79-1-1a

༼ཁ༽ ༄༅། ༈ །འཕགས་པ་དཀོན་མཆོག་བརྩེགས་པ་བཞུགས་སོ། །
(黃)  大寶積經第二部

79-1-1b

འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་
ཕྲག་བརྒྱ་པ་ལས་ལེའུ་དྲུག་པ་སྟེ། དེ་བཞིན་གཤེགས་པ་མི་འཁྲུགས་པའི་བཀོད་པ། བམ་
པོ་དང་པོ། རྒྱ་གར་སྐད་དུ། ཨཱརྱ་ཨཀྵོ་བྷྱ་ཏ་ཐཱ་ག་ཏ་སྱ་བྱཱུ་ཧ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། 
འཕགས་པ་དེ་བཞིན་གཤེགས་པ་མི་འཁྲུགས་པའི་བཀོད་པ་ཞེས་བྱ་བ་ཐེག་པ་ཆེན་པོའི་མདོ། །
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་
ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་
ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། ཐམས་ཅད་ཀྱང་
དགྲ་བཅོམ་པ། །ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་

79-1-2a

ཤིན་དུ་རྣམ་པར་གྲོལ་བ། ཅང་ཤེས་པ་གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་དུ་སྦྱོར་བ། ཡོངས་སུ་ཟད་པ། 
ཡང་དག་པའི་ཤེས་པས་སེམས་ཤིན་དུ་རྣམ་པར་གྲོལ་བ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་དུ་སོན་པ་ཤ་སྟག་སྟེ། གང་ཟག་གཅིག་མ་གཏོགས་པ་ནི་འདི་ལྟར་སློབ་པ་རྒྱུན་དུ་ཞུགས་པ་ཚེ་དང་ལྡན་
བ་ཀུན་དགའ་བོའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རབ་དུ་མང་པོ་དག་དང་། རྒྱལ་པོ་ཆེན་པོ་བཞི་དང་། ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དང་། དེ་དག་ལས་
གཞན་པ་གཟི་བརྗིད་ཆེ་བའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་ཀྱིས་ཡོངས་སུ་བསྐོར་
ཅིང་མདུན་གྱིས་བལྟས་ཏེ་ཆོས་སྟོན་ཏོ། །དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་ཤཱ་ར་དྭ་ཏིའི་བུ་སྟན་ལས་ལངས་ཏེ། ཆོས་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་
ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་སྔོན་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པ་རྣམས་ཀྱི་འཇུག་པ་དང་། སྤྱོད་པ་དང་། སྤྲོ་བ་དང་། སེམས་བསྐྱེད་པ་གང་གིས་སྔོན་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པར་གྱུར་པའི་སེམས་བསྐྱེད་པ་དང་། གོ་ཆ་དང་། ཡོན་ཏན་ཡོངས་སུ་བརྗོད་པ་ལེགས་པར་བཤད་དུ་གསོལ། བཙུན་པ་བཅོམ་ལྡན་འདས་

79-1-2b

སྔོན་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་ལས་དང་། སེམས་བསྐྱེད་པ་དང་། གོ་ཆ་དང་། ཡོན་ཏན་ཡོངས་སུ་བརྗོད་པ་དག་ཀྱང་ལེགས་པར་བཤད་དུ་གསོལ། །བཙུན་པ་
བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ལྷ་དང་བཅས་པའི་འཇིག་རྟེན་གྱི་དོན་དང་། སྨན་པ་དང་། བདེ་བའི་སླད་དུ་བརྩོན་པའི་བྱང་ཆུབ་སེམས་དཔའ་སེམས་དཔའ་ཆེན་
པོ་དེ་ལྟ་བུ་དེ་དག་གི་སྤྱོད་པ་དང་། ཡོན་ཏན་ཡོངས་སུ་དག་པ་ཡོངས་སུ་བརྗོད་པ་དག་ཀྱང་བཤད་དུ་གསོལ། དེ་ནི་སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། 
སྐྱེ་བོ་ཕལ་པོ་ཆེ་དང་། ལྷ་དང་མི་རྣམས་ཀྱི་དོན་དང་། སྨན་པ་དང་། བདེ་བར་འགྱུར་ལ། ད་ལྟར་དང་། མ་འོངས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཡང་འདི་ལྟར་ཆོས་ཀྱི་སྒྲོན་མའི་
སྣང་བ་དང་། འདི་ལྟར་སངས་རྒྱས་ཀྱི་སྣང་བས་སྣང་བ་བགྱིས་པར་འགྱུར་ཞིང་སྤྲོ་བ་སྩལ་བར་ཡང་འགྱུར་རོ། དེ་ལྟ་ལགས་པས་བྱང་ཆུབ་སེམས་དཔའི་ཐེག་པ་པའི་གང་ཟག་རྣམས་ཀྱིས་སྔོན་གྱི་བྱང་ཆུབ་
སེམས་དཔའ་སེམས་དཔའ་ཆེན་པོ་དེ་དག་གི་འཇུག་པ་དང་། སྤྱོད་པ་དང་། སྤྲོ་བ་དང་། སེམས་བསྐྱེད་པ་དང་། གོ་ཆ་དང་། ཡོན་ཏན་ཡོངས་སུ་བརྗོད་པ་དག་ཐོས་ན་དེ་བཞིན་དུ་སློབ་ཅིང་དེ་བཞིན་དུ་སྒྲུབ་པར་
འགྱུར་རོ། །དེ་དག་དེ་ལྟར་བསླབས་ཤིང་དེ་ལྟར་བསྒྲུབས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ཞིང་ཡོན་ཏན་དེ་ལྟ་བུ་དག་དང་ལྡན་པར་གྱུར་ནས་ཀྱང་སླར་ཞིང་
གོང་ནས་གོང་དུ་ཡོན་ཏན་ཤིན་དུ་ཁྱད་པར་ཅན་དག་ཀྱང་ཐོབ་པར་འགྱུར་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །

79-1-3a

ཤཱ་ར་དྭ་ཏིའི་བུ་ལེགས་སོ་ལེགས་སོ། །ཤཱ་ར་དྭ་ཏིའི་བུ་ཁྱོད་མ་འོངས་པའི་དུས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡོངས་སུ་གཟུང་བའི་ཕྱིར་ཞུགས་ཏེ། འདས་པའི་བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་ཀྱི་འཇུག་པ་དང་། སྤྱོད་པ་དང་། སྤྲོ་བ་དང་། སེམས་བསྐྱེད་པ་དང་། གོ་ཆ་དང་། ཡོན་ཏན་ཡོངས་སུ་བརྗོད་པ་དག་འདྲི་བར་སེམས་པ་ནི་ཡང་ཁྱོད་ལེགས་སོ། །ཤཱ་ར་དྭ་ཏིའི་བུ་དེའི་ཕྱིར་
ལེགས་པར་རབ་ཏུ་ཉོན་ལ་ཚུལ་བཞིན་དུ་ཡིད་ལ་ཟུང་ཤིག་དང་། འདི་ལྟ་སྟེ། འདས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལས་བརྩམས་ཏེ་བཤད་པར་བྱའོ། །ཚེ་དང་ལྡན་པ་ཤཱ་ར་དྭ་ཏིའི་བུས་བཅོམ་ལྡན་འདས་
དེ་དེ་བཞིན་ནོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་འཇིག་རྟེན་གྱི་ཁམས་མངོན་པར་དགའ་བ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་ཞེས་བྱ་བ་བཞུགས་ཤིང་འཚོ་ལ་གཞེས་ཏེ། དེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་འདི་ལྟར་ཕ་རོལ་ཏུ་ཕྱིན་པ་དྲུག་ལས་བརྩམས་ཏེ་ཆོས་
སྟོན་ཏོ། །དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུ་འདི་སྙམ་དུ་སེམས་ཏེ། བདག་གིས་འཇིག་རྟེན་གྱི་ཁམས་མངོན་པར་དགའ་བ་ཞེས་བགྱི་བ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་
པོ་ཞེས་བགྱི་བ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་འདི་ལྟར་ཕ་རོལ་ཏུ་ཕྱིན་པ་དྲུག་ལས་རྩམས་ཏེ་ཆོས་སྟོན་པ་དེ་ཕྱོགས་གང་ན་བཞུགས་ཤེས་དོན་དེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ལ་ངེས་པར་ཞུའོ་སྙམ་མོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུའི་སེམས་ཀྱི་ཡོངས་སུ་རྟོག་པ་ཐུགས་ཀྱིས་མཁྱེན་ནས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་

79-1-3b

བཀའ་སྩལ་ཏོ། །ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་སྟོང་ཐམ་པ་ན། འཇིག་རྟེན་གྱི་ཁམས་མངོན་པར་དགའ་བ་ཞེས་བྱ་བ་ཡོད་དེ། དེ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་ཞེས་བྱ་བ་བཞུགས་ཤིང་འཚོ་ལ་གཞེས་ཏེ། དེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་འདི་ལྟར་ཕ་རོལ་དུ་ཕྱིན་པ་དྲུག་ལས་བརྩམས་ཏེ་ཆོས་སྟོན་ཏོ། །ཤཱ་ར་དྭ་ཏིའི་
བུ་ཡང་དེའི་ཚེ་དེའི་དུས་ན་དགེ་སློང་ཞིག་སྟན་ལས་ལངས་ཏེ། ཆོས་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་སྤྱན་ཆེན་པོ་དེ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེ་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་
འདས་བདག་བྱང་ཆུབ་སེམས་དཔའི་བསླབ་པ་ཇི་ལྟར་བཅས་པ་འདི་ལ་སློབ་པར་འཚལ་ལོ། །དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་
ཆེན་པོ་དེས་དགེ་སློང་དེ་ལ་འདི་སྐད་ཅེས་བཀའ་སྩལ་ཏོ། །དགེ་སློང་བྱང་ཆུབ་སེམས་དཔའི་བསླབ་པ་ཇི་ལྟར་བཅས་པ་ལ་དེང་སང་བསླབ་པར་ཤིན་དུ་དཀའོ། །དེ་ཅིའི་ཕྱིར་ཞེ་ན། དགེ་སློང་འདི་ལྟར་བྱང་ཆུབ་སེམས་དཔའ་
སེམས་ཅན་ཐམས་ཅད་ལ་མི་འཁྲུགས་པར་བྱ་བ་དང་། གནོད་སེམས་ཅན་གྱི་སེམས་མི་བསྐྱེད་པར་བྱ་བའི་ཕྱིར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་དེ་བཞིན་གཤེགས་པ་སྤྱན་ཆེན་པོ་དེ་ལ་དགེ་
སློང་དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་དེང་སླན་ཆད་འདི་ལྟར་གཡོ་མ་མཆིས་པ་དང་། སྒྱུ་མ་མཆིས་པའི་ཚིག་དང་། གཞན་དུ་མི་འགྱུར་བའི་ཚིག་གིས་བླ་ན་མེད་པ་ཡང་དག་པར་རྫོགས་པའི་

79-1-4a

བྱང་ཆུབ་ཏུ་སེམས་བསྐྱེད་པར་བགྱི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་འདུད་པར་བགྱི། ཡོངས་སུ་བསྔོ་བར་ཡང་བགྱིའོ། །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་
སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་ཡོངས་སུ་བསྔོས་ལ་འདི་ནས་བཟུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
སངས་མ་རྒྱས་ཀྱི་བར་དུ་གལ་ཏེ་སེམས་ཅན་འགའ་ཙམ་ལ་ཁྲོ་བའམ། གནོད་སེམས་སམ། འཁྲུག་པ་དང་ལྡན་པའི་སེམས་བསྐྱེད་པར་གྱུར་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་
མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་
ཅིག །བཙུན་པ་བཅོམ་ལྡན་འདས་དེ་ལྟར་ཐམས་ཅད་མཁྱེན་པའི་སེམས་བསྐྱེད་པའི་རིན་པོ་ཆེ་འདི་བསྐྱེད་དེ། དེ་ལྟར་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་ཡོངས་སུ་བསྔོས་ལ་འདི་ནས་བཟུང་སྟེ། 
བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་གོམ་པ་འདོར་བ་རེ་རེ་ལ་ཐམས་ཅད་མཁྱེན་པའི་སེམས་དང་བྲལ་བར་གྱུར་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་
མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་
ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆབ་ཏུ་བསྔོས་

79-1-4b

ཤིང་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་ཉན་ཐོས་ཀྱི་སེམས་སམ་རང་སངས་རྒྱས་ཀྱི་སེམས་བསྐྱེད་པར་གྱུར་ན་བདག་གིས་ཕྱོགས་བཅུ་ཀུན་གྱི་
འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པའི་
སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་
ཤིང་ཡོངས་སུ་བསྔོས་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་འདོད་པའི་འདོད་ཆགས་དང་ལྡན་པའི་སེམས་བསྐྱེད་པར་གྱུར་ན་བདག་གིས་ཕྱོགས་བཅུ་ཀུན་གྱི་འཇིག་
རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་
སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་
ཤིང་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་འདོད་ཆགས་དང་ལྡན་པའམ། ཞེ་སྡང་དང་ལྡན་པའམ། གཏི་མུག་དང་ལྡན་པའམ་རྣམ་པར་འཚེ་བ་དང་
ལྡན་པའམ། གཉིད་དང་ལྡན་པའམ། རྨུགས་པ་དང་ལྡན་པའམ། འགྱོད་པ་དང་ལྡན་པའམ། རྒོད་པ་དང་ལྡན་པའི་སེམས་བསྐྱེད་པར་གྱུར་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། 

79-1-5a

གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་
དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་། ཡོངས་སུ་བསྔོས་ལ། བླ་
ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་ཐེ་ཚོམ་དང་ལྡན་པའི་སེམས་བསྐྱེད་པར་གྱུར་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་
མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་
པར་གྱུར་ཅིག བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་། ཡོངས་སུ་བསྔོས་ལ། 
བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་སྲོག་གཅོད་པ་དང་ལྡན་པའི་སེམས་བསྐྱེད་པར་གྱུར་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། 
གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་
བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་། ཡོངས་སུ་བསྔོས་

79-1-5b

ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་མ་བྱིན་པར་ལེན་པ་དང་ལྡན་པའམ། མི་ཚངས་པར་སྤྱོད་པ་དང་ལྡན་པའམ། བརྫུན་དུ་སྨྲ་བ་དང་ལྡན་པའམ། ཕྲ་མ་དང་
ལྡན་པའམ། ངག་རྩུབ་པོ་དང་ལྡན་པའམ། ཚིག་ཀྱལ་བར་སྨྲ་བ་དང་ལྡན་པའམ། བརྣབ་སེམས་དང་ལྡན་པའམ། གནོད་སེམས་དང་ལྡན་པའམ། ལོག་པར་ལྟ་བ་དང་ལྡན་པའི་སེམས་བསྐྱེད་པར་གྱུར་ན་བདག་གིས་ཕྱོགས་
བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་
ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག་ཅེས་བྱས་སོ། །ཤཱ་ར་དྭ་ཏིའི་བུ་དེ་ནས་དགེ་སློང་ཞིག་འདི་སྙམ་དུ་སེམས་ཏེ། ཀྱེ་མ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་དང་པོ་སེམས་
བསྐྱེད་པའི་གོ་ཆ་ཆེན་པོ་བགོས་པ་ཉིད་ནས་སེམས་ཅན་ཐམས་ཅད་ལ་སེམས་མི་འཁྲུགས་པ་ནི་ཤིན་དུ་ངོ་མཚར་ཆེའོ། །ཀྱེ་མ་དགེ་སློང་འདི་ནི་མི་འཁྲུགས་པ་ཞེས་བྱ་བར་འགྱུར་ཏེ་ལེགས་སོ་སྙམ་མོ། །ཤཱ་ར་དྭ་ཏིའི་བུ་དེ་ལྟར་དགེ་
སློང་དེའི་མིང་མི་འཁྲུགས་པ་མི་འཁྲུགས་པ་ཞེས་བྱ་བར་གྱུར་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་དགེ་སློང་ལེགས་སོ་ལེགས་སོ། །དགེ་སློང་ཁྱོད་བྱང་ཆུབ་སེམས་དཔའི་
སྤྱད་པ་སྤྱོད་པའི་ཚེ་ན་ཡང་མིང་འདི་ཉིད་དུ་འགྱུར་ལ། དགེ་སློང་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན་ཡང་མཚན་འདི་ལྟ་སྟེ། མི་འཁྲུགས་པ་མི་འཁྲུགས་པ་ཞེས་བྱ་བ་དེ་
ཉིད་དུ་འགྱུར་རོ་ཞེས་དེའི་མིང་དེ་ལ་རྗེས་སུ་ཡི་རང་བ་མཛད་དོ། །རྒྱལ་པོ་ཆེན་པོ་བཞི་དང་། ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པས་ཀྱང་དགེ་སློང་ལེགས་སོ་ལེགས་སོ། །དགེ་སློང་ཁྱོད་བྱང་ཆུབ་སེམས་

79-1-6a

དཔའི་སྤྱད་པ་སྤྱོད་པའི་ཚེ་ན་ཡང་མིང་དེ་ཉིད་དུ་འགྱུར་ལ། དགེ་སློང་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན་ཡང་མཚན་འདི་ལྟ་སྟེ། མི་འཁྲུགས་པ་མི་འཁྲུགས་
པ་ཞེས་བྱ་བ་དེ་ཉིད་དུ་འགྱུར་རོ་ཞེས་དེའི་མིང་དེ་ལ་རྗེས་སུ་ཡི་རང་བར་བྱས་སོ། །ཤཱ་ར་དྭ་ཏིའི་བུ་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེ་ལ་བྱང་ཆུབ་སེམས་
དཔའ་སེམས་དཔའ་ཆེན་པོ་མི་འཁྲུགས་པ་མངོན་དུ་གྱུར་པ་དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་བསྔོས་ཤིང་། ཡོངས་སུ་བསྔོས་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་ཇི་སྐད་སྨྲས་པ་དེ་བཞིན་དུ་མ་བགྱིས་ན་བདག་གིས་ཕྱོགས་བཅུ་ཀུན་གྱི་
འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་
པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་བསྔོས་ཤིང་ཡོངས་སུ་བསྔོས་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་གོམ་པ་འདོར་བ་རེ་རེ་ཙམ་དག་ལ་སངས་རྒྱས་ཡིད་ལ་བགྱིད་པ་དང་ལྡན་པའི་ཐམས་
ཅད་མཁྱེན་པའི་སེམས་མ་བསྐྱེད་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་

79-1-6b

འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་
པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་། ཡོངས་སུ་བསྔོས་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་ཚེ་
རབས་ཚེ་རབས་སུ་ཁྱིམ་ནས་ཁྱིམ་མ་མཆིས་པར་ཡང་དག་པར་རབ་ཏུ་མ་བྱུང་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་
ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་
མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་། ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་
མ་རྒྱས་ཀྱི་བར་དུ་གལ་ཏེ་ཚེ་རབས་ཚེ་རབས་སུ་མངོན་པར་རབ་ཏུ་བྱུང་ནས་ཀྱང་དགོན་པ་པར་མ་གྱུར་ཏམ། བསོད་སྙོམས་པར་མ་གྱུར་ཏམ། ཕྱག་དར་ཁྲོད་པར་མ་གྱུར་ཏམ། སྟན་གཅིག་པར་མ་གྱུར་ཏམ། ཟས་ཕྱིས་
མི་ལེན་པར་མ་གྱུར་ཏམ། ཟས་རྙེད་རྙེད་ལེན་པར་མ་གྱུར་ཏམ། དུར་ཁྲོད་པར་མ་གྱུར་ཏམ། བླ་ཁབ་མེད་པར་མ་གྱུར་ཏམ། ཤིང་དྲུང་པར་མ་གྱུར་ཏམ། ཅོག་པུ་པར་མ་གྱུར་ཏམ། གཞི་ཇི་བཞིན་པར་མ་
གྱུར་ཏམ། ཆོས་གོས་གསུམ་པར་མ་གྱུར་ཏམ། ཕྱིང་པ་པར་མ་གྱུར་ཏམ། འདོད་པ་ཆུང་བར་མ་གྱུར་ཏམ། ཆོག་ཤེས་པར་མ་གྱུར་ཏམ། ཆོས་འདོད་པར་མ་གྱུར་ཏམ། ཆོས་ལ་དགའ་བར་མ་གྱུར་ཏམ། 

79-1-7a

ཆོས་ལ་གུས་པར་མ་གྱུར་ཏམ། ཆོས་ལ་བརྟན་པར་མ་གྱུར་ཏམ། ཆོས་སྟོན་པར་མ་གྱུར་ནས་བསླབ་པ་དང་སྦྱངས་པའི་ཡོན་ཏན་དང་། ཡོ་བྱེད་བསྙུངས་པའི་ཡི་དམ་ཡང་དག་པར་བླང་བ་དག་བླངས་ཏེ་གནས་
པར་མ་གྱུར་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་
ཏེ་འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་མ་གྱུར་གྱི་བར་དུ་གལ་ཏེ་ཚེ་རབས་ཚེ་རབས་སུ་རབ་ཏུ་བྱུང་ནས་ཀྱང་ཆོས་སྟོན་པར་
མ་གྱུར་ཏམ། སྤོབས་པ་ཆགས་པ་མེད་པ་དང་ལྡན་པར་མ་གྱུར་ཏམ། སྤོབས་པ་ཚད་མ་མཆིས་པ་དང་ལྡན་པར་མ་གྱུར་ན། བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་
གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་
ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་སངས་མ་རྒྱས་ཀྱི་བར་དུ་འདི་ལྟར་འགྲེང་བ་དང་། མཆིས་པ་དང་། འཆག་པའི་སྤྱོད་ལམ་གསུམ་མ་གཏོགས་པར་གལ་ཏེ་ཉལ་བར་གྱུར་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་

79-1-7b

མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་
འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་ཡོངས་སུ་
བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་སེམས་ཅན་འགའ་ཙམ་ལ་རྩ་བའི་ལྟུང་བ་འབྱུང་བ་དང་ལྡན་པའམ། རྩ་བའི་ལྟུང་བ་དང་ལྡན་པའི་སེམས་བསྐྱེད་དམ། 
བུད་མེད་དང་ལྡན་པའམ། བརྫུན་དུ་སྨྲ་བ་དང་ལྡན་པའམ། དེ་ལས་གཞན་པ་སྨྲ་བ་བརྗོད་པ་དང་ལྡན་པའམ། གཞན་ལ་གནོད་ཅིང་སྤ་གོང་བ་དང་ལྡན་པའི་སེམས་བསྐྱེད་པར་གྱུར་ན་བདག་གིས་ཕྱོགས་བཅུ་ཀུན་གྱི་འཇིག་
རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་
སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་བསྔོས་ཤིང་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་བུད་མེད་ལ་འདི་ལྟར་མི་རྟག་པའི་རྣམ་པ་འམ། སྡུག་བསྔལ་བའི་རྣམ་
པ་འམ། སྟོང་པ་དང་། བདག་མེད་པའི་རྣམ་པ་འམ། རྣམ་པ་གཞན་དང་གཞན་དག་གིས་ཆོས་སྟོན་པ་ན་ཡན་ལག་ལས་སྐྱེས་པའི་རྣམ་པ་གཞན་དང་། གཞན་དག་ལ་བཟང་བའི་མཚན་མར་བཟུང་ནས་སོའི་ཕྲེང་བ་

79-1-8a

སྟོན་ཏམ། གོད་པར་བགྱིད་དམ། ལག་པ་གཡོབ་པར་བགྱིད་ན་བདག་གིས་ཕྱོགས་བཅུ་ཀུན་གྱི་འཇིགས་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་
པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་
ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་
རྒྱས་ཀྱི་བར་དུ་ཆོས་སྟོན་པ་ན་གལ་ཏེ་ལག་པ་བསྒྱུར་ཅིང་ཆོས་སྟོན་པར་གྱུར་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་
ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་
ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་
གལ་ཏེ་དེ་བཞིན་གཤེགས་པའི་རྗེས་སུ་སྐྲ་དང་ཁ་སྤུ་བྲེགས་པ་སྣོད་དུ་གྱུར་པ་འམ། སྣོད་དུ་མ་གྱུར་པའང་མི་མངའ་སྟེ། དེ་བཞིན་གཤེགས་པའི་རྒྱལ་མཚན་ཆོས་གོས་ངུར་སྨྲིག་འཚལ་བ་དག་མཐོང་ན་དེ་ལ་དེ་བཞིན་གཤེགས་པའི་འདུ་ཤེས་
སམ། དེ་བཞིན་གཤེགས་པའི་མཆོད་རྟེན་གྱི་འདུ་ཤེས་མ་བསྐྱེད་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་

79-1-8b

སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་
པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་བྱང་ཆུབ་སེམས་དཔའ་
གཞན་དག་མཐོང་ན་དེ་དག་ལ་སྟོན་པའི་འདུ་ཤེས་མ་བསྐྱེད་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་
ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་
བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་ཆོས་འཆད་པ་ན་ཆོས་སྟོན་པ་དག་གལ་ཏེ་
མཆིས་ཏེ། ཆོས་མཉན་པར་མ་གྱུར་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་
འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་
པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་དེ་

79-1-9a

བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་མ་གཏོགས་པར་འདི་ལས་ཕྱི་རོལ་དུ་གྱུར་པའི་དགེ་སྦྱོང་དང་། བྲམ་ཟེ་དང་། ལྷ་གཞན་དག་ལ་ཕྱག་བགྱིས་པར་གྱུར་ན་བདག་གིས་
ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་
གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་བསྔོས་ཤིང་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་འདི་ལ་ནི་སྦྱིན་པ་སྩལ་བར་བགྱིའོ། །འདི་ལ་ནི་སྦྱིན་པ་སྩལ་བར་མི་
བགྱིའོ་ཞེས་སེམས་ཅན་ལ་ཐ་དད་དུ་བགྱི་བའི་འདུ་ཤེས་བསྐྱེད་པར་གྱུར་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་
ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་
ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་། ཡོངས་སུ་བསྔོས་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་འདི་ལ་ནི་ཡོན་དབུལ་བར་བགྱིའོ། །འདི་ལ་ནི་ཡོན་དབུལ་བར་མི་བགྱིའོ། །ཞེས་དེ་ལྟ་བུའི་འདུ་ཤེས་བསྐྱེད་པར་གྱུར་ན་བདག་གིས་ཕྱོགས་བཅུ་ཀུན་གྱི་འཇིག་

79-1-9b

རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་
སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག ། བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་བསྔོས་ཤིང་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་འདི་ལ་ནི་དམ་པའི་ཆོས་ཀྱི་སྦྱིན་པ་སྩལ་བར་བགྱིའོ། །འདི་ལ་ནི་སྩལ་བར་
མི་བགྱིའོ་ཞེས་དེ་ལྟ་བུའི་སེམས་བསྐྱེད་པར་གྱུར་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་
རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག ། བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་
པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བསྔོས་ཤིང་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
སངས་མ་རྒྱས་ཀྱི་བར་དུ་གལ་ཏེ་དགུམ་པར་འོས་པའི་སེམས་ཅན་ལ་ལ་ཞིག་ཁྲིད་དེ་མཆིས་པ་མཐོང་ན་དེ་ཡོངས་སུ་ཐར་པར་བགྱི་བའི་སླད་དུ་བདག་གི་ལུས་ཡོངས་སུ་གཏང་བ་མ་བགྱིས་ན་བདག་གིས་ཕྱོགས་བཅུ་ཀུན་
གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་

79-1-10a

ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །ཤཱ་ར་དྭ་ཏིའི་བུ་ཡང་བྱང་ཆུབ་སེམས་དཔའི་སྤྱོད་པ་ལ་ཞུགས་པའི་བྱང་ཆུབ་སེམས་དཔའ་དེས་གལ་ཏེ་དགུམ་པར་འོས་པའི་
སེམས་ཅན་ལ་ལ་ཞིག་ཁྲིད་དེ་མཆིས་པ་མཐོང་ན་དེ་ཡོངས་སུ་ཐར་བར་མ་བགྱིས་ཀྱི་བར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱའོ་ཞེས་སྨྲས་སོ། །ཤཱ་ར་དྭ་ཏིའི་བུ་དེ་ནས་ཡང་
དགེ་སློང་ཞིག་འདི་སྙམ་དུ་སེམས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་འདིས་གང་གི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་དབང་དུ་གྱུར་པ་དང་། ཚད་
མར་གྱུར་པར་འཇོག་པ་དང་། གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་དུ་གྱུར་པ་དང་། ཚད་མར་གྱུར་པར་འཇོག་པ་དེ་ནི་ལྷ་དང་། མི་དང་ལྷ་མ་ཡིན་དུ་བཅས་པའི་འཇིག་རྟེན་གྱི་དབང་
དུ་གྱུར་པ་དང་། ཚད་མར་གྱུར་པར་འགྱུར་རོ་སྙམ་མོ། །ཤཱ་ར་དྭ་ཏིའི་བུ་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་དགེ་སློང་དེའི་སེམས་ཀྱི་ཡོངས་སུ་རྟོག་པ་ཐུགས་ཀྱིས་
མཁྱེན་ནས་དགེ་སློང་དེ་ལ་འདི་སྐད་ཅེས་བཀའ་སྩལ་ཏོ། །དགེ་སློང་དེ་དེ་བཞིན་ནོ། །ཇི་ལྟར་ཁྱོད་རྣམ་པར་རྟོག་པ་དེ་བཞིན་ཏེ། དགེ་སློང་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་
དབང་དུ་གྱུར་པ་དང་། ཚད་མར་གྱུར་པར་འཇོག་པ་དེ་ཡང་རིང་པོ་མི་ཐོགས་པར་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱི་དབང་དུ་གྱུར་པ་དང་། ཚད་མར་གྱུར་པར་འགྱུར་རོ། །དགེ་སློང་གཞན་ཡང་བྱང་ཆུབ་
སེམས་དཔའ་སེམས་དཔའ་ཆེན་པོ་གང་དག་གོ་ཆ་ཆེན་པོ་དེ་ལྟ་བུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་

79-1-10b

པར་འཚང་རྒྱ་བར་འགྱུར་རོ། །ཤཱ་ར་དྭ་ཏིའི་བུ་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེས་འདི་སྐད་ཅེས་
གསོལ་ཏོ། །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་ཡོངས་སུ་བསྔོས་ལ་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལྟུང་བའི་ནོངས་པ་བྱུང་བ་དག་མཐོང་ན་ཁྱོད་ལ་ལྟུང་བའི་ཉེས་པ་འདི་བྱུང་
ངོ་ཞེས་ལྟུང་བ་གླེངས་པར་གྱུར་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་
འདས་གང་དག་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་ཅི་ནས་ཀྱང་བདག་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེ་ན་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་ཉན་ཐོས་རྣམས་ཀྱི་ལྟུང་བའི་སྒྲ་ཙམ་ཡང་མི་གྲག་ཅིང་མི་འབྱུང་བ་དེ་ལྟར་བདག་གིས་
བཙལ་ཞིང་བསྒྲུབ་པར་བགྱིའོ། །ཅི་ནས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེ་ཡོངས་སུ་དག་པར་འགྱུར་བ་དང་། ཡོན་ཏན་ཡོངས་སུ་རྫོགས་
པ་ཇི་སྙེད་པ་དག་ཡོངས་སུ་འཛིན་པར་འགྱུར་བ་དེ་ལྟར་བཙལ་བར་བགྱིའོ། །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་

79-1-11a

དག་པར་རྫོགས་པའི་བྱང་ཆུབ་ཏུ་བསྔོས་ཤིང་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་ཐ་ན་གཡར་ལམ་ཙམ་དུ་ཁུ་བ་ཕྱུང་
བར་གྱུར་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་
བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་ཅི་ནས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེར་བྱང་ཆུབ་སེམས་དཔའི་ཐེག་པ་པ་དང་། ཉན་ཐོས་ཀྱི་ཐེག་པ་པའི་རིགས་ཀྱི་བུ་འམ། རིགས་ཀྱི་བུ་མོ་གང་དག་ཁྱིམ་གྱི་གནས་ནས་ངེས་པར་བྱུང་ཞིང་རབ་ཏུ་བྱུང་བར་
གྱུར་པ་དག་ཐ་ན་གཡར་ལམ་ན་ཡང་ཁུ་བ་མི་འབྱིན་པ་དེ་ལྟར་བདག་གིས་བཙལ་ཞིང་བསྒྲུབ་པར་བགྱིའོ། །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་བསྔོས་ཤིང་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་འཚང་རྒྱ་བའི་སངས་རྒྱས་ཀྱི་ཞིང་དུ་ད་ལྟར་གྱི་བུད་མེད་དང་། བུད་མེད་ཀྱི་སྐྱོན་གང་ལགས་པའི་བུད་མེད་དང་། བུད་མེད་ཀྱི་སྐྱོན་དེ་ལྟ་བུ་དག་འབྱུང་བར་འགྱུར་ན་བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་འཚང་རྒྱ་བར་མི་འགྱུར་ཞིང་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་

79-1-11b

ལྡན་འདས་གང་དག་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །བཙུན་པ་བཅོམ་ལྡན་འདས་བདག་དེ་ལྟར་ཐམས་ཅད་མཁྱེན་པའི་སེམས་བསྐྱེད་པ་རིན་པོ་
ཆེ་འདི་བསྐྱེད་དེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་ཤིང་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་གལ་ཏེ་ཇི་སྐད་སྨྲས་པ་དེ་བཞིན་
དུ་མ་བགྱིས་ན་བདག་གིས་ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས། བསམ་གྱིས་མི་ཁྱབ། གཞལ་དུ་མ་མཆིས་པ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ད་ལྟར་
བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག །ས་བོན་གྱི་ཆོས་འདི་དང་ལྡན་པའི་བྱང་ཆུབ་སེམས་དཔའ་དག་ནི་ཇི་ལྟ་ཇི་ལྟར་སེམས་མངོན་པར་སྒྲུབ་པར་
འགྱུར་བ་དེ་ལྟ་དེ་ལྟར་སངས་རྒྱས་ཀྱི་ཆོས་རྣམས་མངོན་པར་འགྲུབ་ཅིང་དེ་ལྟ་དེ་ལྟར་ཆོས་སྟོན་པར་ཡང་འགྱུར་རོ་ཞེས་གསོལ་ཏོ། །ཤཱ་ར་དྭ་ཏིའི་བུ་དེ་ནས་དགེ་སློང་ཞིག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་མི་
འཁྲུགས་པ་དེ་ལ་འདི་སྐད་ཅེས་སྨྲས་སོ། །སྐྱེས་བུ་དམ་པ་ཁྱོད་ཀྱིས་དམ་བཅས་པ་འདི་གལ་ཏེ་ཡང་དག་པའི་སྨོན་ལམ་ཡིན་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བའི་ཡང་དག་
པ་ཡིན་ན་བདེན་པ་དང་། བདེན་པའི་ཚིག་འདིས་རྐང་པ་གཡས་པའི་མཐེ་བོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ས་ཆེན་པོ་འདི་གཡོ་བ་དང་། རབ་ཏུ་གཡོ་བ་དང་། ཀུན་དུ་རབ་ཏུ་གཡོ་བ་དང་། འགུལ་
བ་དང་། རབ་ཏུ་འགུལ་བ་དང་། ཀུན་དུ་རབ་ཏུ་འགུལ་བ་དང་། ལྡེག་པ་དང་། རབ་ཏུ་ལྡེག་པ་དང་། ཀུན་དུ་རབ་ཏུ་ལྡེག་པར་བྱོས་ཤིག །ཤཱ་ར་དྭ་ཏིའི་བུ་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་

79-1-12a

པ་དེས་དེའི་ཚེ་སངས་རྒྱས་ཀྱི་མཐུ་དང་། རང་གིས་བདེན་པའི་དམ་བཅས་པའི་དགེ་བའི་རྩ་བའི་སྟོབས་བསྐྱེད་པ་དེས་རྐང་པ་གཡས་པའི་མཐེ་བོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ས་
ཆེན་པོ་འདི་རྣམ་པ་དྲུག་ཏུ་གཡོས་པར་བྱས་ཏེ། གཡོས་རབ་ཏུ་གཡོས། ཀུན་དུ་རབ་ཏུ་གཡོས། འགུལ་རབ་ཏུ་འགུལ། ཀུན་དུ་རབ་ཏུ་འགུལ། ལྡེག་རབ་ཏུ་ལྡེག །ཀུན་དུ་རབ་ཏུ་ལྡེག་པར་བྱས་སོ། །ཤཱ་ར་དྭ་ཏིའི་བུ་དེ་ལྟར་ན་བྱང་ཆུབ་
སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་ནི་ཇི་སྐད་སྨྲས་པ་དེ་བཞིན་ཏུ་བྱེད་པར་གྱུར་པ་ཡིན་ནོ། །ཤཱ་ར་དྭ་ཏིའི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེའི་སྤྱོད་པའི་རྗེས་སུ་བསླབ་པར་བྱའོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་
ཆེན་པོ་མི་འཁྲུགས་པའི་རྗེས་སུ་སློབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་འདྲ་བ་ཁོ་ནའི་སངས་རྒྱས་ཀྱི་ཞིང་ཡོངས་སུ་འཛིན་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་འཚང་རྒྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་དང་པོ་
སེམས་བསྐྱེད་པ་ལ་ཡང་དག་པར་ཞུགས་པ་ན་ལྷའི་རིས་ཇི་སྙེད་ཅིག་འདུས་པར་གྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་
དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་དང་པོ་སེམས་བསྐྱེད་པ་ལ་ཡང་དག་པར་ཞུགས་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྒྱལ་པོ་ཆེན་པོ་བཞི་དང་། 

79-1-12b

ལྷའི་དབང་པོ་བརྒྱ་བྱིན་དང་། བདུད་སྡིག་ཅན་དང་། མི་མཇེད་ཀྱི་བདག་པོ་ཚངས་པ་དང་། འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷའི་བུ་ཇི་སྙེད་པ་དེ་དག་ཐམས་ཅད་འདུས་ནས་ཐལ་མོ་སྦྱར་ཏེ། ཕྱག་འཚལ་
ཞིང་ཚིག་འདི་སྐད་ཅེས་ཀྱེ་མ་སྔོན་མ་ཐོས་པའི་སེང་གེའི་སྒྲ་ཆེན་པོ་འདིའང་བྱང་ཆུབ་སེམས་དཔའ་སེམས་ཆེན་པོ་མི་འཁྲུགས་པ་འདིས་བསྒྲགས་པ་ལས་ཐོས་སོ་ཞེས་སྨྲས་སོ། །ཤཱ་ར་དྭ་ཏིའི་བུ་དེ་ནས་ལྷའི་བུ་དེ་དག་
དགའ་བ་དང་། ཡིད་བདེ་བ་སྐྱེས་ནས་ཁ་འཐུན་པར་འདི་སྐད་ཅེས་ཀྱང་གསོལ་ཏོ། །བཙུན་པ་བཅོམ་ལྡན་འདས་སེམས་ཅན་གང་དག་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་འདི་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེར་སྐྱེ་བར་འགྱུར་བ་དེ་དག་ནི་དགེ་བའི་རྩ་བ་ངན་ངོན་དང་ལྡན་པ་མ་ལགས་སོ། །སེམས་ཅན་གང་དག་གིས་སེང་གེའི་སྒྲ་
ཆེན་པོ་དང་། ཁྱུ་མཆོག་གི་མི་འཇིགས་པ་ཆེན་པོ་དང་། སྨོན་ལམ་ཆེན་པོའི་ཆོས་ཀྱི་རྣམ་གྲངས་འདི་ཐོས་པ་དེ་དག་ཀྱང་དགེ་བའི་རྩ་བ་ངན་ངོན་དང་ལྡན་པ་མ་ལགས་སོ་ཞེས་གསོལ་ཏོ། །དེ་སྐད་ཅེས་བཀའ་སྩལ་
པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེའི་གོ་ཆ་ཆེན་པོ་ཅི་འདྲ་བ་གང་དེ་བཞིན་
གཤེགས་པས་ཡོངས་སུ་བརྗོད་པའི་གོ་ཆ་དེ་ལྟ་བུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་ལ་མཆིས་པར་བདག་གིས་སྔོན་ཆད་མ་ཐོས་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་
ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་དེ་དེ་བཞིན་ནོ། །དེ་དེ་བཞིན་ཏེ། ཇི་སྐད་སྨྲས་པ་བཞིན་ནོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་མི་

79-1-13a

འཁྲུགས་པ་དེས་གོ་ཆ་ཆེན་པོ་གང་བགོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པའི་སྨོན་ལམ་ཆེན་པོ་དེ་དང་། གོ་ཆ་ཆེན་པོ་དེ་བགོས་ནས་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་དེ་ལྟ་བུ་ནི་བྱང་ཆུབ་སེམས་དཔའ་བརྒྱ་ཕྲག་མང་པོ་དང་། བྱང་ཆུབ་སེམས་དཔའ་སྟོང་ཕྲག་མང་པོ་དང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་
སྟོང་ཕྲག་མང་པོ་དག་གི་ནང་ན་ཡང་ཉུང་སྟེ། ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་ཡོན་ཏན་གང་དག་དང་ལྡན་པའི་ཡོན་ཏན་དེ་དག་ནི་བསྐལ་པ་བཟང་པོའི་བྱང་ཆུབ་སེམས་དཔའ་
ཐམས་ཅད་ལ་ཡང་མེད་དོ། །ཤཱ་ར་དྭ་ཏིའི་བུ་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་ལ་རིགས་ཀྱི་
བུ་ཁྱོད་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་
ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་མི་འཁྲུགས་པ་ཞེས་བྱ་བར་འགྱུར་རོ་ཞེས་ལུང་བསྟེན་ཏེ། ཤཱ་ར་དྭ་ཏིའི་བུ་དཔེར་ན་དེ་བཞིན་གཤེགས་པ་མར་མེ་མཛད་ཀྱིས་ང་ད་ལྟར་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་འགྱུར་རོ་ཞེས་ལུང་བསྟན་པ་བཞིན་ནོ། །ཤཱ་ར་དྭ་ཏིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་བྱང་ཆུབ་སེམས་དཔའ་སེམས་
དཔའ་ཆེན་པོ་མི་འཁྲུགས་པ་དེ་བླ་ན་མེད་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་སྣང་བ་ཆེན་པོས་ཁྱབ་པར་གྱུར་ཅིང་། 

79-1-13b

ས་ཆེན་པོ་དེ་ཡང་རྣམ་པ་དྲུག་ཏུ་གཡོས་པར་གྱུར་ཏེ། འདི་ལྟར་གཡོས། རབ་ཏུ་གཡོས། ཀུན་དུ་རབ་ཏུ་གཡོས། འགུལ་རབ་ཏུ་འགུལ། ཀུན་དུ་རབ་ཏུ་འགུལ། ལྡེག་རབ་ཏུ་ལྡེག །ཀུན་དུ་རབ་ཏུ་ལྡེག་པར་གྱུར་ཏེ། ཤཱ་ར་དྭ་
ཏིའི་བུ་དཔེར་ན་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཐམས་ཅད་མཁྱེན་པའི་ཡེ་ཤེས་བརྙེས་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་
སྣང་བ་ཆེན་པོས་ཁྱབ་པར་གྱུར་ཅིང་ས་ཆེན་པོ་འདི་ཡང་རྣམ་པ་དྲུག་ཏུ་གཡོས་པར་གྱུར་ཏེ། འདི་ལྟར་གཡོས། རབ་ཏུ་གཡོས། ཀུན་དུ་རབ་ཏུ་གཡོས། འགུལ། རབ་ཏུ་འགུལ། ཀུན་དུ་རབ་ཏུ་འགུལ། ལྡེག །རབ་ཏུ་ལྡེག །ཀུན་དུ་
རབ་ཏུ་ལྡེག་པར་གྱུར་པ་བཞིན་ནོ། །ཤཱ་ར་དྭ་ཏིའི་བུ་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ན་ཤིང་ལྗོན་པ་དང་། རྩྭ་དང་། ཤིང་གེལ་པ་དང་། སྨན་དང་། ནགས་ཚལ་གང་དག་ཡོད་པ་དེ་དག་ཐམས་ཅད་
ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་ལུང་བསྟན་པ་ག་ལ་བ་དེ་ལོགས་སུ་བཏུད། རབ་ཏུ་བཏུད། མངོན་པར་རབ་ཏུ་བཏུད་པར་གྱུར་ཏེ། ཤཱ་ར་དྭ་ཏིའི་བུ་དཔེར་ན་ངས་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཐམས་ཅད་མཁྱེན་པའི་ཡེ་ཤེས་བརྙེས་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ཤིང་ལྗོན་པ་དང་། རྩྭ་དང་། ཤིང་གེལ་པ་དང་། སྨན་
དང་། ནགས་ཚལ་གང་དག་ཡོད་པ་དེ་དག་ཐམས་ཅད་ཀྱིས་ང་ག་ལ་བ་དེ་ལོགས་སུ་བཏུད་རབ་ཏུ་བཏུད། མངོན་པར་རབ་ཏུ་བཏུད་པར་གྱུར་པ་བཞིན་ནོ། །ཤཱ་ར་དྭ་ཏིའི་བུ་གཞན་ཡང་དེ་བཞིན་གཤེགས་པ་དགྲ་བཅོམ་

79-1-14a

པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ན་སྟོང་གསུམ་གྱི་སྟོང་ཆེན་པོའི་འཇིག་
རྟེན་གྱི་ཁམས་དེ་ན་ལྷ་དང་། ཀླུ་དང་། གནོད་སྦྱིན་དང་དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པའི་འཇིག་རྟེན་གང་དག་འཁོད་པ་དེ་དག་ཐམས་ཅད་ཀྱིས་བྱང་
ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་ལུང་བསྟན་པ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཕྱག་འཚལ་ཞིང་འདུག་པར་གྱུར་ཏེ། ཤཱ་ར་དྭ་ཏིའི་བུ་དཔེར་ན་ངས་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་མངོན་པར་རྫོགས་པར་སངས་རྒྱས་ཏེ། ཐམས་ཅད་མཁྱེན་པའི་ཡེ་ཤེས་བརྙེས་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། 
ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པའི་འཇིག་རྟེན་ན་གང་དག་འཁོད་པ་དེ་དག་ཐམས་ཅད་ཀྱིས་ང་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཕྱག་འཚལ་ཞིང་འདུག་པར་གྱུར་པ་
བཞིན་ནོ། །ཤཱ་ར་དྭ་ཏིའི་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་ལུང་བསྟན་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ན་བུད་མེད་སྦྲུམ་མར་གྱུར་པ་དེ་དག་ཐམས་ཅད་ཀྱང་དེའི་ཚེ་བདེ་ཞིང་བཀྲ་ཤིས་པར་བཙས་པར་གྱུར་ཏོ། །སེམས་ཅན་གང་དག་ལོང་
བར་གྱུར་པ་དེ་དག་ཀྱང་མིག་གིས་གཟུགས་མཐོང་བར་གྱུར་ཏོ། །སེམས་ཅན་འོན་པ་རྣམས་ཀྱང་རྣ་བས་སྒྲ་ཐོས་པར་གྱུར་ཏོ། །སེམས་ཅན་སྨྱོན་པ་རྣམས་ཀྱང་དྲན་པ་རྙེད་པར་གྱུར་ཏོ། །སེམས་ཅན་དབང་པོ་མ་ཚང་བ་

79-1-14b

རྣམས་ཀྱང་དབང་པོ་ཐམས་ཅད་དང་ལྡན་པར་གྱུར་ཏེ། ཤཱ་ར་དྭ་ཏིའི་བུ་དཔེར་ན་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཐམས་ཅད་མཁྱེན་པའི་ཡེ་ཤེས་བརྙེས་པ་ན་སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་བུད་མེད་སྦྲུམ་མར་གྱུར་པ་དེ་དག་ཐམས་ཅད་ཀྱང་དེའི་ཚེ་བདེ་ཞིང་བཀྲ་ཤིས་པར་བཙས་པར་གྱུར། སེམས་ཅན་ལོང་བ་རྣམས་ཀྱང་མིག་གིས་གཟུགས་མཐོང་བར་གྱུར། སེམས་
ཅན་འོན་པ་རྣམས་ཀྱང་རྣ་བས་སྒྲ་ཐོས་པར་གྱུར། སེམས་ཅན་སྨྱོན་པ་རྣམས་ཀྱང་དྲན་པ་རྙེད་པར་གྱུར། སེམས་ཅན་དབང་པོ་མ་ཚང་བ་རྣམས་ཀྱང་དབང་པོ་ཐམས་ཅད་དང་ལྡན་པར་གྱུར་པ་བཞིན་ནོ། །ཤཱ་ར་དྭ་ཏིའི་བུ་གཞན་
ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་
ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ན་དེའི་ཚེ་སེམས་ཅན་འགའ་ཙམ་ཡང་གཤིས་ངན་དུ་འཆི་བའི་དུས་བྱེད་པར་གྱུར་པ་མེད་དེ། ཤཱ་ར་དྭ་ཏིའི་བུ་དཔེར་ན་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་སངས་རྒྱས་ཏེ། ཐམས་ཅད་མཁྱེན་པའི་ཡེ་ཤེས་བརྙེས་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་དེའི་ཚེ་སེམས་ཅན་འགའ་ཙམ་ཡང་གཤིས་ངན་དུ་འཆི་བའི་དུས་བྱེད་པར་གྱུར་པ་མེད་པ་བཞིན་ནོ། །
ཤཱ་ར་དྭ་ཏིའི་བུ་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་ལུང་བསྟན་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེར་ལྷའི་དྲི་བསུང་ཡིད་དུ་འོང་བ་དག་བྱུང་བར་གྱུར་ཏོ། །ཤཱ་ར་དྭ་ཏིའི་བུ་དཔེར་ན་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་

79-1-15a

པར་སངས་རྒྱས་ཏེ། ཐམས་ཅད་མཁྱེན་པའི་ཡེ་ཤེས་བརྙེས་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་ལྷའི་དྲི་བསུང་ཡིད་དུ་འོང་བ་དག་བྱུང་བར་གྱུར་པ་བཞིན་ནོ། །དེ་སྐད་ཅེས་བཀའ་
སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱེ་མ་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་ནི་དེ་ལྟར་ལུང་བསྟན་པ་
ཉིད་ན་ཡོན་ཏན་དེ་ལྟ་བུ་དག་དང་ལྡན་པར་གྱུར་པ་ལས་ནི་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་ནི་ཡོན་ཏན་གྱི་ཆོས་ཆེན་པོ་དང་ལྡན་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་
འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་བྱང་ཆུབ་སེམས་
དཔའ་སེམས་དཔའ་ཆེན་པོ་མི་འཁྲུགས་པ་དེ་ལུང་བསྟན་པ་ན་ཡོན་ཏན་བརྗོད་པ་དེ་དག་ཉི་ཚེར་ཡང་མ་ཟད་དེ། ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་ནི་ཡོན་ཏན་མཐའ་ཡས་
པ་གཞན་དག་གི་ཕ་རོལ་དུ་ཕྱིན་པར་གྱུར་པ་ཡང་ཡིན་ནོ། །ཤཱ་ར་དྭ་ཏིའི་བུ་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་བྱང་ཆུབ་སེམས་དཔའ་སེམས་དཔའ་
ཆེན་པོ་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ལྷ་དང་། མི་དང་། ལྷ་མ་ཡིན་དུ་བཅས་པ་གང་དག་འཁོད་པ་དེ་དག་
ཐམས་ཅད་སེམས་དགའ་བ་དང་། སེམས་ཀྱི་ཉམས་བདེ་བར་གྱུར་ཏེ། ཤཱ་ར་དྭ་ཏིའི་བུ་དཔེར་ན་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཐམས་ཅད་མཁྱེན་པའི་ཡེ་

79-1-15b

ཤེས་བརྙེས་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ལྷ་དང་། མི་དང་། ལྷ་མ་ཡིན་དུ་བཅས་པ་གང་དག་འཁོད་པ་དེ་དག་ཐམས་ཅད་སེམས་དགའ་བ་དང་། སེམས་ཀྱི་ཉམས་བདེ་བར་གྱུར་པ་བཞིན་ནོ། །ཤཱ་ར་
དྭ་ཏིའི་བུ་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་ལུང་བསྟན་པ་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་གནོད་སྦྱིན་གྱི་བདག་པོ་ལག་ན་རྡོ་རྗེ་གང་དག་འཁོད་པ་དེ་དག་ཐམས་ཅད་དེའི་ཕྱི་བཞིན་དུ་འབྲང་བར་གྱུར་ཏེ། ཤཱ་ར་དྭ་ཏིའི་བུ་དཔེར་ན་ངས་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཐམས་ཅད་མཁྱེན་པའི་ཡེ་ཤེས་བརྙེས་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་གནོད་སྦྱིན་གྱི་བདག་པོ་ལག་ན་
རྡོ་རྗེ་གང་དག་འཁོད་པ་དེ་དག་ཐམས་ཅད་ངའི་ཕྱི་བཞིན་དུ་འབྲང་བར་གྱུར་པ་བཞིན་ནོ། །ཤཱ་ར་དྭ་ཏིའི་བུ་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་བྱང་ཆུབ་
སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ལྷ་དང་། ཀླུ་དང་། གནོད་སྦྱིན་
དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་གང་དག་འཁོད་པ་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་ལ་
མཆོད་པ་བྱ་བའི་ཕྱིར་ལྷའི་མེ་ཏོག་དང་། སྤོས་དང་། བདུག་པ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་ག་ལ་བ་དེ་ལོགས་སུ་གཏོར། རབ་ཏུ་གཏོར། མངོན་པར་རབ་ཏུ་གཏོར་

79-1-16a

བར་གྱུར་ཏེ། ཤཱ་ར་དྭ་ཏིའི་བུ་དཔེར་ན་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཐམས་ཅད་མཁྱེན་པའི་ཡེ་ཤེས་བརྙེས་པ་ན་སྟོང་གསུམ་གྱི་སྟོང་ཆེན་པོའི་འཇིག་
རྟེན་གྱི་ཁམས་འདི་ན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་གང་དག་འཁོད་པ་དེ་དག་ཐམས་ཅད་ཀྱིས་དེ་ལ་མཆོད་པ་བྱ་བའི་ཕྱིར་ལྷའི་མེ་ཏོག་དང་། 
སྤོས་དང་། བདུག་པ་དག་གིས་ང་ག་ལ་བ་དེ་ལོགས་སུ་གཏོར། །རབ་ཏུ་གཏོར། མངོན་པར་རབ་ཏུ་གཏོར་བར་གྱུར་པ་བཞིན་ནོ། །ཤཱ་ར་དྭ་ཏིའི་བུ་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་སྤྱན་ཆེན་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ན་མི་
བྱེ་བ་ཕྲག་ཉི་ཤུ་དང་། ལྷ་བྱེ་བ་ཕྲག་སུམ་བཅུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་དེ་དག་ཐམས་ཅད་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་སྤྱན་ཆེན་པོ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །ཤཱ་ར་དྭ་ཏིའི་བུ་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་
བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཐམས་ཅད་མེ་ཏོག་ཨུད་པ་
ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དག་གིས་ཀུན་དུ་ཁེབས་པར་གྱུར་ཏེ། ཤཱ་ར་དྭ་ཏིའི་བུ་དཔེར་ན་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། 

79-1-16b

ཐམས་ཅད་མཁྱེན་པའི་ཡེ་ཤེས་བརྙེས་པ་ན་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དག་གིས་བྱང་ཆུབ་ཀྱི་སྙིང་པོ་ཀུན་དུ་ཁེབས་པར་གྱུར་པ་བཞིན་ནོ། །ཤཱ་ར་དྭ་ཏིའི་བུ་གཞན་ཡང་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ན་ལྷ་བྱེ་བ་ཁྲག་ཁྲིག་
བརྒྱ་ཕྲག་དུ་མ་དག་སྟེང་གི་བར་སྣང་ལ་འཁོད་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་ལ་མཆོད་པ་བྱ་བའི་ཕྱིར་ལྷའི་གོས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་བྱང་ཆུབ་སེམས་དཔའ་སེམས་
དཔའ་ཆེན་པོ་མི་འཁྲུགས་པ་ལུང་བསྟན་པ་ག་ལ་བ་དེ་ལོགས་སུ་བོར་ནས་ཚིག་འདི་སྐད་ཅེས་ཀྱེ་མ་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་འདི་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་མངོན་པར་རྫོགས་པར་སངས་རྒྱས་པར་གྱུར་ཅིག་ཅེས་སྨྲས་ཏེ། ཤཱ་ར་དྭ་ཏིའི་བུ་དཔེར་ན་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཐམས་ཅད་མཁྱེན་པའི་
ཡེ་ཤེས་བརྙེས་པ་ན་ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་སྟེང་གི་བར་སྣང་ལ་འཁོད་ནས་ང་ལ་མཆོད་པ་བྱ་བའི་ཕྱིར་ལྷའི་གོས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་ང་ག་ལ་བ་དེ་ལོགས་སུ་བོར་བ་བཞིན་ནོ། །
ཤཱ་ར་དྭ་ཏིའི་བུ་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་ལུང་བསྟན་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེའི་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་དགའ་བར་གྱུར་པ་ཙམ་དུ་ཕ་མ་དག་བུ་ལ་དགའ་བ་མ་

79-1-17a

ཡིན་ཏེ། ཤཱ་ར་དྭ་ཏིའི་བུ་དཔེར་ན་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཐམས་ཅད་མཁྱེན་པའི་ཡེ་ཤེས་བརྙེས་པ་ན་སྟོང་གསུམ་གྱི་སྟོང་ཆེན་པོའི་
འཇིག་རྟེན་གྱི་ཁམས་འདིའི་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་དགའ་བར་གྱུར་བ་ཙམ་དུ་ཕ་མ་དག་བུ་ལ་དགའ་བ་མ་ཡིན་པ་བཞིན་ནོ།། །། བམ་པོ་གཉིས་པ། ཤཱ་ར་དྭ་ཏིའི་བུ་གཞན་
ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་ཆེན་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་
བསྟན་པ་ན་འདི་ལྟར་སངས་རྒྱས་ཀྱི་མཐུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ན་ལྷ་དང་། མི་གང་དག་འཁོད་པ་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་
པ་དེ་ལུང་བསྟན་པ་ཐོས་པར་གྱུར་ཏོ། །དེ་ལ་ལུང་བསྟན་པ་ཐོས་ནས་ཀྱང་འདོད་པའི་ཁམས་ཀྱི་སེམས་ཅན་གང་ཡིན་པ་དེ་དག་སྦྱིན་པ་དག་སྦྱིན་ཞིང་བསོད་ནམས་དག་ཀྱང་བྱེད་དེ། འདི་ལྟ་སྟེ། བཟའ་བ་དང་། 
བཅའ་བ་དང་། མྱང་བ་རྣམ་པ་སྣ་ཚོགས་དག་སྦྱིན་པ་བྱིན་པར་གྱུར་ཏོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་ཟླ་བ་བཞི་པོ་སྟོན་ཟླ་ཐ་ཆུངས་ཀྱི་ཟླ་བ་ཉ་བ་ལ་ཀུ་མུ་དའི་དུས་སྟོན་གྱི་ཚེ་ན་འདོད་པའི་ཁམས་ཀྱི་སེམས་ཅན་
རྣམས་སྦྱིན་པ་དག་སྦྱིན་ཞིང་བསོད་ནམས་དག་བྱེད་དེ། བཟའ་བ་དང་། བཅའ་བ་དང་། མྱང་བ་རྣམ་པ་སྣ་ཚོགས་དག་གི་སྦྱིན་པ་གཏོང་བར་བྱེད་དོ། །ཤཱ་ར་དྭ་ཏིའི་བུ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་སྤྱན་ཆེན་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ན་སྟོང་གསུམ་གྱི་སྟོང་ཆེན་པོའི་

79-1-17b

འཇིག་རྟེན་གྱི་ཁམས་དེའི་འདོད་པའི་ཁམས་ཀྱི་སེམས་ཅན་རྣམས་ཀྱང་སྦྱིན་པ་དག་སྦྱིན་ཞིང་བསོད་ནམས་དག་བྱེད་དེ། བཟའ་བ་དང་། བཅའ་བ་དང་། མྱང་བ་རྣམ་པ་སྣ་ཚོགས་དག་གི་སྦྱིན་པ་བྱེད་པར་གྱུར་ཏོ། །ལྷ་བྱེ་བ་
ཁྲག་ཁྲིག་བརྒྱ་སྟོང་རྣམས་ཀྱིས་ཀྱང་ལྷའི་སིལ་སྙན་བྱེ་བ་ཁྲག་ཁྲིག་བརྒྱ་སྟོང་དག་མངོན་པར་རབ་ཏུ་དཀྲོལ་ནས་ཨ་ལ་ལ་ཞེས་ཅ་ཅོ་དང་། ག་ཞའི་སྒྲ་དག་ཀྱང་ཕྱུང་བར་གྱུར་ཏོ། །ཤཱ་ར་དྭ་ཏིའི་བུ་དེ་ལྟར་བྱང་ཆུབ་སེམས་
དཔའ་སེམས་དཔའ་ཆེན་པོ་མི་འཁྲུགས་པ་དེ་ལུང་བསྟན་པ་ན་དེ་ལྟ་བུའི་ཡོན་ཏན་དག་དང་ལྡན་པར་གྱུར་ཏོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་
ཅེས་གསོལ་ཏོ། །བཙུན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་དེ་བཞིན་གཤེགས་པའི་མཁྱེན་པ་ཞིབ་མོས་འདི་ལྟར་ལེགས་པར་གསུངས་
པ་དེ་དག་ནི་ངོ་མཚར་ཏེ། བཙུན་པ་བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཡུལ་ནི་བསམ་གྱིས་མི་ཁྱབ་ལགས་སོ། །བསམ་གཏན་པ་རྣམས་ཀྱི་བསམ་གཏན་གྱི་ཡུལ་
ཡང་བསམ་གྱིས་མི་ཁྱབ། ཀླུ་རྣམས་ཀྱི་ཀླུའི་ཡུལ་ཡང་བསམ་གྱིས་མི་ཁྱབ། ལས་རྣམས་ཀྱི་ལས་ཀྱི་རྣམ་པར་སྨིན་པ་ཡང་བསམ་གྱིས་མི་ཁྱབ་ལགས་སོ། །བཙུན་པ་བཅོམ་ལྡན་འདས་དེ་ལྟར་བྱང་ཆུབ་
སེམས་དཔའ་སེམས་དཔའ་ཆེན་པོ་མི་འཁྲུགས་པ་དེས་དང་པོ་སེམས་བསྐྱེད་པ་ཉིད་ནས་ཡོན་ཏན་གྱི་ཁྱད་པར་དེ་ལྟ་བུ་དག་ཡོངས་སུ་ཟིན་ཅིང་། བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་
དཔའ་ཆེན་པོ་མི་འཁྲུགས་པ་ཡོན་ཏན་དེ་ལྟ་བུ་དང་ལྡན་པ་དེའི་ལུང་བསྟན་པ་དེ་ཡང་བསམ་གྱིས་མི་ཁྱབ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་

79-1-18a

འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་དེ་དེ་བཞིན་ཏེ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེའི་ལུང་བསྟན་
པ་ནི་བསམ་གྱིས་མི་ཁྱབ་བོ། །དེ་ནས་ཚེ་དང་ལྡན་པ་ཀུན་དགའ་བོས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེའི་
དང་པོ་སེམས་བསྐྱེད་པའི་གོ་ཆའི་ཡོན་ཏན་ཡོངས་སུ་བརྗོད་པ་དེ་དག་ནི་དེ་བཞིན་གཤེགས་པས་ཕྱོགས་ཙམ་ཞིག་མདོར་བསྡུས་ཏེ་གསུངས་པར་ཟད་ཀྱི་རྒྱ་ཆེར་བསྟན་པ་ནི་མ་ཡིན་ནོ། །དེ་སྐད་ཅེས་སྨྲས་པ་དང་། ཚེ་དང་
ལྡན་པ་ཤཱ་ར་དྭ་ཏིའི་བུས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཀུན་དགའ་བོ་དེ་དེ་བཞིན་ཏེ། ཚེ་དང་ལྡན་པ་ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེའི་
དང་པོ་སེམས་བསྐྱེད་པའི་གོ་ཆའི་ཡོན་ཏན་ཡོངས་སུ་བརྗོད་པ་དེ་དག་ནི་དེ་བཞིན་གཤེགས་པས་ཕྱོགས་ཙམ་ཞིག་བསྟན་པ་ཡིན་ནོ། དེ་ཅིའི་ཕྱིར་ཞེ་ན། ཚེ་དང་ལྡན་པ་ཀུན་དགའ་བོ་འདི་ལྟར་བྱང་ཆུབ་སེམས་དཔའ་
སེམས་དཔའ་ཆེན་པོ་མི་འཁྲུགས་པ་དེ་ནི་དང་པོ་སེམས་བསྐྱེད་པའི་གོ་ཆའི་ཡོན་ཏན་བསམ་གྱིས་མི་ཁྱབ་པ་དང་ལྡན་པའི་ཕྱིར་ཏེ། ཚེ་དང་ལྡན་པ་ཀུན་དགའ་བོ་དེའི་ཕྱིར་རྣ་ལྷོགས་ཏེ་ཉོན་ཅིག་དང་། བཅོམ་ལྡན་འདས་
ཀྱིས་རྒྱ་ཆེར་སྟོན་པར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། བཙུན་པ་བཅོམ་ལྡན་འདས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་
མི་འཁྲུགས་པ་དེའི་དང་པོ་སེམས་བསྐྱེད་པའི་གོ་ཆའི་ཡོན་ཏན་དང་། ཕན་ཡོན་མདོར་བསྡུས་ཏེ་བཀའ་སྩལ་ལགས་ན། བཙུན་པ་བཅོམ་ལྡན་འདས་ད་ལྟར་དང་མ་འོངས་པའི་བྱང་ཆུབ་སེམས་དཔའ་རྣམས་

79-1-18b

རྗེས་སུ་གཟུང་བའི་སླད་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེའི་དང་པོ་སེམས་བསྐྱེད་པའི་གོ་
ཆའི་ཡོན་ཏན་ཡོངས་སུ་བརྗོད་པ་དག་ཤིན་དུ་ལེགས་པར་བསྟན་ཅིང་རྒྱ་ཆེར་བཤད་དུ་གསོལ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་
བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེའི་དང་པོ་སེམས་བསྐྱེད་པའི་གོ་ཆའི་ཡོན་ཏན་ཡོངས་སུ་བརྗོད་པ་ནི་བསམ་གྱིས་མི་ཁྱབ་མོད་ཀྱི། ཤཱ་ར་དྭ་ཏིའི་བུ་འོན་ཀྱང་ཕྱོགས་ཙམ་ཞིག་བསྟན་པར་བྱས་དེ་ལེགས་
པར་རབ་ཏུ་ཉོན་ལ་ཚུལ་བཞིན་དུ་ཡིད་ལ་ཟུང་ཤིག་དང་བཤད་པར་བྱའོ། །ཚེ་དང་ལྡན་པ་ཤཱ་ར་དྭ་ཏིའི་བུས་བཙུན་པ་བཅོམ་ལྡན་འདས་དེ་བཞིན་ནོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་
དེ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེས་འདི་སྙམ་དུ་ནམ་མཁའི་ཁམས་ནི་གཞན་དུ་འགྱུར་ཡང་སྲིད་ཀྱི། བདག་གིས་དམ་བཅས་པ་ནི་གཞན་
དུ་མི་འགྱུར་བར་བྱའོ་ཞེས་སེམས་བསྐྱེད་དེ། ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེ་ནི་གོ་ཆ་ཆེན་པོ་དེ་ལྟ་བུའི་གོ་ཆ་བགོས་པར་གྱུར་ཏོ། །ཤཱ་ར་དྭ་ཏིའི་བུ་ཇི་ལྟར་བྱང་ཆུབ་སེམས་དཔའ་
སེམས་དཔའ་ཆེན་པོ་མི་འཁྲུགས་པས་གོ་ཆ་ཆེན་པོ་བགོས་པར་གྱུར་པ་དེ་ལྟ་བུའི་གོ་ཆ་ཆེན་པོ་བགོས་པའི་བྱང་ཆུབ་སེམས་དཔའ་ནི་ངས་བསྐལ་པ་བཟང་པོའི་བྱང་ཆུབ་སེམས་དཔའ་རྣམས་ཀྱི་ནང་ན་གཅིག་ཀྱང་ཡང་
དག་པར་རྗེས་སུ་མ་མཐོང་ངོ་། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་ཏོག་གི་སྤྱོད་པ་གང་ཡིན་པ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པའི་སྤྱོད་པའི་ཆར་

79-1-19a

ཡང་ཉེ་བར་མི་འགྲོ་སྟེ། ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཁྲུགས་པ་དེས་གོ་ཆ་ཆེན་པོ་གང་བགོས་པར་གྱུར་པའི་གོ་ཆ་ཆེན་པོ་དེ་ནི་བྱང་ཆུབ་སེམས་དཔའ་བརྒྱ་ཕྲག་མང་པོ་དང་། བྱང་
ཆུབ་སེམས་དཔའ་སྟོང་ཕྲག་མང་པོ་དང་། བྱང་ཆུབ་སེམས་དཔའ་བརྒྱ་སྟོང་ཕྲག་མང་པོ་དང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དག་ལ་ཡང་མེད་དོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་
ཆེན་པོ་མི་འཁྲུགས་པ་དེས་དེ་ལྟར་བརྟན་པའི་བརྩོན་འགྲུས་ཆེན་པོ་ཡང་དག་པར་བླངས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ཞེས་བྱ་བ་འཇིག་རྟེན་གྱི་ཁམས་མངོན་པར་དགའ་བ་ཞེས་བྱ་བ་ན་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །ཤཱ་ར་དྭ་ཏིའི་བུ་ངས་
མངོན་པར་ཤེས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་གང་གིས་ལག་པའམ། རྐང་པའམ། 
མགོ་འམ། མིག་གམ། ཡན་ལག་དང་། ཉིང་ལག་གང་ཡང་རུང་བ་དག་བསླངས་པ་ན་མ་བྱིན་པ་གང་ཡང་མེད་དོ། །ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་མི་འཁྲུགས་པ་དེས་དང་པོ་སེམས་བསྐྱེད་པ་ནས་བཟུང་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱི་བར་དུ་ནམ་ཡང་གླད་བ་ན་བར་མ་གྱུར། རླུང་ལས་
གྱུར་པའམ། མཁྲིས་པ་ལས་གྱུར་པའམ། བད་ཀན་ལས་གྱུར་པ་འམ། འདུས་པ་ལས་གྱུར་པའི་ནད་ཀྱིས་ཐེབས་པར་མ་གྱུར་ཏེ། ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་

79-1-19b

དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ངོ་མཚར་དང་། རྨད་དུ་བྱུང་པའི་ཆོས་འདི་ཡང་བྱུང་ངོ་། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དེས་ཚེ་རབས་ཐམས་ཅད་དུ་དེ་བཞིན་གཤེགས་པ་རྣམས་མཉེས་པར་བྱས་ཤིང་ཐུགས་བྱུང་བར་མ་བྱས་སོ། །
ཐམས་ཅད་དུ་ཡང་ཚངས་པར་སྤྱོད་པ་སྤྱད་ཅིང་ཐམས་ཅད་དུ་ཡང་འདི་ལྟ་སྟེ། མི་འཁྲུགས་པ་ཞེས་བྱ་བའི་མིང་དེ་ཉིད་དུ་གྱུར་ནས་དེ་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་ཞིང་གང་ན་སངས་རྒྱས་བཅོམ་ལྡན་འདས་
དག་མངོན་སུམ་དུ་བཞུགས་པ་དེ་དང་དེར་སྐྱེས་པར་གྱུར་ཏོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཁང་བཟངས་ཀྱི་སྟེང་ནས་ཁང་བཟངས་ཀྱི་སྟེང་དུ་འགྲོ་
ཡང་རྐང་མཐིལ་གྱིས་ས་ཆེན་པོ་ལ་འགྲོ་བར་མི་བྱེད་དོ། དེ་ཁང་བཟངས་མཆོག་དེ་དག་གི་སྟེང་དུ་འདུག་ནས་འདོད་པའི་ཡོན་ཏན་ལྔ་པོ་དག་གིས་རྩེ་ཞིང་དགའ་ལ་དགའ་མགུར་སྤྱོད་ཅིང་ཚེ་ཟད་པར་འགྱུར་རོ། །ཤཱ་ར་དྭ་
ཏིའི་བུ་དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡང་དེས་ཚེ་རབས་ཐམས་ཅད་དུ་དེ་བཞིན་
གཤེགས་པ་རྣམས་མཉེས་པར་བྱས་ཤིང་ཐུགས་བྱུང་བར་མ་བྱས་སོ། །ཐམས་ཅད་དུ་ཡང་ཚངས་པར་སྤྱོད་པ་སྤྱད་ཅིང་ཐམས་ཅད་དུ་ཡང་འདི་ལྟ་སྟེ། མི་འཁྲུགས་པ་ཞེས་བྱ་བའི་མིང་དེ་ཉིད་དུ་གྱུར་ནས་དེ་སངས་རྒྱས་
ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་ཞིང་གང་ན་སངས་རྒྱས་བཅོམ་ལྡན་འདས་དག་མངོན་སུམ་དུ་བཞུགས་པ་དེ་དང་དེར་སྐྱེས་པར་གྱུར་ཀྱང་རྐང་མཐིལ་གྱིས་སངས་རྒྱས་ཀྱི་ཞིང་དུ་འགྲོ་བར་མི་བྱེད་དོ། །དེ་ཆོས་གང་དང་གང་

79-1-20a

སྟོན་པ་དེ་དང་དེ་ཐམས་ཅད་ཀྱང་ཕ་རོལ་ཏུ་ཕྱིན་པ་ཉིད་ལས་བརྩམས་ཏེ་ཆོས་སྟོན་གྱི། ཉན་ཐོས་ཀྱི་ས་ལས་བརྩམས་ཏེ་སྟོན་པ་ནི་ཉུང་ངོ་། །གལ་ཏེ་ཉན་ཐོས་ཀྱི་ས་ལས་བརྩམས་ཏེ་ཆོས་སྟོན་པ་ཡང་དེ་
ཐམས་ཅད་ཕ་རོལ་ཏུ་ཕྱིན་པ་ཉིད་ལས་བརྩམས་ཏེ་ཆོས་སྟོན་ཏོ། །གལ་ཏེ་རང་སངས་རྒྱས་ཀྱི་ས་ལས་བརྩམས་ཏེ་ཆོས་སྟོན་ན་ཡང་དེ་ཐམས་ཅད་ཕ་རོལ་ཏུ་ཕྱིན་པ་ཉིད་ལས་བརྩམས་ཏེ་ཆོས་སྟོན་ཏོ། །དེས་ཕ་རོལ་དུ་ཕྱིན་པ་ཉིད་
ལས་བརྩམས་ཏེ་ཆོས་བསྟན་པས་སེམས་ཅན་རྣམས་བྱང་ཆུབ་ལ་བཏུལ་ཞིང་བཙུད་ཏེ། རབ་ཏུ་བཀོད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བརྩམས་ནས་དེ་དག་ལ་ཡང་དག་པར་སྟོན། ཡང་དག་པར་
འཛིན་དུ་འཇུག ། ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་བྱེད་དེ། ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་
བྱང་ཆུབ་སེམས་དཔའི་སྤྱད་པ་སྤྱོད་པ་ན་བརྩོན་འགྲུས་བརྟན་པའི་གོ་ཆ་ཆེན་པོ་དེ་ལྟ་བུ་དང་ལྡན་པར་གྱུར་ཏོ། །དེ་ཆོས་ཀྱི་སྦྱིན་པ་དེའི་དགེ་བའི་རྩ་བ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་
སྟེ། ཀྱེ་མ་དགེ་བའི་རྩ་བ་འདིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ་ཆོས་སྟོན་པའི་སངས་རྒྱས་ཀྱི་ཞིང་དེར་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་
དང་། རིགས་ཀྱི་བུ་མོ་གང་དག་འབྱུང་བར་འགྱུར་ཞིང་དེ་དག་ཐམས་ཅད་སངས་རྒྱས་ཀྱི་མཐུས་ཆོས་སྟོན་པ་འདི་ཉན་པར་གྱུར་ཅིག ། ཐོས་ནས་ཀྱང་འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་
བྱེད་པར་འགྱུར་ཞིང་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པར་གྱུར་ཅིག ། ཚེ་རབས་རྗེས་ནས་ཀྱང་ཆོས་དེ་དག་མི་བརྗེད་པར་གྱུར་ཅིག ། ཇི་ལྟར་བདག་ད་ལྟར་སངས་རྒྱས་ཀྱི་ཞིང་ནས་སངས་རྒྱས་ཀྱི་

79-1-20b

ཞིང་དུ་འགྲོ་བ་བཞིན་དུ་དེར་སྐྱེས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་སངས་རྒྱས་ཀྱི་ཞིང་གང་དང་གང་དུ་སྨོན་པར་གྱུར་པའི་སངས་རྒྱས་ཀྱི་ཞིང་དེ་དང་དེ་དག་ཏུ་སྐྱེ་བར་འགྱུར་ཞིང་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་སངས་རྒྱས་བཅོམ་ལྡན་འདས་རྣམས་དང་མི་འབྲལ་བར་གྱུར་ཅིག ། གང་དག་དགའ་ལྡན་གྱི་གནས་སུ་སྐྱེས་པའི་བྱང་ཆུབ་སེམས་
དཔའ་སེམས་དཔའ་ཆེན་པོ་སྐྱེ་བ་གཅིག་གིས་ཐོགས་པ་རྣམས་ནི་མ་གཏོགས་སོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་འདི་ནི་ཆོས་ཉིད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་སྲིད་པ་ཐ་མ་པ་རྣམས་
ནི་དགའ་ལྡན་གྱི་ལྷའི་རིས་ནས་ཤི་འཕོས་ནས་ལུས་ཐ་མས་མའི་གློ་གཡས་པ་ནས་མངལ་དུ་སྐྱེ་བར་འགྱུར་ཏེ། ཤཱ་ར་དྭ་ཏིའི་བུ་གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྲིད་པ་ཐ་མ་པ་དག་སྐྱེ་བ་ན་ས་ཆེན་པོ་
ཡང་གཡོ་བར་འགྱུར་བའི་ཕྱིར་རོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྲིད་པ་ཐ་མ་བའི་རྣམ་པ་ནི་འདི་དག་ཡིན། རྟགས་ནི་འདི་དག་ཡིན། མཚན་མ་ནི་འདི་དག་ཡིན་ཏེ། ཤཱ་ར་དྭ་ཏིའི་
བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྲིད་པ་ཐ་མ་པ་ནི་མའི་མངལ་དུ་ཞུགས་པ་ན་མི་གཙང་བ་དྲི་ང་བས་གོས་པར་མི་འགྱུར། དེར་ཡིད་དུ་མི་འཐད་པའི་དྲི་དག་ཀྱང་ཚོར་བར་མི་འགྱུར་རོ། །བྱང་ཆུབ་
སེམས་དཔའ་མངལ་ན་འདུག་པ་ན་ཡང་ནམ་མཁའ་ལ་གནས་སོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་རྣལ་འབྱོར་སྤྱོད་པའི་དགེ་སློང་རྫུ་འཕྲུལ་དང་ལྡན་པ་ནི་ཁང་པ་བརྩེགས་པ་འམ། ཁང་པ་བརྩེགས་པ་
རྒྱུད་མར་ཞུགས་ནས་བར་སྣང་གི་ནམ་མཁའ་ལ་མངོན་པར་འཕགས་ཤིང་སྤྱོད་ལམ་གྱིས་གནས་པར་བྱེད་ཀྱང་ཁང་པ་བརྩེགས་པ་དེ་ལ་རེག་པ་མེད་དོ། །ཤཱ་ར་དྭ་ཏིའི་བུ་དེ་བཞིན་དུ་བྱང་ཆུབ་སེམས་དཔའ་སེམས་

79-1-21a

དཔའ་ཆེན་པོ་སྲིད་པ་ཐ་མ་པ་མའི་མངལ་ན་གནས་པ་ན་ནམ་མཁའ་ལ་མངོན་པར་འཕགས་ནས་གནས་ཏེ། མངལ་གྱི་དྲི་མ་དང་། མི་གཙང་བ་དྲི་ང་བས་མི་གོས་པར་གནས་ཤིང་དེར་ཡིད་དུ་མི་མཐོང་
པའི་དྲི་དག་ཀྱང་ཚོར་བར་མི་འགྱུར་རོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་
པ་ན་འདི་སྙམ་དུ་སེམས་ཏེ། ཇི་ལྟར་བདག་ད་ལྟར་བྱང་ཆུབ་སེམས་དཔའི་སྤྱད་པ་སྤྱོད་པ་ན་བདུད་ཐམས་ཅད་ཀྱིས་གླགས་མི་རྙེད་པར་གྱུར་པ་དེ་བཞིན་དུ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་སངས་རྒྱས་པ་ན་སངས་རྒྱས་ཀྱི་ཞིང་དེར་བྱང་ཆུབ་སེམས་དཔའི་ཐེག་པ། པའམ་ཉན་ཐོས་ཀྱི་ཐེག་པ་པའི་རིགས་ཀྱི་བུ་དང་། རིགས་ཀྱི་བུ་མོ་གང་དག་འབྱུང་བ་དེ་དག་ཀྱང་བྱང་ཆུབ་སེམས་དཔའི་སྤྱད་
པ་སྤྱོད་པ་ནས་ནམ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་བདུད་དང་། བདུད་ཀྱི་རིས་ཀྱི་ལྷ་རྣམས་ཀྱིས་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་
ཐམས་ཅད་དུ་གླགས་མི་རྙེད་པར་གྱུར་ཅིག ། ཇི་སྲིད་དུ་བྱང་ཆུབ་སེམས་དཔའ་དེ་དག་གིས་ཡོན་ཏན་ཕུན་སུམ་ཚོགས་པ་དེ་དག་ཡོངས་སུ་ཟིན་པར་མ་གྱུར་པ་དེ་སྲིད་དུ་བདག་ཀྱང་བྱང་ཆུབ་ཀྱི་ཕྱིར་སྤྱོད་པར་གྱུར་ཅིག་སྙམ་
མོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཆོས་སྟོན་པའམ་ཆོས་
ཉན་པའི་ཚེ། ལན་དགའ་ཡང་དེའི་ལུས་ངལ་བ་འམ་སེམས་ངལ་བར་གྱུར་པ་མེད་དེ། དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་འདི་ལྟར་དེ་བཞིན་གཤེགས་པ་དེས་དང་པོ་སེམས་བསྐྱེད་པ་ནས་བཟུང་སྟེ། བྱང་

79-1-21b

ཆུབ་སེམས་དཔའི་སྤྱད་པ་སྤྱོད་པ་ན་ཆོས་ཀྱི་སྐུ་རབ་ཏུ་བསྒོམས་པར་གྱུར་པའི་ཕྱིར་རོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་ཅིང་ཆོས་ཉན་པ་ན་འདི་སྙམས་དུ་སེམས་ཏེ་ཇི་ལྟར་བདག་ད་ལྟར་ཆོས་འདོད་པ་དེ་བཞིན་དུ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་སངས་རྒྱས་པའི་སངས་རྒྱས་ཀྱི་ཞིང་དེ་ན་སེམས་ཅན་རྣམས་ཀྱང་ཆོས་མི་འདོད་པར་མི་འགྱུར་ཞིང་ཆོས་འདོད་པར་གྱུར་ཅིག་སྙམ་མོ། །མི་འཁྲུགས་པ་ལུང་བསྟན་པ་ཐེག་པ་ཆེན་པོའི་མདོ་ལས། ལེའུ་དང་
པོའོ།། །། དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཡོན་ཏན་ཡོངས་སུ་བརྗོད་པ་དག་ནི་ལེགས་པར་བཀའ་སྩལ་
ལགས་ན། བཙུན་པ་བཅོམ་ལྡན་འདས་ཀྱིས་ང་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་ད་ལྟར་གྱི་སངས་རྒྱས་ཀྱི་ཞིང་ན་སངས་
རྒྱས་ཀྱི་ཞིང་གི་ཡོན་ཏན་བཀོད་པ་མ་ཆིས་པ་རྒྱ་ཆེར་ཡང་དག་པར་རབ་ཏུ་བསྟན་དུ་གསོལ། །དེ་ཅིའི་སླད་དུ་ཞེ་ན། འདི་ལྟར་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་དང་། རིགས་ཀྱི་བུ་མོ་དག་གིས་
སངས་རྒྱས་ཀྱི་ཞིང་དེའི་ཡོན་ཏན་བཀོད་པ་ཐོས་ནས་སངས་རྒྱས་ཀྱི་ཞིང་དེར་སྐྱེ་བར་བགྱི་བ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་

79-1-22a

པ་དེ་ལ་ཡང་བལྟ་བ་དང་། ཕྱག་བགྱི་བ་དང་། མཆོད་པ་བགྱི་བ་དང་། བསྙེན་བཀུར་བགྱི་བ་དང་། མཉེས་པར་བགྱི་བའི་སླད་དུ་འདུན་པ་སྐྱེ་བར་འགྱུར་པ་དང་། ཉན་ཐོས་ཀྱི་ཐེག་པ་པའི་རིགས་ཀྱི་བུ་དང་། རིགས་
ཀྱི་བུ་མོ་སྐྱོན་མ་མཆིས་པར་མ་ཞུགས་པ་དག་གིས་ཀྱང་སངས་རྒྱས་ཀྱི་ཞིང་དེའི་ཡོན་ཏན་བཀོད་པ་ཐོས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་མི་འཁྲུགས་པ་དེ་ལ་བལྟ་བ་དང་། ཕྱག་བགྱི་བ་དང་། མཆོད་པ་བགྱི་བ་དང་། བསྙེན་བཀུར་བགྱི་བ་དང་། མཉེས་པར་བགྱི་བའི་སླད་དུ་འདུན་པ་སྐྱེ་བར་འགྱུར་བའི་སླད་དུའོ། །དེ་སྐད་ཅེས་གསོལ་
པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་ལེགས་སོ་ལེགས་སོ། །ཤཱ་ར་དྭ་ཏིའི་བུ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་ཡོད་པ་འདྲི་བར་སེམས་པ་ནི་ཁྱོད་ཡང་ལེགས་སོ། །ཤཱ་ར་དྭ་ཏིའི་བུ་དེའི་ཕྱིར་ལེགས་པར་རབ་
ཏུ་ཉོན་ལ་ཡིད་ལ་ཟུང་ཤིག་དང་། འདི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་སངས་རྒྱས་ཀྱི་ཞིང་གི་
ཡོན་ཏན་བཀོད་པ་ཕུན་སུམ་ཚོགས་པ་ཡོད་པ་བཤད་པར་བྱའོ། །ཤཱ་ར་དྭ་ཏིའི་བུས་བཅོམ་ལྡན་འདས་དེ་བཞིན་ནོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་
སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་དེ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ཀྱིས་དེ་ནས་ཞག་བདུན་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་

79-1-22b

པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཤེས་ནས་སེམས་ཅན་དེ་དག་ཐམས་ཅད་ལ་ཟས་ཀྱི་འདུ་ཤེས་ཀུན་བྱུང་
བར་མ་གྱུར་ཏོ། །བཀྲེས་པའི་འདུ་ཤེས་མ་བྱུང་། སྐོམ་པའི་འདུ་ཤེས་མ་བྱུང་། མལ་དུ་ཉལ་བའི་འདུ་ཤེས་མ་བྱུང་། ལུས་དང་སེམས་ངལ་བའི་འདུ་ཤེས་མ་བྱུང་གི། གཞན་དུ་ན་སེམས་ཅན་དེ་དག་ཐམས་
ཅད་བདེ་བའི་འདུ་ཤེས་དང་ལྡན་པར་གྱུར་ཏེ། དགའ་བ་དང་མཆོག་ཏུ་དགའ་བའི་འདུ་ཤེས་དང་། སེམས་རངས་པ་དང་། སེམས་ཀྱི་ཉམས་བདེ་བ་དང་ལྡན་པར་གྱུར་ཏོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་འདི་
ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་དེ་དག་ཐམས་ཅད་
ཀྱིས་ཀྱང་དེ་ལྟ་བུའི་ཡོན་ཏན་དག་ཡོངས་སུ་ཟིན་པར་གྱུར་བའི་ཕྱིར་རོ། །ཤཱ་ར་དྭ་ཏིའི་བུ་གཞན་ཡང་དེའི་ཚེ་འཇིག་རྟེན་གྱི་ཁམས་དེ་ན་མི་གང་དག་དང་། འདོད་པ་ན་སྤྱོད་པའི་ལྷ་གང་དག་འཁོད་པ་དེ་དག་གི་དེ་ནས་ཞག་བདུན་
ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཤེས་ནས་དེ་དག་འཁྲིག་
པ་སྤྱོད་པའི་འདུ་ཤེས་ཀུན་དུ་མ་བྱུང་བར་གྱུར་ཏོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་
སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་བའི་ཕྱིར་རོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་

79-1-23a

མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་
ཐམས་ཅད་སྣང་བ་ཆེན་པོས་ཁྱབ་པར་གྱུར་ཅིང་ས་ཆེན་པོ་ཡང་རྣམ་པ་དྲུག་ཏུ་གཡོས་པར་གྱུར་ཏེ། འདི་ལྟར་གཡོས། རབ་ཏུ་གཡོས། ཀུན་དུ་རབ་ཏུ་གཡོས། འགུལ་རབ་ཏུ་འགུལ། ཀུན་དུ་རབ་ཏུ་འགུལ། ལྡེག་རབ་
ཏུ་ལྡེག ། ཀུན་དུ་རབ་ཏུ་ལྡེག ། འཁྲུགས་རབ་ཏུ་འཁྲུགས། ཀུན་དུ་རབ་ཏུ་འཁྲུགས། འུར་འུར། རབ་ཏུ་འུར་འུར། ཀུན་དུ་རབ་ཏུ་འུར་འུར། ཆེམ་ཆེམ། རབ་ཏུ་ཆེམ་ཆེམ། ཀུན་དུ་རབ་ཏུ་ཆེམ་ཆེམ་པར་གྱུར་ཏེ། ཤཱ་ར་དྭ་ཏིའི་
བུ་དེ་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྣམ་པ་ཐམས་
ཅད་མཁྱེན་པ་ཉིད་ཀྱི་ཡེ་ཤེས་བརྙེས་པའི་སངས་རྒྱས་ཀྱི་ཞིང་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་ཟིན་པར་གྱུར་པ་ཡིན་ནོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པ་ན་སྟོང་གསུམ་གྱི་སྟོང་ཆེན་པོའི་
འཇིག་རྟེན་གྱི་ཁམས་དེ་ན་ལྷ་དང་། མི་གང་དག་འཁོད་པ་དེ་དག་ཐམས་ཅད་བྱང་ཆུབ་ཀྱི་སྙིང་པོ་ག་ལ་བ་དེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ཞིང་འཁོད་པར་གྱུར་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྣམ་པ་ཐམས་ཅད་མཁྱེན་པ་ཉིད་

79-1-23b

ཀྱི་ཡེ་ཤེས་བརྙེས་པའི་སངས་རྒྱས་ཀྱི་ཞིང་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་ཟིན་པར་གྱུར་པ་ཡིན་ནོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པའི་སངས་རྒྱས་ཀྱི་ཞིང་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་
ཟིན་པར་གྱུར་པ་གང་ཡིན་པ་དག་དང་། ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་ད་ལྟར་སངས་རྒྱས་ཀྱི་ཞིང་གི་
ཡོན་ཏན་བཀོད་པ་ཡོངས་སུ་ཟིན་པ་གང་ཡིན་པ་དེ་དག་ནི་སངས་རྒྱས་བརྒྱ་ཕྲག་མང་པོ་དང་། སངས་རྒྱས་སྟོང་ཕྲག་མང་པོ་དང་། སངས་རྒྱས་བརྒྱ་སྟོང་ཕྲག་མང་པོ་དང་། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དག་
ལ་ཡང་མེད་དེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་
གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་ནི་སྨོན་ལམ་གྱི་ཁྱད་པར་གྱིས་འགྲུབ་སྟེ། ཤཱ་ར་དྭ་ཏིའི་བུ་ཇི་ལྟར་ངས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྨོན་ལམ་ཇི་ལྟར་བཏབ་པ་
དེ་ལྟར་གྱུར་པ་བཞིན་ནོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་སངས་རྒྱས་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པ་ན་སྐད་ཅིག་དེ་དང་། ཐང་ཅིག་དེ་དང་། ཡུད་ཙམ་དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ན་སེམས་ཅན་གང་

79-1-24a

དག་ལྷའི་མིག་དང་ལྡན་པ་དང་། ལྷའི་མིག་དང་མི་ལྡན་པ་དག་འཁོད་པའི་སེམས་ཅན་དེ་དག་གི་མིག་ལམ་དུ་སྣང་བར་གྱུར་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་མི་འཁྲུགས་པ་དེ་བྱང་ཆུབ་ཀྱི་སྙིང་པོར་གཤེགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པ་ན་བདུད་
སྡིག་ཅན་རྣམས་འདི་སྙམ་དུ་ཅིའི་ཕྱིར་བདག་ཅག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་
རྒྱ་བའི་བར་ཆད་བྱ་བའི་ཕྱིར་ཕ་རོལ་གནོན་པར་མི་བྱ་སྙམ་པའི་སེམས་མ་བསྐྱེད་དེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་
ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་
དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ་རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེའི་ལྷ་བྱེ་བ་ཁྲག་ཁྲིག་
བརྒྱ་སྟོང་ཕྲག་དུ་མ་སྟེང་གི་བར་སྣང་ལ་འཁོད་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ལ་མཆོད་པ་བྱ་བའི་ཕྱིར་ལྷའི་མེ་ཏོག་དང་། ལྷའི་སྤོས་དང་། ལྷའི་བདུག་པ་

79-1-24b

དང་། ལྷའི་མེ་ཏོག་ཕྲེང་དང་། ལྷའི་ཙན་དན་དང་། ལྷའི་ཕྱེ་མ་དང་། ལྷའི་སིལ་སྙན་དང་། ལྷའི་ན་བཟའ་དང་། ལྷའི་གདུགས་དང་། ལྷའི་རྒྱལ་མཚན་དང་། ལྷའི་བ་དན་དང་། ལྷའི་རིན་པོ་ཆེའི་རྒྱན་དག་གིས་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ག་ལ་བ་ལ་དེ་ལོགས་སུ་གཏོར། རབ་ཏུ་གཏོར། །མངོན་པར་རབ་ཏུ་གཏོར་ཏེ་མཆོད་པའི་ལས་ལ་བརྩོན་པར་གྱུར་ཏོ། །གཏོར་མ་ཐག་ཏུ་སངས་
རྒྱས་ཀྱི་མཐུས་ལྷའི་མེ་ཏོག་དེ་དག་དང་། ལྷའི་སྤོས་དེ་དག་དང་། ལྷའི་བདུག་པ་དེ་དག་དང་། ལྷའི་མེ་ཏོག་ཕྲེང་དེ་དག་དང་། ལྷའི་ཙན་དན་དེ་དག་དང་། ལྷའི་ཕྱེ་མ་དེ་དག་དང་། ལྷའི་སིལ་སྙན་དེ་དག་དང་། ལྷའི་ན་བཟའ་དེ་དག་
དང་། ལྷའི་གདུགས་དེ་དག་དང་། ལྷའི་རྒྱལ་མཚན་དེ་དག་དང་། ལྷའི་བ་དན་དེ་དག་དང་། ལྷའི་རིན་པོ་ཆེའི་རྒྱན་དེ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་
པ་དེའི་དབུའི་གཙུག་གི་དྲང་ཐད་ཀྱི་སྟེང་གི་ནམ་མཁའ་ལ་རྣམ་པ་ཐམས་ཅད་ཀྱི་མཆོག་དང་ལྡན་པའི་གདུགས་དཔག་ཚད་བརྒྱའི་ཚད་ཙམ་ཞིག་ཏུ་གྱུར་ཅིང་འདུག་པར་གྱུར་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་
ཡེ་ཤེས་བརྙེས་པ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སྐུའི་འོད་དག་གིས་ཉི་མ་དང་། ཟླ་བ་དག་གི་འོད་ཟིལ་གྱིས་མནན་ནས་མོག་མོག་

79-1-25a

པོར་བྱས་ཏེ་མི་མངོན་གྱི། གཞན་དུ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་འོད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
ཐམས་ཅད་སྣང་བ་ཆེན་པོས་ཁྱབ་པར་གྱུར་ཏོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་འོད་ཀྱིས་སྟོང་གསུམ་གྱི་སྟོང་ཆེན་
པོའི་འཇིག་རྟེན་གྱི་ཁམས་དེའི་ཉི་མ་དང་། ཟླ་བ་དག་གི་འོད་དང་། ལྷ་ཐམས་ཅད་ཀྱི་འོད་དག་ཀྱང་ཟིལ་གྱིས་མནན་ཅིང་མོག་མོག་པོར་བྱས་ནས་མིག་ལམ་དུ་ཡང་མི་སྣང་བར་གྱུར་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །དེ་སྐད་ཅེས་བཀའ་སྩལ་པ་དང་། 
བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱེ་མ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་
པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཇི་ཙམ་དུ་གོ་ཆ་ཆེན་པོ་བགོས་ཤིང་དེའི་སྨོན་ལམ་གྱི་ཁྱད་པར་རྒྱ་ཆེན་པོ་དེ་ལྟ་བུ་དག་ཏུ་གྱུར་པ་དང་། སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དེས་སྲོག་ཆགས་བརྒྱ་
ཕྲག་མང་པོ་དང་། སྲོག་ཆགས་སྟོང་ཕྲག་མང་པོ་དང་། སྲོག་ཆགས་བརྒྱ་སྟོང་ཕྲག་མང་པོ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དཔག་ཏུ་མ་མཆིས། གྲངས་མ་མཆིས། བརྗོད་དུ་མ་མཆིས་
བརྗོད་དུ་མ་མཆིས་པའི་ཡང་བརྗོད་དུ་མ་མཆིས་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་བཀོད་ཅིང་དགེ་བའི་རྩ་བ་གང་དག་སེམས་བསྐྱེད་པའི་དགེ་བའི་རྩ་བ་དེ་དག་ཀྱང་སངས་རྒྱས་ཀྱི་ཞིང་ཡོངས་སུ་དག་

79-1-25b

པར་བགྱི་བའི་སླད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ནས་ཇི་ལྟ་ཇི་ལྟར་ཡོངས་སུ་བསྔོས་པ་དེ་ལྟ་དེ་ལྟར་སྨོན་ལམ་ཡོངས་སུ་རྫོགས་པར་གྱུར་པ་ནི་ངོ་མཚར་ལགས་སོ། །དེ་སྐད་ཅེས་
གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་དེ་དེ་བཞིན་ཏེ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ནི་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་གོ་ཆ་ཆེན་པོ་བགོས་པར་གྱུར་པ་ཡིན་ནོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་
པ་དེ་བྱང་ཆུབ་ཀྱི་ཤིང་གང་གི་དྲུང་དུ་བཞུགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཤིང་རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པར་གྱུར་པའི་བྱང་ཆུབ་ཀྱི་ཤིང་
རིན་པོ་ཆེ་སྣ་བདུན་ལས་གྲུབ་པ། འཕང་དུ་དཔག་ཚད་འབུམ་ཡོད། དེའི་སྡོང་པོའི་འཕང་དུ་ནི་དཔག་ཚད་བརྒྱ་ཡོད། སྦོམས་སུ་ནི་རྒྱང་གྲངས་ཕྱེད་ཀྱིས་འཁོར་ལ་དེའི་ཡལ་ག་རྣམས་ནི་དཔག་ཚད་བདུན་སྟོང་བདུན་སྟོང་ཡོད་དེ། 
དེའི་འཁོར་ཡུག་ཏུ་ནི་དཔག་ཚད་བཞི་ཁྲི་ཡོད་དེ། བྱང་ཆུབ་ཀྱི་ཤིང་དེའི་ཡལ་ག་དང་། ལོ་མ་དང་། ཡལ་ག་ཕྲེའུ་དག་རླུང་གིས་ཀུན་དུ་བསྐྱོད་པ་ན་དེ་དག་ལས་སྙན་པ་དང་། ཡིད་དུ་འོང་བ་དང་། ཆགས་པར་འགྱུར་བའི་
སྒྲ་སྐད་དག་བྱུང་སྟེ། ཤཱ་ར་དྭ་ཏིའི་བུ་ཇི་ལྟར་བྱང་ཆུབ་ཀྱི་ཤིང་དེའི་ཡལ་ག་དང་། ལོ་མ་དང་། ཡལ་ག་ཕྲེའུ་དག་རླུང་གིས་ཀུན་དུ་བསྐྱོད་པ་ན་དེ་དག་ལས་སྙན་པ་དང་། ཡིད་དུ་འོང་བ་དང་ཆགས་པར་འགྱུར་བའི་སྒྲ་སྐད་དག་

79-1-26a

བྱུང་བ་དེ་ལྟ་བུའི་སྙན་པ་དང་། ཡིད་དུ་འོང་བ་དང་། ཆགས་པར་འགྱུར་བའི་སྒྲ་སྐད་དག་ནི་ལྷའི་སིལ་སྙན་ཡན་ལག་འབུམ་དང་ལྡན་པ་དག་རོལ་མོའི་སློབ་དཔོན་མཁས་པས་གསིལ་བ་དག་ལས་ཀྱང་འབྱུང་བར་
མི་འགྱུར་རོ། །བྱང་ཆུབ་ཀྱི་ཤིང་དེ་ལས་ཕ་རོལ་དུ་ཕྱིན་པ་ཐམས་ཅད་དང་། མངོན་པར་ཤེས་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ལམ་གྱི་ཡན་ལག་ཐམས་ཅད་ཀྱི་སྒྲ་སྐད་ལྷའི་དབྱངས་ལས་ཤིན་དུ་
འདས་པ། མཉེན་ཤིང་ཡིད་དུ་འོང་བ་དག་བྱུང་སྟེ། སེམས་ཅན་གང་དག་གིས་སྒྲ་སྐད་དེ་དག་ཐོས་པར་གྱུར་པ་དེ་དག་ཐམས་ཅད་ཀྱང་འདོད་ཆགས་དང་བྲལ་བའི་སེམས་རྗེས་སུ་དྲན་པ་ཞེས་བྱ་བའི་ཏིང་ངེ་འཛིན་ཐོབ་པོ། །ཤཱ་ར་དྭ་ཏིའི་
བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་བརྗོད་པ་དག་ལེགས་པར་རབ་ཏུ་ཉོན་ལ་ཚུལ་བཞིན་
དུ་ཡིད་ལ་ཟུང་ཤིག་དང་། ངས་ཁྱོད་ལ་བཤད་པར་བྱའོ། །ཚེ་དང་ལྡན་པ་ཤཱ་ར་དྭ་ཏིའི་བུས་བཅོམ་ལྡན་འདས་ལེགས་སོ་ཞེས་གསོལ་ནས་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་
སྩལ་ཏོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་ངན་སོང་གསུམ་པོ་དག་མེད་དེ། གསུམ་གང་ཞེ་ན། 
འདི་ལྟ་སྟེ། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་ནོ། །དེར་སེམས་ཅན་གང་དག་སྐྱེས་པར་གྱུར་པ་དེ་དག་ཐམས་ཅད་ནི་དགེ་བ་བཅུའི་ལས་ཀྱི་ལམ་དང་ལྡན་པ་ཤ་སྟག་གོ། །ཤཱ་ར་
དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་སེམས་ཅན་རྣམས་ལ་འདི་ལྟར་ཇོ་བོ་འམ། བྲན་གྱི་བྱེ་བྲག་ཏུ་དབྱེ་བ་ཡང་མེད་དེ། ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེའི་མི་རྣམས་ལ་བཀོལ་བའི་ཆོས་ལྷུར་ལེན་པའི་བསམ་པ་

79-1-26b

ཡང་མེད་དོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་ན་སེམས་ཅན་རྣམས་ལ་བདག་དང་བདག་གིར་ཡོངས་སུ་འཛིན་པ་མེད་པའི་ཕྱིར་རོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེའི་ས་གཞི་ཆེན་པོ་ཐམས་
ཅད་ལག་མཐིལ་ལྟར་མཉམ་པ། ཀ་ཙ་ལིན་དི་ཀ་ལྟར་རེག་ན་བདེ་ཞིང་གསེར་གྱི་ཁ་དོག་ལྟར་འདུག་ལ་ལྷའི་ནོར་བུ་རིན་པོ་ཆེས་སྤྲས་ཤིང་པད་མ་གསེར་གྱི་མདོག་ཅན་མདབ་མ་བྱེ་བ་ཕྲག་སྟོང་དང་ལྡན་པ་དག་གིས་ལེགས་པར་
བརྒྱན་ལ། མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་དག་མངོན་པར་བཀྲམ་པ། སྡོང་དུམ་དང་། ཚེར་མ་དང་། གྱོ་མོ་དང་། གསེག་མ་མེད་པ། ངམ་གྲོག་དང་། གད་པ་དང་། མི་གཙང་བ་དོར་བའི་ས་མེད་པ། རྡོ་བ་དང་། 
རི་མེད་པ་སྟེ། ཤཱ་ར་དྭ་ཏིའི་བུ་ས་གཞི་ཆེན་པོ་དེ་ལ་རྐང་པ་བཞག་ན་ནི་ནེམས་ཤེས་བྱེད། རྐང་པ་གཏེག་ན་ནི་སྤར་ཅེས་བྱེད་དེ། ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་ཤིང་བལ་གྱི་སྔས་ནང་ཚངས་ཅན་གྱི་སྟེང་དུ་མགོ་བཞག་ན་ནི་ནེམས་
ཤེས་བྱེད། མགོ་བཏེག་ན་ནི་སྤར་ཅེས་བྱེད་པ་དེ་བཞིན་དུ་ཤཱ་ར་དྭ་ཏིའི་བུ་ས་གཞི་ཆེན་པོ་དེ་ལ་ཡང་རྐང་པ་བཞག་ན་ནི་ནེམས་ཤེས་བྱེད། རྐང་པ་བཏེག་ན་ནི་སྤར་ཅེས་བྱེད་དོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེའི་མི་
རྣམས་ལ་རླུང་ལས་གྱུར་པ་དང་། མཁྲིས་པ་ལས་གྱུར་བ་དང་། བད་ཀན་ལས་གྱུར་བ་དང་། འདུས་པ་ལས་གྱུར་བའི་ནད་རྣམས་ཐམས་ཅད་ཀྱི་ཐམས་ཅད་དུ་མེད་དོ། །ཤཱ་ར་དྭ་ཏིའི་བུ་གཞན་ཡང་སངས་རྒྱས་ཀྱི་ཞིང་དེའི་མི་
རྣམས་ལ་ཁ་དོག་ངན་པ་དང་། དྲི་མི་ཞིམ་པ་དག་ཐམས་ཅད་ཀྱི་ཐམས་ཅད་དུ་མེད་དོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེའི་སེམས་ཅན་དེ་དག་ནི་འདོད་ཆགས་ཆུང་བ་དང་། ཞེ་སྡང་ཆུང་བ་དང་། གཏི་
མུག་ཆུང་བའི་ཕྱིར་རོ། །ཤཱ་ར་དྭ་ཏིའི་བུ་གཞན་ཡང་སངས་རྒྱས་ཀྱི་ཞིང་དེ་ན་སེམས་ཅན་དེ་དག་ལ་བསད་པ་དང་། བཅིང་བ་དང་། གོ་རར་གཞུག་པ་དག་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་མེད་དོ། །

79-1-27a

ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་མུ་སྟེགས་ཅན་གྱི་གནས་དག་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་མེད་དོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་ཤིང་ལྗོན་པ་རྣམས་
རྟག་ཏུ་མེ་ཏོག་ཆགས་ཤིང་རྟག་ཏུ་འབྲས་བུ་ཆགས་པ་ཤ་སྟག་གོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་མི་རྣམས་ཀྱི་གོས་ནི་དཔག་བསམ་གྱི་ཤིང་ལས་བྱུང་བའི་གོས་ཁ་དོག་རྣམ་པ་ལྔས་གོས་ཀྱི་བྱ་བ་བྱེད་དེ། གོས་དེ་དག་ཀྱང་
མདོག་གསལ་ཞིང་དྲི་ཞིམ་པོ་དང་ལྡན་ལ། ཁ་དོག་མི་ཉམས་པ་ཤ་སྟག་སྟེ། ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་ལྷའི་མེ་ཏོག་རྣམས་ཀྱི་དྲི་བསུང་སྣ་ཚོགས་ཅི་འདྲ་བ་དེ་བཞིན་དུ་ཤཱ་ར་དྭ་ཏིའི་བུ་དེ་དག་གི་གོས་ཀྱི་དྲི་ཡང་དེ་འདྲ་ལ། དཔག་
བསམ་གྱི་ཤིང་དེ་ལ་འདུག་པ་ན་དེ་དག་གི་དྲི་ཅི་འདྲ་བ་དེ་བཞིན་དུ་དེ་དག་གིས་ཡོངས་སུ་བཅད་པ་ན་ཡང་དྲི་དེ་དང་འདྲ་བ་ཉིད་དུ་འགྱུར་པས་གོས་དེ་དག་གི་དྲི་དང་། ཁ་དོག་ལ་ཉམས་པར་འགྱུར་བ་ཡང་མེད་ལ། ཤཱ་ར་དྭ་ཏིའི་བུ་མི་དེ་དག་གི་
གོས་རྣམས་ཤིན་དུ་མང་ཞིང་ཕལ་ཆེ་བའི་ཕྱིར་དེ་དག་ཡང་དང་ཡང་དུ་གོས་བརྗེ་ཞིང་བརྗེ་ཞིང་གྱོན་པར་བྱེད་དོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་མི་དེ་དག་ཁ་ཟས་ཇི་ལྟ་བུ་དག་འདོད་པ་དེ་ལྟ་བུའི་ཁ་ཟས་དག་མདུན་དུ་རིན་
པོ་ཆེའི་སྣོད་དག་ནས་འབྱུང་སྟེ། ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་སུམ་བཅུ་རྩ་གསུམ་པའི་ལྷ་རྣམས་ཡིད་ལ་ཅི་བསམ་པའི་ཁ་ཟས་དག་འབྱུང་བ་དེ་བཞིན་དུ་ཤཱ་ར་དྭ་ཏིའི་བུ་འཇིག་རྟེན་གྱི་ཁམས་དེ་ན་མི་དེ་དག་ཀྱང་ཁ་ཟས་ཇི་ལྟ་
བུ་དག་འདོད་པ་དེ་ལྟ་བུའི་ཁ་ཟས་དག་མདུན་དུ་རིན་པོ་ཆེའི་སྣོད་དག་ནས་འབྱུང་ངོ་། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་མི་དེ་དག་གི་ཁ་ཟས་གང་ཡིན་པའི་ཁ་ཟས་དེ་དག་ནི་ཁ་དོག་གམ། དྲིའམ། རོས་ལྷའི་ཁ་ཟས་
དག་ལ་མི་འཐུའོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་མི་དེ་དག་ལ་བཤང་བ་དང་། གཅི་བ་དང་། མཆིལ་མ་དང་། སྣབས་དག་མེད་དེ། ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་འདོད་པ་ན་སྤྱོད་པའི་ལྷ་རྣམས་ལ་བཤང་

79-1-27b

བ་དང་། གཅི་བ་དང་། མཆིལ་མ་དང་། སྣབས་དག་མེད་པ་དེ་བཞིན་དུ་ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་མི་དེ་དག་ལ་ཡང་བཤང་བ་དང་། གཅི་བ་དང་། མཆིལ་མ་དང་། སྣབས་དག་མེད་དོ། །ཤཱ་ར་དྭ་ཏིའི་བུ་ཡང་སངས་
རྒྱས་ཀྱི་ཞིང་དེ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སྔོན་གྱི་སྨོན་ལམ་གྱི་ཁྱད་པར་དང་། མི་དེ་དག་གི་བསོད་ནམས་ཀྱི་རྣམ་པར་སྨིན་པས་མངོན་པར་
གྲུབ་པ་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་འདི་ལྟ་བུ་དག་མངོན་པར་གྲུབ་པ་ཡོད་དེ། གང་དུ་མི་དེ་དག་འདུག་པར་བྱ་བའི་གནས་རིན་པོ་ཆེ་སྣ་བདུན་ལས་གྲུབ་པའི་ཁང་པ་བརྩེགས་པ་དག་དང་ཁང་པ་བརྩེགས་
པ་དེ་དག་གི་ནང་ན་རིན་པོ་ཆེ་སྣ་བདུན་ལས་བྱས་པའི་ཁྲི་དག་གི་སྟེང་དུ་ཤིང་བལ་ཅན་གྱི་སྟན་ལེགས་པར་བཏིང་བ་བཀྲམ་པ་དག་བྱུང་བར་གྱུར་ཅིང་ཁང་པ་བརྩེགས་པ་དེ་དག་ཏུ་ཁང་པ་བརྩེགས་པའི་ཡོངས་སུ་སྤྱད་པ་གང་ལས་མི་
རྣམས་ཆུའི་བྱ་བ་བྱེད་པའི་རྫིང་རྣམ་པ་སྣ་ཚོགས་ཡན་ལག་བརྒྱད་དང་ལྡན་པའི་ཆུས་གང་བ་འབྱུང་སྟེ། རྫིང་བུ་དེ་དག་ཀྱང་གསེར་གྱི་བྱེ་མ་བདལ་པ། ལྷའི་ཤིང་མྱ་ངན་འཚང་གིས་བསྐོར་བ་ཤ་སྟག་གོ། །དེ་དག་ན་མི་རྣམས་
དམ་པའི་ཆོས་ཀྱི་དགའ་བས་དགའ་བར་བྱེད་ཅིང་གནས་སོ། །ཤཱ་ར་དྭ་ཏིའི་བུ་དེ་ན་མི་དེ་དག་གང་དུ་ཡན་ལག་བརྒྱད་དང་ལྡན་པའི་ཆུས་གང་བའི་རྫིང་དག་འབྱུང་བར་འདོད་པ་དེ་ཉིད་དུ་མི་དེ་དག་གི་དྲུང་དུ་ཡན་ལག་བརྒྱད་དང་
ལྡན་པའི་ཆུས་གང་བའི་རྫིང་དག་འབྱུང་ཞིང་། གལ་ཏེ་རྗེས་སུ་འབྲང་བར་འདོད་ན་ཡང་རྗེས་སུ་འབྲང་བར་འགྱུར་ལ། གལ་ཏེ་མི་སྣང་བར་འདོད་ན་ཡང་མི་སྣང་བར་འགྱུར་རོ། །ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་
ན་ཧ་ཅང་ཡང་མི་དྲོ་ཧ་ཅང་ཡང་མི་གྲང་བའི་རླུང་དག་ལྡང་ངོ་། །འཇམ་པ་དང་། བདེ་བ་དང་། དལ་བའི་རླུང་དག་ཀྱང་ལྡང་ངོ་། དྲི་ཞིམ་པ་དང་། ཡིད་དུ་འོང་བའི་རླུང་དག་ཀྱང་ལྡང་སྟེ། རླུང་དེ་དག་ཉིད་ཀྱིས་མི་དེ་དག་དང་། ལྷ་དེ་དག་གི་

79-1-28a

སྤོས་ཀྱི་བྱ་བ་བྱེད་དོ། །གལ་ཏེ་ལ་ལ་ཞིག་བདག་ལ་རླུང་ལྡང་བར་གྱུར་ཅིག་ཅེས་རླུང་ལྡང་བར་འདོད་ན་ཡང་དེ་ལ་རླུང་ལྡང་བར་འགྱུར་རོ། །གལ་ཏེ་གཞན་དག་མི་འདོད་ན་དེ་དག་གིས་ལུས་ལ་རླུང་གིས་ཕོག་
པར་མི་འགྱུར་ཞིང་གང་དང་གང་གི་ཚེ་འདོད་པ་དེ་དང་དེའི་ཚེ་དེ་དག་ལ་རླུང་ལྡང་བར་འགྱུར་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་
རྒྱས་ཀྱི་ཞིང་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་ཡིན་ནོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་ད་ལྟར་ངའི་སངས་རྒྱས་ཀྱི་ཞིང་ན་གང་བུད་མེད་དག་གི་བུད་མེད་ཀྱི་སྐྱོན་དུ་བྱ་བའི་བུད་མེད་དག་
གི་བུད་མེད་ཀྱི་སྐྱོན་དེ་དག་མེད་དེ། ཤཱ་ར་དྭ་ཏིའི་བུ་དེ་དག་ཀྱང་གང་ཞེ་ན། སངས་རྒྱས་ཀྱི་ཞིང་འདི་ན་བུད་མེད་ནི་མདོག་མི་སྡུག་པ། གཟུགས་མ་ལེགས་པ། དྲི་ང་བ། མི་གཙང་བས་གང་བ། འདོད་པའི་ལོངས་སྤྱོད་དག་གིས་
ངོམས་མི་ཤེས་པ། བྱས་པ་མི་གཟོ་བ། ཁྲོ་བ་དང་། ལྕེ་གཉིས་སྨྲ་བ་དང་། ཕྲག་དོག་དང་། སེར་སྣའི་ཆོས་ཀྱིས་གླགས་པ་ཡིན་ཏེ། ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་འདི་ན་བུད་མེད་དག་གི་བུད་མེད་ཀྱི་སྐྱོན་ནི་དེ་དག་ཡིན་ནོ། །
ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་ན་བུད་མེད་ལ་ནི་བུད་མེད་དག་གི་བུད་མེད་ཀྱི་སྐྱོན་དུ་བྱ་བ་དེ་ལྟ་བུ་དག་མེད་དེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་ན་བུད་མེད་ནི་ཡོན་ཏན་ཐམས་ཅད་དང་ལྡན་པ་ཡིན་ཏེ། ཤཱ་ར་དྭ་ཏིའི་བུ་འདི་ལྟ་སྟེ། 
དཔེར་ན་བུད་མེད་རིན་པོ་ཆེ་ནི་མིའི་བུད་མེད་ཀྱི་ཡོན་ཏན་དག་ལས་ཤིན་དུ་འདས་ཤིང་ལྷ་མོའི་ཡོན་ཏན་དང་ལྡན་པ་དེ་བཞིན་དུ་ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་འདི་ན་བུད་མེད་རིན་པོ་ཆེའི་ཡོན་ཏན་གང་ཡིན་པ་དང་། སངས་རྒྱས་ཀྱི་ཞིང་དེ་ན་བུད་

