཟག་དམ་པ་རྣམས་ཀྱི་གོ་ཆ་མཆོག །ཅི་ཕྱིར་འདི་ནི་བྱང་ཆུབ་ཐེག་ཆེན་བྱ་ཞེ་ན། །དེ་གང་ཞོན་ནས་སེམས་ཅན་ཐམས་ཅད་མྱ་ངན་ཟློ། །
ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། །དགའ་སྐྱིད་བདེ་བ་མངོན་པར་འཐོབ་བྱེད་ཐེག་པའི་མཆོག །གང་ཞིག་ཞོན་ནས་ཕྱོགས་སུ་འགྲོ་བ་དམིགས་སུ་མེད། །མྱ་ངན་འདས་པར་འགྲོ་བར་གསུངས་པ་འགྲོ་མི་དམིགས། །
དཔེར་ན་མི་ཤི་དེ་ཡིས་འགྲོ་རྒྱུ་མེད་པ་བཞིན། །རྒྱུ་དེས་དེ་ནི་མྱ་ངན་འདས་ཞེས་རབ་ཏུ་བརྗོད། །བྱང་ཆུབ་སེམས་དཔའ་སྔོན་གྱི་མཐའ་དང་ཕྱི་མཐའ་དང་། །ད་ལྟར་བྱུང་བར་མི་དམིགས་དུས་གསུམ་དག་པ་སྟེ། །གང་དག་དེ་ནི་འདུས་མ་བྱས་
ཡིན་སྤྲོས་མེད་དེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །བྱང་ཆུབ་སེམས་དཔའ་མཁས་རིག་གང་གི་དུས་ཀྱི་ཚེ། །སྐྱེ་མེད་རྣམ་པར་བསམས་ཏེ་འདི་ལྟར་སྤྱོད་བྱེད་ཅིང་། །སྙིང་རྗེ་ཆེན་པོ་བསྐྱེད་ཀྱང་སེམས་ཅན་འདུ་ཤེས་
མེད། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །གལ་ཏེ་སེམས་ཅན་འདུ་ཤེས་སྡུག་བསྔལ་འདུ་ཤེས་སྐྱེད། །འགྲོ་བ་རྣམས་ཀྱི་དོན་བྱ་སྡུག་བསྔལ་སྤང་སྙམ་སྟེ། །བདག་དང་སེམས་ཅན་ཡོངས་རྟོག་བྱང་ཆུབ་སེམས་དཔའ་
སྟེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་མ་ཡིན། །བདག་ཅི་འདྲ་བ་དེ་འདྲར་སེམས་ཅན་ཐམས་ཅད་ཤེས། །སེམས་ཅན་ཐམས་ཅད་ཅི་འདྲར་དེ་འདྲར་ཆོས་ཀུན་ཤེས། །སྐྱེ་བ་མེད་དང་སྐྱེ་བ་གཉི་གར་མི་རྟོག་པ། །འདི་ནི་ཤེས་རབ་
ཕ་རོལ་ཕྱིན་མཆོག་སྤྱོད་པ་ཡིན། །འཇིག་རྟེན་དག་ན་ཆོས་མིང་ཇི་སྙེད་ཡོངས་བརྗོད་པ། །ཀུན་ལ་སྐྱེ་བ་དང་ནི་ཡང་དག་འདས་སྤངས་ནས། །ཡེ་ཤེས་འཆི་མེད་དམ་པ་དེ་ལས་གཞན་མེད་འཐོབ། །དེ་ཕྱིར་འདི་ནི་ཤེས་རབ་ཕ་རོལ་ཕྱིན་ཅེས་བྱ། །
39-1-3b


བྱང་ཆུབ་སེམས་དཔའ་གང་ཞིག་དོགས་མེད་དེ་ལྟར་སྤྱོད། །ཤེས་རབ་ལྡན་ཏེ་མཉམ་ཉིད་གནས་པར་ཤེས་པར་བྱ། །ཆོས་རྣམས་རང་བཞིན་མེད་པར་ཡོངས་སུ་ཤེས་གྱུར་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །སྐབས་གཉིས་
པ་ལམ་ཐམས་ཅད་ཤེས་པ་ཉིད་བསྟན། གང་ཞིག་གཟུགས་ལ་མི་གནས་ཚོར་ལ་མི་གནས་ཤིང་། །གང་ཞིག་འདུ་ཤེས་མི་གནས་སེམས་པར་མི་གནས་ལ། །རྣམ་ཤེས་གང་མི་གནས་པ་ཆོས་ཉིད་གནས་པ་སྟེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་
ཡིན། །རྟག་དང་མི་རྟག་བདེ་དང་སྡུག་བསྔལ་སྡུག་མི་སྡུག །བདག་དང་བདག་མེད་དེ་བཞིན་ཉིད་དང་དེ་བཞིན་སྟོང་། །འབྲས་བུ་ཐོབ་དང་དགྲ་བཅོམ་ས་ལ་མི་གནས་ཤིང་། །རང་རྒྱལ་ས་དང་དེ་བཞིན་སངས་རྒྱས་སར་མི་གནས། །
ཇི་ལྟར་འདྲེན་པ་འདུས་མ་བྱས་ཁམས་མི་གནས་ཤིང་། །དེ་བཞིན་འདུས་བྱས་ལ་ཡང་མི་གནས་གནས་མེད་སྤྱོད། །དེ་ལྟར་བྱང་ཆུབ་སེམས་དཔའ་གནས་ལ་གནས་མེད་གནས། །གནས་མེད་གནས་ཡིན་འདི་ནི་རྒྱལ་བས་གནས་པར་གསུངས། །གང་
དག་བདེ་གཤེགས་ཉན་ཐོས་འགྱུར་བར་བྱ་སྙམ་དང་། །རང་སངས་རྒྱས་དང་དེ་བཞིན་ཆོས་རྒྱལ་འགྱུར་འདོད་པ། །བཟོད་པ་འདི་ལ་མ་བརྟེན་ཐོབ་པར་མི་ནུས་ཏེ། །དཔེར་ན་ཚུ་རོལ་ཕ་རོལ་འགྲོ་ངོགས་མི་མཐོང་བཞིན། །ཆོས་འཆད་པ་དང་
ཉན་དང་བཤད་བྱ་གང་ཡིན་དང་། །འབྲས་བུ་ཐོབ་དང་རྐྱེན་རྒྱལ་དེ་བཞིན་འཇིག་རྟེན་མགོན། །མཁས་པ་གསལ་བས་ཐོབ་པའི་མྱ་ངན་འདས་གང་ཡིན། །དེ་ཀུན་སྒྱུ་མ་ལྟ་བུར་དེ་བཞིན་གཤེགས་པས་བསྟན། །གང་ཟག་བཞི་པོ་འདི་དག་དེ་ལ་
མི་སྐྲག་སྟེ། །རྒྱལ་སྲས་བདེན་ལ་མཁས་དང་ཕྱིར་མི་ལྡོག་པ་དང་། །དགྲ་བཅོམ་དྲི་མ་བསལ་ཞིང་སོམ་ཉི་སྤངས་པ་དང་། །བཞི་པ་དགེ་བའི་བཤེས་ཀྱིས་ཡོངས་སུ་ཟིན་པའོ། །བྱང་ཆུབ་སེམས་དཔའ་མཁས་རིག་དེ་ལྟར་སྤྱོད་པ་ནི། །
དགྲ་བཅོམ་ས་ལ་མི་སློབ་རྐྱེན་རྟོགས་ས་ལ་མིན། །ཐམས་ཅད་མཁྱེན་ཉིད་ཆད་དུ་སངས་རྒྱས་ཆོས་རྗེས་སློབ། །གང་ཞིག་སློབ་མི་སློབ་ལ་མི་སློབ་དེ་སློབ་ཡིན། །གཟུགས་འཕེལ་ཡོངས་སུ་ཉམས་དང་ཡོངས་སུ་གཟུང་ཕྱིར་མིན། །ཆོས་རྣམས་
39-1-4a


སྣ་ཚོགས་ཡོངས་སུ་གཟུང་ཕྱིར་མི་སློབ་པར། །སློབ་ཅིང་ཐམས་ཅད་མཁྱེན་པ་ཉིད་ཀྱང་ཡོངས་འཛིན་ལ། །ངེས་འབྱུང་གང་ཡིན་འདི་ནི་ཡོན་ཏན་དགའ་བའི་སློབ། །གཟུགས་ནི་ཤེས་རབ་མ་ཡིན་གཟུགས་ལ་ཤེས་རབ་
མེད། །རྣམ་ཤེས་འདུ་ཤེས་ཚོར་དང་སེམས་པ་འདི་དག་ནི། །ཤེས་རབ་མ་ཡིན་འདི་དག་ལ་ཡང་ཤེས་རབ་མེད། །འདི་ནི་ནམ་མཁའི་ཁམས་དང་མཚུངས་ཏེ་ཐ་དད་མེད། །དམིགས་པ་རྣམས་ཀྱི་རང་བཞིན་དེ་ནི་ཕ་མཐའ་མེད། །
སེམས་ཅན་རང་བཞིན་གང་ཡིན་དེ་ཡང་ཕ་མཐའ་མེད། །ནམ་མཁའི་ཁམས་ཀྱི་རང་བཞིན་དེ་ཡང་ཕ་མཐའ་མེད། །འཇིག་རྟེན་མཁྱེན་པའི་ཤེས་རབ་དེ་ཡང་ཕ་མཐའ་མེད། །འདུ་ཤེས་ཚུ་རོལ་ཡིན་ཞེས་འདྲེན་པས་ཡོངས་སུ་
བསྒྲགས། །འདུ་ཤེས་རྣམ་པར་བཤིག་ནས་སྤོང་བ་ཕ་རོལ་འགྲོ། །གང་དག་འདུ་ཤེས་བྲལ་བ་འདི་ནི་རྗེས་ཐོབ་པ། །དེ་དག་ཕ་རོལ་ཕྱིན་ནས་སྟོན་པའི་བཀའ་ལ་གནས། །གལ་ཏེ་སྟོན་པས་ཀྱང་ནི་གང་གཱའི་བྱེ་སྙེད་ཀྱི། །བསྐལ་
པར་བཞུགས་ཏེ་སེམས་ཅན་ཞེས་སྒྲ་ཡོངས་བསྒྲགས་ཀྱང་། །གཟོད་ནས་དག་པས་སེམས་ཅན་སྐྱེ་བར་ག་ལ་འགྱུར། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །གང་ཚེ་ང་ནི་ཕ་རོལ་ཕྱིན་པ་མཆོག་འདི་དང་། །
འཐུན་པར་སྨྲ་གྱུར་དེ་ཚེ་སྔོན་གྱི་སྐྱེས་མཆོག་གིས། །མ་འོངས་པ་ཡི་དུས་ན་སངས་རྒྱས་འགྱུར་རོ་ཞེས། །ང་ལུང་བསྟན་པར་གྱུར་ཅེས་རྒྱལ་བ་དེ་སྐད་གསུང་། །ཤེས་རབ་ཕ་རོལ་ཕྱིན་པ་གང་ལ་མགོན་སྤྱོད་པ། །འདི་ནི་
གང་ཞིག་གུས་བྱས་འཛིན་དང་ཆུབ་བྱེད་པ། །དེ་ལ་དུག་དང་མཚོན་དང་མེ་དང་ཆུས་མི་ཚུགས། །བདུད་དང་བདུད་ཀྱི་ཕྱོགས་ཀྱིས་གླགས་ཀྱང་རྙེད་མི་འགྱུར། །ལ་ལས་བདེ་གཤེགས་ཡོངས་སུ་མྱ་ངན་འདས་པ་ཡི། །མཆོད་རྟེན་
རིན་ཆེན་བདུན་ལས་བྱས་ཤིང་མཆོད་བྱེད་ལ། །བདེ་བར་གཤེགས་པའི་མཆོད་རྟེན་དེ་དག་གང་གཱ་ཡི། །བྱེ་མ་སྙེད་ཀྱིས་བྱེ་བ་ཕྲག་སྟོང་ཞིང་བཀང་སྟེ། །ཡོངས་སུ་བརྟག་བཟུང་ཞིང་རྣམས་བྱེ་བ་མཐའ་ཡས་ན། །སེམས་ཅན་
39-1-4b


ཇི་སྙེད་འཁོད་པ་དེ་དག་ཐམས་ཅད་ཀྱིས། །ལས་གཞན་མི་བྱེད་ལྷ་ཡི་མེ་ཏོག་སྤོས་རབ་དང་། །བྱུག་པས་དུས་གསུམ་བསྐལ་པ་འམ་དེ་བས་ལྷག་མཆོད་ལ། །གང་ཞིག་གང་ལས་རྣམ་འདྲེན་སྟོབས་བཅུ་འབྱུང་འགྱུར་བ། །
བདེ་བར་གཤེགས་ཀྱི་ཡུམ་འདི་གླེགས་བམ་ལ་བྲིས་ཏེ། །འཆང་ཞིང་མེ་ཏོག་བྱུག་པས་སྟི་སྟང་བྱེད་གྱུར་ན། །མཆོད་རྟེན་བྱས་མཆོད་བསོད་ནམས་དེས་ནི་ཆར་མི་ཕོད་། །རྒྱལ་བའི་ཤེས་རབ་ཕ་རོལ་ཕྱིན་འདི་རིག་སྔགས་ཆེ། །སེམས་ཅན་
ཁམས་མང་མྱ་ངན་སྡུག་བསྔལ་ཆོས་ཞི་བྱེད། །གང་དག་འདས་དང་གང་དག་ཕྱོགས་བཅུའི་འཇིག་རྟེན་མགོན། །རིག་སྔགས་འདི་བསླབས་སྨན་པའི་རྒྱལ་པོ་བླ་མེད་གྱུར། །གང་དག་ཕན་དང་སྙིང་རྗེར་བཅས་པ་སྤྱད་སྤྱོད་པ། །རིག་
སྔགས་འདི་ལ་བསླབས་ནས་མཁས་པ་བྱང་ཆུབ་རིག །འདུས་བྱས་བདེ་དང་འདུས་མ་བྱས་བདེ་གང་ཡིན་པ། །བདེ་བ་དེ་ཀུན་འདི་ལས་འབྱུང་བར་རིག་པར་བྱ། །ས་བོན་བཏབ་ནས་ས་ལ་གནས་ཏེ་འབྱུང་འགྱུར་བ། །ཚོགས་པ་རྙེད་
ནས་རྣམ་མང་གཟུགས་དག་རྣམ་པར་སྐྱེ། །ཕ་རོལ་ཕྱིན་ལྔ་བྱང་ཆུབ་ཡོན་ཏན་ཇི་སྙེད་པ། །དེ་དག་ཀུན་ཀྱང་ཤེས་རབ་ཕ་རོལ་ཕྱིན་ལས་སྐྱེ། །འཁོར་ལོས་སྒྱུར་རྒྱལ་ལམ་གང་ནས་ནི་རྟག་འགྲོ་བ། །ལམ་དེ་ཉིད་ནས་རིན་
ཆེན་བདུན་དང་དཔུང་ཚོགས་ཀུན། །གང་ནས་རྒྱལ་བའི་ཤེས་རབ་ཕ་རོལ་ཕྱིན་འདི་འགྲོ། །དེ་ཉིད་ནས་ནི་ཡོན་ཏན་ཆོས་ཀུན་འགྲོ་བར་འགྱུར་། །རྒྱལ་བས་བརྒྱ་བྱིན་དྲི་བ་ཡོངས་དྲིས་ལན་གསོལ་པ། །གལ་ཏེ་གང་གཱའི་
བྱེ་སྙེད་སངས་རྒྱས་ཞིང་གྱུར་ལ། །དེ་ཀུན་རྒྱལ་བའི་རིང་བསྲེལ་བྱུར་བུར་བལྟམ་གྱུར་ཀྱང་། །བདག་ནི་ཤེས་རབ་ཕ་རོལ་ཕྱིན་པ་འདི་ཉིད་ལེན། །ཅི་སླད་ཅེ་ན་སྐུ་གདུང་མི་གུས་བདག་མ་ལགས། །འོན་ཀྱང་ཤེས་རབ་
ཡོངས་སུ་བསྒོས་པས་མཆོད་པར་བགྱིད། །དཔེར་ན་རྒྱལ་པོ་རྟེན་མི་རིམ་གྲོ་ཐོབ་པ་ལྟར། །སངས་རྒྱས་རིང་བསྲེལ་ཤེས་རབ་ཕ་རོལ་ཕྱིན་ལ་རྟེན། །ནོར་བུ་རིན་ཆེན་ཡོན་ཏན་ཀུན་ལྡན་རིན་ཐང་མེད། །གབ་ཚེ་གང་དུ་སྩལ་
39-1-5a


པ་དེ་ནི་ཕྱག་བགྱི་འོས། །དེ་ཕྱུང་གྱུར་ཀྱང་གབ་ཚེ་ལ་ནི་དགའ་བགྱིད་དེ། །ཡོན་ཏན་དེ་དག་ནོར་བུ་རིན་ཆེན་དེ་ཡི་ལགས། །དེ་བཞིན་ཤེས་རབ་ཕ་རོལ་ཕྱིན་མཆོག་ཡོན་ཏན་གྱིས། །རྒྱལ་བ་མྱ་ངན་འདས་ཀྱང་རིང་
བསྲེལ་མཆོད་པ་བརྙེས། །དེ་ལྟས་གང་ཞིག་རྒྱལ་བའི་ཡོན་ཏན་འཛིན་འཚལ་དེས། །ཤེས་རབ་ཕ་རོལ་ཕྱིན་བླང་འདི་ནི་ཐར་པ་ལགས། །སྦྱིན་པ་སྦྱིན་པའི་སྔོན་དུ་འགྲོ་བ་ཤེས་རབ་སྟེ། །ཚུལ་ཁྲིམས་བཟོད་པ་བརྩོན་འགྲུས་
བསམ་གཏན་དེ་བཞིན་ནོ། །དགེ་ཆོས་ཆུད་མི་གཟན་ཕྱིར་ཡོངས་སུ་འཛིན་པ་ཡིན། །འདི་ནི་ཆོས་རྣམས་ཐམས་ཅད་ཚུལ་གཅིག་སྟོན་པར་བྱེད། །དཔེར་ན་འཛམ་བུའི་གླིང་ན་ཤིང་རྣམས་བྱེ་བ་སྟོང་། །རྣམ་པ་སྣ་ཚོགས་རྣམ་པ་
དུ་མ་གཟུགས་མང་བ། །གྲིབ་མར་གྱུར་པའི་གྲངས་སུ་བརྗོད་པ་མ་གཏོགས་པར། །གྲིབ་མ་སྣ་ཚོགས་མེད་ཅིང་བྱེ་བྲག་ཡོད་མ་ཡིན། །དེ་བཞིན་རྒྱལ་བའི་ཕ་རོལ་ཕྱིན་ལྔ་འདི་དག་ཀྱང་། །ཤེས་རབ་ཕ་རོལ་ཕྱིན་པའི་
མིང་ཉིད་ཐོབ་པར་འགྱུར། །ཐམས་ཅད་མཁྱེན་པ་ཉིད་ཕྱིར་ཡོངས་སུ་བསྔོས་བྱས་ན། །བྱང་ཆུབ་ཅེས་བྱར་དྲུག་པོ་འདི་ཀུན་རོ་གཅིག་འགྱུར། །བྱང་ཆུབ་སེམས་དཔའ་གལ་ཏེ་རབ་ཏུ་མི་ཤེས་བཞིན། །གཟུགས་དང་འདུ་ཤེས་
ཚོར་དང་སེམས་པ་རྣམ་པར་ཤེས། །མི་རྟག་ཡོངས་སུ་སྟོན་པ་བཅོས་ལ་སྤྱོད་པ་སྟེ། །མཁས་པ་ནམ་ཡང་ཆོས་རྣམས་འཇིག་པར་མི་བྱེད་དོ། །གང་ལ་གཟུགས་མིན་ཚོར་མིན་འདུ་ཤེས་མི་དམིགས་ཤིང་། །རྣམ་པར་ཤེས་
པ་མ་ཡིན་སེམས་པ་མི་དམིགས་ལ། །ཆོས་ཀུན་སྐྱེ་མེད་སྟོང་པའི་ཚུལ་དུ་རབ་ཤེས་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ལ་ལས་གང་གཱའི་ཀླུང་གི་བྱེ་སྙེད་ཞིང་རྣམས་ན། །སེམས་ཅན་ཇི་སྙེད་འཁོད་
ཀུན་དགྲ་བཅོམ་ཉིད་བཏུལ་བས། །གང་གིས་ཤེས་རབ་ཕ་རོལ་ཕྱིན་འདི་ཡིག་བྲིས་ཏེ། །སེམས་ཅན་མཆོག་ལ་གླེགས་བྱིན་བསོད་ནམས་ཁྱད་པར་འཕགས། །ཅི་ཕྱིར་ཞེ་ན་སྨྲ་མཆོག་དེ་དག་འདིར་བསླབས་ནས། །ཆོས་རྣམས་
39-1-5b


མཐའ་དག་སྟོང་པ་ཉིད་དུ་འདིར་སྟོན་བྱེད། །དེ་ཐོས་ཉན་ཐོས་མྱུར་དུ་རྣམ་པར་གྲོལ་ལ་རེག །རང་རྒྱལ་བྱང་ཆུབ་དང་ནི་སངས་རྒྱས་བྱང་ཆུབ་རེག །མྱུ་གུ་མེད་པར་འཇིག་རྟེན་སྡོང་འབྱུང་ཡོང་མེད་ན། །དེ་ལ་ཡལ་མདབ་མེ་ཏོག་
འབྲས་བུ་ག་ལ་འབྱུང་། །བྱང་ཆུབ་སེམས་མེད་རྒྱལ་འབྱུང་འཇིག་རྟེན་ཡོད་མེད་ན། །འབྲས་བུ་བརྒྱ་བྱིན་ཚངས་པ་ཉན་ཐོས་ག་ལ་འབྱུང་། །ཉི་མའི་དཀྱིལ་འཁོར་གང་ཚེ་འོད་ཀྱི་དྲ་བ་འགྱེད། །དེ་ཚེ་སེམས་ཅན་ལས་བྱེད་
བརྩོན་པ་དེ་བཞིན་དུ། །མཁས་པ་ཤེས་ཕྱིར་འཇིག་རྟེན་བྱང་ཆུབ་སེམས་བྱུང་ན། །ཡེ་ཤེས་ཀྱིས་ནི་སེམས་ཅན་ཡོན་ཏན་ཆོས་དང་ལྡན། །དཔེར་ན་མ་དྲོས་མཚོ་ལ་ཀླུ་བདག་མེད་གྱུར་ན། །འཛམ་བུའི་གླིང་འདིར་ཆུ་ཀླུང་
འབབ་པར་ག་ལ་འགྱུར། །ཆུ་ཀླུང་མེད་ན་མེ་ཏོག་འབྲས་བུ་འབྱུང་མི་འགྱུར། །རྒྱ་མཚོ་ལ་ཡང་རིན་ཆེན་གཟུགས་མང་མེད་པར་འགྱུར། །དེ་བཞིན་འདིར་ཡང་བྱང་ཆུབ་སེམས་མེད་བདེ་གཤེགས་ཀྱི། །ཡེ་ཤེས་འཇིག་
རྟེན་འདི་དག་ཀུན་དུ་ག་ལ་འབྱུང་། །ཡེ་ཤེས་མེད་ན་ཡོན་ཏན་འཕེལ་མེད་བྱང་ཆུབ་མེད། །རྒྱ་མཚོ་འདྲ་བའི་སངས་རྒྱས་ཆོས་ཀྱང་མེད་པར་འགྱུར། །འཇིག་རྟེན་འདི་ན་སྣང་བྱེད་སྲོག་ཆགས་ཇི་སྙེད་པ། །ཀུན་གྱིས་སྣང་
བར་བྱ་ཕྱིར་འོད་རྣམས་ཕྱུང་བ་བས། །ཉི་མའི་དཀྱིལ་འཁོར་འོད་ཟེར་གཅིག་ཕྱུང་ཆེས་མཆོག་སྟེ། །སྣང་བྱེད་ཚོགས་ཀྱི་འོད་རྣམས་ཀུན་གྱིས་ཆར་མི་ཕོད། །ཉན་ཐོས་ཚོགས་རྣམས་ཇི་སྙེད་སྦྱིན་དང་ཚུལ་ཁྲིམས་དང་། །
བསྒོམ་དང་རབ་ཏུ་ལྡན་པའི་བསོད་ནམས་ཚོགས་བསྐྱེད་པ་འང་། །བྱང་ཆུབ་སེམས་དཔའི་རྗེས་སུ་ཡི་རང་སེམས་གཅིག་ལ། །ཉན་ཐོས་ཚོགས་ཀྱི་བསོད་ནམས་ཕུང་པོས་ཆར་མི་ཕོད། །འདས་དུས་སྔོན་གྱི་སངས་རྒྱས་
བྱེ་བ་ཁྲག་ཁྲིག་གང་། །ཞིང་མང་མཐའ་ཡས་བྱེ་སྟོང་དག་ན་གང་བཞུགས་དང་། །གང་ཡང་མྱ་ངན་འདས་པ་འཇིག་རྟེན་མགོན་པོ་རྣམས། །སྡུག་བསྔལ་ཟད་པར་བྱ་ཕྱིར་རིན་ཆེན་ཆོས་སྟོན་པ། །དང་པོ་བྱང་ཆུབ་མཆོག་ཏུ་
39-1-6a


ཐུགས་བསྐྱེད་བསྐྱེད་པ་ནས། །རྣམ་པར་འདྲེན་པ་རྣམས་ཀྱི་དམ་ཆོས་ཟད་ཀྱི་དུས། །དེ་བར་རྒྱལ་བ་དེ་དག་བསོད་ནམས་གང་ཡིན་པ། །ཕ་རོལ་ཕྱིན་དང་ལྡན་དང་སངས་རྒྱས་ཆོས་གང་དང་། །གང་ཡང་སངས་རྒྱས་
སྲས་རྣམས་དང་ནི་ཉན་ཐོས་དང་། །སློབ་དང་མི་སློབ་དགེ་བ་ཟག་བཅས་ཟག་མེད་པ། །བསྡུས་ནས་བྱང་ཆུབ་སེམས་དཔའ་རྗེས་སུ་ཡི་རང་ཞིང་། །འགྲོ་བའི་དོན་རྒྱུ་བྱང་ཆུབ་ཕྱིར་ནི་ཐམས་ཅད་བསྔོ། །ཡོངས་བསྔོ་གལ་ཏེ་
སེམས་སུ་འདུ་ཤེས་འབྱུང་འགྱུར་ཞིང་། །བྱང་ཆུབ་འདུ་ཤེས་ཡོངས་བསྔོ་སེམས་ཅན་འདུ་ཤེས་ན། །འདུ་ཤེས་ཕྱིར་ན་ལྟ་གནས་སེམས་ནི་གསུམ་ལ་ཆགས། །དམིགས་པ་ཡོད་པས་ཡོངས་སུ་བསྔོ་བར་ཆུད་མ་ཡིན། །གལ་ཏེ་འདི་
ལྟར་ཆོས་འདི་འགགས་ཤིང་ཟད་པ་དང་། །གང་དུ་ཡོངས་སུ་བསྔོ་བ་དེ་ཡང་ཟད་པ་དང་། །ཆོས་ཀྱིས་ཆོས་ལ་ནམ་ཡང་མི་བསྔོ་ཤེས་གྱུར་ན། །དེ་ལྟར་རབ་ཏུ་ཤེས་པས་ཡོངས་སུ་བསྔོས་པ་ཡིན། །གལ་ཏེ་མཚན་མར་བྱེད་ན་
དེ་ནི་བསྔོ་མ་ཡིན། །ཇི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན། །ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པ་འང་དེ་འདྲར་རྒྱལ་བས་གསུངས། །དེ་ལྟས་འདི་ལྟར་ཡོངས་སུ་བསྔོ་བ་བསླབ་
བྱ་སྟེ། །ཇི་ལྟར་རྒྱལ་བ་དེ་དག་དགེ་བ་དེ་མཁྱེན་པའི། །རྣམ་པ་གང་ཡིན་འབྱུང་གང་མཚན་ཉིད་གང་ཡིན་ལ། །རྗེས་སུ་ཡིད་རང་དེ་ལྟ་དེ་ལྟར་ཡོངས་སུ་བསྔོ། །དེ་ལྟར་བསོད་ནམས་བྱང་ཆུབ་ཡོངས་སུ་བསྔོ་བྱེད་ན། །དུག་མེད་
སངས་རྒྱས་མི་སྤོང་རྒྱལ་བས་གསུངས་པ་སྨྲ། །དེ་ལྟར་ཡོངས་བསྔོ་དཔའ་བོ་འཇིག་རྟེན་དམིགས་ཅན་གྱི། །བྱང་ཆུབ་སེམས་དཔའ་ཇི་སྙེད་ཐམས་ཅད་ཟིལ་གྱིས་གནོན། །དམུས་ལོང་དམིགས་བུ་མེད་པ་བྱེ་བ་ཁྲག་ཁྲིག་
རྣམས། །ལམ་ཡང་མི་ཤེས་གྲོང་ཁྱེར་འཇུག་པར་ག་ལ་འགྱུར། །ཤེས་རབ་མེད་ན་མིག་མེད་ཕ་རོལ་ཕྱིན་ལྔ་འདི། །དམིགས་བུ་མེད་པས་བྱང་ཆུབ་རེག་པར་ནུས་མ་ཡིན། །གང་ཚེ་ཤེས་རབ་ཀྱིས་ནི་རབ་ཏུ་ཟིན་གྱུར་ན། །
39-1-6b


དེ་ཚེ་མིག་རྙེད་གྱུར་ཅིང་འདི་ཡི་མིང་ཐོབ་བོ། །དཔེར་ན་རི་མོའི་ལས་ནི་ཡོངས་ཟིན་མིག་མེད་པ། །ཇི་སྲིད་མིག་མ་བྲིས་པས་རྔན་པ་མི་ཐོབ་བཞིན། །གང་ཚེ་འདུས་བྱས་འདུས་མ་བྱས་དང་དཀར་ནག་ཆོས། །ཤེས་རབ་རྣམ་པར་བཤིག་
ནས་རྡུལ་ཙམ་མི་དམིགས་ཚེ། །འཇིག་རྟེན་དག་ན་ཤེས་རབ་ཕ་རོལ་ཕྱིན་གྲངས་འགྲོ། །ནམ་མཁའ་གང་ལ་འང་ཅུང་ཟད་མི་གནས་དེ་དང་འདྲ། །གལ་ཏེ་བདག་ནི་རྒྱལ་བའི་ཤེས་རབ་སྤྱད་བྱ་ཞིང་། །སེམས་ཅན་སྡུག་བསྔལ་རེག་པ་
ཁྲག་ཁྲིག་མང་དགྲོལ་སེམས། །སེམས་ཅན་འདུ་ཤེས་ཡོངས་རྟོག་བྱང་ཆུབ་སེམས་དཔའ་སྟེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་མ་ཡིན། །བྱང་ཆུབ་སེམས་དཔའ་གང་ཞིག་སྔོན་ཆད་སྤྱོད་པའི་ཚེ། །ཕ་རོལ་ཕྱིན་
འདིར་སྤྱོད་པ་མཁས་པ་སོམ་ཉི་མེད། །ཐོས་མ་ཐག་ཏུ་དེས་ནི་སྟོན་པའི་འདུ་ཤེས་བསྐྱེད། །དེས་ནི་བྱང་ཆུབ་ཞི་བ་མྱུར་དུ་རྟོགས་པར་འགྱུར། །སྔོན་སྤྱོད་ཚེ་ན་སངས་རྒྱས་ཁྲག་ཁྲིག་བཀུར་བྱས་ཀྱང་། །རྒྱལ་བའི་ཤེས་རབ་ཕ་རོལ་ཕྱིན་
ལ་མ་དད་ན། །ཐོས་ནས་བློ་ཆུང་དེ་ཡིས་འདི་ནི་སྤོང་བྱེད་དེ། །སྤངས་ནས་སྐྱབས་མེད་གྱུར་པ་དེ་ནི་མནར་མེད་འགྲོ། །དེ་ལྟ་བས་ན་གལ་ཏེ་སངས་རྒྱས་ཡེ་ཤེས་མཆོག །རེག་པར་འདོད་ན་རྒྱལ་བའི་ཡུམ་འདིར་དད་པར་གྱིས། །དཔེར་ན་
ཚོང་པ་རིན་ཆེན་གླིང་དུ་སོང་ནས་ནི། །ཟོང་ཟད་སླར་ལོག་ལྟ་བུར་གྱུར་ན་མི་རུང་ངོ་། །གཟུགས་ཀྱི་དག་པ་འབྲས་བུ་དག་པར་རིག་པར་བྱ། །འབྲས་བུ་གཟུགས་དག་ཐམས་ཅད་མཁྱེན་ཉིད་དག་པར་འགྱུར། །ཐམས་ཅད་མཁྱེན་
ཉིད་འབྲས་བུ་དག་དང་གཟུགས་དག་པ། །ནམ་མཁའི་ཁམས་དང་མཚུངས་ཏེ་དབྱེར་མེད་གཅད་དུ་མེད། །སྐབས་གསུམ་པ་གཞི་ཐམས་ཅད་ཤེས་པ་བསྟན། །དཔའ་བོ་གར་སྤྱོད་ཤེས་རབ་ཕ་རོལ་ཕྱིན་པ་ཡིས། །ཁམས་གསུམ་ཡང་
དག་འདས་ལ་རྣམ་པར་གྲོལ་བ་འང་མིན། །ཉོན་མོངས་བསལ་བར་གྱུར་ཀྱང་སྐྱེ་བ་སྟོན་པར་བྱེད་། །རྒ་དང་ན་དང་འཆི་བ་མེད་ཀྱང་འཆི་འཕོ་སྟོན། །འགྲོ་བ་འདི་དག་མིང་དང་གཟུགས་ཀྱི་འདམ་ལ་ཆགས། །རླུང་གི་འཁོར་ལོ་
39-1-7a


ལྟ་བུའི་འཁོར་བའི་འཁོར་ལོར་འཁྱམ། །འགྲོ་བ་འཁྲུལ་པ་རི་དགས་རྒྱར་ཆུད་འདྲར་ཤེས་ནས། །ཤེས་རབ་ལྡན་པ་མཁའ་ལ་བྱ་བཞིན་རྣམ་པར་རྒྱུ། །སྤྱོད་པ་ཡོངས་དག་གང་ཞིག་གཟུགས་ལ་མི་སྤྱོད་ཅིང་། །རྣམ་
ཤེས་འདུ་ཤེས་ཚོར་བ་སེམས་པར་མི་སྤྱོད་ན། །དེ་ལྟར་སྤྱོད་པ་ཆགས་པ་ཐམས་ཅད་ཡོངས་སྤོང་ཞིང་། །ཆགས་ལས་རྣམ་གྲོལ་བདེ་གཤེགས་རྣམས་ཀྱི་ཤེས་རབ་སྤྱོད། །དེ་ལྟར་སྤྱོད་པའི་བྱང་ཆུབ་སེམས་དཔའ་མཁས་གསལ་
བ། །ཆགས་པ་བཅད་ནས་འགྲོ་ལ་ཆགས་པ་མེད་པར་འགྲོ། །ཉི་མ་སྒྲ་གཅན་གཟའ་བྲལ་ལྷང་ངེར་འདུག་པ་དང་། །མེ་བཏང་རྩྭ་དང་ཤིང་དང་ནགས་ཚལ་སྲེག་པ་བཞིན། །ཆོས་རྣམས་ཐམས་ཅད་རང་བཞིན་དག་ཅིང་ཡོངས་དག་པར། །
བྱང་ཆུབ་སེམས་དཔའ་ཤེས་རབ་ཕ་རོལ་ཕྱིན་ལྟ་ན། །བྱེད་པ་པོ་ཡང་མི་དམིགས་ཆོས་ཀུན་མི་དམིགས་ཏེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །སྐབས་བཞི་པ་རྣམ་པ་ཀུན་མངོན་པར་རྫོགས་པར་རྟོགས་པ་བསྟན། །
རྒྱལ་བ་ལ་ནི་ལྷ་རྒྱལ་བརྒྱ་བྱིན་གྱིས་ཞུས་པ། །བྱང་ཆུབ་སེམས་དཔའ་ཤེས་རབ་སྤྱོད་པ་ཇི་ལྟར་བརྩོན། །ཕུང་པོ་ཁམས་ལ་རྡུལ་ཙམ་བརྩོན་པར་མི་བྱེད་ཅིང་། །ཕུང་པོར་མི་བརྩོན་དེ་ནི་བྱང་ཆུབ་སེམས་དཔའི་བརྩོན། །གང་ཞིག་ཆོས་
འདི་སྤྲུལ་དང་སྒྱུ་མ་འདྲར་ཐོས་ནས། །སོམ་ཉི་མེད་ཅིང་སློབ་ལ་ཕྱིར་ཞིང་སྦྱོར་བྱེད་པ། །སེམས་ཅན་དེ་ནི་རིང་ནས་ཐེག་ཆེན་ཞུགས་རིག་བྱ། །སངས་རྒྱས་བྱེ་བ་ཁྲག་ཁྲིག་མང་ལ་ལྷག་བྱས་ཡིན། །དགོན་པའི་ལམ་ནི་དཔག་ཚད་
མང་པོར་ཞུགས་པའི་མིས། །གནག་རྫི་མཚམས་ཀྱི་ནགས་ཚལ་ཕུན་སུམ་ཚོགས་མཐོང་ནས། །འདི་དག་གྲོང་དང་གྲོང་ཁྱེར་ཉེ་བར་བརྟགས་སྙམ་སྟེ། །དབུགས་ཕྱིན་རྙེད་པར་འགྱུར་ཞིང་ཆོམ་རྐུན་འཇིགས་པ་མེད། །དེ་བཞིན་
བྱང་ཆུབ་ཡོངས་སུ་ཚོལ་ཚེ་རྒྱལ་རྣམས་ཀྱི། །ཤེས་རབ་ཕ་རོལ་ཕྱིན་འདི་མཉན་པ་གང་ཐོབ་པ། །དེ་ནི་དབུགས་ཕྱིན་ཐོབ་པར་གྱུར་ཅིང་འཇིགས་མེད་དེ། །དགྲ་བཅོམ་ས་ལ་མ་ཡིན་རྐྱེན་རྟོགས་ས་ལ་མིན། །མི་ཞིག་རྒྱ་མཚོའི་
39-1-7b


ཆུ་ནི་བལྟ་ཕྱིར་འགྲོ་བ་ཡིས། །གལ་ཏེ་ཤིང་དང་ནགས་ཚལ་རི་མཐོང་ད་དུང་རིང་། །ཅི་སྟེ་རྟགས་མ་མཐོང་ན་རྒྱ་མཚོ་ཆེན་པོ་ནི། །ཉེ་བར་གྱུར་ཏོ་སྙམ་སྟེ་དེ་ལ་སོམ་ཉི་མེད། །དེ་ལྟར་བྱང་ཆུབ་དམ་པར་རབ་ཞུགས་རྒྱལ་བ་ཡི། །ཤེས་རབ་
ཕ་རོལ་ཕྱིན་པ་འདི་མཉན་རིག་པར་བྱ། །རྣམ་པར་འདྲེན་པས་མངོན་སུམ་ལུང་བསྟན་མ་གྱུར་ཀྱང་། །སངས་རྒྱས་བྱང་ཆུབ་རིང་པོར་མི་ཐོགས་བདག་རེག་འགྱུར། །དཔྱིད་དུས་བཟང་ལ་སྡོང་པོ་ལོ་མ་ལྷགས་གྱུར་ན་། །ཡལ་གས་རིང་པོར་
མི་ཐོགས་ལོ་འབྲས་མེ་ཏོག་སྐྲུན། །ཤེས་རབ་ཕ་རོལ་ཕྱིན་འདི་སུ་ཡི་ལག་ཐོབ་པ། །རིང་པོར་མི་ཐོགས་འདྲེན་པ་རྣམས་ཀྱི་བྱང་ཆུབ་ཐོབ། །དཔེར་ན་བུད་མེད་སྦྲུམ་གང་སྡུག་བསྔལ་ཉེན་གྱུར་ན། །དེ་ནི་དེ་ཡི་བཙའ་བའི་དུས་ལ་བབ་ཅེས་
བྱ། །དེ་བཞིན་བྱང་ཆུབ་སེམས་དཔའ་རྒྱལ་བའི་ཤེས་རབ་ཉན། །དགའ་དང་འདུན་པ་སྐྱེད་པ་མྱུར་དུ་བྱང་ཆུབ་རེག །ཤེས་རབ་ཕ་རོལ་ཕྱིན་མཆོག་སྤྱོད་ཚེ་རྣལ་འབྱོར་པ། །གཟུགས་ཀྱི་འཕེལ་བ་དང་ནི་ཡོངས་སུ་འགྲིབ་མི་མཐོང་། །
གང་ཞིག་ཆོས་དང་ཆོས་མིན་ཆོས་དབྱིངས་མི་མཐོང་ཞིང་། །མྱ་ངན་འདས་ལ་མི་རེག་དེ་ནི་ཤེས་རབ་གནས། །གང་ཞིག་འདིར་སྤྱོད་སངས་རྒྱས་ཆོས་རྣམས་མི་རྟོག་སྟེ། །སྟོབས་དང་རྫུ་འཕྲུལ་རྐང་པ་བྱང་ཆུབ་ཞི་མི་རྟོག །རྣམ་པར་མི་
རྟོག་རྟོག་བྲལ་བྱིན་གྱི་རླབས་ཀྱིས་སྤྱོད། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །སྨྲ་བའི་ཟླ་བ་སངས་རྒྱས་ལ་ནི་རབ་འབྱོར་ཞུས། །ཡོན་ཏན་དགའ་བ་རྣམས་ཀྱི་བར་དུ་གཅོད་གང་ལགས། །སྟོན་པས་བཀའ་སྩལ་
བར་དུ་གཅོད་པར་འགྱུར་མང་སྟེ། །དེ་ལས་རེ་ཤིག་ཅུང་ཟད་ཙམ་ཞིག་ཡོངས་སུ་བརྗོད། །རྒྱལ་བའི་ཤེས་རབ་ཕ་རོལ་ཕྱིན་འདི་ཡིག་འདྲི་ཚེ། །སྤོབས་པ་ཐ་དད་རྣམ་པ་དུ་མ་འབྱུང་འགྱུར་ཞིང་། །འགྲོ་བའི་དོན་མ་བྱས་པར་གློག་
བཞིན་མྱུར་དུ་ཡང་། །ཡོངས་སུ་ཉམས་པར་འགྱུར་བ་འདི་ནི་བདུད་ཀྱི་ལས། །འདི་བཤད་ཚེ་ན་ཁ་ཅིག་སོམ་ཉི་ཟ་འགྱུར་ཏེ། །འདྲེན་པས་འདིར་ནི་བདག་གི་མིང་ཡང་ཡོངས་མ་བརྗོད། །རིགས་དང་ས་དང་རུས་ཀྱང་ཡོངས་
39-1-8a


སུ་མ་བརྗོད་ཅེས། །འདི་ནི་ཉན་པར་མི་འགྱུར་སྤོང་འགྱུར་བདུད་ཀྱི་ལས། །དེ་ལྟར་མི་ཤེས་དེ་དག་རྩ་བ་བོར་ནས་ནི། །རྨོངས་པས་ཡལ་ག་དག་དང་འདབ་མ་ཚོལ་བར་འགྱུར། །གླང་པོ་རྙེད་ནས་གླང་པོའི་རྗེས་ནི་ཚོལ་བ་ལྟར། །
ཤེས་རབ་ཕ་རོལ་ཕྱིན་ཐོས་མདོ་ཚོལ་དེ་བཞིན་ནོ། །དཔེར་ན་ལ་ལས་རོ་བརྒྱ་ལྡན་པའི་ཟས་རྙེད་ལ། །ཟས་མཆོག་རྙེད་ནས་ཟས་ངན་ཚོལ་བར་བྱེད་པ་ལྟར། །བྱང་ཆུབ་སེམས་དཔའ་ཕ་རོལ་ཕྱིན་པ་འདི་རྙེད་ནས། །དགྲ་བཅོམ་ས་ཡིས་
བྱང་ཆུབ་ཚོལ་བྱེད་དེ་བཞིན་ནོ། །སྟི་སྟང་འདོད་པར་འགྱུར་ཞིང་རྙེད་པ་འདོད་འགྱུར་དང་། །ལྷ་དང་བཅས་པའི་སེམས་ཀྱིས་ཁྱིམ་འདྲིས་བྱེད་ལྡན་ཞིང་། །ཆོས་བཏང་ནས་ནི་ཆོས་མིན་བྱ་བ་སྤྱོད་འགྱུར་བ། །ལམ་བོར་ལམ་གོལ་འགྲོ་བ་འདི་ནི་
བདུད་ཀྱི་ལས། །གང་དག་དེ་ཡི་ཚེ་ན་འདུན་ཅིང་དད་གྱུར་ནས། །ཆོས་ཀྱི་དམ་པ་འདི་ནི་ཉན་དུ་སོང་བ་ལས། །དེ་དག་གིས་ནི་ཆོས་སྨྲ་བྱ་བ་ལྡན་རིག་ནས། །དགའ་བ་མེད་ཅིང་ཡིད་མི་བདེ་བར་གྱུར་ནས་འགྲོ། །དེ་ཡི་ཚེ་ན་བདུད་ཀྱི་ལས་འདི་
འབྱུང་བར་འགྱུར། །དེ་ཚེ་གང་དག་གིས་ནི་དགེ་སློང་མང་དཀྲུགས་ནས། །ཤེས་རབ་ཕ་རོལ་ཕྱིན་འདི་འཛིན་པར་མི་འགྱུར་བའི། །བར་དུ་གཅོད་པ་རྣམ་མང་གཞན་ཡང་འབྱུང་བར་འགྱུར། །རིན་ཆེན་རིན་ཐང་མེད་པ་རྙེད་འགྱུར་
གང་དག་ཡིན། །དེ་དག་དཀོན་ལ་དུས་རྣམས་རྟག་ཏུ་འཚེ་བའང་མང་། །དེ་བཞིན་རྒྱལ་བའི་ཤེས་རབ་ཕ་རོལ་ཕྱིན་པ་མཆོག །རིན་ཆེན་ཆོས་ཀྱང་དཀོན་ལ་རྟག་ཏུ་འཚེ་བ་འང་མང་། །ཐེག་པ་གསར་དུ་ཞུགས་པའི་སེམས་ཅན་བློ་ཆུང་
བ། །གང་ཞིག་དཀོན་པའི་རིན་ཆེན་འདི་ནི་མི་རྙེད་པ། །དེ་ལ་བར་ཆད་བྱ་ཕྱིར་བདུད་ནི་སྤྲོ་བར་འགྱུར། །ཕྱོགས་བཅུའི་སངས་རྒྱས་དེ་དག་ཡོངས་སུ་འཛིན་ལ་སྦྱོར། །མ་ཞིག་ན་བར་གྱུར་ལ་བུ་ནི་མང་ཡོད་པ། །དེ་ཀུན་ཡིད་མི་
བདེ་ཞིང་དེ་ལ་རིམ་གྲོ་བྱེད། །དེ་བཞིན་ཕྱོགས་བཅུའི་འཇིག་རྟེན་ཁམས་ཀྱི་སངས་རྒྱས་ཀྱང་། །ཡུམ་གྱུར་ཤེས་རབ་དམ་པ་འདི་ལ་དགོངས་པ་མཛད། །གང་དག་འདས་དང་ཕྱོགས་བཅུའི་འཇིག་རྟེན་མགོན་གང་དང་། །མ་འོངས་
39-1-8b


དུས་ན་འབྱུང་འགྱུར་དེ་དག་འདི་ལས་འབྱུང་། །འཇིག་རྟེན་སྟོན་པ་རྒྱལ་བ་རྣམས་ཀྱི་སྐྱེད་བྱེད་ཡུམ། །སེམས་ཅན་གཞན་གྱི་སེམས་ཀྱི་སྤྱོད་པ་སྟོན་པར་བྱེད། །འཇིག་རྟེན་དེ་བཞིན་ཉིད་དང་དགྲ་བཅོམ་དེ་བཞིན་ཉིད། །རང་རྒྱལ་
དེ་བཞིན་ཉིད་དང་རྒྱལ་སྲས་དེ་བཞིན་ཉིད། །གཅིག་པ་ཉིད་དེ་དངོས་བྲལ་གཞན་མིན་དེ་བཞིན་ཉིད། །ཤེས་རབ་ཕ་རོལ་ཕྱིན་པ་དེ་བཞིན་གཤེགས་པས་མཁྱེན། །མཁས་པ་འཇིག་རྟེན་གནས་སམ་མྱ་ངན་འདས་ཀྱང་རུང་། །ཆོས་
ཉིད་སྐྱོན་མེད་ཆོས་རྣམས་སྟོང་པ་འདི་གནས་ཏེ། །བྱང་ཆུབ་སེམས་དཔའ་དེ་བཞིན་ཉིད་འདི་རྗེས་སུ་རྟོགས། །དེ་ཕྱིར་དེ་བཞིན་གཤེགས་ཞེས་སངས་རྒྱས་མཚན་གསོལ་ཏོ། །ཤེས་རབ་ཕ་རོལ་ཕྱིན་པ་དགའ་ཚལ་ལ་རྟེན་པ། །སྟོབས་
བཅུ་རྣམ་འདྲེན་རྣམས་ཀྱི་སྤྱོད་ཡུལ་འདི་ཡིན་ཏེ། །སེམས་ཅན་སྡུག་བསྔལ་ངན་སོང་གསུམ་ལས་ཡོངས་འདོན་ཀྱང་། །དེ་དག་ནམ་ཡང་སེམས་ཅན་འདུ་ཤེས་འགྱུར་བ་མེད། །དཔེར་ན་སེང་གེ་རི་སུལ་བརྟེན་ནས་འཇིགས་མེད་པར། །
རི་དགས་ཕྲ་མོ་མང་སྐྲག་བྱེད་ཅིང་སྒྲ་སྒྲོགས་ལྟར། །མི་ཡི་སེང་གེ་ཤེས་རབ་ཕ་རོལ་ཕྱིན་བརྟེན་ནས། །མུ་སྟེགས་ཅན་མང་སྐྲག་བྱེད་འཇིག་རྟེན་སྒྲ་ཡང་སྒྲོགས། །དཔེར་ན་ནམ་མཁར་གནས་པའི་ཉི་མའི་འོད་ཟེར་ནི། །
ས་འདི་སྐེམས་པར་བྱེད་ཅིང་གཟུགས་ཀྱང་རབ་ཏུ་སྟོན། །དེ་བཞིན་ཆོས་རྒྱལ་ཤེས་རབ་ཕ་རོལ་ཕྱིན་རྟེན་པ། །སྲེད་པའི་ཆུ་ཀླུང་སྐེམས་ཤིང་ཆོས་ཀྱང་རབ་ཏུ་སྟོན། །གཟུགས་རྣམས་མི་མཐོང་ཚོར་བ་དག་ཀྱང་མི་
མཐོང་ཞིང་། །འདུ་ཤེས་མཐོང་བ་མེད་ལ་སེམས་པ་མི་མཐོང་ཞིང་། །གང་ལ་རྣམ་པར་ཤེས་དང་སེམས་ཡིད་མཐོང་མེད་པ། །འདི་ནི་ཆོས་མཐོང་ཡིན་ཞེས་དེ་བཞིན་གཤེགས་པས་བསྟན། །ནམ་མཁའ་མཐོང་ཞེས་
སེམས་ཅན་ཚིག་ཏུ་རབ་བརྗོད་པ། །ནམ་མཁའ་ཇི་ལྟར་མཐོང་སྟེ་དོན་འདི་བརྟག་པར་གྱིས། །དེ་ལྟར་ཆོས་མཐོང་བ་ཡང་དེ་བཞིན་གཤེགས་པས་བསྟན། །མཐོང་བ་དཔེ་གཞན་གྱིས་ནི་བསྙད་པར་ནུས་མ་ཡིན། །
39-1-9a


གང་གིས་དེ་ལྟར་མཐོང་བ་དེ་ཡིས་ཆོས་ཀུན་མཐོང་། །རྒྱལ་པོ་བཏང་སྙོམས་འདུག་ཅིང་བློན་པོ་ཀུན་བྱེད་ལྟར། །སངས་རྒྱས་མཛད་དང་ཉན་ཐོས་ཆོས་རྣམས་ཇི་སྙེད་པ། །དེ་དག་ཐམས་ཅད་ཤེས་རབ་
ཕ་རོལ་ཕྱིན་པ་བྱེད། །རྒྱལ་པོ་གྲོང་དུ་མི་འགྲོ་ཡུལ་འཁོར་མི་འགྲོ་ལ། །རང་གི་ཡུལ་ནས་འདུ་བ་ཐམས་ཅད་སྡུད་པ་ལྟར། །བྱང་ཆུབ་སེམས་དཔའི་ཆོས་ཉིད་གང་དུ་འང་མི་འགྲོ་ལ། །སངས་རྒྱས་ས་ཡི་ཡོན་ཏན་གང་
ཡིན་ཐམས་ཅད་སྡུད། །གང་ལ་བདེ་གཤེགས་བྱང་ཆུབ་སེམས་དཔའ་དད་བརྟན་ཡོད། །ཤེས་རབ་ཕ་རོལ་ཕྱིན་པ་མཆོག་ལ་བསམ་སྦྱོར་བ། །ཉན་ཐོས་རང་རྒྱལ་ས་གཉིས་ཤིན་དུ་འདས་བྱས་ནས། །ཟིལ་གྱིས་མི་ནོན་
རྒྱལ་བའི་བྱང་ཆུབ་མྱུར་དུ་ཐོབ། །དཔེར་ན་རྒྱ་མཚོར་འཇུག་པའི་གྲུ་ནི་ཆག་གྱུར་ལ། །མི་གང་རོ་འམ་རྩྭ་འམ་ཤིང་ནི་མི་འཛིན་པ། །ཆུ་དབུས་འཇིག་པར་འགྱུར་ཏེ་ངོགས་སུ་ཕྱིན་མི་འགྱུར། །གང་ཞིག་འཛིན་པ་རྒྱ་མཚོའི་ཕ་
རོལ་ཕྱིན་པར་འགྱུར། །དེ་ལྟར་དད་ལྡན་དང་བ་ཐོབ་པ་གང་ཞིག་ནི། །ཤེས་རབ་ཕ་རོལ་ཕྱིན་ཡུམ་རྗེས་སུ་མི་འཇུག་མིན། །དེ་དག་ཐབས་ཀྱི་ཡོན་ཏན་ཤེས་རབ་ཡོངས་ཟིན་ན། །མཆོག་ཏུ་རྨད་བྱུང་བདེ་གཤེགས་བྱང་
ཆུབ་མྱུར་དུ་རེག །དཔེར་ན་ལ་ལས་རྫ་སོ་མ་བཏང་ཆུ་སྐྱེད་ན། །ཉམ་ཆུང་ཕྱིར་ན་མྱུར་དུ་འཇིག་པར་རིག་པར་བྱ། །སོ་བཏང་བུམ་པར་ཆུ་སྐྱེད་ལམ་དུ་འཇིག་པ་ཡི། །འཇིག་པ་མེད་ཅིང་བདེ་བར་ཁྱིམ་དུ་ཕྱིན་པར་འགྱུར། །
དེ་བཞིན་བྱང་ཆུབ་སེམས་དཔའ་དད་པ་མང་གྱུར་ཀྱང་། །ཤེས་རབ་རྣམ་པར་ཉམས་ན་མྱུར་དུ་མ་རུང་འགྱུར། །དད་པས་ཤེས་རབ་ཀྱིས་ནི་ཡོངས་སུ་ཟིན་གྱུར་ན། །ས་གཉིས་ཤིན་དུ་འདས་ཏེ་བྱང་ཆུབ་མཆོག་ཐོབ་འགྱུར། །
དཔེར་ན་བཅོས་ལེགས་མ་བྱས་གྲུ་ནི་རྒྱ་མཚོའི་ནང་། །ནོར་དང་བཅས་ཤིང་ཚོང་པར་བཅས་ཏེ་འཇིག་པར་འགྱུར། །གྲུ་དེ་ལེགས་པར་བཅོས་ལེགས་བྱས་དང་ལྡན་གྱུར་ན། །མི་འཇིག་ནོར་དང་བཅས་པར་ངོགས་སུ་ཕྱིན་
39-1-9b


པར་འགྱུར། །དེ་ལྟར་བྱང་ཆུབ་སེམས་དཔའ་དད་པས་ཡོངས་བསྒོས་ཀྱང་། །ཤེས་རབ་མེད་ན་བྱང་ཆུབ་ལས་ནི་མྱུར་ཉམས་འགྱུར། །དེ་ཉིད་ཤེས་རབ་ཕ་རོལ་ཕྱིན་པ་མཆོག་ལྡན་ན། །མ་སྨས་མ་ཉམས་རྒྱལ་བའི་བྱང་ཆུབ་
རེག་པར་འགྱུར། །ལོ་བརྒྱ་ཉི་ཤུ་ལོན་ཏེ་རྒས་ཤིང་སྡུག་བསྔལ་མི། །ལངས་ཀྱང་བདག་ཉིད་འགྲོ་བར་ནུས་པ་མ་ཡིན་ཏེ། །དེ་ནི་གཡས་གཡོན་གཉིས་ནས་མི་ཡིས་རྟེན་བྱས་ན། །འགྱེལ་བའི་འཇིགས་པ་མེད་ཅིང་བདེ་བླག་
འགྲོ་བར་འགྱུར། །དེ་བཞིན་བྱང་ཆུབ་སེམས་དཔའ་ཤེས་རབ་སྟོབས་ཆུང་བ། །རབ་ཏུ་ཞུགས་པར་གྱུར་ཀྱང་རབ་ཏུ་ཉམས་པར་འགྱུར། །དེ་ཉིད་ཐབས་དང་ཤེས་རབ་མཆོག་གིས་ཡོངས་ཟིན་ན། །མི་ཉམས་དེ་བཞིན་གཤེགས་ཀྱི་
བྱང་ཆུབ་རེག་པར་འགྱུར། །བྱང་ཆུབ་སེམས་དཔའ་དང་པོའི་ལས་ཀྱི་སར་གནས་གང་། །ལྷག་པའི་བསམ་པས་སངས་རྒྱས་བྱང་ཆུབ་མཆོག་ཞུགས་པ། །སློབ་མ་བཟང་པོ་བླ་མ་གུས་ལྡན་དེ་དག་གིས། །བླ་མ་མཁས་
པ་རྣམས་ལ་རྟག་ཏུ་བསྟེན་པར་བྱ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང་། །དེ་དག་ཤེས་རབ་ཕ་རོལ་ཕྱིན་པ་རྗེས་སུ་སྟོན། །སངས་རྒྱས་ཆོས་རྣམས་དགེ་བའི་བཤེས་ལ་རྟེན་ཏོ་ཞེས། །ཡོན་ཏན་ཀུན་གྱི་མཆོག་མངའ་
རྒྱལ་བ་དེ་སྐད་གསུང་། །སྦྱིན་དང་ཚུལ་ཁྲིམས་བཟོད་དང་དེ་བཞིན་བརྩོན་འགྲུས་དང་། །བསམ་གཏན་ཤེས་རབ་བྱང་ཆུབ་ཡོངས་སུ་བསྔོ་བར་གྱིས། །བྱང་ཆུབ་ཕུང་པོར་ཞེན་ནས་མཆོག་འཛིན་མ་བྱེད་ཅེས། །དང་པོའི་ལས་ཅན་
དེ་ལ་དེ་སྐད་བསྟན་པར་བྱ། །དེ་ལྟར་སྤྱོད་པ་ལེགས་མཚོ་སྨྲ་བའི་ཟླ་བ་རྣམས། །འགྲོ་བའི་སྐྱབས་དང་དཔུང་གཉེན་དང་ནི་གནས་ཡིན་ཏེ། །རྟེན་དང་བློ་དང་གླིང་དང་ཡོངས་འདྲེན་དོན་འདོད་པ། །གསལ་བྱེད་སྒྲོན་མ་ཆོས་མཆོག་སྨྲ་བ་
མི་འཁྲུགས་ཡིན། །གྲགས་ཆེན་ལྡན་རྣམས་བྱ་དཀའ་གོ་ཆ་གྱོན་བྱེད་དེ། །ཕུང་པོ་ཁམས་དང་སྐྱེ་མཆེད་རྣམས་ཀྱི་གོ་ཆ་མིན། །ཐེག་གསུམ་འདུ་ཤེས་བྲལ་ཞིང་ཡོངས་སུ་བཟུང་བ་མེད། །མི་ལྡོག་གཡོ་བ་མེད་ཅིང་
39-1-10a


མི་འཁྲུགས་ཆོས་ཅན་ཡིན། །དེ་དག་འདི་འདྲའི་ཆོས་དང་ལྡན་ཞིང་སྤྲོས་པ་མེད། །ཐེ་ཚོམ་སོམ་ཉི་ཡིད་གཉིས་བྲལ་ཞིང་དོན་དང་ལྡན། །ཤེས་རབ་ཕ་རོལ་ཕྱིན་པ་ཐོས་ནས་མི་ནུར་བ། །གཞན་གྱི་དྲིང་མི་
འཇོག་ཅིང་མི་ལྡོག་རིག་པར་བྱ། །འདྲེན་པ་རྣམས་ཀྱི་ཆོས་འདི་ཟབ་སྟེ་མཐོང་བར་དཀའ། །སུས་ཀྱང་རྟོགས་པ་མེད་ཅིང་ཐོབ་པར་འགྱུར་མེད་པ། །དེ་ཕྱིར་ཕན་མཛད་བརྩེར་ལྡན་བྱང་ཆུབ་བརྙེས་ནས་ནི། །སེམས་ཅན་
ཚོགས་སུས་ཤེས་སྙམ་ཐུགས་ཁྲལ་ཆུང་བར་མཛད་། །སེམས་ཅན་རྣམས་ནི་གནས་ལ་དགའ་ཞིང་ཡུལ་རྣམས་འདོད་། །འཛིན་ལ་གནས་ཤིང་མི་མཁས་བླུན་རྨོངས་མུན་པ་བཞིན། །ཐོབ་པར་བྱ་བའི་ཆོས་ནི་གནས་མེད་འཛིན་
མེད་དེ། །དེས་ན་འཇིག་རྟེན་དག་དང་རྩོད་པ་འབྱུང་བ་ཡིན། །ནམ་མཁའི་ཁམས་ནི་ཤར་གྱི་ཕྱོགས་དང་ལྷོ་ཕྱོགས་དང་། །དེ་བཞིན་ནུབ་ཀྱི་ཕྱོགས་དང་བྱང་ཕྱོགས་ཕ་མཐའ་ཡས། །སྟེང་དང་འོག་དང་ཕྱོགས་བཅུའི་ཇི་སྙེད་
རྣམས་ནའང་ཡོད། །ཐ་དད་གྱུར་པ་མེད་ཅིང་བྱེ་བྲག་གྱུར་པ་མེད། །འདས་པའི་དེ་བཞིན་ཉིད་གང་མ་བྱོན་དེ་བཞིན་ཉིད། །ད་ལྟར་དེ་བཞིན་ཉིད་གང་དགྲ་བཅོམ་དེ་བཞིན་ཉིད་། །ཆོས་ཀུན་དེ་བཞིན་ཉིད་གང་རྒྱལ་བའི་དེ་བཞིན་
ཉིད། །ཆོས་ཀྱི་དེ་བཞིན་ཉིད་འདི་ཐམས་ཅད་བྱེ་བྲག་མེད། །བདེ་གཤེགས་བྱང་ཆུབ་ཐ་དད་ཆོས་དང་བྲལ་གྱུར་པ། །འདི་ནི་བྱང་ཆུབ་སེམས་དཔའ་གང་ཞིག་ཐོབ་འདོད་པ། །ཐབས་དང་ལྡན་པས་ཤེས་རབ་ཕ་རོལ་ཕྱིན་ལ་སྦྱོར། །
འདྲེན་པའི་ཤེས་རབ་མེད་ན་ཐོབ་པར་འགྱུར་མ་ཡིན། །བྱ་ཞིག་ལུས་ཆེ་དཔག་ཚད་བརྒྱ་རྩ་ལྔ་བཅུ་པར། །གྱུར་ལ་འདབ་གཤོག་ཟད་དེ་ཉམ་རྩལ་ཡོད་མིན་ན། །དེ་ཡིས་སུམ་བཅུ་རྩ་གསུམ་གནས་ནས་འཛམ་གླིང་འདིར། །
བདག་ཉིད་མཆོངས་ན་དེར་ནི་ཉམ་ཉེས་གྱུར་པ་ཡིན། །རྒྱལ་བ་རྣམས་ཀྱི་ཕ་རོལ་ཕྱིན་པ་ལྔ་འདི་ཡང་། །བསྐལ་པ་བྱེ་བ་ཁྲག་ཁྲིག་མང་པོར་བསྒྲུབ་བྱས་ཤིང་། །སྨོན་ལམ་མཐའ་ཡས་རྒྱ་ཆེན་འཇིག་རྟེན་རྟག་བསྟེན་ཀྱང་། །
39-1-10b


ཐབས་མེད་ཤེས་རབ་བྲལ་བ་ཉན་ཐོས་ཉིད་དུ་ལྟུང་། །སངས་རྒྱས་ཐེག་པ་འདི་ལ་ངེས་པར་འབྱུང་འདོད་གང་། །འགྲོ་བ་ཀུན་ལ་སེམས་སྙོམས་ཕ་མའི་འདུ་ཤེས་དང་། །ཕན་པའི་སེམས་དང་བྱམས་པའི་ཡིད་ཀྱིས་
བརྟུལ་བྱ་ཞིང་། །ཐ་བ་མེད་ཅིང་དྲང་ལ་ཚིག་འཇམ་སྨྲ་བར་བྱ། །འཇིག་རྟེན་མགོན་ལ་གནས་བརྟན་རབ་འབྱོར་ཡོངས་ཞུས་པ། །ཡོན་ཏན་རྒྱ་མཚོ་ཉོན་མོངས་མ་མཆིས་རྟགས་བསྟན་གསོལ། །མཐུ་ཆེ་བ་
དག་ཇི་ལྟར་སླར་ལྡོག་མི་འགྱུར་བ། །དེ་ལྟར་ཡོན་ཏན་ཕྱོགས་ཙམ་རྒྱལ་བས་ལུང་བསྟན་གསོལ། །ཐ་དད་འདུ་ཤེས་བྲལ་ཞིང་རིགས་པ་ལྡན་ཚིག་སྨྲ། །དགེ་སྦྱོང་དག་དང་བྲམ་ཟེ་གཞན་ལ་རྟེན་མི་བྱེད། །མཁས་
པ་དུས་རྣམས་རྟག་ཏུ་ངན་སོང་གསུམ་པོ་སྤངས། །དེ་དག་དགེ་བཅུའི་ལས་ཀྱི་ལམ་ལ་མངོན་པར་བརྩོན། །ཟང་ཟིང་མེད་པར་འགྲོ་ལ་ཆོས་ནི་རྗེས་སུ་སྟོན། །ཆོས་ལ་གཅིག་ཏུ་དགའ་ཞིང་རྟག་ཏུ་ཚིག་འཇམ་ལྡན། །
འགྲོ་འཆག་ཉལ་དང་འདུག་པར་ཤེས་བཞིན་རབ་ཏུ་ལྡན་། །གཉའ་ཤིང་གང་ཙམ་ལྟ་ཞིང་འགྲོ་ལ་སེམས་འཁྲུལ་མེད། །གཙང་བྱས་གཙང་མའི་གོས་འཆང་གསུམ་པོ་དབེན་ཞིང་དག །རྙེད་འདོད་མ་ཡིན་ཁྱུ་མཆོག་རྟག་
ཏུ་ཆོས་འདོད་པ། །བདུད་ཀྱི་ཡུལ་ལས་འདས་ཤིང་གཞན་གྱི་དྲིང་མི་འཇོག །བསམ་གཏན་བཞི་ལ་བསམ་གཏན་བསམ་གཏན་དེར་མི་གནས། །གྲགས་པ་འདོད་པ་མ་ཡིན་ཁྲོ་བས་སེམས་དཀྲིས་མེད། །ཁྱིམ་པར་
གྱུར་ཀྱང་རྟག་ཏུ་དངོས་པོ་ཀུན་མ་ཆགས། །འཚོ་བའི་ཕྱིར་ནི་ཡ་ངས་ལོངས་སྤྱོད་ཚོལ་མི་བྱེད། །དྲག་ཤུལ་སྤྱོད་སྔགས་མི་བྱེད་བུད་མེད་སྦྱོར་སྔགས་མིན། །འདོད་པའི་ལས་ཅན་ཕོ་མོར་འགྱུར་ཞེས་སྟོན་མི་བྱེད། །
རབ་ཏུ་དབེན་པའི་ཤེས་རབ་ཕ་རོལ་ཕྱིན་མཆོག་བརྩོན། །འཐབ་དང་རྩོད་དང་བྲལ་ཞིང་བྱམས་པའི་སེམས་ཀྱང་བརྟན། །ཀུན་མཁྱེན་འདོད་ཅིང་བརྟན་ལ་རྟག་ཏུ་གཞོལ་སེམས་ལྡན། །མཐའ་འཁོབ་ཀླ་ཀློའི་
39-1-11a


སྐྱེ་བོའི་ཡུལ་མཐའ་རྣམ་པར་སྤངས། །རང་གི་ས་ལ་དོགས་མེད་རྟག་ཏུ་རི་རབ་འདྲ། །ཆོས་ཕྱིར་སྲོག་ཀྱང་འདོར་ཞིང་རྣལ་འབྱོར་རབ་ཏུ་བརྩོན། །མི་ལྡོག་རྟགས་ནི་འདི་དག་ཡིན་པར་ཤེས་པར་བྱ། །གཟུགས་
དང་ཚོར་དང་འདུ་ཤེས་སེམས་པ་རྣམ་ཤེས་རྣམས། །ཟབ་སྟེ་རང་བཞིན་མཚན་མ་མེད་ཅིང་རབ་ཞི་བ། །དཔེར་ན་མདའ་ཡིས་རྒྱ་མཚོའི་གཏིང་ཐུག་ཚོལ་བ་ལྟར། །ཤེས་རབ་ཀྱིས་ནི་བརྟགས་ན་ཕུང་པོའི་གཏིང་མི་རྙེད། །
བྱང་ཆུབ་སེམས་དཔའ་གང་ཞིག་དེ་ལྟར་ཟབ་གྱུར་ཅིང་། །ཐེག་པ་དོན་དམ་ཆགས་མེད་གང་ལ་ཕུང་པོ་དང་། །ཁམས་དང་སྐྱེ་མཆེད་ཡོད་མིན་ཆོས་འདི་རྟོགས་པ་དེའི། །བསོད་ནམས་ཡང་དག་གྲུབ་པ་དེ་ལས་ཅི་ཞིག་ཡོད། །
དཔེར་ན་འདོད་ཆགས་ཆོས་ལ་སྤྱོད་པའི་སྐྱེས་བུ་ཞིག །བུད་མེད་དུས་བཏབ་དེ་དང་མ་ཕྲད་དེ་ཡི་ནི། །ཉིན་ཅིག་སེམས་ཀྱི་རྣམ་རྟོག་སྤྱོད་པ་ཇི་སྙེད་པ། །དེ་སྙེད་བསྐལ་པའི་བྱང་ཆུབ་སེམས་དཔས་ཐོབ་པར་འགྱུར། །བྱང་ཆུབ་
སེམས་དཔའ་གང་ཞིག་བསྐལ་མང་བྱེ་སྟོང་དུ། །དགྲ་བཅོམ་རང་རྒྱལ་སྦྱིན་བྱེད་ཚུལ་ཁྲིམས་སྲུང་བྱེད་ཀྱང་། །གང་ཞིག་ཤེས་རབ་ཕ་རོལ་ཕྱིན་མཆོག་ལྡན་པའི་ཆོས། །བརྗོད་པའི་ལེགས་ལ་སྦྱིན་དང་ཚུལ་ཁྲིམས་ཆར་
མི་ཕོད། །བྱང་ཆུབ་སེམས་དཔའ་གང་ཞིག་ཤེས་རབ་མཆོག་བསྒོམས་ཏེ། །དེ་ལས་ལངས་ནས་གོས་པ་མེད་པའི་ཆོས་བརྗོད་ཅིང་། །དེ་ཡང་འགྲོ་བའི་དོན་ཕྱིར་བྱང་ཆུབ་རྒྱུར་བསྔོ་ན། །དགེ་བ་དེ་དང་མཉམ་པ་འཇིག་རྟེན་
གསུམ་ན་མེད། །བསོད་ནམས་དེ་ཡང་གསོག་དང་དེ་བཞིན་སྟོང་པ་དང་། །གསོབ་དང་ཡ་མ་བརླ་དང་སྙིང་པོ་མེད་པར་ཤེས། །དེ་ལྟར་བདེ་གཤེགས་རྣམས་ཀྱི་ཤེས་རབ་སྤྱད་སྤྱད་ན། །སྤྱོད་ཚེ་བསོད་ནམས་དཔག་ཏུ་
མེད་པ་ཡོངས་སུ་འཛིན། །སངས་རྒྱས་ཀྱིས་བཤད་རབ་ཏུ་སྦྱར་ཅིང་རབ་བསྟན་པའི། །ཆོས་འདི་ཐམས་ཅད་བརྗོད་པ་ཙམ་དུ་ཟད་ཤེས་ནས། །བསྐལ་པ་བྱེ་བ་ཁྲག་ཁྲིག་མང་པོར་བརྗོད་བྱས་ཀྱང་། །ཆོས་ཀྱི་དབྱིངས་ལ་
39-1-11b


ཟད་པ་མེད་ཅིང་འཕེལ་བ་མེད། །རྒྱལ་བ་རྣམས་ཀྱི་ཕ་རོལ་ཕྱིན་ཅེས་བྱ་བ་གང་། །ཆོས་དེ་རྣམས་ཀྱང་མིང་ཙམ་དུ་ནི་ཡོངས་སུ་བསྒྲགས། །ཡོངས་བསྔོ་རློམ་སེམས་མེད་པའི་བྱང་ཆུབ་སེམས་དཔའ་ནི། །ཉམས་པ་མེད་
ཅིང་སངས་རྒྱས་བྱང་ཆུབ་མཆོག་རེག་འགྱུར། །འབྲུ་མར་སྙིང་པོ་འབར་བ་ཕྲད་པ་དང་པོ་ཡིས། །སྙིང་པོ་ཚིག་མིན་དེ་མེད་པར་ཡང་དེ་མི་ཚིག །མེ་ལྕེ་ཕྲད་པ་ཐ་མས་སྙིང་པོ་ཚིག་མིན་ལ། །མེ་ལྕེ་ཐ་མ་མེད་པར་སྙིང་
པོ་ཚིག་མིན་ལྟར། །དང་པོའི་སེམས་ཀྱིས་བྱང་ཆུབ་མཆོག་རེག་མ་ཡིན་ལ། །དེ་མེད་པར་ཡང་དེ་ལ་རེག་པར་ནུས་མ་ཡིན། །ཐ་མའི་སེམས་ཀྱིས་བྱང་ཆུབ་ཞི་བ་ཐོབ་མིན་ལ། །དེ་མེད་པར་ཡང་དེ་ཐོབ་ནུས་པ་མ་ཡིན་
ནོ། །ས་བོན་ལས་ནི་མྱུ་གུ་མེ་ཏོག་འབྲས་བུ་འབྱུང་། །དེ་ཡང་འགགས་ལ་ཤིང་ཡང་མེད་པ་དེར་མིན་ལྟར། །དེ་བཞིན་དང་པོའི་སེམས་ཀྱང་བྱང་ཆུབ་རྒྱུ་ཡིན་ཏེ། །དེ་ཡང་འགགས་ལ་བྱང་ཆུབ་མེད་པ་དེ་མ་ཡིན། །
ཆུ་ཡི་ཐིགས་པས་བུམ་པ་དང་པོ་ཐ་མའི་བར། །རིམ་གྱིས་ཉུང་ངུ་ཉུང་ངུས་དེ་ཡོངས་འགེངས་པ་ལྟར། །དེ་བཞིན་དང་པོའི་སེམས་ཀྱང་བྱང་ཆུབ་མཆོག་རྒྱུ་སྟེ། །རིམ་གྱིས་དཀར་པོའི་ཡོན་ཏན་རྫོགས་པའི་སངས་རྒྱས་འགྱུར། །
སྟོང་པ་མཚན་མེད་སྨོན་པ་མེད་པའི་ཆོས་སྤྱོད་ཅིང་། །མྱ་ངན་འདས་ལ་མི་རེག་མཚན་མར་མི་སྤྱོད་པ། །དཔེར་ན་མཉན་པ་མཁས་པ་ཕར་འགྲོ་ཚུར་འགྲོ་ཡང་། །མཐའ་གཉིས་མི་གནས་རྒྱ་མཚོར་གནས་པ་མེད་པ་བཞིན། །
དེ་ལྟར་སྤྱོད་པའི་བྱང་ཆུབ་སེམས་དཔའ་འདི་སྙམ་བདག །སྟོབས་བཅུས་ལུང་བསྟན་བྱང་ཆུབ་རེག་འགྱུར་རློམ་སེམས་མེད། །འདི་ལ་ཅི་ཡང་མེད་ཅེས་བྱང་ཆུབ་སྐྲག་པ་མེད། །དེ་ལྟར་སྤྱོད་པ་བདེ་གཤེགས་ཤེས་རབ་
སྤྱོད་པ་ཡིན། །འཇིག་རྟེན་དགོན་པའི་ལམ་དང་མུ་གེ་ནད་བཅས་པར། །མཐོང་ནས་སྐྲག་པ་མེད་ཅིང་དེ་ནས་གོ་གྱོན་ཏེ། །ཕྱི་མའི་མུ་མཐར་རྟག་ཏུ་བརྩོན་ཞིང་རབ་ཤེས་ནས། །ཡོངས་སུ་སྐྱོ་བའི་ཡིད་ནི་རྡུལ་ཙམ་
39-1-12a


སྐྱེ་མི་བྱེད། །བྱང་ཆུབ་སེམས་དཔའ་རྒྱལ་བའི་ཤེས་རབ་སྤྱོད་བྱེད་ཅིང་། །ཕུང་པོ་འདི་དག་གདོད་ནས་སྟོང་ཞིང་སྐྱེ་མེད་ཤེས། །མཉམ་པར་མ་བཞག་སེམས་ཅན་ཁམས་ལ་སྙིང་རྗེ་འཇུག །བར་སྐབས་དེར་ཡང་
སངས་རྒྱས་ཆོས་ལས་ཡོངས་མི་ཉམས། །དཔེར་ན་སྐྱེས་བུ་མཁས་པ་ཡོན་ཏན་ཀུན་ལྡན་ཞིང་། །སྟོབས་ལྡན་མི་ཐུབ་བརྩོན་བྱས་སྒྱུ་རྩལ་ཆོ་ག་ཤེས། །འཕོང་དང་བཟོ་གནས་མང་པོའི་ཕ་རོལ་ཕྱིན་གྱུར་ཅིང་། །སྒྱུ་མ་སྒྲུབ་
ཤེས་འགྲོ་དོན་རབ་ཏུ་འདོད་པ་ཞིག །ཕ་དང་མ་དང་ཆུང་མར་བཅས་པར་ཡོངས་བསྡུས་ནས། །དགྲ་བྱེད་མང་བ་ད་གོན་པའི་ལམ་དུ་ཕྱིན་པ་དང་། །དེ་ཡིས་དཔའ་ཞིང་རྟུལ་ཕོད་སྐྱེས་བུ་མང་སྤྲུལ་ཏེ། །བདེ་བར་སོང་ཞིང་ཕྱིར་ཡང་
ཁྱིམ་དུ་འོང་བ་ལྟར། །དེ་བཞིན་དེ་ཚེ་བྱང་ཆུབ་སེམས་དཔའ་མཁས་པ་ཡང་། །སེམས་ཅན་ཁམས་རྣམས་ཀུན་དུ་སྙིང་རྗེ་ཆེར་བསྐྱེད་ཅིང་། །བདུད་བཞི་དག་དང་ས་གཉིས་ལས་ཀྱང་རབ་འདས་ནས། །ཏིང་འཛིན་མཆོག་ལ་
གནས་ཤིང་བྱང་ཆུབ་རེག་མི་བྱེད། །མཁའ་ལ་རླུང་བརྟེན་དེ་ལ་ཆུ་ཡི་ཕུང་པོ་བརྟེན། །དེ་ལ་ས་ཆེན་འདི་བརྟེན་དེ་ལ་འགྲོ་བ་བརྟེན། །སེམས་ཅན་ལས་ལ་སྤྱོད་པའི་རྒྱུ་ནི་དེ་འདྲ་སྟེ། །ནམ་མཁའ་གང་ལ་གནས་ཡིན་དོན་འདི་བསམ་
པར་གྱིས། །དེ་བཞིན་བྱང་ཆུབ་སེམས་དཔའ་སྟོང་པ་ཉིད་གནས་པ། །འགྲོ་ལ་སེམས་ཅན་ཤེས་པའི་སྨོན་ལམ་རྟེན་ཅན་གྱིས། །བྱ་བ་རྣམ་པ་སྣ་ཚོགས་དུ་མ་སྟོན་བྱེད་ཅིང་། །མྱ་ངན་འདས་ལ་མི་རེག་སྟོང་པར་གནས་པ་མེད། །
གང་གི་ཚེ་ན་བྱང་ཆུབ་སེམས་དཔའ་མཁས་གསལ་བ། །སྟོང་པ་ཞི་བའི་ཏིང་འཛིན་དམ་པ་འདི་སྤྱོད་པ། །བར་སྐབས་དེར་ནི་མཚན་མ་རབ་ཏུ་སྒོམ་མི་བྱེད། །མཚན་མ་མེད་པར་གནས་ཤིང་ཞི་ལ་རབ་ཞི་སྤྱོད། །བར་སྣང་འཕུར་བའི་
བྱ་ལ་གནས་ཡོད་མ་ཡིན་ཏེ། །དེ་ན་གནས་པ་མ་ཡིན་ས་ལ་ལྟུང་མི་འགྱུར། །དེ་ལྟར་བྱང་ཆུབ་སེམས་དཔའ་རྣམ་ཐར་སྒོར་སྤྱོད་པ། །མྱ་ངན་འདས་ལ་མི་རེག་མཚན་མར་སྤྱོད་མ་ཡིན། །དཔེར་ན་འཕོང་བསླབས་སྐྱེས་བུས་གནམ་
39-1-12b


དུ་མདའ་འཕངས་ཏེ། །མདའ་གཞན་དག་གིས་ཕྱི་བཞིན་བརྒྱུད་མར་ལོང་བཏགས་ཏེ། །སྔ་མའི་མདའ་དེ་ས་ལ་ལྟུང་བའི་སྐབས་མི་བྱེད། །མི་དེ་འདོད་ན་མདའ་དེ་ས་ལ་ལྟུང་བར་འགྱུར། །དེ་ལྟར་ཤེས་རབ་ཕ་རོལ་ཕྱིན་པ་
མཆོག་སྤྱོད་པ། །ཤེས་རབ་ཐབས་སྟོབས་རྫུ་འཕྲུལ་གྱིས་ནི་རྣམ་སྤྱོད་པ། །དེ་དག་དགེ་བའི་རྩ་བ་ཇི་སྲིད་མ་རྫོགས་པ། །དེ་སྲིད་སྟོང་ཉིད་དམ་པ་དེ་ནི་ཐོབ་མི་བྱེད། །དཔེར་ན་དགེ་སློང་རྫུ་འཕྲུལ་སྟོབས་མཆོག་ལྡན་པ་ཞིག །
ནམ་མཁར་གནས་ཏེ་ཅིག་ཆར་ཆོ་འཕྲུལ་རྣམ་པར་འཕྲུལ། །འགྲོ་དང་འཆག་པ་དང་ནི་ཉལ་དང་འདུག་པ་སྟོན། །དེ་ནི་སྐྱོ་བ་མེད་ཅིང་དེ་ལ་དུབ་པ་མེད། །དེ་བཞིན་བྱང་ཆུབ་སེམས་དཔའ་མཁས་པ་སྟོང་གནས་ཤིང་། །ཡེ་ཤེས་རྫུ་
འཕྲུལ་ཕ་རོལ་སོན་ལ་གནས་པ་མེད། །འགྲོ་བ་དག་ལ་བྱ་བ་རྣམ་པ་མཐའ་ཡས་སྟོན། །བསྐལ་པ་བྱེ་བར་སྐྱོ་བ་མེད་ཅིང་དུབ་པ་མེད། །དཔེར་ན་མི་འགའ་གཡང་ས་ཆེན་པོར་འདུག་བྱེད་ཅིང་། །ལག་པ་གཉི་གས་གདུགས་གཉིས་
འཛིན་ཅིང་ནམ་མཁའ་ལ། །འཆོང་བར་བྱེད་ཅིང་གཡང་ས་ཆེན་པོར་ལུས་བོར་ནས། །ལྟུང་བར་མི་འགྱུར་ཇི་སྲིད་དེར་ནི་འགྲོ་བར་འགྱུར། །དེ་བཞིན་བྱང་ཆུབ་སེམས་དཔའ་མཁས་པ་སྙིང་རྗེར་གནས། །ཐབས་དང་ཤེས་རབ་གཉིས་ཀྱི་
གདུགས་ནི་ཡོངས་བཟུང་སྟེ། །ཆོས་རྣམས་སྟོང་པ་མཚན་མེད་སྨོན་པ་མེད་རྟོག་ཅིང་། །མྱ་ངན་འདས་ལ་རེག་པ་མེད་ལ་ཆོས་ཀྱང་མཐོང་། །དཔེར་ན་རིན་ཆེན་འདོད་པ་རིན་ཆེན་གླིང་སོང་སྟེ། །རིན་ཆེན་རྙེད་ནས་ཕྱིར་ཡང་ཁྱིམ་དུ་འོངས་གྱུར་པ། །
དེར་ནི་དེད་དཔོན་འབའ་ཞིག་བདེ་བར་འཚོ་བྱེད་ཅིང་། །གཉེན་བཤེས་ཚོགས་ཡིད་མི་བདེར་འཇོག་པ་མིན་པ་ལྟར། །དེ་བཞིན་བྱང་ཆུབ་སེམས་དཔའ་སྟོང་ཉིད་རིན་ཆེན་གྱི། །གླིང་དུ་སོང་སྟེ་བསམ་གཏན་དབང་པོ་སྟོབས་ཐོབ་པ། །མྱ་ངན་
འདས་ལ་རེག་པ་འབའ་ཤིག་མངོན་དགའ་ཞིང་། །སེམས་ཅན་སྡུག་བསྔལ་ཡིད་དུ་འཇོག་པར་འགྱུར་མ་ཡིན། །དཔེར་ན་དོན་གཉེར་ཚོང་པ་རྒྱུས་ཤེས་བྱ་བའི་ཕྱིར། །བར་གྱི་གྲོང་ཁྱེར་གྲོང་རྡལ་གྲོང་གང་ཡིན་པར་འགྲོ། །དེར་ཡང་མི་གནས་
39-1-13a


རིན་ཆེན་གླིང་དུའང་མི་གནས་ལ། །རིག་པ་ཁྱིམ་དུ་མི་གནས་ལམ་ལ་མཁས་པར་འགྱུར། །དེ་བཞིན་བྱང་ཆུབ་སེམས་དཔའ་གསལ་ཏེ་ཉན་ཐོས་དང་། །རང་རྒྱལ་རྣམས་ཀྱི་ཤེས་པ་རྣམ་གྲོལ་ཀུན་ལ་མཁས། །
དེ་ལ་མི་གནས་སངས་རྒྱས་ཡེ་ཤེས་གནས་མ་ཡིན། །འདུས་མ་བྱས་ལ་མི་གནས་ལམ་གྱི་ཚུལ་ཤེས་ཡིན། །གང་ཚེ་འགྲོ་ལ་བྱམས་པས་རྗེས་སུ་འབྲེལ་བྱས་ནས། །ཏིང་འཛིན་སྟོང་པ་མཚན་མེད་སྨོན་པ་མེད་སྤྱོད་པ། །
དེ་ནི་མྱ་ངན་འདས་པ་ཐོབ་པར་འགྱུར་ཞེ་འམ། །འདུས་བྱས་ཡིན་པར་གདགས་ནུས་དེ་ནི་གནས་མེད་དོ། །དཔེར་ན་སྤྲུལ་པའི་མི་ལུས་མི་སྣང་མ་ཡིན་ཞིང་། །དེ་ནི་མིང་གིས་ཀྱང་ནི་གདགས་པར་ནུས་པ་ལྟར་། །དེ་བཞིན་བྱང་ཆུབ་
སེམས་དཔའ་རྣམ་ཐར་སྒོར་སྤྱོད་པ། །དེ་ནི་མིང་གིས་ཀྱང་ནི་གདགས་པར་ནུས་པ་ཡིན། །གལ་ཏེ་སྤྱོད་པ་དང་ནི་དབང་པོ་ཡོངས་དྲིས་ལ། །བྱང་ཆུབ་སེམས་དཔའ་སྟོང་པ་མཚན་མ་མེད་པའི་ཆོས། །ཡོངས་སུ་མི་སྟོན་ཕྱིར་མི་ལྡོག་པ་ས་
ཡི་ཆོས། །མི་འཆད་དེ་ནི་ལུང་མ་བསྟན་པར་རེག་པར་བྱ། །སྐབས་ལྔ་པ་རྩེ་མོ་མངོན་པར་རྫོགས་པར་རྟོགས་པ་བསྟན། དགྲ་བཅོམ་ས་དང་རྐྱེན་གྱི་སངས་རྒྱས་ཡེ་ཤེས་དང་། །ཁམས་གསུམ་དག་ལ་རྨི་ལམ་ན་ཡང་མི་འདོད་ཅིང་། །
སངས་རྒྱས་རྣམས་མཐོང་འགྲོ་ལ་ཆོས་ཀྱང་སྟོན་བྱེད་པ། །དེ་ནི་མི་ལྡོག་ལུང་བསྟན་ཡིན་པར་རིག་པར་བྱ། །རྨི་ལམ་ན་ནི་སེམས་ཅན་ངན་སོང་གསུམ་གནས་མཐོང་། །སྐད་ཅིག་དེ་ལ་ངན་སོང་རྒྱུན་བཅད་སྨོན་ལམ་འདེབས། །བདེན་
པའི་བྱིན་གྱིས་རླབས་ཀྱིས་མེ་ཡི་ཕུང་པོ་ཞི། །དེ་ནི་མི་ལྡོག་ལུང་བསྟན་ཡིན་པར་རིག་པར་བྱ། །མི་ཡིས་འཇིག་རྟེན་འབྱུང་པོའྀ་གདོན་དང་ནད་མང་བ། །ཕན་དང་སྙིང་བརྩེར་ལྡན་པའི་བདེན་པའི་བྱིན་གྱིས་ཞི། །འོན་ཀྱང་རློམ་སེམས་
མེད་ཅིང་ང་རྒྱལ་སྐྱེ་མེད་པ། །དེ་ནི་མི་ལྡོག་ལུང་བསྟན་ཡིན་པར་རིག་པར་བྱ། །ཅི་སྟེ་དེ་ནི་བདེན་པའི་བྱིན་རླབས་སྣ་ཚོགས་དག །འབྱོར་པས་བདག་ལུང་བསྟན་སྙམ་རློམ་སེམས་འབྱུང་བ་འམ། །གལ་ཏེ་བྱང་ཆུབ་སེམས་དཔའ་
39-1-13b


གཞན་གྱིས་ལུང་བསྟན་རློམ། །རློམ་སེམས་གནས་པ་དེ་ནི་བློ་ཆུང་ཤེས་པར་བྱ། །མིང་གི་གཞི་ལས་བདུད་ནི་ཉེ་བར་འོངས་གྱུར་ནས། །འདི་སྐད་སྨྲས་ཏེ་འདི་ནི་ཁྱོད་དང་ཕ་མ་དང་། །ཁྱོད་ཀྱི་བདུན་མེས་རྒྱུད་ཀྱི་བར་གྱི་མིང་ཡིན་ཞིང་། །
གང་ཚེ་ཁྱོད་ནི་སངས་རྒྱས་འགྱུར་བའི་མིང་འདི་ཡིན། །སྦྱངས་སྡོམ་རྣལ་འབྱོར་ལྡན་པ་ཅི་འདྲ་འབྱུང་འགྱུར་ལ། །ཁྱོད་སྔོན་ཡོན་ཏན་ཚུལ་ཡང་འདི་འདྲའོ་ཞེས་བརྗོད་དོ། །དེ་སྐད་གང་ཐོས་རློམ་སེམས་བྱང་ཆུབ་སེམས་དཔའ་ནི། །བདུད་ཀྱིས་
ཡོངས་སུ་བསླང་ཞིང་བློ་ཆུང་རིག་པར་བྱ། །རབ་ཏུ་དབེན་པའི་གྲོང་དང་གྲོང་ཁྱེར་རི་སུལ་དང་། །དགོན་པ་དབེན་པ་ནགས་ཁྲོད་རབ་ཏུ་སྟེན་བྱེད་ཅིང་། །བདག་བསྟོད་གཞན་ལ་སྨོད་པའི་བྱང་ཆུབ་སེམས་དཔའ་ནི། །བདུད་ཀྱིས་
ཡོངས་སུ་བསླང་ཞིང་བློ་ཆུང་རིག་པར་བྱ། །རྟག་ཏུ་གྲོང་དང་ཡུལ་འཁོར་གྲོང་རྡལ་གནས་བྱེད་ཅིང་། །སེམས་ཅན་སྨིན་བྱེད་བྱང་ཆུབ་བརྩོན་པ་མ་གཏོགས་པར། །དེ་ནི་དགྲ་བཅོམ་རང་རྒྱལ་འདོད་པ་གཞན་མི་སྐྱེ། །འདི་ནི་བདེ་བར་
གཤེགས་ཀྱི་སྲས་ཀྱིས་དབེན་པར་གསུངས། །གང་ཞིག་དཔག་ཚད་ལྔ་བརྒྱ་ཡོད་པའི་རི་ཡི་སུལ། །སྦྲུལ་གྱིས་གང་བར་ལོ་མང་བྱེ་བར་གནས་བྱེད་ཀྱང་། །དབེན་པ་འདི་མི་ཤེས་པའི་བྱང་ཆུབ་སེམས་དཔའ་དེ། །ལྷག་པའི་
ང་རྒྱལ་རྙེད་ནས་འདྲེ་བར་གནས་པ་ཡིན་། །བྱང་ཆུབ་སེམས་དཔའ་འགྲོ་བའི་དོན་བརྩོན་བསམ་གཏན་དང་། །སྟོབས་དང་དབང་པོ་རྣམ་ཐར་ཏིང་འཛིན་ཐོབ་དེ་ལ། །འདི་ནི་དགོན་དབེན་སྤྱོད་པ་མིན་སྙམ་བརྙས་བྱེད་པ། །དེ་ནི་བདུད་ཀྱི་སྤྱོད་ཡུལ་
གནས་ཤེས་རྒྱལ་བས་གསུངས། །གང་ཞིག་གྲོང་ངམ་འོན་ཏེ་དགོན་པར་གནས་ཀྱང་རུང་། །ཐེག་པ་གཉིས་ཀྱི་སེམས་བྲལ་བྱང་ཆུབ་མཆོག་ངེས་ན། །འདི་ནི་འགྲོ་དོན་ཞུགས་པ་རྣམས་ཀྱི་དབེན་པ་སྟེ། །བྱང་ཆུབ་སེམས་དཔའ་དྲོད་ཉོམ་
དེ་ནི་བདག་ཉིད་ཉམས། །དེ་ལྟ་བས་ན་བྱང་ཆུབ་དམ་པ་ཚོལ་བ་ཡིས། །བསམ་པ་དྲག་ལྡན་མཁས་པས་ང་རྒྱལ་ངེས་བཅོམ་སྟེ། །ནད་པའི་ཚོགས་ཀྱིས་གསོ་ཕྱིར་སྨན་པ་སྟེན་པ་ལྟར། །གཡེལ་བ་མེད་པར་དགེ་བའི་བཤེས་གཉེན་བསྟེན་
39-1-14a


པར་བྱ། །སངས་རྒྱས་བྱང་ཆུབ་མཆོག་ཞུགས་བྱང་ཆུབ་སེམས་དཔའ་དག །ཕ་རོལ་ཕྱིན་དང་བཅས་ཏེ་དགེ་བའི་བཤེས་སུ་བསྟན། །དེ་དག་རྗེས་སུ་སྟོན་བྱེད་འདི་ནི་བསྒྲུབ་པའི་ས། །རྒྱུ་རྣམ་གཉིས་ཀྱིས་
སངས་རྒྱས་བྱང་ཆུབ་མྱུར་དུ་རྟོགས། །རྒྱལ་བ་འདས་དང་མ་བྱོན་ཕྱོགས་བཅུར་གང་བཞུགས་པ། །ཀུན་ལམ་ཕ་རོལ་ཕྱིན་པ་འདི་ཡིན་གཞན་མ་ཡིན། །ཕ་རོལ་ཕྱིན་འདི་བྱང་ཆུབ་མཆོག་ལ་ཞུགས་རྣམས་ཀྱི། །
གསལ་དང་སྒྲོན་དང་སྣང་དང་སྟོན་མཆོག་ཡིན་ཞེས་བཤད། །ཇི་ལྟར་ཤེས་རབ་ཕ་རོལ་ཕྱིན་པ་མཚན་ཉིད་སྟོང་། །ཆོས་འདི་ཐམས་ཅད་མཚན་ཉིད་དེ་དང་འདྲར་ཤེས་ཤིང་། །ཆོས་རྣམས་སྟོང་ཞིང་མཚན་མ་མེད་པར་རབ་ཤེས་
ན། །དེ་ལྟར་སྤྱོད་པ་བདེ་གཤེགས་ཤེས་རབ་སྤྱོད་པ་ཡིན། །སེམས་ཅན་ཡོངས་སུ་རྟོག་པ་ཟས་ལ་འདོད་བྱེད་ཅིང་། །འཁོར་བར་ཆ་གས་པའི་ཡིད་དང་ལྡན་རྣམས་རྟག་ཏུ་འཁོར། །བདག་དང་བདག་གི་ཆོས་གཉིས་ཡང་དག་
མིན་སྟོང་སྟེ། །བྱིས་པ་བདག་ཉིད་ཀྱིས་ནི་མཁའ་ལ་མདུད་པ་བོར། །དཔེར་ན་དོགས་པའི་འདུ་ཤེས་ཀྱིས་ནི་དུག་བསླང་བ། །དུག་དེ་ཁོང་དུ་སོང་བ་མེད་ཀྱང་བརྒྱལ་བར་འགྱུར། །དེ་བཞིན་བྱིས་པ་བདག་དང་བདག་གིར་
ཁས་ལེན་པ། །བདག་དེར་འདུ་ཤེས་ཡང་དག་མི་རྟག་སྐྱེ་ཞིང་འཆི། །ཇི་ལྟར་འཛིན་པ་དེ་ལྟར་ཀུན་ནས་ཉོན་མོངས་བསྟན། །བདག་དང་བདག་གིར་མི་དམིགས་རྣམ་པར་བྱང་བར་གསུངས། །འདི་ལ་གང་ཡང་ཉོན་མོངས་
རྣམ་དག་འགྱུར་མེད་པར། །བྱང་ཆུབ་སེམས་དཔས་ཤེས་རབ་ཕ་རོལ་ཕྱིན་པ་རྟོགས། །འཛམ་བུའི་གླིང་ན་སེམས་ཅན་ཇི་སྙེད་མ་ལུས་པ། །དེ་དག་ཐམས་ཅད་བྱང་ཆུབ་མཆོག་ཏུ་སེམས་བསྐྱེད་ནས། །ལོ་སྟོང་བྱེ་བ་མང་པོར་
སྦྱིན་པ་བྱིན་བྱས་ལ། །ཀུན་ཀྱང་འགྲོ་བའི་དོན་དུ་བྱང་ཆུབ་རྒྱུར་བསྔོ་ཡང་། །གང་ཞིག་ཤེས་རབ་ཕ་རོལ་ཕྱིན་མཆོག་མངོན་བརྩོན་པ། །ཐ་ན་ཉི་མ་གཅིག་ཅིག་རྗེས་སུ་འཐུན་བྱེད་ན། །དེ་ལ་སྦྱིན་པའི་ཕུང་པོས་བསོད་
39-1-14b


ནམས་ཆར་མི་ཕོད། །དེ་ཕྱིར་གཡེལ་མེད་རྟག་ཏུ་ཤེས་རབ་འཇུག་པར་བྱ། །ཤེས་རབ་ཕ་རོལ་ཕྱིན་མཆོག་སྤྱོད་པའི་རྣལ་འབྱོར་པ། །སྙིང་རྗེ་ཆེན་པོ་བསྐྱེད་ཀྱང་སེམས་ཅན་འདུ་ཤེས་མེད། །དེ་ཚེ་མཁས་པ་འགྲོ་བ་ཀུན་གྱི་སྦྱིན་
གནས་འགྱུར། །རྟག་ཏུ་ཡུལ་འཁོར་བསོད་སྙོམས་དོན་ཡོད་ཡོངས་སུ་སྤྱོད། །བྱང་ཆུབ་སེམས་དཔའ་གང་འདིར་ཡུན་རིངས་འབྲེལ་པ་ཡི། །ལྷ་མི་ངན་སོང་གསུམ་གྱི་སེམས་ཅན་དགྲོལ་བའི་ཕྱིར། །ལམ་ཡངས་ཕ་རོལ་སེམས་ཅན་
ཁམས་ལ་སྟོན་འདོད་པས། །ཉིན་མཚན་ཤེས་རབ་ཕ་རོལ་ཕྱིན་ལ་བརྩོན་པར་བྱ། །མི་ཞིག་སྔོན་ཆད་མ་རྙེད་པ་ཡི་རིན་ཆེན་མཆོག །དུས་གཞན་ཞིག་ན་རྙེད་པར་གྱུར་ཏེ་དགའ་བ་ལས། །རྙེད་མ་ཐག་ཏུ་བག་མེད་གྱུར་ཏེ་སྟོར་ན་ནི། །སྟོར་བས་
རིན་ཆེན་མངོན་འདོད་རྟག་ཏུ་སྡུག་བསྔལ་ལོ། །དེ་ལྟར་བྱང་ཆུབ་མཆོག་ཞུགས་རིན་ཆེན་ལྟ་བུ་ཡི། །ཤེས་རབ་ཕ་རོལ་ཕྱིན་ལ་རྣལ་འབྱོར་དོར་མི་བྱ། །རིན་ཆེན་རྙེད་ནས་བླངས་ཏེ་རབ་ཏུ་བརྩོན་དཀྲིས་ནས། །མྱུར་དུ་འགྲོ་བར་བྱེད་
པ་ཞི་བར་འགྱུར་བ་བཞིན། །ཉི་མ་སྤྲིན་དང་བྲལ་བའི་འོད་ཟེར་དྲ་བ་ཅན། །མུན་ནག་ཐིབས་པོ་མུན་པ་ཐམས་ཅད་འཇོམས་འཆར་བ། །སྲིན་བུ་མེ་ཁྱེར་སྲོག་ཆགས་འབྱུང་པོ་ཐམས་ཅད་དང་། །སྐར་མའི་ཚོགས་དང་ཟླ་བའི་འོད་
ཀུན་ཟིལ་གྱིས་གནོན། །དེ་བཞིན་བྱང་ཆུབ་སེམས་དཔའ་ཤེས་རབ་ཕ་རོལ་ཕྱིན་། །མཆོག་སྤྱོད་སྟོང་པ་དང་ནི་མཚན་མ་མེད་སྤྱོད་པ། །མཁས་པས་ལྟ་བའི་ཐིབས་པོ་བཅོམ་ནས་འགྲོ་ཀུན་དང་། །དགྲ་བཅོམ་རང་རྒྱལ་བྱང་
ཆུབ་སེམས་མང་ཟིལ་གྱིས་གནོན། །དཔེར་ན་རྒྱལ་པོའི་བུ་ཞིག་ནོར་གཏོང་དོན་འདོད་པ། །ཀུན་གྱི་གཙོ་བོར་གྱུར་ཏེ་མངོན་པར་འགྲོ་བྱ་འོས། །འདི་ནི་ད་ལྟ་ན་ཡང་སེམས་ཅན་མང་དགའ་བྱེད། །ཐབས་ཐོབ་གྱུར་ཏེ་རྒྱལ་སྲིད་
གནས་ནས་སྨོས་ཅི་དགོས། །དེ་ལྟར་ཤེས་རབ་སྤྱོད་མཁས་བྱང་ཆུབ་སེམས་དཔའ་ཡང་། །བདུད་རྩི་སྦྱིན་པར་བྱེད་ཅིང་ལྷ་དང་མི་རྣམས་དགའ། །འདི་ནི་ད་ལྟ་ན་ཡང་སེམས་ཅན་མང་ཕན་བརྩོན། །ཆོས་ཀྱི་རྒྱལ་པོར་གནས་པར་གྱུར་ནས་སྨོས་
39-1-15a


ཅི་དགོས། །དེ་ཡི་ཚེ་ན་བདུད་ནི་ཟུག་རྔུ་ལྡན་པར་འགྱུར། །མྱ་ངན་ཉམས་ཐག་སྡུག་བསྔལ་ཡིད་མི་བདེ་ཉམ་ཆུང་། །ཇི་ལྟར་བྱང་ཆུབ་སེམས་དཔའ་འདི་ཡིད་ནུར་གྱུར་ཞེས། །འཇིགས་པ་བསྟན་ཕྱིར་ཕྱོགས་རྣམས་སྲེག་ཅིང་སྐར་
མདའ་གཏོང་། །གང་ཚེ་མཁས་པ་དེ་དག་བསམ་པ་དྲག་ལྡན་ཞིང་། །ཉིན་མཚན་ཤེས་རབ་ཕ་རོལ་ཕྱིན་པའི་མཆོག་དོན་ལྟ། །དེ་ཚེ་ལུས་སེམས་དག་ནི་མཁའ་འགྲོ་བྱ་ལྟར་རྒྱུ། །ནག་པོའི་རྩ་ལག་རྣམས་ཀྱིས་གླགས་རྙེད་ག་ལ་འགྱུར། །
གང་ཚེ་བྱང་ཆུབ་སེམས་དཔའ་འཐབ་དང་རྩོད་གྱུར་ཅིང་། །ཕན་ཚུན་མི་མཐུན་ཁྲོས་པའི་སེམས་དང་ལྡན་གྱུར་པ། །དེ་ཚེ་བདུད་ནི་དགའ་ཞིང་མཆོག་ཏུ་ཉམས་བདེར་འགྱུར། །དེ་གཉིས་རྒྱལ་བའི་ཡེ་ཤེས་ལས་ནི་རིང་འགྱུར་སྙམ། །
དེ་གཉིས་རིང་དུ་འགྱུར་ཞིང་ཤ་ཟ་འདྲ་བར་འགྱུར། །གཉི་ག་རང་གི་དམ་བཅས་ཉམས་པར་བྱེད་པར་འགྱུར། །སྡང་ཞིང་བཟོད་དང་བྲལ་ལ་བྱང་ཆུབ་ག་ལ་ཡོད། །དེ་ཚེ་བདུད་རྣམས་ཕྱོགས་དང་བཅས་ཏེ་དགའ་བར་འགྱུར། །ལུང་བསྟན་
མ་ཐོབ་བྱང་ཆུབ་སེམས་དཔའ་གང་ཞིག་གིས། །ལུང་བསྟན་ཐོབ་ལ་སེམས་ཁྲོས་རྩོད་པ་རྩོམ་བྱེད་ན། །ཐ་བ་སྐྱོན་ལྡན་སེམས་ཀྱི་སྐད་ཅིག་ཇི་སྙེད་པ། །དེ་སྙེད་བསྐལ་པར་གཞི་ནས་གོ་ཆ་བགོ་བགོས་སོ། །སངས་རྒྱས་བཟོད་
པའི་ཕ་རོལ་ཕྱིན་པས་བྱང་ཆུབ་རེག །སེམས་འདི་བཟང་བ་མིན་སྙམ་དྲན་པ་སྐྱེད་བྱེད་ཅིང་། །སོ་སོར་འཆགས་པར་བྱེད་ཅིང་ཕྱིས་ཀྱང་སྡོམ་བྱེད་ལ། །དགའ་བར་མི་བྱེད་དེ་ནི་སངས་རྒྱས་ཆོས་འདིར་སློབ། །གང་ཞིག་སློབ་ཚེ་བསླབ་པ་
གང་ཡང་ཁས་མི་ལེན། །སློབ་པ་པོ་དང་བསླབ་པའི་ཆོས་རྣམས་མི་དམིགས་ཤིང་། །བསླབ་དང་བསླབ་པ་མ་ཡིན་འདི་གཉིས་མི་རྟོག་པ། །དེ་ལྟར་གང་སློབ་དེ་ནི་སངས་རྒྱས་ཆོས་འདིར་སློབ། །བྱང་ཆུབ་སེམས་དཔའ་གང་ཞིག་དེ་ལྟའི་
བསླབ་འདི་ཤེས། །དེ་ནི་གཞན་ཡང་བསླབ་ཉམས་ཚུལ་ཁྲིམས་འཆལ་མི་འགྱུར། །དེ་ནི་སངས་རྒྱས་ཆོས་མཉེས་བྱ་ཕྱིར་འདི་ལ་སློབ། །དེ་ནི་བསླབ་ལྷག་བསླབ་ལ་མཁས་ཏེ་དམིགས་པ་མེད་། །མཁས་པ་འོད་བྱེད་རྣམས་ཀྱི་ཤེས་རབ་
39-1-15b


དེ་ལྟར་སློབ། །དགེ་བ་མ་ཡིན་སེམས་གཅིག་ཙམ་ཡང་སྐྱེད་མི་བྱེད། །ཉི་མ་མཁའ་ལ་འགྲོ་བའི་ཟེར་གྱིས་ཟིལ་གནོན་པའི། །མདུན་གྱི་བར་སྣང་ལ་ནི་མུན་པ་མི་གནས་བཞིན། །ཤེས་རབ་ཕ་རོལ་ཕྱིན་ལ་བསླབ་པ་བྱས་རྣམས་ཀྱི། །ཕ་རོལ་
ཕྱིན་པ་ཐམས་ཅད་འདིར་ནི་འདུས་པར་འགྱུར། །འཇིག་ཚོགས་ལྟ་བར་ལྟ་བ་དྲུག་བཅུ་གཉིས་འདུས་ལྟར། །དེ་བཞིན་ཕ་རོལ་ཕྱིན་པ་འདི་དག་འདུས་པར་གསུངས། །དཔེར་ན་སྲོག་གི་དབང་པོ་འགགས་ན་དབང་པོ་གཞན། །གང་དག་
ཇི་སྙེད་ཡོད་པ་ཐམས་ཅད་འགག་པར་འགྱུར། །དེ་ལྟར་ཤེས་རབ་སྤྱོད་པ་མཁས་པ་མཆོག་རྣམས་ཀྱི། །ཕ་རོལ་ཕྱིན་པ་ཐམས་ཅད་འདིར་ནི་འདུས་པར་གསུངས། །བྱང་ཆུབ་སེམས་མཁས་ཉན་ཐོས་ཡོན་ཏན་གང་དག་དང་། །དེ་བཞིན་
རང་རྒྱལ་ཡོན་ཏན་ཀུན་ལ་སློབ་བྱེད་ཅིང་། །དེ་དག་དེ་ལ་མི་གནས་འདོད་པ་མི་སྐྱེད་དེ། །འདི་ནི་བདག་གིས་བསླབ་བྱ་ཡིན་སྙམ་དེ་ཕྱིར་སློབ། །མི་ལྡོག་བྱང་ཆུབ་མཆོག་ལ་རབ་ཏུ་ཞུགས་པ་ཡི། །སེམས་བསྐྱེད་པ་ལ་བསམ་པ་ཐག་པས་
ཡི་རང་བ། །སྟོང་གསུམ་རི་རབ་སྲང་ལ་གཞལ་བས་ཚད་གཟུང་རུང་། །རྗེས་སུ་ཡི་རང་དགེ་བ་དེ་ནི་དེ་ལྟ་མིན་། །དགེ་བ་དོན་གཉེར་ཕན་འདོད་སེམས་ཅན་ཇི་སྙེད་པ། །ཀུན་གྱི་བསོད་ནམས་ཕུང་པོ་ལ་ཡང་ཡི་རང་གྱུར། །དེ་ཕྱིར་དེ་དག་
རྒྱལ་བའི་ཡོན་ཏན་ཐོབ་གྱུར་ནས། །སྡུག་བསྔལ་ཟད་པར་བྱ་ཕྱིར་འཇིག་རྟེན་ཆོས་སྦྱིན་བྱེད་། །བྱང་ཆུབ་སེམས་དཔའ་གང་ཞིག་མི་རྟོག་ཆོས་རྣམས་ཀུན། །སྟོང་དང་མཚན་མ་མེད་དང་སྤྲོས་མེད་ཡོངས་ཤེས་པ། །
དེ་ནི་ཤེས་རབ་གཉིས་ཀྱིས་བྱང་ཆུབ་ཚོལ་མི་བྱེད། །རྣལ་འབྱོར་པ་དེ་ཤེས་རབ་ཕ་རོལ་ཕྱིན་མཆོག་བརྩོན། །ནམ་མཁའི་ཁམས་དེ་དང་ནི་ནམ་མཁའ་དེར་འགལ་བ། །ཡོད་པ་མ་ཡིན་གང་གིས་ཀྱང་ནི་དེ་མ་ཐོབ། །
དེ་བཞིན་ཤེས་རབ་སྤྱོད་མཁས་བྱང་ཆུབ་སེམས་དཔའ་ཡང་། །ནམ་མཁའ་ལྟ་བུ་ཡིན་ཏེ་ཉེ་བར་ཞི་བ་སྤྱོད། །སྐྱེ་བོའི་དབུས་ན་སྒྱུ་མའི་སྐྱེས་བུ་འདི་སྙམ་དུ། །སྐྱེ་བོ་འདི་མགུ་བྱ་སྙམ་མི་སེམས་དེ་ཡང་བྱེད། །རྫུ་འཕྲུལ་
39-1-16a


སྣ་ཚོགས་རབ་ཏུ་སྟོན་པར་བྱེད་མཐོང་ཡང་། །དེ་ལ་ལུས་མེད་སེམས་མེད་མིང་ཡང་ཡོད་མ་ཡིན། །དེ་བཞིན་ཤེས་རབ་སྤྱོད་པ་ནམ་ཡང་འདི་སྙམ་དུ། །བྱང་ཆུབ་རྟོགས་ནས་འགྲོ་བ་ཡོངས་སུ་དགྲོལ་མི་སེམས། །
སྐྱེ་བ་སྣ་ཚོགས་དང་ནི་བྱ་བ་མང་ལྡན་པ། །སྒྱུ་མ་ལྟ་བུར་སྟོན་ཀྱང་རྣམ་པར་མི་རྟོག་སྤྱོད། །དཔེར་ན་སངས་རྒྱས་སྤྲུལ་པ་སངས་རྒྱས་མཛད་པ་བྱེད། །བྱེད་པ་དེ་ལ་དྲེགས་པ་ཅུང་ཟད་སྐྱེ་མི་འགྱུར། །དེ་བཞིན་ཤེས་རབ་སྤྱོད་མཁས་བྱང་
ཆུབ་སེམས་དཔའ་ཡང་། །སྤྲུལ་པ་སྒྱུ་མ་བཞིན་དུ་བྱ་བ་ཐམས་ཅད་སྟོན། །ཤིང་མཁན་བཟོ་བོ་མཁས་པས་སྐྱེས་པ་བུད་མེད་དང་། །འདྲ་བའི་བཟོ་བྱས་དེ་ཡང་བྱ་བ་ཐམས་ཅད་བྱེད། །དེ་བཞིན་ཤེས་རབ་སྤྱོད་མཁས་བྱང་ཆུབ་སེམས་
དཔའ་ཡང་། །རྣམ་པར་མི་རྟོག་ཡེ་ཤེས་བྱ་བ་ཐམས་ཅད་བྱེད། །དེ་ལྟར་སྤྱོད་མཁས་རྣམས་ལ་ལྷ་ཚོགས་མང་པོ་དག །ཐལ་མོ་སྦྱར་བ་བཏུད་ནས་ཕྱག་ཀྱང་འཚལ་བར་བྱེད། །ཕྱོགས་བཅུའི་འཇིག་རྟེན་ཁམས་ཀྱི་སངས་རྒྱས་
ཇི་སྙེད་པའང་། །ཡོན་ཏན་བསྔགས་པའི་ཕྲེང་བ་ཡོངས་སུ་བརྗོད་པར་མཛད། །གང་གཱའི་ཀླུང་མཉམ་ཞིང་ན་སེམས་ཅན་ཇི་སྙེད་པ། །དེ་ཀུན་ཡོངས་སུ་བརྟག་པ་བཟུང་སྟེ་བདུད་གྱུར་ལ། །བ་སྤུ་ཉག་རེ་ལས་ཀྱང་དེ་སྙེད་སྤྲུལ་བྱས་
ཀྱང་། །དེ་དག་ཀུན་གྱིས་མཁས་ལ་བར་ཆད་བྱ་མི་ནུས། །རྒྱུ་རྣམ་བཞི་ཡིས་བྱང་ཆུབ་སེམས་དཔའ་མཁས་སྟོབས་ལྡན། །བདུད་བཞིས་ཐུབ་པར་དཀའ་ཞིང་བསྐྱོད་པར་མི་ནུས་ཏེ། །སྟོང་པར་གནས་དང་སེམས་ཅན་ཡོངས་སུ་
མི་གཏོང་དང་། །ཇི་སྐད་སྨྲས་བཞིན་བྱེད་དང་བདེ་གཤེགས་བྱིན་བརླབས་ཅན། །དེ་བཞིན་གཤེགས་ཡུམ་ཤེས་རབ་ཕ་རོལ་ཕྱིན་པ་འདི། །འཆད་ཚེ་བྱང་ཆུབ་སེམས་དཔའ་གང་ཞིག་མོས་བྱེད་ཅིང་། །བསམ་པ་ཐག་པས་
བསྒྲུབ་པར་མངོན་པར་བརྩོན་བྱེད་ན། །ངེས་པ་ཐམས་ཅད་མཁྱེན་པ་ཉིད་ལ་ཞུགས་རིག་བྱ། །ཆོས་དབྱིངས་དེ་བཞིན་ཉིད་ལ་གནས་པར་མི་འགྱུར་ཞིང་། །དཔེར་ན་བར་སྣང་སྤྲིན་བཞིན་གནས་པ་མེད་པར་གནས། །རིག་སྔགས་འཆང་བ་གནས་མེད་
39-1-16b


མཁའ་རྒྱུ་གནས་འདོད་པ། །སྔགས་མཐུས་དུས་མིན་མེ་ཏོག་ལྡན་ཞིང་བྱིན་གྱིས་རློབ། །དེ་ལྟར་སྤྱོད་པ་བྱང་ཆུབ་སེམས་དཔའ་མཁས་གསལ་བ། །རྟོགས་པར་བྱེད་དང་སངས་རྒྱས་ཆོས་རྣམས་དམིགས་མི་འགྱུར། །འཆད་པར་བྱེད་
དང་ཆོས་འདོད་ལྟ་བར་བྱེད་མི་དམིགས། །འདི་ནི་ཞི་འདོད་ཡོན་ཏན་དགའ་བའི་གནས་པ་ཡིན། །དགྲ་བཅོམ་རྣམ་ཐར་དེ་བཞིན་གཤེགས་ཀྱི་མ་གཏོགས་པར། །གནས་པ་འདི་ནི་ཉན་ཐོས་རང་རྒྱལ་བཅས་པ་ཡི། །གནས་པ་ཞི་བའི་ཏིང་
འཛིན་རབ་ཞི་བདེ་ལྡན་པ། །ཇི་སྙེད་ཀུན་གྱི་མཆོག་དང་གོང་ན་མེད་པ་ཡིན། །མདབ་ཆགས་མཁའ་ལ་གནས་ཀྱང་ལྟུང་བར་འགྱུར་མ་ཡིན། །ཉ་ནི་ཆུ་ལ་གནས་ཀྱང་འཚུབས་ཏེ་འཆི་བ་མེད། །དེ་ལྟར་བྱང་ཆུབ་སེམས་དཔའ་བསམ་གཏན་
སྟོབས་དག་གིས། །ཕ་རོལ་སོན་པ་སྟོང་གནས་མྱ་ངན་འདའ་མི་འགྱུར། །སེམས་ཅན་ཀུན་གྱི་ཡོན་ཏན་མཆོག་ཏུ་འགྲོ་བ་དང་། །སངས་རྒྱས་ཡེ་ཤེས་མཆོག་ཏུ་རྨད་བྱུང་མཆོག་རེག་དང་། །ཆོས་ཀྱི་སྦྱིན་པ་རབ་མཆོག་དམ་པ་སྦྱིན་
འདོད་གང་། །ཕན་མཛད་རྣམས་ཀྱི་གནས་མཆོག་འདི་ལ་བསྟེན་པར་གྱིས། །བསླབ་པ་འདི་ནི་འདྲེན་པས་བསླབ་པ་ཡོངས་བརྗོད་ན། །བསླབ་པ་ཇི་སྙེད་ཀུན་གྱི་མཆོག་དང་གོང་ན་མེད། །མཁས་པ་གང་ཞིག་བསླབ་ཀུན་ཕ་རོལ་
འགྲོ་འདོད་པས། །སངས་རྒྱས་བསླབ་པ་ཤེས་རབ་ཕ་རོལ་ཕྱིན་འདིར་སློབས། །འདི་ནི་ཆོས་གཏེར་མཆོག་དང་ཆོས་མཛོད་དམ་པ་ཡིན། །སངས་རྒྱས་རིགས་ཡིན་འགྲོ་བའི་བདེ་དང་སྐྱིད་པའི་མཛོད། །འདས་དང་མ་བྱོན་ཕྱོགས་
བཅུའི་འཇིག་རྟེན་མགོན་པོ་རྣམས། །དེ་དག་འདི་ལས་འཁྲུངས་ཀྱང་ཆོས་དབྱིངས་ཟད་མི་ཤེས། །ཤིང་དང་འབྲས་བུ་མེ་ཏོག་ནགས་ཚལ་ཇི་སྙེད་པ། །དེ་དག་ཐམས་ཅད་ས་ལས་ཡང་དག་འབྱུང་ཞིང་འཐོན། །འོན་ཀྱང་ས་ལ་
ཟད་པ་མེད་ཅིང་འཕེལ་བ་མེད། །ཡོངས་སུ་མི་ཉམས་རྣམ་པར་མི་རྟོག་སྐྱོ་བ་མེད། །སངས་རྒྱས་སྲས་དང་ཉན་ཐོས་རང་རྒྱལ་ལྷ་རྣམས་དང་། །འགྲོ་བ་ཀུན་གྱི་བདེ་སྐྱིད་ཆོས་རྣམས་ཇི་སྙེད་པ། །དེ་ཀུན་ཤེས་རབ་ཕ་རོལ་ཕྱིན་པ་མཆོག་
39-1-17a


ལས་བྱུང་། །ཤེས་རབ་རྣམས་ཀྱང་ཟད་པ་མེད་ཅིང་འཕེལ་བ་མེད། །སེམས་ཅན་ཐ་མ་འབྲིང་དང་མཆོག་གྱུར་ཇི་སྙེད་པ། །དེ་ཀུན་མ་རིག་ལས་བྱུང་བདེ་བར་གཤེགས་པས་གསུངས། །རྐྱེན་རྣམས་ཚོགས་ནས་སྡུག་
བསྔལ་འཁྲུལ་འཁོར་རབ་ཏུ་འབྱུང་། །མ་རིག་འཁྲུལ་འཁོར་དེ་ནི་ཟད་མེད་འཕེལ་བ་མེད། །ཡེ་ཤེས་ཚུལ་སྒོ་ཐབས་དང་རྩ་བ་ཇི་སྙེད་པ། །དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་། །རྐྱེན་རྣམས་ཚོགས་ནས་ལས་
ཀྱི་འཁྲུལ་འཁོར་རབ་ཏུ་འབྱུང་། །ཤེས་རབ་ཕ་རོལ་ཕྱིན་ལ་ཟད་མེད་འཕེལ་བ་མེད། །བྱང་ཆུབ་སེམས་དཔའ་གང་ཞིག་རྟེན་ཅིང་འབྲེལ་འབྱུང་ལ། །སྐྱེ་མེད་ཟད་པ་མེད་པར་ཤེས་རབ་འདི་ཤེས་ཏེ། །ཉི་མ་སྤྲིན་མེད་འོད་ཟེར་འཕྲོ་
བས་མུན་བསལ་ལྟར། །མ་རིག་ཐིབས་པོ་བཅོམ་ནས་རང་བྱུང་ཐོབ་པར་འགྱུར། །མཐུ་ཆེན་ལྡན་པ་བསམ་གཏན་བཞིས་ཀྱང་གནས་བྱེད་ལ། །རྟེན་པར་བྱེད་པ་མ་ཡིན་གནས་པར་བྱེད་པ་མེད། །འོན་ཀྱང་བསམ་གཏན་ཡན་
ལག་བཅས་པ་བཞི་པོ་འདི། །བྱང་ཆུབ་དམ་པ་མཆོག་ཐོབ་པ་ཡི་རྟེན་དུ་འགྱུར། །ཤེས་རབ་མཆོག་ཐོབ་བསམ་གཏན་དག་ལ་གནས་པ་ནི། །གཟུགས་མེད་ཏིང་འཛིན་དམ་པ་བཞི་ཡང་ཉམས་སུ་མྱོང་། །བསམ་གཏན་
འདི་དག་བྱང་ཆུབ་དམ་པ་མཆོག་ལ་ཕན། །བྱང་ཆུབ་སེམས་དཔའ་ཟག་པ་ཟད་ཕྱིར་སློབ་པ་མིན། །འདི་ནི་ཡོན་ཏན་སྩོགས་པའི་ངོ་མཚར་རྨད་བྱུང་སྟེ། །བསམ་གཏན་ཏིང་ངེ་འཛིན་ལ་གནས་ནས་མཚན་མ་མེད། །དེ་ལ་གནས་
རྣམས་གལ་ཏེ་ལུས་ནི་ཞིག་གྱུར་ན། །བསམ་པ་ཇི་བཞིན་འདོད་པའི་ཁམས་སུ་ཡང་སྐྱེའོ། །དཔེར་ན་འཛམ་གླིང་མི་ཞིག་སྔོན་ཆད་ལྷ་ཡུལ་གྱི། །ལྷའི་གྲོང་ཁྱེར་མཆོག་ཏུ་མ་ཕྱིན་ཕྱིས་སོང་སྟེ། །དེ་ནི་ཡོངས་སུ་བཟུང་བའི་
ཡུལ་དེ་རྣམས་མཐོང་ནས། །ཕྱིར་འདིར་འོང་བར་གྱུར་ན་ཆགས་པར་མི་བྱེད་ལྟར། །དེ་བཞིན་བྱང་ཆུབ་སེམས་དཔའི་ཡོན་ཏན་མཆོག་འཆང་བ། །རྣལ་འབྱོར་བརྩོན་ཏེ་བསམ་གཏན་ཏིང་འཛིན་ལ་གནས་ནས། །ཕྱིར་ཡང་འདོད་
39-1-17b


པའི་ཁམས་སུ་གནས་ཏེ་ཆགས་པ་མེད། །ཆུ་ཡི་པད་མ་བཞིན་དུ་བྱིས་པའི་ཆོས་མི་གནས། །བདག་ཉིད་ཆེན་པོ་སེམས་ཅན་ཡོངས་སུ་སྨིན་བྱ་དང་། །ཞིང་སྦྱོང་ཕ་རོལ་ཕྱིན་རྫོགས་དོན་བྱེད་ཁོ་ནར་ཟད། །བྱང་ཆུབ་ཡོན་ཏན་ཕ་རོལ་ཕྱིན་
ཉམས་འགྱུར་འོང་ཞེས། །གཟུགས་མེད་ཁམས་སུ་སྐྱེ་བ་དོན་དུ་གཉེར་མི་བྱེད། །དཔེར་ན་མི་ཞིག་རིན་ཆེན་གཏེར་རྣམས་རྙེད་གྱུར་ནས། །དེ་ལ་འདོད་པའི་བློ་ནི་བསྐྱེད་པར་མ་བྱས་ལ། །དེས་ཀྱང་དུས་གཞན་ཞིག་ན་དེ་དག་ཡོངས་བླངས་
ཤིང་། །བླངས་ནས་ཁྱིམ་དུ་སོང་སྟེ་ཆགས་པར་མི་བྱེད་ལྟར། །དེ་བཞིན་བྱང་ཆུབ་སེམས་དཔའ་མཁས་པ་དགའ་བ་དང་། །བདེ་སྦྱིན་བསམ་གཏན་ཏིང་འཛིན་ཞི་བ་བཞི་ཐོབ་ནས། །བསམ་གཏན་བདེ་ལྡན་བསམ་གཏན་ཏིང་འཛིན་ཐོབ་བཏང་
སྟེ། །འགྲོ་ལ་སྙིང་བརྩེར་ལྡན་པའི་ཕྱིར་ཡང་འདོད་ཁམས་འཇུག །གལ་ཏེ་བྱང་ཆུབ་སེམས་དཔའ་ཏིང་འཛིན་བསམ་གཏན་གནས། །དགྲ་བཅོམ་རང་རྒྱལ་ཐེག་པར་འདོད་པའི་བློ་སྐྱེད་ན། །མཉམ་པར་མ་བཞག་རྒོད་ཅིང་སེམས་གཡེངས་གྱུར་
པ་སྟེ། །སངས་རྒྱས་ཡོན་ཏན་ཡོངས་ཉམས་མཉན་པ་གྲུ་ཞིག་བཞིན། །གཞན་ཡང་གཟུགས་དང་སྒྲ་དང་དེ་བཞིན་དྲི་དང་རོ། །རེག་དང་འདོད་ཡོན་ལྔ་ལ་མངོན་པར་བརྩོན་གྱུར་ཀྱང་། །དགྲ་བཅོམ་རང་རྒྱལ་ཐེག་བྲལ་བྱང་ཆུབ་སེམས་དགའ་
ན། །དཔའ་བོ་རྟག་ཏུ་མཉམ་བཞག་ཡིན་པར་ཤེས་པར་བྱ། །སེམས་ཅན་གང་ཟག་གཞན་ཕྱིར་སེམས་དཔའ་རྣམ་དག་པ། །བརྩོན་འགྲུས་ཕ་རོལ་ཕྱིན་ལ་མངོན་བརྩོན་རྣམ་པར་སྤྱོད། །དཔེར་ན་བྲན་མོ་ཆུ་ཆུན་དབང་མེད་རྗེ་བོའི་དབང་། །
དེ་བཞིན་དཔའ་རྣམས་སེམས་ཅན་ཀུན་གྱི་དབང་གིས་འགྲོ། །སྤྱོ་བ་བྱས་སམ་འོན་ཏེ་རྟག་ཏུ་བརྡེགས་ཀྱང་རུང་། །བྲན་མོ་རྗེ་བོ་ལ་ནི་ཟློག་ཚིག་མི་སྨྲ་ཡི། །འདི་ཡིས་བདག་ནི་བསད་པར་འགྱུར་དུ་འོང་སྙམ་ནས། །ཤིན་དུ་སྐྲག་པའི་ཡིད་
ཀྱིས་འཇིགས་བཅས་ཟིལ་གྱིས་གནོན། །དེ་བཞིན་བྱང་ཆུབ་ཆེད་དུ་བྱང་ཆུབ་མཆོག་ཞུགས་པ། །འགྲོ་བ་ཀུན་ལ་བྲན་གྱུར་བཞིན་དུ་གནས་པར་བྱ། །འདི་ལས་བྱང་ཆུབ་ཐོབ་ཅིང་ཡོན་ཏན་རྫོགས་པར་འགྱུར། །རྩྭ་དང་ཤིང་ལས་མེ་བྱུང་བས་ནི་དེ་
39-1-18a


ཉིད་སྲེག །བདག་གི་བདེ་བ་བཏང་ནས་རེ་བ་མེད་སེམས་གྱིས། །སེམས་ཅན་གཞན་གྱི་དགོས་ལ་ཉིན་མཚན་མངོན་པར་བརྩོན། །བུ་གཅིག་པ་ལ་མ་ནི་རིམ་གྲོ་བྱེད་པ་ལྟར། །བསམ་པ་ཐག་པས་རྣམ་པར་སྐྱོ་མེད་གནས་པར་
གྱིས། །བྱང་ཆུབ་སེམས་དཔའ་གང་ཞིག་ཡུན་རིང་འཁོར་འདོད་ཅིང་། །སེམས་ཅན་དོན་དང་ཞིང་སྦྱོང་བརྩོན་པའི་རྣལ་འབྱོར་པ། །སྐྱོ་བའི་བློ་ནི་རྡུལ་ཙམ་སྐྱེ་བར་མི་འགྱུར་ན། །དེ་ནི་བརྩོན་འགྲུས་ཕ་རོལ་ཕྱིན་ལྡན་གཡེལ་བ་མེད། །བྱང་ཆུབ་
སེམས་དཔའ་མི་མཁས་བསྐལ་པ་བྱེ་བ་བགྲང་། །གལ་ཏེ་རིང་བར་འདུ་ཤེས་སྡུག་བསྔལ་བྱང་ཆུབ་སྒྲུབ། །ཡང་དག་ཆོས་སྒྲུབ་བྱེད་ཚེ་ཡུན་རིང་སྡུག་བསྔལ་འགྱུར། །དེས་ནི་བརྩོན་འགྲུས་ཕ་རོལ་ཕྱིན་ཉམས་ལེ་ལོ་ཅན། །བྱང་ཆུབ་
མཆོག་ཏུ་སེམས་བསྐྱེད་དང་པོ་ནས་བཟུང་སྟེ། །བྱང་ཆུབ་བླ་ན་མེད་པ་ཐོབ་པར་འགྱུར་གྱི་བར། །ཉིན་མཚན་གཅིག་ཙམ་དུ་ནི་ཡིད་ལ་སེམས་བྱེད་ན། །མཁས་པ་གསལ་བས་བརྩོན་འགྲུས་བརྩམས་པར་རིག་པར་བྱ། །གལ་ཏེ་འགའ་
ཞིག་འདི་སྐད་རི་རབ་རི་བཤིག་པའི། །རྗེས་ལ་བྱང་ཆུབ་མཆོག་ཐོབ་འགྱུར་ཞེས་སྨྲ་བ་ལས། །ཅི་སྟེ་སྐྱོ་བའི་བློ་སྐྱེད་ཚད་ཀྱང་སེམས་བྱེད་ན། །དེ་ཚེ་བྱང་ཆུབ་སེམས་དཔའ་ལེ་ལོར་གྱུར་པ་ཡིན། །ཇི་སྟེ་དེ་ནི་འདི་ཙམ་ཚོད་ལྟ་ཅི་དཀའ་
ཞེས། །སྐད་ཅིག་ཙམ་ལ་རི་རབ་ཐལ་བར་རླག་སེམས་བསྐྱེད། །བྱང་ཆུབ་སེམས་དཔའ་མཁས་པ་བརྩོན་འགྲུས་བརྩམས་པ་སྟེ། །རིང་པོར་མི་ཐོགས་འདྲེན་པའི་བྱང་ཆུབ་མཆོག་ཐོབ་འགྱུར། །འགྲོ་བ་ཡོངས་སུ་སྨིན་པར་བྱས་ནས་
དོན་བྱ་ཞེས། །གལ་ཏེ་ལུས་དང་ངག་དང་ཡིད་ཀྱིས་བརྩོན་བྱེད་ན། །བདག་ཏུ་འདུ་ཤེས་གནས་པས་ལེ་ལོར་གྱུར་པ་སྟེ། །ཐམས་ཅད་མཁྱེན་པ་ཉིད་ལས་རིང་འགྱུར་གནམ་ས་བཞིན། །གང་ཚེ་ལུས་དང་སེམས་དང་སེམས་ཅན་
འདུ་ཤེས་མེད། །འདུ་ཤེས་རྣམ་པར་ལོག་ནས་གཉིས་སུ་མེད་ཆོས་སྤྱོད། །འདི་ནི་བྱང་ཆུབ་ཞི་བ་མི་ཉམས་མཆོག་འདོད་པའི། །བརྩོན་འགྲུས་ཕ་རོལ་ཕྱིན་ཅེས་ཕན་པ་མཛད་པས་གསུངས། །གལ་ཏེ་གཞན་ལས་ངན་བརྗོད་ཚིག་རྩུབ་ཐོས་
39-1-18b


གྱུར་ན། །བདག་བདེ་ཡིན་ཞེས་བྱང་ཆུབ་སེམས་དཔའ་མཁས་པ་དགའ། །སུ་སྨྲ་སུས་ཐོས་གང་གིས་གང་ཞིག་གང་གི་ཕྱིར། །བཟོད་པའི་ཕ་རོལ་ཕྱིན་མཆོག་ལྡན་པ་མཛངས་པ་ཡིན། །བྱང་ཆུབ་སེམས་དཔའ་གང་ཞིག་བཟོད་པའི་
ལེགས་ཆོས་ལྡན། །གང་ཞིག་སྟོང་གསུམ་རིན་ཆེན་བཀང་སྟེ་འཇིག་རྟེན་མཁྱེན། །སངས་རྒྱས་རྣམས་དང་དགྲ་བཅོམ་རང་རྒྱལ་ཕུལ་བྱས་པའི། །སྦྱིན་པའི་ཕུང་པོས་དེ་ལ་བསོད་ནམས་ཆར་མི་ཕོད། །བཟོད་ལ་གནས་པའི་ལུས་ནི་ཡོངས་སུ་
དག་འགྱུར་ཏེ། །སུམ་བཅུ་རྩ་གཉིས་མཚན་དང་མཐུ་སྟོབས་ཕ་མཐའ་ཡས། །སེམས་ཅན་རྣམས་ལ་ཆོས་རབ་སྟོང་པ་སྒྲོགས་པར་བྱེད། །འདི་ནི་བཟོད་ལྡན་དེ་ལ་འགྲོ་བ་དག་འགྱུར་མཁས། །གལ་ཏེ་སེམས་ཅན་ལ་
ལས་ཙན་དན་ཕུར་མ་བླངས། །རབ་གུས་བྱང་ཆུབ་སེམས་དཔའ་ལ་ནི་ཉུག་བྱེད་ལ། །གཞན་ཞིག་མེ་མདག་མགོ་ལ་འཐོར་བྱེད་གཉི་ག་ལ། །དེ་ཡིས་མཉམ་ཞིང་སྙོམས་པའི་ཡིད་ནི་བསྐྱེད་པར་བྱ། །བྱང་ཆུབ་སེམས་དཔའ་
མཁས་པས་དེ་ལྟར་བཟོད་བྱས་ནས། །སེམས་བསྐྱེད་དེ་ནི་བྱང་ཆུབ་མཆོག་ཏུ་ཡོངས་བསྔོས་ན། །དཔའ་བོ་འཇིག་རྟེན་ཀུན་ལ་བཟོད་པས་དགྲ་བཅོམ་དང་། །རང་རྒྱལ་སེམས་ཅན་ཁམས་མང་ཇི་སྙེད་ཟིལ་གྱིས་གནོན། །
བཟོད་བྱེད་འདི་སྙམ་དུ་ཡང་སེམས་ནི་བསྐྱེད་བྱ་སྟེ། །སེམས་དམྱལ་དུད་འགྲོ་གཤིན་རྗེའི་འཇིག་རྟེན་སྡུག་བསྔལ་མང་། །འདོད་པའི་ཡོན་ཏན་རྒྱུ་ཡིས་དབང་མེད་གནོད་མྱོང་ན། །བྱང་ཆུབ་ཆེད་དུ་ཅི་ཕྱིར་ད་བཟོད་མི་བྱ་སྙམ། །
ལྕག་དབྱིག་མཚོན་དང་གསད་དང་བཅིང་དང་བརྡེག་པ་དང་། །མགོ་གཅོད་པ་དང་རྣ་བ་རྐང་ལག་སྣ་གཅོད་དང་། །འཇིག་རྟེན་སྡུག་བསྔལ་ཇི་སྙེད་བདག་གིས་བཟོད་སྙམ་པ། །བྱང་ཆུབ་སེམས་དཔའ་བཟོད་པའི་ཕ་རོལ་ཕྱིན་ལ་
གནས། །ཚུལ་ཁྲིམས་ཀྱིས་ནི་ཞི་བ་འདོད་རྣམས་འཕགས་པར་འགྱུར། །སྟོབས་བཅུའི་སྤྱོད་ཡུལ་གནས་ཤིང་ཚུལ་ཁྲིམས་ཉམས་པ་མེད། །སྡོམ་པའི་བྱ་བ་ཇི་སྙེད་ཀུན་གྱི་རྗེས་སུ་འཇུག །སེམས་ཅན་ཀུན་ལ་ཕན་ཕྱིར་དེ་ཡང་བྱང་ཆུབ་བསྔོ། །
39-1-19a


གལ་ཏེ་དགྲ་བཅོམ་རང་རྒྱལ་བྱང་ཆུབ་རེག་འདོད་ན། །ཚུལ་ཁྲིམས་འཆལ་ཅིང་མི་མཁས་དེ་བཞིན་སྤྱོད་པ་ཉམས། །ཅི་སྟེ་བྱང་ཆུབ་ཞི་བ་མཆོག་ཏུ་ཡོངས་བསྔོ་ན། །འདོད་ཡོན་བརྩོན་ཡང་ཚུལ་ཁྲིམས་ཕ་རོལ་ཕྱིན་ལ་གནས། །
ཆོས་གང་ངེས་པའི་བྱང་ཆུབ་ཡོན་ཏན་འབྱུང་འགྱུར་བ། །འདི་ནི་ཡོན་ཏན་ཆོས་ལྡན་རྣམས་ཀྱི་ཚུལ་ཁྲིམས་དོན། །ཆོས་གང་ཕན་བྱེད་རྣམས་ཀྱི་བྱང་ཆུབ་ཡོངས་ཉམས་པ། །འདི་ནི་ཚུལ་ཁྲིམས་འཆལ་ཅེས་རྣམ་པར་འདྲེན་པས་གསུངས། །
གལ་ཏེ་བྱང་ཆུབ་སེམས་དཔའ་འདོད་ཡོན་ལྔ་སྤྱོད་ཀྱང་། །སངས་རྒྱས་ཆོས་དང་འཕགས་པའི་དགེ་འདུན་སྐྱབས་སོང་སྟེ། །སངས་རྒྱས་འགྲུབ་བྱ་སྙམ་དུ་ཀུན་མཁྱེན་ཡིད་བྱེད་ན། །མཁས་པ་ཚུལ་ཁྲིམས་ཕ་རོལ་ཕྱིན་གནས་རིག་
པར་བྱ། །གལ་ཏེ་བསྐལ་པ་བྱེ་བར་དགེ་བའི་ལས་ལམ་བཅུ། །སྤྱོད་ཀྱང་དགྲ་བཅོམ་རང་རྒྱལ་ཉིད་ལ་འདོད་སྐྱེད་ན། །དེ་ཚེ་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་ཡིན། །སེམས་བསྐྱེད་དེ་ནི་ཕས་ཕམ་པས་ཀྱང་ཤིན་དུ་ལྕི། །ཚུལ་ཁྲིམས་
སྲུང་ཞིང་བྱང་ཆུབ་མཆོག་ཏུ་ཡོངས་བསྔོ་ལ། །དེ་ཡིས་རློམ་སེམས་མེད་ཅིང་བདག་བསྟོད་མི་བྱེད་ལ། །ང་ཡི་འདུ་ཤེས་སེམས་ཅན་འདུ་ཤེས་ཡོངས་སུ་སྤངས། །བྱང་ཆུབ་སེམས་དཔའ་ཚུལ་ཁྲིམས་ཕ་རོལ་ཕྱིན་གནས་བརྗོད། །
གལ་ཏེ་བྱང་ཆུབ་སེམས་དཔའ་རྒྱལ་བའི་ལམ་སྤྱོད་པ། །སེམས་ཅན་འདི་དག་ཁྲིམས་ལྡན་འདི་དག་ཁྲིམས་འཆལ་ཞེས། །སྣ་ཚོགས་འདུ་ཤེས་ཞུགས་པ་ཤིན་ཏུ་ཚུལ་ཁྲིམས་འཆལ། །ཚུལ་ཁྲིམས་ཉམས་ཤིང་
དེ་ལ་ཡོངས་དག་ཚུལ་ཁྲིམས་མེད། །གང་ལ་བདག་གི་འདུ་ཤེས་སེམས་ཅན་འདུ་ཤེས་མེད། །འདུ་ཤེས་འདོད་ཆགས་བྲལ་ལ་སྡོམ་མིན་ག་ལ་ཡོད་། །གང་ལ་སྡོམ་དང་སྡོམ་པ་མ་ཡིན་རློམ་སེམས་མེད་། །འདི་ནི་ཚུལ་ཁྲིམས་
སྡོམ་པར་རྣམ་པར་འདྲེན་པས་གསུངས། །སེམས་ཅན་དག་པ་གང་ཞིག་དེ་ལྟར་ཁྲིམས་ལྡན་པ། །སྡུག་དང་མི་སྡུག་ཀུན་ལ་ལྟ་བ་མེད་པ་ཡིན། །མགོ་དང་རྐང་ལག་གཏོང་ཞིང་ཞུམ་པའི་སེམས་ཀྱང་མེད། །བདོག་པ་ཐམས་ཅད་གཏོང་ཞིང་རྟག་ཏུ་
39-1-19b


ཞེན་པ་མེད། །ཆོས་རྣམས་རང་བཞིན་བདག་མེད་ཡ་མ་རླར་ཤེས་ནས། །བདག་གི་ཤ་ཡང་གཏོང་ཞིང་ཞུམ་པའི་སེམས་མེད་ན། །དེ་ཚེ་ཕྱི་རོལ་དངོས་པོ་གཏོང་བ་སྨོས་ཅི་དགོས། །གལ་ཏེ་སེར་སྣ་བྱེད་པ་དེ་ནི་གནས་མེད་དོ། །བདག་ཏུ་འདུ་ཤེས་
དངོས་ལ་བདག་གིར་འཛིན་པས་ཆགས། །བླུན་པོ་རྣམས་ལ་གཏོང་བའི་བློ་ལྟ་ག་ལ་ཡོད། །སེར་སྣ་ཅན་ནི་ཡིད་བཏགས་གནས་སུ་སྐྱེ་བར་འགྱུར། །ཅི་སྟེ་མིར་སྐྱེས་ན་ཡང་དེ་ཚེ་དབུལ་པོར་འགྱུར། །དེ་ཚེ་བྱང་ཆུབ་སེམས་དཔའ་སེམས་
ཅན་དབུལ་ཤེས་ནས། །གཏོང་ལ་མོས་པར་འགྱུར་ཞིང་རྟག་ཏུ་ལྷུག་པར་གཏོང་། །གླིང་བཞི་ལེགས་པར་རྒྱན་པ་མཆིལ་མའི་ཐལ་བ་འདྲ། །བྱིན་ནས་དགའ་བར་འགྱུར་གྱི་གླིང་ཐོབ་དེ་ལྟ་མིན། །བྱང་ཆུབ་སེམས་དཔའ་མཁས་པ་གསལ་
བ་སྲིད་གསུམ་གྱི། །སེམས་ཅན་ཇི་སྙེད་དེ་དག་ཀུན་ལ་སྦྱིན་པ་འདི། །བྱིན་པར་གྱུར་ཅིག་སྙམ་དུ་བསམས་ནས་སྦྱིན་བྱིན་ལ། །དེ་ཡང་འགྲོ་བའི་དོན་ཕྱིར་བྱང་ཆུབ་མཆོག་ཏུ་བསྔོ། །སྦྱིན་པ་བྱིན་ནས་དངོས་ལ་གནས་པར་བྱེད་པ་མེད། །དེ་ནི་ནམ་
དུའང་རྣམ་པར་སྨིན་ལ་རེ་བ་མེད། །དེ་ལྟར་གཏོང་ལ་མཁས་པ་ཐམས་ཅད་གཏོང་བ་སྟེ། །ཆུངུ་བཏང་ལ་མང་པོ་དཔག་ཏུ་མེད་པར་འགྱུར། །སྲིད་པ་གསུམ་ན་སེམས་ཅན་མ་ལུས་ཇི་སྙེད་པ། །ཡོངས་སུ་བརྟག་པར་བཟུང་སྟེ་དེ་དག་ཐམས་
ཅད་ཀྱིས། །འཇིག་རྟེན་མཁྱེན་པ་སངས་རྒྱས་དགྲ་བཅོམ་རང་རྒྱལ་ལ། །བསྐལ་པ་མཐའ་ཡས་སྦྱིན་བྱིན་ཉན་ཐོས་ལེགས་ཚོལ་ན། །བྱང་ཆུབ་སེམས་དཔའ་མཁས་པ་ཐབས་མཁས་གང་ཞིག་གིས། །དེ་དག་བསོད་ནམས་བྱ་བའི་དངོས་
ལ་ཡི་རང་ནས། །སེམས་ཅན་དོན་དུ་བྱང་ཆུབ་མཆོག་རབ་ཡོངས་བསྔོ་ན། །ཡོངས་སུ་བསྔོས་པས་འགྲོ་བ་ཐམས་ཅད་ཟིལ་གྱིས་གནོན། །ནོར་བུ་མཆིང་བུའི་ཕུང་པོ་ཆེན་པོར་གྱུར་པ་ཡང་། །རིན་ཆེན་བཻ་དཱུརྱ་གཅིག་དེ་ཀུན་ཟིལ་གྱིས་གནོན། །
དེ་བཞིན་འགྲོ་ཀུན་སྦྱིན་པའི་ཕུང་པོ་རྒྱ་ཆེན་ཀུན། །རྗེས་སུ་ཡི་རང་བྱང་ཆུབ་སེམས་དཔས་ཟིལ་གྱིས་གནོན། །གལ་ཏེ་བྱང་ཆུབ་སེམས་དཔས་འགྲོ་ལ་སྦྱིན་བྱིན་ནས། །དེ་ལ་བདག་གིར་མི་བྱེད་དངོས་པོ་ཕངས་མེད་ན། །དེ་ལས་དགེ་བའི་རྩ་བ་མཐུ་
39-1-20a


ཆེན་འཕེལ་འགྱུར་ཏེ། །སྤྲིན་མེད་འོད་ལྡན་ཟླ་དཀྱིལ་ཡར་གྱི་ངོ་བཞིན་ནོ། །སྐབས་དྲུག་པ་མཐར་གྱིས་པ་བསྟན། །བྱང་ཆུབ་སེམས་དཔའི་སྦྱིན་པས་ཡིད་བཏགས་འགྲོ་བ་གཅོད། །དབུལ་བ་དང་ནི་དེ་བཞིན་ཉོན་མོངས་ཐམས་ཅད་གཅོད། །
སྤྱོད་ཚེ་ལོངས་སྤྱོད་མཐའ་ཡས་རྒྱས་པ་ཐོབ་པར་འགྱུར། །སྦྱིན་པས་སྡུག་བསྔལ་གྱུར་པའི་སེམས་ཅན་ཡོངས་སྨིན་བྱེད། །ཁྲིམས་ཀྱིས་དུད་འགྲོའི་འགྲོ་བ་དུ་མའི་ངོ་བོ་དང་། །མི་ཁོམ་བརྒྱད་སྤོང་དེ་ཡིས་དལ་བ་རྟག་ཏུ་རྙེད། །བཟོད་པས་གཟུགས་བཟང་དམ་པ་རྒྱ་ཆེན་
ཐོབ་འགྱུར་ཏེ། །གསེར་མདོག་སྡུག་ཅིང་འགྲོ་བས་ལྟ་བའི་འོས་སུ་འགྱུར། །བརྩོན་འགྲུས་ཀྱིས་ནི་དཀར་པོའི་ཡོན་ཏན་འགྲིབ་མི་འགྱུར། །ཡེ་ཤེས་མཐའ་ཡས་རྒྱལ་བའི་བང་མཛོད་རྙེད་པར་འགྱུར། །བསམ་གཏན་གྱིས་ནི་འདོད་པའི་ཡོན་ཏན་སྨད་
པ་འདོར། །རིག་དང་མངོན་པར་ཤེས་དང་ཏིང་འཛིན་མངོན་པར་སྒྲུབ། །ཤེས་རབ་ཀྱིས་ནི་ཆོས་ཀྱི་རང་བཞིན་ཡོངས་ཤེས་ནས། །ཁམས་གསུམ་མ་ལུས་པ་ལས་ཡང་དག་འདའ་བར་འགྱུར། །མི་ཡི་ཁྱུ་མཆོག་འཁོར་ལོ་རིན་ཆེན་བསྐོར་བྱས་ནས། །སྡུག་བསྔལ་
ཟད་པར་བྱ་ཕྱིར་འགྲོ་ལ་ཆོས་ཀྱང་སྟོན། །སྐབས་བདུན་པ་སྐད་ཅིག་མ་གཅིག་ལ་མངོན་པར་རྫོགས་པར་བྱང་ཆུབ་པར་བསྟན། །ཆོས་འདི་ཡོངས་རྫོགས་བྱས་ནས་བྱང་ཆུབ་སེམས་དཔའ་དེ། །སྐབས་བརྒྱད་པ་ཆོས་ཀྱི་སྐུ་བསྟན། །ཡོངས་དག་
ཞིང་དང་སེམས་ཅན་དག་པ་ཡོངས་སུ་འཛིན། །སངས་རྒྱས་རྒྱུད་དང་ཆོས་ཀྱི་རྒྱུད་ཀྱང་ཡོངས་སུ་འཛིན། །དེ་བཞིན་དགེ་འདུན་རྒྱུད་དང་ཆོས་ཀུན་ཡོངས་སུ་འཛིན། །འགྲོ་བའི་ནད་གསོ་མཛད་པ་སྨན་པའི་མཆོག་གྱུར་པས། །
ཤེས་རབ་བསྟན་པ་བྱང་ཆུབ་ལམ་ལྡན་འདི་གསུངས་ཏེ། །མིང་ནི་ཡོན་ཏན་རིན་ཆེན་སྡུད་པ་བྱང་ཆུབ་ལམ། །ལམ་འདི་སེམས་ཅན་ཀུན་གྱིས་ཐོབ་པར་བྱ་ཕྱིར་བཤད། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྡུད་པ་ཚིགས་
སུ་བཅད་པ། རྫོགས་སྷོ།། །།རྒྱ་གར་གྱི་མཁན་པོ་བིདྷྱ་ཀ་ར་སིང་ཧ་དང་། ཞུ་ཆེན་གྱི་ལོ་ཙྪ་བ་བན་དེ་དཔལ་བརྩེགས་ཀྱིས་བསྒྱུར་ཅིང་། ཞུས་ཏེ་གཏན་ལ་ཕབ་པའོ།། །། 
39-1-20b


༄༅༅། །རྒྱ་གར་སྐད་དུ། ཨཱརྱ་སུ་བི་ཀྲན་ཏ་བི་ཀྲ་མི་པ་རི་པྲི་ཙ་པྲ་ཛྙཱ་པཱ་ར་མི་ཏ་ནིར་དེ་ཤ ། བོད་སྐད་དུ། འཕགས་པ་རབ་ཀྱི་རྩལ་གྱིས་རྣམ་པར་གནོན་པས་ཞུས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ།  
བམ་པོ་དང་པོ། སངས་རྒྱས་དང་། བྱང་ཆུབ་སེམས་དཔའ་དང་། འཕགས་པ་ཉན་ཐོས་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་འོད་མའི་
ཚལ་བྱ་ཀ་ལན་དྷ་ཀ་གནས་པ་ན། དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་ཐ་དད་པ་ནས་འདུས་པ་སྐྱེ་བ་གཅིག་གིས་ཐོགས་
པ་ཚད་མེད་གྲངས་མེད་པ་དང་ཐབས་གཅིག་ཏུ་བཞུགས་ཏེ། དེའི་ཚེ་བཅོམ་ལྡན་འདས་འཁོར་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ཏེ་ཆོས་སྟོན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་
པོ་རབ་ཀྱི་རྩལ་གྱིས་རྣམ་པར་གནོན་པ་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ནས་འདུག་པ་དེ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་
ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཀྱི་
རྩལ་གྱིས་རྣམ་པར་གནོན་པ་ལ་འདི་སྐད་ཅེས་བཀའ་སྩལ་ཏོ། །རབ་ཀྱི་རྩལ་གྱིས་རྣམ་པར་གནོན་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཁྱོད་ཅི་དང་ཅི་འདོད་པ་དྲིས་
39-1-21a


ཤིག་དང་། དྲིས་པ་དེ་དང་དེའི་ལུང་བསྟན་པས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཀྱི་རྩལ་གྱིས་རྣམ་པར་
གནོན་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་ཤེས་རབ་ཀྱི་ཕ་རོལ་དུ་ཕྱིན་པ་ཞེས་བགྱི་བ། བཅོམ་ལྡན་འདས་ཇི་ཙམ་གྱིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཤེས་རབ་
ཀྱི་ཕ་རོལ་དུ་ཕྱིན་པ་ཞེས་བགྱི། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་ལགས། བཅོམ་ལྡན་འདས་ཇི་ལྟར་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་
སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་དུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་
ཕ་རོལ་དུ་ཕྱིན་པ་སྒོམ་པ་ན་བདུད་སྡིག་ཅན་གྱིས་གླགས་མི་རྙེད་ཅིང་བདུད་ཀྱི་ལས་ཐམས་ཅད་ཀྱང་རྟོགས་པར་འགྱུར་ལགས། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་དུ་ཕྱིན་པ་ལ་
གནས་པ་ཇི་ལྟ་བུས་གནས་ན་མྱུར་དུ་ཐམས་ཅད་མཁྱེན་པ་ཉིད་ཀྱི་ཆོས་རྣམས་ཡོངས་སུ་རྫོགས་པར་འགྱུར་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཀྱི་རྩལ་
གྱིས་རྣམ་པར་གནོན་པ་ལ་འདི་སྐད་ཅེས་བཀའ་སྩལ་ཏོ། །རབ་ཀྱི་རྩལ་གྱིས་རྣམ་པར་གནོན་པ་ཁྱོད་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དོན་དང་། ཅི་ནས་ཁྱོད་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་
བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་མི་རྣམས་ཀྱི་སྐྱེ་བོ་ཕལ་པོ་ཆེའི་དོན་དང་ཕན་པ་དང་བདེ་བའི་ཕྱིར་ཞུགས་ཤིང་། ད་ལྟར་གྱི་དང་། མ་འོངས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་སྣང་བར་བྱེད་པར་འདོད་པས་
39-1-21b


དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཤེས་རབ་ཀྱི་ཕ་རོལ་དུ་ཕྱིན་པ་འདྲི་བ་ལེགས་སོ། །ལེགས་སོ། །དེ་ནས་བཅོམ་ལྡན་འདས་ཀྱིས་མཁྱེན་བཞིན་དུ་བྱང་ཆུབ་སེམས་དཔའ་སེམས་དཔའ་
ཆེན་པོ་རབ་ཀྱི་རྩལ་གྱིས་རྣམ་པར་གནོན་པ་ལ་འདི་སྐད་ཅེས་བཀའ་སྩལ་ཏོ། །རབ་ཀྱི་རྩལ་གྱིས་རྣམ་པར་གནོན་པ་ཁྱོད་དོན་གྱི་དབང་གང་མཐོང་ནས་དེ་བཞིན་གཤེགས་པ་ལ་དོན་འདི་ལྟ་བུ་འདྲི། དེ་སྐད་ཅེས་བཀའ་སྩལ་པ་དང་། 
བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཀྱི་རྩལ་གྱིས་རྣམ་པར་གནོན་པས་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་ཐམས་ཅད་ལ་སྨན་པ་དང་། སེམས་ཅན་ཐམས་ཅད་ལ་སྙིང་བརྩེ་བ་དང་། 
སེམས་ཅན་ཐམས་ཅད་ཀྱི་དོན་གྱི་སླད་དུ་བདག་དེ་བཞིན་གཤེགས་པ་ལ་དོན་འདི་ཞུ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟ་སྟེ། ཤེས་རབ་ཀྱི་ཕ་རོལ་དུ་ཕྱིན་པ་ནི་ཉན་ཐོས་དང་། རང་སངས་རྒྱས་དང་བྱང་ཆུབ་སེམས་དཔའ་
དང་། ཡང་དག་པར་རྫོགས་པའི་སངས་རྒྱས་ཀྱི་ཆོས་དང་། ཆོས་ཐམས་ཅད་སྡུད་པ་ལགས་པའི་སླད་དུའོ། །བཅོམ་ལྡན་འདས་དེ་ལ་སེམས་ཅན་གང་དག་ཉན་ཐོས་ཀྱི་ཐེག་པ་ལ་ངེས་པར་གྱུར་པ་དེ་དག་གིས་ཐོས་ན་མྱུར་དུ་ཟག་པ་མ་མཆིས་
པའི་ས་མངོན་སུམ་དུ་བགྱིད་པར་འགྱུར་བ་དང་། གང་དག་རང་སངས་རྒྱས་ཀྱི་ཐེག་པ་ལ་ངེས་པར་གྱུར་པ་དེ་དག་ཀྱང་མྱུར་དུ་རང་སངས་རྒྱས་ཀྱི་ཐེག་པ་ལ་ངེས་པར་འབྱུང་བར་འགྱུར་བ་དང་། གང་དག་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ལ་ཡང་དག་པར་ཞུགས་པ་དེ་དག་ཀྱང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དང་། གང་དག་ཡང་དག་པ་ཉིད་སྐྱོན་མེད་པ་ལ་མ་ཞུགས་ཤིང་
ས་གསུམ་ལ་མ་ངེས་པ་དེ་དག་གིས་ཐོས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་བ་དང་། བཅོམ་ལྡན་འདས་དེ་བཞིན་གཤེགས་པས་ཤེས་རབ་ཀྱི་ཕ་རོལ་དུ་ཕྱིན་པ་འདི་ཞུས་པའི་ལན་
39-1-22a


བཏབ་པས་སེམས་ཅན་ཐམས་ཅད་ཀྱི་དགེ་བའི་རྩ་བ་སྐྱེད་པར་འགྱུར་བའི་སླད་དུ་དེ་བཞིན་གཤེགས་པའི་ཡུལ་དང་། དེ་བཞིན་གཤེགས་པའི་ཡེ་ཤེས་བསྟན་དུ་གསོལ། བཅོམ་ལྡན་འདས་བདག་ནི་སེམས་ཅན་
དམན་པ་ལ་མོས་པ་རྣམས་ཀྱི་སླད་དུ་དེ་བཞིན་གཤེགས་པ་ལ་ཞུ་བ་མ་ལགས། དབུལ་པོའི་སེམས་དང་ལྡན་པ་རྣམས་ཀྱི་སླད་དུ་མ་ལགས། དབུལ་པོའི་ཐེག་པ་ལ་ཡང་དག་པར་ཞུགས་པ་རྣམས་ཀྱི་སླད་དུ་མ་ལགས། ལེ་ལོ་
ཅན་རྣམས་ཀྱི་སླད་དུ་མ་ལགས། ལེ་ལོའི་ཟིལ་གྱིས་ནོན་པ་རྣམས་ཀྱི་སླད་དུ་མ་ལགས། ལྟ་བའི་འདམ་དུ་བྱིང་བ་རྣམས་ཀྱི་སླད་དུ་མ་ལགས། བདུད་ཀྱི་ཞགས་པས་ཟིན་པ་རྣམས་ཀྱི་སླད་དུ་མ་ལགས། ངོ་ཚ་མ་འཚལ་
ཅིང་ཁྲེལ་མ་མཆིས་པ་རྣམས་ཀྱི་སླད་དུ་མ་ལགས། ཡོ་བྱད་བསྙུངས་པ་དང་མི་ལྡན་པ་རྣམས་ཀྱི་སླད་དུ་མ་ལགས། བསྐྱུད་ངས་པ་རྣམས་ཀྱི་སླད་དུ་མ་ལགས། སེམས་འཁྲུལ་པ་རྣམས་ཀྱི་སླད་དུ་མ་ལགས། འདོད་པའི་
འདམ་དུ་བྱིང་བ་རྣམས་ཀྱི་སླད་དུ་མ་ལགས། གཡོན་ཅན་རྣམས་ཀྱི་སླད་དུ་མ་ལགས། སྒྱུ་ཅན་རྣམས་ཀྱི་སླད་དུ་མ་ལགས། བགྱིས་པ་མི་གཟོ་བ་རྣམས་ཀྱི་སླད་དུ་མ་ལགས། སྡིག་པ་འཚལ་བ་རྣམས་ཀྱི་སླད་དུ་མ་
མ་ལགས། སྡིག་པ་སྤྱོད་པ་རྣམས་ཀྱི་སླད་དུ་མ་ལགས། ཚུལ་ཁྲིམས་ཉམས་པ་རྣམས་ཀྱི་སླད་དུ་མ་ལགས། ཚུལ་ཁྲིམས་ཡོངས་སུ་མ་དག་པ་རྣམས་ཀྱི་སླད་དུ་མ་ལགས། ལྟ་བ་ཉམས་པ་རྣམས་ཀྱི་སླད་དུ་
མ་ལགས། བདུད་ཀྱི་སྤྱོད་ཡུལ་ལ་སྤྱོད་པ་རྣམས་ཀྱི་སླད་དུ་མ་ལགས། བདག་ལ་སྟོད་པ་རྣམས་ཀྱི་སླད་དུ་མ་ལགས། གཞན་ལ་སྨོད་པ་རྣམས་ཀྱི་སླད་དུ་མ་ལགས། རྙེད་པ་དང་བཀུར་སྟི་ལ་གདུ་བ་རྣམས་ཀྱི་
སླད་དུ་མ་ལགས། ལྷུང་བཟེད་དང་ཆོས་གོས་ལ་ཆགས་པ་རྣམས་ཀྱི་སླད་དུ་མ་ལགས། ཚུལ་འཆོས་པ་རྣམས་ཀྱི་སླད་དུ་མ་ལགས། ཁ་གསག་ཅན་རྣམས་ཀྱི་སླད་དུ་མ་ལགས། གཞོག་སློངས་ཅན་རྣམས་ཀྱི་སླད་དུ་མ་ལགས། 
39-1-22b


ཐོབ་ཀྱིས་འཇལ་བ་རྣམས་ཀྱི་སླད་དུ་མ་ལགས། རྙེད་པ་ལས་རྙེད་པ་སྒྲུབ་པ་རྣམས་ཀྱི་སླད་དུ་མ་ལགས་ཏེ། བཅོམ་ལྡན་འདས་སེམས་ཅན་དེ་ལྟ་བུ་རྣམས་ཀྱི་སླད་དུ་བདག་དེ་བཞིན་གཤེགས་པ་ལ་ཞུ་བ་མ་ལགས་སོ། །བཅོམ་ལྡན་འདས་
སེམས་ཅན་གང་དག་ཐམས་ཅད་མཁྱེན་པའི་ཡེ་ཤེས་ཚོལ་བ་དང་། ཆགས་པ་མ་མཆིས་པའི་ཡེ་ཤེས་དང་། རང་བྱུང་གི་ཡེ་ཤེས་དང་། མི་མཉམ་པ་དང་མཉམ་པའི་ཡེ་ཤེས་དང་། བླ་ན་མེད་པའི་ཡེ་ཤེས་ཚོལ་བ་དེ་དག་དང་། གང་དག་
བདག་དང་ཕ་རོལ་ཀྱང་མི་དམིགས་ན། བདག་ལ་སྟོད་པ་དང་། གཞན་ལ་སྨོད་པ་ལྟ་ག་ལ་མཆིས་ཏེ། བཅོམ་ལྡན་འདས་རྭ་བཅད་པ་ལྟ་བུར་ང་རྒྱལ་མ་མཆིས་པ། ཟུག་རྔུ་ཕྱུང་བ། གདོལ་ལྟ་བུར་སེམས་དམའ་བ། སེམས་ས་དང་ཆུ་དང་
མེ་དང་རླུང་དང་ནམ་མཁའ་དང་མཚུངས་པའི་སེམས་ཅན་རྣམས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སླད་དུ་བདག་དེ་བཞིན་གཤེགས་པ་ལ་ཞུ་ལགས་སོ། །བཅོམ་ལྡན་འདས་གང་དག་ཆོས་ཀྱང་མི་དམིགས་
ཤིང་། རློམ་སེམས་སུ་མི་བགྱིད་ལ་མངོན་པར་ཞེན་པ་མ་མཆིས་ན། ཆོས་མ་ལགས་པ་ལྟ་ག་ལ་མཆིས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་སླད་དུ་བདག་དེ་བཞིན་གཤེགས་པ་ལ་ཞུ་ལགས་སོ། །བཅོམ་
ལྡན་འདས་བསམ་པ་དག་པ། གཡོ་མ་མཆིས་པ། སྒྱུ་མ་མཆིས་པ། དྲང་བ་སེམས་མཉམ་པ། སེམས་ཅན་ཐམས་ཅད་ལ་སྨན་པ་དང་། སྙིང་བརྩེ་བ་ཅན་ཡང་དག་པར་འཛིན་དུ་སྩོལ་བ། ཡང་དག་པར་གཟེང་བསྟོད་པ། ཡང་དག་པར་དགའ་
བར་བགྱིད་པ། ཁུར་ཆེན་པོ་ཁྱེར་བ། ཐེག་པ་ཆེན་པོ་ལ་མངོན་པར་ཞུགས་པ། བགྱི་བ་ཆེན་པོས་སོ་སོར་ཉེ་བར་གནས་པ། སྙིང་རྗེ་ཆེན་པོ་དང་ལྡན་པ། སེམས་ཅན་ཐམས་ཅད་བདེ་བ་ཐོབ་པར་བགྱིད་པ་འདྲེན་པ། རྣམ་པར་འདྲེན་པ། ཡོངས་སུ་འདྲེན་པ། 
ཆོས་ཐམས་ཅད་ལ་མི་རྟེན་པར་གནས་པ། སྐྱེ་བའི་གནས་ཐམས་ཅད་མི་ཚོལ་བ། བདུད་ཀྱི་ཞགས་པ་ཐམས་ཅད་ལས་རྣམ་པར་གྲོལ་བ། འདུན་པ་ཅན་བརྩོན་འགྲུས་དང་ལྡན་པ། བག་མཆིས་པ། ཆོས་ཐམས་ཅད་ཀྱི་དམ་པའི་ཕ་རོལ་དུ་ཕྱིན་པ། 
39-1-23a


ཐེ་ཚོམ་ཐམས་ཅད་གཅོད་པ་ལ་མཁས་པའི་སེམས་ཅན་རྣམས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སླད་དུ་བཅོམ་ལྡན་འདས་བདག་དེ་བཞིན་གཤེགས་པ་ལ་ཞུ་ལགས་སོ། །བཅོམ་ལྡན་
འདས་སེམས་ཅན་གང་དག་སངས་རྒྱས་ཀྱི་ཡེ་ཤེས་ལ་ཡང་རློམ་སེམས་སུ་མི་བགྱིད་ཅིང་མངོན་པར་མི་ཞེན་ལ་ཆགས་པར་མི་གནས་ཤིང་། རློམ་སེམས་ཐམས་ཅད་ལས་ཡང་དག་པར་འདས་པའི་ལམ་ལ་གནས་པ། 
ལམ་དུ་ཞུགས་པ། ལམ་སྟོན་པའི་སེམས་ཅན་རྣམས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་སླད་དུ་བཅོམ་ལྡན་འདས་བདག་དེ་བཞིན་གཤེགས་པ་ལ་ཞུ་ལགས་སོ། །བཅོམ་ལྡན་འདས་བདག་ནི་སེམས་ཅན་ཐམས་
ཅད་ལ་བདེ་བ་དང་། ལྟག་ན་མ་མཆིས་པའི་བདེ་བ་དང་། བླ་ན་མ་མཆིས་པའི་བདེ་བ་དང་། མྱ་ངན་ལས་འདས་པའི་བདེ་བ་དང་། སངས་རྒྱས་ཀྱི་བདེ་བ་དང་། འདུས་མ་བགྱིས་ཀྱི་བདེ་བ་ཉེ་བར་བསྒྲུབ་པར་འཚལ་ཏེ། བདག་སེམས་ཅན་ཐམས་ཅད་ཀྱི་
དོན་དང་། སྨན་པ་དང་། བདེ་བ་དང་། གྲུབ་པ་དང་། བདེ་བའི་སླད་དུ་དེ་བཞིན་གཤེགས་པ་ལ་ཞུ་ལགས་སོ། །བཅོམ་ལྡན་འདས་བདག་ནི་ཐེ་ཚོམ་མ་མཆིས་པར་འཚལ་ཞིང་ཐེ་ཚོམ་མ་མཆིས་ནས་ཀྱང་སེམས་ཅན་རྣམས་ཀྱི་ཐེ་ཚོམ་རབ་ཏུ་
སྤང་བའི་སླད་དུ་ཆོས་བཤད་པར་འཚལ་ཏེ། བཅོམ་ལྡན་འདས་བདག་སེམས་ཅན་ཐམས་ཅད་ཀྱི་ཐེ་ཚོམ་བསལ་བའི་སླད་དུ་བཅོམ་ལྡན་འདས་ལ་ཞུ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་སེམས་ཅན་ཐམས་
ཅད་ནི་སྡུག་བསྔལ་དང་མི་མཐུན་ཞིང་བདེ་བ་འཚལ་ལ། སེམས་ཅན་ཐམས་ཅད་ནི་བདེ་བ་དོན་དུ་གཉེར་བ་ལགས་ཏེ། བཅོམ་ལྡན་འདས་ཤེས་རབ་མ་གཏོགས་པར་གཞན་སེམས་ཅན་རྣམས་ཀྱི་བདེ་བ་གང་ཡང་བདག་གིས་
མ་མཐོང་ཞིང་། བཅོམ་ལྡན་འདས་བྱང་ཆུབ་སེམས་དཔའི་ཐེག་པ་ཐེག་པ་ཆེན་པོ་མ་གཏོགས་པར་གཞན་སེམས་ཅན་རྣམས་ཀྱི་བདེ་བ་གང་ཡང་མ་མཆིས་ཏེ། བཅོམ་ལྡན་འདས་བདག་གིས་དོན་གྱི་དབང་འདི་མཐོང་བས་སེམས་
39-1-23b


ཅན་རྣམས་ལ་བདེ་བ་ཉེ་བར་བསྒྲུབ་པར་འཚལ་བའི་སླད་དུ་ཤེས་རབ་ཀྱི་ཕ་རོལ་དུ་ཕྱིན་པ་ཞུ་ལགས་སོ། །བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་དོན་འདི་ཡང་དག་པར་མཐོང་བས་བདག་གིས་དེ་བཞིན་གཤེགས་པ་ལ་
དོན་འདི་ཞུ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཀྱི་རྩལ་གྱིས་རྣམ་པར་གནོན་པ་ལ་འདི་སྐད་ཅེས་བཀའ་སྩལ་ཏོ། །རབ་ཀྱི་རྩལ་གྱིས་རྣམ་པར་གནོན་པ་
ལེགས་སོ། །ལེགས་སོ། །ཁྱོད་སྐྱེ་བོ་ཕལ་པོ་ཆེ་ལ་སྙིང་བརྩེ་བའི་ཕྱིར་དེ་བཞིན་གཤེགས་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འདྲི་བ་ནི་ཁྱོད་ཀྱི་ཡོན་ཏན་གྱི་མཐའ་རྟོགས་པར་སླ་བ་མ་ཡིན་ནོ། །དེའི་ཕྱིར་རབ་ཀྱི་རྩལ་གྱིས་རྣམ་པར་གནོན་
པ་ལེགས་པར་ཉོན་ལ་རབ་ཏུ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་ལེགས་སོ་ཞེས་གསོལ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཀྱི་རྩལ་གྱིས་རྣམ་པར་གནོན་པ་བཅོམ་ལྡན་འདས་ཀྱི་ལྟར་ཉན་པ་དང་། 
བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །རབ་ཀྱི་རྩལ་གྱིས་རྣམ་པར་གནོན་པ་ཁྱོད་འདི་སྐད་དུ་བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་ཤེས་རབ་ཀྱི་ཕ་རོལ་དུ་ཕྱིན་པ་ཞེས་བགྱི་བ། བཅོམ་ལྡན་འདས་ཇི་ཙམ་གྱིས་ན་
བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་ཕ་རོལ་དུ་ཕྱིན་པ་ཞེས་བགྱི་ཞེས་ཟེར་བ་ནི། རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་གིས་ཀྱང་བརྗོད་པར་བྱ་བ་མ་ཡིན་ཏེ། ཤེས་རབ་ཀྱི་ཕ་རོལ་དུ་
ཕྱིན་པ་ནི་ཚིག་ཐམས་ཅད་ལས་འདས་པའོ། །རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་འདི་ཤེས་རབ་ཀྱི་ཕ་རོལ་དུ་ཕྱིན་པའོ། །འདིའི་ཤེས་རབ་ཀྱི་ཕ་རོལ་དུ་ཕྱིན་པའོ། །འདིས་ཤེས་རབ་ཀྱི་ཕ་རོལ་དུ་
ཕྱིན་པའོ། །འདིའི་ཕྱིར་ཤེས་རབ་ཀྱི་ཕ་རོལ་དུ་ཕྱིན་པའོ་ཞེས་བརྗོད་པར་མི་ནུས་སོ། །རབ་ཀྱི་རྩལ་གྱིས་རྣམ་པར་གནོན་པ་འདི་ནི་ཆོས་ཐམས་ཅད་ཀྱི་ཕ་རོལ་དུ་ཕྱིན་པ་ཡིན་ཏེ། དེའི་ཕྱིར་ཤེས་རབ་ཀྱི་ཕ་རོལ་དུ་ཕྱིན་པ་ཞེས་
39-1-24a


བྱའོ། །རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཉིད་ཀྱང་དེ་བཞིན་གཤེགས་པས་མ་བརྙེས་མ་དམིགས་ན་ཤེས་རབ་ཀྱི་ཕ་རོལ་དུ་ཕྱིན་པ་ལྟ་དམིགས་པར་ག་ལ་འགྱུར། རབ་ཀྱི་རྩལ་གྱིས་རྣམ་པར་གནོན་
པ་ཤེས་རབ་ཅེས་བྱ་བ་འདི་ནི་ཆོས་ཐམས་ཅད་ཀུན་དུ་ཤེས་པ་འདི་ནི་ཆོས་ཐམས་ཅད་ཀུན་དུ་རིག་པ་སྟེ། དེའི་ཕྱིར་ཤེས་རབ་ཅེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་ཆོས་ཐམས་ཅད་ཀུན་དུ་རིག་པ་གང་ཞེ་ན། ཆོས་འདི་དག་
ཐམས་ཅད་ནི་རྣམ་པ་གཞན་ན་ཆོས་ཐམས་ཅད་རྣམ་པ་གཞན་དུ་བརྗོད་དེ། ཆོས་ཐམས་ཅད་ནི་བརྗོད་པ་ལས་རྣམ་པར་གྲོལ་བ་མ་ཡིན་ནོ། །གང་ཆོས་ཐམས་ཅད་ཀུན་དུ་ཤེས་པ་དང་། གང་ཆོས་ཐམས་ཅད་ཀུན་དུ་རིག་པ་དེ་ཡང་ཚིག་
གིས་བརྗོད་པར་མི་ནུས་མོད་ཀྱི། འོན་ཀྱང་ཇི་ལྟར་སེམས་ཅན་རྣམས་ཀྱིས་ཤེས་པར་གྱུར་པ་དེ་ལྟར་ཤེས་རབ་ཅེས་བྱའོ། །འདི་ནི་བཏགས་པ་ཞེས་བྱ་སྟེ། དེའི་ཕྱིར་ཤེས་རབ་ཅེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་ཆོས་
ཐམས་ཅད་ནི་གདགས་སུ་མེད། གཟུང་དུ་མེད། བཤད་དུ་མེད། སྣང་བ་མེད་དེ། དེ་ལྟ་བུར་ཀུན་དུ་རིག་པ་དེ་ནི་ཀུན་དུ་རིག་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཅེས་བྱ་བ་དེ་ནི་ཀུན་ཤེས་པ་ཡང་མ་
ཡིན། ཀུན་མི་ཤེས་པ་ཡང་མ་ཡིན། དེ་ལས་ཀྱང་མ་ཡིན་། དེ་ལས་མ་ཡིན་པ་ཡང་མ་ཡིན་ཏེ། དེའི་ཕྱིར་ཤེས་རབ་ཅེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ནི་མི་ཤེས་པའི་སྤྱོད་ཡུལ་ཡང་མ་ཡིན། 
ཡེ་ཤེས་ཀྱི་སྤྱོད་ཡུལ་ཡང་མ་ཡིན། མི་ཤེས་པའི་ཡུལ་ཡང་མ་ཡིན། ཡེ་ཤེས་ཀྱི་ཡུལ་ཡང་མ་ཡིན་ཏེ། ཡེ་ཤེས་ནི་ཡུལ་མེད་པའོ། །གལ་ཏེ་ཡེ་ཤེས་ལ་ཡུལ་ཡོད་དུ་ཟིན་ན་མི་ཤེས་པར་འགྱུར་རོ། །ཡེ་ཤེས་
ནི་མི་ཤེས་པ་ལས་མ་ཡིན། མི་ཤེས་པ་ཡང་ཡེ་ཤེས་ལས་མ་ཡིན། ཡེ་ཤེས་ནི་མི་ཤེས་པ་མ་ཡིན། མི་ཤེས་པ་ཡང་ཡེ་ཤེས་མ་ཡིན་ཏེ། ཡེ་ཤེས་ཀྱིས་ཡེ་ཤེས་ཤེས་བྱའོ། །ཡེ་ཤེས་ཀྱིས་མི་ཤེས་པ་ཞེས་མི་བྱའོ། །མི་ཤེས་པ་ཡེ་ཤེས་
39-1-24b


ཤེས་བྱའོ། །དེ་ལ་ཡེ་ཤེས་དེ་ནི་འདིའོ། །ཡེ་ཤེས་དེ་ནི་འདིས་སོ། །ཡེ་ཤེས་དེ་ནི་འདིའི་ཕྱིར་རོ་ཞེས་ཡེ་ཤེས་ཅུང་ཟད་ཀྱང་བསྟན་པར་མི་ནུས་ཏེ། དེའི་ཕྱིར་ཡེ་ཤེས་དེ་ནི་ཡེ་ཤེས་ཉིད་ཀྱིས་མེད་དོ། །ཡེ་ཤེས་ཀྱང་ཡེ་ཤེས་སུ་མི་གནས་ཏེ། མི་ཤེས་པས་
ཀྱང་ཡེ་ཤེས་ཤེས་མི་བྱའོ། །གལ་ཏེ་མི་ཤེས་པས་ཡེ་ཤེས་ཤེས་བྱ་ན་ནི་དེའི་ཕྱིར་བྱིས་པ་སོ་སོའི་སྐྱེ་བོ་ཐམས་ཅད་ཀྱང་ཡེ་ཤེས་ཅན་དུ་འགྱུར་རོ། །གང་ཡེ་ཤེས་དང་མི་ཤེས་པ་མི་དམིགས་ཤིང་ཡེ་ཤེས་དང་མི་ཤེས་པ་ཡང་དག་པ་ཇི་ལྟ་བ་བཞིན་
དུ་ཡོངས་སུ་ཤེས་པ་དེ་ཉིད་ཡེ་ཤེས་ཤེས་བྱ་སྟེ། ཡེ་ཤེས་ནི་ཇི་སྐད་དུ་བརྗོད་པ་དེ་བཞིན་དུ་མ་ཡིན་ནོ། །དེ་བས་ན་ཡེ་ཤེས་ནི་བརྗོད་པར་བྱ་བ་མ་ཡིན་ཞིང་ཡུལ་ཐམས་ཅད་ལས་རབ་ཏུ་འདས་པ་སྟེ། ཡེ་ཤེས་ནི་གང་གི་ཡུལ་ཡང་མ་ཡིན་ནོ། །
ཡེ་ཤེས་ཀྱི་ཡུལ་ཡང་གང་ཡང་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་ཡེ་ཤེས་བསྟན་པ་ཡུལ་ཡང་མ་ཡིན། ཕྱོགས་ཀྱང་མ་ཡིན་པ་འདི་གང་གིས་ཤེས་པ་དེ་ནི་ཡེ་ཤེས་ཅན་ནམ། ཡེ་ཤེས་ཅན་མ་ཡིན་པ་ཞེས་བྱ་བའི་གྲངས་སུ་མི་འགྲོའོ། །རབ་ཀྱི་
རྩལ་གྱིས་རྣམ་པར་གནོན་པ་གང་འདི་ལྟར་རབ་ཏུ་ཤེས་པ་དང་། རྗེས་སུ་རྟོགས་པ་དང་། ཀུན་ཤེས་པ་དེ་ནི་ཤེས་རབ་ཅེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་གང་འདི་ལྟར་མངོན་པར་རྟོགས་པ་མངོན་སུམ་དུ་བྱེད་པ་དེ་ནི་འཇིག་རྟེན་ལས་འདས་པའི་
ཤེས་རབ་ཅེས་བྱ་སྟེ། འཇིག་རྟེན་ལས་འདས་པའི་ཤེས་རབ་ཅེས་ཇི་སྐད་དུ་བརྗོད་པ་བཞིན་དུ་ནི་མ་ཡིན་ནོ། །དེ་ཅིའི་ཕྱིར་ཞེ་ན། འཇིག་རྟེན་ཉིད་ཀྱང་མི་དམིགས་ན་འཇིག་རྟེན་ལས་འདས་པའི་ཤེས་རབ་ལྟ་ག་ལ་ཡོད་དེ། འཇིག་རྟེན་ལས་
འདས་པའི་ཤེས་རབ་ཀྱིས་གང་འཇིག་རྟེན་ལས་སྒྲོལ་བར་འགྱུར་བ་ལྟ་ཅི་སྨོས་དེ་ཅིའི་ཕྱིར་ཞེ་ན། དེས་འཇིག་རྟེན་མི་དམིགས་པས་ཅི་ཡང་སྒྲོལ་བར་མི་བྱེད་དེ། དེའི་ཕྱིར་འཇིག་རྟེན་ལས་འདས་པའི་ཤེས་རབ་ཅེས་བྱའོ། །རབ་ཀྱི་རྩལ་གྱིས་
རྣམ་པར་གནོན་པ་འཇིག་རྟེན་ཞེས་བྱ་བ་འདི་ནི་བཏགས་པ་ཞེས་བརྗོད་པ་སྟེ། བཏགས་པ་ནི་འཇིག་རྟེན་ལས་ཡང་དག་པར་འདས་པ་མ་ཡིན་གྱི། བཏགས་པ་ཐམས་ཅད་ལས་ཡང་དག་པར་འདས་པ་ནི་འཇིག་རྟེན་ལས་འདས་པ་
39-1-25a


ཞེས་བྱའོ། །འདའ་བར་བྱ་བ་ནི་འཇིག་རྟེན་ལས་འདས་པ་མ་ཡིན་གྱི། འདའ་བར་མི་བྱ་བ་ནི་འཇིག་རྟེན་ལས་འདས་པའོ། །དེ་ཅིའི་ཕྱིར་ཞེ་ན། དེ་ལ་གང་འདའ་བར་བྱ་བ་འམ་གང་གིས་འདའ་བར་བྱ་བའི་ཆོས་ཕྲ་རབ་ཙམ་ཡང་མེད་
པས་དེའི་ཕྱིར་འདས་པ་ཞེས་བྱ་སྟེ། འཇིག་རྟེན་ལས་འདས་པ་ལ་ནི་འཇིག་རྟེན་ཡང་མེད་འཇིག་རྟེན་ལས་འདས་པ་ཡང་མེད་དོ། །བླ་ན་མེད་པ་ལ་ནི་བསྒྲལ་བ་མེད་དེ། དེའི་ཕྱིར་འཇིག་རྟེན་ལས་འདས་པ་ཞེས་བྱའོ། །རབ་ཀྱི་རྩལ་
གྱིས་རྣམ་པར་གནོན་པ་འདི་ནི་འཇིག་རྟེན་ལས་འདས་པའི་ཤེས་རབ་བསྟན་པ་ཞེས་བྱ་སྟེ། འཇིག་རྟེན་ལས་འདས་པའི་ཤེས་རབ་ཅེས་ཇི་སྐད་དུ་བརྗོད་པ་བཞིན་དུ་ནི་མ་ཡིན་ནོ། །དེ་ཅིའི་ཕྱིར་ཞེ་ན། འཇིག་རྟེན་ལས་འདས་པ་ནི་
བརྗོད་པར་བྱ་བ་མ་ཡིན་གྱི་དེ་ནི་རྒལ་བ་སྟེ། དེ་ལ་ནི་འདའ་བར་བྱ་བ་ཅི་ཡང་མེད་པས་དེའི་ཕྱིར་འཇིག་རྟེན་ལས་འདས་པའི་ཤེས་རབ་ཅེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལ་གང་ངེས་པར་རྟོགས་པའི་ཤེས་རབ་
དེས་ཅི་ངེས་པར་རྟོགས། འདི་ལ་ནི་ངེས་པར་རྟོགས་པར་བྱ་བ་ཅི་ཡང་མེད་དོ། །གལ་ཏེ་ངེས་པར་རྟོགས་པར་བྱ་བ་འགའ་ཞིག་ཡོད་དུ་ཟིན་ན་ནི་དེ་ཤེས་རབ་ཀྱིས་ངེས་པར་རྟོགས་པ་ཞེས་གདགས་ན། གང་གིས་ཀྱང་མི་རྟོགས་
ཤིང་ཀུན་རྟོགས་པ་མ་ཡིན་ལ་གང་གིས་རྟོགས་པར་འགྱུར་བའི་བྱེ་བྲག་གང་ཡང་མི་དམིགས་སོ། །ངེས་པར་རྟོགས་པ་ཞེས་བྱ་བ་ནི་འདི་ལ་རྟོགས་པར་བྱེད་པ་ཅི་ཡང་མེད་ཅིང་ཀུན་རྟོགས་པར་བྱ་བ་ཡང་མེད་དེ། དེ་ལ་རྟོགས་པར་
བྱེད་པ་ཅི་ཡང་མེད་ཅིང་ཀུན་རྟོགས་པར་བྱ་བ་ཡང་མེད་པས་དེའི་ཕྱིར་ངེས་པར་རྟོགས་པ་ཞེས་བྱའོ། །འདི་ལ་ནི་གང་ཡང་མཐར་འགྲོ་བ་མེད་ཅིང་དབུས་སུ་ཡང་མ་ཡིན་ཏེ་དེའི་ཕྱིར་ངེས་པར་རྟོགས་པ་ཞེས་བྱའོ། །ངེས་པར་རྟོགས་པའི་ཤེས་རབ་ཀྱིས་
རྟོགས་པ་ནི་སྟེང་མ་རྟོགས་ཏེ། གང་དུ་ཡང་མི་རྒྱུག །རྣམ་པར་མི་རྒྱུག །ཀུན་དུ་མི་རྒྱུག་སྟེ་དེའི་ཕྱིར་ངེས་པར་རྟོགས་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་ངེས་པར་རྟོགས་ཤེས་བྱ་བའི་ཤེས་རབ་ཀྱིས་ཅི་ངེས་པར་རྟོགས་ཤེ་ན། གང་ཅི་སྣང་
39-1-25b


བ་དེ་ཐམས་ཅད་ངེས་པར་རྟོགས་སོ། །གང་གིས་ངེས་པར་རྟོགས་ཤེ་ན། ཤེས་རབ་ཀྱིས་སོ། །ཤེས་རབ་ཀྱིས་ཇི་ལྟར་ངེས་པར་རྟོགས་ཤེ་ན། གང་བཏགས་པའི་མཚན་ཉིད་དེ་ཐམས་ཅད་མཚན་ཉིད་མེད་པ་དང་། མཚན་ཉིད་མེད་པ་
ཡང་བཏགས་པའི་མཚན་ཉིད་དུའོ། །རབ་ཀྱི་རྩལ་གྱིས་རྣམ་པར་གནོན་པ་གང་འདི་ལྟ་བུའི་ཤེས་རབ་དང་ལྡན་པས་ངེས་པར་རྟོགས་པ་དེས་ནི་ཁམས་གསུམ་རྟོགས་སོ། །ཇི་ལྟར་རྟོགས་ཤེ་ན། ཁམས་གསུམ་ནི་ཁམས་
མེད་པར་རྟོགས་ཏེ། འདི་ལ་ནི་ཁམས་རྟོགས་པ་ཅི་ཡང་མེད་དོ། །དེས་ཁམས་གསུམ་ནི་ཁམས་མེད་པར་རྟོགས་སོ། །གང་དེ་ལྟར་ཁམས་གསུམ་ཁམས་མེད་པར་ངེས་པར་རྟོགས་པ་དང་། གང་གིས་དེ་ལྟར་ཁམས་གསུམ་ངེས་པར་རྟོགས་པ་
དེ་ནི་ངེས་པར་རྟོགས་པའི་ཤེས་རབ་དང་ལྡན་པ་ཞེས་བྱའོ། །ཇི་ལྟར་ན་ངེས་པར་རྟོགས་པའི་ཤེས་རབ་དང་ལྡན་ཞེ་ན་ངེས་པར་རྟོགས་པར་བྱ་བ་ནི་མི་དགེ་བ་གང་ཡང་མེད་དེ། དེས་ཐམས་ཅད་དགེ་བར་ངེས་པར་རྟོག་ཏེ། དེ་ངེས་པར་
རྟོགས་པའི་ཤེས་རབ་ཀྱིས་རབ་ཏུ་འདའ་འོ། །དེ་ལྟར་རྟོགས་པའི་ཤེས་རབ་དང་ལྡན་པས་གང་ཅི་མཐོང་བ་དང་། ཐོས་པ་དང་། སྣམས་པ་དང་། མྱངས་པ་དང་རེག་པ་དང་། རྣམ་པར་ཤེས་པ་དེ་དག་ཐམས་ཅད་ངེས་པར་རྟོགས་སོ། །
ཇི་ལྟ་བུར་རྟོགས་ཞེ་ན། མི་རྟག་པ་དང་སྡུག་བསྔལ་བ་དང་། འབྲས་དང་ནད་དང་། ཟུག་རྔུ་དང་སྟོང་པ་ཉིད་དང་། སྡིག་པ་དང་གནོན་པ་དང་། མཐའ་མ་དང་འཇིག་པ་དང་། འཇིག་པའི་ཆོས་ཉིད་དང་། གཡོ་བ་དང་། འཇིག་པའི་
ཚུལ་ཅན་དང་། བདག་མེད་པ་དང་། མི་སྐྱེ་བ་དང་། མི་འགོག་པ་དང་། མཚན་ཉིད་མེད་པ་ཏེ། རབ་ཀྱི་རྩལ་གྱིས་རྣམ་པར་གནོན་པ་དེ་ནི་བསིལ་བར་གྱུར་པ་ཟུག་རྔུ་མེད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་
འདི་ལྟ་སྟེ། དཔེར་ན་ཟུག་རྔུ་མེད་པ་ཞེས་བྱ་བའི་སྨན་གྱི་རིགས་དེ་གང་ན་འདུག་པ་དེ་ན་ཟུག་རྔུ་ཐམས་ཅད་སེལ་ཅིང་ངེས་པར་འདོན་ཏོ། །དེ་བཞིན་དུ་འདི་ལྟ་བུའི་ཆོས་རྣམས་དང་ལྡན་པའི་དགེ་སློང་ནི་ཟུག་རྔུ་མེད་ཅིང་བསིལ་བར་གྱུར་
39-1-26a


ལ་ངེས་པར་རྟོགས་པའི་ཤེས་རབ་དང་ལྡན་ཞིང་དྲུག་ལ་རྟག་ཏུ་གནས་ལ། ངེས་པར་རྟོགས་པའི་ཤེས་རབ་ཀྱིས་ཁམས་གསུམ་ཐམས་ཅད་ལ་མི་ཆགས་ཤིང་བདུད་ཀྱི་ཞགས་པ་ཐམས་ཅད་ལས་
རབ་ཏུ་འདས་སོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ་དཔེར་ན་རྡོ་རྗེ་ནི་དབུག་པའི་ཕྱིར་གང་དུ་བཙུགས་པ་དེ་དང་དེ་ཉིད་ངེས་པར་ཕིགས་སོ། །དེ་བཞིན་དུ་དགེ་སློང་གིས་ངེས་པར་རྟོགས་པའི་ཤེས་རབ་ཀྱིས་ཡོངས་
སུ་ཟིན་པའི་རྡོ་རྗེ་ལྟ་བུའི་ཏིང་ངེ་འཛིན་གང་དུ་བཙུགས་པ་དང་། གང་དུ་སྤྱོད་པ་དེ་དག་ཐམས་ཅད་ངེས་པར་རྟོགས་སོ། །དེ་ངེས་པར་རྟོགས་པའི་ཤེས་རབ་འཇིག་རྟེན་ལས་འདས་པ་ཡང་དག་པར་སྡུག་བསྔལ་ཟད་པར་
འགྱུར་བ་དང་ལྡན་པས་ཆགས་པ་མེད་པ་ནི་གསུམ་རིག་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་རིག་པ་ཞེས་བྱ་བ་དེ་མ་རིག་པ་ཉེ་བར་ཞི་བའི་ཚིག་བླ་དགས་སོ། །མ་རིག་པ་ཡོངས་སུ་ཤེས་པ་ཤེས་བྱ་བ་དེ་ནི་
སྡུག་བསྔལ་གྱི་ཕུང་པོ་ཉེ་བར་ཞི་བའི་ཚིག་བླ་དགས་སོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སྨན་པ་མཁས་པ་གསལ་བ། ཡིད་རྣོ་བ། ལྷག་པར་རྟོགས་པ་དང་ལྡན་པ། སྨན་ཐམས་ཅད་ལ་
མཁས་པ། ནད་ལྡང་བ་ཐམས་ཅད་ལ་མཁས་པ། སྡུག་བསྔལ་ཐམས་ཅད་ལས་རྣམ་པར་འགྲེལ་བ་དེས་ནད་པ་གང་དང་གང་ལ་གསོ་བར་བྱས་པ་དེ་དང་དེ་འཚོའོ། །དེ་ཅིའི་ཕྱིར་ཞེ་ན། འདི་ལྟ་སྟེ་དེ་སྨན་ཐམས་ཅད་ལ་མཁས་
ཤིང་ནད་ལྡང་བ་ཐམས་ཅད་ལ་མཁས་ཏེ། ནད་ཐམས་ཅད་ལས་ཐར་བར་བྱེད་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་རིག་པ་གསུམ་པོས་ནི་མ་རིག་པ་ཐམས་ཅད་ཉེ་བར་ཞི་བར་འགྱུར། 
སྡུག་བསྔལ་ཐམས་ཅད་འཇོམས་པར་འགྱུར། རྒ་ཤི་དང་མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ཐམས་ཅད་ཉེ་བར་ཞི་བར་འགྱུར་ཏེ། རབ་ཀྱི་རྩལ་གྱིས་རྣམ་པར་
39-1-26b


གནོན་པ་དེ་ནི་འཇིག་རྟེན་ལས་འདས་པའི་ཤེས་རབ་ངེས་པར་རྟོགས་པར་འགྲོ་བ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་ངས་འདི་ལ་དགོངས་ནས། སྲིད་པར་སྐྱེ་བར་ཡོངས་ཟད་པར་གང་གིས་ཡང་དག་པར་
ཤེས་པ། གང་རྣམས་རྟོགས་པར་འགྲོ་བ་དེ། འཇིག་རྟེན་ན་ནི་ཤེས་རབ་མཆོག་ཅེས་བཤད་དོ། །རབ་ཀྱི་རྩལ་གྱིས་རྣམ་པར་གནོན་པ་སྲིད་པར་སྐྱེ་བ་ཡོངས་སུ་ཟད་པ་ཞེས་བྱ་བ་གང་གི་ཚིག་བླ་དགས་ཡིན་ཞེ་ན། དེ་ནི་འབྱུང་བ་དང་ནུབ་པ་
རབ་ཏུ་རྟོགས་པའི་ཚིག་བླ་དགས་སོ། །འབྱུང་བ་དང་ནུབ་པ་གང་ཞེ་ན། ཀུན་འབྱུང་བའི་ཆོས་ཅི་ཡང་རུང་སྟེ་དེ་ཐམས་ཅད་ནི་འགོག་པའི་ཆོས་ཏེ། འདི་ལྟར་ཀུན་འབྱུང་བ་དང་ནུབ་པར་རབ་ཏུ་རྟོགས་སོ། །རབ་ཀྱི་རྩལ་གྱིས་རྣམ་པར་
གནོན་པ་ཀུན་འབྱུང་བ་ཞེས་བྱ་བ་དེ་ནི་འབྱུང་བའི་ཚིག་བླ་དགས་སོ། །ནུབ་པ་ཞེས་བྱ་བ་དེ་ནི་འགོག་པའི་ཚིག་བླ་དགས་ཏེ། འབྱུང་བ་དང་ནུབ་པ་ཞེས་ཇི་སྐད་དུ་བརྗོད་པ་དེ་བཞིན་དུ་ནི་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་
ཀུན་འབྱུང་བ་གང་ཅི་ཡང་རུང་སྟེ། དེ་ནི་ཀུན་འབྱུང་བའི་ཆོས་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་མཉམ་པ་ལ་འབྱུང་བ་གང་ཡང་མེད་དེ། དེ་ནི་ཀུན་དུ་འབྱུང་བར་མི་འགྱུར་རོ། །དེ་མཉམ་པ་ཉིད་ཀྱི་རྗེས་སུ་སོང་སྟེ་དེའི་ཕྱིར་
ཀུན་འབྱུང་བ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་མཉམ་པའི་རྗེས་སུ་སོང་བ་ཞེས་བྱ་བ་ནི་འདི་ལ་འབྱུང་བ་གང་ཡང་མེད་དེ་ཀུན་འབྱུང་བར་མི་འགྱུར་རོ། །དེའི་རང་བཞིན་དེ་ནི་རང་གི་ངང་གིས་འཇིག་ཅིང་དེ་ནི་འགོག་པ་སྟེ། 
དེ་ལ་ནི་འགོག་པ་གང་ཡང་མེད་དོ། །མཉམ་པ་ནི་བླ་ན་མེད་པའི་འགོག་པ་སྟེ། གང་ལ་སྐྱེ་བ་མེད་པ་དེ་ལ། འགོག་པ་མེད་དེ་དེ་ནི་འགོག་པའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྐྱེ་བ་མེད་ཅིང་འགོག་པ་མེད་པའི་ཕྱིར་གང་འབྱུང་བ་
དང་ནུབ་པ་རྟོགས་པ་དེ་ནུབ་པ་རབ་ཏུ་རྟོགས་པ་སྟེ། དེའི་ཕྱིར་འབྱུང་བ་དང་། ནུབ་པ་རབ་ཏུ་རྟོགས་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་རབ་ཏུ་རྟོགས་ཤེས་བྱ་བ་དེ་ནི་རྟེན་ཅིང་འབྲེལ་བར་འབྱུང་བ་ཡོངས་སུ་ཤེས་པ་ཞེས་བྱའོ། །
39-1-27a


གང་ལ་བརྟེན་ནས་ཆོས་གང་སྐྱེ་བ་དེ་ཉིད་ལ་བརྟེན་ནས་ཆོས་དེ་མེད་དེ། འདི་ནི་རྟེན་ཅིང་འབྲེལ་བར་འབྱུང་བ་རབ་ཏུ་རྟོགས་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ནི་རྟེན་ཅིང་འབྲེལ་བར་འབྱུང་བའི་ཡང་
དག་པ་ཉིད་ཇི་ལྟ་བ་བཞིན་དུ་སྐྱེ་བ་མེད་པར་བསྟན་ཏོ། །མི་སྐྱེ་བ་ནི་རྟེན་ཅིང་འབྲེལ་བར་འབྱུང་བ་སྟེ། མི་འབྱུང་བ་མཉམ་པས་དེའི་ཕྱིར་རྟེན་ཅིང་འབྲེལ་བར་འབྱུང་བ་ཞེས་བྱའོ། །གང་ལ་སྐྱེ་བ་མེད་པ་དེ་ལ་འགོག་པ་ག་ལ་ཡོད་དེ། 
འགོག་པ་དང་མི་འགལ་བ་དེ་ནི་རྟེན་ཅིང་འབྲེལ་བར་འབྱུང་བའི་འགོག་པ་མེད་པ་སྟེ། སྐྱེ་བ་མེད་པ་ནི་རྟེན་ཅིང་འབྲེལ་བར་འབྱུང་བ་ཞེས་བྱའོ། །གང་འབྲེལ་བར་འབྱུང་བ་དེ་ནི་མ་བྱུང་བའོ། །གང་མ་བྱུང་བ་དེ་ནི་འདས་པ་མ་ཡིན། མ་འོངས་པ་
མ་ཡིན། ད་ལྟར་བྱུང་བ་མ་ཡིན་ནོ། །གང་འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན་པ་དེ་ལ་འགོག་པ་མེད་དོ། །གང་འགོག་པ་མེད་པ་དེ་ནི་མི་སྐྱེ་བ་ཤེས་པ་ཞེས་བྱའོ། །གང་གིས་མི་སྐྱེ་བར་ཤེས་པ་དེ་ནི་ཡང་སྐྱེད་པ་མ་
ཡིན་འགོག་པ་མངོན་སུམ་དུ་བྱེད་པའང་མ་ཡིན་ནོ། །གང་མི་བསྐྱེད་པ་དེ་འགོག་པར་མི་བྱེད་དེ་སྐྱེ་བ་ཡོད་ན་ནི་འགོག་པར་ཡང་ཤེས་སོ། །གང་མི་སྐྱེད་པ་དེས་ཆོས་ཐམས་ཅད་འགོག་པ་ཉིད་དུ་ཤེས་ཤིང་མཐོང་ལ་རབ་ཏུ་རྟོགས་ཤིང་མངོན་
སུམ་དུ་བྱས་ཏེ། དེའི་ཕྱིར་འགོག་པ་མངོན་སུམ་དུ་བྱས་པ་ཞེས་བྱའོ། །ཟད་པ་ཤེས་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་མི་ཤེས་པ་ཟད་པ་དེའི་ཕྱིར་ཟད་པ་ཤེས་པ་ཞེས་བྱའོ། །གང་གིས་ཟད་ཅེ་ན། མི་ཟད་པས་
ཟད་དེ་དེའི་ཟད་པ་ཡང་མི་མཐོང་ངོ་། །རབ་ཀྱི་རྩལ་གྱིས་རྣམ་པར་གནོན་པ་མི་ཤེས་པ་མེད་པས། དེའི་ཕྱིར་དེ་ཟད་པ་ཤེས་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་མི་ཤེས་པ་ཡོངས་སུ་ཤེས་པ་དེའི་ཕྱིར་མི་ཤེས་པ་ཟད་དེ་ཟད་
པ་ཤེས་པ་ཞེས་བྱའོ། །མི་ཤེས་པ་ནི་ཟད་པ་འམ་མ་ཟད་པ་མ་ཡིན་ཏེ། འདི་ནི་ཤེས་པ་དང་བྲལ་བའི་ཕྱིར་ཟད་པ་ཤེས་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ནི་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པ་སྟེ། དེའི་ཕྱིར་
39-1-27b


བྲལ་བ་ཞེས་བྱའོ། །མི་ཤེས་པ་དང་བྲལ་བ་དང་། ཤེས་པ་དང་བྲལ་བ་འདི་ལས་གཞན་ཅི་ཡང་མི་དམིགས་སོ། །ཡེ་ཤེས་ཉིད་ཀྱང་མི་དམིགས་ན་གང་ཟད་པ་ལས་རྣམ་པར་གྲོལ་བ་མི་ཤེས་པ་ལྟ་ཅི་སྨོས་ཏེ་དེའི་ཕྱིར་ཟད་པ་ཤེས་པ་ཞེས་བྱ་སྟེ། 
ཇི་སྐད་བརྗོད་པ་བཞིན་དུ་ནི་མ་ཡིན་ནོ། །ཟད་པ་ཤེས་པ་གང་ཡིན་པ་དེ་ལ་ཐ་སྙད་དུ་གདགས་པ་གང་ཡང་མེད་མོད་ཀྱི་འོན་ཀྱང་འདི་ལྟར་མི་ཤེས་པ་ཟད་པ་དང་། ཟད་པ་ཤེས་པ་ཞེས་བསྟན་ཏོ། །རབ་ཀྱི་རྩལ་གྱིས་རྣམ་པར་གནོན་པ་གང་གིས་
ཆོས་ཐམས་ཅད་མི་ཟད་པ་དང་། ཟད་པ་ཤེས་པ་ལ་བརྟག་པ་ཁོང་དུ་ཆུད་པ་དེ་ཟད་པ་ཤེས་པ་དང་བྲལ་ཏེ། ཟད་པ་མེད་པའི་མཐའ་རྗེས་སུ་ཐོབ་བོ། །མཐའ་མེད་པ་ནི་མྱ་ངན་ལས་འདས་པའི་མཐའ་སྟེ། ཇི་སྐད་དུ་བརྗོད་པ་བཞིན་དུ་ནི་མ་
ཡིན་ནོ། །ཆོས་ཐམས་ཅད་ནི་མྱ་ངན་ལས་འདས་པའི་མཐའ་སྟེ་མཐའ་མེད་པའོ། །མཐའ་ཐམས་ཅད་ཆད་པ་ནི་མྱ་ངན་ལས་འདས་པའི་མཐའ་ཞེས་བྱ་སྟེ་ཇི་སྐད་དུ་བརྗོད་པ་བཞིན་དུ་ནི་མ་ཡིན་ནོ། །མྱ་ངན་ལས་འདས་པའི་མཐའ་ནི་
ཐ་སྙད་ཐམས་ཅད་ཆད་པ་བརྗོད་པར་བྱ་བ་མ་ཡིན་པ་སྟེ། རབ་ཀྱི་རྩལ་གྱིས་རྣམ་པར་གནོན་པ་མྱ་ངན་ལས་འདས་པའི་དབྱིངས་བསྟན་པ་འདི་ཡང་ཇི་སྐད་བསྟན་པ་བཞིན་དུ་ནི་མ་ཡིན་ནོ། །བསྟན་པ་ཐམས་ཅད་ལས་ཡང་དག་པར་
འདས་པས་མྱ་ངན་ལས་འདས་པའི་དབྱིངས་ནི་བསྟན་དུ་མེད་དེ། བསྟན་པ་ཐམས་ཅད་རབ་ཏུ་ཆད་པ་དེ་ནི་མྱ་ངན་ལས་འདས་པའི་དབྱིངས་ཤེས་བྱའོ། །མྱ་ངན་ལས་འདས་པའི་དབྱིངས་ཤེས་བྱ་བ་གང་ཡིན་པ་དེ་ནི་འཇིག་རྟེན་ལས་འདས་
པའི་ཤེས་རབ་ངེས་པར་རྟོགས་པ་བསྟན་པ་ལ་བྱའོ། །རབ་ཀྱི་རྩལ་གྱིས་རྣམ་པར་གནོན་པ་མྱ་ངན་ལས་འདས་པའི་དབྱིངས་དེ་ནི་ཡུལ་ན་མི་གནས། ཕྱོགས་ན་མི་གནས་པ་ཞེས་བསྟན་ཏོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལ་
ཤེས་རབ་ཀྱི་ཕ་རོལ་དུ་ཕྱིན་པ་གང་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ་ལ་ཚུ་རོལ་འམ་ཕ་རོལ་གང་ཡང་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་གལ་ཏེ་ཤེས་རབ་ཀྱི་ཕ་རོལ་དུ་ཕྱིན་པ་
39-1-28a


ལ་ཚུ་རོལ་ལམ། ཕ་རོལ་དམིགས་ན་ནི་དེ་བཞིན་གཤེགས་པས་ཤེས་རབ་ཀྱི་ཕ་རོལ་དུ་ཕྱིན་པ་ཚུ་རོལ་ལམ་ཕ་རོལ་བཤད་པ་ཞིག་ན། རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ་ཚུ་རོལ་མི་
དམིགས་པས་དེའི་ཕྱིར་དེའི་ཕ་རོལ་ཀྱང་མེད་མོད་ཀྱི་འོན་ཀྱང་རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ་ཞེས་བྱ་བ་དེ་ནི་ཆོས་ཐམས་ཅད་ཀྱི་ཕ་རོལ་ལོ། །དེའི་ཕྱིར་ཤེས་རབ་ཀྱི་ཕ་རོལ་དུ་ཕྱིན་པ་ཞེས་བྱ་སྟེ་
ཇི་སྐད་དུ་བརྗོད་པ་བཞིན་དུ་ནི་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ་ནི་ཚིག་དང་ལས་ཀྱིས་ཉེ་བར་གནས་པ་མ་ཡིན་ཏེ། ཤེས་རབ་ཀྱི་ཕ་རོལ་དུ་ཕྱིན་པ་ནི་བསྟན་དུ་མེད་པའོ། །ཆོས་ཐམས་
ཅད་དེ་ལྟར་ཁོང་དུ་ཆུད་ན་དེ་ནི་ཇི་ལྟ་བ་བཞིན་དུ་རབ་ཏུ་ཆུད་དེ་མི་འགལ་ལོ། །དེ་ཅིའི་ཕྱིར་ཞེ་ན། དེ་ལ་ཁོང་དུ་ཆུད་པ་ཅི་ཡང་མེད་ཅིང་རབ་ཏུ་རྟོགས་པ་ཡང་མེད་པའི་ཕྱིར་རོ། །ཁོང་དུ་ཆུད་པ་དང་རབ་ཏུ་རྟོགས་པ་མཉམ་པ་ཉིད་ནི་བྱང་
ཆུབ་སྟེ། ཆོས་ཐམས་ཅད་ཁོང་དུ་ཆུད་པ་ནི་བྱང་ཆུབ་ཅེས་བྱའོ། །ཇི་ལྟར་ཆོས་ཐམས་ཅད་ཁོང་དུ་ཆུད་ཅེ་ན། འདི་ལ་བྱང་ཆུབ་གང་ཡང་མེད་དེ་འདི་ལ་ཁོང་དུ་ཆུད་པ་གང་ཡང་མེད་དེ། དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་
རྣམ་པར་གནོན་པ་གལ་ཏེ་བྱང་ཆུབ་དམིགས་ན་ནི་བྱང་ཆུབ་ལ་ཡང་བྱང་ཆུབ་དམིགས་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་ལ་ནི་བྱང་ཆུབ་མེད་དེ། དེ་ལྟར་བྱང་ཆུབ་འདི་མངོན་པར་རྫོགས་པར་འཚང་རྒྱ་བར་བྱའོ། །
ཁོང་དུ་ཆུད་པ་མེད་པ་དང་རབ་ཏུ་རྟོགས་པ་མེད་པས་རྗེས་སུ་རྟོགས་པ་ཞེས་བྱ་སྟེ། ཇི་སྐད་དུ་བརྗོད་པ་བཞིན་དུ་ནི་མ་ཡིན་ནོ། །ཆོས་ཐམས་ཅད་ནི་ཁོང་དུ་ཆུད་པ་མ་ཡིན་རབ་ཏུ་རྟོགས་པ་མ་ཡིན་ཏེ། ཆོས་ནི་ཆོས་ཀྱི་ངོ་བོ་ཉིད་ཀྱིས་མེད་དོ། །དེ་
ལྟར་ཁོང་དུ་ཆུད་པ་དེ་ནི་བྱང་ཆུབ་ཅེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་གཤེགས་པས་ནི་བྱང་ཆུབ་མ་དམིགས་ཤིང་དེ་བཞིན་གཤེགས་པས་ནི་བྱང་ཆུབ་རྣམ་པར་མ་རིག་སྟེ། བྱང་ཆུབ་ནི་རྣམ་པར་རིག་པར་བྱ་བ་
39-1-28b


མ་ཡིན། རབ་ཏུ་རྣམ་པར་རིག་པར་བྱ་བ་མ་ཡིན་ནོ། །དེ་བཞིན་གཤེགས་པས་ནི་བྱང་ཆུབ་མ་མཁྱེན་མ་བསྐྱེད་དེ། བྱང་ཆུབ་ནི་མ་སྐྱེས་ཤིང་མངོན་པར་མ་གྲུབ་པའོ། །བྱང་ཆུབ་ནི་སུའི་ཡང་མ་ཡིན་ཞིང་བྱང་ཆུབ་ལ་སེམས་ཅན་ནམ་སེམས་
ཅན་དུ་གདགས་པ་གང་ཡང་མེད་དོ། །གང་ལ་སེམས་ཅན་ནམ་སེམས་ཅན་དུ་གདགས་པ་མེད་པ་དེ་ལ་འདི་ནི་བྱང་ཆུབ་སེམས་དཔའ་འདི་ནི་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ཞེས་ཇི་ལྟར་བརྗོད། རབ་ཀྱི་རྩལ་གྱིས་
རྣམ་པར་གནོན་པ་བྱང་ཆུབ་ལ་བྱང་ཆུབ་ཀྱང་མེད། བྱང་ཆུབ་ལ་སེམས་ཅན་ཡང་མེད་དེ་བྱང་ཆུབ་འདི་ནི་ཤིན་དུ་འདས་པའོ། །བྱང་ཆུབ་འདི་ནི་མ་སྐྱེས་པའོ། །བྱང་ཆུབ་འདི་ནི་མངོན་པར་མ་གྲུབ་པའོ། །བྱང་ཆུབ་འདི་ནི་མཚན་ཉིད་
མེད་པ་སྟེ། འདི་ལ་སེམས་ཅན་མེད་ཅིང་མི་དམིགས་སོ། །བྱང་ཆུབ་ནི་སེམས་ཅན་གྱིས་བཏགས་པ་མ་ཡིན་གྱི། སེམས་ཅན་མེད་པར་ཁོང་དུ་ཆུད་པ་ནི་བྱང་ཆུབ་ཅེས་བྱའོ། །བྱང་ཆུབ་སེམས་ཅན་མ་ཡིན་པར་གང་གིས་ཤེས་པ་
དེ་བྱང་ཆུབ་སེམས་དཔའ་ཞེས་བྱའོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་ནི་སེམས་ཅན་གྱི་འདུ་ཤེས་ཀྱིས་བསྐྱེད་པ་མ་ཡིན་གྱི་སེམས་ཅན་གྱི་འདུ་ཤེས་རྣམ་པར་འཇིག་པའི་ཕྱིར་བྱང་
ཆུབ་སེམས་དཔའ་ཞེས་བྱ་སྟེ། ཇི་སྐད་དུ་བརྗོད་པ་བཞིན་དུ་ནི་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་བརྗོད་པར་བྱ་བ་མ་ཡིན་ཞིང་བྱང་ཆུབ་སེམས་དཔའ་ནི་སེམས་ཅན་གྱི་རང་བཞིན་དང་བྲལ་བའི་ཕྱིར་རོ། །
བྱང་ཆུབ་ནི་སེམས་ཅན་དུ་འདུ་ཤེས་པ་དང་བྲལ་བ་སྟེ། གང་གིས་བྱང་ཆུབ་འདི་ལྟར་ཤེས་པ་དེ་བྱང་ཆུབ་སེམས་དཔའ་ཞེས་བྱའོ། །བྱང་ཆུབ་ཇི་ལྟ་བུར་ཤེས་ཤེ་ན། བྱང་ཆུབ་འདི་ནི་ཤིན་དུ་འདས་པའོ། །བྱང་ཆུབ་འདི་ནི་བྱ་བ་མ་ཡིན་པའོ། །
བྱང་ཆུབ་འདི་ནི་སྐྱེ་བ་མེད་པ། འགོག་པ་མེད་པའོ། །བྱང་ཆུབ་ནི་བྱང་ཆུབ་ཀྱིས་ཤེས་པར་མི་བྱེད། བྱང་ཆུབ་ནི་རྣམ་པར་ཤེས་པར་བྱ་བ་མ་ཡིན། རྣམ་པར་རིག་པར་བྱ་བ་མ་ཡིན། གདགས་པར་བྱ་བ་མ་ཡིན་ཏེ། མངོན་པར་མ་གྲུབ་པ་ནི་བྱང་ཆུབ་
39-1-29a


ཅེས་བྱའོ། །རྣམ་པར་མི་རྟོག་པ་དང་། རྟོག་པ་བཅད་པའི་ཕྱིར་གང་གིས་ཁོང་དུ་ཆུད་པ་དག་རབ་ཏུ་རྟོགས་པ་དེའི་ཕྱིར་བྱང་ཆུབ་སེམས་དཔའ་ཞེས་བྱ་སྟེ། ཇི་སྐད་དུ་བརྗོད་པ་བཞིན་དུ་ནི་མ་ཡིན་ནོ། །དེ་ཅིའི་ཕྱིར་ཞེ་ན། སེམས་ཅན་
མེད་པའི་ཕྱིར་རོ། །གལ་ཏེ་བྱང་ཆུབ་སེམས་དཔའ་ཡང་དག་པར་དམིགས་ན་ནི་འདི་ནི་བྱང་ཆུབ། འདི་ནི་སེམས་ཅན་ཞེས་བྱང་ཆུབ་དེ་འང་རྙེད་པར་འགྱུར་རོ། །སེམས་ཅན་མེད་པ་དང་། སེམས་ཅན་མ་ཡིན་པ་དང་། སེམས་ཅན་དང་
བྲལ་བར་ཁོང་དུ་ཆུད་པ་ནི་བྱང་ཆུབ་སེམས་དཔའ་ཞེས་བྱའོ། །སེམས་ཅན་མེད་པ་དང་། སེམས་ཅན་དུ་འདུ་ཤེས་རྣམ་པར་བཤིག་པས་བྱང་ཆུབ་སེམས་དཔའ་ཞེས་བྱའོ། །དེ་ཅིའི་ཕྱིར་ཞེ་ན། སེམས་ཅན་གྱི་ཁམས་ཤེས་བྱ་བ་དེ་
ནི་སེམས་ཅན་མེད་པའི་ཚིག་བླ་དགས་སོ། །སེམས་ཅན་གྱི་ཁམས་མེད་པའི་ཕྱིར་སེམས་ཅན་ལ་སེམས་ཅན་མེད་དོ། །གལ་ཏེ་སེམས་ཅན་ལ་སེམས་ཅན་ཡོད་ན་ནི་སེམས་ཅན་གྱི་ཁམས་ཤེས་མི་བྱའོ། །སེམས་ཅན་གྱི་ཁམས་ཤེས་བྱ་བ་
དེ་ནི་ཁམས་མེད་པར་བསྟན་ཏེ། ཁམས་མེད་པ་ནི་སེམས་ཅན་གྱི་ཁམས་སོ། །གལ་ཏེ་སེམས་ཅན་གྱི་ཁམས་སེམས་ཅན་གྱི་ཁམས་སུ་གྱུར་ན་ནི་སྲོག་དེ་ལུས་དེ་ཡིན་པར་འགྱུར་རོ། །ཇི་སྟེ་སེམས་ཅན་གྱི་ཁམས་ལས་རྣམ་པར་གྲོལ་བ་
ཁམས་སུ་གྱུར་ན་ནི་སྲོག་ཀྱང་གཞན། ལུས་ཀྱང་གཞན་དུ་འགྱུར་རོ། །ཁམས་མེད་པ་ནི་སེམས་ཅན་གྱི་ཁམས་ཏེ། བརྡས་ཐ་སྙད་གདགས་པའི་ཚིག་ཏུ་འགྲོའོ། །སེམས་ཅན་གྱི་ཁམས་ལ་ནི་ཁམས་མེད་དེ། ཁམས་མ་གཏོགས་
པར་སེམས་ཅན་གྱི་ཁམས་མེད་དོ། །ཆོས་ཐམས་ཅད་ནི་ཁམས་མེད་པ་སྟེ། ངས་དེ་ལ་དགོངས་ནས་སེམས་ཅན་གྱི་ཁམས་ནི་གང་བ་འམ་བྲི་བར་ཡང་མི་མངོན་ནོ་ཞེས་བཤད་དོ། །དེ་ཅིའི་ཕྱིར་ཞེ་ན། སེམས་ཅན་གྱི་ཁམས་རབ་ཏུ་དབེན་
པའི་ཕྱིར་སེམས་ཅན་གྱི་ཁམས་ནི་སེམས་ཅན་མ་ཡིན་ནོ། །ཇི་ལྟར་སེམས་ཅན་གྱི་ཁམས་བྲི་བ་དང་གང་བར་མི་མངོན་པ་དེ་བཞིན་དུ་ཆོས་ཐམས་ཅད་བྲི་བ་འམ། གང་བར་མི་མངོན་ནོ། །གང་དག་བྲི་བ་འམ། གང་བར་འགྱུར་བར་ཆོས་
39-1-29b


ཐམས་ཅད་ལ་ཡོངས་སུ་གྲུབ་པ་གང་ཡང་མེད་དེ། གང་གིས་དེ་ལྟར་ཆོས་ཐམས་ཅད་ཁོང་དུ་ཆུད་པ་དེ་ནི་སངས་རྒྱས་ཀྱི་ཆོས་ཁོང་དུ་ཆུད་པ་ཞེས་བྱ་སྟེ། ངས་འདི་ལ་དགོངས་ནས་ཇི་ལྟར་སེམས་ཅན་གྱི་ཁམས་བྲི་བ་འམ་གང་བར་མི་
མངོན་པ་དེ་བཞིན་དུ་ཆོས་ཐམས་ཅད་ཀྱང་བྲི་བ་འམ་གང་བར་མི་མངོན་ནོ་ཞེས་བཤད་དོ། །གང་ཡང་ཡོངས་སུ་མ་གྲུབ་པའི་ཚུལ་གྱིས་ཆོས་ཐམས་ཅད་བྲི་བ་མ་ཡིན། གང་བ་མ་ཡིན་པ་དེས་སངས་རྒྱས་ཀྱི་ཆོས་ཀྱང་བྲི་བ་མ་ཡིན་གང་བ་མ་ཡིན་ནོ། །
དེ་ལྟར་ཆོས་ཐམས་ཅད་ཁོང་དུ་ཆུད་པའི་ཕྱིར་སངས་རྒྱས་ཀྱི་ཆོས་རྣམས་བྲི་བ་མེད་ཅིང་གང་བ་མེད་པའོ། །ཆོས་ཐམས་ཅད་བྲི་བ་མེད་ཅིང་གང་བ་མེད་པའི་ཕྱིར། སངས་རྒྱས་ཀྱི་ཆོས་ཤེས་བྱ་བ་དེ་ནི། སངས་རྒྱས་ཀྱི་ཆོས་ཀྱི་ཚིག་བླ་དགས་མ་ཡིན་
ནོ། །སངས་རྒྱས་ཀྱི་ཆོས་ནི་གང་གིས་ཀྱང་བྲི་བ་འམ། གང་བར་བྱར་མི་ནུས་སོ། །དེ་ཅིའི་ཕྱིར་ཞེ་ན། འདི་ནི་ཆོས་ཐམས་ཅད་ཁོང་དུ་ཆུད་པའི་ཕྱིར་ཏེ། གང་ཆོས་ཐམས་ཅད་ཁོང་དུ་ཆུད་པ་དེ་ལ་བྲི་བ་འམ། གང་བའི་ཆོས་ཅི་ཡང་མེད་དོ། །ཆོས་
ཐམས་ཅད་ཅེས་བྱ་བ་དེ་ནི་ཆོས་གྱི་དབྱིངས་ཀྱི་ཚིག་བླ་དགས་ཏེ་ཆོས་ཀྱི་དབྱིངས་ལ་ནི་བྲི་བ་འམ་གང་བ་མེད་དོ། །དེ་ཅིའི་ཕྱིར་ཞེ་ན། ཆོས་ཀྱི་དབྱིངས་ནི་མཐའ་ཡས་པའི་ཕྱིར་རོ། །སེམས་ཅན་གྱི་ཁམས་དང་ཆོས་ཀྱི་དབྱིངས་ནི་
ཐ་དད་དུ་མི་དམིགས་སོ། །སེམས་ཅན་གྱི་ཁམས་དང་ཆོས་ཀྱི་དབྱིངས་ལ་བྲི་བ་འམ། གང་བར་དམིགས་པ་འམ། ཡོད་པ་མ་ཡིན་ཏེ། གང་གིས་དེ་ལྟ་བུར་ཁོང་དུ་ཆུད་པ་དེ་ནི་བྱང་ཆུབ་ཅེས་བྱའོ། །དེའི་ཕྱིར་སངས་
རྒྱས་ཀྱི་ཆོས་རྣམས་བྲི་བ་འམ། གང་བར་མི་མངོན་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྲི་བ་མེད་ཅིང་གང་བ་མེད་པ་ཞེས་ཇི་སྐད་སྨྲ་བ་དེ་ནི་བརྟག་པ་ཡང་དག་པ་ཇི་ལྟ་བ་བཞིན་དུ་མཐོང་བའི་ཚིག་བླ་དགས་སོ། །དེ་ལ་ནི་ཅི་
ཡང་བསལ་བ་འམ། གཞག་པར་མི་ནུས་ཏེ། གང་དེ་ལྟར་ཁོང་དུ་ཆུད་པ་དེ་ནི་བྱང་ཆུབ་ཅེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་ཅེས་བྱ་བ་དེ་ནི་སངས་རྒྱས་ཀྱི་མཚན་ཉིད་དོ། །སངས་རྒྱས་ཀྱི་མཚན་ཉིད་ཇི་ལྟ་བུ་ཞེ་ན་
39-1-30a


ཆོས་ཐམས་ཅད་ཀྱི་མཚན་ཉིད་མཚན་ཉིད་མེད་པ་དེ་ནི་སངས་རྒྱས་ཀྱི་མཚན་ཉིད་དོ། །བྱང་ཆུབ་ནི་མཚན་ཉིད་མེད་པ་སྟེ་མཚན་ཉིད་ཀྱི་རང་བཞིན་ལས་བཟློག་པའོ། །གང་དེ་ལྟར་ཁོང་དུ་ཆུད་པ་དེ་ནི་བྱང་ཆུབ་ཅེས་
བྱ་སྟེ། ཇི་སྐད་དུ་བརྗོད་པ་བཞིན་དུ་ནི་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་དེ་ནི་ཆོས་ཐམས་ཅད་རྗེས་སུ་རྟོགས་པས། བྱང་ཆུབ་སེམས་དཔའ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་གང་ལ་ལ་ཞིག་ཆོས་
འདི་རབ་ཏུ་མི་ཤེས་ཁོང་དུ་མ་ཆུད་པར་བདག་བྱང་ཆུབ་སེམས་དཔའ་ཞེས་ཁས་འཆེ་ན། དེ་ནི་བྱང་ཆུབ་སེམས་དཔའི་ས་ལས་རིང་ངོ་། །དེ་ནི་བྱང་ཆུབ་སེམས་དཔའི་ཆོས་རྣམས་ལས་རིང་ངོ་། །དེ་ནི་བྱང་ཆུབ་སེམས་དཔའི་མིང་
གིས་ལྷ་དང་། མི་དང་ལྷ་མ་ཡིན་དང་བཅས་པའི་འཇིག་རྟེན་ལ་སླུ་བའོ། །རབ་ཀྱི་རྩལ་གྱིས་རྣམ་པར་གནོན་པ་གལ་ཏེ་ཚིག་ཙམ་གྱིས་བྱང་ཆུབ་སེམས་དཔར་གྱུར་ན་ནི་དེའི་ཕྱིར་སེམས་ཅན་ཐམས་ཅད་ཀྱང་བྱང་ཆུབ་སེམས་དཔར་
འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། བྱང་ཆུབ་སེམས་དཔའི་ས་ཞེས་བྱ་བ་དེ་ནི་ཚིག་གི་ལས་ཙམ་མ་ཡིན་ནོ། །ཚིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་
མི་ནུས་སོ། །ཚིག་གི་ལས་ཀྱིས་བྱང་ཆུབ་དང་། བྱང་ཆུབ་སེམས་དཔའི་ཆོས་རྣམས་ཐོབ་པར་མི་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་སེམས་ཅན་ཐམས་ཅད་ནི་བྱང་ཆུབ་ལ་སྤྱོད་མོད་ཀྱི་མི་ཤེས་ཤིང་ཁོང་དུ་མ་ཆུད་དེ། དེའི་ཕྱིར་དེ་དག་
བྱང་ཆུབ་སེམས་དཔའ་ཞེས་མི་བྱའོ། །དེ་ཅིའི་ཕྱིར་ཞེ་ན། སེམས་ཅན་རྣམས་སེམས་ཅན་མེད་པར་མི་ཤེས་པའི་ཕྱིར་རོ། །གལ་ཏེ་དེ་ལྟར་ཤེས་ན་བདག་གིས་སྤྱོད་པ་དག་གིས། བྱང་ཆུབ་སེམས་དཔའ་དག་ཏུ་འགྱུར་བའི་རིགས་སོ། །སེམས་ཅན་
ཐམས་ཅད་ནི་ཕྱིན་ཅི་ལོག་པས་རང་གི་སྤྱོད་པ་དང་། རང་གི་ཡུལ་དང་། རང་གི་སྤྱོད་ཡུལ་རབ་ཏུ་མི་ཤེས་སོ། །གལ་ཏེ་རང་གི་སྤྱོད་པ་རབ་ཏུ་ཤེས་ན་ནི་དེ་དག་སླར་གང་ལ་ཡང་རྣམ་པར་རྟོག་ཅིང་སྤྱོད་པར་མི་འགྱུར་རོ། །རྣམ་པར་རྟོག་པ་དང་། སྤྱོད་པ་དེ་དག་
39-1-30b


གིས་བྱིས་པ་སོ་སོའི་སྐྱེ་བོ་ཐམས་ཅད་ཡང་དག་པ་མ་ཡིན་པ་ལ་དམིགས་ཤིང་སྤྱོད་ཀྱང་དེ་དག་བྱང་ཆུབ་ལ་དམིགས་པ་སྙམ་དུ་རློམ་སེམས་སུ་བྱེད་དེ། དམིགས་པ་ལ་སྤྱོད་ཅིང་རྟོག་པ་ལ་སྤྱོད་པ་དེ་དག་ལ་བྱང་ཆུབ་ག་ལ་ཡོད། བྱང་ཆུབ་སེམས་
དཔའི་ཆོས་རྣམས་ག་ལ་ཡོད། གང་གིས་ཆོས་དེ་ལྟ་བུར་རབ་ཏུ་ཤེས་པ་དེ་དག་སླར་ཡང་དག་པ་མ་ཡིན་པའི་དམིགས་པ་ལ་མི་སྤྱོད་ཅིང་། དེ་དག་ནི་ཕྱིར་ཆོས་གང་ཡང་རློམ་སེམས་སུ་མི་བྱེད་དེ། དེའི་ཕྱིར་སྤྱོད་པ་མེད་པ་དེ་ནི་བྱང་ཆུབ་སེམས་
དཔའི་སྤྱོད་པ་ཞེས་བྱ་སྟེ། བྱང་ཆུབ་སེམས་དཔའ་ནི་རྟོག་པ་དང་རྣམ་པར་རྟོག་པ་ལ་མི་སྤྱོད་དོ། །གང་ལ་རྟོག་པ་མེད་པ་དེ་ལ་སྤྱོད་པ་གང་ཡང་མེད་དོ། །གང་ལ་རྣམ་པར་རྟོག་པ་མེད་པ་དེ་ལ་སྤྱོད་པའི་དོན་གང་ཡང་མེད་དོ། །སངས་རྒྱས་
དང་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཐམས་ཅད་ནི་རྣམ་པར་མི་རྟོག་པར་སྤྱོད་ཅིང་ཐམས་ཅད་རློམ་སེམས་མེད་ལ་དམིགས་པ་དང་བཅས་པ་མ་ཡིན་པ་སྟེ། ཆོས་ཐམས་ཅད་དེ་ལྟར་རབ་ཏུ་ཤེས་པ་དེ་ནི་ཕྱིར་མི་དམིགས་
པའམ། རྣམ་པར་རྟོག་པ་སྤྱོད་པའམ། རྣམ་པར་སྤྱོད་པ་མེད་དེ། དེ་ནི་སྤྱོད་པ་མེད་པའི་ཚུལ་གྱིས་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་ན། བྱང་ཆུབ་སེམས་
དཔའི་སྤྱད་པ་ལ་སྤྱོད་པ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་གང་དེ་ལྟར་ཆོས་ཁོང་དུ་ཆུད་ཅིང་རབ་ཏུ་རྟོགས་པ་དེའི་ཕྱིར་བྱང་ཆུབ་སེམས་དཔའ་ཞེས་བྱའོ། །དེས་སེམས་ཅན་དུ་འདུ་ཤེས་བསྩལ་པས། སེམས་ཅན་
མེད་པ་ཞེས་བྱ་བ་དེ་ནི་བྱང་ཆུབ་སེམས་དཔའི་ཚིག་བླ་དགས་སོ། །དེ་ཅིའི་ཕྱིར་ཞེ་ན། དེས་སེམས་ཅན་ཐམས་ཅད་ཡང་དག་པ་མ་ཡིན་པ་དང་། སེམས་ཅན་ཐམས་ཅད་སེམས་ཅན་མ་ཡིན་པ་དང་། སེམས་ཅན་ཐམས་ཅད་ནི་ཕྱིན་
ཅི་ལོག་གི་སེམས་ཅན་དང་སེམས་ཅན་ཐམས་ཅད་ནི་ཡོངས་སུ་བརྟགས་པས་སེམས་ཅན་དང་། སེམས་ཅན་ཐམས་ཅད་ནི་ཡོད་པ་མ་ཡིན་པ་ལ་དམིགས་པས་སེམས་ཅན་དང་། སེམས་ཅན་ཐམས་ཅད་ནི་རང་གི་སྦྱོད་པ་རྣམ་པར་མ་རུང་བར་བྱས་
39-1-31a


པས་སེམས་ཅན་དང་། སེམས་ཅན་ཐམས་ཅད་ནི་མ་རིག་པ་འདུ་བྱེད་པས་སེམས་ཅན་ནོ་ཞེས་ཤེས་པའི་ཕྱིར་རོ། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ནི་ཆོས་གང་དག་མེད་པའི་ཆོས་དེ་དག་མངོན་པར་འདུ་
བྱེད་པས་དེའི་ཕྱིར་སེམས་ཅན་ཐམས་ཅད་ནི་མ་རིག་པ་འདུ་བྱེད་པས་སེམས་ཅན་ཞེས་བྱའོ། །ཆོས་མེད་པ་གང་ཞེ་ན། ང་ཞེ་འམ། ངའི་ཞེ་འམ། ངའོ་ཞེས་བྱ་བའི་ཆོས་གང་ཡང་མེད་པའོ། །གལ་ཏེ་ཆོས་འགའ་ཞིག་ང་ཞེ་འམ། 
ངའི་ཞེ་འམ། ངའོ་ཞེས་བྱ་བར་གྱུར་ན། དེའི་ཕྱིར་སེམས་ཅན་ཐམས་ཅད་ཡང་དག་པར་འགྱུར་བ་ཞིག་ན། རབ་ཀྱི་རྩལ་གྱིས་རྣམ་པར་གནོན་པ་འདི་ལྟར་ང་ཞེ་འམ། ངའི་ཞེ་འམ། ངའོ་ཞེས་བྱ་བའི་ཆོས་གང་ཡང་མེད་པས་དེའི་ཕྱིར་
སེམས་ཅན་ནི་ཡང་དག་པ་མ་ཡིན་པ་སྟེ། སེམས་ཅན་ཐམས་ཅད་ནི་མ་རིག་པ་འདུ་བྱེད་པས་སེམས་ཅན་ཐམས་ཅད་ཅེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་གང་ལ་ཡང་ང་ཞེ་འམ། ངའི་ཞེ་འམ། ངའོ་ཞེས་བྱ་བའི་སེམས་
ཅན་ཞེས་བྱ་བའི་ཆོས་གང་ཡང་མེད་དེ། གང་གི་ཕྱིར་མེད་པ་དེའི་ཕྱིར་སེམས་ཅན་ནི་ཡང་དག་པ་མ་ཡིན་པ་ཞེས་བྱའོ། །ཡང་དག་པ་མ་ཡིན་པ་ཞེས་བྱ་བ་དེ་ནི་སེམས་ཅན་མེད་པའི་ཚིག་བླ་དགས་སོ། །ཇི་ལྟར་སེམས་ཅན་དུ་འདུ་ཤེས་
པ་ཡང་དག་པ་མ་ཡིན་པ་ལ་མངོན་པར་ཞེན་པ་དེ་ལྟར་སེམས་ཅན་རྣམས་ཡང་དག་པ་མ་ཡིན་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་ཡང་དག་པ་མ་ཡིན་པ་ཞེས་བྱ་བ་དེ་ལ་ནི་ཡང་དག་པ་ཅི་ཡང་མེད་ཅིང་མ་བྱུང་བའོ། །
ཆོས་ཐམས་ཅད་ཀྱང་ཡང་དག་པ་མ་ཡིན་ཞིང་མ་བྱུང་བའོ། །དེ་ལ་སེམས་ཅན་ཡང་དག་པ་མ་ཡིན་པ་ལ་ལྷག་པར་ཆགས་པ་དེ་ནི་རྣམ་པར་འཆིང་བ་སྟེ། དེའི་ཕྱིར་ཡང་དག་པ་མ་ཡིན་པ་ལ་དམིགས་པ་ནི་སེམས་ཅན་ཞེས་བྱའོ། །
དེ་དག་ནི་སྤྱོད་པ་གང་ཁོང་དུ་ཆུད་པས་བྱང་ཆུབ་སེམས་དཔའ་ཞེས་བྱ་བའི་རང་གི་སྤྱོད་པ་དེ་མི་ཤེས་ཏེ། ཡོངས་སུ་མ་རྟོགས་པས་སེམས་ཅན་ནི་ཡང་དག་པ་མ་ཡིན་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་གང་དེ་ལྟར་ཆོས་ཁོང་དུ་ཆུད་པ་དེ་ནི་
39-1-31b


བྱང་ཆུབ་སེམས་དཔའ་ཞེས་བྱའོ། །བྱང་ཆུབ་སེམས་དཔའ་ཞེས་བྱ་བ་དེ་ནི་གང་གིས་ཆོས་ཐམས་ཅད་ཁོང་དུ་ཆུད་ཅིང་ཤེས་ལ། སེམས་ཅན་རྗེས་སུ་རྟོགས་པའི་ཚིག་བླ་དགས་སོ། །ཇི་ལྟར་ཤེས་ཤེ་ན། ཡང་དག་པ་མ་ཡིན་པ་དང་། མ་བྱུང་བ་
དང་། ཕྱིན་ཅི་ལོག་མ་ཡིན་པར་རོ། །ཇི་ལྟར་བྱིས་པ་སོ་སོའི་སྐྱེ་བོ་དག་གིས་བརྟགས་པ་དེ་དག་ནི་དེ་བཞིན་དུ་མ་ཡིན་ནོ། །ཇི་ལྟར་བྱིས་པ་སོ་སོའི་སྐྱེ་བོ་དག་གིས་རྙེད་པ་དེ་དག་དེ་བཞིན་དུ་མ་ཡིན་ཏེ། དེའི་ཕྱིར་བྱང་ཆུབ་སེམས་དཔའ་ཞེས་བྱའོ། །
དེ་ཅིའི་ཕྱིར་ཞེ་ན། བྱང་ཆུབ་ནི་མ་བརྟགས། རྣམ་པར་མ་བརྟགས་ཤིང་བྱང་ཆུབ་ནི་རྣམ་པར་མ་བསྒྲུབས་ལ། མི་དམིགས་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་གཤེགས་པས་ནི་བྱང་ཆུབ་མ་བརྙེས་སོ། །ཆོས་ཐམས་ཅད་ནི་མི་
རྙེད་ཅིང་། ཆོས་ཐམས་ཅད་མི་དམིགས་པའི་ཕྱིར་བྱང་ཆུབ་ཅེས་བྱའོ། །དེ་ལྟ་བུ་ནི་སངས་རྒྱས་ཀྱི་བྱང་ཆུབ་ཅེས་བྱ་སྟེ། ཇི་སྐད་དུ་བརྗོད་པ་བཞིན་དུ་ནི་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་གང་དག་བྱང་ཆུབ་ཀྱི་ཕྱིར་སེམས་འདི་བསྐྱེད་པར་
བྱའོ་ཞེས་བྱང་ཆུབ་ཏུ་སེམས་བསྐྱེད་པ་དང་། གང་དུ་བདག་གིས་སེམས་བསྐྱེད་པར་བྱ་བའི་བྱང་ཆུབ་དེ་ཡོད་དོ་ཞེས་བྱང་ཆུབ་རློམ་སེམས་སུ་བྱེད་པ་དེ་དག་ནི་བྱང་ཆུབ་སེམས་དཔའ་ཞེས་མི་བྱ་སྟེ། དེ་དག་ནི་སེམས་ཅན་སྐྱེས་པ་ཞེས་བྱའོ། །
དེ་ཅིའི་ཕྱིར་ཞེ་ན། འདི་ལྟར་དེ་དག་ནི་སྐྱེ་བར་མངོན་པར་ཞེན་ཅིང་། སེམས་སུ་མངོན་པར་ཞེན་ནས་བྱང་ཆུབ་ལ་མངོན་པར་ཞེན་པའི་ཕྱིར་རོ། །གང་དག་བྱང་ཆུབ་ཀྱི་ཕྱིར་སེམས་བསྐྱེད་པ་དེ་དག་ནི་བྱང་ཆུབ་ཀྱི་སེམས་ལ་
མངོན་པར་ཞེན་པ་ཞེས་བྱའོ། །གང་གི་ཕྱིར་མངོན་པར་འདུ་བྱེད་པ་དེའི་ཕྱིར་བྱང་ཆུབ་ཏུ་སེམས་བསྐྱེད་དེ། དེ་བས་ན་མངོན་པར་འདུ་བྱེད་པ་ནི་སེམས་ཅན་ཞེས་བྱ་སྟེ། བྱང་ཆུབ་སེམས་དཔའ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་ནི་
སེམས་ཅན་སྐྱེས་པ་ཞེས་བྱ་བའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་ནི་མ་སྐྱེས་ཤིང་། བྱང་ཆུབ་ནི་བསམ་དུ་མེད་པས་བྱང་ཆུབ་ཀྱི་ཕྱིར་སེམས་བསྐྱེད་པར་མི་ནུས་སོ། །རབ་ཀྱི་རྩལ་གྱིས་རྣམ་པར་གནོན་པ་དེ་དག་ནི་སྐྱེ་
39-1-32a


བ་ཉིད་ལ་མངོན་པར་ཞེན་ཀྱང་དེ་དག་སྐྱེ་བ་རབ་ཏུ་མི་ཤེས་སོ། །རབ་ཀྱི་རྩལ་གྱིས་རྣམ་པར་གནོན་པ་སྐྱེ་བ་མཉམ་པ་ཉིད་གང་ཡིན་པ་དེ་ནི་ཡང་དག་པ་ཉིད་དོ། །སེམས་མཉམ་པ་ཉིད་གང་ཡིན་པ་དང་། ཡང་དག་པ་ཉིད་གང་
ཡིན་པ་དང་། མཉམ་པ་ཉིད་གང་ཡིན་པ་དང་། ཡང་དག་པ་ཉིད་དེ་ནི་བྱང་ཆུབ་སྟེ། གང་ན་ཡང་དག་པ་ཇི་ལྟ་བ་ཉིད་ཡོད་པ་དེ་ན་རྣམ་པར་རྟོག་པ་གང་ཡང་མེད་ན། དེ་དག་ནི་སེམས་དང་བྱང་ཆུབ་ལ་རྣམ་པར་བརྟགས་ཏེ། གཉིས་སུ་
མངོན་པར་ཞེན་ནས་བྱང་ཆུབ་ཀྱི་ཕྱིར་སེམས་བསྐྱེད་དོ། །རབ་ཀྱི་རྩལ་གྱིས་རྣམ་པར་གནོན་པ་སེམས་ཀྱང་གཞན་མ་ཡིན། བྱང་ཆུབ་ཀྱང་གཞན་མ་ཡིན། སེམས་ལ་ཡང་བྱང་ཆུབ་མེད། བྱང་ཆུབ་ལ་ཡང་སེམས་མེད་
དེ། བྱང་ཆུབ་གང་ཡིན་པ་དང་། སེམས་གང་ཡིན་པ་དེ་ནི་ཡང་དག་པ་ཇི་ལྟ་བ་ཉིད་དང་། ཇི་ལྟ་བ་བཞིན་ནོ། །དེ་ལ་ནི་བྱང་ཆུབ་ཀྱང་མེད། སེམས་ཀྱང་མེད་དོ། །གང་གིས་སེམས་ཉིད་དང་། བྱང་ཆུབ་དང་སྐྱེ་བ་དང་། མི་སྐྱེ་བ་ཡང་
མི་དམིགས་པ་དེ་བྱང་ཆུབ་སེམས་དཔའ་ཞེས་བྱའོ། །ཡང་དག་པ་ཇི་ལྟ་བ་བཞིན་གྱི་སེམས་དཔའ་ཞེས་བྱའོ། །སེམས་དཔའ་ཆེན་པོ་ཞེས་བྱའོ། །དེ་ཅིའི་ཕྱིར་ཞེ་ན།  དེས་གང་དང་གང་ལ་དེས་ཡང་དག་པ་མ་ཡིན་པ་དེ་ཤེས་པའི་
ཕྱིར་རོ། །ཡང་དག་པ་མ་ཡིན་པ་གང་ཞེ་ན། འཇིག་རྟེན་ཐམས་ཅད་ནི་ཡང་དག་པ་མ་ཡིན་པ་སྟེ། ཡང་དག་པ་མ་ཡིན་པར་གཏོགས་སོ། །ཀྱེ་མ་འཇིག་རྟེན་གནས་པ་འདི་ནི་ཡང་དག་པ་མ་ཡིན་པའོ། །མ་བྱུང་བའོ། །
དེ་ཅིའི་ཕྱིར། ཡང་དག་པ་མ་ཡིན་པ། མི་འབྱུང་བ་ཞེས་བྱ་ཞེ་ན། ཡང་དག་པ་མ་ཡིན་པ་ལ་འབྱུང་བ་གང་ཡང་མེད་དེ། ཡང་དག་པ་མ་ཡིན་པ་ནི་མི་འབྱུང་བའོ། །དེའི་ཕྱིར་ཆོས་ཐམས་ཅད་ནི་ངོ་བོ་ཉིད་མེད་པ་ཡང་དག་པ་མ་ཡིན་པ་
ཞེས་བྱའོ། །གང་གིས་དེ་ལྟར་ཤེས་པ་དེ་ནི་ཡང་དག་པ་ཇི་ལྟ་བ་བཞིན་གྱི་སེམས་ཅན་ཞེས་བྱའོ། །ཡང་དག་པ་ལ་ཡང་དག་པ་ཞེས་མངོན་པར་མི་ཞེན་པས་དེའི་ཕྱིར་ཡང་དག་པ་ཇི་ལྟ་བ་བཞིན་གྱི་སེམས་ཅན་ཞེས་བྱ་སྟེ། ཇི་སྐད་དུ་བརྗོད་
39-1-32b


པ་བཞིན་དུ་ནི་མ་ཡིན་ནོ། །དེ་ཅིའི་ཕྱིར་ཞེ་ན། ཡང་དག་པ་ཇི་ལྟ་བ་བཞིན་མ་ཡིན་པ་ལ་སེམས་ཅན་ནམ། སེམས་ཅན་ཆེན་པོ་ཞེས་བྱ་བ་གང་ཡང་མེད་པའི་ཕྱིར་རོ། །གང་གིས་ཐེག་པ་ཆེན་པོ་ཁོང་དུ་ཆུད་པ་དེ་སེམས་ཅན་ཆེན་པོ་ཞེས་བྱ་
འོ། །ཐེག་པ་ཆེན་པོ་གང་ཞེ་ན། ཐམས་ཅད་མཁྱེན་པའི་ཡེ་ཤེས་ནི་ཐེག་པ་ཆེན་པོའོ། །ཐམས་ཅད་མཁྱེན་པའི་ཡེ་ཤེས་གང་ཞེ་ན། གང་ཅི་ཡང་རུང་སྟེ། འདུས་བྱས་ཤེས་པ་དང་། འདུས་མ་བྱས་ཤེས་པ་དང་། འཇིག་རྟེན་པ་
ཤེས་པ་དང་། འཇིག་རྟེན་ལས་འདས་པ་ཤེས་པ་དེས་སེམས་ཅན་ཆེན་པོ་ཞེས་བྱའོ། །དེ་ཅིའི་ཕྱིར་ཞེ་ན། དེ་སེམས་ཅན་དུ་འདུ་ཤེས་པ་ཆེན་པོ་མེད་པས་དེའི་ཕྱིར་སེམས་ཅན་ཆེན་པོ་ཞེས་བྱའོ། །དེ་ལ་མ་རིག་པའི་ཕུང་པོ་ཆེན་པོ་
མེད་པས་དེའི་ཕྱིར་སེམས་ཅན་ཆེན་པོ་ཞེས་བྱའོ། །དེ་ལ་འདུ་བྱེད་ཀྱི་ཕུང་པོ་ཆེན་པོ་མེད་པས་དེའི་ཕྱིར་སེམས་ཅན་ཆེན་པོ་ཞེས་བྱའོ། །དེ་ལ་མི་ཤེས་པའི་ཕུང་པོ་ཆེན་པོ་མེད་པས་དེའི་ཕྱིར་སེམས་ཅན་ཆེན་པོ་ཞེས་བྱའོ། །
དེ་ལ་སྡུག་བསྔལ་གྱི་ཕུང་པོ་ཆེན་པོ་མེད་པས་དེའི་ཕྱིར་སེམས་ཅན་ཆེན་པོ་ཞེས་བྱའོ་རབ་ཀྱི་རྩལ་གྱིས་རྣམ་པར་གནོན་པ་གང་དག་སེམས་དཔའ་ཆེན་པོའི་འདུ་ཤེས་ལའང་སྨོད་ལ། སེམས་ཀྱང་མི་དམིགས། སེམས་ལས་བྱུང་བའི་ཆོས་དང་། 
སེམས་ཀྱི་རང་བཞིན་ཡང་རབ་ཏུ་མི་ཤེས། བྱང་ཆུབ་ཀྱང་མི་དམིགས། བྱང་ཆུབ་ཀྱི་ཕྱོགས་ཀྱི་ཆོས་རྣམས་དང་། བྱང་ཆུབ་ཀྱི་རང་བཞིན་ཡང་རབ་ཏུ་མི་ཤེས་ཏེ། དེ་དག་མི་ཤེས་པའི་སེམས་ཀྱིས་བྱང་ཆུབ་ཀྱང་མི་མཐོང་། བྱང་ཆུབ་
མ་གཏོགས་པར་སེམས་ཀྱང་མི་མཐོང་། བྱང་ཆུབ་ལ་སེམས་མི་མཐོང་། སེམས་ལ་བྱང་ཆུབ་མི་མཐོང་སྟེ། གང་དེ་ལྟར་རྣམ་པར་འཇིག་པ་དེ་ནི་བསྒོམ་པ་ཡང་མེད། རྣམ་པར་འཇིག་པར་བྱེད་པ་ཡང་མེད་དེ། རྣམ་པར་འཇིག་པར་
བྱེད་པ་དེ་ཡང་མི་དམིགས་ཤིང་རློམ་སེམས་སུ་མི་བྱེད་ལ། མངོན་པར་ཞེན་པ་མེད་པར་དེ་དག་བྱང་ཆུབ་ཏུ་སེམས་བསྐྱེད་དོ། །རབ་ཀྱི་རྩལ་གྱིས་རྣམ་པར་གནོན་པ་གང་དེ་ལྟར་བྱང་ཆུབ་ཏུ་སེམས་བསྐྱེད་པ་དེ་དག་ནི་བྱང་ཆུབ་སེམས་
39-1-33a


དཔའ་ཡང་དག་པ་ཞེས་བྱ་སྟེ། དེ་དག་བྱང་ཆུབ་ལས་ཕྱིར་མི་ལྡོག་གོ། །དེ་ཅིའི་ཕྱིར་ཞེ་ན། གང་དག་འདི་ལྟར་བྱང་ཆུབ་དང་། སེམས་དང་སྐྱེ་བ་དང་། འགོག་པ་ཐ་དད་དུ་བྱ་བར་ཡང་དག་པར་རྗེས་སུ་མི་མཐོང་བ་དེ་དག་བྱང་
ཆུབ་ཉིད་ལ་གནས་པ་སྟེ། འདི་ནི་གང་ཡང་ཡང་དག་པར་རྗེས་སུ་མི་མཐོང་། གང་ལ་ཡང་མངོན་པར་མི་ཞེན། གང་ལ་ཡང་མངོན་པར་མི་ཞེན། གང་ལ་ཡང་རྣམ་པར་རྟོག་པར་མི་འགྱུར་ཏེ། རབ་ཀྱི་རྩལ་གྱིས་རྣམ་པར་གནོན་པ་གང་
དག་དེ་ལྟར་རྣམ་པར་གྲོལ་བ་དང་རྣམ་པར་གྲོལ་བར་སེམས་མི་སྐྱེད་པ་དེ་དག་ནི་བྱང་ཆུབ་སེམས་དཔའ་ཡང་དག་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་གང་དག་སེམས་ཅན་དུ་འདུ་ཤེས་པ་དང་། བྱང་ཆུབ་ཏུ་འདུ་ཤེས་པས། 
བྱང་ཆུབ་ཀྱི་ཕྱིར་སེམས་བསྐྱེད་ན། དེ་དག་ནི་བྱང་ཆུབ་ལས་རིང་སྟེ། དེ་ནི་བྱང་ཆུབ་དང་ཉེ་བ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་གང་དག་བྱང་ཆུབ་ལས་རིང་བར་འམ། ཉེ་བར་ཡང་དག་པར་རྗེས་སུ་མི་མཐོང་བ་དེ་དག་བྱང་
ཆུབ་དང་ཉེ་བ་སྟེ། དེ་ནི་བྱང་ཆུབ་ཀྱི་ཕྱིར་སེམས་བསྐྱེད་པའོ། །རབ་ཀྱི་རྩལ་གྱིས་རྣམ་པར་གནོན་པ་ངས་དེ་ལ་དགོངས་ནས་གང་དག་གཉིས་སུ་མེད་པར་ཤེས་པ་དེ་ནི་སངས་རྒྱས་དང་ཆོས་ཀྱང་རབ་ཏུ་ཤེས་སོ་ཞེས་བཤད་དོ། །
དེ་ཅིའི་ཕྱིར་ཞེ་ན། གཉིས་སུ་མེད་པ་ཡོངས་སུ་ཤེས་པས་ཆོས་ཐམས་ཅད་ཡོངས་སུ་ཤེས་ཏེ་དེ་ཆོས་ཐམས་ཅད་ཀྱི་བདག་གི་ངོ་བོ་ཉིད་བསྒོམ་པའི་ཕྱིར་རོ། །གང་གཉིས་སུ་མེད་པའི་ཆོས་ཤེས་པ་དེ་ནི་སངས་རྒྱས་ཀྱི་ཆོས་ཤེས་པ་
སྟེ། ཆོས་གཉིས་སུ་མེད་པར་ཡོངས་སུ་ཤེས་པས་སངས་རྒྱས་ཀྱི་ཆོས་ཡོངས་སུ་ཤེས་སོ། །བདག་ཡོངས་སུ་ཤེས་པས་ཁམས་གསུམ་ཐམས་ཅད་ཡོངས་སུ་ཤེས་སོ། །རབ་ཀྱི་རྩལ་གྱིས་རྣམ་པར་གནོན་པ་བདག་ཡོངས་སུ་
ཤེས་པ་ཞེས་བྱ་བ་དེ་ནི་ཆོས་ཐམས་ཅད་ཀྱི་ཕ་རོལ་ལོ། །ཆོས་ཐམས་ཅད་ཀྱི་ཕ་རོལ་གང་ཞེ་ན། གང་ཕ་རོལ་ཉིད་ཀྱང་མི་དམིགས། ཕ་རོལ་དུ་རློམ་སེམས་མི་བྱེད། ཕ་རོལ་ལ་མངོན་པར་མི་ཞེན་པ་དེ་ནི་ཡོངས་སུ་
39-1-33b


ཤེས་པས་ཕ་རོལ་དུ་སོང་བ་ཞེས་བྱ་སྟེ། ཇི་སྐད་དུ་བརྗོད་པ་བཞིན་དུ་ནི་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་ན་འདི་ནི་བྱང་ཆུབ་སེམས་དཔའི་ས་ཡིན་པར་རིག་པར་བྱའོ། །གང་ལ་ཤེས་པར་བྱ་བ་འམ་རྟོགས་
པར་བྱ་བ་ཕྲ་རབ་ཙམ་ཡང་མེད་པ་དེ་ནི་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་སྟེ། དེ་ལ་ནི་འོང་བ་འམ། འགྲོ་བ་མི་མངོན་ནོ། །གླེང་གཞིའི་ལེའུ་ཞེས་བྱ་སྟེ་དང་པོའོ།། །། བམ་པོ་གཉིས་པ། དེ་ནས་བཅོམ་ལྡན་འདས་
ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ང་རྒྱལ་ཅན་མཚན་མ་ལ་སྤྱོད་པ་རྣམས་བསྟན་པ་འདི་ལ་སྐྲག་པར་འགྱུར་ལགས་སོ། །དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུས། ཚེ་དང་ལྡན་པ་ཀུན་དགའ་བོ་ལ་འདི་
སྐད་ཅེས་སྨྲས་སོ། །ཚེ་དང་ལྡན་པ་ཀུན་དགའ་བོ་འདི་ནི་ང་རྒྱལ་ཅན་རྣམས་ཀྱི་ཡུལ་མ་ཡིན་རྟོགས་པ་མ་ཡིན་པས་དེ་དག་འདི་ལ་སྐྲག་པར་མི་འགྱུར་རོ། །དེ་ཅིའི་ཕྱིར་ཞེ་ན། གང་སྡིག་པའི་གྲོགས་པོའི་ལག་ཏུ་སོང་བ་དེ་དག་ནི་འདི་ལ་སྐྲག་
པར་གྱུར་ཟིན་པས་འདི་ནི་དེ་དག་གི་ཡུལ་མ་ཡིན་ཞིང་མི་རྟོགས་སོ། །ཚེ་དང་ལྡན་པ་ཀུན་དགའ་བོ་གང་དག་ང་རྒྱལ་སྤོང་བའི་ཕྱིར་ཞུགས་ཤིང་ང་རྒྱལ་སྤོང་བའི་ཕྱིར་བརྩོན་པ་དེ་དག་ནི་འདི་ལ་སྐྲག་པར་འགྱུར་རོ། །དེ་ཅིའི་ཕྱིར་ཞེ་ན། ང་རྒྱལ་དུ་ཡོངས་སུ་
ཤེས་པས། ང་རྒྱལ་མེད་པ་ཚོལ་ཞིང་། ང་རྒྱལ་སྤོང་བ་ཚོལ་བའི་ཕྱིར་རོ། །ཚེ་དང་ལྡན་པ་ཀུན་དགའ་བོ་གང་ང་རྒྱལ་མི་དམིགས་ཤིང་ཡང་དག་པར་མི་མཐོང་ལ་རློམ་སེམས་སུ་མི་བྱེད་ཅིང་མངོན་པར་མི་ཞེན་པ་དེ་དག་ནི་གང་ལ་ཡང་མི་
སྐྲག་གང་ལ་ཡང་མི་དངང་། གང་ལ་ཡང་དངང་བར་མི་འགྱུར་རོ། །ཚེ་དང་ལྡན་པ་ཀུན་དགའ་བོ་ང་རྒྱལ་ཅན་རྣམས་ཀྱི་ཕྱིར་ཆོས་བསྟན་པ་འདི་ཞུགས་པ་མ་ཡིན་ནོ། །ཚེ་དང་ལྡན་པ་ཀུན་དགའ་བོ་འདི་ནི་ང་རྒྱལ་ཅན་རྣམས་ཀྱི་ཡུལ་
མ་ཡིན་ཏེ། གོ་སྐབས་མེད་དོ། །གང་དག་ང་རྒྱལ་སྤང་བའི་ཕྱིར་བརྩོན་ཞིང་འབད་པ་དེ་དག་ནི་ཡང་དག་པར་འབད་པ་མ་ཡིན་ནོ། །ཚེ་དང་ལྡན་པ་ཀུན་དགའ་བོ་ང་རྒྱལ་ཞེས་བྱ་བ་དེ་ནི་ལྷག་པར་བྱེད་པ། སྒྲོ་འདོགས་པའི་ཚིག་བླ་
39-1-34a


དགས་སོ། །གང་དག་ང་རྒྱལ་ལ་སྤྱོད་ཅིང་ལྷག་པར་བྱེད་པ་སྒྲོ་འདོགས་པར་བྱེད་པ་དེ་དག་ནི་མཚུངས་པར་མི་སྤྱད་དོ། །མཚུངས་པར་སྤྱོད་པ་ཡང་ཆོས་འདི་ལ་ཐེ་ཚོམ་ཟའོ། །ཚེ་དང་ལྡན་པ་ཀུན་དགའ་བོ་གང་དག་མཉམ་པ་ཡང་མི་
དམིགས། མི་མཉམ་པ་ཡང་མ་ཡིན། མཉམ་པར་ཡང་རློམ་སེམས་མི་བྱེད། མི་མཉམ་པར་ཡང་མ་ཡིན། མཉམ་པར་ཡང་མངོན་པར་མི་ཞེན། མི་མཉམ་པ་ལའང་མ་ཡིན་པ་དེ་དག་ནི་གང་ལ་ཡང་མི་སྐྲག་མི་དངང་། དངང་བར་མི་འགྱུར་རོ། །
ཚེ་དང་ལྡན་པ་ཀུན་དགའ་བོ་འདི་ནི་བྱིས་པ་སོ་སོའི་སྐྱེ་བོ་ཐམས་ཅད་ཀྱི་ཡུལ་མ་ཡིན་ཏེ་མི་རྟོགས་སོ། །ཚེ་དང་ལྡན་པ་ཀུན་དགའ་བོ་འདི་ནི་བྱིས་པ་སོ་སོའི་སྐྱེ་བོ་ཐམས་ཅད་ཀྱིས་ཤེས་ཤིང་རྟོགས་པ་མ་ཡིན་ནོ། །ཚེ་དང་ལྡན་པ་ཀུན་དགའ་བོ་ཉན་ཐོས་
ཀྱི་ཐེག་པ་ཅན་རྣམས་ཀྱིས་ཀྱང་མི་རྟོགས་སོ། །འདི་ནི་གང་རང་སངས་རྒྱས་ཀྱི་ཐེག་པ་ཅན་ཆོས་ཟབ་མོ་ལ་སྤྱོད་པ་དེ་དག་གིས་ཀྱང་མི་རྟོགས་སོ། །ཚེ་དང་ལྡན་པ་ཀུན་དགའ་བོ་བྱང་ཆུབ་སེམས་དཔའི་ཐེག་པ་ཅན་གང་དག་མཚན་མ་ལ་སྤྱོད་པ་
དགེ་བའི་བཤེས་གཉེན་གྱིས་ཡོངས་སུ་མ་ཟིན་པ། སྡིག་པའི་གྲོགས་པོའི་ལག་ཏུ་སོང་བ་དེ་དག་ཀྱང་ཆགས་པ་མེད་པའི་ཆོས་འདི་དག་མི་རྟོགས་ཤིང་ཡུལ་མ་ཡིན་ཏེ། ཚེ་དང་ལྡན་པ་ཀུན་དགའ་བོ་ཉན་ཐོས་ཀྱི་ཐེག་པ་ཅན་བདེན་པ་མཐོང་བ་དང་བྱང་ཆུབ་
སེམས་དཔའི་ཐེག་པ་ཅན་དགེ་བའི་བཤེས་གཉེན་གྱིས་བསྟན་པ། ཆོས་ཟབ་མོ་ལ་མོས་པ་གང་ཆོས་འདི་དག་ལ་འཐུན་པར་སྤྱོད་པ་དང་། གང་ཆོས་འདི་ཁོང་དུ་ཆུད་ཅིང་སྤྱོད་པ་རྣམས་ནི་མ་གཏོགས་སོ། །ཚེ་དང་ལྡན་པ་ཀུན་དགའ་བོ་བྱང་
ཆུབ་སེམས་དཔའ་མཚན་མ་དང་བྲལ་བ། མཚན་མ་མེད་པ་ལ་སྤྱོད་པ། སྣ་ཚོགས་མེད་པ་ལ་སྤྱོད་པ། ཟབ་མོའི་ཆོས་ཤིན་དུ་ཚར་ཕྱིན་པ། གང་དག་སེམས་དང་། བྱང་ཆུབ་ཀྱང་མི་དམིགས་ཤིང་ཆོས་གང་ཡང་ཐ་དད་དུ་མི་བྱེད་ལ། ཡང་
དག་པར་རྗེས་སུ་མི་མཐོང་བ་དེ་དག་ནི་འདི་ལྟ་བུའི་ཆོས་ལ་རྨོངས་པར་མི་འགྱུར། ཐེ་ཚོམ་མི་ཟའོ། །དེ་ཅིའི་ཕྱིར་ཞེ་ན། དེ་དག་ཆོས་ཐམས་ཅད་དང་རྗེས་སུ་འཐུན་པར་གནས་ཏེ། མི་མཐུན་པར་ནི་མ་ཡིན་པའི་ཕྱིར་རོ། །དེ་དག་གིས་གང་དང་
39-1-34b


གང་ལ་ཆོས་འདྲི་བ་དེ་དང་དེས་རྗེས་སུ་འཐུན་པར་ལན་འདེབས་ཤིང་རྗེས་སུ་འཐུན་པར་སྨྲ་བར་བྱེད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཇི་ལྟར་ཤཱ་རིའི་
བུ་འདིས་བཤད་པ་དེ་དེ་བཞིན་ཏེ། ཀུན་དགའ་བོ་ཆོས་བསྟན་པ་འདི་དང་། སངས་རྒྱས་ཀྱི་བྱང་ཆུབ་དང་། རྗེས་སུ་འཐུན་པའི་སངས་རྒྱས་ཀྱི་བྱང་ཆུབ་འདི་ནི་ང་རྒྱལ་ཅན་རྣམས་ཀྱིས་མ་ཡིན། འཇུག་པའི་ཡུལ་མ་ཡིན་ནོ། །
ཀུན་དགའ་བོ་སངས་རྒྱས་ཀྱི་ཆོས་རྒྱ་ཆེན་པོ་ལ་ནི་དམན་པ་ལ་མོས་པའི་སེམས་ཅན་རྣམས་ཀྱི་སེམས་མི་འཇུག་གོ། །ཀུན་དགའ་བོ་དམན་པ་ལ་མོས་པ་ང་རྒྱལ་ཅན་རྣམས་ནི་ང་རྒྱལ་གྱི་དབང་གིས་འགྲོ་བས། དེ་དག་
སངས་རྒྱས་ཀྱི་བྱང་ཆུབ་ལ་མི་མཐུན་པར་གནས་སོ། །ཀུན་དགའ་བོ་འཁོར་དེ་ནི་གཙང་མ་སྟེ། སྔོན་གྱི་རྒྱལ་བ་རྣམས་ལ་བྱ་བ་བྱས་ཤིང་དགེ་བའི་རྩ་བ་བསྐྱེད་པ། སངས་རྒྱས་མང་པོ་ལ་བསྙེན་བཀུར་བྱས་པ། ཟབ་མོ་
ལ་མོས་པ། ཟབ་མོ་སྤྱོད་པ་སྟེ། ཀུན་དགའ་བོ་འཁོར་འདི་ལ་དེ་བཞིན་གཤེགས་པས་ཡིད་བརྟན་ནས། ཆོས་མངོན་པར་སྟོན་གྱི་རྗེས་སུ་སྲུང་བའི་ཆོས་ནི་ཅུང་ཟད་ཀྱང་མི་སྟོན་ཏོ། །ཀུན་དགའ་བོ་འཁོར་འདི་ནི་སྙིང་པོ་སྟེ། 
ས་ཞག་དང་། གསེག་མ་དང་། གྱོ་མོ་མེད་པ། སངས་རྒྱས་བརྒྱ་སྟོང་མང་པོ་ལ་བསྙེན་བཀུར་བྱས་པ་སྙིང་པོ་ལ་རབ་ཏུ་གནས་པའོ། །ཀུན་དགའ་བོ་གསེག་མ་དང་། གྱོ་མོ་ཞེས་བྱ་བ་དེ་ནི་བྱིས་པ་སོ་སོའི་སྐྱེ་བོ་རྣམས་ཀྱི་ཚིག་
བླ་དགས་ཏེ། གང་དག་ཆོས་འདི་ལ་གོ་སྐབས་མེད་པའོ། །ཀུན་དགའ་བོ་ས་ཞག་ཅེས་བྱ་བ་དེ་ནི་སེམས་ཅན་ང་རྒྱལ་ཅན་རྣམས་ཀྱི་ཚིག་བླ་དགས་སོ། །ཀུན་དགའ་བོ་འཁོར་འདི་ནི་ང་རྒྱལ་མེད་པ་དགེ་བའི་རྩ་བ་ཆེན་
པོས་མངོན་པར་འཕགས་པའོ། །ཀུན་དགའ་བོ་འདི་ལྟ་སྟེ། དཔེར་ན་ཀླུའི་རྒྱལ་པོ་མ་དྲོས་པ་རབ་ཏུ་དགའ་བར་གྱུར་ཏེ། དགའ་བ་དང་། ཡིད་བདེ་བ་སྐྱེས་ནས། རང་གི་གནས་ན་འདོད་པའི་ཡོན་ཏན་ལྔ་ལ་ཀུན་དུ་སྤྱོད་
39-1-35a


ཅིང་། རང་གི་གནས་ན་རབ་ཏུ་དགའ་བར་ཡན་ལག་བརྒྱད་དང་ལྡན་པའི་ཆར་པའི་ཆུ་ཆེན་པོ་འབེབས་སོ། །དེའི་བུར་གྱུར་པ་དེ་དག་ཀྱང་རབ་ཏུ་དགའ་ནས། རང་རང་གི་གནས་ན་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་ཏེ་
རྩེ་ཞིང་ཆར་པ་ཆེན་པོ་འབེབས་སོ། །ཀུན་དགའ་བོ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་ཆོས་ཀྱི་ཆར་ཆེན་པོ་འབེབས་སོ། །གང་འདི་སྲས་ཐུ་བོ་བྱང་ཆུབ་སེམས་དཔའ་སེམས་དཔའ་ཆེན་
པོ་དེ་དག་ཀྱང་འཇིག་རྟེན་གྱི་ཁམས་འདི་ནས་རང་རང་གི་སངས་རྒྱས་ཀྱི་ཞིང་དུ་སོང་སྟེ། ཆོས་ཀུན་འབྱུང་བ་འདི་ལས་བརྩམས་ནས། དེ་བཞིན་གཤེགས་པ་དེ་དག་གི་སྤྱན་སྔར་ཆོས་ཀྱི་ཆར་ཆེན་པོ་གཏོང་ཞིང་ཆོས་ཀྱི་ཆར་ཆེན་པོ་རབ་ཏུ་
འབེབས་སོ། །ཀུན་དགའ་བོ་འདི་ལྟ་སྟེ། དཔེར་ན་ཀླུའི་རྒྱལ་པོ་རྒྱ་མཚོ་ནི་གང་གི་ཚེ་རབ་ཏུ་དགའ་བར་གྱུར་པ་དེའི་ཚེ་རང་གི་གནས་ནས་ཆར་གྱི་རྒྱུན་ཆེན་པོ་འབེབས་སོ། །གང་དག་གནས་དེ་ན་གནས་པར་གྱུར་པའི་ཀླུ་དེ་དག་གིས་ཀྱང་ཆར་
གྱི་རྒྱུན་དེ་མནོས་ནས་དགའ་བར་འགྱུར་ཏེ་ཆར་གྱི་རྒྱུན་དེས་བདེ་བར་ཤེས་སོ། །གང་དག་དེའི་བུར་གྱུར་པ་དེ་དག་ཀྱང་ཆར་གྱི་རྒྱུན་དེ་བཟོད་ཅིང་། ཆར་གྱི་རྒྱུན་དེས་མཆོག་ཏུ་དགའ་བ་འཐོབ་བོ། །དེ་ཅིའི་ཕྱིར་ཞེ་ན། ཀུན་དགའ་བོ་ཀླུ་གཞན་དག་
གིས་ནི་ཆར་གྱི་རྒྱུན་དེ་མི་བཟོད་ལ། ཀླུ་གཞན་དག་ནི་ཆར་གྱི་རྒྱུན་དེས་བདེ་བར་མི་ཤེས་ཤིང་ཆར་གྱི་རྒྱུན་དེ་དག་གིས་དགའ་བར་མི་འགྱུར་བའི་ཕྱིར་རོ། །ཀུན་དགའ་བོ་དེ་བཞིན་དུ་གང་དག་དེ་བཞིན་གཤེགས་པའི་ཆོས་དཀོན་མཆོག་ལ་ལྷག་
པར་ཆགས་པ་དང་། གང་དག་དེ་བཞིན་གཤེགས་པའི་སྲས་ཐུ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་བྱས་པ། བསམ་པ་རྒྱ་ཆེ་བ་ཆོས་ཟབ་མོའི་ཚུལ་ལས་ངེས་པར་སྐྱེས་པ་དེ་དག་ནི་དེ་བཞིན་གཤེགས་པའི་ཆོས་
ཀྱི་ཚུལ་གྱི་ཆར་ཆེན་པོ་འདི་བཟོད་དོ། །ཐོས་ནས་རབ་ཏུ་དགའ་ཞིང་མགུ་སྟེ་བདེ་བར་ཤེས་སོ། །ཀུན་དགའ་བོ་དེ་བཞིན་གཤེགས་པས་དོན་གྱི་དབང་འདི་ལ་བརྟེན་ཏེ། བསམ་པ་དག་པའི་འཁོར་དུ་སེང་གེའི་སྒྲ་ཆེན་པོ་སྒྲོག་ཅིང་
39-1-35b


ཆོས་ཀྱི་ཆར་ཆེན་པོ་འབེབས་སོ། །ཀུན་དགའ་བོ་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་རིན་པོ་ཆེའི་མཛོད་མང་པོ་བསགས་པ་དང་ལྡན་པ་དེས་བུ་མང་པོ་རིགས་དང་ལྡན་ཞིང་མ་རྒྱུད་ཀྱིས་ཀྱང་དག་པ་དེ་དག་ཐམས་ཅད་
བཀུག་ནས། རིན་པོ་ཆེའི་མཛོད་བགོས་ཏེ། བུ་གང་ལ་ཡང་མི་སླུ་བར་བྱིན་ནོ། །དེ་ལྟར་བགོས་ནས་དེ་དག་འཁོར་ལོས་སྒྱུར་བའི་རྒྱལ་པོ་དེ་དགའ་བ་དང་། མགུ་བ་ཆེན་པོ་ལྷག་པར་སྐྱེས་ནས་འཁོར་ལོས་སྒྱུར་བའི་རྒྱལ་པོ་དང་དོན་མཚུངས་
པར་གྱུར་ཏོ་སྙམ་སྟེ། བདག་བདེ་བར་ཤེས་སོ། །ཀུན་དགའ་བོ་དེ་བཞིན་དུ་དེ་བཞིན་གཤེགས་པ་ཆོས་ཀྱི་རྒྱལ་པོ་ཆོས་ཀྱི་བདག་པོ་རང་འབྱུང་གིས་ཀྱང་སྲས་དེ་དག་བསྡུས་ནས་ཆོས་རིན་པོ་ཆེའི་མཛོད་འདི་མཉམ་པར་བགོས་ཏེ། སྲས་དེ་དག་
གང་ལ་ཡང་མི་སླུ་བས་དེ་དག་ང་ལ་དགའ་བ་དང་། མགུ་བ་དང་། གུས་པ་ཆེར་སྐྱེད་ཅིང་དོན་འཐུན་པ་སངས་རྒྱས་ཀྱི་རིགས་མི་གཅོད་པར་གནས་སོ། །ཀུན་དགའ་བོ་སེམས་ཅན་གཞན་དམན་པ་ལ་མོས་པ། ང་རྒྱལ་ཅན་ལྟ་བ་ལ་
སྤྱོད་པ། མཚན་མ་ལ་སྤྱོད་པ། དམིགས་པ་ལ་སྤྱོད་པ། ངའོ་སྙམ་པའི་ང་རྒྱལ་གྱིས་བཅོམ་པ། འདོད་ཆགས་དང་། ཞེ་སྡང་དང་། གཏི་མུག་གི་ཟིལ་གྱིས་ནོན་པ། ལོག་པའི་ལམ་དུ་དོང་བ་རྣམས་ཀྱིས་ཆོས་རིན་པོ་ཆེ་འདི་
བཟོད་པར་མི་ནུས་སོ། །ཀུན་དགའ་བོ་དམན་པ་ལ་མོས་པའི་སེམས་ཅན་རྣམས་ནི་འཁོར་ལོས་སྒྱུར་བའི་ནོར་མི་འདོད་ཀྱི། ཀུན་དགའ་བོ་གང་དག་འཁོར་ལོས་སྒྱུར་བའི་བུར་གྱུར་པ་དེ་དག་ནི་འཁོར་ལོས་སྒྱུར་བའི་ནོར་འདོད་དོ། །
ཀུན་དགའ་བོ་སེམས་ཅན་དབུལ་པོ་རྣམས་ནི་འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བློན་པོ་རིན་པོ་ཆེ་
དང་། གོས་མང་པོ་དང་། གསེར་དང་། ནོར་བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱུ་རུ་དང་། ས་ལེ་སྦྲམ་དང་། དངུལ་མང་པོ་དག་དགོས་པར་མི་འཛིན་ཏེ། དེ་རྙེད་ཀྱང་དགའ་བར་ཀུན་དུ་སྤྱོད་པར་མི་
39-1-36a