79-1-28b

མེད་ཀྱི་ཡོན་ཏན་གང་ཡིན་པ་དེ་དག་ནི་དེ་དག་གི་ཡོན་ཏན་གྱི་གན་ན་བུད་མེད་རིན་པོ་ཆེའི་ཡོན་ཏན་དག་ནི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། བྱེ་བ་བརྒྱའི་ཆ་དང་། བྱེ་བ་སྟོང་གི་ཆ་དང་། བྱེ་བ་བརྒྱ་
སྟོང་གི་ཆ་དང་། བྱེ་བ་ཁྲག་ཁྲིག་བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་མི་བཟོད་དོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་སྐྱེས་པ་དག་བུད་མེད་དང་ལྷན་ཅིག་ཏུ་འཁྲིག་པ་སྤྱོད་
པའི་ཕྱིར་ལུས་སྦྱོར་བ་མེད་དེ། ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་ན་གང་གི་ཚེ་སྐྱེས་པ་དག་ཀུན་ཏུ་ཆགས་པའི་སེམས་བསྐྱེད་པ་ན་དེ་སོང་སྟེ་ཀུན་དུ་ཆགས་པའི་སེམས་ཀྱིས་བུད་མེད་ལ་ཡུད་ཙམ་ཞིག་བལྟས་པ་
ཙམ་གྱིས་སྐྱེས་པ་དེའི་འདོད་ཆགས་རབ་ཏུ་ཞི་བར་གྱུར་ཏེ། ཤིན་ཏུ་ཡིད་བྱུང་ཞིང་སྤངས་ནས་མི་སྡུག་པ་ལ་འདོད་ཆགས་དང་བྲལ་བའི་ཏིང་ངེ་འཛིན་ཐོབ་བོ། །ཏིང་ངེ་འཛིན་དེས་བདུད་ཀྱི་ཞགས་པ་ལས་གྲོལ་ནས་ཡང་འདོད་
ཆགས་ཀྱི་སེམས་སྐྱེ་བར་མི་འགྱུར་རོ། །སྐྱེས་པ་དེས་གང་ལ་བལྟས་པའི་བུད་མེད་དེ་བལྟས་པ་ཙམ་གྱིས་སྦྲུམ་མར་གྱུར་ཏེ། གཉིས་ཀའི་འདོད་ཆགས་ཞི་བར་གྱུར་ནས་མངལ་ན་གནས་པའི་ཁྱེའུ་འམ། བུ་མོ་དེའི་
ལུས་དང་སེམས་ཀྱིས་ཀྱང་འདི་འདྲ་བའི་བདེ་བ་མྱོང་བར་འགྱུར་ཏེ་འདི་ལྟ་སྟེ། དཔེར་ན་སུམ་བཅུ་རྩ་གསུམ་པའི་ལྷ་རྣམས་རིན་པོ་ཆེའི་གཞལ་མེད་ཁང་ན་དགའ་ཞིང་མཆོག་ཏུ་དགའ་བར་བྱེད་པ་ན་ལུས་དང་། སེམས་
ཀྱིས་བདེ་བ་མྱོང་བ་བཞིན་དུ་ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་ན་མངལ་ན་གནས་པའི་ཁྱིའུ་དང་། བུ་མོ་དག་ཀྱང་དེ་བཞིན་ནོ། །དེ་ན་མངལ་ན་གནས་པ་དེ་དག་ཉིན་ཞག་བདུན་གྱི་བར་དུ་བདེ་བ་མྱོང་ནས་བཙའ་བར་
འགྱུར་ཞིང་བུད་མེད་སྦྲུམ་མ་དེའི་ལུས་དང་། སེམས་ཀྱིས་ཀྱང་འདི་འདྲ་བའི་བདེ་བ་དག་མྱོང་བར་འགྱུར་ཏེ། འདི་ལྟ་སྟེ། དཔེར་ན་བསམ་གཏན་གཉིས་པ་ལ་སྙོམས་པར་ཞུགས་པའི་དགེ་སློང་ཐམས་ཅད་ཀྱིས་ཐམས་

79-1-29a

ཅད་དུ་བདེ་བར་གྱུར་པ་བཞིན་ནོ། །བུད་མེད་དེ་བུ་བཙའ་བ་ན་ཡང་མི་གཙང་བ་དང་། དྲི་མི་ཞིམ་པ་དག་མེད་དོ། །ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཀྱེ་མ་ནམ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེ་ཡོན་ཏན་དེ་ལྟ་བུ་དག་དང་ལྡན་པར་
གྱུར་ཅིག་ཅེས་སྨོན་ལམ་བཏབ་པའི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་
ཞིང་ན་གང་གི་ཚེ་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དག་རྒྱན་དག་ཐོགས་པར་འདོད་པ་དེའི་ཚེ་དཔག་བསམ་གྱི་ཤིང་དག་འདུད་ཅིང་འདོགས་པར་འགྱུར་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །དེ་ནས་དགེ་སློང་ཞིག་གིས་སངས་རྒྱས་ཀྱི་ཞིང་དེའི་བསྔགས་པ་བརྗོད་པ་དང་། བུད་
མེད་དེ་དག་གི་ཡོན་ཏན་ཐོས་ནས་དེ་ལ་ཀུན་དུ་ཆགས་པའི་སེམས་སྐྱེས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཀྱང་སངས་རྒྱས་ཀྱི་ཞིང་དེར་སྐྱེ་བ་ཡོངས་སུ་འཛིན་པར་གྱུར་ཅིག ། དེ་སྐད་ཅེས་
གསོལ་པ་དང་། བཅོམ་ལྡན་འདས་ཀྱིས་དགེ་སློང་དེ་ལ་འདི་སྐད་ཅེས་བཀའ་སྩལ་ཏོ། །མི་གཏི་མུག་པ་ཁྱོད་ལྟ་བུ་སངས་རྒྱས་ཀྱི་ཞིང་དེར་སྐྱེ་བར་མི་འགྱུར་རོ། །དེ་ཅིའི་ཕྱིར་ཞེ་ན། འདོད་ཆགས་ཀུན་ནས་ལངས་པའི་སེམས་ཀྱིས་སངས་
རྒྱས་ཀྱི་ཞིང་དེར་སྐྱེ་བར་མི་ནུས་ཀྱི། དགེ་སློང་གཞན་དུ་ན་དགེ་བའི་སྤྱོད་པ་དང་། ཆོས་ཀྱི་སྤྱོད་པ་དང་། ཚངས་པར་སྤྱོད་པ་དང་། ཡང་དག་པའི་སྤྱོད་པས་སེམས་ཅན་རྣམས་སངས་རྒྱས་ཀྱི་ཞིང་དེར་སྐྱེ་བ་ཡོངས་སུ་འཛིན་པར་འགྱུར་

79-1-29b

བའི་ཕྱིར་རོ། །ཤཱ་ར་དྭ་ཏིའི་བུ་གཞན་ཡང་སངས་རྒྱས་ཀྱི་ཞིང་དེ་ན་འདི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཉིད་ཆོས་ཀྱི་རྒྱལ་པོ་བླ་ན་མེད་པའོ་ཞེས་བྱ་བར་
ཤེས་པ་མ་གཏོགས་པ་རྒྱལ་པོ་གཞན་ནི་འགའ་ཡང་མེད་དོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་བྱང་གི་སྒྲ་མི་སྙན་གྱི་མི་རྣམས་ལ་རྒྱལ་པོ་ཞེས་བྱ་བ་གཞན་མེད་པ་དེ་བཞིན་དུ་ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་ན་ཡང་བཅོམ་ལྡན་འདས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཉིད་ཆོས་ཀྱི་རྒྱལ་པོ་བླ་ན་མེད་པའོ་ཞེས་བྱ་བར་ཤེས་པ་མ་གཏོགས་པ་རྒྱལ་པོ་གཞན་ནི་འགའ་ཡང་མེད་དོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་
ན་སུམ་བཅུ་རྩ་གསུམ་པའི་ལྷ་རྣམས་ནི་ལྷའི་དབང་པོ་བརྒྱ་བྱིན་ལ་རིམ་གྲོ་བྱ་བའི་ཕྱིར་འདུའོ། །ཤཱ་ར་དྭ་ཏིའི་བུ་དེ་བཞིན་དུ་སངས་རྒྱས་ཀྱི་ཞིང་དེའི་ལྷ་དང་། མི་རྣམས་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་མི་འཁྲུགས་པ་དེ་ལ་བལྟ་བ་དང་། ཕྱག་བྱ་བ་དང་། མཆོད་པ་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པའི་ཕྱིར་འདུ་སྟེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་ལས་གྱུར་པ་ཡིན་ནོ། །ཤཱ་ར་དྭ་ཏིའི་བུ་གཞན་ཡང་སངས་རྒྱས་ཀྱི་ཞིང་དེ་ན་མི་རྣམས་ནི་བག་ཡོད་པའི་
གནས་པས་གནས་པ་ཤ་སྟག་སྟེ། དེ་ཅིའི་ཕྱིར་ཞེ་ན། །ཤཱ་ར་དྭ་ཏིའི་བུ་དེ་ན་འདི་ལྟར་ཁ་ལོ་སྒྱུར་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཉིད་ཀྱིས་རྒྱུ་སྔོན་དུ་བཏང་བའི་ཕྱིར་ཏེ། ཤཱ་ར་
དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་

79-1-30a

བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དེ་བཞིན་གཤེགས་པའི་མཆོད་རྟེན་
ནམ། དེ་བཞིན་གཤེགས་པའི་སྐུ་གཟུགས་དག་ལ་མེ་ཏོག་དང་། བདུག་པ་དང་། སྤོས་དང་། མེ་ཏོག་ཕྲེང་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། བ་དན་དག་ཕུལ་ནས་འདི་སྐད་དུ་དགེ་བའི་རྩ་བ་
འདིས་བདག་གི་སངས་རྒྱས་ཀྱི་ཞིང་རྣམ་པ་ཐམས་ཅད་ཀྱི་མཆོག་དང་ལྡན་པར་གྱུར་ཅིག་ཅེས་སྨོན་ལམ་བཏབ་པས་ན་དེའི་ཚེ་དེ་ལྟ་བུར་གྱུར་པ་ཡིན་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་མི་དེ་དག་ལ་ཉོ་ཚོང་དང་། ཚོང་པ་དང་། ཞིང་ལས་དང་། སོ་ནམ་བྱ་བ་མེད་དེ། གཞན་དུ་ན་མི་དེ་དག་ཤིན་ཏུ་བདེ་བ་དང་ལྡན་པར་གནས་སོ། །ཤཱ་ར་དྭ་ཏིའི་བུ་
གཞན་ཡང་སངས་རྒྱས་ཀྱི་ཞིང་དེའི་མི་རྣམས་འདོད་པའི་དགའ་བས་རྩེ་བའི་ཕྱིར་འདོད་པ་དང་ལྡན་པའི་དབྱངས་ཀྱིས་གླུ་མི་ལེན་ཏེ། གཞན་དུ་ན་མི་དེ་དག་ཆོས་ཀྱི་དགའ་བ་ཉམས་སུ་མྱོང་བར་བྱེད་དོ། །ཤཱ་ར་དྭ་ཏིའི་བུ་གཞན་ཡང་
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་གསེར་གྱི་ཤིང་ཏ་ལའི་ཕྲེང་བ་དག་རླུང་གིས་ཀུན་དུ་བསྐྱོད་པ་ན་འདི་ལྟར་སྙན་པ་དང་། འཇེབས་
པ་དང་། ཡིད་དུ་འོང་བ་དང་། ཆགས་པར་འགྱུར་བའི་སྒྲ་འབྱུང་སྟེ། ཤཱ་ར་དྭ་ཏིའི་བུ་ཇི་ལྟར་གསེར་གྱི་ཤིང་ཏ་ལའི་ཕྲེང་བ་དག་རླུང་གིས་ཀུན་དུ་བསྐྱོད་པ་ལས་སྙན་པ་དང་། འཇེབས་པ་དང་། ཡིད་དུ་འོང་བ་དང་ཆགས་པར་འགྱུར་བའི་

79-1-30b

སྒྲ་འབྱུང་བ་དེ་ལྟ་བུའི་སྙན་པ་དང་། འཇེབས་པ་དང་། ཡིད་དུ་འོང་བ་དང་། ཆགས་པར་འགྱུར་བའི་སྒྲ་ནི་ལྷའི་སིལ་སྙན་ཡན་ལག་ལྔ་དང་ལྡན་པ་དག་རོལ་མོའི་སློབ་དཔོན་མཁས་པ་གསིལ་བ་དག་ལས་ཀྱང་འབྱུང་བར་མི་འགྱུར་ཏེ། ཤཱ་ར་དྭ་ཏིའི་
བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་དེ་ལྟ་བས་
ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་བསྒྲུབ་པར་འདོད་པས་ཇི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་
པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་དག་ཡོངས་སུ་གཟུང་བ་དང་། སངས་རྒྱས་ཀྱི་ཞིང་ཡོངས་སུ་སྦྱངས་པས་དེ་ལྟར་སངས་རྒྱས་ཀྱི་ཞིང་གི་ཡོན་ཏན་བཀོད་པ་
ཕུན་སུམ་ཚོགས་པ་དག་ཡོངས་སུ་གཟུང་བར་བྱ། དེ་ལྟར་སངས་རྒྱས་ཀྱི་ཞིང་ཡོངས་སུ་སྦྱང་བར་བྱའོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་
པ་དེའི་སངས་རྒྱས་ཀྱི་ཞིང་ན་ཉི་མ་དང་ཟླ་བ་སྣང་བའི་བྱ་བ་ཆེར་མི་བྱེད་དེ། འོན་ཀྱང་དེ་ན་མུན་པ་ཡང་མེད་ལ་མུན་ནག་ཀྱང་མེད་དོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་དེ་ནི་འདི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་མི་འཁྲུགས་པ་དེའི་འོད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཐམས་ཅད་རྟག་པར་ཀུན་དུ་སྣང་བར་གྱུར་པའི་ཕྱིར་རོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་ནོར་བུ་རིན་པོ་ཆེ་ཞིག་ཁང་
པ་བརྩེགས་པའི་ར་བ་སྒོ་བཅད་པ། སྐར་ཁུང་བཅད་པ། བླ་འོག་གཡོགས་པ། ས་བཟང་པོའི་ཞལ་ཞལ་གྱིས་བསྐུས་པའི་ནང་དུ་བཅུག་ལ་དེར་ནོར་བུ་རིན་པོ་ཆེ་དེའི་རང་གི་ལུས་ཀྱི་འོད་ཀྱིས་སྣང་བའི་བྱ་བ་བྱེད་པ་ན་དེ་ན་སེམས་ཅན་

79-1-31a

གང་དག་འཁོད་པ་དེ་དག་གིས་ཉིན་པར་ཡང་སྣང་བར་ཤེས་མཚན་མོ་ཡང་སྣང་བར་ཤེས་སོ། །ཤཱ་ར་དྭ་ཏིའི་བུ་དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་
པ་དེའི་འོད་ཀྱིས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་དག་ཐམས་ཅད་རྟག་པར་ཀུན་ཏུ་སྣང་བར་གྱུར་ཏོ། །ཤཱ་ར་དྭ་ཏིའི་བུ་དེ་ལ་ཁང་པ་བརྩེགས་པའི་ར་བ་ཞེས་བྱ་བ་དེ་ནི་འཇིག་རྟེན་གྱི་ཁམས་མངོན་པར་དགའ་
བ་ཞེས་བྱ་བ་དེའི་ཚིག་བླ་དགས་སོ། །ཤཱ་ར་དྭ་ཏིའི་བུ་ནོར་བུ་རིན་པོ་ཆེ་ཞེས་བྱ་བ་དེ་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་ཚིག་བླ་དགས་སོ། །ཤཱ་
ར་དྭ་ཏིའི་བུ་ནོར་བུ་རིན་པོ་ཆེའི་འོད་ཅེས་བྱ་བ་དེ་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་འོད་ཀྱི་ཚིག་བླ་དགས་སོ། །ཤཱ་ར་དྭ་ཏིའི་བུ་སེམས་ཅན་ཞེས་
བྱ་བ་དེ་ནི་མི་གང་དག་སངས་རྒྱས་ཀྱི་ཞིང་དེ་ན་གནས་པའི་མི་དེ་རྣམས་ཀྱི་ཚིག་བླ་དགས་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་
འཁྲུགས་པ་དེ་ག་ལས་གར་གཤེགས་པ་ན་ས་ཆེན་པོ་དེ་ལ་ཞབས་གང་དང་གང་དག་ཏུ་བཞག་པ་དེ་དང་དེ་དག་ཏུ་པད་མ་གསེར་གྱི་མདོག་ཅན་འདབ་མ་སྟོང་ཡོད་པ་དག་འབྱུང་བར་འགྱུར་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་
འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཅི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཁང་པའི་ནང་དུ་

79-1-31b

གཤེགས་པ་ན་ཡང་དེའི་ཞབས་ཀྱི་འོག་ནས་པད་མ་གསེར་གྱི་མདོག་ཅན་འདབ་མ་སྟོང་དང་ལྡན་པ་དག་འབྱུང་ལགས་སམ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་
སྩལ་ཏོ། །ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ནི་གྲོང་དང་། གྲོང་ཁྱེར་དག་ཏུ་གཤེགས་པ་ཉུང་མོད་ཀྱི། འོན་ཀྱང་གང་གི་ཚེ་གཤེགས་ཤིང་
བཞུགས་པར་གྱུར་པ་ན་ཁྱིམ་དེར་པད་མ་གསེར་གྱི་མདོག་ཅན་འདབ་མ་སྟོང་དང་ལྡན་པ་དག་འབྱུང་སྟེ། ཤཱ་ར་དྭ་ཏིའི་བུ་གལ་ཏེ་དེར་རིགས་ཀྱི་བུའམ་རིགས་ཀྱི་བུ་མོ་ལ་ལ་ཞིག་གིས་འདི་སྙམ་དུ། གང་དེ་བཞིན་གཤེགས་པ་ཁྱིམ་
འདིར་གཤེགས་པའི་ཞབས་འོག་ནས་བྱུང་བའི་པད་མ་འདི་དག་ཐམས་ཅད་གནས་གཅིག་ཏུ་འདུས་པར་གྱུར་ཅིག་སྙམ་དུ་བསམས་ན་ཡང་འདི་ལྟར་སངས་རྒྱས་ཀྱི་མཐུས་དེ་དག་གནས་གཅིག་ཏུ་འདུའོ། །གལ་ཏེ་ཡང་འདི་སྙམ་
དུ་དེ་དག་ནམ་མཁའ་ལ་གནས་པར་གྱུར་ཅིག །སྙམ་དུ་བསམས་ན་ཡང་འདི་ལྟར་སངས་རྒྱས་ཀྱི་མཐུས་དེ་དག་ནམ་མཁའ་ལ་གནས་ཏེ། ཤཱ་ར་དྭ་ཏིའི་བུ་པད་མ་དེ་དག་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
དེའི་མི་རྣམས་ཀྱི་མཆོད་རྟེན་དུ་འགྱུར་རོ། །ཤཱ་ར་དྭ་ཏིའི་བུ་གཞན་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
མི་འཁྲུགས་པ་དེ་གང་དུ་ཆོས་སྟོན་པའི་ཕྱིར་གཤེགས་པ་དེར་པད་མ་དེ་ལྟ་བུ་དག་འབྱུང་ངོ་། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེས་ཕྱོགས་གཞན་
དག་དང་། འཇིག་རྟེན་གྱི་ཁམས་གཞན་གང་དང་གང་དག་ཏུ་སྤྲུལ་པ་དག་བཀྱེ་བ་དེ་དང་དེ་དག་ཏུ་ཡང་འདི་ལྟར་སངས་རྒྱས་ཀྱི་མཐུས་པད་མ་དེ་ལྟ་བུ་དག་འབྱུང་སྟེ། ཤཱ་ར་དྭ་ཏིའི་བུ་དེ་ལྟར་ན་སྟོང་གསུམ་གྱི་སྟོང་ཆེན་པོའི་

79-1-32a

འཇིག་རྟེན་གྱི་ཁམས་དེ་ཐམས་ཅད་པད་མ་གསེར་གྱི་མདོག་ཅན་འདབ་མ་སྟོང་དང་ལྡན་པ་དེ་ལྟ་བུ་ཤ་སྟག་གིས་རྟག་ཏུ་བརྒྱན་པར་གྱུར་ཏོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་འདི་ལྟར་གསེར་དང་། དངུལ་དང་། བཻ་དཱུརྱ་དང་། རིན་པོ་ཆེ་སྣ་བདུན་ལས་བྱས་པའི་ཐེམ་སྐས་འཛམ་བུའི་གླིང་ནས་བཙུགས་ན་སུམ་བཅུ་
རྩ་གསུམ་པའི་ལྷའི་རིས་ཀྱི་བར་དུ་ཕྱིན་པ་དག་ཡོད་དེ། ཤཱ་ར་དྭ་ཏིའི་བུ་གང་གི་ཚེ་སུམ་བཅུ་རྩ་གསུམ་པའི་ལྷ་རྣམས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་
པ་དེ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བར་འདོད་པའི་ཚེ་སུམ་བཅུ་རྩ་གསུམ་པའི་ལྷའི་རིས་ནས་རིན་པོ་ཆེའི་ཐེམ་སྐས་དེ་དག་ལས་བབས་པ་ན་སུམ་བཅུ་རྩ་གསུམ་པའི་ལྷ་དེ་དག་འཛམ་བུའི་གླིང་པའི་མི་
དེ་དག་ལ་འདི་ལྟར་སྨོན་པའི་སེམས་སྐྱེ་སྟེ། བདག་ཅག་ལྷ་རྣམས་ཀྱི་ལྷའི་ཕུན་སུམ་ཚོགས་པ་གང་ཡིན་པ་དང་། འཛམ་བུའི་གླིང་པའི་མི་རྣམས་ཀྱི་མིའི་ཕུན་སུམ་ཚོགས་པ་གང་ཡིན་པ་དེ་དག་ནི་བདག་ཅག་ལྷ་རྣམས་
ཀྱི་ཕུན་སུམ་ཚོགས་པ་དག་ལས་འཛམ་བུའི་གླིང་པའི་མི་རྣམས་ཀྱི་ཕུན་སུམ་ཚོགས་པ་འདི་དག་ཀྱང་ཁྱད་པར་ཅུང་ཟད་ཙམ་གྱིས་ཀྱང་མི་དམན་པའི་སྟེང་དུ་འཛམ་བུ་གླིང་འདི་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་མི་འཁྲུགས་པ་འདི་ཆོས་འཆད་ཅིང་བཞུགས་པས་ལྷག་པར་ཁྱད་པར་དུ་འཕགས་སོ་ཞེས་དེ་ལྟར་སུམ་བཅུ་རྩ་གསུམ་པའི་ལྷ་རྣམས་འཛམ་བུའི་གླིང་པའི་མི་དེ་དག་ལ་སྨོན་པར་བྱེད་དོ། །
ཤཱ་ར་དྭ་ཏིའི་བུ་གང་གི་ཚེ་འཛམ་བུའི་གླིང་པའི་མི་དེ་དག་སུམ་བཅུ་རྩ་གསུམ་པའི་ལྷ་རྣམས་ཀྱི་གནས་སུ་འཛེག་པར་གྱུར་པའི་ཚེ་ན། དེ་དག་སུམ་བཅུ་རྩ་གསུམ་པའི་ལྷ་རྣམས་ལ་སྨོན་པ་མེད་དོ། །དེ་ཅིའི་ཕྱིར་ཞེ་ན། དེ་

79-1-32b

དག་འདི་སྙམ་དུ་ལྷ་འདི་དག་གི་ལྷའི་ཕུན་སུམ་ཚོགས་པ་དག་ལས་བདག་ཅག་གི་ཕུན་སུམ་ཚོགས་པ་དག་ཀྱང་མི་དམན་པའི་སྟེང་དུ་བདག་ཅག་གི་འཛམ་བུའི་གླིང་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་མི་འཁྲུགས་པ་ཆོས་སྟོན་ཅིང་བཞུགས་པས་ན་འདི་ལྟར་བདག་ཅག་གི་སངས་རྒྱས་ཀྱི་ཕུན་སུམ་ཚོགས་པ་དེས་སུམ་བཅུ་རྩ་གསུམ་པའི་ལྷ་འདི་དག་ནི་ཟིལ་གྱིས་ནོན་ཏོ་སྙམ་དུ་སེམས་པའི་ཕྱིར་
རོ། །ཤཱ་ར་དྭ་ཏིའི་བུ་གཞན་ཡང་སངས་རྒྱས་ཀྱི་ཞིང་དེ་ན་ལྷ་རྣམས་ཀྱིས་ཀྱང་མི་རྣམས་མཐོང་ལ་མི་རྣམས་ཀྱིས་ཀྱང་ལྷ་རྣམས་མཐོང་ངོ་། །འདི་ལྟར་ཡང་འཛམ་བུའི་གླིང་པའི་མི་དེ་དག་འཛམ་བུའི་གླིང་ཉིད་ན་གནས་བཞིན་དུ་
འདོད་པ་ན་སྤྱོད་པའི་ལྷ་རྣམས་ཀྱི་གཞལ་མེད་ཁང་དག་ཀྱང་མཐོང་སྟེ། ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་ད་ལྟར་འཛམ་བུའི་གླིང་འདིའི་མི་རྣམས་ཀྱིས་སྐར་མའི་གཟུགས་རྣམས་དང་། ཉི་མ་དང་། ཟླ་བ་དག་མཐོང་བ་དེ་བཞིན་དུ་
ཤཱ་ར་དྭ་ཏིའི་བུ་སངས་རྒྱས་ཀྱི་མཐུས་སངས་རྒྱས་ཀྱི་ཞིང་དེར་འཛམ་བུའི་གླིང་པའི་མི་རྣམས་ཀྱིས་ཀྱང་འདོད་པ་ན་སྤྱོད་པའི་ལྷ་རྣམས་ཀྱི་གཞལ་མེད་ཁང་དག་མཐོང་སྟེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་
འཁྲུགས་པ་དེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཐམས་ཅད་དུ་ཆོས་སྟོན་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེར་འཁོར་བཞི་པོ་དག་གིས་མི་སྟོངས་པར་འགྱུར་ཏེ། ཤཱ་ར་དྭ་ཏིའི་བུ་

79-1-33a

དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །
མི་འཁྲུགས་པ་ལུང་བསྟན་པ་ཐེག་པ་ཆེན་པོའི་མདོ་ལས་ལེའུ་གཉིས་པའོ།། །། བམ་པོ་གསུམ་པ། ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་མི་འཁྲུགས་པ་དེ་ཆོས་སྟོན་པ་ན་ཆོས་བསྟན་པ་རེ་རེས་ཀྱང་འདི་ལྟར་སེམས་ཅན་དཔག་ཏུ་མེད་ཅིང་གྲངས་མེད་པ་དག་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་བཏུལ་ཏེ། ཤཱ་ར་དྭ་ཏིའི་བུ་
རྣམ་གྲངས་འདིས་སེམས་ཅན་དཔག་ཏུ་མེད་ཅིང་གྲངས་མེད་པ་དག་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་བཏུལ་ཅིང་ཕལ་ཆེར་རྣམ་པར་ཐར་པ་བརྒྱད་ལ་བསམ་གཏན་པ་ཤ་སྟག་གོ། །ཤཱ་ར་དྭ་ཏིའི་བུ་ཡང་
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་ཉན་ཐོས་ཀྱི་དགེ་འདུན་ནི་དཔག་ཏུ་མེད། གྲངས་མེད་དེ་ཤཱ་ར་དྭ་ཏིའི་བུ་དེ་དག་ནི་རྩིས་མཁན་ནམ། རྩིས་མཁན་
ཆེན་པོ་གང་གིས་ཀྱང་གྲངས་དང་། རྩིས་ཀྱིས་ཁྱད་ཕྱིན་ནི་འདི་སྙེད་ཅིག་གོ་ཞེ་འམ། གཏམས་ནི་འདི་སྙེད་ཅིག་གོ་ཞེ་འམ། དཀྲིགས་ནི་འདི་སྙེད་ཅིག་གོ་ཞེ་འམ། མཆོག་ཡས་ནི་འདི་སྙེད་ཅིག་གོ་ཞེ་འམ། ཀ་རན་ད་ནི་འདི་སྙེད་
ཅིག་གོ་ཞེ་འམ། ཟིལ་གནོན་ནི་འདི་སྙེད་ཅིག་གོ་ཞེ་འམ། ཐེར་འབུམ་ནི་འདི་སྙེད་ཅིག་གོ་ཞེ་འམ། གཞལ་དུ་མེད་པ་ནི་འདི་སྙེད་ཅིག་གོ་ཞེས་བྱ་བར་གྲངས་དང་། རྩིས་འདི་དག་གིས་བགྲང་བའམ་བརྩི་བར་ནུས་ཤིང་ཁོང་དུ་ཆུད་
པར་ངས་ཡང་དག་པར་རྗེས་སུ་མ་མཐོང་སྟེ། ཤཱ་ར་དྭ་ཏིའི་བུ་གཞན་དུ་ན་ཉན་ཐོས་དེ་དག་ནི་དཔག་ཏུ་མེད་པ་ཉིད་དམ། གྲངས་མེད་པ་ཉིད་ཀྱི་གྲངས་སུ་འགྲོའོ། །གཞན་དུ་ན་ཐམས་ཅད་མཁྱེན་པ་ཉིད་ཀྱི་ཡེ་ཤེས་ཀྱིས་བགྲང་བའི་

79-1-33b

གྲངས་སུ་འགྲོའོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་རིགས་ཀྱི་བུ་གང་དག་རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་ལ་གནས་པ་དག་ནི་ཉུང་སྟེ། ཤཱ་
ར་དྭ་ཏིའི་བུ་འདི་ལྟ་སྟེ། དཔེར་ན་ངས་ད་ལྟར་ཆོས་བསྟན་པ་ན་དེ་ལྟར་ཐོགས་ན་སྲིད་པ་ལན་བདུན་པའི་རྒྱུན་དུ་ཞུགས་པ་ལེ་ལོ་ཅན་གང་གོང་མའི་ཁྱད་པར་མི་ཐོབ་པ་དེ་ངས་རེས་ལྟར་ཐོགས་ན་སྲིད་པ་ལན་བདུན་པར་བསྟན་
པ་དེ་བཞིན་དུ་དེ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེས་ཆོས་བསྟན་པ་ན་རིགས་ཀྱི་བུ་གང་དག་སྟན་གཅིག་ལ་འདུག་ནས་དགྲ་བཅོམ་
པའི་འབྲས་བུ་མི་ཐོབ་པར་ཆོས་བསྟན་པ་དང་པོས་རྒྱུན་དུ་ཞུགས་པའི་འབྲས་བུ་འཐོབ་པ་དང་། ཆོས་བསྟན་པ་གཉིས་པས་ལན་ཅིག་ཕྱིར་འོང་བའི་འབྲས་བུ་འཐོབ་པ་དང་ཆོས་བསྟན་པ་གསུམ་པས་ཕྱིར་མི་འོང་བའི་
འབྲས་བུ་འཐོབ་པ་དང་། ཆོས་བསྟན་པ་བཞི་པས་དགྲ་བཅོམ་པའི་འབྲས་བུ་འཐོབ་པ་དེ་ནི་དེ་ན་ལེ་ལོ་ཅན་ཞེས་བྱའོ། །ཤཱ་ར་དྭ་ཏིའི་བུ་ཇི་ལྟར་ད་ལྟར་གྱི་བཞིན་དུ་དེ་ན་གང་རྒྱུན་དུ་ཞུགས་པ་དེ་ནི་རེས་ལྟར་ཐོགས་ན་
སྲིད་པ་ལན་བདུན་པ་མ་ཡིན་གྱི། དེ་ནི་ལུས་དེ་ཉིད་ཀྱིས་དགྲ་བཅོམ་པ་ཉིད་མངོན་སུམ་དུ་བྱེད་དེ་འདི་ལྟ་སྟེ། རྒྱུན་དུ་ཞུགས་པ་ཞེས་འབྲས་བུ་རྣམ་པར་གཞག་པ་དེ་ནི་མིང་ཙམ་དུ་ཟད་དོ། །ཇི་ལྟར་ད་ལྟར་གྱི་བཞིན་དུ་
དེ་ན་གང་ལན་ཅིག་ཕྱིར་འོང་བ་དེ་འཇིག་རྟེན་འདིར་ལན་ཅིག་ཕྱིར་འོངས་ནས་སྡུག་བསྔལ་མཐར་བྱེད་པ་མ་ཡིན་གྱི་དེ་ནི་ལུས་དེ་ཉིད་ཀྱིས་དགྲ་བཅོམ་པ་ཉིད་མངོན་སུམ་དུ་བྱེད་དེ། འདི་ལྟ་སྟེ། ལན་ཅིག་ཕྱིར་འོང་བ་ཞེས་
འབྲས་བུ་རྣམ་པར་གཞག་པ་དེ་ནི་མིང་ཙམ་དུ་ཟད་དོ། །ཇི་ལྟར་ད་ལྟར་གྱི་བཞིན་དུ་དེ་ན་གང་ཕྱིར་མི་འོང་བ་དེ་ནི་དེར་ལན་ཅིག་འོངས་ནས་ཡོངས་སུ་མྱ་ངན་ལས་འདའ་བ་མ་ཡིན་གྱི། དེ་ནི་ལུས་དེ་ཉིད་ཀྱིས་དགྲ་བཅོམ་པ་

79-1-34a

ཉིད་མངོན་སུམ་དུ་བྱེད་དེ། འདི་ལྟར་ཕྱིར་མི་འོང་བ་ཞེས་འབྲས་བུ་རྣམ་པར་གཞག་པ་དེ་ནི་མིང་ཙམ་དུ་ཟད་དོ། །ཤཱ་ར་དྭ་ཏིའི་བུ་དེ་ན་དགྲ་བཅོམ་པ་གང་ཡིན་པ་དེ་ནི་དེ་ན་ཡང་མི་གནས། འདི་ན་ཡང་མི་
གནས། གཉིས་ཀ་མེད་པའི་བར་ན་ཡང་མི་གནས་ཏེ། ཕུང་པོའི་ལྷག་མ་མེད་པའི་མྱ་ངན་ལས་འདའ་བའི་དབྱིངས་སུ་ཡོངས་སུ་མྱ་ངན་ལས་འདའ་སྟེ། ཤཱ་ར་དྭ་ཏིའི་བུ་དེ་ལྟར་སངས་རྒྱས་ཀྱི་ཞིང་དེ་ན་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེས་འདི་ལྟར་འབྲས་བུ་རྣམ་པར་གཞག་པ་ཉེ་བར་བཟུང་སྟེ། དགེ་སྦྱོང་གི་འབྲས་བུ་སྟོན་ཏོ། །ཤཱ་ར་དྭ་ཏིའི་བུ་ཡང་དེ་ན་རིགས་ཀྱི་བུ་འམ་
རིགས་ཀྱི་བུ་མོ་གང་ཆོས་ཤེས་པ་དེ་ནི་སློབ་པའི་ས་ལ་གནས་ཤིང་ཉམས་པར་མི་འགྱུར་ཏེ། ཤཱ་ར་དྭ་ཏིའི་བུ་དེ་ལ་སློབ་པའི་ས་ཞེས་བྱ་བ་དེ་ནི་སྙིགས་མའི་ས་ཞེས་བྱ་བའི་ཚིག་བླ་དགས་སོ། །ཤཱ་ར་དྭ་ཏིའི་བུ་དེ་ནི་མི་སློབ་
པའི་ས་ལ་བརྟེན་ནས་ཡོངས་སུ་མྱ་ངན་ལས་འདའ་ཞིང་མི་སློབ་པའི་ས་ལ་གནས་ནས་ཡོངས་སུ་མྱ་ངན་ལས་འདའ་སྟེ། ཤཱ་ར་དྭ་ཏིའི་བུ་དེ་ལ་མི་སློབ་པའི་ས་ཞེས་བྱ་བ་ནི་དགྲ་བཅོམ་པ་ཉིད་ཅེས་བྱ་བའི་ཚིག་བླ་དགས་
ཏེ། ཤཱ་ར་དྭ་ཏིའི་བུ་དེ་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་ཉན་ཐོས་ཀྱི་དགེ་འདུན་རྣམ་པར་དག་པའི་སྙིང་པོ་ལ་གནས་པ་ཕུན་སུམ་ཚོགས་
པ་ཞེས་བྱའོ། །ཤཱ་ར་དྭ་ཏིའི་བུ་དེ་ལ་རྣམ་པར་དག་པའི་སྙིང་པོ་ལ་གནས་པ་ཕུན་སུམ་ཚོགས་པ་ཞེས་བྱ་བ་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་
འཁྲུགས་པ་དེའི་ཉན་ཐོས་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་དུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་

79-1-34b

ཆེན་པོ། །བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་དུ་སྦྱོར་བ། ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་དུ་རྣམ་པར་གྲོལ་བ། སེམས་ཀྱི་དབང་
ཐམས་ཅད་ཀྱི་དམ་པའི་ཕ་རོལ་དུ་སོན་པ། ཕལ་ཆེར་རྣམ་པར་ཐར་པ་བརྒྱད་ལ་བསམ་གཏན་པའི་དགེ་འདུན་གྱི་ཚིག་བླ་དགས་ཡིན་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་ཉན་ཐོས་རྣམས་ཀྱི་ཉན་ཐོས་ཀྱི་དགེ་འདུན་གྱི་བཀོད་པ་ཕུན་སུམ་ཚོགས་པ་ཡིན་ནོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་ཉན་ཐོས་རྣམས་འདི་སྙམ་དུ་དེ་རིང་བདག་ཅག་གང་དུ་ཟན་བཟའ་བར་བྱ། དེ་རིང་བདག་ཅག་ལ་སུས་ཟན་སྦྱིན་པར་འགྱུར་སྙམ་དུ་
སེམས་པ་མེད་དོ། །ཉན་ཐོས་དེ་དག་བསོད་སྙོམས་ཀྱི་ཕྱིར་ཁྱིམ་དག་ཏུ་འཇུག་པ་ཡང་མེད་དོ། །དེ་དག་གང་གི་ཚེ་ཟས་ཀྱི་དུས་ལ་བབ་པར་གྱུར་པའི་དུས་དེ་ཉིད་ཀྱི་ཚེ་ན་ལྷུང་བཟེད་དུ་ཁ་ཟས་འབྱུང་ངོ་། །གང་གི་ཚེ་ཉན་ཐོས་དེ་
དག་གིས་འདི་སྙམ་དུ་བདག་ཅག་ལ་གཞན་དག་གིས་ཟས་བྱིན་ཡང་སླའོ་སྙམ་དུ་བསམ་པ་དེའི་ཚེ་ན་དེ་དག་ལ་གཞན་ཟས་སྦྱིན་པར་ཡང་འགྱུར་ཏེ། དེ་དག་ཟས་ཁམ་གཉིས་སམ་གསུམ་ཙམ་གྱིས་ཁ་ཟས་ཀྱི་བྱ་བ་བྱེད་ཅིང་
ཆོག་པར་ཡང་འགྱུར་རོ། །ཉན་ཐོས་དེ་དག་ལྷུང་བཟེད་དང་། ཆོས་གོས་ཚོལ་བར་ཡང་མི་བྱེད་ལ། དེ་དག་ཆོས་གོས་དག་མི་འདྲ། མི་འདྲུ་བ། མི་འཁྲུ། མི་འཚེད་ཅིང་བདག་ཀྱང་མི་བྱེད་ལ་གཞན་ལ་ཡང་མི་འཆོལ་མོད་
ཀྱི། གཞན་དུ་ན་སྤྱོད་པ་ཙམ་དུ་སངས་རྒྱས་ཀྱི་མཐུས་འབྱུང་བར་ཡང་འགྱུར་རོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་

79-1-35a

ཇི་ལྟར་ད་ལྟར་ཉན་ཐོས་རྣམས་ལ་ལྟུང་བ་བཞི་པོ་དག་གི་ཆོས་སྟོན་པ་དེ་ལྟར་ཉན་ཐོས་རྣམས་ལ་ལྟུང་བའི་ཆོས་རྣམས་མི་སྟོན་ཏོ། །ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ནི་ཉན་ཐོས་རྣམས་ལ་དེ་ལྟ་བུའི་ཆོས་མི་སྟོན་ཏེ། དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་ན་ཚེའི་སྙིགས་མ་མེད། སེམས་ཅན་གྱི་སྙིགས་མ་མེད། 
དུས་ཀྱི་སྙིགས་མ་མེད། ལྟ་བའི་སྙིགས་མ་མེད། ཉོན་མོངས་པའི་སྙིགས་མ་མེད་ཅིང་སྙིང་སྟོབས་ཉམས་པ་མེད་པས་ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་སྙིགས་མ་དང་བྲལ་བ་ཡིན་པའི་ཕྱིར་རོ། །ཤཱ་ར་དྭ་ཏིའི་བུ་གཞན་
ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་གང་གི་ཚེ་ཉན་ཐོས་རྣམས་ལ་ཆོས་སྟོན་པ་ན་དང་པོ་ཉིད་ནས་ཡང་དག་ཕུལ་གྱི་ཆོས་རྣམས་སྟོན་པར་
མཛད་དེ། དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་ན་སེམས་ཅན་རྣམས་ནི་མགོ་སྨོས་པས་གོ་བ་ཤ་སྟག་སྟེ། རྣམ་པར་སྤྲོས་པས་གོ་བ་དང་། ཞིབ་ཏུ་བཤད་པས་གོ་བར་བྱ་དགོས་པ་དེ་དག་དེ་ན་མེད་པའི་
ཕྱིར་རོ། །ཤཱ་ར་དྭ་ཏིའི་བུ་དེ་ན་ཉན་ཐོས་ཀྱི་དགེ་འདུན་ལ་ལྷག་པའི་ང་རྒྱལ་ཅན་ནི་འགའ་ཙམ་ཡང་མེད་དེ། ཤཱ་ར་དྭ་ཏིའི་བུ་དེ་ན་ལྷག་པའི་ང་རྒྱལ་ཅན་ཞེས་བྱ་བའི་མིང་ཙམ་ཡང་མི་སྲིད་དོ། །ཤཱ་ར་དྭ་ཏིའི་བུ་དེ་ན་ཉན་ཐོས་ཀྱི་དགེ་
འདུན་ལ་གང་དག་དགེ་སྦྱོང་གི་དྲི་མར་བྱ་བའི་རྣམ་པ་དང་། དགེ་སྦྱོང་གི་སྐྱོན་དུ་བྱ་བ་དང་། དགེ་སྦྱོང་གི་གྱ་གྱུར་བྱ་བ་དང་། དགེ་སྦྱོང་གི་གཡོར་བྱ་བ་དང་། དགེ་སྦྱོང་གི་སྒྱུར་བྱ་བ་དེ་དག་ནི་ཐམས་ཅད་ཀྱི་ཐམས་ཅད་རྣམ་པ་
ཐམས་ཅད་ཀྱི་ཐམས་ཅད་དུ་མེད་དེ་འདི་ལྟར་དགེ་སྦྱོང་གི་དྲི་མ་ཞེས་བྱ་བའི་མིང་ཙམ་ཡང་ཀུན་དུ་འབྱུང་བ་མེད་དོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་སེམས་ཅན་དེ་དག་ནི་དགེ་བའི་རྩ་བ་ཡོངས་སུ་སྨྱིན་ཅིང་དག་པ་ཡིན་

79-1-35b

པས་ན་དེ་དག་ལ་ཆོས་ཇི་ལྟར་བསྟན་པ་དེ་བཞིན་དུ་ཀུན་དུ་ཤེས་པར་འགྱུར་བའི་ཕྱིར་རོ། །ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་ན་མཚམས་མེད་ལྔ་པོ་དག་སྟོན་པ་ནི་ཐམས་ཅད་ཀྱི་ཐམས་ཅད་དུ་མེད་དེ། དེ་ན་མཚམས་མེད་
པའི་སྒྲ་ཡང་མི་འབྱུང་ངོ་། །ཤཱ་ར་དྭ་ཏིའི་བུ་ཉན་ཐོས་དེ་དག་ནི་རྙེད་པ་དང་། བཀུར་སྟི་ལྷུར་ལེན་པ་མ་ཡིན་ཞིང་། ལྷུང་བཟེད་དང་། ཆོས་གོས་ལྷུར་ལེན་པ་ཡང་མ་ཡིན་ཏེ། དེ་དག་ནི་ཐམས་ཅད་ཀྱི་ཐམས་ཅད་རྣམ་པ་ཐམས་
ཅད་ཀྱི་ཐམས་ཅད་དུ་ཆོས་གོས་དང་། ཡོ་བྱད་ལྷུར་ལེན་པ་མ་ཡིན་ནོ། །ཤཱ་ར་དྭ་ཏིའི་བུ་དེ་དག་ལ་རྙེད་པ་དང་། བཀུར་སྟིའི་བསམ་པ་ལས་བཟླ་བའི་ཕྱིར་ཆོས་བསྟན་པར་བྱ་མི་དགོས་ཏེ། དེ་ཅིའི་ཕྱིར་ཞེ་ན། ཤཱ་ར་དྭ་
ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་ཉན་ཐོས་དེ་དག་ནི་འདོད་པ་ཆུང་བ་དང་། ཆོག་ཤེས་པའི་ཕྱིར་རོ། །ཤཱ་ར་དྭ་ཏིའི་བུ་
ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཇི་ལྟར་ང་ད་ལྟར་ཉན་ཐོས་རྣམས་ལ་བསླབ་པ་འཆའ་བ་དེ་ལྟར་ཉན་ཐོས་རྣམས་ལ་བསླབ་པ་འཆའ་བར་མི་
མཛད་དོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་ཉན་ཐོས་དེ་དག་ལ་སྐྱོན་མེད་པའི་ཕྱིར་ཏེ། དེ་ན་བསླབ་པ་ནི་འདི་ཁོ་ན་སྟེ། འདི་ལྟར་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་རྗེས་སུ་དྲན་པར་བྱེད་པའོ། །ཤཱ་ར་དྭ་ཏིའི་
བུ་ཇི་ལྟར་ད་ལྟར་མི་བླུན་པོ་ཁ་ཅིག་ངའི་བསྟན་པ་ལ་རབ་ཏུ་བྱུང་ནས་ངའི་བསླབ་པའི་གཞི་འདྲལ་བར་བྱེད་པ་དེ་ལྟར་ཉན་ཐོས་དེ་དག་ལ་བསླབ་པའི་གཞི་འདྲལ་བར་བྱེད་པ་མེད་དོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་ཉན་ཐོས་འདུས་པ་ནི་ཅང་ཤེས་པ་ཤ་སྟག་ཡིན་ལ། ཤཱ་ར་དྭ་ཏིའི་བུ་བཅོམ་ལྡན་འདས་དེ་

79-1-36a

བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་སྙིགས་མ་མེད་པའི་ཕྱིར་རོ། །དེ་ན་ཉན་ཐོས་གཅིག་དང་། ཉན་ཐོས་གཉིས་
ལྷན་ཅིག་ཏུ་མི་གནས་པར་དེ་དག་རང་རང་གི་རྣལ་འབྱོར་གྱི་དོན་ལ་རྗེས་སུ་བརྩོན་པར་གནས་སོ། །འདུ་འཛི་མེད་པ་ལ་འགའ་ཞིང་འདུ་འཛི་མེད་པའི་རྣལ་འབྱོར་ལ་བརྩོན་ཏེ། དགེ་བའི་ཕྱོགས་ལ་རྟག་ཏུ་སྦྱོར་ཞིང་རྙེད་པ་དང་
བཀུར་སྟི་དོན་དུ་མི་གཉེར་ཏེ། དེ་ན་གང་ཟག་རྣམས་ནི་བརྩོན་འགྲུས་ཉམས་པ་མེད་པས་རབ་ཏུ་ཕྱེ་བས་དེ་ན་ལེ་ལོ་ཅན་དག་ནི་བལྟར་ཡང་མེད་དེ། ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་ཉན་ཐོས་དེ་དག་ནི་ཡོན་ཏན་ཡོངས་སུ་གྲུབ་པ་དེ་ལྟ་བུ་དག་དང་ལྡན་པ་ཡིན་ནོ། །ཤཱ་ར་དྭ་ཏིའི་བུ་གང་གི་ཚེ་བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ནི་ཉན་ཐོས་དེ་དག་ལ་ཆོས་སྟོན་པ་དེའི་ཚེ་ན་ཉན་ཐོས་དེ་དག་ཀྱང་རྣ་བ་བླགས་ལ་མིག་མི་གཡེངས་ཤིང་སེམས་མི་གཡེངས་པར་ཆོས་ཉན་པར་
བྱེད་དོ། །གང་དག་འགྲེང་སྟེ་ཆོས་ཉན་པར་བྱེད་ཀྱང་དེ་དག་གི་ལུས་དང་སེམས་ལ་ངལ་བ་མེད་དོ། །གང་དག་འདུག་སྟེ་ཆོས་ཉན་པར་བྱེད་ཀྱང་དེ་དག་གི་ལུས་དང་སེམས་ལ་ངལ་བ་མེད་དོ། །ཤཱ་ར་དྭ་ཏིའི་བུ་གཞན་ཡང་གང་གི་ཚེ་
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་རྫུ་འཕྲུལ་གྱིས་ནམ་མཁའ་ལ་མངོན་པར་འཕགས་ཤིང་ཉན་ཐོས་རྣམས་ལ་ཆོས་སྟོན་པ་དེའི་ཚེ་སངས་
རྒྱས་ཀྱི་མཐུས་དེ་ན་དགེ་སློང་གང་དག་རྫུ་འཕྲུལ་དང་ལྡན་པ་རྣམས་དང་། དགེ་སློང་གང་དག་རྫུ་འཕྲུལ་དང་མི་ལྡན་པ་དེ་དག་ཀྱང་རྫུ་འཕྲུལ་གྱིས་ནམ་མཁའ་ལ་མངོན་པར་འཕགས་ཏེ། ཆོས་ཉན་པར་བྱེད་ཅིང་བཅོམ་ལྡན་

79-1-36b

འདས་ཀྱི་ཉན་ཐོས་དེ་དག་ནམ་མཁའ་དེ་ཉིད་ལ་མངོན་པར་འཕགས་བཞིན་དུ་སྤྱོད་ལམ་རྣམ་པ་གསུམ་གྱིས་གནས་པར་ཡང་བྱེད་དེ། གསུམ་གང་ཞེ་ན། འདི་ལྟ་སྟེ། འགྲེང་པ་དང་། འདུག་པ་དང་། འཆག་པའོ། །
དེ་དག་ཡོངས་སུ་མྱ་ངན་ལས་འདའ་བ་ན་ཡང་ནམ་མཁའ་ལ་ཀྱིལ་མོ་དཀྲུང་བཅས་ཏེ་འདུག་ནས་ཡོངས་སུ་མྱ་ངན་ལས་འདའ་བར་བྱེད་དོ། །ཉན་ཐོས་དེ་དག་ཐམས་ཅད་ཡོངས་སུ་མྱ་ངན་ལས་འདའ་བ་ན་ས་ཆེན་པོ་ཡང་ཀུན་དུ་
གཡོའོ། །དེ་དག་ཡོངས་སུ་མྱ་ངན་ལས་འདས་ནས་ཀྱང་ལྷ་དང་མི་རྣམས་བཀུར་བསྟི་བྱ་བས་བཀུར་སྟི་བྱེད་དོ། །དེ་ན་དགྲ་བཅོམ་པ་ཁ་ཅིག་ནི་རང་གི་ལུས་ཀྱི་མེའི་ཁམས་ཀྱིས་ལུས་བསྲེགས་ཏེ་ཡོངས་སུ་མྱ་ངན་ལས་
འདའ་བར་བྱེད་དོ། །དེ་ན་དགྲ་བཅོམ་པ་ཁ་ཅིག་ནི་ཡོངས་སུ་མྱ་ངན་ལས་འདའ་བ་ན་ཇི་ལྟར་རླུང་བཞིན་དུ་རང་གི་ལུས་མི་སྣང་བར་བྱས་ཏེ་ཡོངས་སུ་མྱ་ངན་ལས་འདའ་བར་བྱེད་དོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་ཁ་
དོག་རྣམ་པ་ལྔའི་སྤྲིན་དག་མངོན་པར་ཆགས་ནས་ཞིག་པར་གྱུར་པ་ན་ཆར་པ་དག་མེད་ཅིང་མི་སྣང་བ་དེ་བཞིན་དུ་ཤཱ་ར་དྭ་ཏིའི་བུ་དེ་ན་དགྲ་བཅོམ་པ་ཁ་ཅིག་ཀྱང་ཡོངས་སུ་མྱ་ངན་ལས་འདའ་བ་ན་རང་གི་ལུས་ཞིག་ནས་ཆ་ཤས་ཙམ་
ཡང་མི་སྣང་བར་བྱེད་དོ། །ཤཱ་ར་དྭ་ཏིའི་བུ་དེ་ན་ཉན་ཐོས་ཁ་ཅིག་འདི་ལྟར་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་བྱེད་པ་ཡང་ཡོད་དེ། དེ་ན་ཉན་ཐོས་ཁ་ཅིག་རྫུ་འཕྲུལ་གྱིས་ནམ་མཁའ་ལ་མངོན་
པར་འཕགས་ནས་ལུས་ལས་ཆུའི་རྒྱུན་དག་འབྱིན་ཅིང་ཆུའི་རྒྱུན་དེ་དག་ཀྱང་ས་ལ་མ་ལྷུང་བ་ཉིད་དུ་ནམ་མཁར་བག་ལ་ཞ་བར་བྱས་ནས་དེ་བཞིན་དུ་རང་གི་ལུས་ཀྱང་ནམ་མཁའ་ལས་མ་ལྷུང་བར་ཐལ་བྱུང་དུ་བག་ལ་ཞ་བར་
བྱེད་དེ། ཤཱ་ར་དྭ་ཏིའི་བུ་དེ་ན་ཉན་ཐོས་དག་ཡོངས་སུ་མྱ་ངན་ལས་འདའ་བའི་ཚུལ་དེ་ལྟ་བུ་དག་གིས་ཡོངས་སུ་མྱ་ངན་ལས་འདའ་བར་བྱེད་དེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་

79-1-37a

པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་འདི་སྐད་དུ་ཀྱེ་མ་ནམ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེ་ན་ཉན་ཐོས་རྣམས་འདི་ལྟར་ཆོ་འཕྲུལ་གསུམ་གྱིས་ཡོངས་སུ་མྱ་ངན་ལས་འདའ་བར་གྱུར་ཅིག་ཅེས་སྨོན་ལམ་བཏབ་པའི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་
ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་ཉན་ཐོས་དཔག་ཏུ་མེད་པ་དེ་དག་ལས་གང་དག་སོ་སོ་ཡང་དག་པར་རིག་པ་བཞི་མ་ཐོབ་
པའི་ཉན་ཐོས་དེ་དག་ནི་ཉུང་གི་གང་དག་སོ་སོ་ཡང་དག་པར་རིག་པ་བཞི་ཐོབ་པར་གྱུར་པ་དེ་དག་ནི་ཆེས་མང་ངོ་། །ཉན་ཐོས་གང་དག་རྫུ་འཕྲུལ་གྱི་རྐང་པ་བཞི་ཐོབ་པ་དེ་དག་ཀྱང་ཆེས་མང་སྟེ། ཤཱ་ར་དྭ་ཏིའི་བུ་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་ཉན་ཐོས་རྣམས་ནི་ཡོན་ཏན་ཕུན་སུམ་ཚོགས་པ་དང་ལྡན་པ་ཡིན་ནོ། །དེ་སྐད་ཅེས་
བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་
འཁྲུགས་པ་དེའི་སངས་རྒྱས་ཀྱི་ཞིང་ན་འདི་ལྟ་སྟེ། འདི་ལྟར་ཉན་ཐོས་ཀྱི་དགེ་འདུན་གྱི་བཀོད་པ་ཕུན་སུམ་ཚོགས་པ་ཆེན་པོ་འདི་ནི་ངོ་མཚར་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་
ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་དེ་དེ་བཞིན་ཏེ། དེ་དེ་བཞིན་ནོ། །ཇི་ལྟར་སྨྲས་པ་དེ་བཞིན་ཏེ། ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་

79-1-37b

བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་འདི་ལྟར་ཉན་ཐོས་ཀྱི་དགེ་འདུན་གྱི་བཀོད་པ་ཕུན་སུམ་ཚོགས་པའི་བཀོད་པ་ཆེན་པོ་དེ་ལྟ་བུ་དག་དང་ལྡན་པ་ཡིན་ནོ། །མི་འཁྲུགས་པ་ལུང་
བསྟན་པ་ཞེས་བྱ་བ་ཐེག་པ་ཆེན་པོའི་མདོ་ལས་ལེའུ་གསུམ་པའོ།། །། དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བཅོམ་ལྡན་འདས་ཀྱིས་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་ཉན་ཐོས་རྣམས་ཀྱི་ཉན་ཐོས་ཀྱི་དགེ་འདུན་གྱི་བཀོད་པ་ཕུན་སུམ་ཚོགས་པ་དག་ནི་ལེགས་པར་བཀའ་
སྩལ་ལགས་ན། བཅོམ་ལྡན་འདས་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་གི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་
སེམས་དཔའི་ཡོན་ཏན་བཀོད་པ་ཕུན་སུམ་ཚོགས་པ་དག་ནི་བཀའ་མ་སྩལ་ལགས་པས། བཅོམ་ལྡན་འདས་ད་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་ཡོན་ཏན་བཀོད་པ་ཕུན་སུམ་ཚོགས་པ་དག་ལེགས་
པར་བསྟན་དུ་གསོལ། །དེ་ཅིའི་ཕྱིར་ཞེ་ན། བཙུན་པ་བཅོམ་ལྡན་འདས་དེ་ལས་འདི་ལྟར་བྱང་ཆུབ་སེམས་དཔའི་ཕུན་སུམ་ཚོགས་པ་གང་ལགས་པའི་ཕུན་སུམ་ཚོགས་པ་དེ་དག་ཐམས་ཅད་འབྱུང་བར་འགྱུར་པའི་སླད་དུའོ། །དེ་
སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་
འཁྲུགས་པ་དེའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མངོན་པར་དགའ་བ་ཞེས་བྱ་བ་དེ་ན་ད་ལྟར་གང་དག་བྱང་ཆུབ་སེམས་དཔའ་བརྒྱ་ཕྲག་མང་པོ་དང་། བྱང་ཆུབ་སེམས་དཔའ་སྟོང་ཕྲག་མང་པོ་དང་། བྱང་ཆུབ་སེམས་

79-1-38a

དཔའ་བརྒྱ་སྟོང་ཕྲག་མང་པོ་དང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དཔག་ཏུ་མེད་པ་དང་། གྲངས་མེད་པ་དག་གི་བྱང་ཆུབ་སེམས་དཔའི་འདུས་པ་ཆེན་པོ་ཡོད་དེ། ཤཱ་ར་དྭ་ཏིའི་བུ་དེ་ན་བྱང་
ཆུབ་སེམས་དཔའ་སེམས་དཔའ་ཆེན་པོ་གང་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ལས་རབ་ཏུ་བྱུང་བ་དེ་དག་ཐམས་ཅད་ནི་བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་ཆོས་བསྟན་པ་སངས་རྒྱས་ཀྱིས་མཐུས་འཛིན་པར་བྱེད། འཆང་བར་བྱེད། ཀློག་པར་བྱེད་ཅིང་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པར་བྱེད་དོ། །
ཤཱ་ར་དྭ་ཏིའི་བུ་ངས་ད་ལྟར་ཆོས་བསྟན་པ་གང་ཡིན་པ་འདི་ནི་ངས་ཆོས་ཅུང་ཟད་ཙམ་ཞིག་བསྟན་པར་ཟད་ཀྱི། ཤཱ་ར་དྭ་ཏིའི་བུ་གང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་
པ་དེས་ཆོས་བསྟན་པ་གང་ཡིན་པ་དེ་ནི་དཔག་ཏུ་མེད་གྲངས་མེད་དེ། ཆོས་བསྟན་པ་དེའི་གན་ན་ངས་ཆོས་བསྟན་པ་འདི་ནི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། བྱེ་བ་བརྒྱའི་ཆ་དང་། བྱེ་བ་སྟོང་གི་ཆ་
དང་། བྱེ་བ་བརྒྱ་སྟོང་གི་ཆ་དང་། བྱེ་བ་ཁྲག་ཁྲིག་བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་མི་བཟོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་དག་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་ཆོས་སྟོན་པར་འགྱུར་བ་གང་ཡིན་པ་དང་། བསྐལ་པ་བཟང་པོའི་སངས་རྒྱས་བཅོམ་ལྡན་འདས་ཐམས་ཅད་ཀྱིས་ཆོས་སྟོན་པར་འགྱུར་བ་གང་ཡིན་པས་ཀྱང་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེས་ཆོས་གང་བསྟན་པ་གང་ཡིན་པའི་ཆོས་བསྟན་པ་དེ་ནི་དཔག་ཏུ་མེད་ཅིང་། གྲངས་མེད་དེ། ཆོས་བསྟན་པ་དེའི་གན་ན་བསྐལ་པ་བཟང་པོའི་སངས་རྒྱས་

79-1-38b

བཅོམ་ལྡན་འདས་ཐམས་ཅད་ཀྱིས་ཆོས་སྟོན་པར་འགྱུར་པ་དག་ནི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། བྱེ་བ་བརྒྱའི་ཆ་དང་། བྱེ་བ་སྟོང་གི་ཆ་དང་། བྱེ་བ་བརྒྱ་སྟོང་གི་ཆ་དང་། བྱེ་བ་ཁྲག་ཁྲིག་བརྒྱ་སྟོང་
གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་མི་བཟོད་དོ། །ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་
དཔའི་སྤྱད་པ་སྤྱོད་པ་ན་འདི་སྐད་དུ་ཀྱེ་མ་ནམ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན་སངས་རྒྱས་ཀྱི་ཞིང་དེར་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་འབྱུང་བར་འགྱུར་
ཞིང་ཆོས་སྟོན་པ་དེ་དག་ཐམས་ཅད་ཀྱང་སངས་རྒྱས་ཀྱི་མཐུས་དེ་དག་གིས་འཛིན་པར་འགྱུར་བ་དང་། འཆང་བར་འགྱུར་བ་དང་། ཀློག་པར་འགྱུར་བ་དང་། ཀུན་ཆུབ་པར་བྱེད་པར་འགྱུར་བ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་
ཏུ་སྟོན་པར་གྱུར་ཅིག་ཅེས་སྨོན་ལམ་བཏབ་པའི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་ཆོས་བསྟན་པ་དེ་ཐམས་ཅད་སངས་རྒྱས་ཀྱི་མཐུ་དང་། རང་རང་གི་དགེ་
བའི་རྩ་བའི་རྣམ་པར་སྨིན་པས་འཛིན་པར་བྱེད། འཆང་བར་བྱེད། ཀློག་པར་བྱེད། ཀུན་ཆུབ་པར་བྱེད་ཅིང་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པར་བྱེད་དོ། །ཤཱ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་
དཔའ་ཆེན་པོ་དེ་དག་གལ་ཏེ་དེ་བཞིན་གཤེགས་པ་རྣམས་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པའི་ཕྱིར་སངས་རྒྱས་ཀྱི་ཞིང་གཞན་དག་དང་། འཇིག་རྟེན་གྱི་ཁམས་གཞན་དག་ཏུ་འགྲོ་
བར་འདོད་ན་དེ་དག་གིས་སེམས་བསྐྱེད་མ་ཐག་ཏུ་སངས་རྒྱས་ཀྱི་མཐུ་དང་། རང་རང་གི་དགེ་བའི་སྟོབས་བསྐྱེད་པས་སངས་རྒྱས་ཀྱི་ཞིང་གཞན་དག་དང་། འཇིག་རྟེན་གྱི་ཁམས་གཞན་དག་ཏུ་འགྲོ་བར་འགྱུར་ཏེ། དེ་དག་སངས་

79-1-39a

རྒྱས་ཀྱི་ཞིང་དེ་དག་དང་། འཇིག་རྟེན་གྱི་ཁམས་དེ་དག་ཏུ་ཕྱིན་ནས་ཀྱང་སངས་རྒྱས་བཅོམ་ལྡན་འདས་དག་ལ་ཕྱག་འཚལ་བར་བྱེད། འདུད་པར་བྱེད། བཀུར་སྟིར་བྱེད། བླ་མར་བྱེད། རི་མོར་
བྱེད། མཆོད་པར་བྱེད། ཡོངས་སུ་ཞུ་བར་བྱེད། ཡོངས་སུ་འདྲི་བར་བྱེད་ཅིང་ཆོས་ཐོས་ནས་བཟུང་སྟེ། སེམས་ཅན་རྣམས་ལ་ཆོས་སྟོན་པར་བྱེད་དོ། །དེ་དག་གིས་སངས་རྒྱས་བཅོམ་ལྡན་འདས་དེ་དག་ལ་ཕྱག་བྱས། འདུད་
པ་བྱས། བཀུར་བསྟིར་བྱས། བླ་མར་བྱས། རི་མོར་བྱས། མཆོད་པར་བྱས། ཡོངས་སུ་ཞུ་བར་བྱས། ཡོངས་སུ་འདྲི་བར་བྱས་ཤིང་ཆོས་དེ་ཐོས་ནས་བཟུང་སྟེ། སེམས་ཅན་རྣམས་ལ་ཆོས་ཀྱང་བསྟན་ནས་ཡང་བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་དུ་ལྡོག་པར་བྱེད་དོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བསྐལ་
པ་བཟང་པོ་འདི་ལ་སངས་རྒྱས་དགུ་བརྒྱ་དགུ་བཅུ་རྩ་དྲུག་འབྱུང་བར་འགྱུར་བ་དེ་དག་ལ་ལྟ་བར་འདོད་པ་དག་གིས་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་
པའི་སངས་རྒྱས་ཀྱི་ཞིང་དུ་སྐྱེ་བར་བྱའོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་ལ་དག་འཇིག་རྟེན་གྱི་ཁམས་འདི་ནས་ཤི་འཕོས་སམ། འཇིག་རྟེན་གྱི་ཁམས་གཞན་དག་ནས་ཤི་འཕོས་ཀྱང་རུང་སྟེ་
སངས་རྒྱས་ཀྱི་ཞིང་དེར་སྐྱེས་སམ། སྐྱེ་འམ། སྐྱེ་བར་འགྱུར་བ་དེ་དག་ནི་ཉན་ཐོས་ཀྱི་ས་འམ་རང་སངས་རྒྱས་ཀྱི་སར་ལྟུང་བའི་སྐལ་པ་ཅན་མ་ཡིན་ནོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་བྱང་ཆུབ་སེམས་དཔའ་དེ་དག་ནི་དེ་བཞིན་
གཤེགས་པའི་རྟོགས་པ་དང་འདྲ་བར་རིག་པར་བྱ་བ་དང་། བྱང་ཆུབ་སེམས་དཔའ་དེ་དག་ནི་སངས་རྒྱས་ཀྱི་བཞུད་པ་ལྟར་བུར་རིག་པར་བྱ་བ་དང་། བྱང་ཆུབ་སེམས་དཔའ་དེ་དག་ནི་བདུད་སྡིག་ཅན་ཐམས་ཅད་ཀྱིས་མི་རྫི་བར་རིག་

79-1-39b

པར་བྱ་བ་དང་། བྱང་ཆུབ་སེམས་དཔའ་དེ་དག་ནི་ཉན་ཐོས་ཀྱི་ས་དང་། རང་སངས་རྒྱས་ཀྱི་སར་མཚམས་སྦྱོར་བ་ཆད་པར་རིག་པར་བྱ་བ་དང་། བྱང་ཆུབ་སེམས་དཔའ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
མཚམས་སྦྱོར་བར་རིག་པར་བྱ་བ་ཤ་སྟག་ཡིན་པའི་ཕྱིར་རོ། །ཤཱ་ར་དྭ་ཏིའི་བུ་འདི་ལྟ་སྟེ། བྱང་ཆུབ་སེམས་དཔའ་ནི་འདུས་པ་ན་དེ་བཞིན་གཤེགས་པ་འདུས་པ་དང་། རྡོ་རྗེ་ལྟར་སྲ་ཞིང་མི་ཕྱེད་པའི་འདུས་པ་ཤ་སྟག་ཡིན་པར་
རིག་པར་བྱའོ། །ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་གི་བྱང་ཆུབ་སེམས་དཔའ་གང་ཡིན་པ་དེ་དག་ནི་རྣམ་
པར་དག་པ་དང་། སྙིང་པོ་ལ་གནས་པ་དང་། ཕྱིར་མི་ལྡོག་པའི་ཆོས་ཅན་དང་། མི་འཕྲོགས་པའི་ཆོས་ཅན་དང་། ཕྱིར་མི་ཟློགས་པའི་ཆོས་ཅན་ཤ་སྟག་སྟེ། དེ་དག་ནི་བྱང་ཆུབ་སེམས་དཔའ་དང་། བྱང་ཆུབ་ལས་
མི་བསྐྱོད་མི་གཡོ་ཞིང་། བྱང་ཆུབ་སེམས་དཔའ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་གནས་ལ་གནས་པ་ཤ་སྟག་ཏུ་རིག་པར་བྱའོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་
སེམས་དཔའ་ཆེན་པོ་གང་ལ་ལ་དག་འཇིག་རྟེན་གྱི་ཁམས་འདི་ནས་ཤི་འཕོས་སམ་འཇིག་རྟེན་གྱི་ཁམས་གཞན་དག་ནས་ཤི་འཕོས་ཀྱང་རུང་སྟེ། སངས་རྒྱས་ཀྱི་ཞིང་དེར་སྐྱེས་སམ། སྐྱེ་འམ། སྐྱེ་བར་འགྱུར་བ་དེ་
དག་ཐམས་ཅད་ནི་དེ་བཞིན་གཤེགས་པའི་མཛོད་དུ་ཞུགས་པར་རིག་པར་བྱའོ། །མི་འཇིགས་པའི་གྲོང་ཁྱེར་དུ་ཞུགས་པར་རིག་པར་བྱའོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་དེ་དག་
ནི་དེ་བཞིན་གཤེགས་པའི་མཛོད་དུ་ཞུགས་པར་རིག་པར་བྱའོ། །གཅིག་ལ་གཅིག་སྟོན་པའི་འདུ་ཤེས་ཉེ་བར་འཇོག་པར་བྱེད་དོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་གང་

79-1-40a

དག་ཁྱིམ་ན་གནས་པ་དག་ནི་ཤིན་དུ་ཉུང་གི། སངས་རྒྱས་ཀྱི་ཞིང་དེའི་བྱང་ཆུབ་སེམས་དཔའ་དེ་དག་ནི་ཕལ་ཆེར་ཁྱིམ་གྱི་གནས་ནས་མངོན་པར་འབྱུང་ཞིང་རབ་ཏུ་བྱུང་བ་ཤ་སྟག་གོ། ཤཱ་ར་དྭ་
ཏིའི་བུ་ཡང་གང་གི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཆོས་སྟོན་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་སངས་རྒྱས་ཀྱི་མཐུ་
དང་། རང་རང་གི་དགེ་བའི་རྩ་བའི་སྟོབས་བསྐྱེད་པས་ཆོས་བསྟན་པ་དེ་དག་ཐམས་ཅད་འཛིན་པར་བྱེད། འཆང་བར་བྱེད། ཀློག་པར་བྱེད། ཀུན་ཆུབ་པར་བྱེད་དོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་སེམས་
དཔའ་ཆེན་པོ་གང་དག་ཁྱིམ་གྱི་གནས་ནས་མངོན་པར་བྱུང་ཞིང་ཆོས་བསྟན་པ་དེར་མ་འདུས་ཤིང་ལུས་ཀྱིས་མངོན་སུམ་དུ་མ་གྱུར་པ་དེ་དག་ཀྱང་སངས་རྒྱས་ཀྱི་མཐུས་གང་ན་འགྲེང་བའམ། འདུག་པའི་གནས་དེ་ཉིད་ནས་
ཆོས་སྟོན་པ་དེ་དག་ཐམས་ཅད་ཐོས་ཤིང་ཐོས་ནས་ཀྱང་འཛིན་པར་བྱེད། འཆང་བར་བྱེད། ཀློག་པར་བྱེད། ཀུན་ཆུབ་པར་བྱེད་དོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་པ་གང་དག་ཁྱིམ་གྱི་
གནས་ནས་མངོན་པར་མ་བྱུང་ཞིང་ཐོས་ནས་ཀྱང་འཛིན་པར་བྱེད། འཆང་བར་བྱེད། ཀློག་པར་བྱེད། ཀུན་ཆུབ་པར་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཚེ་བརྗེས་ན་ཡང་ཆོས་དེ་དག་བརྗེད་པར་མི་
འགྱུར་རོ། །སངས་རྒྱས་ཀྱི་ཞིང་གང་དང་གང་དུ་སྐྱེ་བར་འདོད་པའི་སངས་རྒྱས་ཀྱི་ཞིང་དེ་དང་དེར་ཡང་སྐྱེ་བར་འགྱུར་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་ཡིན་ཏེ། དེ་ཅིའི་ཕྱིར་ཞེ་ན། དེ་ནི་འདི་ལྟར་སྔོན་གྱི་སྨོན་ལམ་གྱི་ཁྱད་པར་གྱིས་གྱུར་པའི་ཕྱིར་རོ། །

79-1-40b

ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཚེ་གཅིག་ལ་སངས་རྒྱས་བརྒྱ་ཕྲག་མང་པོ་དང་། སངས་རྒྱས་སྟོང་ཕྲག་མང་པོ་དང་། སངས་རྒྱས་བརྒྱ་སྟོང་ཕྲག་མང་པོ་དང་། སངས་རྒྱས་བྱེ་བ་ཁྲག་ཁྲིག་བརྒྱ་
སྟོང་ཕྲག་མང་པོ་དག་མཐོང་བར་འདོད་པས་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་དུ་སྐྱེ་བར་བྱའོ། །ཤཱ་ར་དྭ་ཏིའི་བུ་བྱང་ཆུབ་སེམས་
དཔའ་སེམས་དཔའ་ཆེན་པོ་དེ་དེར་སྐྱེས་མ་ཐག་ཏུ་སངས་རྒྱས་བརྒྱ་ཕྲག་མང་པོ་དང་། སངས་རྒྱས་སྟོང་ཕྲག་མང་པོ་དང་། སངས་རྒྱས་བརྒྱ་སྟོང་ཕྲག་མང་པོ་དང་། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དག་
མཐོང་བར་འགྱུར་ཞིང་སངས་རྒྱས་བཅོམ་ལྡན་འདས་དེ་དག་ལས་དགེ་བའི་རྩ་བ་མང་པོ་དག་སྐྱེད་པར་ཡང་འགྱུར་རོ། །སྲོག་ཆགས་བརྒྱ་ཕྲག་མང་པོ་དང་། སྲོག་ཆགས་སྟོང་ཕྲག་མང་པོ་དང་། སྲོག་ཆགས་བརྒྱ་སྟོང་ཕྲག་
མང་པོ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དག་ལ་ཆོས་སྟོན་པར་ཡང་འགྱུར་ཞིང་དེ་དག་གི་དགེ་བའི་རྩ་བ་རྣམས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེད་དུ་འཇུག་པར་འགྱུར་རོ། །ཤཱ་ར་
དྭ་ཏིའི་བུ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཞིག་ད་ལྟར་གྱི་བསྐལ་པ་བཟང་པོ་འདི་ལ་སངས་རྒྱས་དགུ་བརྒྱ་དགུ་བཅུ་རྩ་དྲུག་གང་དག་འབྱུང་བར་འགྱུར་བ་དེ་དག་ཐམས་ཅད་ལ་ན་བཟའ་དང་། བསོད་སྙོམས་དང་། 
གཟིམས་ཆ་དང་། སྙུན་གསོས་དང་། སྨན་དང་། ཡོ་བྱད་ཐམས་ཅད་ཀྱིས་བཀུར་སྟིར་བྱེད། བླ་མར་བྱེད། རི་མོར་བྱེད། མཆོད་པར་བྱེད་ཅིང་། དེ་དག་ཐམས་ཅད་ལ་བཀུར་སྟིར་བྱས། བླ་མར་བྱས། རི་མོར་བྱས། མཆོད་
པ་བྱས་ནས་ཀྱང་སངས་རྒྱས་བཅོམ་ལྡན་འདས་དེ་དག་གི་སྤྱན་སྔར་མངོན་པར་བྱུང་ཞིང་རབ་ཏུ་བྱུང་ནས་ཚངས་པར་སྤྱད་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཞིག་བཅོམ་ལྡན་འདས་དེ་བཞིན་

79-1-41a

གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་དུ་ཚེ་གཅིག་ཅིག་ཕ་རོལ་ཏུ་ཕྱིན་པ་དང་ལྡན་པའི་བསོད་ནམས་མངོན་པར་འདུ་བྱ་བ་སྐྱེད་ན་ཤཱ་ར་དྭ་
ཏིའི་བུ་བསོད་ནམས་མངོན་པར་འདུ་བྱ་བ་སྔ་མ་དེ་ནི་བསོད་ནམས་མངོན་པར་འདུ་བྱ་བ་འདིའི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། བྱེ་བ་བརྒྱའི་ཆ་དང་། བྱེ་བ་སྟོང་གི་ཆ་དང་། བྱེ་བ་བརྒྱ་སྟོང་
གི་ཆ་དང་། བྱེ་བ་ཁྲག་ཁྲིག་བརྒྱ་སྟོང་གི་ཆ་དང་། གྲངས་དང་ཆ་དང་། བགྲང་བ་དང་། དཔེ་དང་། རྒྱུར་ཡང་མི་བཟོད་དོ། །ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་ཡིན་ནོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་ལ་དག་འཇིག་རྟེན་གྱིས་
ཁམས་འདི་ནས་ཤི་འཕོས་སམ་འཇིག་རྟེན་གྱི་ཁམས་གཞན་དག་ནས་ཤི་འཕོས་ཀྱང་རུང་སྟེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་
རྒྱས་ཀྱི་ཞིང་དུ་སྐྱེས་སམ། སྐྱེའམ་སྐྱེ་བར་འགྱུར་བ་དེ་དག་ཐམས་ཅད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ལུང་བསྟན་པ་འཐོབ་པར་འགྱུར་རོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་སངས་
རྒྱས་ཀྱི་ཞིང་དེ་ན་བར་ཆད་བྱེད་པའི་བདུད་དང་། བདུད་ཀྱི་རིས་ཀྱི་ལྷ་རྣམས་ཉེ་བར་གནས་པ་མེད་ལ་བདུད་ཀྱི་ལས་རྣམས་ཉེ་བར་གནས་པ་མེད་ཅིང་མཐོ་འཚམ་པར་ཞུགས་པ་མེད་པའི་ཕྱིར་རོ། །ཤཱ་ར་དྭ་ཏིའི་བུ་འདི་ལྟ་སྟེ། 
དཔེར་ན་མི་ཞིག་གིས་སྔགས་ཀྱི་མཐུའམ། སྨན་གྱི་མཐུས་སྦྲུལ་གདུག་པའི་དུག་མེད་པར་བྱས་ཏེ་བཏང་ན་དེ་བཏང་མ་ཐག་ཏུ་འཛིན་པ་འམ། མཐོ་འཚམ་པ་འམ། རྣམ་པར་འཚེ་མི་ནུས་པས་གང་དག་དེ་ལས་གཞན་

79-1-41b

པའི་སྲོག་ཆགས་ཀྱི་རིགས་དེ་དག་ཀྱང་དེས་འཇིགས་པ་མེད་ལ། སེམས་ཅན་འགའ་ཙམ་ལ་ཡང་མཐོ་འཚམ་པ་མེད་ཅིང་བར་ཆད་མི་བྱེད་མོད་ཀྱི། ཤཱ་ར་དྭ་ཏིའི་བུ་འོན་ཀྱང་དེའི་སྔོན་གྱི་ལས་མངོན་པར་འདུ་བྱེད་པར་གྲུབ་པའི་
ལུས་དེས་འཇིགས་པ་ཞེས་བྱ་བའི་མིང་དུ་འགྱུར་རོ། །ཤཱ་ར་དྭ་ཏིའི་བུ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དེས་
ཅི་ནས་བདག་མངོན་པར་རྫོགས་པར་སངས་རྒྱས་ནས་བདུད་སྡིག་ཅན་རྣམས་བཏུལ་བ་གདུག་པ་མེད་པར་བྱས་ནས་ཕྱིས་ཀྱང་བར་ཆད་བྱེད་པ་མེད་པར་གྱུར་ཅིག་ཅེས་དགེ་བའི་རྩ་བ་རྣམས་དེ་ལྟ་དེ་ལྟར་ཡོངས་སུ་བསྔོས་
པས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན་སྟོང་གསུམ་གྱི་སྟོང་
ཆེན་པོའི་འཇིག་རྟེན་གྱི་ཁམས་དེ་ན་བྱང་ཆུབ་སེམས་དཔའ་དེ་དག་དང་། ཉན་ཐོས་དེ་དག་དང་། སོ་སོའི་སྐྱེ་བོ་དེ་དག་ལ་ཐམས་ཅད་ཀྱི་ཐམས་ཅད་དུ་བར་ཆད་བྱེད་པ་འགའ་ཡང་མེད་མོད་ཀྱི། ཤཱ་ར་དྭ་ཏིའི་བུ་འོན་ཀྱང་
སངས་རྒྱས་ཀྱི་ཞིང་དེ་ན་གང་དག་སྔོན་གྱི་མངོན་པར་འདུ་བྱེད་པ་ལས་ཀྱང་གཞན་འཕྲུལ་དབང་བྱེད་ཀྱི་རིས་ཀྱི་ལྷར་སྐྱེས་པ་དེ་དག་བདུད་ཅེས་བྱ་བའི་མིང་འཐོབ་སྟེ། མིང་དེ་དང་། སྐྱེས་པ་དེས་སྨོད་ཅིང་ཆོས་བསྟན་པ་
ཉན་པར་བྱེད་དོ། །ཐོས་ནས་ཀྱང་དད་པ་ཐོབ་ཅིང་ཉན་ཐོས་དེ་དག་ལ་ཡང་དགའ་བར་བྱེད་དེ། བདག་ཅག་ཀྱང་ནམ་ཞིག་ན་འདི་ལྟར་འདོད་པ་ཆུང་བ་དང་། འདི་ལྟར་ཆོག་ཤེས་པ་དང་། འདི་ལྟར་རབ་ཏུ་དབེན་པ་ལ་
གནས་པར་འགྱུར་ཞིག་གུ་སྙམ་མོ། །དེ་ལྟར་བདུད་དེ་དག་མངོན་པར་འབྱུང་བའི་རྣམ་པར་རྟོག་པར་ཀུན་དུ་འབྱུང་ཞིང་བར་ཆད་བྱེད་པ་མེད་པ་ཀུན་དུ་སྤྱོད་དེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་

79-1-42a

པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་ཡིན་ཏེ། ཤཱ་ར་དྭ་ཏིའི་བུ་བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སྔོན་གྱི་སྨོན་ལམ་དང་སྔོན་གྱི་བརྩོན་པ་དང་། སྔོན་གྱི་སྐྱེས་བུའི་བྱེད་པས་སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་
སེམས་དཔའ་ཆེན་པོ་རྣམས་དང་། ཉན་ཐོས་རྣམས་དང་། སོ་སོའི་སྐྱེ་བོ་དེ་དག་ཐམས་ཅད་ཤིན་དུ་བདེ་བར་གནས་སོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་
འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གལ་ཏེ་རིགས་ཀྱི་བུ་འམ་རིགས་ཀྱི་བུ་མོ་སངས་རྒྱས་ཀྱི་ཞིང་དེ་ལ་དགའ་ཞིང་ཉན་ཐོས་དང་། རང་སངས་རྒྱས་ཀྱི་ས་ལས་ལྡོག་པར་འཚལ་བ་དང་། ངེས་
པའི་གནས་སུ་མཆི་བར་འཚལ་བ་ལ་ལས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ་སྦྱིན་པ་སྩལ་ན་དེ་སྦྱིན་པ་སྩལ་པས་སངས་རྒྱས་ཀྱི་ཞིང་དེར་སྐྱེ་བར་འགྱུར་
པས་སྦྱིན་པ་དེ་ནི་ལེགས་པར་བཏང་བ་ལགས་སོ། །དེ་ཅིའི་ཕྱིར་ཞེ་ན། དེ་ཉན་ཐོས་ཉིད་དམ། རང་སངས་རྒྱས་ཉིད་དུ་ལྡོག་པའི་སྐལ་པ་ཅན་མ་ལགས་པའི་སླད་དུའོ། །དེ་ཅིའི་སླད་དུ་ཞེ་ན། དེ་ནི་ཕྱིར་མི་ལྡོག་པའི་
ས་ལ་གནས་པར་འགྱུར་ཞིང་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་མ་གྱུར་གྱི་བར་དུ་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་མཆི་བར་འགྱུར་བ་དང་། ཐམས་ཅད་དུ་ཡང་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་དུ་གྱུར་པ་དག་མཉེས་པར་བགྱིད་པ་དང་། ཐམས་ཅད་དུ་ཡང་སངས་རྒྱས་ཀྱི་བྱང་ཆུབ་ཚོལ་བར་འགྱུར་བ་དང་། སངས་རྒྱས་བརྒྱ་

79-1-42b

ཕྲག་མང་པོ་དང་། སངས་རྒྱས་སྟོང་ཕྲག་མང་པོ་དང་། སངས་རྒྱས་བརྒྱ་སྟོང་ཕྲག་མང་པོ་དང་། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དག་ཀྱང་མཐོང་བར་འགྱུར་ཞིང་སངས་རྒྱས་བཅོམ་ལྡན་འདས་དེ་དག་ལ་
དགེ་བའི་རྩ་བ་དག་ཀྱང་བསྐྲུན་པར་འགྱུར་བའི་སླད་དུ་སྟེ། བཙུན་པ་བཅོམ་ལྡན་འདས་རྣམ་གྲངས་འདིས་ན་རིགས་ཀྱི་བུའམ་རིགས་ཀྱི་བུ་མོ་གང་ལ་ལས་སངས་རྒྱས་བཅོམ་ལྡན་འདས་ལ་མཆོད་པ་བགྱི་བའི་སླད་དུ་སྟོང་གསུམ་གྱི་
སྟོང་ཆེན་པོ་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། སྦྱིན་པ་སྩལ་ལ་སྦྱིན་པ་སྩལ་བས་གལ་ཏེ་སངས་རྒྱས་ཀྱི་ཞིང་དེར་སྐྱེ་བ་ལྟ་ན། བཙུན་པ་བཅོམ་ལྡན་འདས་ལེགས་པར་སྩལ་ཅིང་ལེགས་
པར་བཏང་ལ་ལེགས་པར་སྐྱེས་པ་ལགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་སངས་རྒྱས་ཀྱི་ཞིང་དེར་ལེགས་པར་མཆིས་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་
ལྡན་པ་ཤཱ་ར་དྭ་ཏི་འི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་དེ་དེ་བཞིན་ཏེ། ཇི་སྐད་སྨྲས་པ་དེ་བཞིན་ནོ། །ཤཱ་ར་དྭ་ཏིའི་བུ་དེ་ནི་ལེགས་པར་སོང་ཞིང་ལེགས་པར་སྐྱེས་པས་གང་བས་ན་སངས་རྒྱས་ཀྱི་ཞིང་དེ་བྱང་
ཆུབ་སེམས་དཔའ་སེམས་དཔའ་ཆེན་པོ་དག་གིས་ཡོངས་སུ་གང་བ་ཡིན་ནོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་གསེར་གྱི་རིགས་གསེག་མ་དང་། གྱོ་མོ་མེད་ཅིང་རྡོ་བ་དང་ས་རྡུལ་མེད་ལ། དག་པའི་སྙིང་པོ་ལ་གནས་
པར་གྱུར་པ་དེ་ལ་གསེར་བླངས་ཏེ། སྤུང་པ་གཉིས་ཀྱིས་བཞུ་ཞིང་བཏུལ་ལ། བཞུ་ཞིང་བཏུལ་ནས་རྒྱན་སྣ་ཚོགས་གཞན་དག་ཏུ་བྱས་ཏེ། ལུས་ལ་ཐོགས་པ་དེ་བཞིན་དུ་ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་གི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་དག་པ་སྙིང་པོ་ལ་གནས་པ་ཤ་སྟག་སྟེ། ཤཱ་ར་དྭ་ཏིའི་

79-1-43a

བུ་དེ་བཞིན་གཤེགས་པ་མི་འཁྲུགས་པ་དེའི་སངས་རྒྱས་ཀྱི་ཞིང་དུ་བྱང་ཆུབ་སེམས་དཔའ་སེམས་དཔའ་ཆེན་པོ་འདུས་པ་དེ་དག་ནི་དག་པ་ཡིན་པར་རིག་པར་བྱའོ། །ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་དུ་གང་དག་སྐྱེས་སམ། སྐྱེའམ། སྐྱེ་བར་འགྱུར་པ་དེ་དག་ཐམས་ཅད་ནི་འདི་ལྟ་སྟེ། སེམས་ཅན་དག་བ་ཞེས་བྱ་བ་དེ་
ལྟ་བུའི་གྲངས་སུ་འགྲོའོ། །དེ་དག་ཐམས་ཅད་ནི་འདི་ལྟ་སྟེ། ཕྱིར་མི་ལྡོག་པ་ཞེས་བྱ་བ་དེ་ལྟ་བུའི་གྲངས་སུ་འགྲོའོ། །དེ་དག་ཐམས་ཅད་ནི་འདི་ལྟ་སྟེ། རྟེན་གཅིག་སྟེ། དེ་བཞིན་གཤེགས་པ་ལ་རྟེན་པ་ཞེས་བྱ་བ་དེ་ལྟ་
བུའི་གྲངས་སུ་འགྲོ་སྟེ། ཤཱ་ར་དྭ་ཏིའི་བུ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྟེན་གཅིག་པ་ཡིན་ཞེ་ན། ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དེ་བཞིན་གཤེགས་པ་
ལ་རྟེན་པར་གྱུར་པ་དེ་ནི་རྟེན་གཅིག་པ་ཞེས་བྱའོ། །གཞན་ཡང་རྟེན་གཅིག་པ་ཞེས་བྱ་བ་དེ་ནི་གང་ཉན་ཐོས་དང་། རང་སངས་རྒྱས་ཀྱི་ས་ཐམས་ཅད་ལས་ཤིན་དུ་འདས་པ་ཞེས་བྱ་བའི་ཚིག་བླ་དགས་སོ། །ཤཱ་ར་དྭ་
ཏིའི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྟེན་གཅིག་པ་དེ་བཞིན་གཤེགས་པ་ལ་རྟེན་པ་རྗེས་སུ་ཐོབ་པར་འདོད་པས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་དུ་སྐྱེ་བར་བྱའོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ངས་ཕྱིར་མི་ལྡོག་པར་ལུང་བསྟན་པ་དེ་དག་གིས་ཀྱང་བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་དྲུང་དུ་སྐྱེ་བར་བྱ་སྟེ། ཤཱ་ར་དྭ་ཏིའི་བུ་ངས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བཅོམ་ལྡན་

79-1-43b

འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་དྲུང་དུ་བཏང་བ་དེ་དག་ནི་ངས་ཡོངས་སུ་སྤངས་པ་མ་ཡིན་ནོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་རྒྱལ་པོ་རྒྱལ་རིགས་
སྤྱི་བོ་ནས་དབང་བསྐུར་བ་མཐུ་དང་། སྟོབས་དང་། བརྩོན་འགྲུས་ཐོབ་པ་ཞིག་རྒྱལ་སྲིད་འདོད་པ་དང་། ནོར་འདོད་པ་དང་། ཡུལ་འདོད་པའི་ཕྱིར་འཐབ་ཟླའི་རྒྱལ་པོའི་གན་དུ་འགྱེད་ཅིང་འཐབ་ཏུ་སོང་བ་དང་། དེ་ནས་
འཐབ་ཟླའི་རྒྱལ་པོ་དེས་རྒྱལ་པོ་དེ་རྒྱལ་སྲིད་འདོད་པ་དང་། ནོར་འདོད་པ་དང་། ཡུལ་འདོད་པའི་ཕྱིར་འགྱེད་ཅིང་འཐབ་ཏུ་འོང་ངོ་ཞེས་ཐོས་སོ། །དེ་སྐད་ཐོས་ནས་རྒྱལ་པོ་དེས་འདི་སྙམ་དུ་གང་དག་རིན་པོ་ཆེ་རྣམས་
དང་། བཙུན་མོའི་འཁོར་རྣམས་དང་། བུ་དང་། བུ་མོ་རྣམས་དང་། གང་དག་འཐབ་པར་མི་ནུས་པའི་གཞོན་ནུ་དེ་དག་ཐམས་ཅད་གང་ན་རྒྱལ་པོའི་དཔུང་ཡོད་པ་དང་། ཐུལ་བར་དཀའ་བ་དེར་བཀྱེ་ན་བདེ་བར་གནས་
པར་འགྱུར་གྱི། འདི་ན་ནི་སྡུག་བསྔལ་བར་འགྱུར་རོ་སྙམ་ནས་གྲོང་ཁྱེར་གཞན་ཞིག་ཏུ་བསྐུངས་སོ། །ཤཱ་ར་དྭ་ཏིའི་བུ་དེ་བཞིན་དུ་ངས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་དྲུང་དུ་བཏང་བ་དེ་དག་ཀྱང་ངས་ཡོངས་སུ་སྤངས་པ་མ་ཡིན་ཏེ། ཤཱ་ར་དྭ་ཏིའི་བུ་ཇི་ལྟར་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དེའི་
རིན་པོ་ཆེ་རྣམས་དང་། བཙུན་མོའི་འཁོར་རྣམས་དང་། བུ་དང་། བུ་མོ་རྣམས་དང་། གང་དག་འཐབ་པར་མི་ནུས་པའི་གཞོན་ནུ་བསྐུངས་པ་དེ་ལྟར་ནི་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་དང་། རིགས་
ཀྱི་བུ་མོ་རྣམས་བལྟའོ། །ཤཱ་ར་དྭ་ཏིའི་བུ་ཇི་ལྟར་གང་དུ་རྒྱལ་པོའི་རིན་པོ་ཆེ་རྣམས་དང་། བཙུན་མོའི་འཁོར་རྣམས་དང་། བུ་དང་། བུ་མོ་རྣམས་དང་གང་དག་འཐབ་པར་མི་ནུས་པའི་གཞོན་ནུ་རྣམས་བསྐུངས་

79-1-44a

པའི་གྲོང་ཁྱེར་དེ་ལྟར་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་དུ་བལྟའོ། །ཤཱ་ར་དྭ་ཏིའི་བུ་ཇི་ལྟར་
འཐབ་དུ་འོང་བའི་རྒྱལ་པོ་དེ་ལྟར་ནི་སངས་རྒྱས་ཀྱི་ཞིང་འདི་ན་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་དང་། རིགས་ཀྱི་བུ་མོ་རྣམས་ལ་བར་ཆད་བྱེད་པའི་ལས་ལ་གནས་པ་མཐོ་འཚམ་པ་ལ་ཞུགས་པའི་བདུད་
རྣམས་བལྟའོ། །ཤཱ་ར་དྭ་ཏིའི་བུ་ཇི་ལྟར་རྒྱལ་པོ་མཐུ་དང་ལྡན་ཞིང་ཐུལ་བར་དཀའ་བ་དེ་ལྟར་ནི་བདུད་དང་། བདུད་ཀྱི་རིས་ཀྱི་ལྷ་ཐམས་ཅད་ཀྱིས་མི་ཐུལ་བའི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་མི་འཁྲུགས་པ་བལྟའོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་བུ་ལོན་པས་འཇིགས་ཤིང་སྐྲག་པའི་མི་ནི་གང་དུ་སོང་ན་བུ་ལོན་པ་འམ་བུ་ལོན་པའི་མི་དག་གིས་མི་ཚུགས་པར་
འགྱུར་བའི་མཐའ་འཁོབ་གྱི་གྲོང་ཁྱེར་དུ་འབྲོས་པར་བྱེད་དོ། །དེ་ཅིའི་ཕྱིར་ཞེ་ན། དེར་བུ་ལོན་པའམ། བུ་ལོན་པའི་མི་རྣམས་འོང་བའི་ལམ་ཆད་པའི་ཕྱིར་རོ། །ཤཱ་ར་དྭ་ཏིའི་བུ་དེ་བཞིན་དུ་བྱང་ཆུབ་སེམས་དཔའ་
སེམས་དཔའ་ཆེན་པོ་གང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་དུ་སྐྱེས་པ་དེ་དག་ལ་ཡང་བདུད་སྡིག་ཅན་དང་། བདུད་ཀྱི་
རིས་ཀྱི་ལྷ་རྣམས་ཀྱི་ལམ་ཆད་པ་ཡིན་ནོ། ཤཱ་ར་དྭ་ཏིའི་བུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་བདུད་སྡིག་ཅན་དང་། བདུད་ཀྱི་རིས་ཀྱི་ལྷ་གང་དག་འཁོད་པ་དེ་དག་སྟོང་གསུམ་གྱི་སྟོང་ཆེན་
པོའི་འཇིག་རྟེན་གྱི་ཁམས་འདི་ན་བྱང་ཆུབ་སེམས་དཔའི་ཐེག་པ་པའི་གང་ཟག་དང་། ཉན་ཐོས་ཀྱི་ཐེག་པ་པའི་གང་ཟག་གང་དག་འཁོད་པ་དེ་དག་ལ་བར་ཆད་བྱ་བའི་ཕྱིར་ཉེ་བར་གནས་པ་དང་། མཐོ་བརྩམ་པའི་

79-1-44b

ཕྱིར་ཞུགས་པ་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་ན་བདུད་དང་བདུད་ཀྱི་རིས་ཀྱི་ལྷ་རྣམས་བདུད་ཀྱི་ལས་ཀྱི་ཕྱིར་ཉེ་
བར་གནས་པ་མེད་དོ། །ཤཱ་ར་དྭ་ཏིའི་བུ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སངས་རྒྱས་ཀྱི་ཞིང་དེར་སྐྱེས་སམ། སྐྱེ་འམ། སྐྱེ་བར་འགྱུར་བའི་བྱང་ཆུབ་སེམས་དཔའ་དེ་དག་ནི་བརྒྱ་ལམ་ན་ཡང་མི་
འཇིགས་པར་འགྱུར་རོ། །དེ་ཅིའི་ཕྱིར་ཞེ་ན། དེ་ནི་འདི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཇི་ལྟར་བདག་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེར་བདུད་དང་། བདུད་ཀྱི་རིས་ཀྱི་ལྷ་རྣམས་བར་ཆད་བྱ་བའི་ཕྱིར་ཉེ་བར་གནས་པ་མེད་པ་དེ་ལྟ་དེ་ལྟར་དགེ་བའི་རྩ་བ་རྣམས་
ཡོངས་སུ་བསྔོས་བའི་ཕྱིར་རོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་ཟག་པ་ཟད་པའི་དགྲ་བཅོམ་པ་ནི་བདེ་བ་ཐོབ་ཅིང་མི་འཇིགས་པ་ཐོབ་པར་གནས་སོ། །ཤཱ་ར་དྭ་ཏིའི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་
ཆེན་པོ་གང་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་དུ་སྐྱེས་སམ། སྐྱེ་འམ་སྐྱེ་བར་འགྱུར་བ་དེ་དག་ཐམས་ཅད་ཀྱང་བདེ་བ་ཐོབ་
ཅིང་མི་འཇིགས་པ་ཐོབ་པར་གནས་ཏེ། དེ་དག་ནི་ཀུན་དུ་བསྲུངས་པ་དང་། བསྐྱབས་པ་དང་སྦས་པ་ཡིན་པར་ཤེས་པར་བྱའོ། །དེ་ཅིའི་ཕྱིར་ཞེ་ན། དེ་ནི་འདི་ལྟར་ཁ་ལོ་སྒྱུར་བ་བཅོམ་ལྡན་འདས་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཉིད་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་

79-1-45a

སངས་རྒྱས་ཀྱི་ཞིང་དེར་བདུད་དམ་བདུད་ཀྱི་རིས་ཀྱི་ལྷ་རྣམས་བདུད་ཀྱི་ལས་ལ་ཉེ་བར་མི་གནས་ཤིང་མཐོ་འཚམ་པའི་ཕྱིར་འཇུག་པ་མེད་པ་དེ་ལྟ་དེ་ལྟར་དགེ་བའི་རྩ་བ་རྣམས་བསྐྱེད་པའི་ཕྱིར་རོ། །ཤཱ་ར་དྭ་ཏིའི་
བུ་འདི་ལྟ་སྟེ། དཔེར་ན་མི་ཞིག་གིས་དུག་སྨན་ཟོས་ཏེ་དུག་འཐུངས་ན་དེས་དུག་དེ་ཁ་ཟས་ཀྱི་བྱ་བ་བྱས་ཀྱང་གདུག་པ་མེད་ཅིང་ལེགས་པར་འཇུའོ། །ཤཱ་ར་དྭ་ཏིའི་བུ་དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔར་གྱུར་ཅིང་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཇི་ལྟར་སངས་རྒྱས་ཀྱི་ཞིང་དེར་བདུད་དམ། བདུད་ཀྱི་རིས་ཀྱི་ལྷ་རྣམས་བདུད་ཀྱི་
ལས་ལ་ཉེ་བར་མི་གནས་ཤིང་མཐོ་འཚམ་པའི་ཕྱིར་འཇུག་པ་མེད་པ་དེ་ལྟ་དེ་ལྟར་དགེ་བའི་རྩ་བ་ཡོངས་སུ་བསྔོས་པས་ན་ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་དེ་ལྟ་བུའི་ཡོན་ཏན་ཐམས་ཅད་དང་ལྡན་པ་ཡིན་ནོ། །དེ་ནས་
ཚེ་དང་ལྡན་པ་ཤཱ་ར་དྭ་ཏིའི་བུ་འདི་སྙམ་དུ་སེམས་ཏེ། སངས་རྒྱས་ཀྱི་མཐུས་བདག་ཅག་གིས་ཀྱང་སངས་རྒྱས་ཀྱི་ཞིང་དེ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་མི་འཁྲུགས་པ་དེ་དང་། ཉན་ཐོས་ཀྱི་དགེ་འདུན་དེ་དག་དང་། བྱང་ཆུབ་སེམས་དཔའི་ཚོགས་དཔག་ཏུ་མེད་ཅིང་གྲངས་མེད་པ་དེ་དག་བལྟ་བར་བྱའོ་སྙམ་མོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་
བུའི་སེམས་ཀྱི་ཡོངས་སུ་རྟོག་པ་ཐུགས་ཀྱིས་མཁྱེན་ནས། དེའི་ཚེ་འདི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་དེ། ཇི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་པས་སངས་རྒྱས་ཀྱི་
མཐུས་ཚེ་དང་ལྡན་པ་ཤཱ་ར་དྭ་ཏིའི་བུས་སྟན་དེ་ཉིད་ལ་འདུག་བཞིན་དུ་སངས་རྒྱས་ཀྱི་ཞིང་དེ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་

79-1-45b

ཉན་ཐོས་ཀྱི་དགེ་འདུན་དང་བཅས་པ་བྱང་ཆུབ་སེམས་དཔའི་ཚོགས་ཀྱི་འཁོར་དང་བཅས་པ་དེ་མཐོང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་
ར་དྭ་ཏིའི་བུ་ཁྱོད་ཀྱིས་སངས་རྒྱས་ཀྱི་ཞིང་དེ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་དང་། ཉན་ཐོས་ཀྱི་དགེ་འདུན་དེ་དང་། བྱང་ཆུབ་
སེམས་དཔའི་ཚོགས་དཔག་ཏུ་མེད་ཅིང་གྲངས་མེད་པ་དེ་དག་མཐོང་ངམ། གསོལ་པ་བཙུན་པ་བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །བཅོམ་ལྡན་འདས་ཀྱིས་
བཀའ་སྩལ་པ། ཤཱ་ར་དྭ་ཏིའི་བུ་ཁྱོད་ཀྱིས་འདི་ལྟར་ལྷ་དེ་དག་དང་མི་དེ་དག་ཉེ་བར་སྤྱོད་པ་དང་། ཡོངས་སུ་སྤྱོད་པ་དང་། རྩེ་བ་དང་། དགའ་བས་བྱེ་བྲག་གམ། ཐ་དད་དུ་བྱ་བ་ཅི་ཡང་མཐོང་ངམ། དེ་སྐད་ཅེས་
བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་གིས་འདི་ལྟར་ལྷ་དེ་དག་དང་། མི་དེ་དག་ཉེ་བར་སྤྱོད་པ་དང་། ཡོངས་
སུ་སྤྱོད་པ་དང་། རྩེ་བ་དང་། དགའ་བས་བྱེ་བྲག་གམ། ཐ་དད་དུ་བགྱི་བ་ཅི་ཡང་མ་མཐོང་ལགས་སོ། །དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས་སངས་རྒྱས་ཀྱི་ཞིང་དེ་ན་ཉེ་བར་སྤྱོད་པ་དང་། ཡོངས་
སུ་སྤྱོད་པ་ཐམས་ཅད་ལྷ་རྫས་ཉིད་ལགས་པ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཡང་ཕྱོགས་བཅུ་ཀུན་དུ་སྣང་བར་མཛད་ཅིང་
གསེར་གྱི་མཆོད་སྡོང་ལྟར་གཟི་བརྗིད་གསལ་ཞིང་ཤིས་པ་དང་། དཔལ་འབར་ལ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་སྐུ་ལེགས་པར་བརྒྱན་ཅིང་དཔེ་བྱད་བཟང་པོ་བརྒྱད་བཅུས་གཟུགས་རྣམ་པར་

79-1-46a

སྤྲས་ལ་ཉན་ཐོས་ཀྱི་དགེ་འདུན་གྱི་དབུས་ན་ཆོས་སྟོན་ཅིང་བཞུགས་པར་གདའ་བའི་སླད་དུའོ། །བཙུན་པ་བཅོམ་ལྡན་འདས་འདི་ལྟ་སྟེ། དཔེར་ན་མི་ལ་ལ་ཞིག་རྒྱ་མཚོ་ཆེན་པོའི་ནང་དུ་མཆིས་པ་ན་ཤར་
ཕྱོགས་སུ་ཞུགས་ཤིང་ངམ་རི་ཡང་མི་མཐོང་ཞིང་ལྷོ་ཕྱོགས་སུ་མ་ལགས། ནུབ་ཕྱོགས་སུ་མ་ལགས་ཏེ། བྱང་ཕྱོགས་སུ་ཞུགས་ཤིང་ངམ་རི་ཡང་མི་མཐོང་བ་དེ་བཞིན་དུ་བཙུན་པ་བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་ཉན་ཐོས་ཀྱི་དགེ་འདུན་གྱི་ནང་དུ་མཆིས་ན་ཉན་ཐོས་ཀྱི་མཐའ་མ་ཤར་ཕྱོགས་ན་མི་གདའ། ཉན་ཐོས་ཀྱི་མཐའ་མ་ལྷོ་ཕྱོགས་ན་ཡང་མི་གདའ། ནུབ་ཕྱོགས་
ན་ཡང་མི་གདའ། བྱང་ཕྱོགས་ན་ཡང་མི་གདའ་ལགས་སོ། །བཙུན་པ་བཅོམ་ལྡན་འདས་ཡང་དེ་དག་ཇི་ལྟར་སྙོམས་པར་ཞུགས་པ་དེ་ལྟར་ལུས་མི་གཡོ་མི་འགུལ་བར་ཆོས་ཉན་ཏོ། །བཙུན་པ་བཅོམ་ལྡན་
འདས་འདི་ན་དགྲ་བཅོམ་པ་བསམ་གཏན་པ་སྙོམས་པར་ཞུགས་པའི་ལུས་ནི་གཡོ་བར་ཡང་འགྱུར་ལགས་ཀྱི་ཉན་ཐོས་དེ་དག་ནི་ཆོས་ཉན་པ་ན་ལུས་གཡོ་བ་མ་མཆིས་ཏེ། བཙུན་པ་བཅོམ་ལྡན་འདས་དེ་དག་ནི་ཇི་ལྟར་
སྙོགས་པར་ཞུགས་པ་དེ་ལྟར་ལུས་མི་གཡོ། །མི་འགུལ་བར་ཆོས་ཉན་པར་བགྱིད་པ་ལགས་སོ།། །། བམ་པོ་བཞི་པ། བཙུན་པ་བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་
སངས་རྒྱས་ཀྱི་ཞིང་དེར་སྐྱེ་བར་བགྱི་བའི་སླད་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། སྦྱིན་པ་སྩལ་ཅིང་ཡོངས་སུ་བཏང་ལ་ཡོངས་སུ་བཏང་བས་གལ་ཏེ་སངས་
རྒྱས་ཀྱི་ཞིང་དེར་སྐྱེ་བ་ལྟ་ན་བཙུན་པ་བཅོམ་ལྡན་འདས་ལེགས་པར་སྩལ་ཅིང་ལེགས་པར་བཏང་ལ་ལེགས་པར་སྐྱེས་པ་ལགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་སངས་རྒྱས་ཀྱི་ཞིང་དེར་ལེགས་པར་

79-1-46b

མཆིས་པ་ལགས་སོ། །དེ་ཅིའི་སླད་དུ་ཞེ་ན། འདི་ལྟར་དེ་ནི་ཕྱིར་མི་ལྡོག་པའི་ཆོས་ཉིད་རྗེས་སུ་ཐོབ་པར་འགྱུར་བའི་སླད་དུའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་ར་དྭ་ཏིའི་བུ་དེ་དེ་བཞིན་ཏེ། ཇི་སྐད་སྨྲས་པ་
དེ་བཞིན་ནོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་རྒྱལ་པོ་བཀའ་ཁྲིམས་བཙན་པོའི་འཕར་མ་པའི་མི་ཞིག་རྒྱལ་པོའི་རྒྱས་བཏབ་པའི་སྤྲིང་ཡིག་ཐོགས་ཏེ། གྲོང་ངམ། གྲོང་ཁྱེར་རམ། གྲོང་རྡལ་ལམ། ཡུལ་
ཕྱོགས་གང་ཡང་རུང་བ་ཞིག་ཏུ་སོང་སྟེ། འགྲོ་བ་ན་དེ་ལ་ལ་གཅན་པ་རྣམས་སམ། ཤོ་གམ་པ་རྣམས་སམ། གྲུ་བ་རྣམས་སམ། གྲོང་པ་རྣམས་སམ། གྲོང་ཁྱེར་བ་རྣམས་སམ། ལམ་པ་རྣམས་སམ། རྒྱལ་པོའི་
མིའམ། ལམ་དུ་ཞུགས་པའམ། འགྲོན་པོའམ། དེ་ལས་གཞན་པ་ཡང་རུང་སྟེ། སེམས་ཅན་འགའ་ཡང་དེ་འགྲོ་བའི་བར་ཆད་མི་བྱེད་ཅིང་མཐོ་མི་འཚམ་སྟེ། དེ་འགྲོ་བ་དང་། འོང་བའི་ལམ་ལ་བགེགས་མེད་པ་ཉིད་
དུ་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་རྒྱལ་པོའི་རྒྱས་བཏབ་པའི་ཕྱིར་དེ་འགྲོ་བ་ལ་བགེགས་མེད་པར་འགྲོ་བར་བལྟའོ། །ཤཱ་ར་དྭ་ཏིའི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་འཇིག་རྟེན་གྱི་
ཁམས་འདི་ནས་ཤི་འཕོས་སམ་འཇིག་རྟེན་གྱི་ཁམས་གཞན་དག་ནས་ཤི་འཕོས་ཀྱང་རུང་སྟེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་
ཀྱི་ཞིང་དེར་སྐྱེས་སམ། སྐྱེ་འམ། སྐྱེ་བར་འགྱུར་བ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
སངས་རྒྱས་པར་མ་གྱུར་གྱི་བར་དུ་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་བར་འགྱུར་བ་དང་། ཐམས་ཅད་དུ་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཉེས་པར་

79-1-47a

བྱེད་པར་འགྱུར་བ་དང་། ཐམས་ཅད་དུ་ཡང་སངས་རྒྱས་ཀྱི་བྱང་ཆུབ་ཚོལ་བར་འགྱུར་བ་དང་། ཐམས་ཅད་དུ་ཡང་སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་སེམས་དཔའ་རྣམས་དང་། 
སངས་རྒྱས་ཀྱི་ཉན་ཐོས་རྣམས་དང་། མི་འབྲལ་བར་འགྱུར་བ་དང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བར་རིག་པར་བྱའོ། །དེ་སྐད་ཅེས་བཀའ་
སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གང་འདི་ན་རྒྱུན་དུ་ཞུགས་པའི་འབྲས་བུ་ལ་གནས་པའི་རྒྱུན་དུ་ཞུགས་པ་དང་། སངས་
རྒྱས་ཀྱི་ཞིང་དེར་སྐྱེས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་མཚུངས་པ་ལགས་སོ། །དེ་ཅིའི་སླད་དུ་ཞེ་ན། གང་འདི་ན་རྒྱུན་དུ་ཞུགས་པའི་འབྲས་བུ་ལ་གནས་པའི་རྒྱུན་དུ་ཞུགས་པ་དེས་ལོག་
པར་ལྟུང་བ་རྒྱུན་བཅད་པ་དེ་བཞིན་དུ་བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སངས་རྒྱས་ཀྱི་ཞིང་དེར་སྐྱེས་སམ། སྐྱེ་འམ། སྐྱེ་བར་འགྱུར་བ་དེ་དག་ཐམས་ཅད་ཀྱང་ལོག་
པར་ལྟུང་བ་རྒྱུན་ཆད་པ་ལགས་པར་བལྟ་བ་དང་། ཉན་ཐོས་དང་། རང་སངས་རྒྱས་ཀྱི་ས་ཐམས་ཅད་རྒྱུན་ཆད་པ་ལགས་པར་བལྟ་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
སངས་རྒྱས་པར་མ་གྱུར་གྱི་བར་དུ་ཐམས་ཅད་དུ་ཡང་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་མཆི་བར་འགྱུར་བ་དང་། ཐམས་ཅད་དུ་ཡང་སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་སེམས་དཔའ་
རྣམས་དང་། སངས་རྒྱས་ཀྱི་ཉན་ཐོས་རྣམས་དང་མི་འབྲལ་བར་འགྱུར་བའི་སླད་དུའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །

79-1-47b

ཤཱ་ར་དྭ་ཏིའི་བུ་དེ་དེ་བཞིན་ཏེ། ཇི་སྐད་སྨྲས་པ་དེ་བཞིན་ནོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་ལ་དག་འཇིག་རྟེན་གྱི་ཁམས་འདི་ནས་ཤི་འཕོས་སམ་འཇིག་རྟེན་གྱི་ཁམས་གཞན་
དག་ནས་ཤི་འཕོས་ཀྱང་རུང་སྟེ། སངས་རྒྱས་ཀྱི་ཞིང་དེར་སྐྱེས་སམ། སྐྱེ་འམ། སྐྱེ་བར་འགྱུར་བ་དེ་དག་ཐམས་ཅད་ནི་ལོག་པར་ལྟུང་བ་རྒྱུན་ཆད་པ་ཡིན་པར་བལྟ་བ་དང་། ཉན་ཐོས་དང་། རང་སངས་རྒྱས་ཀྱི་
ས་ཐམས་ཅད་རྒྱུན་ཆད་པ་ཡིན་པར་བལྟ་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་མ་གྱུར་གྱི་བར་དུ་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་བར་འགྱུར་
བ་དང་། ཐམས་ཅད་དུ་ཡང་སངས་རྒྱས་ཀྱི་བྱང་ཆུབ་ཚོལ་བར་འགྱུར་བ་དང་། ཐམས་ཅད་དུ་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་དུ་གྱུར་པ་དག་མཉེས་པར་འགྱུར་
པ་དང་། ཐམས་ཅད་དུ་ཡང་སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་སེམས་དཔའ་རྣམས་དང་། སངས་རྒྱས་ཀྱི་ཉན་ཐོས་རྣམས་དང་མི་འབྲལ་བར་འགྱུར་རོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་
ན་རྒྱུན་དུ་ཞུགས་པ་ནི་ལོག་པར་ལྟུང་བའི་ཆོས་སུ་མི་འགྱུར་ཞིང་རྫོགས་པའི་བྱང་ཆུབ་ལ་ངེས་པར་གཞོལ་ལོ། །ཤཱ་ར་དྭ་ཏིའི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་འཇིག་རྟེན་གྱི་ཁམས་
འདི་ནས་ཤི་འཕོས་སམ་འཇིག་རྟེན་གྱི་ཁམས་གཞན་དག་ནས་ཤི་འཕོས་ཀྱང་རུང་སྟེ། སངས་རྒྱས་ཀྱི་ཞིང་དེར་སྐྱེས་སམ། སྐྱེ་འམ། སྐྱེ་བར་འགྱུར་བ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་ངེས་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་མ་གྱུར་གྱི་བར་དུ་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་བར་འགྱུར་བ་དང་། ཐམས་ཅད་