ནུས་ཤིང་རིན་ཐང་ཆུང་ངུར་འཚོང་ལ། མི་མཁས་པས་འདོར་རོ། །དེ་ཅིའི་ཕྱིར་ཞེ་ན། དེ་དག་རིན་པོ་ཆེ་ལ་མི་མཁས་པའི་ཕྱིར་རོ། །ཀུན་དགའ་བོ་སེམས་ཅན་དབུལ་པོ་ནི་རིན་པོ་ཆེ་འདིའི་མིང་ནི་འདིའོ། །ཞེས་བྱ་བར་རིན་
པོ་ཆེ་རྣམས་ཀྱི་མིང་ཡང་མི་ཤེས་སོ། །ཀུན་དགའ་བོ་དེ་བཞིན་དུ་དེ་བཞིན་གཤེགས་པའི་སྲས་བདེན་པ་མཐོང་བ་རྣམས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་ཆོས་རིན་པོ་ཆེའི་མཛོད་འདི་ཚོལ་བ་སྟེ། དེ་དག་ཆོས་
རིན་པོ་ཆེ་དམིགས་སུ་མེད་པ་སྟོང་པ་ཉིད་དང་ལྡན་པ། སངས་རྒྱས་ཀྱི་ཆོས་དང་ལྡན་པ་འདི་འདོད་ཅིང་བཟོད་དེ་དེ་དག་དེས་བྱ་བ་བྱེད་དོ། །སེམས་ཅན་དབུལ་པོ་ཐོས་པ་དང་བྲལ་བ། ཐོས་པ་ཉམས་པ། མིག་དང་མི་ལྡན་པའི་བྱིས་པ་དེ་དག་ནི་ཆོས་
རིན་པོ་ཆེའི་མཛོད་རྙེད་ཀྱང་ཅི་ཞིག་བྱ་ཞེས་འདོར་ཞིང་གཞན་ལ་སྦྱིན་པར་སེམས་སོ། །ཀུན་དགའ་བོ་གདོལ་པ་དང་། གཡུང་པོ་དང་། སྨིག་མ་མཁན་དང་། དབུལ་པོས་འཚོ་བའི་སེམས་ཅན་གང་དག་གཞན་ལ་ལས་རིན་པོ་ཆེ་མང་པོ་རྙེད་ན་བདག་མི་སྤྱོད་
དེ་རིན་ཐང་ཆུང་ངུར་འཚོང་ཞིང་འདོར་རོ། །ཀུན་དགའ་བོ་སེམས་ཅན་དབུལ་པོ་ཞེས་བྱ་བ་དེ་ནི་མུ་སྟེགས་ཅན་ཐམས་ཅད་དང་། གང་དག་གཞན་མུ་སྟེགས་ཅན་གྱི་ཉན་ཐོས་རྣམས་ཀྱི་ཚིག་བླ་དགས་སོ། །ཀུན་དགའ་བོ་སེམས་ཅན་དབུལ་པོ་
ཞེས་བྱ་བ་དེ་ནི་བྱིས་པ་སོ་སོའི་སྐྱེ་བོ་ལྟ་བའི་འདམ་དུ་བྱིང་བ་དམིགས་པ་ཅན་འཆིང་བ་ལ་མངོན་པར་ཞེན་པ། མཚན་མ་ལ་སྤྱོད་པ། ལམ་ལོག་པར་སོང་བ་རྣམས་ཀྱི་ཚིག་བླ་དགས་ཏེ། དེ་དག་ནི་ཆོས་རིན་པོ་ཆེ་འདི་རྙེད་ན་ཀུན་དུ་སྤྱོད་
མི་ནུས་ཤིང་འདོར་ཏེ། དོན་མེད་པར་གཞན་ལ་ཡང་སྦྱིན་པར་བྱེད་དོ། །ཀུན་དགའ་བོ་གང་སངས་རྒྱས་ཀྱི་སྲས་སངས་རྒྱས་ཀྱི་སྤྱོད་ཡུལ་ལ་སྤྱོད་པ། དེ་བཞིན་གཤེགས་པའི་རིགས་རྒྱུན་མི་གཅོད་པར་གནས་པ་དེ་དག་ཆོས་རིན་
པོ་ཆེ་འདི་ལ་ཡོངས་སུ་སྤྱོད་དོ། །རྙེད་ནས་ཀྱང་ཆུད་མི་གཟོན་ཅིང་འདི་ལ་རིན་པོ་ཆེར་འདུ་ཤེས་པར་འགྱུར་རོ། །ཀུན་དགའ་བོ་ཝས་ནི་སེང་གེའི་སྒྲ་སྒྲོག་མི་ནུས་སོ། །ཀུན་དགའ་བོ་གང་སེང་གེའི་ཕྲུག་གུར་གྱུར་ལ། སེང་གེ་ཆེན་
39-1-36b


པོས་བསྐྱེད་པ་དེ་དག་ནི་སེང་གེའི་སྒྲ་སྒྲོག་གོ། །ཀུན་དགའ་བོ་དེ་བཞིན་དུ་ཝ་ལྟ་བུ་ནི་བྱིས་པ་སོ་སོའི་སྐྱེ་བོ་ལོག་པར་ལྟ་བ་ཐམས་ཅད་དེ་དེ་དག་གིས་ནི་དེ་བཞིན་གཤེགས་པའི་སེང་གེའི་སྒྲ་དང་། ཡང་དག་པར་རྫོགས་པའི་སངས་
རྒྱས་སེང་གེ་ཆེན་པོའི་ཆོས་ཡོངས་སུ་ལོངས་སྤྱོད་པར་མི་ནུས་སོ། །ཀུན་དགའ་བོ་གང་ཡང་དག་པར་རྫོགས་པའི་སངས་རྒྱས་ཀྱི་སྲས་སངས་རྒྱས་ཀྱི་སེང་གེ་ཆེན་པོ་དང་རང་བྱུང་གི་ཡེ་ཤེས་ཀྱིས་བསྐྱེད་པ་དེ་དག་ནི་ཡང་དག་
པར་རྫོགས་པའི་སངས་རྒྱས་ཀྱི་སེང་གེའི་སྒྲ་སྒྲོག་ཅིང་ཀུན་དུ་སྤྱོད་དོ། །དེ་ནས་བཅོམ་ལྡན་འདས་ལ། ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་དེ་བཞིན་གཤེགས་པའི་འཁོར་ཡོངས་
སུ་དག་པ་འདུས་པ་འདི་ངོ་མཚར་ལགས་སོ། །བཅོམ་ལྡན་འདས་དེ་བཞིན་གཤེགས་པའི་འཁོར་རང་བྱུང་གི་འཁོར་མི་ཚུགས་པའི་འཁོར། རྡོ་རྗེ་ལྟ་བུའི་འཁོར། མི་སྒུལ་བ། མི་བསྐྱོད་པ། མི་འཁྲུགས་པའི་འཁོར་ཡོངས་སུ་
དག་པ་འདི་ནི་རབ་ཏུ་ངོ་མཚར་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་ཁྱོད་འཁོར་འདིའི་ཡོན་ཏན་ཡོངས་སུ་རྗོད་དམ། གསོལ་པ་
བཅོམ་ལྡན་འདས་བདག་གིས་འཁོར་འདིའི་ཡོན་ཏན་ཡོངས་སུ་བརྗོད་པའི་རྔོ་མི་ཐོགས་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འཁོར་འདི་ནི་རི་རབ་དང་འདྲ་སྟེ། ཡོན་ཏན་མཐའ་ཡས་པ་དང་ལྡན་པ་ལགས་པའི་སླད་དུའོ། །
བཀའ་སྩལ་པ། ཤཱ་ར་དྭ་ཏིའི་བུ་དེ་དེ་བཞིན་ཏེ། འཁོར་འདི་ནི་ཡོན་ཏན་མཐའ་ཡས་པ་དང་ལྡན་པ་སྟེ། འཁོར་འདིའི་ཡོན་ཏན་གྱི་མཐའ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀྱང་རྟོགས་པར་མི་ནུས་ན་སེམས་ཅན་
གཞན་ཐམས་ཅད་ཀྱིས་ལྟ་ཅི་སྨོས། ཤཱ་ར་དྭ་ཏིའི་བུ་འཁོར་འདི་ནི་དེ་བཞིན་གཤེགས་པས་བསྡུས་པ་མ་ཡིན་ཞིང་འདི་ལ་དེ་བཞིན་གཤེགས་པ་རྩོལ་བ་ཅི་ཡང་མི་མཛད་དེ། རང་གི་དགེ་བའི་རྩ་བས་ངའི་མིང་ཐོས་ནས་འཁོར་
39-1-37a


འདི་འདུས་ཏེ། དེ་བཞིན་གཤེགས་པས་འཁོར་འདི་གང་ལ་ཡང་མ་གླེངས་མ་བསྒོ་བར་དེ་དག་རང་གི་དགེ་བའི་རྩ་བས་བསྐུལ་ནས་འཁོར་འདིར་ལྷགས་སོ། །འདི་ལྟ་བུའི་ཆོས་བསྟན་པ་ལ་འདི་ལྟ་བུའི་སེམས་ཅན་ཆེན་པོ་
འདུ་བར་འགྱུར་བ་ནི་དེའི་ཆོས་ཉིད་དོ། །ཤཱ་ར་དྭ་ཏིའི་བུ་གང་སངས་རྒྱས་བཅོམ་ལྡན་འདས་གཞན་དག་བྱང་ཆུབ་སེམས་དཔའི་སྡེ་སྣོད་ཐེ་ཚོམ་ཐམས་ཅད་གཅོད་པ་འདི་ཡང་དག་པར་སྟོན་པ་དེ་དག་གི་འཁོར་ཀྱང་འདི་ལྟ་བུ་འདུ་བར་འགྱུར་ཏེ། 
འདི་ལྟ་བུ་འདི་འདྲ་བའི་འཁོར་གྱི་དཀྱིལ་འཁོར་གདོན་མི་ཟ་བར་འབྱུང་བ་ནི་ཆོས་བསྟན་པ་འདིའི་ཆོས་ཉིད་དོ། །ཀུན་དགའ་བོའི་ལེའུ་ཞེས་བྱ་སྟེ་གཉིས་པའོ། ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་
རབ་ཀྱི་རྩལ་གྱིས་རྣམ་པར་གནོན་པ་ལ་བཀའ་སྩལ་པ། རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ། ཤེས་རབ་ཀྱི་ཕ་རོལ་དུ་ཕྱིན་པ་ཞེས་བྱ་བ་ལ། བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་གང་ཞེ་ན། 
གང་ཆོས་ཐམས་ཅད་ཀྱི་ཚུ་རོལ་རྟོགས་པ་སྟེ། དེ་ནི་བསྟན་པར་མི་ནུས་མོད་ཀྱི། ཇི་ལྟར་ཁྱེད་ཤེས་པར་འགྱུར་བ་དང་། ཇི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ཐ་སྙད་ཀྱི་ཚིག་ཏུ་འགྱུར་བ་དེ་ལྟར་རབ་ཏུ་བཤད་པར་བྱའོ། །
གཟུགས་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་ཏེ། ཤེས་རབ་ཀྱི་ཕ་རོལ་དུ་ཕྱིན་པ་གཟུགས་ལས་གཞན་པ་ཡང་མ་ཡིན་ནོ། །དེ་བཞིན་དུ་སྦྱར་ཏེ། དེ་ལྟར་ཚོར་བ་དང་། འདུ་ཤེས་དང་འདུ་བྱེད་རྣམས་དང་། རྣམ་པར་ཤེས་པ་ཤེས་
རབ་ཀྱི་ཕ་རོལ་དུ་ཕྱིན་པ་མ་ཡིན་ཏེ། ཤེས་རབ་ཀྱི་ཕ་རོལ་དུ་ཕྱིན་པ་རྣམ་པར་ཤེས་པ་ལས་གཞན་པ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་གཟུགས་ཀྱི་ཕ་རོལ་གང་ཡིན་པ་དེ་གཟུགས་མ་ཡིན་ནོ། །
དེ་བཞིན་དུ་སྦྱར་ཏེ། དེ་ལྟར་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་ཕ་རོལ་གང་ཡིན་པ་དེ་རྣམ་པར་ཤེས་པ་མ་ཡིན་པའི་ཕྱིར་རོ། །གཟུགས་ཀྱི་ཕ་རོལ་ཇི་ལྟ་བར་གཟུགས་ཀྱང་དེ་བཞིན་ནོ། །དེ་བཞིན་
39-1-37b


དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་ཕ་རོལ་ཇི་ལྟ་བར་རྣམ་པར་ཤེས་པ་ཡང་དེ་བཞིན་ནོ། །རྣམ་པར་ཤེས་པའི་ཕ་རོལ་ཇི་ལྟ་བར་ཆོས་ཐམས་ཅད་ཀྱང་དེ་བཞིན་ནོ། །ཆོས་ཐམས་
ཅད་ཀྱི་ཕ་རོལ་གང་ཡིན་པ་དེ་དག་ནི་ཆོས་ཐམས་ཅད་མ་ཡིན་ནོ། །ཆོས་ཐམས་ཅད་ཀྱི་ཕ་རོལ་ཇི་ལྟ་བར་ཆོས་ཐམས་ཅད་ཀྱང་དེ་བཞིན་ནོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལ་གཟུགས་ཀྱི་ཕ་རོལ་གང་ཡིན་པ་དེ་གཟུགས་མ་
ཡིན་ནོ། །ཞེས་བྱ་བ་དེ་ནི་གཟུགས་འབྲལ་བ་བསྟན་པའོ། །གཟུགས་ཀྱི་ཕ་རོལ་ཇི་ལྟ་བར་གཟུགས་ཀྱང་དེ་བཞིན་ནོ་ཞེས་བྱ་བ་དེ་ནི་གཟུགས་ཀྱི་ངོ་བོ་ཉིད་བཤད་པ་བསྟན་པའོ། །དེ་ནི་གཟུགས་ཀྱི་ཇི་ལྟ་བ་བཞིན་བསྟན་པའོ། །
དེ་ནི་གཟུགས་ཀྱི་རང་བཞིན་བསྟན་པའོ། །དེ་ནི་གཟུགས་ཀྱི་མི་དམིགས་པ་བསྟན་པའོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་ཕ་རོལ་གང་ཡིན་པ་དེ་རྣམ་པར་ཤེས་པའི་མ་ཡིན་ནོ། །ཞེས་བྱ་བ་
དེ་ནི་རྣམ་པར་ཤེས་པའི་འབྲལ་བ་བསྟན་པའོ། །རྣམ་པར་ཤེས་པའི་ཕ་རོལ་ཇི་ལྟ་བར་རྣམ་པར་ཤེས་པ་ཡང་དེ་བཞིན་ནོ་ཞེས་བྱ་བ་དེ་ནི་རྣམ་པར་ཤེས་པའི་ངོ་བོ་ཉིད་བཤད་པ་བསྟན་པའོ། །དེ་ནི་རྣམ་པར་ཤེས་པའི་ཇི་ལྟ་བ་བཞིན་དང་
རྣམ་པར་ཤེས་པའི་རང་བཞིན་དང་། རྣམ་པར་ཤེས་པ་མི་དམིགས་པ་བསྟན་པའོ། །རྣམ་པར་ཤེས་པའི་ཕ་རོལ་ཇི་ལྟ་བར་ཆོས་ཐམས་ཅད་ཀྱང་དེ་བཞིན་ནོ་ཞེས་བྱ་བ་དང་། ཆོས་ཐམས་ཅད་ཀྱི་ཕ་རོལ་གང་ཡིན་པ་དེ་དག་ཆོས་
ཐམས་ཅད་མ་ཡིན་ནོ་ཞེས་བྱ་བ་དེ་ནི་ཆོས་ཐམས་ཅད་ཀྱི་འབྲལ་བ་བསྟན་པའོ། །ཆོས་ཐམས་ཅད་ཀྱི་ཕ་རོལ་ཇི་ལྟ་བར་ཆོས་ཐམས་ཅད་ཀྱང་དེ་བཞིན་ནོ་ཞེས་བྱ་བ་དེ་ནི་ཆོས་ཐམས་ཅད་ཀྱི་ངོ་བོ་ཉིད་བཤད་པ་བསྟན་པའོ་དེ་ནི་
ཆོས་ཐམས་ཅད་ཀྱི་ཇི་ལྟ་བ་བཞིན་དང་། ཆོས་ཐམས་ཅད་ཀྱི་མཚན་ཉིད་དང་། ཆོས་ཐམས་ཅད་ཀྱི་རང་བཞིན་དང་། ཆོས་ཐམས་ཅད་མི་དམིགས་པ་བསྟན་པའོ། །ཆོས་ཐམས་ཅད་ཀྱི་ཇི་ལྟ་བ་བཞིན་དང་། ཆོས་ཐམས་ཅད་ཀྱི་རང་
39-1-38a


བཞིན་དང་། ཆོས་ཐམས་ཅད་མི་དམིགས་པ་ཇི་ལྟ་བར་ཤེས་རབ་ཀྱི་ཕ་རོལ་དུ་ཕྱིན་པ་ཡང་དེ་བཞིན་ཏེ། རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ་ནི་གཟུགས་ལ་མི་གནས་སོ། །ཚོར་བ་དང་། འདུ་ཤེས་དང་། འདུ་
བྱེད་རྣམས་དང་། རྣམ་པར་ཤེས་པ་ལ་མི་གནས་སོ། །ཤེས་རབ་ཀྱི་ཕ་རོལ་དུ་ཕྱིན་པ་ནི་གཟུགས་ཀྱི་ནང་ངམ། ཕྱི་འམ་གཉི་ག་མེད་པ་ལས་རིང་དུ་གནས་པ་འང་མ་ཡིན་ཏེ། ཚོར་བ་དང་འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་
པའི་ནང་ངམ། ཕྱི་འམ་གཉི་ག་མེད་པ་ལས་རིང་དུ་གནས་པའང་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ་ནི་གཟུགས་དང་ལྡན་པ་ཡང་མ་ཡིན། གཟུགས་དང་མི་ལྡན་པའང་མ་ཡིན་ནོ། །
ཤེས་རབ་ཀྱི་ཕ་རོལ་དུ་ཕྱིན་པ་ནི་ཚོར་བ་དང་། འདུ་ཤེས་དང་འདུ་བྱེད་རྣམས་དང་། རྣམ་པར་ཤེས་པ་དང་ལྡན་པ་ཡང་མ་ཡིན། མི་ལྡན་པ་ཡང་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ་ནི་
ཆོས་གང་དང་ཡང་ལྡན་པ་ཡང་མ་ཡིན། མི་ལྡན་པ་ཡང་མ་ཡིན་ནོ། །གཟུགས་ཀྱི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་གང་ཡིན་པ་དེ་ཤེས་རབ་ཀྱི་ཕ་རོལ་དུ་
ཕྱིན་པའོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་གང་ཡིན་པ་དེ་ཤེས་རབ་
ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ཤེས་བྱ་བ་འདི་ནི་གཟུགས་བྲལ་བའོ། །དེ་ཅིའི་ཕྱིར་ཞེ་ན། གཟུགས་ལ་ནི་གཟུགས་མེད་དེ། གང་མེད་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །
ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་དེ་བཞིན་ཏེ། རབ་ཀྱི་རྩལ་གྱིས་རྣམ་པར་གནོན་པ་རྣམ་པར་ཤེས་པ་ཞེས་བྱ་བ་འདི་ནི་རྣམ་པར་ཤེས་པ་དང་བྲལ་བའོ། །རྣམ་པར་ཤེས་པ་ལ་རྣམ་པར་
39-1-38b


ཤེས་པ་མེད་དེ། གང་མེད་པ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་གཟུགས་ཀྱི་རང་བཞིན་དང་བྲལ་བའོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་
ཡང་རྣམ་པར་ཤེས་པའི་རང་བཞིན་དང་བྲལ་བ་སྟེ། བྲལ་བའི་རང་བཞིན་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །གཟུགས་ལ་གཟུགས་ཀྱི་རང་བཞིན་མེད་དོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་
རྣམ་པར་ཤེས་པའི་རང་བཞིན་མེད་དེ། རང་བཞིན་མེད་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་གཟུགས་ཀྱི་སྤྱོད་ཡུལ་མ་ཡིན་ནོ། །ཚོར་བ་དང་འདུ་ཤེས་དང་། འདུ་
བྱེད་རྣམས་དང་། རྣམ་པར་ཤེས་པ་ཡང་རྣམ་པར་ཤེས་པའི་སྤྱོད་ཡུལ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་སྤྱོད་ཡུལ་མ་ཡིན་ཞེས་བྱ་བ་ནི། གཟུགས་ཀྱིས་གཟུགས་ཡང་དག་པར་མི་ཤེས་མི་མཐོང་བ་སྟེ། 
གཟུགས་ཀྱིས་མི་ཤེས་མི་མཐོང་བ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པས་རྣམ་པར་ཤེས་པ་མི་མཐོང་ངོ་། །
རྣམ་པར་ཤེས་པས་མི་ཤེས་མི་མཐོང་བ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ཀྱིས་གཟུགས་ཀྱི་ངོ་བོ་ཉིད་མི་ཤེས་སོ། །ཚོར་བ་དང་འདུ་ཤེས་དང་། འདུ་བྱེད་རྣམས་
དང་། རྣམ་པར་ཤེས་པས་རྣམ་པར་ཤེས་པའི་ངོ་བོ་ཉིད་མི་ཤེས་ཏེ། ངོ་བོ་ཉིད་མེད་པར་ཡོངས་སུ་ཤེས་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་གཟུགས་ལ་
ཀུན་དུ་སྦྱོར་བར་མི་བྱེད། ཀུན་དུ་མི་སྦྱོར་བར་ཡང་མི་བྱེད་དོ། །ཚོར་བ་དང་འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་རྣམ་པར་ཤེས་པ་ལ་ཀུན་དུ་སྦྱོར་བར་མི་བྱེད། ཀུན་དུ་མི་སྦྱོར་བར་ཡང་མི་བྱེད་དེ། གཟུགས་དང་། 
39-1-39a


ཚོར་བ་དང་འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཀུན་དུ་སྦྱོར་བར་ཡང་མི་བྱེད། ཀུན་དུ་མི་སྦྱོར་བར་མི་བྱེད་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་
ནི་འབྲི་བར་འགྱུར་བ་འམ། འཕེལ་བར་འགྱུར་བ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་འབྲི་བར་འགྱུར་བ་འམ། འཕེལ་བར་འགྱུར་བ་མ་ཡིན་ཏེ། གཟུགས་དང་། ཚོར་བ་
དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་མི་འབྲི་མི་འཕེལ་བ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་ཀུན་ནས་ཉོན་མོངས་པར་འགྱུར་བ་འམ། 
རྣམ་པར་བྱང་བར་འགྱུར་བ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་ཀུན་ནས་ཉོན་མོང་ས་པར་འགྱུར་བ་འམ། རྣམ་པར་བྱང་བར་འགྱུར་བ་མ་ཡིན་ཏེ། 
གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཀུན་ནས་ཉོན་མོངས་པ་མ་ཡིན། རྣམ་པར་བྱང་བ་ཡང་མ་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་
པ་གཟུགས་ནི་རྣམ་པར་དག་པའི་ཆོས་ཅན་ཡང་མ་ཡིན། རྣམ་པར་མ་དག་པའི་ཆོས་ཅན་ཡང་མ་ཡིན་ནོ། །དེ་བཞིན་དུ་ཚོར་བ་དང་འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་རྣམ་པར་དག་པའི་ཆོས་
ཅན་ཡང་མ་ཡིན། རྣམ་པར་མ་དག་པའི་ཆོས་ཅན་ཡང་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རྣམ་པར་དག་པའི་ཆོས་ཉིད་ཀྱང་མ་ཡིན། རྣམ་པར་མ་དག་པའི་
ཆོས་ཉིད་ཀྱང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་འཕོ་བ་འམ་མི་འཕོ་བ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་
39-1-39b


པ་ཡང་འཕོ་བ་འམ། མི་འཕོ་བ་མ་ཡིན་ཏེ། གཟུགས་དང་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འཕོ་བ་ཡང་མ་ཡིན། མི་འཕོ་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་
གྱིས་རྣམ་པར་གནོན་པ་གཟུགས་ནི་སྦྱོར་བ་འམ། མི་སྦྱོར་བ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་སྦྱོར་བ་འམ། མི་སྦྱོར་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་
དང་འདུ་བྱེད་རྣམས་དང་། རྣམ་པར་ཤེས་པ་འདུ་བ་ཡང་མ་ཡིན། བྲལ་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་འཆི་འཕོ་འམ། སྐྱེ་བ་མ་ཡིན་ནོ། །དེ་བཞིན་དུ་
ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་འཆི་འཕོ་འམ། སྐྱེ་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འཆི་འཕོ་ཡང་མ་ཡིན། སྐྱེ་བ་
ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་སྐྱེ་བ་འམ། འཆི་བ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་
སྐྱེ་བ་འམ། འཆི་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་མི་སྐྱེ་མི་འཆི་བ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་འཁོར་
བར་འགྱུར་བ་འམ། འཁོར་བའི་ཆོས་ཅན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་འཁོར་བར་འགྱུར་བ་འམ། འཁོར་བའི་ཆོས་ཅན་མ་ཡིན་ཏེ། གཟུགས་དང་། ཚོར་བ་དང་། 
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འཁོར་བར་མི་འགྱུར་ཞིང་འཁོར་བའི་ཆོས་ཅན་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་ཟད་པར་
39-1-40a


འགྱུར་བ་འམ། ཟད་པའི་ཆོས་ཅན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་ཟད་པར་འགྱུར་བ་འམ། ཟད་པའི་ཆོས་ཅན་མ་ཡིན་ཏེ། གཟུགས་དང་། 
ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཟད་པར་མི་འགྱུར་ཞིང་ཟད་པའི་ཆོས་ཉིད་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་
ནི་ཀུན་འབྱུང་བའི་ཆོས་ཅན་མ་ཡིན། འགོག་པའི་ཆོས་ཅན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་ཀུན་འབྱུང་བའི་ཆོས་ཅན་མ་ཡིན། འགོག་པའི་
ཆོས་ཅན་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཀུན་འབྱུང་བའི་ཆོས་ཉིད་ཀྱང་མ་ཡིན། འགོག་པའི་ཆོས་ཉིད་ཀྱང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་
དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་སྐྱེ་བའི་ཆོས་ཅན་ནམ། འཇིག་པའི་ཆོས་ཅན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་སྐྱེ་བའི་
ཆོས་ཅན་ནམ། འཇིག་པའི་ཆོས་ཅན་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་སྐྱེ་བའི་ཆོས་ཉིད་ཀྱང་མ་ཡིན། འཇིག་པའི་ཆོས་ཉིད་ཀྱང་མ་ཡིན་པ་གང་ཡིན་པ་དེ་
ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་འགྱུར་བའི་ཆོས་ཅན་ནམ། མི་འགྱུར་བའི་ཆོས་ཅན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་
པ་ཡང་འགྱུར་བའི་ཆོས་ཅན་ནམ། མི་འགྱུར་བའི་ཆོས་ཅན་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འགྱུར་བའི་ཆོས་ཉིད་ཀྱང་མ་ཡིན། མི་འགྱུར་བའི་ཆོས་ཉིད་ཀྱང་མ་ཡིན་པ་
39-1-40b


དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་རྟག་པ་འམ། མི་རྟག་པ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་རྟག་པ་འམ། མི་རྟག་པ་
མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རྟག་པ་ཡང་མ་ཡིན། མི་རྟག་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་
པ་གཟུགས་ནི་བདེ་བ་འམ། སྡུག་བསྔལ་བ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་བདེ་བ་འམ། སྡུག་བསྔལ་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། 
འདུ་བྱེད་རྣམས་དང་། རྣམ་པར་ཤེས་པ་བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་སྡུག་པ་འམ། མི་སྡུག་པ་
མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་སྡུག་པ་འམ། མི་སྡུག་པ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་
ཤེས་པ་སྡུག་པ་ཡང་མ་ཡིན། མི་སྡུག་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་བདག་གམ། བདག་མེད་པ་མ་ཡིན་ནོ། །དེ་བཞིན་དུ་ཚོར་བ་
དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་བདག་གམ། བདག་མེད་པ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་བདག་ཀྱང་མ་ཡིན། བདག་
མེད་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་འདོད་ཆགས་ཀྱི་ཆོས་ཅན་ནམ་འདོད་ཆགས་དང་བྲལ་བའི་ཆོས་ཅན་མ་ཡིན་ནོ། །དེ་བཞིན་དུ་ཚོར་བ་དང་། 
39-1-41a


འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་འདོད་ཆགས་ཀྱི་ཆོས་ཅན་ནམ། འདོད་ཆགས་དང་བྲལ་བའི་ཆོས་ཅན་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་
ཤེས་པ་འདོད་ཆགས་ཀྱི་ཆོས་ཉིད་ཀྱང་མ་ཡིན། འདོད་ཆགས་དང་བྲལ་བའི་ཆོས་ཉིད་ཀྱང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་ཞེ་སྡང་གི་ཆོས་ཅན་ནམ། 
ཞེ་སྡང་དང་བྲལ་བའི་ཆོས་ཅན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་ཞེ་སྡང་གི་ཆོས་ཅན་ནམ། ཞེ་སྡང་མེད་པའི་ཆོས་ཅན་མ་ཡིན་ཏེ། གཟུགས་དང་། ཚོར་བ་དང་། འདུ་
ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཞེ་སྡང་གི་ཆོས་ཉིད་ཀྱང་མ་ཡིན། ཞེ་སྡང་མེད་པའི་ཆོས་ཉིད་ཀྱང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་
ནི་གཏི་མུག་གི་ཆོས་ཅན་ནམ། གཏི་མུག་མེད་པའི་ཆོས་ཅན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་གཏི་མུག་གི་ཆོས་ཅན་ནམ་གཏི་མུག་མེད་པའི་ཆོས་ཅན་
མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་གཏི་མུག་གི་ཆོས་ཅན་ཡང་མ་ཡིན། གཏི་མུག་མེད་པའི་ཆོས་ཅན་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་
པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ལ་བྱེད་པ་པོ་འམ། བྱེད་དུ་འཇུག་པ་གང་ཡང་མེད་དོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡང་བྱེད་པ་པོ་འམ། བྱེད་
དུ་འཇུག་པ་གང་ཡང་མེད་དེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་བྱེད་པ་པོ་ཡང་མེད། བྱེད་དུ་འཇུག་པ་ཡང་མེད་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་
39-1-41b


གནོན་པ་གཟུགས་ལ་སློང་བ་པོ་འམ། ཀུན་ནས་སློང་བ་པོ་གང་ཡང་མེད་དོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སློང་བ་པོ་འམ། ཀུན་ནས་སློང་བ་པོ་གང་ཡང་མེད་དེ། གཟུགས་དང་། ཚོར་བ་
དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སློང་བ་པོ་ཡང་མེད། ཀུན་ནས་སློང་བ་པོ་ཡང་མེད་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ལ་ཤེས་པ་འམ། 
ཤེས་པར་བྱེད་དུ་འཇུག་པ་གང་ཡང་མེད་དོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡང་ཤེས་པ་འམ། ཤེས་པར་བྱེད་དུ་འཇུག་པ་གང་ཡང་མེད་དེ། གཟུགས་དང་། ཚོར་བ་དང་། འདུ་ཤེས་དང་། 
འདུ་བྱེད་རྣམས་དང་། རྣམ་པར་ཤེས་པ་ལ་ཤེས་པ་ཡང་མེད། ཤེས་པར་བྱེད་དུ་འཇུག་པ་ཡང་མེད་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ལ་ཚོར་བ་པོ་འམ། ཚོར་བར་བྱེད་
དུ་འཇུག་པ་གང་ཡང་མེད་དོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཚོར་བ་པོ་འམ། ཚོར་བར་བྱེད་དུ་འཇུག་པ་གང་ཡང་མེད་དེ། གཟུགས་དང་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། 
རྣམ་པར་ཤེས་པ་ལ་ཚོར་བ་པོ་ཡང་མེད། ཚོར་བར་བྱེད་དུ་འཇུག་པ་ཡང་མེད་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ལ་ཤེས་པ་པོ་འམ། མཐོང་བ་པོ་གང་ཡང་མེད་དོ། །དེ་བཞིན་དུ་ཚོར་བ་དང་། 
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡང་ཤེས་པ་པོ་འམ། མཐོང་བ་པོ་གང་ཡང་མེད་དོ། །གཟུགས་དང་། ཚོར་བ་དང་འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཤེས་པ་པོ་ཡང་མེད། མཐོང་བ་པོ་ཡང་མེད་པ་གང་
ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ལ་ནི་ཆད་པ་འམ། རྟག་པ་མེད་དོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡང་ཆད་པ་འམ། རྟག་པ་མེད་དེ། 
39-1-42a


གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཆད་པ་ཡང་མ་ཡིན། རྟག་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་
ནི་མཐའ་འམ། མཐའ་མེད་པ་མ་ཡིན་ནོ། །དེ་བཞིན་དུ་ཚོར་བ་དང་འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་མཐའ་འམ། མཐའ་མེད་པ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། 
རྣམ་པར་ཤེས་པ་མཐའ་ཡོད་པ་ཡང་མ་ཡིན། མཐའ་མེད་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་ལྟ་བར་སོང་བ་ཡང་མ་ཡིན། ལྟ་བར་སོང་བ་སྤོང་བ་
ཡང་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་ལྟ་བར་སོང་བ་ཡང་མ་ཡིན། ལྟ་བར་སོང་བ་སྤོང་བ་ཡང་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་
དང་། རྣམ་པར་ཤེས་པ་ལྟ་བར་སོང་བ་ཡང་མ་ཡིན། ལྟ་བར་སོང་བ་སྤོང་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་སྲེད་པ་ཡང་མ་ཡིན། སྲེད་པ་
སྤོང་བ་ཡང་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་སྲེད་པ་ཡང་མ་ཡིན། སྲེད་པ་སྤོང་བ་ཡང་མ་ཡིན་ཏེ། གཟུགས་དང་ཚོར་བ་དང་། འདུ་ཤེས་དང་འདུ་བྱེད་རྣམས་དང་། 
རྣམ་པར་ཤེས་པ་སྲེད་པ་ཡང་མ་ཡིན། སྲེད་པ་སྤོང་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་དགེ་བ་འམ་མི་དགེ་བ་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་
དང་འདུ་བྱེད་རྣམས་དང་། རྣམ་པར་ཤེས་པ་ཡང་དགེ་བ་འམ་མི་དགེ་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་དགེ་བ་ཡང་མ་ཡིན། མི་དགེ་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་
39-1-42b


པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ལ་འགྲོ་བ་འམ། འོང་བ་མི་མངོན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡང་འགྲོ་བ་འམ་འོང་བར་མི་མངོན་ཏེ། གཟུགས་དང་། ཚོར་བ་དང་། འདུ་ཤེས་དང་། 
འདུ་བྱེད་རྣམས་དང་། རྣམ་པར་ཤེས་པ་འོང་བ་འམ། འགྲོ་བར་ཡང་མི་མངོན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་
པ་ནི་གནས་པ་འམ། མི་གནས་པ་མ་ཡིན་ཏེ། གཟུགས་དང་། ཚོར་བ་དང་འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་གནས་པ་ཡང་མ་ཡིན། མི་གནས་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་
རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཚུ་རོལ་ལམ། ཕ་རོལ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཚུ་
རོལ་ཡང་མ་ཡིན། ཕ་རོལ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཚུལ་ཁྲིམས་སམ། 
འཆལ་པའི་ཚུལ་ཁྲིམས་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཚུལ་ཁྲིམས་ཀྱང་མ་ཡིན། འཆལ་པའི་ཚུལ་ཁྲིམས་ཀྱང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་
ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་རྗེས་སུ་ཆགས་པའམ། ཁོང་ཁྲོ་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་
བྱེད་རྣམས་དང་། རྣམ་པར་ཤེས་པ་རྗེས་སུ་ཆགས་པ་ཡང་མ་ཡིན་ཁོང་ཁྲོ་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་
39-1-43a


རྣམས་དང་། རྣམ་པར་ཤེས་པ་ནི་སྦྱིན་པར་བྱེད་པ་འམ། ལེན་པ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་སྦྱིན་པར་བྱེད་པ་ཡང་མ་ཡིན། ལེན་པ་ཡང་མ་ཡིན་པ་གང་ཡིན་
པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་བཟོད་པ་འམ། མི་བཟོད་པ་མ་ཡིན་ཏེ། གཟུགས་དང་། ཚོར་བ་དང་། 
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་བཟོད་པ་ཡང་མ་ཡིན། མི་བཟོད་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་
ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་བརྩོན་འགྲུས་སམ། ལེ་ལོ་མ་ཡིན་ཏེ། གཟུགས་དང་། ཚོར་བ་དང་འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་བརྩོན་འགྲུས་ཀྱང་མ་ཡིན། ལེ་ལོ་ཡང་མ་ཡིན་པ་གང་
ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཏིང་ངེ་འཛིན་ཀྱང་མ་ཡིན། སེམས་རྣམ་པར་
གཡེངས་པ་ཡང་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཏིང་ངེ་འཛིན་ཀྱང་མ་ཡིན། སེམས་རྣམ་པར་གཡེངས་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་
དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཤེས་རབ་འམ། འཆལ་པའི་ཤེས་རབ་མ་ཡིན་ཏེ། གཟུགས་དང་། ཚོར་བ་དང་། 
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཤེས་རབ་ཀྱང་མ་ཡིན། འཆལ་པའི་ཤེས་རབ་ཀྱང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། 
39-1-43b


འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཕྱིན་ཅི་ལོག་གམ། ཕྱིན་ཅི་ལོག་མ་ཡིན་པ་ཡང་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཕྱིན་ཅི་ལོག་ཀྱང་མ་ཡིན། ཕྱིན་ཅི་
ལོག་མ་ཡིན་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་དྲན་པ་ཉེ་བར་གཞག་
པ་འམ། དྲན་པ་ཉེ་བར་གཞག་པ་མ་ཡིན་པ་ཡང་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་འདུ་བྱེད་རྣམས་དང་། རྣམ་པར་ཤེས་པ་དྲན་པ་ཡང་མ་ཡིན། མི་དྲན་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་
རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཡང་དག་པའི་སྤོང་བ་འམ། ཡང་དག་པའི་སྤོང་བ་མ་ཡིན་པ་ཡང་མ་ཡིན་ཏེ། གཟུགས་
དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་དག་པའི་སྤོང་བ་ཡང་མ་ཡིན། ཡང་དག་པའི་སྤོང་བ་མ་ཡིན་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་
རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་རྫུ་འཕྲུལ་གྱི་རྐང་པ་འམ། ཚད་མེད་པ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། 
འདུ་བྱེད་རྣམས་དང་། རྣམ་པར་ཤེས་པ་རྫུ་འཕྲུལ་གྱི་རྐང་པ་ཡང་མ་ཡིན། ཚད་མེད་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། 
འདུ་ཤེས་དང་འདུ་བྱེད་རྣམས་དང་། རྣམ་པར་ཤེས་པ་ནི་དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་ལམ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་དབང་པོ་དང་། 
39-1-44a


སྟོབས་དང་། བྱང་ཆུབ་ཀྱི་ཡན་ལག་དང་། ལམ་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་རྣམ་པར་ཤེས་
པ་ནི་རིག་པ་འམ། རྣམ་པར་གྲོལ་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རིག་པ་ཡང་མ་ཡིན། རྣམ་པར་གྲོལ་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །
རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ཡང་མ་ཡིན། མངོན་
པར་ཤེས་པ་ཡང་མ་ཡིན། མངོན་པར་ཤེས་པ་མ་ཡིན་པ་ཡང་མ་ཡིན་ཏེ། གཟུགས་དང་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་
འཇུག་པ་ཡང་མ་ཡིན། མངོན་པར་ཤེས་པ་འང་མ་ཡིན། མངོན་པར་མི་ཤེས་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ། གཟུགས་དང་། ཚོར་བ་དང་། འདུ་ཤེས་དང་། 
འདུ་བྱེད་རྣམས་དང་། རྣམ་པར་ཤེས་པ་ནི་སྟོང་པ་ཉིད་དམ། མཚན་མ་མེད་པ་འམ། སྨོན་པ་མེད་པ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་སྟོང་པ་ཉིད་ཀྱང་མ་ཡིན། མཚན་མ་
མེད་པ་ཡང་མ་ཡིན། སྨོན་པ་མེད་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་འདུས་བྱས་སམ། 
འདུས་མ་བྱས་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འདུས་བྱས་ཀྱང་མ་ཡིན་འདུས་མ་བྱས་ཀྱང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་
39-1-44b


རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་འདུ་བ་འམ་མི་འདུ་བ་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འདུ་བ་ཡང་
མ་ཡིན། མི་འདུ་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཤེས་པ་འམ། མི་ཤེས་པ་མ་
ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཤེས་པ་ཡང་མ་ཡིན། མི་ཤེས་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། 
ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་རློམ་སེམས་སམ། གཡོ་བ་འམ། སྦྲོས་པ་མ་མཆིས་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རློམ་སེམས་མ་ཡིན། 
གཡོ་བ་མ་ཡིན། སྤྲོས་པ་མེད་པ་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་འདུ་ཤེས་མ་
ཡིན་ཏེ། འདུ་ཤེས་མ་ཡིན་པ་ཡང་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འདུ་ཤེས་མ་ཡིན། འདུ་ཤེས་མ་ཡིན་པ་ཡང་མ་ཡིན་པ་གང་ཡིན་པ་དེ་ཤེས་རབ་
ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཉེ་བར་ཞི་བ་ཡང་མ་ཡིན། ཉེ་བར་མ་ཞི་བ་ཡང་མ་ཡིན་ཏེ། 
གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཉེ་བར་ཞི་བ་ཡང་མ་ཡིན། ཉེ་བར་མ་ཞི་བ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་
39-1-45a


པ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ལྡོག་པ་ཡང་མ་ཡིན། མི་ལྡོག་པ་ཡང་མ་ཡིན་ཏེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། 
རྣམ་པར་ཤེས་པ་ལྡོག་པ་ཡང་མ་ཡིན་མི་ལྡོག་པ་ཡང་མ་ཡིན་པ་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་ཕུང་པོ་ལྔ་པོ་དག་མངོན་དུ་འགྲུབ་པར་གཏོགས་པ་བསྟན་པ་དེ་ཤེས་རབ་ཀྱི་ཕ་རོལ་
དུ་ཕྱིན་པ་མ་ཡིན་གྱི། གང་ཕུང་པོ་ལྔ་པོ་དག་མངོན་དུ་འགྲུབ་པར་གཏོགས་པ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་དུ་ཕྱིན་
པའོ། །རབ་ཀྱི་རྩལ་གྱིས་རྣམ་པར་གནོན་པ་གང་ཁམས་དང་། སྐྱེ་མཆེད་དང་། རྟེན་ཅིང་འབྲེལ་བར་འབྱུང་བ་མངོན་དུ་འགྲུབ་པར་གཏོགས་པ་བསྟན་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་གྱི་གང་ཁམས་དང་། སྐྱེ་མཆེད་དང་། 
རྟེན་ཅིང་འབྲེལ་བར་འབྱུང་བ་མངོན་དུ་འགྲུབ་པར་གཏོགས་པ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །
རབ་ཀྱི་རྩལ་གྱིས་རྣམ་པར་གནོན་པ་གང་ཕྱིན་ཅི་ལོག་དང་། སྒྲིབ་པ་མངོན་དུ་འགྲུབ་པར་གཏོགས་པ། བསྟན་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་གྱི་གང་ཕྱིན་ཅི་ལོག་དང་། སྒྲིབ་པ་མངོན་དུ་འགྲུབ་པར་གཏོགས་
པ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་སྲེད་
པར་སྤྱོད་པ་སུམ་བཅུ་རྩ་དྲུག་མངོན་དུ་འགྲུབ་པར་གཏོགས་པ་བསྟན་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་གྱི་གང་སྲེད་པར་སྤྱོད་པ་སུམ་བཅུ་དྲུག་མངོན་དུ་གཏོགས་པ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། 
39-1-45b


གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་ལྟ་བར་གྱུར་པ་དྲུག་བཅུ་རྩ་གཉིས་མངོན་དུ་འགྲུབ་པར་གཏོགས་པ་བསྟན་པ་དེ་
ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་གྱི་གང་ལྟ་བར་གྱུར་པ་དྲུག་བཅུ་རྩ་གཉིས་མངོན་དུ་འགྲུབ་པར་གཏོགས་པ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་
གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་བསྟན་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་གྱི་གང་
བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་
ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་མངོན་པར་ཤེས་པ་ལྔ་པོ་དག་བསྟན་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་གྱི་གང་མངོན་པར་ཤེས་པ་ལྔ་བསྟན་པའི་དེ་བཞིན་ཉིད་དང་། མ་ནོར་བ་དེ་
བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་འདུས་བྱས་སུ་གཏོགས་པ། འཇིག་རྟེན་གྱི་དགེ་བ་དང་། 
མི་དགེ་བའི་ཆོས་ཐམས་ཅད་མངོན་དུ་འགྲུབ་པར་གཏོགས་པ་བསྟན་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་གྱི་གང་དེ་དག་གི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། 
ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་དྲན་པ་ཉེ་བར་གཞག་པ་དང་། ཡང་དག་པའི་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་སྟོབས་དང་། 
39-1-46a


བྱང་ཆུབ་ཀྱི་ཡན་ལག་དང་། ལམ་མངོན་དུ་འགྲུབ་པར་གཏོགས་པ་བསྟན་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་གྱི་གང་དྲན་པ་ཉེ་བར་གཞག་པ་དང་། ཡང་དག་པའི་སྤོང་བ་དང་། རྫུ་འཕྲུལ་གྱི་རྐང་པ་དང་། 
དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ལམ་མངོན་དུ་འགྲུབ་པར་གཏོགས་པ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་
བཞིན་ཉིད་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་འཕགས་པའི་བདེན་པ་བཞི་བསྟན་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་གྱི་གང་འཕགས་པའི་བདེན་པ་བཞི་བསྟན་པའི་དེ་
བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་ཚུལ་ཁྲིམས་དང་། ཏིང་ངེ་
འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་རྣམ་པར་དག་པ་བསྟན་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་གྱི་གང་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། 
རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་རྣམ་པར་དག་པ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་
ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་འདུས་མ་བྱས་སུ་གཏོགས་པ། འཇིག་རྟེན་ལས་འདས་པ། མི་གནས་པ། ཟག་པ་མེད་པའི་ཆོས་རྣམས་བསྟན་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་
གྱི་གང་འདུས་མ་བྱས་སུ་གཏོགས་པ། འཇིག་རྟེན་ལས་འདས་པ་མི་གནས་པ། ཟག་པ་མེད་པའི་ཆོས་རྣམས་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་
39-1-46b


ཉིད་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མི་སྐྱེ་བ་དང་། མངོན་པར་འདུས་མ་བྱས་པའི་ཆོས་བསྟན་པ་དེ་ཤེས་རབ་ཀྱི་ཕ་རོལ་
དུ་ཕྱིན་པ་མ་ཡིན་གྱི་གང་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མི་སྐྱེ་བ་དང་། མངོན་པར་འདུས་མ་བྱས་པའི་ཆོས་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་
དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་གང་རིག་པ་དང་། རྣམ་པར་གྲོལ་བ་དང་། འདོད་ཆགས་དང་བྲལ་བ་དང་། འགོག་པ་དང་། མྱ་ངན་ལས་འདས་པ་
བསྟན་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་གྱི་གང་རིག་པ་དང་། རྣམ་པར་གྲོལ་བ་དང་། འདོད་ཆགས་དང་བྲལ་བ་དང་། འགོག་པ་དང་། མྱ་ངན་ལས་འདས་པ་བསྟན་པའི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་
མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ཅིའི་ཕྱིར་ཞེ་ན། གཟུགས་སུ་གཏོགས་པ་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན། 
དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པར་གཏོགས་པ་ཡང་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན། ས་དང་། ཆུ་དང་མེ་དང་། རླུང་དང་། ནམ་མཁར་གཏོགས་པ་ཡང་ཤེས་རབ་ཀྱི་ཕ་རོལ་དུ་
ཕྱིན་པ་མ་ཡིན། འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་སུ་གཏོགས་པ་ཡང་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན། འདུས་བྱས་དང་། འདུས་མ་བྱས་སུ་གཏོགས་པ་ཡང་ཤེས་རབ་ཀྱི་ཕ་
རོལ་དུ་ཕྱིན་པ་མ་ཡིན། འཇིག་རྟེན་པ་དང་། འཇིག་རྟེན་ལས་འདས་པ་དང་། ཟག་པ་དང་བཅས་པ་དང་། ཟག་པ་མེད་པའི་ཆོས་སུ་གཏོགས་པ་ཡང་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན། དགེ་བ་དང་མི་དགེ་བའི་ཆོས་སུ་གཏོགས་པ་ཡང་ཤེས་
39-1-47a


རབ་ཀྱི་ཕ་རོལ་དུ་ཕྱིན་པ་མ་ཡིན། སེམས་ཅན་གྱི་ཁམས་སུ་གཏོགས་པ་ཡང་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་ཞིང་། ཆོས་དེ་དག་ལས་རྣམ་པར་གྲོལ་བ་ཡང་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་
པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ་ནི། ཆོས་གང་དུ་ཡང་གཏོགས་པ་ཡང་མ་ཡིན། མི་གཏོགས་པ་ཡང་མ་ཡིན་ཏེ། གང་གཏོགས་པ་དང་། གང་མི་གཏོགས་པའི་
ཆོས་རྣམས་ཀྱི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །རབ་ཀྱི་རྩལ་གྱིས་རྣམ་པར་གནོན་པ་དེ་
བཞིན་ཉིད་ཅེས་བྱ་བ་དེ་གང་གི་ཚིག་བླ་དགས་ཡིན་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་ཇི་ལྟར་བྱིས་པ་སོ་སོའི་སྐྱེ་བོ་རྣམས་ཀྱིས་དམིགས་པའི་ཆོས་རྣམས་ཀྱིས་དམིགས་པའི་ཆོས་དེ་དག་ནི་དེ་བཞིན་དུ་མ་ཡིན་
ཞིང་གཞན་དུ་འང་མ་ཡིན་ལ། ཇི་ལྟར་ཆོས་རྣམས་དེ་བཞིན་གཤེགས་པ་དང་། དེ་བཞིན་གཤེགས་པའི་ཉན་ཐོས་དང་། བྱང་ཆུབ་སེམས་དཔས་མཐོང་བའི་ཆོས་དེ་ལྟ་བུ་ནི་དེ་བཞིན་ཉིད་མ་ནོར་བ་དེ་བཞིན་ཉིད། གཞན་
མ་ཡིན་པ་དེ་བཞིན་ཉིད་དེ་དེའི་ཕྱིར་དེ་བཞིན་ཉིད་ཅེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པའོ། །རབ་ཀྱི་རྩལ་གྱིས་
རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་འབྲི་བའི་ཕྱིར་རམ། འཕེལ་བའི་ཕྱིར་ཉེ་བར་གནས་པ་མ་ཡིན་ནོ། །ཆོས་གང་འདུ་བའི་ཕྱིར་རམ། འབྲལ་བའི་ཕྱིར་རམ། བྲི་བའི་ཕྱིར་རམ། གང་
བའི་ཕྱིར་རམ། སྩོགས་པའི་ཕྱིར་རམ། མི་སྩོགས་པའི་ཕྱིར་རམ། འཕོ་བའི་ཕྱིར་རམ། མི་འཕོ་བའི་ཕྱིར་རམ། སྐྱེ་བའི་ཕྱིར་རམ། འགོག་པའི་ཕྱིར་རམ། ཀུན་ནས་ཉོན་མོངས་པའི་ཕྱིར་རམ། རྣམ་
39-1-47b


པར་བྱང་བའི་ཕྱིར་རམ། འཇུག་པའི་ཕྱིར་རམ། ལྡོག་པའི་ཕྱིར་རམ། ཀུན་འབྱུང་བའི་ཕྱིར་རམ། ནུབ་པའི་ཕྱིར་རམ། མཚན་ཉིད་ཀྱི་ཕྱིར་རམ། མཉམ་པའི་ཕྱིར་རམ། མི་མཉམ་པའི་ཕྱིར་རམ། ཀུན་རྫོབ་ཀྱི་ཕྱིར་རམ། དོན་དམ་པའི་ཕྱིར་རམ། 
བདེ་བའི་ཕྱིར་རམ། སྡུག་བསྔལ་གྱི་ཕྱིར་རམ། རྟག་པའི་ཕྱིར་རམ། མི་རྟག་པའི་ཕྱིར་རམ། སྡུག་པའི་ཕྱིར་རམ། མི་སྡུག་པའི་ཕྱིར་རམ། བདག་གི་ཕྱིར་རམ། བདག་མེད་པའི་ཕྱིར་རམ། བདེན་པའི་ཕྱིར་རམ། བརྫུན་པའི་ཕྱིར་རམ། བྱེད་པ་
པོའི་ཕྱིར་རམ། བྱེད་པ་པོ་མེད་པའི་ཕྱིར་རམ། འབྱུང་བའི་ཕྱིར་རམ། མི་འབྱུང་བའི་ཕྱིར་རམ། ངོ་བོ་ཉིད་ཀྱི་ཕྱིར་རམ། ངོ་བོ་ཉིད་མེད་པའི་ཕྱིར་རམ། འཆི་འཕོ་བའི་ཕྱིར་རམ། སྐྱེ་བའི་ཕྱིར་རམ། སྐྱེས་པའི་ཕྱིར་རམ། མངོན་པར་འགྲུབ་པའི་ཕྱིར་
རམ། སྐྱེ་བའི་ཕྱིར་རམ། སྐྱེ་བ་ཀུན་འབྱུང་བའི་ཕྱིར་རམ། ཚོགས་པའི་ཕྱིར་རམ། མ་ཚོགས་པའི་ཕྱིར་རམ། འདོད་ཆགས་དང་བཅས་པའི་ཕྱིར་རམ། འདོད་ཆགས་དང་བྲལ་བའི་ཕྱིར་རམ། ཞེ་སྡང་དང་བཅས་པའི་ཕྱིར་རམ། ཞེ་སྡང་དང་བྲལ་བའི་
ཕྱིར་རམ། གཏི་མུག་དང་བཅས་པའི་ཕྱིར་རམ། གཏི་མུག་དང་བྲལ་བའི་ཕྱིར་རམ། ཕྱིན་ཅི་ལོག་གི་ཕྱིར་རམ། ཕྱིན་ཅི་ལོག་མ་ཡིན་པའི་ཕྱིར་རམ། དམིགས་པའི་ཕྱིར་རམ། དམིགས་པ་མེད་པའི་ཕྱིར་རམ། ཟད་པའི་ཕྱིར་རམ། 
མི་ཟད་པའི་ཕྱིར་རམ། ཤེས་པའི་ཕྱིར་རམ། མི་ཤེས་པའི་ཕྱིར་རམ། མཐོ་བའི་ཕྱིར་རམ། དམའ་བའི་ཕྱིར་རམ། ཕན་པའི་ཕྱིར་རམ། མི་ཕན་པའི་ཕྱིར་རམ། འགྲོ་བའི་ཕྱིར་རམ། མི་འགྲོ་བའི་ཕྱིར་རམ། ཡོད་པའི་
ཕྱིར་རམ། མེད་པའི་ཕྱིར་རམ། རྗེས་སུ་ཆགས་པའི་ཕྱིར་རམ། ཁོང་ཁྲོ་བའི་ཕྱིར་རམ། སྣང་བའི་ཕྱིར་རམ། མུན་པའི་ཕྱིར་རམ། ལེ་ལོའི་ཕྱིར་རམ། བརྩོན་འགྲུས་བརྩམ་པའི་ཕྱིར་རམ། སྟོང་པ་ཉིད་ཀྱི་ཕྱིར་རམ། 
སྟོང་པ་ཉིད་མ་ཡིན་པའི་ཕྱིར་རམ། མཚན་མའི་ཕྱིར་རམ། མཚན་མ་མེད་པའི་ཕྱིར་རམ། སྨོན་པའི་ཕྱིར་རམ། སྨོན་པ་མེད་པའི་ཕྱིར་རམ། མངོན་པར་འདུ་བྱེད་པའི་ཕྱིར་རམ། མངོན་པར་འདུ་མི་བྱེད་པའི་ཕྱིར་རམ། ནུབ་
39-1-48a


པའི་ཕྱིར་རམ། ནུབ་པ་མ་ཡིན་པའི་ཕྱིར་རམ། རིག་པའི་ཕྱིར་རམ། རྣམ་པར་གྲོལ་བའི་ཕྱིར་རམ། ཞི་བའི་ཕྱིར་རམ། ཉེ་བར་མ་ཞི་བའི་ཕྱིར་རམ། འགྲུབ་པའི་ཕྱིར་རམ། མི་འགྲུབ་པའི་ཕྱིར་རམ། ཚུལ་བཞིན་གྱི་ཕྱིར་
རམ། ཚུལ་བཞིན་མ་ཡིན་པའི་ཕྱིར་རམ། ཡོངས་སུ་ཤེས་པའི་ཕྱིར་རམ། ཡོངས་སུ་མི་ཤེས་པའི་ཕྱིར་རམ། ངེས་པར་འབྱུང་བའི་ཕྱིར་རམ། ངེས་པར་འབྱུང་བ་མ་ཡིན་པའི་ཕྱིར་རམ། འདུལ་བའི་ཕྱིར་རམ། འདུལ་བ་མ་
ཡིན་པའི་ཕྱིར་རམ། ཚུལ་ཁྲིམས་ཀྱི་ཕྱིར་རམ། འཆལ་པའི་ཚུལ་ཁྲིམས་ཀྱི་ཕྱིར་རམ། རྣམ་པར་གཡེང་བའི་ཕྱིར་རམ། རྣམ་པར་གཡེང་བ་མ་ཡིན་པའི་ཕྱིར་རམ། ཤེས་རབ་ཀྱི་ཕྱིར་རམ། འཆལ་པའི་ཤེས་རབ་ཀྱི་ཕྱིར་
རམ། རྣམ་པར་ཤེས་པའི་ཕྱིར་རམ། རྣམ་པར་ཤེས་པ་མ་ཡིན་པའི་ཕྱིར་རམ། གནས་པའི་ཕྱིར་རམ། མི་གནས་པའི་ཕྱིར་རམ། སྐལ་པ་མཉམ་པའི་ཕྱིར་རམ། སྐལ་པ་མི་མཉམ་པའི་ཕྱིར་རམ། 
འབྱུང་བའི་ཕྱིར་རམ། འཇིག་པའི་ཕྱིར་རམ། ཐོབ་པའི་ཕྱིར་རམ། མ་ཐོབ་པའི་ཕྱིར་རམ། མངོན་པར་རྟོགས་པའི་ཕྱིར་རམ། མངོན་པར་རྟོགས་པ་མ་ཡིན་པའི་ཕྱིར་རམ། མངོན་སུམ་དུ་བྱ་བའི་ཕྱིར་རམ། མངོན་སུམ་དུ་བྱ་བ་མ་
ཡིན་པའི་ཕྱིར་རམ། རབ་ཏུ་རྟོགས་པའི་ཕྱིར་རམ། རབ་ཏུ་མ་རྟོགས་པའི་ཕྱིར་ཉེ་བར་གནས་པ་མ་ཡིན་ནོ། །དེ་བཞིན་ཉིད་ཀྱི་ལེའུ་སྟེ་གསུམ་པའོ།། །། བམ་པོ་གསུམ་པ། རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་
ན་སྐྱེས་བུ་རྨི་ལམ་རྨིས་པས་རྨི་ལམ་གྱི་རང་བཞིན་བཤད་པ་སྟོན་ཀྱང་། རྨི་ལམ་གྱི་རང་བཞིན་བསྟན་པ་མེད་དོ། །དེ་ཅིའི་ཕྱིར་ཞེ་ན། རྨི་ལམ་ཉིད་ཀྱང་མེད་ན་རྨི་ལམ་གྱི་རང་བཞིན་བསྟན་པ་ལྟ་ག་ལ་ཡོད། རབ་ཀྱི་རྩལ་གྱིས་རྣམ་པར་
གནོན་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པའི་རང་བཞིན་སྟོན་ཀྱང་། ཤེས་རབ་ཀྱི་ཕ་རོལ་དུ་ཕྱིན་པའི་རང་བཞིན་གང་ཡང་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་རྨི་ལམ་ནི་ཆོས་གང་
39-1-48b


བསྟན་པར་ཡང་ཉེ་བར་གནས་པ་མ་ཡིན་ནོ། །དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཡང་ཆོས་གང་བསྟན་པར་ཡང་ཉེ་བར་གནས་པ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སྒྱུ་མ་མཐོང་བའི་སྐྱེས་བུ་སྒྱུ་མའི་
རང་བཞིན་བཤད་པ་སྟོན་ཀྱང་སྒྱུ་མའི་རང་བཞིན་གང་ཡང་མེད་ན། སྒྱུ་མའི་རང་བཞིན་བསྟན་པའི་ངོ་བོ་ཉིད་ལྟ་ག་ལ་ཡོད། དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་སྟོན་ཀྱང་ཤེས་རབ་ཀྱི་ཕ་རོལ་དུ་ཕྱིན་པའི་རང་བཞིན་བསྟན་པ་གང་ཡང་མེད་དོ། །
རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སྒྱུ་མ་ནི་ཆོས་གང་མངོན་པར་འགྲུབ་པའི་ཕྱིར་ཡང་ཉེ་བར་གནས་པ་མ་ཡིན་ནོ། །དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཡང་ཆོས་གང་མངོན་པར་འགྲུབ་པའི་ཕྱིར་ཡང་
ཉེ་བར་གནས་པ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་མིག་ཡོར་མཐོང་བའི་སྐྱེས་བུ་མིག་ཡོར་གྱི་རང་བཞིན་སྟོན་ཀྱང་མིག་ཡོར་གྱི་རང་བཞིན་གང་ཡང་མེད་ན། མིག་ཡོར་གྱི་རང་བཞིན་
བསྟན་པ་ལྟ་ག་ལ་ཡོད། རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་སྟོན་ཀྱང་ཤེས་རབ་ཀྱི་ཕ་རོལ་དུ་ཕྱིན་པའི་རང་བཞིན་གང་ཡང་མེད་ན་ཤེས་རབ་ཀྱི་ཕ་རོལ་དུ་ཕྱིན་པའི་རང་
བཞིན་བསྟན་པ་ལྟ་ག་ལ་ཡོད། རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་མིག་ཡོར་ནི་ཆོས་གང་བསྟན་པར་ཡང་ཉེ་བར་གནས་པ་མ་ཡིན་ནོ། །དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་
པ་ཡང་ཆོས་གང་བསྟན་པར་ཡང་ཉེ་བར་གནས་པ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སྨིག་རྒྱུ་མཐོང་བའི་སྐྱེས་བུ་སྨིག་རྒྱུ་བཤད་པ་སྟོན་ཀྱང་སྨིག་རྒྱུ་བསྟན་པ་གང་ཡང་མེད་ན་
སྨིག་རྒྱུ་བསྟན་པའི་རང་བཞིན་ལྟ་ག་ལ་ཡོད། རབ་ཀྱི་རྩལ་གྱིས་རྣམ་པར་གནོན་པ། དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་སྟོན་ཀྱང་ཤེས་རབ་ཀྱི་ཕ་རོལ་དུ་ཕྱིན་པའི་རང་བཞིན་བསྟན་པ་གང་ཡང་མེད་དོ། །རབ་ཀྱི་རྩལ་གྱིས་
39-1-49a


རྣམ་པར་གནོན་པ་འདི་ལྟ་སྟེ། དཔེར་ན་སྨིག་རྒྱུ་ནི་ཆོས་གང་བསྟན་པར་ཡང་ཉེ་བར་གནས་པ་མ་ཡིན་ནོ། །དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཡང་ཆོས་གང་བསྟན་པར་ཡང་ཉེ་བར་གནས་པ་མ་ཡིན་ནོ། །རབ་ཀྱི་
རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་བྲག་ཆའི་སྤྱོད་ཡུལ་ལ་གནས་པའི་སྐྱེས་བུས། བྲག་ཆའི་སྒྲ་ཐོས་ཀྱི་དེ་ནི་མི་མཐོང་སྟེ། ནམ་བདག་གིས་སྒྲ་ཕྱུང་བ་དེའི་ཚེ་སྒྲ་ཐོས་སོ། །དེ་བཞིན་དུ་ཤེས་རབ་ཀྱི་ཕ་རོལ་
དུ་ཕྱིན་པ་བསྟན་པའི་ཚིག་ཐོས་པར་འགྱུར་ཡང་ཆོས་གང་བསྟན་པ་ཐོས་པར་འགྱུར་བ་མེད་དེ། གཞན་དུ་ན་ནམ་མངོན་པར་བཤད་པ་དེའི་ཚེ་ཀུན་ཤེས་ཤིང་ཐོས་པའི་ལམ་དུ་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་
པ་འདི་ལྟ་སྟེ། དཔེར་ན་ལྦུ་བ་རྡོས་པ་མཐོང་བའི་སྐྱེས་བུ་ལྦུ་བ་རྡོས་པའི་རང་བཞིན་སྟོན་ཀྱང་ལྦུ་བ་རྡོས་པའི་རང་བཞིན་ནང་དང་ཕྱི་ནས་ཀྱང་མི་དམིགས་ན་དེ་བསྟན་པའི་རང་བཞིན་དམིགས་པར་ལྟ་ག་ལ་འགྱུར། རབ་ཀྱི་རྩལ་གྱིས་རྣམ་པར་
གནོན་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་སྟོན་ཀྱང་ཤེས་རབ་ཀྱི་ཕ་རོལ་དུ་ཕྱིན་པའི་རང་བཞིན་ཡང་མི་དམིགས་སོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་ལྦུ་བ་རྡོས་པ་དེ་ནི་ཆོས་གང་མངོན་པར་འགྲུབ་པའི་
རང་བཞིན་དུ་ཡང་ཉེ་བར་མི་འགྲོའོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཡང་ཆོས་གང་མངོན་པར་འགྲུབ་པའི་རང་བཞིན་དུ་ཡང་ཉེ་བར་མི་འགྲོའོ། །རབ་ཀྱི་རྩལ་གྱིས་རྣམ་པར་
གནོན་པ་འདི་ལྟ་སྟེ། དཔེར་ན་ཆུའི་ཆུ་བུར་མཐོང་བའི་སྐྱེས་བུ་ཆུའི་ཆུ་བུར་གྱི་རང་བཞིན་སྟོན་ཀྱང་། ཆུའི་ཆུ་བུར་གྱི་རང་བཞིན་ཡང་མེད་ན་ཆུའི་ཆུ་བུར་གྱི་རང་བཞིན་བསྟན་པ་ལྟ་ག་ལ་ཡོད། རབ་ཀྱི་རྩལ་གྱིས་རྣམ་པར་
གནོན་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་སྟོན་ཀྱང་ཤེས་རབ་ཀྱི་ཕ་རོལ་དུ་ཕྱིན་པའི་རང་བཞིན་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་ཆུའི་ཆུ་བུར་ནི་ཆོས་གང་མངོན་པར་འགྲུབ་པ་འབྱུང་བར་ཉེ་བར་
39-1-49b


གནས་པ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཡང་ཆོས་གང་མངོན་པར་འགྲུབ་པ་འབྱུང་བར་ཉེ་བར་གནས་པ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སྐྱེས་
བུས་ཆུ་ཤིང་གི་སྙིང་པོ་ཀུན་དུ་བཙལ་ཀྱང་མི་རྙེད་མོད་ཀྱི་འོན་ཀྱང་དེའི་མདབ་མ་རྣམས་ཀྱིས་དགོས་པ་བྱེད་དོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཡང་སྙིང་པོ་མེད་མོད་ཀྱི། ཤེས་རབ་ཀྱི་ཕ་རོལ་དུ་ཕྱིན་
པས་དགོས་པ་བྱེད་དོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སྐྱེས་བུ་ནམ་མཁའ་སྟོན་པར་ཐ་སྙད་འདོགས་ཀྱང་ནམ་མཁའ་ལ་ནི་བསྟན་པ་ཅི་ཡང་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་
རབ་ཀྱི་ཕ་རོལ་དུ་ཕྱིན་པ་ཞེས་ཐ་སྙད་འདོགས་ཀྱང་ཆོས་གང་ཡང་བསྟན་པར་ཡང་ཐ་སྙད་གདགས་པར་བྱ་བ་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་ནམ་མཁའ་ཞེས་ཐ་སྙད་འདོགས་ཀྱང་ཆོས་གང་
བསྟན་པར་ཡང་ཡོངས་སུ་འགྲུབ་ཅིང་ཐ་སྙད་གདགས་པ་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཞེས་ཐ་སྙད་འདོགས་ཀྱང་ཚིག་གང་བསྟན་པར་ཡང་ཐ་སྙད་དུ་གདགས་པ་མེད་དོ། །
རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་གྲིབ་མ་དང་ཉིན་ལོགས་ཤེས་ཐ་སྙད་དུ་འདོགས་ཀྱང་དེ་གཉིས་ནི་ཆོས་གང་ཡོངས་སུ་མ་གྲུབ་པའི་ཕྱིར་ཡང་ཉེ་བར་མི་གནས་ལ་སྣང་བ་ཡང་མངོན་ནོ། །རབ་ཀྱི་རྩལ་
གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཞེས་ཐ་སྙད་འདོགས་པའི་ཚིག་ཏུ་འགྲོ་ཡང་ཆོས་གང་བསྟན་པར་ཡང་ཐ་སྙད་ཀྱི་ཚིག་ཏུ་ཡང་མི་འགྲོ་ལ། ཆོས་རྣམས་སྣང་བར་ཡང་བྱེད་དོ། །རབ་ཀྱི་རྩལ་
གྱིས་རྣམ་པར་གནོན་པ་འདི་ལྟ་སྟེ། དཔེར་ན་ནོར་བུ་རིན་པོ་ཆེ་སྦྱངས་པ་ནི་སྣང་བ་ཆེན་པོར་ཉེ་བར་གནས་པར་གྱུར་ཀྱང་སྣང་བ་དེ་ནང་ངམ། ཕྱི་རོལ་ན་ཡང་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་
39-1-50a


དུ་ཤེས་རབ་ཀྱི་ཕ་རོལ་དུ་ཕྱིན་པ་སྣང་བའི་བྱ་བ་ཆེན་པོས་ཉེ་བར་གནས་ཀྱང་སྣང་བ་དེ་ནི་ནང་ངམ། ཕྱི་རོལ་དུ་མཐོང་བར་ཉེ་བར་མི་འགྲོའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་ཡུངས་
མར་གྱི་མར་མེ་བུས་ན་དེའི་འོད་འཕྲོ་བ་ཡུད་ཙམ་ཡང་མི་གནས་མོད་ཀྱི་སྣང་བར་ཡང་བྱེད་དེ། སྣང་བ་དེས་གཟུགས་རྣམས་ཀྱང་མཐོང་བར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་
པ་ཆོས་གང་ལ་ཡང་མི་གནས་མོད་ཀྱི་ཆོས་རྣམས་ཀྱི་སྣང་བའི་བྱ་བ་ཡང་བྱེད་དོ། །སྣང་བ་དེས་འཕགས་པ་རྣམས་ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་མཐོང་བར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་
པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་དང་། ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་གྲུབ་པ་བསྟན་པ་ངོ་མཚར་ལགས་སོ། །དེ་སྐད་ཅེས་གསོལ་པ་དང་། བཅོམ་
ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །དེ་དེ་བཞིན་ཏེ། ཤཱ་རིའི་བུ་དེ་དེ་བཞིན་ནོ། །གཟུགས་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་གྲུབ་པོ། །ཚོར་བ་དང་། 
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་གྲུབ་བོ། །མ་རིག་པ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་གྲུབ་བོ། །འདུ་
བྱེད་ཡོངས་སུ་མ་གྲུབ་པ་དང་། རྣམ་པར་ཤེས་པ་ཡོངས་སུ་མ་གྲུབ་པ་དང་། མིང་དང་གཟུགས་ཡོངས་སུ་མ་གྲུབ་པ་དང་། སྐྱེ་མཆེད་དྲུག་ཡོངས་སུ་མ་གྲུབ་པ་དང་། རེག་པ་ཡོངས་སུ་མ་གྲུབ་པ་དང་། ཚོར་བ་
ཡོངས་སུ་མ་གྲུབ་པ་དང་། སྲེད་པ་ཡོངས་སུ་མ་གྲུབ་པ་དང་། ལེན་པ་ཡོངས་སུ་མ་གྲུབ་པ་དང་། སྲིད་པ་ཡོངས་སུ་མ་གྲུབ་པ་དང་། སྐྱེ་བ་ཡོངས་སུ་མ་གྲུབ་པ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་
39-1-50b


འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་གྲུབ་བོ། །ཁམས་དང་། སྐྱེ་མཆེད་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་
པ་ཡོངས་སུ་མ་གྲུབ་བོ། །མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། ཞི་བ་དང་། ཕྱིན་ཅི་ལོག་དང་། སྒྲིབ་པ་དང་། ལྟ་བ་རྣམ་པར་སྤྱོད་པ་དང་། སོགས་པ་དང་། ཉེ་བར་སོགས་པ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་
གྲུབ་བོ། །བདེ་བ་དང་། སྡུག་བསྔལ་བ་དང་། བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་གྲུབ་བོ། །སྐྱེ་བ་དང་། འཇིག་པ་དང་། གནས་པ་དང་། གཞན་དུ་འགྱུར་བ་ཡོངས་
སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་གྲུབ་བོ། །ཀུན་འབྱུང་བ་དང་། ནུབ་པ་དང་། བདག་དང་། སེམས་ཅན་དང་། སྲོག་དང་། གསོ་བ་དང་། སྐྱེས་བུ་དང་། གང་ཟག་དང་། ཤེད་ལས་སྐྱེས་དང་། ཤེད་བུ་དང་། བྱེད་པ་
པོ་དང་། བྱེད་དུ་འཇུག་པ་དང་། སློང་བ་པོ་དང་། ཚོར་བ་པོ་དང་། ཚོར་བར་བྱེད་པ་པོ་དང་། ཤེས་པར་བྱེད་པ་དང་། ཤེས་པར་བྱེད་དུ་འཇུག་པ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་གྲུབ་བོ། །བདེན་པ་དང་། 
བརྫུན་པ་དང་། འདུས་བྱས་དང་། འདུས་མ་བྱས་དང་། འགྲོ་བ་དང་། མི་འགྲོ་བ་དང་། མཐོང་བ་དང་བཅས་པ་དང་། མི་མཐོང་བ་དང་། ནང་དང་ཕྱི་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་གྲུབ་བོ། །
ས་དང་། ཆུ་དང་། མེ་དང་། རླུང་དང་། འདོད་པ་དང་། གཟུགས་དང་། གཟུགས་མེད་པ་དང་། ནམ་མཁའ་དང་། རྣམ་པར་ཤེས་པ་དང་། ཆོས་ཀྱི་ཁམས་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་གྲུབ་བོ། །ལས་ཀྱི་རྣམ་པར་སྨིན་པ་དང་། 
རྒྱུ་དང་རྐྱེན་དང་། ཆད་པ་དང་། རྟག་པ་དང་། འདས་པ་དང་། མ་འོངས་པ་དང་། ད་ལྟར་བྱུང་བ་དང་། སྔོན་གྱི་མཐའ་དང་། ཕྱི་མའི་མཐའ་དང་། དབུས་དང་། ཚུལ་ཁྲིམས་དང་། འཆལ་པའི་ཚུལ་ཁྲིམས་དང་། བཟོད་པ་དང་། གནོད་སེམས་དང་། བརྩོན་འགྲུས་དང་། 
39-1-51a


ལེ་ལོ་དང་། བསམ་གཏན་དང་། རྣམ་པར་གཡེང་བ་དང་། ཤེས་རབ་དང་། འཆལ་བའི་ཤེས་རབ་དང་། སེམས་དང་། ཡིད་དང་། རྣམ་པར་ཤེས་པ་དང་། དེ་མ་ཐག་པ་དང་། འཆི་འཕོ་དང་། སྐྱེ་བ་དང་། ཀུན་ནས་ཉོན་མོངས་པ་དང་། རྣམ་
པར་བྱང་བ་དང་། དྲན་པ་ཉེ་བར་གཞག་པ་དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ལམ་དང་། འཕགས་པའི་བདེན་པ་དང་། ཚད་མེད་པ་དང་། བསམ་གཏན་དང་། 
རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། མངོན་པར་ཤེས་པ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། དགེ་བ་དང་། མི་དགེ་བ་དང་། ཟག་པ་དང་བཅས་པ་དང་། ཟག་པ་མེད་པ་དང་། འཇིག་རྟེན་པ་
དང་། འཇིག་རྟེན་ལས་འདས་པ་དང་། ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་དང་། འདུས་བྱས་དང་། འདུས་མ་བྱས་དང་། ལུང་དུ་བསྟན་པ་དང་། ལུང་དུ་མ་བསྟན་པ་དང་། དཀར་པོ་དང་། ནག་པོ་དང་། དཀར་ནག་མ་ཡིན་པ་དང་། 
གཏོགས་པ་དང་། མི་གཏོགས་པ་དང་། ངན་པ་དང་། བཟང་པོ་དང་། འབྲིང་དང་། འདོད་ཆགས་དང་། ཞེ་སྡང་དང་། གཏི་མུག་དང་། མཐོང་བ་དང་། ཐོས་པ་དང་། བྱེ་བྲག་ཕྱེད་པ་དང་། རྣམ་པར་ཤེས་པ་དང་། རློམ་སེམས་དང་། 
གནས་པ་དང་། རྣམ་པར་རྟོག་པ་དང་། །དཔྱོད་པ་དང་། རྣམ་པར་དཔྱོད་པ་དང་། དམིགས་པ་དང་། སྒྱུ་དང་། ཕྲག་དོག་དང་། སེར་སྣ་དང་། འདུ་བ་དང་། གཉིས་ཀྱི་མཚན་ཉིད་དང་། མ་སྐྱེས་པ་དང་། མངོན་པར་འདུ་མི་བྱེད་པ་
དང་། ཞི་གནས་དང་། ལྷག་མཐོང་དང་། རིག་པ་དང་རྣམ་པར་གྲོལ་བ་དང་། ཟད་པ་དང་། འདོད་ཆགས་དང་བྲལ་བ་དང་། འགོག་པ་དང་། ཕུང་པོ་ཐམས་ཅད་ངེས་པར་འདོར་བ་དང་། འབྱུང་བ་དང་། ཀུན་རྫོབ་པ་དང་། དོན་
དམ་པ་དང་། ཉན་ཐོས་གྱི་ས་དང་། རང་སངས་རྒྱས་ཀྱི་ས་དང་། ཐམས་ཅད་མཁྱེན་པའི་ཡེ་ཤེས་དང་། ཆགས་པ་མེད་པའི་ཡེ་ཤེས་དང་། རང་བྱུང་གི་ཡེ་ཤེས་དང་། མི་མཉམ་པ་དང་མཉམ་པའི་ཡེ་ཤེས་དང་། བྱང་ཆུབ་སེམས་དཔའི་སྨོན་
39-1-51b


ལམ་དང་། ཉན་ཐོས་ཀྱི་དགེ་འདུན་དང་། རང་སངས་རྒྱས་ཀྱི་ཕུན་སུམ་ཚོགས་པ་དང་། ཚད་མེད་པ་གཏོགས་པ་དང་། མི་མཉམ་པ་དང་མཉམ་པའི་ཆོས་ཀྱི་ཡེ་ཤེས་དང་། ཆོས་ཐམས་ཅད་ཀྱི་ཇི་ལྟ་བ་བཞིན་བསྟན་དུ་མེད་པ་དང་། ཆོས་
ཐམས་ཅད་ཤེས་པ་དང་། མཐོང་བ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་གྲུབ་བོ། །བསིལ་བར་གྱུར་པ་དང་། ཞི་བ་དང་། རབ་ཏུ་ཞི་བ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་གྲུབ་བོ། །སེམས་
ཅན་ཡོངས་སུ་སྨིན་པར་བྱ་བ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་གྲུབ་བོ། །མཚན་ཕུན་སུམ་ཚོགས་པ་དང་། སངས་རྒྱས་ཀྱི་ཞིང་ཡོངས་སུ་དག་པ་དང་། སངས་རྒྱས་ཀྱི་སྟོབས་དང་། མི་འཇིགས་པ་དང་། 
སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་གྲུབ་བོ། །མྱ་ངན་ལས་འདས་པ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་གྲུབ་བོ། །དགེ་བ་དང་། མི་དགེ་
བའི་ཆོས་ཐམས་ཅད་ཀྱི་བར་དུ་ཡོངས་སུ་མ་གྲུབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་མ་གྲུབ་སྟེ། དེ་བཞིན་དུ་ཐམས་ཅད་ལ་ཡང་རྒྱས་པར་སྦྱར་རོ། །ཤཱ་རིའི་བུ་འདི་ལྟ་སྟེ། དཔེར་ན་ནམ་མཁའ་ནི་གཟུགས་མེད། བསྟན་
དུ་མེད། དངོས་པོ་མེད་དེ། ཡོངས་སུ་མ་གྲུབ་བོ། །དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཡང་གཟུགས་མེད། བསྟན་དུ་མེད། དངོས་པོ་མེད་དེ་ཡོངས་སུ་མ་གྲུབ་པའོ། །ཤཱ་རིའི་བུ་འདི་ལྟ་སྟེ། དཔེར་ན་འཇའ་ནི་
ཚོན་གྱི་རྣམ་པ་སྣ་ཚོགས་སུ་ཀུན་དུ་སྣང་ཡང་དེ་ལ་ཚོན་གང་ཡང་ཡོངས་སུ་གྲུབ་པ་མེད་དེ་མི་དམིགས་སོ། །དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཡང་བསྟན་པ་སྣ་ཚོགས་སུ་ཉེ་བར་གནས་མོད་ཀྱི་དེ་ལ་བསྟན་པའི་རང་བཞིན་མི་
དམིགས་སོ། །ཤཱ་རིའི་བུ་འདི་ལྟ་སྟེ། དཔེར་ན་ནམ་མཁའ་ལ་སོར་མོ་ལྔ་ཡོངས་སུ་གྲུབ་པར་སྔོན་ནམ་ཡང་སུས་ཀྱང་མ་མཐོང་ངོ་། །ཤཱ་རིའི་བུ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་གྲུབ་པའི་རང་བཞིན་
39-1-52a


སྔོན་ནམ་ཡང་སུས་ཀྱང་མ་མཐོང་ངོ་། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་མཐོང་བར་
དཀའ་བ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་སུ་ལ་ཡང་མཐོང་བར་ཉེ་བར་མི་འགྲོའོ། །གསོལ་པ་བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་ནི་ཁོང་དུ་ཆུད་པར་དཀའ་བ་ལགས་སོ། །བཀའ་སྩལ་པ། ཤཱ་
རིའི་བུ་འདི་ལྟར་འདི་ལ་ནི་གང་མངོན་པར་རྫོགས་པར་རྟོགས་པ་ཡོངས་སུ་གྲུབ་པའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་བསྟན་དུ་མ་མཆིས་པ་ལགས་སོ། །བཀའ་
སྩལ་པ། ཤཱ་རིའི་བུ་འདི་ལྟར་ཆོས་གང་བསྟན་པར་ཡང་ཉེ་བར་གནས་པ་མ་ཡིན་ནོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་རང་བཞིན་མ་མཆིས་པ་ལགས་སོ། །བཀའ་སྩལ་པ། ཤཱ་རིའི་བུ་
གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རང་བཞིན་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་འདི་རང་བཞིན་མེད་དོ། །ཁམས་དང་། སྐྱེ་མཆེད་དང་། རྟེན་ཅིང་འབྲེལ་པར་འབྱུང་བ་རང་
བཞིན་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་རང་བཞིན་མེད་དོ། །ཕྱིན་ཅི་ལོག་དང་། སྒྲིབ་པ་དང་། ལྟ་བར་གྱུར་པ་དང་། སྲེད་པ་རྣམ་པར་སྤྱོད་པ་རང་བཞིན་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་རང་བཞིན་མེད་དོ། །བདག་
དང་། སེམས་ཅན་དང་། སྲོག་དང་། གསོ་བ་དང་། སྐྱེས་བུ་དང་། གང་ཟག་དང་། ཤེད་ལས་སྐྱེས་དང་། ཤེད་བུ་དང་། བྱེད་པ་པོ་དང་། བྱེད་དུ་འཇུག་པ་དང་། སློང་བ་པོ་དང་། ཀུན་ནས་སློང་བ་པོ་དང་། ཚོར་བ་པོ་དང་། 
ཚོར་བར་བྱེད་པ་རང་བཞིན་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་རང་བཞིན་མེད་དོ། །ས་དང་། ཆུ་དང་། མེ་དང་། རླུང་དང་། ནམ་མཁའ་དང་། རྣམ་པར་ཤེས་པ་དང་། ཆོས་ཀྱི་ཁམས་ཀྱི་རང་བཞིན་མེད་པས་ཤེས་རབ་ཀྱི་ཕ་རོལ་
39-1-52b


དུ་ཕྱིན་པ་རང་བཞིན་མེད་དོ། །འདོད་པ་དང་། གཟུགས་དང་། གཟུགས་མེད་པའི་ཁམས་རང་བཞིན་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་རང་བཞིན་མེད་དོ། །ཚུལ་ཁྲིམས་དང་། འཆལ་པའི་ཚུལ་ཁྲིམས་དང་། བཟོད་པ་དང་། 
གནོད་སེམས་དང་། བརྩོན་འགྲུས་དང་། ལེ་ལོ་དང་། བསམ་གཏན་དང་། རྣམ་པར་གཡེང་བ་དང་། ཤེས་རབ་དང་། འཆལ་པའི་ཤེས་རབ་རང་བཞིན་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་རང་བཞིན་མེད་དོ། །བྱང་
ཆུབ་ཀྱི་ཕྱོགས་ཀྱི་ཆོས་རྣམས་རང་བཞིན་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་རང་བཞིན་མེད་དོ། །འཕགས་པའི་བདེན་པ་དང་། ཞི་གནས་དང་། ལྷག་མཐོང་དང་། མངོན་པར་ཤེས་པ་དང་། བསམ་གཏན་དང་། རྣམ་
པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་རང་བཞིན་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་རང་བཞིན་མེད་དོ། །རིག་པ་དང་། རྣམ་པར་གྲོལ་བ་རང་བཞིན་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་རང་བཞིན་མེད་
ནོ། །ཟད་པ་དང་། འདོད་ཆགས་དང་བྲལ་བ་དང་། འགོག་པ་རང་བཞིན་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་རང་བཞིན་མེད་དོ། །མི་སྐྱེ་བ་ཤེས་པ་དང་། འགོག་པ་ཤེས་པ་རང་བཞིན་མེད་པས་ཤེས་རབ་ཀྱི་ཕ་རོལ་དུ་ཕྱིན་
པ་རང་བཞིན་མེད་དོ། །མྱ་ངན་ལས་འདས་པ་རང་བཞིན་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་རང་བཞིན་མེད་དོ། །ཉན་ཐོས་ཀྱི་ས་དང་། །རང་སངས་རྒྱས་ཀྱི་ས་དང་། སངས་རྒྱས་ཀྱི་ས་རང་བཞིན་མེད་པས་ཤེས་རབ་ཀྱི་ཕ་
རོལ་དུ་ཕྱིན་པ་རང་བཞིན་མེད་པའོ། །དོན་དམ་པ་ཤེས་པ་བསྟན་པ་དང་། ཀུན་རྫོབ་རང་བཞིན་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་རང་བཞིན་མེད་དོ། །ཆགས་པ་མེད་པའི་ཡེ་ཤེས་དང་། ཐམས་ཅད་མཁྱེན་པའི་ཡེ་
ཤེས་རང་བཞིན་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་རང་བཞིན་མེད་དོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཤེས་རབ་
39-1-53a


ཀྱི་ཕ་རོལ་དུ་ཕྱིན་པ་འདི་ནི་ཆོས་གང་ཡོངས་སུ་གྲུབ་པའི་སླད་དུ་ཉེ་བར་གནས་པ་མ་ལགས། འགོག་པའི་སླད་དུ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་
སྐྱེ་བའི་ཕྱིར་རམ་ཡོངས་སུ་གྲུབ་པའི་ཕྱིར་རམ། འགོག་པའི་ཕྱིར་རམ། བདག་མེད་པའི་ཕྱིར་ཉེ་བར་གནས་པ་མ་ཡིན་ནོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་ལ་ཡང་དམིགས་པའི་
ཚུལ་གྱིས་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཆོས་ཉིད་ཀྱང་མེད་ན་གང་ལ་དམིགས་པར་འགྱུར་ཏེ། འདི་ལྟར་ཆོས་ཐམས་ཅད་དམིགས་པ་མེད་དོ། །གསོལ་པ། བཅོམ་ལྡན་འདས་ཤེས་རབ་
ཀྱི་ཕ་རོལ་དུ་ཕྱིན་པ་འདི་ནི་ཆོས་གང་འབྲི་བ་འམ། འཕེལ་བའི་སླད་དུ་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་འབྲི་བར་འགྱུར་བ་འམ། འཕེལ་བར་འགྱུར་
བའི་ཆོས་གང་ཡང་ཡང་དག་པར་རྗེས་སུ་མི་མཐོང་ངོ་། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་ལས་ཡང་དག་པར་འདའ་བའི་སླད་དུ་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་
ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཡང་དག་པ་འདའ་བར་བྱ་བའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་ཡང་འབྲི་བ་འམ། སོགས་པའི་སླད་དུ་
ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་འབྲི་བ་འམ། སོགས་པར་འགྱུར་བའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་
རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་ཡང་འདུ་བ་འམ། འབྲལ་བའི་སླད་དུ་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཀུན་དུ་སྦྱོར་བ་འམ། ཀུན་དུ་མི་སྦྱོར་བའི་ཆོས་
39-1-53b


གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་གི་ཚུལ་ལམ། ཚུལ་མ་ལགས་པའི་སླད་དུ་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་
ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་བཀུར་བ་འམ། རྣམ་པར་བཀུར་བའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་ལ་ཡང་ཕན་པ་འམ། གནོད་པའི་སླད་དུ་ཉེ་
བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་གང་ལ་ཕན་པ་འམ། གནོད་པར་བྱ་བའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་
དུ་ཕྱིན་པ་འདི་ནི་ཆོས་གང་འབྱུང་བ་འམ། མི་འབྱུང་བའི་སླད་དུ་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་འབྱུང་བ་འམ། མི་འབྱུང་བའི་ཆོས་གང་ཡང་མི་
དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་ལ་ཡང་སྦྱོར་བ་འམ། མི་སྦྱོར་བའི་སླད་དུ་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་
པ་ནི་ཆོས་གང་སྦྱོར་བ་འམ། མི་སྦྱོར་བའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་དང་ཡང་གནས་པ་འམ། མི་གནས་པའི་སླད་དུ་ཉེ་བར་གནས་པ་མ་ལགས་སོ། །
བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་གནས་པར་བྱེད་པ་འམ། གནས་པར་མི་བྱེད་པའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་
ནི་ཆོས་གང་འཇུག་པ་འམ། ལྡོག་པའི་སླད་དུ་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་འཇུག་པ་འམ། ལྡོག་པའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་
39-1-54a


འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་གི་བྱ་བ་འམ། བྱེད་པའི་སླད་དུ་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་གི་བྱ་བ་འམ། 
བྱེད་པར་འགྱུར་བའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་གི་མཉམ་པ་འམ། མི་མཉམ་པའི་སླད་དུ་ཉེ་བར་གནས་པ་མ་ལགས་སོ། །བཀའ་སྩལ་པ། 
ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་མཉམ་པ་འམ། མི་མཉམ་པའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་ཡང་སྡུད་པ་འམ། 
ཀུན་སྡུད་པའི་སླད་དུ་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་བསྡུ་བར་བྱ་བ་འམ། དོར་བར་བྱ་བའི་ཆོས་གང་ཡང་མི་དམིགས་སོ། །གསོལ་པ། 
བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་བགྱི་བ་གང་གིས་ཀྱང་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་བྱ་བ་བྱེད་པའི་ཆོས་གང་ཡང་མི་
དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཟབ་པ་ལགས་སོ། །བཀའ་སྩལ་པ། ཤཱ་རིའི་བུ་གཟུགས་ཟབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་བོ། །ཤཱ་རིའི་བུ་ཚོར་བ་དང་། 
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཟབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་བོ། །མ་རིག་པ་ཟབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་བོ། །འདུ་བྱེད་དང་། རྣམ་པར་ཤེས་པ་དང་། མིང་
དང་གཟུགས་དང་། སྐྱེ་མཆེད་དྲུག་དང་། རེག་པ་དང་། ཚོར་བ་དང་། སྲེད་པ་དང་། ལེན་པ་དང་། སྲིད་པ་དང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། 
39-1-54b


འཁྲུག་པ་ཟབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་བོ། །ཕྱིན་ཅི་ལོག་ཟབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་བོ། །སྒྲིབ་པ་ལྔ་ཟབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་བོ། །ལྟ་བ་ཟབ་པས་ཤེས་རབ་ཀྱི་ཕ་རོལ་དུ་ཕྱིན་པ་
ཟབ་བོ། །བདག་ཟབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་བོ། །སེམས་ཅན་ཟབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་བོ། །སྤྲོས་པ་ཟབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་བོ། །སྤྲོས་པ་མེད་པ་ཟབ་པས་ཤེས་རབ་ཀྱི་ཕ་རོལ་དུ་
ཕྱིན་པ་ཟབ་བོ། །ཚུལ་ཁྲིམས་དང་། འཆལ་པའི་ཚུལ་ཁྲིམས་ཟབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་བོ། །བཟོད་པ་དང་། གནོད་སེམས་དང་། བརྩོན་འགྲུས་དང་། ལེ་ལོ་དང་། བསམ་གཏན་དང་། རྣམ་པར་གཡེང་བ་དང་། 
ཤེས་རབ་དང་། འཆལ་པའི་ཤེས་རབ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། དྲན་པ་ཉེ་བར་གཞག་པ་དང་། ཡང་དག་པར་སྤོང་བ་དང་། ཕྱིན་ཅི་མ་ལོག་པ་དང་། ལམ་ཡན་ལག་བརྒྱད་པ་དང་། སྡུག་བསྔལ་བ་དང་། 
ཀུན་འབྱུང་བ་དང་། འགོག་པ་དང་། ལམ་དང་། རྣམ་པར་གྲོལ་བའི་ཡེ་ཤེས་མཐོང་བ་དང་། འདས་པ་དང་། མ་འོངས་པ་དང་། ད་ལྟར་བྱུང་བ་དང་། དུས་གསུམ་མཉམ་པ་ཉིད་ཟབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་བོ། །མི་
འཇིགས་པ་བཞི་དང་། རྫུ་འཕྲུལ་གྱི་རྐང་པ་དང་། མངོན་པར་ཤེས་པ་ཟབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་བོ། །འདས་པ་དང་། མ་འོངས་པ་དང་། ད་ལྟར་བྱུང་བ་ལ་ཐོགས་པ་མེད་པའི་ཡེ་ཤེས་ཟབ་པས་ཤེས་རབ་ཀྱི་ཕ་རོལ་དུ་ཕྱིན་
པ་ཟབ་བོ། །སངས་རྒྱས་དང་། ཆོས་དང་། དགེ་འདུན་ཟབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་བོ། །ཟད་པ་ཤེས་པ་དང་། མི་སྐྱེ་བ་ཤེས་པ་དང་། མི་འགོག་པ་ཤེས་པ་དང་། མངོན་པར་འདུ་མི་བྱེད་པ་ཤེས་པ་དང་། འདོད་ཆགས་དང་བྲལ་
བ་ཤེས་པ་ཟབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་བོ། །སྒྲིབ་པ་ཟབ་པས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་བོ། །ཤཱ་རིའི་བུ་འདི་ལྟ་སྟེ། དཔེར་ན་རྒྱ་མཚོ་ནི་རྒྱ་ཆེ་ཞིང་ཟབ་སྟེ་དཔག་ཏུ་མེད་དོ། །དེ་བཞིན་དུ་ཤེས་རབ་ཀྱི་ཕ་རོལ་དུ་
39-1-55a


ཕྱིན་པ་ཡང་རྒྱ་ཆེ་ཞིང་ཟབ་སྟེ་དཔག་ཏུ་མེད་དོ། །ཤཱ་ར་དྭ་ཏིའི་བུ་ཟབ་ཅེས་བྱ་བ་ནི་ཆོས་རིན་པོ་ཆེ་དཔག་ཏུ་མེད་པ་བསྩགས་པར་གྱུར་པ་གང་གཏིང་མི་རྙེད་པའོ། །ཤཱ་ར་དྭ་ཏིའི་བུ་ཟབ་ཅེས་བྱ་བ་ནི་དེ་ལ་འགྲོ་བར་མི་རྙེད་པའོ། །ཤཱ་ར་
དྭ་ཏིའི་བུ་ཟབ་ཅེས་བྱ་བ་ནི་དེའི་ཡོན་ཏན་གྱི་མཐའ་མི་རྟོགས་པའོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་མཚོ་ཆེན་པོ་རྒྱ་མཚོ་ནི་རིན་པོ་ཆེ་ཐམས་ཅད་བསགས་པ། རིན་པོ་ཆེ་དཔག་ཏུ་མེད་པས་གང་། རིན་པོ་ཆེ་ཆེན་པོས་རབ་ཏུ་གང་བའོ། །དེ་བཞིན་དུ་
ཤེས་རབ་ཀྱི་ཕ་རོལ་དུ་ཕྱིན་པ་ཡང་ཆོས་རིན་པོ་ཆེ་ཐམས་ཅད་བསགས་པ། ཆོས་རིན་པོ་ཆེ་ཆེན་པོ་བསགས་པ། ཆོས་རིན་པོ་ཆེ་དཔག་ཏུ་མེད་པ་བསགས་པའོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་བསྟན་
པར་ཡང་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་བསྟན་པའི་ཆོས་གང་ཡང་དམིགས་པར་ཉེ་བར་གནས་པ་མ་ཡིན་ནོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་
དུ་ཕྱིན་པ་འདི་ནི་ཆོས་གང་འཚལ་བ་འམ། མ་འཚལ་བར་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་ཤེས་པ་འམ། མི་ཤེས་པར་འགྱུར་བའི་ཆོས་གང་ཡང་མི་དམིགས་
སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་བསྲུང་བ་འམ། སྦ་བའི་སླད་དུ་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་
པ་ནི་ཆོས་གང་བསྲུང་བ་འམ། སྦ་བར་བྱ་བའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་ཡང་ཀུན་དུ་སྡུད་པ་འམ། ཡོངས་སུ་སྡུད་པའི་སླད་དུ་ཉེ་
བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་ཀུན་དུ་བསྡུ་བ་འམ། ཡོངས་སུ་བསྡུ་བར་བྱ་བའི་ཆོས་གང་ཡང་མི་དམིགས་སོ། །གསོལ་པ། 
39-1-55b


བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་གི་གནས་སམ། གཞིར་ཡང་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་གང་ལ་གནས་སམ། གཞིར་
བྱ་བའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་གི་གནས་སམ། གཞིར་ཡང་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་
ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་ལ་གནས་སམ། གཞིར་བྱ་བའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་ལ་ཡང་མངོན་པར་ཞེན་པར་ཉེ་བར་གནས་པ་
མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་གང་ལ་མངོན་པར་ཞེན་པར་བྱ་བའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་
ཆོས་གང་ཡང་ལྷག་པར་ཞེན་པར་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་ལ་ལྷག་པར་ཞེན་པར་བྱ་བའི་ཆོས་གང་ཡང་ཡང་དག་པར་རྗེས་སུ་མི་མཐོང་ངོ་། །གསོལ་
པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་དང་ཡང་གནས་པ་འམ། མི་གནས་པར་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་གང་དང་ལྷན་ཅིག་ཏུ་
གནས་པའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་གི་མཚམས་སྦྱར་བ་འམ། མཚམས་སྦྱར་བ་མ་ལགས་པར་ཡང་ཉེ་བར་གནས་པ་མ་ལགས་སོ། །བཀའ་
སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་མཚམས་སྦྱར་བར་བྱ་བ་འམ། མཚམས་སྦྱར་བར་བྱ་བ་མ་ཡིན་པའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་
39-1-56a


དུ་ཕྱིན་པ་འདི་ནི་ཆོས་གང་ལ་ཡང་འདོད་ཆགས་སམ། འདོད་ཆགས་དང་བྲལ་བར་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་ལ་ཆགས་པར་འགྱུར་
བ་འམ། མི་ཆགས་པར་འགྱུར་བའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་ལ་ཡང་ཞེ་སྡང་ངམ། ཞེ་སྡང་མ་མཆིས་པར་ཉེ་བར་གནས་པ་མ་ལགས་སོ། །
བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་ཞེ་སྡང་དང་བཅས་པ་འམ། ཞེ་སྡང་མེད་པའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་
གང་ལ་ཡང་གཏི་མུག་གམ། གཏི་མུག་དང་བྲལ་བར་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་ལ་རྨོངས་པ་འམ། རྨོངས་པར་མི་འགྱུར་བའི་ཆོས་གང་ཡང་མི་དམིགས་
སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་གི་ཤེས་པ་པོ་འམ། ཤེས་པར་བགྱིད་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་
ཆོས་གང་ཤེས་པ་འམ། ཆོས་གང་ཤེས་པར་བྱེད་པར་འགྱུར་བའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་གི་རང་བཞིན་ནམ། རང་བཞིན་མ་ལགས་
པར་ཡང་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་གི་རང་བཞིན་ནམ། རང་བཞིན་མ་ཡིན་པར་ཡང་ཡང་དག་པར་རྗེས་སུ་མི་མཐོང་ངོ་། །གསོལ་པ། 
བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཆོས་གང་གི་དག་པ་འམ། རྣམ་པར་དག་པར་ཡང་ཉེ་བར་གནས་པ་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་
39-1-56b


སྦྱོང་བ་འམ། རྣམ་པར་སྦྱོང་བའི་ཆོས་གང་ཡང་ཡང་དག་པར་རྗེས་སུ་མི་མཐོང་ངོ་། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་རང་བཞིན་གྱིས་ཡོངས་སུ་དག་པ་ལགས་སོ། །བཀའ་སྩལ་པ། ཤཱ་ར་དྭ་ཏིའི་བུ་
གཟུགས་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །ཤཱ་རིའི་བུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །
མ་རིག་པ་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །འདུ་བྱེད་ཡོངས་སུ་དག་པ་དང་། རྣམ་པར་ཤེས་པ་ཡོངས་སུ་དག་པ་དང་། མིང་དང་གཟུགས་ཡོངས་སུ་དག་པ་དང་། སྐྱེ་མཆེད་དྲུག་ཡོངས་སུ་དག་
པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །རེག་པ་དང་། ཚོར་བ་དང་། སྲེད་པ་དང་། ལེན་པ་དང་། སྲིད་པ་དང་། སྐྱེ་བ་དང་། རྒ་བ་དང་། ན་བ་དང་། འཆི་བ་ཡོངས་སུ་དག་པས་ཤེས་རབ་ཀྱི་ཕ་རོལ་དུ་
ཕྱིན་པ་ཡོངས་སུ་དག་གོ། །མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །ཕྱིན་ཅི་ལོག་དང་། 
སྒྲིབ་པ་དང་། ལྟ་བར་གྱུར་པ་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །འདོད་ཆགས་དང་། ཞེ་སྡང་དང་། གཏི་མུག་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །
བདག་དང་། སེམས་ཅན་དང་། སྲོག་དང་། གསོ་བ་དང་། སྐྱེས་བུ་དང་། གང་ཟག་དང་། ཤེད་ལས་སྐྱེས་དང་། ཤེད་བུ་དང་། བྱེད་པ་པོ་དང་། བྱེད་དུ་འཇུག་པ་དང་། ཚོར་བ་པོ་དང་། ཚོར་བར་བྱེད་པ་དང་། 
སློང་བ་པོ་དང་། ཀུན་ནས་སློང་བ་པོ་དང་། མཐོང་བ་པོ་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །ཆད་པ་དང་། རྟག་པ་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །མཐའ་དང་། 
39-1-57a


མཐའ་མེད་པ་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །སྦྱིན་པ་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །ཚུལ་ཁྲིམས་དང་། བཟོད་པ་དང་། བརྩོན་འགྲུས་
དང་། བསམ་གཏན་དང་། ཤེས་རབ་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་
འཛིན་དང་། སྙོམས་པར་འཇུག་པ་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་
གོ། །དྲན་པ་ཉེ་བར་གཞག་པ་དང་། ཡང་དག་པའི་སྤོང་བ་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །ཕྱིན་ཅི་མ་ལོག་པ་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །སྡུག་བསྔལ་
བ་དང་། ཀུན་འབྱུང་བ་དང་། འགོག་པ་དང་། ལམ་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །མངོན་པར་ཤེས་པ་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །ལམ་ཡོངས་
སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །ཉན་ཐོས་ཀྱི་ས་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །རང་སངས་རྒྱས་ཀྱི་ས་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་
སུ་དག་གོ། །སངས་རྒྱས་ཀྱི་ས་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །སངས་རྒྱས་དང་། ཆོས་དང་། དགེ་འདུན་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །འདས་པ་དང་། 
མ་འོངས་པ་དང་། ད་ལྟར་བྱུང་བ་མཐོང་བ་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །ཐོགས་པ་མེད་པའི་ཡེ་ཤེས་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །སངས་རྒྱས་ཀྱི་ཆོས་མ་འདྲེས་
39-1-57b


པ་བཅྭ་བརྒྱད་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །འདོད་པའི་ཁམས་ཡོངས་སུ་དག་པ་དང་། གཟུགས་ཀྱི་ཁམས་ཡོངས་སུ་དག་པ་དང་། གཟུགས་མེད་པའི་ཁམས་ཡོངས་སུ་དག་པས་ཤེས་རབ་ཀྱི་ཕ་
རོལ་དུ་ཕྱིན་པ་ཡོངས་སུ་དག་གོ། །སའི་ཁམས་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །ཆུ་དང་མེ་དང་། རླུང་གི་ཁམས་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །སེམས་ཅན་གྱི་
ཁམས་ཡོངས་སུ་དག་པ་དང་། ཆོས་ཀྱི་དབྱིངས་ཡོངས་སུ་དག་པ་དང་། ནམ་མཁའི་ཁམས་ཡོངས་སུ་དག་པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་
དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་རང་བཞིན་གྱིས་ཡོངས་སུ་དག་པ་ངོ་མཚར་ལགས་སོ། །བཀའ་སྩལ་པ། ཤཱ་རིའི་བུ་ནམ་མཁའ་ཡོངས་སུ་དག་
པས་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་གོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་ནི་གཟུགས་མ་མཆིས། བསྟན་དུ་མ་མཆིས་པ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་
ཀྱི་ཕ་རོལ་དུ་ཕྱིན་པ་ནི་ཆོས་གང་གི་གཟུགས་ཡོངས་སུ་གྲུབ་པ་འམ། བསྟན་པར་ཉེ་བར་གནས་པ་མ་ཡིན་ནོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཐོགས་པ་མ་མཆིས་པ་ལགས་སོ། །བཀའ་སྩལ་པ། ཤཱ་ར་དྭ་ཏིའི་
བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་གང་ལ་ཐོགས་པའི་ཆོས་གང་ཡང་ཡང་དག་པར་རྗེས་སུ་མི་མཐོང་ངོ་། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་མ་བགྱིས་པའོ། །བཀའ་སྩལ་པ། ཤཱ་ར་དྭ་ཏིའི་བུ་བྱེད་པ་པོ་
མི་དམིགས་པའི་ཕྱིར་རོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཡང་དག་པར་འདུ་བ་མ་ལགས་སོ། །བཀའ་སྩལ་པ། ཤཱ་ར་དྭ་ཏིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་དང་ལྷན་ཅིག་ཏུ་འདུ་བར་འགྱུར་བའི་
39-1-58a


ཆོས་གང་ཡང་ཡང་དག་པར་རྗེས་སུ་མི་མཐོང་ངོ་། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་གདགས་སུ་མ་མཆིས་པ་ལགས་སོ། །བཀའ་སྩལ་པ། ཤཱ་ར་དྭ་ཏིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་གིས་
གདགས་པའི་ཆོས་གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཐུན་མོང་མ་ལགས་སོ། །བཀའ་སྩལ་པ། ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་དང་ཐུན་མོང་དུ་འགྱུར་བའི་ཆོས་
གང་ཡང་མི་དམིགས་སོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་མཚན་ཉིད་མ་མཆིས་པ་ལགས་སོ། །བཀའ་སྩལ་པ། ཤཱ་ར་དྭ་ཏིའི་བུ་མཚན་ཉིད་མི་དམིགས་པའི་ཕྱིར་རོ། །གསོལ་པ། བཅོམ་ལྡན་འདས་ཤེས་རབ་
ཀྱི་ཕ་རོལ་དུ་ཕྱིན་པ་འདི་ནི་སྣང་བ་མ་མཆིས་པ་ལགས་སོ། །བཀའ་སྩལ་པ། སྣང་བ་མི་དམིགས་པའི་ཕྱིར་རོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་མཐའ་ཡས་པའི་ཕ་རོལ་དུ་ཕྱིན་པ་ལགས་སོ། །བཀའ་སྩལ་
པ། ཤཱ་ར་དྭ་ཏིའི་བུ་གཟུགས་མཐའ་ཡས་པས་ཕ་རོལ་དུ་ཕྱིན་པ་འདི་མཐའ་ཡས་སོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་མཐའ་ཡས་པས་ཕ་རོལ་དུ་ཕྱིན་པ་འདི་མཐའ་ཡས་སོ། །ཕྱིན་ཅི་ལོག་མཐའ་ཡས་པས་
ཕ་རོལ་དུ་ཕྱིན་པ་འདི་མཐའ་ཡས་སོ། །སྒྲིབ་པ་མཐའ་ཡས་པས་ཕ་རོལ་དུ་ཕྱིན་པ་འདི་མཐའ་ཡས་སོ། །མ་རིག་པ་མཐའ་ཡས་པ་དང་། འདུ་བྱེད་རྣམས་མཐའ་ཡས་པ་དང་། རྣམ་པར་ཤེས་པ་མཐའ་ཡས་པ་དང་། མིང་དང་གཟུགས་
མཐའ་ཡས་པ་དང་། སྐྱེ་མཆེད་དྲུག་དང་། རེག་པ་དང་། ཚོར་བ་དང་། སྲེད་པ་དང་། ལེན་པ་དང་། སྲིད་པ་དང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་
བདེ་བ་དང་། འཁྲུག་པ་མཐའ་ཡས་པས་ཕ་རོལ་དུ་ཕྱིན་པ་འདི་མཐའ་ཡས་སོ། །ལྟ་བར་གྱུར་པ་མཐའ་ཡས་པ་དང་། འདོད་ཆགས་དང་། ཞེ་སྡང་དང་། གཏི་མུག་མཐའ་ཡས་པ་དང་། ཆད་པ་དང་། རྟག་པ་མཐའ་ཡས་པ་དང་། 
39-1-58b


སྔོན་གྱི་མཐའི་མུ་མཐའ་ཡས་པས་ཕ་རོལ་དུ་ཕྱིན་པ་འདི་མཐའ་ཡས་སོ། །ཕྱི་མའི་མཐའི་མུ་མཐའ་ཡས་པས་ཕ་རོལ་དུ་ཕྱིན་པ་འདི་མཐའ་ཡས་སོ། །སྦྱིན་པ་མཐའ་ཡས་པ་དང་། ཚུལ་ཁྲིམས་མཐའ་ཡས་པ་དང་། བཟོད་པ་མཐའ་ཡས་
པ་དང་། བརྩོན་འགྲུས་མཐའ་ཡས་པ་དང་། བསམ་གཏན་མཐའ་ཡས་པ་དང་། ཤེས་རབ་མཐའ་ཡས་པས་ཕ་རོལ་དུ་ཕྱིན་པ་འདི་མཐའ་ཡས་སོ། །དྲན་པ་ཉེ་བར་གཞག་པ་མཐའ་ཡས་པ་དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་
པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་མཐའ་ཡས་པ་དང་། ཕྱིན་ཅི་མ་ལོག་པ་མཐའ་ཡས་པས་ཕ་རོལ་དུ་ཕྱིན་པ་འདི་མཐའ་ཡས་སོ། །བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་
འཇུག་པ་མཐའ་ཡས་པས་ཕ་རོལ་དུ་ཕྱིན་པ་འདི་མཐའ་ཡས་སོ། །དམིགས་པ་མཐའ་ཡས་པས་ཕ་རོལ་དུ་ཕྱིན་པ་འདི་མཐའ་ཡས་སོ། །རིག་པ་དང་། རྣམ་པར་གྲོལ་བའི་ཡེ་ཤེས་མཐོང་བ་མཐའ་ཡས་པས་ཕ་རོལ་དུ་ཕྱིན་པ་འདི་
མཐའ་ཡས་སོ། །ཉན་ཐོས་ཀྱི་ས་དང་། རང་སངས་རྒྱས་ཀྱི་ས་མཐའ་ཡས་པས་ཕ་རོལ་དུ་ཕྱིན་པ་འདི་མཐའ་ཡས་སོ། །ཉན་ཐོས་ཀྱི་ཆོས་དང་། རང་སངས་རྒྱས་ཀྱི་ཆོས་དང་། སངས་རྒྱས་ཀྱི་ཆོས་མཐའ་ཡས་པས་ཕ་རོལ་
དུ་ཕྱིན་པ་འདི་མཐའ་ཡས་སོ། །བདག་དང་སེམས་ཅན་མཐའ་ཡས་པས་ཕ་རོལ་དུ་ཕྱིན་པ་འདི་མཐའ་ཡས་སོ། །འདོད་པའི་ཁམས་མཐའ་ཡས་པས་ཕ་རོལ་དུ་ཕྱིན་པ་འདི་མཐའ་ཡས་སོ། །གཟུགས་ཀྱི་ཁམས་
མཐའ་ཡས་པ་དང་། གཟུགས་མེད་པའི་ཁམས་མཐའ་ཡས་པས་ཕ་རོལ་དུ་ཕྱིན་པ་འདི་མཐའ་ཡས་སོ། །མངོན་པར་ཤེས་པ་མཐའ་ཡས་པ་དང་། སྒྲིབ་པ་མཐའ་ཡས་པས་ཕ་རོལ་དུ་ཕྱིན་པ་འདི་མཐའ་ཡས་སོ། །འདས་པ་དང་། 
མ་འོངས་པ་དང་། ད་ལྟར་བྱུང་བའི་ཡེ་ཤེས་མཐོང་བ་མཐའ་ཡས་པས་ཕ་རོལ་དུ་ཕྱིན་པ་འདི་མཐའ་ཡས་སོ། །ཆགས་པ་མེད་པ་མཐའ་ཡས་པ་དང་། ནམ་མཁའ་མཐའ་ཡས་པ་དང་། ཆོས་ཀྱི་དབྱིངས་མཐའ་ཡས་པས་ཕ་རོལ་དུ་ཕྱིན་
39-1-59a


པ་འདི་མཐའ་ཡས་སོ། །ཤཱ་རིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་ནི་ཐོག་མ་དང་། བར་དང་ཐ་མ་མི་དམིགས་སོ། །གང་གིས་ཀྱང་མི་དམིགས་སོ། །ཤཱ་རིའི་བུ་འདི་ལྟ་སྟེ། ཤེས་རབ་ཀྱི་ཕ་རོལ་དུ་ཕྱིན་པ་འདི་
ནི་མཐའ་ཡས་མུ་མེད་པའོ། །འདི་ལྟ་སྟེ། དཔེར་ན་ནམ་མཁའི་མཐའ་མི་དམིགས་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པའི་མཐའ་ཡང་མི་དམིགས་སོ། །སའི་ཁམས་མཐའ་ཡས་པས་ཤེས་རབ་ཀྱི་ཕ་རོལ་དུ་ཕྱིན་པ་མཐའ་ཡས་པར་
བལྟའོ། །ཆུའི་ཁམས་མཐའ་ཡས་པ་དང་། མེའི་ཁམས་མཐའ་ཡས་པ་དང་། རླུང་གི་ཁམས་མཐའ་ཡས་པ་དང་། །ནམ་མཁའི་ཁམས་མཐའ་ཡས་པ་དང་། རྣམ་པར་ཤེས་པའི་ཁམས་མཐའ་ཡས་པས་ཤེས་རབ་ཀྱི་ཕ་
རོལ་དུ་ཕྱིན་པ་མཐའ་ཡས་པར་ཁོང་དུ་ཆུད་པར་བྱའོ། །ཤཱ་རིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་ནི་མཐའ་མེད། དབུས་མེད། མུ་མེད་པར་ཁོང་དུ་ཆུད་པར་བྱའོ། །ཤཱ་རིའི་བུ་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ནི་ཡུལ་ན་མི་
གནས། ཕྱོགས་ན་མི་གནས་སོ། །ཤཱ་རིའི་བུ་གཟུགས་མུ་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་མུ་མེད་པར་རིག་པར་བྱའོ། །དེ་བཞིན་དུ་སྦྱར་ཏེ། འདི་ལྟར་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་
པར་ཤེས་པ་མུ་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་མུ་མེད་པར་རིག་པར་བྱའོ། །མ་རིག་པ་མུ་མེད་པ་ནས། རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་
པའི་བར་དུ་མུ་མེད་པས་ཤཱ་རིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་མུ་མེད་པར་རིག་པར་བྱའོ། །ཕྱིན་ཅི་ལོག་མུ་མེད་པ་དང་། སྒྲིབ་པ་མུ་མེད་པ་དང་། ལྟ་བར་སོང་བ་མུ་མེད་པས་ཤཱ་རིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་མུ་མེད་པར་
རིག་པར་བྱའོ། །བདག་མུ་མེད་པ་དང་། སེམས་ཅན་མུ་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་མུ་མེད་པར་རིག་པར་བྱའོ། །སྦྱིན་པ་མུ་མེད་པ་དང་། ཚུལ་ཁྲིམས་མུ་མེད་པ་དང་། བཟོད་པ་མུ་མེད་པ་དང་། བརྩོན་འགྲུས་མུ་མེད་པ་དང་། 
39-1-59b


བསམ་གཏན་མུ་མེད་པ་དང་། ཤེས་རབ་མུ་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་མུ་མེད་པར་རིག་པར་བྱའོ། །དྲན་པ་ཉེ་བར་གཞག་པ་དང་། ཡང་དག་པར་སྤོང་བ་མུ་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་མུ་མེད་པར་རིག་པར་
བྱའོ། །དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་མུ་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་མུ་མེད་པར་རིག་པར་བྱའོ། །ཤཱ་རིའི་བུ་སྡུག་
བསྔལ་དང་། ཀུན་འབྱུང་བ་དང་། འགོག་པ་དང་། ལམ་མུ་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་མུ་མེད་པར་རིག་པར་བྱའོ། །ཤཱ་རིའི་བུ་མངོན་པར་ཤེས་པ་མུ་མེད་པ་དང་། རྣམ་པར་གྲོལ་བ་མུ་མེད་པ་དང་། རྣམ་པར་གྲོལ་བའི་
ཡེ་ཤེས་མཐོང་བ་མུ་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་མུ་མེད་པར་རིག་པར་བྱའོ། །ཤཱ་རིའི་བུ་སོ་སོའི་སྐྱེ་བོའི་ཆོས་མུ་མེད་པ་དང་། ཉན་ཐོས་ཀྱི་ཆོས་མུ་མེད་པ་དང་། རང་སངས་རྒྱས་ཀྱི་ཆོས་མུ་མེད་པ་དང་། སངས་རྒྱས་ཀྱི་
ཆོས་མུ་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་མུ་མེད་པར་རིག་པར་བྱའོ། །ཤཱ་རིའི་བུ་རིག་པ་མུ་མེད་པ་དང་། རྣམ་པར་གྲོལ་བ་མུ་མེད་པ་དང་། རྣམ་པར་གྲོལ་བའི་ཡེ་ཤེས་མཐོང་བ་མུ་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་མུ་
མེད་པར་རིག་པར་བྱའོ། །ཤཱ་ར་དྭ་ཏིའི་བུ་མུ་མེད་པ་དམིགས་སུ་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་མུ་མེད་པ་ཞེས་བྱའོ། །མཐའ་དམིགས་སུ་མེད་པས་མཐའ་ཡས་པ་ཞེས་བྱའོ། །ཤཱ་ར་དྭ་ཏིའི་བུ་མཐའ་མེད་པ་ཞེས་
བྱ་བ་དེ་ནི་མུ་མེད་པའི་ཚིག་གོ། །ཤཱ་རིའི་བུ་བདག་མ་སྐྱེས་པས་ཆོས་ཐམས་ཅད་མཐའ་ཡས་པར་རིག་པར་བྱའོ། །ཤཱ་རིའི་བུ་ནམ་མཁའ་མཐའ་ཡས་པས་ཆོས་ཐམས་ཅད་མཐའ་ཡས་མུ་མེད་པར་རིག་པར་བྱའོ། །དེ་སྐད་ཅེས་
བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་འདི་བྱང་ཆུབ་སེམས་དཔའ་ཇི་ལྟ་བུ་དག་གི་ཡུལ་དུ་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་
39-1-60a


བུ་ཆོས་འདི་ནི་བྱང་ཆུབ་སེམས་དཔའ་གང་དག་ཆོས་ཀྱང་མི་དམིགས་ན་ཆོས་མ་ཡིན་པ་ལྟ་ཅི་སྨོས། ལམ་ཡང་མི་ད་མིགས་ན། ལམ་མ་ཡིན་པ་ལྟ་ཅི་སྨོས། ཚུལ་ཁྲིམས་ཀྱང་མི་དམིགས་ཤིང་རློམ་སེམས་མི་བྱེད་ན་འཆལ་པའི་ཚུལ་ཁྲིམས་
ལྟ་ཅི་སྨོས་ཏེ། ཁམས་གསུམ་ཐམས་ཅད་དུ་ཡང་མི་རྟོགས། སྲིད་པར་འགྲོ་བ་དང་། འཆི་འཕོ་དང་སྐྱེ་བ་ཐམས་ཅད་དུ་ཡང་མི་རྟོགས། ལུས་དང་སྲོག་ལ་ཡང་མི་ཆགས་ན། ཕྱི་རོལ་གྱི་དངོས་པོ་རྣམས་ལ་ལྟ་ཅི་སྨོས་ཏེ། འཁོར་བའི་རྒྱུན་མཐར་བྱས་
པ་སྲིད་པའི་རྒྱ་མཚོ་ཆེན་པོ་ལས་རྒལ་བ། གཡུལ་ཆེན་པོ་ལས་འདས་པའི་བྱང་ཆུབ་སེམས་དཔའ་དེ་དག་གི་ཡུལ་དང་བགྲོད་པ་ཡིན་ནོ། །ཡུལ་ཐམས་ཅད་ཡུལ་མ་ཡིན་པར་གང་གིས་ཡོངས་སུ་ཤེས་པ་དེ་དང་དེ་དག་ནི་རྣམ་པ་དེ་ལྟ་བུའི་སྐྱེས་བུ་
དམ་པ་དག་སྟེ། ཡུལ་ཐམས་ཅད་ལ་མི་ཆགས་པ་དེ་དང་དེ་དག་ནི་སེང་གེ་ཆེན་པོའོ། །ཡུལ་ཐམས་ཅད་ལ་མ་ཞུགས་པ་དེ་དང་དེ་དག་ནི་རྣམ་པ་དེ་ལྟ་བུ་དག་གོ། །ཡུལ་ཐམས་ཅད་ཀྱིས་མི་གོས་པ་དེ་དང་དེ་དག་ནི་ཡུལ་དང་མ་འདྲེས་
པའོ། །ཡུལ་ཐམས་ཅད་ལས་ཡང་དག་པར་འདས་པ་དེ་དང་དེ་དག་ནི་དེད་དཔོན་ཆེན་པོ་སྟེ། ཤཱ་རིའི་བུ་ཆོས་འདི་ནི་དེ་དག་གི་ཡུལ་དང་བགྲོད་པ་མ་ཡིན་ནོ། །ཤཱ་རིའི་བུ་འཁོར་འདི་ནི་གང་ཆོས་འདི་ལ་མ་མོས་ཤིང་ཡུལ་དུ་མ་གྱུར་པ་འམ། 
གང་ཆོས་རྣམ་པ་འདི་ལྟ་བུ་འདི་ལ་སོམ་ཉི་དང་བཅས་པ་འམ། ཐེ་ཚོམ་དང་། བཅས་པའི་བྱང་ཆུབ་སེམས་དཔའ་གཅིག་ཀྱང་ངས་མ་མཐོང་ངོ་། །ཤཱ་རིའི་བུ་འཁོར་འདི་ནི་ཆོས་འདི་ལ་ཐེ་ཚོམ་མེད་དོ། །ནེམ་ནུར་མེད་དོ། །ཡིད་
གཉིས་མེད་དོ། །ཤཱ་རིའི་བུ་བྱང་ཆུབ་སེམས་དཔའ་འདི་དག་ནི་ཆོས་འདི་ལ་ཡིད་གཉིས་མེད་དེ། ཤཱ་རིའི་བུ་སྐྱེས་བུ་དམ་པ་འདི་དག་ནི་སེམས་ཅན་ཐམས་ཅད་ཀྱི་ཡིད་གཉིས་ཡང་དག་པར་གཞོམ་པའི་ཕྱིར་གནས་པའོ། །ཤཱ་རིའི་བུ་འདི་
དག་ནི་འདི་ལྟ་བུའི་ཆོས་ལ་སོམ་ཉི་མེད་དེ། སོམ་ཉི་ལས་ཡང་དག་པར་འདས་པའོ། །ཤཱ་རིའི་བུ་གང་ཡང་ཕྱི་མའི་ཚེ་ཕྱི་མའི་དུས་ན་ཆོས་བསྟན་པ་འདི་ཉན་པ་དེ་དག་ཀྱང་ཆོས་ཐམས་ཅད་ལ་ཐེ་ཚོམ་མེད་པར་གནས་ཏེ། སེམས་ཅན་ཐམས་
39-1-60b


ཅད་ཀྱི་ཐེ་ཚོམ་གཅད་པའི་ཕྱིར་ཞུགས་པར་འགྱུར་རོ། །ཤཱ་རིའི་བུ་སེམས་ཅན་དགེ་བའི་རྩ་བ་ཆུང་ངུ་རྣམས་ནི་ཆོས་འདི་ལ་མོས་པར་ངས་མ་བཤད་དོ། །ཆོས་འདི་ལ་དེ་དག་གི་གོ་སྐབས་མེད་དེ། འདི་ནི་དེ་དག་གི་ནོར་མ་ཡིན་ནོ། །ཤཱ་རིའི་
བུ་ཆོས་བསྟན་པ་འདི་གང་དག་གི་རྣ་ལམ་དུ་ཐོས་པའི་སེམས་ཅན་དེ་དག་ཀྱང་དགེ་བའི་རྩ་བ་ཆུང་ངུ་དང་ལྡན་པ་མ་ཡིན་ན། གང་དག་འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་ལྟ་ཅི་སྨོས་ཏེ། དེ་དག་སངས་རྒྱས་
བཅོམ་ལྡན་འདས་རྣམས་ཀྱིས་སངས་རྒྱས་ཀྱི་ཆོས་ལ་ངེས་པར་ལུང་བསྟན་ཏེ། ཇི་ལྟར་ད་ལྟར་ང་སེང་གེའི་སྒྲ་སྒྲོགས་པ་དང་། འཇིགས་པ་མེད་པའི་སྒྲ་དང་། སྐྱེས་བུ་ཆེན་པོའི་སྒྲ་དང་། རང་བྱུང་གི་སྒྲ་སྒྲོགས་པ་བཞིན་དུ་དེ་དག་
ཀྱང་སེང་གེའི་སྒྲ་སྒྲོག་པར་འགྱུར་རོ། །གང་དག་ཐ་ན་ཆོས་འདི་ལ་དད་པ་བསྐྱེད་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འདུན་པ་བསྐྱེད་པར་འགྱུར་བ་དེ་དག་གི་ལུང་བསྟན་པ་ཡང་དེ་ཉིད་ཡིན་ནོ། །དེ་
ཅིའི་ཕྱིར་ཞེ་ན། ཤཱ་རིའི་བུ་སེམས་ཅན་གང་དག་ཆོས་ཟབ་མོ་ཐོས་ནས། དགའ་བ་དང་། མཆོག་ཏུ་དགའ་བ་དང་། མོས་པ་སྐྱེད་པ་དེ་དག་ནི་ཤིན་དུ་རྙེད་པར་དཀའོ། །ཤཱ་རིའི་བུ་དེ་བས་ཀྱང་སེམས་ཅན་གང་ཆོས་ཟབ་མོ་ཐོས་
ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་ཅིང་མོས་པ་སྐྱེད་དེ། དགེ་བ་ཆེན་པོ་དང་ལྡན་པ་ནི་ཤིན་དུ་རྙེད་པར་དཀའ་སྟེ། ཤཱ་རིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་གང་དག་གི་རྣ་ལམ་དུ་ཐོས་པར་
འགྱུར་བ་དང་། ཐོས་ནས་ཀློག་པ་དང་། མོས་པ་དང་། དགའ་བ་དང་། ཡིད་བདེ་བ་ཆེན་པོ་སྐྱེད་པ་དང་། ཕྱིར་ཞིང་ཉན་པའི་ཕྱིར་ཆོས་འདི་ལ་འདུན་པ་སྐྱེད་པའི་སེམས་ཅན་དེ་དག་ཀྱང་འཁོར་བ་ཆེན་པོར་ཞུགས་པར་ངས་མ་བཤད་ན་ལུང་ནོད་པ་དང་། 
ཁ་ཏོན་བྱེད་པ་དང་། གཞན་ལ་སྟོན་པ་ལྟ་ཅི་སྨོས། ཤཱ་རིའི་བུ་ཉན་ཐོས་དང་། རང་སངས་རྒྱས་ཀྱི་ཐེག་པ་ལ་ངེས་པར་མ་ཞུགས་ཤིང་མ་ངེས་པ་ནི་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །ཤཱ་རིའི་བུ་ཆོས་ཀྱི་མཆོག་འདི་ལ་
39-1-61a


ཆོས་ཆུང་ངུ་དང་ལྡན་པའི་སེམས་ཅན་རྣམས་ཀྱི་གོ་སྐབས་ངས་མ་མཐོང་ངོ་། །ཤཱ་རིའི་བུ་སངས་རྒྱས་ཀྱི་བྱང་ཆུབ་འདི་ནི་རྒྱ་ཆེན་སེམས་ཅན་ནི་ཕལ་ཆེར་དམན་པ་ལ་མོས་ཤིང་ཆོས་ཆུང་ངུ་དང་ལྡན་ཏེ། འདི་ལྟ་བུའི་ཆོས་ཟབ་མོ་ཆགས་པ་མེད་པ་ལ་
དགེ་བར་མ་བྱས་ཤིང་མི་མཁས་སོ། །ཤཱ་རིའི་བུ་འདི་ནི་སེམས་ཅན་གང་དག་རྒྱ་ཆེ་ཞིང་ཆོས་རྒྱ་ཆེན་པོ་ལ་མོས་པ། ཐེག་པ་ཆེན་པོ་ལ་ཡང་དག་པར་ཞུགས་པ། དགོས་པ་ཤིན་དུ་ཡོངས་སུ་རྙེད་པ། གོ་ཆ་ཆེན་པོ་ཤིན་དུ་བགོས་པ། དོན་ལེགས་
པར་རྟོགས་པ་ཆེན་པོ་དང་དྲང་ཞིང་ཉམ་ང་བ་མེད་པ། ཚང་ཚིང་མེད་པ་མཉམ་པ། སྨིག་མ་དང་ཚེར་མ་མེད་པ་དང་། ངམ་གྲོག་དང་གཡང་ས་མེད་པ། གཙང་བ་གནོད་པ་མེད་པ། གྱ་གྱུ་མེད་པ། ཡོན་པོ་མེད་པར་ཞུགས་པ་དང་། ཤཱ་རིའི་བུ་གང་དག་
འཇིག་རྟེན་ལ་ཕན་པ་དང་། འཇིག་རྟེན་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་མི་རྣམས་ཀྱི་དོན་དང་། ཕན་པ་དང་བདེ་བའི་ཕྱིར་ཞུགས་པ། སྣང་བ་བྱེད་པའི་སེམས་ཅན་རྣམས་ཀྱི་མུ་སྟེགས་སུ་གྱུར་པ། སྙིང་རྗེ་ཆེན་
པོ་དང་ལྡན་པ། ཕན་པར་སྙིང་བརྩེ་བ། ཕན་པར་འདོད་པ། བདེ་བར་འདོད་པ། གྲུབ་པ་དང་བདེ་བར་འདོད་པ། སེམས་ཅན་ཐམས་ཅད་ལ་བདེ་བར་སྦྱར་བར་ཉེ་བར་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟ་བུ་དེ་དག་གི་
ནོར་ཆེན་པོ་ཡིན་ནོ། །ཤཱ་རིའི་བུ་སེམས་ཅན་ཆེན་པོ་དེ་དག་ནི་ཆོས་དཀོན་མཆོག་འདི་ཚོལ་བ་སྟེ། འདི་ནི་དེ་དག་གི་ནོར་དམ་པའོ། །དེ་ཅིའི་ཕྱིར་ཞེ་ན། ཤཱ་རིའི་བུ་སེམས་ཅན་བསོད་ནམས་མ་བྱས་པ། དམན་པ་ལ་མོས་པ། 
དད་པ་རབ་ཏུ་ཉམས་པ་རྣམས་ནི་ཆོས་ཀྱི་ནོར་རྒྱ་ཆེན་པོ་འདི་ལ་མོས་པ་མི་སྐྱེའོ། །ཤཱ་རིའི་བུ་ངས་དེ་ལ་དགོངས་ཏེ། སེམས་ཅན་དམན་པ་ལ་མོས་པ་རྣམས་ཀྱང་། དམན་པ་ལ་མོས་པ་དང་། རྒྱ་ཆེན་པོ་ལ་མོས་པ་རྣམས་
ཀྱང་རྒྱ་ཆེན་པོ་ལ་མོས་པར་ཁམས་སོ་སོར་སྦྱོར་རོ་ཞེས་བཤད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པའི་སྤྱོད་ཡུལ་གང་ལགས། དེ་སྐད་ཅེས་གསོལ་
39-1-61b


པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་ཤེས་རབ་ཀྱི་ཕ་རོལ་དུ་ཕྱིན་པའི་ཡུལ་དང་སྤྱོད་ཡུལ་ནི་མཐའ་ཡས་སོ། །ཤཱ་རིའི་བུ་འདི་ལྟ་སྟེ། དཔེར་ན་རླུང་གི་ཁམས་ཀྱི་ཡུལ་དང་སྤྱོད་
ཡུལ་ནི་མཐའ་ཡས་སོ། །དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པའི་ཡུལ་དང་སྤྱོད་ཡུལ་ཡང་མཐའ་ཡས་སོ། །ཤཱ་རིའི་བུ་འདི་ལྟ་སྟེ། དཔེར་ན་ནམ་མཁའ་ནི་རླུང་གི་ཁམས་ཀྱི་ཡུལ་དང་སྤྱོད་ཡུལ་ལོ། །དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་
པའི་ཡུལ་དང་སྤྱོད་ཡུལ་ནི་ནམ་མཁའོ། །ཤཱ་རིའི་བུ་འདི་ལྟ་སྟེ། དཔེར་ན་ནམ་མཁའི་ཁམས་ཀྱི་ཡུལ་དང་། སྤྱོད་ཡུལ་ནི་མཐའ་ཡས་སོ། །དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པའི་ཡུལ་དང་། སྤྱོད་ཡུལ་ཡང་མཐའ་ཡས་སོ། །ཤཱ་རིའི་བུ་འདི་
ལྟ་སྟེ། དཔེར་ན་ནམ་མཁའི་ཁམས་དང་། རླུང་གི་ཁམས་ནི་གང་ན་ཡང་མི་སྣང་ཞིང་ཆོས་གང་མངོན་པར་འགྲུབ་པའི་མཚན་ཉིད་དུ་ཡང་ཉེ་བར་གནས་པ་མ་ཡིན་ནོ། །ཤཱ་རིའི་བུ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཡང་ཆོས་གང་ལ་ཡང་མི་སྣང་ཞིང་
ཆོས་གང་མངོན་པར་འགྲུབ་པའི་མཚན་ཉིད་དུ་ཡང་ཉེ་བར་གནས་པ་མ་ཡིན་ནོ། །ཤཱ་རིའི་བུ་འདི་ལྟ་སྟེ། དཔེར་ན་ནམ་མཁའི་ཁམས་དང་། རླུང་གི་ཁམས་ནི་གཟུང་དུ་མེད་ཅིང་ཡོངས་སུ་མ་གྲུབ་པས་ཁ་དོག་གི་མཚན་མའི་གྲངས་སུ་མི་འགྲོའོ། །
ཤཱ་ར་དྭ་ཏིའི་བུ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཡང་གཟུང་དུ་མེད་ཅིང་ཡོངས་སུ་མ་གྲུབ་པས་ཁ་དོག་དང་མཚན་མ་གང་གིས་ཀྱང་གང་གི་གྲངས་སུ་ཡང་ཉེ་བར་འགྲོ་བ་མ་ཡིན་ནོ། །ཤཱ་རིའི་བུ་འདི་ལྟ་སྟེ། དཔེར་ན་ནམ་མཁའི་ཁམས་དང་། རླུང་གི་
ཁམས་ནི་ཆོས་གང་ཡོངས་སུ་གྲུབ་པར་མཐོང་བར་ཉེ་བར་འགྲོ་བ་མ་ཡིན་ནོ། །དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཡང་ཆོས་གང་ཡང་ཡོངས་སུ་གྲུབ་པར་མཐོང་བར་ཉེ་བར་འགྲོ་བ་མ་ཡིན་ནོ། །གསོལ་པ། བཅོམ་ལྡན་འདས་ཤེས་རབ་ཀྱི་ཕ་
རོལ་དུ་ཕྱིན་པ་འདིའི་མཚན་ཉིད་གང་ལགས། །བཀའ་སྩལ་པ། ཤཱ་ར་དྭ་ཏིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་མཚན་ཉིད་མེད་དོ། །ཤཱ་རིའི་བུ་འདི་ལྟ་སྟེ། དཔེར་ན་ནམ་མཁའི་ཁམས་དང་། རླུང་གི་ཁམས་ནི་ཆོས་གང་གི་ཡོངས་སུ་
39-1-62a


གྲུབ་པའི་མཚན་ཉིད་དུ་ཡང་ཉེ་བར་འགྲོ་བ་མ་ཡིན་ནོ། །ཤཱ་རིའི་བུ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཡང་ཆོས་གང་ཡོངས་སུ་གྲུབ་པའི་མཚན་ཉིད་དུ་ཡང་ཉེ་བར་འགྲོ་བ་མ་ཡིན་ཏེ། ཤཱ་རིའི་བུ་འདི་ལྟར་མེད་པས་ཤེས་རབ་ཀྱི་ཕ་རོལ་
དུ་ཕྱིན་པ་ནི་མཚན་ཉིད་མེད་པའོ། །ཤཱ་རིའི་བུ་འདི་ལྟ་སྟེ། དཔེར་ན་ནམ་མཁའི་ཁམས་ནི་གང་དུ་ཡང་མི་ཆགས་སོ། །དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཡང་གང་དུ་ཡང་མི་ཆགས་ཏེ། དེའི་ཕྱིར་ཆགས་པ་མེད་པའི་མཚན་ཉིད་
ཅེས་བྱའོ། །ཤཱ་རིའི་བུ་ཆགས་པ་མེད་པ་ལ་ནི་མཚན་ཉིད་ཅི་ཡང་མེད་མོད་ཀྱི་འོན་ཀྱང་གང་གི་ཕྱིར་ཤེས་རབ་ཀྱི་ཕ་རོལ་དུ་ཕྱིན་པ་ཆགས་པ་མེད་པའི་མཚན་ཉིད་དོ་ཞེས་བྱ་བ་དེ་ནི་ཐ་སྙད་ཀྱི་ཚིག་གོ། །ཤཱ་རིའི་བུ་ཆགས་པ་མེད་པ་ལ་ནི་
མཚན་ཉིད་མེད་ཅིང་མཚན་མ་མེད་དེ། དེ་ཉིད་མཚན་ཉིད་མེད་པར་བསྟན་ཏོ། །ཤཱ་རིའི་བུ་ཆགས་པ་མེད་པ་ཞེས་བྱ་བ་དེ་ནི་ཆགས་པ་ཡོངས་སུ་ཤེས་པའོ། །དེ་ནི་ཆགས་པ་མི་དམིགས་པའོ། །དེ་ནི་ཆགས་པའི་ཡང་དག་པ་ཇི་ལྟ་
བ་བཞིན་ནོ། །དེ་ནི་ཆགས་པའི་ཕྱིན་ཅི་ལོག་ཡོངས་སུ་ཤེས་པའོ། །ཤཱ་རིའི་བུ་ཆགས་པ་ལ་ཆགས་པ་མེད་དེ། དེའི་ཕྱིར་ཆགས་པའི་ཡང་དག་པ་ཇི་ལྟ་བ་ཉིད་དང་། ཆགས་པ་མི་དམིགས་པ་ནི་ཆགས་པ་མེད་པ་ཞེས་བྱའོ། །
ཤཱ་རིའི་བུ་ཡེ་ཤེས་བསྟན་པས་ཤེས་རབ་ཀྱི་ཕ་རོལ་དུ་ཕྱིན་པ་འདི་ཆགས་པ་མེད་པའི་མཚན་ཉིད་དོ། །ཤཱ་རིའི་བུ་ཆོས་ཐམས་ཅད་ནི་ཆ་གས་པ་མེད་པའི་མཚན་ཉིད་དེ། ཆོས་གང་གི་མཚན་ཉིད་གང་ཡིན་པ་དེ་མཚན་ཉིད་མེད་པ་སྟེ། 
ཆོས་གང་ཡང་མཚན་ཉིད་མངོན་པར་འགྲུབ་པའི་ཕྱིར་ཉེ་བར་གནས་པ་མ་ཡིན་ནོ། །གང་ལ་མཚན་ཉིད་མེད་པ་དེ་ནི་མཚན་ཉིད་མེད་པ་ཞེས་བྱའོ། །གང་མཚན་ཉིད་མེད་པ་དེ་ལ་ཆགས་པ་མེད་དོ། །གལ་ཏེ་ཆོས་ཀྱི་མཚན་ཉིད་ཅིག་
ཡོད་ན་ནི་ཆོས་ཐམས་ཅད་ལ་ཆགས་པར་ཡང་འགྱུར་ན། གང་གི་ཕྱིར་ཆོས་ཐམས་ཅད་ལ་མཚན་ཉིད་མེད་པ་དེའི་ཕྱིར་དེ་དག་ལ་ཆགས་པ་མེད་དེ། དེས་ན་ཆོས་ཐམས་ཅད་ཆགས་པ་མེད་པའི་མཚན་ཉིད་ཅེས་བྱ་སྟེ། ཇི་སྐད་
39-1-62b


དུ་བརྗོད་པ་དེ་བཞིན་དུ་ནི་མ་ཡིན་ནོ། །གང་ཆགས་པ་མེད་པའི་མཚན་ཉིད་དེ་ནི་བརྗོད་པར་མི་ནུས་སོ། །དེ་ཅིའི་ཕྱིར་ཞེ་ན། མེད་པའི་ཕྱིར་ཆགས་པ་མེད་པའི་མཚན་ཉིད་དོ། །དབེན་པའི་ཕྱིར་ཆགས་པ་མེད་པའི་མཚན་ཉིད་དོ། །
མི་དམིགས་པའི་ཕྱིར་ཆགས་པ་མེད་པའི་མཚན་ཉིད་དོ། །ཤཱ་རིའི་བུ་ཆོས་གང་ཆགས་པ་མེད་པའི་མཚན་ཉིད་ཀྱི་ཆོས་གང་ཡིན་པ་དེ་ནི་མཐོང་བ་ཅིར་ཡང་ཉེ་བར་གནས་པ་མ་ཡིན་ཞིང་མི་མཐོང་བར་ཡང་མ་ཡིན་མོད་ཀྱི། འོན་ཀྱང་དེ་
སེམས་ཅན་རྣམས་ལ་ཆགས་པ་མེད་པའི་མཚན་ཉིད་ཅེས་བསྟན་པ་བྱས་སོ། །ཤཱ་རིའི་བུ་ཀུན་ནས་ཉོན་མོངས་པའི་མཚན་ཉིད་གང་ཡིན་པ་དེ་ནི་མཚན་ཉིད་མེད་པ་སྟེ། ཀུན་ནས་ཉོན་མོངས་པ་ནི་མཚན་ཉིད་ཀྱིས་ཉེ་བར་གནས་པ་
མ་ཡིན་གྱི་ཤཱ་རིའི་བུ་ཀུན་ནས་ཉོན་མོངས་པ་ནི་ཕྱིན་ཅི་ལོག་གིས་ཉེ་བར་གནས་པའོ། །ཕྱིན་ཅི་ལོག་གང་ཡིན་པ་དེ་ནི་མཚན་ཉིད་མེད་པའོ། །གང་མཚན་ཉིད་མེད་པ་དེ་ཐ་སྙད་ཀྱིས་ཀྱང་མཚན་ཉིད་མེད་དེ། དེ་མཚན་ཉིད་མེད་པ་
ཁོ་ནའོ། །ཤཱ་རིའི་བུ་རྣམ་པར་བྱང་བ་དེ་ཡང་མཚན་ཉིད་མེད་པའོ། །དེ་ཅིའི་ཕྱིར་ཞེ་ན། ཤཱ་རིའི་བུ་ཀུན་ནས་ཉོན་མོངས་པ་ཉིད་ཀྱང་མཚན་ཉིད་མེད་ན་རྣམ་པར་བྱང་བ་ལྟ་ཅི་སྨོས་ཤཱ་རིའི་བུ་གང་ཀུན་ནས་ཉོན་མོངས་པ་ཡོངས་སུ་ཤེས་
པ་དེ་ནི་ཡང་དག་པ་ཇི་ལྟ་བ་བཞིན་ཏེ། དེ་ལ་ཀུན་ནས་ཉོན་མོངས་པ་ཅི་ཡང་མེད་མོད་ཀྱི། སེམས་ཅན་རྣམས་ནི་ཕྱིན་ཅི་ལོག་པས་ཀུན་ནས་ཉོན་མོངས་སོ། །གང་ཕྱིན་ཅི་ལོག་པ་དེ་ཡང་དག་པ་མ་ཡིན་ནོ། །གང་ཡང་
ཆོས་མ་ཡིན་པ་དེ་ལ་ཡང་དག་པ་ཡོངས་སུ་གྲུབ་པ་འམ་མཚན་ཉིད་མེད་དོ། །ཤཱ་ར་དྭ་ཏིའི་བུ་གང་དེ་ལྟར་ཤེས་པ་དེ་ནི་རྣམ་པར་བྱང་བ་ཞེས་བྱའོ། །ཀུན་ནས་ཉོན་མོངས་པ་ཉིད་ཀྱང་མཚན་ཉིད་མེད་ན་རྣམ་པར་བྱང་བ་ལྟ་ཅི་སྨོས། 
ཤཱ་རིའི་བུ་འདི་ལྟ་སྟེ། ཀུན་ནས་ཉོན་མོངས་པ་འམ། རྣམ་པར་བྱང་བའི་ཆོས་འདི་གཉིས་ནི་མཚན་ཉིད་མེད་ཅིང་ཡོངས་སུ་མ་གྲུབ་པའོ། །ཤཱ་རིའི་བུ་ཆོས་ཐམས་ཅད་ནི་མཚན་ཉིད་ཡོངས་སུ་མ་གྲུབ་པ་སྟེ། དེ་ནི་ཆགས་
39-1-63a


པ་མེད་པ་ཞེས་བྱའོ། །ཆོས་ཐམས་ཅད་ཆགས་པ་མེད་པའི་མཚན་ཉིད་ཅེས་བྱ་བ་ནི་ཆོས་ཐམས་ཅད་ཆགས་པ་མེད་པ་ཡིན་ན་ཤཱ་རིའི་བུ་བྱིས་པ་སོ་སོའི་སྐྱེ་བོ་ཐམས་ཅད་ནི་ཆགས་པ་མེད་པ་ལ་ཆགས་སོ། །ཤཱ་རིའི་བུ་འདི་ནི་ཆོས་
ཐམས་ཅད་ཆགས་པ་མེད་པའི་མཚན་ཉིད་དེ། ཡེ་ཤེས་ཀྱི་སྤྱོད་ཡུལ་ཞེས་བསྟན་ཏོ། །ཤཱ་རིའི་བུ་འདི་ནི་ཤེས་རབ་ཀྱི་ཕ་རོལ་དུ་ཕྱིན་པའི་སྤྱོད་ཡུལ་ལོ། །ཆགས་པ་མེད་པའི་མཚན་ཉིད་ཡེ་ཤེས་ཀྱི་སྤྱོད་ཡུལ་ནི་ཤེས་རབ་ཀྱི་ཕ་རོལ་དུ་ཕྱིན་པ་སྟེ། 
དེའི་ཕྱིར་ཤེས་རབ་ཀྱི་ཕ་རོལ་དུ་ཕྱིན་པའི་སྤྱོད་ཡུལ་མཐའ་ཡས་ཤེས་བྱའོ། །གང་ཆགས་པ་མེད་པའི་དེའི་ཡུལ་དང་སྤྱོད་ཡུལ་མཐའ་ཡས་སོ། །ཤཱ་རིའི་བུ་སྤྱོད་ཡུལ་ཞེས་བྱ་བ་དེ་ནི་སྤྱོད་ཡུལ་མེད་པའི་ཚིག་བླ་དགས་སོ། །ཤཱ་རིའི་
བུ་ཤེས་རབ་ཀྱི་ཕ་རོལ་དུ་ཕྱིན་པ་ནི་སྤྱོད་ཡུལ་བསྟན་པའི་མཚན་ཉིད་ཀྱིས་ཕྱེ་བ་མ་ཡིན་ནོ། །ཤཱ་རིའི་བུ་ཡུལ་ཞེས་བྱ་བ་དེ་ནི་ཆོས་ཐམས་ཅད་ཡུལ་མེད་པའོ། །དེ་ནི་ཡང་དག་པ་ཇི་ལྟ་བ་ཉིད་དང་། ཇི་ལྟ་བ་བཞིན་ནོ། །མེད་པའི་
ཕྱིར་ཆོས་ཐམས་ཅད་ཡུལ་མེད་དེ། ཆོས་རྣམས་དེ་ལྟར་ཡོངས་སུ་ཤེས་པ་དེ་ནི་ཡུལ་དང་། སྤྱོད་ཡུལ་ཞེས་བྱ་སྟེ། ཇི་སྐད་དུ་བརྗོད་པ་བཞིན་དུ་ནི་མ་ཡིན་ནོ། །གང་ཆོས་རྣམས་དེ་ལྟར་ཡོངས་སུ་ཤེས་པ་དེ་ནི་གང་ལ་ཡང་ཆགས་
པ་མེད་དེ། ཆགས་པ་མེད་པའི་མཚན་ཉིད་ཅེས་བྱའོ། །དེའི་ཕྱིར་ཤེས་རབ་ཀྱི་ཕ་རོལ་དུ་ཕྱིན་པ་ཆགས་པ་མེད་པའི་མཚན་ཉིད་ཅེས་བྱའོ། །ཤཱ་རིའི་བུ་འདི་ལྟ་བུའི་ཆོས་འདི་ལ་གྲོགས་མང་དུ་མི་རྙེད་དོ། །འདི་ལྟ་བུའི་ཆོས་
འཆད་པ་དང་། ཡང་དག་པར་རབ་ཏུ་སྟོན་པ་དང་། རྣམ་པར་འབྱེད་པ་གང་ཡིན་པ་དེ་ནི་དེ་བཞིན་གཤེགས་པའི་ཡེ་ཤེས་ཀྱི་ཡུལ་བསྟན་པའོ། །ཤཱ་རིའི་བུའི་ཆོས་འདི་ལ་ནི་བདེན་པ་མཐོང་བའི་ཉན་ཐོས་དང་། བྱང་ཆུབ་སེམས་
དཔའ་སེམས་དཔའ་ཆེན་པོ་ཕྱིར་མི་ལྡོག་པ་ལྟ་བ་ཕུན་སུམ་ཚོགས་པའི་གང་ཟག་ཕྱིར་མི་ཟློག་པ་རྣམས་མ་གཏོགས་པར་གྲོགས་གཞན་གང་ཡང་མེད་དེ། ལྟ་བ་ཕུན་སུམ་ཚོགས་པ་ཆོས་འདི་ལ་སྤྱོད་པ་དེ་དག་ཀྱང་ཐེ་ཚོམ་དུ་འགྱུར་རོ། །ཤཱ་
39-1-63b


རིའི་བུ་བྱང་ཆུབ་སེམས་དཔའ་ཐེ་ཚོམ་མེད་པ། ལུས་མངོན་སུམ་དུ་གྱུར་པ་རྣམས་ཆོས་འདི་ལ་བཟོད་པ་ཐོབ་པར་འགྱུར་གྱི། ཤཱ་རིའི་བུ་བྱིས་པ་སོ་སོའི་སྐྱེ་བོ་རྣམས་ནི་མ་ཡིན་ནོ། །ཤཱ་རིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་
འདི་ནི་དམན་པ་ལ་མོས་པའི་སེམས་ཅན་རྣམས་ཀྱི་ལག་ཏུ་འགྲོ་བར་མི་འགྱུར་གྱི། ཤཱ་རིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་ནི་སེམས་ཅན་གང་དགེ་བའི་རྩ་བ་ཡོངས་སུ་དག་པ་དང་ལྡན་པ་སངས་རྒྱས་མང་པོ་ལ་བསྙེན་བཀུར་
བྱས་པ་དེ་དག་གི་ལག་ཏུ་འགྲོ་བར་འགྱུར་རོ། །ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་ནི་སེམས་ཅན་གང་དག་དགེ་བའི་རྩ་བ་བསྐྱེད་པ། བསམ་པ་དགེ་བ། སངས་རྒྱས་བཅོམ་ལྡན་འདས་རྣམས་ལ་ལྷག་པར་བྱ་བ་བྱས་པ། 
བྱང་ཆུབ་ཀྱི་ཕྱིར་ས་བོན་བསྐྱེད་པ། སངས་རྒྱས་ཀྱི་ཐེག་པ་ལ་ཞུགས་པ། སངས་རྒྱས་བཅོམ་ལྡན་འདས་རྣམས་དང་ཉེ་བར་གནས་པ། ཚུལ་བཞིན་ཀུན་འདྲི་བ་དེ་དག་གི་ལག་ཏུ་འགྲོ་བར་འགྱུར་རོ། །ཤེས་རབ་ཀྱི་ཕ་
རོལ་དུ་ཕྱིན་པ་བསྟན་པ་འདི་ནི་གང་དག་བཟོད་པ་འཐོབ་པ་དང་། ཉེ་བར་འགྱུར་བ་དང་། བཟོད་པ་འཐོབ་པ་དེ་དག་གི་ལག་ཏུ་འགྲོ་བར་འགྱུར་རོ། །གང་དག་ལུང་བསྟན་པ་དེ་དག་ཀྱང་མྱུར་དུ་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། སྨོན་ལམ་གྱི་དབང་གིས་ནི་མ་གཏོགས་སོ། །གང་དག་ལུང་མ་བསྟན་པ་དེ་དག་ཀྱང་མྱུར་དུ་མངོན་སུམ་དུ་ལུང་བསྟན་པ་ཐོབ་པར་འགྱུར་རོ། །ཤཱ་རིའི་བུ་སེམས་
ཅན་གང་དག་དགེ་བའི་རྩ་བ་ཡོངས་སུ་མ་སྨིན་པའི་རྣ་ལམ་དུ་མདོ་སྡེ་འདི་ཐོས་པར་གྱུར་པ་དེ་དག་ཀྱང་ལུང་བསྟན་པ་ཉིད་དུ་རིག་པར་བྱ་ན། གང་མདོ་སྡེ་འདི་རྙེད་པ་དང་། ཡི་གེར་འདྲི་བ་དང་། འཆང་བ་དང་། ལུང་ནོད་པ་དང་། ཁ་ཏོན་བྱེད་པ་དང་། 
གཞན་ལ་ཡང་རྒྱ་ཆེར་རབ་ཏུ་སྟོན་པ་ལྟ་ཅི་སྨོས། ཤཱ་རིའི་བུ་སེམས་ཅན་གང་དག་དགེ་བའི་རྩ་བ་ཡོངས་སུ་མ་སྨིན་པ་དེ་དག་གིས་མདོ་སྡེ་འདི་མཉན་པ་དང་། ཡི་གེར་འདྲི་བ་དང་། ཀློག་པ་དང་། ཁ་ཏོན་བྱེད་པ་དེ་ནི་གནས་མེད་དེ། ཤཱ་རིའི་
39-1-64a


བུ་ཆོས་ཀྱི་རྣམ་གྲངས་འདི་ནི་སེམས་ཅན་གང་དག་དགེ་བའི་རྩ་བ་འབར་བ་རྣམས་ཀྱི་ལག་ཏུ་འགྲོ་བར་འགྱུར་རོ། །ཤཱ་རིའི་བུ་ཁྱོད་མོས་པར་བྱའོ། །ཁྱོད་ཀྱིས་ཁོང་དུ་ཆུད་པར་བྱའོ། །བྱང་ཆུབ་སེམས་དཔའི་ཐེག་པ་ཅན་
རྣམས། ཉན་ཐོས་ཀྱི་ཐེག་པ་ཅན་གྱི་རིགས་ཀྱི་བུ་འམ། རིགས་ཀྱི་བུ་མོ་དེས་ཆོས་འདི་རྙེད་ན། སྤྲོ་བ་ཆུང་བ་དང་། ལེ་ལོ་དང་གཉིད་ཆེ་བ་དང་། ཤེས་བཞིན་མེད་པ་དང་། དྲན་པ་ཉེ་བར་མི་འཇོག་པ་དང་། སེམས་གཡེང་བ་དང་། ཟང་
ཟིང་ལ་ཆགས་པ་དང་། བརྐམ་པ་དང་། མུ་ཆོར་སྨྲ་བ་དང་། སྨྱོན་ཐབས་དང་། ཁ་པར་དང་། དབང་པོ་ཕལ་བར་མི་བྱའོ། །ཤཱ་རིའི་བུ་དགེ་བའི་རྩ་བ་བྱས་པ་དག་ཀྱང་མི་སླུའོ། །བྱང་ཆུབ་སེམས་དཔའ་ཆོས་འདི་རྙེད་ནས་བག་ཡོད་
པ་དང་། བརྩོན་འགྲུས་དང་། སྤྲོ་བ་དང་། མོས་པ་དང་། ལེ་ལོ་མེད་པ་དང་། དབང་པོ་བསྡམས་པ་དང་། མུ་ཆོར་མི་སྨྲ་བ་རབ་ཏུ་བསྟེན་པར་བྱའོ། །དྲན་པ་ཉེ་བར་གཞག་པ་དང་། མང་དུ་ཐོས་པ་ལ་སྦྱོར་བར་བྱའོ། །བརྩོན་འགྲུས་
བརྩམས་ལ་འདི་ལྟ་བུའི་ཡོན་ཏན་འདི་དག་ཡོངས་སུ་བསྐང་བའི་ཕྱིར་འབད་པར་བྱའོ། །ཤཱ་རིའི་བུ་འདི་ལྟ་བུའི་ཆོས་ཐོས་པའི་འབྲས་བུ་ནི་འདི་མ་ཡིན་ཏེ། གང་བྱང་ཆུབ་སེམས་དཔའ་དང་། ཉན་ཐོས་འདི་ལྟ་བུའི་ཆོས་ཐོས་ན་བག་
བྱེད་པར་མི་འགྱུར་བ་དང་། ཡིད་རྟོན་པར་མི་འགྱུར་བ་དང་། འདུན་པ་ཡོངས་སུ་ཉམས་པ་དང་། བརྩོན་འགྲུས་བྲི་བ་དང་། མ་དྲིས་པ་སྟོན་པ་དང་གནོད་སེམས་མང་དུ་འགྱུར་བ་དེ་ནི་ཐོས་པའི་འབྲས་བུ་མ་ཡིན་ནོ། །དེ་དག་གིས་འདི་ལྟ་བུའི་ཆོས་
འདི་ཐོས་པ་མ་ཡིན་ནོ། །ཤཱ་རིའི་བུ་ཐོས་ཤེས་བྱ་བ་དེ་ནི་ཡང་དག་པའི་ནན་ཏན་གྱི་ཚིག་བླ་དགས་ཏེ། ལོག་པའི་ནན་ཏན་གྱི་ནི་མ་ཡིན་ནོ། །ཤཱ་རིའི་བུ་ལོག་པར་ཞུགས་པས་ནི་ཆོས་འདི་ཐོས་པར་མི་འགྱུར་རོ། །ཤཱ་རིའི་བུ་ཐོས་ནས་ཁྱོད་དོན་ལ་
མཁས་ཤིང་ནན་ཏན་གྱིས་གནས་པར་བྱའོ། །ཤཱ་རིའི་བུ་ལོག་པར་ཞུགས་པ་རྣམས་ལ་ནི་རྗེས་སུ་འཐུན་པའི་བཟོད་པ་ཡང་མེད་དོ། །ཤཱ་རིའི་བུ་གང་ཇི་སྐད་བསྟན་པའི་ཆོས་འདི་ལ་ལོག་པར་མི་སྒྲུབ་པ་དེ་ནི་ཆོས་འདི་ལ་ནན་ཏན་བྱེད་པ་ཞེས་བྱའོ། །ཤཱ་
39-1-64b


རིའི་བུ་བཟོད་པ་ཕུན་སུམ་ཚོགས་པའི་གང་ཟག་ནན་ཏན་ལ་གནས་པ་དག་ནི་ཕྱིར་ངན་སོང་དུ་འགྲོ་བར་མི་འགྱུར་གྱི། མྱུར་དུ་ཆོས་འདི་ཡང་དག་པར་སྒྲུབ་པར་འགྱུར་རོ། །དགེ་བའི་རྩ་བ་ངན་ངོན་ཙམ་ལ་ཡིད་བརྟན་པར་མི་བྱ་སྟེ། ཆོས་འདི་ཡོངས་སུ་མ་གྲུབ་ཀྱི་
བར་དུ་བརྩོན་པ་མི་གཏོང་བས་ཀྱང་ཡིད་བརྟན་པར་མི་བྱའོ། །ཤཱ་རིའི་བུ་གང་ཆོས་འདི་ལ་བསླབས་པ་དང་། ཡོངས་སུ་གྲུབ་པ་དང་། བཟོད་པ་ཐོབ་པ་དེ་ནི་ཕྱིར་ངན་སོང་དུ་འགྲོ་བར་འགྱུར་བའི་ལས་མི་བྱེད་དེ། དེ་ནི་ཕྱིར་ལེ་ལོ་དང་། འདྲི་བ་ལ་སྟེན་པར་མི་འགྱུར་ཏེ། 
དེ་ཕྱིར་ལྡོག་པའི་འཇིགས་པ་མེད་པར་འགྱུར་རོ། །དེ་ལྷོད་པར་ཡང་མི་འགྱུར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ་དེ་ནི་ཀུན་ནས་ཉོན་མོངས་པ་དང་། རྣམ་པར་བྱང་བ་ཡོངས་སུ་ཤེས་པ་ཡིན་ནོ། །དེས་ཆོས་ཐམས་ཅད་ནི་ཕྱིན་ཅི་ལོག་ལས་བྱུང་སྟེ། ཡང་དག་
པ་མ་ཡིན་པའོ་ཞེས་ཡང་དག་པ་ཇི་ལྟ་བ་བཞིན་དུ་མཐོང་བ་ཡིན་ནོ། །དེ་ལྟར་ཡང་དག་པར་མཐོང་བ་དེ་ནི་བཟོད་པ་ཕུན་སུམ་ཚོགས་པ་ཡིན་ནོ། །ངེས་པ་དང་ཚིག་ཉུང་བ་དང་། ཚུལ་ཁྲིམས་རྣམ་པར་དག་པ་ལ་གནས་པ་དང་། ཆོ་ག་དང་། སྤྱོད་ཡུལ་དང་། 
སྤྱོད་པ་དང་། སྡོམ་པ་ཕུན་སུམ་ཚོགས་པ་ཡིན་ཏེ། །གང་ཟག་སེམས་ཅན་དེ་ལྟ་བུ་ལ་ལྷ་རྣམས་ཀྱང་མོས་པར་འགྱུར་ན་མི་རྣམས་ལྟ་ཅི་སྨོས། སེམས་ཅན་དེ་ལྟ་བུ་ལ་ལྷ་རྣམས་ཀྱང་དགའ་བར་འགྱུར་ན་མི་རྣམས་ལྟ་ཅི་སྨོས། དེ་དག་གི་གན་
དུ་ལྷ་རྣམས་ཀྱང་འགྲོ་བར་གྱུར་ན་མི་རྣམས་ལྟ་ཅི་སྨོས། དེ་དག་ལ་ལྷ་རྣམས་ཀྱིས་བཀུར་སྟི་བྱ་བར་འོས་པ་ཡིན་ན་མི་རྣམས་ཀྱིས་ལྟ་ཅི་སྨོས། དེ་དག་ལ་ལྷ་རྣམས་ཀྱང་སྲུང་བར་འགྱུར་ན་མི་རྣམས་ལྟ་ཅི་སྨོས། དེ་བཞིན་དུ་ཀླུ་དང་། གནོད་
སྦྱིན་དང་། སྲིན་པོ་དང་། ནམ་མཁའ་ལྡིང་དང་། དྲི་ཟ་རྣམས་ཀྱང་དེ་ལ་སྲུང་བར་འགྱུར། དེ་དག་ལ་སྲུང་བ་དང་། སྒྲིབ་པ་དང་། སྦེད་པའི་ཕྱིར་འབད་པར་འགྱུར་རོ། །དཔེའི་ལེའུ་ཞེས་བྱ་སྟེ་བཞི་པའོ།།   །། བམ་པོ་བཞི་པ། དེ་ནས་ཚེ་
དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར་སྟོན་པ་ཡང་འདི་ན་མངོན་སུམ་དུ་གྱུར། འཁོར་འདི་ཡང་ཆོས་ཟབ་མོ་བསྟན་པའི་སྣོད་དུ་གྱུར་ཏེ། ཚེ་དང་ལྡན་པ་རབ་འབྱོར་འཁོར་འདི་ནི་དག་ཅིང་
39-1-65a


ཟབ་མོའི་ཆོས་ཐོས་པར་འདོད་ན། ཁྱོད་ཅིའི་ཕྱིར་ཤེས་རབ་ཀྱི་ཕ་རོལ་དུ་ཕྱིན་པ་ལ་བརྩམས་ཏེ་སྤོབས་པར་མི་བྱེད་པར་ཅང་མི་སྨྲ་བར་འདུག །དེ་སྐད་ཅེས་སྨྲས་པ་དང་། ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་སྨྲས་སོ། །
ཚེ་དང་ལྡན་པ་ཁོ་བོས་ནི་གང་བརྩམས་ཏེ་སྤོབས་པར་བྱ་བའི་ཆོས་དེ་ཡང་དག་པར་རྗེས་སུ་མི་མཐོང་ངོ་། །ཚེ་དང་ལྡན་པ་ཤཱ་རིའི་བུ་ཁོ་བོས་ནི་ཤེས་རབ་ཀྱི་ཕ་རོལ་དུ་ཕྱིན་པ་ཡང་དག་པར་རྗེས་སུ་མི་མཐོང་། བྱང་ཆུབ་སེམས་དཔའ་དང་། སྤོབས་པ་
དང་། གང་སྤོབས་པར་འགྱུར་བ་དང་། གང་གིས་སྤོབས་པར་འགྱུར་བ་དང་། གང་ལས་སྤོབས་པར་འགྱུར་བ་ཡང་མི་མཐོང་སྟེ། ཚེ་དང་ལྡན་པ་ཤཱ་རིའི་བུ་ཁོ་བོས་དེ་ལྟར་ཤེས་རབ་ཀྱི་ཕ་རོལ་དུ་ཕྱིན་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དང་། གང་
སྤོབས་པར་འགྱུར་བ་དང་། གང་གིས་སྤོབས་པར་འགྱུར་བ་དང་། གང་ལས་སྤོབས་པར་འགྱུར་བ་དང་། གང་གིས་སྤོབས་པར་འགྱུར་བ་མི་མཐོང་ན། ཇི་སྐད་དུ་བསྟན་པར་བྱ། ཁོ་བོས་གང་ལས་བརྩམས་ཏེ་སྤོབས་པར་བྱ། ཤཱ་རིའི་བུ་འདི་ལ་ཤེས་རབ་
ཀྱི་ཕ་རོལ་དུ་ཕྱིན་པ་འདི་ནི་ཐ་སྙད་མེད་པ། སྨྲར་མེད་པ་བརྗོད་དུ་མེད་པའོ། །ཚེ་དང་ལྡན་པ་ཤཱ་རིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་ནི་སྨྲ་བ་འམ། བསྙད་པ་འམ། བརྗོད་པར་མི་ནུས་ཏེ། གང་དེ་ལྟར་ལན་འདེབས་པ་ནི་ཤེས་རབ་ཀྱི་ཕ་རོལ་དུ་
ཕྱིན་པའོ། །ཚེ་དང་ལྡན་པ་ཤཱ་རིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་ནི་འདས་པ་དང་། མ་འོངས་པ་དང་། ད་ལྟར་བྱུང་བ་མ་ཡིན་ནོ། །ཚེ་དང་ལྡན་པ་ཤཱ་རིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་ནི་འདས་པའི་མཚན་ཉིད་དང་། མ་འོངས་པའི་
མཚན་ཉིད་དང་། ད་ལྟར་བྱུང་བའི་མཚན་ཉིད་དུ་བསྟན་པར་མི་ནུས་ཏེ། ཚེ་དང་ལྡན་པ་ཤཱ་ར་དྭ་ཏིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་ཐ་སྙད་མ་ཡིན་ཏེ། མཚན་ཉིད་མེད་པའོ། །ཚེ་དང་ལྡན་པ་ཤཱ་ར་དྭ་ཏིའི་བུ་མཚན་ཉིད་གང་གིས་
ཤེས་རབ་ཀྱི་ཕ་རོལ་དུ་ཕྱིན་པ་བསྟན་པའི་མཚན་ཉིད་དེ་ཡང་དག་པར་རྗེས་སུ་མི་མཐོང་ངོ་། །ཚེ་དང་ལྡན་པ་ཤཱ་ར་དྭ་ཏིའི་བུ་གཟུགས་ཀྱི་འདས་པའི་མཚན་ཉིད་དམ། མ་འོངས་པའི་མཚན་ཉིད་དམ། ད་ལྟར་བྱུང་བའི་མཚན་
39-1-65b


ཉིད་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་ནོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འདས་པའི་མཚན་ཉིད་དང་། མ་འོངས་པའི་མཚན་ཉིད་དང་། ད་ལྟར་བྱུང་བའི་མཚན་ཉིད་གང་ཡིན་པ་དེ་
ཤེས་རབ་ཀྱི་ཕ་རོལ་དུ་ཕྱིན་པ་མ་ཡིན་ནོ། །ཚེ་དང་ལྡན་པ་ཤཱ་ར་དྭ་ཏིའི་བུ་འདས་པ་དང་། མ་འོངས་པ་དང་། ད་ལྟར་བྱུང་བའི་གཟུགས་ཀྱི་མཚན་ཉིད་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། 
ཇི་ལྟ་བ་བཞིན་གྱི་དེ་བཞིན་ཉིད་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །འདས་པ་དང་། མ་འོངས་པ་དང་། ད་ལྟར་བྱུང་བའི་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་མཚན་ཉིད་ཀྱི་དེ་བཞིན་ཉིད་དང་། 
མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་གང་ཡིན་པ་དེ་ཤེས་རབ་ཀྱི་ཕ་རོལ་དུ་ཕྱིན་པའོ། །ཚེ་དང་ལྡན་པ་ཤཱ་ར་དྭ་ཏིའི་བུ་འདས་པ་དང་། མ་འོངས་པ་དང་། ད་ལྟར་བྱུང་བའི་
གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་མཚན་ཉིད་ཀྱི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཇི་ལྟ་བ་བཞིན་གྱི་དེ་བཞིན་ཉིད་དེ་
ནི་གདགས་པ་འམ། ཚིག་གི་ལས་ཀྱིས་བརྗོད་པར་རམ། བསྙད་པར་རམ། ལན་གདབ་པར་མི་ནུས་སོ། །ཚེ་དང་ལྡན་པ་ཤཱ་ར་དྭ་ཏིའི་བུ་གང་དེ་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ལ་འཇུག་པ་དེས། ཤེས་རབ་ཀྱི་
ཕ་རོལ་དུ་ཕྱིན་པ་རྟོགས་སོ། །ཚེ་དང་ལྡན་པ་ཤཱ་ར་དྭ་ཏིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་བསྟན་པའི་མཚན་ཉིད་དུ་ཡང་ཉེ་བར་གནས་པ་མ་ཡིན་ཏེ། གཟུགས་བསྟན་པའི་མཚན་ཉིད་དང་། ཚོར་བ་དང་། 
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་བསྟན་པའི་མཚན་ཉིད་དུ་ཉེ་བར་གནས་པ་མ་ཡིན་ནོ། །རྟེན་ཅིང་འབྲེལ་བར་འབྱུང་བ་བསྟན་པའི་མཚན་ཉིད་དུ་ཉེ་བར་གནས་པ་མ་ཡིན་ནོ། །མིང་དང་གཟུགས་
39-1-66a


ཀྱི་མཚན་ཉིད་དང་། བདག་གི་མཚན་ཉིད་དང་། སེམས་ཅན་གྱི་མཚན་ཉིད་དང་། ཆོས་ཀྱི་དབྱིངས་ཀྱི་མཚན་ཉིད་དང་། འདུ་བའི་མཚན་ཉིད་དང་། འབྲལ་བའི་མཚན་ཉིད་དང་། རྒྱུའི་མཚན་ཉིད་དང་། རྐྱེན་གྱི་
མཚན་ཉིད་དང་། སྡུག་བསྔལ་གྱི་མཚན་ཉིད་དང་། བདེ་བའི་མཚན་ཉིད་དང་། རྣམ་པར་གཞག་པའི་མཚན་ཉིད་དང་། རྣམ་པར་མི་གཞག་པའི་མཚན་ཉིད་དང་། སྐྱེ་བའི་མཚན་ཉིད་དང་། འཇིག་པའི་མཚན་ཉིད་དང་། ཀུན་
ནས་ཉོན་མོངས་པའི་མཚན་ཉིད་དང་། རྣམ་པར་བྱང་བའི་མཚན་ཉིད་དང་། རང་བཞིན་གྱི་མཚན་ཉིད་དང་། ཀུན་རྫོབ་ཀྱི་མཚན་ཉིད་དང་། དོན་དམ་པའི་མཚན་ཉིད་དང་། བདེན་པའི་མཚན་ཉིད་དང་། བརྫུན་པའི་མཚན་ཉིད་དང་། འཕོ་བའི་མཚན་ཉིད་དང་། 
འཇུག་པའི་མཚན་ཉིད་དུ་ཉེ་བར་གནས་པ་མ་ཡིན་ནོ། །དེ་ཅིའི་ཕྱིར་ཞེ་ན། ཚེ་དང་ལྡན་པ་ཤཱ་རིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་ནི་མཚན་ཉིད་ཐམས་ཅད་དང་བྲལ་བ་སྟེ། འདི་ནི་ཤེས་རབ་ཀྱི་ཕ་རོལ་དུ་ཕྱིན་པ་ཞེ་འམ། འདི་ན་ཤེས་རབ་
ཀྱི་ཕ་རོལ་དུ་ཕྱིན་པ་ཞེ་འམ། འདིས་ཤེས་རབ་ཀྱི་ཕ་རོལ་དུ་ཕྱིན་པ་ཞེ་འམ། འདིའི་ཤེས་རབ་ཀྱི་ཕ་རོལ་དུ་ཕྱིན་པ་ཞེས་དེ་སུའི་མཐོང་བར་ཡང་ཉེ་བར་མི་འགྲོའོ། །ཚེ་དང་ལྡན་པ་ཤཱ་ར་དྭ་ཏིའི་བུ་ཆོས་གང་གིས་ཤེས་རབ་ཀྱི་ཕ་རོལ་
དུ་ཕྱིན་པ་བསྟན་པའི་ཆོས་དེ་ཁོ་བོས་ཡང་དག་པར་རྗེས་སུ་མི་མཐོང་ངོ་། །ཚེ་དང་ལྡན་པ་ཤཱ་ར་དྭ་ཏིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་ངེས་པར་བསྟན་པར་ཡང་ཉེ་བར་འགྲོ་བ་འམ། ཉེ་བར་འགྲོ་བར་འགྱུར་བ་མ་ཡིན་ནོ། །
ཚེ་དང་ལྡན་པ་ཤཱ་ར་དྭ་ཏིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་ནི་གཟུགས་ངེས་པར་བསྟན་པར་ཉེ་བར་འགྲོ་བ་མ་ཡིན་ནོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ངེས་པར་བསྟན་པ་ཉེ་བར་འགྲོ་
བ་མ་ཡིན། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ངེས་པར་བསྟན་པར་ཉེ་བར་འགྲོ་བ་མ་ཡིན། ཁམས་རྣམས་ངེས་པར་བསྟན་པར་ཉེ་བར་འགྲོ་བ་མ་ཡིན། རྟེན་ཅིང་འབྲེལ་པར་འབྱུང་བ་ངེས་
39-1-66b


པར་བསྟན་པར་ཉེ་བར་འགྲོ་བ་མ་ཡིན། རིག་པ་དང་། རྣམ་པར་གྲོལ་བ་ངེས་པར་བསྟན་པར་ཉེ་བར་འགྲོ་བ་མ་ཡིན་ནོ། །ཚེ་དང་ལྡན་པ་ཤཱ་ར་དྭ་ཏིའི་བུ་གང་འཇིག་རྟེན་ལས་འདས་པའི་ཤེས་རབ་ངེས་པར་འབྱེད་པར་འགྲོ་བ་ཡང་། ཤེས་
རབ་ཀྱི་ཕ་རོལ་དུ་ཕྱིན་པ་ངེས་པར་བསྟན་པར་ཉེ་བར་མི་འགྲོའོ། །ཤཱ་རིའི་བུ་འདི་ལྟ་སྟེ། ཆོས་གང་ངེས་པར་བསྟན་པར་ཡང་ཉེ་བར་མི་འགྲོ་བའི་ཆོས་དེ་ཇི་ལྟར་བརྗོད་ཅིང་ངེས་པར་བསྟན་པར་འགྱུར། ཚེ་དང་ལྡན་པ་ཤཱ་ར་དྭ་ཏིའི་བུ་གང་
དག་ཆོས་རྣམས་ཀྱི་ཚུལ་དེ་ལྟར་རབ་ཏུ་ཤེས་པ་དེ་དག་གིས་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་རབ་ཏུ་ཤེས་སོ། །ཚེ་དང་ལྡན་པ་ཤཱ་ར་དྭ་ཏིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་བསྟན་པ་དང་ངེས་པར་བསྟན་པར་ཡང་ཉེ་
བར་གནས་པ་མ་ཡིན་ནོ། །ཚེ་དང་ལྡན་པ་ཤཱ་ར་དྭ་ཏིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་ནི་གཟུགས་བསྟན་པ་དང་། ངེས་པར་བསྟན་པར་ཉེ་བར་གནས་པ་མ་ཡིན་ནོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། 
རྣམ་པར་ཤེས་པ་བསྟན་པ་དང་། ངེས་པར་བསྟན་པར་ཉེ་བར་གནས་པ་མ་ཡིན། མིང་དང་གཟུགས་བསྟན་པ་དང་། ངེས་པར་བསྟན་པར་ཉེ་བར་གནས་པ་མ་ཡིན། ཀུན་ནས་ཉོན་མོངས་པ་དང་། རྣམ་པར་བྱང་བ་བསྟན་
པ་དང་། ངེས་པར་བསྟན་པར་ཉེ་བར་གནས་པ་མ་ཡིན། རྟེན་ཅིང་འབྲེལ་བར་འབྱུང་བ་བསྟན་པ་དང་། ངེས་པར་བསྟན་པར་ཉེ་བར་གནས་པ་མ་ཡིན། ཕྱིན་ཅི་ལོག་རྣམས་བསྟན་པ་དང་། ངེས་པར་བསྟན་པར་ཉེ་བར་
གནས་པ་མ་ཡིན། སེམས་ཅན་གྱི་ཁམས་དང་། བདག་གི་ཁམས་བསྟན་པ་དང་། ངེས་པར་བསྟན་པར་ཉེ་བར་གནས་པ་མ་ཡིན། སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་
བསྟན་པ་དང་། ངེས་པར་བསྟན་པར་ཉེ་བར་གནས་པ་མ་ཡིན། འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་བསྟན་པ་དང་ངེས་པར་བསྟན་པར་ཉེ་བར་གནས་པ་མ་ཡིན། ཚུལ་ཁྲིམས་དང་། འཆལ་
39-1-67a


བའི་ཚུལ་ཁྲིམས་བསྟན་པ་དང་། ངེས་པར་བསྟན་པར་ཉེ་བར་གནས་པ་མ་ཡིན། བཟོད་པ་དང་། གནོད་སེམས་དང་། བརྩོན་འགྲུས་དང་། ལེ་ལོ་དང་། བསམ་གཏན་དང་། །རྣམ་པར་གཡེང་བ་དང་། ཤེས་རབ་དང་། 
འཆལ་པའི་ཤེས་རབ་བསྟན་པ་དང་། ངེས་པར་བསྟན་པར་ཉེ་བར་གནས་པ་མ་ཡིན། དྲན་པ་ཉེ་བར་གཞག་པ་དང་། ཡང་དག་པའི་སྤོང་བ་དང་། རྫུ་འཕྲུལ་གྱི་རྐང་པ་དང་། ཚད་མེད་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་
དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། མངོན་པར་ཤེས་པ་བསྟན་པ་དང་། ངེས་པར་བསྟན་པར་ཉེ་བར་གནས་པ་མ་ཡིན་ནོ། །བདེན་པ་དང་། ལམ་དང་། འབྲས་བུ་བསྟན་པ་
དང་། ངེས་པར་བསྟན་པར་ཉེ་བར་གནས་པ་མ་ཡིན། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའི་བསྟན་པ་དང་། ངེས་པར་བསྟན་པར་ཉེ་བར་གནས་པ་མ་ཡིན། ཉན་ཐོས་དང་། རང་སངས་རྒྱས་ཀྱི་ཆོས་དང་། 
བྱང་ཆུབ་སེམས་དཔའི་ཆོས་བསྟན་པ་དང་། ངེས་པར་བསྟན་པར་ཉེ་བར་གནས་པ་མ་ཡིན། ཆོས་གང་ཤེས་པ་དང་། མི་ཤེས་པ་དང་། བསྟན་པ་དང་། བསྟན་དུ་མེད་པར་ཉེ་བར་གནས་པ་མ་ཡིན། མི་སྐྱེ་བ་ཤེས་པ་དང་། ཟད་པ་ཤེས་
པ་དང་། འགོག་པ་ཤེས་པ་བསྟན་པ་འམ། བསྟན་པ་མ་ཡིན་པར་གནས་པ་མ་ཡིན། མྱ་ངན་ལས་འདས་པ་བསྟན་པ་འམ། བསྟན་པ་མ་ཡིན་པར་ཉེ་བར་གནས་པ་མ་ཡིན་ནོ། །ཚེ་དང་ལྡན་པ་ཤཱ་ར་དྭ་ཏིའི་བུ་འདི་ལྟ་སྟེ། ཆོས་
གང་བསྟན་པ་འམ། བསྟན་པ་མ་ཡིན་པར་ཡང་ཉེ་བར་གནས་པ་མ་ཡིན་པ་དེའི་ཐ་སྙད་ཇི་ལྟར་བསྟན་པར་བྱ། ཚེ་དང་ལྡན་པ་ཤཱ་ར་དྭ་ཏིའི་བུ་སུ་ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་བསྟན་པ་འམ། བསྟན་པ་མ་ཡིན་པར་ཡང་
ཉེ་བར་གནས་པ་མ་ཡིན་པར་བསྟན་པ་འདི་ལྟ་བུ་ཁོང་དུ་ཆུད་པ་དེས་ཤེས་རབ་ཀྱི་ཕ་རོལ་དུ་ཕྱིན་པ་ཡང་ཤེས་ཤིང་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་ཡང་ཤེས་སོ། །ཚེ་དང་ལྡན་པ་ཤཱ་ར་དྭ་ཏིའི་བུ་ཤེས་རབ་ཀྱི་ཕ་རོལ་དུ་ཕྱིན་
39-1-67b


པ་ནི་ཆོས་གང་ལ་ཡང་སྦྱོར་བ་འམ། མི་སྦྱོར་བའི་ཕྱིར་ཉེ་བར་གནས་པ་མ་ཡིན་ནོ། །དེ་ཅིའི་ཕྱིར་ཞེ་ན། ཚེ་དང་ལྡན་པ་ཤཱ་ར་དྭ་ཏིའི་བུ་ཤེས་རབ་ཀྱི་ཕ་རོལ་དུ་ཕྱིན་པ་ནི་གཟུགས་ལ་ཀུན་དུ་སྦྱོར་བར་ཡང་མི་བྱེད། །ཀུན་དུ་མི་སྦྱོར་བར་ཡང་མི་བྱེད་དོ། །
དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཀུན་དུ་སྦྱོར་བར་ཡང་མི་བྱེད། ཀུན་དུ་མི་སྦྱོར་བར་ཡང་མི་བྱེད་དོ། །རྟེན་ཅིང་འབྲེལ་བར་འབྱུང་བ་ལ་ཀུན་དུ་སྦྱོར་བར་ཡང་མི་བྱེད། ཀུན་དུ་མི་སྦྱོར་བར་ཡང་མི་བྱེད་དོ། །འདོད་
པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ལ་ཀུན་དུ་སྦྱོར་བར་ཡང་མི་བྱེད། ཀུན་དུ་མི་སྦྱོར་བར་ཡང་མི་བྱེད་དོ། །སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་ལ་ཀུན་དུ་སྦྱོར་བར་ཡང་མི་བྱེད། ཀུན་དུ་མི་
སྦྱོར་བར་ཡང་མི་བྱེད་དོ། །སེམས་ཅན་གྱི་ཁམས་དང་། བདག་གི་ཁམས་དང་། ཆོས་ཀྱི་དབྱིངས་དང་། ནམ་མཁའི་ཁམས་ལ་ཀུན་དུ་སྦྱོར་བར་ཡང་མི་བྱེད། ཀུན་དུ་མི་སྦྱོར་བར་ཡང་མི་བྱེད་དོ། །ཚུལ་ཁྲིམས་དང་། འཆལ་པའི་
ཚུལ་ཁྲིམས་དང་། བཟོད་པ་དང་། གནོད་སེམས་དང་། བརྩོན་འགྲུས་དང་། ལེ་ལོ་དང་། བསམ་གཏན་དང་། རྣམ་པར་གཡེང་བ་དང་། ཤེས་རབ་དང་། འཆལ་བའི་ཤེས་རབ་ལ་ཀུན་དུ་སྦྱོར་བར་ཡང་མི་བྱེད། ཀུན་དུ་མི་སྦྱོར་བར་
ཡང་མི་བྱེད་དོ། །དྲན་པ་ཉེ་བར་གཞག་པ་རྣམས་དང་། ཡང་དག་པར་སྤོང་བ་རྣམས་དང་། རྫུ་འཕྲུལ་གྱི་རྐང་པ་རྣམས་དང་། ཚད་མེད་པ་རྣམས་དང་། དབང་པོ་རྣམས་དང་། སྟོབས་རྣམས་དང་། བྱང་ཆུབ་ཀྱི་ཡན་ལག་
རྣམས་དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ལ་ཀུན་དུ་སྦྱོར་བར་ཡང་མི་བྱེད། ཀུན་དུ་མི་སྦྱོར་བར་ཡང་མི་བྱེད་དོ། །ལམ་དང་ལམ་གྱི་འབྲས་བུ་དང་། སྡུག་བསྔལ་དང་། ཀུན་འབྱུང་
བ་དང་། འགོག་པ་ལ་ཀུན་དུ་སྦྱོར་བར་ཡང་མི་བྱེད། །ཀུན་དུ་མི་སྦྱོར་བར་ཡང་མི་བྱེད་དོ། །ཉན་ཐོས་ཀྱི་ས་དང་། རང་སངས་རྒྱས་ཀྱི་ས་དང་། བྱང་ཆུབ་སེམས་དཔའི་ས་ལ་ཀུན་དུ་སྦྱོར་བར་ཡང་མི་བྱེད། ཀུན་དུ་མི་སྦྱོར་བར་ཡང་མི་བྱེད་དོ། །
39-1-68a


ཉན་ཐོས་ཀྱི་ཆོས་དང་། རང་སངས་རྒྱས་ཀྱི་ཆོས་དང་། བྱང་ཆུབ་སེམས་དཔའི་ཆོས་ལ་ཀུན་དུ་སྦྱོར་བར་ཡང་མི་བྱེད། ཀུན་དུ་མི་སྦྱོར་བར་ཡང་མི་བྱེད་དོ། །འདས་པ་དང་། མ་འོངས་པ་དང་། ད་ལྟར་བྱུང་བ་ཤེས་པ་དང་། དུས་
གསུམ་མཉམ་པ་ཉིད་ལ་ཀུན་དུ་སྦྱོར་བར་ཡང་མི་བྱེད། ཀུན་དུ་མི་སྦྱོར་བར་ཡང་མི་བྱེད་དོ། །ཐོགས་པ་མེད་པ་དང་། མི་སྐྱེ་བ་ཤེས་པ་དང་། ཟད་པ་ཤེས་པ་དང་། མྱ་ངན་ལས་འདས་པ་ལ་ཀུན་དུ་སྦྱོར་བར་ཡང་མི་བྱེད་དོ། །ཀུན་དུ་མི་སྦྱོར་བར་
ཡང་མི་བྱེད་དོ། །ཚེ་དང་ལྡན་པ་ཤཱ་ར་དྭ་ཏིའི་བུ་འདི་ལྟ་སྟེ། ཆོས་གང་ལ་ཡང་ཀུན་དུ་སྦྱོར་བ་འམ། ཀུན་དུ་སྦྱོར་བ་མ་ཡིན་པར་གནས་པ་མ་ཡིན་པ་དེ་ཇི་ལྟར་བསྟན་པར་བྱ། ཚེ་དང་ལྡན་པ་ཤཱ་ར་དྭ་ཏིའི་བུ་ཁོ་བོས་ཆོས་གང་སྤོབས་པར་
འགྱུར་བ་དང་། གང་གིས་ཁོ་བོ་སྤོབས་པར་འགྱུར་བ་དང་། གང་ལ་ཁོ་བོ་སྤོབས་པར་འགྱུར་བ་དང་། གང་ལ་ཁོ་བོས་བརྩམ་པར་སྤོབས་པར་འགྱུར་བའི་ཆོས་དེ་ཡང་དག་པར་རྗེས་སུ་མི་མཐོང་སྟེ། ཁོ་བོས་དབང་དེ་མཐོང་བས་ཁོ་
བོས་དེ་སྐད་སྨྲས་སོ། །རབ་འབྱོར་གྱི་ལེའུ་ཞེས་བྱ་སྟེ་ལྔ་པའོ།།             །། དེ་ནས་བཅོམ་ལྡན་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཀྱི་རྩལ་གྱིས་རྣམ་པར་གནོན་པ་ལ་འདི་སྐད་ཅེས་བཀའ་སྩལ་ཏོ། །རབ་ཀྱི་རྩལ་གྱིས་
རྣམ་པར་གནོན་པ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་ནི་ཆོས་གང་ལ་ཡང་མི་སྤྱོད་དོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་ཆོས་ཐམས་ཅད་ནི་ཕྱིན་ཅི་ལོག་
ལས་བྱུང་བ། བདེན་པ་མ་ཡིན་པ། མེད་པ་ལོག་པ་ཡང་དག་པ་མ་ཡིན་པ་སྟེ། རབ་ཀྱི་རྩལ་གྱིས་རྣམ་པར་གནོན་པ། དེའི་ཕྱིར་གང་ཆོས་འགའ་ཞིག་ལ་སྤྱོད་ན་དེ་ནི་ཕྱིན་ཅི་ལོག་ལ་སྤྱོད་པའོ། །དེ་ནི་ཡང་དག་པ་མ་ཡིན་པ་
ལ་སྤྱོད་པའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་ནི་ཕྱིན་ཅི་ལོག་སྤྱོད་པས་རབ་ཏུ་ཕྱེ་བ་འམ། ཡང་དག་པ་མ་ཡིན་པ་སྤྱོད་པས་རབ་ཏུ་ཕྱེ་བ་མ་ཡིན་ནོ། །བྱང་ཆུབ་སེམས་དཔའ་ཕྱིན་ཅི་ལོག་གམ། ཡང་
39-1-68b


དག་པ་མ་ཡིན་པ་ལ་སྤྱོད་པ་དེ་ནི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །གང་ཕྱིན་ཅི་ལོག་དང་། ཡང་དག་པ་མ་ཡིན་པ་དེ་ལ་སྤྱོད་པ་གང་ཡང་མེད་པས་དེའི་ཕྱིར་བྱང་ཆུབ་སེམས་དཔའ་དེ་ལ་མི་སྤྱོད་དོ། །རབ་ཀྱི་རྩལ་གྱིས་
རྣམ་པར་གནོན་པ་ཕྱིན་ཅི་ལོག་ཅེས་བྱ་བ་འདི་ནི་ལོག་པར་བྱིས་པ་སོ་སོའི་སྐྱེ་བོ་རྣམས་ཀྱིས་བཟུང་བ་སྟེ། ཆོས་དེ་ནི་ཇི་ལྟ་བ་བཞིན་དུ་མ་ཡིན། གང་དག་ཇི་ལྟར་བཟུང་བ་དེ་བཞིན་དུ་མ་ཡིན་པ་དེ་ནི་ཕྱིན་ཅི་ལོག་དང་། ཡང་དག་པ་མ་
ཡིན་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་ནི་ཕྱིན་ཅི་ལོག་དང་། ཡང་དག་པ་མ་ཡིན་པ་ལ་མི་སྤྱོད་དོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་ནི་ཡང་དག་པ་སྨྲ་བ་སྟེ། ཕྱིན་ཅི་
ལོག་མ་ཡིན་པ་སྤྱོད་པའོ། །གང་དུ་ཡང་དག་པ་ལ་ཕྱིན་ཅི་ལོག་པ་དེ་ལ་སྤྱོད་པ་གང་ཡང་མེད་དེ། དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་སྤྱོད་པ་ཐམས་ཅད་ཡང་དག་པར་
ཆད་པ་ནི་བྱང་ཆུབ་སེམས་དཔའི་སྤྱོད་པ་སྟེ། འདི་ནི་བྱང་ཆུབ་སེམས་དཔའི་སྤྱོད་པའོ། །འདིས་བྱང་ཆུབ་སེམས་དཔའི་སྤྱོད་པའོ། །འདི་ནི་བྱང་ཆུབ་སེམས་དཔའི་སྤྱོད་པའོ། །འདི་ལས་བྱང་ཆུབ་སེམས་དཔའི་སྤྱོད་པའོ་ཞེས་བྱང་ཆུབ་
སེམས་དཔའི་སྤྱོད་པ་དེ་ཀུན་དུ་བསྟན་པར་མི་ནུས་ཏེ། བྱང་ཆུབ་སེམས་དཔའི་སྤྱོད་པ་ནི་དེ་ལྟ་བུས་རབ་ཏུ་ཕྱེ་བ་མ་ཡིན་ནོ། །བྱང་ཆུབ་སེམས་དཔའ་དག་ནི་སོ་སོའི་སྐྱེ་བོའི་སྤྱོད་པ་བཟློག་པའོ། །ཉན་ཐོས་ཀྱི་སྤྱོད་པ་བཟློག་པ་དང་། 
རང་སངས་རྒྱས་ཀྱི་སྤྱོད་པ་བཟློག་པ་དང་། སྤྱོད་པ་ཐམས་ཅད་བཟློག་པའི་ཕྱིར་བྱང་ཆུབ་སེམས་དཔའི་སྤྱད་པ་ལ་སྤྱོད་དོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་འདི་དག་ནི་སངས་རྒྱས་ཀྱི་ཆོས་དེ་དག་གོ། །
འདིས་སངས་རྒྱས་ཀྱི་ཆོས་དེ་དག་གོ། །འདི་ནི་སངས་རྒྱས་ཀྱི་ཆོས་དེ་དག་གོ། །འདིའི་སངས་རྒྱས་ཀྱི་ཆོས་དེ་དག་གོ་ཞེས་སངས་རྒྱས་ཀྱི་ཆོས་གང་ཡིན་པ་དེ་དག་ལ་ཡང་མི་སྤྱོད་ཅིང་མངོན་པར་ཞེན་པ་མེད་དེ། རབ་ཀྱི་རྩལ་གྱིས་
39-1-69a


རྣམ་པར་གནོན་པ་བྱང་ཆུབ་སེམས་དཔའ་ནི་དེ་ལྟར་མི་སྤྱོད་དོ། །རབ་ཀྱི་རྩལ་གྱིས་རྣམ་པར་གནོན་པ་དེ་དག་ཐམས་ཅད་ནི་རྣམ་པར་རྟོག་པ་ལ་སྤྱོད་པའོ། །བྱང་ཆུབ་སེམས་དཔའ་སྤྱོད་པ་ནི་རྟོག་པ་ཐམས་ཅད་སྤངས་
པ་ཡིན་པས་བྱང་ཆུབ་སེམས་དཔའ་ནི་རྣམ་པར་རྟོག་པ་དང་། མི་རྟོག་པ་ལ་མི་སྤྱོད་དོ། །རབ་ཀྱི་རྩལ་གྱིས་རྣམ་པར་གནོན་པ་རྟོག་པ་ཞེས་བྱ་བ་དེ་ནི་ཆོས་རྣམས་ལ་རྣམ་པར་རྟོག་པའོ། །ཆོས་ཐམས་ཅད་ནི་རྣམ་པར་མི་རྟོག་པ་ཡིན་
པས། ཆོས་ཐམས་ཅད་ལ་བརྟག་པར་མི་ནུས་སོ། །དེའི་ཕྱིར་གང་ཆོས་ལ་རྟོག་པ་དེ་ལོག་པར་རྟོག་པའོ། །རབ་ཀྱི་རྩལ་གྱིས་རྣམ་པར་གནོན་པ་ཆོས་ནི་རྟོག་པ་འམ། མི་རྟོག་པ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་རྟོག་པ་
ཞེས་བྱ་བ་དེ་ནི་མཐའ་གཅིག་གོ། །མི་རྟོག་པ་ཞེས་བྱ་བ་དེ་ནི་མཐའ་གཉིས་ཏེ། རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་ནི་མཐའ་དང་མཐའ་མེད་པ་ལ་མི་སྤྱོད་དོ། །གང་མཐའ་དང་མཐའ་མེད་པ་ལ་མི་སྤྱོད་པ་
དེས་ནི་དབུས་ཡང་དག་པར་རྗེས་སུ་མི་མཐོང་ངོ་། །རབ་ཀྱི་རྩལ་གྱིས་རྣམ་པར་གནོན་པ་དབུས་ཡང་དག་པར་རྗེས་སུ་མཐོང་ཞིང་དབུས་ལ་སྤྱོད་ན་ནི་མཐའ་ཉིད་ལ་སྤྱོད་དོ། །རབ་ཀྱི་རྩལ་གྱིས་རྣམ་པར་གནོན་པ་དབུས་ལ་ནི་སྤྱོད་པ་
བསྟན་པ་འམ། ངེས་པར་བསྟན་པ་གང་ཡང་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་དབུས་ཤེས་བྱ་བ་དེ་ནི་འཕགས་པའི་ལམ་ཡན་ལག་བརྒྱད་པའི་ཚིག་བླ་དགས་སོ། །རབ་ཀྱི་རྩལ་གྱིས་རྣམ་པར་གནོན་པ་
འཕགས་པའི་ལམ་ཡན་ལག་བརྒྱད་པ་ནི་ཆོས་གང་དམིགས་པ་དང་། ཆོས་གང་མཐོང་བའི་ཕྱིར་ཉེ་བར་གནས་པ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་ནམ་ཆོས་གང་ལ་ཡང་སྒོམ་པར་ཡང་མི་བྱེད། མི་
སྒོམ་པར་ཡང་མི་བྱེད་པ་དེའི་ཚེ་ལམ་གྱི་རྒྱུན་གཅད་ཅེས་བྱའོ། །དེ་ཆོས་ཐམས་ཅད་ལ་བསྒོམ་པར་ཡང་མི་བྱེད། མི་སྒོམ་པར་ཡང་མི་བྱེད་པས་སྒོམ་པ་ལས་ཡང་དག་པར་འདས་ནས་ཆོས་མཉམ་པ་ཉིད་རྙེད་དེ། ཆོས་
39-1-69b


མཉམ་པ་ཉིད་དེས་ལམ་གྱི་འདུ་ཤེས་ཀྱང་མི་འབྱུང་ན། ལམ་མཐོང་བར་ལྟ་ག་ལ་འགྱུར། རབ་ཀྱི་རྩལ་གྱིས་རྣམ་པར་གནོན་པ་ལམ་གྱི་རྒྱུན་གཅད་ཅེས་བྱ་བ་དེ་ནི་དགེ་སློང་ཟག་པ་ཟད་པ། དགྲ་བཅོམ་པའི་ཚིག་བླ་དགས་སོ། །
དེ་ཅིའི་ཕྱིར་ཞེ་ན། དེས་བསྒོམས་པ་ཡང་མེད་ཅིང་བསྒོམས་པ་མེད་པ་ཡང་མ་ཡིན་པར་ལམ་བསྒོམས་པ་མེད་པས་དེའི་ཕྱིར་བསྒོམས་པ་མེད་ཅེས་བྱའོ། །བསྒོམ་པ་མེད་པ་ཡང་དེ་ལ་མེད་པས་དེའི་ཕྱིར་སྒོམ་པ་མེད་ཅེས་བྱའོ། །དེ་
སྒོམ་པ་དང་བྲལ་བས་དེའི་ཕྱིར་བསྒོམ་པ་མེད་ཅེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་གལ་ཏེ་སྒོམ་པ་འམ། བསྒོམ་པར་བྱེད་པ་ཞིག་ཡོད་ན་ནི་དེ་དམིགས་པར་འགྱུར་ཏེ། དེ་སྒོམ་པ་མེད་པར་མི་འགྱུར་རོ། །རབ་
ཀྱི་རྩལ་གྱིས་རྣམ་པར་གནོན་པ་བསྒོམ་པ་མེད་པ་ཞེས་བྱ་བ་ནི་དེ་བསྒོམ་པ་དང་བྲལ་བས་བསྒོམ་པ་མེད་པ་སྟེ། འདི་དངོས་པོ་དང་བྲལ་བས་དེའི་ཕྱིར་བསྒོམ་པ་མེད་པ་ཞེས་བྱ་སྟེ། ཇི་སྐད་དུ་བརྗོད་པ་བཞིན་དུ་ནི་མ་ཡིན་ནོ། །
དེ་ཅིའི་ཕྱིར་ཞེ་ན། བསྒོམ་པ་མེད་པ་ནི་བརྗོད་དུ་མེད་པའོ། །བསྒོམ་པ་མེད་པ་འདི་ནི་བྲལ་བའོ། །བྲལ་བ་གང་ཞེ་ན། གང་ཕྱིན་ཅི་ལོག་ཀུན་ནས་མི་ལྡང་བ་དང་། གང་ཡང་དག་པ་མ་ཡིན་པ་ཀུན་ནས་མི་ལྡང་བའོ། །རབ་
ཀྱི་རྩལ་གྱིས་རྣམ་པར་གནོན་པ་ཕྱིན་ཅི་ལོག་གིས་ཕྱིན་ཅི་ལོག་ཀུན་ནས་མི་སློང་སྟེ། ཕྱིན་ཅི་ལོག་ནི་ཀུན་ནས་ལངས་པ་ཉིད་མ་ཡིན་ནོ། །དེ་ལ་ཀུན་ནས་སློང་བ་ཅི་ཡང་མེད་དོ། །གལ་ཏེ་དེ་ལ་སློང་བ་འགའ་ཞིག་ཡོད་ན་ནི་
དེར་ཡང་བརྗོད་ན་འདི་ལྟར་ཡང་དག་པ་མ་ཡིན་པ་ལས་བྱུང་བས་དེའི་ཕྱིར་ཕྱིན་ཅི་ལོག་ཅེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔས་ནི་ཆོས་ཐམས་ཅད་ཕྱིན་ཅི་ལོག་མེད་པར་ཁོང་དུ་ཆུད་དོ། །དེ་ཅིའི་
ཕྱིར་ཞེ་ན། དེས་ཕྱིན་ཅི་ལོག་ནི་ཡང་དག་པ་མ་ཡིན་པར་ཤེས་པའི་ཕྱིར་རོ། །ཕྱིན་ཅི་ལོག་ལ་ནི་ཕྱིན་ཅི་ལོག་པ་དང་། གང་གིས་ཕྱིན་ཅི་ལོག་ཡང་དག་པ་མ་ཡིན་པ་དང་། ཕྱིན་ཅི་ལོག་ལ་ཕྱིན་ཅི་ལོག་མེད་པར་ཤེས་པ་དེས་ཆོས་
39-1-70a


ཐམས་ཅད་ཕྱིན་ཅི་ལོག་མ་ཡིན་པར་ཁོང་དུ་ཆུད་དོ། །གང་ཕྱིན་ཅི་ལོག་མེད་པར་ཁོང་དུ་ཆུད་པ་དེ་ལ་ཕྱིན་ཅི་ལོག་གང་ཡང་མི་འབྱུང་ངོ་། །གང་ལ་ཕྱིན་ཅི་ལོག་མེད་པ་དེ་ལ་སྤྱོད་པ་གང་ཡང་མེད་དོ། །རབ་ཀྱི་རྩལ་གྱིས་
རྣམ་པར་གནོན་པ་སྤྱོད་པ་ཐམས་ཅད་ནི་སྤྱོད་པ་ལས་བྱུང་བ་དང་། སྤྱོད་པ་ལ་རྣམ་པར་རྟོག་པས་ཕྱིན་ཅི་ལོག་གོ། །བྱང་ཆུབ་སེམས་དཔའ་ནི་སྤྱོད་པ་ལ་རྣམ་པར་མི་རྟོག་སྟེ། དེའི་ཕྱིར་དེ་ཕྱིན་ཅི་ལོག་མེད་པར་གནས་པ་ཞེས་བྱའོ། །གང་
ཕྱིན་ཅི་ལོག་མེད་པ་དེ་ནི་ཕྱིར་གང་ལ་ཡང་མི་སྤྱོད་དེ། དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་སྤྱོད་པ་མེད་པ་ཞེས་བྱ་བ་དེ་ཆོས་གང་ལ་ཡང་མི་སྤྱོད་རྣམ་པར་མི་སྤྱོད་ཅིང་སྤྱོད་
པའི་མཚན་ཉིད་མི་སྟོན་པའོ། །དེ་ནི་བྱང་ཆུབ་སེམས་དཔའི་སྤྱོད་པ་ཞེས་བྱ་སྟེ། གང་འདི་ལྟ་བུར་སྤྱོད་པ་དེ་ནི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་གཟུགས་ཀྱི་
དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །
དེ་ཅིའི་ཕྱིར་ཞེ་ན། དེས་དམིགས་པ་ཐམས་ཅད་རབ་ཏུ་དབེན་པར་ཤེས་པའི་ཕྱིར་རོ། །དབེན་པ་གང་ཡིན་པ་དེ་ལ་སྤྱོད་པ་གང་ཡང་མེད་དེ། དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་
རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་མིག་གི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་
ཕྱིན་པ་ལ་སྤྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དེས་དམིགས་པ་ཐམས་ཅད་ཡང་དག་པ་མ་ཡིན་པར་ཤེས་པའི་ཕྱིར་རོ། །གང་དམིགས་པ་ཐམས་ཅད་ཡང་དག་པ་མ་ཡིན་པར་ཤེས་པ་དེ་ནི་གང་ལ་ཡང་མི་སྤྱོད་དེ། དེའི་ཕྱིར་སྤྱོད་པ་མེད་པ་ནི་བྱང་ཆུབ་
39-1-70b


སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་གཟུགས་དང་། སྒྲ་དང་། དྲི་དང་། རོ་དང་རེག་བྱ་དང་། ཆོས་ཀྱི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །དེ་ཅིའི་ཕྱིར་ཞེ་
ན། དེས་དམིགས་པ་ཐམས་ཅད་ཕྱིན་ཅི་ལོག་ལས་བྱུང་བར་ཤེས་ཤིང་གང་ཕྱིན་ཅི་ལོག་པ་དེ་ཡང་དག་པ་མ་ཡིན་པར་ཡོངས་སུ་ཤེས་པའི་ཕྱིར་རོ། །གང་གིས་ཕྱིན་ཅི་ལོག་ཡང་དག་པ་མ་ཡིན་པར་ཡོངས་སུ་ཤེས་པ་དེ་ནི་དམིགས་པ་གང་ལ་ཡང་
མི་སྤྱོད་དེ། དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་མིང་དང་གཟུགས་ཀྱི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་
ནོ། །དེ་ཅིའི་ཕྱིར་ཞེ་ན། དེས་དམིགས་པ་ཐམས་ཅད་དམིགས་པ་མེད་པར་མཐོང་བའི་ཕྱིར་རོ། །གང་གིས་དམིགས་པ་ཐམས་ཅད་དམིགས་པ་མེད་པར་ཁོང་དུ་ཆུད་པ་དེ་ནི་དམིགས་པ་གང་ལ་ཡང་མི་སྤྱོད་དེ། དེའི་ཕྱིར་སྤྱོད་པ་
མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་སེམས་དཔའ་ཆེན་པོ་དག་སེམས་ཅན་དང་། བདག་གི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་
སྤྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གིས་སེམས་ཅན་དུ་འདུ་ཤེས་པ་དང་། བདག་ཏུ་འདུ་ཤེས་པ་དེ་ཡང་དག་པ་མ་ཡིན་པར་ཤེས་པའི་ཕྱིར་རོ། །གང་གིས་སེམས་ཅན་དུ་འདུ་ཤེས་པ་དང་། བདག་ཏུ་འདུ་ཤེས་པ་ཡང་དག་པ་མ་ཡིན་
པར་ཤེས་པ་དེ་སྤྱོད་པ་གང་ལ་ཡང་མི་སྤྱོད་དོ། །གང་སྤྱད་པ་གང་ལ་ཡང་མི་སྤྱོད་པ་དེ་སྤྱོད་པ་མེད་པ་སྟེ། དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་
དཔའ་སྲོག་ཏུ་འདུ་ཤེས་པ་དང་། གསོ་བ་དང་། སྐྱེས་བུ་དང་། གང་ཟག་དང་། ཤེད་ལས་སྐྱེས་དང་། ཤེད་བུ་དང་། སློང་བ་པོ་དང་། ཀུན་ནས་སློང་བ་པོ་དང་། བྱེད་དུ་འཇུག་པ་དང་ཚོར་བ་པོ་དང་། ཚོར་བར་བྱེད་པར་འདུ་ཤེས་པ་དང་། ཤེས་པར་བྱེད་པ་དང་། ཤེས་
39-1-71a


པ་པོར་འདུ་ཤེས་པ་ལ་སྤྱོད་ན་རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གི་འདུ་ཤེས་ཐམས་ཅད་རྣམ་པར་བཤིག་པའི་ཕྱིར་རོ། །གང་གིས་འདུ་ཤེས་ཐམས་
ཅད་རྣམ་པར་བཤིག་པ་དེ་དག་ཕྱིར་འདུ་ཤེས་གང་ལ་ཡང་མི་སྤྱོད་དེ། དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་ཕྱིན་ཅི་ལོག་དང་། ལྟ་བར་གྱུར་པ་དང་། 
སྒྲིབ་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །ཕྱིན་ཅི་ལོག་དང་། ལྟ་བར་གྱུར་པ་དང་། སྒྲིབ་པ་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གིས་ཕྱིན་ཅི་ལོག་
དང་། ལྟ་བར་གྱུར་པ་དང་། སྒྲིབ་པའི་དམིགས་པ་ཡོངས་སུ་ཤེས་པའི་ཕྱིར་རོ། །གང་ཡོངས་སུ་ཤེས་པ་དེ་སྤྱོད་པ་མེད་དེ། དེའི་ཕྱིར་སྤྱོད་པ་མེད་པ་ནི། བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ། བྱང་
ཆུབ་སེམས་དཔའ་རྟེན་ཅིང་འབྲེལ་པར་འབྱུང་བའི་དམིགས་པ་ལ་སྤྱོད་པ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གིས་རྟེན་ཅིང་འབྲེལ་བར་འབྱུང་བ་ཡང་ཤེས་ཤིང་རྟེན་ཅིང་འབྲེལ་བར་འབྱུང་བའི་
དམིགས་པ་ཡང་ཤེས་པའི་ཕྱིར་རོ། །གང་རྟེན་ཅིང་འབྲེལ་པར་འབྱུང་བའི་དམིགས་པ་ཤེས་པ་དེ་ལ་སྤྱོད་པ་གང་ཡང་མེད་དོ། །དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་
གནོན་པ་བྱང་ཆུབ་སེམས་དཔའ་དག་འདོད་པའི་ཁམས་ཀྱི་དམིགས་པ་ལ་སྤྱོད་ན། ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །གཟུགས་དང་། གཟུགས་མེད་པའི་ཁམས་ཀྱི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་
དུ་ཕྱིན་པ་ལ་སྦྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གིས་འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ཀྱི་དམིགས་པ་རྣམ་པར་བཤིག་པའི་ཕྱིར་རོ། །གང་འདོད་པའི་ཁམས་དང་། གཟུགས་ཀྱི་
39-1-71b


ཁམས་དང་། གཟུགས་མེད་པའི་ཁམས་ཀྱི་དམིགས་པ་རྣམ་པར་འཇིག་པ་དེ་ལ་སྤྱོད་པ་གང་ཡང་མེད་དེ། དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་
དག་ཚུལ་ཁྲིམས་དང་། འཆལ་པའི་ཚུལ་ཁྲིམས་ཀྱི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གིས་ཚུལ་ཁྲིམས་དང་། འཆལ་པའི་ཚུལ་ཁྲིམས་ཀྱི་དམིགས་པ་ཡོངས་སུ་ཤེས་པའི་
ཕྱིར་རོ། །གང་ཚུལ་ཁྲིམས་དང་། འཆལ་པའི་ཚུལ་ཁྲིམས་ཀྱི་དམིགས་པ་ཤེས་པ་དེ་ལ་སྤྱོད་པ་གང་ཡང་མེད་དེ། དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་
སེམས་དཔའ་དག་བཟོད་པ་དང་། གནོད་སེམས་དང་། བརྩོན་འགྲུས་དང་། ལེ་ལོ་དང་། བསམ་གཏན་དང་། རྣམ་པར་གཡེང་བ་དང་། ཤེས་རབ་དང་། འཆལ་པའི་ཤེས་རབ་ཀྱི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་
ཡིན་ནོ། །དེ་ཅིའི་ཕྱིར་ཞེ་ན། དེ་དག་གིས་དམིགས་པ་ཐམས་ཅད་ཡོངས་སུ་ཤེས་པའི་ཕྱིར་རོ། །གང་དམིགས་པ་ཐམས་ཅད་ཡོངས་སུ་ཤེས་པ་དེ་ལ་ནི་སྤྱོད་པ་གང་ཡང་མེད་དོ། །དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་
པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་དག་ཕྱིན་ཅི་ལོག་མ་ཡིན་པ་དང་། ཡང་དག་པར་སྤོང་བ་དང་། དྲན་པ་ཉེ་བར་གཞག་པ་དང་། ཚད་མེད་པའི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་
པ་ལ་སྤྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གིས་དམིགས་པ་ཐམས་ཅད་ཡ་མ་རླར་ཤེས་པའི་ཕྱིར་རོ། །གང་དམིགས་པ་ཐམས་ཅད་ཡ་མ་རླར་ཡོངས་སུ་ཤེས་པ་དེ་ལ་སྤྱོད་པ་གང་ཡང་མེད་དེ། དེའི་ཕྱིར་སྤྱོད་པ་མེད་པ་ནི་བྱང་
ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའི་དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ཏིང་ངེ་འཛིན་དང་། སྙོམས་པར་འཇུག་པའི་དམིགས་པ་ལ་སྤྱོད་ན་ཤེས་
39-1-72a


རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གིས་དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ཏིང་ངེ་འཛིན་དང་། སྙོམས་པར་འཇུག་པའི་དམིགས་པ་རྣམ་པར་བཤིག་པའི་ཕྱིར་རོ། །གང་
རྣམ་པར་འཇིག་པ་དེ་ལ་སྤྱོད་པ་གང་ཡང་མེད་དེ། དེའི་ཕྱིར་སྤྱོད་པ་མེད་པ་ཞེས་བྱ་བ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་དག་སྡུག་བསྔལ་དང་། ཀུན་འབྱུང་བ་དང་། 
འགོག་པ་དང་། ལམ་གྱི་དམིགས་པ་ལ་སྤྱོད་ན་ཤེས་རབ་གྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གི་སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་གྱི་དམིགས་པ་རྣམ་པར་
བཤིག་པའི་ཕྱིར་རོ། །གང་རྣམ་པར་འཇིག་པ་དེ་ལ་རྣམ་པར་འཇིག་པ་གང་ཡང་མེད་ཅིང་དེ་ལ་ཡང་སྤྱོད་པ་གང་ཡང་མེད་དེ། དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་
རྣམ་པར་གནོན་པ་བྱང་ཆུབ་སེམས་དཔའ་དག་རིག་པ་དང་། རྣམ་པར་གྲོལ་བའི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་སྦྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གིས་རིག་པ་དང་། རྣམ་པར་གྲོལ་
བའི་དམིགས་པ་རྣམ་པར་བཤིག་པའི་ཕྱིར་རོ། །གང་རྣམ་པར་འཇིག་པ་དེ་ལ་སྤྱོད་པ་གང་ཡང་མེད་དེ། དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་
སེམས་དཔའ་དག་མི་སྐྱེ་བའི་དམིགས་པ་འམ། ཟད་པའི་དམིགས་པ་འམ། མངོན་པར་འདུ་མི་བྱེད་པའི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གིས་མི་
སྐྱེ་བ་དང་། ཟད་པ་དང་། མངོན་པར་འདུ་མི་བྱེད་པའི་དམིགས་པ་རྣམ་པར་བཤིག་པའི་ཕྱིར་རོ། །གང་རྣམ་པར་འཇིག་པ་དེ་ལ་ཡང་སྤྱོད་པ་གང་ཡང་མེད་དོ། དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། ། 
39-1-72b


རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་དག་ས་དང་ཆུ་དང་མེ་དང་རླུང་དང་ནམ་མཁའི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གིས་ས་དང་། ཆུ་དང་མེ་དང་རླུང་དང་། ནམ་མཁའི་དམིགས་པ་
རྣམ་པར་གཤིག་པའི་ཕྱིར་རོ། །གང་རྣམ་པར་འཇིག་པ་དེ་ལ་སྤྱོད་པ་གང་ཡང་མེད་དེ། དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་ཀྱི་
སའི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གིས་ཉན་ཐོས་དང་། རང་སངས་རྒྱས་ཀྱི་སའི་དམིགས་པ་རྣམ་པར་བཤིག་པའི་ཕྱིར་རོ། །གང་རྣམ་པར་འཇིག་པ་དེ་ལ་སྤྱོད་པ་གང་ཡང་
མེད་དེ། དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་དག་ཉན་ཐོས་དང་། རང་སངས་རྒྱས་ཀྱི་ཆོས་ཀྱི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་
པ་ལ་སྤྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གིས་ཉན་ཐོས་དང་། རང་སངས་རྒྱས་ཀྱི་ཆོས་ཀྱི་དམིགས་པ་རྣམ་པར་བཤིག་པའི་ཕྱིར་རོ། །གང་རྣམ་པར་འཇིག་པ་དེ་ལ་སྤྱོད་པ་གང་ཡང་མེད་དེ། དེའི་ཕྱིར་སྤྱོད་པ་མེད་པ་ནི་
བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་དག་མྱ་ངན་ལས་འདས་པའི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །དེ་ཅིའི་ཕྱིར་
ཞེ་ན། དེ་དག་གིས་མྱ་ངན་ལས་འདས་པའི་དམིགས་པ་ཡོངས་སུ་ཤེས་པའི་ཕྱིར་རོ། །གང་ཡོངས་སུ་ཤེས་པ་དེ་ལ་སྤྱོད་པ་གང་ཡང་མེད་དེ། དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་
རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་དག་མཚན་ཡོངས་སུ་དག་པའི་དམིགས་པ་ལ་སྤྱོད་དམ། སངས་རྒྱས་ཀྱི་ཞིང་ཡོངས་སུ་དག་པའི་དམིགས་པ་ལ་སྤྱོད་དམ། ཉན་ཐོས་ཕུན་སུམ་ཚོགས་པའི་དམིགས་པ་
39-1-73a


ལ་སྤྱོད་དམ། བྱང་ཆུབ་སེམས་དཔའ་ཕུན་སུམ་ཚོགས་པའི་དམིགས་པ་ལ་སྤྱོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གིས་མཚན་ཡོངས་སུ་དག་པའི་དམིགས་པ་དང་། 
སངས་རྒྱས་ཀྱི་ཞིང་ཡོངས་སུ་དག་པའི་དམིགས་པ་དང་། ཉན་ཐོས་ཕུན་སུམ་ཚོགས་པའི་དམིགས་པ་དང་། བྱང་ཆུབ་སེམས་དཔའ་ཕུན་སུམ་ཚོགས་པའི་དམིགས་པ་རྣམ་པར་བཤིག་པའི་ཕྱིར་རོ། །གང་རྣམ་པར་འཇིག་པ་དེ་ལ་སྤྱོད་
པ་གང་ཡང་མེད་དེ། དེའི་ཕྱིར་སྤྱོད་པ་མེད་པ་ནི་བྱང་ཆུབ་སེམས་དཔའི་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའོ། །འདི་ནི་བྱང་ཆུབ་སེམས་
དཔའ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་དམིགས་པ་ཐམས་ཅད་ཡོངས་སུ་ཤེས་པའི་སྤྱོད་པ་དང་། དམིགས་པ་ཐམས་ཅད་རྣམ་པར་འཇིག་པའི་སྤྱོད་པའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་དེ་ལྟར་
སྤྱོད་ན་གཟུགས་ཀྱི་དམིགས་པ་རྣམ་པར་དག་པ་ལ་མི་སྤྱོད་དོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་དམིགས་པ་རྣམ་པར་དག་པ་ལ་མི་སྤྱོད་དོ། །དེ་ཅིའི་ཕྱིར་ཞེ་ན། དེས་གཟུགས་ཀྱི་བར་གྱི་དམིགས་པ་
རང་བཞིན་གྱིས་རྣམ་པར་དག་པར་ཡོངས་སུ་ཤེས་པའི་ཕྱིར་རོ། །སྤྱོད་པ་དེ་ལྟ་བུ་གང་ཡིན་པ་དེ་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་
བྱང་ཆུབ་སེམས་དཔའ་ནི་མིག་གི་དམིགས་པ་རྣམ་པར་དག་པ་ལ་མི་སྤྱོད་དོ། །རྣ་བ་དང་སྣ་དང་ལྕེ་དང་ལུས་དང་། ཡིད་ཀྱི་དམིགས་པ་རྣམ་པར་དག་པ་ལ་མི་སྤྱོད་དོ། །དེ་ཅིའི་ཕྱིར་ཞེ་ན། དེས་ཡིད་ཀྱི་བར་གྱི་དམིགས་པ་
རང་བཞིན་གྱིས་རྣམ་པར་དག་པར་ཡོངས་སུ་ཤེས་པའི་ཕྱིར་རོ། །སྤྱོད་པ་དེ་ལྟ་བུ་གང་ཡིན་པ་དེ་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་
39-1-73b


བྱང་ཆུབ་སེམས་དཔའ་ནི་གཟུགས་དང་སྒྲ་དང་། དྲི་དང་། རོ་དང་། རེག་བྱ་དང་། ཆོས་ཀྱི་དམིགས་པ་རྣམ་པར་དག་པ་ལ་མི་སྤྱོད་དོ། །དེ་ཅིའི་ཕྱིར་ཞེ་ན། དེས་ཆོས་ཀྱི་བར་གྱི་དམིགས་པ་རང་བཞིན་གྱིས་རྣམ་པར་དག་པར་ཡོངས་སུ་
ཤེས་པའི་ཕྱིར་རོ། །སྤྱོད་པ་དེ་ལྟ་བུ་གང་ཡིན་པ་དེ་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་མིང་དང་གཟུགས་ཀྱི་དམིགས་
པ་རྣམ་པར་དག་པ་ལ་མི་སྤྱོད་དོ། །དེ་ཅིའི་ཕྱིར་ཞེ་ན། དེས་མིང་དང་གཟུགས་ཀྱི་དམིགས་པ་རང་བཞིན་གྱིས་རྣམ་པར་དག་པར་ཡོངས་སུ་ཤེས་པའི་ཕྱིར་རོ། །སྤྱོད་པ་དེ་ལྟ་བུ་གང་ཡིན་པ་དེ་བྱང་ཆུབ་སེམས་དཔའི་ཤེས་རབ་ཀྱི་
ཕ་རོལ་དུ་ཕྱིན་པ་ལ་སྤྱོད་པའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་བདག་དང་སེམས་ཅན་གྱི་དམིགས་པ་རྣམ་པར་དག་པ་ལ་མི་སྤྱོད་དོ། །དེ་ཅིའི་ཕྱིར་ཞེ་ན། དེས་བདག་དང་། སེམས་
ཅན་གྱི་དམིགས་པ་རང་བཞིན་གྱིས་རྣམ་པར་དག་པར་ཡོངས་སུ་ཤེས་པའི་ཕྱིར་རོ། །སྤྱོད་པ་དེ་ལྟ་བུ་གང་ཡིན་པ་དེ་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའོ། །རབ་ཀྱི་རྩལ་གྱིས་རྣམ་པར་གནོན་པ། དེ་
ལྟར་སྤྱོད་པའི་བྱང་ཆུབ་སེམས་དཔའ་ནི་སྲོག་དང་། འབྱུང་བ་དང་། གང་ཟག་དང་། བྱེད་པ་པོ་དང་། བྱེད་དུ་འཇུག་པ་དང་། སློང་བ་པོ་དང་། ཀུན་ནས་སློང་བ་པོ་དང་། ཚོར་བ་པོ་དང་། ཚོར་བར་བྱེད་པ་དང་། ལྟ་བའི་དམིགས་
པ་རྣམ་པར་དག་པ་ལ་མི་སྤྱོད་དོ། །དེ་ཅིའི་ཕྱིར་ཞེ་ན། དེས་སྲོག་དང་། འབྱུང་བ་དང་། གང་ཟག་དང་། བྱེད་པ་པོ་དང་། བྱེད་དུ་འཇུག་པ་དང་། སློང་བ་པོ་དང་། ཀུན་ནས་སློང་བ་པོ་དང་། ཚོར་བ་པོ་དང་། ཚོར་བར་བྱེད་པ་དང་། 
ལྟ་བའི་དམིགས་པ་རང་བཞིན་གྱིས་རྣམ་པར་དག་པར་ཡོངས་སུ་ཤེས་པའི་ཕྱིར་རོ། །སྤྱོད་པ་དེ་ལྟ་བུ་གང་ཡིན་པ་དེ་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་
39-1-74a


སྤྱོད་པའི་བྱང་ཆུབ་སེམས་དཔའ་ནི་ཕྱིན་ཅི་ལོག་དང་། ལྟ་བར་གྱུར་པའི་དམིགས་པ་རྣམ་པར་དག་པ་ལ་མི་སྤྱོད་དོ། །དེ་ཅིའི་ཕྱིར་ཞེ་ན། དེས་ཕྱིན་ཅི་ལོག་དང་། ལྟ་བར་གྱུར་པའི་དམིགས་པ་རང་བཞིན་གྱིས་རྣམ་པར་དག་
པར་ཡོངས་སུ་ཤེས་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་སྒྲིབ་པའི་དམིགས་པ་རྣམ་པར་དག་པ་ལ་མི་སྤྱོད་དོ། །དེ་ཅིའི་ཕྱིར་ཞེ་ན། དེས་སྒྲིབ་པའི་དམིགས་པ་རང་བཞིན་གྱིས་
རྣམ་པར་དག་པར་ཡོངས་སུ་ཤེས་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་རྟེན་ཅིང་འབྲེལ་པར་འབྱུང་བའི་དམིགས་པ་རྣམ་པར་དག་པ་ལ་མི་སྤྱོད་དོ། །དེ་ཅིའི་ཕྱིར་ཞེ་ན། དེས་རྟེན་
ཅིང་འབྲེལ་པར་འབྱུང་བའི་དམིགས་པ་རང་བཞིན་གྱིས་རྣམ་པར་དག་པར་ཡོངས་སུ་ཤེས་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་འདོད་པའི་ཁམས་དང་། གཟུགས་ཀྱི་ཁམས་
དང་། གཟུགས་མེད་པའི་ཁམས་གྱི་དམིགས་པ་རྣམ་པར་དག་པར་མི་སྤྱོད་དོ། །དེ་ཅིའི་ཕྱིར་ཞེ་ན། དེས་འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ཀྱི་དམིགས་པ་རང་བཞིན་གྱིས་རྣམ་པར་དག་
པར་ཡོངས་སུ་ཤེས་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་ཚུལ་ཁྲིམས་དང་། འཆལ་པའི་ཚུལ་ཁྲིམས་ཀྱི་དམིགས་པ་རྣམ་པར་དག་པ་ལ་མི་སྤྱོད་དོ། །དེ་ཅིའི་ཕྱིར་ཞེ་ན། དེས་
ཚུལ་ཁྲིམས་དང་། འཆལ་པའི་ཚུལ་ཁྲིམས་ཀྱི་དམིགས་པ་རང་བཞིན་གྱིས་རྣམ་པར་དག་པར་ཡོངས་སུ་ཤེས་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་བཟོད་པ་དང་། གནོད་
སེམས་དང་། བརྩོན་འགྲུས་དང་། ལེ་ལོ་དང་། བསམ་གཏན་དང་། རྣམ་པར་གཡེང་བ་དང་། ཤེས་རབ་དང་། འཆལ་པའི་ཤེས་རབ་ཀྱི་དམིགས་པ་རྣམ་པར་དག་པ་ལ་མི་སྤྱོད་དོ། །དེ་ཅིའི་ཕྱིར་ཞེ་ན། དེས་བཟོད་པ་དང་། གནོད་སེམས་དང་། 
39-1-74b


བརྩོན་འགྲུས་དང་། ལེ་ལོ་དང་། བསམ་གཏན་དང་། རྣམ་པར་གཡེང་བ་དང་། ཤེས་རབ་དང་། འཆལ་པའི་ཤེས་རབ་ཀྱི་དམིགས་པ་རང་བཞིན་གྱིས་རྣམ་པར་དག་པར་ཡོངས་སུ་ཤེས་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་
དེ་ལྟར་སྤྱོད་པའི་བྱང་ཆུབ་སེམས་དཔའ་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་དམིགས་པ་རྣམ་པར་དག་པ་ལ་མི་སྤྱོད་དོ། །དེ་ཅིའི་ཕྱིར་ཞེ་ན། དེས་འདས་པ་དང་། མ་འོངས་པ་དང་། ད་ལྟར་བྱུང་བའི་དམིགས་པ་རང་བཞིན་གྱིས་རྣམ་
པར་དག་པར་ཡོངས་སུ་ཤེས་པའི་ཕྱིར་རོ། །རབ་གྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཐོགས་པ་མེད་པའི་དམིགས་པ་རྣམ་པར་དག་པ་ལ་མི་སྤྱོད་དོ། །དེ་ཅིའི་ཕྱིར་ཞེ་ན་། དེས་ཐོགས་པ་
མེད་པའི་དམིགས་པ་རང་བཞིན་གྱིས་ཡོངས་སུ་དག་པར་ཤེས་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་མངོན་པར་ཤེས་པའི་དམིགས་པ་རྣམ་པར་དག་པ་ལ་མི་སྤྱོད་དོ། །དེ་ཅིའི་ཕྱིར་ཞེ་ན། དེས་མངོན་
པར་ཤེས་པའི་དམིགས་པ་རང་བཞིན་གྱིས་ཡོངས་སུ་དག་པར་ཤེས་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་ཐམས་ཅད་མཁྱེན་པའི་དམིགས་པ་རྣམ་པར་དག་པ་ལ་མི་སྤྱོད་དོ། །དེ་ཅིའི་ཕྱིར་ཞེ་
ན། དེས་ཐམས་ཅད་མཁྱེན་པའི་དམིགས་པ་རང་བཞིན་གྱིས་ཡོངས་སུ་དག་པར་ཤེས་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་སྟེ། དེ་ནི་དམིགས་
པ་རྣམ་པར་དག་པ་གང་ལ་ཡང་མི་སྤྱོད་དོ། །དེ་ཅིའི་ཕྱིར་ཞེ་ན། དམིགས་པ་ཐམས་ཅད་རང་བཞིན་གྱིས་ཡོངས་སུ་རྣམ་པར་དག་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་དམིགས་
པ་ཐམས་ཅད་རང་བཞིན་གྱིས་ཡོངས་སུ་དག་པ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་འདི་ནི་གཟུགས་སོ་ཞེས་ཡང་དག་པར་རྗེས་སུ་མི་མཐོང་། འདིས་
39-1-75a


གཟུགས་ཤེས་ཡང་དག་པར་རྗེས་སུ་མི་མཐོང་། འདིའི་གཟུགས་ཤེས་ཡང་དག་པར་རྗེས་སུ་མི་མཐོང་། འདི་ལས་གཟུགས་ཤེས་ཡང་དག་པར་རྗེས་སུ་མི་མཐོང་སྟེ། དེ་དེ་ལྟར་གཟུགས་ཡང་དག་པར་རྗེས་སུ་མི་མཐོང་བས་
གཟུགས་མི་འདེག །མི་འཇོག །གཟུགས་མི་བསྐྱེད། མི་འགོག །གཟུགས་ལ་མི་སྤྱོད། རྣམ་པར་མི་སྤྱོད་དོ། །གཟུགས་ཀྱི་དམིགས་པ་ལ་མི་སྤྱོད། རྣམ་པར་མི་སྤྱོད་དོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་འདི་
ནི་ཚོར་བའོ། །འདི་ནི་འདུ་ཤེས་སོ། །འདི་ནི་འདུ་བྱེད་རྣམས་སོ། །འདི་ནི་རྣམ་པར་ཤེས་པའོ་ཞེས་ཡང་དག་པར་རྗེས་སུ་མི་མཐོང་། འདིས་རྣམ་པར་ཤེས་པ་ཞེས་ཡང་དག་པར་རྗེས་སུ་མི་མཐོང་། འདིའི་རྣམ་པར་ཤེས་པ་ཞེས་ཡང་དག་པར་རྗེས་སུ་མི་མཐོང་། འདི་
ལས་རྣམ་པར་ཤེས་པ་ཞེས་ཡང་དག་པར་རྗེས་སུ་མི་མཐོང་སྟེ། དེ་དེ་ལྟར་རྣམ་པར་ཤེས་པ་ཡང་དག་པར་རྗེས་སུ་མི་མཐོང་བས་རྣམ་པར་ཤེས་པ་མི་འདེག་མི་འཇོག །རྣམ་པར་ཤེས་པ་མི་བསྐྱེད། མི་འགོག །རྣམ་པར་ཤེས་པ་ལ་མི་སྤྱོད། །རྣམ་པར་
མི་སྤྱོད་དོ། །རྣམ་པར་ཤེས་པའི་དམིགས་པ་ལ་མི་སྤྱོད་རྣམ་པར་མི་སྤྱོད་དོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའོ། །རབ་ཀྱི་རྩལ་གྱིས་རྣམ་པར་གནོན་པ་གཞན་ཡང་དེ་ལྟར་
སྤྱོད་པའི་བྱང་ཆུབ་སེམས་དཔའ་ནི་གཟུགས་ལ་འདས་པ་ཞེས་མི་སྤྱོད། གཟུགས་ལ་མ་འོངས་པ་ཞེས་མི་སྤྱོད་། གཟུགས་ལ་ད་ལྟར་བྱུང་བ་ཞེས་མི་སྤྱོད་དོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་འདས་པ་དང་། མ་འོངས་པ་དང་། ད་ལྟར་
བྱུང་བ་ཞེས་མི་སྤྱོད་དོ། །གཟུགས་ལ་བདག་ཅེས་མི་སྤྱོད། གཟུགས་ལ་བདག་གི་ཞེས་མི་སྤྱོད་དོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་བདག་ཅེས་མི་སྤྱོད། རྣམ་པར་ཤེས་པ་ལ་བདག་གི་
ཞེས་མི་སྤྱོད་དོ། །གཟུགས་ལ་སྡུག་བསྔལ་ཞེས་མི་སྤྱོད་དོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སྡུག་བསྔལ་ཞེས་མི་སྤྱོད་དོ། །གཟུགས་ལ་བདག་གི་དང་། གཞན་གྱི་ཞེས་མི་སྤྱོད་དོ། །
39-1-75b


དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་བདག་གི་དང་། གཞན་གྱི་ཞེས་མི་སྤྱོད་དོ། །རབ་ཀྱི་རྩལ་གྱིས་རྣམ་པར་གནོན་པ། དེ་ལྟར་སྤྱོད་པའི་བྱང་ཆུབ་སེམས་དཔའ་ནི་ཤེས་རབ་ཀྱི་ཕ་རོལ་དུ་
ཕྱིན་པ་ལ་སྤྱོད་པའོ། །རབ་ཀྱི་རྩལ་གྱིས་རྣམ་པར་གནོན་པ་གཞན་ཡང་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་ནི་གཟུགས་ཀྱི་ཀུན་འབྱུང་བ་ལ་མི་སྤྱོད། གཟུགས་ཀྱི་འགོག་པ་ལ་མི་སྤྱོད། གཟུགས་ལ་ཟབ་
ཅེས་མི་སྤྱོད། གཟུགས་ལ་མི་ཟབ་ཅེས་མི་སྤྱོད། གཟུགས་ལ་སྟོང་ཞེས་མི་སྤྱོད། གཟུགས་ལ་མི་སྟོང་ཞེས་མི་སྤྱོད། གཟུགས་ལ་མཚན་མ་ཞེས་མི་སྤྱོད། གཟུགས་ལ་མཚན་མ་མེད་པ་ཞེས་མི་སྤྱོད། གཟུགས་ལ་སྨོན་པ་ཞེས་མི་
སྤྱོད། གཟུགས་ལ་སྨོན་པ་མེད་པ་ཞེས་མི་སྤྱོད། གཟུགས་ལ་མངོན་པར་འདུ་བྱེད་པ་ཞེས་མི་སྤྱོད། གཟུགས་ལ་མངོན་པར་འདུ་མི་བྱེད་པ་ཞེས་མི་སྤྱོད་དོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་
ཤེས་པའི་ཀུན་འབྱུང་བ་ལ་མི་སྤྱོད། རྣམ་པར་ཤེས་པའི་འགོག་པ་ལ་མི་སྤྱོད། རྣམ་པར་ཤེས་པ་ལ་ཟབ་ཅེས་མི་སྤྱོད། རྣམ་པར་ཤེས་པ་ལ་མི་ཟབ་ཅེས་མི་སྤྱོད། རྣམ་པར་ཤེས་པ་ལ་སྟོང་ཞེས་མི་སྤྱོད། རྣམ་པར་ཤེས་པ་ལ་
མི་སྟོང་ཞེས་མི་སྤྱོད། རྣམ་པར་ཤེས་པ་ལ་མཚན་མ་ཞེས་མི་སྤྱོད། རྣམ་པར་ཤེས་པ་ལ་མཚན་མ་མེད་པ་ཞེས་མི་སྤྱོད། རྣམ་པར་ཤེས་པ་ལ་སྨོན་པ་ཞེས་མི་སྤྱོད། རྣམ་པར་ཤེས་པ་ལ་སྨོན་པ་མེད་པ་ཞེས་མི་སྤྱོད། རྣམ་པར་ཤེས་
པ་ལ་མངོན་པར་འདུ་བྱེད་པ་ཞེས་མི་སྤྱོད། རྣམ་པར་ཤེས་པ་ལ་མངོན་པར་འདུ་མི་བྱེད་པ་ཞེས་མི་སྤྱོད་དོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་འདི་དག་ཐམས་ཅད་ནི་རློམ་སེམས་སུ་གྱུར་པ་དང་། གཡོས་པ་དང་། སྤྲོས་
པ་དང་། སྲེད་པར་གཏོགས་པའི་ཕྱིར་རོ། །བདག་གིས་སྤྱད་པར་བྱའོ་ཞེས་བྱ་བ་དེ་ནི་གཡོས་པའོ། །འདིར་སྤྱད་པར་བྱའོ་ཞེས་བྱ་བ་དེ་ནི་སྤྲོས་པའོ། །འདིས་སྤྱོད་དོ་ཞེས་བྱ་བ་དེ་ནི་སྲེད་པར་གཏོགས་པའོ། །འདི་ལ་སྤྱད་པར་བྱའོ་ཞེས་བྱ་བ་དེ་ནི་རློམ་
39-1-76a


སེམས་སོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལ་བྱང་ཆུབ་སེམས་དཔའ་དག་ནི་དེ་དག་ཐམས་ཅད་རློམ་སེམས་དང་། གཡོས་པ་དང་། སྤྲོས་པ་དང་། སྲེད་པར་གཏོགས་པར་ཤེས་ནས་མི་ཤེས་པ་ཐམས་ཅད་ཡང་དག་པར་གཞོམ་
པའི་ཕྱིར་ཅི་ལ་ཡང་རློམ་སེམས་སུ་མི་བྱེད་དོ། །རློམ་སེམས་སུ་མི་བྱེད་པས་གང་ལ་ཡང་མི་སྤྱོད། གང་ལ་ཡང་མི་སྦྱོར་རོ། །དེ་དག་གནས་མེད་ཅིང་འདུ་བ་ཡང་མེད། འབྲལ་བ་ཡང་མེད་པས་ཅི་ཡང་ལྡན་པར་མི་བྱེད་དོ། །རབ་ཀྱི་རྩལ་གྱིས་རྣམ་པར་གནོན་
པ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་རློམ་སེམས་ཐམས་ཅད་ཡང་དག་པར་འཇོམས་པའོ། །རབ་ཀྱི་རྩལ་གྱིས་རྣམ་པར་གནོན་པ་གཞན་ཡང་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་
དུ་ཕྱིན་པ་ལ་དེ་ལྟར་སྤྱོད་པ་ནི་གཟུགས་ལ་རྟག་ཅེ་འམ། མི་རྟག་ཅེས་མི་སྤྱོད་དོ། །གཟུགས་ལ་སྟོང་ཞེ་འམ། མི་སྟོང་ཞེས་མི་སྤྱོད་དོ། །གཟུགས་ལ་སྒྱུ་མ་ལྟ་བུ་ཞེས་མི་སྤྱོད་དོ། །གཟུགས་ལ་རྨི་ལམ་ལྟ་བུ་ཞེས་མི་སྤྱོད་དོ། །གཟུགས་
ལ་མིག་ཡོར་ལྟ་བུ་ཞེས་མི་སྤྱོད་དོ། །གཟུགས་ལ་བྲག་ཆ་ལྟ་བུ་ཞེས་མི་སྤྱོད་དོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རྟག་ཅེ་འམ། མི་རྟག་ཅེས་མི་སྤྱོད་དོ། །རྣམ་པར་ཤེས་པ་ལ་སྟོང་ཞེ་
འམ། མི་སྟོང་ཞེས་མི་སྤྱོད་དོ། །རྣམ་པར་ཤེས་པ་ལ་སྒྱུ་མ་ལྟ་བུ་ཞེས་མི་སྤྱོད་དོ། །རྣམ་པར་ཤེས་པ་ལ་རྨི་ལམ་ལྟ་བུ་ཞེས་མི་སྤྱོད་དོ། །རྣམ་པར་ཤེས་པ་ལ་མིག་ཡོར་ལྟ་བུ་ཞེས་མི་སྤྱོད་དོ། །རྣམ་པར་ཤེས་པ་ལ་བྲག་ཆ་ལྟ་བུ་
ཞེས་མི་སྤྱོད་དོ། །དེ་ཅིའི་ཕྱིར་ཞེ་ག །རབ་ཀྱི་རྩལ་གྱིས་རྣམ་པར་གནོན་པ་དེ་དག་ཐམས་ཅད་ནི་རྣམ་པར་བརྟགས་པ་དང་། རྣམ་པར་དཔྱད་པ་དང་། སྤྱད་པ་དང་། རྣམ་པར་སྤྱད་པ་མ་ཡིན་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་བྱང་
ཆུབ་སེམས་དཔའ་ནི་དེ་དག་ཐམས་ཅད་རྣམ་པར་བརྟགས་པ་དང་། རྣམ་པར་དཔྱད་པ་དང་། །སྤྱད་པ་དང་། རྣམ་པར་སྤྱད་པ་མ་ཡིན་པར་ཤེས་ནས། སྤྱོད་པ་ཐམས་ཅད་ཡང་དག་པར་གཞོམ་པ་དང་། སྤྱོད་པ་ཐམས་ཅད་ཡོངས་སུ་ཤེས་པར་
39-1-76b


བྱ་བའི་ཕྱིར་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་དོ། །རབ་ཀྱི་རྩལ་གྱིས་རྣམ་པར་གནོན་པ་འདི་ནི་བྱང་ཆུབ་སེམས་དཔའི་སྤྱོད་པ་ཞེས་བསྟན་པའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་
ཆེན་པོ་རབ་ཀྱི་རྩལ་གྱིས་རྣམ་པར་གནོན་པས་འདི་སྐད་ཅེས་གསོལ་ཏོ། །བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་འདི་ནི་བསམ་གྱིས་མི་ཁྱབ་པ་ལགས་སོ། །བཀའ་སྩལ་པ། རབ་ཀྱི་རྩལ་གྱིས་རྣམ་པར་གནོན་པ་དེ་དེ་བཞིན་
ཏེ། གཟུགས་བསམ་གྱིས་མི་ཁྱབ་པས། བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་འདི་བསམ་གྱིས་མི་ཁྱབ་བོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་བསམ་གྱིས་མི་ཁྱབ་པས། 
བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་འདི་བསམ་གྱིས་མི་ཁྱབ་བོ། །མིང་དང་གཟུགས་བསམ་གྱིས་མི་ཁྱབ་པས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་འདི་བསམ་གྱིས་མི་ཁྱབ་བོ། ། 
རྟེན་ཅིང་འབྲེལ་པར་འབྱུང་བ་བསམ་གྱིས་མི་ཁྱབ་པ་དང་། ཀུན་ནས་ཉོན་མོངས་པ་བསམ་གྱིས་མི་ཁྱབ་པས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་འདི་བསམ་གྱིས་མི་ཁྱབ་བོ། ལས་ཀྱི་རྣམ་པར་སྨིན་པ་བསམ་
གྱིས་མི་ཁྱབ་པས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་འདི་བསམ་གྱིས་མི་ཁྱབ་བོ། །ཕྱིན་ཅི་ལོག་བསམ་གྱིས་མི་ཁྱབ་པ་དང་། ལྟ་བར་གྱུར་པ་བསམ་གྱིས་མི་ཁྱབ་པས་བྱང་ཆུབ་སེམས་དཔའི་ཤེས་རབ་ཀྱི་ཕ་
རོལ་དུ་ཕྱིན་པ་ལ་སྤྱོད་པ་འདི་བསམ་གྱིས་མི་ཁྱབ་བོ། །འདོད་པའི་ཁམས་བསམ་གྱིས་མི་ཁྱབ་པ་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་བསམ་གྱིས་མི་ཁྱབ་པས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་
ཕྱིན་པ་ལ་སྤྱོད་པ་འདི་བསམ་གྱིས་མི་ཁྱབ་བོ། །བདག་བསམ་གྱིས་མི་ཁྱབ་པ་དང་། སེམས་ཅན་བསམ་གྱིས་མི་ཁྱབ་པ་དང་། སྦྱིན་པ་བསམ་གྱིས་མི་ཁྱབ་པ་དང་། སེར་སྣ་བསམ་གྱིས་མི་ཁྱབ་པ་དང་། ཚུལ་ཁྲིམས་བསམ་གྱིས་མི་
39-1-77a


མི་ཁྱབ་པ་དང་། འཆལ་པའི་ཚུལ་ཁྲིམས་བསམ་གྱིས་མི་ཁྱབ་པ་དང་། བཟོད་པ་བསམ་གྱིས་མི་ཁྱབ་པ་དང་། གནོད་སེམས་བསམ་གྱིས་མི་ཁྱབ་པ་དང་། བརྩོན་འགྲུས་བསམ་གྱིས་མི་ཁྱབ་པ་དང་། ལེ་ལོ་བསམ་གྱིས་མི་
ཁྱབ་པ་དང་། བསམ་གཏན་བསམ་གྱིས་མི་ཁྱབ་པ་དང་། རྣམ་པར་གཡེང་བ་བསམ་གྱིས་མི་ཁྱབ་པ་དང་། ཤེས་རབ་བསམ་གྱིས་མི་ཁྱབ་པ་དང་། འཆལ་པའི་ཤེས་རབ་བསམ་གྱིས་མི་ཁྱབ་པས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་
སྤྱོད་པ་འདི་བསམ་གྱིས་མི་ཁྱབ་བོ། འདོད་ཆགས་དང་། ཞེ་སྡང་དང་། གཏི་མུག་བསམ་གྱིས་མི་ཁྱབ་པས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་འདི་བསམ་གྱིས་མི་ཁྱབ་བོ། དྲན་པ་ཉེ་བར་གཞག་པ་བསམ་གྱིས་མི་ཁྱབ་པ་དང་། 
ཡང་དག་པའི་སྤོང་བ་དང་། ཕྱིན་ཅི་མ་ལོག་པ་དང་། ཚད་མེད་པ་དང་། རྫུ་འཕྲུལ་གྱི་རྐང་པ་བསམ་གྱིས་མི་ཁྱབ་པས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་འདི་ཡང་བསམ་གྱིས་མི་ཁྱབ་བོ། །དབང་པོ་དང་། སྟོབས་དང་། བྱང་ཆུབ་ཀྱི་
ཡན་ལག་དང་། ཏིང་ངེ་འཛིན་དང་། སྙོམས་པར་འཇུག་པ་བསམ་གྱིས་མི་ཁྱབ་པས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་འདི་བསམ་གྱིས་མི་ཁྱབ་བོ། །སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་བསམ་གྱིས་
མི་ཁྱབ་པས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་འདི་བསམ་གྱིས་མི་ཁྱབ་བོ། རིག་པ་དང་། རྣམ་པར་གྲོལ་བ་བསམ་གྱིས་མི་ཁྱབ་པ་དང་། ཟད་པ་ཤེས་པ་དང་། མི་སྐྱེ་བ་ཤེས་པ་དང་། མངོན་པར་འདུ་མི་བྱེད་པ་ཤེས་པ་བསམ་
གྱིས་མི་ཁྱབ་པས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་འདི་བསམ་གྱིས་མི་ཁྱབ་བོ། ཉན་ཐོས་དང་། རང་སངས་རྒྱས་ཀྱི་ས་བསམ་གྱིས་མི་ཁྱབ་པས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་འདི་
བསམ་གྱིས་མི་ཁྱབ་བོ། །ཉན་ཐོས་དང་། རང་སངས་རྒྱས་ཀྱི་ཆོས་བསམ་གྱིས་མི་ཁྱབ་པས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་འདི་བསམ་གྱིས་མི་ཁྱབ་བོ། །མངོན་པར་ཤེས་པ་བསམ་གྱིས་མི་ཁྱབ་པ་དང་། འདས་
39-1-77b


པ་དང་། མ་འོངས་པ་དང་། ད་ལྟར་བྱུང་བ་བསམ་གྱིས་མི་ཁྱབ་པས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་འདི་བསམ་གྱིས་མི་ཁྱབ་བོ། ། བམ་པོ་ལྔ་པ། ཐོགས་པ་མེད་པའི་ཡེ་ཤེས་བསམ་གྱིས་མི་ཁྱབ་པ་དང་། མྱ་
ངན་ལས་འདས་པ་བསམ་གྱིས་མི་ཁྱབ་པ་དང་། སངས་རྒྱས་ཀྱི་ཆོས་བསམ་གྱིས་མི་ཁྱབ་པས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་འདི་བསམ་གྱིས་མི་ཁྱབ་བོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་
གནོན་པ་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་ནི་སེམས་ཀྱི་སྐྱེད་པ་མ་ཡིན་པའི་ཕྱིར་ཏེ། དེའི་ཕྱིར་བསམ་གྱིས་མི་ཁྱབ་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་སེམས་བསྐྱེད་ཅེས་བྱ་བ་དེ་ནི་ཕྱིན་ཅི་ལོག་གོ། །
རབ་ཀྱི་རྩལ་གྱིས་རྣམ་པར་གནོན་པ་སེམས་ཤེས་བྱ་བ་དེ་ནི་སེམས་རབ་ཏུ་རྟོགས་པའོ། །རབ་ཀྱི་རྩལ་གྱིས་རྣམ་པར་གནོན་པ་སེམས་ཀྱི་རང་བཞིན་གང་ཡིན་པ་དེ་སྐྱེ་བ་དང་འབྱུང་བ་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་ཕྱིན་ཅི་ལོག་དང་
ལྡན་པའི་སེམས་སྐྱེ་སྟེ། དེ་ལ་སེམས་ཀྱང་སྒྲིབ་པ་མེད་ལ། ཕྱིན་ཅི་ལོག་གང་གིས་བསྐྱེད་པ་དེ་ཡང་སྒྲིབ་པ་མེད་པ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་བྱིས་པ་སོ་སོའི་སྐྱེ་བོ་རྣམས་ནི། སེམས་སྒྲིབ་པ་མེད་པ་དང་། གང་དུ་སྐྱེ་བ་
དེ་ཡང་སྒྲིབ་པ་མེད་པ་དང་། གང་གིས་བསྐྱེད་པ་དེ་ཡང་སྒྲིབ་པ་མེད་པར་མི་ཤེས་སོ། །དེ་དག་ནི་སེམས་དབེན་པར་མི་ཤེས་ཤིང་། དམིགས་པ་དབེན་པར་མི་ཤེས་པས། བདག་གི་སེམས། འདིའི་སེམས། འདི་ལས་སེམས་ཤེས་མངོན་པར་
ཞེན་ཏོ། །དེ་དག་ལ་མངོན་པར་ཞེན་པས་དགེ་བ་ཞེས་མངོན་པར་ཞེན། མི་དགེ་བ་ཞེས་མངོན་པར་ཞེན། བདེ་བ་ཞེས་མངོན་པར་ཞེན། སྡུག་བསྔལ་བ་ཞེས་མངོན་པར་ཞེན། ཆད་པ་ཞེས་མངོན་པར་ཞེན་རྟག་པ་ཞེས་མངོན་པར་ཞེན། ལྟ་
བར་གྱུར་པ་ཞེས་མངོན་པར་ཞེན། སྒྲིབ་པ་ཞེས་མངོན་པར་ཞེན། ཚུལ་ཁྲིམས་དང་། འཆལ་པའི་ཚུལ་ཁྲིམས་ཞེས་མངོན་པར་ཞེན། འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ཤེས་མངོན་པར་ཞེན། 
39-1-78a


རྟེན་ཅིང་འབྲེལ་བར་འབྱུང་བ་ཞེས་མངོན་པར་ཞེན། མིང་དང་གཟུགས་ཤེས་མངོན་པར་ཞེན། འདོད་ཆགས་དང་ཞེ་སྡང་དང་། གཏི་མུག་ཅེས་མངོན་པར་ཞེན། ཕྲག་དོག་དང་། སེར་སྣ་ཞེས་མངོན་པར་ཞེན། ངའོ་སྙམ་པའི་ང་རྒྱལ་
ཞེས་མངོན་པར་ཞེན། སྡུག་བསྔལ་ཞེས་མངོན་པར་ཞེན། ཀུན་འབྱུང་ཞེས་མངོན་པར་ཞེན། འགོག་པ་ཞེས་མངོན་པར་ཞེན། ལམ་ཞེས་མངོན་པར་ཞེན། དྲན་པ་ཉེ་བར་གཞག་པ་དང་། ཡང་དག་པའི་སྤོང་བ་དང་། ཕྱིན་ཅི་མ་ལོག་པ་དང་། རྫུ་འཕྲུལ་
གྱི་རྐང་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་ཅེས་མངོན་པར་ཞེན་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ཞེས་མངོན་པར་ཞེན། མི་སྐྱེ་བ་དང་། ཟད་པ་དང་། མངོན་པར་འདུ་མི་བྱེད་
པ་ཞེས་མངོན་པར་ཞེན། ཉན་ཐོས་དང་། རང་སངས་རྒྱས་ཀྱི་ས་ཞེས་མངོན་པར་ཞེན། ཉན་ཐོས་དང་རང་སངས་རྒྱས་ཀྱི་ཆོས་ལ་ཡང་མངོན་པར་ཞེན། མངོན་པར་ཤེས་པ་ལ་ཡང་མངོན་པར་ཞེན། མྱ་ངན་ལས་འདས་པ་ལ་ཡང་མངོན་པར་ཞེན། 
སངས་རྒྱས་ཀྱི་ཡེ་ཤེས་ལ་ཡང་མངོན་པར་ཞེན། མཚན་མ་ལ་ཡང་མངོན་པར་ཞེན། སངས་རྒྱས་ཀྱི་ཞིང་ལ་ཡང་མངོན་པར་ཞེན་། ཉན་ཐོས་ཕུན་སུམ་ཚོགས་པ་ལ་ཡང་མངོན་པར་ཞེན། བྱང་ཆུབ་སེམས་དཔའི་ཕུན་སུམ་ཚོགས་པ་ལ་ཡང་མངོན་
པར་ཞེན་ཏོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལ་བྱང་ཆུབ་སེམས་དཔས་མངོན་པར་ཞེན་པ་འདི་ལྟ་བུ་དག་ནི་སེམས་ཅན་རྣམས་ཀྱི་ཕྱིན་ཅི་ལོག་གི་སེམས་ལས་བྱུང་བར་མཐོང་ནས། ཕྱིན་ཅི་ལོག་གང་ལ་ཡང་སེམས་མི་བསྐྱེད་དེ། དེ་ཅིའི་
ཕྱིར་ཞེ་ན། ཤེས་རབ་ཀྱི་ཕ་རོལ་དུ་ཕྱིན་པ་ནི་སེམས་དང་བྲལ་བའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་གང་སེམས་རང་བཞིན་གྱིས་འོད་གསལ་བ་དང་། རང་བཞིན་གྱིས་ཡོངས་སུ་དག་པ་དེ་ལ་སེམས་བསྐྱེད་པ་གང་ཡང་མེད་དོ། །རབ་
ཀྱི་རྩལ་གྱིས་རྣམ་པར་གནོན་པ་དམིགས་པ་ཡོད་པས། བྱིས་པ་སོ་སོའི་སྐྱེ་བོ་རྣམས་སེམས་བསྐྱེད་དོ། །དེ་ལ་བྱང་ཆུབ་སེམས་དཔས་དམིགས་པ་ཡང་རབ་ཏུ་ཤེས་ཤིང་། སེམས་གང་ནས་སྐྱེ་ཞེས། སེམས་སྐྱེ་བ་ཡང་རབ་ཏུ་ཤེས་པས་དེ་འདི་
39-1-78b


སྙམ་དུ་སེམས་འདི་ནི་རང་བཞིན་གྱིས་འོད་གསལ་བའོ་ཞེས་རྟོག་ཅིང་དེ་འདི་སྙམ་དུ་སེམས་ཏེ། དམིགས་པ་ལ་བརྟེན་ནས་སེམས་སྐྱེའོ་སྙམ་མོ། །དེས་དམིགས་པ་ཡོངས་སུ་ཤེས་པས་སེམས་མི་སྐྱེད་མི་འགོག་སྟེ། དེའི་སེམས་འོད་གསལ་
བ་དང་། ཀུན་ནས་ཉོན་མོངས་པ་ཅན་མ་ཡིན་པར་ཡིད་དུ་འོང་བ་དང་། ཡོངས་སུ་དག་པ་ཡིན་ནོ། །དེ་སེམས་མི་སྐྱེ་བ་ལ་གནས་པས་ཆོས་གང་ཡང་མི་སྐྱེ་མི་འགོག་གོ། །རབ་ཀྱི་རྩལ་གྱིས་རྣམ་པར་གནོན་པ་འདི་ནི་ཤེས་རབ་ཀྱི་ཕ་རོལ་དུ་ཕྱིན་པ་
ལ་སྤྱོད་པའི་བྱང་ཆུབ་སེམས་དཔའི་སྐྱེ་བ་ཡོངས་སུ་ཤེས་པ་སྟེ། གང་འདི་ལྟར་སྤྱོད་པའི་བྱང་ཆུབ་སེམས་དཔའ་དེ་ནི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའོ། །དེ་ལྟར་སྤྱོད་པ་དེ་དག་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་དོ་ཞེ་འམ། འདི་ན་ཤེས་
རབ་ཀྱི་ཕ་རོལ་དུ་ཕྱིན་པ་ལ་སྤྱོད་དོ་ཞེ་འམ། འདིས་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་དོ་ཞེ་འམ། འདི་ནས་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་དོ་ཞེས་དེ་འདི་སྙམ་དུ་མི་སེམས་སོ། །གལ་ཏེ་འདི་ནི་ཤེས་རབ་ཀྱི་ཕ་རོལ་དུ་ཕྱིན་པ་ཞེ་འམ། འདིས་
ཤེས་རབ་ཀྱི་ཕ་རོལ་དུ་ཕྱིན་པ་ཞེ་འམ། འདིའི་ཤེས་རབ་ཀྱི་ཕ་རོལ་དུ་ཕྱིན་པ་ཞེ་འམ། འདི་ནས་ཤེས་རབ་ཀྱི་ཕ་རོལ་དུ་ཕྱིན་པ་ཞེས་ཀུན་ཤེས་ན་ནི། ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་མ་ཡིན་ནོ། །བདག་ཤེས་རབ་ཀྱི་ཕ་རོལ་དུ་ཕྱིན་
པ་ལ་སྤྱོད་དོ་སྙམ་པའི་ཤེས་རབ་ཀྱི་ཕ་རོལ་དུ་ཕྱིན་པ་དེ་ཡང་ཡང་དག་པར་རྗེས་སུ་མི་མཐོང་མི་དམིགས་པ་ནི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་
སེམས་དཔའ་ཆེན་པོ་རབ་ཀྱི་རྩལ་གྱིས་རྣམ་པར་གནོན་པས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་སྟེ། ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་བྱང་ཆུབ་སེམས་དཔའི་སྤྱོད་པ་འདི་ནི་བླ་ན་མ་མཆིས་པ་ལགས་སོ། །བཅོམ་
ལྡན་འདས་འདི་ལྟ་སྟེ། ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ། བྱང་ཆུབ་སེམས་དཔའི་སྤྱོད་པ་འདི་ནི་འོད་གསལ་བ་ལགས་སོ། །བཅོམ་ལྡན་འདས་འདི་ལྟ་སྟེ། ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་བྱང་ཆུབ་སེམས་དཔའི་སྤྱོད་པ་འདི་ནི་ལྟག་
39-1-79a


ན་མ་མཆིས་པ་ལགས་སོ། །བཅོམ་ལྡན་འདས་འདི་ལྟ་སྟེ། ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་བྱང་ཆུབ་སེམས་དཔའི་སྤྱོད་པ་འདི་ནི་མངོན་པར་འཕགས་པ་ལགས་སོ། །བཅོམ་ལྡན་འདས་འདི་ལྟ་སྟེ། ཤེས་རབ་ཀྱི་ཕ་
རོལ་དུ་ཕྱིན་པ་ལ་སྤྱོད་པ་བྱང་ཆུབ་སེམས་དཔའི་སྤྱོད་པ་འདི་ནི་མི་ནོན་པ་ལགས་ཏེ། བདུད་དམ། བདུད་ཀྱི་འཁོར་ཏམ། གཞན་ཡང་མཚན་མ་ལ་སྤྱོད་པ་དང་། དམིགས་པ་ལ་སྤྱོད་པ་དང་། བདག་ཏུ་ལྟ་བ་དང་། སེམས་ཅན་དུ་ལྟ་བ་དང་། སྲོག་ཏུ་
ལྟ་བ་དང་། གང་ཟག་ཏུ་ལྟ་བ་དང་། ཆད་པར་ལྟ་བ་དང་། རྟག་པར་ལྟ་བ་དང་། ཕུང་པོར་ལྟ་བ་དང་། ཁམས་སུ་ལྟ་བ་དང་། སྐྱེ་མཆེད་དུ་ལྟ་བ་དང་། སངས་རྒྱས་སུ་ལྟ་བ་དང་། ཆོས་སུ་ལྟ་བ་དང་། དགེ་འདུན་དུ་ལྟ་བ་དང་། མྱ་ངན་ལས་འདའ་བར་ལྟ་བ་
དང་། ཐོབ་པར་འདུ་ཤེས་པ་དང་། ང་རྒྱལ་ཅན་དང་། འདོད་ཆགས་དང་། ཞེ་སྡང་དང་། གཏི་མུག་ལ་སྤྱོད་པ་དང་། ཕྱིན་ཅི་ལོག་ལ་སྤྱོད་པ་དང་། ལོག་པའི་ལམ་ལ་རབ་ཏུ་གནས་པ་གང་གིས་ཀྱང་མི་ནོན་པ་ལགས་སོ། །བཅོམ་ལྡན་འདས་འདི་ལྟ་སྟེ། 
ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་བྱང་ཆུབ་སེམས་དཔའི་སྤྱོད་པ་འདི་ནི་འཇིག་རྟེན་ཐམས་ཅད་ལས་མངོན་པར་འཕགས་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་
པོ་རབ་ཀྱི་རྩལ་གྱིས་རྣམ་པར་གནོན་པ་ལ་འདི་སྐད་ཅེས་བཀའ་སྩལ་ཏོ། །དེ་དེ་བཞིན་ནོ། །རབ་ཀྱི་རྩལ་གྱིས་རྣམ་པར་གནོན་པ། དེ་དེ་བཞིན་ཏེ། བྱང་ཆུབ་སེམས་དཔའ་འདི་ནི་བདུད་དམ། བདུད་ཀྱི་རིས་ཀྱི་ལྷའི་བུ་འམ། བདུད་ཀྱི་འཁོར་གྱིས་
མི་ནོན་པའོ། །ཐ་ན་མྱ་ངན་ལས་འདའ་བར་ལྟ་བ་འམ། མྱ་ངན་ལས་འདས་པ་ལ་མངོན་པར་ཞེན་པའི་བྱིས་པ་སོ་སོའི་སྐྱེ་བོ་ཐམས་ཅད་ཀྱིས་མི་ནོན་པའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ནི་བྱང་ཆུབ་སེམས་དཔའ་རྣམས་ཀྱི་སྤྱོད་
པ་ཡིན་གྱི། འདི་ནི་སོ་སོའི་སྐྱེ་བོ་ཐམས་ཅད་ཀྱི་སྤྱོད་པ་མ་ཡིན། འདི་ནི་སློབ་པ་དང་། མི་སློབ་པ་དང་། ཉན་ཐོས་ཀྱི་ཐེག་པ་ཅན་དང་། རང་སངས་རྒྱས་ཀྱི་ཐེག་པ་ཅན་རྣམས་ཀྱི་སྤྱོད་པ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་གལ་ཏེ་ཉན་
39-1-79b


ཐོས་ཀྱི་ཐེག་པ་ཅན་ནམ། རང་སངས་རྒྱས་ཀྱི་ཐེག་པ་ཅན་རྣམས་ཀྱི་སྤྱོད་པར་གྱུར་དུ་ཟིན་ན་ནི་དེ་དག་ལ་ཉན་ཐོས་ཀྱི་ཐེག་པ་ཅན་ནམ། རང་སངས་རྒྱས་ཀྱི་ཐེག་པ་ཅན་ཞེས་བྱ་བའི་ཐ་སྙད་འདི་གང་ཡང་མེད་པར་འགྱུར་ཏེ། བྱང་ཆུབ་སེམས་དཔའ་ཉིད་དུ་འགྱུར་
ཞིང་། དེ་དག་མི་འཇིགས་པ་བཞི་ཐོབ་པའི་དེ་བཞིན་གཤེགས་པར་འགྱུར་བ་ཞིག་ན། རབ་ཀྱི་རྩལ་གྱིས་རྣམ་པར་གནོན་པ་འདི་ལྟར་སྤྱོད་པ་འདི་ཉན་ཐོས་ཀྱི་ཐེག་པ་ཅན་རྣམས་ཀྱི་མ་ཡིན། རང་སངས་རྒྱས་ཀྱི་ཐེག་པ་ཅན་རྣམས་ཀྱི་མ་ཡིན་ཏེ། དེའི་ཕྱིར་
དེ་དག་བྱང་ཆུབ་སེམས་དཔའ་ཞེས་བྱ་བའི་གྲངས་སུ་མི་འགྲོ། མི་འཇིགས་པ་བཞི་ཐོབ་པའི་དེ་བཞིན་གཤེགས་པར་ཡང་མི་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་གང་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་འདི་ནི་མི་འཇིགས་པའི་ས་ལགས་
སོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་མ་རྒྱས་ཀྱང་སྨོན་ལམ་གྱི་དབང་དང་། སངས་རྒྱས་བཅོམ་ལྡན་འདས་རྣམས་ཀྱིས་བྱིན་གྱིས་
བརླབས་ཀྱི་དབང་གིས་མྱུར་དུ་མི་འཇིགས་པ་བཞི་འཐོབ་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་ཉན་ཐོས་ཀྱི་ཐེག་པ་ཅན་རྣམས་དང་། རང་སངས་རྒྱས་ཀྱི་ཐེག་པ་ཅན་རྣམས་ལ། མི་འཇིགས་པ་བཞི་མེད་དེ། དེ་དག་ལ་དེ་བཞིན་
གཤེགས་པ་ཡང་མི་འཇིགས་པ་བཞི་བྱིན་གྱིས་མི་རློབ་བོ། །རབ་ཀྱི་རྩལ་གྱིས་རྣམ་པར་གནོན་པ་སྨོན་ལམ་གྱི་དབང་གིས་གང་ལ་མི་འཇིགས་པ་བཞི་ཐོབ་པར་འགྱུར་བ་དེ་ནི་བྱང་ཆུབ་སེམས་དཔའི་སའོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་
རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པའི་བྱང་ཆུབ་སེམས་དཔའ་དག་ནི་སོ་སོར་ཡང་དག་པར་རིག་པ་བཞི་ཐོབ་པར་འགྱུར་བའི་ཕྱིར་ཏེ། བཞི་གང་ཞེ་ན་འདི་ལྟ་སྟེ་དོན་སོ་སོ་ཡང་དག་པར་རིག་པ་དང་། ཆོས་སོ་སོ་ཡང་དག་པར་རིག་པ་དང་། ངེས་པའི་
ཚིག་སོ་སོ་ཡང་དག་པར་རིག་པ་དང་། སྤོབས་པ་སོ་སོ་ཡང་དག་པར་རིག་པའོ། །འདི་བཞི་དང་ལྡན་པ་དེ་དག་མངོན་པར་རྫོགས་པར་སངས་མ་རྒྱས་ཀྱང་སྨོན་ལམ་གྱི་དབང་གིས་མི་འཇིགས་པ་བཞི་རབ་ཏུ་འཛིན་ཏོ། །དེ་བཞིན་གཤེགས་པས་ཀྱང་དེ་
39-1-80a


དག་དགེ་བའི་རྩ་བ་དང་ལྡན་པར་མཁྱེན་ཤེས་རབ་ཀྱི་ཕ་རོལ་དུ་ཕྱིན་པའི་ས་ཡང་རྗེས་སུ་ཐོབ་པར་མཁྱེན་ནས་མི་འཇིགས་པ་བཞི་བྱིན་གྱིས་བརླབ་བོ། །རབ་ཀྱི་རྩལ་གྱིས་རྣམ་པར་གནོན་པ་དེའི་ཕྱིར་བྱང་ཆུབ་སེམས་དཔའི་སོ་སོ་ཡང་
དག་པར་རིག་པ་བཞི་ཐོབ་པར་འདོད་ཅིང་མྱུར་དུ་མི་འཇིགས་པ་བཞི་ལ་མཁས་པར་འགྱུར་བར་འདོད་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་བསླབ་པར་བྱ་སྤྱད་པར་བྱའོ། །རབ་ཀྱི་རྩལ་གྱིས་རྣམ་པར་གནོན་པ་གཞན་ཡང་ཤེས་རབ་ཀྱི་ཕ་རོལ་
དུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔས་ཆོས་ཐམས་ཅད་ཀྱི་རྒྱུ་དང་། ཀུན་འབྱུང་བ་དང་། ནུབ་པ་དང་། འགོག་པ་ཡང་རབ་ཏུ་ཤེས་ཏེ། དེ་ཤེས་རབ་ཀྱི་ཕ་རོལ་དུ་ཕྱིན་པ་ལ་ཆོས་གང་ཡང་མི་སྦྱོར་རོ། །ཆོས་ཐམས་ཅད་ཀྱི་རྒྱུ་དང་། ཀུན་འབྱུང་
བ་དང་། འགོག་པ་དང་། ལམ་དང་། མཚན་ཉིད་རབ་ཏུ་ཤེས་པས་གཟུགས་ལ་སྒོམ་པར་ཡང་མི་བྱེད་མི་སྒོམ་པར་ཡང་མི་བྱེད། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སྒོམ་པར་ཡང་མི་བྱེད། མི་སྒོམ་
པར་ཡང་མི་བྱེད། མིང་དང་གཟུགས་ལ་སྒོམ་པར་ཡང་མི་བྱེད། མི་སྒོམ་པར་ཡང་མི་བྱེད་། ཀུན་ནས་ཉོན་མོངས་པ་དང་། རྣམ་པར་བྱང་བ་ལ་སྒོམ་པར་ཡང་མི་བྱེད། མི་སྒོམ་པར་ཡང་མི་བྱེད། ཕྱིན་ཅི་ལོག་དང་། སྒྲིབ་པ་དང་། ལྟ་བར་གྱུར་པ་ལ་
སྒོམ་པར་ཡང་མི་བྱེད། མི་སྒོམ་པར་ཡང་མི་བྱེད། འདོད་ཆགས་དང་། ཞེ་སྡང་དང་། གཏི་མུག་ལ་སྒོམ་པར་ཡང་མི་བྱེད། མི་སྒོམ་པར་ཡང་མི་བྱེད། འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་
ཁམས་ལ་སྒོམ་པར་ཡང་མི་བྱེད། མི་སྒོམ་པར་ཡང་མི་བྱེད། སེམས་ཅན་གྱི་ཁམས་དང་། བདག་གི་ཁམས་ལ་སྒོམ་པར་ཡང་མི་བྱེད། མི་སྒོམ་པར་ཡང་མི་བྱེད། ཆད་པར་ལྟ་བ་དང་། རྟག་པར་ལྟ་བ་ལ་སྒོམ་པར་ཡང་མི་
བྱེད། མི་སྒོམ་པར་ཡང་མི་བྱེད། སྦྱིན་པ་དང་། སེར་སྣ་དང་། ཚུལ་ཁྲིམས་དང་། འཆལ་པའི་ཚུལ་ཁྲིམས་དང་། བཟོད་པ་དང་། གནོད་སེམས་དང་། བརྩོན་འགྲུས་དང་། ལེ་ལོ་དང་། བསམ་གཏན་དང་། རྣམ་པར་གཡེང་བ་དང་། 
39-1-80b


ཤེས་རབ་དང་། འཆལ་པའི་ཤེས་རབ་ལ་སྒོམ་པར་ཡང་མི་བྱེད། མི་སྒོམ་པར་ཡང་མི་བྱེད། དྲན་པ་ཉེ་བར་གཞག་པ་དང་། ཡང་དག་པར་སྤོང་བ་དང་། ཕྱིན་ཅི་མ་ལོག་པ་དང་། རྫུ་འཕྲུལ་གྱི་རྐང་པ་དང་། ཚད་མེད་པ་ལ་སྒོམ་
པར་ཡང་མི་བྱེད་། མི་སྒོམ་པར་ཡང་མི་བྱེད། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ཏིང་ངེ་འཛིན་དང་། སྙོམས་པར་འཇུག་པ་ལ་སྒོམ་པར་ཡང་མི་བྱེད། མི་སྒོམ་པར་ཡང་མི་བྱེད། རྟེན་ཅིང་འབྲེལ་བར་
འབྱུང་བ་ལ་སྒོམ་པར་ཡང་མི་བྱེད། མི་སྒོམ་པར་ཡང་མི་བྱེད། སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་ལ་སྒོམ་པར་ཡང་མི་བྱེད། མི་སྒོམ་པར་ཡང་མི་བྱེད། མི་སྐྱེ་བའི་ཤེས་པ་དང་། ཟད་པ་ཤེས་པ་
དང་། མངོན་པར་འདུ་མི་བྱེད་པ་ཤེས་པ་ལ་སྒོམ་པར་ཡང་མི་བྱེད། མི་སྒོམ་པར་ཡང་མི་བྱེད། སོ་སོའི་སྐྱེ་བོའི་ས་དང་། ཉན་ཐོས་ཀྱི་ས་དང་། རང་སངས་རྒྱས་ཀྱི་ས་དང་། བྱང་ཆུབ་སེམས་དཔའི་ས་ལ་བསྒོམ་པར་ཡང་མི་བྱེད། མི་སྒོམ་པར་ཡང་
མི་བྱེད། སོ་སོའི་སྐྱེ་བོའི་ཆོས་དང་། ཉན་ཐོས་ཀྱི་ཆོས་དང་། རང་སངས་རྒྱས་ཀྱི་ཆོས་དང་། བྱང་ཆུབ་སེམས་དཔའི་ཆོས་དང་། སངས་རྒྱས་ཀྱི་ཆོས་ལ་བསྒོམ་པར་ཡང་མི་བྱེད། མི་སྒོམ་པར་ཡང་མི་བྱེད། ཞི་གནས་དང་། ལྷག་མཐོང་ལ་སྒོམ་
པར་ཡང་མི་བྱེད། མི་སྒོམ་པར་ཡང་མི་བྱེད། མྱ་ངན་ལས་འདས་པ་ལ་སྒོམ་པར་ཡང་མི་བྱེད། མི་སྒོམ་པར་ཡང་མི་བྱེད། འདས་པ་དང་། མ་འོངས་པ་དང་། ད་ལྟར་བྱུང་བའི་ཡེ་ཤེས་མཐོང་བ་ལ་བསྒོམ་པར་ཡང་མི་བྱེད། མི་སྒོམ་པར་ཡང་མི་བྱེད། 
ཐོགས་པ་མེད་པ་ལ་སྒོམ་པར་ཡང་མི་བྱེད། མི་སྒོམ་པར་ཡང་མི་བྱེད། སངས་རྒྱས་ཀྱི་ཡེ་ཤེས་དང་། སངས་རྒྱས་ཀྱི་མི་འཇིགས་པ་ལ་སྒོམ་པར་ཡང་མི་བྱེད། མི་སྒོམ་པར་ཡང་མི་བྱེད་དོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་
རྣམ་པར་གནོན་པ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་བསྒོམ་པར་བྱ་བ་མ་ཡིན་པའི་ཕྱིར་རོ། །མིང་དང་གཟུགས་དང་། ཕྱིན་ཅི་ལོག་དང་། ལྟ་བར་གྱུར་པ་དང་། དྲན་པ་ཉེ་བར་གཞག་པ་
39-1-81a


དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་། སྟོབས་རྣམས་དང་། བྱང་ཆུབ་ཀྱི་ཡན་ལག་དང་། ཏིང་ངེ་འཛིན་དང་། སྙོམས་པར་འཇུག་པ་དང་། མངོན་པར་ཤེས་པ་དང་། ཟད་པ་ཤེས་པ་དང་། 
མངོན་པར་ཤེས་པ་དང་། མངོན་པར་འདུ་མི་བྱེད་པ་ཤེས་པ་ནི་བསྒོམ་པར་བྱ་བ་མ་ཡིན་པའི་ཕྱིར་རོ། །སོ་སོའི་སྐྱེ་བོའི་ས་དང་། ཉན་ཐོས་ཀྱི་ས་དང་། རང་སངས་རྒྱས་ཀྱི་ས་དང་། བྱང་ཆུབ་སེམས་དཔའི་ས་ནི་བསྒོམ་པར་བྱ་བ་མ་ཡིན་པའི་ཕྱིར་རོ། །སོ་
སོའི་སྐྱེ་བོ་དང་། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའི་ཆོས་ནི་བསྒོམ་པར་བྱ་བ་མ་ཡིན་པའི་ཕྱིར་རོ། །མྱ་ངན་ལས་འདས་པ་ནི་བསྒོམ་པར་བྱ་བ་མ་ཡིན་པའི་ཕྱིར་རོ། །འདས་པ་དང་། མ་འོངས་པ་དང་། ད་ལྟར་བྱུང་བའི་
ཡེ་ཤེས་མཐོང་བ་ནི་བསྒོམ་པར་བྱ་བ་མ་ཡིན་པའི་ཕྱིར་རོ། །ཐོགས་པ་མེད་པའི་ཡེ་ཤེས་ནི་བསྒོམ་པར་བྱ་བ་མ་ཡིན་པའི་ཕྱིར་རོ། །ཡང་དག་པར་རྫོགས་པའི་སངས་རྒྱས་ཀྱི་ཡེ་ཤེས་ཀྱང་བསྒོམ་པར་བྱ་བ་མ་ཡིན་པའི་ཕྱིར་རོ། །དེ་ཅིའི་ཕྱིར་ཞེ་ན། 
རབ་ཀྱི་རྩལ་གྱིས་རྣམ་པར་གནོན་པ་དངོས་པོ་ཡོངས་སུ་གྲུབ་པ་གང་ཡང་མེད་པའི་ཕྱིར་ཐ་སྙད་འདི་དག་ཐམས་ཅད་ནི་ཡང་དག་པ་མ་ཡིན་པ་སྟེ། དེ་ལ་ངོ་བོ་ཉིད་གང་ཡང་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་ཆོས་ཐམས་ཅད་ནི་ཡང་
དག་པ་མ་ཡིན་པ་མ་བྱུང་བ་སྟེ། དངོས་པོ་མེད་པའི་རང་བཞིན་ནོ། །དེ་ཅིའི་ཕྱིར་ཞེ་ན། ཕྱིན་ཅི་ལོག་གང་ཡིན་པ་དེ་ནི་ཡང་དག་པ་མ་ཡིན་ན་ཆོས་ཐམས་ཅད་ནི་ཕྱིན་ཅི་ལོག་ལས་བྱུང་བའི་ཕྱིར་རོ། །ཕྱིན་ཅི་ལོག་གང་ཡིན་པ་དེ་ཡང་དག་པ་
མ་ཡིན་པའོ། །རབ་ཀྱི་རྩལ་གྱིས་རྣམ་པར་གནོན་པ་ཆོས་ཐམས་ཅད་ནི་དངོས་པོ་མེད་པ་སྟེ། རང་བཞིན་མེད་པའི་ཕྱིར་དངོས་པོ་མི་དམིགས་སོ། །རབ་ཀྱི་རྩལ་གྱིས་རྣམ་པར་གནོན་པ་དངོས་པོ་མེད་པ་ཞེས་བྱ་བ་ནི་ཡང་དག་པ་མ་ཡིན་
ཞིང་མ་བྱུང་བ་སྟེ། དེའི་ཕྱིར་དངོས་པོ་མེད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་དངོས་པོ་མེད་པ་ཞེས་བྱ་བ་དེ་ནི་ཡོངས་སུ་བསྟན་པའོ། །གང་ལ་དངོས་པོ་མེད་པ་དེ་ལ་བསྒོམ་པའང་མེད་མི་བསྒོམ་པ་ཡང་མེད་དོ། །རབ་ཀྱི་རྩལ་གྱིས་རྣམ་
39-1-81b


པར་གནོན་པ་སེམས་ཅན་རྣམས་ནི་ཕྱིན་ཅི་ལོག་ལས་བྱུང་བས་བསྒོམ་པར་ཡང་མི་བྱེད། མི་སྒོམ་པར་ཡང་མི་བྱེད་དེ། དེ་ལ་ནི་དངོས་པོ་ཅི་ཡང་མེད་དོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་ཆོས་ཐམས་ཅད་ནི་དངོས་པོ་མེད་པའི་
ཕྱིར། དངོས་པོ་མེད་པའི་རང་བཞིན་ཏེ། དངོས་པོ་དང་བྲལ་བས་འདི་ལ་ནི་བསྒོམ་པར་བྱ་བ་ཅི་ཡང་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་གང་གི་ཚེ་བྱང་ཆུབ་སེམས་དཔའ་ཆོས་འདི་དག་ལ་ཆོས་གྱི་རྗེས་སུ་ལྟ་ཞིང་གནས་ཏེ། ཤེས་རབ་ཀྱི་ཕ་
རོལ་དུ་ཕྱིན་པ་ལ་སྤྱོད་ཅིང་ཆོས་གང་ལ་ཡང་བསྒོམ་པར་ཡང་མི་བྱེད་མི་སྒོམ་པར་ཡང་མི་བྱེད་པ་དེ་ནི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་ཅིང་དེ་ལྟར་གནས་ན་བྱང་ཆུབ་སེམས་
དཔའི་ཤེས་རབ་ཀྱི་ཕ་རོལ་དུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་ནི། གཟུགས་དང་ཕྲད་
པའི་རྒྱུར་སེམས་མི་སྐྱེད་དོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་དང་ཕྲད་པའི་རྒྱུར་སེམས་མི་སྐྱེད། ཐ་བ་དང་ལྡན་པའི་སེམས་མི་སྐྱེད། གནོད་སེམས་དང་ལྡན་པའི་སེམས་མི་བསྐྱེད། སེར་སྣ་དང་ལྡན་
པའི་སེམས་མི་བསྐྱེད། ཀུན་ནས་ཉོན་མོངས་པ་དང་ལྡན་པའི་སེམས་མི་བསྐྱེད། ལེ་ལོ་དང་ལྡན་པའི་སེམས་མི་བསྐྱེད། རྣམ་པར་གཡེང་བ་དང་ལྡན་པའི་སེམས་མི་བསྐྱེད། འཆལ་པའི་ཤེས་རབ་དང་ལྡན་པའི་སེམས་མི་བསྐྱེད། འདོད་པ་དང་
ཕྲད་པ་དང་ལྡན་པའི་སེམས་མི་བསྐྱེད། གཟུགས་ཀྱི་དམིགས་པ་ལ་མངོན་པར་ཞེན་པ་དང་ལྡན་པའི་སེམས་མི་བསྐྱེད། བརྣབ་སེམས་དང་ལྡན་པའི་སེམས་མི་བསྐྱེད། ཕྲ་མ་དང་ལྡན་པའི་སེམས་མི་བསྐྱེད། ལོག་པར་ལྟ་བ་དང་ལྡན་པའི་
སེམས་མི་སྐྱེད། ལོངས་སྤྱོད་ལ་མངོན་པར་ཞེན་པ་དང་ལྡན་པའི་སེམས་མི་སྐྱེད། དབང་ཕྱུག་ལ་མངོན་པར་ཞེན་པ་དང་ལྡན་པའི་སེམས་མི་བསྐྱེད། ལོངས་སྤྱོད་ཆེན་པོའི་རིགས་སུ་སྐྱེས་པ་ལ་མངོན་པར་ཞེན་པ་དང་ལྡན་པའི་སེམས་མི་བསྐྱེད། ལྷར་
39-1-82a


སྐྱེ་བ་ལ་མངོན་པར་ཞེན་པ་དང་ལྡན་པའི་སེམས་མི་བསྐྱེད། འདོད་པའི་ཁམས་ལ་མངོན་པར་ཞེན་པ་དང་ལྡན་པའི་སེམས་མི་བསྐྱེད། གཟུགས་དང་གཟུགས་མེད་པའི་ཁམས་ལ་མངོན་པར་ཞེན་པ་དང་ལྡན་པའི་སེམས་མི་སྐྱེད། ཉན་
ཐོས་ཀྱི་ས་དང་ལྡན་པའི་སེམས་མི་སྐྱེད། རང་སངས་རྒྱས་ཀྱི་ས་དང་ལྡན་པའི་སེམས་མི་བསྐྱེད། བྱང་ཆུབ་སེམས་དཔའི་སྤྱོད་པ་ལ་མངོན་པར་ཞེན་པ་དང་ལྡན་པའི་སེམས་མི་བསྐྱེད་དེ། ཐ་ན་མྱ་ངན་ལས་འདས་པར་ལྟ་བ་དང་ལྡན་པའི་སེམས་ཀྱང་མི་
བསྐྱེད་དོ། །དེ་སེམས་རྣམ་པར་དག་པ་འདི་དང་ལྡན་པའི་སེམས་ཅན་རྣམས་ལ་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཀྱིས་ཁྱབ་པར་བྱེད་དོ། །དེས་སེམས་ཅན་དུ་འདུ་ཤེས་པ་རྣམ་པར་བཤིག་པ་ཡིན་ཏེ། སེམས་ཅན་དུ་འདུ་ཤེས་
པ་ལའང་མི་གནས། ཚངས་པའི་གནས་བཞི་པོ་དེ་དག་ལའང་མངོན་པར་མི་ཞེན་ཏེ། ཐབས་ལ་མཁས་པ་དང་ལྡན་པས་ཤེས་རབ་ཀྱི་ཕ་རོལ་དུ་ཕྱིན་པ་ཆོས་དེ་དག་དང་ལྡན་ཞིང་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་དེའི་ཤེས་རབ་ཀྱི་ཕ་རོལ་དུ་
ཕྱིན་པ་བསྒོམ་པ་མྱུར་དུ་ཡོངས་སུ་རྫོགས་པར་འགྱུར་རོ། །དེ་ལྟར་ཤེས་རབ་ཀྱི་ཕ་རོལ་དུ་ཕྱིན་པ་བསྒོམ་པ་དེ་ནི་གཟུགས་ཁས་མི་ལེན་མི་འཛིན་ཏོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཁས་མི་ལེན་མི་འཛིན་
ཏོ། །ཕྱིན་ཅི་ལོག་དང་། སྒྲིབ་པ་དང་། ལྟ་བར་གྱུར་པ་ཁས་མི་ལེན་མི་འཛིན་ཏོ། །འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ཁས་མི་ལེན་མི་འཛིན་ཏོ། །ཆད་པ་དང་རྟག་པ་ཁས་མི་ལེན་མི་འཛིན་ཏོ། །རྟེན་
ཅིང་འབྲེལ་པར་འབྱུང་བ་ཁས་མི་ལེན་མི་འཛིན་ཏོ། །ས་དང་། ཆུ་དང་མེ་དང་། རླུང་གི་ཁམས་ཁས་མི་ལེན་མི་འཛིན་ཏོ། །འདོད་ཆགས་དང་། ཞེ་སྡང་དང་། གཏི་མུག་ཁས་མི་ལེན་མི་འཛིན་ཏོ། །ནམ་མཁའི་ཁམས་ཁས་མི་ལེན་མི་འཛིན་ཏོ། །
ཚུལ་ཁྲིམས་དང་། འཆལ་པའི་ཚུལ་ཁྲིམས་ཁས་མི་ལེན་མི་འཛིན་ཏོ། །བཟོད་པ་དང་། གནོད་སེམས་དང་། བརྩོན་འགྲུས་དང་། ལེ་ལོ་དང་། བསམ་གཏན་དང་། རྣམ་པར་གཡེང་བ་དང་། ཤེས་རབ་དང་། འཆལ་པའི་ཤེས་རབ་ཁས་མི་
39-1-82b


ལེན་མི་འཛིན་ཏོ། །དྲན་པ་ཉེ་བར་གཞག་པ་དང་། ཡང་དག་པའི་སྤོང་བ་དང་། ཚད་མེད་པ་དང་། རྫུ་འཕྲུལ་གྱི་རྐང་པ་ཁས་མི་ལེན་མི་འཛིན་ཏོ། །དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ཏིང་ངེ་འཛིན་དང་། སྙོམས་པར་འཇུག་པ་
ཁས་མི་ལེན་མི་འཛིན་ཏོ། །མངོན་པར་ཤེས་པ་ཁས་མི་ལེན་མི་འཛིན་ཏོ། །སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་ཁས་མི་ལེན་མི་འཛིན་ཏོ། །མི་སྐྱེ་བ་ཤེས་པ་དང་། ཟད་པ་ཤེས་པ་དང་། མངོན་པར་འདུ་མི་བྱེད་པ་
ཁས་མི་ལེན་མི་འཛིན་ཏོ། །བདག་གི་ཁམས་དང་། སེམས་ཅན་གྱི་ཁམས་དང་། ཆོས་ཀྱི་དབྱིངས་ཁས་མི་ལེན་མི་འཛིན་ཏོ། །སོ་སོའི་སྐྱེ་བོ་དང་། ཉན་ཐོས་དང་། རང་སངས་རྒྱས་ཀྱི་ས་ཁས་མི་ལེན་མི་འཛིན་ཏོ། །སོ་སོའི་སྐྱེ་བོའི་ཆོས་
དང་། ཉན་ཐོས་དང་། རང་སངས་རྒྱས་ཀྱི་ཆོས་ཁས་མི་ལེན་མི་འཛིན་ཏོ། །འདས་པ་དང་། མ་འོངས་པ་དང་། ད་ལྟར་བྱུང་བའི་ཡེ་ཤེས་མཐོང་བ་ཁས་མི་ལེན་མི་འཛིན་ཏོ། །ཐོགས་པ་མེད་པའི་ཡེ་ཤེས་མཐོང་བ་ཁས་མི་ལེན་མི་འཛིན་ཏོ། །
སངས་རྒྱས་ཀྱི་ཡེ་ཤེས་དང་། སྟོབས་དང་། མི་འཇིགས་པ་ཁས་མི་ལེན་མི་འཛིན་ཏོ། །སྒྲིབ་པ་ཁས་མི་ལེན་མི་འཛིན་ཏོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་ཆོས་ཐམས་ཅད་ཁས་ལེན་པ་མེད་ཅིང་འཛིན་པ་མེད་
དེ་གང་གིས་ཀྱང་ཁས་བླངས་པ་མེད་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་གཟུང་བར་བྱ་བའི་ཆོས་གང་ཡང་མེད་དེ་སུས་ཀྱང་མ་བཟུང་ངོ་། །དེ་ཅིའི་ཕྱིར་ཞེ་ན། དེ་ལ་གཟུང་བར་བྱ་བ་འམ། འཛིན་པར་འགྱུར་བ་ཅི་ཡང་
མེད་པའི་ཕྱིར་རོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་སྒྱུ་མ་ལྟ་བུའི་ཕྱིར་སྙིང་པོ་མེད་པའོ། །ཆོས་ཐམས་ཅད་ནི་སྙིང་པོ་མི་དམིགས་པས་ཡ་མ་བརླའོ། །ཆོས་ཐམས་ཅད་ནི་གཟུང་དུ་མེད་པས་མིག་ཡོར་དང་མཚུངས་སོ། །
ཆོས་ཐམས་ཅད་ནི་རང་བཞིན་མེད་པས་གསོག་གོ། །ཆོས་ཐམས་ཅད་ནི་མཉེ་མི་བཟོད་པའི་ཕྱིར་དབུ་བ་རྡོས་པ་ལྟ་བུའོ། །ཆོས་ཐམས་ཅད་ནི་བྱུང་ནས་འཇིག་ཅིང་འཇུ་བས་ཆུའི་ཆུ་བུར་དང་མཚུངས་སོ། །ཆོས་ཐམས་ཅད་ནི་
39-1-83a


ཕྱིན་ཅི་ལོག་ལས་བྱུང་བས་སྨིག་རྒྱུ་དང་འདྲའོ། །ཆོས་ཐམས་ཅད་ནི་སྙིང་པོ་མེད་པས་ཆུ་ཤིང་གི་སྙིང་པོ་ལྟ་བུའོ། །ཆོས་ཐམས་ཅད་ནི་གཟུང་དུ་མེད་པས་ཆུ་ཟླ་དང་མཚུངས་སོ། །ཆོས་ཐམས་ཅད་ནི་ཡོད་པ་མ་ཡིན་པ་
ལ་ཡོངས་སུ་བརྟགས་པས་འཇའ་ཚོན་དང་འདྲའོ། །ཆོས་ཐམས་ཅད་ནི་ཀུན་ནས་ལྡང་བ་མེད་པས་གཡོ་བ་མེད་དོ། །ཆོས་ཐམས་ཅད་ནི་ཡ་མ་བརླའི་རང་བཞིན་ལ་རྟོག་པས་ཆང་པ་སྟོང་པ་དང་མཚུངས་སོ། །རབ་ཀྱི་རྩལ་གྱིས་རྣམ་པར་
གནོན་པ་དེ་ལྟར་ཆོས་ཐམས་ཅད་ཡང་དག་པར་རྗེས་སུ་མཐོང་བའི་བྱང་ཆུབ་སེམས་དཔའ་ནི་ཅི་ཡང་ཁས་མི་ལེན་མི་འཛིན་ཏོ། །མི་འདུག་གོ། །ལྷག་པར་ཡང་ཆགས་ནས་མི་གནས་སོ། །རབ་ཀྱི་རྩལ་གྱིས་རྣམ་པར་གནོན་པ་འདི་ནི་བྱང་ཆུབ་
སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་ཆོས་ཐམས་ཅད་ལ་དད་པ་དང་། མི་གནས་པ་དང་། ལྷག་པར་ཆགས་པ་མེད་པ་དང་། མངོན་པར་མི་ཆགས་པའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་
སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་གཞན་ཡང་དེ་ལྟར་སློབ་པའི་བྱང་ཆུབ་སེམས་དཔའ་ནི་གཟུགས་ལ་མི་སློབ་གཟུགས་ལས་ཡང་དག་
པར་འདའ་བར་བྱ་བའི་ཕྱིར་མི་སློབ། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མི་སློབ། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལས་ཡང་དག་པར་འདའ་བར་བྱ་བའི་ཕྱིར་ཡང་མི་
སློབ། གཟུགས་སྐྱེ་བ་ལ་མི་སློབ། གཟུགས་འགོག་པ་ལ་མི་སློབ། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་སྐྱེ་བ་ལ་མི་སློབ། རྣམ་པར་ཤེས་པ་འགོག་པ་ལ་མི་སློབ། གཟུགས་འདུལ་བ་དང་། མི་འདུལ་བའི་ཕྱིར་
མི་སློབ། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འདུལ་བ་དང་མི་འདུལ་བའི་ཕྱིར་མི་སློབ། གཟུགས་ལས་འདའ་བ་དང་། འཇུག་པ་དང་། གནས་པ་དང་། མི་གནས་པའི་ཕྱིར་ཡང་མི་སློབ། ཚོར་བ་དང་། འདུ་ཤེས་དང་། འདུ་བྱེད་
39-1-83b


རྣམས་དང་། རྣམ་པར་ཤེས་པ་ལས་འདའ་བ་དང་། འཇུག་པ་དང་། གནས་པ་དང་། མི་གནས་པའི་ཕྱིར་ཡང་མི་སློབ་བོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སློབ་པའི་བྱང་ཆུབ་སེམས་དཔའ་ནི་གཟུགས་རྟག་པར་ཡང་མི་སློབ། གཟུགས་
བདེ་བ་དང་། གཟུགས་སྡུག་པ་དང་། གཟུགས་བདག་ཏུ་ཡང་མི་སློབ། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རྟག་པར་ཡང་མི་སློབ། རྣམ་པར་ཤེས་པ་བདེ་བ་དང་། རྣམ་པར་ཤེས་པ་སྡུག་པ་དང་། རྣམ་པར་ཤེས་པ་བདག་ཏུ་ཡང་མི་
སློབ་བོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སློབ་པའི་བྱང་ཆུབ་སེམས་དཔའ་ནི་གཟུགས་འདས་པའི་དམིགས་པ་ལ་མི་སྤྱོད། གཟུགས་མ་འོངས་པའི་དམིགས་པ་ལ་མི་སྤྱོད། གཟུགས་ད་ལྟར་བྱུང་བའི་དམིགས་པ་ལ་མི་སྤྱོད་དོ། །ཚོར་བ་དང་། 
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འདས་པའི་དམིགས་པ་ལ་མི་སྤྱོད། མ་འོངས་པའི་དམིགས་པ་ལ་མི་སྤྱོད། ད་ལྟར་བྱུང་བའི་དམིགས་པ་ལ་མི་སྤྱོད་དོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་
དཔའ་ནི་འདས་པ་ལ་སྟོང་པའི་རྣམ་པ་དང་། ཞི་བའི་རྣམ་པ་དང་། བདག་མེད་པའི་རྣམ་པར་སོ་སོར་རྟོག་སྟེ། གང་འདས་པ་དེ་ལ་སྟོང་པ་དང་། ཞི་བ་དང་། བདག་མེད་པ་ཞེས་དེ་ལྟར་ཡང་མི་སྤྱོད་དོ། །མ་འོངས་པ་ལ་སྟོང་པའི་རྣམ་པ་དང་། ཞི་བའི་རྣམ་
པ་དང་། བདག་མེད་པའི་རྣམ་པར་སོ་སོར་རྟོག་སྟེ། གང་མ་འོངས་པ་དེ་ལ་སྟོང་པ་དང་། བདག་མེད་པ་ཞེས་དེ་ལྟར་ཡང་མི་སྤྱོད་དོ། །ད་ལྟར་བྱུང་བ་ལ་སྟོང་པའི་རྣམ་པ་དང་། ཞི་བའི་རྣམ་པ་དང་། བདག་མེད་པའི་རྣམ་པར་སོ་སོར་རྟོག་སྟེ། གང་
ད་ལྟར་བྱུང་བ་དེ་ལ་སྟོང་པ་དང་། བདག་མེད་པ་ཞེས་དེ་ལྟར་ཡང་མི་སྤྱོད་དོ། །འདས་པ་ལ་སྟོང་པ་འམ། བདག་གམ། བདག་གི་འམ། རྟག་པ་འམ། བརྟན་པ་འམ། ཐེར་ཟུག་པ་འམ། མི་འགྱུར་བའི་ཆོས་ཅན་ཞེས་དེ་ལྟར་ཡང་མི་སྤྱོད་དོ། །
མ་འོངས་པ་ལ་སྟོང་པ་འམ། བདག་གམ། བདག་གི་འམ། རྟག་པ་འམ། བརྟན་པ་འམ། ཐེར་ཟུག་པ་འམ། མི་འགྱུར་བའི་ཆོས་ཅན་ཞེས་དེ་ལྟར་ཡང་མི་སྤྱོད་དོ། །ད་ལྟར་བྱུང་བ་ལ་སྟོང་པ་འམ། བདག་གམ། བདག་གི་འམ། རྟག་པ་འམ། 
39-1-84a


བརྟན་པ་འམ། ཐེར་ཟུག་པ་འམ། མི་འགྱུར་བའི་ཆོས་ཅན་ཞེས་དེ་ལྟར་ཡང་མི་སྤྱོད་དོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་བསྒོམ་པ་ཡོངས་སུ་
རྫོགས་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ལ་བདུད་སྡིག་ཅན་གྱིས་སྐབས་མི་རྙེད་དོ། །དེ་ལྟར་སྤྱོད་པ་ནི་བདུད་ཀྱི་ལས་ཐམས་ཅད་ཁོང་དུ་ཆུད་པས་བདུད་ཀྱི་ལས་དེ་དག་གིས་མི་འཕྲོགས་
སོ། །རབ་ཀྱི་རྩལ་གྱིས་རྣམ་པར་གནོན་པ་གཞན་ཡང་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་གཟུགས་ལ་མི་དམིགས། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མི་དམིགས། ཕྱིན་ཅི་ལོག་དང་། ལྟ་བར་
གྱུར་པ་ལ་མི་དམིགས། བདག་ཏུ་མངོན་པར་ཞེན་པ་ལ་མི་དམིགས། སེམས་ཅན་དུ་མངོན་པར་ཞེན་པ་ལ་མི་དམིགས། ཆད་པ་དང་། རྟག་པ་ལ་མི་དམིགས། མཐའ་དང་། མཐའ་མེད་པ་ལ་མི་དམིགས། གཟུགས་དང་། སྒྲ་དང་། དྲི་དང་། རོ་
དང་། རེག་པ་ལ་མི་དམིགས། འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ལ་མི་དམིགས། རྟེན་ཅིང་འབྲེལ་པར་འབྱུང་བ་ལ་མི་དམིགས། ས་དང་ཆུ་དང་མེ་དང་རླུང་དང་། ནམ་མཁའི་ཁམས་ལ་མི་དམིགས། 
བདེན་པ་དང་། བརྫུན་པ་ལ་མི་དམིགས། འདུ་བ་དང་འབྲལ་བ་ལ་མི་དམིགས། འདོད་ཆགས་དང་། ཞེ་སྡང་དང་། གཏི་མུག་ལ་མི་དམིགས། འདོད་ཆགས་དང་། ཞེ་སྡང་དང་གཏི་མུག་སྤོང་བ་ལ་མི་དམིགས། ཚུལ་ཁྲིམས་དང་། འཆལ་པའི་ཚུལ་
ཁྲིམས་ལ་མི་དམིགས། བཟོད་པ་དང་གནོད་སེམས་ལ་མི་དམིགས། བརྩོན་འགྲུས་དང་། ལེ་ལོ་ལ་མི་དམིགས། བསམ་གཏན་དང་རྣམ་པར་གཡེང་བ་ལ་མི་དམིགས། ཤེས་རབ་དང་འཆལ་པའི་ཤེས་རབ་ལ་མི་དམིགས། དྲན་པ་ཉེ་བར་
གཞག་པ་དང་། ཡང་དག་པའི་སྤོང་བ་དང་། རྫུ་འཕྲུལ་གྱི་རྐང་པ་དང་། ཕྱིན་ཅི་ལོག་པ་ལ་མི་དམིགས། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ཏིང་ངེ་འཛིན་དང་། སྙོམས་པར་འཇུག་པ་ལ་མི་དམིགས། བྱམས་པ་དང་། སྙིང་རྗེ་དང་། 
39-1-84b


དགའ་བ་དང་། བཏང་སྙོམས་ལ་མི་དམིགས། མི་སྐྱེ་བ་ཤེས་པ་དང་། ཟད་པ་ཤེས་པ་དང་། མངོན་པར་འདུ་མི་བྱེད་པ་ཤེས་པ་ལ་མི་དམིགས། སོ་སོའི་སྐྱེ་བོ་དང་། ཉན་ཐོས་དང་། རང་སངས་རྒྱས་ཀྱི་ས་ལ་མི་དམིགས། སོ་སོའི་སྐྱེ་བོ་དང་། ཉན་ཐོས་
དང་། རང་སངས་རྒྱས་ཀྱི་ཆོས་ལ་མི་དམིགས། ཀུན་འབྱུང་བ་དང་། འགོག་པ་དང་། ལམ་ལ་མི་དམིགས། མངོན་པར་ཤེས་པ་དང་། ཡེ་ཤེས་མཐོང་བ་ལ་མི་དམིགས། རྣམ་པར་གྲོལ་བ་ལ་མི་དམིགས། རྣམ་པར་གྲོལ་བའི་ཡེ་ཤེས་མཐོང་བ་ལ་
མི་དམིགས། མྱ་ངན་ལས་འདས་པ་ལ་མི་དམིགས། འདས་པ་དང་མ་འོངས་པ་དང་། ད་ལྟར་བྱུང་བའི་ཡེ་ཤེས་མཐོང་བ་ལ་མི་དམིགས། ཐོགས་པ་མེད་པའི་ཡེ་ཤེས་ལ་མི་དམིགས། །སངས་རྒྱས་ཀྱི་ཡེ་ཤེས་ལ་མི་དམིགས། སངས་རྒྱས་ཀྱི་སྟོབས་
དང་མི་འཇིགས་པ་ལ་མི་དམིགས། སངས་རྒྱས་ཀྱི་ཞིང་ཡོངས་སུ་དག་པ་ལ་མི་དམིགས། མཚན་ཡོངས་སུ་དག་པ་ལ་མི་དམིགས། ཉན་ཐོས་ཕུན་སུམ་ཚོགས་པ་ལ་མི་དམིགས། རང་སངས་རྒྱས་ཕུན་སུམ་ཚོགས་པ་ལ་མི་དམིགས། བྱང་ཆུབ་
སེམས་དཔའ་ཕུན་སུམ་ཚོགས་པ་ལ་མི་དམིགས་སོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་གང་དུ་འདི་དག་ལ་དམིགས་པར་འགྱུར་བའི་འཛིན་པ་གང་ཡང་ཆོས་ཐམས་ཅད་ལ་མེད་དེ་ཆོས་ཐམས་ཅད་དམིགས་པ་མེད་པའི་ཕྱིར་རོ། །
རབ་ཀྱི་རྩལ་གྱིས་རྣམ་པར་གནོན་པ་ཇི་སྲིད་དུ་དམིགས་པ་དེ་སྲིད་དུ་ལྷག་པར་ཆགས་པ་དང་། དེ་སྲིད་དུ་མངོན་པར་ཞེན་པ་དང་། དེ་སྲིད་དུ་ལེན་པ་དང་། དེ་སྲིད་དུ་སྡུག་བསྔལ་དང་། ཡིད་མི་བདེ་བ་དང་། དེ་སྲིད་དུ་མྱ་ངན་མི་བཟད་པའི་ཟུག་རྔུ་དང་། 
འཁྲུག་པ་དང་། སྨྲེ་སྔགས་འདོན་པ་འབྱུང་བར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་ཇི་སྲིད་དུ་དམིགས་པ་དེ་སྲིད་དུ་འཆིང་བའོ། །དེ་སྲིད་དུ་ལམ་མེད་པའོ། །དེ་སྲིད་དུ་སྡུག་བསྔལ་དང་ཡིད་མི་བདེ་བའོ། །ཇི་སྲིད་དུ་དམིགས་པ་དེ་སྲིད་དུ་
རློམ་སེམས་དང་། གཡོ་བ་དང་། སྤྲོས་པའོ། །ཇི་སྲིད་དུ་དམིགས་པ་དེ་སྲིད་དུ་འཐབ་པ་དང་། རྩོད་པ་དང་། འགྱེད་པའོ། །ཇི་སྲིད་དུ་དམིགས་པ་དེ་སྲིད་དུ་མ་རིག་པའི་མུན་པ་དང་། གཏི་མུག་གོ། །ཇི་སྲིད་དུ་དམིགས་པ་དེ་སྲིད་དུ་འཇིགས་པའོ། །དེ་སྲིད་དུ་
39-1-85a


སྐྲག་པའོ། །ཇི་སྲིད་དུ་དམིགས་པ་དེ་སྲིད་དུ་བདུད་ཀྱི་ཞགས་པ་དང་། བདུད་ཀྱིས་འཇོམས་པའོ། །ཇི་སྲིད་དུ་དམིགས་པ་དེ་སྲིད་དུ་སྡུག་བསྔལ་གྱིས་རབ་ཏུ་ཉེན་ཅིང་བདེ་བ་ཀུན་དུ་ཚོལ་བར་འགྱུར་བའོ། །རབ་ཀྱི་
རྩལ་གྱིས་རྣམ་པར་གནོན་པ་དེ་ལ་བྱང་ཆུབ་སེམས་དཔས་ཉེས་དམིགས་འདི་དག་མཐོང་ནས་ཆོས་གང་ལ་ཡང་མི་དམིགས་སོ། །དེ་མི་དམིགས་པས། ཆོས་གང་ཡང་མི་འཛིན་ཏོ། །དེ་ཆོས་ཐམས་ཅད་ལ་འཛིན་པ་འམ། ཀུན་
འཛིན་པར་མི་གནས་སོ། །དམིགས་པ་མེད་པ་དང་། དམིགས་པ་ཡ་མ་རླ་དེ་དག་ལ་ཡང་རློམ་སེམས་སུ་མི་བྱེད་དོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་
ཆོས་གང་ལ་ཡང་མངོན་པར་མི་ཞེན། ཆོས་གང་ལ་ཡང་མངོན་པར་མི་དགའོ། །ཆོས་གང་ལ་ཡང་ལྷག་པར་ཆགས་ནས་མི་གནས་ཏེ། རབ་ཀྱི་རྩལ་གྱིས་རྣམ་པར་གནོན་པ་འདི་ནི་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་
པའི་ཆོས་ཐམས་ཅད་ལ་དམིགས་པ་དང་བྲལ་བའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་ལ་བསྒོམ་པ་ཡོངས་སུ་རྫོགས་པར་འགྱུར་ཏེ་དེ་ལ་བདུད་སྡིག་ཅན་དང་། བདུད་ཀྱི་རིས་
ཀྱི་ལྷ་དང་། བདུད་ཀྱི་འཁོར་དང་། བདུད་ཀྱི་བྱིན་གྱིས་བརླབས་པ་དག་གིས་བར་ཆད་བྱ་བར་མི་ནུས་སོ། །གང་དེ་ལ་ཐོ་འཚམ་པ་དང་། གང་དེ་ལ་བཟུང་ནས་འདུལ་བར་འགྱུར་བའི་གླགས་རྙེད་པར་མི་འགྱུར་རོ། །རྟག་ཏུ་བདུད་ཀྱི་ལས་ཐམས་ཅད་
ཀྱང་ཁོང་དུ་ཆུད་པར་འགྱུར་རོ། །བདུད་ཀྱི་ལས་ཀྱི་དབང་དུ་འགྲོ་བར་མི་འགྱུར་རོ། །བདུད་ཀྱི་གནས་ཐམས་ཅད་སྤ་ཀོང་བར་བྱེད་དོ། །གཞན་མུ་སྟེགས་ཅན་ཐམས་ཅད་ཚར་གཅད་པའི་ཕྱིར་གནས་པར་འགྱུར་རོ། །གཞན་མུ་སྟེགས་ཅན་ཆོམས་པ་དང་། 
ཀུན་དུ་རྒྱུ་ཐམས་ཅད་ཟིལ་གྱིས་གནོན་པར་འགྱུར་རོ། །ཕས་ཀྱི་རྒོལ་བ་ཐམས་ཅད་ཀྱིས་མི་རྫི་བར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་གཟུགས་སུ་རྟོག་པ་དང་མི་རྟོག་པ་ལ་མི་གནས་པ་
39-1-85b


ཡིན། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པར་རྟོག་པ་དང་མི་རྟོག་པ་ལ་མི་གནས་པ་ཡིན་ཏེ། གཟུགས་ལ་རྟོག་པར་ཡང་མི་བྱེད་མི་རྟོག་པར་ཡང་མི་བྱེད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་
ཤེས་པ་ལ་རྟོག་པར་ཡང་མི་བྱེད་མི་རྟོག་པར་ཡང་མི་བྱེད། སྒྲིབ་པ་དང་ལྟ་བར་གྱུར་པ་ལ་རྟོག་པར་ཡང་མི་བྱེད་མི་རྟོག་པར་ཡང་མི་བྱེད། ཆད་པ་དང་། རྟག་པ་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད་དོ། །འདོད་པའི་ཁམས་དང་། གཟུགས་ཀྱི་ཁམས་དང་། 
གཟུགས་མེད་པའི་ཁམས་ལ་རྟོག་པར་ཡང་མི་བྱེད་མི་རྟོག་པར་ཡང་མི་བྱེད། འདོད་ཆགས་དང་། ཞེ་སྡང་དང་། གཏི་མུག་ལ་རྟོག་པར་ཡང་མི་བྱེད་མི་རྟོག་པར་ཡང་མི་བྱེད། བདེན་པ་ལ་རྟོག་པར་ཡང་མི་བྱེད་མི་རྟོག་པར་ཡང་མི་བྱེད། བརྫུན་པ་ལ་རྟོག་པར་ཡང་
མི་བྱེད་མི་རྟོག་པར་ཡང་མི་བྱེད། ས་དང་ཆུ་དང་། མེ་དང་། རླུང་གི་ཁམས་ལ་རྟོག་པར་ཡང་མི་བྱེད་མི་རྟོག་པར་ཡང་མི་བྱེད། འདུ་བ་དང་འབྲལ་བ་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད། རྟེན་ཅིང་འབྲེལ་པར་འབྱུང་བ་ལ་རྟོག་པར་ཡང་མི་བྱེད། 
མི་རྟོག་པར་ཡང་མི་བྱེད། བདག་ཏུ་འདུ་ཤེས་པ་ལ་རྟོག་པར་ཡང་མི་བྱེད་མི་རྟོག་པར་ཡང་མི་བྱེད། སེམས་ཅན་དུ་འདུ་ཤེས་པ་དང་། སྲོག་ཏུ་འདུ་ཤེས་པ་དང་། གང་ཟག་ཏུ་འདུ་ཤེས་པ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད། གཏོང་བ་
དང་། སེར་སྣ་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད། ཚུལ་ཁྲིམས་དང་། འཆལ་པའི་ཚུལ་ཁྲིམས་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད། བཟོད་པ་དང་། གནོད་སེམས་ལ་རྟོག་པར་ཡང་མི་བྱེད། མི་རྟོག་པར་ཡང་
མི་བྱེད། བརྩོན་འགྲུས་དང་། ལེ་ལོ་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད། བསམ་གཏན་དང་། རྣམ་པར་གཡེང་བ་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད། ཤེས་རབ་དང་། འཆལ་པའི་ཤེས་རབ་ལ་རྟོག་པར་
ཡང་མི་བྱེད། མི་རྟོག་པར་ཡང་མི་བྱེད། ཕྱིན་ཅི་མ་ལོག་པ་དང་། ཡང་དག་པའི་སྤོང་བ་དང་། རྫུ་འཕྲུལ་གྱི་རྐང་པ་དང་། དྲན་པ་ཉེ་བར་གཞག་པ་རྣམས་ལ་རྟོག་པར་ཡང་མི་བྱེད་མི་རྟོག་པར་ཡང་མི་བྱེད། དབང་པོ་དང་། སྟོབས་དང་། བྱང་ཆུབ་
39-1-86a


ཀྱི་ཡན་ལག་དང་། ཏིང་ངེ་འཛིན་དང་། སྙོམས་པར་འཇུག་པ་ལ་ཡང་རྟོག་པར་ཡང་མི་བྱེད་མི་རྟོག་པར་ཡང་མི་བྱེད། སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་ལ་རྟོག་པར་ཡང་མི་བྱེད་མི་རྟོག་པར་ཡང་མི་བྱེད། བྱམས་
པ་དང་། སྙིང་རྗེ་དང་། དགའ་བ་དང་། བཏང་སྙོམས་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད། མི་སྐྱེ་བ་ཤེས་པ་དང་། ཟད་པ་ཤེས་པ་དང་། མངོན་པར་འདུ་མི་བྱེད་པ་ཤེས་པ་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད་སོ་
སོའི་སྐྱེ་བོའི་ཆོས་དང་། ཉན་ཐོས་ཀྱི་ཆོས་དང་། རང་སངས་རྒྱས་ཀྱི་ཆོས་དང་། སངས་རྒྱས་ཀྱི་ཆོས་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད་། སོ་སོའི་སྐྱེ་བོའི་ས་དང་། ཉན་ཐོས་ཀྱི་ས་དང་། རང་སངས་རྒྱས་ཀྱི་ས་དང་། སངས་
རྒྱས་ཀྱི་ས་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད། སྒྲིབ་པ་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད། འདས་པ་དང་། མ་འོངས་པ་དང་། ད་ལྟར་བྱུང་བའི་ཡེ་ཤེས་མཐོང་བ་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད། 
ཐོགས་པ་མེད་པའི་ཡེ་ཤེས་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད། རིག་པ་དང་། རྣམ་པར་གྲོལ་བ་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད། རྣམ་པར་གྲོལ་བའི་ཡེ་ཤེས་མཐོང་བ་ལ་རྟོག་པར་ཡང་མི་བྱེད། 
མི་རྟོག་པར་ཡང་མི་བྱེད། སངས་རྒྱས་ཀྱི་ཡེ་ཤེས་མཐོང་བ་དང་། མི་འཇིགས་པ་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད། མཚན་ཡོངས་སུ་དག་པ་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད། སངས་
རྒྱས་ཀྱི་ཞིང་ཡོངས་སུ་དག་པ་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད། ཉན་ཐོས་ཕུན་སུམ་ཚོགས་པ་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད། རང་སངས་རྒྱས་ཕུན་སུམ་ཚོགས་པ་ལ་རྟོག་པར་ཡང་མི་བྱེད། 
མི་རྟོག་པར་ཡང་མི་བྱེད། བྱང་ཆུབ་སེམས་དཔའ་ཕུན་སུམ་ཚོགས་པ་ལ་རྟོག་པར་ཡང་མི་བྱེད། མི་རྟོག་པར་ཡང་མི་བྱེད་དོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་རྟོག་པ་ཡོད་ན་རྟོག་པ་དང་བྲལ་བར་
39-1-86b


འགྱུར་བའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་གང་ན་རྟོག་པ་མེད་པ་དེ་ན་མི་རྟོག་པ་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་བྱིས་པ་སོ་སོའི་སྐྱེ་བོ་ཐམས་ཅད་ནི་རྟོག་པ་ལས་བྱུང་སྟེ། དེ་དག་གི་འདུ་ཤེས་ནི་ལོག་
པར་རྟོག་པ་ལས་བྱུང་བས་དེ་དག་རྟོག་པར་ཡང་མི་བྱེད་མི་རྟོག་པར་ཡང་མི་བྱེད་དོ། །རབ་ཀྱི་རྩལ་གྱིས་རྣམ་པར་གནོན་པ་རྟོག་ཅེས་བྱ་བ་དེ་ནི་མཐའ་གཅིག་གོ། །མི་རྟོག་ཅེས་བྱ་བ་དེ་ནི་མཐའ་གཉིས་ཏེ། གང་ན་རྟོག་པ་དང་མི་རྟོག་པ་མེད་
པ་དེ་ནི་མཐའ་དང་དབུས་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་དབུས་ཤེས་བྱ་བར་རྟོག་ན་དེ་ཉིད་ཀྱང་མཐའ་ཡིན་ནོ། །ཇི་སྲིད་དུ་རྟོག་པ་དེ་སྲིད་དུ་མི་རྟོག་པ་སྟེ། དེ་ལ་ནི་རྟོག་པ་ཆད་པར་མི་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་
པ་གང་ན་རྟོག་པ་མེད་ཅིང་མི་རྟོག་པ་ཡང་མེད་པ་དེ་ན་རྟོག་པ་ཡང་དག་པར་ཆད་དོ། །རབ་ཀྱི་རྩལ་གྱིས་རྣམ་པར་གནོན་པ་རྟོག་པ་ཆད་ཅེས་བྱ་བ་དེ་ལ་ཆད་པ་གང་ཡང་མེད་དོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་རྟོག་པ་
དང་མི་རྟོག་པ་ནི། ཕྱིན་ཅི་ལོག་ལས་བྱུང་བས་མེད་པའི་ཕྱིར་རོ། །དེ་དག་གི་རྣམ་པར་ཞི་བ་གང་ཡིན་པ་དེ་ནི་ཕྱིན་ཅི་ལོག་མ་ཡིན་པ་སྟེ། དེ་ལ་ཆད་པ་གང་ཡང་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་ཆད་པ་མེད་པ་ཞེས་བྱ་བ་དེ་ནི་སྡུག་
བསྔལ་ཡང་དག་པར་ཆད་པའི་ཚིག་བླ་དགས་ཏེ། སྡུག་བསྔལ་ཡང་དག་པར་ཆད་པ་གང་ཡང་མེད་དོ། །གལ་ཏེ་སྡུག་བསྔལ་ཡང་དག་པར་ཆད་པར་འགྱུར་ན་ནི་སྡུག་བསྔལ་ཡོངས་སུ་གྲུབ་པ་འགའ་ཞིག་ཀྱང་ཡོད་པར་འགྱུར་ཏེ། སྡུག་
བསྔལ་ཡང་དག་པར་ཆད་ཅེས་བྱ་བ་དེ་ནི་ཡོངས་སུ་གྲུབ་པ་མེད་པར་མཐོང་བའོ། །གང་འདི་སྡུག་བསྔལ་ཡང་དག་པར་ཆད་ཅེས་བྱ་བ་དེ་ནི་སྡུག་བསྔལ་ཡོངས་སུ་ཤེས་པའོ། །གང་སྡུག་བསྔལ་ལ་རྟོག་པར་ཡང་མི་བྱེད་མི་རྟོག་པར་
ཡང་མི་བྱེད་པ་དེ་ནི་སྡུག་བསྔལ་རྣམ་པར་ཞི་བའོ། །དེ་ནི་སྡུག་བསྔལ་མི་སྐྱེ་མི་འབྱུང་བ་སྟེ། རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་མཐོང་བའི་བྱང་ཆུབ་སེམས་དཔའ་ནི་ཆོས་གང་ལ་ཡང་རྟོག་པར་ཡང་མི་བྱེད་མི་རྟོག་པར་ཡང་
39-1-87a


མི་བྱེད་རབ་ཀྱི་རྩལ་གྱིས་རྣམ་པར་གནོན་པ་འདི་ནི་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པས་རྟོག་པ་དང་མི་རྟོག་པ་ཐམས་ཅད་ཡོངས་སུ་ཤེས་པའོ། །རབ་ཀྱི་རྩལ་གྱིས་རྣམ་པར་གནོན་པ་
དེ་ལྟར་སྤྱོད་པ་ནི་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་དུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་ཏེ། དེ་ལ་བདུད་སྡིག་ཅན་དང་། བདུད་ཀྱི་འཁོར་རྣམས་བར་ཆད་བྱ་བའི་ཕྱིར་གནས་པར་མི་འགྱུར་རོ། །བདུད་ཀྱི་ལས་བྱུང་ཞིང་
སྐྱེས་པ་རྣམས་ཀྱང་ཁོང་དུ་ཆུད་པར་འགྱུར་ཏེ། བདུད་ཀྱི་ལས་བྱུང་ཞིང་སྐྱེས་པ་རྣམས་ཀྱི་དབང་དུ་འགྲོ་བར་མི་འགྱུར་རོ། །བདུད་སྡིག་ཅན་ཕམ་པར་བྱེད་དོ། །སྤ་ཀོང་བ་དང་དེའི་ཕྱོགས་ཉུང་བར་བྱེད་དོ། །འཇིགས་པ་དང་སྐྲག་པ་མེད་པར་འགྱུར་རོ། །
བདུད་ཀྱིས་མི་ཐུལ་བར་འགྱུར་རོ། །དེའི་ངན་སོང་དུ་འགྲོ་བ་ཐམས་ཅད་རྒྱུན་ཆད་པར་འགྱུར་རོ། །དེས་ལམ་ངན་པ་བཀག་པར་འགྱུར་རོ། །ཆུ་བོ་ཐམས་ཅད་ལས་རྒལ་བར་འགྱུར་རོ། །གཏི་མུག་གི་མུན་པ་དང་བྲལ་བར་འགྱུར་རོ། །མིག་ཐོབ་པས་སེམས་
ཅན་ཐམས་ཅད་ལ་སྣང་བར་འགྱུར་རོ། །སངས་རྒྱས་ཀྱི་རིགས་རྒྱུན་མི་གཅོད་པར་གནས་པར་འགྱུར་རོ། །ལམ་མཉམ་པ་ཉིད་ཀྱི་ཕྱིར་ལམ་རྒྱུན་བཅད་པར་འགྱུར་རོ། །སེམས་ཅན་ཐམས་ཅད་ལ་སྙིང་བརྩེ་བར་འགྱུར་རོ། །ཆོས་ལ་མིག་རྣམ་པར་
དག་པར་འགྱུར་རོ། །ལེ་ལོ་མེད་ཅིང་བརྩོན་འགྲུས་ཕུན་སུམ་ཚོགས་པར་འགྱུར་རོ། །གནོད་སེམས་ཀྱི་སེམས་མེད་པས་བཟོད་པ་འཐོབ་པར་འགྱུར་རོ། །མི་གནས་པའི་བསམ་གཏན་པས་བསམ་གཏན་པར་འགྱུར་རོ། །ངེས་པར་རྟོགས་པའི་ཤེས་རབ་
དང་ལྡན་པས་ཤེས་རབ་འཐོབ་པར་འགྱུར་རོ། །སྒྲིབ་པ་མེད་ཅིང་འགྱོད་པ་དང་བྲལ་བར་འགྱུར་རོ། །བདུད་ཀྱི་ཞགས་པ་ཐམས་ཅད་དང་བྲལ་བར་འགྱུར་རོ། །སྲེད་པའི་དྲ་བ་ཐམས་ཅད་དང་བྲལ་བས་བཅིངས་པ་བཅད་པར་འགྱུར་རོ། །བརྗེད་
པ་མེད་པས་དྲན་པ་ཉེ་བར་གནས་པར་འགྱུར་རོ། །ཚུལ་ཁྲིམས་ཡོངས་སུ་དག་པའི་ཕ་རོལ་དུ་ཕྱིན་པ་ཐོབ་པས་ཚུལ་ཁྲིམས་རྣམ་པར་དག་པར་འགྱུར་རོ། །སྐྱོན་ཐམས་ཅད་བསལ་བས་ཡོན་ཏན་ལ་གནས་པར་འགྱུར་རོ། །རབ་ཏུ་གཡོ་
39-1-87b


བ་མེད་པས་ཤེས་རབ་ཀྱི་སྟོབས་བསྐྱེད་པ་རྙེད་པར་འགྱུར་རོ། །ཕས་ཀྱི་རྒོལ་བ་ཐམས་ཅད་ཀྱིས་མི་རྫི་བར་འགྱུར་རོ། །ཆོས་ཐམས་ཅད་རྣམ་པར་དག་པའི་ཕ་རོལ་དུ་ཕྱིན་པ་ཐོབ་པས་ཆོས་ཡོངས་སུ་མི་ཉམས་པར་འགྱུར་རོ། །ཆོས་སྟོན་པ་
ལ་བག་ཚ་བ་མེད་པར་འགྱུར་རོ། །འཁོར་གྱི་ནང་དུ་འགྲོ་བ་ལ་སྤ་གོང་བ་མེད་པར་འགྱུར་རོ། །ཆོས་ཀྱི་སྦྱིན་པ་ལ་འཛིན་པ་མེད་ཅིང་ལྷུག་པར་གཏོང་བར་འགྱུར་རོ། །ལམ་མཉམ་པས་ལམ་རྣམ་པར་སྦྱངས་པར་འགྱུར་རོ། །ལམ་ངན་པ་ཡོངས་
སུ་ཤེས་པས་བསྒོམ་པ་བསྒོམས་པར་འགྱུར་རོ། །ཆོས་རྣམ་པར་དག་པས་བག་ཆགས་བསྒོམ་པར་འགྱུར་རོ། །ཤེས་རབ་རྣམ་པར་དག་པས་སྦྱང་བ་སྦྱངས་པར་འགྱུར་རོ། །རྒྱ་མཚོ་དང་མཚུངས་པའི་ཕྱིར་ཤེས་རབ་ཟབ་པར་འགྱུར་
རོ། །བག་ཚ་བ་མེད་པས་གཏིང་དཔག་དཀའ་བར་འགྱུར་རོ། །ཆོས་རྒྱ་མཚོ་དཔག་ཏུ་མེད་པས་དཔག་ཏུ་མེད་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་ཡོན་ཏན་དེ་རྣམས་དང་། 
གཞན་དག་དང་ཡང་ལྡན་པ་ཡིན་ཏེ། དེ་དག་གི་ཡོན་ཏན་ནི་རྟོགས་པར་མི་ནུས་སོ། །རབ་ཀྱི་རྩལ་གྱིས་རྣམ་པར་གནོན་པ་གཞན་ཡང་བྱང་ཆུབ་སེམས་དཔའ་དེ་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་ནི་གཟུགས་དང་མི་ལྡན་པར་
མི་འགྱུར། ལོངས་སྤྱོད་དང་མི་ལྡན་པར་མི་འགྱུར། གཡོག་དང་མི་ལྡན་པར་མི་འགྱུར། རུས་དང་མི་ལྡན་པར་མི་འགྱུར། རིག་པ་དང་མི་ལྡན་པར་མི་འགྱུར། ཡུལ་དང་མི་ལྡན་པར་མི་འགྱུར། མཐའ་འཁོབ་ཀྱི་ཡུལ་དུ་སྐྱེ་བར་
མི་འགྱུར། མི་དལ་བ་རྙེད་པར་མི་འགྱུར་རོ། །སེམས་ཅན་ཡོངས་སུ་མ་དག་པ་ལས་ཀྱི་མཐའ་ཡོངས་སུ་མ་དག་པ་རྣམས་དང་འདུ་བར་མི་འགྱུར། རང་གི་སེམས་མི་འདོར། ཤེས་རབ་ཉམས་པར་མི་འགྱུར་ཏེ། ཆོས་གང་ཕ་རོལ་
ལས་ཐོས་པ་དེ་ཆོས་ཐམས་ཅད་མཉམ་པ་ཉིད་དང་སྦྱོར་རོ། །སངས་རྒྱས་ཀྱི་རིགས་དང་ཐམས་ཅད་མཁྱེན་པའི་རིགས་མི་གཅོད་པར་གནས་པར་འགྱུར་རོ། །སངས་རྒྱས་ཀྱི་ཆོས་ལ་སྣང་བ་ཐོབ་པར་འགྱུར་རོ། །ཐམས་ཅད་མཁྱེན་པ་དང་ཉེ་
39-1-88a


བར་འགྱུར་རོ། །གལ་ཏེ་དེ་ལྟར་བདུད་སྡིག་ཅན་ཐོ་འཚམ་པའི་ཕྱིར་འོངས་ན་དེས་དེ་དག་གི་སྤོབས་པ་གཅོད་ཅིང་བདུད་ཀྱི་ཞགས་པ་ཐམས་ཅད་གཅོད་དེ། བདུད་འཁོར་དང་བཅས་པ་ཐལ་བར་ཀློག་གོ། །བདུད་ཀྱི་རིས་
བདུད་བྱེ་བ་ཐམས་ཅད་ཀྱིས་ཀྱང་ཐུལ་བར་མི་འགྱུར་གྱི། དེས་བདུད་རྣམས་འཇིགས་སྐྲག་ནས་འབྲོས་པར་འགྱུར་ཏེ། བདུད་སྡིག་ཅན་འདི་སྙམ་དུ་དེ་ནི་བདག་གི་ཡུལ་ལས་རབ་ཏུ་འདས། དེ་ནི་ཕྱིར་བདག་གི་ཡུལ་ལ་མི་སྤྱོད། །དེ་ནི་ཕྱིར་
བདག་གི་ཡུལ་ལ་མི་གནས་དེ་ནི་ཕྱིར་བདག་གི་ཡུལ་ལ་འདུག་པར་མི་འགྱུར། སེམས་ཅན་གཞན་ཡང་བདག་གི་ཡུལ་ལས་གྲོལ་བར་བྱེད། སྒྲོལ་བར་བྱེད་དོ་སྙམ་དུ་སེམས་ཏེ། དེ་ལ་བྱང་ཆུབ་སེམས་དཔའ་དེས་ཕྱོགས་ཉུང་ངུར་བྱེད་དོ་
སྙམ་ནས་མྱ་ངན་བྱེད་དེ། ངུ་ཞིང་སྨྲེ་སྔགས་འདོན་ཏོ། །དེ་ཉམས་དམས་ལ་སྡུག་བསྔལ་ཞིང་ཡིད་མི་བདེ་སྟེ། ཡིད་ལ་གཅགས་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་གང་གི་ཚེ་བྱང་ཆུབ་སེམས་དཔའ་ཤེས་རབ་ཀྱི་ཕ་
རོལ་དུ་ཕྱིན་པ་ལ་སྤྱོད་ཤེས་རབ་ཀྱི་ཕ་རོལ་དུ་ཕྱིན་པ་ལ་སྒོམ། ཤེས་རབ་ཀྱི་ཕ་རོལ་དུ་ཕྱིན་པ་ལ་སྦྱོར་བར་བྱེད་པ་དེའི་ཚེ་བདུད་ཀྱི་གནས་ཐམས་ཅད་གཟི་ཆུང་ཞིང་མོག་མོག་པོར་འགྱུར་རོ། །བདུད་སྡིག་ཅན་ཡང་འདི་སྙམ་དུ་འདིས་བདག་གི་ཡུལ་
ནས་སེམས་ཅན་རྣམས་བསྐྱས་པར་འགྱུར། འདིས་བདག་གི་ཡུལ་ནས་སེམས་ཅན་རྣམས་སྒྲོལ་བར་འགྱུར། འདིས་བདག་གི་ཡུལ་ནས་སེམས་ཅན་རྣམས་ཡོངས་སུ་གྲོལ་བར་བྱེད་པར་འགྱུར། །འདིས་སེམས་ཅན་རྣམས་བདག་གི་
ཡུལ་ནས་འདྲེན་པར་འགྱུར། འདིས་བདུད་ཀྱི་ཞགས་པ་གཅོད་པར་འགྱུར། འདིས་སེམས་ཅན་འདོད་པའི་འདམ་དུ་བྱིང་བ་རྣམས་འབྱིན་པར་འགྱུར། འདིས་སེམས་ཅན་རྣམས་ལྟ་བའི་དྲ་བ་ལས་ཐར་བར་བྱེད་པར་འགྱུར། འདིས་
སེམས་ཅན་རྣམས་སྒྲིབ་པའི་ལམ་ལས་འདོན་པར་འགྱུར་རོ། །འདིས་སེམས་ཅན་རྣམས་ཡང་དག་པའི་ལམ་ལ་རབ་ཏུ་དགོད་པར་འགྱུར། འདིས་སེམས་ཅན་རྣམས་ལྟ་བའི་ཐིབས་པོ་ལས་སྒྲོལ་བར་འགྱུར་རོ་སྙམ་དུ་སེམས་
39-1-88b


ཤིང་། སྡུག་བསྔལ་བ་དང་ཡིད་མི་བདེ་བར་འགྱུར། མྱ་ངན་གྱི་ཟུག་རྔུ་དང་ལྡན་ཞིང་མྱ་ངན་གྱི་ཟུག་རྔུ་ཆེན་པོས་ཟུག་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་བདུད་དེ་དག་གི་དོན་གྱི་དབང་འདི་མཐོང་བས་སྡུག་བསྔལ་ཞིང་ཡིད་མི་བདེ་
སྟེ། མྱ་ངན་གྱི་ཟུག་རྔུས་ཟུག་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སྐྱེས་བུ་ནོར་གྱི་ཕུང་པོ་ཆེན་པོ་ཉམས་པར་གྱུར་པ་ནི་སྡུག་བསྔལ་བར་གྱུར་ཏེ། མི་དགའ་ཞིང་ཡིད་མི་བདེ་བ་ཆེན་པོ་དང་ལྡན་ནོ། །དེ་
བཞིན་དུ་གང་གི་ཚེ་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད། ཤེས་རབ་ཀྱི་ཕ་རོལ་དུ་ཕྱིན་པ་ལ་སྒོམ། ཤེས་རབ་ཀྱི་ཕ་རོལ་དུ་ཕྱིན་པ་ལ་སྦྱོར་བར་བྱེད་པ་ན་བདུད་སྡིག་ཅན་ཡང་སེམས་མི་བདེ་བ་དང་། ཡིད་ལ་གཅགས་
པ་དང་མྱ་ངན་གྱི་ཟུག་རྔུས་ཟུག་སྟེ། སྡུག་བསྔལ་ཞིང་རང་གི་གནས་ལ་ཡང་མི་དགའ་བར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་གཞན་ཡང་བདུད་སྡིག་ཅན་དེ་དག་གཅིག་ཏུ་འདུས་ནས་ཇི་ལྟར་བྱ། ཅི་ཞིག་བྱ་སྙམ་སེམས་ཤིང་། 
ཐེ་ཚོམ་དང་། མྱ་ངན་གྱི་ཟུག་རྔུས་ཟུག་པར་འགྱུར་རོ། །དེ་དག་ཐེ་ཚོམ་དང་མྱ་ངན་གྱི་ཟུག་རྔུས་ཟུག་པར་གྱུར་ནས་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པ་ལ་གླགས་བཙལ་བའི་ཕྱིར་དོང་ཡང་དེ་ན་བྱང་ཆུབ་
སེམས་དཔའི་སྤུ་ཡང་མི་གཡོས་ན། ལུས་དང་སེམས་གཞན་དུ་འགྱུར་བ་ལྟ་ཅི་སྨོས་ཏེ། འཇིགས་ཤིང་སྤུ་ཟིང་ཞེས་བྱེད་པ་དང་བྲལ་བར་འགྱུར། བདུད་སྡིག་ཅན་དུ་ཡང་ཤེས་པར་འགྱུར་རོ། །ཤེས་ནས་ཀྱང་བྱིན་གྱིས་རློབ་བོ། །
དེས་བདུད་སྡིག་ཅན་བྱིན་གྱིས་བརླབས་ནས་ཉམས་སྨད་པར་འགྱུར། འཇིགས་ཤིང་སེམས་ཞུམ་པར་འགྱུར་ཏེ། དེ་ལ་གླགས་རྙེད་པར་མ་ནུས་ནས་དེ་འདི་སྙམ་དུ་བདག་གིས་ཀྱང་དེ་ལ་གླགས་རྙེད་པར་མ་ནུས་ན་བདག་གི་འཁོར་
གྱིས་ལྟ་ཅི་སྨོས་ཏེ། གང་གཞན་དག་གིས་བྱིན་གྱིས་བརླབས་པར་ལྟ་ག་ལ་འགྱུར་སྙམ་དུ་སེམས་སོ། །དེའི་ཕྱིར་བདུད་སྡིག་ཅན་དེ་དག་འཇིགས་ཤིང་སྤྲོ་བ་ཡོངས་སུ་ཉམས་ནས་སྡུག་བསྔལ་དང་། ཡིད་མི་བདེ་བ་སྐྱེས་ཏེ་རང་གི་གནས་སུ་དོང་
39-1-89a


ནས་སེམས་ཁོང་དུ་ཆུད་ཅིང་འཁོད་དེ། ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་ལ་སེ་གོལ་གཏོགས་པ་ཙམ་གྱི་སྲིད་དུ་ཡང་སེམས་རྨོངས་པར་བྱེད་མི་ནུས་ན་གཞན་བར་ཆད་བྱ་བར་ལྟ་ཅི་སྨོས། 
རབ་ཀྱི་རྩལ་གྱིས་རྣམ་པར་གནོན་པ་འདི་ནི་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པས་དེ་ལྟ་བུའི་ཤེས་རབ་ཀྱི་སྟོབས་བསྐྱེད་པར་འགྱུར་བའོ། །ཤེས་རབ་ཀྱི་སྟོབས་བསྐྱེད་པ་དེ་ལྟ་བུ་དང་ལྡན་པས། གལ་ཏེ་སྟོང་གསུམ་གྱི་
སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་དེ་དག་ཐམས་ཅད་བདུད་དུ་གྱུར་ལ། དེ་དག་ཐམས་ཅད་ཀྱང་འཁོར་བདུད་མང་པོ་དང་ལྷན་ཅིག་ཏུ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་ལ་འཐོ་བརྩམ་པའི་བསམ་
པས་དོང་ཡང་། རབ་ཀྱི་རྩལ་གྱིས་རྣམ་པར་གནོན་པ་བདུད་སྡིག་ཅན་དེ་དག་ཐམས་ཅད་ཀྱིས་བར་ཆད་བྱ་བར་མི་ནུས་སོ། །དེ་ཅིའི་ཕྱིར་ཞེ་ན། དེའི་ཚེ་བྱང་ཆུབ་སེམས་དཔའ་དེ་ལྟ་བུའི་ཤེས་རབ་ཀྱི་སྟོབས་བསྐྱེད་པ་དང་། ཤེས་རབ་ཀྱི་རལ་གྲི་དང་། ཤེས་
རབ་ཀྱི་མཚོན་ཆ་དང་ལྡན་པར་འགྱུར་བའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་དེའི་ཚེ་བྱང་ཆུབ་སེམས་དཔའ་ཤེས་རབ་བསམ་གྱིས་མི་ཁྱབ་པ་དང་། དཔག་ཏུ་མེད་པ་དང་། མི་མཉམ་པ་དང་། མཉམ་པ་དང་ལྡན་པར་འགྱུར་རོ། །དེའི་
ཕྱིར་དེ་ལ་བདུད་སྡིག་ཅན་གྱིས་ཟིལ་གྱིས་གནོན་མི་ནུས་སོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། ཤེས་རབ་ཀྱི་ཕ་རོལ་དུ་ཕྱིན་པའི་མཚོན་ཆ་དེ་ནི་མཚོན་ཆ་ཆེན་པོའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། ཤེས་
རབ་ཀྱི་རལ་གྲི་དེ་ནི་རལ་གྲི་ཆེན་པོ་སྟེ་དེ་ནི་བདུད་སྡིག་ཅན་རྣམས་ཀྱི་ཡུལ་མ་ཡིན། སྤྱོད་ཡུལ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། བྱང་ཆུབ་སེམས་དཔའི་ཤེས་རབ་ཐ་མལ་པ་དེ་ལྟ་བུའི་ཤེས་རབ་ཀྱང་ཕྱི་རོལ་
གྱི་དྲང་སྲོང་གང་དག་བསམ་གཏན་བཞི་དང་། གཟུགས་མེད་པའི་སྙོམས་པར་འཇུག་པ་བཞི་རྙེད་པ་དང་། གང་དག་བདུད་ཀྱི་ཡུལ་འདོད་པའི་ཁམས་ལས་འདས་ནས། ཚངས་པའི་འཇིག་རྟེན་དང་། གཟུགས་མེད་པའི་ལྷའི་རིས་བཞིར་སྐྱེ་བ་
39-1-89b


དེ་དག་གི་ཡུལ་ཡང་མ་ཡིན། སྤྱོད་ཡུལ་ཡང་མ་ཡིན་ན། ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་ཤེས་རབ་ལྟ་ཅི་སྨོས་ཏེ། གང་གཟུགས་དང་། གཟུགས་མེད་པའི་ཁམས་ཀྱི་ཡུལ་མ་ཡིན་པ་དེ། བདུད་སྡིག་ཅན་རྣམས་ཀྱི་ཡུལ་ག་ལ་ཡིན། 
རབ་ཀྱི་རྩལ་གྱིས་རྣམ་པར་གནོན་པ་སྟོབས་བསྐྱེད་རྙེད་པའི་བྱང་ཆུབ་སེམས་དཔའ་ནི་དེའི་ཚེ་འདི་ལྟ་སྟེ། སྟོབས་ཆེན་པོ་ཤེས་རབ་ཀྱི་ཕ་རོལ་དུ་ཕྱིན་པའི་སྟོབས་དང་ལྡན་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་གང་སུ་དག་ཤེས་
རབ་ཀྱི་ཕ་རོལ་དུ་ཕྱིན་པའི་སྟོབས་དང་ལྡན་པར་འགྱུར་བ་དང་། ཤེས་རབ་ཀྱི་མཚོན་རྣོན་པོ་དང་ལྡན་པར་འགྱུར་བ་དེ་དག་ནི་བདུད་སྡིག་ཅན་རྣམས་ཀྱིས་མི་ཚུགས་མི་ཐུབ་བོ། །རབ་ཀྱི་རྩལ་གྱིས་རྣམ་པར་གནོན་པ་གང་ལ་ལ་ཤེས་རབ་ཀྱི་སྟོབས་དང་། 
ཤེས་རབ་ཀྱི་མཚོན་རྣོན་པོ་དང་ལྡན་པ་དེ་དག་གང་ལ་ཡང་གནས་པར་མི་བྱེད་དེ། དེ་དག་མི་གནས་པར་འགྱུར་རོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་གནས་པར་གྱུར་ན་ནི་གཡོ་བར་འགྱུར་རོ། །གཡོ་བར་གྱུར་ན་ནི་འགུལ་བར་
འགྱུར་རོ། །འགུལ་བར་གྱུར་ན་ནི་སྤྲོས་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་གང་དག་གནས་པར་འགྱུར་བ་དང་གཡོ་བར་འགྱུར་བ་དང་འགུལ་བར་འགྱུར་བ་དང་སྤྲོས་པར་འགྱུར་བ་དེ་དག་ནི་བདུད་སྡིག་ཅན་གྱི་དབང་དུ་འགྲོ་བ་ཡིན་ཏེ། བདུད་ཀྱི་ཞགས་པ་ལ་
ཡོངས་སུ་གྲོལ་བར་མི་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་གང་སྲིད་པའི་རྩེ་མོར་སྐྱེས་པའི་སེམས་ཅན་གནས་ཤིང་གནས་དང་འབྲེལ་བ། གནས་ལ་ཆགས་པ་དེ་དག་ཀྱང་ཡང་བདུད་ཀྱི་ཡུལ་དུ་འོང་བར་འགྱུར་ཏེ། འདི་ལྟ་
སྟེ། རངས་བྱེད་ཀྱི་བུ་ལྷག་སྤྱོད་དང་། སྒྱུ་རྩལ་ཤེས་ཀྱི་བུ་རིང་འཕུར་དང་། གང་གཞན་གཟུགས་མེད་པ་ན་གནས་ཤིང་། གནས་དང་འབྲེལ་བ། གནས་ལ་ཆགས་པ་དེ་དག་ཀྱང་བདུད་ཀྱི་ཞགས་པ་ལས་ཡོངས་སུ་མ་གྲོལ་ཞིང་
བདུད་ཀྱི་ཞགས་པས་མཚམས་གཅད་པའོ། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད། ཤེས་རབ་ཀྱི་ཕ་རོལ་དུ་ཕྱིན་པ་ལ་སྒོམ། ཤེས་རབ་ཀྱི་ཕ་རོལ་དུ་ཕྱིན་པ་ལ་སྒོམ་པར་
39-1-90a


བྱེད་པ་ན་གང་ལ་གནས་པར་མི་བྱེད་དེ། ཐམས་ཅད་དུ་འང་མི་གནས་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་གང་གི་ཚེ་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་དང་ལྡན་པར་གནས་པ་དེའི་ཚེ་
གཟུགས་ལ་གནས་པར་མི་འགྱུར། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་གནས་པར་མི་འགྱུར་རོ། །ཕྱིན་ཅི་ལོག་དང་། སྒྲིབ་པ་དང་། ལྟ་བར་གྱུར་པ་ལ་གནས་པར་མི་འགྱུར། མིང་དང་གཟུགས་ལ་
གནས་པར་མི་འགྱུར། འདོད་པ་དང་། གཟུགས་དང་། གཟུགས་མེད་པའི་ཁམས་ལ་གནས་པར་མི་འགྱུར། བདག་དང་སེམས་ཅན་དུ་འདུ་ཤེས་པ་ལ་གནས་པར་མི་འགྱུར། སྲོག་དང་གང་ཟག་དང་། ཁམས་དང་། སྐྱེ་མཆེད་ལ་གནས་པར་
མི་འགྱུར། ས་དང་། ཆུ་དང་མེ་དང་རླུང་དང་། ནམ་མཁའ་དང་། རྣམ་པར་ཤེས་པ་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་གནས་པར་མི་འགྱུར། སྲིད་པའི་སྲེད་པ་ལ་གནས་པར་མི་འགྱུར། རྣམ་པར་འབྱོར་བའི་སྲེད་པ་ལ་གནས་
པར་མི་འགྱུར། ཆད་པ་དང་། རྟག་པ་ལ་གནས་པར་མི་འགྱུར། མཐའ་དང་མཐའ་མེད་པ་ལ་གནས་པར་མི་འགྱུར། རྟེན་ཅིང་འབྲེལ་བར་འབྱུང་བ་ལ་གནས་པར་མི་འགྱུར། སྦྱིན་པ་དང་། སེར་སྣ་ལ་གནས་པར་མི་འགྱུར། ཚུལ་ཁྲིམས་དང་། 
འཆལ་པའི་ཚུལ་ཁྲིམས་ལ་གནས་པར་མི་འགྱུར། བཟོད་པ་དང་། གནོད་སེམས་ལ་གནས་པར་མི་འགྱུར། བརྩོན་འགྲུས་དང་། ལེ་ལོ་ལ་གནས་པར་མི་འགྱུར། བསམ་གཏན་དང་། རྣམ་པར་གཡེང་བ་ལ་གནས་པར་མི་འགྱུར། 
ཤེས་རབ་དང་། འཆལ་པའི་ཤེས་རབ་ལ་གནས་པར་མི་འགྱུར། ཕྱིན་ཅི་ལོག་པ་དང་། ཡང་དག་པའི་སྤོང་བ་དང་། ཚད་མེད་པ་དང་། དྲན་པ་ཉེ་བར་གཞག་པ་ལ་གནས་པར་མི་འགྱུར། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། 
ཏིང་ངེ་འཛིན་དང་། སྙོམས་པར་འཇུག་པ་ལ་གནས་པར་མི་འགྱུར། སྡུག་བསྔལ་བ་དང་ཀུན་འབྱུང་བ་དང་། འགོག་པ་དང་། ལམ་ལ་གནས་པར་མི་འགྱུར། མི་སྐྱེ་བ་དང་། ཟད་པ་ཤེས་པ་དང་། མངོན་པར་འདུ་མི་བྱེད་པ་ཤེས་པ་ལ་གནས་
39-1-90b


པར་མི་འགྱུར། རིག་པ་དང་། རྣམ་པར་གྲོལ་བ་ལ་གནས་པར་མི་འགྱུར། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་ལ་གནས་པར་མི་འགྱུར། སོ་སོའི་སྐྱེ་བོ་དང་། ཉན་ཐོས་དང་། རང་སངས་རྒྱས་ཀྱི་ས་ལ་གནས་
པར་མི་འགྱུར། སོ་སོའི་སྐྱེ་བོའི་ཆོས་དང་། ཉན་ཐོས་ཀྱི་ཆོས་དང་། རང་སངས་རྒྱས་ཀྱི་ཆོས་དང་། སངས་རྒྱས་ཀྱི་ཆོས་ལ་གནས་པར་མི་འགྱུར། མྱ་ངན་ལས་འདས་པ་ལ་གནས་པར་མི་འགྱུར། འདས་པ་དང་། མ་འོངས་པ་དང་། ད་ལྟར་བྱུང་བ་དང་། 
ཐོགས་པ་མེད་པ་ལ་གནས་པར་མི་འགྱུར། དུས་གསུམ་མཉམ་པ་ཉིད་ལ་གནས་པར་མི་འགྱུར། སངས་རྒྱས་ཀྱི་ཡེ་ཤེས་དང་། སྟོབས་དང་། མི་འཇིགས་པ་ལ་གནས་པར་མི་འགྱུར། ཐམས་ཅད་མཁྱེན་པའི་ཡེ་ཤེས་ལ་གནས་པར་མི་འགྱུར། མཚན་
ཕུན་སུམ་ཚོགས་པ་ལ་གནས་པར་མི་འགྱུར། སངས་རྒྱས་ཀྱི་ཞིང་ཕུན་སུམ་ཚོགས་པ་ལ་གནས་པར་མི་འགྱུར། ཉན་ཐོས་ཕུན་སུམ་ཚོགས་པ་ལ་གནས་པར་མི་འགྱུར། བྱང་ཆུབ་སེམས་དཔའ་བཀོད་པ་ཕུན་སུམ་ཚོགས་པ་ལ་གནས་པར་མི་
འགྱུར། ཆོས་ཐམས་ཅད་ལ་གནས་པར་མི་འགྱུར་ཏེ་མི་གཡོ་ཀུན་དུ་མི་གཡོའོ། །དེས་གནས་ཐམས་ཅད་རྣམ་པར་རྩལ་པས་མི་གནས་ཏེ་ལམ་ལ་ཡང་མངོན་པར་མི་ཞེན། གནས་པ་མེད་པ་ལ་ཡང་རློམ་སེམས་སུ་མི་བྱེད་དོ། །དེ་འདི་ནི་
གནས་སོ་ཞེས་མི་དམིགས། འདི་ན་གནས་སོ་ཞེས་མི་དམིགས། འདིའི་གནས་སོ་ཞེས་མི་དམིགས། རློམ་སེམས་སུ་མི་བྱེད། འདིས་གནས་སོ་ཞེས་མི་དམིགས་ཏེ་དེ་གནས་ཐམས་ཅད་ལ་རློམ་སེམས་སུ་མི་བྱེད། མི་དམིགས། མངོན་
པར་མི་ཞེན་པས་གནས་གང་དུ་ཡང་ཉེ་བར་མི་འགྲོ། ཉེ་བར་མི་སྟོན། མངོན་པར་དགའ་བར་མི་འགྱུར། ལྷག་པར་ཆགས་ནས་མི་གནས་ཏེ། གནས་ཐམས་ཅད་ཀྱིས་མི་གོས། མི་ཆགས་པས་གནས་ཐམས་ཅད་རྣམ་པར་དག་པ་རྗེས་སུ་
ཐོབ་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་འདི་ནི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའི་ཆོས་ཐམས་ཅད་ཀྱི་གནས་རྣམ་པར་དག་པའི་ཡེ་ཤེས་མཐོང་བ་སྟེ། དེས་དེ་ལ་བདུད་སྡིག་ཅན་རྣམས་ཀྱིས་
39-1-91a


གླགས་མི་རྙེད་ཅིང་། བདུད་སྡིག་ཅན་རྣམས་ཀྱིས་མི་ཐུབ་སྟེ། བདུད་སྡིག་ཅན་རྣམས་ཟིལ་གྱིས་ནོན་པར་འགྱུར་རོ། །སྤྱོད་པའི་ལེའུ་ཞེས་བྱ་སྟེ་དྲུག་པའོ།། །། བམ་པོ་དྲུག་པ་སྟེ་ཐ་མའོ། །རབ་ཀྱི་རྩལ་གྱིས་རྣམ་པར་གནོན་
པ་གཞན་ཡང་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་བསྐྱེད་པར་ཐོག་མ་ཉིད་དུ་དགེ་བའི་རྩ་བའི་ཚོགས་མང་པོ་ཡང་དག་པར་བསྒྲུབས་པར་འགྱུར། སངས་རྒྱས་མང་པོ་ལ་བསྙེན་བཀུར་བྱས་པར་འགྱུར། 
སངས་རྒྱས་མང་པོ་ལ་ཀུན་འདྲི་བར་འགྱུར། སངས་རྒྱས་བཅོམ་ལྡན་འདས་རྣམས་ལ་བྱ་བ་བྱས་པར་འགྱུར། ལྷག་པའི་བསམ་པ་ཕུན་སུམ་ཚོགས་པར་འགྱུར། སྦྱིན་པ་འགྱེད་པ་ལ་དགའ་བར་འགྱུར། ཚུལ་ཁྲིམས་རྣམ་པར་དག་པ་ལྷུར་ལེན་
པར་འགྱུར། བཟོད་པ་དང་དེས་པ་ཕུན་སུམ་ཚོགས་པར་འགྱུར། བརྩོན་འགྲུས་དང་ལྡན་པར་འགྱུར། བསམ་གཏན་རྣམ་པར་དག་པ་ལྷུར་ལེན་པར་འགྱུར། ཤེས་རབ་དང་ལྡན་པར་འགྱུར། ཤེས་རབ་རྣམ་པར་དག་པ་ལྷུར་ལེན་པར་འགྱུར་ཏེ། དེ་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་ཤེས་རབ་ཀྱི་ཕ་རོལ་དུ་ཕྱིན་པ་ལ་བརྩོན་ཏེ། ཤེས་རབ་ཀྱི་སྟོབས་དང་། ཡེ་ཤེས་ཀྱི་སྟོབས་དེས་ཅི་ནས་ཀྱང་བདག་ལ་བདུད་སྡིག་ཅན་གྱིས་གླགས་རྙེད་པར་མ་གྱུར་ཅིག །བདག་
ལ་གཙེ་བར་མ་གྱུར་ཅིག་ཅེས་བདུད་སྡིག་ཅན་རྣམས་ལ་བྱིན་གྱིས་རློབ་བོ། །དེས་བྱིན་གྱིས་བརླབས་པས་བདུད་ཀྱིས་གླགས་མི་རྙེད་ཅིང་དེ་ལ་བར་ཆད་བྱ་བའི་ཕྱིར་ཉེ་བར་གནས་པར་མི་འགྱུར་ཏེ། བྱང་ཆུབ་སེམས་དཔའ་དེ་ལ་བདག་གིས་གླན་ཀ་
བཙལ་བ་འམ། ཐོ་བརྩམ་པར་བྱའོ་སྙམ་དུ་ཡང་སེམས་མི་བསྐྱེད་དོ། །གལ་ཏེ་དེ་དག་གིས་བར་ཆད་བྱ་བའི་ཕྱིར་སེམས་བསྐྱེད་ན་དེའི་ཕྱིར་བདག་ལ་སྡུག་བསྔལ་ཆེན་པོ་འབྱུང་བར་ཡང་དག་པར་ཤེས་ན། དེ་དག་ལ་འཇིགས་པ་ཆེན་པོ་ཉེ་བར་
གནས་པར་འགྱུར་བས་བདག་མེད་པར་མི་འགྱུར་གྲང་སྙམ་སྟེ། སྐྱོ་བར་གྱུར་ནས་ཐོ་བརྩམ་པའི་སེམས་གློན་པར་འགྱུར་ཞིང་། དེ་དག་གི་སེམས་བསྐྱེད་པ་དེ་དག་ཀྱང་ནུབ་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་
39-1-91b


རྣམ་གྲངས་འདི་བྱང་ཆུབ་སེམས་དཔའ་ལ་བདུད་སྡིག་ཅན་རྣམས་ཀྱིས་བར་ཆད་བྱ་བའི་ཕྱིར་ཉེ་བར་གནས་ཤིང་བར་ཆད་བྱ་བའི་སྐབས་མི་རྙེད་དོ། །རབ་ཀྱི་རྩལ་གྱིས་རྣམ་པར་གནོན་པ་གཞན་ཡང་ཤེས་རབ་ཀྱི་ཕ་རོལ་དུ་ཕྱིན་པ་འཆད་པ་
ན་བྱང་ཆུབ་སེམས་དཔས་འདུན་པ་དང་ལྷག་པའི་བསམ་པ་དང་། གུས་པ་དང་། རིམ་གྲོ་བྱ་བ་དང་། སྟོན་པར་འདུ་ཤེས་བསྐྱེད་པར་འགྱུར། ཕ་རོལ་དུ་ཕྱིན་པ་དྲུག་དང་ལྡན་པའི་གཏམ་བརྗོད་པ་ན། དོགས་པ་དང་། ཐེ་ཚོམ་དང་། ཡིད་གཉིས་བསྐྱེད་
པར་མི་འགྱུར། ཆོས་ཟབ་མོ་ཐོས་ན་མགོ་རྨོངས་པ་འམ། དོགས་པ་འམ། ཐེ་ཚོམ་བསྐྱེད་པར་མི་འགྱུར། དེ་ནམ་དུ་ཡང་ཆོས་ཀྱིས་ཕོངས་པར་འགྱུར་བའི་ལས་སོགས་པར་མི་འགྱུར། དེ་ནམ་དུ་ཡང་ཆོས་ཀྱིས་ཕོངས་པར་འགྱུར་བའི་སེམས་
བསྐྱེད་པར་མི་འགྱུར་ཏེ། སེམས་ཅན་གཞན་མང་པོ་ཡང་ཤེས་རབ་ཀྱི་ཕ་རོལ་དུ་ཕྱིན་པ་ཡང་དག་པར་འཛིན་དུ་བཅུག་པར་འགྱུར། ཕ་རོལ་དུ་ཕྱིན་པ་ཐམས་ཅད་ལ་ཡང་དག་པར་དགའ་བ་དང་། ཡང་དག་པར་གཟེང་སྟོད་པ་བྱས་པར་འགྱུར་རོ། །
དེ་སྔོན་གྱི་བསམ་པ་རྣམ་པར་དག་པ་དང་། སྔོན་གྱི་བསམ་པ་ཀུན་ནས་ཉོན་མོངས་པ་མེད་པས་བདུད་སྡིག་ཅན་རྣམས་བར་ཆད་བྱ་བའི་ཕྱིར་ཉེ་བར་གནས་པར་མི་འགྱུར། བདུད་སྡིག་ཅན་རྣམས་ཀྱིས་དེ་ལ་གླགས་རྙེད་པར་མི་འགྱུར། བདུད་
ཀྱི་ལས་བྱུང་ཞིང་སྐྱེས་པ་ཐམས་ཅད་ཁོང་དུ་ཆུད་པར་འགྱུར། བདུད་ཀྱི་ལས་ཀྱིས་འཕྲོགས་པར་མི་འགྱུར། བདུད་ཀྱི་ལས་ཀྱི་དབང་དུ་འགྲོ་བར་མི་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་རྣམ་གྲངས་འདིས་ཀྱང་བྱང་ཆུབ་
སེམས་དཔའ་ལ་བདུད་སྡིག་ཅན་རྣམས་ཐོ་བརྩམ་པའི་ཕྱིར་ཉེ་བར་གནས་པར་མི་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་གཞན་ཡང་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་ནི་གཟུགས་དང་འདུ་
བའི་མཚན་མ་ལ་མི་སྤྱོད་གཟུགས་དང་འབྲལ་བའི་མཚན་མ་ལ་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འདུ་བའི་མཚན་མ་ལ་མི་སྤྱོད་། འབྲལ་བའི་མཚན་མ་ལ་མི་སྤྱོད། གཟུགས་
39-1-92a


ཀྱི་མཚན་ཉིད་དང་། འདུ་བའི་མཚན་མ་ལ་མི་སྤྱོད། གཟུགས་ཀྱི་མཚན་ཉིད་དང་འབྲལ་བའི་མཚན་མ་ལ་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་མཚན་ཉིད་དང་། འདུ་བའི་མཚན་
མ་ལ་མི་སྤྱོད། འབྲལ་བའི་མཚན་མ་ལ་མི་སྤྱོད། གཟུགས་རྣམ་པར་དག་པའི་མཚན་མ་ལ་མི་སྤྱོད། གཟུགས་རྣམ་པར་དག་པའི་མཚན་མ་མེད་པ་ལ་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་
རྣམ་པར་དག་པའི་མཚན་མ་ལ་མི་སྤྱོད། རྣམ་པར་དག་པའི་མཚན་མ་མེད་པ་ལ་མི་སྤྱོད། གཟུགས་ཀྱི་དམིགས་པ་རྣམ་པར་དག་པའི་མཚན་མ་ལ་མི་སྤྱོད། གཟུགས་ཀྱི་དམིགས་པ་རྣམ་པར་དག་པའི་མཚན་མ་མེད་པ་ལ་མི་སྤྱོད། 
ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་དམིགས་པ་རྣམ་པར་དག་པའི་མཚན་མ་ལ་མི་སྤྱོད། རྣམ་པར་ཤེས་པའི་དམིགས་པ་རྣམ་པར་དག་པའི་མཚན་མ་མེད་པ་ལ་མི་སྤྱོད། གཟུགས་འབྱུང་བ་རྣམ་པར་
དག་པ་དང་། འདུ་བ་ལ་མི་སྤྱོད། གཟུགས་འབྱུང་བ་རྣམ་པར་དག་པ་དང་། འབྲལ་བ་ལ་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འབྱུང་བ་རྣམ་པར་དག་པ་དང་འདུ་བ་ལ་མི་སྤྱོད། རྣམ་པར་ཤེས་པ་
འབྱུང་བ་རྣམ་པར་དག་པ་དང་འབྲལ་བ་ལ་མི་སྤྱོད། གཟུགས་ཀྱི་དམིགས་པ་ངོ་བོ་ཉིད་རྣམ་པར་དག་པ་དང་འདུ་བ་ལ་མི་སྤྱོད་། གཟུགས་ཀྱི་དམིགས་པའི་ངོ་བོ་ཉིད་རྣམ་པར་དག་པ་དང་འབྲལ་བ་ལ་མི་སྤྱོད། ཚོར་བ་དང་། འདུ་ཤེས་
དང་། འདུ་བྱེད་རྣམས་དང་། རྣམ་པར་ཤེས་པའི་དམིགས་པའི་ངོ་བོ་ཉིད་རྣམ་པར་དག་པ་དང་། འདུ་བ་ལ་མི་སྤྱོད། རྣམ་པར་ཤེས་པའི་དམིགས་པའི་ངོ་བོ་ཉིད་རྣམ་པར་དག་པ་དང་འབྲལ་བ་ལ་མི་སྤྱོད། གཟུགས་ཀྱི་རང་
བཞིན་རྣམ་པར་དག་པ་ལ་མི་སྤྱོད། ཚོར་བ་དང་། །འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་རང་བཞིན་རྣམ་པར་དག་པ་ལ་མི་སྤྱོད། གཟུགས་ཀྱི་དམིགས་པ་རང་བཞིན་རྣམ་པར་དག་པ་དང་འདུ་བ་ལ་མི་སྤྱོད། གཟུགས་ཀྱི་
39-1-92b


དམིགས་པ་རང་བཞིན་རྣམ་པར་དག་པ་དང་འབྲལ་བ་ལ་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་དམིགས་པ་རང་བཞིན་རྣམ་པར་དག་པ་དང་འདུ་བ་ལ་མི་སྤྱོད། རྣམ་པར་ཤེས་པའི་དམིགས་པ་
རང་བཞིན་རྣམ་པར་དག་པ་དང་འབྲལ་བ་ལ་མི་སྤྱོད། གཟུགས་འདས་པ་དང་། མ་འོངས་པ་དང་། ད་ལྟར་བྱུང་བའི་རྣམ་པར་དག་པ་ལ་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འདས་པ་དང་། མ་འོངས་
པ་དང་། ད་ལྟར་བྱུང་བའི་རྣམ་པར་དག་པ་ལ་མི་སྤྱོད། གཟུགས་ཀྱི་དམིགས་པ་འདས་པ་དང་། མ་འོངས་པ་དང་ད་ལྟར་བྱུང་བའི་རྣམ་པར་དག་པ་ལ་མི་སྤྱོད། ཚོར་བ་དང་འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་དམིགས་
པ་འདས་པ་དང་། མ་འོངས་པ་དང་། ད་ལྟར་བྱུང་བའི་རྣམ་པར་དག་པ་ལ་མི་སྤྱོད། གཟུགས་འདས་པ་དང་། མ་འོངས་པ་དང་ད་ལྟར་བྱུང་བའི་རྣམ་པར་དག་པ་དང་། འདུ་བ་ལ་མི་སྤྱོད། གཟུགས་འདས་པ་དང་། མ་འོངས་པ་དང་། ད་ལྟར་བྱུང་
བའི་རྣམ་པར་དག་པ་དང་འབྲལ་བ་ལ་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འདས་པ་དང་། མ་འོངས་པ་དང་། ད་ལྟར་བྱུང་བའི་རྣམ་པར་དག་པ་དང་། འདུ་བ་ལ་མི་སྤྱོད། རྣམ་པར་ཤེས་པ་འདས་པ་
དང་། མ་འོངས་པ་དང་། ད་ལྟར་བྱུང་བའི་རྣམ་པར་དག་པ་དང་འབྲལ་བ་ལ་མི་སྤྱོད་། གཟུགས་ཀྱི་དམིགས་པ་འདས་པ་དང་། མ་འོངས་པ་དང་། ད་ལྟར་བྱུང་བའི་རྣམ་པར་དག་པ་དང་འདུ་བ་ལ་མི་སྤྱོད། གཟུགས་དམིགས་པ་འདས་པ་དང་། 
མ་འོངས་པ་དང་། ད་ལྟར་བྱུང་བའི་རྣམ་པར་དག་པ་དང་། འབྲལ་བ་ལ་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་དམིགས་པ་འདས་པ་དང་། མ་འོངས་པ་དང་། ད་ལྟར་བྱུང་བའི་རྣམ་པར་དག་པ་དང་འདུ་
བ་ལ་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་དམིགས་པ་འདས་པ་དང་། མ་འོངས་པ་དང་། ད་ལྟར་བྱུང་བའི་རྣམ་པར་དག་པ་དང་འབྲལ་བ་ལ་མི་སྤྱོད་དོ། །དེ་ལྟར་སྤྱོད་པ་ནི་གཟུགས་དང་འདུ་བར་
39-1-93a


ཡང་མི་བྱེད་འབྲལ་བར་ཡང་མི་བྱེད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། མིང་དང་གཟུགས་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། 
ཕྱིན་ཅི་ལོག་པ་དང་། ལྟ་བར་གྱུར་པ་དང་། འདུ་བར་ཡང་མི་བྱེད་འབྲལ་བར་ཡང་མི་བྱེད། འདོད་པ་དང་། གཟུགས་དང་། གཟུགས་མེད་པའི་ཁམས་དང་། འདུ་བར་ཡང་མི་བྱེད་འབྲལ་བར་ཡང་མི་བྱེད། འདོད་ཆགས་དང་། ཞེ་སྡང་དང་། གཏི་མུག་དང་
འདུ་བར་ཡང་མི་བྱེད་འབྲལ་བར་ཡང་མི་བྱེད། བདག་དང་སེམས་ཅན་དང་། སྲོག་དང་གང་ཟག་དང་། དངོས་པོ་དང་། དངོས་པོ་མེད་པར་འདུ་ཤེས་པ་དང་། འདུ་བར་ཡང་མི་བྱེད་འབྲལ་བར་ཡང་མི་བྱེད། ཆད་པ་དང་རྟག་པ་དང་། འདུ་བར་ཡང་མི་བྱེད་
འབྲལ་བར་ཡང་མི་བྱེད། ཁམས་དང་། སྐྱེ་མཆེད་དང་། འདུ་བར་ཡང་མི་བྱེད་འབྲལ་བར་ཡང་མི་བྱེད། ས་དང་ཆུ་དང་མེ་དང་རླུང་དང་། ནམ་མཁའ་དང་། རྣམ་པར་ཤེས་པའི་ཁམས་དང་། འདུ་བར་ཡང་མི་བྱེད་འབྲལ་བར་ཡང་མི་བྱེད། རྟེན་ཅིང་འབྲེལ་བར་
འབྱུང་བ་དང་། འདུ་བར་ཡང་མི་བྱེད་འབྲལ་བར་ཡང་མི་བྱེད། འདོད་པའི་ཡོན་ཏན་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། ཀུན་ནས་ཉོན་མོངས་པ་དང་། རྣམ་པར་བྱང་བ་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། གཏོང་བ་དང་། སེར་སྣ་དང་། 
འདུ་བར་ཡང་མི་བྱེད་འབྲལ་བར་ཡང་མི་བྱེད། ཚུལ་ཁྲིམས་དང་། འཆལ་པའི་ཚུལ་ཁྲིམས་དང་། འདུ་བར་ཡང་མི་བྱེད་འབྲལ་བར་ཡང་མི་བྱེད། བཟོད་པ་དང་། གནོད་སེམས་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། བརྩོན་འགྲུས་དང་། 
ལེ་ལོ་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། བསམ་གཏན་དང་རྣམ་པར་གཡེང་བ་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། ཤེས་རབ་དང་། འཆལ་པའི་ཤེས་རབ་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། ཕྱིན་
ཅི་མ་ལོག་པ་དང་། ཡང་དག་པའི་སྤོང་བ་དང་། ཚད་མེད་པ་དང་། དྲན་པ་ཉེ་བར་གཞག་པ་དང་། རྫུ་འཕྲུལ་གྱི་རྐང་པ་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ཏིང་ངེ་
39-1-93b


འཛིན་དང་། སྙོམས་པར་འཇུག་པ་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། ཞི་གནས་དང་ལྷག་མཐོང་དང་འདུ་
བར་ཡང་མི་བྱེད་འབྲལ་བར་ཡང་མི་བྱེད། རིག་པ་དང་། རྣམ་པར་གྲོལ་བ་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། རྣམ་པར་གྲོལ་བའི་ཡེ་ཤེས་པ་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། མངོན་པར་ཤེས་པ་དང་འདུ་བར་
ཡང་མི་བྱེད་འབྲལ་བར་ཡང་མི་བྱེད་། སོ་སོའི་སྐྱེ་བོ་དང་། ཉན་ཐོས་དང་། རང་སངས་རྒྱས་ཀྱི་ས་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། མི་སྐྱེ་བ་དང་། ཟད་པ་དང་མངོན་པར་འདུ་མི་བྱེད་པ་ཤེས་པ་དང་འདུ་བར་ཡང་མི་བྱེད་འབྲལ་བར་ཡང་
མི་བྱེད། འཁོར་བ་དང་མྱ་ངན་ལས་འདས་པ་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། སངས་རྒྱས་ཀྱི་ཡེ་ཤེས་དང་། སྟོབས་དང་། མི་འཇིགས་པ་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། མཚན་ཕུན་སུམ་ཚོགས་
པ་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། སངས་རྒྱས་ཀྱི་ཞིང་གི་བཀོད་པ་ཕུན་སུམ་ཚོགས་པ་དང་འདུ་བར་ཡང་མི་བྱེད་འབྲལ་བར་ཡང་མི་བྱེད། ཉན་ཐོས་དང་། བྱང་ཆུབ་སེམས་དཔའ་ཕུན་སུམ་ཚོགས་པ་དང་འདུ་བར་ཡང་མི་བྱེད་
འབྲལ་བར་ཡང་མི་བྱེད་དོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་ཆོས་ཐམས་ཅད་ནི་འདུ་བར་ཡང་མ་ཡིན་འབྲལ་བར་ཡང་མ་ཡིན་པའི་ཕྱིར་རོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་ཆོས་ཐམས་
ཅད་ནི་འདུ་བ་དང་འབྲལ་བར་ཉེ་བར་གནས་པ་མ་ཡིན་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་འདུ་བ་ཞེས་བྱ་བའི་ཚིག་དེ་ནི་རྟག་པའོ། །འབྲལ་བ་ཞེས་བྱ་བའི་ཚིག་དེ་ནི་ཆད་པའོ། །རབ་ཀྱི་རྩལ་གྱིས་རྣམ་པར་གནོན་
པ་གང་གིས་ཀྱང་ཆོས་ཐམས་ཅད་འདུ་བ་འམ། འབྲལ་བར་གྱུར་པར་ཁོང་དུ་ཆུད་པ་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་ཆོས་ཐམས་ཅད་ནི་འདུ་བ་འམ་འབྲལ་བའི་ཕྱིར་ཉེ་བར་གནས་པ་གང་ཡང་མེད་དོ། །རབ་ཀྱི་རྩལ་
39-1-94a


གྱིས་རྣམ་པར་གནོན་པ་གལ་ཏེ་ཆོས་རྣམས་ལ་འདུ་བ་འམ། འབྲལ་བར་འགྱུར་བ་འགའ་ཞིག་ཡོད་ན་ནི། ཆོས་རྣམས་ཀྱི་བྱེད་པ་པོ་དང་། བྱེད་དུ་འཇུག་པ་དང་སློང་བ་པོ་དང་། ཀུན་ནས་སློང་བ་པོ་དང་། ཚོར་
བ་པོ་དང་། ཚོར་བར་བྱེད་པ་དང་། ཤེས་པ་པོ་དང་། ཤེས་པར་བྱེད་པ་དང་། འདུ་བ་དང་། འབྲལ་བ་རྙེད་པར་འགྱུར་ཏེ། དེ་བཞིན་གཤེགས་པས་ཀྱང་ཆོས་རྣམས་ཀྱི་བྱེད་པ་པོ་དང་། བྱེད་དུ་འཇུག་པ་དང་། སློང་བ་པོ་དང་། ཀུན་
ནས་སློང་བ་པོ་དང་། ཚོར་བ་པོ་དང་། ཚོར་བར་བྱེད་པ་དང་། ཤེས་པ་པོ་དང་། ཤེས་པར་བྱེད་པ་དང་། འདུ་བར་བྱེད་པ་པོ་དང་། འབྲལ་བར་བྱེད་པ་པོ་དེ་ནི་འདིའོ་ཞེས་བཅས་པར་འགྱུར་བ་ཞིག་ན། རབ་ཀྱི་རྩལ་གྱིས་རྣམ་པར་གནོན་པ་
གང་གི་ཕྱིར་ཆོས་ཐམས་ཅད་ཀྱི་འདུ་བ་དང་། འབྲལ་བ་ཉེ་བར་གནས་པ་གང་ཡང་མེད་པ་དེའི་ཕྱིར་ཆོས་རྣམས་ཀྱི་བྱེད་པ་པོ་དང་། བྱེད་དུ་འཇུག་པ་དང་། སློང་བ་པོ་དང་། ཀུན་ནས་སློང་བ་པོ་དང་། ཚོར་བ་པོ་དང་། ཚོར་བར་བྱེད་པ་དང་། 
ཤེས་པ་པོ་དང་། ཤེས་པར་བྱེད་པ་དང་། འདུ་བར་བྱེད་པ་པོ་དང་། འབྲལ་བར་བྱེད་པ་པོ་གང་ཡང་མི་དམིགས་ཏེ། མི་དམིགས་པས་དེ་བཞིན་གཤེགས་པས་ཀྱང་མ་བཅས་སོ། །རབ་ཀྱི་རྩལ་གྱིས་རྣམ་པར་གནོན་པ་ཆོས་
ཐམས་ཅད་ནི་ཕྱིན་ཅི་ལོག་ལས་བྱུང་སྟེ། ཕྱིན་ཅི་ལོག་དེ་ལ་ཡང་འདུ་བ་དང་འབྲལ་བ་གང་ཡང་མེད་དོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་ཕྱིན་ཅི་ལོག་གི་དངོས་པོ་དམིགས་སུ་མེད་དེ། དེའི་འབྱུང་བ་ཡང་མི་དམིགས་
པའི་ཕྱིར་རོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་ཕྱིན་ཅི་ལོག་ནི་མེད་པ་ཡང་དག་པ་མ་ཡིན་པ་བརྫུན་པ་གསོག་སླུ་བའི་ཆོས་ཅན་ཏེ། དེ་ལ་ཆོས་གང་ཡང་མི་དམིགས་པས་དེ་ནི་ཕྱིན་ཅི་ལོག་ཅེས་
བྱའོ། །རབ་ཀྱི་རྩལ་གྱིས་རྣམ་པར་གནོན་པ་ཕྱིན་ཅི་ལོག་ཅེས་བྱ་བ་འདི་ནི་སེམས་ཅན་རྣམས་སླུ་བའོ། །འདི་ནི་སེམས་ཅན་རྣམས་ལ་འདྲིད་པའོ། །འདི་ནི་སེམས་ཅན་རྣམས་ཀྱི་ཡང་དག་པ་མ་ཡིན་པ་ཀུན་རྟོག་པའོ། །
39-1-94b


འདི་ནི་སེམས་ཅན་རྣམས་ཀྱི་རློམ་སེམས་དང་། གཡོ་བ་དང་སྤྲོས་པའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་བྱིས་པ་ནི་ཆད་པ་སྟོང་པས་བྲིད་ན་དེ་ཡང་དག་པ་སྙམ་དུ་འཛིན་ཏོ། །རབ་ཀྱི་རྩལ་གྱིས་རྣམ་པར་
གནོན་པ་དེ་བཞིན་དུ་བྱིས་པ་སོ་སོའི་སྐྱེ་བོ་རྣམས་ཀྱང་གསོག་དང་། ཕྱིན་ཅི་ལོག་གིས་བྲིད་པས་རྨོངས་ནས་འདི་ཡང་དག་པ་ཡིན་པ་སྙམ་དུ་སེམས་སོ། །དེ་དག་ཡང་དག་པ་མ་ཡིན་པ་ལ་ཡང་དག་པར་འདུ་ཤེས་ཤིང་ཕྱིན་ཅི་ལོག་པས་དེའི་ཕྱིར་
ཕྱིན་ཅི་ལོག་དེ་ལས་དགྲོལ་དཀའ་བར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་ན་བྱིས་པ་སོ་སོའི་སྐྱེ་བོ་ཐམས་ཅད་ཕྱིན་ཅི་ལོག་གི་བཅིང་བས་བཅིངས་ནས་ཀུན་དུ་འཁྱམ་སྟེ། འདུ་བ་དང་འབྲལ་བ་མེད་པར་དེ་དག་འདུ་བ་སྙམ་དུ་
སེམས་འདུ་བ་སྙམ་དུ་དམིགས་འདུ་བ་ཞེས་བཞག་པར་མཐོང་ཞིང་འབྲལ་བ་ཞེས་མངོན་པར་ཞེན་ཏོ། །རབ་ཀྱི་རྩལ་གྱིས་རྣམ་པར་གནོན་པ་གང་ན་འདུ་བར་འགྱུར་བ་དེ་ན་འབྲལ་བར་འགྱུར་རོ། །གང་འདུ་བ་དང་འབྲལ་བར་མི་དམིགས། 
རློམ་སེམས་སུ་མི་བྱེད། མངོན་པར་མི་ཞེན་པ་ནི་རབ་ཏུ་གྲོལ་བའོ། །གལ་ཏེ་འབྲལ་བ་སྙམ་དུ་སེམས་ཤིང་དམིགས་ལ་མངོན་པར་ཞེན་ན་ནི་དེ་འདུ་བ་ཉིད་དུ་འགྱུར་གྱི་འབྲལ་བ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་
པ་དེ་ལ་བྱང་ཆུབ་སེམས་དཔས་དོན་གྱི་དབང་འདི་མཐོང་བས་ཆོས་གང་དང་ཡང་འདུ་བར་ཡང་མི་བྱེད་འབྲལ་བར་ཡང་མི་བྱེད་ཆོས་གང་འདུ་བའི་ཕྱིར་རམ། འབྲལ་བའི་ཕྱིར་ཡང་ཉེ་བར་གནས་པར་མི་འགྱུར་རོ། །རབ་ཀྱི་རྩལ་
གྱིས་རྣམ་པར་གནོན་པ་འདི་ནི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔས་འདུ་བ་དང་། འབྲལ་བ་ཡོངས་སུ་ཤེས་པའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་ན་བྱང་ཆུབ་སེམས་དཔའ་མྱུར་དུ་
ཆོས་ཐམས་ཅད་ཀྱི་ཕ་རོལ་ཁོང་དུ་ཆུད་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་གཞན་ཡང་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་ནི་གཟུགས་ལ་མི་ཆགས་པ་ཉིད་ལ་མི་སྤྱོད། ཚོར་བ་དང་། འདུ་ཤེས་དང་། 
39-1-95a


འདུ་བྱེད་རྣམས་དང་། རྣམ་པར་ཤེས་པ་ལ་མི་ཆགས་པ་ཉིད་ཀྱི་ལ་མི་སྤྱོད། གཟུགས་ལ་མི་ཆགས་པ་ཉིད་ཀྱི་རྣམ་པར་དག་པ་ལ་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མི་ཆགས་པ་ཉིད་ཀྱི་
རྣམ་པར་དག་པ་ལ་མི་སྤྱོད། གཟུགས་ལ་མི་ཆགས་པ་ཉིད་ཀྱི་དམིགས་པ་ལ་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མི་ཆགས་པ་ཉིད་ཀྱི་དམིགས་པ་ལ་མི་སྤྱོད། གཟུགས་ལ་མི་ཆགས་པ་ཉིད་དང་འདུ་བ་ལ་མི་སྤྱོད། 
གཟུགས་ལ་མི་ཆགས་པ་ཉིད་དང་འབྲལ་བ་ལ་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མི་ཆགས་པ་ཉིད་དང་འདུ་བ་ལ་མི་སྤྱོད། རྣམ་པར་ཤེས་པ་ལ་མི་ཆགས་པ་ཉིད་དང་འབྲལ་བ་ལ་མི་སྤྱོད། གཟུགས་ལ་མི་ཆགས་པ་ཉིད་
ཀྱི་རྣམ་པར་དག་པ་དང་འདུ་བ་ལ་མི་སྤྱོད། གཟུགས་ལ་མི་ཆགས་པ་ཉིད་ཀྱི་རྣམ་པར་དག་པ་དང་འབྲལ་བ་ལ་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མི་སྤྱོད་པ་ཉིད་ཀྱི་རྣམ་པར་དག་པ་དང་འདུ་བ་ལ་མི་སྤྱོད་། 
རྣམ་པར་ཤེས་པ་ལ་མི་ཆགས་པ་ཉིད་ཀྱི་རྣམ་པར་དག་པ་དང་འབྲལ་བ་ལ་མི་སྤྱོད། གཟུགས་ཀྱི་དམིགས་པ་རྣམ་པར་དག་པ་དང་འདུ་བ་ལ་མི་སྤྱོད། གཟུགས་ཀྱི་དམིགས་པ་རྣམ་པར་དག་པ་དང་འབྲལ་བ་ལ་མི་སྤྱོད་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། 
རྣམ་པར་ཤེས་པའི་དམིགས་པ་རྣམ་པར་དག་པ་ལ་མི་སྤྱོད་། རྣམ་པར་ཤེས་པའི་དམིགས་པ་རྣམ་པར་དག་པ་དང་། འབྲལ་བ་ལ་མི་སྤྱོད་དོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔས་གཡོ་བ་དང་། རློམ་སེམས་དང་། 
འགུལ་བ་དང་། སྤྱོད་པ་དང་། རྣམ་པར་སྤྱོད་པ་དེ་དག་ཐམས་ཅད་ཡོངས་སུ་ཤེས་ནས་གང་ལ་ཡང་མི་སྤྱོད། རྣམ་པར་མི་སྤྱོད་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་གཞན་ཡང་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་བྱང་ཆུབ་སེམས་
དཔའ་ནི་གཟུགས་འདས་པ་དང་། མ་འོངས་པ་དང་། ད་ལྟར་བྱུང་བ་ལ་ཆགས་པར་མི་སྤྱོད། གཟུགས་འདས་པ་དང་། མ་འོངས་པ་དང་། ད་ལྟར་བྱུང་བ་ལ་མི་ཆགས་པར་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། 
39-1-95b


རྣམ་པར་ཤེས་པ་འདས་པ་དང་། མ་འོངས་པ་དང་། ད་ལྟར་བྱུང་བ་ལ་ཆགས་པར་མི་སྤྱོད། རྣམ་པར་ཤེས་པ་འདས་པ་དང་། མ་འོངས་པ་དང་། ད་ལྟར་བྱུང་བ་ལ་མི་ཆགས་པར་མི་སྤྱོད། གཟུགས་འདས་པ་དང་། མ་འོངས་པ་དང་། 
ད་ལྟར་བྱུང་བ་རྣམ་པར་དག་པ་ལ་མི་སྤྱོད། གཟུགས་འདས་པ་དང་། མ་འོངས་པ་དང་། ད་ལྟར་བྱུང་བ་རྣམ་པར་དག་པ་མ་ཡིན་པ་ལ་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འདས་པ་དང་། མ་འོངས་པ་དང་། ད་ལྟར་
བྱུང་བ་རྣམ་པར་དག་པ་ལ་མི་སྤྱོད། རྣམ་པར་ཤེས་པ་འདས་པ་དང་། མ་འོངས་པ་དང་། ད་ལྟར་བྱུང་བ་རྣམ་པར་དག་པ་མ་ཡིན་པ་ལ་མི་སྤྱོད། གཟུགས་འདས་པ་དང་། མ་འོངས་པ་དང་། ད་ལྟར་བྱུང་བ་ལ་མི་ཆགས་པའི་དམིགས་པ་རྣམ་པར་དག་པ་ལ་མི་
སྤྱོད། གཟུགས་འདས་པ་དང་། མ་འོངས་པ་དང་། ད་ལྟར་བྱུང་བ་ལ་མི་ཆགས་པའི་དམིགས་པ་རྣམ་པར་དག་པ་མ་ཡིན་པ་ལ་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འདས་པ་དང་། མ་འོངས་
པ་དང་། ད་ལྟར་བྱུང་བ་ལ་མི་ཆགས་པའི་དམིགས་པ་རྣམ་པར་དག་པ་ལ་མི་སྤྱོད། རྣམ་པར་ཤེས་པ་འདས་པ་དང་། མ་འོངས་པ་དང་། ད་ལྟར་བྱུང་བ་ལ་མི་ཆགས་པའི་དམིགས་པ་རྣམ་པར་དག་པ་མ་ཡིན་པ་ལ་མི་སྤྱོད་དོ། །དེ་ཅིའི་
ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་ནི་སྤྱོད་པ་ཡང་དག་པར་རྗེས་སུ་མི་མཐོང་བའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་
ཕྱིན་པ་ལ་སྤྱོད་པའི་བྱང་ཆུབ་སེམས་དཔའི་སྤྱོད་པ་ཐམས་ཅད་ལ་འཇུག་པ་དེ་ནི་སྤྱོད་པ་མེད་པའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་མྱུར་དུ་ཐམས་ཅད་མཁྱེན་པ་ཉིད་ཀྱི་ཆོས་ཡོངས་སུ་རྫོགས་པར་འགྱུར་རོ། །
རབ་ཀྱི་རྩལ་གྱིས་རྣམ་པར་གནོན་པ་གཞན་ཡང་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་ནི་གཟུགས་ལ་མ་བསྒྲིབས་པ་ཞེས་མི་སྤྱོད། མ་བསྒྲིབས་པ་མ་ཡིན་པ་ཞེས་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་
39-1-96a


དང་། རྣམ་པར་ཤེས་པ་མ་བསྒྲིབས་པ་ཞེས་མི་སྤྱོད། རྣམ་པར་ཤེས་པ་མ་བསྒྲིབས་པ་མ་ཡིན་པ་ཞེས་མི་སྤྱོད། གཟུགས་ལ་ཞི་བ་ཞེས་མི་སྤྱོད། གཟུགས་ལ་མ་ཞི་བ་ཞེས་མི་སྤྱོད། ཚོར་བ་དང་། འདུ་
ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཞི་བ་ཞེས་མི་སྤྱོད། རྣམ་པར་ཤེས་པ་ལ་མ་ཞི་བ་ཞེས་མི་སྤྱོད། གཟུགས་ལ་རང་བཞིན་གྱིས་མ་བསྒྲིབས་པ་ཞེས་མི་སྤྱོད། གཟུགས་ལ་རང་བཞིན་གྱིས་མ་བསྒྲིབས་པ་མ་ཡིན་པ་
ཞེས་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རང་བཞིན་གྱིས་མ་བསྒྲིབས་པ་ཞེས་མི་སྤྱོད་། རྣམ་པར་ཤེས་པ་ལ་རང་བཞིན་གྱིས་མ་བསྒྲིབས་པ་མ་ཡིན་པ་ཞེས་མི་སྤྱོད། གཟུགས་ལ་རང་བཞིན་
གྱིས་ཞི་བ་ཞེས་མི་སྤྱོད། གཟུགས་ལ་རང་བཞིན་གྱིས་མ་ཞི་བ་ཞེས་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རང་བཞིན་གྱིས་ཞི་བ་ཞེས་མི་སྤྱོད། རྣམ་པར་ཤེས་པ་ལ་རང་བཞིན་གྱིས་མ་
ཞི་བ་ཞེས་མི་སྤྱོད། གཟུགས་འདས་པ་དང་། མ་འོངས་པ་དང་། ད་ལྟར་བྱུང་བ་ལ་རང་བཞིན་གྱིས་དབེན་པ་འམ། རང་བཞིན་གྱིས་ཞི་བ་ཞེས་མི་སྤྱོད། གཟུགས་འདས་པ་དང་། མ་འོངས་པ་དང་། ད་ལྟར་བྱུང་བ་ལ་རང་བཞིན་གྱིས་
དབེན་པ་འམ། རང་བཞིན་གྱིས་ཞི་བ་མ་ཡིན་པ་ཞེས་མི་སྤྱོད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འདས་པ་དང་། མ་འོངས་པ་དང་། ད་ལྟར་བྱུང་བ་ལ་རང་བཞིན་གྱིས་དབེན་པ་འམ། རང་
བཞིན་གྱིས་ཞི་བ་ཞེས་མི་སྤྱོད། རྣམ་པར་ཤེས་པ་འདས་པ་འམ། མ་འོངས་པ་འམ། ད་ལྟར་བྱུང་བ་ལ་རང་བཞིན་གྱིས་དབེན་པ་མ་ཡིན་པ་འམ། རང་བཞིན་གྱིས་ཞི་བ་མ་ཡིན་པ་ཞེས་མི་སྤྱོད་དོ། །རབ་ཀྱི་རྩལ་གྱིས་
རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་མྱུར་དུ་ཐམས་ཅད་མཁྱེན་པ་ཉིད་ཀྱི་ཆོས་ཡོངས་སུ་རྫོགས་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་གཞན་ཡང་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་བྱང་
39-1-96b


ཆུབ་སེམས་དཔའ་ནི་གཟུགས་ལ་རློམ་སེམས་སུ་མི་བྱེད། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རློམ་སེམས་སུ་མི་བྱེད། གཟུགས་ཀྱི་རྣམ་པར་དག་པ་ལ་རློམ་སེམས་སུ་མི་བྱེད། 
གཟུགས་ཀྱི་དམིགས་པ་རྣམ་པར་དག་པ་ལ་རློམ་སེམས་སུ་མི་བྱེད། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་རྣམ་པར་དག་པ་ལ་རློམ་སེམས་སུ་མི་བྱེད། རྣམ་པར་ཤེས་པའི་
དམིགས་པ་རྣམ་པར་དག་པ་ལ་རློམ་སེམས་སུ་མི་བྱེད་དོ། །རབ་ཀྱི་རྩལ་གྱིས་རྣམ་པར་གནོན་པ་གཞན་ཡང་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་ནི་གཟུགས་ལ་མངོན་པར་མི་ཞེན། དེ་བཞིན་དུ་ཚོར་བ་དང་། 
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མངོན་པར་མི་ཞེན། གཟུགས་ཀྱི་རྣམ་པར་དག་པ་ལ་མངོན་པར་མི་ཞེན། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་རྣམ་པར་དག་པ་ལ་མངོན་པར་མི་
ཞེན། གཟུགས་ཀྱི་དམིགས་པ་རྣམ་པར་དག་པ་ལ་མངོན་པར་མི་ཞེན། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་ད་མིགས་པ་རྣམ་པར་དག་པ་ལ་མངོན་པར་མི་ཞེན་ཏོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་
པའི་བྱང་ཆུབ་སེམས་དཔའ་ནི་མྱུར་དུ་ཐམས་ཅད་མཁྱེན་པ་ཉིད་ཀྱི་ཆོས་རྣམས་ཡོངས་སུ་རྫོགས་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་དེ་བཞིན་གཤེགས་པའི་སྟོབས་བཅུ་དང་། 
དེ་བཞིན་གཤིགས་པའི་མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་དང་ཉེ་བར་
འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང་ཉེ་བར་འགྱུར། གསེར་གྱི་ཁ་དོག་གི་
39-1-97a


མདོག་དང་ཉེ་བར་འགྱུར། དེ་བཞིན་གཤེགས་པའི་འོད་མཐའ་ཡས་པ་དང་ཉེ་བར་འགྱུར། གླང་པོ་ལྟར་ལྟ་བ་དང་ཉེ་བར་འགྱུར། སྤྱི་གཙུག་བལྟར་མི་མཐོང་བ་དང་ཉེ་བར་འགྱུར། འདས་པ་དང་མ་འོངས་
པ་དང་ད་ལྟར་བྱུང་བ་ལ་ཐོགས་པ་མེད་པའི་ཡེ་ཤེས་མཐོང་བ་དང་ཉེ་བར་འགྱུར། དེ་བཞིན་གཤེགས་པའི་གདམས་པ་དང་། རྗེས་སུ་བསྟན་པ་དང་། ཆོ་འཕྲུལ་དང་ཉེ་བར་འགྱུར། འདས་པ་དང་མ་འོངས་པ་དང་ད་ལྟར་
བྱུང་བ་ལ་ཐོགས་པ་མེད་པའི་ཡེ་ཤེས་མཐོང་བ་ལུང་བསྟན་པ་དང་ཉེ་བར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་མྱུར་དུ་སངས་རྒྱས་ཀྱི་ཆོས་ཡོངས་སུ་དག་པ་ཐམས་ཅད་ཐོབ་
པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་མྱུར་དུ་སངས་རྒྱས་ཀྱི་ཞིང་ཡོངས་སུ་དག་པ་ཐོབ་པར་འགྱུར་རོ། །མྱུར་དུ་ཉན་ཐོས་དང་བྱང་ཆུབ་སེམས་དཔའི་བཀོད་པ་ཕུན་སུམ་ཚོགས་པ་
ཡོངས་སུ་འཛིན་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་གཟུགས་ལ་རབ་ཏུ་མི་གནས། ཚོར་བ་དང་འདུ་ཤེས་དང་འདུ་བྱེད་རྣམས་དང་། རྣམ་པར་ཤེས་པ་ལ་རབ་ཏུ་མི་གནས། མིང་
དང་གཟུགས་ལ་རབ་ཏུ་མི་གནས་ཕྱིན་ཅི་ལོག་དང་སྒྲིབ་པ་དང་ལྟ་བར་གྱུར་པ་ལ་རབ་ཏུ་མི་གནས། འདོད་པ་དང་གཟུགས་དང་གཟུགས་མེད་པའི་ཁམས་ལ་རབ་ཏུ་མི་གནས། བདག་གི་ཁམས་དང་སེམས་ཅན་གྱི་ཁམས་
ལ་རབ་ཏུ་མི་གནས། གང་ཟག་དང་སྲོག་ཏུ་འདུ་ཤེས་པ་ལ་རབ་ཏུ་མི་གནས། ས་དང་ཆུ་དང་མེ་དང་རླུང་དང་ནམ་མཁའ་དང་རྣམ་པར་ཤེས་པའི་ཁམས་ལ་རབ་ཏུ་མི་གནས། ཁམས་དང་། སྐྱེ་མཆེད་ལ་རབ་ཏུ་མི་གནས། 
ཀུན་ནས་ཉོན་མོངས་པ་དང་། རྣམ་པར་བྱང་བ་ལ་རབ་ཏུ་མི་གནས། རྟེན་ཅིང་འབྲེལ་བར་འབྱུང་བ་ལ་རབ་ཏུ་མི་གནས། གཏོང་བ་དང་སེར་སྣ་ལ་རབ་ཏུ་མི་གནས། ཚུལ་ཁྲིམས་དང་། འཆལ་པའི་ཚུལ་ཁྲིམས་ལ་རབ་ཏུ་མི་གནས། 
39-1-97b


བཟོད་པ་དང་གནོད་སེམས་ལ་རབ་ཏུ་མི་གནས། བརྩོན་འགྲུས་དང་། ལེ་ལོ་ལ་རབ་ཏུ་མི་གནས། བསམ་གཏན་དང་། རྣམ་པར་གཡེང་བ་ལ་རབ་ཏུ་མི་གནས། ཤེས་རབ་དང་། འཆལ་པའི་ཤེས་རབ་ལ་རབ་ཏུ་མི་གནས། 
དྲན་པ་ཉེ་བར་གཞག་པ་དང་། ཡང་དག་པའི་སྤོང་བ་དང་། ཚད་མེད་པ་དང་། རྫུ་འཕྲུལ་གྱི་རྐང་པ་དང་དབང་པོ་དང་སྟོབས་དང་བྱང་ཆུབ་ཀྱི་ཡན་ལག་ལ་རབ་ཏུ་མི་གནས། བསམ་གཏན་དང་རྣམ་པར་ཐར་པ་དང་
ཏིང་ངེ་འཛིན་དང་། སྙོམས་པར་འཇུག་པ་ལ་རབ་ཏུ་མི་གནས། སྡུག་བསྔལ་དང་ཀུན་འབྱུང་བ་དང་འགོག་པ་དང་ལམ་ལ་རབ་ཏུ་མི་གནས། ཟད་པ་དང་མངོན་པར་འདུ་མི་བྱེད་པ་དང་། མི་སྐྱེ་བ་ཤེས་པ་ལ་རབ་ཏུ་མི་
གནས། ཞི་གནས་དང་ལྷག་མཐོང་ལ་རབ་ཏུ་མི་གནས། མངོན་པར་ཤེས་པ་ལ་རབ་ཏུ་མི་གནས། རིག་པ་དང་རྣམ་པར་གྲོལ་བ་ལ་རབ་ཏུ་མི་གནས། སོ་སོའི་སྐྱེ་བོ་དང་ཉན་ཐོས་དང་རང་སངས་རྒྱས་ཀྱི་ས་ལ་
རབ་ཏུ་མི་གནས། སོ་སོའི་སྐྱེ་བོ་དང་ཉན་ཐོས་དང་རང་སངས་རྒྱས་དང་སངས་རྒྱས་ཀྱི་ཆོས་ལ་རབ་ཏུ་མི་གནས། མྱ་ངན་ལས་འདས་པ་ལ་རབ་ཏུ་མི་གནས། སངས་རྒྱས་ཀྱི་ཡེ་ཤེས་དང་སྟོབས་དང་མི་འཇིགས་
པ་ལ་རབ་ཏུ་མི་གནས། ཐོགས་པ་མེད་པའི་ཡེ་ཤེས་ལ་རབ་ཏུ་མི་གནས། འདས་པ་དང་མ་འོངས་པ་དང་ད་ལྟར་བྱུང་བའི་ཡེ་ཤེས་མཐོང་བ་ལ་རབ་ཏུ་མི་གནས། སངས་རྒྱས་ཀྱི་ཞིང་ཕུན་སུམ་ཚོགས་པ་ལ་
རབ་ཏུ་མི་གནས། ཉན་ཐོས་བཀོད་པ་ཕུན་སུམ་ཚོགས་པ་ལ་རབ་ཏུ་མི་གནས། བྱང་ཆུབ་སེམས་དཔའ་བཀོད་པ་ཕུན་སུམ་ཚོགས་པ་ལ་རབ་ཏུ་མི་གནས་སོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་
གནོན་པ་ཆོས་ཐམས་ཅད་མི་གནས་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་ཆོས་ཐམས་ཅད་ནི་གནས་མེད་པའོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་ཆོས་ཐམས་ཅད་ནི་
39-1-98a


གཞི་མེད་པ་སྟེ་གཞི་མེད་པའི་ཕྱིར་མི་གནས་སོ། །རབ་ཀྱི་རྩལ་གྱིས་རྣམ་པར་གནོན་པ་གལ་ཏེ་ཆོས་ཐམས་ཅད་ལ་གནས་ཡོད་པར་གྱུར་ན་ནི་ཆོས་རྣམས་ཀྱི་གཞི་ཡོད་པ་འམ། ཐེར་ཟུག་ཏུ་གནས་པར་འགྱུར་ཏེ། 
དེ་བཞིན་གཤེགས་པས་ཀྱང་འདི་ནི་ཆོས་རྣམས་ཀྱི་རྟེན། འདི་ནི་ཆོས་རྣམས་ཀྱི་གཞི་འདི་ནི་ཆོས་རྣམས་ཀྱི་བསགས་པ་ཞེས་ཆོས་ཐམས་ཅད་ཀྱི་གནས་སྟོན་པར་འགྱུར་བ་ཞིག་ན། རབ་ཀྱི་རྩལ་གྱིས་རྣམ་པར་གནོན་པ་
གང་གི་ཕྱིར་ཆོས་ཐམས་ཅད་མི་གནས་ཤིང་གཞི་མེད་པ་དང་། སོགས་པ་མེད་པ་དེའི་ཕྱིར་ཆོས་གང་ཡང་ཐེར་ཟུག་ཏུ་གནས་པ་མེད་དེ་དེ་བས་ན་དེ་བཞིན་གཤེགས་པས་ཆོས་རྣམས་ཀྱི་གནས་དང་གཞི་དང་སོགས་པ་མ་
བསྟན་ཏོ། །རབ་ཀྱི་རྩལ་གྱིས་རྣམ་པར་གནོན་པ་ཆོས་ཐམས་ཅད་ནི་ཡོངས་སུ་མ་གྲུབ་པ་སྟེ། རང་བཞིན་མེད་པའོ། །ཆོས་གང་ཡང་མེད་ཅིང་ཡོངས་སུ་མ་གྲུབ་པས་ཆོས་རྣམས་ནི་གང་དུ་ཡང་མི་གནས་ཏེ། དེའི་ཕྱིར་
ཆོས་ཐམས་ཅད་ནི་མི་གནས་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་གནས་མེད་པའི་ཚུལ་དང་། རྟེན་མེད་པའི་ཚུལ་གྱིས་ཆོས་ཐམས་ཅད་མི་གནས་པ་སྟེ། རབ་ཀྱི་རྩལ་གྱིས་རྣམ་པར་གནོན་པ་ཆོས་
ཐམས་ཅད་ནི་གནས་པ་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་ཆུ་བོ་ཆེན་པོ་བཞི་ནི་མཚོ་མ་དྲོས་པ་ལས་འབབ་སྟེ། མཚོ་ཆེན་པོ་ལ་མ་ཐུག་བར་རྒྱུན་མི་འཆད་དོ། །རབ་ཀྱི་རྩལ་
གྱིས་རྣམ་པར་གནོན་པ་དེ་བཞིན་དུ་ཆོས་ཐམས་ཅད་ཀྱང་མངོན་པར་འདུ་བྱེད་པ་ཟད་པར་མ་གྱུར་གྱི་བར་དུ་གནས་པ་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་མངོན་པར་འདུ་མི་བྱེད་ཅེས་བྱ་བ་དེ་ལ་གནས་ཀྱང་
མེད་གནས་མ་ཡིན་པ་ཡང་མེད་། རྒྱུན་མི་འཆད་པ་ཡང་མེད་དེ། བགྲང་བ་དེ་ཐམས་ཅད་དེ་ལ་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་གནས་ཤེས་བྱ་བ་འམ། རྒྱུན་ཆད་ཅེས་བྱ་བ་འམ། གནས་མེད་ཅེས་བྱ་
39-1-98b


བ་འམ། མངོན་པར་འདུ་བྱེད་པ་ཞེས་བྱ་བ་དེ་དག་ནི་བགྲང་བར་བསྟན་པའོ། །རབ་ཀྱི་རྩལ་གྱིས་རྣམ་པར་གནོན་པ་གནས་སམ། རྟེན་ཏམ་གཞི་ཞེས་བྱ་བ་དེ་ནི་སེམས་ཅན་རྣམས་ཀྱི་ཇི་ལྟར་འཇུག་པ་བསྟན་པ་བྱས་པའོ། །མངོན་པར་
འདུ་བྱེད་པ་མེད་པ་ལ་ནི་བགྲང་བ་འདི་གང་ཡང་མེད་དེ། དེའི་ཕྱིར་ཆོས་ཐམས་ཅད་མི་གནས་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ནི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའི་ཆོས་
ཐམས་ཅད་ལ་མི་གནས་པར་སྦྱོར་བའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་མྱུར་དུ་ཐམས་ཅད་མཁྱེན་པ་ཉིད་ཀྱི་ཆོས་རྣམས་ཡོངས་སུ་རྫོགས་པར་འགྱུར། བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ལ་ཉེ་བར་འགྱུར། མྱུར་དུ་བྱང་ཆུབ་ཀྱི་སྙིང་པོར་འགྲོ་བར་འགྱུར། མྱུར་དུ་ཐམས་ཅད་མཁྱེན་པའི་མེ་ཤེས་ཐོབ་པར་འགྱུར། མྱུར་དུ་འདས་པ་དང་མ་འོངས་པ་དང་ད་ལྟར་བྱུང་བའི་ཡེ་ཤེས་ཡོངས་སུ་
རྫོགས་པར་འགྱུར། མྱུར་དུ་སེམས་ཅན་ཐམས་ཅད་ཀྱི་སེམས་བསྐྱེད་པ་དང་། གཡོས་པའི་ཕ་རོལ་དུ་འགྲོ་བར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་
ཅན་ཐམས་ཅད་ཀྱི་དོན་བྱེད་པར་འདོད་པ་དང་། སེམས་ཅན་ཐམས་ཅད་ལ་སྦྱིན་པ་སྦྱིན་པར་འདོད་པ་དང་། སེམས་ཅན་ཐམས་ཅད་ལ་ཆོས་ཀྱི་སྦྱིན་པས་ཚིམ་པར་བྱེད་པར་འདོད་པ་དང་། སེམས་ཅན་ཐམས་ཅད་ཀྱི་མ་
རིག་པའི་སྒོ་ངའི་སྦུབས་གཅོག་པར་འདོད་པ་དང་། སེམས་ཅན་ཐམས་ཅད་ལ་ཡེ་ཤེས་ཆེན་པོ་སངས་རྒྱས་ཀྱི་ཡེ་ཤེས་སྒྲུབ་པར་འདོད་པ་དང་། སེམས་ཅན་ཐམས་ཅད་ལ་སྙིང་བརྩེ་བར་འདོད་པ་དང་། སེམས་ཅན་ཐམས་
ཅད་ལ་ཕན་པ་ཚོལ་བར་འདོད་པ་དང་། སེམས་ཅན་ཐམས་ཅད་ལ་ཆོས་ཀྱི་ལོ་ལེགས་པར་བྱེད་པར་འདོད་པ་དང་། སེམས་ཅན་ཐམས་ཅད་ལ་ལོངས་སྤྱོད་ཀྱི་ལོ་ལེགས་པར་བྱེད་པར་འདོད་པ་དང་། སེམས་ཅན་ཐམས་ཅད་ལ་
39-1-99a


ཚུལ་ཁྲིམས་ཀྱི་ལོ་ལེགས་པར་བྱེད་པར་འདོད་པ་དང་། སེམས་ཅན་ཐམས་ཅད་ལ་བཟོད་པ་དང་དེས་པའི་ལོ་ལེགས་པར་བྱེད་པར་འདོད་པ་དང་། སེམས་ཅན་ཐམས་ཅད་ལ་བརྩོན་འགྲུས་ཀྱི་ལོ་ལེགས་པར་བྱེད་པར་འདོད་པ་དང་། 
སེམས་ཅན་ཐམས་ཅད་ལ་བསམ་གཏན་གྱི་ལོ་ལེགས་པར་བྱེད་པར་འདོད་པ་དང་། སེམས་ཅན་ཐམས་ཅད་ལ་ཤེས་རབ་ཀྱི་ལོ་ལེགས་པར་བྱེད་པར་འདོད་པ་དང་། སེམས་ཅན་ཐམས་ཅད་ལ་རྣམ་པར་གྲོལ་བའི་ལོ་ལེགས་པར་བྱེད་པར་འདོད་པ་དང་། 
སེམས་ཅན་ཐམས་ཅད་ལ་མཐོ་རིས་སུ་སྐྱེ་བའི་ལོ་ལེགས་པར་བྱེད་པར་འདོད་པ་དང་། སེམས་ཅན་ཐམས་ཅད་ལ་རིག་པ་དང་རྣམ་པར་གྲོལ་བའི་ལོ་ལེགས་པར་བྱེད་པར་འདོད་པ་དང་། སེམས་ཅན་ཐམས་ཅད་ལ་རིག་པ་དང་རྣམ་པར་གྲོལ་
བའི་ཡེ་ཤེས་མཐོང་བའི་ལོ་ལེགས་པར་བྱེད་པར་འདོད་པ་དང་། སེམས་ཅན་ཐམས་ཅད་ལ་མྱ་ངན་ལས་འདས་པའི་ལོ་ལེགས་པར་བྱེད་པར་འདོད་པ་དང་། སེམས་ཅན་ཐམས་ཅད་ལ་སངས་རྒྱས་ཀྱི་ཆོས་ཀྱི་ལོ་ལེགས་པར་བྱེད་པར་འདོད་པ་
དང་། སེམས་ཅན་ཐམས་ཅད་ལ་ཡོན་ཏན་ཕུན་སུམ་ཚོགས་པ་ཐམས་ཅད་ཀྱི་ལོ་ལེགས་པར་བྱེད་པར་འདོད་པ་དང་། དགེ་སྦྱོང་དང་བྲམ་ཟེ་དང་ལྷ་དང་བདུད་དང་གཞན་སུས་ཀྱང་ཆོས་དང་འཐུན་པར་སྔོན་མ་བསྐོར་བའི་ཆོས་ཀྱི་འཁོར་
ལོ་བསྐོར་བར་འདོད་པ་དང་། ཆོས་ཀྱི་གཏམ་བྱེད་པར་འདོད་པ་དང་། སངས་རྒྱས་ཀྱི་སར་ལུང་བསྟན་པར་འདོད་པ་དང་། ཉན་ཐོས་ཀྱི་ས་ལ་ལུང་བསྟན་པར་འདོད་པ་དང་། རང་སངས་རྒྱས་ཀྱི་ས་ལ་ལུང་བསྟན་པར་འདོད་པ་དང་། སེམས་ཅན་
རྣམས་ཀྱི་སྔོན་གྱི་སྨོན་ལམ་དང་། དགེ་བའི་རྩ་བ་བསྐུལ་བར་འདོད་པས་ཤེས་རབ་ཀྱི་ཕ་རོལ་དུ་ཕྱིན་པ་འདི་ལ་བསླབ་པར་བྱ། བརྩོན་པར་བྱ་འབད་པར་བྱའོ། །ཤེས་རབ་ཀྱི་ཕ་རོལ་དུ་ཕྱིན་པ་ལ་བསྒོམ་པར་སྦྱོར་བ་ལ་བརྩོན་པར་བྱའོ། །རབ་ཀྱི་རྩལ་གྱིས་
རྣམ་པར་གནོན་པ་ཇི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་ལ་བརྩོན་པ་དང་། ནན་ཏན་བྱེད་པ་དང་འདི་ལྟ་སྟེ། ཤེས་རབ་ཀྱི་ཕ་རོལ་དུ་ཕྱིན་པ་ལ་གནས་པ་དེ་མི་འདོར་བ་ལས་སངས་རྒྱས་ཀྱི་ཆོས་ཐམས་ཅད་མྱུར་དུ་ཡོངས་སུ་རྫོགས་
39-1-99b


པར་བྱེད་པ་དེ་ལྟ་བུའི་བྱང་ཆུབ་སེམས་དཔའ་ཆོས་གཞན་གང་ཡང་ངས་མ་མཐོང་ངོ་། །རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་གང་ལ་ལ་ཤེས་རབ་ཀྱི་ཕ་རོལ་དུ་ཕྱིན་པ་འདི་ལ་སྤྱོད་ན། བྱང་ཆུབ་སེམས་དཔའ་དེ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་དང་ཉེ་ཞིང་དེར་ཐུག་པར་རིག་པར་བྱའོ། །རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ་འདི་གང་ལ་ལའི་རྣ་ལམ་དུ་ཐོས་པ་དང་། ཐོས་ནས་ཀྱང་མོས་པ་དང་མངོན་པར་དགའ་བ་དང་ཡང་དག་པར་འདུ་ཤེས་བསྐྱེད་པ་དེ་དག་
ཀྱང་དགེ་བའི་རྩ་བ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འགྲུབ་པར་འགྱུར་རོ་ཞེས་ངས་བཤད་དེ་དེར་ཐུག་པར་ཡང་རིག་པར་བྱའོ། །རིགས་ཀྱི་བུ་འམ་རིགས་ཀྱི་བུ་མོ་དེ་དག་ནི་ཚོགས་ཆེན་པོ་བསགས་པས་དགེ་བའི་རྩ་བ་གཞན་ཡང་ཡོངས་སུ་
བསྡུད་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པའི་ཐབས་ལ་མཁས་པ་བསྟན་པའི་ལེའུ་འདི་བྱང་ཆུབ་སེམས་དཔའ་གང་དག་གི་ལག་ཏུ་སོང་བར་གྱུར་པ་དེ་དག་ཁ་ཅིག་སངས་རྒྱས་བཅོམ་ལྡན་འདས་རྣམས་ཀྱིས་
མངོན་སུམ་དུ་ལུང་མ་བསྟན་ཀྱང་དེ་དག་ནི་ལུང་བསྟན་པ་དང་ཉེ་སྟེ། དེ་དག་ནི་རིང་པོ་མི་ཐོགས་པར་མངོན་སུམ་དུ་ལུང་བསྟན་པ་ཐོབ་པར་འགྱུར་བར་རིག་པར་བྱའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སེམས་ཅན་གང་དག་དགེ་བ་
བཅུའི་ལས་ཀྱི་ལམ་ཡང་དག་པར་བཟུང་སྟེ། འདུག་པའི་སེམས་ཅན་དེ་དག་བྱང་གི་སྒྲ་མི་སྙན་དུ་སྐྱེ་བ་དང་ཉེ་བ་སྟེ། དེར་ཐུག་པར་རིག་པར་བྱའོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་འདི་བྱང་ཆུབ་སེམས་དཔའ་
གང་གི་ལག་ཏུ་འགྲོ་བར་འགྱུར་བ་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཉེ་བར་རིག་པར་བྱའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སེམས་ཅན་གང་དག་སྦྱིན་པ་སྦྱིན་ཞིང་། ལྷུག་པར་གཏོང་བར་གྱུར་ལ་སེམས་
ཅན་རྣམས་ཀྱང་སྦྱིན་པ་དང་། སྙན་པར་སྨྲ་བ་དང་། དོན་སྤྱོད་པ་དང་། དོན་འཐུན་པས་ཀུན་དུ་སྡུད་ཅིང་ཚུལ་ཁྲིམས་ཀྱང་སྲུང་ལ་ང་རྒྱལ་བཅོམ་པའི་སེམས་ཅན་དེ་དག་མྱུར་དུ་རིགས་མཐོན་པོ་དང་ལོངས་སྤྱོད་ཆེན་པོར་འགྱུར་ཏེ། དེར་ཐུག་པར་རིག་པར་བྱའོ། །
39-1-100a


རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སེམས་ཅན་གང་དག་སྦྱིན་པའི་ངང་ཚུལ་ཅན་དུ་གྱུར་པ། ཚུལ་ཁྲིམས་ཕུན་སུམ་ཚོགས་པར་གྱུར་པ། བཟོད་པ་ཕུན་སུམ་ཚོགས་པར་གྱུར་པ། སེམས་ཅན་ལ་བྱམས་པ་སྐྱེད་པ། 
སེམས་ཅན་རྣམས་ཀྱང་ཚུལ་ཁྲིམས་འཛིན་དུ་འཇུག་ཅིང་དབང་པོར་འགྱུར་བའི་ལས་བསགས་པ་དེ་དག་ནི་མྱུར་དུ་འཁོར་ལོས་སྒྱུར་བའི་རྒྱལ་པོ་བྱེད་པར་འགྱུར་བར་རིག་པར་བྱའོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་
རོལ་དུ་ཕྱིན་པ་འདི་བྱང་ཆུབ་སེམས་དཔའ་གང་གི་ལག་ཏུ་འགྲོ་བར་འགྱུར་བ་དེ་ཡང་མྱུར་དུ་བྱང་ཆུབ་ཀྱི་སྙིང་པོར་འགྲོ་བར་རིག་པར་བྱའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་རྒྱལ་པོ་རྒྱལ་རིགས་གང་ཟླ་བ་ཉ་ཚེས་བཅྭ་ལྔ་ལ་དོན་
བྱེད་ཅིང་འདུག་པའི་མདུན་དུ་འཁོར་ལོ་རིན་པོ་ཆེ་བྱུང་བར་གྱུར་ན། དེ་ཉིད་འཁོར་ལོས་སྒྱུར་བར་འགྱུར་ཞིང་། མྱུར་དུ་དེའི་རིན་པོ་ཆེ་སྣ་བདུན་ཐམས་ཅད་ཀྱང་འབྱུང་བར་འགྱུར་བར་རིག་པར་བྱའོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་
ཤེས་རབ་ཀྱི་ཕ་རོལ་དུ་ཕྱིན་པའི་ལེའུ་འདི་བྱང་ཆུབ་སེམས་དཔའ་གང་གི་ལག་ཏུ་འགྲོ་བར་འགྱུར་བ་དེ་མྱུར་དུ་ཐམས་ཅད་མཁྱེན་པའི་དམིགས་པ་དང་ལྡན་པར་འགྱུར་བར་རིག་པར་བྱའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་
སྟེ། དཔེར་ན་སེམས་ཅན་གང་དག་དགེ་བའི་རྩ་བ་མཆོག་དང་ལྡན་པར་གྱུར་ཅིང་སྤྱོད་པ་ཡང་བཟང་རྒྱ་ཆེན་པོ་ལ་ཡང་མོས་པར་གྱུར་ལ། དེ་དག་མིའི་ལུས་ལ་མི་མཐུན་པར་འདུ་ཤེས་འཇོག་ཅིང་། ཚུལ་ཁྲིམས་ཕུན་སུམ་ཚོགས་
པར་གྱུར་པ། སྐྱེ་བོ་མང་པོའི་བྱ་བ་བྱེད་པར་གྱུར་པ་ལྷར་སྐྱེ་བར་འདོད་ན། དེ་དག་ནི་མྱུར་དུ་རྒྱལ་ཆེན་བཞིའི་རིས་ཀྱི་ལྷ་རྣམས་དང་སྐལ་པ་མཉམ་པར་སྐྱེ་ཞིང་དེ་ན་ཡང་དབང་པོ་བྱེད་པར་འགྱུར་བར་རིག་པར་བྱའོ། །རབ་ཀྱི་རྩལ་གྱིས་
རྣམ་པར་གནོན་པ་གང་སུ་དག་དགེ་བའི་རྩ་བ་ཡོངས་སུ་དག་པ་དང་། དགེ་བའི་རྩ་བ་མཆོག་དང་ལྡན་ལ། སྔར་སྦྱིན་པ་སྦྱིན་ཞིང་ཕྱིས་བདག་སྤྱོད་པ་དང་། སྔར་སེམས་ཅན་གཞན་དག་གི་བྱ་བ་བྱེད་དེ། ཕྱིས་བདག་གི་བྱེད་པ་དང་། ཆོས་མ་
39-1-100b


ཡིན་པ་ལ་འདོད་ཅིང་། ཆགས་པ་མེད་པ་དང་། མི་བཟད་པའི་འདོད་པ་དང་། ཆགས་པ་མེད་པ་དང་། ལྷའི་དབང་པོ་དང་། བདག་པོར་འདོད་པ་དེ་དག་ནི་རིང་པོ་མི་ཐོགས་པར་མི་གཡོ་མི་བསྐྱོད་པར་སུམ་བཅུ་རྩ་གསུམ་པའི་ལྷ་རྣམས་ཀྱི་དབང་
པོ་དང་བདག་པོ་བྱེད་པར་འགྱུར་ཏེ། ལྷའི་དབང་པོ་བརྒྱ་བྱིན་དུ་ཡང་འགྱུར་བར་རིག་པར་བྱའོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་འདི་བྱང་ཆུབ་སེམས་དཔའ་གང་ལ་ཉེ་བར་གྱུར་པ་དེ་མྱུར་དུ་ཆོས་ཐམས་
ཅད་ལ་དབང་བྱེད་པའི་དབང་པོ་རྗེས་སུ་ཐོབ་པར་འགྱུར་ཞིང་དེར་ཐུག་པར་རིག་པར་བྱའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་སེམས་ཅན་གང་དག་ཚངས་པའི་གནས་པ་བཞི་རྙེད་པར་འགྱུར་བ་དེ་དག་ནི་མྱུར་དུ་ཚངས་པའི་
འཇིག་རྟེན་དུ་སྐྱེ་བར་འགྱུར་བར་རིག་པར་བྱའོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་འདི་བྱང་ཆུབ་སེམས་དཔའ་གང་ལ་ཉེ་བར་གྱུར་པ་དེ་མྱུར་དུ་ཆོས་ཀྱི་འཁོར་ལོ་བསྐོར་བར་རིག་པར་བྱའོ། །
རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ་དཔེར་ན་དབྱར་གྱི་ཟླ་བ་ཉེ་བར་གནས་པ་ནས་ཆེན་པོ་འདི་སྤྲིན་ལ་བརྟེན་ནས་སྣུམ་པར་འགྱུར་ཞིང་ཆར་མཐར་གྱིས་བབ་པས་བངས་ནས་ཆུ་འབྱུང་སྟེ། གང་དུ་ཆུ་མིག་མང་པོ་བྱུང་བ་དེས་ས་ཆེན་
པོའི་སྟེང་འདི་ཚིམ་པར་བྱེད་དེ། དེ་བཞིན་དུ་ས་ཆེན་པོའི་ཁོང་ཡང་བངས་པར་འགྱུར། སྟེང་འདི་ཆུས་ཡོག་ནས་གང་ལྗོངས་དང་། ཐང་རྣམས་ཚིམ་པར་བྱེད་དེ། དེ་ལྟར་ས་ཆེན་པོ་འདི་ཐང་སྤྲིན་གྱིས་བངས་པར་བྱས་པས་རྩྭ་དང་ཤིང་
གེལ་པ་དང་། སྨན་དང་ནགས་ཚལ་རྣམས་ཀྱང་ངོམས་པར་འགྱུར་རོ། །དེ་དག་ངོམས་པས་ཡལ་ག་དང་ལོ་མ་དང་འདབ་མ་མང་པོ་སྐྱེ་བར་འགྱུར། མེ་ཏོག་དང་འབྲས་བུ་མང་པོ་ཡང་འཆགས་པར་འགྱུར་རོ། །དེའི་ཚེ་ས་ཆེན་
པོ་འདིས་ཡིད་དུ་འོང་བའི་དྲི་འབྱིན་ཏེ། དེའི་ཚེ་ས་ཆེན་པོ་འདི་མེ་ཏོག་དང་འབྲས་བུ་དང་ཆུ་མིག་དང་འཚེའུ་དང་ལྟེང་ཀ་དག་གིས་མཛེས་པར་བྱས་པར་འགྱུར། དེ་ན་མི་དང་མི་མ་ཡིན་པ་རྣམས་མེ་ཏོག་དང་འབྲས་བུ་དེ་རྣམས་ལ་ཟ་ཞིང་
39-1-101a


དྲི་དེ་དག་ལ་ཡང་སྣོམ་པས་དགའ་བར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ནམ་བྱང་ཆུབ་སེམས་དཔའ་ལ་ཤེས་རབ་ཀྱི་ཕ་རོལ་དུ་ཕྱིན་པ་འདི་མངོན་དུ་གྱུར་ཅིང་། ཤེས་རབ་ཀྱི་ཕ་རོལ་དུ་ཕྱིན་པ་
འདི་ལ་སྦྱོར་བར་བྱེད་ན། རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་འདི་རིང་པོ་མི་ཐོགས་པར་ཐམས་ཅད་མཁྱེན་པའི་ཡེ་ཤེས་ཀྱིས་རླན་པར་བྱས་ནས་ཐམས་ཅད་མཁྱེན་པའི་ཡེ་ཤེས་རྣམ་པར་འབྱེད་པར་འགྱུར། ཐམས་
ཅད་མཁྱེན་པའི་ཡེ་ཤེས་རབ་ཏུ་སྟོན་པར་འགྱུར་ཏེ། དེས་བླ་ན་མེད་པའི་ཆོས་རིན་པོ་ཆེ་རབ་ཏུ་བསྟན་པའི་ཕྱིར་སེམས་ཅན་རྣམས་རླན་པར་བྱེད་པར་རིག་པར་བྱའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་གང་དག་ཀླུའི་རྒྱལ་
པོ་མ་དྲོས་པའི་གནས་སུ་སྐྱེས་པའི་སེམས་ཅན་དེ་དག་ཀྱང་ཀླུང་ཆེན་པོ་བཞི་འབེབས་ཤིང་རྒྱ་མཚོ་ཆེན་པོ་འགེངས་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་འདི་བྱང་ཆུབ་སེམས་
དཔའ་གང་དག་གི་ལག་ཏུ་སོང་ཞིང་འདི་ལ་སློབ་པ་དེ་དག་ཐམས་ཅད་ཀྱང་ཆོས་ཆེན་པོའི་རྒྱུན་རབ་ཏུ་འབེབས་ཤིང་ཆོས་ཀྱི་སྦྱིན་པ་དེས་སེམས་ཅན་ཐམས་ཅད་ལ་ཚིམ་པར་བྱེད་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་
པ་འདི་ལྟ་སྟེ། དཔེར་ན་སེམས་ཅན་གང་དག་རིའི་རྒྱལ་པོ་རི་རབ་ཀྱི་དྲུང་དུ་ཕྱིན་པ་དེ་དག་ཐམས་ཅད་ནི་འདི་ལྟ་སྟེ། གསེར་གྱི་ཁ་དོག་ཏུ་ཁ་དོག་གཅིག་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་
ཀྱི་ཕ་རོལ་དུ་ཕྱིན་པ་བསྟན་པ་འདི་བྱང་ཆུབ་སེམས་དཔའ་གང་གི་ལག་ཏུ་སོང་བ་དེ་དག་ཐམས་ཅད་ཀྱང་འདི་ལྟ་སྟེ། དེ་བཞིན་གཤེགས་པའི་འགྲོ་བ་འམ། ཐམས་ཅད་མཁྱེན་པའི་འགྲོ་བར་འགྲོ་བ་གཅིག་ཏུ་འགྱུར་རོ། །
རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་མཚོ་ཆེན་པོ་རྒྱ་མཚོ་ནི་ཆུ་ཐམས་ཅད་ཀུན་དུ་འཛིན་ཏེ་དེར་རྟག་ཏུ་ཆུ་ཐམས་ཅད་འབབ་བོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་
39-1-101b


བསྟན་པ་འདི་བྱང་ཆུབ་སེམས་དཔའ་གང་གི་ལག་ཏུ་འགྲོ་བ་དེ་མྱུར་དུ་ཆོས་ཐམས་ཅད་ཀྱི་རྒྱ་མཚོ་དང་། ཆོས་ཐམས་ཅད་ཀྱི་སྣོད་དང་། ཆོས་ཐམས་ཅད་ཡང་དག་པར་འདུ་བར་འགྱུར་ཏེ། མྱུར་དུ་ཆོས་ཀྱི་བརྡས་མི་འཁྲུགས་པར་འགྱུར་ཞིང་དེར་
ཐུག་པར་རིག་པར་བྱའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། དཔེར་ན་ཉི་མའི་དཀྱིལ་འཁོར་ཤར་ན་འོད་ཐམས་ཅད་མོག་མོག་པོར་བྱེད་དོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཤེས་རབ་ཀྱི་ཕ་རོལ་
དུ་ཕྱིན་པ་འདི་ལ་ཤར་བའི་བྱང་ཆུབ་སེམས་དཔའ་ཡང་སེམས་ཅན་ཐམས་ཅད་ལ་ཆོས་ཀྱིས་སྣང་བར་བྱེད་པར་ཉེ་བར་གནས་པར་འགྱུར་ཏེ། རབ་ཀྱི་རྩལ་གྱིས་རྣམ་པར་གནོན་པ་བྱང་ཆུབ་སེམས་དཔའ་ལ་འདི་ཤར་བས་སེམས་
ཅན་ཐམས་ཅད་ཀྱི་དགེ་བའི་རྩ་བ་སྣང་བར་བྱེད་པར་ཉེ་བར་གནས་པར་འགྱུར། སེམས་ཅན་ཐམས་ཅད་ཀྱི་སྦྱིན་གནས་སུ་འགྱུར། སེམས་ཅན་ཐམས་ཅད་ཀྱི་བསོད་ནམས་ཀྱི་ཞིང་རྣམ་པར་དག་པར་འགྱུར། སེམས་ཅན་
ཐམས་ཅད་ཀྱི་འགྲོ་བར་བྱ་བར་འགྱུར། སེམས་ཅན་ཐམས་ཅད་ཀྱིས་མཆོད་པར་འགྱུར། རབ་ཏུ་སྟོན་པར་འགྱུར་རོ་རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ་འདི་ལ་སློབ་པའི་བྱང་ཆུབ་སེམས་དཔའ་ནི་
བྱང་ཆུབ་སེམས་དཔའ་མཆོག་ལ་སློབ་པའོ། །སེམས་ཅན་ཐམས་ཅད་ཀྱི་མྱ་ངན་ལས་འདས་པའི་ལམ་རྣམ་པར་སྦྱང་བའི་ཕྱིར་སློབ་པའོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་
རོལ་དུ་ཕྱིན་པའི་བསླབ་པ་དེ་ནི་མཆོག་དམ་པ། རབ་ཕུལ་དུ་བྱུང་བ་བླ་ན་མེད་པའི་བསླབ་པའོ། །རབ་ཀྱི་རྩལ་གྱིས་རྣམ་པར་གནོན་པ་འདི་ལ་སློབ་པའི་བྱང་ཆུབ་སེམས་དཔའ་ནི་བསླབ་པ་ཐམས་ཅད་ཀྱི་དམ་པའི་མཆོག་
རྙེད་པར་འགྱུར་རོ། །བསླབ་པ་ཐམས་ཅད་བཟུང་བས་འབྱུང་བར་འགྱུར། བསླབ་པ་ཐམས་ཅད་ཀྱང་སྟོན་པར་འགྱུར། བསླབ་པ་ཐམས་ཅད་ཀྱང་ཐོབ་པར་བྱེད་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་འདས་པ་དང་། 
39-1-102a


མ་འོངས་པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་བྱང་ཆུབ་སེམས་དཔའི་སྤྱད་པ་སྤྱོད་པ་ནི་བསླབ་པ་འདི་ལ་བསླབས་སོ། །སློབ་བོ་སློབ་པར་འགྱུར་རོ། །སངས་རྒྱས་བཅོམ་ལྡན་འདས་རྣམས་བསླབ་པ་འདི་ལ་ཤིན་དུ་
གནས་ནས་སེམས་ཅན་ཐམས་ཅད་ལ་བླ་ན་མེད་པའི་བསླབ་པ་ཡོངས་སུ་དག་པ་རབ་ཏུ་བསྟན། ཡང་དག་པར་རབ་ཏུ་སྟོན། ཡང་དག་པར་རབ་ཏུ་སྟོན་པར་འགྱུར་རོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ། ཤེས་རབ་ཀྱི་
ཕ་རོལ་དུ་ཕྱིན་པའི་བསླབ་པ་འདི་ནི་འཇིག་རྟེན་ཐམས་ཅད་ལས་མངོན་པར་འཕགས་པའི་བསླབ་པ་ཡིན་པའི་ཕྱིར་རོ། །འདི་ལྟ་སྟེ། ཤེས་རབ་ཀྱི་ཕ་རོལ་དུ་ཕྱིན་པའི་བསླབ་པ་ནི་འཇིག་རྟེན་ཐམས་ཅད་ཀྱི་མཆོག །འཇིག་རྟེན་ཐམས་ཅད་ན་རང་བྱུང་གི་
བསླབ་པའོ། །རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ་ལ་སློབ་པའི་བྱང་ཆུབ་སེམས་དཔའ་ནི་འཇིག་རྟེན་པ་དང་འཇིག་རྟེན་ལས་འདས་པ་དང་འདུས་བྱས་དང་འདུས་མ་བྱས་དང་། ཟག་པ་དང་བཅས་པ་དང་ཟག་པ་མེད་པ་དང་། 
ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་དང་། ཆོས་གང་ལ་ཡང་སློབ་པར་མི་འགྱུར། གང་དུ་ཡང་ཆགས་པ་མི་བསྐྱེད་དེ། ཆོས་ཐམས་ཅད་ལ་མི་ཆགས་པར་གནས་པར་འགྱུར་རོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་པར་
གནོན་པ་ཆོས་ཐམས་ཅད་ཆགས་པ་མེད་བཅིངས་པ་མེད་གྲོལ་བ་མེད་དེ། ཆོས་གང་ཡང་འདུ་བར་རམ། བཅིངས་པ་ཉེ་བར་གནས་པ་མ་ཡིན་པའི་ཕྱིར་རོ། །རབ་ཀྱི་རྩལ་གྱིས་རྣམ་པར་གནོན་པ་གཟུགས་ནི་མ་ཆགས། མ་བཅིངས་མ་གྲོལ་
བའོ། །ཚོར་བ་དང་འདུ་ཤེས་དང་འདུ་བྱེད་རྣམས་དང་། རྣམ་པར་ཤེས་པ་ཡང་མ་ཆགས། མ་བཅིངས་མ་གྲོལ་བའོ། །མིང་དང་གཟུགས་ཀྱང་མ་ཆགས་མ་བཅིངས་མ་གྲོལ་བའོ། །ཕྱིན་ཅི་ལོག་དང་སྒྲིབ་པ་དང་ལྟ་བར་གྱུར་པ་ཡང་མ་ཆགས་
མ་བཅིངས་མ་གྲོལ་བའོ། །འདོད་ཆགས་དང་ཞེ་སྡང་དང་གཏི་མུག་ཀྱང་མ་ཆགས་མ་བཅིངས་མ་གྲོལ་བའོ། །ནང་གི་སྐྱེ་མཆེད་དྲུག་ཀྱང་མ་ཆགས་མ་བཅིངས་མ་གྲོལ་བའོ། །ཕྱིའི་སྐྱེ་མཆེད་དྲུག་ཀྱང་མ་ཆགས་མ་བཅིངས་མ་གྲོལ་བའོ། །འདོད་པ་དང་
39-1-102b


གཟུགས་དང་གཟུགས་མེད་པའི་ཁམས་ཀྱང་མ་ཆགས། མ་བཅིངས་མ་གྲོལ་བའོ། །བདག་གི་ཁམས་དང་སེམས་ཅན་གྱི་ཁམས་ཀྱང་མ་ཆགས་མ་བཅིངས་མ་གྲོལ་བའོ། །རྟེན་ཅིང་འབྲེལ་པར་འབྱུང་བ་ཡང་མ་ཆགས་མ་བཅིངས་མ་གྲོལ་
བའོ། །ཀུན་ནས་ཉོན་མོངས་པ་དང་རྣམ་པར་བྱང་བ་ཡང་མ་ཆགས་མ་བཅིངས་མ་གྲོལ་བའོ། །དེ་བཞིན་དུ་གཏོང་བ་དང་སེར་སྣ་དང་ཚུལ་ཁྲིམས་དང་འཆལ་པའི་ཚུལ་ཁྲིམས་དང་བཟོད་པ་དང་གནོད་སེམས་དང་བརྩོན་འགྲུས་དང་ལེ་ལོ་དང་། 
བསམ་གཏན་དང་རྣམ་པར་གཡེང་བ་དང་། ཤེས་རབ་དང་འཆལ་པའི་ཤེས་རབ་ཀྱང་མ་ཆགས་མ་བཅིངས་མ་གྲོལ་བའོ། །སྡུག་བསྔལ་དང་ཀུན་འབྱུང་བ་དང་། འགོག་པ་དང་། ལམ་ཡང་མ་ཆགས་མ་བཅིངས་མ་གྲོལ་བའོ། །དྲན་པ་ཉེ་བར་གཞག་པ་དང་། 
ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་དང་། ཚད་མེད་པ་དང་ཕྱིན་ཅི་མ་ལོག་པ་ཡང་མ་ཆགས་མ་བཅིངས་མ་གྲོལ་བའོ། །དབང་པོ་དང་སྟོབས་དང་། བྱང་ཆུབ་ཀྱི་ཡན་ལག་དང་། ཏིང་ངེ་འཛིན་དང་། སྙོམས་པར་འཇུག་པ་ཡང་མ་ཆགས་
མ་བཅིངས་མ་གྲོལ་བའོ། །ས་དང་ཆུ་དང་མེ་དང་རླུང་དང་། ནམ་མཁའ་དང་། རྣམ་པར་ཤེས་པའི་ཁམས་ཀྱང་མ་ཆགས། མ་བཅིངས་མ་གྲོལ་བའོ། །མི་སྐྱེ་བ་དང་། ཟད་པ་དང་། མངོན་པར་འདུ་མི་བྱེད་པ་ཤེས་པ་ཡང་མ་ཆགས་
མ་བཅིངས་མ་གྲོལ་བའོ། །རིག་པ་དང་རྣམ་པར་གྲོལ་བ་ཡང་མ་ཆགས། མ་བཅིངས་མ་གྲོལ་བའོ། །མངོན་པར་ཤེས་པ་ཡང་མ་ཆགས། མ་བཅིངས་མ་གྲོལ་བའོ། །རྣམ་པར་གྲོལ་བའི་ཡེ་ཤེས་མཐོང་བ་ཡང་མ་ཆགས་མ་བཅིངས་
མ་གྲོལ་བའོ། །སོ་སོའི་སྐྱེ་བོ་དང་། ཉན་ཐོས་དང་རང་སངས་རྒྱས་ཀྱི་ཆོས་ཀྱང་མ་ཆགས་མ་བཅིངས་མ་གྲོལ་བའོ། །མྱ་ངན་ལས་འདས་པ་ཡང་མ་ཆགས་མ་བཅིངས་མ་གྲོལ་བའོ། །སངས་རྒྱས་ཀྱི་ཡེ་ཤེས་དང་སྟོབས་དང་མི་
འཇིགས་པ་ཡང་མ་ཆགས་མ་བཅིངས་མ་གྲོལ་བའོ། །འདས་པ་དང་མ་འོངས་པ་དང་ད་ལྟར་བྱུང་བ་ལ་ཐོགས་པ་མེད་པའི་ཡེ་ཤེས་མཐོང་བ་ཡང་མ་ཆགས་མ་བཅིངས་མ་གྲོལ་བའོ། །དེ་ཅིའི་ཕྱིར་ཞེ་ན། རབ་ཀྱི་རྩལ་གྱིས་རྣམ་
39-1-103a


པར་གནོན་པ་ཆོས་ཐམས་ཅད་ལ་བཅིང་བ་མི་དམིགས་པས་ཆོས་ཐམས་ཅད་ནི་ཆགས་པ་མེད་བཅིངས་པ་མེད་དོ། །དེའི་ཕྱིར་དེ་དག་གི་གྲོལ་བ་མི་དམིགས་སོ། །རབ་ཀྱི་རྩལ་གྱིས་རྣམ་པར་གནོན་པ་ཆགས་པ་མེད་ཅེས་
བྱ་བ་ནི་དེ་དག་ལ་དགྲོལ་བ་གང་ཡང་མེད་མོད་ཀྱི་འོན་ཀྱང་གང་དེ་ལྟར་ཆོས་རྣམས་མཐོང་བ་དེ་ནི་ཆགས་པ་མེད་པའི་ཡེ་ཤེས་མཐོང་བ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་མི་ཆགས་ཤེས་བྱ་བ་ནི་ཆགས་པ་མི་
དམིགས་ཤིང་ཆགས་པ་མེད་པ་ལ་ཆགས་པ་ཡང་དག་པའི་མ་ཡིན་པའི་ཕྱིར་ཆགས་པ་མེད་པ་ཞེས་བྱ་སྟེ། དེ་ལ་ནི་གང་ཆགས་པར་འགྱུར་བ་འམ། འཆིང་བར་འགྱུར་བ་ཅི་ཡང་མི་དམིགས་སོ། །གང་གི་ཕྱིར་གང་ཆགས་པར་འགྱུར་
བ་དང་འཆིང་བར་འགྱུར་བ་མི་དམིགས་པ་དེའི་ཕྱིར་མི་ཆགས་པ་ཞེས་བྱའོ། །རབ་ཀྱི་རྩལ་གྱིས་རྣམ་པར་གནོན་པ་རྟོགས་པ་མེད་ཅེས་བྱ་བ་ནི་རྟོགས་པ་མི་ད་མིགས་ཤིང་རྟོགས་པ་ཡོད་པ་མ་ཡིན་པའི་ཕྱིར་རྟོགས་པ་མེད་པ་ཞེས་བྱ་སྟེ། 
དེ་ལ་ནི་རྟོགས་པར་འགྱུར་བ་ཅི་ཡང་མེད་དོ། །དེ་ལ་གང་རྟོགས་པ་ཅི་ཡང་མི་དམིགས་ཏེ། གང་གི་ཕྱིར་གང་རྟོགས་པ་མི་དམིགས་པ་དེའི་ཕྱིར་རྟོགས་པ་མེད་པ་ཞེས་བྱའོ། །གང་ཆགས་པ་མེད་ཅིང་རྟོགས་པ་མེད་པ་དེ་ལ་རྣམ་
པར་གྲོལ་བ་ག་ལ་ཡོད། གང་ཆགས་པར་མི་འགྱུར་འཆིང་བར་མི་འགྱུར་བ་ནི་གྲོལ་བ་བྲལ་བ། བསིལ་བར་གྱུར་པ་རབ་ཏུ་རྣམ་པར་གྲོལ་བ་སྟེ། དེ་ལ་ནི་ཕྱིར་ཡང་རྟོགས་པར་བྱ་བ་གང་ཡང་མེད་པས་དེའི་ཕྱིར་གྲོལ་བ་ཞེས་
བྱ་སྟེ། དེ་ལ་ཐར་པ་ཡང་མེད་དོ། །རབ་ཀྱི་རྩལ་གྱིས་རྣམ་པར་གནོན་པ་འདི་ནི་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་ཆོས་ཐམས་ཅད་མ་ཆགས་མ་བཅིངས་མ་གྲོལ་བའི་ཡེ་ཤེས་
མཐོང་བ་ལ་འཇུག་པའོ། །རབ་ཀྱི་རྩལ་གྱིས་རྣམ་པར་གནོན་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཉེ་བར་འགྱུར། མྱུར་དུ་ཐམས་ཅད་མཁྱེན་པའི་ཡེ་ཤེས་
39-1-103b


ཐོབ་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་ཤེས་རབ་ཀྱི་ཕ་རོལ་དུ་ཕྱིན་པ་ལ་བརྩོན་པ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་ཐམས་ཅད་ཀྱི་ཐེ་ཚོམ་གཅོད་པའི་ཕྱིར་ངས་
ཕྱག་རྒྱ་འདི་བཞག་གོ། །རབ་ཀྱི་རྩལ་གྱིས་རྣམ་པར་གནོན་པ་ཕྱི་མའི་ཚེ་ཕྱི་མའི་དུས་ལྔ་བརྒྱ་པ་ཐ་མ་ལ་ངའི་ཉན་ཐོས་རྣམས་ཤེས་རབ་ཀྱི་ཕ་རོལ་དུ་ཕྱིན་པ་འདི་འཛིན་མི་ནུས་པའི་ཕྱིར་ངས་ཕྱག་རྒྱ་འདི་བསྟན་ཅིང་བྱིན་
གྱིས་བརླབས་སོ། །དེ་ནས་བཅོམ་ལྡན་འདས་ཀྱིས་བཟང་སྐྱོང་དང་། དེད་དཔོན་བཟང་པོ་ལ་སོགས་པ་བྱང་ཆུབ་སེམས་དཔའ་ལྔ་བརྒྱ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཀྱི་རྩལ་གྱིས་རྣམ་པར་གནོན་པ་ལ་
བཀའ་སྩལ་པ། རིགས་ཀྱི་བུ་དག་ཁྱེད་ཀྱིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་ཕྱི་མའི་ཚེ་ཕྱི་མའི་དུས་དམ་པའི་ཆོས་ནུབ་ཅིང་རབ་ཏུ་རྣམ་པར་འཇིག་སྟེ། ཟད་པར་འགྱུར་བའི་དུས་ན་དེ་བཞིན་གཤེགས་
པས་བསྐལ་པ་བྱེ་བ་ཁྲག་ཁྲིག་འབུམ་ཕྲག་མང་པོར་ཡང་དག་པར་བསྒྲུབས་པའི་ཆོས་རིན་པོ་ཆེའི་མཛོད། ཤེས་རབ་ཀྱི་ཕ་རོལ་དུ་ཕྱིན་པ་སྔོན་དུ་འགྲོ་བ་ཤེས་རབ་ཀྱི་ཕ་རོལ་དུ་ཕྱིན་པ་འབྱུང་བ་ཤེས་རབ་ཀྱི་ཕ་རོལ་དུ་ཕྱིན་པའི་གནས་
འདི་གཟུང་བ་དང་གཞན་ལ་ཡང་རྒྱ་ཆེར་ཡང་དག་པར་སྟོན་ནུས་སམ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་དེ་བཞིན་
གཤེགས་པས་བསྐལ་པ་བྱེ་བ་ཁྲག་ཁྲིག་འབུམ་ཕྲག་མང་པོར་ཡང་དག་པར་བསྒྲུབས་པ་བླ་ན་མེད་པའི་ཆོས་རིན་པོ་ཆེའི་མཛོད་ཤེས་རབ་ཀྱི་ཕ་རོལ་དུ་ཕྱིན་པའི་སྔོན་དུ་འགྲོ་བ་ཤེས་རབ་ཀྱི་ཕ་རོལ་དུ་ཕྱིན་པ་འབྱུང་བ་ཤེས་རབ་
ཀྱི་ཕ་རོལ་དུ་ཕྱིན་པའི་གནས་འདི་གཟུང་བ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པའི་རྔོ་ཐོགས་ལགས་སོ། །བཅོམ་ལྡན་འདས་དུས་དེ་ནི་འཇིགས་པ་ཆེན་པོ་མྱ་ངན་ཆེན་པོ་མ་རུངས་པ་ཆེན་པོར་འགྱུར་
39-1-104a


ཏེ། སེམས་ཅན་ཆོས་ཀྱིས་ཕོངས་པར་འགྱུར་བའི་ལས་དང་ལྡན་པ་ཕལ་ཆེར་འབྱུང་། ལོག་པར་ཆགས། ཤིང་བརྐམ་པ། ལོག་པའི་འདོད་ཆགས་ཀྱིས་ཆགས་པ། ཆོས་མ་ལགས་པ་ལ་འདོད་ཆགས་ཀྱིས་ཆགས་པ། 
ཕྲག་དོག་དང་འདོད་པས་ཡོངས་སུ་ཟིན་པའི་སེམས་དང་ལྡན་པ། ཁྲོ་བ་གཏུམ་པ། བརླང་བ་བཀའ་བློ་མི་བདེ་བ། གཡོན་ཅན་མི་སྲུན་པ་སྒྱུ་ཅན། ཆོས་མ་ལགས་པ་སྤྱོད་པ་དང་། འཐབ་པ་དང་། རྩོད་པ་དང་མཚང་འདྲུ་བ་དང་། འདྲེག་པ་མང་བ། 
སྡོམ་པ་ལ་མི་གནས་པ། འདོད་པ་དང་། བརྐམ་པའི་ཟིལ་གྱིས་གནོན་པ། ལེ་ལོ་ཅན། བརྩོན་འགྲུས་ཆུང་བ། དྲན་པ་ཉམས་པ། ཤེས་བཞིན་ཅན་མ་ལགས་པ། གཅམ་བུ་མུ་ཅོར་སྨྲ་བ། ཁ་བར་ཅན། སྡིག་པའི་ལས་ཁོང་ན་སྦེད་ཅིང་། 
འཆབ་པ། འདོད་ཆགས་དང་། ཞེ་སྡང་དང་གཏི་མུག་ཆེ་བ། མ་རིག་པའི་སྒོ་ངའི་སྦུབས་དང་། གཏི་མུག་གི་མུན་ནག་གི་ཟིལ་གྱིས་གནོན་པ། བདུད་ཀྱི་ཕྱོགས་དང་འཐུན་པར་སྤྱོད་པ། ཆོས་འདུལ་བ་ཟབ་མོ་ཆོས་རིན་པོ་ཆེའི་མཛོད་འདི་
ལ་ཕྱིར་རྒོལ་བ་འབྱུང་། མི་སྩུ་བའི་ངང་ཚུལ་ཅན་འབྱུང་ལགས་མོད་ཀྱི། བཅོམ་ལྡན་འདས་བདག་ཅག་རྣམས་དེ་བཞིན་གཤེགས་པས་བསྐལ་པ་བྱེ་བ་ཁྲག་ཁྲིག་འབུམ་ཕྲག་མང་པོར་དགེ་བའི་རྩ་བ་བསྒྲུབས་པ་བླ་ན་མེད་པའི་ཆོས་
རིན་པོ་ཆེའི་མཛོད་འདི་འཛིན་ཅིང་ཀློག་པར་སྤྲོ་ལགས་སོ། །གང་དག་ཐ་མའི་དུས་དེ་ན་ཆོས་འདི་ཚོལ་བ་ཆོས་འདི་ལ་སློབ་འཚལ་བ། གཡོ་མ་མཆིས་པ་དྲང་བ། སྒྱུ་མ་མཆིས་པ་གང་སྲོག་གི་ཕྱིར་ཡང་མི་གཏོང་བ། ཆོས་འདི་ལྟ་བུ་ལ་མི་
རྒོལ་བ་ཆོས་ཀྱི་རྣམ་གྲངས་འདི་སྤོང་བར་མི་འགྱུར་བ། ཆོས་ཀྱི་རྣམ་གྲངས་འདི་ལ་རྒྱབ་ཀྱིས་ཕྱོགས་པར་མི་འགྱུར་བ་ནི་རབ་ཏུ་ཉུང་བར་འགྱུར་ཏེ། དེ་དག་གི་དོན་བགྱི་ཞིང་སྤྲོ་བ་བསལ་ནས། ཆོས་འདི་ལྟ་བུ་ལ་ཡང་དག་པར་གཟེང་སྟོད་པར་
བགྱི། ཡང་དག་པར་རབ་ཏུ་དགའ་བར་བགྱི་ལགས་སོ། །དེ་ནས་བཅོམ་ལྡན་འདས་དེའི་དུས་ན་ཆོས་ཀྱི་གནས་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་བྱིན་གྱིས་བརླབས་ཏེ་ཆོས་ཀྱི་རྣམ་གྲངས་འདི་ལ་བདུད་སྡིག་ཅན་རྣམས་ཀྱི་ཞགས་པ་
39-1-104b


གཅད་པའི་ཕྱིར་བྱིན་གྱིས་བརླབ་པ་མཛད་དོ། །དེ་ནས་བཅོམ་ལྡན་འདས་འཛུམ་པ་མཛད་པ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བ་ཆེན་པོས་ཁྱབ་པར་གྱུར་ཏོ། །ལྷ་རྣམས་ཀྱིས་ཀྱང་མི་མཐོང་། མི་རྣམས་
ཀྱིས་ཀྱང་ལྷ་མཐོང་ངོ་། །གང་དེར་འདུས་པའི་ལྷ་དང་། ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་མི་འམ་ཅི་དང་། ལྟོ་འཕྱེ་ཆེན་པོ་དེ་དག་ཐམས་ཅད་ཀྱིས་ལྷའི་མེ་ཏོག་བཅོམ་ལྡན་འདས་ལ་གཏོར། ལྷའི་གོས་
ཀྱང་ཕུལ་ནས་སྒྲ་སྐད་ཆེན་པོ་ཕྱུང་སྟེ། ཨ་ལ་ལ་དེ་བཞིན་གཤེགས་པས་བདུད་སྡིག་ཅན་རྣམས་ཀྱི་སྤྱོད་ཡུལ་མ་ལགས་པ་བྱིན་གྱིས་བརླབས་པ་འདི་ནི་བྱིན་གྱིས་རླབས་ཆེན་པོ་ལགས་ཏེ། ཆོས་ཀྱི་བྱིན་གྱི་རླབས་འདིས་བདུད་ཀྱི་
ཞགས་པ་ཐམས་ཅད་བཀུམ་མོ། །རིགས་ཀྱི་བུ་འམ་རིགས་ཀྱི་བུ་མོ་དེ་དག་བདུད་སྡིག་ཅན་གྱིས་འཇིགས་སོ་སྙམ་དུ་དོགས་པར་མི་བགྱིའོ། །གང་ཆོས་ཀྱི་རྣམ་གྲངས་འདི་འཛིན་པ་དང་ཀློག་པ་དང་གཞན་དག་ལ་ཡང་རྒྱ་
ཆེར་ཡང་དག་པར་རབ་ཏུ་སྟོན་པའི་བྱང་ཆུབ་སེམས་དཔའ་དེ་དག་ནི་བདུད་སྡེ་དང་བཅས་པ་ལས་རྒལ་བར་འགྱུར་ལགས་སོ། །གང་ཆོས་ཀྱི་རྣམ་གྲངས་འདི་འཛིན་པ་དང་། ཀློག་པ་དང་གཞན་ལ་ཡང་རྒྱ་ཆེར་ཡང་དག་པར་སྟོན་པ་
དེ་དག་ནི་བདུད་སྡིག་ཅན་སྡེ་དང་བཅས་པ་ལས་རྒྱལ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་རབ་ཀྱི་རྩལ་གྱིས་རྣམ་པར་གནོན་པ་ལ་འདི་སྐད་ཅེས་བཀའ་སྩལ་ཏོ། །དེ་དེ་བཞིན་ནོ། །རབ་ཀྱི་
རྩལ་གྱིས་རྣམ་པར་གནོན་པ་དེ་དེ་བཞིན་ཏེ། ལྷའི་བུ་དེ་དག་གིས་ཚིག་ཇི་སྐད་སྨྲས་པ་བཞིན་ཏེ། རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་གཤེགས་པས་ཆོས་ཀྱི་རྣམ་གྲངས་འདི་ལ་བདུད་སྡིག་ཅན་རྣམས་ཀྱི་མཚམས་
བཅད་དོ། །རབ་ཀྱི་རྩལ་གྱིས་རྣམ་པར་གནོན་པ་རིགས་ཀྱི་བུ་འམ་རིགས་ཀྱི་བུ་མོ་གང་ཆོས་ཀྱི་རྣམ་གྲངས་འདི་འཛིན་པ་དང་འཆང་བ་དང་ཀློག་པ་དང་གཞན་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དེ་དག་ནི་བདུད་སྡིག་ཅན་
39-1-105a


རྣམས་ཀྱི་སྤྱོད་ཡུལ་དུ་མི་འགྱུར་ཏེ། རིགས་ཀྱི་བུ་དང་རིགས་ཀྱི་བུ་མོ་དེ་དག་ནི་བདུད་སྡིག་ཅན་རྣམས་ཀྱིས་མི་ཚུགས་པར་འགྱུར་རོ། །གང་དག་ཆོས་ཀྱི་རྣམ་གྲངས་འདི་འཛིན་པ་དང་འཆང་བ་དང་ཀློག་པ་དང་གཞན་དག་ལ་
ཡང་རྒྱ་ཆེར་ཡང་དག་པར་རབ་ཏུ་སྟོན་པ་དེ་དག་ནི་བདུད་དང་ཕྱིར་རྒོལ་བ་ཆོམས་པར་འགྱུར། གཡུལ་ལས་རྒྱལ་བར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་ཆོས་ཀྱི་རྣམ་གྲངས་འདི་ནི་ཀུན་ནས་ཉོན་མོངས་པ་ཅན་དང་བདུད་
ཀྱི་ཞགས་པས་བཅིངས་པའི་སེམས་ཅན་རྣམས་ཀྱི་ལག་ཏུ་འགྲོ་བར་མི་འགྱུར་ཏེ། རབ་ཀྱི་རྩལ་གྱིས་རྣམ་པར་གནོན་པ་འདི་ནི་ཅང་ཤེས་པ་རྣམས་ཀྱིས་ཡིན་གྱི་ཅང་ཤེས་པ་མ་ཡིན་པ་རྣམས་ཀྱིས་མ་ཡིན་ནོ། །རབ་ཀྱི་རྩལ་གྱིས་རྣམ་
པར་གནོན་པ་འདི་ལྟ་སྟེ་དཔེར་ན་གླང་པོ་ཆེ་ཅང་ཤེས་དང་རྟ་ཅང་ཤེས་གང་ཡིན་པ་དེ་དག་ནི་ཁམས་ཀྱི་རྒྱལ་པོ་རྣམས་ཀྱིས་ཡོངས་སུ་སྤྱོད་པ་མི་བྱེད་དོ། །དེ་དག་ནི་སྐྱེ་བོ་གཏུམ་པོ་རྣམས་ཀྱིས་མཐོང་བར་ཡང་མི་འགྲོའོ། །རབ་ཀྱི་རྩལ་གྱིས་
རྣམ་པར་གནོན་པ་གླང་པོ་ཆེ་ཅང་ཤེས་དང་རྟ་ཅང་ཤེས་དེ་ལྟ་བུ་ནི་འཁོར་ལོས་སྒྱུར་བའི་རྒྱལ་པོས་མཐོང་བ་ཉེ་བར་འགྲོ་སྟེ། དེ་དག་གི་ལོངས་སྤྱོད་དང་བསྙེན་བཀུར་བྱ་བ་དང་ཡོངས་སུ་སྤྱད་པའི་ཕྱིར་ཡང་མངོན་པར་བྱུང་བས་དེ་དག་ནི་འཁོར་
ལོས་སྒྱུར་བའི་རྒྱལ་པོ་རྣམས་ཀྱི་ཡོངས་སུ་སྤྱོད་པར་འགྱུར་རོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་འདི་ལྟ་བུའི་ཆོས་ཀྱི་རྣམ་གྲངས་འདི་ནི་མི་ཅང་ཤེས་ཀྱི་སེམས་ཅན་རྣམས་ཀྱི་ལོངས་སྤྱོད་ཀྱི་ཕྱིར་ལག་ཏུ་འགྲོ་བར་འགྱུར་རོ། །
རབ་ཀྱི་རྩལ་གྱིས་རྣམ་པར་གནོན་པ་འདི་ལྟ་སྟེ་དཔེར་ན་ཀླུའི་རྒྱལ་པོ་ཉེར་རྩི་དང་ཀླུའི་རྒྱལ་པོ་རབ་གནས་དང་ཀླུའི་རྒྱལ་པོ་ས་སྲུང་གི་བུ་དང་། དེ་དག་ནི་མི་རྣམས་ཀྱི་ལོངས་སྤྱོད་ཀྱི་ཕྱིར་ཉེ་བར་མི་འགྲོ། མི་རྣམས་ཀྱིས་མཐོང་བར་ཉེ་བར་
མི་འགྲོ། དེ་དག་ནི་གཞན་གྱི་ཉེ་བར་སྤྱོད་པ་དང་ལོངས་སྤྱོད་ཀྱི་ཕྱིར་ཡང་ཉེ་བར་མི་འགྲོ་ཡི་ཀླུའི་རྒྱལ་པོ་ད་དག་ནི་ལྷ་ཅང་ཤེས་རྣམས་ཀྱི་ལོངས་སྤྱོད་ཀྱི་ཕྱིར་ཉེ་བར་འགྲོའོ། །ཇི་ལྟ་ཇི་ལྟ་བུར་ལྷའི་དབང་པོ་བརྒྱ་བྱིན་བཀོད་པ་བྱས་ནས་འགྲོ་བ་ན། 
39-1-105b


ཀླུའི་རྒྱལ་པོ་དེ་དག་ཀྱང་དེ་ལྟ་དེ་ལྟ་བུར་དེ་འདྲ་བའི་བཀོད་པ་བྱས་ནས་ལོངས་སྤྱོད་ཀྱི་ཕྱིར་ཉེ་བར་འགྲོའོ། །རབ་ཀྱི་རྩལ་གྱིས་རྣམ་པར་གནོན་པ་དེ་བཞིན་དུ་ཆོས་ཀྱི་རྣམ་གྲངས་འདི་ནི་འདི་ལྟ་སྟེ། མིའི་དབང་པོ་མི་ཅང་ཤེས་རྣམས་ཀྱིས་ཀློག་པ་དང་བཤད་པ་དང་རབ་ཏུ་
བསྟན་པའི་ཉེ་བར་སྤྱོད་པ་དང་ལོངས་སྤྱོད་དུ་འགྱུར་ཏེ། ཆོས་ཀྱི་རྣམ་གྲངས་འདི་ནི་དེ་དག་གི་བཀོད་པ་ཆེན་པོ་དང་རྒྱས་པ་ཆེན་པོ་དང་ཆོས་ཀྱི་སྣང་བ་བྱེད་པར་འགྱུར། དེ་དག་ཆོས་ཀྱི་རྣམ་གྲངས་འདི་ལ་ཆོས་ཀྱི་དགའ་བ་བདུན་པོ་མྱོང་བར་འགྱུར་རོ། །གང་ཆོས་ཀྱི་རྣམ་
གྲངས་འདི་ལས་ཚུལ་གཅིག་ཙམ་འཛིན་པ་དེ་དག་ཀྱང་མཆོག་ཏུ་དགའ་བ་དང་ལྡན་པར་འགྱུར་ན་གང་ཐམས་ཅད་རྫོགས་པར་བྲིས་པ་དང་འཛིན་པ་དང་འཆང་བ་དང་མཆོད་པ་དང་རྒྱས་པར་བྱེད་པ་ལྟ་ཅི་སྨོས། ཆོས་ཀྱི་རྣམ་གྲངས་འདིས་མིའི་དབང་པོ་དང་མི་ཅང་ཤེས་
དེ་དག་བཟུང་བར་འགྱུར་རོ། །འདི་ནི་ཅང་ཤེས་མ་ཡིན་པ་རྣམས་ཀྱི་སྤྱོད་ཡུལ་མ་ཡིན་ནོ། །རབ་ཀྱི་རྩལ་གྱིས་རྣམ་པར་གནོན་པ་འདི་ནི་ཐེ་ཚོམ་ཐམས་ཅད་གཅོད་པའི་ཕྱིར་ངས་དེ་དག་སྨྲས་སོ། །ཆོས་ཀྱི་རྣམ་གྲངས་འདི་བཤད་པ་ན། བྱང་ཆུབ་སེམས་དཔའ་
དུ་མ་དཔག་ཏུ་མེད་པ་དག་གིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སེམས་ཅན་གྲངས་མེད་དཔག་ཏུ་མེད་པ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དེ་དག་བྱང་ཆུབ་ཏུ་ངེས་པར་འགྱུར་བ་དེ་བཞིན་
གཤེགས་པས་བསྟན་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཀྱི་རྩལ་གྱིས་རྣམ་པར་གནོན་པ་དང་། འཁོར་བཞི་དང་། ལྷ་དང་མི་དང་ལྷ་མ་ཡིན་དང་ཀླུ་དང་གནོད་སྦྱིན་དང་
དྲི་ཟ་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་བཅས་པའི་འཇིག་རྟེན་ཡིད་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཕན་ཡོན་གྱི་ལེའུ་ཞེས་བགྱི་སྟེ་བདུན་པའོ།།  །།འཕགས་པ་རབ་ཀྱི་རྩལ་གྱིས་
རྣམ་པར་གནོན་པས་ཞུས་པ། ཤེས་རབ་ཀྱི་ཕ་རོལ་དུ་ཕྱིན་པ་རྫོགས་སོ།། །།རྒྱ་གར་གྱི་མཁན་པོ་ཤཱི་ལེན་དྲ་བོ་དྷི་དང་། ཛི་ན་མི་ཏྲ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །། 
39-1-106a


༄༅། །རྒྱ་གར་སྐད་དུ། ཨཱརྱ་སབ་ཏ་ཤ་ཏི་ཀཱ་ནཱ་མ་པྲ་ཛྙཱ་པཱ་ར་མི་ཏཱ་མ་ཧཱ་ཡཱ་ན་སཱུ་ཏྲ།  བོད་སྐད་དུ། འཕགས་པ་ཤེས་རབ་ཀྱི་ཕ་རོལ་དུ་ཕྱིན་པ་བདུན་བརྒྱ་པ་ཞེས་བྱ་བ་ཐེག་པ་ཆེན་པོའི་མདོ།  བམ་པོ་དང་པོ། སངས་རྒྱས་དང་བྱང་ཆུབ་
སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་སྟོང་ཐམས་པའི་དགེ་སློང་གི་དགེ་འདུན་ཆེན་
པོ་དང་ཐབས་གཅིག་ཏུ་བཞུགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པ་ས་ཡ་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཤ་སྟག་ལ་འདི་ལྟ་སྟེ། འཇམ་དཔལ་
གཞོན་ནུར་གྱུར་པ་དང་། བྱམས་པ་དང་། སྤོབས་པ་ཐོགས་མེད་དང་། བརྩོན་པ་མི་འདོར་དང་། དེ་དག་ལ་སོགས་པ་བྱང་ཆུབ་སེམས་དཔའ་ས་ཡ་དང་ཡང་ཐབས་གཅིག་གོ། །དེ་ནས་འཇམ་དཔལ་གཞོན་ནུར་གྱུར་པ་
དེ་བཞིན་གཤེགས་པ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་སྐྱ་རེང་ཤར་བའི་དུས་ཀྱི་ཚེ་རང་གི་གནས་ནས་བྱུང་སྟེ། དེ་བཞིན་གཤེགས་པའི་ཕོ་བྲང་ག་ལ་བ་དེར་སོང་ནས་ཕྱིན་པ་དང་ཕོ་བྲང་གི་སྒོའི་ཕྱི་རོལ་ན་
འདུག་གོ། །དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུ་ཡང་བཅོམ་ལྡན་འདས་ལ་བལྟ་བ་དང་ཕྱག་བྱ་བ་དང་། བསྙེན་བཀུར་བྱ་བའི་ཕྱིར་རང་གི་གནས་ནས་བྱུང་སྟེ། དེ་བཞིན་གཤེགས་པའི་ཕོ་བྲང་ག་ལ་བ་དེར་སོང་ངོ་། །དེ་ནས་ཚེ་དང་
ལྡན་པ་བྱམས་མའི་བུ་གང་པོ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་འོད་སྲུང་ཆེན་པོ་དང་། ཚེ་དང་ལྡན་པ་ཀཱ་ཏྱཱའི་བུ་ཆེན་པོ་དང་། ཚེ་དང་ལྡན་པ་གསུས་པོ་ཆེ་དང་། དེ་དག་ཐམས་ཅད་དང་གཞན་ཡང་
ཉན་ཐོས་ཆེན་པོ་རྣམས་རང་རང་གི་གནས་ནས་བྱུང་སྟེ། བཅོམ་ལྡན་འདས་ཀྱི་ཕོ་བྲང་ག་ལ་བ་དེར་དོང་ནས་ཕྱིན་པ་དང་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་ཉན་ཐོས་ཆེན་པོ་རྣམས་འོངས་ཤིང་
39-1-106b


ལྷགས་ཏེ་འདུས་པར་མཁྱེན་ནས་བདག་གི་ཕོ་བྲང་ནས་བྱུང་སྟེ་ཕོ་བྲང་གི་ཕྱི་རོལ་ཕྱོགས་གཅིག་ཏུ་གདན་བཏིང་བ་ལ་བཞུགས་སོ། །བཞུགས་ནས་ཀྱང་བཅོམ་ལྡན་འདས་ཀྱིས་མཁྱེན་བཞིན་དུ་ཚེ་དང་ལྡན་པ་ཤ་ར་དྭ་ཏིའི་བུ་ལ་བཀའ་སྩལ་
པ། ཤཱ་ར་དྭ་ཏིའི་བུ་ཁྱོད་ཅིའི་ཕྱིར་ཞོགས་པས་འོངས་ཏེ་དེ་བཞིན་གཤེགས་པའི་ཕོ་བྲང་གི་སྒོ་ན་འདུག །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་
འདས་ཐམས་ཅད་ཀྱི་ཐོག་མ་ཉིད་དུ་འཇམ་དཔལ་གཞོན་ནུར་གྱུར་པ་དེ་བཞིན་གཤེགས་པའི་ཕོ་བྲང་གི་ཆབ་སྒོར་མཆིས་སོ། །བདག་ནི་བཅོམ་ལྡན་འདས་ལ་བལྟ་བར་འཚལ་བའི་སླད་དུ་སླད་ཀྱིས་མཆིས་སོ། །དེ་ནས་བཅོམ་ལྡན་
འདས་ཀྱིས་མཁྱེན་བཞིན་དུ་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཁྱོད་དེ་བཞིན་གཤེགས་པ་ལ་བལྟ་བ་དང་ཕྱག་བྱ་བ་དང་བསྙེན་བཀུར་བྱ་བའི་ཕྱིར་ཐམས་ཅད་ཀྱི་ཐོག་མ་ཉིད་དུ་དེ་བཞིན་
གཤེགས་པའི་ཕོ་བྲང་གི་སྒོར་འདུག་པ་བདེན་ནམ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་དེ་ལྟ་ལགས། བདེ་བར་གཤེགས་
པ་དེ་དེ་ལྟ་ལགས་ཏེ། བདག་དེ་བཞིན་གཤེགས་པ་ལ་བལྟ་བ་དང་ཕྱག་བགྱི་བ་དང་། བསྙེན་བཀུར་བགྱི་བའི་སླད་དུ་ཐམས་ཅད་ཀྱི་ཐོག་མ་ཉིད་རང་གི་གནས་ནས་བྱུང་སྟེ། དེ་བཞིན་གཤེགས་པའི་ཕོ་བྲང་ག་ལ་བ་དེར་མཆིས་ནས་
ཕྱོགས་གཅིག་ཏུ་མཆིས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་བདག་ནི་དེ་བཞིན་གཤེགས་པ་ལ་བལྟ་བ་དང་། ཕྱག་བགྱི་བ་དང་བསྙེན་བཀུར་བགྱི་བས་མ་ངོམས་པའི་སླད་དུའོ། །བཅོམ་ལྡན་འདས་འདི་ལྟར་བདག་དེ་བཞིན་གཤེགས་པ་ལ་
བལྟ་བ་དང་ཕྱག་བགྱི་བ་དང་བསྙེན་བཀུར་བགྱི་བའི་སླད་དུ་མཆིས་པ་དེ་ཡང་སེམས་ཅན་ཐམས་ཅད་ཀྱི་དོན་གྱི་སླད་དུ་སྟེ། བཅོམ་ལྡན་འདས་གལ་ཏེ་དེ་བཞིན་གཤེགས་པ་ལ་བལྟ་བ་དང་ཕྱག་བགྱི་བ་དང་བསྙེན་བཀུར་བགྱི་བ་ཇི་ལྟར་བདག་གིས་
39-1-107a


མཐོང་བ་དང་ཇི་ལྟར་བདག་ཕྱག་བགྱིད་པ་དང་ཇི་ལྟར་བདག་བསྙེན་བཀུར་བགྱིད་པ་དེ་ལྟར་བལྟ་བར་བགྱིའོ། །དེ་ལྟར་ཕྱག་བགྱིའོ། །དེ་ལྟར་བསྙེན་བཀུར་བགྱིའོ། །དེ་ལྟ་ན་དེ་བཞིན་གཤེགས་པ་མཐོང་བ་ནས་བསྙེན་
བཀུར་བགྱིས་པའི་བར་དུ་འགྱུར་རོ། །བཅོམ་ལྡན་འདས་བདག་ནི་སེམས་ཅན་ཐམས་ཅད་ཀྱི་སླད་དུ་དེ་བཞིན་གཤེགས་པ་ལ་བལྟ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་བཞིན་གཤེགས་པ་ལ་ཇི་ལྟར་
བལྟ། འཇམ་དཔལ་གྱིས་གསོལ་པ། མི་དམིགས་པའི་ཚུལ་གྱིས་དེ་བཞིན་ཉིད་ཀྱི་རྣམ་པ་དང་རྣམ་པར་མི་རྟོག་པའི་རྣམ་པར་དེ་བཞིན་གཤེགས་པ་ལ་བལྟ་བར་བགྱིའོ། །དེ་བཞིན་དུ་དེ་བཞིན་གཤེགས་པ་ལ་མི་སྐྱེ་བའི་རྣམ་པར་བལྟ་བ་
ནས་དངོས་པོ་མ་མཆིས་པའི་བར་དུ་དེ་བཞིན་གཤེགས་པ་ལ་བལྟ་བར་བགྱིའོ། །དེ་བཞིན་ཉིད་ལ་ཀུན་ནས་འབྱུང་བ་མ་མཆིས་ཏེ། དེ་ལྟར་དེ་བཞིན་གཤེགས་པ་ལ་བལྟ་བར་བགྱིའོ། །དེ་བཞིན་ཉིད་ནི་འབྱུང་བ་ཡང་མ་ལགས་འཇིག་པ་
ཡང་མ་ལགས་ཏེ། དེ་ལྟར་དེ་བཞིན་གཤེགས་པ་ལ་བལྟ་བར་བགྱིའོ། །དེ་བཞིན་ཉིད་ནི་ཡུལ་ན་མི་གནས་ཕྱོགས་ན་མི་གནས་ཏེ་དེ་ལྟར་དེ་བཞིན་གཤེགས་པ་ལ་བལྟ་བར་བགྱིའོ། །དེ་བཞིན་ཉིད་ནི་འདས་པ་ལ་མ་ལགས། མ་འོངས་
པ་ལ་མ་ལགས། ད་ལྟར་བྱུང་བ་ལ་མ་ལགས་ཏེ། དེ་ལྟར་དེ་བཞིན་གཤེགས་པ་ལ་བལྟ་བར་བགྱིའོ། །དེ་བཞིན་ཉིད་ནི་གཉིས་ཀྱིས་རབ་ཏུ་ཕྱེ་བ་མ་ལགས། གཉིས་སུ་མ་མཆིས་པས་རབ་ཏུ་ཕྱེ་བ་ཡང་མ་ལགས་ཏེ། དེ་ལྟར་དེ་བཞིན་
གཤེགས་པ་ལ་བལྟ་བར་བགྱིའོ། །དེ་བཞིན་ཉིད་ནི་ཀུན་ནས་ཉོན་མོངས་པར་འགྱུར་བ་མ་ལགས། རྣམ་པར་བྱང་བར་འགྱུར་བ་མ་ལགས་ཏེ། དེ་ལྟར་དེ་བཞིན་གཤེགས་པ་ལ་བལྟ་བར་བགྱིའོ། །དེ་བཞིན་ཉིད་ནི་མི་སྐྱེ་མི་འགག་པ་སྟེ། 
དེ་ལྟར་དེ་བཞིན་གཤེགས་པ་ལ་བལྟ་བར་བགྱིའོ། །དེ་ལྟ་ན་དེ་བཞིན་གཤེགས་པ་མཐོང་བ་དང་ཕྱག་བགྱིས་པ་དང་། བསྙེན་བཀུར་བགྱིས་པར་འགྱུར་རོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་
39-1-107b


གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་ཀྱིས་དེ་ལྟར་བལྟས་ན་ཅི་ཞིག་མཐོང་། འཇམ་དཔལ་གྱིས་གསོལ་པ། བཅོམ་ལྡན་འདས་བདག་གིས་དེ་ལྟར་བལྟས་ན། ཅི་ཡང་མཐོང་བ་མ་མཆིས་སོ། །བཅོམ་
ལྡན་འདས་དེ་བཞིན་དུ་བདག་གིས་ཆོས་གང་ལ་ཡང་སྐྱེ་བ་ཡང་མ་མཐོང་། འགོག་པ་ཡང་མ་མཐོང་ངོ་། །དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་
དེ་བཞིན་གཤེགས་པ་ལ་དེ་ལྟར་མཐོང་བ་དང་། དེ་ལྟར་བསྙེན་བཀུར་བྱས་པ་གང་ཡིན་པ་དང་། ཁྱོད་ཀྱི་བྱམས་པ་ཆེན་པོ་སེམས་ཅན་ཐམས་ཅད་ལ་ཉེ་བར་གནས་ཀྱང་ཁྱོད་ལ་སེམས་ཅན་དུ་དམིགས་པ་དང་། སེམས་ཅན་དུ་མངོན་པར་
ཞེན་པ་ཅི་ཡང་མེད་ཅིང་སེམས་ཅན་ཐམས་ཅད་ཡོངས་སུ་མྱ་ངན་ལས་འདའ་བའི་ཕྱིར་ཞུགས་ཀྱང་ཁྱོད་ལ་སེམས་ཅན་དུ་མངོན་པར་ཞེན་པ་གང་ཡང་མི་འབྱུང་བ་དང་། ཁྱོད་མི་དམིགས་པའི་ཚུལ་དང་དངོས་པོ་མེད་པའི་ཚུལ་དང་སྒྱིད་ལུག་
པ་མེད་པའི་ཚུལ་གྱིས་སེམས་ཅན་ཐམས་ཅད་ཀྱི་ཆེད་དུ་གོ་ཆ་བགོས་པ་དེ་ནི་ཁྱོད་དཀའ་བ་བྱེད་པའོ། །དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པས། ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་
ར་དྭ་ཏིའི་བུ་ཇི་སྐད་སྨྲས་པ་དེ་དེ་བཞིན་ཏེ། སེམས་ཅན་ཐམས་ཅད་ཡོངས་སུ་མྱ་ངན་ལས་འདའ་བའི་ཕྱིར་གོ་ཆ་འདི་ཡང་བགོས་ཏེ། བདག་ལ་སེམས་ཅན་དུ་དམིགས་པ་འམ། སེམས་ཅན་ལ་མངོན་པར་ཞེན་པ་གང་ཡང་མེད་དོ། །བཙུན་པ་ཤཱ་
ར་དྭ་ཏིའི་བུ་གོ་ཆ་དེ་ནི་འདི་ལྟར་བདག་གིས་སེམས་ཅན་གྱི་ཁམས་བྲི་བ་འམ་གང་བར་བྱ་ཞེས་དེ་ལྟར་མ་བགོས་སོ། །བཙུན་པ་ཤཱ་ར་དྭ་ཏིའི་བུ་ཡོངས་སུ་བརྟག་པ་ཉེ་བར་བཟུང་སྟེ། གལ་ཏེ་སངས་རྒྱས་ཀྱི་ཞིང་རེ་རེ་ན་གང་གཱའི་ཀླུང་གི་
བྱེ་མ་སྙེད་ཀྱི་སངས་རྒྱས་བཅོམ་ལྡན་འདས་རྣམས་བཞུགས་ཤིང་དེ་བཞིན་གཤེགས་པ་དེ་དག་སོ་སོ་ནས་ཉིན་མཚན་དུ་ཆོས་སྟོན་ཏེ། གང་གཱའི་ཀླུང་གི་བྱེ་མ་སྙེད་ཀྱི་བསྐལ་པར་བཞུགས་པར་གྱུར་ལ། གང་གཱའི་ཀླུང་གི་བྱེ་མ་སྙེད་ཀྱི་སངས་
39-1-108a


རྒྱས་བཅོམ་ལྡན་འདས་རྣམས་ཀྱི་ཆོས་བསྟན་པ་རེ་རེས་སེམས་ཅན་ཇི་སྙེད་བཏུལ་བ་དེ་སྙེད་ཀྱི་སེམས་ཅན་དེ་བཞིན་གཤེགས་པ་རེ་རེས་ཆོས་བསྟན་པ་རེ་རེས་བཏུལ་བར་གྱུར་དུ་ཟིན་ཀྱང་སེམས་ཅན་གྱི་ཁམས་ལ་བྲི་བ་འམ་གང་བར་མངོན་པ་མེད་དོ་དེ་ཅིའི་
ཕྱིར་ཞེ་ན། སེམས་ཅན་དབེན་པ་དང་། སེམས་ཅན་སེམས་ཅན་མ་ཡིན་པའི་ཕྱིར་ཏེ། བཙུན་པ་ཤཱ་ར་དྭ་ཏིའི་བུ་སེམས་ཅན་གྱི་ཁམས་ནི་བྲི་བ་འམ་གང་བར་མི་མངོན་ནོ། །དེ་སྐད་ཅེས་སྨྲས་པ་དང་། ཚེ་དང་ལྡན་པ་ཤཱ་ར་དྭ་ཏིའི་བུས་འཇམ་དཔལ་གཞོན་
ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་གལ་ཏེ་སེམས་ཅན་དབེན་པ་དང་། སེམས་ཅན་སེམས་ཅན་མ་ཡིན་པའི་ཕྱིར་སེམས་ཅན་གྱི་ཁམས་བྲི་བ་དང་གང་བར་མི་མངོན་ན། འོ་ན་བྱང་ཆུབ་མངོན་པར་རྫོགས་པར་སངས་རྒྱས་ནས་སུ་ལ་ཆོས་
སྟོན། དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་ར་དྭ་ཏིའི་བུ་གང་གི་ཚེ་སེམས་ཅན་ཤིན་དུ་མི་དམིགས་པ་དེའི་ཚེ་སུ་ཞིག་མངོན་པར་རྫོགས་པར་འཚང་རྒྱ། 
སུ་ལ་ཆོས་བསྟན་པར་བྱ། དེ་ཅིའི་ཕྱིར་ཞེ་ན། བཙུན་པ་ཤཱ་ར་དྭ་ཏིའི་བུ་འདི་ལྟར་ཆོས་ཐམས་ཅད་ཤིན་དུ་མི་དམིགས་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་
གང་གི་ཚེ་ཆོས་ཐམས་ཅད་ཤིན་དུ་མི་དམིགས་པ་དེའི་ཚེ་ཅི་སེམས་ཅན་དུ་ཡང་འདོགས་སམ། ཡང་གལ་ཏེ་འཇམ་དཔལ་ཁྱོད་ལ་འགའ་ཞིག་སེམས་ཅན་ཇི་སྙེད་ཡོད་ཅེས་དེ་སྐད་འདྲི་ན། དེ་ལ་ཁྱོད་ཀྱིས་ཇི་སྐད་བྱ། འཇམ་དཔལ་གྱིས་གསོལ་
པ། བཅོམ་ལྡན་འདས་དེ་སྐད་འདྲི་བ་དེ་ལ་བདག་གིས་འདི་སྐད་དུ་སངས་རྒྱས་ཀྱི་ཆོས་ཇི་སྙེད་པ་དེ་སྙེད་དོ་ཞེས་བགྱིའོ། །བཅོམ་ལྡན་འདས་གལ་ཏེ་ཡང་སེམས་ཅན་གྱི་ཁམས་ཀྱི་ཚད་ཇི་ཙམ་ཞེས་འདྲི་ན། དེ་སྐད་འདྲི་བ་དེ་ལ་བདག་གིས་འདི་
སྐད་དུ་སངས་རྒྱས་ཀྱི་ཡུལ་གྱི་ཚད་ཇི་ཙམ་མོ་ཞེས་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་གལ་ཏེ་ཡང་ལ་ལ་ཞིག་འདི་སྐད་དུ་སེམས་ཅན་གྱི་ཁམས་གང་དུ་གཏོགས་ཤེས་འདྲི་ན་དེ་ལ་ཁྱོད་ཀྱིས་
39-1-108b


ཇི་སྐད་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་སྐད་འདྲི་བ་དེ་ལ་བདག་གིས་འདི་སྐད་དུ་སྐྱེ་བ་མེད་པ་བསམ་གྱིས་མི་ཁྱབ་པ་གང་དུ་གཏོགས་པར་གཏོགས་སོ་ཞེས་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་
དཔལ་གལ་ཏེ་ཡང་ལ་ལ་ཞིག་ཁྱོད་ལ་འདི་སྐད་དུ། སེམས་ཅན་གྱི་ཁམས་ཅི་ལ་གནས་ཞེས་འདྲི་ན། དེ་ལ་ཁྱོད་ཀྱིས་ཇི་སྐད་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་སྐད་འདྲི་བ་དེ་ལ་བདག་གིས་འདི་སྐད་དུ། སྐྱེ་བ་མེད་
པའི་ཁམས་ཅི་ལ་གནས་པ་དེ་ལ་སེམས་ཅན་གྱི་ཁམས་ཀྱང་གནས་སོ་ཞེས་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་གང་གི་ཚེ་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་དེའི་ཚེ། ཅི་ལ་གནས་ཏེ་ཤེས་རབ་
ཀྱི་ཕ་རོལ་དུ་ཕྱིན་པ་སྒོམ། འཇམ་དཔལ་གྱིས་གསོལ་པ། བཅོམ་ལྡན་འདས་གང་གི་ཚེ་བདག་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་དེའི་ཚེ་མི་གནས་པར་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་ཀྱིས་
བཀའ་སྩལ་པ། འཇམ་དཔལ་མི་གནས་པ་ལ་ཤེས་རབ་ཀྱི་ཕ་རོལ་དུ་ཕྱིན་པ་ལ་བསྒོམ་དུ་ཡང་ཅི་ཡོད། འཇམ་དཔལ་གྱིས་གསོལ་པ། བཅོམ་ལྡན་འདས་གང་ཅི་ལ་ཡང་མི་གནས་པ་དེ་ཉིད་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་
ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་གང་གི་ཚེ། ཤེས་རབ་ཀྱི་ཕ་རོལ་དུ་ཕྱིན་པ་ལ་སྒོམ་པ་དེའི་ཚེ་ཁྱོད་ཀྱིས་དགེ་བའི་རྩ་བ་འཕེལ་བ་འམ་འབྲི་བར་འགྱུར། འཇམ་དཔལ་གྱིས་གསོལ་པ། 
བཅོམ་ལྡན་འདས་དེའི་ཚེ་བདག་གི་དགེ་བའི་རྩ་བ་འཕེལ་བ་འམ། འབྲི་བར་འགྱུར་བ་ཅི་ཡང་མ་མཆིས་སོ། །བཅོམ་ལྡན་འདས་གང་ལས་ཆོས་འགའ་ཞིག་འཕེལ་བ་འམ་འབྲི་བ་མཆིས་ན། དེ་ནི་ཤེས་རབ་ཀྱི་ཕ་རོལ་དུ་
ཕྱིན་པ་སྒོམ་པ་མ་ལགས་ཏེ། བཅོམ་ལྡན་འདས་གང་ཡང་ཆོས་འགའ་ཞིག་འཕེལ་བའི་སླད་དུ་འམ། འབྲི་བའི་སླད་དུ་ཉེ་བར་གནས་པ་དེ་ནི་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་མ་ལགས་པར་རིག་པར་བགྱིའོ། །བཅོམ་
39-1-109a


ལྡན་འདས་གང་སོ་སོའི་སྐྱེ་བོའི་ཆོས་རྣམས་ཀྱང་མི་སྤོང་ལ་སངས་རྒྱས་ཀྱི་ཆོས་རྣམས་ཀྱང་མི་ལེན་པ་དེ་ནི་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་ཤེས་
རབ་ཀྱི་ཕ་རོལ་དུ་ཕྱིན་པ་སྒོམ་པ་ནི་ཆོས་གང་སྤོང་བ་འམ་བླང་བར་དམིགས་པས་ཆོས་གང་ལ་ཡང་མི་གནས་པའི་སླད་དུའོ། །བཅོམ་ལྡན་འདས་གང་འཁོར་བའི་སྐྱོན་དུ་ཡང་མི་མཆི་ལ། མྱ་ངན་ལས་འདས་པའི་ཡོན་ཏན་དུ་
ཡང་མི་མཆི་བ་དེ་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་འཁོར་བ་ཉིད་ཀྱང་མི་མཐོང་ན་འཁོར་བའི་སྐྱོན་ལྟ་སྨོས་ཀྱང་ཅི་འཚལ། མྱ་ངན་ལས་འདས་པ་ཉིད་མི་
དམིགས་ན་མྱ་ངན་ལས་འདས་པའི་ཡོན་ཏན་ལྟ་སྨོས་ཀྱང་ཅི་འཚལ་ཏེ། བཅོམ་ལྡན་འདས་གང་ཆོས་གང་ལ་ཡང་བླང་བ་འམ་གཟུང་བ་འམ་དོར་བ་མ་མཆིས་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་སོ། །
བཅོམ་ལྡན་འདས་གང་ཆོས་གང་ལ་ཡང་འགྲིབ་པ་དང་འཕེལ་བ་མི་དམིགས་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་སྐྱེ་བ་མ་མཆིས་པ་ལ་འགྲིབ་པ་དང་འཕེལ་བ་མ་
མཆིས་པའི་སླད་དུའོ། །བཅོམ་ལྡན་འདས་གང་དེ་ལྟར་སྒོམ་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་གང་ཆོས་གང་ཡང་སྐྱེ་བ་འམ་འགག་པར་མི་བགྱིད་པ་དེ་ཤེས་རབ་ཀྱི་
ཕ་རོལ་དུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་གང་ཆོས་གང་ལ་ཡང་འགྲིབ་པ་འམ་རྒྱས་པར་མི་བགྱིད་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་ཏེ། བཅོམ་ལྡན་འདས་གང་དེ་ལྟར་སྒོམ་པ་དེ་ཤེས་རབ་ཀྱི་ཕ་
རོལ་དུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་གཞན་ཡང་བསམ་གྱིས་མི་ཁྱབ་པའི་ཆོས་ལ་ཡང་མི་སྨོན་ཅིང་ཉི་ཚེ་བ་ལ་ཡང་མི་སྨོན་གྱི། བཅོམ་ལྡན་འདས་གང་ལ་སྨོན་པ་དང་། གང་གིས་སྨོན་པ་དེ་ཉིད་ཀྱང་མ་མཆིས་
39-1-109b


པ་དེ་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་ཏེ། བཅོམ་ལྡན་འདས་དེ་ལྟར་སྒོམ་ན་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ནི་འདི་ལྟར་ཆོས་འདི་དག་ནི་མཆོག་
གོ། །ཆོས་འདི་དག་ནི་ཐ་མའོ་ཞེས་བགྱི་བར་ཉེ་བར་མི་གནས་ཤིང་ཆོས་གང་དག་མཆོག་དང་ཐ་མར་འགྱུར་བའི་ཆོས་དེ་དག་ཀྱང་མི་དམིགས་ཏེ། དེ་ལྟར་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པའི་རྣལ་འབྱོར་ལ་བརྩོན་པའི་རིགས་ཀྱི་བུ་ནི་
ཆོས་ཐམས་ཅད་མི་དམིགས་སོ། །བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ནི་ཆོས་གང་ཡང་མཆོག་ཅེ་འམ་ཐ་མ་ཞེས་མི་རྟོག་གོ། །དེ་ཅིའི་སླད་དུ་ཞེ་ན། བཅོམ་ལྡན་འདས་སྐྱེ་བ་མ་མཆིས་པ་ལ་མཆོག་གམ་ཐ་མ་
ཞེས་བགྱི་བ་གང་ཡང་མ་མཆིས་པའི་སླད་དུའོ། །དེ་བཞིན་ཉིད་དང་། ཡང་དག་པའི་མཐའ་དང་། ཆོས་ཐམས་ཅད་ཀྱི་བར་ལ་ཡང་མཆོག་གམ་ཐ་མ་མ་མཆིས་ཏེ། བཅོམ་ལྡན་འདས་དེ་ལྟར་སྒོམ་ན་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་
པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་སངས་རྒྱས་ཀྱི་ཆོས་རྣམས་མཆོག་མ་ཡིན་ནམ། འཇམ་དཔལ་གྱིས་གསོལ་པ། 
བཅོམ་ལྡན་འདས་གཟུང་དུ་མ་མཆིས་པའི་སླད་དུ་སངས་རྒྱས་ཀྱི་ཆོས་རྣམས་ནི་མཆོག་ལགས་སོ། །བཅོམ་ལྡན་འདས་ཆོས་ཐམས་ཅད་སྟོང་པར་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་ལགས་སམ། བཅོམ་
ལྡན་འདས་ཀྱིས་བཀའ་སྩལ་པ། འཇམ་དཔལ་དེ་དེ་བཞིན་ཏེ། དེ་བཞིན་གཤེགས་པས་ཆོས་ཐམས་ཅད་སྟོང་པར་མངོན་པར་རྫོགས་པར་སངས་རྒྱས་སོ། །འཇམ་དཔལ་གྱིས་གསོལ་པ། བཅོམ་ལྡན་འདས་སྟོང་པ་ཉིད་ལ་མཆོག་
གམ་ཐ་མ་ཞེས་བགྱི་བ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ལེགས་སོ་ལེགས་སོ། །འཇམ་དཔལ་དེ་དེ་བཞིན་ཏེ། ཇི་སྐད་སྨྲས་པ་བཞིན་ནོ། །འཇམ་དཔལ་སངས་རྒྱས་ཀྱི་ཆོས་རྣམས་བླ་ན་མེད་པ་
39-1-110a


མ་ཡིན་ནམ། འཇམ་དཔལ་གྱིས་གསོལ་པ། དེ་དེ་ལྟ་ལགས་ཏེ། སངས་རྒྱས་ཀྱི་ཆོས་རྣམས་ནི་བླ་ན་མ་མཆིས་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་དེ་དག་ལ་ཆོས་ཅུང་ཟད་ཙམ་ཡང་མ་མཆིས་ཤིང་མི་
དམིགས་ཏེ། དེ་བས་ན་སངས་རྒྱས་ཀྱི་ཆོས་དེ་དག་ནི་བླ་ན་མ་མཆིས་པའོ། །བཅོམ་ལྡན་འདས་གཞན་ཡང་གང་སངས་རྒྱས་ཀྱི་ཆོས་རྣམས་སྒྲུབ་པར་ཡང་མི་བགྱིད་ལ། སོ་སོའི་སྐྱེ་བོའི་ཆོས་རྣམས་སྤོང་བར་ཡང་མི་བགྱིད་ཅིང་སངས་
རྒྱས་ཀྱི་ཆོས་རྣམས་འདུལ་བ་ཡང་མ་ལགས་ལ་འཛིན་པ་ཡང་མ་ལགས་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་གཞན་ཡང་གང་ཆོས་གང་ལ་ཡང་མི་སེམས་ལ་རྣམ་པར་མི་རིག་པ་དེ་ཤེས་རབ་ཀྱི་ཕ་
རོལ་དུ་ཕྱིན་པ་ལ་སྒོམ་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་སངས་རྒྱས་ཀྱི་ཆོས་རྣམས་ལ་མི་སེམས་སམ། འཇམ་དཔལ་གྱིས་གསོལ་པ། བཅོམ་ལྡན་འདས་གལ་ཏེ་བདག་གིས་སངས་
རྒྱས་ཀྱི་ཆོས་རྣམས་ཡོངས་སུ་གྲུབ་པར་མཐོང་ན་ནི་བདག་སངས་རྒྱས་ཀྱི་ཆོས་རྣམས་ལ་སེམས་པ་ལགས་སོ། །བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ནི་འདི་དག་ནི་སོ་སོའི་སྐྱེ་བོའི་ཆོས་སོ། །འདི་དག་ནི་ཉན་ཐོས་
ཀྱི་ཆོས་སོ། །འདི་དག་ནི་རང་སངས་རྒྱས་ཀྱི་ཆོས་སོ། །འདི་དག་ནི་ཡང་དག་པར་རྫོགས་པའི་སངས་རྒྱས་ཀྱི་ཆོས་སོ་ཞེས་ཆོས་གང་ལ་ཡང་རྣམ་པར་རྟོག་པས་ཉེ་བར་གནས་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་
ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པའི་རྣལ་འབྱོར་ལ་བརྩོན་པའི་རིགས་ཀྱི་བུས་ཆོས་དེ་ཉིད་ཀྱང་མི་དམིགས་ཏེ། གང་ལ་ཆོས་དེ་དག་སོ་སོའི་སྐྱེ་བོའི་ཆོས་ཤེས་བརྗོད་པ་འམ། སློབ་པའི་ཆོས་ཤེས་བརྗོད་པ་འམ། མི་སློབ་པའི་
ཆོས་ཤེས་བརྗོད་པ་འམ། རང་སངས་རྒྱས་ཀྱི་ཆོས་ཤེས་བརྗོད་པ་འམ། ཡང་དག་པར་རྫོགས་པའི་སངས་རྒྱས་ཀྱི་ཆོས་ཤེས་བརྗོད་པ་ཡང་མཐའ་ལས་འདས་པའི་ཆོས་ཉིད་ལགས་པས་ཆོས་དེ་མི་དམིགས་ཤིང་ཡང་དག་པར་
39-1-110b


རྗེས་སུ་མི་མཐོང་བའི་སླད་དུའོ། །བཅོམ་ལྡན་འདས་དེ་ལྟར་སྒོམ་ན། ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་བསྒོམ་པའི་རྣལ་འབྱོར་ལ་བརྩོན་པའི་རིགས་ཀྱི་བུ་
ནི་འདི་ལྟར་འདི་ནི་འདོད་པའི་ཁམས་སོ། །འདི་ནི་གཟུགས་ཀྱི་ཁམས་སོ། །འདི་ནི་གཟུགས་མེད་པའི་ཁམས་སོ་ཞེས་བགྱི་བ་ནས་འདི་ནི་འགོག་པའི་དབྱིངས་སོ་ཞེས་བགྱི་བའི་བར་དུ་ཡང་མི་སེམས་སོ། །དེ་ཅིའི་སླད་དུ་ཞེ་ན། 
བཅོམ་ལྡན་འདས་འདི་ལྟར་དེས་འགོག་པའི་ཆོས་གང་ལགས་པའི་ཆོས་དེ་གང་ཡང་མི་མཐོང་སྟེ། བཅོམ་ལྡན་འདས་དེ་ལྟར་སྒོམ་པ་ནི་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པར་རིག་པར་བགྱིའོ། །བཅོམ་ལྡན་འདས་གཞན་ཡང་
གང་ཆོས་གང་ལ་ཡང་ཕན་པ་འམ་གནོད་པར་ཡང་མི་བགྱིད་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ནི་སངས་རྒྱས་ཀྱི་ཆོས་རྣམས་སྦྱིན་པར་བགྱིད་པ་འང་
མ་ལགས། སོ་སོའི་སྐྱེ་བོའི་ཆོས་རྣམས་གཅོད་པར་བགྱིད་པའང་མ་ལགས་སོ། །བཅོམ་ལྡན་འདས་གང་སོ་སོའི་སྐྱེ་བོའི་ཆོས་རྣམས་ཀྱང་མི་འགོག་ལ་སངས་རྒྱས་ཀྱི་ཆོས་རྣམས་ཀྱང་མི་འཐོབ་པ་དེ་ཤེས་རབ་ཀྱི་ཕ་རོལ་དུ་
ཕྱིན་པ་སྒོམ་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་ཀྱིས་ཆོས་ཟབ་མོ་འདི་ལྟ་བུ་འདི་བསྟན་པ་ལེགས་
སོ་ལེགས་སོ། །འཇམ་དཔལ་ཁྱོད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། ཉན་ཐོས་ཀྱི་ཐེག་པ་བ་མངོན་པའི་ང་རྒྱལ་ཅན་རྣམས་དང་། བྱང་ཆུབ་སེམས་དཔའི་ཐེག་པ་པ་དམིགས་པ་ཅན་རྣམས་ཡང་
དག་པ་ཇི་ལྟ་བ་བཞིན་དུ་རྟོགས་པར་བྱ་བའི་ཕྱིར་རྒྱ་འདི་བཞག་གོ། །འཇམ་དཔལ་རིགས་ཀྱི་བུ་འམ་རིགས་ཀྱི་བུ་མོ་གང་དག་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་བསྟན་པ་འདི་ཐོས་ནས་མི་སྐྲག་མི་དངང་དངང་བར་མི་
39-1-111a


འགྱུར་བ་དེ་དག་ནི་སངས་རྒྱས་གཅིག་ལ་བསྙེན་བཀུར་བྱས་པ་མ་ཡིན། སངས་རྒྱས་གཅིག་ལ་དགེ་བའི་རྩ་བ་བསྐྱེད་པ་མ་ཡིན་ནོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་
གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་ཤེས་རབ་ཀྱི་ཕ་རོལ་དུ་ཕྱིན་པ་རྒྱ་ཆེར་སྟོན་པར་སྤོབས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་སྤོབས་པར་གྱིས་ཤིག །འཇམ་
དཔལ་གྱིས་གསོལ་པ། བཅོམ་ལྡན་འདས་གང་ཆོས་གང་གིས་གནས་པ་མི་དམིགས་པ་དང་། མི་གནས་པ་ཡང་མི་དམིགས་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་སོ། །དེ་ཅིའི་སླད་དུ་ཞེ་ན། ཆོས་ཐམས་
ཅད་ནི་མི་གནས་པའི་སླད་དུ་མི་དམིགས་པ་སྟེ། བཅོམ་ལྡན་འདས་གང་ཆོས་གང་ལ་ཡང་ལྷག་པར་དམིགས་པའི་སླད་དུ་ཉེ་བར་མི་གནས་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པར་རིག་པར་བྱའོ། །དེ་ཅིའི་སླད་དུ་ཞེ་ན། 
བཅོམ་ལྡན་འདས་འདི་ལྟར་ཆོས་ཐམས་ཅད་ནི་དམིགས་པ་མ་མཆིས་པའི་སླད་དུ་སྟེ། བཅོམ་ལྡན་འདས་དེ་ལྟར་སྒོམ་པ་ནི་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་གཞན་ཡང་གང་ལ་སངས་རྒྱས་
ཀྱི་ཆོས་རྣམས་ཀྱང་མངོན་དུ་མི་འགྱུར་ན། རང་སངས་རྒྱས་ཀྱི་ཆོས་རྣམས་ལྟ་སྨོས་ཀྱང་ཅི་འཚལ། ཉན་ཐོས་ཀྱི་ཆོས་རྣམས་ཀྱང་མངོན་དུ་མི་འགྱུར་ན། སོ་སོའི་སྐྱེ་བོའི་ཆོས་རྣམས་ལྟ་སྨོས་ཀྱང་ཅི་འཚལ་བ་དེ་ཤེས་རབ་ཀྱི་ཕ་
རོལ་དུ་ཕྱིན་པ་སྒོམ་པར་བལྟ་བར་བགྱིའོ་བཅོམ་ལྡན་འདས་གཞན་ཡང་སྒོམ་པ་གང་ལ་བརྟེན་ནས་སངས་རྒྱས་ཀྱི་ཆོས་རྣམས་བསམ་གྱིས་མི་ཁྱབ་པ་ལ་ཡང་སངས་རྒྱས་ཀྱི་ཆོས་རྣམས་བསམ་གྱིས་མི་ཁྱབ་པའོ། །ཞེས་རྣམ་པར་མི་རྟོག་
པ་དེ་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཐམས་ཅད་ལ་རྣམ་པར་མི་རྟོག་པར་བལྟ་བར་བགྱིའོ། །
39-1-111b


བཅོམ་ལྡན་འདས་གཞན་ཡང་སྒོམ་པ་གང་ལ་བརྟེན་ནས་མཐོང་བ་མ་མཆིས་པར་ཆོས་ཐམས་ཅད་སངས་རྒྱས་ཀྱི་ཆོས་སུ་མཐོང་བ་དང་། ཆོས་ཐམས་ཅད་བསམ་གྱིས་མི་ཁྱབ་པའི་ཆོས་སུ་མཐོང་བ་དེ་ཤེས་རབ་ཀྱི་ཕ་
རོལ་དུ་ཕྱིན་པ་སྒོམ་པ་ལགས་སོ། །རིགས་ཀྱི་བུ་འམ་རིགས་ཀྱི་བུ་མོ་གང་དག་ཤེས་རབ་ཀྱི་ཕ་རོལ་དུ་ཕྱིན་པ་འདི་བསྟན་པ་འདི་ཐོས་ནས་མི་སྐྲག་མི་དངང་དངང་བར་མི་འགྱུར་བ་དེ་དག་སངས་རྒྱས་བརྒྱ་སྟོང་མང་པོ་ལ་བསྙེན་བཀུར་
བགྱིས་པར་འགྱུར་རོ། །བཅོམ་ལྡན་འདས་གཞན་ཡང་གང་ཀུན་ནས་ཉོན་མོངས་པ་འམ་རྣམ་པར་བྱང་བའི་ཆོས་གང་ཡང་དག་པར་རྗེས་སུ་མི་མཐོང་བ་དེ་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་ཏེ་བཅོམ་ལྡན་འདས་དེ་ལྟར་སྒོམ་ན་
ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་དེ་ནི་སོ་སོའི་སྐྱེ་བོ་དང་ཉན་ཐོས་དང་རང་སངས་རྒྱས་དང་ཡང་དག་པར་རྫོགས་པའི་སངས་རྒྱས་ཀྱི་བར་དུ་ཡང་ཐ་དད་དུ་མི་བགྱིད་
པ་སྟེ། བཅོམ་ལྡན་འདས་དེ་ནི་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པ་ལགས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཁྱོད་ཀྱིས་དེ་བཞིན་གཤེགས་པ་ཇི་སྙེད་ཅིག་ལ་བསྙེན་བཀུར་བྱས། འཇམ་
དཔལ་གྱིས་གསོལ་པ། བཅོམ་ལྡན་འདས་སྒྱུ་མའི་སྐྱེ་བུའི་སེམས་དང་སེམས་ལས་བྱུང་བ་ཇི་སྙེད་འགགས་པ་དེ་སྙེད་ལ་སྟེ། བཅོམ་ལྡན་འདས་བདག་གིས་དེ་བཞིན་གཤེགས་པ་དེ་སྙེད་ལ་བསྙེན་བཀུར་བགྱིས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་
དཔལ་ཁྱོད་སངས་རྒྱས་ཀྱི་ཆོས་ལ་ཡང་དག་པར་མ་ཞུགས་སམ། འཇམ་དཔལ་གྱིས་གསོལ་པ། བཅོམ་ལྡན་འདས་གང་སངས་རྒྱས་ཀྱི་ཆོས་ལ་ཡང་དག་པར་ཞུགས་པའི་ཆོས་དེ་གང་ཡང་དམིགས་སུ་མཆིས་སམ། བཅོམ་ལྡན་འདས་ཀྱིས་བཀའ་སྩལ་
པ། འཇམ་དཔལ་འོ་ན་སངས་རྒྱས་ཀྱི་ཆོས་དེ་དག་སུ་ལ་ཡོད། འཇམ་དཔལ་གྱིས་གསོལ་པ། བཅོམ་ལྡན་འདས་ཉིད་ལ་ཡང་སངས་རྒྱས་ཀྱི་ཆོས་ཤེས་བགྱི་བ་དེ་དག་གི་མིང་ཡང་མ་མཆིས་ཏེ། མི་དམིགས་ན་གཞན་རྣམས་ལ་མཆིས་པར་འགྱུར་
39-1-112a


བ་ལྟ་ཅི་སྨོས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཀྱིས་ཆགས་པ་མེད་པ་ཉིད་རྙེད་དམ། འཇམ་དཔལ་གྱིས་གསོལ་པ། བཅོམ་ལྡན་འདས་བདག་ཉིད་ཆགས་པ་མ་མཆིས་པ་ཉིད་ལགས་ན་བདག་གིས་ཀྱང་
ཆགས་པ་མ་མཆིས་པ་ཉིད་འཐོབ་པར་འགྱུར་རམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཅི་བྱང་ཆུབ་ཀྱི་སྙིང་པོ་ལ་འདུག་གམ། འཇམ་དཔལ་གྱིས་གསོལ་པ། ཡང་དག་པའི་མཐའ་བརྩན་པར་བགྱིས་ན་བཅོམ་
ལྡན་འདས་ཉིད་ཀྱང་བྱང་ཆུབ་ཀྱི་སྙིང་པོ་ལ་མ་ཞུགས་ན་བདག་ལྟ་མཆིས་པར་ཇི་ལྟར་འགྱུར། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཡང་དག་པའི་མཐའ་ཞེས་བྱ་བ་དེ་གང་གི་ཚིག་བླ་དགས། འཇམ་དཔལ་གྱིས་གསོལ་པ། 
བཅོམ་ལྡན་འདས་ཡང་དག་པའི་མཐའ་ཞེས་བགྱི་བ་དེ་ནི་འཇིག་ཚོགས་ཀྱི་ཚིག་བླ་དགས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཅི་ལས་བསམས་ཏེ་དེ་སྐད་སྨྲ། འཇམ་དཔལ་གྱིས་གསོལ་པ། བཅོམ་ལྡན་
འདས་ཚོགས་དེ་ནི་མ་མཆིས་པ་སྟེ། འཇིག་ཚོགས་མ་ལགས་པས་དེ་ནི་མི་འཕོ་ལ་འཕོ་བ་དང་བྲལ་བ་ཡང་མ་ལགས་ཏེ་དེའི་སླད་དུ་ཚོགས་འདི་ནི་འཇིག་ཚོགས་མ་ལགས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་
སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་ཐོས་ནས་མོས་ཏེ་མི་སྐྲག་མི་དངང་དངང་བར་མི་འགྱུར་བ་དེ་དག་ནི་བྱང་ཆུབ་ཏུ་ངེས་པར་འགྱུར་
བ་ལགས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཤེས་རབ་ཀྱི་ཕ་རོལ་དུ་ཕྱིན་པ་
བསྟན་པ་འདི་ཐོས་ནས་མོས་ཏེ་མི་སྐྲག་མི་དངང་དངང་བར་མི་འགྱུར་བ་དེ་དག་ནི་བྱང་ཆུབ་ལ་ཉེ་བར་གྱུར་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གང་ཆོས་དེ་དག་རྗེས་སུ་མི་རྟོག་པ་དེ་ཉིད་བྱང་ཆུབ་མཆོག་ལགས་པའི་སླད་དུའོ། །
39-1-112b


དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་ཐོས་ནས་མོས་ཏེ་མི་སྐྲག་མི་དངང་
དངང་བར་མི་འགྱུར་བ་དེ་དག་ནི་སངས་རྒྱས་ཉིད་དུ་བལྟ་བར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་སངས་རྒྱས་ཤེས་བགྱི་བ་དེ་ནི་དོན་དམ་པར་ན་སྐྱེ་བ་མ་མཆིས་པའི་ཚིག་བླ་དགས་ལགས་པའི་སླད་དུའོ། །དེ་ནས་བཅོམ་ལྡན་འདས་
ལ་སྲིང་མོ་དམིགས་པ་མེད་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཤེས་རབ་ཀྱི་ཕ་རོལ་དུ་ཕྱིན་པ་འདི་ཐོས་ནས་མོས་ཏེ། མི་སྐྲག་མི་དངང་དངང་བར་མི་འགྱུར་བ་དེ་དག་ནི་སོ་སོའི་
སྐྱེ་བོའི་ཆོས་རྣམས་དང་ཉན་ཐོས་ཀྱི་ཆོས་རྣམས་དང་རང་སངས་རྒྱས་ཀྱི་ཆོས་རྣམས་དང་ཡང་དག་པར་རྫོགས་པའི་སངས་རྒྱས་ཀྱི་ཆོས་རྣམས་ལ་ལྷག་པར་དམིགས་པར་མི་འགྱུར་བ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་
འདི་ལྟར་ཆོས་ཐམས་ཅད་ནི་མ་མཆིས་པའི་སླད་དུ་མི་དམིགས་པ་སྟེ། དེའི་སླད་དུ་དེ་དག་ལ་དམིགས་པ་མ་མཆིས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་བཀའ་སྩལ་པ། དེ་དེ་བཞིན་ནོ། །ཤཱ་ར་དྭ་ཏིའི་བུ་དེ་དེ་
བཞིན་ཏེ། རིགས་ཀྱི་བུ་འམ་རིགས་ཀྱི་བུ་མོ་གང་དག་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་བསྟན་པ་འདི་ཐོས་ནས་མོས་ཏེ་མི་སྐྲག་མི་དངང་དངང་བར་མི་འགྱུར་བ་དེ་དག་ནི་བྱང་ཆུབ་ཏུ་ངེས་པར་འགྱུར་རོ། །ཤཱ་ར་དྭ་ཏིའི་བུ་རིགས་ཀྱི་
བུ་འམ་རིགས་ཀྱི་བུ་མོ་གང་དག་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་ཐོས་ནས་མོས་ཏེ་མི་སྐྲག་མི་དངང་དངང་བར་མི་འགྱུར་ཞིང་སྤྱི་བོས་ལེན་པ་དེ་དག་ནི་ཕྱིར་མི་ལྡོག་པའི་ས་ལ་གནས་པ་ཡིན་པར་ཁྱོད་ཀྱིས་ཤེས་པར་གྱིས་
ཤིག །ཤཱ་ར་དྭ་ཏིའི་བུ་གང་དག་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་ཐོས་ནས་མོས་ཏེ་མི་སྐྲག་མི་དངང་དངང་བར་མི་འགྱུར་བ་དེ་དང་དེ་དག་ནི་སྦྱིན་བདག་དམ་པར་འགྱུར། སྦྱིན་བདག་ཆེན་པོར་འགྱུར། སྦྱིན་བདག་ཁྱད་པར་དུ་
39-1-113a


འཕགས་པར་འགྱུར་རོ། །ཤཱ་ར་དྭ་ཏིའི་བུ་དེ་དང་དེ་དག་ནི་ཚུལ་ཁྲིམས་ཕུན་སུམ་ཚོགས་པར་འགྱུར་རོ། །ཚུལ་ཁྲིམས་དང་ལྡན་པའི་མཆོག་ཏུ་འགྱུར། ཚུལ་ཁྲིམས་དང་ལྡན་པ་ཁྱད་པར་དུ་འཕགས་པར་འགྱུར། ཚུལ་ཁྲིམས་
ཀྱི་ཡོན་ཏན་གྱི་ལམ་རྙེད་པར་འགྱུར་རོ། །ཤཱ་ར་དྭ་ཏིའི་བུ་གང་དག་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་ཐོས་ནས་མོས་ཏེ་མི་སྐྲག་མི་དངང་དངང་བར་མི་འགྱུར་བ་དེ་དང་དེ་དག་ནི་བཟོད་པའི་མཆོག་དང་། བརྩོན་འགྲུས་ཀྱི་མཆོག་དང་། 
བསམ་གཏན་གྱི་མཆོག་དང་། མཚུངས་པ་མེད་པའི་ཤེས་རབ་ཀྱི་མཆོག་དང་ལྡན་པར་འགྱུར་རོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་ཐོས་ནས་
མོས་ཏེ། མི་སྐྲག་མི་དངང་དངང་བར་མི་འགྱུར་བ་དེ་དང་དེ་དག་ནི་རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་དང་ལྡན་པའི་བར་དུ་འགྱུར་རོ། །བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་གཞན་
ཡང་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་ཀྱིས་དོན་གྱི་དབང་ཅི་ཞིག་མཐོང་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད། འཇམ་དཔལ་གྱིས་གསོལ་པ། བཅོམ་
ལྡན་འདས་གལ་ཏེ་བདག་བྱང་ཆུབ་ཏུ་ཞུགས་ན་ནི་དེ་ལྟ་ན་བདག་མངོན་པར་རྫོགས་པར་འཚང་རྒྱ་བར་ཡང་འཚལ་ན་བཅོམ་ལྡན་འདས་བདག་ནི་བྱང་ཆུབ་ཏུ་སྨོན་པ་མ་ལགས་སོ། །དེ་ཅིའི་སླད་དུ་ཞེ་ན། འཇམ་དཔལ་གཞོན་ནུར་གྱུར་
པ་གང་ལགས་པ་དེ་བྱང་ཆུབ་ཉིད་དོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་ཟབ་མོ་ཟབ་པའི་གནས་འདི་ལྟ་བུ་འདི་སྟོན་པ་ལེགས་སོ། 
ལེགས་སོ། །འདི་ལྟར་ཁྱོད་ནི་སྔོན་གྱི་རྒྱལ་བ་ལ་བྱ་བ་བྱས་པ་སྟེ། མི་དམིགས་པར་ཚངས་པར་སྤྱོད་པ་ཡུན་རིང་དུ་སྤྱད་པའོ། །འཇམ་དཔལ་གྱིས་གསོལ་པ། བཅོམ་ལྡན་འདས་གལ་ཏེ་བདག་མི་དམིགས་པར་སྤྱོད་པ་ལགས་ན་ནི་ཆོས་ཐོབ་
39-1-113b


པ་ཉིད་དུ་འགྱུར་བ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་ཀྱིས་ངའི་ཉན་ཐོས་ཕུན་སུམ་ཚོགས་པ་འདི་དག་མཐོང་ངམ། འཇམ་
དཔལ་གྱིས་གསོལ་པ། བཅོམ་ལྡན་འདས་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་ཅི་འདྲ་བར་མཐོང་། འཇམ་དཔལ་གྱིས་གསོལ་པ། བཅོམ་ལྡན་འདས་ཇི་ལྟར་སོ་སོའི་སྐྱེ་བོར་མི་མཐོང་བ་དང་སློབ་པར་མི་མཐོང་བ་
དང་མི་སློབ་པར་མི་མཐོང་བ་དང་མཐོང་བ་ཡང་མ་མཆིས་པ་དང་། མ་མཐོང་བ་ཡང་མ་མཆིས་པ་དེ་ལྟར་མཐོང་ངོ་། །འདི་ལྟར་མང་དུའང་མི་མཐོང་བ་དང་། ཉུང་ངུའང་མི་མཐོང་བ་དང་། དུལ་བར་ཡང་མི་མཐོང་བ་དང་། མ་དུལ་བར་ཡང་མི་
མཐོང་བ་དེ་ལྟར་མཐོང་ངོ་། །དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་ཉན་ཐོས་ཀྱི་ཐེག་པ་པ་རྣམས་དེ་ལྟར་མཐོང་ན་ཡང་དག་པར་རྫོགས་པའི་སངས་རྒྱས་
ཀྱི་ཐེག་པ་པ་རྣམས་ཁྱོད་ཀྱིས་ཇི་ལྟར་མཐོང་འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་བྱང་ཆུབ་སེམས་དཔའ་ཞེས་བྱ་བའི་ཆོས་ཀྱང་རྗེས་སུ་མི་མཐོང་། བྱང་ཆུབ་ཏུ་ཞུགས་པ་ཞེས་བྱ་བའི་ཆོས་ཀྱང་རྗེས་སུ་མི་མཐོང་བྱང་
ཆུབ་ཀྱི་ཕྱིར་སྤྱོད་དོ་ཞེས་བྱ་བའི་ཆོས་ཀྱང་རྗེས་སུ་མི་མཐོང་། མངོན་པར་རྫོགས་པར་སངས་རྒྱས་ཞེས་བྱ་བའི་ཆོས་ཀྱང་རྗེས་སུ་མི་མཐོང་སྟེ། བཙུན་པ་ཤཱ་ར་དྭ་ཏིའི་བུ་ཡང་དག་པར་རྫོགས་པའི་སངས་རྒྱས་ཀྱི་ཐེག་པ་པ་དག་དེ་ལྟར་མཐོང་
ངོ་། །ཤཱ་ར་དྭ་ཏིའི་བུས་སྨྲས་པ། འཇམ་དཔལ་ཁྱོད་ཀྱིས་དེ་བཞིན་གཤེགས་པ་ཇི་ལྟར་མཐོང་། འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་གླང་པོ་ཆེན་པོ་ཞོག་ཤིག །གླང་པོ་ཆེན་པོ་མ་བསྐྱོད་ཅིག །དེ་སྐད་ཅེས་སྨྲས་པ་དང་། 
ཚེ་དང་ལྡན་པ་ཤཱ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་སངས་རྒྱས་ཤེས་བྱ་བ་དེ་གང་གི་ཚིག་བླ་དགས། འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་བདག་ཅེས་བྱ་བ་དེ་གང་གི་
39-1-114a


ཚིག་བླ་དགས། ཤཱ་ར་དྭ་ཏིའི་བུས་སྨྲས་པ། འཇམ་དཔལ་འདི་ལྟ་སྟེ། བདག་ཅེས་བྱ་བ་དེ་ནི་སྐྱེ་བ་མེད་པའི་ཚིག་བླ་དགས་སོ། །འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་དེ་དེ་བཞིན་ཏེ་བདག་ཅེས་བྱ་བ་དེ་གང་གི་ཚིག་བླ་
དགས་ཡིན་པ་སངས་རྒྱས་ཤེས་བྱ་བ་དེ་ཡང་དེའི་ཚིག་བླ་དགས་སོ། །བཙུན་པ་ཤཱ་ར་དྭ་ཏིའི་བུ་ཡང་འདི་ལྟ་སྟེ། སངས་རྒྱས་ཤེས་བྱ་བ་དེ་ནི་གཞི་མེད་པའི་ཚིག་བླ་དགས་སོ། །བཙུན་པ་ཤཱ་ར་དྭ་ཏིའི་བུ་སངས་རྒྱས་ཤེས་བྱ་བ་དེ་ནི་ཚིག་
གིས་ཤེས་པར་བྱ་དཀའ་བའོ། །བཙུན་པ་ཤཱ་ར་དྭ་ཏིའི་བུ་ཚིག་ཀྱང་འདི་ནི་ཚིག་གོ་ཞེས་བརྟག་པར་དཀའ་ན་སངས་རྒྱས་ཤེས་བྱ་བ་ལྟ་ཅི་སྨོས། བཙུན་པ་ཤཱ་ར་དྭ་ཏིའི་བུ་སངས་རྒྱས་ཤེས་བྱ་བ་དེ་གང་གི་ཚིག་བླ་དགས་ཤེས་དེ་སྐད་སྨྲ་
བ་ནི་གང་ཡང་དག་པར་མ་གྲུབ་པ་དང་མ་སྐྱེས་པ་དང་མི་འགག་པ་སྟེ། གང་ཆོས་གང་དང་ཡང་མི་ལྡན་པ་དེ་ལ་གཞི་ཅི་ཡང་མེད་ཅིང་གཞི་དབྱེར་མེད་ལ་གཞི་མེད་པ་སྟེ། བཙུན་པ་ཤཱ་ར་དྭ་ཏིའི་བུ་འདི་ལྟ་སྟེ། སངས་རྒྱས་ཤེས་བྱ་
བ་དེ་ནི་དེའི་ཚིག་བླ་དགས་སོ། །བཙུན་པ་ཤཱ་ར་དྭ་ཏིའི་བུ་དེ་བཞིན་གཤེགས་པ་ཚོལ་བར་འདོད་པས་ནི་བདག་བཙལ་བར་བྱའོ། །བཙུན་པ་ཤཱ་ར་དྭ་ཏིའི་བུ་བདག་ཅེས་བྱ་བ་དེ་ནི་སངས་རྒྱས་ཀྱི་ཚིག་བླ་དགས་ཏེ། ཇི་ལྟར་བདག་ཅེས་བྱ་བ་ཤིན་དུ་མེད་ཅིང་
མི་དམིགས་པ་དེ་བཞིན་དུ་སངས་རྒྱས་ཀྱང་ཤིན་དུ་མེད་ཅིང་མི་དམིགས་སོ། །ཇི་ལྟར་བདག་ཅེས་བྱ་བ་ཆོས་གང་གིས་ཀྱང་ཚིག་ཏུ་བརྗོད་པ་མ་ཡིན་པ་དེ་བཞིན་དུ་སངས་རྒྱས་ཀྱང་ཆོས་གང་གིས་ཀྱང་ཚིག་ཏུ་བརྗོད་པ་མ་ཡིན་ནོ། །གང་ལ་གྲངས་སུ་བྱ་བ་
མེད་པ་དེ་ནི་སངས་རྒྱས་ཤེས་བྱ་སྟེ། བཙུན་པ་ཤཱ་ར་དྭ་ཏིའི་བུ་བདག་ཅེས་བྱ་བའི་གཞིའི་ཚིག་བླ་དགས་དེ་ནི་ཤེས་པར་སླ་བ་མ་ཡིན་ནོ། །བཙུན་པ་ཤཱ་ར་དྭ་ཏིའི་བུ་དེ་བཞིན་དུ་སངས་རྒྱས་ཤེས་བྱ་བའི་གཞིའི་ཚིགས་བླ་དགས་འདི་ཡང་ཤེས་པར་སླ་བ་མ་ཡིན་ནོ། །
དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇམ་དཔལ་གཞོན་ནུར་གྱུར་པ་འདི་ནི་ཇི་ལྟར་ལས་དང་པོ་པས་འཚལ་བར་འགྱུར་བ་དེ་ལྟ་བུ་མི་སྟོན་ཏོ། །དེ་སྐད་ཅེས་གསོལ་པ་དང་། འཇམ་
39-1-114b


དཔལ་གཞོན་ནུར་གྱུར་པས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་ར་དྭ་ཏིའི་བུ་ཁོ་བོ་ནི་ཇི་ལྟར་དགྲ་བཅོམ་པ་བྱས་པ་རྟོགས་པ་ཅན་གྱིས་ཀྱང་ཤེས་པར་འགྱུར་བ་དེ་ལྟ་བུའི་ཆོས་མི་སྟོན་ཏོ། །ཁོ་བོ་ནི་ཇི་ལྟར་སུས་ཀྱང་ཤེས་
པར་འགྱུར་བ་དེ་ལྟ་བུར་ཡང་མི་སྟོན་ཏོ། །དེ་ཅིའི་ཕྱིར་ཞེ་ན། བྱང་ཆུབ་ནི་སུས་ཀྱང་མ་ཤེས། སུས་ཀྱང་རྣམ་པར་མ་ཤེས། སུས་ཀྱང་མངོན་པར་རྫོགས་པར་མ་རྟོགས། མ་མཐོང་མ་ཐོས་མ་དྲན་མ་བསྐྱེད་མ་བཀག་མ་སྨྲས་མ་བསྟན་པའི་ཕྱིར་རོ། །
བཙུན་པ་ཤཱ་ར་དྭ་ཏིའི་བུ་བྱང་ཆུབ་ནི་དེ་ལྟ་བུ་སྟེ། བྱང་ཆུབ་དེ་ཡང་དངོས་པོ་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་ཀྱིས་མངོན་པར་རྫོགས་པར་འཚང་རྒྱ་བར་བྱ་བ་ཅི་ཡང་མེད་ཅིང་བྱང་ཆུབ་ཀྱང་བྱང་ཆུབ་ཀྱིས་མངོན་པར་རྫོགས་པར་འཚང་རྒྱ་བ་མ་
ཡིན་པའི་ཕྱིར་རོ། །ཤཱ་ར་དྭ་ཏིའི་བུས་སྨྲས་པ། འཇམ་དཔལ་བཅོམ་ལྡན་འདས་ཀྱིས་ཆོས་ཀྱི་དབྱིངས་མངོན་པར་རྫོགས་པར་སངས་མ་རྒྱས་སམ། འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་དེ་ནི་མ་ཡིན་ནོ། །དེ་ཅིའི་ཕྱིར་ཞེ་ན། 
བཙུན་པ་ཤཱ་ར་དྭ་ཏིའི་བུ་འདི་ལྟར་ཆོས་ཀྱི་དབྱིངས་ཉིད་བཅོམ་ལྡན་འདས་ཡིན་པའི་ཕྱིར་རོ། །བཙུན་པ་ཤཱ་ར་དྭ་ཏིའི་བུ་གལ་ཏེ་བཅོམ་ལྡན་འདས་ཀྱིས་ཆོས་ཀྱི་དབྱིངས་མངོན་པར་རྫོགས་པར་སངས་རྒྱས་པར་གྱུར་ན། འོ་ན་ནི་གང་སྐྱེ་བ་མེད་པའི་
དབྱིངས་དེ་དང་ཡང་འགལ་བར་འགྱུར་རོ། །བཙུན་པ་ཤཱ་ར་དྭ་ཏིའི་བུ་ཆོས་ཀྱི་དབྱིངས་དེ་ཉིད་བྱང་ཆུབ་བོ། །དེ་ཅིའི་ཕྱིར་ཞེ་ན། ཆོས་ཀྱི་དབྱིངས་ནི་སེམས་ཅན་མེད་པའི་ཕྱིར་རོ། །ཆོས་ཐམས་ཅད་ངོ་བོ་ཉིད་མེད་པའོ་ཞེས་བྱ་བ་དེ་ནི་བྱང་ཆུབ་ཀྱི་
ཚིག་བླ་དགས་ཏེ། དེ་ནི་ཆོས་ཀྱི་དབྱིངས་ཀྱི་གྲངས་སུ་འགྲོའོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་སངས་རྒྱས་ཀྱི་ཡུལ་དུ་ཐ་དད་པ་མེད་པའི་ཕྱིར་རོ། །བཙུན་པ་ཤཱ་ར་དྭ་ཏིའི་བུ་ཐ་དད་པ་མེད་ཅེས་བྱ་བ་དེ་ནི་རྣམ་པར་རིག་པ་མེད་པའོ། །བཙུན་
པ་ཤཱ་ར་དྭ་ཏིའི་བུ་རྣམ་པར་རིག་པ་མེད་པ་ཞེས་བྱ་བ་དེ་ནི་རྣམ་པར་ཤེས་པར་མི་ནུས་པ་སྟེ། འདུས་བྱས་སུ་རྣམ་པར་རིག་པར་མི་ནུས་པ་ནས་འདུས་མ་བྱས་ཀྱི་བར་དུ་ཡང་རྣམ་པར་རིག་པར་མི་ནུས་པ་སྟེ། དེ་ལ་རྣམ་པར་རིག་པ་གང་ཡང་
39-1-115a


མེད་པས་དེས་ན་དེ་རྣམ་པར་རིག་པ་མེད་པའོ། །བཙུན་པ་ཤཱ་ར་དྭ་ཏིའི་བུ་ཆོས་ཐམས་ཅད་ནི་རྣམ་པར་རིག་པ་མེད་པ་སྟེ། དེ་ཅིའི་ཕྱིར་ཞེ་ན། འདི་ལྟར་ཆོས་ཐམས་ཅད་ནི་གང་ལ་གནས་ཏེ་རྣམ་པར་རིག་པར་འགྱུར་བའི་སྐྱེ་བ་
མེད་པའི་ཕྱིར་རོ། །གང་དག་མཚམས་མེད་པ་ལ་ཞུགས་པ་དེ་དག་ནི་བསམས་གྱིས་མི་ཁྱབ་པ་ལ་ཞུགས་པའོ། །གང་དག་བསམ་གྱིས་མི་ཁྱབ་པ་ལ་ཞུགས་པ་དེ་དག་ནི་ཡང་དག་པར་ཞུགས་པའོ། །དེ་ཅིའི་ཕྱིར་ཞེ་ན། བཙུན་པ་ཤཱ་ར་དྭ་ཏིའི་བུ་
ཡང་དག་པ་ཞེས་བྱ་བ་དེ་ནི་གཞི་དབྱེར་མེད་པའི་ཕྱིར་རོ། །གང་དག་བསམ་གྱིས་མི་ཁྱབ་པ་དང་ལྡན་པ་དེ་དག་ནི་མཐོ་རིས་སུ་འགྲོ་བ་མ་ཡིན། ངན་སོང་དུ་འགྲོ་བ་མ་ཡིན། མྱ་ངན་ལས་འདས་པར་འགྲོ་བ་མ་ཡིན་ནོ། །དེ་ཅིའི་ཕྱིར་ཞེ་ན། 
བསམ་གྱིས་མི་ཁྱབ་པ་ནི་འགྲོ་བ་དང་མི་འགྲོ་བར་ཉེ་བར་གནས་པ་མ་ཡིན་པ་ནས་མྱ་ངན་ལས་འདས་པའི་བར་དུ་འགྲོ་བ་དང་། མི་འགྲོ་བར་ཉེ་བར་གནས་པ་མ་ཡིན་པའི་ཕྱིར་རོ། །བཙུན་པ་ཤཱ་ར་དྭ་ཏིའི་བུ་གང་དག་ལྟུང་བའི་རྩ་བ་བཞི་ལ་
གནས་པ་དེ་དག་ཀྱང་རྩ་བ་མེད་པ་ལ་གནས་པའོ། །དེ་ཅིའི་ཕྱིར་ཞེ་ན། བཙུན་པ་ཤཱ་ར་དྭ་ཏིའི་བུ་སྐྱེ་བ་མེད་པ་ལ་རྩ་བ་འམ་རྩེ་མོ་ཞེས་བྱ་བ་མེད་པའི་ཕྱིར་རོ། །རྩ་བ་མེད་པའི་དགེ་སློང་ཞེས་བྱ་བ་དེ་ནི་མི་གནས་པའི་དགེ་སློང་གི་ཚིག་
བླ་དགས་སོ། །རྩོད་པ་བྱུང་བ་ཞེས་བྱ་བ་དེ་ནི་ལྷག་པར་སྒྲོ་འདོགས་པ་ཞེས་བྱ་བའི་ཚིག་བླ་དགས་སོ། །བཙུན་པ་ཤཱ་ར་དྭ་ཏིའི་བུ་ལྷག་པར་སྒྲོ་འདོགས་པ་ལ་སྤྱོད་པ་ནི་འཇིག་རྟེན་ན་སྦྱིན་གནས་སུ་འགྱུར་རོ། །དེ་ཅིའི་ཕྱིར་ཞེ་ན། 
འདི་ལྟར་མཉམ་པ་ལ་ལྷག་པར་སྒྲོ་འདོགས་པའི་ཕྱིར་རོ། །བཙུན་པ་ཤཱ་ར་དྭ་ཏིའི་བུ་དགེ་སློང་དད་པ་ནི་དད་པས་བྱིན་པ་སྤྱད་པའི་འོས་མ་ཡིན་ནོ། །བཙུན་པ་ཤཱ་ར་དྭ་ཏིའི་བུ་དགེ་སློང་མ་དད་པ་ནི་དད་པས་བྱིན་པ་སྤྱད་པའི་འོས་སོ། །བཙུན་
པ་ཤཱ་ར་དྭ་ཏིའི་བུ་རུང་བ་ཅན་གྱི་དགེ་སློང་ནི་དད་པས་བྱིན་པ་སྤྱད་པའི་འོས་མ་ཡིན་ནོ། །བཙུན་པ་ཤཱ་ར་དྭ་ཏིའི་བུ་རུང་བ་ཅན་མ་ཡིན་པའི་དགེ་སློང་ནི་དད་པས་བྱིན་པ་སྤྱད་པའི་འོས་སོ། །ཚུལ་ཡང་དག་པར་མ་བཅོམ་པའི་དགེ་སློང་དེ་
39-1-115b


ནི་དགྲ་བཅོམ་པ་ཟག་པ་ཟད་པ་ཞེས་བྱའོ། །ཤཱ་ར་དྭ་ཏིའི་བུས་སྨྲས་པ། འཇམ་དཔལ་ཅི་ལས་བསམས་ཏེ་དེ་སྐད་སྨྲ། འཇམ་དཔལ་གྱིས་སྨྲས་པ། མཉམ་པ་ཉིད་གང་མཉམ་པ་ཉིད་ཡང་དག་པར་འཇོམ་པར་མི་བྱེད་པ་དེ་ཉིད་ཚུལ་ཡིན་ཏེ། 
བཙུན་པ་ཤཱ་ར་དྭ་ཏིའི་བུ་དེ་ལ་བསམས་ནས་ཚུལ་ཡང་དག་པར་མ་བཅོམ་པའི་དགེ་སློང་ནི་དགྲ་བཅོམ་པ་ཟག་པ་ཟད་པ་ཞེས་བྱའོ་ཞེས་དེ་སྐད་སྨྲས་སོ། །བཙུན་པ་ཤཱ་ར་དྭ་ཏིའི་བུ་འཇིགས་པ་ལས་མ་རྒལ་བ་ཞེས་བྱ་བ་དེ་ནི་དགྲ་བཅོམ་
པ་ཟག་པ་ཟད་པ་ཞེས་བྱ་བའི་ཚིག་བླ་དགས་སོ། །ཤཱ་ར་དྭ་ཏིའི་བུས་སྨྲས་པ། འཇམ་དཔལ་ཅི་ལས་བསམས་ཏེ་དེ་སྐད་སྨྲ། འཇམ་དཔལ་གྱིས་སྨྲས་པ། དེ་འཇིགས་པ་ཅུང་ཟད་ཙམ་ཡང་མེད་ན་ཅི་ཞིག་ལས་རྒལ་བར་འགྱུར། 
ཤཱ་ར་དྭ་ཏིའི་བུས་སྨྲས་པ། འཇམ་དཔལ་མ་སྐྱེས་པའི་བཟོད་པ་ཅན་ཞེས་བྱ་བ་དེ་གང་གི་ཚིག་བླ་དགས་ལགས། འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་གང་གིས་ཆོས་ཅུང་ཟད་ཙམ་ཡང་མ་བསྐྱེད་པ་དེ་མ་སྐྱེས་
པའི་བཟོད་པ་ཅན་ཞེས་བྱའོ། །ཤཱ་ར་དྭ་ཏིའི་བུས་སྨྲས་པ། འཇམ་དཔལ་དགེ་སློང་མ་དུལ་བ་ཞེས་བྱ་བ་དེ་གང་གི་ཚིག་བླ་དགས། འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་དགེ་སློང་མ་དུལ་བ་ཞེས་བྱ་བ་དེ་ནི་དགྲ་
བཅོམ་པ་ཟག་པ་ཟད་པའི་ཚིག་བླ་དགས་སོ། །དེ་ཅིའི་ཕྱིར་ཞེ་ན། མ་དུལ་བ་ནི་དུལ་ལ་དུལ་བ་ནི་མ་དུལ་བས་བཙུན་པ་ཤཱ་ར་དྭ་ཏིའི་བུ་འདི་ལས་བསམས་ཏེ་དགེ་སློང་མ་དུལ་བ་ཞེས་བྱ་བ་དེ་ནི་དགྲ་བཅོམ་པ་ཟག་པ་ཟད་པའི་ཚིག་
བླ་དགས་སོ། །ཞེས་དེ་སྐད་སྨྲས་སོ། །བཙུན་པ་ཤཱ་ར་དྭ་ཏིའི་བུ་ལྷག་པའི་སེམས་ལ་སྤྱོད་དོ་ཞེས་བྱ་བ་དེ་ནི་སོ་སོ་སྐྱེ་བོའི་ཚིག་བླ་དགས་སོ། །ཤཱ་ར་དྭ་ཏིའི་བུས་སྨྲས་པ། འཇམ་དཔལ་ཅི་ལས་བསམས་ཏེ་དེ་སྐད་སྨྲ། 
འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་འདི་ལྟར་དེ་ལ་ལྷག་པར་བྱེད་པའི་ཕྱིར་རོ། །དེ་སྐད་ཅེས་སྨྲས་པ་དང་། ཚེ་དང་ལྡན་པ་ཤཱ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་
39-1-116a


དཔལ་ཁྱོད་ཀྱིས་དགྲ་བཅོམ་པ་ཟག་པ་ཟད་པ་ཇི་ལྟ་བ་དེ་བཞིན་དུ་སྨྲས་པ་ལེགས་སོ་ལེགས་སོ། །འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་དེ་དེ་བཞིན་ཏེ་ཇི་སྐད་སྨྲས་པ་བཞིན་ནོ། །ཁོ་བོ་ནི་ཟག་པ་ཟད་མོད་
ཀྱི་དགྲ་བཅོམ་པ་ནི་མ་ཡིན་ནོ། །དེ་ཅིའི་ཕྱིར་ཞེ་ན། བཙུན་པ་ཤཱ་ར་དྭ་ཏིའི་བུ་འདི་ལྟར་ཉན་ཐོས་ཀྱི་ས་དང་། རང་སངས་རྒྱས་ཀྱི་སར་ཁོ་བོའི་བསམ་པ་ཟད་པའི་ཕྱིར་ཏེ། བཙུན་པ་ཤཱ་ར་དྭ་ཏིའི་བུ་རྣམ་གྲངས་འདིས་ན་ཁོ་བོ་ཟག་པ་ཟད་
མོད་ཀྱི་དགྲ་བཅོམ་པ་ནི་མ་ཡིན་ནོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་སྙིང་པོར་འདུག་ལ། 
བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་སྐལ་བ་མེད་པར་འགྱུར་བའི་རྣམ་གྲངས་ཡོད་དམ། འཇམ་དཔལ་གྱིས་གསོལ་པ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་
ཆེན་པོ་བྱང་ཆུབ་ཀྱི་སྙིང་པོར་མཆིས་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་སྐལ་བ་མ་མཆིས་པར་འགྱུར་བའི་རྣམ་གྲངས་མཆིས་སོ། །དེ་ཅིའི་སླད་དུ་ཞེ་ན། འདི་ལྟར་བྱང་ཆུབ་ལ་
ཅུང་ཟད་ཙམ་གྱིས་ཆོས་ཀྱང་མ་མཆིས་ཤིང་མི་དམིགས་པས་དེའི་སླད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཅེས་བགྱིའོ། །བྱང་ཆུབ་དེ་ཡང་མ་སྐྱེས་པ་སྟེ། དེ་ལ་གང་བྱང་ཆུབ་ཀྱི་སྙིང་པོ་ལ་མཆིས་པ་འམ། སུ་བྱང་
ཆུབ་མངོན་པར་རྫོགས་པར་འཚང་རྒྱ་བ་འམ། གང་གིས་བྱང་ཆུབ་མངོན་པར་རྫོགས་པར་འཚང་རྒྱ་བ་འམ། བྱང་ཆུབ་གང་མངོན་པར་རྫོགས་པར་འཚང་རྒྱ་བ་འམ། བྱང་ཆུབ་ཀྱི་སྙིང་པོ་ལས་ལྡང་བ་གང་ཡང་མ་མཆིས་
ཤིང་མི་དམིགས་ཏེ། བཅོམ་ལྡན་འདས་རྣམ་གྲངས་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་སྙིང་པོར་མཆིས་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་
39-1-116b


བའི་སྐལ་བ་མ་མཆིས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་བྱང་ཆུབ་ཅེས་བྱ་བ་དེ་གང་གི་ཚིག་བླ་དགས། འཇམ་དཔལ་
གྱིས་གསོལ་པ། བཅོམ་ལྡན་འདས་བྱང་ཆུབ་ཅེས་བགྱི་བ་དེ་ནི་མཚམས་མ་མཆིས་པ་ལྔ་པོ་དག་གི་ཚིག་བླ་དགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་དངོས་པོ་མ་མཆིས་པས་མཚམས་མ་མཆིས་པ་ལྔ་པོ་
དེ་དག་ཉིད་བྱང་ཆུབ་ཀྱི་རང་བཞིན་ཏེ། །དེ་ཅིའི་སླད་དུ་ཞེ་ན། བྱང་ཆུབ་དེ་ནི་མཚམས་མ་མཆིས་པ་ལྔའི་རང་བཞིན་ཅན་ལགས་སོ། །མཚམས་མ་མཆིས་པ་རྣམས་མངོན་པར་རྫོགས་པར་རྟོགས་པ་བྱང་ཆུབ་མ་ལགས། ཆོས་ཐམས་
ཅད་མངོན་སུམ་དུ་གྱུར་པ་ཡང་བྱང་ཆུབ་མ་ལགས་སོ། །དེ་ཅིའི་སླད་དུ་ཞེ་ན། ཆོས་ཐམས་ཅད་ནི་ཤིན་དུ་མངོན་སུམ་མ་ལགས་ཏེ། དེ་དག་གང་གིས་ཀྱང་མངོན་པར་རྫོགས་པར་མ་རྟོགས། མ་མཐོང་མ་ཐོས་མ་འཚལ་བ་ནས་མ་རྟོགས་
པའི་བར་གྱི་སླད་དུ་སྟེ། དེ་ལྟ་བུ་དེ་ནི་བྱང་ཆུབ་བོ། །དེ་ལྟ་ལགས་ཀྱིས་ཀྱང་བཅོམ་ལྡན་འདས་མངོན་པའི་ང་རྒྱལ་ཅན་དག་གིས་ནི་མངོན་པར་རྫོགས་པར་སངས་རྒྱས་པ་ནས་མངོན་སུམ་དུ་བགྱིས་པའི་བར་དུ་དེ་དག་གཞག་གོ། །དེ་སྐད་ཅེས་
གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཅི་ཁྱོད་ང་ལ་འདི་སྙམ་དུ་དེ་བཞིན་གཤེགས་པ་ནི་བདག་གི་དེ་བཞིན་གཤེགས་པའོ་སྙམ་སེམས་སམ། འཇམ་
དཔལ་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་དེ་བཞིན་གཤེགས་པ་ནི་བདག་གི་དེ་བཞིན་གཤེགས་པའོ། །སྙམ་དུ་མི་སེམས་པའི་སླད་དུའོ། །དེ་ཅིའི་སླད་དུ་ཞེ་ན། བཅོམ་
ལྡན་འདས་འདི་ལྟར་དེ་བཞིན་ཉིད་ནི་དེ་བཞིན་གཤེགས་པ་ཉིད་དེ། དེ་བཞིན་ཉིད་ཀྱིས་དེ་བཞིན་གཤེགས་པ་རྣམ་པར་རིག་པར་མི་བགྱིད་ཅིང་དེ་བཞིན་གཤེགས་པས་ཀྱང་དེ་བཞིན་ཉིད་རྣམ་པར་རིག་པར་མི་བགྱིད་པའི་སླད་དུའོ། །དེ་ཅིའི་
39-1-117a


ཕྱིར་ཞེ་ན། བཅོམ་ལྡན་འདས་འདི་ལྟར་དོན་དམ་པར་ན་དེ་བཞིན་ཉིད་དངོས་པོ་མ་མཆིས་ཤིང་དེ་བཞིན་གཤེགས་པ་འང་དངོས་པོ་མ་མཆིས་པའི་སླད་དུའོ། །བཅོམ་ལྡན་འདས་དེ་བས་ན་བདག་ནི་འདི་སྙམ་དུ་དེ་བཞིན་གཤེགས་པ་
བདག་གི་དེ་བཞིན་གཤེགས་པའོ་སྙམ་དུ་མི་སེམས་སོ། །བཅོམ་ལྡན་འདས་དེ་བཞིན་གཤེགས་པ་ཞེས་བགྱི་བ་དེ་ནི་མིང་ཙམ་དུ་བས་ན་གང་ལ་བདག་འདི་སྙམ་དུ་དེ་བཞིན་གཤེགས་པ་ནི་བདག་གི་དེ་བཞིན་གཤེགས་པའོ་སྙམ་དུ་སེམས་པར་འགྱུར་
བའི་དེ་བཞིན་གཤེགས་པ་དེ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་དེ་བཞིན་གཤེགས་པ་ལ་ཐེ་ཚོམ་ཟ་འམ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་
གལ་ཏེ་དེ་བཞིན་གཤེགས་པ་བྱུང་བ་འམ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་འང་རུང་སྟེ། དེ་བཞིན་གཤེགས་པར་ཡོངས་སུ་གྲུབ་པ་འགའ་ཞིག་མཆིས་ན་ནི་དེ་ལ་བདག་ཐེ་ཚོམ་འཚལ་ལོ། །དེ་སྐད་ཅེས་གསོལ་པ་
དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་དེ་བཞིན་གཤེགས་པ་བྱུང་ངོ་སྙམ་དུ་མི་སེམས་སམ། འཇམ་དཔལ་གྱིས་གསོལ་པ། བཅོམ་ལྡན་འདས་
གལ་ཏེ་ཆོས་ཀྱི་དབྱིངས་ལ་འབྱུང་བ་མཆིས་ན་ནི་བདག་དེ་བཞིན་གཤེགས་པ་བྱུང་ངོ་སྙམ་དུ་སེམས་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་སངས་རྒྱས་བཅོམ་ལྡན་འདས་གང་གཱའི་ཀླུང་གི་
བྱེ་མ་སྙེད་ཡོངས་སུ་མྱ་ངན་ལས་འདས་པར་མི་མོས་སམ། འཇམ་དཔལ་གྱིས་གསོལ་པ། བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་ནི་འདི་ལྟར་བསམ་གྱིས་མི་ཁྱབ་པའི་ཡུལ་དུ་ཡུལ་གཅིག་པ་མ་ལགས་སམ། 
བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་དེ་བཞིན་ཏེ། སངས་རྒྱས་བཅོམ་ལྡན་འདས་རྣམས་ནི་འདི་ལྟར་བསམ་གྱིས་མི་ཁྱབ་པའི་ཡུལ་དུ་ཡུལ་གཅིག་གོ། །འཇམ་དཔལ་གྱིས་གསོལ་པ། བཅོམ་ལྡན་འདས་ད་
39-1-117b


ལྟར་བཞུགས་སམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་དེ་བཞིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས་དེའི་སླད་དུ་གང་གཱའི་ཀླུང་གི་བྱེ་མ་སྙེད་ཀྱི་སངས་རྒྱས་བཅོམ་ལྡན་འདས་དེ་དག་ཡོངས་
སུ་མྱ་ངན་ལས་མ་འདས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་ནི་འདི་ལྟར་བསམ་གྱིས་མི་ཁྱབ་པའི་ཡུལ་དུ་ཡུལ་གཅིག་པའི་སླད་དུ་སྟེ། བསམ་གྱིས་མི་ཁྱབ་པ་ཉིད་ནི་སྐྱེ་བ་མ་ལགས་
འགག་པ་མ་ལགས་སོ། །བཅོམ་ལྡན་འདས་དེ་བས་ན་བཅོམ་ལྡན་འདས་ཉིད་ཀྱིས་མངོན་པར་རྫོགས་པར་སངས་རྒྱས་ན་གང་དག་མ་མཆིས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་
འགྱུར་བ་དེ་དག་ཀྱང་དེ་བཞིན་དུ་མངོན་པར་རྫོགས་པར་སངས་རྒྱས་པ་ཉིད་དོ། །དེ་ཅིའི་སླད་དུ་ཞེ་ན། བསམ་གྱིས་མི་ཁྱབ་པ་ལ་འདས་པ་འམ། མ་འོངས་པ་འམ། ད་ལྟར་ཞེས་བགྱི་བ་མ་མཆིས་པའི་སླད་དུའོ། །བཅོམ་ལྡན་འདས་
དེ་བས་ན་སུ་དག་འདི་སྙམ་དུ་དེ་བཞིན་གཤེགས་པ་སྐྱེས་སོ་ཞེས་བགྱི་བ་ནས་ཡོངས་སུ་མྱ་ངན་ལས་འདའ་བའི་བར་དུ་སེམས་པ་དེ་དག་གི་འཇིག་རྟེན་གནས་པ་ནི་འཁྲུལ་པ་སྟེ། བཅོམ་ལྡན་འདས་དེ་དག་ནི་འཇིག་རྟེན་གནས་པ་
འཕྲོས་པར་བགྱིད་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་དེའི་ཕྱིར་ཁྱོད་ཀྱིས་དེ་བཞིན་གཤེགས་པའི་བསམ་
གྱིས་མི་ཁྱབ་པ། བསམ་དུ་མེད་པ། བསམ་གྱིས་མི་ལང་བ། བསམ་པ་ལས་འདས་པ་འདི་དེ་བཞིན་གཤེགས་པ་འམ། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་འམ། དགྲ་བཅོམ་པ་ཟག་པ་ཟད་
པའི་མདུན་དུ་བརྗོད་ན་རྗོད་ཅིག །དེ་ཅིའི་ཕྱིར་ཞེ་ན། འདི་ལྟར་དེ་དག་ནི་ཐོས་ནས་བསྔགས་པར་ཡང་མི་འགྱུར་སྤོང་བར་ཡང་མི་འགྱུར་བའི་ཕྱིར་རོ། །དེ་ཅིའི་ཕྱིར་ཞེ་ན། འདི་ལྟར་འདི་བསམ་གྱིས་མི་ཁྱབ་པ། བསམ་དུ་མེད་
39-1-118a


པ་བསམ་གྱིས་མི་ལང་བའི་ཕྱིར་རོ། །འཇམ་དཔལ་གྱིས་གསོལ་པ། བཅོམ་ལྡན་འདས་ཆོས་ཐམས་ཅད་བསམ་གྱིས་མི་ཁྱབ་ཅིང་བསམ་དུ་མ་མཆིས་པ་འདི་ལ་སུ་ཞིག་བསྔགས་པ་འམ། སྤོང་བར་འགྱུར། 
བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཇི་ལྟར་དེ་བཞིན་གཤེགས་པ་བསམ་གྱིས་མི་ལང་བ་དེ་ལྟར་སོ་སོའི་སྐྱེ་བོ་རྣམས་ཀྱང་བསམ་གྱིས་མི་ལང་བ་ཡིན་ནམ། འཇམ་དཔལ་གྱིས་གསོལ་པ། བཅོམ་ལྡན་འདས་
སོ་སོའི་སྐྱེ་བོ་རྣམས་ཀྱང་དེ་བཞིན་དུ་བསམ་གྱིས་མི་ལང་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་དེ་བཞིན་ནོ། །དེ་ཅིའི་ཕྱིར་ཞེ་ན། འདི་ལྟར་བསམ་པ་ཐམས་ཅད་ནི་བསམ་གྱིས་མི་ལང་བའི་
ཕྱིར་རོ། །འཇམ་དཔལ་གྱིས་གསོལ་པ། བཅོམ་ལྡན་འདས་འོ་ན་ཇི་ལྟར་དེ་བཞིན་གཤེགས་པ་བསམ་གྱིས་མི་ལང་བ་དེ་བཞིན་དུ་སོ་སོའི་སྐྱེ་བོ་རྣམས་ཀྱང་བསམ་གྱིས་མི་ལང་བའོ་ཞེས་བཅོམ་ལྡན་འདས་ཀྱིས་ཅིའི་སླད་དུ་དེ་
སྐད་བཀའ་སྩལ། བཅོམ་ལྡན་འདས་སོ་སོའི་སྐྱེ་བོ་ཉིད་ཀྱང་བསམ་གྱིས་མི་ལང་བ་མ་ལགས་སམ། དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་བསམ་གྱིས་མི་ལང་བའི་སླད་དུའོ། །བཅོམ་ལྡན་འདས་
གང་ལ་ལ་དག་མྱ་ངན་ལས་འདས་པའི་སླད་དུ་ཞུགས་ན་བཅོམ་ལྡན་འདས་དེ་དག་ནི་ཉམ་ཐག་པར་འགྱུར་རོ། །དེ་ཅིའི་སླད་དུ་ཞེ་ན། གང་བསམ་གྱིས་མི་ལང་བ་དེ་ཉིད་མྱ་ངན་ལས་འདས་པ་ལགས་པའི་སླད་དུ་སྟེ། བཅོམ་ལྡན་
འདས་དེའི་སླད་དུ་བསམ་གྱིས་མི་ལང་བ་ལ་ཐ་དད་པ་མ་མཆིས་སོ། །བཅོམ་ལྡན་འདས་གང་དག་འདི་སྐད་དུ་འདི་དག་ནི་སོ་སོའི་སྐྱེ་བོའི་ཆོས་རྣམས་སོ། །འདི་ནི་འཕགས་པའི་ཆོས་རྣམས་སོ་ཞེས་མཆི་བ་དེ་དག་ལ་རེ་ཤིག་དགེ་བའི་
བཤེས་གཉེན་རྣམས་ལ་བསྙེན་བཀུར་གྱིས་ཤིག་དང་དེ་ནས་གཟོད་འདི་དག་ནི་སོ་སོའི་སྐྱེ་བོའི་ཆོས་རྣམས་སོ། །འདི་ནི་འཕགས་པའི་ཆོས་རྣམས་སོ་ཞེས་བྱ་བར་ཤེས་པར་འགྱུར་རོ་ཞེས་དེ་དག་ལ་འདི་སྐད་བརྗོད་པར་བགྱིའོ། །
39-1-118b


དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་དེ་བཞིན་གཤེགས་པ་སེམས་ཅན་ཐམས་ཅད་ཀྱི་མཆོག་ཏུ་འདོད་དམ། འཇམ་
དཔལ་གྱིས་གསོལ་པ། བཅོམ་ལྡན་འདས་གལ་ཏེ་འདི་ལ་སེམས་ཅན་དུ་ཡོངས་སུ་གྲུབ་པ་འགའ་ཞིག་མཆིས་ན་ནི་བདག་དེ་བཞིན་གཤེགས་པ་སེམས་ཅན་ཐམས་ཅད་ཀྱི་མཆོག་ཏུ་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་
ཁྱོད་དེ་བཞིན་གཤེགས་པ་བསམ་གྱིས་མི་ཁྱབ་པའི་ཆོས་དང་ལྡན་པར་འདོད་དམ། འཇམ་དཔལ་གྱིས་གསོལ་པ། བཅོམ་ལྡན་འདས་གལ་ཏེ་བསམ་པའི་ཆོས་དང་ལྡན་པ་འགའ་ཞིག་མཆིས་ན་ནི་བདག་དེ་བཞིན་གཤེགས་པ་བསམ་གྱིས་མི་ཁྱབ་པའི་
ཆོས་དང་ལྡན་པར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་འདི་ལྟར་ཉན་ཐོས་འདི་དག་ནི་དེ་བཞིན་གཤེགས་པས་བཏུལ་ལོ་ཞེས་བྱ་བར་འདོད་དམ། འཇམ་དཔལ་གྱིས་གསོལ་པ། བཅོམ་ལྡན་འདས་གལ་ཏེ་ལ་ལ་ཞིག་བསམ་
གྱིས་མི་ཁྱབ་པའི་དབྱིངས་འདུལ་བར་འགྱུར་ན་ནི་བདག་ཉན་ཐོས་འདི་དག་དེ་བཞིན་གཤེགས་པས་བཏུལ་ལོ་ཞེས་བགྱི་བར་དེ་ལྟར་འཚལ་ལོ། །བཅོམ་ལྡན་འདས་སངས་རྒྱས་འབྱུང་བ་ནི་གང་ལ་ཕན་པ་འམ། གནོད་པར་ཡང་ཉེ་བར་གནས་པ་མ་ལགས་སོ། །
དེ་ཅིའི་སླད་དུ་ཞེ་ན། འདི་ལྟར་དབྱིངས་འདི་ནི་གནས་པ་ཉིད་དང་། དབྱིངས་འདི་ནི་མ་འདྲེས་པ་ཉིད་དེ། འདི་ལྟ་སྟེ་བསམ་གྱིས་མི་ཁྱབ་པའི་དབྱིངས་ལགས་པའི་སླད་དུའོ། །དབྱིངས་དེ་ལ་ནི་ཉན་ཐོས་ཐ་དད་པ་ནས་སོ་སོའི་སྐྱེ་བོ་ཐ་དད་པའི་བར་དུ་མི་
དམིགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་འདི་ལྟར་དེ་བཞིན་གཤེགས་པ་བསོད་ནམས་ཀྱི་ཞིང་བླ་ན་མེད་པ་ཡིན་པར་མི་འདོད་དམ། འཇམ་དཔལ་གྱིས་གསོལ་པ། བཅོམ་ལྡན་འདས་དངོས་པོ་མ་མཆིས་
པའི་སླད་དུ་དེ་བཞིན་གཤེགས་པ་བསོད་ནམས་ཀྱི་ཞིང་སྟེ། དེའི་སླད་དུ་དེ་ནི་བསོད་ནམས་ཀྱི་ཞིང་བླ་ན་མ་མཆིས་པའོ། །དེ་ནི་ཞིང་གང་བ་མ་ལགས། ཞིང་མ་གང་བ་ཡང་མ་ལགས་ཤིང་ཞིང་མ་ལགས་པ་ཡང་མ་ལགས་ཏེ། 
39-1-119a


དེའི་སླད་དུ་དེ་ནི་བསོད་ནམས་ཀྱི་ཞིང་བླ་ན་མ་མཆིས་པའོ། །བཅོམ་ལྡན་འདས་ཡང་དེ་ལ་ཆོས་གང་ཡང་ཡང་དག་པར་འགྲུབ་པར་མི་འགྱུར། བས་པར་མི་འགྱུར་ཏེ། དེ་ལྟར་ན་དེ་བསོད་ནམས་ཀྱི་ཞིང་ལགས་སོ། །དེ་ལ་ས་བོན་
བཏབ་པ་ནི་རྣམ་པར་མི་འཕེལ་ཞིང་ཡོངས་སུ་མི་འགྲིབ་བོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཀྱིས་ཅི་ལས་བསམས་ཏེ། ཞིང་དེ་ལས་ས་བོན་བཏབ་པ་རྣམ་པར་མི་འཕེལ་ཞིང་ཡོངས་སུ་མི་འགྲིབ་བོ་ཞེས་དེ་སྐད་
སྨྲ། འཇམ་དཔལ་གྱིས་གསོལ་པ། བཅོམ་ལྡན་འདས་འདི་ལྟར་ཞིང་དེ་ནི་བསམ་གྱིས་མི་ཁྱབ་པ་སྟེ། དེ་ལྟར་ན་དེ་བསོད་ནམས་ཀྱི་ཞིང་ལགས་སོ། །དེ་ནས་དེའི་ཚེ་སངས་རྒྱས་ཀྱི་མཐུས་ས་ཆེན་པོ་རྣམ་པ་དྲུག་ཏུ་གཡོས་པར་གྱུར་ཏོ། །
དགེ་སློང་ཁྲི་དྲུག་སྟོང་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དགེ་སློང་མ་བདུན་བརྒྱ་དང་དགེ་བསྙེན་སུམ་བརྒྱ་དང་། དགེ་བསྙེན་མ་བཞི་ཁྲི་དང་། འདོད་པ་ན་སྤྱོད་པའི་ལྷ་བྱེ་བ་ཁྲག་ཁྲིག་དྲུག་བཅུ་ནི་ཆོས་རྣམས་
ལ་ཆོས་ཀྱི་མིག་རྡུལ་དང་བྲལ་ཞིང་དྲི་མ་མེད་པ་སྐྱེས་སོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་ཆོས་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་
མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་དུ་དོག་ས་ཆེར་གཡོས་པ་བྱུང་བ་འདིའི་རྒྱུ་གང་ལགས་རྐྱེན་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་
པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་བསོད་ནམས་ཀྱི་ཞིང་བསྟན་པ་ཞེས་བྱ་བའི་ཆོས་ཀྱི་རྣམ་གྲངས་འདི་སྔོན་གྱི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་ཕྱོགས་འདི་ཉིད་དུ་གསུངས་ཏེ། ཀུན་
དགའ་བོ་འཇིག་རྟེན་དུ་ས་གཡོས་པ་བྱུང་བ་འདིའི་རྒྱུ་ནི་དེ་ཡིན་ནོ། །རྐྱེན་ནི་དེ་ཡིན་ནོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇམ་དཔལ་འདི་ནི་བསམ་གྱིས་མི་
39-1-119b


ཁྱབ་པའི་དཔལ་ལོ། །དེ་ཅིའི་སླད་དུ་ཞེ་ན། འདི་ལྟར་འདིའི་སྤོབས་པ་གང་དང་གང་ལགས་པའི་སྤོབས་པ་དེ་དང་དེ་ཉིད་བསམ་གྱིས་མི་ཁྱབ་པ་ཉིད་ལགས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་
བཀའ་སྩལ་པ། འཇམ་དཔལ་དགེ་སློང་ཤཱ་ར་དྭ་ཏིའི་བུས་ཚིག་ཇི་སྐད་སྨྲས་པ་དེ་དེ་བཞིན་ཏེ། འཇམ་དཔལ་གཞོན་ནུར་གྱུར་པའི་སྤོབས་པ་གང་དང་གང་ཡིན་པའི་སྤོབས་པ་དེ་དག་ཐམས་ཅད་ནི་བསམ་གྱིས་མི་ཁྱབ་པ་ཉིད་དོ། །དེ་སྐད་ཅེས་
བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བསམ་གྱིས་མི་ཁྱབ་ན་སྤོབས་པར་མི་འགྱུར་རོ། །གལ་ཏེ་བསམ་གྱིས་མི་ཁྱབ་པ་སྤོབས་པར་འགྱུར་ན་ནི་
བསམ་དུ་མ་མཆིས་པ་ཉིད་དུ་མི་འགྱུར་རོ། །ཡང་གང་བསམ་གྱིས་མི་ཁྱབ་པ་མ་ལགས་པའི་བསམ་གྱིས་མི་ཁྱབ་པ་ནི་ཅི་ཡང་མ་མཆིས་སོ། །བཅོམ་ལྡན་འདས་སྒྲ་ཐམས་ཅད་ནི་བསམ་གྱིས་མི་ཁྱབ་པ་སྟེ། བསམ་གྱིས་མི་
ཁྱབ་པ་ཉིད་ནི་སྒྲ་མ་ལགས་སོ། །སྒྲ་མ་ལགས་པ་དང་། སྒྲ་མ་ལགས་པ་ཡང་མ་ལགས་པ་ནི་བསྟན་པར་མི་ནུས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་བསམ་གྱིས་མི་ཁྱབ་པའི་ཏིང་ངེ་འཛིན་ལ་སྙོམས་པར་འཇུག་
གམ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་ནི་མ་ལགས་ཏེ། བསམ་གྱིས་མི་ཁྱབ་པའི་ཏིང་ངེ་འཛིན་ལ་སྙོམས་པར་མི་འཇུག་གོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་བདག་ཉིད་བསམ་གྱིས་མི་
ཁྱབ་པའི་ཏིང་ངེ་འཛིན་ལགས་པའི་སླད་དུའོ། །བཅོམ་ལྡན་འདས་གལ་ཏེ་བདག་བསམ་དུ་རུང་བ་ལགས་ན་ནི་བདག་བསམ་གྱིས་མི་ཁྱབ་པའི་ཏིང་ངེ་འཛིན་ལ་སྙོམས་པར་འཇུག་གོ། །བཅོམ་ལྡན་འདས་ཏིང་ངེ་འཛིན་ཅེས་བགྱི་བ་དེ་ནི་བསམ་
དུ་མ་མཆིས་པ། བསམ་གྱིས་མི་ཁྱབ་པ། བསམ་གྱིས་མི་ལང་བ་ལགས་ན་ཇི་ལྟར་བསམ་གྱིས་མི་ཁྱབ་པའི་ཏིང་ངེ་འཛིན་ལ་སྙོམས་པར་འཇུག་པར་བགྱི་དེ་ལྟ་ལགས་ཀྱིས་ཀྱང་བཅོམ་ལྡན་འདས་བདག་སྔོན་ལས་དང་པོ་པའི་ཚེ་ན། 
39-1-120a


བསམ་གྱིས་མི་ཁྱབ་པའི་ཏིང་ངེ་འཛིན་ལ་སྙོམས་པར་འཇུག་གོ། །སྙམ་དུ་དེ་སྙམ་བསམས་པར་གྱུར་ཏོ། །བཅོམ་ལྡན་འདས་དེ་ལྟར་ན་བདག་བསམ་གྱིས་མི་ཁྱབ་པའི་ཏིང་ངེ་འཛིན་ལ་སྙོམས་པར་འཇུག་གོ་སྙམ་དུ་ཡང་དེ་ལ་སེམས་པ་
ཀུན་དུ་འབྱུང་བ་མ་མཆིས་སོ། །བཅོམ་ལྡན་འདས་འདི་ལྟ་སྟེ་དཔེར་ན་འཕོང་གི་སློབ་དཔོན་ནི་སྔོན་ལས་དང་པོའི་ས་ན་སློབ་པའི་ཚེ་འདི་སྙམ་དུ་བ་ལང་གི་ཕུར་པ་དག་ལ་ཕོག་པར་བྱའོ་སྙམ་དུ་སེམས་སོ། །དེ་གང་གི་ཚེ་སྐྲ་ལ་ཕོག་པ་གྲུབ་པར་
གྱུར་པ་དེའི་ཚེ་འདི་ལྟར་སྐྲ་ལ་ཕོག་པ་ལེགས་པར་ལོབས་པའི་སླད་དུ་དེ་ཡང་འདི་སྙམ་དུ་བདག་གིས་བ་ལང་གི་ཕུར་པ་དག་ལ་ཕོག་པར་བྱའོ་སྙམ་དུ་སེམས་པ་མི་འབྱུང་ངོ་། །ཅི་སྟེ་གང་གི་ཚེ་སྐྲ་ལ་ཕོག་པར་འཚལ་བ་དེའི་ཚེ་བསྒྲིམ་མི་
འཚལ་བར་ཕོག་པར་འགྱུར་རོ། །བཅོམ་ལྡན་འདས་དེ་བཞིན་དུ་བདག་སྔོན་ནི་བསམ་གྱིས་མི་ཁྱབ་པའི་ཏིང་ངེ་འཛིན་ལ་སྙོམས་པར་འཇུག་གོ་སྙམ་དུ་དེ་སྙམ་བསམས་པར་གྱུར་ཏོ། །གང་གི་ཚེ་བདག་གིས་ཏིང་ངེ་འཛིན་དེ་ལ་སྙོམས་པར་
ཞུགས་ནས་ཏིང་ངེ་འཛིན་འདིས་གནས་པ་དེའི་ཚེ་བདག་སླར་ཡང་ཏིང་ངེ་འཛིན་འདིས་གནས་པར་བགྱིའོ་སྙམ་དུ་མི་སེམས་སོ། །དེ་ཅིའི་སླད་དུ་ཞེ་ན། གང་དང་གང་གི་ཚེ་ཏིང་ངེ་འཛིན་འདིས་གནས་པ་དེ་དང་དེའི་ཚེ་ཏིང་ངེ་འཛིན་འདི་གདགས་སུ་མ་མཆིས་
པའི་སླད་དུའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ནི་བསམ་གྱིས་མི་ཁྱབ་པའི་ཏིང་ངེ་འཛིན་འདིས་གནས་པ་དེའི་ཚེ་འདི་ལ་
ཡིད་མི་རྟོན་ན། བཅོམ་ལྡན་འདས་བསམ་གྱིས་མི་ཁྱབ་པའི་ཏིང་ངེ་འཛིན་འདི་བས་ཆེས་ཞི་བའི་ཏིང་ངེ་འཛིན་གཞན་ལྟ་མཆིས་སམ་དེ་ནས་འཇམ་དཔལ་གཞོན་ནུར་གྱུར་པས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །
བཙུན་པ་ཤཱ་ར་དྭ་ཏིའི་བུ་འདི་སྐད་དུ་བསམ་གྱིས་མི་ཁྱབ་པའི་ཏིང་ངེ་འཛིན་འདི་བས་ཆེས་ཞི་བའི་ཏིང་ངེ་འཛིན་གཞན་ལྟ་མཆིས་སམ་ཞེས་འདྲི་ན་བཙུན་པ་ཤཱ་ར་དྭ་ཏིའི་བུ་ཁྱོད་ཀྱིས་བསམ་གྱིས་མི་ཁྱབ་པའི་ཏིང་ངེ་འཛིན་འདི་ཞི་བ་ཡིན་པར་
39-1-120b


ཇི་ལྟར་ཤེས། བཙུན་པ་ཤཱ་ར་དྭ་ཏིའི་བུ་གལ་ཏེ་བསམ་གྱིས་མི་ཁྱབ་པའི་ཏིང་ངེ་འཛིན་འདི་ཡོད་ཅིང་དམིགས་ན་ནི་བསམ་གྱིས་མི་ཁྱབ་པའི་ཏིང་ངེ་འཛིན་འདི་བས་ཆེས་ཞི་བའི་ཏིང་ངེ་འཛིན་གཞན་ཡོད་པར་འགྱུར་རོ། །ཤཱ་ར་དྭ་ཏིའི་བུས་
སྨྲས་པ། འཇམ་དཔལ་བསམ་གྱིས་མི་ཁྱབ་པའི་ཏིང་ངེ་འཛིན་འདི་མེད་ཅིང་མི་དམིགས་པ་ཡིན་ནམ། འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་འདི་ལྟར་དེ་ནི་བསམ་གྱིས་མི་ཁྱབ་པའི་ཏིང་ངེ་འཛིན་ཏེ། དེ་བས་ན་
བསམ་གྱིས་མི་ཁྱབ་པའི་ཏིང་ངེ་འཛིན་འདི་མེད་དེ་མི་དམིགས་པའོ། །དེ་ལྟ་མོད་ཀྱིས་བཙུན་པ་ཤཱ་ར་དྭ་ཏིའི་བུ་བསམ་གྱིས་མི་ཁྱབ་པའི་ཏིང་ངེ་འཛིན་མ་ཐོབ་པ་ནི་སུ་ཡང་མེད་དོ། །བཙུན་པ་ཤཱ་ར་དྭ་ཏིའི་བུ་སེམས་ཅན་ཐམས་ཅད་ཀྱང་
བསམ་གྱིས་མི་ཁྱབ་པའི་ཏིང་ངེ་འཛིན་ཐོབ་པའོ། །དེ་ཅིའི་ཕྱིར་ཞེ་ན། བསམ་པ་ཐམས་ཅད་ནི་བསམ་གྱིས་མི་ཁྱབ་པ་ཡིན་ལ། གང་བསམ་གྱིས་མི་ཁྱབ་པ་དེ་ནི་བསམ་གྱིས་མི་ཁྱབ་པའི་ཏིང་ངེ་འཛིན་ཏེ། དེ་བས་ན་
སེམས་ཅན་ཐམས་ཅད་བསམ་གྱིས་མི་ཁྱབ་པའི་ཏིང་ངེ་འཛིན་འདི་ཐོབ་པོ། ། བམ་པོ་གཉིས་པ་སྟེ་ཐ་མའོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་
བཀའ་སྩལ་ཏོ། །འཇམ་དཔལ་ཁྱོད་ཀྱིས་ཟབ་མོ་ཟབ་པའི་གནས་འདི་ལྟ་བུ་འདི་ཐམས་ཅད་བསྟན་པ་ལེགས་སོ་ལེགས་སོ། །འདི་ལྟར་འཇམ་དཔལ་ཁྱོད་ནི་སྔོན་གྱི་རྒྱལ་བ་ལ་བྱ་བ་བྱས་པ་སྟེ། མི་
དམིགས་པར་ཚངས་པར་སྤྱོད་པ་ཡུན་རིང་དུ་སྤྱད་པའོ། །ཅི་འཇམ་དཔལ་ཁྱོད་ཤེས་རབ་ཀྱི་ཕ་རོལ་དུ་ཕྱིན་པ་ལ་གནས་ཏེ། དེ་སྐད་སྨྲའོ་སྙམ་དུ་སེམས་སམ། འཇམ་དཔལ་
གྱིས་གསོལ་པ། བཅོམ་ལྡན་འདས་གལ་ཏེ་བདག་འདི་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ལ་གནས་ནས་འདི་སྐད་མཆི་ན་ནི་འོ་ན་དམིགས་པ་ལ་གནས་ཏེ། དེ་སྐད་མཆི་བར་འགྱུར། བདག་ཏུ་
39-1-121a


འདུ་ཤེས་པ་ལ་གནས་པ་ནས་དངོས་པོའི་འདུ་ཤེས་ཀྱི་བར་ལ་གནས་ཏེ་དེ་སྐད་མཆི་བར་འགྱུར་རོ། །དེ་བས་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་གནས་ཏེ་དེ་སྐད་མི་མཆིའོ། །དེ་ཅིའི་སླད་དུ་ཞེ་ན། 
བཅོམ་ལྡན་འདས་གལ་ཏེ་ཤེས་རབ་ཀྱི་ཕ་རོལ་དུ་ཕྱིན་པ་གནས་སུ་གྱུར་ཏམ། ཇི་སྟེ་གནས་མ་ལགས་པ་ཞིག་ཏུ་གྱུར་ན་ཤེས་རབ་ཀྱི་ཕ་རོལ་དུ་ཕྱིན་པ་མ་ལགས་པར་འགྱུར་རོ། །བཅོམ་ལྡན་འདས་བདག་གི་གནས་ནི་ཤེས་
རབ་ཀྱི་ཕ་རོལ་དུ་ཕྱིན་པའི་གནས་ཏེ། གནས་མ་མཆིས་པ། ཀུན་ནས་འབྱུང་བ་མ་མཆིས་པ། གོ་སྐབས་མ་མཆིས་པ། འབྱུང་བ་མ་མཆིས་པ་ལགས་སོ། །དེ་ལྟར་ན་གནས་དེ་ནི་ཆོས་གང་གི་གནས་ཀྱང་མ་ལགས་
སོ། །དེའི་སླད་དུ་གནས་དེ་ནི་བསམ་གྱིས་མི་ཁྱབ་པའི་གནས་ཏེ། ཤེས་རབ་ཀྱི་ཕ་རོལ་དུ་ཕྱིན་པའི་གནས་ལགས་སོ། །བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་ཞེས་བགྱི་བ་ནི་ཆོས་ཐམས་ཅད་ཀྱི་སྐྱེ་བ་མ་མཆིས་
པ་གང་ལགས་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་ལགས་སོ། །ཤེས་རབ་ཀྱི་ཕ་རོལ་དུ་ཕྱིན་པ་ཞེས་བགྱི་བ་དེ་ནི་འདི་ལྟ་སྟེ་བསམ་གྱིས་མི་ཁྱབ་པའི་དབྱིངས་ཀྱི་ཚིག་བླ་དགས་སོ། །བསམ་གྱིས་མི་ཁྱབ་པའི་དབྱིངས་གང་
ལགས་པ་དེ་སྐྱེ་བ་མ་མཆིས་པའི་དབྱིངས་སོ། །སྐྱེ་བ་མ་མཆིས་པའི་དབྱིངས་གང་ལགས་པ་དེ་ཆོས་ཀྱི་དབྱིངས་སོ། །ཆོས་ཀྱི་དབྱིངས་གང་ལགས་པ་དེ་ཀུན་དུ་འབྱུང་བ་མ་མཆིས་པའི་དབྱིངས་སོ། །ཀུན་དུ་འབྱུང་བ་མ་
མཆིས་པའི་དབྱིངས་གང་ལགས་པ་དེ་བསམ་གྱིས་མི་ཁྱབ་པའི་དབྱིངས་སོ། །བསམ་གྱིས་མི་ཁྱབ་པའི་དབྱིངས་གང་ལགས་པ་དེ་བདག་གི་དབྱིངས་སོ། །བདག་གི་དབྱིངས་གང་ལགས་པ་དེ་ཤེས་རབ་ཀྱི་ཕ་རོལ་དུ་ཕྱིན་
པའི་དབྱིངས་ཏེ། དེ་ལྟར་ན་ཤེས་རབ་ཀྱི་ཕ་རོལ་དུ་ཕྱིན་པའི་དབྱིངས་དང་། བདག་གི་དབྱིངས་འདི་ནི་གཉིས་སུ་མ་མཆིས་ཏེ། གཉིས་སུ་དབྱེར་མ་མཆིས་སོ། །གང་གི་སླད་དུ་འདི་གཉིས་སུ་མ་མཆིས་ཏེ་གཉིས་སུ་དབྱེར་
39-1-121b


མ་མཆིས་པ་དེའི་སླད་དུ་འདི་ནི་བསམ་གྱིས་མི་ཁྱབ་པའི་དབྱིངས་སོ། །གང་གི་སླད་དུ་འདི་བསམ་གྱིས་མི་ཁྱབ་པའི་དབྱིངས་ལགས་པ་དེའི་སླད་དུ་འདི་ནི་སྐྱེ་བ་མ་མཆིས་པའི་དབྱིངས་སོ། །གང་གི་སླད་དུ་འདི་སྐྱེ་བ་མ་མཆིས་པའི་དབྱིངས་
ལགས་པ་དེའི་སླད་དུ་འདི་ནི་ཆོས་ཀྱི་དབྱིངས་སོ། །གང་གི་སླད་དུ་འདི་ཆོས་ཀྱི་དབྱིངས་ལགས་པ་དེའི་སླད་དུ་འདི་ནི་ཀུན་དུ་འབྱུང་བ་མ་མཆིས་པའི་དབྱིངས་སོ། །གང་གི་སླད་དུ་འདི་ཀུན་དུ་འབྱུང་བ་མ་མཆིས་པའི་དབྱིངས་ལགས་
པ་དེའི་སླད་དུ་འདི་ནི་བསམ་གྱིས་མི་ཁྱབ་པའི་དབྱིངས་སོ། །གང་གི་སླད་དུ་འདི་བསམ་གྱིས་མི་ཁྱབ་པའི་དབྱིངས་ལགས་པའི་སླད་དུ་འདི་ནི་བདག་གི་དབྱིངས་སོ། །གང་གི་སླད་དུ་འདི་བདག་གི་དབྱིངས་ལགས་པ་དེའི་སླད་དུ་
འདི་ནི་ཤེས་རབ་ཀྱི་ཕ་རོལ་དུ་ཕྱིན་པའི་དབྱིངས་སོ། །གང་གི་སླད་དུ་འདི་ཤེས་རབ་ཀྱི་ཕ་རོལ་དུ་ཕྱིན་པའི་དབྱིངས་ལགས་པ་དེའི་སླད་དུ་འདི་ནི་བསམ་གྱིས་མི་ཁྱབ་པའི་དབྱིངས་སོ། །གང་གི་སླད་དུ་འདི་བསམ་གྱིས་མི་ཁྱབ་
པའི་དབྱིངས་ལགས་པ་དེའི་སླད་དུ་འདི་ནི་ཡང་དག་པར་འགྲུབ་པ་མ་མཆིས་པའི་དབྱིངས་སོ། །ཡང་དག་པར་འགྲུབ་པ་མ་མཆིས་པ་གང་ལགས་པ་དེ་མཆིས་པ་མ་ལགས་སོ། །གང་མཆིས་པ་མ་ལགས་པ་དེ་ནི་འཇིག་པར་
མི་འགྱུར་རོ། །གང་འཇིག་པར་མི་འགྱུར་བ་དེ་ནི་བསམ་གྱིས་མི་ཁྱབ་པ་སྟེ། དེ་ལྟར་ན་དེ་བཞིན་གཤེགས་པའི་དབྱིངས་དང་། བདག་གི་དབྱིངས་འདི་ནི་གཉིས་སུ་མ་མཆིས་ཏེ། གཉིས་སུ་དབྱེར་མ་མཆིས་སོ། །བཅོམ་ལྡན་འདས་
ཀྱིས་གང་བདག་སྒོམ་པ་ནི་ཤེས་རབ་ཀྱི་ཕ་རོལ་དུ་ཕྱིན་པ་སྒོམ་པའོ་ཞེས་བཀའ་སྩལ་པ་དེ་ཡང་ཅིའི་སླད་དུ་ཞེ་ན། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་ཞེས་བགྱི་བ་འདི་ནི་བདག་གི་དབྱིངས་ཀྱི་ཚིག་བླ་དགས་ལགས་
པའི་སླད་དུའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གང་གིས་བདག་གི་དབྱིངས་འཚལ་བ་དེས་ཆགས་པ་མ་མཆིས་པའི་དབྱིངས་འཚལ་ཏོ། །གང་གིས་ཆགས་པ་མ་མཆིས་པ་ཉིད་འཚལ་བ་དེས་ཆོས་གང་ཡང་འཚལ་བ་མ་
39-1-122a


མཆིས་ཏེ། དེ་ཅིའི་སླད་དུ་ཞེ་ན། འདི་ལྟར་བསམ་གྱིས་མི་ཁྱབ་པའི་ཡེ་ཤེས་ནི་སངས་རྒྱས་ཀྱི་ཡེ་ཤེས་ལགས་ཏེ་ཆོས་གང་ལ་ཡང་ཤེས་པ་མ་མཆིས་པ་ནི་སངས་རྒྱས་ཀྱི་ཡེ་ཤེས་ལགས་པའི་སླད་དུའོ། །དེ་ཅིའི་སླད་དུ་
ཞེ་ན། ཡེ་ཤེས་དེ་ནི་དོན་དམ་པར་ན་མཆིས་པ་མ་ལགས་ཏེ། གང་དོན་དམ་པར་མ་མཆིས་པ་དེ་ཆོས་ཀྱི་འཁོར་ལོ་སྐོར་བར་ཡང་ཇི་ལྟར་འགྱུར། གང་གི་ཚེ་ཡེ་ཤེས་དེ་དོན་དམ་པར་མ་མཆིས་པ་དེའི་ཚེ་ཡེ་ཤེས་དེ་ནི་ཆགས་པ་མ་མཆིས་
པའོ། །གང་གི་ཚེ་ཡེ་ཤེས་དེ་ཆགས་པ་མ་མཆིས་པ་དེའི་ཚེ་ཡེ་ཤེས་དེ་ནི་དངོས་པོ་མ་མཆིས་པའོ། །གང་གི་ཚེ་ཡེ་ཤེས་དེ་དངོས་པོ་མ་མཆིས་པ་དེའི་ཚེ་ཡེ་ཤེས་དེ་ནི་ཡུལ་མ་མཆིས་པའོ། །གང་གི་ཚེ་ཡེ་ཤེས་དེ་
ཡུལ་མ་མཆིས་པ་དེའི་ཚེ་ཡེ་ཤེས་དེ་ནི་མི་གནས་པའོ། །གང་གི་ཚེ་ཡེ་ཤེས་དེ་མི་གནས་པ་དེའི་ཚེ་ཡེ་ཤེས་དེ་ནི་རྟེན་མ་མཆིས་པའོ། །གང་གི་ཚེ་ཡེ་ཤེས་དེ་རྟེན་མ་མཆིས་པ་དེའི་ཚེ་ཡེ་ཤེས་དེ་ནི་མ་བསྐྱེད་པའོ། །མ་ཐོབ་པའོ། །
སྐྱེ་བར་མི་འགྱུར་བའོ། །དེ་ཅིའི་སླད་དུ་ཞེ་ན། ཡེ་ཤེས་དེ་ནི་ཡོན་ཏན་གྱིས་འདུས་བགྱིས་པ་འམ་ཡོན་ཏན་མ་ལགས་པས་འདུས་བགྱིས་པ་མ་ལགས་པའི་སླད་དུའོ། །དེ་ཅིའི་སླད་དུ་ཞེ་ན། འདི་ལྟར་ཡེ་ཤེས་དེ་ནི་བསམ་གྱིས་མི་
ཁྱབ་པ་སྟེ། དེའི་སླད་དུ་ཡོན་ཏན་ནམ། ཡོན་ཏན་མ་ལགས་པར་ཡང་ཇི་སྐད་དུ་བསྟན་པར་བགྱི། གང་གི་སླད་དུ་ཡེ་ཤེས་དེ་བསམ་གྱིས་མི་ཁྱབ་པ་དེའི་སླད་དུ་ཡེ་ཤེས་དེ་བསམ་དུ་མ་མཆིས་པ་སྟེ། གང་དེ་ལྟར་ཤེས་པ་དེ་ནི་མི་
དམིགས་པའི་ཚུལ་དུ་སངས་རྒྱས་ཀྱི་ཡེ་ཤེས་ལགས་སོ། །ཡེ་ཤེས་དེས་ནི་ཆོས་གང་ཡང་མངོན་པར་རྫོགས་པར་སངས་རྒྱས་པ་འམ་མཁྱེན་པ་མ་མཆིས་སོ། །ཡེ་ཤེས་དེ་ནི་སྔོན་གྱི་མཐའ་འམ་ཕྱི་མའི་མཐའ་ནས་
མཆིས་པ་མ་ལགས་སོ། །ཡེ་ཤེས་དེ་ནི་སྔོན་སྐྱེས་པ་ཡང་མ་ལགས་ཡེ་ཤེས་དེ་ནི་སྔོན་མ་སྐྱེས་པ་ཡང་མ་ལགས་ཏེ། སྔོན་མ་སྐྱེས་པའི་སླད་དུ་གང་མ་སྐྱེས་པ་དེ་ནི་ནུབ་པར་ཡང་མི་འགྱུར། ཆད་པར་ཡང་མི་འགྱུར་རོ། །
39-1-122b


ཡེ་ཤེས་དེ་དང་འདྲ་བའི་ཡེ་ཤེས་གང་ཡང་མ་མཆིས་ཏེ། དེའི་སླད་དུ་ཡེ་ཤེས་དེ་ནི་བསམ་གྱིས་མི་ཁྱབ་ཅིང་འདྲ་བ་མ་མཆིས་པའོ། །ཡེ་ཤེས་དེ་ནི་ཐོག་མ་དང་དབུས་དང་ཐ་མ་མི་དམིགས་པ་སྟེ། དེའི་སླད་དུ་ཡེ་ཤེས་དེ་ནི་ནམ་མཁའ་དང་
འདྲ་བའོ། །ཡེ་ཤེས་དེ་ལ་མཉམ་པ་འམ། མི་མཉམ་པ་མི་དམིགས་ཏེ། དེའི་སླད་དུ་ཡེ་ཤེས་དེ་ནི་མི་མཉམ་པ་དང་མཉམ་པའོ། །ཡེ་ཤེས་དེ་ལ་ནི་དེ་དང་འདྲ་བའི་ཡེ་ཤེས་གཞན་མི་དམིགས་ཏེ། དེའི་སླད་དུ་ཡེ་ཤེས་དེ་ནི་མཚུངས་པ་མ་མཆིས་པའོ། །
དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཡེ་ཤེས་འདི་མི་བསྒྱུར་བ་མ་ཡིན་ནམ། འཇམ་དཔལ་གྱིས་གསོལ་པ། བཅོམ་ལྡན་འདས་ཡེ་ཤེས་འདི་ནི་མ་བགྱིས་པ་སྟེ། དེའི་སླད་དུ་
འདི་མི་བསྒྱུར་བ་ལགས་སོ། །བཅོམ་ལྡན་འདས་འདི་ལྟ་སྟེ་དཔེར་ན་ཀར་ཤ་པ་ཎ་རྟགས་མ་བཏབ་པ་ནི་བསྒྱུར་བ་ཡང་མ་ལགས་མི་བསྒྱུར་བ་ཡང་མ་ལགས་པའི་གྲངས་སུ་མཆིའོ། །བཅོམ་ལྡན་འདས་དེ་བཞིན་དུ་ཡེ་ཤེས་འདི་ཡང་མ་བགྱིས་པ་
མ་བསྒྲུབས་པ། མ་བསྐྱེད་པ། མ་ཕྱུང་བ། མ་འགགས་པ་སྟེ། དེའི་སླད་དུ་མི་བསྒྱུར་བ་ལགས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་དེ་བཞིན་གཤེགས་པའི་ཡེ་ཤེས་བསྟན་
པ་འདི་ལ་འདི་ལྟར་བསྟན་པར་སུ་དག་མོས། འཇམ་དཔལ་གྱིས་གསོལ་པ། བཅོམ་ལྡན་འདས་གང་དག་འཁོར་བའི་ཆོས་ཅན་ཡང་མ་ལགས་ལ། ཡོངས་སུ་མྱ་ངན་ལས་འདས་པའི་ཆོས་ཅན་ཡང་མ་ལགས་པ་དང་། གང་དག་འཇིག་ཚོགས་
ལ་ཡང་མ་བསྐྱོད་པ་དང་། གང་དག་འདོད་ཆགས་དང་། ཞེ་སྡང་དང་། གཏི་མུག་ཀྱང་མ་བས་པ་དེ་དག་མོས་སོ། །དེ་ཅིའི་སླད་དུ་ཞེ་ན། མི་བས་པ་ནི་བས་པར་མི་འགྱུར་ཏེ། ཡོངས་སུ་བས་པར་ཡང་མི་མཆིའོ། །གང་དག་འཁོར་བ་ལས་ཀྱང་
མ་འདས་ལ་འཁོར་བའི་གྲངས་སུ་ཡང་མི་མཆི་བ་དང་། གང་དག་ལམ་དང་བྲལ་བ་ཡང་མ་ལགས་ཤིང་ལམ་གྱི་འདུ་ཤེས་ཀྱང་མི་སྐྱེད་པ་དེ་དག་གིས་བསྟན་པ་འདིའི་དོན་འཚལ་བར་འགྱུར་རོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་
39-1-123a


འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ལེགས་སོ་ལེགས་སོ། །ཁྱོད་ཀྱི་ཚིག་འདི་ལེགས་པར་སྨྲས་པའོ། །དེ་ནས་དེའི་ཚེ་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་
ཅེས་གསོལ་ཏོ། །བཅོམ་ལྡན་འདས་མ་མཆིས་པའི་དུས་ན་གང་ལ་ལ་ཆོས་འདུལ་བ་ཟབ་མོ་འདི་དང་། ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་འདི་ལ་ཉན་པ་དང་། མོས་པ་དང་། ཀུན་འཚལ་བ་དང་། རབ་ཏུ་འཛིན་པར་འགྱུར་བ་འབྱུང་བ་མཆིས་སམ། 
དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་འཁོར་འདི་ཉིད་ན་ཡང་གང་དག་མ་འོངས་པའི་དུས་ན་ཆོས་འདུལ་བ་ཟབ་མོ་འདི་དང་། ཤེས་རབ་ཀྱི་ཕ་རོལ་དུ་ཕྱིན་པ་ཟབ་
མོ་འདི་ལ་ཉན་པ་དང་། མོས་པ་དང་། ཀུན་ཤེས་པ་དང་། རབ་ཏུ་འཛིན་པར་འགྱུར་བའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དེ་དག་ཡོད་དོ། །འོད་སྲུང་འདི་ལྟ་སྟེ་དཔེར་ན་ཁྱིམ་བདག་གམ། ཁྱིམ་བདག་གི་བུ་ཞིག་གི་ནོར་བུ་
རིན་པོ་ཆེ་བརྒྱ་སྟོང་རི་བ་སྟོར་ན་སྡུག་བསྔལ་བ་དང་། ཡིད་མི་བདེ་བར་འགྱུར་རོ། །དེ་ཉིད་རྙེད་ན་བདེ་བ་དང་། ཡིད་བདེ་བ་སྐྱེ་ཞིང་ཀུན་ནས་དཀྲིས་པའི་ཡིད་ལ་བྱེད་པ་མེད་པར་འགྱུར་རོ། །འོད་སྲུང་དེ་བཞིན་དུ་དགེ་སློང་དང་། དགེ་སློང་མ་དང་། དགེ་
བསྙེན་དང་། དགེ་བསྙེན་མ་དེ་དག་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་འདི་མ་སྐྱེས་པ་དང་། མ་བྱུང་བ་དང་། རང་བཞིན་གྱིས་ཡོངས་སུ་མྱ་ངན་ལས་འདས་པ་ནས་དངོས་པོ་མེད་པའི་བར་དུ་མ་ཐོས་པ་ན་འདི་སྙམ་དུ་བདག་ཅག་གིས་ཤེས་རབ་ཀྱི་ཕ་རོལ་
དུ་ཕྱིན་པ་ཟབ་མོ་མ་སྐྱེས་པ་དང་། མ་བྱུང་བ་དང་། རང་བཞིན་གྱིས་ཡོངས་སུ་མྱ་ངན་ལས་འདས་པ་ནས་དངོས་པོ་མེད་པའི་བར་འདི་ལྟ་བུ་འདི་མ་ཐོས་སོ་སྙམ་དུ་སེམས་སོ། །དེ་དག་གིས་དུས་གཞན་ན་ཐོས་པར་གྱུར་པ་ན་དགའ་བ་དང་། བདེ་བ་དང་། 
ཡིད་དགའ་བར་འགྱུར་ཞིང་ཀུན་ནས་དཀྲིས་པའི་ཡིད་ལ་བྱེད་པ་མེད་པར་འགྱུར་ཏེ། ཚིག་འདི་སྐད་དུ་འདི་ལྟར་བདག་ཅག་གིས་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་མ་སྐྱེས་པ་དང་། དངོས་པོ་མེད་པ་དང་། མ་བྱུང་བ་འདི་ཐོས་པས་དེང་བདག་ཅག་གིས་
39-1-123b


སངས་རྒྱས་མཐོང་ཞིང་དེ་བཞིན་གཤེགས་པ་ལ་བསྙེན་བཀུར་ཡང་བྱས་སོ་ཞེས་སྨྲ་བར་འགྱུར་རོ། །འོད་སྲུང་འདི་ལྟ་སྟེ་དཔེར་ན་སུམ་བཅུ་རྩ་གསུམ་པའི་ལྷ་རྣམས་ནི་ཤིང་ཡོངས་འདུ་ས་བརྟོལ་ཁ་འབུས་པ་མཐོང་ནས་ཀྱེ་མ་ཡོངས་འདུ་ས་བརྟོལ་
འདི་རིང་པོ་མི་ཐོགས་པར་མེ་ཏོག་ཐམས་ཅད་རྒྱས་པར་འགྱུར་རོ་སྙམ་སྟེ། ཡིད་དགའ་བ་དང་། རབ་ཏུ་དགའ་བར་འགྱུར་རོ། །འོད་སྲུང་དེ་བཞིན་དུ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དེ་དག་ཀྱང་ཤེས་རབ་ཀྱི་ཕ་རོལ་
དུ་ཕྱིན་པ་ཟབ་མོ་མ་སྐྱེས་མ་བྱུང་བ་ནས་དངོས་པོ་མེད་པའི་བར་འདི་ཐོས་ན། ཡིད་དགའ་བ་དང་། རབ་ཏུ་དགའ་བར་འགྱུར་རོ། །གང་དག་མ་འོངས་པའི་དུས་ན་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་མ་སྐྱེས་པ་དང་། མ་བྱུང་བ་ནས་དངོས་
པོ་མེད་པའི་བར་འདི་ཐོས་ན་ཡིད་དགའ་བ་དང་། རབ་ཏུ་དགའ་བར་འགྱུར་བ་དེ་དག་ཀྱང་ངའི་འཁོར་འདི་ཉིད་ན་གནས་པར་འོད་སྲུང་ཁྱོད་ཀྱིས་ཤེས་པར་གྱིས་ཤིག །གང་དག་མ་འོངས་པའི་དུས་ན་ཡིད་དགའ་བ་དང་། རབ་ཏུ་དགའ་བར་འགྱུར་བ་
དེ་དག་ཡིད་དགའ་བ་དེ་དང་རབ་ཏུ་དགའ་བ་དེས་རིང་པོ་མི་ཐོགས་པར་སངས་རྒྱས་ཀྱི་ཆོས་ཐམས་ཅད་ཀྱི་མེ་ཏོག་རྒྱས་པར་འགྱུར་བས་མེ་ཏོག་ཐམས་ཅད་རྒྱས་པ་འགྱུར་བར་ཤེས་པར་གྱིས་ཤིག །འོད་སྲུང་འདི་ལྟར་ཤེས་རབ་ཀྱི་ཕ་རོལ་དུ་
ཕྱིན་པ་ཟབ་མོ་མ་སྐྱེས་པ་དང་། མ་བྱུང་བ་ནས་དངོས་པོ་མེད་པའི་བར་འདི་མ་འོངས་པའི་དུས་ན་དེ་བཞིན་གཤེགས་པ་འདས་པའི་ཕྱི་ན་གནས་པར་འགྱུར་བ་དང་། སྤྱོད་པར་འགྱུར་བ་གང་ཡིན་པ་དེ་ཡང་འོད་སྲུང་སངས་རྒྱས་ཀྱི་བྱིན་གྱིས་བརླབས་
དང་། སངས་རྒྱས་ཀྱི་མཐུ་ཡིན་པར་ཤེས་པར་བྱའོ། །འོད་སྲུང་དེ་བས་ན་གང་དག་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་མ་སྐྱེས་པ་དང་། མ་བྱུང་བ་ནས་དངོས་པོ་མེད་པའི་བར་འདི་ཐོས་ནས་དགའ་ན། འོད་སྲུང་དེ་ནི་དེ་དག་གི་ཐོས་པའི་
དང་པོ་མ་ཡིན་ནོ། །འོད་སྲུང་འདི་ལྟ་སྟེ་དཔེར་ན་ནོར་བུ་མཁན་ཞིག་གིས་ནོར་བུ་རིན་པོ་ཆེ་མཐོང་ནས་གང་གི་ཚེ་དགའ་བར་གྱུར་པ་དེ་ན་ནོར་བུ་མཁན་དེས་ནོར་བུ་རིན་པོ་ཆེ་དེ་གདོད་མཐོང་བ་མ་ཡིན་གྱི་དེ་ནི་སྔོན་ནས་རྒྱུན་དུ་ནོར་བུ་རིན་པོ་ཆེ་
39-1-124a


མཐོང་བའོ་ཞེས་ཤེས་པར་བྱའོ། །འོད་སྲུང་དེ་བཞིན་དུ་གང་དག་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་མ་སྐྱེས་པ་དང་། མ་བྱུང་བ་ནས་དངོས་པོ་མེད་པའི་བར་འདི་ཐོས་ནས་ཡིད་དགའ་བ་དང་། རབ་ཏུ་དགའ་བར་གྱུར་ཅིང་མགུ་བ་
དང་། རངས་པ་དང་། ཡིད་བདེ་བ་སྐྱེས་ན་འོད་སྲུང་འདི་ནི་དེ་དག་གི་ཐོས་པའི་དང་པོ་མ་ཡིན་ནོ། །འོད་སྲུང་དེ་དག་ནི་འདི་སྐད་དུ་སྨྲ་བར་གྱུར་ཏེ། གང་འདི་འཇམ་དཔལ་གཞོན་ནུར་གྱུར་པས་མ་སྐྱེས་པ་ནས་དངོས་པོ་མེད་པ་དང་། མ་བྱུང་བའི་བར་དུ་
བསྟན་པ་འདི་ཉིད་སྨྲོས་ཤིག་ཅེས་ཟེར་བར་འགྱུར་ཏེ། དེ་དག་ནི་སྔོན་རྒྱུན་དུ་འཇམ་དཔལ་གཞོན་ནུར་གྱུར་པ་ལ་བསྙེན་བཀུར་བྱས་པར་གྱུར་པའོ། །འོད་སྲུང་འདི་ལྟ་སྟེ་དཔེར་ན། མི་ལ་ལ་ཞིག་གྲོང་ངམ་གྲོང་ཁྱེར་རམ། གྲོང་རྡལ་ལམ། གྲོང་གང་
ཡང་རུང་བ་ཞིག་དུ་དགོས་པ་ལ་ལའི་ཕྱིར་སོན་པར་གྱུར་ལ། ཡང་དུས་གཞན་ཞིག་ན་དེའི་དྲུང་དུ་མི་ལ་ལ་ཞིག་སོང་སྟེ། གྲོང་ཁྱེར་དེའི་བསྔགས་པ་བརྗོད་ཅིང་ཀུན་དགའི་ར་བ་ཉམས་དགའ་བ་དང་། ཡུལ་ཉམས་དགའ་བ་དང་། རྫིང་བུ་ཉམས་དགའ་
བ་དང་། བསྐྱེད་མོས་ཚལ་ཉམས་དགའ་བ་དང་། ཆུ་མིག་དང་། མཚེའུ་དང་། མཚོ་བྲན་ཉམས་དགའ་བ་དང་། མེ་ཏོག་དང་། འབྲས་བུ་ཉམས་དགའ་བ་དེ་དག་གི་བསྔགས་པ་བརྗོད་ནས་དེས་དེ་ཐོས་པ་དང་། དགའ་བར་ཚོར་ཏེ་ཡིད་
བདེ་བ་སྐྱེས་ནས་ཡང་དང་ཡང་དུ་འདི་སྐད་དུ་ཀྱེ་སྐྱེས་བུ་དེ་ཉིད་ཟློས་ཏེ་བརྗོད་ཅིག་ཅེས་འཚོལ་ན་མི་དེས་ནི་སྔོན་ཡང་གྲོང་ཁྱེར་དེ་དང་། ཀུན་དགའ་ར་བ་ཉམས་དགའ་བ་དང་། ཡུལ་ཉམས་དགའ་བ་དང་། རྫིང་བུ་ཉམས་དགའ་བ་དང་། བསྐྱེད་མོས་ཚལ་
ཉམས་དགའ་བ་དང་། ཆུ་མིག་དང་། མཚེའུ་དང་། མཚོ་བྲན་ཉམས་དགའ་བ་དང་། མེ་ཏོག་དང་། འབྲས་བུ་ཉམས་དགའ་བ་དག་ཀྱང་མྱོང་བ་ཡིན་པར་མི་དེས་དེ་ལྟར་རྟོགས་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེས་ཐོས་ནས་ཡིད་ཆེར་
དགའ་བ་དང་། །རབ་ཏུ་དགའ་བ་དང་། རབ་ཏུ་དགའ་བར་གྱུར་ཏེ། མགུ་བ་དང་། རངས་པ་དང་། ཡིད་བདེ་བ་སྐྱེས་པའི་ཕྱིར་རོ། །འོད་སྲུང་དེ་བཞིན་དུ་གང་དག་གིས་འཇམ་དཔལ་གཞོན་ནུར་གྱུར་པ་ལ་བསྙེན་བཀུར་བྱས་པར་གྱུར་པ་དང་། ཡང་དང་ཡང་
39-1-124b


དྲུང་དུ་འགྲོ་ཞིང་འདྲི་བ་བྱས་པར་གྱུར་པ་དེ་དག་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་མ་སྐྱེས་པ་དང་། མ་བྱུང་བ་ནས་དངོས་པོ་མེད་པའི་བར་འདི་ཐོས་ན་རབ་ཏུ་དགའ་ཞིང་མགུ་བར་གྱུར་ཏེ། དགའ་བ་དང་མགུ་བ་ཆེར་བསྐྱེད་ཅིང་ཚིག་འདི་སྐད་དུ་མ་
ལ་འདི་ལྟ་སྟེ། མ་སྐྱེས་པ་དང་། མ་བྱུང་བ་ནས་དངོས་པོ་མེད་པའི་བར་དུ་བསྟན་པའི་ཤེས་རབ་ཀྱི་ཕ་རོལ་དུ་ཕྱིན་པ་འདི་ལྟ་བུ་འདི་ཉིད་ཇི་མཉན་ཏོ་ཞེས་སྨྲ་བར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་འོད་སྲུང་
ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་མ་མཆིས་པའི་དུས་ན་དད་པའི་རིགས་ཀྱི་བུ་འམ། རིགས་ཀྱི་བུ་མོ་འབྱུང་བ་དེ་དག་གི་རྣམ་པ་དང་། རྟགས་དང་། མཚན་མ་བཅོམ་ལྡན་འདས་ཀྱིས་གང་དག་བཀའ་སྩལ་པ་དེ་དག་ཉིད་ལགས་
སམ། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཇི་སྐད་སྨྲས་པ་དེ་དེ་བཞིན་ཏེ་མ་འོངས་པའི་དུས་ན་དད་པའི་རིགས་ཀྱི་བུ་འམ། རིགས་ཀྱི་བུ་མོ་འབྱུང་བ་དེ་དག་གི་རྣམ་པ་དང་། རྟགས་དང་། མཚན་མ་འདི་གང་དག་ངས་ད་ལྟར་
བསྟན་པ་འདི་དག་ཉིད་ཡིན་ནོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ནི་རྣམ་པ་མ་མཆིས་ཤིང་རྟགས་མ་མཆིས་པ་དང་། བཅོམ་ལྡན་འདས་ཤེས་རབ་
ཀྱི་ཕ་རོལ་དུ་ཕྱིན་པ་ཡང་རྣམ་པ་མ་མཆིས་པ་ནས་མཚན་མ་མ་མཆིས་པའི་བར་དུ་ལགས་ན་རྣམ་པ་འམ། རྟགས་སམ། མཚན་མ་ཇི་ལྟ་བུ་ཞིག་མཆིས་པར་འགྱུར། བཅོམ་ལྡན་འདས་ཀྱིས་ཆོས་བསྟན་པ་གང་ལགས་པ་དེ་ཡང་
རྣམ་པ་མ་མཆིས། རྟགས་མ་མཆིས། མཚན་མ་མ་མཆིས་པའི་བར་དུ་ལགས་ན་བཅོམ་ལྡན་འདས་རྣམ་པ་མ་མཆིས་པ་དང་། རྟགས་མ་མཆིས་པ་དང་། མཚན་མ་མ་མཆིས་པ་ཇི་ལྟར་བསྟན་པར་འགྱུར། དེ་སྐད་ཅེས་གསོལ་པ་
དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་ཤིན་དུ་མ་སྐྱེས་པ་དང་། དངོས་པོ་མེད་པའི་བར་འདི་བསྟན་ན་གང་དག་མོས་པ་ནས་
39-1-125a


ཀུན་ཆུབ་པར་བྱེད་པའི་བར་དུ་བྱེད་པ་དེ་དག་ཉིད་རིགས་ཀྱི་བུ་དང་། རིགས་ཀྱི་བུ་མོ་དེ་དག་གི་རྣམ་པ་དང་། རྟགས་དང་། མཚན་མ་ཡིན་ནོ། །འཇམ་དཔལ་གང་དུ་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་དེར། སངས་རྒྱས་ཀྱི་
ཆོས་ཐམས་ཅད་བལྟ་བར་བྱའོ། །དེར་བསམ་གྱིས་མི་ཁྱབ་པ་བསྟན་པར་བལྟའོ། །འཇམ་དཔལ་ངས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། དགེ་བའི་རྩ་བ་གང་དག་ཡང་དག་པར་བསྒྲུབས་ཏེ། དགེ་བའི་རྩ་བ་གང་དག་གིས་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་འདི་མངོན་པར་རྫོགས་པར་སངས་རྒྱས་པའི་དགེ་བའི་རྩ་བ་དེ་དག་ཡང་དག་པར་བསྒྲུབ་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་མཉན་པར་བྱ། མོས་པར་
བྱ། ཡི་གེར་བྲི་བར་བྱ། གཟུང་བར་བྱ། བཀླག་པར་བྱ། ལུང་ནོད་པར་བྱ། ཁ་ཏོན་དུ་བྱ། ཚིག་ཏུ་གདོན་པར་བྱ། ཀུན་ཆུབ་པར་བྱ། ཚུལ་བཞིན་དུ་ཡིད་ལ་བྱ། བསྒོམ་པར་བྱ་བ་ནས། མེ་ཏོག་དང་། བདུག་པ་དང་། སྤོས་དང་། 
ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་དང་། རྣམ་པར་རྒྱལ་བའི་བ་དན་དང་། མར་མེ་ལ་སོགས་པ་ཅི་ནུས་ཅི་ཕོད་དུ་མཆོད་པའི་བར་དུ་བྱའོ། །རིམ་གྲོར་བྱའོ། །ཉན་ཐོས་དང་། སངས་
རྒྱས་ཐམས་ཅད་ཀྱི་ས་ལས་འདའ་བར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོར་བྱ་བའི་བར་དུ་བྱའོ། །འཇམ་དཔལ་ཇི་ལྟར་ཕྱིར་མི་ལྡོག་པའི་ས་ལ་འཇུག་
པར་འགྱུར་བ་དེ་ལྟ་བུ་ཉན་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །འཇམ་དཔལ་ཆོས་གང་ཡང་རུང་སྟེ། དེ་དག་ཐམས་ཅད་མ་སྐྱེས་པར་
མཉམ་པ་ཉིད་དུ་མོས་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །འཇམ་དཔལ་སངས་རྒྱས་ཀྱི་ཆོས་ཐམས་ཅད་མངོན་པར་རྫོགས་པར་
39-1-125b


བྱང་ཆུབ་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །འཇམ་དཔལ་ཆོས་ཐམས་ཅད་དེ་བཞིན་གཤེགས་པས་མངོན་པར་རྫོགས་པར་
སངས་རྒྱས་སོ་ཞེས་ཤིན་དུ་བསྟན་པ་འདི་ལ་མོས་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །དེ་ཅིའི་ཕྱིར་ཞེ་ན། གང་མངོན་
པར་རྫོགས་པར་འཚང་རྒྱ་བར་བྱེད་པ་འམ། གང་གིས་མངོན་པར་རྫོགས་པར་འཚང་རྒྱ་བར་བྱེད་པ་འམ། གང་མངོན་པར་རྫོགས་པར་འཚང་རྒྱ་བར་བྱ་བའི་ཆོས་དེ་གང་ཡང་མེད་དེ་མི་དམིགས་པའི་ཕྱིར་རོ། །དེ་ལྟར་དོན་འདི་
རྟོགས་ཤིང་མོས་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །གང་བྱང་ཆུབ་མ་ཡིན་པའི་ཆོས་དེ་གང་ཡང་མེད་དོ་ཞེས་དེ་ལྟར་མོས་
པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །ཆོས་ཐམས་ཅད་ལ་རྣམ་པར་མི་རྟོག་པར་འདོད་པའི་རིགས་ཀྱི་བུ་འམ། རིགས་ཀྱི་བུ་
མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །དེ་ཅིའི་ཕྱིར་ཞེ་ན། ཤེས་རབ་ཀྱི་ཕ་རོལ་དུ་ཕྱིན་པ་ནི་ཆོས་གང་གི་ཡོངས་སུ་གྲུབ་པ་རྣམ་པར་གཞོག་པ་འམ། སྐྱེད་པ་འམ། སྟོན་པ་མ་
ཡིན་པའི་ཕྱིར་རོ། །ཆོས་ཐམས་ཅད་ཀུན་ནས་ཉོན་མོངས་པ་མ་ཡིན། རྣམ་པར་བྱང་བ་མ་ཡིན་ཞེས་བྱ་བར་འཇུག་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་མཉན་པར་བྱ་བ་ནས་རིམ་
གྲོའི་བར་དུ་བྱའོ། །ཆོས་ཐམས་ཅད་འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན་ཞེས་བྱ་བར་མོས་པར་བྱ་བར་འདོད་ཅིང་འཇུག་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་
39-1-126a


འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །དེ་ཅིའི་ཕྱིར་ཞེ་ན། འཇམ་དཔལ་སྐྱེ་བ་མེད་པ་ནི་འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན་པའི་ཕྱིར་རོ། །དེ་ཅིའི་ཕྱིར་ཞེ་ན། འཇམ་དཔལ་ཆོས་ཐམས་
ཅད་ནི་སྐྱེ་བ་མེད་པ་ལ་རྟོན་པའི་ཕྱིར་རོ། །དེ་ལྟ་བུའི་ཆོས་ཐམས་ཅད་ཐེ་ཚོམ་མེད་པར་རྟོགས་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །འཇམ་
དཔལ་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བའི་ཆོས་ཀྱི་འཁོར་ལོར་ཇི་ལྟར་འགྱུར་བ་དེ་ཉན་པར་འདོད་པ་དང་། དེ་རྟོགས་པར་འདོད་པ་དང་། དེ་ལ་མོས་པར་འདོད་པ་དང་། དེ་ལ་འཇུག་པར་འདོད་པའི་རིགས་ཀྱི་བུ་འམ། རིགས་ཀྱི་
བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །སེམས་ཅན་ཐམས་ཅད་ལ་བྱམས་པས་ཁྱབ་པར་བྱ་བར་ཡང་འདོད་ལ་སེམས་ཅན་དུ་འདུ་ཤེས་པ་ལ་ཡང་མི་གནས་པར་འདོད་པ་དང་། 
འཇིག་རྟེན་ཐམས་ཅད་དང་། རྩོད་པར་ཡང་འདོད་ཅིང་འཇིག་རྟེན་ཐམས་ཅད་མི་དམིགས་པར་རྟོགས་པར་ཡང་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་
དུ་བྱའོ། །ཆོས་ཐམས་ཅད་སྐྱེ་བ་མེད་པའི་བར་དུ་རྟོགས་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་ལ་མི་དམིགས་པའི་ཚུལ་གྱིས་བསླབ་པར་བྱའོ། །དེ་ནས་བཅོམ་ལྡན་འདས་
ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཤེས་རབ་ཕ་རོལ་དུ་ཕྱིན་པ་ཡོན་ཏན་མ་མཆིས་པའི་ཡོན་ཏན་གང་ལགས། ཕན་ཡོན་གང་ལགས། བཅོམ་ལྡན་འདས་ཤེས་རབ་ཀྱི་ཕ་རོལ་དུ་
ཕྱིན་པ་ནི་ནུས་པ་ཅི་ཡང་མ་མཆིས་པ། ཀུན་ནས་སྤོང་བར་མི་བགྱིད་པ། རྣམ་པར་འཇིག་པར་མི་བགྱིད་པ། ཆོས་གང་ཡང་མི་ལེན་པ། མི་འདོར་བ་གཡོ་བ་མ་མཆིས་པ། བྱེད་པ་མ་མཆིས་པ་ལགས། ཤེས་རབ་ཀྱི་ཕ་རོལ་དུ་ཕྱིན་
39-1-126b


པ་ནི་ངོ་བོ་ཉིད་ཤེས་པ་མ་ལགས། ངོ་བོ་ཉིད་མཐོང་བ་མ་ལགས་པ། ཆོས་གང་ཡང་སྦྱིན་པར་མི་བགྱིད་པ་ཆོས་ཐམས་ཅད་དང་མི་འགལ་བ། ཆོས་ཐམས་ཅད་ཐ་དད་པར་མི་བགྱིད་པ་ལགས་ན། བཅོམ་ལྡན་འདས་ཤེས་རབ་ཀྱི་ཕ་
རོལ་དུ་ཕྱིན་པའི་ཡོན་ཏན་གང་ལགས། ཕན་ཡོན་གང་ལགས་བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་ཆོས་ཐམས་ཅད་གཅིག་དུ་བགྱིད་པ་མ་ལགས་པ། ཆོས་ཐམས་ཅད་ཐ་དད་པར་བགྱིད་པ་མ་ལགས་པ། མ་བགྱིས་
པ་བགྱི་བ་མ་མཆིས་པ། མི་བས་པ་རྣམ་པར་འཇིག་པར་མི་བགྱིད་པ། སོ་སོའི་སྐྱེ་བོའི་ཆོས་རྣམས་དང་། དགྲ་བཅོམ་པའི་ཆོས་རྣམས་དང་། བྱང་ཆུབ་སེམས་དཔའི་ཆོས་རྣམས་དང་། སངས་རྒྱས་ཀྱི་ཆོས་རྣམས་ཀྱང་སྦྱིན་པར་
བགྱིད་པ་མ་ལགས་པ། འགྲིབ་པར་བགྱིད་པ་མ་ལགས་པ། འཁོར་བ་ལེན་པར་མི་བགྱིད་པ་མྱ་ངན་ལས་འདས་པ་འདོར་བར་མི་བགྱིད་པ། སངས་རྒྱས་ཀྱི་ཆོས་རྣམས་སྦྱིན་པར་བགྱིད་པ་མ་ལགས་པ། རྣམ་པར་འཇིག་པར་
བགྱིད་པ་མ་ལགས་པ། བསམ་པར་བགྱིད་པ་མ་ལགས་པ། བསམ་དུ་མ་མཆིས་པ་མ་ལགས་པ། བགྱིད་པ་མ་ལགས་པ། འཇིག་པར་བགྱིད་པ་མ་ལགས་པ། ཆོས་ཐམས་ཅད་སྐྱེད་པ་མ་ལགས་པ། འགོག་པ་མ་ལགས་
པ། ཆད་པར་བགྱིད་པ་མ་ལགས་པ། རྟག་པར་བགྱིད་པ་མ་ལགས་པ། འོང་བར་བགྱིད་པ་མ་ལགས་པ། འགྲོ་བར་བགྱིད་པ་མ་ལགས་པ། དབེན་པར་བགྱིད་པ་མ་ལགས་པ། མི་དབེན་པར་བགྱིད་པ་མ་ལགས་པ། གཉིས་
སུ་བགྱིད་པ་མ་ལགས་པ། མི་གཉིས་པར་བགྱིད་པ་མ་ལགས་པའི་ཡོན་ཏན་གང་ལགས། ཕན་ཡོན་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་
སྩལ་ཏོ། །འཇམ་དཔལ་དངོས་པོ་མེད་པ་ནས་བྱེད་པ་མེད་པའི་བར་འདི་ཉིད་ཤེས་རབ་ཀྱི་ཕ་རོལ་དུ་ཕྱིན་པ་འདིའི་ཡོན་ཏན་དུ་རིག་པར་བྱའོ། །འཇམ་དཔལ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་
39-1-127a


དཔའི་ཏིང་ངེ་འཛིན་ལ་སློབ་པར་འདོད་པ་དང་། བྱང་ཆུབ་སེམས་དཔའི་ཏིང་ངེ་འཛིན་བསྒྲུབ་པར་འདོད་པ་དང་། ཏིང་ངེ་འཛིན་གང་ལ་གནས་ནས་སངས་རྒྱས་བཅོམ་ལྡན་འདས་ཐམས་ཅད་སྣང་བ་དང་། དེ་དག་གི་སངས་རྒྱས་ཀྱི་ཞིང་
རྣམས་ཀྱང་མཐོང་བར་འདོད་པ་དང་། དེ་དག་གི་མིང་ཡང་ཤེས་པར་འདོད་པ་དང་། དེ་དག་ལ་མཆོད་པ་བླ་ན་མེད་པ་ཡང་བྱེད་པར་འདོད་པ་དང་། དེ་དག་གི་ཆོས་བསྟན་པ་ལ་འཇུག་པར་འདོད་པ་དང་། མོས་པར་འདོད་པས་མི་བསླབ་པའི་ཚུལ་དུ་
ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་ལ་བསླབ་པར་བྱའོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་འདི་ལ་ཤེས་རབ་ཀྱི་ཕ་རོལ་དུ་ཕྱིན་པ་ཞེས་བགྱི། 
བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་མ་སྐྱེས་མ་འགགས་པའི་ཕྱིར་ཤེས་རབ་ཀྱི་ཕ་རོལ་དུ་ཕྱིན་པ་ཞེས་བྱའོ། །འདི་ལྟར་ཡང་གཟོད་མ་ནས་ཞི་བ་དང་། འབྱུང་བ་མེད་པ་དང་། བྱ་བ་མེད་པ་ནས་དངོས་པོ་མེད་པའི་བར་
གྱི་ཕྱིར་ཏེ། གང་དངོས་པོ་མེད་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་ཡིན་ནོ། །འཇམ་དཔལ་དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཤེས་རབ་ཀྱི་ཕ་རོལ་དུ་ཕྱིན་པ་བསྒོམ་པར་ཤེས་པར་བྱའོ། །གང་ཆོས་
ཐམས་ཅད་སྤྱོད་ཡུལ་མ་ཡིན་པ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྤྱོད་ཡུལ་ཏེ། འདི་ལ་སྤྱོད་པ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་ཡུལ་ལ་ཞུགས་པ་ཞེས་བྱའོ། །འདི་ལྟ་སྟེ་སྤྱོད་
ཡུལ་མ་ཡིན་པ་ཐེག་པ་ཐམས་ཅད་པ་འདི་ཉིད་སྤྱོད་ཡུལ་ཡིན་ནོ། །དེ་ཅིའི་ཕྱིར་ཞེ་ན། སྤྱོད་ཡུལ་འདི་ནི་མ་བྱས་པ་སྟེ། དེའི་ཕྱིར་སྤྱོད་ཡུལ་མ་ཡིན་པ་ཞེས་བྱའོ། །དེ་ནས་བཅོམ་ལྡན་འདས་འཇམ་དཔལ་གཞོན་ནུར་གྱུར་
པས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ལ་སྤྱད་ན་བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། དེ་སྐད་ཅེས་
39-1-127b


གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཤེས་རབ་ཀྱི་ཕ་རོལ་དུ་ཕྱིན་པ་ལ་སྤྱོད་ན་བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །འཇམ་དཔལ་བཀོད་པ་གཅིག་པ་ཞེས་བྱ་བའི་ཏིང་ངེ་འཛིན་ཡོད་དེ་ཏིང་ངེ་འཛིན་དེ་ལ་སྤྱད་ན་བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བཀོད་པ་གཅིག་པའི་ཏིང་ངེ་འཛིན་
ལ་བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་འཇུག་པར་བགྱི། ཅིའི་སླད་དུ་བཀོད་པ་གཅིག་པའི་ཏིང་ངེ་འཛིན་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་བཀོད་པ་གཅིག་པ་ཞེས་བྱ་བ་འདི་ནི་སྐྱེ་བ་
མེད་པའི་ཚིག་བླ་དགས་སོ། །བཀོད་པ་གཅིག་པའི་ཏིང་ངེ་འཛིན་ལ་འཇུག་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཐོག་མ་ཉིད་དུ་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དྲི་བ་བྱ་དགོས་ཏེ། དེའི་འོག་ཏུ་བཀོད་པ་
གཅིག་པའི་ཏིང་ངེ་འཛིན་ལ་འཇུག་པར་འགྱུར་རོ། །དེ་ཅིའི་ཕྱིར་ཞེ་ན། འཇམ་དཔལ་སྐྱེ་བ་མེད་པ་ནི་མི་འཁྲུགས་པ་སྟེ། དཀྲུག་ཏུ་མི་རུང་བ་དཀྲུག་པར་བྱ་བ་མ་ཡིན་པ། བསམ་གྱིས་མི་ཁྱབ་པ། བསམ་པར་མི་བྱ་བ། བསམ་
གྱིས་མི་ལང་བའོ། །འཇམ་དཔལ་བཀོད་པ་གཅིག་པའི་ཏིང་ངེ་འཛིན་ལ་འཇུག་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་དབེན་པའི་ལམ་བསྟན་པ་རྣམས་བསྟེན་པར་བྱ། འདུ་འཛི་མེད་པ་ལ་དགའ་བར་བྱས་ལ། 
མཚན་མ་ཐམས་ཅད་ཡིད་ལ་མི་བྱ་བར་དཀྱིལ་མོ་དཀྲུང་བཅས་ཏེ་འདུག་ནས་དེར་མི་དམིགས་པའི་ཚུལ་གྱིས་དེ་བཞིན་གཤེགས་པ་གཅིག་ཡིད་ལ་བྱའོ། །ཆོས་ཐམས་ཅད་ཀྱང་ཡིད་ལ་བྱའོ། །དེ་བཞིན་གཤེགས་པ་གང་ཡིད་ལ་བྱེད་
39-1-128a


པ་དེའི་མིང་ཡང་གཟུང་བར་བྱའོ། །མིང་དེ་ཡང་ཐོས་ཏེ་དམིགས་ནས་དེ་བཞིན་གཤེགས་པ་ཕྱོགས་ག་ལ་བཞུགས་པའི་ཕྱོགས་དེར་མངོན་དུ་བལྟས་ཏེ་འདུག་པར་བྱའོ། །ཡིད་ལ་བྱའོ། །དེ་བཞིན་གཤེགས་པ་དེ་ཉིད་ཡིད་ལ་བྱས་
ན་དེ་ཡིད་ལ་བྱས་པས་འདས་པ་དང་མ་འོངས་པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཡིད་ལ་བྱས་པར་འགྱུར་རོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཉིད་གཅིག་པའི་ཕྱིར་རོ། །འཇམ་དཔལ་ཇི་ལྟར་དེ་བཞིན་གཤེགས་
པ་གཅིག་གི་སངས་རྒྱས་ཀྱི་ཡོན་ཏན་ཚད་མེད་པ་དང་། སྤོབས་པ་ཚད་མེད་པ་དེ་བཞིན་དུ་འཇམ་དཔལ་བཀོད་པ་གཅིག་པའི་ཏིང་ངེ་འཛིན་ཐོབ་ནས་སྐྱེ་བ་མེད་པ་གཅིག་གི་ཆོས་ཀྱི་རྣམ་གྲངས་ཀྱི་བྱེ་བྲག་ཚད་མེད་པར་ཤེས་པར་བྱའོ། །
འདིར་གང་དག་ཆུད་པར་འགྱུར་བ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་གང་དག་གསུངས་པ་དང་། ཀུན་དགའ་བོས་ཇི་སྙེད་ཡོངས་སུ་བཟུང་བ་དེ་སྙེད་ཀྱི་ཆོས་ཀྱི་རྣམ་གྲངས་
འདིར་སྣང་བར་འགྱུར་རོ། །བཀོད་པ་གཅིག་པའི་ཏིང་ངེ་འཛིན་འདི་བསྒྲུབས་པས་དེའི་ཚེའི་ཚད་ཇི་ཙམ་པ་དེ་ཙམ་དུ་གནས་ཤིང་གླེང་གཞི་དང་བཅས་པའི་ཆོས་སྟོན་པར་འགྱུར་རོ། །འཇམ་དཔལ་དེ་ལ་བྱང་ཆུབ་སེམས་དཔའི་ཐེག་
པ་པ་ཁ་ཅིག་འདི་སྙམ་དུ་བཀོད་པ་གཅིག་པའི་ཏིང་ངེ་འཛིན་འདི་གང་ཡིན་སྙམ་དུ་སེམས་ན། དེ་དག་ལ་འདི་སྐད་ཅེས་ཡོན་ཏན་བསམ་གྱིས་མི་ཁྱབ་པ་ཡོངས་སུ་བསྒྲུབས་པ་འདི་ཡང་དག་པར་ཟུང་ལ་འདུག་ཤིག་དང་། ཇི་ལྟ་ཇི་ལྟར་
ཡང་དག་པར་བླངས་ཏེ་གནས་པ་དེ་ལྟ་དེ་ལྟར་ཏིང་ངེ་འཛིན་འདིའི་ཡོན་ཏན་མཐོང་བར་འགྱུར་གྱིས་ཇི་སྐད་བསྟན་པའི་ཚུལ་གྱིས་ཞུམ་པ་མེད་པར་གྱིས་ཤིག་ཅེས་བརྗོད་པར་བྱའོ། །ཏིང་ངེ་འཛིན་འདི་ནི་དམིགས་པའི་ལྟ་བ་ཅན་དག་དང་། 
དངོས་པོར་ལྟ་བ་ཅན་དག་ནས་ཡོད་པར་ལྟ་བ་ཅན་དག་གི་བར་གྱིས་བསྒྲུབ་པར་མི་ནུས་སོ། །འཇམ་དཔལ་འདི་ལྟ་སྟེ་དཔེར་ན་མི་ཞིག་ལ་རིན་ཐང་མེད་པའི་ནོར་བུ་རིན་པོ་ཆེ་བྱི་དོར་མ་བྱས་པ་ཞིག་བདོག་ལ་མི་གཞན་ཞིག་གིས་དེར་མི་དེ་ལ་
39-1-128b


འདི་སྐད་དུ་ཀྱེ་སྐྱེས་བུ་ནོར་བུ་རིན་པོ་ཆེ་འདིའི་རིན་ཐང་ཇི་ཙམ། ནོར་བུ་རིན་པོ་ཆེ་འདི་ལ་ཡོན་ཏན་ཅི་ཞིག་ཡོད་ཅེས་ཟེར་ལ། མི་དེས་ཀྱང་དེ་ལ་འདི་སྐད་དུ་ཀྱེ་སྐྱེས་བུ་རིན་པོ་ཆེ་འདིའི་ཡོན་ཏན་ཚད་མེད་ཀྱིས། ཚད་མེད་པ་ཉིད་དུ་ཤེས་
པར་གྱིས་ཤིག་ཅེས་སྨྲས་ཏེ། དེ་ནས་མི་དེས་ནོར་བུ་རིན་པོ་ཆེ་དེ་བྱི་དོར་བྱ་བའི་ཕྱིར་མི་དེ་ལ་བཞག་ནས་ཀྱེ་སྐྱེས་བུ་ནོར་བུ་རིན་པོ་ཆེ་འདི་རེ་ཤིག་བྱི་དོར་གྱིས་ཤིག་དང་། དེ་ནས་ཤེས་པར་འགྱུར་རོ་ཞེས་བྱས་ལ་དེ་ནས་མི་དེས་ནོར་བུ་རིན་པོ་ཆེ་དེ་མི་
དེ་ལས་བླངས་ཏེ། བྱི་དོར་བྱ་བའི་ཡོ་བྱད་རྣམས་ཀྱིས་བྱི་དོར་བྱས་པ་དང་། དེ་ལྟར་བྱི་དོར་བྱས་པས་ནོར་བུ་རིན་པོ་ཆེ་དེ་རིན་ཐང་མེད་དེ་དེས་ཇི་ལྟ་ཇི་ལྟར་ནོར་བུ་རིན་པོ་ཆེ་དེའི་བྱི་དོར་བྱས་པ་དེ་ལྟ་དེ་ལྟར་ནོར་བུ་རིན་པོ་ཆེ་དེའི་ཡོན་ཏན་མཐོང་བར་
འགྱུར་བ་དེ་བཞིན་དུ་འཇམ་དཔལ་གང་གི་ཚེ་རིགས་ཀྱི་བུ་འམ། རིགས་ཀྱི་བུ་མོ་དེ་ཏིང་ངེ་འཛིན་འདི་ལ་མཉམ་པར་འཇོག་པ་དང་། འཇུག་པ་དེ་དང་དེའི་ཚེ་ཏིང་ངེ་འཛིན་འདིའི་ཡོན་ཏན་མཐོང་བར་འགྱུར་རོ། །འཇམ་དཔལ་འདི་ལྟ་སྟེ་
དཔེར་ན་ཉི་མའི་དཀྱིལ་འཁོར་གྱི་འོད་ཟེར་དག་གིས་དཀྱིལ་འཁོར་གྱི་མཐའ་གང་ཡང་མ་ཁྱབ་པ་མེད་དོ། །འཇམ་དཔལ་དེ་བཞིན་དུ་བཀོད་པ་གཅིག་པའི་ཏིང་ངེ་འཛིན་འདི་ཐོབ་ཅིང་ཞུགས་ནས་རྙེད་པ་དེ་ཤེས་རབ་ཀྱི་ཕ་རོལ་དུ་ཕྱིན་པ་སྟོན་པ་
མ་ཡིན་པའི་ཆོས་གང་ཡང་མི་སྟོན་ཏོ། །གང་ལ་ལས་འདི་བཞིན་དུ་ཤེས་ན་དེས་སྐྱེ་བ་མེད་པ་དང་། འགལ་བའི་ཆོས་གང་ཡང་མི་མཐོང་ངོ་། །འཇམ་དཔལ་འདི་ལྟ་སྟེ་དཔེར་ན་རྒྱ་མཚོ་ཆེན་པོའི་ཕྱོགས་བཞི་ནས་སྐྱེས་བུ་བཞི་ཆུ་འཆུ་
ན་དེ་ཐམས་ཅད་འདི་ལྟ་སྟེ་ལན་ཚྭའི་རོར་རོ་གཅིག་པ་ཉིད་འཆུ་འདིང་ལེན་ཏོ། །འཇམ་དཔལ་དེ་བཞིན་དུ་ཆོས་གང་ཅི་བསྟན་པ་དེ་དག་ཐམས་ཅད་ནི་འདི་ལྟ་སྟེ་སྐྱེ་བ་མེད་པའི་རོ་དང་། དངོས་པོ་མེད་པའི་རོ་དང་། འདོད་ཆགས་དང་བྲལ་
བའི་རོ་དང་། རྣམ་པར་གྲོལ་བའི་རོ་དང་། འགོག་པའི་རོར་རོ་གཅིག་པའོ། །འཇམ་དཔལ་དེ་ལྟ་བས་ན་རིགས་ཀྱི་བུ་འམ། རིགས་ཀྱི་བུ་མོ་ཏིང་ངེ་འཛིན་འདི་དང་ལྡན་པ་དེ་ཆོས་གང་དང་གང་སྟོན་ཀྱང་དེ་དག་ཐམས་ཅད་འདི་ལྟ་སྟེ། སྐྱེ་
39-1-129a


བ་མེད་པའི་རོ་དང་། དངོས་པོ་མེད་པའི་རོ་དང་། འདོད་ཆགས་དང་བྲལ་བའི་རོ་དང་། རྣམ་པར་གྲོལ་བའི་རོ་དང་། འགོག་པའི་རོར་རོ་གཅིག་པར་སྟོན་པར་འགྱུར་རོ། །ཏིང་ངེ་འཛིན་འདི་ཐོབ་ནས་རིགས་ཀྱི་བུ་འམ། རིགས་ཀྱི་བུ་མོ་དེ་འདོད་ན་ངས་
ཆོས་གང་ཅི་བསྟན་པ་དེ་འཆད་པ་དང་། རྣམ་པར་སྟོན་པ་དང་། ཉེ་བར་སྟོན་པར་འགྱུར་རོ། །འཇམ་དཔལ་དེ་ལྟར་ན་རིགས་ཀྱི་བུ་འམ། རིགས་ཀྱི་བུ་མོ་དེ་ཏིང་ངེ་འཛིན་འདི་ཐོབ་ནས་གང་ཅི་སྟོན་ཀྱང་དེ་དག་ཐམས་ཅད་མི་དམིགས་པའི་ཚུལ་དུ་མ་
སྐྱེས་པ་དང་། མ་བྱུང་བ་དང་། དངོས་པོ་མེད་པར་སྟོན་པར་འགྱུར་རོ། །འཇམ་དཔལ་གཞན་ཡང་ཏིང་ངེ་འཛིན་འདི་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་ནས་མྱུར་བ་ཉིད་
དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །འཇམ་དཔལ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་གང་གི་ཚེ་བདག་གི་དབྱིངས་ནས་ཆོས་ཀྱི་དབྱིངས་ཀྱི་བར་དུ་སྐྱེ་
བ་དང་། འགག་པ་དང་། གཅིག་ཁོ་ན་དང་། ཐ་དད་པ་ཁོ་ནར་ཡང་མི་མཐོང་ན་འཇམ་དཔལ་དེ་ལྟ་བུའི་བཟོད་པ་ཅན་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་འཚང་རྒྱའོ། །རིགས་ཀྱི་བུ་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་མི་སེམས་པ་དང་། རྣམ་པར་མི་རྟོག་པ་དེའི་བཟོད་པ་འདི་ཡང་བྱང་ཆུབ་སེམས་དཔའི་ཆོས་རྣམས་དང་། སངས་རྒྱས་ཀྱི་ཆོས་རྣམས་ཐོབ་པར་འགྱུར་བའོ། །གང་
ཡང་སངས་རྒྱས་ཉིད་ཀྱི་ཕྱིར་བྱང་ཆུབ་ཏུ་མི་སྨོན་པ་དེ་ལྟ་བུའི་བཟོད་པ་འདི་ཡང་རིགས་ཀྱི་བུ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མྱུར་བར་འགྱུར་བར་ངས་བཤད་དོ། །ཆོས་ཐམས་ཅད་ནི་སངས་རྒྱས་ཀྱི་ཆོས་སོ་ཞེས་སུ་དེ་ལྟར་མོས་
ཤིང་ཞུམ་པར་མི་འགྱུར་བ། དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ངས་བཤད་དེ། དེ་ནི་སངས་རྒྱས་ཀྱི་ཆོས་ཐམས་ཅད་དང་མ་བྲལ་བར་བརྗོད་པར་བྱའོ། །རིགས་ཀྱི་བུ་འམ་རིགས་ཀྱི་བུ་མོ་གང་གིས་བསྟན་པ་འདི་
39-1-129b


ཐོས་ནས་རྨོངས་པར་མི་འགྱུར་བ་དང་། སོམ་ཉི་ཟ་བར་མི་འགྱུར་བ་དེ་ཡང་སངས་རྒྱས་ཀྱི་ཆོས་ཐམས་ཅད་དང་མི་འབྲལ་བར་བརྗོད་པར་བྱའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་
ཅེས་གསོལ་ཏོ། །བཅོམ་ལྡན་འདས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྒྱུ་ལས་ངེས་པར་བྱུང་བ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་ནི་མ་ཡིན་ཏེ། བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ནི་རྒྱུ་མ་ཡིན་ཞིང་རྒྱུ་ལས་ངེས་པར་བྱུང་བ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། སྐྱེ་བ་མེད་པ་དང་། དངོས་པོ་མེད་པ་ནི་རྒྱུ་ཡང་མ་ཡིན་ལ། རྒྱུ་ལས་ངེས་པར་བྱུང་བ་ཡང་མ་ཡིན་པའི་ཕྱིར་རོ། །དེ་ཅིའི་ཕྱིར་ཞེ་ན། ཆོས་ཐམས་ཅད་མ་སྐྱེས་པའི་
ཕྱིར་རོ། །འཇམ་དཔལ་དེ་ལྟ་བས་ན་རིགས་ཀྱི་བུ་འམ་རིགས་ཀྱི་བུ་མོ་གང་གིས་བསྟན་པ་འདི་ཐོས་ནས་ནུར་བར་མི་འགྱུར་བ་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ངས་བཤད་དོ། །འཇམ་དཔལ་དེ་ལྟ་བས་ན་དགེ་
སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་གང་དག་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་འདི་ལ་ཞུམ་པར་མི་འགྱུར་བ་ནས་ནུར་བའི་བར་དུ་མི་འགྱུར་བ་དེ་དག་ནི་ང་ལ་སྐྱབས་སུ་དོང་བའོ། །དེ་དག་ངའི་རྗེས་སུ་རབ་ཏུ་བྱུང་བའོ། །
དེ་དག་གི་སྟོན་པ་ནི་ང་ཡིན་ནོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་འདི་ལ་མི་སློབ་པ་དེ་བྱང་ཆུབ་སེམས་དཔའི་བསླབ་པ་ལ་མི་སློབ་པའོ། །འཇམ་དཔལ་འདི་ལྟ་སྟེ་དཔེར་ན་འབྱུང་
བའི་ཚོགས་དང་། ས་བོན་གྱི་ཚོགས་དང་། རྩྭ་དང་། ཤིང་གེལ་པ་དང་། སྨན་དང་། ནགས་ཚལ་གང་ཅི་ཡོད་པ་དེ་དག་ཐམས་ཅད་ནི་ས་ཆེན་པོ་ལ་བརྟེན་ནས་སྐྱེའོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་
རྣམས་ཀྱི་དགེ་བའི་ཆོས་གང་ཅི་ཡང་རུང་བ་དེ་དག་ཐམས་ཅད་ཤེས་རབ་ཀྱི་ཕ་རོལ་དུ་ཕྱིན་པས་ཡོངས་སུ་ཟིན་ན་འཕེལ་ཞིང་རྒྱས་པ་དང་ཡངས་པར་འགྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སླུ་བར་མི་བྱེད་དོ། །
39-1-130a


དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཀྱི་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་བཤད་པ་གང་ལགས་པའི་ཤེས་
རབ་ཀྱི་ཕ་རོལ་དུ་ཕྱིན་པ་བསྟན་པ་འདི་འཛམ་བུའི་གླིང་འདིར་གྲོང་ངམ། གྲོང་ཁྱེར་རམ། ཡུལ་ལམ། ལྗོངས་དག་ཏུ་གང་ལ་ལ་དག་འཛིན་པར་འགྱུར་བ་ནས་སྟོན་པའི་བར་དུ་འགྱུར་བ་མཆིས་སམ་དེ་སྐད་ཅེས་གསོལ་པ་དང་། བཅོམ་ལྡན་
འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་གང་དག་གིས་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་ད་ལྟར་གྱི་ཚེ་ལ་ཐོས་ནས། བདག་ཚེ་འདི་རྗེས་ནས་ཀྱང་ཤེས་རབ་ཀྱི་ཕ་རོལ་དུ་ཕྱིན་
པ་བསྟན་པ་འདི་མཉན་ཏོ་ཞེས་སྨོན་ལམ་བཏབ་པ་དེ་དག་ནི་མཉན་པ་ནས་རྒྱ་ཆེར་མི་བསྒོམ་པའི་ཚུལ་གྱིས་སྒོམ་པར་བྱེད་པའི་བར་དུ་འགྱུར་རོ། །འཇམ་དཔལ་གང་དག་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་འདི་ཐོས་ཏེ་ཐོས་ནས་
ཀྱང་དགའ་བ་དང་། མགུ་བ་ཡངས་པ་འཐོབ་པ་དེ་དག་ནི་དགེ་བའི་རྩ་བ་ཆུང་བར་ང་མི་འཆད་དོ། །འཇམ་དཔལ་གང་ཞིག་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་ལ་ཉན་འདོད་པར་གྱུར་ན་དེ་ལ་འདི་སྐད་ཅེས་རིགས་ཀྱི་བུ་
ཁྱོད་དེ་མཉན་པས་ཅི་ཞིག་བྱ། ཐོས་ནས་མ་དད་ཅིང་ཕྱིར་ནུར་ཏ་རེ། དེ་ཅིའི་ཕྱིར་ཞེ་ན། འདི་ལ་ཆོས་གང་ཡང་ཡོངས་སུ་འགྲུབ་པར་མ་བསྟན་ཏེ། སོ་སོའི་སྐྱེ་བོའི་ཆོས་རྣམས་སྐྱེ་བ་འམ། འཇིག་པར་ཡང་མ་བསྟན། སློབ་
པའི་ཆོས་རྣམས་དང་། མི་སློབ་པའི་ཆོས་རྣམས་དང་། རང་སངས་རྒྱས་ཀྱི་ཆོས་རྣམས་དང་། སངས་རྒྱས་ཀྱི་ཆོས་རྣམས་ཀྱང་སྐྱེ་བ་འམ། འཇིག་པ་འམ། འཐོབ་པར་མ་བསྟན་པའི་ཕྱིར་རོ་ཞེས་བརྗོད་པར་བྱའོ། །དེ་སྐད་ཅེས་བཀའ་སྩལ་
པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་གང་ལ་ལ་བདག་ལ་འདི་སྐད་དུ་དེང་དེ་བཞིན་
39-1-130b


གཤེགས་པའི་ཆོས་ཀྱི་གཏམ་མཛད་པ་དེ་གང་ཡིན་ཞེས་མཆི་ན། བཅོམ་ལྡན་འདས་དེ་སྐད་འདྲི་བ་དེ་ལ་བདག་གིས་འདི་སྐད་དུ་ཐམས་ཅད་དང་མི་འགལ་བའི་གཏམ་མོ་ཞེས་བརྗོད་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་
གང་སྐྱེ་བ་མ་མཆིས་པ་དང་། འགག་པ་མ་མཆིས་པའི་ཆོས་དེ་གང་ཡང་མ་མཆིས་ཏེ། བཀའ་མཆིད་དེ་ནི་སེམས་ཅན་གང་གིས་ཀྱང་འཚལ་བར་སླ་བ་མ་ལགས་སོ། །དེ་ཅིའི་སླད་དུ་ཞེ་ན། འདི་ལྟར་སེམས་ཅན་གང་ཡང་དམིགས་
སུ་མ་མཆིས་པའི་སླད་དུའོ། །བཅོམ་ལྡན་འདས་གཞན་ཡང་བདག་གིས་དེ་ལ་འདི་སྐད་དུ་མི་སྐྱེ་བ་ཞེས་བྱ་བའི་ཆོས་དེ་བསྟན་པར་གྱུར་ཏོ་ཞེས་བརྗོད་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་ཆོས་ཐམས་
ཅད་ནི་སྐྱེ་བ་མ་མཆིས་པར་མཉམ་པའི་སླད་དུའོ། །བཀའ་འཆིང་དེར་ནི་ཇི་ལྟར་དགྲ་བཅོམ་པའི་ཆོས་རྣམས་ཀྱིས་སོ་སོའི་སྐྱེ་བོའི་ཆོས་དེ་དག་རྣམ་པར་བཤིག་པ་མ་ལགས་པ། དགྲ་བཅོམ་པ་རྣམས་ཀྱི་གོང་མ་རྟོགས་པ་མ་བསྟན་ཏོ། །
བཅོམ་ལྡན་འདས་གཞན་ཡང་དེ་ལ་བདག་གིས་འདི་སྐད་དུ་ཆོས་བསྟན་པ་འདི་ལ་སེམས་ཅན་གང་ཡང་མྱ་ངན་ལས་འདས་པ་དང་། མྱ་ངན་ལས་འདའ་བ་དང་། མྱ་ངན་ལས་འདའ་བར་འགྱུར་བ་མེད་དོ་ཞེས་བརྗོད་པར་བགྱིའོ། །
དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་སེམས་ཅན་ཤིན་དུ་མི་དམིགས་པའི་སླད་དུ་སྟེ། བཅོམ་ལྡན་འདས་དེ་སྐད་འདྲི་ན་བདག་གིས་དེ་སྐད་ཅེས་བགྱིའོ། །བཅོམ་ལྡན་འདས་གཞན་ཡང་བདག་ལས་ཤེས་རབ་ཀྱི་ཕ་
རོལ་དུ་ཕྱིན་པ་ཟབ་མོ་འདི་ཉན་པར་འཚལ་ཏེ། དེང་ཁྱོད་བཅོམ་ལྡན་འདས་དང་གཏམ་ཅི་ཞིག་བྱས་ཤེས་འདྲི་ན། དེ་ལ་བདག་གིས་འདི་སྐད་དུ། གལ་ཏེ་ཁྱེད་ཉན་པར་འདོད་ན་དེ་མཉན་ཏོ་སྙམ་དུ་ཡིད་མ་གཏོད་ཅིག །མཉན་ཏོ་
སྙམ་དུ་སེམས་མ་བསྐྱེད་ཅིག །ཀྱེ་སྐྱེས་བུ་སྒྱུ་མའི་སྐྱེས་བུའི་ཤེས་རབ་ཅི་འདྲ་བ་དེ་ལྟ་བུའི་ཤེས་རབ་བསྐྱེད་ཅིག་དང་། དེ་ལྟ་བུས་ཆོས་བསྟན་པ་འདི་ཤེས་པར་ནུས་སོ། །ཀྱེ་སྐྱེས་བུ་གལ་ཏེ་ཁྱོད་ཀྱིས་ཆོས་བསྟན་པ་འདི་
39-1-131a


མཉན་པར་འདོད་ན། དེའི་ཕྱིར་འདི་ལྟར་འདི་ལྟ་སྟེ་དཔེར་ན་ནམ་མཁའ་ལ་བྱའི་རྗེས་ལྟ་བུར་གནས་པར་གྱིས་ཤིག་དང་། དེ་ལྟ་བུས་ཆོས་བསྟན་པ་འདི་མཉན་པར་ནུས་སོ། །ཀྱེ་སྐྱེས་བུ་གལ་ཏེ་ཁྱོད་ཀྱིས་ཆོས་བསྟན་པ་
འདི་མཉན་པར་འདོད་ན་དེའི་ཕྱིར་གཉིས་ལ་མ་དམིགས་ཤིག །མི་གཉིས་པ་ལ་ཡང་མ་དམིགས་ཤིག །དེ་ཅིའི་ཕྱིར་ཞེ་ན། འདི་ལ་གཉིས་སུ་བརྗོད་པར་བྱ་བ་ཡོངས་སུ་བརྗོད་པ་འམ། མི་གཉིས་པར་བརྗོད་པར་བྱ་བ་གང་ཡང་མེད་པའི་
ཕྱིར་རོ། །གལ་ཏེ་ཆོས་བསྟན་པ་འདི་མཉན་པར་འདོད་ན་བདག་ཏུ་འདུ་ཤེས་རྣམས་ཀྱང་མ་གཞིག་ཤིག །ལྟ་བར་གྱུར་པ་རྣམས་ལས་ཀྱང་མ་འདའ་ཤིག །སངས་རྒྱས་ཀྱི་ཆོས་རྣམས་ལ་ཡང་ལྷག་པར་མ་དམིགས་ཤིག །སོ་སོའི་སྐྱེ་བོའི་
ཆོས་རྣམས་ལས་ཀྱང་མ་བསྐྱོད་ཅིག་ཅེས་བརྗོད་པར་བགྱིའོ། །བཅོམ་ལྡན་འདས་གང་ཞིག་བདག་ལས་ཉན་པར་འཚལ་ཏེ་འདྲི་ན་དེ་ལ་བདག་གིས་དེ་སྐད་བརྗོད་པར་བྱའོ། །དེ་སྐད་རྗེས་སུ་བསྟན་པར་བགྱིའོ། །དེ་ལྟར་འདི་ལ་གཞག་པར་
བགྱིའོ། །གལ་ཏེ་འདྲི་བའི་རིགས་ཀྱི་བུའམ། རིགས་ཀྱི་བུ་མོ་དེ་ལྟར་གནས་ཤིང་དེ་ལྟར་བཞུགས་ན་སྤོབས་པའི་ཕྱག་རྒྱ་འདི་ལ་གནས་པ་དེ་ལ་སླད་ཀྱིས་ཤེས་རབ་ཀྱི་ཕ་རོལ་དུ་ཕྱིན་པ་མ་སྐྱེས་པ་དང་། དངོས་པོ་མ་མཆིས་པ་དང་། 
མ་བྱུང་བའི་བར་འདི་བསྟན་པར་བགྱིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ལེགས་སོ་ལེགས་སོ། །འཇམ་དཔལ་ཁྱོད་ཀྱིས་
ཚིག་འདི་ལེགས་པར་སྨྲས་པ་ལེགས་སོ། །རིགས་གྱི་བུའམ། རིགས་ཀྱི་བུ་མོ་དེ་ལ་ཡང་ཕྱིས་འདི་སྐད་གྱིས་ཤིག །དེ་བཞིན་གཤེགས་པ་ལ་བལྟ་བར་འདོད་ན་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་ལ་མི་བསྒོམ་པའི་ཚུལ་གྱིས་བསྒོམ་
པར་བྱའོ། །དེ་བཞིན་གཤེགས་པ་ལ་བསྙེན་བཀུར་བྱ་བར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་ལ་མི་དམིགས་པའི་ཚུལ་གྱིས་བསླབ་པར་བྱའོ། །དེ་བཞིན་གཤེགས་པ་ནི་བདག་
39-1-131b


གི་སྟོན་པའོ་ཞེས་སྨྲ་བར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་ལ་མི་དམིགས་པའི་ཚུལ་གྱིས་བསླབ་པར་བྱའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་
བར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་ལ་མངོན་པར་འདུ་བྱ་བ་མེད་པའི་ཚུལ་གྱིས་བསླབ་པར་བྱའོ། །ཏིང་ངེ་འཛིན་ཐམས་ཅད་ལ་མཁས་པར་བསྒྲུབ་པར་འདོད་པའི་རིགས་ཀྱི་བུ་འམ། 
རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་ལ་མི་དམིགས་པའི་ཚུལ་གྱིས་བསླབ་པར་བྱའོ། །ཏིང་ངེ་འཛིན་ཐམས་ཅད་ལ་སྙོམས་པར་འཇུག་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་
ཕྱིན་པ་འདི་ཉིད་ལ་མི་དམིགས་པའི་ཚུལ་གྱིས་བསླབ་པར་བྱའོ། །དེ་ཅིའི་ཕྱིར་ཞེ་ན། ཏིང་ངེ་འཛིན་དེ་དག་བྱས་པ་མ་ཡིན་པའི་ཕྱིར་རོ། །རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་བསྒྲུབ་
པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་ལ་དངོས་པོ་མེད་པའི་ཚུལ་གྱིས་བསླབ་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་རྣམ་པ་ཐམས་ཅད་ཀྱི་མཆོག་དང་ལྡན་པའི་
ཐམས་ཅད་མཁྱེན་པའི་ཡེ་ཤེས་ཀྱི་བར་དུ་བྱས་པ་མ་ཡིན་པ་དང་། མ་སྐྱེས་པ་དང་། དངོས་པོ་མེད་པའི་ཕྱིར་རོ། །ཆོས་ཐམས་ཅད་ནི་ངེས་པར་འབྱུང་བ་དང་བཅས་པ་སྟེ། གང་ངེས་པར་མི་འབྱུང་བའི་ཆོས་དེ་གང་ཡང་མེད་དོ་ཞེས་དེ་ལྟར་
ཤེས་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་ལ་དངོས་པོ་མེད་པའི་བར་གྱི་ཚུལ་གྱིས་བསླབ་པར་བྱའོ། །ཆོས་ཐམས་ཅད་ནི་ངེས་པར་མི་འབྱུང་བ་སྟེ། གང་ངེས་པར་
འབྱུང་བ་དང་བཅས་པའི་ཆོས་དེ་གང་ཡང་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་མ་སྐྱེས་པའི་ཕྱིར་རོ། །ཆོས་དེ་དག་ནི་ཇི་ལྟར་བརྗོད་པ་དེ་ལྟར་ཡོད་པ་མ་ཡིན་ཏེ། བརྗོད་དུ་མེད་པ་ནི་ཡོད་པ་མ་ཡིན་ཞིང་དམིགས་སུ་མེད་
39-1-132a


དོ་ཞེས་དེ་ལྟར་ཤེས་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་ལ་དངོས་པོ་མེད་པའི་བར་གྱི་ཚུལ་གྱིས་བསླབ་པར་བྱའོ། །སེམས་ཅན་ཐམས་ཅད་ནི་བྱང་ཆུབ་ཀྱི་ཕྱིར་
སྤྱོད་པ་སྟེ། གང་བྱང་ཆུབ་ཀྱི་ཕྱིར་མི་སྤྱོད་པའི་སེམས་ཅན་དེ་གང་ཡང་མེད་དོ་ཞེ་ན། ཡང་དེ་ལ་ཞུམ་པ་མེད་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་ལ་དངོས་པོ་མེད་པའི་བར་གྱི་ཚུལ་
གྱིས་བསླབ་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་ཆོས་ཐམས་ཅད་ནི་བྱང་ཆུབ་དང་མཉམ་པའོ། །ཇི་ལྟར་ཆོས་ཐམས་ཅད་བྱང་ཆུབ་དང་མཉམ་པ་དང་། བྱང་ཆུབ་ཇི་ལྟ་བར་སེམས་ཅན་ཐམས་ཅད་ཀྱང་དེ་བཞིན་ནོ། །སེམས་ཅན་ཐམས་
ཅད་ཅི་འདྲ་བར་མེད་པ་དེ་ཡང་དེ་བཞིན་ནོ། །མེད་པའི་ཕྱིར་སྤྱོད་པ་ཐམས་ཅད་ནི་སྤྱོད་པ་མེད་པའོ། །དེ་ཡང་བྱང་ཆུབ་སྟེ་བྱང་ཆུབ་གང་ཡིན་པ་སྐྱེ་བ་མེད་པའང་དེ་ཡིན། འབྱུང་བ་མེད་པ་ཡང་དེ་ཡིན་ཏེ། དེ་ལྟ་བུའི་ཆོས་འདི་ལ་ཞུམ་པ་
མེད་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་ལ་དངོས་པོ་མེད་པ་དང་། སྐྱེ་བ་མེད་པའི་བར་གྱི་ཚུལ་གྱིས་བསླབ་པར་བྱའོ་ཞེས་གྱིས་ཤིག །འཇམ་དཔལ་གང་དེ་བཞིན་གཤེགས་
པའི་རྣམ་པར་འཕྲུལ་པ་ནས་དེ་བཞིན་གཤེགས་པའི་རྣམ་པར་རོལ་པའི་བར་དེ་དག་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་ལས་བསྟན་ཏོ། །དེ་ཅིའི་ཕྱིར་ཞེ་ན། དེ་ནི་བསྟན་དུ་མེད་པ་སྟེ། ཤེས་རབ་ཀྱི་ཕ་རོལ་དུ་ཕྱིན་པ་ནི་མི་སྟོན་པའི་ཕྱིར་
རོ། །འཇམ་དཔལ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་དག་ཤེས་རབ་ཀྱི་ཕ་རོལ་དུ་ཕྱིན་པ་འདི་ལས་ཚིག་བཞི་པའི་ཚིགས་སུ་བཅད་པ་ཙམ་ཡང་འཛིན་པ་དང་། ཀུན་ཆུབ་པར་བྱེད་པ་དང་། འཆང་
བ་དང་། ཀློག་པ་ནས་ཡང་དག་པར་སྟོན་པའི་བར་དུ་བྱེད་པ་དེ་དག་ཀྱང་ཕྱིར་མི་ལྡོག་པར་ང་འཆད་ན། གང་དག་དེ་བཞིན་ཉིད་དུ་སྒྲུབ་པ་ལྟ་ཅི་སྨོས་ཏེ། རིགས་ཀྱི་བུའམ། རིགས་ཀྱི་བུ་མོ་དེ་དག་ནི་བྱང་ཆུབ་ཏུ་ངེས་པར་རིག་པར་བྱའོ། །གང་
39-1-132b


དག་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་མ་སྐྱེས་པ་དང་། དངོས་པོ་མེད་པ་དང་། འབྱུང་བ་མེད་པའི་བར་འདི་ཐོས་ནས། མི་སྐྲག་མི་དངང་དངང་བར་མི་འགྱུར་བ་དག་ནི་སངས་རྒྱས་ཀྱི་ཡུལ་ལ་གནས་པའོ། །གོང་དུ་ཡང་མོས་པར་བྱེད་ན། དེ་
དག་ནི་སངས་རྒྱས་ཀྱི་ཆོས་ཐམས་ཅད་ལ་ངེས་པར་འགྱུར་རོ། །འཇམ་དཔལ་ངས་སངས་རྒྱས་ཀྱི་གནང་བ་དེ་བཞིན་གཤེགས་པས་རྣམ་པར་མཁྱེན་པ། དགྲ་བཅོམ་པ་ཐམས་ཅད་ཀྱིས་ཡང་དག་པར་མནོས་པའི་རྒྱ་འདི་གཞག་པར་བྱ་
སྟེ། རྒྱ་འདི་ནི་མཉམ་པ་ཉིད་དུ་རྟོགས་པ་རྣམས་ལ་གཞག་གོ། །འདི་ནི་སངས་རྒྱས་ཀྱི་ཆོས་ཐམས་ཅད་ཀྱི་བར་དུ་ཡང་ཆགས་པ་མེད་པ་ཡོངས་སུ་སྟོན་པའོ། །འཇམ་དཔལ་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་འམ། 
རིགས་ཀྱི་བུ་མོ་རྒྱ་འདིས་བཏབ་པ་ནི་ངན་སོང་དུ་འགྲོ་བའི་སྐལ་བ་ཅན་མ་ཡིན་ནོ། །ཉན་ཐོས་དང་། རང་སངས་རྒྱས་ཀྱི་སར་འགྲོ་བ་དང་། འཇུག་པའི་སྐལ་བ་ཅན་མ་ཡིན་ནོ། །དེ་ནས་དེའི་ཚེ་ལྷའི་དབང་པོ་བརྒྱ་བྱིན་དང་། སུམ་བཅུ་རྩ་གསུམ་
པའི་ལྷའི་བུ་རྣམས་ཀྱིས་ལྷའི་ཙན་དན་གྱི་ཕྱེ་མ་དང་། ལྷའི་གསེར་གྱི་ཕྱེ་མ་དང་། ལྷའི་མེ་ཏོག་མན་དཱ་ར་བ་དང་། མན་དཱར་བ་ཆེན་པོ་དང་། ལྷའི་སྤོས་དང་། ལྷའི་ཨུཏ་པ་ལ་དང་། ཀུ་མུ་ད་དང་། པད་མ་དཀར་པོ་དང་། ལྷའི་
རོལ་མོའི་སྒྲ་དག་གིས་ཤེས་རབ་ཀྱི་ཕ་རོལ་དུ་ཕྱིན་པ་འདི་ལ་ཡང་མཆོད་ཅིང་བཅོམ་ལྡན་འདས་དང་འཇམ་དཔལ་གཞོན་ནུར་གྱུར་པ་ལ་ཡང་གཏོར། མངོན་པར་གཏོར་ནས་འདི་སྐད་ཅེས་དགེ་བའི་རྩ་བ་འདིས་གང་དག་ཕྱག་རྒྱ་འདིས་
བཏབ་པ་དེ་དག་གིས་བླ་ན་མེད་པའི་ཆོས་རིན་པོ་ཆེ་འདི་མཆོད་པ་དང་། ཕྱི་ཕྱིར་ཞིང་ཐོས་པར་གྱུར་ཅིག་ཅེས་སྨྲས་སོ། །ལྷའི་དབང་པོ་བརྒྱ་བྱིན་གྱིས་ཀྱང་ཚིག་འདི་སྐད་ཅེས་སྨྲས་སོ། །བཅོམ་ལྡན་འདས་བདག་གིས་ཀྱང་མ་
བྱུང་བ་དང་། མ་སྐྱེས་པའི་བར་གྱི་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་འདི་འཛམ་བུའི་གླིང་འདིར་སྤྱོད་པར་འགྱུར་བ་དང་། རིགས་ཀྱི་བུ་འམ། རིགས་ཀྱི་བུ་མོ་དེ་འདྲ་བ་དེ་དག་གི་རྣ་ལམ་དུ་གྲག་པར་འགྱུར་བ་ནས་དེ་དག་ཉིད་སངས་
39-1-133a


རྒྱས་ཀྱི་ཆོས་ཐམས་ཅད་ཡོངས་སུ་བསྒྲུབ་པར་འགྱུར་བར་བགྱི་བའི་བར་གྱི་སླད་དུ་བརྩོན་པར་བགྱིའོ། །བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་རིགས་ཀྱི་བུ་འམ། རིགས་ཀྱི་བུ་མོ་དག་གི་རྣ་ལམ་
དུ་ཚེགས་ཆུང་ངུས་གྲག་ལ། ཐོས་ནས་ཀྱང་མོས་པ་དང་། མོས་ནས་ཀྱང་འཛིན་པ་དང་། ཀུན་ཆུབ་པར་བགྱིད་པ་དང་། འཆང་བའི་བར་དུ་བགྱིད་པའི་རིགས་ཀྱི་བུ་འམ། རིགས་ཀྱི་བུ་མོ་དེ་དག་གིས་བདག་ཅག་གི་འདི་ནི་ལྷས་
བསྒྲུབས་པའོ་ཞེས་ཐེ་ཚོམ་མ་མཆིས་པར་འཚལ་བར་བགྱིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀོའུ་ཤི་ཀ་དེ་དེ་བཞིན་ནོ། །རིགས་ཀྱི་བུ་འམ་
རིགས་ཀྱི་བུ་མོ་དེ་དག་ལ་སངས་རྒྱས་ཀྱི་ཆོས་ཐམས་ཅད་འགྲུབ་པར་བལྟའོ། །དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་ངེས་པར་ཤེས་པར་བྱའོ། །དེ་ནས་བཅོམ་ལྡན་འདས་ལ། འཇམ་དཔལ་གཞོན་
ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་དེ་དག་གི་དོན་དུ་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་བྱིན་གྱིས་བརླབ་ཏུ་གསོལ། བདེ་བར་གཤེགས་པ་བྱིན་གྱིས་
བརླབ་ཏུ་གསོལ། ཚིག་འདི་སྨྲས་མ་ཐག་ཏུ་དེའི་ཚེ་སྐད་ཅིག་དེ་ཉིད་ལ་སངས་རྒྱས་ཀྱི་མཐུས་ས་ཆེན་པོ་རྣམ་པ་དྲུག་ཏུ་གཡོས་པར་གྱུར་ཏོ། །ས་ཆེན་པོ་གཡོས་མ་ཐག་ཏུ་དེ་ནས་དེའི་ཚེ་བཅོམ་ལྡན་འདས་ཀྱིས་འཛུམ་པ་
མཛད་དོ། །བཅོམ་ལྡན་འདས་ཀྱིས་འཛུམ་པ་མཛད་མ་ཐག་ཏུ་དེ་ནས་དེའི་ཚེ་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་ལ་དེ་བཞིན་གཤེགས་པས་བྱིན་གྱིས་རློབ་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
ཁམས་འདི་སྣང་བ་ཆེན་པོས་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ནི་དེ་བཞིན་གཤེགས་པས་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་
39-1-133b


འདི་བྱིན་གྱིས་བརླབས་པའི་སྔ་ལྟས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་དེ་བཞིན་ནོ། །འཇམ་དཔལ་འདི་དག་ནི་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་བྱིན་གྱིས་བརླབས་པའི་
སྔ་ལྟས་རྣམས་ཏེ། ལྟས་འདི་དག་གིས་ཤེས་རབ་ཀྱི་ཕ་རོལ་དུ་ཕྱིན་པ་བསྟན་པ་འདི་བྱིན་གྱིས་བརླབས་པར་ཤེས་པར་བྱའོ། །འཇམ་དཔལ་གང་དག་ཆོས་གང་ཡང་མི་སྤྱོད་ཞིང་མི་ཟློག་ལ་བསྔགས་པར་ཡང་མི་
བྱེད་པ་དེ་དང་དེ་དག་ནི་ཕྱག་རྒྱ་འདིས་བཏབ་པར་ཤེས་པར་བྱའོ། །དེ་ཅིའི་ཕྱིར་ཞེ་ན། འཇམ་དཔལ་དམིགས་པ་ཡོད་ན་སྤོང་བར་བྱེད་པ་དང་། བསྔགས་པར་བྱེད་པར་འགྱུར་བའི་ཕྱིར་རོ། །འཇམ་དཔལ་དེ་ལྟ་བས་ན་གང་
དག་རྒྱ་འདིས་བཏབ་པ་དེ་དག་གི་ཆེད་དུ་ངས་རྒྱ་འདི་བཞག་སྟེ། འདི་ལྟར་དེ་དག་གིས་ཐོས་ནས་ཀྱང་ཆོས་གང་ལ་ཡང་སྟོན་པ་འམ་རྣམ་པར་རྟོགས་པ་མེད་དོ། །དེ་ཅིའི་ཕྱིར་ཞེ་ན། འཇམ་དཔལ་ཆོས་ཐམས་ཅད་དོན་དམ་པར་མ་སྐྱེས་
པའི་ཕྱིར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། ཉན་ཐོས་ཆེན་པོ་དེ་དག་དང་། ལྷ་དང་། མི་དང་། ལྷ་
མ་ཡིན་དང་། དྲི་ཟར་བཅས་པའི་འཇིག་རྟེན་ཡིད་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཤེས་རབ་ཀྱི་ཕ་རོལ་དུ་ཕྱིན་པ་བདུན་བརྒྱ་པ་རྫོགས་སྷོ།། །། 
སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།།    །། རྒྱ་གར་སྐད་དུ། ཨཱརྱ་པཉྩ་ཤ་ཏཱི་ཀ་པྲཛྙཱ་པཱ་ར་མི་ཏཱ།  བོད་སྐད་དུ།  འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལྔ་བརྒྱ་པ།  སངས་རྒྱས་དང་བྱང་
ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན། བྱ་རྒོད་ཀྱི་ཕུང་པོའི་རི་ལ་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་
39-1-134a


དཔའི་ཚོགས་ཆེན་པོ་དང་ཐབས་གཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་བཀའ་སྩལ་པ། རབ་འབྱོར་གཟུགས་ནི་དངོས་པོ་མེད་པ། དངོས་པོ་ངན་པ། དངོས་པོ་
ཡོད་པའོ། །རབ་འབྱོར་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་དངོས་པོ་མེད་པ། དངོས་པོ་ངན་པ། དངོས་པོ་ཡོད་པའོ། །རབ་འབྱོར་མིག་དང་། གཟུགས་རྣམས་དང་། མིག་
གི་རྣམ་པར་ཤེས་པ་དང་། རྣ་བ་དང་། སྒྲ་རྣམས་དང་། རྣ་བའི་རྣམ་པར་ཤེས་པ་དང་། སྣ་དང་། དྲི་རྣམས་དང་། སྣའི་རྣམ་པར་ཤེས་པ་དང་། ལྕེ་དང་། རོ་རྣམས་དང་། ལྕེའི་རྣམ་པར་ཤེས་པ་དང་། ལུས་དང་། རེག་བྱ་རྣམས་
དང་། ལུས་ཀྱི་རྣམ་པར་ཤེས་པ་དང་། ཡིད་དང་། ཆོས་རྣམས་དང་། ཡིད་ཀྱི་རྣམ་པར་ཤེས་པ་ནི་དངོས་པོ་མེད་པ། དངོས་པོ་ངན་པ། དངོས་པོ་ཡོད་པའོ། །དེ་ལྟར་གཟུགས་དེ་ལེའུ་གསུམ་དུ་བྱིས་པ་སོ་
སོའི་སྐྱེ་བོ་རྣམས་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་མི་ཤེས་པས་གཟུགས་དེ་ལ་མངོན་པར་ཞེན་ཏོ། །མངོན་པར་སྒྲུབ་བོ། །སྒྲིབ་པར་བྱེད་དོ། །དེ་དག་གཟུགས་དེ་ལ་མངོན་པར་ཞེན་ཅིང་མངོན་པར་སྒྲུབ་
སྟེ། སྒྲིབ་པར་བྱེད་པས་ཉན་ཐོས་ཀྱི་ཐེག་པ་འམ། རང་སངས་རྒྱས་ཀྱི་ཐེག་པས་ཀྱང་ངེས་པར་འབྱུང་བར་མི་འགྱུར་ན། ཐེག་པ་ཆེན་པོས་ལྟ་སྨོས་ཀྱང་ཅི་དགོས། དེ་ལྟར་མངོན་པར་ཞེན་ཅིང་མངོན་པར་སྒྲུབ་སྟེ། སྒྲིབ་པར་
བྱེད་པས་འདི་ལྟ་སྟེ། སེམས་ཅན་དམྱལ་བ་རྣམས་དང་། དུད་འགྲོ་དང་། ཡི་དགས་རྣམས་དང་ལྷ་རྣམས་དང་། མི་རྣམས་དང་། མི་རྣམས་ཀྱི་ནང་དུ་ཡུན་རིང་པོར་རྒ་ཤི་མྱོང་ངོ་། །རབ་འབྱོར་དེ་བཞིན་དུ་ཚོར་བ་དང་། འདུ་ཤེས་དང་། འདུ་
བྱེད་རྣམས་དང་། རྣམ་པར་ཤེས་པ་དངོས་པོ་མེད་པ་དང་། དངོས་པོ་ངན་པ་དང་། དངོས་པོ་ཡོད་པ་དང་། རབ་འབྱོར་མིག་དང་། གཟུགས་རྣམས་དང་། མིག་གི་རྣམ་པར་ཤེས་པ་དང་། རྣ་བ་དང་། སྒྲ་རྣམས་དང་། རྣ་བའི་རྣམ་
39-1-134b


པར་ཤེས་པ་དང་། སྣ་དང་། དྲི་རྣམས་དང་། སྣའི་རྣམ་པར་ཤེས་པ་དང་། ལྕེ་དང་། རོ་རྣམས་དང་། ལྕེའི་རྣམ་པར་ཤེས་པ་དང་། ལུས་དང་། རེག་བྱ་རྣམས་དང་། ལུས་ཀྱི་རྣམ་པར་ཤེས་པ་དང་། ཡིད་དང་། ཆོས་རྣམས་
དང་། ཡིད་ཀྱི་རྣམ་པར་ཤེས་པ་དངོས་པོ་མེད་པ་དང་། དངོས་པོ་ངན་པ་དང་། དངོས་པོ་ཡོད་པ་དེ་ལྟར་ཡིད་ཀྱི་རྣམ་པར་ཤེས་པ་དེ་ལེའུ་གསུམ་དུ་བྱིས་པ་སོ་སོའི་སྐྱེ་བོ་རྣམས་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་མི་ཤེས་
པས་རྣམ་པར་ཤེས་པ་དེ་ལ་མངོན་པར་ཞེན་ཏོ། །མངོན་པར་སྒྲུབ་བོ། །སྒྲིབ་པར་བྱེད་དོ། །དེ་དག་རྣམ་པར་ཤེས་པ་དེ་ལ་མངོན་པར་ཞེན་ཅིང་མངོན་པར་སྒྲུབ་སྟེ། སྒྲིབ་པར་བྱེད་པས་ཉན་ཐོས་ཀྱི་ཐེག་པ་འམ། རང་སངས་རྒྱས་ཀྱི་ཐེག་པས་ཀྱང་
ངེས་པར་འབྱུང་བར་མི་འགྱུར་ན་ཐེག་པ་ཆེན་པོས་ལྟ་སྨོས་ཀྱང་ཅི་དགོས། དེ་ལྟར་མངོན་པར་ཞེན་ཅིང་མངོན་པར་སྒྲུབ་སྟེ། སྒྲིབ་པར་བྱེད་པས་འདི་ལྟ་སྟེ་སེམས་ཅན་དམྱལ་བ་རྣམས་དང་། དུད་འགྲོ་དང་། ཡི་དགས་རྣམས་དང་
ལྷ་དང་མི་རྣམས་ཀྱི་ནང་དུ་ཡུན་རིང་པོར་རྒ་ཤི་མྱོང་ངོ་། །མཁས་པ་རྣམས་ཀྱིས་ནི་གཟུགས་དེ་དེ་ལྟར་ལེའུ་གསུམ་དུ་ཡང་དག་པར་ཇི་ལྟ་བ་བཞིན་དུ་རབ་ཏུ་ཤེས་པས་མངོན་པར་ཞེན་པར་མི་བྱེད་ཅིང་མངོན་པར་སྒྲུབ་པར་མི་
བྱེད་ཀྱི་གསལ་བར་བྱེད་དོ། །མངོན་པར་ཞེན་པར་མི་བྱེད་ཅིང་མངོན་པར་སྒྲུབ་པར་མི་བྱེད་ཀྱི་གསལ་བར་བྱེད་པས་ཐེག་པ་ཆེན་པོས་ཀྱང་ངེས་པར་འབྱུང་བར་འགྱུར་ན་ཉན་ཐོས་ཀྱི་ཐེག་པ་འམ། རང་སངས་རྒྱས་ཀྱི་ཐེག་
པས་ལྟ་སྨོས་ཀྱང་ཅི་དགོས། དེ་ལྟར་མངོན་པར་ཞེན་པར་མི་བྱེད་ཅིང་མངོན་པར་སྒྲུབ་པར་མི་བྱེད་ཀྱི་གསལ་བར་བྱེད་པས་འདི་ལྟ་སྟེ། སེམས་ཅན་དམྱལ་བ་རྣམས་དང་། དུད་འགྲོ་དང་། ཡི་དགས་རྣམས་དང་། ལྷ་
དང་མི་རྣམས་ཀྱི་ནང་དུ་རྒ་ཤི་མྱོང་བ་མ་ཡིན་ནོ། །རབ་འབྱོར་དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་དང་། མིག་དང་། གཟུགས་རྣམས་དང་། མིག་གི་རྣམ་པར་ཤེས་པ་དང་། རྣ་བ་
39-1-135a


དང་སྒྲ་རྣམས་དང་། རྣ་བའི་རྣམ་པར་ཤེས་པ་དང་། སྣ་དང་། དྲི་རྣམས་དང་། སྣའི་རྣམ་པར་ཤེས་པ་དང་། ལྕེ་དང་། རོ་རྣམས་དང་། ལྕེའི་རྣམ་པར་ཤེས་པ་དང་། ལུས་དང་། རེག་བྱ་རྣམས་དང་། ལུས་ཀྱི་རྣམ་
པར་ཤེས་པ་རྣམས་དང་། ཡིད་དང་། ཆོས་རྣམས་དང་། ཡིད་ཀྱི་རྣམ་པར་ཤེས་པ་ལེའུ་གསུམ་དུ་མཁས་པ་རྣམས་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པས་མངོན་པར་ཞེན་པར་མི་བྱེད་ཅིང་མངོན་པར་སྒྲུབ་
པར་མི་བྱེད་ཀྱི་གསལ་བར་བྱེད་དོ། །མངོན་པར་ཞེན་པར་མི་བྱེད་ཅིང་མངོན་པར་སྒྲུབ་པར་མི་བྱེད་ཀྱི་གསལ་བར་བྱེད་པས་ཐེག་པ་ཆེན་པོས་ཀྱང་ངེས་པར་འབྱུང་བར་འགྱུར་ན་ཉན་ཐོས་ཀྱི་ཐེག་པ་འམ། རང་སངས་རྒྱས་ཀྱི་
ཐེག་པས་ལྟ་སྨོས་ཀྱང་ཅི་དགོས། དེ་ལྟར་མངོན་པར་ཞེན་པར་མི་བྱེད་ཅིང་མངོན་པར་སྒྲུབ་པར་མི་བྱེད་ཀྱི་གསལ་བར་བྱེད་པས་འདི་ལྟ་སྟེ། སེམས་ཅན་དམྱལ་བ་རྣམས་དང་། དུད་འགྲོ་དང་། ཡི་དགས་རྣམས་དང་། 
ལྷ་དང་མི་རྣམས་ཀྱི་ནང་དུ་རྒ་ཤི་མྱོང་བ་མ་ཡིན་ནོ། །རབ་འབྱོར་གཟུགས་ནི་སྐྱེ་བའོ། །འཇིག་པའོ། །གཟུགས་ཀྱི་སྐྱེ་བ་གང་ཡིན་པ་དེ་ནི་གཟུགས་ཀྱི་སྐྱེ་བ་མེད་པའོ། །གཟུགས་ཀྱི་སྐྱེ་བ་མེད་པ་གང་ཡིན་པ་དེ་ནི་
གཟུགས་ཀྱི་སྐྱེ་བ་མེད་པའི་རང་བཞིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་གཟུགས་ཀྱི་སྐྱེ་བ་མེད་པའི་རང་བཞིན་དེ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པས་གཟུགས་ཀྱི་སྐྱེ་བ་མེད་པ་གང་ཡིན་པ་དེ་ཡང་
དག་པར་སྒྲུབ་བོ། །རབ་འབྱོར་དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་སྐྱེ་བའོ། །འཆི་བའོ། །རྣམ་པར་ཤེས་པའི་སྐྱེ་བ་གང་ཡིན་པ་དེ་ནི་རྣམ་པར་ཤེས་པ་སྐྱེ་བ་མེད་པའོ། །
རྣམ་པར་ཤེས་པའི་སྐྱེ་བ་མེད་པ་གང་ཡིན་པ་དེ་ནི་རྣམ་པར་ཤེས་པའི་སྐྱེ་བ་མེད་པའི་རང་བཞིན་ཏེ། བྱང་ཆུབ་སེམས་དཔའ་རྣམ་པར་ཤེས་པའི་སྐྱེ་བ་མེད་པའི་རང་བཞིན་ཏེ། ཡང་དག་པ་ཇི་ལྟ་བ་བཞིན་ཏེ། ཡང་དག་པ་ཇི་ལྟ་བ་བཞིན་
39-1-135b


དུ་རབ་ཏུ་ཤེས་པས་རྣམ་པར་ཤེས་པའི་སྐྱེ་བ་མེད་པ་གང་ཡིན་པ་དེ་ཡང་དག་པར་སྒྲུབ་བོ། །རབ་འབྱོར་གང་ལ་ལ་ཞིག་གཟུགས་ནི་བདག་གམ་བདག་གིའོ་ཞེས་དེ་སྐད་སྨྲ་ན་དེ་ནི་ཕྱི་རོལ་བྱིས་པ་སོ་སོའི་སྐྱེ་བོའི་ཕྱོགས་ལ་གནས་པ་
སྟེ། ལོག་པར་ལྟ་བའོ་ཞེས་ང་སྨྲའོ། །རབ་འབྱོར་གང་ལ་ལ་ཞིག་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་བདག་གམ་བདག་གིའོ་ཞེས་དེ་སྐད་སྨྲ་ན། དེ་ནི་ཕྱི་རོལ་བྱིས་པ་སོ་སོའི་སྐྱེ་བོའི་
ཕྱོགས་ལ་གནས་པ་སྟེ། ལོག་པར་ལྟ་བའོ་ཞེས་ང་སྨྲའོ། །རབ་འབྱོར་གང་ལ་ལ་ཞིག་གཟུགས་ནི་སྔོན་བྱས་པའི་རྒྱུ་ལས་བྱུང་བའོ་ཞེ་འམ། དབང་ཕྱུག་གིས་སྤྲུལ་པའི་རྒྱུ་ལས་བྱུང་བའོ་ཞེ་འམ། རྒྱུ་མེད་རྐྱེན་མེད་
པའོ་ཞེས་དེ་སྐད་སྨྲ་ན་དེ་ནི་ཕྱི་རོལ་བྱིས་པ་སོ་སོའི་སྐྱེ་བོའི་ཕྱོགས་ལ་གནས་པ་སྟེ། ལོག་པར་ལྟ་བའོ་ཞེས་ང་སྨྲའོ། །རབ་འབྱོར་གང་ལ་ལ་ཞིག་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་
པ་ནི་སྔོན་བྱས་པའི་རྒྱུ་ལས་བྱུང་བའོ་ཞེ་འམ། དབང་ཕྱུག་གིས་སྤྲུལ་པའི་རྒྱུ་ལས་བྱུང་བའོ་ཞེ་འམ། རྒྱུ་མེད་རྐྱེན་མེད་པའོ་ཞེས་དེ་སྐད་སྨྲ་ན་དེ་ནི་ཕྱི་རོལ་བྱིས་པ་སོ་སོའི་སྐྱེ་བོའི་ཕྱོགས་ལ་གནས་པ་སྟེ། ལོག་པར་ལྟ་བའོ། །
ཞེས་ང་སྨྲའོ། །རབ་འབྱོར་གང་ཡང་གཟུགས་ནི་གཟུགས་སུ་ཡོད་པའི་མཚན་ཉིད་དོ། །ཚོར་བ་ནི་མྱོང་བའི་མཚན་ཉིད་དོ། །འདུ་ཤེས་ནི་ཀུན་དུ་ཤེས་པའི་མཚན་ཉིད་དོ། །འདུ་བྱེད་རྣམས་ནི་མངོན་པར་འདུ་བྱེད་པའི་
མཚན་ཉིད་དོ། །རྣམ་པར་ཤེས་པ་ནི་རྣམ་པར་ཤེས་པའི་མཚན་ཉིད་དོ་ཞེས་དེ་སྐད་སྨྲ་ན་དེ་ནི་ཕྱི་རོལ་པས་ཀྱང་ཕྱི་རོལ་སོ་སོའི་སྐྱེ་བོའི་ཕྱོགས་ལ་གནས་པ་སྟེ། ལོག་པར་ལྟ་བའོ་ཞེས་ང་སྨྲའོ། །རབ་འབྱོར་དེ་གང་ཡང་གཟུགས་
ནི་སྡུག་བསྔལ་བ་སྟེ། རབ་ཏུ་མ་ཞི་བའོ། །གཟུགས་འགོག་པ་ནི་བདེ་བ་དང་ཞི་བའོ་ཞེས་དེ་སྐད་སྨྲ་ན་དེ་ནི་ཕྱི་རོལ་པས་ཀྱང་ཕྱི་རོལ་ཞེས་བྱ་བ་ནས་ལོག་པར་ལྟ་བའི་བར་དུའོ་ཞེས་ང་སྨྲའོ། །རབ་འབྱོར་གང་ཡང་ཚོར་བ་དང་། 
39-1-136a


འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་སྡུག་བསྔལ་བ་སྟེ་རབ་ཏུ་མ་ཞི་བའོ། །རྣམ་པར་ཤེས་པ་འགོག་པ་ནི་བདེ་བ་དང་། ཞི་བའོ་ཞེས་དེ་སྐད་སྨྲ་ན་དེ་ནི་ཕྱི་རོལ་པས་ཀྱང་ཕྱི་རོལ་ཞེས་བྱ་བ་ནས་ལོག་
པར་ལྟ་བའི་བར་དུའོ་ཞེས་ང་སྨྲའོ། །རབ་འབྱོར་གང་ཡང་གཟུགས་ནི་མེད་པ་ཉིད་དོ་ཞེས་དེ་སྐད་སྨྲ་ན་དེ་ནི་ཕྱི་རོལ་པས་ཀྱང་ཕྱི་རོལ་སོ་སོའི་སྐྱེ་བོའི་ཕྱོགས་ལ་གནས་པ་སྟེ། ལོག་པར་ལྟ་བའོ་ཞེས་ང་སྨྲའོ། །རབ་འབྱོར་གང་ཡང་ཚོར་བ་དང་། འདུ་
ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་མེད་པ་ཉིད་དོ་ཞེས་དེ་སྐད་སྨྲ་ན་དེ་ནི་ཕྱི་རོལ་པས་ཀྱང་ཕྱི་རོལ་སོ་སོའི་སྐྱེ་བོའི་ཕྱོགས་ལ་གནས་པ་སྟེ། ལོག་པར་ལྟ་བའོ་ཞེས་ང་སྨྲའོ། །རབ་འབྱོར་གང་ཡང་བཅོམ་ལྡན་འདས་ཀྱིས་
གཟུགས་རང་བཞིན་མེད་པ་དང་། སྐྱེ་བ་མེད་པ་དང་། འགག་པ་མེད་པ་དང་། གདོད་མ་ནས་ཞི་བ་དང་། རང་བཞིན་གྱིས་ཡོངས་སུ་མྱ་ངན་ལས་འདས་པར་བསྟན་པ་གང་ཡིན་པའི་བསྟན་པ་དེ་ཐམས་ཅད་ནི་ལྡེམ་པོར་དགོངས་པ་མ་ཡིན་པ་
དགོངས་པ་མ་ཡིན་པ་སྟེ། སྒྲ་ཇི་བཞིན་པ་ཉིད་དུ་ཤེས་པར་བྱའོ་ཞེས་དེ་སྐད་སྨྲ་ན་དེ་ནི་ཕྱི་རོལ་པས་ཀྱང་ཕྱི་རོལ་སོ་སོའི་སྐྱེ་བོའི་ཕྱོགས་ལ་གནས་པ་སྟེ། ལོག་པར་ལྟ་བའོ་ཞེས་ང་སྨྲའོ། །རབ་འབྱོར་གང་ཡང་བཅོམ་ལྡན་འདས་ཀྱིས་ཚོར་བ་དང་། 
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རང་བཞིན་མེད་པ་དང་། སྐྱེ་བ་མེད་པ་དང་། འགག་པ་མེད་པ་དང་། གདོད་མ་ནས་ཞི་བ་དང་། རང་བཞིན་གྱིས་ཡོངས་སུ་མྱ་ངན་ལས་འདས་པར་བསྟན་པ་གང་ཡིན་པའི་བསྟན་པ་དེ་
ཐམས་ཅད་ནི་ལྡེམ་པོར་དགོངས་པ་མ་ཡིན་པ། དགོངས་པ་མ་ཡིན་པ་སྟེ། སྒྲ་ཇི་བཞིན་པ་ཉིད་དུ་ཤེས་པར་བྱའོ་ཞེས་དེ་སྐད་སྨྲ་ན་དེ་ནི་ཕྱི་རོལ་པས་ཀྱང་ཕྱི་རོལ་སོ་སོའི་སྐྱེ་བོའི་ཕྱོགས་ལ་གནས་པ་སྟེ། ལོག་པར་ལྟ་བའོ་ཞེས་ང་སྨྲའོ། །
རབ་འབྱོར་གཟུགས་ནི་ཡོད་དེ་གང་གཟུགས་ལ་མངོན་པར་ཞེན་པ་དང་། སྐྱེ་བ་དང་། བསྟན་པར་འགྱུར་བའོ། །གཟུགས་ནི་ཡོད་དེ་གང་གཟུགས་ལ་ཀུན་ནས་ཉོན་མོངས་པ་དང་། གནས་པ་དང་། འཇུག་པར་འགྱུར་བའོ། །གཟུགས་
39-1-136b


ནི་ཡོད་དེ། གང་གཟུགས་ལ་རྣམ་པར་བྱང་བ་དང་། འབྱོར་པ་དང་དབང་དུ་འགྱུར་བའོ། །རབ་འབྱོར་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཡོད་དེ། གང་རྣམ་པར་ཤེས་པ་ལ་མངོན་པར་ཞེན་
པ་དང་། སྐྱེ་བ་དང་། བསྟན་པར་འགྱུར་བའོ། །རབ་འབྱོར་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཡོད་དེ། གང་རྣམ་པར་ཤེས་པ་ལ་ཀུན་ནས་ཉོན་མོངས་པ་དང་། གནས་པ་དང་། འཇུག་
པར་འགྱུར་བའོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཡོད་དེ། གང་རྣམ་པར་ཤེས་པ་ལ་རྣམ་པར་བྱང་བ་དང་། འབྱོར་པ་དང་། དབང་དུ་འགྱུར་བའོ། །རབ་འབྱོར་གཟུགས་ནི་ཡོད་དེ། གང་
བྱང་ཆུབ་སེམས་དཔའ་རྣམས་ཀྱིས་སྤངས་ཤིང་ཡོངས་སུ་ཤེས་ཏེ་བསྟན་ན་དབང་དུ་འགྱུར་བའོ། །རབ་འབྱོར་གཟུགས་ནི་ཡོད་དེ། གང་སྤངས་ཤིང་ཡོངས་སུ་ཤེས་ཏེ་ཡང་དག་པར་བསྟན་ན་དབང་དུ་འགྱུར་བའོ། །རབ་འབྱོར་
གཟུགས་ནི་ཡོད་དེ། གང་སྤངས་ཤིང་ཡོངས་སུ་ཤེས་ན་ཆོས་དཀར་པོ་དང་ལྡན་པ་དང་། ཆོས་ཐམས་ཅད་ལ་དབང་བསྒྱུར་བ་དང་བདེ་བ་ཆེན་པོ་ལ་གནས་པར་འགྱུར་བའོ། །རབ་འབྱོར་ཚོར་བ་དང་། འདུ་ཤེས་དང་། འདུ་བྱེད་
རྣམས་དང་། རྣམ་པར་ཤེས་པ་ནི་ཡོད་དེ། གང་བྱང་ཆུབ་སེམས་དཔའ་རྣམས་ཀྱིས་སྤངས་ཤིང་ཡོངས་སུ་ཤེས་ཏེ་བསྟན་ན་དབང་དུ་འགྱུར་བའོ། །རབ་འབྱོར་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཡོད་དེ། གང་སྤངས་
ཤིང་ཡོངས་སུ་ཤེས་ཏེ་ཡང་དག་པར་བསྟན་ན་དབང་དུ་འགྱུར་བའོ། །རབ་འབྱོར་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཡོད་དེ། གང་སྤངས་ཤིང་ཡོངས་སུ་ཤེས་ཏེ་ཡང་དག་པར་བསྟན་ན་དབང་
དུ་འགྱུར་བའོ། །རབ་འབྱོར་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་ཡོད་དེ། གང་སྤངས་ཤིང་ཡོངས་སུ་ཤེས་ཏེ་ཆོས་དཀར་པོ་དང་ལྡན་པ་དང་། ཆོས་ཐམས་ཅད་ལ་དབང་སྒྱུར་བ་དང་། བདེ་བ་
39-1-137a


ཆེན་པོ་ལ་གནས་པར་འགྱུར་རོ། །རབ་འབྱོར་བྱང་ཆུབ་སེམས་དཔའ་གང་ལ་ལ་ཞིག་གཟུགས་ལ་གཟུགས་ཙམ་དང་། སྡུག་བསྔལ་ཙམ་དུ་ཡང་དག་པར་རྗེས་སུ་མི་མཐོང་བ་དེ་གཟུགས་ལ་བདག་ཏུ་དམིགས་སོ། །
གང་གཟུགས་ལ་བདག་ཏུ་དམིགས་པ་དེ་གཟུགས་ལ་བདག་ཏུ་ལྟ་བར་དམིགས་སོ། །གང་གཟུགས་ལ་བདག་ཏུ་ལྟ་བར་དམིགས་པ་དེ་གཟུགས་ལ་ཐམས་ཅད་དམིགས་སོ། །གང་གཟུགས་ལ་ཐམས་ཅད་དམིགས་པ་དེ། གཟུགས་
ལ་ཐམས་ཅད་མི་དམིགས་སོ། །གཟུགས་ལ་ཐམས་ཅད་དམིགས་པ་ན་ཐམས་ཅད་མི་དམིགས་པ་དེའི་དམིགས་པ་དེ་ཡོངས་སུ་གྲུབ་པ་ཡིན་ནོ། །དེ་དམིགས་པ་དེ་ལ་གནས་ན་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པས་
ཀྱང་ངེས་པར་འབྱུང་བར་མི་འགྱུར་ན་ཐེག་པ་ཆེན་པོས་ལྟ་སྨོས་ཀྱང་ཅི་དགོས། རབ་འབྱོར་བྱང་ཆུབ་སེམས་དཔའ་གང་ལ་ལ་ཞིག་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རྣམ་པར་ཤེས་པ་ཙམ་དང་
སྡུག་བསྔལ་ཙམ་དུ་ཡང་དག་པར་རྗེས་སུ་མི་མཐོང་བ་དེ་རྣམ་པར་ཤེས་པ་ལ་བདག་ཏུ་དམིགས་སོ། །གང་རྣམ་པར་ཤེས་པ་ལ་བདག་ཏུ་དམིགས་པ་དེ་རྣམ་པར་ཤེས་པ་ལ་བདག་ཏུ་ལྟ་བར་དམིགས་སོ། །གང་རྣམ་པར་
ཤེས་པ་ལ་བདག་ཏུ་ལྟ་བར་དམིགས་པ་དེ་རྣམ་པར་ཤེས་པ་ལ་ཐམས་ཅད་དམིགས་སོ། །གང་རྣམ་པར་ཤེས་པ་ལ་ཐམས་ཅད་དམིགས་པ་དེ་རྣམ་པར་ཤེས་པ་ལ་ཐམས་ཅད་མི་དམིགས་སོ། །གང་རྣམ་པར་ཤེས་པ་ལ་ཐམས་ཅད་
དམིགས་པ་ན་ཐམས་ཅད་མི་དམིགས་པ་དེའི་དམིགས་པ་དེ་ཡོངས་སུ་གྲུབ་པ་ཡིན་ནོ། །དེ་དམིགས་པ་དེ་ལ་གནས་ན་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པས་ཀྱང་ངེས་པར་འབྱུང་བར་མི་འགྱུར་ན་ཐེག་པ་ཆེན་
པོས་ལྟ་སྨོས་ཀྱང་ཅི་དགོས། རབ་འབྱོར་གང་ཡང་གཟུགས་ལ་གཟུགས་ཙམ་དང་། སྡུག་བསྔལ་ཙམ་དུ་ཡང་དག་པར་རྗེས་སུ་མཐོང་བ་དེ་གཟུགས་ལ་བདག་ཏུ་མི་དམིགས་སོ། །གང་གཟུགས་ལ་བདག་ཏུ་མི་དམིགས་པ་དེ་
39-1-137b


གཟུགས་ལ་བདག་ཏུ་ལྟ་བར་མི་དམིགས་སོ། །གང་གཟུགས་ལ་བདག་ཏུ་ལྟ་བར་མི་དམིགས་པ་དེ་གཟུགས་ལ་ཐམས་ཅད་མི་དམིགས་སོ། །གང་གཟུགས་ལ་ཐམས་ཅད་མི་དམིགས་པ་དེ་གཟུགས་ལ་ཐམས་ཅད་དམིགས་
སོ། །གང་གཟུགས་ལ་ཐམས་ཅད་མི་དམིགས་པ་ན་ཐམས་ཅད་དམིགས་པ་དེའི་དམིགས་པ་དེ་ཡོངས་སུ་གྲུབ་པ་ཡིན་ནོ། །དེ་དམིགས་པ་དེ་ལ་གནས་ན་ཉན་ཐོས་དང་། རང་སངས་རྒྱས་ཀྱི་ཐེག་པས་ངེས་པར་འབྱུང་བར་འགྱུར་གྱི་
ཐེག་པ་ཆེན་པོས་ནི་མ་ཡིན་ནོ། །རབ་འབྱོར་གང་ཡང་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རྣམ་པར་ཤེས་པ་ཙམ་དང་། སྡུག་བསྔལ་ཙམ་དུ་ཡང་དག་པར་རྗེས་སུ་མཐོང་བ་དེ་རྣམ་པར་
ཤེས་པ་ལ་བདག་ཏུ་མི་དམིགས་སོ། །གང་རྣམ་པར་ཤེས་པ་ལ་བདག་ཏུ་མི་དམིགས་པ་དེ་རྣམ་པར་ཤེས་པ་ལ་བདག་ཏུ་ལྟ་བར་མི་དམིགས་སོ། །གང་རྣམ་པར་ཤེས་པ་ལ་བདག་ཏུ་ལྟ་བར་མི་དམིགས་པ་དེ་རྣམ་པར་
ཤེས་པ་ལ་ཐམས་ཅད་མི་དམིགས་སོ། །གང་རྣམ་པར་ཤེས་པ་ལ་ཐམས་ཅད་མི་དམིགས་པ་དེ་རྣམ་པར་ཤེས་པ་ལ་ཐམས་ཅད་དམིགས་སོ། །གང་རྣམ་པར་ཤེས་པ་ལ་ཐམས་ཅད་མི་དམིགས་པ་ན་ཐམས་ཅད་དམིགས་པ་དེའི་
དམིགས་པ་དེ་ཡོངས་སུ་གྲུབ་པ་ཡིན་ནོ། །དེ་མི་དམིགས་པ་དེ་ལ་གནས་ན། ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པས་ངེས་པར་འབྱུང་བར་འགྱུར་གྱི་ཐེག་པ་ཆེན་པོས་ནི་མ་ཡིན་ནོ། །རབ་འབྱོར་གང་ལ་ལ་
ཞིག་གཟུགས་ལ་ཡང་དག་པ་མ་ཡིན་པ་ཀུན་བརྟགས་པ་ཙམ་དང་། འཁྲུལ་པ་ཙམ་དུ་ཡང་དག་པར་རྗེས་སུ་མི་མཐོང་བ་དེ་གཟུགས་ལ་གཟུགས་སུ་དམིགས་སོ། །གང་གཟུགས་ལ་གཟུགས་སུ་དམིགས་པ་དེ་གཟུགས་
ལ་གཟུགས་སུ་ལྟ་བར་དམིགས་སོ། །གང་གཟུགས་ལ་གཟུགས་སུ་ལྟ་བར་དམིགས་པ་དེ་གཟུགས་ལ་ཐམས་ཅད་དམིགས་སོ། །གང་གཟུགས་ལ་ཐམས་ཅད་དམིགས་པ་དེ་གཟུགས་ལ་ཐམས་ཅད་མི་དམིགས་སོ། །
39-1-138a


གང་གཟུགས་ལ་ཐམས་ཅད་དམིགས་པ་ན་ཐམས་ཅད་མི་དམིགས་པ་དེའི་དམིགས་པ་དེ་ཡོངས་སུ་གྲུབ་པ་ཡིན་ནོ། །དེ་དམིགས་པ་དེ་ལ་གནས་ན་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པས་ཀྱང་ངེས་པར་
འབྱུང་བར་མི་འགྱུར་ན་ཐེག་པ་ཆེན་པོས་ལྟ་སྨོས་ཀྱང་ཅི་དགོས་རབ་འབྱོར་གང་ཡང་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡང་དག་པ་མ་ཡིན་པ་ཀུན་བརྟགས་པ་ཙམ་དང་། འཁྲུལ་པ་ཙམ་དུ་ཡང་དག་པར་
རྗེས་སུ་མི་མཐོང་བ་དེ་རྣམ་པར་ཤེས་པ་ལ་རྣམ་པར་ཤེས་པར་དམིགས་སོ། །གང་རྣམ་པར་ཤེས་པ་ལ་རྣམ་པར་ཤེས་པར་དམིགས་པ་དེ་རྣམ་པར་ཤེས་པ་ལ་རྣམ་པར་ཤེས་པར་ལྟ་བར་དམིགས་སོ། །གང་རྣམ་པར་ཤེས་པ་ལ་རྣམ་པར་
ཤེས་པར་ལྟ་བར་དམིགས་པ་དེ་རྣམ་པར་ཤེས་པ་ལ་ཐམས་ཅད་དམིགས་སོ། །གང་རྣམ་པར་ཤེས་པ་ལ་ཐམས་ཅད་དམིགས་པ་དེ་རྣམ་པར་ཤེས་པ་ལ་ཐམས་ཅད་མི་དམིགས་སོ། །གང་རྣམ་པར་ཤེས་པ་ལ་ཐམས་ཅད་དམིགས་པ་ན་
ཐམས་ཅད་མི་དམིགས་པ་དེའི་དམིགས་པ་དེ་ཡོངས་སུ་གྲུབ་པ་ཡིན་ནོ། །དེ་དམིགས་པ་དེ་ལ་གནས་ན་ཉན་ཐོས་ཀྱི་ཐེག་པ་འམ། རང་སངས་རྒྱས་ཀྱི་ཐེག་པས་ཀྱང་ངེས་པར་འབྱུང་བར་མི་འགྱུར་ན། ཐེག་པ་ཆེན་པོས་ལྟ་སྨོས་ཀྱང་
ཅི་དགོས། རབ་འབྱོར་གང་གཟུགས་ལ་ཡང་དག་པ་མ་ཡིན་པ་ཀུན་བརྟགས་པ་ཙམ་དང་། འཁྲུལ་པ་ཙམ་དུ་ཡང་དག་པར་རྗེས་སུ་མཐོང་བ་དེ་གཟུགས་ལ་གཟུགས་སུ་མི་དམིགས་སོ། །གང་གཟུགས་ལ་གཟུགས་སུ་མི་དམིགས་
པ་དེ་གཟུགས་ལ་གཟུགས་སུ་ལྟ་བར་མི་དམིགས་སོ། །གང་གཟུགས་ལ་གཟུགས་སུ་ལྟ་བར་མི་དམིགས་པ་དེ་གཟུགས་ལ་ཐམས་ཅད་མི་དམིགས་སོ། །གང་གཟུགས་ལ་ཐམས་ཅད་མི་དམིགས་པ་དེ་གཟུགས་ལ་
ཐམས་ཅད་མི་དམིགས་སོ། །གང་གཟུགས་ལ་ཐམས་ཅད་མི་དམིགས་པ་ན་ཐམས་ཅད་དམིགས་པ་དེའི་དམིགས་པ་དེ་ཡོངས་སུ་གྲུབ་པ་ཡིན་ནོ། །དེ་མི་དམིགས་པ་དེ་ལ་གནས་ན་ཐེག་པ་ཆེན་པོས་ཀྱང་ངེས་པར་འབྱུང་བར་
39-1-138b


འགྱུར་ན་ཉན་ཐོས་ཀྱི་ཐེག་པ་འམ། རང་སངས་རྒྱས་ཀྱི་ཐེག་པས་ལྟ་སྨོས་ཀྱང་ཅི་དགོས། རབ་འབྱོར་གང་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡང་དག་པ་མ་ཡིན་པ་ཀུན་བརྟགས་པ་ཙམ་དང་། 
འཁྲུལ་པ་ཙམ་དུ་ཡང་དག་པར་རྗེས་སུ་མཐོང་བ་དེ་རྣམ་པར་ཤེས་པ་ལ་རྣམ་པར་ཤེས་པར་མི་དམིགས་སོ། །གང་རྣམ་པར་ཤེས་པ་ལ་རྣམ་པར་ཤེས་པར་མི་དམིགས་པ་དེ་རྣམ་པར་ཤེས་པ་ལ་རྣམ་པར་ཤེས་པར་ལྟ་བར་མི་དམིགས་
སོ། །གང་རྣམ་པར་ཤེས་པ་ལ་རྣམ་པར་ཤེས་པར་ལྟ་བར་མི་དམིགས་པ་དེ་རྣམ་པར་ཤེས་པ་ལ་ཐམས་ཅད་མི་དམིགས་སོ། །གང་རྣམ་པར་ཤེས་པ་ལ་ཐམས་ཅད་མི་དམིགས་པ་དེ་རྣམ་པར་ཤེས་པ་ལ་ཐམས་ཅད་དམིགས་སོ། །
གང་རྣམ་པར་ཤེས་པ་ལ་ཐམས་ཅད་མི་དམིགས་ན་ཐམས་ཅད་དམིགས་པ་དེའི་མི་དམིགས་པ་དེ་ཡོངས་སུ་གྲུབ་པ་ཡིན་ནོ། །དེ་དམིགས་པ་དེ་ལ་ཐེག་པ་ཆེན་པོས་ཀྱང་ངེས་པར་འབྱུང་བར་འགྱུར་ན་ཉན་ཐོས་ཀྱི་ཐེག་པ་འམ། རང་སངས་
རྒྱས་ཀྱི་ཐེག་པས་ལྟ་སྨོས་ཀྱང་ཅི་དགོས། རབ་འབྱོར་བྱང་ཆུབ་སེམས་དཔའ་གཟུགས་ལ་སྒྲ་ཇི་བཞིན་དུ་མངོན་པར་ཞེན་ཏེ། ཐ་སྙད་དུ་ཀུན་དུ་སྤྱོད་ན་འཇིག་ཚོགས་ལ་ལྟ་བར་ཀུན་དུ་སྤྱོད་པ་ཡིན། ཡང་འབྱུང་བའི་སྲེད་པ་ལ་
ཀུན་དུ་སྤྱོད་པ་ཡིན། འཇིག་པ་ཡོངས་སུ་ཚོལ་བར་ཀུན་དུ་སྤྱོད་པ་ཡིན་ཏེ། གཟུགས་ཡོངས་སུ་མི་ཤེས་པའི་རྟགས་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་
པ་སྒྲ་ཇི་བཞིན་དུ་མངོན་པར་ཞེན་ཏེ། ཐ་སྙད་དུ་ཀུན་དུ་སྤྱོད་ན་འཇིག་ཚོགས་ལ་ལྟ་བར་ཀུན་དུ་སྤྱོད་པ་ཡིན་། ཡང་འབྱུང་བའི་སྲེད་པ་ལ་ཀུན་དུ་སྤྱོད་པ་ཡིན། འཇིག་པ་ཡོངས་སུ་ཚོལ་བར་ཀུན་དུ་སྤྱོད་པ་ཡིན་ཏེ། རྣམ་པར་ཤེས་པ་
ཡོངས་སུ་མི་ཤེས་པའི་རྟགས་ཡིན་ནོ། །རབ་འབྱོར་བྱང་ཆུབ་སེམས་དཔའ་གཟུགས་ལ་སྒྲ་ཇི་བཞིན་དུ་མངོན་པར་ཞེན་ཏེ། ཐ་སྙད་དུ་ཀུན་དུ་མི་སྤྱོད་ན་འཇིག་ཚོགས་ལ་ལྟ་བར་ཀུན་དུ་སྤྱོད་པ་མ་ཡིན་། ཡང་འབྱུང་བའི་སྲེད་པ་ལ་ཀུན་དུ་སྤྱོད་
39-1-139a


པ་མ་ཡིན། འཇིག་པ་ཡོངས་སུ་ཚོལ་བར་ཀུན་དུ་སྤྱོད་པ་མ་ཡིན་ཏེ། གཟུགས་ཡོངས་སུ་ཤེས་པའི་རྟགས་ཡིན་ནོ། །རབ་འབྱོར་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་
པ་ལ་སྒྲ་ཇི་བཞིན་དུ་མངོན་པར་ཞེན་ཏེ། ཐ་སྙད་དུ་ཀུན་དུ་མི་སྤྱོད་ན་འཇིག་ཚོགས་ལ་ལྟ་བར་ཀུན་དུ་སྤྱོད་པ་མ་ཡིན། ཡང་འབྱུང་བའི་སྲེད་པ་ལ་ཀུན་དུ་སྤྱོད་པ་མ་ཡིན། འཇིག་པ་ཡོངས་སུ་ཚོལ་བར་ཀུན་དུ་སྤྱོད་པ་མ་ཡིན་ཏེ། རྣམ་པར་
ཤེས་པ་ཡོངས་སུ་ཤེས་པའི་རྟགས་ཡིན་ནོ། །རབ་འབྱོར་བྱང་ཆུབ་སེམས་དཔའ་གཟུགས་ལ་རྐྱེན་གང་དག་ཡོངས་སུ་བཟུང་ན་རྣམ་པར་བྱང་བར་འགྱུར་བའི་སེམས་ཀྱི་ས་བོན་ནི་གསུམ་པོ་འདི་དག་སྟེ། མོས་པ་སེམས་ཀྱི་ས་
བོན་དང་། ཡིད་འབྱུང་བ་སེམས་ཀྱི་ས་བོན་དང་། ཆུད་མི་གསོན་པ་སེམས་ཀྱི་ས་བོན་ནོ། །རབ་འབྱོར་བྱང་ཆུབ་སེམས་དཔས་གཟུགས་ལ་མངོན་པར་ཞེན་པ་མེད་པའི་སེམས་དང་། འབྲལ་བའི་སེམས་དང་། ཡོངས་སུ་
སྦྱོང་བའི་སེམས་དང་། སེམས་གསུམ་པོ་འདི་དག་བསྐྱེད་པར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་སེམས་སྐྱེ་བ་དང་། མི་སྐྱེ་བ་དང་། ཆེར་སྐྱེ་བ་དང་། མཉམ་དུ་སྐྱེ་བ་དེ་ཡང་དག་པར་རྗེས་སུ་མཐོང་སྟེ། དེ་
ལྟར་ཡང་དག་པར་རྗེས་སུ་མཐོང་ན་མྱུར་དུ་བླ་ན་མེད་པའི་བྱང་ཆུབ་མངོན་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་
དང་། རྣམ་པར་ཤེས་པ་ལ་རྐྱེན་གང་དག་ཡོངས་སུ་བཟུང་ན་རྣམ་པར་བྱང་བར་འགྱུར་བའི་སེམས་ཀྱི་ས་བོན་ནི་གསུམ་པོ་འདི་དག་སྟེ། མོས་པ་སེམས་ཀྱི་ས་བོན་དང་། ཡིད་འབྱུང་བ་སེམས་ཀྱི་ས་བོན་དང་། ཆུད་མི་གསོན་
པ་སེམས་ཀྱི་ས་བོན་ནོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མངོན་པར་ཞེན་པའི་སེམས་དང་བྲལ་བའི་སེམས་དང་། ཡོངས་སུ་སྦྱོང་བའི་སེམས་དང་། 
39-1-139b


སེམས་གསུམ་པོ་འདི་དག་བསྐྱེད་པར་བྱའོ། །རབ་འབྱོར་གལ་ཏེ་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སེམས་སྐྱེ་བ་དང་། མི་སྐྱེ་བ་དང་། ཆེར་སྐྱེ་བ་དང་། མཉམ་དུ་སྐྱེ་བ་དང་། 
དེ་ལྟར་ཡང་དག་པར་རྗེས་སུ་མཐོང་སྟེ། དེ་དེ་ལྟར་ཡང་དག་པར་རྗེས་སུ་མཐོང་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རབ་འབྱོར་གལ་ཏེ་བྱང་ཆུབ་སེམས་དཔས་གཟུགས་ལ་
ཡོད་པ་ཉིད་དང་། དེ་བཞིན་དུ་ཡོད་པ་ཉིད་དམ་མེད་པ་ཉིད་དུ་ཡང་དག་པར་རྗེས་སུ་མཐོང་ན་དེ་ཁོ་ན་མི་ཤེས་པའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་གལ་ཏེ་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་
རྣམས་དང་། རྣམ་པར་ཤེས་པ་ལ་ཡོད་པ་ཉིད་དང་དེ་བཞིན་དུ་ཡོད་པ་ཉིད་དམ་མེད་པ་ཉིད་དུ་ཡང་དག་པར་རྗེས་སུ་མཐོང་ན་དེ་ཁོ་ན་མི་ཤེས་པའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་གལ་ཏེ་བྱང་ཆུབ་སེམས་དཔས་
གཟུགས་ལ་ཡོད་པ་མ་ཡིན་པ་དང་དེ་བཞིན་དུ་ཡོད་པ་མ་ཡིན་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པར་ཡང་དག་པར་རྗེས་སུ་མཐོང་ན་དེ་ཁོ་ན་ཤེས་པའི་བྱང་ཆུབ་སེམས་དཔའ་ཞེས་བྱའོ། །རབ་འབྱོར་གལ་ཏེ་
བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡོད་པ་མ་ཡིན་པ་དང་། དེ་བཞིན་དུ་ཡོད་པ་མ་ཡིན་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པར་ཡང་དག་པར་རྗེས་
སུ་མཐོང་ན་དེ་ཁོ་ན་ཤེས་པའི་བྱང་ཆུབ་སེམས་དཔའ་ཞེས་བྱའོ། །རབ་འབྱོར་བྱང་ཆུབ་སེམས་དཔའ་གཟུགས་ལ་སེམས་མཉམ་པར་གཞག་པར་འདོད་ཅིང་གཟུགས་ལ་མོས་ལ། གཟུགས་ལ་སེམས་དེ་སྐྱོད་ཀུན་དུ་སྐྱོད་རྣམ་
པར་སྐྱོད། མོས་པ་ངན་པའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སེམས་མཉམ་པར་གཞག་པར་འདོད་ཅིང་
39-1-140a


རྣམ་པར་ཤེས་པ་ལ་མོས་ལ་རྣམ་པར་ཤེས་པ་ལ་སེམས་དེ་བསྐྱོད། ཀུན་དུ་བསྐྱོད། རྣམ་པར་བསྐྱོད་ན་མོས་པ་ངན་པའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་བྱང་ཆུབ་སེམས་དཔའ་གཟུགས་ལ་སེམས་
མཉམ་པར་འདོད་ཅིང་། སེམས་དེ་གཟུགས་ལ་མོས་པ་ན། གཟུགས་ལ་སེམས་མི་འདོགས། ཀུན་དུ་མི་འདོགས། རྣམ་པར་མི་འདོགས་ན་མོས་པ་བཟང་པོའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་བྱང་ཆུབ་སེམས་
དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སེམས་མཉམ་པར་གཞག་པར་འདོད་ཅིང་སེམས་དེ་རྣམ་པར་ཤེས་པ་ལ་མོས་པ་ན་རྣམ་པར་ཤེས་པ་ལ་སེམས་མི་འདོགས། ཀུན་དུ་མི་འདོགས། རྣམ་
པར་མི་འདོགས་ན་མོས་པ་བཟང་པོའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་བྱང་ཆུབ་སེམས་དཔའ་གཟུགས་ལ་མཚན་ཉིད་མེད་པའི་ཆོས་ཡོངས་སུ་ཤེས་པར་བྱ་བ་དང་། སྡུག་བསྔལ་རབ་ཏུ་ཞི་བར་བྱ་བ་དང་། མྱ་ངན་
ལས་འདས་པ་ལ་གཅིག་ཏུ་ངེས་པར་བྱ་བའི་ཕྱིར་ཞུགས་ན། ཡང་དག་པར་ཞུགས་པར་རིག་པར་བྱའོ། །བྱང་ཆུབ་སེམས་དཔའ་དེ་ལྟར་ཡང་དག་པར་ཞུགས་པ་ནི་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་འཚང་རྒྱའོ། །རབ་འབྱོར་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མཚན་ཉིད་མེད་པའི་ཆོས་ཡོངས་སུ་ཤེས་པར་བྱ་བ་དང་། སྡུག་བསྔལ་རབ་ཏུ་ཞི་
བར་བྱ་བ་དང་། མྱ་ངན་ལས་འདས་པ་ལ་གཅིག་ཏུ་ངེས་པར་བྱ་བའི་ཕྱིར་ཞུགས་ན། ཡང་དག་པར་ཞུགས་པར་རིག་པར་བྱའོ། །བྱང་ཆུབ་སེམས་དཔའ་དེ་ལྟར་ཡང་དག་པར་ཞུགས་པ་ནི་མྱུར་དུ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །མཚན་ཉིད་མེད་པར་ཤེས་བྱ་དང་། །སྡུག་བསྔལ་ཞི་བར་བྱ་བ་དང་། ཞི་བ་གཅིག་ཏུ་ངེས་བྱར་བར། བྱང་ཆུབ་སེམས་དཔའ་སྒྲུབ་པར་བྱེད། རབ་འབྱོར་བྱང་ཆུབ་སེམས་
39-1-140b


དཔའ་གཟུགས་ལ་སྣང་བ་མེད་པ་དང་། ཀུན་དུ་སྣང་བ་དང་། དེ་ལ་གནས་པ་དང་། དེ་ལ་འཇུག་པའི་ཆོས་ཡང་དག་པ་ཇི་ལྟ་བ་བཞིན་དུ་ཤེས་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རབ་འབྱོར་
བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སྣང་བ་མེད་པ་དང་། ཀུན་དུ་སྣང་བ་དང་། དེ་ལ་གནས་པ་དང་། དེ་འཇུག་པའི་ཆོས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་ན། མྱུར་དུ་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །ཆོས་གང་སྣང་བ་མེད་པ་དང་། །ཀུན་དུ་སྣང་བ་ཉིད་དང་ནི། །དེ་ལ་གནས་དང་རབ་འཇུག་པ། །དེ་ཤེས་ནས་ནི་བྱང་ཆུབ་འཐོབ། །རབ་འབྱོར་བྱང་ཆུབ་
སེམས་དཔའ་གཟུགས་ལ་གཟུགས་ཡོངས་སུ་ཚོལ་བ་ན་དེ་མི་དམིགས་ཏེ། གཟུགས་མི་སྣང་བར་བྱས་ཤིང་གཟུགས་ཀྱི་ཆོས་ཉིད་ཀྱང་རབ་ཏུ་རྟོགས་པར་བྱས་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་འཚང་རྒྱའོ། །རབ་འབྱོར་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རྣམ་པར་ཤེས་པ་ཡོངས་སུ་ཚོལ་བ་ན་དེ་མི་དམིགས་ཏེ། རྣམ་པར་ཤེས་པ་མི་སྣང་བར་བྱས་
ཤིང་རྣམ་པར་ཤེས་པའི་ཆོས་ཉིད་ཀྱང་རབ་ཏུ་རྟོགས་པར་བྱས་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རབ་ཏུ་བཙལ་ན་མི་དམིགས་ཆོས། །སེམས་ལ་དངོས་པོར་མི་སྣང་
བ། །ཆོས་ཉིད་ལེགས་པར་ཤེས་པ་ཡི། །བློ་ལྡན་བྱང་ཆུབ་འཐོབ་པར་འགྱུར། རབ་འབྱོར་བྱང་ཆུབ་སེམས་དཔའ་གཟུགས་ལ་དངོས་པོ་མེད་པར་མཁས་པ་ནི་གཟུགས་འཇིག་པ་དང་ལྡན་ཞིང་གཟུགས་ཀྱི་ཆོས་ཀྱི་དབྱིངས་ལས་མི་
གཡོ་བར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རབ་འབྱོར་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་དངོས་པོ་མེད་
39-1-141a


པར་མཁས་པ་ནི་རྣམ་པར་ཤེས་པ་འཇིག་པ་དང་ལྡན་ཞིང་རྣམ་པར་ཤེས་པའི་ཆོས་ཀྱི་དབྱིངས་ལས་མི་གཡོ་བར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བློ་ལྡན་དངོས་
པོ་མེད་མཁས་པ། །རྣམ་པར་འཇིག་དང་ལྡན་གྱུར་ཅིང་། །ཆོས་ཀྱི་དབྱིངས་ལས་མི་གཡོ་བར། །ཐམས་ཅད་མཁྱེན་པ་ཉིད་འཐོབ་འགྱུར། །རབ་འབྱོར་བྱང་ཆུབ་སེམས་དཔས་གཟུགས་ལ་དོན་དང་བྲལ་བ་དང་། དོན་མེད་པ་དང་། དོན་ཆེན་
པོར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་
པར་ཤེས་པ་ལ་དོན་དང་བྲལ་བ་དང་དོན་མེད་པ་དང་། དོན་ཆེན་པོར་ཡང་དག་པ་ཇི་ལྟ་བ་བཞིན་དུ་ཤེས་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །དོན་བྲལ་བ་དང་དོན་མེད་དང་། །དོན་ཆེ་
བ་ཡི་དོན་དུ་ནི། །ཤེས་ནས་བྱང་ཆུབ་སེམས་དཔའ་རྣམས། །བྱང་ཆུབ་ཆེན་པོ་འཐོབ་པར་འགྱུར། །རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་གཟུགས་ལ་རྣམ་པར་རྟོག་པའི་འདོད་ཆགས་དང་། རབ་ཏུ་རྟོག་པའི་འདོད་
ཆགས་དང་། རྣམ་པར་རྟོག་པའི་འདོད་ཆགས་དང་། འདོད་ཆགས་དང་། འདོད་ཆགས་ཆེན་པོ་དང་། འདོད་ཆགས་ལྔ་ཡོངས་སུ་ཤེས་པར་བྱས་ཏེ། ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་
ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རྣམ་པར་རྟོག་པའི་འདོད་ཆགས་དང་། རབ་ཏུ་རྟོག་པའི་འདོད་ཆགས་དང་། རྣམ་པར་རྟོག་པའི་འདོད་ཆགས་དང་། འདོད་ཆགས་དང་འདོད་ཆགས་ཆེན་པོ་དང་འདོད་ཆགས་
ལྔ་ཡོངས་སུ་ཤེས་པར་བྱས་ཏེ་ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་འདོད་ཆགས་ལྔ་པོ་འདི་དག་ཡོངས་སུ་སྤངས་ནས་གཟུགས་ཀྱི་རང་བཞིན་མི་དམིགས་སོ། །གཟུགས་ཀྱི་རང་བཞིན་མི་དམིགས་
39-1-141b


པས་གཟུགས་ལ་གཟུགས་སུ་མི་དམིགས་སོ། །གཟུགས་ལ་གཟུགས་སུ་མི་དམིགས་པས་གཟུགས་ལ་གཟུགས་དམིགས་ཏེ། གང་གཟུགས་ལ་གཟུགས་དམིགས་པ་དེ་ཉིད་གཟུགས་ལ་གཟུགས་མི་དམིགས་པའོ། །དེ་གཟུགས་མི་
དམིགས་པ་དེས་གཟུགས་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་
པ་ལ་འདོད་ཆགས་ལྔ་པོ་འདི་དག་ཡོངས་སུ་སྤངས་ནས་རྣམ་པར་ཤེས་པའི་རང་བཞིན་མི་དམིགས་སོ། །རྣམ་པར་ཤེས་པའི་རང་བཞིན་མི་དམིགས་པས་རྣམ་པར་ཤེས་པར་མི་དམིགས་སོ། །རྣམ་པར་ཤེས་པ་ལ་རྣམ་པར་ཤེས་པར་མི་དམིགས་པས་
རྣམ་པར་ཤེས་པ་ལ་རྣམ་པར་ཤེས་པར་མི་དམིགས་ཏེ། གང་རྣམ་པར་ཤེས་པ་ལ་རྣམ་པར་ཤེས་པ་དམིགས་པ་དེ་ཉིད་རྣམ་པར་ཤེས་པ་ལ་རྣམ་པར་ཤེས་པ་མི་དམིགས་པའོ། །དེ་ནས་རྣམ་པར་ཤེས་པ་དམིགས་པ་མི་དམིགས་པ་དེས་རྣམ་པར་ཤེས་པ་རྣམ་པ་ཐམས་
ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔའ་གཟུགས་ལ་རྣམ་པར་རྟོག་པ་དང་། རྣམ་པར་དཔྱོད་པའི་ཞེ་སྡང་དང་། རབ་ཏུ་རྟོག་པ་དང་། རྣམ་པར་དཔྱོད་
པའི་ཞེ་སྡང་དང་། རྣམ་པར་རྟོག་པ་དང་། རྣམ་པར་དཔྱོད་པའི་ཞེ་སྡང་དང་། ཞེ་སྡང་དང་། ཞེ་སྡང་ཆེན་པོ་དང་། ཞེ་སྡང་ལྔ་ཡོངས་སུ་ཤེས་པར་བྱས་ཏེ་ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། 
འདུ་བྱེད་རྣམས་དང་། རྣམ་པར་ཤེས་པ་ལ་རྣམ་པར་རྟོག་པ་དང་། རྣམ་པར་དཔྱོད་པའི་ཞེ་སྡང་དང་། རབ་ཏུ་རྟོག་པ་དང་། རྣམ་པར་དཔྱོད་པའི་ཞེ་སྡང་དང་། རྣམ་པར་རྟོག་པ་དང་། རྣམ་པར་དཔྱོད་པའི་ཞེ་སྡང་དང་། ཞེ་སྡང་དང་། ཞེ་སྡང་
ཆེན་པོ་དང་། ཞེ་སྡང་ལྔ་ཡོངས་སུ་ཤེས་པར་བྱས་ཏེ་ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་ཞེ་སྡང་ལྔ་པོ་འདི་དག་ཡོངས་སུ་སྤངས་ནས་གཟུགས་ཀྱི་རང་བཞིན་མི་དམིགས་སོ། །གཟུགས་ཀྱི་རང་བཞིན་
39-1-142a


མི་དམིགས་པས་གཟུགས་ལ་གཟུགས་སུ་མི་དམིགས་སོ། །གཟུགས་ལ་གཟུགས་སུ་མི་དམིགས་པས་གཟུགས་ལ་གཟུགས་དམིགས་ཏེ། གང་གཟུགས་ལ་གཟུགས་དམིགས་པ་དེ་ཉིད་གཟུགས་ལ་གཟུགས་
མི་དམིགས་པའོ། །དེ་གཟུགས་དམིགས་པ་མི་དམིགས་པ་དེས་གཟུགས་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་
དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཞེ་སྡང་ལྔ་པོ་འདི་དག་ཡོངས་སུ་སྤངས་ནས་རྣམ་པར་ཤེས་པའི་རང་བཞིན་མི་དམིགས་སོ། །རྣམ་པར་ཤེས་པའི་རང་བཞིན་མི་དམིགས་པས་རྣམ་པར་ཤེས་
པ་ལ་རྣམ་པར་ཤེས་པར་མི་དམིགས་སོ། །རྣམ་པར་ཤེས་པ་ལ་རྣམ་པར་ཤེས་པ་མི་དམིགས་པས་རྣམ་པར་ཤེས་པ་ལ་རྣམ་པར་ཤེས་པ་དམིགས་ཏེ། གང་རྣམ་པར་ཤེས་པ་ལ་རྣམ་པར་ཤེས་པ་དམིགས་པ་དེ་ཉིད་རྣམ་པར་ཤེས་པ་
ལ་རྣམ་པར་ཤེས་པ་མི་དམིགས་པའོ། །དེ་རྣམ་པར་ཤེས་པ་དམིགས་པ་མི་དམིགས་པ་དེས་རྣམ་པར་ཤེས་པ་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་
ངོ་། །རབ་འབྱོར་བྱང་ཆུབ་སེམས་དཔའ་གཟུགས་ལ་འཁྲུལ་པའི་གཏི་མུག་དང་། འཁྲུལ་པའི་རྒྱུའི་གཏི་མུག་དང་། མི་འཁྲུལ་པའི་རྒྱུའི་གཏི་མུག་དང་། གཏི་མུག་དང་། གཏི་མུག་ཆེན་པོ་དང་། གཏི་མུག་ལྔ་ཡོངས་
སུ་ཤེས་པར་བྱས་ཏེ་ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་འཁྲུལ་པའི་གཏི་མུག་དང་། འཁྲུལ་པའི་རྒྱུའི་གཏི་མུག་དང་། 
མི་འཁྲུལ་པའི་རྒྱུའི་གཏི་མུག་དང་། གཏི་མུག་དང་། གཏི་མུག་ཆེན་པོ་དང་། གཏི་མུག་ལྔ་ཡོངས་སུ་ཤེས་པར་བྱས་ཏེ་ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་གཏི་མུག་ལྔ་པོ་
39-1-142b


འདི་དག་ཡོངས་སུ་སྤངས་ནས་གཟུགས་ཀྱི་རང་བཞིན་མི་དམིགས་སོ། །གཟུགས་ཀྱི་རང་བཞིན་མི་དམིགས་པས་གཟུགས་ལ་གཟུགས་སུ་མི་དམིགས་སོ། །གཟུགས་ལ་གཟུགས་སུ་མི་དམིགས་པས་གཟུགས་ལ་
གཟུགས་དམིགས་ཏེ། གང་གཟུགས་ལ་གཟུགས་དམིགས་པ་དེ་ཉིད་གཟུགས་ལ་གཟུགས་མི་དམིགས་པའོ། །དེ་གཟུགས་དམིགས་པ་མི་དམིགས་པ་དེས་གཟུགས་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། 
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་གཏི་མུག་ལྔ་པོ་འདི་དག་ཡོངས་སུ་
སྤངས་ནས་རྣམ་པར་ཤེས་པའི་རང་བཞིན་མི་དམིགས་སོ། །རྣམ་པར་ཤེས་པའི་རང་བཞིན་མི་དམིགས་པས་རྣམ་པར་ཤེས་པ་རྣམ་པར་ཤེས་པར་མི་དམིགས་སོ། །རྣམ་པར་ཤེས་པ་ལ་རྣམ་པར་ཤེས་པར་མི་དམིགས་པས་རྣམ་པར་
ཤེས་པ་ལ་རྣམ་པར་ཤེས་པ་དམིགས་ཏེ། གང་རྣམ་པར་ཤེས་པ་ལ་རྣམ་པར་ཤེས་པ་དམིགས་པ་དེ་ཉིད་རྣམ་པར་ཤེས་པ་ལ་རྣམ་པར་ཤེས་པ་མི་དམིགས་པའོ། །དེ་རྣམ་པར་ཤེས་པ་དམིགས་པ་མི་དམིགས་པ་དེས་
རྣམ་པར་ཤེས་པ་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔས་གཟུགས་ལ་མང་དུ་ཐོས་པའི་ང་རྒྱལ་དང་། 
མངོན་པར་མཐོ་བའི་ང་རྒྱལ་དང་། མངོན་པའི་ང་རྒྱལ་དང་། ང་རྒྱལ་དང་། ང་རྒྱལ་ཆེན་པོ་དང་། ང་རྒྱལ་ལྔ་ཡོངས་སུ་ཤེས་པར་བྱས་ཏེ་ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་
རྣམས་དང་། རྣམ་པར་ཤེས་པ་ལ་མང་དུ་ཐོས་པའི་ང་རྒྱལ་དང་། མངོན་པར་མཐོ་བའི་ང་རྒྱལ་དང་། མངོན་པའི་ངའི་ང་རྒྱལ་དང་། ང་རྒྱལ་དང་། ང་རྒྱལ་ཆེན་པོ་དང་། ང་རྒྱལ་ལྔ་ཡོངས་སུ་ཤེས་པར་བྱས་ཏེ་ཡོངས་སུ་སྤང་བར་བྱའོ། །
39-1-143a


རབ་འབྱོར་བྱང་ཆུབ་སེམས་དཔས་གཟུགས་ལ་ང་རྒྱལ་ལྔ་པོ་འདི་དག་ཡོངས་སུ་སྤངས་ནས་གཟུགས་ཀྱི་རང་བཞིན་མི་དམིགས་སོ། །གཟུགས་ཀྱི་རང་བཞིན་མི་དམིགས་པས་གཟུགས་ལ་གཟུགས་སུ་མི་དམིགས་སོ། །
གཟུགས་ལ་གཟུགས་སུ་མི་དམིགས་པས་གཟུགས་ལ་གཟུགས་དམིགས་ཏེ། གང་གཟུགས་ལ་གཟུགས་དམིགས་པ་དེ་ཉིད་གཟུགས་ལ་གཟུགས་མི་དམིགས་པའོ། །དེ་གཟུགས་དམིགས་པ་མི་དམིགས་པ་དེས་གཟུགས་རྣམ་
པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ང་
རྒྱལ་ལྔ་པོ་འདི་དག་ཡོངས་སུ་སྤངས་ནས་རྣམ་པར་ཤེས་པའི་རང་བཞིན་མི་དམིགས་སོ། །རྣམ་པར་ཤེས་པའི་རང་བཞིན་མི་དམིགས་པས་རྣམ་པར་ཤེས་པ་ལ་རྣམ་པར་ཤེས་པར་མི་དམིགས་སོ། །རྣམ་པར་ཤེས་པ་ལ་རྣམ་པར་
ཤེས་པར་མི་དམིགས་པས་རྣམ་པར་ཤེས་པ་ལ་རྣམ་པར་ཤེས་པ་དམིགས་ཏེ། གང་རྣམ་པར་ཤེས་པ་ལ་རྣམ་པར་ཤེས་པ་དམིགས་པ་དེ་ཉིད་རྣམ་པར་ཤེས་པ་ལ་རྣམ་པར་ཤེས་པ་མི་དམིགས་པའོ། །དེ་རྣམ་པར་ཤེས་པ་དམིགས་པ་
མི་དམིགས་པ་དེས་རྣམ་པར་ཤེས་པ་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔས་གཟུགས་ལ་རང་བཞིན་ལ་ཕྱིན་ཅི་
ལོག་གི་ལྟ་བ་དང་། ཡོད་དོ་སྙམ་པའི་ལྟ་བ་དང་། སྐུར་བ་འདེབས་པའི་ལྟ་བ་དང་། ལྟ་བ་དང་། ལྟ་བ་ཆེན་པོ་དང་། ལྟ་བ་ལྔ་ཡོངས་སུ་ཤེས་པར་བྱས་ཏེ་ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། 
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རང་བཞིན་ལ་ཕྱིན་ཅི་ལོག་པའི་ལྟ་བ་དང་། ཡོད་དོ་སྙམ་པའི་ལྟ་བ་དང་། སྐུར་པ་འདེབས་པའི་ལྟ་བ་དང་། ལྟ་བ་དང་ལྟ་བ་ཆེན་པོ་དང་། ལྟ་བ་ལྔ་ཡོངས་སུ་ཤེས་པར་བྱས་ཏེ་ཡོངས་
39-1-143b


སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་ལྟ་བ་ལྔ་པོ་འདི་དག་ཡོངས་སུ་སྤངས་ནས་གཟུགས་ཀྱི་རང་བཞིན་མི་དམིགས་སོ། །གཟུགས་ཀྱི་རང་བཞིན་མི་དམིགས་པས་གཟུགས་ལ་གཟུགས་སུ་མི་དམིགས་སོ། །
གཟུགས་ལ་གཟུགས་སུ་མི་དམིགས་པས་གཟུགས་ལ་གཟུགས་དམིགས་ཏེ་གང་གཟུགས་ལ་གཟུགས་དམིགས་པ་དེ་ཉིད་གཟུགས་ལ་གཟུགས་མི་དམིགས་པའོ། །དེ་གཟུགས་དམིགས་པ་མི་དམིགས་པ་དེས་གཟུགས་རྣམ་པ་ཐམས་ཅད་དུ་
ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ལྟ་བ་ལྔ་པོ་འདི་དག་ཡོངས་སུ་
སྤངས་ནས་རྣམ་པར་ཤེས་པའི་རང་བཞིན་མི་དམིགས་སོ། །རྣམ་པར་ཤེས་པའི་རང་བཞིན་མི་དམིགས་པས་རྣམ་པར་ཤེས་པ་ལ་རྣམ་པར་ཤེས་པར་མི་དམིགས་སོ། །རྣམ་པར་ཤེས་པ་ལ་རྣམ་པར་ཤེས་པར་མི་དམིགས་པས་
རྣམ་པར་ཤེས་པ་ལ་རྣམ་པར་ཤེས་པ་དམིགས་ཏེ། གང་རྣམ་པར་ཤེས་པ་ལ་རྣམ་པར་ཤེས་པར་དམིགས་པ་དེ་ཉིད་རྣམ་པར་ཤེས་པ་ལ་རྣམ་པར་ཤེས་པ་མི་དམིགས་པའོ། །དེ་རྣམ་པར་ཤེས་པ་དམིགས་པ་མི་དམིགས་པ་དེས་
རྣམ་པར་ཤེས་པ་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔས་གཟུགས་དང་ཆོས་ལ་ཡིད་གཉིས་ཟ་བ་དང་། 
འགྲོ་བ་དང་སྡུག་བསྔལ་ལ་ཡིད་གཉིས་ཟ་བ་དང་མྱ་ངན་ལས་འདས་པ་དང་སངས་རྒྱས་དང་བྱང་ཆུབ་སེམས་དཔའ་ལ་ཡིད་གཉིས་ཟ་བ་དང་། ཡིད་གཉིས་ཟ་བ་དང་། ཡིད་གཉིས་ཟ་བ་ཆེན་པོ་དང་། ཡིད་གཉིས་ཟ་བ་ལྔ་ཡོངས་སུ་ཤེས་
པར་བྱས་ཏེ། ཡོངས་སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཆོས་ལ་ཡིད་གཉིས་ཟ་བ་དང་། འགྲོ་བ་དང་། སྡུག་བསྔལ་ལ་ཡིད་གཉིས་ཟ་བ་
39-1-144a


དང་མྱ་ངན་ལས་འདས་པ་དང་སངས་རྒྱས་དང་བྱང་ཆུབ་སེམས་དཔའ་ལ་ཡིད་གཉིས་ཟ་བ་དང་ཡིད་གཉིས་ཟ་བ་དང་ཡིད་གཉིས་ཟ་བ་ཆེན་པོ་དང་། ཡིད་གཉིས་ཟ་བ་ལྔ་ཡོངས་སུ་ཤེས་པར་བྱས་ཏེ་ཡོངས་
སུ་སྤང་བར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་ཡིད་གཉིས་ཟ་བ་འདི་དག་ཡོངས་སུ་སྤངས་ནས་གཟུགས་ཀྱི་རང་བཞིན་མི་དམིགས་སོ། །གཟུགས་ཀྱི་རང་བཞིན་མི་དམིགས་པས་གཟུགས་ལ་གཟུགས་སུ་མི་
དམིགས་སོ། །གཟུགས་ལ་གཟུགས་སུ་མི་དམིགས་པས་གཟུགས་ལ་གཟུགས་སུ་དམིགས་ཏེ། གང་གཟུགས་ལ་གཟུགས་དམིགས་པ་དེ་ཉིད་གཟུགས་ལ་གཟུགས་མི་ད་མིགས་པའོ། །དེ་གཟུགས་དམིགས་པ་མི་དམིགས་པ་དེས་གཟུགས་
རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡིད་
གཉིས་ཟ་བ་ལྔ་པོ་འདི་དག་ཡོངས་སུ་སྤངས་ནས་རྣམ་པར་ཤེས་པའི་རང་བཞིན་མི་དམིགས་སོ། །རྣམ་པར་ཤེས་པའི་རང་བཞིན་མི་དམིགས་པས་རྣམ་པར་ཤེས་པ་ལ་རྣམ་པར་ཤེས་པར་མི་དམིགས་སོ། །རྣམ་པར་ཤེས་པ་ལ་རྣམ་པར་ཤེས་པར་
མི་དམིགས་པས་རྣམ་པར་ཤེས་པ་ལ་རྣམ་པར་ཤེས་པ་དམིགས་ཏེ། གང་རྣམ་པར་ཤེས་པ་ལ་རྣམ་པར་ཤེས་པ་དམིགས་པ་དེ་ཉིད་རྣམ་པར་ཤེས་པ་ལ་རྣམ་པར་ཤེས་པ་མི་དམིགས་པའོ། །དེ་རྣམ་པར་ཤེས་པ་དམིགས་པ་མི་དམིགས་པ་དེས་རྣམ་
པར་ཤེས་པ་རྣམ་པ་ཐམས་ཅད་དུ་ཟིལ་གྱིས་མནན་ནས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་ངོ་། །རབ་འབྱོར་བྱང་ཆུབ་སེམས་དཔའ་གཟུགས་ཡོངས་སུ་ཚོལ་ཞིང་གཟུགས་ཀྱི་ཆོས་སྟོན་ལ་གཟུགས་
ལ་ལུས་དང་ངག་དང་། ཡིད་ཀྱི་ལས་ཡོངས་སུ་སྦྱོང་ཞིང་གཟུགས་དེ་ཇི་ལྟར་བརྗོད་པ་དང་། ཇི་ལྟར་བསྟན་པ་དང་། ཇི་ལྟར་བསྙད་པ་བཞིན་དུ་ཡོངས་སུ་ཚོལ་ཞིང་ཆོས་སྟོན་ཏེ། དེ་ལ་ལུས་དང་། ངག་དང་། ཡིད་ཀྱི་ལས་ཡོངས་སུ་སྦྱོང་བ་
39-1-144b


གཟུགས་ལ་ཉེས་པ་ཡོངས་སུ་ཚོལ་བའི་བྱང་ཆུབ་སེམས་དཔར་རིག་པར་བྱའོ། །གཟུགས་ལ་དམ་པའི་ཆོས་མ་ཡིན་པའི་གཏམ་ཅན་གྱི་བྱང་ཆུབ་སེམས་དཔར་རིག་པར་བྱའོ། །གཟུགས་ལ་ལུས་དང་། ངག་དང་། ཡིད་ཀྱི་ལས་ཡོངས་སུ་མ་
དག་པའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་བྱང་ཆུབ་སེམས་དཔའ་གཟུགས་ཡོངས་སུ་ཚོལ་ཞིང་གཟུགས་ཀྱི་ཆོས་སྟོན་ལ་གཟུགས་ལ་ལུས་དང་། ངག་དང་། ཡིད་ཀྱི་ལས་ཡོངས་སུ་སྦྱོང་ཞིང་གཟུགས་དེ་ལ་ཇི་ལྟར་བརྗོད་
པ་བཞིན་དུ་མ་ཡིན། ཇི་ལྟར་བསྟན་པ་བཞིན་དུ་མ་ཡིན། ཇི་ལྟར་བསྙད་པ་བཞིན་དུ་མ་ཡིན་པར་ཡོངས་སུ་ཚོལ་ཞིང་ཆོས་སྟོན་ཏེ། དེ་ལ་ལུས་དང་། ངག་དང་། ཡིད་ཀྱི་ལས་ཡོངས་སུ་སྦྱོང་ན་གཟུགས་ལ་ལེགས་པར་ཚོལ་བའི་བྱང་ཆུབ་སེམས་
དཔའ་སྟེ། ཡང་དག་པའི་ངག་གི་ལས་ཀྱི་གཏམ་ཅན་གྱི་བྱང་ཆུབ་སེམས་དཔར་རིག་པར་བྱའོ། །གཟུགས་དེ་ལ་ལུས་དང་། ངག་དང་། ཡིད་ཀྱི་ལས་ཡོངས་སུ་དག་པའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་བྱང་ཆུབ་སེམས་དཔའ་ཚོར་བ་དང་། འདུ་ཤེས་
དང་། འདུ་བྱེད་རྣམས་དང་། རྣམ་པར་ཤེས་པ་ཡོངས་སུ་ཚོལ་ཞིང་རྣམ་པར་ཤེས་པའི་ཆོས་སྟོན་ལ། རྣམ་པར་ཤེས་པ་ལ་ལུས་དང་། ངག་དང་། ཡིད་ཀྱི་ལས་ཡོངས་སུ་སྦྱོང་ཞིང་རྣམ་པར་ཤེས་པ་དེ་ཇི་ལྟར་བརྗོད་པ་དང་། ཇི་ལྟར་བསྟན་པ་དང་། ཇི་ལྟར་
བསྙད་པ་བཞིན་དུ་ཡོངས་སུ་ཚོལ་ཞིང་ཆོས་སྟོན་ཏེ། དེ་ལ་ལུས་དང་། ངག་དང་། ཡིད་ཀྱི་ལས་ཡོངས་སུ་སྦྱོང་ན། རྣམ་པར་ཤེས་པ་ལ་ཉེས་པར་ཡོངས་སུ་ཚོལ་བའི་བྱང་ཆུབ་སེམས་དཔར་རིག་པར་བྱའོ། །རྣམ་པར་ཤེས་པ་ལ་དམ་
པའི་ཆོས་མ་ཡིན་པའི་གཏམ་ཅན་གྱི་བྱང་ཆུབ་སེམས་དཔར་རིག་པར་བྱའོ། །རྣམ་པར་ཤེས་པ་ལ་ལུས་དང་། ངག་དང་། ཡིད་ཀྱི་ལས་ཡོངས་སུ་མ་དག་པའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་བྱང་ཆུབ་སེམས་དཔའ་
རྣམ་པར་ཤེས་པ་ཡོངས་སུ་ཚོལ་ཞིང་རྣམ་པར་ཤེས་པའི་ཆོས་སྟོན་ལ། རྣམ་པར་ཤེས་པ་ལ་ལུས་དང་ངག་དང་ཡིད་ཀྱི་ལས་ཡོངས་སུ་སྦྱོང་ཞིང་རྣམ་པར་ཤེས་པ་དེ་ལ་ཇི་ལྟར་བརྗོད་པ་བཞིན་དུ་མ་ཡིན། ཇི་ལྟར་བསྟན་པ་བཞིན་དུ་མ་ཡིན། ཇི་ལྟར་བསྙད་པ་
39-1-145a


བཞིན་དུ་མ་ཡིན་པར་ཡོངས་སུ་ཚོལ་ཞིང་ཆོས་སྟོན་ཏེ། དེ་ལ་ལུས་དང་ངག་དང་། ཡིད་ཀྱི་ལས་ཡོངས་སུ་སྦྱོང་ན་རྣམ་པར་ཤེས་པ་ལ་ལེགས་པར་ཚོལ་བའི་བྱང་ཆུབ་སེམས་དཔའ་སྟེ། ཡང་དག་པའི་ངག་
གི་ལས་ཀྱི་གཏམ་ཅན་གྱི་བྱང་ཆུབ་སེམས་དཔར་རིག་པར་བྱའོ། །རྣམ་པར་ཤེས་པ་དེ་ལ་ལུས་དང་ངག་དང་། ཡིད་ཀྱི་ལས་ཡོངས་སུ་དག་པའི་བྱང་ཆུབ་སེམས་དཔར་རིག་པར་བྱའོ། །རབ་འབྱོར་བྱང་ཆུབ་སེམས་
དཔའ་གཟུགས་ལ་སེམས་མཉམ་པར་གཞག་པར་འདོད་ཅིང་གཟུགས་དེ་ལ་ནང་དུ་མོས་ན། གཟུགས་ལ་མོས་པར་བྱ་བའི་གཟུགས་དང་། མོས་པའི་གཟུགས་གཉིས་དམིགས་པར་འགྱུར་རོ། །དེ་ལ་བྱང་ཆུབ་སེམས་དཔའ་མོས་པའི་གཟུགས་
ལ་མོས་པར་བྱ་བ་ཇི་ལྟ་བ་བཞིན་དུ་སྟོན་ཏམ། མོས་པར་བྱ་བ་ལ་མོས་པ་ཇི་ལྟ་བ་བཞིན་དུ་སྟོན་ན་གཟུགས་ལ་ཡང་དག་པ་མ་ཡིན་པར་སྟོན་པའི་བྱང་ཆུབ་སེམས་དཔར་རིག་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར་མོས་པར་བྱ་བའི་གཟུགས་
ལས་མོས་པའི་གཟུགས་ཀྱི་མཚན་ཉིད་གུད་ན་མེད་དོ། །རབ་འབྱོར་གལ་ཏེ་མོས་པར་བྱ་བའི་གཟུགས་ལས་མོས་པའི་གཟུགས་ཀྱི་མཚན་ཉིད་གུད་ན་ཡོད་ན་ནི་མོས་པར་བྱ་བ་ལ་སེམས་ཅན་མོས་པ་ཐ་དད་པ་རྣམས་དང་། མཚུངས་
པར་ལྟ་བ་ཐ་དད་པར་དམིགས་པར་འགྱུར་ཞིང་རྨི་ལམ་ལ་སོགས་པ་ལ་དམིགས་པ་མེད་པའི་མོས་པས་དམིགས་པར་ཡང་མི་འགྱུར་ལ། བྱིས་པ་སོ་སོའི་སྐྱེ་བོ་རྣམས་ཀྱང་གཟུགས་ལ་དེ་ཁོ་ན་མཐོང་བར་འགྱུར་ཞིང་རྣམ་པར་མི་
རྟོག་པའི་མོས་པ་གྲུབ་པ། རིགས་པ་ལ་ཡང་མོས་པར་བྱ་བའི་གཟུགས་རྗེས་སུ་འཇུག་པར་མི་འགྱུར་བ་ཞིག་ན། རབ་འབྱོར་འདི་ལྟར་མོས་པར་བྱ་བ་ལ་སེམས་ཅན་མོས་པ་ཐ་དད་པ་རྣམས་དང་། མཚུངས་པར་ལྟ་བ་ཐ་དད་པར་མ་
གྱུར་ཅིང་རྨི་ལམ་ལ་སོགས་པ་ལ་ཡང་དམིགས་པ་མེད་པའི་མོས་པ་དམིགས་ལ། བྱིས་པ་སོ་སོའི་སྐྱེ་བོ་རྣམས་ཀྱང་གཟུགས་ལ་དེ་ཁོ་ན་མཐོང་བར་མ་གྱུར་ཏེ། རྣམ་པར་མི་རྟོག་པའི་མོས་པ་གྲུབ་པ། རིགས་པ་ལ་ཡང་མོས་པར་བྱ་བའི་གཟུགས་
39-1-145b


རྗེས་སུ་འཇུག་སྟེ། དེའི་ཕྱིར་བྱང་ཆུབ་སེམས་དཔས་མོས་པའི་གཟུགས་ལས་མོས་པར་བྱ་བའི་གཟུགས་ཀྱི་མཚན་ཉིད་གུད་ན་མེད་པར་བལྟ་བར་བྱའོ། །གཞན་དུ་ན་མོས་པར་བྱ་བའི་གཟུགས་དེ་ཇི་ལྟ་བ་བཞིན་དུ་མཚན་མ་དང་བཅས་པའི་
ལྟ་བའི་མོས་པའི་གཟུགས་ཀྱང་ཡང་དག་པར་བྱུང་བ་ནི་མ་གཏོགས་སོ། །དེ་བས་ན་དོན་གཞན་སྣང་ངོ་། །དེ་ལྟར་མཐོང་བའི་བྱང་ཆུབ་སེམས་དཔས་མོས་པར་བྱ་བའི་གཟུགས་ཀྱི་འདུ་ཤེས་རྣམ་པར་འཇིག་སྟེ། དེ་འདི་སྙམ་དུ་སེམས་
སོ། །མོས་པར་བྱ་བའི་གཟུགས་ཡོད་ན་མོས་པའི་གཟུགས་རིགས་པར་འགྱུར་གྱི། མེད་ན་ནི་མ་ཡིན་པར་རིག་ནས་གཟུགས་ལ་འཁྲུལ་པའི་སེམས་དམིགས་ཏེ། མོས་པའི་གཟུགས་ཀྱི་འདུ་ཤེས་ཀྱང་རྣམ་པར་འཇིག་གོ། །དེ་གཟུགས་
གཉིས་ཀྱི་འདུ་ཤེས་རྣམ་པར་བཤིག་ཅིང་གཟུགས་ཀྱི་འདུ་ཤེས་ཐམས་ཅད་གཤིག་ནས་གཟུགས་ཐམས་ཅད་མི་དམིགས་སོ། །གཟུགས་ཐམས་ཅད་མི་དམིགས་པས་གཟུགས་བས་གཟུགས་ལ་འཁྲུལ་པར་དམིགས་སོ། །
གཟུགས་ལ་འཁྲུལ་པར་དམིགས་པས་གཟུགས་ལ་འཁྲུལ་པའི་རྒྱུ་དམིགས་སོ། །གཟུགས་ལ་འཁྲུལ་པའི་རྒྱུ་དམིགས་པས་གཟུགས་ལ་འཁྲུལ་པ་མེད་པའི་ཆོས་ཡང་དག་པར་སྒྲུབ་བོ། །གཟུགས་ལ་འཁྲུལ་པ་མེད་པའི་
ཆོས་ཡང་དག་པར་སྒྲུབ་པས་གཟུགས་ལ་འཁྲུལ་པ་མེད་པའི་རྒྱུ་དམིགས་སོ། །གཟུགས་ལ་འཁྲུལ་པ་མེད་པའི་རྒྱུ་དམིགས་པས་གཟུགས་ལ་འཁྲུལ་པ་མེད་པའི་ཆོས་ཡང་དག་པར་སྒྲུབ་བོ། །གཟུགས་ལ་འཁྲུལ་པ་མེད་པའི་ཆོས་
ཡང་དག་པར་སྒྲུབ་པས་གཟུགས་ལ་འཁྲུལ་པ་མེད་པའི་རྒྱུ་འཐུན་པའི་ཆོས་ཡང་དག་པར་སྒྲུབ་སྟེ། དེས་གཟུགས་ལ་འཁྲུལ་པ་དང་། འཁྲུལ་པ་མེད་པའི་ཆོས་སྔ་ནས་ཡང་དག་པར་བསྒྲུབས་པ་ཡིན་ནོ། །དེ་གཟུགས་ལ་འཁྲུལ་པ་མེད་པའི་
ཆོས་དང་འཁྲུལ་པ་མེད་པའི་རྒྱུ་འཐུན་པའི་ཆོས་ལ་རྟེན་ནས་སངས་རྒྱས་ཀྱི་ཆོས་ཐམས་ཅད་སྒོམ་མོ། །སེམས་ཅན་རྣམས་ཀྱང་ཡོངས་སུ་སྨིན་པར་བྱེད་དོ། །སངས་རྒྱས་ཀྱི་ཞིང་ཡང་ཡོངས་སུ་སྦྱོང་ངོ་། །མྱུར་དུ་བླ་ན་མེད་པ་ཡང་དག་པར་རྫོགས་
39-1-146a


པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱའོ། །བྱང་ཆུབ་སེམས་དཔའ་གཟུགས་ལ་དེ་ལྟར་སྟོན་ན་ཡང་དག་པར་སྟོན་པ་ཡིན་ནོ། །རབ་འབྱོར་བྱང་ཆུབ་སེམས་དཔའ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་
པ་ལ་སེམས་མཉམ་པར་གཞག་པར་འདོད་ཅིང་རྣམ་པར་ཤེས་པ་དེ་ལ་ནང་དུ་མོས་ན་རྣམ་པར་ཤེས་པ་ལ་མོས་པར་བྱ་བའི་གཟུགས་དང་། མོས་པའི་གཟུགས་གཉིས་དམིགས་པར་འགྱུར་རོ། །དེ་ལ་བྱང་ཆུབ་སེམས་དཔའ་མོས་པའི་རྣམ་པར་
ཤེས་པ་ལ་མོས་པ་ལ་མོས་པར་བྱ་བ་ཇི་ལྟ་བ་བཞིན་དུ་སྟོན་ཏམ། མོས་པར་བྱ་བ་ལ་མོས་པ་ཇི་ལྟ་བ་བཞིན་དུ་སྟོན་ན་རྣམ་པར་ཤེས་པ་ལ་ཡང་དག་པ་མ་ཡིན་པར་སྟོན་པའི་བྱང་ཆུབ་སེམས་དཔར་རིག་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར་མོས་པར་བྱ་
བའི་རྣམ་པར་ཤེས་པ་ལས་མོས་པའི་རྣམ་པར་ཤེས་པའི་མཚན་ཉིད་གུད་ན་མེད་དོ། །རབ་འབྱོར་གལ་ཏེ་མོས་པར་བྱ་བའི་རྣམ་པར་ཤེས་པ་ལས་མོས་པའི་རྣམ་པར་ཤེས་པའི་མཚན་ཉིད་གུད་ན་ཡོད་ན་ནི་མོས་པར་བྱ་བ་ལ་སེམས་ཅན་མོས་པ་ཐ་དད་པ་རྣམས་
དང་། མཚུངས་པར་ལྟ་བ་ཐ་དད་པར་དམིགས་པར་འགྱུར་ཞིང་། རྨི་ལམ་ལ་སོགས་པ་ལ་དམིགས་པ་མེད་པའི་མོས་པ་དམིགས་པར་ཡང་མི་འགྱུར་ལ། བྱིས་པ་སོ་སོའི་སྐྱེ་བོ་རྣམས་ཀྱང་རྣམ་པར་ཤེས་པ་ལ་དེ་ཁོ་ན་མཐོང་བར་ཡང་འགྱུར་ཞིང་། 
རྣམ་པར་མི་རྟོག་པའི་མོས་པ་གྲུབ་པར་རིགས་པ་ལ་ཡང་མོས་པར་བྱ་བའི་རྣམ་པར་ཤེས་པ་རྗེས་སུ་འཇུག་པར་མི་འགྱུར་བ་ཞིག་ན། རབ་འབྱོར་འདི་ལྟར་མོས་པར་བྱ་བ་ལ་སེམས་ཅན་མོས་པ་ཐ་དད་པ་རྣམས་དང་། མཚུངས་པར་ལྟ་བ་ཐ་དད་པར་
མ་གྱུར་ཅིང་། རྨི་ལམ་ལ་སོགས་པ་ལ་ཡང་དམིགས་པ་མེད་པའི་མོས་པ་དེ་དམིགས་ལ། བྱིས་པ་སོ་སོའི་སྐྱེ་བོ་རྣམས་ཀྱང་རྣམ་པར་ཤེས་པ་ལ་དེ་ཁོ་ན་མཐོང་བར་མ་གྱུར་ཏེ། རྣམ་པར་མི་རྟོག་པའི་མོས་པ་གྲུབ་པ། རིག་པ་ལ་
ཡང་མོས་པར་བྱ་བའི་རྣམ་པར་ཤེས་པ་རྗེས་སུ་འཇུག་སྟེ། དེའི་ཕྱིར་བྱང་ཆུབ་སེམས་དཔས་མོས་པའི་རྣམ་པར་ཤེས་པ་ལས་མོས་པར་བྱ་བའི་རྣམ་པར་ཤེས་པའི་མཚན་ཉིད་གུད་ན་མེད་པར་བལྟ་བར་བྱའོ། །གཞན་དུ་ན་
39-1-146b


མོས་པར་བྱ་བའི་རྣམ་པར་ཤེས་པ་དེ་ཇི་ལྟ་བ་བཞིན་དུ་མཚན་མ་དང་བཅས་པའི་ལྟ་བའི་མོས་པའི་རྣམ་པར་ཤེས་པ་ཡང་ཡང་དག་པར་བྱུང་བ་ནི་མ་གཏོགས་སོ། །དེ་བས་ན་དོན་གཞན་སྣང་ངོ་། །དེ་ལྟར་མཐོང་བའི་བྱང་ཆུབ་སེམས་དཔའ་མོས་
པར་བྱ་བའི་རྣམ་པར་ཤེས་པའི་འདུ་ཤེས་རྣམ་པར་འཇིག་སྟེ། དེ་འདི་སྙམ་དུ་སེམས་སོ། །མོས་པར་བྱ་བའི་རྣམ་པར་ཤེས་པ་ཡོད་ན་མོས་པའི་རྣམ་པར་ཤེས་པ་ཡང་རིགས་པར་འགྱུར་གྱི། མེད་ན་ནི་མ་ཡིན་པར་རིག་ནས་མོས་པའི་རྣམ་
པར་ཤེས་པ་ལ་མོས་པའི་རྣམ་པར་ཤེས་པའི་འདུ་ཤེས་ཀྱང་རྣམ་པར་འཇིག་གོ། །དེ་རྣམ་པར་ཤེས་པ་གཉིས་ཀྱི་འདུ་ཤེས་རྣམ་པར་བཤིག་ནས་རྣམ་པར་ཤེས་པ་ཐམས་ཅད་མི་དམིགས་སོ། །རྣམ་པར་ཤེས་པ་ཐམས་ཅད་མི་དམིགས་པས་
རྣམ་པར་ཤེས་པ་ལ་འཁྲུལ་པར་དམིགས་སོ། །རྣམ་པར་ཤེས་པ་ལ་འཁྲུལ་པར་དམིགས་པས་རྣམ་པར་ཤེས་པ་ལ་འཁྲུལ་པའི་རྒྱུ་དམིགས་སོ། །རྣམ་པར་ཤེས་པ་ལ་འཁྲུལ་པའི་རྒྱུ་དམིགས་པས་རྣམ་པར་ཤེས་པ་ལ་འཁྲུལ་པ་མེད་པའི་
ཆོས་ཡང་དག་པར་སྒྲུབ་བོ། །རྣམ་པར་ཤེས་པ་ལ་འཁྲུལ་པ་མེད་པའི་ཆོས་ཡང་དག་པར་སྒྲུབ་པས་རྣམ་པར་ཤེས་པ་ལ་འཁྲུལ་པ་མེད་པའི་རྒྱུ་འཐུན་པའི་ཆོས་ཡང་དག་པར་སྒྲུབ་སྟེ། དེས་རྣམ་པར་ཤེས་པ་ལ་འཁྲུལ་པ་དང་། འཁྲུལ་པ་
མེད་པའི་ཆོས་སྔ་ནས་ཡང་དག་པར་བསྒྲུབས་པ་ཡིན་ནོ། །དེ་རྣམ་པར་ཤེས་པ་ལ་འཁྲུལ་པ་མེད་པའི་ཆོས་དང་། འཁྲུལ་པ་མེད་པའི་རྒྱུ་འཐུན་པའི་ཆོས་ལ་བརྟེན་ནས་སངས་རྒྱས་ཀྱི་ཆོས་ཐམས་ཅད་སྒོམ་མོ། །སེམས་ཅན་རྣམས་ཀྱང་
ཡོངས་སུ་སྨིན་པར་བྱེད་དོ། །སངས་རྒྱས་ཀྱི་ཞིང་ཡང་ཡོངས་སུ་སྦྱོང་ངོ་། །མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱའོ། །བྱང་ཆུབ་སེམས་དཔའ་རྣམ་པར་ཤེས་པ་ལ་དེ་ལྟར་སྟོན་ན་
ཡང་དག་པར་སྟོན་པར་རིག་པར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་དམ་པའི་ཆོས་ཉེ་བར་བསྒྲུབ་པའི་བྱམས་པ་དང་། འཇིག་རྟེན་པའི་བདེ་བ་ཉེ་བར་བསྒྲུབ་པའི་བྱམས་པ་དང་། འཇིག་རྟེན་ལས་འདས་
39-1-147a


པའི་བདེ་བ་ཉེ་བར་བསྒྲུབ་པའི་བྱམས་པ་དང་། བྱམས་པ་དང་། བྱམས་པ་ཆེན་པོ་དང་། བྱམས་པ་རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་འདུ་ཤེས་དང་། འདུ་བྱེད་རྣམས་དང་། 
རྣམ་པར་ཤེས་པ་ལ་དམ་པའི་ཆོས་ཉེ་བར་བསྒྲུབ་པའི་བྱམས་པ་དང་། འཇིག་རྟེན་པའི་བདེ་བ་ཉེ་བར་བསྒྲུབ་པའི་བྱམས་པ་དང་། འཇིག་རྟེན་ལས་འདས་པའི་བདེ་བ་ཉེ་བར་བསྒྲུབ་པའི་བྱམས་པ་དང་། བྱམས་པ་དང་། བྱམས་པ་ཆེན་
པོ་དང་། བྱམས་པ་རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་མི་སྡུད་པའི་སྙིང་རྗེ་དང་། འདུ་བའི་སྙིང་རྗེ་དང་། འབྲལ་བའི་སྙིང་རྗེ་དང་། སྙིང་རྗེ་དང་། སྙིང་རྗེ་ཆེན་པོ་དང་། སྙིང་རྗེ་རྣམ་པ་
ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མི་སྡུད་པའི་སྙིང་རྗེ་དང་། འདུ་བའི་སྙིང་རྗེ་དང་། འབྲལ་བའི་སྙིང་རྗེ་དང་། སྙིང་རྗེ་དང་། སྙིང་རྗེ་ཆེན་པོ་དང་། 
སྙིང་རྗེ་རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་དམ་པའི་ཆོས་ལ་དད་པས་བརླན་པ་དང་། ཕན་འདོགས་པ་དང་། རྗེས་སུ་ཡི་རང་བའི་དགའ་བ་དང་། འཇིག་རྟེན་པའི་བདེ་བས་བརླན་པ་དང་། 
ཕན་འདོགས་པ་དང་། རྗེས་སུ་ཡི་རང་བའི་དགའ་བ་དང་། འཇིག་རྟེན་ལས་འདས་པའི་བདེ་བས་བརླན་པ་དང་། ཕན་འདོགས་པ་དང་། རྗེས་སུ་ཡི་རང་བའི་དགའ་བ་དང་། དགའ་བ་དང་། དགའ་བ་ཆེན་པོ་དང་། དགའ་བ་རྣམ་པ་ལྔ་བསྒོམ་
པར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་དམ་པའི་ཆོས་ལ་དད་པས་བརླན་པ་དང་། ཕན་འདོགས་པ་དང་། རྗེས་སུ་ཡི་རང་བའི་དགའ་བ་དང་། འཇིག་རྟེན་
པའི་བདེ་བས་བརླན་པ་དང་། ཕན་འདོགས་པ་དང་། རྗེས་སུ་ཡི་རང་བའི་དགའ་བ་དང་། འཇིག་རྟེན་ལས་འདས་པའི་བདེ་བས་བརླན་པ་དང་། ཕན་འདོགས་པ་དང་། རྗེས་སུ་ཡི་རང་བའི་དགའ་བ་དང་། དགའ་བ་དང་། དགའ་བ་ཆེན་པོ་དང་། དགའ་བ་རྣམ་པ་ལྔ་
39-1-147b


བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་ལྟ་བ་ངན་པ་དང་། ཀུན་ནས་ཉོན་མོངས་པ་མེད་པ། བརྟུལ་བའི་བཏང་སྙོམས་དང་། ཉེས་པ་ཐམས་ཅད་ཡོངས་སུ་སྤང་བ་དང་། ཀུན་ནས་ཉོན་མོངས་པ་བརྟུལ་བའི་བཏང་སྙོམས་དང་། 
ཡོན་ཏན་ཐམས་ཅད་ཡོངས་སུ་བསྡུ་བ་དང་། ཀུན་ནས་ཉོན་མོངས་པ་མེད་པའི་བརྟུལ་བའི་བཏང་སྙོམས་དང་། བཏང་སྙོམས་དང་། བཏང་སྙོམས་ཆེན་པོ་དང་། བཏང་སྙོམས་རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་
ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ལྟ་བ་ངན་པ་དང་། ཀུན་ནས་ཉོན་མོངས་པ་མེད་པ་བརྟུལ་བའི་བཏང་སྙོམས་དང་། ཉེས་པ་ཐམས་ཅད་ཡོངས་སུ་སྤང་བ་དང་། ཀུན་ནས་ཉོན་མོངས་པ་མེད་པ་བརྟུལ་བའི་བཏང་སྙོམས་དང་། ཡོན་ཏན་
ཐམས་ཅད་ཡོངས་སུ་བསྡུ་བ་དང་། ཀུན་ནས་ཉོན་མོངས་པ་མེད་པ་བཏུལ་བའི་བཏང་སྙོམས་དང་། བཏང་སྙོམས་དང་། བཏང་སྙོམས་ཆེན་པོ་དང་། བཏང་སྙོམས་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔའ་སྦྱིན་པའི་ཕ་རོལ་དུ་ཕྱིན་པ་ལ་བརྩོན་པས་
གཟུགས་ལ་དམ་བཅས་པའི་སྦྱིན་པ་དང་། ཟང་ཟིང་དང་མི་འཇིགས་པ་བསྒྲུབ་པའི་སྦྱིན་པ་དང་། ཆོས་བསྒྲུབ་པའི་སྦྱིན་པ་དང་། སྦྱིན་པ་དང་། སྦྱིན་པ་ཆེན་པོ་དང་། སྦྱིན་པ་རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔའ་སྦྱིན་པའི་
ཕ་རོལ་དུ་ཕྱིན་པ་ལ་བརྩོན་པས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་དམ་བཅས་པའི་སྦྱིན་པ་དང་། ཟང་ཟིང་དང་། མི་འཇིགས་པ་བསྒྲུབ་པའི་སྦྱིན་པ་དང་། ཆོས་བསྒྲུབ་པའི་སྦྱིན་པ་དང་། སྦྱིན་པ་དང་། 
སྦྱིན་པ་ཆེན་པོ་དང་། སྦྱིན་པ་རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔའ་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་བརྩོན་པས་གཟུགས་ལ་ཡང་དག་པར་བླངས་པ་དང་བརྡ་ཅན་གྱི་སྡོམ་པའི་ཚུལ་ཁྲིམས་དང་། བསམ་གཏན་གྱི་སྡོམ་
པའི་ཚུལ་ཁྲིམས་དང་། ཟག་པ་མེད་པའི་སྡོམ་པའི་ཚུལ་ཁྲིམས་དང་། ཚུལ་ཁྲིམས་དང་། ཚུལ་ཁྲིམས་ཆེན་པོ་དང་། ཚུལ་ཁྲིམས་རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔའ་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་བརྩོན་པས་ཚོར་བ་དང་། 
39-1-148a


འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡང་དག་པར་བླངས་པ་དང་བརྡ་ཅན་གྱི་སྡོམ་པའི་ཚུལ་ཁྲིམས་དང་། བསམ་གཏན་གྱི་སྡོམ་པའི་ཚུལ་ཁྲིམས་དང་། ཟག་པ་མེད་པའི་སྡོམ་པའི་ཚུལ་ཁྲིམས་དང་། ཚུལ་ཁྲིམས་
དང་། ཚུལ་ཁྲིམས་ཆེན་པོ་དང་། ཚུལ་ཁྲིམས་རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔའ་བཟོད་པའི་ཕ་རོལ་དུ་ཕྱིན་པ་ལ་བརྩོན་པས་གཟུགས་ལ་སེམས་ཅན་གནོད་པ་བྱེད་པ་ལ་ཇི་མི་སྙམ་པའི་བཟོད་པ་དང་། སྡུག་བསྔལ་
དང་དུ་ལེན་པའི་བཟོད་པ་དང་། ཆོས་ལ་ངེས་པར་སེམས་པའི་བཟོད་པ་དང་། བཟོད་པ་དང་། བཟོད་པ་ཆེན་པོ་དང་། བཟོད་པ་རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔའ་བཟོད་པའི་ཕ་རོལ་དུ་ཕྱིན་པ་ལ་བརྩོན་པས་ཚོར་བ་དང་། 
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སེམས་ཅན་གནོད་པ་བྱེད་པ་ལ་ཇི་མི་སྙམ་པའི་བཟོད་པ་དང་། སྡུག་བསྔལ་དང་དུ་ལེན་པའི་བཟོད་པ་དང་། ཆོས་ལ་ངེས་པར་སེམས་པའི་བཟོད་པ་དང་། བཟོད་པ་དང་། བཟོད་པ་
ཆེན་པོ་དང་། བཟོད་པ་རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔའ་བརྩོན་འགྲུས་ཀྱི་ཕ་རོལ་དུ་ཕྱིན་པ་ལ་བརྩོན་པས་གཟུགས་ལ་ལུང་ནོད་པ་དང་། ཁ་ཏོན་བྱ་བ་སེམས་པའི་བརྩོན་འགྲུས་དང་། ཉེས་པ་ཐམས་ཅད་ཡོངས་
སུ་སྤང་བའི་བརྩོན་འགྲུས་དང་། ཡོན་ཏན་ཐམས་ཅད་ཡོངས་སུ་བསྡུ་བའི་བརྩོན་འགྲུས་དང་། བརྩོན་འགྲུས་དང་། བརྩོན་འགྲུས་ཆེན་པོ་དང་། བརྩོན་འགྲུས་རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔའ་བརྩོན་
འགྲུས་ཀྱི་ཕ་རོལ་དུ་ཕྱིན་པ་ལ་བརྩོན་པས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ལུང་ནོད་པ་དང་། ཁ་ཏོན་བྱ་བ་སེམས་པའི་བརྩོན་འགྲུས་དང་། ཉེས་པ་ཐམས་ཅད་ཡོངས་སུ་སྤང་བའི་བརྩོན་འགྲུས་དང་། 
ཡོན་ཏན་ཐམས་ཅད་ཡོངས་སུ་བསྡུ་བའི་བརྩོན་འགྲུས་དང་། བརྩོན་འགྲུས་དང་། བརྩོན་འགྲུས་ཆེན་པོ་དང་། བརྩོན་འགྲུས་རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔའ་བསམ་གཏན་གྱི་ཕ་རོལ་དུ་ཕྱིན་པ་ལ་བརྩོན་པས་གཟུགས་
39-1-148b


ལ་ཚིག་འབྲུ་ལ་ལྟོས་པའི་དགེ་བའི་བསམ་གཏན་དང་། ཚིག་འབྲུ་ལ་མི་ལྟོས་པའི་དགེ་བ་གདོད་མ་ནས་དག་པའི་འཇིག་རྟེན་པའི་བསམ་གཏན་དང་། འཇིག་རྟེན་ལས་འདས་པའི་བསམ་གཏན་དང་། བསམ་གཏན་དང་། བསམ་གཏན་ཆེན་པོ་དང་། བསམ་གཏན་
རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔའ་བསམ་གཏན་གྱི་ཕ་རོལ་དུ་ཕྱིན་པ་ལ་བརྩོན་པས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཚིག་འབྲུ་ལ་ལྟོས་པའི་དགེ་བའི་བསམ་གཏན་དང་། ཚིག་འབྲུ་ལ་མི་ལྟོས་པའི་དགེ་བ་གདོད་
མ་ནས་དག་པའི་འཇིག་རྟེན་པའི་བསམ་གཏན་དང་། འཇིག་རྟེན་ལས་འདས་པའི་བསམ་གཏན་དང་། བསམ་གཏན་དང་། བསམ་གཏན་ཆེན་པོ་དང་། བསམ་གཏན་རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་དུ་ཕྱིན་པ་ལ་བརྩོན་
པས་གཟུགས་ལ་ཚིག་འབྲུ་ལ་ལྟོས་པའི་བསམ་གཏན་ལ་བརྟེན་པའི་ཤེས་རབ་དང་། ཚིག་འབྲུ་ལ་མི་ལྟོས་པའི་དགེ་བ་གདོད་མ་ནས་དག་པའི་འཇིག་རྟེན་པའི་བསམ་གཏན་ལ་བརྟེན་པའི་ཤེས་རབ་དང་། འཇིག་རྟེན་ལས་འདས་པའི་བསམ་གཏན་ལ་བརྟེན་པའི་ཤེས་རབ་
དང་། ཤེས་རབ་དང་། ཤེས་རབ་ཆེན་པོ་དང་། ཤེས་རབ་རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་དུ་ཕྱིན་པ་ལ་བརྩོན་པས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཚིག་འབྲུ་ལ་ལྟོས་པའི་
དགེ་བའི་བསམ་གཏན་ལ་བརྟེན་པའི་ཤེས་རབ་དང་། ཚིག་འབྲུ་ལ་མི་ལྟོས་པའི་དགེ་བ་གདོད་མ་ནས་དག་པའི་འཇིག་རྟེན་པའི་བསམ་གཏན་ལ་བརྟེན་པའི་ཤེས་རབ་དང་། འཇིག་རྟེན་ལས་འདས་པའི་བསམ་གཏན་ལ་བརྟེན་པའི་ཤེས་རབ་དང་། ཤེས་རབ་
དང་། ཤེས་རབ་ཆེན་པོ་དང་། ཤེས་རབ་རྣམ་པ་ལྔ་བསྒོམ་པར་བྱའོ། །རབ་འབྱོར་བྱང་ཆུབ་སེམས་དཔའ་དགེ་བའི་བཤེས་གཉེན་ལ་བསྟེན་པ་དང་ལྡན་པས་མཉན་པས་བསྟེན་པ་དང་། བསྙེན་བཀུར་བྱ་བ་དང་། ཡོངས་སུ་སྤྱད་པ་དང་། བསླབ་པའི་
ཆོ་ག་དང་འཐུན་པས་བསྟེན་པ་དང་། ནན་ཏན་གྱིས་མགུ་བར་བྱ་བས་བསྟེན་པ་དང་། བསྟེན་པ་དང་། བསྟེན་པ་ཆེན་པོ་དང་། དགེ་བའི་བཤེས་གཉེན་ལ་བསྟེན་པ་རྣམ་པ་ལྔས་གཟུགས་ལ་དགེ་བའི་བཤེས་གཉེན་ལ་བསྟེན་པར་བྱའོ། །
39-1-149a


རབ་འབྱོར་བྱང་ཆུབ་སེམས་དཔའ་དགེ་བའི་བཤེས་གཉེན་ལ་བསྟེན་པ་དང་ལྡན་པས་མཉན་པས་བསྟེན་པ་དང་། བསྙེན་བཀུར་བྱ་བ་དང་། ཡོངས་སུ་སྤྱད་པ་དང་། བསླབ་པའི་ཆོ་ག་བཞིན་དུ་བསྟེན་པ་དང་། ནན་ཏན་གྱིས་མགུ་བར་བྱ་
བས་བསྟེན་པ་དང་། བསྟེན་པ་དང་། བསྟེན་པ་ཆེན་པོ་དང་། དགེ་བའི་བཤེས་གཉེན་ལ་བསྟེན་པ་རྣམ་པ་ལྔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་དགེ་བའི་བཤེས་གཉེན་ལ་བསྟེན་པར་བྱའོ། །དེ་ལྟར་
དགེ་བའི་བཤེས་གཉེན་ལ་བསྟེན་པའི་བྱང་ཆུབ་སེམས་དཔའ་ནི་རྣམ་པར་ཐར་པའི་ཐབས་ཀྱང་ཡོངས་སུ་འཛིན་ཅིང་བསོད་ནམས་མང་པོ་ཡང་རབ་ཏུ་བསྐྱེད་དེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་ངེས་པར་འབྱུང་ངོ་། །རབ་འབྱོར་བྱང་ཆུབ་
སེམས་དཔའ་དེ་བཞིན་གཤེགས་པ་ལ་མཆོད་པ་ལ་བརྩོན་པས་བསྟོད་པ་སྣ་ཚོགས་ཉེ་བར་བསྒྲུབ་པའི་མཆོད་པ་དང་། འཐོབ་པ་དང་། བཀུར་སྟི་ཉེ་བར་བསྒྲུབ་པའི་མཆོད་པ་དང་། ནན་ཏན་གྱིས་མཉེས་པར་བྱ་བའི་མཆོད་པ་དང་། མཆོད་པ་དང་། མཆོད་
པ་ཆེན་པོ་དང་། མཆོད་པ་རྣམ་པ་ལྔས་གཟུགས་ལ་དེ་བཞིན་གཤེགས་པ་ལ་མཆོད་པར་བྱའོ། །རབ་འབྱོར་བྱང་ཆུབ་སེམས་དཔའ་དེ་བཞིན་གཤེགས་པ་ལ་མཆོད་པ་ལ་བརྩོན་པས་བསྟོད་པ་སྣ་ཚོགས་ཉེ་བར་བསྒྲུབ་པའི་མཆོད་པ་དང་། འཐོབ་
པ་དང་། བཀུར་སྟི་ཉེ་བར་བསྒྲུབ་པའི་མཆོད་པ་དང་། ནན་ཏན་གྱིས་མཉེས་པར་བྱ་བའི་མཆོད་པ་དང་། མཆོད་པ་དང་། མཆོད་པ་ཆེན་པོ་དང་། མཆོད་པ་རྣམ་པ་ལྔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་
ཤེས་པ་ལ་དེ་བཞིན་གཤེགས་པ་ལ་མཆོད་པར་བྱའོ། །དེ་ལྟར་དེ་བཞིན་གཤེགས་པ་ལ་མཆོད་པ་ལ་བརྩོན་པའི་བྱང་ཆུབ་སེམས་དཔའ་ལ་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་པའི་སངས་རྒྱས་བཅོམ་ལྡན་འདས་རྣམས་ཀྱིས་
བསྔགས་པ་བརྗོད་པ་མཛད་དོ། །ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་ལས་ཀྱང་འཐོབ་པ་དང་། བཀུར་སྟི་རྙེད་དོ། །སེམས་ཅན་ཚད་མེད་པ་ཡང་ཡོངས་སུ་སྨིན་པར་བྱེད་དོ། །སངས་རྒྱས་ཀྱི་ཞིང་ཡང་ཡོངས་སུ་དག་པར་
39-1-149b


བྱེད་དེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱའོ། །རབ་འབྱོར་བྱང་ཆུབ་སེམས་དཔའ་སྦྱིན་པའི་ཕ་རོལ་དུ་ཕྱིན་པ་དང་ལྡན་པ་གཟུགས་ལ་མཚན་མ་དང་བཅས་པའི་སྦྱིན་པ་སྒོམ་ན་མྱུར་དུ་སྦྱིན་
པའི་ཕ་རོལ་དུ་ཕྱིན་པ་ཡོངས་སུ་རྫོགས་པར་མི་བྱེད་དོ། །མཚན་མ་མེད་པའི་སྦྱིན་པ་སྒོམ་ན་ནི་མྱུར་དུ་སྦྱིན་པའི་ཕ་རོལ་དུ་ཕྱིན་པ་ཡོངས་སུ་རྫོགས་པར་བྱེད་དོ། །རབ་འབྱོར་བྱང་ཆུབ་སེམས་དཔའ་གཟུགས་ལ་མཚན་མ་དང་བཅས་པ་འམ། 
མཚན་མ་མེད་པའི་སྦྱིན་པ་ཇི་ལྟར་སྒོམ་ཞེ་ན། རབ་འབྱོར་གལ་ཏེ་བྱང་ཆུབ་སེམས་དཔའ་གཟུགས་ལ་སྦྱིན་པ་ལ་མོས་ན། མོས་པར་བྱ་བའི་སྦྱིན་པ་འམ། མོས་པའི་སྦྱིན་པ་དམིགས་ཏེ། བྱང་ཆུབ་སེམས་དཔའ་གཟུགས་ལ་མཚན་
མ་དང་བཅས་པའི་སྦྱིན་པ་བསྒོམ་པར་བྱའོ། །རབ་འབྱོར་གལ་ཏེ་བྱང་ཆུབ་སེམས་དཔའ་གཟུགས་ལ་སྦྱིན་པ་ལ་མོས་ན་འདི་ལྟ་སྟེ། གཟུགས་ངོ་བོ་ཉིད་ཀྱིས་དམིགས་སུ་མེད་པ་དང་། དེ་ལྟར་དངོས་པོ་དམིགས་སུ་མེད་པ་དང་། རང་
བཞིན་གྱིས་དམིགས་སུ་མེད་པས་མོས་པར་བྱ་བའི་སྦྱིན་པ་མི་དམིགས་ཤིང་མོས་པའི་སྦྱིན་པ་མི་དམིགས་ཏེ། བྱང་ཆུབ་སེམས་དཔའ་གཟུགས་ལ་མཚན་མ་མེད་པའི་སྦྱིན་པ་བསྒོམ་པར་རིག་པར་བྱའོ། །རབ་འབྱོར་བྱང་ཆུབ་སེམས་དཔའ་སྦྱིན་
པའི་ཕ་རོལ་དུ་ཕྱིན་པ་ལ་བརྩོན་པས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མཚན་མ་དང་བཅས་པའི་སྦྱིན་པ་སྒོམ་ན་མྱུར་དུ་སྦྱིན་པའི་ཕ་རོལ་དུ་ཕྱིན་པ་ཡོངས་སུ་རྫོགས་པར་མི་བྱེད་དོ། །མཚན་མ་མེད་པའི་སྦྱིན་པ་སྒོམ་ན་ནི་
མྱུར་དུ་སྦྱིན་པའི་ཕ་རོལ་དུ་ཕྱིན་པ་ཡོངས་སུ་རྫོགས་པར་བྱེད་དོ། །རབ་འབྱོར་བྱང་ཆུབ་སེམས་དཔའ་རྣམ་པར་ཤེས་པ་ལ་མཚན་མ་དང་བཅས་པ་འམ། མཚན་མ་མེད་པའི་སྦྱིན་པ་ཇི་ལྟར་སྒོམ་ཞེ་ན། རབ་འབྱོར་གལ་ཏེ་བྱང་ཆུབ་སེམས་དཔའ་
རྣམ་པར་ཤེས་པ་ལ་སྦྱིན་པ་ལ་མོས་ན་མོས་པར་བྱ་བའི་སྦྱིན་པ་འམ་མོས་པའི་སྦྱིན་པ་དམིགས་ཏེ། བྱང་ཆུབ་སེམས་དཔའ་རྣམ་པར་ཤེས་པ་ལ་མཚན་མ་དང་བཅས་པའི་སྦྱིན་པ་བསྒོམ་པར་རིག་པར་བྱའོ། །རབ་འབྱོར་གལ་ཏེ་བྱང་ཆུབ་
39-1-150a


སེམས་དཔའ་རྣམ་པར་ཤེས་པ་ལ་སྦྱིན་པ་ལ་མོས་ན། འདི་ལྟ་སྟེ། རྣམ་པར་ཤེས་པ་ངོ་བོ་ཉིད་ཀྱིས་དམིགས་སུ་མེད་པ་དང་། དེ་ལྟར་དངོས་པོ་དམིགས་སུ་མེད་པ་དང་། རང་བཞིན་གྱིས་དམིགས་སུ་མེད་པས་མོས་པར་བྱ་
བའི་སྦྱིན་པ་མི་དམིགས་ཤིང་མོས་པའི་སྦྱིན་པ་མི་དམིགས་ཏེ། བྱང་ཆུབ་སེམས་དཔའ་རྣམ་པར་ཤེས་པ་ལ་མཚན་མ་མེད་པའི་སྦྱིན་པ་བསྒོམ་པར་རིག་པར་བྱའོ། །ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་
གཏན་དང་། ཤེས་རབ་ལ་ཡང་དེ་བཞིན་སྦྱར་བར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་སྟོང་པ་ཉིད་ཀྱི་ཏིང་ངེ་འཛིན་ཡོངས་སུ་ཤེས་པར་བྱའོ། །རབ་འབྱོར་གཟུགས་ལ་སྟོང་པ་ཉིད་ཀྱི་ཏིང་ངེ་འཛིན་གང་ཞེ་ན། རབ་འབྱོར་གང་
གཟུགས་ལ་དངོས་པོ་མེད་པ་སྟོང་པ་ཉིད་དང་། དེ་ལྟར་དངོས་པོ་སྟོང་པ་ཉིད་དང་། རང་བཞིན་སྟོང་པ་ཉིད་ལ་དམིགས་ནས་སེམས་རྩེ་གཅིག་ཏུ་བྱེད་པ་འདི་ནི་སྟོང་པ་ཉིད་ཀྱི་ཏིང་ངེ་འཛིན་ཏེ། བྱང་ཆུབ་སེམས་དཔས་དེ་ལྟར་གཟུགས་ལ་སྟོང་པ་ཉིད་ཀྱི་
ཏིང་ངེ་འཛིན་ཡོངས་སུ་ཤེས་པར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སྟོང་པ་ཉིད་ཀྱི་ཏིང་ངེ་འཛིན་ཡོངས་སུ་ཤེས་པར་བྱའོ། །རབ་འབྱོར་རྣམ་པར་ཤེས་པ་ལ་སྟོང་པ་ཉིད་ཀྱི་
ཏིང་ངེ་འཛིན་གང་ཞེ་ན། རབ་འབྱོར་གང་རྣམ་པར་ཤེས་པ་ལ་དངོས་པོ་མེད་པ་སྟོང་པ་ཉིད་དང་། དེ་ལྟར་དངོས་པོ་སྟོང་པ་ཉིད་དང་། རང་བཞིན་སྟོང་པ་ཉིད་ལ་དམིགས་ནས་སེམས་རྩེ་གཅིག་ཏུ་བྱེད་པ་འདི་ནི་སྟོང་པ་ཉིད་ཀྱི་ཏིང་ངེ་འཛིན་ཏེ། རབ་འབྱོར་བྱང་ཆུབ་
སེམས་དཔས་དེ་ལྟར་རྣམ་པར་ཤེས་པ་ལ་སྟོང་པ་ཉིད་ཀྱི་ཏིང་ངེ་འཛིན་ཡོངས་སུ་ཤེས་པར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་མཚན་མ་མེད་པའི་ཏིང་ངེ་འཛིན་ཡོངས་སུ་ཤེས་པར་བྱའོ། །རབ་འབྱོར་གཟུགས་ལ་
མཚན་མ་མེད་པའི་ཏིང་ངེ་འཛིན་གང་ཞེ་ན། རབ་འབྱོར་གང་བྱང་ཆུབ་སེམས་དཔས་གཟུགས་ལ་གཟུགས་དངོས་པོ་མེད་པ་སྟོང་པ་ཉིད་དང་། དེ་ལྟར་དངོས་པོ་སྟོང་པ་ཉིད་དང་། རང་བཞིན་སྟོང་པ་ཉིད་དུ་དེ་ལྟར་ཡིད་ལ་བྱེད་ཅིང་གཟུགས་ལ་དངོས་
39-1-150b


པོའི་མཚན་མ་འགགས་ཏེ་དངོས་པོ་མེད་པའི་མཚན་མའི་རྗེས་སུ་འབྲང་བའི་རྣམ་པར་ཤེས་པ་དང་ཡང་བྲལ། དེ་ལྟར་དངོས་པོའི་མཚན་མ་རྗེས་སུ་འབྲང་བའི་རྣམ་པར་ཤེས་པ་དང་ཡང་བྲལ། དངོས་པོ་དང་། དངོས་པོ་མེད་པའི་མཚན་
མའི་རྗེས་སུ་འབྲང་བའི་རྣམ་པར་ཤེས་པ་དང་ཡང་བྲལ་བར་སེམས་རྩེ་གཅིག་ཏུ་བྱེད་པ་འདི་ནི་རབ་འབྱོར་གཟུགས་ལ་མཚན་མ་མེད་པའི་ཏིང་ངེ་འཛིན་ཏེ། བྱང་ཆུབ་སེམས་དཔས་དེ་ལྟར་གཟུགས་ལ་མཚན་མ་མེད་པའི་ཏིང་ངེ་འཛིན་
ཡོངས་སུ་ཤེས་པར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མཚན་མ་མེད་པའི་ཏིང་ངེ་འཛིན་ཡོངས་སུ་ཤེས་པར་བྱའོ། །རབ་འབྱོར་རྣམ་པར་ཤེས་
པ་ལ་མཚན་མ་མེད་པའི་ཏིང་ངེ་འཛིན་གང་ཞེ་ན། རབ་འབྱོར་གང་བྱང་ཆུབ་སེམས་དཔས་རྣམ་པར་ཤེས་པ་ལ་རྣམ་པར་ཤེས་པ་དངོས་པོ་མེད་པ་སྟོང་པ་ཉིད་དང་། དེ་ལྟར་དངོས་པོ་སྟོང་པ་ཉིད་དང་། རང་བཞིན་སྟོང་པ་ཉིད་དུ་དེ་ལྟར་ཡིད་
ལ་བྱེད་ཅིང་རྣམ་པར་ཤེས་པ་ལ་དངོས་པོའི་མཚན་མ་འགགས་ཏེ། དངོས་པོ་མེད་པའི་མཚན་མའི་རྗེས་སུ་འབྲང་བའི་རྣམ་པར་ཤེས་པ་དང་ཡང་བྲལ། དེ་ལྟར་དངོས་པོའི་མཚན་མའི་རྗེས་སུ་འབྲང་བའི་རྣམ་པར་ཤེས་པ་དང་ཡང་བྲལ། དངོས་
པོ་དང་དངོས་པོ་མེད་པའི་མཚན་མའི་རྗེས་སུ་འབྲང་བའི་རྣམ་པར་ཤེས་པ་དང་ཡང་བྲལ་བར་སེམས་རྩེ་གཅིག་ཏུ་བྱེད་པ་འདི་ནི་རབ་འབྱོར་རྣམ་པར་ཤེས་པ་ལ་མཚན་མ་མེད་པའི་ཏིང་ངེ་འཛིན་ཏེ། བྱང་ཆུབ་སེམས་དཔས་དེ་ལྟར་རྣམ་པར་ཤེས་
པ་ལ་མཚན་མ་མེད་པའི་ཏིང་ངེ་འཛིན་ཡོངས་སུ་ཤེས་པར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་སྨོན་པ་མེད་པའི་ཏིང་ངེ་འཛིན་ཡོངས་སུ་ཤེས་པར་བྱའོ། །རབ་འབྱོར་གཟུགས་ལ་སྨོན་པ་མེད་པའི་ཏིང་ངེ་འཛིན་གང་
ཞེ་ན། གང་གཟུགས་ལ་སྟོང་པ་ཉིད་དང་། མཚན་མ་མེད་པའི་ཏིང་ངེ་འཛིན་རྙེད་པས་གཟུགས་ལ་དངོས་པོ་མེད་པའི་མཚན་མ་དང་མི་མཐུན་པའི་དམིགས་པ་དང་། དེ་ལྟར་དངོས་པོ་མེད་པའི་མཚན་མ་དང་མི་མཐུན་པའི་
39-1-151a


དམིགས་པ་དང་། དངོས་པོ་དང་། དངོས་པོ་མེད་པའི་མཚན་མ་དང་མི་མཐུན་པའི་དམིགས་པ་ལ་སེམས་རྩེ་གཅིག་ཏུ་བྱེད་པ་འདི་ནི་རབ་འབྱོར་གཟུགས་ལ་སྨོན་པ་མེད་པའི་ཏིང་ངེ་འཛིན་ཏེ། རབ་འབྱོར་བྱང་ཆུབ་སེམས་
དཔས་དེ་ལྟར་གཟུགས་ལ་སྨོན་པ་མེད་པའི་ཏིང་ངེ་འཛིན་ཡོངས་སུ་ཤེས་པར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སྨོན་པ་མེད་པའི་ཏིང་ངེ་འཛིན་ཡོངས་སུ་ཤེས་པར་བྱའོ། །
རབ་འབྱོར་རྣམ་པར་ཤེས་པ་ལ་སྨོན་པ་མེད་པའི་ཏིང་ངེ་འཛིན་གང་ཞེ་ན། རབ་འབྱོར་གང་རྣམ་པར་ཤེས་པ་ལ་སྟོང་པ་ཉིད་དང་། མཚན་མ་མེད་པའི་ཏིང་ངེ་འཛིན་རྙེད་པས་རྣམ་པར་ཤེས་པ་ལ་དངོས་པོ་མེད་པའི་མཚན་མ་དང་མི་མཐུན་པའི་དམིགས་པ་དང་། 
དེ་ལྟར་དངོས་པོའི་མཚན་མ་དང་། མི་མཐུན་པའི་དམིགས་པ་དང་། དངོས་པོ་དང་། དངོས་པོ་མེད་པའི་མཚན་མ་དང་མི་མཐུན་པའི་དམིགས་པ་ལ་སེམས་རྩེ་གཅིག་ཏུ་བྱེད་པ་འདི་ནི་རབ་འབྱོར་རྣམ་པར་ཤེས་པ་ལ་སྨོན་པ་མེད་པའི་ཏིང་ངེ་འཛིན་ཏེ། རབ་
འབྱོར་བྱང་ཆུབ་སེམས་དཔས་དེ་ལྟར་རྣམ་པར་ཤེས་པ་ལ་སྨོན་པ་མེད་པའི་ཏིང་ངེ་འཛིན་ཡོངས་སུ་ཤེས་པར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་མེད་པའི་དོན་དང་། རྣམ་པར་འཇིག་པའི་དོན་དང་། དྲི་མ་དང་བཅས་པ་དང་། དྲི་མ་
མེད་པའི་དོན་དང་། དོན་གསུམ་གྱིས་མི་རྟག་པ་ཉིད་ཡོངས་སུ་ཤེས་པར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མེད་པའི་དོན་དང་། རྣམ་པར་འཇིག་པའི་
དོན་དང་། དྲི་མ་དང་བཅས་པ་དང་། དྲི་མ་མེད་པའི་དོན་དང་། དོན་གསུམ་གྱིས་མི་རྟག་པ་ཉིད་ཡོངས་སུ་ཤེས་པར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་མངོན་པར་ཞེན་པའི་དོན་དང་། མཚན་ཉིད་རྣམ་
པ་གསུམ་གྱི་དོན་དང་། འབྲེལ་བའི་དོན་དང་། དོན་གསུམ་གྱི་སྡུག་བསྔལ་ཉིད་ཡོངས་སུ་ཤེས་པར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་

39-1-151b


པ་ལ་མངོན་པར་ཞེན་པའི་དོན་དང་། མཚན་ཉིད་རྣམ་པ་གསུམ་གྱི་དོན་དང་། འབྲེལ་པའི་དོན་དང་། དོན་གསུམ་གྱིས་སྡུག་བསྔལ་ཡོངས་སུ་ཤེས་པར་བྱའོ། །རབ་འབྱོར་བྱང་ཆུབ་སེམས་དཔས་གཟུགས་ལ་དངོས་པོ་མེད་
པ་བདག་མེད་པའི་དོན་དང་། དེ་ལྟར་དངོས་པོ་བདག་མེད་པའི་དོན་དང་། རང་བཞིན་བདག་མེད་པའི་དོན་དང་། དོན་གསུམ་གྱིས་བདག་མེད་པ་ཉིད་ཡོངས་སུ་ཤེས་པར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། 
འདུ་བྱེད་རྣམས་དང་། རྣམ་པར་ཤེས་པ་ལ་དངོས་པོ་མེད་པ་བདག་མེད་པའི་དོན་དང་། དེ་ལྟར་དངོས་པོ་བདག་མེད་པའི་དོན་དང་། རང་བཞིན་བདག་མེད་པའི་དོན་དང་། དོན་གསུམ་གྱིས་བདག་མེད་པ་ཉིད་ཡོངས་སུ་ཤེས་པར་བྱའོ། །རབ་འབྱོར་
བྱང་ཆུབ་སེམས་དཔས་གཟུགས་ལ་གཟུགས་དངོས་པོ་མེད་པ་ཤིན་དུ་ཞི་བའི་དོན་དང་། དེ་ལྟར་དངོས་པོ་ཞི་བའི་དོན་དང་། རང་བཞིན་གྱིས་རྣམ་པར་དག་པ་ཞི་བའི་དོན་དང་། དོན་གསུམ་གྱིས་མྱ་ངན་ལས་འདས་པ་ཞི་བ་ཉིད་ཡོངས་སུ་
ཤེས་པར་བྱའོ། །རབ་འབྱོར་བྱང་ཆུབ་སེམས་དཔས་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་རྣམ་པར་ཤེས་པ་དངོས་པོ་མེད་པ་ཤིན་དུ་ཞི་བའི་དོན་དང་། དེ་ལྟར་དངོས་པོ་ཞི་བའི་དོན་དང་། རང་བཞིན་
གྱིས་རྣམ་པར་དག་པ་ཞི་བའི་དོན་དང་། དོན་གསུམ་གྱིས་མྱ་ངན་ལས་འདས་པ་ཞི་བ་ཉིད་ཡོངས་སུ་ཤེས་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། གནས་བརྟན་རབ་འབྱོར་དང་། དགེ་སློང་དང་། དགེ་སློང་
མ་དང་། དགེ་བསྙེན་དང་། དགེ་བསྙེན་མ་དེ་དག་དང་། ལྷ་དང་མི་དེ་དག་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་
པ་ཤེས་རབ་ཀྱི་ཕ་རོལ་དུ་ཕྱིན་པ་ལྔ་བརྒྱ་པ་རྫོགས་སྷོ།།  །།སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།།         །། རྒྱ་གར་སྐད་དུ། ཨཱརྱ་བཛྲ་ཙྪེ་ད་ཀ་ནཱ་
39-1-152a


མ་པྲ་ཛྙཱ་པཱ་ར་མི་ཏཱ་མ་ཧཱ་ཡཱ་ན་སཱུ་ཏྲ།  བོད་སྐད་དུ།  འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་རྡོ་རྗེ་གཅོད་པ་ཞེས་བྱ་བ་ཐེག་པ་ཆེན་པོའི་མདོ།  སངས་རྒྱས་དང་། བྱང་ཆུབ་སེམས་དཔའ་ཐམས་
ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པ་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་སྟོང་ཉིས་བརྒྱ་ལྔ་བཅུའི་
དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་སྔ་དྲོའི་དུས་ཀྱི་ཚེ་ཤམ་ཐབས་དང་ཆོས་གོས་བགོས་ཏེ། ལྷུང་བཟེད་
བསྣམས་ནས། མཉན་ཡོད་ཀྱི་གྲོང་ཁྱེར་ཆེན་པོར་བསོད་སྙོམས་ཀྱི་ཕྱིར་ཞུགས་སོ། །དེ་ནས་བཅོམ་ལྡན་འདས་མཉན་ཡོད་ཀྱི་གྲོང་ཁྱེར་ཆེན་པོར་བསོད་སྙོམས་ཀྱི་ཕྱིར་གཤེགས་ནས་བསོད་སྙོམས་ཀྱི་ཞལ་ཟས་མཇུག་ཏུ་
གསོལ་ཏེ། ཞལ་ཟས་ཀྱི་བྱ་བ་མཛད། ལྷུང་བཟེད་དང་ཆོས་གོས་བཞག་ནས་ཞལ་བསིལ་ཏེ་གདན་བཤམས་པ་ལ་སྐྱིལ་མོ་དཀྲུང་བཅས་ནས་སྐུ་དྲང་པོར་བསྲང་སྟེ། དྲན་པ་མངོན་དུ་བཞག་ནས་བཞུགས་སོ། །དེ་ནས་དགེ་སློང་མང་
པོ་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །ཡང་དེའི་ཚེ་ཚེ་དང་ལྡན་པ་རབ་
འབྱོར་འཁོར་དེ་ཉིད་ན་འདུས་པར་གྱུར་ཏེ་འདུག་གོ། །དེ་ནས་ཚེ་དང་ལྡན་པ་རབ་འབྱོར་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་
མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
39-1-152b


ལ་ཕན་གདགས་པའི་དམ་པ་ཇི་སྙེད་པས་ཕན་གདགས་པ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡོངས་སུ་གཏད་པའི་
དམ་པ་ཇི་སྙེད་པས་ཡོངས་སུ་གཏད་པ་ནི་བཅོམ་ལྡན་འདས་ངོ་མཚར་ཏེ། བདེ་བར་གཤེགས་པ་ངོ་མཚར་ཏོ། །བཅོམ་ལྡན་འདས་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པས་ཇི་ལྟར་གནས་པར་བགྱི། 
ཇི་ལྟར་བསྒྲུབ་པར་བགྱི། ཇི་ལྟར་སེམས་རབ་ཏུ་གཟུང་བར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་བཀའ་སྩལ་ཏོ། །རབ་འབྱོར་ལེགས་སོ་ལེགས་སོ། །རབ་འབྱོར་དེ་དེ་བཞིན་ནོ། །དེ་དེ་བཞིན་
ཏེ། དེ་བཞིན་གཤེགས་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཕན་གདགས་པའི་དམ་པས་ཕན་བཏགས་སོ། །དེ་བཞིན་གཤེགས་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡོངས་སུ་གཏད་པའི་དམ་
པས་ཡོངས་སུ་གཏད་དོ། །རབ་འབྱོར་དེའི་ཕྱིར་ཉོན་ལ་ལེགས་པར་རབ་ཏུ་ཡིད་ལ་ཟུང་ཤིག་དང་། བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པས་ཇི་ལྟར་གནས་པར་བྱ་བ་དང་། ཇི་ལྟར་བསྒྲུབ་པར་བྱ་བ་དང་། ཇི་ལྟར་
སེམས་རབ་ཏུ་གཟུང་བར་བྱ་བ་ངས་ཁྱོད་ལ་བཤད་དོ། །བཅོམ་ལྡན་འདས་དེ་དེ་བཞིན་ནོ་ཞེས་གསོལ་ནས་ཚེ་དང་ལྡན་པ་རབ་འབྱོར་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །རབ་འབྱོར་
འདི་ལ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པས་འདི་སྙམ་དུ་བདག་གིས་ཅི་ཙམ་སེམས་ཅན་དུ་བསྡུ་བར་བསྡུས་པ་སྒོ་ང་ལས་སྐྱེས་པ་འམ། མངལ་ནས་སྐྱེས་པ་འམ། དྲོད་གཤེར་ལས་སྐྱེས་པ་འམ། བརྫུས་ཏེ་སྐྱེས་
པ་འམ། གཟུགས་ཅན་ནམ། གཟུགས་མེད་པ་འམ། འདུ་ཤེས་ཅན་ནམ། འདུ་ཤེས་མེད་པ་འམ། འདུ་ཤེས་མེད་འདུ་ཤེས་མེད་མིན་ནམ། སེམས་ཅན་གྱི་ཁམས་ཇི་ཙམ་སེམས་ཅན་དུ་གདགས་པས་བཏགས་པ་དེ་དག་ཐམས་ཅད་ཕུང་པོའི་ལྷག་
39-1-153a


མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའོ། །དེ་ལྟར་སེམས་ཅན་ཚད་མེད་པ་ཡོངས་སུ་མྱ་ངན་ལས་འདས་ཀྱང་སེམས་ཅན་གང་ཡང་ཡོངས་སུ་མྱ་ངན་ལས་འདས་པར་གྱུར་པ་མེད་དོ་སྙམ་དུ་སེམས་
བསྐྱེད་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར་བྱང་ཆུབ་སེམས་དཔའ་སེམས་ཅན་དུ་འདུ་ཤེས་འཇུག་ན་དེ་བྱང་ཆུབ་སེམས་དཔའ་ཞེས་མི་བྱ་བའི་ཕྱིར་རོ། །དེ་ཅིའི་ཕྱིར་ཞེ་ན། རབ་འབྱོར་གང་སེམས་ཅན་དུ་འདུ་ཤེས་འཇུག་གམ། སྲོག་ཏུ་འདུ་ཤེས་
སམ། གང་ཟག་ཏུ་འདུ་ཤེས་འཇུག་ན་དེ་བྱང་ཆུབ་སེམས་དཔའ་ཞེས་མི་བྱ་བའི་ཕྱིར་ཏེ། ཡང་རབ་འབྱོར་བྱང་ཆུབ་སེམས་དཔས་དངོས་པོ་ལ་མི་གནས་པར་སྦྱིན་པ་སྦྱིན་ནོ། །ཆོས་ལ་ཡང་མི་གནས་པར་སྦྱིན་པ་སྦྱིན་ནོ། །གཟུགས་ལའང་མི་གནས་པར་སྦྱིན་པ་
སྦྱིན་ནོ། །སྒྲ་དང་། དྲི་དང་། རོ་དང་། རེག་བྱ་དང་། ཆོས་ལ་ཡང་མི་གནས་པར་སྦྱིན་པ་སྦྱིན་ནོ། །རབ་འབྱོར་ཅི་ནས་མཚན་མར་འདུ་ཤེས་པ་ལའང་མི་གནས་པ་དེ་ལྟར་བྱང་ཆུབ་སེམས་དཔས་སྦྱིན་པ་སྦྱིན་ནོ། །དེ་ཅིའི་ཕྱིར་ཞེ་ན། རབ་འབྱོར་བྱང་
ཆུབ་སེམས་དཔའ་གང་མི་གནས་པར་སྦྱིན་པ་སྦྱིན་པ་དེའི་བསོད་ནམས་ཀྱི་ཕུང་པོ་ནི་རབ་འབྱོར་ཚད་གཟུང་བར་སླ་བ་མ་ཡིན་པའི་ཕྱིར་རོ། །རབ་འབྱོར་འདི་ཇི་སྙམ་དུ་སེམས། ཤར་ཕྱོགས་ཀྱི་ནམ་མཁའ་ཚད་གཟུང་བར་སླ་འམ། རབ་འབྱོར་གྱིས་
གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་དུ་ལྷོ་དང་། ནུབ་དང་། བྱང་དང་། སྟེང་དང་། འོག་གི་ཕྱོགས་དང་། ཕྱོགས་མཚམས་དང་། ཕྱོགས་བཅུའི་ནམ་མཁའ་
ཚད་གཟུང་བར་སླ་འམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་བཞིན་དུ་བྱང་ཆུབ་སེམས་དཔའ་གང་མི་གནས་པར་སྦྱིན་པ་སྦྱིན་པ་
དེའི་བསོད་ནམས་ཀྱི་ཕུང་པོ་ཡང་ཚད་གཟུང་བར་སླ་བ་མ་ཡིན་ནོ། །རབ་འབྱོར་འདི་ཇི་སྙམ་དུ་སེམས། མཚན་ཕུན་སུམ་ཚོགས་པས་དེ་བཞིན་གཤེགས་པར་བལྟ་འམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་
39-1-153b


ལགས་ཏེ། མཚན་ཕུན་སུམ་ཚོགས་པས་དེ་བཞིན་གཤེགས་པར་མི་ལྟའོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པས་མཚན་ཕུན་སུམ་ཚོགས་པར་གང་གསུངས་པ་དེ་ཉིད་མཚན་ཕུན་སུམ་ཚོགས་པ་མ་མཆིས་པའི་སླད་
དུའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་ཅི་ཙམ་དུ་མཚན་ཕུན་སུམ་ཚོགས་པ་དེ་ཙམ་དུ་བརྫུན་ནོ། །ཅི་ཙམ་དུ་མཚན་ཕུན་སུམ་ཚོགས་པ་མེད་པ་དེ་
ཙམ་དུ་མི་བརྫུན་ཏེ། དེ་ལྟར་དེ་བཞིན་གཤེགས་པ་ལ་མཚན་དང་། མཚན་མེད་པར་བལྟའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་མ་འོངས་
པའི་དུས་ལྔ་བརྒྱ་ཐ་མ་ལ་དམ་པའི་ཆོས་རབ་དུ་རྣམ་པར་འཇིག་པར་འགྱུར་བ་ན་སེམས་ཅན་གང་ལ་ལ་དག་འདི་ལྟ་བུའི་མདོ་སྡེའི་ཚིག་བཤད་པ་འདི་ལ་ཡང་དག་པར་འདུ་ཤེས་སྐྱེད་པར་འགྱུར་བ་ལྟ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། 
རབ་འབྱོར་ཁྱོད་འདི་སྐད་དུ་མ་འོངས་པའི་དུས་ལྔ་བརྒྱ་ཐ་མ་ལ་དམ་པའི་ཆོས་རབ་ཏུ་རྣམ་པར་འཇིག་པར་འགྱུར་བ་ན་སེམས་ཅན་གང་ལ་ལ་དག་འདི་ལྟ་བུའི་མདོ་སྡེའི་ཚིག་བཤད་པ་འདི་ལ་ཡང་དག་པར་འདུ་ཤེས་སྐྱེད་པར་འགྱུར་བ་མཆིས་སམ་
ཞེས་མ་ཟེར་ཅིག །ཡང་རབ་འབྱོར་མ་འོངས་པའི་དུས་ལྔ་བརྒྱ་ཐ་མ་ལ་དམ་པའི་ཆོས་རབ་ཏུ་རྣམ་པར་འཇིག་པར་འགྱུར་བ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། ཤེས་རབ་དང་ལྡན་པ་
དག་འབྱུང་སྟེ། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་དག་ཀྱང་སངས་རྒྱས་གཅིག་ལ་བསྙེན་བཀུར་བྱས་པ་མ་ཡིན། སངས་རྒྱས་གཅིག་ལ་དགེ་བའི་རྩ་བ་བསྐྱེད་པ་མ་ཡིན་གྱི། རབ་འབྱོར་སངས་རྒྱས་བརྒྱ་སྟོང་དུ་མ་ལ་
བསྙེན་བཀུར་བྱས་ཤིང་། སངས་རྒྱས་བརྒྱ་སྟོང་དུ་མ་ལ་དགེ་བའི་རྩ་བ་དག་བསྐྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་འབྱུང་ངོ་། །གང་དག་འདི་ལྟ་བུའི་མདོ་སྡེའི་ཚིག་བཤད་པ་འདི་ལ་སེམས་དད་པ་གཅིག་ཙམ་རྙེད་པར་འགྱུར་བ་
39-1-154a


དེ་དག་ནི་རབ་འབྱོར་དེ་བཞིན་གཤེགས་པས་མཁྱེན་ཏོ། །རབ་འབྱོར་དེ་དག་ནི་དེ་བཞིན་གཤེགས་པས་གཟིགས་ཏེ། རབ་འབྱོར་སེམས་ཅན་དེ་དག་ཐམས་ཅད་ནི་བསོད་ནམས་ཀྱི་ཕུང་པོ་དཔག་ཏུ་མེད་པ་བསྐྱེད་ཅིང་རབ་ཏུ་སྡུད་པར་འགྱུར། 
དེ་ཅིའི་ཕྱིར་ཞེ་ན། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་བདག་ཏུ་འདུ་ཤེས་འཇུག་པར་མི་འགྱུར་ཞིང་སེམས་ཅན་དུ་འདུ་ཤེས་པ་མ་ཡིན། སྲོག་ཏུ་འདུ་ཤེས་པ་མ་ཡིན། གང་ཟག་ཏུ་འང་འདུ་ཤེས་འཇུག་པར་མི་འགྱུར་
བའི་ཕྱིར་རོ། །རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་ཆོས་སུ་འདུ་ཤེས་པ་དང་། ཆོས་མེད་པར་ཡང་འདུ་ཤེས་མི་འཇུག་སྟེ། དེ་དག་ནི་འདུ་ཤེས་དང་འདུ་ཤེས་མེད་པར་ཡང་འཇུག་པར་མི་འགྱུར་རོ། །དེ་ཅིའི་ཕྱིར་ཞེ་ན། 
རབ་འབྱོར་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཆོས་སུ་འདུ་ཤེས་འཇུག་ན་དེ་ཉིད་དེ་དག་གི་བདག་ཏུ་འཛིན་པར་འགྱུར་ཞིང་། སེམས་ཅན་དུ་འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པར་འགྱུར་
བའི་ཕྱིར་རོ། །གལ་ཏེ་ཆོས་མེད་པར་འདུ་ཤེས་འཇུག་ན་ཡང་དེ་ཉིད་དེ་དག་གི་བདག་ཏུ་འཛིན་པར་འགྱུར་ཞིང་། སེམས་ཅན་དུ་འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པར་འགྱུར་བའི་ཕྱིར་རོ། །དེ་ཅིའི་ཕྱིར་ཞེ་ན། ཡང་
རབ་འབྱོར་བྱང་ཆུབ་སེམས་དཔས་ཆོས་ཀྱང་ལོག་པར་གཟུང་བར་མི་བྱ་སྟེ། ཆོས་མ་ཡིན་པ་ཡང་མི་གཟུང་བའི་ཕྱིར་རོ། །དེ་བས་ན་དེ་ལ་དགོངས་ཏེ་དེ་བཞིན་གཤེགས་པས་ཆོས་ཀྱི་རྣམ་གྲངས་གཟིངས་ལྟ་བུར་ཤེས་པ་རྣམས་ཀྱིས་
ཆོས་རྣམས་ཀྱང་སྤང་བར་བྱ་ན་ཆོས་མ་ཡིན་པ་རྣམས་ལྟ་ཅི་སྨོས་ཞེས་གསུངས་སོ། །གཞན་ཡང་བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་འདི་ཇི་སྙམ་དུ་སེམས། དེ་བཞིན་
གཤེགས་པས་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་ཆོས་དེ་གང་ཡང་ཡོད་དམ། དེ་བཞིན་གཤེགས་པས་ཆོས་གང་ཡང་བསྟན་ཏམ། དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་ཚེ་
39-1-154b


དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཀྱིས་གསུངས་པའི་དོན་བདག་གིས་འཚལ་བ་ལྟར་ན། དེ་བཞིན་གཤེགས་པས་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་
པར་སངས་རྒྱས་པའི་ཆོས་དེ་གང་ཡང་མ་མཆིས་སོ། །དེ་བཞིན་གཤེགས་པས་གང་བསྟན་པའི་ཆོས་དེ་གང་ཡང་མ་མཆིས་སོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པས་ཆོས་གང་ཡང་མངོན་པར་རྫོགས་པར་སངས་རྒྱས་པའམ་བསྟན་པ་དེ་གཟུང་དུ་མ་མཆིས། 
བརྗོད་དུ་མ་མཆིས་ཏེ། དེ་ནི་ཆོས་ཀྱང་མ་ལགས། ཆོས་མ་མཆིས་པའང་མ་ལགས་པའི་སླད་དུའོ། །དེ་ཅིའི་སླད་དུ་ཞེ་ན། འཕགས་པའི་གང་ཟག་རྣམས་ནི་འདུས་མ་བགྱིས་ཀྱིས་རབ་ཏུ་ཕྱེ་བའི་སླད་དུའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་
ཇི་སྙམ་དུ་སེམས། རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་རབ་ཏུ་གང་བར་བྱེས་ཏེ་སྦྱིན་པ་བྱིན་ན། རིགས་ཀྱི་བུ་འམ། རིགས་ཀྱི་བུ་མོ་དེ་བཞི་དེ་ལས་
བསོད་ནམས་ཀྱི་ཕུང་པོ་མང་དུ་བསྐྱེད་དམ། རབ་འབྱོར་གྱིས་གསོལ་པ། བཅོམ་ལྡན་འདས་མང་ལགས་སོ། །བདེ་བར་གཤེགས་པ་མང་ལགས་ཏེ། རིགས་ཀྱི་བུ་འམ། རིགས་ཀྱི་བུ་མོ་དེ་གཞི་དེ་ལས་བསོད་ནམས་ཀྱི་ཕུང་པོ་མང་དུ་བསྐྱེད་དོ། །དེ་
ཅིའི་སླད་དུ་ཞེ་ན། བཅོམ་ལྡན་འདས་བསོད་ནམས་ཀྱི་ཕུང་པོ་དེ་ཉིད་ཕུང་པོ་མ་མཆིས་པའི་སླད་དུ་སྟེ། དེས་ན་དེ་བཞིན་གཤེགས་པས་བསོད་ནམས་ཀྱི་ཕུང་པོ་བསོད་ནམས་ཀྱི་ཕུང་པོ་ཞེས་གསུངས་སོ། །བཅོམ་ལྡན་འདས་ཀྱིས་བཀའ་
སྩལ་པ། རབ་འབྱོར་རིགས་ཀྱི་བུ་འམ། རིགས་ཀྱི་བུ་མོ་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ་སྦྱིན་པ་བྱིན་པ་བྱིན་པ་བས། གང་གིས་ཆོས་ཀྱི་རྣམ་གྲངས་འདི་ལས་
ཐ་ན་ཚིག་བཞི་པའི་ཚིགས་སུ་བཅད་པ་གཅིག་ཙམ་བཟུང་ནས་གཞན་དག་ལ་ཡང་འཆད་ཅིང་ཡང་དག་པར་རབ་ཏུ་སྟོན་ན། དེ་གཞི་དེ་ལས་བསོད་ནམས་ཀྱི་ཕུང་པོ་ཆེས་མང་དུ་གྲངས་མེད་དཔག་ཏུ་མེད་པ་བསྐྱེད་དོ། །དེ་ཅིའི་ཕྱིར་ཞེ་ན། རབ་འབྱོར་
39-1-155a


དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་འདི་ལས་བྱུང་སྟེ། སངས་རྒྱས་བཅོམ་ལྡན་འདས་རྣམས་ཀྱང་འདི་ལས་སྐྱེས་པའི་ཕྱིར་རོ། །དེ་ཅིའི་ཕྱིར་
ཞེ་ན། རབ་འབྱོར་སངས་རྒྱས་ཀྱི་ཆོས་རྣམས་སངས་རྒྱས་ཀྱི་ཆོས་རྣམས་ཤེས་བྱ་བ་ནི་སངས་རྒྱས་ཀྱི་ཆོས་དེ་དག་མེད་པར་དེ་བཞིན་གཤེགས་པས་གསུངས་པའི་ཕྱིར་ཏེ། དེས་ན་སངས་རྒྱས་ཀྱི་ཆོས་རྣམས་ཤེས་བྱའོ། །རབ་འབྱོར་འདི་ཇི་སྙམ་
དུ་སེམས། རྒྱུན་དུ་ཞུགས་པ་འདི་སྙམ་དུ་བདག་གིས་རྒྱུན་དུ་ཞུགས་པའི་འབྲས་བུ་ཐོབ་བོ་སྙམ་དུ་སེམས་སམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་ཅི་ལའང་
ཞུགས་པ་མ་མཆིས་པའི་སླད་དུ་སྟེ། དེས་ན་རྒྱུན་དུ་ཞུགས་པ་ཞེས་བྱའོ། །གཟུགས་ལའང་མ་ཞུགས། སྒྲ་ལ་མ་ལགས། དྲི་ལ་མ་ལགས། རོ་ལ་མ་ལགས། རེག་བྱ་ལ་མ་ལགས། ཆོས་ལའང་མ་ཞུགས་ཏེ། དེས་ན་རྒྱུན་དུ་ཞུགས་པ་ཞེས་བགྱིའོ། །
བཅོམ་ལྡན་འདས་གལ་ཏེ་རྒྱུན་དུ་ཞུགས་པ་དེ་འདི་སྙམ་དུ་བདག་གིས་རྒྱུན་དུ་ཞུགས་པའི་འབྲས་བུ་ཐོབ་བོ་སྙམ་དུ་སེམས་པར་གྱུར་ན་དེ་ཉིད་དེའི་བདག་ཏུ་འཛིན་པར་འགྱུར་རོ། །སེམས་ཅན་དུ་འཛིན་པ་དང་། སྲོག་ཏུ་འཛིན་པ་དང་། གང་
ཟག་ཏུ་འཛིན་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ཇི་སྙམ་དུ་སེམས། ལན་གཅིག་ཕྱིར་འོང་བ་འདི་སྙམ་དུ་བདག་གིས་ལན་གཅིག་ཕྱིར་འོང་བའི་འབྲས་བུ་ཐོབ་བོ་སྙམ་དུ་སེམས་སམ། རབ་
འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །དེ་ཅིའི་སླད་དུ་ཞེ་ན། གང་ལན་གཅིག་ཕྱིར་འོང་བའི་ཆོས་དེ་གང་ཡང་མ་མཆིས་པའི་སླད་དུ་སྟེ། དེས་ན་ལན་གཅིག་ཕྱིར་འོང་བ་ཞེས་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་
དེ་ཇི་སྙམ་དུ་སེམས། ཕྱིར་མི་འོང་བ་འདི་སྙམ་དུ། བདག་གིས་ཕྱིར་མི་འོང་བའི་འབྲས་བུ་ཐོབ་བོ་སྙམ་དུ་སེམས་སམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །དེ་ཅིའི་སླད་དུ་ཞེ་ན། གང་ཕྱིར་མི་འོང་བ་ཉིད་དུ་ཞུགས་པའི་ཆོས་དེ་
39-1-155b


གང་ཡང་མ་མཆིས་པའི་སླད་དུ་སྟེ། དེས་ན་ཕྱིར་མི་འོང་བ་ཞེས་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ཇི་སྙམ་དུ་སེམས། ཡང་དགྲ་བཅོམ་པ་འདི་སྙམ་དུ་བདག་གིས་དགྲ་བཅོམ་པ་ཉིད་ཐོབ་བོ་སྙམ་དུ་སེམས་སམ། རབ་
འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །དེ་ཅིའི་སླད་དུ་ཞེ་ན། གང་དགྲ་བཅོམ་པ་ཞེས་བགྱི་བའི་ཆོས་དེ་གང་ཡང་མ་མཆིས་པའི་སླད་དུའོ། །བཅོམ་ལྡན་འདས་གལ་ཏེ་དགྲ་བཅོམ་པ་འདི་སྙམ་དུ་བདག་གིས་དགྲ་བཅོམ་
པ་ཉིད་ཐོབ་བོ་སྙམ་དུ་སེམས་པར་གྱུར་ན་དེ་ཉིད་དེའི་བདག་ཏུ་འཛིན་པར་འགྱུར་རོ། །སེམས་ཅན་དུ་འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པར་འགྱུར་རོ། །བཅོམ་ལྡན་འདས་བདག་ནི་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་ཀྱིས་ཉོན་མོངས་པ་མེད་པར་གནས་པ་རྣམས་ཀྱི་མཆོག་ཏུ་བསྟན་ཏེ། བཅོམ་ལྡན་འདས་བདག་འདོད་ཆགས་དང་བྲལ་བ་དགྲ་བཅོམ་པ་ལགས་ཀྱང་། བཅོམ་ལྡན་འདས་བདག་འདི་སྙམ་དུ་བདག་ནི་དགྲ་
བཅོམ་པའོ་སྙམ་དུ་མི་སེམས་སོ། །བཅོམ་ལྡན་འདས་གལ་ཏེ་བདག་ནི་འདི་སྙམ་དུ་བདག་གིས་དགྲ་བཅོམ་པ་ཉིད་ཐོབ་བོ་སྙམ་དུ་སེམས་པར་གྱུར་ན། དེ་བཞིན་གཤེགས་པས་བདག་ལ་རིགས་ཀྱི་བུ་རབ་འབྱོར་ནི་ཉོན་མོངས་པ་མེད་
པར་གནས་པ་རྣམས་ཀྱི་མཆོག་ཡིན་ཏེ། ཅི་ལ་ཡང་མི་གནས་པས་ན་ཉོན་མོངས་པ་མེད་པར་གནས་པ་ཉོན་མོངས་པ་མེད་པར་གནས་པ་ཞེས་ལུང་མི་སྟོན་ཏོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ཇི་སྙམ་དུ་སེམས། 
དེ་བཞིན་གཤེགས་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ལས་གང་བླངས་པའི་ཆོས་དེ་གང་ཡང་ཡོད་དམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་བཞིན་
གཤེགས་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ལས་གང་བླངས་པའི་ཆོས་དེ་གང་ཡང་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་བྱང་ཆུབ་སེམས་དཔའ་གང་ལ་ལ་
39-1-156a


ཞིག་འདི་སྐད་དུ་བདག་གིས་ཞིང་བཀོད་པ་རྣམས་བསྒྲུབ་པར་བྱའོ་ཞེས་ཟེར་ན་དེ་ནི་མི་བདེན་པར་སྨྲ་བའོ། །དེ་ཅིའི་ཕྱིར་ཞེ་ན། རབ་འབྱོར་ཞིང་བཀོད་པ་རྣམས་ཞིང་བཀོད་པ་རྣམས་ཤེས་བྱ་བ་ནི་བཀོད་པ་དེ་དག་མེད་པར་དེ་བཞིན་གཤེགས་པས་
གསུངས་པའི་ཕྱིར་ཏེ། དེས་ན་ཞིང་བཀོད་པ་རྣམས་ཤེས་བྱའོ། །རབ་འབྱོར་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་འདི་ལྟར་མི་གནས་པར་སེམས་བསྐྱེད་པ་ཞེས་བྱའོ། །ཅི་ལ་ཡང་མི་གནས་པར་སེམས་བསྐྱེད་པར་བྱའོ། །གཟུགས་
ལ་ཡང་མི་གནས་པར་སེམས་བསྐྱེད་པར་བྱའོ། །སྒྲ་དང་དྲི་དང་རོ་དང་། རེག་བྱ་དང་། ཆོས་ལ་ཡང་མི་གནས་པར་སེམས་བསྐྱེད་པར་བྱའོ། །རབ་འབྱོར་འདི་ལྟ་སྟེ་དཔེར་ན་སྐྱེས་བུ་ཞིག་ལུས་འདི་ལྟ་བུར་གྱུར་ཏེ། འདི་ལྟ་སྟེ། རིའི་རྒྱལ་པོ་རི་རབ་ཙམ་དུ་
གྱུར་ན་རབ་འབྱོར་འདི་ཇི་སྙམ་དུ་སེམས། ལུས་དེ་ཆེ་བ་ཡིན་ནམ། རབ་འབྱོར་གྱིས་གསོལ་པ། བཅོམ་ལྡན་འདས་ལུས་དེ་ནི་ཆེ་བ་ལགས་སོ། །བདེ་བར་གཤེགས་པ་ལུས་དེ་ཆེ་བ་ལགས་སོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པས་དེ་
དངོས་པོ་མ་མཆིས་པར་གསུངས་པའི་སླད་དུ་སྟེ། དེས་ན་ལུས་ཤེས་བགྱིའོ། །དེ་དངོས་པོ་མ་མཆིས་པར་དེ་བཞིན་གཤེགས་པས་གསུངས་ཏེ། དེས་ན་ལུས་ཤེས་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ཇི་སྙམ་
དུ་སེམས། གང་གཱའི་ཀླུང་གི་བྱེ་མ་ཇི་སྙེད་པ་གང་གཱའི་ཀླུང་ཡང་དེ་སྙེད་ཁོ་ནར་གྱུར་ན་དེ་དག་གི་བྱེ་མ་གང་ཡིན་པ་དེ་མང་བ་ཡིན་ནམ། རབ་འབྱོར་གྱིས་གསོལ་པ། བཅོམ་ལྡན་འདས་གང་གཱའི་ཀླུང་དེ་དག་ཉིད་ཀྱང་མང་བ་ལགས་ན་དེ་དག་གི་བྱེ་མ་ལྟ་
སྨོས་ཀྱང་ཅི་འཚལ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་ཁྱོད་ཀྱིས་མོས་པར་བྱ། ཁྱོད་ཀྱིས་ཁོང་དུ་ཆུད་པར་བྱའོ། །གང་གཱའི་ཀླུང་དེ་དག་གི་བྱེ་མ་ཇི་སྙེད་པ་དེ་སྙེད་ཀྱི་འཇིག་རྟེན་གྱི་ཁམས་སྐྱེས་པ་འམ། བུད་མེད་གང་ལ་ལ་
ཞིག་གིས་རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་སྦྱིན་པ་བྱིན་ན། རབ་འབྱོར་འདི་ཇི་སྙམ་དུ་སེམས་སྐྱེས་པ་འམ། བུད་མེད་དེ་གཞི་དེ་ལས་བསོད་ནམས་མང་དུ་བསྐྱེད་དམ། 
39-1-156b


རབ་འབྱོར་གྱིས་གསོལ་པ། བཅོམ་ལྡན་འདས་མང་ལགས་སོ། །བདེ་བར་གཤེགས་པ་མང་ལགས་ཏེ། སྐྱེས་པ་འམ། བུད་མེད་དེ་གཞི་དེ་ལས་བསོད་ནམས་མང་དུ་སྐྱེད་དོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་གང་གིས་འཇིག་རྟེན་
གྱི་ཁམས་དེ་སྙེད་རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་སྦྱིན་པ་བྱིན་པ་བས། གང་གིས་ཆོས་ཀྱི་རྣམ་གྲངས་འདི་ལས་ཐ་ན་ཚིག་བཞི་པའི་ཚིགས་སུ་
བཅད་པ་ཙམ་བཟུང་ནས་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་ན། དེ་ཉིད་གཞི་དེ་ལས་བསོད་ནམས་ཆེས་མང་དུ་གྲངས་མེད་དཔག་ཏུ་མེད་པ་བསྐྱེད་དོ། །ཡང་རབ་འབྱོར་ས་ཕྱོགས་གང་ན་ཆོས་ཀྱི་རྣམ་གྲངས་འདི་ལས་ཐ་ན་ཚིག་བཞི་པའི་
ཚིགས་སུ་བཅད་པ་ཙམ་འདོན་ཏམ་སྟོན་པའི་ས་ཕྱོགས་དེ་ལྷ་དང་མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱི་མཆོད་རྟེན་དུ་གྱུར་པ་ཡིན་ན། སུ་ཞིག་ཆོས་ཀྱི་རྣམ་གྲངས་འདི་ལེན་པ་དང་། འཛིན་པ་དང་། ཀློག་པ་དང་། ཀུན་ཆུབ་པར་བྱེད་པ་དང་། 
ཚུལ་བཞིན་དུ་ཡིད་ལ་བྱེད་པ་དེ་ངོ་མཚར་རབ་དང་ལྡན་པར་འགྱུར་བ་ལྟ་ཅི་སྨོས། ས་ཕྱོགས་དེ་ན་སྟོན་པ་ཡང་བཞུགས་ཏེ། བླ་མའི་གནས་གཞན་དག་ཀྱང་གནས་སོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་
སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། ཇི་ལྟར་གཟུང་བར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་ཆོས་ཀྱི་རྣམ་གྲངས་འདི་
ཤེས་རབ་ཀྱི་ཕ་རོལ་དུ་ཕྱིན་པ་ཞེས་བྱ་སྟེ། འདི་དེ་ལྟར་ཟུང་ཞིག །དེ་ཅིའི་ཕྱིར་ཞེ་ན། རབ་འབྱོར་དེ་བཞིན་གཤེགས་པས་ཤེས་རབ་ཀྱི་ཕ་རོལ་དུ་ཕྱིན་པ་གང་བཟུང་བ་དེ་ཉིད་ཕ་རོལ་དུ་ཕྱིན་པ་མེད་པའི་ཕྱིར་ཏེ། དེས་ན་ཤེས་རབ་ཀྱི་ཕ་རོལ་དུ་ཕྱིན་པ་ཞེས་བྱའོ། །རབ་
འབྱོར་འདི་ཇི་སྙམ་དུ་སེམས། དེ་བཞིན་གཤེགས་པས་གང་གསུངས་པའི་ཆོས་དེ་གང་ཡང་ཡོད་དམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་བཞིན་གཤེགས་པས་གང་གསུངས་པའི་ཆོས་དེ་གང་ཡང་མ་མཆིས་སོ། །བཅོམ་ལྡན་འདས་ཀྱིས་
39-1-157a