79-1-48a

དུ་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་མཉེས་པར་བྱེད་པར་འགྱུར་བ་དང་། ཐམས་ཅད་དུ་ཡང་སངས་རྒྱས་ཀྱི་བྱང་ཆུབ་ཚོལ་བར་འགྱུར་བ་དང་། 
ཐམས་ཅད་དུ་ཡང་སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་སེམས་དཔའ་རྣམས་དང་། སངས་རྒྱས་ཀྱི་ཉན་ཐོས་རྣམས་དང་མི་འབྲལ་བར་འགྱུར་བར་རིག་པར་བྱའོ། །དེ་སྐད་ཅེས་བཀའ་སྩལ་པ་དང་། 
བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གང་འདི་ན་ལན་ཅིག་ཕྱིར་འོང་བའི་འབྲས་བུ་ལ་གནས་པའི་ལན་ཅིག་ཕྱིར་འོང་བ་དང་། སངས་རྒྱས་ཀྱི་ཞིང་དེར་སྐྱེས་
པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་མཚུངས་པ་ལགས་སོ། །བཙུན་པ་བཅོམ་ལྡན་འདས་གང་འདི་ན་ཕྱིར་མི་འོང་བའི་འབྲས་བུ་ལ་གནས་པའི་ཕྱིར་མི་འོང་བ་དང་། སངས་རྒྱས་ཀྱི་ཞིང་དེར་སྐྱེས་
པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཡང་མཚུངས་པ་ལགས་སོ། །བཙུན་པ་བཅོམ་ལྡན་འདས་གང་འདི་ན་དགྲ་བཅོམ་པ་ཉིད་ཀྱི་འབྲས་བུ་ལ་གནས་པའི་དགྲ་བཅོམ་པ་དང་། སངས་རྒྱས་ཀྱི་ཞིང་
དེར་སྐྱེས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཡང་མཚུངས་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །
ཤཱ་ར་དྭ་ཏིའི་བུ་ཁྱོད་དེ་སྐད་མ་ཟེར་ཅིག ། ཤཱ་ར་དྭ་ཏིའི་བུ་ཁྱོད་ཡང་དེ་སྐད་མ་ཟེར་ཅིག ། དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་གང་འདི་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པའི་བྱང་ཆུབ་
སེམས་དཔའ་སེམས་དཔའ་ཆེན་པོ་དང་། སངས་རྒྱས་ཀྱི་ཞིང་དེར་སྐྱེས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་མཚུངས་ལ། གང་འདི་ན་མི་སྐྱེ་བའི་ཆོས་ལ་བཟོད་པ་ཐོབ་པའི་བྱང་ཆུབ་སེམས་

79-1-48b

དཔའ་སེམས་དཔའ་ཆེན་པོ་དང་། སངས་རྒྱས་ཀྱི་ཞིང་དེར་སྐྱེས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་མཚུངས་པའི་ཕྱིར་རོ། །ཤཱ་ར་དྭ་ཏིའི་བུ་གཞན་གང་འདི་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་
ཀྱི་སྙིང་པོ་ལ་འདུག་པ་དང་། སངས་རྒྱས་ཀྱི་ཞིང་དེར་སྐྱེས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཡང་མཚུངས་སོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་གང་དག་སངས་རྒྱས་ཀྱི་ཞིང་དེར་སྐྱེས་པའི་བྱང་ཆུབ་
སེམས་དཔའ་སེམས་དཔའ་ཆེན་པོ་དེ་དག་ནི་དེ་བཞིན་གཤེགས་པ་ལ་རྟེན་པ་ཡིན་པར་རིག་པར་བྱ་བ་དང་། དེ་དག་ནི་བདུད་དང་། བདུད་ཀྱི་རིས་ཀྱི་ལྷ་རྣམས་ཀྱིས་མི་རྫི་བར་རིག་པར་བྱ་བ་དང་། བྱང་ཆུབ་སེམས་དཔའ་དེ་དག་
ནི་ཉན་ཐོས་ཀྱི་ས་དང་། རང་སངས་རྒྱས་ཀྱི་སར་མཚམས་སྦྱོར་བ་ཆད་པར་རིག་པར་བྱ་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་མ་གྱུར་གྱི་བར་དུ་སངས་རྒྱས་
ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་བར་འགྱུར་བ་དང་། ཐམས་ཅད་དུ་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་མཉེས་པར་བྱེད་པར་འགྱུར་བའི་ཕྱིར་རོ། །དེ་ནས་
ཚེ་དང་ལྡན་པ་ཀུན་དགའ་བོ་འདི་སྙམ་དུ་སེམས་ཏེ། འདི་ལ་གནས་བརྟན་རབ་འབྱོར་གྱི་སྤོབས་པ་ཅི་འདྲ་བ་བདག་གིས་གནས་བརྟན་རབ་འབྱོར་ལ་སད་པར་བྱའོ་སྙམ་མོ། །དེ་ནས་ཚེ་དང་ལྡན་པ་ཀུན་དགའ་བོས་
ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །གནས་བརྟན་རབ་འབྱོར་བདག་ཅག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་
ཉན་ཐོས་ཀྱི་དགེ་འདུན་དང་བཅས་པ་བྱང་ཆུབ་སེམས་དཔའི་ཚོགས་དང་བཅས་པ་དེ་དང་། བཅོམ་ལྡན་འདས་དེ་བཞིན་གཤེགས་པ་མི་འཁྲུགས་པའི་སངས་རྒྱས་ཀྱི་ཞིང་དེ་བལྟ་བར་བྱའོ། །དེ་སྐད་ཅེས་

79-1-49a

སྨྲས་པ་དང་། ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཀུན་དགའ་བོ་ཁྱོད་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་མི་འཁྲུགས་པ་ཉན་ཐོས་ཀྱི་དགེ་འདུན་དང་བཅས་པ་བྱང་ཆུབ་སེམས་དཔའི་ཚོགས་དང་བཅས་པ་དེ་དང་། སངས་རྒྱས་ཀྱི་ཞིང་དེ་ལྟའམ། སྨྲས་པ། གནས་བརྟན་རབ་འབྱོར་བདག་ཅག་གིས་
བལྟའོ། །དེ་སྐད་ཅེས་སྨྲས་པ་དང་། ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཀུན་དགའ་བོ་གནམ་དུ་ལྟོས་ཤིག །དེ་ནས་ཚེ་དང་ལྡན་པ་ཀུན་དགའ་བོས་གནམ་དུ་བལྟས་
སོ། །བལྟས་ནས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །གནས་བརྟན་རབ་འབྱོར་བདག་གིས་གནམ་དུ་བལྟས་ན། སྟེང་གི་ནམ་མཁའ་ཐམས་ཅད་དབེན་པར་མཐོང་ངོ་། །དེ་སྐད་ཅེས་སྨྲས་པ་དང་། 
ཚེ་དང་ལྡན་པ་རབ་འབྱོར་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཀུན་དགའ་བོ་ཇི་ལྟར་ཁྱོད་ཀྱིས་སྟེང་གི་ནམ་མཁའ་ཐམས་ཅད་དབེན་པར་མཐོང་བ་བཞིན་དུ་ཚེ་དང་ལྡན་པ་ཀུན་དགའ་
བོ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ཉན་ཐོས་ཀྱི་དགེ་འདུན་དང་བཅས་པ་བྱང་ཆུབ་སེམས་དཔའི་ཚོགས་དང་བཅས་པ་དེ་དང་། སངས་རྒྱས་
ཀྱི་ཞིང་དེ་ཡང་དེ་ལྟར་བལྟ་བར་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བཅོམ་ལྡན་འདས་ཀྱིས་འདི་སྐད་དུ་གང་འདི་ན་ལུང་
བསྟན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དང་། དེར་སྐྱེས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་མཚུངས་སོ། །ཞེས་བཀའ་སྩལ་ལགས་ན་བཙུན་པ་བཅོམ་ལྡན་འདས་དེ་

79-1-49b

མཉམ་པ་ཉིད་གང་ཞིག་གིས་མཚུངས་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་དེ་ནི་ཆོས་ཀྱི་དབྱིངས་
མཉམ་པ་ཉིད་ཀྱིས་མཚུངས་པ་ཡིན་ནོ། །དེ་བཞིན་གཤེགས་པ་མི་འཁྲུགས་པའི་བཀོད་པ་ལས་ལེའུ་བཞི་པའོ།། །། དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུ་འདི་སྙམ་དུ་སེམས་ཏེ། བཙུན་པ་
བཅོམ་ལྡན་འདས་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཡོན་ཏན་ཡོངས་སུ་བརྗོད་པ་
ཡང་བཤད། དེའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཆོགས་པ་ཡང་བཤད། ཉན་ཐོས་ཀྱི་དགེ་འདུན་གྱི་བཀོད་པ་ཕུན་སུམ་ཚོགས་པ་ཡང་བཤད། བྱང་ཆུབ་སེམས་དཔའི་ཡོན་ཏན་
བཀོད་པ་ཕུན་སུམ་ཚོགས་པ་ཡང་བཤད་ན་བཙུན་པ་བཅོམ་ལྡན་འདས་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་ཡོངས་སུ་མྱ་ངན་ལས་
འདའ་བ་ཆེན་པོ་ནི་ད་དུང་མ་བཤད་པས་བཙུན་པ་བཅོམ་ལྡན་འདས་ཀྱིས་ད་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་ཡོངས་སུ་མྱ་ངན་ལས་
འདས་པ་ཆེན་པོ་དེ་ཚུལ་ཅི་འདྲ་བ་དང་། མཚན་མ་ཇི་ལྟ་བུར་འགྱུར་བ་དེ་དག་ལེགས་པར་བཤད་པའི་རིགས་སོ་སྙམ་མོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུའི་སེམས་ཀྱི་ཡོངས་སུ་
རྟོག་པ་ཐུགས་ཀྱིས་མཁྱེན་ནས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་གང་གི་ཉིན་མོ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་

79-1-50a

པའི་སངས་རྒྱས་མི་འཁྲུགས་པ་དེ་ཡོངས་སུ་མྱ་ངན་ལས་འདའ་བ་ཆེན་པོས་ཡོངས་སུ་མྱ་ངན་ལས་འདའ་བར་འགྱུར་བ་དེའི་ཉིན་མོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེའི་
སེམས་ཅན་དེ་དག་ལ་ཆོས་བསྟན་པའི་ཕྱིར་དེ་བཞིན་གཤེགས་པས་སྐུ་སྤྲུལ་པ་དག་སྤྲུལ་པར་འགྱུར་རོ། དེ་ནས་དེ་བཞིན་གཤེགས་པའི་སྤྲུལ་པའི་སྐུ་དེ་དག་སེམས་ཅན་དེ་རྣམས་ལ་འདི་ལྟ་བུའི་ཆོས་སྟོན་
པར་འགྱུར་ཏེ། ཆོས་བསྟན་པ་དེས་སྔོན་ཆོས་བསྟན་པས་སེམས་ཅན་ཇི་སྙེད་བཏུལ་བར་གྱུར་བ་དེ་བས་ཆེས་དཔག་ཏུ་མེད་ཅིང་ཆེས་གྲངས་མེད་པའི་སེམས་ཅན་དག་འདུལ་བར་འགྱུར་ཏེ། དེ་དག་ལས་སེམས་ཅན་
ལ་ལ་དག་ནི་ཉན་ཐོས་ཀྱི་ཐེག་པ་ལ་འདུལ་བར་འགྱུར་རོ། །ལ་ལ་དག་ནི་རང་སངས་རྒྱས་ཀྱི་ཐེག་པ་ལའོ། །ལ་ལ་དག་ནི་སྟོབས་བཅུའི་ཐེག་པ་བླ་ན་མེད་པ་ལ་འདུལ་བར་འགྱུར་རོ། །ཤཱ་ར་དྭ་ཏིའི་བུ་དེ་ནས་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཡོངས་སུ་མྱ་ངན་ལས་འདའ་བའི་དུས་ཀྱི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་
ཆེ་ཞེས་བྱ་བ་ལ་སྐྱེས་བུ་དམ་པ་ཁྱོད་ངའི་དམ་པའི་ཆོས་ནུབ་ནས་ཞག་བདུན་ལོན་པའི་འོག་ཏུ་འཇིག་རྟེན་གྱི་ཁམས་མངོན་པར་དགའ་བ་འདིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ་བདེ་བར་གཤེགས་པ། འཇིག་རྟེན་མཁྱེན་པ། སྐྱེས་
བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་གསེར་གྱི་པད་མ་ཞེས་བྱ་བར་འགྱུར་རོ་ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་

79-1-50b

ཏུ་ལུང་སྟོན་པར་འགྱུར་རོ། །ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་གྱི་པད་མ་དེའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་
པ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་ཅི་འདྲ་བ་དེ་འདྲ་བར་འགྱུར་ཞིང་ཤཱ་ར་དྭ་
ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་གྱི་པད་མ་དེའི་ཉན་ཐོས་ཀྱི་དགེ་འདུན་གྱི་བཀོད་པ་ཕུན་སུམ་ཚོགས་པ་དང་། བྱང་ཆུབ་སེམས་དཔའི་
ཚོགས་ཀྱི་བཀོད་པ་ཕུན་སུམ་ཚོགས་པ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཉན་ཐོས་ཀྱི་དགེ་འདུན་གྱི་བཀོད་པ་ཕུན་སུམ་ཚོགས་
པ་དང་། བྱང་ཆུབ་སེམས་དཔའི་ཚོགས་ཀྱི་བཀོད་པ་ཕུན་སུམ་ཚོགས་པ་ཅི་འདྲ་བ་དེ་འདྲ་བར་ལྷག་ཆད་མེད་པར་འགྱུར་རོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་མི་འཁྲུགས་པ་དེ་ཡོངས་སུ་མྱ་ངན་ལས་འདའ་བ་ཆེན་པོའི་དུས་ཀྱི་ཚེ་ན་ས་ཆེན་པོ་དེ་རྣམ་པ་དྲུག་ཏུ་རབ་ཏུ་གཡོ་བར་འགྱུར་ཏེ། གཡོ་བར་འགྱུར། རབ་ཏུ་གཡོ་བར་འགྱུར། 
ཀུན་དུ་རབ་ཏུ་གཡོ་བར་འགྱུར། འགུལ་བར་འགྱུར། རབ་ཏུ་འགུལ་བར་འགྱུར། ཀུན་དུ་རབ་ཏུ་འགུལ་བར་འགྱུར། ལྡེག་པར་འགྱུར་། རབ་ཏུ་ལྡེག་པར་འགྱུར། ཀུན་དུ་རབ་ཏུ་ལྡེག་པར་འགྱུར་ཞིང་
འཇིག་རྟེན་དུ་སྣང་བ་ཆེན་པོ་ཡང་འབྱུང་བར་འགྱུར་རོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེར་སྒྲ་སྐད་ཆེན་པོ་ཡང་འབྱུང་བར་འགྱུར་ཞིང་སྒྲ་དེ་ཡང་འདོད་པ་ན་སྤྱོད་པའི་ལྷའི་རིས་དྲུག་

79-1-51a

པོ་དག་དང་། འོག་མིན་གྱི་ལྷའི་རིས་རྣམས་ཀྱི་བར་དུ་གྲགས་པར་འགྱུར་རོ། །དེ་ན་འདོད་པ་ན་སྤྱོད་པའི་ལྷའི་རིས་རྣམས་དང་། གཟུགས་ན་སྤྱོད་པའི་ལྷའི་རིས་དེ་དག་གིས་སྒྲ་དེ་ཐོས་ནས་
ཀྱང་འདི་སྙམ་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཡོངས་སུ་མྱ་ངན་ལས་འདའ་བར་འགྱུར་རོ་སྙམ་དུ་རིག་པར་འགྱུར་ཞིང་འདི་ལྟར་
རང་རང་གི་ལྷའི་གཞལ་མེད་ཁང་རྣམས་ལ་མངོན་པར་མི་དགའ་བར་འགྱུར་བ་དེ་ལྟ་བུའི་མངོན་པར་མི་དགའ་བའི་འདུ་ཤེས་དག་ཀྱང་སྐྱེ་བར་འགྱུར་ལ། ཚིག་འདི་སྐད་དུ་ཀྱེ་མ་བཅོམ་ལྡན་འདས་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་སྤྱན་དུ་གྱུར་བ། ཡེ་ཤེས་སུ་གྱུར་པ། དབང་དུ་གྱུར་བ། ཚད་མར་གྱུར་བ། སྣང་བར་གྱུར་བ་ཤིན་དུ་མྱུར་བར་འཇིག་རྟེན་དུ་ནུབ་བོ་ཞེས་བརྗོད་པར་ཡང་
འགྱུར་རོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཡོངས་སུ་མྱ་ངན་ལས་འདའ་བ་ཆེན་པོའི་དུས་ཀྱི་ཚེ་སངས་རྒྱས་
ཀྱི་ཞིང་དེ་ན་རིན་པོ་ཆེའི་ཤིང་ལྗོན་པ་དང་། དཔག་བསམ་གྱི་ཤིང་ལྗོན་པ་རྩྭ་དང་། གེལ་བ་དང་། སྨན་དང་། ནགས་ཚལ་གང་ཇི་སྙེད་པ་དེ་དག་ཐམས་ཅད་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་མི་འཁྲུགས་པ་དེ་ཡོངས་སུ་མྱ་ངན་ལས་འདའ་བ་ཆེན་པོ་ག་ལ་བ་དེ་ལོགས་སུ་རབ་ཏུ་འདུད་པར་འགྱུར་རོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སྔོན་གྱི་སྨོན་ལམ་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིས་འབྱུང་བ་རྣམས་ཀྱི་ཆེད་དུ་གྲོགས་པོ་དག་འདི་ཆོས་ཀྱི་སྒོའི་གཞི་

79-1-51b

བརྒྱ་རྩ་བརྒྱད་དེ། ང་འདས་པའི་འོག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སངས་རྒྱས་ཀྱི་ཞིང་འདིར་སྐྱེ་བར་འགྱུར་བ་དེ་དག་གིས་ཆོས་ཀྱི་སྒོའི་གཞི་བརྒྱ་རྩ་བརྒྱད་པོ་འདི་ཀུན་ཆུབ་པར་བྱས་ན་ཆོས་
ཐམས་ཅད་ཀུན་ཆུབ་པ་དང་། །ཀུན་བཟུང་བར་འགྱུར་རོ་ཞེས་ཆོས་ཀྱི་སྒོའི་གཞི་བརྒྱ་རྩ་བརྒྱད་འཇོག་པར་འགྱུར་རོ། །ཤཱ་ར་དྭ་ཏིའི་བུ་དེ་ལྟར་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་ཇི་ལྟར་དེ་བཞུགས་སམ། ཡོངས་སུ་མྱ་ངན་ལས་འདས་ན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་ཆོས་ཐམས་ཅད་ཀུན་ཆུབ་པར་
བྱེད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་མ་གྱུར་གྱི་བར་དུ་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་བ་དང་། དེ་བཞིན་གཤེགས་པ་ལ་བལྟ་བ་དང་། 
ཕྱིར་མི་ལྡོག་པས་ན་ཤིན་དུ་ཡོངས་སུ་བཟུང་བ་ཡིན་ནོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་ལ་དག་འཇིག་རྟེན་གྱི་ཁམས་འདི་ནས་ཤི་འཕོས་སམ་འཇིག་རྟེན་གྱི་ཁམས་གཞན་
དག་ནས་ཤི་འཕོས་ཀྱང་རུང་སྟེ། སངས་རྒྱས་ཀྱི་ཞིང་དེར་སྐྱེས་སམ། སྐྱེ་འམ། སྐྱེ་བར་འགྱུར་བ་དེ་དག་ཐམས་ཅད་ནི་ཇི་ལྟར་བཅོམ་ལྡན་འདས་དེ་བཞུགས་པ་དེ་བཞིན་དུ་དེ་ཡོངས་སུ་མྱ་ངན་ལས་འདས་
པ་ན་ཡང་ཆོས་ཐམས་ཅད་ཀུན་ཆུབ་པར་བྱེད་པ་འཐོབ་པར་འགྱུར་རོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་
དེ་ཡོངས་སུ་མྱ་ངན་ལས་འདའ་བ་ཆེན་པོའི་དུས་ཀྱི་ཚེ་འདི་ལྟར་སངས་རྒྱས་ཀྱི་མཐུས་སེམས་ཅན་གང་དག་འཇིག་རྟེན་གྱི་ཁམས་གཞན་དང་གཞན་དག་ན་གནས་པའི་སེམས་ཅན་དེ་དག་གི་མིག་ལམ་དུ་བཅོམ་

79-1-52a

ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་མི་འཁྲུགས་པ་དེ་སྣང་བར་འགྱུར་རོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཡོངས་སུ་མྱ་ངན་ལས་འདའ་བ་ཆེན་པོས་ཡོངས་སུ་མྱ་ངན་ལས་འདས་པ་ན་ལྷ་དང་མི་རྣམས་ཀྱིས་མེ་ཏོག་དང་། བདུག་པ་དང་། 
སྤོས་དང་། མེ་ཏོག་ཕྲེང་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་དང་། རིན་པོ་ཆེའི་རྒྱན་དག་གིས་སྐུ་ལ་མཆོད་པ་བྱ་བའི་ཕྱིར་འཐོར་བར་འགྱུར་ཏེ། ལྷ་དང་མི་རྣམས་ཀྱི་མེ་
ཏོག་དང་། བདུག་པ་དང་། སྤོས་དང་། མེ་ཏོག་ཕྲེང་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་དང་། རིན་པོ་ཆེའི་རྒྱན་དེ་དག་མངོན་པར་གཏོར་བའི་ཕུང་པོ་ནི་ཁོ་ར་ཁོར་
ཡུག་དང་། འཕང་དུ་དཔག་ཚད་ཀྱི་ཚད་ཙམ་དུ་འགྱུར་རོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཡོངས་སུ་མྱ་ངན་
ལས་འདའ་བ་ཆེན་པོས་ཡོངས་སུ་མྱ་ངན་ལས་འདས་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ན་ལྷ་དང་། མི་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། 
མི་འམ་ཅི་དང་། ལྟོ་འཕྱེ་ཆེན་པོ་གང་ཇི་སྙེད་ཡོད་པ་དེ་དག་ཐམས་ཅད་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་ཡོངས་སུ་མྱ་ངན་ལས་འདས་
པ་ཆེན་པོ་ག་ལ་བ་དེ་ལོགས་སུ་འདུད་ཅིང་ཐལ་མོ་སྦྱར་ཏེ་ཕྱག་འཚལ་བར་འགྱུར་རོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་

79-1-52b

མི་འཁྲུགས་པ་དེ་ཡོངས་སུ་མྱ་ངན་ལས་འདའ་བ་ཆེན་པོས་ཡོངས་སུ་མྱ་ངན་ལས་འདས་པ་ན་ལྷ་དང་། མི་དེ་རྣམས་ཉིན་མཚན་བདུན་དུ་མྱ་ངན་གྱི་ཟུག་རྔུ་དང་ལྡན་པར་གྱུར་ནས་ཀྱེ་མ་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་འདི་ཤིན་དུ་མྱུར་བར་ཡོངས་སུ་མྱ་ངན་ལས་འདས་སོ་ཞེས་བྲང་རྡུང་བར་འགྱུར་ཞིང་ལྷ་དང་མི་དེ་དག་དགའ་བ་དང་། རྩེད་མོ་ཉམས་
སུ་མྱོང་བར་མི་འགྱུར། འདོད་པའི་ལོངས་སྤྱོད་ལ་འཇུག་པར་མི་འགྱུར་ཏེ་ལྷ་དང་མི་དེ་དག་དེ་ལྟར་སེམས་ཁོངས་སུ་ཆུད་པར་གྱུར་ནས་གཅིག་ལ་གཅིག་འདི་སྐད་དུ་ཀྱེ་མ་སྤྱན་དུ་གྱུར་པ། ཡེ་ཤེས་སུ་གྱུར་པ། དཔང་
དུ་གྱུར་པ། ཚད་མར་གྱུར་པ། སྣང་བར་གྱུར་བའི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་འདི་ཤིན་དུ་མྱུར་བར་འཇིག་རྟེན་དུ་ནུབ་བོ་ཞེས་ཚིག་ཏུ་བརྗོད་
པར་འགྱུར་རོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་ལ་དག་འཇིག་རྟེན་གྱི་ཁམས་འདི་ནས་ཤི་འཕོས་སམ་འཇིག་རྟེན་གྱི་ཁམས་གཞན་དག་ནས་ཤི་འཕོས་ཀྱང་རུང་སྟེ། སངས་
རྒྱས་ཀྱི་ཞིང་དེར་སྐྱེས་སམ། སྐྱེ་འམ། སྐྱེ་བར་འགྱུར་བ་དེ་དག་ཐམས་ཅད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཡིན་པར་རིག་པར་བྱ་སྟེ། ཤཱ་ར་དྭ་ཏིའི་བུ་བྱང་ཆུབ་སེམས་དཔའ་དེ་
དག་ནི་བརྒྱར་བགྲང་བས་བགྲང་བར་མི་འགྱུར་གྱི། ཤཱ་ར་དྭ་ཏིའི་བུ་གཞན་དུ་ན་དེ་དག་ནི་བརྒྱ་ཞེ་འམ། སྟོང་ཞེ་འམ། བརྒྱ་སྟོང་ཞེས་བྱ་བའི་གྲངས་སུ་འགྲོའོ། །ཤཱ་ར་དྭ་ཏིའི་བུ་ཇི་ལྟར་བྱང་ཆུབ་སེམས་
དཔའ་སེམས་དཔའ་ཆེན་པོ་དེ་དག་བརྒྱའི་གྲངས་དང་། སྟོང་གི་གྲངས་དང་། བརྒྱ་སྟོང་གི་གྲངས་སུ་འགྲོ་བ་དེ་བཞིན་དུ་ཤཱ་ར་དྭ་ཏིའི་བུ་དེ་བཞིན་གཤེགས་པའི་གྲངས་སུ་བལྟ་བར་བྱའོ། །སངས་རྒྱས་

79-1-53a

ཀྱི་གྲངས་སུ་བལྟ་བར་བྱའོ། །ཐམས་ཅད་མཁྱེན་པ་ཉིད་ཀྱི་གྲངས་སུ་བལྟ་བར་བྱའོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་ལ་དག་འཇིག་རྟེན་གྱི་ཁམས་འདི་ནས་ཤི་
འཕོས་སམ་འཇིག་རྟེན་གྱི་ཁམས་གཞན་དག་ནས་ཤི་འཕོས་ཀྱང་རུང་སྟེ། སངས་རྒྱས་ཀྱི་ཞིང་དེར་སྐྱེས་སམ། སྐྱེ་འམ། སྐྱེ་བར་འགྱུར་བ་དེ་དག་ཐམས་ཅད་ཀྱང་དེ་ལྟ་བུའི་གྲངས་ཉིད་དུ་འགྲོ་བར་འགྱུར་ཏེ། འདི་ལྟ་སྟེ། 
དེ་བཞིན་གཤེགས་པའི་གྲངས་དང་། སངས་རྒྱས་ཀྱི་གྲངས་དང་། ཐམས་ཅད་མཁྱེན་པ་ཉིད་ཀྱི་གྲངས་སུ་གྲངས་དེ་ཉིད་དུ་འགྲོ་བར་འགྱུར་རོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་
ལྡོག་པ་རྣམས་མ་གཏོགས་པ་དེ་ལས་གཞན་པའི་བྱང་ཆུབ་སེམས་དཔའ་གང་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་ཡོན་ཏན་ཡོངས་
སུ་བརྗོད་པའི་ཆོས་ཀྱི་རྣམས་གྲངས་འདི་ཐོས་པར་མི་འགྱུར་བ་དེ་དག་ཐམས་ཅད་ནི་བདུད་ཀྱིས་བྱིན་གྱིས་བརླབས་པར་རིག་པར་བྱའོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཡོངས་སུ་མྱ་ངན་ལས་འདའ་བ་ཆེན་པོས་ཡོངས་སུ་མྱ་ངན་ལས་འདས་པ་ན་སྐུ་ནི་རང་གི་མེའི་ཁམས་ཀྱིས་སྲེག་པར་འགྱུར་རོ། དེའི་སྐུ་གདུང་རྣམས་
ནི་གསེར་གྱི་མདོག་འདྲ་བར་འགྱུར་ཏེ། སྐུ་གདུང་དེ་དག་བཅད་པའི་འཕྲོ་ནས་བཀྲ་ཤིས་དང་། གཡུང་དྲུང་འཁྱིལ་པ་དག་སྣང་བར་འགྱུར་ཞིང་རབ་ཏུ་གསལ་བར་འགྱུར་རོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་
ཤིང་ལྗོན་པ་ཆེན་པོ་ཏི་མི་ས་ཞེས་བྱ་བའི་རིགས་དེ་བཅད་པའི་འཕྲོ་ནས་བཀྲ་ཤིས་དང་། གཡུང་དྲུང་འཁྱིལ་པ་དག་སྣང་ཞིང་འབྱུང་ངོ་། །ཤཱ་ར་དྭ་ཏིའི་བུ་དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་དགྲ་

79-1-53b

བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཡོངས་སུ་མྱ་ངན་ལས་འདའ་བ་ཆེན་པོས་ཡོངས་སུ་མྱ་ངན་ལས་འདས་པའི་སྐུ་གདུང་དེ་དག་བཅད་པའི་འཕྲོ་ནས་ཀྱང་བཀྲ་ཤིས་དང་གཡུང་དྲུང་
འཁྱིལ་པ་དག་འབྱུང་བར་འགྱུར་ཞིང་ཆོ་འཕྲུལ་སྣ་ཚོགས་དག་དང་། མཐུ་སྣ་ཚོགས་དག་ཀྱང་སྟོན་པར་འགྱུར་རོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་མི་འཁྲུགས་པ་དེ་ཡོངས་སུ་མྱ་ངན་ལས་འདའ་བ་ཆེན་པོས་ཡོངས་སུ་མྱ་ངན་ལས་འདས་པའི་སྐུ་གདུང་དེ་དག་བཅད་པའི་འཕྲོ་དག་ནས་བཀྲ་ཤིས་དང་། གཡུང་དྲུང་འཁྱིལ་པ་དག་
འབྱུང་བར་འགྱུར་རོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་རྡོ་མུ་ལ་སོ་ཞེས་བྱ་བ་དེ་བཅག་པའི་འཕྲོ་ནས་བཀྲ་ཤིས་དང་། གཡུང་དྲུང་འཁྱིལ་པ་དག་འབྱུང་ངོ་། །ཤཱ་ར་དྭ་ཏིའི་བུ་དེ་བཞིན་དུ་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཡོངས་སུ་མྱ་ངན་ལས་འདའ་བ་ཆེན་པོས་ཡོངས་སུ་མྱ་ངན་ལས་འདས་པའི་སྐུ་གདུང་གཏུབས་པ་དེ་དག་གི་བཅད་འཕྲོ་དག་ལས་ཀྱང་
བཀྲ་ཤིས་དང་། གཡུང་དྲུང་འཁྱིལ་པ་དག་འབྱུང་བར་འགྱུར་རོ། །སྐུ་གདུང་དེ་དག་ལ་སྐུ་གདུང་ལ་མཆོད་པར་བྱ་བའི་ཕྱིར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཐམས་ཅད་དུ་སེམས་ཅན་རྣམས་རིན་
པོ་ཆེ་སྣ་བདུན་གྱིས་མཆོད་རྟེན་དག་བྱེད་པར་འགྱུར་རོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཐམས་ཅད་འདི་ལྟར་བརྒྱན་པར་འགྱུར་ཏེ། འདི་ལྟ་སྟེ། དཔེར་ན་སྐར་མ་རྣམས་ཀྱིས་ནམ་མཁའ་
ཡོངས་སུ་ཁྱབ་པ་དེ་བཞིན་དུ་རིན་པོ་ཆེ་སྣ་བདུན་གྱི་མཆོད་རྟེན་དག་དང་། པད་མ་གསེར་གྱི་མདོག་ཅན་འདབ་མ་བྱེ་བ་ཕྲག་སྟོང་དང་ལྡན་པ་དེ་དག་གིས་ཀྱང་སངས་རྒྱས་ཀྱི་ཞིང་དེ་རྟག་ཏུ་བརྒྱན་པར་འགྱུར་རོ།།

79-1-54a

ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་བྱང་ཆུབ་སེམས་དཔའ་སེམས་
དཔའ་ཆེན་པོ་གང་དག་འཆི་བའི་གནས་སྐབས་ལ་ཉེ་བར་གནས་ཤིང་འཆི་འཕོ་བ་དེ་དག་དེ་ནས་འཆི་འཕོ་བ་ན་སྔ་ལྟས་འདི་ལྟ་བུ་དག་འབྱུང་བར་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་སངས་
རྒྱས་ཀྱི་ཞིང་གང་དུ་སྐྱེ་བར་འགྱུར་བའི་སངས་རྒྱས་ཀྱི་ཞིང་དེའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་བར་འགྱུར་ཞིང་མཐོང་ནས་ཀྱང་མི་བརྗེད་པར་འཆི་བའི་
དུས་བྱེད་དོ། །འཆི་བའི་དུས་བྱས་པ་དེ་དག་གི་སྐུ་གདུང་རྣམས་ལ་ཡང་ལྷ་དང་མི་རྣམས་སྐུ་གདུང་ལ་མཆོད་པ་བྱ་བའི་ཕྱིར་བརྩོན་པར་འགྱུར་ཏེ། ལྷ་དང་མིའི་ཕུན་སུམ་ཚོགས་པས་སྐུ་གདུང་རྣམས་ལ་སྐུ་གདུང་
གི་མཆོད་པ་བྱེད་པར་འགྱུར་རོ། །ཤཱ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་སྐུ་གདུང་རྣམས་ནི་མཐར་གྱིས་ནམ་མཁའ་ལ་འཐོར་ཅིང་ཕྲ་མོར་གྱུར་ནས་དེ་དག་གི་ཆ་
ཤས་ཀྱང་མེད་ཅིང་མི་སྣང་བར་འགྱུར་རོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་རྩྭ་གཤེར་བ་དག །མེའི་ནང་དུ་བཅུག་ན་དུ་བའི་རྒྱུན་དག་འབྱུང་ཞིང་དུ་བ་དེ་དག་ཀྱང་མཐར་གྱིས་ནམ་མཁའ་ལ་མངོན་པར་འཕགས་ཏེ། 
ནམ་མཁའ་ལ་འཐོར་ཞིང་ཕྲ་མོར་གྱུར་ནས་དེ་དག་གི་ཆ་ཤས་ཀྱང་མེད་ཅིང་མི་སྣང་བར་འགྱུར་རོ། །ཤཱ་ར་དྭ་ཏིའི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སངས་རྒྱས་ཀྱི་ཞིང་དེ་ནས་
ཤི་འཕོས་པ་དེ་དག་གི་སྐུ་གདུང་རྣམས་ཀྱང་མཐར་གྱིས་ནམ་མཁའ་ལ་འཐོར་ཞིང་ཕྲ་མོར་གྱུར་ནས་དེ་དག་གི་ཆ་ཤས་ཀྱང་མེད་ཅིང་མི་སྣང་བར་འགྱུར་རོ། །ཤཱ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་

79-1-54b

སེམས་དཔའ་ཆེན་པོ་དེ་དག་འཆི་བའི་གནས་སྐབས་ལ་ཉེ་བར་གནས་ཤིང་སངས་རྒྱས་ཀྱི་ཞིང་དེ་ནས་འཆི་འཕོ་བ་ན་ལྟས་འདི་ལྟ་བུ་དག་འབྱུང་བར་འགྱུར་ཏེ། ཕྱོགས་བཅུ་ཀུན་གྱི་འཇིག་རྟེན་གྱི་ཁམས་ཐམས་ཅད་དུ་
འཇིག་རྟེན་གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དག་དགའ་ལྡན་གྱི་ལྷའི་རིས་རྣམས་སུ་སྐྱེ་བ་དག་མཐོང་ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་སེམས་དཔའ་
ཆེན་པོ་དག་དགའ་ལྡན་གྱི་ལྷའི་རིས་རྣམས་ན་གནས་པ་དག་མཐོང་ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དག་དགའ་ལྡན་གྱི་ལྷའི་རིས་རྣམས་ནས་འཆི་འཕོ་བ་དག་
མཐོང་ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དག་མའི་མངལ་དུ་འཇུག་པ་དག་མཐོང་ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་
སེམས་དཔའ་ཆེན་པོ་དག་མའི་མངལ་ནས་བཙའ་བ་དག་མཐོང་ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དག་གོམ་པ་བདུན་འདོར་བ་དག་མཐོང་ངོ་། །འཇིག་རྟེན་
གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དག་རྟ་གད་ཏུ་དགོད་པ་དག་མཐོང་ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དག་གཞོན་ནུ་རྩེ་བ་རྗེས་
སུ་སྟོན་པ་དག་མཐོང་ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དག་བཙུན་མོའི་འཁོར་གྱི་ནང་དུ་འདུག་པ་དག་མཐོང་ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་
བྱང་ཆུབ་སེམས་དཔའ་སེམས་དཔའ་ཆེན་པོ་དག་ཁྱིམ་ནས་ཁྱིམ་མེད་པར་རབ་ཏུ་འབྱུང་བ་དག་མཐོང་ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དག་དཀའ་བ་སྤྱོད་པ་སྟོན་པ་

79-1-55a

དག་མཐོང་ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དག་བྱང་ཆུབ་ཀྱི་སྙིང་པོར་འགྲོ་བ་དག་མཐོང་ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་
སེམས་དཔའ་ཆེན་པོ་དག་བྱང་ཆུབ་ཀྱི་སྙིང་པོ་ལ་ངེས་པར་རྟོག་པ་དག་མཐོང་ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་སྙིང་པོ་ལ་གུས་པ་དང་རྗེས་སུ་སྐོར་བ་བྱེད་པ་མཐོང་
ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དག་བྱང་ཆུབ་ཀྱི་སྙིང་པོ་ལ་འདུག་པར་རྩོམ་པ་དག་མཐོང་ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་སེམས་
དཔའ་ཆེན་པོ་དག་བྱང་ཆུབ་ཀྱི་སྙིང་པོ་ལ་འདུག་པར་གྱུར་བ་དག་མཐོང་ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དག་བདུད་སྡིག་ཅན་རབ་ཏུ་འདུལ་བ་དག་མཐོང་ངོ་། །འཇིག་རྟེན་
གྱི་ཁམས་ཁ་ཅིག་ཏུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་ཞིང་ཐམས་ཅད་མཁྱེན་པའི་ཡེ་ཤེས་ཐོབ་པ་དག་མཐོང་ངོ་། །
འཇིག་རྟེན་གྱི་ཁམས་ཁ་ཅིག་ཏུ་ནི་སངས་རྒྱས་བཅོམ་ལྡན་འདས་དག་ཆོས་ཀྱི་འཁོར་ལོ་བསྐོར་བ་དག་མཐོང་ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་སངས་རྒྱས་བཅོམ་ལྡན་འདས་དག་བྱང་ཆུབ་སེམས་དཔའ་སེམས་
དཔའ་ཆེན་པོ་རྣམས་ལུང་སྟོན་པར་མཛད་པ་དག་མཐོང་ངོ་། །འཇིག་རྟེན་གྱི་ཁམས་ཁ་ཅིག་ཏུ་ནི་སངས་རྒྱས་བཅོམ་ལྡན་འདས་དག་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བ་
དག་མཐོང་སྟེ། ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་འཆི་བའི་གནས་སྐབས་ལ་ཉེ་བར་གནས་ཤིང་སངས་རྒྱས་ཀྱི་ཞིང་དེ་ནས་འཆི་འཕོ་བ་ན་དེ་ལྟ་བུའི་ལྟས་དེ་དག་འབྱུང་བར་འགྱུར་རོ།།

79-1-55b

ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སྐུ་ཚེའི་ཚད་ནི་བསྐལ་པ་ཆེན་པོ་འབུམ་ཕྲག་བཅུར་གནས་ཏེ། ཤཱ་ར་དྭ་ཏིའི་བུ་བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཡོངས་སུ་མྱ་ངན་ལས་འདའ་བ་ཆེན་པོས་ཡོངས་སུ་མྱ་ངན་ལས་འདས་ནས་ཀྱང་བདེ་བར་གཤེགས་པས་གསུངས་པའི་
དམ་པའི་ཆོས་ནི་བསྐལ་པ་ཆེན་པོ་འབུམ་ཕྲག་བཅུའི་བར་དུ་གནས་པར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་
བཅོམ་ལྡན་འདས་བདེ་བར་གཤེགས་པས་གསུངས་པའི་དམ་པའི་ཆོས་གནས་པར་འགྱུར་བའི་བསྐལ་པ་ཆེན་པོ་འབུམ་ཕྲག་བཅུ་པོ་དག་ཇི་ལྟར་རྩི་བ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་
ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་བར་གྱི་བསྐལ་པ་ཉི་ཤུ་ལ་བསྐལ་པ་གཅིག་གོ། །བསྐལ་པ་བཅུ་ལ་བསྐལ་པ་ཆེན་པོ་གཅིག་སྟེ། ཤཱ་ར་དྭ་ཏིའི་བུ་འདི་ལྟར་རྩིས་
པའི་བསྐལ་པ་ཆེན་པོ་འབུམ་ཕྲག་བཅུའི་བར་དུ་བདེ་བར་གཤེགས་པས་གསུངས་པའི་དམ་པའི་ཆོས་གནས་པར་འགྱུར་རོ། །ཤཱ་ར་དྭ་ཏིའི་བུ་དེའི་དམ་པའི་ཆོས་ནུབ་པར་འགྱུར་བ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་
གྱི་ཁམས་དེ་ཐམས་ཅད་དུ་སྣང་བ་ཆེན་པོ་འབྱུང་བར་འགྱུར། ས་ཆེན་པོ་ཡང་གཡོ་བར་འགྱུར། སྒྲ་སྐད་ཆེན་པོ་ཡང་གྲག་པར་འགྱུར་རོ། །ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་དམ་པའི་ཆོས་ནི་བདུད་དང་། བདུད་ཀྱི་རིས་ཀྱི་ལྷ་རྣམས་ཀྱིས་ནུབ་པར་བྱེད་པར་མི་འགྱུར། དེའི་དམ་པའི་ཆོས་ནི་བཅོམ་ལྡན་འདས་ཀྱི་ཉན་ཐོས་རྣམས་

79-1-56a

ཀྱིས་ཀྱང་ནུབ་པར་བྱེད་པར་མི་འགྱུར་གྱི། ཤཱ་ར་དྭ་ཏིའི་བུ་གཞན་དུ་ན་དེའི་མི་རྣམས་དམ་པའི་ཆོས་ཉན་པའི་འདུན་པ་ཆུང་བར་འགྱུར་ཏེ། དེ་དག་འདུན་པ་ཆུང་བས་ན་ཆོས་སྨྲ་བའི་དགེ་སློང་རྣམས་ཀྱི་དྲུང་དུ་འགྲོ་
བར་མི་འགྱུར་རོ། །དེ་དག་དེར་མི་འགྲོ་བས་ན་དམ་པའི་ཆོས་ཐོས་པར་མི་འགྱུར་རོ། །དམ་པའི་ཆོས་མ་ཐོས་པས་ན་སྒྲུབ་པར་མི་འགྱུར་རོ། །མི་སྒྲུབ་པས་ན་གོང་མའི་ཁྱད་པར་འཐོབ་པར་མི་འགྱུར་ཞིང་ཆོས་སྨྲ་བའི་དགེ་
སློང་རྣམས་ཀྱིས་ཀྱང་མི་དེ་དག་འདུན་པ་ཆུང་བར་རིག་ནས་ཆོས་སྟོན་པར་མི་འགྱུར་ཏེ། ཤཱ་ར་དྭ་ཏིའི་བུ་དེ་ལྟ་བུའི་རིམ་གྱིས་དེའི་དམ་པའི་ཆོས་ནུབ་པར་འགྱུར་རོ།། །། །།དེ་བཞིན་གཤེགས་
པ་མི་འཁྲུགས་པའི་བཀོད་པ་ལས་ལེའུ་ལྔ་པའོ།། །། དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་
སེམས་དཔའ་ཆེན་པོ་དགེ་བའི་རྩ་བ་ཇི་ལྟ་བུ་དང་། རྒྱུ་གང་དང་རྐྱེན་གང་གིས་སངས་རྒྱས་ཀྱི་ཞིང་དེར་སྐྱེ་བར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་
བཀའ་སྩལ་ཏོ། །ཤཱ་ར་དྭ་ཏིའི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་
སེམས་དཔའི་སྤྱད་པ་སྤྱོད་པའི་སྤྱོད་པར་གྱུར་པ་གང་ཡིན་པའི་སྤྱོད་པ་དེ་དག་ལ་སྤྱད་པར་བྱ་ཞིང་སྤྱོད་པ་དེ་དག་བསྒྲུབ་པར་བྱའོ་ཞེས་དེ་ལྟར་སེམས་བསྐྱེད་ཅིང་སྨོན་ལམ་བཏབ་ན། སངས་རྒྱས་ཀྱི་ཞིང་འཇིག་རྟེན་གྱི་
ཁམས་མངོན་པར་དགའ་བ་ཞེས་བྱ་བ་དེར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་དྲུང་དུ་སྐྱེ་བར་འགྱུར་ཏེ། །ཤཱ་ར་དྭ་ཏིའི་

79-1-56b

བུ་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་དེར་སྐྱེ་བར་འགྱུར་བའི་རྒྱུ་ནི་དེ་ཡིན་རྐྱེན་ནི་དེ་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་བདག་དགེ་བའི་རྩ་བ་འདི་དང་ལྡན་པས་
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་དང་ལྷན་ཅིག་འགྲོགས་པར་གྱུར་ཅིག་ཅེས། སྦྱིན་པའི་ཕ་རོལ་ཏུ་ཕྱིན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་
སུ་བསྔོ་བར་བྱ་སྟེ། ཤཱ་ར་དྭ་ཏིའི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་དེར་སྐྱེ་བར་འགྱུར་བའི་རྒྱུ་ཡིན་ནོ། །དེ་ཡང་རྐྱེན་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བྱང་ཆུབ་
སེམས་དཔའ་སེམས་དཔའ་ཆེན་པོས་བདག་དགེ་བའི་རྩ་བ་འདི་དང་ལྡན་པས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་དང་ལྷན་ཅིག་
འགྲོགས་པར་གྱུར་ཅིག་ཅེས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱ་སྟེ། །ཤཱ་ར་དྭ་ཏིའི་བུ་དེ་ཡང་བྱང་ཆུབ་སེམས་དཔའ་སེམས་
དཔའ་ཆེན་པོ་སངས་རྒྱས་ཀྱི་ཞིང་དེར་སྐྱེ་བར་འགྱུར་བའི་རྒྱུ་ཡིན་ནོ། །དེ་ཡང་རྐྱེན་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་བདག་དགེ་བའི་རྩ་བ་
འདི་དང་ལྡན་པས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་དང་ལྷན་ཅིག་འགྲོགས་པར་གྱུར་ཅིག་ཅེས་བཟོད་པའི་ཕ་རོལ་ཏུ་ཕྱིན་
པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱ་སྟེ། །།ཤཱ་ར་དྭ་ཏིའི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་དེར་སྐྱེ་བར་

79-1-57a

འགྱུར་བའི་རྒྱུ་ཡིན་ནོ། །དེ་ཡང་རྐྱེན་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་བདག་དགེ་བའི་རྩ་བ་འདི་དང་ལྡན་པས་
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་དང་ལྷན་ཅིག་འགྲོགས་པར་གྱུར་ཅིག་ཅེས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱ་སྟེ། །ཤཱ་ར་དྭ་ཏིའི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་དེར་སྐྱེ་བར་འགྱུར་བའི་རྒྱུ་ཡིན་ནོ། །དེ་
ཡང་རྐྱེན་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་བདག་དགེ་བའི་རྩ་བ་འདི་དང་ལྡན་པས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་དང་ལྷན་ཅིག་འགྲོགས་པར་གྱུར་ཅིག་ཅེས།  བསམ་གཏན་ཀྱི་ཕ་རོལ་ཏུ་ཕྱིན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
ཡོངས་སུ་བསྔོ་བར་བྱ་སྟེ། །ཤཱ་ར་དྭ་ཏིའི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་དེར་སྐྱེ་བར་འགྱུར་བའི་རྒྱུ་ཡིན་ནོ། །དེ་ཡང་རྐྱེན་ཡིན་
ནོ། །ཤཱ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་བདག་དགེ་བའི་རྩ་བ་འདི་དང་ལྡན་པས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་མི་འཁྲུགས་པ་དེ་དང་ལྷན་ཅིག་འགྲོགས་པར་གྱུར་ཅིག་ཅེས་ཤེས་རབ་ཀྱི་ཕ་རོལ་ཏུ་ཕྱིན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་

79-1-57b

བྱ་སྟེ། །ཤཱ་ར་དྭ་ཏིའི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་དེར་སྐྱེ་བར་འགྱུར་བའི་རྒྱུ་ཡིན་ནོ། །དེ་ཡང་རྐྱེན་ཡིན་ནོ། །གཞན་ཡང་བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེས་ཆོས་གང་བཤད་པ་དེ་རྣམ་པ་ལས་རྗེས་སུ་དྲན་པར་བྱ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་
འཁྲུགས་པ་དེའི་ཉན་ཐོས་ཀྱི་དགེ་འདུན་ཚད་མེད་གྲངས་མེད་བརྗོད་དུ་མེད་ཅིང་བརྗོད་དུ་མེད་པའི་ཡང་བརྗོད་དུ་མེད་པ་གང་ཡིན་པ་དེ་དག་ཀྱང་རྣམ་པ་ལས་རྗེས་སུ་དྲན་པར་བྱ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་མི་འཁྲུགས་པ་དེའི་བྱང་ཆུབ་སེམས་དཔའ་བགྲང་བ་ལས་ཤིན་དུ་འདས་པ་དེ་དག་ཀྱང་རྣམ་པ་ལས་རྗེས་སུ་དྲན་པར་བྱ་སྟེ། ཇི་ལྟར་བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་
ཆོས་སྟོན་པར་འགྱུར་བ་དང་། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེར་ཉན་ཐོས་ཀྱི་དགེ་འདུན་དང་བྱང་ཆུབ་སེམས་དཔའི་ཚོགས་ཚད་མེད་གྲངས་མེད་བརྗོད་དུ་མེད་ཅིང་བརྗོད་
དུ་མེད་པའི་ཡང་བརྗོད་དུ་མེད་པར་འགྱུར་བར་དེ་དག་རྣམ་པ་ལས་རྗེས་སུ་དྲན་པར་བྱའོ། །ཤཱ་ར་དྭ་ཏིའི་བུ་གསུམ་གྱི་རྣམ་པ་དང་ལྡན་པའི་རིགས་ཀྱི་བུས་འདི་ལྟར་ཡང་དག་པར་བསླབ་པར་བྱ་སྟེ། བདག་གིས་གསུམ་གྱི་རྣམ་པ་དང་ལྡན་པའི་དགེ་བའི་རྩ་བ་
འདི་སེམས་ཅན་ཐམས་ཅད་དང་ལྷན་ཅིག་ཐུན་མོང་དུ་བྱ་ཞིང་སེམས་ཅན་ཐམས་ཅད་དང་ལྷན་ཅིག་ཐུན་མོང་དུ་བྱས་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱའོ་ཞེས་གསུམ་གྱི་རྣམ་པ་དང་ལྡན་པའི་དགེ་བའི་རྩ་བ་
སེམས་ཅན་ཐམས་ཅད་ཀྱི་ཕྱིར་ཡོངས་སུ་བསྔོ་བར་བྱའོ། །ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་གསུམ་གྱི་རྣམ་པ་ལས་ཡོངས་སུ་བསྔོས་པ་ལ་བར་མ་དོར་ཡོངས་སུ་ཉམས་པ་མེད་པས་ན་ཤཱ་ར་དྭ་ཏིའི་བུ་གསུམ་གྱི་རྣམ་པ་དང་

79-1-58a

ལྡན་པའི་དགེ་བའི་རྩ་བས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་ཞིང་སངས་རྒྱས་ཀྱི་ཞིང་དེར་ཡང་སྐྱེ་བར་འགྱུར་ན་ཕ་རོལ་ཏུ་ཕྱིན་པ་ཐམས་ཅད་དང་ལྡན་པའི་དགེ་བའི་
རྩ་བས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་དྲུང་དུ་སྐྱེ་བར་འགྱུར་བ་ལྟ་སྨོས་ཀྱང་ཅི་དགོས་ཏེ། ཤཱ་ར་དྭ་ཏིའི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་
ཀྱི་ཞིང་དེར་སྐྱེ་བར་འགྱུར་བའི་རྒྱུ་ཡིན་ནོ། །དེ་ཡང་རྐྱེན་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་དེར་སྐྱེ་བར་འདོད་པས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་མི་འཁྲུགས་པ་དེའི་འོད་ཀྱིས་ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྣང་བར་བྱེད་པ་མཐོང་ཞིང་། དེ་དག་མཐོང་ནས་ཀྱང་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེར་ཡང་རང་གི་འོད་ཀྱིས་སྣང་བར་བྱའོ་ཞེས་རྣམ་པ་ལས་རྗེས་སུ་དྲན་པར་བྱ་བ་དེ་ལྟ་བུའི་སེམས་བསྐྱེད་པར་བྱ་སྟེ། ཤཱ་ར་དྭ་ཏིའི་བུ་དེ་ཡང་བྱང་ཆུབ་སེམས་དཔའ་སེམས་དཔའ་
ཆེན་པོ་སངས་རྒྱས་ཀྱི་ཞིང་དེར་སྐྱེ་བར་འགྱུར་བའི་རྒྱུ་ཡིན་ནོ། །དེ་ཡང་རྐྱེན་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་དེར་སྐྱེ་བར་འདོད་པས་འདི་ལྟར་བདག་བྱང་ཆུབ་སེམས་དཔའི་སྤྱད་པ་སྤྱོད་པ་ན་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་ཉན་ཐོས་ཀྱི་དགེ་འདུན་ཚད་མེད། གྲངས་མེད། བརྗོད་དུ་མེད་ཅིང་བརྗོད་དུ་མེད་པའི་ཡང་བརྗོད་དུ་མེད་པ་དེ་དག་མཐོང་ཞིང་དེ་དག་མཐོང་ནས་ཀྱང་ཇི་ལྟར་བདག་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེར་ཡང་ཉན་ཐོས་ཀྱི་དགེ་འདུན་ཚད་མེད། གྲངས་མེད། བརྗོད་དུ་མེད་ཅིང་བརྗོད་དུ་མེད་པའི་ཡང་བརྗོད་དུ་མེད་པ་དག་འབྱུང་བར་འགྱུར་བ་དེ་ལྟར་བྱ་ཞིང་དེ་

79-1-58b

ལྟར་བརྩོན་པར་བྱའོ་ཞེས་དེ་ལྟར་སེམས་བསྐྱེད་པར་བྱ་སྟེ། ཤཱ་ར་དྭ་ཏིའི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་དེར་སྐྱེ་བར་འགྱུར་བའི་རྒྱུ་ཡིན་ནོ། །དེ་ཡང་རྐྱེན་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བྱང་ཆུབ་སེམས་
དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་དེར་སྐྱེ་བར་འདོད་པས་འདི་ལྟར་བདག་བྱང་ཆུབ་སེམས་དཔའི་སྤྱད་པ་སྤྱོད་པ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་
རྒྱས་ཀྱི་ཞིང་དེར་རྣམ་པ་ཐམས་ཅད་ཀྱི་མཆོག་དང་ལྡན་པ་དེ་མཐོང་ཞིང་མཐོང་ནས་ཀྱང་། ཇི་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་ཡང་དེ་ལྟར་རྣམ་པ་ཐམས་ཅད་ཀྱི་མཆོག་དང་
ལྡན་པར་འགྱུར་བ་དེ་འདྲ་བར་བྱ་ཞིང་དེ་ལྟར་བརྩོན་པར་བྱའོ་ཞེས་དེ་ལྟར་སེམས་བསྐྱེད་པར་བྱ་སྟེ། ཤཱ་ར་དྭ་ཏིའི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་དེར་སྐྱེ་བར་འགྱུར་བའི་རྒྱུ་ཡིན་ནོ། །དེ་ཡང་རྐྱེན་ཡིན་ནོ། །ཤཱ་ར་
དྭ་ཏིའི་བུ་གཞན་ཡང་རིགས་ཀྱི་བུ་འམ་རིགས་ཀྱི་བུ་མོས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་གང་དག་དེ་བཞིན་གཤེགས་པའི་གྲངས་སུ་འགྲོ་བ་དང་། 
སངས་རྒྱས་ཀྱི་གྲངས་སུ་འགྲོ་བ་དང་། ཐམས་ཅད་མཁྱེན་པ་ཉིད་ཀྱི་གྲངས་སུ་འགྲོ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེ་དང་། བལ་གླང་སྤོས་ཀྱི་གླང་པོ་ཆེ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་
པོ་ཚད་མེད། གྲངས་མེད་པ་དེ་ལྟ་བུ་དེ་དག་གི་མིང་ཐོས་ན་ཡང་སངས་རྒྱས་ཀྱི་ཞིང་དེར་སྨོན་ལམ་འདེབས་ཤིང་སྐྱེ་བར་འགྱུར་ན་ཕ་རོལ་ཏུ་ཕྱིན་པ་ཐམས་ཅད་དང་ལྡན་པའི་དགེ་བའི་རྩ་བ་རྣམས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ག་ལ་བ་དེར་ཡོངས་སུ་བསྔོས་པས། སངས་རྒྱས་ཀྱི་ཞིང་དེར་སྐྱེ་བར་འགྱུར་བ་ལ་སླུ་བར་མི་འགྱུར་བ་ལྟ་སྨོས་ཀྱང་ཅི་དགོས་ཏེ། ཤཱ་ར་དྭ་ཏིའི་བུ་དེ་ཡང་བྱང་ཆུབ་སེམས་དཔའ་སེམས་

79-1-59a

དཔའ་ཆེན་པོ་སངས་རྒྱས་ཀྱི་ཞིང་དེར་སྐྱེ་བར་འགྱུར་བའི་རྒྱུ་ཡིན་ནོ། །དེ་ཡང་རྐྱེན་ཡིན་ནོ། །ཤཱ་ར་དྭ་ཏིའི་བུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་དགེ་བའི་རྩ་བའི་ཚད་ནི་གཟུང་བར་མི་ནུས་ཏེ། ཤཱ་ར་དྭ་ཏིའི་བུ་གལ་ཏེ་
སེམས་ཅན་ཐམས་ཅད་ཀྱིས་ནམ་མཁའི་ཚད་ཙམ་གྱི་སྣོད་དག་ཡོངས་སུ་བཀང་སྟེ་ཁྱེར་བ་གྱུར་ཀྱང་སྣོད་ཆེན་པོས་བཅུས་པ་དེས་དགེ་བའི་རྩ་བ་དེ་ཟད་པར་མི་ནུས་སོ། །ཤཱ་ར་དྭ་ཏིའི་བུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་དགེ་བའི་རྩ་བ་
གང་ཡིན་པ་དེ་སྣོད་དག་གིས་གཞལ་བར་མི་ནུས་ཏེ། ཤཱ་ར་དྭ་ཏིའི་བུ་དེའི་སྣོད་ནི་ཐམས་ཅད་མཁྱེན་པ་ཉིད་ཡིན་ནོ། །ཤཱ་ར་དྭ་ཏིའི་བུ་གསུམ་གྱི་རྣམ་པ་དང་ལྡན་པའི་དགེ་བའི་རྩ་བ་ལས་དཀོན་མཆོག་གསུམ་གྱི་གདུང་འཐོབ་པར་འགྱུར་རོ། །ཤཱ་ར་དྭ་
ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་ལ་དག་གསུམ་གྱི་རྣམ་པ་ཡོངས་སུ་བསྔོས་པའི་དགེ་བའི་རྩ་བ་འདི་དང་ལྡན་པ་དེ་དག་ཐམས་ཅད་ནི་ལོག་པར་ལྟུང་བ་མེད་པའི་ཆོས་ཅན་དུ་བལྟའོ། །ཤཱ་ར་དྭ་ཏིའི་བུ་གསུམ་རྣམ་པ་ཡོངས་
སུ་བསྔོས་པའི་དགེ་བའི་རྩ་བ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བདུད་སྡིག་ཅན་དང་བདུད་ཀྱི་རིས་ཀྱི་ལྷ་རྣམས་འདུལ་བར་བྱེད་ཅིང་སངས་རྒྱས་ཀྱི་ཞིང་གང་དང་གང་དུ་སྐྱེ་བར་འདོད་པའི་སངས་རྒྱས་ཀྱི་ཞིང་དེ་དང་དེར་ཡང་
སྐྱེ་བར་འགྱུར་རོ། །ཤཱ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་དེར་སྐྱེ་བར་འདོད་པས་ཤར་ཕྱོགས་ཀྱི་འཇིག་རྟེན་གྱི་ཁམས་ཚད་མེད་གྲངས་མེད་པ་དག་ན། སངས་རྒྱས་བཅོམ་ལྡན་འདས་
གང་དག་བཞུགས་པ་དེ་དག་རྣམ་པ་ལས་རྗེས་སུ་དྲན་པར་བྱ། སངས་རྒྱས་བཅོམ་ལྡན་འདས་དེ་དག་གིས་ཆོས་གང་བཤད་པ་དེ་ཡང་རྣམ་པ་ལས་རྗེས་སུ་དྲན་པར་བྱ། སངས་རྒྱས་བཅོམ་ལྡན་འདས་དེ་དག་གི་ཉན་ཐོས་ཀྱི་དགེ་འདུན་
དང་། བྱང་ཆུབ་སེམས་དཔའི་ཚོགས་གང་ཡིན་པ་དེ་དག་ཐམས་ཅད་ཀྱང་རྣམ་པ་ལས་རྗེས་སུ་དྲན་པར་བྱའོ། །གསུམ་གྱི་རྣམ་པ་དང་ལྡན་པའི་དགེ་རྩ་བ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་

79-1-59b

པར་རྫོགས་པའི་སངས་རྒྱས་མི་འཁྲུགས་པ་ག་ལ་བ་དེར་ཡོངས་སུ་བསྔོ་བར་བྱ་སྟེ། ཤཱ་ར་དྭ་ཏིའི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་དེར་སྐྱེ་བར་འགྱུར་བའི་རྒྱུ་ཡིན་ནོ། །དེ་ཡང་རྐྱེན་ཡིན་ནོ། །དེ་བཞིན་
དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། དེ་བཞིན་དུ་འོག་དང་། སྟེང་གི་ཕྱོགས་དང་། དེ་བཞིན་དུ་ཕྱོགས་བཅུ་ཀུན་གྱི་སངས་རྒྱས་ཀྱི་ཞིང་ཐམས་ཅད་ན་སངས་རྒྱས་བཅོམ་ལྡན་འདས་གང་དག་བཞུགས་པ་དེ་དག་ཐམས་
ཅད་ཀྱང་རྣམ་པ་ལས་རྗེས་སུ་དྲན་པར་བྱ། སངས་རྒྱས་བཅོམ་ལྡན་འདས་དེ་དག་གིས་ཆོས་གང་བཤད་པ་དེ་དག་ཐམས་ཅད་ཀྱང་རྣམ་པ་ལས་རྗེས་སུ་དྲན་པར་བྱ། སངས་རྒྱས་བཅོམ་ལྡན་འདས་དེ་དག་གི་ཉན་ཐོས་ཀྱི་དགེ་འདུན་དང་
བྱང་ཆུབ་སེམས་དཔའི་ཚོགས་གང་ཡིན་དེ་དག་ཐམས་ཅད་ཀྱང་རྣམ་པ་ལས་རྗེས་སུ་དྲན་པར་བྱའོ། །ཤཱ་ར་དྭ་ཏིའི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་གསུམ་གྱི་རྣམ་པ་དང་ལྡན་པའི་དགེ་བའི་རྩ་བ་དེ་
དག་ལ་རྗེས་སུ་ཡི་རང་བར་བྱ་ཞིང་རྗེས་སུ་ཡི་རང་ནས་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ག་ལ་བ་དེར་ཡོངས་སུ་བསྔོ་བར་བྱ་སྟེ། དེར་ཡོངས་སུ་བསྔོས་ན་
སངས་རྒྱས་ཀྱི་ཞིང་དེར་སྐྱེ་བ་ལ་སླུ་བར་མི་འགྱུར་རོ། །ཤཱ་ར་དྭ་ཏིའི་བུ་གཞན་ཡང་སངས་རྒྱས་ཀྱི་ཞིང་མང་པོ་དང་། སངས་རྒྱས་ཀྱི་ཞིང་བརྒྱ་ཕྲག་མང་པོ་དང་། སངས་རྒྱས་ཀྱི་ཞིང་སྟོང་ཕྲག་མང་པོ་དག་དང་། སངས་རྒྱས་ཀྱི་
ཞིང་བརྒྱ་སྟོང་ཕྲག་མང་པོ་དག་དང་། སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དག་ན་ཡང་གང་ད་ལྟར་གྱི་སངས་རྒྱས་ཀྱི་ཞིང་གི་ཡོན་ཏན་བཀོད་པ་མཛེས་པ་འདི་ལྟ་བུ་དག་མེད་དེ། ཤཱ་ར་དྭ་ཏིའི་བུ་དེ་ལྟ་བས་ན་བྱང་
ཆུབ་སེམས་དཔའ་སེམས་དཔའ་ཆེན་པོས་འདི་ལྟར་བདག་གི་དགེ་བའི་རྩ་བ་འདིས་གང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་ད་ལྟར་གྱི་སངས་རྒྱས་

79-1-60a

ཀྱི་ཞིང་གི་ཡོན་ཏན་བཀོད་པ་མཛེས་པ་དེ་ལྟ་བུའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་མཐོང་ཞིང་། སངས་རྒྱས་ཀྱི་ཞིང་གི་ཡོན་ཏན་བཀོད་པ་དེ་ལྟ་བུ་དག་མཐོང་ནས་ཀྱང་སངས་རྒྱས་ཀྱི་ཞིང་གི་
ཡོན་ཏན་བཀོད་པ་དེ་ལྟ་བུ་དག་ཡོངས་སུ་གཟུང་བར་བྱའོ། །ཡོངས་སུ་བཟུང་ནས་ཀྱང་ཁ་ལོ་སྒྱུར་བ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ལ་སོགས་པའི་
ལུང་གིས་བྱང་ཆུབ་སེམས་དཔའ་བརྒྱ་ཕྲག་མང་པོ་དག་དང་།   བྱང་ཆུབ་སེམས་དཔའ་སྟོང་ཕྲག་མང་པོ་དག་དང་། བྱང་ཆུབ་སེམས་དཔའ་བརྒྱ་སྟོང་ཕྲག་མང་པོ་དག་དང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་
ཕྲག་མང་པོ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་བསྟན་པར་བྱ། ཡང་དག་པར་འཛིན་དུ་གཞུག་པར་བྱ། ཡང་དག་པར་གཟེང་བསྟོད་པར་བྱ། ཡང་དག་པར་རབ་ཏུ་དགའ་བར་བྱའོ་ཞེས་སེམས་
བསྐྱེད་པར་བྱ་སྟེ། ཤཱ་ར་དྭ་ཏིའི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་དེར་སྐྱེ་བར་འགྱུར་བའི་རྒྱུ་ཡིན་ནོ། །དེ་ཡང་རྐྱེན་ཡིན་ནོ། །ཤཱ་ར་དྭ་ཏིའི་བུ་དེ་ལྟ་བས་ན། བྱང་ཆུབ་སེམས་དཔའ་
སེམས་དཔའ་ཆེན་པོ་གང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་དེར་སྐྱེ་བ་རབ་ཏུ་འཛིན་པར་འདོད་པས་དེ་ལྟར་ལྷག་པའི་
བསམ་པས་སེམས་བསྐྱེད་པར་བྱའོ། །གལ་ཏེ་དེ་ལྟར་མ་བྱས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཉིད་བསླུས་པར་འགྱུར་རོ། །ཤཱ་ར་དྭ་ཏིའི་
བུ་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དེ་ལྟར་ལྷག་པའི་བསམ་པས་སེམས་བསྐྱེད་པར་འགྱུར་བ་དེ་དག་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་

79-1-60b

པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་དུ་སྐྱེ་བར་འགྱུར་ཏེ། ཤཱ་ར་དྭ་ཏིའི་བུ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་དེ་ལྟར་ལྷག་པའི་བསམ་པས་སེམས་བསྐྱེད་པར་འགྱུར་བ་དེ་ནི་བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་དུ་སྐྱེ་བར་ངས་ལུང་བསྟན་ཏོ།། །། བམ་པོ་ལྔ་པ། ཤཱ་ར་དྭ་ཏིའི་བུ་
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་འདི་སྐད་དུ་ཀྱེ་མ་སེམས་ཅན་གང་དག་བདག་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དུ་སྐྱེ་བར་འདོད་པ་དེ་དག་འཆི་བའི་དུས་ཀྱི་ཚེ། བདག་ཀྱང་ཉན་ཐོས་ཀྱི་དགེ་འདུན་གྱིས་ཡོངས་སུ་བསྐོར་ཅིང་བྱང་ཆུབ་
སེམས་དཔའི་ཚོགས་ཀྱིས་མདུན་དུ་བདར་ནས་དེ་དག་གི་དྲུང་དུ་གནས་པར་འགྱུར་ལ། དེ་དག་གིས་ཀྱང་བདག་མཐོང་ནས་སེམས་རབ་ཏུ་དགའ་བར་འགྱུར་ཞིང་དྲན་པ་ཉམས་པ་མེད་པ་དང་། སེམས་གཡེང་བ་མེད་པར་འཆི་བའི་དུས་བྱས་
ནས་བདག་གི་སངས་རྒྱས་ཀྱི་ཞིང་དུ་སྐྱེ་བར་གྱུར་ཅིག་ཅེས་སྨོན་ལམ་ཆེན་པོ་བཏབ་པས་ན་ཤཱ་ར་དྭ་ཏིའི་བུ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་མི་འཁྲུགས་པ་དེའི་མཚན་ཐོས་པར་འགྱུར་བ་དང་། ཐོས་ནས་ཀྱང་ཡིད་ལ་བྱེད་པར་འགྱུར་བ་དང་། དེ་བཞིན་གཤེགས་པ་མི་འཁྲུགས་པའི་སྐུ་གླང་པོ་ཆེའི་ཁྲི་པད་མའི་གདན་ལ་བཞུགས་པའི་བཀོད་པ་སྟོང་བྱེད་དུ་
འཇུག་ན་གང་གི་ཚེ་རིགས་ཀྱི་བུ་དང་། རིགས་ཀྱི་བུ་མོ་དེ་འཆི་བའི་དུས་བྱེད་པར་འགྱུར་བའི་ཚེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ཉན་ཐོས་ཀྱི་དགེ་འདུན་གྱིས་

79-1-61a

ཡོངས་སུ་བསྐོར་ཅིང་བྱང་ཆུབ་སེམས་དཔའི་ཚོགས་ཀྱིས་མདུན་དུ་བདར་ཏེ་གཤེགས་པར་འགྱུར་ཞིང་དེས་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
མི་འཁྲུགས་པ་དེ་མདུན་ན་བཞུགས་པ་མཐོང་བར་འགྱུར་རོ། །།མཐོང་ནས་ཀྱང་སེམས་དགའ་བར་འགྱུར་ཞིང་མི་བརྗེད་པ་དང་། སེམས་མི་གཡེང་བར་འཆི་བའི་དུས་བྱེད་པར་འགྱུར་ཏེ། འཆི་བའི་དུས་བྱས་ནས་ཀྱང་བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མངོན་པར་དགའ་བ་དེ་ཉིད་དུ་སྐྱེ་བར་འགྱུར་རོ། །།གང་གི་ཚེ་རིགས་ཀྱི་བུ་འམ། རིགས་
ཀྱི་བུ་མོ་དེ་སྦྱིན་པའི་ཆོས་བྱེད་པ་དེ་ན་འཆི་བའི་དུས་ཀྱི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་མཐོང་ཞིང་། མཐོང་ནས་ཀྱང་སྡིག་པ་ཐམས་ཅད་རྣམ་
པར་བསལ་ནས་སངས་རྒྱས་ཀྱི་ཞིང་དེར་སྐྱེ་བར་འགྱུར་རོ། །།ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་
སྤྱོད་པ་ན། ཀྱེ་མ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེར་སེམས་ཅན་གང་དག་སྐྱེ་བར་འདོད་པ་དེ་དག་འཆི་བའི་དུས་ཀྱི་ཚེ། བདག་ཉན་ཐོས་ཀྱི་དགེ་
འདུན་གྱིས་ཡོངས་སུ་བསྐོར་བ་དང་བཅས། བྱང་ཆུབ་སེམས་དཔའི་ཚོགས་ཀྱིས་མདུན་གྱིས་བལྟས་པ་དང་བཅས་པར་དེ་དག་གི་མདུན་ན་འདུག་པར་འགྱུར་ལ། དེ་དག་གིས་བདག་མཐོང་ནས་སེམས་དད་པར་གྱུར་ཏེ། མི་
བརྗེད་ཅིང་སེམས་མི་གཡེང་བས་འཆི་བའི་དུས་བྱས་ནས་བདག་གི་སངས་རྒྱས་ཀྱི་ཞིང་དུ་སྐྱེ་བར་གྱུར་ཅིག་ཅེས་སྨོན་ལམ་དེ་ལྟ་བུ་བཏབ་པར་གྱུར་ཏོ། །།ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་གྲོང་ཁྱེར་ཀུན་དགའི་ར་བ་དང་བསྐྱེད་

79-1-61b

མོས་ཚལ་མེད་ཅིང་འབབ་ཆུ་དང་། མཚོ་བྲན་དང་། ཀླུང་དང་། རྫིང་བུའི་ལོངས་སྤྱོད་དང་། རྟ་དང་། གླང་པོ་དག་ཀྱང་མེད་ལ། བྱེ་མ་དང་། གསེག་མ་དང་། རྡོ་བ་དང་། གྱོ་མོ་དག་ཡོད་ཅིང་ཚེར་མ་སྟུག་པོས་གང་སྟེ། བགྲོད་པར་དཀའ་བ་ཞིག་
ཡོད་ལ། ཤཱ་ར་དྭ་ཏིའི་བུ་གྲོང་ཁྱེར་དེ་ན་རྒྱལ་པོ་མཐུ་ཆེ་ཞིང་དཔུང་དང་ལྡན་པ་ཞིག་གནས་པར་གྱུར་ཀྱང་ཤཱ་ར་དྭ་ཏིའི་བུ་གྲོང་ཁྱེར་དེ་ན་གྲོང་ཁྱེར་གྱི་ཡོན་ཏན་དེ་དག་དང་བྲལ་བས་མི་མཛེས་ཏེ། ཤཱ་ར་དྭ་ཏིའི་བུ་འདི་ལྟར་རྒྱལ་པོ་དེ་མཐུ་ཆེ་ཞིང་དཔུང་དང་
ལྡན་ཡང་རུང་སྟེ། གྲོང་ཁྱེར་དེ་གྲོང་ཁྱེར་གྱི་ཡོན་ཏན་དག་དང་བྲལ་བས་ན་མི་མཛེས་སོ། །།ཤཱ་ར་དྭ་ཏིའི་བུ་དེ་ལ་ཇི་ལྟར་རྒྱལ་པོ་མཐུ་ཆེ་ཞིང་དཔུང་དང་ལྡན་པར་གྱུར་པ་དེ་ལྟར་ནི་ཤཱ་ར་དྭ་ཏིའི་བུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་
དེ་བཞིན་གཤེགས་པ་ཆོས་ཀྱི་རྒྱལ་པོ་དཔུང་དང་ལྡན་པ་ཡིན་ནོ། །།ཤཱ་ར་དྭ་ཏིའི་བུ་འོན་ཀྱང་ངའི་སངས་རྒྱས་ཀྱི་ཞིང་འདི་ན་མི་འཁྲུགས་པའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་གང་ཡིན་པ་དེ་ལྟ་བུ་དག་མེད་པས་མི་མཛེས་སོ། །།ཤཱ་ར་
དཱ་ཏིའི་བུ་གལ་ཏེ་ངའི་སངས་རྒྱས་ཀྱི་ཞིང་འདིར་ཡང་སངས་རྒྱས་ཀྱི་ཞིང་གི་ཡོན་ཏན་བཀོད་པ་དེ་ལྟ་བུ་དག་བྱུང་བར་གྱུར་ན་ནི་ཇི་ལྟར་ད་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་
འཁྲུགས་པའི་སངས་རྒྱས་ཀྱི་ཞིང་མཛེས་པ་བཞིན་དུ་ངའི་སངས་རྒྱས་ཀྱི་ཞིང་འདི་ཡང་མཛེས་པར་འགྱུར་རོ། །།ཤཱ་ར་དྭ་ཏིའི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་གི་ཡོན་ཏན་བཀོད་པ་
ཡོངས་སུ་སྦྱོང་བར་འདོད་པ་དང་། ཡོངས་སུ་འཛིན་པར་འདོད་པས་ཇི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། 
སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་སྦྱངས་ཤིང་ཡོངས་སུ་བཟུང་བ་དེ་ལྟར་ཡོངས་སུ་སྦྱང་ཞིང་དེ་ལྟར་ཡོངས་སུ་བཟུང་བར་བྱའོ། །ཤཱ་ར་དྭ་ཏིའི་བུ་གཞན་ཡང་ངས་ད་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་

79-1-62a

མངོན་པར་རྫོགས་པར་སངས་རྒྱས་ནས་སེམས་ཅན་གང་དག་རྒྱུན་དུ་ཞུགས་པའི་འབྲས་བུ་ལ་བཀོད་པ་དང་། ལན་ཅིག་ཕྱིར་འོང་བའི་འབྲས་བུ་ལ་བཀོད་པ་དང་། ཕྱིར་མི་ལྡོག་པའི་འབྲས་བུ་ལ་བཀོད་པ་དང་། དགྲ་
བཅོམ་པ་ཉིད་ལ་བཀོད་པ་དང་། རང་བྱང་ཆུབ་ལ་བཀོད་པ་དང་། ཤཱ་ར་དྭ་ཏིའི་བུ་ངའི་ཉན་ཐོས་གང་ཡིན་པ་དེ་དག་གིས་ཀྱང་སེམས་ཅན་གཞན་གང་དག་བཏུལ་བའི་ཉན་ཐོས་དེ་དག་ཐམས་ཅད་མངོན་པར་བསྡུས་ཀྱང་བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཉན་ཐོས་ཀྱི་དགེ་འདུན་གྱི་གསན་ན་ཉན་ཐོས་ཀྱི་དགེ་འདུན་དེ་དག་ནི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། བྱེ་བ་བརྒྱའི་ཆ་དང་། བྱེ་བ་
སྟོང་གི་ཆ་དང་། བྱེ་བ་བརྒྱ་སྟོང་གི་ཆ་དང་། བྱེ་བ་ཁྲག་ཁྲིག་བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་མི་བཟོད་དོ། །།དེ་ཅིའི་ཕྱིར་ཞེ་ན། ཚད་མེད་པ་དང་། གྲངས་མེད་པའི་ཕྱིར་ཏེ། རྣམ་པར་
གྲོལ་བས་ནི་མ་ཡིན་ནོ། །།ཤཱ་ར་དྭ་ཏིའི་བུ་ངའི་ཉན་ཐོས་རྣམས་ལྟ་ཞོག་གི། ཤཱ་ར་དྭ་ཏིའི་བུ་གང་ཡང་མ་འོངས་པའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་
པའི་ཉན་ཐོས་གང་དག་འབྱུང་བར་འགྱུར་བ་དེ་དག་དང་། གང་ཡང་ཉན་ཐོས་དེ་དག་གིས་སེམས་ཅན་གཞན་དག་འདུལ་བར་འགྱུར་བའི་ཉན་ཐོས་དེ་དག་ཐམས་ཅད་མངོན་པར་བསྡུས་ཀྱང་དེ་དག་གིས་བཅོམ་ལྡན་འདས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཉན་ཐོས་ཀྱི་དགེ་འདུན་གྱི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། བྱེ་བ་བརྒྱའི་ཆ་དང་། བྱེ་བ་སྟོང་གི་
ཆ་དང་། བྱེ་བ་བརྒྱ་སྟོང་གི་ཆ་དང་། བྱེ་བ་ཁྲག་ཁྲིག་བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་མི་བཟོད་དོ། །།དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་

79-1-62b

པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེས་ཆོས་བཤད་པ་ལན་རེ་རེས་སེམས་ཅན་གང་དག་བཏུལ་བར་གྱུར་པ་དེ་དག་གི་ཚད་ཀྱང་སུས་ཀྱང་བཟུང་བར་མི་ནུས་པའི་ཕྱིར་རོ། །ཤཱ་ར་དྭ་ཏིའི་བུ་ངའི་ཉན་ཐོས་རྣམས་ཀྱང་ལྟ་
ཞོག །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པའི་ཉན་ཐོས་རྣམས་ལྟའང་ཞོག་གི། ཤཱ་ར་དྭ་ཏིའི་བུ་གང་ཡང་མ་འོངས་པའི་དུས་ཀྱི་བསྐལ་པ་བཟང་པོའི་སངས་
རྒྱས་བཅོམ་ལྡན་འདས་དེ་དག་ཐམས་ཅད་ཀྱི་ཉན་ཐོས་གང་དག་འབྱུང་བར་འགྱུར་བ་དང་། གང་ཡང་ཉན་ཐོས་དེ་དག་གིས་ཉན་ཐོས་གཞན་དག་འདུལ་བར་འགྱུར་བ་གང་ཡིན་པ་དེ་དག་ཐམས་ཅད་མངོན་པར་བསྡུས་ཀྱང་དེ་དག་གིས་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཉན་ཐོས་རྣམས་ཀྱི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། བྱེ་བ་བརྒྱའི་ཆ་དང་། བྱེ་བ་
སྟོང་གི་ཆ་དང་། བྱེ་བ་བརྒྱ་སྟོང་གི་ཆ་དང་། བྱེ་བ་ཁྲག་ཁྲིག་བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་མི་བཟོད་དོ། །།དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེས་ཆོས་བཤད་པ་ལན་རེ་རེས་སེམས་ཅན་གང་དག་བཏུལ་བར་གྱུར་པ་དེ་དག་གི་ཚད་ཀྱང་གཟུང་བར་མི་ནུས་པའི་ཕྱིར་ཏེ། རྣམ་པར་གྲོལ་བས་ནི་མ་
ཡིན་ནོ། །།དེ་སྐད་ཅེས་བཀའ་སྩལ་པ་དང་བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །།བཙུན་པ་བཅོམ་ལྡན་འདས་ཇི་ལྟར་བཅོམ་ལྡན་འདས་ཀྱིས་གསུངས་པའི་དོན་བདག་གིས་འཚལ་བ་ལྟར་ན་
བཅོམ་ལྡན་འདས་སངས་རྒྱས་ཀྱི་ཞིང་དེ་ནི་སོ་སོའི་སྐྱེ་བོའི་ཞིང་མ་ལགས་ཀྱི་དགྲ་བཅོམ་པའི་ཞིང་ལགས་པར་བལྟ་ལགས་སོ། །།དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས་དེ་ན་ཟག་པ་ཟད་པའི་དགྲ་བཅོམ་པ་དག་མང་

79-1-63a

བའི་སླད་དུའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །།ཤཱ་ར་དྭ་ཏིའི་བུ་དེ་དེ་བཞིན་ནོ། །།ཤཱ་ར་དྭ་ཏིའི་བུ་ཇི་སྐད་སྨྲས་པ་དེ་བཞིན་ཏེ། དེ་ན་ཟག་
པ་ཟད་པའི་དགྲ་བཅོམ་པ་དག་མང་ངོ་། །།ཤཱ་ར་དྭ་ཏིའི་བུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་སྐར་མའི་གཟུགས་རྣམས་ཀྱི་ཚད་ནི་བཟུང་བར་ནུས་ཀྱི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་ན་སེམས་ཅན་གང་དག་དེ་བཞིན་གཤེགས་པ་དེའི་ཆོས་བཤད་པ་ལན་རེ་རེས་དགྲ་བཅོམ་པ་ཐོབ་པར་གྱུར་པ་དེ་དག་གི་ཚད་ནི་བཟུང་བར་མི་ནུས་
ཏེ། ཤཱ་ར་དྭ་ཏིའི་བུ་དེ་ལྟར་ན་འདུས་པ་ཆེན་པོ་ལན་རེ་རེ་ལ་ཡང་སེམས་ཅན་ཚད་མེད་གྲངས་མེད་པ་དག་གིས་དགྲ་བཅོམ་པ་ཐོབ་པར་འགྱུར་བར་རིག་པར་བྱའོ། །ཤཱ་ར་དྭ་ཏིའི་བུ་སྟོང་གསུམ་གྱི་སྟོང་ཆེན་པོའི་འཇིག་རྟེན་
གྱི་ཁམས་འདིའི་སྐར་མའི་གཟུགས་རྣམས་ཀྱི་ཚད་ནི་བཟུང་བར་ནུས་ཀྱི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་ན། འདུས་
པ་ཆེན་པོ་འདུས་པ་དེ་དག་གི་འདུས་པ་ཆེན་པོའི་ཚད་ནི་བཟུང་བར་མི་ནུས་སོ། །།ཤཱ་ར་དྭ་ཏིའི་བུ་གཞན་ཡང་ལྷ་དང་མི་དེ་རྣམས་དགེ་བའི་རྩ་བ་བསྐྱེད་པ་ན་བྲེལ་བ་མེད་པར་འགྱུར་ཞིང་ཤཱ་ར་དྭ་ཏིའི་བུ་རིགས་ཀྱི་བུ་འམ་རིགས་
ཀྱི་བུ་མོ་གང་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེར་སྐྱེས་པ་དེ་དག་ཀྱང་ཉིན་མཚན་དུ་བྲེལ་བ་མེད་པར་འགྱུར་རོ། །།ཤཱ་ར་དྭ་ཏིའི་བུ་གང་དག་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ཉན་པ་དང་། 
ཐོས་ནས་ཀྱང་མོས་པ་དང་། འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དེ་དག་ཐམས་ཅད་ཀྱིས་བཅོམ་ལྡན་འདས་དེ་བཞིན་གཤེགས་པ་

79-1-63b

དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་མཐོང་བ་དང་ཐོས་པར་འགྱུར་བའི་ཕྱིར་རོ། །།དེ་ཅིའི་ཕྱིར་ཞེ་ན། འདི་ལྟར་དེ་དག་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་
འདི་ཉན་པར་འགྱུར་ཞིང་ཐོས་ནས་ཀྱང་ཐོས་མ་ཐག་ཏུ་དད་པ་ཆེན་པོ་འཐོབ་པར་འགྱུར་བའི་ཕྱིར་རོ། །།ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་
ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ནི་ཕྱོགས་བཅུ་ཀུན་གྱི་སངས་རྒྱས་ཀྱི་ཞིང་ཐམས་ཅད་དུ་ཡང་སངས་རྒྱས་བཅོམ་ལྡན་འདས་རྣམས་ཀྱིས་གསུངས་སོ། །།གསུང་ངོ་། །།གསུང་བར་འགྱུར་རོ། །།ཤཱ་ར་དྭ་ཏིའི་བུ་དེ་ལ་
སངས་རྒྱས་ཀྱི་ཞིང་དེ་དག་ན་རིགས་ཀྱི་བུ་འམ་རིགས་ཀྱི་བུ་མོ་གང་དག་འཁོད་པ་དེ་དག་ཀྱང་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་འཛིན་པར་འགྱུར་འཆང་བར་འགྱུར། ཀློག་པར་འགྱུར། ཀུན་ཆུབ་པར་བྱེད་པར་
འགྱུར་ཞིང་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པར་འགྱུར་ཏེ། ཤཱ་ར་དྭ་ཏིའི་བུ་འཇིག་རྟེན་གྱི་ཁམས་དེ་དག་ན་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སངས་རྒྱས་ཀྱི་ཞིང་
དེ་དག་ཉིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་རྣམས་མ་གཏོགས་པ་གང་དག་དེ་ལས་གཞན་པའི་བྱང་ཆུབ་སེམས་དཔའི་ཐེག་པ་པ་འམ། ཉན་ཐོས་ཀྱི་
ཐེག་པ་པའི་རིགས་ཀྱི་བུ་འམ། རིགས་ཀྱི་བུ་མོ་དེ་དག་ནི་ཕལ་ཆེར་སྨོན་ལམ་གྱི་དབང་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་
སངས་རྒྱས་ཀྱི་ཞིང་དུ་སྐྱེས་པ་འམ། སྐྱེ་འམ། སྐྱེ་བར་འགྱུར་བ་ཡིན་ནོ། །།ཤཱ་ར་དྭ་ཏིའི་བུ་དེ་ལྟར་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་

79-1-64a

པ་དེ་ནི་འཇིག་རྟེན་གྱི་ཁམས་མངོན་པར་དགའ་བ་ན་བཞུགས་ཤིང་། ཕྱོགས་བཅུ་ཀུན་གྱི་སངས་རྒྱས་ཀྱི་ཞིང་ཐམས་ཅད་དུ་བྱང་ཆུབ་སེམས་དཔའི་ཐེག་པ་པའི་གང་ཟག་རྣམས་དང་། ཉན་ཐོས་ཀྱི་ཐེག་པ་པའི་གང་ཟག་
རྣམས་ལ་ཕན་འདོགས་པར་གྱུར་པ་ཡིན་ནོ། །།ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་ནི་རིན་པོ་ཆེ་སྣ་བདུན་པོ་དག་བྱུང་བར་གྱུར་པ་ན། རིན་པོ་ཆེ་སྣ་བདུན་པོ་དེ་དག་གིས་གླིང་ཆེན་པོ་བཞི་ཀུན་དུ་གནོན་པར་
བྱེད་དོ། །།ཤཱ་ར་དྭ་ཏིའི་བུ་དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཡང་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདིས་ཕྱོགས་བཅུ་ཀུན་གྱི་
སངས་རྒྱས་ཀྱི་ཞིང་ཐམས་ཅད་དུ་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་དང་། རིགས་ཀྱི་བུ་མོ་དག་ཀུན་དུ་གནོན་ཅིང་རང་གི་སངས་རྒྱས་ཀྱི་ཞིང་ཡང་ཀུན་དུ་གནོན་པར་མཛད་དོ། །།ཤཱ་ར་དྭ་ཏིའི་བུ་རིགས་ཀྱི་བུ་འམ་རིགས་ཀྱི་
བུ་མོ་གང་ལ་ལ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ཉན་ཅིང་ཐོས་ནས་ཀྱང་འཛིན་པ་དང་། 
འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དང་། སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་ཡང་འདེབས་པ་དེ་དག་འཆི་བའི་མཐར་ཐུག་པའི་བར་དུ་བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེས་རྟག་ཏུ་དགོངས་པར་འགྱུར་རོ། །།དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་དེ་དག་ལ་བདུད་སྡིག་ཅན་གྱིས་གླགས་རྙེད་པར་མི་འགྱུར་བ་དང་། 
བདུད་ཀྱིས་བྱིན་གྱིས་བརླབས་པའི་སེམས་ཅན་རྣམས་ཀྱིས་དེ་དག་གི་སྨོན་ལམ་ཟློགས་པར་མི་འགྱུར་བའི་ཕྱིར་ཏེ། ཤཱ་ར་དྭ་ཏིའི་བུ་དེ་བཞིན་གཤེགས་པས་དགོངས་པའི་རིགས་ཀྱི་བུ་འམ་རིགས་ཀྱི་བུ་མོ་དེ་དག་ནི་བླ་ན་མེད་པ་ཡང་དག་

79-1-64b

པར་རྫོགས་པའི་བྱང་ཆུབ་དང་། སངས་རྒྱས་ཀྱི་ཞིང་དེར་སྐྱེ་བ་ལས་ཕྱིར་ལྡོག་པའི་འཇིགས་པ་མེད་པར་ཤེས་པར་བྱའོ། །གཞན་ཡང་རིགས་ཀྱི་བུ་དང་། རིགས་ཀྱི་བུ་མོ་དེ་དག་གི་ལུས་ལ་གང་དག་དེ་ལས་གཞན་པ་སྲོག་གི་བར་ཆད་བྱེད་པ་ལ་
བརྩོན་པ་དང་། གང་དག་སྲོག་གི་བར་ཆད་དུ་འགྱུར་བ་འདི་ལྟ་སྟེ། མེ་དང་། ཆུ་དང་། དུག་དང་། མཚོན་ལ་སོགས་པ་དག་གིས་ཀྱང་ཕོག་པར་མི་འགྱུར་རོ། །།དེ་དག་གིས་ལུས་ལ་གང་དག་དེ་ལས་གཞན་པ་ལག་པའི་རེག་པ་དང་། བོང་བ་དང་། དབྱིག་
པ་ལ་སོགས་པ་དག་གིས་ཀྱང་ཕོག་པར་མི་འགྱུར་རོ། །།དེ་དག་ལ་མི་དང་མི་མ་ཡིན་པའི་འཇིགས་པ་ཡང་མེད་པར་ཤེས་པར་བྱ་སྟེ། དེ་ལྟར་ན་དེ་དག་ནི་ཀུན་ནས་བསྲུངས་པ་དང་། བསྐྱབས་པ་དང་། སྦས་པ་ཡིན་པར་ཤེས་པར་བྱའོ། །གང་གི་ཚེ་
དེ་དག་འཆི་བའི་དུས་བྱེད་པར་འགྱུར་བ་དེའི་ཚེ་ན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མངོན་པར་དགའ་བ་ཞེས་བྱ་བ་དེར་
སྐྱེ་བར་འགྱུར་རོ། །།ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་ཉི་མའི་དཀྱིལ་འཁོར་ནི་ཐག་རིང་པོ་ན་འདུག་ཀྱང་འཛམ་བུའི་གླིང་གི་མི་རྣམས་ལ་སྣང་བར་བྱེད་དོ། །།ཤཱ་ར་དྭ་ཏིའི་བུ་དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་མི་འཁྲུགས་པ་དེ་ཡང་ཐག་རིང་པོ་ན་བཞུགས་ཀྱང་འཇིག་རྟེན་གྱི་ཁམས་གཞན་དག་ན་གནས་པའི་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་དང་རིགས་ཀྱི་བུ་མོ་དག་ལ་ཡེ་ཤེས་ཀྱི་སྣང་བ་མཛད་
དོ། །།ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་དགེ་སློང་ལྷའི་མིག་དང་ལྡན་པ་ནི་ཐག་རིང་པོ་ན་གནས་ཀྱང་གཟུགས་ཀྱི་ཁ་དོག་བཟང་པོ་དང་། ཁ་དོག་ངན་པ་དག་མཐོང་ངོ་། །།ཤཱ་ར་དྭ་ཏིའི་བུ་དེ་བཞིན་དུ་བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཡང་ཐག་རིང་པོ་ན་བཞུགས་ཀྱང་འཇིག་རྟེན་གྱི་ཁམས་གཞན་དག་ན་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཁ་དོག་

79-1-65a

དང་། དབྱིབས་དང་། གཟུགས་དག་གཟིགས་སོ། །།ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་དགེ་སློང་རྫུ་འཕྲུལ་དང་ལྡན་པ་སེམས་ཀྱི་དབང་དམ་པའི་ཕ་རོལ་ཏུ་སོན་པ་ནི་ཐག་རིང་པོ་ན་གནས་ཀྱང་མི་མ་ཡིན་པ་རྣམས་
ཀྱི་སེམས་ཡང་དག་པར་ཤེས་སོ། །།ཤཱ་ར་དྭ་ཏིའི་བུ་དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཡང་ཐག་རིང་པོ་ན་བཞུགས་ཀྱང་འཇིག་རྟེན་གྱི་ཁམས་གཞན་
དག་ན་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སེམས་ཡང་དག་པར་མཁྱེན་ཏོ། །།ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་དགེ་སློང་རྫུ་འཕྲུལ་དང་ལྡན་པ་ནི་ཐག་རིང་པོ་ན་གནས་ཀྱང་རྣ་བས་སྒྲ་དག་ཐོས་སོ། །།ཤཱ་ར་དྭ་ཏིའི་
བུ་དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཡང་ཐག་རིང་པོ་ན་བཞུགས་ཀྱང་འཇིག་རྟེན་གྱི་ཁམས་གཞན་དག་ན་གནས་པའི་བྱང་ཆུབ་སེམས་དཔའ་སེམས་
དཔའ་ཆེན་པོ་རྣམས་བདག་ཅག་ཀྱང་སངས་རྒྱས་ཀྱི་ཞིང་འཇིག་རྟེན་གྱི་ཁམས་མངོན་པར་དགའ་བ་དེར་སྐྱེ་བར་བྱའོ་ཞེས་སྨྲ་བ་དག་གསན་ཅིང་ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་མི་འཁྲུགས་པ་དེས་རིགས་ཀྱི་བུ་དང་། རིགས་ཀྱི་བུ་མོ་དེ་དག་གི་མིང་དང་། རུས་ཅི་ཡིན་པ་ཡང་མཁྱེན་ཏོ། །།ཤཱ་ར་དྭ་ཏིའི་བུ་གང་དག་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་འཛིན་པ་དང་། འཆང་བ་དང་། 
ཀློག་པ་དང་། ཀུན་ཆུབ་པར་བྱེད་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དེ་དག་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་མི་འཁྲུགས་པ་དེས་
གཟིགས་སོ། །།དེ་དག་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེས་མཁྱེན་ནོ། །།དེ་དག་ནི་ནམ་འཆི་བའི་དུས་ཀྱི་ཚེའི་བར་དུ་ཡང་བཅོམ་ལྡན་

79-1-65b

འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེས་དགོངས་པར་འགྱུར་རོ། །།དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་
སྐད་ཅེས་གསོལ་ཏོ། །།བཙུན་པ་བཅོམ་ལྡན་འདས་ཇི་ཙམ་དུ་སངས་རྒྱས་བཅོམ་ལྡན་འདས་རྣམས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཤིན་ཏུ་ཡོངས་སུ་བཟུང་བ་ནི་བཅོམ་ལྡན་འདས་ངོ་མཚར་
ལགས་སོ། །།བདེ་བར་གཤེགས་པ་ཤིན་དུ་ངོ་མཚར་ལགས་སོ། །།དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །།ཤཱ་ར་དྭ་ཏིའི་བུ་དེ་དེ་བཞིན་
ཏེ། དེ་དེ་བཞིན་ནོ། །།ཇི་སྐད་སྨྲས་པ་དེ་བཞིན་ཏེ། སངས་རྒྱས་བཅོམ་ལྡན་འདས་རྣམས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཤིན་དུ་ཡོངས་བཟུང་ངོ་། །།དེ་ཅིའི་ཕྱིར་ཞེ་ན། 
ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཤིན་ཏུ་ཡོངས་སུ་གཟུང་བས་སེམས་ཅན་ཐམས་ཅད་ཀྱང་ཤིན་དུ་ཡོངས་སུ་བཟུང་བར་འགྱུར་རོ། །།ཤཱ་ར་དྭ་ཏིའི་བུ་འདི་ལྟ་སྟེ། དཔེར་
ན་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཞིག་ལ་འདི་ལྟ་སྟེ། འབྲས་སཱ་ལུ་འམ། འབྲུ་འམ། ནས་སམ། གྲོ་འམ། ཏིལ་ལམ། མོན་སྲན་སྡེའུ་འམ། མོན་སྲན་གྲེའུ་འམ། 
སྲན་ཆུང་ངམ། འབྲུའི་རྣམ་པ་གཞན་གང་ཡང་རུང་བས་གང་བའི་བདབ་གཅིག་གམ། གཉིས་སམ། གསུམ་འམ། བཞི་འམ། ལྔ་འམ། བཅུ་འམ། ཉི་ཤུ་འམ། སུམ་བཅུ་འམ། བཞི་བཅུ་འམ། 
ལྔ་བཅུ་འམ། བརྒྱ་འམ། སྟོང་ངམ། འབུམ་འམ། ཤིན་དུ་མང་པོ་དག་ཅིག་བདོག་པར་གྱུར་ན་དེ་འདི་སྙམ་དུ་འདི་དག་ནི་མུ་གེ་བྱུང་བ་འམ་ཕོངས་པར་གྱུར་པ་ན། འདི་དག་གིས་ལོ་ལེགས་པར་འགྱུར་རོ་སྙམ་ནས་

79-1-66a

ཤིན་དུ་ཡོངས་སུ་འཛིན་པར་འགྱུར་རོ། །།དེ་ཅིའི་ཕྱིར་ཞེ་ན། མུ་གེ་བྱུང་བར་གྱུར་པ་ན་སེམས་ཅན་རྣམས་ཀྱི་གསོས་སུ་འགྱུར་བའི་ཕྱིར་རོ། །།ཤཱ་ར་དྭ་ཏིའི་བུ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་རྣམས་འདས་པ་ན་བྱང་ཆུབ་སེམས་དཔའ་སེམས་དཔའ་ཆེན་པོ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། བླ་ན་མེད་པ་ཡང་
དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཀྱང་དམ་པའི་ཆོས་ཀྱིས་མུ་གེར་གྱུར་བའི་སེམས་ཅན་ཐམས་ཅད་ལ་དམ་པའི་ཆོས་བཤད་པས་དམ་པའི་ཆོས་ཀྱི་ལོ་ལེགས་པ་དང་། དགེ་འདུན་གྱི་ལོ་
ལེགས་པར་འགྱུར་ཏེ། ཤཱ་ར་དྭ་ཏིའི་བུ་རྣམ་གྲངས་དེས་ན་སངས་རྒྱས་བཅོམ་ལྡན་འདས་རྣམས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཤིན་དུ་ཡོངས་སུ་བཟུང་བ་ཡིན་ནོ། །།ཤཱ་ར་དྭ་ཏིའི་བུ་བྱང་ཆུབ་
སེམས་དཔའ་སེམས་དཔའ་ཆེན་པོ་གང་ལ་ལ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་
གྲངས་འདི་ཉན་ཅིང་ཐོས་ནས་ཀྱང་འཛིན་པར་བྱེད། འཆང་བར་བྱེད། ཀློག་པར་བྱེད། ཀུན་ཆུབ་པར་བྱེད་ཅིང་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པར་བྱེད་ལ། སྲོག་ཆགས་བརྒྱ་ཕྲག་མང་པོ་དང་། 
སྲོག་ཆགས་སྟོང་ཕྲག་མང་པོ་དང་། སྲོག་ཆགས་བརྒྱ་སྟོང་ཕྲག་མང་པོ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དག་ཀྱང་ཆོས་ཀྱི་རྣམ་གྲངས་འདི་ལ་ཡང་དག་པར་འཛིན་དུ་འཇུག་ཅིང་འཛུད་
དེ། རབ་ཏུ་འགོད་ལ་སངས་རྒྱས་ཀྱི་ཞིང་དེར་སྐྱེ་བར་བྱ་བའི་ཕྱིར་སྨོན་ལམ་ཡང་འདེབས་པར་བྱེད་པ་དེ་དག་ཐམས་ཅད་ནི་སངས་རྒྱས་ཀྱི་ཞིང་དེར་སྐྱེ་བར་འགྱུར་རོ། །།ཤཱ་ར་དྭ་ཏིའི་བུ་གཞན་ཡང་བྱང་ཆུབ་སེམས་

79-1-66b

དཔའ་སེམས་དཔའ་ཆེན་པོ་གང་ལ་ལ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་འདི་ཉན་ཅིང་ཐོས་
ནས་ཀྱང་འཛིན་པར་བྱེད། འཆང་བར་བྱེད། ཀློག་པར་བྱེད། ཀུན་ཆུབ་པར་བྱེད་ཅིང་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པར་བྱེད་ལ། སྲོག་ཆགས་བརྒྱ་ཕྲག་མང་པོ་དང་། སྲོག་ཆགས་སྟོང་ཕྲག་མང་
པོ་དང་། སྲོག་ཆགས་བརྒྱ་སྟོང་ཕྲག་མང་པོ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དག་ཀྱང་ཆོས་ཀྱི་རྣམ་གྲངས་འདི་ལ་ཡང་དག་པར་འཛིན་དུ་འཇུག་ཅིང་འཛུད་དེ་རབ་ཏུ་འགོད་ན་སངས་རྒྱས་ཀྱི་
ཞིང་དེར་སྐྱེ་བར་བྱ་བའི་ཕྱིར་སྨོན་ལམ་མ་བཏབ་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་ཕྱིར་མི་ལྡོག་པར་རིག་པར་བྱ་ཞིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་རིག་པར་བྱ་སྟེ། 
དེ་དག་ནི་རང་རང་གི་སངས་རྒྱས་ཀྱི་ཞིང་དག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །།ཤཱ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་
ལ་ལ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ཉན་ཅིང་ཐོས་ནས་ཀྱང་འཛིན་པར་བྱེད། 
འཆང་བར་བྱེད། ཀློག་པར་བྱེད། ཀུན་ཆུབ་པར་བྱེད་ཅིང་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ལ་བཟུང་ཞིང་བཅངས་ལ་ཀློགས་ཤིང་ཀུན་ཆུབ་པར་བྱས་ཏེ། གཞན་དག་ལ་རྒྱ་ཆེར་ཡང་དག་པར་རབ་
ཏུ་བསྟན་ནས་སྲོག་ཆགས་བརྒྱ་ཕྲགས་མང་པོ་དང་། སྲོག་ཆགས་སྟོང་ཕྲག་མང་པོ་དང་། སྲོག་ཆགས་བརྒྱ་སྟོང་ཕྲག་མང་པོ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དག་ཀྱང་ཆོས་ཀྱི་རྣམ་

79-1-67a

གྲངས་འདི་ཡང་དག་པར་འཛིན་དུ་འཇུག་ཅིང་འཛུད་དེ། རབ་ཏུ་འགོད་ལ་སྲོག་ཆགས་བརྒྱ་སྟོང་ཕྲག་མང་པོ་དག་གི་དགེ་བའི་རྩ་བ་བསྐྱེད་ན་དེ་དག་ཇི་ལྟ་ཇི་ལྟར་སེམས་ཅན་རྣམས་ཀྱི་དགེ་བའི་རྩ་བ་བསྐྱེད་པ་
དེ་ལྟ་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཉེ་བར་འགྱུར་རོ། །།ཤཱ་ར་དྭ་ཏིའི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་འཚང་རྒྱ་བར་འདོད་པས་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་གཟུང་བར་བྱ། བཅང་བར་བྱ། ཀློག་པར་བྱ། ཀུན་ཆུབ་པར་བྱ་སྟེ། བཟུང་ཞིང་བཅངས་ལ་ཀློགས་ཤིང་ཀུན་ཆུབ་
པར་བྱས་ནས་སྲོག་ཆགས་བརྒྱ་ཕྲག་མང་པོ་དང་། སྲོག་ཆགས་སྟོང་ཕྲག་མང་པོ་དང་། སྲོག་ཆགས་བརྒྱ་སྟོང་ཕྲག་མང་པོ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དག་ལ་ཡང་བཤད་པར་བྱ། 
ཡང་དག་པར་རབ་ཏུ་བསྟན་པར་བྱའོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟ་ཇི་ལྟར་ཆོས་ཀྱི་རྣམ་གྲངས་འདི་སྟོན་པ་དེ་ལྟ་དེ་ལྟར་ཤེས་རབ་ཆེན་པོར་འགྱུར་བའི་
ལས་ཉེ་བར་སོགས་པར་འགྱུར་ཏེ། དེ་དག་ཤེས་རབ་ཆེན་པོར་འགྱུར་བའི་ལས་བྱས་ཤིང་བསགས་པ་དེས་ལུས་དེ་ཉིད་ཀྱིས་ཟག་པ་ཟད་པ་རྗེས་སུ་འཐོབ་པར་འགྱུར་རོ། །།ཤཱ་ར་དྭ་ཏིའི་བུ་ཉན་ཐོས་ཀྱི་ཐེག་པ་བའི་
རིགས་ཀྱི་བུའམ། རིགས་ཀྱི་བུ་མོ་གང་ལ་ལ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་
རྣམ་གྲངས་འདི་ཉན་ཅིང་ཐོས་ནས་ཀྱང་འཛིན་པར་བྱེད། འཆང་བར་བྱེད། ཀློག་པར་བྱེད། ཀུན་ཆུབ་པར་བྱེད་ཅིང་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟོན་པར་བྱེད་ལ། སྲོག་ཆགས་བརྒྱ་

79-1-67b

ཕྲག་མང་པོ་དང་། སྲོག་ཆགས་སྟོང་ཕྲག་མང་པོ་དང་། སྲོག་ཆགས་བརྒྱ་སྟོང་ཕྲག་མང་པོ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དག་ཀྱང་ཆོས་ཀྱི་རྣམ་གྲངས་འདི་ལ་ཡང་དག་པར་འཛིན་དུ་འཇུག་
ཅིང་འཛུད་ཏེ། རབ་ཏུ་འགོད་པ་དེ་དག་ཐམས་ཅད་ཀྱང་ལུས་དེ་ཉིད་ཀྱིས་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །།ཤཱ་ར་དྭ་ཏིའི་བུ་གལ་ཏེ་དེ་དག་ལུས་དེ་ཉིད་ཀྱིས་དགྲ་བཅོམ་པ་ཉིད་མངོན་སུམ་དུ་བྱེད་པར་
མི་འགྱུར་ན་ཡང་དེ་དག་ཡང་དག་པར་རྫོགས་པའི་སངས་རྒྱས་གཉིས་པ་ལས་འདའ་བར་ནི་མི་འགྱུར་རོ། །།ཤཱ་ར་དྭ་ཏིའི་བུ་དེ་ལྟ་བས་ན་ཉན་ཐོས་ཀྱི་ཐེག་པ་པའི་རིགས་ཀྱི་བུ་འམ། རིགས་ཀྱི་བུ་མོ་ལུས་
དེ་ཉིད་ཀྱིས་དགྲ་བཅོམ་པ་ཉིད་མངོན་སུམ་དུ་བྱེད་པར་འདོད་པ་དག་གིས་བཅོམ་ལྡན་འདས་དེ་བཞིན་གཤེགས་པར་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་
པའི་ཆོས་ཀྱི་རྣམ་གྲངས་འདི་མཉན་པར་བྱ་ཞིང་ཐོས་ནས་ཀྱང་བཟུང་བར་བྱ། བཅང་བར་བྱ། ཀླག་པར་བྱ། ཀུན་ཆུབ་པར་བྱ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱ་ཞིང་། སྲོག་
ཆགས་བརྒྱ་ཕྲག་མང་པོ་དང་། སྲོག་ཆགས་སྟོང་ཕྲག་མང་པོ་དང་། སྲོག་ཆགས་བརྒྱ་སྟོང་ཕྲག་མང་པོ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དག་ཀྱང་ཆོས་ཀྱི་རྣམ་གྲངས་འདི་ལ་ཡང་
དག་པར་འཛིན་དུ་གཞུག་པར་བྱ། གཟུང་བར་བྱ། རབ་ཏུ་དགོད་པར་བྱའོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་འདི་ལྟར་དམ་པའི་ཆོས་ཡོངས་སུ་བཟུང་བའི་རིགས་ཀྱི་བུ་འམ་རིགས་ཀྱི་བུ་མོ་རྣམས་ནི་
ལུས་དེ་ཉིད་ཀྱིས་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་བའི་ཕྱིར་རོ། །ཤཱ་ར་དྭ་ཏིའི་བུ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་དག་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་གཞན་

79-1-68a

དག་ལ་དུས་སུ་ཡང་དག་པར་རབ་ཏུ་སྟོན་པ་དེ་དག་ནི་ལུས་དེ་ཉིད་ཀྱིས་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་ཏེ། སངས་རྒྱས་འབྱུང་བ་གཉིས་པ་ལས་འདའ་བར་ནི་མི་འགྱུར་རོ། །ཤཱ་ར་དྭ་
ཏིའི་བུ་ཉན་ཐོས་ཀྱི་ཐེག་པ་པའི་རིགས་ཀྱི་བུ་འམ་རིགས་ཀྱི་བུ་མོ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་
ཆོས་ཀྱི་རྣམ་གྲངས་འདི་ཇི་ལྟ་ཇི་ལྟར་འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དེ་ལྟ་དེ་ལྟར་ཤེས་རབ་ཆེན་པོར་འགྱུར་བའི་ལས་བྱེད་པར་
འགྱུར་ཞིང་སོགས་པར་འགྱུར་རོ། །།དེ་དག་ཤེས་རབ་ཆེན་པོར་འགྱུར་བའི་ལས་བྱས་ཤིང་བསགས་པ་དེས་ལུས་དེ་ཉིད་ཀྱིས་དགྲ་བཅོམ་པ་ཉིད་མངོན་སུམ་དུ་བྱེད་པར་ཡང་འགྱུར་རོ། །ཤཱ་ར་དྭ་ཏིའི་བུ་གལ་ཏེ་དེ་དག་ལུས་དེ་ཉིད་
ཀྱིས་དགྲ་བཅོམ་པ་ཉིད་མངོན་སུམ་དུ་བྱེད་པར་ཡང་མི་འགྱུར་ན། ཡང་དག་པར་རྫོགས་པའི་སངས་རྒྱས་གཉིས་པ་ལས་འདའ་བར་ནི་མི་འགྱུར་རོ། །ཤཱ་ར་དྭ་ཏིའི་བུ་ཉན་ཐོས་ཀྱི་ཐེག་པ་པའི་རིགས་ཀྱི་བུ་དང་། རིགས་ཀྱི་བུ་མོ་
རྣམས་ཀྱིས་ཀྱང་དོན་གྱི་དབང་འདི་མཐོང་ན་ཆོས་ཀྱི་རྣམ་གྲངས་འདི་ལ་གུས་པར་བྱ་ཞིང་རྣལ་འབྱོར་དུ་བྱའོ། །ཤཱ་ར་དྭ་ཏིའི་བུ་དེ་ལྟ་བས་ན་ཉན་ཐོས་ཀྱི་ཐེག་པ་པའི་རིགས་ཀྱི་བུ་འམ་རིགས་ཀྱི་བུ་མོ་དམ་པའི་ཆོས་ཡོངས་སུ་
འཛིན་པར་འདོད་པ་རྣམས་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་གཟུང་བར་བྱ། བཅང་
བར་བྱ། ཀླག་པར་བྱ། ཀུན་ཆུབ་པར་བྱ་ཞིང་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །ཤཱ་ར་དྭ་ཏིའི་བུ་ཡང་ཉན་ཐོས་ཀྱི་ཐེག་པ་པའི་རིགས་ཀྱི་བུ་འམ་རིགས་ཀྱི་བུ་མོ་གང་དག་བཅོམ་ལྡན་འདས་དེ་

79-1-68b

བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ཉན་ཅིང་ཐོས་ནས་ཀྱང་འཛིན་པར་བྱེད། འཆང་བར་བྱེད། ཀློག་པར་བྱེད། 
ཀུན་ཆུབ་པར་བྱེད་ཅིང་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པར་བྱེད་ལ། སྲོག་ཆགས་བརྒྱ་ཕྲག་མང་པོ་དང་། སྲོག་ཆགས་སྟོང་ཕྲག་མང་པོ་དང་། སྲོག་ཆགས་བརྒྱ་སྟོང་ཕྲག་མང་པོ་དང་། 
སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དག་ཀྱང་ཆོས་ཀྱི་རྣམ་གྲངས་འདི་ལ་ཡང་དག་པར་འཛིན་དུ་འཇུག་ཅིང་འཛུད་དེ། རབ་ཏུ་འགོད་ལ་དེ་བཞིན་ཉིད་དུ་རྣལ་འབྱོར་དུ་སྒྲུབ་ཅིང་རྩོལ་ལ་འབད་དེ་སློབ་ཅིང་
མོས་ན། ཤཱ་ར་དྭ་ཏིའི་བུ་ཉན་ཐོས་ཀྱི་ཐེག་པ་པའི་རིགས་ཀྱི་བུའམ་རིགས་ཀྱི་བུ་མོ་དེ་དག་ནི་སྲིད་པ་ཐ་མ་ལ་གནས་པ་འམ། སྐྱེ་བ་གཅིག་གིས་ཐོགས་པ་འམ། སྐྱེ་བ་གཉིས་ཀྱིས་ཐོགས་པ་སྟེ། ཡང་དག་པར་
རྫོགས་པའི་སངས་རྒྱས་གཉིས་པ་ལས་འདའ་བར་མི་འགྱུར་བར་རིག་པར་བྱའོ། །ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་
ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ནི་སེམས་ཅན་བསོད་ནམས་ཆུང་ངུ་རྣམས་ཀྱིས་ཐོས་པར་མི་ནུས་ཏེ། ཤཱ་ར་དྭ་ཏིའི་བུ་སངས་རྒྱས་ཀྱི་མཐུས་རིགས་ཀྱི་བུ་འམ་རིགས་ཀྱི་བུ་མོ་གང་སུ་ཡང་རུང་བ་ཞིག་གི་རྣ་
ལམ་དུ་གྲགས་པར་གྱུར་ན་རིགས་ཀྱི་བུ་འམ་རིགས་ཀྱི་བུ་མོ་དེས་ཀྱང་མྱུར་བ་མྱུར་བར་གཟུང་བར་བྱ། ལ་ལ་ཞིག་གིས་སེམས་ཅན་འགའ་ཞིག་གི་དོན་གྱི་ཕྱིར་ཀྱེ་མ་སེམས་ཅན་འདིས་བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ཐོས་པར་གྱུར་ཅིག་ཅེས་འཛམ་བུའི་གླིང་འདི་དབྱིག་དང་གསེར་གྱིས་ཡོངས་སུ་བཀང་སྟེ། 