བཀའ་སྩལ་པ། རབ་འབྱོར་འདི་ཇི་སྙམ་དུ་སེམས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སའི་རྡུལ་ཕྲ་རབ་ཇི་སྙེད་ཡོད་པ་དེ་མང་བ་ཡིན་ནམ། རབ་འབྱོར་གྱིས་གསོལ་པ། བཅོམ་ལྡན་འདས་སའི་རྡུལ་དེ་མང་ལགས་སོ། བདེ་
བར་གཤེགས་པ་མང་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་སའི་རྡུལ་གང་ལགས་པ་དེ་རྡུལ་མ་མཆིས་པར་དེ་བཞིན་གཤེགས་པས་གསུངས་པའི་སླད་དུ་སྟེ། དེས་ན་སའི་རྡུལ་ཅེས་བགྱིའོ། །འཇིག་རྟེན་གྱི་ཁམས་གང་ལགས་པ་
དེ་ཁམས་མ་མཆིས་པར་དེ་བཞིན་གཤེགས་པས་གསུངས་ཏེ། དེས་ན་འཇིག་རྟེན་གྱི་ཁམས་ཤེས་བྱའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ཇི་སྙམ་དུ་སེམས། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་པོ་དེ་དག་གིས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་ལྟ་འམ། རབ་འབྱོར་གྱིས་གསོལ་པ། །བཅོམ་ལྡན་འདས་དེ་ནི་མ་ལགས་སོ། །དེ་ཅིའི་སླད་དུ་ཞེ་ན། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་པོ་གང་དག་དེ་བཞིན་
གཤེགས་པས་གསུངས་པ་དེ་དག་མཚན་མ་མཆིས་པར་གསུངས་པའི་སླད་དུ་སྟེ། དེས་ན་དེ་བཞིན་གཤེགས་པའི་མཚན་སུམ་བཅུ་རྩ་གཉིས་ཤེས་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ཡང་རབ་འབྱོར་སྐྱེས་པ་འམ། 
བུད་མེད་གང་གིས་ལུས་གང་གཱའི་ཀླུང་གི་བྱེ་མ་སྙེད་ཡོངས་སུ་གཏོང་བ་བས་གང་གིས་ཆོས་ཀྱི་རྣམ་གྲངས་འདི་ལས་ཐ་ན་ཚིག་བཞི་པའི་ཚིགས་སུ་བཅད་པ་ཙམ་བཟུང་སྟེ། གཞན་དག་ལ་ཡང་བསྟན་ན་དེ་གཞི་དེ་ལས་བསོད་ནམས་
ཆེས་མང་དུ་གྲངས་མེད་དཔག་ཏུ་མེད་པ་བསྐྱེད་དོ། །དེ་ནས་ཚེ་དང་ལྡན་པ་རབ་འབྱོར་ཆོས་ཀྱི་ཤུགས་ཀྱིས་མཆི་མ་བྱུང་སྟེ། དེས་མཆི་མ་ཕྱིས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །འདི་ལྟར་ཆོས་ཀྱི་རྣམ་གྲངས་འདི་དེ་བཞིན་
གཤེགས་པས་གསུངས་པ་ནི་བཅོམ་ལྡན་འདས་ངོ་མཚར་ཏོ། བདེ་བར་གཤེགས་པ་ངོ་མཚར་ཏོ། །བཅོམ་ལྡན་འདས་བདག་གིས་ཡེ་ཤེས་སྐྱེས་ཚུན་ཆད་བདག་གིས་ཆོས་ཀྱི་རྣམ་གྲངས་འདི་སྔོན་ནམ་ཡང་མ་ཐོས་སོ། །བཅོམ་ལྡན་འདས་མདོ་
39-1-157b


བཤད་པ་འདི་ལ་གང་དག་ཡང་དག་པར་འདུ་ཤེས་བསྐྱེད་པར་གྱུར་པའི་སེམས་ཅན་དེ་དག་ནི་ངོ་མཚར་རབ་དང་ལྡན་པར་འགྱུར་རོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཡང་དག་པར་འདུ་ཤེས་པ་གང་ལགས་པ་དེ་ཉིད་འདུ་ཤེས་མ་མཆིས་
པའི་སླད་དུ་སྟེ། དེ་བས་ན་ཡང་དག་པར་འདུ་ཤེས་ཡང་དག་པར་འདུ་ཤེས་ཞེས་དེ་བཞིན་གཤེགས་པས་གསུངས་སོ། །བཅོམ་ལྡན་འདས་བདག་ཆོས་ཀྱི་རྣམ་གྲངས་འདི་བཤད་པ་ལ་རྟོག་ཅིང་མོས་པ་ནི་བདག་ལ་མོས་པ་མ་ལགས་
ཀྱི། བཅོམ་ལྡན་འདས་སླད་མའི་ཚེ་སླད་མའི་དུས་ལྔ་བརྒྱ་ཐ་མ་ལ་སེམས་ཅན་གང་དག་ཆོས་ཀྱི་རྣམ་གྲངས་འདི་ལེན་པ་དང་། འཛིན་པ་དང་། ཀློག་པ་དང་། ཀུན་ཆུབ་པར་བགྱིད་པ་དེ་དག་ནི་ངོ་མཚར་རབ་དང་ལྡན་པར་འགྱུར་རོ། །
ཡང་བཅོམ་ལྡན་འདས་དེ་དག་ནི་བདག་ཏུ་འདུ་ཤེས་འཇུག་པར་མི་འགྱུར། སེམས་ཅན་དུ་འདུ་ཤེས་འཇུག་པར་མི་འགྱུར། སྲོག་ཏུ་འདུ་ཤེས་པ་དང་། གང་ཟག་ཏུ་འདུ་ཤེས་འཇུག་པར་མི་འགྱུར་ལགས་སོ། །དེ་ཅིའི་སླད་དུ་ཞེ་ན། 
བཅོམ་ལྡན་འདས་བདག་ཏུ་འདུ་ཤེས་པ་དང་། སེམས་ཅན་དུ་འདུ་ཤེས་པ་དང་། སྲོག་ཏུ་འདུ་ཤེས་པ་དང་། གང་ཟག་ཏུ་འདུ་ཤེས་པ་གང་ལགས་པ་དེ་དག་ཉིད་འདུ་ཤེས་མ་མཆིས་པའི་སླད་དུའོ། །དེ་ཅིའི་སླད་དུ་ཞེ་ན། སངས་རྒྱས་བཅོམ་ལྡན་འདས་རྣམས་
ནི་འདུ་ཤེས་ཐམས་ཅད་དང་བྲལ་བའི་སླད་དུའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་དེ་དེ་བཞིན་ནོ། །དེ་དེ་བཞིན་ཏེ། མདོ་བཤད་པ་འདི་ལ་གང་དག་མི་སྐྲག་མི་དངང་
ཞིང་དངང་བར་མི་འགྱུར་བའི་སེམས་ཅན་དེ་དག་ནི་ངོ་མཚར་རབ་དང་ལྡན་པར་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར་ཕ་རོལ་དུ་ཕྱིན་པ་དམ་པ་འདི་ནི་དེ་བཞིན་གཤེགས་པས་གསུངས་ཏེ། ཕ་རོལ་དུ་ཕྱིན་པ་དམ་པ་གང་དག་དེ་བཞིན་གཤེགས་པས་
གསུངས་པ་དེ་སངས་རྒྱས་བཅོམ་ལྡན་འདས་དཔག་ཏུ་མེད་པ་རྣམས་ཀྱིས་གསུངས་པའི་ཕྱིར་ཏེ། དེས་ན་ཕ་རོལ་དུ་ཕྱིན་པ་དམ་པ་ཞེས་བྱའོ། །ཡང་རབ་འབྱོར་དེ་བཞིན་གཤེགས་པའི་བཟོད་པའི་ཕ་རོལ་དུ་ཕྱིན་པ་གང་ཡིན་པ་དེ་ཉིད་ཕ་
39-1-158a


རོལ་དུ་ཕྱིན་པ་མེད་དོ། །དེ་ཅིའི་ཕྱིར་ཞེ་ན། རབ་འབྱོར་གང་གི་ཚེ་ཀ་ལིང་ཀཱའི་རྒྱལ་པོས་ངའི་ཡན་ལག་དང་ཉིང་ལག་རྣམས་བཅད་པར་གྱུར་པ་དེའི་ཚེ་ང་ལ་བདག་ཏུ་འདུ་ཤེས་སམ། སེམས་ཅན་དུ་འདུ་ཤེས་སམ། སྲོག་ཏུ་
འདུ་ཤེས་སམ། གང་ཟག་ཏུ་འདུ་ཤེས་ཀྱང་མ་བྱུང་ལ། ང་ལ་འདུ་ཤེས་ཅིའང་མེད་ལ་འདུ་ཤེས་མེད་པར་གྱུར་པ་ཡང་མ་ཡིན་པའི་ཕྱིར་རོ། །དེ་ཅིའི་ཕྱིར་ཞེ་ན། རབ་འབྱོར་གལ་ཏེ་དེའི་ཚེ་ང་ལ་བདག་ཏུ་འདུ་ཤེས་བྱུང་ན་དེའི་ཚེ་གནོད་སེམས་ཀྱི་འདུ་ཤེས་
ཀྱང་བྱུང་ལ། སེམས་ཅན་དུ་འདུ་ཤེས་པ་དང་། སྲོག་ཏུ་འདུ་ཤེས་པ་དང་། གང་ཟག་ཏུ་འདུ་ཤེས་བྱུང་ན་དེའི་ཚེ་གནོད་སེམས་ཀྱི་འདུ་ཤེས་ཀྱང་འབྱུང་བའི་ཕྱིར་རོ། །རབ་འབྱོར་ངས་མངོན་པར་ཤེས་ཏེ། འདས་པའི་དུས་ན་ང་ཚེ་རབས་ལྔ་བརྒྱར་བཟོད་
པར་སྨྲ་བ་ཞེས་བྱ་བའི་དྲང་སྲོང་དུ་གྱུར་པ་དེ་ན་ཡང་ང་ལ་བདག་ཏུ་འདུ་ཤེས་མ་བྱུང་། སེམས་ཅན་དུ་འདུ་ཤེས་པ་དང་། གང་ཟག་ཏུ་འདུ་ཤེས་མ་བྱུང་ངོ་། །རབ་འབྱོར་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་འདུ་ཤེས་ཐམས་
ཅད་རྣམ་པར་སྤངས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱའོ། །གཟུགས་ལ་མི་གནས་པར་སེམས་བསྐྱེད་པར་བྱའོ། །སྒྲ་དང་།  དྲི་དང་། རོ་དང་། རེག་བྱ་དང་། ཆོས་ལའང་མི་གནས་པར་སེམས་བསྐྱེད་པར་
བྱའོ། །ཆོས་མེད་པ་ལའང་མི་གནས་པར་སེམས་བསྐྱེད་པར་བྱའོ། །ཅི་ལའང་མི་གནས་པར་སེམས་བསྐྱེད་པར་བྱའོ། །དེ་ཅིའི་ཕྱིར་ཞེ་ན། གནས་པ་གང་ཡིན་པ་དེ་ཉིད་མི་གནས་པའི་ཕྱིར་ཏེ། དེ་བས་ན་དེ་བཞིན་གཤེགས་པས་
འདི་སྐད་དུ། བྱང་ཆུབ་སེམས་དཔས་མི་གནས་པར་སྦྱིན་པ་སྦྱིན་པར་བྱའོ་ཞེས་གསུངས་སོ། །ཡང་རབ་འབྱོར་བྱང་ཆུབ་སེམས་དཔས་འདི་ལྟར་སེམས་ཅན་ཐམས་ཅད་ཀྱི་དོན་གྱི་ཕྱིར་སྦྱིན་པ་ཡོངས་སུ་གཏང་བར་བྱའོ། །སེམས་ཅན་
དུ་འདུ་ཤེས་པ་གང་ཡིན་པ་དེ་ཉིད་ཀྱང་འདུ་ཤེས་མེད་པ་སྟེ། དེ་བཞིན་གཤེགས་པས་སེམས་ཅན་ཐམས་ཅད་ཅེས་གང་གསུངས་པ་དེ་ཉིད་ཀྱང་མེད་པའོ། །དེ་ཅིའི་ཕྱིར་ཞེ་ན། རབ་འབྱོར་དེ་བཞིན་གཤེགས་པ་ནི་ཡང་དག་པར་གསུང་བ། 
39-1-158b


བདེན་པ་གསུང་བ། དེ་བཞིན་ཉིད་གསུང་བ་སྟེ། དེ་བཞིན་གཤེགས་པ་ནི་མ་ནོར་བ་དེ་བཞིན་ཉིད་གསུང་བའི་ཕྱིར་རོ། །ཡང་རབ་འབྱོར་དེ་བཞིན་གཤེགས་པས་ཆོས་གང་མངོན་པར་རྫོགས་པར་སངས་རྒྱས་པའམ་བསྟེན་པ་དེ་ལ་ནི་བདེན་པ་
ཡང་མེད་བརྫུན་པ་ཡང་མེད་དོ། །རབ་འབྱོར་འདི་ལྟ་སྟེ་དཔེར་ན་མིག་དང་ལྡན་པའི་མི་ཞིག་མུན་པར་ཞུགས་ནས་ཅི་ཡང་མི་མཐོང་བ་དེ་བཞིན་དུ་གང་དངོས་པོར་ལྷུང་བས་སྦྱིན་པ་ཡོངས་སུ་གཏོང་བའི་བྱང་ཆུབ་སེམས་དཔར་བལྟའོ། །རབ་འབྱོར་འདི་ལྟ་
སྟེ་དཔེར་ན་ནམ་ལངས་ཏེ་ཉི་མ་ཤར་ན་མིག་དང་ལྡན་པའི་མིས་གཟུགས་རྣམ་པ་སྣ་ཚོགས་དག་མཐོང་བ་དེ་བཞིན་དུ། གང་དངོས་པོར་མ་ལྷུང་བས་སྦྱིན་པ་ཡོངས་སུ་གཏོང་བའི་བྱང་ཆུབ་སེམས་དཔར་བལྟའོ། །ཡང་རབ་འབྱོར་རིགས་ཀྱི་བུ་
འམ། རིགས་ཀྱི་བུ་མོ་གང་དག་ཆོས་ཀྱི་རྣམ་གྲངས་འདི་ལེན་པ་དང་། འཛིན་པ་དང་། ཀློག་པ་དང་། ཀུན་ཆུབ་པར་བྱེད་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དེ་དག་ནི་དེ་བཞིན་གཤེགས་པས་མཁྱེན། དེ་དག་
ནི་དེ་བཞིན་གཤེགས་པས་གཟིགས་ཏེ། སེམས་ཅན་དེ་དག་ཐམས་ཅད་ནི་བསོད་ནམས་ཀྱི་ཕུང་པོ་དཔག་ཏུ་མེད་པ་བསྐྱེད་པར་འགྱུར་རོ། །ཡང་རབ་འབྱོར་སྐྱེས་པ་འམ། བུད་མེད་གང་ཞིག་སྔ་དྲོའི་དུས་ཀྱི་ཚེ་ལུས་གང་གཱའི་ཀླུང་གི་བྱེ་མ་
སྙེད་ཡོངས་སུ་གཏོང་ལ། ཕྱེད་ཀྱི་དུས་དང་། ཕྱི་དྲོའི་དུས་ཀྱི་ཚེ་ཡང་ལུས་གང་གཱའི་ཀླུང་གི་བྱེ་མ་སྙེད་ཡོངས་སུ་གཏོང་སྟེ། རྣམ་གྲངས་འདི་ལྟ་བུར་བསྐལ་པ་ཁྲག་ཁྲིག་བརྒྱ་སྟོང་དུ་ལུས་ཡོངས་སུ་གཏོང་བ་བས། གང་གིས་ཆོས་ཀྱི་རྣམ་གྲངས་
འདི་ཐོས་ནས་མི་སྤོང་ན་དེ་ཉིད་གཞི་དེ་ལས་བསོད་ནམས་ཆེས་མང་དུ་གྲངས་མེད་དཔག་ཏུ་མེད་པ་བསྐྱེད་ན། གང་གིས་ཡི་གེར་བྲིས་ནས་ལེན་པ་དང་། འཛིན་པ་དང་། ཀློག་པ་དང་། ཀུན་ཆུབ་པར་བྱེད་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་
པ་ལྟ་ཅི་སྨོས། ཡང་རབ་འབྱོར་ཆོས་ཀྱི་རྣམ་གྲངས་འདི་ནི་བསམ་གྱིས་མི་ཁྱབ་ཅིང་མཚུངས་པ་མེད་དེ། ཆོས་ཀྱི་རྣམ་གྲངས་འདི་ནི་ཐེག་པ་མཆོག་ལ་ཡང་དག་པར་ཞུགས་པའི་སེམས་ཅན་རྣམས་ཀྱི་དོན་དང་། ཐེག་པ་ཕུལ་དུ་ཕྱིན་པ་ལ་ཡང་དག་པར་ཞུགས་
39-1-159a


པའི་སེམས་ཅན་རྣམས་ཀྱི་དོན་གྱི་ཕྱིར། དེ་བཞིན་གཤེགས་པས་གསུངས་སོ། །གང་དག་ཆོས་ཀྱི་རྣམ་གྲངས་འདི་ལེན་པ་དང་། ཀློག་པ་དང་། ཀུན་ཆུབ་པར་བྱེད་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དེ་དག་ནི་དེ་
བཞིན་གཤེགས་པས་མཁྱེན་ཏེ། དེ་དག་དེ་བཞིན་གཤེགས་པས་གཟིགས་ཏེ། སེམས་ཅན་དེ་དག་ཐམས་ཅད་ནི་བསོད་ནམས་ཀྱི་ཕུང་པོ་དཔག་ཏུ་མེད་པ་དང་ལྡན་པར་འགྱུར་རོ། །བསོད་ནམས་ཀྱི་ཕུང་པོ་བསམ་གྱིས་མི་ཁྱབ་པ་དང་། མཚུངས་པ་མེད་
པ་དང་། གཞལ་དུ་མེད་པ་དང་། ཚད་མེད་པ་དང་ལྡན་པར་འགྱུར་ཏེ། སེམས་ཅན་དེ་དག་ཐམས་ཅད་ངའི་བྱང་ཆུབ་ཕྲག་པ་ལ་ཐོགས་པར་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར་དམན་པ་ལ་མོས་པ་རྣམས་ཀྱིས་ཆོས་ཀྱི་རྣམ་གྲངས་འདི་མཉན་པར་མི་
ནུས་ཏེ། བདག་ཏུ་ལྟ་བ་རྣམས་ཀྱིས་མ་ཡིན། སེམས་ཅན་དུ་ལྟ་བ་རྣམས་ཀྱིས་མ་ཡིན། སྲོག་ཏུ་ལྟ་བ་རྣམས་ཀྱིས་མ་ཡིན། གང་ཟག་ཏུ་ལྟ་བ་རྣམས་ཀྱིས་མཉན་པ་དང་། བླང་བ་དང་། གཟུང་བ་དང་། ཀླག་པ་དང་། ཀུན་ཆུབ་པར་བྱེད་མི་
ནུས་ཏེ། དེ་ནི་གནས་མེད་པའི་ཕྱིར་རོ། །ཡང་རབ་འབྱོར་ས་ཕྱོགས་གང་ན་མདོ་སྡེ་འདི་སྟོན་པའི་ས་ཕྱོགས་དེ་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱིས་མཆོད་པར་འོས་པར་འགྱུར་རོ། །ས་ཕྱོགས་དེ་ཕྱག་བྱ་
བར་འོས་པ་དང་། བསྐོར་བ་བྱ་བར་འོས་པར་འགྱུར་ཏེ། ས་ཕྱོགས་དེ་མཆོད་རྟེན་ལྟ་བུར་འགྱུར་རོ། །རབ་འབྱོར་རིགས་ཀྱི་བུ་འམ། རིགས་ཀྱི་བུ་མོ་གང་དག་འདི་ལྟ་བུའི་མདོ་སྡེའི་ཚིག་འདི་དག་ལེན་པ་དང་། འཛིན་པ་དང་། ཀློག་པ་དང་། 
ཀུན་ཆུབ་པར་བྱེད་པ་དེ་དག་ནི་མནར་བར་འགྱུར། ཤིན་དུ་མནར་བར་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར་སེམས་ཅན་དེ་དག་གི་ཚེ་རབས་སྔ་མའི་མི་དགེ་བའི་ལས་ངན་སོང་དུ་སྐྱེ་བར་འགྱུར་བ་གང་དག་བྱས་པ་དག་ཚེ་འདི་ཉིད་ལ་མནར་བས་
ཚེ་རབས་སྔ་མའི་མི་དགེ་བའི་ལས་དེ་དག་བྱང་བར་འགྱུར་ཏེ། སངས་རྒྱས་ཀྱི་བྱང་ཆུབ་ཀྱང་ཐོབ་པར་འགྱུར་བའི་ཕྱིར་རོ། །རབ་འབྱོར་ངས་མངོན་པར་ཤེས་ཏེ། འདས་པའི་དུས་བསྐལ་པ་གྲངས་མེད་པའི་ཡང་ཆེས་གྲངས་མེད་པ་ན། དེ་བཞིན་
39-1-159b


གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱི་ཕ་རོལ་གྱི་ཡང་ཆེས་ཕ་རོལ་ན་སངས་རྒྱས་བྱེ་བ་ཁྲག་ཁྲིག་སྟོང་ཕྲག་བརྒྱད་བཅུ་རྩ་བཞི་དག་བྱུང་བ་ངས་མཉེས་པར་བྱས་ཏེ། མཉེས་པར་བྱས་ནས་ཐུགས་མ་
བྱུང་བར་བྱས་ཏེ། རབ་འབྱོར་སངས་རྒྱས་བཅོམ་ལྡན་འདས་དེ་དག་ངས་མཉེས་པར་བྱས་ནས་ཐུགས་བྱུང་བར་མ་བྱས་པ་གང་ཡིན་པ་དང་། ཕྱི་མའི་དུས་ལྔ་བརྒྱ་ཐ་མར་གྱུར་པ་ན་མདོ་སྡེ་འདི་ལེན་པ་དང་། འཛིན་པ་དང་། ཀློག་པ་དང་། ཀུན་ཆུབ་
པར་བྱེད་པ་གང་ཡིན་པ་ལས། རབ་འབྱོར་བསོད་ནམས་ཀྱི་ཕུང་པོ་འདི་ལ་བསོད་ནམས་ཀྱི་ཕུང་པོ་སྔ་མས་བརྒྱའི་ཆར་ཡང་མི་ཕོད་། སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། ཟླ་དང་། རྒྱུར་ཡང་མི་བཟོད་དོ། །
རབ་འབྱོར་གལ་ཏེ་དེའི་ཚེ་རིགས་ཀྱི་བུ་འམ། རིགས་ཀྱི་བུ་མོ་དག་བསོད་ནམས་ཀྱི་ཕུང་པོ་ཇི་སྙེད་རབ་ཏུ་འཛིན་པར་འགྱུར་བའི་རིགས་ཀྱི་བུའམ། རིགས་ཀྱི་བུ་མོ་དེ་དག་གི་བསོད་ནམས་ཀྱི་ཕུང་པོ་ངས་བརྗོད་ན། སེམས་ཅན་རྣམས་མྱོ་མྱོང་པོར་
འགྱུར་ཏེ། སེམས་འཁྲུགས་པར་འགྱུར་རོ། །ཡང་རབ་འབྱོར་ཆོས་ཀྱི་རྣམ་གྲངས་འདི་བསམ་གྱིས་མི་ཁྱབ་སྟེ། འདིའི་རྣམ་པར་སྨིན་པ་ཡང་བསམ་གྱིས་མི་ཁྱབ་པར་རིག་པར་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་
འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པས་ཇི་ལྟར་གནས་པར་བགྱི། ཇི་ལྟར་བསྒྲུབ་པར་བགྱི། ཇི་ལྟར་སེམས་རབ་ཏུ་གཟུང་བར་བགྱི། བཅོམ་
ལྡན་འདས་ཀྱིས་བཀའ་སྩལ་པ། རབ་འབྱོར་འདི་ལ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པས་འདི་སྙམ་དུ་བདག་གིས་སེམས་ཅན་ཐམས་ཅད་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་
སུ་མྱ་ངན་ལས་འདའོ། །དེ་ལྟར་སེམས་ཅན་ཡོངས་སུ་མྱ་ངན་ལས་འདས་ཀྱང་སེམས་ཅན་གང་ཡང་ཡོངས་སུ་མྱ་ངན་ལས་འདས་པར་གྱུར་པ་མེད་དོ་སྙམ་དུ་སེམས་བསྐྱེད་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར་གལ་ཏེ་བྱང་ཆུབ་སེམས་དཔའ་སེམས་ཅན་
39-1-160a


དུ་འདུ་ཤེས་འཇུག་ན་དེ་བྱང་ཆུབ་སེམས་དཔའ་ཞེས་མི་བྱ་ལ། གང་ཟག་གི་བར་དུ་འདུ་ཤེས་འཇུག་ན་དེ་ཡང་བྱང་ཆུབ་སེམས་དཔའ་ཞེས་མི་བྱ་བའི་ཕྱིར་རོ། །དེ་ཅིའི་ཕྱིར་ཞེ་ན། རབ་འབྱོར་གང་བྱང་ཆུབ་སེམས་དཔའི་ཐེག་པ་ལ་ཡང་དག་པར་
ཞུགས་པ་ཞེས་བྱ་བའི་ཆོས་དེ་གང་ཡང་མེད་པའི་ཕྱིར་རོ། །རབ་འབྱོར་འདི་ཇི་སྙམ་དུ་སེམས། དེ་བཞིན་གཤེགས་པས་དེ་བཞིན་གཤེགས་པ་མར་མེ་མཛད་ལས་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་
པའི་ཆོས་དེ་གང་ཡང་ཡོད་དམ། དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་དེ་བཞིན་གཤེགས་པ་མར་མེ་མཛད་ལས་གང་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་ཆོས་དེ་གང་ཡང་མ་མཆིས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་དེ་དེ་བཞིན་
ནོ། །དེ་དེ་བཞིན་ཏེ། དེ་བཞིན་གཤེགས་པ་མར་མེ་མཛད་ལས་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་ཆོས་དེ་གང་ཡང་མེད་དོ། །རབ་འབྱོར་གལ་ཏེ་དེ་བཞིན་གཤེགས་པས་གང་མངོན་པར་
རྫོགས་པར་སངས་རྒྱས་པའི་ཆོས་དེ་འགའ་ཞིག་ཡོད་པར་གྱུར་ན། དེ་བཞིན་གཤེགས་པ་མར་མེ་མཛད་ཀྱིས་ང་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་མི་སྟོན་པ་ཞིག་ན། རབ་འབྱོར་འདི་ལྟར་དེ་བཞིན་གཤེགས་པས་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་ཆོས་དེ་གང་ཡང་མེད་པས་
དེའི་ཕྱིར་དེ་བཞིན་གཤེགས་པ་མར་མེ་མཛད་ཀྱིས་ང་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་
39-1-160b


བསྟན་ཏོ། །དེ་ཅིའི་ཕྱིར་ཞེ་ན། རབ་འབྱོར་དེ་བཞིན་གཤེགས་པ་ཞེས་བྱ་བ་ནི་ཡང་དག་པ་དེ་བཞིན་ཉིད་ཀྱི་ཚིག་བླ་དགས་ཡིན་པའི་ཕྱིར་རོ། །རབ་འབྱོར་གང་ལ་ལ་ཞིག་འདི་སྐད་དུ། དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་ཟེར་ན་དེ་ལོག་པར་སྨྲ་བ་ཡིན་ནོ། །དེ་ཅིའི་ཕྱིར་ཞེ་ན། རབ་འབྱོར་དེ་བཞིན་གཤེགས་པས་
གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་ཆོས་དེ་གང་ཡང་མེད་པའི་ཕྱིར་རོ། །རབ་འབྱོར་དེ་བཞིན་གཤེགས་པས་ཆོས་གང་མངོན་པར་རྫོགས་པར་སངས་རྒྱས་པ་དེ་ལ་བདེན་པ་ཡང་མེད་བརྫུན་པ་
ཡང་མེད་དེ། དེ་བས་ན་དེ་བཞིན་གཤེགས་པས་ཆོས་ཐམས་ཅད་སངས་རྒྱས་ཀྱི་ཆོས་སོ་ཞེས་གསུངས་སོ། །རབ་འབྱོར་ཆོས་ཐམས་ཅད་ཅེས་བྱ་བ་ནི་དེ་དག་ཐམས་ཅད་ཆོས་མེད་པ་ཡིན་ཏེ་དེ་བས་ན་ཆོས་ཐམས་ཅད་སངས་རྒྱས་ཀྱི་ཆོས་ཤེས་བྱ་སྟེ། 
རབ་འབྱོར་འདི་ལྟ་སྟེ། དཔེར་ན་མི་ཞིག་ལུས་དང་ལྡན་ཞིང་ལུས་ཆེན་པོར་གྱུར་པ་བཞིན་ནོ། །ཚེ་དང་ལྡན་པ་རབ་འབྱོར་གྱིས་གསོལ་པ། བཅོམ་ལྡན་འདས་དེ་བཞིན་གཤེགས་པས་མི་ལུས་དང་ལྡན་ཞིང་ལུས་ཆེན་པོ་ཞེས་གང་
གསུངས་པ་དེ། དེ་བཞིན་གཤེགས་པས་ལུས་མ་མཆིས་པར་གསུངས་ཏེ། དེས་ན་ལུས་དང་ལྡན་ཞིང་ལུས་ཆེན་པོ་ཞེས་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་བཞིན་ཏེ། བྱང་ཆུབ་སེམས་
དཔའ་གང་འདི་སྐད་དུ་བདག་གིས་སེམས་ཅན་རྣམས་ཡོངས་སུ་མྱ་ངན་ལས་འདའོ་ཞེས་ཟེར་ན་དེ་བྱང་ཆུབ་སེམས་དཔའ་ཞེས་མི་བྱའོ། །དེ་ཅིའི་ཕྱིར་ཞེ་ན། རབ་འབྱོར་གང་བྱང་ཆུབ་སེམས་དཔའ་ཞེས་བྱ་བའི་ཆོས་
དེ་གང་ཡང་ཡོད་དམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་བས་ན་དེ་བཞིན་གཤེགས་པས་ཆོས་ཐམས་ཅད་ནི་སེམས་ཅན་མེད་
39-1-161a


པ། སྲོག་མེད་པ། གང་ཟག་མེད་པ་ཞེས་གསུངས་སོ། །རབ་འབྱོར་བྱང་ཆུབ་སེམས་དཔའ་གང་ཞིག་འདི་སྐད་དུ། བདག་གིས་ཞིང་བཀོད་པ་རྣམས་བསྒྲུབ་བོ་ཞེས་ཟེར་ན་དེ་ཡང་དེ་བཞིན་དུ་བརྗོད་པར་བྱའོ། །དེ་ཅིའི་
ཕྱིར་ཞེ་ན། རབ་འབྱོར་ཞིང་བཀོད་པ་རྣམས་ཞིང་བཀོད་པ་རྣམས་ཤེས་བྱ་བ་ནི་དེ་དག་བཀོད་པ་མེད་པར་དེ་བཞིན་གཤེགས་པས་གསུངས་པའི་ཕྱིར་ཏེ། དེ་བས་ན་ཞིང་བཀོད་པ་རྣམས་ཤེས་བྱའོ། །རབ་འབྱོར་བྱང་ཆུབ་སེམས་
དཔའ་གང་ཞིག་ཆོས་རྣམས་ནི་བདག་མེད་པའོ། །ཆོས་རྣམས་ནི་བདག་མེད་པའོ་ཞེས་མོས་པ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བྱང་ཆུབ་སེམས་དཔའ་བྱང་ཆུབ་སེམས་དཔའ་
ཞེས་བརྗོད་དོ། །རབ་འབྱོར་འདི་ཇི་སྙམ་དུ་སེམས། དེ་བཞིན་གཤེགས་པ་ལ་ཤའི་སྤྱན་མངའ་འམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་དེ་ལྟ་ལགས་ཏེ། དེ་བཞིན་གཤེགས་པ་ལ་ཤའི་སྤྱན་མངའོ། །
བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ཇི་སྙམ་དུ་སེམས། དེ་བཞིན་གཤེགས་པ་ལ་ལྷའི་སྤྱན་མངའ་འམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་དེ་ལྟ་ལགས་ཏེ། དེ་བཞིན་
གཤེགས་པ་ལ་ལྷའི་སྤྱན་མངའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ཇི་སྙམ་དུ་སེམས། དེ་བཞིན་གཤེགས་པ་ལ་ཤེས་རབ་ཀྱི་སྤྱན་མངའ་འམ། རབ་འབྱོར་གྱིས་གསོལ་པ། བཅོམ་
ལྡན་འདས་དེ་དེ་ལྟ་ལགས་ཏེ། དེ་བཞིན་གཤེགས་པ་ལ་ཤེས་རབ་ཀྱི་སྤྱན་མངའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ཇི་སྙམ་དུ་སེམས། དེ་བཞིན་གཤེགས་པ་ལ་ཆོས་ཀྱི་སྤྱན་མངའ་འམ། རབ་འབྱོར་གྱིས་
གསོལ་པ། བཅོམ་ལྡན་འདས་དེ་དེ་ལྟ་ལགས་ཏེ། དེ་བཞིན་གཤེགས་པ་ལ་ཆོས་ཀྱི་སྤྱན་མངའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ཇི་སྙམ་དུ་སེམས། དེ་བཞིན་གཤེགས་པ་ལ་སངས་རྒྱས་ཀྱི་སྤྱན་མངའ་འམ། རབ་འབྱོར་གྱིས་
39-1-161b


གསོལ་པ། བཅོམ་ལྡན་འདས་དེ་དེ་ལྟ་ལགས་ཏེ། དེ་བཞིན་གཤེགས་པ་ལ་སངས་རྒྱས་ཀྱི་སྤྱན་མངའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ཇི་སྙམ་དུ་སེམས། གང་གཱའི་ཀླུང་གི་བྱེ་མ་ཇི་སྙེད་པ་གང་གཱའི་
ཀླུང་ཡང་དེ་སྙེད་དུ་གྱུར་ལ། དེ་དག་གི་བྱེ་མ་སྙེད་པ་དེ་སྙེད་ཀྱི་འཇིག་རྟེན་གྱི་ཁམས་སུ་གྱུར་ན་འཇིག་རྟེན་གྱི་ཁམས་དེ་མང་བ་ཡིན་ནམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་དེ་ལྟ་ལགས་ཏེ། འཇིག་རྟེན་གྱི་ཁམས་དེ་དག་
མང་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འཇིག་རྟེན་གྱི་ཁམས་དེ་དག་ན་སེམས་ཅན་ཇི་སྙེད་ཡོད་པ་དེ་དག་གི་བསམ་པ་ཐ་དད་པའི་སེམས་ཀྱི་རྒྱུད་ངས་རབ་ཏུ་ཤེས་སོ། །དེ་ཅིའི་ཕྱིར་ཞེ་ན། རབ་འབྱོར་
སེམས་ཀྱི་རྒྱུད་སེམས་ཀྱི་རྒྱུད་ཅེས་བྱ་བ་ནི་དེ་རྒྱུད་མེད་པར་དེ་བཞིན་གཤེགས་པས་གསུངས་པའི་ཕྱིར་ཏེ། དེས་ན་སེམས་ཀྱི་རྒྱུད་ཅེས་བྱའོ། །དེ་ཅིའི་ཕྱིར་ཞེ་ན། རབ་འབྱོར་འདས་པའི་སེམས་ཀྱང་དམིགས་སུ་མེད། མ་འོངས་
པའི་སེམས་ཀྱང་དམིགས་སུ་མེད། ད་ལྟར་བྱུང་བའི་སེམས་ཀྱང་དམིགས་སུ་མེད་པའི་ཕྱིར་རོ། །རབ་འབྱོར་དེ་ཇི་སྙམ་དུ་སེམས། གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་
ཡོངས་སུ་གང་བར་བྱས་ཏེ་སྦྱིན་པ་བྱིན་ན། རིགས་ཀྱི་བུའམ། རིགས་ཀྱི་བུ་མོ་དེ་གཞི་དེ་ལས་བསོད་ནམས་མང་དུ་བསྐྱེད་དམ། རབ་འབྱོར་གྱིས་གསོལ་པ། བཅོམ་ལྡན་འདས་མང་ལགས་སོ། །བདེ་བར་གཤེགས་པ་མང་ལགས་སོ། །བཅོམ་ལྡན་འདས་ཀྱིས་
བཀའ་སྩལ་པ། རབ་འབྱོར་དེ་དེ་བཞིན་ནོ། །དེ་དེ་བཞིན་ཏེ། རིགས་ཀྱི་བུ་འམ། རིགས་ཀྱི་བུ་མོ་དེ་གཞི་དེ་ལས་བསོད་ན་མས་ཀྱི་ཕུང་པོ་མང་པོ་སྐྱེད་དོ། །རབ་འབྱོར་གལ་ཏེ་བསོད་ནམས་ཀྱི་ཕུང་པོ་བསོད་ནམས་ཀྱི་ཕུང་པོར་གྱུར་ན། བསོད་ནམས་ཀྱི་ཕུང་པོ་ཞེས་
དེ་བཞིན་གཤེགས་པ་མི་གསུང་ངོ་། །རབ་འབྱོར་དེ་ཇི་སྙམ་དུ་སེམས། གཟུགས་ཀྱི་སྐུ་ཡོངས་སུ་གྲུབ་པས་དེ་བཞིན་གཤེགས་པར་བལྟའམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་ལགས་ཏེ། གཟུགས་ཀྱི་སྐུ་ཡོངས་སུ་གྲུབ་པས་དེ་བཞིན་
39-1-162a


གཤེགས་པར་མི་བལྟའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གཟུགས་ཀྱི་སྐུ་ཡོངས་སུ་གྲུབ་པས་གཟུགས་ཀྱི་སྐུ་ཡོངས་སུ་རྫོགས་པ་ཞེས་བགྱི་བ་ནི་དེ་ཡོངས་སུ་གྲུབ་པ་མ་མཆིས་པར་དེ་བཞིན་གཤེགས་པས་གསུངས་པའི་སླད་
དུ་སྟེ། དེས་ན་གཟུགས་ཀྱི་སྐུ་ཡོངས་སུ་གྲུབ་པ་ཞེས་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ཇི་སྙམ་དུ་སེམས། མཚན་ཕུན་སུམ་ཚོགས་པས་དེ་བཞིན་གཤེགས་པར་བལྟ་འམ། རབ་འབྱོར་གྱིས་གསོལ་པ། བཅོམ་
ལྡན་འདས་དེ་ནི་མ་ལགས་ཏེ། མཚན་ཕུན་སུམ་ཚོགས་པས་དེ་བཞིན་གཤེགས་པར་མི་བལྟའོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པས་མཚན་ཕུན་སུམ་ཚོགས་པར་གསུངས་པ་དེ་མཚན་ཕུན་སུམ་ཚོགས་པ་མ་མཆིས་པར་དེ་བཞིན་
གཤེགས་པས་གསུངས་པའི་སླད་དུ་སྟེ། དེས་ན་མཚན་ཕུན་སུམ་ཚོགས་པ་ཞེས་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ཇི་སྙམ་དུ་སེམས། དེ་བཞིན་གཤེགས་པ་འདི་སྙམ་དུ་ངས་ཆོས་བསྟན་ཏོ་ཞེས་
དགོངས་སོ་སྙམ་ན། རབ་འབྱོར་དེ་ལྟར་མི་བལྟ་སྟེ། དེ་བཞིན་གཤེགས་པས་གང་བསྟན་པའི་ཆོས་དེ་གང་ཡང་མེད་དོ། །རབ་འབྱོར་སུ་ཞིག་འདི་སྐད་དུ་དེ་བཞིན་གཤེགས་པས་ཆོས་བསྟན་ཏོ་ཞེས་ཟེར་ན། རབ་འབྱོར་དེ་ནི་མེད་པ་དང་། 
ལོག་པར་ཟིན་པས་ང་ལ་སྐུར་བར་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར་ཆོས་བསྟན་པ་ཞེས་བྱ་བ་དམིགས་པར་འགྱུར་བའི་ཆོས་བསྟན་པ་ཆོས་བསྟན་པ་ཞེས་བྱ་བ་དེ་གང་ཡང་མེད་པའི་ཕྱིར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་
འདི་སྐད་ཅེས་གསོལ་ཏོ། །བཅོམ་ལྡན་འདས་མ་འོངས་པའི་དུས་ན་སེམས་ཅན་གང་དག་འདི་ལྟ་བུའི་ཆོས་བཤད་པ་ཐོས་ནས་མངོན་པར་ཡིད་ཆེས་པར་འགྱུར་བ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་དག་ནི་སེམས་ཅན་ཡང་མ་ཡིན་སེམས་
ཅན་མེད་པ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། རབ་འབྱོར་སེམས་ཅན་རྣམས་ཤེས་བྱ་བ་ནི་དེ་བཞིན་གཤེགས་པས་དེ་དག་སེམས་ཅན་མེད་པར་གསུངས་པའི་ཕྱིར་ཏེ། དེས་ན་སེམས་ཅན་རྣམས་ཤེས་བྱའོ། །རབ་འབྱོར་འདི་ཇི་སྙམ་དུ་སེམས། དེ་བཞིན་གཤེགས་པས་གང་
39-1-162b


བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་ཆོས་དེ་གང་ཡང་ཡོད་དམ། ཚེ་དང་ལྡན་པ་རབ་འབྱོར་གྱིས་གསོལ་པ། བཅོམ་ལྡན་འདས་དེ་བཞིན་གཤེགས་པས་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་སངས་རྒྱས་པའི་ཆོས་དེ་གང་ཡང་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་དེ་བཞིན་ནོ། །དེ་དེ་བཞིན་ཏེ། དེ་ཆོས་ཅུང་ཟད་ཀྱང་མེད་ཅིང་མི་དམིགས་ཏེ་དེས་ན་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཅེས་བྱའོ། །ཡང་རབ་འབྱོར་ཆོས་དེ་ནི་མཉམ་པ་སྟེ། དེ་ལ་མི་མཉམ་པ་གང་ཡང་མེད་པས་དེས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཅེས་བྱའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་བདག་མེད་པ་དང་། སེམས་
ཅན་མེད་པ་དང་། སྲོག་མེད་པ་དང་། གང་ཟག་མེད་པར་མཉམ་སྟེ། དགེ་བའི་ཆོས་ཐམས་ཅད་ཀྱིས་མངོན་པར་རྫོགས་པར་འཚང་རྒྱའོ། །རབ་འབྱོར་དགེ་བའི་ཆོས་རྣམས་དགེ་བའི་ཆོས་རྣམས་ཤེས་བྱ་བ་ནི་དེ་དག་དེ་བཞིན་གཤེགས་པས་ཆོས་མེད་པ་ཉིད་
དུ་གསུངས་ཏེ། དེས་ན་དགེ་བའི་ཆོས་རྣམས་ཤེས་བྱའོ། །ཡང་རབ་འབྱོར་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་རིའི་རྒྱལ་པོ་རི་རབ་དག་ཇི་སྙེད་ཡོད་པ་དེ་ཙམ་གྱི་རིན་པོ་ཆེ་སྣ་བདུན་
གྱི་ཕུང་པོ་མངོན་པར་བསྡུས་ཏེ་སྦྱིན་པ་བྱིན་པ་བས་གང་གིས་ཤེས་རབ་ཀྱི་ཕ་རོལ་དུ་ཕྱིན་པ་འདི་ལས་ཐ་ན་ཚིག་བཞི་པའི་ཚིགས་སུ་བཅད་པ་ཙམ་བཟུང་ནས་གཞན་དག་ལ་ཡང་བསྟན་ན། རབ་འབྱོར་བསོད་ནམས་ཀྱི་ཕུང་པོ་འདི་ལ་བསོད་ནམས་ཀྱི་ཕུང་པོ་སྔ་མ་
དེས་བརྒྱའི་ཆར་ཡང་མི་ཕོད་པ་ནས་རྒྱུའི་བར་དུ་ཡང་མི་བཟོད་དོ། །རབ་འབྱོར་འདི་ཇི་སྙམ་དུ་སེམས། དེ་བཞིན་གཤེགས་པ་འདི་སྙམ་དུ་ངས་སེམས་ཅན་རྣམས་བཀྲོལ་ལོ་ཞེས་དགོངས་སོ་སྙམ་ན། རབ་འབྱོར་དེ་དེ་ལྟར་མི་བལྟའོ། །དེ་ཅིའི་
ཕྱིར་ཞེ་ན། རབ་འབྱོར་དེ་བཞིན་གཤེགས་པས་གང་བཀྲོལ་བའི་སེམས་ཅན་དེ་དག་གང་ཡང་མེད་པའི་ཕྱིར་རོ། །རབ་འབྱོར་གལ་ཏེ་དེ་བཞིན་གཤེགས་པས་སེམས་ཅན་གང་ལ་ལ་ཞིག་བཀྲོལ་བར་གྱུར་ན་དེ་ཉིད་དེ་བཞིན་གཤེགས་པའི་བདག་
39-1-163a


ཏུ་འཛིན་པར་འགྱུར། སེམས་ཅན་དུ་འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པར་འགྱུར་རོ། །རབ་འབྱོར་བདག་ཏུ་འཛིན་ཅེས་བྱ་བ་ནི་དེ་འཛིན་པ་མེད་པར་དེ་བཞིན་གཤེགས་པས་གསུངས་ན་དེ་ཡང་བྱིས་པ་སོ་སོའི་
སྐྱེ་བོ་རྣམས་ཀྱིས་བཟུང་ངོ་། །རབ་འབྱོར་བྱིས་པ་སོ་སོའི་སྐྱེ་བོ་རྣམས་ཤེས་བྱ་བ་ནི་དེ་དག་སྐྱེ་བོ་མེད་པར་དེ་བཞིན་གཤེགས་པས་གསུངས་ཏེ། དེས་ན་བྱིས་པ་སོ་སོའི་སྐྱེ་བོ་རྣམས་ཤེས་བྱའོ། །རབ་འབྱོར་འདི་ཇི་སྙམ་དུ་སེམས། 
མཚན་ཕུན་སུམ་ཚོགས་པས་དེ་བཞིན་གཤེགས་པར་བལྟ་འམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་ལགས་ཏེ། མཚན་ཕུན་སུམ་ཚོགས་པས་དེ་བཞིན་གཤེགས་པར་མི་བལྟའོ། །བཅོམ་ལྡན་
འདས་ཀྱིས་བཀའ་སྩལ་པ། རབ་འབྱོར་དེ་དེ་བཞིན་ཏེ། མཚན་ཕུན་སུམ་ཚོགས་པས་དེ་བཞིན་གཤེགས་པར་མི་བལྟའོ། །རབ་འབྱོར་གལ་ཏེ་མཚན་ཕུན་སུམ་ཚོགས་པས་དེ་བཞིན་གཤེགས་པར་བལྟ་བར་གྱུར་ན་
འཁོར་ལོས་སྒྱུར་བའི་རྒྱལ་པོ་ཡང་དེ་བཞིན་གཤེགས་པར་འགྱུར་ཏེ། དེ་བས་ན་མཚན་ཕུན་སུམ་ཚོགས་པས་དེ་བཞིན་གཤེགས་པར་མི་བལྟའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་
གསོལ་ཏོ། །བཅོམ་ལྡན་འདས་ཀྱིས་གསུངས་པའི་དོན་བདག་གིས་འཚལ་བ་ལྟར་ན་མཚན་ཕུན་སུམ་ཚོགས་པས་དེ་བཞིན་གཤེགས་པར་མི་བལྟའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་
བཀའ་སྩལ་ཏོ། །གང་དག་ང་ལ་གཟུགས་སུ་མཐོང་། །གང་དག་ང་ལ་སྒྲར་ཤེས་པ། །ལོག་པར་སྤོང་བར་ཞུགས་པ་སྟེ། །སྐྱེ་བོ་དེ་དག་ང་མི་མཐོང་། །སངས་རྒྱས་རྣམས་ནི་ཆོས་ཉིད་བལྟ། །འདྲེན་པ་རྣམས་ནི་
ཆོས་ཀྱི་སྐུ། །ཆོས་ཉིད་རིག་པར་བྱ་མིན་པས། །དེ་ནི་རྣམ་པར་ཤེས་མི་ནུས། །རབ་འབྱོར་འདི་ཇི་སྙམ་དུ་སེམས། མཚན་ཕུན་སུམ་ཚོགས་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
39-1-163b


རྒྱས་སོ་སྙམ་དུ་འཛིན་ན། རབ་འབྱོར་ཁྱོད་ཀྱིས་དེ་ལྟར་མི་བལྟ་སྟེ། རབ་འབྱོར་མཚན་ཕུན་སུམ་ཚོགས་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་སངས་རྒྱས་པ་མེད་དོ། །རབ་འབྱོར་འདི་ཇི་སྙམ་དུ་སེམས། བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་རྣམས་ཀྱིས་ཆོས་ལ་ལ་ཞིག་རྣམ་པར་བཤིག་གམ། ཆད་པར་བཏགས་པ་
སྙམ་དུ་འཛིན་ན། རབ་འབྱོར་དེ་ལྟར་མི་བལྟ་སྟེ། བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་རྣམས་ཀྱིས་ཆོས་གང་ལ་ཡང་རྣམ་པར་བཤིག་པའམ། ཆད་པར་བཏགས་པ་མེད་དོ། །ཡང་རབ་འབྱོར་རིགས་ཀྱི་བུ་འམ། 
རིགས་ཀྱི་བུ་མོ་གང་གིས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ་སྦྱིན་པ་བྱིན་པ་བས། བྱང་ཆུབ་སེམས་དཔའ་གང་ཞིག་ཆོས་རྣམས་བདག་མེད་ཅིང་སྐྱེ་བ་མེད་པ་ལ་བཟོད་
པ་ཐོབ་ན་དེ་ཉིད་གཞི་དེ་ལས་བསོད་ནམས་ཀྱི་ཕུང་པོ་ཆེས་མང་དུ་བསྐྱེད་དོ། །ཡང་རབ་འབྱོར་བྱང་ཆུབ་སེམས་དཔས་བསོད་ནམས་ཀྱི་ཕུང་པོ་ཡོངས་སུ་གཟུང་བར་མི་བྱའོ། །ཚེ་དང་ལྡན་པ་རབ་འབྱོར་གྱིས་གསོལ་པ། བཅོམ་ལྡན་
འདས་བྱང་ཆུབ་སེམས་དཔས་བསོད་ནམས་ཀྱི་ཕུང་པོ་ཡོངས་སུ་གཟུང་བར་མི་བགྱི་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་ཡོངས་སུ་གཟུང་མོད་ཀྱིས་ལོག་པར་མི་གཟུང་སྟེ། དེས་ན་ཡོངས་སུ་
གཟུང་བ་ཞེས་བྱའོ། །རབ་འབྱོར་གང་ལ་ལ་ཞིག་འདི་སྐད་དུ། དེ་བཞིན་གཤེགས་པ་བཞུད་དམ། བྱོན་ཏམ། བཞེངས་སམ། བཞུགས་སམ། །མནལ་བ་མཛད་དོ་ཞེས་དེ་སྐད་ཟེར་ན། དེས་ན་ངས་བཤད་པའི་དོན་མི་ཤེས་
སོ། །དེ་ཅིའི་ཕྱིར་ཞེ་ན། རབ་འབྱོར་དེ་བཞིན་གཤེགས་པ་ཞེས་བྱ་བ་ནི་གར་ཡང་མ་བཞུད། གང་ནས་ཀྱང་མ་བྱོན་པའི་ཕྱིར་ཏེ། དེས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤེས་བྱའོ། །ཡང་རབ་འབྱོར་
39-1-164a


རིགས་ཀྱི་བུ་འམ། རིགས་ཀྱི་བུ་མོ་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སའི་རྡུལ་རྣམས་ཇི་སྙེད་ཡོད་པ་དེ་དག་འདི་ལྟ་སྟེ་དཔེར་ན་རྡུལ་ཕྲ་རབ་ཀྱི་ཚོགས་བཞིན་དུ་ཕྱེ་མར་བྱས་ན། རབ་འབྱོར་འདི་ཇི་
སྙམ་དུ་སེམས། རྡུལ་ཕྲ་རབ་ཀྱི་ཚོགས་དེ་མང་བ་ཡིན་ནམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་དེ་ལྟ་ལགས་ཏེ། རྡུལ་ཕྲ་རབ་ཀྱི་ཚོགས་དེ་མང་བ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གལ་ཏེ་ཚོགས་
ཤིག་མཆིས་པར་གྱུར་ན་བཅོམ་ལྡན་འདས་ཀྱིས་རྡུལ་ཕྲ་རབ་ཀྱི་ཚོགས་ཤེས་བཀའ་མི་སྩལ་བའི་སླད་དུའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཀྱིས་རྡུལ་ཕྲ་རབ་ཀྱི་ཚོགས་ཤེས་གང་གསུངས་པ་དེ་ཚོགས་མ་མཆིས་པར་དེ་བཞིན་
གཤེགས་པས་གསུངས་པའི་སླད་དུ་སྟེ། དེས་ན་རྡུལ་ཕྲ་རབ་ཀྱི་ཚོགས་ཤེས་བགྱིའོ། །དེ་བཞིན་གཤེགས་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཤེས་གང་གསུངས་པ་དེ་ཁམས་མ་མཆིས་པར་དེ་བཞིན་གཤེགས་པས་
གསུངས་ཏེ། དེས་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཤེས་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གལ་ཏེ་ཁམས་ཤིག་མཆིས་པར་གྱུར་ན། དེ་ཉིད་རིལ་པོར་འཛིན་པར་འགྱུར་བའི་སླད་དུའོ། །དེ་
བཞིན་གཤེགས་པས་རིལ་པོར་འཛིན་པར་གང་གསུངས་པ་དེ་འཛིན་པ་མ་མཆིས་པར་དེ་བཞིན་གཤེགས་པས་གསུངས་ཏེ། དེས་ན་རིལ་པོར་འཛིན་པ་ཞེས་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་རིལ་པོར་འཛིན་
པ་ཉིད་ནི་ཐ་སྙད་དེ། ཆོས་དེ་ནི་བརྗོད་དུ་མེད་པ་ཡིན་ན། དེ་ཡང་བྱིས་པ་སོ་སོའི་སྐྱེ་བོ་རྣམས་ཀྱིས་བཟུང་ངོ་། །རབ་འབྱོར་གང་ལ་ལ་ཞིག་འདི་སྐད་དུ་དེ་བཞིན་གཤེགས་པས་བདག་ཏུ་ལྟ་བར་གསུངས་ཏེ། དེ་བཞིན་གཤེགས་པས་སེམས་ཅན་དུ་ལྟ་བ་དང་། སྲོག་
ཏུ་ལྟ་བ་དང་། གང་ཟག་ཏུ་ལྟ་བར་གསུངས་སོ་ཞེས་ཟེར་ན། རབ་འབྱོར་དེ་ཡང་དག་པར་སྨྲ་བས་སྨྲ་བ་ཡིན་ནམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །བདེ་བར་གཤེགས་པ་དེ་ནི་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་
39-1-164b


བཞིན་གཤེགས་པས་བདག་ཏུ་ལྟ་བར་གང་གསུངས་པ་དེ་ལྟ་བ་མ་མཆིས་པར་དེ་བཞིན་གཤེགས་པས་གསུངས་པའི་སླད་དུ་སྟེ། དེས་ན་བདག་ཏུ་ལྟ་བ་ཞེས་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་བྱང་ཆུབ་སེམས་
དཔའི་ཐེག་པ་ལ་ཡང་དག་པར་ཞུགས་པས་འདི་ལྟར་ཆོས་ཐམས་ཅད་ཤེས་པར་བྱ་བལྟ་བར་བྱ་མོས་པར་བྱ་སྟེ། ཅི་ནས་ཆོས་སུ་འདུ་ཤེས་པ་ལ་ཡང་མི་གནས་པ་དེ་ལྟར་མོས་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར་ཆོས་སུ་འདུ་ཤེས་
ཆོས་སུ་འདུ་ཤེས་ཤེས་བྱ་བ་ནི་འདུ་ཤེས་མེད་པར་དེ་བཞིན་གཤེགས་པས་གསུངས་པའི་ཕྱིར་ཏེ། དེས་ན་ཆོས་སུ་འདུ་ཤེས་ཤེས་བྱའོ། །ཡང་རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་འཇིག་རྟེན་གྱི་ཁམས་དཔག་ཏུ་མེད་ཅིང་
གྲངས་མེད་པ་དག་རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ་སྦྱིན་པ་བྱིན་པ་བས། རིགས་ཀྱི་བུའམ། རིགས་ཀྱི་བུ་མོ་གང་གིས་ཤེས་རབ་ཀྱི་ཕ་རོལ་དུ་ཕྱིན་པ་འདི་ལས་ཐ་ན་ཚིག་བཞི་པའི་ཚིགས་སུ་བཅད་པ་ཙམ་བླངས་ནས་འཛིན་ཏམ། ཀློག་
གམ། ཀུན་ཆུབ་པར་བྱེད་དམ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ན་དེ་ཉིད་གཞི་དེ་ལས་བསོད་ནམས་ཆེས་མང་དུ་གྲངས་མེད་དཔག་ཏུ་མེད་པ་བསྐྱེད་དོ། །ཇི་ལྟར་ཡང་དག་པར་རབ་ཏུ་སྟོན་ཞེ་ན། ཇི་ལྟར་ཡང་དག་
པར་རབ་ཏུ་མི་སྟོན་པ་བཞིན་དུ་སྟེ། དེས་ན་ཡང་དག་པར་རབ་ཏུ་སྟོན་པ་ཞེས་བྱའོ། །སྐར་མ་རབ་རིབ་མར་མེ་དང་། །སྒྱུ་མ་ཟིལ་པ་ཆུ་བུར་དང་། །རྨི་ལམ་གློག་དང་སྤྲིན་ལྟ་བུར། །འདུས་བྱས་དེ་ལྟར་བལྟ་བར་བྱ། །བཅོམ་ལྡན་འདས་
ཀྱིས་དེ་སྐད་ཅེས་བཀའ་སྩལ་ནས་གནས་བརྟན་རབ་འབྱོར་དང་། བྱང་ཆུབ་སེམས་དཔའ་དེ་དག་དང་། འཁོར་བཞི་པོ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་
པའི་འཇིག་རྟེན་ཡིད་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཤེས་རབ་ཀྱི་ཕ་རོལ་དུ་ཕྱིན་པ་རྡོ་རྗེ་གཅོད་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་སྐད་དུ། ཨཱརྱ་
39-1-165a


བྷ་ག་བ་ཏི་པྲ་ཛྙཱ་པཱ་ར་མི་ཏཱ་པཉྩཱ་ཤ་ཏི་ཀ །  བོད་སྐད་དུ། འཕགས་པ་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པ་ལྔ་བཅུ་པ།   །སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་
བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། བརྒྱ་བྱིན་དང་། ཚངས་པ་
དང་། འཇིག་རྟེན་སྐྱོང་བ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དུ་མ་དག་དང་ཡང་ཐབས་
གཅིག་གོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་བཀའ་སྩལ་པ། རབ་འབྱོར་གང་ལ་ལ་ཞིག་ཉན་ཐོས་ཀྱི་ས་ལ་སློབ་པར་འདོད་པ་དང་། རང་སངས་རྒྱས་ཀྱི་ས་ལ་སློབ་པར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་
ཉིད་མཉན་པར་བྱ། གཟུང་བར་བྱ། བཅང་བར་བྱ། ཀླག་པར་བྱ། ཀུན་ཆུབ་པར་བྱའོ། །བྱང་ཆུབ་སེམས་དཔའ་ཐབས་ལ་མཁས་པ་དང་ལྡན་པས་སངས་རྒྱས་དང་། བྱང་ཆུབ་སེམས་དཔའི་ཆོས་ཐམས་ཅད་ཡང་དག་པར་བསྒྲུབ་པའི་ཕྱིར་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་མངོན་པར་བརྩོན་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་གང་ལ་བསླབ་པར་བྱ་བ་དང་། རྣལ་འབྱོར་དུ་བྱ་བ་སངས་རྒྱས་དང་བྱང་ཆུབ་སེམས་
དཔའི་ཆོས་ཐམས་ཅད་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་དུ་རྒྱ་ཆེར་བསྟན་པའི་ཕྱིར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་སློབ་པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ། གཟུང་བར་བྱ། བཅང་བར་བྱ། ཀླག་པར་
བྱ་ཀུན་ཆུབ་པར་བྱའོ། །བྱང་ཆུབ་སེམས་དཔའ་ཐབས་ལ་མཁས་པ་དང་ལྡན་པས་སངས་རྒྱས་དང་བྱང་ཆུབ་སེམས་དཔའི་ཆོས་ཐམས་ཅད་ཡང་དག་པར་བསྒྲུབ་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་མངོན་པར་བརྩོན་པར་བྱའོ། །དེ་ཅིའི་ཕྱིར་ཞེ་ན། རབ་
39-1-165b


འབྱོར་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་གང་ལ་བསླབ་པར་བྱ་བ་དང་། རྣལ་འབྱོར་དུ་བྱ་བ་སངས་རྒྱས་དང་བྱང་ཆུབ་སེམས་དཔའི་ཆོས་ཐམས་ཅད་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་དུ་རྒྱ་ཆེར་བསྟན་པའི་ཕྱིར་རོ། །རབ་འབྱོར་དགེ་
བའི་ཆོས་བྱང་ཆུབ་ཀྱི་ཕྱོགས་རྣམས་དང་། ཉན་ཐོས་ཀྱི་ཆོས་རྣམས་དང་། རང་སངས་རྒྱས་ཀྱི་ཆོས་རྣམས་དང་། བྱང་ཆུབ་སེམས་དཔའི་ཆོས་རྣམས་དང་། སངས་རྒྱས་ཀྱི་ཆོས་རྣམས་གང་དག་ཡིན་པ་དེ་དག་ཐམས་ཅད་ནི་ཤེས་རབ་ཀྱི་ཕ་རོལ་དུ་
ཕྱིན་པའི་ནང་དུ་ཆུད་ཅིང་འདུས་ཏེ་འུབ་ལ་ཡང་དག་པར་གཞོལ་བ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་དུ་ཕྱིན་པ་ལ་བསླབ་པར་བྱ། རྣལ་འབྱོར་དུ་བྱ་སྟེ། ཉན་ཐོས་ཀྱི་ས་ལ་སློབ་པར་འདོད་པ་དང་། རང་སངས་
རྒྱས་ཀྱི་ས་ལ་སློབ་པར་འདོད་པས་ཤེས་རབ་ཀྱི་ཕ་རོལ་དུ་ཕྱིན་པ་འདི་ཉིད་དང་། སངས་རྒྱས་ཀྱི་ཆོས་རྣམས་དང་། བྱང་ཆུབ་སེམས་དཔའི་ཆོས་རྣམས་ཀྱང་མཉན་པར་བྱ། གཟུང་བར་བྱ། བཅང་བར་བྱ། ཀླག་པར་བྱ། ཀུན་ཆུབ་པར་བྱའོ། །
དགེ་བའི་ཆོས་བྱང་ཆུབ་ཀྱི་ཆོས་རྣམས་དང་། ཉན་ཐོས་ཀྱི་ཆོས་རྣམས་དང་། རང་སངས་རྒྱས་ཀྱི་ཆོས་རྣམས་དང་། བྱང་ཆུབ་སེམས་དཔའི་ཆོས་རྣམས་དང་། སངས་རྒྱས་ཀྱི་ཆོས་རྣམས་གང་དག་ཡིན་པ་རྣམས་ཤེས་རབ་ཀྱི་ཕ་རོལ་
ཏུ་ཕྱིན་པའི་ནང་དུ་ཆུད་ཅིང་འདུས་ཏེ་འུབ་ལ་ཡང་དག་པར་གཞོལ་བ་ཡིན་ནོ་ཞེས་བགྱི་བ་དེ་དག་གང་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ལྟ་སྟེ་སྦྱིན་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་
ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་དུ་ཕྱིན་པ་དང་། ནང་སྟོང་པ་ཉིད་དང་། ཕྱི་སྟོང་པ་ཉིད་དང་། ཕྱི་ནང་སྟོང་པ་
ཉིད་དང་། སྟོང་པ་ཉིད་སྟོང་པ་ཉིད་དང་། ཆེན་པོ་སྟོང་པ་ཉིད་དང་། དོན་དམ་པ་སྟོང་པ་ཉིད་དང་། འདུས་བྱས་སྟོང་པ་ཉིད་དང་། འདུས་མ་བྱས་སྟོང་པ་ཉིད་དང་། མཐའ་ལས་འདས་པ་སྟོང་པ་ཉིད་དང་། ཐོག་མ་དང་ཐ་མ་མེད་པ་སྟོང་པ་ཉིད་
39-1-166a


དང་། དོར་བ་མེད་པ་སྟོང་པ་ཉིད་དང་། རང་བཞིན་སྟོང་པ་ཉིད་དང་། ཆོས་ཐམས་ཅད་སྟོང་པ་ཉིད་དང་། རང་གི་མཚན་ཉིད་སྟོང་པ་ཉིད་དང་། མི་དམིགས་པ་སྟོང་པ་ཉིད་དང་། དངོས་པོ་མེད་པ་སྟོང་པ་ཉིད་དང་། ངོ་བོ་ཉིད་སྟོང་པ་ཉིད་དང་། 
དངོས་པོ་མེད་པའི་ངོ་བོ་ཉིད་སྟོང་པ་ཉིད་དང་། དྲན་པ་ཉེ་བར་གཞག་པ་བཞི་དང་། ཡང་དག་པའི་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་
ལག་བརྒྱད་དང་། འཕགས་པའི་བདེན་པ་བཞི་དང་། ཚད་མེད་པ་བཞི་དང་། གཟུགས་མེད་པའི་སྙོམས་པར་འཇུག་པ་བཞི་དང་། རྣམ་པར་ཐར་པ་བརྒྱད་དང་། མཐར་ཀྱིས་གནས་པའི་སྙོམས་པར་འཇུག་པ་དགུ་དང་། རྣམ་པར་ཐར་པའི་སྒོ་སྟོང་
པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མངོན་པར་ཤེས་པ་རྣམས་དང་། ཏིང་ངེ་འཛིན་རྣམས་དང་། གཟུངས་ཀྱི་སྒོ་རྣམས་དང་། དེ་བཞིན་གཤེགས་པའི་སྟོབས་བཅུ་དང་། མི་འཇིགས་པ་བཞི་དང་། སོ་སོ་ཡང་དག་
པར་རིག་པ་བཞི་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དང་། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་
བཅོམ་པ་ཉིད་དང་། རང་བྱང་ཆུབ་ཉིད་དང་། ཐམས་ཅད་ཤེས་པ་ཉིད་དང་། ལམ་གྱི་རྣམ་པ་ཤེས་པ་ཉིད་དང་། རྣམ་པ་ཐམས་ཅད་མཁྱེན་པ་ཉིད་དོ། །རབ་འབྱོར་དེ་དག་ནི་དགེ་བའི་ཆོས་བྱང་ཆུབ་ཀྱི་ཕྱོགས་རྣམས་དང་། ཉན་ཐོས་ཀྱི་ཆོས་
རྣམས་དང་། རང་སངས་རྒྱས་ཀྱི་ཆོས་རྣམས་དང་། བྱང་ཆུབ་སེམས་དཔའི་ཆོས་རྣམས་དང་། སངས་རྒྱས་ཀྱི་ཆོས་རྣམས་གང་དག་ཡིན་པ་རྣམས་ཤེས་རབ་ཀྱི་ཕ་རོལ་ཏུ་ཕྱིན་པའི་ནང་དུ་ཆུད་ཅིང་འདུས་ཏེ་འུབ་ལ་ཡང་དག་པར་གཞོལ་བ་རྣམས་
ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས་འདི་ལྟར་དགེ་བའི་ཆོས་བྱང་ཆུབ་ཀྱི་ཕྱོགས་རྣམས་དང་། ཉན་ཐོས་ཀྱི་ཆོས་རྣམས་དང་། རང་སངས་རྒྱས་ཀྱི་ཆོས་རྣམས་དང་། བྱང་ཆུབ་སེམས་དཔའི་ཆོས་རྣམས་དང་། སངས་
39-1-166b


རྒྱས་ཀྱི་ཆོས་རྣམས་གང་དག་ལགས་པ་དེ་དག་ཤེས་རབ་ཀྱི་ཕ་རོལ་ཏུ་ཕྱིན་པའི་ནང་དུ་ཆུད་ཅིང་འདུས་ཏེ། འུབ་ལ་ཡང་དག་པར་གཞོལ་བ་ནི་བཅོམ་ལྡན་འདས་ཀྱེ་མ་ཨ་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཟབ་པ་ལགས་སོ། །བཅོམ་
ལྡན་འདས་ཀྱིས་བཀའ་སྩལ་པ། རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་ཤིན་དུ་དབེན་པའི་ཕྱིར་རོ། །རབ་འབྱོར་གྱིས་གསོལ་པ། བཅོམ་ལྡན་འདས་ཀྱེ་མ་ཨ་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་གཏིང་དཔག་དཀའ་བ་ལགས་སོ། །བཅོམ་
ལྡན་འདས་ཀྱིས་བཀའ་སྩལ་པ། རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་ཤིན་དུ་རྣམ་པར་དག་པའི་ཕྱིར་རོ། །རབ་འབྱོར་གྱིས་གསོལ་པ། བཅོམ་ལྡན་འདས་ཀྱེ་མ་ཨ་ལ་ལ། ཨ་ལ་ལ། ཤེས་རབ་ཀྱི་ཕ་རོལ་དུ་ཕྱིན་པ་འདི་ནམ་མཁའ་དང་
མཚུངས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་ཤེས་རབ་ཀྱི་ཕ་རོལ་དུ་ཕྱིན་པ་ཤིན་དུ་རྣམ་པར་དག་པའི་ཕྱིར་ཏེ། རབ་འབྱོར་དེ་བས་ན་ཤེས་རབ་ཀྱི་ཕ་རོལ་དུ་ཕྱིན་པ་ནི་ནམ་མཁའ་ལྟ་བུ་ཡིན་ནོ། །རབ་འབྱོར་
གྱིས་གསོལ་པ། བཅོམ་ལྡན་འདས་ཀྱེ་མ་ཨ་ལ་ལ། ཨ་ལ་ལ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་མི་བརྩོན་པས་རྟོགས་པར་དཀའ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་དེ་བཞིན་ཏེ། དེ་དེ་བཞིན་ནོ། །
ཇི་སྐད་སྨྲས་པ་བཞིན་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་ནི་མངོན་པར་མི་བརྩོན་པ་དང་། དགེ་བའི་རྩ་བ་ཆུང་བ་དང་། ཡིད་མི་གཞུངས་པ་དང་། དོན་དུ་མི་གཉེར་བ་དང་། ཐོས་པ་དང་མི་ལྡན་པ་དང་། ཤེས་རབ་ཆུང་བ་དང་། སྡིག་པའི་
གྲོགས་པོས་ཟིན་པ་དང་། སྡིག་པའི་གྲོགས་པོ་དང་འདྲེ་བ་མང་བ་དང་། སྡིག་པའི་གྲོགས་པོས་འཛིན་དུ་བཅུག་པ་དང་། དང་བ་ཙམ་དང་ལྡན་པ་དང་། དད་པ་ཙམ་དང་ལྡན་པ་དང་། ལས་དང་པོ་པ་དང་སྐལ་བ་མེད་པའི་ཚུལ་ཅན་དང་། 
ཡོངས་སུ་མི་འདྲི་བའི་རང་བཞིན་ཅན་དང་། ཤེས་རབ་འཆལ་པར་འགྱུར་བ་བྱས་པ་དང་། ལེ་ལོ་ཅན་དང་། བརྩོན་འགྲུས་ཆུང་བ་དང་། སྙིང་སྟོབས་ཆུང་བ་དང་། མོས་པ་ཆུང་བ་དང་། དགེ་བའི་ཆོས་དེ་དག་ལ་མངོན་པར་མི་བརྩོན་
39-1-167a


པས་མོས་པར་དཀའ་བ་སྟེ། རབ་འབྱོར་དེ་ལྟ་བས་ན་ཤེས་རབ་ཀྱི་ཕ་རོལ་ཏུ་ཕྱིན་པ་ནི་མོས་པར་དཀའ་བ་ཞེས་བྱའོ། །རབ་འབྱོར་གཞན་ཡང་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་ཤེས་རབ་ཀྱི་ཕ་རོལ་ཏུ་
ཕྱིན་པ་ཟབ་མོ་འདི་ཉན་ཏམ། འཛིན་ཏམ། འཆང་ངམ། ཀློག་གམ། ཀུན་ཆུབ་པར་བྱེད་དམ། གཞན་དག་ལ་ཡང་རྒྱ་ཆེར་ཡང་དག་པར་སྟོན་ན་དེས་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་
ཀྱི་བྱང་ཆུབ་བཟུང་བ་ཡིན་ནོ། །རབ་འབྱོར་དེ་ལྟ་བས་ན། རིགས་ཀྱི་བུ་འམ། རིགས་ཀྱི་བུ་མོ་གང་ལྷག་པའི་བསམ་པ་ཕུན་སུམ་ཚོགས་པ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་
པས་རྒྱུན་མི་འཆད་པར་ཤེས་རབ་ཀྱི་ཕ་རོལ་དུ་ཕྱིན་པ་མཉན་པར་བྱ། གཟུང་བར་བྱ། བཅང་བར་བྱ། ཀླག་པར་བྱ། ཀུན་ཆུབ་པར་བྱ་སྟེ། དེས་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བར་འགྱུར་
རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་རབ་འབྱོར་དང་། དགེ་སློང་དེ་དག་དང་། བྱང་ཆུབ་སེམས་དཔའ་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡིད་
རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པ་ལྔ་བཅུ་པ་རྫོགས་སྷོ།།        །། རྒྱ་གར་སྐད་དུ། ཨེ་ཀ་ཨཀྵ་
རི་མཱ་ཏཱ་ནཱ་མ་སརྦ་ཏ་ཐཱ་ག་ཏ་པྲ་ཛྙཱ་པཱ་ར་མི་ཏཱ།  བོད་སྐད་དུ། དེ་བཞིན་གཤེགས་པ་ཐམས་ཅད་ཀྱི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ་ཡི་གེ་གཅིག་མ་ཞེས་བྱ་བ། ཡུམ་ཆེན་མོ་ཤེས་རབ་ཀྱི་ཕ་རོལ་དུ་ཕྱིན་མ་ལ་ཕྱག་
འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་ལ། དགེ་སློང་གི་དགེ་འདུན་ཆེན་པོ་བརྒྱ་ཕྲག་ཕྱེད་དང་བཅུ་གསུམ་དང་། བྱང་ཆུབ་སེམས་དཔའ་བྱེ་བ་ཁྲག་
39-1-167b


ཁྲིག་མང་པོ་དང་ཐབས་གཅིག་ཏུ་བཞུགས་སོ། །དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡི་གེ་གཅིག་མ་ཞེས་བྱ་བ་འདི་སེམས་ཅན་
རྣམས་ལ་ཕན་པ་དང་བདེ་བའི་ཕྱིར་ཟུང་ཤིག །འདི་ལྟ་སྟེ། ཨ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ཚེ་དང་ལྡན་པ་ཀུན་དགའ་བོ་དང་། དགེ་སློང་དེ་དག་དང་། བྱང་ཆུབ་སེམས་དཔའ་སེམས་དཔའ་
ཆེན་པོ་དེ་དག་ཐམས་ཅད་ཀྱིས་ཕ་རོལ་ཏུ་ཕྱིན་པ་རྗེས་སུ་རྟོགས་ཤིང་ཡི་རངས་ནས། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།  །དེ་བཞིན་གཤེགས་པ་ཐམས་ཅད་ཀྱི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་
མ་ཡི་གེ་གཅིག་མ་ཞེས་བྱ་བ་རྫོགས་སོ།།             །། ༄༅། །རྒྱ་གར་སྐད་དུ། ཨཱརྱ་པྲ་ཛྙཱ་པཱ་ར་མི་ཏཱ་སཱུརྱ་གརྦྷ་མ་ཧཱ་ཡ་ན་སཱུ་ཏྲ།  བོད་སྐད་དུ།  འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཉི་མའི་སྙིང་
པོ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་མ་ག་དྷཱ་ན་ཆོས་ཀྱི་དགོན་པ་ན་དགེ་སློང་གི་དགེ་
འདུན་རབ་ཏུ་མང་བ་དང་། བྱང་ཆུབ་སེམས་དཔའ་སངས་རྒྱས་ཀྱི་ཞིང་མཐའ་ཡས་པ་ནས་འདུས་པ་ཚད་མེད་གྲངས་མེད་པ་དང་། ཐབས་གཅིག་ཏུ་བཞུགས་ཏེ། དེའི་ཚེ་འཁོར་དེར་བྱང་ཆུབ་སེམས་དཔའ་ཉི་མ་རབ་ཏུ་སྣང་བ་ཞེས་
བྱ་བ་འདུག་པ་དེ་སྟན་ལས་ལངས་ཏེ། བཅོམ་ལྡན་འདས་ག་ལ་བ་དེར་སོང་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་དེ་བཞིན་གཤེགས་པ་ལ་ཞུ་བ་མཆིས་ཏེ། བཅོམ་ལྡན་འདས་གནང་བའི་
སྐབས་དབྱེ་བར་གསོལ། བཅོམ་ལྡན་འདས་ཀྱིས་བཀའ་སྩལ་པ། ཅི་དང་ཅི་འདོད་པ་དྲིས་ཤིག་དང་ངས་བཤད་པར་བྱའོ། །དེ་ནས་བྱང་ཆུབ་སེམས་དཔའ་ཉི་མ་རབ་ཏུ་སྣང་བས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
39-1-168a


བཅོམ་ལྡན་འདས་ཐབས་མཁས་པའི་བྱང་ཆུབ་སེམས་དཔས་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བགྱི། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཐབས་མཁས་པའི་ཏིང་
ངེ་འཛིན་ཉི་མ་ཞེས་བྱ་བ་ཡོད་པས་དེ་ལ་བྱང་ཆུབ་སེམས་དཔའ་རྣམས་ཀྱིས་དེ་ལྟར་བསླབ་པར་བྱའོ། །བཅོམ་ལྡན་འདས་ལ་གསོལ་པ་ཇི་ལྟར་བསླབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ལྟར་ཐབས་
མཁས་པའི་ཉི་མའི་ཏིང་ངེ་འཛིན་ནི་རྣམ་པ་བདུན་ཡོད་དེ། གང་ཞེ་ན་དང་པོ་ནི་འདི་ལྟར་ཉི་མས་མྱུ་གུ་སྨིན་པར་བྱེད་པ་ལྟར། བྱང་ཆུབ་སེམས་དཔའི་ཏིང་ངེ་འཛིན་ཉི་མ་ལྟ་བུས་སེམས་ཅན་རྣམས་ལ་བྱང་ཆུབ་ཀྱི་མྱུ་གུ་སྨིན་པར་མཛད་དོ། །གཉིས་
པ་ནི་ཉི་མ་དབྲི་བཀོལ་མེད་པ་ལྟར་བྱང་ཆུབ་སེམས་དཔའི་ཏིང་ངེ་འཛིན་གྱི་ཐུགས་རྗེ་ནི་སེམས་ཅན་ཐམས་ཅད་ལ་སྙོམས་པར་མཛད་དོ། །གསུམ་པ་ནི་ཉི་མས་ཉལ་ཉིལ་སྲེག་པ་ལྟར་བྱང་ཆུབ་སེམས་དཔའི་ལྷག་མཐོང་གི་ཤེས་རབ་
ཀྱིས་ཉོན་མོངས་པའི་ཉལ་ཉིལ་རྣམས་བསྲེག་པར་བྱེད་དོ། །བཞི་པ་ནི་ཉི་མས་འཁྱགས་པ་འཇུ་བ་ལྟར་བྱང་ཆུབ་སེམས་དཔའི་ཏིང་ངེ་འཛིན་གཉེན་པོ་ཡེ་ཤེས་དང་ལྡན་པས་ཉོན་མོངས་པ་འཁྱགས་པ་ལྟ་བུ་འཇུ་བར་བྱེད་དོ། །
ལྔ་པ་ནི་ཉི་མས་མུན་པ་སེལ་བ་ལྟར་བྱང་ཆུབ་སེམས་དཔའི་སོ་སོར་ཀུན་དུ་རྟོགས་པའི་ཡེ་ཤེས་ཀྱིས་གཟུང་བ་དང་། འཛིན་པའི་མུན་པ་སེལ་བར་བྱེད་དོ། །དྲུག་པ་ནི་ཉི་མས་གླིང་བཞི་འཁོར་བ་ལྟར་བྱང་ཆུབ་སེམས་དཔའི་ཕྲིན་ལས་
ཕུན་སུམ་ཚོགས་པས་སྡུག་བསྔལ་གྱི་ཆུ་བོ་བཞི་ལས་ཐར་བར་མཛད་དོ། །བདུན་པ་ནི་ཉི་མས་ཀུན་ལ་སྙོམས་པར་དྲོ་བ་བཞིན་དུ་བྱང་ཆུབ་སེམས་དཔའི་སྤྱོད་པ་ཕུན་སུམ་ཚོགས་པས་སེམས་ཅན་ཐམས་ཅད་ལ་རབ་ཏུ་དགའ་བར་མཛད་
པའི་ཐབས་ནི་དྲོ་བའི་ལས་ལྟ་བུའོ། །གཞན་ཡང་རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱ་སྟེ། དེས་འདི་ལྟར་ཆོས་ཐམས་ཅད་རང་བཞིན་མེད་པ་དང་། མཚན་མ་མེད་པ་དང་། མཚན་མ་
39-1-168b


ཐམས་ཅད་དང་རབ་ཏུ་བྲལ་བ་དང་། དངོས་པོ་མེད་པ་དང་། དངོས་པོ་ཐམས་ཅད་དང་བྲལ་བ་དང་། གང་ཟག་པ་མེད་པ་དང་། གང་ཟག་པ་ཐམས་ཅད་དང་བྲལ་བ་དང་། ངོ་བོ་ཉིད་ཀྱིས་སྟོང་པ་ཉིད་ལ་བསླབ་པར་བྱའོ། །རིགས་ཀྱི་བུ་ཆོས་
ཉིད་དང་ཆོས་ཀྱི་དབྱིངས་དང་། དེ་བཞིན་ཉིད་དང་། ཡང་དག་པའི་མཐའ་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། བདེན་པ་དང་། དེ་ཁོ་ནའི་དོན་ལ་བྱང་ཆུབ་སེམས་དཔས་བསླབ་པར་བྱའོ། །དེ་ནས་བཅོམ་ལྡན་
འདས་ཀྱིས་བྱང་ཆུབ་སེམས་དཔའ་ཉི་མ་རབ་ཏུ་སྣང་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་བྱང་ཆུབ་སེམས་དཔའས་ཡང་ཆོས་ཐམས་ཅད་མངོན་པར་འདུ་བྱ་བ་མེད་པ་དང་། སྐྱེ་བ་མེད་པ་ལ་བསླབ་པར་བྱའོ། །རིགས་ཀྱི་བུ་
ཆོས་ཐམས་ཅད་རང་བཞིན་གྱིས་རྣམ་པར་དག་པ་ལ་བསླབ་པར་བྱའོ། །གཟུགས་ལ་སོགས་པའི་ཆོས་ཐམས་ཅད་ཀྱང་རང་བཞིན་གྱིས་སྟོང་པར་ཤེས་པར་བྱའོ། །ངོ་བོ་ཉིད་ཀྱིས་དབེན་པར་ཤེས་པར་བྱའོ། །རིགས་ཀྱི་བུ་གང་
དག་གིས་ཤེས་རབ་ཀྱི་ཕ་རོལ་དུ་ཕྱིན་པའི་མདོ་འཛིན་པར་བྱེད་ན་དེ་ལས་ཀྱི་སྒྲིབ་པ་བྱང་བར་འགྱུར་རོ། །དེ་བསོད་ནམས་ཀྱི་ཚོགས་སྐྱེ་བར་འགྱུར་རོ། །ཤེས་རབ་ཀྱི་ཚོགས་ཚད་མེད་པ་དང་ལྡན་པར་འགྱུར་རོ། །དྲན་པ་དང་ལྡན་པ་དང་། 
ཚུལ་ཁྲིམས་དང་ལྡན་པར་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་རྣམས་ཀྱིས་ཤེས་རབ་ཀྱི་ཕ་རོལ་དུ་ཕྱིན་པ་ལ་བསླབ་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །
མང་ཐོས་དམ་པའི་ཆོས་ལ་བརྩོན། །སེམས་ཅན་ཀུན་ལ་བྱམས་པར་ལྡན། །བརྩོན་འགྲུས་གོ་ཆ་ཕུན་སུམ་ཚོགས། །བདག་དང་གཞན་གྱི་དོན་ལ་མོས། །བསམ་གཏན་ཏིང་འཛིན་བསྒོམ་ལ་བརྩོན། །བདག་དང་སེམས་ཅན་
འདུ་ཤེས་མེད། །ཡང་དག་ཐེག་པའི་ལམ་དུ་ཞུགས། །སྔོན་གྱི་རྒྱལ་སྲས་དེ་ལྟར་སྤྱོད། །མཁས་པས་མ་ནོར་དེ་བཞིན་སློབ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་
39-1-169a


དཔའ་ཉི་མ་རབ་ཏུ་སྣང་བ་དང་། ལྷ་དང་མིར་བཅས་པའི་འཇིག་རྟེན་ཡིད་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཉི་མའི་སྙིང་པོ་ཐེག་པ་ཆེན་པོ
འི་མདོ་རྫོགས་སོ།།       །། ༄༅། །རྒྱ་གར་སྐད་དུ། ཨཱརྱ་ཙན་དྲ་གརྦྷེ་པྲ་ཛྙཱ་པ་ར་མི་ཏཱ་མ་ཧཱ་ཡཱ་ན་སཱུ་ཏྲ།  བོད་སྐད་དུ།  འཕགས་པ་ཟླ་བའི་སྙིང་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཐེག་པ་ཆེན་པོའི་མདོ།  སངས་རྒྱས་དང་བྱང་ཆུབ་སེམས་དཔའ་ཐམས་
ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཀྱི་ཕུང་པོའི་རི་ལ་དགེ་སློང་གི་དགེ་འདུན་ཚད་མེད་གྲངས་མེད་པ་དང་། བྱང་ཆུབ་སེམས་དཔའ་རབ་ཏུ་མང་པོ་དང་ཐབས་གཅིག་
ཏུ་བཞུགས་ཏེ། དེའི་ཚེ་འཁོར་དེར་བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་བའི་སྙིང་པོ་འདུག་པ་སྟན་ལས་ལངས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱིས་ཤེས་
རབ་ཀྱི་ཕ་རོལ་ཏུ་ཕྱིན་པ་ལ་ཇི་ལྟར་བསླབ་པར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཟླ་བའི་སྙིང་པོ་ཆོས་ཐམས་ཅད་དངོས་པོ་དང་བྲལ་བ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །འདི་ལྟ་སྟེ་
དཔེར་ན། ཟླ་བའི་དཀྱིལ་འཁོར་ནི་རྟོག་པ་མེད་ཀྱང་གླིང་བཞིར་འཁོར་བར་བྱེད་ཅིང་མུན་པ་རྣམས་རབ་ཏུ་སེལ་ཏོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ནི་རྟོག་པ་མེད་ཀྱང་ཕྱིན་ཅི་ལོག་
བཞི་རྣམས་ལ་ཐུགས་རྗེས་འཁོར་ཞིང་རང་བཞིན་གྱིས་ཉོན་མོངས་པ་རྣམས་སེལ་བར་བྱེད་ཀྱང་མི་རྟོག་པའི་ཕྱིར་རོ། །ཟླ་བའི་སྙིང་པོས་གསོལ་པ། བཅོམ་ལྡན་འདས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དུ་
མཆིས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣམ་པ་གཉིས་ཏེ། ཟག་པ་དང་བཅས་པ་དང་། ཟག་པ་མེད་པའོ། །རིགས་ཀྱི་བུ་དེ་ལ་ཟག་
39-1-169b


པ་དང་བཅས་པའི་ཤེས་རབ་ནི་མོས་པས་སྤྱོད་པའི་སའི་གནས་སྐབས་ན་གཟུང་བར་ཏོག་པ་དང་འཛིན་པར་རྟོག་པ་སྟེ། དེ་སྤོང་བར་བྱེད་པ་ནི་ཟག་པ་དང་བཅས་པའི་ཤེས་རབ་ཀྱི་ཕ་རོལ་དུ་ཕྱིན་པའོ། །རིགས་ཀྱི་བུ་དེ་ལ་ཟག་པ་མེད་པའི་ཤེས་
རབ་ཀྱི་ཕ་རོལ་དུ་ཕྱིན་པ་ནི་མཐོང་བའི་ལམ་གྱི་རྣམ་པར་མི་རྟོག་པའི་ཡེ་ཤེས་ཏེ། ཡེ་ཤེས་དེ་ནི་རྟོག་པ་ཐམས་ཅད་དང་བྲལ་བའི་ཕྱིར་ན་མི་རྟོག་པའི་ཕྱིར་རོ། །རིགས་ཀྱི་བུ་འདི་ལྟ་སྟེ། ཤེས་རབ་ཀྱི་ཕ་རོལ་དུ་ཕྱིན་པ་ནི་ཕ་རོལ་དང་
ཚུ་རོལ་གྱི་མཐའ་གང་ལ་ཡང་མི་གནས་པའི་ཕྱིར་རོ། །ཤེས་རབ་ནི་གཟུགས་ནས་རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་རང་བཞིན་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་རང་བཞིན་མེད་པར་ཤེས་པར་བྱའོ། །གཟུགས་
ལ་སོགས་པའི་ཆོས་རྣམས་དུས་གསུམ་དུ་མི་དམིགས་ཤིང་མ་བཅིངས་མ་གྲོལ་བར་ཤེས་པར་བྱའོ། །རིགས་ཀྱི་བུ་ཆོས་ཐམས་ཅད་མཉམ་པ་ཉིད་པས་ཤེས་རབ་ཀྱི་ཕ་རོལ་དུ་ཕྱིན་པ་མཉམ་པ་ཉིད་དོ། །ཆོས་ཐམས་ཅད་
འགག་པ་མེད་པ་ཉིད་པས་ཤེས་རབ་ཀྱི་ཕ་རོལ་དུ་ཕྱིན་པ་འགག་པ་མེད་པའོ། །ཆོས་ཐམས་ཅད་མཚན་མ་མེད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མཚན་མ་མེད་པའོ། །ཆོས་ཐམས་ཅད་སྐྱེ་བ་མེད་པས་ཤེས་རབ་ཀྱི་ཕ་
རོལ་དུ་ཕྱིན་པ་སྐྱེ་བ་མེད་པའོ། །ཆོས་ཐམས་ཅད་ཆད་པ་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་ཆད་པ་མེད་པའོ། །ཆོས་ཐམས་ཅད་འོང་བ་མེད་པས་ཤེས་རབ་ཀྱི་ཕ་རོལ་ཏུ་ཕྱིན་པ་འོང་བ་མེད་པའོ། །ཆོས་ཐམས་ཅད་
འགྲོ་བ་མེད་པ་ཉིད་པས་ཤེས་རབ་ཀྱི་ཕ་རོལ་དུ་ཕྱིན་པ་འགྲོ་བ་མེད་པ་ཉིད་དོ། །ཆོས་ཐམས་ཅད་རྟག་པ་མེད་པ་ཉིད་པས་ཤེས་རབ་ཀྱི་ཕ་རོལ་དུ་ཕྱིན་པ་རྟག་པ་མེད་པ་ཉིད་དོ། །ཆོས་ཐམས་ཅད་ཐ་དད་པ་མེད་པ་
ཉིད་པས་ཤེས་རབ་ཀྱི་ཕ་རོལ་དུ་ཕྱིན་པ་ཐ་དད་པ་མེད་པ་ཉིད་དོ། །ཆོས་ཐམས་ཅད་དོན་གཅིག་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་དོན་གཅིག་པ་ཉིད་དོ། །ཆོས་ཐམས་ཅད་དངོས་པོ་མེད་པའི་ངོ་བོ་ཉིད་པས་ཤེས་རབ་
39-1-170a


ཀྱི་ཕ་རོལ་ཏུ་ཕྱིན་པ་དངོས་པོ་མེད་པའི་ངོ་བོ་ཉིད་དོ། །མདོར་ན་ཐམས་ཅད་མཚན་མ་དང་། རང་བཞིན་དང་། ངོ་བོ་ཉིད་ལས་འདས་པས་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་ལྟ་བས་ན་ཤེས་རབ་ཀྱི་ཕ་རོལ་
ཏུ་ཕྱིན་པའི་སྔགས་སོ། །ཏདྱ་ཐཱ། ཨོཾ་པྲཛྙེ་པྲ་ཛྙེ་མ་ཧཱ་པྲ་ཛྙེ་ཙན་དྲ་པྲ་ཛྙེ། སརྦ་ཤཱ་ས་ཀ་རི་སྭཱ་ཧཱ། ཆོས་རྣམས་ཐམས་ཅད་རྒྱུ་ལས་བྱུང་། །དེ་ཉིད་ཀུན་རྫོབ་བདེན་པ་སྟེ། །རང་བཞིན་མེད་ཅིང་སྤྲོས་མེད་པ། །དེ་ཉིད་
དོན་དམ་སྤྱོད་ཡུལ་ལོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་ཟླ་བའི་སྙིང་པོ་དང་། ཐམས་ཅད་དང་ལྡན་པའི་འཁོར་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་
ཡིད་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཟླ་བའི་སྙིང་པོ་ཤེས་རབ་ཀྱི་ཕ་རོལ་དུ་ཕྱིན་པ་ཐེག་པ་ཆེན་པོའི་མདོ་རྫོགས་སྷོ།།     །། ༄༅། །རྒྱ་གར་སྐད་དུ། ཨཱརྱ་པྲ་ཛྙཱ་
པཱ་ར་མི་ཏཱ་ས་མན་ཏ་བྷ་དྲ་མ་ཧཱ་ཡ་ན་སཱུ་ཏྲ།  བོད་སྐད་དུ།  འཕགས་པ་ཤེས་རབ་ཀྱི་ཕ་རོལ་དུ་ཕྱིན་པ་ཀུན་དུ་བཟང་པོ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་
གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་མ་ག་དྷཱ་དགོན་པ་ཆོས་ཀྱི་སྙིང་པོ་ན་བཞུགས་ཏེ། ཕྱོགས་བཅུའི་སངས་རྒྱས་ཀྱི་ཞིང་ཚད་མེད་གྲངས་མེད་པ་ནས་འདུས་པའི་བྱང་ཆུབ་སེམས་དཔའ་སངས་རྒྱས་ཀྱི་ཞིང་རྡུལ་ཕྲ་མོ་
དང་མཉམ་པ་དང་ཐབས་གཅིག་གོ། །ཐམས་ཅད་ཀྱང་ཀུན་དུ་བཟང་པོའི་སྨོན་ལམ་ལ་མངའ་བརྙེས་པ་སྤྱོད་པ་ལ་གནས་པའོ། །དེ་ནས་བྱང་ཆུབ་སེམས་དཔའ་ཀུན་དུ་བཟང་པོས་ཆོས་ཐམས་ཅད་རྣམ་པར་མི་རྟོག་པ་བསྟན་པ་
ཞེས་བྱ་བའི་ཏིང་ངེ་འཛིན་ལ་སྙོམས་པར་བཞུགས་སོ། །ཏིང་ངེ་འཛིན་དེའི་མཐུས་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་མོ་དང་མཉམ་པ་ཐམས་ཅད་གཡོས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་
39-1-170b


དཔའ་ཀུན་དུ་བཟང་པོ་ལ་ཕྱག་གིས་དབུ་ལ་རེག་པར་གྱུར་ཏོ། །དེ་ལྟར་རེག་པས་སངས་རྒྱས་ཀྱི་ཞིང་རྣམས་ཀྱང་རབ་ཏུ་གཡོས་པར་གྱུར། ལྷ་རྣམས་ཀྱིས་འཐུན་པར་ཚིགས་སུ་བཅད་པས་བསྟོད་པ། འཇིག་རྟེན་སྒྲོན་མ་ལྷ་མིའི་དཔེ་ལས་འདས། །
ཡོན་ཏན་རྒྱ་མཚོ་ལྟ་བུ་ཕ་རོལ་ཕྱིན། །སྲིད་པའི་མཚོ་ལས་འགྲོ་བ་ཁྱོད་ཀྱིས་སྒྲོལ། །དེད་དཔོན་ཁྱོད་ཀྱིས་རབ་ཏུ་བསྐྱབ་པ་གསོལ། །དེ་ནས་བྱང་ཆུབ་སེམས་དཔའ་ཀུན་དུ་བཟང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་
འདས་ཇི་ལྟར་བསླབ་པར་བྱ་བའི་དོན་ཤེས་རབ་འདྲ་བ་དང་ཤེས་རབ་ཡིན་པ་ལ་བསླབ་པར་བྱ། བཅོམ་ལྡན་འདས་ཀྱིས་བཀའ་སྩལ་པ། ཀུན་དུ་བཟང་པོ་ཤེས་རབ་འདྲ་བ་ནི་འཇིག་རྟེན་ཚོགས་ཀྱི་ལམ་པ་རྣམས་ཀྱི་ཤེས་རབ་གང་ཡིན་པའོ། །
ཤེས་རབ་ཡིན་པ་ནི་ས་དང་པོ་ཡན་ཆད་ཀྱི་ཤེས་རབ་གང་ཡིན་པའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་ཀུན་དུ་བཟང་པོ་དང་། ལྷ་དང་། མིར་བཅས་པའི་འཇིག་རྟེན་ཡིད་རངས་ཏེ། བཅོམ་ལྡན་
འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཀུན་དུ་བཟང་པོ་ཐེག་པ་ཆེན་པོའི་མདོ་རྫོགས་སྷོ།།      །། ༄༅། །རྒྱ་གར་སྐད་དུ། ཨཱརྱ་པྲ་ཛྙཱ་པཱ་ར་མི་ཏཱ་བཛྲ་པཱ་ཎི་མ་ཧཱ་ཡ་ན་སཱུ་ཏྲ།  བོད་སྐད་དུ།  འཕགས་པ་ཤེས་
རབ་ཀྱི་ཕ་རོལ་ཏུ་ཕྱིན་པ་ལག་ན་རྡོ་རྗེའི་མདོ་ཐེག་པ་ཆེན་པོ།  སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བཞུགས་ཏེ། དེའི་ཚེ་འཁོར་
དེར་བྱང་ཆུབ་སེམས་དཔའ་ལག་ན་རྡོ་རྗེ་འདུག་པ་སྟན་ལས་ལངས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཇི་ལྟར་བསླབ་པར་བགྱི། བཅོམ་ལྡན་
འདས་ཀྱིས་བཀའ་སྩལ་པ། ལག་ན་རྡོ་རྗེ་བྱང་ཆུབ་སེམས་དཔས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་འདི་ལྟར་བསླབ་པར་བྱ་སྟེ། ཆོས་ཐམས་ཅད་སྐྱེ་བ་མེད་པས་ཤེས་རབ་ཀྱི་ཕ་རོལ་དུ་ཕྱིན་པ་ལ་བསླབ་པར་བྱའོ། །གཞན་ཡང་
39-1-171a


གཟུགས་ལ་སོགས་པའི་ཆོས་ཐམས་ཅད་རང་བཞིན་མ་མཆིས་པ་དང་། མཚན་མ་མ་མཆིས་པ་དང་། དངོས་པོ་དང་བྲལ་བ་དང་། མི་དམིགས་པས་ན་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ། །ནང་སྟོང་པ་
ཉིད་དང་། དངོས་པོ་མེད་པ་སྟོང་པ་ཉིད་ཀྱི་ཕྱིར་ན་ཤེས་རབ་ཀྱི་ཕ་རོལ་དུ་ཕྱིན་པ་ལ་བསླབ་པར་བྱའོ། །ལག་ན་རྡོ་རྗེ་ཤེས་རབ་ཀྱི་ཕ་རོལ་དུ་ཕྱིན་པ་འདི་ནི་དུས་གསུམ་གྱི་སངས་རྒྱས་ཐམས་ཅད་ཀྱི་ཡུམ་སྟེ། རིག་པ་ཆེན་པོའི་སྔགས་
ཀྱི་ཚིག་ནི་འདི་དག་གོ། །ཏདྱ་ཐཱ། ཨོཾ་མུ་ནི་མུ་ནི། མ་ཧཱ་མུ་ན་ཡེ་སྭཱ་ཧཱ། སུ་ཞིག་ཤེས་རབ་ཀྱི་ཕ་རོལ་དུ་ཕྱིན་པ་འདི་འཛིན་པར་བྱེད་ན། དུས་གསུམ་གྱི་སངས་རྒྱས་རྣམས་ཀྱི་ཆོས་རྣམས་གཟུང་བར་འགྱུར་རོ། །དེ་སྐྱེ་བ་དྲན་པར་
འགྱུར་རོ། །མི་ཁོམ་པ་ཐམས་ཅད་སྤངས་པར་འགྱུར་རོ། །བསོད་ནམས་ཀྱི་འབྲས་བུ་ཚད་མེད་པ་ཐོབ་པར་འགྱུར་རོ། །སངས་རྒྱས་བཅོམ་ལྡན་འདས་རྣམས་དང་དུས་རྟག་ཏུ་འགྲོགས་པར་འགྱུར་རོ། །བྱང་ཆུབ་ཀྱི་སེམས་དང་
ལྡན་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་ཕྱག་ན་རྡོ་རྗེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡིད་རངས་ཏེ། བཅོམ་ལྡན་འདས་ཀྱིས་གསུངས་
པ་ལ་མངོན་པར་བསྟོད་དོ། །འཕགས་པ་ཤེས་རབ་ཀྱི་ཕ་རོལ་དུ་ཕྱིན་པ་ལག་ན་རྡོ་རྗེའི་མདོ་ཐེག་པ་ཆེན་པོ་རྫོགས་སྷོ།།             །། ༄༅།  །རྒྱ་གར་སྐད་དུ། ཨཱརྱ་པྲ་ཛྙཱ་པཱ་ར་མི་ཏ་བཛྲ་ཀེ་ཏུ་མ་ཧཱ་ཡ་
ན་སཱུ་ཏྲ།  བོད་སྐད་དུ།  འཕགས་པ་ཤེས་རབ་ཀྱི་ཕ་རོལ་དུ་ཕྱིན་པ་རྡོ་རྗེ་རྒྱལ་མཚན་གྱི་མདོ་ཐེག་པ་ཆེན་པོ།  སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་
ན། བཅོམ་ལྡན་འདས་རྒྱལ་པོའི་ཁབ་ན་བཞུགས་ཏེ། ཐམས་ཅད་དང་ལྡན་པའི་འཁོར་དང་ཐབས་གཅིག་གོ། །དེ་ནས་དེའི་ཚེ་འཁོར་དེར་བྱང་ཆུབ་སེམས་དཔའ་རྡོ་རྗེ་རྒྱལ་མཚན་འདུག་པ་དེ་སྟན་ལས་ལངས་ཏེ། བཅོམ་ལྡན་
39-1-171b


འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་གང་དང་ལྡན་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རྡོ་རྗེའི་རྒྱལ་མཚན་འདུག་པ་དེ་ཆོས་རྣམ་པ་བཞི་དང་ལྡན་པ་སྟེ། བཞི་
གང་ཞེ་ན། འདི་ལྟ་སྟེ། ཆོས་ཐམས་ཅད་སྟོང་པ་ཉིད་དུ་མངོན་པ་དང་། འདུས་བྱས་ཐམས་ཅད་མི་རྟག་པ་དང་། སྡུག་བསྔལ་བར་ཤེས་པ་དང་། སྤྲོས་པ་ཐམས་ཅད་དང་བྲལ་བའི་ཆོས་ཉིད་དུ་ལྡན་པ་དང་། ཐམས་ཅད་དུ་མི་རྟོག་མི་
དམིགས་པར་བསྒོམ་པའོ། །གཞན་ཡང་ཆོས་རྣམ་པ་བཞི་དང་ལྡན་ན་ཤེས་རབ་སྐྱེ་བའི་རྒྱུ་སྟེ། བཞི་གང་ཞེ་ན། འདི་ལྟ་སྟེ། དང་པོ་གང་ཟག་ཆོས་སྨྲ་བའི་མཁན་པོ་བསྟེན་པ་དང་། གཉིས་པ་དེའི་དམ་པའི་ཆོས་ཉན་པ་དང་། གསུམ་
པ་དོན་ལ་འཇུག་ཅིང་སེམས་པ་དང་། བཞི་པ་གཞན་ལ་ཚུལ་བཞིན་དུ་སྟོན་པར་མོས་པ་སྟེ། འདི་ནི་ཤེས་རབ་སྐྱེ་བའི་རྒྱུའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་རྣམས་ཀྱིས་འདི་ལྟ་སྟེ། ཆོས་ཐམས་ཅད་རང་བཞིན་གྱིས་རྣམ་
པར་དག་པས་སྟོང་པ་དང་། བདག་མེད་པ་དང་། དངོས་པོ་མེད་པའི་ངོ་བོ་ཉིད་དང་། མཚན་མ་མེད་པ་དང་། མ་བཅིངས་པ་དང་། མ་གྲོལ་བ་དང་། སྣང་བ་མེད་པ་དང་། མུན་པ་མེད་པའི་རང་བཞིན་དུ་ཤེས་པར་བྱའོ། །དེ་ལྟ་བས་
ན་བྱང་ཆུབ་སེམས་དཔའ་རྣམས་ཀྱིས་ཤེས་རབ་ཀྱི་ཕ་རོལ་དུ་ཕྱིན་པ་ལ་བསླབ་པར་བྱའོ། །ཆོས་ཐམས་ཅད་སྐྱེ་བ་མེད་པ་དང་། གནས་པ་མེད་པའི་ཚུལ་དུ་ཤེས་རབ་ཀྱི་ཕ་རོལ་དུ་ཕྱིན་པ་ལ་བསླབ་པར་བྱའོ། །བཅོམ་ལྡན་འདས་
ཀྱིས་བཀའ་སྩལ་པ། དངོས་མེད་ངོ་བོ་ཉིད་དུ་བསྒོམ་དང་། ཤེས་རབ་སྐྱེ་བའི་རྒྱུ་ལ་མོས་དང་། །མཚན་མ་ཐམས་ཅད་བྲལ་བ་ཡི། །ཤེས་རབ་དོན་ལ་བསླབ་པར་བྱ་དང་། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་བྱང་ཆུབ་
སེམས་དཔའ་རྡོ་རྗེ་རྒྱལ་མཚན་ལ་སོགས་པ། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡིད་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཤེས་རབ་ཀྱི་ཕ་རོལ་དུ་ཕྱིན་པ་རྡོ་རྗེ་རྒྱལ་
39-1-172a


མཚན་གྱི་མདོ་རྫོགས་སྷོ།།         །། ༄༅། །རྒྱ་གར་སྐད་དུ། དྷརྨ་ཙཀྲ་པྲ་བརྟ་ན་སཱུ་ཏྲ།  བོད་སྐད་དུ། ཆོས་ཀྱི་འཁོར་ལོ་རབ་ཏུ་བསྐོར་བའི་མདོ། འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་
ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་བཱ་རཱ་ཎ་སཱིའི་དྲང་སྲོང་ལྷུང་བ་རི་དགས་རྒྱུ་བའི་གནས་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་ལྔ་སྡེ་རྣམས་བོས་ཏེ་བཀའ་སྩལ་པ། དགེ་
སློང་དག་རབ་ཏུ་བྱུང་བ་མཐའ་གཉིས་པོ་འདི་ལ་གནས་པར་མི་བྱའོ། །གང་སུ་དག་འདིར་འདོད་པ་རྣམས་དང་བདེ་བ་ལ་ཞེན་པ་ནི་མི་རིགས་པ་དང་དམན་པར་འགྱུར་རོ། །སོ་སོའི་སྐྱེ་བོ་རྣམས་ནི་དོན་མེད་པ་དང་ལྡན་པའི་ཕྱིར་གང་སུ་དག་ལུས་
དུབ་པ་དང་འབྲལ་བའི་སྡུག་བསྔལ་བསྔགས་པར་བྱ་བ་མ་ཡིན་པ་རྣམས་ཀྱི་དོན་མེད་པ་དང་ལྡན་ནོ། །དགེ་སློང་དག་འདི་རྣམས་ནི་མཐའ་གཉིས་ཀྱི་མཐའ་སྟེ་དེ་ལ་འཇུག་པར་མི་བྱའོ། །དེ་བཞིན་གཤེགས་པ་མངོན་པར་རྫོགས་པར་སངས་རྒྱས་
ནས་དབུ་མའི་ལམ་འདི་གསུངས་སོ། །མིག་བྱེད་པ་དང་། ཡེ་ཤེས་བྱེད་པ་དང་། ཞི་བར་བྱེད་པ་དང་། མངོན་པར་ཤེས་པ་དང་། ཡང་དག་པར་ཁོང་དུ་ཆུད་པ་དང་། མྱ་ངན་ལས་འདས་པ་ལ་ཡང་དག་པར་འཇུག་གོ། །དགེ་སློང་དག་དེ་བཞིན་གཤེགས་
པས་མངོན་པར་རྫོགས་པར་སངས་རྒྱས་ནས་གསུངས་པའི་དབུ་མའི་ལམ་གང་ཞེ་ན། མིག་བྱེད་པ་དང་། ཡེ་ཤེས་བྱེད་པ་དང་། ཞི་བར་བྱེད་པ་དང་། མངོན་པར་ཤེས་པ་དང་། ཡང་དག་པར་ཁོང་དུ་ཆུད་པ་དང་། མྱ་ངན་ལས་འདས་པ་ལ་ཡང་དག་
པར་འཇུག་གོ། །དབུ་མའི་ལམ་ནི་འཕགས་པའི་ལམ་ཡན་ལག་བརྒྱད་དེ། བརྒྱད་པོ་དེ་ནི་འདི་ལྟ་སྟེ། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་
དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཏོ། །དབུ་མའི་ལམ་འདི་ཡང་དེ་བཞིན་གཤེགས་པ་མངོན་པར་རྫོགས་པར་སངས་རྒྱས་ནས་གསུངས་སོ། །མིག་བྱེད་པ་དང་། 
39-1-172b


ཡེ་ཤེས་བྱེད་པ་དང་། ཞི་བ་བྱེད་པ་དང་། མངོན་པར་ཤེས་པ་དང་། ཡང་དག་པར་ཁོང་དུ་ཆུད་པ་དང་། མྱ་ངན་ལས་འདས་པ་ལ་ཡང་དག་པར་འཇུག་གོ། །འདི་ཡང་དགེ་སློང་དག་སྡུག་བསྔལ་འཕགས་པའི་བདེན་པ་སྟེ། སྐྱེ་བའི་སྡུག་བསྔལ་དང་། 
རྒ་བའི་སྡུག་བསྔལ་དང་། ན་བའི་སྡུག་བསྔལ་དང་། འཆི་བའི་སྡུག་བསྔལ་དང་། མི་སྡུག་པ་དང་ཕྲད་པའི་སྡུག་བསྔལ་དང་། སྡུག་པ་དང་བྲལ་བའི་སྡུག་བསྔལ་དང་། གང་འདོད་པ་བཙལ་ཏེ་མ་རྙེད་པ་དེ་ཡང་སྡུག་བསྔལ་བ་དང་། མདོར་ན་
ཉེ་བར་ལེན་པའི་ཕུང་པོ་ལྔ་སྡུག་བསྔལ་ལོ། །འདི་ཡང་དགེ་སློང་དག་སྡུག་བསྔལ་ཀུན་འབྱུང་འཕགས་པའི་བདེན་པ་སྟེ། གང་སྲེད་པ་འབྱུང་བ་ཅན་དང་། དགའ་བའི་འདོད་ཆགས་དང་ལྡན་པ་དང་། དེ་དང་དེ་ལ་མངོན་པར་དགའ་བ་ནི། འདི་
ལྟ་སྟེ། འདོད་པའི་སྲེད་པ་དང་། འཁོར་བ་ལ་སྲེད་པ་དང་། འཁོར་བ་དང་བྲལ་བ་ལ་སྲེད་པའོ། །འདི་ཡང་དགེ་སློང་དག་སྡུག་བསྔལ་འགོག་པ་འཕགས་པའི་བདེན་པ་སྟེ། གང་ཞིག་འདི་བཞིན་སྲེད་པ་མ་ལུས་པ་ལ་འདོད་ཆགས་དང་བྲལ་
བ་དང་། འགོག་པ་དང་། བོར་བ་དང་། སོ་སོར་བསྒྱུར་བ་དང་། གྲོལ་བ་དང་། གྲོལ་བ་ལ་ཞུམ་པ་མེད་པའོ། །འདི་ཡང་དགེ་སློང་དག་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པའོ། །འདི་ཡང་
འཕགས་པའི་ལམ་ཡན་ལག་བརྒྱད་པ་སྟེ། འདི་ལྟ་སྟེ། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་
དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཏོ། །དགེ་སློང་དག་འདི་ནི་སྡུག་བསྔལ་འཕགས་པའི་བདེན་པ་སྟེ། སྔར་ཆོས་མ་ཐོས་པ་ལ་མིག་བསྐྱེད་པ་དང་། ཡེ་ཤེས་བསྐྱེད་པ་དང་། 
ཤེས་རབ་བསྐྱེད་པ་དང་། རིག་པ་བསྐྱེད་པ་དང་། སྣང་བ་བསྐྱེད་པའོ། །དེ་ཡང་སྡུག་བསྔལ་འཕགས་པའི་བདེན་པ་སྟེ། དགེ་སློང་དག་འདི་ཡོངས་སུ་ཤེས་པར་བྱའོ། །སྔར་ཆོས་མ་ཐོས་པ་ལ་མིག་བསྐྱེད་
39-1-173a


པ་དང་། ཡེ་ཤེས་བསྐྱེད་པ་དང་། ཤེས་རབ་བསྐྱེད་པ་དང་། རིག་པ་བསྐྱེད་པ་དང་། སྣང་བ་བསྐྱེད་པའོ། །འདི་ནི་སྡུག་བསྔལ་ཀུན་འབྱུང་འཕགས་པའི་བདེན་པ་སྟེ། དགེ་སློང་དག་འདི་ནི་སྔར་ཆོས་མ་ཐོས་པ་ལ། མིག་
བསྐྱེད་པ་དང་། ཡེ་ཤེས་བསྐྱེད་པ་དང་། ཤེས་རབ་བསྐྱེད་པ་དང་། རིག་པ་བསྐྱེད་པ་དང་། སྣང་བ་བསྐྱེད་པའོ། །འདི་ཡང་སྡུག་བསྔལ་ཀུན་འབྱུང་འཕགས་པའི་བདེན་པ་སྟེ་རབ་དུ་སྤང་བར་བྱའོ། །དགེ་སློང་དག་འདི་ནི་སྔར་ཆོས་མ་ཐོས་
པ་ལ་མིག་བསྐྱེད་པ་དང་། ཡེ་ཤེས་བསྐྱེད་པ་དང་། ཤེས་རབ་བསྐྱེད་པ་དང་། རིག་པ་བསྐྱེད་པ་དང་། སྣང་བ་བསྐྱེད་པའོ། །འདི་ནི་སྡུག་བསྔལ་འགོག་པ་འཕགས་པའི་བདེན་པ་སྟེ། དགེ་སློང་དག་འདི་ནི་སྔར་ཆོས་མ་ཐོས་པ་ལ། མིག་བསྐྱེད་
པ་དང་། ཡེ་ཤེས་བསྐྱེད་པ་དང་། ཤེས་རབ་བསྐྱེད་པ་དང་། རིག་པ་བསྐྱེད་པ་དང་། སྣང་བ་བསྐྱེད་པའོ། །འདི་ཡང་སྡུག་བསྔལ་འགོག་པ་འཕགས་པའི་བདེན་པ་སྟེ། མངོན་སུམ་དུ་བྱའོ། །དགེ་སློང་དག་འདི་ནི་སྔར་ཆོས་མ་ཐོས་པ་ལ། 
མིག་བསྐྱེད་པ་དང་། ཡེ་ཤེས་བསྐྱེད་པ་དང་། ཤེས་རབ་བསྐྱེད་པ་དང་། རིག་པ་བསྐྱེད་པ་དང་། སྣང་བ་བསྐྱེད་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པའོ། །དགེ་སློང་དག་འདི་ནི་སྔར་ཆོས་མ་ཐོས་པ་
ལ། མིག་བསྐྱེད་པ་དང་། ཡེ་ཤེས་བསྐྱེད་པ་དང་། ཤེས་རབ་བསྐྱེད་པ་དང་། རིག་པ་བསྐྱེད་པ་དང་། སྣང་བ་བསྐྱེད་པའོ། །འདི་ཡང་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་སྟེ་བསྒོམ་པར་བྱའོ། །དགེ་སློང་དག་འདི་ནི་
སྔར་ཆོས་མ་ཐོས་པ་ལ། མིག་བསྐྱེད་པ་དང་། ཡེ་ཤེས་བསྐྱེད་པ་དང་། ཤེས་རབ་བསྐྱེད་པ་དང་། རིག་པ་བསྐྱེད་པ་དང་། སྣང་བ་བསྐྱེད་པའོ། །དགེ་སློང་དག་དེ་ལྟར་བཤད་པ་རྣམ་པ་བཞི་པོ་འདི་ནི་འཕགས་པའི་བདེན་པའོ། །འདི་ལྟར་ལན་
གསུམ་དུ་བཟླས་ཏེ་རྣམ་པ་བཅུ་གཉིས་པོ་ཇི་ལྟར་གྱུར་པ་རྣམས་ཡེ་ཤེས་མཐོང་བ་ཤིན་ཏུ་རྣམ་པར་དག་པ་ཡིན་ནོ། །དགེ་སློང་དག་ང་སྤངས་ཏེ། ལྷ་དང་བཅས་པའི་འཇིག་རྟེན་དང་། བདུད་དང་བཅས་པ་དང་། ཚངས་པ་དང་བཅས་པ་དང་། དགེ་སྦྱོང་དང་
39-1-173b


བཅས་པ་དང་། སྐྱེ་དགུའི་བདག་པོ་དང་། ལྷ་དང་མིར་བཅས་པ་རྣམས་ལས། བླ་ན་མེད་པ་ཡང་དག་པར་རྫོགས་པའི་སངས་རྒྱས་གཞན་མེད་དོ། །དགེ་སློང་དག་གང་ཡང་འདི་ནི་འཕགས་པའི་བདེན་པ་བཞི་པོ་འདི་ལྟར་ལན་གསུམ་དུ་
བཟླས་ཏེ། རྣམ་པ་བཅུ་གཉིས་སུ་ཇི་ལྟར་གྱུར་པའི་ཡེ་ཤེས་མཐོང་བ་ཤིན་དུ་རྣམ་པར་དག་པ་ཡིན་ནོ། །ཇི་ལྟར་དགེ་སློང་དག་ང་ནི་འཇིག་རྟེན་ལྷ་དང་བཅས་པ་དང་། བདུད་དང་བཅས་པ་དང་། ཚངས་པ་དང་བཅས་པ་དང་། དགེ་སྦྱོང་དང་བཅས་
པ་དང་། སྐྱེ་དགུའི་བདག་པོ་དང་། ལྷ་དང་མིར་བཅས་པ་རྣམས་ལས། བླ་ན་མེད་པ་ཡང་དག་པར་རྫོགས་པའི་སངས་རྒྱས་མངོན་པར་རྫོགས་པར་སངས་རྒྱས་ནས་སོ་སོར་རྟོགས་སོ། །ཡེ་ཤེས་འདི་ཡང་བདག་མཐོང་བར་གྱུར་པ་དང་། སྔར་མེད་
པའི་རྣམ་པར་གྲོལ་བ་དང་། བདག་ནི་ལྷག་མ་མེད་པར་ཡང་སྲིད་པ་ལེན་པ་མེད་པར་མྱ་ངན་ལས་འདས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། དགེ་སློང་ལྔ་སྡེ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའོ། །
འདི་ལྟར་ལུང་དུ་བསྟན་པ་དེ་ཚུན་ཆོད་ནས། ཚེ་དང་ལྡན་པ་ཀཽ་ཌི་ནྱས་རྡུལ་སྤངས་པ་དང་། དྲི་མ་མེད་པའི་ཆོས་ཀྱི་མིག་སྐྱེས་སོ། །གང་ཅུང་ཟད་ཀུན་འབྱུང་བའི་ཆོས་ཐམས་ཅད་ནི་དེ་འགོག་པའི་ཆོས་ཡིན་ནོ། །བཅོམ་ལྡན་འདས་ཀྱིས་ཆོས་
ཀྱི་འཁོར་ལོ་རབ་ཏུ་བསྐོར་ཞིང་བསྐོར་ནས། སའི་ལྷ་རྣམས་ཀྱིས་བསྟོད་པའི་སྒྲ་བསྒྲགས་སོ། །དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། འཇིག་རྟེན་དུ་གཞན་སུས་ཀྱང་བསྐོར་བར་མི་ནུས་པ་འདི་
ནི་བཅོམ་ལྡན་འདས་ཀྱིས་ཡུལ་བཱ་རཱ་ཎ་སཱིའི་དྲང་སྲོང་ལྷུང་བ་དང་། རི་དགས་རྒྱུ་བའི་གནས་སུ་བཞུགས་ནས་བླ་ན་མེད་པའི་ཆོས་ཀྱི་འཁོར་ལོ་རབ་ཏུ་མ་བསྐོར་བ་བསྐོར་ཏོ། །དེ་ནས་སའི་ལྷའི་སྒྲ་ཐོས་ནས། རྒྱལ་ཆེན་རིས་བཞིའི་
ལྷ་རྣམས་ཀྱིས་བསྟོད་པའི་སྒྲ་བསྒྲགས་སོ། །དགེ་སྦྱོང་ངམ་བྲམ་ཟེ་འམ། ལྷ་འམ། བདུད་དམ། ཚངས་པའམ། འཇིག་རྟེན་དུ་གཞན་སུས་ཀྱང་བསྐོར་བར་མི་ནུས་པ་འདི་ནི་བཅོམ་ལྡན་འདས་ཀྱིས་ཡུལ་བཱ་རཱ་ཎ་སཱིའི་དྲང་སྲོང་ལྷུང་
39-1-174a


བ་དང་རི་དགས་རྒྱུ་བའི་གནས་སུ་བཞུགས་ནས། བླ་ན་མེད་པའི་ཆོས་ཀྱི་འཁོར་ལོ་མ་བསྐོར་བ་བསྐོར་ཏོ། །རྒྱལ་ཆེན་རིས་བཞིའི་ལྷ་རྣམས་ཀྱིས་བསྟོད་པའི་སྒྲ་ཐོས་ནས། སུམ་བཅུ་རྩ་གསུམ་གྱི་ལྷ་རྣམས་ཀྱིས་བསྟོད་
པའི་སྒྲ་བསྒྲགས་སོ། །དགེ་སྦྱོང་ངམ། བྲམ་ཟེའམ། ལྷ་འམ། བདུད་དམ། ཚངས་པ་འམ། འཇིག་རྟེན་དུ་གཞན་སུས་ཀྱང་བསྐོར་བར་མི་ནུས་པ་འདི་ནི་བཅོམ་ལྡན་འདས་ཀྱིས་ཡུལ་བཱ་རཱ་ཎ་སཱིའི་དྲང་སྲོང་ལྷུང་བ་དང་རི་དགས་
རྒྱུ་བའི་གནས་སུ་བཞུགས་ནས། བླ་ན་མེད་པའི་ཆོས་ཀྱི་འཁོར་ལོ་མ་བསྐོར་བ་བསྐོར་ཏོ། །སུམ་བཅུ་རྩ་གསུམ་གྱི་ལྷ་རྣམས་ཀྱིས་བསྟོད་པའི་སྒྲ་ཐོས་ནས། འཐབ་བྲལ་གྱི་ལྷ་རྣམས་ཀྱིས་བསྟོད་པའི་སྒྲ་བསྒྲགས་སོ། །
དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། འཇིག་རྟེན་དུ་གཞན་སུས་ཀྱང་བསྐོར་བར་མི་ནུས་པ་འདི་ནི་བཅོམ་ལྡན་འདས་ཀྱིས་ཡུལ་བཱ་རཱ་ཎ་སཱིའི་དྲང་སྲོང་ལྷུང་བ་དང་། རི་དགས་རྒྱུ་བའི་གནས་སུ་བཞུགས་ནས་
བླ་ན་མེད་པའི་ཆོས་ཀྱི་འཁོར་ལོ་མ་བསྐོར་བ་བསྐོར་ཏོ། །འཐབ་བྲལ་གྱི་ལྷ་རྣམས་ཀྱིས་བསྟོད་པའི་སྒྲ་ཐོས་ནས། དགའ་ལྡན་གྱི་ལྷ་རྣམས་ཀྱིས་བསྟོད་པའི་སྒྲ་བསྒྲགས་སོ། །དགེ་སྦྱོང་ངམ། བྲམ་ཟེའམ། ལྷའམ། བདུད་
དམ། ཚངས་པ་འམ། འཇིག་རྟེན་དུ་གཞན་སུས་ཀྱང་བསྐོར་བར་མི་ནུས་པ་འདི་ནི་བཅོམ་ལྡན་འདས་ཀྱིས་ཡུལ་བཱ་རཱ་ཎ་སཱིའི་དྲང་སྲོང་ལྷུང་བ་དང་། རི་དགས་རྒྱུ་བའི་གནས་སུ་བཞུགས་ནས། བླ་ན་མེད་པའི་ཆོས་ཀྱི་འཁོར་ལོ་མ་
བསྐོར་བ་བསྐོར་ཏོ། །དགའ་ལྡན་གྱི་ལྷ་རྣམས་ཀྱིས་བསྟོད་པའི་སྒྲ་ཐོས་ནས། འཕྲུལ་དགའི་ལྷ་རྣམས་ཀྱིས་བསྟོད་པའི་སྒྲ་བསྒྲགས་སོ། །དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པའམ། འཇིག་
རྟེན་དུ་གཞན་སུས་ཀྱང་བསྐོར་བར་མི་ནུས་པ་འདི་ནི་བཅོམ་ལྡན་འདས་ཀྱིས་ཡུལ་བཱ་རཱ་ཎ་སཱིའི་དྲང་སྲོང་ལྷུང་བ་དང་། རི་དགས་རྒྱུ་བའི་གནས་སུ་བཞུགས་ནས། བླ་ན་མེད་པའི་ཆོས་ཀྱི་འཁོར་ལོ་མ་བསྐོར་བ་བསྐོར་ཏོ། །འཕྲུལ་
39-1-174b


དགའི་ལྷ་རྣམས་ཀྱིས་བསྟོད་པའི་སྒྲ་ཐོས་ནས། གཞན་འཕྲུལ་དབང་བྱེད་ཀྱི་ལྷ་རྣམས་ཀྱིས་བསྟོད་པའི་སྒྲ་བསྒྲགས་སོ། །དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། འཇིག་རྟེན་དུ་གཞན་སུས་
ཀྱང་བསྐོར་བར་མི་ནུས་པ་འདི་ནི་བཅོམ་ལྡན་འདས་ཀྱིས་ཡུལ་བཱ་རཱ་ཎ་སཱིའི་དྲང་སྲོང་ལྷུང་བ་དང་། རི་དགས་རྒྱུ་བའི་གནས་སུ་བཞུགས་ནས། བླ་ན་མེད་པའི་ཆོས་ཀྱི་འཁོར་ལོ་མ་བསྐོར་བ་བསྐོར་ཏོ། །གཞན་འཕྲུལ་དབང་
བྱེད་ཀྱི་ལྷ་རྣམས་ཀྱིས་བསྟོད་པའི་སྒྲ་ཐོས་ནས། ཚངས་རིས་ཀྱི་ལྷ་རྣམས་ཀྱིས་བསྟོད་པའི་སྒྲ་བསྒྲགས་སོ། །དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། འཇིག་རྟེན་དུ་གཞན་སུས་ཀྱང་
བསྐོར་བར་མི་ནུས་པ་འདི་ནི་བཅོམ་ལྡན་འདས་ཀྱིས་ཡུལ་བཱ་རཱ་ཎ་སཱིའི་དྲང་སྲོང་ལྷུང་བ་དང་། རི་དགས་རྒྱུ་བའི་གནས་སུ་བཞུགས་ནས་བླ་ན་མེད་པའི་ཆོས་ཀྱི་འཁོར་ལོ་མ་བསྐོར་བ་བསྐོར་ཏོ། །དེ་ནས་སྐད་ཅིག་དང་ཡུད་ཙམ་དེ་ལ་ཚངས་
པའི་འཇིག་རྟེན་གྱི་བར་དུ་སྒྲས་ཁྱབ་པར་གྱུར་ཏོ། །འདིར་ཡང་འཇིག་རྟེན་གྱི་ཁམས་སྟོང་ཕྲག་བཅུ་ཡང་དག་པར་གཡོས་སོ། །ཡང་དག་པར་རབ་ཏུ་གཡོས་སོ། །ཡང་དག་པར་རབ་ཏུ་ལྡེག་གོ། །བག་ཡོད་པར་
གྱུར། ཡ་མཚན་དུ་གྱུར། སྣང་བར་གྱུར། འཇིག་རྟེན་རྣམས་སུ་དེ་ལྟར་གྱུར་ཏོ། །འཇིག་རྟེན་རྣམས་སུ་དེ་ལྟར་གྱུར་ཏེ། ཚངས་པས་ཆོས་བསྟན་པ་ཐོས་ནས། ལྷ་རྣམས་རང་རང་གི་གནས་སུ་སོང་ངོ་། །
དེ་ནས་ཡང་བཅོམ་ལྡན་འདས་ཀྱིས་ཆེད་དུ་བརྗོད་པ་ཆེད་དུ་བརྗོད་དེ། ཀུན་ཤེས་པའི་ཕྱིར་ཀཽ་ཌི་ནྱའོ། །ཀུན་ཤེས་པ་རྣམས་ཀྱིས་ཀཽ་ཌི་ནྱའོ། །དེའི་ཕྱིར་འདི་ནི་ཚེ་དང་ལྡན་པ་ཀཽ་ཌི་ནྱའོ་སྟེ། ཀུན་ཤེས་ཀཽ་ཌི་ནྱས་ཞེས་བྱ་
བའི་མིང་ཐོབ་བོ། །ཆོས་ཀྱི་འཁོར་ལོ་བསྐོར་བའི་མདོ། རྫོགས་སྷོ།།           །། 
39-1-175a


༄༅། །རྒྱ་གར་སྐད་དུ། ཛཱ་ཏ་ཀ་ནི་དཱ་ནྃ།  བོད་སྐད་དུ། སྐྱེས་པ་རབས་ཀྱི་གླེང་གཞི། འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །བཅོམ་ལྡན་འདས་རྒྱལ་བྱེད་ཚལ་མགོན་
མེད་ཟས་སྦྱིན་གྱི་ཀུན་དགའ་ར་བ་ན་བཞུགས་པའི་ཚེ། གནས་བརྟན་ཆེན་པོ་དོན་མཐོང་བཅོམ་ལྡན་འདས་ཀྱི་ཐད་དུ་སོང་ནས། ཕྱག་བྱས་ཏེ་བསྐོར་བ་བྱས་ནས་ཕྱོགས་གཅིག་ཏུ་འཁོད་དེ། བཅོམ་ལྡན་འདས་ཀྱི་
ཐད་དུ་འདི་སྐད་ཅེས་གསོལ་ཏོ། །བཙུན་པ་བདག་ནི་སངས་རྒྱས་བཅོམ་ལྡན་འདས་ཀྱི་རྒྱུད་ཀྱི་ཆོས་ཐོས་པར་འཚལ་ལོ། །བཀའ་སྩལ་པ། དོན་མཐོང་ཡིད་ལ་ཟུང་ཤིག་དང་ངས་བཤད་པར་བྱའོ་ཞེས་འབྱུང་ངོ་། །
དེ་ཡང་འདིར་སྡུད་པར་བྱེད་པ་པོ་རབ་ཏུ་རྟོག་པའི་ཤེས་རབ་དང་ཞི་བའི་དགྲ་བཅོམ་པ་རྣམས་ཀྱི་སྐྱེས་པ་རབས་ཀྱི་གླེང་གཞིའི་དོན་གྱི་བསྔགས་པ་བརྗོད་དོ། །རིང་བའི་གླེང་གཞི་དང་བར་པའི་གླེང་གཞི་དང་། ཉེ་བའི་གླེང་གཞི་སྟེ། །གླེང་གཞི་གསུམ་
པོ་འདི་གཟིགས་ནས་བསྔགས་པ་གང་ཞིག་ཉན་པའོ། །དེ་ལ་དང་པོ་རེ་ཤིག་དེ་རྣམས་ཀྱི་གླེང་གཞི་ཡོངས་སུ་བཅད་པ་རྣམས་རིག་པར་བྱའོ། །མར་མེ་མཛད་ཀྱི་ཞབས་ཀྱི་དྲུང་འདིར་སེམས་པ་ཆེན་པོས་སྨོན་ལམ་བཏབ་བོ། ། 
ཇི་སྲིད་ཐམས་ཅད་སྒྲོལ་གྱི་ལུས་སྤངས་པའི་བར་དང་དགའ་ལྡན་གྱི་གནས་སུ་འཁྲུངས་པའི་ཆོས་ཀྱི་གཏམ་གྱི་བར་གྱི་ལམ་ནི་རིང་པོའི་གླེང་གཞི་ཞེས་བྱའོ། །ཇི་སྲིད་དགའ་ལྡན་གྱི་གནས་ནས་འཕོས་ནས་བྱང་ཆུབ་ཀྱི་སྙིང་པོར་
ཐམས་ཅད་མཁྱེན་པ་ཐོབ་ནས་ཆོས་ཀྱི་གཏམ་གྱི་བར་ནི་གླེང་གཞི་བར་པ་ཞེས་བྱ་བའོ། །གང་དང་གང་དུ་ཞུགས་ནས། དེ་དང་དེ་ཐོབ་པ་རྣམས་ནི་ཉེ་བའི་གླེང་གཞི་ཞེས་བྱ་བའོ། །དེ་ལ་འདིར་རིང་པོའི་གླེང་གཞི་ཞེས་བྱ་
བ་ནི་འདི་ནས་བསྐལ་པ་གྲངས་མེད་པ་བཞི་དང་བསྐལ་པ་འབུམ་ཕྲག་གཅིག་ལྷག་པ་ནས་མགོ་བརྩམས་ནས་གྲོང་ཁྱེར་འཇིགས་མེད་ལྡན་ཞེས་བྱ་བ་བྱུང་ངོ་། །དེར་ཡང་བྲམ་ཟེ་བློ་གྲོས་བཟང་པོ་ཞེས་བྱ་བ་གནས་སོ། །
39-1-175b


ཕ་དང་མ་གཉིས་ཀའང་རིགས་བཟང་བའི་མངལ་དུ་ཞུགས་ཏེ་རིགས་བདུན་རྒྱུད་ཀྱི་བར་དུ་གཞན་གྱིས་རྩོད་པ་དང་དཔྱ་བ་དང་སྨོད་པ་མེད་ཅིང་རྣམ་པར་དག་གོ། །གཟུགས་བཟང་བ་བལྟ་ན་སྡུག་པ་རབ་ཏུ་མཛེས་པ་མཆོག་གི་ཁ་དོག་དང་ལྡན་
པའི་སྐྱེས་བུ་ཅན་ནོ། །དེ་ཡང་ལས་གཞན་མི་བྱེད་པར་བྲམ་ཟེའི་ལས་འབའ་ཞིག་སློབ་བོ། །དེ་ཡང་ཁྱེའུ་གཞོན་ནུའི་དུས་སུ་ཕ་དང་མ་གཉིས་ཀ་དུས་ལས་འདས་སོ། །དེ་ནས་དེའི་ལོངས་སྤྱོད་སྤེལ་བའི་བློན་པོས་ནོར་གྱི་ཡི་
གེ་བླངས་ཏེ་གསེར་དང་དངུལ་དང་ནོར་བུ་དང་མུ་ཏིག་ལ་སོགས་པས་གང་བ་རྣམས་སྒོར་བཏོན་ཏེ་གཞོན་ནུ་འདི་རྣམས་མའི་ནོར་ཡིན་ནོ། །འདི་རྣམས་ཕའི་ནོར་ཡིན་ནོ། །འདི་དག་ནི་མེས་པོ་དང་ཡང་མེས་ཀྱི་ནོར་ཡིན་ནོ། །
རིགས་བདུན་རྒྱུད་ཀྱི་བར་གྱི་ནོར་ཡིན་ནོ་ཞེས་སྨྲས་སོ། །འདི་རྣམས་སོ་སོར་བསྐྱང་བའི་ཕྱིར་སྨྲས་པ་ཡིན་ནོ། །མཁས་པ་བློ་གྲོས་བཟང་པོས་བསམས་པ། འདིའི་ནོར་རྣམས་བཟུང་ནས་བདག་གི་ཕ་དང་མེས་པོ་
ལ་སོགས་པས་འཇིག་རྟེན་ཕ་རོལ་དུ་འགྲོ་བ་ན་གསེར་སེ་བ་གཅིག་ཀྱང་ཁྱེར་ནས་མ་སོང་གིས་བདག་ཉིད་ཀྱིས་ཁྱེར་ནས་འགྲོ་བར་རིག་པར་བྱའོ་ཞེས་རྒྱལ་པོ་ལ་སྨྲས་ནས། གྲོང་ཁྱེར་དུ་རོལ་མོ་བསྒྲགས་ཏེ། སྐྱེ་བོ་ཐམས་
ཅད་ལ་སྦྱིན་པར་བྱིན་ནས། དཀའ་ཐུབ་པའི་རབ་ཏུ་བྱུང་བ་ལ་རབ་ཏུ་བྱུང་ངོ་། །འདིའི་ཡང་དོན་གསལ་བར་བྱ་བའི་ཕྱིར་གནས་འདིར་བློ་གྲོས་བཟང་པོས་གཏམ་བྱས་སོ། །དེ་ཡང་འདི་ཙམ་འབའ་ཞིག་མ་ཡིན་ཏེ། 
སངས་རྒྱས་ཀྱི་རྒྱུར་རྒྱུན་མི་འཆད་པར་གསུངས་ལ་སླར་ཡང་ཚིགས་སུ་བཅད་པས་བཅིངས་ཏེ་བཤད་ཀྱང་གོ་དཀའ་བས་དེ་དང་དེའི་བར་བར་དུ་ཚིགས་སུ་བཅད་པའི་ཚིག་གིས་གསལ་བ་དང་བཅས་པ་བཤད་པར་བྱའོ། །
བསྐལ་པ་གྲངས་མེད་པ་བཞི་དང་བསྐལ་པ་འབུམ་ཕྲག་གཅིག་ལྷག་པ་ནས་མགོ་བརྩམས་ནས་སྒྲ་བཅུ་རྒྱུན་ཆད་མེད་པར་འཇིགས་མེད་ལྡན་གྲོང་ཁྱེར་དེར་བྱུང་ངོ་། །དེའི་སངས་རྒྱས་ཀྱིས་རྒྱུད་བཤད་
39-1-176a


དོ། །བསྐལ་པ་གྲངས་མེད་བཞི་དང་ནི། །འབུམ་ཕྲག་གཅིག་ནི་ལྷག་པ་ན། །གྲོང་ཁྱེར་འཇིགས་མེད་ལྡན་ཞེས་པ། །མཐོང་བ་ཡིས་ནི་དགའ་བར་བྱེད། །རྒྱུན་མི་འཆད་པ་སྒྲ་
བཅུ་བཞིན། །བཟའ་དང་བཏུང་བ་ཡང་དག་ལྡན། །དེ་ལ་སྒྲ་བཅུ་རྒྱུན་མི་འཆད་པ་ནི། གླང་པོ་ཆེའི་སྒྲ་དང་རྟའི་སྒྲ་དང་ཤིང་རྟའི་སྒྲ་དང་རོལ་མོའི་སྒྲ་དང་རོལ་མོ་མྲི་དྃ་གའི་སྒྲ་དང་པི་ཝང་གི་སྒྲ་དང་གླུའི་སྒྲ་དང་རོལ་
མོ་སམ་མའི་སྒྲ་དང་ཆ་ལང་གི་སྒྲ་དང་རྒོད་པ་དང་འཐུང་བ་དང་ཟ་བའི་སྒྲ་སྟེ། སྒྲ་བཅུ་པོ་འདི་རྣམས་ནི་རྒྱུན་མི་འཆད་པ་ཡིན་ནོ། །སྒྲ་དེ་རྣམས་ཕྱོགས་གཅིག་ཏུ་བྱ་སྟེ། གླང་པོའི་སྒྲ་དང་རྟ་ཡི་
སྒྲ། །རོལ་མོ་དུང་དང་ཤིང་རྟའི་སྒྲ། །ཟ་དང་འཐུང་བ་དེ་ཉིད་དང་། །བཟའ་དང་བཏུང་བའི་སྒྲ་དང་ནི། །སངས་རྒྱས་རྒྱུད་དུ་ཚིགས་སུ་བཅད་པ་འདི་གསུངས་ནས། གྲོང་
ཁྱེར་ཡན་ལག་ཉིང་ལག་ལྡན། །འདོད་པ་ཐམས་ཅད་ཉེ་རབ་གནས། །རིན་ཆེན་བདུན་པོ་ཡང་དག་ལྡན། །སྐྱེ་བོ་སྣ་ཚོགས་ཡང་དག་གང་། །ལྷ་ཡི་གྲོང་ཁྱེར་ཕུན་ཚོགས་
བཞིན། །བསོད་ནམས་ཅན་ནི་གནས་པའོ། །འཇིག་མེད་ལྡན་པའི་གྲོང་ཁྱེར་དུ། །བྲམ་ཟེ་བློ་བཟངས་ཞེས་བྱ་བས། །ལོངས་སྤྱོད་བྱ་བ་དུ་མ་བསགས། །ནོར་དང་
འབྲུ་ནི་མང་པོ་ཡི། །ནང་གི་གསང་སྔགས་འཛིན་པ་དང་། །རིག་བྱེད་གསུམ་གྱི་ཕ་རོལ་སོན། །མཚན་ཉིད་ཨི་ཐི་ཧ་ས་དང་། །དམ་པའི་ཆོས་ཀྱི་ཕ་རོལ་སོན། །དེ་ནས་དེ་ཉིད་
ཉི་མ་གཅིག་ལ་མཁས་པ་བློ་གྲོས་བཟང་པོ་དེ་ཁང་བཟང་མཆོག་གི་སྟེང་དུ་གཅིག་པུར་སྐྱིལ་མོ་དཀྲུང་བཅས་ནས་དབེན་པར་བཞུགས་ཏེ་བསམས་པ། མཁས་པ་སྐྱེ་བ་གཞན་དུ་མའི་མངལ་བཟུང་ན་སྡུག་
39-1-176b


བསྔལ་ལོ། །དེ་བཞིན་དུ་སྐྱེ་བའི་གནས་སུ་ལུས་འཇིག་གོ། །བདག་སྐྱེ་བའི་ཆོས་ཅན་དང་རྒ་བའི་ཆོས་ཅན་དང་ན་བའི་ཆོས་ཅན་དང་འཆི་བའི་ཆོས་ཅན་ནོ། །དེ་ལྟ་བུར་གྱུར་པས་བདག་ནི་སྐྱེ་
བ་མེད་པ་དང་། རྒས་པ་མེད་པ་དང་ན་བ་མེད་པ་དང་སྡུག་བསྔལ་མེད་པའི་བདེ་བ་དང་བསིལ་བ་དང་བདུད་རྩི་ལྟ་བུའི་མྱ་ངན་ལས་འདས་པ་ཆེན་པོ་ཚོལ་བར་རིགས་སོ། །ངེས་པར་སྲིད་པ་ལས་གྲོལ་བའི་མྱ་
ངན་ལས། འདས་པར་འགྲོ་བའི་ལམ་གཅིག་པོ་ཡིན་པ་ལྟ་བུའོ། །དེའི་ཕྱིར་གསུངས་པ། དབེན་པར་གཅིག་པུར་གནས་ནས་ནི། །དེ་ཚེ་བདག་གིས་འདི་ལྟར་བསམས། །སྲིད་པར་སྐྱེ་བ་
སྡུག་བསྔལ་ཞིང་། །ལུས་ནི་ཡོངས་སུ་ཞིག་པ་ན། །སྐྱེ་བའི་ཆོས་དང་རྒས་པའི་ཆོས། །ན་བའི་ཆོས་དང་དེ་ཚེ་བདག །སྐྱེ་བ་མེད་དང་འཆི་མེད་བདེ། །མྱ་ངན་འདས་པ་ཡོངས་
སུ་བཙལ། །གང་ཚེ་དྲི་ངན་ལུས་འདི་ནི། །སྣ་ཚོགས་མི་གཙང་གིས་གང་ཞིང་། །དོན་མེད་ལྟོས་པ་མེད་པ་ཡི། །དོར་ནས་འགྲོ་བར་བྱ་བ་ཡིན། །དེ་ཡི་ལམ་ནི་ཡོད་དམ་སྙམ། །
འབད་པ་མེད་པར་ལམ་མི་ཐོབ། །དེ་ཡི་ལམ་ནི་བཙལ་བར་བྱ། །སྲིད་པ་རྣམས་ལས་གྲོལ་གྱུར་སྙམ། །དེ་ནས་ལྷག་པར་ཡང་བསམས་པ། ཇི་ལྟར་འཇིག་རྟེན་པས་སྡུག་བསྔལ་གྱི་མི་
མཐུན་པའི་ཕྱོགས་སུ་གྱུར་པའི་བདེ་བ་ཞེས་བྱ་བ་ཡོད་དོ། །དེ་ལྟར་མི་མཐུན་ཕྱོགས་སྲིད་པ་ཡོད་ན་མྱ་ངན་ལས་འདའ་བར་འགྱུར་རོ་སྙམ། དེ་ལྟར་ཡང་གདུང་བ་ཡོད་ན་དེ་ཞི་བར་བྱེད་པའི་བསིལ་བ་ཡོད་དོ། །
དེ་བཞིན་དུ་འདོད་ཆགས་ལ་སོགས་པའི་མེ་ཞི་བར་བྱེད་པའི་མྱ་ངན་ལས་འདས་པ་ཡོད་པར་འགྱུར་རོ་སྙམ་མོ། །ཇི་ལྟར་ཡང་སྡིག་པ་དང་མི་མཐུན་པའི་ཕྱོགས་སུ་གྱུར་པ་ཁ་ན་མ་ཐོ་བ་མེད་པའི་དགེ་བའི་ཆོས་ཡོད་པར་
39-1-177a


འགྱུར་སྙམ་པ་ཉིད་དོ། །དེ་དང་དེ་ལྟ་བུ་ཉིད་ཀྱིས་སྡིག་པ་ཅན་ལ་སོགས་པའི་སྐྱེ་བ་ཡོད་ན། སྐྱེ་བ་ཐམས་ཅད་ཟད་པར་བྱེད་པའི་སྐྱེ་བ་མེད་པར་གྲགས་པའི་མྱ་ངན་ལས་འདས་པའང་ཡོད་
པར་འགྱུར་སྙམ་པ་ཉིད་དོ། །དེའི་ཕྱིར་གསུངས་པ། ཇི་ལྟར་སྡུག་བསྔལ་ཡོད་པ་ན། །བདེ་བ་ཞེས་པའང་ཡོད་པ་ཡིན། །དེ་ལྟར་སྲེད་པ་ཡོད་པ་ན། །སྲིད་པ་མེད་པའང་ཡོད་པ་ཡིན། །
ཇི་ལྟར་ཚ་བ་ཡོད་གྱུར་ན། །གྲང་བ་ཡང་ནི་ཡོད་པ་ཡིན། །དེ་ལྟར་མེ་གསུམ་ཡོད་གྱུར་ན། །མྱ་ངན་འདས་པའང་ཡོད་པ་ཡིན། །ཇི་ལྟར་སྡིག་པ་ཡོད་གྱུར་ན། །དགེ་བ་ཡང་ནི་ཡོད་པ་ཡིན། །
དེ་ལྟར་སྐྱེ་བ་ཡོད་གྱུར་ན། །སྐྱེ་བ་མེད་པའང་ཡོད་པར་འདོད། །གཞན་ཡང་བསམས་པ། ཇི་ལྟར་བཤད་པའི་ཕུང་པོར་སྐྱེས་བུ་འགྱེལ་བར་གྱུར་པ་ཞིག་ཐག་རིང་པོ་ནས་ཁ་དོག་ལྔ་དང་ལྡན་པའི་པད་མ་དང་མཚོ་ཆེན་
པོ་མཐོང་ན་ལམ་གང་ནས་འགྲོ་བར་བྱས་ནས་མཚོ་དེར་འཇུག་པར་རིགས་སོ། །དེའི་ལམ་དུ་མི་འགྲོ་ན་མཚོ་ཆེན་པོའི་སྐྱོན་མ་ཡིན་ནོ། །དེ་ལྟར་ཉོན་མོངས་པའི་དྲི་མ་འཁྲུད་པ་ན་འཆི་བ་མེད་པའི་མྱ་ངན་ལས་འདའ་
བའི་མཚོ་ཆེན་པོ་ཡོད་པ་ན་དེར་མི་འཇུག་ན། འཆི་བ་མེད་པའི་མྱ་ངན་ལས་འདའ་བའི་མཚོ་ཆེན་པོའི་སྐྱོན་ནི་མ་ཡིན་ནོ། །ཇི་ལྟར་ཡང་ཆོམ་རྐུན་པས་ཡོངས་སུ་བསྐོར་བའི་སྐྱེས་བུ་འབྲོས་པའི་ལམ་ཡོད་པ་ལ་མྱུར་
དུ་མི་འབྲོས་ན་ལམ་གྱི་སྐྱོན་མ་ཡིན་ཏེ་སྐྱེས་བུའི་སྐྱོན་ཡིན་ནོ། །དེ་ལྟར་ཉོན་མོངས་པས་ཡོངས་སུ་བསྐོར་ནས་བཟུང་བའི་སྐྱེས་བུ་ལ་ཞི་བ་མྱ་ངན་ལས་འདའ་བའི་ལམ་ཡོད་པར་གྱུར་པ་ན་ལམ་མི་ཚོལ་བ་ནི་ལམ་གྱི་
སྐྱོན་མ་ཡིན་ཏེ་གང་ཟག་གི་སྐྱོན་ཡིན་ནོ། །ཇི་ལྟར་ནད་ཀྱིས་གཟིར་བའི་སྐྱེས་བུ་ལ་ནད་གསོ་བའི་སྨན་པ་ཡོད་པར་གྱུར་ན་གལ་ཏེ་དེའི་གནས་སུ་ནད་གསོ་བའི་སྨན་པ་མི་ཚོལ་ན་སྨན་པའི་སྐྱོན་མ་ཡིན་ཏེ་ནད་པའི་སྐྱོན་
39-1-177b


ཡིན་ནོ། །དེ་ལྟར་ཉོན་མོངས་པའི་ནད་ཀྱིས་གཟིར་བའི་སྐྱེས་བུ་ལ་ཉོན་མོངས་པ་ཞི་བར་བྱེད་པའི་མཆོག་ཏུ་མཁས་པ་ཡོད་པར་གྱུར་ན། སློབ་དཔོན་ཚོལ་བར་མི་བྱེད་ན་དེ་ནི་སྐྱེས་བུའི་སྐྱོན་ཡིན་ཏེ་ཉོན་མོངས་པ་འཇོམས་
པར་བྱེད་པའི་སློབ་དཔོན་གྱི་སྐྱོན་ནི་མ་ཡིན་ནོ། །དེའི་ཕྱིར་གསུངས་པ། ཇི་ལྟར་མི་གཙང་གོས་པའི་མི། །གང་བའི་མཚོ་ནི་མཐོང་བཞིན་དུ། །མཚོ་དེར་འཇུག་པར་མི་བྱེད་ན། །དེ་ནི་མཚོ་ཡི་
སྐྱོན་མིན་ནོ། །དེ་ལྟར་ཉོན་མོངས་དྲི་འཁྲུད་པ། །བདུད་རྩིའི་མཚོ་ནི་ཡོད་པ་ཡི། །མཚོ་དེ་ལ་ནི་མི་འཇུག་ན། །བདུད་རྩི་མཚོ་ཡི་སྐྱོན་མིན་ནོ། །ཇི་ལྟར་ཆོམ་རྐུན་གྱིས་བསྐོར་བ། །འགྲོ་བའི་
ལམ་ནི་ཡོད་པ་ལ། །སྐྱེས་བུ་འབྲོས་པར་མི་བྱེད་ན། །དེ་ནི་ལམ་གྱི་སྐྱོན་མ་ཡིན། །ཇི་ལྟར་ཉོན་མོངས་ཀྱིས་བསྐོར་ན། །ཞི་བའི་ལམ་ནི་ཡོད་པ་ལ། །དེ་ཡི་ལམ་དུ་མི་འཇུག་ན། །ཞི་བའི་
ལམ་གྱི་སྐྱོན་མ་ཡིན། །ཇི་ལྟར་ནད་ཀྱིས་གཟིར་བའི་མི། །གསོ་སྤྱད་བྱེད་པ་ཡོད་གྱུར་པ། །ནད་ནི་ཞི་བར་མི་བྱེད་ན། །དེ་ནི་སྨན་པའི་སྐྱོན་མ་ཡིན། །དེ་ལྟར་ཉོན་མོངས་པ་ཡི་ནད། །གཟིར་
ཅིང་སྡུག་བསྔལ་གྱུར་པའི་ཚེ། །སློབ་དཔོན་ཚོལ་བར་མི་བྱེད་ན། །སློབ་དཔོན་གྱི་ནི་སྐྱོན་མ་ཡིན། །གཞན་ཡང་བསམས་པ། ཇི་ལྟར་རྒྱན་གྱིས་བརྒྱན་པའི་སྐྱེས་བུའི་མགྲིན་པ་ལ་མི་གཙང་བ་
བཅིངས་ན་དེ་དེ་ནས་བདེ་བར་འགྲོ་བ་བཞིན་དུ། དེ་ལྟར་བདག་ཀྱང་མི་གཙང་བའི་ལུས་སྤངས་ཏེ་ལྟོས་པ་མེད་པར་མྱ་ངན་ལས་འདས་པའི་གྲོང་ཁྱེར་དུ་འཇུག་པར་རིགས་སོ། །གཞན་ཡང་ཇི་ལྟར་སྐྱེས་པ་དང་
བུད་མེད་ཀྱིས་བཤང་བའི་གནས་སུ་བཤང་བ་དོར་བར་བྱས་ནས་སྣོད་དུ་བླུགས་ཏེ་ཁུར་ནས་འགྲོ་བར་བྱེད་པ་མ་ཡིན་གྱི། ལྟོས་པ་མེད་པར་སྐྱུག་བྲོ་བས་དོར་ནས་འགྲོའོ། །དེ་ལྟར་བདག་ཀྱང་མི་
39-1-178a


གཙང་བའི་ལུས་ལ་སོགས་པ་ལ་ལྟོས་པ་མེད་པར་དོར་ནས་འཆི་བ་མེད་པའི་མྱ་ངན་ལས་འདས་པའི་གྲོང་ཁྱེར་དུ་འཇུག་པར་རིགས་སོ། །གཞན་ཡང་ཇི་ལྟར་གྲུ་མཁན་རྣམས་ནི་
གྲུ་རྡོལ་བ་རྣམས་ལ་ལྟོས་པ་མེད་པར་དོར་ནས་འགྲོ་བ་དེ་བཞིན་དུ་བདག་ཀྱང་སྒོ་དགུའི་རྨ་འདི་རྣམས་ཀྱི་ནང་ནས་འབབ་པའི་ལུས་འདི་དོར་ནས་ལྟོས་པ་མེད་པར་མྱ་ངན་ལས་འདས་པའི་གྲོང་ཁྱེར་དུ་འཇུག་པར་རིགས་སོ། །
གཞན་ཡང་ཇི་ལྟར་སྐྱེས་བུ་སྣ་ཚོགས་པའི་རིན་པོ་ཆེ་བླངས་ནས་ཆོམ་རྐུན་པ་དང་འགྲོགས་ཏེ། ལམ་དུ་འགྲོ་ན་རང་གི་རིན་པོ་ཆེ་བརླག་པར་དོགས་པའི་འཇིགས་པས་དེ་རྣམས་དོར་ནས་ལམ་བཟང་
པོར་འཇུག་པ་བཞིན་ནོ། །དེ་ལྟར་བདག་ཀྱང་ལུས་མི་གཙང་བ་དུ་མ་ཅན་རིན་པོ་ཆེ་འཕྲོག་པའི་ཆོམ་རྐུན་བཞིན་དུ་གལ་ཏེ་སྲེད་པ་འདི་བྱེད་ན་འཕགས་པའི་ལམ་གྱི་དགེ་བའི་ཆོས་ཀྱི་
རིན་པོ་ཆེ་བདག་གིས་བརླག་པར་དོགས་སོ། །དེའི་ཕྱིར་བདག་གིས་ཆོམ་རྐུན་ལྟ་བུའི་ལུས་འདི་དོར་ནས་མྱ་ངན་ལས་འདས་པའི་གྲོང་ཁྱེར་དུ་འཇུག་པར་རིགས་སོ། །དེའི་ཕྱིར་
གསུངས་པ། ཇི་ལྟར་མི་ཡིས་དྲི་ང་བ། །མགུལ་ལ་བཅིངས་ན་སྐྱུག་བྲོ་སྟེ། །དེ་དག་སྤངས་ནས་འགྲོ་བྱེད་ན། །སྐྱུག་མི་བྲོ་ཞིང་བདེ་བར་འགྲོ། །དེ་བཞིན་
དུ་ནི་དྲི་ང་ལུས། །སྣ་ཚོགས་པ་ཡིས་གང་གྱུར་པ། །སྤངས་ནས་འགྲོ་བར་བྱེད་པ་ནི། །དོན་མེད་ལྟོས་པ་མེད་པའོ། །ཇི་ལྟར་བཤང་བའི་གནས་སུ་ནི། །
སྐྱེས་པ་བུད་མེད་ཀྱིས་བཤངས་ནས། །དོར་ནས་འགྲོ་བར་བྱེད་པ་ནི། །དོན་མེད་ལྟོས་པ་མེད་པ་ཡིན། །དེ་ལྟར་བདག་གི་ལུས་འདི་ཡང་། །མི་གཙང་སྣ་ཚོགས་ཀྱིས་
39-1-178b


གང་བ། །དོར་ནས་བདག་ཀྱང་འགྲོ་བར་བྱ། །ཇི་ལྟར་བཤང་བའི་གནས་བཞིན་ནོ། །ཇི་ལྟར་གྲུ་ནི་རྡོལ་གྱུར་ན། །ཆུ་ནི་ནང་དུ་འབྱུང་བར་འགྱུར། །དེ་ནི་གྲུ་མཁན་
གྱིས་དོར་ནས། །དོན་མེད་ལྟོས་པ་མེད་པ་ཡིན། །དེ་ལྟར་བདག་གི་ལུས་འདི་ཡང་། །བུ་ག་དགུ་ཡང་མི་རྟག་པས། །དོར་ནས་འགྲོ་བར་བྱེད་པ་ན། །གྲུ་མཁན་གྲུ་ནི་
དོར་བ་བཞིན། །ཇི་ལྟར་ཆོམ་རྐུན་ལྷན་ཅིག་མི། །ནོར་ནི་ཁྱེར་ནས་འགྲོ་བ་ན། །ནོར་ཁྱེར་འཇིགས་པ་མཐོང་བ་ན། །འཇིགས་གནས་དོར་ནས་འགྲོ་བྱེད་བཞིན། །
དེ་བཞིན་དུ་ནི་ལུས་འདི་ནི། །ཆོམ་རྐུན་ཆེན་པོ་དང་མཚུངས་ཞིང་། །འདིར་ནི་དོར་ནས་འགྲོ་བ་ན། །དགེ་བ་སྤྱོད་པ་འཇིགས་མེད་དོ། །དེ་བཞིན་དུ་མཁས་
པ་བློ་གྲོས་བཟང་པོས་སྣ་ཚོགས་པའི་དཔེ་འདི་ཡིས་ཕན་ཡོན་གྱི་དོན་ལ་རྣམ་པར་བསམས་ཤིང་རང་གི་ཁྱིམ་དུ་དཔག་ཏུ་མེད་པའི་ལོངས་སྤྱོད་ཀྱི་ཕུང་པོ་སྔར་ཇི་ལྟར་བརྗོད་པ་བཞིན་དུ་བཀྲེན་པ་ལ་སོགས་
པ་རྣམས་ལ་སྦྱིན་པ་ཆེན་པོ་བྱིན་ཏེ། ནོར་གྱི་འདོད་པ་དང་ཉོན་མོངས་པའི་འདོད་པ་སྤངས་ནས། གྲོང་ཁྱེར་འཇིགས་མེད་ལྡན་གྱི་ཕྱི་རོལ་དུ་སོང་སྟེ། གཅིག་པུར་གངས་ཅན་ཆོས་
ཀྱི་རི་ཞེས་བྱ་བ་ལ་བརྟེན་ནས། དེར་ལོ་མའི་ཁང་པར་འཆག་པར་བྱེད་ཅིང་སྐྱོན་ལྔ་པོ་མ་བཟློག་ལ་མ་སྤངས་བཞིན་དུ་དེ་ལྟར་སེམས་མཉམ་པར་བཞག་པ་དང་པོ་དང་བྱེད་པ་བརྒྱད་དང་ལྡན་པའི་
མངོན་པར་ཤེས་པས་སྨྲས་པ་དང་སྟོབས་ལེན་པ་དང་དེ་རུ་གནས་ཏེ་སྐྱོན་དགུ་དང་ལྡན་པ་གྱོན་པའི་གོས་སྤངས་ནས། ཡོན་ཏན་བཅུ་གཉིས་དང་ལྡན་པའི་ཤིང་ཤུན་གྱི་དུམ་བུའི་གོས་
39-1-179a


གྱོན་ནས། དྲང་སྲོང་གི་རབ་ཏུ་བྱུང་བ་ལ་རབ་ཏུ་བྱུང་སྟེ་དེ་ལྟར་རབ་ཏུ་བྱུང་ནས་སྐྱོན་བརྒྱད་དང་ལྡན་པའི་ལོ་མའི་ཁང་པ་དེ་སྤངས་ནས་ཡོན་ཏན་བཅུ་དང་ལྡན་པའི་ཤིང་
གི་དྲུང་དུ་ཉེ་བར་གནས་སོ། །འབྱོར་པ་ཐམས་ཅད་སྤངས་ནས་ཤིང་གི་འབྲས་བུ་མཆོག་ཟ་ཞིང་འདུག་པའོ། །གནས་སུ་འཆག་པར་བྱེད་པའི་དཀའ་ཐུབ་བྱེད་དོ། །ཞག་བདུན་གྱི་
ནང་དེ་ཉིད་དུ་བརྒྱད་ལ་སྙོམས་པར་འཇུག་ཅིང་མངོན་པར་ཤེས་པ་ལྔ་པོ་ཐོབ་པར་གྱུར་ཏོ། །དེ་བཞིན་དུ་དེས་དོན་དུ་གཉེར་བས་མངོན་པར་ཤེས་པའི་སྟོབས་ཐོབ་པར་གྱུར་ཏོ། །དེའི་ཕྱིར་གསུངས་
པ། དེ་ལྟར་བདག་གིས་བསམས་གྱུར་པ། །སྣ་ཚོགས་བྱེ་བ་བརྒྱ་ཡི་ནོར། །མགོན་དང་མགོན་མེད་རྣམས་ལ་སྦྱིན། །གངས་ཅན་ལ་ནི་ཉེ་བར་སོང་། །གངས་ཅན་དང་
ནི་མི་རིང་བར། །ཆོས་ཀྱི་རི་ཞེས་བྱ་བ་ལ། །བདག་གིས་དེ་ལ་མཆོག་ཏུ་བརྟེན། །ལོ་མའི་ཁང་པ་ལེགས་བྱས་སོ། །དེ་རུ་འཆག་པར་བྱེད་པ་དང་། །སྐྱོན་ནི་ལྔ་པོ་རྣམ་པར་
སྤངས། །ཡོན་ཏན་བརྒྱད་དང་ཡང་དག་ལྡན། །མངོན་པར་ཤེས་པའི་སྟོབས་ལྡན་ནོ། །སྐྱོན་དགུ་དང་ནི་ལྡན་པ་ཡི། །དེར་ནི་དེ་ཉིད་དོར་གྱུར་ནས། །ཤིང་ཤུན་དུམ་བུའི་གོས་
གྱོན་ཏེ། །ཡོན་ཏན་བཅུ་གཉིས་ལྡན་པའོ། །སྐྱོན་ནི་བརྒྱད་དང་ལྡན་པ་ཡི། །ལོ་མའི་ཁང་པ་སྤངས་གྱུར་ནས། །ཤིང་གི་དྲུང་དུ་ཉེ་བར་འདུག །ཡོན་ཏན་བཅུ་དང་ལྡན་
པ་ཡི། །རྨོངས་དང་བསྐྲུན་པའི་འབྲུ་རྣམས་ནི། །ལྷག་མ་མེད་པར་དོར་བྱས་ནས། །ཡོན་ཏན་མ་ལུས་ལྡན་པ་ཡི། །ཤིང་ཏོག་མཆོག་ནི་དང་པོར་ཟོས། །དེ་རུ་དཀའ་
39-1-179b


ཐུབ་བྱས་ནས་ནི། །འདུག་དང་འཆག་པའི་གནས་རྣམས་སུ། །ཞག་བདུན་གྱི་ནི་ནང་ཉིད་དུ། །མངོན་པར་ཤེས་པའི་སྟོབས་ཐོབ་བོ། །འདིར་ཡང་གླེང་གཞི་ནི་མཁས་
པ་བློ་གྲོས་བཟང་པོས་བརྟེན་པའི་ལོ་མའི་ཁང་པ་དང་འཆག་པ་ནི་རང་གི་ལག་གིས་བྱས་པ་ལྟར་བརྗོད་དོ། །འདིར་ཡང་དོན་ནི་སེམས་པ་ཆེན་པོ་གངས་ཅན་གྱི་ནང་ནས་འོངས་པ་དང་དི་
རིང་ཆོས་ཀྱི་རིར་ཡོང་བ་མཐོང་ནས་ལྷའི་དབང་པོ་བརྒྱ་བྱིན་གྱིས་ལས་སྣ་ཚོགས་པའི་ལྷའི་བུ་ལ་མཁས་པ་བློ་གྲོས་བཟང་པོ་འདི་ནི་རབ་ཏུ་འབྱུང་བར་འདོད་པས་སོང་སྟེ། འདིའི་གནས་རྣམས་
ཀྱིས་ཅིག་དེའི་ཚིག་ཐོས་ནས་དགའ་བའི་གནས་ཕུག་ལེགས་པའི་ལོ་མའི་ཁང་པར་འཆག་པའི་གནས་བྱས་སོ། །བཅོམ་ལྡན་འདས་ཀྱིས་ཡང་དེའི་ཚེ་བདག་གིས་བསམས་ནས་གོམས་
པར་བྱས་པ་རྫོགས་པ་ལས་དེའི་དུས་སུ་དེའི་རྒྱུ་མཚན་གྱིས་ཤཱ་རིའི་བུ་དེ་ཆོས་ཀྱི་རི་དེར། གནས་བཟང་པོ་ནི་བདག་གིས་བྱས། །ལོ་མའི་ཁང་པ་བཟང་པོར་ལྡན། །དེར་ནི་འཆག་
ཅིང་གནས་ནས་ནི། །སྐྱོན་ལྔ་པོ་ནི་རྣམ་པར་སྤངས་ཞེས་གསུངས་སོ། །འཆག་པའི་སྐྱོན་ལྔ་པོ་གང་ཞེ་ན། སྲ་ཞིང་མི་སྙོམས་པ་དང་། ནང་ན་ཤིང་རད་རོད་ཅན་དང་། ནགས་
ཐིབས་པོ་དང་ཤིན་དུ་དོག་པ་དང་། ཤིན་དུ་ཡངས་པའོ། །སྲ་ཞིང་མི་སྙོམས་པའི་སའི་ཆར་འཆག་ཅིང་འཆག་པ་ན། རྐང་པ་ལ་འབྲུམ་བུ་འབྱུང་བ་དང་། སེམས་རྩེ་
གཅིག་ཏུ་མི་གནས་པ་དང་། ལས་བྱེད་པའི་གནས་མི་འགྲུབ་ལ། སའི་སྟེང་མཉམ་ཞིང་འཇམ་པར་འཆག་པ་ནི་བདེ་ཞིང་ལས་བྱེད་པའི་གནས་རྫོགས་པ་དེའི་ཕྱིར་ཚ་བ་དང་མི་སྙོམས་
39-1-180a


པའི་སའི་ཆ་ནི་སྐྱོན་གཅིག་ཏུ་རིག་པར་བྱའོ། །འཆག་པའི་བར་དང་ནང་དང་ཐ་མར་ཤིང་ཡོད་པ་ན་བག་མེད་པར་འོང་ཞིང་འཆག་པ་ན་དཔྲལ་བ་དང་མགོ་ལ་གནོད་པ་བྱེད་པ་ནི་
ནང་གི་ཤིང་གི་གནོད་པ་གཉིས་པའོ། །རྩ་དང་འཁྲི་ཤིང་ལ་སོགས་པ་ནགས་ཚལ་ཐིབས་པོའི་འཆག་སར་བྱེད་པ་ན་མུན་པ་ནག་པོའི་དུས་སུ་སྦྲུལ་ལ་སོགས་པའི་སྲོག་ཆགས་རྐང་པས་བརྫིས་
ནས་འཆི་བ་འམ། དེས་མཆེ་བས་རྨུགས་ནས་གནོད་པ་སྐྱེལ་བ་ནི་ནགས་ཐིབས་པོའི་སྐྱོན་གསུམ་པའོ། །ཤིན་དུ་དོག་སའི་འཆག་སའི་མཆུ་རུ་ཁྲུ་གཅིག་པ་འམ་ཁྲུ་ཕྱེད་
པའི་འཆག་ས་བྱེད་ན་ནང་དུ་གཅོད་པ་དང་སེན་མོ་འམ་སོར་མོ་འཆད་པར་འགྱུར་བ་ནི་ཤིན་དུ་དོག་པའི་སྐྱོན་བཞི་པའོ། །ཤིན་དུ་ཡངས་པའི་འཆག་སར་འཆག་པ་ན་སེམས་གཡེངས་
པར་གྱུར་པ་དང་། སེམས་རྩེ་གཅིག་ཏུ་གནས་པ་མི་ཐོབ་པ་ནི་ཤིན་དུ་ཡངས་པའི་སྐྱོན་ལྔ་པའོ། །འཆག་སའི་མཐོ་ཚད་ཀྱི་སྟུགས་སུ་ཁྲུ་ཕྱེད་དང་དོ་ངོས་གཉིས་སུ་ཁྲུ་གཅིག་
ཙམ་དཀྱུས་སུ་ཁྲུ་དྲུག་བཅུ་པ་སའི་མཐིལ་འཇམ་པ་དང་མཚུངས་ཞིང་ཡངས་པ་བྱེ་མ་དང་བཅས་པའི་འཆག་ས་ནི་རིགས་སོ། །མཆོད་རྟེན་གྱི་རིགས་མར་མེ་ལྟར་གསལ་བ་གནས་བརྟན་
ཆེན་པོ་དབང་ཆེན་གྱི་འཆག་ས་ལྟ་བུ་བྱ་བར་རིགས་སོ། །དེའི་ཕྱིར་གསུངས་པ། དེ་རུ་འཆག་ས་བྱས་ལ་སྐྱོན་ལྔ་པོ་སྤང་བར་བྱའོ། །ཡོན་ཏན་བརྒྱད་དང་ལྡན་པའི་
དགེ་སྦྱོང་གི་བདེ་བ་བརྒྱད་དང་ལྡན་པའོ། །དགེ་སྦྱོང་གི་བདེ་བ་བརྒྱད་དང་ལྡན་པ་ཞེས་བྱ་བ་ནི་གང་ཞེ་ན། ནོར་དང་འབྲུ་ཡོངས་སུ་འཛིན་པའི་འདོད་པ་མེད་པ་དང་། ཁ་ན་མ་ཐོ་བ་
39-1-180b


མེད་པའི་བསོད་སྙོམས་ལས་འདོད་པ་མེད་པ་དང་། བཟའ་བ་བཙལ་བའི་འདོད་པ་མེད་པ་དང་། ནོར་གཅེས་པའི་ཡུལ་མི་སྡུག་པར་བྱེད་པ་འམ་མགོ་རེ་རེའི་ཁྲལ་ལ་སོགས་པ་ལེན་ན་
རྒྱལ་པོའི་རིགས་ཀྱིས་ཡུལ་འཁོར་གྱི་མི་སྡུག་བསྔལ་བ་མི་འདོད་པ་དང་། ཉེ་བར་མཁོ་བ་ཐམས་ཅད་ལ་འདོད་པ་མེད་པ་དང་། ཆོམ་རྐུན་གྱིས་འཕྲོག་པའི་འཇིགས་པ་མེད་པ་དང་། 
རྒྱལ་པོ་དང་རྒྱལ་ཚབ་དང་བློན་པོའི་ཉེ་བར་འཚེ་བ་མེད་པ་དང་། ཕྱོགས་བཞིར་འགྲོ་བ་ན་འཚེ་བ་མེད་པ་སྟེ། དེ་ལྟར་དེར་གནས་ན་བདེ་བ་བརྒྱད་པོ་ཉམས་སུ་མྱོང་བར་ནུས་སོ། །དེ་ལྟར་
ཡོན་ཏན་བརྒྱད་དང་ལྡན་པ་འདིར་གནས་པར་བྱས་ནས་མངོན་པར་ཤེས་པའི་སྟོབས་ཐོབ་པར་འགྱུར་ཞིང་། དེ་ནས་དེར་གནས་ཏེ། ཟད་པར་གྱི་ལས་རྣམས་བྱས་ནས་མངོན་པར་ཤེས་
པ་དང་སྙོམས་པར་འཇུག་པ་རྣམས་བསྐྱེད་པའི་ཕྱིར་ཏེ། མི་རྟག་པ་དང་སྡུག་བསྔལ་བ་དང་ལྷག་མཐོང་བརྩམས་ནས་གནས་ཐོབ་པར་བྱེད་དོ། །ལྷག་མཐོང་གི་སྟོབས་བླངས་ནས་ཇི་ལྟར་
གནས་ན་དེའི་སྟོབས་བླང་བར་ནུས་སོ། །དེ་ལྟར་དེར་གནས་ནས་དེའི་མངོན་པར་ཤེས་པའི་ཕྱིར་ལྷག་མཐོང་གི་སྟོབས་འཐུན་པར་བྱས་པ་ནི་ཁང་པ་བྱས་པའི་དོན་ཡིན་ནོ། །དེར་སྐྱོན་དགུ་དང་
ལྡན་པའི་གོས་དོར་བ་ནི་འདིར་སྔར་རིམ་པ་བཞིན་དུ་བརྗོད་པ་དེ་རྣམས་དེའི་ཚེ་ཁང་མིག་ཆུང་བ་དང་ཁང་མིག་ཆེ་བ་དང་འཆག་ས་ལ་སོགས་པ་སོ་སོར་བརྒྱན་ནས་མེ་ཏོག་དང་འབྲས་བུ་དང་ཤིང་
ལྗོན་པའི་ཚོགས་ཡིད་དགའ་བ་དང་བསམ་པ་ཆུ་ལྟར་ཡིད་དུ་འོང་བ་གདུག་པ་ཅན་གྱི་རི་དགས་མེད་པ་དང་གནོད་པར་བྱེད་པའི་བྱའི་ཚོགས་མེད་པ་ཤིན་དུ་དབེན་པར་གནས་པར་བྱའོ། །
39-1-181a


འཆག་ས་བརྒྱན་པའི་ཕྱོགས་གཉིས་དང་དབུས་སུ་རྒྱབ་ཀྱི་རྟེན་གྱི་གཞི་ལ་བརྟེན་ནས་བཞུགས་པའི་ཆེད་དུ་འཆག་སའི་ནང་དུ་ས་གཞི་མཉམ་པ་ཁ་དོག་སེར་པོ་རྡོ་དང་བསྲེས་པ་ལོ་མའི་ཁང་པའི་
ནང་དུ་རལ་པའི་ཁོར་ཡུག་དང་ཤིང་ཤུན་གྱི་དུམ་བུའི་ཆོས་གོས་དང་དབྱུ་གུ་གསུམ་དང་བུམ་པ་ལ་སོགས་པ་དཀའ་ཐུབ་པའི་ཡོ་བྱད་དང་ལྡན་པ་བསྟི་གནས་ཀྱི་ནང་དུ་ཆུ་དང་བུམ་པ་ཆེན་པོར་ཆུ་དང་དུང་ཆོས་ཀྱི་
ཆུ་དང་ཁམ་ཕོར་དང་མེ་ཁང་དང་སྣོད་སོལ་བ་ཅན་དང་ཤིང་ལ་སོགས་པ་དེ་ལྟར་གང་དང་གང་དུ་རབ་ཏུ་འབྱུང་བ་ལ་རིགས་སོ། །དེ་ཐམས་ཅད་བྱས་ནས་ལོ་མའི་ཁང་པའི་ལོགས་ལ་གང་ཞིག་རབ་
ཏུ་འབྱུང་བར་འདོད་པ་ན་འདིའི་ཡོ་བྱད་རྣམས་བླངས་ནས་རབ་ཏུ་བྱུང་བར་གྱིས་ཤིག་ཅེས་ཡི་གེར་བྲིས་ནས། ལས་སྣ་ཚོགས་པའི་ལྷའི་བུ་ལྷའི་འཇིག་རྟེན་དུ་སོང་ངོ་། །མཁས་པ་
བློ་གྲོས་བཟང་པོས་གངས་ཅན་གྱི་རིའི་འགྲམ་ན་ཆུ་ཀླུང་རྗེས་སུ་འབྲང་བ་དང་བདག་ཉིད་ཀྱི་གནས་དང་འཐུན་པའི་གནས་སུ་བལྟ་ཞིང་ཆུ་ཀླུང་བཟློག་པའི་ལས་སྣ་ཚོགས་ལས་སྤྲུལ་ཞིང་
བརྒྱ་བྱིན་གྱིས་བྱིན་པའི་གནས་ཡིད་ལ་དགའ་བ་མཐོང་ངོ་། །འཆག་སའི་དཀྱུས་ཀྱི་ཕྱོགས་གཅིག་ཏུ་འགྲོ་ཞིང་རྐང་པའི་རྗེས་མི་མཐོང་བར་རབ་ཏུ་བྱུང་བ་རྣམས་ཀྱིས་ཐག་རིང་
པོའི་གྲོང་ནས་བསོད་སྙོམས་བཙལ་བས་ངལ་ཞིང་འོངས་ནས་ལོ་མའི་ཁང་པར་ཞུགས་ནས་གནས་སོ་སྙམ་དུ་བསམས་སོ། །དེ་མ་ཐག་ཏུ་མ་སླེབ་པར་དུས་རིང་པོར་མ་སླེབ་པར་སོ་སོར་
ཤེས་དགོས་སོ། །ཤིང་གི་ཁང་པའི་ཁང་མིག་གི་སྒོར་ཞུགས་ཏེ་ནང་དུ་ཕྱིན་ནོ། །དེ་དང་དེ་བལྟས་པས་རྩིག་པ་ཆེན་པོ་ལ་ཡི་གེ་བྲིས་པ་བླགས་ནས་འདི་རྣམས་ཐམས་ཅད་
39-1-181b


བདག་གི་ཡོ་བྱད་དུ་བརྟག་པར་བྱའོ། །དེ་རྣམས་བླངས་ན་རབ་ཏུ་འབྱུང་ངོ་ཞེས་བསམས་སོ། །བདག་ཉིད་ཀྱི་སྟོད་གོས་དང་སྨད་གོས་ཟུང་དག་དོར་རོ། །དེའི་ཕྱིར་གསུངས་པ། 
དེར་གོས་དོར་རོ། །དེ་ལྟར་བཞུགས་ནས་ཤཱ་རིའི་བུ་བདག་དེའི་ལོ་མའི་ཁང་པ་དང་སྐྱོན་དགུ་དང་བཅས་པའི་གོས་དོར་རོ། །དེ་ཡང་སྐྱོན་དགུ་གསལ་བར་མཐོང་སྟེ། དཀའ་
ཐུབ་པའི་རབ་ཏུ་བྱུང་བ་རྣམས་ལ་གོས་སྐྱོན་དགུ་དང་ལྡན་པ་ནི་རྙེད་དཀའ་བའི་སྐྱོན་དང་། གཞན་འདོད་པ་སྐྱེ་བའི་སྐྱོན་དང་། ལོངས་སྤྱོད་པ་ན་མྱུར་དུ་དྲི་མ་དང་ལྡན་པའི་སྐྱོན་དང་། དྲི་
མ་ཅན་དུ་གྱུར་ན་འཁྲུད་པ་དང་ཚོས་བྱ་དགོས་པ་དང་། ལོངས་སྤྱོད་པ་ན་འདྲལ་བའི་སྐྱོན་དང་། རྙིངས་ན་འཚེམ་པ་དང་ལྷན་པ་འདེབས་དགོས་པ་དང་སླར་ཡང་ཚོལ་བ་ན་རྙེད་དཀའ་བའི་སྐྱོན་དང་། 
དཀའ་ཐུབ་པའི་རབ་ཏུ་བྱུང་བ་ལ་མི་རིགས་པའི་སྐྱོན་དང་། དགྲ་ལ་སོགས་པས་འཕྲོག་པར་འགྱུར་བའི་སྐྱོན་དང་། ཇི་ལྟར་ཡང་གོས་ནི་དགྲ་ལ་སོགས་པས་མི་ལེན་པ་དེའི་ཕྱིར་དེ་བཞིན་དུ་སྦེད་
དགོས་པ་དང་། གྱོན་པ་ན་རྒྱན་དུ་འགྱུར་བའི་སྐྱོན་དང་། ཁྱེར་ནས་འགྲོ་བ་ན་ལུས་ཀྱི་ཁུར་པོ་ཆེན་པོར་འགྲོ་བའི་སྐྱོན་ནོ། །ཤིང་ཤུན་གྱི་གོས་ཤེས་པ་ནི་དེའི་ཚེ་ཤཱ་རིའི་བུ་བདག་འདིའི་
སྐྱོན་དགུ་མཐོང་ནས་གོས་དོར་རོ། །ཤིང་ཤུན་ལ་རྩྭ་མུན་ཛ་དུམ་བུ་དུམ་བུར་བྱས་ནས་སྦྱོར་ཞིང་སྒྲོག་པ་ནི་ཤིང་ཤུན་ལ་སྨད་གོས་དང་སྟོད་གོས་དོན་དུ་གཉེར་བའི་ཕྱིར་རོ། །ཡོན་
ཏན་བཅུ་གཉིས་དང་ལྡན་པ་ཞེས་པ་ནི་ཕན་ཡོན་བཅུ་གཉིས་དང་ལྡན་པའི་ཤིང་ཤུན་གྱི་གོས་ཀྱི་ཕན་ཡོན་བཅུ་གཉིས་དང་ལྡན་པའི་རིན་ཆུང་བ་དང་། བལྟ་ན་མཛེས་པ་དང་། རུང་བ་དང་འདི་རྣམས་ནི་
39-1-182a


ཕན་ཡོན་གཅིག་དང་། རང་གི་ལག་གིས་བྱ་བར་ནུས་པ་ནི་གཉིས་པ་དང་། ལོངས་སྤྱོད་པ་ནི་དྲི་མ་ཅན་དུ་གྱུར་ཀྱང་མྱུར་དུ་བཀྲུ་བར་ནུས་པ་ནི་གསུམ་པ་དང་། ལོངས་སྤྱོད་པ་ན་རྙིངས་པར་གྱུར་ཀྱང་བཙེམ་པར་ནུས་པ་ནི་
བཞི་པ་དང་། སླར་ཡང་ཚོལ་བ་ན་བདེ་བར་བྱེད་ནུས་པ་ནི་ལྔ་པ་དང་། དཀའ་ཐུབ་པའི་རབ་ཏུ་བྱུང་བ་ལ་རིགས་པ་ནི་དྲུག་པ་དང་། ཆོམ་རྐུན་པ་ལ་མི་མཁོ་བ་ནི་བདུན་པ་དང་། གྱོན་པ་ན་དཀའ་ཐུབ་པའི་རྒྱན་དུ་འགྱུར་བ་ནི་བརྒྱད་པ་དང་། 
གྱོན་པ་ན་ཡང་བར་འགྱུར་བ་ནི་དགུ་པ་དང་། ཆོས་གོས་སོ་སོ་ལ་འདོད་པ་ཆུང་བ་ནི་བཅུ་པ་དང་། སློང་བ་ན་ཆོས་པ་ལ་ཁ་ན་མ་ཐོ་བ་མེད་པ་ནི་བཅུ་གཅིག་པ་དང་། ཤིང་ཤུན་གྱི་གོས་སྟོར་ན་ཡང་ལྟོས་པ་མེད་པ་ནི་བཅུ་གཉིས་
པའོ། །སྐྱོན་བརྒྱད་དང་ལྡན་པའི་ལོ་མའི་ཁང་པ་དོར་ཞེས་པ་ནི་ཇི་ལྟར་དོར། དེའི་གོས་མཆོག་གཉིས་ཀྱི་རིགས་སུ་གྱུར་པ་ཨ་ཎའོ་ཛའི་མེ་ཏོག་གི་ཕྲེང་བ་ལྟ་བུའི་གོས་དམར་པོ་བླངས་ནས་སྨད་དུ་གྱོན་ཏེ་སྟེང་དུ་
གཞན་ཡང་ཁ་དོག་སེར་པོའི་ཤིང་ཤུན་གྱི་གོས་གྱོན་ནས། པུན་ནཱ་གའི་མེ་ཏོག་གི་སྟན་དང་འདྲ་བའི་རྐང་པ་དང་བཅས་པའི་གཟིག་གི་ལྤགས་པའི་གཡང་གཞི་གྱོན་ཏེ་རལ་པའི་ཁོར་ཡུག་མགོ་བོ་ལ་བཅིངས་
ནས་གཙུག་ཕུད་བསྟན་པར་བྱ་བའི་ཕྱིར་དུ་འཁྲེགས་པའི་སྤྱི་ཁབ་བཙུགས་སོ། །མུ་ཏིག་གི་དྲ་བ་བཞིན་དུ་འཐེན་ཐག་བྱི་རུའི་ཁ་དོག་ལྟ་བུའི་བུམ་པ་ནང་དུ་བཅུག་སྟེ་གནས་གསུམ་གྱི་ཀྱོག་པོའི་ཤིང་དེ་བླངས་ནས་
ཁུར་ཤིང་དེའི་ཕྱོགས་གཅིག་ལ་བུམ་པ་དང་ཕྱོགས་གཉིས་ལ་ལྕགས་ཀྱུ་དང་སྨྱུག་འཁུར་དང་དབྱུག་གུ་གསུམ་པ་ལ་སོགས་པ་བཟུང་ཞིང་ཁྱེར་ནས་ཕྲག་པའི་ཁུར་དུ་ཁྱེར་ཏེ་ལག་པ་གཡས་སུ་མཁར་བ་བཟུང་ནས་ལོ་མའི་
ཁང་པ་ནས་བྱུང་སྟེ་ཁྲུ་དྲུག་བཅུ་པའི་འཆག་ས་ཆེན་པོར་ཕན་ཚུན་དུ་འཆག་པར་བྱེད་ཅིང་རང་གི་ཆ་ལུགས་ལ་བལྟས་ནས། བདག་གི་འདོད་པ་ཡོངས་སུ་རྫོགས་པར་ཐོབ་བོ། །བདག་ཉིད་མཛེས་པར་རབ་ཏུ་བྱུང་
39-1-182b


ནས་སངས་རྒྱས་དང་རང་སངས་རྒྱས་ལ་སོགས་པའི་སྐྱེས་བུ་དཔའ་བོས་བསྔགས་པ་དང་བསྟོད་ཅིང་། རབ་ཏུ་བྱུང་བ་ཞེས་བྱ་བ་འདི་ནི་ཁྱིམ་གྱི་འཆིང་བ་སྤངས་ནས་བདག་གིས་ངེས་པར་བྱུང་ཞིང་རབ་ཏུ་བྱུང་བ་མཆོག་བདག་གིས་ཐོས་པས་
དགེ་སྦྱོང་གི་ཆོས་བདག་གིས་བྱས་སོ། །བདེ་བའི་འབྲས་བུ་བདག་གིས་ཐོབ་ནས་སྤྲོ་བ་སྐྱེས་སོ། །ཁུར་དལ་བུས་ས་ལ་བཞག་ནས་འཆག་སའི་དབུས་སུ་ཁ་དོག་སེར་པོའི་རྡོའི་སྟེང་དུ་གསེར་གྱི་གཟུགས་བརྙན་ལྟ་བུ་བཞུགས་
ཏེ་ཉིན་མོའི་ཆ་སོང་ནས་སྲོད་ཀྱི་དུས་སུ་ལོ་མའི་ཁང་པའི་ནང་དུ་བཞུགས་ནས། ཁྲི་ཤིང་ལེགས་པོའི་གཞོག་གི་སྟེང་དུ་ཉལ་ལོ། །ལུས་ལ་སེར་བུས་གོས་པར་བྱེད་ཅིང་ནམ་གྱི་ཆ་སྨད་ལ་ལངས་ཏེ་བདག་ཡོངས་པའི་དོན་ལ་རྟོག་ཅིང་
བདག་གིས་ཁྱིམ་གྱི་གནས་ཀྱི་སྐྱོན་མཐོང་ནས་བདུད་རྩི་ལ་ལོངས་སྤྱོད་པ་དང་གྲགས་པ་མཐའ་ཡས་པ་སྤངས་ནས་དགོན་པར་གནས་ཏེ་ངེས་པར་འབྱུང་བ་བཙལ་བའི་ཕྱིར་རབ་ཏུ་བྱུང་ངོ་། །དེ་ནས་བཟུང་ནས་བག་མེད་པའི་སྤྱོད་པའི་
རྟོགས་པ་དང་རབ་ཏུ་དབེན་པ་སྤངས་ནས་འགྲོ་བ་ལོག་པའི་སྦྲང་མས་ཟ་བས་ད་ནི་བདག་གི་རབ་ཏུ་དབེན་པ་དོར་བར་རིགས་སོ། །བདག་གིས་ཀྱང་ཁྱིམ་པའི་གནས་ཟང་ཟིང་དང་བཅས་པར་མཐོང་སྟེ་ཕྱིན་ནས་ལོ་མའི་ཁང་པ་ཡིད་དུ་འོང་བ་
འདི་ཡང་ཁ་དོག་སེར་པོས་ས་གཞི་ལ་ཞལ་བ་ལེགས་པར་བྱས་ནས། དངུལ་གྱི་ཁ་དོག་ལྟར་དཀར་བའི་རྩིག་པ་རྣམས་དང་ཐོག་ཕུག་རོན་གྱི་རྐང་པའི་ཁ་དོག་ལྟར་དམར་བའི་ལོ་མའི་བླ་གབ་ཅན་ནོ། །སྣ་ཚོགས་པའི་ཁ་དོག་
ཅན་གྱི་ཤིང་ཁྲིའི་སྟན་ལ་ཉལ་བ་དང་འདུག་པ་ན་བདེ་བར་བལྟ་བ་དེ་རྣམས་ནི་ཆེས་ཆེར་ལྷག་པར་ཁྱིམ་པའི་ཕུན་སུམ་ཚོགས་པ་དང་འདྲ་བར་མཐོང་ངོ་། །ལོ་མའི་ཁང་པའི་སྐྱོན་བལྟས་པས་སྐྱོན་བརྒྱད་མཐོང་སྟེ། 
ལོ་མའི་ཁང་པ་ལ་ལོངས་སྤྱོད་པ་ན་སྐྱོན་བརྒྱད་པོ་ནི། ཤིང་མང་པོ་ལ་ནོར་མང་པོ་དགོས་པ་དང་བསྡུས་ནས་ཁང་པ་བྱེད་ཅིང་ཚོལ་བ་ནི་སྐྱོན་གཅིག་པ་དང་། རྩ་དང་ས་འཛད་པ་དང་ཡང་དང་ཡང་ཟད་པས་ན་བཅོས་དགོས་པ་རྒྱུན་མི་
39-1-183a


འཆད་པ་ནི་སྐྱོན་གཉིས་པ་དང་། ཉལ་བའི་གནས་ཞེས་བྱ་བ་ནི་ཆེན་པོ་ལ་རིགས་ཏེ། དུས་མ་ཡིན་པར་སློང་དགོས་པས་སེམས་གཅིག་ཏུ་མི་གནས་པ་དང་འགྲོ་དགོས་པ་ནི་སྐྱོན་གསུམ་པ་དང་། གྲང་བ་དང་དྲོ་བ་དང་འཇམ་པ་དང་ལུས་
བདེ་བར་བྱེད་པ་ནི་སྐྱོན་བཞི་པ་དང་། ཁང་པའི་ནང་དུ་ཞུགས་ནས་སྡིག་པ་བྱེད་པར་ནུས་པ་དང་། ངོ་ཚ་བ་བཟློག་པ་ནི་སྐྱོན་ལྔ་པ་དང་བདག་གི་ཡིན་ནོ་ཞེས་བསྲུང་བ་ནི་སྐྱོན་དྲུག་པ་དང་། ཁྱིམ་པ་ཡོང་ཞེས་པ་གཉིས་པའི་སྐྱོན་བདུན་པ་
དང་། ཤིག་དང་འདྲེ་ཤིག་དང་ཁྱི་ཤིག་ལ་སོགས་པའི་སྲོག་ཆགས་དུ་མ་གནས་པར་འགྱུར་བ་ནི་སྐྱོན་བརྒྱད་པའོ། །འདི་རྣམས་ཀྱི་སྐྱོན་བརྒྱད་པོ་རྣམས་མཐོང་ནས་སེམས་པ་ཆེན་པོས་ལོ་མའི་ཁང་པ་སྤངས་སོ། །དེའི་ཕྱིར་གསུངས་པ། 
སྐྱོན་བརྒྱད་དང་ནི་ལྡན་པ་ཡི། །ལོ་མའི་ཁང་པ་སྤངས་ཞེས་པ། །ཤིང་གི་དྲུང་དུ་གནས་གྱུར་ན། །ཡོན་ཏན་བཅུ་དང་ལྡན་པ་ཡིན། །ཡིབ་པའི་གནས་རྣམས་སྤངས་པ་དང་། །ཡོན་ཏན་བཅུ་དང་ལྡན་པ་ཡི། །ཤིང་གི་དྲུང་དུ་གནས་པའོ་ཞེས་
བརྗོད་པ་ནི་དེ་ལ་ཡོན་ཏན་བཅུ་པོ་འདི་བསྩག་མི་དགོས་པ་ནི་ཡོན་ཏན་གཅིག་དང་། ཉལ་བར་གནས་པ་ཙམ་གྱིས་བསྲུང་མི་དགོས་པར་རྙེད་པ་ནི་གཉིས་པ་དང་། དེར་བྱི་དོར་བྱེད་པ་མེད་པར་ལོངས་སྤྱོད་པ་དང་བདེ་བར་གནས་པ་དང་སློང་བ་མེད་པ་ནི་གསུམ་
པ་དང་། ངོ་ཚ་བ་ན་ཡིབ་པ་མེད་ཅིང་དེར་སྡིག་པ་བྱེད་པ་མེད་ལ་སྦེད་པ་མེད་པ་ནི་བཞི་པ་དང་། བླ་གབ་མེད་པའི་གནས་བཞིན་དུ་ལུས་རྟག་ཏུ་སྡོད་པ་མེད་པ་ནི་ལྔ་པ་དང་། ཡོངས་སུ་འཛིན་པར་མི་འདོད་པ་ནི་དྲུག་པ་དང་། ཁྱིམ་གྱི་འདོད་པ་སྤངས་པ་ནི་བདུན་
པ་དང་། མང་པོ་དགོས་པའི་འཛིན་པ་མེད་པ་དང་ཡོངས་སུ་བསྲུང་བ་མེད་པ་དང་འགྲོ་བ་ན་འདོད་པ་མེད་པ་ནི་བརྒྱད་པ་དང་། སྡོད་པ་ན་དགའ་བ་དང་བཅས་པ་མེད་པ་ནི་དགུ་པ་དང་། ཤིང་དྲུང་གི་གནས་ནི་སོང་ཞིང་སོང་བ་ན་རྙེད་སླ་བ་དང་ལྟོས་པ་
མེད་པ་ནི་བཅུ་པའོ། །ཡོན་ཏན་བཅུ་པོ་འདི་མཐོང་སྟེ་ཤིང་གི་འགྲམ་དུ་གནས་ཞེས་བརྗོད་པ་དང་། འདི་ལྟ་བུ་དེ་རྣམས་ནི་བྱེད་པར་བསམས་པའོ། །སེམས་པ་ཆེན་པོ་སང་གི་ཉི་མ་ལ་བསོད་སྙོམས་ལ་གཤེགས་པས་དེ་མ་ཐག་ཏུ་
39-1-183b


གྲོང་དུ་སླེབ་སྟེ་མི་རྣམས་སྤྲོ་བ་ཆེན་པོ་སྐྱེས་ནས་བསོད་སྙོམས་བྱིན་ནོ། །དེའི་གདུགས་ཚོད་ཐོན་ནས་གནས་སུ་བྱོན་ཏེ་སླེབ་ཅིང་བཞུགས་ནས་བསམས་པ། བདག་གིས་བསོད་སྙོམས་ཐོབ་པའི་ཕྱིར་རབ་ཏུ་བྱུང་བ་ནི་མ་ཡིན་ནོ། །ཟས་ཞིམ་པ་
ཞེས་བྱ་བ་འདིས་ང་རྒྱལ་གྱི་རྒྱགས་པ་དང་། སྐྱེས་བུ་འདོད་པའི་རྒྱགས་པ་འཕེལ་བ་དང་། བཟའ་བའི་གཞི་ལ་བརྟེན་ནས་སྡུག་བསྔལ་མཐའ་མེད་དོ། །བདག་གིས་སླར་ཡང་བཏབ་པ་དང་བསྐྲུན་པ་ལས་སྐྱེས་པའི་འབྲུའི་བཟའ་བ་སྤངས་ནས། 
འབྲས་བུ་མཆོག་གི་བཟའ་བ་ལ་བརྟེན་པར་བྱའོ། །དེས་དེ་ནས་དེ་བླངས་ཏེ། དེ་ལྟར་བྱས་ནས་ལུས་སྡུག་བསྔལ་དུ་འབད་པ་བྱས་པ་དང་ཞག་བདུན་གྱི་ནང་དུ་སྙོམས་པར་འཇུག་པ་བརྒྱད་པོ་རྣམས་དང་མངོན་པར་ཤེས་པ་ལྔ་སྐྱེད་ཏེ་དེའི་ཕྱིར་གསུངས་པ། 
བཏབ་དང་བསྐྲུན་པའི་འབྲུ་རྣམས་ནི། །ལྷག་མ་མེད་པར་སྤངས་པ་དང་། །ཡོན་ཏན་དུ་མ་དང་ལྡན་པའི། །འབྲས་བུ་སྩོགས་ལ་འཇུག་པའོ། །དེར་ནི་དཀའ་ཐུབ་ཀྱིས་གནས་དང་། །སྡོད་དང་འཆག་པའི་གནས་རྣམས་སུ། །ཞག་བདུན་གྱི་ནི་ནང་
ཉིད་དུ། །མངོན་པར་ཤེས་པའི་སྟོབས་ཐོབ་བོ། །དེ་ལྟར་མངོན་པར་ཤེས་པ་ཐོབ་ནས། བློ་གྲོས་བཟང་པོ་དཀའ་ཐུབ་པས་བདེ་བའི་སྙོམས་པར་འཇུག་པ་ལ་གནས་སོ། །དེའི་ཚེ་མར་མེ་མཛད་ཅེས་བྱ་བའི་སྟོན་པ་འཇིག་རྟེན་དུ་བྱོན་པར་གྱུར་
ཏོ། །དེ་མངལ་དུ་ཞུགས་ནས་བལྟམ་པ་དང་བྱང་ཆུབ་པ་དང་། ཆོས་ཀྱི་འཁོར་ལོ་བསྐོར་བ་ན། འཇིག་རྟེན་གྱི་ཁམས་སྟོང་ཕྲག་བཅུ་པོ་ཐམས་ཅད་གཡོས་སོ་རབ་ཏུ་གཡོས་སོ་སྒྲ་སྒྲོགས་སོ། །སྒྲ་ཆེར་སྒྲོགས་སོ། །སྔོན་གྱི་མཚན་མར་གྱུར་
པ་སུམ་བཅུ་རྩ་གཉིས་དང་། བློ་གྲོས་བཟང་པོ་དཀའ་ཐུབ་པས་སྙོམས་པར་འཇུག་པའི་བདེ་བ་ལ་གནས་པས་དེ་རྣམས་ཀྱི་སྒྲ་མ་ཐོས་པ་དང་དེ་རྣམས་ཀྱི་སྔོན་གྱི་མཚན་མ་མ་མཐོང་ངོ་། །དེའི་ཕྱིར་གསུངས་པ། སྟན་གཅིག་ལ་ནི་
བསྟེན་ནས་སུ། །བདག་གིས་དེ་ལྟར་གྲུབ་པ་ཐོབ། །རྒྱལ་བ་མར་མེ་མཛད་ཅེས་པ། །འཇིག་རྟེན་འདྲེན་པ་བྱོན་པར་གྱུར། །མངལ་དུ་ཞུགས་ནས་སྐྱེས་གྱུར་པ། །སངས་རྒྱས་ནས་ནི་ཆོས་བསྟན་པ། །མཚན་མ་བཞི་པོ་མཐོང་མ་གྱུར། །
39-1-184a


བསམ་གཏན་བདེ་བས་མ་ཐོས་སོ། །དེའི་ཚེ་སྟོབས་བཅུ་ལྡན་པའི་མར་མེ་མཛད་ཟག་པ་ཟད་པ་འབུམ་ཕྲག་བཞིའི་འཁོར་དང་བཅས་པ་གོ་རིམས་བཞིན་དུ་སེམས་ཅན་ལ་ཕན་པའི་ཕྱིར་འཆག་ཅིང་དགའ་བ་ཅན་ཞེས་བྱ་བའི་གྲོང་ཁྱེར་དུ་བྱོན་ཏེ། 
བལྟ་ན་སྡུག་ཅེས་བྱ་བའི་གཙུག་ལག་ཁང་ཆེན་པོར་བཞུགས་སོ། །དགའ་བ་ཅན་ཞེས་བྱ་བའི་གྲོང་ཁྱེར་ན་གནས་པའི་མར་མེ་མཛད་དགེ་སྦྱོང་གི་དབང་ཕྱུག་དེ་ཉིད་ཡང་དག་པར་རྫོགས་པའི་བྱང་ཆུབ་ཀྱི་མཆོག་ཐོབ་ནས་མཆོག་གི་ཆོས་ཀྱི་འཁོར་ལོ་བསྐོར་
རོ། །དེ་ལྟར་རིམ་གྱིས་སེམས་ཅན་ལ་ཕན་པའི་དོན་དུ་འཆག་ཅིང་དགའ་བ་ཅན་གྱི་གྲོང་ཁྱེར་དུ་བྱོན་ཏེ་། བལྟ་ན་སྡུག་གི་གཙུག་ལག་ཁང་ཆེན་པོར་བཞུགས་པ་དེ་དེ་ན་གནས་པ་རྣམས་ཀྱིས་ཐོས་ནས་མར་གསར་དང་ཞུན་མར་ལ་སོགས་པ་དང་སྨན་དང་གོས་དང་
མལ་ཆ་ལ་སོགས་པ་དང་དྲིའི་ཕྲེང་བ་ལ་སོགས་པ་ལག་ཏུ་ཐོགས་ཏེ། གང་གིས་སངས་རྒྱས་དང་གང་གིས་ཆོས་དང་གང་གིས་དགེ་འདུན་གང་དེ་རྣམས་ལ་འདུད་ཅིང་དེ་ལ་དགའ་བ་དང་དེ་ལ་ཤིན་དུ་གུས་པ་དང་བཅས་པས་སྟོན་པའི་དྲུང་དུ་སོང་སྟེ། ཕྱག་བྱས་
ནས་དྲི་ལ་སོགས་པའི་མཆོད་པ་བྱས་སྟེ་ཕྱོགས་གཅིག་ཏུ་འཁོད་ཅིང་ཆོས་བསྟན་པ་མཉན་ནས་སང་མགྲོན་དུ་གཉེར་ཏེ་རང་གི་ས་ནས་སོང་ངོ་། །དེ་རྣམས་བྱས་ནས་སང་སྦྱིན་པ་ཆེན་པོ་སྟ་གོན་བྱ་སྟེ་གྲོང་ཁྱེར་བརྒྱན། སྟོབས་བཅུ་པ་བྱོན་པའི་ལམ་
བརྒྱན་ཏེ་ཆུ་ཡིས་ས་གཞི་མི་མཉམ་པའི་གནས་རྣམས་སུ་ས་བླུག་ནས་ས་གཞི་མཉམ་པར་བྱས་སོ། །དངུལ་གྱི་མདོག་ལྟ་བུའི་བྱེ་མས་སྤྲས་སོ། །མེ་ཏོག་གི་ཕྲེང་བ་ཉིད་དང་མེ་ཏོག་སིལ་མ་དགྲམ་པར་བྱས་སོ། །ཁ་དོག་སྣ་ཚོགས་པའི་གོས་
ཀྱི་རྒྱལ་མཚན་དང་བ་དན་ལ་སོགས་པ་བསྒྲེང་བར་བྱས་སོ། །ཆུ་ཤིང་གི་ཤིང་དང་བུམ་པ་གང་བ་རྣམས་བསྒྲིགས་ནས་གཞག་པར་བྱས་སོ། །དེའི་ཚེ་བློ་གྲོས་བཟང་པོ་དཀའ་ཐུབ་པས་རང་གི་གནས་ནས་སྟེང་དུ་འཕགས་ཏེ་མི་དེ་རྣམས་ཀྱིས་
སྟེང་གི་ཆའི་མཁའ་ལ་འགྲོ་བ་དེ་ལ་མི་རྣམས་དགའ་ཞིང་ཚིམ་པས་མཐོང་སྟེ་ནམ་མཁའ་ནས་ས་ལ་ཕྱོགས་གཅིག་ཏུ་འཁོད་པ་ལ་མི་རྣམས་ཀྱིས་དྲིས་སོ། །བསོད་ནམས་དང་ལྡན་པ་རྣམས་ལམ་འདི་རྣམས་སུ་ཞིག་གིས་བརྒྱན་པར་
39-1-184b


བྱས། དེའི་ཕྱིར་གསུངས་པ། ཡུལ་དང་ཕྱོགས་ཀྱི་མཐར་གནས་པའི། །དེ་བཞིན་གཤེགས་པ་མགྲོན་དུ་གཉེར། །དེ་ཉིད་བྱིན་ནས་ལམ་འདི་ནི། །སེམས་ནི་དགའ་བས་ལམ་ཕྱོགས་གཅིག །བདག་ནི་དེ་ཚེ་དེ་ཡི་དུས། །རང་གི་གནས་ནི་བྱེད་པ་
དང་། །ཤིང་ཤུན་གོས་ནི་རླུང་གིས་གཡོ། །དེ་ཚེ་བདག་ནི་མཁའ་ལ་འགྲོ། །དགའ་དང་ཚིམ་དང་བདེ་བ་ཡིས། །སྐྱེ་བོ་ལམ་འཕྱག་བྱེད་པ་མཐོང་། །ནམ་མཁའ་ལས་ནི་བྱོན་ནས་སུ། །དེ་མ་ཐག་པར་མི་ལ་དྲིས། །དགའ་དང་ཚིམ་ལ་བདེ་
བ་ཡི། །མཁས་ཤིང་རིག་པའི་སྐྱེ་བོ་ཆེ། །ལམ་ནི་སྙོམ་པར་བྱེད་པ་ན། །སུ་ཞིག་ཕྱིར་དུ་ལམ་འདི་འཆོས། །མི་རྣམས་ཀྱིས་སྨྲས་པ། བཙུན་པ་དཀའ་ཐུབ་པ་བློ་གྲོས་བཟང་པོ་ཉིད་ཀྱིས་མི་མཁྱེན་ནམ། སྟོབས་བཅུ་དང་ལྡན་པའི་མར་མེ་མཛད་
ཀྱིས་ཡང་དག་པར་རྫོགས་པའི་སངས་རྒྱས་ཐོབ་ནས། ཆོས་ཀྱི་འཁོར་ལོ་བསྐོར་རོ། །སེམས་ཅན་རྣམས་ལ་ཕན་པའི་དོན་དུ་འཆག་ཅིང་། བདག་ཅག་གི་གྲོང་ཁྱེར་དུ་བྱོན་ནས་བལྟ་ན་སྡུག་གི་གཙུག་ལག་ཁང་ཆེན་པོར་བཞུགས་ལ་བདག་ཅག་གིས་
བཅོམ་ལྡན་འདས་དེ་མགྲོན་དུ་གཉེར་ཏོ། །དེའི་ཕྱིར་སངས་རྒྱས་བཅོམ་ལྡན་འདས་དེ་བྱོན་པའི་ལམ་བརྒྱན་པར་བྱའོ། །དཀའ་ཐུབ་པ་བློ་གྲོས་བཟང་པོས་བསམས་པ། སངས་རྒྱས་ཞེས་བྱ་བའི་སྒྲ་ཙམ་ཡང་འཇིག་རྟེན་དུ་རྙེད་པར་དཀའ་
འོ། །དེ་ལྟར་སངས་རྒྱས་བྱོན་པ་ལ་བདག་མི་འདི་རྣམས་དང་བཅས་པས་སྟོབས་བཅུ་པའི་ལམ་བརྒྱན་པར་བྱེད་པར་རིགས་སོ། །དེས་མི་རྣམས་ལ་གསུངས་པ། གལ་ཏེ་ཁྱོད་རྣམས་ཀྱིས་ལམ་འདི་རྣམས་སངས་རྒྱས་ཀྱི་ཆེད་དུ་
བརྒྱན་པར་གྱིས་ཅིག །བདག་ལ་ཡང་གནས་གཅིག་སྦྱིན་པར་གྱིས་ཅིག །བདག་གིས་ཀྱང་ཁྱེད་རྣམས་དང་འགྲོགས་ནས་ལམ་བརྒྱན་པར་བྱའོ། །དེ་རྣམས་ཀྱིས་ལེགས་སོ་ཞེས་བསམས་ནས་དཀའ་ཐུབ་པ་བློ་གྲོས་བཟང་པོ་
རྫུ་འཕྲུལ་དང་ལྡན་པར་ཤེས་ནས་ཆུ་ཡིས་གནོད་པར་བྱས་པའི་གནས་ཕན་ཚུན་དུ་བསམས་ནས་དེ་ལ་གནས་བརྒྱན་པར་གྱིས་ཤིག་ཅེས་བྱིན་ནོ། །བློ་གྲོས་བཟང་པོ་སངས་རྒྱས་ལ་དགའ་ནས་བསམས་སོ། །བདག་གིས་
39-1-185a


གནས་འདིར་རྫུ་འཕྲུལ་གྱིས་བརྒྱན་པར་ནུས་སོ། །ཇི་ལྟར་བརྒྱན་པར་བྱས་ཀྱང་བདག་གི་ཡིད་ཚིམ་པ་མེད་དོ། །བདག་གིས་དེ་རིང་ལུས་དུབ་པར་བྱས་སོ། །ས་རྣམས་བླངས་ནས་གནས་དེར་བླུག་གོ། །དེ་དེའི་ཕྱོགས་དེ་བརྒྱན་པ་མ་གྲུབ་
པར་སྟོབས་བཅུ་ལྡན་པའི་མར་མེ་མཛད་ཐུབ་པ་ཆེན་པོ་དང་མངོན་པར་ཤེས་པ་དྲུག་དང་ལྡན་པ་ཟག་པ་ཟད་པ་འབུམ་ཕྲག་བཞིའི་འཁོར་དང་བཅས་པ་རྣམས་ལ་ལྷ་རྣམས་ཀྱིས་ལྷའི་དྲི་བཟང་དང་མེ་ཏོག་གི་ཕྲེང་བ་ལ་སོགས་པས་མཆོད་པར་བྱེད་
ཅིང་ལྷའི་གླུ་དབྱངས་དང་བཅས་པ་སྒྲོགས་སོ། །མི་རྣམས་ཀྱིས་མིའི་དྲི་བཟང་དང་མེ་ཏོག་གི་ཕྲེང་བ་ལ་སོགས་པས་མཆོད་པར་བྱེད་ཅིང་མཐའ་ཡས་པའི་སངས་རྒྱས་ཀྱི་རོལ་པའི་རི་མ་ནོ་ཤི་ལའི་སྟེང་དུ་སེང་གེ་སྒྲ་སྒྲོགས་པ་བཞིན་དུ། ལྷའི་
ལམ་བརྒྱན་པར་བྱས་ནས་ལམ་དུ་བྱོན། བློ་གྲོས་བཟང་པོ་དཀའ་ཐུབ་པས་མིག་གིས་བལྟས་ནས་ལམ་བརྒྱན་པ་ལ་སྟོབས་བཅུ་བྱོན་ནོ། །སྐྱེས་བུ་ཆེན་པོའི་མཚན་བཟང་པོ་སུམ་བཅུ་རྩ་གཉིས་ཀྱིས་བརྒྱན་པ། དཔེ་བྱད་བཟང་པོ་
བརྒྱད་བཅུས་ཉེ་བར་གསལ་བ། འོད་འདོམ་གང་གིས་ཡོངས་སུ་བསྐོར་བ་དང་ནོར་བུའི་ཁ་དོག་ལྟ་བུ་ནམ་མཁའི་མཐིལ་ལ་སྣ་ཚོགས་པའི་རྣམ་པ་ཀློག་གི་འོད་ལྟ་བུ་དུས་དང་དུས་མ་ཡིན་པར་འབྱུང་བ་ཉིད་ཟུང་དང་ཟུང་དུ་གྱུར་པ་དང་ཁ་དོག་དྲུག་དང་
ལྡན་པའི་ཚོགས་སངས་རྒྱས་ཀྱི་འོད་ཟེར་འཕྲོ་ཞིང་གཟུགས་མཆོག་ཐོབ་པའི་བདག་ཉིད་བལྟས་ནས་དེ་རིང་བདག་གིས་སྟོབས་བཅུ་པ་ལ་སྲོག་ཡོངས་སུ་གཏོང་བར་རིགས་སོ། །བཅོམ་ལྡན་འདས་འཇིམ་པའི་སྟེང་དུ་འགྲོ་བར་མི་རིགས་
སོ། །ནོར་བུའི་སྤང་ལེབ་ཀྱི་ཟམ་པ་ལ་ཞབས་གནོན་ཅིང་གཤེགས་པ་ལྟ་བུར་ཟག་པ་ཟད་པ་འབུམ་ཕྲག་བཞི་དང་ལྷན་ཅིག་བདག་གི་རྒྱབ་གནོན་ཅིང་གཤེགས་སུ་གསོལ། དེ་ནི་བདག་ལ་ཡུན་རིང་པོར་ཕན་པ་དང་བདེ་བར་འགྱུར་
རོ། །སྐྲ་བཀྲོལ་ཏེ་གཟིག་གི་ལྤགས་པ་དང་ཤིང་ཤུན་གྱི་གོས་དང་། འཇིམ་པ་ནག་པོའི་སྟེང་ནོར་བུའི་སྤང་ལེབ་ཀྱི་ཟམ་པ་ལྟ་བུའི་འཇིམ་པའི་སྟེང་དུ་ཉལ་ལོ། །དེའི་ཕྱིར་གསུངས་པ། བདག་གི་དེ་ལ་དྲི་ལུང་བསྟན། །
39-1-185b


འཇིག་རྟེན་འདས་པའི་སངས་རྒྱས་ནི། །རྒྱལ་བ་མར་མེ་མཛད་ཅེས་པ། །འཇིག་རྟེན་འདྲེན་པ་བྱོན་པ་ཡི། །མི་མཉམ་ལམ་ནི་འཆོས་པ་དང་། །དེ་ཡི་ལམ་ནི་བྱི་དོར་བྱེད། །སངས་རྒྱས་ཞེས་པ་བདག་གིས་ཐོས། །དེ་མ་ཐག་ཏུ་
དགའ་བ་སྐྱེས། །སངས་རྒྱས་སངས་རྒྱས་ཞེས་བརྗོད་པ། །ཡིད་བདེ་དགའ་བ་སྐྱེས་པར་གྱུར། །ཚིམ་ཞིང་དགའ་བ་སྐྱེས་པའི་སེམས། །དེ་རུ་འཁོར་ཏེ་རྣམ་པར་བསམ། །འདིར་ནི་ས་བོན་བསྐྲུན་བྱས་ནས། །དེ་མ་ཐག་ཏུ་བདག་
ལ་སྐྱེ། །གལ་ཏེ་སངས་རྒྱས་ཆེད་བྱི་དོར། །མ་བཅོས་གནས་གཅིག་བདག་ལ་བྱིན། །བདག་ཀྱང་བྱི་དོར་བྱེད་པ་ཡིན། །མི་མཉམ་པ་ནི་འཆོས་པའོ། །དེ་ཚེ་ལམ་ནི་བྱི་དོར་བྱ། །བདག་ལ་མ་བཅོས་གནས་གཅིག་བྱིན། །
སངས་རྒྱས་སངས་རྒྱས་ཞེས་བསམ་ཞིང་། །དེ་ཚེ་བདག་ནི་ལམ་འདི་འཆོས། །བདག་གི་གནས་ནི་མ་གྲུབ་པར། །ཐུབ་པ་ཆེན་པོ་མར་མེ་མཛད། །མངོན་ཤེས་དྲུག་པོ་མཚུངས་ལྡན་པར། །འབུམ་ཕྲག་བཞི་པོ་རྣམས་ལ་ནི། །
དྲི་མ་མེད་ཅིང་ཟག་པ་ཟད། །རྒྱལ་བ་ལམ་དུ་བྱོན་པར་གྱུར། །བསུ་བ་བྱེད་པ་པོ་རྣམས་ནི། །རོལ་མོ་རྣམས་ནི་དཀྲོལ་བ་དང་། །ལྷ་དང་མི་རྣམས་ཡི་རང་བྱེད། །ལེགས་སོ་ཞེས་པའི་ཚིག་བྱིན་ནོ། །ལྷ་ཡིས་མི་རྣམས་
མཐོང་བ་དང་། །མི་རྣམས་ཀྱིས་ཀྱང་ལྷ་རྣམས་མཐོང་། །དེ་གཉིས་ཀྱིས་ནི་ཐལ་མོ་སྦྱོར། །དེ་བཞིན་གཤེགས་དང་ཐབས་གཅིག་འགྲོ། །ལྷ་དང་ལྷ་ཡི་རོལ་མོ་དང་། །མི་དང་མི་ཡི་རོལ་མོ་དང་། །གཉིས་ཀ་ཡང་ནི་རོལ་
མོ་དཀྲོལ། །དེ་བཞིན་གཤེགས་དང་ཐབས་ཅིག་འགྲོ། །ལྷ་མི་མེ་ཏོག་མན་དཱ་ར། །པད་མ་པ་རི་ཚད་ཏྲ་ཀ །ཕྱོགས་དང་མཚམས་སུ་མེ་ཏོག་འཐོར། །ལྷ་རྣམས་མཁའ་ལ་གནས་ནས་སོ། །ཙམ་པ་ཀྃ་ཤཱ་ལ་ལཾ་
ནི་པཾ། །ནཱ་གཱ་པུནྣཱ་གཱ་ཀེ་ཏ་ཀཾ །།སྟེང་གི་ཕྱོགས་དང་མཚམས་སུ་འཐོར། །ས་སྟེང་འགྲོ་བ་མི་རྣམས་སོ། །དེར་ནི་བདག་གི་སྐྲ་བཀྲོལ་ནས། །ཤིང་ཤུན་ཆོས་གོས་གཟིག་ལྤགས་ནི། །འཇིམ་པའི་སྟེང་དུ་བསྟིང་ནས་སུ། །
39-1-186a


ཁ་བུབ་དུ་ནི་བདག་གིས་ཉལ། །འཇིམ་པའི་སྟེང་ནས་མི་གཤེགས་པར། །བདག་ནི་གནོན་ཅིང་སངས་རྒྱས་རྣམས། །སློབ་མ་འཁོར་བཅས་གཤེགས་སུ་གསོལ། །བདག་ལ་ཕན་པར་འགྱུར་བ་ཡིན། །དེ་འཇིམ་པའི་སྟེང་དུ་
ཉལ་ནས་སླར་ཡང་མིག་གིས་བལྟ་ཞིང་སྟོབས་བཅུ་དང་ལྡན་པའི་མར་མེ་མཛད་སངས་རྒྱས་ཀྱི་འབྱོར་པ་ཡང་དག་པར་བལྟས་ནས་དེ་ལྟར་བསམས་སོ། །གལ་ཏེ་བདག་གི་ཉོན་མོངས་པ་ཐམས་ཅད་གཞོམ་པར་འདོད་པ་དང་། དགེ་འདུན་རྣམས་
ཀྱི་གཞོན་ནུར་འགྱུར་བར་བྱ་བ་དང་། དགའ་བ་ཅན་གྱི་གྲོང་ཁྱེར་དུ་འཇུག་པར་འདོད་དོ། །གཞན་གྱི་ཆ་ལུགས་ཀྱིས་ཀྱང་ཉོན་མོངས་པ་འདི་གཞོམ་པར་བྱས་ནས་མྱ་ངན་ལས་འདས་པ་ཐོབ་པ་ལ་དོན་མེད་དོ། །སྟོབས་བཅུ་དང་ལྡན་པའི་མར་མེ་མཛད་
བདག་གིས་ཇི་ལྟ་བ་བཞིན་དུ་བྱའོ། །མཆོག་གི་བྱང་ཆུབ་ཐོབ་ནས་སྐྱེ་བོ་མང་པོ་འཁོར་བའི་རྒྱ་མཚོ་ལ་གྲུར་ཞུགས་ནས་ཕ་རོལ་དུ་སྒྲལ་བར་བྱས་ནས། ཕྱི་མྱ་ངན་ལས་འདས་པ་ཐོབ་པར་བྱ་བ་འདི་ནི་བདག་གིས་རིགས་པའོ། །དེ་ནས་ཆོས་བརྒྱད་
པོ་གཅིག་ཏུ་བསྡུ་སྟེ་སངས་རྒྱས་འདོད་པར་སྨོན་པས་སེམས་ལ་བལྟ་ཞིང་ཉལ་ལོ། །དེའི་ཕྱིར་གསུངས་པ། ས་གཞི་ལ་ནི་ཉལ་ནས་ནི། །བདག་གིས་དེ་ལྟར་བསམས་པ་ནས། །བདག་ནི་དེ་རིང་འདོད་པ་ཡི། །བདག་གིས་ཉོན་མོངས་གཞོམ་པ་
འོ། །བདག་ནི་ཆ་ལུགས་གཞན་གྱིས་ཀྱང་། །འདིར་ནི་ཆོས་འདི་མངོན་དུ་བྱ། །ཐམས་ཅད་མཁྱེན་པ་ཐོབ་གྱུར་ནས། །ལྷ་དང་བཅས་པ་སངས་རྒྱས་འགྱུར། །བདག་ཉིད་གཅིག་པུ་གྲོལ་ནས་ཅི། །སྐྱེས་བུ་མཐུ་ལྡན་མཐོང་བ་དང་། །ཐམས་ཅད་
མཁྱེན་པ་ཐོབ་གྱུར་ནས། །ལྷ་དང་མི་རྣམས་ཡང་དག་བསྒྲལ། །བདག་གི་འདི་ཡི་གཞི་ཡིས་ནི། །མཐུ་དང་ལྡན་པ་མཐོང་བ་དང་། །ཐམས་ཅད་མཁྱེན་པ་ཐོབ་ནས་ནི། །སྐྱེ་བོ་མང་པོ་བདག་གིས་བསྒྲལ། །འཁོར་བའི་མདུད་པ་བཅད་ནས་
ནི། །སྲིད་གསུམ་པོ་ནི་ཟད་བྱས་ལ། །ཆོས་ཀྱི་གྲུ་ཡི་ནང་ཞུགས་ནས། །ལྷ་དང་མི་རྣམས་ཡང་དག་བསྒྲལ། །གང་ཞིག་སླར་ཡང་སངས་རྒྱས་དོན་དུ་གཉེར་བའི་ཕྱིར་རོ། །མི་ཡི་ལུས་ནི་མཚན་མར་ལྡན། །སྟོན་པའི་ལྟ་བའི་རྒྱུ་དང་ནི། །
39-1-186b


རབ་བྱུང་ཡོན་ཏན་ལྡན་པ་དང་། །རིགས་པ་དང་ནི་འདུན་པ་དང་། །ཆོས་བརྒྱད་པོ་ནི་བསྡུས་ནས་སུ། །སྨོན་ལམ་མངོན་པར་འཕེལ་བའོ། །མིའི་ལུས་ལ་གནས་ཤིང་སངས་རྒྱས་ཉིད་དོན་དུ་གཉེར་བ་ནི་དོན་དུ་གཉེར་བ་ཕུན་སུམ་ཚོགས་པ་འགྲུབ་བོ། །ཀླུའམ་མཁའ་
ལྡིང་ངམ་ལྷ་རྣམས་ཀྱིས་དེ་དོན་དུ་གཉེར་ཡང་མི་འགྲུབ་བོ། །མིའི་ལུས་སུ་གྱུར་ཅིང་སྐྱེས་བུའི་མཚན་གནས་པས་ནི་དེ་དོན་དུ་གཉེར་བ་འགྲུབ་བོ། །བུད་མེད་དམ་ཟ་མའམ་མ་ནིང་ངམ་མཚན་གཉིས་པས་ནི་འགྲུབ་པ་མ་ཡིན་ནོ། །སྐྱེས་བུར་གྱུར་ནས་དེའི་ལུས་སུ་འདོད་པ་
དང་དགྲ་བཅོམ་པ་ཐོབ་པར་བྱ་བའི་ཕྱིར་དུ་ཡོངས་སུ་རྫོགས་པར་འགྲུབ་བོ། །གཞན་གྱིས་ནི་མ་ཡིན་ནོ། །སྒྱུ་དང་ལྡན་ཞིང་གལ་ཏེ་འཚོ་བ་དང་ལྡན་པའི་སངས་རྒྱས་ཀྱི་དྲུང་དུ་གཉེར་ན་དོན་དུ་འགྲུབ་བོ། །སངས་རྒྱས་ཡོངས་སུ་མྱ་ངན་ལས་འདས་ནས་མཆོད་རྟེན་
གྱི་དྲུང་དུའམ་བྱང་ཆུབ་ཤིང་གི་དྲུང་དུ་དོན་དུ་གཉེར་བས་ནི་མི་འགྲུབ་བོ། །སངས་རྒྱས་ཀྱི་དྲུང་དུ་དོན་དུ་གཉེར་ཀྱང་རབ་ཏུ་བྱུང་བའི་མཚན་མ་དང་ལྡན་པས་འགྲུབ་ཀྱི། ཁྱིམ་པའི་མཚན་མ་དང་ལྡན་པས་ནི་མ་ཡིན་ནོ། །རབ་ཏུ་བྱུང་ཡང་མངོན་པར་ཤེས་པ་ལྔ་དང་
སྙོམས་པར་འཇུག་པ་བརྒྱད་ཐོབ་པས་འདོད་པར་འགྲུབ་ཀྱི། ཡོན་ཏན་འདི་རྣམས་དང་བྲལ་བས་ནི་མ་ཡིན་ནོ། །ཡོན་ཏན་དང་ལྡན་ཡང་གང་ཞིག་འཚོ་བ་དང་ལྡན་པའི་ལུས་སངས་རྒྱས་ལ་ཡོངས་སུ་བཏང་ན་འགྲུབ་ཀྱི། གཞན་དུ་ནི་མ་ཡིན་ནོ། །དེའི་གཞི་
འདིས་གཞི་ཡོངས་སུ་རྫོགས་ནས་འགྲུབ་བོ། །གཞན་གྱིས་ནི་མ་ཡིན་ནོ། །གཞི་དང་ལྡན་ཡང་གང་ཞིག་སངས་རྒྱས་ཀྱི་ཆོས་ཀྱི་ཕྱིར་དུ་འདུན་པ་ཆེན་པོ་དང་། སྤྲོ་བ་ཆེན་པོ་དང་། རྩོལ་བ་ཆེན་པོ་དང་། ཡོངས་སུ་འབད་པ་རྣམས་ཀྱིས་འགྲུབ་བོ། །གཞན་
གྱིས་ནི་མ་ཡིན་ནོ། །དེ་ལ་འདིར་འདུན་པ་ཆེན་པོའི་དཔེ་ནི་གལ་ཏེ་འདི་ལྟར་གང་ཞིག་འཇིག་རྟེན་ཐམས་ཅད་ཀྱི་ཁོར་ཡུག་གི་ནང་ཆུ་ཡིས་གང་བར་གྱུར་པ་ལ་བདག་གི་ལག་པས་བརྐྱལ་ཏེ་ཕ་རོལ་དུ་འགྲོ་བར་ནུས་ན་དེས་སངས་རྒྱས་ཐོབ་པར་འགྱུར་
རོ། །ཡང་ན་གང་དུ་གང་ཞིག་སླར་ཡང་ཐམས་ཅད་ཀྱི་ཁོར་ཡུག་གི་ནང་དུ་འོད་མ་མང་པོས་བཀང་སྟེ་རྐང་པས་ཉེད་ཅིང་རྡུལ་དུ་བྱེད་པས་ཕ་རོལ་དུ་འགྲོ་བར་ནུས་ན་དེ་ཡིས་སངས་རྒྱས་ཐོབ་པར་ནུས་སོ། །ཡང་ན་གང་ཞིག་སླར་ཡང་ཐམས་ཅད་
39-1-187a


ཀྱི་ཁོར་ཡུག་གི་ནང་དུ་མཚོན་ཆ་རྣམས་ཁ་གྱེན་ལ་བསྟན་པའི་མཚོན་རྩེ་མོ་བར་མེད་པས་ཡོངས་སུ་གང་བ་ལ་རྐང་པས་རྫི་ཞིང་ཕ་རོལ་དུ་འགྲོ་བར་ནུས་ན་དེས་སངས་རྒྱས་ཐོབ་པར་འགྱུར་རོ། །ཡང་ན་གང་ཞིག་གིས་སླར་ཡང་འཇིག་རྟེན་
ཁོར་ཡུག་གི་ནང་དུ་སོལ་བ་འབར་བས་ཡོངས་སུ་གང་བར་བྱས་ནས་རྐང་པས་རྫི་ཞིང་ཕ་རོལ་དུ་འགྲོ་བར་ནུས་ན་དེ་ཡིས་སངས་རྒྱས་ཐོབ་པར་འགྱུར་རོ། གང་ཞིག་དེ་རྣམས་ལས་གང་ཞིག་ལ་སྡུག་བསྔལ་བར་མི་སེམས་པར་བདག་གིས་འདི་རྣམས་
ཀྱང་ཕ་རོལ་དུ་བསྒྲལ་བ་འམ་འགྲོ་བའམ་ཕ་རོལ་དུ་འགྲོ་བར་བྱའོ་ཞེས་ཤེས་སོ། །དེ་དེ་ལྟར་འདུན་པ་ཆེན་པོ་དང་། སྤྲོ་བ་དང་། རྩོལ་བ་དང་། འབད་པ་རྣམས་དང་ཡང་དག་པར་ལྡན་ན་དེའི་དོན་དུ་གཉེར་བ་འགྲུབ་བོ། །གཞན་གྱིས་ནི་མ་ཡིན་ནོ། །
བློ་གྲོས་བཟང་པོ་དཀའ་ཐུབ་པ་སླར་ཡང་ཆོས་བརྒྱད་པོ་འདི་རྣམས་བསྡུས་ནས་སངས་རྒྱས་འདོད་པའི་སྨོན་ལམ་བཏབ་ནས་ཉལ་ལོ། །བཅོམ་ལྡན་འདས་མར་མེ་མཛད་ཀྱིས་ཀྱང་བྱོན་ནས་བློ་གྲོས་བཟང་པོ་དཀའ་ཐུབ་པའི་མགོའི་གམ་དུ་
བཞུགས་ཏེ་ནོར་བུ་སེང་གེའི་ཁང་པའི་གཟེབ་ཀྱི་སྒོར་སྟོན་པ་བཞིན་དུ་ཁ་དོག་ལྔ་པ་རབ་ཏུ་དངས་པ་དང་ལྡན་པའི་སྤྱན་གྱིས་གཟིགས་ནས་འཇིམ་པའི་སྟེང་ན་ཉལ་བའི་བློ་གྲོས་བཟང་པོ་དཀའ་ཐུབ་པ་གཟིགས་སོ། །དཀའ་ཐུབ་པ་འདི་སངས་
རྒྱས་ཐོབ་པའི་ཕྱིར་དུ་སྨོན་ལམ་འདེབས་ཤིང་ཉལ་ལོ། །འདིའི་དོན་དུ་གཉེར་བ་འགྲུབ་བམ་མི་འགྲུབ་སྙམ་དུ་དགོངས་ནས་མ་འོངས་པའི་ཡེ་ཤེས་ཀྱིས་རྟོག་ཅིང་དཔྱོད་དོ། །འདི་ནས་བསྐལ་པ་གྲངས་མེད་པ་བཞི་དང་འབུམ་ཕྲག་གཅིག་
ལྷག་ནས་གཽ་ཏ་མ་ཞེས་བྱ་བའི་སངས་རྒྱས་སུ་འགྱུར་ཞེས་རྟོགས་ནས་འཁོར་གྱི་ནང་དུ་ལུང་སྟོན་པས་བཀའ་སྩལ་པ། མཆོག་གི་དཀའ་ཐུབ་ཀྱི་དཀའ་ཐུབ་པ་འདི་འཇིམ་པའི་སྟེང་ན་ཉལ་བ་ཁྱེད་རྣམས་ཀྱིས་མཐོང་ངམ། གསོལ་པ། 
བཙུན་པ་དེ་བཞིན་དུ་མཐོང་ངོ་། །བཀའ་སྩལ་པ། འདིས་སངས་རྒྱས་ཐོབ་པར་བསམས་ནས་ཉལ་ཏོ། །གསོལ་པ། འདིའི་དོན་དུ་གཉེར་བ་འགྲུབ་པར་འགྱུར་ལགས་སམ། །བཀའ་སྩལ་པ། འདི་ནས་བསྐལ་པ་གྲངས་
39-1-187b


མེད་པ་བཞི་དང་འབུམ་ཕྲག་གཅིག་ལྷག་འདས་ནས་གཽ་ཏ་མ་ཞེས་བྱ་བའི་སངས་རྒྱས་སུ་འགྱུར་རོ། །དེ་ལ་སླར་ཡང་གྲོང་ཁྱེར་སེར་སྐྱའི་གནས་སུ་འཁྲུང་པར་འགྱུར་རོ། །ལྷ་མོ་སྒྱུ་འཕྲུལ་མ་ཆེན་མོ་ཞེས་བྱ་བ་ནི་ཡུམ་མོ། །རྒྱལ་པོ་ཟས་
གཙང་མ་ཞེས་བྱ་བ་ནི་ཡབ་པོ། །ཉན་ཐོས་ཀྱི་མཆོག་ནི་གནས་བརྟན་ཉེ་རྒྱལ་དང་ཉན་ཐོས་གཉིས་པ་ནི་གནས་བརྟན་པང་ནས་སྐྱེས་སོ། །སངས་རྒྱས་ཀྱི་ཉེ་གནས་ནི་ཀུན་དགའ་བོ་ཞེས་བྱ་བའོ། །ཉན་ཐོས་མའི་མཆོག་ནི་གནས་
བརྟན་མ་དགེ་མ་ཞེས་བྱ་བ་དང་ཉན་ཐོས་མ་གཉིས་པ་ནི་གནས་བརྟན་མ་ཨུད་པ་ལའི་མདོག་ཅན་ཞེས་བྱ་བར་འགྱུར་རོ། །ཡེ་ཤེས་ཡོངས་སུ་སྨིན་པར་གྱུར་ཏེ། ངེས་པར་འབྱུང་བ་ཆེན་པོ་བྱས་ནས་དཀའ་ཐུབ་ཆེན་པོ་རྫོགས་པར་བྱ་སྟེ། 
ནྱ་གྲོ་དྷའི་ཤིང་དྲུང་དུ་འོ་ཐུག་བླངས་ནས་ཆུ་ཀླུང་ནཻ་ར་ཛ་རའི་འགྲམ་དུ་གསོལ་ལོ། །བྱང་ཆུབ་ཀྱི་སྙིང་པོར་གཤེགས་ཏེ་ཨ་ཤཱདྠའི་ཤིང་དྲུང་དུ་མངོན་པར་རྫོགས་པར་འཚང་རྒྱ་བར་འགྱུར་རོ། །དེའི་ཕྱིར་གསུངས་པ། མར་མེ་མཛད་པ་འཇིག་རྟེན་
མཁྱེན། །སེམས་ཅན་ཕན་ཕྱིར་འཇིག་རྟེན་བྱུང་། །བདག་གི་མགོ་བོའི་གམ་འདུག་སྟེ། །འདི་ལྟ་བུ་ཡི་ཚིག་གསུངས་སོ། །དཀའ་ཐུབ་པ་འདི་ལྟོས་ཤིག་དང་། །དཀའ་བ་མཆོག་གི་རལ་པ་འཛིན། །འདི་ནི་བསྐལ་པ་མང་འདས་ནས། །
འཇིག་རྟེན་དུ་ནི་སངས་རྒྱས་འགྱུར། །སེར་སྐྱ་དགའ་བའི་གྲོང་དུ་འཁྲུངས། །དེ་བཞིན་གཤེགས་པ་ངེས་པར་འབྱུང་། །དཀའ་ཐུབ་གནས་སུ་གནས་ནས་ནི། །ཤིན་དུ་དཀའ་བའི་དཀའ་ཐུབ་སྤྱད། །ཨ་ཙ་པཱ་ལའི་ཤིང་དྲུང་དུ། །
དེ་བཞིན་གཤེགས་པ་བཞུགས་ནས་སུ། །དེར་ནི་འོ་ཐུག་བླངས་ནས་ནི། །ནཻ་ར་ཛ་རའི་འགྲམ་གནས་ནས། །ནཻ་ར་ཛཱ་རའི་འགྲམ་དུ་ནི། །འོ་ཐུག་རྒྱལ་བས་ལོངས་སྤྱོད་དོ། །ལམ་གྱི་མཆོག་གི་ཆེད་དུ་ནི། །བྱང་ཆུབ་གཞི་ནི་
བྱོན་འགྱུར་རོ། །བླ་མེད་བྱང་ཆུབ་སྙིང་པོ་ལ། །དེ་ནས་བསྐོར་བ་བྱས་ནས་ནི། །ཨ་ཤཱདྠ་ཡི་དྲུང་དུ་ནི། །གྲགས་ཆེན་ཞེས་པ་སངས་རྒྱས་འགྱུར། །འདི་ཡི་སྐྱེ་བའི་ཡུམ་གྱུར་པ། །སྒྱུ་མ་ཞེས་པར་འགྱུར་བ་ཡིན། །ཡབ་ནི་ཟས་གཙང་
39-1-188a


ཞེས་བྱའོ། །འདི་ནི་གཽ་ཏམ་ཞེས་པར་འགྱུར། །ཟག་པ་ཟད་ཅིང་འདོད་ཆགས་བྲལ། །ཞི་བའི་སེམས་དང་མཚུངས་པར་ལྡན། །པང་ནས་སྐྱེས་དང་ཉེ་རྒྱལ་ནི། །ཉན་ཐོས་རྣམས་ཀྱི་མཆོག་ཡིན་ནོ། །ཉེ་གནས་ཀུན་དགའ་བོ་ཞེས་
པས། །རྒྱལ་བ་དེ་ལ་ཞབས་ཏོག་བྱེད། །དགེ་མ་དང་ནི་ཨུད་པལ་མདོག །ཉན་ཐོས་མ་ཡི་མཆོག་ཡིན་ནོ། །ཟག་པ་མེད་ཅིང་འདོད་ཆགས་བྲལ། །ཞི་བའི་སེམས་དང་མཚུངས་པར་ལྡན། །དེ་ཡི་བཅོམ་ལྡན་བྱང་ཆུབ་ཤིང་། །ཨ་ཤྭདྠ་ཞེས་བརྗོད་
པའོ། །དེ་ཐོས་ནས་བློ་གྲོས་བཟང་པོ་དཀའ་ཐུབ་པ་བདག་གིས་དོན་དུ་གཉེར་བ་གྲུབ་པར་འགྱུར་བས་ཡིད་བདེ་བ་ཐོབ་པར་གྱུར་ཏོ། །སྐྱེ་བོ་མང་པོས་སྟོབས་བཅུ་དང་ལྡན་པའི་མར་མེ་མཛད་ཀྱི་གསུང་ཐོས་ནས། བློ་གྲོས་བཟང་པོ་དཀའ་ཐུབ་
པ་སངས་རྒྱས་ཀྱི་ས་བོན་གྱི་མྱུ་གུར་གྱུར་པས་དགའ་བ་དང་བདེ་བ་སྐྱེས་སོ། །དེ་ལྟ་བུར་གྱུར་པའི་སེམས་ཀྱིས། ཇི་ལྟར་སྐྱེས་བུ་ཆུ་ཀླུང་གི་ཕ་རོལ་དུ་འགྲོ་བ་ན་མུ་འགྲམ་དྲང་པོ་ནས་ཕ་རོལ་དུ་འགྲོ་བར་མི་ནུས་ན་འོག་གི་ཆའི་མུ་གནས་ནས་ཕ་རོལ་
དུ་འགྲོའོ། །དེ་ལྟར་འདི་ལྟར་བདག་གིས་སྟོབས་བཅུ་དང་ལྡན་པའི་མར་མེ་མཛད་ཀྱི་བསྟན་པ་ལ་ལམ་གྱི་འབྲས་བུ་མ་ཐོབ་པར་གྱུར་ན། གང་གི་ཚེ་ཁྱོད་མ་འོངས་པ་ན་སངས་རྒྱ་བར་འགྱུར་རོ་ཞེས་སོ། །དེའི་ཚེ་ཁྱོད་ཀྱིས་མངོན་སུམ་དུ་ལམ་འབྲས་བུ་
མངོན་དུ་བྱེད་པ་བདག་གིས་ནུས་སོ། །དོན་དུ་གཉེར་བར་བྱས་ནས་སྟོབས་བཅུ་དང་ལྡན་པའི་མར་མེ་མཛད་ཀྱིས་ཀྱང་བྱང་ཆུབ་སེམས་དཔའི་བསྔགས་པ་བརྗོད་ཅིང་མེ་ཏོག་སྙིམ་པ་བརྒྱད་ཀྱིས་གཏོར་ནས་བསྐོར་བ་བྱས་ཏེ་གཤེགས་སོ། །འབུམ་
ཕྲག་བཞི་པོ་ཟག་པ་ཟད་པ་དེ་རྣམས་ཀྱིས་ཀྱང་བྱང་ཆུབ་སེམས་དཔའ་ལ་དྲི་བཟང་དང་མེ་ཏོག་གིས་མཆོད་ནས་བསྐོར་བ་བྱས་ཏེ་གཤེགས་སོ། །ལྷ་དང་མི་རྣམས་ཀྱིས་ཀྱང་དེ་བཞིན་དུ་མཆོད་ནས་ཕྱག་བཙལ་ཏེ་སོང་ངོ་། །བྱང་ཆུབ་སེམས་དཔས་ཐམས་
ཅད་སོང་བའི་དུས་སུ་ཉལ་བའི་གནས་ནས་ལངས་ཏེ་ཕ་རོལ་དུ་ཕྱིན་པ་བསམ་པའི་ཕྱིར་མེ་ཏོག་གི་ཕུང་པོའི་སྟེང་དུ་དཀྱིལ་དཀྲུང་བཅས་ནས་བཞུགས་སོ། །དེ་ལྟར་བྱང་ཆུབ་སེམས་དཔའ་བཞུགས་ནས་འཇིག་རྟེན་གྱི་ཁམས་སྟོང་ཕྲག་བཅུའི་ཁོར་
39-1-188b


ཡུག་གི་ལྷ་རྣམས་ཀྱིས་ལེགས་སོ་ཞེས་བྱ་བ་བྱིན་ནོ། །འཕགས་པ་བློ་གྲོས་བཟང་པོ་དཀའ་ཐུབ་པ་སྔར་གྱི་བྱང་ཆུབ་སེམས་དཔའ་རྣམས་ཀྱིས་ཀྱང་སྐྱིལ་དཀྲུང་བཅས་ཏེ་ཕ་རོལ་དུ་ཕྱིན་པ་སེམས་ཤིང་སྔོན་གྱི་དུས་ན་བཞུགས་བཞིན་དུ་སྡུག་བསྔལ་
གྱི་མཚན་མ་མཐོང་ནས་དེ་རྣམས་ཀྱི་མཚན་མ་རྣམས་ཀྱང་དེ་རིང་སྐྱེས་པར་གྱུར་ཏོ། །ཐེ་ཚོམ་མེད་པར་ཁྱོད་སངས་རྒྱས་སུ་འགྱུར་རོ་ཞེས་བདག་གིས་དེ་རྣམས་ཤེས་སོ། །གང་གིས་འདི་རྣམས་ཀྱི་མཚན་མ་མཐོང་བར་གྱུར་པས་དེ་ངེས་པར་སངས་
རྒྱས་སུ་འགྱུར་རོ། །དེ་ལ་ཁྱོད་བདག་ཉིད་བརྩོན་འགྲུས་བརྟན་པོ་མཆོག་བཟུང་ནས་བྱང་ཆུབ་སེམས་དཔའ་རྣམས་ལ་སྣ་ཚོགས་པའི་བསྟོད་པ་བྱས་སོ། །དེའི་ཕྱིར་གསུངས་པ། འདི་ཡི་ཚིག་ནི་ཐོས་ནས་ནི། །མཚུངས་མེད་དྲང་སྲོང་ཆེན་པོ་ལ། །
ལྷ་དང་མི་ནི་རྗེས་ཡིད་རང་། །སངས་རྒྱས་ས་བོན་མྱུ་གུ་འདི། །སྒྲ་ནི་ཆེན་པོ་སྒྲོགས་བྱེད་ཅིང་། །གསལ་བར་བཞད་པར་བྱེད་པ་དང་། །ཐལ་མོ་སྦྱར་ནས་ཕྱག་བྱེད་པ། །སྟོང་ཕྲག་བཅུ་ཡི་ལྷ་དང་བཅས། །བསྟན་པ་འདི་ལ་འབྲས་མ་ཐོབ། །གལ་ཏེ་
འཇིག་རྟེན་མགོན་པོ་འདི། །མ་འོངས་པ་རྣམས་འདས་གྱུར་ནས། །འདི་ནི་སྔོན་དུ་འགྱུར་བའོ། །ཇི་ལྟར་ཆུ་ཀླུང་ཕ་རོལ་མི། །འགྲོ་བ་པོ་ཡི་མུ་གནས་ལ། །འོག་གི་མུ་ནས་བཟུང་ནས་ནི། །ཆུ་ཀླུང་ཆེན་པོའི་ཕ་རོལ་འགྲོ། །དེ་ལྟར་འདི་ལྟར་བདག་གིས་
ནི། །རྒྱལ་བ་འདི་ནི་གལ་ཏེ་ན། །མ་འོངས་པ་ནི་མང་སོང་ནས། །འདི་ནི་མངོན་སུམ་གྱུར་པ་ཡིན། །མར་མེ་མཛད་ནི་འཇིག་རྟེན་མཁྱེན། །འདི་ལྟར་འགྱུར་ཞེས་གསུངས་པ་ཡིན། །བདག་གི་ལས་རྣམས་བསལ་བྱས་ནས། །རྐང་པ་གཡས་པ་
བཏེག་བྱས་སོ། །གང་ཞིག་དེ་ལ་རྒྱལ་སྲས་ནི། །བདག་ལ་ཀུན་གྱིས་བསྐོར་བ་བྱས། །མི་དང་ཀླུ་དང་དྲི་ཟ་རྣམས། །ཕྱག་བྱས་ནས་ནི་གཤེགས་པར་གྱུར། །དགེ་འདུན་བཅས་པ་འཇིག་རྟེན་འདྲེན། །བདག་གིས་གཤེགས་པ་
མཐོང་བ་ན། །དགའ་ཞིང་ཚིམ་པའི་སེམས་ཀྱིས་ནི། །དེ་ཚེ་བདག་གིས་སྟན་ལས་ལངས། །བདག་ནི་བདེ་ཞིང་བདེ་བར་འགྱུར། །དགའ་ཞིང་དགའ་བར་གྱུར་པ་སྟེ། །དགའ་དང་ལྡན་པར་སྐྱེ་བ་དང་། །དེ་ཡི་ཚེ་ན་སྐྱིལ་དཀྲུང་བཅས། །སྐྱིལ་
39-1-189a


དཀྲུང་ལ་ནི་གནས་ནས་སུ། །དེ་ལ་བདག་གིས་འདི་ལྟར་བསམས། །བདག་གི་བསམ་གཏན་དབང་དུ་གྱུར། །ཡེ་ཤེས་ཀྱི་ནི་ཕ་རོལ་ཕྱིན། །སྟོང་ཕྲག་གི་ནི་འཇིག་རྟེན་ན། །ང་དང་མཚུངས་པའི་དྲང་སྲོང་མེད། །རྫུ་འཕྲུལ་ཆོས་ནི་བདག་
མི་མཚུངས། །འདི་འདྲ་ཅི་བདེ་གཞན་མ་ཐོབ། །བདག་གིས་དཀྱིལ་དཀྲུང་བཅས་ནས་བདག །སྟོང་ཕྲག་བཅུ་ལྷག་གནས་ནས་སུ། །སྒྲ་ཆེན་པོ་ནི་སྒྲོགས་པར་བྱེད། །ངེས་པར་ཁྱོད་ནི་སངས་རྒྱས་འགྱུར། །གང་ཞིག་བྱང་སེམས་སྔོན་མ་
རྣམས། །སྐྱིལ་དཀྲུང་དུ་ནི་བཞུགས་ནས་སུ། །མཚན་མ་རྣམས་ནི་མཐོང་བ་ནི། །དེ་རྣམས་དེ་རིང་མཐོང་བ་ཡིན། །གྲང་བ་རྣམས་ནི་མེད་པར་གྱུར། །དྲོ་བ་རྣམས་ནི་ཉེ་བར་ཞི། །དེ་རྣམས་དེ་རིང་སོ་སོར་མཐོང་། །ངེས་པར་ཁྱོད་ནི་སངས་རྒྱས་
འགྱུར། །སྟོང་ཕྲག་བཅུ་ཡི་འཇིག་རྟེན་ཁམས། །ཕན་ཚུན་དུ་ནི་འཇིགས་མེད་གྱུར། །དེ་རྣམས་དེ་རིང་སོ་སོར་མཐོང་། །ངེས་པར་ཁྱོད་ནི་སངས་རྒྱས་འགྱུར། །རླུང་ཆེན་པོ་ནི་མི་ལྡང་ཞིང་། །ཆུ་རྣམས་རྒྱུན་ལས་ལོག་པ་དང་། །དེ་རྣམས་
དེ་རིང་སོ་སོར་མཐོང་། །ངེས་པར་ཁྱོད་ནི་སངས་རྒྱས་འགྱུར། །ཐང་སྐྱེས་ཆུ་སྐྱེས་མེ་ཏོག་རྣམས། །ཐམས་ཅད་དུ་ནི་མེ་ཏོག་བྱེ། །དེ་རྣམས་དེ་རིང་མེ་ཏོག་བྱེ། །ངེས་པར་ཁྱོད་ནི་སངས་རྒྱས་འགྱུར། །འཁྲི་ཤིང་ཡང་ན་ཤིང་གྱུར་པ། །
དེ་མ་ཐག་ཏུ་འབྲས་བུར་གྱུར། །དེ་རྣམས་དེ་ཀུན་འབྲས་གྱུར་པ། །ངེས་པར་ཁྱོད་ནི་སངས་རྒྱས་འགྱུར། །ནམ་མཁའ་དང་ནི་ས་གཞི་ལ། །རིན་ཆེན་དེ་དག་འོད་འགྱེད་དོ། །དེ་རྣམས་དེ་རིང་འོད་འགྱེད་པས། །ངེས་པར་ཁྱོད་ནི་སངས་
རྒྱས་འགྲོ། །ལྷ་རྣམས་དང་ནི་མི་རྣམས་ནི། །དེ་དག་རོལ་མོའི་སྒྲ་སྒྲོགས་སོ། །དེ་རྣམས་དེ་རིང་སྒྲ་འབྱིན་པས། །ཁྱོད་ནི་ངེས་པར་སངས་རྒྱས་འགྱུར། །མེ་ཏོག་སྣ་ཚོགས་པ་ཡི་ཚོགས། །དེ་མ་ཐག་ཏུ་ཆར་པ་འབེབས། །
དེ་རྣམས་དེ་རིང་ཆར་འབེབས་པས། །ངེས་པར་ཁྱོད་ནི་སངས་རྒྱས་འགྱུར། །རྒྱ་མཚོ་ཆེན་པོ་མ་གཡོ་ཞིང་། །འཇིག་རྟེན་སྟོང་ཕྲག་བཅུ་པོ་གཡོ། །དེ་རྣམས་དེ་རིང་གྱུར་པས་ན། །ངེས་པར་ཁྱོད་ནི་སངས་རྒྱས་འགྱུར། །
39-1-189b


སྟོང་ཕྲག་བཅུ་ཡི་དམྱལ་བ་རྣམས། །དེ་མ་ཐག་ཏུ་བསྲེག་དང་བྲལ། །དེ་རྣམས་དི་རིང་ཞི་བས་ན། །ངེས་པར་ཁྱོད་ནི་སངས་རྒྱས་འགྱུར། །ཉི་མ་དྲི་མ་མེད་པ་དང་། །རྒྱུ་སྐར་ཐམས་ཅད་མཐོང་བ་དང་། །དེ་རྣམས་དི་རིང་མཐོང་བས་ན། །ངེས་
པར་ཁྱོད་ནི་སངས་རྒྱས་འགྱུར། །ཆར་པ་འབབ་པར་མ་གྱུར་ཀྱང་། །ས་ནི་སྣུམ་བག་བཅས་པ་དང་། །དེ་རྣམས་དི་རིང་ས་ལ་གྱུར། །ངེས་པར་ཁྱོད་ནི་སངས་རྒྱས་འགྱུར། །རྒྱུ་སྐར་ཚོགས་ནི་རྣམ་པར་གསལ། །ནམ་མཁའི་དབྱིངས་སུ་རྒྱུ་སྐར་
རྣམས། །ཟླ་བ་དང་ནི་འགྲོགས་པ་བཞིན། །ངེས་པར་ཁྱོད་ནི་སངས་རྒྱས་འགྱུར། །ས་ཁུང་རི་ཁུང་སྲོག་ཆགས་རྣམས། །སེམས་གཅིག་པས་ནི་ཕ་རོལ་མཐོང་། །དི་རིང་དེ་རྣམས་སེམས་དགའ་བས། །ངེས་པར་ཁྱོད་ནི་སངས་རྒྱས་
འགྱུར། །སེམས་ཅན་རྣམས་ནི་མི་དགའ་མེད། །དེ་མ་ཐག་ཏུ་དགའ་བར་འགྱུར། །དི་རིང་དེ་རྣམས་དགའ་བས་ན། །ངེས་པར་ཁྱོད་ནི་སངས་རྒྱས་འགྱུར། །དེ་ཚེ་ནད་རྣམས་ཉེ་བར་ཞི། །འདོད་པའི་ནད་ནི་མེད་པའོ། །དི་རིང་དེ་རྣམས་མཐོང་
བས་ན། །ངེས་པར་ཁྱོད་ནི་སངས་རྒྱས་འགྱུར། །དེ་ཚེ་ཆགས་པ་བསྲབས་པ་དང་། །སྐྱོན་དང་རྨོངས་པ་རྣམ་པར་ཞིག །དེ་རིང་དེ་ཀུན་དོར་བས་ན། །ངེས་པར་ཁྱོད་ནི་སངས་རྒྱས་འགྱུར། །དེ་ཡི་ཚེ་ན་འཇིགས་མེད་པ། །དི་རིང་དེ་རྣམས་མཐོང་
བས་ན། །བདག་གི་རྟགས་དེ་ཀུན་གྱིས་ཤེས། །ངེས་པར་ཁྱོད་ནི་སངས་རྒྱས་འགྱུར། །སྟེང་འོག་རྡུལ་ནི་གོ་བཟློག་འགྲོ། །དི་རིང་ཡང་ནི་དེ་རྣམས་མཐོང་། །བདག་གི་རྟགས་དེ་ཀུན་གྱིས་ཤེས། །ངེས་པར་ཁྱོད་ནི་སངས་རྒྱས་འགྱུར། །
དྲི་རྣམས་ངན་པ་སོང་བ་དང་། །ལྷ་ཡི་དྲི་ནི་འོང་བ་དང་། །དི་རིང་དེ་རྣམས་དྲི་ལྡང་བས། །ངེས་པར་ཁྱོད་ནི་སངས་རྒྱས་འགྱུར། །ལྷ་རྣམས་ཐམས་ཅད་མཐོང་བ་དང་། །གཟུགས་མེད་པ་རྣམས་སྤངས་པ་ནི། །དི་རིང་དེ་ཀུན་མཐོང་བས་ན། །ངེས་པར་
ཁྱོད་ནི་སངས་རྒྱས་འགྱུར། །དམྱལ་བ་རྣམས་ནི་ཇི་སྲིད་པ། །དེ་ཡི་ཚེ་ན་ཐམས་ཅད་མཐོང་། །དེ་རྣམས་དི་རིང་ཀུན་མཐོང་བས། །ངེས་པར་ཁྱོད་ནི་སངས་རྒྱས་འགྱུར། །སྒོ་ཆུང་དང་ནི་རི་ཡི་རྣམས། །དེ་ཡི་ཚེ་ན་མི་མཐོང་མེད། །དི་རིང་ནམ་
39-1-190a


མཁའ་བཞིན་དུ་མཐོང་། །ངེས་པར་ཁྱོད་ནི་སངས་རྒྱས་འགྱུར། །རུམ་དུ་གནས་དང་འཐོན་པ་ནི། །སྐད་ཅིག་ཙམ་གྱིས་མ་ཡིན་ནོ། །དི་རིང་དེ་རྣམས་སོ་སོར་མཐོང་། །ངེས་པར་ཁྱོད་ནི་སངས་རྒྱས་འགྱུར། །བརྩོན་འགྲུས་བརྟན་
པར་བྱས་ནས་ནི། །ངེས་པར་འབྱུང་བ་ལྡོག་མི་བྱ། །བདག་གིས་འདི་རྣམས་ལེགས་ཤེས་པས། །ངེས་པར་ཁྱོད་ནི་སངས་རྒྱས་འགྱུར། །བྱང་ཆུབ་སེམས་དཔས་སྟོབས་བཅུ་དང་ལྡན་པའི་མར་མེ་མཛད་དང་སྟོང་ཕྲག་བཅུའི་ཁོར་ཡུག་གི་ལྷ་
རྣམས་ཀྱི་གསུང་ཐོས་ནས། ཡིད་བདེ་བ་ཆེར་སྐྱེས་ཏེ་བདག་ཉིད་སྤྲོ་བར་གྱུར་ནས་བསམས་པ། སངས་རྒྱས་རྣམས་ཀྱི་དོན་ཡོད་པའི་གསུང་ཞེས་བྱ་བ་ནི་སངས་རྒྱས་རྣམས་ཀྱི་གསུང་ལས་གཞན་དུ་མི་འགྱུར་བ་ཡིན་ནོ། །
ཇི་ལྟར་ཡང་ནམ་མཁའ་ལ་རྡོ་འཕངས་ན་ལྷུང་བར་འགྱུར་བ་དང་། སྐྱེས་ནས་འཆི་བར་འགྱུར་བ་དང་། སྐྱ་རེང་ཤར་ན་ཉི་མ་འཆར་བར་འགྱུར་བ་དང་། གནས་ནས་སེང་གེ་ལངས་ནས་སྒྲ་ཕྱུང་སྟེ་འགྲོ་བ་དང་། སྦྲུམ་མ་ཡོངས་སུ་སྨིན་ནས་སྐྱེ་བར་འགྱུར་བར་ངེས་
སོ། །ངེས་པར་དེ་བཞིན་དུ་འདི་ལྟར་སངས་རྒྱས་རྣམས་ཀྱི་གསུང་ནི་ངེས་ཤིང་དོན་ཡོད་པར་འདོད་དོ། །ངེས་པར་བདག་ནི་སངས་རྒྱས་སུ་འགྱུར་རོ། །དེའི་ཕྱིར་གསུངས་པ། སངས་རྒྱས་ཀྱི་ནི་གསུང་ཐོས་ནས། །སྟོང་ཕྲག་བཅུ་དང་གཉིས་ཀ་ཡི། །ཚིམ་
ཞིང་དགྱེས་ལ་རབ་ཏུ་དགའ། །བདག་གིས་དེ་ཚེ་འདི་ལྟར་བསམས། །གཉིས་ནི་མི་གསུང་སངས་རྒྱས་ནི། །རྒྱལ་བ་དོན་ཡོད་པ་ཡི་གསུང་། །སངས་རྒྱས་རྣམས་ནི་གཞན་མི་གསུང་། །བདག་ནི་ངེས་པར་སངས་རྒྱས་འགྱུར། །ཇི་ལྟར་མཁའ་ལ་རྡོ་
འཕངས་པ། །ངེས་པར་ས་ལ་ལྷུང་བར་འགྱུར། །དེ་བཞིན་དུ་ནི་སངས་རྒྱས་ཀྱི། །གསུང་ནི་ངེས་པར་འགྱུར་བ་བཞིན། །ཇི་ལྟར་སེམས་ཅན་ཐམས་ཅད་ནི། །ངེས་པར་འཆི་བར་འགྱུར་བའོ། །དེ་བཞིན་དུ་ནི་སངས་རྒྱས་ཀྱི། །གསུང་ནི་ངེས་པར་འགྱུར་
བ་བཞིན། །ཇི་ལྟར་ནམ་ནི་ཟད་པ་ན། །ངེས་པར་ཉི་མ་འཆར་བར་འགྱུར། །དེ་བཞིན་དུ་ནི་སངས་རྒྱས་ཀྱི། །གསུང་ནི་ངེས་པར་འགྱུར་བ་བཞིན། །ཇི་ལྟར་སེང་གེའི་གནས་ནས་ནི། །སེང་གེའི་སྒྲ་ནི་ངེས་པའོ། །དེ་བཞིན་དུ་ནི་སངས་རྒྱས་ཀྱི། །
39-1-190b


གསུང་ནི་ངེས་པར་འགྱུར་བ་བཞིན། །ཇི་ལྟར་སྦྲུམ་མ་སྨིན་གྱུར་ན། །མངལ་ནས་ངེས་པར་སྐྱེ་བར་འགྱུར། །དེ་བཞིན་དུ་ནི་སངས་རྒྱས་ཀྱི། །གསུང་ནི་ངེས་པར་འགྱུར་བ་བཞིན། །ལེགས་སོ་བདག་ནི་སངས་རྒྱས་སུ་འགྱུར་རོ། །དེ་ལྟར་ངེས་
པར་བྱས་ནས་སངས་རྒྱས་སུ་བྱེད་པའི་ཆོས་ཚོལ་བས་སངས་རྒྱས་སུ་འགྱུར་བའི་ཆོས་གང་ཞིག་ན་ཡོད། གལ་ཏེ་སྟེང་ན་ཡོད་དམ་འོག་ནའམ་ཕྱོགས་སམ་མཚམས་རྣམས་ན་ཡོད་དམ་ཅི། གོ་རིམས་བཞིན་ཏུ་ཆོས་ཀྱི་དབྱིངས་ཐམས་
ཅད་ལ་བརྩམས་ནས་སྔར་གྱི་བྱང་ཆུབ་སེམས་དཔས་ཀྱང་བསྙེན་པ་དང་ངེས་པར་བརྟེན་པར་བྱ་བའི་དང་པོར་སྦྱིན་པའི་ཕ་རོལ་ཏུ་ཕྱིན་པ་གཟིགས་སོ། །དེ་ལྟར་བདག་གིས་ཀྱང་བདག་ལ་གདམས་པ། མཁས་པ་བློ་གྲོས་བཟང་པོ་ཁྱོད་
ཀྱིས་ཀྱང་འདི་ནས་བཟུང་ནས་སྦྱིན་པའི་ཕ་རོལ་ཏུ་ཕྱིན་པ་རྫོགས་པར་བྱའོ། །ཇི་ལྟར་ན་ཆུའི་བུམ་པར་ཁ་ཕུབ་ན་བུམ་པར་ཆུ་རྣམས་མི་གནས་པར་ས་ལ་བོ་བ་ཉིད་སླར་ཡང་བུམ་པ་ལ་མི་གནས་སོ། །དེ་ལྟར་འདི་ལྟར་ནོར་རམ་གྲགས་པའམ་བུ་
དང་ཆུང་མ་འམ་ཡན་ལག་དང་ཉིང་ལག་རྣམས་ལྟོས་པ་མེད་པར་སློང་བ་རྣམས་ཀྱི་དོན་དུ་ཐམས་ཅད་གང་དང་གང་འདོད་པ་ལ་ལྷག་མ་མེད་པར་བྱས་ནས་སྦྱིན་ཏེ་བྱང་ཆུབ་ཀྱི་ཤིང་དྲུང་དུ་བཞུགས་ནས་སངས་རྒྱས་ཐོབ་བོ། །དང་པོར་སྦྱིན་པའི་ཕ་རོལ་
ཏུ་ཕྱིན་པ་བརྟན་པར་བྱས་ནས་གནས་པར་བྱའོ། །དེའི་ཕྱིར་གསུངས་པ། བདག་གིས་སངས་རྒྱས་བྱེད་པའི་ཆོས། །གང་དང་དེ་རུ་བཙལ་བྱས་པ། །སྟེང་དང་འོག་དང་ཕྱོགས་བཅུ་དང་། །ཆོས་ཀྱི་དབྱིངས་ཀྱི་བར་དུའོ། །དེ་ཚེ་བཙལ་བ་ན་ནི་
མཐོང་། །དང་པོར་སྦྱིན་པའི་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡི། །ལམ་ནི་ཕ་རོལ་རྗེས་སུ་འགྲོ། །འདི་ནི་རེ་ཞིག་ཁྱོད་ཀྱིས་ཀྱང་། །བརྟན་པོར་བྱས་ནས་གཟུང་བར་གྱིས། །གལ་ཏེ་བྱང་ཆུབ་ཐོབ་འདོད་ན། །སྦྱིན་པའི་
ཕ་རོལ་ཕྱིན་པར་གྱིས། །ཇི་ལྟར་བུམ་པ་གང་གྱུར་པ། །གང་གང་ཁ་ནི་བུབ་པ་ན། །ཆུ་ནི་ལྷག་མ་མེད་པར་འབོ། །བུམ་པའི་ནང་དུ་མི་གནས་སོ། །དེ་བཞིན་དུ་ནི་སློང་བ་མཐོང་། །མཆོག་དམན་འབྲིང་པོ་གང་ཡིན་པ། །མ་ལུས་
39-1-191a


པར་ནི་སྦྱིན་པར་བྱ། །ཁ་ཕུབ་བུམ་པ་དེ་བཞིན་ནོ། །གཞན་ཡང་སངས་རྒྱས་སུ་བྱེད་པའི་ཆོས་འདི་འབའ་ཞིག་མ་ཡིན་པར་བལྟ་བར་བྱའོ། །ལྷག་པར་ཚོལ་བ་ནི་གཉིས་པ་ཚུལ་ཁྲིམས་ཀྱི་ཕ་རོལ་དུ་ཕྱིན་པ་མཐོང་ནས་འདི་
ལྟ་བུའི་སེམས་སུ་གྱུར་ཏོ། །མཁས་པ་བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་ཚུལ་ཁྲིམས་ཀྱི་ཕ་རོལ་དུ་ཕྱིན་པ་རྫོགས་པར་བྱའོ། །དཔེར་ན་གཞན་ཡང་རྒོད་གཡག་ཞེས་བྱ་བ་སྲོག་ལ་མི་ལྟ་བར་རང་གི་མཇུག་
མའི་རྔ་མ་ཉིད་བསྲུང་བ་དེ་བཞིན་དུ། ཁྱོད་ཀྱིས་ཀྱང་འདི་ནས་བཟུང་ནས་སྲོག་ལ་མི་ལྟ་བར་ཚུལ་ཁྲིམས་བསྲུངས་ན་ཁྱོད་ཀྱིས་སངས་རྒྱས་ཐོབ་པར་འགྱུར་རོ། །གཉིས་པ་ཚུལ་ཁྲིམས་ཀྱི་ཕ་རོལ་དུ་ཕྱིན་པ་བརྟན་པར་བྱས་ཏེ་གནས་པར་
བྱའོ། །དེའི་ཕྱིར་གསུངས་པ། འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་བྱེད་ཆོས། །གཞན་ལ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང་། །གཉིས་པ་ཚུལ་ཁྲིམས་ཕ་རོལ་
ཕྱིན། །སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །རེ་ཞིག་གཉིས་པ་འདི་ཡིས་ནི། །བརྟན་པོར་བྱས་ནས་གཟུང་བར་བྱ། །གལ་ཏེ་བྱང་ཆུབ་ཐོབ་འདོད་ན། །ཚུལ་ཁྲིམས་ཕ་རོལ་ཕྱིན་པར་གྱིས། །ཇི་ལྟར་རྒོད་
གཡག་སྔ་མ་ནི། །གང་དང་གང་གིས་བཟུང་བ་ན། །ལྟོས་པ་མེད་པར་སྲོག་འདོར་རོ། །རྔ་མ་ལ་དགའ་ཁྲོ་བ་མེད། །དེ་བཞིན་དུ་ནི་ས་གཞི་རུ། །ཚུལ་ཁྲིམས་ཡོངས་སུ་རྫོགས་པ་དང་། །རྟག་ཏུ་ཚུལ་ཁྲིམས་ཀུན་སྲུང་བྱེད། །རྒོད་གཡག་
རྔ་མ་བསྲུང་བ་བཞིན། །གཞན་ཡང་སངས་རྒྱས་སུ་བྱེད་པའི་ཆོས་འདི་འབའ་ཞིག་མ་ཡིན་པར་བལྟ་བར་བྱའོ། །ལྷག་པར་ཚོལ་བ་ན་གསུམ་པ་ངེས་འབྱུང་གི་ཕ་རོལ་དུ་ཕྱིན་པ་མཐོང་ནས་འདི་ལྟ་བུའི་སེམས་སུ་གྱུར་ཏོ། །མཁས་པ་
བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་ངེས་པར་འབྱུང་བའི་ཕ་རོལ་དུ་ཕྱིན་པ་ཡང་རྫོགས་པར་བྱའོ། །ཇི་ལྟར་བཙོན་རར་ཡུན་རིང་པོར་བཅིངས་ནས་བཞག་པའི་མི་དེ་ལ་འདོད་པར་མི་བྱེད་དོ། །གཞན་ཡང་ཤིན་དུ་སྡུག་བསྔལ་
39-1-191b


བའི་སེམས་དེ་ལ་དེ་བཞིན་དུ་གནས་པར་འདོད་པ་མེད་དོ། །དེ་ལྟར་འདི་ལྟར་ཁྱོད་ཀྱིས་ཀྱང་སྐྱེ་བ་ཐམས་ཅད་དུ་བཙོན་རར་བཅིངས་པ་བཞིན་བྱས་ནས་སྐྱེ་བ་ཐམས་ཅད་དུ་ཤིན་དུ་སྡུག་བསྔལ་བའི་སེམས་ཀྱིས་གྲོལ་བར་འདོད་པའི་སེམས་ཀྱིས་
ངེས་པར་འབྱུང་བ་མངོན་སུམ་དུ་འགྱུར་རོ། །དེ་ལྟར་བྱས་ན་སངས་རྒྱས་ཐོབ་པར་འགྱུར་རོ། །ངེས་པར་འབྱུང་བའི་ཕ་རོལ་དུ་ཕྱིན་པ་ལ་བརྟན་པར་བྱས་ཏེ་གནས་སོ། །དེའི་ཕྱིར་གསུངས་པ། འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་
ཐོབ་བྱེད་ཆོས། །གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང་། །གསུམ་པ་ངེས་འབྱུང་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །རེ་ཞིག་གསུམ་པ་
འདི་ཡིས་ནི། །བརྟན་པོར་བྱས་ཏེ་གཟུང་བར་བྱ། །གལ་ཏེ་བྱང་ཆུབ་ཐོབ་འདོད་ན། །ངེས་འབྱུང་ཕ་རོལ་ཕྱིན་པར་གྱིས། །ཇི་ལྟར་སྐྱེས་བུ་བཙོན་རར་བཅིངས། །ཡུན་རིང་གནས་ཤིང་སྡུག་བསྔལ་བ། །དེ་ལ་དགའ་བར་མི་བྱེད་པར། །མྱུར་དུ་
འགྲོལ་བར་འདོད་པར་སེམས། །དེ་བཞིན་ཁྱོད་ནི་སྐྱེ་ཀུན་དུ། །བཙོན་ར་བཞིན་དུ་བལྟ་བར་གྱིས། །ངེས་པར་འབྱུང་བ་སྔོན་དུ་ན། །སྐྱེ་བ་ལས་ནི་གྲོལ་བར་འགྱུར། །གཞན་ཡང་སངས་རྒྱས་སུ་བྱེད་པའི་ཆོས་འདི་འབའ་ཞིག་མ་ཡིན་པར་བལྟ་བར་
བྱའོ། །ལྷག་པར་ཚོལ་བ་ན་བཞི་པ་ཤེས་རབ་ཀྱི་ཕ་རོལ་དུ་ཕྱིན་པ་མཐོང་ནས་འདི་ལྟ་བུའི་སེམས་སུ་གྱུར་ཏོ། །མཁས་པ་བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་ཤེས་རབ་ཀྱི་ཕ་རོལ་དུ་ཕྱིན་པ་ཡང་རྫོགས་པར་བྱའོ། །
དམན་པ་དང་འབྲིང་པོ་དང་ཆེན་པོ་རྣམས་སུ་མི་སེམས་པར་དེ་རྣམས་ཀྱི་གནས་སུ་སོང་སྟེ་མཁས་པ་རྣམས་འདྲི་བར་བྱའོ། །ཇི་ལྟར་ན་བསོད་སྙོམས་ལ་འགྲོ་བའི་དགེ་སློང་དམན་པ་ལ་སོགས་པའི་གནས་སུ་སོང་སྟེ། རིགས་ཀྱི་དབྱེ་བ་མ་སྤངས་
པར་གོ་རིམས་བཞིན་དུ་བསོད་སྙོམས་ལ་འགྲོ་བ་མྱུར་དུ་རང་གི་བཟའ་བའི་ཚད་ཐོབ་པར་འགྱུར་རོ། །དེ་བཞིན་དུ་ཁྱོད་ཀྱིས་ཀྱང་མཁས་པ་ཐམས་ཅད་ཀྱི་དྲུང་དུ་སོང་སྟེ་དྲི་བར་བྱས་ན་སངས་རྒྱས་ཐོབ་པོ། །བཞི་པ་ཤེས་རབ་ཀྱི་ཕ་རོལ་དུ་ཕྱིན་པ་
39-1-192a


ལ་བརྟན་པར་བྱ་སྟེ་གནས་པར་གྱིས་ཤིག །དེའི་ཕྱིར་གསུངས་པ། འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་བྱེད་ཆོས། །གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང་། །
བཞི་པ་ཤེས་རབ་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡི། །བསྙེན་དང་བརྟེན་པར་བྱས་པས་སོ། །རེ་ཞིག་བཞི་པ་འདི་ཡིས་ནི། །བརྟན་པོར་བྱ་སྟེ་གཟུང་བར་བྱ། །གལ་ཏེ་བྱང་ཆུབ་ཐོབ་འདོད་ན། །ཤེས་རབ་ཕ་རོལ་ཕྱིན་པར་གྱིས། །ཇི་ལྟར་
དགེ་སློང་བསོད་སྙོམས་པ། །དམན་དང་འབྲིང་དང་ཆེན་པོ་ཡི། །རིགས་རྣམས་དཔྱོད་པར་མི་བྱེད་པར། །དེ་ལྟར་བཟའ་བའི་ཟས་ཐོབ་བོ། །དེ་བཞིན་ཁྱོད་ཀྱིས་དུས་ཀུན་དུ། །སྐྱེ་བོ་མཁས་ལ་ཡོངས་སུ་དྲིས། །ཤེས་རབ་ཕ་རོལ་ཕྱིན་སོང་བས། །བྱང་
ཆུབ་ཐོབ་པར་འགྱུར་བ་ཡིན། །གཞན་ཡང་སངས་རྒྱས་སུ་བྱེད་པའི་ཆོས་ནི་འདི་འབའ་ཞིག་མ་ཡིན་པར་བལྟ་བར་བྱའོ། །ལྷག་པར་བཙལ་ན་ལྔ་པ་བརྩོན་འགྲུས་ཀྱི་ཕ་རོལ་དུ་ཕྱིན་པ་ཐོབ་ནས་འདི་ལྟ་བུའི་སེམས་སུ་གྱུར་ཏོ། །མཁས་པ་བློ་གྲོས་
བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་བརྩོན་འགྲུས་ཀྱི་ཕ་རོལ་དུ་ཕྱིན་པ་ཡང་རྫོགས་པར་བྱའོ། །ཇི་ལྟར་རི་དགས་ཀྱི་རྒྱལ་པོ་སེང་གེ་དུས་ཐམས་ཅད་དུ་བརྩོན་འགྲུས་བརྟན་པོ་དང་ལྡན་པ་དེ་བཞིན་དུ་ཁྱོད་ཀྱིས་ཀྱང་སྐྱེ་བ་ཐམས་
ཅད་དུ་བརྩོན་འགྲུས་བརྟན་པར་བྱའོ། །ཞུམ་པ་མེད་པའི་བརྩོན་འགྲུས་བྱས་ན་སངས་རྒྱས་ཐོབ་པར་འགྱུར་རོ། །ལྔ་པ་བརྩོན་འགྲུས་ཀྱི་ཕ་རོལ་དུ་ཕྱིན་པ་བརྟན་པར་བྱས་ནས་གནས་པར་གྱིས་ཅིག །དེའི་ཕྱིར་གསུངས་པ། འདི་ཙམ་འབའ་ཞིག་
མ་ཡིན་གྱི། །གང་ཞིག་བྱང་ཆུབ་ཐོབ་བྱེད་ཆོས། །གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང་། །ལྔ་པ་བརྩོན་འགྲུས་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་
པས་སོ། །རེ་ཞིག་ལྔ་པོ་འདི་ཡིས་ནི། །གལ་ཏེ་བྱང་ཆུབ་མཆོག་འདོད་ན། །བརྩོན་འགྲུས་ཕ་རོལ་ཕྱིན་པར་གྱིས། །བརྟན་པོར་བྱས་ཏེ་གཟུང་བར་བྱ། །ཇི་ལྟར་རི་དགས་རྒྱལ་པོ་ནི། །སྡོད་དང་འགྲོ་བའི་གནས་རྣམས་སུ། །ཞུམ་པ་མེད་
39-1-192b