79-1-69a

སྦྱིན་པ་བྱིན་ཞིང་ཡོངས་སུ་བཏང་བར་གྱུར་ཀྱང་ཤཱ་ར་དྭ་ཏིའི་བུ་སེམས་ཅན་བསོད་ནམས་ཆུང་ངུ་རྣམས་ཀྱིས་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་
ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ཐོས་པར་མི་ནུས་སོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་ཆོས་ཀྱི་རྣམ་གྲངས་འདི་ནི་ཆོས་ཐམས་ཅད་རབ་ཏུ་རྣམ་པར་འབྱེད་པར་བྱེད་ཅིང་རིགས་ཀྱི་བུ་དང་རིགས་ཀྱི་བུ་མོ་དད་
པ་རྣམས་སངས་རྒྱས་ཀྱི་ཞིང་ཡོངས་སུ་དག་པར་འགྲོ་བར་བྱེད་པའི་ཕྱིར་རོ། །ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་
བརྗོད་པའི་ཆོས་ཀྱི་རྣམ་གྲངས་འདི་ནི་འཆལ་བའི་ཤེས་རབ་ཅན་རྣམས་ཀྱི་ལག་ན་གནས་པར་མི་འགྱུར་ཏེ། ཤཱ་ར་དྭ་ཏིའི་བུ་གཞན་དུ་ན་ཆོས་ཀྱི་རྣམ་གྲངས་འདི་ནི་མཁས་པ་ཤེས་རབ་ཟབ་མོ་དང་ལྡན་པ་རྣམས་ཀྱི་ལག་ཏུ་གནས་པར་
འགྱུར་རོ། །ཤཱ་ར་དྭ་ཏིའི་བུ་རིགས་ཀྱི་བུ་འམ་རིགས་ཀྱི་བུ་མོ་གང་དག་གི་ལག་ཏུ་ཆོས་ཀྱི་རྣམ་གྲངས་འདི་གནས་པ་དང་། ལུས་ལ་གནས་པ་དེ་དག་ནི་དེ་བཞིན་གཤེགས་པ་མཐོང་བ་ཡིན་ནོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་རིན་
པོ་ཆེ་རིན་ཐང་མེད་པ་རིན་ཆེ་བ་གང་ཡང་རུང་བ་ཞིག་རྒྱ་མཚོ་ཆེན་པོའི་ནང་ནས་ཁྱེར་ཏེ་འོངས་པར་གྱུར་ན་ཤཱ་ར་དྭ་ཏིའི་བུ་འདི་ཇི་སྙམ་དུ་སེམས། ནོར་བུ་རིན་པོ་ཆེ་དེ་དང་པོ་ཁོ་ནར་སུའི་ལག་ཏུ་འོང་བར་འགྱུར། གསོལ་པ། བཙུན་པ་བཅོམ་ལྡན་
འདས་རིན་པོ་ཆེ་དེ་ནི་དང་པོ་ཁོ་ནར་རྒྱལ་པོ་འམ་རྒྱལ་པོའི་བུ་རྣམས་སམ། རྒྱལ་པོའི་བློན་པོ་ཆེན་པོ་རྣམས་ཀྱི་སུག་པར་མཆི་བར་འགྱུར་ལགས་སོ། །བཀའ་སྩལ་པ། ཤཱ་ར་དྭ་ཏིའི་བུ་དེ་བཞིན་དུ་བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་རྣམ་གྲངས་འདི་ཡང་བྱང་ཆུབ་སེམས་དཔའི་ལག་ཏུ་གནས་པར་འགྱུར་ཏེ། ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་

79-1-69b

དཔའ་ཆེན་པོ་གང་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ཉན་ཅིང་ཐོས་ནས་ཀྱང་འཛིན་
པར་བྱེད། འཆང་བར་བྱེད། ཀློག་པར་བྱེད། ཀུན་ཆུབ་པར་བྱེད་ཅིང་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པ་ཉིད་ཀྱི་རྣལ་འབྱོར་དུ་སྒྲུབ་པར་
བྱེད་པ་དེ་དག་ནི་ཕྱིར་མི་ལྡོག་པ་ཉིད་དུ་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་དེ་ལྟ་ལགས་པས་ན་རིགས་ཀྱི་
བུ་འམ་རིགས་ཀྱི་བུ་མོ་ཕྱིར་མི་ལྡོག་པའི་ས་ལ་གནས་པར་འཚལ་བ་རྣམས་ཀྱི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་
ཆོས་ཀྱི་རྣམ་གྲངས་འདི་གཟུང་བར་བགྱི། བཅང་བར་བགྱི། བཀླག་པར་བགྱི། ཀུན་ཆུབ་པར་བགྱི་ཞིང་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བགྱི་ལགས་སོ། །དེ་ཅིའི་སླད་དུ་ཞེ་ན། 
བཙུན་པ་བཅོམ་ལྡན་འདས་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྣམ་གྲངས་འདི་ལ་ཞུགས་པ་ན་ཕྱིར་མི་ལྡོག་པའི་ཆོས་ཉིད་རྗེས་སུ་འཐོབ་པར་འགྱུར་བའི་སླད་དུའོ། །དེ་སྐད་ཅེས་གསོལ་
པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་དེ་དེ་བཞིན་ཏེ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། རིགས་གྱི་བུ་འམ་རིགས་ཀྱི་བུ་མོ་
ཕྱིར་མི་ལྡོག་པའི་ས་ལ་གནས་པར་འདོད་པ་རྣམས་ཀྱིས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་

79-1-70a

བརྗོད་པའི་ཆོས་ཀྱི་རྣམ་གྲངས་འདི་གཟུང་བར་བྱ། བཅང་བར་བྱ། བཀླག་པར་བྱ། ཀུན་ཆུབ་པར་བྱ་ཞིང་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །ཤཱ་ར་
དཱ་ཏིའི་བུ་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོའི་རིན་པོ་ཆེ་སྣ་བདུན་པོ་དག་ནི་ལས་ཀྱི་རྣམ་པར་སྨིན་པ་ལས་བྱུང་བ་ཡིན་ནོ། །ཤཱ་ར་དྭ་ཏིའི་བུ་དེ་བཞིན་དུ་ངས་འཁོར་བཞི་པོ་རྣམས་ལ་ཡོན་ཏན་
ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་བཤད་ཅིང་རྒྱ་ཆེར་ཡང་དག་པར་རབ་ཏུ་བསྟན་པ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་
པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེའི་སྔོན་གྱི་སྨོན་ལམ་གྱིས་བཤད་ཅིང་། རྒྱ་ཆེར་ཡང་དག་པར་རབ་ཏུ་བསྟན་ཏེ། བྱང་ཆུབ་སེམས་དཔའ་སེམས་
དཔའ་ཆེན་པོ་གང་དག་གིས་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ཐོས་པ་དང་། ཉན་པར་འགྱུར་བ་དེ་དག་ཐམས་ཅད་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་དང་། རང་རང་གི་དགེ་བའི་རྩ་བའི་རྣམ་པར་སྨིན་པས་ཐོས་ཤིང་ཉན་པར་འགྱུར་བ་ཡིན་ནོ། །ཤཱ་ར་དྭ་ཏིའི་བུ་གང་
དག་བསྐལ་པ་བཟང་པོ་འདི་ལ་སངས་རྒྱས་དགུ་བརྒྱ་དགུ་བཅུ་རྩ་དྲུག་གང་ན་འབྱུང་བར་འགྱུར་བའི་སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱང་དཔེར་ན་ངས་ད་ལྟར་འཁོར་བཞི་པོ་དག་ལ་བཤད་ཅིང་རྒྱ་ཆེར་ཡང་
དག་པར་རབ་ཏུ་བསྟན་པ་བཞིན་དུ་ལྷག་ཆད་མེད་པར་འཁོར་བཞི་པོ་དག་ལ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་

79-1-70b

ཆོས་ཀྱི་རྣམ་གྲངས་འདི་འཆད་ཅིང་རྒྱ་ཆེར་ཡང་དག་པར་རབ་ཏུ་སྟོན་པར་འགྱུར་རོ། །།ཤཱ་ར་དྭ་ཏིའི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་འཚང་རྒྱ་བར་འདོད་པས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་
གཟུང་བར་བྱ། བཅང་བར་བྱ། བཀླག་པར་བྱ། ཀུན་ཆུབ་པར་བྱ་ཞིང་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །ཤཱ་ར་དྭ་ཏིའི་བུ་གལ་ཏེ་བྱང་ཆུབ་སེམས་དཔའི་ཐེག་པ་པའི་གང་ཟག་ཁྱིམ་
གྱི་གནས་ནས་མངོན་པར་བྱུང་བ་ལ་ལ་ཞིག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་
མཉན་པ་དང་། གཟུང་བ་དང་། བཅང་བ་དང་། བཀླག་པ་དང་། ཀུན་ཆུབ་པར་བྱ་བ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱ་བར་མི་རྙེད་པར་གྱུར་ལ། ཤཱ་ར་དྭ་ཏིའི་བུ་བྱང་ཆུབ་སེམས་དཔའི་
ཐེག་པ་པའི་གང་ཟག་ཁྱིམ་གྱི་གནས་ནས་མངོན་པར་བྱུང་བ་དེ་ལ་གལ་ཏེ་ལ་ལ་ཞིག་གིས་འདི་སྐད་དུ་གལ་ཏེ་རིགས་ཀྱི་བུ་ཁྱོད་ཁྱིམ་གྱི་གནས་ན་གནས་ཤིང་བཙུན་མོའི་འཁོར་གྱི་ནང་དུ་ཞུགས་ཏེ་སྤྱོད་པར་བྱེད་ན་དེ་ལྟ་ན་ངས་ཁྱོད་ལ་
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་སྦྱིན་པར་བྱའོ་ཞེས་ཟེར་ན་ཤཱ་ར་དྭ་ཏིའི་བུ་བྱང་ཆུབ་སེམས་
དཔའི་ཐེག་པ་པའི་གང་ཟག་ཁྱིམ་གྱི་གནས་ནས་མངོན་པར་བྱུང་བ་དེ་ཆོས་ཀྱི་རྣམ་གྲངས་འདི་ལ་གུས་པར་བྱ་བའི་ཕྱིར་གལ་ཏེ་ཆོས་ཀྱི་རྣམ་གྲངས་འདི་མཉན་པ་འམ། གཟུང་བ་འམ། བཅང་བ་འམ། བཀླག་པ་

79-1-71a

འམ། ཀུན་ཆུབ་པར་བྱ་བ་འམ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱར་རྙེད་ན་ཁྱིམ་གྱི་གནས་སུ་སོང་སྟེ། བཙུན་མོའི་འཁོར་གྱི་ནང་དུ་ཞུགས་ནས་ཆོས་ཀྱི་རྣམ་གྲངས་
འདི་བཟུང་ཞིང་། ཀུན་ཆུབ་པར་བྱས་ཏེ། ཡང་ཕྱིར་མངོན་པར་བྱུང་ཡང་བྱང་ཆུབ་སེམས་དཔའི་ཐེག་པ་པའི་གང་ཟག་ཁྱིམ་གྱི་གནས་ནས་མངོན་པར་བྱུང་བ་བཙུན་མོའི་འཁོར་གྱི་ནང་དུ་སོང་བ་དེ་ལ་ལྟུང་བ་མེད་པར་ངས་རྗེས་
སུ་གནང་ངོ་། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་བྱང་ཆུབ་སེམས་དཔའི་ཐེག་པ་པའི་གང་ཟག་དེ་འདས་ན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་
པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ནུབ་པར་མི་འགྱུར་བའི་ཕྱིར་རོ། །ཤཱ་ར་དྭ་ཏིའི་བུ་གལ་ཏེ་གྲོང་ངམ། གྲོང་ཁྱེར་རམ། ཐག་རིང་པོར་གྱུར་པ་གང་ཞིག་ན་བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་རབ་ཏུ་སྤྱོད་པར་གྱུར་ན་བྱང་ཆུབ་སེམས་དཔའ་སེམས་དཔའ་ཆེན་པོ་དེས་དེ་ཡང་བགྲོད་པར་བྱ་ཞིང་དེར་
ཕྱིན་ནས་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་གཟུང་བར་བྱ། བཅང་བར་བྱ། བཀླག་
པར་བྱ། ཀུན་ཆུབ་པར་བྱ་ཞིང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །ཤཱ་ར་དྭ་ཏིའི་བུ་གལ་ཏེ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་གིས་བཅོམ་ལྡན་འདས་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་གཟུང་བར་བྱ། བཅང་བར་བྱ། བཀླག་པར་བྱ། ཀུན་ཆུབ་པར་བྱ་ཞིང་གཞན་དག་ལ་ཡང་རྒྱ་ཆེར་

79-1-71b

ཡང་དག་པར་རབ་ཏུ་བསྟན་པར་བྱའོ། །ཞེས་སེམས་བསྐྱེད་ལ། ཤཱ་ར་དྭ་ཏིའི་བུ་གལ་ཏེ་རིགས་ཀྱི་བུ་འམ་རིགས་ཀྱི་བུ་མོ་གཞན་ཞིག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་བརྗོད་པར་མི་ནུས་ཀྱི། གླེགས་བམ་དུ་བྱས་པ་ཞིག་ལག་ན་སྲེལ་བར་གྱུར་ན་དེས་གླེགས་བམ་དེ་བརྙས་ཏེ། ཕྱིར་ལོག་ནས་
བདག་གིས་གླེགས་བམ་བྲི་བར་བྱའོ། །གལ་ཏེ་གླེགས་བམ་ཡང་དེ་ཉིད་དུ་བྲི་བར་བྱའོ། །ཤཱ་ར་དྭ་ཏིའི་བུ་གལ་ཏེ་རིགས་ཀྱི་བུ་འམ་རིགས་ཀྱི་བུ་མོ་དེ་འདི་སྐད་དུ་གལ་ཏེ་རིགས་ཀྱི་བུ་ཁྱོད་ཟན་བཅད་དེ་འབྲི་ཕོད་ན་དེ་ལྟ་ན་ངས་ཁྱོད་
ལ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་སྦྱིན་པར་བྱའོ། །ཞེས་ཟེར་ན་ཡང་དེས་ཟན་
བཅད་དེ་འདུག་འབྲི་བར་བྱའོ། །གལ་ཏེ་ཡང་འདི་སྐད་དུ་འཆག་ཅིང་བྲིས་ཤིག་ཅེས་ཟེར་ན་ཡང་དེས་ཆག་ཅིང་བྲི་བར་བྱའོ། །གལ་ཏེ་ཡང་འདི་སྐད་དུ་འགྲེང་སྟེ་བྲེས་ཤིག་ཅེས་ཟེར་ན་ཡང་དེ་དེས་འགྲེང་སྟེ་བྲི་བར་བྱའོ། །གལ་
ཏེ་ཡང་འདི་སྐད་དུ་འདུག་སྟེ་བྲིས་ཤིག་ཅེས་ཟེར་ན་ཡང་ངེས་འདུག་སྟེ་བྲི་བར་བྱའོ། །ཤཱ་ར་དྭ་ཏིའི་བུ་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ལ་ཞིག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་
ཡང་དག་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདིའི་དོན་གྱི་ཕྱིར་གྲོང་དང་གྲོང་ཁྱེར་དུ་སོང་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་མ་རྙེད་པར་གྱུར་ན་དེ་ནས་རྒྱལ་ཁམས་གཞན་ནམ། ཡུལ་གཞན་དག་དུ་ཡང་བགྲོད་ཅིང་གང་དུ་ཐོས་པར་འགྱུར་

79-1-72a

བ་དེར་འགྲོ་བར་བྱའོ། །དེར་ཕྱིན་ནས་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་མཉན་
པར་བྱ། གཟུང་བར་བྱ། བཅང་བར་བྱ། བཀླག་པར་བྱ། ཀུན་ཆུབ་པར་བྱ་ཞིང་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །ཤཱ་ར་དྭ་ཏིའི་བུ་དེ་ལྟར་གང་དུ་ཐོས་པར་འགྱུར་བ་དེར་ཕྱིན་ནས་གལ་
ཏེ་མ་རྙེད་ན་ཡང་དེས་འདི་སྙམ་དུ་གང་གི་ཕྱིར་བདག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་
གྲངས་དེའི་མིང་ཐོས་པར་གྱུར་པས་ན་བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པའི་འཇིགས་པ་ཡང་མེད་ལ། གང་གིས་ད་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་དེའི་མིང་བསྟན་པ་དེ་ཡང་བདག་ལ་ཕན་པར་འདོད་པ་བདེ་བར་འདོད་པ། དོན་དུ་འདོད་པ། གྲུབ་པ་དང་། བདེ་བར་
འདོད་པ་ཡིན་ནོ་སྙམ་དུ་སེམས་བསྐྱེད་པར་བྱའོ། །ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་
རྣམ་གྲངས་འདི་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཉིད་ཀྱི་སྔོན་གྱི་སྨོན་ལམ་གྱི་དབང་གིས་ངས་བཤད་དེ། རིགས་ཀྱི་བུ་འམ་རིགས་ཀྱི་བུ་མོ་གང་
དག་གིས་ཐོས་པ་དང་། གང་དག་ཐོས་པར་འགྱུར་བ་དེ་ཡང་སངས་རྒྱས་ཀྱི་མཐུ་དང་། རང་རང་གི་དགེ་བའི་རྩ་བའི་རྣམ་པར་སྨིན་པ་ཡིན་ནོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་

79-1-72b

དཱ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་དེ་བཞིན་གཤེགས་པ་འདས་པའི་འོག་ཏུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་
ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་སུའི་མཐུས་ཐོས་པར་འགྱུར། བཅོམ་ལྡན་འདས་ཀྱིས་བཀའ་སྩལ་བ། ཤཱ་ར་དྭ་ཏིའི་བུ་ང་འདས་པའི་འོག་ཏུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་
འཁྲུགས་པ་དེ་ཉིད་ཀྱི་མཐུས་ཐོས་པར་འགྱུར་ཞིང་། ཇི་ལྟར་དམ་པའི་ཆོས་སྨྲ་བ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་
ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་སྨྲ་བར་འགྱུར་བ་དེ་ལྟར་རྒྱལ་པོ་བཞི་པོ་དག་དང་། ལྷའི་དབང་པོ་བརྒྱ་བྱིན་ཡང་སྤྲོ་བ་སྐྱེ་བར་འགྱུར་ལ། བྱང་ཆུབ་སེམས་དཔའ་སེམས་དཔའ་ཆེན་པོ་
གང་དག་ཉན་པར་འགྱུར་བ་དེ་དག་གི་ལས་ཀྱི་རྣམ་པར་སྨིན་པས་ཀྱང་རྒྱལ་པོ་ཆེན་པོ་བཞི་པོ་དག་དང་། ལྷའི་དབང་པོ་བརྒྱ་བྱིན་སྤྲོ་བ་སྐྱེ་བར་འགྱུར་རོ། །དེ་སྐད་ཅེས་བཀའ་སྩལ་བ་དང་། བཅོམ་ལྡན་འདས་
ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་
སུ་བརྗོད་པའི་ཆོས་ཀྱི་རྣམ་གྲངས་འདི་ནི་ཡོན་ཏན་གྱི་ཆོས་ཆེན་པོ་དང་ལྡན་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་

79-1-73a

ཏོ། །ཤཱ་ར་དྭ་ཏིའི་བུ་དེ་དེ་བཞིན་ཏེ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་
པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ནི་ཡོན་ཏན་གྱི་ཆོས་ཆེན་པོ་དང་ལྡན་པ་ཡིན་ཏེ། ཤཱ་ར་དྭ་ཏིའི་བུ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་དག་འཇིགས་པ་འམ་སྐྲག་པར་གྱུར་པ་ན། 
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་མཚན་ནས་བརྗོད་ན་རིགས་ཀྱི་བུ་འམ་རིགས་ཀྱི་བུ་མོ་དེ་དག་གི་འཇིགས་པ་དང་། སྐྲག་པ་དག་མེད་
པར་འགྱུར་རོ། །ཤཱ་ར་དྭ་ཏིའི་བུ་གལ་ཏེ་ཕྱོགས་ལ་ལ་ཞིག་ཏུ་འཁོར་ལོ་དྲག་པོ་ལྟ་བུའི་སེར་བ་བབ་པར་གྱུར་ན་དེ་འབབ་པ་ན་རིགས་ཀྱི་བུ་འམ་རིགས་ཀྱི་བུ་མོ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་མཚན་ནས་བརྗོད་ཅིང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་
སེམས་དཔའི་སྤྱད་པ་སྤྱོད་པ་ན་བདེན་པ་དང་། བདེན་པའི་ཚིག་གང་གིས་ཀླུ་བརྒྱ་ཕྲག་མང་པོ་དང་། ཀླུ་སྟོང་ཕྲག་མང་པོ་དང་། ཀླུ་བརྒྱ་སྟོང་ཕྲག་མང་པོ་དང་། ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་སྡུག་བསྔལ་བར་
གྱུར་པ་དག་ཐར་པར་མཛད་ཅིང་ཐར་པར་མཛད་ནས་ཀྱང་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོས་ཏེ། དགེ་བའི་རྩ་བ་འདིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་
ནས་གང་གི་ཚེ་འཇིག་རྟེན་ཁམས་གཞན་དང་། གཞན་དག་ཏུ་ཀླུ་ཁྲོ་བོ་དག་གིས་འཁོར་ལོ་དྲག་པོ་ལྟ་བུའི་སེར་བ་འབེབས་པར་བྱེད་པས་ན་སེམས་ཅན་དག་འཇིགས་ཤིང་སྐྲག་པར་འགྱུར་བ་དེ་དག་གི་མཚན་ནས་བརྗོད་

79-1-73b

པར་འགྱུར་ཞིང་དེར་བདག་གི་མཐུས་འཁོར་ལོ་དྲག་པོ་ལྟ་བུའི་སེར་བ་དེ་དག་ཉེ་བར་ཞི་བར་གྱུར་ཅིག་ཅེས་ཡོངས་སུ་བསྔོས་པའི་བདེན་པ་དང་། བདེན་པའི་ཚིག་དེས་བདག་ཅག་ལ་འཁོར་ལོ་དྲག་པོ་ལྟ་བུའི་སེར་བ་འབབ་པ་འདི་དག་ཉེ་
བར་ཞི་བར་གྱུར་ཅིག་ཅེས་བརྗོད་པ་ཙམ་གྱིས་ན་ཀླུ་རྣམས་ཀྱི་འཁོར་ལོ་དྲག་པོ་ལྟ་བུའི་སེར་བ་དེ་དག་ཉེ་བར་ཞི་བར་འགྱུར་ཏེ། ཤཱ་ར་དྭ་ཏིའི་བུ་སེམས་ཅན་དེ་དག་གི་སྔོན་གྱི་ལས་ཀྱི་རྣམ་པར་སྨིན་པ་ནི་མ་གཏོགས་སོ། །ཤཱ་ར་
དཱ་ཏིའི་བུ་གཞན་ཡང་རིགས་ཀྱི་བུ་འམ་རིགས་ཀྱི་བུ་མོ་དག་འཇིགས་པ་འམ། སྐྲག་པ་འམ། ཡམས་ཀྱི་ནད་དམ། གནོད་པ་བྱུང་བར་གྱུར་པ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་མི་འཁྲུགས་པ་དེ་རྗེས་སུ་དྲན་པར་བྱ་ཞིང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་
སྤྱད་པ་སྤྱོད་པ་ན་བདེན་པ་དང་། བདེན་པའི་ཚིག་གང་གིས་དམ་བཅས་པ་དང་། ཚིག་བརྗོད་པ་གང་ཡིན་པའི་དམ་བཅས་པ་དང་། ཚིག་བརྗོད་པ་དེ་དག་ཐམས་ཅད་ཡོངས་སུ་རྫོགས་པར་གྱུར་ཅིང་དམ་བཅས་པ་དང་། 
ཚིག་བརྗོད་པ་དེ་དག་ཐམས་ཅད་ཀྱི་ཕ་རོལ་ཏུ་སོན་པའི་བདེན་པ་དང་བདེན་པའི་ཚིག་དེས་འཇིགས་པ་དང་། སྐྲག་པ་དང་། ཡམས་ཀྱི་ནད་དང་། གནོད་པ་འདི་དག་ནུབ་པར་གྱུར་ཅིག་ཅེས་བརྗོད་པ་ཙམ་གྱིས་འཇིགས་
པ་དེ་དག་དང་། སྐྲག་པ་དེ་དག་དང་། ཡམས་ཀྱི་ནད་དེ་དག་དང་། གནོད་པ་དེ་དག་ནུབ་པར་འགྱུར་ཏེ། ཤཱ་ར་དྭ་ཏིའི་བུ་སེམས་ཅན་དེ་དག་གི་སྔོན་གྱི་ལས་ཀྱི་རྣམ་པར་སྨིན་པ་ནི་མ་གཏོགས་སོ། །དེ་སྐད་ཅེས་བཀའ་
སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གཅིག་བླ་ན་མེད་པ་ཡང་དག་པར་རྫོགས་པའི་

79-1-74a

བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་གྱི། གཉིས་ནི་མ་ལགས་པས་བཙུན་པ་བཅོམ་ལྡན་འདས་དེ་ལྟ་ལགས་པས་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་བས་ཇི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པས་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་མངོན་པས་རྫོགས་པར་སངས་རྒྱས་པ་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བགྱིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་
ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་དེ་དེ་བཞིན་ཏེ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཇི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པོ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ། །ཤཱ་ར་དྭ་ཏིའི་བུ་ཇི་ལྟར་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པས་སངས་རྒྱས་ཀྱི་ཞིང་ཡོངས་སུ་སྦྱངས་པ་དང་། སངས་རྒྱས་ཀྱི་ཞིང་ཡོངས་སུ་བཟུང་བ་དེ་ལྟར་གང་གིས་སངས་རྒྱས་ཀྱི་ཞིང་
ཡོངས་སུ་སྦྱོང་བ་དང་། དེ་ལྟར་སངས་རྒྱས་ཀྱི་ཞིང་ཡོངས་སུ་འཛིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཉུང་ཏེ། ཤཱ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་བླ་ན་མེད་

79-1-74b

པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན་སངས་རྒྱས་བཅོམ་ལྡན་འདས་དེ་དག་གི་སངས་རྒྱས་པ་ཉིད་ཀྱང་མཚུངས། ཐམས་ཅད་མཁྱེན་པ་ཉིད་ཀྱང་མཚུངས་ཁ་དོག་ཀྱང་མཚུངས། རྟགས་
ཀྱང་མཚུངས། རིགས་ཀྱང་མཚུངས། སངས་རྒྱས་ཀྱི་ཞིང་ཡོངས་སུ་འཛིན་པར་མཚུངས། ཉན་ཐོས་ཀྱི་དགེ་འདུན་གྱི་འདུས་པ་ཡང་མཚུངས། དེ་དག་གི་རྣམ་པར་གྲོལ་བ་ཡང་མཚུངས་མོད་ཀྱི། གཞན་
དུ་ན་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཐ་དད་པར་འགྱུར་བ་དང་། སིང་གེའི་ཁྲི་ཐ་དད་པ་དང་། པད་མའི་དཀྱིལ་འཁོར་ཐ་དད་པར་འགྱུར་བ་འབའ་ཤིག་ཏུ་ཟད་དོ། །དེ་ནས་འདོད་པ་ན་སྤྱོད་པའི་
ལྷ་རྣམས་དང་། ཚངས་རིས་ཀྱི་ལྷ་རྣམས་ཤར་ཕྱོགས་སུ་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། ཕྱག་
འཚལ་ནས་འདི་སྐད་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་གང་འཇིག་རྟེན་གྱི་ཁམས་གཞན་ནས་བཞུགས་པའི་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་འདིར་བཤད་པའི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ལ་ཕྱག་འཚལ་ལོ། །ཕྱག་འཚལ་
ལོ་ཞེས་ལན་གསུམ་དུ་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་འདོད་པ་ན་སྤྱོད་པའི་ལྷ་རྣམས་དང་། ཚངས་རིས་ཀྱི་ལྷ་དེ་དག་གིས་ལྷའི་མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་དང་། ལྷའི་

79-1-75a

སྤོས་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་གཏོར་མངོན་པར་གཏོར་མངོན་པར་རབ་ཏུ་གཏོར་ཏོ། །མངོན་པར་གཏོར་
མ་ཐག་ཏུ་སངས་རྒྱས་ཀྱི་མཐུས་མེ་ཏོག་དེ་དག་དང་། སྤོས་དེ་དག་བཅོམ་ལྡན་འདས་ཀྱི་སྟེང་གི་ནམ་མཁའ་ལ་མེ་ཏོག་གི་གདུགས་ཆེན་པོ་གནས་པར་གྱུར་ཏོ། །གཞན་ཡང་འདོད་པ་ན་སྤྱོད་པའི་ལྷ་རྣམས་དང་། 
ཚངས་རིས་ཀྱི་ལྷ་དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ལ་མཆོད་པ་བྱ་བའི་ཕྱིར་བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ག་ལ་བ་དེ་ལོགས་སུ་མེ་ཏོག་དག་གིས་གཏོར་བར་གྱུར་ཏོ། །དེ་ནས་ལྷའི་དབང་པོ་བརྒྱ་བྱིན་འདི་སྙམ་དུ་སེམས་ཏེ། བདག་གིས་སངས་རྒྱས་
ཀྱི་མཐུས་འཁོར་བཞི་པོ་དེ་དག་དང་། འདོད་པ་ན་སྤྱོད་པའི་ལྷ་འདི་དག་དང་། ཚངས་རིས་ཀྱི་ལྷ་འདི་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་
པ་དེ་མཐོང་བར་འགྱུར་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་གསོལ་བ་གདབ་པར་བྱའོ། །སྙམ་མོ། །དེ་ནས་བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་གྱི་སེམས་ཀྱི་
ཡོངས་སུ་རྟོག་པ་ཐུགས་ཀྱིས་མཁྱེན་ནས་རྫུ་འཕྲུལ་གྱིས་ནམ་མཁའ་ལ་མངོན་པར་འཕགས་ཏེ། བར་སྣང་ལ་སྐྱིལ་མོ་དཀྲུང་བཅས་ནས་བཞུགས་པར་གྱུར་ཏོ། །སངས་རྒྱས་ཀྱི་མཐུས་འཁོར་བཞི་པོ་དེ་དག་ཀྱང་
སྟེང་གི་ནམ་མཁའ་ལ་མངོན་པར་འཕགས་ནས་པར་སྣང་ལ་འཁོད་པར་གྱུར་ཏོ། །སངས་རྒྱས་ཀྱི་མཐུས་འདོད་པ་ན་སྤྱོད་པའི་ལྷ་དེ་དག་དང་། ཚངས་རིས་ཀྱི་ལྷ་དེ་དག་ཀྱང་སྟེང་གི་ནམ་མཁའ་ལ་མངོན་པར་

79-1-75b

འཕགས་ནས་པར་སྣང་ལ་འཁོད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་འདི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་དེ། དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་པས་
འཁོར་བཞི་དེ་དག་དང་། འདོད་པ་ན་སྤྱོད་པའི་ལྷ་དེ་དག་དང་། ལྷའི་དབང་པོ་བརྒྱ་བྱིན་དང་། ཚངས་རིགས་ཀྱི་ལྷ་དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་མི་འཁྲུགས་པ་ཉན་ཐོས་ཀྱི་དགེ་འདུན་དང་བཅས་པ་དང་། བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་བ་དང་བཅས་པ་དེ་དང་སངས་རྒྱས་ཀྱི་ཞིང་དེ་ཡང་མཐོང་བར་གྱུར་ཏོ། །མཐོང་ནས་ཀྱང་
དེ་དག་ཐམས་ཅད་པུས་མོ་གཡས་པའི་ལྷ་ང་སྟེང་གི་བར་སྣང་ལ་བཙུགས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ག་ལ་བ་དེ་ལོགས་
སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ལ་ཕྱག་འཚལ་བར་གྱུར་ཏོ། །དེ་ནས་འཁོར་བཞི་པོ་དེ་དག་གིས་
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་གི་མི་རྣམས་མཐོང་བ་དང་། འདི་སྙམ་དུ་སེམས་ཏེ། འདི་ལྟར་
ལྷའི་ཁ་དོག་དང་། མཚན་མ་དང་། དབྱིབས་དང་ལྡན་པ་འདི་དག་ཅི་སུམ་བཅུ་རྩ་གསུམ་གྱི་ལྷའི་རིས་ནས་སུམ་བཅུ་རྩ་གསུམ་པའི་ལྷ་རྣམས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་མི་འཁྲུགས་པ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པའི་ཕྱིར་ལྷག་པའི་ལྷ་རྣམས་ཡིན་ནམ་འོན་ཏེ། འདི་དག་མ་ཡིན་

79-1-76a

སྙམ་མོ། །དེ་ནས་ལྷའི་དབང་པོ་བརྒྱ་བྱིན་འདི་སྙམ་དུ་སེམས་ཏེ། འདི་དག་ནི་ལྷ་ཡིན་ཏེ། དམ་པའི་ཆོས་ཉན་པའི་ཕྱིར་མིའི་ཆ་ལུགས་དང་རྟགས་འཛིན་ཅིང་། བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སྤྱན་སྔ་ན་འདུག་གོ། །དེ་ཅིའི་ཕྱིར་ཞེ་ན། བདག་གིས་སྔོན་ཆད་མི་རྣམས་ལ་འདི་ལྟ་བུའི་མཛེས་པ་དང་། དཔལ་དང་། 
སྐལ་པ་བཟང་པོ་ཕུན་ཚོགས་པ་དག་ལན་འགའ་ཡང་མ་མཐོང་མ་ཐོས་པའི་ཕྱིར་རོ་སྙམ་མོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་གྱི་ཆོ་འཕྲུལ་དེ་དག་སླར་བསྡུས་སོ། །དེ་ནས་བཅོམ་ལྡན་
འདས་ཀྱིས་འཁོར་བཞི་པོ་དེ་དག་དང་། འདོད་པ་ན་སྤྱོད་པའི་ལྷའི་བུ་དེ་དག་ཐེ་ཚོམ་དང་བཅས་ཡིད་གཉིས་དང་བཅས་པར་ཐུགས་སུ་ཆུད་ནས་ལྷའི་དབང་པོ་བརྒྱ་བྱིན་ལ་བཀའ་སྩལ་པ། ཀཽ་ཤི་ཀ་གང་
དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་དུ་སྐྱེས་པའི་མི་དེ་དག་ནི་ལྷའི་ཉེ་བར་སྤྱོད་པ་དང་། ཡོངས་སུ་སྤྱོད་
པ་དག་དང་ལྡན་པ་ཡིན་ནོ། །དེ་ནས་ལྷའི་དབང་པོ་བརྒྱ་བྱིན་འདི་སྙམ་དུ་སེམས་ཏེ། མི་གང་དག་གིས་སངས་རྒྱས་ཀྱང་མཐོང་ལ་ལྷའི་ལོངས་སྤྱོད་དང་། ཉེ་བར་སྤྱོད་པ་དང་ལྡན་པའི་མི་དེ་དག་གི་ལྷའི་ཕུན་སུམ་
ཚོགས་པ་དང་ལྡན་པ་སྟེ། འདོད་པར་བྱ་བ་ཡིན་ན་གང་དག་འཇིག་རྟེན་གྱི་ཁམས་གཞན་དག་དང་། སངས་རྒྱས་ཀྱི་ཞིང་གཞན་དག་ནས་ཤི་འཕོས་ནས་བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་དུ་སྐྱེ་བར་འགྱུར་བའི་མི་དེ་དག་ཀྱང་འདོད་པར་བྱ་བ་ཡིན་ནོ་སྙམ་མོ། །དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུས་ལྷའི་དབང་པོ་བརྒྱ་བྱིན་

79-1-76b

ལ་འདི་སྐད་ཅེས་སྨྲས་སོ། །ཀཽ་ཤི་ཀ་གང་ཁྱོད་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་མཐོང་ཞིང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ཡང་མཐོང་བས་ན། ཀཽ་ཤི་ཀ་གལ་ཏེ་དེ་ཙམ་གྱིས་ཀྱང་ཁྱོད་ཀྱི་ལུས་ཀྱིས་རྙེད་པ་ལེགས་པར་རྙེད་པ་ཡིན་ན་ཀཽ་ཤི་ཀ་གང་ཁྱོད་སངས་རྒྱས་ཀྱི་ཞིང་དེར་སྐྱེ་བར་
འགྱུར་བའི་རྙེད་པ་དེ་ལྟ་སྨོས་ཀྱང་ཅི་དགོས། དེ་ནས་ལྷའི་དབང་པོ་བརྒྱ་བྱིན་འདི་སྙམ་དུ་སེམས་ཏེ། གང་དག་གི་རྣ་ལམ་དུ་ཡོན་ཏན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་གྲག་པ་དེ་དག་ཀྱང་རྙེད་པ་ལེགས་
པར་རྙེད་པ་ཡིན་ན་གང་དག་སངས་རྒྱས་ཀྱི་ཞིང་དེར་སྐྱེ་བར་འགྱུར་བ་ལྟ་སྨོས་ཀྱང་ཅི་དགོས་སྙམ་མོ། །དེ་ནས་བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ་བྱང་ཆུབ་
སེམས་དཔའི་ཐེག་པ་པའི་གང་ཟག་དག་སངས་རྒྱས་ཀྱི་ཞིང་དེར་སྐྱེ་བར་འགྱུར་དེ་དག་ནི་རྙེད་པ་ལེགས་པར་རྙེད་པ་ཡིན་ནོ། །དེ་ཅིའི་ཕྱིར་ཞེ་ན། ཀཽ་ཤི་ཀ་དེ་ནི་འདི་ལྟར་ཕྱིར་མི་ལྡོག་པ་ཉིད་ལ་གནས་པར་
འགྱུར་བའི་ཕྱིར་རོ། །ཀཽ་ཤི་ཀ་སྲོག་ཆགས་གང་དག་གིས་ཇི་ལྟར་སངས་རྒྱས་ཀྱི་ཞིང་དེར་སྐྱེ་བར་སེམས་བསྐྱེད་ན་དེ་དག་ནི་དེ་ལྟར་སེམས་བསྐྱེད་མ་ཐག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་
པ་ཇི་ལྟ་བ་དེ་ལྟར་བཟུང་བར་བྱའོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པ་ན་དགེ་སློང་ལྔ་སྟོང་ཙམ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །བྱང་ཆུབ་སེམས་དཔའི་
ཐེག་པ་པའི་དགེ་སློང་བརྒྱད་སྟོང་གིས་ནི་སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་བཏབ་བོ། །བྱང་ཆུབ་སེམས་དཔའི་ཐེག་པ་པའི་དགེ་སློང་མ་ལྔ་སྟོང་གིས་ཀྱང་སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་བཏབ་བོ། །

79-1-77a

བྱང་ཆུབ་སེམས་དཔའི་ཐེག་པ་པའི་དགེ་བསྙེན་བརྒྱ་སྟོང་གིས་ཀྱང་སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་བཏབ་བོ། །བྱང་ཆུབ་སེམས་དཔའི་ཐེག་པ་པའི་དགེ་བསྙེན་མཁྲིས་ཀྱང་
སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་བཏབ་བོ། །འདོད་པ་ན་སྤྱོད་པའི་ལྷའི་བུ་སྟོང་ཕྲག་རབ་ཏུ་མང་པོ་དག་གིས་ཀྱང་སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་བཏབ་སྟེ། དེ་དག་ཐམས་ཅད་ཀྱང་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སངས་རྒྱས་ཀྱི་ཞིང་དེར་སྐྱེ་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ལུང་བསྟན་ཏོ། །གང་དག་
དེ་ལས་གཞན་པའི་སེམས་ཅན་སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་འདེབས་པར་འགྱུར་བ་དེ་དག་ཀྱང་དེ་ཉིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ལུང་བསྟན་པར་
འགྱུར་ཏེ། ལུང་བསྟན་ནས་ཀྱང་དེ་དག་སངས་རྒྱས་ཀྱི་ཞིང་དེ་ཉིད་དུ་སྐྱེ་བར་འགྱུར་རོ། །གཞན་ཡང་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པ་ན་ཆོས་ཀྱི་རྣམ་གྲངས་འདིའི་མཐུ་དང་། བྱིན་གྱིས་
བརླབས་ཀྱིས་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་འདི་ཐམས་ཅད་རྣམ་པ་དྲུག་ཏུ་གཡོས་ཏེ། གཡོས་རབ་ཏུ་གཡོས། ཀུན་ཏུ་རབ་ཏུ་གཡོས། འགུལ་རབ་ཏུ་འགུལ། ཀུན་ཏུ་རབ་ཏུ་འགུལ། 
ལྡེག་རབ་ཏུ་ལྡེག །ཀུན་ཏུ་རབ་ཏུ་ལྡེག །འཁྲུགས་རབ་ཏུ་འཁྲུགས། ཀུན་དུ་རབ་ཏུ་འཁྲུགས། འུར་འུར། རབ་ཏུ་འུར་འུར། ཀུན་ཏུ་རབ་ཏུ་འུར་འུར། ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་
ཆེམ་ཞིང་འཇིག་རྟེན་དུ་སྣང་བ་ཆེན་པོས་ཀྱང་ཁྱབ་པར་གྱུར་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཤཱ་ར་དྭ་ཏིའི་བུ་དང་། ཚེ་དང་ལྡན་པ་དགའ་བོ་དང་། རྒྱལ་པོ་ཆེན་པོ་བཞི་དང་། 

79-1-77b

ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དང་། དགེ་སློང་དེ་དག་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་
རངས་ཏེ། བཅོམ་ལྡན་འདས་ཀྱིས་གསུངས་བ་ལ་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོ་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་མི་འཁྲུགས་པའི་བཀོད་པའི་ལེའུ་ཞེས་བྱ་
སྟེ་དྲུག་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེན་དྲ་བོདྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ། ། 
འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བདུན་པ་སྟེ་གོ་ཆའི་བཀོད་པ་བསྟན་པ། བམ་པོ་དང་པོ། 
རྒྱ་གར་སྐད་དུ། ཨཱརྱ་ཝརྨ་བྱཱུ་ཧ་ནིར་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་གོ་ཆའི་བཀོད་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ། །སངས་རྒྱས་དང་བྱང་ཆུབ་སེམས་དཔའ་
ཐམས་ཅད་ལ་ཕྱག་འཚལ་ལོ། །འདི་སྐད་བདག་གི་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་ཀ་ལན་ད་ཀའི་གནས་འོད་མའི་ཚལ་ན་དགེ་སློང་གི་དགེ་འདུན་ཆེན་པོ་དང་། བྱང་ཆུབ་
སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་སྣ་ཚོགས་ནས་འདུས་པ་ཤ་སྟག་དང་ཐབས་གཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ལ་འཁོར་མང་པོ་བརྒྱ་སྟོང་ཚད་མེད་པས་ཡོངས་སུ་
བསྐོར་ཅིང་གུས་པས་རིམ་གྲོ་དང་། བཀུར་སྟི་བྱས་པར་གྱུར་ཏོ། །དེའི་ཚེ་འདུས་པ་དེར་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཤེས་བྱ་བ་འདུས་པར་གྱུར་བ་དེ་འདུག་པ་སྟན་ལས་

79-1-78a

ལངས་ནས་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་སྤྱི་བོ་བཏུད་དེ་ཕྱག་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ། 
བཅོམ་ལྡན་འདས་བདག་ལ་ཐེ་ཚོམ་ཅུང་ཟད་ཅིག་མཆིས་ཏེ། དེ་བཞིན་གཤེགས་པ་ལ་ཞུ་བར་འཚལ་ན་ཐུགས་རྗེས་གནང་བར་མཛད་ཅིང་བདག་ལ་བཤད་དུ་གསོལ། དེ་སྐད་ཅེས་གསོལ་
པ་དང་། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་ཚིགས་སུ་བཅད་དེ་གསོལ་པ། །དཔའ་ཆེན་སྐྱེས་བུ་ཆེན་པོ་སྟེ། །འཇིག་རྟེན་དག་ན་མཚུངས་
མ་མཆིས། །བདག་ནི་སེམས་ཅན་དག་གི་སླད། །ཐེ་ཚོམ་ཅུང་ཟད་ཞུ་བ་ལགས། །སེང་གེའི་གདན་ལས་མ་བཞེངས་པར། །སྐུ་ནི་ཕྱོགས་བཅུ་ཀུན་དུ་ཁྱབ། །ཐ་དད་སྨྲ་བ་ཐམས་ཅད་ཀྱིས། །
གང་ཡང་བསྒུལ་བར་མི་འགྱུར་བར། །མཁྱེན་པའི་གཏེར་ནི་མཐའ་མི་མངའ། །སྟོབས་རྣམས་ཀྱང་ནི་ཚད་མ་མཆིས། །བཅོམ་ལྡན་སྟོབས་ནི་རེ་རེས་ཀྱང་། །འཇིག་རྟེན་མ་ལུས་སྒྲོལ་བར་མཛད། །
ཐམས་ཅད་མཁྱེན་ལ་རབ་གནས་ཤིང་། །སྟོབས་བཅུ་ལ་ནི་གང་གནས་པ། །མི་འཇིགས་སེང་གེ་ཆེན་པོ་སྟེ། །རྒྱལ་བ་བླ་ན་མེད་པའི་གཙོ། །མ་འདྲེས་ཆོས་ནི་བཅྭ་བརྒྱད་དག ། །དེ་བཞིན་གཤེགས་
ལ་མངའ་བས་ན། །འཇིག་རྟེན་རྣམས་ནི་གསལ་མཛད་ཅིང་། །མུ་སྟེགས་རྣམས་ནི་ཕམ་པར་མཛད། །ཆོས་རྣམས་ཐམས་ཅད་རབ་མཁྱེན་པས། །དེ་སླད་མཐའ་མེད་མཆོག་ཅེས་བགྱི། །ཉམས་པ་མི་
མངའི་འདྲེན་པ་ལ། །བདག་ནི་ཐེ་ཚོམ་ཞུ་བ་ལགས། །དྲི་མེད་མཁྱེན་པ་མཐའ་མེད་པ། །མཁྱེན་པ་མི་གཡོ་རྒྱ་མཚོ་བཞིན། །མཁྱེན་པ་ཡུལ་ལ་ཐོགས་མི་མངའ། །བདག་ནི་ཐེ་ཚོམ་ཞུ་བ་ལགས། །བཅོམ་

79-1-78b

ལྡན་ལེགས་པར་བསྒོམ་པ་ན། །ལམ་ལ་ཐེ་ཚོམ་ཡོད་མི་མངའ། །བདེར་གནས་འདྲེན་པ་ཆེན་པོ་ལ། །བདག་ནི་ཐེ་ཚོམ་ཞུ་བ་ལགས། །ཆུ་བོ་དག་ནི་རབ་རྒལ་ཅིང་། །མཚམས་སྦྱོར་འཆིང་བ་ཡོངས་ཅད་པ། །གདུག་
པའི་ཟུག་རྔུ་འབྱིན་པ་ལ། །བདག་ནི་ཐེ་ཚོམ་ཞུ་བ་ལགས། །མ་རིག་སྒོ་ངའི་སྦུབས་བཅོམ་ཞིང་། །ཉོན་མོངས་གདུང་བ་ཉེར་ཞི་བ། །ཤིན་དུ་བསིལ་ལ་རབ་གནས་ལ། །བདག་ནི་ཐེ་ཚོམ་ཞུ་བ་ལགས། །འཇིགས་
མེད་ཡེ་ཤེས་བླ་མེད་དང་། །ཡེ་ཤེས་ཆགས་དང་ཐོག་མེད་པ། །ཆོས་ཀྱི་རྒྱ་མཚོའི་མཁྱེན་པ་རྣམས། །དེ་བཞིན་གཤེགས་པས་མངོན་སུམ་བརྙེས། །སངས་རྒྱས་ཡོན་ཏན་ཚད་མེད་པས། །མངོན་སུམ་མཁྱེན་
པ་ཡོངས་སུ་རྫོགས། །ཟག་པ་ཐམས་ཅད་ཟད་གྱུར་ཅིང་། །ཉོན་མོངས་ལྟ་བ་རབ་བཅོམ་པ། །བཅོམ་ལྡན་ཡོན་ཏན་ཚད་མེད་པ། །མང་པོ་དག་ནི་རབ་ཏུ་བསགས། །བསམ་གྱིས་མི་ཁྱབ་ཆོས་རྗེ་ལ། བདག་
ནི་ཐེ་ཚོམ་ཞུ་བ་ལགས། །བཅོམ་ལྡན་མཆོག་གིས་མཁྱེན་པ་ཡིས། །འཇིག་རྟེན་ཀུན་ནི་གསལ་བར་མཛད། །ཆོས་ཀྱི་སྣང་བ་སྟོན་མཛད་པས། །ཡོན་ཏན་རྒྱ་མཚོ་མཐའ་མི་མངའ། །འདྲེན་པའི་ཆོས་ཀྱི་
འོད་ཟེར་གྱིས། །འཇིག་རྟེན་ཀུན་དུ་གསལ་བར་མཛད། །དེ་སླད་འཇིག་རྟེན་སངས་རྒྱས་ཀྱི། །ཆོས་ཀྱི་འོད་ཟེར་སྣང་བ་ལགས། །ཆོས་ཀྱི་རྒྱ་མཚོ་ཐམས་ཅད་མཁྱེན། །སྤོབས་པ་དག་ནི་བླ་ན་མེད། །བརྩོན་
འགྲུས་བསམ་གྱིས་མི་ཁྱབ་ཅིང་། །རྣམ་པ་ལྟ་བ་རབ་སྤངས་པ། །སངས་རྒྱས་སྤྱན་ནི་མཐའ་མེད་པས། །མཁྱེན་པའི་ཡུལ་ལ་མཐའ་མི་མངའ། །འཇིག་རྟེན་མཚུངས་མེད་གཙོ་བོ་ལ། །བདག་ནི་ཐེ་ཚོམ་
ཞུ་བ་ལགས། །ཆོས་རྒྱལ་ཐུབ་པ་ཆེན་པོ་ཡིས། །སེམས་ཅན་ཐེ་ཚོམ་གཅོད་པར་མཛད། །འདྲེན་པ་ལ་ནི་བདག་ཞུ་ན། །མོས་པ་ཇི་བཞིན་བཀས་བཤད་གསོལ། །ལྷ་དང་མི་ཡི་འཇིག་རྟེན་ཀུན། །ཐམས་

79-1-79a

ཅད་བདག་གིས་རབ་བརྟགས་ན། །དེ་བཞིན་གཤེགས་དང་མཚུངས་མེད་པས། ཐམས་ཅད་མ་ལུས་གསལ་བར་མཛད། །ཡོན་ཏན་རྣམས་ལ་རབ་གནས་ཤིང་། །རྒྱན་དང་ལྡན་པའི་སྐྱེས་ཆེན་ལགས། །
བསམ་གྱིས་མི་ཁྱབ་ཆོས་ཀྱི་རྒྱལ། །དྲང་སྲོང་ནང་ན་གསལ་བ་པོ། །དཔེར་ན་གངས་རི་ཆེན་པོ་ནི། །རིན་ཆེན་ཀུན་གྱིས་བཀོད་པའི་གནས། །བཅོམ་ལྡན་ཆོས་གདན་བཞུགས་པ་ཡི། །བཀོད་པ་དག་ཀྱང་དེ་བཞིན་
ནོ། །།རབ་ཡངས་བརྩོན་འགྲུས་ཆེན་པོ་ཡིས། །ཡིད་འོང་སྒྲ་ནི་སྟོན་མཛད་པས། །སེམས་ཅན་གང་དག་ཐོས་གྱུར་ན། །དགེ་བའི་རྩ་བ་རྣམ་དག་འགྱུར། །བཅོམ་ལྡན་མི་གཡོ་མཆོག་ལགས་པས། །ཆོས་
ཀྱི་སྣང་བ་སྟོན་བར་མཛད། །དེས་ནི་སེམས་ཅན་ཐམས་ཅད་ཀྱི། །ཡིད་བཞིན་བློ་ནི་བདེ་བར་འགྱུར། །དུས་དང་འཁོར་ནི་རབ་མཁྱེན་ཅིང་། །གང་ཟག་མཁྱེན་པ་འདྲེན་པ་ཡིས། །ཆོས་ཀྱི་སྣང་བ་སྟོན་མཛད་པས། །
དུས་མཁྱེན་པ་ཡི་བློ་ལྡན་ལགས། །ཚངས་སྐད་བརྩོན་འགྲུས་ཆེན་པོ་ཡིས། །རྣམ་དག་གསུང་ནི་བཀས་བཤད་གསོལ། །ཆར་ཆེན་ས་ལ་བབས་པ་ལྟར། །ཆོས་ཀྱི་རླན་གྱིས་ཁྱབ་པར་མཛོད། །བཅོམ་
ལྡན་འཁོར་འདུས་ནང་བཞུགས་ཏེ། །ཀུན་ཏུ་ཆོས་ཀྱི་ཆར་ཕབ་ནས། །ཆོས་འདི་ལ་ནི་གང་རེ་བ། །སེམས་ཅན་རྣམས་ནི་ཚིམ་པར་མཛོད། །མཆོག་ཏུ་བདེ་ལ་རབ་གནས་པས། །རྒྱལ་པོ་རི་རབ་ཇི་ལྟ་བཞིན། 
སེམས་ཅན་རྣམས་ལ་སྦྱིན་མཛད་ཅིང་། །མང་པོ་རྣམས་ནི་དགའ་བར་མཛོད། །དཔའ་ཆེན་རྐང་གཉིས་གཙོ་དག་ནི། །སྤྱོད་ཡུལ་བསམ་གྱིས་མི་ཁྱབ་པས། །སེམས་ཅན་དག་ནི་ཐམས་ཅད་ཀྱིས། །གང་ཡང་
འཆལ་བར་མི་འགྱུར་རོ། །སྐྱེས་བུ་ཆེན་པོ་ཚད་མ་མཆིས། །འཁོར་འདུས་འཐུན་པར་གྱུར་བ་དག ། །ཐུབ་པ་ཆེ་ལ་བརྟེན་ནས་ནི། །སངས་རྒྱས་སྤྱོད་ཡུལ་ཆོལ་བ་ལགས། །བདག་ནི་སངས་རྒྱས་སྤྱོད་ཡུལ་ལ། །

79-1-79b

གཞོལ་བའི་སླད་དུ་འདིར་མཆིས་ན། །འདྲེན་པ་མཁྱེན་པ་ཐོགས་མི་མངའ། །ཇི་ལྟར་མྱུར་དུ་དབྱེ་མི་མཛད། །བདག་ནི་དེ་ཡི་མོས་པ་བཞིན། །ཞལ་དུ་བལྟས་ནས་ཞུ་ལགས་ན། །བཅོམ་ལྡན་ཐུགས་
རྗེས་རབ་ཕྱེ་ནས། །ཐེ་ཚོམ་རྣམས་ནི་བཅད་དུ་གསོལ། །བླ་མེད་ཆོས་ནི་ཐོས་གྱུར་ན། །སེམས་ནི་རབ་ཏུ་དགའ་བར་འགྱུར། །ལུས་ནི་དགའ་བས་ཁྱབ་གྱུར་ནས། །ཐེ་ཚོམ་དྲ་བ་ཆད་པར་འགྱུར། །ཆོས་ཀྱི་
རྒྱལ་པོ་བླ་མེད་གཙོ། །ཐམས་ཅད་མཁྱེན་པ་འཇིགས་མི་མངའ། །ཐམས་ཅད་མཁྱེན་ཅིང་གཟིགས་པ་ལ། །བདག་ནི་ཐེ་ཚོམ་ཞུ་བ་ལགས། །སངས་རྒྱས་ཆོས་ནི་ཐམས་ཅད་ལ། །ཐེ་ཚོམ་ཅུང་
ཟད་ཡོད་མི་མངའ། །རབ་བརྩོན་འདྲེན་པ་ཆེན་པོ་ལ། །བདག་ནི་ཐེ་ཚོམ་ཞུ་བ་ལགས། །བླ་མེད་ཐེ་ཚོམ་ཆད་པ་པོ། །ཆོས་ལ་ཐེ་ཚོམ་མི་མངའ་བ། །ཡོན་ཏན་རྒྱ་མཚོ་དཔག་མེད་ལ། །བདག་ནི་ཐེ་
ཚོམ་ཞུ་བ་ལགས། །སྣང་བ་ཆེན་པོ་དཔག་མེད་དང་། །ཡོན་ཏན་ཆེན་པོ་དཔག་མེད་དང་། །རྣམ་དག་མཁྱེན་པ་དཔག་མེད་ལ། །བདག་ནི་ཐེ་ཚོམ་ཞུ་བ་ལགས། །བརྩོན་འགྲུས་མཁྱེན་པ་དཔག་མེད་དང་། །
སྤྱོད་ཡུལ་མཁྱེན་པ་དཔག་མེད་དང་། །ཕན་དོགས་མཁྱེན་པ་དཔག་མེད་ལ། །བདག་ནི་ཐེ་ཚོམ་ཞུ་བ་ལགས། །བཅོམ་ལྡན་མཁྱེན་པ་མཐའ་མེད་ཀྱང་། མཐའ་དང་མཐའ་མེད་རབ་ཏུ་སྤངས། །ཐེ་ཚོམ་
ཐམས་ཅད་གཅོད་པ་ལ། །བདག་ནི་ཐེ་ཚོམ་ཞུ་བ་ལགས། །བསམ་གྱིས་མི་ཁྱབ་ཆོས་ཀྱི་རྒྱལ། །ཐུགས་རྗེས་ཞུ་བ་གསན་དུ་གསོལ། །གནང་བར་མཛད་ན་བདག་ཞུ་ན། །ཐུབ་པ་ཆེན་པོས་བཤད་དུ་
གསོལ། །ཐམས་ཅད་མཁྱེན་པ་ཤཱཀྱའི་གཙོ། །གྲགས་ཆེན་ལ་ནི་ཞུ་བ་ལགས། །གལ་ཏེ་ཐུགས་རྗེས་གནང་གྱུར་ན། །ཐེ་ཚོམ་དྲ་བ་བཅད་དུ་གསོལ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་

79-1-80a

དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་བཀའ་སྩལ་པ། བློ་གྲོས་མཐའ་ཡས་དེང་ཁྱོད་ཀྱིས་ངའི་ཞལ་དུ་བལྟས་ནས་སེམས་རྩེ་གཅིག་ཏུ་གསོལ་བ་འདེབས་པ་འདིས་དེ་བཞིན་
གཤེགས་པ་ལ་ཞུ་བ་དུ་ཞིག་ཞུ་བར་སེམས། གལ་ཏེ་ཞུ་བ་ཡོད་ན་ངས་བཤད་པར་བྱའོ། །དེ་སྐད་ཅེས་བཀའ་སྩལ་པ་དང་། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ།། །བློ་གྲོས་
མཐའ་ཡས་ཁྱོད་ཀྱིས་ནི། །ང་ལ་ཅི་ཞིག་འདྲི་བར་སེམས། །དེ་བཞིན་དུ་ནི་ཞུས་ཤིག་དང་། །ངས་ནི་རབ་ཏུ་བཤད་པར་བྱ། །ཁྱོད་ཀྱིས་ཇི་སྐད་དྲིས་པ་བཞིན། །རེ་རེ་ནས་ནི་གསལ་ཕྱེ་ནས། །ཇི་ལྟར་
མོས་དང་འཐུན་བཞིན་དུ། །མྱུར་དུ་ཕྱེ་སྟེ་རབ་བཤད་དོ། །ངས་ནི་ཁྱོད་ལ་རབ་བཤད་ཀྱིས། །ཐམས་ཅད་ཐེ་ཚོམ་མེད་པར་བྱོས། །ཁྱོད་ཀྱིས་ཞུས་དང་འཚམ་པར་བཤད། །དེང་ཁྱོད་དུས་བཞིན་ཞུ་བར་གྱིས། །དུས་དང་དོན་ནི་ཇི་ལྟ་བཞིན། །དུས་
བཞིན་དུ་ནི་ཞུས་པའི་ཕྱིར། །ངས་ནི་ངེས་པར་རབ་བཤད་དོ། །ཇི་ལྟར་ཁྱོད་ཀྱི་མོས་པ་བཞིན། ཞུ་བ་དག་ནི་ཞུས་ཤིག་དང་། །ངས་ནི་ཐམས་ཅད་རྗེས་འཐུན་པར། །ཁྱོད་ལ་རབ་ཏུ་བཤད་པར་བྱ། །དེང་ཁྱོད་
དུས་སུ་ཞུས་ཤིག་དང་། །ངས་ཀྱང་དུས་བཞིན་བཤད་པར་བྱ། །ཐེ་ཚོམ་དྲ་བ་བཤད་པས་ན། །ཐེ་ཚོམ་མེད་པ་འཐོབ་པར་འགྱུར། །ང་ནི་ཆོས་ཀྱི་རྗེར་གྱུར་པས། །དོན་ནི་མཐར་ཕྱིན་ཐུགས་སུ་ཆུད། །
ཆོས་རྣམས་ཐམས་ཅད་དག་ལ་ཡང་། །ཐེ་ཚོམ་མེད་པ་བརྙེས་པ་ཡིན། །ང་ནི་ཆོས་རྣམས་ཐམས་ཅད་ལས། །མངོན་སངས་རྒྱས་པས་བསམ་དཀའ་ཡིན། །སེམས་ཅན་མོས་པ་ཇི་བཞིན་དུ། །ཞུས་
པ་དག་ནི་སྟོན་པར་མཛད། །ང་ནི་ཆོས་རྣམས་ཐམས་ཅད་ལ། །ཐོགས་པ་དག་ནི་མི་མངའ་བས། །དུས་བཞིན་དུ་ནི་ཞུས་པ་ལ། །མྱུར་དུ་བཤད་པ་མཛད་པ་ཡིན། །ངས་ནི་དུས་བཞིན་རབ་བཤད་ཅིང་། །ཐེ་

79-1-80b

ཚོམ་དག་ནི་མི་མངའ་བས། །དེ་ཡི་མོས་པ་ཇི་ལྟ་བར། །དེ་ཡི་ཐེ་ཚོམ་གཅོད་པར་མཛད། །ང་ནི་རྟག་ཏུ་དུས་རྣམས་དང་། །འཁོར་འདུས་པ་ཡི་བསམ་པ་དང་། །སེམས་ཅན་དག་ནི་ཐམས་ཅད་ཀྱི། །
བསམ་པ་ཐ་དད་མཁྱེན་པ་ཡིན། །རྟག་ཏུ་སེམས་ཅན་ཐམས་ཅད་ཀྱི། །འདོད་པ་དང་ནི་འདོད་མེད་པ། །སོ་སོར་རབ་ཏུ་བརྟགས་ནས་ནི། །དེ་དག་གསལ་བར་གཟིགས་པ་ཡིན། །གལ་ཏེ་བློ་དང་ལྡན་པ་
རྣམས། །ལེགས་པ་ཉིད་དུ་སྒྲུབ་བྱེད་ན། །ང་ཡིས་དུས་དང་སྦྱར་ནས་ནི། །ཡང་དག་ཆོས་སྟོན་གོ་བར་མཛད། །བློ་དང་མི་ལྡན་དེ་དག་ནི། །གཏི་མུག་དག་གིས་རྨོངས་དཀྲུགས་ཤིང་། །དེ་དག་ཤེས་རབ་
སྣང་མེད་པས། །ཡང་དག་ཆོས་ལ་གུས་མི་འགྱུར། །གལ་ཏེ་གུས་པ་མེད་གྱུར་ན། །ཡང་དག་ཆོས་ནི་ཚོལ་མི་བྱེད། །ཆོས་འདི་ཐོས་པར་གྱུར་ཀྱང་ནི། །སྣང་བ་ཆེན་པོའི་ཤེས་མི་སྐྱེ། །གང་ཞིག་ཆོས་
ལ་མཁས་གྱུར་པ། །ཆོས་ལ་མོས་ཤིང་ཚོལ་བར་བྱེད། །གལ་ཏེ་ཆོས་འདི་ཐོས་གྱུར་ན། །རབ་སྣང་ཡེ་ཤེས་ཐོབ་པར་འགྱུར། །ཐེག་ཆེན་དག་ལ་མོས་པ་ནི། །མི་ཡི་གཙོ་བོ་ཚོལ་བྱེད་པས། །རབ་སྣང་
ཡེ་ཤེས་ཐོབ་པར་འགྱུར། །བསམ་གྱིས་མི་ཁྱབ་གཉེར་བ་དག ། །བསམ་གྱིས་མི་ཁྱབ་ཡེ་ཤེས་ལ། །གཞོལ་བ་གང་ཡིན་དེ་དག་ནི། །ཐོས་པས་ཡོངས་སུ་རྫོགས་པར་འགྱུར། །དཔག་མེད་
ཡེ་ཤེས་ལ་མོས་དང་། །བསམ་གྱིས་མི་ཁྱབ་གཉེར་བ་དག ། །དེས་ནི་ཆོས་འདི་ཐོས་གྱུར་ན། །བླ་མེད་ཡེ་ཤེས་ཐོབ་པར་འགྱུར། །སེམས་ཅན་དག་ནི་ལ་ལ་ཞིག ། །བྱང་ཆུབ་སྙིང་པོ་ཚོལ་བ་དང་། །
བླ་མེད་འཁོར་ལོ་བསྐོར་འདོད་པས། །མོས་ཤིང་རབ་ཏུ་བརྩོན་པ་དང་། །ཆོས་ལ་གཙོ་བོར་གང་འཛིན་པ། །དྲི་མེད་ཆོས་ནི་ཐོས་གྱུར་ན། །མོས་ཤིང་རབ་ཏུ་དགའ་བར་འགྱུར། །གལ་ཏེ་སེམས་ཅན་

79-1-81a

ལ་ལ་དག ། །ལེགས་པར་བསྒྲུབ་པར་མོས་གྱུར་པ། །ཆོས་ཀྱི་འོད་ཟེར་སྣང་བ་ཡི། །བླ་མེད་ཆོས་འདི་བསྟན་པར་བྱ། །ཁུར་ལྕི་རྣམས་ནི་ཁྱེར་བ་དང་། །ནན་ཏན་བསྒྲུབ་པ་ལ་
མོས་པ། །དེས་ནི་ཆོས་འདི་ཐོས་གྱུར་ན། །དགའ་བས་ཀུན་དུ་ཁྱབ་པར་འགྱུར། །གང་ཞིག་རབ་ཏུ་མོས་པ་ཡིས། །དགེ་བའི་ཆོས་ནི་སེམས་བྱེད་ན། །དེ་ལ་སྙིང་བརྩེ་བསམ་བཞག་ནས། །རབ་ཏུ་
ཕྱེ་ནས་བསྟན་པར་བྱ། །ཁྱོད་ལ་སོགས་ལ་ཐུགས་བརྩེ་ཕྱིར། །ཁྱོད་ཀྱིས་ཇི་སྐད་ཞུས་པ་བཞིན། །ངས་ཀྱང་ཡང་དག་ངེས་པར་ནི། །ཁྱོད་ཀྱི་ཐེ་ཚོམ་བཅད་པར་བྱ། །ངས་ནི་ལོ་མང་སྟོང་ཕྲག་
ཏུ། །ཐབས་མཁས་དག་ནི་རབ་བསྒོམས་ཤིང་། །ཐེ་ཚོམ་དག་ནི་བསལ་བས་ན། །ཁྱོད་ཀྱིས་མོས་པ་རབ་ཏུ་མཁྱེན། །གལ་ཏེ་ཐེ་ཚོམ་ཡོད་གྱུར་ན། །ཇི་ལྟར་འདོད་བཞིན་ཞུ་བར་གྱིས། །ཁྱོད་ལ་
རབ་ཏུ་བསྟན་པས་ན། །ཐེ་ཚོམ་རྣམས་ནི་བཅད་པར་བྱ། །གལ་ཏེ་ཐེ་ཚོམ་ཡོད་གྱུར་ན། །ཇི་ལྟར་འདོད་བཞིན་ཞུ་བར་གྱིས། །ཇི་ལྟར་མོས་པ་བཞིན་དུ་ནི། །ངས་ནི་རབ་ཏུ་བཤད་པར་བྱ། །གལ་ཏེ་ཐེ་
ཚོམ་ཡོད་གྱུར་ན། །ཇི་ལྟར་འདོད་བཞིན་ཞུ་བར་གྱིས། །ང་ནི་ཆོས་ལ་རབ་གནས་པས། །གཡོ་བ་མེད་པ་བརྙེས་པ་ཡིན། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་
མཐའ་ཡས་ཀྱིས་འདི་སྐད་ཅེས་གསོལ་ཏོ། །།བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་བྱང་ཆུབ་སེམས་དཔའི་ཐེག་པ་ལ་ཐེ་ཚོམ་ཅུང་ཟད་
ཅིག་མཆིས་པ་དེང་ཞུ་བ་ལགས་ན། ཇི་ལྟར་ན་སྐྱེས་བུ་དམ་པ་འཇིགས་པ་སྤངས་ནས་ཡང་དག་པར་སེམས་རྩེ་གཅིག་ཏུ་སེམས་ཅན་རྣམས་ཀྱི་སླད་དུ་གོ་ཆ་ཆེན་པོ་བགོས་ནས་གོ་ཆ་ཆེན་པོས་རབ་ཏུ་བརྒྱན་

79-1-81b

པ་དང་། མོས་པ་ཆེན་པོ་བསྐྱེད་ནས་གུས་པར་བགྱིད་པ་དང་། བག་ཡོད་པ་དང་བཅས་པས་ཐེག་པ་ཆེན་པོ་འདི་ལ་འཚལ་ནས་ཤིན་ཏུ་རྣམ་པར་དག་པ་ཆེན་པོ་མཉམ་པ་ཉིད་ཀྱི་ཤུལ་མཐོ་དམན་དང་། གྱོ་མོ་
དང་། གསེག་མ་དང་། ཚེར་མ་དང་། མི་གཙང་བ་རྣམ་པ་སྣ་ཚོགས་ཀྱི་ལྟ་བའི་ཐིབས་པོ་རྣམས་མ་མཆིས་པ། ཟུག་རྔུ་ཟུག་པའི་སྡུག་བསྔལ་དང་། ཉོན་མོངས་པའི་གཡང་ས་མ་མཆིས་པ། འཆི་བ་
དང་། འཇིགས་ཤིང་སྐྲག་པ་དང་། བར་ཆད་མ་མཆིས་པ། དྲང་ཞིང་གྱ་གྱུ་མ་མཆིས་པ་དང་། དེ་ཁོ་ན་ཉིད་ཀྱི་མཉམ་པ་ཉིད་ཀྱི་ཤུལ་དང་། ཐོགས་པ་མ་མཆིས་པའི་ཤུལ་དུ་ཞུགས་ནས་ལྟ་བའི་ཐིབས་
པོ་རྣམས་བཅད་པ་དང་། དྲ་བ་ཐམས་ཅད་དྲལ་བ་དང་། མུན་ནག་རྣམས་བསལ་བ་དང་། སྲིད་པའི་མངོན་པར་ཞེན་པ་རྣམས་སྤང་བ་དང་། འདུ་འཕྲོ་བ་རྣམས་སྤང་བའི་སླད་དུ་བླ་ན་མ་མཆིས་པ་ཡང་དག་པར་རྫོགས་
པའི་བྱང་ཆུབ་ལ་གཞོལ་བ་ལགས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་དོན་འདིའི་སླད་དུ་ཞུ་བ་ལགས་སོ། །སྐྱེས་བུ་དམ་པ་ཇི་ལྟ་བུས་
གོ་ཆ་ཆེན་པོ་ཇི་ལྟ་བུ་བགོས་ན་གོ་ཆ་བགོས་པ་དེས་ཐེག་པ་ཆེན་པོ་ལ་འཚལ་ནས་ལམ་ཆེན་པོ་འདིས་གཞོལ་ཞིང་ཡང་དག་པར་འཇུག་པར་འགྱུར་བ་ལགས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་
སེམས་དཔའ་ཆེན་པོ་རྣམས་ཀྱི་གོ་ཆའི་བཀོད་པ་གང་ལགས་པ་དང་། ལམ་གང་ལ་གནས་པ་དང་། ཆོས་རྣམས་ཀྱི་ཚུལ་ལ་མཁས་པ་ལ་གནས་པ་གང་ལགས་པ་བཀས་བཤད་དུ་གསོལ། ཆོས་ཀྱི་
ཚུལ་ལ་མཁས་པ་ལ་རབ་ཏུ་གནས་པས་ནི་ཆོས་རྣམས་ཀྱི་ཚུལ་ལ་མཁས་པའི་སྣང་བ་སྐྱེད་པར་འགྱུར་ལ། ཆོས་ཀྱི་སྣང་བའི་དབང་གིས་ནི་གོ་ཆ་མི་སྤོང་པར་ཐེག་པ་ཆེན་པོ་ལ་འཚལ་ནས་ནུར་བ་མ་མཆིས་

79-1-82a

པའི་བརྩོན་འགྲུས་ཀྱི་སྟོབས་དང་། བརྗེད་ངས་པ་མ་མཆིས་པའི་དབང་པོ་དང་། རྒྱུན་ཆགས་པ་མ་མཆིས་པའི་ཤེས་རབ་ཀྱི་སྟོབས་ཀྱིས་མྱུར་དུ་ཆོས་ཀྱི་དབྱིངས་ཀྱི་ཚུལ་ལ་གསལ་བར་མཁས་
པ་མངོན་པར་བསྒྲུབས་ནས། བྱང་ཆུབ་ཀྱི་སྙིང་པོར་བགྲོད་པ་དང་། ཆོས་ཀྱི་འཁོར་ལོ་བསྐོར་ནས་སེམས་ཅན་རྣམས་ལ་ཡང་དག་པར་ཆོས་སྟོན་པའི་སླད་དུ་སེམས་ཅན་ཐམས་ཅད་ཇི་ལྟར་མོས་པ་དང་། ཇི་ལྟར་
གཞོལ་བ་བཞིན་དུ་མ་གྲོལ་བ་ལས་རྣམ་པར་གྲོལ་བར་འགྱུར་ལགས་སོ། །བཅོམ་ལྡན་འདས་ཐེག་པ་ཆེན་པོ་འདིས་སེམས་ཅན་རྣམས་ལ་སྨན་པ་དང་། བདེ་བར་བགྱི་བའི་སླད་དུ་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་དོན་འདི་ཞུ་ལགས་སོ། །བཅོམ་ལྡན་འདས་དེ་བཞིན་གཤེགས་པ་ནི་ཐམས་ཅད་མཁྱེན་པ་ཐམས་ཅད་གཟིགས་པ་ལགས་ན་ཆོས་གང་གིས་བྱང་ཆུབ་
སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་མངོན་པར་བསྒྲུབས་པ་དང་། ཏིང་ངེ་འཛིན་ཐོབ་པའི་དབང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་
རྣམས་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་མ་རྒྱས་ཀྱི་བར་དུ་ཕྱིར་ལྡོག་པར་མི་འགྱུར་བ་གང་ལགས་པ་བཀས་བཤད་དུ་གསོལ། བཅོམ་ལྡན་འདས་དེ་བཞིན་
གཤེགས་པའི་མཁྱེན་པ་དང་། གཟིགས་པ་ནི་ངོ་མཚར་རྨད་དུ་བྱུང་བའི་ཆོས་ཡོངས་སུ་རྫོགས་ཤིང་སེམས་ཅན་རྣམས་ཀྱི་ཤེས་རབ་ཀྱི་སྨན་རབ་ཏུ་མཁྱེན་པ་ལགས་པས་དེའི་སླད་དུ་བདག་ཞུ་བ་གསོལ་ལགས་སོ། །
དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་ཚིགས་སུ་བཅད་དེ་གསོལ་པ། །བྱང་ཆུབ་སེམས་དཔའ་རྣམས་ཀྱི་སླད། །སངས་རྒྱས་ཆོས་དོན་ཟབ་མོ་དག ། །ཐམས་ཅད་

79-1-82b

མཁྱེན་ཅིང་གཟིགས་པ་པོ། །རྐང་གཉིས་གཙོ་ལ་བདག་ཞུ་ལགས། །ཐེག་པ་ཆེན་པོའི་རྣལ་འབྱོར་པ། །ཏིང་འཛིན་གང་གིས་གཞོལ་གྱུར་པ། །སེམས་ཅན་རྣམས་ལ་སྨན་སླད་དུ། །དེ་དག་ཞུ་བ་གསོལ་བ་
ལགས། །ཇི་ལྟར་སྐྱེས་བུ་དམ་པ་ཡིས། །གོ་ཆ་དཔག་མེད་བགོ་བར་འགྱུར། །དེ་ལྟར་གོ་ཆ་བགོས་ནས་ཀྱང་། །ཇི་ལྟར་རབ་ཏུ་གཞོལ་བར་འགྱུར། །ཇི་ལྟར་འདུན་པ་སློང་བར་འགྱུར། །ཇི་ལྟར་དེ་ལ་སྲེད་པར་འགྱུར། 
ཇི་ལྟར་བརྩོན་འགྲུས་ཆེན་པོར་འགྱུར། །ཇི་ལྟར་བག་ཡོད་ལྡན་པར་འགྱུར། །ཇི་ལྟར་བྱང་ཆུབ་སེམས་དཔའ་རྣམས། །ཐེག་ཆེན་འདི་ལ་གཞོལ་བར་བགྱི། །དེ་ལ་འཚལ་ནས་ཅི་བགྱིད་པ། །དངོས་པོ་འདི་ཡང་བཀས་
བཤད་གསོལ། །ཇི་ལྟར་ཐེག་ཆེན་བཏེག་ནས་ནི། །བྱང་ཆུབ་སེམས་ལ་གཞོལ་གྱུར་པ། །འཇིག་རྟེན་འདྲེན་པའི་ཐུགས་རྗེས་ཡིས། །མྱུར་དུ་བདག་ལ་བཀས་བཤད་གསོལ། །ཇི་ལྟར་ཡང་དག་མཉམ་
ལམ་གྱིས། །མཉམ་པ་ཉིད་དུ་གཞོལ་བར་འགྱུར། །ལྟ་བ་རྣམས་ཀྱི་ཐིབས་པོ་དག ། །གཅོད་པར་བགྱིད་ལ་སྐྱོན་མེད་འགྱུར། །སྤྱོད་ཡུལ་དག་ནི་ཐམས་ཅད་ལས། །ཇི་ལྟར་བགྱིས་ན་འདའ་བར་འགྱུར། །
ཇི་ལྟར་མཉམ་པ་ཉིད་དག་གིས། །འདོད་ཆགས་དྲ་བ་དྲལ་བར་འགྱུར། །ཇི་ལྟར་མུན་ནག་རབ་བསལ་ནས། །ཡེ་ཤེས་སྣང་ཆེན་ཐོབ་པར་འགྱུར། །བྱང་ཆུབ་སེམས་དཔའ་དེ་དག་གིས། །ཇི་ལྟར་བགྱིས་ན་གཞོལ་
བར་འགྱུར། །ཇི་ལྟར་སོ་སོར་རབ་བརྟགས་པས། །འཆིང་བ་མང་པོ་སྤོང་བར་འགྱུར། །ཇི་ལྟར་བྱང་ཆུབ་སེམས་དཔའ་རྣམས། །འཆིང་བ་སྤངས་ནས་བདེ་བར་གནས། །ཇི་ལྟར་བྱང་ཆུབ་སེམས་དཔའ་རྣམས། །
འཇིགས་པ་ཆེ་ལས་འདའ་བར་འགྱུར། །ཆོས་ཀྱི་དོན་ལ་མཁས་གྱུར་ནས། །བླ་མེད་ལ་ནི་གཞོལ་བར་འགྱུར། །བྱང་ཆུབ་སེམས་དཔའ་ཇི་ལྟ་བུའི། །དཔག་མེད་གོ་ཆ་བགོ་བར་བགྱིད། །གོ་ཆ་དེ་དག་བགོས་ནས་

79-1-83a

ཀྱང་། །ཐེག་ཆེན་ལ་ནི་འཚལ་བར་བགྱིད། །ཇི་ལྟར་བྱང་ཆུབ་སེམས་དཔའ་རྣམས། །མཉམ་ཉིད་ལམ་ལ་གཞོལ་བར་བགྱིད། །བདག་གིས་དེང་འདིར་ཞུས་པ་འདི། །བཅོམ་ལྡན་འདས་ཀྱིས་བཀས་
བཤད་གསོལ། །བྱང་ཆུབ་སེམས་དཔའ་ཇི་ལྟ་བུར། །གོ་ཆ་བཀོད་པ་ཐོབ་འགྱུར་དང་། །བླ་མེད་ཐེག་པ་རབ་བརྒྱན་པ། །བཅོམ་ལྡན་འདས་ཀྱིས་བཀས་བཤད་གསོལ། །ལམ་འདི་ལ་ནི་གནས་པ་དང་། །ལམ་
དེའི་བཀོད་པ་གང་ལགས་དང་། །ཆོས་རྣམས་ལ་ནི་མཁས་གྱུར་པ། །བཅོམ་ལྡན་འདས་ཀྱིས་བཀས་བཤད་གསོལ། །ཆོས་ཀྱི་དབྱིངས་ཀྱི་ཚུལ་རྣམས་དང་། །ཆོས་ལ་མཁས་པའི་སྣང་བ་དག ། །ཇི་
ལྟ་བུར་ནི་རྟོག་གྱུར་པ། །བཅོམ་ལྡན་འདས་ཀྱིས་བཀས་བཤད་གསོལ། །ཇི་ལྟར་བྱང་ཆུབ་སེམས་དཔའ་རྣམས། །ཆོས་ཀྱི་སྣང་བ་དེ་ཐོས་ནས། །ཆོས་རྣམས་ཐམས་ཅད་མཐར་ཕྱིན་པ། །བཅོམ་ལྡན་འདས་
ཀྱིས་བཀས་བཤད་གསོལ། །ཇི་ལྟར་བྱང་ཆུབ་སེམས་དཔའ་རྣམས། །ཆོས་ཀྱི་སྣང་བ་ཐོབ་གྱུར་ནས། །གོ་ཆ་ཆེན་པོ་མི་སྤོང་ཞིང་། །དེ་ཡི་དབང་གིས་གཞོལ་འགྱུར་ལགས། །ཇི་ལྟར་བྱང་ཆུབ་སེམས་
དཔའ་རྣམས། །ཐེག་ཆེན་འདི་ལ་འཚལ་ནས་ནི། །བརྩོན་འགྲུས་ལྡོག་པར་མི་འགྱུར་ཞིང་། །དེ་ཡི་དབང་གིས་གཞོལ་འགྱུར་ལགས། །ཇི་ལྟར་བྱང་ཆུབ་སེམས་དཔའ་རྣམས། །བསམ་པ་དག་ནི་
རབ་བརྟན་ཞིང་། །འདི་ལྟར་ཤེས་རབ་སྟོབས་དག་གིས། །ཤིན་དུ་འདུལ་བ་ཐོབ་འགྱུར་ལགས། །ཇི་ལྟར་ཆོས་ཀྱི་དབྱིངས་རྣམས་ཀྱི། །ཚུལ་ལ་མཁས་པས་ཐོབ་པར་འགྱུར། །ཆོས་ཀྱི་རྒྱལ་པོ་
བསམ་མི་ཁྱབ། །བཅོམ་ལྡན་འདས་ཀྱིས་བཀས་བཤད་གསོལ། །ཇི་ལྟར་མྱུར་བ་ཁོ་ནར་ནི། །བྱང་ཆུབ་སྙིང་པོར་བགྲོད་གྱུར་ནས། །སུ་ཡང་སྐོར་བར་མི་འགྱུར་བ། །ཚངས་པའི་འཁོར་ལོ་སྐོར་འགྱུར་ལགས། 

79-1-83b

ཇི་ལྟར་གཡོ་བ་མ་མཆིས་པར། །སྔོན་གྱི་སྨོན་ལམ་ཇི་ལྟ་བཞིན། །སེམས་ཅན་ཐམས་ཅད་ཀུན་ལ་ནི། །ཆོས་རྣམས་ཡང་དག་སྟོན་འགྱུར་ལགས། །ཆོས་རྣམས་ཡང་དག་བསྟན་པས་ན། །འཁོར་བ་ལས་ནི་གྲོལ་
འགྱུར་ལགས། །ཇི་ལྟར་བགྱིས་ན་སེམས་ཅན་རྣམས། །གཏན་དུ་བདེ་བ་འཐོབ་འགྱུར་ལགས། །སེམས་ཅན་རྣམས་ལ་སྨན་སླད་དུ། །འཇིག་རྟེན་འདྲེན་ལ་བདག་ཞུ་ན། །ཐམས་ཅད་མཁྱེན་ཅིང་གཟིགས་པ་པོའི། །
ཐུགས་རྗེས་བདག་ལ་བཀས་བཤད་གསོལ། །ཆོས་ནི་གང་དང་གང་དག་གིས། །བྱང་ཆུབ་སེམས་དཔའ་སྨིན་བགྱིད་པ། །ཆོས་ཀྱི་རྒྱ་མཚོ་ཐམས་ཅད་ཀྱིས། །ཏིང་འཛིན་ཕྱག་རྒྱ་མཛད་དུ་གསོལ། །སངས་རྒྱས་
ཆོས་ལ་རབ་མོས་ཤིང་། །བྱང་ཆུབ་ཆེ་ལ་གང་ལྟ་བ། །ཆོས་ཀྱི་སྒྲ་འདི་ཐོས་གྱུར་ན། །ལུས་ཀུན་ཁྱབ་པར་དགའ་བར་འགྱུར། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་
ཡས་ལ་བཀའ་སྩལ་པ། བློ་གྲོས་མཐའ་ཡས་ཁྱོད་ཀྱིས་སྔོན་སངས་རྒྱས་ཚད་མེད་པ་རྣམས་ལ་མཆོད་ཅིང་རིམ་གྲོ་བྱས་པ་དང་། དགེ་བའི་རྩ་བ་རྣམས་བསྐྱེད་ཅིང་ཡོན་ཏན་གཞལ་དུ་མེད་པ་བསགས་པས་
ན་ཆོས་ཟབ་མོ་འདི་ལ་རབ་ཏུ་གདུང་བ་མོས་པར་གྱུར་པ་དང་། བསམ་པ་རྒྱ་ཆེན་པོས་སེམས་ཅན་ཡོངས་སུ་སྨིན་པར་བྱ་བའི་ཕྱིར་སྙིང་རྗེ་ཆེན་པོ་བསྐྱེད་ནས་དེ་བཞིན་གཤེགས་པ་ལ་ཞུ་བ་ཞུས་པ་ལེགས་སོ་ལེགས་སོ། །
ཁྱོད་ལེགས་པར་ཉོན་ལ་ཤིན་དུ་ཡིད་ལ་ཟུང་ཤིག་དང་། ངས་ཁྱོད་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོན་ཏན་མངོན་པར་བསྒྲུབ་པ་དང་། ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ལ་གཞོལ་བར་གྱུར་པ་ཡང་དག་པར་བཤད་པར་བྱའོ། །བཅོམ་ལྡན་འདས་དེ་བཞིན་དུ་ཐོས་པར་འཚལ་ལོ་ཞེས་གསོལ་པ་དང་། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་

79-1-84a

པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་སྩལ་ཏོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་
ཕྱིར་གོ་ཆ་ཆེན་པོ་བགོས་པ་དེས་སེམས་ཅན་རྣམས་ཡོངས་སུ་བསྡུད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་སྦྱིན་པ་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་
ཅན་རྣམས་ཚུལ་ཁྲིམས་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་བཟོད་པ་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་བརྩོན་
འགྲུས་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་བསམ་གཏན་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་ཤེས་རབ་རྣམ་པར་དག་པ་ལ་
དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་བདེ་བ་ཐོབ་པར་བྱ་བའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་ལ་ཕན་གདགས་པའི་དངོས་པོ་དང་མཚུངས་པར་ལྡན་པའི་
སེམས་བསྐྱེད་པའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་ཀྱི་འདོད་ཆགས་དང་། ཞེ་སྡང་དང་། གཏི་མུག་གི་ནད་ཀྱི་གཉེན་པོར་བྱ་བའི་ཕྱིར་གོ་ཆ་ཆེན་པོ་བགོ་བར་བྱའོ། །ཡོན་ཏན་ཆེན་པོ་
མངོན་པར་བསྒྲུབ་པ་ལ་མཁས་པར་བྱ་བའི་ཕྱིར་གོ་ཆ་ཆེན་པོ་བགོ་བར་བྱའོ། །བླ་ན་མེད་པའི་ཡེ་ཤེས་ལེགས་པར་ཡོངས་སུ་རྫོགས་པར་བྱ་བའི་ཕྱིར་གོ་ཆ་ཆེན་པོ་བགོ་བར་བྱའོ། །སེམས་ཅན་རྣམས་
འཁོར་བའི་འཇིགས་པ་ལས་ཡོངས་སུ་བསྐྱབ་པའི་ཕྱིར་གོ་ཆ་ཆེན་པོ་བགོ་བར་བྱའོ། །མཚུངས་པ་མེད་པའི་ཡེ་ཤེས་ལེགས་པར་ཡོངས་སུ་རྫོགས་པར་རབ་ཏུ་བསྟན་པར་འདོད་པའི་ཕྱིར་གོ་ཆ་ཆེན་པོ་བགོ་བར་བྱའོ། །

79-1-84b

སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་བདུད་དང་། བདུད་ཀྱི་འཁོར་དང་། བདུད་ཀྱི་ཕོ་ཉ་དང་། བདུད་ཀྱི་ལས་ལ་གནས་པ་དང་། ལྟ་བ་རྣམས་ཀྱི་ཐིབས་པོ་དང་། ལམ་ཡ་ང་བར་ཞུགས་པའི་མུ་
སྟེགས་ཅན་གྱི་བསྟན་པ་ལས་རབ་ཏུ་བྱུང་བ་ཐམས་ཅད་དང་། འཇིག་རྟེན་རྒྱང་པན་དང་། མུ་སྟེགས་ཅན་དང་འཐུན་པ་ཇི་སྙེད་པ་དག་དང་འཐབ་པའི་ཕྱིར་གོ་ཆ་ཆེན་པོ་བགོ་བར་བྱའོ། བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་དེ་ལྟར་གོ་ཆ་ཆེན་པོ་བགོ་ཞིང་། གོ་ཆ་མི་སྤོང་པར་བརྩོན་འགྲུས་ཆེན་པོ་བསྐྱེད་ནས་སེམས་ཅན་གྱི་ཁམས་ཐམས་ཅད་དུ་ཞུགས་ཏེ། བཟོད་པ་ལ་གནས་ནས་འཇིགས་པ་རྣམས་སྤངས་
ཏེ། མི་སྐྲག་མི་དངང་། མི་གཡོ་མི་འཁྲུག་པར་བྱས་ནས་གོ་ཆ་དཔག་ཏུ་མེད་པ་དག་བགོ་བར་བྱའོ། དེ་འདི་ལྟ་སྟེ། སེམས་ཅན་ཐམས་ཅད་ཡོངས་སུ་སྐྱོབ་པའི་གོ་ཆ་དང་། ལྟ་བའི་ཐིབས་པོ་ཐམས་
ཅད་གཅོད་པའི་གོ་ཆ་དང་། བདུད་ཀྱི་དཔུང་རྣམ་པར་འཇིག་པར་བྱེད་པའི་གོ་ཆ་དང་། ཤེས་རབ་ཡང་དག་པར་ལེན་པའི་གོ་ཆ་དང་། ཚོགས་དཔག་ཏུ་མེད་པ་སོགས་པའི་གོ་ཆ་དང་། ཁུར་ལྕི་བ་རྣམས་
སྒྲོལ་བའི་གོ་ཆ་དང་། མངོན་པར་ཡིད་ཆེས་པ་འཕེལ་བར་བྱེད་པའི་གོ་ཆ་དང་། ཚུལ་ཁྲིམས་ལ་གནས་པའི་གོ་ཆ་དང་། ལས་ཀྱི་ཀུན་གཞི་ཡོངས་སུ་སྦྱོང་བའི་གོ་ཆ་དང་། ཐམས་ཅད་རྣམ་པར་དག་པར་བྱེད་པའི་
སྟོབས་ཀྱི་གཏེར་གྱི་གོ་ཆ་དང་། ཐབས་མཁས་པའི་གཏེར་གྱི་གོ་ཆ་དང་། མངོན་པར་ཞེན་པ་ཐམས་ཅད་ཡོངས་སུ་སྤོང་བའི་གོ་ཆ་དང་། ལྡོག་པ་དང་། འགྱེད་པ་མེད་པའི་ཤེས་རབ་ཀྱི་གོ་ཆ་གང་ཡིན་པའོ། །
བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གོ་ཆ་ཆེན་པོ་དེ་ལྟ་བུ་བགོས་ནས་འཁོར་བའི་མཐའ་ཇི་སྲིད་པ་དེའི་བར་དུ་ཤིན་དུ་བསྟན་པའི་བརྩོན་འགྲུས་ཀྱི་སྟོབས་གཡོ་བ་མི་སྤོང་བར་བླ་ན་མེད་པ་ཡང་དག་པར་

79-1-85a

རྫོགས་པའི་བྱང་ཆུབ་ལ་གཞོལ་བར་བྱའོ། དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །བྱང་ཆུབ་སེམས་དཔའ་སེམས་ཅན་རྣམས། །བསྡུ་ཕྱིར་གོ་ཆ་
བགོ་བར་བྱ། །སེམས་ཅན་རྣམས་ནི་ཚད་མེད་ཕྱིར། །གོ་ཆ་བགོས་བ་ཚད་མེད་དོ། །སྦྱིན་པ་རྣམ་པར་དག་པའི་ཕྱིར། །ཐམས་ཅད་རབ་ཏུ་དགའ་བར་བྱེད། །སེམས་ཅན་ལ་ནི་ཕན་གདགས་ཕྱིར། །གོ་ཆ་
འདི་ནི་བགོ་བར་བྱ། །ཚུལ་ཁྲིམས་རྣམ་པར་དག་པའི་ཕྱིར། །གོ་ཆ་འདི་ནི་བགོ་བར་བྱ། །འཇིག་རྟེན་ལ་ནི་ཕན་འདོགས་བྱེད། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་འདི་ནི་བགོ་བར་བྱ། །
བཟོད་པ་རྣམ་པར་དག་པའི་ཕྱིར། །དར་ཤིང་བདེ་བར་གནས་པར་བྱེད། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་འདི་ནི་བགོ་བར་བྱ། །བརྩོན་འགྲུས་རྣམ་པར་དག་པའི་ཕྱིར། །ཕྱིར་མི་ལྡོག་
པར་འགྲུབ་པར་བྱེད། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་འདི་ནི་བགོ་བར་བྱ། །བསམ་གཏན་རྣམ་པར་དག་པའི་ཕྱིར། །སྤྱོད་ཡུལ་དག་ཀྱང་དེ་བཞིན་ནོ། །།སེམས་ཅན་རྣམས་ལ་ཕན་
གདགས་ཕྱིར། །གོ་ཆ་འདི་ནི་བགོ་བར་བྱ། །ཤེས་རབ་རྣམ་པར་དག་པའི་ཕྱིར། །ཟག་མེད་བླ་ན་མེད་པའི་ཡིན། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་འདི་ནི་བགོ་བར་བྱ། །སེམས་ཅན་
དག་ནི་ཐམས་ཅད་ལ། །བདེ་བའི་ཡོ་བྱད་སྦྱིན་དགོས་པས། །དོན་དེ་ལེགས་པར་ཤེས་པའི་ཕྱིར། །གོ་ཆ་འདི་ནི་བགོ་བར་བྱ། །བྱང་ཆུབ་སེམས་དཔའ་སེམས་ཅན་རྣམས། །ཕན་པའི་དངོས་པོ་བྱ་དགོས་
པས། །བསྡུ་བ་རྣམ་དག་བཞི་པོ་ཡིས། །སྲིད་པ་ཀུན་དུ་འཇུག་པར་བྱེད། །འདོད་ཆགས་ཞེ་སྡང་གཏི་མུག་ནད། །གཉེན་པོ་དག་ནི་བསྟན་པའི་ཕྱིར། །སེམས་ཅན་ལ་ནི་སྨན་གཏོང་བས། །ནད་རྣམས་

79-1-85b

རབ་ཏུ་སེལ་བར་བྱེད། །དེས་ན་བྱང་ཆུབ་སེམས་དཔའ་རྣམས། །གོ་ཆ་ལེགས་པར་བགོས་ནས་ནི། །ཡོན་ཏན་རྣམས་ཀྱི་ཚོགས་དག་ན། །མཁས་པ་དཔག་མེད་ཐོབ་པ་ཡིན། །སེམས་ཅན་འཁོར་བའི་
སྡུག་བསྔལ་གྱི། །ཉམས་ཐག་ཤིན་ཏུ་མི་བདེ་བས། །བདག་གིས་ཡོངས་སུ་བསྐྱབ་སྙམ་ནས། །གོ་ཆ་དཔག་མེད་བགོ་བར་བྱ། །འཁོར་བའི་སྡུག་བསྔལ་ཚད་མེད་རྣམས། །བདག་གིས་རྣམ་པར་དགྲོལ་
སྙམ་ནས། །སྲིད་ལྟའི་དྲ་བས་གླགས་པ་དག ། །ཐམས་ཅད་ཡོངས་སུ་བཅད་པར་བྱ། །གང་གིས་ཉོན་མོངས་དྲ་བ་འདི། ཐམས་ཅད་གཅོད་པར་གང་ནུས་པ། །བརྟན་པའི་བརྩོན་འགྲུས་སྟོབས་དག་
གིས། །དཔའ་བོའི་གོ་ཆ་བགོ་བ་ཡིན། །སེམས་ཅན་དག་ནི་ཐམས་ཅད་ཀུན། །བདེ་བའི་ལམ་ལ་རབ་བཀོད་ཅིང་། །མྱ་ངན་འདས་ལ་གཞོལ་བ་དང་། །བླ་མེད་བདེ་ལ་དགོད་པར་བྱ། །གང་ཞིག་བརྩོན་
འགྲུས་ཆེན་པོའི་སྟོབས། །གོ་ཆ་འདི་ནི་བགོ་བྱེད་པ། །བདུད་རྣམས་ཐམས་ཅད་དག་དང་ནི། །རྟག་ཏུ་འཐབ་ཀྱང་ངལ་མི་འགྱུར། །གང་ཞིག་ལྟ་ལ་རབ་གནས་ནས། །ཐིབས་པོ་དག་དུ་གང་ཞུགས་དང་། །
འཇིག་རྟེན་རྒྱང་པན་པ་དག་པ་དག་ལ། །གོ་ཆ་བགོས་ནས་ཕན་གདགས་བྱ། །གཞན་ཡང་འཁོར་ནི་ཚད་མེད་པ། །ལམ་གོལ་དག་ཏུ་ཞུགས་པ་རྣམས། །དེ་དག་ལ་ནི་ཕན་གདགས་ཕྱིར། །གོ་ཆ་དཔག་མེད་བགོ་
བར་བྱ། །དེ་ལྟར་གོ་ཆ་བགོས་ནས་ནི། །གོ་ཆ་ཆེན་པོ་མི་སྤོང་བར། །བརྩོན་འགྲུས་ཆེན་པོའི་སྟོབས་བསྐྱེད་ན། །གོ་བགོས་རབ་རྟགས་ཁྱད་པར་འཕགས། །སེམས་ཅན་ཁམས་ལ་རབ་ཞུགས་ཏེ། །བཟོད་པ་ལ་ནི་
གནས་གྱུར་ནས། །བརྟན་པའི་བཟོད་པ་བསྒྲུབ་བྱེད་པ། །གོ་བགོས་གོང་ན་མེད་པ་ཡིན། །འཇིགས་པ་དག་ནི་རབ་སྤོངས་ཤིང་། །སྐྲག་པ་དག་ནི་མེད་པར་ཡང་། །གོ་ཆ་དཔག་མེད་བགོས་ནས་ནི། །ཐམས་ཅད་རབ་

79-1-86a

བརྩོན་འགྲུབ་པར་བྱ། །གང་ཞིག་གོ་ཆ་རབ་གནས་པ། །རྟག་ཏུ་ཡང་དག་རྟོགས་གྱུར་ཅིང་། །རབ་དབེན་གཡོ་བ་མེད་པས་ན། །མི་འཁྲུགས་ལྡོག་པར་མི་འགྱུར་རོ། །དེ་ལྟའི་གོ་ཆ་རབ་བགོས་
ནས། །བློ་དང་ལྡན་པས་གཞན་ཡང་ནི། །སེམས་ཅན་སྐྱོབ་པའི་གོ་བགོས་ཏེ། །བདུད་ཀྱི་གོ་ཆ་གཞོམ་པར་བྱ། །ཡོན་ཏན་དཔག་མེད་གོ་ཆ་དག ། །ཐམས་ཅད་རབ་ཏུ་བགོ་བར་བྱ། །དབང་པོ་ཤེས་མཆོག་གང་ཟག་
གིས། །བགོས་ནས་བདེ་བ་ཐོབ་པར་འགྱུར། །ཁུར་ལྕི་རབ་ཏུ་སྤང་བའི་ཕྱིར། །བླ་མེད་གོ་ཆ་བགོས་ནས་སུ། །སེམས་ཅན་ཐམས་ཅད་ཡོངས་བཟླས་ནས། །སྡུག་བསྔལ་ཁུར་ལས་ཐར་བར་བྱ། །རྣམ་
དག་དད་པ་འཕེལ་བྱེད་ཅིང་། །དབང་པོ་དྲུག་ནི་རབ་བསྡོམ་པ། །ཚུལ་ཁྲིམས་གང་དག་ལྡན་པ་ནི། །གོ་བགོས་གོང་ན་མེད་པ་ཡིན། །དཔའ་བོ་ཡེ་ཤེས་བསྒྲུབ་པ་ལ། །བྱང་ཆུབ་སེམས་དཔའ་རབ་གནས་པས། །
སྤྱོད་ལམ་ཚུལ་ཁྲིམས་ལྡན་པས་ན། །གོ་བགོས་གཡོ་བ་མེད་པ་ཡིན། །སྔོན་གྱི་རྒྱལ་བ་མང་པོ་ལས། །རྣམ་དག་ལས་ནི་བསྒྲུབས་པས་ན། །དེ་ཕྱིར་གོ་ཆ་རབ་བགོས་ནས། །རྟག་ཏུ་འཇིགས་པ་མེད་
པ་ཡིན། །སེམས་ཅན་ལ་ནི་སྲིད་པའི་བློས། །འཇིག་རྟེན་ལས་ནི་ཕན་འདོགས་པས། །ཐབས་ནི་རབ་ཏུ་རྟོགས་པས་ན། །གོ་བགོས་ལེགས་པར་གནས་པ་ཡིན། །ཐབས་མཁས་ཡེ་ཤེས་གང་
ཡིན་པ། བྱང་ཆུབ་སེམས་དཔས་རབ་རྟོགས་པས། །དེ་ལྟར་གོ་ཆ་བགོས་ནས་ནི། །འཆིང་བ་མཐའ་དག་གཅོད་པར་བྱེད། །མངོན་ཞེན་ཐམས་ཅད་རབ་སྤོང་ཞིང་། །ཡིད་ཆེས་རྒྱབ་ཀྱིས་མི་ཕྱོགས་པ། །གོ་
བགོས་བློ་དང་ལྡན་པ་ནི། །བླ་མེད་བྱང་ཆུབ་བགྲོད་པར་འགྱུར། །བྱང་ཆུབ་སེམས་དཔའ་ངེས་པར་ནི། །བདག་དང་གཞན་ལ་ཕན་འདོགས་གང་། །བརྩོན་འགྲུས་སྟོབས་ལ་རབ་གནས་པ། །བརྟན་ཞིང་ཕྱིར་ལྡོག་མི་འགྱུར་

79-1-86b

རོ།། །། བམ་པོ་གཉིས་པ།། །།གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསྐལ་པ་ཚད་མེད་པ་ནས་ཁུར་ཆེན་པོ་ཁྱེར་ཞིང་གོ་ཆ་ཆེན་པོ་བགོས་
པའི་གོ་ཆ་དེ་ལྟ་བུ་དེ་ནི་བདུད་དམ། བདུད་ཀྱི་འཁོར་རམ། བདུད་ཀྱི་ཕོ་ཉ་འམ། ལོག་པར་ལྟ་བའི་ཐིབས་པོ་དགོན་དུང་མ་རུངས་པར་ཞུགས་པའི་སེམས་ཅན་རྣམས་ཀྱིས་མཐོང་བར་མི་འགྱུར་རོ། །དེ་ཅིའི་ཕྱིར་
ཞེ་ན། གཟུགས་མེད་ཅིང་བསྟན་དུ་མེད་པ་དང་། ལྟོས་པ་མེད་ཅིང་མཚན་མ་མེད་པ་དང་། མཚན་མ་སྤངས་པས་མཚན་མ་དང་བྲལ་བ་དང་། མིང་དང་ཡི་གེ་མེད་པའི་ཕྱིར་རོ། །བློ་གྲོས་མཐའ་ཡས་གལ་
ཏེ་ལ་ལ་ཞིག་མདའི་ཚད་རི་རབ་ཙམ་ཤ་སྟག་འཕངས་ན་ཡང་ཕོག་པར་མི་འགྱུར་ལ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པ་ཐམས་ཅད་བདུད་ཀྱི་རྒྱལ་པོར་གྱུར་ལ། 
རེ་རེ་ལ་ཡང་བདུད་ཀྱི་དམག་རྣམ་པ་སྣ་ཚོགས་འཁོར་དང་བཅས་པར་གྱུར་པ་དེ་དག་དུས་གཅིག་ཏུ་མདའ་རྣོན་པོ་ཚད་རི་རབ་ཙམ་ཤ་སྟག་འཕངས་ན་ཡང་ནམ་ཡང་བྱང་ཆུབ་སེམས་དཔའ་སེམས་དཔའ་ཆེན་
པོ་དེ་ལྟ་བུའི་གོ་ཆ་བགོས་པ་ལ་རྣམ་པར་གཞིགས་པ་འམ། ཐ་ན་སྤུ་ཉག་མ་གཅིག་ཙམ་ཉམས་པར་བྱེད་པར་མི་ནུས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་སེམས་ཀྱིས་ཀྱང་ཐ་
དད་པའི་འདུ་ཤེས་སྐྱེད་པར་མི་ནུས་ན་ལུས་ཀྱིས་གནོད་པ་བྱ་བ་ལྟ་སྨོས་ཀྱང་ཅི་དགོས། བྱང་ཆུབ་སེམས་དཔའ་སེམས་དཔའ་ཆེན་པོ་གང་སེམས་རྩེ་གཅིག་ཏུ་དེ་དག་འདུལ་བར་བྱེད་པ་གང་ཡིན་པ་དེ་དག་ནི་
བདུད་མང་པོ་ཕམ་པར་བྱེད་ཅིང་ཉེ་བར་ཞི་བར་ཡང་བྱེད་ལ། གོ་ཆ་དེ་ལྟ་བུ་ལ་གནས་ཤིང་གཡོ་བ་མེད་པར་སེམས་ཅན་ཐམས་ཅད་ཀྱིས་ཀྱང་རྣམ་པར་འཇིག་པར་བྱེད་མི་ནུས་སོ། །དེ་ཅིའི་ཕྱིར་ཞེ་ན། འདི་ལྟར་

79-1-87a

མཚན་མ་མེད་པའི་ཕྱིར་དང་། སེམས་ཅན་རྣམས་ཀྱིས་བལྟ་བར་བྱ་བའི་སྤྱོད་ཡུལ་མ་ཡིན་པའི་ཕྱིར་སེམས་ཅན་ཐམས་ཅད་ཀྱིས་མཐོང་ཞིང་ཤེས་པར་མི་ནུས་སོ། །བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་ནི་ཆོས་ཐམས་ཅད་རྟོགས་པའི་ཕྱིར་ཡང་དག་པ་ཇི་ལྟ་བ་བཞིན་དུ་གོ་ཆ་ཆེན་པོ་བགོས་པ་དེ་དག་ཤེས་ཤིང་མཐོང་ངོ་། །སེམས་ཅན་རྣམས་ཡོངས་སུ་བསྐྱབ་པའི་ཕྱིར་ཆོས་
ཐམས་ཅད་ལ་ཡང་མངོན་པར་ཞེན་པ་མི་བྱེད་དོ། །སེམས་ཅན་རྣམས་ལ་ཕན་གདགས་པའི་ཕྱིར་ཆོས་ཐམས་ཅད་ལ་ཡང་དམིགས་པར་མི་བྱེད་དེ། དེ་ལྟ་བས་ན་སེམས་ཅན་རྣམས་ཀྱིས་མཐོང་ཞིང་
ཤེས་པར་མི་ནུས་སོ། །གོ་ཆ་དེ་ལྟ་བུ་བགོས་པ་དེ་དག་ལ་ནི་ཁ་དོག་གི་མཚན་མ་མེད་ཅིང་བསྟན་དུ་མེད་པ་དང་། ཚིག་གི་བརྗོད་པ་མེད་པའི་ཕྱིར་གཟུགས་དང་ཡང་མཚུངས་པར་ལྡན་པར་མི་འགྱུར་ལ། ཚོར་
བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་དང་། ཡང་མཚུངས་པར་ལྡན་པར་མི་འགྱུར་རོ། །ནང་དང་མཚུངས་པར་ལྡན་པར་མི་འགྱུར། ཕྱི་རོལ་དང་མཚུངས་པར་ལྡན་པར་མི་འགྱུར། ནང་དང་
ཕྱི་རོལ་གཉིས་ཀ་དང་མཚུངས་པར་ལྡན་པར་མི་འགྱུར། ནང་ཡང་མ་ཡིན་ཕྱི་རོལ་ཡང་མ་ཡིན་པ་དང་མཚུངས་པར་ལྡན་པར་མི་འགྱུར། ཁམས་དང་ཡང་མཚུངས་པར་ལྡན་པར་མི་འགྱུར། སྐྱེ་མཆེད་དང་ཡང་
མཚུངས་པར་ལྡན་པར་མི་འགྱུར། སའི་ཁམས་དང་ཡང་མཚུངས་པར་ལྡན་པར་མི་འགྱུར། ཆུ་དང་། མེ་དང་། རླུང་དང་། ནམ་མཁའ་དང་། རྣམ་པར་ཤེས་པའི་ཁམས་དང་ཡང་མཚུངས་པར་
ལྡན་པར་མི་འགྱུར། འདོད་པའི་ཁམས་དང་ཡང་མཚུངས་པར་ལྡན་པར་མི་འགྱུར། གཟུགས་དང་གཟུགས་མེད་བའི་ཁམས་དང་ཡང་མཚུངས་པར་ལྡན་པར་མི་འགྱུར། མངོན་པར་འདུ་བྱེད་པ་དང་

79-1-87b

བཅས་པ་དང་། ཡང་མཚུངས་པར་ལྡན་པར་མི་འགྱུར། མངོན་པར་འདུ་བྱེད་པ་མེད་པ་དང་ཡང་མཚུངས་པར་ལྡན་པར་མི་འགྱུར། མངོན་པར་འདུ་བྱེད་པ་དང་བཅས་པ་དང་། མངོན་པར་འདུ་བྱེད་པ་མེད་པ་དང་
ཡང་མཚུངས་པར་ལྡན་པར་མི་འགྱུར། མངོན་པར་འདུ་བྱེད་པ་དང་བཅས་པ་ཡང་མ་ཡིན། མངོན་པར་འདུ་བྱེད་པ་མེད་པ་ཡང་མ་ཡིན་པ་དང་། ཡང་མཚུངས་པར་ལྡན་པར་མི་འགྱུར། ཉན་ཐོས་ཀྱི་ས་དང་ཡང་
མཚུངས་པར་ལྡན་པར་མི་འགྱུར། རང་སངས་རྒྱས་ཀྱི་ས་དང་ཡང་མཚུངས་པར་ལྡན་པར་མི་འགྱུར། སངས་རྒྱས་ཀྱི་ས་དང་ཡང་མཚུངས་པར་ལྡན་པར་མི་འགྱུར། ཚིག་གི་ལམ་དང་ཡང་མཚུངས་པར་
ལྡན་པར་མི་འགྱུར། གཟུགས་ཀྱི་རྒྱུ་དང་ཡང་མཚུངས་པར་ལྡན་པར་མི་འགྱུར། གཟུགས་ཀྱི་མཚན་ཉིད་དང་ཡང་མཚུངས་པར་ལྡན་པར་མི་འགྱུར། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་
པའི་རྒྱུ་དང་མཚུངས་པར་ལྡན་པར་མི་འགྱུར། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་མཚན་ཉིད་དང་ཡང་མཚུངས་པར་ལྡན་པར་མི་འགྱུར། མཚན་ཉིད་དང་། མཚན་ཉིད་མ་ཡིན་
པ་དང་ཡང་མཚུངས་པར་ལྡན་པར་མི་འགྱུར། ཆོས་ཐམས་ཅད་དང་མཚུངས་པར་ལྡན་པར་ཡང་མི་འགྱུར། མཚུངས་པར་ལྡན་པར་མི་འགྱུར་བ་ཡང་མ་ཡིན་ཏེ། འཆིང་བ་མེད་པ། གྲོལ་བ་མེད་པ་བགྲང་བ་
དང་། དཔེ་དག་གིས་ཤེས་པར་བྱ་བ་མ་ཡིན་པ་སྟེ། འདི་ལྟར་ཆོས་ཐམས་ཅད་ནི་བགྲང་བ་ལས་ཡང་དག་པར་འདས་པའི་ཕྱིར་རོ། །དེ་ལྟ་བུའི་གོ་ཆ་དང་ལྡན་པ་དེ་དག་ནི་ཆོས་ཐམས་ཅད་དུ་ལྟ་བ་ཡང་
དག་པར་མི་དམིགས་ཏེ། གཟུགས་སུ་ལྟ་བ་ཡང་དག་པར་མི་དམིགས་སོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པར་ལྟ་བར་ཡང་དག་པར་མི་དམིགས་སོ། །ཐ་ན་

79-1-88a

ཆོས་ཅུང་ཟད་ཙམ་དུ་ལྟ་བ་ཡང་དག་པར་མི་དམིགས་སོ། །དེ་བཞིན་དུ་གོ་ཆ་དེ་ལྟ་བུ་བགོས་པ་དེ་དག་ནི་ཆོས་ཐམས་ཅད་དང་མཚུངས་པར་ལྡན་པ་ཡང་མ་ཡིན། མཚུངས་པ་མི་ལྡན་པ་
ཡང་མ་ཡིན་ནོ། །གཟུགས་དང་མཚུངས་པར་ལྡན་པ་ཡང་མ་ཡིན། མཚུངས་པར་མི་ལྡན་པ་ཡང་མ་ཡིན་ནོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པར་དང་མཚུངས་པར་ལྡན་
པ་ཡང་མ་ཡིན། མཚུངས་པར་མི་ལྡན་པ་ཡང་མ་ཡིན་ཏེ། ཆོས་ཐམས་ཅད་ཀྱི་མཚུངས་པར་ལྡན་པ་དང་། མཚུངས་པར་མི་ལྡན་པ་དེ་དག་ཐག་བསྲིངས་པ་ཡིན་ནོ། །དེ་བཞིན་དུ་གོ་ཆ་དེ་ལྟ་བུ་བགོས་པ་
དེ་དག་ལ་ནི་མངོན་པར་འདུ་བྱ་བ་མེད་དེ། བྱེད་པ་མེད་པའི་ཕྱིར་རོ། །མཚན་མ་ཡང་མེད་དེ། མཚན་མ་ཉིད་ཡོད་པ་མ་ཡིན་པའི་ཕྱིར་རོ། །གནས་ཀྱི་མཚན་མ་མེད་པ། འདུས་པའི་མཚན་མ་མེད་པ། 
རྣམ་པར་རྟོག་པ་མེད་པ། གཡོ་བ་མེད་པ། དམིགས་པ་མེད་པ། ངོ་བོ་ཉིད་དུ་བལྟ་བ་མེད་པ་སྟེ། གོ་ཆ་བགོས་པ་ཉིད་ཀྱང་དམིགས་སུ་མེད་པའོ། །དེ་བཞིན་དུ་གོ་ཆ་བགོས་པ་ཉིད་ཀྱང་ཡང་དག་པར་རྗེས་
སུ་མི་མཐོང་ངོ་། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གོ་ཆ་ཡང་དག་པར་བགོས་པ་ན་གང་གིས་གོ་ཆ་བགོས་པ་དང་། གང་དུ་གོ་ཆ་བགོས་པ་དང་། གང་ལས་གོ་ཆ་
བགོས་པ་ཡང་དག་པར་རྗེས་སུ་མི་མཐོང་བ་དང་། བདག་གིས་གོ་ཆ་བགོས་པ་དང་། བདག་གིས་གོ་ཆ་བགོས་པར་ཡང་ཡང་དག་པར་རྗེས་སུ་མི་མཐོང་བ་དང་། འདིར་གོ་ཆ་བགོས་པ་དང་། གཞན་དུ་གོ་ཆ་
བགོས་པ་ཡང་ཡང་དག་པར་རྗེས་སུ་མི་མཐོང་བ་དང་། གོ་ཆ་དེ་ལྟ་བུ་བགོས་པའི་སེམས་ཅན་ཡང་ཡང་དག་པར་རྗེས་སུ་མི་མཐོང་སྟེ། ཆོས་ཐམས་ཅད་མངོན་པར་འདུས་བྱ་བ་མེད་པའི་ཕྱིར་དང་། ཡོད་པ་མ་

79-1-88b

ཡིན་པའི་ཕྱིར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་དེ་ལྟ་བུ་བགོས་པ་དེ་དག་ནི་དེ་བཞིན་གཤེགས་པའི་གོ་ཆ་བགོས་པ་ཡིན་པས་ལུས་ཀྱང་མི་དམིགས། ངག་ཀྱང་མི་དམིགས། ཡིད་ཀྱང་མི་དམིགས་ཏེ་དམིགས་
སུ་མེད་པའི་ཕྱིར་རྣམ་པར་རྟོག་པ་རབ་ཏུ་སྤངས་པ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་གལ་ཏེ་ཆོས་ཅུང་ཟད་ཙམ་ལ་གནས་པར་གྱུར་ཏམ། གལ་ཏེ་ཆོས་ཅུང་ཟད་ཙམ་ལ་དམིགས་
ནས་གོ་ཆ་བགོས་སམ། གོ་ཆ་བགོ་འམ། གོ་ཆ་བགོ་བར་འགྱུར་བ་དེ་དག་ནི་གོ་ཆ་ཆེན་པོ་བགོས་པ་ཞེས་མི་བྱ་སྟེ། གལ་ཏེ་སེམས་དེ་དག་ལས་ཡང་དག་པར་འདས་པར་གྱུར་པ་ན་གདོད་བསམ་གྱིས་མི་ཁྱབ་
པའི་གོ་ཆ་ཆེན་པོ་བགོས་པ་ཞེས་བརྗོད་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་ཅན་འགའ་ཙམ་གྱི་ཕྱིར་གོ་ཆ་ཆེན་པོ་བགོས་པ་མ་ཡིན། བསྐལ་པ་གཅིག་གི་སེམས་
ཅན་ཙམ་གྱི་ཕྱིར་གོ་ཆ་ཆེན་པོ་བགོས་པ་མ་ཡིན་བསྐལ་པ་བརྒྱ་སྟོང་དང་བསྐལ་པ་བྱེ་བ་བརྒྱ་སྟོང་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་གི་སེམས་ཅན་ཙམ་གྱི་ཕྱིར་གོ་ཆ་ཆེན་པོ་བགོས་པ་མ་ཡིན་གྱི། 
བསྐལ་པ་ཚད་མེད་པ་གྲངས་མེད་པའི་སེམས་ཅན་གྱི་ཕྱིར་གོ་ཆ་ཆེན་པོ་བགོས་པ་ཡིན་པས་དེའི་ཕྱིར་གོ་ཆ་ཆེན་པོ་ཚད་མེད་པ་བགོས་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་
རྣམས་ནི་གོ་ཆ་ཡང་དག་པར་བགོས་པ་ན་སེམས་ཅན་གྱི་འདུ་ཤེས་ལ་མི་གནས་པའི་གོ་ཆ་གྱོན་པར་བྱེད་དོ། །སེམས་ཅན་གྱི་འདུ་ཤེས་མི་སྐྱེད་པའི་གོ་ཆ་དང་། སེམས་ཅན་གྱི་འདུ་ཤེས་སྤང་བའི་
གོ་ཆ་དང་། བདག་གི་འདུ་ཤེས་བཟློག་པའི་གོ་ཆ་དང་། སེམས་ཅན་གྱི་ངོ་བོ་ཉིད་ཤེས་པའི་གོ་ཆ་དང་། བདག་གི་ངོ་བོ་ཉིད་ཤེས་པའི་གོ་ཆ་དང་། འདུ་ཤེས་དང་། ཚོར་བ་ལས་ཡང་དག་པར་འདས་པའི་

79-1-89a

གོ་ཆ་དང་། ཆོས་ཐམས་ཅད་ལ་བྱེད་པའི་འདུ་ཤེས་པའི་གོ་ཆ་དང་། མཚན་མའི་གོ་ཆ་དང་། མཚན་མ་མེད་པའི་མཚན་ཉིད་ཀྱི་གོ་ཆ་དང་། སྨོན་པ་མེད་པའི་མཚན་ཉིད་ཀྱི་གོ་ཆ་དང་། 
ཆོས་ཐམས་ཅད་སྐྱེ་བ་མེད་པའི་མཚན་ཉིད་ཀྱི་གོ་ཆ་དང་། འགག་པ་མེད་པའི་མཚན་ཉིད་ཤེས་པའི་གོ་ཆ་དང་། ཆོས་ཐམས་ཅད་ཀྱི་བྱེ་བྲག་གི་ངོ་བོ་ཉིད་ཀྱི་མཚན་ཉིད་ཤེས་པའི་གོ་ཆ་དང་། ངོ་བོ་
ཉིད་མེད་པའི་མཚན་ཉིད་ཤེས་པའི་གོ་ཆ་དང་། ཆོས་ཐམས་ཅད་ཀྱི་དངོས་པོའི་མཚན་ཉིད་ཤེས་པའི་གོ་ཆ་དང་། དངོས་པོ་མེད་པའི་མཚན་ཉིད་ཀྱི་གོ་ཆ་གྱོན་པར་བྱེད་དོ། །བློ་གྲོས་མཐའ་ཡས་
གལ་ཏེ་དངོས་པོ་མེད་པ་ལ་གནས་ནས་གོ་ཆ་གྱོན་པར་བྱེད་ལ་གོ་ཆ་ཆེན་པོ་བགོས་པ་ཞེས་མི་བྱ་སྟེ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དངོས་པོ་ལ་མི་གནས་པར་ཡེ་ཤེས་ཆེན་
པོ་ཡོངས་སུ་ཚོལ་བ་ཡིན་པས་དེའི་ཕྱིར་གོ་ཆ་ཆེན་པོ་བགོས་པ་ཞེས་བརྗོད་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །བསྐལ་པ་སྟོང་ཕྲག་ཚད་མེད་དུ། །
གོ་ཆ་དཔག་མེད་བགོས་ནས་ནི། །སེམས་ཅན་དག་ནི་ཐམས་ཅད་ཀུན། །སྡུག་བསྔལ་རྣམས་ལས་གྲོལ་བར་བྱེད། དེ་ལྟའི་གོ་ཆ་ཆེ་བགོས་པ། །བདུད་དམ་བདུད་ཀྱི་མངག་པ་དང་། །བདུད་ཀྱི་
ལས་རྣམས་བྱེད་པ་དག ། །མིག་གིས་མཐོང་བར་མི་འགྱུར་རོ། །དེ་ལས་གཞན་པའི་སེམས་ཅན་གང་། །ལྟ་བ་ཐིབས་པོར་ཞུགས་པ་དག ། །བསམ་གྱིས་མི་ཁྱབ་གོ་ཆ་འདི། །དེས་ཀྱང་ཐོབ་
པར་འགྱུར་མ་ཡིན། །གཟུགས་མེད་ཅིང་ནི་ཁ་དོག་མེད། །བསྟན་དུ་མེད་ཅིང་ལྟོས་མེད་པ། །གོ་ཆ་བསམ་གྱིས་མི་ཁྱབ་པ། །དེ་ཕྱིར་མིག་གིས་བལྟ་བྱ་མིན། མིང་མེད་མཚན་མ་མེད་པ་དང་། མཚན་

79-1-89b

མ་ཐམས་ཅད་སྤངས་པས་ན། །གོ་ཆ་བགོས་པ་དཔག་ཏུ་མེད། །གལ་ཏེ་མདའ་ནི་རི་རབ་ཚད། །ཤིན་ཏུ་རྣོན་པོ་འཕངས་ན་ཡང་། བསམ་གྱིས་མི་ཁྱབ་གོ་བགོས་པས། །མདའ་ནི་རང་ཉིད་ཆག་པར་འགྱུར། །
འཇིག་རྟེན་བདུད་ནི་ཇི་སྙེད་པས། །རི་རབ་ཚད་ནི་མདའ་རྣམས་ཀྱིས། །གོ་ཆ་ཆེན་པོ་བགོས་པ་ལ། །དུས་གཅིག་འོངས་ཏེ་འཕངས་ན་ཡང་། །གོ་ཆ་ཆེན་པོ་བགོས་པ་ཡི། །སྤུ་ཉག་གཅིག་ནི་ཉམས་མི་འགྱུར། །
བསམ་གྱིས་མི་ཁྱབ་གོ་བགོས་པས། །གང་ཡང་ཕན་བྱེད་གཞིག་མི་ནུས། །དེ་ནས་བྱང་ཆུབ་སེམས་དཔའ་རྣམས། །ལུས་དང་སེམས་ནི་འགྱུར་བ་མེད། །བསམ་གྱིས་མི་ཁྱབ་གོ་བགོས་ལ། །སུ་ཞིག་
བསྒུལ་ཞིང་གཡོ་བར་ནུས། །སེམས་བསྐྱེད་ཐང་ཅིག་ཙམ་གྱིས་ཀྱང་། །བདུད་ནི་མང་པོ་ཕམ་བྱེད་པས། །བྱང་ཆུབ་སེམས་དཔའ་བསམ་མི་ཁྱབ། །བདུད་དཔུང་དག་ནི་འཇིལ་བར་བྱེད། །དེ་ལྟའི་གོ་ཆ་ཆེ་
བགོས་པ། །ནམས་ཀྱང་གཡོ་བར་མི་འགྱུར་བས། །སེམས་ཅན་དག་ནི་ཐམས་ཅད་ཀྱིས། །མཐོང་བར་ནུས་པ་གང་ཡང་མེད། །སེམས་ཅན་དག་ནི་ཐམས་ཅད་ཀྱིས། །གོ་ཆ་མཚན་ཉིད་མི་ཤེས་པས། །
དེ་ཕྱིར་སེམས་ཅན་ཐམས་ཅད་ཀྱིས། །མིག་གིས་མཐོང་བར་མི་ནུས་སོ། །བྱང་ཆུབ་སེམས་དཔའ་སྐྱབས་མེད་ཅིང་། །ཆོས་རྣམས་ཐམས་ཅད་ཤེས་པས་ནི། །རྡོ་རྗེ་མཆོག་དང་འདྲ་བས་ན། །དེ་ནི་
ལེགས་པར་གོ་བགོས་ཡིན། །ཆོས་རྣམས་ཐམས་ཅད་མི་ལེན་ཅིང་། །སེམས་ཅན་རྣམས་ནི་སྐྱོབ་བྱེད་པས། །སངས་རྒྱས་ཆོས་ཀྱི་རྗེས་འབྲང་ཕྱིར། །དེ་ནི་ལེགས་པར་གོ་བགོས་ཡིན། །གོ་ཆར་
འཛིན་པ་མེད་པ་ནི། །ཆོས་རྣམས་ཀུན་གྱི་རྗེས་འབྲང་བ། །བསམ་གྱིས་མི་ཁྱབ་གོ་བགོས་པས། །དེ་ནི་ལེགས་པར་གོ་བགོས་ཡིན། །གོ་ཆ་བསྟན་པར་མེད་པར་ཡང་། །ཆོས་ནི་ཐམས་ཅད་གང་སྦྱོང་བ། །ཆོས་

79-1-90a

རྣམས་ཚིག་དང་བྲལ་བས་ན། །སྟོན་པར་ནུས་པ་གང་ཡང་མེད། །གཟུགས་དང་མཚུངས་པར་མི་ལྡན་ཞིང་། །ཚོར་བ་དང་ཡང་མཚུངས་མི་ལྡན། །འདུ་ཤེས་འདུ་བྱེད་རྣམ་ཤེས་དང་། །
མཚུངས་ལྡན་འདུས་བ་ཡང་མ་ཡིན། །ནང་དུ་མཚུངས་པར་མི་ལྡན་ཞིང་། །ཕྱི་རོལ་ཏུ་ཡང་མཚུངས་ལྡན་མིན། །ནང་དང་ཕྱི་རོལ་གཉིས་གར་ཡང་། །མཚུངས་ལྡན་འདུས་པ་ཡང་མ་ཡིན། །ཁམས་
དང་མཚུངས་པར་མི་ལྡན་ཞིང་། སྐྱེ་མཆེད་དང་ཡང་མཚུངས་ལྡན་མིན། །ཁམས་དང་སྐྱེ་མཆེད་དག་དང་ཡང་། །འདུས་པར་གྱུར་པར་ཡོད་མ་ཡིན། །ས་དང་མཚུངས་པར་མི་ལྡན་ཞིང་། །ཆུ་དང་མཚུངས་
པར་ལྡན་པ་མིན། །མེ་རླུང་ནམ་མཁའ་རྣམ་ཤེས་དང་། །མཚུངས་ལྡན་འདུས་པ་ཡང་མ་ཡིན། །འདོད་དང་མཚུངས་པར་མི་ལྡན་ཞིང་། །གཟུགས་དང་མཚུངས་པར་ལྡན་པའང་མིན། །གཟུགས་མེད་པའི་ཁམས་
རྣམས་དང་། །མཚུངས་ལྡན་འདུས་པ་ཡང་མ་ཡིན། །ཐམས་ཅད་དམིགས་སུ་མེད་པས་ན། །མངོན་པར་འདུས་བྱེད་རྣམས་དང་ནི། མངོན་པར་འདུས་བྱས་མེད་པ་དང་། །མཚུངས་ལྡན་འདུས་པ་ཡང་མ་
ཡིན། །བསམ་གྱིས་མི་ཁྱབ་གོ་བགོས་པས། །གནས་པ་མེད་ཅིང་འདུས་པ་མེད། །འཆིང་བ་མེད་ཅིང་གྲོལ་བ་མེད། །མཚུངས་པར་མི་ལྡན་ཡོད་མ་ཡིན། །གོ་ཆ་མཐའ་ནི་དཔག་མེད་པས། །ཉན་
ཐོས་དག་གི་ས་དག་དང་། །རང་སངས་རྒྱས་ཀྱི་ས་དང་ཡང་། །མཚུངས་ལྡན་འདུས་པ་ཡང་མ་ཡིན། །སངས་རྒྱས་ཀྱི་ནི་ས་རྣམས་དང་། །ཆོས་རྣམས་ཐམས་ཅད་ཀུན་དང་ནི། །ཐམས་ཅད་མཚུངས་
པར་མི་ལྡན་ཞིང་། །ཐམས་ཅད་འདུས་པར་གྱུར་མ་ཡིན། །ཚིག་གི་ལམ་ནི་སྣ་ཚོགས་ཀྱིས། །གང་ཡང་རིགས་པར་མི་འགྱུར་བས། །དཔག་ཏུ་མེད་པའི་གོ་ཆ་འདི། །ངོ་བོ་མེད་ཅིང་བསམ་དཀའ་ཡིན། །

79-1-90b

ཆོས་རྣམས་ཐམས་ཅད་བདག་དང་ནི། །མཚུངས་ལྡན་མཚུངས་མིན་ལྡན་མིན་པས། །བསམ་གྱིས་མི་ཁྱབ་གོ་ཆ་ནི། །བགྲང་བ་ཀུན་ལས་འདས་པ་ཡིན། །གོ་ཆ་བླ་ན་མེད་པས་ན། །འཆིང་བ་མེད་ཅིང་
གྲོལ་བ་མེད། །གཟུགས་དང་ཚོར་བ་འདུ་ཤེས་དང་། །འདུ་བྱེད་རྣམ་ཤེས་མཚན་ཉིད་མེད། །དེ་དག་གི་ནི་མཚན་ཉིད་དང་། །མཚུངས་ལྡན་འདུས་བ་ཡང་མ་ཡིན། །ཆོས་རྣམས་ཀུན་གྱི་མཚན་ཉིད་དང་། །
མཚུངས་ལྡན་མཚུངས་མིན་ལྡན་པའང་མིན། །མཚན་མ་མེད་པ་དག་དང་ཡང་། །མཚུངས་ལྡན་འདུས་པ་ཡང་མ་ཡིན། །གོ་ཆ་བླ་ན་མེད་པས་ནི། །འཆིང་བ་མེད་ཅིང་གྲོལ་བ་མེད། །ཆོས་རྣམས་དག་ནི་
ཐམས་ཅད་ལས། །ཆོས་གཅིག་གྲངས་སུའང་བགྲང་བ་མེད། །ཆོས་རྣམས་ཐམས་ཅད་དག་ལས་ནི། །གོ་ཆ་དམིགས་པར་མི་འགྱུར་པས། །དེ་ཕྱིར་བླ་ན་མེད་འགྱུར་ཞིང་། །བསམ་གྱིས་མི་ཁྱབ་པ་ཞེས་
བརྗོད། །གོ་ཆ་ལ་ནི་གཟུགས་མེད་ཅིང་། །ཚོར་བ་འདུ་ཤེས་ཡོད་མ་ཡིན། །འདུ་ཤེས་མེད་ཅིང་རྣམ་ཤེས་མེད། །ཕུང་པོ་རྣམས་ཀྱིས་བསྡུས་པའང་མིན། །དེ་ལྟའི་དཔའ་བོ་གང་དག་གིས། །གོ་ཆ་ཆེན་པོ་འདི་
བགོས་པས། །ལུས་དང་སེམས་ནི་མི་དམིགས་པས། །ཆོས་ནི་ཅུང་ཟད་མཐོང་མི་འགྱུར། །བསམ་པ་རྣམས་ལས་འདས་པའི་ཕྱིར། རྣམས་དག་སེམས་ལ་རབ་གནས་ཤིང་། །རྟག་ཏུ་ཞུམ་པ་མེད་
པས་ན། བསམ་གྱིས་མི་ཁྱབ་པ་ཞེས་བརྗོད། །ཤིན་དུ་བརྟན་པས་གོ་བགོས་པ། །དེ་ཡི་སེམས་ནི་མི་སྒུལ་ཞིང་། །བསྐལ་པའི་ཚད་ནི་མི་འཛིན་པས། །བསམ་གྱིས་མི་ཁྱབ་པ་ཞེས་བརྗོད། །
གོ་ཆ་ལ་ནི་ཚད་མེད་ཅིང་། །ཆོས་དང་ཆོས་མིན་མི་ལེན་པས། །དུས་ཀྱི་ཚད་ནི་མེད་པའི་ཕྱིར། །གཞལ་དུ་མེད་པ་ཞེས་བྱའོ། །སེམས་ཅན་འདུ་ཤེས་མི་སྐྱེད་ཅིང་། །བདག་གི་འདུ་ཤེས་ཡོད་མ་ཡིན། །

79-1-91a

འདུ་ཤེས་འདི་ནི་ཤེས་པའི་ཕྱིར། །འདུ་ཤེས་ཐམས་ཅད་སྐྱེ་མི་འགྱུར། །ཆོས་རྣམས་ཐམས་ཅད་ཤེས་ཀྱང་ནི། །ཆོས་དེའི་འདུ་ཤེས་སྐྱེ་མི་འགྱུར། །དེ་ལྟར་གོ་ཆ་གང་བགོས་པས། །
བསམ་གྱིས་མི་ཁྱབ་པ་ཞེས་བརྗོད། །གཞན་ཡང་བློ་གྲོས་མཐའ་ཡས་གོ་ཆ་ཆེན་པོ་འདི་ནི་ཆོས་གྱ་ནོམ་པའི་བཀོད་པའི་ཡོ་བྱད་ཅེས་ཀྱང་བྱ། །མཆོག་ཏུ་གྱུར་པ་ཞེས་ཀྱང་བྱ་སྟེ། རྣམ་པར་གཞིག་པར་མི་
ནུས་པའི་ཕྱིར་རོ། །ཆོས་ཐམས་ཅད་དབྱེར་མེད་པ་ཞེས་བྱ་སྟེ། ཆོས་ཅུང་ཟད་ཙམ་ལ་ཡང་བྱེ་བྲག་ཏུ་འབྱེད་པ་མེད་པའི་ཕྱིར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་གོ་ཆ་འདི་ལྟ་བུ་བགོས་པ་
དེ་ནི་ཤེས་རབ་ཆེན་པོའི་སྟོབས་འཛིན་ཅིང་ཐེག་པ་ཆེན་པོ་དང་ཐེག་པ་མཆོག་དང་མཚུངས་པ་མེད་པའི་ཐེག་པ་དང་། ཡོངས་སུ་བསྡུད་པ་ཆེན་པོའི་ཐེག་པ་དང་དཔག་ཏུ་མེད་པ་སྡུད་པའི་ཐེག་པ་ལ་ཞོན་ནས་
སེམས་ཅན་ཐམས་ཅད་ཐེག་པ་འདིས་འདེགས་པར་བྱེད་ཀྱང་ཐེག་པ་འདི་ལ་མི་ཤོང་བ་གང་ཡང་མེད་ལ། ཐེག་པ་དེ་ཡང་འཕེལ་བ་མེད་ཅིང་འགྲིབ་པ་མེད་པར་སེམས་ཅན་རྣམས་བདེ་བ་ལ་དགོད་པར་བྱེད་
ཅིང་སེམས་ཅན་རྣམས་བདེ་བར་ངེས་པར་བྱུང་བར་བྱེད་དོ། །སེམས་ཅན་གང་ངེས་པར་བདེ་བར་བྱེད་པའི་ཐེག་པ་འདི་ལ་ཞོན་པ་གང་ཡིན་པ་དེ་དག་ལ་ནི་ལུས་དང་སེམས་ངལ་ཞིང་ཉོན་མོངས་པར་གྱུར་པར་ཡོད་
པར་མི་འགྱུར་རོ། །བློ་གྲོས་མཐའ་ཡས་ཐེག་པ་འདི་ནི་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་དང་། ཉན་ཐོས་དང་། རང་སངས་རྒྱས་དང་ཐེག་པ་གཞན་གྱིས་ངེས་པར་འབྱུང་བར་
བྱེད་པ་ཐམས་ཅད་ཟིལ་གྱིས་གནོད་པར་བྱེད་དོ། །ཐེག་པ་འདི་ནི་འགྲོ་བ་མེད་པ་འོང་བ་མེད་པ་གནས་པ་མེད་པ་བལྟར་མེད་པ་ཤེས་པ་མེད་པ་སྔོན་གྱི་མཐའ་མི་དམིགས་པ་ཕྱི་མའི་མཐའ་མི་དམིགས་པ། 

79-1-91b

དབུས་ཀྱི་མཐའ་མི་དམིགས་པ། དུས་གསུམ་མཉམ་པ་ཉིད་དུ་གྱུར་ཅིང་། ནམ་མཁའ་དང་མཚུངས་པ། ཀུན་ནས་ཉོན་མོངས་པའི་རྡུལ་མི་སྤོང་པ། བལྟས་པ་མེད་པ། ཐོགས་པ་མེད་པ་མངོན་པར་
ཞེན་པ་མེད་པ་ཡིན་པས། ཐེག་པ་འདིས་ངེས་པར་འབྱུང་བར་བྱའོ། །ཐེག་པ་འདི་ནི་ཚད་མེད་པ་ཡིན་ཏེ་གཞལ་དུ་མེད་པའི་ཕྱིར་རོ། །རང་བཞིན་གྱིས་ཐོགས་པའི་མཚན་མ་མེད་པ་ཡང་ཡིན་ཏེ། མཚན་མ་ལ་
མི་གནས་པའི་ཕྱིར་རོ། །ཐེག་པ་མཆོག་འདི་ལ་ཞོན་པ་གང་ཡིན་པ་དེ་དག་ནི་སེམས་ལ་ཞུམ་པ་མེད་པར་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་གཞོལ་ཞིང་འཇུག་པར་འགྱུར་
རོ། །བློ་གྲོས་མཐའ་ཡས་འདི་ལྟ་སྟེ། དཔེར་ན་མར་མེ་དང་ཉི་མ་དང་ཟླ་བའི་དཀྱིལ་འཁོར་ནི་སེམས་ཅན་རྣམས་ཀྱི་སྣང་བ་ཆེན་པོར་བྱེད་དོ། །དེ་བཞིན་དུ་ཐེག་པ་ཆེན་པོ་འདི་ཡང་འོད་ཟེར་གྱིས་སྟོང་གསུམ་
གྱི་སྟོང་ཆེན་པོའི་འཇིག་རྟེན་གྱི་ཁམས་གསལ་བར་བྱེད་ཅིང་གང་གིས་ཀྱང་ཟིལ་གྱིས་ནོན་པ་འམ་བར་ཆད་བྱེད་མི་ནུས་པས་ཡོན་ཏན་ཆེན་པོའི་རྒྱ་མཚོ་དཔག་ཏུ་མེད་པས་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ལ་གཞོལ་བར་འགྱུར་རོ། །བློ་གྲོས་མཐའ་ཡས་ཐེག་པ་འདི་ནི་མུན་གནག་སྤོང་བར་བྱེད་ཅིང་འཇིག་རྟེན་གྱི་ནད་ཐམས་ཅད་རབ་ཏུ་སེལ་བ་དང་། འཇིག་རྟེན་པའི་ཆོས་ཐམས་ཅད་ལས་
ཡང་དག་པར་འདས་ཤིང་སེམས་ཅན་ཆེན་པོ་ཡོངས་སུ་སྡུད་པ་ཡིན་པས་དམན་པ་རྣམས་ཀྱི་བཞོན་པར་བྱ་བ་མ་ཡིན་ཏེ། གོ་ཆ་ཆེན་པོ་བགོས་པ་ནི་མ་གཏོགས་སོ། །ངས་ཇི་སྐད་དུ་འདི་ནི་བསྐལ་པ་ཚད་མེད་པ་ནས་
སེམས་ཅན་རྣམས་ཡོངས་སུ་བསྐྱབས་པ། སངས་རྒྱས་མང་པོ་ལ་མཆོད་ཅིང་རིམ་གྲོ་བྱས་པ། དགེ་བའི་རྩ་བ་རྣམས་བསྐྱེད་པ། ཚོགས་ཡོངས་སུ་དག་པ་རྣམས་ཀྱིས་བཞོན་པ་བྱ་བ་ཡིན་གྱི། ཉན་ཐོས་དང་། 

79-1-92a

རང་སངས་རྒྱས་དང་དེ་ལས་གཞན་པ་འཇིག་རྟེན་གྱིས་བཅིངས་པ་འཇིག་རྟེན་དང་མཚུངས་པར་ལྡན་པ་དང་། མངོན་པའི་ང་རྒྱལ་ཅན་དང་། མུ་སྟེགས་ཅན་ལ་མངོན་པར་ཡིད་ཆེས་པར་བྱེད་པ་
དམན་པ་ཐམས་ཅད་ཐེག་པ་འདིའི་མིང་ཐོས་པར་ཡང་མི་འདོད་ན་ཐེག་པ་འདི་ལ་བཞོན་པར་བྱ་བ་ལྟ་སྨོས་ཀྱང་ཅི་དགོས་ཞེས་གསྲུངས་པ་ལྟ་བུའོ། །གལ་ཏེ་སེམས་ཅན་གང་ལ་ལ་ཞིག་བསམ་གྱིས་མི་
ཁྱབ་པའི་སྤྱོད་ཡུལ་ལ་རྣམ་པར་རྩེན་ཅིང་ཐེག་པ་འདི་ལ་ཞོན་པར་བྱེད་ན་སྨོན་ལམ་ཁྱད་པར་དུ་འཕགས་པ་ཇི་ལྟ་བ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞོལ་བར་འགྱུར་རོ། །བློ་གྲོས་
མཐའ་ཡས་ཐེག་པ་འདི་ནི་མཐའ་མེད་དེ། སྔོན་དང་། དབུས་དང་། ཐ་མའི་མཐའ་རྟོགས་པར་མི་ནུས་སོ། །ཐེག་པ་འདི་ནི་མཐའ་ཡོངས་སུ་ཆད་པ་ཡིན་ཏེ། མཐའ་མི་དམིགས་པས་མཐའ་
དཔག་ཏུ་མེད་དོ། །ཐེག་པ་འདིའི་མཐའ་ནི་ཚད་མེད་པའི་མཐའ་ཡིན་ནོ། །བློ་གྲོས་མཐའ་ཡས་ཐེག་པ་ལ་ནི་མཐའ་དཔག་ཏུ་མེད་པས་དབུས་ཀྱི་མཐའ་ཡང་མེད་ལ་སྤང་པར་བྱ་བའི་མཐའ་ཅུང་ཟད་
ཙམ་ཡང་ཡོད་པ་མ་ཡིན་ནོ། །།དེ་ལ་མཐའ་སྤངས་པ་ཞེས་བྱ་བ་ནི་མཐའ་ཞེས་བྱ་བ་ཅུང་ཟད་ཀྱང་མེད་པས་སྤངས་པ་ཞེས་བཤད་དོ། །རྣམ་པར་མི་རྟོག་པའི་མཐའ་ལ་མཐའ་སྤངས་པ་ཞེས་བཤད་དེ། དེ་ནི་
ཐེག་པ་འདིའི་མཐའ་སྤངས་པ་ཞེས་བྱའོ། །མཐའ་ཡོད་པ་མ་ཡིན་པས་དབུས་ཀྱི་མཐའ་ཞེས་བྱའོ། །མཐའ་ཡོད་པ་མ་ཡིན་པས་མཐའི་མཐའ་ཞེས་བྱའོ། །མཐའ་ཡོད་པ་མ་ཡིན་པས་མཐའ་ཞེས་
བཤད་དོ། །མཐའ་དེ་ལ་ནི་མཐའ་དམིགས་སུ་མེད་དོ། །དམིགས་སུ་མེད་པའི་ཕྱིར་མཐའི་མཐའ་དང་། དབུས་ཀྱི་མཐའ་དང་། མཐའ་མེད་པས་རྒྱུན་མི་ཆད་པར་མཐའི་སྒོར་འཇུག་པར་འགྱུར་རོ། །མཐའི་

79-1-92b

སྒོར་ཞུགས་པའི་ཕྱིར་ཐེག་པ་འདི་དེ་ལས་ཡང་དག་པར་འདས་པ་ཡིན་ཡང་ཡང་དག་པར་འདས་པ་ཉིད་དམིགས་སུ་མེད་དོ། །བློ་གྲོས་མཐའ་ཡས་མཐའ་ཉིད་གང་ཞེ་ན། འདི་ལྟ་སྟེ། ཆད་པ་དང་། རྟག་
པའི་མཐའ་གང་ཡིན་པའོ། །ཚིག་གི་རྗེས་སུ་ཞུགས་པའི་ཕྱིར་མཐའ་ཉིད་མཐའ་མ་ཡིན་ནོ། །དེས་རྟག་པའི་མཐའ་སྤངས་ན་མཐའི་མཐའ་ཡང་ཡོད་པར་མི་འགྱུར་ཏེ། མཐའ་དེའི་མཚན་ཉིད་མཐའ་མེད་
པའི་ཕྱིར་རོ། །དེ་ལ་མཐའ་ཞེས་བྱ་བ་ནི་རྣམ་པར་རྟོག་པ་མེད་ཅིང་རྣམ་པར་རྟོག་པ་ཆད་པའི་ཕྱིར་མཐའ་ལས་ཡང་དག་པར་འདས་ཤིང་ཆད་པ་དང་། རྟག་པར་རབ་ཏུ་སྤངས་པ་ཡིན་ནོ། །བློ་གྲོས་མཐའ་ཡས་
གང་འཇིག་ཚོགས་ལ་ལྟ་བ་དང་བཅས་པ་དེ་ནི་མཐའི་སྒོ་གནས་པར་བྱེད་ཀྱི། གང་འཇིག་ཚོགས་ལ་བལྟ་བ་མེད་པ་དེ་དག་ནི་མཐའི་སྒོ་ལ་མངོན་པར་ཞེན་པར་མི་བྱེད་དོ། །མངོན་པར་ཞེན་པ་མེད་
པའི་ཕྱིར་ཆད་པ་དང་། རྟག་པའི་མཐའ་ལས་ཡང་དག་པར་འདས་པ་ཡིན་ནོ། །བློ་གྲོས་མཐའ་ཡས་ཆད་པ་དང་། རྟག་པའི་མཐའ་དེ་དག་ནི་ཡང་དག་པར་ཡོད་པ་མ་ཡིན་གྱི་སླུ་བའི་ཚིག་སྲིད་
པ་གསུམ་པོ་དག་ན་མཐའ་རྣམ་པ་གཉིས་སུ་རྣམ་པར་རྟོག་པར་བྱེད་པ་ཡིན་པས་མཐའ་གཉིས་པོ་དེ་དག་གིས་ཡོངས་སུ་བསྡུས་ཤིང་མཚུངས་པར་ལྡན་པར་མ་གྱུར་ན་ཡང་དག་པར་འདས་ཤིང་
འཇིག་ཚོགས་ལ་ལྟ་བ་སྤོང་པའི་ཕྱིར་མཐའ་གཉིས་ཀྱི་སྒོ་ལ་མངོན་པར་ཞེན་པར་མི་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་འཇིག་ཚོགས་ལ་ལྟ་བ་ད་
དུང་མ་སྤངས་པ་གང་ཡིན་དེ་དག་ནི་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་པ་ཞེས་མི་བྱ་སྟེ། མཐའི་སྒོ་དེ་དག་ལ་མངོན་པར་ཞེན་པར་གྱུར་པས་གལ་ཏེ་མཐའ་སྤོང་བར་འདོད་པར་གྱུར་

79-1-93a

ན་ཡང་མཐའ་སྤོང་པའི་འདུ་ཤེས་སྐྱེད་པར་བྱེད་པས་སྔོན་དང་ཕྱི་མའི་མཐའ་ལ་རྣམ་པར་རྟོག་པར་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་འཇིག་ཚོགས་ལ་
ལྟ་བ་སྤངས་པ་གང་ཡིན་པ་དེ་དག་ནི་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་བཞོན་པ་ཞེས་བྱ་སྟེ། མཐའི་སྒོ་དེ་དག་ལ་མངོན་པར་ཞེན་པ་མེད་པས་མཐའ་གཉིས་པོ་དག་ལས་ཡང་དག་
པར་འདས་ནས་རབ་ཏུ་བདེ་བའི་ཐེག་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་རོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་
གང་བློ་གྲོས་ཆེན་པོའི་སྟོབས་ཀྱིས་མཐའི་ཆོས་ལ་གནས་པ་ཐམས་ཅད་མི་སྤོང་མི་གཞིག་པའི་ཐབས་ལ་མཁས་པས་ཞི་གནས་དང་། ལྷག་མཐོང་ཡོངས་སུ་བསྡུས་ནས་མཚན་མ་མེད་པ་
མངོན་པར་བསྒྲུབས་ཏེ། མཚན་མ་མེད་པ་མངོན་སུམ་དུ་གྱུར་ན་སངས་རྒྱས་རྣམས་ཀྱིས་ཆོས་ཀྱི་སྣང་བ་སྦྱིན་པར་འགྱུར་ལ། ཆོས་ཀྱི་སྣང་བ་ཐོབ་པའི་དབང་གིས་མཐའ་ཐམས་ཅད་ཡོངས་སུ་
སྤོང་ཞིང་མཐའི་སྤོང་བ་དེ་དག་ལ་ཡང་མངོན་པར་ཞེན་པ་མེད་པས་མཐའ་ཅུང་ཟད་ཙམ་ལ་ཡང་མཐའི་སྒོ་དེ་དག་དང་མཚུངས་པར་ལྡན་པ་འམ། མཚུངས་པར་མི་ལྡན་པ་འམ། ཡིད་ལ་བྱེད་པ་
འམ། ཡིད་ལ་མི་བྱེད་པ་ཡང་མེད་པར་ཆོས་ཐམས་ཅད་ལ་ཐབས་མཁས་པས་ཞི་གནས་དང་། ལྷག་མཐོང་དེ་ལ་རབ་ཏུ་གནས་ཤིང་ཆོས་ཀྱི་སྣང་བ་ཆེན་པོ་དཔག་ཏུ་མེད་པ་འཐོབ་པར་འགྱུར་རོ། །
ཆོས་ཀྱི་སྣང་བ་ཐོབ་པའི་ཕྱིར་ནི་མུན་ནག་དང་། སྤུ་ཟིང་ཞེས་བྱེད་པའི་འཇིགས་པ་དག་ཡོངས་སུ་སྤངས་ནས་ཆོས་ཀྱི་རྒྱལ་མཚན་ཆེན་པོ་བསྒྲེང་བ་དང་། ཚངས་པའི་སྒྲ་ཆེན་པོ་འབྱིན་པ་དང་། སེང་

79-1-93b

གེའི་སྒྲ་ཆེན་པོ་བསྒྲགས་ནས་སེམས་ཅན་རྣམས་ལ་འདི་སྐད་དུ་ཀྱེ་ཁྱེད་རྣམས་མྱུར་དུ་འདིར་ཤོག་ལ་ཐེག་པ་ཆེན་པོ་རབ་ཏུ་བདེ་བའི་ཐེག་པ་དང་། ཁ་ལོ་བསྒྱུར་བ་ཆེན་པོའི་ཐེག་པ་དང་། རབ་ཏུ་གཞོལ་བ་ཆེན་
པོའི་ཐེག་པ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་ནས་སེམས་ཅན་རྣམས་ལ་ཆོས་ཀྱི་སྣང་བ་རབ་ཏུ་སྟོན་ལ། ཆོས་ཀྱི་སྣང་བའི་དབང་གིས་སེམས་ཅན་རྣམས་
གོ་ཆ་ཆེན་པོ་བགོས་ནས་ཐེག་པ་ཆེན་པོ་གཞོན་པ་ལ་དགོད་པར་བྱའོ། །ཞེས་སྒྲོགས་པར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཐེག་པ་ཆེན་པོ་འདི་དང་། 
གོ་ཆ་ཆེན་པོ་འདི་ལ་སེར་སྣ་མི་སྐྱེད་པར་སེམས་ཅན་རྣམས་ལ་བྱང་ཆུབ་ཏུ་སེམས་བསྐྱེད་དེ། གོ་ཆ་འདི་བགོས་ནས་ཐེག་པ་ཆེན་པོ་འདི་ལ་ཞོན་པར་གྱུར་ཅིག་ཅེས་སྨོན་ལམ་གདབ་པར་བྱའོ། །ཐེག་པ་ཆེན་
པོ་འདི་དང་གོ་ཆ་ཆེན་པོ་འདི་ལ་སེར་སྣ་མི་བྱ་བར་སེམས་ཅན་རྣམས་ལ་བརྒྱུད་ཅིང་སྤེལ་བར་བྱའོ། །གཞན་ཡང་སེམས་ཅན་རྣམས་གོ་ཆ་འདི་བགོས་ནས་ཐེག་པ་ཆེན་པོ་འདི་ལ་ཞོན་ཏེ་ངེས་པར་འབྱུང་བར་
གྱུར་ཅིག་ཅེས་སྨོན་ལམ་གདབ་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སྤྱོད་པ་འདི་ལྟ་བུ་ལ་གནས་པའི་ཚེ་སངས་རྒྱས་ཀྱི་ཞིང་ཡོངས་སུ་དག་པ་ཡང་ཡོངས་སུ་སྡུད་པར་བྱེད་ལ་
ཉན་ཐོས་དང་། བྱང་ཆུབ་སེམས་དཔའ་རྣམས་ཀྱི་ཡོན་ཏན་ཡོངས་སུ་རྫོགས་པའི་ཡང་སྡུད་པར་འགྱུར་བས་ཡོན་ཏན་གྱི་རྒྱ་མཚོ་ཆེན་པོ་དཔག་ཏུ་མེད་པ་འདིས་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ལ་རབ་ཏུ་གཞོལ་བར་བྱའོ། །བློ་གྲོས་མཐའ་ཡས་ཐེག་པ་ཆེན་པོ་འདི་ནི་ཆོས་ཀྱི་དབྱིངས་དང་མཉམ་པས་ཚུ་རོལ་གྱི་འགྲམ་དང་། ཕ་རོལ་གྱི་འགྲམ་དམིགས་སུ་མེད་མོད་ཀྱི་འོན་ཀྱང་རང་གི་ངང་གིས་

79-1-94a

སེམས་ཅན་ཐམས་ཅད་བཏེག་སྟེ། འདི་ནས་ཆོས་ཀྱི་དབྱིངས་སུ་ཕྱིན་པར་བྱེད་པས་གནས་མེད་པའི་རྗེས་སུ་འཐུན་པ་དང་། ཆོས་ཀྱི་དབྱིངས་ཀྱི་རྗེས་སུ་འཐུན་པ་དང་། གོ་ཆའི་རྗེས་སུ་འཐུན་
པར་འགྱུར་རོ། །གང་གིས་ཐེག་པ་ཆེན་པོའི་ཆོས་ཀྱི་དབྱིངས་དང་མཉམ་པ་འདི་ལ་ནན་ཏན་གྱིས་སྒྲུབ་པར་བྱེད་པ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་རབ་ཏུ་ཞུགས་པ་
ཡིན་ནོ། །བློ་གྲོས་མཐའ་ཡས་འདི་ལྟ་སྟེ། དཔེར་ན་ཆོས་ཀྱི་དབྱིངས་ནི་རྡུལ་གྱིས་གོས་པ་མེད་པས་གང་གིས་རྣམ་པར་གཞིག་པའམ་གོས་པར་བྱར་མེད་དོ། །ཐེག་པ་ཆེན་པོ་འདི་ཡང་དེ་བཞིན་དུ་རྣམ་པར་
འཇིག་པ་མེད་ཅིང་གོས་པ་མེད་དེ། རྣམ་པར་འཇིག་པ་དང་། གོས་པ་མེད་པའི་ཕྱིར་ཐམས་ཅད་མཁྱེན་པའི་ཡེ་ཤེས་ལ་རབ་ཏུ་གཞོལ་བར་འགྱུར་ཏེ། དེའི་ཕྱིར་ཐེག་པ་འདི་ནི་ཐེག་པ་ཆེན་པོ་ཞེས་བྱའོ། །
ཐེག་པ་འདི་ནི་ཐོག་པ་མེད་པས་ལྷ་དང་། མི་དང་ལྷ་མ་ཡིན་དུ་བཅས་པའི་འཇིག་རྟེན་ཐམས་ཅད་གང་གིས་ཀྱང་བསྐོར་མི་ནུས་ཤིང་མངོན་པར་ཞེན་པ་མེད་པའི་ཕྱིར་ཐམས་ཅད་མཁྱེན་པའི་ཡེ་ཤེས་ལ་
རབ་ཏུ་གཞོལ་བ་ཡིན་པས་དེའི་ཕྱིར་ཐེག་པ་འདི་ནི་ཐེག་པ་ཆེན་པོ་ཞེས་བྱའོ། །དེ་ལ་ཐེག་ཆེན་པ་པོ་ཞེས་བྱ་བ་ནི་བཀོད་པ་ཆེན་པོ་གང་ཡིན་པ་སྟེ། བཀོད་པ་ཐམས་ཅད་གང་ཡང་ཐེག་པ་ཆེན་པོ་འདིར་མི་འཇུག་
པ་མེད་པས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཐེག་པ་འདི་ལ་ཡང་འདུས་བྱས་ཀྱི་
བཀོད་པ་ཞེས་བགྱི་བ་ལྟ་ཅི་མཆིས་ལགས་སམ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་སྩལ་ཏོ། །བློ་གྲོས་མཐའ་

79-1-94b

ཡས་དེ་དེ་བཞིན་ནོ། །དེ་དེ་བཞིན་ཏེ། ད་ནི་འཇིག་རྟེན་པའི་རྗེས་སུ་ཐེག་པ་འདིར་ཡང་འདུས་བྱས་ཀྱི་བཀོད་པ་ཐམས་ཅད་རབ་ཏུ་སྟོན་པར་མཛད་དོ། །བློ་གྲོས་མཐའ་ཡས་འཁོར་ལོས་སྒྱུར་བའི་རྒྱལ་པོ་འམ། 
ལྷའི་དབང་པོ་བརྒྱ་བྱིན་ནམ། ཚངས་པའི་རྒྱལ་པོ་ཡང་རུང་སྟེ། དེ་དག་ཐམས་ཅད་ནི་ཐེག་པ་ཆེན་པོ་འདི་ལས་བྱུང་ངོ་། །འབྱུང་ངོ་། །འབྱུང་བར་འགྱུར་ཏེ། འཁོར་ལོས་སྒྱུར་བ་དང་། བརྒྱ་བྱིན་དང་། ཚངས་
པའི་འབྱོར་པའི་ས་ལ་གནས་པར་བྱེད་ཀྱང་འཁོར་བའི་ཉོན་མོངས་པའི་སྐྱོན་རྣམས་ཀྱིས་གོས་པར་མི་འགྱུར་བས་འདོད་པ་རྣམས་ཀྱི་ཉེས་དམིགས་རེ་རེ་ནས་འཇལ་བར་བྱེད་ཅིང་གཞལ་ནས་ཀྱང་ཡོངས་སུ་
སྐྱོ་བར་གྱུར་པས་ངེས་པར་འབྱུང་བའི་ལམ་རབ་ཏུ་རྟོག་པར་འགྱུར་རོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཐེག་པ་འདི་ལ་ཞོན་པར་བྱེད་པ་གང་ཡིན་པ་དེ་དག་ནི་འཁོར་བ་ལེན་
པར་བྱེད་ཀྱང་གནས་ཐམས་ཅད་དུ་སྐྱོན་གྱིས་གོས་པར་མི་འགྱུར་ཞིང་ཉེས་དམིགས་ཀྱང་མཐོང་ལ་ངེས་པར་འབྱུང་བ་ཡང་རབ་ཏུ་ཤེས་པས་ངས་འདིར་མ་བསྟན་པའི་ཆོས་རྣམས་དང་། བཀོད་པ་གང་ཡིན་པ་དེ་
དག་ཀྱང་ཐེག་པ་འདིའི་མཚན་ཉིད་ཀྱི་དབང་གིས་ཆོས་དེ་དག་དང་། བཀོད་པ་དེ་དག་ཀྱང་རབ་ཏུ་རྟོག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་རོ། །དེ་ནས་དེའི་ཚེ་
བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ།། །།ཐེག་ཆེན་བླ་ན་མེད་པའི་ཐེག ། །ཐེག་པ་འདི་ནི་བསམ་མི་ཁྱབ། །གང་ཞིག་ཐེག་པ་འདི་ཞོན་པ། །དེ་དག་ངེས་པར་འབྱུང་བར་འགྱུར། །
བརྟེན་པའི་གནས་ཆེན་ཡིན་པས་ན། །ཐེག་པ་འདི་ནི་བསམ་མི་ཁྱབ། །མཐའ་ནི་དཔག་མེད་ཚད་མེད་པས། །དེ་ཕྱིར་ཐེག་ཆེན་ཞེས་བྱའོ། །སེམས་ཅན་དག་ནི་ཐམས་ཅད་ཀྱིས། །ཐེག་པ་འདི་

79-1-95a

ལ་གཞོལ་བྱེད་ཀྱང་། །ཐེག་པ་འདི་ལ་འགྲིབ་པ་མེད། །འཕེལ་བར་ཡང་ནི་མི་འགྱུར་རོ། །སེམས་ཅན་དག་ནི་ཐམས་ཅད་ལས། །གང་ཞིག་ཐེག་པ་འདི་ཞོན་པ། །བདེ་བར་གཞོལ་བ་
འགྱུར་བས་ན། །དེ་ན་སྡུག་བསྔལ་ཅི་ཡང་མེད། །གལ་ཏེ་བྱང་ཆུབ་སེམས་དཔའ་རྣམས། །ཐེག་པ་འདི་ལ་གཞོལ་བྱེད་ན། །དྲང་པོར་འགྲོ་ཞིང་གཞན་སྤྱོད་མེད། །ལུས་དང་སེམས་ནི་ངལ་མི་འགྱུར། །
འཇིག་རྟེན་རྣམས་ནི་གསལ་བྱེད་པས། །ལྷ་མི་ལྷ་མ་ཡིན་རྣམས་ཀྱི། །ཐེག་ཆེན་བླ་མེད་འདི་ལ་ནི། །སེམས་བསྐྱེད་རབ་ཏུ་གཞོལ་བར་བྱ། །རང་སངས་རྒྱས་དང་ཉན་ཐོས་ཀྱི། །ཐེག་པ་ཟིལ་
གནོན་གང་འདོད་པ། །ཐེག་ཆེན་བླ་མེད་འདི་ལ་ནི། །སེམས་བསྐྱེད་རབ་ཏུ་གཞོལ་བར་བྱ། །འགྲོ་བ་མེད་ཅིང་འོང་བ་མེད། །གནས་པ་མེད་ཅིང་སྔོན་མཐའ་མེད། །ཕྱི་དང་དབུས་ཀྱི་མཐའ་ཡང་མེད། །
ཐོབ་མེད་མཐོང་བ་མེད་པས་ན། །དུས་གསུམ་དག་ནི་མཉམ་པ་ཉིད། །ཇི་ལྟར་ནམ་མཁའ་དག་པ་ལྟར། །ཐེག་པ་འདི་ཡང་དེ་བཞིན་ཏེ། །ཉོན་མོངས་དག་ནི་རབ་ཏུ་སྤངས། །ཐེག་པ་འདི་ནི་ལྟོས་པ་མེད། །
སྒྲིབ་མེད་ཐོགས་པ་མེད་པས་ན། །ཐམས་ཅད་ཡོངས་སུ་སྐྱོབ་པར་ནུས། །གཞོལ་བར་བྱེད་ཀྱང་མངོན་ཞེན་མེད། །ཐེག་པ་འདི་ནི་ཚད་མེད་པས། །མཚན་མ་ཐམས་ཅད་ཡོད་མ་ཡིན། །རང་བཞིན་དག་
ནི་མི་དམིགས་པར། །འཇིགས་མེད་བསམ་གྱིས་མི་ཁྱབ་ཡིན། །གང་ཞིག་ཐེག་པ་འདི་ཞོན་ནས། །འཇིགས་པ་མེད་པ་ཐོབ་པས་ནི། །དེ་ཡིས་སངས་རྒྱས་ཆོས་དག་ལ། །སྒྲིབ་མེད་ཐོགས་པ་མེད་
པར་འགྱུར། །ཐེག་པ་འདི་ལ་གང་ཞོན་པ། །འཇིག་རྟེན་ཀུན་ནི་སྣང་བྱེད་པར། །ཉི་མའི་འོད་ཟེར་བརྒྱ་སྟོང་ལྟར། །ཐམས་ཅད་དུ་ནི་གསལ་བར་བྱེད། །ཐེག་པ་འདི་ནི་མི་འཇིགས་ཅིང་། །ཟིལ་གྱིས་གནོན་

79-1-95b

པ་མེད་པས་ན། །ཡོན་ཏན་ཚོགས་ནི་དཔག་མེད་ལྡན། །བླ་མེད་འདི་ལ་གཞོལ་བར་བྱ། །ཐེག་པ་འདི་ནི་འཇིག་རྟེན་འདས། །ཁམས་དང་ལས་ནི་ངེས་པར་འབྱུང་། །མུན་ནག་དག་ནི་རབ་ཏུ་སྤངས། །ཟག་པ་
མེད་ལ་གཞོལ་བར་བྱེད། །ཐེག་འདི་བྱང་ཆུབ་སེམས་དཔའ་རྣམས། །འབའ་ཤིག་ཡོངས་སུ་འཛིན་པས་ན། །དེ་ལས་གཞན་པའི་སེམས་ཅན་རྣམས། །དེར་ནི་ཤོང་བར་མི་འགྱུར་རོ། །བློ་དང་ལྡན་པ་
གང་ཞིག་གིས། །བསྐལ་པ་སྟོང་ཕྲག་ཚད་མེད་དུ། །ཐབས་མཁས་ནན་ཏན་སྒྲུབ་བྱེད་པ། །ངེས་འདོད་ཐེག་པ་འདི་བཞོན་འགྱུར། །ཉན་ཐོས་ཀྱི་ནི་ཚོགས་རྣམས་དང་། །རང་རྒྱལ་དག་གི་ཚོགས་དག་
དང་། །མུ་སྟེགས་དག་ནི་ཐམས་ཅད་ཀྱིས། །ཐེག་པ་འདི་ལ་གཞོལ་མི་ནུས། །གལ་ཏེ་སེམས་ཅན་གང་ཞིག་གིས། །བསམ་གྱིས་མི་ཁྱབ་ཆོས་འདི་ལ། །ཐབས་མཁས་རྣམ་པར་
གང་རྩེན་པ། །ཐེག་པ་འདི་ལ་གནས་པར་འགྱུར། །མོས་པ་དག་ནི་ཇི་ལྟ་བཞིན། །ཁྱབ་པའི་སྨོན་ལམ་རྣམ་གཞག་ནས། །ཡང་དག་ལམ་ལ་རབ་གནས་ཤིང་། །བླ་མེད་འདི་ལ་གཞོལ་བར་བྱ། །
ཐེག་པ་འདི་ནི་མཐའ་མེད་པས། །དབུས་ཀྱི་མཐའ་ཡང་ཡོད་མ་ཡིན། །མཐའ་ཡི་མཐའ་དང་དབུས་ཀྱི་མཐའ། །ཐམས་ཅད་དམིགས་པར་མི་འགྱུར་རོ། །མཐའ་ནི་དམིགས་སུ་མེད་པས་ན། །ཐེག་
པ་ཆེ་ལ་མཐའ་ཡོད་མིན། །མཐའ་ནི་ཐམས་ཅད་སྤངས་པའི་ཕྱིར། །བདེ་བར་ཡང་དག་གཞོལ་བར་བྱ། །ཐེག་མཐའ་དག་ནི་དཔག་མེད་པས། །དཔག་མེད་གང་ཡིན་ཐེག་མཐའ་ཡིན། །ཐེག་
འདི་མཐའ་ནི་ཚད་མེད་པས། །ཚད་མེད་གང་ཡིན་ཐེག་མཐའ་ཡིན། །ཐེག་འདི་མཐའ་སྤོངས་མེད་པས་ན། །མཐའ་མེད་གང་ཡིན་སྤོང་མཐའ་ཡིན། །མཐའ་ནི་གང་ཞིག་མི་རྟོག་ན། །

79-1-96a

སྤོང་བ་ཡང་ནི་དམིགས་མི་འགྱུར། །ཐེག་པའི་མཐའ་ནི་དཔག་མེད་པས། །དབུས་ཀྱི་མཐའ་ཡང་ཡོད་མ་ཡིན། །མཐའ་མེད་མཐའ་ནི་མེད་པས་ན། །མཐའ་ཡི་ངོ་བོ་ཅི་ཡང་
མེད། །མཐའ་དང་མཐའ་མེད་མཚན་ཉིད་ནི། །མཐའ་མིན་མཐའ་ཡི་མཚན་ཉིད་མིན། །མཐའ་རྣམས་དེ་དག་ལ་ཡང་ནི། །མཐའ་ཡི་མཚན་ཉིད་ཅི་ཡང་མེད། །མཐའ་མིན་ལ་ནི་མཐའ་སྒོར་
བཤད། །ཐེག་པ་འདི་ནི་ཡང་དག་འདས། །དེ་ཡི་ཚད་ལས་འདས་པས་ན། །མཚུངས་པར་ལྡན་པར་དམིགས་སུ་མེད། །ངས་ནི་རྟག་དང་ཆད་པའི་མཐའ། །མཐའ་རྣམས་དེ་དག་ཐམས་ཅད་ནི། མཐའ་
མིན་པར་ཡང་རབ་ཏུ་བསྟན། །མཐའ་ནི་ཐམས་ཅད་མཐའ་མེད་པས། །མཐའ་ཡི་མཚན་ཉིད་ཡོད་མ་ཡིན། །རང་བཞིན་ངོ་བོ་ཐམས་ཅད་ནི། །དེ་ན་རྟོག་པ་ཅི་ཡང་མེད། །མཐའ་རྣམས་དེ་དག་
ཐམས་ཅད་ལ། །རྣམ་པར་རྟོག་པ་གང་སྤངས་པ། །མཐའ་ཡོད་དང་ནི་མཐའ་མེད་རྣམས། །ཐམས་ཅད་རབ་ཏུ་སྤོང་བར་འགྱུར། །གང་ཞིག་འཇིག་རྟེན་ལྟ་ལྡན་པ། །དེས་ནི་མཐའ་སྒོར་རབ་སྟོན་ཅིང་། །མཐའ་
རྣམས་ལ་ནི་རབ་ཞེན་པས། །སྐྱབས་མེད་པར་ནི་གྱུར་པ་ཡིན། །གང་ཞིག་འཇིག་ཚོགས་ལྟ་མིན་ལྡན། །མཐའ་སྒོ་རྣམས་ལ་མ་ཆགས་པ། །མཐའ་རྣམས་ཐམས་ཅད་མི་འཛིན་པས། །སྣང་
བ་དག་ནི་བྱེད་པར་འགྱུར། །ཐམས་ཅད་མཐའ་ནི་མཐའ་མིན་པས། །མཐའ་རྣམས་ཡང་དག་ཡོད་མ་ཡིན། །མཐའ་ཡི་མཚན་ཉིད་ཐམས་ཅད་ནི། །དེ་དག་ཡོད་པར་མི་འགྱུར་རོ། །མཐའ་
རྣམས་ཐམས་ཅད་མི་ལེན་ཅིང་། །མཐའ་དག་ལས་ནི་གང་འདས་པ། །མཐའ་སྒོ་དག་ལ་ཆགས་མེད་པས། །འཇིག་ཚོགས་ལྟ་བཅས་སྤོང་བར་བྱེད། །གང་ཞིག་འཇིག་ཚོགས་ལྟ་བ་དག ། །

79-1-96b

མི་གཅོད་སྤོང་བར་མི་བྱེད་པ། །གོ་ཆ་ཆེན་པོ་མ་བགོས་པས། །ཐེག་ཆེན་ལ་ནི་མོས་མི་འགྱུར། །མཐའ་རྣམས་དག་ནི་ལེན་བྱེད་ཅིང་། །མཐའ་ཡི་མཚན་ཉིད་སྔོན་གྱི་མཐའ། །ཕྱི་མའི་མཐའ་ནི་གང་
རྟོགས་པ། །དེ་དག་ཐམས་ཅད་རྣམ་རྟོག་ཡིན། །གང་ཞིག་འཇིག་ཚོགས་ལྟ་བ་དག ། །ཐམས་ཅད་རབ་ཏུ་གང་སྤངས་པ། །གོ་ཆ་དཔག་མེད་བགོས་ནས་ནི། །བླ་མེད་ཐེག་པ་ཞོན་པ་ཡིན། །མཐའ་
སྒོ་རྣམས་ལ་མ་ཆགས་པས། །འཇིག་རྟེན་བློར་ནི་གྱུར་བས་ན། །མཐའ་རྣམས་སྣ་ཚོགས་དག་ལ་ནི། །ཐམས་ཅད་ཡང་དག་འདས་པར་འགྱུར། །དེས་ན་སངས་རྒྱས་ཆོས་རྣམས་ལ། །བདེ་བར་ཡང་དག་
ཞུགས་པ་ཡིན། །བྱང་ཆུབ་སེམས་དཔའ་རབ་རྟགས་ན། །ཤེས་རབ་ཆེན་པོ་སྟོབས་དག་གིས། །ཆོས་འགའ་ཡང་ནི་མི་དམིགས་པས། །སྤང་ཞིང་བསལ་དུ་ཅི་ཡང་མེད། །རྟག་ཏུ་ཐབས་ལ་མཁས་
པ་ཡིས། །ཞི་གནས་ལྷག་མཐོང་ལེགས་བསྟུས་པ། །མཚན་ཉིད་གཅིག་ཏུ་རྟོགས་པའི་ཕྱིར། །མཚན་ཉིད་རྣམས་ནི་རབ་ཏུ་རྟོགས། །ཡང་དག་ཆོས་ལ་རབ་གནས་ཤིང་། །ཆོས་ཀྱི་སྣང་ཆེན་ཐོབ་
པས་ན། །ཆོས་ཀྱི་སྣང་བ་དེ་ཡིས་ནི། །མཐའ་རྣམས་དེ་དག་ཁོང་དུ་ཆུད། །མཐའ་ནི་ཅུང་ཟད་ཙམ་དག་དང་། །མཐའ་དང་མཐའ་མིན་དེ་དག་ནི། །མཚུངས་པར་ལྡན་པར་མི་མཐོང་བས། །ཐམས་ཅད་ལ་ནི་
ཆགས་པ་མེད། །སེམས་ཅན་སྡུག་བསྔལ་མཐོང་འགྱུར་ན། །སྤྲོ་བསྐྱེད་ཚིག་ནི་འདི་སྐད་དུ། །ཁྱེད་འདིར་ཤོག་ལ་ཐེག་འདི་ལ། །ངེས་པར་འབྱུང་བར་གྱིས་ཤེས་སྨྲོས། །སྐྱེ་བ་ལེན་པ་ཐམས་ཅད་དུ། །ཆོས་ཀྱི་
སྣང་བ་བྱེད་པར་འགྱུར། །གོ་བགོས་ཐེག་ཆེན་ཞོན་ནས་ནི། །འདི་ཉིད་རབ་ཏུ་བསྟན་པར་བྱ། །ཐེག་པ་འདི་དང་གོ་ཆ་འདི། །དེ་དག་ལ་ནི་ཕངས་མི་བྱ། །སེམས་ཅན་རྣམས་ནི་ཐམས་ཅད་ཀྱིས། །གོ་བགོས་

79-1-97a

ཐེག་པ་ཆེན་པོ་དང་། །རབ་བདེ་ཐེག་པ་འདི་ཞོན་ནས། །བླ་མེད་བགྲོད་ལ་དགོད་པར་བྱ། །བྱང་ཆུབ་སེམས་དཔའ་དེ་དག་ནི། །རྣལ་འབྱོར་འདི་ལ་གནས་གྱུར་ནས། །སངས་རྒྱས་ཀྱི་
ནི་ཆོས་དག་ལ། །མྱུར་བ་ཁོ་ནར་གཞོལ་བར་འགྱུར། །སངས་རྒྱས་ཞིང་ནི་རྣམ་དག་དང་། །ཉན་ཐོས་བྱང་ཆུབ་སེམས་དཔའ་ཡི། །ཡོན་ཏན་བཀོད་པ་གང་ཡིན་པ། །དངོས་པོ་དེ་དག་འཛིན་པར་འགྱུར། 
བམ་པོ་གསུམ་པ།།   །།གཞན་ཡང་བློ་གྲོས་མཐའ་ཡས་ངས་མངོན་པར་དྲན་ཏེ། སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་གོ་ཆ་འདི་ལྟ་བུ་བགོས་ཤིང་ཐེག་པ་ཆེན་པོ་འདི་ལྟ་བུ་
ལ་ཞོན་པས་ན་མཐའ་རྣམས་ལས་ཡང་དག་པར་འདས་ཤིང་མུན་པ་རྣམས་རབ་ཏུ་བསལ་བ་དང་། །འཇིགས་པ་རྣམས་བསྐྱབ་ཤིང་བརྩོན་འགྲུས་ཆེན་པོས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཚད་
མེད་པ་དག་ལས་བྱང་ཆུབ་སེམས་དཔའ་སེམས་དཔའ་ཆེན་པོའི་གོ་ཆའི་བཀོད་པ་དང་། ཐེག་པ་ཆེན་པོའི་བཀོད་པ་འདི་ཐོས་པས་རབ་ཏུ་དགའ་བར་གྱུར་ཏེ། ཆོས་འདི་སྒོམ་པ་ན་སངས་རྒྱས་
བཅོམ་ལྡན་འདས་དེ་དག་ལ་གུས་པས་རིམ་གྲོ་དང་། བཀུར་སྟི་བྱེད་ཀྱང་འདི་སྙམ་ཏུ་བདག་ནི་གོ་ཆ་འདི་ལྟ་བུ་བགོས་པའོ། །བདག་ནི་གོ་ཆ་འདི་ལྟ་བུ་དང་ལྡན་པའོ། །བདག་ནི་ཆོས་འདི་ལྟ་བུ་ཐོས་པ་
ཡིན་ནོ། །བདག་ནི་ཆོས་འདི་ལྟ་བུ་དང་ལྡན་པ་ཡིན་ནོ། །བདག་ནི་ཆོས་ཀྱི་རྣམ་པ་འདི་ལྟ་བུ་དང་ལྡན་པ་ཡིན་ནོ་སྙམ་པའི་བསམ་པ་མ་བྱུང་ངོ་། །དེ་ལ་དེའི་ཚེ་བདག་ཏུ་འདུ་ཤེས་པ་མེད་པས་འཇིགས་ཚོགས་ལ་ལྟ་བ་སྤངས་ཤིང་བདག་ཏུ་ང་རྒྱལ་
བ་ཡང་སྤངས་སོ། །སེམས་ལ་མཐོ་དམན་མེད་ཅིང་རྣམ་པར་རྟོག་པ་ཡང་མེད་པར་གྱུར་ཏོ། །སེམས་ཅན་ཐམས་ཅད་བསྡུས་པ་དང་། དེ་བཞིན་གཤེགས་པ་རྣམས་ཀྱི་ཆོས་ཀྱི་སྡེ་སྣོད་རབ་

79-1-97b

ཏུ་བསྲུང་བ་དང་། སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་རྣམས་ཡོངས་སུ་སྨིན་པར་བྱ་བའི་ཕྱིར་སྐད་ཅིག་ཙམ་དུ་ཡང་སེམས་ཡོངས་སུ་སྐྱོ་ཞིང་ངལ་བར་མ་གྱུར་ཏོ། །ང་དེའི་ཚེ་གོ་ཆ་མ་སྤངས་ཤིང་
ཐེག་པ་དཔག་ཏུ་མེད་པ་ལ་ཞོན་པར་གྱུར་པས་ཚེ་རབས་ཐམས་ཅད་དུ་བདུད་ཀྱི་དཔུང་དང་། བདུད་ཀྱི་འཁོར་དང་། བདུད་ཀྱི་དམག་རྣམས་བཅོམ་ཞིང་ཕམ་པར་བྱས་སོ། །ལམ་ཐ་དད་པར་གྱུར་བ་ཙ་ར་ཀ་དང་། 
འཇིག་རྟེན་བརྒྱང་པན་དང་། པ་རི་པར་ཙ་ཀ་རྣམ་པར་གཡེང་བར་གྱུར་བར་ཐམས་ཅད་དང་། གཞན་ཡང་མུ་སྟེག་ཅན་འདི་དང་འདྲ་བ་རྣམས་ངས་རབ་ཏུ་བཏུལ་ཏེ་བདེ་བ་ལ་བཀོད་དོ། །ཐ་དད་པར་སྨྲ་བ་ཐམས་
ཅད་ཚར་བཅད་དོ། །མུ་སྟེགས་ཅན་ཐམས་ཅད་རབ་ཏུ་བཏུལ་ཏོ། །ལོག་པར་སོང་བའི་སེམས་ཅན་རྣམས་ཐེག་པ་འདིའི་དབང་གིས་དགེ་བའི་སྡོམ་པ་སྣ་ཚོགས་ལ་གནས་པར་བྱས་སོ། །སེམས་
ཅན་རྣམས་ལ་གོ་ཆ་དང་གོ་ཆའི་བཀོད་པ་རྣམ་པར་ཕྱེ་སྟེ་བསྟན་ཏོ། །སེམས་ཅན་རྣམས་ལ་རབ་ཏུ་བདེ་བ་ཐེག་པ་ཆེན་པོའི་ཆོས་ཀྱི་རྣམ་པ་དེ་ལྟ་བུ་དག་བསྟན་པས། གང་ཐེག་པ་འདི་ལ་གནས་པར་
གྱུར་པ་དེ་དག་བདེ་བའི་ཡོ་བྱད་ཐམས་ཅད་ཐོབ་པར་བྱས་ཏེ། འདི་ལྟ་སྟེ། འདུས་བྱས་ཀྱི་བདེ་བའི་ཡོ་བྱད་འཁོར་ལོས་སྒྱུར་བའི་རྒྱལ་པོའི་བདེ་བའི་ཡོ་བྱད་དང་། བརྒྱ་བྱིན་དང་། ཚངས་པའི་རྒྱལ་
པོའི་བདེ་བའི་ཡོ་བྱད་དང་། འདུས་མ་བྱས་ཀྱི་བདེ་བའི་ཡོ་བྱད་ཐོབ་པར་བྱས་པ་གང་ཡིན་པའོ། །སེམས་ཅན་རྣམས་ལ་ཆོས་འདི་བསྟན་པར་གྱུར་བ་ན་དེ་དག་ཆོས་འདི་ལ་ཡང་དག་པར་ཞུགས་
པས། འཕགས་པའི་རིགས་སུ་སྐྱེས་པས། ཆོས་ཀྱི་རྒྱལ་མཚན་ཆེན་པོ་བསྒྲེང་ཞིང་སེང་གེའི་སྒྲ་བསྒྲགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་གཞོལ་

79-1-98a

བར་གྱུར་ཏོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་དེ་ལྟ་བུ་བགོས་ནས་ཚུལ་བཞིན་དུ་སོ་སོར་བརྟགས་ཤིང་རབ་ཏུ་རྣམ་པར་འབྱེད་པར་བྱེད་པ་དེ་དག་
ནི་ཆོས་གང་གིས་རབ་ཏུ་གཞོལ་བར་འགྱུར་བའི་ཆོས་དེ་དག་ཐམས་ཅད་མ་ལུས་པར་ཤེས་ཤིང་མཐོང་བར་གྱུར་ཀྱང་རྣམ་པར་རྟོག་པར་མི་བྱེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་
དཔའ་ཆེན་པོ་རྣམས་ནི་ལམ་ཡང་དག་པ་ལ་གནས་པས་ཚུལ་བཞིན་དུ་ཤེས་པར་གྱུར་པའི་ཕྱིར་དང་། ཡང་དག་པའི་ལམ་ལ་རབ་ཏུ་ཞུགས་པས་ཚུལ་བཞིན་དུ་མཐོང་པའི་ཕྱིར་རོ། །ཚུལ་བཞིན་དུ་
རྣམ་པར་དག་པར་གྱུར་པ་གང་ཡིན་པ་དེ་ནི་རྣམ་པར་རྟོག་པར་ཡང་མ་ཡིན་རྣམ་པར་མི་རྟོག་པ་ཡང་མ་ཡིན་པས་རྣམ་པར་རྟོག་པ་དང་། རྣམ་པར་མི་རྟོག་པ་དག་མཉམ་པ་ཉིད་དུ་ཤེས་ཤིང་མཐོང་བར་འགྱུར་རོ། །
གང་གིས་ཆོས་རྣམས་བཙལ་ཞིང་གཉེར་དུ་ཡོད་པར་མཐོང་བ་དེ་དག་ནི་མཉམ་པ་ཉིད་མ་ཡིན་པས་ཚུལ་བཞིན་དུ་རྣམ་པར་དག་པའི་ཤེས་པ་དང་། མཐོང་བ་ལ་གནས་པར་མི་འགྱུར་རོ། །རྣམ་པར་རྟོག་པ་དང་། 
རྣམ་པར་མི་རྟོག་པ་མེད་པ་གང་ཡིན་པ་དེ་དག་ནི་རྣམ་པར་རྟོག་པ་དང་། རྣམ་པར་མི་རྟོག་པ་དེ་དག་ལ་མངོན་པར་ཞེན་ཅིང་འཛིན་པར་མི་བྱེད་ལ། མངོན་པར་ཞེན་ཅིང་འཛིན་པ་མེད་པས་རྣམ་པར་རྟོག་དང་། 
རྣམ་པར་མི་རྟོག་པ་ཡང་ཡོངས་སུ་སྤོང་བར་བྱེད་དོ། །ལམ་འདི་ལ་ནི་སྙིང་བརྩེ་བ་ཡང་མེད། མངོན་པར་འདུ་བྱེད་པ་ཡང་མེད། སྒྲོ་འདོགས་པ་ཡང་མེད། བླང་ཞིང་དོར་བ་ཡང་མེད་དོ། །མཉམ་
པ་ཉིད་ཀྱི་ལམ་ཡང་དག་པ་ལ་གནས་པ་ནི་འདས་པ་དང་། ད་ལྟར་བྱུང་བ་དང་། མ་འོངས་པ་ལ་རྣམ་པར་མི་བྱེད་པས་མི་བྱེད་པ་རྣམ་པར་རྟོག་པ་ཐམས་ཅད་དང་། བག་ལ་ཉལ་ཇི་སྙེད་པ་དག་མ་ལུས་པར་

79-1-98b

ཁོང་དུ་ཆུད་ཅིང་ཆོས་ཐམས་ཅད་ཀྱི་མཉམ་པ་ཉིད་ཀྱི་ཕྱིན་ཅི་མ་ལོག་པའི་དོན་ལ་རབ་ཏུ་གནས་པར་བྱེད་པས་ལམ་ཡང་དག་པ་ལ་གནས་པ་ཞེས་བྱའོ། །བློ་གྲོས་མཐའ་ཡས་ལམ་དང་། རྣམ་པར་དག་པའི་
ལམ་གང་ཞེ་ན། འཕགས་པའི་ལམ་ཡན་ལག་བརྒྱད་པ་གང་ཡིན་པ་སྟེ། འདི་ལྟ་སྟེ། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་
མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཏོ། །ཡང་དག་པའི་ལྟ་བས་ནི་འཇིག་ཚོགས་ལ་ལྟ་བ་སྤོང་ཞིང་ལྟ་
བར་གྱུར་པའི་སྤྱོད་ཡུལ་ཐམས་ཅད་ལས་ཡང་དག་པར་འདའ་བར་བྱེད་པས་ལྟ་བ་ཐམས་ཅད་གནས་དང་། དུས་ཐམས་ཅད་དུ་ཤིན་དུ་རྣམ་པར་དག་པ་ཡང་འཐོབ་པར་འགྱུར་ལ། རྣམ་པར་
རྟོག་པ་དང་། ཁྱད་པར་དུ་རྣམ་པར་རྟོག་པ་དང་། ཀུན་དུ་རྣམ་པར་རྟོག་པ་ཐམས་ཅད་རབ་ཏུ་རྟོགས་པས་རྣམ་པར་རྟོག་པ་དང་། ཁྱད་པར་དུ་རྣམ་པར་རྟོག་པ་དང་། ཀུན་དུ་རྣམ་པར་རྟོག་པ་ཡང་མེད་
པར་འགྱུར་རོ། །ལོག་པར་རྟོག་པ་ལ་མི་གནས་ཤིང་ལོག་པར་རྟོག་པ་རབ་ཏུ་སྤངས་པས་ཡང་དག་པའི་འཚོ་བ་དང་། ཡང་དག་པའི་འཚོ་བའི་འདུ་ཤེས་ཀྱང་འཐོབ་པར་འགྱུར་རོ། །འཚོ་བ་རྣམ་པར་
དག་པ་མཐོང་ཞིང་འཚོ་བ་རྣམ་པར་དག་པ་ལ་གནས་པའི་ལུས་ཀྱི་ལས་རྣམ་པར་དག་པ་དང་། ངག་གི་ལས་རྣམ་པར་དག་པ་དང་། ཡིད་ཀྱི་ལས་རྣམ་པར་དག་པ་མཐོང་ཞིང་ཡང་དག་པའི་
ལས་ཀྱི་མཐའ་ལ་གནས་པར་འགྱུར་རོ། །ཡང་དག་པའི་ལྟ་བའི་ངག་གི་ལས་ཀྱིས་ནི་ཚིག་དང་། སྨྲ་བ་མང་པོ་དག་རབ་ཏུ་ཤེས་ཤིང་མཐོང་བས་ཡང་དག་པའི་ངག་ལ་གནས་ནས་མི་མཐུན་པའི་

79-1-99a

ཕྱོགས་ཡོངས་སུ་དག་པར་བྱེད་དོ། །ཡང་དག་པའི་རྩོལ་བའི་ལྟ་བས་ནི་བརྩོན་འགྲུས་རབ་ཏུ་སྦུད་ཅིང་། ཡང་དག་པའི་བརྩོན་འགྲུས་ལ་གནས་པར་བྱེད་དོ། །ཡང་དག་པའི་ལྟ་བའི་དྲན་
བ་ཡང་མེད། ཡིད་ལ་བྱེད་པ་ཡང་མེད། འཛིན་པ་ཡང་མེད་པར་རྣམ་པར་དག་པའི་དྲན་པས་ཡང་དག་པའི་དྲན་པ་ལ་གནས་པར་བྱེད་དོ། །ཡང་དག་པའི་ཏིང་ངེ་འཛིན་གྱིས་ནི་ཏིང་ངེ་འཛིན་
ལ་གནས་པ་མེད་པར་ཏིང་ངེ་འཛིན་ཏུ་ལྟ་བ་རབ་ཏུ་སྦྱངས་ནས་ཡང་དག་པའི་ཏིང་ངེ་འཛིན་ལ་རབ་ཏུ་གནས་པར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་ལྟར་མཐོང་
བའི་ཚེ་ཐམས་ཅད་དུ་རྣམ་པར་དག་པའི་ཡང་དག་པའི་ལྟ་བ་ཐོབ་པས་ཤིན་ཏུ་རྣམ་པར་དག་པའི་ལམ་ལ་གནས་པར་འགྱུར་ཏེ། ཤིན་ཏུ་རྣམ་པར་དག་པའི་ལམ་འདི་ནི་སྐྱེས་བུ་དམ་པ་རྣམས་ཀྱིས་བསྒོམ་
བར་བྱ་བ། བློ་དང་ལྡན་པ་རྣམས་ཀྱིས་བཀུར་བར་བྱ་བ། འཕགས་པ་རྣམས་དགའ་བར་བྱེད་པ། དེ་བཞིན་གཤེགས་པ་རྣམས་ཀྱིས་རབ་ཏུ་བསྔགས་པ་ཡིན་པས་བདུད་དང་། བདུད་ཀྱི་འཁོར་དང་། བདུད་
ཀྱི་མངག་པ་དང་། བདུད་ཀྱི་རིས་ཀྱི་ལྷ་ཐམས་ཅད་ཀྱི་བགྲོད་པར་བྱ་བའི་གནས་མ་ཡིན་ནོ། །ཕྱི་རོལ་པའི་ལམ་ལ་སྲིད་ཅིང་མངོན་པར་ཞེན་པ་ཐམས་ཅད་དང་། རྩོད་པའི་སྨྲ་བ་ལ་གནས་པ་དང་། ལྟ་
བའི་ཐིབས་པོར་ཞུགས་པ་དང་། ལམ་མ་ཡིན་པར་སོང་བ་དང་། འཇིག་རྟེན་རྒྱང་པན་པ་ལ་སོགས་པས་བགྲོད་པར་བྱ་བའི་སྤྱོད་ཡུལ་ཡང་མ་ཡིན་ནོ། །མྱ་ངན་ལས་འདས་པ་ལ་སྲིད་པ་ཐམས་
ཅད་ཀྱིས་བགྲོད་པར་བྱ་བའི་སྤྱོད་ཡུལ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། འདུས་མ་བྱས་ལ་གནས་པ་གང་ཡིན་པ་དེ་དག་ནི་མྱ་ངན་ལས་འདས་པར་རྣམ་པར་རྟོག་པ་དང་བཅས་པས་ན་མྱ་ངན་ལས་

79-1-99b

འདས་པར་རྟོག་པ་གང་ཡིན་པ་དེ་ཉིད་འདུ་བྱེད་རྣམས་སུ་རྣམ་པར་རྟོག་པ་ཡིན་པས་སོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པའི་དབྱིངས་སུ་རྣམ་པར་རྟོག་པའི་གཡོ་བ་ཐམས་ཅད་ལས་ཡང་དག་
པར་འདས་པ་ཡིན་པས་འདུས་མ་བྱས་ཀྱང་ཡོད་པ་མ་ཡིན་ན་འདུས་བྱས་ཡོད་པར་མི་འགྱུར་བ་ལྟ་སྨོས་ཀྱང་ཅི་དགོས་ཏེ། ལམ་འདི་ནི་རྣམ་པར་རྟོག་པ་ཐམས་ཅད་ཡོངས་སུ་སྦྱོང་བར་བྱེད་པས་ཐ་ན་
འདུས་མ་བྱས་སུ་རྟོག་པ་ཅུང་ཟད་ཙམ་ཡང་མེད་ན་འདུས་བྱས་སུ་རྟོག་པ་ཐམས་ཅད་ལྟ་ཡོད་པར་ག་ལ་འགྱུར། གང་གིས་ཇི་ཙམ་དུ་འཕགས་པའི་ལམ་ལ་རྣམ་པར་རྟོག་པ་དང་བཅས་པ་དེ་དག་ནི་
འཕགས་པའི་ལམ་ལ་གནས་པ་ཞེས་མི་བྱའོ་གང་གིས་རྣམ་པར་རྟོག་པའི་གཡོ་བ་ཐམས་ཅད་སྤངས་པ་གང་ཡིན་པ་དེ་ནི་འཕགས་པའི་ལམ་ལ་གནས་པ་དང་། འཇིགས་པ་མེད་པའི་ལམ་
ལ་གནས་པ་དང་། རབ་ཏུ་ཞི་བའི་ལམ་ལ་གནས་པ་དང་། རབ་ཏུ་བདེ་བའི་ལམ་ལ་གནས་པ་ཞེས་བྱའོ། །ལམ་འདིས་ནི་རྒ་བ་དང་། ན་པ་དང་། འཆི་བ་དང་། མྱ་ངན་དང་། སྡུག་བསྔལ་མེད་པའི་
གནས་སུ་ཕྱིན་པར་བྱེད་དོ། །ལམ་འདིས་ནི་ངོ་བོ་ཉིད་མེད་པར་ཕྱིན་པར་བྱེད་ཅིང་ངོ་བོ་ཉིད་ཀྱི་གནས་ལས་ཡང་དག་པར་འདའ་བར་བྱེད་དོ། །ལམ་འདིས་ནི་ངོ་བོ་ཉིད་དང་། ངོ་བོ་ཉིད་མ་ཡིན་པ་ཐམས་ཅད་སྤངས་
བའི་གནས་སུ་ཕྱིན་པར་བྱེད་དོ། །ལམ་འདིས་ནི་མཚན་ཉིད་བསྟན་དུ་མེད་པ་དང་། གཟུགས་ཅན་གྱི་མཚན་ཉིད་མ་ཡིན་པའི་གནས་སུ་ཕྱིན་པར་བྱེད་དོ། །ལམ་འདིས་ནི་ནམ་མཁའ་བཞིན་དུ་ཐམས་ཅད་དུ་ཁྱབ་
པས་བླ་ན་མེད་པའི་གཞལ་མེད་ཁང་ཆེན་པོར་ཕྱིན་པར་བྱེད་དེ། དེ་ལྟར་སོང་བ་གང་ཡིན་པ་དེ་དག་ནི་ཕྱིར་ལྡོག་པར་མི་འགྱུར་བས་བདེ་བ་རྣམ་པ་སྣ་ཚོགས་རབ་ཏུ་འཐོབ་པར་འགྱུར་རོ་གཞལ་མེད་ཁང་དེ་ཡང་བསྟན་དུ་མེད་

79-1-100a

ཅིང་དངོས་པོའི་མཚན་མ་ཅི་ཡང་མེད་པས་འདུས་མ་བྱས་ཅུང་ཟད་ཙམ་ཡང་མེད་དེ། འདུས་བྱས་བཀག་ཅིང་འདུས་མ་བྱས་སྤངས་པ་ཡིན་པས་སེམས་ཅན་རྣམས་ལ་འདུས་བྱས་ཀྱི་
བདེ་བ་འམ་འདུས་མ་བྱས་ཀྱི་བདེ་བ་ཡང་སྦྱིན་པར་མི་བྱེད་དོ། །བློ་གྲོས་མཐའ་ཡས་ཇི་ཙམ་དུ་འདུས་བྱས་ཀྱི་མྱ་ངན་ལས་འདས་པ་ལ་མོས་པ་དེ་དག་ཀྱང་འདུས་བྱས་ཀྱི་བདེ་བ་ཡོངས་སུ་ཚོལ་བར་མི་བྱེད་ན་གཞལ་
མེད་ཁང་ཆེན་པོར་ཞུགས་པ་ལྟ་སྨོས་ཀྱང་ཅི་དགོས། གཞལ་མེད་ཁང་ཆེན་པོ་དེ་ནི་མངོན་པར་འདུ་བྱ་བ་མེད་པ་དང་། རབ་ཏུ་བསིལ་ཞིང་དབེན་པར་གྱུར་བའི་ཕྱིར་མྱ་ངན་ལས་འདས་པ་ཞེས་བྱའོ། །འདོད་
ཆགས་དང་། ཞེ་སྡང་དང་། གཏི་མུག་འགོག་པ་དང་། བག་ལ་ཉལ་རྣམས་སྤོངས་པ་དང་། སྲིད་པའི་ལྟ་བ་དྲལ་བ་དང་། མ་རིག་པའི་ཆུ་བོ་བསྐམས་པ་དང་། ཟུག་རྔུ་གདུག་པ་རྩ་བ་ནས་བཏོན་པ་དང་
མི་དགེ་བའི་ཆོས་རྣམས་ཟད་པའི་ཕྱིར་མྱ་ངན་ལས་འདས་པ་ཞེས་བྱའོ། །ང་རྒྱལ་གྱི་ནད་དང་། སྡུག་བསྔལ་མང་པོས་ཉོན་མོངས་པ་ཐམས་ཅད་ཐག་བསྲིངས་པའི་ཕྱིར་མྱ་ངན་ལས་འདས་པ་ཞེས་བྱའོ། །
སེམས་དང་། ཡིད་དང་། རྣམ་པར་ཤེས་པའི་སྤྱོད་ཡུལ་མ་ཡིན་པའི་ཕྱིར་མྱ་ངན་ལས་འདས་པ་ཞེས་བྱའོ། །རྩོད་པའི་སྨྲ་བ་རྣམས་དང་། མཚམས་སྦྱོར་བ་ཐམས་ཅད་ནས་ཆོས་ཀྱི་འདུ་ཤེས་ཀྱི་བར་དུ་
ཉེ་བར་གྱུར་བའི་ཕྱིར་མྱ་ངན་ལས་འདས་པ་ཞེས་བྱའོ། །ཡིད་ཀྱི་མོས་པ་རྣམས་དང་། ཡིད་ཀྱི་མོས་པས་ཡོངས་སུ་ཚོལ་བ་གཅོད་ཅིང་། རྣམ་པར་བརྟག་པ་དང་། རྣམ་པར་བརྟག་པར་བྱ་
བའི་མཚན་མ་མེད་པའི་ཕྱིར་མྱ་ངན་ལས་འདས་པ་ཞེས་བྱའོ། །བློ་གྲོས་མཐའ་ཡས་འདི་ནི་ཡོངས་སུ་མྱ་ངན་ལས་འདས་པ་ཆེན་པོའི་ངོ་བོ་ཉིད་ཡིན་ཏེ། མྱ་ངན་ལས་འདས་པ་ལ་མཐའ་མེད་པས་

79-1-100b

བརྗོད་ཀྱིས་མི་ལང་ངོ་། གལ་ཏེ་བགྲོད་པར་བྱ་བ་དང་བཅས་པར་གྱུར་ན་དེ་ནི་ལམ་མ་ཡིན་ཏེ། ལམ་ལ་ཡང་ཚིག་མེད་པས་བརྗོད་པར་མི་ནུས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལམ་འདིས་
མྱ་ངན་ལས་འདས་པའི་གཞལ་མེད་ཁང་ཆེན་པོར་བགྲོད་པར་གྱུར་པ་ན་སེམས་ཅན་བརྒྱ་སྟོང་ཚད་མེད་པ་རྣམས་ཀྱང་ལམ་འདི་ལ་འགོད་པར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་
ཆེན་པོ་རྣམས་ལམ་འདི་ལ་གཞོལ་བར་གྱུར་པའི་ཚེ་ཡོངས་སུ་ངལ་བ་དང་། གདུང་བ་མེད་པར་ཇི་ལྟ་ཇི་ལྟར་ཡོངས་སུ་ཚོལ་བ་དང་། ཇི་ལྟ་ཇི་ལྟར་རབ་ཏུ་བཀོད་པ་དང་། འདུན་པ་དེ་ལྟ་དེ་ལྟར་རབ་ཏུ་བཀོད་
ནས་བཀོད་པ་རེ་རེས་ཀྱང་སེམས་ཅན་ཡོངས་སུ་བསྡུས་ནས་ཆོས་སྟོན་པར་བྱེད་པས་སེམས་ཅན་རྣམས་རབ་ཏུ་དགའ་བར་བྱེད་དོ། །དེ་ཅིའི་ཕྱིར་ཞེ་ན། ལམ་འདི་ནི་མཚུངས་པ་མེད་པས་མི་མཐུན་པའི་ཕྱོགས་
ཡོངས་སུ་དག་པར་བྱེད་པ་དང་། བྱ་བ་རྣམས་མཐར་ཕྱིན་པར་བྱེད་པས་སངས་རྒྱས་བཅོམ་ལྡན་འདས་རྣམས་དང་། ཉན་ཐོས་དང་། རང་སངས་རྒྱས་དག་ཀྱང་ལམ་འདི་ལ་གཞོལ་ཞིང་འགལ་བར་མི་མཛད་
པ་དང་། ས་དེ་དག་ཏུ་མ་བྱོན་ཅིང་སྨོན་པ་རྣམས་ཡོངས་སུ་རྫོགས་པར་མ་གྱུར་གྱི་བར་དུ་ནམས་ཀྱང་སྤོང་བར་མི་མཛད་པས་སོ། །དེ་ལ་ས་གང་ཞེ་ན། འདི་ལྟ་སྟེ། མྱ་ངན་ལས་འདས་པའི་ས་དང་། གཞལ་མེད་
ཁང་ཆེན་པོའི་ས་གང་ཡིན་པའོ། །འདི་ལྟ་སྟེ། དཔེར་ན་ནམ་མཁའ་ནི་དཔེར་བྱར་མེད་ཀྱང་ནམ་མཁའ་མ་གཏོགས་པར་དཔེ་གཞན་གྱིས་ནམ་མཁའ་མཚོན་པར་མི་ནུས་པས་ཤིན་ཏུ་ཡངས་ཤིང་རྒྱ་ཆེ་བའི་
ནམ་མཁའ་དབེན་པ་ལ་ནམ་མཁའ་ཞེས་བརྗོད་དོ། །མྱ་ངན་ལས་འདས་པའི་གཞལ་མེད་ཁང་ཡང་དེ་བཞིན་དུ་སྟོང་པ་ཉིད་ཀྱི་དབེན་པ་ཆེན་པོ་བདག་པོ་མེད་པ། བདག་གི་བ་མེད་པ་ཡིན་པས་སེམས་ཅན་

79-1-101a

ཐམས་ཅད་དེར་ཞུགས་པར་གྱུར་ཀྱང་སྤུ་ཉག་མ་གཅིག་ཙམ་གྱི་ཚད་ཀྱང་ཡོངས་སུ་གཟུང་དུ་མེད་དེ། ཤིན་དུ་ཡངས་ཤིང་རྒྱ་ཆེ་བའི་སྟོང་པ་ཉིད་རབ་ཏུ་དབེན་བ། རྒྱ་ཆེ་ཞིང་ཚད་མེད་
པས་མྱ་ངན་ལས་འདས་པ་ཆེན་པོ་ཞེས་ཀྱང་བྱའོ། །གཞལ་མེད་ཁང་ཆེན་པོ་ཞེས་ཀྱང་བྱའོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལམ་ཁྱད་པར་དུ་འཕགས་པ་འདི་ནི་ཉན་
ཐོས་དང་། རང་སངས་རྒྱས་རྣམས་ལས་ཡོད་པ་མ་ཡིན་ནོ་སྙམ་ནས་ལམ་འདི་ལ་གནས་པ་གང་ཡིན་པ་དེ་དག་ནི་ཡོན་ཏན་གྱི་ཚོགས་ཐམས་ཅད་མངོན་པར་སྒྲུབ་ཅིང་ཕྱིར་མི་ལྡོག་པ་ཐོབ་པར་གྱུར་པས་
སེམས་ཅན་རྣམས་ལ་ཕན་འདོགས་པ་ཆེན་པོ་བྱེད་པར་འགྱུར་རོ། །སྤྱོད་པ་ཁྱད་པར་དུ་འཕགས་པས་བཀོད་པ་བྱས་ནས་ལམ་འདིས་སེམས་བསྐྱེད་དེ་གཞོལ་བར་གྱུར་པས་ན་དེའི་བཀོད་པ་དེ་ལྟ་བུ་དེ་ནི་
ཉན་ཐོས་དང་། རང་སངས་རྒྱས་རྣམས་ལ་ཡོད་པ་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ལམ་འདི་ལ་གནས་པའི་ཚེ་གལ་ཏེ་འཁོར་ལོས་སྒྱུར་པའི་རྒྱལ་པོ་བྱས་པར་གྱུར་
པ་ན་ཡང་ཆགས་ཤིང་ལྟ་བ་མེད་པར་མཐུ་ཆེན་པོ་དང་ལྡན་ཞིང་རྫུ་འཕྲུལ་སྟོན་པར་བྱེད་པ་དང་། འཇིག་རྟེན་དང་འཇིག་རྟེན་ལས་འདས་པ་ཡང་རབ་ཏུ་རྟོགས་པར་འགྱུར་རོ། །གལ་ཏེ་བརྒྱ་བྱིན་དང་། ཚངས་
པའི་རྒྱལ་པོ་བྱས་པར་གྱུར་ན་ཡང་ཆགས་ཤིང་ཞེན་པ་མེད་པས་ང་རྒྱལ་སྤངས་ནས་སངས་རྒྱས་རྣམས་ལ་བལྟ་བར་མོས་པ་དང་། ཡང་དག་པའི་ཆོས་ཉན་པར་དགའ་བ་དང་། ལྷ་བརྒྱ་སྟོང་ཚད་མེད་པ་
རྣམས་ཡོངས་སུ་སྨིན་པར་བྱེད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །བྱང་ཆུབ་

79-1-101b

སེམས་དཔའི་ཁྱད་པར་ལམ། །འཇིག་རྟེན་དག་ན་མཆོག་གྱུར་པས། །འཕགས་པ་ཐེག་པ་པ་གཉིས་དག ། །ཐམས་ཅད་ལམ་འདིར་འཇུག་པར་འགྱུར། །བྱང་ཆུབ་སེམས་དཔའ་ཐམས་ཅད་གང་། 
བྱང་ཆུབ་ཆེན་པོར་བགྲོད་པ་དང་། །ལམ་གྱི་བཀོད་པ་ཐོབ་འདོད་པ། །ལམ་འདིར་རབ་ཏུ་དབྱེ་བར་བྱ། །གང་ཞིག་ལམ་འདི་དག་ལ་ནི། །བགྲོད་དང་བགྲོད་པར་འགྱུར་བ་དག ། །དེ་དག་ཡང་དག་ལྟ་བ་ཡིས། །ལམ་འདི་ལ་ནི་གནས་པར་བྱ། །
བྱང་ཆུབ་སེམས་དཔའ་ཐམས་ཅད་གང་། །མཉམ་པའི་ལྟ་ལ་གང་གནས་པ། །ལམ་འདིར་རབ་ཏུ་ཞུགས་ནས་ནི། །བདེ་བས་ངེས་པར་འབྱུང་བར་བྱ། །ལམ་འདི་མཆོག་ཏུ་ཁྱད་པར་འཕགས། །ལམ་
འདི་བླ་ན་མེད་པས་ན། །ཡང་དག་ཇི་བཞིན་འདྲེན་བྱེད་ཀྱང་། །གཟུང་བར་བྱ་བ་ཅི་ཡང་མེད། །གང་ཞིག་ལམ་འདིར་གནས་པ་དང་། །ལམ་འདིར་ཡང་དག་ཞུགས་པ་ཡི། །བློ་ལྡན་གང་ཟག་ཐམས་ཅད་ཀྱི། །
སེམས་ནི་གཡོ་བར་མི་འགྱུར་རོ། །ལམ་འདི་ལ་ནི་ཅུང་ཟད་ཀྱང་། །གཡོ་བ་ཡོད་པར་མི་སྟོན་པས། །དེས་ནི་གཡོ་བ་ཡོད་མི་འགྱུར། །གཡོ་བ་དག་ནི་རྟག་ཏུ་སྤོང་། །ང་ཡིས་ལམ་འདི་དག་ལ་ནི། །གཡོ་
བ་མེད་ཅིང་བྱེད་པ་མེད། །སྒྲོ་འདོགས་མེད་པར་རབ་བརྟན་པས། །ལམ་འདི་དེ་ཕྱིར་བླ་ན་མེད། །བྱང་ཆུབ་དག་ནི་ཐམས་ཅད་ཀུན། །ལམ་འདི་ལ་ནི་རབ་གནས་ཀྱང་། །ལམ་འདི་ལ་ནི་སྲེད་མེད་ཅིང་། །ཁོང་ཁྲོ་
བ་ཡང་ཡོད་པ་མིན། །ལམ་འདི་འདས་པ་མ་ཡིན་ཏེ། །ལམ་འདི་མ་འོངས་པ་ཡང་མིན། །དེ་ཡིས་རྣམ་རྟོག་རབ་བསལ་ནས། །དེ་བཞིན་དུ་ནི་བསྒོམ་པར་བྱ། །ལམ་འདི་ལ་ནི་ཉོན་མོངས་མེད། །ལམ་འདི་
ལ་ནི་རྣམ་རྟོག་མེད། །དོན་དག་དང་ནི་མི་འགལ་བར། །དེ་བཞིན་དུ་ནི་གནས་པར་བྱ། །ལམ་མཆོག་ལ་ནི་གང་གནས་པ། །གནས་པ་མེད་པར་གནས་པར་བྱ། །ལམ་འདི་ལ་ནི་གང་གནས་པ། །རྣམ་དག་

79-1-102a

རང་བཞིན་འཐོབ་པར་འགྱུར། །ང་ཡིས་ཡན་ལག་བརྒྱད་པའི་ལམ། །འཕགས་པའི་བགྲོད་པ་ཡིན་པར་བཤད། །ལམ་འདི་ལ་ནི་གང་གནས་པ། །བྱང་ཆུབ་ཐོབ་པར་དཀའ་མི་འགྱུར། །
བྱང་ཆུབ་སེམས་དཔའ་མགོན་མེད་པས། །དེ་བཞིན་ལམ་འདིར་གནས་པར་བྱ། །རྣམ་དག་ལམ་འདི་ཐོབ་གྱུར་ནས། །རེ་རེ་ནས་ནི་བགྲོད་པར་བྱ། །ལམ་རབ་མཆོག་ཏུ་གྱུར་པ་འདི། །སྐྱེས་བུ་དམ་པ་སྒྲུབ་བྱེད་ཅིང་། །དེ་
བཞིན་གཤེགས་པས་བསྔགས་པས་ན། །ཡེ་ཤེས་འདི་ནི་བླ་ན་མེད། །བདུད་དང་བདུད་ཀྱི་དམག་རྣམས་དང་། །བདུད་ཀྱིས་ཡོངས་སུ་བཟུང་བ་དང་། །མུ་སྟེགས་ཅན་ནི་གཞན་རྣམས་ཀྱིས། །བགྲོད་པར་བྱ་བའི་
ཡུལ་མ་ཡིན། །མྱ་ངན་འདས་ལ་གང་རྟོག་པ། །ལམ་མཆོག་འདི་ལ་གནས་མི་འགྱུར། །བྱིས་པ་རྣམ་རྟོག་གཙེས་པས་ན། །མྱ་ངན་འདས་ལ་ཕྱོགས་མི་འགྱུར། །རྣམ་རྟོག་ལས་ནི་གང་འདས་པ། །
འདུ་ཤེས་རྣམ་རྟོག་མེད་པས་ན། །ལམ་ནི་ཆེན་པོ་འདི་དག་ལ། །དེས་ན་རབ་ཏུ་ཞུགས་པར་འགྱུར། །འཕགས་པ་རྣམས་ཀྱི་ལམ་མཆོག་འདི། །བྱིས་པ་སྐྱེ་བོ་སྤོང་བར་བྱེད། །ཆོས་འདི་ལ་ནི་གང་
ཞུགས་པ། །ལམ་འདི་བླ་ན་མེད་པ་ཡིན། །ཁྱད་པར་འཕགས་པའི་ལམ་མཆོག་འདི། །བླ་མེད་གནས་སུ་ཕྱིན་པར་བྱེད། །དེ་ནི་གནོད་དང་མྱ་ངན་མེད། །འཇིགས་པ་མེད་ཅིང་བགེགས་ཀྱང་མེད། །བླ་ན་
མེད་པའི་ལམ་འདི་ནི། །གཟུགས་མེད་ཁ་དོག་མཚན་ཉིད་མེད། །གཟུགས་ཀྱི་མཚན་ཉིད་དག་གིས་ཀྱང་། །བསྟན་པར་ཡང་ནི་མི་ནུས་སོ། །ཤིན་དུ་བདེ་བའི་ལམ་འདི་ནི། །ཡང་དག་ཡིན་པས་འཇིགས་པ་མེད། །
ལམ་འདི་ལ་ནི་གང་ཞུགས་པ། །མཐར་ནི་མྱ་ངན་འདའ་བར་འགྱུར། །མཆོག་ཏུ་རྣམ་དག་ལམ་འདི་ནི། །ནམ་མཁའ་སྟོང་པ་འདྲ་བས་ན། །ཐམས་ཅད་དུ་ནི་ཐོགས་པ་མེད། །རྟག་ཏུ་མྱ་ངན་འདས་ལ་གཞོལ། །གལ་

79-1-102b

ཏེ་མྱ་ངན་འདས་ཕྱིན་ན། །ཕྱིར་ནི་ལྡོག་པར་མི་འགྱུར་པས། །མྱ་ངན་འདས་པ་ཆེན་པོ་འདི། །བླ་མེད་མཆོག་ཏུ་བདེ་བ་ཡིན། །མྱ་ངན་འདས་ཆེན་གཞལ་མེད་ཁང་། །སྟོང་དབེན་ཚད་ནི་གཞལ་དུ་མེད། །དེ་ཕྱིར་མྱ་ངན་
འདས་ཆེན་ཡིན། །གཞལ་མེད་ཁང་ཆེན་ཞེས་ཀྱང་བྱ། །མྱ་ངན་འདས་པ་ཆེན་པོ་འདིར། །དུག་གསུམ་ཉོན་མོངས་རབ་ཏུ་ཞི། །གལ་ཏེ་དེར་ནི་ཕྱིན་གྱུར་ན། །ལྡོག་པ་མེད་ཅིང་སྐྱེ་ལེན་མེད། །མྱ་ངན་འདས་ཆེན་སྟོང་
དབེན་འདི། །དཔེར་ན་ནམ་མཁའ་ཇི་ལྟ་བཞིན། །སྟོང་དབེན་རྒྱ་ནི་ཆེ་བའི་ཕྱིར། །དེ་ན་ཐོགས་པ་ཅི་ཡང་མེད། །མྱ་ངན་འདས་ཆེན་གཞལ་མེད་ཁང་། །སྡུག་བསྔལ་མྱ་ངན་གནས་སྤངས་ཤིང་། །སྤྱོད་ཡུལ་
གནས་ནི་དཔག་མེད་པས། །མྱ་ངན་འདས་པ་ཞེས་བརྗོད་དོ། །མྱ་ངན་འདས་ལ་གྲངས་མེད་པས། །གྲངས་ཀྱི་ཚད་ནི་དམིགས་སུ་མེད། །རབ་ཞི་བསིལ་བའི་རང་བཞིན་ལ། །མྱ་ངན་འདས་པ་ཞེས་བརྗོད་དོ། །མྱ་ངན་
འདས་ལ་བྱ་མེད་པས། །ལམ་ཞུགས་པ་ཡང་བླ་ན་མེད། །ཚད་མེད་རྣམ་རྟོག་མེད་པས་ན། །རྣམ་པར་རྟོག་པ་དམིགས་སུ་མེད། །ངས་ནི་བྱང་ཆུབ་སེམས་དཔའི་ཕྱིར། །ལམ་འདི་རབ་ཏུ་བསྟན་པའི་ཕྱིར། །
ལམ་འདི་ལ་ནི་གང་གནས་པ། །དེ་ནི་མྱ་ངན་འདས་དང་ཉེ། །ལམ་འདི་ལ་ནི་གང་གནས་པ། །འཇིག་རྟེན་པ་ཡི་བདེ་བའི་མཆོག ། །ཐམས་ཅད་རབ་ཏུ་འཐོབ་འགྱུར་བས། །འཇིགས་པ་མེད་པ་ཞེས་བྱའོ། །ལམ་
འདི་ལ་ནི་རབ་གནས་ན། །སེམས་ནི་ཉོན་མོངས་མེད་པར་འགྱུར། །དེས་ན་ལམ་ནི་རྣམ་དག་པས། །འཇིགས་པ་མེད་པ་ཞེས་བྱའོ། །མཉམ་ཉིད་ཡང་དག་ལམ་མཐོང་པས། །ཐམས་ཅད་རྗེས་སུ་རྟོགས་པར་འགྱུར། །
འཚོ་བའི་ཡོ་བྱད་ཐམས་ཅད་ལ། །ཐམས་ཅད་དུ་ནི་ཆགས་མི་འགྱུར། །བྱང་ཆུབ་སེམས་དཔའི་གནས་མེད་པ། །ཡང་དག་ཁྱད་པར་འཕགས་པའི་ལམ། །སེམས་ཅན་རྣམས་ལ་ཕན་འདོགས་པ། །རབ་ཏུ་རྩོལ་བས་

79-1-103a

གཞོལ་བར་བྱ། །བླ་མེད་ལམ་ནི་ཐོབ་གྱུར་ན། །ལམ་མཆོག་བཀོད་པ་འདི་དག་གིས། །འཇིག་རྟེན་རྣམས་ནི་མགུ་བྱེད་པས། །ལམ་འདི་ལ་ནི་གཞོལ་བར་བྱ། །ལམ་འདི་མཆོག་ཏུ་ཁྱད་པར་
འཕགས། །ཡིད་ནི་ཡོངས་སུ་དག་པར་བྱེད། །ཇི་ལྟར་མོས་བཞིན་ཚོལ་བ་དག ། །ཐམས་ཅད་རབ་ཏུ་གཞོལ་བར་བྱ། །གལ་ཏེ་འཁོར་ལོས་སྒྱུར་བའི་རྒྱལ། །དཔུང་ཆེན་ཐོབ་པར་གྱུར་ན་ཡང་། །རྒྱལ་ཐབས་
དག་ནི་རབ་སྤོངས་ནས། །རབ་བྱུང་ལམ་ནི་སློབ་པར་བྱེད། །གལ་ཏེ་བརྒྱ་བྱིན་ཚངས་པ་ཡི། །རྒྱལ་ཐབས་ཐོབ་པར་གྱུར་ན་ཡང་། །དེ་དག་ལ་ནི་ཆགས་མེད་པས། །དེ་ནི་ལེགས་པར་རྗེས་འབྲང་ཡིན། །འཇིག་རྟེན་
བསླབ་པའི་གནས་རྣམས་ཀྱང་། །ཐམས་ཅད་གསལ་བར་ཁོང་དུ་ཆུད། །ལམ་འདི་ལ་ནི་གང་གནས་པ། །བདེན་ཚིག་སྨྲ་བ་ཞེས་བྱའོ། །གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་
ཆེན་པོ་རྣམས་ལམ་འདི་ལ་ཡང་དག་པར་གཞོལ་བར་གྱུར་པ་ན་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བར་འདོད་པའི་ཕྱིར་ཆོས་གཅིག་མངོན་པར་སྒྲུབ་པར་བྱེད་དེ། འདི་ལྟ་སྟེ། མི་དགེ་བའི་ཆོས་
རྣམས་མི་བྱེད་པ་གང་ཡིན་པའོ། །གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གཉིས་མངོན་པར་སྒྲུབ་པར་བྱེད་དེ། ནང་དུ་དགེ་བའི་ཆོས་གང་ཡིན་ཞེས་ཚུལ་བཞིན་དུ་
སེམས་པ་དང་། ཕྱི་རོལ་དུ་དགེ་བའི་ཆོས་གང་ཡིན་ཞེས་ཚུལ་བཞིན་དུ་འདྲི་བར་བྱེད་པ་གང་ཡིན་པའོ། །གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གཉིས་
མངོན་པར་སྒྲུབ་པར་བྱེད་དེ། དངོས་པོ་ཇི་ལྟ་བ་བཞིན་དུ་ཆོས་རྣམས་རྟོགས་པར་ཁོང་དུ་ཆུད་པ་དང་། དངོས་པོ་མེད་པ་དང་། རྣམ་པར་རྟོགས་པ་མེད་པར་ཁོང་དུ་ཆུད་པ་གང་ཡིན་པའོ། །གཞན་ཡང་ཡང་དག་

79-1-103b

པའི་ལམ་ཡན་ལག་བརྒྱད་པ་ཡོངས་སུ་བསྡུ་པའི་ཕྱིར་ཆོས་རྣམ་པ་གཉིས་མངོན་པར་སྒྲུབ་པར་བྱེད་དེ། ནང་དུ་རྟོགས་པའི་རྗེས་སུ་འབྲང་བར་བྱེད་པ་དང་། ཕྱི་རོལ་ལ་མངོན་པར་ཞེན་པ་མེད་པ་གང་ཡིན་པའོ། །གཞན་ཡང་
ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གཉིས་མངོན་པར་སྒྲུབ་པར་བྱེད་དེ། རྣམ་པར་རྟོག་པར་བྱ་བ་མེད་པར་བདག་ཉིད་མངོན་པར་ཡིད་ཆེས་པ་དང་། སེམས་ཅན་གང་ད་དུང་
མངོན་པར་ཡིད་ཆེས་པར་མ་གྱུར་པ་དེ་དག་བདག་གིས་ལམ་འདི་ལ་དགོད་པར་བྱའོ་སྙམ་དུ་སེམས་པ་གང་ཡིན་པའོ། །གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་
པ་གཉིས་མངོན་པར་སྒྲུབ་པར་བྱེད་དེ། ལས་སུ་བྱ་བ་རྣམས་ཡང་དག་པ་ཇི་ལྟ་བ་བཞིན་དུ་ཤེས་ཤིང་མཐོང་བ་དང་། ལས་སུ་བྱ་བ་རྣམས་ལ་མངོན་པར་ཞེན་པ་མེད་པ་གང་ཡིན་པའོ། །གཞན་ཡང་ཡང་དག་པའི་
ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གསུམ་མངོན་པར་སྒྲུབ་པར་བྱེད་དེ། ཉེ་བར་ལེན་པའི་ཕུང་པོ་སྡུག་བསྔལ་དང་བཅས་པ་རྣམས་རེ་རེ་ནས་རྟོགས་པར་ཁོང་དུ་ཆུད་པར་བྱེད་པ་དང་། ཉེ་
བར་ལེན་པའི་ཕུང་པོ་སྡུག་བསྔལ་མེད་པ་རྣམས་ནན་ཏན་གྱིས་ཡོངས་སུ་ཚོལ་ཞིང་མོས་པར་བྱེད་པ་དང་། འདུས་པའི་ཆོས་རྣམས་ཡོངས་སུ་སྤོང་བར་བརྩོན་པ་གང་ཡིན་པའོ། །གཞན་ཡང་ཡང་དག་པའི་ལམ་
ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གསུམ་མངོན་པར་སྒྲུབ་པར་བྱེད་དེ། ཆོས་མཆོག་ཏུ་གྱུར་པ་ཡང་དག་པར་སྟོན་པ་ན་ཚིག་འགལ་བ་མེད་པར་ཆོས་ཀྱི་དོན་རྗེས་སུ་འཐུན་པར་སྟོན་ཅིང་སེམས་
ལ་རྩོད་པ་མེད་པ་དང་། ཚིག་འབྲུ་དང་། ཡི་གེ་ཐམས་ཅད་ལ་མངོན་པར་ཞེན་པ་མེད་པ་དང་། ཆོས་ཐམས་ཅད་ཡོངས་སུ་སྡུད་པར་བྱེད་པ་གང་ཡིན་པའོ། །གཞན་ཡང་ཡང་དག་པའི་ལམ་ཡན་ལག་བརྒྱད་པ་

79-1-104a

ཡོངས་སུ་བསྡུ་བའི་ཕྱིར་ཆོས་རྣམ་པ་བཞི་མངོན་པར་སྒྲུབ་པར་བྱེད་དེ། དོན་ལ་ཡང་དག་པར་སྦྱོར་བའི་དངོས་པོ་མངོན་པར་སྒྲུབ་པར་བྱེད་པ་དང་། དོན་ཇི་ལྟ་བ་བཞིན་དུ་རྗེས་སུ་འཐུན་པར་ཡང་དག་
པའི་སྦྱོར་བའི་དངོས་པོ་མངོན་པར་སྒྲུབ་པར་བྱེད་པ་དང་། ཆོས་ཀྱི་རྗེས་སུ་འཐུན་པའི་སོ་སོར་རྟོག་པ་ལ་ཡང་དག་པར་སྦྱོར་བའི་དངོས་པོ་མངོན་པར་སྒྲུབ་པར་བྱེད་པ་དང་། ཐམས་ཅད་ལ་མངོན་པར་ཞེན་པ་
མི་སྐྱེད་པར་ཡང་དག་པའི་སྦྱོར་བའི་དངོས་པོ་མངོན་པར་སྒྲུབ་པར་བྱེད་པ་གང་ཡིན་པའོ། །གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་བཞི་མངོན་པར་བསྒྲུབ་པར་བྱེད་དེ། ཤིན་
དུ་བརྟན་པའི་ཡི་དམ་གྱིས་བདག་ཉིད་སྲུང་ཞིང་ཇི་སྐད་བསྟན་པ་ཁོ་ན་བཞིན་དུ་སྒྲུབ་པར་བྱེད་པ་དང་། དབང་པོ་དྲུག་ལ་མཁས་ཤིང་ལམ་ལ་གཞོལ་བར་བྱེད་པ་དང་། བསམ་པ་རྣམ་པར་དག་པར་བྱེད་པ་དང་། བག་
ཡོད་པ་ལ་གནས་པར་བྱེད་པ་གང་ཡིན་པའོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་ཀྱི་སྤྱོད་པ་འདིས་ལམ་ཡོངས་སུ་སྡུད་པར་བྱེད་པའི་ཕྱིར་ལམ་གྱི་རྗེས་སུ་འབྲང་བ་ཞེས་
བྱ་སྟེ། ཆོས་ཐམས་ཅད་ཀྱི་ངོ་བོ་ཉིད་སྟོང་པ་ཉིད་དུ་བལྟ་བའི་ཕྱིར་དང་། མིང་མེད་པའི་ཕྱིར་དང་། མཚན་མ་མེད་པའི་ཕྱིར་དང་། སྨོན་པ་མེད་པའི་ཕྱིར་དང་། སྐྱེ་བ་མེད་པའི་ཕྱིར་དང་། མངོན་པར་འདུ་བྱ་བ་མེད་
པའི་ཕྱིར་དང་། ཡོངས་སུ་སྐྱོ་བར་གྱུར་པའི་ཕྱིར་དང་། སྤངས་པར་གྱུར་པའི་ཕྱིར་དང་། འགགས་པའི་ཕྱིར་དང་། ངེས་པར་འབྱུང་བའི་ཕྱིར་ཆོས་ཀྱི་སྣང་བ་ཐོབ་པ་ཡིན་ནོ། །སྐྱེ་བ་རྣམས་ཟད་པར་སོ་སོར་
རྟོག་པ་ན་ཡང་སྐྱེ་བ་མེད་པ་ལ་ཡང་སྐྱེ་བའི་འདུ་ཤེས་སྐྱེད་པར་མི་བྱེད་པས་དེའི་ཚེ་སྐྱེ་བ་ལས་ཡང་དག་པར་འདས་ནས་ཆོས་མ་ཡིན་པ་ལས་ངེས་པར་འབྱུང་བ་དང་། རྣམ་པར་དག་པའི་ལམ་ཐོབ་ནས་མི་སྐྱེ་བའི་ཆོས་

79-1-104b

ལ་བཟོད་པ་ཐོབ་པར་འགྱུར་རོ། །ལམ་རྣམ་པར་དག་པར་གྱུར་པའི་ཕྱིར་འདུ་ཤེས་ཐམས་ཅད་ལས་ཡང་དག་པར་འདས་ནས་འདུ་ཤེས་མེད་པ་ལ་མི་གནས་པ་དང་། ལམ་གྱི་འདུ་ཤེས་བཀག་ནས་ཆོས་ཀྱི་འདུ་ཤེས་
སྤོང་བ་དང་། མ་རིག་པའི་དྲ་བ་ལས་ངེས་པར་འབྱུང་ཞིང་རིག་པས་བསྒོམ་པས་འཐོབ་པར་བྱ་བའི་ཆོས་རྣམས་ཀྱང་རབ་ཏུ་འཐོབ་པར་འགྱུར་རོ། །རིག་པས་བསྒོམ་པས་ཆོས་གང་ཞིག་འཐོབ་པར་འགྱུར་ཞེ་ན། འདི་
ལྟ་སྟེ། རིག་པས་བསྒོམས་པས་འདུ་ཤེས་དང་། ཚོར་བ་འགོག་པ་འཐོབ་པ་དང་། ཆོས་ཐམས་ཅད་ལ་ངེས་པར་མཁས་པ་འཐོབ་པ་དང་། དགོངས་ཏེ་གསུངས་པ་རྟོགས་པས་ཆོས་ཉིད་ཀྱི་རྗེས་སུ་འབྲང་བར་
འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལམ་འདིར་ཞུགས་པར་གྱུར་པའི་ཚེ་ཡུལ་ལ་མི་གནས་ཤིང་མཚན་མས་བསྒྲིབས་པར་མི་འགྱུར་ཏེ། ཆོས་ཐམས་ཅད་ནམ་མཁའ་དང་མཚུངས་
པ་དང་། སྐྱེ་བ་ནམ་མཁའ་དང་མཚུངས་པ་དང་། སྐྱེ་བའི་ངོ་བོ་ཉིད་ནམ་མཁའི་ངོ་བོ་ཉིད་དང་མཚུངས་པར་ཤེས་པས་མཚན་མ་ཅུང་ཟད་ཙམ་གྱིས་ཀྱང་བར་ཆད་བྱེད་པར་མི་འགྱུར་རོ། །ལམ་འདི་ཤིན་དུ་རྣམ་པར་དག་
པས་གནོད་པས་འཇིགས་པ་ཡང་མེད་དོ། །གོ་ཆ་ཆེན་པོ་བགོས་པས་འཛིན་པས་འཆིང་བར་ཡང་མི་འགྱུར་ལ། ཐེག་པ་ཆེན་པོ་ལ་ཞོན་པས་རྨོངས་པར་མི་འགྱུར་རོ། །བསྒྲིབས་པ་རྣམས་སྤངས་པས་ནམ་
མཁའ་ལྟ་བུར་གྱུར་ནས་འདིར་ཞུགས་ཏེ། སེམས་ཅན་རྣམས་ཀྱི་སྣང་བ་ཆེན་པོ་བྱེད་པར་འགྱུར་རོ། །བློ་གྲོས་མཐའ་ཡས་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ལམ་ཁྱད་པར་དུ་
འཕགས་པ་ཡིན་ཏེ། ཉན་ཐོས་དང་། རང་སངས་རྒྱས་ཀྱི་སྤྱོད་ཡུལ་མ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །ཡང་དག་ལམ་བརྒྱད་བསྡུ་བའི་ཕྱིར། 