པའི་བརྩོན་འགྲུས་ཀྱིས། །ཡིད་ནི་རྟག་ཏུ་བརྟན་པ་ཡིན། །དེ་བཞིན་ཁྱོད་ཀྱིས་དུས་ཀུན་དུ། །བརྩོན་འགྲུས་བརྟན་པོར་གྱིས་ལ་ཟུང་། །བརྩོན་འགྲུས་ཕ་རོལ་ཕྱིན་གྱུར་ནས། །བྱང་ཆུབ་ཐོབ་པར་འགྱུར་བ་ཡིན། །གཞན་ཡང་སངས་རྒྱས་སུ་
བྱེད་པའི་ཆོས་འདི་འབའ་ཞིག་མ་ཡིན་པར་བལྟ་བར་བྱའོ། །ལྷག་པར་ཚོལ་བ་ན་དྲུག་པ་བཟོད་པའི་ཕ་རོལ་དུ་ཕྱིན་པ་མཐོང་ནས་འདི་ལྟ་བུའི་སེམས་སུ་གྱུར་ཏོ། །མཁས་པ་བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་བཟོད་པའི་ཕ་རོལ་
དུ་ཕྱིན་པ་ཡང་རྫོགས་པར་བྱའོ། །བཟང་པོ་དང་ངན་པར་བྱས་པ་ལ་བཟོད་པར་བྱའོ། །ཇི་ལྟར་སའི་སྟེང་དུ་གཙང་བ་དང་མི་གཙང་བ་གོས་པར་བྱས་ན་ས་གཞི་ཁྲོ་བར་མི་བྱེད་པ་བཞིན་དུ་བཟོད་ཅིང་སྲན་པ་དང་ལྷག་པར་གནས་པ་དེ་བཞིན་དུའོ། །དེ་ལྟར་
འདི་ལྟར་ཁྱོད་ཀྱིས་ཀྱང་གནོད་པ་དང་ཕན་པར་བྱས་ཀྱང་བཟོད་ཅིང་སྲན་པར་བྱས་ན་སངས་རྒྱས་ཐོབ་པར་འགྱུར་རོ། །དྲུག་པ་བཟོད་པའི་ཕ་རོལ་དུ་ཕྱིན་པ་བརྟན་པར་བྱས་ནས་གནས་པར་གྱིས་ཤིག །དེའི་ཕྱིར་གསུངས་པ། འདི་ཙམ་འབའ་
ཞིག་མ་ཡིན་གྱི། །གང་ཞིག་བྱང་ཆུབ་ཐོབ་འདོད་པ། །གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང་། །དྲུག་པ་བཟོད་པའི་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་
པར་བྱས་པས་སོ། །རེ་ཞིག་དྲུག་པ་འདི་ཡིས་ནི། །དེ་ལ་ཞེ་སྡང་མ་བྱས་ན། །ཡང་དག་བྱང་ཆུབ་ཐོབ་པར་འགྱུར། །ཇི་ལྟར་ཡང་ནི་ས་གཞི་ལ། །གཙང་དང་མི་གཙང་བྱུགས་པ་ན། །ཐམས་ཅད་བླུགས་ཀྱང་བཟོད་
པར་བྱེད། །སྐྱུག་བྲོ་བ་ནི་བྱེད་པ་མེད། །དེ་བཞིན་ཁྱོད་ཀྱིས་ཐམས་ཅད་ལ། །ཕན་དང་གནོད་པ་བྱེད་པ་ན། །བཟོད་པའི་ཕ་རོལ་ཕྱིན་གྱུར་ནས། །བྱང་ཆུབ་ཡང་དག་ཐོབ་པར་འགྱུར། །གཞན་ཡང་སངས་རྒྱས་སུ་བྱེད་པའི་
ཆོས་འདི་འབའ་ཞིག་མ་ཡིན་པར་བལྟ་བར་བྱའོ། །ལྷག་པར་ཚོལ་བ་ན་བདུན་པ་བདེན་པའི་ཕ་རོལ་དུ་ཕྱིན་པ་མཐོང་ནས་འདི་ལྟ་བུའི་སེམས་སུ་གྱུར་ཏོ། །མཁས་པ་བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་བདེན་པའི་
39-1-193a


ཕ་རོལ་དུ་ཕྱིན་པ་ཡང་རྫོགས་པར་བྱའོ། །ཐོག་མགོ་ལ་ལྷུང་བར་གྱུར་ན་ཡང་ནོར་ལ་སོགས་པའི་ཕྱིར་དུ་འདུན་པ་ལ་སོགས་པའི་དབང་གིས་ཤེས་ནས་བརྫུན་མི་སྨྲའོ། །ཇི་ལྟར་ན་ཐ་སྐར་ལ་སོགས་པའི་རྒྱུ་སྐར་
དུས་ཐམས་ཅད་དུ་རང་རང་འགྲོ་བའི་ལམ་དོར་ནས་ལམ་གཞན་ནས་མི་འགྲོ་བར་རང་གི་ལམ་ཉིད་ནས་འགྲོ་བའོ། །དེ་ལྟར་འདི་ལྟར་ཁྱོད་ཀྱིས་ཀྱང་བདེན་པ་གཟུང་ནས་བརྫུན་མི་བྱེད་པས་ནི་སངས་རྒྱས་ཐོབ་པར་འགྱུར་རོ། །བདུན་པ་བདེན་
པའི་ཕ་རོལ་དུ་ཕྱིན་པ་བརྟན་པར་བྱས་ནས་གནས་པར་གྱིས་ཤིག །དེའི་ཕྱིར་གསུངས་པ། འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་འདོད་ཆོས། །གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །དེ་ཡི་
ཚེ་ན་ཚོལ་བ་མཐོང་། །བདུན་པ་བདེན་པའི་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །རེ་ཞིག་བདུན་པ་འདི་ཡིས་ནི། །བརྟན་པར་བྱས་ནས་གནས་པར་གྱིས། །དེ་ལ་བརྫུན་ནི་མི་སྨྲ་བས། །ཡང་
དག་བྱང་ཆུབ་ཐོབ་པར་གྱིས། །ཇི་ལྟར་ཐ་སྐར་ཞེས་བྱ་བ། །ལྷ་དང་མི་རྣམས་མཚུངས་པར་ནི། །དུས་ཀྱི་ལོ་ཡི་དུས་སུ་ནི། །ལམ་གཞན་དུ་ནི་མི་འགྲོའོ། །ཁྱོད་ཀྱིས་ཀྱང་ནི་དེ་བཞིན་བདེན། །བདེན་པ་བཟུང་ནས་མི་འགྲོ་བ། །བདེན་པའི་ཕ་
རོལ་ཕྱིན་གྱུར་པས། །བྱང་ཆུབ་ཡང་དག་ཐོབ་པར་འགྱུར། །གཞན་ཡང་སངས་རྒྱས་སུ་བྱེད་པའི་ཆོས་འདི་འབའ་ཞིག་མ་ཡིན་པར་བལྟ་བར་བྱའོ། །ལྷག་པར་ཚོལ་བ་ན་བརྒྱད་པ་ལྷག་པར་གནས་པའི་ཕ་རོལ་དུ་ཕྱིན་པ་མཐོང་ནས་འདི་ལྟ་བུའི་
སེམས་སུ་གྱུར་ཏོ། །མཁས་པ་བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་ལྷག་པར་གནས་པའི་ཕ་རོལ་དུ་ཕྱིན་པ་ཡང་རྫོགས་པར་བྱའོ། །གང་ཞིག་ལྷག་པར་གནས་པར་གྱིས་ལ་དེ་ལ་ལྷག་པར་གནས་ན་གཡོ་བ་མེད་པར་འགྱུར་
རོ། །ཇི་ལྟར་ན་རི་བོ་ནི་ཕྱོགས་ཐམས་ཅད་ནས་རླུང་གིས་བསྐྱོད་ཀྱང་གཡོ་བར་མི་འགྱུར་ཞིང་བསྐྱོད་པར་མི་འགྱུར་ཅིང་། རང་གི་གནས་ཞིག་ཏུ་གནས་སོ། །དེ་ལྟར་འདི་ལྟར་ཁྱོད་ཀྱིས་ཀྱང་བདག་ཉིད་ལྷག་པར་གནས་པ་རྣམས་མི་གཡོ་བར་གྱུར་ན་སངས་
39-1-193b


རྒྱས་ཐོབ་པར་འགྱུར་རོ། །བརྒྱད་པ་ལྷག་པར་གནས་པའི་ཕ་རོལ་དུ་ཕྱིན་པ་བརྟན་པར་བྱས་ནས་གནས་པར་གྱིས་ཅིག །དེའི་ཕྱིར་གསུངས་པ། འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་འདོད་ཆོས། །གཞན་པ་ཡང་ནི་
བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང་། །བརྒྱད་པ་ལྷག་གནས་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །རེ་ཤིག་བརྒྱད་པ་འདི་ཡིས་ནི། །བརྟན་པར་བྱ་སྟེ་
གནས་པར་གྱིས། །དེ་ལ་ཁྱོད་ནི་གཡོ་མེད་པས། །ཡང་དག་བྱང་ཆུབ་ཐོབ་པར་འགྱུར། །ཇི་ལྟར་རི་བོའི་བྲག་ཆེན་པོ། །གཡོ་བ་མེད་ཅིང་ལེགས་པར་གནས། །རླུང་ཆེན་པོས་ནི་གཡོ་བ་མེད། །རང་གི་གནས་སུ་གནས་པ་ཉིད། །དེ་བཞིན་ཁྱོད་ཀྱིས་
ལྷག་གནས་པར། །ཐམས་ཅད་དུ་ནི་མི་གཡོ་བར། །ལྷག་གནས་ཕ་རོལ་ཕྱིན་གྱུར་པས། །ཡང་དག་བྱང་ཆུབ་ཐོབ་པར་འགྱུར། །གཞན་ཡང་སངས་རྒྱས་སུ་བྱེད་པའི་ཆོས་འདི་འབའ་ཞིག་མ་ཡིན་པར་བལྟ་བར་བྱའོ། །ལྷག་པར་ཚོལ་བ་ན་དགུ་
པ་བྱམས་པའི་ཕ་རོལ་དུ་ཕྱིན་པ་མཐོང་བས་དེ་ལྟ་བུའི་ཁམས་སུ་གྱུར་ཏོ། །མཁས་པ་བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་བྱམས་པའི་ཕ་རོལ་དུ་ཕྱིན་པ་ཡང་རྫོགས་པར་བྱའོ། །ཕན་པ་དང་མི་ཕན་པར་གྱུར་ཀྱང་སེམས་
གཅིག་ཏུ་བྱའོ། །ཇི་ལྟར་ཆུ་ནི་སྡིག་པ་ཅན་གྱི་སྐྱེ་བོ་དང་དགེ་བའི་སྐྱེ་བོས་ཀྱང་བསིལ་བར་གྱུར་ཅིང་གཅིག་ཏུ་མཚུངས་པར་བྱས་ནས་རེག་གོ། །དེ་ལྟར་ན་འདི་ལྟར་ཁྱོད་ཀྱིས་ཀྱང་སེམས་ཅན་ལ་བྱམས་པའི་སེམས་གཅིག་ཏུ་གྱུར་ནས་སངས་རྒྱས་
ཐོབ་པར་འགྱུར་རོ། །དགུ་པ་བྱམས་པའི་ཕ་རོལ་དུ་ཕྱིན་པ་བརྟན་པར་བྱས་ཏེ་གནས་པར་གྱིས་ཤིག །དེའི་ཕྱིར་གསུངས་པ། འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་འདོད་ཆོས། །གཞན་པ་ཡང་ནི་བཙལ་བར་བྱ། །གང་
ཞིག་ཆོས་ནི་ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང་། །དགུ་པ་བྱམས་པའི་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡི། །བསྙེན་དང་བརྟེན་པར་བྱས་པའོ། །རེ་ཤིག་དགུ་པ་འདི་ཡིས་ནི། །བྱམས་པར་བྱས་ཏེ་གནས་པར་གྱིས། །
39-1-194a


གལ་ཏེ་བྱང་ཆུབ་ཐོབ་འདོད་ན། །བྱམས་པ་མཚུངས་པ་མེད་པར་འགྱུར། །ཇི་ལྟར་ཆུ་ཞེས་བྱ་བ་ལ། །དགེ་འམ་སྡིག་པའི་སྐྱེ་བོ་ནི། །མཚུངས་པར་བསིལ་བར་གྱུར་ལ་རེག །རྡུལ་དང་དྲི་མ་སྤོང་བར་བྱེད། །དེ་ལྟར་ཁྱོད་ཀྱིས་མི་ཕན་
དང་། །ཕན་ལའང་མཚུངས་པར་བྱམས་པར་བྱ། །བྱམས་པའི་ཕ་རོལ་ཕྱིན་གྱུར་ནས། །ཡང་དག་བྱང་ཆུབ་ཐོབ་པར་འགྱུར། །གཞན་ཡང་སངས་རྒྱས་སུ་བྱེད་པའི་ཆོས་འདི་འབའ་ཞིག་མ་ཡིན་པར་བལྟ་བར་བྱའོ། །ལྷག་པར་ཚོལ་བ་ན་བཅུ་པ་བཏང་
སྙོམས་ཀྱི་ཕ་རོལ་དུ་ཕྱིན་པ་མཐོང་ནས་འདི་ལྟ་བུའི་སེམས་སུ་གྱུར་ཏོ། །མཁས་པ་བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་བཏང་སྙོམས་ཀྱི་ཕ་རོལ་དུ་ཕྱིན་པ་ཡང་རྫོགས་པར་བྱའོ། །བདེ་བ་འམ་སྡུག་བསྔལ་ཡང་བར་མ་
ལ་གནས་པར་བྱའོ། །ཇི་ལྟར་ས་གཞི་ལ་གཙང་བ་དང་མི་གཙང་བས་བྱུགས་ཀྱང་བར་མར་གནས་པར་འགྱུར་རོ། །དེ་ལྟར་འདི་ལྟར་ཁྱོད་ཀྱིས་ཀྱང་བདེ་བ་དང་སྡུག་བསྔལ་བ་ལ་བར་མར་གནས་པར་གྱུར་ན་སངས་རྒྱས་ཐོབ་པར་འགྱུར་རོ། །བཅུ་
པ་བཏང་སྙོམས་ཀྱི་ཕ་རོལ་དུ་ཕྱིན་པ་བརྟན་པར་བྱས་ལ་གནས་པར་གྱིས་ཤིག །དེའི་ཕྱིར་གསུངས་པ། འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་འདོད་ཆོས། །གཞན་པ་ཡང་ནི་བཙལ་བར་གྱིས། །གང་ཞིག་ཆོས་ནི་
ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང་། །བཅུ་པ་བཏང་སྙོམས་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །རེ་ཤིག་བཅུ་པ་འདི་ཡིས་ནི། །བརྟན་པར་བྱས་ནས་གནས་པར་གྱིས། །སྲང་ནི་གང་བར་
འགྱུར་བ་བཞིན། །ཡང་དག་བྱང་ཆུབ་ཐོབ་པར་འགྱུར། །ཇི་ལྟར་ས་གཞི་ཞེས་བྱ་ལ། །གཙང་དང་མི་གཙང་བྱུགས་པ་ན། །ལྟོས་པ་མེད་ཅིང་བཏང་སྙོམས་པས། །ཁྲོ་བ་མེད་པར་སྤོང་བ་ཡིན། །ཇི་ལྟར་ཁྱོད་ཀྱིས་ཀྱང་བདེ་སྡུག །དུས་
རྣམས་ཀུན་དུ་སྲང་བཞིན་དུ། །བཏང་སྙོམས་ཕ་རོལ་ཕྱིན་གྱུར་ནས། །ཡང་དག་བྱང་ཆུབ་ཐོབ་པར་འགྱུར། །དེ་ནས་བསམས་པ་འཇིག་རྟེན་པ་འདི་རྣམས་བྱང་ཆུབ་སེམས་དཔའ་ལ་བྱང་ཆུབ་རྫོགས་པར་བྱེད་པ་དང་སངས་རྒྱས་སུ་བྱེད་པའི་
39-1-194b


ཆོས་དེ་རྣམས་ཉིད་དོ། །ཕ་རོལ་དུ་ཕྱིན་པ་བཅུ་དོར་ན་གཞན་མེད་དོ། །ཕ་རོལ་དུ་ཕྱིན་པ་བཅུ་པོ་འདི་ནི་སྟེང་གི་ནམ་མཁའ་ན་ཡང་མེད་དོ། །འོག་གི་ས་གཞི་ལ་ཡང་མེད་དོ། །ཤར་ལ་སོགས་པའི་ཕྱོགས་རྣམས་ན་ཡང་མེད་དོ། །བདག་ཉིད་
ཁོ་ནའི་སྙིང་གི་ཤའི་ནང་ན་གནས་སོ། །དེ་ལྟར་དེའི་སྙིང་ལ་སོ་སོར་གནས་པ་མཐོང་ནས་ཐམས་ཅད་བརྟན་པར་བྱ་སྟེ་གནས་པར་བྱའོ། །ཡང་དང་ཡང་དུ་དྲན་པར་བྱ་སྟེ་ལུགས་ལས་བྱུང་བ་དང་ལུགས་ལས་བཟློག་པ་བརྟན་པར་བྱེད་དོ། །ཐ་མ་
ནས་བཟུང་སྟེ་ཐོག་མའི་བར་བསམ་པར་བྱའོ། །དང་པོ་ནས་བཟུང་ནས་ཐ་མའི་བར་བསམ་མོ། །དབུས་ནས་བཟུང་ནས་ཐོག་མ་དང་ཐ་མའི་བར་བསམ་པར་བྱའོ། །ཐོག་མ་དང་ཐ་མ་ནས་བཟུང་ནས་དབུས་ཀྱི་བར་བལྟ་བར་བྱའོ། །ལུས་
ཡོངས་སུ་གཏོང་བ་ནི་ཕ་རོལ་དུ་ཕྱིན་པ་ཞེས་བྱ་བའོ། །ཕྱིའི་ལོངས་སྤྱོད་ཡོངས་སུ་གཏོང་བ་ནི་ཉེ་བའི་ཕ་རོལ་དུ་ཕྱིན་པ་ཞེས་བྱ་བའོ། །སྲོག་ཡོངས་སུ་གཏོང་བ་ནི་དོན་དམ་པའི་ཕ་རོལ་དུ་ཕྱིན་པ་ཞེས་བྱ་བའོ། །ཕ་རོལ་དུ་ཕྱིན་པ་བཅུ་པོ་དང་། ཉེ་
བའི་ཕ་རོལ་དུ་ཕྱིན་པ་བཅུ་པོ་དང་། དོན་དམ་པའི་ཕ་རོལ་དུ་ཕྱིན་པ་བཅུ་པོའོ། །མེའི་སྟེངས་སུ་འབྲུ་མར་བསྐོལ་བ་བཞིན་དུ་ཁོར་ཡུག་གི་ནང་དུ་རྒྱ་མཚོ་ཆེན་པོ་རི་བོ་མཆོག་རབ་ཀྱིས་བསྲུབ་པ་བཞིན་དུ་དྲན་པར་བྱ་སྟེ། དེའི་ཕ་རོལ་དུ་ཕྱིན་
པ་བཅུ་དྲན་པར་བྱས་ནས་ཆོས་ཀྱི་གཟིས་འབུམ་ཕྲག་གཉིས་དང་སྟོང་ཕྲག་བཞི་བཅུ་ལྷག་པའི་ས་ཆེན་པོ་འདིའི་སྟུགས་ལ་གླང་པོ་ཆེས་རྐང་པས་གནོན་ཅིང་སྨྱུག་མ་འཆག་པ་བཞིན་དུའོ། །བུར་ཤིང་གི་འཁྲུལ་འཁོར་བཞིན་དུ་བཙིར་བ་དང་
སྒྲ་ཆེན་པོ་སྒྲོགས་པ་བཞིན་དུ་ཡང་དག་པར་སྒྲོགས་སོ། །རབ་ཏུ་གཡོས་སོ། །ཡང་དག་པར་རབ་ཏུ་གཡོས་ཏེ་རྫ་མཁན་གྱི་འཁོར་ལོ་བཞིན་ནོ། །འབྲུ་མར་གྱི་འཁྲུལ་འཁོར་བཞིན་དུ་ཡོངས་སུ་བསྐོར་རོ། །དེའི་ཕྱིར་གསུངས་པ། 
འདི་ཡི་འཇིག་རྟེན་དེ་རྣམས་ཉིད། །གང་ཞིག་བྱང་ཆུབ་ཐོབ་བྱེད་ཆོས། །འདི་ནི་སྟེང་དང་གཞན་ནའང་མེད། །བརྟན་པར་བྱ་སྟེ་སེམས་ལ་ཞོག །རང་བཞིན་གྱིས་ནི་གཡོ་མེད་པར། །འདི་ཡི་ཆོས་ནི་དྲན་པར་བྱེད། །ཆོས་ཀྱི་གཞི་ཡི་
39-1-195a


ས་གཞི་ནི། ། འཇིག་རྟེན་སྟོང་ཕྲག་རབ་ཏུ་གཡོས། །སེམས་མེད་པའི་ས་གཞི་ནི། །བུར་ཤིང་འཁྲུལ་འཁོར་བཞིན་དུ་བཙིར། །འབྲུ་མར་འཁྲུལ་འཁོར་བཞིན་དུ་འཁོར། །དེ་ལྟར་ས་ནི་རབ་ཏུ་གཡོས། །ས་
ཆེན་པོ་འདི་གཡོས་པས་དགའ་བ་ཅན་གྱི་གྲོང་ཁྱེར་ན་གནས་པའི་མི་རྣམས་ལྡང་བར་མ་ནུས་ཏེ། བསྐལ་པའི་མཐའ་ཡི་རླུང་གིས་བསྐྱོད་པའི་སའི་ཤིང་ཆེན་པོ་གཡོས་པ་བཞིན་རྒྱལ་བ་དང་བག་མེད་པས་འགྱེལ་བར་གྱུར་ཏོ། །བུམ་པ་
ལ་སོགས་པའི་སྣོད་ནི་མཛད་པ་དང་ཕན་ཚུན་དུ་ཕྲད་པའི་སྒྲ་དང་ཕྱེ་མ་དང་དུམ་བུར་གྱུར་ཏོ། །སྐྱེ་བོ་ཐམས་ཅད་འཇིགས་པར་གྱུར་ནས་སྟོན་པའི་དྲུང་དུ་ཉེ་བར་སོང་ངོ་། །བཅོམ་ལྡན་འདས་ཅི་ལགས་འདིའི་ཀླུ་འཁྲུགས་པ་འམ་འདིའི་འབྱུང་པོ་འམ་
གནོད་སྦྱིན་ནམ་ལྷ་རྣམས་སམ་གཞན་རྣམས་འཁྲུགས་སམ་བདག་ཅག་གིས་འཚལ་བར་མ་གྱུར་ཏོ། །གཞན་ཡང་འདིའི་སྐྱེ་བོ་ཆེན་པོ་ཐམས་ཅད་ལ་ཉེ་བར་འཚེ་བར་གྱུར་ཏོ། །ཅིའི་རྒྱུ་འདིའི་འཇིག་རྟེན་གྱི་སྡིག་པ་ལས་གྱུར་རམ། ཡང་ན་དགེ་
བ་ལས་གྱུར། བདག་ཅག་ལ་འདི་རྣམས་ཀྱི་རྒྱུ་མཚན་རྣམས་གསུང་དུ་གསོལ་ཞེས་ཞུས་སོ། །སྟོན་པས་དེ་རྣམས་ཀྱི་གཏམ་ཐོས་ནས། ཁྱེད་རྣམས་འཇིགས་པར་མ་བྱེད་ཅིག །ཁྱེད་རྣམས་ཅུང་ཟད་ཀྱང་མ་སེམས་ཤིག །མཚན་མ་འདི་
རྣམས་ལ་ཁྱེད་རྣམས་ལ་འཇིགས་པ་མེད་དོ། །གང་ཚེ་བདག་གིས་དེ་རིང་མཁས་པ་བློ་གྲོས་བཟང་པོ་དཀའ་ཐུབ་པ་མ་འོངས་པ་ན་གཽ་ཏ་མ་ཞེས་བྱ་བའི་སངས་རྒྱས་སུ་འགྱུར་རོ་ཞེས་ལུང་བསྟན་ཏོ། །དེ་ནི་འདིར་ཕ་རོལ་དུ་ཕྱིན་པ་དྲན་པར་བྱེད་དོ། ། 
དེས་ཕ་རོལ་དུ་ཕྱིན་པ་དྲན་པར་བྱེད་ཅིང་དཔྱོད་དོ། །དེའི་ཆོས་ཀྱི་གཟི་བརྗིད་ཀྱིས་སྟོང་ཕྲག་བཅུའི་འཇིག་རྟེན་གྱི་ཁམས་ཐམས་ཅད་སྐད་ཅིག་ཙམ་གྱིས་གཡོ་བ་དང་སྒྲ་འབྱིན་ནོ་ཞེས་གསུང་ངོ་། །དེའི་ཕྱིར་གསུངས་པ། ཇི་སྲིད་འཁོར་རྣམས་ཡོད་
པ་ལ། །སངས་རྒྱས་ཀྱི་ནི་སྦྲེལ་བས་ན། །དེ་ནི་དེ་རུ་སྡུག་བསྔལ་སེམས། །བརྒྱལ་བར་གྱུར་ནས་ས་ལ་ཉལ། །བུམ་པ་སྟོང་ཕྲག་དུ་མ་དང་། །སྣོད་ཆེན་བརྒྱ་ཕྲག་མང་པོ་རྣམས། །དེར་ནི་ཕྱེ་མ་ཞིབ་མོར་གྱུར། །ཕན་ཚུན་ཐུག་ཅིང་འཆག་
39-1-195b


པས་སོ། །བརྒྱལ་དང་སྐྲག་དང་འཇིགས་པ་དང་། །གནོད་ཅིང་གཟིར་བའི་སེམས་ཀྱིས་འགྱེལ། །སྐྱེ་བོ་ཐམས་ཅད་གཅིག་ཏུ་འདུས། །མར་མེ་མཛད་ཀྱི་དྲུང་དུ་སོང་། །འཇིག་རྟེན་པ་རྣམས་ཅི་ཕྱིར་གྱུར། །དགེ་བ་འམ་ཡང་ན་སྡིག་གམ་ཅི། །
འཇིག་རྟེན་ཀུན་ལ་ཉེར་འཚེ་བྱུང་། །སྤྱན་ལྡན་ལེགས་པར་གསུང་དུ་གསོལ། །དེ་རྣམས་ཀུན་ལ་ཆོས་བསྟན་ཅིང་། །ཐུབ་པ་ཆེན་པོ་མར་མེ་མཛད། །འཇིགས་པར་མ་བྱེད་དབུགས་དབྱུང་གིས། །འདི་ཡི་ས་གཞི་གཡོ་བས་ནི། །གང་ཞིག་དེ་རིང་
བདག་ལུང་བསྟན། །འཇིག་རྟེན་པ་རྣམས་སངས་རྒྱས་འགྱུར། །དེ་ནི་ཆོས་ནི་དྲན་པར་བྱེད། །སྔོན་གྱི་རྒྱལ་བ་བསྟེན་བྱས་ཤིང་། །དེ་ཡི་ཆོས་རྣམས་དྲན་བྱེད་པས། །སངས་རྒྱས་ས་ནི་མ་ལུས་པ། །དེས་ན་འདི་ཡི་ས་རྣམས་གཡོས། །ལྷ་དང་
བཅས་པ་སྟོང་ཕྲག་བཅུ། །སྐྱེ་བོ་ཆེན་པོ་རྣམས་ཀྱིས་དེ་བཞིན་གཤེགས་པའི་གསུང་ཐོས་པས་དགའ་བ་དང་ཚིམ་པ་སྐྱེས་ནས་མེ་ཏོག་དང་དྲི་བཟང་དང་བྱུག་པ་རྣམས་བླངས་ཏེ་དགའ་བ་ཅན་གྱི་གྲོང་ཁྱེར་ནས་འཐོན་ནས་བྱང་ཆུབ་སེམས་དཔའི་དྲུང་
དུ་སོང་སྟེ་མེ་ཏོག་ལ་སོགས་པས་མཆོད་ནས་ཕྱག་དང་བསྟོད་པ་བྱས་ཏེ་དགའ་བ་ཅན་གྱི་གྲོང་ཁྱེར་ཉིད་དུ་གནས་སོ། །བྱང་ཆུབ་སེམས་དཔས་ཀྱང་ཕ་རོལ་དུ་ཕྱིན་པ་བཅུ་དྲན་པར་བྱས་ནས་བརྩོན་འགྲུས་བརྟན་པར་བྱ་སྟེ་ལྷག་པར་གནས་ནས་སྟན་
ལས་ལངས་སོ། །དེའི་ཕྱིར་གསུངས་པ། སངས་རྒྱས་ཀྱི་ནི་གསུང་ཐོས་ནས། །དེ་མ་ཐག་ཏུ་འཇིགས་མེད་སེམས། །ཐམས་ཅད་བདག་གི་དྲུང་དུ་འོངས། །སླར་ཡང་ཕྱག་ནི་བྱས་ནས་སོ། །སངས་རྒྱས་ཡོན་ཏན་སེམས་པར་བྱེད། །དེ་
ཚེ་བདག་གིས་སྟན་ལས་ལངས། །མར་མེ་མཛད་ལ་ཕྱག་བྱས་སོ། །དེ་ནས་བྱང་ཆུབ་སེམས་དཔའ་སྟན་ལས་ལངས་པ་ན་སྟོང་ཕྲག་བཅུའི་ལྷ་ཐམས་ཅད་འདུས་ནས་ལྷའི་མེ་ཏོག་དང་དྲི་བཟང་གིས་མཆོད་པ་བྱས། འཕགས་པ་བློ་གྲོས་
བཟང་པོ་དཀའ་ཐུབ་པ་དེ་ཡིས་དེ་རིང་སྟོབས་བཅུ་དང་ལྡན་པའི་མར་མེ་མཛད་ཀྱིས་ཞབས་དྲུང་དུ་དོན་ཆེན་པོ་དོན་དུ་གཉེར་བའི་ཕྱིར་དོན་དུ་གཉེར་ཏོ། །དེ་ཡིས་དེ་རྣམས་ལ་བར་གཅོད་མེད་ཅིང་རྫོགས་པར་འགྱུར་རོ། །དེ་ལ་འཇིགས་པ་མེད་པ་དང་། ཞུམ་པ་
39-1-196a


མེད་པར་འགྱུར་རོ། །སྐུ་ལ་ནད་ཅུང་ཟད་ཀྱང་མི་འབྱུང་ཞིང་མྱུར་དུ་ཕ་རོལ་དུ་ཕྱིན་པ་རྫོགས་པར་བྱས་ནས་ཡང་དག་པར་རྫོགས་པའི་སངས་རྒྱས་གྲུབ་པར་གྱིས་ཅིག །ཇི་ལྟར་མེ་ཏོག་ཅན་གྱི་ཤིང་ངམ་འབྲས་བུ་ཅན་གྱི་ཤིང་དུས་
སུ་མེ་ཏོག་སྨིན་པ་དང་འབྲས་བུ་སྨིན་པ་ཉིད་དོ། །དེ་བཞིན་དུ་ཁྱོད་ཀྱིས་ཀྱང་དེའི་དུས་སུ་ལྷག་པར་གནས་པར་བྱེད་པ་ལ་མྱུར་དུ་མཆོག་རྫོགས་པར་བྱེད་པ་ལ་སོགས་པའི་བསྟོད་པ་དང་བཀྲ་ཤིས་པས་བསྟོད་དོ། །དེ་བཞིན་དུ་བསྟོད་པ་བྱས་
ནས་ལྷ་རྣམས་རང་རང་གི་གནས་སུ་སོང་ངོ་། །བྱང་ཆུབ་སེམས་དཔས་ཀྱང་ལྷ་ལ་སོགས་པའི་བསྟོད་པ་ཐོས་པར་བྱས་ནས། བདག་གིས་ཕ་རོལ་དུ་ཕྱིན་པ་བཅུ་རྫོགས་པར་བྱས་ཏེ་བསྐལ་པ་གྲངས་མེད་པ་བཞི་དང་འབུམ་ཕྲག་གཅིག་
ལྷག་པའི་མཐར་སངས་རྒྱས་ཐོབ་པར་འགྱུར་བས་བརྩོན་འགྲུས་བརྟན་པོ་ལྷག་པར་གནས་ནས་ནམ་མཁའ་ལ་འཕགས་ཏེ་གངས་ཅན་གྱི་གནས་ཉིད་ལ་གཤེགས་སོ། །དེའི་ཕྱིར་གསུངས་པ། ལྷ་དང་མི་ཡི་མེ་ཏོག་རྣམས། །ལྷ་དང་
མི་རྣམས་གཉིས་ཀ་ཡིས། །སྟན་ལས་ལངས་པར་གྱུར་ནས་ནི། །མེ་ཏོག་མཚུངས་པར་བསྡུས་ནས་སོ། །ལྷ་དང་མི་རྣམས་གཉིས་ཀ་ཡང་། །ཐམས་ཅད་ཞི་བར་གྱུར་ཞེས་བསྟོད། །ཁྱོད་ཀྱིས་ཆེན་པོ་དོན་དུ་གཉེར། །ཇི་ལྟར་འདོད་པ་དེ་ཐོབ་
པོ། །དུས་མིན་འཆི་བ་རིང་དུ་སོང་། །ནད་རྣམས་ཐམས་ཅད་ཉམས་པར་གྱུར། །ཁྱོད་ལ་བར་ཆད་མི་འབྱུང་ངོ་། །མཆོག་གི་བྱང་ཆུབ་མྱུར་དུ་ཐོབ། །ཇི་ལྟར་དུས་སུ་སླེབ་པ་ན། །ལྗོན་ཤིང་མེ་ཏོག་བྱེ་བར་གྱུར། །དེ་བཞིན་ཁྱོད་ཀྱི་དཔའ་ཆེན་
པོས། །སངས་རྒྱས་ཡེ་ཤེས་མེ་ཏོག་གྱུར། །གང་ཞིག་ཇི་ལྟར་རྫོགས་སངས་རྒྱས། །ཕ་རོལ་ཕྱིན་བཅུ་རྫོགས་པར་བྱས། །དེ་བཞིན་ཁྱོད་ཀྱི་དཔའ་ཆེན་པོས། །ཕ་རོལ་ཕྱིན་བཅུ་རྫོགས་པར་གྱིས། །ཇི་ལྟར་གང་ཞིག་རྫོགས་སངས་
རྒྱས། །བྱང་ཆུབ་སྙིང་པོ་རྫོགས་པར་གྱུར། །དེ་བཞིན་ཁྱོད་ཀྱི་དཔའ་ཆེན་པོས། །རྒྱལ་བའི་བྱང་ཆུབ་རྫོགས་པར་གྱིས། །གང་ཞིག་ཇི་ལྟར་རྫོགས་སངས་རྒྱས། །ཆོས་ཀྱི་འཁོར་ལོ་བསྐོར་བར་གྱུར། །དེ་བཞིན་ཁྱོད་ཀྱི་དཔའ་ཆེན་
39-1-196b


པོས། །ཆོས་ཀྱི་འཁོར་ལོ་བསྐོར་བར་གྱིས། །ཇི་ལྟར་ཟླ་བ་ཉ་བ་བཞིན། །ཡོངས་སུ་དག་པས་འོད་འགྱེད་པ། །དེ་བཞིན་ཁྱོད་ཀྱིས་བསམ་རྫོགས་པའི། །སྟོང་ཕྲག་བཅུ་ཡི་འོད་ཕྱུང་ཅིག །ཉི་མ་སྒྲ་གཅན་ལས་གྲོལ་བ། །
ཚ་ཞིང་འོད་ཟེར་རབ་ཏུ་འགྱེད། །དེ་བཞིན་འཇིག་རྟེན་གྲོལ་བྱས་ནས། །ཁྱོད་ཀྱི་དཔལ་ལྡན་འོད་ཟེར་ཕྱུང་། །གང་ཞིག་ཇི་ལྟར་ཆུ་ཀླུང་ནི། །རྒྱ་མཚོ་ཆེན་པོའི་རྗེས་སུ་འགྲོ། །དེ་ལྟར་ལྷ་མིའི་འཇིག་རྟེན་ཚོགས། །ཁྱོད་ཀྱི་རྗེས་
སུ་འཇུག་པར་འགྱུར། །དེ་རྣམས་ཁྱོད་ལ་བསྟོད་ཅིང་བསྔགས། །ཆོས་བཅུ་པོ་ལ་གནས་བྱས་ནས། །དེ་ཡི་ཆོས་རྣམས་རྫོགས་བྱེད་ཅིང་། །དེ་ཚེ་ནགས་ཚལ་ཆེན་པོར་ཕྱིན། །མཁས་པ་བློ་གྲོས་བཟང་པོའི་གཏམ་དུ་བྱ་
བ་རྫོགས་སོ།། །།དགའ་བ་ཅན་གྱི་གྲོང་ཁྱེར་དུ་གནས་པ་རྣམས་གྲོང་ཁྱེར་དུ་ཞུགས་ནས་སངས་རྒྱས་ལ་སོགས་པའི་དགེ་སློང་གི་དགེ་འདུན་རྣམས་ལ་སྦྱིན་པ་ཆེན་པོ་གཏང་ངོ་། །སྟོན་པས་དེ་རྣམས་ལ་ཆོས་བསྟན་ཅིང་བསྟན་ནས་སྐྱེ་བོ་མང་
པོ་སྐྱབས་སུ་འགྲོ་བ་ལ་གནས་པར་བྱས་ཏེ། དགའ་བ་ཅན་གྱི་གྲོང་ཁྱེར་ནས་འཐོན་ཏེ། ལྷག་པར་གནས་པ་ཇི་སྲིད་འཚོ་ཡི་བར་དེ་སྲིད་དུ་གནས་ནས་སངས་རྒྱས་ཀྱི་འཕྲིན་ལས་ཐམས་ཅད་བྱེད་ཅིང་གོ་རིམས་བཞིན་དུ་ལྷག་མ་
མེད་པར་ཡོངས་སུ་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །དེ་ལ་ཅུང་ཟད་བརྗོད་པས་དེ་ཐམས་ཅད་ལ་སངས་རྒྱས་ཀྱི་རྒྱུད་ལ་བརྗོད་པའི་རིགས་པ་དེ་བཞིན་རིག་པར་བྱའོ། །དེ་ལ་གསུངས་པ། 
དེ་ཚེ་ཁྱོད་རྣམས་མཆོད་སྟོན་བྱེད། །དགེ་འདུན་དང་བཅས་འཇིག་རྟེན་འདྲེན། །དེ་ལ་སྐྱབས་སུ་འགྲོ་བ་ཡིན། །སྟོན་པ་མར་མེ་མཛད་པ་ལ། །དེ་བཞིན་གཤེགས་པས་ངེས་གསུངས་པའི། །གང་ཞིག་སྐྱབས་སུ་འགྲོ་བར་གྱུར། །
གང་ཞིག་ཚུལ་ཁྲིམས་ལྔ་དང་ལྡན། །གཞན་ཡང་ཚུལ་ཁྲིམས་བཅུ་པོ་ཡི། །གང་ཞིག་ལ་ནི་གཞན་བྱིན་པ། །མཆོག་གི་འབྲས་བུ་བཞི་པོ་དང་། །གང་ཞིག་ལ་ནི་མཚུངས་མེད་ཆོས། །སོ་སོ་ཡང་དག་རིག་པ་བྱིན། །ཕུན་ཚོགས་
39-1-197a


མཆོག་ནི་གང་ཞིག་ལ། །བརྒྱན་ནས་མི་ཡི་ཁྱུ་མཆོག་བྱིན། །གང་ཞིག་ལ་ནི་རིག་པ་གསུམ། །མངོན་པར་ཤེས་པ་དྲུག་ལ་ཞུགས། །དེ་ཡིས་རིག་པ་སྐྱེ་བོའི་ཚོགས། །ཐུབ་པ་ཆེན་པོའི་གདམས་པ་བྱིན། །དེ་ཡིས་རྒྱ་
ཆེན་པོར་ནི་གྱུར། །འཇིག་རྟེན་མགོན་པོའི་བསྟན་ལའོ། །ཁྱུ་མཆོག་ཕྲག་པ་འགྲམ་ཆེན་པོ། །མར་མེ་མཛད་ཀྱི་མཚན་དང་ལྡན། །སྐྱེ་བོ་མང་པོ་སྒྲོལ་བར་བྱེད། །ངན་འགྲོ་ཡོངས་སུ་གྲོལ་བར་བྱེད། །གྲོལ་བའི་ཕྱིར་དུ་སྐྱེ་བོ་མཐོང་། །སྟོང་
ཕྲག་བརྒྱ་ཡི་དཔག་ཚད་དུ། །སྐད་ཅིག་ཙམ་གྱི་ཉེ་བར་སོང་། །ཐུབ་པ་ཆེན་པོ་དེ་མཁྱེན་ཕྱིར། །དང་པོར་འདུས་པའི་སངས་རྒྱས་ཀྱིས། །བྱེ་བ་བརྒྱ་པོ་རྟོགས་པར་བྱས། །མགོན་པོ་འདུས་པ་གཉིས་པ་ནི། །འབུམ་ཕྲག་གཅིག་གིས་
རྟོགས་པར་བྱས། །གང་ཚེ་ལྷ་ཡི་གནས་སུ་ནི། །སངས་རྒྱས་ཀྱིས་ནི་ཆོས་བསྟན་ནོ། །བྱེ་བ་སྟོང་ཕྲག་དགུ་བཅུ་ཡི། །འདུས་པ་གསུམ་པ་ལ་ནི་གྱུར། །དེ་རྣམས་འདུས་པ་གསུམ་དུ་གྱུར། །སྟོན་པ་མར་མེ་མཛད་ཀྱིའོ། །བྱེ་བ་སྟོང་
ཕྲག་བརྒྱ་ཡིས་ནི། །དང་པོ་ཡི་ནི་འདུས་པ་ཡིན། །སླར་ཡང་ནཱ་ར་དྷ་ཡི་ཕུར། །རྒྱལ་བ་གཅིག་པུར་བཞུགས་པ་ནི། །ཟག་པའི་དྲི་མ་ཟད་པ་ཡི། །བྱེ་བ་བརྒྱ་ནི་ཞི་བ་དང་། །དཔའ་བོ་ཆེན་པོ་ཇི་སྲིད་བཞུགས། །རི་ཡི་སྟེང་ན་བལྟ་ན་སྡུག །སྟོང་
ཕྲག་བྱེ་བ་དགུ་བཅུ་ཡིས། །དེ་ཚེ་ཐུབ་པ་ཡི་ནི་འཁོར། །བདག་གིས་དེ་ཡི་དུས་སུ་ནི། །སྡོམ་བརྩོན་དཀའ་ཐུབ་པ་ཡི་མཆོག །བདག་ནི་བར་སྣང་ལ་ནི་འགྲོ། །མངོན་ཤེས་ལྔ་ཡི་ཕ་རོལ་སོན། །སྟོང་ཕྲག་བཅུ་དང་ཉི་ཤུ་ནི། །ཆོས་ལ་
འདུས་པར་གྱུར་པའོ། །གཅིག་དང་གཉིས་ཀྱི་འདུས་པ་ནི། །བགྲང་དུ་མེད་ཅིང་གྲངས་མེད་དོ། །རྒྱ་ཆེ་དེད་དཔོན་ཅང་ཤེས་པ། །དེ་ཚེ་རྫུ་འཕྲུལ་ལྡན་ཞིང་རྫོགས། །བཅོམ་ལྡན་འདས་ནི་མར་མེ་མཛད། །བསྟན་པ་ཤིན་དུ་དག་ཅིང་མཛེས། །
འབུམ་ཕྲག་བཞི་པོ་རྣམས་ལ་ནི། །མངོན་ཤེས་དྲུག་དང་རྫུ་འཕྲུལ་ལྡན། །མར་མེ་མཛད་ནི་འཇིག་རྟེན་མཁྱེན། །རྟག་ཏུ་འཁོར་རྣམས་ཡོངས་དག་ལྡན། །གང་ཞིག་དེ་ཡི་དུས་སུ་ནི། །མི་རྣམས་དངོས་པོ་གཏོང་བ་དང་། །སེམས་ཀྱི་ལྷག་མ་མ་ཐོབ་
39-1-197b


པ། །དེ་རྣམས་སྐུར་པ་འདེབས་པར་གྱུར། །མེ་ཏོག་བཟང་པོའི་ཚིག་རྙེད་པ། །དགྲ་བཅོམ་རྣམས་ནི་དེ་དང་མཚུངས། །དྲི་མ་མེད་ཅིང་ཟག་པ་ཟད། །ལྷ་དང་མི་རྣམས་ཉེ་བར་མཛེས། །གྲོང་ཁྱེར་དགའ་བ་ཅན་ཞེས་པ། །བློ་གྲོས་བཟང་པོ་རྒྱལ་པོའི་
རིགས། །ཡུམ་ནི་བློ་གྲོས་བཟང་མོ་ཡིན། །སྟོན་པ་མར་མེ་མཛད་ཡིན་ནོ། བཀྲ་ཤིས་བཟང་པོ་ཉེ་རྒྱལ་ནི། །ཉན་ཐོས་རྣམས་ཀྱི་མཆོག་ཡིན་ནོ། །ལེགས་འོངས་ཞེས་པ་ཉེ་གནས་ཡིན། །སྟོན་པ་མར་མེ་མཛད་པའོ། །དགའ་བ་ཉིད་དང་ཤིན་དུ་དགའ། །
ཉན་ཐོས་མ་ཡི་མཆོག་ཡིན་ནོ། །བཅོམ་ལྡན་དེ་ཡི་བྱང་ཆུབ་ཤིང་། །བིམ་པ་ལ་ཞེས་བྱ་བ་ཡིན། །མཐོ་ཚད་ཁྲུ་ནི་བརྒྱད་བཅུ་པ། །ཐུབ་པ་ཆེན་པོ་མར་མེ་མཛད། །ཤིང་བཞིན་རབ་ཏུ་འབར་བ་ཡི། །མེ་ཏོག་སཱ་ལའི་ཤིང་རྒྱས་བཞིན། །ལོ་ནི་སྟོང་
ཕྲག་བརྒྱ་རུ་ནི། །དྲང་སྲོང་ཆེན་པོ་དེ་ཡི་ཚེ། །དེ་སྲིད་དུ་ནི་གནས་པ་སྟེ། །སྐྱེ་བོ་མང་པོ་སྒྲོལ་བར་བྱེད་། །ཆོས་ཀྱི་སྣང་བར་བྱས་ནས་ནི། །སྐྱེ་བོ་མང་པོ་ཡང་དག་སྒྲོལ། །མེ་ཡི་ཕུང་པོ་བཞིན་དུ་གསལ། །དེ་ནས་ཉན་ཐོས་དང་བཅས་འདས། །དེ་ཡང་
རྫུ་འཕྲུལ་དེ་གྲགས་པ། །རིན་ཆེན་འཁོར་ལོ་དེ་ཞབས་ལ། །ཐམས་ཅད་ཀུན་ནས་བྲལ་བ་དང་། །འདུས་བྱས་ཆོས་རྣམས་གཏོང་བའོ། །མར་མེ་མཛད་ཀྱི་འོག་ཏུ་ནི། །འདྲེན་པ་ཀཽ་ཌི་ནྱ་ཞེས་པ། །གཟི་བརྗིད་དཔག་མེད་མཐའ་ཡས་གྲགས། །
རིང་ལ་སེམས་པ་གཞལ་དུ་མེད། །སླར་ཡང་བཅོམ་ལྡན་འདས་མར་མེ་མཛད་ཀྱི་འོག་གི་ཆར་བསྐལ་པ་གྲངས་མེད་པ་གཅིག་འདས་ནས། སྟོན་པའི་འདྲེན་པ་ཀཽ་ཌི་ནྱ་ཞེས་བྱ་བ་བྱོན་ནོ། །དེའི་ཡང་ཉན་ཐོས་འདུས་པ་གསུམ་དུ་གྱུར་ཏོ། །
འདུས་པ་དང་པོ་ལ་བྱེ་བ་སྟོང་ཕྲག་བརྒྱའོ། །འདུས་པ་གཉིས་པ་ལ་བྱེ་བ་སྟོང་ཕྲག་གཅིག་གོ། །འདུས་པ་གསུམ་པ་ལ་ནི་བྱེ་བ་ཕྲག་དགུ་བཅུའོ། །དེའི་ཚེ་བྱང་ཆུབ་སེམས་དཔའ་རྣམ་པར་རྒྱལ་བ་ཞེས་བྱ་བ་འཁོར་ལོས་སྒྱུར་བའི་རྒྱལ་
པོར་གྱུར་ཏོ། །བྱེ་བ་སྟོང་ཕྲག་བརྒྱའི་གྲངས་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཆེན་པོ་རྣམས་ལ་སྦྱིན་པ་ཆེན་པོ་གཏོང་ངོ་། །སྟོན་པས་བྱང་ཆུབ་སེམས་དཔའ་སངས་རྒྱས་སུ་འགྱུར་རོ་ཞེས་ལུང་བསྟན་པར་བྱས་ནས་
39-1-198a


ཆོས་བསྟན་ནོ། །དེས་སྟོན་པའི་ཆོས་ཐོས་ནས་རྒྱལ་སྲིད་སྤངས་ནས་རབ་ཏུ་བྱུང་ངོ་། །དེས་སྡེ་སྣོད་གསུམ་པོ་བསླབས་ནས་སྙོམས་པར་འཇུག་པ་བརྒྱད་དང་མངོན་པར་ཤེས་པ་ལྔ་བསྐྱེད་དོ། །བསམ་གཏན་མ་བོར་བར་ཚངས་
པའི་འཇིག་རྟེན་དུ་སྐྱེས་སོ། །སླར་ཡང་སངས་རྒྱས་ཀཽ་ཌི་ནྱ་དེའི་གྲོང་ཁྱེར་དགའ་བ་ཅན་ཡིན་ནོ། །ཤིན་དུ་དགའ་བའི་རྒྱལ་པོ་ནི་ཡབ་པོ། །རིགས་བཟང་ལྷ་མོ་ནི་ཡུམ་མོ། །བཟང་པོ་དང་ལེགས་བཟང་གཉིས་ནི་ཉན་ཐོས་རྣམས་ཀྱི་མཆོག་གོ། །མི་
འགལ་བ་ཞེས་བྱ་བ་ནི་ཉེ་གནས་སོ། །རྒྱལ་མ་དང་ཉེ་རྒྱལ་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་དགེ་བའི་ཤིང་ནི་ཤཱ་ལ་བྱའོ། །སྐུའི་མཐོ་ཚད་དུ་ཁྲུ་བརྒྱད་བཅུ་རྩ་བརྒྱད་དོ། །སྐུ་ཚེའི་ཚད་ནི་ལོ་སྟོང་ཕྲག་བརྒྱའོ། །དེའི་འོག་གི་ཆར་བསྐལ་
པ་གྲངས་མེད་པ་གཅིག་འདས་ནས་བསྐལ་པ་གཅིག་གི་ནང་དེ་ཉིད་དུ་སངས་རྒྱས་བཞི་བྱོན་པར་གྱུར་ཏོ། །བཀྲ་ཤིས་བཟང་པོ་དང་། ཐུགས་བཟང་པོ་དང་། ནམ་གྲུ་ཅན་དང་མ་ངེས་པ་ཅན་ནོ། །བཅོམ་ལྡན་འདས་བཀྲ་ཤིས་བཟང་པོའི་ཉན་ཐོས་ཀྱི་འདུས་
པ་གསུམ་དུ་འགྱུར་ཏེ། དེའི་འདུས་པ་དང་པོ་ནི་བྱེ་བ་སྟོང་ཕྲག་བརྒྱའི་དགེ་སློང་ངོ་། །གཉིས་པ་ལ་བྱེ་བ་སྟོང་ཕྲག་གཅིག་གོ། །གསུམ་པ་ལ་བྱེ་བ་ཕྲག་དགུ་བཅུའོ། །མའི་སྤུན་གྱི་གཞོན་ནུ་ཀུན་དགའ་བོ་ཞེས་བྱ་བ་བྱེ་བ་ཕྲག་དགུ་བཅུའི་འཁོར་དང་བཅས་
པ་ནི་ཆོས་ཉན་པའི་ཕྱིར་དུའོ། །སྟོན་པའི་ཉེ་བར་གནས་པ་རྣམས་སོང་ངོ་། །སྟོན་པ་དེའི་སྔོན་གྱི་གཏམ་རྣམས་གོ་རིམས་བཞིན་དུ་བརྗོད་པར་བྱའོ། །དེ་འཁོར་དང་བཅས་པ་སོ་སོ་ཡང་དག་པར་རིག་པ་དང་དགྲ་བཅོམ་པ་ཐོབ་པོ། །སྟོན་པ་དེས་རིགས་
ཀྱི་བུ་རྣམས་ལ་སྔར་གྱི་སྤྱོད་པ་རྣམས་ལ་བལྟ་ཞིང་རྫུ་འཕྲུལ་ལས་བྱུང་བའི་ལྷུང་བཟེད་དང་ཆོས་གོས་རྣམས་གཟིགས་ཏེ། ཕྱག་གཡས་པ་བརྐྱང་ནས་དགེ་སློང་རྣམས་ཚུར་ཤོག་ཅིག་ཅེས་གསུངས་པ་དང་། ཐམས་ཅད་དེ་མ་ཐག་ཉིད་དུ་རྫུ་འཕྲུལ་
ལས་བྱུང་བའི་ལྷུང་བཟེད་དང་ཆོས་གོས་བཟུང་ནས་གནས་བརྟན་ལོ་དྲུག་བཅུ་ལོན་པ་བཞིན་དུ་གྱུར་ཏེ། ཆོ་ག་ཕུན་སུམ་ཚོགས་པར་གྱུར་ནས་སྟོན་པ་ལ་ཕྱག་བྱས་ཏེ་འཁོར་དུ་གྱུར་ཏོ། །ཇི་ལྟར་གཞན་ཡང་སངས་རྒྱས་གཞན་རྣམས་ལ་ཀུན་ནས་ཁྲུ་
39-1-198b


བརྒྱད་བཅུ་པའི་སྐུ་ཚད་ཉིད་ཀྱི་འོད་དུ་གྱུར་ཏོ། །བཅོམ་ལྡན་འདས་དེ་ཉིད་ཀྱི་སྐུའི་འོད་དེ་ལྟ་བུ་ཉིད་མ་ཡིན་གྱི། དུས་རྟག་ཏུ་སྟོང་ཕྲག་བཅུའི་འཇིག་རྟེན་གྱི་ཁམས་སུ་འཕྲོ་ཞིང་གནས་ཏེ། ཤིང་དང་ས་དང་རི་དང་རྒྱ་མཚོ་ལ་སོགས་པའི་ཕྱོགས་
ལྷག་མ་རྣམས་དང་ཚང་བང་ལ་སྩོགས་པ་གསེར་གྱིས་སྤྲས་པ་བཞིན་ནོ། །སྐུ་ཚེའི་ཚད་ནི་སྟོང་ཕྲག་དགུ་བཅུའོ། །དེ་རྣམས་ཀྱི་ལུས་ལ་ཟླ་བ་དང་ཉི་མ་ལ་སོགས་པ་ལ་རང་གི་འོད་ཀྱི་སྣང་བའི་ནུས་པ་མེད་དོ། །མཚན་མོ་དང་ཉིན་མོའི་བྱེ་བྲག་མི་
ཤེས་སོ། །སེམས་ཅན་རྣམས་ཀྱི་ཉིན་མོ་ཉི་མ་ཤར་བ་བཞིན་དུ་སངས་རྒྱས་ཀྱི་འོད་ཀྱིས་རྟག་ཏུ་འགྲོ་བར་བྱེད་དོ། །མཚན་མོ་མེ་ཏོག་ཟུམ་པ་དང་སྔ་དྲོའི་དུས་སུ་བྱ་རྣམས་སྐད་འབྱིན་པ་ལ་སོགས་པ་ལ་བརྟེན་ནས་འཇིག་རྟེན་པས་ཉིན་མཚན་
ཤེས་པར་བྱེད་དོ། །ཡང་དག་པར་རྫོགས་པའི་སངས་རྒྱས་གཞན་རྣམས་ལ་ཅིའི་ཕྱིར་འདི་ལྟ་བུ་མེད་པ་ཡིན་ནམ། མེད་པ་ནི་མ་ཡིན་ཏེ། དེ་རྣམས་ཀྱིས་ཀྱང་དགོངས་པར་གྱུར་ན་སྟོང་ཕྲག་བཅུའི་འཇིག་རྟེན་གྱི་ཁམས་སུ་གྱུར་པ་འམ་དེ་བས་ལྷག་
པར་ཡང་འོད་འཕྲོ་བར་བྱེད་དོ། །སླར་ཡང་བཅོམ་ལྡན་འདས་བཀྲ་ཤིས་བཟང་པོ་སྔར་གྱི་དོན་དུ་གཉེར་བའི་དབང་གིས་ཏེ། གཞན་གྱི་འོད་འདོམ་གང་བ་བཞིན་ནོ། །སྐུའི་འོད་ཀྱིས་རྒྱུན་མི་འཆད་པ་ཉིད་དུ་སྟོང་ཕྲག་བཅུའི་འཇིག་རྟེན་གྱི་ཁམས་
ཁྱབ་པར་བྱས་ནས་གནས་སོ། །དེའི་བྱང་ཆུབ་སེམས་དཔའི་སྤྱོད་པའི་དུས་ན་ཐམས་ཅད་སྒྲོལ་བཞིན་དུ་བདག་ཉིད་གནས་སོ། །དེའི་བུ་དང་བུ་མོར་བཅས་པ་རི་བོ་བྷཾ་ག་བཞིན་དུ་རི་ལ་བཞུགས་སོ། །དེ་ནས་མཆེ་བ་གཅིག་པ་གདུག་པ་
ཅན་གྱི་གནོད་སྦྱིན་ཞིག་གིས་སྐྱེས་བུ་ཆེན་པོ་སྦྱིན་པ་གཏོང་ཞེས་ཐོས་ནས་བྲམ་ཟེའི་གཟུགས་ཀྱིས་ཉེ་བར་སོང་སྟེ་སེམས་དཔའ་ཆེན་པོའི་དྲུང་དུ་བུ་དང་བུ་མོ་སློང་ངོ་། །སེམས་དཔའ་ཆེན་པོས་བྲམ་ཟེ་ལ་བུ་དང་བུ་མོ་སྦྱིན་ནོ་ཞེས་བསམས་
ནས་དགའ་བ་དང་ཚིམ་པས་ཆུའི་མཐར་ཐུག་པའི་ས་རྣམས་གཡོས་སོ། །དེ་ནས་གནོད་སྦྱིན་འཆག་པའི་གནས་ཀྱི་མཐར་ཙོག་པུར་རྒྱབ་རྟེན་ལ་འདུག་སྟེ་སེམས་དཔའ་ཆེན་པོ་ལ་ལྟ་ཞིང་འདུག་གོ། །དེ་ལ་དེས་བུ་དང་བུ་མོ་བྱིན་པ་དང་
39-1-199a


དེས་ལ་ཕུག་ཟ་བ་བཞིན་དུ་བུ་དང་བུ་མོ་ཟོས་ནས། གནོད་སྦྱིན་གྱིས་སྐྱེས་བུ་ཆེན་པོ་དེ་ལ་བལྟ་སྟེ། ཁ་གདངས་ནས་མེ་འབར་བ་བཞིན་དུ་ཁྲག་གི་རྒྱུན་འབབ་བོ། །དེའི་ཁ་མཐོང་ནས་ཀྱང་སྐྲའི་རྩེ་མོ་ཙམ་གྱི་ཡིད་མི་བདེ་བ་ཡང་
མ་སྐྱེས་པར་ངས་བྱིན་པ་ཤིན་དུ་ལེགས་པ་གཅིག་གོ་ཞེས་སེམས་སོ། །སླར་ཡང་ལུས་ལ་མཆོག་ཏུ་དགའ་བ་ཆེན་པོ་སྐྱེས་སོ། །དེ་དག་འདི་ལ་བྱིན་པའི་བསོད་ནམས་ཀྱི་ཕན་ཡོན་གྱིས་མ་འོངས་པ་ན་འདི་ལྟ་བུའི་རིམ་པའི་འོད་ཟེར་འཕྲོ་བར་དོན་
དུ་གཉེར་རོ། །དེ་ལ་དོན་དུ་གཉེར་བའི་རྒྱུ་མཚན་གྱིས་སངས་རྒྱས་སུ་གྱུར་ནས་སྐུའི་འོད་དེ་ཕྱི་རོལ་དུ་འཕྲོ་ཞིང་དེ་རྣམས་ལ་ཁྱབ་པར་གནས་སོ། །གཞན་ཡང་འདིའི་སྔར་གྱི་མཛད་པ་ཡོད་པས་དེ་བྱང་ཆུབ་སེམས་དཔའི་དུས་སུ་སངས་རྒྱས་གཅིག་
གི་སྐུ་གདུང་གི་མཆོད་རྟེན་མཐོང་ནས་སངས་རྒྱས་འདིའི་སྐུ་གདུང་ལ་བདག་གིས་འཚོ་བ་ཡོངས་སུ་བཏང་ན་རིགས་སོ་སྙམ་ནས་ཤིང་རས་ཀྱིས་དཀྲིས་པ་བཞིན་དུ་ལུས་ཐམས་ཅད་གོས་གཞན་གྱིས་དཀྲིས་ཤིང་རིན་པོ་ཆེའི་ཅོད་པན་གྱོན་ནས་
འབུམ་ཕྲག་ཅིག་རི་བའི་གསེར་གྱི་སྣོད་དུ་མར་གྱིས་བཀང་སྟེ་དེར་རས་འདེ་སྟོང་ཕྲག་བརྒྱ་བཙུགས་ནས་མར་མེ་སྦར་ཏེ་མགོའི་སྟེང་དུ་བཞག་ཅིང་ལུས་ཐམས་ཅད་ཀྱང་འབར་བར་བྱས་ནས་སྐུ་གདུང་གི་མཆོད་རྟེན་ལ་བསྐོར་བ་བྱེད་དོ། །དེ་ལྟར་
མཚན་ཐོག་ཐག་སྔ་དྲོའི་སྐྱ་རེང་ཤར་གྱི་བར་དུ་འབད་པ་བྱེད་པ་ཉིད་ཀྱི་བ་སྤུའི་ཁུང་བུ་ཙམ་ཡང་དྲོ་བར་མ་གྱུར་ཏེ་པད་མའི་ཚལ་དུ་བཞུགས་པ་བཞིན་ནོ། །ཆོས་ཞེས་བྱ་བ་འདི་རང་ཉིད་བསྲུང་ན་ཆོས་བསྲུངས་པར་འགྱུར་རོ། །དེའི་ཕྱིར་
གསུངས་པ། ཆོས་བཞིན་བསྲུང་ན་ཆོས་སྤྱོད་དེ། །ཆོས་ཀྱིས་བསྒྲལ་ན་ཆོས་བཞིན་ཐོབ། །ལེགས་པར་བསྒྲལ་ན་ཆོས་ཕན་ཡོན། །ཆོས་སྤྱོད་ངན་འགྲོར་མི་འགྲོའོ། །འདིའི་ལས་ཀྱི་འབྲས་བུ་བཅོམ་ལྡན་འདས་དེའི་སྐུའི་འོད་ཀྱིས་
སྟོང་ཕྲག་བཅུའི་འཇིག་རྟེན་གྱི་ཁམས་ཁྱབ་ཅིང་གནས་སོ། །དེའི་ཚེ་བདག་ཅག་གི་བྱང་ཆུབ་སེམས་དཔའ་ཤིན་དུ་སྲེད་པ་ཞེས་བྱ་བའི་བྲམ་ཟེར་གྱུར་ཏོ། །དེས་སྟོན་པ་མགྲོན་དུ་གཉེར་བའི་ཕྱིར་དྲུང་དུ་སོང་སྟེ་ཆོས་སྙན་པོའི་བཤད་པ་ཐོས་ནས་
39-1-199b


བཙུན་པ་སང་བདག་གི་གདུགས་ཚོད་ལ་བྱོན་པར་ཞུ་ཞེས་ཞུས་སོ། །བྲམ་ཟེས་དགེ་སློང་དུ་ཙམ་དགོས་ཞེས་གསུངས་པ་དང་། བཙུན་པ་འཁོར་དང་བཅས་པའི་དགེ་འདུན་དུ་ཙམ་བདོག་ཅེས་ཞུས་སོ། །དེའི་ཚེ་སྟོན་པའི་འདུས་པ་དང་པོ་
ཉིད་ཙམ་ཡོད་དོ། །དེའི་ཕྱིར་བྱེ་བ་སྟོང་ཕྲག་བརྒྱ་ཡོད་ཅེས་གསུངས་སོ། །བཙུན་པ་འཁོར་ཐམས་ཅད་དང་བཅས་པ་བདག་གི་ཁང་པར་གདུགས་ཚོད་ལ་བྱོན་པར་ཞུ་ཞེས་ཞུས་པ་དང་། བཅོམ་ལྡན་འདས་ཀྱིས་གནང་སྟེ་བྲམ་ཟེས་སང་དོན་ཏུ་
གཉེར་ཅིག །ཁང་པར་འགྲོ་ཞིང་བསམས་པ། བདག་གིས་དགེ་སློང་འདི་རྣམས་ལ་ཐུག་པ་དང་ཟན་དང་གོས་ལ་སོགས་པ་འབུལ་བར་ནུས་སོ། །བཞུགས་པའི་གནས་ཇི་ལྟ་བུ་ཞེས་བསམས་སོ། །དཔག་ཚད་བརྒྱད་ཁྲི་བཞི་སྟོང་
གི་སྟེང་ན་གནས་པའི་ལྷའི་རྒྱལ་པོའི་ལ་བ་དམར་པོའི་རྡོ་ལེབ་ལ་བཞུགས་པ་ན་དྲོ་བར་གྱུར་ཏེ། བརྒྱ་བྱིན་གང་ཞིག་བདག་གི་གནས་འདི་འདོར་བའི་སེམས་སུ་ཞིག་ལ་ཡོད་སྙམ་པ་དང་། ལྷའི་དབང་པོས་ལྷའི་མིག་གིས་བལྟས་པས་
སྐྱེས་བུ་ཆེན་པོ་དེ་མཐོང་ནས། འདི་ལྟར་ཤིན་དུ་སྲེད་པའི་བྲམ་ཟེས་སངས་རྒྱས་ལ་སོགས་པ་དགེ་སློང་གི་དགེ་འདུན་མགྲོན་དུ་གཉེར་ཏེ། བཞུགས་པའི་གནས་ཀྱང་བསམས་ཀྱི། བདག་ཀྱང་དེར་ཕྱིན་ནས་བསོད་ནམས་ཀྱི་ཆ་ལེན་པར་
རིགས་སོ་སྙམ་ནས་ཤིང་མཁན་གྱི་གཟུགས་སུ་སྤྲུལ་ཏེ། སྟེའུ་དང་དགྲ་སྟ་བླངས་ཏེ་སྐྱེས་བུ་ཆེན་པོའི་མདུན་དུ་གནས་པར་གྱུར་ནས། གང་སུ་ཞིག་ཁོ་བོ་ལ་གླ་བྱིན་ཏེ་ལས་ཀ་བྱེད་པ་ཡོད་ཅེས་སྨྲས་སོ། །སྐྱེས་བུ་ཆེན་པོས་གཟིགས་ཏེ། 
གང་ཞིག་ལས་ཀ་བྱེད་ནུས་ཞེས་གསུང་པ་དང་། བདག་གིས་མི་ཤེས་པའི་གཟོ་མེད་དོ། །ཁང་པ་འམ་བསྟི་གནས་སམ་གང་ཞིག་ཅུང་ཟད་བྱེད་པའི་བཟོ་དེ་བདག་གིས་བྱེད་ཀྱང་ཡང་ནུས་སོ་ཞེས་ཟེར་རོ། །བྱང་ཆུབ་སེམས་དཔས་སྨྲས་པ། དེའི་
ཕྱིར་ང་ལ་ལས་སུ་བྱ་བ་ཡོད་དོ། །ཁོ་བོས་སང་འཕགས་པ་ལས་བྱེ་བ་ཕྲག་བརྒྱ་པའི་དགེ་སློང་གི་དགེ་འདུན་མགྲོན་དུ་གཉེར་ཏོ། །དེ་རྣམས་བཞུགས་པའི་གནས་བྱེད་པར་ནུས་སམ། སྨྲས་པ་བདག་གིས་བགྱིའོ། །བདག་ལ་གླ་སྟེར་བར་ནུས་
39-1-200a


སམ། བུ་བདག་གིས་ནུས་སོ། །ལེགས་སོ་ཞེས་བྱ་བ་ལེགས་པར་བྱས་སོ། །ཕྱིན་ནས་ས་ཕྱོགས་གཅིག་བལྟས་ནས་དཔག་ཚད་བཅུ་གཉིས་སམ་བཅུ་གསུམ་པའི་ཚད་ཀྱི་ས་ཕྱོགས་གཅིག་ཏུ་ཟད་པར་སྔོན་པོའི་དཀྱིལ་
འཁོར་བཞིན་དུ་སྟེང་མཉམ་པར་བྱས་སོ། །དེས་འདི་རྣམས་ཀྱི་གནས་ཙམ་དུ་རིན་པོ་ཆེ་སྣ་བདུན་ལས་བྱུང་བའི་བསྟི་གནས་ས་འོག་ནས་ཕྱུང་ནས་བྱའོ་ཞེས་བསམ་ཞིང་བལྟའོ། །དེ་མ་ཐག་པར་ས་གཞི་བརྟོལ་ནས་བསྟི་གནས་གྲུབ་བོ། །
དེ་ནི་གསེར་ལས་བྱུང་བའི་ཀ་བ་རྣམས་ལ་དངུལ་ལས་བྱུང་བའི་ཀ་ཞུའི་སྟེང་དུ་གསེར་ལས་བྱུང་བའི་སྡུང་ངོ་། །ནོར་བུའི་ཀ་བ་ལ་བྱི་རུའི་རང་བཞིན་ནོ། །བྱི་རུའི་ཀ་བ་ལ་ནོར་བུའི་རང་བཞིན་ནོ། །རིན་པོ་ཆེ་སྣ་བདུན་ལས་བྱུང་བའི་ཀ་བ་ལ་རིན་
པོ་ཆེ་སྣ་བདུན་ལས་བྱུང་བའི་ཀ་ཞུ་ཉིད་དོ། །དེ་ནས་བསྟི་གནས་ཀྱི་བར་བར་དུ་གཡེར་ཁའི་དྲ་བ་འཕྱང་བ་ལ་བལྟ་ཞིང་དེ་བལྟས་ཙམ་ཉིད་ན་དྲ་བ་འཕྱང་བ། གང་ལ་རླུང་གིས་བསྐྱོད་པ་དེ་ལ་ཡན་ལག་ལྔ་པའི་རོལ་མོ་སྒྲ་སྙན་སྒྲོགས་ཏེ། ལྷའི་གླུ་དབྱངས་
སྒྲོགས་པ་བཞིན་ནོ། །བར་བར་དུ་སྤོས་ཀྱི་ཕྲེང་བ་དང་མེ་ཏོག་གི་ཕྲེང་བ་འཕྱང་བ་ལ་སེམས་ཤིང་ཕྲེང་བ་འཕྱང་བ་ལའོ། །བྱེ་བ་སྟོང་ཕྲག་བརྒྱའི་དགེ་སློང་གི་དགེ་འདུན་གྱི་གྲངས་ཀྱིས་སྟན་དང་རྒྱབ་རྟེན་རྣམས་ས་གཞི་ལ་བརྟེན་ནས་བྱུང་བར་བསམས་
སོ། །དེ་མ་ཐག་ཏུ་སའི་སྟེང་དུ་གྲུབ་བོ། །མཚམས་དང་མཚམས་རྣམས་སུ་རེ་རེར་ཆུའི་སྣོད་ཆེན་པོ་གྲུབ་པ་བསམས་སོ། །ཆུའི་སྣོད་ཆེན་པོ་དེ་རྣམས་གྲུབ་བོ། །དེ་དག་ཐམས་ཅད་སྤྲུལ་ནས་བྲམ་ཟེའི་དྲུང་དུ་སོང་ནས་འཕགས་པ་འདིར་བྱོན་
ལ་བསྟི་གནས་གཟིགས་མཛོད། བདག་ལ་གླ་སྦྱིན་པར་རིགས་སོ་ཞེས་ཞུས་ནས་སྐྱེས་བུ་ཆེན་པོ་གཤེགས་ཏེ་བསྟི་གནས་གཟིགས་ནས་དེ་མ་ཐག་ཏུ་བརྒྱ་བྱིན་མི་སྣང་བར་གྱུར་ཏོ། །གཟིགས་པ་ཙམ་ན་ལུས་ཐམས་ཅད་ཁ་དོག་ལྔ་དང་ལྡན་པ་
ལ་དགའ་བ་རྒྱུན་མི་འཆད་པར་འཕྲོ་བར་གྱུར་ཏོ། །དེ་ནས་བསྟི་གནས་གཟིགས་ནས་འདི་ལྟར་ཡིད་ལ་བསམས་སོ། །བསྟི་གནས་འདི་མིར་གྱུར་པས་བསྒྲུབས་པ་མ་ཡིན་ནོ། །སླར་ཡང་བདག་གི་ལྷག་པའི་བསམ་པ་དང་བདག་གི་ཡོན་
39-1-200b


ཏན་རྟོགས་པས་ངེས་པར་བརྒྱ་བྱིན་གྱི་སྟན་དྲོ་བར་གྱུར་ནས་བརྒྱ་བྱིན་ལྷའི་རྒྱལ་པོས་བསྟི་གནས་འདི་བྱས་པར་གྱུར་ཏོ། །དེ་ནས་སླར་ཡང་འདི་ལྟ་བུའི་ཚུལ་གྱི་བསྟི་གནས་སུ་ཉི་མ་གཅིག་ཉིད་ལ་སྦྱིན་པ་གཏོང་བ་ནི་བདག་གི་རིགས་པ་མ་
ཡིན་ནོ། །ཉི་མ་བདུན་དུ་བདག་གིས་སྟེར་བར་བསམས་སོ། །ཕྱི་རོལ་གྱི་སྦྱིན་པས་ཇི་ཙམ་གྱིས་ཀྱང་བྱང་ཆུབ་སེམས་དཔའ་རྣམས་དགྱེས་པར་མི་ནུས་སོ། །རྒྱན་གྱིས་བརྒྱན་པའི་མགོ་བོ་བཅད་པ་དང་དྲི་མ་མེད་པའི་མིག་བཏོན་པ་དང་སྙིང་གི་
ཤ་བྲེགས་པ་འམ་བཅད་ནས་བྱིན་པའི་དུས་སུ་བྱང་ཆུབ་སེམས་དཔའ་བཏང་བའི་དགྱེས་པར་འགྱུར་རོ། །བདག་ཅག་བྱང་ཆུབ་སེམས་དཔའ་རྣམས་ཀྱི་ཡང་ཤ་སི་བིའི་སྐྱེས་རབས་ལས་ཉི་མ་རེ་རེར་དོང་ཙེ་ཁལ་ལྔ་ལྔ་རི་བའི་རིན་གྱིས་མྱོས་
ནས་སྒོ་བཞི་དང་གྲོང་ཁྱེར་གྱི་དབུས་སུ་སྦྱིན་པ་གཏོང་ངོ་། །དེའི་སྦྱིན་པ་དེ་གཏོང་བས་ཡོངས་སུ་ཚིམ་པ་མེད་དོ། །སླར་ཡང་གང་གི་ཚེ་བརྒྱ་བྱིན་ལྷའི་རྒྱལ་པོ་བྲམ་ཟེའི་གཟུགས་ཀྱིས་འོངས་ནས་མིག་བསླངས་སོ། །དེའི་ཚེ་དེའི་མིག་བཏོན་
ནས་སྟེར་བ་ཉིད་ཀྱིས་དགྱེས་པར་འགྱུར་རོ། །སྐྲའི་རྩེ་མོ་ཙམ་ཡང་སེམས་ལ་སྡུག་བསྔལ་བར་མི་འགྱུར་རོ། །དེ་བཞིན་དུ་སྦྱིན་པའི་རྒྱུས་བྱང་ཆུབ་སེམས་དཔའ་ལ་ཚིམ་པ་མེད་དོ། །དེའི་ཕྱིར་སྐྱེས་བུ་ཆེན་པོ་དེ་ཡང་ཞག་བདུན་དུ་
བདག་གིས་བྱེ་བ་སྟོང་ཕྲག་བརྒྱའི་གྲངས་ཀྱི་དགེ་སློང་གི་དགེ་འདུན་རྣམས་ལ་སྦྱིན་པ་གཏོང་བར་རིགས་སོ་ཞེས་བསམས་སོ། །དེའི་བསྟི་གནས་སུ་བཞུགས་ནས་ཞག་བདུན་དུ་དགའ་བ་པཱ་ན་ཞེས་བྱ་བའི་སྦྱིན་པ་བྱིན་ནོ། །དགའ་བ་ཅན་
ཞེས་པ་ནི་ཆེས་ཆེ་བའི་སྣོད་ཤིན་དུ་ཆེ་བ་འོ་མས་བསྐང་ནས་ཚང་བང་ཆེན་པོའི་སྟེང་དུ་བཞག་ནས་མེས་འོ་མ་ཤིན་དུ་བསྐ་བར་བསྐོལ་ཏེ་འབྲས་ཅུང་ཟད་བཏབ་ནས་བཙོས་ཏེ་སྦྲང་དང་དཀར་བའི་ཕྱེ་མ་དང་མར་གསར་པ་རྣམས་བཙོས་
པའི་བཟའ་བའི་འོ་ཐུག་ནི་དགའ་བ་པཱ་ན་ཞེས་བརྗོད་དོ། །མི་རྣམས་ཀྱིས་འདྲེན་པར་མ་ནུས་ན་ལྷ་རྣམས་ཀྱིས་ཀྱང་བར་བར་དུ་འདྲེན་ནོ། །དཔག་ཚད་བཅུ་གཉིས་སམ་བཅུ་གསུམ་པའི་ཚད་ཀྱི་གནས་སུ་དགེ་སློང་རྣམས་མ་ཤོང་
39-1-201a


ན། སླར་ཡང་དགེ་སློང་དེ་རྣམས་རང་རང་གི་མཐུས་བཞུགས་སོ། །ཞག་བདུན་གྱི་མཐར་དགེ་སློང་ཐམས་ཅད་ཀྱི་ལྷུང་བཟེད་བགྲུས་ནས་སྨན་གྱི་ཕྱིར་དུ་མར་གསར་པ་དང་ཞུན་མར་དང་སྦྲང་དང་བུ་རམ་བསྐོལ་བའི་ཆུ་རྣམས་ཀྱིས་
ལྷུང་བཟེད་བསྐང་ནས་ཆོས་གོས་གསུམ་དང་བཅས་པ་ཕུལ་ལོ། །དགེ་འདུན་གཞོན་ནུ་རྣམས་ཀྱིས་དགེ་སློང་གིས་ཐོབ་པའི་ཆོས་གོས་ཀྱི་རྒྱུའི་རས་འབུམ་ཕྲག་གཅིག་རི་བར་གྱུར་ཏོ། །སྟོན་པས་རྗེས་སུ་ཡི་རང་བ་མཛད་དོ། །སྐྱེས་བུ་འདིས་འདི་ལྟ་
བུའི་ཚུལ་གྱིས་སྦྱིན་པ་ཆེན་པོ་བྱིན་ནོ། །གང་གི་དོན་དུ་འགྱུར་ཞེས་རྟོག་པར་བྱེད་དོ། །མ་འོངས་པའི་བསྐལ་པ་འབུམ་ཕྲག་གཅིག་ལྷག་པའི་གྲངས་མེད་པ་གཉིས་འདས་པ་ན་གཽ་ཏ་མ་ཞེས་བྱ་བའི་སངས་རྒྱས་སུ་འགྱུར་ཞེས་གཟིགས་ཏེ། སྐྱེས་བུ་ཆེན་པོ་
བོས་ནས་ཁྱོད་ཀྱི་དུས་འདི་རྣམས་འདས་ནས་གཽ་ཏ་མ་ཞེས་བྱ་བའི་སངས་རྒྱས་སུ་འགྱུར་རོ་ཞེས་ལུང་བསྟན་ནོ། །སྐྱེས་བུ་ཆེན་པོས་ལུང་བསྟན་པ་ཐོས་ནས་བདག་ནི་སངས་རྒྱས་སུ་འགྱུར་བས། བདག་ཁྱིམ་ན་གནས་པ་ལ་དོན་མེད་ཀྱིས་རབ་ཏུ་འབྱུང་ངོ་
སྙམ་དུ་བསམས་སོ། །དེ་དེ་ལྟ་བུའི་ཚུལ་དང་ལྡན་པས་མཆིལ་མ་དོར་བ་བཞིན་དུ་ཁྱིམ་སྤངས་ནས་སྟོན་པའི་དྲུང་དུ་རབ་ཏུ་བྱུང་ཞིང་བྱུང་ནས་སངས་རྒྱས་ཀྱི་གསུང་རབ་བསླབས་ནས་མངོན་པར་ཤེས་པ་དང་། སྙོམས་པར་འཇུག་པ་བསྐྱེད་དེ། ཚེའི་མཐར་ཚངས་
པའི་འཇིག་རྟེན་དུ་སྐྱེས་སོ། །གཞན་ཡང་བཅོམ་ལྡན་འདས་བཀྲ་ཤིས་བཟང་པོའི་གྲོང་ཁྱེར་མཆོག་ཅེས་བྱ་བར་གྱུར་ཏོ། །ཡབ་ནི་མཆོག་གི་རྒྱལ་པོའོ། །ཡུམ་ནི་མཆོག་མ་ཞེས་བྱ་བའོ། །ལྟང་བཟང་དང་ཆོས་ཀྱི་སྡེ་གཉིས་ནི་ཉན་ཐོས་ཀྱི་མཆོག་གོ །
བསྐྱང་བ་ཞེས་བྱ་བ་ནི་ཉེ་གནས་སོ། །ཞི་བྱེད་ལེན་དང་། མྱ་ངན་མེད་གཉིས་ནི་ཉན་ཐོས་མའི་མཆོག་གོ། །བྱང་ཆུབ་ཤིང་ནི་ཀླུ་ཤིང་ངོ་། །སྐུའི་མཐོ་ཚད་དུ་ཁྲུ་བརྒྱད་བཅུ་རྩ་བརྒྱད་པའོ། །སྟོང་ཕྲག་དགུ་བཅུའི་ལོ་ནི་སྐུ་ཚེའི་ཚད་དོ། །སྟོང་ཕྲག་དགུ་བཅུ་བཞུགས་
ནས་མྱ་ངན་ལས་འདས་སོ། །སངས་རྒྱས་མྱ་ངན་ལས་འདས་ནས་སླར་ཡང་དེ་མ་ཐག་པར་སྟོང་ཕྲག་བཅུའི་ཁོར་ཡུག་གི་ཕྱོགས་ཀུན་མུན་པར་གྱུར་ཏོ། །ཁོར་ཡུག་ཐམས་ཅད་ཀྱི་མི་རྣམས་ཆོ་ངེས་ཆེན་པོ་འདེབས་སོ། །ཀཽ་ཊི་ནྱ་འོག་ཏུ་ནི། །འཇིག་རྟེན་འདྲེན་པ་བཀྲ་
39-1-201b


ཤིས་བཟང་། །འཇིག་རྟེན་ནང་གི་མུན་བསལ་ནས། །ཆོས་ཀྱི་སྣང་བའི་འོད་བཀྱེའོ། །དེ་བཞིན་དུ་སྟོང་ཕྲག་བཅུའི་འཇིག་རྟེན་གྱི་ཁམས་མུན་ནག་ཏུ་བྱས་ནས་མྱ་ངན་ལས་འདས་སོ། །བཅོམ་ལྡན་འདས་དེའི་འོག་གི་ཆར་ཡིད་བཟངས་ཞེས་བྱ་བའི་སྟོན་
པ་བྱོན་ནོ། །དེའི་ཡང་ཉན་ཐོས་ཀྱི་འདུས་པ་གསུམ་སྟེ། འདུས་པ་དང་པོ་ལ་བྱེ་བ་སྟོང་ཕྲག་བརྒྱའི་དགེ་སློང་ངོ་། །འདུས་པ་གཉིས་པ་ལ་གསེར་གྱི་རི་ལ་བྱེ་བ་སྟོང་ཕྲག་དགུ་བཅུའོ། །གསུམ་པ་ལ་བྱེ་བ་སྟོང་ཕྲག་བརྒྱད་བཅུའོ། །དེའི་ཚེ་སེམས་དཔའ་ཆེན་པོ་
ཀླུའི་རྒྱལ་པོ་མཉམ་མེད་ཅེས་བྱ་བར་གྱུར་ཏོ། །རྫུ་འཕྲུལ་གྱི་མཐུ་དང་ལྡན་ཞིང་དེས་སངས་རྒྱས་བྱོན་པ་ཐོས་ནས་གཉེན་གྱི་གྲོགས་རྣམས་འཁོར་དུ་བྱས་ཏེ། ཀླུའི་གནས་ནས་འཐོན་ཏེ། བྱེ་བ་སྟོང་ཕྲག་བརྒྱའི་དགེ་སློང་གི་འཁོར་དང་བཅས་པའི་བཅོམ་
ལྡན་འདས་ལ་ལྷའི་རོལ་མོས་ཉེ་བར་མཆོད་ནས་སྦྱིན་པ་ཆེན་པོ་ཕུལ་ལོ། །སོ་སོ་ལ་ལྷའི་གོས་གཉིས་གཉིས་ཕུལ་བས་སྐྱབས་སུ་འགྲོ་བའི་ཚུལ་ཁྲིམས་ལ་གནས་སོ། །དེ་ཡང་སྟོན་པ་དེས་མ་འོངས་པ་ན་སངས་རྒྱས་སུ་འགྱུར་བར་ལུང་བསྟན་ནོ། །
བཅོམ་ལྡན་འདས་དེའི་གྲོང་ཁྱེར་དགེ་བ་ཅན་ཞེས་བྱ་བར་གྱུར་ཏེ། ལེགས་བྱིན་ཞེས་བྱ་བའི་རྒྱལ་པོ་ནི་ཡབ་བོ། །དཔལ་ལྡན་མ་ཞེས་བྱ་བ་ནི་ཡུམ་མོ། །ངེས་འགྲོ་དང་གོམས་བྱེད་ནི་ཉན་ཐོས་ཀྱི་མཆོག་གོ། །འཆར་བྱེད་ནི་ཉེ་གནས་སོ། །ཉན་པ་དང་ཉེ་བར་
ཉན་པ་གཉིས་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཀླུ་ཤིང་ངོ་། །སྐུའི་མཐོ་ཚད་དུ་ཁྲུ་དྲུག་བཅུའོ། །སྐུ་ཚེའི་ཚད་ནི་ལོ་སྟོང་ཕྲག་དགུ་བཅུའོ། །བཀྲ་ཤིས་བཟང་པོའི་འོག་ཏུ་ནི། །འདྲེན་པ་ཐུགས་བཟང་ཞེས་བྱ་བ། །ཆོས་རྣམས་
ཀུན་ལ་མཚུངས་མེད་པ། །སེམས་ཅན་ཀུན་གྱི་མཆོག་ཡིན་ནོ། །དེའི་ཡང་འོག་གི་ཆར་ནམ་གྲུ་ཅན་གྱི་སྟོན་པ་ཞེས་བྱ་བ་བྱོན་ནོ། །དེའི་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་བགྲང་དུ་མེད་པ་ཞེས་བྱ་བའོ། །གཉིས་པ་ལ་བྱེ་བ་
སྟོང་ཕྲག་བརྒྱའི་དགེ་སློང་ངོ་། །དེ་བཞིན་དུ་གསུམ་པ་ཡང་ངོ་། །དེའི་ཚེ་བྱང་ཆུབ་སེམས་དཔའ་ལྷག་པའི་ལྷ་ཞེས་བྱ་བའི་བྲམ་ཟེར་གྱུར་ཏོ། །སྟོན་པའི་ཆོས་བཤད་པ་ཐོས་ནས་སྐྱབས་སུ་འགྲོ་བའི་ཚུལ་ཁྲིམས་ལ་གནས་སོ། །མགོའི་སྟེང་དུ་
39-1-202a


ཐལ་མོ་སྦྱར་ནས་སྟོན་པ་ལ་དེའི་ཉོན་མོངས་རྣམས་སྤོང་བའི་བསྔགས་པ་བརྗོད་ནས་བླ་གོས་ཀྱིས་མཆོད་པས་དེ་ཡང་སངས་རྒྱས་སུ་འགྱུར་རོ་ཞེས་ལུང་བསྟན་ཏོ། །སླར་ཡང་དེའི་བཅོམ་ལྡན་འདས་ཀྱི་གྲོང་ཁྱེར་ནི་ནམ་གྲུ་བཟང་
ལྡན་ཞེས་བྱ་བར་གྱུར་ཏོ། །ཡབ་ནི་ཤིན་དུ་རྒྱས་པ་ཞེས་བྱ་བའི་རྒྱལ་པོའོ། །ཡུམ་ནི་ཤིན་དུ་རྒྱས་མ་ཞེས་བྱ་བའོ། །ཆུ་ལྷ་དང་ལྷ་ཚངས་པ་ནི་ཉན་ཐོས་ཀྱི་མཆོག་གོ། །ཡང་དག་འབྱུང་ཞེས་བྱ་བ་ནི་ཉེ་གནས་སོ། །བཟང་མོ་དང་ལེགས་བཟང་
མོ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཀླུ་ཤིང་ངོ་། །སྐུ་མཐོ་ཚད་དུ་ཁྲུ་བརྒྱད་བཅུའོ། །སྐུ་ཚེའི་ཚད་ནི་ལོ་སྟོང་ཕྲག་དྲུག་བཅུའོ། །ཐུགས་བཟང་གི་ནི་འོག་ཏུ་ནི། །འདྲེན་པ་ནམ་གྲུ་ཅན་ཞེས་བྱ། །མཚུངས་པ་མེད་ཅིང་དཔེ་མེད་
པར། །རྒྱལ་བ་མཉམ་མེད་མཆོག་ཏུ་གྱུར། །དེའི་འོག་གི་ཆར་མཛེས་བྱེད་ཅེས་བྱ་བའི་སྟོན་པ་བྱོན་ནོ། །དེའི་འདུས་པ་གསུམ་དུ་གྱུར་ཏེ། འདུས་པ་དང་པོ་ལ་བྱེ་བ་བརྒྱའི་དགེ་སློང་ངོ་། །གཉིས་པ་ལ་བྱེ་བ་དགུ་བཅུའོ། །གསུམ་པ་ལ་བྱེ་བ་
བརྒྱད་བཅུའོ། །དེའི་ཚེ་བྱང་ཆུབ་སེམས་དཔའ་མི་ཕམ་པ་ཞེས་བྱ་བའི་བྲམ་ཟེར་གྱུར་ཏོ། །སྟོན་པའི་ཆོས་བསྟན་པ་ཐོས་ནས་སྐྱབས་སུ་འགྲོ་བའི་ཚུལ་ཁྲིམས་ལ་གནས་སོ། །སངས་རྒྱས་ལ་སོགས་པའི་དགེ་སློང་གི་དགེ་འདུན་ལ་སྦྱིན་པ་ཆེན་
པོ་བཏང་ངོ་། །དེས་ཡང་སངས་རྒྱས་སུ་འགྱུར་བར་ལུང་བསྟན་ནོ། །སླར་ཡང་བཅོམ་ལྡན་འདས་དེའི་གྲོང་ཁྱེར་ཆོས་བཟང་ཞེས་བྱ་བར་གྱུར་ཏོ། །ཡབ་ནི་ཆོས་བཟང་རྒྱལ་པོའོ། །ཡུམ་ནི་ཆོས་བཟང་མ་ཞེས་བྱ་བའོ། །མཚུངས་མེད་དང་ལེགས་
སྤྱན་ནི་ཉན་ཐོས་ཀྱི་མཆོག་གོ། །ཡིད་ལྡན་ནི་ཉེ་གནས་སོ། །རིག་མ་དང་ལེགས་སྐྱེས་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཀླུ་ཤིང་ཉིད་དོ། །སྐུ་མཐོ་ཚད་དུ་ཁྲུ་ལྔ་བཅུ་རྩ་བརྒྱད་དོ། །སྐུ་ཚེའི་ཚད་ནི་ལོ་སྟོང་ཕྲག་དགུ་བཅུའོ། །
ནམ་གྲུ་ཅན་གྱི་འོག་ཏུ་ནི། །འདྲེན་པ་མཛེས་བྱེད་ཅེས་བྱ་བ། །མཉམ་པར་བཞག་ཅིང་ཐུགས་ནི་ཞི། །གང་ཟག་ཟླ་མེད་མཚུངས་མེད་དོ། །དེའི་འོག་གི་ཆར་བསྐལ་པ་གྲངས་མེད་པ་གཅིག་འདས་ནས་བསྐལ་པ་གཅིག་གི་ནང་དུ་སངས་རྒྱས་
39-1-202b


གསུམ་བྱོན་ནོ། །ཐུགས་ལྡན་མཐོང་བ་དང་། པད་མ་དང་མི་སྦྱིན་ནོ། །བཅོམ་ལྡན་འདས་ཐུགས་ལྡན་མཐོང་གི་འདུས་པ་གསུམ་དུ་གྱུར་ཏེ། དང་པོ་ལ་དགེ་སློང་འབུམ་ཕྲག་གཅིག་གོ། །གཉིས་པ་ལ་འབུམ་ཕྲག་བདུན་ནོ། །གསུམ་
པ་ལ་འབུམ་ཕྲག་དྲུག་གོ། །དེ་ནས་བྱང་ཆུབ་སེམས་དཔའ་གནོད་སྦྱིན་གཅིག་ཏུ་གྱུར་ཏོ། །རྫུ་འཕྲུལ་དང་མཐུ་ཆེན་པོ་དང་ལྡན་པའི་བྱེ་བ་སྟོང་ཕྲག་བརྒྱ་དུ་མའི་གནོད་སྦྱིན་རྣམས་ཀྱི་བདག་པོར་གྱུར་ཏོ། །དེས་བཅོམ་ལྡན་འདས་བྱོན་པ་
ཐོས་ནས་འོངས་ཏེ་སངས་རྒྱས་ལ་སོགས་པའི་དགེ་སློང་གི་དགེ་འདུན་ལ་སྦྱིན་པ་ཆེན་པོ་བཏང་ངོ་། །སྟོན་པས་ཀྱང་མ་འོངས་པའི་སངས་རྒྱས་སུ་འགྱུར་རོ་ཞེས་ལུང་བསྟན་ནོ། །གཞན་ཡང་བཅོམ་ལྡན་འདས་ཐུགས་ལྡན་མཐོང་གི་གྲོང་
ཁྱེར་ནི་ལ་བ་ཅན་ཞེས་བྱ་བར་འགྱུར་རོ། །ཡབ་ནི་གྲགས་ལྡན་རྒྱལ་པོའོ། །ཡུམ་ནི་གྲགས་འཛིན་མའོ། །ངེས་བཟང་དང་ཡིད་ལྡན་ནི་ཉན་ཐོས་ཀྱི་མཆོག་གོ། །ཆུ་ལྷ་ནི་ཉེ་གནས་སོ། །ལེགས་མཛེས་དང་ཡིད་བཟང་མ་ནི་ཉན་ཐོས་མའི་
མཆོག་གོ། །བྱང་ཆུབ་ཀྱི་ཤིང་ནི་སྲིད་སྒྲུབ་ཀྱི་ཤིང་ངོ་། །སྐུའི་མཐོ་ཚད་ཁྲུ་ལྔ་བཅུ་རྩ་བརྒྱད་དོ། །འབུམ་ཕྲག་གཅིག་གི་ལོ་ནི་སྐུ་ཚེའི་ཚད་དོ། །མཛེས་བྱེད་ཀྱི་ནི་འོག་ཏུ་ནི། །རྐང་གཉིས་མཆོག་གི་རྫོགས་སངས་རྒྱས། །ཐུགས་བཟང་མཐོང་དང་
འཆི་མེད་གྲགས། །གཟི་བརྗིད་ལྡན་ཞིང་རིང་མཐོང་ངོ་། །དེའི་འོག་གི་ཆར་པད་མ་ཞེས་བྱ་བའི་སྟོན་པ་བྱོན་ནོ། །དེའི་ཡང་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་བྱེ་བ་འབུམ་ཕྲག་གཅིག་གི་དགེ་སློང་ངོ་། །གཉིས་པ་ལ་འབུམ་ཕྲག་གསུམ་
མོ། །གསུམ་པ་ལ་གྲོང་མེད་པའི་དགོན་པར་གནས་ཚལ་ཆེན་པོ་ན་དགེ་སློང་འབུམ་ཕྲག་གཉིས་གནས་སོ། །དེའི་ཚེ་དེ་བཞིན་གཤེགས་པ་ཡང་དེའི་ནགས་ཚལ་ཆེན་པོར་བཞུགས་པའི་ཚེ་བྱང་ཆུབ་སེམས་དཔའ་སེང་གེར་སྐྱེས་པར་གྱུར་ཏོ། །
སྟོན་པས་འགོག་པ་ལ་སྙོམས་པར་ཞུགས་སོ། །ཞུགས་པ་མཐོང་ནས་སེམས་རབ་ཏུ་དང་བས་ཕྱག་བྱས་ནས་བསྐོར་བ་བྱས་ཏེ། དགའ་བ་དང་ཡིད་བདེ་བ་སྐྱེས་སོ། །ལན་གསུམ་དུ་སེང་གེའི་སྒྲ་སྒྲོགས་སོ། །ཞག་བདུན་དུ་སངས་རྒྱས་ཀྱི་ཕྱིར་དུ་
39-1-203a


དགའ་བ་མ་སྤངས་པས་དགའ་བ་དང་བདེ་བ་ཉིད་ཀྱི་སྤྱོད་ཡུལ་དུ་མ་ཕྱིན་པར་སྲོག་ཡོངས་སུ་བཏང་ངོ་སྙམ་སྟེ་བལྟ་ཞིང་འདུག་གོ། །སྟོན་པ་ཞག་བདུན་ནས་འགོག་པའི་སྙོམས་པར་འཇུག་པ་ལས་ལངས་ནས། སེང་གེ་ལ་བལྟ་ཞིང་
དགེ་སློང་གི་དགེ་འདུན་རྣམས་ཀྱིས་ཀྱང་སེམས་དང་བར་བྱས་ནས་དགེ་འདུན་ལ་ཕྱག་བྱེད་དོ་ཞེས་བརྗོད་ཅིང་དགེ་སློང་གི་དགེ་འདུན་ཤོག་ཅེས་བསམས་ཏེ་དགེ་སློང་རྣམས་དེ་མ་ཐག་ཏུ་བྱོན་ནོ། །སེང་གེས་དགེ་འདུན་ལ་སེམས་རབ་ཏུ་དང་བར་བྱེད་དོ། །སྟོན་
པས་དེའི་སེམས་ལ་བརྟགས་ཏེ་མ་འོངས་པ་ན་སངས་རྒྱས་སུ་འགྱུར་རོ་ཞེས་ལུང་བསྟན་ནོ། །སླར་ཡང་བཅོམ་ལྡན་འདས་པད་མའི་གྲོང་ནི་ཙམ་པ་ཀ་ཞེས་བྱ་བར་འགྱུར་རོ། །ཡབ་ནི་པད་མའི་རྒྱལ་པོའོ། །ཡུམ་ནི་མཚུངས་མེད་མ་ཞེས་བྱའོ། །སཱ་ལ་དང་ཨུ་
པ་སཱ་ལ་ནི་ཉན་ཐོས་ཀྱི་མཆོག་གོ། །ཆུ་ལྷ་ཞེས་བྱ་བ་ནི་ཉེ་གནས་སོ། །དགའ་མ་དང་ཤིན་དུ་དགའ་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་སྲོ་ནའི་ཤིང་ངོ་། །སྐུའི་མཐོ་ཚད་དུ་ཁྲུ་ལྔ་བཅུ་རྩ་བརྒྱད་དོ། །སྐུ་ཚེའི་ཚད་ནི་ལོ་སྟོང་ཕྲག་གཅིག་གོ། ། 
ཐུགས་ལྡན་མཐོང་གི་འོག་ཏུ་ནི། །རྐང་གཉིས་མཆོག་གི་རྫོགས་སངས་རྒྱས། །མཚན་ནི་པད་མ་ཞེས་བྱ་བ། །གང་ཟག་ཟླ་མེད་མཚུངས་མེད་དོ། །དེའི་འོག་ཏུ་མི་སྦྱིན་ཞེས་བྱ་བའི་སྟོན་པ་བྱོན་ནོ། །དེའི་ཡང་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་
བྱེ་བ་སྟོང་ཕྲག་བརྒྱའི་དགེ་སློང་ངོ་། །གཉིས་པ་ལ་བྱེ་བ་འབུམ་ཕྲག་དགུ་བཅུའོ། །གསུམ་པ་ལ་བྱེ་བ་བརྒྱད་བཅུ་དང་འབུམ་ཕྲག་གཅིག་གོ། །དེའི་ཚེ་བྱང་ཆུབ་སེམས་དཔའ་དྲང་སྲོང་གིས་རབ་ཏུ་བྱུང་སྟེ་མངོན་པར་ཤེས་པ་ལྔ་དང་སྙོམས་པར་འཇུག་པ་བརྒྱད་
པོ་དབང་དུ་གྱུར་ཏེ་སངས་རྒྱས་ལ་སོགས་པའི་དགེ་སློང་གི་དགེ་འདུན་ལ་སྦྱིན་པ་ཆེན་པོ་བཏང་ནས། ཙན་དན་དམར་པོས་མཆོད་ནས་དེ་ཡང་དེས་མ་འོངས་པ་ན་སངས་རྒྱས་པར་འགྱུར་རོ་ཞེས་ལུང་བསྟན་ཏོ། །བཅོམ་ལྡན་འདས་དེའི་གྲོང་ཁྱེར་ནི་འབྱོར་ལྡན་ཞེས་
བྱ་བར་འགྱུར་རོ། །ཡབ་ནི་བློ་གྲོས་བཟང་པོ་ཞེས་བྱ་བའི་རྒྱལ་པོའོ། །ཡུམ་ནི་ཡིད་ལྡན་མ་ཞེས་བྱ་བའོ། །སཱ་ལ་བཟང་པོ་དང་རྒྱལ་བྱེད་བཤེས་གཉེན་ནི་ཉན་ཐོས་ཀྱི་མཆོག་གོ། །གནས་མཆོག་ནི་ཉེ་གནས་སོ། །མཆོག་མ་དང་འབྲས་བུ་ཅན་མ་ནི་
39-1-203b


ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་སྲོ་ན་ཆེན་པོའོ། །སྐུའི་མཐོ་ཚད་དུ་ཁྲུ་བརྒྱད་བཅུ་རྩ་བརྒྱད་པའོ། །སྐུ་ཚེའི་ཚད་ནི་ལོ་སྟོང་ཕྲག་དགུ་བཅུའོ། །པད་མ་ཡི་ནི་འོག་ཏུ་ནི། །རྐང་གཉིས་མཆོག་གི་རྫོགས་སངས་རྒྱས། །མཚན་ནི་མི་སྦྱིན་ཞེས་བྱ་བ། །
གང་ཟག་ཟླ་མེད་མཚུངས་མེད་དོ། །སངས་རྒྱས་མི་སྦྱིན་གྱི་འོག་གི་ཆར་འདི་ནས་བསྐལ་པ་འབུམ་ཕྲག་གཅིག་གི་མགོ་ནས་བརྩམས་ཏེ་བསྐལ་པ་གཅིག་ཉིད་ཀྱི་ནང་དུ་སངས་རྒྱས་པད་མ་མཆོག་ཅེས་བྱ་བ་བྱོན་ནོ། །དེའི་ཡང་འདུས་པ་གསུམ་དུ་འགྱུར་
ཏེ། འདུས་པ་དང་པོ་ལ་བྱེ་བ་སྟོང་ཕྲག་བརྒྱའི་དགེ་སློང་ངོ་། །གཉིས་པ་ལ་བཻ་བྷཱ་རའི་རི་ལ་བྱེ་བ་སྟོང་ཕྲག་དགུ་བཅུའོ། །གསུམ་པ་ལ་བྱེ་བ་སྟོང་ཕྲག་བརྒྱད་བཅུའོ། །དེའི་ཚེ་བྱང་ཆུབ་སེམས་དཔའ་རལ་པ་ཅན་ཞེས་བྱ་བའི་ཡུལ་འཁོར་ཆེན་པོར་སྐྱེས་སོ། །
སངས་རྒྱས་ལ་སོགས་པའི་དགེ་འདུན་རྣམས་ལ་ཆོས་གོས་དང་བཅས་པའི་སྦྱིན་པ་ཆེན་པོ་བཏང་ངོ་། །དེ་ཡང་དེས་མ་འོངས་པ་ན་སངས་རྒྱས་པར་འགྱུར་རོ་ཞེས་ལུང་བསྟན་ནོ། །གཞན་ཡང་བཅོམ་ལྡན་འདས་པད་མ་མཆོག་གི་དུས་སུ་མུ་སྟེགས་ཞེས་
བྱ་བའི་མིང་ཡང་མེད་དོ། །ལྷ་དང་མི་ཐམས་ཅད་སངས་རྒྱས་ལ་སྐྱབས་སུ་འགྲོ་བའོ། །དེའི་གྲོང་ཁྱེར་ནི་དང་བ་ལྡན་ཞེས་བྱ་བར་འགྱུར་རོ། །ཡབ་ནི་ཀུན་དགའ་བོ་ཞེས་བྱ་བའི་རྒྱལ་པོའོ། །ཡུམ་ནི་ལེགས་མ་ཞེས་བྱ་བའོ། །ལྷའི་སྤྱན་དང་ལེགས་སྐྱེས་
ནི་ཉན་ཐོས་ཀྱི་མཆོག་གོ། །ཡིད་བཟང་ཞེས་བྱ་བ་ནི་ཉེ་གནས་སོ། །གྲོགས་མེད་མ་དང་མཚུངས་མེད་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཤཱ་ལའི་ཤིང་ཉིད་དོ། །སྐུའི་མཐོ་ཚད་དུ་ཁྲུ་བརྒྱད་བཅུ་རྩ་བརྒྱད་དོ། །སྐུའི་འོད་ཀུན་ནས་འཁོར་
བ་ལ་དཔག་ཚད་བཅུ་གཉིས་སོ། །སྐུ་ཚེའི་ཚད་ནི་ལོ་འབུམ་ཕྲག་གཅིག་གོ། །མི་སྦྱིན་གྱི་ནི་འོག་ཉིད་དུ། །རྐང་གཉིས་མཆོག་གི་རྫོགས་སངས་རྒྱས། །རྒྱལ་བ་པད་མ་མཆོག་ཞེས་པ། །མི་འཁྲུགས་རྒྱ་མཚོ་ལྟ་བུའོ། །དེའི་འོག་གི་ཆར་བསྐལ་
པ་སྟོང་ཕྲག་གསུམ་འདས་ནས། བློ་གྲོས་བཟང་པོ་དང་ལེགས་སྐྱེས་ཞེས་བྱ་བ་ནི་བསྐལ་པ་གཅིག་གི་ནང་དུ་སངས་རྒྱས་གཉིས་སུ་གྱུར་ཏོ། །བློ་གྲོས་བཟང་པོའི་ཡང་ཉན་ཐོས་ཀྱི་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་གྲོང་ཁྱེར་ལྟ་ན་
39-1-204a


སྡུག་ཅེས་བྱ་བ་ན་བྱེ་བ་བརྒྱའི་ཟག་པ་ཟད་པའོ། །འདུས་པ་གཉིས་པ་ལ་ཡང་བྱེ་བ་དགུ་བཅུར་འགྱུར་རོ། །འདུས་པ་གསུམ་པ་ལ་ནི་བྱེ་བ་བརྒྱད་བཅུའོ། །དེའི་ཚེ་བྱང་ཆུབ་སེམས་དཔའ་ལུས་མཆོག་ཅེས་བྱ་བ་བྲམ་ཟེའི་ཁྱེའུར་
གྱུར་ཏོ། །སའི་འོག་ཏུ་གཏེར་དུ་བཅུག་པ་ཉིད་བྱེ་བ་བརྒྱད་བཅུའི་ནོར་རྣམས་སྤེལ་ནས་སངས་རྒྱས་ལ་སོགས་པའི་དགེ་སློང་གི་དགེ་འདུན་ལ་སྦྱིན་པ་ཆེན་པོ་ཕུལ་ཏེ་ཆོས་མཉན་ནས་སྐྱབས་སུ་འགྲོ་བའི་སྡོམ་པ་ལ་གནས་སོ། །རབ་ཏུ་བྱུང་
ནས་ནགས་ཚལ་དུ་བྱོན་ནོ། །དེ་ཡང་མ་འོངས་པ་ན་སངས་རྒྱ་བར་ལུང་བསྟན་ནོ། །བཅོམ་ལྡན་འདས་བློ་གྲོས་བཟང་པོའི་གྲོང་ཁྱེར་ནི་བལྟ་ན་སྡུག་ཅེས་བྱ་བར་གྱུར་ཏོ། །ཡབ་ནི་ལེགས་སྦྱིན་ཞེས་བྱ་བའི་རྒྱལ་པོའོ། །ཡུམ་ནི་ལེགས་སྦྱིན་མ་ཞེས་བྱ་བའོ། །
ངེས་འབྱུང་དང་ཐམས་ཅད་འདོད་ནི་ཉན་ཐོས་ཀྱི་མཆོག་གོ། །རྒྱ་མཚོ་ཞེས་བྱ་བ་ནི་ཉེ་གནས་སོ། །དགའ་མ་དང་ཤིན་དུ་དགའ་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཤིང་ནཱི་པ་ཆེན་པོའོ། །སྐུ་མཐོ་ཚད་དུ་ཁྲུ་བརྒྱད་བཅུ་རྩ་བརྒྱད་དོ། །སྐུ་
ཚེའི་ཚད་ནི་ལོ་སྟོང་ཕྲག་དགུ་བཅུའོ། །པད་མ་མཆོག་གི་འོག་ཏུ་ནི། །འདྲེན་པ་བློ་བཟང་ཞེས་བྱ་བ། །འོད་ཟེར་དྲག་ཅིང་རིང་ལ་སེམས། །ཐུབ་པ་འཇིག་རྟེན་ཀུན་གྱི་མཆོག །དེའི་འོག་གི་ཆར་ལེགས་སྐྱེས་ཞེས་བྱ་བའི་སྟོན་པ་བྱོན་ནོ། །དེའི་
ཡང་ཉན་ཐོས་ཀྱི་འདུས་པ་གསུམ་དུ་གྱུར་ཏེ། འདུས་པ་དང་པོ་ལ་དགེ་སློང་སྟོང་ཕྲག་བཅུའོ། །གཉིས་པ་ལ་སྟོང་ཕྲག་ལྔ་བཅུའོ། །གསུམ་པ་ལ་སྟོང་ཕྲག་བཞི་བཅུའོ། །དེའི་ཚེ་བྱང་ཆུབ་སེམས་དཔའ་འཁོར་ལོས་སྒྱུར་བའི་རྒྱལ་
པོར་གྱུར་ཏེ། སངས་རྒྱས་བྱོན་ཞེས་ཐོས་ནས་ཉེ་བར་སོང་སྟེ། ཆོས་ཐོས་ནས་སངས་རྒྱས་ལ་སོགས་པའི་དགེ་འདུན་ལ་རིན་པོ་ཆེ་སྣ་བདུན་དང་བཅས་པའི་གླིང་ཆེན་པོ་བཞིའི་རྒྱལ་སྲིད་སྦྱིན་པར་བཏང་ནས། སྟོན་པའི་དྲུང་དུ་རབ་ཏུ་
བྱུང་ངོ་། །ཡུལ་ཐམས་ཅད་ན་གནས་པའི་ཡུལ་དུ་སྐྱེས་པའི་ནོར་བླངས་ནས་གཙུག་ལག་ཁང་རྣམས་རྫོགས་པར་བྱ་སྟེ། སངས་རྒྱས་ལ་སོགས་པའི་དགེ་སློང་རྣམས་ལ་སྦྱིན་པ་ཆེན་པོ་ཕུལ་ལོ། །དེ་ཡང་མ་འོངས་པ་ན་སྟོན་པས་སངས་
39-1-204b


རྒྱས་པར་འགྱུར་རོ་ཞེས་ལུང་བསྟན་ནོ། །བཅོམ་ལྡན་འདས་དེའི་གྲོང་ཁྱེར་ནི་བཀྲ་ཤིས་བཟང་པོ་ཞེས་བྱ་བར་གྱུར་ཏོ། །ཡབ་ནི་དྲག་པོ་ཞེས་བྱ་བའི་རྒྱལ་པོའོ། །ཡུམ་ནི་འོད་ལྡན་མ་ཞེས་བྱ་བའོ། །བལྟ་ན་སྡུག་དང་ལྟ་གཉིས་ནི་ཉན་ཐོས་ཀྱི་མཆོག་
གོ། །མི་སྦྱིན་ནི་ཉེ་གནས་སོ། །གླུ་མ་དང་གླུ་མའི་ཕྲེང་བ་དང་བཅས་པ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་འོད་མ་ཆེན་པོའོ། །དེའི་ནང་བུག་པ་ཕྲ་མོ་ཅན་ནོ། །སྡོང་པོ་ནི་སྡུག་པོའོ། །སྟེང་ན་ཡལ་ག་སྨ་བྱའི་གདུགས་ལྟར་
མཛེས་པའི་འདབ་མ་ཅན་ནོ། །བཅོམ་ལྡན་འདས་དེའི་སྐུའི་མཐོ་ཚད་དུ་ཁྲུ་ལྔ་བཅུའོ། །སྐུ་ཚེའི་ཚད་ནི་ལོ་སྟོང་ཕྲག་དགུ་བཅུའོ། །སྙིང་པོའི་བསྐལ་པ་དེ་ཉིད་ལ། །འདྲེན་པ་ལེགས་སྐྱེས་ཞེས་བྱ་བ། །ཁྱུ་མཆོག་དཔུང་པ་སེང་གེ་
ཡི་འགྲམ། །རིང་ལ་སེམས་ཞིང་གཞལ་དུ་མེད། །དེའི་འོག་གི་ཆར་འདི་ནས་བསྐལ་པ་བརྒྱ་དང་བཅྭ་བརྒྱད་ཀྱི་མགོ་ནས་བརྩམས་ནས་བསྐལ་པ་གཅིག་ལ་དགའ་མཐོང་དང་། དོན་མཐོང་དང་། ཆོས་མཐོང་སྟེ་སངས་རྒྱས་གསུམ་
བྱོན་ནོ། །དགའ་མཐོང་གི་ཡང་ཉན་ཐོས་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་བྱེ་བ་སྟོང་ཕྲག་བརྒྱའི་དགེ་སློང་ངོ་། །གཉིས་པ་ལ་བྱེ་བ་དགུ་བཅུའོ། །གསུམ་པ་ལ་བྱེ་བ་བརྒྱད་བཅུའོ། །དེའི་ཚེ་བྱང་ཆུབ་སེམས་དཔའ་འོད་
བསྲུང་ཞེས་བྱ་བའི་བྲམ་ཟེའི་ཁྱེའུར་གྱུར་ཏོ། །རིག་བྱེད་གསུམ་གྱི་ཕ་རོལ་དུ་ཕྱིན་ནས་སྟོན་པའི་ཆོས་བསྟན་པ་ཐོས་ཏེ་བྱེ་བ་སྟོང་ཕྲག་བརྒྱའི་ནོར་ཡོངས་སུ་བཏང་ནས་དགེ་འདུན་གྱི་གཙུག་ལག་ཁང་བྱེད་ཅིང་སྐྱབས་སུ་སོང་ནས་ཚུལ་ཁྲིམས་
ལ་གནས་སོ། །དེ་ནས་སྟོན་པས་བསྐལ་པ་བརྒྱ་དང་བཅྭ་བརྒྱད་འདས་ནས་སངས་རྒྱས་སུ་འགྱུར་རོ་ཞེས་ལུང་བསྟན་ནོ། །བཅོམ་ལྡན་འདས་དེའི་གྲོང་ཁྱེར་ནི་ཡིད་ལྡན་ཞེས་བྱ་བར་གྱུར་ཏོ། །ཡབ་ནི་ལེགས་སྦྱིན་ཞེས་བྱ་བའི་རྒྱལ་པོའོ། །
ཡུམ་ནི་ཟླ་བ་མ་ཞེས་བྱ་བའོ། །བསྐྱངས་པ་དང་ཀུན་མཐོང་གཉིས་ནི་ཉན་ཐོས་ཀྱི་མཆོག་གོ། །མཛེས་བྱེད་ནི་ཉེ་གནས་སོ། །ལེགས་སྐྱེས་མ་དང་ཆོས་སྦྱིན་མ་གཉིས་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་པྲི་ཡཾ་གུའི་ཤིང་ངོ་། །སྐུའི་
39-1-205a


མཐོ་ཚད་དུ་ཁྲུ་བརྒྱད་བཅུའོ། །སྐུ་ཚེའི་ཚད་ནི་ལོ་སྟོང་ཕྲག་དགུ་བཅུའོ། །ལེགས་སྐྱེས་ཀྱི་ནི་འོག་ཏུ་ནི། །རང་བྱུང་འཇིག་རྟེན་འདྲེན་པ་ཉིད། །མཚུངས་དང་མི་མཚུངས་རིང་དུ་སེམས། །དགའ་མཐོང་གྲགས་པ་ཆེན་པོའོ། །དེའི་འོག་
གི་ཆར་བཅོམ་ལྡན་འདས་དོན་མཐོང་ཞེས་བྱ་བ་བྱོན་ནོ། །དེའི་ཡང་ཉན་ཐོས་ཀྱི་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་འབུམ་ཕྲག་དགུ་བཅུ་རྩ་བརྒྱད་ཀྱི་དགེ་སློང་ངོ་། །གཉིས་པ་ལ་འབུམ་ཕྲག་བརྒྱད་བཅུ་རྩ་བརྒྱད་དོ། །དེ་བཞིན་དུ་གསུམ་པ་
ལ་ཡང་ངོ་། །དེའི་ཚེ་བྱང་ཆུབ་སེམས་དཔའ་འཚམས་བཟང་ཞེས་བྱ་བ་རྫུ་འཕྲུལ་དང་ལྡན་པའི་དཀའ་ཐུབ་པར་གྱུར་ཏོ། །ལྷའི་འཇིག་རྟེན་གྱི་མན་དཱ་ར་བའི་མེ་ཏོག་གི་གདུགས་བླངས་ནས་སྟོན་པ་ལ་མཆོད་དོ། །དེ་ཡང་དེས་ལུང་བསྟན་ཏོ། །བཅོམ་
ལྡན་འདས་དེའི་གྲོང་ཁྱེར་ནི་མཛེས་བྱེད་ཅེས་བྱ་བར་གྱུར་ཏོ། །ཡབ་ནི་རྒྱ་མཚོ་ཞེས་བྱ་བའི་རྒྱལ་པོའོ། །ཡུམ་ནི་ལྟ་ན་སྡུག་མའོ། །ཞི་བ་དང་ཉེ་བར་ཞི་བ་ནི་ཉན་ཐོས་ཀྱི་མཆོག་གོ། །འཇིགས་མེད་ནི་ཉེ་གནས་སོ། །ཆོས་མ་དང་ཆོས་བཟང་མ་ནི་ཉན་
ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཙམ་པ་ཀའི་ཤིང་ངོ་། །སྐུའི་མཐོ་ཚད་དུ་ཁྲུ་བརྒྱད་བཅུ་རྩ་བརྒྱད་དོ། །སྐུའི་འོད་ཀུན་ནས་འཁོར་བ་ལ་དུས་ཐམས་ཅད་དུ་དཔག་ཚད་གཅིག་གི་བར་དུ་ཁྱབ་ཅིང་གནས་སོ། །སྐུ་ཚེའི་ཚད་ནི་ལོ་འབུམ་
ཕྲག་གཅིག་གོ། །སྙིང་པོའི་བསྐལ་པ་དེ་ཉིད་ལ། །དོན་མཐོང་མིའི་ཁྱུ་མཆོག་ནི། །མུན་པ་ཆེན་པོ་གསལ་ནས་ནི། །ཡང་དག་བྱང་ཆུབ་མཆོག་ཐོབ་བོ། །དེའི་འོག་གི་ཆར་ཆོས་མཐོང་ཞེས་བྱ་བའི་སྟོན་པ་བྱོན་ནོ། །དེའི་ཡང་ཉན་ཐོས་འདུས་པ་
གསུམ་དུ་འགྱུར་ཏེ། འདུས་པ་དང་པོ་ལ་བྱེ་བ་བརྒྱའི་དགེ་སློང་ངོ་། །གཉིས་པ་ལ་བྱེ་བ་བདུན་བཅུའོ། །གསུམ་པ་ལ་བྱེ་བ་བརྒྱད་བཅུའོ། །དེའི་ཚེ་བྱང་ཆུབ་སེམས་དཔའ་ལྷའི་རྒྱལ་པོ་བརྒྱ་བྱིན་དུ་གྱུར་ཏོ། །ལྷའི་དྲི་བཟང་དང་མེ་ཏོག་དང་ལྷའི་
རོལ་མོ་རྣམས་ཀྱིས་མཆོད་དེ། དེ་ཡང་མ་འོངས་པ་ན་སངས་རྒྱ་བར་ལུང་བསྟན་ཏོ། །བཅོམ་ལྡན་འདས་དེའི་གྲོང་ཁྱེར་ནི་སྐྱབས་ཞེས་བྱ་བར་གྱུར་ཏོ། །ཡབ་ནི་སྐྱབས་ཀྱི་རྒྱལ་པོ་ཞེས་བྱའོ། །ཡུམ་ནི་ཤིན་དུ་དགའ་མ་ཞེས་བྱ་བའོ། །པད་མ་དང་
39-1-205b


ལྷར་གྱུར་པ་ནི་ཉན་ཐོས་ཀྱི་མཆོག་གོ། །ལེགས་སྤྱན་ཞེས་བྱ་བ་ནི་ཉེ་གནས་སོ། །དགེ་མ་དང་བདེན་མ་ཞེས་བྱ་བ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་པིམ་པ་ཛཱ་ལའི་ཤིང་ངོ་། །སྐུའི་མཐོ་ཚད་དུ་ཁྲུ་བརྒྱད་བཅུའོ། །སྐུ་ཚེའི་ཚད་ནི་
ལོ་འབུམ་ཕྲག་གཅིག་གོ། །སྙིང་པོའི་བསྐལ་པ་དེ་ཉིད་ལ། །ཆོས་མཐོང་གྲགས་པ་ཆེན་པོ་ཡིས། །མུན་པ་ཆེན་པོ་བཅོམ་ནས་ནི། །ལྷ་དང་བཅས་པ་སྣང་བར་མཛད། །དེའི་འོག་གི་ཆར་འདི་ནས་བསྐལ་པ་དགུ་བཅུ་རྩ་བཞི་ནས་མགོ་བརྩམས་ནས་བསྐལ་
པ་གཅིག་ལ་དོན་གྲུབ་ཞེས་བྱ་བའི་སངས་རྒྱས་གཅིག་བྱོན་ནོ། །དེའི་ཡང་ཉན་ཐོས་ཀྱི་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་བྱེ་བ་འབུམ་ཕྲག་གཅིག་གི་དགེ་སློང་ངོ་། །གཉིས་པ་ལ་བྱེ་བ་དགུ་བཅུའོ། །གསུམ་པ་ལ་བྱེ་བ་བརྒྱད་བཅུའོ། །དེའི་
ཚེ་བྱང་ཆུབ་སེམས་དཔའ་གཟི་བརྗིད་དྲག་པོ་དང་། མངོན་པར་ཤེས་པའི་སྟོབས་དང་ལྡན་པའི་དཀའ་ཐུབ་པ་བཀྲ་ཤིས་བཟང་པོ་ཞེས་བྱ་བར་གྱུར་ཏོ། །ཤིང་འཛམ་བུ་ཆེན་པོའི་འབྲས་བུ་བླངས་ནས་དེ་བཞིན་གཤེགས་པ་ལ་ཕུལ་ལོ། །སྟོན་པས་འབྲས་
བུ་དེ་གསོལ་ནས་བསྐལ་པ་དགུ་བཅུ་རྩ་བཞིའི་འོག་ཏུ་བྱང་ཆུབ་སེམས་དཔའ་མ་འོངས་པ་ན་སངས་རྒྱས་སུ་འགྱུར་རོ་ཞེས་ལུང་བསྟན་ནོ། །བཅོམ་ལྡན་འདས་དེའི་གྲོང་ཁྱེར་ནི་བཻ་བྷཱ་ར་ཞེས་བྱ་བར་གྱུར་ཏོ། །ཡབ་ནི་རྒྱལ་བའི་སྡེ་ཞེས་བྱ་བའི་རྒྱལ་པོ
འོ། །ཡུམ་ནི་ལེགས་གྱུར་མ་ཞེས་བྱ་བའོ། །མང་དུ་འབྱུང་དང་བཤེས་གཉེན་བཟང་པོ་ནི་ཉན་ཐོས་ཀྱི་མཆོག་གོ། །ནམ་གྲུ་ཅན་ནི་ཉེ་གནས་སོ། །ཞི་བྱེད་ལེན་མ་དང་ལེགས་བརྟན་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཀརྣི་ཀའི་ཤིང་ངོ་། །
སྐུའི་མཐོ་ཚད་ནི་ཁྲུ་དྲུག་བཅུའོ། །སྐུ་ཚེའི་ཚད་ནི་ལོ་འབུམ་ཕྲག་གཅིག་གོ། །ཆོས་མཐོང་གི་ནི་འོག་ཉིད་དུ། །འཇིག་རྟེན་འདྲེན་པ་དོན་གྲུབ་ཀྱི། །མུན་པ་ཐམས་ཅད་བཅོམ་ནས་ནི། །ནམ་མཁར་ཉི་མ་ཤར་བ་བཞིན། །དེའི་འོག་གི་ཆར་འདི་
ནས་བསྐལ་པ་འབུམ་ཕྲག་དགུ་བཅུ་རྩ་གཉིས་ནས་མགོ་བརྩམས་ནས་བསྐལ་པ་གཅིག་ལ་དཀར་རྒྱལ་དང་གྱུར་པ་ཞེས་བྱ་བའི་སངས་རྒྱས་གཉིས་བྱོན་ནོ། །བཅོམ་ལྡན་འདས་དཀར་རྒྱལ་དེའི་ཡང་འདུས་པ་གསུམ་དུ་འགྱུར་ཏེ། 
39-1-206a


འདུས་པ་དང་པོ་ལ་བྱེ་བ་བརྒྱའི་དགེ་སློང་ངོ་། །གཉིས་པ་ལ་བྱེ་བ་དགུ་བཅུའོ། །གསུམ་པ་ལ་བྱེ་བ་བརྒྱད་བཅུའོ། །དེའི་ཚེ་བྱང་ཆུབ་སེམས་དཔའ་ལོངས་སྤྱོད་ཆེན་པོ་དང་གྲགས་པ་ཆེན་པོ་དང་ལྡན་པའི་ལེགས་སྐྱེས་ཞེས་བྱ་བའི་རྒྱལ་
རིགས་སུ་གྱུར་པ་དཀའ་ཐུབ་པའི་རབ་ཏུ་བྱུང་བ་ལ་རབ་ཏུ་བྱུང་ནས་རྫུ་འཕྲུལ་དང་ལྡན་པར་གྱུར་ཏེ་སངས་རྒྱས་བྱོན་པ་ཐོས་ནས་ལྷའི་མེ་ཏོག་མན་དཱ་ར་བ་དང་པད་མ་དང་པཱ་རི་ཙྪ་ཏྟྲའི་མེ་ཏོག་རྣམས་བླངས་ནས་འཁོར་བཞིའི་ནང་དུ་གཤེགས་པའི་དེ་བཞིན་གཤེགས་
པ་ལ་མཆོད་ནས། ནམ་མཁའ་མེ་ཏོག་གི་བླ་རེས་བྲེས་སོ། །སངས་རྒྱས་དེས་ཡང་འདི་ནས་བསྐལ་པ་དགུ་བཅུ་རྩ་གཉིས་ནས་འཚང་རྒྱ་བར་འགྱུར་རོ་ཞེས་ལུང་བསྟན་ཏོ། །བཅོམ་ལྡན་འདས་དེའི་གྲོང་ཁྱེར་ནི་དགེ་མ་ཞེས་བྱ་བའོ། །ཡབ་ནི་སྐྱེ་བོ་དད་
པ་ཅན་ཞེས་བྱ་བའི་རྒྱལ་པོའི་རིགས་སོ། །ཡུམ་ནི་པད་མ་ཞེས་བྱ་བའོ། །ཚངས་པའི་ལྷ་དང་འཆར་བྱེད་ནི་ཉན་ཐོས་ཀྱི་མཆོག་གོ། །ཡང་དག་མཆོག་ནི་ཉེ་གནས་སོ། །མྱུར་མ་དང་ལེགས་སྦྱིན་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་
ཨ་ས་ནའི་ཤིང་ངོ་། །སྐུའི་མཐོ་ཚད་ལ་ཁྲུ་དྲུག་བཅུའོ། །སྐུ་ཚེའི་ཚད་ནི་ལོ་འབུམ་ཕྲག་གཅིག་གོ། །དོན་གྲུབ་ཀྱི་ནི་འོག་ཉིད་དུ། །གང་ཟག་ཟླ་མེད་མཚུངས་མེད་པ། །ཚུལ་ཁྲིམས་དཔག་མེད་མཐའ་ཡས་གྲགས། །འཇིག་རྟེན་འདྲེན་པ་
དཀར་རྒྱལ་མཆོག །དེའི་འོག་གི་ཆར་གྱུར་པ་ཞེས་བྱ་བའི་སྟོན་པ་བྱོན་ནོ། །དེའི་ཡང་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་འབུམ་ཕྲག་དྲུག་བཅུའི་དགེ་སློང་ངོ་། །གཉིས་པ་ལ་འབུམ་ཕྲག་ལྔ་བཅུའོ། །གསུམ་པ་ལ་འབུམ་
ཕྲག་སུམ་བཅུ་རྩ་གཉིས་སོ། །དེའི་ཚེ་བྱང་ཆུབ་སེམས་དཔའ་རྣམ་པར་རྒྱལ་བྱེད་ཞེས་བྱ་བའི་རྒྱལ་རིགས་སུ་གྱུར་ཏེ། རྒྱལ་པོ་ཆེན་པོའི་རྒྱལ་རིགས་སྤངས་ནས་ནི་སྟོན་པའི་དྲུང་དུ་རབ་ཏུ་བྱུང་སྟེ་སྡེ་སྣོད་གསུམ་བསླབས་ནས་སྐྱེ་བོ་མང་
པོ་ལ་དམ་པའི་ཆོས་སྟོན་ཅིང་འཆད་པ་དང་ཚུལ་ཁྲིམས་ཀྱི་ཕ་རོལ་དུ་ཕྱིན་པ་རྫོགས་པར་བྱས་ནས་དེ་ཡང་དེ་བཞིན་དུ་འཚང་རྒྱ་བར་འགྱུར་རོ་ཞེས་ལུང་བསྟན་ཏོ། །བཅོམ་ལྡན་འདས་དེའི་གྲོང་ཁྱེར་ནི་གསལ་ལྡན་ཞེས་བྱ་བར་གྱུར་
39-1-206b


ཏོ། །ཡབ་ནི་རྒྱལ་བའི་སྡེ་ཞེས་བྱ་བའི་རྒྱལ་པོའོ། །ཡུམ་ནི་དཔལ་ལྡན་མ་ཞེས་བྱའོ། །ལེགས་བསྲུང་དང་ཆོས་ཀྱི་སྡེ་ནི་ཉན་ཐོས་ཀྱི་མཆོག་གོ། །འཇིགས་བཅས་ནི་ཉེ་གནས་སོ། །ཕྲེང་བ་མ་དང་ཉེ་བའི་ཕྲེང་བ་མ་ནི་ཉན་ཐོས་མའི་
མཆོག་གོ། །བྱང་ཆུབ་ཀྱི་ཤིང་ནི་སྐྱུ་རུ་རའི་ཤིང་ངོ་། །སྐྲུའི་མཐོ་ཚད་དུ་ཁྲུ་ལྔ་བཅུ་རྩ་བརྒྱད་དོ། །སྐུ་ཚེའི་ཚད་ནི་ལོ་སྟོང་ཕྲག་དགུ་བཅུའོ། །སྙིང་པོའི་བསྐལ་པ་དེ་ཉིད་ལ། །སྟོན་པ་བླ་ན་མེད་པར་གྱུར། །མཚུངས་དང་མི་མཚུངས་དཔེ་མེད་
པ། །འཇིག་རྟེན་མཆོག་གི་འདྲེན་པར་གྱུར། །དེའི་འོག་གི་ཆར་འདི་ནས་བསྐལ་པ་དགུ་བཅུ་རྩ་གཅིག་ལ་བཅོམ་ལྡན་འདས་རྣམ་པར་གཟིགས་ཞེས་བྱ་བ་བྱོན་ནོ། །དེའི་ཡང་འདུས་པ་གསུམ་དུ་གྱུར་ཏེ། འདུས་པ་དང་པོ་ལ་དགེ་སློང་
འབུམ་ཕྲག་དགུ་བཅུ་རྩ་བརྒྱད་དོ། །གཉིས་པ་ལ་འབུམ་ཕྲག་གཅིག་གོ། །གསུམ་པ་ལ་སྟོང་ཕྲག་བརྒྱད་བཅུའོ། །དེའི་ཚེ་བྱང་ཆུབ་སེམས་དཔའ་རྫུ་འཕྲུལ་ལྡན་ཞིང་མཐུ་ཆེ་བས་མཚུངས་པ་མེད་པའི་ཀླུའི་རྒྱལ་པོར་གྱུར་ཏེ། རིན་པོ་
ཆེ་སྣ་བདུན་གྱིས་བརྒྱན་པའི་གསེར་གྱི་གདན་ཆེན་པོ་བཅོམ་ལྡན་འདས་ལ་ཕུལ་ལོ། །དེས་ཡང་འདི་ནས་བསྐལ་པ་དགུ་བཅུ་རྩ་གཅིག་ནས་སངས་རྒྱ་བར་འགྱུར་རོ་ཞེས་ལུང་བསྟན་ནོ། །བཅོམ་ལྡན་འདས་དེའི་གྲོང་ཁྱེར་ནི་བློ་གྲོས་
གཉེན་ཞེས་བྱ་བར་གྱུར་ཏོ། །ཡབ་ནི་གཉེན་གྱི་རྒྱལ་པོ་ཞེས་བྱ་བའོ། །ཡུམ་ནི་བློ་གྲོས་གཉེན་མ་ཞེས་བྱ་བའོ། །ཕུང་པོ་དང་དཀར་རྒྱལ་ནི་ཉན་ཐོས་ཀྱི་མཆོག་གོ། །མྱ་ངན་མེད་ནི་ཉེ་གནས་སོ། །ཟླ་བ་མ་དང་ཟླ་བའི་བཤེས་གཉེན་མ་ནི་ཉན་
ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་པཱ་ཊི་ལིའི་ཤིང་ངོ་། །སྐུའི་མཐོ་ཚད་དུ་ཁྲུ་བརྒྱད་བཅུའོ། །སྐུའི་འོད་ལ་རྟག་ཏུ་དཔག་ཚད་བདུན་དུ་འཕྲོ་ཞིང་གནས་སོ། །སྐུ་ཚེའི་ཚད་ནི་ལོ་སྟོང་ཕྲག་བརྒྱད་བཅུའོ། །གྱུར་པ་ཡི་ནི་འོག་ཏུ་ནི། །རྐང་
གཉིས་མཆོག་གི་རྫོགས་སངས་རྒྱས། །མཚན་ནི་རྣམ་པར་གཟིགས་ཤེས་བྱ། །སྤྱན་ལྡན་འཇིག་རྟེན་བསྐྱེད་པའོ། །དེའི་འོག་གི་ཆར་འདི་ནས་བསྐལ་པ་སུམ་བཅུ་རྩ་གཉིས་ནས་གཙུག་ཏོར་ཅན་དང་ཐམས་ཅད་སྐྱོབ་ཅེས་པའི་སངས་རྒྱས་
39-1-207a


བྱོན་ནོ། །གཙུག་ཏོར་ཅན་གྱི་ཡང་ཉན་ཐོས་ཀྱི་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་འབུམ་ཕྲག་གཅིག་གི་དགེ་སློང་ངོ་། །གཉིས་པ་ལ་འབུམ་ཕྲག་བརྒྱད་བཅུའོ། །གསུམ་པ་ལ་འབུམ་ཕྲག་བཅུའོ། །དེའི་
ཚེ་བྱང་ཆུབ་སེམས་དཔའ་སྒྲའི་དབང་པོ་ཞེས་བྱ་བའི་རྒྱལ་པོར་གྱུར་ཏེ། སངས་རྒྱས་དང་བཅས་པའི་དགེ་འདུན་རྣམས་ལ་ཆོས་གོས་དང་བཅས་པའི་སྦྱིན་པ་ཆེན་པོ་ཕུལ་ལོ། །རིན་པོ་ཆེ་སྣ་བདུན་གྱིས་སོ་སོར་བརྒྱན་པའི་གླང་པོ་ཆེ་ཕུལ་ནས། གླང་པོ་
ཆེའི་ཚད་ཙམ་རི་ཞིང་རུང་བའི་ཡོ་བྱད་རྣམས་ཕུལ་ལོ། །དེས་ཡང་འདི་ནས་བསྐལ་པ་སུམ་བཅུ་རྩ་གཅིག་ནས་སངས་རྒྱས་སུ་འགྱུར་རོ་ཞེས་ལུང་བསྟན་ཏོ། །གཞན་ཡང་བཅོམ་ལྡན་འདས་དེའི་གྲོང་ཁྱེར་ནི་སྐྱ་རེང་ལྡན་ཞེས་བྱ་བར་གྱུར་ཏོ། །ཡབ་ནི་
སྐྱ་རེང་ལྡན་ཞེས་བྱ་བའི་རྒྱལ་པོའོ། །ཡུམ་ནི་འོད་ལྡན་མ་ཞེས་བྱ་བའོ། །མངོན་འབྱུང་དང་ཡང་དག་བྱུང་ནི་ཉན་ཐོས་ཀྱི་མཆོག་གོ། །དགེ་བར་བྱེད་པ་ནི་ཉེ་གནས་སོ། །མ་གི་ལ་དང་པད་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་པུཎ་ཊ་རི་
ཀའི་ཤིང་ངོ་། །སྐུའི་མཐོ་ཚད་དུ་ཁྲུ་སུམ་བཅུ་རྩ་བདུན་དུ་འགྱུར་རོ། །སྐུའི་འོད་དཔག་ཚད་གསུམ་དུ་འཕྲོ་ཞིང་གནས་སོ། །སྐུ་ཚེའི་ཚད་ནི་ལོ་སྟོང་ཕྲག་སུམ་བཅུ་རྩ་བདུན་ནོ། །རྣམ་པར་གཟིགས་ཀྱི་འོག་ཏུ་ནི། །རྐང་གཉིས་མཆོག་གི་རྫོགས་
སངས་རྒྱས། །མཚུངས་མེད་རྒྱལ་བ་གཙུག་ཏོར་ཅན། །གང་ཟག་ཟླ་མེད་མཚུངས་མེད་དོ། །དེའི་འོག་གི་ཆར་ཐམས་ཅད་སྐྱོབ་ཅེས་བྱ་བའི་སངས་རྒྱས་བྱོན་ནོ། །དེའི་ཡང་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་འབུམ་ཕྲག་བརྒྱད་
བཅུའི་དགེ་སློང་ངོ་། །གཉིས་པ་ལ་འབུམ་ཕྲག་སུམ་བཅུ་རྩ་བདུན་ནོ། །གསུམ་པ་ལ་འབུམ་ཕྲག་དྲུག་བཅུའོ། །དེའི་ཚེ་བྱང་ཆུབ་སེམས་དཔའ་བལྟ་ན་སྡུག་ཅེས་བྱ་བའི་རྒྱལ་པོར་གྱུར་ཏེ། སངས་རྒྱས་ལ་སོགས་པའི་དགེ་འདུན་ལ་ཆོས་གོས་དང་བཅས་
པའི་སྦྱིན་པ་ཆེན་པོ་ཕུལ་ནས་དེའི་དྲུང་དུ་རབ་ཏུ་བྱུང་སྟེ། སྤྱོད་པ་དང་ཡོན་ཏན་དང་ལྡན་པས་སངས་རྒྱས་དཀོན་མཆོག་ལ་རི་མོར་བྱས་ཏེ་དགའ་བར་གྱུར་ཏོ། །དེ་ཡང་བཅོམ་ལྡན་འདས་ཀྱིས་འདི་ནས་བསྐལ་པ་སུམ་བཅུ་རྩ་གཅིག་ནས་སངས་རྒྱས་
39-1-207b


སུ་འགྱུར་ཞེས་ལུང་བསྟན་ཏོ། །གཞན་ཡང་བཅོམ་ལྡན་འདས་དེའི་གྲོང་ཁྱེར་ནི་ཡིད་ལྡན་ཞེས་བྱ་བར་གྱུར་ཏོ། །ཡབ་ནི་ལེགས་པར་གནས་ཞེས་བྱ་བའི་རྒྱལ་པོའོ། །ཡུམ་ནི་གྲགས་ལྡན་མ་ཞེས་བྱ་བའོ། །ཉན་པ་དང་མཆོག་ནི་ཉན་ཐོས་ཀྱི་མཆོག་
གོ། །ཉེ་བར་ཞི་བ་ནི་ཉེ་གནས་སོ། །ཕྲེང་བ་མ་དང་ཕྲེང་བ་དང་བཅས་པ་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་སཱ་ལའི་ཤིང་ངོ་། །སྐུའི་མཐོ་ཚད་ནི་ཁྲུ་དྲུག་བཅུར་འགྱུར་རོ། །སྐུ་ཚེའི་ཚད་ནི་ལོ་སྟོང་ཕྲག་དྲུག་བཅུའོ། །སྙིང་པོའི་བསྐལ་པ་དེ་
ཉིད་ལ། །གང་ཟག་ཟླ་མེད་མཚུངས་པ་མེད། །མཚན་ནི་ཐམས་ཅད་སྐྱོབ་ཅེས་པ། །རྒྱལ་བ་དེ་ནི་འཇིག་རྟེན་བསྐྱེད། །དེའི་ཡང་འོག་གི་ཆར་བསྐལ་པ་འདི་ལ་སངས་རྒྱས་བཞི་བྱོན་ནོ། །ལོག་པར་དད་སེལ་དང་གསེར་ཐུབ་དང་འོད་བསྲུང་དང་བདག་ཅག་
གི་བཅོམ་ལྡན་འདས་སོ། །གཞན་ཡང་བཅོམ་ལྡན་འདས་ལོག་པར་དད་སེལ་གྱི་ཉན་ཐོས་ཀྱི་འདུས་པ་ནི་གཅིག་གོ། །དེ་ལ་སྟོང་ཕྲག་བཞི་བཅུའི་དགེ་སློང་ངོ་། །དེའི་ཚེ་བྱང་ཆུབ་སེམས་དཔའ་དགེ་བ་ཞེས་བྱ་བའི་རྒྱལ་པོར་གྱུར་ཏོ། །སངས་རྒྱས་ལ་སོགས་
པ་དགེ་འདུན་ལ་ལྷུང་བཟེད་ཆོས་གོས་དང་བཅས་པའི་སྦྱིན་པ་ཉིད་དང་མིག་སྨན་དང་སྨན་ལ་སོགས་པ་ཕུལ་ནས་སྟོན་པའི་ཆོས་བསྟན་པ་ཐོས་ནས་རབ་ཏུ་བྱུང་ངོ་། །དེ་ཡང་སྟོན་པས་ལུང་བསྟན་ཏོ། །གཞན་ཡང་བཅོམ་ལྡན་འདས་ལོག་པར་དད་སེལ་
དེའི་གྲོང་ཁྱེར་དགེ་བ་ཞེས་བྱ་བར་འགྱུར་རོ། །ཡབ་ནི་མི་སྦྱིན་བྲམ་ཟེ་ཞེས་བྱ་བའོ། །ཡུམ་ནི་བྲམ་ཟེ་མོ་གྲོགས་མའོ། །བི་དྷུ་ར་དང་ཡང་དག་འཚོ་ནི་ཉན་ཐོས་ཀྱི་མཆོག་གོ། །བྲམ་ཟེ་བློ་གྲོས་ནི་ཉེ་གནས་སོ། །མཉམ་བྱེད་དང་ཙམ་པ་ཀ་ནི་ཉན་ཐོས་
མའི་མཆོག་གོ། །བྱང་ཆུབ་ཀྱི་ཤིང་ནི་ཤིང་ཤ་རི་ཥ་ཆེན་པོའོ། །སྐུའི་མཐོ་ཚད་ལ་ཁྲུ་བཞི་བཅུར་འགྱུར་རོ། །སྐུ་ཚེའི་ཚད་ནི་ལོ་སྟོང་ཕྲག་བཞི་བཅུའོ། །ཐམས་ཅད་སྐྱོབ་ཀྱི་འོག་ཏུ་ནི། །རྐང་གཉིས་མཆོག་གི་རྫོགས་སངས་རྒྱས། །
མཚན་ནི་ལོག་པར་དད་སེལ་ཞེས། །གཞལ་མེད་རིང་ལ་སེམས་པའོ། །དེའི་འོག་གི་ཆར་སྟོན་པ་གསེར་ཐུབ་ཅེས་བྱ་བ་བྱོན་ནོ། །དེའི་ཡང་ཉན་ཐོས་ཀྱི་འདུས་པ་གཅིག་སྟེ། དེ་ལ་སྟོང་ཕྲག་སུམ་བཅུའི་དགེ་སློང་དུ་འགྱུར་རོ། །དེའི་ཚེ་
39-1-208a


བྱང་ཆུབ་སེམས་དཔའ་རི་ཞེས་བྱ་བའི་རྒྱལ་པོར་གྱུར་ཏོ། །བློན་པོའི་ཚོགས་མང་པོ་འཁོར་དང་བཅས་པ་ཆོས་བསྟན་པ་ཐོས་ནས་སངས་རྒྱས་ལ་སོགས་པའི་དགེ་སློང་གི་དགེ་འདུན་རྣམས་མགྲོན་དུ་གཉེར་ནས་སྦྱིན་པ་ཆེན་པོ་
ཕུལ་ཏེ་སྟོན་པའི་དྲུང་དུ་སོང་སྟེ། ལྷུང་བཟེད་དང་། རྒྱའི་དར་དང་གྲོང་ཁྱེར་གསལ་ལྡན་གྱི་ཡུལ་གྱི་རས་དང་ལ་བ་དང་། དུ་ཀུ་ལའི་རས་དང་། དར་གོས་གསེར་མ་རྣམས་ཕུལ་ཏེ། སྟོན་པའི་དྲུང་དུ་རབ་ཏུ་བྱུང་ངོ་། །དེ་ཡང་སངས་རྒྱས་སུ་འགྱུར་བར་ལུང་
བསྟན་ནོ། །བཅོམ་ལྡན་འདས་དེའི་གྲོང་ཁྱེར་ནི་མཛེས་ལྡན་ཞེས་བྱ་བར་འགྱུར་རོ། །ཡབ་ནི་གནོད་སྦྱིན་ཞེས་བྱ་བའི་བྲམ་ཟེའོ། །ཡུམ་ནི་མཆོག་མ་ཞེས་བྱ་བའི་བྲམ་ཟེ་མོའོ། །འཇིགས་བྱེད་དང་མཆོག་ནི་ཉན་ཐོས་ཀྱི་མཆོག་གོ། །བཀྲ་ཤིས་ཞེས་
བྱ་བ་ནི་ཉེ་གནས་སོ། །རྒྱ་མཚོ་མ་དང་མཆོག་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཨུ་དུམ་བ་རའི་ཤིང་ངོ་། །སྐུའི་མཐོ་ཚད་ལ་ཁྲུ་ཉི་ཤུའོ། །སྐུ་ཚེའི་ཚད་ནི་ལོ་སྟོང་ཕྲག་སུམ་བཅུའོ། །ལོག་པར་དད་སེལ་འོག་ཏུ་ནི། །རྐང་
གཉིས་མཆོག་གི་རྫོགས་སངས་རྒྱས། །མཚན་ནི་རྒྱལ་བ་གསེར་ཐུབ་བོ། །མི་ཡི་ཁྱུ་མཆོག་འཇིག་རྟེན་གཙོ། །དེའི་འོག་གི་ཆར་འོད་སྲུང་ཞེས་བྱ་བའི་སྟོན་པ་བྱོན་ནོ། །དེའི་ཡང་འདུས་པ་གཅིག་སྟེ། དེ་ལ་དགེ་སློང་སྟོང་ཕྲག་ཉི་ཤུའོ། །
དེའི་ཚེ་བྱང་ཆུབ་སེམས་དཔའ་འོད་བསྐྱོད་ཞེས་བྱ་བའི་བྲམ་ཟེའི་ཁྱེའུར་གྱུར་ནས། རིག་བྱེད་གསུམ་གྱི་ཕ་རོལ་དུ་སོན་ཏེ། ས་དང་བར་སྣང་ཐམས་ཅད་ལ་གྲགས་སོ། །བུམ་པ་བྱེད་པའི་རྫ་མཁན་གྱི་གྲོགས་པོར་གྱུར་ཏོ། །བྱང་ཆུབ་
སེམས་དཔའ་རྫ་མཁན་དང་འདྲོགས་ཏེ་སྟོན་པའི་དྲུང་དུ་ཉེ་བར་སོང་སྟེ། ཆོས་ཀྱི་གཏམ་ཐོས་ནས་རབ་ཏུ་བྱུང་ངོ་། །བརྩོན་འགྲུས་ཆེར་བསྐྱེད་ནས་སྡེ་སྣོད་གསུམ་བསླབས་ཏེ་སྤྱོད་པ་དང་ལྡན་པས་སངས་རྒྱས་ཀྱི་བསྟན་པ་མཛེས་པར་བྱེད་དོ། །
དེ་ཡང་སྟོན་པས་ལུང་བསྟན་ནོ། །བཅོམ་ལྡན་འདས་དེའི་བལྟམ་པའི་གྲོང་ཁྱེར་ནི་བཱ་རཱ་ཎ་སཱི་ཞེས་བྱ་བའོ། །ཡབ་ནི་ཚངས་བྱིན་ཞེས་བྱ་བའི་བྲམ་ཟེའོ། །ཡུམ་ནི་འབྱོར་ལྡན་མ་ཞེས་བྱ་བའི་བྲམ་ཟེ་མོའོ། །དཀར་རྒྱལ་དང་བྷཱ་ར་དྷོ་ཛ་ནི་ཉན་ཐོས་
39-1-208b


ཀྱི་མཆོག་གོ། །ཐམས་ཅད་བཤེས་གཉེན་ནི་ཉེ་གནས་སོ། །རྗེས་སུ་ལེན་མ་དང་སྟོང་རྒྱས་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ནྱ་གྲོ་ཏའི་ཤིང་ངོ་། །སྐུའི་མཐོ་ཚད་དུ་ཁྲུ་ཉི་ཤུ་པར་གྱུར་ཏོ། །སྐུ་ཚེའི་ཚད་ནི་ལོ་སྟོང་
ཕྲག་ཉི་ཤུའོ། །གསེར་ཐུབ་ཀྱི་ནི་འོག་ཏུ་ནི། །རྐང་གཉིས་མཆོག་གི་རྫོགས་སངས་རྒྱས། །མཚན་ནི་རྒྱལ་བ་འོད་སྲུང་ངོ་། །ཆོས་ཀྱི་རྒྱལ་པོ་འོད་མཛད་དོ། །གཞན་ཡང་བསྐལ་པ་གང་ལ་སྟོབས་བཅུ་དང་ལྡན་པའི་མར་མེ་མཛད་
པ་དེ་ལ། གཞན་ཡང་སངས་རྒྱས་གསུམ་བྱོན་པར་གྱུར་ཏེ། དེ་རྣམས་ཀྱི་དྲུང་དུ་བྱང་ཆུབ་སེམས་དཔའ་ལུང་མ་བསྟན་ནོ། །དེའི་ཕྱིར་འདིར་ཡང་མ་བསྟན་ཏེ། གཞན་ཡང་དོན་གྱི་གཏམ་འདིའི་བསྐལ་པ་ནས་བཟུང་ནས་སངས་རྒྱས་
ཐམས་ཅད་མཐོང་བའི་དོན་དུ་འདིར་བཤད་དོ། །སྲེད་མཛད་དང་ནི་བློ་གྲོས་མཛད། །དེ་ནས་སྐྱབས་ནི་མཛད་པ་ཡིན། །མར་མེ་མཛད་ནི་རྫོགས་སངས་རྒྱས། །རྐང་གཉིས་མཆོག་ནི་ཀཽ་ཊི་ནྱ། །བཀྲ་ཤིས་དང་ནི་ཐུགས་བཟང་དང་། །ཐུབ་
པ་ནམ་གྲུ་མཛེས་བྱེད་དང་། །ཐུགས་ལྡན་མཐོང་དང་པད་མ་དང་། །མི་སྦྱིན་དང་ནི་པད་མའི་མཆོག །བློ་གྲོས་བཟང་དང་ལེགས་ཀྱེས་དང་། །གྲགས་ཆེན་བལྟ་ན་སྡུག་པ་དང་། །དོན་མཐོང་དང་ནི་ཆོས་མཐོང་དང་། །འཇིག་རྟེན་འདྲེན་
པ་དོན་གྲུབ་དང་། །རྫོགས་སངས་རྒྱས་ནི་དཀར་རྒྱས་གྱུར། །རྣམ་གཟིགས་གཙུག་ཏོར་ཐམས་ཅད་སྐྱོབ། །ལོག་དད་སེལ་དང་གསེར་ཐུབ་དང་། །འདྲེན་པ་འོད་སྲུང་ཞེས་བྱའོ། །ཡང་དག་རྫོགས་སངས་དེ་རྣམས་ནི། །མཉམ་པར་བཞག་
ཅིང་འདོད་ཆགས་བཅོམ། །འོད་ཟེར་བརྒྱ་པ་བཞིན་དུ་འཁྲུངས། །མུན་པ་ཆེན་པོ་རྣམ་པར་འཇོམས། །མེ་ཡི་ཕུང་པོ་བཞིན་དུ་འབར། །ཉན་ཐོས་དང་བཅས་མྱ་ངན་འདས། །དེ་ལ་བདག་ཅག་གི་བྱང་ཆུབ་སེམས་དཔའ་མར་མེ་མཛད་
ལ་སོགས་པའི་སངས་རྒྱས་ཉི་ཤུ་རྩ་བཞིའི་དྲུང་དུ་སྨོན་ལམ་བཏབ་ནས་བསྐལ་པ་གྲངས་མེད་པ་བཞི་དང་འབུམ་ཕྲག་ལྷག་པ་ནས་བྱོན་ནོ། །གཞན་ཡང་བཅོམ་ལྡན་འདས་འོད་སྲུང་དེའི་འོག་གི་ཆར་གནས་ཏེ་ཡང་དག་པར་རྫོགས་པའི་
39-1-209a


སངས་རྒྱས་འདི་ལས་སངས་རྒྱས་གཞན་མེད་དོ་ཞེས་མར་མེ་མཛད་ལ་སོགས་པའི་སངས་རྒྱས་ཉི་ཤུ་རྩ་བཞིའི་དྲུང་དྲུ་ལུང་བསྟན་པ་ཐོབ་བོ། །གཞན་ཡང་བྱང་ཆུབ་སེམས་དཔའ་གང་དེས། མི་ཡི་བདག་ཉིད་རྟགས་དང་ལྡན། །
སྒྱུ་དང་སྟོན་པའི་ལྟ་བ་དང་། །རབ་ཏུ་བྱུང་ཞིང་ཡོན་ཏན་ལྡན། །གཞི་རྣམས་དང་ནི་འདུན་པ་དང་། །ཆོས་བརྒྱད་པོ་ནི་ཚོགས་པ་དང་། །སྨོན་ལམ་རྣམས་ནི་ཡང་དག་རྫོགས། །ཆོས་བརྒྱད་པོ་འདི་རྣམས་ཚོགས་པར་བྱས་ནས་མར་མེ་མཛད་ཀྱི་
ཞབས་དྲུང་དུ་སྨོན་ལམ་བཏབ་ཅིང་སངས་རྒྱས་སུ་བྱེད་པའི་ཆོས་འདི་རྣམས་གང་དང་གང་དུ་ཚོལ་བའི་སྤྲོ་བ་སྐྱེས་སོ། །བཙལ་བ་དེ་རྣམས་མཐོང་བས་ན། །དང་པོ་སྦྱིན་པའི་ཕ་རོལ་ཕྱིན། །སྦྱིན་པའི་ཕ་རོལ་དུ་ཕྱིན་པ་ལ་སོགས་པས་སངས་
རྒྱས་ཐོབ་པར་བྱེད་པའི་ཆོས་རྫོགས་པར་བྱེད་པ་ཉིད་ཐམས་ཅད་སྒྲོལ་གྱི་བདག་ཉིད་བྱོན་ནོ། །བྱོན་ནས་གང་དེ་རྣམས་བྱས་པའི་སྨོན་ལམ་བྱང་ཆུབ་སེམས་དཔའ་རྣམས་ཀྱིས་ཕན་ཡོན་བསྔགས་པར་མཛད་དོ། །དེ་བཞིན་ཡན་ལག་ཐམས་ཅད་ལྡན། །
མི་ཡི་བྱང་ཆུབ་ངེས་པ་དང་། འཁོར་བ་ཡུན་རིང་གཞི་མེད་པ། །བསྐལ་པ་བྱེ་བ་བརྒྱ་ཉིད་དམ། །མནར་མེད་དུ་ནི་མི་སྐྱེའོ། །དེ་བཞིན་དུ་ནི་འཇིག་རྟེན་པར། །བསྐྲེས་སྐོམ་སྲེད་དང་འབར་བ་དང་། །ཡན་ལག་ཐམས་ཅད་མི་འཆད་འགྱུར། །སྲོག་
ཆགས་ཕྲ་མོར་མི་འགྱུར་ཞིང་། །ངན་འགྲོ་རྣམས་སུ་སྐྱེ་མི་འགྱུར། །མི་རུ་སྐྱེས་པར་གྱུར་པ་ན། །དེ་ནི་དམུས་ལོང་མི་འགྱུར་ཞིང་། །འོན་པར་ཡང་ནི་མི་འགྱུར་ལ། །ལྐུག་དང་གཞོག་ཕྱེད་ན་མི་འགྱུར། །བུད་མེད་དུ་ནི་སྐྱེ་མི་འགྱུར། །ཟ་མ་མ་ནིང་མཚན་
གཉིས་དང་། །འཐའ་འཁོབ་ཏུ་ནི་སྐྱེ་མི་འགྱུར། །མི་ཡི་བྱང་ཆུབ་ངེས་པ་ཡིན། །འཚམས་མེད་པ་ལས་གྲོལ་བ་དང་། །དག་པའི་སྤྱོད་ཡུལ་ཐམས་ཅད་དུ། །ལོག་པའི་ལྟ་བ་མི་བརྟེན་ནོ། །ལས་ཀྱི་བྱ་བ་མཐོང་བ་དང་། །མཐོ་རིས་ལ་ནི་གནས་
ནས་སུ། །འདུ་ཤེས་མེད་པར་སྐྱེ་མི་འགྱུར། །གཙང་མ་རིས་ཀྱི་ལྷ་རྣམས་སུ། །སྒྱུ་དང་མིང་ནི་སྐྱེ་བ་མེད། །སྐྱེས་བུ་དམ་པ་ངེས་འབྱུང་སེམས། །དངོས་དང་དངོས་མེད་ལྡན་པ་མེད། །གང་ཞིག་འཇིག་རྟེན་དོན་དུ་འགྲོ། །ཕ་རོལ་ཕྱིན་ཀུན་རྫོགས་པར་བྱེད། །
39-1-209b


ཕན་ཡོན་དེ་རྣམས་ལྷག་པར་ཐོབ་པ་འམ་དེས་ཕ་རོལ་དུ་ཕྱིན་པ་རྫོགས་པར་བྱེད་དོ། །གྲགས་པ་དང་ལྡན་པའི་བྲམ་ཟེའི་དུས་སུ་དང་། དུང་གི་བྲམ་ཟེའི་དུས་སུ་དང་། ནོར་རྒྱལ་གྱི་རྒྱལ་པོའི་དུས་སུ་དང་། བལྟ་ན་སྡུག་ཆེན་པོའི་རྒྱལ་པོའི་དུས་སུ་དང་། 
ཁྱབ་འཇུག་ཆེན་པོའི་དུས་སུ་དང་། རྒྱུ་མཚན་རྒྱལ་པོའི་དུས་སུ་དང་། ཟླ་བ་གཞོན་ནུའི་དུས་སུ་དང་། ཡུལ་གྱི་མཆོག་གི་དུས་སུ་དང་། ཤི་བི་པའི་རྒྱལ་པོའི་དུས་སུ་དང་། ཐམས་ཅད་སྒྲོལ་གྱི་དུས་སུ་ནི་སྦྱིན་པའི་ཕ་རོལ་དུ་ཕྱིན་པ་རྫོགས་པའི་
བདག་ཉིད་དེ་ཚད་མེད་པ་ཞེས་བྱའོ། །མཐའ་གཅིག་ཏུ་ཡང་དང་ཡང་བྱང་ཆུབ་སེམས་དཔའ་མཁས་པ་རི་བོང་གི་སྐྱེས་རབས་ལས། ཉེར་འོངས་སློང་བ་མཐོང་བ་ན། །རང་གི་ལུས་ནི་ཡོངས་སུ་བཏང་། །བདག་གི་སྦྱིན་ལ་མཉམ་པ་མེད། །འདི་རྣམས་སྦྱིན་
པའི་ཕ་རོལ་ཕྱིན། །དེ་ལྟར་ལུས་ཡོངས་སུ་གཏོང་བར་བྱེད་པས་སྦྱིན་པའི་ཕ་རོལ་དུ་ཕྱིན་པ་སྟེ་དོན་དམ་པའི་ཕ་རོལ་དུ་ཕྱིན་པ་ཞེས་བྱ་བ་སྐྱེས་སོ། །དེ་བཞིན་དུ་ཚུལ་ཁྲིམས་དང་ལྡན་པའི་ཀླུའི་རྒྱལ་པོའི་དུས་སུ་དང་། ཙམ་པོ་སྤྱའི་ཀླུའི་རྒྱལ་པོའི་
དུས་སུ་དང་། ས་སྦྱིན་ཀླུའི་རྒྱལ་པོའི་དུས་སུ་དང་། མཆེ་བ་དྲུག་པའི་གླང་པོའི་རྒྱལ་པོའི་དུས་སུ་དང་། རྒྱལ་བ་དང་མཚུངས་པའི་རྒྱལ་པོའི་བུ་ཞུམ་པ་མེད་པའི་དགྲ་གཞོན་ནུའི་དུས་སུ་ནི་ཚུལ་ཁྲིམས་ཀྱི་ཕ་རོལ་དུ་ཕྱིན་པ་རྫོགས་པར་སྐྱེས་
པ་ལ་ཚད་མེད་དོ། །མཐའ་གཅིག་ཏུ་གཞན་ཡང་། དེ་ཡི་དུང་སྐྱོང་སྐྱེས་རབས་ལས། གསལ་ཤིང་གིས་ནི་ཕུག་ནས་ནི། །མཚོན་ཆ་བླངས་ནས་བརྡེག་པ་དང་། །གྲོང་དཔོན་བུ་ལ་ཁྲོ་མི་བྱེད། །ཚུལ་ཁྲིམས་ཕར་ཕྱིན་བདག་གི་འདི། །དེ་
བཞིན་དུ་ལུས་ཡོངས་སུ་གཏོང་བར་བྱེད་པ་ནི། ཚུལ་ཁྲིམས་ཀྱི་ཕ་རོལ་དུ་ཕྱིན་པ་སྟེ་དོན་དམ་པའི་ཕ་རོལ་དུ་ཕྱིན་པ་ཞེས་བྱ་བ་སྐྱེས་སོ། །དེ་བཞིན་དུ་ཡིད་བཟངས་གཞོན་ནུའི་དུས་སུ་དང་། གླང་ཆེན་ནོར་སྐྱོང་གཞོན་ནུའི་དུས་སུ་དང་། ལྕགས་
ཁྱིམ་མཁས་པའི་དུས་སུ་ནི་རྒྱལ་སྲིད་ཆེན་པོ་སྤངས་ནས་ངེས་པར་འབྱུང་བའི་ཕ་རོལ་དུ་ཕྱིན་པ་བདག་ཉིད་ལ་སྐྱེས་པ་ནི་ཚད་མེད་དོ། །གཞན་ཡང་མཐའ་གཅིག་ཏུ་དེའི་བུ་ཞི་བ་ཆུང་ངུའི་སྐྱེས་རབས་ལས། རྒྱལ་པོ་ཆེན་པོ་ལག་ཏུ་
39-1-210a


ཐོབ། །འཆིལ་མའི་ལྦུ་བ་བཞིན་དུ་སྤངས། །རྒྱལ་སྲིད་སྤངས་ཀྱང་ཞེན་པ་མེད། །བདག་གི་ངེས་འབྱུང་ཕར་ཕྱིན་འདི། །དེ་བཞིན་དུ་ངེས་པར་བདག་གི་རྒྱལ་སྲིད་སྤངས་ནས་ངེས་པར་འབྱུང་བའི་ཕ་རོལ་དུ་ཕྱིན་པ་སྟེ། 
དོན་དམ་པའི་ཕ་རོལ་དུ་ཕྱིན་པ་ཞེས་བྱ་བ་སྐྱེས་སོ། །དེ་བཞིན་དུ་མཁས་པ་བི་དྷུ་རའི་དུས་སུ་དང་། མཁས་པ་ཁྱབ་འཇུག་ཆེན་པོའི་དུས་སུ་དང་། མཁས་པ་སྟོག་རྩེ་བའི་དུས་སུ་དང་། མཁས་པ་ཨ་རའི་དུས་སུ་དང་། ཀུན་དུ་རྒྱུ་བྱང་ཆུབ་
ཀྱི་དུས་སུ་དང་། མཁས་པ་སྨན་ཆེན་པོའི་དུས་སུ་ནི་ཤེས་རབ་ཀྱི་ཕ་རོལ་དུ་ཕྱིན་པ་རྫོགས་པར་བདག་ལ་སྐྱེས་པ་ལ་ཚད་མེད་དོ། །གཞན་ཡང་མཐའ་གཅིག་ཏུ་དེའི་སྡེ་སྣོད་ཀྱི་སྐྱེས་རབས་ལས། མཁས་པ་སྡེ་ཅན་གྱི་དུས་སུ། བདག་
གིས་ཤེས་རབ་ཚོལ་བ་ན། །བྲམ་ཟེའི་སྡུག་བསྔལ་གྲོལ་བ་དང་། །བདག་གི་ཤེས་རབ་མཚུངས་པ་མེད། །བདག་གི་ཤེས་རབ་ཕར་ཕྱིན་འདི། །ཕ་ཚིའི་ནང་གི་སྦྲུལ་བདག་གིས་བལྟ་བ་ནི་ཤེས་རབ་ཀྱི་ཕ་རོལ་དུ་ཕྱིན་པ་སྟེ་དོན་དམ་པའི་
ཕ་རོལ་དུ་ཕྱིན་པ་ཞེས་བྱ་བ་སྐྱེས་སོ། །དེ་བཞིན་དུ་བརྩོན་འགྲུས་ཀྱི་ཕ་རོལ་དུ་ཕྱིན་པ་རྫོགས་པར་བདག་ལ་སྐྱེས་པ་ཚད་མེད་དོ། །གཞན་ཡང་མཐའ་གཅིག་ཏུ་དེའི་སྐྱེ་བོ་ཆེན་པོ་ཅན་གྱི་སྐྱེས་རབས་ལས། །ངོགས་མ་མཐོང་བའི་
རྒྱ་མཚོའི་དབུས། མི་རྣམས་ཐམས་ཅད་ཤི་བར་གྱུར། །སྡུག་བསྔལ་མེད་པའི་སེམས་ཀྱིས་ནི། །བདག་གི་བརྩོན་འགྲུས་ཕར་ཕྱིན་འདི། །རྒྱ་མཚོ་ཆེན་པོ་ལས་སྒྲོལ་བར་བྱེད་པའི་བརྩོན་འགྲུས་ཀྱི་ཕ་རོལ་དུ་ཕྱིན་པ་ཞེས་
བྱ་བ་སྐྱེས་སོ། །བཟོད་པར་སྨྲ་བའི་སྐྱེ་རབས་ལས། སེམས་མེད་པ་ལ་གཅོད་པ་བཞིན། །བདག་ལ་རྣོ་བའི་དགྲ་སྟ་ཡིས། །གསལ་ལྡན་རྒྱལ་པོ་ལ་མི་ཁྲོ། །བདག་གི་བཟོད་པའི་ཕར་ཕྱིན་འདི། །དེ་ལྟར་སེམས་མེད་པའི་
དངོས་པོ་བཞིན་དུ་བདག་སྡུག་བསྔལ་ཆེན་པོ་ལ་ལྷགས་པར་གནས་པ་ནི་བཟོད་པའི་ཕ་རོལ་དུ་ཕྱིན་པ་སྟེ། དོན་དམ་པའི་ཕ་རོལ་དུ་ཕྱིན་པ་ཞེས་བྱ་བ་སྐྱེས་སོ། །བུ་ཞི་བ་ཆེན་པོའི་སྐྱེས་རབས་ལས། བདེན་པའི་ཚིག་ནི་རྗེས་སུ་
39-1-210b


བསྲུང་། །བདག་གི་སྲོག་ནི་སྤངས་ནས་སུ། །རྒྱལ་རིགས་བརྒྱ་ཕྲག་གྲོལ་བར་བྱས། །བདག་གི་བདེན་པའི་ཕར་ཕྱིན་འདི། །དེ་ལྟར་སྲོག་སྤངས་ནས་བདེན་པ་རྗེས་སུ་བསྲུང་བ་དེ་ནི་བདེན་པའི་ཕ་རོལ་དུ་ཕྱིན་པ་སྟེ། དོན་དམ་པའི་
ཕ་རོལ་དུ་ཕྱིན་པ་ཞེས་བྱ་བ་སྐྱེས་སོ། །ལྐུག་པ་དང་གཞོགས་ཕྱེད་ན་བའི་ཚུལ་གྱི་སྐྱེས་རབས་ལས། ཕ་མ་བདག་ལ་མི་དགོས་ཤིང་། །ནོར་དང་གྲགས་པ་འང་དགོས་པ་མེད། །བདག་ནི་ཐམས་ཅད་མཁྱེན་ལ་དགའ། །དེ་ཕྱིར་
བརྟུལ་ཞུགས་གནས་པའོ། །དེ་ལྟར་སྲོག་གི་འདོད་པ་ཡོངས་སུ་བཏང་ནས་བརྟུལ་ཞུགས་ལ་ལྷག་པར་གནས་པ་ནི་ལྷག་པར་གནས་པའི་ཕ་རོལ་དུ་ཕྱིན་པ་སྟེ། དོན་དམ་པའི་ཕ་རོལ་དུ་ཕྱིན་པ་ཞེས་བྱ་བ་སྐྱེས་སོ། །རྒྱལ་པོ་གཅིག་
གི་སྐྱེས་རབས་ལས། གང་ཞིག་བདག་ལ་སྐྲག་བྱེད་མེད། །བདག་གིས་གང་ལའང་འཇིགས་མ་བྱས། །བྱམས་པའི་སྟོབས་ཀྱི་སྟེང་གནས་ཞིང་། །དེ་ཚེ་སློང་བ་ཉིད་ལ་དགའ། །དེ་ལྟར་སྲོག་ཡོངས་སུ་གཏོང་བ་ལ་མི་བལྟ་ཞིང་
བྱམས་པར་བྱེད་པ་དེའི་བྱམས་པ་ནི་ཕ་རོལ་དུ་ཕྱིན་པ་སྟེ། དོན་དམ་པའི་ཕ་རོལ་དུ་ཕྱིན་པ་ཞེས་བྱ་བ་སྐྱེས་སོ། །ངང་པའི་སྤུའི་སྐྱེ་རབས་ལས། དུར་ཁྲོད་དུ་ནི་གནས་པར་སེམས། །རུས་གོང་ལ་ནི་བརྟེན་བྱས་ནས། །བདག་གི་གནས་
སུ་ཉེ་བར་འོངས། །གཟུགས་ལ་ལྟ་བ་ཉུང་བ་མེད། །དེ་ལྟར་གྲོང་གི་ཁྱེའུ་ལ་རྡོ་ལ་སོགས་པ་བླངས་ནས་རྡུང་བ་ཉིད་དང་། མེ་ཏོག་ཕྲེང་བ་དང་སྤོས་ཀྱིས་ཉེ་བར་སྤྱོད་པ་ལ་སོགས་པས་བདེ་བ་དང་སྡུག་བསྔལ་བསྐྱེད་ཀྱང་བཏང་སྙོམས་སུ་
འདོར་བ་དེ་ནི་བཏང་སྙོམས་ཀྱི་ཕ་རོལ་དུ་ཕྱིན་པ་སྟེ། དོན་དམ་པའི་ཕ་རོལ་དུ་ཕྱིན་པ་ཞེས་བྱ་བ་སྐྱེས་སོ། །དེ་རྣམས་འདིར་འདོར་བསྡུས་པའོ། །རྒྱ་ཆེར་ཡང་སླར་འདིའི་དོན་སྤྱོད་པའི་སྡེ་སྣོད་ལས་བླང་བར་བྱའོ། །དེ་ལྟར་ཕ་རོལ་དུ་ཕྱིན་
པ་རྫོགས་ནས་ཐམས་ཅད་སྒྲོལ་གྱི་བདག་ཉིད་དུ་གནས་སོ། །སེམས་མེད་པ་ཡི་ས་གཞི་ཡིས། །བདེ་དང་སྡུག་བསྔལ་མི་ཤེས་ཀྱང་། །བདག་གི་སྦྱིན་པའི་སྟོབས་དེ་ཡིས། །ལན་བདུན་དུ་ནི་རབ་ཏུ་གཡོས། །དེ་ལྟར་ས་གཞི་ཆེན་པོ་གཡོ་
39-1-211a


བ་ལ་སོགས་པ་བསོད་ནམས་ཆེན་པོ་བྱེད་ཅིང་ཚེའི་མཐར་ཤི་འཕོས་ཏེ་དགའ་ལྡན་དུ་སྐྱེས་སོ་ཞེས་པ་མར་མེ་མཛད་ཀྱི་ཞབས་དྲུང་ནས་བཟུང་སྟེ་ཇི་སྲིད་དགའ་ལྡན་དུ་སྐྱེས་པ་དེ་རྣམས་ཀྱི་བར་ནི་རིང་པོའི་གཞི་ཞེས་བྱ་
བར་རིག་པར་བྱའོ།  །གཞན་ཡང་བྱང་ཆུབ་སེམས་དཔའ་དགའ་ལྡན་དུ་བཞུགས་པ་ཉིད་ནས་སངས་རྒྱས་ཀྱི་སྒྲ་ཆེར་སྒྲོགས་པ་ཞེས་བྱ་བ་སྐྱེས་པ་ན་འཇིག་རྟེན་འདིར་སྒྲ་ཆེར་སྒྲོགས་པ་གསུམ་བྱུང་སྟེ། བསྐལ་པའི་སྒྲ་ཆེར་སྒྲོགས་
པ་དང་། སངས་རྒྱས་ཀྱི་སྒྲ་ཆེར་སྒྲོགས་པ་དང་། འཁོར་ལོས་སྒྱུར་བའི་སྒྲ་ཆེར་སྒྲོགས་པའོ། །དེ་ལ་ལོ་འབུམ་ཕྲག་གཅིག་གི་མཐར་བསྐལ་པ་འཇིག་པར་འགྱུར་རོ་ཞེས་པ་འཇིག་རྟེན་གྱི་མིང་དུ་བརྗོད་པ་ནི་འདོད་པ་ན་སྤྱོད་པའི་ལྷ་
མགོ་གཡོགས་ཀྱིས་མ་བསྒྲིབས་པ་དང་། སྐྲ་གྲོལ་བ་དང་། ངུ་བའི་ཁ་ཅན་ལག་པས་མིག་གི་མཆི་མ་འཆི་བ་གོས་དམར་པོ་གྱོན་པ་ལྷག་པར་གཟུགས་མི་སྡུག་པའི་ཆ་བྱད་འཛིན་པར་གྱུར་པའི་མི་རྣམས་ལམ་ལ་འགྲོ་ཞིང་འདི་
ལྟར་བརྗོད་དོ། །འཇིག་རྟེན་པ་འདི་ནས་ལོ་འབུམ་ཕྲག་གཅིག་འདས་ནས་བསྐལ་པ་འཇིག་པར་འགྱུར་རོ། །འདི་ཡི་འཇིག་རྟེན་རྣམས་འཇིག་པར་འགྱུར་རོ། །རྒྱ་མཚོ་ཆེན་པོ་ཡང་བསྐམས་པར་འགྱུར་རོ། །ས་གཞི་ཆེན་པོ་འདི་དང་རིའི་རྒྱལ་པོ་རི་རབ་
ཀྱང་ཐལ་བར་འགྱུར་ཅིང་འཇིག་གོ། །ཚངས་པའི་འཇིག་རྟེན་གྱི་བར་དུ་འཇིག་རྟེན་འཇིག་པར་འགྱུར་རོ་ཞེས་བརྗོད་དོ། །འཇིག་རྟེན་པ་རྣམས་བྱམས་པ་སྒོམས་ཤིག །སྙིང་རྗེ་བསྒོམས་ཤིག །དགའ་བ་བསྒོམས་ཤིག །བཏང་སྙོམས་བསྒོམས་ཤིག །
མ་ལ་རིམ་གྲོ་གྱིས་ཤིག །ཕ་ལ་རིམ་གྲོ་གྱིས་ཤིག །རིགས་ཀྱི་གཙོ་བོ་ལ་རིམ་གྲོ་གྱིས་ཤིག་ཅེས་པ་འདི་ནི་བསྐལ་པའི་སྒྲ་ཆེར་སྒྲོགས་པ་ཞེས་བྱ་བའོ། །ལོ་སྟོང་ཕྲག་གཅིག་འདས་ནས་སླར་ཡང་སངས་རྒྱས་ཐམས་ཅད་མཁྱེན་པ་འཇིག་རྟེན་
དུ་བྱོན་ནོ་ཞེས་བརྗོད་པ་འདི་འཇིག་རྟེན་སྐྱོང་བའི་ལྷ་རྣམས་འདི་ནས་འཇིག་རྟེན་པ་རྣམས་ལོ་སྟོང་ཕྲག་གཅིག་འདས་ནས་གཞན་ཡང་སངས་རྒྱས་འཇིག་རྟེན་དུ་བྱོན་ནོ་ཞེས་རྗོད་ཅིང་སྒྲ་ཆེར་སྒྲོགས་པས་རྒྱུ་བ་འདི་ནི་སངས་རྒྱས་ཀྱི་སྒྲ་ཆེར་སྒྲོགས་པ་
39-1-211b


ཞེས་བྱ་བ་ཡིན་ནོ། །གཞན་ཡང་ལོ་བརྒྱ་འདས་ནས་འཁོར་ལོས་སྒྱུར་བའི་རྒྱལ་པོ་བྱོན་ནོ་ཞེས་བརྗོད་པ་ནི་ལྷ་ཉིད་དེ། འཇིག་རྟེན་པ་རྣམས་ལོ་བརྒྱ་འདས་ནས་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱོན་ཞེས་སྒྲ་ཆེར་བརྗོད་ཅིང་
རྒྱུ་བ་འདི་ནི་འཁོར་ལོས་སྒྱུར་བའི་སྒྲ་ཆེར་སྒྲོགས་པ་ཞེས་བྱ་བ་ཡིན་ནོ། །གསུམ་པོ་འདི་ནི་སྒྲ་ཆེར་སྒྲོགས་པ་ཡིན་ནོ། །དེ་རྣམས་ལས་སངས་རྒྱས་ཀྱི་སྒྲ་ཆེར་སྒྲོགས་པ་ཐོས་ནས་སྟོང་ཕྲག་བཅུའི་ཁོར་ཡུག་གི་ཐམས་ཅད་གནས་གཅིག་
ཏུ་འདུས་ཏེ། ཆེ་གེ་མོ་ཞེས་བྱ་བའི་བྱང་ཆུབ་སེམས་དཔའ་སངས་རྒྱས་སུ་འགྱུར་བར་རྟོགས་ནས་ཞུ་བའི་ཕྱིར་ཉེ་བར་སོང་སྟེ། ཞུས་ནས་ཀྱང་སྔར་གྱི་མཚན་མ་སྐྱེས་པ་ལ་ཞུས་སོ། །དེའི་ཚེ་སླར་ཡང་ཐམས་ཅད་ཀྱི་རེ་རེའི་ཁོར་ཡུག་གི་
རྒྱལ་པོ་ཆེན་པོ་བཞིའི་རིས་དང་། བརྒྱ་བྱིན་དང་འཐབ་བྲལ་དང་དགའ་ལྡན་དང་འཕྲུལ་དགའ་དང་གཞན་འཕྲུལ་དབང་བྱེད་དང་། ཚངས་པ་ཆེན་པོ་དང་བཅས་པའི་ལྷ་དང་། ཁོར་ཡུག་གི་ལྷ་རྣམས་འདུས་པའོ། །དགའ་ལྡན་གྱི་གནས་སུ་
བྱང་ཆུབ་སེམས་དཔའི་དྲུང་དུ་སོང་སྟེ། དྲང་སྲོང་ཆེན་པོ་ཁྱོད་ཀྱིས་ཕ་རོལ་དུ་ཕྱིན་པ་བཅུ་རྫོགས་པ་ནི་བརྒྱ་བྱིན་གྱི་ཕུན་སུམ་ཚོགས་པར་བྱ་བའི་ཕྱིར་མ་ཡིན། བདུད་ཀྱི་ཕྱིར་མ་ཡིན། ཚངས་པའི་ཕྱིར་དོན་དུ་གཉེར་བ་རྫོགས་པར་བྱ་བའི་ཕྱིར་མ་
ཡིན་འཁོར་ལོས་སྒྱུར་བའི་ཕུན་སུམ་ཚོགས་པའི་ཕྱིར་དོན་དུ་གཉེར་བ་རྫོགས་པར་བྱ་བའི་ཕྱིར་མ་ཡིན་ནོ། །གཞན་ཡང་འཇིག་རྟེན་བསྒྲལ་བའི་ཕྱིར་དང་། ཐམས་ཅད་མཁྱེན་པ་དོན་དུ་གཉེར་བའི་ཕྱིར་རྫོགས་པར་བྱེད་དོ། །དེ་རྣམས་ནི་ད་ལྟའི་
དུས་ནས་དྲང་སྲོང་ཆེན་པོ་སངས་རྒྱས་སུ་འགྱུར་བའི་དུས་ནི་དྲང་སྲོང་ཆེན་པོ་སངས་རྒྱས་སུ་འགྱུར་ཞེས་ཞུས་སོ། །སེམས་དཔའ་ཆེན་པོ་ལྷ་ལ་གནང་བ་མ་བྱིན་ཏེ། དུས་དང་གླིང་དང་ཡུལ་དང་རིགས་དང་ཡུམ་དང་། ཚེ་དང་ཚེའི་བྱེ་བྲག་ལྷག་
མ་ལས་མེད་དོ། །ཆེན་པོ་ལྔ་པོ་ཞེས་བྱ་བ་ལེགས་པར་གཟིགས་ཤིང་གཟིགས་སོ། །དེ་ལ་དུས་དང་དུས་མ་ཡིན་པ་ཞེས་བྱ་བ་སྟེ། དང་པོ་དུས་ལ་གཟིགས་སོ། །དེ་ལ་ལོ་འབུམ་ཕྲག་གཅིག་གི་ཐོག་མ་ནས་འཕེལ་བ་ནི་ཚེའི་དུས་དང་
39-1-212a


དུས་མ་ཡིན་པའོ། །གང་གི་ཕྱིར་དེའི་ཚེ་སེམས་ཅན་རྣམས་ཀྱི་སྐྱེ་བ་དང་རྒ་བ་དང་ན་བ་དང་འཆི་བ་རྣམས་ལ་གཟིགས་སོ། །སངས་རྒྱས་རྣམས་ཀྱི་ཆོས་སྟོན་པ་ནི་མཚན་ཉིད་ལྔ་སྤངས་ནས་གཞན་པ་ནི་མེད་དོ། །དེ་རྣམས་ནི་མི་
རྟག་པ་དང་། སྡུག་བསྔལ་བ་དང་། བདག་མེད་པ་སྟོན་ཅིང་འདི་རྣམས་ཅིའི་ཕྱིར་འཆད་པ་ཉིད་མི་ཉན་པ་དང་མི་དད་པ་དང་མི་སེམས་པའོ། །དེ་ནི་དུས་མ་ཡིན་ནོ། །དེའི་ཕྱིར་མི་སེམས་པ་དང་མ་ངེས་པའི་བསྟན་པ་ཡིན་ནོ། །དེའི་ཕྱིར་དེ་ནི་
དུས་མ་ཡིན་པའོ། །ལོ་བརྒྱ་པ་དམན་པས་ཚེའི་དུས་ཀྱང་དེའི་དུས་མ་ཡིན་ནོ། །གང་གི་ཕྱིར་དེའི་ཚེ་སེམས་ཅན་ཉོན་མོངས་པ་ཤིན་དུ་ཆེ་བ་ཡིན་ནོ། །ཉོན་མོངས་པ་ཤིན་དུ་ཆེ་བས་གདམས་པ་བྱིན་ནོ། །གདམས་པ་ལ་མི་གནས་ན་ཆུ་ལ་
དབྱུག་པ་རྒྱབ་པའི་རི་མོ་བཞིན་མྱུར་དུ་འགག་གོ། །དེའི་ཕྱིར་དེ་ཡང་དུས་མ་ཡིན་པའོ། །ལོ་འབུམ་ཕྲག་གཅིག་ནས་བཟུང་བའི་འོག་ཏུ་ལོ་བརྒྱ་པའི་མགོར་ཚེའི་དུས་ཏེ་དུས་ཞེས་བྱ་བ་ཡིན་ནོ། །དེའི་ཚེ་ཡང་ལོ་བརྒྱ་པ་ཡིན་ནོ། །དེ་ནས་
སེམས་དཔའ་ཆེན་པོ་སྐྱེ་བར་རིགས་སོ་ཞེས་དུས་ལ་གཟིགས་སོ། །དེ་ནས་གླིང་ལ་གཟིགས་ཏེ་གླིང་བཞི་འཁོར་དང་བཅས་པ་ལ་གཟིགས་ནས་གླིང་གསུམ་པོ་རྣམས་སུ་སངས་རྒྱས་མི་འབྱོན་ནོ། །འཛམ་བུའི་གླིང་ཉིད་དུ་འབྱོན་ནོ། །གླིང་ལ་
གཟིགས་པའོ། །དེ་ནས་འཛམ་བུའི་གླིང་ཞེས་བྱ་བ་དཔག་ཚད་སྟོང་ཕྲག་བཅུའི་ཚད་ཀྱིས་ཆེ་བའོ། །ཡུལ་གྱི་ཕྱོགས་གང་ཞིག་ཏུ་སངས་རྒྱས་འབྱོན་པར་འགྱུར་ཞེས་ཡངས་ཤིང་གྲོལ་བའི་གནས་བལྟ་ཞིང་ཡུལ་དབུས་ལ་གཟིགས་ཏེ་ཡུལ་
དབུས་ཞེས་བྱ་བ་ནི་ཤར་གྱི་ཕྱོགས་ན་ཀ་ཛྃ་ག་ལ་ཞེས་བྱ་བའི་གྲོང་རྡལ་ལོ། །དེའི་ཕ་རོལ་ན་ཤིང་སཱ་ལ་ཆེན་པོའོ། །དེ་ནས་གཞན་ཡང་བས་མཐའི་ལྗོངས་ཉེ་བའི་ནང་ངོ་། །ཤར་ལྷོའི་མཚམས་སུ་སཱ་ལ་ཅན་ཞེས་བྱ་བའི་ཆུ་ཀླུང་ངོ་། །
དེ་ནས་གཞན་ཡང་བས་མཐའི་ལྗོངས་དང་ཉེ་བའི་ནང་ངོ་། །ལྷོ་ཕྱོགས་སུ་སཽ་ཏ་ཀ་ར་ཎི་ཀ་ཞེས་བྱ་བའི་གྲོང་རྡལ་ལོ། །དེ་ནས་གཞན་ཡང་བས་མཐའི་ལྗོངས་དང་ཉེ་བའི་ནང་ངོ་། །ནུབ་ཕྱོགས་ཀ་བ་ཞེས་བྱ་བ་བྲམ་ཟེའི་གྲོང་རྡལ་ལོ། །དེ་ནས་གཞན་
39-1-212b


ཡང་བས་མཐའི་ལྗོངས་དང་ཉེ་བའི་ནང་ངོ་། །བྱང་གི་ཕྱོགས་ཨུ་ཤི་རིའི་རིའོ། །དེ་ནས་གཞན་ཡང་བས་མཐའི་ལྗོངས་དང་ཉེ་བའི་ནང་ངོ་། །འདི་ལྟར་འདུལ་བར་བཤད་ཅིང་བསྟན་ནོ། །དཀྱུས་སུ་དཔག་ཚད་སུམ་བརྒྱའོ། །ཞེང་དུ་
དཔག་ཚད་ཕྱེད་དང་སུམ་བརྒྱའོ། །མཐའ་བསྐོར་ལ་དཔག་ཚད་དགུ་བརྒྱའོ། །ཡུལ་ཕྱོགས་དེ་རྣམས་སུ་ནི་སངས་རྒྱས་དང་། རང་སངས་རྒྱས་དང་ཉན་ཐོས་མཆོག་རྣམས་དང་། ཉན་ཐོས་ཆེན་པོ་བརྒྱད་བཅུ་དང་། འཁོར་ལོས་སྒྱུར་བའི་
རྒྱལ་པོ་དང་། གཞན་ཡང་སྐྱེས་བུ་ཆེན་པོར་གྲགས་པའི་རིགས་དང་། བྲམ་ཟེའི་རིགས་དང་། ཤིང་སཱ་ལ་ཆེན་པོ་ལྟ་བུའི་ཁྱིམ་བདག་རྣམས་འཁྲུངས་པའི་གནས་སོ། །དེ་རྣམས་ལས་གྲོང་ཁྱེར་སེར་སྐྱ་ཞེས་བྱ་བ་འདིའོ། །དེར་བདག་
འཁྲུང་བར་རིགས་སོ་ཞེས་ཐུགས་ཀྱིས་ངེས་པར་བྱས་སོ། །དེ་ནས་རིགས་ལ་གཟིགས་པ་ཞེས་བྱ་བ་ནི་སངས་རྒྱས་ཞེས་བྱ་བ་རྗེའུའི་རིགས་སམ། གདོལ་པའི་རིགས་ལ་མི་འཁྲུང་ངོ་། །སླར་ཡང་འཇིག་རྟེན་པ་མོས་པའི་རྒྱལ་རིགས་
སམ་བྲམ་ཟེའི་རིགས་གཉིས་ལ་འཁྲུང་ངོ་། །ད་ལྟ་ནི་རྒྱལ་རིགས་ལ་འཇིག་རྟེན་པ་སེམས་སོ། །དེ་ལ་འཁྲུང་ངོ་། །བདག་གི་ཡབ་ནི་ཟས་གཙང་མ་ཞེས་བྱ་བའི་རྒྱལ་པོ་ཡིན་ཏེ་རིགས་ལ་གཟིགས་སོ། །དེ་ནས་ཡུམ་ལ་གཟིགས་ཏེ་འདོད་
པ་དང་ཆང་ལ་དགའ་བ་ནི་སངས་རྒྱས་ཀྱི་ཡུམ་ཞེས་བྱ་བ་མ་ཡིན་ནོ། །གཞན་ཡང་བསྐལ་པ་འབུམ་ཕྲག་གཅིག་ལ་ཕ་རོལ་དུ་ཕྱིན་པ་རྫོགས་པར་བྱས་ནས་འཁྲུང་ངོ་། །ཉམས་པ་མེད་པའི་ཚུལ་ཁྲིམས་ལྔ་པོ་ཉིད་ལེན་ནོ། །ལྷ་མོ་སྒྱུ་
འཕྲུལ་ཆེན་མོ་ཞེས་བྱ་བ་འདི་དེ་དང་འདྲ་བ་བདག་གི་ཡུམ་ཡིན་ནོ། །གཞན་ཡང་གང་དེ་ཙམ་གྱི་ཚེའོ། །ཟླ་བ་བཅུའི་མགོ་ནས་ཞག་བདུན་དུ་གཟིགས་སོ། །འདི་ནི་ཆེན་པོ་ལྔ་ལ་གཟིགས་སོ། །གཟིགས་ནས་དྲང་སྲོང་ཆེན་པོ་བདག་གི་དུས་ཏེ་སངས་རྒྱས་
སུ་འགྱུར་བའི་ལྷ་རྣམས་ཀྱིས་ཚིག་གིས་གནང་ངོ་། །ཁྱེད་རྣམས་གཤེགས་པར་ཞུ་ཞེས་ལྷ་དེ་རྣམས་བཏང་ནས་དགའ་ལྡན་གྱི་ལྷ་རྣམས་ཀྱིས་ཡོངས་སུ་བསྐོར་ཏེ། དགའ་ལྡན་གྱི་དགའ་བའི་ཚལ་དུ་ཞུགས་སོ། །འཇིག་རྟེན་གྱི་ལྷ་ཐམས་
39-1-213a


ཅད་དགའ་བའི་ཚལ་ན་ཡོད་པ་ཉིད་དོ། །དེ་ལ་འདིའི་ལྷ་འདི་ནས་ཤི་འཕོས་ནས་བདེ་བའི་འགྲོ་བར་སྐྱེས་ཏེ་འདི་ནས་ཤི་འཕོས་ནས་བདེ་བའི་འགྲོ་བར་སྐྱེས་སོ། །སྔར་བྱས་པའི་དགེ་བའི་ལས་བྱས་པ་རྗེས་སུ་དྲན་ཞིང་རྒྱུའོ། །
དེ་དེ་ལྟར་ལྷ་རྣམས་ཀྱིས་དགེ་བ་རྗེས་སུ་དྲན་པ་རྣམས་འཁོར་དུ་བྱས་ཤིང་དེར་རྒྱུའོ། །ཤི་འཕོས་ནས་ལྷ་མོ་སྒྱུ་འཕྲུལ་མ་ཆེན་མོའི་མངལ་དུ་ཞུགས་སོ། །དེ་ལ་ལེགས་པར་བརྗོད་པའི་ཕྱིར་འདི་གོ་རིམས་བཞིན་དུ་སྔོན་གྱི་གཏམ་བརྗོད་དོ། །དེའི་
ཚེ་གྲོང་ཁྱེར་སེར་སྐྱར་དབྱར་ཟླ་འབྲིང་པོའི་རྒྱུ་སྐར་དུ་བརྗོད་པར་སྐྱེ་བོ་ཐམས་ཅད་རྒྱུ་སྐར་ལ་རྩེ་ཞིང་ལྷ་མོ་སྒྱུ་འཕྲུལ་ཆེན་པོ་ཡང་ཉའི་སྡུན་དུ་ཞག་བདུན་ནས་མེ་ཏོག་གི་ཕྲེང་བ་དང་སྤོས་ཀྱི་འབྱོར་པ་དང་ལྡན་པས་རྒྱུ་སྐར་ལ་རྩེ་ཞིང་ལོངས་སྤྱོད་
དོ། །ཞག་བདུན་གྱི་མཐར་སྔ་དྲོ་ལངས་ནས་དྲི་བཟང་གི་ཆུས་ཁྲུས་བྱས་ཏེ། འབུམ་ཕྲག་བཞིའི་ལོངས་སྤྱོད་སྤེལ་ཏེ་སྦྱིན་པ་ཆེན་པོ་བཏང་ནས་རྒྱན་ཐམས་ཅད་ཀྱིས་བརྒྱན། ཁ་ཟས་བཟང་པོ་ཟོས་ཏེ། གསོ་སྦྱོང་ཡན་ལག་བརྒྱད་པ་ལ་གནས་སོ། །
རྒྱན་དུ་བྱེད་པ་ལ་རིགས་པའི་དཔལ་གྱི་ཁང་པའི་ནང་དུ་ཞུགས་ནས་དཔལ་གྱི་མལ་ཆ་ལ་ཉལ་ཏེ་གཉིད་དུ་སོང་ནས་འདི་ལྟ་བུའི་རྨི་ལམ་མཐོང་ངོ་། །རྒྱལ་པོ་ཆེན་པོ་བཞི་པོས་མལ་སྟན་དང་བཅས་པ་ཉིད་བླངས་ནས་གངས་ཅན་གྱི་ནང་དུ་སོང་ངོ་། །དཔག་
ཚད་དྲུག་བཅུ་པའི་མ་ན་ཤི་ལའི་སྟེང་དུ་དང་དཔག་ཚད་བདུན་པའི་ཤིང་སཱ་ལ་ཆེན་པོའི་འོག་ཏུ་བཞག་ནས་ཕྱོགས་གཅིག་ཏུ་འཁོད་དོ། །དེ་ནས་དེའི་ལྷ་མོ་འོངས་ནས་ལྷ་མོ་སྒྱུ་འཕྲུལ་མ་ཆེན་མོ་མཚོ་མ་དྲོས་པར་ཁྲིད་དོ། །མིའི་དྲི་མ་བསལ་བའི་ཕྱིར་
ཁྲུས་བྱས་ཏེ། ལྷའི་གོས་གྱོན་ནས་དྲི་བཟང་པོས་བྱུག་ཅིང་ལྷའི་མེ་ཏོག་འདོགས་སོ། །དེ་ནས་མི་རིང་བར་དངུལ་གྱི་རི་དེའི་ནང་ན་གསེར་གྱི་གཞལ་ཡས་ཁང་འདུག་གོ། །དེར་ཤར་དུ་མགོ་བསྟན་པའི་ལྷའི་མལ་ཆ་ལ་དེར་ཉོལ་ཞེས་ཟེར་ནས་ཉལ་ལོ། །
དེ་ནས་བྱང་ཆུབ་སེམས་དཔའ་གླང་པོ་ཆེ་དཀར་པོ་ཅིག་ཏུ་གྱུར་ཏོ། །དེ་ནས་མི་རིང་བར་གསེར་གྱི་རི་གཅིག་ལ་དེར་འཛེག་ཅིང་དེ་ནས་མར་བབས་ནས། དངུལ་གྱི་རི་ལ་འཛེག་གོ། །བྱང་གི་ཕྱོགས་ནས་འོངས་ཏེ། དངུལ་གྱི་ཕྲེང་བ་དང་མཚུངས་པའི་གླང་པོ་
39-1-213b


ཆེའི་སྣས་པད་མ་དཀར་པོ་འཛིན་ཅིང་། གླང་པོ་ཆེའི་སྒྲ་སྒྲོགས་པས་གསེར་གྱི་གཞལ་ཡས་ཁང་དུ་ཞུགས་ཏེ། རང་གི་མལ་ཆ་ལ་ལན་གསུམ་དུ་བསྐོར་བ་བྱས་ནས་གློ་གཡས་པ་ཕུག་ནས་ལྟོར་ཞུགས་པ་བཞིན་དུ་གྱུར་ཏོ། །དེ་ལྟར་བྲེའི་སྐར་
མ་མཆོག་ལ་ལྷུམས་སུ་ཞུགས་སོ། །ཉི་མ་གཉིས་པ་ལ་དེའི་སྔ་དྲོ་སད་དེ་ལྷ་མོས་རྒྱལ་པོ་ལ་རྨི་ལམ་རྣམས་སྨྲས་སོ། །རྒྱལ་པོས་བྲམ་ཟེ་དྲུག་བཅུ་རྩ་བཞི་བོས་ནས་མེ་ཏོག་ཕྲེང་བ་ལ་སོགས་པ་དང་། བཀྲ་ཤིས་དང་སྟི་སྟང་བྱེད་ཅིང་ས་ལ་མལ་སྟན་
ཆེན་པོ་བཤམས་ཏེ་དེ་ལ་བཞུགས་པའི་བྲམ་ཟེ་རྣམས་ལ་མར་གསར་དང་སྦྲང་རྩི་དང་ཀར་ར་རྣམས་དང་བསྲེས་པའི་འོ་ཐུག་རྣམས་གསེར་དང་དངུལ་ལས་བྱས་པའི་སྡེར་མ་བཀང་སྟེ་གསེར་དང་དངུལ་གྱི་སྡེར་མས་སོ་སོར་བཀབ་ནས་བྲམ་ཟེ་རྣམས་ལ་
ཕུལ་ལོ། །གཞན་ཡང་རྒྱལ་པོ་གྱོན་པ་དང་མཚུངས་པའི་གོས་དང་གསེར་རྒྱ་མ་ལ་སོགས་པ་བྱིན་ནས་དེ་རྣམས་ཚིམ་པར་བྱས་སོ། །དེ་ནས་དེ་ཐམས་ཅད་འདོད་པ་ཐམས་ཅད་ཀྱིས་ཚིམ་པར་གྱུར་ནས་རྨི་ལམ་བཤད་དེ་ཅི་འདྲ་བར་འགྱུར་ཞེས་དྲིས་སོ། །
བྲམ་ཟེ་རྣམས་ཀྱིས་སྨྲས་པ། རྒྱལ་པོ་ཆེན་པོ་འཇིགས་པར་མ་བྱེད་ཅིག །ཁྱོད་ཀྱི་ལྷ་མོའི་ལྟོའི་ནང་དུ་སེམས་ཅན་ཞུགས་ཏེ། དེ་ཡང་ནང་གི་དེ་སྐྱེས་བུའོ། །མངལ་གྱི་ནང་གི་དེ་བུ་མོ་ནི་མ་ཡིན་ནོ། །དེ་ཁྱེད་ཀྱི་སྲས་པོར་འགྱུར་རོ། །དེ་གལ་ཏེ་ཁྱིམ་ན་
གནས་ན་འཁོར་ལོས་སྒྱུར་བའི་རྒྱལ་པོར་འགྱུར་རོ། །གལ་ཏེ་ཁྱིམ་སྤངས་ནས་རབ་ཏུ་བྱུང་ན་སངས་རྒྱ་བར་འགྱུར་རོ། །འཇིག་རྟེན་དུ་བཟློག་ནས་སླར་ཁྱིམ་ན་གནས་ནས་སྐྱེ་བ་མེད་དོ། །གཞན་ཡང་བྱང་ཆུབ་སེམས་དཔའ་ཡུམ་གྱི་མངལ་དུ་ཞུགས་པ་དེ་མ་ཐག་
ཏུ་ཐུན་ཅིག་ཉིད་ལ་སྟོང་ཕྲག་བཅུའི་འཇིག་རྟེན་གྱི་ཁམས་ཐམས་ཅད་ཡང་དག་པར་གཡོས་སོ། །ཡང་དག་པར་རབ་ཏུ་གཡོས་སོ། །ཡང་དག་པར་སྒྲ་སྒྲོགས་སོ། །མཚན་མ་སུམ་བཅུ་རྩ་གཉིས་སྔོན་གྱི་མཚན་མར་གྱུར་ཏོ། །སྟོང་ཕྲག་བཅུའི་ཁོར་ཡུག་
རྣམས་སུ་སྣང་བ་ཚད་མེད་པར་ཁྱབ་ཅིང་གནས་སོ། །དེ་འམ་དེའི་དཔལ་བལྟ་བ་འདི་ལྟ་བུ་སྟེ་ལོང་བ་རྣམས་ཀྱིས་མིག་ཐོབ་བོ། །འོན་པ་རྣམས་ཀྱིས་རྣ་བས་སྒྲ་ཐོས་སོ། །ལྐུགས་པ་རྣམས་ཀྱིས་སྨྲ་ཤེས་སོ། །སྒུར་པོ་རྣམས་དྲང་པོར་གྱུར་ཏོ། །གོང་
39-1-214a


པོ་རྣམས་ཀྱིས་འགྲོ་ཤེས་པར་གྱུར་ཏོ། །བཅིངས་པའི་སེམས་ཅན་ཐམས་ཅད་ནི་རྗེས་སུ་བཅིངས་པ་ལས་གྲོལ་བར་གྱུར་ཏོ། །དམྱལ་བ་ཐམས་ཅད་ཀྱི་མེ་ཞི་བར་གྱུར་ཏོ། །ཡི་དགས་ཀྱི་ཡུལ་པ་རྣམས་བཀྲེས་པ་དང་སྐོམ་པ་ཞི་བར་
གྱུར་ཏོ། །དུད་འགྲོ་རྣམས་ཕན་ཚུན་འཇིགས་པ་མེད་པར་གྱུར་ཏོ། །སེམས་ཅན་ཐམས་ཅད་ཀྱི་ནད་ཞི་བར་གྱུར་ཏོ། །སེམས་ཅན་ཐམས་ཅད་དགའ་བཞིན་དུ་སྨྲ་བར་གྱུར་ཏོ། །རྟ་རྣམས་སྐད་སྙན་པའི་རྣམ་པར་གྱུར་ཏོ། །གླང་པོ་རྣམས་ནི་སྒྲ་སྒྲོགས་
སོ། །རོལ་མོ་རྣམས་རང་བྱུང་གི་སྒྲ་སྒྲོགས་སོ། །མི་རྣམས་ཀྱི་རྐང་པ་དང་ལག་པའི་རྒྱན་རང་རང་མ་རེག་པར་སོ་སོར་འབྱིན་ཏོ། །ཕྱོགས་ཐམས་ཅད་རབ་ཏུ་དངས་པར་གྱུར་ཏོ། །སེམས་ཅན་རྣམས་བདེ་བ་བསྐྱེད་པའི་ཕྱིར་རླུང་འཇམ་པོ་ལྡང་
བར་གྱུར་ཏོ། །དུས་མ་ཡིན་པར་སྤྲིན་ལ་ཆར་འབབ་བོ། །ས་ལ་ཆུ་བྱུང་ནས་ཕྱོགས་ཐམས་ཅད་ཆུར་གྱུར་ཏོ། །བྱ་རྣམས་ནམ་མཁའ་ལ་འགྲོ་བ་སྤོང་ངོ་། །ཆུ་ཀླུང་རྣམས་འགྲོ་བ་མེད་པར་གནས་སོ། །རྒྱ་མཚོ་ཆེན་པོའི་ཆུ་ནི་དངར་བར་གྱུར་ཏོ། །
གནས་ཐམས་ཅད་ཉིད་དུ་ཁ་དོག་ལྔ་པའི་པད་མས་སའི་སྟེང་ཐམས་ཅད་ཁྱབ་པར་གྱུར་ཏོ། །ཐང་དང་ཆུ་ལས་སྐྱེས་པའི་མེ་ཏོག་རྣམས་ཁ་བྱེ་བར་གྱུར་ཏོ། །ལྗོན་ཤིང་རྣམས་སྡོང་པོ་ལ་སྡོང་པོའི་པད་མའི་མེ་ཏོག་གོ། །ཡལ་ཁ་རྣམས་ལ་ཡལ་
ཁའི་པད་མའི་མེ་ཏོག་གོ། །འཁྲིལ་ཤིང་རྣམས་ལ་འཁྲིལ་ཤིང་གི་པད་མའི་མེ་ཏོག་ཁ་བྱེའོ། །ཐང་དང་རྡོའི་སྟེང་དུ་བརྟོལ་ནས་སྟེང་ནས་སྟེང་དུ་བདུན་བདུན་དུ་གྱུར་ནས་དན་དྲ་པད་མ་ཞེས་བྱ་བ་ཕྱུང་ངོ་། །ནམ་མཁའ་ནས་མཐུར་དུ་པད་མ་འཕྱང་
ངོ་། །ཐམས་ཅད་དུ་མེ་ཏོག་གི་ཆར་འབབ་བོ། །ནམ་མཁའ་ལ་ལྷའི་རོལ་མོའི་སྒྲ་སྒྲོགས་སོ། །སྟོང་ཕྲག་བཅུའི་འཇིག་རྟེན་གྱི་ཁམས་ཐམས་ཅད་མེ་ཏོག་དང་བདུག་སྤོས་དང་དྲི་ཆབ་མཆོག་ཏུ་སྐལ་བ་བཟང་བར་གྱུར་ཏོ། །འདི་ལྟར་བྱང་
ཆུབ་སེམས་དཔའ་མངལ་དུ་ཞུགས་པ་ཉིད་ནས་བྱང་ཆུབ་སེམས་དཔའ་དང་། བྱང་ཆུབ་སེམས་དཔའི་ཡུམ་གྱི་ཉེ་བར་འཚེ་བ་བཟློག་པའི་ཕྱིར་རལ་གྲི་ལག་ཏུ་ཐོགས་པའི་ལྷའི་བུ་བཞིས་སྲུང་བར་བྱེད་དོ། །བྱང་ཆུབ་སེམས་དཔའི་ཡུམ་ནི་སྐྱེས་
39-1-214b


པ་ལ་འདོད་ཆགས་མི་སྐྱེ་ཞིང་། རྙེད་པ་དང་གྲགས་པ་ཐོབ་པར་གྱུར་ཏོ། །སྐྱིད་པ་སྐུ་ལ་དུབ་པ་མེད་པར་བྱང་ཆུབ་སེམས་དཔའ་དེ་ཡང་རུམ་དུ་ཞུགས་ནས། ནོར་བུ་རིན་པོ་ཆེ་རབ་ཏུ་དངས་པ་སྲད་བུ་དམར་པོ་ལ་བརྒྱུས་པ་བཞིན་དུ་མཐོང་ངོ་། །
གང་གི་ཕྱིར་ཡང་བྱང་ཆུབ་སེམས་དཔའ་ཞུགས་པའི་རུམ་ཞེས་བྱ་བ་ནི་མཆོད་རྟེན་གྱི་ནང་བཞིན་དུ་སེམས་ཅན་གཞན་གྱིས་རེག་པ་དང་ལོངས་སྤྱོད་པར་མི་ནུས་སོ། །དེའི་ཕྱིར་བྱང་ཆུབ་སེམས་དཔའི་ཡུམ་བྱང་ཆུབ་སེམས་དཔའ་འཁྲུངས་ནས་
ཞག་བདུན་ནས་དུས་ལས་འདས་ནས་དགའ་ལྡན་དུ་སྐྱེ་བར་འགྱུར་རོ། །ཇི་ལྟར་ཡང་བུད་མེད་གཞན་ཟླ་བ་བཅུ་ལས་དམན་པ་འམ། ལྷག་པ་འམ། འདུག་པ་འམ། ཉལ་ནས་སྐྱེའོ། །བྱང་ཆུབ་སེམས་དཔའི་ཡུམ་ནི་དེ་ལྟ་བུ་མ་ཡིན་ཏེ། དེ་ཡང་
བྱང་ཆུབ་སེམས་དཔའ་ཟླ་བ་བཅུར་རུམ་དུ་བསྲུངས་ནས་འགྲེང་བ་ལ་སྐྱེའོ། །འདི་ནི་བྱང་ཆུབ་སེམས་དཔའི་ཡུམ་ཐམས་ཅད་ཀྱི་ཆོས་ཉིད་དོ། །ལྷ་མོ་སྒྱུ་འཕྲུལ་མ་ཆེན་མོ་ཡང་སྣོད་ཀྱི་ནང་གི་འབྲུ་མར་བཞིན་དུ་བྱང་ཆུབ་སེམས་དཔའ་ཟླ་བ་བཅུར་
རུམ་དུ་འཚོ་ཞིང་རུམ་ཡོངས་སུ་རྫོགས་ནས་གཉེན་གྱི་གྲོང་དུ་འགྲོའོ་ཞེས་རྒྱལ་པོ་ཆེན་པོ་ཟས་གཙང་གི་དྲུང་དུ་སྨྲས་སོ། །ལྷ་རིགས་ཀྱི་རྒྱུད་ཀྱི་གྲོང་ཁྱེར་ཆེན་པོ་ལྷ་བསྟན་དུ་བདག་འགྲོ་བར་འདོད་དོ། །རྒྱལ་པོས་ལེགས་སོ་ཞེས་བརྗོད་ནས་
གནང་ངོ་། །སེར་སྐྱའི་གཞི་དང་། གྲོང་ཁྱེར་ལྷ་བསྟན་གཉིས་ཀྱི་བར་གྱི་ལམ་མཚུངས་པར་བྱས་ནས། ཆུ་ཤིང་དང་། བུམ་པ་གང་བ་དང་། རྒྱལ་མཚན་དང་བ་དན་ལ་སོགས་པའི་རྒྱན་འཛུགས་སུ་བཅུག་ནས་ལྷ་མོ་གསེར་གྱི་དོ་ལི་ལ་བཞུགས་
ཏེ། བློན་པོ་སྟོང་ཕྲག་གཅིག་གིས་བཏེག་སྟེ་འཁོར་མང་པོ་དང་བཅས་པ་བཏང་ངོ་། །གྲོང་ཁྱེར་གཉིས་ཀྱི་བར་དུ་ཡང་གཉིས་ཀའི་གྲོང་ཁྱེར་པ་གནས་པའི་ལུམྦི་ནཱིའི་ཚལ་ཞེས་བྱ་བ་ལ་བཀྲ་ཤིས་པའི་ཤིང་སཱ་ལའི་ཤིང་ཡོད་དོ། །དེའི་དུས་སུ་
རྩ་བ་ནས་རྩེ་མོའི་ཡལ་གའི་བར་ཐམས་ཅད་དུ་བར་མ་ཆད་པར་མེ་ཏོག་ཁ་བྱེ་བར་གྱུར་ཏོ། །ཡལ་གའི་བར་ཉིད་དང་། མེ་ཏོག་གི་བར་ཁ་དོག་སྣ་ལྔ་པའི་བུང་བ་མང་པོ་ལྡིང་བ་དང་། རྣམ་པ་སྣ་ཚོགས་པའི་བྱ་མང་པོའི་ཚོགས་ནི་སྙན་པའི་སྒྲ་
39-1-215a


དབྱངས་སྒྲོགས་ཤིང་སྤྱོད་དོ། །ལུམྦི་ནཱིའི་ཚལ་ཐམས་ཅད་ནི་ཤིང་རྟ་སྣ་ཚོགས་པའི་ཚལ་བཞིན་དུ་མཐུ་དང་དབང་ཕྱུག་ནི་རྒྱལ་པོའི་མཛེས་པར་བྱས་པའི་མདུན་ས་ལྟ་བུ་དེ་ལྷ་མོས་གཟིགས་ནས་ཤིང་སཱ་ལའི་ཚལ་དུ་
རྩེ་བར་བསམས་པ་སྐྱེས་སོ། །བློན་པོ་རྣམས་ཀྱིས་ལྷ་མོ་བཏེག་ནས་ཤིང་སཱ་ལའི་ཚལ་དུ་བཞུགས་སོ། །དེ་བཀྲ་ཤིས་པའི་ཤིང་སཱ་ལའི་རྩ་བར་གཤེགས་ཏེ་དེས་ཤིང་སཱ་ལའི་ཡལ་ག་བཟུང་བར་སེམས་པར་གྱུར་ཏེ། དེས་ཤིང་སཱ་ལའི་
ཡལ་ག་ཤིན་དུ་ལེགས་པ་མེ་ལ་སྲོས་ནས་བཀུག་པ་བཞིན་དུ་མདུད་པ་ལ་ལྷ་མོའི་ལག་པར་ཉེ་བར་འཕྱང་ངོ་། །དེའི་ལག་པ་བརྐྱང་ནས་ཡལ་གའི་རྩེ་མོ་བཟུང་ངོ་། །དེ་མ་ཐག་ཏུ་ལས་ཀྱི་རླུང་གིས་བསྐྱོད་དོ། །དེ་ནས་དེའི་ཕྱོགས་ཀུན་དུ་ཡོལ་བ་བྱས་ནས་
སྐྱེ་བོ་ཐམས་ཅད་ཕྱིར་རིང་དུ་གྱུར་ཏེ་ཤིང་སཱ་ལའི་ཡལ་ག་བཟུང་ནས་འདུག་པ་ཉིད་ལ་དེ་ལྟར་དེའི་མངལ་ནས་བལྟམས་པར་གྱུར་ཏོ། །དེ་མ་ཐག་རྣམ་པར་དག་པའི་སེམས་དང་ལྡན་པའི་ཚངས་པ་བཞི་པོས་གསེར་གྱི་དྲ་བ་བླངས་ནས་སླེབ་བོ། །དེ་རྣམས་
ཀྱིས་དེར་གསེར་གྱི་དྲ་བས་བྱང་ཆུབ་སེམས་དཔའ་བླངས་ཏེ་ཡུམ་གྱི་མདུན་ན་འདུག་གོ། །ལྷ་མོ་སེམས་སྡུག་བསྔལ་བར་མ་བྱེད་ཅིག །ཁྱེད་ཀྱི་སྲས་དབང་ཕྱུག་དང་གྲགས་པ་དང་བཅས་པ་བལྟམས་སོ་ཞེས་སྨྲས་སོ། །དེ་ལྟར་ཡང་སེམས་ཅན་གཞན་
རྣམས་མའི་རུམ་ནས་འཐོན་པ་ན་མི་གཙང་བས་གོས་ཤིང་སྐྱུག་བྲོ་བ་ཅན་འཐོན་ནོ། །བྱང་ཆུབ་སེམས་དཔའ་ནི་དེ་ལྟ་བུ་མ་ཡིན་ནོ། །གཞན་ཡང་ཆོས་ཀྱི་ཁྲི་ནས་ཆོས་འཆད་པ་འབབ་པ་བཞིན་དང་སྐས་ལ་འབབ་པའི་སྐྱེས་བུ་བཞིན་དུ་ལག་
པ་གཉིས་དང་རྐང་པ་གཉིས་བརྐྱང་ནས་འདུག་པ་ཉིད་བཞིན་ནོ། །མའི་རུམ་ནས་མི་གཙང་བ་ཅུང་ཟད་ཀྱིས་ཀྱང་མ་གོས་པར་དག་ཅིང་འཇིགས་པ་མེད་པ་བཞིན་ནོ། །ཡུལ་ཀ་ཤི་ཀའི་རས་ཀྱི་ནང་དུ་ནོར་བུ་རིན་པོ་ཆེ་བཅུག་པ་བཞིན་དུ་འོད་འགྱེད་
ཅིང་ཡུམ་གྱི་རུམ་ནས་འཐོན་ནོ། །དེ་ལྟར་གྱུར་པའི་བྱང་ཆུབ་སེམས་དཔའ་དེ་དང་བྱང་ཆུབ་སེམས་དཔའི་ཡུམ་དེ་དག་པར་བྱ་བའི་ཕྱིར་ནམ་མཁའ་ནས་ཆུའི་རྒྱུན་གཉིས་བབས་པས་བྱང་ཆུབ་སེམས་དཔའ་དང་ཡུམ་གྱི་སྐུ་དག་པར་བྱས་སོ། །
39-1-215b


དེ་ཡང་གསེར་གྱི་དྲ་བས་བླངས་ནས་ཚངས་པ་འདུག་པའི་ལག་ནས་རྒྱལ་པོ་ཆེན་པོ་བཞི་པོ་རྣམས་ཀྱིས་བཀྲ་ཤིས་པ་དང་། བདེ་བ་ལ་རེག་པར་གནས་པར་བྱ་བའི་ཕྱིར་གཟིག་གི་ལྤགས་པས་སྔར་གྱི་བཞིན་དུ་བླངས་སོ། །དེ་རྣམས་ཀྱི་ལག་ནས་
མི་རྣམས་ཀྱིས་དུ་གུ་ལའི་རས་ཀྱི་སྟེང་དུ་བླངས་སོ། །མི་རྣམས་ཀྱི་ལག་ཏུ་བཏང་ནས་ས་ལ་གནས་སོ། །ཤར་ཕྱོགས་ལ་གཟིགས་ཏེ་སྟོང་ཕྲག་དུ་མའི་ཁོར་ཡུག་རྣམས་ཕན་ཚུན་དུ་མཐོང་ངོ་། །དེའི་ལྷ་དང་མི་རྣམས་ཀྱིས་མེ་ཏོག་གི་ཕྲེང་བ་དང་
སྤོས་ལ་སོགས་པས་མཆོད་ཅིང་སྐྱེས་བུ་ཆེན་པོ་ཁྱོད་ལྟ་བུ་འདི་ན་མེད་ཁྱོད་ཀྱི་གོང་ན་གཞན་སུ་ཡང་མེད་དོ་ཞེས་སྨྲས་སོ། །དེ་བཞིན་དུ་ཕྱོགས་བཞི་དང་མཚམས་བཞི་དང་འོག་དང་སྟེང་སྟེ་ཕྱོགས་བཅུ་པོ་ཐམས་ཅད་ལེགས་པར་གཟིགས་ནས་
བདག་དང་མཚུངས་པ་མེད་པར་མཐོང་ངོ་། །དེ་ནས་བྱང་གི་ཕྱོགས་སུ་གོམ་པ་བདུན་སྒྲོད་དོ། །ཚངས་པ་ཆེན་པོའི་གདུགས་དཀར་པོ་འཛིན་ཅིང་འཐབ་བྲལ་བས་རྔ་ཡབ་གཡོག་པ། ལྷ་གཞན་རྣམས་ཀྱིས་རྒྱལ་པོ་ལ་ཉེ་བར་མཁོ་བའི་དངོས་པོ་མ་ལུས་
པ་ལག་ཏུ་ཐོགས་ནས་རྗེས་སུ་འགྲོའོ། །དེ་ནས་གོམ་པ་བདུན་པ་ལ་གནས་པ་ན་འཇིག་རྟེན་པ་རྣམས་ལས་བདག་མཆོག་གོ་ཞེས་པ་ལ་སོགས་པའི་ཤིས་པ་བརྗོད་པའི་གཏམ་བརྗོད་ཅིང་། སེང་གེའི་སྒྲ་སྒྲོགས་སོ། །བྱང་ཆུབ་སེམས་དཔས་
ཀྱང་སྐྱེ་བ་གསུམ་དུ་རུམ་ནས་འཐོན་ཙམ་ན་གཏམ་དུ་བརྗོད་དོ། །སྨན་ཆེན་པོར་སྐྱེས་པ་དང་ཐམས་ཅད་སྒྲོལ་དུ་སྐྱེས་པ་དང་འདིར་སྐྱེས་པའོ། །སྨན་ཆེན་པོ་སྐྱེས་པ་ན་ཡུམ་གྱི་རུམ་ནས་འཐོན་མ་ཐག་ཉིད་དུ་བརྒྱ་བྱིན་ལྷའི་རྒྱལ་པོ་འོངས་ཏེ་
ཙན་དན་གྱི་སྙིང་པོ་ལག་ཏུ་ཐོགས་ནས་སོང་ངོ་། །དེ་དེ་རྣམས་ཀྱི་ཁྲུ་ཚུར་དུ་བཅུག་ནས་འཐོན་ནོ། །དེ་ནས་ཡང་ཡུམ་གྱིས་དྲིས་པ། བུ་ཅི་ཁྱེར་ནས་འོངས། མ་སྨན་ཡིན་ནོ། །འདིས་སྨན་ཁྱེར་ནས་འོངས་པའི་ཕྱིར་སྨན་གྱི་ཁྱེའུ་ཞེས་བྱ་
བར་མིང་བཏགས་སོ། །དེས་སྨན་བླངས་ནས་ཆུའི་སྣོད་ཀྱི་ནང་དུ་བཅུག་གོ། །འོངས་ཤིང་འོངས་པའི་ལོང་བ་དང་འོན་པ་ལ་སོགས་པ་དེ་རྣམས་དེ་ཉིད་ཀྱིས་ནད་ཐམས་ཅད་ཉེ་བར་ཞི་བས་ན་སྨན་པར་གྱུར་ཏོ། །དེ་ནས་སྨན་ཆེན་པོ་སྨན་ཆེན་
39-1-216a


པོ་ཞེས་བརྗོད་ཅིང་སྐྱེས་པའི་ཚིག་གི་རྒྱུས་སྨན་ཆེན་པོ་ཉིད་དེའི་མིང་དུ་གྱུར་ཏོ། །གཞན་ཡང་ཐམས་ཅད་སྒྲོལ་དུ་སྐྱེས་པ་ན་མའི་རུམ་ནས་སྐྱེས་ཙམ་ན་ལག་པ་གཡས་པ་བརྐྱང་ནས་ཡུམ་བདག་ཅག་གི་ཁྱིམ་ན་སྦྱིན་པ་བཏང་
རྒྱུ་འདྲ་བདོག་གེ་ཞེས་བརྗོད་ཅིང་འཐོན་ནོ། །དེ་ནས་དེའི་མས། བུ་འབྱོར་པ་དང་ལྡན་པའི་རིགས་སུ་ཁྱོད་སྐྱེས་སོ། །བུའི་ལག་པ་རང་གི་ལག་པའི་སྟེང་དུ་བཞག་སྟེ་ནོར་བུ་རིན་པོ་ཆེ་སྟོང་ཕྲག་གཅིག་གི་སྣོད་བཞག་གོ། །གཞན་ཡང་འདི་སྐྱེས་
པ་ན་འདིས་སེང་གེའི་སྒྲ་སྒྲོགས་སོ། །དེ་བཞིན་དུ་བྱང་ཆུབ་སེམས་དཔའ་སྐྱེ་བ་གསུམ་དུ་མའི་རུམ་ནས་སྐྱེས་ཙམ་ནས་གཏམ་བརྗོད་དོ། །ཇི་ལྟར་ཡང་རུམ་དུ་ཞུགས་ཙམ་དང་བལྟམས་ཙམ་ན་སུམ་བཅུ་རྩ་གཉིས་སྔོན་གྱི་མཚན་མ་བཞིན་དུ་
སྐྱེས་པར་གྱུར་ཏོ། །གཞན་ཡང་གང་གི་ཚེ་བདག་ཅག་གི་བྱང་ཆུབ་སེམས་དཔའ་ལུམ་བི་ནཱིའི་ཚལ་དུ་བལྟམས་སོ། །དེ་མ་ཐག་ཏུ་ལྷ་མོ་སྒྲ་གཅན་འཛིན་གྱི་མ་དང་། བློན་པོ་འདུན་པ་དང་། བློན་པོ་ནག་པོ་འཆར་ཀ་དང་། རྟའི་རྒྱལ་པོ་བསྔགས་
ལྡན་དང་། བྱང་ཆུབ་ཀྱི་ཤིང་དང་། གཏེར་བཞིའི་བུམ་པ་སྐྱེས་སོ། །དེ་ལ་གཅིག་ལ་རྒྱང་གྲགས་བཞི་དང་། གཅིག་ལ་རྒྱང་གྲགས་བརྒྱད་དང་། གཅིག་ལ་རྒྱང་གྲགས་བཅུ་གཉིས་དང་། གཅིག་ལ་རྒྱང་གྲགས་བཅུ་དྲུག་གོ། །བདུན་པོ་འདི་
ལྷན་ཅིག་ཏུ་སྐྱེས་པ་ཡིན་ནོ། །གྲོང་ཁྱེར་གཉིས་ན་གནས་པའི་མི་རྣམས་ཀྱིས་བྱང་ཆུབ་སེམས་དཔའ་ཁྲིད་ནས་གྲོང་ཁྱེར་སེར་སྐྱའི་གཞི་ཁོ་ནར་ཕྱིན་ནོ། །ཉི་མ་དེ་ཉིད་ལ་གྲོང་ཁྱེར་སེར་སྐྱའི་གཞི་ལ་རྒྱལ་པོ་ཆེན་པོ་ཟས་གཙང་གི་སྲས་པོར་
བལྟམས་སོ། །གཞོན་ནུ་འདི་བྱང་ཆུབ་ཤིང་གི་དྲུང་དུ་བཞུགས་ནས་སངས་རྒྱས་སུ་འགྱུར་རོ་ཞེས་པ་ལ་སུམ་བཅུ་རྩ་གསུམ་གྱི་གནས་ཀྱི་ལྷ་རྣམས་ཀྱིས་དགའ་བ་དང་ཚིམ་པས་ལག་པ་གྱེན་དུ་བསྐྱོད་ནས་རྩེ་ཞིང་བསྟོད་པ་བྱེད་དོ། །དེའི་
ཚེ་རྒྱལ་པོ་ཆེན་པོ་ཟས་གཙང་གི་མཆོད་གནས་སྙོམས་པར་འཇུག་པ་བརྒྱད་ཐོབ་པའི་དཀའ་ཐུབ་པ་ནག་པོ་ལྷ་ལེན་ཞེས་བྱ་བ་ཁ་ཟས་བཟང་པོ་ལ་ལོངས་སྤྱོད་དོ། །ཉིན་མོ་ཉི་མ་ལ་མི་གནས་པའི་ཕྱིར་སུམ་བཅུ་རྩ་གསུམ་གྱི་གནས་
39-1-216b


སུ་འགྲོ་ཞིང་དེར་བདེ་བར་འདུག་ནས་ལྷ་དེ་རྣམས་བལྟའོ། །ཁྱེད་རྣམས་ཅིའི་ཕྱིར་འདི་ལྟར་དགའ་བའི་སེམས་ཀྱིས་རྩེ། བདག་ཀྱང་འདི་རྣམས་ཀྱི་ཆེད་དུ་བྱ་བ་ཁོ་བོ་ལ་སྟོན་ཅིག་ཅེས་དྲིས་སོ། །ལྷ་རྣམས་ཀྱིས་སྨྲས་པ། དྲང་སྲོང་ཆེན་
པོ་རྒྱལ་པོ་ཆེན་པོ་ཟས་གཙང་གི་སྲས་བལྟམས་སོ། །དེས་བྱང་ཆུབ་ཤིང་གི་དྲུང་དུ་བཞུགས་ནས་སངས་རྒྱས་སུ་གྱུར་ནས་ཆོས་ཀྱི་འཁོར་ལོ་བསྐོར་རོ། །དེ་ནས་མཐའ་ཡས་པའི་སངས་རྒྱས་ཀྱི་རོལ་མོ་བལྟ་བ་དང་། ཆོས་ཐམས་ཅད་ཐོབ་བོ་
སྙམ་པ་འདི་རྣམས་ཀྱི་རྒྱུ་མཚན་གྱིས་དགའ་བར་གྱུར་ཏོ། །དཀའ་ཐུབ་པས་དེའི་ཚིག་ཐོས་ནས་མྱུར་དུ་ལྷའི་ཡུལ་ནས་བབས་ཏེ་རྒྱལ་པོའི་གནས་སུ་འོངས་ནས། གདན་བཤམས་པ་ལ་འདུག་སྟེ། བུ་རྣམས་རྒྱལ་པོ་ཆེན་པོའི་སྲས་སུ་གྱུར་པ་
དེ་བདག་གིས་བལྟའོ་ཞེས་སྨྲས་སོ། །རྒྱལ་པོས་རྒྱན་དང་ལྡན་པའི་གཞོན་ནུ་བླངས་ནས་དཀའ་ཐུབ་པ་ལ་ཕྱག་བྱ་བའི་ཕྱིར་བྱང་ཆུབ་སེམས་དཔའི་ཞབས་ཀྱིས་བསྐོར་ནས་དཀའ་ཐུབ་པའི་རལ་པའི་སྟེང་ན་འདུག་གོ། །བྱང་ཆུབ་སེམས་དཔས་ཀྱང་
དེ་རྣམས་ཀྱི་ལུས་ཀྱིས་ཕྱག་བྱེད་པར་རིག་པ་གཞན་མེད་དོ། །གལ་ཏེ་མི་ཤེས་པས་བྱང་ཆུབ་སེམས་དཔའི་དབུ་ལ་དཀའ་ཐུབ་པའི་རྐང་པ་བཞག་ན་དེའི་མགོ་ཚལ་པ་བདུན་དུ་འགས་པར་འགྱུར་རོ། །དཀའ་ཐུབ་པས་བདག་ཉམས་པའི་ཕྱིར་དུ་རིགས་
པ་མ་ཡིན་ནོ། །སྟན་ལས་ལངས་ནས་བྱང་ཆུབ་སེམས་དཔའ་ལ་ཐལ་མོ་སྦྱར་རོ། །རྒྱལ་པོས་ཡ་མཚན་ཆེ་བ་གཟིགས་ནས་རང་གི་སྲས་ལ་ཕྱག་བྱས་སོ། །དཀའ་ཐུབ་པས་འདས་པའི་བསྐལ་པ་བཞི་བཅུ་དང་མ་འོངས་པའི་བསྐལ་པ་བཞི་
བཅུ་སྟེ། བསྐལ་པ་བརྒྱད་བཅུ་རྗེས་སུ་དྲན་ནོ། །བྱང་ཆུབ་སེམས་དཔའི་མཚན་ཉིད་ཕུན་སུམ་ཚོགས་པ་མཐོང་ནས་སངས་རྒྱ་བར་འགྱུར་རམ་མི་འགྱུར་ཞེས་བརྟགས་པས་ཐེ་ཚོམ་མེད་པར་སངས་རྒྱས་སུ་འགྱུར་བར་རྟོགས་ཏེ། 
འདི་ཡ་མཚན་ཆེ་བའི་སྐྱེས་བུ་ཡིན་ནོ་ཞེས་བསམས་ནས་བརྒད་དོ། །དེ་ནས་འདི་སངས་རྒྱས་ནས་བདག་གིས་མཐོང་ངམ་མི་མཐོང་ཞེས་བརྟགས་པས་མི་མཐོང་ངོ་། །བར་དུ་དུས་ལས་འདས་ནས་སངས་རྒྱས་
39-1-217a


བརྒྱ་འམ་སངས་རྒྱས་སྟོང་གཤེགས་ནས་བརྟག་པར་མི་ནུས་པའི་གཟུགས་མེད་པའི་གནས་སུ་སྐྱེ་བར་ངེས་པར་མཐོང་ངོ་། །འདི་ལྟ་བུའི་ཚུལ་གྱི་ཡ་མཚན་ཆེ་བའི་སྐྱེས་བུ་མཐོང་བར་མི་ནུས་སོ་སྙམ་སྟེ་བདག་གི་སེམས་ཤིན་
དུ་སྡུག་བསྔལ་བར་གྱུར་ནས་ངུས་སོ། །དེ་མི་རྣམས་ཀྱིས་མཐོང་སྟེ། བདག་ཅག་གི་འཕགས་པ་རེས་འགའ་ནི་རྒོད་རེས་འགའ་ནི་ངུ་བའི་རྒྱུ་མཚན་ཅི་ལགས། བདག་ཅག་གི་སྲས་འཕགས་པ་ལ་བར་དུ་གཅོད་པ་འོང་ངམ་ཞེས་དྲིས་སོ། །འདི་ལ་བར་
དུ་གཅོད་པ་མི་འབྱུང་ཞིང་ཐེ་ཚོམ་མེད་པར་སངས་རྒྱས་སུ་འགྱུར་རོ་ཞེས་སྨྲས་སོ། །འོ་ན་གང་གི་ཕྱིར་ངུ་ཞེས་དྲིས་སོ། །འདི་ལྟ་བུའི་ཚུལ་གྱིས་སྐྱེས་བུ་སངས་རྒྱ་བར་འགྱུར་བ་བདག་གིས་མཐོང་བར་མི་འགྱུར་བས་བདག་ཤིན་དུ་ངེས་པར་
སྡུག་བསྔལ་ལོ། །དེའི་ཕྱིར་རང་གི་ཆེད་དུ་མྱ་ངན་གྱིས་ངུའོ་ཞེས་སྨྲས་སོ། །དེས་ན་ཅིའི་ཕྱིར་རང་གི་ཉེ་དུ་རྣམས་ལས་འགའ་ཞིག་གིས་འདི་སངས་རྒྱས་སུ་གྱུར་ནས་མཐོང་བར་འགྱུར་རམ་མི་འགྱུར་ཞེས་བརྟགས་པས་ཚ་བོ་ནཱ་ལ་ཀའི་གཞོན་
ནུས་མཐོང་ངོ་། །དེ་སྲིང་མོའི་ཁང་པར་སོང་སྟེ། ནཱ་ལ་ཀ་གཞོན་ནུ་དེ་གང་ན་ཡོད། འཕགས་པ་ཁང་པ་ན་ཡོད་དོ། །དེ་བོས་ལ་ཤོག །དེ་རང་གི་གནས་སུ་འོངས་ནས་ནཱ་ལ་ཀ་ལ་སྨྲས་སོ། །ཚ་བོ་རྒྱལ་པོ་ཆེན་པོ་ཟས་གཙང་གི་རིགས་ཀྱི་
བུ་འཁྲུངས་སོ། །འདི་ནི་སངས་རྒྱས་ཀྱི་མྱུ་གུའོ། །ལོ་སུམ་བཅུ་རྩ་ལྔ་འདས་ནས་སངས་རྒྱས་སུ་འགྱུར་ཞིང་ཁྱོད་ཀྱིས་འདི་མཐོང་བར་འགྱུར་བས་ད་ལྟ་ཉིད་དུ་རབ་ཏུ་བྱུང་བ་གྱིས་ཅིག་ཅེས་སྨྲས་སོ། །བྱེ་བ་བརྒྱད་བཅུ་རྩ་བདུན་གྱི་ནོར་
གྱི་རིགས་ལ་སྐྱེས་པའི་གཞོན་ནུས་ཞང་པོ་འདིས་བདག་ལ་དོན་མེད་ཅིང་དགོས་པ་མེད་དོ་ཞེས་བརྗོད་པར་བསམས་སོ། །དེ་མ་ཐག་ཏུ་རང་གི་ཚོང་གནས་སུ་ངུར་སྨྲིག་གི་གོས་ཉིད་དང་སའི་ལྷུང་བཟེད་བླངས་ནས་སྐྲ་དང་ཁ་སྤུ་བྲེགས་ཏེ། 
ངུར་སྨྲིག་གི་གོས་གྱོན་ནས་གང་ཞིག་འཇིག་རྟེན་པའི་གང་ཟག་གི་མཆོག་གི་མཆོག་ལ་བསམས་ཤིང་བདག་རབ་ཏུ་འབྱུང་བར་འགྱུར་རོ་ཞེས་བསམས་ཏེ་བྱང་ཆུབ་སེམས་དཔའི་ཕྱོགས་སུ་ཐལ་མོ་སྦྱར་ནས་ཡན་ལག་ལྔའི་ཕྱག་བྱེད་
39-1-217b


དོ། །ལྷུང་བཟེད་སྣོད་དུ་བཅུག་ནས་ཕྲག་པ་ལ་གཟེར་ཏེ་གངས་ཅན་དུ་གཤེགས་ནས་དགེ་སྦྱོང་གི་ཆོས་བྱེད་དོ། །དེས་མཆོག་ཏུ་མངོན་པར་རྫོགས་པར་སངས་རྒྱས་པའི་དེ་བཞིན་གཤེགས་པའི་དྲུང་དུ་ཉེ་བར་སོང་སྟེ། ནཱ་ལ་ཀའི་སོ་
སོའི་རྟོགས་པའི་གཏམ་ཐོས་ནས་སླར་ཡང་གངས་ཅན་དུ་གཤེགས་ཏེ་དགྲ་བཅོམ་པ་ཐོབ་བོ། །མཆོག་ཏུ་རྟོགས་དཀའ་བ་རྟོགས་ནས་ཟླ་བ་བདུན་ཉིད་ཀྱི་ནང་དུ་ཚེ་འདས་ཏེ་གསེར་གྱི་རི་གཅིག་ལ་བརྟེན་ནས་འདུག་དེ་ལྷག་མ་མེད་པར་
ཡོངས་སུ་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །བྱང་ཆུབ་སེམས་དཔའ་ཡང་ཞག་ལྔ་ནས་དབུ་འཁྲུ་བར་བྱེད་ཅིང་མིང་འདོགས་པར་རིགས་སོ་ཞེས་བསམས་ནས་རྒྱལ་པོའི་ཕོ་བྲང་ལ་དྲི་བཞིའི་རིགས་
ཀྱིས་བྱུག་པ་བྱས་ཏེ། རིན་པོ་ཆེ་ལྔའི་མེ་ཏོག་གཅལ་དུ་བཀྲམ་ནས་ཆུ་མེད་པའི་འོ་མ་བཙོས་པའི་འོ་ཐུག་འཚོད་ཅིང་རིག་བྱེད་གསུམ་གྱི་ཕ་རོལ་དུ་སོན་པའི་བྲམ་ཟེ་བརྒྱ་རྩ་བརྒྱད་མགྲོན་དུ་གཉེར་ཏེ་རྒྱལ་པོའི་ཕོ་བྲང་དུ་བཞུགས་ནས་
ཁ་ཟས་བཟང་པོ་ལ་ལོངས་སྤྱོད་ཅིང་བཀུར་སྟི་ཆེན་པོ་བྱས་ནས་མཚན་ཉིད་ཇི་ལྟ་བུ་ཞེས་དྲིས་སོ། །དེ་རྣམས་ལས་དགའ་བྱེད་དང་། རྒྱལ་མཚན་དང་མཚན་ཉིད་དང་རིགས་ཀྱི་སྔགས་པ་དང་། །ཀཽ་ཊི་ནྱ་དང་ལག་པ་ཅན་དང་གཤིན་
རྗེ་བཟང་དང་། ལེགས་སྦྱིན་ཏེ་དེ་རྣམས་དེའི་ཚེ་བྲམ་ཟེ་བརྒྱད་ཡིན་ནོ། །ཡན་ལག་དྲུག་གི་སྔགས་བརྡ་སྤྲད་ནས་བྲམ་ཟེ་བརྒྱད་པོ་འདི་ལྟ་བུ་ཉིད་ཀྱི་མཚན་ཉིད་སོ་སོར་བརྗོད་ནས་དགའ་ལྡན་གནས་ནས་མའི་མངལ་དུ་
ཞུགས་པའི་མཚན་ཉིད་འདི་རྣམས་ཀྱིས་བཤད་དོ། །དེ་རྣམས་ལས་བྲམ་ཟེ་བདུན་གྱིས་མཛུབ་མོ་གཉིས་བསྒྲེངས་ཏེ་དོན་གཉིས་ལུང་བསྟན་ནོ། །མཚན་ཉིད་འདི་དང་ལྡན་པས་ཁྱིམ་ན་གནས་ན་འཁོར་ལོས་སྒྱུར་བའི་རྒྱལ་པོར་འགྱུར་རོ། །རབ་ཏུ་
བྱུང་ན་སངས་རྒྱ་བར་འགྱུར་རོ། །འཁོར་ལོས་སྒྱུར་བའི་ཕུན་སུམ་ཚོགས་པ་ཐམས་ཅད་བཤད་པ་རྫོགས་ནས་གཞན་དེ་རྣམས་ཀྱི་ནང་ནས་ཐམས་ཅད་ཀྱི་གཞོན་ཤོས་ཀྱི་རིགས་ནི་ཀཽ་ཊི་ནྱ་བྲམ་ཟེའི་ཁྱེའུ་འོ་ཞེས་བྱ་བའོ། །བྱང་ཆུབ་སེམས་དཔའ་དེའི་མིང་ཚད་
39-1-218a


མཆོག་རྣམས་རྫོགས་པར་བཏགས་སོ། །འདི་ནི་ཁྱིམ་ན་གནས་པའི་རྒྱུ་མེད་པས་མཐའ་གཅིག་ཉིད་དུ་ཁྱིམ་ན་མི་གནས་པར་སངས་རྒྱའོ། །མཛུབ་མོ་གཅིག་བསྒྲེངས་ཏེ་འདི་ལྟར་ལུང་བསྟན་ནོ། །འདི་ནི་སྔར་གྱི་གཞི་བྱས་པས་ཕྱིས་མིར་གྱུར་པ་
ན་ཤེས་རབ་དང་ལྡན་ནོ། །བྲམ་ཟེ་བདུན་ལས་ལྷག་པར་གྱུར་ནས་འདིའི་མཚན་ཉིད་རིག་པར་ལྡན་ནས་ཁྱིམ་དུ་གནས་པའི་མིང་ཡང་མེད་དོ། །ཐེ་ཚོམ་མེད་པར་སངས་རྒྱ་བར་འགྱུར་ཏེ་འགྲོ་བ་གཅིག་ལས་གཞན་མ་མཐོང་ངོ་། །དེའི་ཕྱིར་མཛུབ་མོ་གཅིག་
བསྒྲེངས་ཏེ་འདི་ལྟར་ལུང་བསྟན་ནོ། །དེ་ནས་བྲམ་ཟེ་དེ་རྣམས་རང་གི་ཁྱིམ་དུ་འགྲོ་ཞིང་བུ་རྣམས་བོས་ཏེ། བུ་བདག་ཅག་རྣམས་རྒན་པོར་གྱུར་པས་རྒྱལ་པོ་ཆེན་པོ་ཟས་གཙང་གི་སྲས་ཐམས་ཅད་མཁྱེན་པ་ཐོབ་པར་གྱུར་པ་ན་བདག་ཅག་དང་མཇལ་
བར་འགྱུར་རམ་མི་འགྱུར་ཆ་མེད་ཀྱིས། ཁྱོད་དེའི་སྲས་ཀྱིས་ཐམས་ཅད་མཁྱེན་པ་ཐོབ་པར་གྱུར་ནས་དེའི་བསྟན་པ་ལ་རབ་ཏུ་བྱུང་ཅིག་ཅེས་སྨྲས་སོ། །བྲམ་ཟེ་བདུན་པོ་རྣམས་ཀྱིས་ཀྱང་ཇི་སྲིད་ཚེ་གནས་ཀྱི་བར་ཇི་ལྟར་བྱས་པའི་ལས་རྟོགས་སོ། །
བྲམ་ཟེའི་ཁྱེའུ་ཀཽ་ཊི་ནྱ་ཉིད་ནད་མེད་པར་གྱུར་ནས་གནས་སོ། །དེའི་སེམས་དཔའ་ཆེན་པོ་བློ་དང་ལྡན་པ་ངེས་པར་འབྱུང་བ་ཆེན་པོས་མངོན་པར་བྱུང་ནས་གོ་རིམས་བཞིན་དུ་སྟེང་རྒྱས་སུ་སོང་ངོ་། །ས་ཕྱོགས་འདི་ནི་ཉམས་དགའ་བས་རིགས་ཀྱི་བུ་
ས་ཕྱོགས་འདི་དཀའ་བ་སྤྱོད་པའི་གནས་སུ་རིག་པར་སེམས་སྐྱེས་པས་དེར་གནས་ཏེ་སྐྱེས་བུ་ཆེན་པོ་རབ་ཏུ་བྱུང་ངོ་ཞེས་ཐོས་ནས་བྲམ་ཟེའི་བུའི་གནས་སུ་ཉེ་བར་སོང་ངོ་ཞེས་སྨྲས་སོ། །གཞོན་ནུ་དོན་གྲུབ་རབ་ཏུ་བྱུང་ནས་ཐེ་ཚོམ་
མེད་པར་དེ་སངས་རྒྱ་བར་འགྱུར་རོ། །གལ་ཏེ་ཁྱེད་རྣམས་ཀྱི་ཕ་ནད་མེད་པར་གནས་ན་དེ་རིང་ཕྱིན་ནས་རབ་ཏུ་བྱུང་བ་བྱེད་དོ། །གལ་ཏེ་ཁྱོད་ཀྱང་འདོད་ན་འདིར་འོངས་ནས་བདག་གིས་སྐྱེས་བུ་དེའི་རྗེས་སུ་རབ་ཏུ་འབྱུང་བར་བགྱིའོ། །དེ་
ཐམས་ཅད་འདུན་པ་གཅིག་པར་མ་ནུས་པར་སྐྱེ་བོ་བཞི་པོ་ལས་ཀཽ་ཊི་ནྱས་གཙོ་བོ་བྱས་ནས་སྐྱེ་བོ་ལྔ་པོ་རབ་ཏུ་བྱུང་སྟེ། དེ་རྣམས་ཀྱི་སྐྱེ་བོ་ལྔ་པོ་ནི་གནས་བརྟན་ལྔ་སྡེ་ཞེས་བྱ་བའི་རིགས་སུ་གྱུར་ཏོ། །གཞན་ཡང་དེའི་ཚེ་རྒྱལ་པོ་འདི་སྐད་དུ་
39-1-218b


གང་མཐོང་ནས་བདག་གི་བུ་རབ་ཏུ་འབྱུང་ཞེས་འདྲིའོ། །སྔོན་གྱི་མཚན་མ་བཞི་མཐོང་བས་དེ་གང་དང་རྒས་ཤིང་འཁོགས་པ་དང་ན་བ་དང་འཆི་བ་དང་རབ་ཏུ་བྱུང་བའོ། །རྒྱལ་པོས་འདི་རྣམས་བཟུང་ནས་འདི་ལྟ་བུའི་ཚུལ་བདག་གི་བུ་དང་ཉེ་བར་འོང་དུ་མྱི་
འཇུག་ཅིང་། བདག་གི་སྲས་ཀྱིས་སངས་རྒྱས་ཐོབ་ཀྱང་དོན་མེད་དོ། །བདག་གི་སྲས་སྟོང་ཕྲག་གཉིས་ཀྱི་གླིང་འཁོར་དང་བཅས་པའི་གླིང་ཆེན་པོ་བཞི་པོ་རྣམས་ཀྱི་དབང་ཕྱུག་གི་བདག་པོའི་རྒྱལ་པོ་བྱེད་ཅིང་དཔག་ཚད་སུམ་བཅུ་རྩ་དྲུག་གི་ཁོར་ཡུག་གི་འཁོར་
ནམ་མཁའི་དབྱིངས་སུ་གཤེགས་པ་ལ་བལྟ་བར་འདོད་དོ། །སླར་ཡང་འདི་ལྟར་བརྗོད་ཅིང་འདི་ལྟ་བུའི་རྣམ་པ་བཞིའི་སྐྱེས་བུ་གཞོན་ནུའི་མིག་ལམ་དུ་འོང་བ་བསྲུང་ཞིང་ཕྱོགས་བཞིར་རྒྱང་གྲགས་བཞི་བཞིར་བསྲུང་བ་བཞག་གོ། །དེའི་ཉི་མ་ལ་ཡང་བཀྲ་ཤིས་
པའི་གནས་སུ་འདུས་པའི་རིགས་ཀྱི་ཉེ་དུ་སྟོང་ཕྲག་བརྒྱད་བཅུ་པོ་རེ་རེའི་བུ་བརྒྱ་ཡོངས་སུ་སྟེར་བར་བསམས་སོ། །འདི་སངས་རྒྱས་སུ་འགྱུར་རམ་རྒྱལ་པོར་འགྱུར་རམ་བདག་གི་བུ་རེ་རེ་སྟེར་རོ། །གལ་ཏེ་སངས་རྒྱས་པར་གྱུར་ན་རྒྱལ་རིགས་ཀྱི་དགེ་སྦྱོང་
ཉིད་ཀྱིས་མདུན་རྒྱབ་ཐམས་ཅད་དུ་བསྐོར་ནས་འགྲོ་བ་ཡིན་ནོ། །གལ་ཏེ་རྒྱལ་པོར་གྱུར་ན་རྒྱལ་རིགས་ཀྱི་གཞོན་ནུ་ཉིད་ཀྱིས་མདུན་རྒྱབ་ཀུན་ནས་བསྐོར་ནས་འགྲོའོ་ཞེས་སྨྲ་ཞིང་འབུལ་ལོ། །རྒྱལ་པོས་ཀྱང་བྱང་ཆུབ་སེམས་དཔའ་ལ་གཟུགས་
མཆོག་དང་ལྡན་པ་སྐྱོན་ཐམས་ཅད་སྤངས་པའི་ནུ་མ་བསྣུན་པ་ཉིད་གནས་པ་བྱིན་ནོ། །བྱང་ཆུབ་སེམས་དཔའ་འཁོར་མཐའ་ཡས་པ་དཔལ་དང་སྐལ་པ་འཕེལ་བ་དང་ལྡན་ནོ། །དེ་ནས་ཉི་མ་གཅིག་ལ་རྒྱལ་པོའི་འབྲས་འདེབས་
པ་ལ་བཀྲ་ཤིས་བྱེད་དོ། །དེའི་ཉི་མ་ལ་གྲོང་ཁྱེར་ཐམས་ཅད་དུ་ལྷ་གཤེགས་པ་བཞིན་དུ་བརྒྱན་ནོ། །བྲན་དང་ལས་བྱེད་པ་ལ་སོགས་པས་གོས་ལེགས་པོ་གྱོན་ནས་སྤོས་དང་མེ་ཏོག་གི་ཕྲེང་བ་ལ་སོགས་པས་བརྒྱན་པར་བྱས་ནས་རྒྱལ་པོའི་ཕོ་
བྲང་གི་ནང་དུ་འདུས་སོ། །རྒྱལ་པོའི་གཞིས་རྣམས་ལ་ཞིང་རྨོ་བ་སྟོང་ཕྲག་གཅིག་རིགས་སོ། །སླར་ཡང་དེའི་ཉི་མ་ལ་གཅིག་གིས་དམན་པའི་ཞིང་རྨོ་བ་བརྒྱད་བརྒྱ་དང་བཅས་པའི་གླང་གི་གཉའ་ཤིང་གི་ཐག་པ་དངུལ་ལས་བྱས་པ་དང་། རྒྱལ་པོ་འཛིན་
39-1-219a


པའི་ཞིང་རྨོ་བའི་ཐོང་པ་སླར་ཡང་གསེར་ལས་བྱས་པར་གྱུར་ཏོ། །གླང་གི་རྭ་གཉིས་ལ་གསེར་གྱིས་བསྐུས་སོ། །ཁ་དང་སྐེའི་ཐག་པ་ནི་གསེར་ལའང་བྱས་སོ། །རྒྱལ་པོའི་འཁོར་ཆེན་པོ་དང་བཅས་པ་བྱོན་ནས་སྲས་བླངས་ཏེ་གཤེགས་
སོ། །གཞིས་ཁའི་གནས་ན་ཤིང་འཛམ་བུ་གཅིག་ལ་ལོ་མ་མང་པོས་གྲིབ་མ་སྟུག་པོར་གྱུར་པ་ཞིག་ཡོད་པའི་འོག་ཏུ་གཞོན་ནུའི་མལ་སྟན་ཆེན་པོ་བྱས་ནས་སྟེང་དུ་བླ་རེས་གསེར་གྱི་སྐར་མ་དང་མཚུངས་པ་བྲེས་ཏེ། ལྕགས་རི་ལྟར་ཡོལ་བས་
ཕྱོགས་ཀུན་ནས་བསྐོར་ཏོ། །རྒྱལ་པོ་རྒྱན་ཐམས་ཅད་ཀྱིས་བརྒྱན་པར་བྱས་ནས་བློན་པོ་འཁོར་དང་བཅས་པ་ཞིང་རྨོ་བའི་གནས་སུ་གཤེགས་ཏེ། དེར་རྒྱལ་པོས་གསེར་གྱི་ཐོང་པ་བཟུང་ངོ་། །གཅིག་གིས་དམན་པའི་བརྒྱད་བརྒྱའི་དངུལ་གྱི་ཐོང་
པ་བློན་པོས་བཟུང་སྟེ་སོ་ནམ་བྱེད་པའི་སྐྱེ་བོ་རྣམས་ཀྱིས་ཐོང་པ་ལྷག་མ་རྣམས་བསླངས་སོ། །དེ་རྣམས་ཀྱིས་ཐོང་པ་བཟུང་ནས་དེ་དང་དེར་སྒལ་རྨོའོ། །རྒྱལ་པོས་སླར་ཡང་འདི་ནས་ཕར་འགྲོ་ཞིང་ཕ་རོལ་ནས་ཚུར་འོངས་སོ། །དེའི་གནས་
ཕུན་སུམ་ཚོགས་པར་འགྱུར་རོ་ཞེས་བསམས་ནས་བྱང་ཆུབ་སེམས་དཔའ་འཁོར་དང་བཅས་པ་བཞུགས་པའི་ནུ་མ་སྣུན་པ་རྣམས་རྒྱལ་པོའི་ཕུན་སུམ་ཚོགས་པར་བལྟའོ། །ཡོལ་བའི་ནང་ནས་ཕྱིར་འཐོན་ནོ། །བྱང་ཆུབ་སེམས་དཔའ་དེ་
དང་དེར་གཟིགས་པས་གཅིག་ཀྱང་མི་སྣང་ངོ་། །མྱུར་བར་ལངས་ནས་སྐྱིལ་ཀྲུང་བཅས་ཏེ། རླུང་འབྱུང་བ་དང་རྔུབ་ཅིང་བཟུང་བས་བསམ་གཏན་དང་པོ་སྐྱེས་སོ། །ནུ་མ་སྣུན་པ་རྣམས་ཁ་ཟས་ཟ་བའི་ཕྱིར་ཕན་ཚུན་དུ་འགྲོ་ཞིང་དེ་མ་ཐག་
ཅུང་ཟད་ཐོགས་པར་གྱུར་ཏོ། །ཤིང་གཞན་རྣམས་ཀྱི་གྲིབ་མ་མི་ལྡོག་ཅིང་གཞན་ཡང་ཤིང་དེའི་གྲིབ་མ་རྣམས་ཀུན་ནས་གནས་སོ། །ནུ་མ་སྣུན་པ་རྣམས་ཀྱིས་སྲས་འཕགས་པ་ཞེས་ཅིག་ཏུ་བརྗོད་ཅིང་མྱུར་དུ་ཡོལ་བ་སྟེངས་སུ་བརྫེས་
ཏེ་ནང་དུ་ཞུགས་ནས་བྱང་ཆུབ་སེམས་དཔའ་མལ་སྟན་ལ་སྐྱིལ་ཀྲུང་གིས་བཞུགས་པ་དེའི་ཆོ་འཕྲུལ་མཐོང་ནས་སོང་སྟེ་རྒྱལ་པོ་ལ་ཞུས་སོ། །ལྷ་གཞོན་ནུ་འདི་ལྟ་བུའི་ཚུལ་གྱིས་བཞུགས་སོ། །འདི་ལྟར་ཤིང་གཞན་རྣམས་གྲིབ་མ་མི་
39-1-219b


བཟློག་གོ། །ཤིང་འཛམ་བུའི་གྲིབ་མ་ནི་ཀུན་ནས་གནས་སོ། །རྒྱལ་པོ་མྱུར་དུ་བྱོན་ནས་ཆོ་འཕྲུལ་བལྟ་སྟེ། སྲས་འདི་ལ་ཕྱག་གཉིས་པ་སྟེ་ཞེས་བརྗོད་ནས་སྲས་ལ་ཕྱག་བརྩལ་ལོ། །དེ་ནས་གོ་རིམས་བཞིན་དུ་བྱང་ཆུབ་སེམས་དཔའ་
ལོ་བཅུ་དྲུག་པའི་ན་ཚོད་དུ་གྱུར་ཏོ། །རྒྱལ་པོས་བྱང་ཆུབ་སེམས་དཔའ་ལ་དུས་གསུམ་དུ་རྗེས་སུ་རིགས་པར་ཁང་བཟང་གསུམ་བྱས་ནས་གཅིག་དགུ་ཐོག་གཅིག་ལ་བདུན་ཐོག་གཅིག་ལ་ལྔ་ཐོག་གོ། །སྟོང་ཕྲག་བཞི་བཅུའི་གར་
བྱེད་པའི་བུད་མེད་རྣམས་ཉེ་བར་གནས་པར་བྱས་སོ། །བྱང་ཆུབ་སེམས་དཔའ་ནི་ལྷ་བཞིན་དུ་ལྷ་དང་འདྲ་བའི་བུད་མེད་རྣམས་འཁོར་དུ་བྱས་ནས་རྒྱན་གྱིས་བརྒྱན་པའི་བུད་མེད་དུ་མ་དང་བཅས་པ་སྐྱེས་པ་མེད་པའི་རོལ་མོ་སྒྲོགས་
པ་འཁོར་དུ་བྱ་སྟེ་ཕུན་སུམ་ཚོགས་པ་ཆེན་པོ་རྗེས་སུ་མྱོང་བར་བྱེད་དོ། །དུས་ཀྱི་རེས་དང་དུས་ཀྱི་རེས་འདི་དང་དེའི་ཁང་བཟངས་སུ་བཞུགས་སོ། །གཞན་ཡང་སྒྲ་གཅན་འཛིན་གྱི་མ་དེ་ཉིད་བཙུན་མོ་རྣམས་ཀྱི་གཙོ་མོར་གྱུར་ཏོ། །དེའི་དེ་བཞིན་
དུ་ཕུན་སུམ་ཚོགས་པ་ཆེན་པོ་རྗེས་སུ་མྱོང་བར་བྱེད་དོ། །ཉི་མ་གཅིག་ལ་ཉེ་དུའི་ནང་དུ་འདི་ལྟ་བུའི་གཏམ་བྱུང་ངོ་། །དོན་གྲུབ་རྩེད་མོས་བརྗེད་ནས་གཤེགས་ཤིང་བཟོ་ཅུང་ཟད་ཀྱང་མི་སློབ་བོ། །གཡུལ་སོ་སོ་ནས་ཉེ་བར་གྱུར་ན་ཅི་བྱེད། དེའི་ཚེ་བྱང་
ཆུབ་སེམས་དཔའ་བོས་ནས་བུ་ཁྱོད་ཀྱི་ཉེ་དུ་རྣམས་དོན་གྲུབ་བཟོ་ཅུང་ཟད་ཀྱང་མི་སློབ་ཅིང་རྩེད་མོས་གཤེགས་ནས་འགྲོའོ་ཞེས་ཟེར་རོ། །འདིར་གཡུལ་བྱུང་ན་ཇི་ལྟར་བྱེད་ཅེས་བསམས། ལྷ་ངས་བཟོ་བསླབས་པ་ལ་དགོས་པ་མེད་དོ། །
གྲོང་ཁྱེར་གྱི་མི་རྣམས་བདག་གི་བཟོ་བལྟ་བའི་སེམས་ཡོད་ན་གྲིལ་སྒྲོགས་ཤིག །འདི་ནས་ཞག་བདུན་པ་ལ་ཉེ་དུ་རྣམས་ལ་བཟོ་བསྟན་པར་བགྱིའོ། །རྒྱལ་པོས་དེ་བཞིན་དུ་བྱས་སོ། །བྱང་ཆུབ་སེམས་དཔས་སྒྲ་ལ་
འཕེན་པ་དང་། སྤུན་ལ་འཕེན་པ་དང་། གཞུ་ཐོགས་པ་འདུས་པར་བྱས་ནས་སྐྱེ་བོ་མང་པོའི་ནང་དུ་གཞན་གཞུ་ཐོགས་པ་དང་ཐུན་མོང་མ་ཡིན་པ་ཉེ་དུ་རྣམས་ལ་བཟོ་བཅུ་གཉིས་བསྟན་ནོ། །དེ་རྣམས་མདའ་འཇོམས་པའི་སྐྱེས་
39-1-220a


རབས་ལས་འབྱུང་བའི་ཚུལ་བཞིན་དུ་རིག་པར་བྱའོ། །དེའི་ཉེ་དུ་རྣམས་ཀྱི་ཐེ་ཚོམ་སེལ་ལོ། །གཞན་ཡང་བྱང་ཆུབ་སེམས་དཔའ་སྐྱེད་མོས་ཚལ་དུ་གཤེགས་པར་བསམས་ནས་ཁ་ལོ་སྒྱུར་བ་བོས་ཏེ། ཤིང་རྟ་ཆས་
སུ་ཆུག་ཅིག་ཅེས་སྨྲས་སོ། །དེས་ལེགས་སོ་ཞེས་བརྗོད་ཅིང་ཚིག་ཐོས་ནས་ཤིང་རྟ་ཆེན་པོའི་འཁོར་ལོའི་མཆོག་ལ་ཇི་ལྟར་རིགས་པའི་རྒྱན་ཐམས་ཅད་ཀྱིས་བརྒྱན་ནས་ཀུ་མུ་དའི་འདབ་མའི་མདོག་དང་འདྲ་བའི་བཀྲ་ཤིས་པའི་རྟ་བཞིས་
ཤིང་རྟ་ཁྲིད་ནས་བྱང་ཆུབ་སེམས་དཔའ་གཤེགས་སོ། །ཞེས་སྨྲས་སོ། །བྱང་ཆུབ་སེམས་དཔའ་ལྷའི་གཞལ་མེད་ཁང་བཞིན་དུ་ཤིང་རྟ་ལ་ཞོན་ནས་སྐྱེད་མོས་ཚལ་གྱི་ཕྱོགས་སུ་གཤེགས་སོ། །ལྷ་རྣམས་ཀྱིས་གཞོན་ནུ་དོན་གྲུབ་
ཀྱི་མངོན་པར་རྫོགས་པར་བྱང་ཆུབ་པའི་དུས་ནི་ཉེ་བར་གྱུར་ཏོ། །སྔར་གྱི་མཚན་མ་རྣམས་བལྟ་བར་རིགས་སོ། །ལྷའི་བུ་ཅིག་གིས་རྒས་པ་འཁོགས་པ་སོ་བྱི་བ་སྐྲ་དཀར་བ་སྒུར་བ་རྒྱབ་གྲུམ་པའི་ལུས་ཅན་ལག་ཏུ་འཁར་བ་ཐོགས་
པ་སྐད་འཛེར་བར་བྱེད་པ་བསྟན་ནོ། །དེ་བྱང་ཆུབ་སེམས་དཔའ་དང་ཁ་ལོ་སྒྱུར་བས་མཐོང་ངོ་། །དེ་ནས་བྱང་ཆུབ་སེམས་དཔས་ཁ་ལོ་སྒྱུར་བ་ལ་དྲིས་སོ། །སྐྱེས་བུ་འདི་གང་ཞིག་ཡིན། སྐྲ་ཡང་གཞན་དང་མི་འདྲ་བ་ཇི་ལྟ་བུ། གཙོ་བོ་ཆེན་པོའི་
མདོ་ནས་བྱུང་བ་བཞིན་འདྲི་བར་བྱའོ། །དེའི་ཚིག་ཐོས་ནས་སྐྱེ་བ་མི་རྟག་ཅིང་སྐྱེས་པར་གྱུར་པ་ཐམས་ཅད་རྒས་པར་འགྱུར་རོ་ཞེས་སེམས་སྡུག་བསྔལ་ཞིང་དེ་ཉིད་དུ་བཟློག་ནས་རང་གི་ཁང་བཟང་ཉིད་དུ་གཤེགས་སོ། །རྒྱལ་པོས་རྒྱུ་མཚན་
ཅིའི་ཕྱིར་བདག་གི་སྲས་པོ་མྱུར་དུ་ལྡོག་པ་ཅིའི་ཕྱིར་དྲིས་སོ། །ལྷ་རྒས་ཤིང་འཁོགས་པའི་མི་གཅིག་མཐོང་བས་རབ་ཏུ་འབྱུང་ངོ་། །མྱུར་དུ་བུ་ལ་གར་བྱེད་པ་རྣམས་སྟ་གོན་གྱིས་ཤིག །ཕུན་སུམ་ཚོགས་པ་ཉམས་སུ་མྱོང་བར་བྱས་
པས་རབ་ཏུ་འབྱུང་བ་རྗེས་སུ་དྲན་པར་མི་འགྱུར་རོ་ཞེས་སྨྲས་ནས་བསྲུང་བར་བྱེད་པ་སྤེལ་ཏེ་ཕྱོགས་ཐམས་ཅད་དུ་རྒྱང་གྲགས་བརྒྱད་བརྒྱད་དུ་བཞག་གོ། །གཞན་ཡང་ཉི་མ་གཅིག་ལ་བྱང་ཆུབ་སེམས་དཔའ་དེ་བཞིན་དུ་བསྐྱེད་མོས་
39-1-220b


ཚལ་དུ་གཤེགས་པ་ན་ལྷས་སྤྲུལ་པའི་ནད་པ་གཅིག་མཐོང་ནས་སྔར་བཞིན་དུ་དྲིས་སོ། །སེམས་སྡུག་བསྔལ་བར་གྱུར་ཏེ་སླར་ཡང་བཟློག་ནས་རང་གི་ཁང་བཟངས་སུ་གཤེགས་སོ། །རྒྱལ་པོས་ཡང་དྲིས་པ་སྔར་དེ་བཞིན་དུ་བྱས་
ནས་སླར་ཡང་སྤེལ་ཏེ་ཐམས་ཅད་དུ་རྒྱང་གྲགས་བཅུ་གཉིས་ཀྱི་སའི་ཆར་སྲུང་བར་བྱེད་པ་བཞག་གོ། །ཡང་ཉི་མ་གཞན་ལ་བྱང་ཆུབ་སེམས་དཔའ་དེ་བཞིན་དུ་སྐྱེད་མོས་ཚལ་དུ་གཤེགས་པ་ན་ལྷས་སྤྲུལ་པའི་དུས་ལ་འདས་པ་
གཅིག་མཐོང་ནས་སྔར་བཞིན་དུ་དྲིས་ཏེ་སེམས་སྡུག་བསྔལ་བར་གྱུར་ནས། སླར་ཡང་བཟློག་སྟེ་ཁང་བཟངས་སུ་གཤེགས་ནས་རྒྱལ་པོས་དྲིས་པ་སྔར་བཞིན་དུ་བྱས་ནས། སླར་ཡང་བསྲུང་བ་སྤེལ་ཏེ་ཀུན་ནས་བསྐོར་བར་དཔག་ཚད་གཅིག་
གི་ཚད་ལ་བསྲུང་བ་བཞག་གོ། །སླར་ཡང་ཉི་མ་གཞན་ལ་སྐྱེད་མོས་ཚལ་དུ་གཤེགས་པ་ན་དེ་བཞིན་དུ་ལྷས་སྤྲུལ་པའི་གོས་བཟང་པོ་ལེགས་པ་གྱོན་པའི་རབ་ཏུ་བྱུང་བ་ཅིག་གཟིགས་ནས། འདིའི་མིང་ཅི་ཞེས་ཁ་ལོ་བ་ལ་དྲིས་སོ། །གང་དུ་
ཡང་སངས་རྒྱས་བྱོན་པར་མ་གྱུར་ཅིང་རབ་ཏུ་བྱུང་བའི་ཡོན་ཏན་མི་ཤེས་ལྷའི་མཐུས་སླར་ཡང་ལྷ་རབ་ཏུ་བྱུང་བ་ཡིན་ཞེས་བརྗོད་དོ། །རབ་ཏུ་བྱུང་བའི་ཡོན་ཏན་ལ་བསྔགས་པ་བརྗོད་དོ། །བྱང་ཆུབ་སེམས་དཔའ་རབ་ཏུ་བྱུང་བ་ལ་
འདུན་པ་སྐྱེས་ནས་དེའི་ཉིན་མོ་སྐྱེད་མོས་ཚལ་དུ་གཤེགས་སོ། །སློབ་དཔོན་ཁ་ཅིག་འདི་སྐད་ཟེར་ཏེ། སྔུན་གྱི་མཚན་མ་བཞི་པ་ཉི་མ་གཅིག་ཉིད་ལ་མཐོང་ངོ་ཞེས་ཟེར་རོ། །དེ་ནི་མི་འཐད་དོ། །དེ་ལ་ཉིན་མོའི་ཆར་རྩེ་ཞིང་
བཀྲ་ཤིས་པའི་རྫིང་བུར་ཁྲུས་བྱས་ནས་ཉི་མ་ནུབ་པ་ན་བཀྲ་ཤིས་པའི་རྡོ་ལེབ་ཀྱི་སྟན་ལ་བཞུགས་སོ། །རང་ལ་རྒྱན་གྱིས་བརྒྱན་པར་སེམས་སོ། །དེ་ནས་རྗེས་སུ་འབྲང་བའི་སྐྱེས་བུ་རྣམས་ཁ་དོག་སྣ་ཚོགས་པའི་གོས་
དང་རྒྱན་རྣམ་པ་སྣ་ཚོགས་པས་བརྒྱན། མེ་ཏོག་གི་ཕྲེང་བ་དང་སྤོས་དང་བྱུག་པ་ལ་སོགས་པ་བསླངས་ནས་ཕྱོགས་ཀུན་དུ་བསྐོར་ནས་འདུག་གོ། །དེ་མ་ཐག་པར་བརྒྱ་བྱིན་སྡོད་པའི་གདན་དྲོ་བར་གྱུར་ཏོ། །གང་ཞིག་
39-1-221a


བདག་གི་གནས་འདོར་བའི་སེམས་སུ་ཤིག་ལ་སྐྱེས་པར་གྱུར་ཞེས་བརྟགས་སོ། །བྱང་ཆུབ་སེམས་དཔའི་རྒྱན་བྱེད་པའི་དུས་མཐོང་ངོ་། །ལས་ཐམས་ཅད་པ་བོས་སོ། །ལས་ཐམས་ཅད་པ་གཞོན་ནུ་དོན་གྲུབ་དེ་
རིང་གི་མཚན་ཕྱེད་ཀྱི་དུས་སུ་ངེས་པར་འབྱུང་བ་ཆེན་པོས་འཐོན་ནོ། །འདི་དེའི་ཕྱི་མའི་རྒྱན་ཡིན་ནོ། །སྐྱེད་མོས་ཚལ་དུ་སོང་ལ་སྐྱེས་བུ་ཆེན་པོ་ལྷའི་རྒྱན་གྱིས་བརྒྱན་པར་གྱིས་ཤིག །དེས་དེ་ཐོས་ནས་ལེགས་སོ་ཞེས་བརྗོད་དེ་ལྷའི་
མཐུས་དེ་མ་ཐག་པར་ཉེ་བར་སོང་སྟེ། དེའི་རིམ་གྲོ་པ་དང་མཚུངས་པར་གྱུར་ནས་རིམ་གྲོ་པའི་ལག་ཏུ་རས་བསླངས་ནས་བྱང་ཆུབ་སེམས་དཔའི་དབུ་ལ་བཅིངས་སོ། །བྱང་ཆུབ་སེམས་དཔས་མགོ་ལ་ལག་པས་རེག་པ་ན་འདི་མི་མ་ཡིན་ཏེ་
ལྷའི་བུ་ཡིན་པར་ཤེས་སོ། །བཅིངས་པ་ཙམ་ན་བཅིངས་པའི་དབུའི་ཅོད་པན་ནོར་བུ་རིན་པོ་ཆེའི་རྣམ་པ་ལ་སྟོང་ཕྲག་གཅིག་གི་དུ་གུ་ལའི་རས་ཀྱིས་བཅིངས་སོ། །སླར་ཡང་འཆིང་བ་ན་དུ་གུ་ལའི་རས་སྟོང་ཕྲག་གཅིག་གིས་ལན་བཅུ་དཀྲིས་ནས་
སྟོང་ཕྲག་བཅུས་དུ་གུ་ལའི་རས་བཅིངས་སོ། །དབུ་ནི་ཆུང་ཞིང་དུ་གུ་ལའི་རས་ནི་མང་བས་ཇི་ལྟར་བཅིང་ཞེས་མི་བསམ་མོ། །དེ་རྣམས་ཐམས་ཅད་ལ་ཁྲི་ཞིང་སཱ་ཀ་ལའི་མེ་ཏོག་གི་ཚད་ཙམ་ཆེ་བའོ། །ཡང་ན་ཀུ་བའི་མེ་ཏོག་གི་ཚད་ཙམ་དུ་གྱུར་
ཏོ། །བྱང་ཆུབ་སེམས་དཔའི་དབུ་ཀི་ཛ་ལ་ཀའི་མེ་ཏོག་ལྟར་མཚུངས་པའོ། །ཡང་ན་གུ་སྤྱ་ཀའི་མེ་ཏོག་ལྟར་གྱུར་པའོ། །དེ་ནས་རྒྱན་ཐམས་ཅད་ཀྱིས་སོ་སོར་བརྒྱན་ནས་རོལ་མོ་ཐམས་ཅད་རང་རང་གི་སྒྲ་འབྱིན་ཞིང་བྲམ་ཟེ་རྣམས་རྒྱལ་བར་གྱུར་
ཅིག་དགའ་བར་གྱུར་ཅིག་ཅེས་རྣམ་པ་སྣ་ཚོགས་པའི་བཀྲ་ཤིས་ཀྱིས་བསྟོད་པའི་དབྱངས་བྱེད་དོ། །རྒྱན་ཐམས་ཅད་ཀྱིས་བརྒྱན་ནས་མཆོག་གི་ཤིང་རྟ་ལ་ཆིབས་སོ། །དེའི་ཚེ་གྲགས་འཛིན་མ་ལ་བུ་བཙས་སོ། །རྒྱལ་པོ་ཟས་གཙང་གིས་ཐོས་
ནས་བདག་གི་བུ་དགའ་བར་བྱ་བའི་ཕྱིར་ཕོ་ཉ་བ་བཏང་ངོ་། །བྱང་ཆུབ་སེམས་དཔས་དེ་ཐོས་ནས་སྒྲ་གཅན་འཛིན་སྐྱེས་པས་འཆིང་བ་སྐྱེས་སོ་ཞེས་གསུངས་སོ། །རྒྱལ་པོ་བདག་གི་བུ་ལ་ཅིའི་ཕྱིར་འདྲི། དེའི་ཚིག་ཐོས་ཏེ་འདི་ནས་བཟུང་སྟེ་བདག་གི་ཆ་འོ་
39-1-221b


གཞོན་ནུ་སྒྲ་གཅན་འཛིན་ཉིད་མིང་དུ་གྱུར་ཏོ་ཞེས་སྨྲས་སོ། །བྱང་ཆུབ་སེམས་དཔས་ཀྱང་གྲགས་པ་ཆེན་པོས་ཤིན་དུ་དགའ་བ་དང་དཔལ་དང་སྐལ་བ་བཟང་པོ་དང་ལྡན་པའི་གྲོང་ཁྱེར་དུ་གཤེགས་སོ། །དེའི་ཚེ་གཽ་ཏ་མི་སྐེམ་མོ་ཞེས་བྱ་བ་རྒྱལ་རིགས་ཀྱི་བུ་མོ་ཁང་
བཟང་གི་སྟེང་དུ་འདུག་པས་གྲོང་ཁྱེར་ལ་བསྐོར་བ་བྱེད་པའི་བྱང་ཆུབ་སེམས་དཔའི་དཔལ་དང་ལྡན་པའི་གཟུགས་མཐོང་ནས། དགའ་བ་དང་ཡིད་བདེ་བ་སྐྱེས་ཏེ་ཆེད་དུ་བརྗོད་པ་འདི་ཆེད་དུ་བརྗོད་དོ། །དེ་ཡི་མ་ནི་ཞི་བར་གྱུར། །དེ་ཡི་ཕ་ནི་ངེས་པར་ཞི། །དེ་ཡི་བུད་མེད་ངེས་
ཞིར་གྱུར། །དེ་ཡི་ཡང་ནི་དེ་བདག་མཚུངས། །བྱང་ཆུབ་སེམས་དཔས་ཐོས་ནས་བསམས་པ། འདི་འདི་ལྟ་བུར་སྨྲ་བ། འདི་ལྟ་བུའི་ཚུལ་གྱི་བདག་ཉིད་ཀྱི་ལུས་མཐོང་བས་མའི་སེམས་ཞི་བར་གྱུར། ཕའི་སེམས་ཞི་བར་གྱུར། སྐྱེ་དགུ་དང་སྐྱེ་དགུའི་བདག་མོའི་སེམས་
ཞི་བར་གྱུར་ཞེས་སྨྲའོ། །ཅིའི་ཕྱིར་སེམས་ཞི་བ་ཞེས་བྱ་བའི་དོན་གང་། དེ་ནས་ཉོན་མོངས་པའི་ཆགས་པ་མེད་པའི་སེམས་ལ་དེ་སྐད་བརྗོད་དོ། །འདོད་ཆགས་ཀྱི་མེ་ཞི་བར་གྱུར་པ་ནི་ཞི་བའི་མིང་དུ་གྱུར་ཏོ། །སྐྱོན་གྱི་མེ་དང་གཏི་མུག་གི་མེ་ཞི་བར་གྱུར་པ་ནི་
ཞི་བའི་མིང་དུ་གྱུར་ཏོ། །ང་རྒྱལ་དང་ལྟ་བ་ལ་སོགས་པའི་ཉོན་མོངས་པ་ཀུན་སྐྱེས་པ་ཐམས་ཅད་ཞི་བ་ནི་ཞི་བའི་མིང་དུ་བརྗོད་དོ། །འདི་བདག་ལ་ཚིག་སྙན་པ་བརྗོད་ཅིང་བདག་ནི་མྱ་ངན་ལས་འདས་པ་ཚོལ་དུ་འགྲོ་ཞིང་ཚོལ་ལོ། །དེ་རིང་ཉིད་ནས་
བདག་ཁྱིམ་ན་གནས་པ་སྤངས་ནས་ངེས་པར་འབྱུང་བས་རབ་ཏུ་བྱུང་ནས་མྱ་ངན་ལས་འདས་པ་ཚོལ་བར་རིགས་སོ། །འདི་ནི་བདག་གི་སློབ་དཔོན་མར་གྱུར་ཏོ། །གཽ་ཏ་མི་སྐེམ་མོ་ལ་འབུམ་ཕྲག་གཅིག་རི་བའི་མུ་ཏིག་གི་དྲ་བ་མགྲིན་པ་ནས་བཀྲོལ་
ཏེ་བསྐུར་རོ། །དེས་དོན་གྲུབ་གཞོན་ནུ་བདག་ལ་ཆགས་ཤིང་ཞེན་པར་གྱུར་པས་སེམས་རྟེན་བསྐུར་བ་ཡིན་པས་དེས་སེམས་བདེ་བ་སྐྱེས་པར་གྱུར་ཏོ། །བྱང་ཆུབ་སེམས་དཔའ་ནི་དཔལ་དང་ལྡན་སྐལ་པ་བཟང་པོ་དང་ལྡན་པའི་རང་གི་ཁང་བཟངས་སུ་
གཤེགས་ནས་དཔལ་གྱི་མལ་སྟན་ལ་གཟིམས་སོ། །དེ་མ་ཐག་ཏུ་རྒྱན་ཐམས་ཅད་ཀྱིས་བརྒྱན་པའི་གླུ་དང་གར་རྣམས་ལེགས་པར་བསླབས་པའི་ལྷའི་བུ་མོ་དང་འདྲ་བའི་གཟུགས་མཆོག་དང་ལྡན་པའི་བུད་མེད་རྣམས་ཀྱིས་རྣམ་པ་སྣ་
39-1-222a