79-1-105a

ཆོས་སྤྱོད་རྣམས་ནི་སྟོན་པ་ཡི། །ལམ་འདི་ལ་ནི་གང་གནས་པ། །དེ་ནི་བརྩོན་འགྲུས་ཆེན་པོ་ཡིན། །དགེ་བའི་ཆོས་ཀྱིས་ལམ་བསྒྲུབས་ཤིང་། །དུས་ནི་ཐམས་ཅད་དག་ཏུ་ཡང་། །མི་དགེའི་
ཆོས་ནི་མི་བྱེད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་རྣལ་འབྱོར་པས། །ནང་དུ་ཚུལ་བཞིན་ཡིད་བྱེད་ཅིང་། །ཕྱི་རོལ་དུ་ནི་འདྲི་བྱེད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་
ཆུབ་སེམས་དཔའ་གང་རྟོག་པ། །དངོས་པོ་ཇི་བཞིན་རབ་ཤེས་ཤིང་། །ཚུལ་བཞིན་ཆོས་བཞིན་གང་གནས་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་སྐྱབས་བྱེད་པས། །ནང་དུ་རྗེས་སུ་
རྟོག་བྱེད་ཅིང་། །ཕྱི་རོལ་དུ་ནི་ཞེན་བྱེད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་འཇིགས་མེད་པས། །བདག་ཉིད་རྟོག་མེད་ཡིད་ཆེས་ཤིང་། །གཞན་དག་ཡིད་ཆེས་གནས་བྱེད་པ། །སྤྱོད་པ་
འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་ཡིད་བྱེད་པས། །བྱ་བའི་ལས་རྣམས་དག་བྱེད་ཅིང་། །ལས་རྣམས་ལ་ནི་འཛིན་བྱེད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་
འཆིང་མེད་པས། །རྟག་ཏུ་སྡུག་བསྔལ་ཉེར་ལེན་ཤེས། །ཉེར་ལེན་སྡུག་བསྔལ་མེད་ཚོལ་བ། །སྤྱོད་པ་འདི་ནི་ལམ་སྡུད་འགྱུར། །བྱང་ཆུབ་སེམས་དཔའ་རབ་ཤེས་པས། །འདུས་པ་སྤྱོད་པ་སྤྱོད་སྒྲུབ་ཅིང་། །འདུས་
འཕྲོད་དག་ནི་གང་སྤོང་བ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་དོན་སེམས་པས། །དོན་ཀྱི་རྗེས་སུ་རབ་རྟོགས་ཤིང་། །རྩོད་པ་མེད་པར་གང་སྟོན་པ། །སྤྱོད་པ་འདིས་ནི་ལམ་སྡུད་འགྱུར། །
བྱང་ཆུབ་སེམས་དཔའ་བློ་ལྡན་པས། །ཚིག་འབྲུ་ཡི་གེ་ཞེན་མེད་པར། །ཆོས་རྣམས་ཐམས་ཅད་སྡུད་བྱེད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་ཆོས་སྤྱོད་པས། །ཆོས་ཀྱི་རྗེས་སུ་འཐུན་

79-1-105b

བྱེད་ཅིང་། །དོན་གྱི་རྗེས་སུ་འཐུན་གྱུར་པ། སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་ལམ་འབྲང་བས། །བརྟན་པའི་ཡིད་དམ་ཡང་དག་གནས། །ཇི་སྐད་བསྟན་བཞིན་གང་སྒྲུབས་པ། །སྤྱོད་པ་འདིས་ནི་ལམ་སྡུད་འགྱུར། །བྱང་
ཆུབ་སེམས་དཔའ་ལམ་དག་པས། །ཡིད་ལ་མོས་པ་རབ་སྦྱངས་ནས། །ཆོས་ལ་གནས་ཤིང་བག་ཡོད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་ཐམས་ཅད་དུ། །སྤྱོད་པ་འདི་རྣམས་རབ་
བསྒྲུབས་ནས། །ལུས་དང་སེམས་ནི་བདེ་ཐོབ་ན། སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་ཡང་དག་དྲན། །རྣམ་དག་ལམ་ལ་གང་གནས་པ། །ཆོས་རྣམས་སྟོང་ཞིང་མཚན་མེད་པར། །ཐམས་
ཅད་རབ་ཏུ་རྟོགས་པར་འགྱུར། །བྱང་ཆུབ་སེམས་དཔའ་རབ་བརྟགས་ན། །སྨོན་ལམ་རྣམ་པར་དག་བྱེད་ཅིང་། །སྨོན་ལམ་མེད་ལ་མི་གནས་པས། །མཚན་མ་རྣམས་ནི་སྤོང་བར་འགྱུར། །བྱང་ཆུབ་སེམས་དཔའ་
ཚུལ་བཞིན་དུ། །དོན་ཚུལ་མཉམ་པར་རབ་བརྟགས་ན། །ཆོས་རྣམས་སྐྱེ་བར་མི་འགྱུར་བས། །ཐེ་ཚོམ་ཅུང་ཟད་ཡོད་མི་འགྱུར། །བྱང་ཆུབ་སེམས་དཔའ་བློ་ལྡན་དག ། །ཐམས་ཅད་ཆོས་ནི་རབ་བརྟགས་
ན། །སྐྱེ་ཞིང་ཞི་བར་འགྱུར་བའི་ཕྱིར། གསལ་བར་མཐོང་ནས་གཞོལ་བར་འགྱུར། །བྱང་ཆུབ་སེམས་དཔའ་ཆོས་རྟོགས་པས། །ཚུལ་བཞིན་ཆོས་སྐྱེ་མཐོང་བས་ན། །སྐྱེ་བ་ལས་ནི་སྐྱེ་མི་མཐོང་། །ཟད་པ་ལས་ནི་
ཟད་མི་མཐོང་། །བྱང་ཆུབ་སེམས་དཔའ་བརྩོན་འགྲུས་ལྡན། །དེ་ལྟར་སོ་སོར་རྟོག་བྱེད་ན། །ཆོས་མིན་པ་ལས་ངེས་འབྱུང་ཞིང་། །ཡང་དག་གནས་ལ་གནས་པར་འགྱུར། །བྱང་ཆུབ་སེམས་དཔའ་བློ་དམ་པས། །ལམ་
འདི་རྣམ་པར་དག་པས་ན། །མྱུར་དུ་བདེ་གནས་ཕྱིན་སེམས་པ། །བླ་མེད་བཟོད་པ་འགྲུབ་པར་འགྱུར། །བྱང་ཆུབ་སེམས་དཔའ་བློ་དམ་པས། །ཚུལ་བཞིན་ཆོས་རྣམས་རྟོག་བྱེད་ཅིང་། །འདུ་ཤེས་རྣམས་ལས་

79-1-106a

གང་འདས་པ། །འདུ་ཤེས་མེད་ལ་རྟག་གནས་འགྱུར། །བྱང་ཆུབ་སེམས་དཔའ་བློ་དམ་པས། །ལམ་འདི་རབ་སྦྱོར་འགྱུར་རོ་ཞེས། །ལམ་གྱི་འདུ་ཤེས་གང་སྤོང་བ། །ཆོས་ཀྱི་འདུ་ཤེས་
ལ་མི་གནས། །བྱང་ཆུབ་སེམས་དཔའ་བློ་དམ་པས། །ལམ་འདི་རབ་ཏུ་སྦྱོང་བའི་ཕྱིར། །མ་རིག་དྲ་བ་དྲལ་སེམས་པ། །ཆོས་ཀྱི་སྣང་ཆེན་ཐོབ་པར་འགྱུར། །བྱང་ཆུབ་སེམས་དཔའ་བློ་དམ་པས། །རིག་
པས་སྒོམ་པར་བྱེད་པས་ནི། །སེམས་ཅན་རྣམས་ལ་སྟོན་བྱེད་པས། །དེས་ན་རབ་ཏུ་གཞོལ་བར་འགྱུར། །བྱང་ཆུབ་སེམས་དཔའ་རིག་སྒོམ་པ། །ཆོས་རྣམས་ཐམས་ཅད་རབ་རྟོགས་ཕྱིར། །དོན་ཟབ་ལ་ནི་ངེས་
འགྱུར་ཞིང་། །ཐབས་མཁས་ཆེན་པོ་ཐོབ་པར་འགྱུར། །བྱང་ཆུབ་སེམས་དཔའ་རིག་སྒོམ་པ། །ཐབས་ཀྱིས་འདུ་ཤེས་ཀུན་སྤངས་བས། །གསང་བའི་ཆོས་ཀྱི་རྗེས་འབྲང་ཞིང་། །ངེས་པའི་དོན་ནི་རྟོགས་པར་
འགྱུར། །བྱང་ཆུབ་སེམས་དཔའ་བློ་དམ་པས། །ཆོས་ཀྱི་སྣང་བ་ཆེན་པོ་ཡིས། །འདུ་ཤེས་ཚོར་བ་འགོག་བྱེད་ན། །དེས་ན་ཡང་དག་གཞོལ་བར་འགྱུར། །བྱང་ཆུབ་སེམས་དཔའ་བློ་དམ་པས། །ལམ་འདི་
ལ་ནི་མི་གནས་ཕྱིར། །ལམ་ལ་ཡང་དག་གཞོལ་བར་འགྱུར། །བྱང་ཆུབ་སེམས་དཔའ་འཇིགས་མེད་པས། །ཆོས་རྣམས་དག་ནི་ཐམས་ཅད་ཀྱང་། །ནམ་མཁའ་དག་པ་ལྟར་ཤེས་པས། །མཚན་
མ་རྣམས་ཀྱིས་སྒྲིབ་མི་འགྱུར། །བྱང་ཆུབ་སེམས་དཔའ་ཆོས་རྣམས་ཀྱི། །རང་བཞིན་ནམ་མཁའ་འདྲར་ཤེས་ཏེ། །ཆོས་རྣམས་ནམ་མཁའ་འདྲ་བའི་ཕྱིར། །རྣམ་དག་དྲི་མ་མེད་པར་ཤེས། །བྱང་
ཆུབ་སེམས་དཔའ་དེ་ལྟ་བུར། །གནས་པས་མཚན་མ་སྒྲིབས་པར་འགྱུར། །མྱུར་དུ་སེམས་ཅན་རྣམས་ལ་ནི། །གདམས་ངག་རྗེས་སུ་སྟོན་པར་འགྱུར། །བྱང་ཆུབ་སེམས་དཔའ་བློ་དམ་པའི། །ལས་རྣམས་

79-1-106b

ཐམས་ཅད་རྣམ་དག་པས། །ལམ་ལ་བར་ཆད་ཅི་ཡང་མེད། ཐོགས་པ་མེད་པར་གཞོལ་བར་འགྱུར། །རྣམ་པར་དག་པའི་ལམ་འདི་ནི། །བྱང་ཆུབ་ཆེན་པོར་མྱུར་དུ་འགྲོ། །འདུས་མ་བྱས་ནི་མངོན་དུ་བྱེད་
མཉམ་པ་ཉིད་དུ་གཞོལ་བར་འགྱུར། །བྱང་ཆུབ་སེམས་དཔའ་གོ་ཆེན་པོ། །ཐེག་ཆེན་ལམ་ནི་ཆེན་པོ་དག །ནམ་མཁའ་འདྲ་བར་ཐོགས་མེད་ཅིང་། །རྣམ་པར་དག་པར་གཞོལ་བར་བྱ། །ཐེག་དང་
ལམ་འདི་གང་སྐྱེས་པ། །ནམ་མཁའ་བསྐྱེད་པ་ལྟ་བུར་ནི། །མཚན་མ་མང་པོ་རབ་སྤངས་ནས། །མཚན་མ་མེད་པར་བགྲོད་པར་བྱ། །ཐེག་པ་ཆེན་པོ་མཉམ་པའི་ཐེག །རྒྱ་ཆེན་ནམ་མཁའ་འདྲ་བས་ན 
ཤིན་དུ་རྣམ་དག་ལམ་འདི་ལ། །ཐེག་པ་འདིས་ནི་བགྲོད་པར་བྱ། །བྱང་ཆུབ་སེམས་དཔའ་ཐམས་ཅད་ཀྱང་། །ཆོས་འདི་ལས་ནི་གུས་བྱེད་པས། །སེམས་ཅན་རྣམས་ནི་ཀུན་གྱི་ཕྱིར། །དཔའ་བོས་རབ་ཏུ་
བགྲོད་པར་བྱ། །བྱང་ཆུབ་ཆེན་པོར་བགྲོད་བྱེད་ཅིང་། །ཁྱད་པར་ལམ་འདིར་གང་གནས་པ། །ཐེག་པ་པ་གཉིས་ལ་སོགས་པས། །བགྲོད་པར་བྱ་བའི་ཡུལ་མ་ཡིན། །བྱང་ཆུབ་སེམས་དཔའ་ཡང་དག་དྲན། །
ལམ་འདི་དག་པར་གང་བྱེད་པ། །རྣམ་པར་དག་པའི་ལམ་འདི་ཡིས། །བླ་མེད་མཆོག་ཏུ་བགྲོད་པར་འགྱུར། །གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
ནི་དེ་ལྟར་ཡང་དག་པར་ཞུགས་ཤིང་གཞོལ་བར་གྱུར་པའི་ཚེ་དྲན་པ་ཉེ་བར་གཞག་པ་དང་། ཡང་དག་པར་སྤོང་བ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། རྣམ་པར་ཐར་པ་དང་། ཏིང་
ངེ་འཛིན་དང་། སྙོམས་པར་འཇུག་པ་དང་། རྫུ་འཕྲུལ་གྱི་རྐང་པ་དང་། ཞི་གནས་དང་། ལྷག་མཐོང་ཚད་མེད་པ་རྣམས་ཡང་དག་པར་ཁོང་དུ་ཆུད་པས་ཡོན་ཏན་ཁྱད་པར་དུ་འཕགས་པ་ཚད་མེད་པས་

79-1-107a

བརྒྱན་ནས་འཇིག་རྟེན་པ་རྣམས་རབ་ཏུ་གདུལ་བའི་ཕྱིར་དང་། གོ་ཆ་ཆེན་པོ་བགོས་ནས་ཁམས་གསུམ་ལས་ངེས་པར་འབྱུང་བར་བྱ་བའི་ཕྱིར་དང་། ཐེག་པ་ཆེན་པོ་ལ་ཞོན་ནས་ལྷ་དང་། 
མི་དང་། ལྷ་མ་ཡིན་རྣམས་ཡོངས་སུ་གཟུང་བར་བྱ་བའི་ཕྱིར་ལམ་འདི་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་གཞོལ་བར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་ནི་གོ་ཆ་ཆེན་པོ་བགོས་ཏེ། ཐེག་པ་ཆེན་པོ་ལ་ཞོན་ནས་ལམ་འདི་ལ་གནས་པའི་ཚེ་གལ་ཏེ་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཀྱིས་
སེམས་ཅན་ཀུན་ལ་ཁྱབ་པར་མི་བྱེད་དམ། སེམས་ཅན་རྣམས་ལ་བདག་དང་འདྲ་བར་ཕངས་པར་མི་བྱེད་ན་ནི་དེ་ལྟ་བུའི་གོ་ཆ་དང་། ཐེག་པ་ཆེན་པོ་འདི་དག་ནི་ས་ཆེན་པོས་ཀྱང་ཐེག་པར་མི་འགྱུར་ལ། 
སེམས་ཅན་ཐམས་ཅད་ཀྱིས་ཀྱང་སྟེན་པར་མི་འགྱུར་བ་ཞིག་ན་འདི་ལྟར་སེམས་ཅན་རྣམས་ལ་སྙིང་བརྩེ་ཞིང་ཕན་གདགས་པའི་ཕྱིར་གོ་ཆ་ཆེན་པོ་བགོས་ཏེ། ཐེག་པ་ཆེན་པོ་ལ་ཞོན་ནས་ལམ་འདི་ལ་
གནས་པ་ཡིན་པས་གོ་ཆ་དང་། ཐེག་པ་ཆེན་པོའི་ལམ་ཆེན་པོ་འདི་དག་ཏུ་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་ཐམས་ཅད་ཀྱིས་ཀྱང་བགྲོད་པར་མི་ནུས་ལ། བྱིས་པ་སོ་སོའི་སྐྱེ་བོ་འཇིག་
རྟེན་ལ་མངོན་པར་ཞེན་པ་དང་། འཇིག་རྟེན་ན་གནས་པར་མོས་པ་ཐམས་ཅད་ཀྱིས་ཀྱང་མཐོང་བར་མི་ནུས་པ་ཡིན་ནོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་
ཅན་ཐམས་ཅད་ལ་སྙིང་བརྩེ་བའི་ཕྱིར་གོ་ཆ་ཆེན་པོ་བགོས་པ་ཡིན་པས་འདི་ལྟར་གོ་ཆའི་མཐུས་ས་དང་། ཆུ་དང་། མེ་དང་། རླུང་གི་ཁམས་བྱིན་གྱིས་བརླབས་པས་སའི་ཁམས་འདི་གཡོ་ཞིང་འཁྲུག་

79-1-107b

པ་མེད་པ་དང་། སེམས་ཅན་ཐམས་ཅད་འཇིགས་པ་མི་སྐྱེ་བ་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་རྣམས་ཀྱང་དེ་དག་གི་རྗེས་སུ་ཅི་རིགས་པར་བྱ་བ་རྣམས་བྱེད་པ་
ཡིན་ནོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་པོ་སེམས་བསྐྱེད་དེ་གོ་ཆ་བགོས་ནས་དེང་གོ་ཆ་ཆེན་པོ་འདི་བགོས་ཏེ། ཐེག་པ་ཆེན་པོ་འདི་ལ་ཞོན་ནས་རྣམ་པར་དག་པའི་
ལམ་གྱིས་སྐྱེ་བ་གཅིག་གིས་ཐོགས་པ་ལ་གཞོལ་ཞིང་བྱང་ཆུབ་ཀྱི་ཤིང་དྲུང་དུ་བགྲོད་པ་དང་། བྱང་ཆུབ་ཀྱི་སྙིང་པོ་ལ་ཞུགས་པར་གྱུར་པའི་བར་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྡོ་
རྗེ་ལས་མངོན་པར་གྲུབ་པའི་སའི་དཀྱིལ་འཁོར་ཤིན་དུ་བརྟན་པ་འདི་གལ་ཏེ་བྱིན་གྱིས་མ་བརླབས་ན་འཁྲུག་ཅིང་གཡོ་བར་འགྱུར་ཏེ། ཤིན་དུ་བརྟན་པའི་རྡོ་རྗེ་ལས་མངོན་པར་གྲུབ་པ་ཡིན་ཡང་གོ་ཆ་ཆེན་
པོ་དང་། ཐེག་པ་ཆེན་པོའི་ལམ་ཆེན་པོ་འདི་འདེགས་པའི་འོས་སུ་མི་འགྱུར་རོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སྔོན་གྱི་སྨོན་ལམ་གྱིས་སེམས་ཅན་ལ་བྱམས་པ་དང་། སྙིང་
རྗེ་ཆེན་པོ་བསྐྱེད་པ་དང་། ཕྱོགས་བཅུའི་སངས་རྒྱས་དང་། བྱང་ཆུབ་སེམས་དཔའ་རྣམས་ཐབས་གཅིག་ཏུ་བསྔགས་པ་བརྗོད་ནས་གལ་ཏེ་རྡོ་རྗེ་ཆེན་པོའི་དཀྱིལ་འཁོར་ཆེན་པོ་དང་། རི་རབ་དང་། 
རིན་པོ་ཆེའི་རི་ཐམས་ཅད་དང་། དེ་ལས་གཞན་པའི་རིའི་རྒྱལ་པོ་རྣམས་བྱིན་གྱིས་བརླབས་པར་མ་གྱུར་ན་གོ་ཆ་ཆེན་པོ་དང་། ཐེག་པ་ཆེན་པོའི་ལམ་ཆེན་པོ་འདི་དག་འདེགས་པའི་འོས་སུ་མི་འགྱུར་
རོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སྔོན་གྱི་སྨོན་ལམ་གྱི་མཐུའི་ཕྱིར། དེ་བཞིན་གཤེགས་པ་རྣམས་ཀྱི་སྔོན་གྱི་སྨོན་ལམ་གྱི་མཐུས་བྱིན་གྱིས་བརླབས་པའི་ཕྱིར་

79-1-108a

དང་། སེམས་ཅན་རྣམས་ལ་རྣམ་པར་མི་འཚེ་བའི་ཕྱིར་དང་། གནོད་པ་མི་བྱེད་པའི་ཕྱིར་དང་། མཉམ་པར་མི་བྱེད་པའི་ཕྱིར་དང་། སྐྲག་པར་མི་བྱེད་པའི་ཕྱིར་དང་། འཁོན་དུ་མི་
འཛིན་པའི་ཕྱིར་དང་། མནར་བར་མི་བྱེད་པའི་ཕྱིར་དང་། ཉོན་མོངས་པར་མི་བྱེད་པའི་ཕྱིར་དང་། སེམས་ཅན་རྣམས་བདེ་བ་ཐོབ་པར་བྱ་བའི་ཕྱིར་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་ཏེ། ལམ་
འདི་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་བགོས་པ་ན་ཤེས་
རབ་ཀྱི་གོ་ཆ་བགོས་ནས་ཤེས་རབ་ཀྱི་མཚོན་ཆ་ཐོགས་ཏེ། ཤེས་རབ་ཆེན་པོས་ཡོངས་སུ་བསྔོ་བར་བྱེད་དོ། །ཡོངས་སུ་བསྔོ་བའི་ཐེག་པ་ལ་ཞོན་ནས། ཤེས་རབ་ཀྱི་སྣང་བ་སྐྱེད་པར་བྱེད་དོ། །སྣང་བའི་ལམ་
ལ་གནས་ནས་ཤེས་རབ་ཀྱི་སྣང་བའི་མིག་གིས་ཆོས་རྣམས་སོ་སོར་བརྟགས་ཏེ། ཐམས་ཅད་མཁྱེན་པའི་ཡེ་ཤེས་ལ་རབ་ཏུ་གཞོལ་བར་བྱེད་དོ། །ཐམས་ཅད་མཁྱེན་པའི་ཡེ་ཤེས་དང་། སེམས་ཅན་
རྣམས་ཡོངས་སུ་བསྡུ་བའི་ཕྱིར་སྦྱིན་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་དུ་ཕྱིན་པ་དང་། བཟོད་པའི་ཕ་རོལ་དུ་ཕྱིན་པ་དང་། བརྩོན་འགྲུས་ཀྱི་ཕ་རོལ་དུ་ཕྱིན་པ་དང་། བསམ་གཏན་གྱི་ཕ་
རོལ་ཏུ་ཕྱིན་པ་རྣམས་སྒོམ་པར་བྱེད་དེ། ཐམས་ཅད་ཀྱང་ཤེས་རབ་སྔོན་དུ་འགྲོ་ཞིང་ཤེས་རབ་ཀྱིས་མངོན་པར་བསྒྲུབ་པ་དང་། ཤེས་རབ་ཀྱིས་ཡོངས་སུ་བསྡུས་ནས་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་ཡོངས་སུ་སྔོ་བར་བྱེད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་

79-1-108b

སེམས་དཔའ་ཆེན་པོ་རྣམས་ཀྱིས་ཤེས་རབ་རྣམ་པ་སྣ་ཚོགས་ཐམས་ཅད་དུ་ཁྱབ་ཅིང་སངས་རྒྱས་ཀྱི་ཆོས་ཚད་མ་མཆིས་པ་རྣམས་ཡོངས་སུ་སྡུད་ཅིང་མངོན་པར་བསྒྲུབ་པར་བགྱིད་པ་ནི་ཤིན་དུ་ངོ་མཚར་
ཆེ་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་བཀའ་སྩལ་པ། བློ་གྲོས་མཐའ་ཡས་དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱིས་
ཇི་སྐད་སྨྲས་པ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཤེས་རབ་རྣམ་པ་སྣ་ཚོགས་ཀྱིས་ཀུན་དུ་ཁྱབ་ཅིང་ཆོས་ཐམས་ཅད་ཡོངས་སུ་བསྡུས་ཏེ། གོ་ཆ་ཆེན་པོ་བགོས་ནས་ཐེག་པ་
ཆེན་པོ་ལ་ཞོན་ཏེ། ལམ་ཆེན་པོ་འདི་ལ་གནས་ནས་ཐམས་ཅད་ཀྱང་ཤེས་རབ་སྔོན་དུ་འགྲོ་བས་རབ་ཏུ་གཞོལ་བར་བྱེད་དོ། །བློ་གྲོས་མཐའ་ཡས་གལ་ཏེ་ཤེས་རབ་དང་ལྡན་ཡང་ཤེས་རབ་སྔོན་དུ་འགྲོ་བ་མེད་ན་
ལམ་འདི་ལ་རབ་ཏུ་གཞོལ་བར་མི་འགྱུར་གྱི། གལ་ཏེ་ཤེས་རབ་དང་ལྡན་ཞིང་ཤེས་རབ་སྔོན་དུ་འགྲོ་བས་ཐམས་ཅད་དུ་ཁྱབ་པར་གྱུར་ན་རྗེས་སུ་འཇུག་པ་དང་། རྗེས་སུ་སྤྱོད་པ་དང་། ཤེས་རབ་ཀྱིས་ཡོངས་
སུ་བསྡུས་ཤིང་། ཤེས་རབ་ཀྱིས་རབ་ཏུ་བསྡམས་པར་གྱུར་ནས་གདོད་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་པ་དང་། ལམ་ཆེན་པོ་འདི་ལ་གནས་པ་ཞེས་བྱ་སྟེ། རབ་ཏུ་བདེ་བའི་ཆོས་ཀྱིས་འཇིག་
རྟེན་ལ་ཕན་འདོགས་ཤིང་ཤེས་རབ་ཀྱི་མིག་འབྱེད་པར་བྱེད་དོ། །ཤེས་རབ་ཀྱི་མིག་གིས་སོ་སོར་བརྟགས་ནས་ཤེས་རབ་ཀྱིས་ལུས་གསལ་བར་གྱུར་པས་འོད་ཟེར་ཆེན་པོ་བཀྱེ་ནས་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དེ། བློ་གྲོས་མཐའ་ཡས་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བགོ་བར་བྱ་བའི་གོ་ཆ་དང་། གོ་ཆའི་བཀོད་པ་དང་། བཞོན་པར་བྱ་བའི་

79-1-109a

ཐེག་པ་ཆེན་པོ་དང་། ཐེག་པ་ཆེན་པོའི་བཀོད་པ་དང་། བགྲོད་པར་བྱ་བའི་ལམ་ཆེན་པོ་དང་། ལམ་ཆེན་པོའི་བཀོད་པ་དང་། བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ལ་རབ་ཏུ་གཞོལ་བར་འགྱུར་བ་ཡིན་ནོ། །བློ་གྲོས་མཐའ་ཡས་སྐྱེས་བུ་དམ་པ་གང་གོ་ཆའི་བཀོད་པ་དང་། ཐེག་པ་ཆེན་པོའི་བཀོད་པ་དང་། ལམ་ཆེན་པོའི་བཀོད་པ་དང་། ཡོན་ཏན་རྣམ་
པ་སྣ་ཚོགས་ཐམས་ཅད་ཀྱིས་རབ་ཏུ་བརྒྱན་པ་གང་ཡིན་པ་དེ་དག་ངས་ཡོངས་སུ་རྫོགས་པར་བརྗོད་པར་གྱུར་ན་བསྐལ་པ་ཚད་མེད་པ་རྣམས་སུ་བརྗོད་ཀྱང་མཐར་ཐུག་པར་མི་འགྱུར་མོད་ཀྱི། འོན་
ཀྱང་ཁྱེད་ལ་སོགས་པས་རབ་ཏུ་རྟོགས་པར་བྱ་བའི་ཕྱིར་དང་། མ་འོངས་པའི་སྐྱེས་བུ་དམ་པ་རྣམས་གོ་ཆའི་བཀོད་པ་དང་། ཐེག་པ་ཆེན་པོའི་བཀོད་པ་དང་། ལམ་ཆེན་པོའི་བཀོད་པ་དང་། ཡོན་ཏན་དཔག་ཏུ་
མེད་པའི་ཚོགས་ཀྱི་བཀོད་པ་ཐོབ་པར་བྱ་བའི་ཕྱིར་ངས་དེང་འདིར་ཕྱོགས་ཅུང་ཟད་ཙམ་ཞིག་མདོར་བསྟན་པར་བྱ་སྟེ། སྐྱེས་བུ་དམ་པ་དེ་དག་གལ་ཏེ་ངས་བསྟན་པའི་ཆོས་ཐོས་པར་གྱུར་ན་གོ་ཆ་ཆེན་པོ་བགོས་ནས་
ཐེག་པ་ཆེན་པོ་ལ་ཞོན་ཏེ། ལམ་ཆེན་པོ་འདི་ལ་གནས་པར་འགྱུར་ཞིང་ཡོན་ཏན་གྱིས་རབ་ཏུ་བརྒྱན་ནས་རབ་ཏུ་གཞོལ་བར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་
སྩལ་པ། །ངས་ནི་ཡང་དག་སྤོང་བ་དང་། །དྲན་པ་ཉེར་གཞག་རྣམ་བཞི་དང་། །ཐབས་མཁས་ཐམས་ཅད་བཤད་པས་ན། །དེ་ཕྱིར་བག་ཡོད་བཅས་པར་འགྱུར། །ཡང་དག་དྲན་པ་ཕུན་ཚོགས་
ཤིང་། །ཆོས་མཁས་མཚུངས་པར་ལྡན་པ་དང་། །རབ་བརྩོན་ངེས་པར་འབྱུང་བྱེད་པས། །དེ་ཕྱིར་བག་ཡོད་བཅས་པར་འགྱུར། །དབང་པོ་སྟོབས་དང་བྱང་ཆུབ་ཕྱོགས། །གོ་བགོས་ཐེག་ཆེན་བཞོན་

79-1-109b

བྱས་ཏེ། །འདི་ཡིས་བསྲུང་བ་རབ་བྱས་ནས། །བྱང་ཆུབ་སེམས་དཔའ་གཞོལ་བར་བྱ། །བསམ་གཏན་ཟིལ་གནོན་རྣམ་མཐར་དང་། །ཏིང་འཛིན་སྙོམས་པར་རབ་ཞུགས་ཏེ། །འདི་ཡིས་བསྲུང་བ་རབ་བྱས་
ནས། །བྱང་ཆུབ་སེམས་དཔས་གཞོལ་བར་བྱ། །སྙིང་རྗེ་བྱམས་དང་དགའ་བཏང་སྙོམས། །གོ་བགོས་ཐེག་ཆེན་བཞོན་བྱས་ཏེ། །འདི་ཡིས་བསྲུང་བ་རབ་བྱས་ནས། །བྱང་ཆུབ་སེམས་དཔའ་གཞོལ་
བར་བྱ། །ཞི་གནས་ལྷག་མཐོང་རྫུ་འཕྲུལ་རྐང་། །ཆོ་འཕྲུལ་དག་ནི་རྫོགས་བྱས་ཏེ། འདི་ཡིས་བསྲུང་བ་རབ་བྱས་ནས། །བྱང་ཆུབ་སེམས་དཔས་གཞོལ་བར་བྱ། །ཚད་མེད་ཡོན་ཏན་རྣམས་དང་ནི། །
གོ་བགོས་ཐེག་ཆེན་བཞོན་བྱས་ཏེ། །ལམ་ལ་ངལ་བ་མེད་བྱས་ནས། །བྱང་ཆུབ་སེམས་དཔས་གཞོལ་བར་བྱ། །བརྩོན་འགྲུས་དག་ནི་བག་ཡོད་དང་། །གོ་བགོས་ཐེག་ཆེན་བཞོན་བྱས་ཏེ། །དྲན་ནས་དེ་
དག་ཤེས་བྱས་ནས། །བྱང་ཆུབ་སེམས་དཔས་གཞོལ་བར་བྱ། །སྣང་བ་གོ་ཆ་ཆེན་པོ་ཡིས། །འཇིག་རྟེན་དག་ནི་རབ་བཏུལ་ཏེ། །གོ་ཆ་འདི་ནི་བགོ་བྱས་པ། །འདི་ནི་བློ་ལྡན་ཞེས་བྱའོ། །ཐམས་ཅད་
མཁྱེན་ལ་ཡང་དག་ཕྱོགས། །ཁམས་གསུམ་ལས་ནི་ངེས་འབྱུང་ཕྱིར། །ཐེག་ཆེན་འདི་ལ་གང་ཞོན་པ། །འདི་ནི་བློ་ལྡན་ཞེས་བྱའོ། །ལམ་ཆེན་རྣམ་པར་དག་པའི་ལམ། །ལྷ་དང་མི་དང་ལྷ་མ་ཡིན། །
འཇིག་རྟེན་ཟིལ་གྱིས་མནན་པ་ནི། །ཀུན་དུ་གྲགས་པ་ཞེས་བྱའོ། །འདི་འདྲའི་བྱང་ཆུབ་སེམས་དཔའ་ནི། །སེམས་ཅན་རྣམས་ནི་ཀུན་གྱི་ཕྱིར། །དུས་རྣམས་ཐམས་ཅད་དག་དུ་ཡང་། །གོ་ཆ་བརྩོན་འགྲུས་
བགོ་བར་བྱེད། །གལ་ཏེ་བྱང་ཆུབ་སེམས་དཔའ་རྣམས། །བྱམས་དང་སྙིང་རྗེ་དགའ་བ་དང་། །གཏང་སྙོམས་ཆེན་པོ་མི་སྒོམ་ན། །ས་ཆེན་དག་ནི་ཤོང་མི་འགྱུར། །གལ་ཏེ་བྱང་ཆུབ་སེམས་དཔའ་རྣམས། 

79-1-110a

སེམས་ཅན་རྣམས་ནི་དེ་དག་ལ། །དུས་རིག་ཕན་འདོགས་མི་བྱེད་ན། །ས་ཆེན་དག་ནི་ཤོང་མི་འགྱུར། །གལ་ཏེ་བྱང་ཆུབ་སེམས་དཔའ་རྣམས། །སྙིང་རྗེ་ཐེག་ཆེན་མི་ཞོན་ན། །རི་དང་
རྒྱ་མཚོ་ཆེན་པོ་རྣམས། །ས་ཆེན་དག་ནི་ཤོང་མི་འགྱུར། །གལ་ཏེ་བྱང་ཆུབ་སེམས་དཔའ་རྣམས། །བྱམས་པས་སེམས་ཅན་དྲན་བྱེད་ཅིང་། །ཐེག་ཆེན་འདི་ལ་མི་ཞོན་ན། །སེམས་ཅན་གང་
ཡང་བརྟེན་མི་འགྱུར། །གལ་ཏེ་གོ་ཆ་འདི་བགོས་ནས། །བྱམས་འོད་གསལ་བར་མ་བྱས་ན། །གོ་ཆ་ཆེན་པོ་དེ་དག་ལ། །སེམས་ཅན་གང་ཡང་བསྟེན་མི་འགྱུར། །གོ་ཆ་འདི་ནི་རབ་བགོས་ནས། །
ཡོན་ཏན་རྒྱ་མཚོ་དཔག་མེད་ཀྱིས། །འབྱུང་ཆེན་ཁམས་བཞི་བྱིན་བརླབས་པས། །དེ་འདེག་འོས་སུ་གྱུར་པ་ཡིན། །སེམས་ཅན་ཡོངས་སུ་བསྡུ་བའི་ཕྱིར། །སྙིང་རྗེའི་འོད་ཀྱིས་ཀུན་ཁྱབ་ཅིང་། །
འབྱུང་ཆེན་ཁམས་བཞི་བྱིན་བརླབས་པས། །དེ་འདེག་འོས་སུ་གྱུར་པ་ཡིན། །སེམས་ཅན་ཡོངས་སུ་བསྡུ་བའི་ཕྱིར། །བྱང་ཆུབ་ཆེན་པོ་མངོན་བསྒྲུབས་ནས། །འབྱུང་ཆེན་ཁམས་བཞི་བྱིན་བརླབས་པས། །
དེ་འདེག་འོས་སུ་གྱུར་པ་ཡིན། །སེམས་ཅན་མི་སྨོན་གནོད་མི་བྱེད། །གོ་ཆ་ཆེན་པོ་འདི་བགོས་ནས། །ཐེག་ཆེན་གྱིས་ནི་ངེས་འབྱུང་བ། །འདི་ནི་བློ་ལྡན་ཞེས་བྱའོ། །ཐབས་ལ་མཁས་པ་ཆེན་པོ་ཡིས། ཐམས་
ཅད་བྱིན་གྱིས་རབ་བརླབས་ནས། །བླ་ན་མེད་པར་ངེས་འབྱུང་བ། །འདི་ནི་བློ་ལྡན་ཞེས་བྱའོ། །དེས་ན་ས་ནི་ཆེན་པོ་འདི། །མི་འབྱིང་རབ་ཏུ་མི་གཡོ་ཞིང་། །ཆུ་དང་མེ་དང་རླུང་གི་ཁམས། །བྱ་བ་དག་ནི་བྱེད་པ་ཡིན། །
བྱང་ཆུབ་སེམས་དཔའ་ཆེན་པོ་རྣམས། །གོ་ཆ་དཔག་མེད་བགོས་ནས་ནི། །ཐེག་ཆེན་འདི་ལ་བཞོན་བྱས་ནས། །ལམ་གྱིས་རབ་ཏུ་གཞོལ་བར་བྱེད། །ཚེ་གཅིག་ཐོགས་པ་མངོན་བསྒྲུབས་ཏེ། །ཐ་མའི་ལུས་ནི་

79-1-110b

ཐོབ་གྱུར་ནས། །བྱང་ཆུབ་ཤིང་རྒྱལ་དྲུང་སོང་སྟེ། །རབ་བརྟན་ས་ལ་འདུག་ནས་ནི། །བྱང་ཆུབ་སྙིང་པོ་དེ་དག་ཏུ། །རྡོ་རྗེ་བཞིན་དུ་རབ་གནས་ནས། །ལུས་དང་སེམས་ནི་ངལ་མེད་པར། །ཐམས་ཅད་མཁྱེན་པ་མངོན་
དུ་བྱེད། །བྱང་ཆུབ་སེམས་དཔའ་འཇིགས་མེད་པས། །གལ་ཏེ་བྱིན་གྱིས་མ་བརླབས་ན། །ས་ཆེན་པོ་དག་གཡོ་འགྱུར་ཞིང་། །ཞི་གནས་ཕྱིར་ཡང་ཆགས་མི་འགྱུར། །ས་ཆེན་ཁམས་ནི་ཐམས་ཅད་ཀུན། །
གལ་ཏེ་བྱིན་གྱིས་མ་བརླབས་ན། །རྡོ་རྗེ་ལས་ནི་གྲུབ་གྱུར་ཀྱང་། །མི་གཡོ་མི་འཁྲུག་གང་ཡང་མེད། །བྱང་ཆུབ་སེམས་དཔའ་འདས་པའི་དུས། །སྨོན་ལམ་ཆེན་པོས་རབ་བརྒྱན་པས། །སེམས་ཅན་
རྣམས་ནི་དེ་དག་ལ། །བྱམས་པ་ཆེན་པོས་དྲན་པར་བྱེད། །མངོན་སུམ་ཕྱོགས་བཅུའི་ཞིང་ཁམས་ན། །སངས་རྒྱས་དག་ནི་ཐམས་ཅད་མཁྱེན། །རྐང་གཉིས་གཙོ་བོ་གང་བཞུགས་པ། །ཐམས་ཅད་
སྲུང་ཞིང་དགོངས་པར་འགྱུར། །གལ་ཏེ་དེ་ལས་གཞན་པའི་རི། །རི་རབ་རིན་པོ་ཆེ་ཡི་རི། །རྡོ་རྗེའི་དཀྱིལ་འཁོར་ཁོར་ཡུག་རི། །ཤིན་དུ་བརྟན་པར་གང་གནས་པ། །བྱང་ཆུབ་སེམས་དཔའ་བློ་ལྡན་
དག །གལ་ཏེ་བྱིན་གྱིས་མ་བརླབས་ན། །གོ་ཆ་ཆེན་པོ་འདི་བགོས་པ། །འདེག་པའི་འོས་སུ་མི་འགྱུར་རོ། །སངས་རྒྱས་བྱང་ཆུབ་སེམས་དཔའ་རྣམས། །རྫུ་འཕྲུལ་སྟོབས་ཀྱི་བྱིན་བརླབས་པ། །
སེམས་ཅན་དང་ནི་ས་ཆེན་པོ། །བསྟེན་འདེག་འོས་སུ་གྱུར་པ་ཡིན། །གོ་ཆ་ཆེན་པོ་གང་བགོས་པ། །སེམས་ཅན་འཚེ་བ་མི་བྱེད་པས། །གོ་ཆ་དག་ནི་གོང་ན་མེད། །ཐེག་པ་དག་གིས་གཞོལ་བར་
བྱ། །གོ་ཆ་ཆེན་པོ་གང་བགོས་པ། །སེམས་ཅན་གནོད་པ་མི་བྱེད་པས། །གོ་ཆ་དག་ནི་བསམ་མི་ཁྱབ། །ཐེག་པ་དག་གིས་གཞོལ་བར་བྱ། །གོ་ཆ་ཆེན་པོ་གང་བགོས་པ། །སེམས་ཅན་དག་ལ་

79-1-111a

འཁོན་མི་འཛིན། །སེམས་ཅན་ནད་ནི་བསལ་བའི་ཕྱིར། །ཐེག་པ་དག་གིས་གཞོལ་བར་བྱ། །ལམ་མཆོག་དག་ནི་ཕུན་ཚོགས་པ། །བླ་མེད་མཆོག་ཏུ་སྦྱོང་བས་ན། །མི་འཚེ་འཁོན་
འཛིན་མེད་པ་དང་། །གནོད་མི་བྱེད་པ་ཡང་དག་གནས། །ཤེས་རབ་ཆེན་པོའི་གོ་བགོས་ཏེ། །ཤེས་རབ་བསྔོ་བའི་ཐེག་བཞོན་པ། །གོ་ཆ་འཛིན་པར་མི་འགྱུར་བས། །བསྔོ་བའི་ནང་ན་མཆོག་ཏུ་འགྱུར། །
བྱང་ཆུབ་སེམས་དཔའ་སྐྱབས་བྱེད་པས། །ཤེས་རབ་སྣང་བ་ལ་གནས་ཏེ། །ཤེས་རབ་ཆོས་རྣམས་རབ་བརྟགས་ནས། །བླ་ན་མེད་པར་གཞོལ་བར་འགྱུར། །བྱང་ཆུབ་སེམས་དཔའ་ལམ་མཆོག་དང་། །
གོ་ཆ་དང་ནི་ཐེག་ཆེན་དག །ཤེས་རབ་འོད་ལས་བྱུང་བས་ན། །དེ་ཕྱིར་སེམས་ནི་རྣམ་པར་དག །ཕ་རོལ་ཕྱིན་ལ་རབ་ཞོན་ནས། །བྱང་ཆུབ་ཆེན་པོར་བགྲོད་བྱེད་ཅིང་། །ཤེས་རབ་ཡོངས་སྡུད་ཤེས་རབ་གཙང་། །
ཤེས་རབ་དག་ནི་སྔོན་དུ་འགྲོ། །ཕ་རོལ་ཕྱིན་པ་ཐམས་ཅད་ཀྱི། །ཤེས་རབ་འདི་ནི་སྔོན་དུ་འགྲོ། །ཤེས་རབ་ཡོངས་སྡུད་ཤེས་རབ་གཙང་། །བླ་མེད་ཡེ་ཤེས་ལེན་པར་བྱེད། །བྱང་ཆུབ་སེམས་དཔའ་
བསམ་མི་ཁྱབ། །ཤེས་རབ་སྣང་བ་སྐྱེད་བྱེད་ཅིང་། །ཤེས་རབ་སྒྲོན་ཆེན་སྤར་བྱེད་པས། །བདེ་བར་རབ་ཏུ་གཞོལ་བར་འགྱུར། །ཤེས་རབ་སྣང་བ་བསྐྱེད་པའི་ཕྱིར། །དེས་ན་ཤེས་རབ་མིག་ཀྱང་འབྱེད། །
སངས་རྒྱས་བླ་མེད་ཡེ་ཤེས་དག །གསལ་མཐོང་རབ་ཏུ་གཞོལ་བར་འགྱུར། །བྱང་ཆུབ་སེམས་དཔའ་དཔའ་བོ་དག །གོ་ཆ་དཔག་ཏུ་མེད་པ་ཡིས། །ཚད་མེད་པར་ནི་བརྒྱན་པའི་ཕྱིར། །གོ་ཆ་བགོས་པ་
ཞེས་བྱའོ། །བྱང་ཆུབ་སེམས་དཔའ་བློ་ཆེན་དག །ཐེག་ཆེན་རབ་ཏུ་བརྒྱན་པས་ན། །སངས་རྒྱས་ཐམས་ཅད་མཁྱེན་པ་ལ། །གོས་པ་མེད་པར་གཞོལ་བར་བྱེད། །བྱང་ཆུབ་སེམས་དཔའ་བློ་ཆེན་དག །

79-1-111b

ལམ་ཆེན་རབ་ཏུ་བརྒྱན་པས་ན། །བསམ་གྱིས་མི་ཁྱབ་མཆོག་དག་ལ། །རྣམ་པར་དག་པས་གཞོལ་བར་བྱེད། ། བམ་པོ་བཞི་པ།། གཞན་ཡང་བློ་གྲོས་མཐའ་ཡས་བྱང་ཆུབ་
སེམས་དཔའ་སེམས་དཔའ་ཆེན་པོ་རྣམས་ཀྱིས་གོ་ཆའི་སྤྱོད་ཡུལ་དཔག་ཏུ་མེད་པ་དང་། ཐེག་པ་ཆེན་པོའི་སྤྱོད་ཡུལ་དཔག་ཏུ་མེད་པ་དང་། ལམ་ཆེན་པོའི་སྤྱོད་ཡུལ་དཔག་ཏུ་མེད་པ་དག་ལ་རབ་ཏུ་གཞོལ་
བར་བྱའོ། །དེ་ཅིའི་ཕྱིར་ཞེ་ན། ཐམས་ཅད་དུ་རྗེས་སུ་འཇུག་པར་འགྱུར་བའི་ཕྱིར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་ཐམས་ཅད་ཀྱི་རྗེས་སུ་འཇུག་པར་འདོད་པའི་ཕྱིར་གོ་ཆ་ཆེན་པོ་བགོ་བར་
བྱེད་དོ། །ཆོས་ཐམས་ཅད་ཀྱི་རྗེས་སུ་འཇུག་པར་འདོད་པའི་ཕྱིར་ཐེག་པ་ཆེན་པོ་ལ་གཞོལ་བར་བྱེད་དོ། །ཆོས་ཐམས་ཅད་ཀྱི་རྗེས་སུ་འཇུག་པར་འདོད་པའི་ཕྱིར་ལམ་ཆེན་པོ་ལ་རབ་ཏུ་གནས་པར་བྱེད་དོ། །ཆོས་
ཐམས་ཅད་ལ་མཉམ་པ་ཉིད་རབ་ཏུ་ཐོབ་པར་བྱ་བའི་ཕྱིར་རབ་ཏུ་གཞོལ་བར་བྱེད་དོ། །འོན་ཀྱང་གོ་ཆ་དེས་ཆོས་ཅུང་ཟད་ཙམ་ཡང་ནང་ངམ། ཕྱི་རོལ་ལམ། རགས་པ་འམ། ཕྲ་བ་འམ། ཐག་རིང་བ་
འམ། ཐག་ཉེ་བ་འམ། འདས་པ་འམ། ད་ལྟར་བྱུང་བ་འམ། མ་འོངས་པ་འམ། འདུས་བྱས་སམ། འདུས་མ་བྱས་སམ། གནས་པ་འམ། མི་གནས་པ་ཞེས་བྱ་བ་ཡང་དག་པར་རྗེས་སུ་མི་དམིགས་
སོ། །གལ་ཏེ་གོ་ཆ་འདིས་ཆོས་ཐམས་ཅད་རབ་ཏུ་རྣམ་པར་འབྱེད་མི་ནུས་སམ། གཏན་ལ་འབེབས་པར་མི་ནུས་སམ། ཡོངས་སུ་མི་ཤེས་སམ། རྗེས་སུ་འཇུག་པར་མི་ནུས་སམ། མངོན་སུམ་དུ་བྱེད་
མི་ནུས་སམ། ཡང་དག་པར་འདའ་བར་མི་ནུས་ན། གོ་ཆ་ཆེན་པོ་བགོས་པ་ཞེས་མི་བྱའོ། །ཆོས་ཐམས་ཅད་རབ་ཏུ་རྣམ་པར་འབྱེད་པར་བྱེད་དམ། གཏན་ལ་འབེབས་སམ། ཡོངས་སུ་ཤེས་པར་གྱུར་ཏམ། 

79-1-112a

རྗེས་སུ་འཇུག་པར་བྱེད་དམ། མངོན་སུམ་དུ་བྱེད་དམ། ཡང་དག་པར་འདའ་བར་བྱེད་ན་གོ་ཆ་ཆེན་པོ་བགོས་པ་ཞེས་བྱའོ། །ཐེག་པ་ཆེན་པོ་དེས་ཀྱང་ཆོས་འགའ་ཙམ་ཡང་ནང་ངམ་ཕྱི་
རོལ་ཞེས་བྱ་བ་ནས་ཐམས་ཅད་མཁྱེན་པའི་ཡེ་ཤེས་སུ་བསྔོ་བ་ཞེས་བྱ་བའི་བར་ཏུ་ཡང་དག་པར་མི་དམིགས་ཤིང་ཡོངས་སུ་ཤེས་པ་དང་། རྗེས་སུ་འཇུག་པ་དང་། མངོན་སུམ་དུ་བྱེད་པ་དང་། ཡང་དག་
པར་འདའ་བར་བྱེད་པས་དེའི་ཕྱིར་ཐེག་པ་འདི་ནི་ཐེག་པ་ཆེན་པོ་དང་། ཆོས་ལ་རབ་ཏུ་མཁས་པའི་ཐེག་པ་དང་། མྱ་ངན་ལས་འདས་པར་ཕྱིན་པར་བྱེད་པའི་ཐེག་པ་དང་། གོང་ན་མེད་པའི་ཐེག་པ་དང་། མཚུངས་
པ་མེད་པའི་ཐེག་པ་ཞེས་བྱའོ། །ལམ་ཆེན་པོ་དེས་ཀྱང་ཅུང་ཟད་ཙམ་ནང་ངམ་ཕྱི་རོལ་ཞེས་བྱ་བ་ནས་ཆོས་ཐམས་ཅད་མཉམ་པ་ཉིད་ཀྱི་ལམ་ཆེན་པོར་གྱུར་ནས་གཞོལ་བར་བྱེད་པ་ཞེས་བྱ་བའི་བར་ཡང་དག་
པར་མི་དམིགས་ཤིང་མཉམ་པ་ཉིད་ཀྱི་ལམ་འདིས་ཆོས་འགའ་ཙམ་ཡང་ཡོངས་སུ་མི་ཤེས་པ་མེད་པས་དེའི་ཕྱིར་ལམ་འདི་ནི་བླ་ན་མེད་པའི་ལམ་དང་། གྲངས་དང་། ཚད་མེད་པའི་ལམ་དང་། མཚུངས་
པ་མེད་པའི་ལམ་ཞེས་བྱའོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པ་ནི་སེམས་ཅན་ཐམས་ཅད་ཀྱི་སེམས་དང་སེམས་ལས་བྱུང་བའི་སྤྱོད་པ་ཀུན་གྱི་རྗེས་
སུ་ཡང་དག་པར་འཇུག་པར་བྱེད་དོ། །སེམས་ཅན་ཐམས་ཅད་ཀྱི་ཉོན་མོངས་པའི་ཀུན་ནས་ཉོན་མོངས་པ་སྤོང་ཞིང་ཡོངས་སུ་དག་པར་བྱེད་དོ། །ཐེག་པ་ཆེན་པོ་ལ་ཞོན་ནས་སེམས་ཅན་རྣམས་ཀྱི་དགེ་བའི་རྩ་བ་
ཐམས་ཅད་ཡང་དག་པར་འཕེལ་བར་བྱེད་དོ། །ལམ་ཆེན་པོ་འདི་ལ་གནས་ནས་སེམས་ཅན་རྣམས་དགེ་བའི་རྩ་བ་ཐམས་ཅད་སྒྲུབ་པར་ཡང་དག་པར་སྐུལ་བར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་

79-1-112b

དཔའ་སེམས་དཔའ་ཆེན་པོ་རྣམས་ནི་སེམས་ཅན་རེ་རེའི་ཕྱིར་སེམས་ཀྱི་སྤྱོད་པ་རེ་རེའི་ཕྱིར་ཡང་འཁོར་བའི་མཐའ་ཇི་སྲིད་པ་དེ་སྲིད་དུ་ཡུན་རིང་པོར་འཁོར་བ་ན་འཁོར་ཞིང་། ཤེས་རབ་ཀྱི་སྨན་ཡོངས་སུ་ཚོལ་བ་དང་། 
གོ་ཆ་མི་སྤོང་བར་ཤིན་ཏུ་བརྟན་པར་བྱས་ནས་གོ་ཆ་ཆེན་པོ་དང་། ཚད་མེད་པའི་གོ་ཆ་དང་། བསམ་པར་དཀའ་བའི་གོ་ཆ་དང་། རྣམ་པར་དག་པའི་གོ་ཆ་དང་། དཔག་ཏུ་མེད་པའི་གོ་ཆ་དང་། བླང་བ་མེད་པའི་
གོ་ཆ་དང་། སེམས་ཅན་གྱི་འདུ་ཤེས་རིག་པའི་གོ་ཆ་དང་། སེམས་ཅན་མེད་པར་ཤེས་པའི་གོ་ཆ་དང་། བདག་མེད་པར་ཤེས་པའི་གོ་ཆ་དང་། སེམས་ཅན་གྱི་རང་བཞིན་ཤེས་པའི་གོ་ཆ་དང་། སེམས་ཅན་
གྱི་རང་བཞིན་རྗེས་སུ་རྟོགས་པའི་གོ་ཆ་དང་། བདག་གི་རང་བཞིན་ཤེས་པའི་གོ་ཆ་དང་། ནང་གི་རང་བཞིན་ཤེས་པའི་གོ་ཆ་དང་། ནང་གི་རང་བཞིན་རྗེས་སུ་རྟོགས་པའི་གོ་ཆ་དང་། ཕྱི་རོལ་གྱི་རང་བཞིན་ཤེས་
པའི་གོ་ཆ་དང་། ཕྱི་རོལ་གྱི་རང་བཞིན་རྗེས་སུ་རྟོགས་པའི་གོ་ཆ་དང་། ནང་དང་ཕྱི་རོལ་གཉིས་གའི་རང་བཞིན་ཤེས་པའི་གོ་ཆ་དང་། ནང་དང་ཕྱི་རོལ་གཉིས་གའི་རང་བཞིན་རྗེས་སུ་རྟོགས་པའི་གོ་ཆ་དང་། ཆོས་
ཐམས་ཅད་ཀྱི་རང་བཞིན་ཤེས་པའི་གོ་ཆ་དང་། ཆོས་ཐམས་ཅད་ཀྱི་རང་བཞིན་རྗེས་སུ་རྟོགས་པའི་གོ་ཆ་དང་། ཆོས་ཐམས་ཅད་དམིགས་སུ་མེད་པར་ཤེས་པའི་གོ་ཆ་དང་། ཆོས་ཐམས་ཅད་ཀྱི་རང་བཞིན་དམིགས་
སུ་མེད་པར་ཤེས་པའི་གོ་ཆ་དང་། ཆོས་ཐམས་ཅད་རྟོགས་པར་ཁོང་དུ་ཆུད་པའི་གོ་ཆ་དང་མཐའ་མེད་པའི་གོ་ཆ་དང་། དབུས་མེད་པའི་གོ་ཆ་དང་། དབུས་དང་མཐའ་མེད་པའི་གོ་ཆ་དང་། འདས་
པ་མ་ཡིན་པའི་གོ་ཆ་དང་། མ་འོངས་པ་མ་ཡིན་པའི་གོ་ཆ་དང་། ད་ལྟར་བྱུང་བ་ཡིན་པའི་གོ་ཆ་དང་། བྱ་བ་མེད་པའི་གོ་ཆ་དང་། བྱེད་པ་མེད་པའི་གོ་ཆ་ཡང་དག་པར་བགོ་བར་བྱེད་དོ། །བློ་གྲོས་མཐའ་

79-1-113a

ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་འདི་ལ་བགོས་པར་མི་བྱེད། རྗེས་སུ་རྟོགས་པར་ཡང་མྱི་བྱེད། གཏན་ལ་འབེབས་པར་ཡང་མི་བྱེད། ངེས་པར་འབྱུང་
བར་མི་བྱེད། མངོན་སུམ་དུ་ཡང་མི་བྱེད་དེ། གོ་ཆ་ཉིད་ཡོད་པ་མ་ཡིན་པའི་ཕྱིར་རོ། །གོ་ཆ་བགོས་པ་གང་ཡིན་པ་དེ་དག་ནི་རྗེས་སུ་རྟོགས་པར་མི་བྱེད་པའི་ཕྱིར་རྗེས་སུ་རྟོགས་པར་བྱེད་དོ། །གཏན་ལ་འབེབས་
པར་མི་བྱེད་པའི་ཕྱིར་གཏན་ལ་འབེབས་པར་བྱེད་དོ། །ངེས་པར་འབྱུང་བར་མི་བྱེད་པའི་ཕྱིར་ངེས་པར་འབྱུང་བར་བྱེད་དོ། །མངོན་སུམ་དུ་མི་བྱེད་པའི་ཕྱིར་མངོན་སུམ་དུ་བྱེད་དོ། །གདེག་པར་བྱ་བ་མེད་པའི་ཕྱིར་
ཐེག་པ་ཆེན་པོ་ལ་ཞོན་པར་བྱེད་དོ། །ཐེག་པ་ཆེན་པོ་ལ་གདགས་པར་མི་བྱེད་དེ། གདགས་པ་མེད་པའི་གདགས་པས་གདགས་པར་བྱེད་ཀྱང་ཐེག་པ་ཆེན་པོ་ལ་ནི་གདགས་པར་བྱ་བ་ཅི་ཡང་མེད་དོ། །གལ་
ཏེ་གདགས་པ་དང་བཅས་པར་གྱུར་ན་དེ་ཉིད་གདགས་པ་མ་ཡིན་ཏེ། གདགས་པ་དེ་དག་དམིགས་སུ་མེད་པའི་ཕྱིར་དང་། བལྟར་མེད་པའི་ཕྱིར་རོ། །ཐེག་པ་ཡང་ཡོད་པ་མ་ཡིན་པ་སྟེ། ཐེག་པ་ལ་གནས་པ་དག་ནི་
དམིགས་སུ་མེད་པས་ཐེག་པ་ཆེན་པོ་ལ་གནས་པར་བྱས་པས་གཞོལ་བར་བྱས་པ་སྤོང་ཞིང་མཐར་ཕྱིན་པར་ཡང་མི་བྱེད་ལ། མྱ་ངན་ལས་འདས་པར་ཕྱིན་པར་ཡང་མི་བྱེད་དེ། དམིགས་སུ་མེད་པའི་ཕྱིར་རོ། །
ལམ་མ་ཡིན་པས་ལམ་མེད་དེ། ལམ་ལ་གཞོལ་བར་བྱེད་པ་ཉིད་ཡང་དག་པར་མཉམ་པའི་ཕྱིར་རོ། །ཡང་དག་པའི་ལམ་འདི་ནི་གདགས་སུ་མེད་པས་སུ་ཞིག་གང་དུ་གང་ལས་གདགས་པར་བྱེད་དེ། བྱ་
བ་ཡང་མེད། བྱེད་པ་ཡང་མེད། འདུས་པ་ཡང་མ་ཡིན། འདུས་པ་མེད་པ་ཡང་མ་ཡིན། ཐམས་ཅད་ལ་སྐྱོ་ཞིང་ཐམས་ཅད་ཡོངས་སུ་མི་འཚལ་བ་ཡིན་ནོ། །དེ་ཅིའི་ཕྱིར་ཞེ་ན། ཡང་དག་པར་མཉམ་

79-1-113b

པའི་ལམ་འདི་ནི་ཆོས་ཐམས་ཅད་དང་གཅིག་པ་ཡང་མ་ཡིན། ཐ་དད་པ་ཡང་མ་ཡིན་ཞིང་མཚུངས་པར་མི་ལྡན་པའི་ཕྱིར་རོ། །ཆོས་ཀྱི་འདུ་ཤེས་མི་སྐྱེད་ཅིང་ཆོས་ཐམས་ཅད་སྤོང་བར་བྱེད་པས་གཙང་བ་ཡང་མེད་
མི་གཙང་བ་ཡང་མེད་དོ། །ཆོས་ཉིད་ཀྱང་དེ་བཞིན་ཏེ། གཙང་བ་མེད། མི་གཙང་བ་མེད་པས་དེའི་ཕྱིར་ལམ་འདི་ནི་ཀུན་ནས་ཉོན་མོངས་པ་མེད་པའི་ལམ་ཞེས་བྱ་སྟེ། བགྲོད་པ་མེད་པས་བགྲོད་པར་བྱེད་དོ། །
ཡོངས་སུ་བཟུང་བ་མེད་པས་ཡོངས་སུ་བཟུང་བར་བྱེད་དོ། །ལམ་འདི་ནི་ཤིན་ཏུ་ཟབ་པས་སྐྱེ་བ་མེད་པ། འབྱུང་བ་མེད་པ། བྱེད་པ་མེད་པ། ཐོབ་པ་མེད་པ། མངོན་པར་འདུ་བྱེད་པ་མེད་པ། གནས་མེད་
པ་སྒྲིབ་པ་མེད་པ། དངོས་པོ་མེད་པ་དངོས་པོ་ཐམས་ཅད་རབ་ཏུ་སྟོན་པ། དངོས་པོ་ཐམས་ཅད་དབྱེར་མེད་པ། དངོས་པོའི་རྗེས་སུ་མི་འཇུག་པ་ཡིན་ཏེ། དངོས་པོ་མེད་པའི་ཕྱིར་བླ་ན་མེད་པའི་གནས་སུ་ཕྱིན་པར་བྱེད་པ་
ཡིན་ནོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་གོ་ཆ་འདི་དང་། ཐེག་པ་འདི་དང་། ལམ་འདི་དེ་ལྟར་རིག་པར་བྱའོ། །འོན་ཀྱང་གོ་ཆ་འདི་དང་། ཐེག་པ་འདི་དང་། 
ལམ་འདི་ནི་བལྟར་མེད་ཅིང་ཤེས་པར་བྱར་མེད་པ་དང་། དམིགས་སུ་མེད་པའི་ཕྱིར་སུ་ཞིག་གོ་ཆ་བགོ་བར་བྱེད། སུ་ཞིག་ཐེག་པ་འདི་ལ་ཞོན་པར་བྱེད། སུ་ཞིག་ལམ་འདི་ལ་སྤྱོད་པར་བྱེད་དེ། བལྟར་མེད་
ཅིང་ཤེས་པར་བྱར་མེད་པ། དམིགས་སུ་མེད་པས་སོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་ཆོས་འདི་ཐོས་ནས་མི་སྐྲག་མི་དངང་བར་ཀློག་པ་དང་། ཁ་ཏོན་དུ་འདོན་
པ་དང་། ཡང་དག་པར་རབ་ཏུ་སྟོན་པ་དང་། ཆོས་ཀྱི་ཚུལ་དང་འགལ་བ་མེད་ཅིང་རྗེས་སུ་འཐུན་པར་བསྒྲུབས་པ་དང་། རབ་ཏུ་དགའ་བར་མོས་པར་བྱེད་པ་དང་། ཆོས་འདིའི་ཕྱིར་རབ་ཏུ་བརྩོན་པར་བྱེད་པ་དང་། ཆོས་

79-1-114a

ཀྱི་ཚུལ་ངེས་པ་འདི་ལ་ཐབས་མཁས་པའི་ནུས་པ་དང་ལྡན་པར་གྱུར་པ་གང་ཡིན་པ་དེ་དག་ནི་གོ་ཆ་འདི་བགོས་ཏེ། ཐེག་པ་འདི་ལ་ཞོན་ནས་ལམ་འདིར་ཞུགས་ཏེ། ཆོས་ཟབ་མོ་དམིགས་
སུ་མེད་པ་འདི་ལ་གཞོལ་བར་བྱེད་པས་འཁོར་བའི་མཐའ་གཏུགས་ནས་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང་ཡོན་ཏན་དཔག་ཏུ་མེད་པས་རབ་ཏུ་བརྒྱན་ནས་
འཇིག་རྟེན་དུ་འབྱུང་བར་འགྱུར་རོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཆོས་འདི་ལ་རབ་ཏུ་དགའ་བས་བརྩོན་འགྲུས་བསྐྱེད་ནས་བག་ཡོད་པར་བསྒྲུབ་པར་བྱའོ། །
སེམས་ཅན་གང་ལ་ལ་ཞིག་ཆོས་ཟབ་མོ་འདི་ཐོབ་མ་ཐག་ཏུ་དགའ་བ་བསྐྱེད་པ་གང་ཡིན་པ་དེ་དག་ཀྱང་ངས་ཕན་པ་ཆེན་པོ་ཐོབ་པར་རབ་ཏུ་བསྟན་ནས་གང་ཞིག་ནན་ཏན་བརྩོན་འགྲུས་ཀྱི་བག་ཡོད་པ་དང་
བཅས་པ་དང་། ཚུལ་ཁྲིམས་ཀྱི་སྤྱོད་པ་རྣམ་པར་དག་པས་གཞོལ་བར་བྱེད་པ་ལྟ་སྨོས་ཀྱང་ཅི་དགོས། བློ་གྲོས་མཐའ་ཡས་ཁྱོད་ཀྱིས་ཆོས་འདི་ཤིན་ཏུ་ཡངས་ཤིང་རྒྱ་ཆེ་བ་རྣམ་པ་དུ་མ་དང་། ཁྱད་པར་དུ་
འཕགས་པ་རྣམ་པ་དུ་མ་དང་། རྣམ་པར་དག་པ་དུ་མ་དང་ལྡན་པ་ལ་ལྟོས། ངས་ཆོས་འདི་ལ་ནན་ཏན་གྱིས་བསྔགས་པ་རབ་ཏུ་བརྗོད་པ་ནི་སེམས་ཅན་རྣམས་རབ་ཏུ་དགའ་བ་བསྐྱེད་པས་ཡུན་རིང་པོའི་ཕན་
པ་དང་། བདེ་བ་ཐོབ་ནས་ཡོངས་སུ་སྐྱོ་བར་བྱ་བའི་ཕྱིར་དང་། རབ་ཏུ་ཞི་བར་བྱ་བའི་ཕྱིར་དང་། ཡོངས་སུ་ཤེས་པར་བྱ་བའི་ཕྱིར་རོ། །བློ་གྲོས་མཐའ་ཡས་ཡང་ཁྱོད་ཀྱིས་ཆོས་འདི་འཇིག་རྟེན་དང་
འཇིག་རྟེན་ལས་འདས་པའི་ཕུན་སུམ་ཚོགས་པའི་བདེ་བ་སྦྱིན་པ་བྱེད་པ་ཡིན་ཡང་སྲིད་པ་རྣམས་སུ་དབུལ་ཕོངས་པ་སྣ་ཚོགས་སྣང་བར་གྱུར་པ་ནི་སེམས་ཅན་རྣམས་ཆོས་ཟབ་མོ་འདི་ལས་རབ་ཏུ་

79-1-114b

ཉམས་པར་གྱུར་པའི་ཕྱིར་འཇིག་རྟེན་པ་དང་འཇིག་རྟེན་ལས་འདས་པའི་ཕུན་སུམ་ཚོགས་པ་དང་། འབྱོར་པ་དང་། བདེ་བ་རྣམས་སྤངས་པ་ཡིན་པར་བལྟ་བར་བྱའོ། །བློ་གྲོས་མཐའ་ཡས་ཡང་ཁྱོད་
ཀྱིས་དེ་བཞིན་གཤེགས་པ་མངོན་སུམ་དུ་བཞུགས་པས། ཆོས་རིན་པོ་ཆེ་ཟབ་མོ་འདི་འབྱོར་པ་དུ་མ་རྙེད་སླ་བར་གྱུར་ཏོ་སྙམ་དུ་བལྟ་བར་བྱ་ཞིང་། ཁྱོད་ཀྱིས་ཆོས་ཟབ་མོ་འདི་ལ་ནན་ཏན་གྱིས་རབ་ཏུ་བསྒྲུབ་
པར་བྱའོ། །བྱིས་པ་སོ་སོའི་སྐྱེ་བོ་རྣམས་ནི་ངས་ཆོས་རིན་པོ་ཆེ་འདི་ཡང་དག་པར་བསྟན་པ་ན་ཐོས་པར་ཡང་མི་འདོད་ན། ལེན་པ་དང་འཛིན་པ་ལྟ་སྨོས་ཀྱང་ཅི་དགོས། དེ་བཞིན་གཤེགས་པ་མངོན་སུམ་དུ་
བཞུགས་ཤིང་ཆོས་རིན་པོ་ཆེ་འབྱོར་བའི་དུས་སུ་ཡང་མཉན་པར་མོས་པ་དང་། འདྲི་བར་ཡང་འདུན་པར་མི་འགྱུར་ན་མ་འོངས་པའི་དུས་ལྔ་བརྒྱ་ཐ་མ་ལ་ཡང་དག་པའི་ཆོས་རབ་ཏུ་རྣམ་པར་འཇིག་པའི་
ཚེ་སངས་རྒྱས་དང་། ཆོས་དཀོན་མཆོག་དང་། ཆོས་འཛིན་པར་བྱེད་པ་རྣམ་པ་གསུམ་མངོན་དུ་མི་འགྱུར་བའི་དུས་སུ་མཉན་པ་དང་། འདྲི་བར་མོས་པར་ལྟ་ག་ལ་འགྱུར། བློ་གྲོས་མཐའ་ཡས་འོན་ཀྱང་མ་འོངས་
པའི་དུས་ན་གལ་ཏེ་དེ་བཞིན་གཤེགས་པས་ལེགས་པར་བྱིན་གྱིས་བརླབས་པར་གྱུར་ན་ཆོས་རིན་པོ་ཆེ་ཟབ་མོ་འདི་རྙེད་པར་འགྱུར་རོ། །བློ་གྲོས་མཐའ་ཡས་ཤིན་དུ་འཇིགས་པའི་དུས་དེའི་ཚེ་ཆོས་རིན་པོ་ཆེ་ཟབ་མོ་འདི་
ཡང་དག་པར་ཉམས་ཤིང་འགྲིབ་པ་འམ་ཟད་པར་གྱུར་བ་མེད་མོད་ཀྱི། འོན་ཀྱང་ཆོས་ལ་ཉན་པ་དང་འཛིན་པར་བྱེད་པ་མེད་དེ། ངའི་སྤྱན་སྔར་སེམས་རྩེ་གཅིག་ཏུ་མཉན་པར་མོས་པ་དང་། གོ་ཆ་བགོས་པ་
ནི་མ་གཏོགས་ཏེ། དེ་དག་དེའི་ཚེ་ཆོས་འདི་ལ་རབ་ཏུ་དགའ་བས་ཉན་པ་དང་། ལེན་པར་འགྱུར་བས་སོ། །དེའི་ཚེ་སེམས་ཅན་གང་དག་ཆོས་འདི་ཐོས་ནས་རབ་ཏུ་དང་བ་ཙམ་སྐྱེད་པར་བྱེད་ན་ཡང་། ངས་དེ་

79-1-115a

དག་ཆོས་རྒྱ་ཆེན་པོ་འདི་མངོན་པར་བསྒྲུབ་པར་འགྱུར་བར་བསྟན་ན་ད་ལྟར་ཆོས་འདི་ལ་ཡོངས་སུ་དད་པ་བསྐྱེད་ནས་ནན་ཏན་གྱིས་སྒྲུབ་པར་བྱེད་པ་ལྟ་སྨོས་ཀྱང་ཅི་དགོས། བློ་གྲོས་མཐའ་ཡས་
བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་བླ་ན་མེད་པའི་གོ་ཆ་དང་། གོ་ཆ་ཆེན་པོ་ཚད་མེད་པ་རྣམས་ཡང་དག་པར་བགོས་པ་ན། འདི་སྙམ་དུ་སེམས་ཏེ། བདག་ནི་སེམས་ཅན་དབུལ་
ཕོངས་པར་གྱུར་པ་འདི་ལྟ་སྟེ། ཚུལ་ཁྲིམས་ཀྱིས་རྒུད་པ་དང་། ཐོས་པས་རྒུད་པ་དང་། ཤེས་རབ་ཀྱིས་རྒུད་པ་དང་། རྣམ་པར་གྲོལ་བས་རྒུད་པ་དང་། རྣམ་པར་གྲོལ་བའི་ཡེ་ཤེས་མཐོང་བས་རྒུད་
པ་དེ་དག་ཐམས་ཅད་ལས་ཆོས་ཆེན་པོ་འདིས་ཕོངས་པ་མེད་པར་བྱའོ། །ཆོས་ཆེན་པོ་འདིས་ཕོངས་པ་མེད་པར་བྱ་བའི་ཕྱིར་རྒུད་པ་ཐམས་ཅད་སྤངས་ནས། ཚུལ་ཁྲིམས་ཀྱི་ནོར་དང་། ཐོས་པའི་ནོར་དང་། 
ཤེས་རབ་ཀྱི་ནོར་དང་། རྣམ་པར་གྲོལ་བའི་ནོར་དང་། རྣམ་པར་གྲོལ་བའི་ཡེ་ཤེས་མཐོང་བའི་ནོར་གྱིས་ཕྱུག་པར་བྱའོ། །འདོད་ཆགས་དང་། ཞེ་སྡང་དང་། གཏི་མུག་གི་མེ་རྣམས་རབ་ཏུ་ཞི་བར་
བྱའོ། །ནད་ཐམས་ཅད་ལས་སོས་པར་བྱའོ། །བླ་ན་མེད་པའི་སྨན་གྱ་ནོམ་པ་གཏང་བར་བྱའོ། །སྨན་འདིའི་དབང་གིས་ནད་རྣམ་པ་སྣ་ཚོགས་བསལ་ནས་བདེ་བ་ཆེན་པོ་ཐོབ་པར་བྱའོ། །ལྷག་མ་དང་བཅས་པ་
གཏན་དུ་སྤངས་ཏེ། ཤིན་དུ་བསིལ་བའི་ངོ་བོ་ཉིད་བླ་ན་མེད་པའི་མྱ་ངན་ལས་འདས་པ་མངོན་དུ་བྱས་ནས་ཡིད་ལ་སེམས་པ་དང་། སོ་སོར་རྟོག་པའི་ལྷག་མ་ཅི་ཡང་ལུས་པ་མེད་པ་དང་། འདུས་བྱས་དང་། 
འདུས་མ་བྱས་ཐམས་ཅད་ཡོངས་སུ་ཚོལ་བ་མེད་པ་ལ་དགོད་པར་བྱའོ་སྙམ་མོ། །དེ་ཅིའི་ཕྱིར་ཞེ་ན།  མྱ་ངན་ལས་འདས་པ་འདི་ནི་མཆོག་ཏུ་བདེ་ཞིང་ཚོལ་བ་ཐམས་ཅད་ལུས་པ་མེད་པའི་ཕྱིར་དང་། ཡོངས་སུ་

79-1-115b

ཚོལ་བ་གཏན་དུ་ཞི་ཞིང་ཡོངས་སུ་ཟད་པའི་ཕྱིར་རོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་ཆེན་པོ་དེ་ལྟ་བུ་བགོས་ནས་གཞན་ཡང་སེམས་ཅན་ཐམས་ཅད་ལ་སྙིང་
བརྩེ་བས་ཡོངས་སུ་བསྡུ་བའི་ཕྱིར། ཐེག་པ་ཆེན་པོ་ལ་ཞོན་ནས་འདི་སྙམ་དུ་ཐེག་པ་ཆེན་པོ་འདི་ལ་ནི་འདས་པའི་སངས་རྒྱས་རྣམས་ཀྱིས་ཀྱང་བཅིབས་ནས་ངེས་པར་བྱུང་བར་གྱུར་ཏོ། །མ་བྱོན་པའི་སངས་རྒྱས་
རྣམས་ཀྱང་འདི་ལ་བཅིབས་ནས་ངེས་པར་འབྱུང་བར་འགྱུར་རོ། །ད་ལྟར་བཞུགས་པའི་སངས་རྒྱས་རྣམས་ཀྱིས་ཀྱང་འདི་ལ་བཅིབས་ནས་ངེས་པར་བྱུང་བར་གྱུར་ཀྱང་གཤེགས་པར་གྱུར་པ་ཡང་མེད་ལ། བཅིབས་
པ་དང་། ངེས་པར་འབྱུང་བ་ཡང་མེད་དོ་སྙམ་མོ། །དེ་ཅིའི་ཕྱིར་ཞེ་ན། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། སྐྱེ་བ་མེད་པ་དང་། བྱེད་པ་མེད་པའི་ཕྱིར་ངེས་པར་བྱུང་བར་གྱུར་བ་ཡང་མ་
ཡིན། ངེས་པར་འབྱུང་བ་ཡང་མ་ཡིན། ངེས་པར་འབྱུང་བར་འགྱུར་བ་ཡང་མ་ཡིན་ནོ། །ཐེག་པ་འདི་ལ་ཞོན་ནས་དེ་ལྟར་ངེས་པར་འབྱུང་བ་གང་ཡིན་པ་དེ་དག་ནི་ལེགས་པར་བྱུང་བ་ཡིན་ཏེ། མངོན་པར་ཞེན་པ་
མེད་པས་ཆོས་ཐམས་ཅད་འདུས་པ་ཡང་མ་ཡིན། འདུས་པ་མེད་པ་ཡང་མ་ཡིན་པས་འོང་པ་མེད་པ་འགྲོ་བ་མེད་པ་ཡིན་ནོ། །ཐེག་པ་འདི་ལམ་གང་གིས་ངེས་པར་འབྱུང་བའི་ཚེ་ཡང་འདུས་པ་མ་ཡིན་པས་འོང་པ་
མེད་པ་འགྲོ་བ་མེད་པ་ཡིན་ནོ། །ཐེག་པ་འདི་དང་། ལམ་འདིས་གོ་ཆ་ཆེན་པོ་བྱས་ནས་ངེས་པར་འབྱུང་བའི་ཚེ། །།ཡང་འདུས་པ་ཡང་མ་ཡིན། འདུས་པ་མེད་པ་ཡང་མ་ཡིན་པས་འོང་བ་མེད་པ་འགྲོ་
བ་མེད་པ་ཡིན་ཏེ། དམིགས་སུ་མེད་པའི་ཕྱིར་རོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་འདི་དང་། ཐེག་པ་འདི་དང་ལམ་འདིས་དེ་ལྟར་གཞོལ་བར་བྱེད་དོ། །གཞན་

79-1-116a

ཡང་གོ་ཆ་འདི་དང་། ཐེག་པ་འདི་དང་ལམ་འདིས་གཞོལ་བར་བྱེད་པའི་ཚེ་འདི་སྙམ་དུ་སོ་སོའི་སྐྱེ་བོའི་ཆོས་གང་ཡིན་པ་དང་། ཉན་ཐོས་ཀྱི་ཆོས་གང་ཡིན་པ་དང་། རང་སངས་རྒྱས་ཀྱི་ཆོས་གང་
ཡིན་པ་དང་། སངས་རྒྱས་ཀྱི་ཆོས་གང་ཡིན་པའི་ཆོས་དེ་དག་བདག་དང་ཉེ་བ་ཞིག་གམ། འོན་ཏེ་ཐག་རིང་བ་ཞིག་ཅེས་ཡོངས་སུ་རྟོགས་པར་མི་བྱེད་དོ། །སྟོང་པ་དང་། མཚན་མ་མེད་པ་དང་། སྨོན་པ་མེད་
པ་དང་། སྐྱེ་བ་མེད་པ་དང་། མངོན་པར་འདུ་བྱ་བ་མེད་པའི་ཆོས་གང་ཡིན་པ་དེ་དག་བདག་དང་ཉེ་བ་ཞིག་གམ། འོན་ཏེ་ཐག་རིང་བ་ཞིག་ཅེས་ཡོངས་སུ་རྟོག་པར་མི་བྱེད་དོ། །ཡོངས་སུ་སྐྱོ་བ་དང་བྲལ་བ་དང་
འགག་པར་འགྱུར་བ་ནས། མྱ་ངན་ལས་འདས་པ་ཆེན་པོའི་བར་གྱི་གོ་ཆ་དེ་དག་ལ་ཡང་བདག་དང་ཉེ་བ་ཞིག་གམ་འོན་ཏེ་ཐག་རིང་བ་ཞིག་ཅེས་ཡོངས་སུ་རྟོག་པར་མི་བྱེད་དོ། །བློ་གྲོས་མཐའ་ཡས་གོ་ཆ་ཆེན་པོ་
འདི་དང་། ཐེག་པ་འདི་དང་། ལམ་འདི་དག་ལ་ནི་བྱང་ཆུབ་སེམས་དཔའ་ཐམས་ཅད་དང་། ཉན་ཐོས་ཐམས་ཅད་དང་། རང་སངས་རྒྱས་ཐམས་ཅད་དང་། སེམས་ཅན་ཐམས་ཅད་གང་གིས་ཀྱང་བསྒུལ་བར་མི་ནུས་
པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ། །བློ་གྲོས་མཐའ་ཡས་སངས་རྒྱས་བཅོམ་ལྡན་འདས་རྣམས་ནི་གོ་ཆ་འདི་དང་། ཐེག་པ་འདི་དང་། ལམ་འདི་ལ་གཡོ་བ་
མི་མངའ་བ་བརྙེས་པས་ཡོངས་སུ་མྱ་ངན་ལས་འདས་པ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཐམས་ཅད་གཡོ་བ་མེད་པའི་ཕྱིར་དང་། ཆོས་ཐམས་ཅད་ཀྱི་ངོ་བོ་ཉིད་དང་། ཆོས་ཉིད་ཀྱི་མཚན་ཉིད་མི་མཐུན་པ་དང་བྲལ་
བའི་ཕྱིར་དང་། མཚན་མ་རྣམ་པར་དག་པའི་ཕྱིར་དང་། ཡོངས་སུ་རྣམ་པར་དག་པའི་ཕྱིར་དང་། མཚན་མ་དག་གིས་སོ་སོར་བརྟག་པ་དང་། མཆོག་ཏུ་སོ་སོར་བརྟག་པ་དང་། ཀུན་དུ་སོ་སོར་བརྟག་པར་

79-1-116b

བྱ་བ་མ་ཡིན་ནོ། །ཆོས་ཐམས་ཅད་ཀྱི་ཆོས་ཀྱི་མཚན་ཉིད་ཀྱི་ངོ་བོ་ཉིད་ཀྱང་ངོ་བོ་ཉིད་ཀྱིས་སོ་སོར་བརྟག་པ་དང་། མཆོག་ཏུ་སོ་སོར་བརྟག་པ་དང་། ཀུན་དུ་སོ་སོར་བརྟག་པར་བྱ་བ་མ་ཡིན་ནོ། །ཆོས་ཐམས་ཅད་
ཀྱི་ངོ་བོ་ཉིད་མེད་པ་དང་། མཚན་མ་མེད་པ་དང་། བསྟན་དུ་མེད་པ་དང་། བརྗོད་དུ་མེད་པ་གང་ཡིན་པ་འདི་ནི་ཆོས་རྣམས་ཀྱི་དེ་ཁོ་ན་ཉིད་ཀྱི་མཚན་ཉིད་ཅེས་བྱའོ། །བློ་གྲོས་མཐའ་ཡས་གོ་ཆ་འདི་དང་། ཐེག་པ་འདི་
དང་། ལམ་འདི་ལྟ་བུ་འདི་དག་གིས་དེ་ཁོ་ན་ཉིད་ཀྱི་མཚན་ཉིད་ཀྱང་དེ་བཞིན་དུ་བསྟན་དུ་མེད་ཅིང་བརྗོད་དུ་མེད་པ་ཡིན་ཡང་སེམས་ཅན་རྣམས་ཁོང་དུ་ཆུད་པར་བྱ་བའི་ཕྱིར་དང་། ཆོས་ཐམས་ཅད་ཀྱི་སྣང་བ་
འཕེལ་བར་བྱ་བའི་ཕྱིར་གོ་ཆ་འདི་དང་། ཐེག་པ་འདི་དང་། ལམ་འདི་དག་བཏགས་པ་ཙམ་དུ་མདོར་བསྟན་པ་ཡིན་ནོ། །དེང་ཁྱོད་ཀྱིས་གལ་ཏེ་གོ་ཆ་འདི་དང་། ཐེག་པ་འདི་དང་། ལམ་འདིའི་དོན་གྱི་རྗེས་སུ་འཇུག་
ཅིང་སྤྱོད་པར་འདོད་ན་གདགས་པ་མེད་པ་དང་། བསྟན་པ་མེད་པ་དང་། བརྗོད་པ་མེད་པར་དོན་གྱི་རྗེས་སུ་འབྲང་བར་བྱའོ། །དོན་གྱི་རྗེས་སུ་འབྲང་བ་གང་ཡིན་པ་དེ་དག་ལ་ནི་འདི་ནི་སྤྱད་པར་བྱའོ། །ཞེས་བྱ་བ་ཡང་
ཅུང་ཟད་ཀྱང་མེད་ལ། འདི་ནི་རྗེས་སུ་འབྲང་བར་བྱའོ་ཞེས་བྱ་བ་ཡང་ཅུང་ཟད་ཀྱང་མེད་པས་དོན་མ་ཡིན་པ་དེ་དག་གི་རྗེས་སུ་ནི་འབྲང་བར་མི་བྱེད་ལ་དོན་གང་ཡིན་པ་དེ་དག་གི་རྗེས་སུ་འབྲང་བར་བྱེད་དོ། །དོན་གྱི་རྗེས་སུ་འབྲང་
བའི་ཚེ་སྒྲའི་རྗེས་སུ་འབྲང་བར་མི་བྱེད་དོ། །ཡི་གེའི་རྗེས་སུ་འབྲང་བར་མི་བྱེད་དོ། །ངག་གི་རྗེས་སུ་འབྲང་བར་མི་བྱེད་དེ། རྗེས་སུ་མི་འབྲང་བ་དེའི་རྗེས་སུ་མི་འཇུག་པ་གང་ཡིན་པའོ། །དེ་ལ་དོན་གང་ཡིན་ཞེ་ན། འདི་ལྟ་སྟེ། 
གསང་སྟེ། བསྟན་པ་གང་ཡིན་པ་དག་ཡིན་པས་གསང་སྟེ། བསྟན་པ་རྣམས་རྗེས་སུ་རྟོགས་པར་བྱས་ནས་མངོན་པར་ཡིད་ཆེས་པས་སྤྱད་པར་བྱའོ། །མངོན་པར་ཡིད་ཆེས་པས་སྤྱོད་པ་གང་ཡིན་པ་དེ་དག་ནི་དོན་དེ་

79-1-117a

དག་ལ་རྣམ་པར་རྟོག་པར་མི་བྱེད་པས་རྣམ་པར་མི་རྟོག་པའི་རྗེས་སུ་འབྲང་བར་བྱེད་དེ། རྗེས་སུ་འབྲང་བར་བྱེད་པ་གང་ཡིན་པ་དེ་ནི་སྤྱོད་པ་མེད་པ་དང་། རྗེས་སུ་འབྲང་བ་མེད་པ་ཞེས་
བྱའོ། །དེ་ཅིའི་ཕྱིར་ཞེ་ན། དོན་དེ་དག་ལ་སྤྱོད་པ་ཞེས་བྱ་བ་ཡང་ཅུང་ཟད་ཀྱང་མེད་ལ། རྗེས་སུ་འབྲང་བ་དང་། ཀུན་དུ་འགྲོ་བ་ཞེས་བྱ་བ་ཡང་ཅུང་ཟད་ཀྱང་མེད་དེ། སྤྱོད་པ་ཡོངས་སུ་སྦྱངས་པའི་
ཕྱིར་རྗེས་སུ་འབྲང་བར་མི་བྱེད་དོ། །བྱང་ཆུབ་ཀྱི་རྗེས་སུ་འཐུན་པར་ཡང་མི་སྤྱོད་ལ་འཁོར་བའི་རྗེས་སུ་འཐུན་པར་ཡང་མི་སྤྱོད་དེ། རྗེས་སུ་འཐུན་པ་དང་། རྗེས་སུ་མི་མཐུན་པ་དེ་དག་ནི་ཡིད་ལ་བྱེད་པ་
ཡང་མ་ཡིན། ཡང་དག་པའི་དྲན་པ་ཡང་མ་ཡིན་ཏེ། བསམ་པ་ཡོངས་སུ་དག་པར་གྱུར་པའི་ཕྱིར་ཏེ། རྗེས་སུ་འབྲང་བར་མི་བྱེད་དོ། །བློ་གྲོས་མཐའ་ཡས་ཁྱོད་ཀྱིས་དོན་འདིའི་རྗེས་སུ་འབྲང་
བར་བྱའི་ཐ་དད་པའི་སྤྱོད་པ་དང་ལྡན་པར་མི་བྱའོ། །གལ་ཏེ་ཐ་དད་པའི་རྗེས་སུ་འབྲང་བར་བྱེད་ན་དེ་ནི་བརྗེད་ངས་པ་ཡིན་པས་སྒྲའི་རྗེས་སུ་འབྲང་བ་དང་། ཚིག་འབྲུ་དང་། ཡི་གེའི་རྗེས་སུ་འབྲང་བ་དང་། 
ངག་གི་རྗེས་སུ་འབྲང་བར་འགྱུར་ཏེ། ཚིག་གི་བརྗོད་པ་དེ་དག་ཀྱང་ཡོངས་སུ་སྤོང་བར་མི་འགྱུར་རོ། །སྒྲ་ཡོངས་སུ་ཤེས་པ་དང་། ཚིག་འབྲུ་དང་། ཡི་གེ་ལས་ཡང་དག་པར་འདས་པ་དང་། ཚིག་གི་
བརྗོད་པ་རྗེས་སུ་རྟོགས་པ་གང་ཡིན་པ་དེ་དག་ནི་དེ་ལྟར་རྗེས་སུ་འབྲང་བར་མི་བྱེད་པས། འཁོར་བར་འཇུག་པར་མི་འགྱུར་རོ། །དོན་འདི་ལ་དེ་ལྟར་རྗེས་སུ་འབྲང་བ་དང་། དེ་ལྟར་རྗེས་སུ་འཇུག་པ་
གང་ཡིན་པ་དེ་དག་ལ་ནི་སྤྱོད་པ་ཅུང་ཟད་ཀྱང་མེད་དེ། སྤྱོད་པ་ཉེ་བར་ཞི་བར་གྱུར་པའི་ཕྱིར་རོ། །བློ་གྲོས་མཐའ་ཡས་དོན་གྱི་རྗེས་སུ་འཇུག་པའི་ཚེ་མངོན་པར་འདུས་བྱས་པ་དང་བཅས་པས་དོན་གྱི་

79-1-117b

རྗེས་སུ་འབྲང་བར་མི་བྱའོ། །གལ་ཏེ་མངོན་པར་འདུ་བྱེད་པ་མེད་པར་དོན་གྱི་རྗེས་སུ་འབྲང་བར་བྱེད་ན་དེ་ནི་འོང་བ་མེད་པ་དང་། ཕྱིར་མི་ལྡོག་པར་མི་འགྱུར་བ་ཞེས་བྱ་སྟེ། འོང་བ་མེད་པ་དང་། ཕྱིར་ལྡོག་
པར་མི་འགྱུར་བ་གང་ཡིན་པ་དེ་དག་ནི་གོ་ཆ་འདི་དང་། ཐེག་པ་འདི་དང་། ལམ་འདི་དང་། རྗེས་སུ་འཐུན་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞོལ་བར་བྱེད་པ་ཡིན་པས་
སེམས་ཅན་རྣམས་ལ་ཕན་པ་ཆེན་པོ་བྱེད་པར་འགྱུར་རོ། །བློ་གྲོས་མཐའ་ཡས་གང་གིས་ཆོས་འདི་དེ་ལྟར་སྟོན་པ་དང་། དོན་གྱི་རྗེས་སུ་འབྲང་བར་བྱེད་པ་དང་། རྗེས་སུ་འཇུག་པར་བྱེད་པ་གང་ཡིན་པ་དེ་
དག་ནི་སེམས་ཕྱིན་ཅི་ལོག་མེད་པ་དང་། ཐེ་ཚོམ་མེད་པའི་མོས་པ་ཡོངས་སུ་བསྒྲུབ་པ་ཡིན་པས་གོ་ཆ་འདི་དང་། ཐེག་པ་འདི་དང་། ལམ་འདི་ཡོངས་སུ་མ་བསྡུས་པ་གང་ཡིན་པ་དེ་དག་ནི་ཡོངས་སུ་
བསྡུས་ནས་མྱུར་དུ་གཞོལ་བར་བྱེད་པས་གོ་ཆ་འདི་མ་བགོས་པར་ཡང་མྱུར་དུ་བགོ་བར་བྱེད་དོ་ཐེག་པ་འདི་ལ་ད་དུང་ཞོན་པར་མ་གྱུར་པ་ཡང་མྱུར་དུ་ཞོན་པར་བྱེད་དོ། །ལམ་འདི་ལ་གནས་པར་མ་གྱུར་པ་
ཡང་མྱུར་དུ་གནས་པར་བྱེད་དོ། །བློ་གྲོས་མཐའ་ཡས་སེམས་ཅན་དེ་དག་ནི་བསོད་ནམས་ཀྱི་ཚོགས་རྒྱ་ཆེན་པོ་ཡོངས་སུ་སྡུད་པ་དང་། སངས་རྒྱས་བཅོམ་ལྡན་འདས་རྣམས་ཀྱིས་རྗེས་སུ་བསྲུང་
ཞིང་དགོངས་པར་འགྱུར་བས་ཆོས་དང་འགལ་བ་མེད་པ་དང་། དགེ་འདུན་དང་འཐུན་པར་སྤྱོད་པར་འགྱུར་རོ། །བློ་གྲོས་མཐའ་ཡས་ཁྱོད་ནི་དགེ་བའི་རྩ་བ་ཚད་མེད་པ་རྣམས་ཡོངས་སུ་བསྡུས་པ་
ཡིན་པས་མ་འོངས་པའི་དུས་སུ་ཆོས་འདིས་སེམས་ཅན་རྣམས་ཡོངས་སུ་བསྡུས་ནས་སེམས་ཅན་རྣམས་ཀྱི་ཆེད་དུ་ཁུར་ལྕི་བ་བསྐུར་བར་བྱའོ། །དེ་ནས་བསོད་ནམས་ཀྱི་ཚད་ཤིན་དུ་བརྗོད་པར་དཀའ་བ་དག་

79-1-118a

རབ་ཏུ་འཐོབ་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །བྱང་ཆུབ་སེམས་དཔའ་འཇིགས་མེད་པས། །དེ་ལྟར་གོ་ཆ་བགོས་
པའི་ཚེ། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་དཔག་མེད་བགོ་བར་བྱེད། །སེམས་ཅན་གལ་ཏེ་ཕོངས་གྱུར་ཏམ། །སྡུག་བསྔལ་ཆོས་ནི་མེད་པའི་ཚེ། །ཚུལ་ཁྲིམས་དང་ནི་མང་དུ་
ཐོས། །ཤེས་རབ་རྣམས་གྲོལ་ཚད་མེད་པ། །གོ་ཆ་དཔག་མེད་རབ་བགོས་ནས། །ཆོས་ཀྱིས་རབ་ཏུ་ཕྱུག་པོར་བྱེད། །ཆོས་ཀྱིས་ཕྱུག་པོར་གྱུར་པའི་ཕྱིར། །ཐམས་ཅད་བདེ་བ་ཐོབ་པར་བྱེད། །དབུལ་བའི་
སྡུག་བསྔལ་སྤོངས་པའི་ཕྱིར། །བླ་མེད་ཆོས་ནི་སྟོན་བྱེད་པས། །ཐོས་པ་དག་ནི་རྡུལ་སྤངས་ནས། །བདེ་ལམ་འདི་ལ་བཀོད་པར་བྱེད། །ཚུལ་ཁྲིམས་ཕུང་པོ་རབ་རྒྱས་ཤིང་། །མང་དུ་ཐོས་པ་རྒྱ་མཚོ་
འདྲ། །ཤེས་རབ་མཆོག་ནི་ཐོབ་པས་ནས། །དེས་ན་འཆིང་བ་གཅོད་པར་བྱེད། །རྣམ་གྲོལ་ཀུན་དུ་གསལ་བྱེད་དང་། །རྣམ་གྲོལ་ཡང་དག་ཤེས་མཐོང་བ། །གང་གིས་མངོན་སུམ་བྱེད་པ་ནི། །ཐམས་
ཅད་བདེ་བ་འཐོབ་པར་འགྱུར། །འདོད་ཆགས་ཞེ་སྡང་གཏི་མུག་མེས། །རྟག་ཏུ་སྲེག་ཅིང་ཀུན་གདུངས་པས། །དེས་ན་སེམས་ཅན་སྡུག་བསྔལ་འགྱུར། །མེ་དེ་བདག་གིས་བསད་པར་བྱ། །སེམས་ཅན་
རྣམས་ལ་སྨན་བཏང་ནས། །ནད་རྣམས་ཐམས་ཅད་གསལ་བར་བྱ། །གལ་ཏེ་ནད་ནི་ཞི་གྱུར་ན། །མྱ་ངན་འདས་དབྱིངས་ཕྱིན་པར་འགྱུར། །ལྷག་མ་ཐམས་ཅད་གཏན་སྤངས་ནས། །བདེ་གནས་ལ་ནི་
གཞོལ་བར་བྱེད། །བདེ་བའི་གནས་སུ་བཞག་པས་ན། །ལྡོག་པར་གྱུར་པ་གང་ཡང་མེད། །འདུས་བྱས་བདེ་བ་ཐམས་ཅད་ལ། །ཡོངས་སུ་ཚོལ་བར་མི་བྱེད་ཅིང་། །བླ་ན་མེད་པའི་བདེ་ཆེན་དག །ཐམས་

79-1-118b

ཅད་མངོན་སུམ་བྱེད་པར་འགྱུར། །སྤྲོས་པ་མེད་པའི་ཆོས་དག་གིས། །སེམས་ཅན་ཡོངས་སུ་སྨིན་བྱེད་པས། །མཐར་ཕྱིན་པ་ཡི་བདེ་བ་དག །ཐམས་ཅད་རབ་ཏུ་འཐོབ་པར་བྱེད། །དེ་ལྟ་བུར་ནི་གང་གཞོལ་
བ། །ལན་ཅིག་སོང་ནས་ཕྱིར་མི་ལྡོག །གཞོལ་བ་ལས་ནི་ཡང་དག་འདས། །མཆོག་ཏུ་བདེ་བ་རྟག་ཏུ་ཐོབ། །བདེ་བ་ཆེན་པོ་དག་གིས་ནི། །མོས་པ་དང་ནི་མི་མོས་པ། །གཞོལ་བ་དང་ནི་གཞོལ་མེད་པ། །ཐམས་
ཅད་རབ་ཏུ་སྤོང་བར་བྱེད། །དེ་ལྟར་གོ་ཆ་བགོས་ནས་ཀྱང་། །ཐེག་པ་འདི་ལ་ཞོན་ནས་ནི། །སེམས་ཅན་རྣམས་ལ་སྙིང་བརྩེའི་ཕྱིར། །ཐམས་ཅད་ཡོངས་སུ་གཟུང་བར་བྱ། །འདས་པའི་ཐམས་ཅད་མཁྱེན་
པ་རྣམས། །ཐེག་པ་འདི་ཡིས་ངེས་བྱུང་གྱུར། །མ་བྱོན་ཐམས་ཅད་མཁྱེན་རྣམས་ཀྱང་། །ཐེག་པ་འདི་དབང་ངེས་འབྱུང་འགྱུར། །ད་ལྟར་སངས་རྒྱས་བཅོམ་ལྡན་འདས། །ཐེག་པ་འདི་དབང་ངེས་
འབྱུང་བརྙེས། །དེ་ཕྱིར་ཐེག་པ་འདི་ལ་ནི། །མ་བཅིབས་པ་ནི་གང་ཡང་མེད། །འཇིག་རྟེན་དག་ལ་མགོན་མཛད་པས། །རྒྱལ་བ་དག་ནི་ཐམས་ཅད་ཀུན། །ཐེག་པ་འདི་ཡིས་ངེས་བྱུང་ཡང་། །ཐེག་པའི་འདུ་
ཤེས་སྐྱེད་མི་མཛད། །ཐེག་པ་མེད་པས་ཐེག་པ་མཛད། །ལམ་མེད་པ་ལ་ལམ་དུ་མཛད། །ངེས་འབྱུང་མེད་པར་ངེས་པར་འབྱུང་། །དེ་ཕྱིར་ངེས་འབྱུང་བླ་ན་མེད། །ཐེག་པ་འདི་ནི་ངེས་འབྱུང་ཚེ། །ངེས་འབྱུང་ཅུང་
ཟད་ཡོད་མ་ཡིན། །སྟོང་པ་མཚན་མ་མེད་པ་དང་། །སྨོན་མེད་བྱེད་པ་མེད་ཕྱིར་རོ། །ཐེག་མིན་ངེས་འབྱུང་མ་ཡིན་པ། །དེས་ནི་ཐེག་ཆེན་ཞེས་བྱའོ། །ཐམས་ཅད་རབ་ཏུ་མཉམ་པས་ན། །དེས་ན་ཡང་དག་གཞོལ་
བར་བྱེད། །ཐེག་པ་འདི་ལ་འདུས་པ་མེད། །མ་འདུས་པ་ཡང་ཡོད་མ་ཡིན། །བླ་མེད་ལམ་ལ་གཞོལ་བྱེད་པས། །བདེ་བ་ཆེན་པོ་མངོན་དུ་བྱེད། །ཐེག་པ་འདི་ལ་མཚུངས་ལྡན་མེད། །མཚུངས་མི་ལྡན་

79-1-119a

པ་ཡོད་མ་ཡིན། །གནས་པ་མེད་ཅིང་རྟེན་པ་མེད། །དེས་ན་རབ་ཏུ་གཞོལ་བར་བྱེད། །ལམ་འདི་ལ་ནི་འོང་བ་མེད། །ལམ་འདི་ལ་ནི་བགྲོད་པ་མེད། །ཡང་དག་ལམ་འདི་གང་སྤྱོད་པ། །
རབ་དབེན་ཡང་དག་གཞོལ་བར་འགྱུར། །ངས་ནི་ལམ་འདི་ཐེག་འདི་དང་། །གོ་ཆ་ཆེན་པོ་འདི་དག་ནི། །ཆོས་ལ་རྟེན་པར་མི་བྱེད་པས། །རབ་དབེན་བླ་མེད་མཆོག་ཏུ་བསྟན། །སོ་སོའི་སྐྱེ་བོའི་ཆོས་རྣམས་
དང་། །ཉན་ཐོས་ཆོས་ནི་ཐམས་ཅད་དང་། །རང་རྒྱལ་ཆོས་རྣམས་ཐམས་ཅད་ཀྱང་། །ཐམས་ཅད་དམིགས་སུ་མེད་པ་ཡིན། །སངས་རྒྱས་ཆོས་ནི་ཐམས་ཅད་དང་། །དྲི་མེད་བླ་ན་མེད་པའི་ཆོས། །རིང་
བ་མ་ཡིན་ཉེ་མིན་པས། །ཐམས་ཅད་དམིགས་སུ་མེད་པ་ཡིན། །སྟོང་དང་མཚན་མ་མེད་པའི་ཆོས། །སྨོན་དང་བྱེད་པ་མེད་ཆོས་ཀྱང་། །རིང་བ་མ་ཡིན་ཉེ་མིན་པས། །ཐམས་ཅད་དམིགས་སུ་མེད་པ་ཡིན། །
སྐྱོན་བྲལ་དང་ནི་འགགས་པའི་ཆོས། །རབ་དབེན་མྱ་ངན་འདས་པའི་ཆོས། །རིང་བ་མ་ཡིན་ཉེ་མིན་པས། །ཐམས་ཅད་དམིགས་སུ་མེད་པ་ཡིན། །ཐེག་པ་འདི་དང་གོ་ཆ་འདི། །ལམ་འདི་ལ་ནི་འཛིན་
མེད་ཅིང་། །བླ་མེད་གཡོ་བ་མེད་པས་ན། །མཐར་ནི་གང་ཡང་དམིགས་སུ་མེད། །ཆོས་ཀྱི་རང་བཞིན་ཐམས་ཅད་དང་། །དེ་ཁོ་ན་ཡི་མཚན་ཉིད་ནི། །གདགས་སུ་རུང་བ་མ་ཡིན་ཏེ། །ཆོས་ཉིད་རྣམས་ནི་སྟོང་ཕྱིར་
རོ། །ཐེག་པ་འདི་དང་གོ་ཆ་འདི། །ལམ་འདི་བསྟན་དུ་མེད་པ་ཡིན། །ཆོས་རྣམས་རང་བཞིན་ཇི་ལྟ་བ། །དེ་ཡི་རང་བཞིན་དེ་བཞིན་ནོ། །ཆོས་རྣམས་དག་ནི་ཐམས་ཅད་ལ། །མཚན་ཉིད་རང་བཞིན་མེད་པའི་ཆོས། །
ང་ཡིས་མདོར་ནི་བསྟན་པ་ཡིན། །ཆོས་རྣམས་ཐམས་ཅད་དག་ལ་ནི། །རང་བཞིན་མཚན་ཉིད་ཐམས་ཅད་ཀུན། །ཇི་ལྟར་ངས་ནི་བཤད་པ་བཞིན། །མཐར་ནི་ཡོད་པར་མི་འགྱུར་རོ། །ཐེག་པ་འདི་དང་ལམ་འདི་དང་། །

79-1-119b

གོ་ཆའི་རང་བཞིན་མཚན་ཉིད་ལ། །ཚིག་གིས་བརྗོད་པ་རབ་བསལ་ནས། །མཐར་ནི་དམིགས་པར་འགྱུར་མ་ཡིན། །ཚིག་ནི་ཡོད་པ་མ་ཡིན་ཕྱིར། །ངོ་མཚར་རབ་ཏུ་གྱུར་པ་ཡིན། །ཚིག་གི་བརྗོད་པ་དེ་དག་ལ། །དག་
གི་མཚན་ཉིད་ཡོད་མ་ཡིན། །ཆོས་རྣམས་དག་ནི་གཞལ་དུ་མེད། །མཆོག་དང་ཀུན་དུ་གཞལ་དུ་མེད། །ཐམས་ཅད་དཔག་ཏུ་མེད་པས་ན། དེ་ཕྱིར་ཆོས་ནི་བླ་ན་མེད། །ཐེག་པ་འདི་དང་གོ་ཆ་འདི། །ལམ་འདི་
ཡང་ནི་དེ་བཞིན་དུ། །མཚན་མ་མེད་པ་དེ་དག་ལ། །དེ་ལྟར་རྗེས་སུ་འཇུག་པར་བྱ། །སེམས་ཅན་རྣམས་ནི་ཀུན་གྱིས་ཀྱང་། །ཡོངས་ཤེས་ནན་ཏན་བསྒྲུབ་པ་དང་། །མྱུར་དུ་ཆོས་སྣང་ཐོབ་བྱའི་ཕྱིར། །དེ་ཕྱིར་
ངས་ནི་དེ་སྐད་བསྟན། །ཆོས་རྣམས་ལ་ནི་ཚིག་མེད་པས། །ཐམས་ཅད་བརྗོད་དུ་མེད་པ་ཡིན། །ཆོས་རྣམས་དེ་དག་ཀུན་ལ་ནི། །ཐམས་ཅད་རྗེས་སུ་འཇུག་པར་བྱ། །ཆོས་ལ་ཚིག་ནི་མེད་པའི་ཕྱིར། །
དེ་ཡི་རྗེས་སུ་འབྲང་བར་བྱ། །སྤྱོད་ཀྱང་སྤྱད་པ་ཅུང་ཟད་མེད། །ཚོལ་བ་མེད་ཅིང་མོས་ཚོལ་མེད། །འགྲོ་བ་མེད་པས་རྗེས་སུ་འབྲང་། །དེ་ལྟར་རྗེས་སུ་གང་འབྲང་བ། དོན་ལ་སོ་སོར་རྟོག་མི་བྱེད། །ཁྱོད་ཀྱིས་
ཡང་དག་བདེན་པའི་དོན། །ཐམས་ཅད་རྗེས་སུ་འབྲང་བར་བྱ། །སྒྲ་རྣམས་དང་ནི་ཚིག་གི་ནི། །རྗེས་སུ་འཇུག་པར་མི་བྱའོ། །སྒྲ་རྣམས་དང་ནི་ཚིག་དག་གི། །རྗེས་སུ་གལ་ཏེ་མི་འཇུག་ན། དོན་གྱི་རྗེས་
སུ་འབྲང་བྱེད་པས། །འདི་ནི་དོན་ཚོལ་ཞེས་ཀྱང་བྱ། །དོན་ཅེས་བྱ་བ་གང་ཞེ་ན། །གསང་སྟེ་གསུངས་པར་རིག་པར་བྱ། །རྣམ་རྟོག་མེད་ལ་ཡིད་ཆེས་པས། །དོན་དེའི་རྗེས་སུ་འབྲང་བར་བྱ། །དོན་དེ་གསལ་
བར་རབ་རྟོགས་ན། །གསང་སྟེ་གསུངས་པ་དེ་དག་ལ། །འཛིན་མེད་ཞེན་པ་མེད་པ་དང་། །འབྲང་དང་རྗེས་སུ་འཇུག་མི་འགྱུར། །གལ་ཏེ་རྗེས་སུ་འབྲང་བྱེད་ན། །མངོན་ཤེས་རྗེས་སུ་འབྲང་བར་བྱེད། །གལ་ཏེ་

79-1-120a

རྗེས་སུ་མི་འབྲང་ན། །ཐམས་ཅད་རྗེས་སུ་འཇུག་མི་འགྱུར། །ཡང་དག་དྲན་པ་དེ་དབང་གིས། །རྗེས་སུ་འཇུག་པ་སྤོང་བར་བྱེད། །བྱང་ཆུབ་དང་ནི་འཁོར་བ་དང་། །གཉིས་ག་ཡང་ནི་མཚུངས་
མི་ལྡན། །དེ་ལ་བསམ་པར་མི་བྱེད་པས། །བསམ་མེད་ཡང་དག་དྲན་པ་ཡིན། །བསམ་པ་ཡོངས་སུ་དག་པའི་ཕྱིར། །རྣམ་པར་དག་པ་ཞེས་བྱའོ། །འདི་དང་ཐ་དད་སྒྲུབ་བྱེད་ན། །བླ་མེད་ཆོས་ནི་སྤོང་བར་འགྱུར། །
ཁྱོད་ཀྱིས་དོན་དེ་དག་ལ་ནི། །ཇི་སྐད་བསྟན་བཞིན་བསྒྲུབ་པར་བྱ། །གལ་ཏེ་ཚིག་གི་རྗེས་འབྲང་ན། །དེ་ནི་སྒྲ་ཡི་རྗེས་འབྲང་བས། །དེ་ལས་ཡང་དག་མི་འདའ་ཞིང་། །འཇིག་རྟེན་ཆོས་དང་མཚུངས་པར་
འགྱུར། །སྒྲ་དང་ཚིག་འབྲུ་ཡི་གེ་རྣམས། །དེ་དག་རྗེས་སུ་འཇུག་མི་བྱ། །ཡང་དག་དོན་ནི་རྟོགས་བྱས་ཏེ། །བགྲོད་པ་མེད་པས་རྗེས་འབྲང་བྱ། །ཡང་དག་དོན་ལ་སྒྲ་ཡང་མེད། །ཚིག་འབྲུ་ཡི་གེ་ཡོད་མ་ཡིན། །
ཚིག་ལས་ཡང་དག་འདས་པའི་ཕྱིར། །ཡང་དག་དོན་ཅེས་བྱ་བ་ཡིན། །དོན་དེའི་རྗེས་སུ་འབྲང་བྱེད་ཀྱང་། །རྗེས་སུ་འབྲང་བ་ཅི་ཡང་མེད། །འབྲང་བར་བྱ་བ་ཞི་བའི་ཕྱིར། །ཡང་དག་དོན་ཅེས་བྱ་བ་ཡིན། །
ཡང་དག་དོན་ནི་དེ་དག་ལ། །འབྲང་བ་མེད་པ་འབྲང་མེད་པས། །དེ་ནི་ཕྱིར་ལྡོག་མི་འགྱུར་ཞིང་། །གོ་ཆ་སྤོང་བར་མི་བྱེད་དོ། །གོ་ཆ་ཆེན་པོ་ཐེག་ཆེན་དང་། །ལམ་ཆེན་རྗེས་སུ་གང་འབྲང་བ། །བདེ་བའི་གནས་སུ་
བགྲོད་བྱས་ནས། །སེམས་ཅན་རྣམས་ལ་ཕན་བྱེད་འགྱུར། །རབ་ཏུ་བདེ་བའི་ཆོས་འདི་དག །ངས་ནི་ཁྱོད་ལ་རབ་ཏུ་བཤད། །ཁྱོད་དོན་རྗེས་སུ་འབྲང་བྱེད་ན། །ཁྱོད་ཀྱི་ཐེ་ཚོམ་ཆད་པར་འགྱུར། །ཐེག་པ་འདི་
ལ་གང་ཞོན་པ། །ཞོན་ནས་རབ་ཏུ་བགྲོད་བྱེད་ན། །བྱང་ཆུབ་ཆེན་པོར་མྱུར་ཕྱིན་ནས། །བླ་མེད་སངས་རྒྱས་མངོན་སུམ་བྱེད། །ཐེག་པ་མཆོག་ཏུ་གྱུར་པ་འདི། །བཞོན་བྱེད་གང་ཡིན་མྱུར་ཞོན་བྱེད། །ལམ་

79-1-120b

དང་གོ་ཆ་ཆེན་པོ་ཡི། །དོན་དག་ཀྱང་ནི་དེ་བཞིན་ནོ། །བླ་ན་མེད་པའི་ཆོས་འདི་ལ། །ནན་ཏན་གྱིས་ནི་གང་སྒྲུབ་པ། །སེམས་ཅན་དེ་དག་ཐམས་ཅད་ལ། །སངས་རྒྱས་རྣམས་ཀྱིས་དགོངས་པར་འགྱུར། 
མ་འོངས་འཇིག་པའི་དུས་ཀྱི་ཚེ། །ཁྱོད་ཀྱིས་ཆོས་འདི་རབ་ཕྱེ་ནས། །སེམས་ཅན་རྣམས་ལ་རྒྱ་ཆེར་ནི། །ཕན་པ་དག་ནི་རབ་ཏུ་བྱོས། །མ་འོངས་འཇིག་པའི་དུས་ཀྱི་ཚེ། །གལ་ཏེ་ཆོས་འདི་རབ་ཕྱེ་ནས། །
བླ་མེད་བསོད་ནམས་སྐྱེ་འགྱུར་བས། །དེ་ཡི་གྲངས་ནི་གཞལ་མི་ནུས། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བགོས་པའི་གོ་ཆ་གང་ཡིན་པ་དེ་ནི་རྒྱལ་པོ་ཆེན་པོ་ཞེས་བྱའོ། །
དཔག་ཏུ་མེད་པའི་རྒྱལ་པོ་ཞེས་ཀྱང་བྱའོ། །བཀོད་པ་ཆེན་པོ་དང་ལྡན་པས་བཞོན་པའི་ཐེག་པ་ཞེས་ཀྱང་བྱའོ། །དེད་དཔོན་ཆེན་པོ་ཞེས་ཀྱང་བྱའོ། །དཔག་ཏུ་མེད་པའི་འོད་ཅེས་ཀྱང་བྱའོ། །བཀོད་པ་དམ་པ་དང་
ལྡན་པ་བགྲོད་པར་བྱ་བའི་ལམ་ཞེས་ཀྱང་བྱའོ། །བཀོད་པ་ཚད་མེད་པའི་ཚོགས་ཤེས་ཀྱང་བྱའོ། །ཐབས་ཚད་མེད་པའི་ཚོགས་ཤེས་ཀྱང་བྱ་སྟེ། ལམ་འདིའི་དབང་གིས་སྐྱེས་བུ་དམ་པ་རྣམས་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱའོ། །གཞན་ཡང་བློ་གྲོས་མཐའ་ཡས་སྔོན་འདས་པའི་དུས་ཀྱི་བསྐལ་པ་ཚད་མེད་ཅིང་གྲངས་མེད་པའི་ཡང་ཆེས་གྲངས་མེད་པ་ན་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་འདུལ་བ་ཁ་ལོ་སྒྱུར་བ། ལྷ་དང་མི་རྣམས་ཀྱི་
སྟོན་པ། སངས་རྒྱས་བཅོམ་ལྡན་འདས་ཙན་དན་སྤོས་ཀྱི་འོད་ཟེར་ཞེས་བྱ་བ་འཇིག་རྟེན་དུ་བྱུང་སྟེ། བསྐལ་པའི་མིང་ནི་གློག་གི་འོད་ཅེས་བྱའོ། །འཇིག་རྟེན་གྱི་ཁམས་ནི་རབ་ཏུ་སྣང་བ་ཞེས་བྱ་སྟེ། དེའི་ཚེ་