ཚོགས་པའི་རོལ་མོ་བཟུང་ནས་དེ་ལ་ཡོངས་སུ་བསྐོར་ནས་མངོན་པར་དགའ་བར་བྱེད་ཅིང་གར་དང་གླུ་དང་རོལ་མོ་ལ་སོགས་པ་བྱེད་པར་རྩོམ་མོ། །བྱང་ཆུབ་སེམས་དཔའ་ཉོན་མོངས་པ་ལ་མི་དགའ་བའི་སེམས་ཀྱིས་
གར་ལ་སོགས་པ་ལ་མངོན་པར་དགའ་བ་མེད་པས་ཡུད་ཙམ་གྱིས་མནལ་དུ་བཞུད་དོ། །བུད་མེད་དེ་རྣམས་ཀྱང་གང་གི་དོན་དུ་ངེད་རྣམས་ཀྱིས་གར་ལ་སྩོགས་པ་བྱེད་པ་ལ་དེ་མནལ་དུ་གཤེགས་སོ། །ད་ནི་ཅིའི་ཕྱིར་བདག་ཅག་ངལ་བར་བྱེད་གང་
དང་གང་བསླབས་པའི་རོལ་མོ་རྣམས་ས་ལ་བཞག་ནས་ཉལ་ལོ། །དྲི་བཟང་དང་ལྡན་པའི་འབྲུ་མར་གྱི་མར་མེ་དང་ལྡན་པའི་བྱང་ཆུབ་སེམས་དཔའ་རབ་ཏུ་སད་ནས་མལ་གྱི་སྟེང་དུ་སྐྱིལ་དཀྲུང་གིས་བཞུགས་ནས་གཟིགས་པས་བུད་མེད་
རྣམས་རོལ་མོ་བཞག་ནས་གཉིད་དུ་སོང་བ་གཟིགས་སོ། །ཁ་ཅིག་མཆིལ་མ་ལུག་པ་དང་། ཁ་ཅིག་ནི་ལུས་ལ་མཆིལ་མས་གོས་པའི་དྲི་མ་ཅན་དུ་གྱུར་པ་དང་། ཁ་ཅིག་ནི་སོ་འཆའ་བ་དང་། ཁ་ཅིག་ནི་ངར་ངར་འབྱིན་པ་དང་། ཁ་ཅིག་
ནི་རྙ་མ་རྨི་འཆང་པ་དང་། ཁ་ཅིག་ནི་ཁ་གདངས་པ་དང་། ཁ་ཅིག་ནི་གོས་ཞུས་པ་དང་། འགའ་ཞིག་གི་ནི་མཚན་མ་སྣང་ངོ་། །བྱང་ཆུབ་སེམས་དཔས་དེ་རྣམས་ཀྱི་རྣམ་འགྱུར་གཟིགས་ནས་ཐུགས་གཟིགས་པས་འདོད་པ་ལ་མི་དགའ་
བར་གྱུར་ཏོ། །དེའི་རྒྱན་དུ་བྱས་པ་ནི་ཉེ་བར་ལྡན་པ་བརྒྱ་བྱིན་གྱི་ཕོ་བྲང་དང་མཚུངས་པའི་ཁང་བཟང་ཆེན་པོ་ཡངས་ཤིང་རྣམ་པ་སྣ་ཚོགས་པའི་དྲི་ང་བས་གང་བའི་རོ་དང་ལྡན་པའི་དུར་ཁྲོད་དང་མཚུངས་པར་བསམས་སོ། །སྲིད་པ་
གསུམ་པོ་མེ་འབར་བའི་ཁྱིམ་དང་མཚུངས་པར་བསམས་སོ། །བདག་ལ་གནོད་པར་བྱེད་པ་དང་། འཚེ་བར་བྱེད་པའོ་ཞེས་ཆེད་དུ་བརྗོད་པ་འཆད་ཅིང་ཤིན་དུ་རབ་ཏུ་འབྱུང་བར་འདོད་པར་གྱུར་ཏོ། །དེ་བདག་གི་དེ་རིང་ནས་ངེས་པར་
འབྱུང་བ་ཆེན་པོས་འཐོན་པར་བསམས་ཏེ་མལ་ནས་བཞེངས་ནས་སྒོ་དང་ཉེ་བར་གཤེགས་ཏེ་འདི་ན་སུ་ཡོད་ཅེས་དྲིས་སོ། །བློན་པོ་མདུན་པ་ཐེམ་པ་ལ་སྔས་བྱས་ནས་ཉལ་ལོ། །འཕགས་པ་བུ་བདག་བློན་པོ་མདུན་པ་ཡིན་ནོ་ཞེས་
39-1-222b


སྨྲས་སོ། །ད་ནི་ངེས་པར་འབྱུང་བ་ཆེན་པོས་འཐོན་པར་འདོད་དོ། །བདག་གི་རྟ་གཅིག་ལ་སྒ་གྱིས་ཤིག །དེས་ལྷ་ལེགས་སོ་ཞེས་བརྗོད་ནས་རྟའི་སྒ་ཁྱེར་ཏེ་རྟ་རར་སོང་ནས་དྲི་བཟང་པོ་དང་ལྡན་པའི་འབྲུ་མར་གྱི་མར་མེ་སྤར་བ་སུ་མ་ནའི་མེ་ཏོག་
ཅན་གྱི་དར་གྱི་བླ་རེས་ཀྱི་འོག་ན་ཤིན་དུ་དགའ་བའི་ས་ཕྱོགས་ལ་སྡོད་པའི་རྟའི་རྒྱལ་པོ་བསྔགས་ལྡན་མཐོང་ངོ་། །ད་ནི་བདག་གིས་འདི་ཉིད་ཀྱི་སྒ་བྱ་བར་རིག་ནས་བསྔགས་ལྡན་ལ་སྒ་སྒྲོན་ནོ། །དེས་སྒ་སྒྲོན་པར་ཤེས་ནས་འདི་སྒ་སྒྲོན་པ་ན་གློ་
བསྡམས་སོ། །ཉི་མ་གཞན་ལ་བསྐྱེད་མོས་ཚལ་དུ་རྩེད་མོ་ལ་འགྲོ་བའི་དུས་སུ་སྒ་འདི་ལྟར་མ་བྱས་སོ། །བདག་གི་སྲས་འཕགས་པ། ད་ནི་ངེས་པར་འབྱུང་བ་ཆེན་པོས་འཐོན་པར་འདོད་པར་གྱུར་ཏོ་སྙམ་ནས་སེམས་དགའ་བས་རྟ་སྐད་ཚེར་ཚེར་
འདོན་པ་དེའི་སྒྲ་གྲོང་ཁྱེར་ཐམས་ཅད་དུ་གྲག་པར་བྱེད་པ་སླར་ཡང་ལྷ་རྣམས་ཀྱིས་དེའི་སྒྲ་བཀག་ནས་སུས་ཀྱང་མི་ཐོས་པར་བྱས་སོ། །བྱང་ཆུབ་སེམས་དཔས་ཀྱང་བློན་པོ་མདུན་པ་རྟའི་གནས་སུ་བཏང་ནས་རེ་ཞིག་བུ་ལ་
བལྟ་བར་བསམས་སོ། །གྲགས་འཛིན་མའི་གནས་སུ་གཤེགས་ཏེ་སྒོ་ཕྱེ་ནས་དེ་མ་ཐག་པར་ཉལ་སའི་ནང་དུ་དྲི་བཟང་པོ་དང་ལྡན་པའི་འབྲུ་མར་གྱི་མར་མེ་སྤར་གྲགས་འཛིན་མ་སུ་མ་ནའི་མེ་ཏོག་དང་། མལ་ལི་ཀའི་
མེ་ཏོག་ལ་སྩོགས་པའི་མེ་ཏོག་མལ་གྱི་སྟེང་དུ་ཁལ་གཅིག་ཙམ་བཀྲམ་པའི་སྟེང་དུ་བུའི་མགོའི་སྟེང་དུ་ལག་པ་བཞག་ནས་གཉིད་དུ་སོང་བ་ལ་བྱང་ཆུབ་སེམས་དཔས་སྒོའི་ཐེམ་པའི་སྟེང་དུ་ཞབས་ཡ་གཅིག་བཞག་སྟེ་འཁོད་
པས་གཟིགས་སོ། །གལ་ཏེ་བདག་གིས་ལྷ་མོའི་ལག་པ་ནས་འཐེན་ནས་རང་གི་བུ་བསླང་བར་བསམས་ཏེ། ལྷ་མོ་གཉིད་སད་ན་བདག་ཉིད་འགྲོ་བའི་བར་གཅོད་དུ་འགྱུར་ཞིང་སངས་རྒྱས་སུ་གྱུར་ནས་བུ་བལྟའོ་སྙམ་དུ་སེམས་
ཏེ་ཁང་བཟངས་ནས་བབས་སོ། །སླར་ཡང་སློབ་དཔོན་ཁ་ཅིག་འདི་ལྟར་སྨྲ་སྟེ། དེའི་ཚེ་བྱང་ཆུབ་སེམས་དཔའ་གཤེགས་པའི་སྔོན་རོལ་གྱི་ཉི་མ་བདུན་གྱི་གོང་དུ་སྐྱེས་སོ་ཞེས་ཟེར་རོ། །དེ་འདྲ་གཞན་དུ་མ་བཤད་པས་དེའི་
39-1-223a


ཕྱིར་འདི་ཁོ་ན་གཟུང་བར་བྱའོ། །འདི་ལྟར་བྱང་ཆུབ་སེམས་དཔའ་ཁང་བཟངས་ནས་བབས་ནས་རྟའི་ར་བ་ཉིད་དུ་གཤེགས་ཏེ་འདི་ལྟར་གསུངས་སོ། །བུ་བསྔགས་ལྡན་ཁྱོད་ཀྱིས་ད་ནི་ནུབ་གཅིག་བསྒྲལ་བར་གྱིས་ཤིག །བདག་ཁྱོད་
ཀྱི་དྲིན་གྱིས་སངས་རྒྱས་སུ་གྱུར་ནས་ལྷ་དང་བཅས་པའི་འཇིག་རྟེན་ཐམས་ཅད་བསྒྲལ་བར་བྱའོ། །དེ་ནས་བསྔགས་ལྡན་གྱི་རྒྱབ་དུ་ཆིབས་སོ། །བསྔགས་ལྡན་གྱི་སྐེ་ནས་བཟུང་ནས་མཆུ་རུ་ཁྲུ་བཅྭ་བརྒྱད་པ། དེ་དང་འཐུན་པའི་མཐོ་ཚད་
དང་ལྡན་ཞིང་མཐུ་དང་མགྱོགས་པ་དང་ལྡན་ལ་དུང་ཕྱིས་པའི་ཁ་དོག་ལྟར་ཐམས་ཅད་དཀར་བ་དང་མཚུངས་པའོ། །གལ་ཏེ་ཚེར་ཚེར་སྒྲོགས་པའམ་རྨིག་པའི་སྒྲ་སྒྲོགས་པའི་སྒྲས་གྲོང་ཁྱེར་ཐམས་ཅད་གྲག་པར་འགྱུར་བའོ། །དེའི་
ཕྱིར་ལྷ་རང་གི་མཐུས་དེ་སུས་ཀྱང་མི་ཐོས་པར་དེ་འདི་ལྟར་སྒྲ་སྒྲོགས་པ་བཀག་གོ། །ཁྲབ་ཁྲབ་འགྲོ་བའི་རྐང་ལག་གི་རྨིག་པ་རེ་རེ་ལྷའི་ལག་པའི་མཐིལ་དུ་ཉེ་བར་བཞག་གོ། །བྱང་ཆུབ་སེམས་དཔས་རྟའི་རྒྱབ་ཀྱི་དབུས་སུ་བཞུགས་
སོ། །བློན་པོ་མདུན་པ་རྟའི་མཇུག་མ་ནས་ཟུང་ཅིག་ཅེས་མཚན་ཕྱེད་ཀྱི་དུས་སུ་སྒོ་ཆེན་པོ་དང་ཉེ་བར་ཕྱིན་ཏོ། །དེའི་ཚེ་སླར་ཡང་འདི་ལྟར་རྒྱལ་པོ་ཆེན་པོས་འདི་ལྟར་བྱང་ཆུབ་སེམས་དཔའ་གང་གི་དུས་སུ་ཡང་གྲོང་ཁྱེར་ཆེན་པོའི་སྒོ་ཕྱེ་ནས་ཕྱི་རོལ་
དུ་འགྲོ་བར་མི་ནུས་པར་ཕྱེད་སྒོ་མའི་སྒོ་གླེག་རེ་རེ་ལ་མི་སྟོང་ཕྲག་རེ་རེས་དབྱེ་དགོས་པར་བཀོས་སོ། །བྱང་ཆུབ་སེམས་དཔའ་སྟོབས་དང་ལྡན་པས་གླང་པོ་ཆེའི་གྲངས་བྱེ་བ་སྟོང་ཕྲག་བཅུའི་གླང་པོ་ཆེའི་སྟོབས་འཛིན་ནོ། །མིའི་གྲངས་
ཀྱིས་མི་བྱེ་བ་འབུམ་ཕྲག་གཅིག་གི་མིའི་སྟོབས་འཛིན་ནོ། །བྱང་ཆུབ་སེམས་དཔས་བསམས་པ། གལ་ཏེ་སྒོ་མ་ཕྱེད་ན་ད་ནི་བསྔགས་ལྡན་གྱི་རྒྱབ་དུ་བཞུགས་པ་ཉིད་ནི་བློན་པོ་མདུན་པས་རྔ་མ་ནས་བཟུང་བ་དང་ལྷན་ཅིག་ཉིད་དུ་
བསྔགས་ལྡན་བརླ་བཙིར་ནས་ཁྲུ་བཅྭ་བརྒྱད་པའི་ལྕགས་རིའི་མཐོ་ཚད་ལ་མཆོངས་ཏེ་འདའ་བར་བསམས་སོ། །བློན་པོ་མདུན་པས་བསམས་པ། གལ་ཏེ་སྒོ་མ་ཕྱེད་ན་བདག་གིས་འཕགས་པ་སྲས་དཔུང་པ་ལ་ཁྱེར་ནས་ལག་པ་གཡས་
39-1-223b


པས་བསྔགས་ལྡན་གྱི་གསུས་པ་མཆན་ཁུང་དུ་བཅུག་ནས་ལྕགས་རི་ལ་མཆོངས་ཏེ་འདའ་བར་བསམས་སོ། །བསྔགས་ལྡན་གྱིས་བསམས་པ། གལ་ཏེ་སྒོ་མ་ཕྱེད་ན་བདག་གིས་རང་གི་བདག་པོ་ཇི་ལྟར་རྒྱབ་ཏུ་བཞུགས་པ་དེ་བཞིན་ཉིད་དུ་བློན་པོ་
མདུན་པས་རྔ་མ་ནས་བཟུང་ནས་ལྷན་ཅིག་ཏུ་གནས་པ་ཉིད་དུ་ཁུར་ནས་ལྕགས་རི་ལ་མཆོངས་ཏེ་འདའ་བར་བསམས་སོ། །གལ་ཏེ་སྒོ་མ་ཕྱེད་པར་གྱུར་ན་ཇི་ལྟར་བསམས་པ་དེ་བཞིན་དུ་གསུམ་པོའི་ནང་ནས་གང་ཡང་རུང་བ་གཅིག་ངེས་པར་འགྱུར་རོ། །
སླར་ཡང་སྒོ་སྲུང་བའི་ལྷ་རྣམས་ཀྱིས་སྒོ་ཕྱེའོ། །དེ་མ་ཐག་ཉིད་དུ་བདུད་ཀྱིས་བྱང་ཆུབ་སེམས་དཔའ་བཟློག་པར་བསམས་ནས་འོངས་ཏེ་ནམ་མཁའ་ལ་འདུག་ནས་སྨྲས་པ། དྲང་སྲོང་ཆེན་པོ་ངེས་པར་འབྱུང་བས་མ་འགྲོ་ཅིག །འདི་ནས་ཉི་མ་
བདུན་པ་ལ་ཁྱོད་ཀྱིས་རིན་པོ་ཆེའི་འཁོར་ལོ་ཐོབ་པར་འགྱུར་རོ། །གླིང་ཕྲན་སྟོང་ཕྲག་གཉིས་ཀྱིས་ཡོངས་སུ་བསྐོར་བའི་གླིང་ཆེན་པོ་བཞིའི་རྒྱལ་སྲིད་བྱེད་པར་འགྱུར་རོ། །དྲང་སྲོང་ཆེན་པོ་བཟློག་ཅིག་ཅེས་སྨྲས་སོ། །ཁྱོད་སུ་ཞིག་ཡིན་
ཞེས་དྲིས་སོ། །བདག་ནི་འཇིག་རྟེན་གྱི་དབང་པོ་ཡིན་ཞེས་སྨྲས་སོ། །བདུད་རིན་པོ་ཆེའི་འཁོར་ལོ་བདག་ལ་ཡོང་བར་བདག་གིས་ཤེས་ཏེ་བདག་ལ་རྒྱལ་པོའི་དགོས་པ་མེད་དོ། །སྟོང་ཕྲག་བཅུའི་འཇིག་རྟེན་གྱི་ཁམས་སུ་སྒྲ་སྒྲོགས་
ཤིང་སངས་རྒྱ་བར་འགྱུར་རོ་ཞེས་བརྗོད་དོ། །བདུད་ཀྱིས་སྨྲས་པ། འདི་ནས་བཟུང་ནས་འདོད་པའི་རྣམ་པར་རྟོག་པ་འམ། གནོད་སེམས་ཀྱི་རྣམ་པར་རྟོག་པ་འམ། རྣམ་པར་འཚེ་བའི་རྣམ་པར་རྟོག་པ་སེམས་ལ་བསམས་པའི་
དུས་སུ་བུ་བདག་གིས་ཤེས་སོ་ཞེས་སྨྲས་སོ། །གྲོགས་དང་མ་བྲལ་བར་གྲིབ་མ་བཞིན་དུ་རྗེས་སུ་འབྲེལ་བར་འགྲོའོ། །བྱང་ཆུབ་སེམས་དཔའ་ཡང་འཁོར་ལོས་སྒྱུར་བའི་རྒྱལ་སྲིད་ལག་ཏུ་ཐོགས་ཀྱང་མཆིལ་མའི་ཐལ་བ་
བཞིན་དུ་ལྟོས་པ་མེད་པར་དོར་ནས་བཀུར་སྟི་ཆེན་པོས་གྲོང་ཁྱེར་ནས་ཕྱིར་འཐོན་ནོ། །དབྱར་ཟླ་འབྲིང་པོའི་ཉ་ལ་མཆོག་གི་སྐར་མ་བྲེའི་དུས་སུ་ཕྱིར་འཐོན་ནས་སླར་ཡང་གྲོང་ཁྱེར་ལ་བཟློག་ནས་བལྟ་བར་བརྗོད་པར་བསམས་སོ། །
39-1-224a


འདི་ལྟར་བྱང་ཆུབ་སེམས་དཔའི་ཐུགས་ལ་འཁྲུངས་ཙམ་ཉིད་ནའོ། །སྐྱེས་བུ་ཆེན་པོ་ཁྱོད་ཀྱིས་ལོག་ནས་བལྟ་བའི་ལས་ཀྱི་བསོད་ནམས་ཁྱོད་ཀྱིས་བྱས་པ་མེད་དམ་ཞེས་བརྗོད་པ་བཞིན་དུ་ས་གཞི་ཆེན་པོ་རྫ་མཁན་གྱི་འཁོར་
ལོ་བཞིན་དུ་ཕུག་ནས་བཟློག་གོ། །བྱང་ཆུབ་སེམས་དཔའ་གྲོང་ཁྱེར་ལ་སྔོན་དུ་ཕྱོགས་ཤིང་འཁོད་ནས་གྲོང་ཁྱེར་ལ་གཟིགས་ཏེ་དེའི་ས་ཕྱོགས་ཞིག་དུ་བསྔགས་ལྡན་ལྡོག་པའི་མཆོད་རྟེན་གྱི་གནས་གཅིག་བསྟན་ནོ། །བསྔགས་ལྡན་འགྲོ་
བའི་ལམ་ལ་མངོན་དུ་ཕྱོགས་པར་བྱས་ནས་བྱོན་ནོ། །བཀུར་སྟི་ཆེན་པོ་དང་དཔལ་དང་སྐལ་བ་བཟང་པོ་དང་ལྡན་ནོ། །དེའི་ཚེ་ལྷ་རྣམས་ཀྱིས་དེའི་མདུན་དུ་སྟོང་ཕྲག་དྲུག་བཅུའི་མར་མེ་ཆེན་པོ་སྤར་རོ། །རྒྱབ་ཀྱི་ཕྱོགས་སུ་ཡང་མར་མེ་ཆེན་པོ་
སྟོང་ཕྲག་དྲུག་བཅུ་སྤར་རོ། །གཡས་ཀྱི་ཕྱོགས་སུ་ཡང་མར་མེ་ཆེན་པོ་སྟོང་ཕྲག་དྲུག་བཅུ་སྤར་རོ། །གཡོན་གྱི་ཕྱོགས་སུ་ཡང་མར་མེ་ཆེན་པོ་སྟོང་ཕྲག་དྲུག་བཅུ་སྤར་རོ། །ལྷ་གཞན་རྣམས་ཀྱིས་ཀྱང་ཁོར་ཡུག་གི་རིའི་སྟེང་དུ་གྲངས་
མེད་པའི་མར་མེ་སྟོང་ཕྲག་མང་པོ་སྤར་རོ། །ལྷ་གཞན་རྣམས་དང་ཀླུ་དང་འདབ་བཟངས་ལ་སྩོགས་པས་ལྷའི་སྤོས་དང་མེ་ཏོག་གི་ཕྲེང་བ་དང་ཕྱེ་མ་དང་བདུག་པ་ལ་སོགས་པས་མཆོད་ཅིང་འགྲོའོ། །པཱ་རིཙྪ་ཏྲའི་མེ་ཏོག་ཉིད་དང་མན་དཱ་རའི་
མེ་ཏོག་སྤྲིན་ལྟར་འཐུག་པ་རྒྱུན་དུ་འབབ་པ་བཞིན་དུ་ནམ་མཁའ་ལས་རྒྱུན་མི་འཆད་པར་མེ་ཏོག་གི་ཆར་བབས་པར་གྱུར་ཏོ། །ལྷའི་གླུ་དབྱངས་སྒྲོགས་པར་གྱུར་ཏོ། །ཀུན་ནས་བསྐོར་བར་སྟོང་ཕྲག་དྲུག་བཅུ་རྩ་བརྒྱད་ཀྱི་རོལ་མོའི་སྒྲ་སྒྲོགས་སོ། །རྒྱ་
མཚོའི་དབུས་སུ་འབྲུག་གི་སྒྲ་སྒྲོགས་པ་བཞིན་ནོ། །རི་བོ་གཉའ་ཤིང་འཛིན་གྱི་འགྲམ་དུ་རྒྱ་མཚོའི་སྒྲ་སྒྲོགས་པའི་དུས་བཞིན་དུ་འཇུག་གོ། །འདི་ནི་དཔལ་དང་སྐལ་བ་བཟང་པོ་དང་ལྡན་པའི་བྱང་ཆུབ་སེམས་དཔའ་གཤེགས་པའི་མཚན་གཅིག་ལ་
རྒྱལ་སྲིད་གསུམ་སྤངས་ནས་དཔག་ཚད་སུམ་བཅུའི་མཐར་ཡིད་ལྡན་ཞེས་བྱ་བའི་ཆུ་ཀླུང་གི་འགྲམ་དུ་བཞུད་དོ། །ཅིའི་ཕྱིར་ཡང་རྟ་འདིའི་ཕ་རོལ་དུ་ཡང་འགྲོ་བར་མི་ནུས་སམ། མི་ནུས་པ་ནི་མ་ཡིན་ཏེ། དེ་ནི་ཁོར་ཡུག་གཅིག་གི་ནང་དུ་སྔ་དྲོ་
39-1-224b


གཅིག་ལ་སོང་ནས་བསྐོར་ཏེ་དེ་མ་ཐག་ཏུ་སྔ་དྲོ་ཉིད་དུ་འོངས་ཞིང་རང་གི་མདུན་དུ་ཁ་ཟས་བྱིན་པ་ཟ་བར་ནུས་སོ། །དེའི་ཚེ་སླར་ཡང་ལྷ་དང་ཀླུ་དང་འདབ་བཟངས་ལ་སོགས་པ་ནམ་མཁའ་ལ་འཁོད་ནས་སྤོས་དང་མེ་ཏོག་གི་ཕྲེང་བ་ལ་སོགས་པ་བབས་ཏེ། 
ཇི་སྲིད་རྟའི་བརླའི་བར་དུ་ལུས་ནུབ་པས་འཐོན་པར་མི་ནུས་པ་སྤོས་དང་མེ་ཏོག་གི་ཕྲེང་བ་ལ་སོགས་པ་ནི་རལ་པ་ལྟར་གདོན་པར་མི་ནུས་པར་ཤིན་དུ་ཐོགས་པར་གྱུར་ཏོ། །དེའི་ཕྱིར་དཔག་ཚད་སུམ་བཅུ་རྩ་གཉིས་སུ་སོང་ངོ་། །དེ་ནས་བྱང་ཆུབ་སེམས་དཔའ་ཆུ་
ཀླུང་གི་འགྲམ་དུ་འཁོད་ནས་བློན་པོ་མདུན་པ་ལ་དྲིས་པ། ཆུ་ཀླུང་འདིའི་མིང་ཅི། ལྷ་ཡིད་ལྡན་ཞེས་བགྱི་བ་ལགས་སོ། །བདག་ཀྱང་རབ་ཏུ་འབྱུང་བ་ལ་ཡིད་དང་ལྡན་པ་ཞེས་བྱ་བར་གྱུར་ཏོ། །ཞབས་ཀྱིས་བརྒྱབ་སྟེ་རྟ་བསྐུལ་བ་བྱས་ཏེ། རྟ་ཡིས་མཆོངས་ནས་གླང་བརྒྱད་
ཀྱི་སྐད་ཙམ་གྱི་ཆུ་ཀླུང་གི་ཞེང་འགྲམ་གྱི་ཕ་རོལ་དུ་འཁོད་དོ། །བྱང་ཆུབ་སེམས་དཔའ་རྟའི་རྒྱབ་ནས་བབས་ཏེ་དངུལ་དང་མཚུངས་པའི་བྱེ་མའི་ཕུང་པོའི་སྟེང་དུ་འཁོད་དོ། །མདུན་པ་བོས་ནས་ཁྱོད་ཀྱིས་བདག་གི་རྒྱན་རྣམས་དང་བསྔགས་ལྡན་ཁྲིད་ལ་སོང་ཅིག །
བདག་རབ་ཏུ་འབྱུང་བར་འགྱུར་རོ། །ལྷ་བདག་ཀྱང་རབ་ཏུ་འབྱུང་དུ་གསོལ། བྱང་ཆུབ་སེམས་དཔས་ཁྱོད་ཀྱིས་རབ་ཏུ་འབྱུང་བ་མི་འཐོབ་པས་སོང་ཅིག །ལན་གསུམ་དུ་ཞུས་ཀྱང་མ་གནང་ངོ་། །རྒྱན་དང་བསྔགས་ལྡན་ལག་པས་གཏད་དེ་བསམས་པ། 
བདག་གི་སྐྲ་འདི་དགེ་སྦྱོང་དང་མི་མཐུན་ནོ་སྙམ་ནས་བྱང་ཆུབ་སེམས་དཔའ་གཞན་གྱིས་ཀྱང་སྐྲ་བྲེག་པར་རུང་བ་གཞན་མེད་དོ། །དེ་ནས་བདག་ཉིད་ཀྱི་རལ་གྲིས་བྲེག་པར་བསམས་སོ། །ཕྱག་གཡས་པས་རལ་གྲི་བཟུང་ནས་ཕྱག་གཡོན་པས་ཅོད་
པན་དང་བཅས་པའི་ནོར་བུ་བཟུང་སྟེ་བཅད་དོ། །དབུ་སྐྲ་ནི་སོར་གཉིས་པར་གྱུར་ཅིང་གཡས་ཕྱོགས་ནས་འཁྱིལ་བས་དབུ་ལ་གནས་སོ། །དེ་རྣམས་ཇི་སྲིད་འཚོའི་བར་དེ་ཉིད་ཀྱི་ཚད་དུ་གྱུར་ཏོ། །ཁས་སྤུ་ཡང་མེད་པར་གྱུར་ཏོ། །སླར་དབུ་སྐྲ་དང་ཁས་སྤུ་བཞར་མི་
དགོས་པར་གྱུར་རོ། །བྱང་ཆུབ་སེམས་དཔས་ཅོད་པན་དང་བཅས་པའི་ནོར་བུ་བཟུང་ནས་གལ་ཏེ་བདག་སངས་རྒྱ་བར་འགྱུར་ན་ནམ་མཁའ་ལ་འཁོད་ཅིག །མ་ཡིན་ན་ས་ལ་ལྷུང་བར་གྱུར་ཅིག་ཅེས་ནམ་མཁའ་ལ་དོར་རོ། །དེ་ནི་གཙུག་གི་ནོར་བུ་བཅིངས་པ་དཔག་
39-1-225a


ཚད་གཅིག་གི་ཚད་ཙམ་དུ་སོང་ནས་ནམ་མཁའ་ལ་འཁོད་དོ། །ལྷའི་རྒྱལ་པོ་བརྒྱ་བྱིན་གྱི་ལྷའི་མིག་གིས་བལྟས་པས་དཔག་ཚད་གཅིག་གི་ཚད་ཙམ་གྱི་རིན་པོ་ཆེའི་ཟ་མ་ཏོག་གི་ནང་དུ་བཅུག་ནས་སུམ་བཅུ་རྩ་གསུམ་གྱི་ཕོ་བྲང་དུ་གཙུག་གི་ནོར་བུ་
བཞུགས་པའི་མཆོད་རྟེན་བཞེངས་སོ། །མཆོག་གི་དྲི་ཡིས་བསྒོས་པའི་གཙུག་ཕུད་བཅད། །གང་ཟག་མཆོག་གིས་ནམ་མཁའ་ལ་ནི་དོར། །མིག་སྟོང་པ་ཡིས་དབུ་སྐྲ་མགོ་སྟེང་བཟུང་། །གསེར་གྱི་ཟ་མ་ཏོག་ཏུ་ལྷ་གནས་ཁྱེར། །སླར་ཡང་བྱང་ཆུབ་
སེམས་དཔས་བསམས་པ། ཡུལ་ཀ་ཤི་ཀའི་རས་འདི་དགེ་སྦྱོང་བདག་གི་ཚུལ་དང་འཐུན་པ་མ་ཡིན་ནོ་ཞེས་བསམས་སོ། །དེ་ནས་སངས་རྒྱས་འོད་བསྲུང་གི་དུས་སུ་སྔོན་གྱི་གྲོགས་པོ་རྫ་མཁན་ཚངས་པ་ཆེན་པོར་གྱུར་ཏོ། །སངས་རྒྱས་གཅིག་
གི་བར་དུ་གྲོགས་པོ་དང་མ་ཕྲད་དོ་ཞེས་བསམས་ཏེ་དེ་ནི་བདག་གི་གྲོགས་པོ་ངེས་པར་འབྱུང་བ་ཆེན་པོས་འཐོན་ནོ། །དགེ་སྦྱོང་གི་ཡོ་བྱད་འདིའི་བཟུང་ནས་འགྲོའོ་ཞེས་བསམས་སོ། །ཆོས་གོས་གསུམ་དང་ལྷུང་བཟེད་དང་། །སྤུ་གྲི་ཁབ་དང་ཀ་
རགས་དང་། །ཆུ་ཚགས་དང་བཅས་བརྒྱད་ཡིན་ནོ། །དགེ་སྦྱོང་རྣམས་ལ་རིགས་ཤིང་མཁོ། །དགེ་སྦྱོང་གི་མཁོ་བའི་ཡོ་བྱད་བརྒྱད་པོ་འདི་བསླངས་ནས་ཕུལ་ལོ། །བྱང་ཆུབ་སེམས་དཔས་མཆོད་པར་འོས་པའི་རྒྱལ་མཚན་གྱོན་ནས་རབ་ཏུ་འབྱུང་
བ་མཆོག་གི་ཆ་བྱད་བསླངས་ཏེ་མདུན་པ་ལ་བདག་གི་ཚིག་གིས་མ་དང་ཡབ་ལ་བདག་ལ་ནད་མེད་པར་གྱུར་རོ་ཞེས་སྨྲོས་ཅིག་ཞེས་པས་བཏང་ངོ་། །མདུན་པས་བྱང་ཆུབ་སེམས་དཔའ་ལ་ཕྱག་བྱས་བསྐོར་བ་བྱས་ནས་སོང་ངོ་། །སླར་ཡང་བསྔགས་
ལྡན་གྱིས་མདུན་པ་དང་བྱང་ཆུབ་སེམས་དཔའ་གསུང་གླེང་བྱེད་ཅིང་འདུག་པ་ཐོས་ན། བདག་ནི་ཇོ་བོ་དང་ཕྲད་པར་མི་འགྱུར་ཞེས་བསམས་སོ། །མིག་ལམ་དུ་སྤངས་ནས་མྱ་ངན་ལ་ཤིན་དུ་གནས་པ་བསྲན་པར་མ་ནུས་ཏེ་སྙིང་གས་ནས་དུས་ལས་འདས་
ཏེ་སུམ་བཅུ་རྩ་གསུམ་གྱི་གནས་སུ་བསྔགས་ལྡན་ཞེས་བྱ་བའི་ལྷའི་བུར་སྐྱེས་སོ། །མདུན་པ་ལ་དང་པོའི་མྱ་ངན་དུ་གྱུར་པ་གཅིག་གོ། །སླར་ཡང་བསྔགས་ལྡན་དུས་ལས་འདས་པའི་རྒྱུ་མཚན་གྱིས་མྱ་ངན་གཉིས་པས་གཟིར་ཏེ། ངུ་ཞིང་སྨྲེ་སྔགས་འདོན་
39-1-225b


ཞིང་གྲོང་ཁྱེར་དུ་སོང་ངོ་། །བྱང་ཆུབ་སེམས་དཔའ་དེའི་ཕྱོགས་ཉིད་དུ་རྗེས་སུ་དགའ་བ་ཞེས་བྱ་བའི་ཨ་སྨྲའི་ཚལ་ཡོད་དོ། །དེར་ཉི་མ་བདུན་ནས་རབ་ཏུ་འབྱུང་བའི་བདེ་བས་གནས་ཤིང་ཉིན་མཚན་འདའོ། །ཉི་མ་གཅིག་ཉིད་ལ་དཔག་ཚད་སུམ་བཅུའི་ལམ་དུ་
ཞབས་ཀྱིས་གཤེགས་ནས་རྒྱལ་པོའི་ཁབ་དུ་བྱོན་ནོ། །བྱོན་ནས་སྒོ་མཐར་ཆགས་སུ་བསོད་སྙོམས་ལ་གཤེགས་ཏེ་གྲོང་ཁྱེར་པ་ཐམས་ཅད་ཀྱིས་བྱང་ཆུབ་སེམས་དཔའི་སྐུ་མཐོང་ནས་གླང་པོ་ཆེ་ནོར་སྐྱོང་ཞུགས་པའི་རྒྱལ་པོའི་ཁབ་བཞིན་དང་ལྷ་མ་
ཡིན་གྱི་དབང་པོ་ཞུགས་པའི་ལྷའི་གྲོང་ཁྱེར་བཞིན་དུ་ཀུན་དུ་འཁྲུགས་པར་གྱུར་ཏེ། རྒྱལ་པོའི་མི་འོངས་ཤིང་། ལྷ་འདི་ལྟ་བུའི་གཟུགས་ཀྱི་སེམས་ཅན་གཅིག་གྲོང་ཁྱེར་ན་བསོད་སྙོམས་བྱེད་དེ། ལྷའམ་མིའམ་འདབ་བཟང་སྟེ་འདི་གང་ཡིན་བདག་ཅག་
གིས་མ་ཤེས་སོ་ཞེས་སྨྲས་སོ། །རྒྱལ་པོ་ཁང་བཟངས་ཀྱི་སྟེང་དུ་འཁོད་ནས་སྐྱེས་བུ་ཆེན་པོ་མཐོང་སྟེ་ཡ་མཚན་དང་རྨད་དུ་བྱུང་བ་སྐྱེས་སོ། །མི་གཅིག་བོས་ནས་སོང་ལ་རྟོགས་ཤིག །གལ་ཏེ་མི་མ་ཡིན་པར་གྱུར་ན་གྲོང་ཁྱེར་ནས་ཕྱི་རོལ་དུ་སོང་སྟེ་མི་
སྣང་བར་འགྱུར་རོ། །གལ་ཏེ་ལྷ་ཡིན་པར་གྱུར་ན་ནམ་མཁའ་ལ་འགྲོའོ། །གལ་ཏེ་ཀླུ་ཡིན་ན་སའི་འོག་དུ་འགྲོ་བར་འགྱུར་རོ། །གལ་ཏེ་མི་ཡིན་ན་ཇི་ལྟར་ཐོབ་པའི་ཁ་ཟས་ཟའོ་ཞེས་བསྒོའོ། །སྐྱེས་བུ་ཆེན་པོས་ཀྱང་ཁ་ཟས་འདྲེས་པ་རྣམས་
བསྡུས་ནས་བདག་ལ་འདི་ཙམ་གྱིས་ཆོག་པར་རྟོགས་ཏེ། ཞུགས་པའི་སྒོ་ཉིད་ནས་གྲོང་ཁྱེར་གྱི་ཕྱི་རོལ་དུ་འཐོན་ཏེ། རི་སྐྱ་བོ་ཡི་གྲིབ་མ་ལ་ཤར་དུ་སྔུན་དུ་ཕྱོགས་པས་བཞུགས་ནས་ཁ་ཟས་ལ་ལོངས་སྤྱོད་པར་བརྩམས་སོ། །དེ་ནས་
གང་གི་སྒྱུ་མ་ཕྱིན་ཅི་ལོག་སྟེ་ཁ་ནས་འཐོན་པའི་རྣམ་པར་བསམས་པར་གྱུར་ཏོ། །དེ་ནས་དེའི་བདག་ཉིད་ཀྱི་ལུས་ཀྱིས་འདི་ལྟ་བུའི་ཚུལ་གྱི་ཁ་ཟས་མིག་གིས་མཐོང་བ་ཡང་དཀོན་ནོ། །དེའི་ཕྱིར་རིགས་སོ་སོའི་ཁ་ཟས་ལ་མི་
དགའ་བར་བསམས་ནས་འདི་ལྟར་རང་ལ་རང་གིས་གདམས་སོ། །དོན་གྲུབ་ཁྱོད་རྙེད་སླ་བའི་བཟའ་བ་དང་བཏུང་བའི་རིགས་ལོ་གསུམ་པའི་འབྲས་དྲི་ཞིམ་པོའི་བཟའ་བ་སྣ་ཚོགས་པའི་རོ་དང་བཅས་པའི་བཟའ་བའི་གནས་སུ་སྐྱེས་པར་གྱུར་ནས་ཕྱག་
39-1-226a


དར་ཁྲོད་པ་གཅིག་མཐོང་སྟེ། ནམ་དུའང་བདག་ནི་འདི་ལྟ་བུའི་ཚུལ་དུ་གྱུར་ནས་བསོད་སྙོམས་ལ་འགྲོ་ཞིང་ཁ་ཟས་ལོངས་སྤྱོད་དོ། །དེའི་དུས་སུ་བདག་ལ་དེ་ལྟར་འགྱུར་རོ་ཞེས་བསམས་ནས་འཐོན་ནོ། །ད་ནི་འདི་ཅི་བྱེད་པ་ཡིན་ཞེས་
འདི་ལྟར་རང་ལ་རང་གིས་གདམས་ནས་རྟོག་པ་མེད་པར་ཁ་ཟས་ལ་ལོངས་སྤྱོད་དོ། །རྒྱལ་པོའི་མིས་འདིའི་འཇུག་པར་མཐོང་ནས་སོང་སྟེ་རྒྱལ་པོ་ལ་སྨྲས་སོ། །རྒྱལ་པོས་ཕོ་ཉ་བའི་གཏམ་ཐོས་ནས་མྱུར་བར་གྲོང་ཁྱེར་གྱི་ཕྱི་རོལ་
དུ་འཐོན་ནས་བྱང་ཆུབ་སེམས་དཔའ་དང་ཉེ་བར་སོང་སྟེ་སྤྱོད་ལམ་ལ་དད་པར་གྱུར་ཏོ། །བྱང་ཆུབ་སེམས་དཔའ་ལ་དབང་ཕྱུག་ཐམས་ཅད་རྫོགས་པར་ཕུལ་ལོ། །བྱང་ཆུབ་སེམས་དཔས་རྒྱལ་པོ་ཆེན་པོ་བདག་ལ་དངོས་པོའི་འདོད་པ་
འམ་ཉོན་མོངས་པའི་འདོད་པའི་དོན་མེད་དོ། །བདག་ནི་མཆོག་གི་མངོན་པར་རྫོགས་པར་བྱང་ཆུབ་པ་དོན་དུ་གཉེར་བས་འོངས་སོ། །རྒྱལ་པོས་རྣམ་པ་སྣ་ཚོགས་པའི་སྦྱིན་པ་བྱིན་ཡང་དེའི་ཐུགས་ལ་མི་འཕྲོད་དོ། །ངེས་པར་ཁྱོད་སངས་
རྒྱ་བར་འགྱུར་རོ། །སངས་རྒྱས་སུ་གྱུར་ནས་སླར་ཡང་དང་པོར་བདག་གི་གྲོང་ཁྱེར་དུ་བྱོན་པར་ཞུ་ཞེས་དམ་བཅའ་བཟུང་ངོ་། །འདི་ནི་འདིར་མདོར་བསྡུས་པ་སྟེ། རྒྱས་པར་ནི་སླར་ཡང་འདི་རབ་ཏུ་འབྱུང་བའི་མདོ་དང་བཅས་པར་དོན་
དང་གཏམ་འདི་ནི་བལྟ་ཞིང་རིག་པར་བྱའོ། །བྱང་ཆུབ་སེམས་དཔས་ཀྱང་རྒྱལ་པོ་ལ་དམ་བཅའ་བྱིན་ནས་གོ་རིམས་བཞིན་དུ་སྤྱོད་པ་ལ་གཤེགས་ཤིང་ཀུན་ནས་ཚོན་དང་ནག་པོ་ཅན་དང་། འཆར་བྱེད་གསེར་དང་། དགའ་བྱེད་བུའི་
གནས་སུ་ཉེ་བར་གཤེགས་ནས་སྙོམས་པར་འཇུག་པ་བསྐྱེད་དེ་སངས་རྒྱས་ཐོབ་པའི་ལམ་ནི་འདི་མ་ཡིན་ནོ། །དེ་ལ་སྙོམས་པར་འཇུག་པ་སྐྱེས་ཀྱང་དགྱེས་པར་མ་གྱུར་ནས་ལྷ་དང་བཅས་པའི་འཇིག་རྟེན་པའི་རང་གི་སྟོབས་
དང་བརྩོན་འགྲུས་རྣམས་ལ་ལེགས་པར་བལྟ་བར་འདོད་པས་དཀའ་བ་ཆེན་པོ་སྤྱོད་པའི་བསམ་པས་སྟེང་རྒྱས་སུ་བྱོན་ཏེ་ས་ཕྱོགས་འདི་ནི་ཤིན་དུ་དགའ་བ་ཡིན་ནོ། །སྙམ་ནས་དེ་ཉིད་དུ་ཉེ་བར་གནས་པར་བྱས་ཏེ་དཀའ་བ་ཆེན་
39-1-226b


པོ་སྤྱོད་དོ། །དེ་ཡང་ཀཽ་ཊི་ནྱ་ལ་སོགས་པ་རབ་ཏུ་བྱུང་བ་ལྔ་གྲོང་དང་གྲོང་རྡལ་དང་རྒྱལ་པོའི་ཕོ་བྲང་རྣམས་སུ་བསོད་སྙོམས་ལ་རྒྱུ་ཞིང་བྱང་ཆུབ་སེམས་དཔའི་གནས་དེར་འོངས་སོ། །དེ་ནས་ལོ་དྲུག་ཏུ་དཀའ་བ་ཆེན་པོ་སྤྱད་དོ། །ད་ནི་
སངས་རྒྱས་སུ་འགྱུར་རོ་ད་ནི་སངས་རྒྱས་སུ་འགྱུར་རོ་ཞེས་ཞུས་པའི་གནས་ལ་བྱི་དོར་ལ་སོགས་པ་བྱེད་ཅིང་སྐུ་ལ་རིམ་གྲོ་བྱེད་པར་གྱུར་ཏེ་ཉེ་བར་གནས་པར་གྱུར་ཏོ། །བྱང་ཆུབ་སེམས་དཔའ་ཡང་ཕྱི་མའི་མཐར་ཐུག་
པར་དཀའ་བ་སྤྱད་པར་བསམས་སོ། །ཏིལ་གཅིག་དང་འབྲས་ཀྱི་ཉག་མ་གཅིག་ལ་སོགས་པའི་ཉི་མ་འདའ་ཞིང་ཐམས་ཅད་དུ་ཡང་ཁ་ཟས་ཐམས་ཅད་སྤངས་སོ། །ལྷ་རྣམས་ཀྱིས་ཀྱང་བ་སྤུའི་བུ་ག་རེ་རེ་ནས་མདངས་སྟོན་ཏོ། །དེ་ནས་དེའི་ཁ་
ཟས་མེད་པར་སྐུ་རིད་པར་གྱུར་ཏེ། གསེར་གྱི་ཁ་དོག་ཅན་གྱི་སྐུ་ཡང་ནག་པོར་གྱུར་ཏོ། །སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱང་མི་སྣང་བར་གྱུར་ཏོ། །ཉི་མ་གཞན་ལ་ཡང་རླུང་དལ་བུས་བསམ་གཏན་བྱེད་ཅིང་སྐུ་ལ་ཟུག་གཟེར་
ཆེན་པོ་སྐྱེས་ནས་འདུ་ཤེས་མེད་པར་གྱུར་ཏེ་འཆག་པའི་གནས་སུ་འགྱེལ་ལོ། །དེ་ནས་ལྷ་གཅིག་གིས་དགེ་སྦྱོང་གཽ་ཏ་མ་དུས་ལས་འདས་སོ་ཞེས་བརྗོད་དོ། །གཅིག་གིས་འགྱེལ་བ་ན་དགྲ་བཅོམ་པ་ཐོབ་པོ་ཞེས་བརྗོད་དོ། །དེར་གང་ཞིག་
གིས་དུས་ལས་འདས་སོ་ཞེས་བརྗོད་ནས་དེ་སོང་སྟེ་རྒྱལ་པོ་ཆེན་པོ་ཟས་གཙང་ལ་སྨྲས་པ་ཁྱེད་ཀྱི་སྲས་དུས་ལས་འདས་སོ། །བདག་གི་སྲས་སངས་རྒྱས་མ་ཐོབ་པར་དུས་ལས་འདས་སམ། ཐོབ་ནས་དུས་ལས་འདས་ཞེས་
དྲིས་སོ། །སངས་རྒྱས་ཐོབ་པར་མ་ནུས་སོ། །དཀའ་བ་སྤྱོད་པའི་གནས་སུ་འགྱེལ་ནས་དུས་ལས་འདས་སོ། །འདི་ཐོས་ནས་རྒྱལ་པོ་ཡིད་མ་ཆེས་པར་གྱུར་ཏོ། །བདག་གི་སྲས་སངས་རྒྱས་མ་ཐོབ་པར་དུས་ལས་འདའ་
བ་མེད་དོ་ཞེས་བཀག་གོ། །གང་གི་ཕྱིར་སླར་ཡང་རྒྱལ་པོ་ཡིད་མ་ཆེས་ནས་དཀའ་ཐུབ་པ་ནག་པོ་ལྷ་ལེན་གྱིས་ཕྱག་བྱེད་པའི་དུས་དང་འཛམ་བུའི་ཤིང་གི་དྲུང་ཉིད་དུ་ཆོ་འཕྲུལ་མཐོང་བའི་རྒྱུ་མཚན་ཉིད་ཀྱིས་སོ། །སླར་ཡང་བྱང་
39-1-227a


ཆུབ་སེམས་དཔས་འདུ་ཤེས་ཐོབ་ནས་བཞེངས་སོ། །ལྷ་དེ་སོང་ནས་རྒྱལ་པོ་ཆེན་པོ་ཁྱོད་ཀྱི་སྲས་པོ་དེ་ནད་མེད་པར་གྱུར་ཏོ་ཞེས་སྨྲས་སོ། །རྒྱལ་པོས་སྲས་པོ་མི་ན་བར་བདག་གིས་ཤེས་སོ་ཞེས་སྨྲས་སོ། །སེམས་
དཔའ་ཆེན་པོ་ལོ་དྲུག་ཏུ་དཀའ་བ་བྱེད་ཅིང་འདི་ལྟ་བུའི་སེམས་སུ་གྱུར་ཏེ། འདི་ལྟ་བུའི་དཀའ་ཐུབ་སྤྱོད་པ་ཞེས་བྱ་བ་ནི་བྱང་ཆུབ་ཀྱི་ལམ་མ་ཡིན་ནོ་ཞེས་བསམས་ནས་ཁ་ཟས་ཅུང་ཟད་ལ་ལོངས་སྤྱོད་པར་བྱེད་ཅིང་གྲོང་དང་གྲོང་རྡལ་རྣམས་
སུ་བསོད་སྙོམས་ལ་རྒྱུ་བས་བསོད་སྙོམས་སྤྱོད་དོ། །དེ་ནས་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་གསལ་བར་གྱུར་ཏོ། །སྐུ་གསེར་གྱི་ཁ་དོག་ལྟ་བུར་གྱུར་ཏོ། །དགེ་སློང་ལྔ་སྡེ་ན་རེ་འདིས་ལོ་དྲུག་ཏུ་དཀའ་བ་སྤྱད་ཀྱང་ཐམས་ཅད་
མཁྱེན་པའི་ཡེ་ཤེས་ཐོབ་པར་མ་གྱུར་ཏོ། །ད་ནི་གྲོང་ལ་སོགས་པར་བསོད་སྙོམས་སྤྱོད་ཅིང་ཁ་ཟས་བསླངས་ནས་ཟ་སྟེ། རོ་ལ་ཆགས་པར་གྱུར་ན་ཅི་ནུས་འདིས་དཀའ་བ་སྤྱད་པར་འཁྲུལ་ལོ། །ལུས་ལ་ཁྲུས་བྱེད་པར་འདོད་པས་
ལུས་ཀྱི་བ་སྤུ་རེ་རེའི་སྒོར་ཆུ་ཞུགས་ནས་འདོད་པའི་ཐིག་ལེར་གྱུར་པ་དང་མཚུངས་སོ། །བདག་ཅག་དེའི་འདོད་པའི་རྣམ་པར་རྟོག་པ་ཡོད་པའི་གནས་སུ་འདུག་པས་ཅི་ཞིག་བྱ། སྐྱེས་བུ་ཆེན་པོ་སྤངས་ཤིང་རང་རང་གི་ཆོས་གོས་དང་
ལྷུང་བཟེད་ཐོགས་ནས་དཔག་ཚད་བཅོ་བརྒྱད་ཀྱི་ལམ་དུ་སོང་སྟེ་དྲང་སྲོང་ལྷུང་བའི་ཚལ་དུ་གནས་སོ། །དེའི་ཚེ་དེའི་དུས་སུ་སྟེང་རྒྱས་ན་སྡེ་ཅན་གྱི་གྲོང་རྡལ་བ་ཞིང་པའི་ཁྱིམ་དུ་སྐྱེས་པའི་ལེགས་སྐྱེས་མ་ཞེས་བྱ་བའི་བུ་མོ་ན་ཚོད་ལྡན་པར་གྱུར་
ཏེ་ནྱ་གྲོ་དྷའི་ཤིང་གཅིག་དོན་དུ་གཉེར་ཏོ། །གལ་ཏེ་བདག་དང་མཉམ་པར་སྐྱེས་པའི་རིགས་ཀྱི་ཁྱིམ་དུ་སོང་ནས་དང་པོར་མངལ་ཆགས་ཏེ། བུ་རྙེད་ན་དེ་ལ་ལོ་སོ་སོར་འབུམ་ཕྲག་གཅིག་ར་བའི་གཏོར་མའི་ལས་བྱའོ། །དེའི་དོན་
དུ་གཉེར་བ་འགྲུབ་བོ། །དེས་སེམས་དཔའ་ཆེན་པོ་ལོ་དྲུག་གི་མཐར་དཀའ་བ་སྤྱོད་པ་རྫོགས་པར་བྱེད་དོ། །དཔྱིད་ཟླ་ཐ་ཆུང་གི་ཉ་ལ་གཏོར་མའི་ལས་བྱེད་པར་སེམས་སོ། །དེའི་སྔུན་ཉིད་དུ་སྟོང་ཕྲག་གཅིག་གི་བ་བཞོན་
39-1-227b


མ་ཤིང་མངར་གྱི་ནགས་སུ་ཤིང་མངར་ཟ་བ་དེ་རྣམས་ཀྱི་འོ་མ་བཞོས་ནས་བཞོན་མ་ལྔ་བརྒྱ་ལ་བྱིན་ནོ། །དེ་རྣམས་ཀྱི་འོ་མ་བཞོས་ནས་བ་བཞོན་མ་ཕྱེད་དང་སུམ་བརྒྱ་ལ་བྱིན་ནོ། །དེ་བཞིན་དུ་བ་བཞོན་མ་བཅུ་དྲུག་གི་འོ་མ་བཞོས་
ནས་བ་བཞོན་མ་བརྒྱད་ལ་བྱིན་ནོ། །དེ་སྲིད་ཀྱི་འོ་མ་སྐ་མོ་དང་མངར་བ་དང་མདངས་དང་མདོག་དང་ལྡན་པ་དོན་དུ་གཉེར་བར་འདོད་ཅིང་འོ་མ་བསྐོལ་ལོ། །དེས་དཔྱིད་ཟླ་ཐ་ཆུང་གི་ཉའི་ཉིན་མོའི་སྔ་དྲོ་གཏོར་མའི་ལས་བྱེད་པར་སེམས་
ཤིང་མཚན་མོའི་ནམ་ལངས་ཁའི་དུས་སུ་བ་འཇོ་མཁན་ལངས་ནས་བ་བཞོན་མ་བརྒྱད་པོ་འཇོ་རུ་སོང་བ། བེའུ་བའི་ནུ་མ་ལ་ཉེ་བར་མ་གྱུར་པར་ཡང་། བའི་ནུ་མའི་གམ་དུ་སྣོད་སར་པ་ཉེ་བར་གནས་པ་བྱས་པ་ཙམ་ན་རང་གི་ཆོས་ཉིད་
ཀྱིས་འོ་མའི་རྒྱུན་གྱིས་སྣོད་གང་བར་གྱུར་ཏོ། །ལེགས་སྐྱེས་མས་ཡ་མཚན་ཆེ་བ་དེ་མཐོང་སྟེ། འོ་མ་རང་གི་ལག་པས་ཁྱེར་ནས་སྣོད་གསར་པར་བླུགས་པ་ལ་རང་གི་ལག་གིས་མེ་བཏང་སྟེ་འཚོད་པར་བརྩམས་ནས། 
དེར་འོ་ཐུག་བསྐོལ་བས་ལྦུ་བ་ཆེན་པོ་འཐོན་ནས་གཡས་ཕྱོགས་སུ་འཁོར་ཞིང་ཐུར་མ་གཅིག་ཙམ་ཡང་ས་ལ་མ་ལྷུང་ལ། ཐབ་ན་དུ་བ་ཅུང་ཟད་ཀྱང་མེད་དོ། །དེའི་ཚེ་འཇིག་རྟེན་སྐྱོང་བ་བཞི་པོ་འོངས་ནས་ཐབ་སྲུན་པར་བྱེད་དོ། །
ཚངས་པ་ཆེན་པོས་ནི་གདུགས་འཛིན་ནོ། །བརྒྱ་བྱིན་གྱིས་ནི་ཇི་ལྟར་རིགས་པའི་མེ་གཏོང་བར་བྱེད་དོ། །སྟོང་ཕྲག་གཉིས་ཀྱིས་ཡོངས་སུ་བསྐོར་བའི་གླིང་ཆེན་པོ་བཞིའི་ལྷ་དང་མི་རྣམས་ཀྱིས་ཇི་ལྟར་རིགས་པའི་མདངས་རྣམས་
ལྷ་རང་རང་གི་མཐུས་བསྡུས་ནས་བཅུག་གོ། །མི་རྣམས་ཀྱིས་ཀྱང་དེ་བཞིན་དུ་བྱས་ནས་དུས་གཞན་ལ་ལྷ་རྣམས་ཟན་གྱི་གོང་བུ་རེ་རེས་མདངས་འཇུག་གོ། །སླར་ཡང་བྱང་ཆུབ་པའི་ཉིན་མོ་དང་ཡོངས་སུ་མྱ་ངན་ལས་
འདའ་བའི་ཉིན་མོ་སྣོད་ཉིད་དུ་འཇུག་པར་བྱེད་དོ། །ལེགས་སྐྱེས་མས་ཉི་མ་གཅིག་ཉིད་ལ་དེར་རང་ཉིད་གསལ་བར་གྱུར་ནས་ཡ་མཚན་ཆེ་བ་དུ་མ་མཐོང་སྟེ་བྲན་མོ་རྫོགས་མ་ཞེས་བྱ་བ་བོས་ནས། རྫོགས་མ་དེ་རིང་བདག་ཅག་གི་
39-1-228a


ལྷ་ཤིན་དུ་དགྱེས་པར་གྱུར་ཏེ། བདག་གིས་དེ་རྣམས་ཀྱི་དུས་སུ་འདི་ལྟ་བུའི་ཚུལ་གྱི་ཡ་མཚན་ཆེ་བ་མ་མཐོང་བས་མྱུར་དུ་སོང་ལ་ལྷའི་གནས་སུ་བྱི་དོར་ལེགས་པར་གྱིས་ཅིག །དེས་ལེགས་སོ་ཞེས་བརྗོད་ནས་
འཕགས་མ་དེའི་ཚིག་བཟུང་སྟེ་མྱུར་བ་མྱུར་བར་ཤིང་གི་དྲུང་དུ་ཕྱིན་ནོ། །བྱང་ཆུབ་སེམས་དཔས་ཀྱང་དེའི་མཚན་མོའི་ཆ་ལ་རྨི་ལམ་ཆེན་པོ་ལྔ་གཟིགས་པ་ཡོངས་སུ་རྟོག་ཅིང་ཐེ་ཚོམ་མེད་པར་བདག་དེ་རིང་སངས་རྒྱས་
ཐོབ་པར་འགྱུར་བར་བྱའོ་སྙམ་དུ་ཐུགས་བརྟན་པོར་མཛད་ནས། དེའི་ནུབ་མོ་འདས་ཏེ་སྐུའི་བྱི་དོར་མཛད་ནས་བསོད་སྙོམས་ལ་གཤེགས་པའི་དུས་ཀྱི་སྔ་དྲོ་བྱོན་ཏེ། ཤིང་ནྱ་གྲོ་དྷའི་དྲུང་དུ་བཞུགས་ནས་རང་གི་འོད་ཀྱིས་ཤིང་ཐམས་ཅད་སྣང་བར་
མཛད་དོ། །དེ་ནས་ཡང་རྫོགས་མ་དེ་འོངས་ནས་བྱང་ཆུབ་སེམས་དཔའ་ཤིང་གི་དྲུང་ན་ཤར་ཕྱོགས་ཀྱི་འཇིག་རྟེན་གྱི་ཁམས་ལ་གཟིགས་ཤིང་གཟིགས་པ་མཐོང་ལ་སྐུ་ལ་འོད་ཟེར་འཐོན་པའི་འོད་ཀྱིས་ཤིང་ཐམས་ཅད་གསེར་གྱི་ཁ་དོག་ཏུ་མཐོང་ངོ་། །དེས་
འདི་ལྟར་བསམས་ཏེ། དེ་རིང་བདག་ཅག་གི་ལྷ་ཤིང་ལ་བབས་ནས་རང་གི་ལག་ཉིད་ཀྱིས་གཏོར་མ་ལེན་ཅིང་བཞུགས་སོ་ཞེས་བསམས་པས་སེམས་ཚིམ་པ་ཐོབ་ནས་མྱུར་དུ་སོང་སྟེ་ལེགས་སྐྱེས་མ་ལ་དོན་དེ་རྣམས་སྨྲས་སོ། །ལེགས་སྐྱེས་
མས་དེའི་ཚིག་ཐོས་ནས་སེམས་ཚིམ་པར་གྱུར་ཏེ། དེ་རིང་ནས་བཟུང་ནས་བདག་གི་བུ་མོ་ཆེན་མོ་གནས་སུ་སྡོད་ཅིག་ཅེས་བུ་མོ་ལ་ཇི་ལྟར་རིགས་པའི་རྒྱན་ཐམས་ཅད་བྱིན་ནོ། །སླར་ཡང་གང་གི་ཕྱིར་སངས་རྒྱས་ཀྱི་ཡོངས་སུ་རྫོགས་
པར་ཐོབ་པའི་ཉིན་མོ་འབུམ་ཕྲག་གཅིག་གི་གྲངས་ཀྱང་གསེར་གྱི་སྡེར་མ་ཆེན་པོ་ཐོབ་པར་རིགས་སོ། །དེའི་ཕྱིར་གསེར་གྱི་སྡེར་མ་ཆེན་པོའི་ནང་དུ་འོ་ཐུག་ལྡུགས་པའི་སེམས་སྐྱེས་ནས་འབུམ་ཕྲག་གཅིག་རི་བའི་གསེར་གྱི་སྡེར་མ་ཆེན་
པོ་བསླངས་ཏེ། འོ་ཐུག་བཙོས་པའི་ནང་དུ་ཁ་སྦུབ་ནས་བླུག་གོ། །འོ་ཐུག་ཐམས་ཅད་པད་མའི་འདབ་མའི་ནང་གི་ཆུ་བཞིན་དུ་ཆུའི་ཐིགས་པ་གཅིག་ཏུ་གྱུར་ནས་གསེར་གྱི་སྡེར་དུ་བྱུང་ངོ་། །གསེར་གྱི་སྡེར་མ་གཅིག་གང་བའི་ཚད་ཙམ་དུ་གྱུར་ཏོ། །དེས་གསེར་
39-1-228b


གྱི་སྣོད་དེ་ལ་གསེར་གྱི་སྣོད་གཞན་གྱིས་བཀབ་ནས་གོས་ཀྱིས་དྲིལ་ལོ། །ལེགས་སྐྱེས་མ་རྒྱན་གྱིས་ལུས་ཐམས་ཅད་བརྒྱན་ནས་གསེར་གྱི་སྡེར་མ་དེ་རང་གི་མགོར་བཞག་སྟེ། མཐུ་ཆེན་པོས་ཤིང་ནྱ་གྲོ་དྷའི་དྲུང་དུ་ཕྱིན་པ་དང་། བྱང་ཆུབ་སེམས་དཔའ་མཐོང་
ནས་ཤིན་ཏུ་ཡིད་བདེ་བ་སྐྱེས་པར་གྱུར་ཏེ། ཤིང་གི་ལྷ་ཡིན་ནམ་ཞེས་བསམས་ནས་བལྟ་བའི་གནས་སུ་དུང་ཅིང་དུང་ཅིང་སོང་སྟེ་མགོའི་སྟེང་གི་གསེར་གྱི་སྡེར་མ་ཕབ་ནས་ཁ་ཕྱེས་ཏེ། གསེར་གྱི་རིལ་བ་སྤྱི་བླུགས་ཀྱིས་དྲི་བཟང་པོས་བསྒོས་པའི་ཆུ་
བཟུང་ནས་བྱང་ཆུབ་སེམས་དཔའ་དང་ཉེ་བར་སོང་སྟེ་འཁོད་དོ། །གྲོགས་པོ་རྫ་མཁན་ཚངས་པ་ཆེན་པོར་གྱུར་པས་ཕུལ་བའི་སའི་ལྷུང་བཟེད་ནི་དེ་རྣམས་ཀྱི་དུས་སུ་བྱང་ཆུབ་སེམས་དཔས་མ་སྤངས་ཀྱང་དེ་དེ་མ་ཐག་ཏུ་མི་སྣང་བར་གྱུར། 
བྱང་ཆུབ་སེམས་དཔས་ལྷུང་བཟེད་མ་གཟིགས་སོ། །ཕྱག་གཡས་པ་བརྐྱང་ནས་ཆུ་བསླངས་ཏེ། ལེགས་སྐྱེས་མས་སྣོད་དང་བཅས་པ་ཉིད་ཀྱི་འོ་ཐུག་སྐྱེས་བུ་ཆེན་པོའི་ཕྱག་ཏུ་ཕུལ་ལོ། །སྐྱེས་བུ་ཆེན་པོས་ལེགས་སྐྱེས་
མ་ལ་བརྟགས་པ་ན། དེས་རྣམ་འགྱུར་ཤེས་ནས་འཕགས་པ་བདག་གིས་ཉིད་ལ་ཡོངས་སུ་ཕུལ་གྱིས་བཞེས་ལ་ཇི་ལྟར་བཞེད་པ་བཞིན་གཤེགས་པར་ཞུ་ཞེས་ཕྱག་བྱས་ནས། ཇི་ལྟར་བདག་གི་འདོད་པ་ཡོངས་སུ་
རྫོགས་པར་གྱུར་ཏོ། །འདི་ལྟར་ཉིད་ཀྱིས་ཀྱང་བསམ་པ་ཡོངས་སུ་རྫོགས་པར་གྱུར་ཅིག་ཅེས་སྨྲས་སོ། །འབུམ་ཕྲག་གཅིག་རི་བའི་གསེར་གྱི་སྡེར་ཆེན་པོ་གཅིག་ཤིང་གི་ལོ་མ་རྙིངས་པ་བཞིན་དུ་ལྟོས་པ་མེད་པར་སོང་ངོ་། །བྱང་
ཆུབ་སེམས་དཔའ་བཞུགས་པ་ལས་བཞེངས་ནས་ཤིང་ལ་བསྐོར་ཏེ། གསེར་གྱི་སྡེར་མ་བསླངས་ནས་ཆུ་ཀླུང་ནཻ་ར་ཛ་ནའི་འགྲམ་དུ་གཤེགས་ཏེ། བྱང་ཆུབ་སེམས་དཔའ་གྲངས་མེད་པ་འབུམ་ཕྲག་མང་པོ་རྣམས་ཀྱིས་མངོན་པར་
བྱང་ཆུབ་པའི་ཉིན་མོ་བབས་ཁྲུས་བྱེད་པའི་གནས་སུ་ལེགས་པར་རབ་ཏུ་གནས་པའི་མུ་གནས་ཞེས་བྱ་བ་ཡོད་དོ། །དེའི་འགྲམ་དུ་སྡེར་མ་བཞག་སྟེ་བབས་ནས་ཁྲུས་མཛད་དོ། །འབུམ་ཕྲག་དུ་མའི་སངས་རྒྱས་རྣམ་ཀྱིས་ནམ་བཟའ་
39-1-229a


དང་མཆོད་པར་འོས་པ་གྱོན་ནས་ཤར་ཕྱོགས་སུ་སྔོན་དུ་ཕྱོགས་པས་བཞུགས་ནས་ཏ་ལའི་ཤིང་རྟོག་གི་ནང་གི་རུས་པ་ཅིག་གི་ཚད་ཙམ་དང་མཉམ་པ་གཅིག་གིས་དམན་པའི་ལྔ་བཅུའི་གོང་བུ་བྱས་ནས་ཆུ་མྱེད་ཅིང་དངར་བའི་
འོ་ཐུག་ཐམས་ཅད་གསོལ་ལོ། །དེ་འདི་ལྟར་གང་གིས་སངས་རྒྱས་སུ་གྱུར་ནས་ཞག་བཞི་བཅུ་ཞེ་དགུ་རུ་བྱང་ཆུབ་ཀྱི་སྙིང་པོར་བཞུགས་ཏེ་ཞག་བཞི་བཅུ་ཞེ་དགུའི་ཁ་ཟས་སུ་གྱུར་ཏོ། །དེ་རྣམས་ཀྱི་དུས་སུ་ཁ་ཟས་གཞན་མེད་པ་
དང་། ཁྲུས་བྱེད་པ་མེད་པ་དང་། ཞལ་ཤོལ་བ་མེད་པ་དང་། སྐུ་ལུས་ཀྱི་བྱ་བ་བྱེད་པ་མེད་དོ། །བསམ་གཏན་གྱི་བདེ་བ་དང་། ལམ་གྱི་བདེ་བ་དང་། འབྲས་བུའི་བདེ་བ་ཉིད་ཀྱིས་ཉིན་མཚན་འདའོ། །གཞན་ཡང་དེའི་འོ་ཐུག་གསོལ་ནས་
གསེར་གྱི་སྡེར་མ་ཕྱག་ཏུ་བཞེས་ཏེ། གལ་ཏེ་བདག་ནི་དེ་རིང་སངས་རྒྱས་སུ་འགྱུར་ནུས་ན་སྡེར་མ་འདི་ཆུའི་སྟེང་དུ་གྱེན་དུ་འགྲོ་བར་གྱུར་ཅིག །མ་ཡིན་ན་ཐུར་ལ་འགྲོ་བར་གྱུར་ཅིག་ཅེས་ཆུ་ལ་དོར་རོ། །དེས་ཆུའི་རྒྱུན་གྱི་རླབས་ཆུ་ཀླུང་གི་
དབུས་སུ་སོང་ནས་དབུས་དབུས་ཀྱི་གནས་ཉིད་དུ་རྟ་མགྱོགས་པོར་འགྲོ་བ་བཞིན་དུ། ཁྲུ་བརྒྱད་བཅུའི་ཚད་ཙམ་གྱི་སྟེང་དུ་སོང་ཞིང་། ཆུ་ལ་ལན་ཅིག་འཁྱིལ་བས་བྱིང་ནས་ཀླུའི་རྒྱལ་པོ་ནག་པོའི་གནས་སུ་སོང་ངོ་། །དེ་ནས་སངས་རྒྱས་
གསུམ་པོ་རྣམས་ཀྱིས་བཤོས་གསོལ་བའི་གསེར་གྱི་སྡེར་མ་ཆེན་པོ་སིལ་སིལ་ཞེས་སྒྲ་སྒྲོགས་པར་བྱེད་ཅིང་ཕྱོགས་ཅིག་ཏུ་དེ་རྣམས་ཐམས་ཅད་ཀྱི་འོག་ཏུ་གྱུར་ནས་གནས་སོ། །ཀླུའི་རྒྱལ་པོ་ནག་པོས་དེའི་སྒྲ་ཐོས་
ནས་ཁ་སང་སངས་རྒྱས་ཅིག་ཐོབ་པར་གྱུར་ཅིང་། སླར་ཡང་དེ་རིང་སངས་རྒྱས་ཉིད་ཐོབ་པར་གྱུར་ནས་མང་པོས་བསྟོད་པར་བྱེད་པར་གྱུར་ཏོ། །བྱང་ཆུབ་སེམས་དཔའ་ས་ནི་ཆུ་ཀླུང་གི་འགྲམ་ཤིང་སཱ་ལའི་ཚལ་དུ་ཉིན་མོ་
བཞུགས་ནས་སྲོད་ཀྱི་དུས་སུ་མེ་ཏོག་ཀུ་མུ་ད་ཁ་འབྱེ་བའི་དུས་ལ་ལྷ་རྣམས་ཀྱིས་བརྒྱན་པར་བྱས་ནས། ཞེང་ལ་གླང་གི་སྐད་བརྒྱད་ཀྱིས་ཐོས་པའི་ཚད་དུ་ལམ་བྱེད་པ་ལ་སེང་གེ་བཞིན་དུ་སྒྲ་བསྒྲགས་ནས། བྱང་ཆུབ་
39-1-229b


ཀྱི་ཤིང་ལ་སྔོན་པར་ཕྱོགས་པས་བཞུད་དོ། །ཀླུ་དང་གནོད་སྦྱིན་དང་འདབ་བཟང་ལ་སྩོགས་པ་རྣམས་ཀྱིས་ལྷའི་སྤོས་དང་མེ་ཏོག་ལ་སོགས་པ་དང་། ལྷའི་གླུ་དབྱངས་ལ་སོགས་པས་མཆོད་དོ། །སྟོང་ཕྲག་བཅུའི་འཇིག་རྟེན་གྱི་ཁམས་རྣམས་
དྲི་བཟང་པོར་གྱུར་ཅིང་མེ་ཏོག་གི་ཕྲེང་བར་གྱུར་ནས་ཐམས་ཅད་ལེགས་སོ་ཞེས་བརྗོད་པར་གྱུར་ཏོ། །དེའི་ཚེ་རྩྭ་འཚོང་བཀྲ་ཤིས་ཞེས་བྱ་བས་རྩྭ་བླངས་ནས་ལམ་གྱི་སྔོན་དུ་འོངས་ཏེ་སྐྱེས་བུ་ཆེན་པོའི་རྣམ་འགྱུར་རྟོགས་ནས་རྩྭ་སྤར་མོ་བརྒྱད་
ཕུལ་ལོ། །བྱང་ཆུབ་སེམས་དཔས་རྩྭ་བླངས་ནས་བྱང་ཆུབ་ཀྱི་སྙིང་པོ་དང་ཉེ་བར་གཤེགས་ཏེ་ལྷོ་ཕྱོགས་ཀྱི་ཆར་ཞལ་བྱང་དུ་མངོན་པར་ཕྱོགས་པས་འཁོད་དོ། །དེ་མ་ཐག་པར་ལྷོ་ཕྱོགས་ཀྱི་ཁོར་ཡུག་གིས་བྱིང་ནས་འགྲོ་བ་ནི་འོག་མནར་མེད་
པའི་བར་དུ་གྱུར་པ་བཞིན་ནོ། །ལྷོ་ཕྱོགས་ཀྱི་ཁོར་ཡུག་སྟེང་དུ་ལངས་ནས་འགྲོ་བ་ནི་སྲིད་པའི་རྩེ་མོར་གྱུར་པ་བཞིན་ནོ། །བྱང་ཆུབ་སེམས་དཔས་འདི་ཡང་དག་པར་རྫོགས་པའི་སངས་རྒྱས་ཐོབ་པའི་གནས་མ་ཡིན་ནོ་ཞེས་དགོངས་ཞིང་བསྐོར་ནས་
ནུབ་ཀྱི་ཕྱོགས་ཀྱི་ཆར་གཤེགས་ཏེ་ཤར་ཕྱོགས་སུ་མངོན་དུ་ཕྱོགས་པས་འཁོད་དོ། །དེ་ནས་ནུབ་ཕྱོགས་ཀྱི་ཁོར་ཡུག་འོག་ཏུ་བྱིང་ནས་འགྲོ་བ་ནི་མནར་མེད་པའི་བར་དུ་གྱུར་པ་བཞིན་ནོ། །ཤར་ཕྱོགས་ཀྱི་ཁོར་ཡུག་སྟེང་དུ་ལངས་ནས་འགྲོ་བ་ནི་སྲིད་པའི་རྩེ་མོར་གྱུར་པ་
བཞིན་ནོ། །བྱང་ཆུབ་སེམས་དཔའ་འཁོད་ཅིང་འཁོད་པའི་གནས་ནི་མུ་ཁྱུད་ཀྱི་མཐར་ཐུག་པར་མནན་ཞིང་སོ་སོར་གནས་པའི་ཤིང་རྟའི་འཁོར་ལོ་ཆེན་པོ་ལྟ་བུར་ས་གཞི་ཆེན་པོ་ལ་བྱིང་ཞིང་བྱིང་ནས་འགྲོ་བར་གྱུར་ཏོ། །བྱང་ཆུབ་སེམས་དཔས་འདི་ནི་བྱང་ཆུབ་ཐོབ་
པའི་གནས་མ་ཡིན་ནོ་ཞེས་བསྐོར་ནས་བྱང་ཕྱོགས་ཀྱི་ཆར་གཤེགས་ཏེ། ལྷོ་ཕྱོགས་སུ་མངོན་དུ་ཕྱོགས་པས་འཁོད་དོ། །དེ་ནས་བྱང་གི་ཁོར་ཡུག་ས་ལ་བྱིང་ནས་མནར་མེད་ཀྱི་བར་དུ་གྱུར་པ་བཞིན་ནོ། །བྱང་གི་ཁོར་ཡུག་གྱེན་དུ་ལངས་ནས་སྲིད་པའི་རྩེ་མོའི་བར་དུ་གྱུར་པ་བཞིན་
ནོ། །བྱང་ཆུབ་སེམས་དཔས་འདི་ནི་བྱང་ཆུབ་ཐོབ་པའི་གནས་མ་ཡིན་ནོ་ཞེས་བསམས་ཏེ་བསྐོར་ནས་ཤར་ཕྱོགས་ཀྱི་ཆར་གཤེགས་ནས་ནུབ་ཕྱོགས་སུ་སྔུན་དུ་ཕྱོགས་པས་འཁོད་དོ། །སླར་ཡང་ཤར་ཕྱོགས་ཀྱི་ཆར་སངས་རྒྱས་ཐམས་ཅད་ཀྱིས་སྐྱིལ་དཀྲུང་བཅས་
39-1-230a


པའི་གནས་དེ་གཡོ་བར་མི་འགྱུར་ཞིང་མི་ལྡེག་གོ། །སེམས་དཔའ་ཆེན་པོས་འདི་ནི་སངས་རྒྱས་ཐམས་ཅད་ཀྱིས་མ་སྤངས་ཤིང་མི་གཡོ་བའི་གནས། ཉོན་མོངས་པའི་དྲ་བ་ཐམས་ཅད་རྣམ་པར་འཇོམས་པའི་གནས་སུ་རྟོགས་སོ། །དེའི་རྩྭ་རྣམས་རྩེ་
མོ་ནས་བཟུང་སྟེ་བཀྲམ་ནས་དེ་མ་ཐག་ཏུ་ཁྲུ་བཅུ་བཞི་པའི་ཚད་ཙམ་གྱི་གདན་དུ་གྱུར་ཏོ། །དེ་ཡང་དེ་ལྟ་བུའི་ཚུལ་གྱིས་ཇི་ལྟར་བཞག་པ་དེ་བཞིན་དུ་མི་གནས་སོ། །ཇི་ལྟར་གཟུགས་ལ་མཁས་པའི་རི་མོ་བྱེད་པ་རྣམས་ཀྱིས་རི་མོ་བྲིས་པ་བཞིན་དུ་
བྱང་ཆུབ་སེམས་དཔས་བྱང་ཆུབ་ཤིང་གི་སྡོང་པོ་ལ་སྐུ་རྒྱབ་བརྟེན་པར་བྱས་ནས་ཞལ་ཤར་དུ་མངོན་དུ་ཕྱོགས་པར་མཛད་དོ། །བརྟན་པའི་སེམས་སུ་གྱུར་ནས་བདག་གི་ལྤགས་པ་དང་རྒྱུས་པ་དང་རུས་པ་དང་ཁྲག་དང་ཤ་རྣམས་སྐམས་
པར་གྱུར་ཀྱང་ཡང་དག་པར་རྫོགས་པའི་སངས་རྒྱས་མ་ཐོབ་བར་དུ་ནི་སྟན་འདི་ལས་ལུས་བསྐྱོད་པར་མི་བྱའོ། །ཐོག་བརྒྱ་ཕྲག་བབས་ཀྱང་མི་ཕྱེད་ཅིང་ཕ་རོལ་གྱིས་མི་ཚུངས་པར་བསྟན་ལ་སྐྱིལ་དཀྲུང་གིས་བཞུགས་སོ། །དེའི་ཚེ་
ལྷའི་བུའི་བདུད་ཀྱིས་གཞོན་ནུ་དོན་གྲུབ་བདག་གི་དབང་དུ་བྱེད་པར་འདོད་པས་ད་ནི་བདག་ལས་འདའ་བར་བྱེད་དུ་མི་སྟེར་རོ་ཞེས་བསམས་ནས་བདུད་ཀྱི་དམག་དང་ཉེ་བར་སོང་སྟེ། དོན་འདི་སྨྲས་ཤིང་བདུད་ཀྱི་སྒྲ་ཞེས་པས་སྒྲ་
བསྒྲགས་ནས་བདུད་ཀྱི་དམག་ཁྲིད་དེ་འཐོན་ནས། བདུད་ཀྱི་སྡེ་བདུད་ཀྱི་མདུན་དུ་དཔག་ཚད་བཅུ་གཉིས་ཀྱི་སར་འགྲོའོ། །གཡས་ཕྱོགས་གཡོན་ཕྱོགས་རྣམས་སུ་དཔག་ཚད་བཅུ་གཉིས་འགྲོའོ། །རྒྱབ་ཕྱོགས་སུ་ཇི་སྲིད་ཁོར་ཡུག་གི་མཐར་
ཐུག་པར་བྱས་ནས་གནས་སོ། །སྟེང་དུ་དཔག་ཚད་དགུའོ། །འཁོར་ཐམས་ཅད་ཀྱི་གཏམ་བྱེད་པའི་སྒྲ་དཔག་ཚད་སྟོང་ཕྲག་གཅིག་གི་བར་དུ་ས་གཞི་འབུགས་པ་ཙམ་གྱི་སྒྲ་ཐོས་སོ། །དེ་ནས་ལྷའི་བུའི་བདུད་དཔག་ཚད་ཕྱེད་
དང་ཉིས་བརྒྱའི་རིའི་འོག་པག་ཞེས་བྱ་བའི་གླང་པོ་ཆེའི་རྒྱབ་དུ་ཞོན་ནས་ལག་པ་སྟོང་ཕྲག་གཅིག་སྤྲུལ་ནས་མཚོན་ཆ་སྣ་ཚོགས་པ་བླངས་སོ། །གཞན་ཡང་བདུད་ཀྱི་འཁོར་གྱི་གྲོགས་གཉིས་གཅིག་དང་མཚུངས་པར་མཚོན་ཆའི་
39-1-230b


རིགས་གཉིས་མི་ལེན་ནོ། །ཁ་དོག་རྣམ་པ་སྣ་ཚོགས་པ་དང་རྣམ་པ་སྣ་ཚོགས་པའི་གདོང་ཅན་སེམས་དཔའ་ཆེན་པོ་གཞོམ་པར་བྱ་བའི་ཕྱིར་འོངས་སོ། །སྟོང་ཕྲག་བཅུའི་ཁོར་ཡུག་གི་ལྷ་རྣམས་སླར་ཡང་སེམས་དཔའ་ཆེན་པོ་ལ་བསྟོད་པ་བྱེད་ཅིང་གནས་སོ། །
བརྒྱ་བྱིན་ལྷའི་རྒྱལ་པོས་རྣམ་པར་རྒྱལ་བ་བླ་ན་མེད་པའི་དུང་འབུད་ཅིང་འཁོད་དོ། །སླར་ཡང་དུང་དེ་ཁྲུ་བརྒྱ་ཉི་ཤུར་གྱུར་ཏོ། །གལ་ཏེ་ལེགས་པར་བུས་ན་ཟླ་བ་བཞིའི་བར་དུ་རྒྱུན་མི་འཆད་ཅིང་དེ་ནས་རྒྱུན་འཆད་དོ། །ཀླུའི་རྒྱལ་པོ་ནག་
པོ་ཆེན་པོས་བརྒྱ་ཕྲག་དུ་མའི་བསྟོད་པ་བྱེད་ཅིང་གནས་སོ། །ཚངས་པ་ཆེན་པོ་གདུགས་དཀར་པོ་བཟུང་ནས་གནས་སོ། །སླར་ཡང་བདུད་ཀྱི་དམག་བྱང་ཆུབ་ཀྱི་སྙིང་པོར་འོངས་ཤིང་འོངས་སོ། །ལྷ་དེ་རྣམས་གཅིག་ཏུ་འཁོད་
པར་མ་ནུས་པས་རང་གི་གནས་སུ་བྲོས་ནས་སོང་ངོ་། །ཀླུའི་རྒྱལ་པོ་ནག་པོ་ས་ལ་བྱིང་ནས་དཔག་ཚད་ལྔ་བརྒྱའི་སྙེ་མ་ཅན་གྱི་ཀླུའི་ཕོ་བྲང་དུ་སོང་སྟེ། ལག་པ་གཉིས་ཁ་ལ་བཀབ་ནས་ཉལ་ལོ། །བརྒྱ་བྱིན་གྱི་རྣམ་པར་རྒྱལ་
བ་བླ་ན་མེད་པའི་དུང་རྒྱབ་ཏུ་བསྐལ་ཏེ་ཁོར་ཡུག་གི་སྟེང་དུ་འཁོད་དོ། །ཚངས་པ་ཆེན་པོས་གདུགས་དཀར་པོ་ཁོར་ཡུག་གི་སྟེང་དུ་བཙུགས་ནས་ཚངས་པའི་འཇིག་རྟེན་དུ་སོང་ངོ་། །ལྷ་གཅིག་གིས་ཀྱང་འཁོད་པར་མ་ནུས་ཏེ། 
སྐྱེས་བུ་ཆེན་པོ་ཉིད་གཅིག་པུ་བཞུགས་སོ། །བདུད་ཀྱིས་རང་གི་འཁོར་ལ་སྨྲས་པ། བུ་ཟས་གཙང་གི་བུ་དོན་གྲུབ་དང་འདྲ་བའི་སྐྱེས་བུ་གཞན་མེད་པས། བདག་གིས་དེའི་མདུན་དུ་གཡུལ་འགྱེད་པར་མི་ནུས་ཀྱིས། རྒྱབ་ཀྱི་
ཕྱོགས་སུ་གཡུལ་བགྱིའོ་ཞེས་སྨྲས་སོ། །སྐྱེས་བུ་ཆེན་པོས་ཀྱང་ཕྱོགས་གསུམ་ལ་གཟིགས་པས་ལྷ་ཐམས་ཅད་བྲོས་པའི་ཕྱིར་གནས་ཐམས་ཅད་སྟོང་པར་མཐོང་ངོ་། །གཞན་ཡང་བྱང་ཕྱོགས་སུ་གཟིགས་པས་བདུད་
ཀྱི་དམག་རྣམས་བདག་གཞོམ་པའི་ཕྱིར་འོང་བ་གཟིགས་སོ། །འདི་རྣམས་ཀྱི་དམག་གི་ཚོགས་བདག་གཅིག་པུའི་ཕྱིར་རྩོལ་བ་ཆེན་པོས་ཕ་རོལ་གནོན་པར་བྱེད་ཅིང་གནས་འདིར་འོངས་ཏེ། བདག་གི་མ་འམ་ཕའམ་སྤུན་ནམ་
39-1-231a


སུ་ཡང་རུང་བའི་གཉེན་ལས་གཞན་མེད་དོ། །གཞན་ཡང་གང་གི་ཕྱིར་ཕ་རོལ་དུ་ཕྱིན་པ་བཅུ་པོ་ཉིད་བདག་གིས་དུས་ཡུན་རིང་པོར་གཉེར་ལ་དགའ་བ་བཞིན་གོམས་པ་དེའི་ཕྱིར་བདག་གིས་ཕ་རོལ་དུ་ཕྱིན་པ་ཉིད་ཀྱིས་ཕུབ་བྱས་
ནས། ཕ་རོལ་དུ་ཕྱིན་པ་ཉིད་ཀྱི་མཚོན་ཐོགས་ཏེ། འདིའི་དམག་གི་ཚོགས་རྣམས་གཞོམ་པར་རིགས་སོ་སྙམ་ནས་ཕ་རོལ་དུ་ཕྱིན་པ་བཅུ་པོ་ཐུགས་ལ་བསམས་ནས་བཞུགས་སོ། །དེ་ནས་ལྷའི་བུའི་བདུད་ཀྱིས་དོན་གྲུབ་དེ་མ་
ཐག་ཏུ་འབྲོས་པར་བྱེད་པར་རིགས་སོ་ཞེས་སྨྲས་ནས་རླུང་གི་དཀྱིལ་འཁོར་ཉེ་བར་གནས་ནས་འོངས་སོ། །དེ་མ་ཐག་ཁོ་ནར་ཤར་ཕྱོགས་ལ་སོགས་པའི་རླུང་གི་དཀྱིལ་འཁོར་རྣམས་ལངས་ནས་འོངས་ཏེ་དཔག་ཚད་ཕྱེད་དང་
ཡང་གཉིས་ལ་སོགས་པའི་ཚད་ཀྱི་རིའི་ཕུང་པོ་བླངས་ནས་ནགས་ཐིབས་པོ་དང་ཤིང་ལ་སོགས་པ་ས་ལ་གཏོན་ཞིང་། ཐམས་ཅད་དུ་གྲོང་དང་གྲོང་རྡལ་ཕྱེ་མ་དང་རྣམ་པར་ཕྱེ་མར་བྱེད་པའི་ནུས་པ་ནི་སྐྱེས་བུ་ཆེན་པོའི་བསོད་
ནམས་ཀྱི་གཟི་བརྗིད་ཀྱི་མཐུས་གྱེས་ཏེ། བྱང་ཆུབ་སེམས་དཔའི་དྲུང་དུ་འོངས་ནས་བླ་གོས་ཀྱི་གྲྭ་ཙམ་ཡང་བསྒུལ་བར་མི་ནུས་སོ། །དེ་ནས་ཆུ་ཡིས་གཞོམ་པའི་ཕྱིར་འོངས་ནས་གསོད་པར་བསམས་པ་ན་ཆར་པ་ཆེན་པོ་འབབ་
ཅིང་གནས་སོ། །དེའི་མཐུས་སྟེང་ནས་སྟེང་དུ་བརྒྱ་ཕྲག་དུ་མ་བརྩེགས་པ་དང་། སྟོང་ཕྲག་དུ་མ་བརྩེགས་པའི་སྤྲིན་ཆེན་པོ་འདུས་ནས་ཆར་འབེབས་སོ། །ཆར་པའི་རྒྱུན་གྱི་ཤུགས་ཀྱིས་ས་གཞི་འབུགས་པར་གྱུར་ཏོ། །ནགས་
ཚལ་དང་ཤིང་ལ་སོགས་པའི་སྟེང་གི་ཆར་སྤྲིན་ཆེན་པོ་འོངས་ནས་སེམས་དཔའ་ཆེན་པོ་ཆུས་ཐིགས་གཅིག་ཙམ་གྱིས་ཀྱང་སྦང་བར་མ་ནུས་སོ། །དེ་ནས་རྡོའི་ཆར་བཀུག་ནས་ཆེས་ཆེ་བའི་རིའི་ཕུང་པོ་དུ་བར་བྱེད་ཅིང་འབར་བར་བྱས་ནས་
ནམ་མཁའ་ནས་འོངས་ཏེ་བྱང་ཆུབ་སེམས་དཔའི་དྲུང་དུ་འོངས་ནས། ལྷའི་མེ་ཏོག་གི་ཆུན་བུའི་གཟུགས་འབབ་པོ། །དེ་ནས་མཚོན་ཆའི་ཆར་ཐམས་ཅད་བཀུག་ནས་མཚོན་སོ་གཅིག་པ་དང་སོ་གཉིས་པ་དང་རལ་གྲི་དང་མདུང་ཐུང་དང་སྤུ་གྲི་ལ་སོགས་
39-1-231b


པའི་མཚོན་ཆ་རྣམས་དུ་བར་བྱེད་ཅིག་འབར་བར་བྱས་ནས་ནམ་མཁའ་ལ་འོངས་ཏེ། བྱང་ཆུབ་སེམས་དཔའི་དྲུང་དུ་འོངས་ནས་ལྷའི་མེ་ཏོག་ཏུ་གྱུར་ཏོ། །དེ་ནས་སོལ་བའི་ཆར་བཀུག་ནས་རྒྱ་སྐྱེགས་ཀྱི་མེ་ཏོག་གི་ཁ་དོག་ཅན་གྱི་སོལ་བ་ནམ་མཁའ་ནས་འོངས་
ནས་བྱང་ཆུབ་སེམས་དཔའི་ཞབས་དྲུང་དུ་ལྷའི་མེ་ཏོག་ཏུ་གྱུར་ནས་འབབ་བོ། །དེ་ནས་ཐལ་བའི་ཆར་པ་རྣམས་བཀུག་ནས་ཤིན་དུ་དྲོ་བ་མེའི་ཁ་དོག་ཅན་གྱི་ཐལ་བ་ནམ་མཁའ་ནས་འོངས་ནས་བྱང་ཆུབ་སེམས་དཔའི་ཞབས་དྲུང་དུ་ཙན་དན་གྱི་ཕྱེ་མ་ལྟར་གྱུར་པའི་ཆར་
འབབ་བོ། །དེ་ནས་བྱེ་མའི་མར་བཀུག་ནས་ཤིན་དུ་ཕྲ་བའི་བྱེ་མ་རྣམས་དུ་བར་བྱེད་ཅིང་འབར་བར་བྱས་ནས་ནམ་མཁའ་ནས་འོངས་ཏེ་བྱང་ཆུབ་སེམས་དཔའི་ཞབས་དྲུང་དུ་ལྷའི་ཕྱེ་མ་ལྟར་གྱུར་ནས་ཆར་འབབ་བོ། །དེ་ནས་འཇིམ་པའི་ཆར་པ་རྣམས་བཀུག་ནས་
འཇིམ་པ་རྣམས་དུ་བར་བྱེད་ཅིང་འབར་བར་བྱས་ནས་ནམ་མཁའ་ནས་འོངས་ཏེ་བྱང་ཆུབ་སེམས་དཔའི་ཞབས་དྲུང་དུ་ལྷའི་བྱུག་པར་གྱུར་ནས་འབབ་བོ། །དེ་ནས་འདི་བཞིན་དུ་འཇིགས་པར་བྱེད་པས་དོན་གྲུབ་འབྲོས་པར་བྱ་བའི་ཕྱིར་མུན་པ་ཉེ་བར་གནས་
པར་བྱའོ། །དེ་ནི་ཡན་ལག་བཞི་དང་ལྡན་པའི་མུན་ནག་ཆེན་པོར་གྱུར་ནས་བྱང་ཆུབ་སེམས་དཔའི་དྲུང་དུ་སླེབ་ནས་ཉི་མའི་འོད་ཀྱིས་མུན་པ་བཅོམ་པ་བཞིན་དུ་མི་སྣང་བར་གྱུར་ནས་འདི་ལྟར་བདུད་དགུ་པོ་འདི་རླུང་དང་ཆར་དང་རྡོ་དང་མཚོན་ཆ་དང་
སོལ་བ་དང་ཐལ་བ་དང་བྱེ་མ་དང་འཇིམ་པ་དང་མུན་པ་སྟེ། དེ་རྣམས་ཆར་དུ་བབས་ནས་བྱང་ཆུབ་སེམས་དཔའ་འབྲོས་པར་བྱེད་པར་མ་ནུས་སོ། །ཅིས་བརྗོད་ཅིང་ཅིའི་ཕྱིར་སྡོད། གཞོན་ནུ་འདི་ལ་ཟུང་ཅིག་རྒྱོབ་ཅིག་ཐོན་ཅིག་ཅེས་འཁོར་རྣམས་
བོས་ནས་རང་གིས་ཀྱང་རིའི་འོག་བག་གླང་པོ་ཆེའི་རྒྱབ་ཏུ་ཞོན་ནས་འཁོར་ལོའི་མཚོན་ཆ་བསླངས་ཏེ། བྱང་ཆུབ་སེམས་དཔའི་དྲུང་དུ་ཉེ་བར་འོངས་ནས་དོན་གྲུབ་སྟན་ལ་ལོངས་ཅིག །འདི་ཁྱོད་ལ་རིགས་པ་མ་ཡིན་གྱི་ངེད་ལ་རིགས་པ་
ཡིན་ནོ་ཞེས་སྨྲས་སོ། །སེམས་དཔའ་ཆེན་པོས་དེའི་ཚིག་ཐོས་ནས་འདི་ལྟར་སྨྲས་སོ། །བདུད་ཁྱོད་ཀྱིས་ཕ་རོལ་དུ་ཕྱིན་པ་བཅུ་མ་རྫོགས་པ་དང་། ཉེ་བའི་ཕ་རོལ་དུ་ཕྱིན་པ་མ་རྫོགས་པ་དང་། དོན་དམ་པའི་ཕ་རོལ་དུ་ཕྱིན་པ་
39-1-232a


མ་རྫོགས་པ་དང་། ཆེན་པོ་ལྔ་ཡོངས་སུ་གཏོང་བ་མེད་པ་དང་། གཉེན་གྱི་དོན་དུ་སྤྱོད་པ་མེད་པ་དང་། འཇིག་རྟེན་གྱི་དོན་གྱི་སྤྱོད་པ་མེད་པ་དང་། སངས་རྒྱས་ཀྱི་སྤྱོད་པ་ཡོངས་སུ་མ་རྫོགས་པས་སྟན་འདི་ཁྱོད་ལ་
རིགས་པ་མ་ཡིན་ནོ། །སྟན་འདི་བདག་ཁོ་ན་ལ་རིགས་པ་ཡིན་ནོ། །བདུད་ཁྲོས་པར་གྱུར་ནས་ཁྲོས་པའི་ཤུགས་བསྲན་པར་མ་ནུས་ཏེ། སྐྱེས་བུ་ཆེན་པོ་ལ་མཚོན་ཆའི་འཁོར་ལོ་འཕངས་སོ། །དེའི་ཕ་རོལ་དུ་ཕྱིན་པ་བཅུ་སེམས་པར་བྱེད་
ཅིང་བཞུགས་པ་ན་སྟེང་གི་ཆར་མེ་ཏོག་གི་ཕྲེང་བའི་བླ་རེས་བྲེས་པ་བཞིན་དུ་གྱུར་ཏོ། །དེའི་འཁོར་ལོའི་མཚོན་ཆ་གཞན་ལ་དེ་ཤིན་དུ་ཁྲོས་པས་འཕངས་ཏེ་རྡོ་བ་འཐུག་པོ་འམ། རྡོ་བ་འཐུག་པོའི་ཀ་བ་འབུབས་ཤིང་འགྲོ་བའོ། །སླར་
ཡང་དེ་ནི་དེའི་མེ་ཏོག་གི་བླ་རེས་སུ་གྱུར་ནས་གནས་པ་ན་བདུད་ཀྱི་འཁོར་ལྷག་མ་རྣམས་དེ་ནས་སྟན་ལ་ལངས་ཏེ་འགྲོ་བར་བསམས་ནས་ཆེས་ཆེ་བའི་རིའི་ཕུང་པ་འཕངས་སོ། །དེ་རྣམས་ཀྱང་སྐྱེས་བུ་ཆེན་པོའི་ཕ་རོལ་དུ་ཕྱིན་
པ་བཅུ་ལ་སེམས་ཞིང་བཞུགས་པ་ན་མེ་ཏོག་གི་ཆུན་པོར་གྱུར་ནས་ས་ལ་ལྷུང་ངོ་། །ལྷ་རྣམས་ཁོར་ཡུག་གི་མཐར་འཁོད་པ་རྣམས་སྐྱེ་བཏེག་ནས་བལྟ་ཞིང་། མགོ་བོ་བཏེག་ཅིང་བཏེག་ནས་དོན་གྲུབ་གཞོན་ནུ་མཆོག་
གི་སྐུའི་བདག་ཉིད་ཉམས་སམ་སྙམ་ནས་ཅི་བྱེད་ན་ཞེས་བསམས་ཤིང་བལྟའོ། །དེ་ནས་སྐྱེས་བུ་ཆེན་པོས་ཕ་རོལ་དུ་ཕྱིན་པ་རྫོགས་པའི་བྱང་ཆུབ་སེམས་དཔའ་རྣམས་མངོན་པར་རྫོགས་པར་བྱང་ཆུབ་པའི་ཉིན་མོ་ཐོབ་པའི་སྟན་
བདག་ལ་རིགས་པ་ཡིན་ནོ་ཞེས་བཤད་ནས། འཁོད་པའི་བདུད་ལ་སྨྲས་སོ། །བདུད་ཁྱོད་ཀྱིས་སྦྱིན་པ་བཏང་བའི་དཔང་པོ་སུ་ཡོད་ཅེས་སྨྲས་སོ། །བདུད་འདི་རྣམས་ཐམས་ཅད་བདག་གི་དཔང་པོ་ཡིན་ནོ་ཞེས་བདུད་ཀྱི་དམག་
རྣམས་ལ་ལག་པ་བརྐྱང་ངོ་། །དེ་མ་ཐག་པར་བདུད་ཀྱི་འཁོར་རྣམས་ང་ཡང་དཔང་པོ་ཡིན་ང་ཡང་དཔང་པོ་ཡིན་ཞེས་བརྗོད་པའི་སྒྲས་ས་གཞི་ཡང་རལ་བ་བཞིན་དུ་བརྗོད་པའི་སྒྲར་གྱུར་ཏོ། །དེ་ནས་བདུད་ཀྱིས་སྐྱེས་བུ་ཆེན་པོ་
39-1-232b


ལ་སྨྲས་པ། དོན་གྲུབ་ཁྱོད་ཀྱིས་སྦྱིན་པ་བཏང་བའི་དངོས་པོ་ལ་དཔང་པོ་སུ་ཡོད་ཅེས་སྨྲས་སོ། །སྐྱེས་བུ་ཆེན་པོ་ཁྱོད་ཀྱིས་རེ་ཞིག་སྦྱིན་པ་བྱིན་པའི་དངོས་པོ་ལ་སེམས་དང་བཅས་པ་རྣམས་དཔང་པོ་ཡིན་ནོ། །སླར་ཡང་བདག་ལ་
གནས་འདི་ན་སེམས་དང་བཅས་པའི་དཔང་པོ་སུ་ཡང་མེད་པས་བདག་ཉིད་ཀྱིས་སྐྱེ་བའི་མཐར་སྦྱིན་པ་བཏང་བ་དེ་སྲིད་གནས་པ་ཐམས་ཅད་སྒྲོལ་གྱི་ལུས་ཀྱི་བདག་ཉིད་ལ་གནས་ནས་སྦྱིན་པ་ཆེན་པོ་བདུན་བརྒྱ་པ་
བདུན་བྱིན་པའི་དངོས་པོ་ལ་སེམས་མེད་པའི་ས་གཞི་ཆེན་པོ་མཐུག་པོ་འདི་དཔང་པོ་ཡིན་ནོ་ཞེས་ཆོས་གོས་ཀྱི་ནང་ནས་ཕྱག་གཡས་པ་བཏོན་ཏེ། ཐམས་ཅད་སྒྲོལ་གྱི་བདག་ཉིད་ཀྱི་ལུས་སུ་གནས་ནས་བདག་གིས་སྦྱིན་པ་
བདུན་བརྒྱ་པ་བདུན་བྱིན་པའི་དངོས་པོ་དེ་ལ་ཁྱོད་ཀྱིས་དཔང་པོ་ཡིན་ནམ་མ་ཡིན་པ་སྨྲོས་ཤིག་ཅེས་ས་ཆེན་པོ་ལ་མངོན་དུ་ཕྱོགས་པས་ཕྱག་བརྐྱང་བ་དང་། ས་ཆེན་པོས་བདག་ནི་དེའི་ཚེ་དཔང་པོ་ཡིན་ནོ་ཞེས་སྒྲ་སྒྲོགས་པར་
གྱུར་ནས། སྒྲ་ཆེན་པོ་སྒྲོགས་པ་བརྒྱ་དང་སྟོང་ཕྲག་གཅིག་དང་། སྒྲ་ཆེན་པོ་འབུམ་ཕྲག་གཅིག་པོ་རྣམས་ཀྱིས་བདུད་ཀྱི་དམག་གི་སྒྲ་རྣམས་ཟིལ་གྱིས་མནན་པ་བཞིན་དུ་གྱུར་ཏོ། །དེ་ནས་སྐྱེས་བུ་ཆེན་པོ་དོན་གྲུབ་ཀྱི་སྦྱིན་
པ་ཆེན་པོ་བྱིན་པ་ནི་མཆོག་གི་སྦྱིན་པའོ་ཞེས་ཐམས་ཅད་སྒྲོལ་གྱི་སྦྱིན་པ་དྲན་པར་བྱེད་ཅིང་དཔག་ཚད་ཕྱེད་དང་ཉིས་བརྒྱའི་རིའི་འོག་པག་གི་གླང་པོ་ཆེ་པུས་མོ་ས་ལ་བཙུགས་ནས་འཁོད་དོ། །བདུད་ཀྱི་འཁོར་རྣམས་
ཕྱོགས་དང་མཚམས་རྣམས་སུ་བྲོས་ནས་གཉིས་ལམ་གཅིག་ལ་འགྲོ་བ་མེད་དོ། །མགོའི་རྒྱན་ཉིད་དང་གྱོན་པའི་གོས་དང་པོར་དོར་ནས་རང་གི་ཕྱོགས་ཕྱོགས་ཉིད་དུ་འབྲོས་སོ། །དེ་ནས་ལྷའི་ཚོགས་རྣམས་ཀྱིས་
བདུད་བྲོས་ནས་འགྲོ་བ་མཐོང་སྟེ། བདུད་རྣམས་ཕམ་པས་དོན་གྲུབ་གཞོན་ནུ་རྒྱལ་བར་གྱུར་ཏོ་ཞེས་རྒྱལ་བའི་མཆོད་པ་བྱེད་པར་སེམས་སོ། །ཀླུ་ནི་ཀླུ་རྣམས་ལ་བསྐུལ་ལོ། །འདབ་བཟང་ནི་འདབ་བཟང་རྣམས་ལའོ། །ལྷ་ནི་ལྷ་རྣམས་ལའོ། །
39-1-233a


ཚངས་པས་ནི་ཚངས་པ་རྣམས་བཀུལ་ལོ། །སྤོས་དང་མེ་ཏོག་གི་ཕྲེང་བ་ལ་སོགས་པ་ལག་ཏུ་ཐོགས་ནས་བྱང་ཆུབ་ཤིང་གི་དྲུང་དུ་དཀྱིལ་དཀྲུང་གིས་བཞུགས་པའི་སྐྱེས་བུ་ཆེན་པོ་དང་ཉེ་བར་འོངས་སོ། །དེ་ལྟར་བདུད་རྣམས་
བྲོས་ནས་སོང་ངོ་། །དཔལ་ལྡན་སངས་རྒྱས་རྒྱལ་བར་གྱུར། །སྡིག་ཅན་བདུད་ནི་ཕམ་པར་གྱུར། །རབ་དགའ་བྱང་ཆུབ་སྙིང་པོར་སྒྲོགས། །དེ་ཚེ་དྲང་སྲོང་ཀླུ་ཚོགས་རྒྱལ། །དཔལ་ལྡན་སངས་རྒྱས་རྒྱལ་བར་གྱུར། །སྡིག་ཅན་བདུད་
ནི་ཕམ་པར་གྱུར། །རབ་དགའ་བྱང་ཆུབ་སྙིང་པོར་སྒྲོགས། །འདབ་བཟང་ཚོགས་ཀྱི་དྲང་སྲོང་རྒྱལ། །དཔལ་ལྡན་སངས་རྒྱས་རྒྱལ་བར་གྱུར། །སྡིག་ཅན་བདུད་ནི་ཕམ་པར་གྱུར། །རབ་དགའ་བྱང་ཆུབ་སྙིང་པོར་སྒྲོགས། །ལྷ་ཚོགས་
དེ་ཚེ་དྲང་སྲོང་རྒྱལ། །དཔལ་ལྡན་སངས་རྒྱས་རྒྱལ་བར་གྱུར། །སྡིག་ཅན་བདུད་ནི་ཕམ་པར་གྱུར། །རབ་དགའ་བྱང་ཆུབ་སྙིང་པོར་སྒྲོགས། །ཚངས་ཚོགས་དེ་ཚེ་རྒྱལ་བར་སྒྲོགས། །མཐར་སྟོང་ཕྲག་བཅུའི་ཁོར་ཡུག་གི་ལྷ་རྣམས་
ཀྱིས་མེ་ཏོག་དང་སྤོས་དང་བྱུག་པ་རྣམས་ཀྱིས་མཆོད་པར་བྱེད་དོ། །རྣམ་པ་སྣ་ཚོགས་པའི་བསྟོད་པ་བྱེད་ཅིང་འཁོད་དོ། །འདི་ལྟར་སྐྱེས་བུ་ཆེན་པོ་ཉི་མ་ནུབ་པའི་ཚེ་བདུད་རྣམ་པར་བཅོམ་ནས་ཆོས་གོས་ཀྱི་སྟེང་དུ་བྱང་ཆུབ་ཀྱི་ཤིང་གི་འདབ་
མ་མྱུ་གུ་ལྟ་བུ་ལྷུང་ཞིང་བྱི་རུ་དམར་པོས་མཆོད་པར་བྱེད་པ་ལྟ་བུའོ། །ཐུན་དང་པོ་ལ་སྔོན་གྱི་གནས་རྗེས་སུ་དྲན་པ་ཡེ་ཤེས་ཀྱིས་རྟོགས་པ་དང་། །ཐུན་བར་པ་ལ་ལྷའི་སྤྱན་རྣམ་པར་དག་པས་ཡེ་ཤེས་ཐོབ་པ་དང་། ཐུན་ཐ་མ་ལ་རྟེན་ཅིང་འབྲེལ་
བར་འབྱུང་བའི་ཡེ་ཤེས་ཐོབ་པོ། །དེ་ནས་རྟེན་འབྲེལ་བཅུ་གཉིས་ཀྱི་རྐྱེན་གྱིས་རྣམ་པར་འཇུག་པ་དང་མི་འཇུག་པའི་ལུགས་ལས་འབྱུང་བ་དང་ལུགས་ལས་བཟློག་པ་དྲན་པར་བྱེད་ཅིང་དྲན་པར་བྱེད་དོ། །སྟོང་ཕྲག་བཅུའི་འཇིག་རྟེན་གྱི་ཁམས་
ཆུའི་མཐར་ཐུག་པར་བྱས་ནས་ལན་བཅུ་གཉིས་སུ་ཡང་དག་པར་གཡོས་སོ། །སླར་ཡང་སྐྱེས་བུ་ཆེན་པོས་སྟོང་ཕྲག་བཅུའི་འཇིག་རྟེན་གྱི་ཁམས་སུ་སྒྲ་ཆེན་པོ་སྒྲོགས་ཤིང་སྐྱ་རེང་ཤར་བའི་དུས་སུ་ཐམས་ཅད་མཁྱེན་པའི་ཡེ་ཤེས་སོ་
39-1-233b


སོར་མྱོང་ངོ་། །སྟོང་ཕྲག་བཅུའི་འཇིག་རྟེན་གྱི་ཁམས་ཐམས་ཅད་བརྒྱན་བཞིན་དུ་རིགས་པར་གྱུར་ཏོ། །ཤར་ཕྱོགས་ཀྱི་ཁོར་ཡུག་གི་སྟེང་དུ་རྒྱལ་མཚན་དང་བ་དན་བཙུགས་པའི་ཤམ་བུས་ནུབ་ཀྱི་ཁོར་ཡུག་གི་སྟེང་དུ་ཆགས་སོ། །
དེ་བཞིན་དུ་ནུབ་ཀྱི་ཕྱོགས་ཀྱི་ཁོར་ཡུག་གི་མཐའི་སྟེང་དུ་རྒྱལ་མཚན་དང་བ་དན་བཙུགས་པའི་ཤམ་བུས་ཤར་གྱི་ཁོར་ཡུག་གི་སྟེང་དུ་ཆགས་སོ། །བྱང་གི་ཕྱོགས་ཀྱི་ཁོར་ཡུག་གི་སྟེང་དུ་རྒྱལ་མཚན་དང་བ་དན་བཙུགས་པའི་ཤམ་བུ་ལྷོའི་
ཁོར་ཡུག་གི་སྟེང་དུ་ཆགས་སོ། །ལྷོའི་ཕྱོགས་ཀྱི་ཁོར་ཡུག་གི་སྟེང་དུ་རྒྱལ་མཚན་དང་བ་དན་བཙུགས་པའི་ཤམ་བུས་བྱང་གི་ཁོར་ཡུག་གི་སྟེང་དུ་ཆགས་སོ། །ས་གཞི་ལས་ལངས་པའི་རྒྱལ་མཚན་དང་བ་དན་ཚངས་པའི་གནས་
སུ་ཆགས་སོ། །ཚངས་པའི་འཇིག་རྟེན་གྱི་གནས་སུ་བཅིངས་པའི་རྒྱལ་མཚན་དང་བ་དན་ས་གཞིའི་སྟེང་དུ་ཆགས་སོ། །སྟོང་ཕྲག་བཅུའི་ཁོར་ཡུག་ལ་མེ་ཏོག་གི་ཤིང་ལ་མེ་ཏོག་ཁ་བྱེའོ། །འབྲས་བུའི་ཤིང་ལ་འབྲས་བུ་མང་པོར་
གྱུར་ཏོ། །སྡོང་པོ་རྣམས་ལ་སྡོང་པོའི་པད་མའི་མེ་ཏོག་ཁ་བྱེའོ། །ཡལ་ག་རྣམས་ལ་ཡལ་གའི་པད་མའི་མེ་ཏོག་གོ། །འཁྲིལ་ཤིང་རྣམས་ལ་འཁྲིལ་ཤིང་གི་པད་མའི་མེ་ཏོག་གོ། །ནམ་མཁའ་ནས་མཐུར་དུ་པད་མའི་མེ་ཏོག་འཕྱང་
ངོ་། །ཐང་དང་རྡོའི་སྟེང་དུ་བརྟོལ་ནས་སྟེང་དུ་བདུན་བདུན་དུ་གྱུར་ཏེ་རྒྱུན་ཆགས་པའི་པད་མའི་མེ་ཏོག་ཅེས་བྱ་བ་ཕྱུང་ངོ་། །སྟོང་ཕྲག་བཅུའི་འཇིག་རྟེན་གྱི་ཁམས་ཁྱད་པར་དུ་འཕགས་པའི་མེ་ཏོག་གི་གདན་བཞིན་དུ་གྱུར་ཏོ། །ཁོར་ཡུག་
གི་བར་དཔག་ཚད་སྟོང་ཕྲག་བརྒྱད་ཀྱི་འཇིག་རྟེན་གྱི་བར་གྱི་དམྱལ་བ་ཉི་མ་བདུན་གྱི་འོད་ཀྱིས་ཀྱང་སྣང་བར་བྱེད་པ་མེད་པས་ན་དཀོན་ནོ། །དེ་དང་མཚུངས་པའི་འཇིག་རྟེན་གྱི་བར་གྱི་དམྱལ་བ་དེ་མ་ཐག་ཏུ་སྣང་བར་གྱུར་ཏོ། །དཔག་
ཚད་བརྒྱད་ཁྲི་བཞི་སྟོང་ཙམ་གྱིས་ཟབ་པའི་རྒྱ་མཚོ་ཆེན་པོའི་ཆུ་དངར་པོར་གྱུར་ཏོ། །ཆུ་ཀླུང་རྣམས་ནི་འགྲོ་བར་གནས་སོ། །དམུས་ལོང་རྣམས་ཀྱི་མིག་གིས་གཟུགས་མཐོང་ངོ་། །འོན་པ་རྣམས་ཀྱི་རྣ་བས་སྒྲ་ཐོས་སོ། །གོང་པོ་རྣམས་
39-1-234a


ཀྱིས་འགྲོ་ཤེས་པར་གྱུར་ཏོ། །བཅིངས་པའི་སེམས་ཅན་རྣམས་ནི་རྗེས་སུ་བཅིངས་པ་ལས་གྲོལ་བར་གྱུར་ཏོ། །འདི་ལྟར་ཚད་མེད་པའི་དཔལ་དུ་གྱུར་ནས་མཆོད་པ་དང་ཡ་མཚན་པའི་ཆོས་རབ་ཏུ་སྐྱེས་སོ། །ཐམས་ཅད་
མཁྱེན་པའི་ཡེ་ཤེས་སོ་སོར་རིག་གོ། །སངས་རྒྱས་ཐམས་ཅད་ཀྱི་བཤད་པ་ཆེད་དུ་བརྗོད་པ་ཆེད་དུ་བརྗོད་དོ། །སྐྱེ་བའི་འཁོར་བ་མ་ལུས་པ། །དུག་མེད་རྣམ་པར་དུག་མེད་ཚོལ། །ཁྱིམ་མེད་པ་ནི་ཚོལ་བ་ན། །སྐྱེ་བའི་སྡུག་བསྔལ་
ཡང་ཡང་དང་། །ཁྱིམ་མེད་པ་ནི་མཐོང་བར་གྱུར། །སླར་ཡང་ཁྱིམ་ནི་བྱེད་པ་མེད། །དེ་ཡི་སྡུག་བསྔལ་ཐམས་ཅད་བཅོམ། །དུག་གི་མིང་ཅན་ཁྱིམ་གྱི་ཕུང་། །སེམས་ནི་འདུ་བྱེད་པ་ལས་གྲོལ། །སྲེད་པ་ཟད་ནས་མེད་པར་
གྱུར་ཞེས་པ་འདི་ནི་དགའ་ལྡན་གྱི་ཕོ་བྲང་དུ་གནས་པ་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་འདིར་ཐམས་ཅད་མཁྱེན་པ་ཐོབ་པ་དེ་རྣམས་ཀྱི་གནས་ནི་གླེང་གཞི་བར་མ་ཞེས་བྱ་བ་ཡིན་ནོ།།  །།གཞན་ཡང་ཉེ་བའི་གླེང་གཞི་
ནི་བཅོམ་ལྡན་འདས་མཉན་ཡོད་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བའི་གནས་སུ་བཞུགས་པ་དང་། ཡངས་པ་ཅན་གྱི་ནགས་ཚལ་ཆེན་པོ་ཁང་པ་བརྩེགས་པའི་གནས་སུ་བཞུགས་སོ། །དེ་ལྟར་
དེ་དང་དེའི་གནས་རྣམས་སུ་བཞུགས་ཤིང་དེ་དང་དེའི་གནས་ཉིད་ཐོབ་ཅེས་བརྗོད་དོ། །གང་ཅི་ཡང་འདི་ལྟར་བརྗོད་པ་དེ་ནས་ཡང་དེ་དང་པོ་ནས་བཟུང་ནས་འདི་ལྟར་རིག་པར་བྱའོ། །བཅོམ་ལྡན་འདས་བཞུགས་ནས་ཆེད་
དུ་བརྗོད་ཅིང་ཆེད་དུ་བརྗོད་པ་དེ་ལྟ་བུའི་སེམས་སྐྱེས་སོ། །བདག་གིས་བསྐལ་པ་གྲངས་མེད་པ་བཞི་དང་འབུམ་ཕྲག་གཅིག་ལྷག་པ་ནས་སྐྱིལ་ཀྲུང་བཅས་པ་འདིའི་ཆེད་དུ་དུས་འདི་རྣམས་ལ་བདག་གི་མགོ་རྒྱན་གྱིས་
བརྒྱན་པའི་མགྲིན་པ་ནས་བྲེགས་ཏེ་སྦྱིན་པར་བཏང་བ་དང་། སྤྱན་བཟང་པོ་བཏང་བ་དང་། སྙིང་གི་ཤ་བྲེགས་ནས་བཏང་བ་དང་། གཞོན་ནུ་དྲ་བ་འཛིན་དང་འདྲ་བའི་བུ་སྦྱིན་པར་བཏང་བ་དང་། ཀྲིཥྞ་ཛི་ནའི་གཞོན་ནུ་མ་དང་
39-1-234b


མཚུངས་པའི་བུ་མོ་སྦྱིན་པར་བཏང་བ་དང་། ལྷ་མོ་མ་ཀྲི་དང་མཚུངས་པའི་ཆུང་མ་རྣམས་གཞན་གྱི་བྲན་གྱི་ཕྱིར་སྦྱིན་པར་བཏང་ངོ་། །འདི་ནི་བདག་གི་འདུག་སྟངས་ཡིན་ནོ། །རྒྱལ་བའི་འདུག་སྟངས་ཡིན་ནོ། །མཆོག་གི་འདུག་སྟངས་ཡིན་ནོ། །འདི་
ལ་བདག་བཞུགས་ནས་བསམ་པ་ཐམས་ཅད་ཡོངས་སུ་རྫོགས་སོ། །རེ་ཞིག་སྟན་འདི་ལས་བདག་མི་ལྡང་ངོ་སྙམ་དུ་བསམས་ནས་བྱེ་བ་འབུམ་ཕྲག་དུ་མ་ལ་སྙོམས་པར་ཞུགས་ནས་མཉམ་པར་གནས་ཏེ་ཞག་བདུན་དུ་དེ་ཉིད་
དུ་བཞུགས་སོ། །དེའི་ཕྱིར་སངས་རྒྱས་ཞེས་བརྗོད་དོ། །དེ་ནས་བཅོམ་ལྡན་འདས་ཀྱིས་ཞག་བདུན་དུ་འདུག་སྟངས་གཅིག་གིས་བཞུགས་སོ། །རྣམ་པར་གྲོལ་བ་དང་བདེ་བ་སོ་སོར་རིག་ཅིང་བཞུགས་སོ། །གཞན་ཡང་ལྷ་གང་
དང་གང་ཞིག་ད་དུང་ཡང་ངེས་པར་དོན་གྲུབ་ལ་བྱ་བ་ཡོད་དམ་འདུག་སྟངས་འདི་ལ་ཞེན་པ་མ་སྤང་བ་དང་རྣམ་པར་རྟོག་པ་ཡོངས་སུ་བསྐྱེད་དོ་ཞེས་བསམས་ནས་སྟོན་པས་ལྷ་རྣམས་ཀྱི་རྣམ་པར་རྟོག་པ་མཁྱེན་ནས། 
དེ་རྣམས་ཀྱི་རྣམ་པར་རྟོག་པ་ཉེ་བར་ཞི་བར་བྱ་བའི་ཕྱིར་སྟེང་གི་ནམ་མཁའ་ལ་འདུག་ནས་སོ་སོར་ཆོ་འཕྲུལ་བསྟན་ཏོ། །བྱང་ཆུབ་ཀྱི་སྙིང་པོར་མཛད་པའི་ཆོ་འཕྲུལ་དང་། ཉེ་དུ་དང་འདུས་པའི་དུས་སུ་མཛད་པའི་ཆོ་འཕྲུལ་
དང་། ཀློག་པའི་མདོ་དང་འདུས་པར་མཛད་པའི་ཆོ་འཕྲུལ་ཐམས་ཅད་ཨ་སྨྲའི་ཤིང་གི་དྲུང་དུ་མཛད་པའི་སོ་སོའི་ཆོ་འཕྲུལ་དང་མཚུངས་པར་གྱུར་ཏོ། །འདི་ལྟར་སྟོན་པས་འདི་ལྟ་བུའི་ཆོ་འཕྲུལ་མཛད་ནས་ལྷ་རྣམས་ཀྱི་རྣམ་པར་
རྟོག་པ་ཉེ་བར་ཞི་བར་མཛད་དོ། །འདུག་སྟངས་ཀྱིས་བྱང་ཤར་གྱི་ཆར་འཁོད་དེ་འདིའི་འདུག་སྟངས་ཀྱིས་ཐམས་ཅད་མཁྱེན་པའི་ཡེ་ཤེས་སོ་སོར་རྟོགས་པར་བྱེད་དོ། །བསྐལ་པ་གྲངས་མེད་པ་བཞི་དང་འབུམ་ཕྲག་གཅིག་གིས་
ཕ་རོལ་དུ་ཕྱིན་པ་ཡོངས་སུ་རྫོགས་པའི་འབྲས་བུ་ལྷག་པར་རྟོགས་པའི་འདུག་སྟངས་ཀྱིས་མིག་མི་འཛུམ་པར་ལྟ་ཞིང་ཞག་བདུན་དུ་འཁོད་དོ། །དེའི་གནས་སུ་མིག་མི་འཛུམ་པའི་མཆོད་རྟེན་ཞེས་བྱ་བ་བྱུང་ངོ་། །དེ་ནས་འདུག་སྟངས་ལ་
39-1-235a


འཁོད་པའི་གནས་ཀྱི་བར་དུ་འཆག་པར་བྱས་ནས་ཤར་དང་ནུབ་དུ་རིན་པོ་ཆེ་ལ་འཆག་པས་ཞག་བདུན་དུ་འཁོད་དོ། །གནས་དེར་རིན་པོ་ཆེ་ལ་འཆག་པའི་མཆོད་རྟེན་ཞེས་བྱ་བ་བྱུང་ངོ་། །གཞན་ཡང་ཞག་བདུན་པ་བཞི་པ་ལ་བྱང་
ཆུབ་ཤིང་གི་བྱང་ཤར་གྱི་ཆར་ལྷ་རྣམས་ཀྱིས་རིན་པོ་ཆེའི་ཁང་པ་སྤྲུལ་ལོ། །དེར་འདུག་སྟངས་ཀྱིས་བཞུགས་ནས་ཆོས་མངོན་པའི་སྡེ་སྣོད་མ་ལུས་པར་འདི་རྣམས་མཐའ་ཡས་པའི་ཚུལ་གྱིས་ཀུན་གནས་པར་སེམས་ཤིང་ཞག་
བདུན་བཞུགས་སོ། །ཆོས་མངོན་པ་སླར་ཡང་འདི་སྐད་སྨྲའོ། །རིན་པོ་ཆེའི་ཁང་པ་ཞེས་བྱ་བ་རིན་པོ་ཆེ་ལས་བྱུང་བའི་ཁང་པ་ཡིན་ནོ་ཞེས་ཟེར་རོ། །སྡུད་པར་བྱེད་པ་པོ་རྣམས་སླར་ཡང་འདི་སྐད་གསུང་སྟེ། རབ་ཏུ་བྱེད་པ་བདུན་གྱི་ཆོས་མངོན་
པ་རྗེས་སུ་དྲན་པར་བྱེད་པའི་རིན་པོ་ཆེའི་ཁང་པ་ཡིན་ཞེས་གསུང་ངོ་། །གང་གི་ཕྱིར་སླར་ཡང་འདིར་ཚིག་གཉིས་ཀ་ཡང་འཐད་དོ། །དེའི་ཕྱིར་འདི་གཉིས་ཀ་ཡང་གཟུང་བར་བྱའོ། །དེ་ནས་སླར་ཡང་གནས་དེ་རིན་པོ་ཆེའི་ཁང་པའི་མཆོད་རྟེན་ཞེས་
བྱ་བ་བྱུང་ངོ་། །འདི་ལྟར་བྱང་ཆུབ་ཤིང་དང་ཉེ་བ་ཉིད་དུ་ཞག་བདུན་པ་བཞི་པ་སོང་ནས་ཞག་བདུན་པ་ལྔ་པ་ལ་བྱང་ཆུབ་ཤིང་གི་དྲུང་ནས་ར་ལུག་སྐྱོང་བའི་ཤིང་ནྱ་གྲོ་དྷ་དང་ཉེ་བར་གཤེགས་ནས་དེར་ཡང་ཆོས་ལ་རྣམ་པར་སེམས་པ་ཉིད་ཀྱིས་རྣམ་པར་
གྲོལ་བ་དང་བདེ་བས་སོ་སོར་རིག་པར་མཛད་ནས་བཞུགས་སོ། །དེའི་ཚེ་ལྷའི་བུའི་བདུད་དུས་འདི་རྣམས་ཀྱི་ཕྱི་མ་ལ་གྲིབ་མ་བཞིན་དུ་ཕྱོགས་གང་དུའང་མ་སྤངས་སོ། །བྱང་ཆུབ་སེམས་དཔའ་ལ་སྐྱོན་ཅུང་ཟད་ཀྱང་མ་མཐོང་ངོ་། །ད་ནི་ངའི་
དབང་དུ་བྱ་བ་ལས་འདས་པས་ཡིད་མི་བདེ་བ་ཐོབ་པར་གྱུར་ཅིང་ལམ་ཆེན་པོར་གནས་ནས་རྣམ་པ་བཅུ་དྲུག་གི་རྒྱུ་མཚན་ལ་སེམས་ཤིང་ས་ལ་རི་མོ་བཅུ་དྲུག་འདྲིའོ། །བདག་གིས་འདི་བཞིན་དུ་སྦྱིན་པའི་ཕ་རོལ་དུ་ཕྱིན་པ་མ་རྫོགས་
པ་དེའི་ཕྱིར་བདག་འདི་དང་འདྲ་བར་མ་གྱུར་ཏོ་ཞེས་རི་མོ་གཅིག་བྲིས་སོ། །དེ་བཞིན་དུ་བདག་འདི་དང་མཚུངས་པར་ཚུལ་ཁྲིམས་ཀྱི་ཕ་རོལ་དུ་ཕྱིན་པ་དང་། ངེས་འབྱུང་གི་ཕ་རོལ་དུ་ཕྱིན་པ་དང་། ཤེས་རབ་ཀྱི་ཕ་རོལ་དུ་ཕྱིན་པ་དང་། བརྩོན་
39-1-235b


འགྲུས་ཀྱི་ཕ་རོལ་དུ་ཕྱིན་པ་དང་། བཟོད་པའི་ཕ་རོལ་དུ་ཕྱིན་པ་དང་། བདེན་པའི་ཕ་རོལ་དུ་ཕྱིན་པ་དང་། ལྷག་པར་གནས་པའི་ཕ་རོལ་དུ་ཕྱིན་པ་དང་། བྱམས་པའི་ཕ་རོལ་དུ་ཕྱིན་པ་དང་། བཏང་སྙོམས་ཀྱི་ཕ་རོལ་དུ་ཕྱིན་པ་རྣམས་མ་རྫོགས་སོ། །
དེའི་ཕྱིར་བདག་འདི་དང་མཚུངས་པར་མ་གྱུར་ཏོ་སྙམ་ནས་རི་མོ་བཅུ་བྲིས་སོ། །བདག་འདི་དང་མཚུངས་པའི་ཐུན་མོང་མ་ཡིན་པའི་དབང་པོ་མཆོག་གི་གོང་མའི་ཡེ་ཤེས་སོ་སོར་རིག་པ་ཉེ་བར་གནས་པར་གྱུར་པའི་ཕ་རོལ་དུ་ཕྱིན་པ་བཅུ་མ་རྫོགས་
པ་དེའི་ཕྱིར་བདག་འདི་དང་མཚུངས་པར་མ་གྱུར་ཏོ་སྙམ་ནས་རི་མོ་བཅུ་དྲུག་བྲིས་སོ། །དེ་བཞིན་དུ་བདག་འདི་དང་མཚུངས་པའི་ཐུན་མོང་མ་ཡིན་པའི་བསམ་པའི་བག་ལ་ཉལ་དང་ཡེ་ཤེས་ཀྱི་ཐུགས་རྗེ་ཆེན་པོ་དང་། སྙོམས་པར་འཇུག་
པའི་ཡེ་ཤེས་དང་། སོ་སོར་ཆོ་འཕྲུལ་གྱི་ཡེ་ཤེས་དང་སྒྲིབ་པ་མེད་པའི་ཡེ་ཤེས་དང་། ཐམས་ཅད་མཁྱེན་པའི་ཡེ་ཤེས་སོ་སོར་གནས་པ་ཉེ་བར་གནས་པར་གྱུར་པའི་ཕ་རོལ་དུ་ཕྱིན་པ་བཅུ་མ་རྫོགས་པའི་དེའི་ཕྱིར་བདག་འདི་དང་མཚུངས་
པར་མ་གྱུར་ཏོ་སྙམ་ནས་རི་མོ་བཅུ་དྲུག་བྲིས་སོ། །འདི་ལྟར་འདིའི་རྒྱུ་མཚན་སེམས་ཤིང་ལམ་ཆེན་པོར་རི་མོ་བཅུ་དྲུག་བྲིས་ནས་གནས་སོ། །དེའི་ཚེ་སྲེད་མ་དང་། ཀུན་དུ་དགའ་མ་དང་། དགའ་མ་སྡེ་གསུམ་པོ་ནི་བདུད་ཀྱི་བུ་མོ་བདག་
ཅག་གི་ཕ་ནི་མ་མཐོང་བར་གྱུར་པས་དེ་མ་ཐག་པར་ག་ན་ཡོད་དམ་ཞེས་བལྟ་ཞིང་རྒྱུ་བ་ན་དེ་ཡིད་མི་བདེ་བ་ཐོབ་པར་གྱུར་ཏེ། ས་ལ་རི་མོ་བྱེད་པ་མཐོང་ནས་ཕ་དང་ཉེ་བར་སོང་སྟེ་ཕ་གང་གི་ཕྱིར་སྡུག་བསྔལ་ཞིང་ཡིད་མི་བདེ་བར་
བྱེད་ཅེས་དྲིས་སོ། །བུ་མོ་དགེ་སྦྱོང་ཆེན་པོ་འདི་བདག་གི་དབང་དུ་བྱེད་པ་ལས་འདས་སོ་ཞེས་འདི་རྣམས་ཀྱི་དུས་སུ་བལྟས་པས་སྐྱོན་ཅུང་ཟད་ཀྱང་མ་མཐོང་ངོ་། །དེའི་ཕྱིར་བདག་སྡུག་བསྔལ་ཞིང་ཡིད་མི་བདེ་བ་སྐྱེས་
སོ། །འདི་ལྟར་གྱུར་ན་དེ་ལྟར་མ་བསམ་ཅིག །བདག་ཅག་གསུམ་གྱིས་དེ་དབང་དུ་བྱས་ནས་ཁྲིད་ལ་འོང་ངོ་། །སྨྲས་པ། བུ་མོས་མི་ནུས་ཏེ་སུས་ཀྱང་དབང་དུ་བྱ་བར་མི་ནུས་པས་སྐྱེས་བུ་འདི་ནི་མི་གཡོ་
39-1-236a


བའི་དད་པ་ལ་གནས་སོ། །སྨྲས་པ། ཕ་བདག་ཅག་བུད་མེད་ཡིན་པས་ད་ལྟ་ཉིད་དུ་དེ་ལ་འདོད་ཆགས་ཀྱི་ཞགས་པས་བཅིངས་ཏེ་ཁྲིད་ལ་འོང་ངོ་། །ཁྱེད་མ་སེམས་ཤིག །དེ་ནས་བུད་མེད་དེ་རྣམས། བཅོམ་
ལྡན་འདས་དང་ཉེ་བར་སོང་སྟེ་དགེ་སྦྱོང་ཁྱེད་ཀྱི་ཞབས་ལ་བསྙེན་བཀུར་བདག་ཅག་གིས་བགྱིའོ་ཞེས་སྨྲས་སོ། །བཅོམ་ལྡན་འདས་ཉིད་ཀྱིས་དེ་རྣམས་ཀྱི་ཚིག་ལ་ཐུགས་མ་གཏད་དོ། །སྤྱན་རྣམ་པར་གྲོལ་བ་ཡང་མ་
གཟིགས་སོ། །ཇི་ལྟར་དེ་བླ་ན་མེད་པའི་ཉེ་བར་སྐྱེ་བ་ཟད་པ་རྣམ་པར་གྲོལ་བའི་བསམ་པས་དབེན་པའི་བདེ་བ་ཉིད་ལ་ཉམས་སུ་མྱོང་བར་མཛད་ཅིང་བཞུགས་སོ། །གཞན་ཡང་བདུད་ཀྱི་བུ་མོ་བསམ་པ་མང་ཞིང་སྐྱེས་བུ་
དང་མཚུངས་པའི་སེམས་སོ། །གང་དང་གང་གཞོན་ནུ་ལ་དགའ་བར་གྱུར་པ་དང་། གང་དང་གང་ཞིག་ན་ཚོད་དང་པོར་གྱུར་པ་ལ་དགའ་བ་དང་། གང་དང་གང་ཞིག་ན་ཚོད་བར་མར་གྱུར་པ་ལ་དགའ་བ་དང་། གང་དང་གང་ཞིག་ན་
ཚོད་ཕྱི་མར་གྱུར་པ་ལ་དགའ་བའོ། །བདག་གིས་དེ་ལྟ་བུའི་རྣམ་པ་སྣ་ཚོགས་པའི་འོད་ལ་ཆགས་པར་བགྱིའོ་ཞེས་སྨྲས་ནས། བུ་མོ་རེ་རེས་གཞོན་ནུ་མའི་གཟུགས་ལ་སོགས་པའི་བརྒྱ་ཕྲག་བརྒྱ་ཕྲག་གིས་བདག་ཉིད་ཀྱི་
ལུས་སྤྲུལ་ལོ། །གཞོན་ནུ་མའི་གཟུགས་དང་ལང་ཚོ་མའི་གཟུགས་དང་། དང་པོ་བུ་དང་བུ་མོ་ལན་ཅིག་སྐྱེས་པའི་གཟུགས་དང་། བར་མའི་བུད་མེད་ཀྱི་གཟུགས་དང་། ལུས་རགས་མོར་གྱུར་ནས་ལན་དྲུག་དུ་བཅོམ་
ལྡན་འདས་དང་ཉེ་བར་སོང་ནས་དགེ་སྦྱོང་ཁྱོད་ཀྱི་ཞབས་ལ་བདག་ཅག་གིས་བསྙེན་བཀུར་བགྱིའོ་ཞེས་སྨྲས་སོ། །བཅོམ་ལྡན་འདས་ཀྱིས་དེ་རྣམས་ཀྱི་ཚིག་ལ་ཡང་ཐུགས་མ་གཏད་དོ། །ཇི་ལྟར་དེ་བླ་ན་མེད་པའི་ཉེ་བར་སྐྱེ་བ་རྣམ་
པར་གྲོལ་ལོ། །གཞན་ཡང་སློབ་དཔོན་གང་ཞིག་འདི་སྐད་སྨྲའོ། །དེ་རྫུ་འཕྲུལ་དང་ལྡན་པས་བུད་མེད་འོངས་པ་ལ་བལྟ་ཞིང་བཅོམ་ལྡན་འདས་འདི་ལྟ་བུའི་གཟུགས་ཀྱིས་འདི་རྣམས་སོ་བྱི་བ་དང་། སྐྲ་དཀར་པོར་གྱུར་པར་བྱིན་གྱིས་བརླབས་སོ་ཞེས་ཟེར་རོ། །
39-1-236b


དེའི་ཚིག་གཟུང་བར་མི་བྱའོ། །སྟོན་པས་འདི་ལྟ་བུའི་གཟུགས་སུ་བྱིན་གྱིས་བརླབས་པར་མ་མཛད་དོ། །གཞན་ཡང་བཅོམ་ལྡན་འདས་ཀྱིས་ཅི་མཐོང་འདི་ལྟ་བུའི་འབད་པ་བྱེད་པ་ད་སོང་ཅིག །འདི་ལྟ་བུའི་ཚུལ་གྱིས་འདོད་ཆགས་དང་མ་བྲལ་བ་ལ་སྩོགས་
པའི་མདུན་དུ་བྱ་བར་རིགས་སོ། །དེ་བཞིན་གཤེགས་པས་སླར་ཡང་འདོད་ཆགས་སྤངས་ཤིང་ཉེས་པ་སྤངས་པ་དང་གཏི་མུག་སྤངས་པས་རང་གི་འདོད་ཆགས་སྤངས་པའི་ཕྱིར་རོ། །གང་ཞིག་རྒྱལ་བ་དེ་ལ་རྒྱལ་མི་ནུས། །གང་ཞིག་འཇིག་རྟེན་འདིར་ནི་རྒྱལ་
མི་འགྱུར། །མཐའ་ཡས་སངས་རྒྱས་སྤྱོད་ཡུལ་དེ་མི་གནས། །རྐང་མེད་ཀྱིས་ནི་རྐང་ཡོད་ལ་མི་ནུས། །གང་གི་སྲིད་པའི་དྲ་བ་བཏོན་གྱུར་ནས། །དེ་ལ་སྲེད་པ་རྣམས་ནི་ཅུང་ཟད་མེད། །མཐའ་ཡས་སངས་རྒྱས་སྤྱོད་ཡུལ་དེ་ཉིད་ལ། །རྐང་མེད་དེ་
ཡིས་རྐང་ཡོད་ལ་མི་ནུས། །འདི་ནི་སངས་རྒྱས་ཀྱི་ཆོས་མཆོག་གི་སྡེ་ལས་ཚིགས་སུ་བཅད་པ་གཉིས་གསུངས་ནས་ཆོས་བསྟན་ཏོ། །བུ་མོ་རྣམས་ལ་ཕ་ཟེར་བ་ཡང་བདེན་པ་ཡིན་ནོ། །དགྲ་བཅོམ་པ་བདེ་བར་གཤེགས་པ་འཇིག་རྟེན་མིའི་མཆོག་
ཡིན་ནོ་ཞེས་སྨྲས་ནས་ལྷ་དང་ཉེ་བར་སོང་ངོ་། །བཅོམ་ལྡན་འདས་ཀྱིས་ཀྱང་འདིར་ཞག་བདུན་བཞུགས་ནས་བཏང་ཟུང་གི་གནས་སུ་གཤེགས་སོ། །དེར་ཞག་བདུན་དུ་སྐུ་ལ་ཡུལ་ངན་དང་གྲང་བ་ཞི་བར་བྱ་བའི་ཕྱིར་ཀླུའི་རྒྱལ་
པོ་བཏང་ཟུང་ཞེས་བྱ་བས་ལུས་ཀྱིས་ལན་བདུན་དུ་དཀྲིས་ནས་གདེངས་ཀ་བྱས་སོ། །དྲིའི་གཙང་ཁང་ཤིན་དུ་ཡངས་པར་བཞུགས་པ་བཞིན་རྣམ་པར་གྲོལ་བ་དང་བདེ་བ་སོ་སོར་རིག་པར་བྱེད་ཅིང་ཞག་བདུན་དུ་བཞུགས་
ནས་ཤིང་རཱ་ཛ་ཡ་ཏ་ན་དང་ཉེ་བར་གཤེགས་སོ། །དེར་ཡང་རྣམ་པར་གྲོལ་བ་དང་བདེ་བ་སོ་སོར་རིག་པར་བྱེད་པ་ཉིད་ཀྱིས་བཞུགས་སོ། །དེ་རྣམས་ཀྱིས་རེ་ཞིག་ཞག་བདུན་ཕྲག་བདུན་ཡོངས་སུ་རྫོགས་སོ། །
དེ་རྣམས་ཀྱི་བར་དུ་ཞལ་ཤོལ་བ་མེད་པ་དང་སྐུ་ལ་བྱི་དོར་བྱེད་པ་མེད་པ་དང་ཞལ་ཟས་གསོལ་བ་མེད་པར་གྱུར་ཏོ། །བསམ་གཏན་གྱི་བདེ་བ་དང་། ལམ་གྱི་བདེ་བ་དང་། འབྲས་བུའི་བདེ་བ་ཉིད་ཀྱིས་ཉིན་མཚན་འདའོ། ། 
39-1-237a


དེ་ནས་དེའི་བདུན་ཕྲག་བདུན་གྱི་མཐར་གཅིག་གིས་དམན་པའི་ལྔ་བཅུའི་མཐའི་ཉི་མ་ལ་དེར་བཞུགས་ནས་ཞལ་ཤོལ་བའི་ཐུགས་སྐྱེས་སོ། །ལྷའི་དབང་པོ་བརྒྱ་བྱིན་གྱིས་ཨ་རུ་ར་མཆོག་བླངས་ནས་ཕུལ་ལོ། །སྟོན་པས་དེ་
གསོལ་བས་སྐུ་དངས་པར་གྱུར་ཏོ། །དེ་ནས་བརྒྱ་བྱིན་ཉིད་ཀྱིས་སོ་རྩིའི་སོ་ཤིང་ཉིད་ཀྱི་སོ་ཤིང་དང་། ཞལ་ཤོལ་བའི་ཆུ་ཕུལ་ལོ། །སྟོན་པས་སོ་ཤིང་བླངས་ནས་སོ་བྲུད་དེ་མཚོ་ཆེན་པོ་མ་དྲོས་པའི་ཆུས་ཞལ་བཤལ་ལོ། །དེ་ཉིད་དུ་ཤིང་
རཱ་ཛ་ཡ་ཏ་ནའི་དྲུང་དུ་བཞུགས་སོ། །དེའི་ཚེ་ག་གོན་དང་བཟང་པོ་ཞེས་བྱ་བའི་ཚོང་དཔོན་གཉིས་ཤིང་རྟ་ལྔ་བརྒྱ་དང་བཅས་པ་ལྷོ་ཕྱོགས་ཀྱི་ལྗོངས་ནས་ཡུལ་དབུས་སུ་འགྲོ་བ་ན་རང་ཉིད་ཀྱི་སྔར་གྱི་གཉེན་ལྷར་གྱུར་པས་ཤིང་རྟ་ཐམས་
ཅད་བྱིང་ནས་འགྲོ་བར་མི་ནུས་པར་བྱིན་གྱིས་བརླབས་པས་སྟོན་པ་ལ་ཁ་ཟས་སྟེར་བའི་ཕྱིར་སྤྲོ་བ་སྐྱེས་སོ། །སྦྲང་བསྲུབས་པའི་ཁུར་བའི་གོང་བུ་བླངས་ནས་བཙུན་པ་བཅོམ་ལྡན་འདས་བཟའ་བ་འདི་ཐུགས་རྗེ་ཆེན་པོ་སྐྱེད་ལ་སོ་
སོར་བཞེས་པར་ཞུ་ཞེས་སྟོན་པའི་དྲུང་དུ་ཉེ་བར་འཁོད་དོ། །བཅོམ་ལྡན་འདས་འོ་ཐུག་བཞེས་པའི་ཉིན་མོ་ཉིད་ལྷུང་བཟེད་མི་སྣང་བའི་ཕྱིར་དེ་བཞིན་གཤེགས་པ་རྣམས་ཀྱི་ཡང་ཕྱག་གིས་ལེན་ནམ་འོན་ཀྱང་ལྷུང་བཟེད་
ཀྱིས་བླང་ཞེས་བསམས་སོ། །དེ་ནས་སེམས་ཀྱིས་ཤེས་ནས་ཕྱོགས་བཞིའི་རྒྱལ་པོ་ཆེན་པོ་བཞི་པོ་རྣམས་ཀྱིས་ནོར་བུ་ཨིན་དྲ་ནཱི་ལའི་ལྷུང་བཟེད་བླངས་པ། བཅོམ་ལྡན་འདས་ཀྱིས་མ་གནང་ངོ་། །སླར་ཡང་སྲན་མ་
མུད་གའི་ཁ་དོག་ཅན་གྱི་རྡོ་ལས་བྱུང་བའི་ལྷུང་བཟེད་བཞི་ཕུལ་ལོ། །བཅོམ་ལྡན་འདས་ཀྱིས་ལྷའི་བུ་བཞི་པོ་རྣམས་ལ་རྗེས་སུ་བརྩེ་བས་ལྷུང་བཟེད་བཞི་པོ་བཞེས་ཏེ་སྟེང་ནས་སྟེང་དུ་བརྩེགས་ནས་བཞག་སྟེ་གཅིག་
ཏུ་འགྱུར་བར་བྱིན་གྱིས་བརླབས་སོ། །བཞི་པོ་ཡང་བལྟ་བའི་ཕྱིར་དུ་ཁ་ལ་རི་མོ་བཞིར་གྱུར་ཏེ་ལྷུང་བཟེད་འབྲིང་པོའི་ཚད་གཅིག་ཏུ་གྱུར་ཏོ། །བཅོམ་ལྡན་འདས་ལ་དེའི་སོ་སོར་ཕུལ་བ་རིན་ཐང་མེད་པའི་རྡོ་ལས་བྱུང་བའི་ལྷུང་
39-1-237b


བཟེད་དུ་བཟའ་བའི་ཕྱིར་དུ་བཞེས་ནས་ཡོངས་སུ་ལོངས་སྤྱད་ནས་རྗེས་སུ་ཡི་རང་བར་མཛད་དོ། །ཚོང་དཔོན་སྤུན་གཉིས་སངས་རྒྱས་དང་ཆོས་ལ་སྐྱབས་སུ་འགྲོ་ཞིང་ཚིགས་གཉིས་པའི་དགེ་བསྙེན་དུ་གྱུར་ཏོ། །དེ་ནས་དེ་རྣམས་ཀྱིས་བཙུན་པ་མཆོད་
པ་བྱ་བར་རིགས་པའི་དངོས་པོ་གཅིག་བསླང་ཞེས་ཞུས་སོ། །དེ་ནས་ཕྱག་གཡས་པ་རང་གི་མགོ་ལ་བྱུགས་ནས་སྐྲའི་གདུང་གནང་ངོ་། །དེ་དག་གིས་རང་གི་གྲོང་ཁྱེར་དུ་ཁྱེར་སོང་ནས་མཆོད་རྟེན་བཞེངས་སོ། །ཡང་དག་པར་རྫོགས་པའི་སངས་རྒྱས་
ཀྱིས་ཀྱང་དེ་ནས་བཞེངས་ནས་སླར་ཡང་ར་ལུག་སྐྱོང་བའི་ཤིང་ནྱ་གྲོ་དྷ་ཉིད་དུ་གཤེགས་ནས་ནྱ་གྲོ་དྷའི་དྲུང་དུ་བཞུགས་སོ། །དེ་ནས་དེ་ཉིད་དུ་བཞུགས་ཙམ་ཉིད་ན་རང་གིས་ལྷག་པར་རྟོགས་པའི་ཟབ་མོའི་ཆོས་སོ་སོར་བསམ་ཞིང་སངས་
རྒྱས་རྣམས་ཀྱིས་ལྷག་པར་རྟོགས་པ་འདི་ནི་ཆོས་སོ། །གཞན་གྱིས་ཆོས་སྟོན་པར་མི་ནུས་པར་བསམས་ནས་རབ་ཏུ་འཇུག་པའི་རྣམ་པའི་རྣམ་པར་རྟོག་པ་སྐྱེས་སོ། །དེ་ནས་མི་མཇེད་ཀྱི་བདག་པོ་ཚངས་པ་འཇིག་རྟེན་ཉམས་པར་འགྱུར་
བའི་ཕྱིར་རོ་ཞེས་བསམས་ནས་སྟོང་ཕྲག་བཅུའི་ཁོར་ཡུག་གི་བརྒྱ་བྱིན་དང་། འཐབ་བྲལ་བཟང་པོ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་ཕྱུག་དང་། ཚངས་པ་ཆེན་པོ་རྣམས་ཁྲིད་ནས་
སྟོན་པའི་དྲུང་དུ་ཕྱིན་ནས། བཙུན་པ་བཅོམ་ལྡན་འདས་ཆོས་བསྟན་དུ་གསོལ། དང་པོའི་ཚུལ་གྱིས་ཆོས་བསྟན་དུ་གསོལ་ཞེས་ཞུས་སོ། །སྟོན་པས་དེ་རྣམས་ལ་སྣང་བ་བྱིན་ནོ། །གང་ཞིག་ལ་བདག་གིས་
དང་པོར་ཆོས་བསྟན་པར་བྱའོ་ཞེས་དགོངས་ཤིང་མཁས་པ་ཀུན་ལེན་དེའི་ཆོས་འདི་མྱུར་དུ་ཤེས་པར་འགྱུར་བའི་ཐུགས་སྐྱེས་སོ། །སླར་ཡང་གཟིགས་ཏེ་དེ་དུས་ལས་འདས་ནས་ཞག་བདུན་ལོན་པར་རྟོགས་སོ། །འཆར་
བྱེད་ལ་བརྟགས་པས་དེ་ཡང་དུས་ལས་འདས་པར་མཁྱེན་ནོ། །དགེ་སློང་ལྔ་སྡེས་བདག་ལ་བསྙེན་བཀུར་མང་པོ་བྱས་པས་ལྔ་སྡེའི་ཆེད་དུ་བསམས་ནས་དེ་རྣམས་གང་ན་གནས་པ་ཡིན་ཞེས་བརྟགས་སོ། །གྲོང་ཁྱེར་
39-1-238a


བཱ་རཱ་ཎ་སཱིའི་རི་དགས་རྒྱུ་བའི་ནགས་ཚལ་ན་ཡོད་པར་མཁྱེན་ནོ། །དེར་གཤེགས་ནས་ཆོས་ཀྱི་འཁོར་ལོ་བསྐོར་རོ་ཞེས་དགོངས་ནས་ཞག་འགའ་ཞིག་ཏུ་བྱང་ཆུབ་ཀྱི་སྙིང་པོ་ཀུན་དུ་ཉེ་བ་ཉིད་དུ་བསོད་སྙོམས་མཛད་ཅིང་
བཞུགས་ནས་དབྱར་ཟླ་འབྲིང་པོའི་ཉ་ལ་གྲོང་ཁྱེར་བཱ་རཱ་ན་སཱིར་གཤེགས་པར་དགོངས་ནས་ཚེས་བཅུ་བཞིའི་མཚན་གྱི་མཐར་ནམ་ལངས་པ་ན་ཤིན་དུ་སྔ་བ་ཉིད་དུ་ལྷུང་བཟེད་དང་སྣམ་སྦྱར་བསྣམས་ནས་དཔག་ཚད་བཅྭ་བརྒྱད་ཡོད་པའི་
ལམ་ལ་གཤེགས་ཤིང་ལམ་གྱི་བར་དུ་ཉེ་བར་གནས་པ་ཞེས་བྱ་བའི་འཚོ་བྱེད་གཅིག་གཟིགས་སོ། །དེ་ལ་རང་གི་སངས་རྒྱས་སུ་གྱུར་པ་བཤད་དོ། །ཉི་མ་དེ་ཉིད་ལ་སྲོད་ཀྱི་དུས་སུ་དྲང་སྲོང་ལྷུང་བའི་གནས་སུ་གཤེགས་སོ། །གནས་
བརྟན་ལྔ་སྡེས་དེ་བཞིན་གཤེགས་པ་བྱོན་པ་རིང་པོ་ཉིད་ནས་མཐོང་སྟེ། དགེ་སྦྱོང་གཽ་ཏ་མ་འདི་བཟའ་བ་མང་པོའི་ཕྱིར་ལུས་ཡོངས་སུ་རྫོགས་པར་གྱུར། དབང་པོ་ཡོངས་སུ་རྫོགས་པར་གྱུར། གསེར་གྱི་ཁ་དོག་ཏུ་གྱུར་ནས་འོངས་ཀྱིས། 
འདི་ལ་ཕྱག་ལ་སོགས་པ་མི་བྱའོ། །འདི་རིགས་ཆེན་པོར་སྐྱེས་པ་ཡིན་པས་གདན་ཤོམ་པ་ཙམ་འོས་སོ། །དེའི་ཕྱིར་གདན་ཙམ་རིགས་སོ་ཞེས་གཏམ་བྱེད་དོ། །བཅོམ་ལྡན་འདས་ལ་ལྷ་དང་བཅས་པའི་འཇིག་རྟེན་རྣམས་ཀྱི་
སེམས་དང་སྤྱོད་པ་ཤེས་པར་ནུས་པའི་ཡེ་ཤེས་ཡོད་དོ། །དེ་ཡང་འདི་རྣམས་ཇི་ལྟར་སེམས་པ་ཡིན་ཞེས་བསམས་ནས་སེམས་ཤེས་པ་ཡིན་ནོ། །དེ་ནས་ལྷ་དང་མི་ཐམས་ཅད་ལ་མཐོང་བ་མེད་པའི་དབང་གིས་ཐམས་ཅད་དུ་ཁྱབ་
པར་ནུས་པའི་བྱམས་པའི་སེམས་ཡང་དག་པར་བསྡུས་ནས། མ་མཐོང་བའི་དབང་གིས་བྱམས་པའི་སེམས་ཀྱིས་ཁྱབ་པར་བཅོམ་ལྡན་འདས་ཀྱིས་བསྒོམས་ནས་དེ་བཞིན་གཤེགས་པ་ཉེ་བར་གཤེགས་ཤིང་གཤེགས་པ་ན། 
སྔར་གྱི་བཅའ་ཁྲིམས་རྣམས་གནས་པར་མི་ནུས་པས་ཕྱག་ཕུལ་ཞིང་བསྲུང་བ་དང་བསྙེན་བཀུར་ཐམས་ཅད་བྱས་སོ། །གཞན་ཡང་དགེ་སློང་དེ་རྣམས་ཡང་དག་པར་རྫོགས་པའི་སངས་རྒྱས་གྲུབ་པ་མི་ཤེས་པའི་ཕྱིར་མིང་
39-1-238b


བརྗོད་པ་ན་ཚེ་དང་ལྡན་པ་ཞེས་སྨྲ་བ་ཐ་མལ་པའི་ཚིག་གིས་བརྗོད་པར་བྱེད་དོ། །དེ་ནས་བཅོམ་ལྡན་འདས་ཀྱིས་དགེ་སློང་དག་བཅོམ་ལྡན་འདས་དང་དེ་བཞིན་གཤེགས་པའི་མིང་དང་ཚེ་དང་ལྡན་པ་ཞེས་ཐ་མལ་པའི་ཚིག་
བརྗོད་པར་མི་རུང་ངོ་། །དགེ་སློང་དག་ང་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སོ་ཞེས་བདག་ཉིད་སངས་རྒྱས་སྒྲུབ་པར་བྱེད་པ་དང་གདན་བཤམས་པ་མཆོག་ལ་སངས་རྒྱས་བཞུགས་
ཏེ། རྒྱུ་སྐར་བྲེ་མཆོག་གསུམ་འཛོམ་པ་ལ་བྱེ་བ་ཕྲག་བཅྭ་བརྒྱད་ཀྱི་ཚངས་པའི་འཁོར་གྱིས་བསྐོར་ནས་གནས་བརྟན་ལྔ་སྡེ་བོས་ཏེ་ཆོས་ཀྱི་འཁོར་ལོ་བསྐོར་བའི་མདོའི་མཐར་བཤད་དོ། །དེ་རྣམས་ལ་གནས་བརྟན་ཀུན་
ཤེས་ཀཽ་ཊི་ནྱས་བཤད་པའི་རྗེས་སུ་འབྲངས་ནས་ཡེ་ཤེས་ཐོབ་པ་མདོའི་མཐར་བྱེ་བ་ཕྲག་བཅྭ་བརྒྱད་ཀྱི་ཚངས་པ་རྣམས་ཀྱིས་རྒྱུན་དུ་ཞུགས་པའི་འབྲས་བུ་ཐོབ་བོ། །སྟོན་པས་དེ་ཉིད་དུ་དབྱར་བཞུགས་སོ། །སྔར་ཡང་ཉི་མ་
གཉིས་པ་ལ་གནས་བརྟན་བརླངས་པ་ལ་ཆོས་སྦྱིན་ནོ་ཞེས་གཙུག་ལག་ཁང་དུ་བཞུགས་སོ། །ལྷག་མ་བཞི་པོ་བསོད་སྙོམས་ལ་སོང་ངོ་། །གནས་བརྟན་བརླངས་པས་ཉི་མ་ཕྱེད་ཀྱི་ནང་དུ་རྒྱུན་དུ་ཞུགས་པའི་
འབྲས་བུ་ཐོབ་བོ། །འདི་ལྟ་བུའི་ཐབས་ཉིད་ཀྱིས་སླར་ཡང་ཉི་མ་ཕྱི་མ་ལ་གནས་བརྟན་བཟང་ལྡན་དང་། སླར་ཡང་ཉི་མ་ཕྱི་མ་ལ་གནས་བརྟན་མིང་ཅན་དང་། སླར་ཡང་ཉི་མ་ཕྱི་མ་ལ་གནས་བརྟན་རྟ་ཐུལ་རྣམས་དེ་
ཐམས་ཅད་ཀྱིས་རྒྱུན་དུ་ཞུགས་པའི་འབྲས་བུ་ཐོབ་པར་བྱས་ནས་ཚེས་ཉི་ཤུ་ལ་དགེ་སློང་ལྔ་པོ་འདུས་པ་ལ་བདག་མེད་པའི་མཚན་ཉིད་ཀྱི་མདོ་སྡེ་རྣམས་བཤད་དོ། །བཤད་པའི་མཐར་གནས་བརྟན་ལྔ་སྡེས་དགྲ་བཅོམ་པའི་
འབྲས་བུ་ཐོབ་བོ། །དེ་ནས་སྟོན་པས་རིགས་ཀྱི་བུ་གྲགས་པ་ཉེ་བར་མི་རྟེན་པར་གཟིགས་ནས། དེའི་མཚན་མོའི་ཆར་སྡུག་བསྔལ་བའི་སེམས་ཀྱིས་ཁྱིམ་སྤངས་ནས་འཐོན་པ་ལ་གྲགས་པ་འདིར་ཤོག་ཅེས་བོས་ནས་མཚན་མོ་དེ་ཉིད་
39-1-239a


ཀྱི་ཆ་ལ་རྒྱུན་དུ་ཞུགས་པའི་འབྲས་བུ་དང་སླར་ཡང་ཉི་མ་གཉིས་པ་ལ་དགྲ་བཅོམ་པའི་འབྲས་བུ་གྲུབ་པར་བྱེད་དོ། །གཞན་ཡང་སླར་དེའི་གྲོགས་པོ་ལྔ་བཅུ་རྩ་བཞིས་རབ་ཏུ་བྱུང་ཞིང་དགེ་སློང་དུ་གྱུར་ནས་དགྲ་བཅོམ་པ་བྱེད་དོ། །
འདི་ལྟར་འཇིག་རྟེན་དུ་དགྲ་བཅོམ་པ་དྲུག་བཅུ་རྩ་གཅིག་ཏུ་གྱུར་ཏོ། །སྟོན་པས་དབྱར་བཞུགས་ནས་དགག་དབྱེ་བྱས་ཏེ་དགེ་སློང་དྲུག་བཅུ་པོ་རྣམས་ཕྱོགས་ཕྱོགས་སུ་བཏང་ནས། རང་ཉིད་སྟེང་རྒྱས་སུ་གཤེགས་པའི་བར་གྱི་
ལམ་ན་རས་བལ་ཅན་གྱི་ཚལ་ནི་དཔག་ཚད་བཅུ་པའོ། །གཞོན་ནུ་བཟང་སྡེ་བརྟུལ་ལོ། །དེ་རྣམས་ལས་ཐམས་ཅད་ཀྱི་མཐའི་ཕྱི་མ་རྒྱུན་དུ་ཞུགས་པར་གྱུར་ལ། ཐོག་མ་ནི་ཕྱིར་མི་འོང་དུ་གྱུར་ཏོ། །དེ་རྣམས་ཀྱང་དགེ་སློང་
གི་གཟུགས་ཀྱིས་རབ་ཏུ་བྱུང་བ་བགྱིས་ནས་ཕྱོགས་ཕྱོགས་སུ་བཏང་སྟེ་སྟེང་རྒྱས་སུ་གཤེགས་སོ། །སྟོང་ཕྲག་ཕྱེད་དང་གསུམ་གྱི་ཆོ་འཕྲུལ་ལྟ་ཞིང་སྟེང་རྒྱས་འོད་སྲུང་ལ་སོགས་པའི་སྤུན་གསུམ་པོ་དང་རལ་པ་ཅན་སྟོང་
ཕྲག་གཅིག་བརྟུལ་བ་དགེ་སློང་གི་གཟུགས་ཀྱིས་རབ་ཏུ་བྱུང་བར་བྱས་ནས་རི་བོ་ག་ཡའི་རྩེ་མོ་ན་སྡོད་པ་རྣམས་ལ་ཉི་མའི་རྣམ་གྲངས་ཀྱི་མདོ་སྡེ་བསྟན་ནས་དགྲ་བཅོམ་པར་བྱས་ཏེ། དེས་དགྲ་བཅོམ་པ་སྟོང་ཕྲག་རྣམས་
འཁོར་དུ་བྱས་ནས་རྒྱལ་པོ་གཟུགས་ཅན་སྙིང་པོ་ལ་ཁས་བླངས་བྱིན་པ་དགྲོལ་བར་བྱ་བའི་དགོངས་པས་རྒྱལ་པོའི་ཁབ་ཀྱི་གྲོང་ཁྱེར་དང་ཉེ་བའི་ཤིང་དངར་གྱི་ཚལ་དུ་བྱོན་ནོ། །སྐྱེད་མོས་ཚལ་སྐྱོང་བ་རྣམས་
ཀྱིས་སྟོན་པ་བྱོན་ནོ་ཞེས་རྒྱལ་པོ་ལ་སྨྲས་སོ། །རྒྱལ་པོས་ཐོས་ཏེ། ཁྲི་ཕྲག་བཅུ་གཉིས་ཀྱི་བྲམ་ཟེ་དང་ཁྱིམ་བདག་འཁོར་དུ་བྱས་ནས་སྟོན་པ་དང་ཉེ་བར་སོང་སྟེ་འཁོར་ལོ་སྣ་ཚོགས་པའི་སྟེང་དུ་གསེར་
གྱི་བླ་རེ་དང་འདྲ་བའི་འོད་ཟེར་ཕྱོགས་ཕྱོགས་སུ་འཕྲོ་ཞིང་བཞུགས་པའི་དེ་བཞིན་གཤེགས་པའི་ཞབས་ལ་མགོ་བོས་ཕྱག་ལེགས་པར་བྱས་ནས་འཁོར་དང་བཅས་པ་ཕྱོགས་གཅིག་ཏུ་འཁོད་དོ། །དེ་ནས་ཡང་བྲམ་ཟེ་རྣམས་དང་ཁྱིམ་བདག་ལ་སོགས་པ་འདི་ལྟ་
39-1-239b


བུའི་སེམས་སུ་གྱུར་ཏེ། འོན་ཀྱང་དགེ་སྦྱོང་ཆེན་པོས་སྟེང་རྒྱས་འོད་སྲུང་གི་རྗེས་སུ་ཚངས་པར་སྤྱོད་པ་སྤྱད་དམ། ཡང་ན་སྟེང་རྒྱས་འོད་སྲུང་གིས་དགེ་སྦྱོང་ཆེན་པོའི་རྗེས་སུ་ཚངས་པར་སྤྱོད་པ་སྤྱད་ཅེས་བསམས་སོ། །བཅོམ་ལྡན་འདས་ཀྱིས་
དེ་རྣམས་ཀྱི་རྟོག་པ་ཐུགས་ཀྱིས་མཁྱེན་ནས་གནས་བརྟན་ལ་ཚིགས་སུ་བཅད་པ་གསུངས་སོ། །སྟེང་རྒྱས་གནས་སུ་གནས་ནས་ཅི་ཞིག་མཐོང་། །སྦྱིན་བསྲེག་འདོར་བའི་རྒྱུ་མཚན་ཅི་ཞིག་སྨྲ། །འོད་སྲུང་འདི་ཡི་དོན་ནི་དྲི་བར་བྱ། །ཁྱོད་ཀྱི་ཇི་
ལྟར་སྦྱིན་སྲེག་སྤོང་བ་ཡིན། །གནས་བརྟན་གྱིས་ཀྱང་བཅོམ་ལྡན་འདས་ཀྱི་དགོངས་པ་ཤེས་ནས། གཟུགས་དང་སྒྲ་དང་དེ་བཞིན་རོ་དང་དྲི། །བུད་མེད་འདོད་པ་ཡང་ནི་མཆོད་སྦྱིན་སྤྱོད། །འདི་རྣམས་དྲི་མ་ལེགས་པར་རྟོགས་བྱས་ནས། །དེ་ཕྱིར་མེ་
ཡི་སྦྱིན་སྲེག་འདི་སྤངས་སོ། །ཚིགས་སུ་བཅད་པ་འདི་བརྗོད་ནས་རང་ཉིད་ཉན་ཐོས་ཀྱི་འདོད་པ་བསལ་བར་བྱ་བའི་ཕྱིར་དེ་བཞིན་གཤེགས་པའི་ཞབས་ཀྱི་བོལ་དུ་མགོ་བོས་རེག་ནས། བདག་སྟོན་པ་བཙུན་པ་བཅོམ་ལྡན་འདས་ཀྱི་ཉན་
ཐོས་ཡིན་ནོ་ཞེས་སྨྲས་སོ། །ཤིང་ཏཱ་ལ་གཅིག་དང་ཤིང་ཏཱ་ལ་གཉིས་དང་ཤིང་ཏཱ་ལ་གསུམ་དང་ཇི་སྲིད་དུ་ཤིང་ཏཱ་ལ་བདུན་ཙམ་དུ་ནམ་མཁའ་ལ་འཕགས་ནས་བབས་ཏེ་དེ་བཞིན་གཤེགས་པ་ལ་ཕྱག་བྱས་ནས་ཕྱོགས་
གཅིག་ཏུ་འཁོད་དོ། །དེའི་ཆོ་འཕྲུལ་ལྟ་ཞིང་མི་མང་པོ་རྣམས་ཀྱིས་ཨེ་མ་ཧོ་སངས་རྒྱས་ཀྱི་མཐུ་ཆེན་པོ་འདི་ལྟ་བུའི་ལྟ་བ་བསྟན་པས། དགྲ་བཅོམ་པ་ཞེས་བྱ་བ་ལ་སེམས་ཤིང་། སྟེང་རྒྱས་འོད་སྲུང་གི་ལྟ་
བའི་དྲ་བ་བཅད་དེ་དེ་བཞིན་གཤེགས་པས་བརྟུལ་ནས་སྟོན་པའི་ཡོན་ཏན་ཉིད་བརྗོད་དོ། །བཅོམ་ལྡན་འདས་ཀྱིས་ཁོ་བོས་འང་དེ་ལྟ་ཁོ་ན་མ་ཡིན་པར་སྟེང་རྒྱས་འོད་སྲུང་བརྟུལ་ལོ། །འདས་པ་ཉིད་དུ་འང་འདི་ངས་བརྟུལ་ལོ་ཞེས་བརྗོད་
ནས་དོན་འདི་འདས་པ་ན་མི་སྦྱིན་ཆེན་པོ་འོད་སྲུང་གི་སྐྱེས་རབས་སུ་བཤད་པའི་བདེན་པ་བཞི་པོ་གསལ་བར་བསྟན་ནོ། །དེའི་མོད་ལ་ཡུལ་མ་ག་དྷའི་རྒྱལ་པོ་འཁོར་ཁྲི་ཕྲག་བཅུ་གཅིག་དང་བཅས་པས་རྒྱུན་དུ་ཞུགས་པའི་འབྲས་བུ་ཐོབ་བོ། །ཁྲི་ཕྲག་
39-1-240a


གཅིག་དགེ་བསྙེན་དུ་གྱུར་ཏོ། །རྒྱལ་པོ་སྟོན་པ་དང་ཉེ་བ་ཉིད་དུ་འདུག་སྟེ་བསླབ་པའི་གཞི་ལྔ་སོ་སོར་རབ་ཏུ་ཐོས་ནས་སྐྱབས་སུ་སོང་སྟེ་སང་གི་གདུགས་ཚོད་ལ་མགྲོན་དུ་གཉེར་ནས། སྟན་ལས་ལངས་ཏེ་བཅོམ་ལྡན་འདས་ལ་བསྐོར་བ་བྱས་ནས་
སོང་ངོ་། །སླར་ཡང་སང་གི་སྔ་དྲོ་ཉིད་བཅོམ་ལྡན་འདས་མཐོང་བ་དང་མ་མཐོང་བ་རྒྱལ་པོའི་ཁབ་ན་གནས་པ་རྣམས་ཀྱིས་བྱེ་བ་ཕྲག་བཅོ་བརྒྱད་ཀྱི་གྲངས་ཀྱི་མི་རྣམས་དེ་བཞིན་གཤེགས་པ་བལྟ་བར་འདོད་པས་སྔ་དྲོ་ཉིད་རྒྱལ་པོའི་ཁབ་ནས་ཤིང་
དངར་གྱི་ཚལ་དུ་སོང་སྟེ་རྒྱང་གྲགས་བཅུ་གཉིས་སུ་མི་ཤོང་བར་ཤིང་དངར་གྱི་ཚལ་ཐམས་ཅད་རྒྱུན་མི་འཆད་པར་གྱུར་ཏོ། །མི་ཐམས་ཅད་ཀྱིས་སྟོབས་བཅུ་པའི་གཟུགས་མཆོག་ཐོབ་པར་འདོད་པ་བདག་ཉིད་ཀྱི་སྐུ་ལ་བལྟ་བས་
ཚིམ་པར་མ་ནུས་སོ། །འདི་ལྟ་བུའི་ས་གཞིའི་ཁ་དོག་ཡིན་ནོ། །འདི་ལྟ་བུའི་གཟུགས་ཀྱི་གནས་སུ་དེ་བཞིན་གཤེགས་པའི་མཚན་དང་དཔེ་བྱད་བཟང་པོ་ལ་སོགས་པའི་རབ་ཏུ་བྱེད་པ་ཐམས་ཅད་ཀྱང་གཟུགས་ཀྱི་སྐུ་དཔལ་གྱིས་བསྔགས་པར་བྱ་བར་
འོས་སོ། །འདི་ལྟར་གཟུགས་མཆོག་ཐོབ་པའི་སྟོབས་བཅུ་པའི་སྐུ་བལྟ་བའི་ཕྱིར་མི་མང་པོ་རྒྱུན་མི་འཆད་དོ། །སྐྱེད་མོས་ཚལ་དང་ལམ་དུ་དགེ་སློང་གཅིག་གིས་ཀྱང་ཕྱི་རུ་འཐོན་པའི་སྐབས་མེད་དོ། །ཉི་མ་དེའི་དུས་ན་བཅོམ་ལྡན་འདས་ཀྱི་གདུགས་ཚོད་ཡོལ་
བ་ལྟ་བུར་གྱུར་ཏོ། །དེ་མ་ཐག་པར་བརྒྱ་བྱིན་སྡོད་པའི་སྟན་དྲོ་བའི་རྣམ་པར་མཐོང་སྟེ་དེས་རྣམ་པར་བརྟགས་སོ། །དེའི་རྒྱུ་མཚན་ཤེས་ནས་བྲམ་ཟེའི་ཁྱེའུའི་གཟུགས་སུ་མངོན་པར་སྤྲུལ་ཏེ། སངས་རྒྱས་དང་ཆོས་དང་དགེ་འདུན་སོ་སོ་ལ་ཇི་ལྟར་རིགས་
པའི་བསྟོད་པ་རྗོད་པར་བྱེད་དོ། །སྟོབས་བཅུ་པའི་སྔུན་དུ་ཆས་ནས་ལྷའི་མཐུ་ཡིས་ལམ་ཐོབ་པར་བྱས་སོ། །འདུལ་ཞིང་འདུལ་བའི་གྲོགས་སྔོན་བཅས། །བྲམ་ཟེ་རྣམ་གྲོལ་རལ་པ་དང་། །སེང་གེའི་གཟུགས་ཀྱིས་འཐོན་ནས་ནི། །བཅོམ་
ལྡན་རྒྱལ་པོའི་ཁབ་ནང་བྱོན། །གྲོལ་ཞིང་གྲོལ་བའི་གྲོགས་སྔོན་བཅས། །བྲམ་ཟེ་རྣམ་གྲོལ་རལ་པ་དང་། །སེང་གེའི་གཟུགས་ཀྱིས་འཐོན་ནས་ནི། །བཅོམ་ལྡན་རྒྱལ་པོའི་ཁབ་ནང་བྱོན། །བསྒྲལ་ཞིང་བསྒྲལ་བའི་གྲོགས་སྔོན་བཅས། །
39-1-240b


བྲམ་ཟེ་རྣམ་གྲོལ་རལ་པ་དང་། །སེང་གེའི་གཟུགས་ཀྱིས་འཐོན་ནས་ནི། །རྒྱལ་པོའི་ཁབ་ནང་བཅོམ་ལྡན་བྱོན། །བཅུ་པོ་གསུང་བའི་སྟོབས་བཅུ་པ། །ཆོས་བཅུ་ལ་མཁས་བཅུ་ལ་གནས། །སྟོང་ཕྲག་བཅུ་ཡི་འཁོར་དང་ལྡན། །བཅོམ་ལྡན་
རྒྱལ་པོའི་ཁབ་ནང་བྱོན། །ཚིགས་སུ་བཅད་པ་འདིས་ནི་སྟོན་པ་ལ་བསྔགས་པས་བསྟོད་ཅིང་སྔུན་དུ་འགྲོ་བའི་མི་རྣམས་ཀྱིས་བྲམ་ཟེའི་ཁྱེའུའི་གཟུགས་ཀྱི་དཔལ་མཐོང་ནས་བྲམ་ཟེའི་ཁྱེའུ་འདི་ཤིན་དུ་གཟུགས་བཟང་བའོ། །སླར་ཡང་
སྔར་མཐོང་བ་མེད་དོ་ཞེས་བསམས་ནས་བྲམ་ཟེའི་ཁྱེའུ་འདི་གང་ན་གནས་པ་ཡིན། གང་ཞིག་གི་ཡིན་ཞེས་སྨྲས་སོ། །དེ་ཐོས་ནས་བྲམ་ཟེའི་ཁྱེའུས་སྨྲས་པ། གང་ཞིག་བསྟན་པ་ཐམས་ཅད་འདུལ། །གང་ཟག་ཟླ་མེད་སངས་རྒྱས་ཏེ། །དགྲ་
བཅོམ་བདེ་གཤེགས་འཇིག་རྟེན་དུ། །དེ་ནི་བདག་གི་ཉེ་བར་གནས། །ཚིགས་སུ་བཅད་པ་བརྗོད་དེ་སྟོན་པས་བརྒྱ་བྱིན་གྱིས་སྐབས་ཕྱེ་བའི་ལམ་དུ་དགེ་སློང་སྟོང་ཕྲག་གཅིག་འཁོར་དུ་བྱས་ནས་རྒྱལ་པོའི་ཁབ་ཀྱི་ནང་དུ་གཤེགས་
སོ། །རྒྱལ་པོས་སངས་རྒྱས་ལ་སོགས་པའི་དགེ་འདུན་ལ་སྦྱིན་པ་ཆེན་པོ་ཕུལ་ལོ། །བཙུན་པ་བདག་དཀོན་མཆོག་གསུམ་སྤངས་ནས་སྡོད་པར་མི་ནུས་སོ། །དུས་དང་དུས་མ་ཡིན་པར་བཅོམ་ལྡན་
འདས་དང་ཉེ་བར་འོང་བར་འདོད་དོ། །ཤིང་དངར་ཅན་གྱི་སྐྱེད་མོས་ཚལ་ཤིན་དུ་ཐག་རིང་ངོ་། །སླར་ཡང་བདག་ཅག་གི་འོད་མའི་ཚལ་ཞེས་བྱ་བ་འདི་ཤིན་དུ་ཉེ་བས་
གཤེགས་པ་དང་། འོང་བ་ཤིན་དུ་ཉེ་བས་སངས་རྒྱས་ལ་འོས་པའི་གནས་ལགས་པས་བཞེས་པར་ཞུ། དེས་གསེར་གྱི་རིལ་བ་སྤྱི་བླུགས་ལ་མེ་ཏོག་
གི་དྲིས་བསྒོས་ཏེ། ནོར་བུའི་ཁ་དོག་ཅན་གྱི་ཆུ་བླངས་ནས་འོད་མའི་ཚལ་ཡོངས་སུ་གཏོང་ཞིང་སྟོབས་བཅུ་པའི་ཕྱག་ཏུ་ཆུ་བསྒྲེངས་ནས་དེར་ཀུན་དགའ་ར་བ་བཞེས་ནས་སངས་རྒྱས་ཀྱི་བསྟན་པའི་གཞི་
39-1-241a


ཞེས་བརྗོད་ཅིང་ས་གཞི་ཆེན་པོ་གཡོས་སོ། །འཛམ་བུའི་གླིང་གི་ནང་ནས་འོད་མའི་ཚལ་སྤངས་པའི་ས་གཞི་གཡོས་པ་འདི་བཞེས་ཏེ་སྡེ་གཞན་ནི་མེད་དོ། །སི་གྷ་གླིང་གི་གཙུག་ལག་ཁང་ཆེན་པོ་སྤངས་ནས་ས་གཞི་ཆེན་པོ་གཡོས་
པ་འདི་བཞེས་ཏེ། སྡེ་གཞན་ནི་མེད་དོ། །སྟོན་པས་འོད་མའི་ཚལ་གྱི་ཀུན་དགའ་ར་བ་བཞེས་ནས་རྒྱལ་པོ་ལ་རྗེས་སུ་ཡི་རང་བར་མཛད་ཅིང་སྟན་ལས་བཞེངས་ཏེ། དགེ་སློང་གི་དགེ་འདུན་འཁོར་དུ་བྱས་ནས་འོད་མའི་ཚལ་དུ་བྱོན་ནོ། །དེའི་
ཚེ་དེའི་དུས་ན་ཤཱ་རིའི་བུ་དང་། །མཽད་གལ་གྱི་བུ་ཀུན་དུ་རྒྱུ་གཉིས་པོ་རྒྱལ་པོའི་ཁབ་ལ་བརྟེན་ནས་གནས་ཤིང་བདུད་རྩི་ཚོལ་བར་སེམས་སོ། །དེའི་ནང་ནས་ཤཱ་རིའི་བུས་གནས་བརྟན་རྟ་ཐུལ་བསོད་སྙོམས་ལ་ཞུགས་པ་མཐོང་བས་སེམས་
རབ་ཏུ་དངས་པར་གྱུར་ཏེ་བཟའ་བ་བྱིན་ནས་ཆོས་རྣམས་གང་དག་རྒྱུ་ལས་བྱུང་བ་དང་ཞེས་པའི་ཚིགས་བཅད་ཐོས་པས་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་ཏོ། །རང་གི་གྲོགས་པོ་ཀུན་དུ་རྒྱུ་མཽད་གལ་ལ་ཡང་ཚིགས་སུ་བཅད་
པ་དེ་ཉིད་སྨྲས་སོ། །དེས་ཀྱང་རྒྱུན་དུ་ཞུགས་པའི་འབྲས་བུ་ཐོབ་པོ། །དེ་གཉིས་ཀྱིས་ཀྱང་རང་ཉིད་རྒྱལ་བ་ལ་བལྟས་ནས་རང་གི་འཁོར་དང་བཅས་པ་སྟོན་པའི་དྲུང་དུ་རབ་ཏུ་བྱུང་ངོ་། །དེ་རྣམས་ལས་མཽད་གལ་གྱི་བུ་ཆེན་པོ་ཞག་བདུན་
ནས་དགྲ་བཅོམ་པ་ཐོབ་པོ། །གནས་བརྟན་ཤཱ་རིའི་བུས་ཟླ་བ་ཕྱེད་ནས་དགྲ་བཅོམ་པ་ཐོབ་སྟེ་དེ་གཉིས་པོ་ཡང་སྟོན་པའི་ཉན་ཐོས་ཀྱི་མཆོག་ཏུ་གནས་པར་གཟུང་ངོ་། །གནས་བརྟན་ཤཱ་རིའི་བུས་དགྲ་བཅོམ་པ་ཐོབ་པའི་ཉིན་མོ་
ཉིད་བཅོམ་ལྡན་འདས་ཀྱི་ཉན་ཐོས་ཀྱི་འདུས་པ་དང་པོར་བྱས་སོ། །སླར་ཡང་དེ་བཞིན་གཤེགས་པས་འོད་མའི་ཚལ་དེ་ཉིད་དུ་བཞུགས་སོ། །དེའི་ཚེ་རྒྱལ་པོ་ཆེན་པོ་ཟས་གཙང་གིས་བདག་གི་སྲས་ལོ་དྲུག་ཏུ་དཀའ་བ་སྤྱད་
ནས་མཆོག་གི་ཡང་དག་པར་རྫོགས་པའི་བྱང་ཆུབ་སྟེ། ཆོས་ཀྱི་འཁོར་ལོ་བསྐོར་ནས་རྒྱལ་པོའི་ཁབ་ཀྱི་འོད་མའི་ཚལ་དུ་བཞུགས་སོ་ཞེས་པ་ཐོས་ནས་བློན་པོ་ཕན་ཚུན་རྣམས་བོས་ཏེ་འདིར་ཤོག་ཅིག་སྐྱེས་བུ་སྟོང་ཕྲག་གཅིག་གིས་
39-1-241b


འཁོར་ཁྲིད་དེ་རྒྱལ་པོའི་ཁབ་ཏུ་སོང་ལ་ངའི་ཚིག་གིས་ཁྱེད་ཀྱི་ཡབ་རྒྱལ་པོ་ཟས་གཙང་ཁྱེད་བལྟ་བར་འདོད་ཅེས་བརྗོད་པས་བདག་གི་སྲས་ཁྲིད་ལ་ཤོག་ཅེས་སྨྲས་སོ། །བློན་པོས་ཀྱང་ལྷ་དེ་བཞིན་དུ་བགྱིའོ་ཞེས་རྒྱལ་པོའི་
གསུང་སྤྱི་བོས་བླངས་ནས་སྐྱེས་བུ་སྟོང་ཕྲག་གཅིག་གི་འཁོར་དེ་ཁྲིད་དེ་མྱུར་བ་ཉིད་དུ་དཔག་ཚད་དྲུག་བཅུའི་ལམ་དུ་སོང་ནས་སྟོབས་པ་འཁོར་བཞིའི་ནང་དུ་བཞུགས་ནས་ཆོས་སྟོན་པའི་དུས་སུ་གཙུག་ལག་ཁང་དུ་ཞུགས་སོ། །
དེ་རྒྱལ་པོས་བཏང་བའི་དོན་རེ་ཞིག་བཞག་ནས་འཁོར་ཐམས་ཅད་ཀྱི་མཐར་འཁོད་དེ་སྟོན་པའི་ཆོས་བསྟན་པ་ཐོས་ནས་ཇི་ལྟར་འཁོད་པ་ཉིད་བཞིན་དུ་སྐྱེས་བུ་སྟོང་ཕྲག་གཅིག་དང་ལྷན་ཅིག་ཏུ་དགྲ་བཅོམ་པ་ཐོབ་ནས་རབ་ཏུ་
འབྱུང་བར་ཞུགས་སོ། །བཅོམ་ལྡན་འདས་ཀྱིས་བཙུན་པ་རྣམས་འདིར་ཤོག་ཅིག་ཅེས་ཕྱག་བརྐྱང་ངོ་། །ཐམས་ཅད་དེ་ཉིད་དུ་རྫུ་འཕྲུལ་ལས་བྱུང་བའི་ལྷུང་བཟེད་དང་ཆོས་གོས་གསུམ་བཟུང་ནས། ལོ་བརྒྱ་ལོན་
པའི་གནས་བརྟན་ལྟ་བུར་གྱུར་ཏོ། །དགྲ་བཅོམ་པ་ཐོབ་པའི་དུས་ནས་བཟུང་སྟེ། སླར་ཡང་འཕགས་པ་ཞེས་བྱ་བ་རེ་ཞིག་བར་མར་གནས་པར་གྱུར་ཏོ། །རྒྱལ་པོས་བཏང་བའི་སྤྲིང་ཡིག་སྟོབས་བཅུ་པ་ལ་
མ་བརྗོད་དོ། །རྒྱལ་པོས་གཏང་བའི་མི་རྣམས་ལས་གཅིག་ཀྱང་མ་བྱུང་ཞིང་སྤྲིང་ཡིག་ཀྱང་མ་ཐོས་སོ། །འདིར་ཤོག་ལ་ཁྱེད་སོང་ཅིག་དང་དེ་ལྟ་བུའི་ངེས་པས་བློན་པོ་གཞན་གཅིག་བཏང་ངོ་། །དེས་སོང་ནས་ཡང་
སྔར་བཞིན་དུ་འཁོར་དང་བཅས་པ་དགྲ་བཅོམ་པ་ཐོབ་ནས་ཅང་མི་གསུང་བར་གནས་སོ། །རྒྱལ་པོས་དེ་ལྟ་བུར་ངེས་པས་སྐྱེས་བུ་སྟོང་ཕྲག་རེ་རེའི་འཁོར་དང་བཅས་པའི་བློན་པོ་དགུ་བཏང་ངོ་། །ཐམས་ཅད་རང་
གི་དོན་རྫོགས་པར་བྱས་ནས་ཅང་མི་སྨྲ་བར་གྱུར་ཏེ་དེ་ཉིད་དུ་གནས་སོ། །རྒྱལ་པོས་སྤྲིང་ཡིག་ཙམ་གྱི་ལོ་རྒྱུས་ཀྱང་མ་ཐོབ་པོ་ཞེས་བསམས་ནས་མི་འདི་རྣམས་ང་ལ་མི་དགའ་བའི་རྒྱུ་མཚན་གྱིས་སྤྲིང་ཡིག་ཙམ་གྱི་ལོ་རྒྱུས་
39-1-242a


ཀྱང་མི་བརྗོད་དོ། །སུ་ཞིག་ངའི་ཚིག་བཞིན་བྱེད་པར་སེམས། རྒྱལ་པོས་མི་ཐམས་ཅད་ལ་བརྟགས་པས་ནག་པོ་འཆར་ཀ་མཐོང་ངོ་། །དེ་ཡང་རྒྱལ་པོའི་དོན་ཐམས་ཅད་སྒྲུབ་པར་བྱེད་པའི་བློན་པོ་ཡིན་ནོ་ནང་མི་ཡིན་
ནོ། །ཤིན་དུ་ཐུགས་ཆེས་པ་ཡིན་ནོ། །དེ་བཞིན་གཤེགས་པ་དང་ལྷན་ཅིག་ལ་ཉིན་གཅིག་ཏུ་སྐྱེས་པ་ཡིན་ནོ། །དེ་དང་ལྷན་ཅིག་ཏུ་བརྩེ་བའི་གྲོགས་པོ་ཡིན་ནོ། །དེ་ནས་བློན་པོ་རྒྱལ་པོས་བོས་ཏེ། བུ་ནག་པོ་
འཆར་ཀ་བདག་གི་སྲས་བལྟ་བར་འདོད་པས་སྐྱེས་བུ་སྟོང་ཕྲག་དགུ་བཏང་སྟེ་མི་གཅིག་ཀྱང་མ་འོངས་ནས་སྤྲིང་ཡིག་ཙམ་གྱི་ལོ་རྒྱུས་ཅི་ཡང་མ་བྱུང་། སླར་ཡང་ཐམས་ཅད་ནད་ཀྱིས་ཐེབས་པ་ཡིན་ནམ་ཚེའི་བར་ཆད་དུ་གྱུར་པ་ཡིན་
ནམ། བདག་འཚོ་བ་ཉིད་ཀྱི་བར་དུ་སྲས་པོ་བལྟ་བར་འདོད་དེ་བདག་གི་བུ་བལྟ་བར་ནུས་སམ་ཞེས་སྨྲས་སོ། །ལྷ་ནུས་ལགས་སོ། །གལ་ཏེ་རབ་ཏུ་ཕྱུང་ཡང་བལྟ་བར་ནུས་སོ། །བུ་ཁྱོད་རབ་ཏུ་བྱུང་བའམ་མ་བྱུང་ཡང་། 
ང་སྲས་པོ་བལྟའོ་ཞེས་སྨྲས་སོ། །དེས་ལྷ་ལེགས་སོ་ཞེས་རྒྱལ་པོའི་གསུང་བླངས་ནས་རྒྱལ་པོའི་ཁབ་ཏུ་སོང་སྟེ། སྟོན་པ་ཆོས་སྟོན་པའི་དུས་སུ་འཁོར་རྣམས་ཀྱི་མཐར་འཁོད་དེ་ཆོས་ཐོས་ནས་འཁོར་དང་བཅས་པ་དགྲ་བཅོམ་
པའི་འབྲས་བུ་ཐོབ་པར་གྱུར་ཏེ་དགེ་སློང་གི་དངོས་པོར་སོ་སོར་གནས་སོ། །སྟོན་པ་སངས་རྒྱས་སུ་གྱུར་ནས་དང་པོའི་ལོ་ལ་དྲང་སྲོང་ལྷུང་བའི་གནས་སུ་དབྱར་བཞུགས་ཏེ། དགག་དབྱེ་བྱས་ནས་སྟེང་རྒྱས་སུ་གཤེགས་ཤིང་
དེར་ཟླ་བ་གསུམ་བཞུགས་ཏེ། རལ་བ་ཅན་སྤུན་རྣམས་བརྟུལ་ནས་དགེ་སློང་སྟོང་ཕྲག་གཅིག་གི་འཁོར་དང་བཅས་པ་དགུན་ཟླ་འབྲིང་པོའི་ཉ་ལ་རྒྱལ་པོའི་ཁབ་དུ་གཤེགས་ནས་ཟླ་བ་གཉིས་བཞུགས་སོ། །དེ་རྣམས་ནི་གྲོང་ཁྱེར་
བཱ་རཱ་ཎ་སཱི་ནས་འོངས་པའི་བར་ཏེ། ཟླ་བ་ལྔ་སོང་ཞིང་དགུན་གྱི་དུས་ཐམས་ཅད་འདས་སོ། །གནས་བརྟན་འཆར་ཀ་འོངས་ནས་ཞག་བདུན་དང་བརྒྱད་སོང་ངོ་། །དེས་དཔྱིད་ཟླ་ར་བའི་ཉ་ལ་བསམས་པ། དགུན་གྱི་དུས་
39-1-242b


འདས་ནས་དཔྱིད་ཀའི་དུས་སུ་སླེབ་པ་དང་། མི་རྣམས་ཀྱིས་འབྲུ་རྣམས་བླངས་ཏེ། ཕྱོགས་ཕྱོགས་ནས་ལམ་དུ་བྱུང་བས་རྩྭ་རྣམས་ལྗང་གུར་གྱུར་ཏོ། །ས་གཞི་དང་ནགས་ཚལ་གྱི་ཤིང་ལ་སོགས་པ་མེ་ཏོག་ཤིན་དུ་མང་བ་
ཁ་བྱེ་བ་ནི་ལམ་དུ་འགྲོ་བའི་དུས་སོ། །སྟོབས་བཅུ་པའི་ཉེ་དུ་དང་ཕྲད་པར་བྱེད་པའི་ལམ་དུ་འགྲོ་བའི་དུས་ཡིན་ནོ། །དེ་ནས་བཅོམ་ལྡན་འདས་ཀྱི་དྲུང་དུ་ཉེ་བར་སོང་ནས། བཙུན་པ་ལྗོན་ཤིང་དེ་ནི་ལྗང་གུར་གྱུར། །ཤིང་གི་ལོ་མ་
ས་ལ་དུད་པ་དང་། །དེ་རྣམས་བར་ནས་འོད་ཟེར་འགྱེད་པ་ཡིན། །དཔའ་བོ་ཆེན་པོ་གཉེན་གནས་གཤེགས་པའི་དུས། །ཧ་ཅང་མི་དྲོ་མི་གྲང་ཞིང་། །མུ་གེ་དང་ནི་བཀྲེས་པ་མེད། །ས་སྟེང་ཤིང་རྣམས་ལྗང་གུར་གྱུར། །ཐུབ་པ་ཆེན་
པོ་དུས་འདིར་གྱུར། །ཚིགས་སུ་བཅད་པ་དྲུག་བཅུ་ཙམ་གྱིས་སྟོབས་བཅུ་པ་ལ་རིགས་ཀྱི་གྲོང་ཁྱེར་དུ་གཤེགས་པའི་ཕྱིར་བསྔགས་པར་འོས་པའི་བསྔགས་པ་བརྗོད་པའོ། །དེ་ནས་སྟོན་པ་ལ་འཆར་ཀས་དབྱངས་སྙན་པོས་
གཤེགས་པའི་བསྔགས་པར་འོས་པའི་བསྔགས་པ་གསུངས་སོ། །བཙུན་པ་ཁྱེད་ཀྱི་ཡབ་རྒྱལ་པོ་ཆེན་པོ་ཟས་གཙང་བལྟ་བར་འདོད་པས་ཉེ་དུ་རྣམས་རྗེས་སུ་འཛིན་པར་ཞུ། ལེགས་སོ་འཆར་ཀ་ཉེ་དུ་རྣམས་རྗེས་སུ་གཟུང་བར་བགྱིའོ། །
ཞེས་དགེ་སློང་གི་དགེ་འདུན་ལ་སྨྲོས་ཅིག །གཤེགས་པའི་གནས་ཐམས་ཅད་ལ་བྱི་དོར་གྱིས་ཤིག་ཅེས་སྨྲོས་ཤིག །བཙུན་པས་ལེགས་སོ་ཞེས་གནས་བརྟན་སོང་ནས་སྨྲས་སོ། །བཅོམ་ལྡན་འདས་ཀྱིས་ཡུལ་ཨྃ་གྷ་དང་མ་ག་
དྷ་ན་གནས་པའི་རིགས་ཀྱི་བུ་རྣམས་སྟོང་ཕྲག་བཅུ་དང་བཅས་པ་གྲོང་ཁྱེར་སེར་སྐྱའི་གཞི་ན་གནས་པའི་སྟོང་ཕྲག་བཅུ་པོ་ཐམས་ཅད་ཟག་པ་ཟད་པའི་དགེ་སློང་འཁོར་དུ་བྱས་ནས་རྒྱལ་པོའི་ཁབ་ནས་ཕྱི་རོལ་དུ་འཐོན་ཏེ། ཉི་མ་རེ་རེ་ལ་
དཔག་ཚད་རེ་རེ་བགྲོད་ཅིང་རྒྱལ་པོའི་ཁབ་ནས་དཔག་ཚད་དྲུག་བཅུའི་གྲོང་ཁྱེར་སེར་སྐྱའི་གཞིར་ཟླ་བ་གཉིས་ཀྱིས་སླེབ་པར་དགོངས་ཤིང་བུལ་བ་ཡང་མ་ཡིན་མྱུར་བ་ཡང་མ་ཡིན་པར་འབྲིང་པོར་གཤེགས་སོ། །གནས་བརྟན་གྱིས་ཀྱང་
39-1-243a


བཅོམ་ལྡན་འདས་བྱོན་ནོ་ཞེས་རྒྱལ་པོའི་དྲུང་དུ་སྨྲའོ་ཞེས་བསམས་ནས་ནམ་མཁའ་ལ་སོང་སྟེ་རྒྱལ་པོའི་གནས་སུ་སླེབ་པར་གྱུར་ཏོ། །རྒྱལ་པོས་གནས་བརྟན་གཟིགས་ནས་ཐུགས་ཚིམ་པར་གྱུར་ཏེ། གདན་བཤམས་
པ་ལ་བཞུགས་སུ་བཅུག་གོ། །རང་ལ་བྱེད་པ་བཞིན་བཅོས་ནས་རོ་སྣ་ཚོགས་པའི་བཟའ་བས་ལྷུང་བཟེད་བཀང་ནས་ཕུལ་ལོ། །གནས་བརྟན་ལངས་ནས་འགྲོ་བར་བསམས་པ་དང་། བུ་བཞུགས་ལ་གསོལ་ཅིག །
རྒྱལ་པོ་ཆེན་པོ་སྟོན་པ་དང་ཉེ་བར་སོང་སྟེ་བཟའོ། །སླར་ཡང་བུ་སྟོན་པ་ག་ན་ཡོད། སྟོང་ཕྲག་ཉི་ཤུའི་དགེ་སློང་འཁོར་དུ་བྱས་ནས་རྒྱལ་པོ་ཆེན་པོ་ཉིད་བལྟ་བའི་ཕྱིར་བྱོན་ནོ། །རྒྱལ་པོ་ཐུགས་ཚིམ་པར་གྱུར་ནས་སྨྲས་པ། 
ཁྱེད་འདི་གསོལ་ལ་བདག་གི་སྲས་གྲོང་ཁྱེར་འདིར་མ་བྱོན་གྱི་བར་ལ་འདི་ཉིད་ནས་ལྷུང་བཟེད་དུ་བཟའ་བ་ཁྱེར་ལ་སོང་ཅིག་ཅེས་སྨྲས་སོ། །གནས་བརྟན་གྱིས་རྒྱལ་པོའི་གསུང་མཉན་ཏེ་རྒྱལ་པོས་གནས་བརྟན་གྱི་བཟའ་བ་གསོལ་
ཟིན་པ་དང་ལྷུང་བཟེད་བཀྲུས་ནས། དྲི་བཟང་པོའི་ཕྱེ་མས་བྱུགས་ཏེ་བཟའ་བ་མཆོག་གིས་གང་བར་བྱས་ནས་དེ་བཞིན་གཤེགས་པ་ལ་ཕུལ་ཅིག་ཞེས་སྨྲས་ནས་གནས་བརྟན་གྱི་ལག་པར་བྱིན་ནོ། །གནས་བརྟན་མི་
ཐམས་ཅད་ཀྱིས་མཐོང་བ་དང་ལྷུང་བཟེད་ནམ་མཁའ་ལ་འཕངས་སོ། །རང་ཉིད་ཀྱང་ནམ་མཁའ་ལ་གཤེགས་ནས་བཟའ་བའི་ལྷུང་བཟེད་བཟུང་སྟེ། སྟོན་པའི་ཕྱག་ཏུ་ཕུལ་ནས་སྟོན་པས་ཀྱང་དེར་བཟའ་བ་ལ་ལོངས་སྤྱོད་
དོ། །གནས་བརྟན་ཐབས་འདིའི་ཉི་མ་རེ་རེ་བཞིན་དུ་བཟའ་བ་ཕུལ་ལོ། །སྟོན་པས་ཀྱང་ལམ་གྱི་བར་དུ་རྒྱལ་པོ་ཉིད་ཀྱི་གདུགས་ཚོད་ལ་ལོངས་སྤྱོད་དོ། །གནས་བརྟན་གྱིས་ཀྱང་གདུགས་ཚོད་ལ་ལོངས་སྤྱོད་པའི་
མཐར་ཉི་མ་རེ་རེ་བཞིན་དུ་དེ་རིང་འདི་ཙམ་ནས་བཅོམ་ལྡན་འདས་བྱོན་ནོ། །དེ་རིང་འདི་ཙམ་དུ་བཅོམ་ལྡན་འདས་བྱོན་ཞེས་པ་དང་། སངས་རྒྱས་ཀྱི་ཡོན་ཏན་ཡང་དག་པར་ལྡན་པ་ཉིད་བརྗོད་ཅིང་རྒྱལ་རིས་ཐམས་ཅད་སྟོན་པ་མ་མཐོང་
39-1-243b


བ་ཉིད་ཀྱིས་སྟོན་པའི་དྲུང་དུ་རང་ཉིད་ཀྱི་སེམས་དངས་པར་མཛད་དོ། །དེའི་རྒྱུ་མཚན་གྱིས་གནས་བརྟན་ལ་བཅོམ་ལྡན་འདས་ཀྱིས་དགེ་སློང་དག་བདག་གི་ཉན་ཐོས་ཀྱི་ནང་ནས་རིགས་དད་པར་བྱེད་པ་རྣམས་ཀྱི་མཆོག་ཡིན་གང་ན་འདི་ནི་
འཆར་ཀ་ཞེས་པའོ། །འདི་མཆོག་ཏུ་བཟུང་བས་ཤཱཀྱ་བ་རྣམས་ཀྱིས་ཀྱང་བཅོམ་ལྡན་འདས་རྗེས་སུ་བྱོན་པའི་སྔུན་ལ་བདག་ཅག་གི་ཉེ་དུའི་གཙོ་བོ་བལྟའོ་ཞེས་འདུས་ནས་བཅོམ་ལྡན་འདས་བཞུགས་པའི་གནས་རྟོག་ཅིང་ཤཱཀྱ་ནྱ་གྲོ་དྷའི་
ཀུན་དགའ་ར་བ་ཡིད་དུ་འོང་བ་སྟ་གོན་བྱས་སོ། །དེར་ཐམས་ཅད་ཉེར་བསྡོགས་བྱས་ནས་སྤོས་དང་མེ་ཏོག་སོ་སོ་ལག་ཏུ་ཐོགས་ཏེ། བསུ་བ་བྱེད་ཅིང་རྒྱན་ཐམས་ཅད་ཀྱིས་སོ་སོར་བརྒྱན་ནས་གཞོན་ནུ་དང་གཞོན་ནུ་མ་གྲོང་ཁྱེར་གྱི་ཁྱེའུ་དང་བུ་མོ་
སྔར་དང་པོར་བཏང་བ་རྣམས་དང་། དེ་ནས་རྒྱལ་པོའི་གཞོན་ནུ་དང་གཞོན་ནུ་མ་དག་དེ་རྣམས་ཀྱི་བར་རང་རང་གིས་སྤོས་དང་མེ་ཏོག་དང་ཕྱེ་མ་ལ་སྩོགས་པས་མཆོད་པ་བྱེད་ཅིང་། བཅོམ་ལྡན་འདས་ཀྱིས་བཞེས་ནས་ནྱ་གྲོ་དྷའི་ཀུན་དགའ་ར་བ་
ཉིད་དུ་བྱོན་ནོ། །དེར་བཅོམ་ལྡན་འདས་ཀྱིས་སྟོང་ཕྲག་ཉི་ཤུའི་ཟག་པ་ཟད་པའི་དགེ་སློང་འཁོར་དུ་བྱས་ནས་གདན་བཤམས་པ་མཆོག་ལ་སངས་རྒྱས་བཞུགས་སོ། །ཤཱཀྱའི་རིགས་ནི་ང་རྒྱལ་དང་ལྡན་པ་ཡིན། སེམས་རྩུབ་པ་
ཡིན་པས་འདི་ནི་དོན་གྲུབ་གཞོན་ནུ་ངེད་དང་ལྷན་ཅིག་གཞོན་ནུ་ཡིན་ནོ། །ངེད་ནི་ཕུ་བོ་ཡིན་ནོ། །འདི་ནི་སྲིང་མོའི་བུ་ཡིན་ནོ། །འདི་ནི་ཚ་བོ་ཡིན་ནོ་ཞེས་བསམས་ནས་ཁྱེའུ་དང་རྒྱལ་པོའི་གཞོན་ནུ་ཞེས་སྨྲས་ཏེ། ཁྱེད་ཀྱི་ཕྱག་གིས་བདག་
ཁྱེད་ཀྱི་རྒྱབ་ཏུ་སྡོད་དོ་ཞེས་བསམས་སོ། །དེ་རྣམས་དེ་བཞིན་དུ་གནས་ནས། བཅོམ་ལྡན་འདས་ཀྱིས་དེ་རྣམས་ཀྱི་བསམ་པ་གཟིགས་ནས་གཉེན་རྣམས་བདག་ལ་ཕྱག་མི་བྱེད་པར་འདོད་ཀྱང་ད་ལྟ་ཕྱག་བྱེད་དུ་གཞུག་དགོས་ཏེ། མངོན་
པར་ཤེས་པའི་གཞི་དང་ཡེ་ཤེས་དང་བསམ་གཏན་དང་སྙོམས་པར་འཇུག་པ་བསྐྱེད་དགོས་སོ་སྙམ་སྟེ། བཞེངས་ནས་ནམ་མཁའ་ལ་གཤེགས་སོ། །དེ་རྣམས་ཀྱི་མགོ་ལ་ཞབས་ཀྱི་རྡུལ་ལྷུང་བ་བཞིན་དུ་ཨ་སྨྲ་བསྲུང་བའི་ཨ་
39-1-244a


སྨྲའི་ཤིང་གི་དྲུང་དུ་སོ་སོའི་ཆོ་འཕྲུལ་དང་མཚུངས་པར་ཆོ་འཕྲུལ་མཛད་དོ། །རྒྱལ་པོས་དེའི་ཡ་མཚན་ཆེ་བ་མཐོང་ངོ་ཞེས་སྨྲས་སོ། །བཅོམ་ལྡན་འདས་ཁྱེད་འཁྲུངས་པའི་ཉིན་མོ་དཀའ་ཐུབ་པ་ནག་པོ་ལྷ་ལེན་གྱིས་ཕྱག་
བྱེད་ཅིང་ཉེ་བར་གནས་པས་ཁྱེད་ཀྱིས་ཞབས་བསྐྱོད་པ་བྲམ་ཟེའི་སྤྱི་བོ་ལ་ཉེ་བར་གནས་སོ། །དེ་མཐོང་ནས་བདག་གིས་ཀྱང་ཁྱེད་ལ་ཕྱག་བྱས་སོ། །འདི་ནི་བདག་གི་ཕྱག་དང་པོ་ཡིན་ནོ། །བཀྲ་ཤིས་པའི་འབྲུ་འདེབས་པའི་ཉིན་མོ་
འཛམ་བུའི་ཤིང་གི་གྲིབ་མའི་དཔལ་གྱི་མལ་སྟན་ལ་ཁྱེད་བཞུགས་པ་ན་ཤིང་འཛམ་བུའི་གྲིབ་མས་མ་བཏང་བར་མཐོང་བའི་ཚེ་ཡང་ཞབས་ལ་ཕྱག་བྱས་སོ། །འདི་ནི་བདག་གི་ཕྱག་གཉིས་པ་ཡིན་ནོ། །ད་ལྟ་ནི་བདག་གིས་སྔར་མ་མཐོང་
བའི་ཆོ་འཕྲུལ་ཡང་མཐོང་བས་ཁྱེད་ཀྱི་ཞབས་ལ་ཕྱག་བགྱིད་དོ། །འདི་ནི་བདག་གི་ཕྱག་གསུམ་པ་ཡིན་ནོ། །སླར་ཡང་རྒྱལ་པོས་བཅོམ་ལྡན་འདས་ལ་ཕྱག་བྱེད་ཅིང་ཕྱག་བྱེད་པར་མི་ནུས་པའི་ཤཱཀྱའི་རིགས་གཅིག་ཀྱང་མེད་དོ། །ཐམས་
ཅད་ཀྱིས་ཀྱང་ཕྱག་བྱེད་པ་ཉིད་དོ། །དེ་ནས་བཅོམ་ལྡན་འདས་ལ་ཉེ་དུ་རྣམས་ཀྱིས་ཕྱག་བྱེད་ཅིང་ནམ་མཁའ་ལས་བབས་ནས་གདན་བཤམས་པའི་མཆོག་གི་གུང་ལ་བཞུགས་སོ། །བཅོམ་ལྡན་འདས་བཞུགས་ནས་ཉེ་དུ་རྣམས་དང་འདུས་
པར་གྱུར་པ་ལ་ཐམས་ཅད་སེམས་གཅིག་ཏུ་གནས་སོ། །དེ་ནས་སྤྲིན་ཆེན་པོ་ལས་པད་མའི་འདབ་མ་ལ་ཆུ་མི་འཆགས་པ་ལྟ་བུའི་ཆར་འབེབས་སོ། །ཆུ་ཟངས་ཀྱི་མདོག་ཅན་ས་ལ་སྒྲ་སྒྲོགས་ཤིང་འབབ་པོ། འབང་བར་འདོད་པ་རྣམས་
འབང་ངོ་། །འབང་བར་མི་འདོད་པ་རྣམས་མི་འབང་ངོ་། །ཐིགས་པ་ཙམ་ཡང་མི་ལྟུང་ངོ་། །དེ་མཐོང་ནས་ཐམས་ཅད་དུ་ཡ་མཚན་པ་དང་རྨད་དུ་བྱུང་བ་སྐྱེས་སོ། །ཨེ་མ་ཧོ་ངོ་མཚར་ཆེ། ཨེ་མ་ཧོ་རྨད་དུ་བྱུང་ངོ་ཞེས་རྗོད་པར་བྱེད་དོ། །
སྟོན་པས་འདི་ཁོ་ན་མ་ཡིན་གྱི་བདག་གི་ཉེ་དུ་དང་ཕྲད་པ་ན་པད་མའི་འདབ་མ་ལ་ཆུ་མི་འཆགས་པ་ལྟ་བུའི་ཆར་འབེབས་ཤིང་འདས་པའི་དུས་སུའང་ངས་ཕབ་པོ། །འདིའི་དོན་བྱུང་བ་ནི་ཐམས་ཅད་སྒྲོལ་གྱི་སྐྱེས་རབས་སུ་བཤད་དོ། །
39-1-244b


ཆོས་བསྟན་པ་ཐོས་ནས་ཐམས་ཅད་ལངས་ཏེ་ཕྱག་བྱས་ནས་སོང་ངོ་། །གཅིག་གིས་ཀྱང་རྒྱལ་པོ་དང་རྒྱལ་ཚབ་དང་བློན་པོ་རྣམས་སང་བདག་གི་གནས་སུ་བསོད་སྙོམས་ཁྱེར་འོང་ངོ་ཞེས་སྨྲ་བ་སོང་བ་དེ་རྣམས་ལས་གཅིག་ཀྱང་མ་བྱུང་
ངོ་། །སྟོན་པས་སླར་ཉི་མ་གཉིས་པ་ལ་སྟོང་ཕྲག་ཉི་ཤུའི་དགེ་སློང་འཁོར་དུ་བྱས་ནས་གྲོང་ཁྱེར་སེར་སྐྱའི་གཞིར་བསོད་སྙོམས་ལ་བཞུད་དོ། །གང་ཞིག་མགྲོན་དུ་གཉེར་བ་དང་། ལྷུང་བཟེད་ཁྱེར་བ་སུ་ཡང་མེད་དོ། །བཅོམ་
ལྡན་འདས་སྒོ་དྲུང་དྲུ་འཁོད་དེ་རྣམ་པར་བརྟགས་པས་ཇི་ལྟར་སྔོན་གྱི་སངས་རྒྱས་རྣམས་ཀྱི་རིགས་ཀྱི་གྲོང་ཁྱེར་དུ་བྱོན་ནས་བསོད་སྙོམས་མཛད་པ་བཞིན་དུ་གང་ཇི་ལྟར་རིགས་པར་མི་ཆེན་པོའི་ཁྱིམ་དུ་འགྲོ་ཞིང་ཡང་ན་གོ་རིམས་བཞིན་དུ་
བསོད་སྙོམས་སྤྱོད་དོ། །དེ་ནས་སངས་རྒྱས་གཅིག་གིས་ཀྱང་ཇི་ལྟར་རིགས་པར་གཤེགས་པ་མ་མཐོང་བས་བདག་གིས་ཀྱང་ང་ནི་འདིའི་རིགས་སོ། །འདི་སྔོན་གྱི་སངས་རྒྱས་ཀྱི་རིགས་བཞིན་དུ་བདག་གིས་ཀྱང་རིགས་པར་གཟུང་བར་
བྱའོ། །བདག་གི་ཉན་ཐོས་ཀྱང་བདག་ཉིད་བཞིན་རྗེས་སུ་བསློབ་ཅིང་བསོད་སྙོམས་ལ་རྫོགས་པར་བྱོན་ནོ། །འཁོད་པའི་ཁྱིམ་ནས་བཟུང་ནས་གོ་རིམས་བཞིན་དུ་བསོད་སྙོམས་ལ་སྤྱོད་དོ། །འཕགས་པ་གཞོན་ནུ་དོན་གྲུབ་བསོད་
སྙོམས་ལ་གཤེགས་སོ་ཞེས་བརྗོད་དོ། །ཉིས་ཐོག་དང་སུམ་ཐོག་ལ་སྩོགས་པའི་ཁང་བཟངས་རྣམས་སུ་སྟེང་གི་སྒོ་ཆུང་ཕྱེ་ནས་མི་ཐམས་ཅད་བལྟ་བར་གྱུར་ཏེ་ལྷ་མོ་སྒྲ་གཅན་འཛིན་གྱི་ཡུམ་ཡང་འཕགས་པའི་བུ་གྲོང་ཁྱེར་འདི་ཉིད་དུ་
རྒྱལ་པོ་ཆེན་པོའི་མཐུས་གསེར་གྱི་དོ་ལི་ལ་སྩོགས་པ་ལ་ཞོན་ཏེ་དེ་རིང་ནས་སྐྲ་དང་ཁ་སྤུ་བྲེགས་ཤིང་ངུར་སྨྲིག་གི་གོས་གྱོན་ནས་སྣོད་ལག་ཏུ་ཁྱེར་ཏེ། བསོད་སྙོམས་ལ་འགྲོ་བ་མཛེས་སམ་མི་མཛེས་ཞེས་སྟེང་གི་སྒོ་ཆུང་ཕྱེ་ནས་
བལྟའོ། །སྣ་ཚོགས་པའི་འདོད་ཆགས་དང་བྲལ་བ་ཡང་དག་པར་འབར་ཞིང་སྐུ་ལུས་ཀྱི་འོད་ཀྱིས་གྲོང་ཁྱེར་གྱི་སྟེང་ཐམས་ཅད་སྣང་བར་མཛད་དེ། འདོམ་གང་བའི་འོད་ཀུན་ནས་བསྐོར་ཞིང་རབ་ཏུ་གསལ་བ་དཔེ་བྱད་བཟང་པོ་
39-1-245a


བརྒྱད་བཅུ་དང་ལྡན་པ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་བརྒྱན་པ་སངས་རྒྱས་ཀྱི་དཔལ་དཔེ་མེད་པར་རྣམ་པར་གསལ་བ་མཐོང་ངོ་། །གཙུག་ཏོར་ནས་བཟུང་ནས་ཞབས་ཀྱི་མཐིལ་གྱི་བར་དེ་སྲིད་དོ། །
དབུ་སྐྲ་གཡས་འཁྱིལ་འཇམ་གནག་སྣུམ་པ་དང་། དཔྲལ་བ་དྲི་མེད་ཉི་མའི་མཐིལ་བཞིན་ནོ། །སྐུ་དང་འཚམ་པའི་ཤངས་ནི་མཐོ་བ་དང་། །མི་ཡི་སེང་གེ་འོད་ཟེར་གསལ་བར་མཛད། །འདི་ལྟ་བུ་ལ་སྩོགས་པའི་མིའི་སེང་གེ་ལ་ཚིགས་
སུ་བཅད་པས་མངོན་པར་བསྟོད་དོ། །ཁྱེད་ཀྱི་སྲས་པོ་བསོད་སྙོམས་ལ་སྤྱོད་དོ་ཞེས་རྒྱལ་པོ་ལ་སྨྲས་སོ། །རྒྱལ་པོའི་སེམས་སྡུག་བསྔལ་བས་གོས་ནས་བཟུང་སྟེ་མྱུར་ཞིང་མྱུར་བར་ཕྱིར་འཐོན་ཏེ་བཅོམ་ལྡན་འདས་ཀྱི་དྲུང་དུ་འཁོད་ནས་
སྨྲས་པ་ཅི་བཙུན་པ་བདག་ཅག་ངོ་ཚ་བས་ཅིའི་དོན་དུ་བསོད་སྙོམས་མཛད། དགེ་སློང་འདི་རྣམས་ཀྱི་བཟའ་བ་བདག་གིས་སྟེར་བར་མི་ཤེས་བསམས་པ་ཡིན་ནམ་ཅི་ལགས། རྒྱལ་པོ་ཆེན་པོའི་རིགས་ཀྱི་སྤྱོད་པ་ཡིན་ནོ། །བཙུན་པ་
བདག་ཅག་ཤཱཀྱའི་རིགས་ཞེས་བྱ་བའི་རིགས་སོ། །དེ་ལ་རྒྱལ་རིགས་གཅིག་ཀྱང་བསོད་སྙོམས་བྱེད་པའི་མིང་ཙམ་ཡང་མེད་དོ། །རྒྱལ་པོ་ཆེན་པོའི་རིགས་ཞེས་བྱ་བ་ནི་ཁྱོད་ཀྱི་རིགས་འདི་ཡིན་ནོ། །བཀའ་སྩལ་པ། རྒྱལ་པོ་ཆེན་པོ་མི་
དགྱེས་པ་མ་མཛད་ཅིག །སླར་ཡང་བདག་ཅག་གི་མར་མེ་མཛད་དང་ཀཽ་ཊི་ནྱ་དང་འོད་སྲུང་ཞེས་བྱ་བ་འདི་སངས་རྒྱས་ཀྱི་རིགས་ཡིན་ནོ། །འདི་རྣམས་དང་གཞན་སངས་རྒྱས་སྟོང་ཕྲག་དུ་མས་ཀྱང་བསོད་སྙོམས་སྤྱོད་ཅིང་འཚོ་བར་མཛད་ལ། སྲང་གི་
དབུས་སུ་འཁོད་པ་ཉིད་དོ། །བག་མེད་ལྷག་མར་བྱེད་པ་མེད། །ཆོས་ལ་སྤྱོད་ཅིང་ལེགས་པར་སྤྱོད། །ཆོས་ལ་སྤྱད་ན་བདེ་བ་འབྱུང་། །འཇིག་རྟེན་འདི་དང་ཕྱི་མར་བདེ། །ཆོས་ཀྱི་རྐང་པའི་ཚིགས་སུ་བཅད་པ་འདི་བསྟན་ཅིང་བཤད་དོ། །
ཚིགས་སུ་བཅད་པའི་མཐར་རྒྱལ་པོས་རྒྱུན་དུ་ཞུགས་པའི་འབྲས་བུ་ཐོབ་པོ། །ཆོས་སྤྱོད་པ་ནི་ལེགས་པར་སྤྱོད། །ཉེས་པར་སྤྱོད་པ་མི་བྱ་ཞིང་། །ཆོས་སྤྱད་པ་ཡིས་བདེ་བ་འབྱུང་། །འཇིག་རྟེན་འདི་དང་ཕ་རོལ་དུའོ། །སླར་ཡང་ཆོས་ཀྱི་
39-1-245b


རྐང་པའི་ཚིགས་སུ་བཅད་པ་འདི་ཐོས་ནས་ལན་ཅིག་ཕྱིར་འོང་གི་འབྲས་བུ་ཐོབ་པར་གྱུར་ཏོ། །ཆོས་སྐྱོང་བའི་སྐྱེས་རབས་ཐོས་ནས་ཕྱིར་མི་འོང་བའི་འབྲས་བུ་ཐོབ་པར་གྱུར་ཏོ། །འཆི་བའི་དུས་སུ་གདུགས་དཀར་པོའི་འོག་ཏུ་དཔལ་གྱི་
མལ་སྟན་གྱི་སྟེང་དུ་གཟིམས་པ་ཉིད་ན་དགྲ་བཅོམ་པ་ཐོབ་པར་གྱུར་ཏོ། །དགོན་པར་གནས་ནས་དཀའ་ཐུབ་སྤྱོད་པ་རྒྱལ་པོ་ལ་དགོས་པ་མེད་དོ། །རྒྱུན་དུ་ཞུགས་པའི་འབྲས་བུ་མངོན་དུ་བྱས་ནས་སླར་ཡང་བཅོམ་ལྡན་འདས་ཀྱི་ལྷུང་བཟེད་
བཟུང་ཏེ། འཁོར་དང་བཅས་པ་ཁང་བཟང་ཆེན་པོའི་སྟེང་དུ་སྤྱན་དྲངས་ནས་གྱ་ནོམ་པའི་བཟའ་བ་དང་བཅའ་བ་རྣམས་དྲངས་སོ། །གདུགས་ཚོད་ཟིན་པའི་མཐར་སྒྲ་གཅན་འཛིན་གྱི་མ་མ་གཏོགས་པའི་བཙུན་མོ་འཁོར་དང་བཅས་
པ་ཐམས་ཅད་འོངས་ནས་བཅོམ་ལྡན་འདས་ལ་ཕྱག་བྱས་སོ། །གཞན་ཡང་དེས་འཁོར་གྱི་མི་རྣམས་ལ་འཕགས་པའི་བུ་ལ་ཕྱག་གྱིས་ཤེས་བརྗོད་ནས། གལ་ཏེ་ཁོ་མོ་ལ་ཡོན་ཏན་ཡོད་ན་འཕགས་པའི་བུ་རང་ཉིད་ཀྱི་གནས་སུ་འབྱོན་ནོ། །
བྱོན་པ་ཉིད་ན་དེ་ལ་ཕྱག་བྱེད་དོ་ཞེས་བརྗོད་ནས་མ་འོངས་སོ། །རྒྱལ་པོས་ལྷུང་བཟེད་བཟུང་ནས་བཅོམ་ལྡན་འདས་ཉན་ཐོས་མཆོག་གཉིས་དང་བཅས་པ་རྒྱལ་པོའི་བུ་མོའི་ཁང་བཟངས་སུ་གཤེགས་ཏེ། རྒྱལ་པོའི་བུ་མོ་རང་ཉིད་ཇི་ལྟར་
མོས་པའི་ཕྱག་བྱེད་ཅིང་གཞན་དང་འགལ་བ་ཅུང་ཟད་ཀྱང་མ་བྱེད་ཅེས་ནས་གདན་བཤམས་པ་མཆོག་གི་གུང་ལ་བཞུགས་སོ། །དེ་མྱུར་དུ་འོངས་ནས་བྱིན་པ་བཟུང་སྟེ། ཞབས་ཀྱི་སྟེང་དུ་མགོ་བོ་བཞག་ནས་ཇི་ལྟར་འདོད་པའི་ཕྱག་
བྱས་སོ། །རྒྱལ་པོ་དང་རྒྱལ་པོའི་བུ་མོས་བཅོམ་ལྡན་འདས་ལ་དགའ་བ་མང་པོས་ཡོན་ཏན་ལ་སྩོགས་པས་ཡོན་ཏན་དང་ལྡན་པར་བརྗོད་ནས། བཙུན་པ་བདག་གི་བུ་མོས་ཉིད་ཀྱིས་གོས་ངུར་སྨྲིག་གྱོན་པ་ཐོས་ནས། དེ་ནས་བཟུང་
སྟེ་དང་གི་བར་དུ་གོས་ངུར་སྨྲིག་གྱོན་ནོ། །ཉིད་ཀྱིས་གདུགས་ཚོད་ལན་ཅིག་གསོལ་བ་ཐོས་ནས་བུ་མོས་ཀྱང་བཟའ་བ་ལན་ཅིག་ཟོས་སོ། །ཉིད་ཀྱིས་མལ་སྟན་ཆེན་པོ་སྤངས་པ་ཐོས་ནས། ཉལ་ཁྲི་ཆུང་བ་ལ་ཉལ་ལོ། །ཉིད་ཀྱི་མ་
39-1-246a


མེ་ཏོག་གི་ཕྲེང་བ་དང་སྤོས་ལ་སྩོགས་པ་ལ་སྲེད་པ་མེད་པ་ཐོས་ནས། མེ་ཏོག་གི་ཕྲེང་བ་དང་སྤོས་ལ་སྩོགས་པ་ལ་ཆགས་པ་མེད་པ་སྐྱེས་སོ། །རང་གི་ཉེ་དུ་རྣམས་བདག་གིས་གསོའོ་ཞེས་འཕྲིན་བསྐུར་ནས། གཉེན་ཅིག་ལ་
ཡང་བལྟ་བ་མི་འདུག་གོ། །བཅོམ་ལྡན་འདས་འདི་ལྟ་བུའི་ཡོན་ཏན་དང་ལྡན་པ་ནི་བདག་གི་བུ་མོ་ཡིན་ནོ་ཞེས་གསོལ་ཏོ། །རྒྱལ་པོ་ཆེན་པོ་ཡ་མཚན་མི་ཆེའོ། །འདི་ད་ལྟ་ཁྱེད་སྲུང་བར་བྱེད་པའི་རྒྱལ་པོའི་བུ་མོ་ཡེ་ཤེས་
ཡོངས་སུ་མ་སྨིན་པ་རང་གིས་བསྲུང་ངོ་། །སྔར་བསྲུང་བ་མེད་ཅིང་རི་ལ་སྩོགས་པ་ལ་འགྲོ་བ་ན། ཡེ་ཤེས་ཡོངས་སུ་མ་རྫོགས་པ་རང་གིས་བསྲུངས་སོ་ཞེས་གསུངས་ནས། མིའམ་ཅི་ཟླ་བའི་སྐྱེས་རབས་གསུངས་ཏེ་སྟན་ལས་བཞེངས་
ནས་གཤེགས་སོ། །ཉི་མ་གཉིས་པ་ལ་རྒྱལ་བུ་གཞོན་ནུ་དགའ་བོ་རྒྱལ་པོར་དབང་བསྐུར་བ་དང་། ཁང་པ་གསར་པའི་ནང་དུ་ཞུགས་ཏེ་བཀྲ་ཤིས་པའི་བག་མ་བླངས་ནས་ཉེ་བར་གནས་སོ། །དེའི་ཁྱིམ་དུ་གཤེགས་ནས་གཞོན་ནུ་ལྷུང་
བཟེད་ཟུང་ཅིག་ཅེས་རབ་ཏུ་དབྱུང་བར་དགོངས་ནས་བཀྲ་ཤིས་བརྗོད་དེ། གདན་ལ་བཞེངས་ནས་གཤེགས་སོ། །ལྗོངས་ཀྱི་དགེ་བའི་བུ་མོས་འགྲོ་བ་མཐོང་ངོ་། །འཕགས་པའི་བུ་མྱུར་དུ་ཤོག་ཅེས་བརྗོད་ནས་བལྟའོ། །དེས་ཀྱང་བཅོམ་ལྡན་
འདས་ཀྱི་ལྷུང་བཟེད་གཟུང་བར་མ་ནུས་ནས་གཙུག་ལག་ཁང་ཉིད་དུ་གཤེགས་སོ། །བཅོམ་ལྡན་འདས་དེ་ལ་འདོད་པ་མེད་པ་ཉིད་ཀྱིས་རབ་ཏུ་འབྱུང་བ་བྱེད་དོ། །འདི་ལྟར་བཅོམ་ལྡན་འདས་གྲོང་ཁྱེར་སེར་སྐྱར་གཤེགས་ཤིང་ཉི་མ་གསུམ་པ་ལ་
དགའ་བོ་རབ་ཏུ་བྱུང་བར་བྱས་སོ། །ཉི་མ་བདུན་པ་ལ་སྒྲ་གཅན་འཛིན་གྱི་མས་གཞོན་ནུ་རྒྱན་གྱིས་བརྒྱན་ནས། བཅོམ་ལྡན་འདས་ཀྱི་དྲུང་དུ་བཏང་ངོ་། །བུ་སྟོང་ཕྲག་ཉི་ཤུའི་དགེ་སློང་འཁོར་དང་བཅས་པ་འདི་རྣམས་ལྟོས། གསེར་གྱི་ཁ་དོག་ཅན་གྱི་
ཚངས་པའི་གཟུགས་ཀྱི་མདོག་ཅན་དགེ་སྦྱོང་འདི་ནི་ཁྱེད་ཀྱི་ཡབ་པོ། །འདི་ལ་གཏེར་ཆེན་པོ་ཡོད་ཅིང་དེ་འཐོན་པ་ནས་བཟུང་ནས་གཏེར་མཐོང་བ་མེད་དོ། །སོང་ལ་ནོར་སློངས་ཤིག །བདག་ཁྱེད་ཀྱི་བུ་གཞོན་ནུ་ཡིན་ནོ། །རྒྱལ་པོར་དབང་
39-1-246b


བསྐུར་བ་ཐོབ་ནས་འཁོར་ལོས་སྒྱུར་བ་ལ་དབང་བྱེད་པར་འགྱུར་རོ། །བདག་ལ་ནོར་གྱི་དོན་དུ་ནོར་སྩལ་དུ་གསོལ། ཡབ་ཀྱི་ནོར་བུ་བདག་ཡིན་ནོ་ཞེས་གསོལ་ཅིག་ཅེས་སྨྲས་པ་དང་། གཞོན་ནུ་བཅོམ་ལྡན་འདས་དང་ཉེ་བར་སོང་སྟེ། ཡབ་ཀྱི་དྲུང་
དུ་དགའ་བ་སྐྱེས་སོ། །སེམས་སྤྲོ་བར་གྱུར་ཏོ། །དགེ་སྦྱོང་དེས་ཁྱེད་ཀྱི་གྲིབ་མ་ནི་དེའོ་ཞེས་བརྗོད་ནས། གཞན་ཡང་རང་གི་རིགས་པས་བརྗོད་ཅིང་འཁོད་དོ། །བཅོམ་ལྡན་འདས་གདུགས་ཚོད་ཀྱི་མཐར་རྗེས་སུ་ཡི་རང་བ་མཛད་ནས་གདན་ལས་བཞེངས་ཏེ་
གཤེགས་སོ། །གཞོན་ནུས་བདག་ལ་དགེ་སློང་ནོར་སྩལ་དུ་གསོལ། བདག་ལ་དགེ་སློང་ནོར་སྩལ་དུ་གསོལ། བཅོམ་ལྡན་འདས་ཀྱི་རྗེས་སུ་འབྲངས་ནས། བཅོམ་ལྡན་འདས་ཀྱིས་གཞོན་ནུ་ཕྱིར་ལོག་ལ་ངའི་རྗེས་སུ་མ་འགྲོ་ཞེས་པ་དང་། རྗེས་སུ་
འབྲང་བ་རྣམས་ཀྱང་བཅོམ་ལྡན་འདས་དང་འགྲོགས་ནས་བྱོན་ཏེ་ལྡོག་པར་མ་ནུས་ནས། གཞོན་ནུ་བཅོམ་ལྡན་འདས་དང་ལྷན་ཅིག་ཀུན་དགའ་ར་བ་ཉིད་དུ་ཕྱིན་ནོ། །དེ་ནས་བཅོམ་ལྡན་འདས་ཀྱིས་བསམས་པ། འདི་ཡབ་ཀྱི་ནོར་འདོད་ཅིང་
འཇིག་རྟེན་པའི་ནོར་ནི་འཚེ་བ་དང་བཅས་པ་ཡིན། ད་ནི་གཞོན་ནུ་ལ་བྱང་ཆུབ་སྙིང་པོ་དེས་ཐོབ་པའི་འཕགས་པའི་ནོར་རྣམ་པ་བདུན་བྱིན་ན་འཇིག་རྟེན་ལས་འདས་པའི་ནོར་གྱི་བདག་པོ་བྱེད་པར་འགྱུར་བར་དགོངས་ནས། ཚེ་དང་ལྡན་པ་ཤཱ་རི་
འི་བུ་བོས་ཏེ། དེའི་ཕྱིར་ན་ཤཱ་རིའི་བུ་ཁྱོད་ཀྱིས་གཞོན་ནུ་སྒྲ་གཅན་འཛིན་རབ་ཏུ་ཕྱུང་ཞེས་བརྗོད་ནས་རབ་ཏུ་བྱུང་བ་བྱས་སོ། །སླར་ཡང་རྒྱལ་པོ་གཞོན་ནུའི་སྡུག་བསྔལ་ཆེར་སྐྱེས་ཏེ་བསྲན་པར་མ་ནུས་ནས། བཅོམ་ལྡན་འདས་ཀྱི་
གནས་སུ་ཕྱིན་ཏེ། བཙུན་པ་འཕགས་པ་མ་དང་ཕ་ཡིས་རྗེས་སུ་མ་གནང་བའི་བུ་རབ་ཏུ་འབྱུང་བར་བྱེད་པ་མ་ལེགས་སོ་ཞེས་དམ་པ་བསླངས་སོ། །བཅོམ་ལྡན་འདས་ཀྱིས་དེ་ལ་དམ་པ་བྱིན་ནོ། །སླར་ཡང་ཉི་མ་གཉིས་པ་ལ་རྒྱལ་པོའི་
གནས་སུ་གདུགས་ཚོད་གསོལ་ནས་ཕྱོགས་གཅིག་ཏུ་འཁོད་དོ། །རྒྱལ་པོས་བཙུན་པ་ཉིད་དཀའ་བ་སྤྱོད་པའི་དུས་སུ་ལྷ་ཅིག་བདག་གི་དྲུང་དུ་ཉེ་བར་འོངས་ནས་ཁྱེད་ཀྱི་བུ་དུས་ལས་འདས་སོ་ཞེས་སྨྲས་སོ། །དེའི་ཚིག་ལ་ཡིད་
39-1-247a


ཆེས་པ་མེད་ཅིང་བདག་གི་སྲས་བྱང་ཆུབ་མ་ཐོབ་བར་དུ་དུས་ལས་འདའ་བར་མི་བྱེད་དོ། །དེའི་ཚིག་བདག་གིས་བཀག་གོ་ཞེས་བརྗོད་དོ། །བཅོམ་ལྡན་འདས་ཀྱིས་བཀའ་སྩལ་པ། ད་ལྟ་ཇི་ལྟར་ཁྱོད་ཡིད་ཆེས་པར་བྱེད། 
སྔར་རུས་པ་མཐོང་ནས་ཁྱེད་ཀྱི་བུ་ཤིའོ་ཞེས་ཟེར་བ་ལ་ཡིད་ཆེས་པར་མ་བྱས་སོ། །འདིའི་དོན་འབྱུང་བ་ནི་ཆོས་སྐྱོང་བ་ཆེན་པོའི་སྐྱེས་རབས་སུ་བཤད་དོ། །གཏམ་གྱི་མཐར་རྒྱལ་པོས་ཕྱིར་མི་འོང་བའི་འབྲས་བུ་ལ་གནས་སོ། །དེ་ལྟར་
བཅོམ་ལྡན་འདས་ཀྱི་ཡབ་འབྲས་བུ་གསུམ་ལ་སོ་སོར་གནས་ནས་དགེ་སློང་གི་དགེ་འདུན་འཁོར་དུ་བྱས་སོ། །སླར་ཡང་རྒྱལ་པོའི་ཁབ་དུ་གཤེགས་ནས་བསིལ་བའི་ཚལ་དུ་བཞུགས་སོ། །དེའི་ཚེ་ཁྱིམ་བདག་མགོན་མེད་ཟས་སྦྱིན་གྱིས་
ཤིང་རྟ་ལྔ་བརྒྱའི་ནོར་ཁྱེར་ནས་རྒྱལ་པོའི་ཁབ་དུ་རང་ཉིད་དགའ་བའི་གྲོགས་ཀྱི་ཁང་པར་སོང་སྟེ། དེས་སངས་རྒྱས་བཅོམ་ལྡན་འདས་བྱོན་ནོ་ཞེས་པ་ཐོས་ནས་ཤིན་དུ་སྔ་བར་ལྷའི་མཐུས་སྒོ་ཕྱེ་སྟེ། སྟོན་པའི་དྲུང་དུ་ཉེ་བར་སོང་ནས་ཆོས་
ཐོས་ཏེ་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་ཏོ། །ཉི་མ་གཉིས་པ་ལ་སངས་རྒྱས་ལ་སོགས་པའི་དགེ་འདུན་ལ་སྦྱིན་པ་ཆེན་པོ་ཕུལ་ལོ། །མཉན་ཡོད་དུ་གཤེགས་པའི་ཕྱིར་དུ་སྟོན་པའི་དྲུང་དུ་དམ་བཅའ་བླངས་ནས་བར་གྱི་ལམ་
དཔག་ཚད་བཞི་བཅུ་རྩ་ལྔའི་གནས་སུ་འབུམ་ཕྲག་རེ་རེའི་ནོར་བྱིན་ནས་དཔག་ཚད་རེ་རེའི་གཙུག་ལག་ཁང་བྱས་སོ། །རྒྱལ་བྱེད་ཚལ་བྱེ་བ་ཕྲག་བཅོ་བརྒྱད་ཀྱི་དབྱིག་གིས་ཉོས་ནས་ལས་ཁ་གསར་པ་བྱེད་ཅིང་དབུས་སུ་སྟོབས་བཅུ་
པའི་དྲིའི་གཙང་ཁང་བྱེད་དོ། །དེ་ལ་བསྐོར་བ་རྣམས་ལ་གནས་བརྟན་ཆེན་པོ་བརྒྱད་བཅུའི་བཞུགས་གནས་སོ། །ཆིག་ཐོག་དང་ཉིས་ཐོག་དང་ཁང་པ་རིང་པོ་དང་། བསྟི་གནས་ལ་སྩོགས་པའི་བཞུགས་གནས་དང་། རྫིང་བུ་དང་། 
འཆག་ས་དང་། མཚན་མོའི་བཞུགས་གནས་དང་། ཉིན་མོའི་བཞུགས་གནས་སོ། །བྱེ་བ་ཕྲག་བཅྭ་བརྒྱད་ཀྱི་ནོར་སྤེལ་ཏེ་ཡིད་དུ་འོང་བའི་ས་ཕྱོགས་ཡིད་ལ་འཐད་པའི་གཙུག་ལག་ཁང་བྱེད་དོ། །སྟོབས་བཅུ་པ་གྱོན་པའི་ཕྱིར་
39-1-247b


དུ་ཕོ་ཉ་བ་བཏང་ངོ་། །སྟོན་པས་ཕོ་ཉ་བའི་འཕྲིན་གསན་ནས་དགེ་སློང་གི་དགེ་འདུན་ཆེན་པོའི་འཁོར་དུ་བྱས་ཏེ་རྒྱལ་པོའི་ཁབ་ནས་ཕྱིར་བྱོན་ཏེ་གོ་རིམས་བཞིན་དུ་གྲོང་ཁྱེར་མཉན་ཡོད་དུ་བྱོན་ནོ། །གཙོ་བོ་ཆེན་པོ་གཙུག་ལག་ཁང་ཆེན་པོ་
སྟ་གོན་བྱས་ནས་དེ་བཞིན་གཤེགས་པ་རྒྱལ་བྱེད་ཚལ་དུ་བྱོན་པའི་ཉིན་མོ་བུ་རྒྱན་ཐམས་ཅད་ཀྱིས་བརྒྱན་ནོ། །སླར་ཡང་བརྒྱན་པ་ཉིད་ཀྱི་གཞོན་ནུ་ལྔ་བརྒྱ་དང་བཅས་པ་བཏང་ངོ་། །དེ་འཁོར་དང་བཅས་པ་ཁ་དོག་ལྔའི་གོས་ཡང་དག་པར་
འབར་བའི་རྒྱལ་མཚན་ལྔ་བརྒྱ་ཐོགས་ནས་སྟོབས་བཅུ་པའི་མདུན་དུ་སོང་བར་གྱུར་ཏོ། །དེ་རྣམས་ཀྱི་ཕྱི་མ་ལ་ལེགས་བཟངས་ཆེན་མོ་དང་། ལེགས་བཟངས་མ་ཆུང་བ་སྟེ་བུ་མོ་གཉིས་གཞོན་ནུ་མ་ལྔ་བརྒྱ་དང་བཅས་པ་གསེར་གྱིས་གང་
བའི་བུམ་པ་ལག་པར་ཐོགས་ནས་ཕྱིར་འཐོན་ནོ། །དེའི་ཕྱི་མ་ལ་ཚོང་དཔོན་གྱི་ཆུང་མ་རྒྱན་ཐམས་ཅད་ཀྱིས་བརྒྱན་ནས་བུད་མེད་ལྔ་བརྒྱ་དང་བཅས་པ་གསེར་གྱིས་གང་བའི་སྡེར་མ་ཆེན་པོ་ཐོགས་ནས་ཕྱིར་འཐོན་ཏོ། །ཐམས་ཅད་ཕྱིན་
ནས་ཚོང་དཔོན་རང་ཉིད་གོས་བཟང་པོ་གྱོན་ནོ། །དེ་བཞིན་དུ་གོས་བཟང་པོ་གྱོན་པའི་ཚོང་དཔོན་ལྔ་བརྒྱ་དང་བཅས་པ་བཅོམ་ལྡན་འདས་ཀྱི་དྲུང་དུ་སོང་ངོ་། །བཅོམ་ལྡན་འདས་ཀྱི་འཁོར་དགེ་བསྙེན་འདི་རྣམས་མདུན་དུ་བྱས་ནས། དགེ་སློང་གི་
དགེ་འདུན་ཆེན་པོ་རྣམས་འཁོར་དུ་བྱས་ཏེ། རང་ཉིད་ཀྱི་སྐུ་ལུས་ཀྱི་འོད་ཀྱིས་གསེར་གྱི་བཅུད་ཀྱི་གོང་བུ་ལྟ་བུ་དང་མཚུངས་པ་དང་། ནགས་ཚལ་གྱི་བར་དུ་སྣང་བར་མཛད་ཅིང་མཐའ་ཡས་པའི་སངས་རྒྱས་ཀྱི་རོལ་པ་སངས་རྒྱས་ཀྱི་དཔལ་
ཟླ་མེད་ཅིང་མཚུངས་པ་མེད་པ་རྒྱལ་བྱེད་ཚལ་གྱི་ནང་དུ་བྱོན་ནོ། །དེ་ནས་མགོན་མེད་ཟས་སྦྱིན་གྱིས་ཞུས་པ། བཙུན་པ་གཙུག་ལག་ཁང་འདི་ཇི་ལྟ་བུ་ལ་དབུལ་བར་བགྱི། ཁྱིམ་བདག་གཙུག་ལག་ཁང་འདི་འོང་བ་དང་འགྲོ་བའི་དགེ་སློང་གི་
དགེ་འདུན་རྣམས་ལ་ཕུལ་ཅིག །ལེགས་སོ་བཅོམ་ལྡན་འདས་ཞེས་ཚོང་དཔོན་ཆེན་པོས་གསེར་གྱི་རིལ་བ་སྤྱི་བླུགས་བླངས་ནས་སྟོབས་བཅུ་པའི་ཕྱག་ཏུ་ཆུ་བསྒྲེངས་ཏེ་རྒྱལ་བྱེད་ཚལ་གྱི་གཙུག་ལག་ཁང་འདི་འགྲོ་བ་དང་འོང་བའི་
39-1-248a


ཕྱོགས་བཞིའི་སངས་རྒྱས་ལ་སོགས་པའི་དགེ་འདུན་ལ་སྦྱིན་ཞེས་ཕུལ་ལོ། །སྟོན་པས་གཙུག་ལག་ཁང་བཞེས་ནས་རྗེས་སུ་ཡི་རང་བ་མཛད་དོ། །གྲང་དང་དྲོ་བས་མི་ཉམས་ཤིང་། །དེ་ལྟར་རི་དགས་ལ་སོགས་པའི། །སྡིག་སྦྲུལ་
དང་ནི་སྦྲང་བུ་དང་། །བ་མོ་དང་ནི་ཆར་པས་སོ། །དེ་ལྟར་རླུང་དང་ཤིན་དུ་དྲོ། །སོ་སོར་ལུས་ལ་གོས་པ་དང་། །ཁང་ནང་གནས་ནས་བདེ་བ་སྐྱེས། །ཁང་པར་བསམ་གཏན་ལྷག་མཐོང་རྣམས། །དགེ་འདུན་གཙུག་ལག་ཁང་འབུལ་བ། །སངས་
རྒྱས་མཆོག་གིས་བསྔགས་པར་མཛད། །སྐྱེས་བུ་མཁས་པས་དེ་ཡི་ཕྱིར། །བདག་ཉིད་ཀྱི་ནི་ཕྱིར་དུ་ནི། །དགའ་བས་གཙུག་ལག་ཁང་བྱེད་པ། །མང་དུ་ཐོས་པ་གནས་པ་ཡིན། །དེ་རྣམས་ཀྱི་ནི་བཟའ་དང་བཏུང་། །གོས་དང་མལ་ཆ་སྟན་
དང་ནི། །དེ་རྣམས་སེམས་ནི་དྲང་པོས་འབུལ། །རབ་ཏུ་དང་བའི་སེམས་ཀྱིས་སོ། །དེས་ནི་དེ་ལ་ཆོས་བསྟན་ཏོ། །སྡུག་བསྔལ་ཐམས་ཅད་ཉེར་ཞིའི་ཕྱིར། །གང་དེའི་ཆོས་ནི་རྟོགས་པ་དང་། །རྟེན་མེད་མྱ་ངན་འདས་པར་བྱེད་ཅེས་བྱ་བའི་
གཙུག་ལག་ཁང་གི་ཕན་ཡོན་བཤད་དོ། །མགོན་མེད་ཟས་སྦྱིན་གྱིས་ཉི་མ་གཉིས་པ་ནས་བཟུང་ནས་སྦྱིན་པ་གཏོང་བའི་མགོ་བརྩམས་སོ། །ས་ཁམས་བྱས་པའི་ཁང་བཟངས་ནི་ཟླ་བ་བཞིས་གྲུབ་བོ། །སླར་ཡང་མགོན་མེད་ཟས་སྦྱིན་གྱི་གཙུག་ལག་ཁང་ཆེན་
པོ་ཟླ་བ་དགུས་གྲུབ་བོ། །གཙུག་ལག་ཁང་ཆེན་པོ་ལ་ཡང་བྱེ་བ་སྟོང་ཕྲག་བཅྭ་བརྒྱད་ཉིད་སོང་ངོ་། །འདི་ལ་གཙུག་ལག་ཁང་ཆེན་པོ་འདི་ཉིད་ལ་བྱེ་བ་ཕྲག་ལྔ་བཅུ་རྩ་བཞིའི་ནོར་ཡོངས་སུ་བཏང་ངོ་། །སླར་ཡང་འདས་པའི་བཅོམ་ལྡན་འདས་རྣམ་པར་
གཟིགས་ཀྱི་དུས་སུ་ཚོང་དཔོན་ཀུན་གྱི་གྲོགས་ཞེས་བྱ་བས་གསེར་གྱི་གླང་པོའི་རྐང་པའི་རྨིག་རྗེས་ལྟ་བུའི་ས་གཞི་ཉོས་ནས། གནས་འདི་ཉིད་དུ་དཔག་ཚད་གཅིག་གི་དགེ་འདུན་གྱི་ཀུན་དགའ་ར་བ་བྱས་སོ། །བཅོམ་ལྡན་འདས་གཙུག་ཏོར་ཅན་གྱི་དུས་སུ་
དཔལ་འཕེལ་ཞེས་བྱ་བའི་ཚོང་དཔོན་གྱི་བུས་གསེར་གྱི་སྡེར་མ་རྒྱུན་མི་འཆད་པས་ཉོས་པའི་ས་གཞིའི་གནས་དེ་ཉིད་དུ་རྒྱང་གྲགས་བཅུ་གཉིས་ཀྱི་ཚད་ཙམ་གྱི་དགེ་འདུན་གྱི་ཀུན་དགའ་ར་བ་བྱས་སོ། །བཅོམ་ལྡན་འདས་ཐམས་ཅད་སྐྱོབ་ཀྱི་དུས་སུ་
39-1-248b


ཚོང་དཔོན་བཀྲ་ཤིས་ཞེས་བྱ་བས་གསེར་གྱི་ས་གཞི་གསེར་གྱི་རྐང་པའི་རྗེས་ལྟ་བུའི་ས་གཞི་ཉོས་ནས་གནས་དེ་ཉིད་དུ་དཔག་ཚད་ཕྱེད་ཀྱི་དགེ་འདུན་གྱི་ཀུན་དགའ་ར་བ་བྱས་སོ། །བཅོམ་ལྡན་འདས་ལོག་པར་དད་སེལ་གྱི་དུས་སུ་ཚོང་དཔོན་འཕོ་བ་མེད་པ་ཞེས་བྱ་
བས་གསེར་གྱི་ཕ་གུ་ལྟ་བུ་རྒྱུན་མི་འཆད་པའི་ས་གཞི་ཉོས་ནས་གནས་ཉིད་དུ་རྒྱང་གྲགས་བཞིའི་ཚད་ཀྱི་དགེ་འདུན་གྱི་ཀུན་དགའ་ར་བ་བྱས་སོ། །བཅོམ་ལྡན་འདས་གསེར་ཐུབ་ཀྱི་དུས་སུ་ཚོང་དཔོན་དྲག་པོ་ཞེས་བྱ་བས་གསེར་གྱི་རུས་སྦལ་རྒྱུན་མི་འཆད་
པ་ལྟ་བུའི་ས་གཞི་ཉོས་ནས་གནས་དེ་ཉིད་དུ་རྒྱང་གྲགས་གཉིས་ཀྱི་ཚད་ཀྱི་ཀུན་དགའ་ར་བ་བྱས་སོ། །བཅོམ་ལྡན་འདས་འོད་སྲུང་གི་དུས་སུ་ཚོང་དཔོན་བཀྲ་ཤིས་བཟང་པོ་ཞེས་བྱ་བས་གསེར་གྱི་ཕ་གུ་རྒྱུན་མི་འཆད་པ་ལྟ་བུས་ས་གཞི་ཉོས་ནས་གནས་
དེ་ཉིད་དུ་རྒྱང་གྲགས་གཅིག་གི་ཚད་ཀྱི་ཀུན་དགའ་ར་བ་བྱས་སོ། །སླར་ཡང་བདག་ཅག་གི་བཅོམ་ལྡན་འདས་ཀྱི་དུས་སུ་ཚོང་དཔོན་མགོན་མེད་ཟས་སྦྱིན་གྱིས་བྱེ་བ་ཕྲག་བཅྭ་བརྒྱད་ཀྱི་དབྱིག་གིས་གསེར་གྱི་འདྲ་མེན་དུ་བྱས་པ་རྒྱུན་མི་འཆད་པ་ལྟ་བུས་
ས་གཞི་ཉོས་ནས་གནས་དེ་ཉིད་དུ་རྒྱང་གྲགས་ཕྱེད་ཀྱི་ཀུན་དགའ་ར་བ་བྱས་སོ། །གནས་འདི་སངས་རྒྱས་ཐམས་ཅད་ཀྱིས་མ་སྤངས་པའི་གནས་ཡིན་ནོ། །འདི་ལྟར་བྱང་ཆུབ་ཆེན་པོའི་སྙིང་པོའི་དྲུང་དུ་ཐམས་ཅད་མཁྱེན་པའི་ཡེ་ཤེས་ཐོབ་པ་ཇི་སྲིད་པ་ནས་ཡོངས་
སུ་མྱ་ངན་ལས་འདས་པའི་མཐར་ཐུག་པ་དེ་སྲིད་དུ་གང་དང་གང་གི་གནས་སུ་བཅོམ་ལྡན་འདས་བདག་བཞུགས་པ་འདི་ནི་ཉེ་བའི་གླེང་གཞི་ཞེས་བྱ་བའོ། །དེའི་ལུགས་ཀྱིས་སྐྱེས་རབས་ཐམས་ཅད་དུ་བསྔགས་པར་མཛད་དོ། །སྐྱེས་པ་རབས་ཀྱི་གླེང་གཞིའི་བཤད་པ་
རྫོགས་སྷོ།།   །།   ༄༅། །རྒྱ་གར་སྐད་དུ། ཨཱ་ཊཱ་ནཱ་ཊི་ཡ་སཱུ་ཏྲ།  བོད་སྐད་དུ། ལྕང་ལོ་ཅན་གྱི་ཕོ་བྲང་གི་མདོ།  འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་
པོའི་ཁབ་བྱ་རྒོད་ཕུང་པོའི་རི་ལ་བཞུགས་སོ། །དེ་ནས་རྒྱལ་པོ་ཆེན་པོ་བཞི་པོ་གནོད་སྦྱིན་མང་པོའི་སྡེ་དང་། དྲི་ཟ་མང་པོའི་སྡེ་དང་གྲུལ་བུམ་གྱི་སྡེ་མང་པོ་དང་ཀླུའི་སྡེ་མང་པོ་རྣམས་ཕྱོགས་བཞི་བསྲུང་ཞིང་གནས་སོ། །ཕྱོགས་བཞིར་ཚན་ཚན་དུ་གནས་སོ། །
39-1-249a


ཕྱོགས་བཞི་སྐྱོབ་ཅིང་གནས་སོ། །མཚན་མོ་འོངས་ཏེ་ཁ་དོག་སྣ་ཚོགས་པ་ཅན་གྱིས་བྱ་རྒོད་ཕུང་པོའི་རི་འབའ་ཞིག་སྣང་བར་བྱས་ཏེ། བཅོམ་ལྡན་འདས་ག་ལ་བ་དེར་སོང་ནས་བཅོམ་ལྡན་འདས་ལ་ཕྱག་བྱས་ནས་ཕྱོགས་གཅིག་ཏུ་འཁོད་
དོ། །གནོད་སྦྱིན་དེ་རྣམས་ལས་ཀྱང་གང་ལ་ལས་བཅོམ་ལྡན་འདས་ལ་ཕྱག་བྱས་ནས་ཕྱོགས་གཅིག་ཏུ་འཁོད་དོ། །གང་སུ་དག་གིས་བཅོམ་ལྡན་འདས་ལ་བསྙུན་གསོལ་ཏེ་བསྙུན་གསོལ་ནས་ཇི་ལྟར་སྙིང་པོ་དང་སྙིང་པོ་མེད་པའི་གཏམ་འདྲི་ཞིང་
ཕྱོགས་གཅིག་ཏུ་འཁོད་དོ། །གང་སུ་དག་གིས་བཅོམ་ལྡན་འདས་ལ་ཐལ་མོ་སྦྱར་བའི་ཕྱག་བྱས་ནས་ཕྱོགས་གཅིག་ཏུ་འཁོད་དོ། །གང་སུ་དག་གིས་མིང་དང་རིགས་དཔྱོད་ཅིང་ཕྱོགས་གཅིག་ཏུ་འཁོད་དོ། །གང་སུ་དག་ཅང་མི་སྨྲ་བར་ཕྱོགས་
གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གནོད་སྦྱིན་མ་རུངས་པ་གང་ལ་ལ་ཞིག་བཅོམ་ལྡན་འདས་ལ་མ་དད་པར་གྱུར་ཏོ། །གནོད་སྦྱིན་མ་
རུངས་པ་གང་ལ་ལ་ཞིག་བཅོམ་ལྡན་འདས་ལ་དད་པར་གྱུར་ཏོ། །གནོད་སྦྱིན་འབྲིང་པོ་གང་ལ་ལ་ཞིག་བཙུན་པ་བཅོམ་ལྡན་འདས་ལ་མ་དད་པར་གྱུར་ཏོ། །གནོད་སྦྱིན་འབྲིང་པོ་གང་ལ་ལ་ཞིག་བཙུན་པ་བཅོམ་ལྡན་འདས་ལ་དད་པར་གྱུར་ཏོ། །གནོད་
སྦྱིན་དམན་པ་གང་ལ་ལ་ཞིག་བཙུན་པ་བཅོམ་ལྡན་འདས་ལ་མ་དད་པར་གྱུར་ཏོ། །གནོད་སྦྱིན་དམན་པ་གང་ལ་ལ་ཞིག་བཙུན་པ་བཅོམ་ལྡན་འདས་ལ་དད་པར་གྱུར་ཏོ། །གནོད་སྦྱིན་གང་ལ་ལ་ཞིག་བཙུན་པ་བཅོམ་ལྡན་འདས་ལ་མ་དད་པར་གྱུར་པའི་
རྒྱུ་གང་ལགས། བཙུན་པ་བཅོམ་ལྡན་འདས་ཀྱིས་སྲོག་གཅོད་པ་སྤོང་བའི་ཆོས་བསྟན་པ་དང་། མ་བྱིན་པར་ལེན་པ་སྤོང་བའི་ཆོས་བསྟན་པ་དང་། འདོད་པ་ལོག་པར་སྤྱོད་པ་སྤོང་བའི་ཆོས་བསྟན་པ་དང་། བརྫུན་དུ་སྨྲ་བ་སྤོང་བའི་ཆོས་
བསྟན་པ་དང་། མྱོས་པར་འགྱུར་བའི་ཆང་གི་བཏུང་བ་སྤོང་བའི་ཆོས་བསྟན་པ་མཛད་ལ། གནོད་སྦྱིན་གང་དེ་རྣམས་སྲོག་གཅོད་པ་སྤོང་བ་ལ་མི་དགའ་བར་གྱུར་པ་དང་། མ་བྱིན་པར་ལེན་པ་སྤོང་བ་ལ་མི་དགའ་བར་གྱུར་པ་དང་། 
39-1-249b


འདོད་པ་ལོག་པར་སྤྱོད་པ་སྤོང་བ་ལ་མི་དགའ་བར་གྱུར་པ་དང་། བརྫུན་དུ་སྨྲ་བ་སྤོང་བ་ལ་མི་དགའ་བར་གྱུར་པ་དང་། མྱོས་པར་འགྱུར་བའི་ཆང་གི་བཏུང་བ་སྤོང་བ་ལ་མི་དགའ་བར་གྱུར་པས་དེ་རྣམས་ལ་མི་དགའ་ཞིང་མི་འདོད་པར་གྱུར་ཏོ། །
བཙུན་པ་བཅོམ་ལྡན་འདས་ཀྱིས་ཉན་ཐོས་ཇི་སྙེད་ཡོད་པ་རྣམས་འབྲོག་དགོན་པའི་ལམ་དུ་ཞུགས་ནས་ཉལ་བ་དང་འདུག་པ་ལ་བརྟེན་ནོ། །སྒྲ་མེད་ཅིང་དབྱངས་མེད་པར་དབེན་པར་གནས་ཤིང་འདུ་འཛིའི་འཚེ་བ་མེད་དོ། །སོ་སོར་དགེ་སྦྱོང་
རྣམས་འཐུན་པར་གནས་སོ། །དེ་ན་གནོད་སྦྱིན་མ་རུངས་པ་རྣམས་ཀྱི་གནས་ཡོད་དོ། །གང་ཞིག་གིས་བཅོམ་ལྡན་འདས་ཀྱི་གསུང་རབ་ལ་མ་དད་པར་གྱུར་ཏེ། དེ་རྣམས་དད་པར་བྱ་བའི་ཕྱིར་བཙུན་པ་བཅོམ་ལྡན་འདས་ལ་བསླབ་པར་
བྱ་སྟེ། ལྕང་ལོ་ཅན་གྱི་ཕོ་བྲང་གིས་བསྲུང་དུ་གསོལ། དགེ་སློང་ངམ་དགེ་སློང་མ་འམ། དགེ་བསྙེན་ནམ་དགེ་བསྙེན་མ་རྣམས་ལ་བསྲུང་བ་དང་། སྦ་བ་དང་འཚེ་བ་མེད་པ་དང་བདེ་བ་དང་ལེགས་པར་གནས་སོ། །བཅོམ་ལྡན་འདས་
ཀྱིས་ཅང་མི་གསུང་བའི་ཚུལ་གྱིས་གནང་ངོ་། །དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུས་བཅོམ་ལྡན་འདས་ཀྱིས་གནང་བ་ཤེས་ཏེ། དེའི་ཚེ་འདི་ལྟར་ལྕང་ལོ་ཅན་གྱི་ཕོ་བྲང་གིས་སྲུངས་ཤིག་ཅེས་གསོལ་ཏོ། །སྤྱན་
ལྡན་དཔལ་དང་ལྡན་པ་ཡི། །རྣམ་པར་གཟིགས་ལ་ཕྱག་འཚལ་ལོ། །འབྱུང་པོ་རྣམས་ལ་བརྩེ་བ་ཡི། །གཙུག་ཏོར་ཅན་ལའང་ཕྱག་འཚལ་ལོ། །མགོན་མེད་རྣམས་ལ་གདུང་བ་ཡི། །ཐམས་ཅད་སྐྱོབ་ལ་
ཕྱག་འཚལ་ལོ། །བདུད་ཀྱི་སྡེ་རྣམས་འཇོམས་པ་ཡི། །འཁོར་བ་འཇིག་ལ་ཕྱག་འཚལ་ལོ། །བྲམ་ཟེ་དཔལ་དང་ལྡན་པ་ཡི། །གསེར་ཐུབ་ལ་ནི་ཕྱག་འཚལ་ལོ། །སེམས་ཅན་རྣམ་གྲོལ་མཛད་པ་ཡི། །
འོད་སྲུང་ལ་ནི་ཕྱག་འཚལ་ལོ། །ཤཱཀྱའི་སྲས་ནི་དཔལ་དང་ལྡན། །ཉི་མའི་རྒྱུད་ལ་ཕྱག་འཚལ་ལོ། །སྡུག་བསྔལ་ཀུན་ལས་སྒྲོལ་མཛད་པ། །གང་ཞིག་ཆོས་ནི་རབ་སྟོན་མཛད། །གང་ཡང་འཇིག་རྟེན་པར་གྱུར་པ། །
39-1-250a


ཇི་ལྟ་བ་བཞིན་གཟིགས་གྱུར་པའི། །དེ་རྣམས་ལ་ནི་ཕྲ་མ་མེད། །འཇིགས་པ་མེད་པ་ཆེན་པོའོ། །གང་ཞིག་གཽ་ཏམ་ཕྱག་བྱེད་པ། །ལྷ་དང་མི་ལ་ཕན་པ་ཡིན། །རིག་པ་དང་ནི་ཞབས་སུ་ལྡན། །འཇིགས་པ་མེད་པ་
ཆེན་པོ་སྟེ། །ཉི་མའི་དཀྱིལ་འཁོར་ཆེན་པོ་ནི། །གང་ཞིག་ཏུ་ནི་ནུབ་ཅིང་འཆར། །གང་དུ་ཉི་མ་ནུབ་གྱུར་པ། །དེ་ནི་མཚན་མོར་འགྱུར་བ་ཡིན། །གང་དུ་ཉི་མ་ཤར་གྱུར་པ། །དེ་ནི་ཉིན་མོ་ཞེས་བརྗོད་དོ། །གཏིང་ནི་ཟབ་པའི་རྒྱ་
མཚོ་ཡི། །དེ་ཡི་ཆུ་ཡི་བཅུད་བཟང་ངོ་། །དེ་ལྟར་དེར་ནི་སྐྱེས་གྱུར་པ། །རྒྱ་མཚོའི་ཆུ་ཡི་བཅུད་བཞིན་ནོ། །འདིར་ནི་ཤར་གྱི་ཕྱོགས་ཀྱི་ནི། །སྐྱེ་བོ་རྣམས་ལ་འདི་བརྗོད་དེ། །དེ་ཡི་ཕྱོགས་ནི་ཀུན་སྐྱོང་བའི། །རྒྱལ་པོ་
ཆེན་པོ་གྲགས་ཆེན་ལྡན། །དྲི་ཟ་རྣམས་ཀྱི་བདག་པོ་སྟེ། །མིང་ནི་རྒྱལ་པོ་ཡུལ་འཁོར་སྐྱོང་། །དྲི་ཟ་འཁོར་དང་བཅས་པ་ནི། །གླུ་དང་གར་གྱིས་དགའ་བར་བྱེད། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་
པ་སྟེ། །དབང་པོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་གོ། །དེ་ཡང་སངས་རྒྱས་མཐོང་བ་དང་། །ཉི་མའི་གཉེན་གྱི་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིའོ། །སྐྱེས་བུ་ཅང་
མཁྱེན་ཁྱེད་ཕྱག་འཚལ། །སྐྱེས་བུ་མཆོག་ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ཁྱོད་ཕྱག་འཚལ། །རྟག་ཏུ་འདི་ནི་ཉན་པའོ། །དེ་ཕྱིར་དེ་ལྟར་འདི་བརྗོད་དེ། །རྒྱལ་བ་གཽ་ཏམ་ཕྱག་གྱིས་ཤིག །
རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །སངས་རྒྱས་གཽ་ཏམ་ཕྱག་འཚལ་ལོ། །གང་ཡང་ཡི་དགས་རྗོད་བྱེད་པ། །ཕྲ་མ་རྒྱབ་ཀྱི་ཤ་ཅན་དང་། །སྲོག་གཅོད་པ་ལ་ཆགས་པ་དང་། །སྐྱེ་བོ་མ་ལུས་འཇོམས་པའོ། །
འདིར་ནི་ལྷོ་ཡི་ཕྱོགས་གནས་པའི། །སྐྱེ་བོ་རྣམས་ལ་འདི་སྐད་བརྗོད། །དེ་ཡི་གནས་ནི་ཡོངས་སྐྱོང་བ། །རྒྱལ་པོ་ཆེན་པོ་གྲགས་ལྡན་པ། །གྲུལ་བུམ་རྣམས་ཀྱི་བདག་པོ་སྟེ། །མིང་ནི་འཕགས་སྐྱེས་པོ་ཞེས་བྱ། །གྲུལ་བུམ་འཁོར་དང་
39-1-250b


བཅས་པ་ནི། །གླུ་དང་གར་གྱིས་དགའ་བར་བྱེད། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་གོ། །དེ་ཡང་སངས་རྒྱས་མཐོང་བ་དང་། །ཉི་མའི་རྒྱུད་ཀྱིས་
སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིའོ། །སྐྱེས་བུ་ཅང་མཁྱེན་ཁྱེད་ཕྱག་འཚལ། །སྐྱེས་བུ་མཆོག་ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ཁྱེད་ཕྱག་འཚལ། །
རྟག་ཏུ་འདི་ནི་ཉན་པའོ། །དེ་ཕྱིར་དེ་ལྟར་འདི་བརྗོད་དེ། །རྒྱལ་བ་གཽ་ཏམ་ཕྱག་གྱིས་ཤིག །རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །སངས་རྒྱས་གཽ་ཏམ་ཕྱག་འཚལ་ལོ། །ཉི་མའི་དཀྱིལ་འཁོར་ཆེན་པོ་ནི། །
གང་ནས་གང་དུ་ཤར་གྱུར་པ། །དེར་ནི་ཉིན་མོར་འགྱུར་བ་སྟེ། །ཉིན་མོ་ཞེས་ནི་བརྗོད་པ་ཡིན། །གང་དུ་ཉི་མ་ནུབ་གྱུར་པ། །དེ་ནི་མཚན་མོར་བརྗོད་པར་བྱེད། །གཏིང་ནི་ཟབ་པའི་རྒྱ་མཚོ་ཡི། །དེ་ཡི་ཆུ་ནི་བཅུད་བཟང་ངོ་། །དེ་ལྟར་
དེར་ནི་སྐྱེས་གྱུར་པའི། །རྒྱ་མཚོའི་ཆུ་ཡི་བཅུད་བཞིན་ནོ། །འདིར་ནི་ནུབ་ཀྱི་ཕྱོགས་ཀྱི་ནི། །སྐྱེ་བོ་རྣམས་ལ་འདི་བརྗོད་དེ། །དེ་ཡི་ཕྱོགས་ནི་ཀུན་སྐྱོང་བའི། །རྒྱལ་པོ་ཆེན་པོ་གྲགས་ཆེན་ལྡན་། །ཀླུ་རྣམས་ཀྱི་ནི་བདག་པོ་སྟེ། །འདི་ཡི་
མིང་ནི་མིག་མི་བཟང་། །ཀླུ་ཡི་འཁོར་དང་བཅས་པ་ནི། །གླུ་དང་གར་གྱིས་དགའ་བར་བྱེད། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་གོ། །དེ་ཡང་སངས་
རྒྱས་མཐོང་བ་དང་། །ཉི་མའི་གཉེན་གྱི་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིའོ། །སྐྱེས་བུ་ཅང་མཁྱེན་ཁྱེད་ཕྱག་འཚལ། །སྐྱེས་བུ་མཆོག་ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །
མི་མ་ཡིན་རྣམས་ཁྱེད་ཕྱག་འཚལ། །རྟག་ཏུ་འདི་ནི་ཉན་པའོ། །དེ་ཕྱིར་དེ་ལྟར་འདི་བརྗོད་དེ། །རྒྱལ་བ་གཽ་ཏམ་ཕྱག་གྱིས་ཤིག །རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །སངས་རྒྱས་གཽ་ཏམ་ཕྱག་འཚལ་ལོ། །
39-1-251a


གང་ཞིག་བྱང་ཕྱོགས་སྒྲ་མི་སྙན། །ལྷུན་པོ་བལྟ་ན་སྡུག་རི་དགའ། །དེར་སྐྱེས་པ་ཡི་མི་རྣམས་ནི། །བདག་གིར་ཡོངས་སུ་བཟུང་བ་མེད། །དེ་རྣམས་ས་བོན་འདེབས་པ་མེད། །རྨོ་བ་ཡང་ནི་མེད་པ་ཡིན། །དཀའ་སྤྱད་
མེད་པར་འབྲས་སྨིན་ཞིང་། །མི་རྣམས་ཡོངས་སུ་ལོངས་སྤྱོད་དོ། །སྦུན་མེད་མ་གྲུགས་ཤིན་དུ་དག །དྲི་བཟང་འབྲས་ནི་འབྲས་བུར་ལྡན། །འབྲས་ཀྱི་འོ་མ་ལ་འཚེད་ཅིང་། །དེ་བཞིན་བཙོས་ནས་ལོངས་སྤྱོད་དོ། །བ་ལང་རྐང་གཅིག་
ལ་ཞོན་ནས། །ཡུལ་དང་ཕྱོགས་སུ་འགྲོ་བར་བྱེད། །རྐང་པ་གཅིག་པའི་ཕྱུགས་ཞོན་ནས། །ཡུལ་དང་ཕྱོགས་སུ་འགྲོ་བར་བྱེད། །བུད་མེད་ཀྱི་ནི་བཞོན་པ་ལ། །ཞོན་ནས་ཡུལ་དང་ཕྱོགས་སུ་འགྲོ། །སྐྱེས་པའི་བཞོན་པ་ལ་
ཞོན་ནས། །ཡུལ་དང་ཕྱོགས་སུ་འགྲོ་བར་བྱེད། །གཞོན་ནུ་མ་ཡི་བཞོན་པ་ལ། །ཞོན་ནས་ཡུལ་དང་ཕྱོགས་སུ་འགྲོ། །གཞོན་ནུའི་བཞོན་པ་ལ་ཞོན་ནས། །ཡུལ་དང་ཕྱོགས་སུ་འགྲོ་བར་བྱེད། །བཞོན་པ་དེ་རྣམས་ལ་ཞོན་ནས། །
ཕྱོགས་ཀུན་དུ་ནི་རྗེས་སུ་འགྲོ། །གཙོ་བོ་རྒྱལ་པོ་ཁྱད་མེད་དོ། །གླང་ཆེན་བཞོན་དང་རྟ་ཡི་བཞོན། །ལྷ་ཡི་བཞོན་པ་ལ་གནས་ནས། །ཁང་བཟང་དང་ནི་ཁྱོགས་དང་ནི། །རྒྱལ་པོ་ཆེན་པོ་གྲགས་དང་ལྡན། །དེའི་ཡང་གྲུབ་པའི་གྲོང་ཁྱེར་
ནི། །དྲི་མེད་བར་སྣང་ལ་གནས་པ། །ལྕང་ལོ་ཅན་དང་ཀུ་ཤའི་གྲོང་། །ཕ་རོལ་ཀུ་ཤའི་གྲོང་དང་ནི། །ནཱ་ཊའི་གྲོང་དང་ཕ་རོལ་གྱི། །ཀུ་ཤི་ཏའི་གྲོང་ཡིན་ནོ། །བྱང་གི་ཕྱོགས་ན་ཐམས་ཅད་རྒྱས། །སྐྱེས་བོའི་ཚོགས་པ་མང་པོ་གནས། །
དགུ་བཅུ་རྩ་དགུ་གྲོང་མཁའ་ལ། །རྒྱལ་པོའི་ཕོ་བྲང་ལྕང་ལོ་ཅན། །སླར་ཡང་དྲང་སྲོང་ཆེན་པོ་དང་། །རྒྱལ་པོ་ཆེན་པོ་ལུས་ངན་པོ། །བི་སཱ་ཎཱ་ཞེས་པ་རྒྱལ་པོའི་ཕོ་བྲང་ངོ་། །དེའི་ཕྱིར་རྒྱལ་པོ་ཆེན་པོ་རྣམ་ཐོས་ཀྱི་བུ་དང་། 
ལུས་ངན་པོ་ཞེས་བརྗོད་དོ། །སོ་སོར་རབ་ཏུ་གསལ་ཞིང་ཞི་བ་དང་དེ་དང་དེར་ནི་དེ་དང་དེ་མདངས་དང་དེའི་གཟི་བརྗིད་དང་དཔའ་ཞིང་སྟོབས་དང་ལྡན་པའི་རྒྱལ་པོ་སྟོབས་དང་ལྡན་པའི་མིང་ངོ་། །ས་གཞི་ཡང་ནི་བཅུད་ལྡན་ནོ། །
39-1-251b


གནས་དེར་སྤྲིན་རྣམས་ཆར་འབེབས་པར་བྱེད་དོ། །དེར་ནི་བྷ་ག་ལ་བ་ཏཱི་ཞེས་པའི་རྫིང་བུའོ། །གང་དུ་གནོད་སྦྱིན་ཚོགས་དང་ལྷན་ཅིག་ཏུ་གནས་སོ། །དེར་ནི་རྟག་ཏུ་ཤིང་གི་འབྲས། །སྣ་ཚོགས་བྱ་རྣམས་ལྷན་ཅིག་གནས། །རྨ་བྱ་ཁྲུང་ཁྲུང་
སྒྲ་སྒྲོགས་ཤིང་། །ཁུ་བྱུག་རྣམས་ནི་ཚན་ཚན་གནས། །ཤང་ཤང་ཏེའུ་སྒྲ་སྒྲོགས་ཤིང་། །དེ་ནས་ཡང་ནི་ངུར་པ་དང་། །གོང་མོ་ནགས་ཀྱི་བྱ་དག་ནི། །ནགས་ཀྱི་རྫིང་བུར་གནས་པའོ། །ནེ་ཚོ་རི་སྐེགས་དེ་སྒྲ་འབྱིན། །དཎ་ཊ་མཱ་ཊ་བྱ་དཀར་ནི། །
དུས་ཀུན་དུ་ནི་མཛེས་པར་བྱེད། །ལུས་ངན་རྒྱལ་པོའི་རྫིང་རྟག་མཛེས། །འདི་ནི་བྱང་གི་ཕྱོགས་ཀྱི་ཡུལ། །སྐྱེ་བོ་རྣམས་ནི་འདི་བཞིན་བརྗོད། །དེ་ཡི་ཕྱོགས་ནི་ཡོངས་སྐྱོང་བའི། །རྒྱལ་པོ་ཆེན་པོ་གྲགས་དང་ལྡན། །གནོད་སྦྱིན་རྣམས་ཀྱི་
བདག་པོ་སྟེ། །འདི་ཡི་མིང་ནི་ལུས་ངན་པོ། །གནོད་སྦྱིན་འཁོར་དང་བཅས་པ་ནི། །གླུ་དང་གར་གྱིས་དགའ་བར་བྱེད། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་
གོ། །དེ་ཡང་སངས་རྒྱས་མཐོང་བ་དང་། །ཉི་མའི་གཉེན་གྱིས་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིའོ། །སྐྱེས་བུ་ཅང་མཁྱེན་ཁྱེད་ཕྱག་འཚལ། །སྐྱེས་བུ་མཆོག་ཁྱོད་ཕྱག་འཚལ་ལོ། །
དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ཁྱེད་ཕྱག་འཚལ། །རྟག་ཏུ་འདི་ནི་ཉན་པའོ། །དེ་ཕྱིར་དེ་ལྟར་འདི་བརྗོད་དེ། །རྒྱལ་བ་གཽ་ཏམ་ཕྱག་གྱིས་ཤིག །རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །
སངས་རྒྱས་གཽ་ཏམ་ཕྱག་འཚལ་ལོ། །འདིར་ནི་དྲང་སྲོང་ཆེན་པོས་ལྕང་ལོ་ཅན་གྱི་ཕོ་བྲང་དང་བཅས་པས་སྲུངས་ཤིག །དགེ་སློང་ངམ་དགེ་སློང་མ་འམ་དགེ་བསྙེན་ནམ་དགེ་བསྙེན་མ་རྣམས་ལ་བསྲུང་བ་དང་། སྦ་བ་དང་། འཚེ་བ་
མེད་པ་དང་། བདེ་བ་དང་ལེགས་པར་གནས་སོ། །དྲང་སྲོང་ཆེན་པོ་གང་སུ་དག་དགེ་སློང་དང་བཅས་པ་འམ་དགེ་སློང་མ་དང་བཅས་པ་འམ་དགེ་བསྙེན་དང་བཅས་པ་འམ་དགེ་བསྙེན་མ་དང་བཅས་པ་རྣམས་ལ། འདིར་ལྕང་ལོ་ཅན་གྱི་ཕོ་བྲང་
39-1-252a