79-1-121a

ཞིང་དེ་ས་གཞི་ལག་མཐིལ་ལྟར་མཉམ་ཞིང་མི་གཙང་བ་རྣམ་པ་སྣ་ཚོགས་དང་། གྱོ་མོ་དང་། གསེག་མ་དང་། ཚེར་མ་དང་། སྡོང་དུམ་ལ་སོགས་པ་མེད་དེ་གསེར་དང་། དངུལ་གྱི་བྱེ་མ་
གཅལ་དུ་བཀྲམ་པས་འཇིག་རྟེན་གྱི་ཁམས་དེ་གང་གིས་མཐོང་བ་རབ་ཏུ་དགའ་བར་གྱུར་ཏོ། །དེའི་ཚེ་གླིང་བཞི་པོ་རྣམས་ཡངས་ཤིང་རྒྱ་ཆེ་བས་ཐམས་ཅད་ཀྱང་དཔག་ཚད་འབུམ་ཕྲག་གཉིས་གཉིས་ཀྱིས་
འཁོར་བར་གྱུར་ཏེ། གླིང་རེ་རེ་ན་ཡང་གྲོང་ཁྱེར་ཆེན་པོ་བཞི་ཁྲི་བརྒྱད་སྟོང་ཡོད་དེ། གྲོང་ཁྱེར་རེ་རེའི་ཚད་ཀྱང་ཞེང་དུ་དཔག་ཚད་བཅུ་དང་། སྲིད་དུ་དཔག་ཚད་བཅུ་གཉིས་ཡོད་དེ། ཐ་མའི་ར་བ་ཡང་ཤིན་དུ་མཐོ་
ཞིང་བཀོད་པ་དང་ལྡན་པར་གྱུར་ཏོ། །གྲོང་ཁྱེར་རེ་རེ་ན་ཡང་མི་བྱེ་བ་ཕྲག་བརྒྱད་བརྒྱད་གནས་ཏེ། དེ་ཡང་གྲོང་རྡལ་ཁྲི་དང་། བསྐྱེད་མོས་ཚལ་སྟོང་གིས་བསྐོར་ནས་རབ་ཏུ་བརྒྱན་པར་གྱུར་ཏོ། །གཞན་ཡང་ཞིང་
ཁམས་དེ་ན་མེ་ཏོག་གི་ལྗོན་ཤིང་དང་། འབྲས་བུའི་ལྗོན་ཤིང་དང་། སྤོས་ཀྱི་ལྗོན་ཤིང་དང་། གོས་ཀྱི་ལྗོན་ཤིང་དང་། རོ་མཆོག་ཏུ་གྱུར་པའི་ལྗོན་ཤིང་དང་། རྡོ་རྗེའི་ལྗོན་ཤིང་རྣམ་པ་སྣ་ཚོགས་ཀྱིས་བཀོད་པ་
དང་། རྫིང་དང་རྫིང་བུ་དང་། ཆུ་མིག་དང་། འབབ་ཆུ་རྣམས་ཀྱང་གཡས་གཡོན་གྱི་འགྲམ་དྲང་ཞིང་མཛེས་པ་དང་། ཡོན་ཏན་བརྒྱད་དང་ལྡན་པའི་ཆུས་རབ་ཏུ་གང་བ་དང་། དེ་ན་མེ་ཏོག་ཨུད་པལ་དང་། པད་མ་
དང་། ཀུ་མུ་ད་དང་། པད་མ་དཀར་པོ་ཁ་དོག་སྣ་ཚོགས་ཀྱི་འོད་དང་ལྡན་པས་ཀུན་དུ་ཁྱབ་པར་གྱུར་ཏོ། །དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་དེའི་སྐུའི་ཚེའི་ཚད་ནི་ལོ་བྱེ་བ་ཁྲག་ཁྲིག་ཕྲག་དྲུག་བཅུ་རྩ་
བརྒྱད་ཐུབ་པར་གྱུར་ཏོ། །ཉན་ཐོས་ཀྱི་འཁོར་ནི་བྱེ་བ་ཁྲག་ཁྲིག་ཕྲག་དྲུག་བཅུ་མངའ་བར་གྱུར་ཏོ། །དེའི་ཚེ་མི་རྣམས་བྱད་བཞིན་སྤུག་ཅིང་མཛེས་པ་དང་། རབ་ཏུ་བདེ་བ་དང་ལྡན་པ་དང་། འདོད་ཆགས་དང་། ཞེ་སྡང་

79-1-121b

དང་། གཏི་མུག་སྲབ་པས་གདུལ་སླ་བ་དང་། ཅུང་ཟད་ཙམ་ཞིག་བཤད་ཅིང་བསྟན་པས་ཀྱང་ཆོས་རྣམས་ཀྱི་རང་བཞིན་གྱི་མཚན་ཉིད་ཡོངས་སུ་ཤེས་པར་གྱུར་ཏོ། །བློ་གྲོས་མཐའ་ཡས་གཞན་ཡང་
དེའི་ཚེ་འཁོར་ལོས་སྒྱུར་བའི་རྒྱལ་པོ་དོན་ཐམས་ཅད་གྲུབ་པ་ཞེས་བྱ་བ་རིན་པོ་ཆེ་སྣ་བདུན་དང་ལྡན་པ། གླིང་བཞི་པ་རྣམས་སྐྱབས་སུ་དོང་བ་ཞིག་བྱུང་སྟེ། འཛམ་བུའི་གླིང་དེ་ན་གྲོང་ཁྱེར་ཆེན་པོ་ཆུ་ཞིང་དུ་དཔག་
ཚད་བཞི་བཅུས་འཁོར་བ་ཞིག་ཡོད་དེ། མིས་རབ་ཏུ་གང་བ། བདེ་ཞིང་འབྱོར་པ་དང་ལྡན་པ། གྲོང་ཁྱེར་གྱི་ནང་དུ་དཔག་ཚད་ལྔ་ཚུན་ཆད་རིན་པོ་ཆེ་སྣ་བདུན་གྱིས་གཅལ་དུ་བཀྲམ་པ། ཤིང་ཏ་ལ་མཆོག་རྣམས་ཀྱང་
དྲིལ་བུ་གཡེར་ཀ་སྤྱངས་ཤིང་གསེར་ཡང་དག་པའི་དྲ་བས་གཡོགས་པ་དག་གིས་ཀུན་དུ་གང་བར་གྱུར་ཏོ་རྒྱལ་པོ་དེའི་ཕོ་བྲང་ནི་བཻ་དཱུརྱ་འབའ་ཤིག་ལས་བྱས་ཤིང་ཞེང་དུ་དཔག་ཚད་གཅིག་ཡོད་དེ། ངོས་བཞི་ན་
ཀ་བ་སྟོང་སྟོང་ཡོད་དོ། །ཕོ་བྲང་གཞལ་མེད་ཁང་དེའི་སྟེང་ན་ཡང་ཁང་པ་བརྩེག་མ་ཤིན་དུ་མཐོ་ཞིང་རིན་པོ་ཆེ་སྣ་ཚོགས་ཀྱིས་རབ་ཏུ་བརྒྱན་པ་སྟོང་ཡོད་དོ། །ཕོ་བྲང་གཞལ་མེད་ཁང་དེའི་མདུན་ན་སྤོས་ཀྱི་
རྫིང་ཆེན་པོ་ཤིན་དུ་དང་བ་ཞིག་ཡོད་དོ། །དེའི་ཉེ་འཁོར་ན་གཞན་ཡང་སྤོས་ཀྱི་འོད་དང་ལྡན་པའི་རྫིང་བུ་ཕྲ་མོ་རིན་པོ་ཆེ་སྣ་བདུན་ལས་མངོན་པར་གྲུབ་པ་བཅུ་དྲུག་ཡོད་དེ། དེ་དག་གིས་མཐའ་མ་འཁོར་བར་བསྐོར་
ཏོ། །རྫིང་བུ་རེ་རེ་ལས་ཀྱང་འབབ་ཆུ་དག་རབ་ཏུ་འབབ་པས་དེ་ལས་དཔེར་ན་རོལ་མོ་མང་པོ་བྱས་པ་ལྟ་བུའི་སྒྲ་སྙན་པ་དག་བྱུང་བར་གྱུར་ཏོ། །རྫིང་བུ་ཕྲ་མོ་རེ་རེ་ལ་ཡང་ལམ་སྟེགས་བརྒྱད་བརྒྱད་ཡོད་དོ། །སྤོས་ཀྱི་འོད་
ཀྱི་རྫིང་ཆེན་པོ་ནི་ལམ་སྟེགས་སུམ་བཅུ་རྩ་གཉིས་ཡོད་དེ། ལམ་སྟེགས་ཐམས་ཅད་ཀྱང་གསེར་འབའ་ཤིག་ལས་མངོན་པར་གྲུབ་པ། རིན་པོ་ཆེའི་ཤིང་ལྗོན་པ་ཕྲེང་དུ་དཀྲིགས་པ། རིན་པོ་ཆེའི་དྲ་བས་གཡོགས་

79-1-122a

པ། སྤོས་མཆོག་དམ་པའི་དྲིས་གྲོང་ཁྱེར་ཀུན་དུ་གང་བར་བྱེད་པའི་ཕྱིར་རྫིང་དེ་དག་སྤོས་ཀྱི་འོད་ལྡན་ཞེས་བྱའོ། །བློ་གྲོས་མཐའ་ཡས་འཁོར་ལོས་སྒྱུར་བའི་རྒྱལ་པོ་དེ་ལ་བཙུན་མོ་བཞི་ཡོད་དེ། 
དཔག་མེད་སྤོས་དང་། ལེགས་པའི་དབྱངས་དང་། དམ་པ་སྣ་ཚོགས་ཀྱི་དབྱངས་དང་། ངང་པའི་རྒྱལ་པོ་ལྟ་བུའི་དབྱངས་ཤེས་བྱ་བ་དག་ཡིན་ནོ། །བཙུན་མོ་རེ་རེ་ལ་ཡང་བུ་གཉིས་གཉིས་ཡོད་དེ། 
གདོན་མི་ཟ་བའི་མཆོག་དང་། བཟང་པོའི་མཆོག་དང་། ཀླུའི་མཆོག་དང་། མཆོག་གི་དབྱངས་དང་། དམ་པའི་དབྱངས་དང་། ཚངས་པའི་དབྱངས་དང་། མཆོག་གི་སྤྲིན་དང་། སྤྲིན་གྱི་དབྱངས་
ཤེས་བྱ་བ་དག་ཡིན་ནོ། །དེ་ལ་སླས་ནི་འབུམ་ཕྲག་དྲུག་ཡོད་དེ། བུ་ནི་སྟོང་ཕྲག་བཅུ་ཡོད་དོ། །དེའི་ཚེ་རྒྱལ་པོའི་ཕོ་བྲང་གི་ནང་དུ་འཁོར་རྣམས་ལྷན་ཅིག་ཏུ་དགའ་བ་མྱོང་ཞིང་རྩེ་བ་ལས་ནམ་མཁའ་
ལས་དེ་བཞིན་གཤེགས་པའི་སྐུ་ཤིན་ཏུ་མཛེས་པ་ཞིག་མཐོང་ངོ་། དེ་ནས་དེ་བཞིན་གཤེགས་པ་དེས་རྒྱལ་པོ་དེ་ལ་འདི་སྐད་ཅེས་བཀའ་སྩལ་ཏོ། །ཀྱེ་རྒྱལ་པོ་ཆེན་པོ་བླ་ན་མེད་པའི་གོ་ཆ་བགོས་ཏེ། བླ་
ན་མེད་པའི་ཐེག་པ་ལ་ཞོན་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞོལ་ཞིང་སེམས་ཅན་རྣམས་ལ་ཤེས་རབ་ཀྱི་སྨན་གཏང་བར་བྱའི། ལྷ་དང་མིའི་འདོད་པའི་ཡོན་ཏན་ལྔ་པོ་དག་ལ་
མངོན་པར་ཞེན་པར་མི་བྱའོ། །གོ་ཆ་ཆེན་པོ་འདིས་ནི་བླ་ན་མེད་པའི་བདེ་བ་ཡོངས་སུ་སྡུད་པར་བྱེད་དོ། །བླ་ན་མེད་པའི་ཐེག་པ་འདིས་ཀྱང་སྐྱེ་དགུ་རྣམས་བླ་ན་མེད་པའི་བསྐྱེད་མོས་ཚལ་དུ་རབ་ཏུ་འདྲེན་པར་བྱེད་དེ། 
གང་གིས་དེར་ཞུགས་པས་དེ་དག་ནི་ཕྱིར་ལྡོག་པར་མི་འགྱུར་རོ། །ལྷ་དང་མི་ཐམས་ཅད་ཀྱི་འདོད་པ་རྣམས་པ་སྣ་ཚོགས་མི་རྟག་པ། རྣམ་པར་འཇིག་ཅིང་ཡོངས་སུ་འགྱུར་བའི་ཆོས་ཅན། མཐུ་ཡུན་རིང་དུ་མི་

79-1-122b

གནས་པ། དེ་མ་ཐག་ཏུ་འགག་པའི་ཆོས་ཅན་ཡིན་ནོ་ཞེས་གསུངས་སོ། །བློ་གྲོས་མཐའ་ཡས་དེའི་ཚེ་རྒྱལ་པོ་ཆེན་པོ་དོན་ཐམས་ཅད་གྲུབ་པས་དེ་སྐད་ཅེས་བཀའ་སྩལ་པ་ཐོས་པ་དང་། དེ་བཞིན་གཤེགས་
པ་དེ་ལ་འདི་སྐད་ཅེས་གསོལ་ཏོ། །སུ་ཞིག་གོ་ཆ་ཆེན་པོ་དེ་ལྟ་བུ་རབ་ཏུ་སྟོན་པར་བགྱིད། གོ་ཆ་དེ་ཇི་ལྟ་བ་བཞིན་དུ་རབ་ཏུ་བགོ་བར་བགྱིའོ། །སུ་ཞིག་ཐེག་པ་ཆེན་པོ་དེ་ལྟ་བུ་རབ་ཏུ་སྟོན་པར་བགྱིད། 
ཐེག་པ་ཆེན་པོ་དེ་ཇི་ལྟ་བ་བཞིན་དུ་དེ་ལ་འཚལ་པར་བགྱིའོ། །སུ་ཞིག་ལམ་ཆེན་པོ་དེ་ལྟ་བུ་རབ་ཏུ་སྟོན་པར་བགྱིད། ལམ་ཆེན་པོ་དེ་ཇི་ལྟ་བ་བཞིན་དུ་རབ་ཏུ་གཞོལ་བར་བགྱིའོ། །དེ་སྐད་ཅེས་གསོལ་
པ་དང་། དེའི་ཚེ་དེ་བཞིན་གཤེགས་པ་དེས་རྒྱལ་པོ་ཆེན་པོ་དེ་ལ་འདི་སྐད་ཅེས་བཀའ་སྩལ་ཏོ། །ཀྱེ་རྒྱལ་པོ་འདི་ལྟར་ཤེས་པར་གྱིས་ཤིག །དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་ཞེས་བྱ་
བ་ཡོད་ཀྱིས་རྒྱལ་པོ་དེའི་ཐད་དུ་སོང་ཤིག་དང་། རྒྱལ་པོ་ཆེན་པོ་ལ་ཇི་ལྟར་གོ་ཆ་ཆེན་པོ་བགོས་པ་དང་། ཐེག་པ་ཆེན་པོ་ལ་ཞོན་པ་དང་། ལམ་ཆེན་པོ་ལ་གཞོལ་བར་བྱ་བའི་ཆོས་དེ་ཡང་དག་པར་སྟོན་པར་
འགྱུར་རོ། །དེ་ནས་དེ་བཞིན་གཤེགས་པ་དེས་དེ་སྐད་ཅེས་བཀའ་སྩལ་ནས་མི་སྣང་བར་གྱུར་ཏོ། །བློ་གྲོས་མཐའ་ཡས་དེའི་ཚེ་རྒྱལ་པོ་ཆེན་པོ་དོན་ཐམས་ཅད་གྲུབ་པ་དངོས་པོ་དེ་ལྟ་བུ་མཐོང་བ་དང་།། བ་སྤུ་
ཟིང་ཞེས་བྱེད་ནས་ངོ་མཚར་གྱི་བསམ་པ་དང་། འཇིགས་པའི་སེམས་སྐྱེས་པས་ལྷ་དང་། མིའི་འདོད་པའི་བདེ་བ་སྣ་ཚོགས་ལ་མོས་ཤིང་འདུས་བྱས་ཐམས་ཅད་ལ་ཡོངས་སུ་སྐྱོ་བར་གྱུར་ནས་གོ་
ཆ་ཆེན་པོ་དང་། ཐེག་པ་ཆེན་པོ་དང་། ལམ་ཆེན་པོ་ཡོངས་སུ་གཉེར་བའི་ཕྱིར་རྒྱལ་བུ་བརྒྱད་དང་། བཙུན་མོ་བཞི་དང་། བུ་གཞན་རྣམས་དང་། སླས་དང་། གཡོག་འཁོར་རྣམས་དང་ལྷན་ཅིག་ཏུ་

79-1-123a

དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་ག་ལ་བ་དེ་ལོགས་སུ་དོང་ངོ་། དེར་ཕྱིན་པ་དང་། འཁོར་དང་བཅས་ཏེ་གུས་པས་བཅོམ་ལྡན་འདས་དེའི་ཞབས་ལ་མགོ་བོས་གཏུགས་
ཏེ་ཕྱག་བྱས་ནས་རིན་པོ་ཆེ་སྣ་བདུན་གྱི་མེ་ཏོག་རྣམ་པ་སྣ་ཚོགས་བརྒྱ་སྟོང་དུ་མས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་མངོན་པར་གཏོར་ཏོ། །གཞན་ཡང་
ན་བཟའ་ཚད་མེད་པ་སྙེད་དེ་དེ་བཞིན་གཤེགས་པ་དང་། ཉན་ཐོས་ཀྱི་དགེ་བདུན་རྣམས་ལ་ཕུལ་ལོ། །གཞན་ཡང་བདེ་བའི་ཡོ་བྱད་ཐམས་ཅད་ཀྱིས་ལོ་སྟོང་ཕྲག་བཅུའི་བར་དུ་བསྙེན་བཀུར་བ་དང་། རིམ་
གྲོ་དང་། མཆོད་པ་བྱས་སོ། །དེའི་འོག་ཏུ་རྒྱལ་ཐབས་སྤངས་ནས་འཁོར་དང་བཅས་དེ། དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་གྱི་གསུང་རབ་ལས་རབ་ཏུ་བྱུང་ངོ་། བློ་གྲོས་མཐའ་ཡས་དེ་
བཞིན་གཤེགས་པ་ཙན་དན་སྤོས་ཀྱི་འོད་ཟེར་དེས་དགེ་སློང་དོན་ཐམས་ཅད་གྲུབ་པ་དང་། འཁོར་རྣམས་ཀྱི་མོས་པའི་བསམ་པ་ཐུགས་སུ་ཆུད་ནས་གོ་ཆའི་བཀོད་པ་དང་། ཐེག་པ་ཆེན་པོའི་བཀོད་པ་
གང་ཡིན་པ་རྣམ་པར་ཕྱེ་སྟེ། དེ་དག་ལ་ཡང་དག་པར་བསྟན་ཏོ། །དེ་དག་གིས་ཐོས་པར་གྱུར་པ་དང་། ཤིན་ཏུ་བརྟན་པའི་སེམས་བསྐྱེད་ནས་ཆོས་ཟབ་མོའི་ཕྱིར་ཇི་སྲིད་འཚོའི་བར་དུ་ལུས་དྲང་པོར་བསྲང་
སྟེ། ནན་ཏན་གྱིས་ནུར་བ་མེད་པར་བསྒོམས་པ་དང་། རྟག་ཏུ་དེ་བཞིན་གཤེགས་པ་ལ་བརྟེན་པས་འཇིག་རྟེན་པའི་འདོད་པ་ཐམས་ཅད་ཀྱིས་མི་གཡོས་པའི་ཡིད་ལ་བྱེད་པ་ཐོབ་པར་གྱུར་ཏོ། །བློ་གྲོས་
མཐའ་ཡས་དེའི་ཚེ་དེ་བཞིན་གཤེགས་པ་དེས་དགེ་སློང་དོན་ཐམས་ཅད་གྲུབ་པ་ལ་བཀའ་སྩལ་པ། རིགས་ཀྱི་བུ་དེང་ཁྱོད་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་ཏེ། ལམ་ལ་ཡང་དག་པར་

79-1-123b

གཞོལ་བར་བྱེད་ན་ལམ་འདིའི་དབང་གིས་ཐམས་ཅད་མཁྱེན་པའི་ཡེ་ཤེས་དང་མཚུངས་པ་མེད་པའི་ཡེ་ཤེས་མངོན་པར་འགྲུབ་པར་འགྱུར་གྱིས་ཁྱོད་ཀྱིས་ཚུལ་བཞིན་དུ་ནན་ཏན་བརྩོན་འགྲུས་ཀྱིས་བསྒོམ་པར་བྱའོ། །
དེ་སྐད་ཅེས་བཀའ་སྩལ་པ་དང་། དགེ་སློང་དོན་ཐམས་ཅད་གྲུབ་པ་དེས་དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ནི་ད་ལྟར་གོ་ཆ་ཞེས་
བགྱི་བའི་ཆོས་ཡང་དག་པར་རྗེས་སུ་མ་མཐོང་། གོ་ཆ་བགོས་པར་བགྱིད་པ་ཡང་ཡང་དག་པར་རྗེས་སུ་མ་མཐོང་། གོ་ཆ་བགོས་ནས་བགྲོད་པར་བགྱིད་པའི་ཕྱོགས་ཀྱང་ཡང་དག་པར་རྗེས་སུ་མ་མཐོང་ངོ་། །གོ་
ཆ་བགོས་པའི་གནས་ཀྱང་ཡང་དག་པར་རྗེས་སུ་མ་མཐོང་ལགས་སོ། །བཅོམ་ལྡན་འདས་བདག་གིས་ནི་ཐེག་པ་ཞེས་བགྱི་བའི་ཆོས་ཀྱང་ཡང་དག་པར་རྗེས་སུ་མ་མཐོང་། ཐེག་པ་ཆེན་པོ་ལ་བཞོན་པར་
བགྱིད་པ་ཡང་ཡང་དག་པར་རྗེས་སུ་མ་མཐོང་། ཐེག་པས་བགྲོད་པར་བགྱིད་པའི་ཕྱོགས་ཀྱང་ཡང་དག་པར་རྗེས་སུ་མ་མཐོང་། ཐེག་པ་ཆེན་པོ་ལ་འཚལ་བའི་གནས་ཀྱང་ཡང་དག་པར་རྗེས་
སུ་མ་མཐོང་ལགས་སོ། །བཅོམ་ལྡན་འདས་བདག་གིས་ནི་ལམ་ཞེས་བགྱི་བའི་ཆོས་ཀྱང་ཡང་དག་པར་རྗེས་སུ་མ་མཐོང་། ལམ་འདིའི་དབང་གིས་གཞོལ་བར་གྱུར་པ་དང་། གཞོལ་བར་འགྱུར་བ་དང་། 
གཞོལ་བར་བགྱིད་པ་ཡང་ཡང་དག་པར་རྗེས་སུ་མ་མཐོང་། ལམ་གྱིས་བགྲོད་པར་བགྱི་བའི་ཕྱོགས་ཀྱང་ཡང་དག་པར་རྗེས་སུ་མ་མཐོང་། ལམ་གྱིས་གནས་ཀྱང་ཡང་དག་པར་རྗེས་སུ་མ་མཐོང་ལགས་
སོ། །བཅོམ་ལྡན་འདས་བདག་གིས་ནི་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ལ་ཐག་རིང་བ་ཞེས་བགྱི་བ་འམ། ཐག་ཉེ་བར་བགྱི་བ་འམ། འདས་པ་དང་། མ་འོངས་པ་དང་། ད་ལྟར་

79-1-124a

བྱུང་བ་ཞེས་བགྱི་བ་ཡང་དག་པར་མི་དམིགས་ཤིང་ཡང་དག་པར་རྗེས་སུ་མ་མཐོང་ལགས་སོ། །བདག་དེ་ལྟར་རྣམ་པར་ལྟ་བ་ན་ཆོས་ཅུང་ཟད་ཙམ་ཡང་རྙེད་པར་བགྱི་བ་འམ་མངོན་
དུ་བགྱི་བ་ཡང་དག་པར་མ་མཐོང་ལགས་སོ། །བདག་ལ་ནི་མངོན་དུ་བགྱི་བ་ཅི་ཡང་མ་མཆིས་ན། བཅོམ་ལྡན་འདས་ཅིའི་སླད་དུ་བདག་ལ་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་ཏེ་ལམ་ལ་
ཡང་དག་པར་གཞོལ་བར་བྱེད་དམ་ཞེས་བཀའ་སྩལ་ལགས། བཅོམ་ལྡན་འདས་ནི་ཐམས་ཅད་མཁྱེན་པ། ཐམས་ཅད་གཟིགས་པ་ལགས་པས་ཇི་ལྟར་བདག་ཅག་ལ་སོགས་པས་ཆོས་ལས་མངོན་
པར་བསྒྲུབ་པར་བགྱིད་པ་ནི་དེ་བཞིན་གཤེགས་པ་ཉག་གཅིག་གིས་ཐུགས་སུ་ཆུད་ཀྱི། ཉན་ཐོས་དང་། རང་སངས་རྒྱས་རྣམས་ཀྱི་སྤྱོད་པ་ལ་ནི་མ་ལགས་སོ་ཞེས་གསོལ་ཏོ། །བློ་གྲོས་མཐའ་ཡས་
དགེ་སློང་དོན་ཐམས་ཅད་གྲུབ་པས་དེ་བཞིན་གཤེགས་པ་དེའི་སྤྱན་སྔར་དེ་སྐད་སྨྲས་པའི་ཚེ་དང་འཁོར་དང་བཅས་པ་ཐམས་ཅད་ཀྱིས་བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ཆོས་
ཀྱི་བཟོད་པ་ཐོབ་པའི་ཕྱིར་ཐམས་ཅད་ཕྱིར་མི་ལྡོག་པ་ཐོབ་པར་གྱུར་ཏོ། །དེ་ནས་དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་གྱིས་ཀྱང་ཁྱོད་བསྐལ་པ་གྲངས་མེད་པ་ལྔ་བརྒྱ་འདས་ནས་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་ལུང་བསྟན་ཏོ། །དེ་དག་གིས་ལུང་བསྟན་པ་ཐོས་པས་རབ་ཏུ་དགའ་བར་གྱུར་ནས་ནམ་མཁའ་ལ་ཏ་ལ་བདུན་ཙམ་དུ་འཕགས་
ཏེ། དེ་བཞིན་གཤེགས་པ་ལ་ཚིགས་སུ་བཅད་དེ་མངོན་པར་བསྟོད་པ། །གྲགས་པ་ཆེན་པོ་ཆད་མེད་པས། །རི་རྒྱལ་བཞིན་དུ་མངོན་པར་འཕགས། །བཅོམ་ལྡན་ཐམས་ཅད་མཁྱེན་པ་ཡིས། །

79-1-124b

ཡོན་ཏན་རྣམས་ནི་སྟོན་པར་མཛད། །སངས་རྒྱས་སྤྱན་ནི་གསལ་གཟིགས་བས། །ཉི་མ་བཞིན་དུ་སྣང་བར་མཛད། །གཙོ་བོ་འཁོར་འདུས་བཞུགས་པ་ཡི། །ཞབས་ལ་བདག་ནི་ཕྱག་འཚལ་ལོ། །ཡོན་ཏན་
ཚོགས་ནི་ཚད་མེད་ཅིང་། །སངས་རྒྱས་མཁྱེན་པ་ཡོངས་རྫོགས་པས། །བདག་ལ་སོགས་པས་སངས་རྒྱས་ཀྱི། །བླ་མེད་ཡེ་ཤེས་ཐོབ་པར་འགྱུར། །བླ་མེད་སྣང་བ་ཆེན་པོ་ཡིས། །ལྷ་མི་མ་
ལུས་གསལ་མཛད་པས། །ཆོས་ཀྱི་གཏེར་ནི་རབ་ཕྱེ་ནས། །ཡོན་ཏན་རྒྱ་མཚོ་དཔག་མེད་སྟོན། །མཁྱེན་པ་རྟག་ཏུ་མི་ཉམས་ཤིང་། །ཡང་དག་སངས་རྒྱས་ཉོན་མོངས་སྤངས། །ཤེས་རབ་འོད་
ལྡན་བརྩོན་འགྲུས་ཆེ། །ཡོན་ཏན་ཟབ་ལ་བདག་ཕྱག་འཚལ། །ཀླུ་ཆེན་བཀོད་པ་ཆེན་པོ་སྟེ། །མཚན་མང་དག་གིས་སྐུ་རབ་བརྒྱན། །བཞུགས་པ་དག་ནི་རི་རབ་འདྲ། །འཁོར་བཞུགས་དཔེ་ཟླ་ཡོང་
མ་མཆིས། །འཇིག་རྟེན་འདྲེན་པ་རབ་མཛད་པས། །ལྷ་མིན་འཁོར་ནི་ཟིལ་གྱིས་གནོན། །ཆོས་སྟོན་པ་ལ་བསྙེངས་མི་མངའ། །སྐྱེས་མཆོག་ལ་ནི་བདག་ཕྱག་འཚལ། །བཅོམ་ལྡན་ཐུབ་པ་ཆེན་
པོ་ནི། །ཡོན་ཏན་དཔག་མེད་མཚོ་ལགས་པས། །བདག་ཅག་ཆོས་མིག་རྣམ་པར་ཕྱེ། །བདག་ཅག་གོ་ཆ་རབ་ཏུ་བཀོན། །བདག་ཅག་དུས་ནི་ཐམས་ཅད་དུ། །ཐེག་པ་ཆེ་ལ་རབ་འཚལ་ནས། །རྟག་ཏུ་ལམ་མཆོག་འདི་དག་ལ། །གཞོལ་
བགྱིད་གཞན་དུ་མི་མཆིའོ། །ཐུབ་པ་ཆེན་པོ་དཔའ་བོའི་གཙོ། །ཆོས་རྣམས་ཐམས་ཅད་ཐུགས་སུ་ཆུད། །འཇིག་རྟེན་དག་ན་ལྷག་མ་མཆིས། །བདག་ཅག་སྲོག་ཕྱོགས་སྐྱབས་སུ་མཆིའོ། །བློ་གྲོས་
མཐའ་ཡས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཙན་དན་སྤོས་ཀྱི་འོད་ཟེར་དེས་ཆོས་འདི་བསྟན་པས། སེམས་ཅན་ཚད་མེད་གྲངས་མེད་པ་རྣམས་ཡོངས་སུ་སྨིན་

79-1-125a

པར་མཛད་དོ། །དགེ་སློང་དོན་ཐམས་ཅད་གྲུབ་པ་དེ་ཕྱིན་ཅད་འཁོར་དང་བཅས་ཏེ། སངས་རྒྱས་བཅོམ་ལྡན་འདས་ཚད་མེད་གྲངས་མེད་པ་སྙེད་ལ་རིམ་གྲོ་དང་། མཆོད་པ་བྱས་པས་
བསྐལ་པ་གྲངས་མེད་པ་ལྔ་བརྒྱ་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ཏེ། མཚན་ཡང་དེ་བཞིན་གཤེགས་པ་སྤྱོད་ཡུལ་དཔག་
ཏུ་མེད་པ་ལས་ཡང་དག་པར་འདས་པའི་རྒྱལ་པོ་ཞེས་བྱ་བར་གྱུར་ཏོ། །སངས་རྒྱས་དེའི་ཞིང་གི་ཡོན་ཏན་དང་། ཆུ་ཞིང་གི་མཚན་ཉིད་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ཙན་དན་སྤོས་ཀྱི་འོད་ཟེར་གྱི་ཞིང་ཁམས་རབ་ཏུ་སྣང་བ་དང་ཐ་དད་པ་མེད་པར་གྱུར་ཏོ། །ཉན་ཐོས་རྣམས་ཀྱི་གྲངས་ཀྱང་ཚད་མེད་པར་གྱུར་ཏོ། །རྒྱལ་པོའི་བཙུན་མོ་དང་། རྒྱལ་བུ་དང་
འཁོར་རྣམས་ཀྱང་བསྐལ་པ་གྲངས་མེད་པ་ལྔ་བརྒྱ་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ཏོ། །བློ་གྲོས་མཐའ་ཡས་བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་ནི་གོ་ཆ་ཆེན་པོ་བགོས་པས་ཐེག་པ་ཆེན་པོ་ལ་ཞོན་ཏེ། ལམ་འདི་ཆོས་ཀྱི་སྒྲོན་མ་ཆེན་པོ་བཟུང་ནས་ཆོས་ཀྱི་སྣང་བ་ཆེན་པོ་བྱེད་པ་དང་། ཆོས་ཀྱི་འོད་ཟེར་ཆེན་པོ་
འགྱེད་པ་དང་། ཆོས་ཀྱི་རྒྱལ་མཚན་ཆེན་པོ་བསྒྲེང་བ་དང་། ཆོས་ཀྱི་རྔ་ཆེན་པོ་རྡུང་བ་དང་། ཆོས་ཀྱི་གྲུ་ཆེན་པོར་ཞུགས་ནས་ཆོས་ཆེན་པོ་ཡོངས་སུ་བསྡུས་ཏེ། རབ་ཏུ་གཞོལ་བར་བྱེད་པ་དང་། སྐྱེས་
བུ་དམ་པའི་རྣམ་པར་རྩེན་པས་རྣམ་པར་རྩེ་བ་དང་། ཆོས་ཀྱི་ཆར་གྱིས་སེམས་ཅན་རྣམས་ཚིམ་པར་བྱས་ནས་རབ་ཏུ་དགའ་བར་བྱེད་པ་དང་། ནན་ཏན་བརྩོན་འགྲུས་ཀྱིས་བླ་ན་མེད་པ་ཡང་དག་པར་

79-1-125b

རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལམ་འདི་ལ་གནས་པའི་ཚེ་ཆོས་ཀྱི་སྣང་བ་ཆེན་པོ་འཐོབ་པར་འགྱུར་
ཏེ། སྣང་བ་འཐོབ་པར་འགྱུར་བའི་ཕྱིར་རྟེན་ཅིང་འབྲེལ་བར་འབྱུང་བའི་ཆོས་ཐམས་ཅད་རང་བཞིན་གྱིས་གཟོད་མ་ཉིད་ནས་སྟོང་པ་དང་། རང་བཞིན་གྱིས་མཚན་མ་མེད་པ་དང་། རང་བཞིན་གྱིས་འབྱུང་
བ་མེད་པར་མཐོང་བས་གཟུགས་ལ་གཟུགས་ཉིད་དུ་མི་མཐོང་སྟེ། ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་ལ་ཡང་དེ་བཞིན་ནོ། །རྣམ་པར་ཤེས་པ་ལ་ཡང་རྣམ་པར་ཤེས་པ་ཉིད་དུ་མི་མཐོང་བས་རྣམ་པར་ཤེས་པ་
ཐ་དད་པའི་རྐྱེན་ལས་འབྱུང་བ་དང་། རྣམ་པར་ཤེས་པའི་མཚན་ཉིད་རང་བཞིན་གྱིས་གཟོད་མ་ཉིད་ནས་སྟོང་པ་དང་། རང་བཞིན་གྱིས་མཚན་མ་མེད་པ་དང་། རང་བཞིན་གྱིས་འབྱུང་བ་མེད་དེ་
རྒྱུ་རྐྱེན་མང་པོར་གཏོགས་པ་ཙམ་ཡིན་པ་རབ་ཏུ་རྟོགས་སོ། །རྒྱུ་རྐྱེན་འདུས་པར་མཐོང་བ་ན་རྒྱུ་རྐྱེན་ཉིད་ཀྱང་སྟོང་པ་དང་། མཚན་མ་མེད་པ་དང་། འབྱུང་བ་མེད་པར་རབ་ཏུ་ཤེས་སོ། །དེ་ལྟར་མཐོང་
བའི་ཚེ་མིག་ལ་མིག་ཉིད་དུ་མི་ལྟ་སྟེ། རྣ་བ་དང་། སྣ་དང་། ལྕེ་དང་། ལུས་དང་། ཡིད་ལ་ཡང་དེ་བཞིན་ནོ། །ཡིད་ལ་ཡང་ཡིད་ཉིད་དུ་མི་མཐོང་བས་ཡིད་ཐ་དད་པའི་རྐྱེན་ལས་བྱུང་བ་དག་ཡིད་ཀྱི་
མཚན་ཉིད་རང་བཞིན་གྱིས་གཟོད་མ་ཉིད་ནས་སྟོང་པ་དང་། རང་བཞིན་གྱིས་མཚན་མ་མེད་པ་དང་། རང་བཞིན་གྱིས་འབྱུང་བ་མེད་པར་རབ་ཏུ་རྟོགས་སོ། །སའི་ཁམས་དང་། ཆུའི་ཁམས་དང་། མེའི་
ཁམས་དང་། རླུང་གི་ཁམས་དང་། ནམ་མཁའི་ཁམས་དང་། འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ཀྱི་བར་ལ་ཡང་བྱེད་པ་མེད་པ་དང་། མྱོང་

79-1-126a

བ་མེད་པར་རབ་ཏུ་ཤེས་སོ། །ཆོས་ཅུང་ཟད་ཙམ་ལ་ཡང་ཆོས་ཅུང་ཟད་ཙམ་དུ་མི་མཐོང་སྟེ། ཐ་དད་པའི་རྐྱེན་ལས་བྱུང་ཞིང་རྒྱུ་དང་རྐྱེན་མང་པོར་གཏོགས་པས་རང་བཞིན་གྱིས་མཚན་མ་
མེད་པ་དང་། རང་བཞིན་གྱིས་འབྱུང་བ་མེད་པ་ཞེས་བྱའོ། །རྟེན་ཅིང་འབྲེལ་བར་འབྱུང་བ་ཉིད་ཀྱང་སྟོང་པ་དང་། མཚན་མ་མེད་པ་དང་། འབྱུང་བ་མེད་པར་རབ་ཏུ་ཤེས་སོ། །བློ་གྲོས་མཐའ་ཡས་འདི་ནི་
བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལམ་དེ་ལ་གནས་པའི་ཚེ་རྟེན་ཅིང་འབྲེལ་བར་འབྱུང་བ་ལ་སོ་སོར་རྟོག་པར་བྱེད་པ་ཡིན་ཏེ། དེ་ལྟར་བརྟགས་པས་ཤེས་རབ་ཀྱིས་རྟེན་ཅིང་འབྲེལ་
བར་འབྱུང་བའི་དེ་ཁོ་ན་ཉིད་ཀྱི་མཐའ་མངོན་སུམ་དུ་རྟོགས་པར་འགྱུར་ཏེ། ཆོས་ཀྱི་སྣང་བ་དེ་དག་ཐམས་ཅད་ཀྱི་དབང་གིས་དེ་བཞིན་གཤེགས་པའི་སྟོབས་བཅུ་དང་། མི་འཇིགས་པ་བཞི་དང་། སངས་རྒྱས་
ཀྱི་ཆོས་མ་འདྲེས་པ་བཅོ་བརྒྱད་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་ནས་སངས་རྒྱས་ཀྱི་ཆོས་ཇི་སྙེད་པ་ཐམས་ཅད་ཀྱི་བར་རྣམས་ཀྱང་
མྱུར་དུ་ཡོངས་སུ་རྫོགས་པར་བྱེད་དོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། བྱང་ཆུབ་སེམས་དཔའ་འཇིགས་མེད་པས། །དེ་ལྟར་གནས་པ་མེད་པས་ན། །
ཆོས་ཀྱི་སྣང་ཆེན་རབ་བྱས་ནས། །ཤེས་པ་དམ་པས་གཞོལ་བར་བྱེད། །ཆོས་ཆེན་རྒྱལ་མཚན་འཛུགས་བྱེད་པས། །རྒྱལ་མཚན་འདི་ནི་བླ་ན་མེད། །སངས་རྒྱས་ཆོས་ནི་ཐམས་ཅད་ལ། །ཡང་
དག་དྲན་པས་གཞོལ་བར་བྱེད། །ཤེས་རབ་ལེགས་པར་རྣམ་པར་རྩེན། །ཆོས་ཀྱིས་སེམས་ཅན་སྦྱིན་པ་གཏོང་། །ཆོས་ཆེན་ཆར་ནི་རབ་འབེབས་ཤིང་། །འཇིགས་པ་མེད་པས་གཞོལ་བར་བྱེད། །དེ་ལྟར་

79-1-126b

བྱང་ཆུབ་སེམས་དཔའ་རྣམས། །ཆོས་ཀྱི་སྣང་ཆེན་ཐོབ་པས་ན། །ཡང་དག་པ་ཡི་ཆོས་དག་ལ། །དཔའ་བོས་ལེགས་པར་གནས་པར་བྱེད། །ཆོས་ཀྱི་སྣང་བ་དེ་དབང་གིས། །ཆོས་རྣམས་ཐམས་
ཅད་རྟོགས་པར་བྱེད། །རྐྱེན་ནི་མང་ལས་བྱུང་བའི་ཕྱིར། །ཐམས་ཅད་བརྟན་བདེན་གང་ཡང་མེད། །ཆོས་རྣམས་རང་བཞིན་ཉིད་ཀྱིས་སྟོང་། །རང་བཞིན་ཉིད་ཀྱིས་མཚན་མ་མེད། །རང་བཞིན་ཉིད་ཀྱིས་
སྐྱེ་བ་མེད། །རང་བཞིན་ཉིད་ཀྱིས་ངོ་བོ་མེད། །ཆོས་རྣམས་རྐྱེན་ནི་མང་པོ་དག །ལྷན་ཅིག་འདུས་ལས་བྱུང་བ་ཡིན། །རྐྱེན་ནི་མང་པོ་འདུས་པའི་ཕྱིར། །རང་བཞིན་གྱིས་ནི་མེད་པ་ཡིན། །བྱང་ཆུབ་
སེམས་དཔའི་རྐྱེན་རྣམས་ལ། །སོ་སོར་རྟོག་པས་སྟོང་པར་རིག །རྐྱེན་རྣམས་རང་བཞིན་གྱིས་སྟོང་པས། །རང་བཞིན་གྱིས་ནི་མཚན་མ་མེད། །སྐྱེ་བ་དག་ནི་ཡོད་མ་ཡིན། །བྱ་བ་དག་ཀྱང་ཡོད་
པ་མིན། །དེ་ལྟར་སོ་སོར་གང་རྟོགས་པ། །ཆོས་ལ་ནན་ཏན་སྒྲུབ་པར་བྱེད། །རྟེན་འབྲེལ་ངོ་བོ་ཉིད་མེད་ཕྱིར། །རྐྱེན་རྣམས་ཀྱང་ནི་རྐྱེན་མ་ཡིན། །དེ་ལྟར་ཚུལ་བཞིན་གང་རྟོག་པ། །ཆོས་རྣམས་ཐམས་
ཅད་ཤེས་པར་འགྱུར། །གཟུགས་དང་ཚོར་བ་འདུ་ཤེས་དང་། འདུ་བྱེད་རྣམ་ཤེས་དེ་བཞིན་རྟོག །རྒྱུ་དང་རྐྱེན་ནི་མང་པོ་ལས། །ཕུང་པོ་རྣམས་ནི་བྱུང་བ་ཡིན། །ཕུང་པོ་ཡང་དག་མེད་པས་ན། །རང་
བཞིན་ངོ་བོ་ཉིད་ཀྱིས་སྟོང་། །ངོ་བོ་སྟོང་ཕྱིར་མཚན་མ་མེད། །ཐམས་ཅད་སྐྱེ་བ་གང་ཡང་མེད། ཕུང་པོ་རྣམས་ནི་མཚན་མ་སྤངས། །མཚན་མ་སྤངས་པས་སྐྱེ་བ་མེད། །སྐྱེ་བ་མེད་པས་འགག་པ་མེད། །
ཕུང་པོ་མཚན་ཉིད་དེ་འདྲའོ། །མཚན་མེད་མི་བདེན་མཚན་མར་མཐོང་། །མཚན་མ་དེ་ནི་གང་ལས་ཡོད། །ཆོས་རྣམས་ངོ་བོ་ཉིད་མེད་ཕྱིར། །ཕུང་པོ་འདི་ཡང་རང་བཞིན་མེད། དེ་བཞིན་ཁམས་དང་སྐྱེ་མཆེད་

79-1-127a

ཀྱང་། །ཐམས་ཅད་རྐྱེན་ལས་བྱུང་བས་ན། །རང་བཞིན་ངོ་བོ་ཉིད་ཀྱིས་སྟོང་། །མཚན་མ་མེད་ཅིང་ངོ་བོ་མེད། །ཆོས་རྣམས་དག་ནི་ཐམས་ཅད་ལ། །ཆོས་ཀྱི་ངོ་བོ་མི་དམིགས་པར། །ཆོས་
རྣམས་ཐམས་ཅད་གང་ཤེས་པ། །དེ་ནི་དོན་སེམས་པ་ཞེས་བྱ། །འདོད་དང་གཟུགས་དང་གཟུགས་མེད་ཁམས། །ཐམས་ཅད་རྐྱེན་ལས་བྱུང་བས་ན། །རང་བཞིན་ངོ་བོ་ཉིད་ཀྱིས་སྟོང་། །མཚན་མ་མེད་ཅིང་ངོ་བོ་
མེད། །འདི་ལ་རྟོག་པའི་ཡེ་ཤེས་དེ། །ཇི་ལྟར་ཡུལ་དེ་ཤེས་པར་འགྱུར། །ཡེ་ཤེས་འདི་དང་ཡུལ་དེ་དག །རང་བཞིན་རྟག་ཏུ་སྤངས་པས་ན། །སྐྱེ་བ་དང་ནི་རྐྱེན་མང་པོ། །འདི་གཉིས་ལ་ཡང་བྱེད་པ་མེད། 
ཁྱེད་མེད་དེ་ལྟར་གང་ཤེས་པ། །དེ་ནི་ཡང་དག་མཚན་ཉིད་ཡིན། །མཚན་ཉིད་མེད་ཀྱང་མཚན་ཉིད་བཤད། །བྱང་ཆུབ་སེམས་དཔའ་དེས་ཞུགས་ཀྱང་། །མཚན་ཉིད་མཚན་ཉིད་མེད་པར་ཡང་། །རྣམ་པར་
རྟོག་པར་མི་བྱེད་དོ། །དེ་ལྟར་རབ་ཏུ་གང་ཤེས་པ། །ཡང་དག་མཚན་ཉིད་མཐོང་བས་ན། །ཆོས་རྣམས་ཀྱི་ནི་དབྱིངས་དག་ལ། །ཆོས་ཀྱི་འདུ་ཤེས་ཅུང་ཟད་མེད། །ཆོས་རྣམས་དང་ནི་ཆོས་ཀྱི་དབྱིངས། །འདི་
གཉིས་ལ་ཡང་མཚན་མ་མེད། །ཆོས་རྣམས་མཚན་མ་སྤངས་པས་ནི། །ཆོས་ཀྱི་དབྱིངས་ཤེས་བཤད་པ་ཡིན། །ཆོས་ཀྱི་དབྱིངས་ཤེས་གང་བཤད་པ། །དབྱིངས་མེད་དབྱིངས་མེད་པ་ཡང་མིན། །ཆོས་
ཀྱི་དབྱིངས་ཤེས་རབ་བསྟན་ཀྱང་། །ཡང་དག་པར་ནི་དམིགས་སུ་མེད། །དོན་འདི་རབ་ཏུ་སེམས་པའི་ཚེ། །དམིགས་སུ་མེད་པར་མི་སེམས་ཤིང་། རྣམ་རྟོག་རྣམས་ནི་སྤངས་པའི་ཕྱིར། །ཆོས་ཀྱི་སྣང་ཆེན་
ཐོབ་པར་འགྱུར། །ཆོས་རྣམས་རང་བཞིན་མེད་པའི་ཕྱིར། །སྣང་བ་ལ་ཡང་རང་བཞིན་མེད། །དེ་ལྟར་སོ་སོར་རྟོག་པའི་ཕྱིར། །ཆོས་ཀྱི་སྣང་བ་ཐོབ་པ་ཡིན། །རྟོག་མེད་ཡེ་ཤེས་མི་མཐོང་ཞིང་། །ལྟ་བ་


79-1-127b

འདི་ཡང་མི་མཐོང་བ། །ཆོས་རྣམས་མི་བདེན་མཐོང་བའི་ཕྱིར། །འདི་ལ་རྟོག་པར་བྱེད་ཅེས་བསྟན། །ཆོས་ཀྱི་སྣང་བ་བསམ་མི་ཁྱབ། །མཐའ་མེད་ཅིང་ནི་ཚད་ཀྱང་མེད། །ཆོས་རྣམས་སྟོང་པར་མཐོང་
བས་ན། །རྣམ་པར་མི་རྟོག་པ་ཞེས་བཤད། །ཆོས་རྣམས་དང་ནི་མཚན་ཉིད་རྣམས། རྟག་ཏུ་ཐོབ་དང་འཇུག་མེད་པའི། །རྣམ་དག་ཆོས་སྒྲ་འདི་ཐོས་ནས། །དགའ་བ་ཆེན་པོ་རབ་ཏུ་བསྐྱེད། །གལ་ཏེ་ཆོས་ནི་སྐྱེ་
མེད་དང་། །རྟག་ཏུ་རྣམ་རྟོག་མེད་པ་ཡི། །རྣམ་དག་ཆོས་སྒྲ་འདི་ཐོས་ནས། །རབ་དབེན་བདེ་བ་ཐོབ་པར་འགྱུར། །གལ་ཏེ་མ་འོངས་དུས་ཀྱི་ཚེ། །བླ་མེད་ཆོས་ནི་ཐོས་གྱུར་ན། །སེམས་ཅན་དེ་དག་ཡུན་རིང་
ནས། །ཡོན་བསགས་པ་ཡང་བཤད་པར་བྱ། །གལ་ཏེ་མ་འོངས་དུས་ཀྱི་ཚེ། །བླ་མེད་ཆོས་འདི་ཐོས་གྱུར་ན། །དེ་ནས་ཡང་དག་ཆོས་འདི་ལ། །མྱུར་བར་ཁོ་ནར་གཞོལ་བར་འགྱུར། །
བམ་པོ་ལྔ་པ། །གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དེ་ལྟར་ཆོས་ཐམས་ཅད་ལ་སོ་སོར་རྟག་ཏུ་རྟོག་པར་བྱེད་པའི་ཚེ་
ཆོས་རྣམས་ལ་ཆོས་ཀྱི་སྣང་བ་ཐོབ་པས་སྟོང་པ་ཉིད་ལ་སྟོང་པ་ཉིད་དུ་མི་བལྟའོ། །སྟོང་པ་ཉིད་ལས་ལོགས་ཤིག་ན་ཡང་སྟོང་པ་ཉིད་དུ་མི་བལྟའོ། །ཆོས་འགའ་ཙམ་ཡང་སྟོང་པ་ཉིད་དང་མཚུངས་པར་ལྡན་པ་འམ། 
མཚུངས་པར་མི་ལྡན་པར་ཡང་དག་པར་རྗེས་སུ་མི་བལྟའོ། །སྟོང་པ་ཉིད་ཀྱིས་སྟོང་པ་ཉིད་སྟོང་པ་འམ་མི་སྟོང་པར་ཡང་ཡང་དག་པར་རྗེས་སུ་མི་བལྟའོ། །ལྟ་བ་ཉིད་ཀྱིས་ཆོས་ཐམས་ཅད་ལ་ལྟ་བར་ཡང་
མི་བྱེད་དོ། །དེ་ལྟར་ལྟ་བའི་ཚེ་མཚན་མ་མེད་པ་ལ་མཚན་མ་མེད་པར་ཡང་དག་པར་རྗེས་སུ་མི་བལྟའོ། །མཚན་མ་མེད་པ་ལས་ལོགས་ཤིག་ན་ཡང་མཚན་མ་མེད་པར་ཡང་དག་པར་རྗེས་སུ་མི་བལྟའོ། །

79-1-128a

ཆོས་འགའ་ཙམ་ཡང་མཚན་མ་མེད་པ་དང་མཚུངས་པར་ལྡན་པ་འམ་མཚུངས་པར་མི་ལྡན་པར་ཡང་དག་པར་རྗེས་སུ་མི་བལྟའོ། །མཚན་མ་མེད་པས་མཚན་མ་མེད་པར་ཡང་དག་པར་
རྗེས་སུ་མི་བལྟའོ། །མཚན་མ་དང་བཅས་པས་མཚན་མ་དང་བཅས་པའི་ལྟ་བ་དང་། མཚན་མ་མེད་པའི་ལྟ་བ་དང་། མཚན་མ་མེད་པ་མ་ཡིན་པ་ཡང་མ་ཡིན་པའི་ལྟ་བར་ཡང་དག་པར་རྗེས་སུ་
ལྟ་བར་མི་བྱེད་དེ། སྐྱེ་བ་མེད་པ་དང་། བྱེད་པ་མེད་པ་ལ་ཡང་དེ་བཞིན་ནོ། །ཟད་པ་ལ་ཡང་ཟད་པར་ཡང་དག་པར་རྗེས་སུ་མི་བལྟའོ། །ཟད་པ་ལས་ལོགས་ཤིག་ན་ཡང་ཟད་པར་ཡང་དག་པར་རྗེས་
སུ་མི་བལྟའོ། །ཆོས་འགའ་ཙམ་ཡང་ཟད་པ་དང་མཚུངས་པར་ལྡན་པ་འམ་མཚུངས་པར་མི་ལྡན་པར་ཡང་ཡང་དག་པར་རྗེས་སུ་མི་བལྟའོ། །ཟད་པས་ཟད་པར་ཡང་དག་པར་རྗེས་སུ་མི་བལྟའོ། །ཟད་པ་ལ་
ཟད་པ་མེད་པར་ཡང་ཡང་དག་པར་རྗེས་སུ་མི་བལྟའོ། །ཟད་པ་ཡང་མ་ཡིན། ཟད་པ་མེད་པ་ཡང་མ་ཡིན་པར་ཡང་དག་པར་རྗེས་སུ་མི་བལྟའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
དེ་ལྟར་ལྟ་བའི་ཚེ་ཆོས་ཅུང་ཟད་ཙམ་ཡང་བལྟར་ཡོད་པ་འམ། བལྟར་མེད་པ་འམ། བསྟན་དུ་ཡོད་པ་འམ། བསྟན་དུ་མེད་པ་འམ། འཇུག་ཏུ་རུང་བ་འམ། འཇུག་ཏུ་མི་རུང་བ་འམ། རྟོགས་པར་བྱར་
རུང་བ་འམ། རྟོགས་པར་བྱར་མི་རུང་བ་ཞེས་བྱ་བ་གང་ཡང་མི་དམིགས་ཏེ། བློ་གྲོས་མཐའ་ཡས་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ལམ་འདི་ལ་གནས་པའི་ཆོས་ཀྱི་སྣང་
བ་ཆེན་པོ་ཞེས་བྱའོ། །ཆོས་ཀྱི་སྣང་བ་ཐོབ་པའི་ཕྱིར་ཆོས་ཐམས་ཅད་ལ་མཐའ་ཅི་ཡང་མེད་པར་མཐོང་ཞིང་མཐའ་དང་དབུས་ལ་ཡང་མངོན་པར་ཞེན་པར་མི་བྱེད་དོ། །མངོན་པར་ཞེན་པ་མེད་པའི་ཕྱིར་

79-1-128b

སངས་རྒྱས་ཀྱི་ཆོས་ལ་ཡང་རབ་ཏུ་གཞོལ་བར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །སྟོང་པ་ཉིད་ལ་སྟོང་མི་ལྟ། །སྟོང་ལས་གུད་ན་སྟོང་མི་ལྟ། །དེ་
ལྟ་བུར་ནི་གང་ལྟ་བ། །སྟོང་པ་མཐོང་བ་ཞེས་བྱའོ། །ཆོས་འགའ་ལ་ཡང་མི་གནས་ཤིང་། །ཆོས་འགའ་ཙམ་ཡང་སྟོང་དེ་དང་། །མཚུངས་པར་ལྡན་དང་མཚུངས་མི་ལྡན། །གང་ཡང་དམིགས་པར་མི་བྱེད་
དོ། །སྟོང་པ་ཉིད་ནི་རང་བཞིན་སྟོང་། །སྟོང་པ་ཉིད་ལ་འཛིན་མི་བྱེད། །ཡོངས་སུ་འཛིན་པ་མེད་པའི་ཕྱིར། །ཆོས་རྣམས་ཐམས་ཅད་ཤེས་པར་འགྱུར། །ལྟ་བ་དག་ལ་ལེན་མེད་ཅིང་། །སོ་སོར་རྟོག་ལ་
འཛིན་མི་བྱེད། །ལྟ་དང་རྟོག་པ་རབ་ཤེས་པས། །དེ་གཉིས་ལེན་པར་མི་བྱེད་དོ། །ལྟ་བ་དག་ནི་རྣམ་དག་ཅིང་། །རྟོག་པ་དག་ནི་མི་དམིགས་པར། །དེ་ལྟར་ཆོས་རྣམས་གང་རྟོག་པ། །མཐར་ནི་གང་
ཡང་འཛིན་མི་བྱེད། །མཚན་མ་མེད་པར་མི་ལྟ་ཞེང་། མཚན་མ་མེད་པར་རྟོག་མི་བྱེད། །མཚན་མ་མེད་པ་དག་ལ་ཡང་། །མཚན་མ་མེད་པར་སྒོམ་མི་བྱེད། །མཚན་མ་མེད་ཅིང་བསྟན་དུ་མེད། །སྨོན་པ་
མེད་ཅིང་མི་དམིགས་པས། །ཆོས་ཀྱི་ངོ་བོ་འགའ་ཙམ་ཡང་། །བསྒོམ་པར་བྱ་བ་ཅི་ཡང་མེད། །མཚན་མ་མེད་པ་མི་སེམས་ཤིང་། །སྨོན་པ་མེད་པའང་སེམས་མི་བྱེད། །དེ་ལྟར་རྣམ་པར་མི་རྟོག་
པས། །མཚན་དང་མཚན་མེད་རབ་རྟོགས་འགྱུར། །མཚན་མ་མེད་ལ་མི་གཞོལ་ཞིང་། །མཚན་མ་མེད་ལ་འཇུག་མི་བྱེད། །གཞོལ་དང་འཇུག་པ་མེད་པས་ན། །རབ་རྟོགས་མཉམ་ཉིད་གནས་
པར་འགྱུར། །བློ་ལྡན་མཚན་མ་མི་མཐོང་ཞིང་། །མཚན་མ་མེད་པའང་མཐོང་མི་འགྱུར། །གང་ཞིག་མི་མཐོང་མི་སེམས་པ། །ཐམས་ཅད་མེད་པར་རབ་ཏུ་རྟོགས། །གང་ཞིག་རྟག་ཏུ་འདི་སྙམ་དུ། 

79-1-129a

བསམ་མེད་བརྟན་མེད་གང་སེམས་པ། །བསམ་དང་བརྟན་པ་དག་ལ་ནི། །མཉམ་དང་མཉམ་པར་རབ་ཏུ་གནས། །མཚན་མ་མེད་པ་ཇི་ལྟ་བ། །བྱས་པ་མེད་པའང་དེ་བཞིན་ཏེ། །
རབ་ཏུ་བསྟན་ཀྱང་བསྟན་དུ་མེད། །བསམས་ནས་རབ་ཏུ་རྟོགས་ཕྱིར་རོ། །སྐྱེ་བ་མེད་པའང་དེ་བཞིན་དུ། །ཆོས་འགའ་ཙམ་ཡང་སྐྱེ་བ་མེད། །རང་བཞིན་ཅི་ཡང་མེད་པས་ན། །ངོ་བོ་མེད་པར་རབ་ཏུ་རྟོགས། །
སྐྱེ་བ་དང་ནི་སྐྱེ་བ་མེད། །བྱེད་བཅས་བྱེད་པ་མེད་པ་ཡང་། །གཟུང་བར་བྱ་བ་ཅུང་ཟད་མེད། །བློ་ལྡན་རྣམ་པར་རྟོག་མི་བྱེད། །དྲན་དང་ཤེས་རབ་གཡོ་བ་མེད། །རྣམ་འབྱེད་མེད་པར་རབ་རྟོགས་པས། །ངོ་བོ་
ཡོད་དང་ངོ་བོ་མེད། །མཉམ་པ་ངོ་བོ་རྣམས་དང་བྲལ། །ཟད་པ་ལ་ཡང་ཟད་མི་ལྟ། །ཟད་པ་མེད་པར་ཡང་མི་ལྟ། །ལྟ་བ་མེད་པར་རབ་རྟོགས་པས། །ཟད་པའི་ཡེ་ཤེས་གོང་ན་མེད། །ཟད་པ་དང་ནི་མ་ཟད་
པ། །གཉིས་ག་ལ་ཡང་རྟོག་མི་བྱེད། །རྣམ་པར་རྟོག་པ་མེད་པའི་ཕྱིར། །བསམ་མེད་མཉམ་པར་རབ་ཏུ་གནས། །ཟད་པ་ལ་ཡང་ཟད་ལྟ་མེད། །ཟད་མེད་ལྟ་བའང་ཡོད་མ་ཡིན། །དེ་ལྟར་ལྟ་
བ་ཟད་པའི་ཕྱིར། །ཟད་དང་མ་ཟད་འཛིན་མི་བྱེད། །བསམ་མེད་མཉམ་པར་རབ་ཏུ་གནས། །ཟད་པ་ལ་ཡང་ཟད་ལྟ་མེད། །ཟད་མེད་ལྟ་བའང་ཡོད་མ་ཡིན། །དེ་ལྟར་ལྟ་བ་ཟད་པའི་ཕྱིར། །ཟད་དང་
མ་ཟད་འཛིན་མི་བྱེད། །གལ་ཏེ་ཟད་དང་མ་ཟད་ལ། །ཐམས་ཅད་འཛིན་པར་མི་བྱེད་ན། །ཡོངས་སུ་འཛིན་པ་མེད་པའི་ཕྱིར། །ཟད་པའི་ཡེ་ཤེས་གསལ་རྟོགས་འགྱུར། །ཟད་པའི་ཡེ་ཤེས་
སྤྱོད་ཡུལ་ནི། །འཇིགས་པ་མེད་པས་འཐོབ་པར་འགྱུར། །ཆོས་འདི་རབ་ཏུ་རྟོགས་པའི་ཕྱིར། །བྱང་ཆུབ་སེམས་དཔའ་བདེ་བར་གནས། །དེ་ནས་འཁོར་འདུས་པ་དེར་བྱང་ཆུབ་སེམས་དཔའ་སེམས་

79-1-129b

དཔའ་ཆེན་པོ་བློ་གྲོས་འཕགས་པ་ཞེས་བྱ་བ་འདུས་པར་གྱུར་པ་སྟན་ལས་ལངས་ནས། བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་
ལ་བ་དེ་ལོགས་སུ་ཐལ་མོ་སྦྱར་ཏེ་ཕྱག་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་རྣམས་ཀྱི་ཡེ་ཤེས་ཡོངས་སུ་བསྡུ་བར་འཚལ་བའི་སླད་
དུ་བསྒྲུབ་པ་བསྐྱེད་པས་ཆོས་ཀྱི་སྣང་བ་ཆེན་པོ་དེ་ཐོབ་པར་འགྱུར་བ་ལགས་ཀྱིས་ཀྱང་ཆོས་ཀྱི་སྣང་བ་དེ་ལ་ལྟ་ཅུང་ཟད་པ་མ་མཆིས་ཏེ། ཆོས་ཀྱི་སྣང་བའི་དབང་གིས་འདུས་བྱས་དང་འདུས་མ་བྱས་དང་། 
འཇིག་རྟེན་པ་དང་། འཇིག་རྟེན་ལས་འདས་པ་དང་། རྗེས་སུ་འཐུན་པ་དང་། རྗེས་སུ་མི་མཐུན་པ་དང་། སྤྲོས་པ་དང་བཅས་པ་དང་། སྤྲོས་པ་མ་མཆིས་པའི་ཆོས་ཐམས་ཅད་རྟོགས་པར་གྱུར་པ་
ལགས་ན་བཅོམ་ལྡན་འདས་ཆོས་ཀྱི་སྣང་བ་དེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསྒྲུབ་པ་མ་མཆིས་པར་མཐོང་བར་འགྱུར་བ་ལྟ་མཆིས་ལགས་སམ། དེ་ནས་བཅོམ་ལྡན་འདས་
ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་བསྒྲུབ་པ་ཅུང་ཟད་
ཀྱང་མེད། ཁྱད་པར་དུ་བསྒྲུབ་པ་ཡང་མེད། བསྒྲུབ་པའི་རྗེས་སུ་འབྲང་བ་ཡང་མེད། ཀུན་ཏུ་ཁྱབ་པར་བསྒྲུབ་པ་ཡང་མེད་པར་ཆོས་ཀྱི་སྣང་བ་ཆེན་པོ་དཔག་ཏུ་མེད་པ་ཐོབ་པར་འགྱུར་ཏེ། བྱང་ཆུབ་སེམས་
དཔའ་སེམས་དཔའ་ཆེན་པོ་ཉིད་ཀྱང་དམིགས་སུ་མེད་ཅིང་མཐོང་བར་མི་འགྱུར་ན་བྱང་ཆུབ་སེམས་དཔའི་སྤྱོད་པ་མི་དམིགས་ཤིང་མཐོང་བར་མི་འགྱུར་བ་ལྟ་སྨོས་ཀྱང་ཅི་དགོས་ཏེ། དེའི་ཕྱིར་བསྐལ་པ་

79-1-130a

དུ་མར་མངོན་པར་བསྒྲུབ་པས་ཆོས་ཀྱི་སྣང་བ་ཆེན་པོ་དཔག་ཏུ་མེད་པ་འཐོབ་པར་འགྱུར་བར་ལྟ་བར་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སྤྱོད་པ་ཐམས་ཅད་ཉེ་
བར་ཞི་ཞིང་སྤྱོད་པ་རྣམ་པར་དག་པར་གྱུར་པས་ན་ཆོས་ཀྱི་སྣང་བ་འཐོབ་པ་ཡིན་ནོ། །ཆོས་ཀྱི་སྣང་བའི་སྤྱོད་པ་ནི་གྲངས་ཀྱི་ཚད་དང་ལྡན་པའི་སྤྱོད་པ་ཡང་མ་ཡིན། མཚན་མའི་རྗེས་སུ་འབྲང་བའི་སྤྱོད་པ་
ཡང་མ་ཡིན་ན་གང་ལས་སྤྱོད་པ་ཐམས་ཅད་ཅེས་ཉེ་བར་འདོགས། མངོན་པར་བསྒྲུབ་པ་ཞེས་བྱ་བ་ནི་ཉེ་བར་འདོད་པའི་སྤྱོད་པ་ཡང་མ་ཡིན་ལ། དེ་དང་བྲལ་བ་ཡང་མ་ཡིན་ནོ། །བློ་གྲོས་འཕགས་
པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སྤྱོད་པ་འདི་ལ་གནས་པའི་ཚེ་སྤྱོད་པ་ཐམས་ཅད་སྤོང་བར་བྱེད་པས་ཡོངས་སུ་འཛིན་པར་མི་བྱེད་དོ། །སྤྱོད་པ་འདི་དང་ལྡན་པ་ནི་གྲངས་ཀྱི་ཚད་དང་
ལྡན་པའི་སྤྱོད་པ་ཡང་མ་ཡིན། མཚན་མའི་རྗེས་སུ་འབྲང་བའི་སྤྱོད་པ་ཡང་མ་ཡིན་པས་མཚན་མ་མེད་པ་སྤྱོད་པ་མེད་པས་ཆོས་ཀྱི་སྣང་བ་ཆེན་པོ་འདི་ཐོབ་པར་འགྱུར་རོ། །དེ་ནས་དེའི་ཚེ་བཅོམ་ལྡན་
འདས་ཀྱིས་ཚིགས་སུ་བཅད་དེ་བཀའ་སྩལ་པ། བྱང་ཆུབ་སེམས་དཔའ་སྤྱོད་མེད་ལ། །སྤྱོད་པ་དག་ནི་ཅི་ཡང་མེད། །སྤྱོད་པ་མེད་པ་གང་ཐོབ་པ། །འཇིགས་པ་མེད་པས་གཞོལ་བར་བྱེད། །ཁྱད་པར་
སྒྲུབ་པ་ཡོད་མ་ཡིན། །ཀུན་ཏུ་སྒྲུབ་པ་ཅི་ཡང་མེད། །སྤྱོད་མེད་ཁྱད་པར་སྒྲུབ་མེད་པས། མཉམ་པ་ཉིད་དུ་གཞོལ་བར་བྱེད། །སྤྱོད་པ་འདི་ནི་བསྟན་དུ་མེད། །མཚན་མ་རྣམས་ཀྱང་ཡོད་མ་ཡིན། །
སྤྱོད་དང་མཚན་མ་མེད་གྱུར་པ། །འདི་ནི་སྤྱོད་པའི་མཚན་ཉིད་ཡིན། །བྱང་ཆུབ་སེམས་དཔའ་མཚན་མེད་སྤྱོད། །དངོས་པོ་རྣམས་ལ་ཡོངས་མི་གནས། །སྤྱོད་མེད་གནས་པ་མེད་པས་ན། །བློ་ལྡན་མངོན་

79-1-130b

པར་སྒྲུབ་པར་བྱེད། །སྤྱོད་པ་མེད་པས་གཡོ་བ་མེད། །སྤྱོད་པ་འདི་ནི་བླ་ན་མེད། །གཡོ་མེད་སྤྱོད་ལ་གང་སྤྱོད་པ། །འབད་པས་རབ་ཏུ་གཞོལ་བར་བྱེད། །བྱང་ཆུབ་སེམས་དཔའ་དམིགས་སུ་མེད། །
སྤྱོད་པ་དག་ནི་བལྟར་མི་མཐོང་། གཟུགས་ཀྱི་ལུས་ཀྱང་མི་མཐོང་བ། །འདི་ནི་ལེགས་པར་རྗེས་འབྲང་ཡིན། །གཟུགས་མེད་ཁ་དོག་མཚན་མ་མེད། །དེ་ཕྱིར་སྤྱོད་པ་ཐམས་ཅད་མེད། །ལྟ་བ་དག་ལ་འཛིན་པ་
མེད། འདི་ནི་སྤྱོད་པ་དཔེ་མེད་ཡིན། །བྱང་ཆུབ་སེམས་དཔའ་བླ་མེད་སྤྱོད། །གདགས་པ་དག་ཏུ་མི་ལྟུང་ཞིང་། །རྣམ་པར་འགྱུར་བའང་མེད་པས་ན། །དེ་ན་འཛིན་པ་ཅི་ཡང་མེད། །སྤྱོད་ལ་གདགས་པ་མེད་
པའི་ཕྱིར། །བླ་མེད་སྤྱོད་པ་ཞེས་བྱའོ། །གལ་ཏེ་སྤྱོད་པ་འདི་ཐོབ་ན། །ཆོས་ཀྱི་སྣང་ཆེན་འཐོབ་པར་འགྱུར། །བྱང་ཆུབ་སེམས་དཔའ་སྤྱོད་གྲུབ་པ། །ཚིག་མེད་བསྐལ་པའི་ཚད་ཀྱང་མེད། །བསྐལ་པ་ཚད་མེད་སྙེད་
དུ་ཡང་། །སྤྱོད་པ་རྣམས་ནི་སྟོན་པར་བྱེད། །བྱང་ཆུབ་སེམས་དཔའི་སྤྱོད་གཙང་བས། །རྣམ་པར་དག་ལ་རབ་ཏུ་གནས། །སྤྱོད་པ་ཐམས་ཅད་སྤངས་པས་ན། གཟུང་བར་བྱ་བ་ཅི་ཡང་མེད། །བྱང་ཆུབ་སེམས་
དཔའ་བཏང་སྙོམས་གནས། །སྤྱོད་པ་རྣམས་ནི་སྲུང་བར་བྱེད། །སྤྱོད་པ་ཐམས་ཅད་སྤངས་པས་ན། །བཏང་སྙོམས་ལ་ནི་རབ་ཏུ་གནས། །བྱང་ཆུབ་སེམས་དཔའི་སྤྱོད་དཔག་མེད། །མཐའ་དང་མཐའ་མེད་རབ་ཏུ་
སྤངས། །སྤྱོད་པ་དེ་ལ་གཡོ་མེད་པས། །སྤྱོད་པ་བླ་ན་མེད་ཅེས་བྱ། །བྱང་ཆུབ་སེམས་དཔའི་མཚན་མེད་སྤྱོད། །སྤྱོད་པ་འདི་ནི་བླ་ན་མེད། །སྤྱོད་པ་འདི་ནི་སྤྱོད་པ་ན། །བདུད་གྱི་སྤྱོད་ཡུལ་ཡང་དག་འདས། །བྱང་ཆུབ་
སེམས་དཔའི་མཚན་མེད་སྤྱོད། །མཚན་མ་མེད་པ་གསལ་རྟོགས་པས། །མཚན་མ་དང་ནི་མཚན་མ་མེད། །ཐམས་ཅད་ལ་ནི་རྟེན་མི་བྱེད། །བྱང་ཆུབ་སེམས་དཔའ་ཤེས་འདི་གནས། །སྤྱོད་པ་འདི་ནི་ལེགས་པར་

79-1-131a

གྲུབ། །སྤྱོད་པ་ཅུང་ཟད་མེད་པས་ན། །སྤྱོད་པ་མེད་པ་ཞེས་བརྗོད་དོ། །བྱང་ཆུབ་སེམས་དཔའ་རྣམ་དག་པ། །སྤྱོད་པ་དག་ལ་འཇིགས་པ་མེད། །ཡང་དག་དྲན་པས་གཞོལ་བྱེད་པས། །
འདི་ནི་ལེགས་པར་གནས་པ་ཡིན། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་སྐྱེས་བུ་དམ་པ་རྣམས་སྤྱོད་པ་
རྣམ་པ་དུ་མ་མངོན་པར་བསྒྲུབ་པར་བགྱིད་པ་གང་ལགས་པ་འདི་ཤིན་དུ་ཟབ་པས་བྱིས་པ་སོ་སོའི་སྐྱེ་བོ་མཚན་མ་དང་བཅས་ཤིང་མངོན་པར་འདུ་བགྱི་བ་དང་བཅས་པའི་མངོན་པར་བསྒྲུབ་པ་དག་གིས་ཅུང་ཟད་ཙམ་
ཡང་སྤྱོད་པར་མི་འགྱུར་བ་ནི་ངོ་མཚར་ཆེ་ལགས་སོ། །བཅོམ་ལྡན་འདས་ཆོས་འགའ་ཙམ་ཡང་སྤྱོད་པ་འདིའི་ནང་དུ་འཇུག་པར་འགྱུར་བ་གང་ཡང་མ་མཆིས་པས་དེའི་སླད་དུ་སྤྱོད་པ་འདི་ནི་སྐྱེས་བུ་དམ་པ་
རྣམས་ཀྱི་མཉམ་པ་ཉིད་ཀྱི་སྤྱོད་པར་གྱུར་པ་ལགས་སོ། །བཅོམ་ལྡན་འདས་སྐྱེས་བུ་དམ་པ་རྣམས་ཀྱི་སྤྱོད་པ་གང་ལགས་པ་དེ་ནི་ཚད་མ་རྣམས་ཀྱིས་མཐའ་དཔག་པར་བགྱི་བ་མ་ལགས་སོ། །དེ་ནས་དེའི་
ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པས་ཚིགས་སུ་བཅད་པ་འདི་དག་གིས་དེ་བཞིན་གཤེགས་པ་ལ་མངོན་པར་བསྟོད་པ། །དཔའ་ཆེན་ཡང་དག་སངས་རྒྱས་ཏེ། །བླ་མེད་རྐང་གཉིས་
ཀུན་གྱི་གཙོ། །སྤྱོད་པ་ཟབ་མོ་རབ་བསྟན་ནས། །བྱང་ཆུབ་སེམས་དཔའ་ཕན་འདོགས་མཛད། །བཅོམ་ལྡན་སྤོབས་པ་གྱ་ནོམ་བ། །དེ་ཡི་ཚད་ནི་དཔག་པར་དཀའ། །སྤོབས་པ་དག་ནི་མཐའ་མེད་པས། །
སྐྱེས་བུ་ཆེན་པོ་མཆོག་ལགས་སོ། །ཆོས་རྗེ་གཏམ་གྱི་ཚུལ་མཁྱེན་པས། །དེས་ན་ཡང་དག་མ་ལུས་མཁྱེན། །བྱང་ཆུབ་སེམས་དཔའ་རྣམས་ལས་ནི། །བླ་མེད་སྤྱོད་པ་འདི་རབ་བཤད། །བཅོམ་ལྡན་

79-1-131b

མགོན་པོར་འགྱུར་བ་ཡི། །སྤྱོད་པའི་ཐབས་ནི་སྟོན་མཛད་ཅིང་། །སྤྱོད་པ་དག་ལས་འདས་པས་ན། །བློ་ལྡན་གང་ཟག་གཞོལ་བར་བགྱིད། །ཀླུ་ཆེན་བསམ་གྱིས་མི་ཁྱབ་པ། །མཁྱེན་པའི་སྤྱོད་ཡུལ་མཐའ་མ་
མཆིས། །ཐམས་ཅད་མཁྱེན་པ་རྐང་གཉིས་གཙོ། །སྤྱོད་པ་དམ་པ་འདི་རབ་ཕྱེ། །བཅོམ་ལྡན་ཐུབ་པ་མི་གཡོ་བའི། །སྤྱོད་པ་དག་ནི་གང་ཕྱེ་བ། །སྤྱོད་པ་འདི་ནི་མི་སྒུལ་བས། །དེ་སླད་དཔེ་མེད་སྤྱོད་
ཅེས་བགྱི། །དཔའ་ཆེན་ཐུབ་པ་ཆེན་པོ་སྟེ། །སྔོན་ཆད་བསྐལ་པ་མང་པོར་ནི། །སྤྱོད་པ་དག་ནི་གང་བསྒྲུབས་པས། །སུ་ཡང་དེར་ནི་ཕྱིན་མི་འགྱུར། །བྱང་ཆུབ་སེམས་དཔའ་ཆོས་སྟོན་པས། །འཇིག་
རྟེན་དག་ན་གནས་བགྱིད་ཀྱང་། །རྣམ་པ་ཐམས་ཅད་མཁྱེན་པ་དག །རིང་པོར་མི་ཐོགས་འཐོབ་པར་འགྱུར། །བདག་ཅག་སེམས་ཅན་སྙིང་བརྩེའི་སླད། །མ་འོངས་ཐ་མ་དུས་ཀྱི་ཚེ། །བླ་ན་མ་མཆིས་ཆོས་
འདི་ནི། །སྲུང་ཞིང་རབ་ཏུ་འཛིན་པར་བགྱིད། །བདག་ཅག་ཆོས་འདི་ཐོས་གྱུར་ནས། །མ་འོངས་ཐ་མ་དུས་ཀྱི་ཚེ། །སེམས་ཅན་རྣམས་ནི་ཀུན་གྱི་སླད། །སྤྱོད་ཅིང་རབ་ཏུ་སྟོན་པར་བགྱིད། །བདག་ཅག་
ཆོས་ཀྱི་སྣང་བ་ཡིས། །མ་འོངས་ཐ་མ་དུས་ཀྱི་ཚེ། །ཆོས་རྣམས་ཡོངས་སུ་ཚོལ་བ་ལ། །ཕན་འདོགས་ཆེན་པོ་རབ་ཏུ་བགྱིད། །བདག་ཅག་ཡི་དམ་རབ་བསྐྱེད་ནས། །མ་འོངས་ཐ་མ་དུས་ཀྱི་ཚེ། །
སེམས་ཅན་རྣམས་ནི་ཀུན་གྱི་སླད། །བསྲུང་བ་འཛིན་དང་འཇོག་པར་བགྱིད། །བདག་ཅག་རྟག་ཏུ་འདི་སྙམ་དུ། །མ་འོངས་ཐ་མ་དུས་ཀྱི་ཚེ། །སངས་རྒྱས་ཆོས་མཚོ་མཆོད་བགྱིས་ནས། །བླ་མེད་ཆོས་
ནི་འཛིན་པར་སྟོན། །བདག་ཅག་ཆོས་ཀྱི་སྡེ་སྣོད་ཀྱི། །སྐྱེས་བུ་མཆོག་ནི་བགྱིས་འགྱུར་བས། །ཆོས་ཀྱི་སྒོ་འདི་རབ་བཟུང་སྟེ། །བསྲུངས་ནས་ཡུན་རིངས་གནས་པར་སྨོན། །བདག་ཅག་ཆོས་ཀྱི་ཆུ་དག་

79-1-132a

ལ། །ཡི་དམ་བླངས་ཏེ་རབ་འཐུངས་ནས། །ཆོས་ཀྱི་སྒོ་མོ་འདི་དག་ལ། །བསྲུང་བ་དག་ནི་བགྱིད་འགྱུར་ཞིང་། །བདག་ཅག་ཆོས་འདི་ཐོས་གྱུར་ནས། །མ་འོངས་ཐ་མ་དུས་ཀྱི་ཚེ། །
སྐྱེས་བུ་ཆེན་པོ་རབ་བགྱིས་ནས། །ཡང་དག་ཆོས་ནི་འཛིན་པར་ཤོག །བདག་ཅག་སྲོག་ནི་ཉམས་གྱུར་ཀྱང་། །བླ་མེད་ཆོས་ནི་མི་སྤོང་ཞིང་། །ཡང་དག་ཆོས་ནི་འདི་དག་གི། །ཆོས་འཛིན་
པ་ནི་བགྱིད་པར་ཤོག །བདག་ཅག་ཆོས་འཛིན་པ་ལ་ཡང་། །ཆོས་སེམས་དག་ནི་མི་སྐྱེད་པར། །རབ་གདུང་ཟབ་མོས་འདི་ཐོས་ནས། །ངེས་པར་འདོད་དང་འཐུན་པར་ཤོག །
བདག་ཅག་མ་འོངས་དུས་ཀྱི་ཚེ། །ཆོས་རྣམས་ཡོངས་སུ་ཚོལ་བ་ལ། །ཡང་དག་ཆོས་འདི་རབ་བསྟན་ནས། །དེ་དག་ཀུན་ཀྱང་དགའ་བར་བགྱིད། །ཆོས་ཀྱི་མངའ་བདག་
བསམ་མི་ཁྱབ། །སྐྱབས་ཆེན་དག་ནི་མཛད་པས་ན། །ཐུགས་རྗེས་བདག་ལ་བྱིན་བརླབས་ཏེ། །བདག་ཆོས་འཛིན་ལ་དགོངས་པར་སྨོན། །དེ་ནས་བཅོམ་ལྡན་འདས་
ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་འཕགས་པ་ཁྱོད་ཀྱིས་མ་འོངས་པའི་དུས་ཐ་མ་ལ་ཡང་དག་པའི་
ཆོས་ཡོངས་སུ་གཟུང་བའི་ཕྱིར་གོ་ཆ་ཆེན་པོ་བགོས་པ་ནི་ཇི་ལྟར་སྔོན་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྒྱལ་བ་རྣམས་ལ་མཆོད་པ་དང་། རིམ་གྲོ་བྱས་ནས་
དགེ་བའི་རྩ་བ་རྣམས་བསྐྱེད་དེ། ཡུན་རིང་པོར་ཚངས་པར་སྤྱོད་པ་ཡང་དག་པར་སྤྱད་ནས་གོ་ཆ་ཆེན་པོ་བགོས་ཏེ། སངས་རྒྱས་བཅོམ་ལྡན་འདས་རྣམས་ཀྱི་ཆོས་བསྲུང་ཞིང་ཡོངས་སུ་

79-1-132b

གཟུང་བར་འགྱུར་བ་དག་དང་བྱེ་བྲག་ཏུ་གྱུར་པ་ཅི་ཡང་མེད་པས་ལེགས་སོ་ལེགས་སོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །མ་འོངས་འཇིག་
པའི་དུས་ཀྱི་ཚེ། །ཁྱེད་ཀྱིས་ཆོས་འདི་རབ་བཟུང་སྟེ། །སེམས་ཅན་རྣམས་ལ་ཕན་གདགས་ཕྱིར། །ཆོས་འདི་རྣམ་པར་དབྱེ་བར་བྱ། །མ་འོངས་ཐ་མ་དུས་ཀྱི་ཚེ། །ཁྱོད་ཀྱི་
རྒྱལ་བའི་ཆོས་ཟུང་ཤིག །གལ་ཏེ་ཆོས་འདི་ཐོས་གྱུར་ན། །རབ་ཏུ་དགའ་བ་སྐྱེད་པར་འགྱུར། །མ་འོངས་ཐ་མ་དུས་ཀྱི་ཚེ། །ཁྱོད་ནི་ཆོས་འཛིན་པར་འགྱུར་བས། །
དེས་ནི་ཆོས་ཟབ་བཤད་པར་བྱ། །ཁྱོད་ཀྱིས་དེ་བཞིན་གཟུང་བར་གྱིས། །གསང་སྟེ་གསུངས་པའི་མདོ་སྡེ་དག །ཁྱོད་ཐོས་གྱུར་ན་ཡིད་ལ་ཟུང་། །དོན་གྱི་ཚུལ་ནི་འདི་དག་ལ། །
ཐེ་ཚོམ་དག་ནི་མེད་པར་གྱིས། །རྣམ་པར་ངེས་པའི་དོན་ཟབ་དག །ཁྱོད་ཐོས་གྱུར་ན་ཡིད་ལ་ཟུང་། །སེམས་ཅན་རྣམས་ལ་ཕན་གདགས་ཕྱིར། །ཆོས་ཀྱི་གཏེར་ནི་རབ་ཟུང་ཤིག །
ཆོས་ཀྱི་སྦྱིན་པ་ཡོངས་བཏང་ནས། །སེམས་ཅན་རྣམས་ནི་ཚིམ་པར་གྱིས། །ཐོས་པར་གྱུར་ན་ལུས་དང་སེམས། །ཀུན་དུ་ཁྱབ་པར་དགའ་བར་འགྱུར། །བྱང་ཆུབ་སེམས་
དཔའི་ལམ་རྣམས་དང་། །སྤྱོད་པ་རྣམས་ཀྱི་ཚུལ་དག་དང་། །དེ་དག་གི་ནི་མདོ་སྡེ་རྣམས། །མཐར་ཕྱིན་ཡོངས་སུ་འཛིན་པའི་ཕྱིར། །ཁྱོད་ཀྱིས་སེམས་ཅན་ཚད་མེད་རྣམས། །རྒྱ་
ཆེར་རབ་ཏུ་སྒྲོལ་བར་འགྱུར། །འཇིག་རྟེན་དག་ནི་ཐམས་ཅད་དུ། །ཡོངས་སུ་མི་བཟློགས་གང་ཡང་མེད། །ཁྱོད་ཀྱིས་ཆོས་འདི་གཟུང་བའི་ཕྱིར། །འཇིག་རྟེན་རྣམས་ལ་ཕན་འདོགས་པས།།

79-1-133a

བསོད་ནམས་ཕུང་པོ་མཆོག་ཐོབ་འགྱུར། །དེ་ཕྱིར་རབ་ཏུ་གཞོལ་བར་བྱ། །ངས་འདིར་ཆོས་ནི་གང་བསྟན་པ། །ཁྱོད་ཀྱིས་ཐམས་ཅད་རབ་བཟུང་སྟེ། །མ་འོངས་ཐ་མ་དུས་ཀྱི་
ཚེ། །བློ་ལྡན་རྣམས་ལ་བཤད་པར་བྱ། །ད་ལྟར་མ་འོངས་དུས་ཀྱི་ཚེ། །ཆོས་འདི་གང་ཞིག་འཛིན་བྱེད་པ། །དེས་ནི་སངས་རྒྱས་སྟོང་རྣམས་ཀྱི། །ཡང་དག་ཆོས་ནི་འཛིན་
པར་འགྱུར། །སེམས་ཅན་རྣམས་ལ་ཕན་གདགས་ཕྱིར། ཆོས་ཀྱི་སྒོ་འདི་བསྲུང་བར་བྱ། །མ་འོངས་ཐ་མ་དུས་ཀྱི་ཚེ། །ཕན་པ་ཆེན་པོ་བྱེད་པར་འགྱུར། །གལ་ཏེ་མ་
འོངས་དུས་ཀྱི་ཚེ། །གང་ཞིག་ཆོས་འདི་འཛིན་བྱེད་པ། །དེ་ནི་སངས་རྒྱས་གཅིག་འགའ་ལས། །བསྙེན་ཅིང་རིམ་གྲོ་བྱས་པ་མིན། །གལ་ཏེ་མ་འོངས་དུས་ཀྱི་ཚེ། །གང་
ཞིག་ཆོས་འདི་སྲུང་བྱེད་པས། །དེས་ནི་ཆོས་འདི་ལེགས་སྟོན་པས། །མང་པོ་རིམ་གྲོ་བྱས་པ་ཡིན། །གང་ཞིག་ཆོས་ནི་འདི་དག་ལ། །ཐེ་ཚོམ་ཅུང་ཟད་མི་སྐྱེད་ཅིང་། །མ་
འོངས་ཆོས་ནི་སྲུང་བྱེད་པ། །དེ་ནི་བློ་དང་ལྡན་པ་ཡིན། །གོ་ཆ་དཔག་མེད་བགོས་ནས་ནི། །རྒོལ་བའི་དགྲ་ལས་གང་རྒྱལ་བ། །མ་འོངས་ཐ་མ་དུས་ཀྱི་ཚེ། །ཡང་དག་ཆོས་
འདི་འཛིན་པར་འགྱུར། །སངས་རྒྱས་ཡང་དག་ཆོས་འདི་ལ། །ཐེ་ཚོམ་དྲི་མ་རབ་བསལ་ཏེ། །ཆོས་ཐོས་གང་ཞིག་འཇིགས་མེད་པ། །ཡང་དག་ཆོས་འདི་འཛིན་པར་འགྱུར། །
དེ་ལྟ་བས་ན་བློ་གྲོས་འཕགས་པ་རིགས་ཀྱི་བུ་འམ་རིགས་ཀྱི་བུ་མོ་གང་དག་ནན་ཏན་གྱིས་ཡོན་ཏན་ཁྱད་པར་དུ་འཕགས་པ་ཆེན་པོ་ཡོངས་སུ་ཚོལ་བ་རྣམས་ཀྱིས་མ་འོངས་པའི་དུས་ཐ་མའི་ཚེ་ཆོས་

79-1-133b

ཟབ་མོའི་ཕྱིར་གོ་ཆ་བགོས་ནས་ཡོངས་སུ་གཟུང་བར་བྱ། བཀླག་པར་བྱ། ཁ་ཏོན་དུ་གདོན་པར་བྱ། གཞན་དག་ལ་ཡང་དེའི་དོན་ཡང་དག་པར་རབ་ཏུ་བསྟན་པར་བྱའོ། །གཞན་ཡང་བློ་གྲོས་
འཕགས་པ་ངས་མངོན་པར་དྲན་ཏེ། སྔོན་འདས་པའི་བསྐལ་པ་གྲངས་མེད་པའི་ཡང་ཆེས་གྲངས་མེད་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་
ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཀུན་དུ་སྣང་མཛད་
ཅེས་བྱ་བ་ཞིག་འཇིག་རྟེན་དུ་བྱུང་སྟེ། བསྐལ་པའི་མིང་ནི་ཡང་དག་པར་རྒྱལ་བ་ཞེས་བྱའོ། །འཇིག་རྟེན་གྱི་ཁམས་ནི་དྲི་མ་མེད་པ་ཞེས་བྱ་སྟེ། ས་གཞི་ཡངས་ལ་ཤིན་དུ་མཛེས་པ་རིན་པོ་ཆེ་
སྣ་བདུན་ལས་མངོན་པར་གྲུབ་པའོ། །དེའི་ཚེ་གླིང་ཆེན་པོ་དེ་ཆུ་ཞེང་འདྲ་སྟེ། དཔག་ཚད་བདུན་ཁྲི་བདུན་ཁྲི་ཡོད་དོ། །དེ་ནས་ཡང་གྲོང་ཁྱེར་ཆེན་པོ་དྲུག་ཁྲི་དྲུག་ཁྲི་ཡོད་དེ། གྲོང་ཁྱེར་རེ་རེའི་ཚད་ཀྱང་ཆུ་
ཞེང་འདྲ་སྟེ། དཔག་ཚད་བཅུ་དྲུག་བཅུ་དྲུག་ཡོད་དོ། །དེ་དག་ཀྱང་མཐའ་མ་ར་བས་འཁོར་བར་བསྐོར་ཅིང་། བ་གམ་གྱིས་བརྒྱན་པ། སྒོ་རབ་ཏུ་མཛེས་ཤིང་མཐོང་ན་དགའ་བ་དང་། ཤིང་ཏ་ལ་
མཆོག་རྣམས་ཕྲེང་དུ་དཀྲིགས་པས་བསྐོར་བ། བསྐྱེད་མོས་ཚལ་བརྒྱ་སྟོང་དུ་མས་རབ་ཏུ་བརྒྱན་པ། བསྐྱེད་མོས་ཚལ་ཀུན་དུ་ཁྲི་དང་སྟན་ལེགས་པར་བཤམས་པ་རྫིང་དང་། རྫིང་བུ་དང་། འབབ་ཆུ་
རྣམས་རབ་ཏུ་གང་ཞིང་འགྲམ་གྱི་སྟེགས་དང་། ལམ་རྣམས་རིན་པོ་ཆེ་སྣ་ཚོགས་གཅལ་དུ་བཀྲམ་པ། མཐའ་མའི་ས་གཞི་མཉམ་པ་འབྱུང་ཞིང་འཇུག་པའི་ཚེ་ཉམ་ང་བ་མེད་པ། འགྲམ་གྱི་འོབས་

79-1-134a

རྣམས་སུ་ཙན་དན་དང་། ཏ་མ་ལ་ལ་སོགས་པ་སྤོས་སྣ་ཚོགས་ཀྱི་ལྗོན་ཤིང་རྣམས་ཕྲེང་དུ་དཀྲིགས་པར་གྱུར་ཏོ། །གྲོང་ཁྱེར་རེ་རེ་ན་ཡང་མི་བྱེ་བ་སྟོང་ཕྲག་བཅུ་བཅུ་གནས་ཏེ། 
སེམས་ཅན་དེ་དག་ཐམས་ཅད་ཀྱང་དགེ་བ་བཅུའི་ལས་ཀྱི་ལམ་རྣམས་ཡོངས་སུ་རྫོགས་པར་གྱུར་བའི་ཕྱིར། དེ་ལྟ་བུའི་བདེ་བ་རབ་ཏུ་མྱོང་བར་གྱུར་ཏོ། །དེའི་ཚེ་དེ་བཞིན་གཤེགས་པ་དེ་བསྐལ་པ་
དང་པོ་ནས་བསྐལ་པ་ཉིས་བརྒྱ་འདས་ནས་དེར་བྱུང་བས་དེའི་ཕྱིར་བསྐལ་པ་དེའི་མིང་ཡང་ཡང་དག་པར་རྒྱལ་བ་ཞེས་བྱའོ། །བསྐལ་པ་དེ་ལ་དེ་བཞིན་གཤེགས་པ་ལྔ་བརྒྱ་རིམ་བཞིན་དུ་བྱུང་སྟེ། དེ་རེ་རེའི་ཞིང་
ཡང་རིན་པོ་ཆེ་སྣ་མདུན་ལས་མངོན་པར་གྲུབ་པ་ཤ་སྟག་གོ། །དེ་བཞིན་གཤེགས་པ་དེ་དག་ཡོངས་སུ་མྱ་ངན་ལས་འདས་པའི་འོག་ཏུ་ཀུན་ཀྱང་འདྲ་སྟེ། ཡང་དག་པའི་ཆོས་ནི་ལོ་ཁྲིའི་བར་དུ་གནས་པར་གྱུར་
ཏོ། །དེ་ལྟར་དེ་བཞིན་གཤེགས་པ་ལྔ་བརྒྱ་པོ་དག་འཇིག་རྟེན་དུ་བྱུང་བ་དེ་དག་ལ་ཡང་ཉན་ཐོས་དང་། བྱང་ཆུབ་སེམས་དཔའི་འཁོར་འདུས་པ་རབ་ཏུ་མང་སྟེ། འདུས་པ་རེ་རེའི་ཚེ་ཡང་བྱང་ཆུབ་
སེམས་དཔའ་བྱེ་བ་ཁྲག་ཁྲིག་ཚད་མེད་པ་སྙེད་ཐེག་པ་གཅིག་གི་ལམ་དུ་ཞུགས་པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེའི་ཚེ་བསྐལ་པ་དེ་ལ་འཁོར་ལོས་བསྒྱུར་བའི་རྒྱལ་པོ་དཔའ་
བོའི་སྡེ་ཞེས་བྱ་བ་རིན་པོ་ཆེ་བདུན་དང་ལྡན་པ། གླིང་བཞི་ལ་དབང་བྱེད་པ་ཞིག་བྱུང་ངོ་། །དེའི་ཚེ་འཛམ་བུའི་གླིང་ན་གྲོང་ཁྱེར་ཆེན་པོ་དཔག་ཚད་བཅུ་དྲུག་གིས་འཁོར་བ་ཞིག་ཡོད་དེ། མི་བྱེ་བ་ཕྲག་བརྒྱད་ཁྲི་གནས་
པ། རབ་ཏུ་བདེ་ཞིང་དགའ་བ། འབྱོར་པ་རྒྱས་པ། འོབས་རིམ་པ་བདུན་དང་། ལྗོན་ཤིང་བཀྲིགས་པ་རིམ་པ་བདུན་དང་། ལམ་སྲང་རིམ་པ་བདུན་དང་། བསྐྱེད་མོས་ཚལ་སྟོང་གིས་གྲོང་ཁྱེར་དེ་

79-1-134b

ཡོངས་སུ་བསྐོར་ཅིང་རབ་ཏུ་བརྒྱན་པར་གྱུར་ཏོ། །བསྐྱེད་མོས་ཚལ་རེ་རེའི་ཚད་ཀྱང་ཆུ་ཞིང་འདྲ་སྟེ། དཔག་ཚད་ཉི་ཤུ་ཉི་ཤུ་ཡོད་དོ། །དེ་རེ་རེ་ཡང་ར་བ་རིམ་བདུན་དང་། དྲ་བ་རིམ་བདུན་དང་། 
བཀོད་པ་རྣམ་པ་སྣ་ཚོགས་དང་། རིན་པོ་ཆེ་སྣ་ཚོགས་ཤིན་དུ་གྱ་ནོམ་པ་དག་གིས་རབ་ཏུ་མཛེས་པར་བྱས་པས་དཔེར་ན་ལྷ་རྣམས་ཀྱི་བསྐྱེད་མོས་ཚལ་ཇི་ལྟ་བ་བཞིན་ནོ། །དེ་དག་རེ་རེ་ལ་
ཡང་རྫིང་དང་རྫིང་བུ་རིན་པོ་ཆེ་བཻ་དཱུརྱ་ས་འོག་གཞི་དང་འགྲམ་བྱེད་པ། རྡོའི་སྙིང་པོ་དང་རིན་པོ་ཆེ་སྣ་ཚོགས་ཀྱིས་ལམ་སྟེགས་བྱས་ཤིང་བཅལ་དུ་བཀྲམ་པ། རིན་པོ་ཆེའི་ལྗོན་ཤིང་མེ་
ཏོག་སྣ་ཚོགས་རབ་ཏུ་རྒྱས་པ་ཕྲེང་དུ་དཀྲིགས་པ་བརྒྱ་བརྒྱ་ཡོད་དོ། །གྲོང་ཁྱེར་ཆེན་པོ་དེའི་ནང་ན་རྒྱལ་པོ་དེའི་ཕོ་བྲང་དཔག་ཚད་བདུན་གྱིས་འཁོར་བ་ཡོད་དེ་གསེར་དང་རིན་པོ་ཆེ་སྣ་ཚོགས་ལས་
མངོན་པར་གྲུབ་པ། མཐའ་མ་རིན་པོ་ཆེས་རབ་ཏུ་བརྒྱན་པ། བཻ་དཱུརྱ་དང་། ཡིད་བཞིན་ཀྱི་ནོར་བུ་རིན་པོ་ཆེའི་དྲ་བས་གཡོགས་པ། ཤིང་ཏ་ལ་རྣམས་ཀྱིས་རབ་ཏུ་མཛེས་པར་བརྒྱན་པ། རྫིང་བུ་
བཅུ་གཉིས་ཀྱིས་རབ་ཏུ་བསྐོར་བ། འོག་གཞི་གསེར་ཡང་དག་པས་གཅལ་དུ་བཀྲམ་པ། བཻ་དཱུརྱ་དང་རིན་པོ་སྣ་ཚོགས་ཀྱི་ཟམ་པ་བཏགས་པ། གསེར་ཤིན་ཏུ་གྱ་ནོམ་པ་འབའ་ཤིག་གིས་ལམ་
སྟེགས་དང་ལམ་བྱས་པར་གྱུར་ཏེ། རྫིང་བུ་དེ་དག་གི་ནང་ན་མེ་ཏོག་ཨུད་པ་ལ་དང་། ཀུ་མུ་ད་དང་། པད་མ་དཀར་པོ་རབ་ཏུ་རྒྱས་པ་དག་གིས་གང་བར་གྱུར་ཏོ། །འཁོར་ལོས་སྒྱུར་བའི་རྒྱལ་པོ་
དེ་ལ་བཙུན་མོ་ནི་ཉིས་སྟོང་ཡོད་དོ། །བུ་ནི་དྲུག་ཁྲི་ཡོད་དེ། འཁོར་རྣམས་དང་བསྐྱེད་མོས་ཚལ་དེ་དག་ཏུ་འདོད་པ་ལྔའི་བདེ་བ་མྱོང་ཞིང་རབ་ཏུ་རྩེ་བ་ལས་རྒྱལ་པོ་དེ་འདི་སྙམ་དུ་འདོད་པ་རྣམས་ནི་

79-1-135a

མི་རྟག་ཅིང་རིང་པོར་མི་ཐོགས་པར་རྣམ་པར་འགྱུར་བ་ཡིན་པས་བདག་གིས་གདོན་མི་ཟ་བར་སེམས་རྩེ་གཅིག་ཏུ་སངས་རྒྱས་ཀྱི་ཆོས་ཡོངས་སུ་བཙལ་བར་བྱའོ། །གལ་ཏེ་
ཆོས་ཐོས་ནས་བསྟན་པ་ཇི་ལྟ་བ་བཞིན་དུ་བསྒྲུབས་པར་གྱུར་ན་བདག་ལ་ཡུན་རིང་པོའི་ཕན་པ་དང་། བདེ་བ་བྱེད་པར་འགྱུར་རོ། །སྙམ་དུ་བསམས་མ་ཐག་ཏུ་ནམ་མཁའ་ལས་ལྷ་ཞིག་གིས་
རྒྱལ་པོ་དེ་ལ་སྨྲས་པ། ཀྱེ་སྐྱེས་བུ་ཆེན་པོ་ལེགས་སོ་ལེགས་སོ། །ད་ལྟར་དེ་བཞིན་གཤེགས་པ་ཀུན་དུ་སྣང་མཛད་ཅེས་བྱ་བ་འཇིག་རྟེན་དུ་བྱུང་སྟེ། ཐོག་མར་དགེ་བ། བར་དུ་དགེ་བ། 
ཐ་མར་དགེ་བའི་ཆོས་ཡང་དག་པར་རབ་ཏུ་སྟོན་པར་མཛད་ཀྱིས། རྒྱལ་པོ་མྱུར་དུ་དེ་བཞིན་གཤེགས་པ་དེའི་སྤྱན་སྔར་སོང་ལ་ཡང་དག་པའི་ཆོས་ཞུས་ཤིག་དང་རྒྱལ་པོས་ཡུན་རིང་པོའི་ཕན་
པ་དང་། བདེ་བ་ཡང་འཐོབ་པར་འགྱུར་ལ། སངས་རྒྱས་ཀྱི་ཆོས་མངོན་པར་སྒྲུབ་ཅིང་སངས་རྒྱས་ཀྱི་ཆོས་ཡོངས་སུ་རྫོགས་པར་བྱེད་པར་ཡང་འགྱུར་རོ། །རྒྱལ་པོ་དེ་ལྷས་དེ་སྐད་
སྨྲས་པ་ཐོས་པ་དང་། རབ་ཏུ་དགའ་བར་གྱུར་ནས་གཡོག་འཁོར་རྣམས་ཀྱིས་བསྐོར་ཏེ། དེ་བཞིན་གཤེགས་པ་ཀུན་དུ་སྣང་མཛད་ག་ལ་བ་དེ་ལོགས་སུ་དོང་ནས་ཞབས་ལ་མགོ་བོས་གཏུགས་ཏེ་ཕྱག་
བྱས་ནས་བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཇི་ལྟ་བུ་ཞིག་གིས་ཆོས་རྣམས་ཀྱི་ཐབས་མཁས་པ་ཡོངས་སུ་སྡུད་པ་དང་། ཚངས་པར་སྤྱོད་པ་མྱུར་དུ་ཡོངས་
སུ་རྫོགས་པར་བགྱིས་པར་འགྱུར། བདག་དེ་བཞིན་དུ་བསྒྲུབ་པར་འཚལ་ལོ། །དེ་སྐད་ཅེས་གསོལ་པ་དང་། དེའི་ཚེ་དེ་བཞིན་གཤེགས་པ་དེས་ཀྱང་རྒྱ་ཆེར་རྣམ་པར་ཕྱེ་སྟེ་རབ་ཏུ་བསྟན་ཏོ། །རྒྱལ་པོ་དེས་ཆོས་

79-1-135b

ཐོས་པས་འཁོར་དང་བཅས་ཏེ། བདེ་བའི་ཡོ་བྱད་ཐམས་ཅད་ཀྱིས་དེ་བཞིན་གཤེགས་པ་ཀུན་དུ་སྣང་མཛད་དང་། ཉན་ཐོས་ཀྱི་དགེ་འདུན་རྣམས་ལ་ལོ་ཉི་ཁྲིའི་བར་དུ་གུས་པས་རིམ་གྲོ་དང་། མཆོད་
པ་བྱས་སོ། །དེ་བཞིན་གཤེགས་པ་ཀུན་དུ་སྣང་མཛད་ཀྱི་གསུང་རབ་ལས་རབ་ཏུ་བྱུང་ནས་ཡང་དག་པའི་ཆོས་ཐོས་ཏེ། མངོན་པར་བསྒྲུབས་པའི་ཕྱིར་དེའི་ཚེ་ཆོས་ཡང་དག་པར་བླངས་པའི་
དགེ་བའི་རྩ་བ་དང་། ཆོས་ཡང་དག་པར་བཟུང་བའི་དགེ་བའི་རྩ་བ་དང་། ཆོས་ཡང་དག་པར་བསྟན་པའི་དགེ་བའི་རྩ་བ་ཐོབ་པར་འགྱུར་བས་ཆོས་ཇི་སྙེད་ཐོས་པ་རྣམས་རབ་ཏུ་སེམས་ཤིང་མི་བརྗེད་
པ་དང་། ཡོན་ཏན་ཚད་མེད་པ་རྣམས་ནན་ཏན་བརྩོན་འགྲུས་ཀྱིས་མངོན་པར་བསྒྲུབས་པར་གྱུར་ཏེ། དེ་བཞིན་གཤེགས་པས་དུས་གསུམ་དུ་གསུངས་པའི་ཡང་དག་པའི་ཆོས་རྣམས་སེམས་ཅན་
རྣམས་ལ་རྣམ་པ་སྣ་ཚོགས་སུ་རབ་ཏུ་ཕྱེ་སྟེ། སྟོན་པར་གྱུར་ཅིག་ཅེས་ཀྱང་སྨོན་ལམ་བཏབ་བོ། །དེ་ལྟར་སྨོན་ལམ་བཏབ་ནས་ཀྱང་བསྐལ་པ་ཡང་དག་པར་རྒྱལ་བ་ལ་བྱུང་བའི་དེ་བཞིན་གཤེགས་པ་
ཇི་སྙེད་པ་དེ་དག་རེ་རེ་ལ་ཡང་རིམ་གྲོ་དང་། མཆོད་པ་བྱས་ནས་དེ་བཞིན་གཤེགས་པ་དེ་དག་གིས་དུས་དང་པོར་གསུངས་པའི་ཆོས་ཡང་དག་པར་མངོན་སུམ་དུ་གསུངས་པ་དང་། དུས་པར་མར་གསུངས་པའི་
ཆོས་ཡང་དག་པ་དང་། དུས་ཐ་མར་གསུངས་པའི་ཆོས་ཡང་དག་པ་རྣམས་ཀྱང་མ་ལུས་པར་ཡང་དག་པར་གཟུང་ནས་སེམས་ཅན་བྱེ་བ་ཁྲག་ཁྲིག་ཕྲག་བཞི་ཁྲི་བརྒྱ་སྟོང་སྙེད་ཡོངས་སུ་སྨིན་པར་བྱས་
ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱས་སོ། །སེམས་ཅན་ཚད་མེད་པ་སྙེད་ཐབས་མཁས་པས་བཏུལ་ཏེ། ཉན་ཐོས་དང་རང་སངས་རྒྱས་ཀྱི་ཐེག་པ་ལ་རབ་ཏུ་བཀོད་དོ། །

79-1-136a

བསྐལ་པ་དེ་ལས་ནང་གིས་ཐ་མར་དེ་བཞིན་གཤེགས་པ་གློག་གི་འོད་ཅེས་བྱ་བ་བྱུང་སྟེ། དགེ་སློང་དཔའ་བོའི་སྡེས་དེ་བཞིན་གཤེགས་པ་གློག་གི་འོད་ལས་ཆོས་ཡང་དག་པར་གསུངས་པ་ཐོས་
པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏེ། དེ་བཞིན་གཤེགས་པ་གློག་གི་འོད་ཀྱིས་ཀྱང་དཔའ་བོའི་སྡེ་ཁྱོད་མ་འོངས་པའི་དུས་ན་སངས་རྒྱས་བཅོམ་ལྡན་འདས་བརྒྱ་སྟོང་ཚད་མེད་པ་སྙེད་ལ་རིམ་
གྲོ་དང་། མཆོད་པ་བྱས་ནས་དེ་བཞིན་གཤེགས་པས་དུས་གསུམ་དུ་གསུངས་པའི་ཆོས་ཡང་དག་པ་རྣམས་ཡོངས་སུ་བཟུང་སྟེ། སེམས་ཅན་ཚད་མེད་གྲངས་མེད་པ་སྙེད་ལ་ཕན་གདགས་པ་དང་། སེམས་ཅན་
བྱེ་བ་ཁྲག་ཁྲིག་བརྒྱ་སྟོང་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་བཀོད་པ་དང་། སེམས་ཅན་ཚད་མེད་པ་རྣམས་ཉན་ཐོས་ཀྱི་ཐེག་པ་ལ་རབ་ཏུ་བཀོད་དེ། དེའི་འོག་ཏུ་བསྐལ་པ་གྲངས་མེད་
པ་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་བརྩོན་འགྲུས་དཔག་ཏུ་མེད་པའི་འོད་ཟེར་རྣམ་པར་རྒྱལ་བའི་རྒྱལ་པོ་ཞེས་
བྱ་བར་འགྱུར་རོ། །ཞེས་ལུང་བསྟན་ཏེ། སངས་རྒྱས་དེའི་ཞིང་ནི་རྣམ་པར་དག་པའི་ཡོན་ཏན་ཚད་མེད་པ་བསགས་པ་ལས་མངོན་པར་གྲུབ་པས་མི་རྣམས་ཀྱིས་རབ་ཏུ་གང་ཞིང་བདེ་བ་དང་འབྱོར་བ་རབ་ཏུ་ལྡན་པ་
ཉན་ཐོས་དང་བྱང་ཆུབ་སེམས་དཔའི་ཚོགས་རབ་ཏུ་མང་པོར་གྱུར་ཏོ། །དེ་བཞིན་གཤེགས་པ་དེའི་སྐུ་ཚེའི་ཚད་ནི་བསྐལ་པ་ཆུང་ངུ་ལྔ་ཐུབ་པར་གྱུར་ཏོ། །ཡོངས་སུ་མྱ་ངན་ལས་འདས་པའི་འོག་ཏུ་ཡང་དག་པའི་ཆོས་ནི་བསྐལ་
པ་ཆུང་ངུའི་བར་དུ་གནས་པར་གྱུར་ཏེ། བསྐལ་པར་གནས་པའི་ཆོས་ཀྱང་ལྷ་དང་། མི་རྣམས་ཀྱིས་ཡོངས་སུ་བཟུང་བར་གྱུར་ཏོ། །རིང་བསྲེལ་གྱི་མཆོད་རྟེན་ཡང་ཞིང་ཁམས་ཀུན་དུ་གང་བར་གྱུར་ཏོ། །དེ་ལྟ་བས་ན་བློ་གྲོས་

79-1-136b

འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཤིན་ཏུ་རྣམ་པར་དག་པའི་ཆོས་ཟབ་མོ་འདི་ལ་གུས་པས་ཡང་དག་པར་བཟུང་ཞིང་བསྒོམས་ནས་ཆོས་ཀྱི་རྒྱན་གྱི་ཡོ་བྱད་ཀྱིས་ལུས་རབ་ཏུ་བརྒྱན་པར་བྱའོ་ཆོས་ཀྱི་
རབ་ཏུ་བརྒྱན་པར་གྱུར་ན་དེ་བཞིན་གཤེགས་པའི་སྐུ་རྡོ་རྗེ་ལས་མངོན་པར་གྲུབ་པ་མཐུ་བོ་ཆེ་ཤིན་དུ་བརྟན་པ་འཐོབ་པར་འགྱུར་ཏེ། གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་ཐམས་
ཅད་ལུས་ཀྱི་མཐུ་སྟོབས་གཏུགས་ཏེ། ཤིན་དུ་བརྟན་པའི་སྐུ་དེ་རྣམ་པར་གཞིག་པར་འདོད་ན་ཡང་གང་གིས་ཀྱང་རྣམ་པར་གཞིག་པར་མི་ནུས་སོ། །ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་གྱི་འཁོར་གྱི་ནང་དུ་ཆོས་
ཀྱི་སྣང་བ་རབ་ཏུ་བསྟན་ན་ཡང་གང་གིས་ཀྱང་བརྒལ་དུ་མེད་པར་འགྱུར་རོ། །སེམས་ཅན་གང་གིས་ཆོས་ཟབ་མོ་འདི་ལེན་ཏམ། ཀློག་གམ་ཁ་ཏོན་དུ་འདོན་ཏམ། ནན་ཏན་བརྩོན་འགྲུས་ཀྱིས་སྒྲུབ་པར་བྱེད་ན་ཇི་ལྟར་
མོས་པ་བཞིན་དུ་རིགས་ཤིན་དུ་མཐོ་བའི་རིགས་སུ་སྐྱེ་བར་འགྱུར་བ་ནས་བྱང་ཆུབ་ཀྱི་ཤིང་དྲུང་དུ་མངོན་པར་རྫོགས་པར་སངས་རྒྱས་པའི་བར་དུ་ཡང་ཐོབ་ནས་གྲགས་པ་ཕུན་སུམ་ཚོགས་པ་དང་། འཇིག་རྟེན་
གྱི་ཁམས་ཁྱད་པར་དུ་འཕགས་ཤིང་ལམ་ཐ་དད་པ་དང་། འདྲེས་པ་མེད་པ་དང་། བྲམ་ཟེ་དང་མུ་སྟེགས་ཅན་གྱི་མིང་ཡང་མེད་ན་ལྟ་བ་ངན་པས་ལོག་པར། ཡོངས་སུ་ཚོལ་བ་ལྟ་སྨོས་ཀྱང་ཅི་
དགོས་པ་དང་། མི་དགེ་བའི་ཆོས་རྣམས་ཀྱི་མིང་ཡང་མི་ཐོས་ན་མི་དགེ་བའི་རྩ་བ་མངོན་པར་བསྒྲུབ་པ་ལྟ་ཡོད་པར་ག་ལ་འགྱུར་བ་དང་། ལག་པ་དང་། རྐང་པའི་སོར་མོ་ལས་
འོད་ཟེར་བཀྱེ་ནས་འཇིག་རྟེན་གྱི་ཁམས་ཚད་མེད་པ་རྣམས་སྣང་བར་བྱེད་དེ། སེམས་ཅན་གང་གི་ལུས་ལ་རེག་པ་དེ་དག་ཐམས་ཅད་བདེ་བ་ཐོབ་པར་བྱེད་པ་དང་། 

79-1-137a

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་སུམ་དུ་བྱེད་པར་འགྱུར་རོ། །བློ་གྲོས་འཕགས་པ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་ངའི་བསྟན་པ་ལ་ནན་
ཏན་གྱིས་སྒྲུབ་པར་བྱེད་པ་དེ་དག་ནི་ཡོན་ཏན་ཁྱད་པར་དུ་འཕགས་པ་དེ་དག་འཐོབ་པར་འགྱུར་ཏེ། གལ་ཏེ་ངས་ཡོངས་སུ་རྫོགས་པར་བརྗོད་པར་གྱུར་ན་ནམས་ཀྱང་མཐར་ཐུག་པར་མི་འགྱུར་རོ། །དེ་ནས་
བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་འཕགས་པ་གང་དག་བྱང་ཆུབ་སེམས་དཔའི་ལམ་འདི་ལ་གནས་
པ་དེ་དག་གིས་ནི་རྣམ་པར་དག་པའི་ཆོས་ཟབ་མོ་འདི་ནན་ཏན་གྱིས་མངོན་པར་བསྒྲུབས་ནས་སྟོང་པ་ཉིད་དང་རྗེས་སུ་འཐུན་པ་དང་། རབ་ཏུ་དབེན་པ་དང་རྗེས་སུ་འཐུན་པར་གྱུར་ན་ཆོས་ཀྱི་སྣང་བ་རབ་ཏུ་འཐོབ་པར་
འགྱུར་རོ། །ཆོས་ཀྱི་སྣང་བའི་དབང་གིས་ནི་ཆོས་ཐམས་ཅད་ཀྱི་ངོ་བོ་ཉིད་ཐ་དད་པ་མེད་པ་མཐོང་བར་འགྱུར་རོ། །ངོ་བོ་ཉིད་ཐ་དད་པ་མེད་པ་མཐོང་བའི་ཕྱིར་ནི་ལྟ་བ་རྣམ་པར་དག་པར་འགྱུར་རོ། །ལྟ་བ་རྣམ་
པར་དག་པའི་ཕྱིར་ནི་ཆོས་སུ་ལྟ་བ་ཡང་མེད་ལ། ཆོས་གང་ཡང་རང་བཞིན་དང་བྲལ་བར་ལྟ་བ་ཡང་མེད་དོ། །ཆོས་སུ་ལྟ་བ་རྣམ་པར་དག་པས་རྣམ་པར་དག་པ་ཡང་མེད་དོ། །རྣམ་པར་དག་པ་ཡང་མེད་པ་གང་
ཡིན་པ་དེ་ལ་ནི་རྣམ་པར་དག་པའི་ལུས་ཀྱང་མེད་པས་རྣམ་པར་དག་པའི་ཡེ་ཤེས་ཀྱི་སྤྱོད་ཡུལ་ཐོབ་ནས་ཆོས་ཀྱི་དབྱིངས་ཀྱང་མ་ཡིན། དབྱིངས་མ་ཡིན་པ་ཡང་མ་ཡིན་པར་ཡང་ཡང་དག་པར་
འཐོབ་པར་འགྱུར་རོ། །དབྱིངས་སུ་ལྟ་བ་རྣམ་པར་དག་པར་གྱུར་པས་དབྱིངས་རྣམ་པ་སྣ་ཚོགས་ཀྱི་ངོ་བོ་ཉིད་དུ་འདུ་ཤེས་པ་ཡོངས་སུ་སྤོང་བར་འགྱུར་རོ། །ངོ་བོ་ཉིད་དུ་ཤེས་པ་སྤངས་པའི་ཕྱིར་དབྱིངས་ཀྱི་ཚུལ་གྱི་