གིས་དེ་བསྲུང་བ་དང་ཡོངས་སུ་རྫོགས་པ་ཐམས་ཅད་ཡིད་ལ་ཟུང་ཅིག །དེའི་ཡང་མི་མ་ཡིན་རྣམས་སོ། །གནོད་སྦྱིན་ནམ་གནོད་སྦྱིན་མོ་འམ་གནོད་སྦྱིན་གྱི་བུ་ཕོ་འམ། གནོད་སྦྱིན་གྱི་བུ་མོ་འམ་གནོད་སྦྱིན་གྱི་བློན་པོ་ཆེན་པོའམ་གནོད་སྦྱིན་གྱི་
འཁོར་རམ་གནོད་སྦྱིན་གྱི་གཡོག་འཁོར་རམ། དྲི་ཟ་ཕོའམ་དྲི་ཟ་མོའམ་དྲི་ཟའི་བུ་ཕོའམ་དྲི་ཟའི་བུ་མོའམ་དྲི་ཟའི་བློན་པོ་ཆེན་པོའམ་དྲི་ཟའི་འཁོར་རམ་དྲི་ཟའི་གཡོག་འཁོར་རམ། གྲུལ་བུམ་ཕོའམ་གྲུལ་བུམ་མོའམ་གྲུལ་བུམ་གྱི་བུ་ཕོ་
འམ་གྲུལ་བུམ་གྱི་བུ་མོའམ་གྲུལ་བུམ་གྱི་བློན་པོ་ཆེན་པོའམ་གྲུལ་བུམ་གྱི་འཁོར་རམ་གྲུལ་བུམ་གྱི་གཡོག་འཁོར་རམ། ཀླུ་ཕོའམ་ཀླུ་མོའམ་ཀླུའི་བུ་ཕོའམ་ཀླུའི་བུ་མོའམ་ཀླུའི་བློན་པོ་ཆེན་པོའམ་ཀླུའི་འཁོར་རམ་ཀླུའི་གཡོག་འཁོར་
རམ། རབ་ཏུ་སྡང་བའི་སེམས་ཀྱིས་འགྲོའམ་རྗེས་སུ་འགྲོ་འམ་རྗེས་སུ་འགྲོ་བ་དང་སྡོད་པ་དང་ལྷན་ཅིག་ཏུ་སྡོད་པ་དང་། གནས་པ་དང་ལྷན་ཅིག་ཏུ་གནས་པ་དང་། ཉལ་བ་དང་ལྷན་ཅིག་ཏུ་ཉལ་བ་རྣམས་ནི་དྲང་སྲོང་ཆེན་པོ་འདི་རྣམས་ནི་མི་མ་ཡིན་
ཞེས་བྱའོ། །གྲོང་ངམ་གྲོང་རྡལ་ལམ་བཀུར་སྟི་བྱེད་པའམ་སྟི་སྟང་དུ་བྱེད་པ་ལ་དྲང་སྲོང་ཆེན་པོ་མི་མ་ཡིན་རྣམས་ཀྱིས་དེ་ཐོབ་པ་མ་ཡིན་ནོ། །རྒྱལ་པོའི་ཕོ་བྲང་ལྕང་ལོ་ཅན་ཞེས་བྱ་བ་ལ་གཞི་འམ་གནས་མེད་དོ། །དྲང་སྲོང་ཆེན་པོ་མི་མ་
ཡིན་རྣམས་དང་གནོད་སྦྱིན་རྣམས་ཀྱིས་ལྷན་ཅིག་ཏུ་གནས་པའང་མི་འཐོབ་པོ། །དྲང་སྲོང་ཆེན་པོ་གཞན་ཡང་མི་མ་ཡིན་རྣམས་ཀྱི་བཀའ་མཉན་པར་བྱའོ། །དྲང་སྲོང་ཆེན་པོ་གཞན་ཡང་མི་མ་ཡིན་རྣམས་ཀྱིས་བདག་ལ་ཕན་པ་རྫོགས་པ་
དང་། ཕ་རོལ་ལ་སྨོད་པ་དང་རྩོད་པ་དང་། དྲང་སྲོང་ཆེན་པོ་གཞན་ཡང་མི་མ་ཡིན་རྣམས་ལ་སྣོད་མེར་རབ་ཏུ་འབར་བ་མགོ་ལ་བཀོན་པ་དང་། དྲང་སྲོང་ཆེན་པོ་གཞན་ཡང་མི་མ་ཡིན་རྣམས་ཀྱི་མགོ་བོ་ཚལ་པ་བདུན་དུ་གཤེག་པར་བྱེད་དོ། །
དྲང་སྲོང་ཆེན་པོ་གཞན་ཡང་མི་མ་ཡིན་ནི་གཏུམ་པ་དང་དྲག་པ་དང་ཁྲོ་བའོ། །དེ་རྣམས་ཀྱིས་འདི་ལྟར་རྒྱལ་པོ་ཆེན་པོ་ལ་རྗོད་པར་བྱེད་དོ། །རྒྱལ་པོ་ཆེན་པོ་ལ་བརྗོད་པར་མ་ནུས་ན་སྐྱེས་བུ་ལ་སོགས་པ་ལ་བརྗོད་པར་བྱེད་དོ། །རྒྱལ་པོའི་
39-1-252b


སྐྱེས་བུ་ལ་བརྗོད་པར་མ་ནུས་ན་དེའི་འོག་མའི་སྐྱེས་བུ་རྣམས་ལ་བརྗོད་པར་བྱེད་དོ། །དྲང་སྲོང་ཆེན་པོ་དེ་ཡང་མི་མ་ཡིན་རྣམས་རྒྱལ་པོ་ཆེན་པོ་ལ་འགལ་བ་སྨྲ་བའོ། །དྲང་སྲོང་ཆེན་པོ་འདི་ལྟ་སྟེ། མ་ག་དྷའི་ཡུལ་གྱི་རྒྱལ་པོ་ལ་ཆོམ་རྐུན་བྱུང་ན་དེ་མ་
ཐག་ཏུ་རྒྱལ་པོ་ལ་བརྗོད་པར་བྱེད་དོ། །རྒྱལ་པོ་ལ་བརྗོད་པར་མ་ནུས་ན་རྒྱལ་པོའི་སྐྱེས་བུ་ལ་བརྗོད་པར་བྱེད་དོ། །སྐྱེས་བུ་ལ་བརྗོད་པར་མ་ནུས་ན་དེའི་འོག་མའི་སྐྱེས་བུ་ལ་བརྗོད་པར་བྱེད་པ་བཞིན་ནོ། །དྲང་སྲོང་ཆེན་པོ་དེ་ཡང་མ་ག་དྷའི་རྒྱལ་
པོ་ལ་ཆོམ་རྐུན་གྱིས་གནོད་པ་བྱེད་པར་བརྗོད་དོ། །དྲང་སྲོང་ཆེན་པོ་འདི་ལྟ་བུ་མི་མ་ཡིན་ཡོད་པ་རྣམས་གཏུམ་པ་དང་དྲག་པ་དང་ཁྲོ་བའོ། །དེ་མ་ཐག་ཏུ་རྒྱལ་པོ་ཆེན་པོ་རྣམས་ལ་བརྗོད་པར་བྱེད་དོ། །རྒྱལ་པོ་ཆེན་པོ་ལ་བརྗོད་པར་མ་ནུས་ན་རྒྱལ་
པོའི་སྐྱེས་བུ་ལ་བརྗོད་པར་བྱེད་དོ། །སྐྱེས་བུ་ལ་བརྗོད་པར་མ་ནུས་ན་དེའི་འོག་མའི་སྐྱེས་བུ་ལ་བརྗོད་པར་བྱེད་དོ། །དྲང་སྲོང་ཆེན་པོ་དེ་ནི་མི་མ་ཡིན་རྣམས་རྒྱལ་པོ་ཆེན་པོ་རྣམས་ལ་འགལ་བར་བརྗོད་པར་བྱེད་དོ། །དྲང་སྲོང་ཆེན་པོ་མི་མ་
ཡིན་གང་ཞིག་གནོད་སྦྱིན་ཕོ་འམ་གནོད་སྦྱིན་མོ་འམ་གནོད་སྦྱིན་གྱི་བུ་འམ་གནོད་སྦྱིན་གྱི་བུ་མོ་འམ་གནོད་སྦྱིན་གྱི་བློན་པོ་ཆེན་པོ་འམ་གནོད་སྦྱིན་གྱི་འཁོར་རམ་གནོད་སྦྱིན་གྱི་གཡོག་འཁོར་རམ། དྲི་ཟ་ཕོ་འམ་དྲི་ཟ་མོ་འམ་དྲི་ཟའི་བུ་
ཕོའམ་དྲི་ཟའི་བུ་མོའམ་དྲི་ཟའི་བློན་པོ་ཆེན་པོ་འམ་དྲི་ཟའི་འཁོར་རམ་དྲི་ཟའི་གཡོག་འཁོར་རམ། གྲུལ་བུམ་ཕོ་འམ་གྲུལ་བུམ་མོ་འམ་གྲུལ་བུམ་གྱི་བུ་ཕོ་འམ་གྲུལ་བུམ་གྱི་བུ་མོ་འམ་གྲུལ་བུམ་གྱི་བློན་པོ་ཆེན་པོ་འམ་གྲུལ་བུམ་གྱི་
འཁོར་རམ་གྲུལ་བུམ་གྱི་གཡོག་འཁོར་རམ། ཀླུ་ཕོ་འམ་ཀླུ་མོ་འམ་ཀླུའི་བུ་ཕོ་འམ་ཀླུའི་བུ་མོ་འམ་ཀླུའི་བློན་པོ་ཆེན་པོ་འམ་ཀླུའི་འཁོར་རམ་ཀླུའི་གཡོག་འཁོར་རམ། རབ་ཏུ་སྡང་བའི་སེམས་གྱིས་དགེ་སློང་ངམ་དགེ་སློང་མ་འམ་
དགེ་བསྙེན་ནམ་དགེ་བསྙེན་མ་རྣམས་འགྲོ་བ་འམ་རྗེས་སུ་འགྲོ་བ་འམ་རྗེས་སུ་འགྲོ་བ་དང་སྡོད་པ་དང་ལྷན་ཅིག་ཏུ་སྡོད་པ་དང་། གནས་པ་དང་ལྷན་ཅིག་ཏུ་གནས་པ་དང་། ཉལ་བ་དང་ལྷན་ཅིག་ཏུ་ཉལ་བ་དང་། འདི་རྣམས་ནི་གནོད་སྦྱིན་
39-1-253a


རྣམས་དང་། གནོད་སྦྱིན་ཆེན་པོ་རྣམས་དང་། སྡེ་དཔོན་རྣམས་དང་། སྡེ་དཔོན་ཆེན་པོ་རྣམས་ལ་གསོལ་བར་བྱེད་པ་དང་། ང་རོ་སྒྲོགས་པར་བྱེད་པ་དང་། སྒྲ་ཆེར་སྒྲོགས་པར་བྱེད་པའོ། །འདིར་གནོད་སྦྱིན་གྱིས་བཟུང་
ནས་གནོད་སྦྱིན་འདིས་ཚེ་འཕྲོག་པར་བྱེད་པ་དང་། གནོད་སྦྱིན་འདིས་འཚེ་བར་བྱེད་པ་དང་། གནོད་སྦྱིན་འདིས་རྣམ་པར་ཐོ་འཚམ་པར་བྱེད་པ་དང་། གནོད་སྦྱིན་འདིས་གནོད་པར་བྱེད་པ་དང་། གནོད་སྦྱིན་འདིས་རྣམ་པར་གནོད་པར་བྱེད་པ་དང་། 
གནོད་སྦྱིན་འདིས་ནི་མི་གཏོང་བར་བྱེད་དོ། །གནོད་སྦྱིན་རྣམས་དང་གནོད་སྦྱིན་ཆེན་པོ་རྣམས་དང་། སྡེ་དཔོན་རྣམས་དང་སྡེ་དཔོན་ཆེན་པོ་རྣམས་གང་ཞེ་ན། དབང་པོ་ཟླ་བ་ཆུ་ཟླ་དང་། །བྷཱ་ར་དྭ་ཛ་སྐྱེ་དགུའི་བདག །ཙན་ད་ན་དང་འོད་མཆོག་དང་། །
མགུལ་པ་མཛེས་དང་མགུལ་ངེས་དང་། །སྐྱེ་དགུའི་བླ་མར་གྱུར་པ་དང་། །ལྷ་ལས་བྱུང་བའི་ཁ་ལོ་པ། །དྲི་ཟ་སྣ་ཚོགས་སྡེ་དང་ནི། །མི་རྒྱལ་རྒྱལ་བའི་ཁྱུ་མཆོག་དང་། །དེ་བཞིན་རི་དང་གངས་ཅན་དང་། །གང་བ་སྨིན་དྲུག་ཕུག་དང་ནི། །
འཚོ་བ་དང་ནི་བཏང་གཟུང་དང་། །སྣ་ཚོགས་བཤེས་གཉེན་གཉའ་ཤིང་འཛིན། །ས་སྐྱོང་རབ་ཏུ་རྟོགས་པ་དང་། །ངོ་ཚ་མིག་དང་ཁང་པ་དང་། །ལྔ་ལེན་གཏུམ་པོ་ཨཱལ་བ་ཀ །སྲིད་སྒྲུབ་ཡིད་བཟང་བཞིན་བཟང་དང་། །
ཞོ་གདོང་ནོར་བུ་ནོར་བུ་སྤྱོད། །དེ་བཞིན་དབང་ཕྱུག་དང་བཅས་སོ། །འདི་རྣམས་ནི་གནོད་སྦྱིན་རྣམས་དང་། གནོད་སྦྱིན་ཆེན་པོ་རྣམས་དང་། སྡེ་དཔོན་རྣམས་དང་སྡེ་དཔོན་ཆེན་པོ་རྣམས་ལ་གསོལ་བར་བྱེད་པ་དང་། ང་རོ་
སྒྲོགས་པར་བྱེད་པ་དང་། སྒྲ་ཆེར་སྒྲོགས་པར་བྱེད་པའོ། །འདིར་གནོད་སྦྱིན་གྱིས་བཟུང་ནས་གནོད་སྦྱིན་འདིས་ཚེ་འཕྲོག་པར་བྱེད་པ་དང་། གནོད་སྦྱིན་འདིས་འཚེ་བར་བྱེད་པ་དང་། གནོད་སྦྱིན་འདིས་རྣམ་པར་ཐོ་འཚམ་པར་བྱེད་
པ་དང་། གནོད་སྦྱིན་འདིས་གནོད་པར་བྱེད་པ་དང་། གནོད་སྦྱིན་འདིས་རྣམ་པར་གནོད་པར་བྱེད་པ་དང་། གནོད་སྦྱིན་འདིས་ནི་མི་གཏོང་བར་བྱེད་དོ། །དྲང་སྲོང་ཆེན་པོ་འདིས་ནི་ལྕང་ལོ་ཅན་གྱི་ཕོ་བྲང་གིས་བསྲུངས་ཤིག །དགེ་སློང་དང་
39-1-253b


དགེ་སློང་མ་དང་། དགེ་བསྙེན་དང་དགེ་བསྙེན་མ་རྣམས་ལ་བསྲུང་བ་དང་། སྦ་བ་དང་། འཚེ་བ་མེད་པ་དང་། བདེ་བ་དང་། ལེགས་པར་གནས་སོ། །དྲང་སྲོང་ཆེན་པོ་དེ་ནི་བདག་ཅག་རྣམས་འགྲོ་བར་བགྱིའོ། །བདག་ཅག་རྣམས་ནི་བྱ་བ་
མང་བ་དང་བྱེད་པ་མང་བས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཁྱེད་རྣམས་ད་ནི་འགྲོ་བར་གྱིས་ཤིག །དེ་ནས་རྒྱལ་པོ་ཆེན་པོ་བཞི་པོ་རྣམས་ལངས་ནས། བཅོམ་ལྡན་འདས་ལ་ཕྱག་བྱས་ཏེ་བསྐོར་བ་
བྱས་ནས་དེར་མི་སྣང་བར་གྱུར་ཏོ། །གནོད་སྦྱིན་དེ་རྣམས་ཀྱང་ལངས་ནས་གང་སུ་དག་གིས་བཅོམ་ལྡན་འདས་ལ་ཕྱག་བྱས་ཏེ་བསྐོར་བ་བྱས་ནས་དེ་ཉིད་དུ་མི་སྣང་བར་གྱུར་ཏོ། །གང་སུ་དག་གིས་བཅོམ་ལྡན་འདས་ལ་སྙུན་གསོལ་
ཏེ་བསྙུན་གསོལ་ནས་སྙིང་པོ་དང་སྙིང་པོ་མེད་པ་ཇི་ལྟར་ཞེས་ཞུས་པ་དེ་རྣམས་དེ་ཉིད་དུ་མི་སྣང་བར་གྱུར་ཏོ། །གང་སུ་དག་གིས་བཅོམ་ལྡན་འདས་ག་ལ་བ་དེར་ཐལ་མོ་སྦྱར་ནས་དེ་ཉིད་དུ་མི་སྣང་བར་གྱུར་ཏོ། །གང་ལ་ལ་ཞིག་གིས་མིང་དང་
རིགས་རྣམ་པར་དཔྱད་ནས་དེ་ཉིད་དུ་མི་སྣང་བར་གྱུར་ཏོ། །གང་ལ་ལ་ཞིག་ཅང་མི་སྨྲ་བར་གྱུར་ཏེ་དེ་ཉིད་དུ་མི་སྣང་བར་གྱུར་ཏོ། །ལྕང་ལོ་ཅན་གྱི་ཕོ་བྲང་གི་མདོ་ལས་སྐབས་རབ་མཆོག་དང་པོའོ།།  །།དེ་ནས་ཡང་བཅོམ་ལྡན་འདས་ཀྱིས་
དེའི་མཚན་མོ་འདས་ནས་དགེ་སློང་རྣམས་བོས་ནས་དགེ་སློང་དག་འདིའི་མཚན་མོ་རྒྱལ་པོ་ཆེན་པོ་བཞི་པོ་རྣམས་དང་། གནོད་སྦྱིན་གྱི་སྡེ་དཔོན་ཆེན་པོ་རྣམས་དང་དྲི་ཟའི་སྡེ་མང་པོ་དང་། གྲུལ་བུམ་གྱི་སྡེ་མང་པོ་དང་། ཀླུའི་སྡེ་མང་པོ་དང་། 
ཕྱོགས་བཞི་བསྲུང་ཞིང་གནས་སོ། །ཕྱོགས་བཞིར་ཚན་ཚན་དུ་གནས་སོ། །ཕྱོགས་བཞི་སྐྱོང་ཞིང་གནས་སོ། །མཚན་མོ་འོངས་ཏེ་ཁ་དོག་སྣ་ཚོགས་པ་ཅན་གྱིས་བྱ་རྒོད་ཕུང་པོའི་རི་འབའ་ཞིག་སྣང་བར་བྱས་ཏེ། 
བཅོམ་ལྡན་འདས་ག་ལ་བ་དེར་སོང་སྟེ་སོང་ནས་ང་ལ་ཕྱག་བྱས་ནས་ཕྱོགས་གཅིག་ཏུ་འཁོད་དོ། །དགེ་སློང་དག་དང་གནོད་སྦྱིན་དེ་རྣམས་གང་ལ་ལ་ཞིག་གིས་ང་ལ་ཕྱག་བྱས་ནས་ཕྱོགས་གཅིག་ཏུ་འཁོད་དོ། །གང་སུ་དག་གིས་
39-1-254a


ང་ལ་སྙུན་གསོལ་ཏེ་བསྙུན་གསོལ་ནས་ཇི་ལྟར་སྙིང་པོ་དང་སྙིང་པོ་མེད་པའི་གཏམ་འདྲི་ཞིང་ཕྱོགས་གཅིག་ཏུ་འཁོད་དོ། །གང་སུ་དག་གིས་ང་ལ་ཐལ་མོ་སྦྱར་ནས་ཕྱོགས་གཅིག་ཏུ་འཁོད་དོ། །གང་སུ་དག་གིས་མིང་དང་རིགས་དཔྱོད་
ཅིང་ཕྱོགས་གཅིག་ཏུ་འཁོད་དོ། །གང་སུ་དག་ཅང་མི་སྨྲ་བར་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་དགེ་སློང་དག་དང་རྒྱལ་པོ་ཆེན་པོ་རྣམ་ཐོས་ཀྱི་བུས་ང་ལ་འདི་སྐད་ཅེས་གསོལ་ནས། གནོད་སྦྱིན་མ་རུངས་པ་
ཡོད་པ་རྣམས་བཙུན་པ་བཅོམ་ལྡན་འདས་ལ་མ་དད་པར་གྱུར་ཏོ། །གནོད་སྦྱིན་མ་རུངས་པ་གང་ལ་ལ་ཞིག་བཅོམ་ལྡན་འདས་ལ་དད་པར་གྱུར་ཏོ། །གནོད་སྦྱིན་འབྲིང་པོ་གང་ལ་ལ་ཞིག་བཙུན་པ་བཅོམ་ལྡན་འདས་ལ་མ་དད་པར་གྱུར་ཏོ། །
གནོད་སྦྱིན་འབྲིང་པོ་གང་ལ་ལ་ཞིག་བཙུན་པ་བཅོམ་ལྡན་འདས་ལ་དད་པར་གྱུར་ཏོ། །གནོད་སྦྱིན་དམན་པ་གང་ལ་ལ་ཞིག་བཙུན་པ་བཅོམ་ལྡན་འདས་ལ་མ་དད་པར་གྱུར་ཏོ། །གནོད་སྦྱིན་དམན་པ་གང་ལ་ལ་ཞིག་བཙུན་པ་བཅོམ་ལྡན་འདས་
ལ་དད་པར་གྱུར་ཏོ། །གནོད་སྦྱིན་གང་ལ་ལ་ཞིག་བཙུན་པ་བཅོམ་ལྡན་འདས་ལ་མ་དད་པར་གྱུར་པའི་རྒྱུ་གང་ལགས། བཙུན་པ་བཅོམ་ལྡན་འདས་ཀྱིས་སྲོག་གཅོད་པ་སྤོང་བའི་ཆོས་བསྟན་པ་དང་། མ་བྱིན་པར་ལེན་པ་སྤོང་བའི་ཆོས་
བསྟན་པ་དང་། འདོད་པས་ལོག་པར་སྤྱོད་པ་སྤོང་བའི་ཆོས་བསྟན་པ་དང་། བརྫུན་དུ་སྨྲ་བ་སྤོང་བའི་ཆོས་བསྟན་པ་དང་། མྱོས་པར་འགྱུར་བའི་ཆང་གི་བཏུང་བ་སྤོང་བའི་ཆོས་བསྟན་པས་སོ། །གནོད་སྦྱིན་གང་དེ་རྣམས་བཙུན་པས་སྲོག་
གཅོད་པ་སྤོང་བ་ལ་མི་དགའ་བར་གྱུར་པ་དང་། མ་བྱིན་པར་ལེན་པ་སྤོང་བ་ལ་མི་དགའ་བར་གྱུར་པ་དང་། འདོད་པས་ལོག་པར་སྤྱོད་པ་སྤོང་བ་ལ་མི་དགའ་བར་གྱུར་པ་དང་། བརྫུན་དུ་སྨྲ་བ་སྤོང་བ་ལ་མི་དགའ་བར་གྱུར་པ་དང་། མྱོས་པར་
འགྱུར་བའི་ཆང་གི་བཏུང་བ་སྤོང་བ་ལ་མི་དགའ་བར་གྱུར་པས་སོ། །དེ་རྣམས་ལ་མི་དགའ་ཞིང་མི་འདོད་པར་གྱུར་ཏོ། །བཙུན་པ་བཅོམ་ལྡན་འདས་ཉན་ཐོས་ཇི་སྙེད་ཡོད་པ་རྣམས་འབྲོག་དགོན་པའི་ལམ་དུ་ཞུགས་ནས་ཉལ་བ་དང་འདུག་
39-1-254b


པ་དང་བརྟེན་ཏོ། །སྒྲ་མེད་ཅིང་དབྱངས་མེད་པར་དབེན་པར་གནས་ཤིང་འདུ་འཛིའི་འཚེ་བ་མེད་དོ། །སོ་སོར་དགེ་སྦྱོང་རྣམས་འཐུན་ཞིང་གནས་སོ། །དེ་ན་གནོད་སྦྱིན་མ་རུངས་པ་རྣམས་ཀྱི་གནས་ཡོད་དོ། །གང་ཞིག་བཅོམ་ལྡན་འདས་ཀྱི་
གསུང་རབ་ལ་མ་དད་པར་གྱུར་ཏེ། དེ་རྣམས་དད་པར་བྱ་བའི་ཕྱིར་བཙུན་པ་བཅོམ་ལྡན་འདས་ལ་བསླབ་པར་བྱ་སྟེ། ལྕང་ལོ་ཅན་གྱི་ཕོ་བྲང་གིས་བསྲུང་དུ་གསོལ། དགེ་སློང་ངམ་དགེ་སློང་མ་འམ། དགེ་བསྙེན་ནམ་དགེ་བསྙེན་མ་རྣམས་
ལ་བསྲུང་བ་དང་། སྦ་བ་དང་། འཚེ་བ་མེད་པ་དང་། བདེ་བ་དང་ལེགས་པར་གནས་སོ། །དགེ་སློང་རྣམས་ལ་བདག་གིས་ཅང་མི་གསུང་བའི་ཚུལ་གྱིས་གནང་བ་བྱིན་ནོ། །དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུས་གནང་བ་བྱིན་པ་ཤེས་ཏེ། 
དེའི་ཚེ་འདི་ལྟར་ལྕང་ལོ་ཅན་གྱི་ཕོ་བྲང་གིས་སྲུངས་ཤིག་ཅེས་གསོལ་ཏོ། །སྤྱན་ལྡན་དཔལ་དང་ལྡན་པ་ཡི། །རྣམ་པར་གཟིགས་ལ་ཕྱག་འཚལ་ལོ། །སེམས་ཅན་རྣམས་ལ་བརྩེ་བ་ཡི། །གཙུག་ཏོར་ཅན་ལ་ཕྱག་འཚལ་ལོ། །མགོན་མེད་
རྣམས་ལ་གདུང་བ་ཡི། །ཐམས་ཅད་སྐྱོབ་ལ་ཕྱག་འཚལ་ལོ། །བདུད་ཀྱི་སྡེ་རྣམས་འཇོམས་པ་ཡི། །འཁོར་བ་འཇིག་ལ་ཕྱག་འཚལ་ལོ། །བྲམ་ཟེ་དཔལ་དང་ལྡན་པ་ཡི། །གསེར་ཐུབ་ལ་ཡང་ཕྱག་འཚལ་ལོ། །སེམས་ཅན་
རྣམ་གྲོལ་མཛད་པ་ཡི། །འོད་སྲུང་ལ་ནི་ཕྱག་འཚལ་ལོ། །ཤཱཀྱའི་སྲས་ནི་དཔལ་དང་ལྡན། །ཉི་མའི་རྒྱུད་ལ་ཕྱག་འཚལ་ལོ། །སྡུག་བསྔལ་ཀུན་ལས་གྲོལ་མཛད་པའི། །གང་ཞིག་ཆོས་ནི་རབ་སྟོན་མཛད། །གང་ཡང་འཇིག་རྟེན་པར་
གྱུར་པ། །ཇི་ལྟ་བ་བཞིན་གཟིགས་གྱུར་པའི། །དེ་རྣམས་ལ་ནི་ཕྲ་མ་མེད། །འཇིགས་པ་མེད་པ་ཆེན་པོ་ནི། །གང་ཞིག་གཽ་ཏམ་ཕྱག་བྱེད་པ། །ལྷ་དང་མི་ལ་ཕན་པ་ཡིན། །རིག་པ་དང་ནི་ཞབས་སུ་ལྡན། །འཇིགས་པ་མེད་པ་
ཆེན་པོ་སྟེ། །ཉི་མའི་དཀྱིལ་འཁོར་ཆེན་པོ་ནི། །གང་ཞིག་ཏུ་ནི་ནུབ་ཅིང་འཆར། །གང་དུ་ཉི་མ་ནུབ་གྱུར་པ། །དེར་ནི་མཚན་མོར་འགྱུར་བ་ཡིན། །གང་དུ་ཉི་མ་ཤར་གྱུར་པ། །དེར་ནི་ཉིན་མོ་ཞེས་བརྗོད་དོ། །གཏིང་ནི་ཟབ་པའི་
39-1-255a


རྒྱ་མཚོ་ཡི། །དེ་ཡི་ཆུ་ཡི་བཅུད་བཟང་ངོ་། །དེ་ལྟར་དེར་ནི་སྐྱེས་གྱུར་པའི། །རྒྱ་མཚོའི་ཆུ་ཡི་བཅུད་བཞིན་ནོ། །འདིར་ནི་ཤར་གྱི་ཕྱོགས་ཀྱི་ནི། །སྐྱེ་བོ་རྣམས་ལ་འདི་བརྗོད་དོ། །དེ་ཡི་ཕྱོགས་ནི་ཡོངས་སྐྱོང་བའི། །
རྒྱལ་པོ་ཆེན་པོ་གྲགས་ཆེན་ལྡན། །དྲི་ཟ་རྣམས་ཀྱི་བདག་པོ་སྟེ། །མིང་ནི་རྒྱལ་པོ་ཡུལ་འཁོར་སྐྱོང་། །དྲི་ཟ་འཁོར་དང་བཅས་པ་ནི། །གླུ་དང་གར་གྱིས་དགའ་བར་བྱེད། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །
དབང་པོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་གོ། །དེ་ཡང་སངས་རྒྱས་མཐོང་བ་དང་། །ཉི་མའི་གཉེན་གྱི་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིའོ། །སྐྱེས་བུ་ཅང་མཁྱེན་
ཁྱེད་ཕྱག་འཚལ། །སྐྱེས་བུ་མཆོག་ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ཁྱེད་ཕྱག་འཚལ། །རྟག་ཏུ་འདི་ནི་ཉན་པའོ། །དེ་ཕྱིར་དེ་ལྟར་འདི་བརྗོད་དོ། །རྒྱལ་བ་གཽ་ཏམ་ཕྱག་གྱིས་ཤིག །
རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །རྒྱལ་བ་གཽ་ཏམ་ཕྱག་འཚལ་ལོ། །གང་ཡང་ཡི་དགས་རྗོད་བྱེད་པ། །ཕྲ་མ་རྒྱབ་ཀྱི་ཤ་ཅན་དང་། །སྲོག་གཅོད་པ་ལ་ཆགས་པ་དང་། །སྐྱེ་བོ་མ་ལུས་
འཇོམས་པའོ། །འདིར་ནི་ལྷོ་ཡི་ཕྱོགས་གནས་པའི། །སྐྱེ་བོ་རྣམས་ལ་འདི་སྐད་བརྗོད། །དེ་ཡི་གནས་ནི་ཡོངས་སྐྱོང་བ། །རྒྱལ་པོ་ཆེན་པོ་གྲགས་ལྡན་པ། །གྲུལ་བུམ་རྣམས་ཀྱི་བདག་པོ་སྟེ། །མིང་ནི་འཕགས་
སྐྱེས་པོ་ཞེས་བྱ། །གྲུལ་བུམ་འཁོར་དང་བཅས་པ་ནི། །གླུ་དང་གར་གྱིས་དགའ་བར་བྱེད། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་གོ། །
དེ་ཡང་སངས་རྒྱས་མཐོང་བ་དང་། །ཉི་མའི་རྒྱུད་ཀྱི་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིའོ། །སྐྱེས་བུ་ཅང་མཁྱེན་ཁྱེད་ཕྱག་འཚལ། །སྐྱེས་བུ་མཆོག་ཁྱོད་ཕྱག་འཚལ་ལོ། །
39-1-255b


དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ཁྱེད་ཕྱག་འཚལ། །རྟག་ཏུ་འདི་ནི་ཉན་པའོ། །དེ་ཕྱིར་དེ་ལྟར་འདི་བརྗོད་དེ། །རྒྱལ་བ་གཽ་ཏམ་ཕྱག་གྱིས་ཤིག །རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་
ལྡན། །སངས་རྒྱས་གཽ་ཏམ་ཕྱག་འཚལ་ལོ། །ཉི་མའི་དཀྱིལ་འཁོར་ཆེན་པོ་ནི། །གང་ནས་གང་དུ་ཤར་གྱུར་པ། །དེར་ནི་ཉིན་མོར་འགྱུར་བ་སྟེ། །ཉིན་མོ་ཞེས་ནི་བརྗོད་པ་ཡིན། །གང་དུ་ཉི་མ་ནུབ་གྱུར་པ། །དེར་ནི་མཚན་
མོར་རྗོད་པར་བྱེད། །གཏིང་ནི་ཟབ་པའི་རྒྱ་མཚོ་ཡི། །དེ་ཡི་ཆུ་ཡི་བཅུད་བཟང་ངོ་། །དེ་ལྟར་དེར་ནི་སྐྱེས་གྱུར་པའི། །རྒྱ་མཚོའི་ཆུ་ཡི་བཅུད་བཞིན་ནོ། །འདིར་ནི་ནུབ་ཀྱི་ཕྱོགས་ཀྱི་ནི། །སྐྱེ་བོ་རྣམས་ལ་འདི་བརྗོད་དེ། །
དེ་ཡི་ཕྱོགས་ནི་ཀུན་སྐྱོང་བའི། །རྒྱལ་པོ་ཆེན་པོ་གྲགས་ཆེན་ལྡན། །ཀླུ་རྣམས་ཀྱི་ནི་བདག་པོ་སྟེ། །འདི་ཡི་མིང་ནི་མིག་མི་བཟང་། །ཀླུ་ཡི་འཁོར་དང་བཅས་པ་ནི། །གླུ་དང་གར་གྱིས་དགའ་བར་བྱེད། །དེ་ཡི་བུ་ནི་མང་པོ་
རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་གོ། །དེ་ཡང་སངས་རྒྱས་མཐོང་བ་དང་། །ཉི་མའི་གཉེན་གྱི་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། ། 
ཐག་རིང་ནས་ནི་ཕྱག་བགྱིད་དོ། །སྐྱེས་བུ་ཅང་མཁྱེན་ཁྱེད་ཕྱག་འཚལ། །སྐྱེས་བུ་མཆོག་ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ཁྱེད་ཕྱག་འཚལ། །རྟག་ཏུ་འདི་ནི་ཉན་པའོ། །
དེ་ཕྱིར་དེ་ལྟར་འདི་བརྗོད་དོ། །རྒྱལ་བ་གཽ་ཏམ་ཕྱག་གྱིས་ཤིག །རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །སངས་རྒྱས་གཽ་ཏམ་ཕྱག་འཚལ་ལོ། །གང་ཞིག་བྱང་ཕྱོགས་སྒྲ་མི་སྙན། །ལྷུན་
པོ་ལྟ་ན་སྡུག་རི་དགའ། །དེར་སྐྱེས་པ་ཡི་མི་རྣམས་ནི། །བདག་གིར་ཡོངས་སུ་བཟུང་བ་མེད། །དེ་རྣམས་ས་བོན་འདེབས་པ་མེད། །རྨོ་བ་ཡང་ནི་མེད་པ་ཡིན། །དཀའ་སྤྱད་མེད་པར་འབྲས་སྨིན་ནས། །མི་རྣམས་
39-1-256a


ཡོངས་སུ་ལོངས་སྤྱོད་དེ། །སྦུན་མེད་མ་གྲུགས་ཤིན་དུ་དག །དྲི་བཟང་འབྲས་ནི་འབྲས་བུར་ལྡན། །འབྲས་ཀྱི་འོ་མ་ལ་འཚེད་ཅིང་། །དེ་བཞིན་བཙོས་ནས་ལོངས་སྤྱོད་དོ། །བ་ལང་རྐང་གཅིག་ལ་ཞོན་ནས། །
ཡུལ་དང་ཕྱོགས་སུ་འགྲོ་བར་བྱེད། །རྐང་པ་གཅིག་པའི་ཕྱུགས་ཞོན་ནས། །ཡུལ་དང་ཕྱོགས་སུ་འགྲོ་བར་བྱེད། །བུད་མེད་ཀྱི་ནི་བཞོན་པ་ལ། །ཞོན་ནས་ཡུལ་དང་ཕྱོགས་སུ་འགྲོ། །སྐྱེས་པའི་བཞོན་པ་ལ་ཞོན་ནས། །
ཡུལ་དང་ཕྱོགས་སུ་འགྲོ་བར་བྱེད། །གཞོན་ནུ་མ་ཡི་བཞོན་པ་ལ། །ཞོན་ནས་ཡུལ་དང་ཕྱོགས་སུ་འགྲོ། །གཞོན་ནུའི་བཞོན་པ་ལ་ཞོན་ནས། །ཡུལ་དང་ཕྱོགས་སུ་འགྲོ་བར་བྱེད། །བཞོན་པ་དེ་རྣམས་ལ་ཞོན་ནས། །
ཕྱོགས་ཀུན་དུ་ནི་རྗེས་སུ་འགྲོ། །གཙོ་བོ་རྒྱལ་པོ་ཁྱད་མེད་དོ། །གླང་ཆེན་བཞོན་དང་རྟ་ཡི་བཞོན། །ལྷ་ཡི་བཞོན་པ་ལ་གནས་ནས། །ཁང་བཟང་དང་ནི་ཁྱོགས་རྣམས་ནི། །རྒྱལ་པོ་ཆེན་པོ་གྲགས་ཆེན་ལྡན། །དེའི་ཡང་གྲུབ་
པའི་གྲོང་ཁྱེར་ནི། །དྲི་མེད་བར་སྣང་ལ་གནས་པ། །ལྕང་ལོ་ཅན་དང་ཀུ་ཤའི་གྲོང་། །ཕ་རོལ་ཀུ་ཤའི་གྲོང་དང་ནི། །ནཱ་ཊཱའི་གྲོང་དང་ཕ་རོལ་གྱི། །ཀུ་ཤི་ཏའི་གྲོང་ཡིན་ནོ། །བྱང་གི་ཕྱོགས་ན་ཐམས་ཅད་རྒྱས། །སྐྱེ་བོའི་
ཚོགས་པ་མང་པོ་གནས། །དགུ་བཅུ་རྩ་དགུ་གྲོང་མཁའ་ལ། །རྒྱལ་པོའི་ཕོ་བྲང་ལྕང་ལོ་ཅན། །སླར་ཡང་དྲང་སྲོང་ཆེན་པོ་དང་། །རྒྱལ་པོ་ཆེན་པོ་ལུས་ངན་པོ། །ཅོག་ལྡན་ཞེས་པ་རྒྱལ་པོ་ཆེན་པོའི་ཕོ་བྲང་ངོ་། །དེའི་ཕྱིར་
རྒྱལ་པོ་ཆེན་པོ་རྣམ་ཐོས་ཀྱི་བུ་དང་ལུས་ངན་པོ་ཞེས་བརྗོད་དོ། །སོ་སོར་རབ་ཏུ་གསལ་ཞིང་ཞི་བ་དང་དེ་དང་དེར་ནི་དེ་དང་དེ་མདངས་དང་དེའི་གཟི་བརྗིད་དང་དཔའ་ཞིང་སྟོབས་དང་ལྡན་པའི་རྒྱལ་པོ་སྟོབས་དང་ལྡན་པའི་མིང་ངོ་། །ས་གཞི་ཡང་
ནི་བཅུད་ལྡན་ནོ། །གནས་དེར་སྤྲིན་རྣམས་ཆར་འབེབས་པར་བྱེད་དོ། །དེར་ནི་བྷ་ག་ལ་བརྟཱི་ཞེས་པའི་རྫིང་བུའོ། །གང་དུ་གནོད་སྦྱིན་ཚོགས་དང་ལྷན་ཅིག་ཏུ་གནས་སོ། །དེར་ནི་རྟག་ཏུ་ཤིང་གི་འབྲས། །སྣ་ཚོགས་
39-1-256b


བྱ་རྣམས་ལྷན་ཅིག་གནས། །རྨ་བྱ་ཁྲུང་ཁྲུང་སྒྲ་སྒྲོགས་ཤིང་། །ཁུ་བྱུག་རྣམས་ནི་ཚན་ཚན་གནས། །ཤང་ཤང་ཏེའུ་སྒྲ་སྒྲོགས་ཤིང་། །དེ་ནས་ཡང་ནི་ངུར་པ་དང་། །གོང་མོ་ནགས་ཀྱི་བྱ་གག་རྣམས། །ནགས་ཀྱི་
རྫིང་བུར་གནས་པའོ། །ནེ་ཙོ་རི་སྐེགས་དེ་སྒྲ་འབྱིན། །དཎ་ཊ་མཱ་ན་བྱ་དཀར་དང་། །དུས་ཀུན་དུ་ནི་མཛེས་པར་བྱེད། །ལུས་ངན་རྒྱལ་པོའི་རྫིང་རྟག་མཛེས། །འདི་ནི་བྱང་གི་ཕྱོགས་ཀྱི་ཡུལ། །སྐྱེ་བོ་རྣམས་ནི་འདི་བཞིན་
བརྗོད། །དེ་ཡི་ཕྱོགས་ནི་ཡོངས་སྐྱོང་བའི། །རྒྱལ་པོ་ཆེན་པོ་གྲགས་དང་ལྡན། །གནོད་སྦྱིན་རྣམས་ཀྱི་བདག་པོ་སྟེ། །འདི་ཡི་མིང་ནི་ལུས་ངན་པོ། །གནོད་སྦྱིན་འཁོར་དང་བཅས་པ་ནི། །གླུ་དང་གར་གྱིས་དགའ་བར་བྱེད། །
དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་གོ། །དེ་ཡང་སངས་རྒྱས་མཐོང་བ་དང་། །ཉི་མའི་གཉེན་གྱི་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །
ཐག་རིང་ནས་ནི་ཕྱག་བགྱིའོ། །སྐྱེས་བུ་ཅང་མཁྱེན་ཁྱེད་ཕྱག་འཚལ། །སྐྱེས་བུ་མཆོག་ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ཁྱེད་ཕྱག་འཚལ། །རྟག་ཏུ་འདི་ནི་ཉན་པའོ། །དེ་ཕྱིར་དེ་ལྟར་འདི་
བརྗོད་དོ། །རྒྱལ་བ་གཽ་ཏམ་ཕྱག་གྱིས་ཤིག །རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །སངས་རྒྱས་གཽ་ཏམ་ཕྱག་འཚལ་ལོ། །འདིར་ནི་དྲང་སྲོང་ཆེན་པོ་ལྕང་ལོ་ཅན་དང་བཅས་པས་བསྲུངས་ཤིག །དགེ་སློང་ངམ་དགེ་སློང་
མ་འམ། དགེ་བསྙེན་ནམ་དགེ་བསྙེན་མ་རྣམས་ལ་བསྲུང་བ་དང་། སྦ་བ་དང་འཚེ་བ་མེད་པ་དང་། བདེ་བ་དང་ལེགས་པར་གནས་སོ། །དྲང་སྲོང་ཆེན་པོ་གང་སུ་དག་དགེ་སློང་དང་བཅས་པ་འམ་དགེ་སློང་མ་དང་བཅས་པ་འམ། དགེ་བསྙེན་དང་བཅས་པ་འམ་
དགེ་བསྙེན་མ་དང་བཅས་པ་རྣམས་དང་། འདིར་ལྕང་ལོ་ཅན་གྱི་ཕོ་བྲང་གིས་དེ་བསྲུང་བ་དང་། ཡོངས་སུ་རྫོགས་པ་ཐམས་ཅད་ཡོངས་སུ་ཟུང་ཤིག །དེ་ཡང་མི་མ་ཡིན་རྣམས་སོ། །གནོད་སྦྱིན་ནམ་གནོད་སྦྱིན་མོ་འམ་གནོད་སྦྱིན་གྱི་བུ་ཕོ་འམ་
39-1-257a


གནོད་སྦྱིན་གྱི་བུ་མོ་འམ་གནོད་སྦྱིན་གྱི་བློན་པོ་ཆེན་པོ་འམ་གནོད་སྦྱིན་གྱི་འཁོར་རམ་གནོད་སྦྱིན་གྱི་གཡོག་འཁོར་རམ། །དྲི་ཟ་ཕོ་འམ་དྲི་ཟ་མོ་འམ་དྲི་ཟའི་བུ་ཕོ་འམ་དྲི་ཟའི་བུ་མོ་འམ་དྲི་ཟའི་བློན་པོ་ཆེན་པོ་འམ་དྲི་ཟའི་འཁོར་རམ་
དྲི་ཟའི་གཡོག་འཁོར་རམ། གྲུལ་བུམ་ཕོ་འམ་གྲུལ་བུམ་མོ་འམ་གྲུལ་བུམ་གྱི་བུ་ཕོ་འམ་གྲུལ་བུམ་གྱི་བུ་མོ་འམ་གྲུལ་བུམ་གྱི་བློན་པོ་ཆེན་པོ་འམ་གྲུལ་བུམ་གྱི་འཁོར་རམ་གྲུལ་བུམ་གྱི་གཡོག་འཁོར་རམ། ཀླུ་ཕོ་འམ་ཀླུ་མོ་འམ་ཀླུའི་
བུ་ཕོ་འམ་ཀླུའི་བུ་མོ་འམ་ཀླུའི་བློན་པོ་ཆེན་པོ་འམ་ཀླུའི་འཁོར་རམ་ཀླུའི་གཡོག་འཁོར་རྣམས་རབ་ཏུ་སྡང་བའི་སེམས་ཀྱིས་འགྲོ་བ་འམ་རྗེས་སུ་འགྲོ་བ་འམ་རྗེས་སུ་འགྲོ་བ་དང་། སྡོད་པ་དང་ལྷན་ཅིག་ཏུ་སྡོད་པ་དང་། གནས་པ་དང་ལྷན་ཅིག་ཏུ་
གནས་པ་དང་། ཉལ་བ་དང་ལྷན་ཅིག་ཏུ་ཉལ་བ་རྣམས་ལ། དྲང་སྲོང་ཆེན་པོ་འདི་རྣམས་ནི་མི་མ་ཡིན་རྣམས་ཞེས་བྱའོ། །གྲོང་ངམ་གྲོང་རྡལ་ལམ། བཀུར་སྟིར་བྱེད་པ་འམ་སྟི་སྟང་དུ་བྱེད་པ་རྣམས། དྲང་སྲོང་ཆེན་པོ་མི་མ་ཡིན་རྣམས་
ཀྱིས་དེ་ཐོབ་པ་མ་ཡིན་ནོ། །རྒྱལ་པོ་ཆེན་པོའི་ཕོ་བྲང་ལྕང་ལོ་ཅན་ཞེས་བྱ་བ་གཞི་འམ་གནས་ས་མེད་དོ། །དྲང་སྲོང་ཆེན་པོ་མི་མ་ཡིན་རྣམས་ཀྱིས་གནོད་སྦྱིན་དང་ལྷན་ཅིག་ཏུ་གནས་པ་འམ་མི་འཐོབ་པོ། །དྲང་སྲོང་ཆེན་པོ་གཞན་ཡང་
མི་མ་ཡིན་རྣམས་ཀྱི་བཀའ་མཉན་པར་བྱའོ། །དྲང་སྲོང་ཆེན་པོ་གཞན་ཡང་མི་མ་ཡིན་རྣམས་ཀྱིས་བདག་ལ་ཕན་པ་རྫོགས་པ་དང་། ཕ་རོལ་ལ་སྨོད་པ་དང་། རྩོད་པ་དང་། དྲང་སྲོང་ཆེན་པོ་གཞན་ཡང་མི་མ་ཡིན་རྣམས་ལ་སྣོད་མེར་རབ་ཏུ་
འབར་བ་མགོ་ལ་བཀོན་པ་དང་། དྲང་སྲོང་ཆེན་པོ་གཞན་ཡང་མི་མ་ཡིན་རྣམས་ཀྱིས་མགོ་བོ་ཚལ་པ་བདུན་དུ་གཤེག་པར་བྱེད་དོ། །དྲང་སྲོང་ཆེན་པོ་གཞན་ཡང་མི་མ་ཡིན་ནི་གཏུམ་པ་དང་དྲག་པ་དང་ཁྲོ་བའོ། །དེ་རྣམས་ཀྱིས་འདི་ལྟར་
རྒྱལ་པོ་ཆེན་པོ་ལ་བརྗོད་པར་བྱེད་དོ། །རྒྱལ་པོ་ཆེན་པོ་ལ་བརྗོད་པར་མ་ནུས་ན་སྐྱེས་བུ་ལ་སོགས་པ་ལ་རྗོད་པར་བྱེད་དོ། །རྒྱལ་པོ་ཆེན་པོའི་སྐྱེས་བུ་ལ་བརྗོད་པར་མ་ནུས་ན་དེའི་འོག་མའི་སྐྱེས་བུ་ལ་རྗོད་པར་བྱེད་དོ། །དྲང་སྲོང་ཆེན་
39-1-257b


པོ་དེ་ཡང་མི་མ་ཡིན་རྣམས་རྒྱལ་པོ་ལ་འགལ་བ་སྨྲ་བའོ། །དྲང་སྲོང་ཆེན་པོ་འདི་ལྟ་སྟེ། མ་ག་དྷའི་ཡུལ་གྱི་རྒྱལ་པོ་ལ་ཆོམ་རྐུན་བྱུང་ན་དེ་མ་ཐག་ཏུ་རྒྱལ་པོ་ལ་བརྗོད་པར་བྱེད་དོ། །རྒྱལ་པོ་ལ་བརྗོད་པར་མ་ནུས་ན་རྒྱལ་པོའི་
སྐྱེས་བུ་ལ་བརྗོད་པར་བྱེད་དོ། །སྐྱེས་བུ་ལ་བརྗོད་པར་མ་ནུས་ན། དེའི་འོག་མའི་སྐྱེས་བུ་ལ་རྗོད་པར་བྱེད་པ་བཞིན་ནོ། །དྲང་སྲོང་ཆེན་པོ་དེ་ཡང་མ་ག་དྷའི་རྒྱལ་པོ་ལ་ཆོམ་རྐུན་གྱིས་གནོད་པར་བྱེད་པར་བརྗོད་དོ། །དྲང་སྲོང་ཆེན་པོ་
འདི་ལྟ་བུའི་མི་མ་ཡིན་ཡོད་པ་རྣམས་གཏུམ་པ་དང་དྲག་པོ་དང་ཁྲོ་བའོ། །དེ་མ་ཐག་ཏུ་རྒྱལ་པོ་ཆེན་པོ་རྣམས་ལ་བརྗོད་པར་བྱེད་དོ། །རྒྱལ་པོ་ཆེན་པོ་ལ་བརྗོད་པར་མ་ནུས་ན་རྒྱལ་པོའི་སྐྱེས་བུ་ལ་བརྗོད་པར་བྱེད་དོ། །སྐྱེས་བུ་ལ་
བརྗོད་པར་མ་ནུས་ན་དེའི་འོག་མའི་སྐྱེས་བུ་ལ་རྗོད་པར་བྱེད་དོ། །དྲང་སྲོང་ཆེན་པོ་མི་མ་ཡིན་རྣམས་རྒྱལ་པོ་ཆེན་པོ་རྣམས་ལ་འགལ་བ་རྗོད་པར་བྱེད་དོ། །དྲང་སྲོང་ཆེན་པོ་མི་མ་ཡིན་གང་ཞིག་གནོད་སྦྱིན་ནམ་གནོད་སྦྱིན་མོ་འམ་
གནོད་སྦྱིན་གྱི་བུ་འམ་གནོད་སྦྱིན་གྱི་བུ་མོ་འམ་གནོད་སྦྱིན་གྱི་བློན་པོ་ཆེན་པོ་འམ་གནོད་སྦྱིན་གྱི་འཁོར་རམ་གནོད་སྦྱིན་གྱི་གཡོག་འཁོར་རམ། དྲི་ཟ་ཕོ་འམ་དྲི་ཟ་མོ་འམ་དྲི་ཟའི་བུ་ཕོ་འམ་དྲི་ཟའི་བུ་མོ་འམ་དྲི་ཟའི་བློན་པོ་ཆེན་པོ་འམ་
དྲི་ཟའི་འཁོར་རམ་དྲི་ཟའི་གཡོག་འཁོར་རམ། གྲུལ་བུམ་ཕོ་འམ་གྲུལ་བུམ་མོ་འམ་གྲུལ་བུམ་གྱི་བུ་ཕོའམ་གྲུལ་བུམ་གྱི་བུ་མོ་འམ་གྲུལ་བུམ་གྱི་བློན་པོ་ཆེན་པོ་འམ་གྲུལ་བུམ་གྱི་འཁོར་རམ་གྲུལ་བུམ་གྱི་གཡོག་འཁོར་རམ། 
ཀླུ་ཕོ་འམ་ཀླུ་མོ་འམ་ཀླུའི་བུ་ཕོ་འམ་ཀླུའི་བུ་མོ་འམ་ཀླུའི་བློན་པོ་ཆེན་པོ་འམ་ཀླུའི་འཁོར་རམ་ཀླུའི་གཡོག་འཁོར་རྣམས་རབ་ཏུ་སྡང་བའི་སེམས་ཀྱིས་དགེ་སློང་ངམ་དགེ་སློང་མ་འམ། དགེ་བསྙེན་ནམ་དགེ་བསྙེན་མ་རྣམས་
འགྲོ་བ་འམ་རྗེས་སུ་འགྲོ་བ་འམ་རྗེས་སུ་འགྲོ་བ་དང་སྡོད་པ་དང་ལྷན་ཅིག་ཏུ་སྡོད་པ་དང་ཉལ་བ་དང་ལྷན་ཅིག་ཏུ་ཉལ་བ་དང་། འདི་རྣམས་ནི་གནོད་སྦྱིན་རྣམས་དང་། གནོད་སྦྱིན་ཆེན་པོ་རྣམས་དང་། སྡེ་དཔོན་རྣམས་དང་། སྡེ་དཔོན་
39-1-258a


ཆེན་པོ་རྣམས་ལ་གསོལ་བར་བྱེད་པ་དང་། ང་རོ་སྒྲོགས་པར་བྱེད་པ་དང་། སྒྲ་ཆེར་སྒྲོགས་པར་བྱེད་པའོ། །འདིར་གནོད་སྦྱིན་གྱིས་བཟུང་ནས་གནོད་སྦྱིན་འདིས་ཚེ་འཕྲོག་པར་བྱེད་པ་དང་གནོད་སྦྱིན་འདིས་འཚེ་བར་
བྱེད་པ་དང་། གནོད་སྦྱིན་འདིས་རྣམ་པར་ཐོ་འཚམ་པར་བྱེད་པ་དང་། གནོད་སྦྱིན་འདིས་གནོད་པར་བྱེད་པ་དང་། གནོད་སྦྱིན་འདིས་རྣམ་པར་གནོད་པར་བྱེད་པ་དང་། གནོད་སྦྱིན་འདིས་མི་གཏོང་བར་བྱེད་དོ། །གནོད་སྦྱིན་རྣམས་
དང་གནོད་སྦྱིན་ཆེན་པོ་རྣམས་དང་། སྡེ་དཔོན་རྣམས་དང་། སྡེ་དཔོན་ཆེན་པོ་རྣམས་གང་ཞེ་ན། དབང་པོ་ཟླ་བ་ཆུ་ཟླ་དང་། །བྷཱ་ར་དྭ་ཛ་སྐྱེ་དགུའི་བདག །ཙན་ད་ན་དང་འདོད་མཆོག་དང་། །མགུལ་པ་མཛེས་དང་མགུལ་ངེས་དང་། །སྐྱེ་དགུའི་བླ་མར་གྱུར་པ་དང་། །
ལྷ་ལས་བྱུང་བའི་ཁ་ལོ་པ། །དྲི་ཟ་སྣ་ཚོགས་སྡེ་དང་ནི། །མི་རྒྱལ་རྒྱལ་བའི་ཁྱུ་མཆོག་དང་། །དེ་བཞིན་རི་དང་གངས་ཅན་དང་། །གང་བ་སྨིན་དྲུག་ཕུག་དང་ནི། །འཚེ་བ་དང་ནི་བཏང་བཟུང་དང་། །སྣ་ཚོགས་བཤེས་གཉེན་གཉའ་
ཤིང་འཛིན། །ས་སྐྱོངས་རབ་ཏུ་རྟོགས་པ་དང་། །ངོ་ཚ་མིག་དང་ཁང་པ་དང་། །ལྔ་ལེན་གཏུམ་པ་ཨཱ་ལ་བ་ཀ །སྲིད་སྒྲུབ་ཡིད་བཟང་བཞིན་བཟང་དང་། །ཞོ་གདོང་ནོར་བུ་ནོར་བུ་སྤྱོད། །དེ་བཞིན་དབང་ཕྱུག་དང་བཅས་སོ། །
འདི་རྣམས་ནི་གནོད་སྦྱིན་རྣམས་དང་གནོད་སྦྱིན་ཆེན་པོ་རྣམས་དང་། སྡེ་དཔོན་རྣམས་དང་སྡེ་དཔོན་ཆེན་པོ་རྣམས་ལ་གསོལ་བར་བྱེད་པ་དང་། ང་རོ་སྒྲོགས་པར་བྱེད་པ་དང་། སྒྲ་ཆེར་སྒྲོགས་པར་བྱེད་པའོ། །འདིར་གནོད་སྦྱིན་གྱིས་བཟུང་ནས་
གནོད་སྦྱིན་འདིས་ཚེ་འཕྲོག་པར་བྱེད་པ་དང་། གནོད་སྦྱིན་འདིས་འཚེ་བར་བྱེད་པ་དང་། གནོད་སྦྱིན་འདིས་རྣམ་པར་ཐོ་འཚམ་པར་བྱེད་པ་དང་། གནོད་སྦྱིན་འདིས་གནོད་པར་བྱེད་པ་དང་། གནོད་སྦྱིན་འདིས་རྣམ་པར་གནོད་པར་བྱེད་
པ་དང་། གནོད་སྦྱིན་འདིས་ནི་མི་གཏོང་བར་བྱེད་དོ། །དྲང་སྲོང་ཆེན་པོ་འདིས་ནི་ལྕང་ལོ་ཅན་གྱི་ཕོ་བྲང་གིས་བསྲུངས་ཤིག །དགེ་སློང་དང་དགེ་སློང་མ་དང་། དགེ་བསྙེན་དང་དགེ་བསྙེན་མ་རྣམས་ལ་བསྲུང་བ་དང་། སྦ་བ་དང་འཚེ་
39-1-258b


བ་མེད་པ་དང་། བདེ་བ་དང་ལེགས་པར་གནས་སོ། །དྲང་སྲོང་ཆེན་པོ་ད་ནི་བདག་ཅག་རྣམས་འགྲོ་བར་བགྱིའོ། །བདག་ཅག་རྣམས་ནི་བྱ་བ་མང་བ་དང་། བྱེད་པ་མང་བས་སོ། །དགེ་སློང་དག་བདག་གིས་ད་ནི་རྒྱལ་པོ་ཆེན་པོ་རྣམས་
ལ་འགྲོ་བའི་གནང་བ་བྱིན་ནོ། །དེ་ནས་རྒྱལ་པོ་ཆེན་པོ་བཞི་པོ་རྣམས་ལངས་ནས་བདག་ལ་ཕྱག་བྱས་ཏེ། བསྐོར་བ་བྱས་ནས་དེ་ཉིད་དུ་མི་སྣང་བར་གྱུར་ཏོ། །དགེ་སློང་དག་གནོད་སྦྱིན་རྣམས་ཀྱིས་ཀྱང་ལངས་ནས་བདག་ལ་
ཕྱག་བྱས་བསྐོར་བ་བྱས་ནས་དེ་ཉིད་དུ་མི་སྣང་བར་གྱུར་ཏོ། །གང་སུ་དག་གིས་བདག་ལ་བསྙུན་གསོལ་ཏེ། བསྙུན་གསོལ་ནས་སྙིང་པོ་དང་སྙིང་པོ་མེད་པ་ཇི་ལྟར་ཞེས་ཞུས་པ་དེ་རྣམས་དེ་ཉིད་དུ་མི་སྣང་བར་གྱུར་ཏོ། །གང་སུ་དག་
གིས་བདག་ག་ལ་བ་དེར་ཐལ་མོ་སྦྱར་ནས་འདུད་པ་བྱས་ཏེ་མི་སྣང་བར་གྱུར་ཏོ། །གང་ལ་ལ་ཞིག་གིས་མིང་དང་རིགས་རྣམ་པར་དཔྱད་ནས་དེ་ཉིད་དུ་མི་སྣང་བར་གྱུར་ཏོ། །གང་ལ་ལ་ཞིག་ཅང་མི་སྨྲ་བར་གྱུར་ཏེ་དེ་ཉིད་དུ་མི་སྣང་བར་གྱུར་ཏོ། །
དགེ་སློང་དག་ཁ་དོན་དུ་ཟུང་ལ་ལྕང་ལོ་ཅན་གྱི་ཕོ་བྲང་གིས་བསྲུངས་ཤིག །དགེ་སློང་དག་ཆོངས་ལ་ལྕང་ལོ་ཅན་གྱི་ཕོ་བྲང་གིས་བསྲུངས་ཤིག །དགེ་སློང་དག་དོན་དང་བཅས་པས་ལྕང་ལོ་ཅན་གྱི་ཕོ་བྲང་གིས་བསྲུངས་ཤིག །
དགེ་སློང་ངམ་དགེ་སློང་མ་འམ། །དགེ་བསྙེན་ནམ་དགེ་བསྙེན་མ་རྣམས་ལ་བསྲུང་བ་དང་། སྦ་བ་དང་། འཚེ་བ་མེད་པ་དང་། བདེ་བ་དང་ལེགས་པར་གནས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། དགེ་སློང་
དེ་རྣམས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །སྐབས་རབ་མཆོག་གཉིས་པ་སྟེ་ལྕང་ལོ་ཅན་གྱི་ཕོ་བྲང་གི་མདོ་རྫོགས་སྷོ།།       །། རྒྱ་གར་སྐད་དུ། མ་ཧཱ་ས་མ་ཡ་སཱུ་ཏྲ།  བོད་སྐད་དུ།  
འདུས་པ་ཆེན་པོའི་མདོ།  འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཤཱཀྱའི་ཡུལ་སེར་སྐྱའི་གཞིའི་ཚལ་ཆེན་པོ་ན་དགེ་སློང་
39-1-259a


གི་དགེ་འདུན་ཆེན་པོ་ལྔ་བརྒྱ་སྟེ། དེ་ཐམས་ཅད་ཀྱང་དགྲ་བཅོམ་པ་རྣམས་དང་ལྷན་ཅིག་ཏུ་བཞུགས་སོ། །འཇིག་རྟེན་གྱི་ཁམས་བཅུའི་ལྷ་རྣམས་དེ་མ་ཐག་ཏུ་འདུས་ཏེ། བཅོམ་ལྡན་འདས་དང་དགེ་སློང་གི་དགེ་འདུན་
རྣམས་བལྟ་བའི་ཕྱིར་རོ། །དེ་ནས་གནས་གཙང་མའི་རིས་ཀྱི་ལྷའི་རིས་བཞི་པོ་རྣམས་ཀྱིས་འདི་སྐད་ཅེས་གསོལ་ཏོ། །འདིར་ཡང་བཅོམ་ལྡན་འདས་ཀྱིས་ཤཱཀྱའི་ཡུལ་སེར་སྐྱའི་གཞིའི་ཚལ་ཆེན་པོ་ན་དགེ་སློང་གི་དགེ་འདུན་ཆེན་པོ་
ལྔ་བརྒྱ་སྟེ། དེ་ཐམས་ཅད་ཀྱང་དགྲ་བཅོམ་པ་རྣམས་དང་ལྷན་ཅིག་ཏུ་བཞུགས་སོ། །འཇིག་རྟེན་གྱི་ཁམས་བཅུའི་ལྷ་རྣམས་དེ་མ་ཐག་ཏུ་འདུས་ཏེ། བཅོམ་ལྡན་འདས་ཀྱི་དགེ་སློང་གི་དགེ་འདུན་རྣམས་བལྟ་བའི་ཕྱིར་རོ། །གང་དག་
དེ་བཞིན་དུ་བཅོམ་ལྡན་འདས་ག་ལ་བ་དེར་དེ་དག་སོང་སྟེ་སོང་ནས། བཅོམ་ལྡན་འདས་ཀྱི་ཐད་དུ་ཚིགས་སུ་བཅད་པ་སོ་སོར་བརྗོད་པར་བྱའོ། །དེ་ནས་ལྷ་དེ་རྣམས་ཀྱིས་འདི་ལྟ་སྟེ་སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས། 
བརྐྱང་བ་ཙམ་དང་བརྐྱང་བ་ལས་བསྐུམ་པ་དེ་བཞིན་དུ་གནས་གཙང་མའི་ལྷ་རྣམས་མི་སྣང་བར་གྱུར་ཏེ་བཅོམ་ལྡན་འདས་ཀྱི་ཐད་དུ་སྣང་བར་གྱུར་ཏོ། །དེ་ནས་ལྷ་དེ་རྣམས་ཀྱིས་བཅོམ་ལྡན་འདས་ལ་ཕྱག་བྱས་ནས་ཕྱོགས་གཅིག་ཏུ་
འཁོད་དོ། །ཕྱོགས་གཅིག་ཏུ་འཁོད་ནས་ཡང་ལྷ་དེ་རྣམས་ཀྱིས་བཅོམ་ལྡན་འདས་ཀྱི་ཐད་དུ་ཚིགས་སུ་བཅད་པ་འདི་རྣམས་གསོལ་ཏོ། །འདུས་པ་ཆེན་པོའི་ཚལ་འདི་རུ། །ལྷ་ཡི་ཚོགས་རྣམས་འདུས་པ་སྟེ། །ཆོས་འདིའི་
ཕྱིར་དུ་བདག་འོངས་པ། །དགེ་འདུན་མི་ཕམ་འདུས་པ་བལྟ། །དེ་ནས་ལྷ་གཞན་རྣམས་ཀྱིས་བཅོམ་ལྡན་འདས་ཀྱི་ཐད་དུ་ཚིགས་སུ་བཅད་པ་འདི་གསོལ་ཏོ། །དགེ་འདུན་སེམས་རྣམས་དུལ་བ་དང་། །རང་གི་སེམས་ནི་དྲང་
པོར་བྱས། །ཁ་ལོ་སྒྱུར་བས་དྲང་པོར་འཛིན། །དེ་བཞིན་མཁས་པས་དབང་པོ་བསྲུང་། །དེ་ནས་ལྷ་གཞན་རྣམས་ཀྱིས་བཅོམ་ལྡན་འདས་ཀྱི་ཐད་དུ་ཚིགས་སུ་བཅད་པ་འདི་གསོལ་ཏོ། །ཁྱིམ་གྱི་འཆིང་བ་བཏོན་པ་དང་། །
39-1-259b


དབང་པོ་ནས་ནི་སེམས་འགྲོ་ཞིང་། །དག་ཅིང་དྲི་མེད་དེར་འགྲོ་བ། །མིག་ལྡན་གླང་པོ་དུལ་བ་བཞིན། །དེ་ནས་ལྷ་གཞན་རྣམས་ཀྱིས་བཅོམ་ལྡན་འདས་ཀྱི་ཐད་དུ་ཚིགས་སུ་བཅད་པ་འདི་གསོལ་ཏོ། །གང་ཞིག་སངས་རྒྱས་སྐྱབས་
འགྲོ་བ། །དེ་ནི་ངན་སོང་འགྲོ་མི་འགྱུར། །མི་ཡི་ལུས་ནི་སྤངས་ནས་སུ། །ལྷ་ཡི་ལུས་ནི་ཡོངས་རྫོགས་འགྱུར། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་བོས་ཏེ་དེ་མ་ཐག་ཏུ་དགེ་སློང་དག་འཇིག་རྟེན་གྱི་ཁམས་བཅུའི་ལྷ་
རྣམས་འདུས་ཏེ་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་བལྟ་བའི་ཕྱིར་རོ། །དགེ་སློང་གང་དེ་རྣམས་སུ་གྱུར་པ་འདས་པའི་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་རྣམས་བཅོམ་ལྡན་འདས་དེ་ཙམ་དུ་
གྱུར་པ་དེ་བཞིན་དུ་ལྷ་རྣམས་འདུས་པར་གྱུར་ཏོ། འདི་ལྟ་སྟེ། བདག་ཀྱང་དགེ་སློང་དག་དེ་བཞིན་དུ་འདུས་པར་གྱུར་ཏོ། །འདི་ལྟ་སྟེ། བདག་ཀྱང་འདི་སྐད་ཅེས་སྨྲ་སྟེ། དགེ་སློང་དག་ལྷའི་ཚོགས་རྣམས་ཀྱི་མིང་བརྗོད་པར་བྱ་སྟེ། 
དགེ་སློང་དག་རབ་ཏུ་གསོལ་བར་བྱེད་པ་ཞེས་བྱ་བའི་ལྷའི་ཚོགས་དང་། དགེ་སློང་དག་ལྷའི་ཚོགས་སྟོན་པར་བྱེད་པ་ཞེས་བྱ་བའོ། །དེ་ཐོས་ནས་ལེགས་པར་ཡིད་ལ་ཟུང་ཤིག་དང་ངས་བཤད་པར་བྱའོ། །དེ་ལྟར་བཙུན་པ་
བཅོམ་ལྡན་འདས་ལ་དགེ་སློང་དེ་རྣམས་ཀྱིས་སོ་སོར་ཞུས་ནས། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཚིགས་སུ་བཅད་པ་སོ་སོར་བཤད། །གང་དུ་ས་གཞི་མཐོང་གྱུར་ན། །རི་ཡི་ཕུག་དུ་གང་གནས་
པ། །དེ་རུ་མཉམ་པར་འཇོག་པར་བྱེད། །ས་གཞིར་སེང་གེ་འཇིགས་མེད་བཞིན། །བ་སྤུ་ཙམ་ཡང་གཡོ་བ་མེད། །སེམས་ནི་དག་ཅིང་དཀར་བ་དང་། །ཆུ་ནི་རབ་ཏུ་དངས་བཞིན་དུ། །ལྔ་བརྒྱ་པོ་ཡིས་ལེགས་
ཤེས་ཤིང་། །སེར་སྐྱའི་ཚལ་གྱི་གནས་མང་པོ། །དེ་ནས་དགེ་སློང་སྟོན་པས་བོས། །བསྟན་ལ་དགའ་བའི་ཉན་ཐོས་རྣམས། །ལྷ་ཡི་ཚོགས་རྣམས་འོངས་ནས་ནི། །དགེ་སློང་རྣམས་ཀྱིས་དེ་ཤེས་བྱ། །
39-1-260a


ལུས་ནི་གདུང་བར་མ་བྱེད་པར། །སངས་རྒྱས་བསྟན་པ་ཐོས་པས་སོ། །དེ་རྣམས་ཡེ་ཤེས་སྣང་བར་འགྱུར། །མི་མ་ཡིན་རྣམས་མཐོང་འགྱུར་བ། །གང་ཞིག་གིས་ནི་བརྒྱ་མཐོང་ཞིང་། །སྟོང་དང་བདུན་བཅུ་
མཐོང་བ་ཡིན། །བརྒྱ་དང་སྟོང་ཕྲག་གཅིག་དང་ནི། །མི་མ་ཡིན་རྣམས་མཐོང་བར་འགྱུར། །གང་ཞིག་གིས་ནི་མཐའ་མེད་མཐོང་། །ཕྱོགས་ཀུན་གང་བར་འགྱུར་བ་མཐོང་། །དེ་རྣམས་ཀྱིས་ནི་རྟོགས་པ་དང་། །སྤྱན་ལྡན་
རྣམ་པར་དཔྱད་ནས་ནི། །དེ་ཕྱིར་སྟོན་པ་ཡིས་ནི་བོས། །བསྟན་ལ་དགའ་བའི་ཉན་ཐོས་ཀྱིས། །ལྷ་ཡི་ཚོགས་རྣམས་འོངས་ནས་ནི། །དགེ་སློང་རྣམས་ཀྱིས་དེ་ཤེས་བྱ། །གང་ཞིག་ལ་ནི་བདག་བཤད་བྱ། །གོ་རིམས་བཞིན་
དུ་མཉན་པར་གྱིས། །སྟོང་ཕྲག་བདུན་གྱི་གནོད་སྦྱིན་རྣམས། །སེར་སྐྱའི་ས་ལ་གནས་པ་ནི། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་
སློང་ཚལ་དུའོ། །སྟོང་ཕྲག་དྲུག་ནི་གངས་ཅན་གྱི། །གནོད་སྦྱིན་ཁ་དོག་སྣ་ཚོགས་ལུས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བ་དགེ་སློང་
ཚལ་དུའོ། །སྣ་ཚོགས་བཤེས་གཉེན་ལྔ་བརྒྱ་པོ། །གནོད་སྦྱིན་ཁ་དོག་སྣ་ཚོགས་ལུས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་
ཚལ་དུའོ། །རྒྱལ་ཁབ་གནོད་སྦྱིན་ཆུ་སྲིན་ནི། །ངོས་ཡངས་རི་ལ་གནས་པ་ཡིན། །སྟོབས་ལྡན་འབུམ་ཕྲག་གཅིག་པོ་ནི། །གནོད་སྦྱིན་རྣམས་ཀྱི་འཁོར་གྱིས་བསྐོར། །རྒྱལ་ཁབ་གནོད་སྦྱིན་ཆུ་སྲིན་ནི། །
ཞི་བས་དགེ་སློང་ཚལ་དུའོ། །ཤར་གྱི་ཕྱོགས་ཀྱི་རྒྱལ་པོ་ནི། །མིང་ནི་ཡུལ་འཁོར་སྲུང་ཞེས་པ། །དྲི་ཟ་རྣམས་ཀྱི་བདག་པོ་སྟེ། །རྒྱལ་པོ་ཆེན་པོ་གྲགས་ཆེན་ལྡན། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་
39-1-260b


ཐོས་པ་སྟེ། །དབང་པོ་ཞེས་བྱ་སྟོབས་ཆེན་པོ། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །ལྷོ་ཡི་ཕྱོགས་ཀྱིའང་རྒྱལ་པོ་ནི། །
མིང་ནི་འཕགས་སྐྱེས་པོ་ཞེས་བྱ། །གྲུལ་བུམ་རྣམས་ཀྱི་བདག་པོ་སྟེ། །རྒྱལ་པོ་ཆེན་པོ་གྲགས་ཆེན་ལྡན། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་ཆེན་པོ། །རྫུ་འཕྲུལ་ལྡན་
ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །ནུབ་ཀྱི་ཕྱོགས་ཀྱི་རྒྱལ་པོ་ནི། །མིང་ནི་མིག་མི་བཟང་ཞེས་གྲགས། །ཀླུ་རྣམས་ཀྱི་ནི་བདག་པོ་སྟེ། །
རྒྱལ་པོ་ཆེན་པོ་གྲགས་ཆེན་ལྡན། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །རྫུ་འཕྲུལ་ལྡན་ཞིང་སྟོབས་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་
ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །བྱང་གི་ཕྱོགས་ཀྱི་རྒྱལ་པོ་ནི། །དེ་མིང་ལུས་ངན་པོ་ཞེས་གྲགས། །གནོད་སྦྱིན་རྣམས་ཀྱི་བདག་པོ་སྟེ། །རྒྱལ་པོ་ཆེན་པོ་གྲགས་ཆེན་ལྡན། །དེ་ཡི་བུ་ནི་མང་པོ་
རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་ཆེན་པོ། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །
ཤར་ཕྱོགས་ན་ནི་ཡུལ་འཁོར་སྐྱོང་། །ལྷོ་ཕྱོགས་ན་ནི་འཕགས་སྐྱེས་པོ། །ནུབ་ཕྱོགས་ན་ནི་མིག་མི་བཟང་། །བྱང་ཕྱོགས་ན་ནི་ལུས་ངན་པོ། །དེ་རྣམས་རྒྱལ་པོ་ཆེན་པོ་བཞི། །ཕྱོགས་རྣམས་བཞི་པོ་ཀུན་དུའོ། །
གཟི་བརྗིད་འབར་བས་འཁོད་ནས་ནི། །སེར་སྐྱའི་གཞི་ཡི་ཚལ་དུའོ། །དེ་རྣམས་སྒྱུ་མ་རྩེད་མོ་བསམ། །དྲུང་ལྡན་རྣམས་ནི་ནམ་མཁར་འཁོད། །སྒྱུ་མ་སྐུ་ཊེ་ཏྱ་བཻ་ཊ་ཎུ། །བིརྱ་ཙྪ་བིརྱ་ཊོ་བཅས། །ཙན་ད་ན་དང་འདོད་
39-1-261a


མཆོག་དང་། །མགུལ་པ་མཛེས་དང་མགུལ་ངེས་དང་། །སྐྱེ་དགུའི་བླ་མར་གྱུར་པ་དང་། །ལྷ་ལས་བྱུང་བའི་ཁ་ལོ་པ། །དྲི་ཟ་སྣ་ཚོགས་སྡེ་དང་ནི། །མི་རྒྱལ་རྒྱལ་བའི་ཁྱུ་མཆོག་དང་། །མདུན་དུ་རྩེ་མོ་ལྔ་དེ་བཞིན། །གཡེར་མ་དང་ནི་ཉི་
ཟེར་དང་། །དེ་དང་གཞན་གྱི་རྒྱལ་པོ་རྣམས། །རྒྱལ་པོ་དྲི་ཟ་དང་བཅས་དང་། །ཆོས་གཏམ་བྱ་ཕྱིར་འདིར་འོངས་ནས། །ཞི་བས་དགེ་སློང་ཚལ་དུའོ། །དེ་ནས་གཞན་ཡང་ནམ་མཁའི་ཀླུ། །ཡངས་པ་ཅན་དུ་ལྷན་ཅིག་གནས། །ལ་བ་རྟ་ཡི་མཆོག་
དང་ནི། །རབ་འགྲོ་གཉེན་དང་ལྷན་ཅིག་པ། །ཡ་མུ་ན་དང་ཡུལ་འཁོར་སྐྱོང་། །ཀླུ་ཡི་སྤུན་དང་གྲགས་ལྡན་དང་། །ས་སྲུང་གླང་པོ་ཆེན་པོ་རྣམས། །དེ་ཡང་ནགས་ཀྱི་ཚལ་དུའོ། །གང་ཞིག་ཀླུ་རྒྱལ་མྱུར་དུ་ལེན། །ལྷ་དང་བྱ་དང་རྣམ་དག་མིག །
ནམ་མཁའ་ལས་འོངས་ཚལ་དེར་སླེབ། །སྣ་ཚོགས་འདབ་བཟང་ཅེས་དེའི་མིང་། །འཇིགས་མེད་བྱིན་པས་ཀླུ་ཡི་རྒྱལ། །མཁའ་ལྡིང་བཟོད་པ་རྟོགས་པས་སོ། །ཕན་ཚུན་དུ་ནི་མི་རྩོད་ཅིང་། །ཀླུ་ཁྱུང་སངས་རྒྱས་སྐྱབས་འགྲོ་བ། །རྡོ་རྗེ་ལག་གིས་
རྒྱལ་བ་དང་། །ལྷ་མ་ཡིན་ནི་རྒྱ་མཚོར་གནས། །སྤུན་རྣམས་དེ་ཡི་གནས་དང་ནི། །གཟི་བརྗིད་ལྡན་ཞིང་གྲགས་དང་ལྡན། །ནག་པོ་མིག་སྨན་འཇིགས་བྱེད་ལྡན། །ལྷ་མ་ཡིན་རྣམས་ཁྲོ་བྱེད་དང་། །ཐག་བཟང་དང་ནི་ཐག་བཟང་རིས། །
མཚན་འཇོམས་ན་མོ་ཙི་དང་བཅས། །སྟོབས་ཀྱི་བུ་ནི་བརྒྱད་པོ་རྣམས། །ཐམས་ཅད་རྣམ་པར་སྣང་མཛད་མེད། །སྟོབས་ཀྱི་སྡེ་ནི་གོ་བགོས་པ། །སྒྲ་གཅན་བཟང་པོ་སྔོན་དུ་འགྲོ། །བཙུན་པ་དེ་ནི་འདུས་ནས་ནི། །ཞི་བས་དགེ་སློང་ཚལ་དུའོ། །
ཆུ་དང་ལྷ་དང་ས་དང་ནི། །མེ་དང་རླུང་ཡང་དེར་འོངས་སོ། །ཆུ་ལྷ་ཆུ་ཡི་ལྷ་དང་ནི། །ཟླ་བ་དང་ནི་གྲགས་པར་ལྡན། །བྱམས་དང་སྙིང་རྗེའི་ཚོགས་ཅན་དང་། །ལྷ་ནི་གྲགས་ལྡན་མདུན་དུའོ། །ཕྱོགས་བཅུའི་འཇིག་རྟེན་ཚོགས་
རྣམས་ནི། །ཐམས་ཅད་ཁ་དོག་སྣ་ཚོགས་ལུས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །ཁྱབ་འཇུག་ལྷ་དང་ལྷན་
39-1-261b


ཅིག་ཏུ། །ཐ་དད་ཐ་དད་འོངས་པ་དང་། །ཟླ་བ་དེ་ཡི་འཁོར་གྱི་ལྷ། །ཟླ་བའི་མདུན་བྱས་འཁོར་དང་ནི། །ཉི་མའི་འཁོར་གྱི་ལྷ་རྣམས་དང་། །ཉི་མའི་མདུན་བྱས་འཁོར་དང་ནི། །རྒྱུ་སྐར་དེ་ཡི་འཁོར་དང་ཡང་། །མདུན་བྱས་པ་ལ་
ཧ་ཀ་དང་། །ས་དང་ས་ཡི་གཙོ་བོ་དང་། །བརྒྱ་བྱིན་ཡང་ཡང་སྦྱིན་པ་དང་། །ཕྱོགས་བཅུའི་འཇིག་རྟེན་ཚོགས་རྣམས་དང་། །ཐམས་ཅད་ཁ་དོག་སྣ་ཚོགས་ལུས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །
ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །དེ་ནས་ཉེར་སྤྱོད་ལྷ་དང་ནི། །ཆུ་དང་མེ་ཡི་རྩེ་མོ་བཞིན། །སྒྲ་ལྡན་སྣང་བར་བྱེད་པ་དང་། །ཨུ་མའི་མེ་ཏོག་དེ་བཞིན་དུ། །ཆུ་ལྷ་དང་བཅས་ཆོས་དང་ནི། །ཨ་ཙྩུ་ཏ་དང་
དུ་མ་རྣམས། །བཟང་ལེན་མཛེས་པའི་མདུན་དང་ནི། །མདུན་དང་གནས་དང་དུ་མ་དང་། །ཕྱོགས་བཅུའི་འཇིག་རྟེན་ཚོགས་དང་ནི། །ཐམས་ཅད་ཁ་དོག་སྣ་ཚོགས་ལུས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་
ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །འདུས་དང་འདུས་པ་ཆེན་པོ་ནི། །མི་དང་མི་ཡི་མཆོག་དང་ནི། །རོལ་པའི་གོ་འཕང་མདུན་དུ་དང་། །ཡིད་མཆོག་དང་ནི་གོ་འཕང་རྩེ། །དེ་ནས་ལྷ་ཡི་མཆོད་འོས་དང་། །
གང་ཡང་དམར་པོའི་གོས་གྱོན་དང་། །ཕ་རོལ་ཕ་རོལ་སོན་ཆེན་དང་། །གྲགས་ཆེན་ལྷའི་མདུན་གནས་དང་། །ཕྱོགས་བཅུའི་འཇིག་རྟེན་ཚོགས་དང་ནི། །ཐམས་ཅད་ཁ་དོག་སྣ་ཚོགས་ལུས། །རྫུ་འཕྲུལ་ལྡན་ཞིང་འོད་དང་ལྡན། །
ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །དཀར་དང་དྲོད་དང་དམར་པོ་དང་། །སྔོན་ཤུགས་སྟུག་པོ་ལྷན་ཅིག་དང་། །དཀར་པོ་འཛིན་པ་ལ་སོགས་དང་། །མཁས་པའི་ལྷ་
ནི་སྔོན་དུའོ། །རྟག་ཏུ་གླང་ཆེན་མྱོས་འཕྲང་བ། །འདྲེས་པ་གྲགས་དང་ལྡན་པ་དང་། །པྲ་ཛྫུན་མང་པོ་མདུན་དུ་དང་། །གང་ཞིག་ཕྱོགས་ནི་མཛེས་པ་དང་། །ཕྱོགས་བཅུའི་འཇིག་རྟེན་ཚོགས་རྣམས་དང་། །ཐམས་ཅད་ཁ་དོག་སྣ་ཚོགས་
39-1-262a


ལུས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །དགེ་བ་དགའ་ལྡན་འཐབ་བྲལ་དང་། །གྲགས་ལྡན་ཤིང་དང་ལྡན་པ་དང་། །འཕྱང་
བ་གནས་དང་གཙོ་བོ་དང་། །འོད་དང་བསམ་པ་ཞེས་བྱ་དང་། །འཕྲུལ་དགའ་བ་ནི་སྔོན་དུ་དང་། །དེ་ནས་གཞན་འཕྲུལ་དབང་བྱེད་སྔོན། །ཕྱོགས་བཅུའི་འཇིག་རྟེན་ཚོགས་དང་ནི། །ཐམས་ཅད་ཁ་དོག་སྣ་ཚོགས་ལུས། །རྫུ་འཕྲུལ་ལྡན་ཞིང་
འོད་དང་ལྡན། །ཆོས་གཏམ་བྱ་ཕྱིར་འདིར་འོངས་ནས། །ཞི་བས་དགེ་སློང་ཚལ་དུའོ། །སྣ་ཚོགས་དྲུག་པོའི་སྡེ་པ་ནི། །ཐམས་ཅད་ཁ་དོག་སྣ་ཚོགས་ལུས། །མིང་ནི་གྲགས་དང་ལྡན་པ་སྔོན། །ཁང་གཞན་འདྲ་བ་ལྷན་ཅིག་ཏུ། །མ་ལུས་
རིགས་ནི་བརྗོད་པ་དང་། །ཟག་མེད་ཚོགས་ནི་ཕ་རོལ་བརྒལ། །གླང་ཆེན་ཚོགས་ནི་བལྟ་བ་དང་། །ཟླ་བ་བཞད་པ་གསུམ་ལྡན་དང་། །ཚངས་བཟང་མཆོག་གི་ཐོབ་པ་དང་། །རྫུ་འཕྲུལ་ལྡན་པའི་བུ་དང་ནི། །དེ་ཡི་དགའ་བའི་གཞོན་ནུ་ནི། །
དེ་རྣམས་ཞི་བས་ཚལ་དུའོ། །ཚངས་པའི་འཇིག་རྟེན་སྟོང་དུ་ནི། །ཚངས་པ་ཆེན་པོ་ཉེ་བར་འཁོད། །འོད་དང་ལྡན་པར་སྐྱེ་བ་དང་། །གྲགས་ལྡན་སྣ་ཚོགས་ལུས་དང་ནི། །དབང་ཕྱུག་བཅུ་པོ་སྔོན་དུ་དང་། །སོ་སོ་དབང་དུ་གྱུར་པ་དང་། །
དེ་ཡི་དབུས་དང་སྔོན་དུ་དང་། །འཕྲོག་མ་འཁོར་དང་བཅས་པའོ། །དེ་རྣམས་ཐམས་ཅད་འོངས་གྱུར་ནས། །དབང་པོ་ལྷ་དང་ཚངས་བཅས་འོངས། །བདུད་ཀྱི་སྡེ་རྣམས་འོངས་ནས་ནི། །གཽ་ཏམ་ཐུགས་ནི་བལྟ་བ་དང་། །འདི་ནི་ཟུང་ཅིག་
ཆིངས་ཤིག་བརྗོད། །ཆགས་པ་གླང་པོ་བཅིངས་པ་བཞིན། །འཁོར་དང་བཅས་པས་བསྐོར་ནས་ནི། །གང་དུ་འང་སྟོང་པ་མ་ཡིན་ནོ། །དེ་ལ་འདི་ནི་བདེ་ཆེན་དང་། །གཽ་ཏམ་སྡེ་ལ་གནོད་མི་ནུས། །ལག་པ་ཐལ་མོ་རྡེབས་
པ་དང་། །འཇིགས་པར་བྱེད་པའི་ཆོ་ངེ་སྒྲོགས། །ཇི་ལྟར་རླུང་གིས་སྤྲིན་རྣམས་དང་། །མུན་ནག་གློག་དང་བཅས་པ་ནི། །དེ་མ་ཐག་ཏུ་འཇིགས་དང་བྲལ། །བསམ་པ་ཁྲོ་བ་མེད་པར་གནས། །ལྷ་དེ་རྣམས་ཐམས་ཅད་དང་ཚངས་པས་
39-1-262b


བཅོམ་ལྡན་འདས་ལ་ཕྱག་བྱས་ཏེ་བསྐོར་བ་བྱས་ནས་དེ་ཉིད་དུ་མི་སྣང་བར་གྱུར་ཏོ། །བདུད་ཀྱི་སྡེ་དེ་རྣམས་ཀྱང་ཅང་མི་སྨྲ་བའི་ཚུལ་གྱིས་སོང་ངོ་། །སྟོན་པས་ཉན་ཐོས་བསྟན་པ་ལ་དགའ་བ་རྣམས་བོས་ཏེ། དེ་ཡང་འཇིགས་པ་མེད་
བྱེད་དང་། །དག་པའི་སངས་རྒྱས་བསྟན་པ་ལ། །འཇིགས་མེད་འདོད་ཆགས་བྲལ་བ་ནི། །དེ་ཡི་བ་སྤུའང་གཡོ་བ་མེད། །གཡུལ་ནི་ཀུན་ལས་རྒྱལ་བ་དང་། །འཇིགས་པ་འདས་ཤིང་གྲགས་པར་ལྡན། །ལྷ་དང་ལྷན་ཅིག་
བརྗོད་པ་དང་། །ཉན་ཐོས་རྣམས་ནི་དེར་གནས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། དགེ་སློང་དེ་རྣམས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།  །འདུས་པ་ཆེན་པོའི་
མདོ་རྫོགས་སྷོ།།   །།   །། རྒྱ་གར་སྐད་དུ། མཻ་ཏྲི་སཱུ་ཏྲ།  བོད་སྐད་དུ།  བྱམས་པའི་མདོ།  འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །སྟོན་པ་དུས་གཅིག་ན་སེར་སྐྱའི་གཞི་དང་། ནྱ་གྲོ་དྷའི་ཀུན་དགའ་
ར་བ་དང་། ཆུ་ཀླུང་རོ་ཧི་ནིའི་འགྲམ་ན་བཞུགས་སོ། །དེ་ནས་ཚེ་དང་ལྡན་པ་ཤཱ་རིའི་བུས་མ་འོངས་པའི་རྒྱལ་བ་དེའི་ཕྱིར་བཅོམ་ལྡན་འདས་ལ་ཞུས་པ། ཁྱེད་ཀྱི་རྗེས་བསྟན་བློ་བརྟན་ནི། །ཅི་འདྲའི་སངས་རྒྱས་སུ་འགྱུར་བར། །
སྤྱན་ལྡན་ཡོངས་སུ་རྒྱས་པར་ནི། །བདག་ནི་རབ་ཏུ་ཉན་པར་འདོད། །གནས་བརྟན་ཞུས་པ་གསན་ནས་ནི། །བཅོམ་ལྡན་འདས་ཀྱིས་འདི་སྐད་གསུངས། །བསོད་ནམས་ཕུང་པོ་མི་ཉུང་བའི། །གྲགས་པ་ཆེན་པོ་མི་
ཕམ་པའི། །ཡོན་ཏན་ཐམས་ཅད་བརྗོད་མི་ནུས། །མདོར་བསྡུས་ནས་ནི་ལེགས་བཤད་པ། །ཕྱོགས་གཅིག་ཙམ་ནི་བསྟན་པར་བྱ། །ཤཱ་རིའི་བུ་ཉོན་ང་ཡི་ཚིག །འདི་ནི་བསྐལ་པ་བཟང་པོ་སྟེ། །སྐྱེ་བ་བྱེ་བའི་ལོ་རུ་ནི། །
བྱམས་པ་ཞེས་པའི་མིང་ཉིད་ཀྱིས། །རྐང་གཉིས་མཆོག་གི་སངས་རྒྱས་སོ། །ཇི་ལྟར་ང་འདས་ནས་དང་པོར་དུས་ལྔ་འབྱུང་སྟེ། འབྲས་བུའི་བར་གྱི་དུས་དང་། བསྒྲུབ་པའི་བར་གྱི་དུས་དང་། ལུང་གི་བར་གྱི་དུས་དང་། 
39-1-263a


རྟགས་ཙམ་གྱི་བར་གྱི་དུས་དང་། སྐུ་གདུང་གི་བར་གྱི་དུས་སོ། །དེ་ལ་འབྲས་བུའི་བར་གྱི་དུས་ནི། སངས་རྒྱས་ཡོངས་སུ་མྱ་ངན་ལས་འདས་ནས། ལོ་སྟོང་ཕྲག་གཅིག་གི་ནང་དུ་རྟོགས་པ་བསྐྱེད་པར་ནུས་སོ། །
དེ་སོང་ཞིང་སོང་བའི་དུས་སོ། །ཕྱིར་མི་འོང་བ་རྣམས་དང་། ལན་ཅིག་ཕྱིར་འོང་བ་དང་། རྒྱུན་དུ་ཞུགས་པའོ། །དེ་རྣམས་ཡོད་པ་ན་འབྲས་བུའི་བར་གྱི་དུས་མེད་ཅེས་བརྗོད་པར་མི་བྱའོ། །ལྷག་མ་ནི་རྒྱུན་དུ་ཞུགས་པ་སྟེ། དེ་འདས་
ནས་འབྲས་བུའི་བར་གྱི་དུས་ནུབ་པ་ཞེས་བྱའོ། །འདི་ནི་འབྲས་བུའི་བར་གྱི་དུས་ནུབ་པ་ཞེས་བྱ་བ་ཡིན་ནོ། །སྒྲུབ་པའི་བར་གྱི་དུས་ཞེས་བྱ་བ་ནི། ཞི་གནས་དང་ལྷག་མཐོང་གི་ལམ་གྱི་འབྲས་བུ་བསླབ་པར་མི་ནུས་པར། ཕམ་པ་བཞི་པོ་
བསྲུང་བར་ནུས་པ་ཙམ་མོ། །སོང་ཞིང་སོང་བའི་དུས་སུ། ཕམ་པ་བཞི་པོ་ཉིད་བསྲུང་བ་ཙམ་མོ། །ཕམ་པ་བཞི་པོ་སྲུང་བར་བྱེད་པ་ནི། དགེ་སློང་རྣམས་སྟོང་ཕྲག་གཅིག་གི་ནང་ན་བརྒྱ་ཙམ་ཡོད་ན་ཡང་སྒྲུབ་པའི་བར་གྱི་དུས་ནུབ་པ་
ཞེས་མི་བྱའོ། །བརྒྱའི་ནང་ན་དགེ་སློང་གཅིག་ཙམ་ཡོད་པ་ལས་སྡོམ་པ་ཞིག་པ་དང་། ཤི་བ་ན་སྒྲུབ་པའི་བར་གྱི་དུས་ནུབ་པ་ཞེས་བྱའོ། །འདི་ནི་སྒྲུབ་པའི་བར་གྱི་དུས་ནུབ་པ་ཞེས་བྱའོ། །ལུང་གི་བར་གྱི་དུས་ནུབ་པ་ཞེས་བྱ་བ་ནི། 
སངས་རྒྱས་ཀྱི་གསུང་རབ་སྡེ་སྣོད་གསུམ་པོའི་དོན་མི་གོ་ཞིང་སྒྲ་ཙམ་ཀློག་པ་དང་། པོ་ཏི་ཡོད་པའི་བར་ནི་ལུང་གི་བར་གྱི་དུས་ཡོངས་སུ་རྫོགས་པ་ཞེས་བྱའོ། །སོང་ཞིང་སོང་བའི་དུས་སུ་རྩོད་པའི་དུས་ཀྱི་རྒྱལ་པོ་རྣམས་ཆོས་མ་
ཡིན་པ་བྱེད་པར་འགྱུར་རོ། །བློན་པོ་ལ་སོགས་པ་རྣམས་ཀྱང་ཆོས་མ་ཡིན་པ་བྱེད་པར་འགྱུར་ཏེ། དེ་ནས་ཡུལ་འཁོར་རྣམས་དང་། ལྗོངས་རྣམས་ཀྱང་དེ་བཞིན་ནོ། །དེ་རྣམས་ཀྱི་ཆོས་མ་ཡིན་པའི་རྒྱུ་ཡིས་ལྷ་རྣམས་ཆར་
ལེགས་པར་མི་འབེབས་སོ། །འབྲུ་རྣམས་ལེགས་པར་མི་སྨིན་ནོ། །དེ་རྣམས་ཀྱི་འབྲུ་མ་སྨིན་པས་དགེ་སློང་གི་དགེ་འདུན་ལ་བཟའ་བ་སྟེར་མི་ནུས་སོ། །དགེ་སློང་རྣམས་ཀྱིས་ཁ་ཟས་མ་རྙེད་པས་སློབ་མ་དང་ཡང་སློབ་རྣམས་
39-1-263b


འཛིན་པར་མི་ནུས་སོ། །སོང་ཞིང་སོང་བའི་དུས་སུ་ལུང་གི་བར་གྱི་དུས་དམན་པའོ། །དང་པོ་ནི་རབ་ཏུ་བྱེད་པ་ཆེན་པོ་ཉམས་པར་འགྱུར་རོ། །དེ་ནུབ་ནས་ཡ་མ་ཀྃ་གི་ཚིགས་སུ་བཅད་པ་དང་། གཞི་དང་གང་ཟག་དང་གདགས་པ་དང་། 
སྐུ་གདུང་གི་གཏམ་དང་། རྣམ་འབྱེད་དང་། ཆོས་བསྡུ་བ་ནུབ་པར་འགྱུར་བའོ། །ཆོས་མངོན་པའི་སྡེ་སྣོད་ནུབ་ནས། མདོ་སྡེའི་སྡེ་སྣོད་ནུབ་པར་འགྱུར་རོ། །དེ་ནས་ཨྃ་ག་ཕྱི་མའི་སྡེ་པ་ནུབ་པར་འགྱུར་རོ། །ཨྃ་ག་ཕྱི་མའི་སྡེ་པ་ནུབ་
ནས། ཡང་དག་པར་ལྡན་པའི་སྡེ་པ་ནུབ་པར་འགྱུར་རོ། །བར་མའི་སྡེ་པ་དང་རིང་པོའི་སྡེ་པ་ནུབ་པར་འགྱུར་རོ། །རིང་པོའི་སྡེ་པ་ནུབ་ནས་འདུལ་བ་དང་བཅས་པའི་སྐྱེས་རབས་གནས་སོ། །འདུལ་བའི་སྡེ་སྣོད་ལ་ཡང་ངོ་ཚ་དང་ལྡན་
པ་ཙམ་འཛིན་ནོ། །སོང་ཞིང་སོང་བའི་དུས་སུ་སྐྱེས་པའི་རབས་ཙམ་ཡང་འཛིན་པར་མི་ནུས་སོ། །དང་པོ་ཐམས་ཅད་སྒྲོལ་གྱི་སྐྱེས་པའི་རབས་ནུབ་པར་འགྱུར་རོ། །ཐ་མར་ལོ་མ་མེད་པའི་སྐྱེས་པའི་རབས་ནུབ་པར་འགྱུར་རོ། །
སྐྱེས་རབས་རྣམས་ནུབ་ནས་འདུལ་བའི་སྡེ་སྣོད་འབའ་ཤིག་འཛིན་ནོ། །སོང་ཞིང་སོང་བའི་དུས་སུ། མི་གང་ཞིག་གིས་སངས་རྒྱས་ཀྱི་གསུང་རབ་ཀྱི་ཚིགས་སུ་བཅད་པ་གཅིག་ཙམ་དར་བར་བྱེད་ན། ལུང་གི་བར་གྱི་དུས་ནུབ་པ་
མེད་དོ། །གང་ཞིག་རྒྱལ་པོ་ཆོས་ལ་དད་པའི་དུས་སུ་གླང་པོ་ཆེའི་རྒྱབ་དུ་གསེར་གྱི་ཟ་མ་ཏོག་གཅིག་བཞག་སྟེ། ནོར་སྟོང་ཕྲག་གཅིག་དེ་རུ་བཅུག་ནས་སངས་རྒྱས་ཀྱིས་གསུངས་པའི་ཚིགས་སུ་བཅད་པ་གཅིག་གང་གིས་
ཤེས་པ་དེས་ནོར་སྟོང་ཕྲག་དེ་ལོང་ཞེས་གྲོང་ཁྱེར་གྱི་དབུས་སུ་རོལ་མོའི་སྒྲ་ལན་གསུམ་བསྒྲགས་ནས་དེ་སྐད་བརྗོད་དེ། དེ་ལེན་པར་མ་ནུས་པ་ན་ནོར་སྟོང་ཕྲག་དེ་རྒྱལ་པོའི་མཛོད་དུ་ཡང་འཇོག་གོ། །དེའི་དུས་ནི་ལུང་གི་བར་གྱི་
དུས་ནུབ་པའི་དུས་སུ་འགྱུར་རོ། །འདི་ནི་ལུང་གི་བར་གྱི་དུས་ནུབ་པའི་དུས་ཞེས་བྱ་བ་ཡིན་ནོ། །སོང་ཞིང་སོང་བའི་དུས་སུ། ཆོས་གོས་འཛིན་པ་དང་། ལྷུང་བཟེད་འཛིན་པ་དང་། གཅེར་བུ་པའི་དགེ་སྦྱོང་དང་འདྲ་བར་
39-1-264a


ཆག་ཚང་ཀུ་བའི་སྣོད། སློང་བའི་སྣོད་དང་། ལག་པའི་རྩེ་མོ་ལ་འཕྱང་བའི་ཚུལ་དང་འདྲ་བ་དང་། དྲ་བའི་ནང་དུ་ཁྱེར་ནས་འགྲོ་བའོ། །སོང་ཞིང་སོང་བའི་དུས་སུ། གོས་ངུར་སྨྲིག་གིས་བདག་ལ་ཅི་བྱེད། ཅུང་ཟད་ཆོས་སུ་བྱས་པའི་དུམ་
བུ་ལག་པ་འམ། མགྲིན་པ་འམ། རྣ་བ་རྣམས་སུ་འམ། སྐྲ་རྣམས་ལ་འགེབས་སོ། །བག་མ་ལེན་པ་དང་། སོ་ནམ་དང་། ཚོང་ལ་སོགས་པ་བྱས་ནས། འཚོ་བའི་ཕྱིར་དུ་སྤྱོད་ཅིང་འགྲོ་བར་བྱེད་དོ། །དེའི་ཚེ་ཡོན་སྟེར་ཅིང་དགེ་འདུན་གྱི་ཆེད་དུ་དེ་
ཐམས་ཅད་སྟེར་བར་བྱེད་དེ། དེའི་ཚེ་ངས་ཀུན་དགའ་བོ་དགེ་འདུན་གྱི་ཡོན་གྱི་འབྲས་བུ་ནི་གྲངས་མེད་པར་བཤད་དོ། །སོང་ཞིང་སོང་བའི་དུས་སུ། འདི་ཅི་བདག་གི་དོན་དུ་ངུར་སྨྲིག་གི་དུམ་བུ་བཏོགས་ནས་དགོན་པ་འམ་ནགས་ཚལ་དུ་སྐྱུར་བར་
བྱེད་དོ། །དེ་རྣམས་ཀྱི་དུས་སུ་རྟགས་ཙམ་འཛིན་པའི་བར་གྱི་དུས་ནུབ་པར་འགྱུར་རོ། །འདི་ནི་རྟགས་ཙམ་འཛིན་པའི་བར་གྱི་དུས་ནུབ་པའི་དུས་ཞེས་བྱ་བ་ཡིན་ནོ། །དེ་ནས་ཡང་དག་པར་རྫོགས་པའི་སངས་རྒྱས་ཀྱི་བསྟན་པ་ལོ་སྟོང་ཕྲག་
ལྔ་པ་ལ་རྙེད་པ་དང་བཀུར་སྟི་ལ་སོགས་པའི་རྙེད་པ་ཆུང་ངོ་། །སྐུ་གདུང་རྣམས་རྙེད་བཀུར་བྱེད་པའི་གནས་སུ་འགྲོ་བར་བྱེད་དོ། །སོང་ཞིང་སོང་བའི་དུས་སུ། གནས་ཅད་དུ་བཀུར་སྟི་དང་སྟི་སྟང་མ་ཐོབ་ནས། བསྟན་པ་ཐ་མའི་དུས་སུ་ཀླུའི་ཡུལ་
དང་། ལྷའི་འཇིག་རྟེན་དང་། ཚངས་པའི་འཇིག་རྟེན་གྱི་གནས་ཐམས་ཅད་ནས་འོངས་ནས། སྐུ་གདུང་ཐམས་ཅད་བྱང་ཆུབ་ཀྱི་སྙིང་པོ་ཁོ་ནར་བསྡུས་ཏེ་སངས་རྒྱས་ཀྱི་སྐུ་རུ་གྱུར་ནས། གཤིན་རྗེ་རྫུ་འཕྲུལ་དུ་མ་སྟོན་པ་དང་འདྲ་བར་
གཞན་ལ་སྟོན་ནོ། །དེའི་གནས་སུ་སེམས་ཅན་མིར་གྱུར་པའི་མིང་ཡང་མེད་དོ། །སྟོང་ཕྲག་བཅུའི་ལྷའི་འཇིག་རྟེན་གྱི་ཁོར་ཡུག་གི་བར་ཐམས་ཅད་འདུས་ནས། དེ་རིང་སྟོབས་བཅུ་པ་ཡོངས་སུ་མྱ་ངན་ལས་འདའ་བར་བྱེད་དོ། །
དེང་ནས་བཟུང་ནས་མུན་ནག་ཏུ་གྱུར་ཏོ། །ཞེས་ངུ་བར་བྱེད་དོ། །སྐུ་གདུང་ཐམས་ཅད་ལ་མེའི་ཁམས་ལངས་ནས་དེའི་སྐུ་ལུས་ལྷག་མ་མེད་པར་སྲེག་པར་བྱེད་དོ། །འདི་ནི་སྐུ་གདུང་གི་བར་གྱི་དུས་ནུབ་པ་ཞེས་བྱ་བ་ཡིན་ནོ། །
39-1-264b


དེ་ནས་ལོ་སྟོང་ཕྲག་ལྔ་པོ་འདིར་བསྟན་པ་ནུབ་པར་གྱུར་ནས་འཇིག་རྟེན་པ་རྣམས་ལ་མི་དགེ་བ་ལྷག་པར་འཕེལ་བར་བྱེད་དོ། །ཞེས་བྱ་བའི་དོན་ནོ། །མི་རྣམས་ལ་ངོ་ཚ་དང་ཁྲེལ་མེད་པར་འགྱུར་ཞིང་མ་
དང་། བུ་མོ་དང་། སྲིང་མོ་ལ་སོགས་པའི་འདུ་ཤེས་མེད་པར་འགྱུར་རོ། །ཕག་དང་ཅེ་སྤྱང་ལ་སོགས་པ་དང་འདྲ་བར་ངོ་ཚ་མེད་པར་འགྱུར་རོ། །དེ་ནས་མི་དགེ་བ་ལ་སྦྱོར་ཞིང་ཚེ་བྲི་ནས་ཚེ་ལོ་བཅུ་པར་འགྱུར་རོ། ། 
ལོ་ལྔ་པའི་ཁྱེའུ་ལ་ལོ་ལྔ་པའི་བུ་མོ་བག་མར་ལེན་ནོ། །ཡང་ལོ་ལྔའི་ནང་ཉིད་དུ་བུ་དང་བུ་མོ་དང་ཚ་བོ་དང་ཚ་མོ་འང་འབྱུང་ངོ་། །དེའི་དུས་སུ་མཚོན་གྱི་བསྐལ་པ་བར་མ་འབྱུང་བར་འགྱུར་རོ། །བསྐལ་པ་བར་
མ་གསུམ་སྟེ། མུ་གེའི་བསྐལ་པ་བར་མ་དང་། ནད་ཀྱི་བསྐལ་པ་བར་མ་དང་། མཚོན་གྱི་བསྐལ་པ་བར་མའོ། །དེ་ལ་གང་གི་ཚེ་འཇིག་རྟེན་གྱི་སེམས་ཅན་རྣམས་ལ་འདོད་པ་ལྷག་པར་སྐྱེས་ནས་
མུ་གེའི་བསྐལ་པ་བར་མར་འགྱུར་རོ། །གང་གི་ཚེ་གཏི་མུག་ལྷག་པར་ཆེ་སྟེ། ནད་ཀྱི་བསྐལ་པ་བར་མར་འགྱུར་རོ། །གང་གི་ཚེ་སྐྱོན་དུ་གྱུར་པ་དེའི་དུས་སུ་མཚོན་གྱི་བསྐལ་པ་བར་མར་འགྱུར་རོ། །
མུ་གེའི་བསྐལ་པ་བར་མས་སེམས་ཅན་རྣམས་བརླག་པར་བྱས་ནས་ཡི་དགས་སུ་སྐྱེ་བར་འགྱུར་རོ། །ནད་ཀྱི་བསྐལ་པ་བར་མས་སེམས་ཅན་རྣམས་བརླག་པར་བྱས་ནས་དུད་འགྲོར་སྐྱེ་བར་བྱེད་དོ། །
མཚོན་གྱི་བསྐལ་པ་བར་མས་སེམས་ཅན་རྣམས་བརླག་པར་བྱས་ནས་དམྱལ་བར་སྐྱེ་བར་འགྱུར་རོ། །དེའི་ཚེ་མི་རྣམས་ཕན་ཚུན་དུ་རི་དགས་ཀྱི་འདུ་ཤེས་དང་བཅས་པ་ཐོབ་པར་གྱུར་ནས་མཚོན་སོ་
གཅིག་པ་དང་། མཚོན་སོ་གཉིས་པ་དང་། སྤུ་གྲིའི་སོ་དང་འདྲ་བའི་མཚོན་ཆ་རྣམས་བཟུང་ནས་ཕན་ཚུན་གསོད་པར་བྱེད་དོ། །དེ་རྣམས་སུ་མཁས་པ་གང་ཞིག་
39-1-265a


དེས་འཇོམས་པར་ཐོས་ནས་རིའི་སུལ་ལ་སོགས་པར་ཞག་བདུན་གྱི་ཁ་ཟས་བཟུང་སྟེ་ཡིབ་ནས་སྡོད་དོ། །དེ་རྣམས་སུ་མ་ཡིབ་པའི་སེམས་ཅན་ལྷག་མ་རྣམས་ཕན་ཚུན་དུ་བརྡེག་ཅིང་གསོད་དོ། །ས་གཞི་ཐམས་ཅད་ཤ་
དང་ཁྲག་ཏུ་འགྱུར་རོ། །དེའི་དུས་སུ་སྤྲིན་ཆེན་པོ་འདུས་ནས་ཆར་འབེབས་པར་བྱེད་དོ། །ལྷ་ཡིས་ཆར་བབ་པའི་རྗེས་སུ་དྲི་ཞིམ་པའི་ཆར་འབབ་ཅིང་འབབ་པར་བྱེད་དོ། །དེ་རྣམས་ཀྱི་དུས་སུ་གནས་ཐམས་ཅད་ཡིད་དུ་འོང་བར་འགྱུར་
རོ། །གནས་ཐམས་ཅད་དག་པར་གྱུར་ནས་འབྲས་ཤུན་པ་ཅན་གྱི་ཆར་འབབ་ཅིང་འབབ་པར་འགྱུར་རོ། །འབྲས་ཤུན་པ་ཅན་གྱི་ཆར་ཕབ་པའི་རྗེས་སུ་འབྲས་ཤུན་པ་མེད་པའི་ཆར་འབབ་ཅིང་འབབ་པར་འགྱུར་རོ། །དེའི་རྗེས་སུ་གོས་དང་
རྒྱན་གྱི་ཆར་འབབ་ཅིང་འབབ་པར་བྱེད་དོ། །དེའི་མཐར་པུས་མོ་ནུབ་ཙམ་གྱི་ཚད་དང་མཉམ་པའི་རིན་པོ་ཆེ་སྣ་བདུན་གྱི་ཆར་འབབ་ཅིང་འབབ་པར་བྱེད་དོ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། དྲི་ཞིམ་པ་ཡི་ཆར་འབབ་
ཅིང་། །ཤུན་ཅན་ཤུན་མེད་འབྲས་ཀྱི་ཆར། །གོས་དང་རྒྱན་གྱི་ཆར་འབབ་པ། །དེ་ལྟར་དགའ་ཚལ་མཛེས་པ་བཞིན། །རིན་ཆེན་སྣ་བདུན་མ་ལུས་པའི། །དེ་ཡི་གནས་སུ་ཆར་འབབ་པོ། །གནས་ཀུན་གང་བར་བྱས་ནས་ནི། །དེ་ཚེ་
དགའ་ཚལ་མཛེས་པ་བཞིན། །དེ་རྣམས་འདས་ནས་མི་ཡིབ་པ་རྣམས་འཐོན་ཏེ། དེ་རྣམས་འཐོན་ནས་ཕན་ཚུན་དུ་འཁྱུད་པ་དང་། ངུ་བ་དང་། ཚུལ་ཁྲིམས་ལྔ་ལས་སོགས་པའི་དགེ་བའི་ཆོས་རྣམས་རྗེས་སུ་དྲན་པར་བྱས་ནས་
རྫོགས་པར་རྩོམ་མོ། །དེ་ནས་ཚེ་ལོ་བཅུ་པའི་མི་རྣམས་ལས་སྐྱེས་པའི་བུ་དང་བུ་མོ་ཚེ་ལོ་ཉི་ཤུ་པར་འཕེལ་ལོ། །དེ་ནས་མི་རྣམས་ལ་ལྷག་པར་ཆོས་འཕེལ་བས་གོ་རིམས་བཞིན་དུ་ཚེ་འཕེལ་ཏེ་ཚེ་ལོ་གྲངས་མེད་པར་
འགྱུར་རོ། །དེའི་ཚེ་སེམས་ཅན་རྣམས་ལ་རྒས་པ་དང་འཆི་བ་མི་མཐོང་བར་འགྱུར་རོ། །དེ་ལྟར་སེམས་ཅན་གཞན་ཡང་བག་ཡོད་པར་འགྱུར་ཏེ། དམྱལ་བའི་སྡུག་བསྔལ་ཞེས་བྱ་བ་ནི་ཅི་ཞེས་སེམས་ཅན་རྣམས་སེམས་
39-1-265b


པ་མེད་དོ། །དེ་ནས་ཚེ་ལོ་གྲངས་མེད་པ་རྣམས་འབྲི་བར་བྱེད་དོ། །སྔར་བཞིན་དུ་བྲི་ནས་ཚེ་ལོ་བརྒྱད་ཁྲི་པར་འགྱུར་རོ། །དེའི་དུས་སུ་འཛམ་བུའི་གླིང་ཐམས་ཅད་དུ་ལྷའི་བུ་མོའི་སྐལ་བ་དང་འདྲ་བར་བུད་མེད་དང་། དེ་ལྟར་སྐྱེས་པ་
དང་བཅས་པས་གང་བར་འགྱུར་རོ། །ལྷའི་ཆར་པ་ཟླ་བ་ཕྱེད་དུ་འབབ་པ་དང་། ཞག་བཅུ་དང་། ཞག་ལྔ་དང་། ཉིན་ཞག་ཕྱེད་དུ་སའི་བཅུད་འཕེལ་བར་འགྱུར་རོ། །དེའི་ཚེ་ས་གཞི་ཐམས་ཅད་ཀྱི་ཆ་མཉམ་པ་དང་། ཚེར་མ་དང་ཤིང་རད་རོད་
མེད་ཅིང་། གྲོང་ཁྱེར་ལ་ཕྱོགས་བཞིའི་སྒོ་དང་ལྡན་པ་དང་། གྲོང་ཁྱེར་གྱི་དབུས་སུ་དཔག་བསམ་གྱི་ཤིང་སྐྱེ་བར་འགྱུར་རོ། །དེའི་ཕྱིར་གསུངས་པ། དེ་ནས་དེ་ཡི་གྲོང་ཁྱེར་ནི། །སྣ་ཚོགས་ཚོང་འདུས་སོ་སོ་དང་། །ལེགས་པར་རབ་བྱུང་རྫིང་
བུ་དང་། །དགའ་ཞིང་རབ་ཏུ་གནས་པ་དང་། །དྲི་མ་མེད་པའི་ཆུ་ཆེན་པོ། །ཤིན་དུ་གྲང་ཞིང་དྲི་བཟང་ལྡན། །རྙོག་མེད་མཉམ་ཞིང་ཚིམ་པ་དང་། །དེ་ནས་རྙོག་མ་ཡང་དག་གནས། །པད་མ་ཨུད་པལ་གྱིས་གང་ཞིང་། །རྦ་རླབས་དང་ནི་རྙོག་
པ་མེད། །ཏ་ལའི་ཕྲེང་བ་བདུན་གནས་ཞིང་། །རིན་ཆེན་རང་བཞིན་གྱིས་ཁྱེབས་པ། །ལྕགས་རི་བདུན་དང་ལྡན་པ་དང་། །གྲོང་ཁྱེར་ཐམས་ཅད་འབྲེལ་བ་དང་། །རྩྭ་ཅན་རྒྱལ་པོའི་ཕོ་བྲང་ནི། །དེ་ཚེ་ཏོག་དང་ལྡན་པར་འགྱུར། །གྲོང་ཁྱེར་
ཕྱོགས་ཀྱི་སྒོ་བཞི་རུ། །དཔག་བསམ་ཤིང་ནི་སྐྱེ་བར་འགྱུར། །སྔོན་པོ་སེར་པོ་དམར་པོ་དང་། །དཀར་པོ་རབ་ཏུ་གསལ་བའི་འོད། །ལྷ་ཡི་གོས་ནི་སྐྱེ་བར་འགྱུར། །ལྷ་ཡི་དྲིན་གྱིས་རྒྱན་དང་ནི། །ལོངས་སྤྱོད་ཉེ་བར་སྤྱོད་པ་རྣམས། །
ཐམས་ཅད་སྟེང་ནས་འཕྱང་བ་ཡིན། །དེ་ནས་གྲོང་ཁྱེར་དབུས་སུ་ནི། །ཁང་དམིག་བཞི་དང་ལྡན་པ་ཡིན། །བསོད་ནམས་ལས་ཀྱིས་གྲུབ་པ་ནི། །དཔག་བསམ་ཤིང་གི་སྟེང་ནས་འབྱུང་། །རས་བལ་རས་ནི་བཟང་པོ་དང་། །ཀོ་མ་ཨུ་
དུམ་བ་རའི་རས། །བསོད་ནམས་ལས་ཀྱིས་གྲུབ་པ་ནི། །དཔག་བསམ་ཤིང་གི་སྟེང་ནས་འབྱུང་། །མྲི་དཾ་ག་ནི་ལག་པས་རྡུང་། །མུ་ར་རྫ་དང་ཨ་ལམ་བྷ། །བསོད་ནམས་ལས་ལས་བྱུང་བ་ནི། །དཔག་བསམ་ཤིང་གི་སྟེང་ནས་འབྱུང་། །
39-1-266a


དཔུང་རྒྱན་དག་གི་རྒྱན་དང་ནི། །དཔུང་རྒྱན་དང་ནི་དོ་ཤལ་དང་། །རིན་ཆེན་རང་བཞིན་མགུལ་པའི་རྒྱན། །བསོད་ནམས་ལས་ལས་བྱུང་བ་ནི། །དཔག་བསམ་ཤིང་གི་སྟེང་ནས་འབྱུང་། །དཔྲལ་བ་ཁ་ཡི་རྒྱན་དང་ནི། །ནོར་བུ་
འོག་པག་ལུས་ལ་ལྡན། །བསོད་ནམས་ལས་ལས་བྱུང་བ་ནི། །དཔག་བསམ་ཤིང་གི་སྟེང་ནས་འབྱུང་། །གཞན་ཡང་རྣམ་པ་སྣ་ཚོགས་པའི། །རྒྱན་རྣམས་ཀུན་གྱིས་རྣམ་པར་བརྒྱན། །བསོད་ནམས་ལས་ལས་གྲུབ་པ་ནི། །དཔག་
བསམ་ཤིང་གི་སྟེང་ནས་འབྱུང་། །མ་རྨོས་མ་བཏབ་རང་བྱུང་བའི། །བསོད་ནམས་ལས་ཀྱིས་སྐྱེས་པ་ནི། །མ་ཞིག་སྤུན་མེད་དྲི་མ་མེད། །འབྲས་ཀྱི་འབྲས་བུ་དྲི་ཞིམ་ལྡན། །འབྲས་རྣམས་བེད་པར་བཙོས་པ་ན། །མི་རྣམས་ཡོངས་
སུ་ལོངས་སྤྱོད་དོ། །དེ་ཡི་འབྲས་ལ་ཟལ་ཟེལ་མེད། །སྟོང་ཕྲག་བརྒྱ་ནི་འབྱུང་བ་ཡིན། །འབྲས་ཀྱི་མྱུ་གུ་སྐྱེ་བ་ནི། །ཐམས་ཅད་དུ་ནི་ཁྱབ་པར་གནས། །འབྲས་སྙེ་རེ་རེ་སྐྱེ་བ་ལ། །ཕུལ་ནི་རེ་རེ་འབྱུང་བར་འགྱུར། །མི་རྣམས་ཀྱི་ནི་འབྲས་ཀྱི་དྲི། །
ཐམས་ཅད་དུ་ནི་ལོངས་སྤྱོད་དོ། །སྟོང་ཕྲག་གཉིས་ཀྱི་ཤིང་རྟའི་ཚད། །ཤིང་རྟ་བརྒྱ་ཡི་ཚད་ཙམ་དང་། །ཤིང་རྟ་སུམ་བཅུ་རྩ་དགུ་དང་། །བྲེ་ཆེན་བཅུ་དྲུག་པ་ཡི་ཁལ། །དེ་ནས་ཡང་ནི་ཀུ་བ་གཉིས། །དེ་ལྟ་བུས་འབྲས་འབྱུང་ངོ་། །ས་
བོན་གཅིག་ལ་སྐྱེ་བ་ནི། །སྐྱེ་བོ་རྣམས་ཀྱི་བསོད་ནམས་ལས། །གང་ཞིག་ཏོག་དང་ལྡན་པར་གནས། །དུང་གི་རྒྱལ་པོ་མི་ཡི་བདག །དེ་ཡི་ཚེ་ན་དེ་ལྟར་འགྱུར། །ཡོན་ཏན་གྱི་ནི་དཔུང་རྒྱན་འཛིན། །བསམ་པ་ཐམས་ཅད་ཡོངས་སུ་རྫོགས། །
བཞིན་ལེགས་རྣ་བའི་རྒྱན་དང་ལྡན། །ཧ་རི་ཙན་དན་ལུས་ལ་བྱུགས། །ག་ཤིའི་གོས་ནི་མཆོག་ཏུ་གྱོན། །ནོར་ནི་རྒྱ་ཆེར་མང་བ་དེང་། །ཏིང་ཅག་པི་ཝང་གིས་སད་བྱེད། །རྟག་ཏུ་ཤིན་དུ་སྐྱིད་པ་དང་། །དེ་ཡི་ལུས་དང་སེམས་བདེ་ཞིང་། །དཔག་ཚད་སྟོང་
ཕྲག་བཅུ་རུ་ནི། །འཛམ་བུ་གླིང་ནི་གནས་པ་ཡིན། །ཚེར་མ་མེད་ཅིང་ཤིང་མེད་པ། །མཉམ་ཞིང་འཇམ་ལ་སྔོ་བསང་གནས། །དེ་ལ་ནད་ནི་གསུམ་འབྱུང་སྟེ། །འདོད་དང་ཞེན་དང་རྒས་པའོ། །ལྔ་བརྒྱའི་ལོ་ལོན་བུད་མེད་ནི། །རྒན་དང་གཞོན་པ་
39-1-266b


བག་མར་ལེན། །གཏན་དུ་གཉིས་ཀ་བདེ་བ་ཡིན། །རྩོད་པ་མེད་པར་འགྱུར་བ་ཡིན། །འབྲས་བུ་ལོ་ཏོག་ཕུན་སུམ་ཚོགས། །འཁྲིལ་ཤིང་གེལ་པ་ཤིང་གི་ཚལ། །རྩྭ་ནི་སོར་བཞི་པ་རུ་སྐྱེ། །ཤིན་དུ་འཇམ་པའི་ཤིང་བལ་
འདྲ། །ཧ་ཅང་མི་གྲང་མི་དྲོ་ཞིང་། །ཆར་ནི་མཉམ་པར་འབབ་པ་དང་། །རླུང་ནི་ཤིན་དུ་ཆུང་བ་དང་། །དུས་ཚོད་མཉམ་པར་ལྡན་པ་དང་། །ཆུ་ཀླུང་ཏཱ་ལ་མི་དམན་ཞིང་། །དེ་དང་དེ་ཡི་ས་ཡི་ཆ། །ས་ལ་རྡོ་ནི་ཆུང་ལྡན་ལ། །སྲན་ནག་སྲན་ཆུང་
ཚད་ཙམ་མོ། །མུ་ཏིག་འདྲ་བས་ཡོངས་སུ་གང་། །རྒྱན་རྣམས་བསྐྱེད་མོས་ཚལ་དང་འདྲ། །དགའ་ཞིང་ཡིད་དུ་འོང་བར་འགྱུར། །གྲོང་དང་གྲོང་རྡལ་མང་པོས་གང་། །དེ་དང་དེ་ནི་ཉེ་བ་རུ། །འོད་མ་སྨྱུག་ཕྲན་ཚལ་བཞིན་ནོ། །བྱ་གག་
འཕུར་བ་ཙམ་ཉིད་དོ། །དགེ་ཞིང་རྒྱས་ལ་རྫུ་འཕྲུལ་ལྡན། །ལུགས་ལ་ཉེ་བར་འཚེ་བ་མེད། །རྟག་ཏུ་རྩེ་ཞིང་དགའ་བ་དང་། །གཅིག་ཏུ་བདེ་བས་ཚིམ་པ་དང་། །རྒྱུ་སྐར་བདེ་བས་བསྐོར་བ་དང་། །དགའ་ཞིང་ཚིམ་ལ་རབ་ཏུ་དགའ། །བཟའ་
དང་བཏུང་བ་མང་པོ་ཟ། །ཤ་ཆང་ཆུ་བཞིན་མང་བ་ནི། །ལྷ་ཡི་ཕོ་བྲང་ཅང་ལོ་བཞིན། །ཁང་བཟང་རྒྱལ་པོའི་ཕོ་བྲང་ནི། །ཉམས་དགའ་སྒྲ་མི་སྙན་བཞིན་ནོ། །འཛམ་བུའི་གླིང་ཡང་དེ་བཞིན་གྱུར། །དེའི་དུས་སུ་བྱང་ཆུབ་སེམས་དཔའ་
བྱམས་པ་འདི་ནི་བསྐལ་པ་གྲངས་མེད་པ་བཅུ་དྲུག་དང་བསྐལ་པ་འབུམ་ཕྲག་གཅིག་ལྷག་ཙམ་དུ་སྦྱིན་པའི་ཕ་རོལ་དུ་ཕྱིན་པ་དང་། ཕ་རོལ་དུ་ཕྱིན་པ་སུམ་བཅུ་རྫོགས་པར་བྱས་ནས་ཐམས་ཅད་སྒྲོལ་བཞིན་དུ་སྐྱེ་བ་ལྷག་མའི་ལུས་
སྦྱིན་པ་ཆེན་པོར་བྱས་ཤིང་། ཕ་རོལ་དུ་ཕྱིན་པ་ཡོངས་སུ་རྫོགས་པར་བྱས་ཏེ། དེའི་ལུས་ཞིག་ནས་དགའ་ལྡན་དུ་སྐྱེ་བ་རྫོགས་པར་བྱས་ནས། སངས་རྒྱས་བྱོན་པར་འགྱུར་རོ་ཞེས་སྒྲོགས་སོ། །སྟོང་ཕྲག་བཅུའི་འཁོར་ཡུག་གི་ལྷ་རྣམས་
ནི་སངས་རྒྱས་བྱོན་པར་འགྱུར་རོ་ཞེས་དམ་འཆའོ། །ཕྱོགས་ལྔར་གཟིགས་ཏེ་དགའ་ལྡན་གྱི་ལྷའི་ཚོགས་རྣམས་ཀྱི་འཁོར་གྱིས་བསྐོར་ལ། དགའ་ལྡན་ནས་བྱོན་ཏེ། ཏོག་ལྡན་ཞེས་བྱ་བའི་རྒྱལ་པོའི་ཕོ་བྲང་དུ། དུང་གི་རྒྱལ་པོའི་
39-1-267a


ཚངས་བཟང་མདུན་ན་འདོན་བྲམ་ཟེའི་རིགས་ཀྱི་ཚངས་ལྡན་མའི་རུམ་དུ་ཞུགས་ཏེ། འཇིག་རྟེན་གྱི་ཁམས་སྟོང་ཕྲག་བཅུ་གཡོས་སོ། །ཟླ་བ་བཅུ་འདས་ནས་དྲང་སྲོང་ལྷུང་བ་དང་རི་དགས་རྒྱུ་བའི་གནས་སུ་མའི་རུམ་ནས་འཐོན་
ཏེ་རིམ་པ་བཞིན་དུ་ཤེས་པ་དང་ལྡན་པར་གྱུར་ཏེ། བདག་ཉིད་ཀྱི་བསོད་ནམས་ཀྱི་མཐུས་ས་གཞི་བཏོལ་ནས་སྟེང་དུ་འོངས་ཏེ་རིན་པོ་ཆེ་སྣ་བདུན་གྱི་ཁང་བཟང་བཞིར་རང་ཉིད་ཀྱི་ལྷ་བཞིན་དུ་ལྷ་མོ་ཟླ་བའི་གདོང་ཅན་མ་ལ་སོགས་པ། ལྷའི་བུ་
མོ་བཞིན་དུ་བུད་མེད་མང་པོ་དེ་རྣམས་དང་འགྲོགས་ནས། ལོ་སྟོང་ཕྲག་གཅིག་ལྷ་བཞིན་དུ་རྗེས་སུ་མྱོང་བར་གྱུར་ཏེ། དེའི་ཉིན་པར་རབ་ཏུ་བྱུང་བའི་གཟུགས་གཅིག་མཐོང་ནས་གསེར་གྱི་གཟེབ་ལ་མི་དགའ་བ་སེང་གེའི་རྒྱལ་པོ་བཞིན་དུ་
དཔལ་འབྱོར་མ་ལུས་པ་རྫོགས་པ་རིན་པོ་ཆེའི་ཁང་བཟང་རྣམས་ལ་ཤིན་དུ་མི་དགའ་བར་གྱུར་ནས་ངེས་པར་འབྱུང་བའི་འདོད་པ་སྐྱེས་སོ། །ཐམས་ཅད་སྟོང་ཕྲག་བཅུའི་ཁོར་ཡུག་གི་ལྷ་རྣམས་ལྷའི་མེ་ཏོག་ལ་སོགས་པ་ལག་པས་
བླངས་ནས་འཇིག་རྟེན་གྱི་འཁོར་ལོ་འདི་གཅིག་ཏུ་འདུས་ཏེ། དུང་གི་རྒྱལ་པོ་ལ་སོགས་པའི་སྐྱེ་བོ་ཆེན་པོས་བཟུང་ནས་དྲི་བཟང་དང་ཕྲེང་བ་དང་བདུག་སྤོས་ལ་སོགས་པས་ཁང་བཟང་ལ་བསྐོར་ནས་འདུག་གོ། །ནམ་མཁའི་ལྷ་
རྣམས་ཀྱིས་ལྷའི་མེ་ཏོག་ལག་པས་བཟུང་ནས་ལེགས་སོ་ཞེས་བྱ་བའི་སྒྲ་གཅིག་ཏུ་འབྱིན་པར་བྱེད་དོ། །འོག་མིན་གྱི་བར་དུ་ཐམས་ཅད་སྒྲ་གཅིག་ཏུ་བྱེད་ཅིང་གནས་སོ། །དེའི་དུས་སུ་རིན་པོ་ཆེའི་ཁང་བཟང་རྫ་མཁན་གྱི་
འཁོར་ལོ་ལྟར་འཁོར་ཞིང་ནམ་མཁའ་ལ་འགྲོའོ། །ཟླ་བ་ཉ་བ་ལ་རྒྱུ་སྐར་གྱི་ཕྲེང་བས་བསྐོར་བ་བཞིན་ནོ། །བྱང་ཆུབ་སེམས་དཔའི་བཙུན་མོ་ཆེན་མོ་ལ་སོགས་པ་ནམ་མཁའ་ལ་བཞུད་དོ། །གང་ཞིག་སེམས་དཔའ་ཆེན་
པོ་དང་འགྲོགས་ནས་འགྲོ་བའི་སེམས་ཀྱིས་དེ་རྣམས་ཀྱིས་རང་རང་གི་ནམ་མཁའ་མཐོང་སྟེ་ཚངས་པ་ཆེན་པོས་དཔག་ཚད་གསུམ་གྱི་ཚད་དང་མཉམ་པའི་གདུགས་དཀར་པོ་འཛིན་ནོ། །བརྒྱ་བྱིན་ལྷའི་རྒྱལ་པོས་དུང་ལ་སོགས་པ་
39-1-267b


བཟུང་ནས་འབུད་དོ། །དེ་ལྟར་དཔལ་དང་སྐལ་པ་བཟང་པོ་དང་ལྡན་པའི་ལྷ་དང་མིའི་ཚོགས་ཀྱིས་བསྐོར་ནས་ཁང་བཟང་གི་ཀླུ་ཤིང་བྱང་ཆུབ་ཤིང་དྲུང་དུ་གཤེགས་སོ། །དེའི་ཚད་ནི་ཁྲུ་བརྒྱ་ཉི་ཤུ་ཡལ་གའི་བར། །ཡལ་གའི་མཐོ་
ཚད་དེ་དང་མཉམ། །འཁྲིལ་ནས་སྟེང་ནས་འོག་ཏུ་འཕྱང་། །རྨ་བྱའི་གདུགས་བཞིན་མཛེས་པའོ། །རྟག་ཏུ་རྩེ་མོར་མེ་ཏོག་གསལ། །ལྷ་ཡི་དྲི་བཟང་བསུང་ལྡན་ཞིང་། །གེ་སར་ཕུལ་ལུ་གང་ཙམ་མོ། །མེ་ཏོག་བཟང་པོ་འཁོར་
ལོ་ཙམ། །ཕྱོགས་ཕྱོགས་རླུང་གིས་འཁྱེར་བར་བྱེད། །དཔག་ཚད་བཅུ་རུ་ཁྱབ་པའོ། །སྟེང་གི་མེ་ཏོག་འོག་ཏུ་ལྷུང་། །བྱང་ཆུབ་སྙིང་པོར་མེ་ཏོག་བརྩེགས། །དེའི་དུས་སུ་ནམ་མཁའ་ལ་འགྲོ་བའི་བྱ་རྣམ་པ་སྣ་ཚོགས་པའི་ཚོགས་
ཀྱིས་སྒྲ་སྙན་པས་མཆོད་དེ། དེ་ལྟར་ཀླུ་ཤིང་གི་བྱང་ཆུབ་ཀྱི་ཤིང་དྲུང་དུ་གཤེགས་ཏེ་ནམ་མཁའ་ལ་འཕྱང་ཞིང་སའི་ཆ་ཐམས་ཅད་ཉམས་དགའ་བའི་གནས་སུ་སྡོད་དོ། །དེ་ལ་ཞག་བདུན་དུ་དཔལ་གྱི་སྙིང་པོར་དཀའ་བ་སྤྱོད་དོ། །
ཚངས་པ་ཆེན་པོས་བླངས་ནས་དངོས་པོ་རྣམས་བཟུང་ནས་རབ་ཏུ་བྱུང་ངོ་། །ཇི་སྙེད་པའི་འཁོར་ཐམས་ཅད་ཀྱང་རབ་ཏུ་བྱུང་ངོ་། །དེ་ནས་གཞན་ཡང་སྟོང་ཕྲག་བརྒྱད་བཅུ་རྩ་བཞི་ཡིས། །བྲམ་ཟེའི་རིག་བྱེད་མཆོག་ཤེས་
ཤིང་། །བྱམས་པ་རབ་ཏུ་བྱུང་བར་གྱུར། །དེ་དང་དེ་ནི་རབ་ཏུ་བྱུང་། །དེ་ལ་རབ་ཏུ་བྱུང་ནས་ཟླ་བའི་གདོང་ཅན་གྱི་ལྷ་མོས་ཤིན་དུ་མངར་བའི་འོ་ཐུག་ཕུལ་ལོ། །ཡོངས་སུ་ལོངས་སྤྱད་ནས་སྲོད་ཀྱི་ཐུན་ལ་བྱང་ཆུབ་ཀྱི་ཤིང་དྲུང་དུ་
ས་མཉམས་ནས་སྐྱིལ་དཀྲུང་གིས་མ་ཕམ་པ་བཞུགས་སོ། །ཤར་གྱི་འཇིག་རྟེན་གྱི་ཁམས་ཀྱི་ཕྱོགས་སུ་གཟིགས་ཤིང་བཞུགས་སོ། །རིམ་པ་བཞིན་དུ་དུས་ལ་ཐམས་ཅད་མཁྱེན་པའི་ཡེ་ཤེས་སོ་སོར་རྟོགས་སོ། །འདི་སྐད་
གསུངས་པ། འཁོར་བའི་སྐྱེ་བོ་མ་ལུས་པ། །དུག་མེད་པ་ནི་བཙལ་བའི་ཕྱིར། །དུག་མེད་པ་ནི་བྱེད་པ་ནི། །ཡང་ཡང་སྐྱེ་བ་སྡུག་བསྔལ་བ། །ཁྱིམ་ནི་བྱེད་པ་མཐོང་བར་འགྱུར། །ཁྱིམ་ནི་གཞན་ནི་བྱེད་པ་མེད། །སྡུག་
39-1-268a


བསྔལ་ཐམས་ཅད་གཞིག་པ་དང་། །དུག་ལྡན་ཁྱིམ་ནི་གཞིག་པའོ། །སེམས་ཀྱི་དུག་ནི་སྤོང་བ་དང་། །སྲེད་པ་ཟད་ནས་གྲོལ་བར་འགྱུར། །ཆེད་དུ་བརྗོད་པ་གསུངས་པའོ། །བྱང་ཆུབ་ཀྱི་ཤིང་གི་དྲུང་དུ་ཞག་བཞི་
བཅུ་རྩ་དགུ་བཞུགས་ནས་ཚངས་པས་གསོལ་བ་འདེབས་པའི་ཕྱིར། ཆོས་ཀྱི་འཁོར་ལོ་བསྐོར་བའི་ཆེད་དུ་དྲང་སྲོང་ལྷུང་བའི་གནས་སུ་གཤེགས་པ་དང་། དེ་ནས་དེར་གཤེགས་པ་ན། ཞབས་ནི་བཏེག་དང་བཞག་པ་ན། །མེ་ཏོག་
པད་མ་སྐྱེས་པར་གྱུར། །འདབ་མཉམ་ཁྲུ་ནི་སུམ་བཅུ་པ། །འདབ་ཆུང་ཁྲུ་ནི་ཉི་ཤུ་ལྔ། །གེ་སར་ཁྲུ་ནི་ཉི་ཤུ་པ། །ལྟེ་བ་ཁྲུ་ནི་བཅུ་དྲུག་པ། །གེ་སར་རྣམས་ནི་ཁྱབ་པར་གནས། །པད་མ་མཛོད་སྤུ་ཐམས་ཅད་དུའོ། །སྟོབས་བཅུ་
པའི་འོད་ཀྱིས་ཉིན་མོར་བྱེད་པའི་འོད་ཟིལ་གྱིས་མནན་ནོ། །ཉིན་མོ་དང་མཚན་མོ་མི་ཕྱེད་པར་གྱུར་ཏོ། །དེ་ལ་སྲོད་དང་ཐོ་རངས་བྱ་རྣམས་སྐད་སྒྲོགས་སོ། །མེ་ཏོག་ཁ་ཟུམ་པ་དང་བྱེ་བས་མཚན་མོ་དང་ཉིན་མོར་ཤེས་པར་བྱེད་དོ། །
གང་དང་གང་དུ་ཆོས་སྟོན་པར་བྱེད་པ་དེ་དང་དེ་རུ་ཆོས་ཀྱི་སྒྲ་སྒྲོགས་སོ། །དེའི་ཕྱིར་གསུངས་པ། འོད་དང་འོད་ཟེར་ཚད་རྣམས་ནི། །དབྱངས་དང་དབྱངས་ཀྱི་ཚད་ཙམ་མོ། །གཟི་བརྗིད་གཟི་ཡི་ཚད་རྣམས་ནི། །བསོད་ནམས་བསོད་
ནམས་ཀྱི་ནི་ཚད། །ཤེས་རབ་ཤེས་རབ་ཀྱི་ནི་ཚད། །གྲགས་པ་གྲགས་པ་ཡི་ནི་ཚད། །ཁ་དོག་ཁ་དོག་གི་ནི་ཚད། །ཆོས་ནི་ཆོས་རྣམས་ཀྱི་ནི་ཚད། །དེ་ནས་སྟོང་ཕྲག་བརྒྱད་བཅུ་རྩ་བཞིའི་བྲམ་ཟེ་དང་། བྱེ་བ་ཕྲག་བཅྭ་བརྒྱད་ཀྱི་
ཚངས་པ་རྣམས་ཀྱིས་བདུད་རྩིའི་བཏུང་བ་མཐུངས་ནས། ཇི་ལྟར་བཅོམ་ལྡན་འདས་བསོད་ནམས་ཀྱི་མཐུ་ཡིས་རྣམ་པ་བརྒྱ་ཕྲག་དུ་མའི་འོད་ཟེར་འཕྲོ་ཞིང་། རྣམ་པ་བརྒྱ་ཕྲག་དུ་མའི་མཚན་རྫོགས་པ་མཚན་སུམ་བཅུ་རྩ་
གཉིས་མཆོག་དང་ལྡན་པ་དཔེ་བྱད་བཟང་པོ་བརྒྱད་བཅུ་དང་ལྡན་པ་བརྒྱ་ཕྲག་དུ་མའི་སྐུ་མདོག་རྣམ་པ་དུ་མའི་ཡ་མཚན་དང་ལྡན་པར་གྱུར་པ་བརྒྱ་ཕྲག་དུ་མའི་འོད་ཟེར་དེའི་སྐུ་ལས་འཐོན་པར་གྱུར་ཏོ། །དེ་ནི་ཁ་དོག་སྔོན་པོ་
39-1-268b


དང་ཁ་དོག་སེར་པོ་དང་། ཁ་དོག་དམར་པོ་དང་། ཁ་དོག་དཀར་པོ་དང་། བཙོད་ཀྱི་མདོག་ལྟ་བུའི་འོད་ཟེར་དང་ལྡན་པའི་སྐུ་མདོག་ཅན་ནོ། །དེའི་སྐུ་ལུས་ལ་བྱུང་བ་ནི་ཤིང་ཏ་ལའི་ཚད་ཙམ་གྱི་འོད་ཟེར་འཕྲོའོ། །དུས་དང་དུས་མ་ཡིན་
པ་དང་། ཟུང་དང་ཟུང་མ་ཡིན་པ་དང་། ཕུང་པོ་དང་ཕུང་པོ་མ་ཡིན་པ་ནི། བཅོམ་ལྡན་འདས་ཀྱི་སྐུ་ལུས་ལ་ལན་གསུམ་བསྐོར་བ་བྱས་ནས་རྒྱང་རིང་དུ་འགྲོ་བ་དང་ཐུང་དུ་འགྲོ་བའོ། །བཅོམ་ལྡན་འདས་དེའི་སྐུ་ལུས་ནི་མཐོ་ཚད་དུ་ཁྲུ་བརྒྱད་
བཅུ་རྩ་བརྒྱད་པར་འགྱུར་རོ། །ཞབས་ཀྱི་འོག་ནས་དཔུས་མོའི་བར་དུ་ཁྲུ་ཉི་ཤུ་རྩ་གཉིས་སོ། །པུས་མོ་ནས་ལྟེ་བའི་བར་དུ་ཁྲུ་ཉི་ཤུ་རྩ་གཉིས་སོ། །ལྟེ་བ་ནས་སྒྲོག་རུས་ཀྱི་བར་དུ་ཁྲུ་ཉི་ཤུ་རྩ་གཉིས་སོ། །སྒྲོག་རུས་ནས་སྤྱི་གཙུག་གི་
བར་དུ་ཁྲུ་ཉི་ཤུ་རྩ་གཉིས་སོ། །དཔུང་པ་གཉིས་ཀྱི་བར་དུ་ཁྲུ་ཉི་ཤུ་རྩ་ལྔའི་ཚད་དོ། །སྒྲོག་རུས་རེ་རེའི་དཀྱུས་ནི་ཁྲུ་ལྔ་ལྔའོ། །སྙན་གཉིས་ཀྱི་རྩེ་མོ་ནས་རྩ་བའི་བར་ལ་ཁྲུ་བདུན་བདུན་ནོ། །སྤྱན་རེ་རེའི་མཆུ་རུ་ཁྲུ་ལྔ་ལྔའོ། །སྨིན་མ་གཉིས་
ཀྱི་ཀྱུས་སུ་ཁྲུ་ལྔ་ལྔའོ། །སྨིན་མ་གཉིས་ཀྱི་དབུས་ཀྱི་བར་ཞེང་ལ་ཁྲུ་ལྔའོ། །ཤངས་ལ་ཁྲུ་བདུན་ནོ། །ཡ་མཆུ་མ་མཆུ་གཉིས་ཀྱི་མཆུ་རུ་ཁྲུ་བཅུ་བཅུའོ། །ལྗགས་ཀྱི་ཟླུམས་སུ་ཁྲུ་ལྔའོ། །གཙུག་ཏོར་ལ་ཁྲུ་ལྔའོ། །གསེར་གྱི་མེ་ལོང་དང་འདྲ་
བའི་ཞལ་གྱི་དཀྱིལ་འཁོར་ལ་ཁྲུ་ཉི་ཤུ་རྩ་ལྔའོ། །མགུལ་པ་ལ་ཁྲུ་ལྔའོ། །ཕྱག་གཉིས་ཀྱི་རིང་དུ་ཁྲུ་བཞི་བཅུ་རྩ་བཞི་པ་ཡིན་ནོ། །དེ་ནི་འདི་བཞིན་དུ་དཔེ་མེད་པའི་སངས་རྒྱས་ཀྱི་དཔལ་མཐའ་ཡས་པའི་སངས་རྒྱས་ཀྱི་རོལ་པའོ། །སྟོང་
ཕྲག་བཅུའི་འཇིག་རྟེན་གྱི་ཁོར་ཡུག་ཐམས་ཅད་ཀྱི་ལྷ་རྣམས་དང་། དེའི་རྗེས་སུ་མི་རྣམས་ཀྱི་ནང་དུ་གནས་སུ་ཆོས་ཀྱི་འཁོར་ལོ་བསྐོར་རོ། །ཆོས་སྟོན་པའི་གནས་དང་བྱེ་བ་འབུམ་ཕྲག་གཅིག་གི་ལྷ་དང་། མིའི་འཆིང་བ་གྲོལ་བ་
དང་། ཆོས་ཀྱི་དང་པོ་ཐོབ་པ་དང་། ཆོས་ཀྱི་དང་པོ་མ་ཐོབ་པ་རྣམས་མཐོ་རིས་སུ་སྐྱེ་བར་འགྱུར་རོ། །དེ་ལྟར་མཆོག་དང་ལྡན་པའི་བྱམས་པ་སུ་ཞིག་གིས་མི་མཐོང་། ང་ནི་མ་བསད་པ་དང་། ཕ་བསད་པ་དང་། དགེ་སློང་མ་སུན་
39-1-269a


ཕྱུང་བ་དང་། དགེ་འདུན་གྱི་དབྱེན་བྱས་པ་དང་། མཚམས་མེད་པ་ལྔའི་ལས་བྱས་པ་དང་། མཆོད་རྟེན་བཤིག་པ་དང་། བྱང་ཆུབ་ཀྱི་ཤིང་བཅད་པ་དང་། བྱང་ཆུབ་སེམས་དཔའ་བསད་པ་དང་། དགེ་འདུན་གྱི་ཁ་ཟས་
བརླག་པར་བྱས་པ་དང་། ཤིན་དུ་སེར་སྣ་ཆེ་བ་དང་། ལོག་པར་ལྟ་བར་ངེས་པ་དང་། འཕགས་པའི་གང་ཟག་ལ་སྐུར་པ་འདེབས་པ་དང་། གཅེར་བུ་པའི་རིགས་ཏེ་དེ་རྣམས་ཀྱིས་མི་མཐོང་ངོ་། །ཚིགས་བཅད་སྟོང་ཕྲག་གཅིག་གིས་
སོ་སོར་བརྒྱན་པ་འདི་ཐམས་ཅད་སྒྲོལ་གྱི་སྐྱེས་རབས་ཆེན་པོ་ཉི་མ་གཅིག་ལ་སྐྱེ་བོ་རྣམས་ཀྱིས་བཤད་པ་དང་མཉན་པ་དང་། མར་མེ་སྟོང་ཕྲག་གཅིག་གམ། སྟོང་ཕྲག་གཅིག་གི་མེ་ཏོག་ཕལ་པ་འམ། སྟོང་ཕྲག་གཅིག་གི་ཨུ་
པ་ལ་སྔོན་པོའི་མེ་ཏོག་གམ། མཆོད་རྟེན་བྱེད་པ་འམ། སངས་རྒྱས་ཀྱི་སྐུ་གཟུགས་བྱེད་པ་འམ། དེ་ལ་མཆོད་པ་བྱེད་པས་ནི་བྱམས་པ་སངས་རྒྱས་པའི་དུས་སུ། དེའི་དྲུང་དུ་དང་པོའི་ཆོས་ཐོབ་ཅིང་སྐྱེ་བར་འགྱུར་རོ། །སེམས་
ཅན་ལྷག་མ་རྣམས་ཀྱིས་སྦྱིན་པ་བྱིན་པ་དང་། ཚུལ་ཁྲིམས་བསྲུངས་པ་དང་། གཙུག་ལག་ཁང་སྦྱངས་པ་དང་། བྱང་ཆུབ་ཀྱི་ཤིང་བསྐྲུན་པ་དང་། མཆོད་རྟེན་བྱས་པ་དང་། མཆོད་རྟེན་དང་བྱང་ཆུབ་ཀྱི་ཤིང་ལ་རིམ་གྲོ་བྱས་པ་དང་། 
བསྐྱེད་མོས་ཚལ་བསྐྲུན་པ་དང་། ཟམ་པ་བཙུགས་པ་དང་། ལམ་བཅོས་པ་དང་། འགྲོན་ཁང་བྱས་པ་དང་། ཁྲོན་པ་བྱས་པ་དང་། བསྟན་པའི་བྱ་བ་བྱས་པ་དང་། ཆོས་ཀྱི་གནས་ལ་བྱི་དོར་བྱས་པ་དང་། དྲི་དང་ཕྲེང་བ་
ལ་སྩོགས་པས་མཆོད་པར་བྱེད་པ་དང་། གུས་པར་བྱས་ནས་ཆོས་མཉན་པ་དང་། ཁ་ཟས་ཙམ་གྱི་སྦྱིན་པ་དགེ་འདུན་ལ་གཏོང་བ་དང་། ཕ་དང་མ་ལ་རྙེད་བཀུར་བྱེད་པ་དང་། རིགས་ཀྱི་གཙོ་བོ་ལ་རྙེད་བཀུར་བྱེད་པ་དང་། གསོ་སྦྱོང་
ལ་གནས་པ་ལ་ཁ་ཟས་སྟེར་བ་དང་། གློ་བུར་བའི་བཙུན་པ་ལ་སྦྱིན་པ་སྟེར་བ་དང་། བསོད་སྙོམས་པ་ལ་སྟེར་བ་དང་། སྟན་འབུལ་བའི་སྐྱེ་བོས་ཡང་དག་པར་རྫོགས་པའི་སངས་རྒྱས་བྱམས་པ་མཐོང་བར་འགྱུར་རོ། །
39-1-269b


ཐ་ན་མེ་ཏོག་སྙིམ་པ་གང་ཙམ་འམ། མར་མེ་གཅིག་ཙམ་འབུལ་བ་འམ། གཞན་བསོད་ནམས་བྱེད་པ་རྣམས་ལ་རྗེས་སུ་ཡི་རང་བ་དང་། ལྷ་འམ་མི་རྣམས་ཀྱི་དགེ་བ་འདི་རྣམས་བྱེད་པ་ནི་དེའི་དུས་སུ་བྱོན་པའི་ཡང་
དག་པར་རྫོགས་པའི་སངས་རྒྱས་བྱམས་པ་མཐོང་བར་འགྱུར་རོ། །དེ་ལ་ཡང་དག་པར་རྫོགས་པའི་སངས་རྒྱས་བྱམས་པ་མཐོང་བར་འདོད་པ་རྣམས་ཀྱིས་སྦྱིན་པ་གཏོང་བ་དང་། ཚུལ་ཁྲིམས་སྲུང་བ་དང་། གསོ་སྦྱོང་གི་
ལས་བྱེད་པ་དང་། སྒོམ་པར་བྱེད་པ་དང་། དགེ་བའི་ལས་ཀྱི་བག་ཡོད་པར་གྱུར་ན་གདོན་མི་ཟ་བར་མཐོང་ངོ་། །གང་ཞིག་ཚངས་པར་སྤྱད་པ་སྤྱོད། །ཐུབ་པའི་གསུང་རབ་ཐོས་པ་དང་། །དེ་རྣམས་འཁོར་བ་ལས་
གྲོལ་ཞིང་། །བླ་མེད་མཆོག་གྱུར་འཆི་བ་མེད། །ཚངས་པར་སྤྱད་པ་སྤྱོད་བྱེད་ཅིང་། །མཆོད་འོས་རྣམས་ལ་སྟེར་བ་དང་། །གསོ་སྦྱོང་རྣམས་ལ་གནས་པ་དང་། །ལེགས་པར་བྱམས་པ་བསྒོམ་པར་གྱིས། །བག་ཡོད་པར་ནི་
འགྱུར་བ་དང་། །རྟག་ཏུ་བསོད་ནམས་བྱ་བ་བྱེད། །དགེ་བ་འདི་རྣམས་བྱས་པ་ཡིས། །སྡུག་བསྔལ་མཐར་ནི་བྱེད་པའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ད་གེ་སློང་དེ་དག་བཅོམ་ལྡན་འདས་ཀྱིས་
གསུངས་པ་ལ་མངོན་པར་བསྟོད་དོ། །བྱམས་པའི་མདོ་རྫོགས་སྷོ།།    །།༄༅། ། རྒྱ་གར་སྐད་དུ། མཻ་ཏྲི་བྷཱ་བ་ན་སཱུ་ཏྲ།  བོད་སྐད་དུ། བྱམས་པ་བསྒོམ་པའི་མདོ།  འཕགས་པ་དཀོན་མཆོག་གསུམ་ལ་གུས་
པས་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་
རྣམས་བོས་ནས། དགེ་སློང་དག་བཙུན་པ་བཅོམ་ལྡན་འདས་ཀྱི་སྤྱན་སྔར་སོ་སོར་འོངས་པ་ལ་བཅོམ་ལྡན་འདས་ཀྱིས་ཀྱང་འདི་སྐད་ཅེས་བཀའ་སྩལ་ཏོ། །སེམས་རྣམ་པར་གྲོལ་བར་བྱ་བའི་ཕྱིར་བྱམས་པ་བསྒོམ་པར་བྱའོ། །
39-1-270a


བསམ་པ་བརྟན་པར་བྱ་བའི་ཕྱིར་རོ། །མང་དུ་བྱེད་པ་དང་། ཞི་བར་བྱེད་པ་དང་། གཞིར་བྱེད་པ་དང་། རྗེས་སུ་གནས་པར་བྱེད་པ་དང་། འདྲིས་པར་བྱ་བ་དང་། ཤིན་དུ་བརྩོན་པར་བྱའོ། །ཕན་ཡོན་བཅུ་གཅིག་པོ་
སོ་སོར་བཤད་པར་བྱའོ། །བཅུ་གཅིག་གང་ཞེ་ན། བདེ་བར་ཉལ་བ་དང་། བདེ་བར་སད་པ་དང་། སྡིག་པའི་རྨི་ལམ་མི་མཐོང་བ་དང་། དེ་ལ་མི་རྣམས་དགའ་བ་དང་། མི་མ་ཡིན་རྣམས་དགའ་བ་དང་། ལྷ་རྣམས་ཀྱིས་བསྲུང་བ་དང་། 
མེ་དང་དུག་དང་། མཚོན་རྣམས་ཀྱིས་གནོད་པར་མི་འགྱུར་རོ། །དུས་རྟག་ཏུ་སེམས་ཤིན་དུ་དགའ་བར་གནས་པ་དང་། བཞིན་གྱི་མདངས་རབ་ཏུ་གསལ་བ་དང་། སེམས་གསལ་བར་འཆི་བ་དང་། ཆེས་ཆེར་བག་ཡོད་པར་བྱས་
པས་ཚངས་པའི་འཇིག་རྟེན་དུ་སྐྱེ་བའོ། །དགེ་སློང་དག་བྱམས་པའི་སེམས་དང་མི་འབྲལ་བར་རིག་པར་བྱའོ། །བསམ་པས་བརྟེན་པར་བྱའོ། །བསྒོམ་པར་བྱ་བ་དང་། མང་དུ་བྱེད་པ་དང་། ཞི་བར་བྱེད་པ་དང་། གཞིར་བྱེད་པ་
དང་། རྗེས་སུ་གནས་པར་བྱེད་པ་དང་། འདྲིས་པར་བྱ་བ་དང་། ཤིན་དུ་བརྩོན་པར་བྱའོ། །བཅུ་གཅིག་པོ་རྣམས་ཀྱི་ཕན་ཡོན་རྣམས་སོ་སོར་བཤད་ཟིན་ཏོ། །དགེ་སློང་དག་གཞན་ཡང་བྱམས་པའི་ཕན་ཡོན་རྣམས་བཤད་
པར་བྱའོ། །ཁ་ཟས་དུ་མ་ཐོབ་པ་དང་། །རང་གི་ཡུལ་དུ་ཉེ་བར་གནས། །མང་པོ་རྣམས་ནི་འཚོ་བ་ནི། །གང་གིས་བྱམས་པ་མ་སྤངས་ནའོ། །གྲོང་རྡལ་གང་གང་འགྲོ་བ་དང་། །གྲོང་ཁྱེར་རྒྱལ་པོའི་ཕོ་བྲང་དང་། །ཐམས་
ཅད་དུ་ནི་མཆོད་པར་འགྱུར། །གང་གིས་བྱམས་པ་མ་སྤངས་ནའོ། །དེ་ལ་ཆོམ་རྐུན་མི་འབྱུང་ཞིང་། །དེ་ལ་རྒྱལ་པོ་གནོད་མི་བྱེད། །སེམས་ཅན་ཐམས་ཅད་བཤེས་སུ་འགྱུར། །གང་གིས་བྱམས་པ་མ་སྤངས་ནའོ། །ཁྲོ་
མེད་རང་ཡུལ་བདེ་བར་གནས། །སྐྱེ་བའི་འདུན་སར་སྨོད་མེད་དགའ། །མཆོག་གི་གཉེན་དང་ལྡན་པར་འགྱུར། །གང་གིས་བྱམས་པ་མ་སྤངས་ནའོ། །མཆོད་ན་མཆོད་པ་ཐོབ་པར་འགྱུར། །འདུད་ན་སོ་སོར་འདུད་པར་བྱེད། །
39-1-270b


སྙན་དང་གྲགས་པ་ཐོབ་པར་འགྱུར། །གང་གིས་བྱམས་པ་མ་སྤངས་ནའོ། །བཀུར་སྟི་བྱས་ན་བཀུར་སྟི་ཐོབ། །གུས་པར་བྱས་ན་གུས་པ་འཐོབ། །ཁ་དོག་གཟི་བརྗིད་ལྡན་པར་འགྱུར། །གང་གིས་བྱམས་པ་མ་སྤངས་ནའོ། །
མེ་ལྟར་རབ་ཏུ་འབར་བ་ཡི། །ལྷ་ཡི་ལུས་དང་འདྲ་བར་འགྱུར། །དཔལ་དང་བྲལ་བར་མི་འགྱུར་རོ། །གང་གིས་བྱམས་པ་མ་སྤངས་ནའོ། །ཕྱུགས་རྣམས་མང་པོ་ཐོབ་པ་དང་། །ཞིང་ལ་འབྲུ་མང་སྐྱེ་བ་དང་། །བུ་དང་བུ་མོ་མང་
བར་འགྱུར། །གང་གིས་བྱམས་པ་མ་སྤངས་ནའོ། །རི་ལས་ཐུར་དུ་ལྷུང་བ་དང་། །ཤིང་ལས་འོག་ཏུ་ལྷུང་བ་ན། །ལྟུང་བར་མི་འགྱུར་གནས་ས་ཐོབ། །གང་གིས་བྱམས་པ་མ་སྤངས་ནའོ། །བ་ཊའི་ཤིང་སྟེང་འཛེགས་
གྱུར་ན། །རླུང་གིས་བསྐྱོད་པར་མི་ནུས་བཞིན། །དགྲ་བོས་ཅུང་ཟད་བྱ་མི་ནུས། །གང་གིས་བྱམས་པ་མ་སྤངས་ནའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། དགེ་སློང་དེ་དག་བཅོམ་ལྡན་འདས་ཀྱིས་གསུངས་པ་
ལ་མངོན་པར་བསྟོད་དོ། །བྱམས་པ་བསྒོམ་པའི་མདོ་རྫོགས་སྷོ།།    །། ༄༅། །རྒྱ་གར་སྐད་དུ། པཉྩ་ཤིཀྟྱཱ་ནུ་སྃ་ས་སཱུ་ཏྲ།  བོད་སྐད་དུ། བསླབ་པ་ལྔའི་ཕན་ཡོན་གྱི་མདོ། འཕགས་པ་དཀོན་མཆོག་གསུམ་ལ་གུས་
པས་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གརྒ་ར་དང་། ཆུ་སྲིན་བྱིས་པ་གསོད་ཀྱི་རི་དང་། སྨན་གྱི་ནགས་རི་དགས་རྒྱུ་བའི་གནས་ན་བཞུགས་སོ། །དེ་ནས་བཅོམ་ལྡན་འདས་སྔ་
དྲོའི་དུས་སུ་ཆོས་གོས་གྱོན་ལྷུང་བཟེད་ཐོགས་ཏེ། ཕ་ན་ཀུ་ལའི་ཁྱིམ་བདག་གང་ན་ཡོད་པའི་གནས་དེར་གཤེགས་ཤིང་ཉེ་བར་གཤེགས་ཏེ། གདན་བཤམས་པ་ལ་བཞུགས་སོ། །དེ་ནས་ཡང་ཕ་ན་ཀུ་ལའི་ཁྱིམ་བདག་དང་། མ་
ན་ཀུ་ལའི་ཁྱིམ་བདག་མོས། བཅོམ་ལྡན་འདས་ག་ལ་བ་དེར་སོང་ཞིང་ཉེ་བར་སོང་ནས། བཅོམ་ལྡན་འདས་ལ་ཕྱག་བྱས་ཏེ། ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས། ཕ་ན་ཀུ་ལའི་ཁྱིམ་བདག་དེས་
39-1-271a


བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གང་གི་ཚེ་བཙུན་པ་བཅོམ་ལྡན་འདས། མ་ན་ཀུ་ལའི་ཁྱིམ་བདག་མོ་བདག་ཁྱེའུའི་དུས་སུ་བུ་མོ་གཞོན་ནུ་མ་བླངས་ཏེ། མ་ན་ཀུ་ལའི་ཁྱིམ་བདག་མོ་ལས་ལོག་པར་
གཡེམ་པའི་སེམས་མ་སྐྱེས་སོ། །ལུས་ཀྱི་སྐྱོན་གང་ཡང་མ་བྱུང་བ་ལས་བཙུན་པ་བཅོམ་ལྡན་འདས་མཐོང་བའི་ཆོས་འདི་ལ་ཕན་ཚུན་དུ་མཐོང་ངོ་། །སྐྱེ་བ་གཞན་དུ་ཕན་ཚུན་དུ་མཐོང་བར་བདག་འདོད་དོ། །མ་ན་ཀུ་
ལའི་ཁྱིམ་བདག་མོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གང་གི་ཚེ་བཙུན་པ་བཅོམ་ལྡན་འདས་ཕ་ན་ཀུ་ལའི་ཁྱིམ་བདག་གཞོན་ནུའི་དུས་སུ་བདག་གཞོན་ནུ་མ་བླངས་སོ། །ཕ་ན་ཀུ་ལའི་ཁྱིམ་བདག་
ལས་འདོད་པས་ལོག་པར་གཡེམ་པའི་སེམས་མ་སྐྱེས་སོ། །ལུས་ཀྱི་སྐྱོན་མ་བྱུང་བ་གང་ལས་བཙུན་པ་བཅོམ་ལྡན་འདས་མཐོང་བའི་ཆོས་འདི་ལ་ཕན་ཚུན་དུ་མཐོང་ངོ་། །སྐྱེ་བ་གཞན་དུ་ཕན་ཚུན་དུ་མཐོང་བར་འདོད་
དོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་དང་ཁྱིམ་བདག་མོ་གཉིས་པོ་ལ་འདོད་པ་ཡོད་པར་གྱུར་པས་མཐོང་བའི་ཆོས་འདི་ལ་ཕན་ཚུན་དུ་མཐོང་བར་གྱུར་ཏོ། །སྐྱེ་བ་གཞན་དུ་མཐོང་བར་
འགྱུར་རོ། །གཉིས་པོ་དག་དད་པ་མཉམ་པ་དང་། ཚུལ་ཁྲིམས་མཉམ་པ་དང་། གཏོང་བ་མཉམ་པ་དང་། ཤེས་རབ་མཉམ་པ་རྣམས་ཀྱིས་མཐོང་བའི་ཆོས་འདི་ལ་ཕན་ཚུན་དུ་མཐོང་བར་གྱུར་ཏོ། །སྐྱེ་བ་གཞན་
དུ་མཐོང་བར་འགྱུར་རོ། །ཡང་ཚིགས་སུ་བཅད་པ་འདི་བཀའ་སྩལ་ཏེ། གཉིས་ཀ་དད་དང་ཆོས་ཚིག་དང་། །མཉམ་དང་ཆོས་ཀྱིས་འཚོ་བ་དང་། །ཕན་ཚུན་དུ་ནི་དགའ་བའི་ཚིག །དེ་ལྟར་སྐྱེས་པ་བུད་མེད་གཅིག །ནོར་
མང་དང་ནི་ལྡན་པ་དང་། །གནས་ནི་བཟང་པོར་སྐྱེ་བར་འགྱུར། །དགྲ་ནི་དེ་ལ་དགའ་བ་དང་། །གཉིས་ཀ་མཉམ་པའི་ཚུལ་ཁྲིམས་ཀྱིས། །འདི་ལྟར་ཆོས་ནི་སྤྱད་པ་དང་། །གཉིས་ཀ་ཚུལ་ཁྲིམས་ལྡན་པ་དང་། །
39-1-271b


འདོད་ཅིང་འདོད་ལ་ཡི་རང་བས། །ལྷ་ཡི་གནས་སུ་དགའ་བར་འགྱུར། །དེའི་ཕྱིར་བསླབ་པ་རྣམ་པ་ལྔ་པོ་བསྲུང་བར་བྱའོ། །འདི་ལྟ་སྟེ། སྲོག་གཅོད་པ་སྤོང་བ་དང་། མ་བྱིན་པར་ལེན་པ་སྤོང་བ་དང་། འདོད་པས་ལོག་པར་
གཡེམ་པ་སྤོང་བ་དང་། བརྫུན་དུ་སྨྲ་བ་སྤོང་བ་དང་། མྱོས་པར་འགྱུར་བའི་ཆང་གི་བཏུང་བ་སྤོང་བའོ། །བསླབ་པ་ལྔ་པོ་འདི་ནི་བསྲུང་བར་བྱའོ། །དེ་ནས་ཡང་དགེ་སློང་རྣམས་ཀྱིས་ཚུལ་ཁྲིམས་ལྔའི་ཕན་ཡོན་ཞུས་
པ། གཞན་ཡང་བཙུན་པ་བཅོམ་ལྡན་འདས་སྲོག་གཅོད་པ་སྤངས་པའི་རྣམ་པར་སྨིན་པ་ཇི་ལྟར་ཤེས་པར་བགྱི། མ་བྱིན་པར་ལེན་པ་སྤངས་པའི་རྣམ་པར་སྨིན་པ་ཇི་ལྟར་ཤེས་པར་བགྱི། འདོད་པས་ལོག་པར་
གཡེམ་པ་སྤངས་པའི་རྣམ་པར་སྨིན་པ་ཇི་ལྟར་ཤེས་པར་བགྱི། བརྫུན་དུ་སྨྲ་བ་སྤངས་པའི་རྣམ་པར་སྨིན་པ་ཇི་ལྟར་ཤེས་པར་བགྱི། མྱོས་པར་འགྱུར་བའི་ཆང་གི་བཏུང་བ་སྤངས་པའི་རྣམ་པར་སྨིན་པ་ཇི་ལྟར་ཤེས་པར་
བགྱི། དེ་ནས་བཅོམ་ལྡན་འདས་ཀྱིས་དེ་རྣམས་ཀྱིས་དྲིས་པ་དེ་བསྟན་ཅིང་རྟོགས་པར་བྱ་བའི་ཕྱིར་བཀའ་སྩལ་པ། དགེ་སློང་དག་སྲོག་གཅོད་པ་ནི་སྦྲུལ་དུག་ཅན་དང་འདྲ་བར་བལྟ་བར་བྱའོ། །སྡིག་པ་དུ་མ་དང་ལྡན་པ་དང་། 
ཡི་དགས་ཀྱི་སྐྱེ་གནས་སུ་སྐྱེ་བ་དང་། དུད་འགྲོའི་སྐྱེ་གནས་སུ་སྐྱེ་བ་དང་། དམྱལ་བའི་སྐྱེ་གནས་སུ་སྐྱེ་བར་འགྱུར་ཏེ། དེའི་ལུས་ཞིག་ནས་ཤི་བའི་ཕ་རོལ་དུ་དམྱལ་བ་ཡང་སོས་སུ་སྐྱེའོ། །དེ་ནི་དམྱལ་བ་ཡང་སོས་
དམྱལ་བའི་བསྲུངས་མས་ཡང་དག་པར་སྲེག་པ་དང་མཚོན་སྣ་ཚོགས་པ་བཟུང་ནས་དུམ་བུར་གཅོད་ཅིང་ལུས་ལ་བུག་པ་འབུགས་པར་བྱེད་དོ། །རྣམ་པ་ལྔ་ཡིས་བཅིང་ངོ་ཞེས་པས་ལས་བྱེད་ཅིང་བྱེད་ལ། དམྱལ་བའི་སེམས་
ཅན་དེ་ཡང་དང་ཡང་དུ་ཤི་ནས་ཡང་དང་ཡང་དུ་འཚོ་བས་ན་ཡང་སོས་སུ་སྐྱེའོ། །དེ་རྣམས་དེ་ལ་ཡང་སོས་ཀྱི་སྡུག་བསྔལ་དྲག་པོ་རྩུབ་པ་ཚ་བ་འཇོམས་ཤིང་འཇོམས་ལ་གང་ཞིག་ལ་ཐམས་ཅད་ལྕི་ཞིང་སྲོག་བཅད་པའི་རྣམ་པར་
39-1-272a


སྨིན་པ་དེའོ། །དེ་མིར་སྐྱེས་ཀྱང་ཚེ་ཐུང་བར་འགྱུར་རོ། །དབང་པོ་ཡོངས་སུ་མ་ཚང་བར་འགྱུར་རོ། །གཟུགས་ངན་པ་དང་། ཤེས་རབ་འཆལ་པ་དང་། རྟག་ཏུ་སྐྲག་པ་དང་། རྟག་ཏུ་ཁྲོ་བ་དང་། ནད་དང་བཅས་པ་དང་། མྱ་
ངན་དང་བཅས་པ་དང་། དགའ་བ་དང་འབྲལ་བ་དང་། ཐམས་ཅད་དང་འབྲལ་བ་དང་། རྟག་ཏུ་ཡུན་རིང་དུ་འབྲལ་བར་འགྱུར་རོ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། སྐྱེ་བ་ལྔ་བརྒྱར་ཡི་དགས་དང་། །ཉ་སྦྲུལ་
རི་དགས་འུག་པ་དང་། །མ་ཧེ་ཁྱི་དང་ཝ་རྣམས་ནི། །སྲོག་བཅད་པ་ཡི་ཉེས་པའོ། །འདི་ནི་སྲོག་བཅད་པའི་རྣམ་པར་སྨིན་པའོ། །སྲོག་གཅོད་པ་ནི་སྤངས་པ་ཡིས། །སྐྱེས་པ་འམ་ནི་བུད་མེད་ལུས། །ཐོབ་པར་འགྱུར་ཏེ་ཕན་ཡོན་
ནི། །ཡོན་ཏན་ཉི་ཤུ་མི་དམན་པར། །ཡན་ལག་ཉིང་ལག་ཕུན་སུམ་ཚོགས། །ལུས་ནི་ཤེད་དང་ལྡན་པ་དང་། །རིགས་བཟང་པོར་ནི་མྱུར་དུ་སྐྱེ། །ཡན་ལག་གཙང་ཞིང་འཇམ་པ་དང་། །ཚེ་རིང་བ་དང་བདེ་བ་དང་། །དཔའ་ཞིང་སྟོབས་དང་
ལྡན་པ་དང་། །ཚིག་ནི་མཆོག་ཏུ་བཟང་བ་དང་། །ལྷ་དང་བཅས་པ་དགའ་བ་དང་། །འཇིག་རྟེན་པ་ཡིས་ངན་མི་བྱེད། །འཕགས་པས་ཚིག་ངན་མི་བརྗོད་དང་། །བྱད་སྟེམ་ངན་པས་མི་འཆི་ཞིང་། །མཐའ་ཡས་པ་ཡི་འཁོར་དང་ལྡན། །
ཁ་དོག་གཟུགས་དང་ཡང་དག་ལྡན། །ནད་དང་མྱ་ངན་ཉུང་བ་དང་། །ཁྱིམ་གྱི་གནས་ནི་མི་སྤོང་དང་། །གཞན་གྱིས་མི་དགར་མི་འགྱུར་རོ། །སྲོག་གཅོད་པ་ནི་སྤངས་པ་ཡིས། །སྐྱེས་པ་འམ་ནི་བུད་མེད་ཀྱིས། །ཕན་ཡོན་འདི་ནི་
མྱོང་བར་འགྱུར། །ལྷ་རྣམས་དང་ནི་མི་རྣམས་སུའོ། །དེ་ལུས་ཞིག་ཅིང་ཤི་ནས་བདེ་འགྲོ་མཐོ་རིས་ལྷའི་འཇིག་རྟེན་དུ་ཉེ་བར་སྐྱེའོ། །མ་བྱིན་པར་ལེན་པ་ནི་མ་བྱིན་པར་ཕ་རོལ་གྱི་རྫས་རྣམ་པར་ཤེས་པ་དང་བཅས་པ་དང་། རྣམ་
པར་ཤེས་པ་མེད་པ་གང་རུང་ཁང་པ་ཕུག་ནས་རྐུ་བ་ལ་སོགས་པའོ། །ཕ་རོལ་བསླུས་ནས་ལེན་པ་དང་། རང་འཚོ་བའི་ཕྱིར་དེ་རྣམས་དེ་ལྟ་བུའི་རིམ་པས་མ་བྱིན་པར་ལེན་དེ་དེའི་ལུས་ཞིག་ནས་ཤི་བའི་ཕ་རོལ་དུ་ངུ་འབོད་དུ་སྐྱེ་བར་
39-1-272b


འགྱུར་རོ། །ངུ་འབོད་ཅེས་པའི་མིང་ནི་ངུ་འབོད་གཉིས་ཏེ། འབར་བའི་ངུ་འབོད་དང་། དུ་བའི་ངུ་འབོད་དོ། །འབར་བའི་ངུ་འབོད་ནི་ཚེ་བསྐལ་པ་གཅིག་ཏུ་གནས་སོ། །བར་བར་དུ་མེ་འབར་བས་ཡོངས་སུ་གང་བའོ། །དུ་བའི་ངུ་
འབོད་ནི་དུ་བ་འཚུབ་ཅིང་དེ་གཉིས་ལ་མེ་འབར་བས་ངུ་འབོད་དུ་སེམས་ཅན་དམྱལ་བ་རྣམས་འཚེད་དོ། །བུ་ག་དགུ་ནས་མེ་འབྱུང་ཞིང་ལུས་སྲེག་གོ། །འདི་ནི་དུ་བའི་ངུ་འབོད་དོ། །དུ་བའི་ངུ་འབོད་ནི་སེམས་ཅན་དམྱལ་བ་རྣམས་
སུ་འཚེད་དོ། །བུ་ག་དགུ་ནས་དུ་བ་འཚུབ་ཅིང་འབྱུང་ངོ་། །ཇི་ལྟར་ཟན་འཚེད་པ་ལྟར་ལུས་འཚེད་དོ། །སེམས་ཅན་གཉིས་ཀ་མྱ་ངན་གྱི་སྒྲ་ཆེན་པོ་སྒྲོགས་སོ། །དེ་དག་ནི་དེར་སྡུག་བསྔལ་དྲག་ཅིང་རྩུབ་པ་དང་ཚ་བ་མྱོང་བར་འགྱུར་རོ། །
མ་བྱིན་པར་ལེན་པ་ནི་དགེ་སློང་དག་སྦྲུལ་དུག་ཅན་དང་འདྲ་བར་བལྟ་བར་བྱའོ། །དམྱལ་བར་འཇུག་པ་དང་ཡི་དགས་ཀྱི་ཡུལ་དུ་འཇུག་པ་དང་། དུད་འགྲོའི་སྐྱེ་གནས་སུ་སྐྱེ་བར་འགྱུར་རོ། །གང་ཞིག་མ་བྱིན་པར་ལེན་པའི་
རྣམ་པར་སྨིན་པ་ནི་ཤིན་དུ་ཆེན་པོའོ། །མིར་སྐྱེས་ཀྱང་ལོངས་སྤྱོད་རྣམས་ཉམས་པར་འགྱུར་བ་དང་། མ་བྱིན་པར་བླངས་པའི་སེམས་ཅན་གྱི་ལག་ཏུ་དངོས་པོ་ཅུང་ཟད་ཀྱང་འཆགས་པར་མི་འགྱུར་རོ། །བཟའ་བ་དང་། བཏུང་བ་
དང་། གོས་དང་། སྟན་ལ་སོགས་པ་རྙེད་དཀའ་བར་འགྱུར་བ་དང་། རྒྱུན་མི་འཆད་པར་ཟུག་རྔུ་ཅན་དང་། གཞན་སྡང་བ་དང་། འཚེ་བར་འགྱུར་རོ། །གང་དང་གང་རྙེད་པ་དེ་དང་དེ་ནི་ཉམས་པར་འགྱུར་རོ། །གཞན་གྱིས་
ལོངས་སྤྱོད་པར་འགྱུར་རོ། །གང་འདོད་པའི་ལོངས་སྤྱོད་ནི་རྙེད་དཀའ་བར་འགྱུར་རོ། །དངོས་པོ་ཡོད་པ་རྣམས་འཕེལ་བར་མི་འགྱུར་རོ། །བདེ་བ་དང་འབྲལ་བར་འགྱུར་རོ། །དེའི་ཕྱིར་བཅོམ་ལྡན་འདས་ཀྱིས་གསུངས་
པ། འདིར་ནི་དབུལ་དང་བཀྲེན་པ་དང་། །གཟུགས་ངན་ཉེ་བར་འཚེ་བ་དང་། །རིགས་ངན་དུ་ནི་སྐྱེ་བ་ནི། །མ་བྱིན་ལེན་པའི་ཉེས་པའོ། །མ་བྱིན་པར་ལེན་པའི་རྣམ་པར་སྨིན་པའོ། །མ་བྱིན་ལེན་པ་སྤངས་པ་ཡིས། །སྐྱེས་
39-1-273a


པ་འམ་ནི་བུད་མེད་ནི། །ཐོབ་པར་འགྱུར་ཏེ་ཕན་ཡོན་ནི། །ཡོན་ཏན་ཉི་ཤུ་མི་དམན་པར། །རྟག་ཏུ་འབྲུ་ནི་མང་བ་དང་། །མཐའ་ཡས་ལོངས་སྤྱོད་ཕུན་སུམ་ཚོགས། །སྔར་མེད་པ་ནི་རབ་ཏུ་འཕེལ། །འདོད་པ་
རྣམས་ནི་བརྟན་པ་དང་། །གཟུགས་སྒྲ་རོ་དང་དྲི་དང་ནི། །རེག་བྱ་རྣམས་ནི་ཡིད་དུ་འོང་། །དོན་དུ་གཉེར་བ་ཐམས་ཅད་ལ། །བསམ་པ་ཐམས་ཅད་མྱུར་དུ་འགྲུབ། །དེ་ལ་རྒྱལ་པོ་ཆོམ་རྐུན་དང་། །མི་མཛའ་བ་ཡིས་མི་འཕྲོགས་
དང་། །མེ་འམ་ཡང་ན་ཆུ་དང་ནི། །དེ་རྣམས་ཀྱིས་ནི་འཚེ་མི་འགྱུར། །འདི་འདྲ་བ་ཡི་ལོངས་སྤྱོད་ལྡན། །གང་ཞིག་སྟེར་དང་ཟ་བ་ལ། །མེད་ཅེས་པ་ནི་འབྱུང་མི་འགྱུར། །རྟག་ཏུ་བདེ་བར་གནས་པ་དང་། །མ་བྱིན་ལེན་པ་
སྤངས་པ་ཡིས། །སྐྱེས་པ་འམ་ནི་བུད་མེད་ལ། །ཐོབ་པར་འགྱུར་ཏེ་ཕན་ཡོན་ནོ། །ལྷ་རྣམས་དང་ནི་མི་རྣམས་སུའོ། །དེ་ལུས་ཞིག་ཅིང་ཤི་ནས་བདེ་འགྲོ་མཐོ་རིས་དང་ལྷའི་འཇིག་རྟེན་དུ་ཉེ་བར་སྐྱེའོ། །འདོད་པ་
རྣམས་ལ་ལོག་པར་གཡེམ་པས་ནི་འཚོ་བའི་འཇིག་རྟེན་འདིར་འདོད་པར་བྱེད་པ་ནི། དེའི་ལུས་ཞིག་ནས་ཤི་བའི་ཕ་རོལ་དུ་ངུ་འབོད་ཆེན་པོར་སྐྱེ་ཞིང་ལྟུང་བར་འགྱུར་རོ། །དེ་ནས་ཕྱི་རུ་ཆུ་བོ་རབ་མེད་ཀྱི་ངོགས་གཉིས་
སུ། ཤལ་མ་ལིའི་ནགས་དཔག་ཚད་བརྒྱད་བཅུ་གྱེན་དུ་མཉམ་ཞིང་མཐོ་བ། ཚེར་མ་སོར་བཅུ་དྲུག་པ་ཡལ་ག་རྣམས་ཐུར་ལ་འཕྱང་བ། ལུས་པོ་རྒྱང་གྲགས་བཅུ་གཉིས་དང་ལྡན་ཞིང་ལུས་ལ་མེ་གྱེན་དུ་འབར་བ། 
དཔག་ཚད་དྲུག་བཅུར་གྱེན་དུ་འགྲོ་ཞིང་དེ་ལ་རྟག་ཏུ་སྣ་ཚོགས་པའི་མཚོན་གྱིས་ཕན་ཚུན་དུ་གསོད་ཅིང་། དེ་ནི་ཤལ་མ་ལིའི་ཤིང་གི་ནགས་ལ་ཤོན་ནོ། །ལོ་སྟོང་ཕྲག་མང་པོར་ཤིང་གི་ཚེར་མ་ལ་འཛེག་གོ། །གཞན་
ཡང་དམྱལ་བའི་སྲུང་མ་རྣམས་ཀྱིས་མཚོན་བླངས་ནས་བརྒྱབ་པས་ངུ་ཞིང་མགོ་ཐུར་ལ་བསྟན་ནས་ལྷུང་ངོ་། །ལྷུང་བའི་དུས་སུ་ལྕགས་བསྲེགས་ཀྱི་ས་གཞིར་གསལ་ཤིང་བཙུགས་པ་རྣམས་ལ་ལྷུང་ངོ་། །
39-1-273b


དེ་རྣམས་བཤང་ལམ་ནས་འཐོན་པས། དེ་རྣམས་ཀྱིས་སྡུག་བསྔལ་མྱོང་བར་འགྱུར་རོ། །རྒྱུན་དུ་ངུ་ཞིང་དཔག་ཚད་དྲུག་བཅུ་པའི་ལྕགས་ཀྱི་བུམ་པར་བསྐལ་པ་གཅིག་ཏུ་སྡོད་དོ། །མེ་མདག་གིས་ཡོངས་སུ་གང་བར་དམྱལ་
བའི་བསྲུངས་མ་རྣམས་ཀྱི་ཁར་ལྡུགས་སོ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། རི་ནག་བརྩེགས་པ་མཉམ་ཞིང་མཐོ། །ཤིང་ནི་ཚེར་མར་བཅས་པ་དང་། །ལྕགས་ཀྱི་ཚེར་མ་རྣོན་པོ་ཡིས། །འཇིག་རྟེན་མི་ལ་
བདེ་བ་མེད། །ཤིང་གི་རྩེ་མོར་གནས་པ་ཡི། །དུས་ཀྱི་ཆུང་མས་ཅི་ཞིག་བྱ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདོད་པ་རྣམས་ལ་ལོག་པར་གཡེམ་པ་ནི། སྦྲུལ་དུག་ཅན་དང་འདྲ་བར་
བལྟ་བར་བྱའོ། །དམྱལ་བར་འཇུག་པ་དང་། ཡི་དགས་ཀྱི་ཡུལ་དུ་འཇུག་པ་དང་། དུད་འགྲོའི་སྐྱེ་གནས་སུ་སྐྱེ་བར་འགྱུར་རོ། །གང་ཞིག་འདོད་པ་རྣམས་ལ་ལོག་པར་གཡེམ་པའི་རྣམ་པར་སྨིན་པ་ནི་ཤིན་དུ་ཆེན་པོའོ། །
དེ་མིར་སྐྱེས་ཀྱང་སྡུག་བསྔལ་ཆེན་པོ་མྱོང་བར་འགྱུར་རོ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། སྐྱེ་བ་ལྔ་བརྒྱར་བུད་མེད་འགྱུར། །དེ་བཞིན་དུ་ནི་མ་ནིང་འགྱུར། །སྐྱུག་བྲོའི་མཛེ་ཅན་ཡང་ཡང་འགྱུར། །
ལོག་པར་གཡེམ་པའི་ཉེས་པའོ། །སྐྱེ་བ་དུ་མར་ཉེ་བར་འཚེ་བ་དང་། དགྲ་མང་བར་འགྱུར་བ་དང་། མི་མཛའ་བ་དང་རྟག་ཏུ་ལྷན་ཅིག་ཏུ་གནས་པར་འགྱུར་བ་དང་། ཉལ་བ་དང་ལྡང་བའི་ཚེ་སྡུག་བསྔལ་དང་བཅས་པ་དང་། 
དུས་རྟག་ཏུ་ཁྲོ་བ་དང་། མིས་གནོད་པར་བྱེད་པ་དང་། རྟག་ཏུ་ལུས་སྒུར་བར་འགྱུར་བ་དང་། འོན་པ་དང་། སྐྱེ་བ་ནས་སྐྱེ་བར་དམུས་ལོང་ལ་སྩོགས་པར་སྐྱེ་བར་འགྱུར། རྣམ་པར་འགྱུར་བར་ངེས་པ་དང་། རྟག་ཏུ་སེམས་མི་
དགའ་བར་འགྱུར་བ་དང་། ཕན་ཚུན་དུ་འཐབ་པ་ལ་དགའ་བ་དང་། དགའ་བའི་སེམས་དང་འབྲལ་བར་འགྱུར་རོ། །དེ་ལུས་ཞིག་ནས་ཤི་བའི་ཕ་རོལ་དུ་ངུ་འབོད་ཆེན་པོའི་དམྱལ་བར་ལྟུང་ཞིང་སྐྱེ་བར་འགྱུར་རོ། །དེར་ཡང་དེ་ལ་
39-1-274a


སྡུག་བསྔལ་དྲག་པ་དང་། རྩུབ་པ་དང་། ཚ་བ་ཉམས་སུ་མྱོང་བར་འགྱུར། འདོད་པས་ལོག་པར་གཡེམ་པའི་རྣམ་པར་སྨིན་པའོ། །ལོག་པར་གཡེམ་པ་སྤངས་པ་ཡི། །སྐྱེས་པ་འམ་ནི་བུད་མེད་ཀྱིས། །
ཐོབ་པར་འགྱུར་ཏེ་ཕན་ཡོན་ནི། །ཡོན་ཏན་ཉི་ཤུ་མི་དམན་པར། །དེ་ལ་དགྲ་ནི་མེད་པ་དང་། །འཇིག་རྟེན་ཐམས་ཅད་དགའ་བ་དང་། །བཟའ་དང་བཏུང་བ་རྙེད་པར་སླ། །གོས་དང་སྟན་དང་གནས་རྣམས་དང་། །བདེ་བར་ཉལ་
དང་བདེ་བར་འདུག །དེ་ནི་བདེ་བར་ལྡང་བ་དང་། །ངན་སོང་འཇིགས་ལས་རྣམ་པར་གྲོལ། །མྱ་ངན་མེད་དང་འཇིགས་པ་འང་མེད། །ནད་རྣམས་ཐམས་ཅད་དེ་ལ་མེད། །མ་ནིང་བུད་མེད་དུ་མི་སྐྱེ། །ཅུང་ཟད་གང་ནི་དོན་གཉེར་འདོད། །
དེ་ཡི་འདོད་པ་གྲུབ་པར་འགྱུར། །ཕན་ཚུན་དུ་ནི་མཛའ་བ་མང་། །གཞན་ནི་མི་དགའ་དེ་ལ་མེད། །དབང་པོ་ཀུན་ནི་ཚང་བ་དང་། །དགེ་བའི་མཚན་ཉིད་ཡང་དག་ལྡན། །མི་བཟོད་ཆུང་དང་དོགས་པ་མེད། །སྐྱེས་པ་བུད་མེད་
དོགས་མེད་དོ། །ལོག་པར་གཡེམ་པ་སྤངས་པ་ཡི། །སྐྱེས་པ་འམ་ནི་བུད་མེད་ཀྱིས། །ཕན་ཡོན་འདི་ནི་མྱོང་བར་འགྱུར། །ལྷ་འམ་ཡང་ན་མི་རྣམས་ཀྱིས། །དེའི་ལུས་ཞིག་ནས་ཤི་བའི་ཕ་རོལ་དུ་མཐོ་རིས་དང་ལྷའི་འཇིག་རྟེན་
དུ་བདེ་འགྲོར་སྐྱེ་བར་འགྱུར་རོ། །གང་ཞིག་སྐྱེས་པ་འདོད་པ་ཡིས། །སྐྱེ་བ་ཡང་དང་ཡང་དུ་ནི། །བུད་མེད་གཞན་ལ་འགྲོ་མི་བྱ། །སེམས་ཀྱི་དྲི་མ་བཀྲུ་བའོ། །བུད་མེད་གང་ཞིག་གི་གྱོས་རྒྱུག་ལ་ཉེ་བར་མི་བསྙེན་པ་དང་། རང་གི་
ཁྱོ་ལ་ཉེ་བར་མི་བསྙེན་པ་དང་། རང་གི་ཁྱོ་ལ་མི་བརྩི་བ་དང་། རང་གི་ཁྱོའི་ཕུ་བོ་ལ་མི་འདུད་པ་དང་། རང་གི་ཁྱོའི་སྲིང་མོ་རྣམས་ལ་གནོད་པར་བྱེད་པ་དང་། གཞན་ཡང་ལག་པ་དང་། རྐང་པ་དང་། རྒྱབ་ལ་ལས་སུ་བྱ་བ་མི་བྱེད་པ་དང་། 
བཟའ་བ་དང་བཏུང་བ་གང་འདོད་པ་མི་སྟེར་བ་དང་། དེ་རྣམས་ལ་ངོ་ཚ་དང་ཁྲེལ་དུ་མི་བྱེད་པ་དང་། རང་གི་ཁྱོ་བོ་ལ་ཀློག་པར་བྱེད་པ་དང་། བསྐུར་པ་བཏབ་ན་དམྱལ་བར་སྐྱེ་བར་འགྱུར་རོ། །ལྕགས་བསྲེགས་ཀྱི་ས་གཞིའི་སྟེང་དུ་ཉལ་བ་དང་། 
39-1-274b


འབར་བའི་ལྕགས་ཀྱུ་ཁ་རུ་བཅུག་ནས་མཆིལ་པའི་ཉ་ལ་བྱ་བ་བཞིན་དུ། ལྕེའི་རྩེ་མོ་ཕྱི་རོལ་དུ་ཕྱུང་སྟེ། ཐག་པས་བཅིངས་ནས་ཕྱི་རོལ་དུ་འདོན་ཏོ། །དེ་ལྟར་ཕྱི་རོལ་དུ་བཏོན་པ་ལ། ལྕེའི་རྩེ་མོ་ལ་མཚོན་ཆས་བརྒྱབ་ནས་བརྒྱབ་པའི་
གནས་སུ་མཆུ་རང་ལ་སྐྱེས་པའི་སྲིན་བུ་ཆེན་པོས་ཟའོ། །དེ་ལྟར་ཟོས་པས་ཅུང་ཟད་ཀྱང་སྨྲ་བར་མི་ནུས་སོ། །དེ་ལྟར་དེ་ནི་དེ་ལ་ལོ་སྟོང་ཕྲག་དུ་མར་འཚེད་པར་འགྱུར་རོ། །བཙོས་ནས་ཡང་དམྱལ་བ་ཆེན་པོར་ལྷུང་བར་འགྱུར་རོ། །དེའི་
ཕྱིར་བཅོམ་ལྡན་འདས་ཀྱིས་བཀའ་སྩལ་པ། གང་ཞིག་བུད་མེད་སྐྱེས་པ་འདོད། །སྐྱེ་བ་སྐྱེ་བར་ཡང་དང་ཡང་། །ལྷ་དང་ལྷ་མོ་ཇི་བཞིན་དུ། །རང་གི་ཁྱོ་ནི་སྤང་མི་བྱ། །བརྫུན་དུ་སྨྲས་པས་སླར་ཡང་ཐིག་ནག་ཏུ་སྐྱེ་བར་འགྱུར་རོ། །དེར་ཡང་
དམྱལ་བའི་སྲུང་མ་རྣམས་ཀྱིས་སྒྲ་ཆེན་པོའི་ཚིག་སྒྲོགས་ཤིང་། མཚོན་ཆ་འབར་བ་སྣ་ཚོགས་པ་བླངས་ནས་ལྕགས་བསྲེགས་ཀྱི་ས་གཞི་ལ་དམྱལ་བའི་སེམས་ཅན་གཅིག་གིས་གཅིག་འགྲུད་པ་དང་། འབར་བའི་ཐིག་ནག་པོས་
འདེབས་པ་དང་། འབར་བའི་མཚོན་ཆ་བཟུང་ནས་ཡང་དག་པར་བསྒྱུར་བ་དང་། ཞིབ་མས་འཚག་པ་བཞིན་དུ་སྟེའུ་དང་དགྲ་སྟས་འཇོག་པ་དང་། དེ་རྣམས་ཀྱིས་སྒྲ་ཆེན་པོ་སྒྲོགས་ཏེ་ངུ་ཞིང་གནས་སོ། །རང་གི་ཁྲག་འཐུང་ཞིང་ནང་དུ་
དེར་གནས་པ་དེ་ཐིག་ནག་སྟེ་བརྫུན་དུ་སྨྲས་པས་སྐྱེའོ། །དེར་སྡུག་བསྔལ་དྲག་པ་དང་། རྩུབ་པ་དང་། ཚ་བའི་ཚོར་བ་མྱོང་བར་འགྱུར་རོ། །དགེ་སློང་དག་བརྫུན་དུ་སྨྲ་བ་ནི་སྦྲུལ་དུག་ཅན་དང་འདྲ་བར་ཡིད་ལ་བྱའོ། །དེས་སྡུག་བསྔལ་
མང་པོ་བྱེད་དོ། །དམྱལ་བར་འཇུག་པ་དང་། ཡི་དགས་ཀྱི་ཡུལ་དུ་འཇུག་པ་དང་། དུད་འགྲོའི་སྐྱེ་གནས་སུ་སྐྱེ་བར་འགྱུར་རོ། །གང་ཞིག་བརྫུན་དུ་སྨྲ་བ་ནི་རྣམ་པར་སྨིན་པ་ཆེན་པོའོ། །དེ་མིར་སྐྱེས་ཀྱང་སྙིང་རྗེ་མེད་པ་དང་། སྐད་
བྱ་རོག་གི་དང་འདྲ་བ་དང་། ལྕེ་མི་བདེ་བ་དང་། སོ་ལ་སྲིན་འབྱུང་བ་དང་། ཁ་དྲི་མི་ཞིམ་པ་དང་། སོ་མི་སྙོམས་པ་དང་། ཚིག་རྩུབ་པ་དང་། གྲེ་བ་འཛེར་བ་དང་། མཆུ་མི་བདེ་བ་དང་། ཕྲག་དོག་དང་བཅས་པ་དང་། རྟག་ཏུ་སྲེད་པ་དང་ལྡན་པ་དང་། 
39-1-275a


དེ་ལུས་ཞིག་ནས་ཤི་བའི་ཕ་རོལ་དུ་ཐིག་ནག་ཏུ་སྐྱེ་བར་འགྱུར་རོ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། ཁ་ནས་རྣག་གི་དྲི་ལྡང་ཞིང་། །དཔག་ཚད་གཅིག་ཏུ་དྲི་ངན་འགྲོ། །ཆོས་ནི་ཤེས་པར་མི་འགྱུར་བ། །རྫུན་དུ་
སྨྲས་པའི་ཉེས་པའོ། །བརྫུན་དུ་སྨྲས་པའི་རྣམ་པར་སྨིན་པའོ། །བརྫུན་དུ་སྨྲ་བ་སྤངས་པ་ཡིས། །སྐྱེས་པ་འམ་ནི་བུད་མེད་ནི། །ཐོབ་པར་འགྱུར་ཏེ་ཕན་ཡོན་ནི། །སུམ་བཅུ་རྩ་གསུམ་མི་ཉུང་བའི། །མིག་དང་རྣ་བ་སྣ་དང་ནི། །
ལྕེ་དང་ལུས་དང་དེ་བཞིན་ཡིད། །དེ་ལ་རྣམ་པར་དག་པར་འགྱུར། །པད་མའི་ཟེ་འབྲུ་ལྟར་མཚུངས་སོ། །མིག་དང་སོ་ནི་མཉམ་པ་དང་། །ལུས་ནི་མི་རིང་མི་ཐུང་ལ། །ཧ་ཅང་སྦོམ་དང་ཕྲ་བ་མིན། །འདི་ལྟར་ལེགས་པར་བཤད་པའི་ཚིག །
ཇི་ལྟར་ཨུཏ་པ་ལ་ཡི་དྲི། །རྟག་ཏུ་ཀུན་ད་ཁ་ཡི་དྲི། །གཡོག་རྣམས་ཐམས་ཅད་བསྙེན་བཀུར་འགྱུར། །མཆོད་པར་འོས་པའི་ཚིག་གིས་སོ། །ཆོས་རྣམས་ཀུན་ལ་མཁས་པ་དང་། །དོན་དང་ཚིག་འབྲུ་རྣམ་པར་མཁས། །སེམས་
ཀྱི་རྟོག་ལ་ཞུམ་པ་མེད། །རྟག་ཏུ་ཁྱད་པར་འཕགས་པའི་ཚིག །བརྫུན་དུ་སྨྲ་བ་སྤངས་པ་ཡིས། །སྐྱེས་པ་འམ་ནི་བུད་མེད་ཀྱིས། །ཕན་ཡོན་འདི་ནི་མྱོང་བར་འགྱུར། །ལྷ་དང་མི་རུ་སྐྱེས་པ་ན། དེའི་ལུས་ཞིག་ནས་ཤི་བའི་ཕ་
རོལ་དུ་བདེ་འགྲོ་ལྷའི་འཇིག་རྟེན་དང་མཐོ་རིས་སུ་སྐྱེའོ། །བརྫུན་དུ་སྨྲ་བ་ཞེས་བྱ་བ་ནི། ཁ་ན་མ་ཐོ་བ་དང་བཅས་པའོ། །འདོད་པའི་དོན་རྣམས་ལ་རིགས་ཀྱི་བུས་མི་བྱ་བ་ཉིད་དོ། །བདེན་པ་དང་ལེགས་པའི་བཅུད་རྣམས་དེ་ལྟ་བུ་ནི་བླང་བར་བྱའོ། །
བརྫུན་དུ་སྨྲ་བ་ཞེས་བྱ་བ་དོན་མེད་པར་བྱེད་པའོ། །འཇིག་རྟེན་སླུ་བར་བྱེད་དོ། །སྐྱེ་བ་གཞན་དུ་མར་མནར་མེད་པའི་དམྱལ་བར་སྐྱེ་བར་འགྱུར་རོ། །དེའི་ཕྱིར་འཚོ་བའི་སླད་དུ་བརྫུན་དུ་སྨྲ་བར་མི་བྱའོ། །ཐམས་ཅད་མཁྱེན་པ་སངས་རྒྱས། བྱང་
ཆུབ་སེམས་དཔའ་སྒྲིབ་པ་དང་བཅས་པའི་དུས་ན་འང་ཕྲ་མ་ནི། ཡུང་བའི་ཁ་དོག་ལྟར་ཡུན་རིང་པོར་མི་གནས་སོ། །ཕུབ་མའི་ཕུང་པོའི་སྟེང་དུ་ཕུར་པ་བཙུགས་ན་ཡུན་རིང་དུ་མི་གནས་པ་བཞིན་ནོ། །རྟའི་རྒྱབ་དུ་ཤིང་ཐོག་རིལ་བུ་བཞག་ན་ཡུན་
39-1-275b


རིང་དུ་མི་གནས་པ་བཞིན་དུ། སྨྲས་པའི་ཚིག་ལ་རལ་གྲིས་སྐེ་འབྲེག་པའི་ཚེ་ཚིག་གཉིས་མི་སྨྲ་བ་བཞིན་ནོ། །བདེན་པ་ཡུན་རིང་པོར་སྨྲས་པས་དགེ་སྦྱོང་དང་བྲམ་ཟེས་ཕ་རོལ་དུ་སྒྲོལ་བར་བྱེད་དོ། །ཆང་འཐུངས་པ་ནི་ཚ་བའི་
དམྱལ་བར་ལྟུང་ཞིང་སྐྱེ་བར་འགྱུར་རོ། །དེར་ལྷུང་བའི་སེམས་ཅན་ནི་ལོ་སྟོང་ཕྲག་མང་པོར་འཚེད་པར་འགྱུར་རོ། །དེ་ནས་ཕྱིར་ཕྱུང་ནས་ཆུ་བོ་རབ་མེད་ཀྱི་ངོགས་སུ་སྐྱུར་བར་བྱེད་དོ། །གང་དུའང་འགྲོ་ས་མེད་པར་ཡང་དང་ཡང་དུ་
སྐྱལ་བར་བྱེད་དོ། །དེར་དམྱལ་བའི་བསྲུངས་མ་རྣམས་ཀྱིས་མཆིལ་པའི་ཉ་འདོན་པ་ལྟར། ལྕགས་བསྲེགས་ཀྱི་ས་གཞི་ལ་རྡེབས་པར་བྱེད་དོ། །འདི་ལྟར་སྒྲོགས་ཏེ། ཀྱེ་སྐྱེས་བུ་ཁྱོད་ཅི་འདོད། ཇོ་བོ་སྐོམ་མོ། །དམྱལ་བའི་བསྲུངས་མ་དེས་
ལྕགས་འབར་བའི་ལྕགས་ཀྱུས་ཁ་ཕྱེ་སྟེ་ལྕགས་བཞུ་བའི་ཁུ་བ་ལྡུགས་པར་བྱེད་དོ། །དེ་ལ་དེ་ཡི་མཆུ་སྲེག་གོ། །མགྲིན་པ་ཡང་སྲེག་གོ། །བྲང་སྲེག་གོ། །རྒྱུ་མ་སྲེག་གོ། །སྙིང་ཡང་སྲེག་གོ། །བཤང་ལམ་ནས་མར་འཐོན་པར་བྱེད་དོ། །
དེ་རྣམས་ཀྱིས་སྡུག་བསྔལ་མྱོང་བར་བྱེད་ཅིང་། ངུ་ལ་འདྲེ་བར་བྱེད་དོ། །དེའི་དུས་སུ་ཡང་འཆི་བར་ནི་མི་འགྱུར་ཏེ། ཇི་སྲིད་ཀྱི་བར་དུ་སྡིག་པའི་ལས་ཀྱི་འབྲས་བུ་མྱོང་བར་བྱེད་དོ། །དེ་སྲིད་དུ་དེ་རྣམས་ཀྱིས་རྣམ་པར་སྨིན་པའི་ཚོར་བ་
མྱོང་བར་བྱེད་དོ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། ཚ་ཞིང་རྩུབ་པའི་ཆུ་བོ་ནི། །རབ་མེད་ཤིན་དུ་བགྲོད་པར་དཀའ། །ལྕགས་ཀྱི་པད་མའི་འདབ་མ་རྣམས། །འདབ་མ་རྣོ་བའི་སྟེང་དུ་འགྲེ། །ཆུ་བོ་རབ་མེད་གཞི་མེད་
པར། །ཆོས་མིན་ཇི་ལྟར་སྤྱོད་པར་འགྱུར། །གང་ཞིག་ཆང་འཐུང་བ་དེ་ནི་སྡིག་པ་ཆུང་བ་མ་ཡིན་ནོ། །དེ་མིར་གྱུར་ཀྱང་རྟག་ཏུ་བརྗེད་ངས་པ་དང་། ལུག་ལྟར་ལྐུགས་པ་དང་། ཤེས་རབ་འཆལ་པ་དང་། རིག་པ་མི་ཤེས་པ་དང་། རྟག་ཏུ་
གཉིད་དུ་འགྲོ་བ་དང་། བློ་གྲོས་དམན་པ་དང་། གཏི་མུག་ཆེ་བ་དང་། འཇིགས་པ་དང་། སྐྲག་པར་འགྱུར་བ་དང་། དོགས་པར་འགྱུར་བ་དང་། ཕྲ་མ་ཅན་དང་། ཚིག་མི་བརྟན་པ་དང་། སེར་སྣ་ཅན་དང་། ཕྲག་དོག་ཅན་དང་། ངེས་
39-1-276a


པར་མི་འབྱུང་བ་དང་། ངོ་ཚ་མེད་པ་དང་། ཁྲེལ་མེད་པ་དང་། ཤེས་རབ་ཆུང་བ་དང་། དགེ་བའི་ཆོས་རྣམས་མི་རིག་པ་སྟེ། སྐྱེ་བ་ལྔ་བརྒྱར་གནོད་སྦྱིན་སྐྱེ། །སྐྱེ་བ་ལྔ་བརྒྱར་ཁྱི་དང་ནི། །མཐའ་ཡས་སྨྱོན་པར་སྐྱེ་བར་འགྱུར། །
ཆང་འཐུངས་པ་ཡི་ཉེས་པའོ། །མྱོས་པར་འགྱུར་བའི་ཆང་གི་བཏུང་བའི་རྣམ་པར་སྨིན་པའོ། །ཆང་འཐུང་བ་ནི་སྤངས་པ་ཡིས། །སྐྱེས་པ་འམ་ནི་བུད་མེད་ནི། །ཐོབ་སྟེ་དེ་ཡི་ཕན་ཡོན་ནི། །སུམ་བཅུ་རྩ་དྲུག་གི་དམན་པར། །
འདས་དང་མ་འོངས་པ་ཡི་དུས། །ད་ལྟར་བྱུང་བ་ཅུང་ཟད་དུ། །མྱུར་དུ་ཤེས་པར་འགྱུར་བ་དང་། །རྟག་ཏུ་དྲན་པ་གནས་པ་དང་། །དེ་ནི་སྨྱོ་བར་མི་འགྱུར་ཞིང་། །ཁྱད་པར་འཕགས་པའི་ཤེས་རབ་དང་། །མི་རྨོངས་པ་དང་བག་ཡོད་
དང་། །ཚིག་ནི་ཤིན་དུ་གསལ་བ་དང་། །ངོ་ཚ་ཤེས་ཤིང་ཚིག་ནི་གསལ། །དེ་ནི་ལོག་པར་སྨྲ་མི་འགྱུར། །ཕྲ་མ་དང་ནི་ཚིག་རྩུབ་མེད། །དོན་མེད་པ་ལ་མི་བསྟོད་ཅིང་། །ཉིན་དང་མཚན་དུ་དེ་བཞིན་དུ། །བྱས་པ་ཤེས་ཤིང་བྱས་
པ་ཚོར། །འདོད་མེད་གཏོང་དང་ཚུལ་ཁྲིམས་ལྡན། །ཁྲོ་བ་མེད་ཅིང་ཚིག་ནི་དྲང་། །འཇིགས་པ་མེད་ཅིང་རྣམ་པར་མཁས། །ངོ་ཚ་ཁྲེལ་ཡོད་ཕུན་སུམ་ཚོགས། །འཇིགས་པ་དང་ནི་དོགས་པ་མེད། །ཡིད་གཞུངས་ཐོས་པ་
འཛིན་པ་དང་། །དོན་ཡོད་སྐྱེ་བོ་མང་ནང་མཁས། །ཆང་གི་བཏུང་བ་སྤངས་པ་ཡིས། །སྐྱེས་པ་འམ་ནི་བུད་མེད་ཀྱིས། །ཕན་ཡོན་འདི་རྣམས་མྱོང་བར་འགྱུར། །ལྷ་རྣམས་དང་ནི་མི་རྣམས་སུ། །དེའི་ལུས་ཞིག་ནས་ཤི་བའི་ཕ་
རོལ་དུ་བདེ་འགྲོ་མཐོ་རིས་ལྷའི་འཇིག་རྟེན་དང་མཐོ་རིས་སུ་སྐྱེའོ། །ཚུལ་ཁྲིམས་འདི་རྣམས་བསྲུང་བར་བྱའོ། །འདི་གང་ཟག་གང་སུ་དག་སྐྱེས་པ་འམ་བུད་མེད་ཀྱི་ཚུལ་ཁྲིམས་བསྲུང་བར་མི་བྱེད་པ་དང་། བསྒོམ་པར་
མི་བྱེད་ན་དེའི་ལུས་ཞིག་ནས་ཤི་བའི་ཕ་རོལ་དུ་ངན་སོང་ངམ་ངན་འགྲོ་ལོག་པར་ལྟུང་བར་སྐྱེ་བར་འགྱུར་རོ། །གང་སུ་དག་ཚུལ་ཁྲིམས་སྲུང་བར་བྱེད་པ་དང་། སྒོམ་པར་བྱེད་པ་རྣམས་ནི་དེའི་ལུས་ཞིག་ནས་ཤི་བའི་ཕ་རོལ་དུ་བདེ་འགྲོ་
39-1-276b


མཐོ་རིས་དང་། ལྷའི་འཇིག་རྟེན་དུ་སྐྱེ་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། དགེ་སློང་དེ་རྣམས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཚུལ་ཁྲིམས་ལྔའི་ཕན་ཡོན་བསྟན་
པའི་མདོ་རྫོགས་སོ།།   །། ༄༅། །རྒྱ་གར་སྐད་དུ། གི་རི་ཨཱ་ནན་ད་སཱུ་ཏྲ།  བོད་སྐད་དུ། རིའི་ཀུན་དགའ་བོའི་མདོ། འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །འདི་སྐད་བདག་གིས་ཐོས་
པའི་དུས་གཅིག་ན། བཅོམ་ལྡན་འདས་མཉན་ཡོད་རྒྱལ་བྱེད་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་དེའི་དུས་ན་ཚེ་དང་ལྡན་པ་རིའི་ཀུན་དགའ་བོ་ནད་དམ་པོར་སྡུག་བསྔལ་བས་གཟིར་ཏོ། །དེ་
ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ག་ལ་བ་དེར་སོང་ཞིང་ཉེ་བར་སོང་ནས་བཅོམ་ལྡན་འདས་ལ་ཕྱག་བྱས་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཡང་ཚེ་དང་ལྡན་པ་ཀུན་དགའ་བོས་བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །བཙུན་པ་ཚེ་དང་ལྡན་པ་རིའི་ཀུན་དགའ་བོ་ནད་དམ་པོས་སྡུག་བསྔལ་བས་གཟིར་ཏོ། །བཙུན་པ་བཅོམ་ལྡན་འདས་ལེགས་པར་མཛད་དུ་གསོལ། དགེ་སློང་ཚེ་དང་ལྡན་པ་རིའི་ཀུན་དགའ་
བོ་ག་ལ་བ་དེར་གཤེགས་ལ་རྗེས་སུ་བརྩེ་བས་གཤེགས་པར་ཞུ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། དེར་ཡང་ཀུན་དགའ་བོ་ཁྱོད་དགེ་སློང་རིའི་ཀུན་དགའ་བོའི་ཐད་དུ་སོང་ལ་འདུ་
ཤེས་བཅུ་བཤད་པར་གྱིས་ཤིག །རྣམ་པར་ཤེས་པ་དང་ལྡན་པའི་གནས་སུ་སྨྲ་བར་གྱིས་ཤིག །གཞན་ཡང་དགེ་སློང་རིའི་ཀུན་དགའ་བོས་འདུ་ཤེས་བཅུ་ཐོས་ནས་ནད་ཀྱིས་གཟིར་བའི་གནས་རྣམས་ལ་སོ་སོར་རིག་པར་
འགྱུར་རོ། །བཅུ་གང་ཞེ་ན། མི་རྟག་པའི་འདུ་ཤེས་དང་། བདག་མེད་པའི་འདུ་ཤེས་དང་། མི་གཙང་བའི་འདུ་ཤེས་དང་། བར་དུ་གཅོད་པའི་འདུ་ཤེས་དང་། སྤོང་བའི་འདུ་ཤེས་དང་། འདོད་ཆགས་དང་བྲལ་བའི་འདུ་ཤེས་དང་། 
39-1-277a


འགོག་པའི་འདུ་ཤེས་དང་། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང་། འདུ་བྱེད་ཐམས་ཅད་ལ་མི་རྟག་པའི་འདུ་ཤེས་དང་། འབྱུང་བ་དང་རྔུབ་པ་རྗེས་སུ་དྲན་པའི་འདུ་ཤེས་སོ། །
མི་རྟག་པའི་འདུ་ཤེས་དུ་ཞེ་ན། འདི་ནི་ཚེ་དང་ལྡན་པ་ཀུན་དགའ་བོ། དགོན་པ་འམ། ཤིང་དྲུང་ངམ། ཁང་པ་སྟོང་པར་སོང་ལ་འདི་ནི་སོ་སོར་རིག་པར་བྱའོ། །གཟུགས་མི་རྟག་པ་དང་། ཚོར་བ་མི་རྟག་པ་དང་། འདུ་
ཤེས་མི་རྟག་པ་དང་། འདུ་བྱེད་མི་རྟག་པ་དང་། རྣམ་པར་ཤེས་པ་མི་རྟག་པ་སྟེ་འདི་རྣམས་ལ་ཉེ་བར་ལེན་པའི་ཕུང་པོ་ལྔ་པོ་མི་རྟག་པར་བལྟ་བར་བྱའོ། །དེ་ལ་མི་རྟག་པའི་འདུ་ཤེས་སྟོན་ཅིག །ཀུན་དགའ་བོ་བདག་
མེད་པའི་འདུ་ཤེས་དུ་ཞེ་ན། འདི་ནི་དགེ་སློང་ཀུན་དགའ་བོ། དགོན་པ་འམ། ཤིང་དྲུང་ངམ། ཁང་པ་སྟོང་པར་སོང་ལ་འདི་ནི་སོ་སོར་རིག་པར་བྱའོ། །མིག་བདག་མེད་པ་དང་། གཟུགས་བདག་མེད་པ་དང་། རྣ་བ་བདག་
མེད་པ་དང་། སྒྲ་བདག་མེད་པ་དང་སྣ་བདག་མེད་པ་དང་། དྲི་བདག་མེད་པ་དང་། ལྕེ་བདག་མེད་པ་དང་། རོ་བདག་མེད་པ་དང་། ལུས་བདག་མེད་པ་དང་། རེག་བྱ་བདག་མེད་པ་དང་། ཡིད་བདག་མེད་པ་དང་། ཆོས་བདག་མེད་པ་སྟེ། 
འདི་རྣམས་ནི་ནང་གི་དྲུག་དང་ཕྱིའི་སྐྱེ་མཆེད་དྲུག་བདག་མེད་པའོ། །བདག་མེད་པ་ལ་ལྟ་ཞིང་བསམ་པར་བྱའོ། །ཀུན་དགའ་བོ་བདག་མེད་པ་འདི་རྣམས་སྟོན་ཅིག །ཀུན་དགའ་བོ་མི་གཙང་བའི་འདུ་ཤེས་ནི་དགེ་སློང་
ཀུན་དགའ་བོ་འདི་ནི་ལུས་འདི་ཉིད་ལ་སྤྱི་གཙུག་ནས་འོག་གི་རྐང་མཐིལ་གྱི་བར་གྱི། པགས་པའི་ཕྱི་ཤུན་གྱི་བར་གང་བར་རྣམ་པ་སྣ་ཚོགས་པའི་མི་གཙང་བ་སོ་སོར་བརྟག་པར་བྱའོ། །ལུས་འདི་ལ་སྐྲ་དང་། བ་སྤུ་དང་། 
སེན་མོ་དང་། སོ་དང་། ལྤགས་པའི་ཕྱི་ཤུན་དང་། ཤ་དང་། ཆུ་བ་དང་། རུས་པ་དང་། རྐང་མར་དང་། མཁལ་མ་དང་། སྙིང་དང་། མཚེར་པ་དང་། གློ་བ་དང་། སུལ་མང་དང་། ཕོ་བ་དང་། རྒྱུ་མ་དང་། རྒྱུ་མའི་གཉེ་
39-1-277b


མ་དང་། ལྒང་པ་དང་། རྟུག་པ་དང་། མཁྲིས་པ་དང་། བད་ཀན་དང་། ཚིགས་དང་། ཁྲག་དང་། རྔུལ་དང་། ཚིལ་དང་། མཆི་མ་དང་། ཞག་དང་། མཆིལ་མ་དང་། སྣབས་དང་། ཆུ་སེར་དང་། གཅིན་དང་། གླད་པ་སྟེ་མི་གཙང་
བའི་རྫས་སུམ་བཅུ་རྩ་གཉིས་སོ། །ལུས་འདི་ལ་མི་གཙང་བར་བལྟ་བར་བྱའོ། །ཀུན་དགའ་བོ་མི་གཙང་བ་འདི་རྣམས་བསྟན་པར་གྱིས་ཤིག །ཀུན་དགའ་བོ་བར་དུ་གཅོད་པ་རྣམས་དུ་ཞེ་ན། དགེ་སློང་ཀུན་དགའ་བོ་འདི་
ནི་དགོན་པ་འམ། ཤིང་དྲུང་ངམ། ཁང་སྟོང་དུ་སོང་སྟེ་འདི་རྣམས་སོ་སོར་བརྟག་པར་བྱའོ། །ལུས་འདི་ནི་སྡུག་བསྔལ་མང་བ་དང་། བར་དུ་གཅོད་པ་མང་བ་སྟེ། ལུས་འདི་ལ་རྣམ་པ་དུ་མའི་ནད་འབྱུང་ངོ་། །འདི་ལྟ་སྟེ། མིག་
གི་ནད་དང་། རྣ་བའི་ནད་དང་། སྣའི་ནད་དང་། ལྕེའི་ནད་དང་། ལུས་ཀྱི་ནད་དང་། མགོ་བོའི་ནད་དང་། རྣ་བའི་ནང་གི་ནད་དང་། ཁའི་ནད་དང་། སོའི་ནད་དང་། གློ་དང་། དབུགས་མི་བདེ་བ་དང་། པི་ན་སོའི་ནད་དང་། ཚ་རིམས་དང་། 
ལྟོ་བའི་ནད་དང་། བརྒྱལ་བ་དང་། གཞོགས་ཕྱེད་ན་བ་དང་། གཟེར་བ་དང་། གསུང་པ་དང་། མཛེ་དང་། ཤ་འབྲས་དང་། འབྲུམ་བུ་ཕྲ་མོ་དང་། གཅོང་ནད་དང་། བརྗེད་བྱེད་ཀྱི་ནད་དང་། བས་ལྡགས་དང་། གཡན་པ་དང་། ལུས་ཟ་བ་དང་། 
རཤྐ་ས་དང་། བི་ཙར་རྩི་ཀ་དང་། ཁྲག་མཁྲིས་དང་། མ་དྷུ་མེ་ཧ་དང་། ཨྃ་ག་དང་། སི་ལ་ཀ་དང་། མཚན་མར་རྡོལ་བ་དང་། མཁྲིས་པ་འཁྲུགས་པའི་ནད་དང་། བད་ཀན་འཁྲུགས་པའི་ནད་དང་། རླུང་འཁྲུགས་
པའི་ནད་དང་། འདུས་པའི་ནད་དང་། དུས་སུ་ཟས་ཡི་ཁར་མི་འོང་བའི་ནད་དང་། མི་མཉམ་པའི་ནད་འཁྲུགས་པ་དང་། ཨ་ཨུ་པ་ཀ་མྲི་ཀའི་ནད་དང་། ལས་ཀྱི་རྣམ་པར་སྨིན་པའི་ནད་དང་། གྲང་བ་དང་། དྲོ་བ་དང་། 
བཀྲེས་པ་དང་། སྐོམ་པ་དང་། འཁྲུ་བ་དང་། ཆུ་ནད་སྟེ། ལུས་ཀྱི་ནད་འདི་རྣམས་ནི་བར་དུ་གཅོད་པར་བལྟ་ཞིང་བསྒོམ་པར་བྱའོ། །ཀུན་དགའ་བོ་འདི་ནི་བར་དུ་གཅོད་པར་བསྟན་པར་བྱའོ། །ཀུན་དགའ་བོ་སྤོང་བའི་འདུ་
39-1-278a


ཤེས་རྣམས་དུ་ཞེ་ན། དགེ་སློང་ཀུན་དགའ་བོ་འདི་ནི་འདོད་པ་ལས་སྐྱེས་པ་སྟེ། མི་གནས་པར་དོར་བར་བྱའོ། །རྣམ་པར་གཞིག་པ་དང་། གོམས་པར་མི་བྱེད་པ་དང་། མི་བསྒོམ་པར་འགྲོ་བ་དང་། རྣམ་པར་
འཚེ་བའི་རྣམ་རྟོག་ལས་སྐྱེས་པ་དང་། མི་གནས་པ་སྟེ་དོར་བར་བྱའོ། །རྣམ་པར་གཞིག་པ་དང་། གོམས་པར་མི་བྱེད་པ་དང་། མི་བསྒོམ་པར་འགྲོ་བ་སྟེ་སྐྱེས་ཤིང་སྐྱེས་པའི་སྡིག་པ་མི་དགེ་བའི་ཆོས་མི་གནས་པ་སྟེ་
དོར་བར་བྱའོ། །རྣམ་པར་གཞིག་པ་དང་། གོམས་པར་མི་བྱེད་པ་དང་། མི་བསྒོམ་པར་འགྲོ་བ་སྟེ། ཀུན་དགའ་བོ་འདི་ནི་སྤོང་བའི་འདུ་ཤེས་སོ། །ཀུན་དགའ་བོ་འདོད་ཆགས་དང་བྲལ་བའི་འདུ་ཤེས་དུ་ཞེ་ན། དགེ་སློང་
ཀུན་དགའ་བོ་འདི་ནི་དགོན་པ་འམ། ཤིང་དྲུང་ངམ། ཁང་སྟོང་དུ་སོང་སྟེ་སོ་སོར་བརྟག་པར་བྱའོ། །འདི་ནི་ཞི་བ་དང་། གྱ་ནོམ་པ་གང་འདི་ནི་འདུས་བྱས་ཐམས་ཅད་གནས་པ་དང་། སྐྱེ་བ་དང་། བསྒྱུར་བ་དང་། སྲེད་པ་ཟད་
པ་དང་། འགོག་པ་དང་། མྱ་ངན་ལས་འདས་པའོ། །ཀུན་དགའ་བོ་འདི་ནི་འགོག་པའི་འདུ་ཤེས་སོ། །ཀུན་དགའ་བོ་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དུ་ཞེ་ན། དགེ་སློང་ཀུན་དགའ་བོ་འདི་ནི་
གང་ཞིག་འཇིག་རྟེན་པ་ཐབས་དང་ཉེ་བར་སྐྱེ་བ་དང་། རྟོག་པ་དང་། གནས་པ་དང་། བག་ལ་ཉལ་བ་བོར་ཏེ་དགའ་བ་མི་བསྐྱེད་པར་རོ། །ཀུན་དགའ་བོ་འདི་ནི་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་
སུ་བསྟན་པར་བྱའོ། །ཀུན་དགའ་བོ་འདུ་བྱེད་ཐམས་ཅད་མི་རྟག་པའི་འདུ་ཤེས་དུ་ཞེ་ན། དགེ་སློང་ཀུན་དགའ་བོ་འདི་ནི་འདུ་བྱེད་ཐམས་ཅད་ལ་ཞེན་པ་མེད་པ་དང་། སྤོང་བ་དང་། སྐྱུག་བྲོ་བ་སྟེ། ཀུན་དགའ་བོ་འདི་ནི་
འདུ་བྱེད་ཐམས་ཅད་མི་རྟག་པའི་འདུ་ཤེས་སུ་བསྟན་པར་བྱའོ། །ཀུན་དགའ་བོ་དབུགས་རྔུབ་པ་དང་དབྱུང་བ་རྗེས་སུ་དྲན་པ་དུ་ཞེ་ན། དགེ་སློང་ཀུན་དགའ་བོ། དགོན་པ་འམ། ཤིང་དྲུང་ངམ། ཁང་སྟོང་དུ་སོང་སྟེ་འདུག་ལ་
39-1-278b


སྐྱིལ་དཀྲུངས་བཅས་ཏེ་ལུས་དྲང་པོར་བསྲངས་ལ་ཁ་གྱེན་དུ་བལྟས་ལ་རྗེས་སུ་དྲན་ཅིང་གནས་པར་བྱའོ། །དེ་ནས་དབུགས་ཐུང་ངུ་ཕྱུང་ན་དབུགས་ཐུང་ངུ་ཕྱུང་ངོ་སྙམ་དུ་ཡང་དག་པར་ཤེས་སོ། །དབུགས་རིང་དུ་རྔུབས་པ་འམ་ཐུང་ངུ་
རྔུབས་ན་རྔུབས་སོ་སྙམ་དུ་ཡང་དག་པར་ཤེས་སོ། །དབུགས་རིང་དུ་ཕྱུང་ན་དབུགས་རིང་དུ་མཐོང་ངོ་སྙམ་དུ་ཡང་དག་པར་ཤེས་སོ། །དབུགས་ཐུང་བ་འམ་ཐུང་ངུ་ཕྱུང་ན་དབུགས་ཐུང་ངུ་ཕྱུང་ངོ་སྙམ་དུ་ཡང་དག་པར་ཤེས་སོ། །
དབུགས་ཐུང་བ་འམ་ཐུང་ངུ་རྒྱུས་ན་ཐུང་ངུ་བལྟ་བ་དང་ཡང་དག་པར་ཤེས་སོ། །ལུས་ཀྱི་ཐམས་ཅད་ཡང་དག་པར་མྱོང་ཞིང་དབུགས་ཐུང་ངུ་རྒྱུས་སོ་ཞེས་བསླབ་པར་བྱས་ཏེ། ལུས་ཀྱི་ཡང་དག་པར་མྱོང་ཞིང་བལྟ་ཞིང་བསླབ་པར་
བྱའོ། །ལུས་ཀྱི་འདུ་བྱེད་ཤིན་དུ་སྦྱངས་ནས་དབུགས་ཐུང་ངུ་རྔུབས་ན་རྔུབས་པ་ལ་བལྟ་ཞིང་བསླབ་པར་བྱའོ། །སྙམ་དུ་ཡང་དག་པར་ཤེས་སོ། །གཉིས་ཀ་མཐོང་ཞིང་ལུས་ཀྱི་འདུ་བྱེད་ཡང་དག་པར་སྦྱངས་ཤིང་རླུང་ཐུང་ངུ་ཕྱུང་ངོ་། །
ཞེས་གནས་ཤིང་བསླབ་པར་བྱའོ། །གཉིས་ཀ་མཐོང་ཞིང་ལུས་ཀྱི་འདུ་བྱེད་ལ་བལྟ་ཞིང་གནས་པར་བསླབ་པར་བྱའོ། །དགའ་བ་ཡང་དག་པར་མྱོང་ཞིང་དབུགས་ཐུང་ངུ་རྒྱུས་སོ་སྙམ་དུ་བསླབ་པར་བྱའོ། །དགའ་བ་ཡང་དག་
པར་མྱོང་ཞིང་བལྟ་ཞིང་བསླབ་པར་བྱའོ། །བདེ་བ་ཡང་དག་པར་མྱོང་ཞིང་དབུགས་ཐུང་ངུ་རྒྱུས་སོ་སྙམ་དུ་བསླབ་པར་བྱའོ། །བདེ་བ་ཡང་དག་པར་མྱོང་ཞིང་བལྟ་ཞིང་བསླབ་པར་བྱའོ། །སེམས་ཀྱི་འདུ་བྱེད་ཡང་དག་པར་
མྱོང་ཞིང་དབུགས་ཐུང་ངུ་རྒྱུས་སོ་སྙམ་དུ་བསླབ་པར་བྱའོ། །སེམས་ཀྱི་འདུ་བྱེད་ཡང་དག་པར་མྱོང་ཞིང་བལྟ་ཞིང་བསླབ་པར་བྱའོ། །གཉིས་ཀ་མཐོང་ཞིང་སེམས་ཀྱི་འདུ་བྱེད་ཡང་དག་པར་མྱོང་ཞིང་དབུགས་ཐུང་ངུ་རྒྱུས་ན་རྒྱུས་སོ་
སྙམ་དུ་བསླབ་པར་བྱའོ། །གཉིས་ཀ་མཐོང་ཞིང་སེམས་ཀྱི་འདུ་བྱེད་ཡང་དག་པར་སྦྱངས་སོ་སྙམ་དུ་བསླབ་པར་བྱའོ། །སེམས་ཡང་དག་པར་མྱོང་ན་དབུགས་ཐུང་ངུ་རྔུབས་ན་རྔུབས་སོ་ཞེས་བསླབ་པར་བྱའོ། །སེམས་ཡང་དག་པར་མྱོང་ཞིང་ཡང་
39-1-279a


དག་པར་སྦྱངས་སོ་སྙམ་དུ་བསླབ་པར་བྱའོ། །སེམས་མངོན་པར་དགའ་བ་བསྐྱེད་པ་དང་དབུགས་ཐུང་ངུ་རྒྱུས་པ་ན་རྒྱུས་སོ་ཞེས་བསླབ་པར་བྱའོ། །སེམས་མངོན་པར་དགའ་བ་བསྐྱེད་པ་དང་ཤིན་
ཏུ་སྦྱངས་སོ་སྙམ་དུ་བསླབ་པར་བྱའོ། །སེམས་ཞི་གནས་ལ་གནས་པས་དབུགས་ཐུང་ངུ་རྒྱུས་ན་རྒྱུས་སོ་སྙམ་དུ་བསླབ་པར་བྱའོ། །སེམས་ཞི་གནས་ལ་གནས་པས་ལྷག་མཐོང་དུ་གནས་པར་བསླབ་པར་བྱའོ། །སེམས་རྣམ་
པར་གྲོལ་བས་དབུགས་ཐུང་ངུ་རྒྱུས་ན་རྒྱུས་སོ་ཞེས་བསླབ་པར་བྱའོ། །སེམས་རྣམ་པར་གྲོལ་བས་ལྷག་མཐོང་ལ་གནས་པར་བསླབ་པར་བྱའོ། །མི་རྟག་པར་རྗེས་སུ་ལྟ་བས་དབུགས་ཐུང་ངུ་རྒྱུས་ན་རྒྱུས་སོ་སྙམ་དུ་བསླབ་པར་བྱའོ། །
མི་རྟག་པར་རྗེས་སུ་ལྟ་བས་ལྷག་མཐོང་ལ་གནས་པར་བསླབ་པར་བྱའོ། །འདོད་ཆགས་དང་བྲལ་བར་རྗེས་སུ་བལྟ་བས་དབུགས་ཐུང་ངུ་རྒྱུས་ན་རྒྱུས་སོ་སྙམ་དུ་བསླབ་པར་བྱའོ། །འདོད་ཆགས་དང་བྲལ་བར་རྗེས་སུ་ལྟ་བས་ལྷག་མཐོང་ལ་གནས་
པར་བསླབ་པར་བྱའོ། །འགོག་པ་ལ་རྗེས་སུ་བལྟ་བས་དབུགས་ཐུང་ངུ་རྒྱུས་ན་རྒྱུས་སོ་སྙམ་དུ་བསླབ་པར་བྱའོ། །འགོག་པ་ལ་རྗེས་སུ་ལྟ་བས་ལྷག་མཐོང་ལ་གནས་པར་བསླབ་པར་བྱའོ། །སོ་སོར་སྤོང་བ་རྗེས་སུ་ལྟ་བས་དབུགས་
ཐུང་ངུ་རྒྱུས་ན་རྒྱུས་སོ་སྙམ་དུ་བསླབ་པར་བྱའོ། །སོ་སོར་སྤོང་བར་རྗེས་སུ་ལྟ་བས་ལྷག་མཐོང་ལ་གནས་པར་བསླབ་པར་བྱའོ། །ཀུན་དགའ་བོ་དབུགས་རྔུབས་པ་དང་དབྱུང་བ་རྗེས་སུ་དྲན་པ་འདི་བཤད་པར་བྱའོ། །དེར་
ཡང་ཀུན་དགའ་བོའི་གནས་སུ་སོང་ལ། འདུ་ཤེས་བཅུ་པོ་འདི་བཤད་པར་བྱའོ། །གནས་གཞན་ཡང་ཡོད་དེ་དགེ་སློང་རིའི་ཀུན་དགའ་བོས་འདུ་ཤེས་བཅུ་པོ་འདི་ཐོས་ན་དེའི་ནད་ཐམས་ཅད་ཞི་བར་འགྱུར་རོ། །དེ་ནས་
ཡང་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལས་མཉན་ཏེ། ཚེ་དང་ལྡན་པ་རིའི་ཀུན་དགའ་བོའི་གནས་སུ་སོང་ནས། ཚེ་དང་ལྡན་པ་རིའི་ཀུན་དགའ་བོ་ལ། འདུ་ཤེས་བཅུ་སོ་སོར་བཤད་དོ། །དེ་ནས་ཚེ་དང་ལྡན་པ་
39-1-279b


རིའི་ཀུན་དགའ་བོས་འདུ་ཤེས་བཅུ་པོ་འདི་རྣམས་ཐོས་ནས་དེའི་ནད་ཐམས་ཅད་ཞི་བར་གྱུར་ཏོ། །དེའི་ནད་ཐམས་ཅད་ཞི་ནས་ཚེ་དང་ལྡན་པ་རིའི་ཀུན་དགའ་བོ་ལངས་ཏེ། ཚེ་དང་ལྡན་པ་རིའི་ཀུན་དགའ་བོའི་ནད་
ཕྱིས་མེད་པར་གྱུར་ཏོ། །ཚེ་དང་ལྡན་པ་རིའི་ཀུན་དགའ་བོའི་མདོ་རྫོགས་སྷོ།།      །། ༄༅། །རྒྱ་གར་སྐད་དུ། ནནྡོ་པ་ནནྡ་ནཱ་ག་རཱ་ཛ་ད་མ་ན་སཱུ་ཏྲ།  བོད་སྐད་དུ།  
ཀླུའི་རྒྱལ་པོ་དགའ་བོ་ཉེར་དགའ་འདུལ་བའི་མདོ། འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་རྒྱལ་བྱེད་
ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཁྱིམ་བདག་མགོན་མེད་ཟས་སྦྱིན་དུས་གཅིག་ན། བཅོམ་ལྡན་འདས་ཀྱིས་ཆོས་བསྟན་པ་ཐོས་ནས། བཙུན་པ་དགེ་སློང་ལྔ་བརྒྱ་དང་བཅས་པ་སང་ནང་པར་བདག་
གི་ཁྱིམ་དུ་གདུགས་ཚོད་ལ་འབྱོན་པར་ཞུ་ཞེས་མགྲོན་དུ་གཉེར་ཏོ། །བཅོམ་ལྡན་འདས་ཀྱིས་དེ་ལ་གནང་ནས། དེའི་ཉིན་མོའི་ལྷག་མ་དང་མཚན་མོའི་མཐའ་འདས་ནས་ཐོ་རངས་ཀྱི་དུས་སུ་སྟོང་ཕྲག་བཅུའི་འཇིག་རྟེན་གྱི་ཁམས་ལ་
ཐུགས་ཀྱིས་རྣམ་པར་དགོངས་སོ། །དེ་ནས་ཀླུའི་རྒྱལ་པོ་དགའ་བོ་ཉེར་དགའ་ཞེས་བྱ་བ་ཡེ་ཤེས་ཀྱི་སྒོ་ནས་མངོན་དུ་བྱས་སོ། །དེ་ལ་ངེས་པར་ལེགས་པའི་ས་བོན་ཡོད་དམ་ཞེས་བརྟགས་པ་ན། 
འདི་ནི་ལོག་པར་ལྟ་བ་ཅན་དཀོན་མཆོག་གསུམ་ལ་དད་པ་མེད་པར་གཟིགས་སོ། །གཟིགས་ནས་གང་ཞིག་འདི་ནི་ལོག་པར་ལྟ་བ་ལས། རྣམ་པར་གྲོལ་བར་བྱ་བའི་ཕྱིར། 
འདུལ་བར་བྱེད་པ། གནས་བརྟན་ཆེན་པོ་མཽད་གལ་གཟིགས་སོ། །དེ་ནས་མཚན་མོ་ཐོ་རངས་ཀྱི་དུས་སུ་སྐུའི་བྱི་དོར་མཛད་
39-1-280a


ནས། ཚེ་དང་ལྡན་པ་ཀུན་དགའ་བོ་བོས་ཏེ་བཀའ་སྩལ་པ། ཀུན་དགའ་བོ། དགེ་སློང་ལྔ་བརྒྱ་དང་བཅས་པའི་བཅོམ་ལྡན་འདས་ལྷའི་འཇིག་རྟེན་དུ་གཤེགས་སོ་ཞེས་སྟོན་ཅིག །དེས་བཙུན་པ་བཀའ་བཞིན་འཚལ་ལོ་ཞེས་གསོལ་
ནས་དགེ་སློང་རྣམས་ལ་དོན་དེ་སྨྲས་སོ། །དེའི་ཉི་མ་ལ་དགའ་བོ་ཉེར་དགས་ཉེར་བསྡོགས་བྱས་སོ། །དེ་ལྷའི་རིན་པོ་ཆེའི་སྟེང་དུ་སྐྱིལ་དཀྲུངས་ཀྱིས་གནས་ཏེ། ལྷའི་གདུགས་དཀར་པོ་བཟུང་ངོ་། །ཀླུ་དང་ཀླུ་མོ་གར་བྱེད་ཅིང་ཀླུའི་
འཁོར་གཡོག་དུ་མས་བསྐོར་ཏེ་ལྷའི་སྣོད་ཉེ་བར་བཞག་ནས་བཟའ་བ་དང་བཏུང་བ་རྣམ་པ་སྣ་ཚོགས་པ་ལ་རྟོག་པར་བྱེད་དོ། །དེ་ནས་བཅོམ་ལྡན་འདས་ཀྱིས་ཀླུའི་རྒྱལ་པོ་ཇི་ལྟ་བར་གཟིགས་སོ། །དེ་ལྟར་བྱས་པ་གཟིགས་ནས་དེའི་
མགོ་བོའི་སྟེང་གི་བླ་བྲེས་ཀྱི་སྟེང་ཉིད་ནས། བཅོམ་ལྡན་འདས་དགེ་སློང་ལྔ་བརྒྱ་དང་བཅས་པས་གཤེགས་ཏེ། སུམ་བཅུ་རྩ་གསུམ་གྱི་ལྷའི་བར་མངོན་སུམ་དུ་གྱུར་ཏོ། །དེའི་ཚེ་དེའི་དུས་ན་ཀླུའི་རྒྱལ་པོ་དགའ་བོ་ཉེར་དགའ་དེ་ལྟ་བུའི་
གཟུགས་ཀྱིས་སྡིག་པའི་ལྟ་བར་ལྷུང་བ་ལྟ་བ་ངན་པའི་སེམས་སྐྱེས་སོ། །དགེ་སྦྱོང་མགོ་རེག་འདི་ངའི་སྟེང་ནས་སུམ་བཅུ་རྩ་གསུམ་གྱི་ལྷའི་འཇིག་རྟེན་གྱི་གནས་སུ་གཤེགས་པར་འགྱུར་རོ། །འདི་ནི་ད་ལྟ་ནས་ངའི་མགོ་བོ་ལ་རྐང་པའི་
རྡུལ་མགོ་བོའི་སྟེང་དུ་ལྷུང་བར་བྱེད་པས་འགྲོ་རུ་མི་སྟེར་རོ་སྙམ་སྟེ། ལངས་ནས་རི་རབ་ཀྱི་རྩ་བར་སོང་ངོ་། །རང་གི་གཟུགས་བོར་ཏེ་རི་བོ་མཆོག་རབ་སྟེང་འོག་ཐམས་ཅད་རང་གི་ལུས་ཀྱིས་ལན་བདུན་དུ་དཀྲིས་ནས། སྟེང་དུ་གདེངས་ཀ་
བྱས་ཏེ། སུམ་བཅུ་རྩ་གསུམ་པ་རྣམས་ཀྱིས་མི་མཐོང་བར་བྱ་བའི་ཕྱིར་རོ། །དེ་ནས་ཚེ་དང་ལྡན་པ་ཡུལ་འཁོར་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་སྔར་བཞིན་གནས་འདིའི་ཕྱོགས་སུ་འདུག་ནས་
རི་བོ་མཆོག་རབ་མཐོང་ངོ་། །རི་བོ་མཆོག་རབ་འཁོར་དང་བཅས་པ་མཐོང་ངོ་། །སུམ་བཅུ་རྩ་གསུམ་མཐོང་ངོ་། །རྣམ་པར་རྒྱལ་བའི་ཁང་བཟང་མཐོང་ངོ་། །རྣམ་པར་རྒྱལ་བའི་ཁང་བཟང་གི་སྟེང་གི་རྒྱལ་
39-1-280b


མཚན་མཐོང་ངོ་། །བཙུན་པ་ཅིའི་རྒྱུ་ཅིའི་རྐྱེན་ལགས། ད་ནི་རི་བོ་མཆོག་རབ་མི་མཐོང་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། ཡུལ་འཁོར་སྐྱོང་འདི་ནི་ཀླུའི་རྒྱལ་པོ་དགའ་བོ་ཉེར་དགའ་ཞེས་བྱ་བ་ཁྱེད་རྣམས་
ལ་ཁྲོས་པར་གྱུར་ཏེ། རི་བོ་མཆོག་རབ་ལན་བདུན་དུ་ལུས་ཀྱིས་དཀྲིས་ནས་སྟེང་དུ་གདེངས་ཀས་བསྒྲིབས་སོ། །མུན་པ་མུན་ནག་ཏུ་བྱས་ནས་གནས་སོ། །གསོལ་པ། བཙུན་པ་བདག་གིས་གདུལ་བར་བགྱི་འམ། བཅོམ་
ལྡན་འདས་ཀྱིས་གནང་བ་མ་བྱིན་ནོ། །དེ་ནས་ཚེ་དང་ལྡན་པ་བཟང་ལྡན་དང་། ཚེ་དང་ལྡན་པ་སྒྲ་གཅན་འཛིན་ཏེ། གོ་རིམས་བཞིན་དུ་དགེ་སློང་ཐམས་ཅད་ཀྱིས་ཞུས་སོ། །བཅོམ་ལྡན་འདས་ཀྱིས་རྗེས་སུ་གནང་བ་མ་བྱིན་
ནོ། །ཐམས་ཅད་ཀྱི་རྗེས་སུ་གནས་བརྟན་ཆེན་པོ་མཽད་གལ་གྱི་བུས་བཙུན་པ་བདག་གིས་གདུལ་བར་བགྱི་འམ་ཞེས་ཞུས་པ་དང་། མཽད་གལ་གྱི་བུ་ཐུལ་ཅིག་ཅེས་བཅོམ་ལྡན་འདས་ཀྱིས་གནང་བ་བྱིན་ནོ། །གནས་
བརྟན་རང་གི་ལུས་བོར་ལ་ཀླུའི་རྒྱལ་པོའི་ལུས་ཆེན་པོར་སྤྲུལ་ཏེ། དགའ་བོ་ཉེར་དགའི་ལུས་ཀྱི་སྟེང་དུ་ལན་བཅུ་བཞི་ལུས་ཀྱིས་དཀྲི་བ་དང་། དེའི་གདེངས་ཀའི་སྟེང་དུ་རང་གི་གདེངས་ཀ་བྱའོ། །རི་བོ་མཆོག་རབ་དང་བཅས་
པ་ཐམས་ཅད་ནོན་ཅིག་ཅེས་བཀའ་སྩལ་པ་དང་། གནས་བརྟན་མཽད་གལ་གྱི་བུས་དེ་བཞིན་དུ་བྱས་སོ། །དེ་ནས་ཀླུའི་རྒྱལ་པོ་དགའ་བོ་ཉེར་དགས་ཁ་བརླངས་ཀྱི་དུ་བ་བཏང་ངོ་། །གནས་བརྟན་གྱིས་ཀྱང་ཁྱེད་
ཀྱི་ལུས་ལ་ཁ་བརླངས་ཀྱི་དུ་བ་ཡོད་ལ་ངེད་ལ་མེད་པ་ཡིན་ནམ་ཞེས་ཁ་བརླངས་བཏང་ངོ་། །ཀླུའི་རྒྱལ་པོ་དགའ་བོ་ཉེར་དགའི་དུ་བས་གནས་བརྟན་ལ་གནོད་པར་མ་གྱུར་ཏོ། །གནས་བརྟན་གྱི་ཁ་བརླངས་ཀྱི་དུ་བས་
ཀླུའི་རྒྱལ་པོ་ལ་གནོད་པར་གྱུར་ཏོ། །ཀླུའི་རྒྱལ་པོ་རབ་ཏུ་འབར་རོ། །གནས་བརྟན་གྱིས་ཁྱེད་ཀྱི་ལུས་ལ་འབར་བ་ཡོད་པ་བཞིན་ངེད་ལ་མེད་དམ་ཞེས་འབར་བར་བྱས་སོ། །ཀླུའི་རྒྱལ་པོའི་མེ་འོད་ཀྱིས་གནས་བརྟན་ལ་གནོད་པར་
39-1-281a


མ་གྱུར་ཏོ། །གནས་བརྟན་གྱི་མེ་འོད་ཀྱིས་ཀླུའི་རྒྱལ་པོ་ལ་གནོད་པར་གྱུར་ཏོ། །ཀླུའི་རྒྱལ་པོས་བསམས་པ་འདི་ནི་བདག་གི་ལུས་རི་བོ་མཆོག་རབ་དང་བཅས་པ་ངེས་པར་མནན་ནས་དུ་བ་དང་མེ་འབར་བར་བྱེད་དོ་སྙམ་ནས། ཁྱེད་གང་
ཡིན་ཞེས་དྲིས་སོ། །བདག་མཽད་གལ་ཞེས་བྱའོ། །བཙུན་པ་རང་གི་གཟུགས་ཀྱིས་གནས་པར་གྱིས་ཤིག །གནས་བརྟན་གྱིས་ཀླུའི་ལུས་དོར་ནས། དེའི་རྣ་བ་གཡས་པའི་བུ་ག་ནས་ཞུགས་ཏེ། རྣ་བ་གཡོན་པའི་བུ་ག་ནས་འཐོན་ནོ། །ཡང་
རྣ་བ་གཡོན་པའི་བུ་ག་ནས་ཞུགས་ནས། རྣ་བ་གཡས་པའི་བུ་ག་ནས་འཐོན་ནོ། །དེ་བཞིན་དུ་སྣ་གཡས་པའི་བུ་ག་ནས་ཞུགས་ནས། སྣ་གཡོན་པའི་བུ་ག་ནས་འཐོན་ཏེ། ཡང་སྣ་གཡོན་པའི་བུ་ག་ནས་ཞུགས་ནས། སྣ་གཡས་
པའི་བུ་ག་ནས་འཐོན་ནོ། །དེ་ནས་ཀླུའི་རྒྱལ་པོའི་ཁ་གདངས་སོ། །གནས་བརྟན་ཁར་ཞུགས་ནས། གསུས་པའི་ནང་དུ་མདུན་རྒྱབ་དུ་ཡང་དང་ཡང་དུ་རྒྱུས་སོ། །བཅོམ་ལྡན་འདས་ཀྱིས་མཽད་གལ་རྫུ་འཕྲུལ་ཆེར་ཡིད་ལ་གྱིས་ཤིག 
ཀླུ་རྫུ་འཕྲུལ་ཆེན་པོ་དང་ལྡན་པ་ཡིན་ནོ་ཞེས་བཀའ་སྩལ་ཏོ། །གནས་བརྟན་གྱིས་བཙུན་པ། བདག་གིས་རྫུ་འཕྲུལ་གྱི་རྐང་པ་བཞི་བསྒོམས་པ་དང་། མང་དུ་བྱས་པ་དང་། བརྩོན་པར་བྱས་པ་དང་། གཞིར་བྱས་པ་དང་། རྗེས་སུ་བསྒྲུབས་
པ་དང་། འདྲིས་པར་བྱས་པས་ལེགས་པར་བརྩམས་སོ། །བཙུན་པ། དགའ་བོ་ཉེར་དགའ་ལྟ་ཞོག །དགའ་བོ་ཉེར་དགའ་དང་མཚུངས་པར་བརྒྱའི་ཚོགས་དང་། །སྟོང་གི་ཚོགས་དང་། འབུམ་གྱི་ཚོགས་ཀྱང་བདག་གིས་གདུལ་བར་ནུས་སོ། །
ཞེས་གསོལ་ཏོ། །ཀླུའི་རྒྱལ་པོས་བསམས་པ་ནང་ན་རྒྱུ་བ་བདག་གིས་མ་མཐོང་ངོ་། །ཕྱིར་འབྱུང་བའི་ཚེ་མཆེ་བ་གཉིས་ཀྱི་བར་དུ་བཟའ་བོ་སྙམ་ནས། བཙུན་པ་ཕྱིར་ཤོག །ངའི་ལྟོ་བའི་ནང་དུ་ཡང་དང་ཡང་དུ་རྒྱུ་བ་དང་སྡོད་པས་ཅི་བྱ་
ཞེས་པས། གནས་བརྟན་ཕྱིར་བྱོན་ནས་གནས་སོ། །ཀླུའི་རྒྱལ་པོས་མཐོང་ནས། འདི་ཡིན་ནམ་ཞེས་སྨྲས་ཏེ། སྣའི་རླུང་ཕྱིར་བཏང་ངོ་། །གནས་བརྟན་བསམ་གཏན་བཞི་པོ་མཉམ་པར་ཐོབ་པས། བ་སྤུའི་བུ་ག་གཅིག་ཏུ་ཡང་
39-1-281b


སྣའི་རླུང་གིས་བསྐྱོད་པར་མི་ནུས་སོ། །དེ་ལས་གཞན་པའི་དགེ་སློང་རྣམས་ཀྱིས་དང་པོ་རྣམས་ཀྱི་ཆོ་འཕྲུལ་ཐམས་ཅད་བྱེད་པར་ནུས་ཀྱིས། གནས་འདི་རྣམས་ལ་རབ་ཏུ་ཞུགས་ནས། བསམ་གཏན་བཞི་པོ་མྱུར་དུ་བསྒྲུབ་པར་མི་
ནུས་སོ། །དེའི་ཕྱིར་བཅོམ་ལྡན་འདས་ཀྱིས་ཀླུའི་རྒྱལ་པོ་འདུལ་བ་དེ་རྣམས་ལ་གནང་བ་མ་བྱིན་ནོ། །ཀླུའི་རྒྱལ་པོ་བདག་གིས་དགེ་སློང་འདིའི་བ་སྤུའི་བུ་ག་ཙམ་ཡང་སྣའི་རླུང་གིས་བསྐྱོད་པར་མ་ནུས་པས་རྫུ་འཕྲུལ་ཆེན་པོར་བསམས་སོ། །
གནས་བརྟན་གྱིས་དགེ་སློང་གི་གཟུགས་དོར་ནས། འདབ་བཟང་བྱ་ཁྱུང་གི་གཟུགས་སུ་མངོན་པར་སྤྲུལ་ཏོ། །འདབ་བཟང་ཀྱི་ལུས་དེ་མཐོང་ནས་ཀླུའི་རྒྱལ་པོ་བྲོས་པར་གྱུར་ཏོ། །འདབ་བཟང་ཀྱི་རྗེས་སུ་འབྲེལ་བར་ཀླུའི་རྒྱལ་
པོས་རང་གི་གཟུགས་དོར་ནས་བྲམ་ཟེའི་ཁྱེའུའི་གཟུགས་སུ་སྤྲུལ་ཏེ། བཙུན་པ་ཁྱེད་ལ་སྐྱབས་སུ་འགྲོའོ་ཞེས་བརྗོད་པར་བྱེད་ཅིང་གནས་བརྟན་གྱི་ཞབས་ལ་ཕྱག་བཙལ་ལོ། །གནས་བརྟན་གྱིས་སྟོན་པའི་ཐད་དུ་ཤོག་ཅིག་འགྲོ་བ་ཡིན་ནོ་ཞེས་
ཀླུའི་རྒྱལ་པོ་བཏུལ་ནས་དུག་མེད་པར་བྱས་ཏེ་བཅོམ་ལྡན་འདས་ཀྱི་དྲུང་དུ་ཕྱིན་ནོ། །ཀླུའི་རྒྱལ་པོས་བཅོམ་ལྡན་འདས་ལ་ཕྱག་བྱས་ཏེ། བཙུན་པ་ཁྱེད་ལ་སྐྱབས་སུ་འགྲོའོ་ཞེས་གསོལ་ཏོ། །བཅོམ་ལྡན་འདས་ཀྱིས་ལེགས་སོ་ཞེས་
བཀའ་སྩལ་ནས། དགེ་སློང་འཁོར་དང་བཅས་པ་མགོན་མེད་ཟས་སྦྱིན་གྱི་གནས་སུ་གཤེགས་སོ། །མགོན་མེད་ཟས་སྦྱིན་གྱིས། བཙུན་པ་ཡུན་རིང་པོར་མི་འབྱོན་པ་ཅི་ཞེས་གསོལ་པ་དང་། བཅོམ་ལྡན་འདས་ཀྱིས་མཽད་
གལ་གྱི་བུ་དང་། དགའ་བོ་ཉེར་དགའ་གཉིས་གཡུལ་བཀྱེའོ་ཞེས་བཀའ་སྩལ་ཏོ། །བཙུན་པ་སུ་ཞིག་ཕམ་སུ་ཞིག་རྒྱལ་བར་གྱུར་ཞེས་གསོལ་པས། ཁྱིམ་བདག་མཽད་གལ་གྱི་བུ་རྒྱལ་བར་གྱུར། དགའ་བོ་ཉེར་དགའ་
ཕམ་པར་གྱུར་ཏོ་ཞེས་བཀའ་སྩལ་ཏོ། །མགོན་མེད་ཟས་སྦྱིན་གྱིས་བཙུན་པ་བཅོམ་ལྡན་འདས་ལ་ཞག་བདུན་དུ་གདུགས་ཚོད་གསོལ་བར་ཞུས། གནས་བརྟན་ལ་བཀུར་སྟི་དང་སྟི་བཏང་བགྱིད་པར་ཞུས་སོ། །
39-1-282a


སངས་རྒྱས་ལ་སོགས་པའི་དགེ་སློང་ལྔ་བརྒྱ་པོ་རྣམས་ལ་བཀུར་སྟི་དང་། སྟི་སྟང་ཞག་བདུན་དུ་བགྱིད་པར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ་དང་། དགེ་སློང་དེ་རྣམས་བཅོམ་ལྡན་འདས་ཀྱིས་
གསུངས་པ་ལ་མངོན་པར་བསྟོད་དོ། །ཀླུའི་རྒྱལ་པོ་དགའ་བོ་ཉེར་དགའ་འདུལ་བའི་མདོ་རྫོགས་སྷོ།།    །།   །། རྒྱ་གར་སྐད་དུ། མ་ཧཱ་ཀཱ་ཤྱ་པ་སཱུ་ཏྲ།  བོད་སྐད་དུ།  འོད་སྲུང་ཆེན་པོའི་མདོ། འཕགས་
པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། རྒྱལ་པོའི་ཁབ་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་དེའི་དུས་ན། ཚེ་དང་ལྡན་པ་འོད་སྲུང་
ཆེན་པོ་པི་ཕྱ་ལིའི་ཕུག་ན་བཞུགས་ཏེ། ནད་དམ་པོས་གཟིར་ཅིང་སྡུག་བསྔལ་བར་གྱུར་ཏོ། །དེ་ནས་བཅོམ་ལྡན་འདས་སྲོད་ལའི་དུས་སུ་སོ་སོར་ཐམས་ཅད་རྟོག་ཅིང་བཞུགས་སོ། །ཚེ་དང་ལྡན་པ་འོད་སྲུང་ཆེན་པོ་ག་ལ་བ་དེར་གཤེགས་
ཤིང་ཉེ་བར་གཤེགས་ཏེ་གདན་བཤམས་པ་ལ་བཞུགས་ཏེ་བཞུགས་ནས་ཡང་བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་ཁྱོད་ཇི་ལྟར་བཟའ་བ་འདོད་དམ། ཇི་ལྟར་སྡུག་
བསྔལ་མྱོང་། ཇི་ལྟར་ཞི་བར་འགྱུར། ཞི་བར་བྱེད་པའི་ཐབས་ཀྱིས་མི་ཞི་བ་མ་ཡིན་ནོ། །དེ་ནས་ཚེ་དང་ལྡན་པ་འོད་སྲུང་ཆེན་པོས་གསོལ་པ། བཙུན་པ་བདག་ནི་བཟའ་བ་དང་བཏུང་བ་ལ་མི་སྲེད་པར་གྱུར། 
བདག་ནད་དམ་པོས་གཟིར་བར་གྱུར་ཏེ། ཞི་བ་འམ་མི་ཞི་བར་འགྱུར། ཞི་བར་བྱེད་པའི་ཐབས་མཛད་དུ་གསོལ། བྱང་ཆུབ་ཀྱི་ཡན་ལག་བདུན་པོ་འདི་ངས་ལེགས་པར་བཤད་པར་བྱའོ། །དེ་མང་དུ་བསྒོམས་
པར་བྱས་པ་ན། མངོན་པར་ཤེས་པ་དང་། བྱང་ཆུབ་པ་དང་། མྱ་ངན་ལས་འདས་པར་གྱུར་ཏོ། །བདུན་པོ་གང་ཞེ་ན། དྲན་པ་ཡང་དག་བྱང་ཆུབ་ཀྱི་ཡན་ལག་འདི། འོད་སྲུང་ངས་ཡང་དག་པའི་བྱང་ཆུབ་ཀྱི་
39-1-282b


ཡན་ལག་ཏུ་བཤད་དོ། །དེ་མང་དུ་བསྒོམས་པར་བྱས་པ་ན། མངོན་པར་ཤེས་པ་དང་། བྱང་ཆུབ་པ་དང་། མྱ་ངན་ལས་འདས་པར་གྱུར་ཏོ། །ཡང་འོད་སྲུང་ངས་ཆོས་རྣམ་པར་འབྱེད་པ་ཡང་དག་པའི་བྱང་ཆུབ་ཀྱི་ཡན་ལག་ཏུ་
བཤད་དོ། །དེ་མང་དུ་བསྒོམས་པར་བྱས་པ་ན། མངོན་པར་ཤེས་པ་དང་། བྱང་ཆུབ་པ་དང་། མྱ་ངན་ལས་འདས་པར་གྱུར་ཏོ། །ཡང་འོད་སྲུང་ངས་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ཏུ་བཤད་དོ། །དེ་མང་དུ་བསྒོམས་
པར་བྱས་པ་ན། མངོན་པར་ཤེས་པ་དང་། བྱང་ཆུབ་པ་དང་། མྱ་ངན་ལས་འདས་པར་གྱུར་ཏོ། །ཡང་འོད་སྲུང་ངས་དགའ་བ་ཡང་དག་བྱང་ཆུབ་ཀྱི་ཡན་ལག་ཏུ་བཤད་དོ། །དེ་མང་དུ་བསྒོམས་པར་བྱས་པ་ན། མངོན་པར་ཤེས་པ་
དང་། བྱང་ཆུབ་པ་དང་། མྱ་ངན་ལས་འདས་པར་གྱུར་ཏོ། །ཡང་འོད་སྲུང་ངས་ཤིན་དུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ཏུ་བཤད་དོ། །དེ་མང་དུ་བསྒོམས་པར་བྱས་པ་ན། མངོན་པར་ཤེས་པ་དང་། བྱང་ཆུབ་
པ་དང་། མྱ་ངན་ལས་འདས་པར་གྱུར་ཏོ། །ཡང་འོད་སྲུང་ངས་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ཏུ་བཤད་དོ། །དེ་མང་དུ་བསྒོམས་པར་བྱས་པ་ན། མངོན་པར་ཤེས་པ་དང་། བྱང་ཆུབ་པ་དང་། མྱ་ངན་ལས་འདས་པར་
གྱུར་ཏོ། །ཡང་འོད་སྲུང་ངས་བཏང་སྙོམས་ཡང་དག་བྱང་ཆུབ་ཀྱི་ཡན་ལག་ཏུ་བཤད་དོ། །དེ་མང་དུ་བསྒོམས་པར་བྱས་པ་ན། མངོན་པར་ཤེས་པ་དང་། བྱང་ཆུབ་པ་དང་། མྱ་ངན་ལས་འདས་པར་གྱུར་ཏོ། །འོད་སྲུང་འདི་ནི་
བྱང་ཆུབ་ཀྱི་ཡན་ལག་བདུན་ཏེ་ངས་བཤད་དོ། །དེ་མང་དུ་བསྒོམས་པར་བྱས་པ་ན། མངོན་པར་ཤེས་པ་དང་། བྱང་ཆུབ་པ་དང་། མྱ་ངན་ལས་འདས་པར་གྱུར་ཏོ། །བཅོམ་ལྡན་འདས་དེ་བཞིན་གཤེགས་པས་གསུངས་
པའི་བྱང་ཆུབ་ཀྱི་ཡན་ལག་ལ་བསླབ་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ཚེ་དང་ལྡན་པ་འོད་སྲུང་ཆེན་པོ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །
39-1-283a


དེ་མ་ཐག་ཏུ་ནད་ཞི་བར་གྱུར་ནས། ཚེ་དང་ལྡན་པ་འོད་སྲུང་ཆེན་པོ་ལངས་སོ། །ཚེ་དང་ལྡན་པ་འོད་སྲུང་ཆེན་པོའི་ནད་ཞི་བར་གྱུར་ཏོ། །གནས་བརྟན་འོད་སྲུང་ཆེན་པོའི་མདོ་རྫོགས་སྷོ།།      །། 
༄༅། །རྒྱ་གར་སྐད་དུ། སཱུརྱ་སཱུ་ཏྲ།  བོད་སྐད་དུ། ཉི་མའི་མདོ། འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་
རྒྱལ་བྱེད་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ལྷའི་བུ་ཉི་མ། ལྷ་མ་ཡིན་གྱི་དབང་པོ་སྒྲ་གཅན་འཛིན་གྱིས་བཟུང་ངོ་། །དེ་ནས་ལྷའི་བུ་ཉི་མས་བཅོམ་ལྡན་འདས་རྗེས་སུ་དྲན་པ་ཡིད་ལ་
བྱས་ཏེ། དེའི་དུས་སུ་ཚིགས་སུ་བཅད་པ་འདི་གསོལ་ཏོ། །སངས་རྒྱས་དཔའ་བོ་དེ་ལ་འདུད། །ཐམས་ཅད་མྱུར་དུ་གྲོལ་བར་གྱིས། །བདག་འདིའི་ཁ་རུ་བཅུག་པས་ན། །བདག་ནི་ཁྱེད་ལ་སྐྱབས་སུ་མཆི། །དེ་ནས་བཅོམ་
ལྡན་འདས་ཀྱིས་ལྷའི་བུ་ཉི་མའི་ཆེད་དུ། ལྷ་མ་ཡིན་གྱི་དབང་པོ་སྒྲ་གཅན་འཛིན་ལ་ཚིགས་སུ་བཅད་པ་བཀའ་སྩལ་པ། སངས་རྒྱས་འཇིག་རྟེན་ལ་བརྩེ་བས། །དགྲ་བཅོམ་དེ་བཞིན་གཤེགས་པ་ལ། །ཉི་མ་སྐྱབས་
སུ་སོང་བས་ན། །སྒྲ་གཅན་འཛིན་གྱིས་ཉི་མ་ཐོང་། །གང་ཞིག་མུན་པ་སྣང་བས་གསལ་བར་བྱེད། །རྣམ་སྣང་དྲག་པོའི་གཟི་བརྗིད་དཀྱིལ་འཁོར་ཅན། །ནམ་མཁའི་ཉི་མ་སྒྲ་གཅན་སྒྲིབ་མ་བྱེད། །ཉི་མ་འདི་ནི་སྒྲ་
གཅན་གྱིས་ཐོང་ཤིག །དེ་ནས་ལྷ་མ་ཡིན་གྱི་དབང་པོ་སྒྲ་གཅན་འཛིན་གྱིས་ལྷའི་བུ་ཉི་མ་གྲོལ་བར་བྱས་ནས། སྔར་གྱི་གཟུགས་བཞིན་དུ་གང་སུ་ཞིག་གིས་ལྷ་མ་ཡིན་གྱི་དབང་པོ་ཐགས་བཟང་རིས་ཀྱི་དྲུང་དུ་སོང་ཞིང་སོང་
ནས། སེམས་མི་དགའ་ཞིང་ཡི་མུག་པས་བ་སྤུ་ལངས་པར་གྱུར་ཏེ། ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ལྷ་མ་ཡིན་གྱི་དབང་པོ་སྒྲ་གཅན་འཛིན་ལ། ལྷ་མ་ཡིན་གྱི་དབང་པོ་ཐགས་བཟང་རིས་ཀྱིས་
39-1-283b


ཚིགས་སུ་བཅད་པ་སྨྲས་པ། ཅི་ཕྱིར་ཡིད་ནི་སྐྲག་པར་གྱུར། །སྒྲ་གཅན་འཛིན་གྱིས་ཉི་མ་ཐོང་། །གཟུགས་ཀྱི་རྣམ་འགྱུར་ཀུན་ཏུ་ངན། །ཅི་ཕྱིར་འཇིགས་པས་འདི་རུ་ལྷགས། །དེས་སྨྲས་པ། སངས་རྒྱས་ཚིགས་བཅད་ཐོས་ནས་ནི། །
བདག་གིས་ཉི་མ་མ་བཏང་ན། །མགོ་བོ་ཚལ་པ་བདུན་འགས་ཤིང་། །འཚོ་བ་ལ་ནི་བདེ་བ་མེད། །ཉི་མའི་མདོ་རྫོགས་སྷོ།།    །། རྒྱ་གར་སྐད་དུ། ཙན་ཏྲ་སཱུ་ཏྲ།  བོད་སྐད་དུ། ཟླ་བའི་མདོ། འཕགས་པ་དཀོན་མཆོག་
གསུམ་ལ་གུས་པས་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་རྒྱལ་བྱེད་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་དེའི་ཚེ་ལྷའི་བུ་ཟླ་བ། 
ལྷ་མ་ཡིན་གྱི་དབང་པོ་སྒྲ་གཅན་འཛིན་གྱིས་བཟུང་ནས། དེ་ནས་ལྷའི་བུ་ཟླ་བས་བཅོམ་ལྡན་འདས་རྗེས་སུ་དྲན་པ་ཡིད་ལ་བྱས་ཏེ། དེའི་དུས་སུ་ཚིགས་སུ་བཅད་པ་འདི་གསོལ་ཏོ། །སངས་རྒྱས་དཔའ་བོ་དེ་ལ་འདུད། །ཐམས་ཅད་
མྱུར་དུ་གྲོལ་བར་གྱིས། །བདག་འདིའི་ཁ་རུ་བཅུག་པས་ན། །བདག་ནི་ཁྱེད་ལ་སྐྱབས་སུ་འགྲོ། །དེ་ནས་བཅོམ་ལྡན་འདས་ཀྱིས་ལྷའི་བུ་ཟླ་བའི་ཆེད་དུ་ལྷ་མ་ཡིན་གྱི་དབང་པོ་སྒྲ་གཅན་འཛིན་ལ་ཚིགས་སུ་བཅད་པ་བཀའ་
སྩལ་པ། སངས་རྒྱས་འཇིག་རྟེན་ལ་བརྩེ་བས། །དགྲ་བཅོམ་དེ་བཞིན་གཤེགས་པ་ལ། །ཟླ་བ་སྐྱབས་སུ་སོང་བས་ན། །སྒྲ་གཅན་འཛིན་གྱིས་ཟླ་བ་ཐོང་། །དེ་ནས་ལྷ་མ་ཡིན་གྱི་
དབང་པོ་སྒྲ་གཅན་འཛིན་གྱིས། ལྷའི་བུ་ཟླ་བ་གྲོལ་བར་བྱས་ནས། སྔར་གྱི་གཟུགས་བཞིན་དུ་གང་སུ་ཞིག་གིས་ལྷ་མ་ཡིན་གྱི་དབང་པོ་ཐགས་བཟང་རིས་ཀྱི་དྲུང་དུ་སོང་ཞིང་སོང་ནས། སེམས་
མི་དགའ་ཞིང་ཡི་མུག་པས་བ་སྤུ་ལངས་པར་གྱུར་པས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཡང་ལྷ་མ་
39-1-284a


ཡིན་གྱི་དབང་པོ་སྒྲ་གཅན་འཛིན་ལ། ལྷ་མ་ཡིན་གྱི་དབང་པོ་ཐགས་བཟང་རིས་ཀྱིས་ཚིགས་སུ་བཅད་པ་སྨྲས་པ། ཅི་ཕྱིར་ཡིད་ནི་སྐྲག་པར་གྱུར། །སྒྲ་གཅན་འཛིན་གྱིས་ཟླ་བ་ཐོང་། །གཟུགས་ཀྱི་རྣམ་འགྱུར་ཀུན་དུ་ངན། །
ཅི་ཕྱིར་འཇིགས་པས་འདི་རུ་ལྷགས། །སྒྲ་གཅན་འཛིན་གྱིས་སྨྲས་པ། སངས་རྒྱས་ཚིགས་བཅད་ཐོས་ནས་ནི། །ཟླ་བ་བདག་གིས་མ་བཏང་ན། །མགོ་བོ་ཚལ་པ་བདུན་འགས་ཤིང་། །འཚོ་བ་ལ་ནི་བདེ་བ་མེད། །ཟླ་བའི་མདོ་རྫོགས་སྷོ།། །། 
༄༅།   །རྒྱ་གར་སྐད་དུ། མ་ཧཱ་མྃ་ག་ལ་སཱུ་ཏྲ།  བོད་སྐད་དུ། བཀྲ་ཤིས་ཆེན་པོའི་མདོ། འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་
ལྡན་འདས་མཉན་ཡོད་ན་རྒྱལ་བྱེད་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་ལྷ་དུ་མ་རྣམས་མཚན་མོ་ཁ་དོག་སྣ་ཚོགས་པ་དང་ལྡན་པའི་འོད་རྣམས་ཀྱིས་དུས་གཅིག་ལ་རྒྱལ་བྱེད་ཚལ་འོད་ཀྱིས་སྣང་བར་བྱས་
ནས། བཅོམ་ལྡན་འདས་གང་དུ་བཞུགས་པ་དེར་ལྷགས་ཏེ་ལྷགས་ནས། བཅོམ་ལྡན་འདས་ལ་ཕྱག་བྱས་ནས་ཕྱོགས་གཅིག་ཏུ་འཁོད་དེ། ཕྱོགས་གཅིག་ཏུ་འཁོད་ནས། ལྷ་དེ་རྣམས་ཀྱིས་བཅོམ་ལྡན་འདས་ལ་ཚིགས་སུ་
བཅད་པ་མང་དུ་ཞུས་སོ། །ལྷ་དང་མི་རྣམས་མང་པོ་ཡིས། །བཀྲ་ཤིས་པས་ནི་བསམ་གྱུར་པ། །བཀྲ་ཤིས་པ་ལ་ཐེ་ཚོམ་སྐྱེས། །བཀྲ་ཤིས་མཆོག་ནི་གསུང་དུ་གསོལ། །ལྷའི་ཡང་ལྷ་ཡིས་བཀའ་སྩལ་པ། །
སྡིག་པ་ཐམས་ཅད་རྣམ་པར་འཇོམས། །འཇིག་རྟེན་ཀུན་ལ་ཕན་པའི་དོན། །བཀྲ་ཤིས་དེ་རྣམས་ཁྱེད་ལ་བཤད། །བྱིས་པ་རྣམས་ལ་བསྙེན་མི་བྱ། །མཁས་པ་རྣམས་ལ་བསྙེན་པར་བྱ། །མཆོད་ལ་མཆོད་པའི་
ལན་བྱ་བ། །འདི་ནི་མཆོག་གི་བཀྲ་ཤིས་སོ། །སྔར་བྱས་པ་ཡི་བསོད་ནམས་ཀྱིས། །འཐུན་པའི་ཡུལ་དུ་གནས་པ་དང་། །བདག་ཉིད་མཆོག་གི་སྨོན་ལམ་བྱ། །འདི་ནི་མཆོག་གི་བཀྲ་ཤིས་སོ། །བདེན་དང་ལག་པའི་བཟོ་
39-1-284b


དང་ནི། །འདུལ་བའི་སྦྱོར་བས་ལེགས་པར་བསླབ། །གང་གིས་ལེགས་པར་བཤད་པའི་ཚིག །འདི་ནི་མཆོག་གི་བཀྲ་ཤིས་སོ། །ཕ་དང་མ་ལ་བསྙེན་བཀུར་བྱ། །བུ་དང་ཆུང་མ་རྗེས་སུ་བཟུང་། །མི་མཐུན་པ་ཡི་ལས་མི་བྱ། །འདི་ནི་
མཆོག་གི་བཀྲ་ཤིས་སོ། །སྦྱིན་པ་ཆོས་ཀྱི་སྤྱོད་པ་དང་། །གཉེན་འདུན་རྣམས་ནི་རྗེས་སུ་གཟུང་། །ཁ་ན་མ་ཐོའི་ལས་མི་བྱེད། །འདི་ནི་མཆོག་གི་བཀྲ་ཤིས་སོ། །སྡིག་ལ་དགའ་བ་སྤང་བར་བྱ། །ཆང་གི་བཏུང་བ་རྣམ་པར་སྤང་། །
གང་ཞིག་ཆོས་ལ་བག་ཡོད་པ། །འདི་ནི་མཆོག་གི་བཀྲ་ཤིས་སོ། །གློ་བུར་བླ་མ་གུས་པར་བྱ། །བྱས་པ་ཤེས་ཤིང་གུས་པར་བྱ། །དུས་སུ་ཆོས་ནི་མཉན་པར་བྱ། །འདི་ནི་མཆོག་གི་བཀྲ་ཤིས་སོ། །ཚིག་ངན་པ་ནི་བཟོད་པར་བྱ། །
དགེ་སྦྱོང་རྣམས་ནི་མཐོང་བར་བྱ། །དུས་སུ་ཆོས་ཀྱི་འབྲེལ་གཏམ་བྱ། །འདི་ནི་མཆོག་གི་བཀྲ་ཤིས་སོ། །དཀའ་ཐུབ་དང་ནི་ཚངས་སྤྱོད་བྱ། །འཕགས་པའི་བདེན་པ་མཐོང་བར་བྱ། །མྱ་ངན་འདས་པ་མངོན་སུམ་བྱ། །
འདི་ནི་མཆོག་གི་བཀྲ་ཤིས་སོ། །འཇིག་རྟེན་ཆོས་ལ་དྲིས་པ་ན། །གང་ཞིག་སེམས་ནི་གཡོ་མི་བྱ། །མྱ་ངན་མི་དགའ་མེད་བཟོད་བྱ། །འདི་ནི་མཆོག་གི་བཀྲ་ཤིས་སོ། །དེ་ལྟར་བཤད་པར་བྱས་པ་རྣམས། །ཐམས་
ཅད་དུ་ནི་རྒྱལ་བ་དང་། །ཐམས་ཅད་དུ་ནི་ཞི་བར་འགྲོ། །དེ་རྣམས་དེ་ལ་མཆོག་བཀྲ་ཤིས། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ལྷ་དེ་རྣམས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །། 
བཀྲ་ཤིས་ཆེན་པོའི་མདོ་རྫོགས་སྷོ།།    །།འདི་ཡི་བསོད་ནམས་ལས་ཀྱིས་ནི། །སངས་རྒྱས་མ་ཐོབ་བར་དུ་བདག །སྨན་ཆེན་པོ་ཡི་ཤེས་རབ་དང་། །འོད་གཙོ་ཕྱུག་པོའི་ལོངས་སྤྱོད་དང་། །ཐམས་ཅད་སྒྲོལ་གྱི་སྦྱིན་པ་དང་། །སྐྱེ་བ་
སྐྱེ་བར་བདག་ལ་གྱུར། །འཕགས་པ་ཆོས་ཀྱི་འཁོར་ལོ་བསྐོར་བའི་མདོ། སྐྱེས་པ་རབས་ཀྱི་གླེང་གཞིའི་བཤད་པ། ལྕང་ལོ་ཅན་གྱི་ཕོ་བྲང་གི་མདོ། འདུས་པ་ཆེན་པོའི་མདོ། བྱམས་པའི་མདོ། བྱམས་པ་བསྒོམ་པའི་མདོ། 
39-1-285a


ཚུལ་ཁྲིམས་ལྔའི་ཕན་ཡོན་བསྟན་པའི་མདོ། ཚེ་དང་ལྡན་པ་རིའི་ཀུན་དགའ་བོའི་མདོ། ཀླུའི་རྒྱལ་པོ་དགའ་བོ་དང་ཉེར་དགའ་འདུལ་བའི་མདོ། གནས་བརྟན་འོད་སྲུང་ཆེན་པོའི་མདོ། ཉི་མའི་
མདོ། ཟླ་བའི་མདོ། བཀྲ་ཤིས་ཆེན་པོའི་མདོ་ཞེས་བྱ་བ་སྟེ། དེ་ལྟར་མདོ་བཅུ་གསུམ་པོ་འདི་རྣམས་ནི་འཛམ་བུའི་གླིང་གི་དབུས། འཕགས་པའི་ཡུལ། བྱང་ཆུབ་ཀྱི་སྙིང་པོ་རྡོ་རྗེའི་གདན་ལས་དཔག་ཚད་བརྒྱ་ཙམ་
བྱང་ཤར་དུ་བགྲོད་པའི་བོད་ཡུལ། གངས་རིའི་ཁྲོད། རྩང་ཉང་རོ་ཚོང་འདུས་འགུར་མོའི་ས་ཆ། འཕགས་པ་རང་བྱུང་འཇིག་རྟེན་དབང་ཕྱུག་གི་གཙུག་ལག་ཁང་གི་བདག་པོ། སངས་རྒྱས་བཅོམ་ལྡན་འདས་
ཀྱི་བསྟན་པ་ལ་ལྷག་པར་མོས་ཤིང་། དཔལ་འབྱོར་དང་ཆབ་སྲིད་དུ་མ་ལ་དབང་ཕྱུག་དམ་པའི་གོ་འཕང་ཐོབ་པའི་ཞལ་བུ་པ་སྐུ་ཞང་གྲགས་པ་རྒྱལ་མཚན་དུ་དབེན་ཤའི་བཀའ་ལུང་གིས། བྱང་ཆུབ་ཀྱི་སྙིང་པོ་རྡོ་རྗེའི་
གདན་ལས་ལྷོ་ཕྱོགས་སུ་དཔག་ཚད་དྲུག་བརྒྱ་ཙམ་བགྲོད་པའི་གནས། སིང་ག་གླིང་པ་བྲམ་ཟེའི་རིགས་ལས་ལེགས་པར་རབ་ཏུ་བྱུང་ཞིང་བསྙེན་པར་རྫོགས་པ་སྡེ་སྣོད་གསུམ་ལ་ཐུགས་ལེགས་པར་བྱང་བའི་པཎྜི་ཏ་ཨཱ་ནནྡ་
ཤྲཱིའི་ཞལ་སྔ་ནས། མང་དུ་ཐོས་པའི་ལོ་ཅཱ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས། སྐད་གཉིས་སྨྲ་བ་རྣམས་ཀྱི་གདན་ས་གཙུག་ལག་ཁང་ཆེན་པོ་དཔལ་ཐར་པ་གླིང་དུ་བསྒྱུར་ཅིང་ཞུས་ཏེ། གཏན་ལ་ཕབ་པའོ།། །།