79-1-137b

གསང་ཚིག་གང་ཡིན་པ་རྟོགས་པར་གྱུར་ནས་ཆོས་རྣམས་དབྱིངས་མ་ཡིན་པར་ཡོངས་སུ་ཤེས་པར་གྱུར་ཏེ། འདི་ལྟར་ཆོས་ཀྱི་དབྱིངས་ལ་ཐ་དད་པ་མེད་པར་མཐོང་བའི་ཕྱིར་དང་། རྣམ་པར་འཇིག་
པ་མེད་པར་མཐོང་བའི་ཕྱིར་དང་། འགྱུར་བ་མེད་པར་མཐོང་བའི་ཕྱིར་ཆོས་ཀྱི་དབྱིངས་ཀྱི་ཚུལ་ཐམས་ཅད་ལ་ཐབས་མཁས་པ་རབ་ཏུ་འཐོབ་པར་འགྱུར་རོ། །ཐབས་མཁས་པའི་དབང་གིས་ནི། ཆོས་ཀྱི་དབྱིངས་
ཀྱི་ཚུལ་ཡོངས་སུ་ཤེས་ཤིང་ཏིང་ངེ་འཛིན་གྱི་སྟོབས་ཀྱིས་ཆོས་ཀྱི་དབྱིངས་རྣམས་ཀྱི་བྱེ་བྲག་གི་ཚུལ་གང་ཡིན་པ་དེ་དག་ལ་ཡང་རྗེས་སུ་འཇུག་པར་འགྱུར་རོ། །སྤྱོད་པ་འདི་ལ་གནས་པའི་ཚེ་ཆོས་ཐམས་ཅད་ལ་ཐབས་མཁས་
པས་ཆོས་ཐམས་ཅད་ལ་གནས་པ་མེད་པ་དང་། མངོན་པར་ཞེན་པ་མེད་པར་འགྱུར་རོ། །མངོན་པར་ཞེན་པ་མེད་པའི་ཕྱིར་ཆོས་ཀྱི་དབྱིངས་ཀྱི་ཚུལ་ཐམས་ཅད་ཅི་རིགས་པར་རྣམ་པ་སྣ་ཚོགས་སུ་རབ་ཏུ་
ཕྱེ་ནས་སྟོན་པར་འགྱུར་རོ། །ཏིང་ངེ་འཛིན་གྱི་མཐུའི་དབང་གིས་གཞན་ཡང་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་ལ་རྣམ་པར་རྩེན་པའི་རྫུ་འཕྲུལ་གྱིས་
གཅིག་ལས་མང་པོར་སྒྱུར་བ་དང་། མང་པོ་ལས་གཅིག་ཏུ་སྒྱུར་བ་དང་། རི་དང་བྲག་དང་། བརྩིག་པ་དག་ལ་ཐོགས་པ་མེད་པར་འགྲོ་བ་དང་། འཕུར་བ་ལ་དབང་འཐོབ་པར་འགྱུར་རོ། །ཁམས་བཞི་པོ་དག་
འདུས་པ་ལ་རབ་ཏུ་མཁས་པར་འགྱུར་རོ། །ཁམས་ལ་མི་གནས་པར་ཁམས་ཐམས་ཅད་རབ་ཏུ་ཤེས་པར་འགྱུར་རོ། །ནམ་མཁའི་ཁམས་དང་གཅིག་ཏུ་གྱུར་ཀྱང་ནམ་མཁའི་ཁམས་ལ་མངོན་པར་ཞེན་པ་
དང་། ཐོགས་པ་ཅི་ཡང་མེད་དོ། །ཁམས་འདུས་པ་ལ་རབ་ཏུ་མཁས་པར་གྱུར་པའི་ཕྱིར་ཁམས་ཐམས་ཅད་ཐབས་མཁས་པས་མངོན་པར་སྒྲུབ་པར་བྱེད་དོ། །མངོན་པར་བསྒྲུབས་པའི་ཕྱིར་

79-1-138a

ཆུའི་ཁམས་རབ་ཏུ་རྟོགས་པར་གྱུར་ནས་ཆུའི་ཁམས་ལས་དུད་པ་འཐུལ་བ་དང་། མེ་རབ་ཏུ་འབར་བ་དང་། དུད་པ་འཐུལ་བ་དང་། མེ་རབ་ཏུ་འབར་བ་གཉིས་ཀ་སྟོན་པར་བྱེད་པས་རྣམ་པ་སྣ་ཚོགས་སུ་
སྟོན་པའི་བར་དུ་བྱས་ནས་སེམས་ཅན་རྣམས་ལ་ཕན་གདགས་པ་ཆེན་པོ་བྱེད་དོ། །ཆོས་ཀྱི་དབྱིངས་ཀྱི་ཚུལ་གྱི་ཐབས་མཁས་པ་ལ་རབ་ཏུ་གནས་ནས་གཡོ་བ་མེད་པར་ཇི་ལྟར་མོས་པ་བཞིན་དུ་
སངས་རྒྱས་ཀྱི་ཞིང་གང་དུ་མོས་པ་དེ་བཞིན་དུ་སྐྱེ་བར་འགྱུར་བས་སྲིད་པ་རྣམས་སུ་མངལ་དུ་སྐྱེ་བའི་ལུས་བཟློག་སྟེ། སྤྲུལ་པས་སྐྱེ་བའི་ལུས་བླངས་ནས་རྟག་ཏུ་ཕྱོགས་བཅུའི་འཇིག་རྟེན་གྱི་ཁམས་
ན་བཞུགས་པའི་དེ་བཞིན་གཤེགས་པ་རྣམས་མཐོང་ཞིང་དེ་བཞིན་གཤེགས་པ་དེ་དག་ཀྱང་མཚན་ནི་འདི་ལྟ་བུའོ། །རིགས་ནི་འདི་ལྟ་བུའོ། །འཁོར་འདུས་པ་ནི་འདི་ལྟ་བུའོ། །ཆོས་སྟོན་པ་ནི་འདི་ལྟ་བུའོ། །
ཞེས་མ་འདྲེས་པར་རབ་ཏུ་ཤེས་སོ། །དེ་ནས་འཁོར་དེ་ཉིད་དུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དཔག་ཏུ་མེད་པའི་རྒྱལ་བ་ཞེས་བྱ་བ་འདུས་པར་གྱུར་པ་དེས་བཅོམ་ལྡན་འདས་ལ་འདི་
སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཇི་ལྟ་བུ་ཞིག་ལ་གནས་པར་གྱུར་ན་བཅོམ་ལྡན་འདས་ཀྱིས་ཇི་སྐད་གསུངས་པའི་ཡོན་ཏན་མཆོག་དེ་
དག་འཐོབ་པར་འགྱུར་ལགས། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དཔག་ཏུ་མེད་པའི་རྒྱལ་བ་ལ་འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་དཔའ་སེམས་དཔའ་ཆེན་
པོ་གང་ཆོས་ཐམས་ཅད་ལ་གནས་པ་མེད་པ་གང་ཡིན་པ་དེས་ངས་ཇི་སྐད་བསྟན་པའི་ཡོན་ཏན་མཆོག་ཏུ་གྱུར་པ་དེ་དག་འཐོབ་པར་འགྱུར་རོ། །དཔག་ཏུ་མེད་པའི་རྒྱལ་བ་བྱང་ཆུབ་སེམས་དཔའ་སེམས་དཔའ་

79-1-138b

ཆེན་པོ་རྣམས་གལ་ཏེ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ལ་གནས་པར་གྱུར་ཏམ། གལ་ཏེ་སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་
ཁམས་དང་། ནམ་མཁའི་ཁམས་ལ་གནས་པར་གྱུར་ཏམ། གལ་ཏེ་འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ལ་གནས་པར་གྱུར་ན་ངས་མདོ་སྡེ་འདི་ལས་བསྟན་པའི་ཡོན་
ཏན་དེ་དག་དང་ལྡན་པར་མི་སྟོན་ཏོ། །གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ལ་གནས་པ་མེད་ཅིང་འབྱུང་བ་དང་། འཇུག་པ་མེད་པར་གྱུར་ན་ངས་དེ་དག་གི་ཡོན་ཏན་གྱིས་རྒྱ་མཚོ་
ཆེན་པོ་དཔག་ཏུ་མེད་པ་ཐོབ་པར་འགྱུར་བར་རབ་ཏུ་བསྟན་ཏོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་ཆོས་ཅུང་ཟད་ཙམ་ཡང་དམིགས་པར་བྱ་བ་དང་། གནས་པར་བྱ་བ་ཡང་
མེད་ལ་ཆོས་ཅུང་ཟད་ཙམ་ཡང་འཇུག་པར་བྱ་བའམ། འབྱུང་བར་བྱ་བ་ཡང་མེད་པར་ཆོས་རྣམས་ཀྱི་ཚུལ་ལ་ལེགས་པར་གནས་ཤིང་གཡོ་བ་མེད་པས་སོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་
སེམས་དཔའ་ཆེན་པོ་རྣམས་ལ་ནི་གནས་པ་དང་། གཡོ་བ་མེད་དེ་གཡོ་བ་མེད་པའི་ཕྱིར་མཐོ་བ་ཡང་མེད། དམའ་བ་ཡང་མེད་དོ། །མཐོ་བ་དང་དམའ་བ་མེད་པའི་ཕྱིར་མཐོ་བ་དང་། དམའ་བ་
ལ་གནས་པ་ཡོངས་སུ་སྤོང་བར་བྱེད་དོ། །མཐོ་དམའ་ལ་མི་གནས་པའི་ཕྱིར་དགེ་བའི་གནས་སུ་གནས་པ་ཞེས་བྱའོ། །དགེ་བའི་གནས་སུ་གནས་པ་གང་ཡིན་པ་དེ་ནི་གནས་པ་མེད་པ་ལ་གནས་པ་
ཡིན་ནོ། །གནས་པ་མེད་པ་ལ་གནས་པ་གང་ཡིན་པ་དེ་ནི་ཅི་ལ་ཡང་གནས་པ་མེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་འགའ་ཙམ་ཡང་རྣམ་པར་གཞག་པ་འམ། 

79-1-139a

རྫོགས་པར་བྱེད་པ་མེད་པས་གནས་མེད་པ། གནས་པ་མེད་པ། འབྱུང་བ་མེད་པ། བྱེད་པ་མེད་པར་གྱུར་བ་ཡིན་ནོ། །དེ་ཅིའི་ཕྱིར་ཞེ་ན། གནས་མི་དམིགས་པས་སོ། །གནས་མེད་པའི་ཕྱིར་
རྣམ་པར་རྟོག་པར་ཡང་མེད་དོ། །རྣམ་པར་རྟོག་པ་མེད་པའི་ཕྱིར་མི་གཡོ་བའི་གནས་སུ་གནས་པར་བྱེད་དོ། །ཆོས་ཀྱི་དབྱིངས་ཇི་ལྟ་བ་བཞིན་དུ་གནས་པར་བྱེད་དོ། །གནས་མེད་པ་ལ་གནས་པར་བྱེད་པས་
གནས་པ་ཅི་ཡང་མེད་དེ། གནས་དང་། གནས་མེད་པ་ལ་མངོན་པར་ཞེན་པ་མེད་པས་ལེགས་པར་གནས་པ་ཞེས་བྱའོ། །དཔག་ཏུ་མེད་པའི་རྒྱལ་བ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་ཚུལ་ལ་
རབ་ཏུ་གནས་པ་ནི་དེ་ལྟར་གནས་པ་མེད་པ་རྣམ་པར་གཞག་ནས་གནས་མེད་པ་ལ་གནས་པར་བྱེད་པས་ཆོས་ཐམས་ཅད་ལ་རྣམ་པར་རྟོག་པ་མེད་པར་མཐོང་ཞིང་རྣམ་པར་མི་རྟོག་པའི་སྤྱོད་པ་དེ་ལྟ་བུ་ལ་གནས་པར་
བྱེད་དེ། སྤྱོད་པ་དེས་ཆོས་ཐམས་ཅད་གཡོ་བ་མེད་པར་མཐོང་བས་ཚུལ་བཞིན་དུ་གནས་པའི་རྗེས་སུ་འཐུན་པ་དང་། ཚུལ་བཞིན་དུ་མི་གཡོ་བའི་རྗེས་སུ་འཐུན་པ་དང་། ཚུལ་བཞིན་དུ་མི་ལེན་པའི་རྗེས་སུ་
འཐུན་པར་གྱུར་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། བྱང་ཆུབ་སེམས་དཔའ་ཡང་དག་དྲན། །དོན་ལ་ལེགས་པར་སེམས་བྱེད་ཅིང་། །ཆོས་རྣམས་ལ་ནི་མི་
གནས་པས། །བློ་དང་ལྡན་པ་ཞེས་བྱའོ། །ཆོས་ནི་ཅུང་ཟད་འགའ་ཙམ་ཡང་། །རྣམ་པར་གཞག་པར་བྱ་བ་མེད། །རྣམ་པར་གཞག་པ་མེད་པའི་ཕྱིར། །འཇིགས་པ་མེད་པར་གཞོལ་བར་བྱེད། །གཟུགས་ནི་རྣམ་
པར་མི་གཞག་ཅིང་། །ཚོར་བ་རྣམས་ཀྱང་གཞག་པ་མེད། །འདུ་ཤེས་དང་ནི་འདུ་བྱེད་དང་། །རྣམ་པར་ཤེས་པ་འང་དེ་བཞིན་ནོ། །ཕུང་པོ་རྣམས་ལ་མི་གནས་ཤིང་། །ཁམས་རྣམས་དང་ནི་སྐྱེ་མཆེད་དང་། །

79-1-139b

གནས་དང་གནས་མ་ཡིན་ལ་ཡང་། །རྟག་ཏུ་གནས་པ་མེད་པ་ཡིན། །ས་ཡི་ཁམས་ལ་མི་གནས་ཤིང་། །ཆུ་ཡི་ཁམས་ལ་འང་གནས་པ་མིན། །མེ་དང་རླུང་གི་ཁམས་ལ་ཡང་། །རྟག་ཏུ་གནས་པ་མེད་པ་ཡིན། །
འདོད་པའི་ཁམས་དང་གཟུགས་ཀྱི་ཁམས། །གཟུགས་མེད་ཁམས་ལ་མི་གནས་ཏེ། །རྣམ་གཞག་མེད་པ་ཐོབ་པའི་ཕྱིར། ཁམས་གསུམ་དག་ལ་གནས་མི་བྱེད། །ནམ་མཁའི་ཁམས་ནི་དེ་དག་ལ། །གནས་
པར་ཡང་ནི་མི་བྱེད་དེ། གནས་པར་བྱེད་པ་མེད་པས་ན། །མཉམ་པ་ཉིད་དུ་གཞོལ་བར་བྱེད། །དེ་ཕྱིར་ཆོས་ནི་ཅུང་ཟད་ཙམ། །གནས་པར་བྱ་བ་ཅི་ཡང་མེད། །གནས་པ་མེད་པ་གང་ཐོབ་པ། །དེ་ནི་ཡེ་ཤེས་
དམ་པ་ཡིན། །ཡེ་ཤེས་དམ་པ་གནས་པ་མེད། །གནས་པ་མེད་པས་ལེགས་གནས་ཡིན། །དེ་ལྟའི་གནས་པ་གང་ཐོབ་པ། །ཆོས་ཀྱི་དབྱིངས་ལ་གནས་པ་ཡིན། གནས་པ་མེད་དང་མཚུངས་ལྡན་ཕྱིས། 
དེ་ནི་རྟག་ཏུ་ལེགས་གནས་འགྱུར། །གནས་པ་མེད་ཅིང་རྟེན་པ་མེད། །ཆོས་ལ་གནས་པ་འཐོབ་པར་འགྱུར། །གལ་ཏེ་རྟེན་མེད་ཐོབ་གྱུར་ན། །རྟག་ཏུ་གཡོ་བ་མེད་པར་འགྱུར། །འཇུག་པ་མེད་ཅིང་འབྱུང་
བ་མེད། །མཉམ་པ་ཉིད་དུ་རབ་ཏུ་གནས། །ཆོས་ལ་དེ་ལྟར་གང་གནས་པ། །དེ་ནི་དཔའ་བོ་ཞེས་བྱའོ། །ཆོས་རྣམས་ཀུན་ལ་མཐོ་བ་མེད། །ཆོས་རྣམས་ཀུན་ལ་དམའ་བ་མེད། །དེ་ལྟར་གཡོ་བ་མེད་གྱུར་པས། །
ཆོས་ཀྱི་དབྱིངས་ལ་རབ་ཏུ་གནས། །གཡོ་བ་མེད་ལ་གནས་པའི་ཕྱིར། །བླ་མེད་གནས་པ་འཐོབ་པར་འགྱུར། །མི་གནས་གནས་དང་རྗེས་འཐུན་པ། །དེ་ནི་དཔའ་བོ་ཞེས་བྱའོ། །གནས་པ་ལ་ནི་མི་གནས་ཤིང་། །
གནས་ལ་གཡོ་བ་མེད་གྱུར་པ། །གནས་པ་མེད་པས་གྲུབ་པས་ན། །ལེགས་པར་གནས་པ་འཐོབ་པར་འགྱུར། །གནས་དང་གནས་མ་ཡིན་ལ་ཡང་། །ཐམས་ཅད་དུ་ནི་གཡོ་བ་མེད། །གཡོ་བ་མེད་ལ་གནས་

79-1-140a

པས་ན། །གཡོ་བ་མེད་པ་ཞེས་བྱའོ། །གལ་ཏེ་མི་གཡོ་གནས་འགྱུར་ན། །ཐམས་ཅད་ལ་ཡང་གནས་མི་འགྱུར། །གནས་དང་གནས་མིན་མི་སེམས་པས། །རྣམ་རྟོག་མེད་ལ་རྟག་ཏུ་གནས། །
གནས་ལ་གནས་པར་མི་བྱེད་ཕྱིར། །གཡོ་བར་གྱུར་པ་ཅི་ཡང་མེད། །གནས་ཀྱིས་གཡོ་བ་མེད་པས་ན། །ཐམས་ཅད་ལ་ཡང་གནས་མི་འགྱུར། །གལ་ཏེ་མི་གནས་ཐོབ་འགྱུར་ན། །གནས་དང་གནས་མིན་
གྱིས་མི་གཡོས། །གནས་ཀྱིས་མི་གཡོས་གང་ཡིན་པ། །གནས་ལ་རབ་གནས་ཞེས་བྱའོ། །གནས་ལ་རབ་ཏུ་གང་གནས་པ། །གནས་པ་མེད་ལ་གནས་པས་ན། །ཆོས་རྣམས་ཐམས་ཅད་མཐོང་འགྱུར་ཞིང་། །
ཆོས་ཀྱི་རྗེས་སུ་འཐུན་ལ་གནས། །དེ་ལྟར་ཆོས་རྣམས་མཐོང་བས་ན། །སྣ་ཚོགས་དག་ལ་མི་གནས་ཤིང་། །གནས་མེད་རབ་ཏུ་གནས་པ་མེད། །ཆོས་གནས་པ་ལ་མཁས་པར་འགྱུར། །རྟག་ཏུ་ཆོས་ལ་རབ་གནས་
པས། །རྣམ་པར་རྟོག་པ་ཅི་ཡང་མེད། །རྣམ་པ་རྟོག་པ་སྤངས་པའི་ཕྱིར། །འདི་ནི་མི་གཡོས་པ་ཞེས་བྱ། །གལ་ཏེ་མི་གཡོས་གནས་གྱུར་ན། །སྤྱོད་པ་དག་ལ་རྣམ་མི་རྟོག །གནས་དང་གནས་མིན་ཡོངས་སུ་
སྤོང་། །འདི་ནི་སོ་སོར་རྟོག་བྱེད་ཡིན། །གལ་ཏེ་མི་གཡོ་རབ་རྟོག་ན། །ཐམས་ཅད་གཡོ་བ་མེད་པར་འགྱུར། །ཆོས་རྣམས་རྟག་ཏུ་མཉམ་པ་ལ། །དེ་བཞིན་རབ་ཏུ་གཞོལ་བར་འགྱུར། །ཚུལ་བཞིན་
རྗེས་མཐུན་གནས་པ་དང་། །ཚུལ་བཞིན་རྣམ་པར་མི་གཡོ་དང་། །མི་གཡོ་གནས་ནི་གང་ཐོབ་པ། །གནས་མེད་ལ་ནི་རྟག་ཏུ་གནས། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་
ཆེན་པོ་བློ་གྲོས་མཐའ་ཡས་ཀྱིས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་ཚུལ་འཆིང་བ་མ་མཆིས་པ་དང་། གྲོལ་བ་མ་མཆིས་པ་ལ་

79-1-140b

རབ་ཏུ་འགོད་པར་མཛད་པ་ཤིན་ཏུ་ངོ་མཚར་ཆེ་ལགས་སོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་ཚུལ་རྣམ་པར་གཞག་པ་ལ་རབ་ཏུ་མཁས་པ་ནི་ཆོས་ཅུང་ཟད་ཙམ་ཡང་མཚུངས་
པར་ལྡན་པའམ། མཚུངས་པར་མི་ལྡན་པ་འམ། འཐུན་པར་གྱུར་པ་འམ། ཡོངས་སུ་བསྡུས་པ་འམ། ཡོངས་སུ་མ་བསྡུས་པ་འམ། སྐྱབས་སུ་འགྲོ་བ་དང་མི་ལྡན་པ་འམ། འདོད་ཆགས་དང་བཅས་པའམ། 
འདོད་ཆགས་དང་བྲལ་བ་འམ། ཞེ་སྡང་དང་བཅས་པ་འམ། ཞེ་སྡང་དང་བྲལ་བ་ཞེས་བགྱི་བ་ཡང་དག་པར་རྗེས་སུ་མི་དམིགས་ལགས་སོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་
ཆོས་ཀྱི་ཚུལ་ཐམས་ཅད་རྣམ་པར་གཞག་པ་ལ་རབ་ཏུ་མཁས་པ་ནི་གལ་ཏེ་སེམས་ཅན་རྣམས་ཀྱིས་གུས་པས་མཆོད་པ་བགྱིས་པ་ན་ཡང་འདོད་ཆགས་ཀྱི་སྲེད་པ་སྐྱེ་བར་མི་འགྱུར་ལ། སྨོད་ཅིང་གནོད་པར་
བགྱིད་ན་ཡང་ཞེ་སྡང་སྐྱེ་བར་མི་འགྱུར་ཏེ། འདུ་ཤེས་སྣ་ཚོགས་མ་མཆིས་ཤིང་ཆོས་སུ་ལྟ་བ་ཐམས་ཅད་ཡོངས་སུ་སྤངས་པས་ཆོས་འགའ་ཙམ་ཡང་ཆོས་འགའ་ཙམ་དང་མཚུངས་པར་ལྡན་པ་འམ་མཚུངས་པར་
མི་ལྡན་པར་ཡང་དག་པར་རྗེས་སུ་མི་དམིགས་ལགས་སོ། །མཚུངས་པར་ལྡན་པ་དང་། མཚུངས་པར་མི་ལྡན་པ་ལས་ཀྱང་ཡང་དག་པར་འདས་པའི་སླད་དུ་མཚུངས་པར་ལྡན་པ་དང་། མཚུངས་པར་མི་ལྡན་
པའི་འདུ་ཤེས་སྤོང་ཞིང་མཚུངས་པར་ལྡན་པ་དང་། མཚུངས་པར་མི་ལྡན་པའི་འདུ་ཤེས་ཀྱང་ཡང་དག་པར་ཁོང་དུ་ཆུད་པར་འགྱུར་རོ། །ཁོང་དུ་ཆུད་པ་ལས་ཡང་དག་པར་འདས་ནས་ཀྱང་ཆོས་འགའ་ཙམ་ལ་ཡང་
རྩོལ་བ་འམ། ལྡོག་པ་འམ། བགྲོད་པར་བགྱི་བ་དང་བཅས་པ་འམ། བགྲོད་པར་བགྱི་བ་མ་མཆིས་པ་ཞེས་མཚུངས་པར་ལྡན་པར་བགྱིད་ལགས་སོ། །ཆོས་ཐམས་ཅད་ཀྱི་ཚུལ་ཡང་ཡང་དག་པ་མ་ལགས་

79-1-141a

པའི་བསམ་པ་མ་མཆིས་ཤིང་ཡོངས་སུ་འཛིན་པ་མ་མཆིས་པས་ཐབས་མཁས་པས་ཆོས་ཀྱི་ངོ་བོ་ཉིད་རྣམ་པར་འཇིག་པར་མི་བགྱིད་ལགས་སོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་
ཆེན་པོ་རྣམས་ནི་ཆོས་ཐམས་ཅད་ལ་དེ་ལྟར་གནས་པའི་ཚེ་ཐབས་མཁས་པས་ཆོས་ཐམས་ཅད་ཀྱི་དབྱིངས་ཀྱི་ཚུལ་ཡང་དག་པར་སྟོན་པར་བགྱིད་ལགས་པས་སངས་རྒྱས་ཀྱི་ཆོས་ཐམས་ཅད་མྱུར་དུ་ཡོངས་སུ་
རྫོགས་པར་བགྱིད་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་བཀའ་སྩལ་པ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་
དཔའ་ཆེན་པོ་རྣམས་སངས་རྒྱས་ཀྱི་ཆོས་ལ་རྣམ་པར་གཞག་པར་བྱ་བ་མེད་ཅིང་གནས་པར་བྱ་བ་མེད་པར་མཐོང་བར་གྱུར་ན། སངས་རྒྱས་ཀྱི་ཆོས་ལ་རྣམ་པར་གཞག་པར་བྱ་བ་མེད་པ་དང་། གནས་པར་བྱ་བ་མེད་
པ་དང་། ཁྱད་པར་དུ་གནས་པ་མེད་པར་ཡང་དག་པར་མཐོང་བར་གྱུར་ཏེ། སངས་རྒྱས་ཀྱི་ཆོས་གནས་པ་མི་གཡོ་བར་མཐོང་བའི་ཕྱིར་དང་། འཁོར་བར་མི་འཇུགས་པའི་ཕྱིར་དང་། ཡོངས་སུ་མི་འགྱུར་བའི་ཕྱིར་
ཆོས་ཐམས་ཅད་ཀྱི་དབྱིངས་དང་རྗེས་སུ་འཐུན་པར་གནས་པར་གྱུར་པས་ཆོས་ཐམས་ཅད་ཀྱི་དབྱིངས་ཀྱི་ཚུལ་རྣམ་པར་གཞག་པ་ལ་མཁས་པ་ཞེས་བྱའོ། །བློ་གྲོས་མཐའ་ཡས་བྱང་ཆུབ་སེམས་དཔའ་
སེམས་དཔའ་ཆེན་པོ་གང་སངས་རྒྱས་ཀྱི་ཆོས་ལ་གནས་པ་མེད་པ་དང་། མི་གནས་པ་མེད་པ་དང་། ཁྱད་པར་དུ་གནས་པ་མེད་པ་དང་། ཁྱད་པར་གནས་པ་མེད་པ་དང་། གནས་པའི་གནས་པ་མེད་
པ་དང་། གནས་པ་མ་ཡིན་པར་གནས་པ་མེད་པ་དང་། གཡོ་བ་མེད་པ་དང་། རྣམ་པར་རྟོག་པ་མེད་པ་དང་། ཁྱད་པར་དུ་རྣམ་པར་རྟོག་པ་མེད་པ་དང་། ཀུན་ཏུ་རྟོག་པ་མེད་པར་གྱུར་ན། གདོད་ཆོས་

79-1-141b

ཐམས་ཅད་ཀྱི་དབྱིངས་ཀྱི་ཚུལ་རྣམ་པར་གཞག་པ་ལ་རབ་ཏུ་མཁས་པ་ཞེས་བྱའོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་འགའ་ཙམ་ཡང་རྣམ་པར་གཞག་པ་
མི་མཐོང་ལ། ཆོས་ཐམས་ཅད་ཀྱི་གནས་མཆོག་ཏུ་རྣམ་པར་གཞག་ཏུ་ཡོད་པར་ཡང་མི་མཐོང་ཞིང་རྣམ་པར་རྟོག་པ་མེད་པ་དང་། མཆོག་ཏུ་རྣམ་པར་རྟོག་པ་མེད་པ་དང་། ཀུན་ཏུ་རྣམ་པར་
རྟོག་པ་མེད་པར་གྱུར་ན། གདོད་ཆོས་ཐམས་ཅད་ཀྱི་དབྱིངས་ཀྱི་ཚུལ་རྣམ་པར་གཞག་པ་ལ་མཁས་པ་ཞེས་བྱའོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་འགའ་ཙམ་
ཡང་འདུག་པ་འམ། འགྲོ་བ་ཞེས་བྱ་བ་ཡང་དག་པར་མི་མཐོང་ལ་རྣམ་པར་རྟོག་པ་ཡང་མེད། ཁྱད་པར་དུ་རྣམ་པར་རྟོག་པ་ཡང་མེད། ཀུན་ཏུ་རྣམ་པར་རྟོག་པ་ཡང་མེད་དེ། ཆོས་ཐམས་ཅད་ནམ་མཁའ་
ཡོངས་སུ་དག་པ་ལྟར་མཐོང་ཞིང་འོད་ཀྱིས་རབ་ཏུ་གསལ་བར་གྱུར་བས་ཉོན་མོངས་པ་ཡོངས་སུ་སྤོང་བ་དང་། ཆོས་ཐམས་ཅད་འོད་ཀྱིས་རབ་ཏུ་གསལ་བར་བྱེད་པའི་ཕྱིར་གདོད་ཆོས་ཐམས་ཅད་ཀྱི་དབྱིངས་ཀྱི་ཚུལ་
ལ་ཐབས་མཁས་པ་ཐོབ་པ་ཞེས་བྱ་སྟེ། རྣམ་པར་གཞག་པས་ཆོས་ཀྱི་དབྱིངས་ལ་སོ་སོར་རྟོག་པར་མི་བྱེད་དོ། །དེ་ཅིའི་ཕྱིར་ཞེ་ན། ཆོས་ཀྱི་དབྱིངས་ལ་རྣམ་པར་གཞག་པ་ཅུང་ཟད་ཙམ་ཀྱང་མེད་པའི་ཕྱིར་རོ། །
འདི་ལྟ་སྟེ། དཔེར་ན་ནམ་མཁའ་དང་། རླུང་གི་ཁམས་ལ་ནི་གནས་ཀྱང་མེད། བལྟར་ཡང་མི་མཐོང་རྣམ་པར་གཞག་པའི་གནས་ཀྱང་མེད། རྟེན་པའི་གནས་ཀྱང་མེད། བསྟན་དུ་ཡང་མེད་དོ། །དེ་བཞིན་དུ་ཆོས་
ཀྱི་དབྱིངས་ཀྱང་འཇུག་པར་བྱ་བའི་གནས་ཀྱང་མེད། །                                           །།ལྟ་བར་བྱ་བའི་གནས་ཀྱང་མེད། རྣམ་པར་གཞག་པའི་གནས་ཀྱང་མེད། བསྟེན་པའི་གནས་ཀྱང་མེད། 

79-1-142a

ཁོང་དུ་ཆུད་པར་བྱ་བ་ཡང་མེད། བསྟན་དུ་ཡང་མེད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་བསྟན་པར་བྱ་བ་མེད་པའི་ཕྱིར། དེ་བཞིན་ཉིད་ཀྱི་དབྱིངས་དང་མཚུངས་
པར་ལྡན་པར་གནས་སོ། །བློ་གྲོས་མཐའ་ཡས་ཆོས་ཐམས་ཅད་ཀྱི་དབྱིངས་ནི་སྐྱེ་བ་མེད་པ། སྲོག་མེད་པ། རྒ་བ་མེད་པ། འཆི་བ་མེད་པ། རྒོད་པ་མེད་པ། བྱིང་བ་མེད་པ། བསྟན་དུ་མེད་པའི་
དབྱིངས་ཡིན་པས་ཆོས་ཀྱི་དབྱིངས་ཤེས་བྱའོ། །རྣམ་པར་འགྱུར་བ་མེད་པའི་དབྱིངས་ཡིན་པས་ཆོས་ཀྱི་དབྱིངས་ཤེས་བྱ་སྟེ། ཆོས་ཀྱི་དབྱིངས་ནི་གནས་ཐམས་ཅད་དུ་ཁྱབ་པ་ཡིན་ནོ། །བློ་གྲོས་མཐའ་
ཡས་ཆོས་ཀྱི་དབྱིངས་ནི་འགྲོ་བ་མེད་ཅིང་འགྲོ་བའི་གནས་མེད་དེ། འགྲོ་བ་དང་། གནས་པ་མེད་པའི་ཕྱིར་ཆོས་ཀྱི་དབྱིངས་དང་མཚུངས་པར་ལྡན་པར་གནས་པ་ཞེས་བྱའོ། །དེ་བཞིན་ཉིད་ཀྱི་ཆོས་ཀྱི་དབྱིངས་
ལ་ནི་གནས་ཀྱང་མེད། གནས་མ་ཡིན་པ་ཡང་མེད་དོ། །དེ་ཅིའི་ཕྱིར་ཞེ་ན། དེ་བཞིན་ཉིད་ཀྱི་ཆོས་ཀྱི་དབྱིངས་དང་། དེ་བཞིན་ཉིད་ཀྱི་རང་བཞིན་ནི་ཡོད་པ་མ་ཡིན་པའི་ཕྱིར་རོ། །བློ་གྲོས་མཐའ་ཡས་བྱང་ཆུབ་
སེམས་དཔའ་སེམས་དཔའ་ཆེན་པོ་རྣམས་ཀྱིས་ངས་བསྟན་པ་འདི་ཐོས་པར་གྱུར་ན་ཆོས་ཐམས་ཅད་ཀྱི་དབྱིངས་ཀྱི་ཚུལ་གྱི་ཆོས་ཀྱི་སྣང་བ་ཆེན་པོ་འཐོབ་པར་འགྱུར་ལ། ཆོས་ཀྱི་སྣང་བ་ཐོབ་བའི་དབང་གིས་ནི་མི་
སྐྱེ་བའི་ཆོས་ལ་བཟོད་པ་ཐོབ་ནས་མྱུར་དུ་དེ་བཞིན་གཤེགས་པའི་སྟོབས་བཅུ་དང་། མ་འདྲེས་པ་བཅྭ་བརྒྱད་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱེད་དོ། །སེམས་ཅན་ཐམས་ཅད་ཀྱི་དགེ་
བའི་རྩ་བ་རྒྱ་ཆེན་པོ་དང་། ཚོགས་ཁྱད་པར་དུ་འཕགས་པ་ཡོངས་སུ་སྨིན་པར་བྱ་བའི་ཕྱིར་དང་། དེ་བཞིན་གཤེགས་པའི་གདུང་རྒྱུན་མི་འཆད་པར་བྱ་བའི་ཕྱིར་མྱུར་དུ་བྱང་ཆུབ་ཀྱི་སྙིང་པོར་སོང་ནས་ཆོས་ཀྱི་འཁོར་

79-1-142b

ལོ་བསྐོར་བ་དང་། བདུད་ཀྱིས་གནས་རྣམས་ཟིལ་གྱིས་གནོན་པ་དང་། །ཐ་དད་པར་སྨྲ་བ་རྣམས་ཚར་གཅོད་པ་དང་། སྐྱེ་བུ་དམ་པའི་སེང་གེའི་སྒྲ་ཆེན་པོ་སྒྲོགས་ཤིང་སེམས་ཅན་རྣམས་ཀྱི་མོས་པ་ཇི་ལྟ་བ་དང་། སྨོན་
ལམ་ཇི་ལྟ་བ་དང་། སེམས་བསྐྱེད་པ་ཇི་ལྟ་བ་བཞིན་དུ་ཡང་དག་པར་རྣམ་པར་གྲོལ་བར་བྱ་བའི་ཕྱིར་དམ་པའི་ཆོས་བསྟན་ནས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་འགོད་པར་བྱེད་དོ། །
དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། བྱང་ཆུབ་སེམས་དཔའ་ཐམས་ཅད་ནི། །ཆོས་རྣམས་ཀུན་ལ་མི་གནས་པས། །སངས་རྒྱས་ཀྱི་ནི་ཆོས་དག་ལ། །རྣམ་པར་
གཞག་པ་ཅི་ཡང་མེད། །བྱང་ཆུབ་སེམས་དཔའ་ཐམས་ཅད་ནི། །རྣམ་པར་གཞག་པ་མེད་པའི་ཕྱིར། །སངས་རྒྱས་ཀྱི་ནི་ཆོས་དག་ལ། །འཇིགས་པ་མེད་པར་གཞོལ་བར་བྱེད། །བྱང་ཆུབ་སེམས་
དཔའ་ཐམས་ཅད་ནི། །སངས་རྒྱས་ཆོས་ལ་གནས་པ་དང་། །གནས་ཀྱང་མེད་པར་མཐོང་བས་ན། །ཤིན་ཏུ་ལེགས་པར་གནས་པར་བྱེད། །བྱང་ཆུབ་སེམས་དཔའ་ཐམས་ཅད་ནི། །གནས་དག་ལ་ནི་
མི་གནས་པར། །ཆོས་རྣམས་རབ་ཏུ་མཐོང་བས་ན། །གནས་པ་མེད་ཅིང་ལྡོག་པ་མེད། །བྱང་ཆུབ་སེམས་དཔའ་ཐམས་ཅད་ནི། །ཆོས་ལ་གནས་པ་མེད་མཐོང་བས། །སངས་རྒྱས་ཆོས་ལ་མི་གཡོས་ཤིང་། །
སངས་རྒྱས་ཆོས་ཀྱང་ཚོལ་མི་བྱེད། །བྱང་ཆུབ་སེམས་དཔའ་ཐམས་ཅད་ནི། །ཆོས་ནི་ཐ་དད་མི་མཐོང་བས། །སངས་རྒྱས་ཆོས་ལས་མ་གཡོས་ཤིང་། །ཡོངས་སུ་འཚོལ་བར་མི་བྱེད་དོ། །བྱང་ཆུབ་སེམས་དཔའ་
ཐམས་ཅད་ནི། །ཆོས་རྣམས་དེ་ལྟར་མཐོང་བས་ན། །ཆོས་རྣམས་མཁས་པར་བྱ་བ་ལ། །ཐབས་མཁས་པས་ནི་གནས་པར་བྱེད། །བྱང་ཆུབ་སེམས་དཔའ་ཐམས་ཅད་ནི། །རྟག་ཏུ་མཉམ་པར་

79-1-143a

མཐོང་བས་ན། །སངས་རྒྱས་ཆོས་ལ་མི་གནས་ཤིང་། །མི་གནས་པ་ཡང་མ་ཡིན་ནོ། །རྟག་ཏུ་གནས་མེད་པ་ལ་གནས། །གནས་མེད་པ་ཡང་མ་ཡིན་ནོ། །རྟག་ཏུ་རྣམ་པར་རྟོག་མི་བྱེད། །རྣམ་པར་
མི་རྟོག་པ་ཡང་མིན། །རྣམ་པར་རྟོག་པ་སྣ་ཚོགས་དག །རྟག་ཏུ་མེད་པར་གྱུར་པ་ཡིན། །བྱང་ཆུབ་སེམས་དཔའ་ཐམས་ཅད་ནི། །གནས་པ་མེད་དང་མཚུངས་ལྡན་པས། །དུས་དང་གནས་རྣམས་ཀུན་ཏུ་ཡང་། །
གཡོ་བ་མེད་པར་གྱུར་པ་ཡིན། །བྱང་ཆུབ་སེམས་དཔའ་ཐམས་ཅད་ཀྱིས། །ནམ་ཞིག་ཆོས་ཀྱི་ཚུལ་དག་ལ། །མཉམ་པ་ཉིད་དུ་གནས་པའི་ཚེ། །ལེགས་པར་གནས་པ་ཞེས་བྱའོ། །བྱང་ཆུབ་སེམས་དཔའ་
ཐམས་ཅད་ཀྱིས། །ནམ་ཞིག་ཆོས་ཀྱི་ཚུལ་དག་ལ། །ཆོས་འགའ་ཙམ་ཡང་མི་མཐོང་ན། །མཉམ་པ་ཉིད་ལ་གནས་པ་ཡིན། །བྱང་ཆུབ་སེམས་དཔའ་ཐམས་ཅད་ནི། །ཆོས་རྣམས་ཀུན་ལ་གནས་
མེད་པར། །རབ་ཏུ་མཐོང་བར་གྱུར་ཀྱང་ནི། །གནས་ནི་ཡོངས་སུ་སྤོང་མི་བྱེད། །གཡོ་བ་མེད་པ་ཐོབ་པས་ན། །བསྟེན་པར་བྱ་བ་ཅི་ཡང་མེད། །བྱང་ཆུབ་སེམས་དཔའ་ཐམས་ཅད་ནི། །ཆོས་རྣམས་ཀུན་
གྱི་ཚུལ་དག་ལ། །རབ་ཏུ་མཁས་པར་གྱུར་པས་ན། །ཐབས་མཁས་པས་ནི་གནས་པར་བྱེད། །གནས་པ་མེད་ལ་གནས་པས་ན། །བྱང་ཆུབ་སེམས་དཔའ་ཞེས་བྱའོ། །བྱང་ཆུབ་སེམས་དཔའ་ཐམས་ཅད་
ནི། །ཆོས་ནི་ཅུང་ཟད་ཙམ་ལ་ཡང་། །འགྲོ་འམ་འོང་ཞེས་བྱ་བ་ཡི། །རྣམ་རྟོག་དག་ལ་མི་གནས་པས། །དེ་ཚེ་ཆོས་རྣམས་ཐམས་ཅད་ཀྱི། །ཚུལ་ལ་རབ་ཏུ་གནས་པ་ཡིན། །བྱང་ཆུབ་སེམས་དཔའ་
ཐམས་ཅད་ནི། །ཆོས་ཀྱི་ཚུལ་ནི་ཀུན་ལ་ཡང་། །རྣམ་པ་སྣ་ཚོགས་གནས་བྱེད་པས། །ཆོས་ཀྱི་སྣང་བ་ཆེན་པོ་ནི། །དཔག་ཏུ་མེད་པ་སྐྱེད་པར་བྱེད། །ཆོས་ཀྱི་སྣང་བའི་དབང་གིས་ནི། །མཉམ་པའི་ལྟ་བ་རབ་

79-1-143b

གནས་པས། །ཆོས་རྣམས་ཐམས་ཅད་ཀུན་ལ་ནི། །ཆོས་རྣམས་ཀུན་གྱི་ཚུལ་རྣམས་ཀྱང་། །ནམ་མཁའ་དག་པ་ལྟ་བུ་དང་། །གྲིབ་མ་དང་ནི་གཟུགས་བརྙན་དང་། །མཉམ་ཞིང་དྲི་མ་མེད་པར་མཐོང་། །བྱང་ཆུབ་སེམས་
དཔའ་ཐམས་ཅད་ནི། །ལྟ་བ་དག་ནི་རྟོགས་གྱུར་ཀྱང་། །རྟོགས་པ་དག་ནི་མེད་པས་ན། །རང་བཞིན་ཡོངས་སུ་སྤོང་བར་བྱེད། །བྱང་ཆུབ་སེམས་དཔའ་ཐམས་ཅད་ནི། །ཇི་ལྟར་མཐོང་ཞིང་རྟོགས་བྱེད་པས། །
ཆོས་ཀྱི་ཚུལ་ནི་ཐམས་ཅད་ལ། །རབ་ཏུ་གནས་པར་གྱུར་པ་ཡིན། །ཆོས་རྣམས་ཀུན་གྱི་དབྱིངས་དག་ལ། །བརྟན་པས་ནན་ཏན་བསྒྲུབས་པས་ན། །ཆོས་ཀྱི་དབྱིངས་ཀྱི་ཚུལ་དག་ལ། །ཐབས་མཁས་པ་
ཞེས་བརྗོད་པ་ཡིན། །བྱང་ཆུབ་སེམས་དཔའ་ཐམས་ཅད་ནི། །ཆོས་ཀྱི་དབྱིངས་ལ་མི་གནས་པས། །ཆོས་ཀྱི་དབྱིངས་རྣམས་ཐམས་ཅད་ཀུན། །གཏན་དུ་ཡོད་མིན་ལྟ་བར་བྱེད། །བྱང་ཆུབ་སེམས་དཔའ་
ཐམས་ཅད་ནི། །ཆོས་ཀྱི་དབྱིངས་རྣམས་རྟོགས་པས་ན། །ཆོས་རྣམས་ནམ་མཁའ་རླུང་རྣམས་ལ། །རྣམ་གཞག་མེད་ཅིང་ཐམས་ཅད་དུ། །ཁྱབ་པར་གྱུར་པ་བཞིན་དུ་མཐོང་། །ཆོས་ཀྱི་དབྱིངས་ཀྱང་
དེ་བཞིན་ཏེ། །ཐམས་ཅད་དུ་ནི་ཁྱབ་པ་ཡིན། །ཆོས་ཀྱི་དབྱིངས་ནི་བསམ་དཀའ་བས། །བསྟན་པར་བྱ་བར་རུང་མ་ཡིན། །བློ་ལྡན་དག་ནི་ཐམས་ཅད་ཀུན། །རྟེན་པར་ཡང་ནི་མི་བྱེད་དོ། །བསྟན་མེད་དབྱིངས་
ནི་གང་ཡིན་པ། །དེ་ནི་ཆོས་ཀྱི་དབྱིངས་ཤེས་བྱ། །གནས་པའི་གནས་ནི་མེད་པས་ན། །དེ་ནི་གནས་པ་ཞེས་བྱའོ། །ཆོས་ཀྱི་དབྱིངས་ལ་སྐྱེ་བ་མེད། །སྲོག་ཀྱང་མེད་ལ་རྒ་བའང་མེད། །འཆི་བ་མེད་ཅིང་
བྱིང་བ་མེད། །ངེས་པར་འབྱུང་བའང་ཡོད་མ་ཡིན། །ཆོས་ཀྱི་དབྱིངས་ནི་བསམ་དཀའ་བས། །འོང་བ་མེད་ཅིང་འགྲོ་བ་མེད། །ཆོས་ཀྱི་དབྱིངས་ནི་ཕུང་པོ་མིན། །ཁམས་དང་སྐྱེ་

79-1-144a

མཆེད་ཀྱང་མ་ཡིན། །གནས་ཀྱང་སྤོང་བར་མི་བྱེད་པས། །གཡོ་བ་མེད་པར་གྱུར་པ་ཡིན། །ཆོས་ཀྱི་དབྱིངས་ཀྱི་དེ་བཞིན་ཉིད། །རང་བཞིན་དག་ནི་ཡོད་མ་ཡིན། །བྱང་ཆུབ་སེམས་
དཔའ་ཐམས་ཅད་ཀྱིས། །ཆོས་ཀྱི་དབྱིངས་ནི་བསམ་དཀའ་བས། །དེ་ལྟར་ཁོང་དུ་ཆུད་གྱུར་ན། །ཆོས་ཀྱི་སྣང་བ་འཐོབ་པར་འགྱུར། །དེ་ཡི་དབང་གིས་བྱང་ཆུབ་ཀྱི། །སྙིང་པོར་ཡང་ནི་བགྲོད་པར་འགྱུར། །
སངས་རྒྱས་རྣམས་ཀྱི་ཆོས་ལ་ཡང་། །ཐེ་ཚོམ་དག་ནི་མེད་པར་འགྱུར། །གཡོ་བ་དག་ནི་མེད་པར་ཡང་། །ཆོས་ཀྱི་སྣང་བ་དག་གིས་ཀྱང་། །སེམས་ཅན་དག་ནི་ཐམས་ཅད་ཀུན། །བདེ་བ་ཆེན་པོ་འཐོབ་པར་
བྱེད། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཟབ་མོ་འདི་ལྟ་བུ་དག་ལ་ནན་ཏན་གྱིས་མངོན་པར་སྒྲུབ་པར་བྱེད་ན། ཆོས་ཀྱི་སྣང་བ་དེ་ལྟ་བུ་འཐོབ་པར་འགྱུར་ཏེ། 
ཤེས་རབ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ།། །། བམ་པོ་དྲུག་པ་སྟེ་ཐ་མ། །གཞན་ཡང་བློ་གྲོས་མཐའ་ཡས་ངས་མངོན་པར་དྲན་ཏེ། 
སྔོན་བསྐལ་པ་གྲངས་མེད་པ་གཉིས་འདས་པ་ན་དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ་བདེ་བར་གཤེགས་པ། འཇིག་རྟེན་མཁྱེན་པ་
བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཟླ་བའི་སྒྲོན་མའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། བསྐལ་པའི་མིང་ནི་བདུད་རྩི་ཞེས་བྱའོ། །
འཇིག་རྟེན་གྱི་ཁམས་ནི་ཡོངས་སུ་དག་པར་བྱེད་པ་ཞེས་བྱའོ། །སངས་རྒྱས་དེའི་ཞིང་ཆུ་ཤེལ་ལས་མངོན་པར་གྲུབ་པས་རྟག་ཏུ་འོད་ཟེར་གྱིས་ཞིང་དེ་ཀུན་དུ་གསལ་བར་བྱེད་དེ། སེམས་ཅན་གང་འོད་ཟེར་

79-1-144b

དེས་རེག་པར་གྱུར་པ་དེ་དག་ཤིན་དུ་མཛེས་ཤིང་བྱད་བཞིན་བཟང་པོར་གྱུར་པས་དེའི་ཕྱིར་འཇིག་རྟེན་གྱི་ཁམས་དེ་ཡོངས་སུ་དག་པར་བྱེད་པ་ཞེས་བྱའོ། །དེ་ན་ལོགས་ཤིག་ན་གྲོང་ཁྱེར་དང་། གྲོང་རྡལ་ཞེས་བྱ་བའི་
མིང་ཡང་མེད་དེ། ལམ་རྣམས་གྱ་ནོམ་ཞིང་གསེར་གྱི་ཐིག་པ་བཀྱེ་བ་ལམ་རྣམས་ཀྱི་བར་རེ་རེའི་ཚད་རྒྱང་གྲགས་ཕྱེད་ཕྱེད་ཡོད་དོ། །ལམ་རེ་རེའི་བར་ཏུ་ཡང་རིན་པོ་ཆེའི་ཀ་བ་དང་། ཏ་ལ་སྣ་ཚོགས་ཀྱི་ལྗོན་ཤིང་
འོད་དང་ལྡན་པ་བརྒྱད་བཅུ་རྩ་བཞི་ཕྲེང་དུ་དཀྲིགས་སོ། །གཞན་ཡང་རྫིང་བུ་བཞི་ལམ་སྟེགས་ཀྱིས་བསྐོར་བ་ཡོད་དོ། །མི་རྣམས་ནི་རིན་པོ་ཆེ་སྣ་བདུན་གྱི་གཞལ་མེད་ཁང་དྲ་བས་གཡོགས་ཤིང་དར་གྱིས་ལྡ་
ལྡི་སྤྱངས་པ། མེ་ཏོག་གིས་རབ་ཏུ་མཛེས་པར་བྱས་པ་དག་ན་གནས་པས་དཔེར་ན་ལྷ་རྣམས་ཇི་ལྟ་བ་བཞིན་ནོ། །འཇིག་རྟེན་གྱི་ཁམས་དེའི་སེམས་ཅན་རྣམས་ནི་རབ་ཏུ་བདེ་ཞིང་བདེ་བ་དང་ལྡན་པས་དགེ་བ་
བཅུའི་ལས་ཀྱི་ལམ་རྣམས་ཡོངས་སུ་རྫོགས་ཤིང་བྱད་བཞིན་ཤིན་དུ་སྡུག་པ། ཚེ་ཤིན་དུ་རིང་བ། འདོད་ཆགས་དང་། ཞེ་སྡང་དང་། གཏི་མུག་སྲབ་བ། གདུལ་སླ་བ། སྦྱོར་བ་ཆུང་ངུས་ཆོས་རྣམས་རྒྱ་
ཆེར་རྟོགས་པ་ཤ་སྟག་གོ། །དེ་བཞིན་གཤེགས་པ་དེའི་སྐུ་ཚེའི་ཚད་ནི་ལོ་བྱེ་བ་ཕྲག་སྟོང་ཐུབ་པར་གྱུར་ཏོ། །ཡོངས་སུ་མྱ་ངན་ལས་འདས་པའི་འོག་ཏུ་ཡང་དག་པའི་ཆོས་ནི་འཇིག་རྟེན་ན་ལོ་བྱེ་བ་སྙེད་གནས་
པར་གྱུར་ཏོ། །འདུས་པ་ལན་བཅུའི་ཆོས་བཤད་དེ། འདུས་པ་རེ་རེ་ལ་ཡང་ཉན་ཐོས་ཀྱི་འཁོར་སློབ་པའི་ས་ལ་གནས་པ་ནི་བྱེ་བ་ཁྲག་ཁྲིག་ཕྲག་ཉི་ཤུ་ཡོད་པར་གྱུར་ཏོ། །བྱང་ཆུབ་སེམས་དཔའི་འཁོར་
ཐེག་པ་ཅིག་གི་ལམ་ལ་བགྲོད་པར་གྱུར་པ། དེའི་གྲངས་ནི་ཚད་ཀྱང་མེད་དོ། །བློ་གྲོས་མཐའ་ཡས་དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོ་དེའི་བྱང་ཆུབ་ཀྱི་ཤིང་རིན་པོ་ཆེའི་ཚད་ཀྱང་རྒྱར་ནི་དཔག་ཚད་

79-1-145a

ལྔ་བཅུ་ཡོད་དོ། །སྲིད་དུ་ནི་དཔག་ཚད་བརྒྱ་ཡོད་དེ། རྩ་བ་ནི་བྱི་རུ་ལས་བྱས་པ། སྡོང་པོ་ནི་བཻ་དཱུརྱ་ལས་བྱས་པ། ཡལ་ག་ནི་གསེར་ལས་བྱས་པ། ལོ་མ་ནི་རྡོའི་སྙིང་པོ་ལས་བྱས་པའོ། །
བྱང་ཆུབ་ཀྱི་གདན་གྱི་ཚད་ཀྱང་ཆུ་ཞིང་འདྲ་སྟེ། དཔག་ཚད་བརྒྱ་བརྒྱ་ཡོད་དོ། །གདན་དེའི་མཐའ་མ་ནི་ལན་ཀན་གྱིས་འཁོར་བར་བསྐོར་ཏོ། །ཏ་ལའི་ལྗོན་ཤིང་མཆོག་རྣམས་ཀྱིས་ནི་ཕྲེང་དུ་དཀྲིགས་ཏེ། །
གསེར་གྱི་དྲིལ་བུ་དང་། རིན་པོ་ཆེའི་དྲ་བས་གཡོགས་ཤིང་རབ་ཏུ་བརྒྱན་པར་གྱུར་ཏོ། །བྱང་ཆུབ་ཆེན་པོའི་གདན་དེ་འཕང་དུ་ནི་དཔག་ཚད་གསུམ་ཡོད་དེ། གདན་ཤིན་ཏུ་ཕྲ་ཞིང་འཇམ་པ་དག་དེའི་སྟེང་དུ་
བཏིང་ངོ་། །གོས་མཆོག་དམ་པ་བརྒྱ་སྟོང་སྙེད་ཀྱིས་བརྒྱན་ཅིང་སྤྱངས་པར་གྱུར་ཏེ། གདུགས་དང་། རྒྱལ་མཚན་དང་། བ་དན་ཉི་ཤུ་ནི་གཡས་གཡོན་དུ་དཀྲིགས་སོ། །དེ་བཞིན་གཤེགས་པ་
ཟླ་བའི་སྒྲོན་མའི་རྒྱལ་པོ་གདན་དེ་ལ་བཞུགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེའི་ཚེ་འཇིག་རྟེན་གྱི་ཁམས་དེ་ན་ངན་སོང་གསུམ་ཡང་
མེད། ངན་སོང་གསུམ་གྱི་མིང་ཡང་མེད། མི་ཁོམ་པ་རྣམས་ཀྱང་མེད། མི་ཁོམ་པ་རྣམས་ཀྱི་མིང་ཡང་མེད་དེ། དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོ་དེ་ནི་རྟག་པར་འཇིག་རྟེན་
གྱི་ཁམས་ཐམས་ཅད་དུ་སྤྲུལ་པའི་སྐུ་བསྟན་ནས་ཆོས་ཀྱི་འཁོར་ལོ་བསྐོར་བར་མཛད་དོ། །བློ་གྲོས་མཐའ་ཡས་དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོ་དེ་ལ་བྱང་ཆུབ་སེམས་དཔའ་
གཉིས་ཡོད་དེ། གཅིག་གིས་མིང་ནི་སྤྲིན་གྱི་དབྱངས་ཤེས་བྱའོ། །གཅིག་གི་མིང་ནི་དཔག་མེད་དབྱངས་ཤེས་བྱའོ། །བྱང་ཆུབ་སེམས་དཔའ་དེ་གཉིས་ཀྱིས་དེ་བཞིན་གཤེགས་པ་དེ་ལ་འདི་སྐད་ཅེས་

79-1-145b

གསོལ་ཏོ། །བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་ལ་མཁས་པ་འཐོབ་པར་འགྱུར་ལགས། དེ་སྐད་ཅེས་གསོལ་པ་
དང་། དེའི་ཚེ་དེ་བཞིན་གཤེགས་པ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་མཁས་པ་འཐོབ་པར་བྱ་བའི་ཕྱིར་བྱང་ཆུབ་སེམས་དཔའ་དེ་གཉིས་
ལ་ཆོས་དེ་རྒྱ་ཆེར་ཡང་དག་པར་རབ་ཏུ་བསྟན་ཏེ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་དེ་ཐོས་པས་ཆོས་ཐམས་ཅད་ཀྱི་རྣམ་པར་གཞག་པའི་ཐབས་ལ་མཁས་པ་ཐོབ་པར་གྱུར་ཏོ། །
བྱང་ཆུབ་སེམས་དཔའ་དེ་གཉིས་ཀྱང་དེའི་འོག་ཏུ་ལོ་ཉི་ཁྲིའི་བར་དུ་གཉིད་ཀྱང་མེད། འདོད་པ་དང་། ཁོང་ཁྲོ་བ་དང་། རྣམ་པར་འཚེ་བའི་བསམ་པ་ཡང་མེད། ཟས་ཀྱི་འདུ་ཤེས་ཀྱང་མེད། ཉལ་བའི་འདུ་ཤེས་
ཀྱང་མེད། ན་པའི་རྐྱེན་ཡང་མེད། སྨན་ལ་སོགས་པ་ཡོངས་སུ་ཚོལ་བའི་འདུ་ཤེས་ཀྱང་མེད། འཇིག་རྟེན་པའི་ལྟད་མོ་དང་། གཏམ་དང་། རྩེད་མོ་ལ་ཡང་དགའ་བ་མེད་པར་དེ་བཞིན་གཤེགས་པ་དེས་ཆོས་
བསྟན་པ་རྩེ་གཅིག་ཏུ་མཉན་པས་སྟན་ལས་མ་ལངས་པར་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་དེ་བཞིན་གཤེགས་པ་དེས་བཀའ་སྩལ་པ། རིགས་ཀྱི་བུ་ཆོས་ཐམས་ཅད་ཀྱི་ཚུལ་རྣམ་པར་
གཞག་པ་ལ་འདི་ལྟར་ཐབས་མཁས་པར་གྱུར་དེ་དེང་ཁྱེད་ཡོངས་སུ་ཚོལ་བར་བྱེད་དམ། བྱང་ཆུབ་སེམས་དཔའ་དེ་གཉིས་ཀྱིས་གསོལ་པ་བཅོམ་ལྡན་འདས་བདག་ཅག་ནི་ཆོས་ཐམས་ཅད་ཀྱི་ཚུལ་རྣམ་པར་
གཞག་པའི་ཐབས་ལ་མཁས་པའི་མིང་ཡང་ཡང་དག་པར་རྗེས་སུ་མི་མཐོང་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་ལ་མཁས་པའི་ཆོས་མཆིས་པར་ཡང་ཡང་དག་པར་རྗེས་སུ་མི་མཐོང་ན་

79-1-146a

ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་ལ་མཁས་པ་ལྟ་སྨོས་ཀྱང་ཅི་འཚལ་ལགས། བཅོམ་ལྡན་འདས་བདག་ཅག་ནི་ཆོས་ཐམས་ཅད་ཀྱང་ཡང་དག་པར་མི་དམིགས། 
ཆོས་རྣམས་ཀྱི་རྣམ་པར་གཞག་པ་ཡང་ཡང་དག་པར་མི་དམིགས་པས་ཆོས་ཐམས་ཅད་ལ་གནས་པ་ཡང་མ་ལགས། མི་གནས་པ་ཡང་མ་ལགས་སོ། །བཅོམ་ལྡན་འདས་བདག་ཅག་དེ་ལྟར་མཐོང་
བ་ལ་ཆོས་ཐམས་ཅད་ཀྱི་ཚུལ་རྣམ་པར་གཞག་པ་འདི་ལྟར་ཐབས་མཁས་པ་དེ་ཡོངས་སུ་ཚོལ་བར་བགྱིད་པ་འམ། ཡོངས་སུ་ཚོལ་བར་མི་བགྱིད་པ་ལྟ་མཆིས་པར་ག་ལ་འགྱུར། བཅོམ་ལྡན་འདས་བདག་
ཅག་ནི་ཆོས་ཐམས་ཅད་ཀྱི་ཚུལ་རྣམ་པར་གཞག་པ་ལ་དེ་ལྟར་ཐབས་མཁས་པ་ཡོངས་སུ་ཚོལ་བར་བགྱིད་པ་ཡང་ཡང་དག་པར་རྗེས་སུ་མི་མཐོང་། ནང་ངམ། ཕྱི་རོལ་ལམ། དེ་གཉིས་ཀྱི་བར་རམ། 
ཆོས་ཐམས་ཅད་ཅེས་བགྱི་བ་འམ། ཆོས་ཀྱི་ཚུལ་ལ་དེ་ལྟར་ཐབས་མཁས་པ་རྣམ་པར་གཞག་པ་ཞེས་བགྱི་བ་ཡང་དག་པར་རྗེས་སུ་མི་མཐོང་། ཆོས་འགའ་ཡང་ནང་ངམ། སླད་རོལ་ལམ། དེ་གཉིས་
ཀྱི་བར་རམ། ཆོས་ཐམས་ཅད་ཅེས་བགྱིད་བའམ། ཆོས་ཀྱི་ཚུལ་ལ་ཐབས་མཁས་པ་རྣམ་པར་གཞག་པ་ཞེས་བགྱི་བ་ཡང་ཡང་དག་པར་རྗེས་སུ་མི་མཐོང་ལགས་སོ། །བཅོམ་ལྡན་འདས་བདག་
ཅག་ནི་ཐ་ན་ཆོས་ཅུང་ཟད་ཙམ་ཡང་ནང་ངམ། སླད་རོལ་ལམ། དེ་གཉིས་ཀྱི་བར་རམ། ཆོས་ཀྱི་ཚུལ་ལ་ཐབས་མཁས་པ་རྣམ་པར་གཞག་པ་ཞེས་བགྱི་བ་བགྲོད་པར་བགྱིར་རུང་བ་འམ་སྟེན་པར་བགྱིར་
རུང་བ་ཡང་ཡང་དག་པར་རྗེས་སུ་མ་མཐོང་ལགས་སོ། །བཅོམ་ལྡན་འདས་དེ་ལྟར་ཆོས་འགའ་ཙམ་ཡང་གཞོལ་བར་བགྱིད་པ་འམ་བསྟེན་པར་བགྱིད་རུང་བ་མ་མཆིས་ན་བདག་ཅག་གིས་ཇི་ལྟར་དེ་རྣམ་

79-1-146b

པར་གཞག་པར་བགྱི་ལགས། བཅོམ་ལྡན་འདས་བདག་ཅག་གིས་ནི་འདས་པ་འམ། ད་ལྟར་བྱུང་བ་འམ། མ་འོངས་པ་གང་ཡང་རྣམ་པར་གཞག་པའི་གནས་སུ་གྱུར་པར་ཡང་ཡང་དག་པར་རྗེས་སུ་མ་
མཐོང་ལགས་སོ། །གལ་ཏེ་རྣམ་པར་གཞག་པའི་གནས་ཡང་དག་པར་མཆིས་པ་མ་ལགས་ན་བདག་ཅག་གིས་གང་དུ་ཅི་ཞིག་རྣམ་པར་གཞག་པར་བགྱི་ལགས། བཅོམ་ལྡན་འདས་རྣམ་པར་གཞག་
པ་མ་མཆིས་པའི་སླད་དུ་རྗེས་སུ་འཐུན་པ་ལ་གནས་པ་ཡང་མ་ལགས། རྗེས་སུ་མི་མཐུན་པ་ལ་མི་གནས་པ་ཡང་མ་ལགས་པས་བསམ་པ་མ་མཆིས་པ་དང་མཚུངས་པར་ལྡན་པ་དང་། སྐྱེ་བ་མ་མཆིས་པ་དང་མཚུངས་
པར་ལྡན་པར་གྱུར་པ་ལགས་སོ། །བཅོམ་ལྡན་འདས་བདག་ཅག་ནི་གང་ལས་གང་གིས་གང་དུ་གང་གི་ཚེ་བདག་ཅག་གི་སེམས་དང་། ཡིད་དང་། རྣམ་པར་ཤེས་པ་སྐྱེ་བ་འམ། འགག་པ་ཞེས་བགྱི་བ་ཡང་དག་
པར་རྗེས་སུ་མ་མཐོང་ན་སེམས་དང་ཡིད་དང་། རྣམ་པར་ཤེས་པས་ཆོས་ཐམས་ཅད་ཀྱི་ཚུལ་ལ་ཐབས་མཁས་པ་རྣམ་པར་གཞག་པ་ཞེས་ཇི་སྐད་དུ་བརྗོད་པར་བགྱི་ལགས། བློ་གྲོས་མཐའ་ཡས་བྱང་
ཆུབ་སེམས་དཔའ་དེ་གཉིས་ཀྱིས་དེ་བཞིན་གཤེགས་པ་དེའི་སྤྱན་སྔར་དེ་སྐད་སྨྲས་པའི་ཚེ་བྱང་ཆུབ་སེམས་དཔའ་སྟོང་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་བྱེ་བ་ཕྲག་
སྟོང་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོས་ཡང་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཇི་ལྟར་ཁྱེད་
གནས་པ་མེད་པས་གནས་མེད་པ་ལ་གནས་ནས་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་མཁས་པ་ལ་གནས་པ་དེ་བཞིན་དུ་རིགས་ཀྱི་བུ་ཆོས་ཐམས་ཅད་ཀྱང་དེ་བཞིན་ཏེ། དེ་བཞིན་གཤེགས་

79-1-147a

པ་འཇིག་རྟེན་པའི་རྗེས་སུ་འཐུན་པར་མཛད་པའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་བརྙེས་པར་སྟོན་པར་མཛད་དོ། །གལ་ཏེ་དེ་བཞིན་
གཤེགས་པ་འཇིག་རྟེན་པའི་རྗེས་སུ་འཐུན་པར་མི་མཛད་ན་དེ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་མངོན་དུ་མཛད་པ་ཡང་མི་སྟོན་ཏོ། །རིགས་ཀྱི་བུ་
ཆོས་རྣམས་ལ་ནི་གནས་མེད་དོ། །གནས་མེད་པ་ཡང་མ་ཡིན་ནོ། །གནས་དང་གནས་མེད་པ་ཞེས་བྱ་བ་གང་ཡིན་པ་དེ་དག་ཐམས་ཅད་ནི་འཇིག་རྟེན་པའི་རྗེས་སུ་འབྲང་བའོ། །འཇིག་རྟེན་པའི་རྗེས་སུ་
འབྲང་བ་གང་ཡིན་པ་དེ་ལ་ནི་ཆོས་འགའ་ཙམ་ཡང་སྐྱེ་བར་བྱ་བ་འམ། ཁོང་དུ་ཆུད་པར་བྱ་བ་མེད་པས་དེའི་ཕྱིར་རིགས་ཀྱི་བུ་ནན་ཏན་བརྩོན་འགྲུས་བསྐྱེད་ནས་མྱུར་དུ་ཆོས་རྣམས་ལས་རྣམ་པར་གྲོལ་བ་འཐོབ་
པར་བྱའོ། །བྱང་ཆུབ་སེམས་དཔའ་དེ་གཉིས་དེ་བཞིན་གཤེགས་པ་དེ་ལས་ཆོས་དེ་ལྟ་བུ་ཐོས་པ་དང་། ནམ་མཁའ་ལ་འཕགས་ནས་ཚིགས་སུ་བཅད་དེ་དེ་བཞིན་གཤེགས་པ་ལ་མངོན་པར་བསྟོད་པ། 
ཆོས་ཀྱི་རྒྱལ་པོ་བསམ་མི་ཁྱབ། །ངོ་མཚར་ཆོས་ནི་རབ་ཏུ་བརྙེས། །ཐམས་ཅད་མཁྱེན་པ་རྐང་གཉིས་གཙོ། །སངས་རྒྱས་ཆོས་ནི་བླ་ན་མེད། །ཆོས་ཉིད་བླ་ན་མ་མཆིས་སླད། །དེ་བཞིན་གཤེགས་དང་
མཚུངས་མ་མཆིས། །ཆོས་རྣམས་སྐྱེ་བ་མ་མཆིས་པས། །དེང་བདག་བཟོད་པ་འདི་ཐོབ་ལགས། །བདག་ནི་རྟག་ཏུ་སྐྱེ་བ་དང་། །སྐྱེ་བ་མ་མཆིས་རྟོག་མི་བགྱིད། །དེ་བཞིན་རྣམ་མི་རྟོག་ལ་ཡང་། །ཐམས་
ཅད་བསམ་པར་མི་བགྱིད་དོ། །ཆོས་རྒྱལ་ཐུབ་པ་ཆེན་པོ་ཏེ། །ཡོན་ཏན་ཚིག་དང་རྟོག་སྤངས་པ། །རྣམ་པར་དག་པའི་ཆོས་བསྟན་ནས། །འཁོར་རྣམས་དགའ་བར་མཛད་དུ་གསོལ། །སངས་རྒྱས་

79-1-147b

ཡོན་ཏན་མཆོག་དག་གི། །མཐའ་ནི་གང་ཞིག་རྟོགས་འཚལ་བས། །བསྐལ་པ་ཚད་མེད་རབ་བརྟགས་ཀྱང་། །དམིགས་པར་ཡང་ནི་མི་འགྱུར་རོ། །ཡོན་ཏན་དཔག་ཏུ་མ་མཆིས་སླད། ཁྱད་
པར་འཕགས་ཤིང་བླ་ན་མེད། །ཆོས་རྣམས་སྐྱེ་བ་མ་མཆིས་ལ། །བདག་ནི་རྟོག་པར་མི་བགྱིད་དོ། །བདག་ནི་སངས་རྒྱས་ཆོས་དག་ལ། །རྣམ་པར་འཛིན་པར་མི་བགྱིད་པས། །དགེ་བའི་རྩ་བ་མང་པོ་དག །
ཇི་ལྟར་འཐོབ་སྙམ་སེམས་མི་བགྱིད། །ཆོས་རྣམས་བསྟན་དུ་མ་མཆིས་ཤིང་། །སྐྱེ་དང་མཚན་མ་མ་མཆིས་པས། །འདི་ལྟར་མཚན་མ་མ་མཆིས་བཟོད། །འདི་ནི་ཐམས་ཅད་མངོན་དུ་གྱུར། །དེང་བདག་ཐོབ་
པའི་བཟོད་པ་འདི། །ནམས་ཀྱང་ལྡོག་པར་མི་འགྱུར་བས། །དེ་སླད་ཐམས་ཅད་མཁྱེན་པ་ལ། །དེས་ན་དགའ་བ་སྐྱེས་པ་ལགས། །དེ་བཞིན་གཤེགས་པའི་ཆོས་ལ་བདག །ངེས་པར་སོམ་ཉི་མ་མཆིས་པས། །
ཆོས་རྣམས་ཐམས་ཅད་དག་ལ་ཡང་། །ཐེ་ཚོམ་མང་པོ་རབ་ཏུ་སྤངས། །བླ་མེད་སངས་རྒྱས་ཆོས་དག་ལས། །དེང་བདག་བཟོད་པ་འདི་ཐོབ་ཀྱང་། །བདག་ནི་རྟོག་པར་ཡོད་མི་བགྱིད། །རྟོག་པ་མ་མཆིས་པ་ཡང་མིན། །
བློ་གྲོས་མཐའ་ཡས་བྱང་ཆུབ་སེམས་དཔའ་དེ་གཉིས་ཀྱིས་ཚིགས་སུ་བཅད་པ་འདི་དག་སྨྲས་ནས་དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོ་ལ་ལན་གསུམ་བསྐོར་བ་བྱས་ཏེ། ལྷའི་མེ་ཏོག་དང་། ཙན་དན་
གྱི་ཕྱེ་མས་དེ་བཞིན་གཤེགས་པ་ལ་མངོན་པར་གཏོར་ཏོ། །དེ་ནས་དེ་བཞིན་གཤེགས་པ་དེས་ཀྱང་འདི་སྐད་དུ་ཁྱེད་བསྐལ་པ་ཉི་ཁྲི་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་འཚང་རྒྱ་བར་འགྱུར་ཏོ། །ཞེས་ལུང་བསྟན་ཏོ། །བྱང་ཆུབ་སེམས་དཔའ་དེ་གཉིས་ཀྱང་དེ་བཞིན་གཤེགས་པས་ལུང་བསྟན་པ་ཐོབ་པས་རབ་ཏུ་དགའ་བར་གྱུར་ཏེ། དེ་བཞིན་གཤེགས་པ་ལ་སེམས་རྩེ་

79-1-148a

གཅིག་ཏུ་བརྟགས་ནས་བསམ་གཏན་རྣམས་ལ་ཞུགས་པས་རྫུ་འཕྲུལ་གྱིས་རྣམ་པར་རྩེན་པ་དང་། །དུད་པ་འཐུལ་བ་དང་། འོད་འབྱིན་པ་དག་ལ་རང་དབང་ཐོབ་པར་གྱུར་ཏོ། །གཞན་ཡང་སེམས་ཅན་
རྣམས་ལ་ཆོས་ཡང་དག་པར་རྣམ་པར་ཕྱེ་སྟེ་བསྟན་པས་ལྷ་དང་། མི་བྱེ་བ་ཕྲག་ཉི་ཤུ་རྩ་བཞི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་གྱུར་ཏོ། །བྱང་ཆུབ་སེམས་དཔའ་དེ་གཉིས་
ཇི་སྲིད་འཚོའི་བར་དུ་ནན་ཏན་གྱིས་ཚངས་པར་སྤྱོད་པ་ཡང་དག་པར་སྤྱད་ནས་དེ་བཞིན་གཤེགས་པ་དེས་དུས་པར་མར་གསུངས་པའི་ཡང་དག་པའི་ཆོས་དང་། དུས་ཐ་མར་གསུངས་པའི་ཡང་དག་པའི་
ཆོས་རྣམས་རབ་ཏུ་བསྲུངས་ཤིང་ཡོངས་སུ་བཟུང་ངོ་། །གཞན་ཡང་དེའི་ཚེ་དེ་དག་གིས་སེམས་ཅད་བྱེ་བ་ཕྲག་བཞིའི་བར་དུ་བཏུལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་
བྱས་སོ། །བྱང་ཆུབ་སེམས་དཔའ་དེ་གཉིས་རིམ་གྱིས་སངས་རྒྱས་བརྒྱ་སྟོང་མང་པོ་ལ་རིམ་གྲོ་དང་། མཆོད་པ་བྱས་ནས་དེ་བཞིན་གཤེགས་པ་རྣམས་ཀྱི་ཏིང་ངེ་འཛིན་དང་། ཡང་དག་པའི་ཆོས་རྣམས་མ་ལུས་
པར་ཡོངས་སུ་བཟུང་བས་བསྐལ་པ་ཉི་ཁྲི་འདས་ནས་དེ་བཞིན་གཤེགས་པ་རིན་པོ་ཆེའི་ཏོག་ཅེས་བྱ་བ་ཆོས་ཀྱི་འཁོར་ལོ་རྗེས་སུ་བསྐོར་བ་དང་ཕྲད་པར་གྱུར་པས་སེམས་ཅན་ཚད་མེད་པ་སྙེད་བཏུལ་ཏེ། །
ཡོངས་སུ་སྨིན་པར་བྱས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་གྱུར་ཏོ། །དེ་བཞིན་གཤེགས་པ་རིན་པོ་ཆེའི་ཏོག་དེའི་ཞིང་ནི་ཤིན་ཏུ་རྣམ་པར་དག་ཅིང་ཉན་ཐོས་
ཀྱི་མིང་ཡང་མེད་པས་ཚེ་གཅིག་གིས་ཐོགས་པའི་བྱང་ཆུབ་སེམས་དཔའ་འབའ་ཤིག་གིས་གང་བར་གྱུར་ཏོ། །དེ་བཞིན་གཤེགས་པ་རིན་པོ་ཆེའི་ཏོག་ཡོངས་སུ་མྱ་ངན་ལས་འདས་པའི་ཚེ་འདི་སྐད་དུ་ང་

79-1-148b

ཡོངས་སུ་མྱ་ངན་ལས་འདས་པའི་འོག་ཏུ་བྱང་ཆུབ་སེམས་དཔའ་སྤྲིན་གྱི་དབྱངས་ཤེས་བྱ་བ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། མཚན་ཡང་དེ་བཞིན་གཤེགས་
པ་ཉི་མའི་སྒྲོན་མའི་རྒྱལ་པོ་ཞེས་བྱ་བར་འགྱུར་རོ། །སངས་རྒྱས་དེའི་ཞིང་ནི་བཀོད་པ་ཕུན་སུམ་ཚོགས་པ། ཡོན་ཏན་དཔག་ཏུ་མེད་པ་ལས་མངོན་པར་གྲུབ་པ། བྱང་ཆུབ་སེམས་དཔའ་དང་། ཉན་ཐོས་ཀྱི་འཁོར་ཕུན་སུམ་
ཚོགས་པར་མ་གྱུར་པ་མེད་དོ། །དེ་བཞིན་གཤེགས་པ་ཉི་མའི་སྒྲོན་མའི་རྒྱལ་པོ་ཡོངས་སུ་མྱ་ངན་ལས་འདས་པའི་འོག་ཏུ་བྱང་ཆུབ་སེམས་དཔའ་དཔག་ཏུ་མེད་པའི་དབྱངས་ཤེས་བྱ་བ་འདི་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏོ། །ཞེས་ལུང་བསྟན་ཏོ། །བློ་གྲོས་མཐའ་ཡས་ཆོས་ཀྱི་རྣམ་གྲངས་འདི་ནི་དམིགས་སུ་མེད་པའི་ཕྱིར་དང་། ཚིག་མེད་པའི་ཕྱིར་
བསྟན་དུ་མེད་པ། སྐྱེ་བ་མེད་པ། འགག་པ་མེད་པ་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ནན་ཏན་བརྩོན་འགྲུས་ཀྱིས་ཚུལ་བཞིན་དུ་བསྒྲུབ་པར་བྱའོ། །བྱང་ཆུབ་སེམས་དཔའ་
གང་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་མཁས་པ་ལ་གནས་ཤིང་དམིགས་སུ་མེད་པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ན་སངས་རྒྱས་ཀྱི་ཆོས་ཡོངས་སུ་རྫོགས་པ་དང་། ཡོན་ཏན་
ཚད་མེད་པས་རབ་ཏུ་བརྒྱན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་རོ། །བློ་གྲོས་མཐའ་ཡས་ང་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཆོས་
འདི་མ་གཏོགས་པར་གུད་ན་ཆོས་ཅུང་ཟད་ཙམ་ཡང་ཐམས་ཅད་མཁྱེན་པའི་ཡེ་ཤེས་མངོན་པར་བསྒྲུབ་པར་འགྱུར་བ་ཡོད་པར་ཡང་དག་པར་མི་སྨྲ་འོ། །གང་ལ་ལ་ཞིག་སྐྱེ་བ་མེད་པ། འགག་པ་མེད་པ། 

79-1-149a

ཤིན་ཏུ་ཟབ་པ། སྟོང་པ་ཉིད་ཀྱི་ཆོས་འདི་ནན་ཏན་བརྩོན་འགྲུས་ཀྱིས་ཡང་དག་པར་བསྒྲུབ་པར་བྱེད་པ་ན་མྱུར་དུ་བྱང་ཆུབ་སེམས་དཔའ་ཆོས་ཀྱི་ཚུལ་ལ་ཐབས་མཁས་པ་དང་། གཟུགས་དང་། སྤོབས་
པ་ཕུན་སུམ་ཚོགས་པ་དང་། བླ་ན་མེད་པའི་ཡོངས་སུ་སྡུད་པ་འཐོབ་པར་འགྱུར་ཞིང་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་བསྔགས་པ་བརྗོད་པ་དང་། ཆོས་ཀྱི་བཀོད་པའི་ཡོ་བྱད་ཀྱིས་རབ་ཏུ་བརྒྱན་པ་དང་། 
སྦྱིན་པ་ཡོངས་སུ་རྫོགས་པ་དང་། ཚུལ་ཁྲིམས་རྣམ་པར་དག་པ་ལ་གནས་པ་དང་། བཟོད་པ་རྣམ་པར་དག་པ་དང་། བླ་ན་མེད་པའི་བརྩོན་འགྲུས་དང་། དམིགས་པ་མེད་པའི་བསམ་གཏན་དང་། ཤེས་རབ་ཆེན་པོ་
ཐོབ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་བས་མཆོག་ཏུ་གྱུར་པའི་ནང་ན་རབ་མཆོག་ཏུ་གྱུར་པ་དང་། མྱུར་དུ་ཐམས་ཅད་མཁྱེན་པ་ཞེས་བྱ་བའི་མིང་ཐོབ་ནས་བྱང་ཆུབ་ཀྱི་སྙིང་
པོ་ལ་འདུག་པར་འགྱུར་བས་རྒྱལ་པོ་ཆེན་པོ་བཞི་གདུགས་ཐོགས་ནས་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པས་ལྷ་དང་མི་རྣམས་ལ་སྣང་བ་ཆེན་པོ་བྱས་ནས་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ལ་རབ་ཏུ་འགོད་པར་འགྱུར་རོ། །གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་བརྩོན་འགྲུས་ཀྱིས་སྒྲུབ་པར་
བྱེད་ན་ཆོས་ཐམས་ཅད་ཆོས་ཀྱི་དབྱིངས་དང་མཚུངས་པ་ཉིད་དུ་མཐོང་བར་འགྱུར་ཏེ། དེ་ལྟར་མཐོང་བའི་ཚེ་ཆོས་ཀྱི་དབྱིངས་ལ་ཡང་ཆོས་ཐམས་ཅད་དུ་མི་མཐོང་ལ། ཆོས་རྣམས་ལ་ཡང་ཆོས་ཀྱི་དབྱིངས་སུ་
མི་མཐོང་བས་བརྩོན་འགྲུས་ཀྱིས་མངོན་པར་སྒྲུབ་པར་བྱེད་དོ། །ཆོས་ཐམས་ཅད་ཀྱི་ཁམས་འདུས་པ་ལ་ཐབས་མཁས་པས་ཆོས་ཐམས་ཅད་ཀྱི་ཁམས་ལ་ཡང་མངོན་པར་ཞེན་པ་ཡང་མེད་གཡོའ་བ་ཡང་མེད་དོ།།

79-1-149b

ཆོས་ཐམས་ཅད་ཀྱི་ཁམས་འདུས་པ་ལ་ཐབས་མཁས་ཤིང་མངོན་པར་ཞེན་པ་ཡང་མེད། རྣམ་པར་རྟོག་པ་ཡང་མེད་པས་ཆོས་གཅིག་ཏུ་འདུས་པའི་ནང་དུ་ཆོས་ཐམས་ཅད་འདུས་པར་མཐོང་ལ། ཆོས་ཐམས་ཅད་
འདུས་པའི་ནང་དུ་ཆོས་གཅིག་འདུས་པར་མཐོང་ཡང་ཆོས་ཐམས་ཅད་འདུས་པས་ཆོས་གཅིག་འདུས་པ་ལ་བསྟེན་པར་ཡང་མི་བྱེད་ལ། ཆོས་གཅིག་གི་འདུས་པས་ཀྱང་ཆོས་ཐམས་ཅད་ཀྱི་འདུས་པ་ལ་སྟེན་
པར་མི་བྱེད་དོ། །ཆོས་འདི་གཅིག་རབ་ཏུ་རྟོགས་པའི་ཕྱིར་ཡང་ཆོས་ཐམས་ཅད་རབ་ཏུ་རྟོགས་པར་འགྱུར་ལ། ཆོས་ཐམས་ཅད་རབ་ཏུ་རྟོགས་པའི་ཕྱིར་ཡང་ཆོས་འདི་གཅིག་ཤེས་པར་བྱ་བའི་གནས་རྣམས་
རབ་ཏུ་རྟོགས་པར་འགྱུར་ཡང་ཆོས་རྣམས་ཀྱིས་ཆོས་ཐམས་ཅད་ལ་སྟེན་པར་མི་བྱེད་དོ། །ཉེ་བར་ལེན་པའི་ཕུང་པོ་རྣམས་འདུས་པ་རྟོགས་པར་ཁོང་དུ་ཆུད་པས་ཉེ་བར་ལེན་པའི་ཕུང་པོ་སྣ་ཚོགས་ཀྱི་ངོ་བོ་ཉིད་
ཀྱི་མཚན་ཉིད་ལ་ཡང་འདུས་པ་ཡོད་པ་འམ། འདུས་པ་མེད་པར་མངོན་པར་ཞེན་པ་སྐྱེད་པར་མི་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་ལྟར་སྤྱོད་པའི་ཚེ་ཆོས་གང་རྒྱུ་དང་། 
རྐྱེན་མང་པོ་འདུས་པ་ལས་སྐྱེ་བ་དང་། ཆོས་གང་རྒྱུ་དང་། རྐྱེན་མང་པོ་འདུས་པ་ལས་མངོན་པར་སྒྲུབ་པར་འགྱུར་བའི་ཆོས་དེ་དག་ཀྱང་རྟོགས་པར་ཁོང་དུ་ཆུད་དོ། །ཆོས་གང་རྒྱུ་དང་། རྐྱེན་འདུས་པ་ལས་
རྣམ་པ་སྣ་ཚོགས་ཀྱི་ངོ་བོ་ཉིད་མཚུངས་པར་ལྡན་པར་འབྱུང་བར་འགྱུར་བའི་ཆོས་གང་ཡིན་པ་དེ་དག་རྟོགས་པར་ཁོང་དུ་ཆུད་ཀྱང་མངོན་པར་ཞེན་པ་ཡང་མེད་ལ། ཆོས་ཐམས་ཅད་ཅེས་གདགས་པའི་
མཚན་ཉིད་ཀྱང་རྗེས་སུ་རྟོགས་པར་བྱེད་དོ། །།མཚན་མ་དང་བཅས་པ་དང་། མཚན་མ་མེད་པ་ཡང་རབ་ཏུ་རྟོགས་པར་བྱེད་དོ། །ཁམས་རྣམས་ཀྱི་བྱེ་བྲག་དང་། ཁམས་སྣ་ཚོགས་ཀྱི་ངོ་བོ་ཉིད་ཀྱིས་མཚན་

79-1-150a

ཉིད་ཀྱི་བྱེ་བྲག་ཀྱང་རབ་ཏུ་རྟོགས་པར་འགྱུར་རོ། །གང་གིས་རྒྱུ་བྱས་ནས་ཉོན་མོངས་པས་རྟེན་ཅིང་འབྲེལ་བར་འབྱུང་བའི་ཆོས་རྣམས་ལ་སྟེན་པ་དང་། གཞོལ་བར་མི་འགྱུར་བ་ཡང་ཁོང་དུ་
ཆུད་པར་འགྱུར་རོ། །འཇིག་རྟེན་དང་། འཇིག་རྟེན་ལས་འདས་པའི་ཆོས་རྣམས་ཕན་ཚུན་མི་འགལ་བར་ཡང་རྗེས་སུ་རྟོགས་པར་འགྱུར་རོ། །འཇིག་རྟེན་དང་། འཇིག་རྟེན་ལས་འདས་པའི་ཆོས་ཐམས་ཅད་
དང་། འཇིག་རྟེན་པའི་མཚན་ཉིད་ཀྱི་ཕྱག་རྒྱ་ཡང་ཡོངས་སུ་རྟོགས་པར་འགྱུར་རོ། །ཆོས་ཀྱི་རྣམ་གྲངས་གཅིག་གིས་ཀྱང་ཆོས་ཐམས་ཅད་ཀྱི་རྣམ་གྲངས་ཁོང་དུ་ཆུད་པར་བྱེད་ལ། ཆོས་ཀྱི་རྣམ་གྲངས་མང་
པོས་ཀྱང་ཆོས་གཅིག་གིས་རྣམ་གྲངས་ཁོང་དུ་ཆུད་པར་བྱེད་དོ། །ཆོས་ཐམས་ཅད་ཀྱི་རྣམ་གྲངས་ཀྱིས་ཀྱང་ཆོས་གཅིག་གི་རྣམ་གྲངས་ལ་སྟེན་པར་མི་བྱེད་ལ། ཆོས་གཅིག་གི་རྣམ་གྲངས་ཀྱིས་ཀྱང་ཆོས་
རྣམས་ཀྱི་རྣམ་གྲངས་ལ་སྟེན་པར་མི་བྱེད་དོ། །ཆོས་ཀྱི་རྣམ་གྲངས་དེ་ལྟ་བུ་དག་མ་ལུས་པར་ཡོངས་སུ་སྦྱོང་བར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་
ཆོས་འདི་ནན་ཏན་གྱིས་སྒྲུབ་པར་བྱེད་པ་དེ་དག་ནི་ཚུལ་གཅིག་པའི་ཚིག་གི་བསྟན་པའི་རྣམ་གྲངས་གཅིག་གིས་ཆོས་ཐམས་ཅད་ཀྱི་ངོ་བོ་ཉིད་རོ་གཅིག་པ་ཁོང་དུ་ཆུད་པར་འགྱུར་བས་ཆོས་ཐམས་ཅད་ལ་
རྩོད་པ་མེད་པ་ཚུལ་བཞིན་གྱིས་རབ་ཏུ་དབེན་པའི་མཆོག་འཐོབ་པར་འགྱུར་ཏེ། ཕན་ཚུན་འགལ་བ་མེད་པར་འཁོར་མང་པོའི་ནང་དུ་ཆོས་འདིའི་བསྔགས་པ་བརྗོད་ནས་ཡང་དག་པར་བསྟན་པ་དང་། ནན་ཏན་
གྱིས་བསྒྲུབས་པས་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཡང་རབ་ཏུ་འཐོབ་པར་འགྱུར་རོ། །དེ་ལྟར་མངོན་པར་བསྒྲུབས་པས་རྩོད་པ་དང་བཅས་པ་འམ། རྩོད་པ་མེད་པར་ཡང་རུང་སྟེ། 

79-1-150b

དེ་དག་ཐམས་ཅད་ཉེ་བར་ཞི་བར་གྱུར་བས་ཚུལ་བཞིན་དུ་གནས་པར་འགྱུར་རོ། །ང་རྒྱལ་དང་། བག་མེད་པ་དག་ཀྱང་རྗེས་སུ་འཐུན་པས་ཡོངས་སུ་སྤོང་བར་བྱེད་དོ། །ངེས་པར་བཤད་པ་དག་ཀྱང་ལེགས་པར་ཡོངས་སུ་འཛིན་པར་བྱེད་དོ། །
མིང་དང་། ཚིག་ཐ་དད་པ་དག་ཀྱང་ཡོངས་སུ་རྟོགས་པར་འགྱུར་རོ། །ཆོས་ཀྱི་དབྱིངས་ཀྱི་ཚུལ་དག་ལ་ཡང་ཐབས་མཁས་པས་ནན་ཏན་གྱིས་སྒྲུབ་པར་བྱེད་དོ། །ཆོས་ཀྱི་སྒོ་རྣམས་ཀྱང་ལེགས་པར་ཡིད་ལ་བྱེད་དོ། །ཆོས་གང་དང་མཚུངས་
པར་ལྡན་པ་འམ། མཚུངས་པར་མི་ལྡན་པ་ཡང་རུང་སྟེ། ཐབས་མཁས་པས་ངེས་པའི་དོན་ལ་བསམ་པ་རྣམ་པར་དག་པས་རབ་ཏུ་གནས་པར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་
སྒོ་འདི་ལ་དེ་ལྟར་གནས་པ་དེ་དག་ནི་སྤྱོད་པ་ཆུང་ངུས་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐོབ་ནས་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཚད་མེད་པ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་
གཞོལ་བར་བྱེད་དོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། ཁྱེད་ཀྱིས་ཆོས་རྣམས་ཐམས་ཅད་ནི། །ཆོས་ཀྱི་དབྱིངས་སུ་འཇུག་པར་ལྟོས། །ཆོས་རྣམས་ཆོས་དབྱིངས་མཚུངས་པས་ན། ཚུལ་ནི་ཀུན་
ཀྱང་མཉམ་པ་ཡིན། །གཞན་ཡང་ཆོས་ཀྱི་དབྱིངས་རྣམས་ནི། །ཆོས་རྣམས་ཀུན་དུ་འཇུག་པར་བལྟོས། །ཆོས་དབྱིངས་ཆོས་དང་མཚུངས་པས་ན། །ཚུལ་ནི་ཀུན་དུ་མཉམ་པ་ཡིན། །ཆོས་ཀྱི་དབྱིངས་རྣམས་ལ་ཡང་ནི། །
ཐམས་ཅད་ཆོས་སུ་ལྟ་མི་བྱེད། །ཆོས་ཀྱི་དབྱིངས་ལས་མ་གཏོགས་པར། །ཆོས་རྣམས་སུ་ཡང་ལྟ་མི་བྱེད། །ཆོས་རྣམས་ཐམས་ཅད་ཀུན་ལ་ཡང་། །ཆོས་ཀྱི་དབྱིངས་སུ་ལྟ་མི་བྱེད། །ཆོས་རྣམས་མ་གཏོགས་གུད་ན་ཡང་། །
ཆོས་ཀྱི་དབྱིངས་སུ་ལྟ་མི་བྱེད། །ཁམས་ནི་རྣམ་པ་སྣ་ཚོགས་དང་། །ཆོས་ཀྱི་དབྱིངས་ནི་སྣ་ཚོགས་ཉིད། །ཆོས་འདུས་རྣམས་ནི་རྟོགས་པས་ན། །ཐབས་མཁས་གནས་པ་ཅི་ཡང་མེད། །དུས་དང་གནས་ནི་ཐམས་ཅད་དུ། །སྣ་ཚོགས་ངོ་བོ་འདུས་པ་ཡང་། །གནས་

79-1-151a

པ་མེད་ཅིང་རྟེན་པ་མེད། །བླང་བར་བྱ་བ་ཅི་ཡང་མེད། །འདུས་པ་ཐ་དད་ངོ་བོ་ཉིད། །རྣམ་པར་རྟོག་དང་མི་རྟོག་པ། །དེ་ལ་གཉིས་ག་ཡོད་མ་ཡིན། །བློ་དང་ལྡན་པས་མཉམ་པར་མཐོང་། །འདུས་པ་
གཅིག་ནི་ཤེས་པའི་ཕྱིར། །འདུས་པ་མང་པོ་ཤེས་པར་འགྱུར། །འདུས་པ་མང་པོ་ཤེས་པའི་ཕྱིར། །འདུས་པ་གཅིག་ཀྱང་ཤེས་པར་འགྱུར། །འདུས་པ་དང་ནི་མ་འདུས་དང་། །རང་བཞིན་གཅིག་དང་ཐ་དད་
ལ། །སྟེན་པར་མི་བྱེད་རྟོག་མི་བྱེད། །འཛིན་པ་མེད་ཅིང་ཞེན་པ་མེད། །ཆོས་རྣམས་ཐམས་ཅད་དེ་དག་ལ། །འདུས་པ་མེད་པར་རྟོགས་པས་ན། །འདུས་པ་ཉིད་དུ་མི་སེམས་ཤིང་། །འཛིན་པ་
མེད་ཅིང་ཞེན་པ་མེད། །ཆོས་ཀྱི་རྣམ་པ་ཐམས་ཅད་ཀྱི། །གདགས་པའི་མཚན་ཉིད་དེ་ཤེས་པས། །སེམས་དཔའ་མེད་ཅིང་སྟེན་པ་མེད། །འཇིགས་པ་མེད་ཅིང་ཞེན་པ་མེད། །ལས་དང་ལས་ཀྱི་རྣམ་སྨིན་
དག །ཐམས་ཅད་མ་ལུས་རྟོགས་ཤེས་ཤིང་། །དེ་དང་འགལ་བར་མི་བྱེད་པས། །འདི་ནི་བརྩོན་འགྲུས་ལྡན་པ་ཡིན། །ལས་དང་ལས་ནི་གང་བྱས་པ། །འདི་གཉིས་འདུས་པའི་མཚན་ཉིད་ཡིན། །མཚན་
དེ་མཚན་མེད་གང་ཤེས་པ། །འདི་ནི་བརྩོན་འགྲུས་ལྡན་པ་ཡིན། །ཁམས་རྣམས་འདུས་པ་དག་དང་ནི། །ཁམས་ཀྱི་བྱེ་བྲག་ངོ་བོ་ལ། །དེ་དག་རྟག་ཏུ་མཉམ་ཤེས་པ། །འདི་ནི་བརྩོན་འགྲུས་ལྡན་པ་ཡིན། །
རྒྱུ་འབྲས་ཕན་ཚུན་འབྲེལ་བ་ནི། །ཐམས་ཅད་ཁོང་དུ་ཆུད་པས་ན། །རྒྱུ་རྐྱེན་ཆོས་ནི་དེ་དག་ལ། །གོ་དགོས་ཚུལ་བཞིན་གནས་པར་བྱེད། །འཇིག་རྟེན་འདས་པའི་ཆོས་རྣམས་དང་། །འཇིག་རྟེན་པའི་ཆོས་
རྣམས་ནི། །འགལ་བ་ཅུང་ཟད་མེད་རྟོགས་པས། །དེ་བཞིན་མཉམ་པར་གནས་པར་བྱེད། །འཇིག་རྟེན་ཇི་ཙམ་གནས་པ་ཡིན། །མཚན་ཉིད་ཕྱག་རྒྱ་ཐམས་ཅད་ཀྱང་། །རྗེས་འཐུན་སོ་སོར་རྟོག་བྱེད་པས། 

79-1-151b

ཡོངས་ཤེས་མཉམ་པར་གནས་པར་བྱེད། །ཆོས་ཀྱི་རྣམ་གྲངས་གཅིག་གིས་ནི། །ཆོས་རྣམས་རྣམ་གྲངས་རབ་ཤེས་ཀྱང་། །ཆོས་ཀྱི་རྣམ་གྲངས་མང་པོ་ཡིས། །རྣམ་གྲངས་གཅིག་ནི་སྟེན་མི་བྱེད། །ཆོས་ཀྱི་
རྣམ་གྲངས་གཅིག་གིས་ནི། །རྣམ་གྲངས་མང་པོ་སྟེན་མི་བྱེད། །ཆོས་ཀྱི་རྣམ་གྲངས་མང་པོས་ཀྱང་། །རྣམ་གྲངས་གཅིག་ལ་སྟེན་མི་བྱེད། །ཆོས་ཀྱི་རྣམ་གྲངས་ཐམས་ཅད་ལ། །མཉམ་དང་ཡོངས་སུ་དག་པ་དང་། །
ཐ་དད་འདུ་ཤེས་མེད་གྱུར་པ། །འདི་ནི་སོ་སོར་རྟོག་པ་ཡིན། །ཚིག་གིས་བསྟན་པའི་ཆོས་རྣམས་ལ། །མཉམ་པ་ཉིད་དུ་སྟོན་བྱེད་ཅིང་། །མཉམ་པ་ཉིད་ལ་གང་གནས་པ། །འདི་ནི་སོ་སོར་རྟོག་པ་ཡིན། །ཚིག་གིས་བསྟན་པའི་ཆོས་རྣམས་ལ། །
ཚུལ་བཞིན་དུ་ནི་ཤེས་མཐོང་བ། །རྗེས་འཐུན་རབ་ཏུ་ཐོབ་པས་ན། །འདི་ནི་ཐབས་དང་ལྡན་ཞེས་བྱ། །རྩོད་པའི་སྨྲ་བ་མི་སྐྱེད་ཅིང་། །རྩོད་པའི་རྒྱུ་རྐྱེན་མི་བྱེད་པ། །ཐམས་ཅད་འགལ་བར་མི་བྱེད་པས། །
འདི་ནི་རྗེས་མཐུན་ཞེས་བྱའོ། །རྟག་ཏུ་རྩོད་པ་མེད་སྐྱེད་ཅིང་། །རྩོད་པ་མེད་དང་མཚུངས་ལྡན་པ། །མཉམ་ཞིང་འགལ་བར་མི་བྱེད་པས། །འདི་ནི་བློ་ལྡན་ཞེས་བྱའོ། །ཆོས་རྣམས་ཀུན་གྱི་ཚུལ་དག་ལ། །
རྩོད་པས་སྨྲ་བ་ཉེར་ཞི་ཞིང་། །གོ་དགོས་ཚུལ་བཞིན་གང་སྒྲུབ་པ། །འདི་ནི་དཔའ་བོ་ཞེས་བྱའོ། །དེ་ལྟར་སོ་སོར་རབ་བརྟགས་ན། །གཅིག་ཏུ་རྩོད་པ་མེད་གྱུར་པ། །འཁོར་འདུས་མང་པོ་རྣམས་སུ་ནི། །
བླ་མེད་ཆོས་ནི་བསྔགས་པར་འགྱུར། །འདི་ནི་བྱང་ཆུབ་སེམས་དཔའ་རྣམས། །ཆོས་ཀྱི་རྒྱ་མཚོ་ཐམས་ཅད་ཀྱི། །ཕྱག་རྒྱའི་ཏིང་འཛིན་མངོན་སྒྲུབ་པ། །འདི་ནི་ཡང་དག་དྲན་ལྡན་ཡིན། །འདི་ལྟར་
གཅིག་ཏུ་རྩོད་པ་མེད། །ནན་ཏན་གྱིས་ནི་སྒྲུབ་བྱེད་ཅིང་། །རྩོད་སྨྲ་ཉེར་བཞི་མཚུངས་ལྡན་པ། །ཏིང་འཛིན་འདི་ནི་རྫོགས་པར་བྱེད། །ཚུལ་བཞིན་དུ་ནི་རབ་གནས་ཤིང་། །གསུངས་ཏེ་གསུངས་

79-1-152a

པ་གང་ཤེས་པ། །བདག་དང་ང་རྒྱལ་ཤེས་པས་ན། །ང་རྒྱལ་སེམས་མཐོ་སྤོང་བར་བྱེད། །ངེས་པར་གསུངས་པའི་གསུང་རབ་ལས། །ཐབས་མཁས་ཡོངས་སུ་རྫོགས་བྱེད་ཅིང་། །བྱེ་བྲག་མིང་ནི་གང་
ཤེས་པ། །འདི་ནི་བློ་ལྡན་ཞེས་བྱའོ། །ཆོས་རྣམས་ཀུན་གྱི་ཚུལ་ལ་ནི། །ཚུལ་བཞིན་ནན་ཏན་གང་སྒྲུབ་པ། །ཆོས་རྣམས་ཀུན་གྱི་སྒོ་མཐོང་བས། །འདི་ནི་ཆོས་མཐོང་ཞེས་བྱའོ། །དེ་ལྟར་ནན་ཏན་གང་
སྒྲུབ་པ། །ཆོས་གང་མཚུངས་པར་ལྡན་པ་དང་། །ཆོས་གང་མཚུངས་པར་མི་ལྡན་པ། །ཆོས་དེ་ཐམས་ཅད་ཤེས་པར་འགྱུར། །ཆོས་རྣམས་ཐམས་ཅད་ཀུན་ལས་ནི། །ལས་ནི་དག་པར་གང་དྲན་པ། །
ངེས་པར་གསུངས་པའི་དོན་དག་ལ། །ཐབས་མཁས་པ་ནི་འཐོབ་པར་འགྱུར། །ཆོས་རྣམས་ཐམས་ཅད་ཀུན་ལ་ནི། །བརྩོན་འགྲུས་བསྐྱེད་ནས་གང་སེམས་པ། །ཆོས་རྣམས་ཐམས་ཅད་རྟོགས་པས་ན། །
ཏིང་འཛིན་འདི་ནི་འཐོབ་པར་འགྱུར། །གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་འདི་ལ་ནན་ཏན་གྱིས་སྒྲུབ་པར་བྱེད་ན་གཞན་ཡང་ཏི་ངེ་འཛིན་གྱི་ཆོས་ཡོངས་
སུ་སྡུད་པར་འགྱུར་གྱིས་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་ཡང་དག་པར་བཤད་པར་བྱའོ། །བཅོམ་ལྡན་འདས་དེ་བཞིན་དུ་ཐོས་པར་འཚལ་ལོ་ཞེས་གསོལ་པ་དང་། དེ་ནས་བཅོམ་ལྡན་
འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་སྩལ་ཏོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཆོས་ཀྱི་
སྣང་བའི་སྒོ་ཡོད་དེ། ཆོས་ཀྱི་ཚུལ་ལ་ཐབས་མཁས་པ་འབྱུང་བར་བྱེད་དོ། །ཆོས་ཐམས་ཅད་ཀྱི་ཕྱག་རྒྱ་རབ་ཏུ་འབྱུང་བར་བྱེད་དོ། །ཆོས་ཀྱི་ཕྱག་རྒྱའི་སྒོ་ཐམས་ཅད་དུ་འཇུག་པར་འགྱུར་རོ། །

79-1-152b

ཆོས་ཐམས་ཅད་ཀྱི་བྱ་བ་རྣམས་ཁོང་དུ་ཆུད་ཅིང་རབ་ཏུ་འཇིག་པར་འགྱུར་རོ། །ཆོས་ཀྱི་སྣང་བ་འཐོབ་པར་ནུས་ཤིང་ཡང་དག་པར་རབ་ཏུ་སྟོན་པར་བྱེད་དོ། །ཆོས་ཀྱི་སྣང་བའི་དབང་གིས་ཆོས་ཀྱི་ཚིག་གི་སྒོ་
རྣམས་ལ་རྗེས་སུ་གཞོལ་བར་བྱེད་དོ། །ཐབས་མཁས་པའི་སྣང་བ་ཡང་དག་པར་འབྱུང་བར་བྱེད་པའི་ཆོས་ཀྱི་སྣང་བའི་སྒོ་དེ་ཡང་གང་ཞེ་ན། འདི་ལྟ་སྟེ། མིང་ཐ་དད་པ་བསྟན་པའི་སྒོ་དང་། གསང་བ་བསྡམས་
པའི་སྒོ་དང་། མིང་ཐ་དད་པའི་དངོས་པོའི་སྒོ་དང་། དངོས་པོ་ཡོངས་སུ་བསྡུ་བའི་སྒོ་དང་། བྱེ་བྲག་རྣམས་ཀྱི་སྒོ་རབ་ཏུ་རྟོགས་པ་གང་ཡིན་པའོ། །ཇི་ལྟར་དེ་དག་ཁོང་དུ་ཆུད་ནས་ཏིང་ངེ་འཛིན་གྱི་སྒོ་ཡང་དག་པར་
སྐྱེ་བར་འགྱུར་རོ། །ཞེ་ན་ཆོས་ཀྱི་དབྱིངས་ཀྱི་ཚུལ་གྱི་སྒོ། ཐམས་ཅད་ནི་དོན་གཅིག་ཏུ་འཇུག་པར་འགྱུར་བས་ཆོས་ཀྱི་སྣང་བ་རྣམས་རྗེས་སུ་རྟོགས་པར་འགྱུར་རོ། །བློ་གྲོས་མཐའ་ཡས་བྱང་ཆུབ་སེམས་དཔའ་
སེམས་དཔའ་ཆེན་པོ་གང་ཆོས་ཟབ་མོའི་ཚུལ་ལ་ཐབས་མཁས་པ་འདི་སྒྲུབ་པར་བྱེད་པ་དང་། སྒྲུབ་པར་འགྱུར་བ་དང་། ཡོངས་སུ་ཚོལ་བ་དང་། ཡོངས་སུ་ཚོལ་བར་འགྱུར་བ་དེ་དག་ཆོས་ཀྱི་རྣམ་གྲངས་འདི་
ཐོབ་པར་གྱུར་ན་སྦྱོར་བ་ཆུང་ངུས་སྣང་བ་ཆེན་པོ་ཐོབ་ནས་ཆོས་ཀྱི་སྒོར་རབ་ཏུ་འཇུག་པར་འགྱུར་རོ། །ཆོས་ཀྱི་སྒོ་འདི་ལས་ཀྱང་ཡང་སྣང་བ་བྱུང་ནས་སྣང་བ་དེས་ཀྱང་ཆོས་ཀྱི་སྒོ་ཇི་ལྟ་བུ་དང་། སྤྱོད་པ་ཇི་ལྟ་བ་བཞིན་དུ་
རྗེས་སུ་འཇུག་ཅིང་རྗེས་སུ་སྤྱོད་པར་འགྱུར་བས་ཚུལ་ཇི་ལྟ་བ་བཞིན་དུ་ཏིང་ངེ་འཛིན་གྱི་སྟོབས་ཀྱིས་ཆོས་ཀྱི་སྒོ་རྣམས་ལ་སོ་སོར་རབ་ཏུ་རྟོགས་པར་བྱེད་དོ། །ཏིང་ངེ་འཛིན་གྱི་སྒོ་ནས་ཤེས་རབ་
སྐྱེས་པས་ཀྱང་དེ་ཁོ་ན་ཉིད་ཀྱི་ཚུལ་གང་ཡིན་པ་དག་རབ་ཏུ་རྟོགས་པར་འགྱུར་ཏེ། ཏིང་ངེ་འཛིན་གྱི་མཐུའི་ཕྱིར་དང་། ཆོས་ཀྱི་སྒོ་ལ་སོ་སོར་རབ་ཏུ་རྟོགས་པར་བྱེད་པའི་ཕྱིར་དང་། ཤེས་རབ་སྐྱེད་པར་

79-1-153a

བྱེད་པའི་ཕྱིར་ཏིང་ངེ་འཛིན་གྱི་སྒོ་ནས་ཆོས་ཀྱི་དབྱིངས་རྟོགས་ཤིང་ཐབས་མཁས་པ་ལ་གནས་པར་འགྱུར་བས་ཆོས་ཀྱི་སྒོའི་སྣང་བ་ཐམས་ཅད་རབ་ཏུ་སྐྱེད་པ་དང་། ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་
འཛིན་ཐམས་ཅད་ཀྱང་རབ་ཏུ་འཐོབ་པར་འགྱུར་རོ། །བློ་གྲོས་མཐའ་ཡས་ཆོས་ཀྱི་སྒོ་ཞེས་བྱ་བ་གང་ཞེ་ན། འདི་ལྟ་སྟེ་ཡི་གེ་ཨ་ཞེས་བྱ་བའི་ཕྱག་རྒྱས་བཏབ་ནས་མ་རིག་པས་མངོན་པར་འདུས་བྱས་པས་
འདུ་བྱེད་ཡོངས་སུ་རྫོགས་པར་འགྱུར་བ་གང་ཡིན་པ་ཡི་གེ་ཨ་ཞེས་བྱ་བའི་སྔོན་དུ་འགྲོ་བས་མ་རིག་པ་ཉེ་བར་ཞི་བར་བྱེད་དོ། །གནས་པར་བྱ་བ་ཅི་ཡང་མེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་
རྣམས་མཚན་མ་མེད་པའི་ཕྱག་རྒྱའི་སྒོར་འཇུག་པར་བྱའོ། །ཡི་གེ་ཨི་ཞེས་བྱ་བའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ནས་ལས་ཀྱི་རྣམ་པར་སྨིན་པའི་འབྲས་བུ་དང་། ལས་ཀྱི་བྱ་བ་དང་། ལས་དང་། འབྲས་བུ་དང་། ཚོགས་
པ་རྣམས་འགྲུབ་པར་བྱེད་པ་དང་། ལས་དང་འབྲས་བུ་དང་། ཚོགས་པ་དང་། རྐྱེན་རབ་ཏུ་རྟོགས་པར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལས་མེད་པ་དང་། འབྲས་བུ་
མེད་པ་དང་། ཚོགས་པ་མེད་པ་དང་། རྐྱེན་མེད་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་འདུ་བྱེད་རྣམས་ཀྱི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ནས་ལམ་རྣམ་པ་སྣ་ཚོགས་དང་། །
ལས་ཀྱི་བྱ་བ་དག་ལས་ཆོས་ཀྱི་ཡེ་ཤེས་ཀྱི་སྣང་བ་ཐམས་ཅད་རབ་ཏུ་སྐྱེད་པར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་རྣམས་འདུ་བྱེད་ཐམས་ཅད་ལ་ཐབས་མཁས་པའི་ཕྱག་རྒྱའི་
སྒོར་འཇུག་པར་བྱའོ། །འདི་ལྟར་ཡི་གེ་དྷ་ཞེས་བྱ་བའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ནས་ཡི་གེ་མཱ་ཞེས་བྱ་བས་མིང་དང་ཚིག་ཏུ་གདགས་པའི་གྲོགས་བྱས་པས་ཆོས་སྣ་ཚོགས་དང་མཚུངས་

79-1-153b

པར་ལྡན་པར་འགྱུར་བ་དང་། ཡི་གེ་དྷ་དང་མས་གྲོགས་བྱས་པར་རབ་ཏུ་རྟོགས་པར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདུས་པ་མེད་པ་དང་། གྲོགས་མེད་པ་དང་། མིང་མེད་པའི་ཕྱག་
རྒྱའི་སྒོར་འཇུག་པར་བྱའོ། །འདི་ལྟར་ཕྱག་རྒྱ་དཔག་ཏུ་མེད་པས་ཆོས་ཐམས་ཅད་ཕྱག་རྒྱས་བཏབ་པས་རྣམ་པར་རྟོག་པ་ཐམས་ཅད་མི་དམིགས་ཤིང་རྣམ་པར་རྟོག་པ་ཡོངས་སུ་སྤོང་བར་བྱེད་པའི་ཕྱིར་བྱང་ཆུབ་
སེམས་དཔའ་སེམས་དཔའ་ཆེན་པོ་རྣམས་རྣམ་པར་མི་རྟོག་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་མཐའ་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ནས་མཐའ་འདུས་པ་མེད་ཅིང་མཐའ་
ཡོངས་སུ་ཟད་པར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྟོག་པ་མེད་པ་དང་། དཔྱོད་པ་མེད་པ་དང་། ཚིག་མེད་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་རང་བཞིན་སྣ་ཚོགས་
མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པས་རང་བཞིན་གཅིག་གིས་མངོན་པར་འདུས་བྱས་པའི་མཚན་མ་དང་། རང་བཞིན་སྣ་ཚོགས་ཀྱི་འདུ་ཤེས་རབ་ཏུ་སེལ་བར་བྱེད་པའི་ཕྱིར་བྱང་ཆུབ་སེམས་དཔའ་
སེམས་དཔའ་ཆེན་པོ་རྣམས་རང་བཞིན་སྣ་ཚོགས་ཀྱི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་འདུན་པ་དང་། མཚུངས་པར་ལྡན་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པས་འདུས་བྱས་ཀྱི་སྤྱོད་
པ་མངོན་དུ་བྱུང་བ་རྣམས་ཡོངས་སུ་རྫོགས་པར་བྱེད་པ་དང་། འདོད་པ་སྤངས་ནས་རབ་ཏུ་དབེན་པར་གྱུར་པ་དང་། ཚོགས་པ་ཉིད་ཡོད་པ་མ་ཡིན་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདོད་
པ་ཟད་པར་བྱེད་པའི་ཤེས་པ་དང་། མཐོང་བ་དང་། ཚོགས་པ་མེད་པའི་ཕྱག་རྒྱའི་སྒོར་འཇུག་པར་བྱ་སྟེ། བློ་གྲོས་མཐའ་ཡས་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཕྱག་རྒྱའི་སྒོས་

79-1-154a

ཆོས་ཐམས་ཅད་ཕྱག་རྒྱས་བཏབ་པ་ཡིན་ཏེ། ཕྱག་རྒྱའི་སྒོ་འདིས་ཆོས་ཐམས་ཅད་ལ་རབ་ཏུ་འཇུག་པར་བྱེད་དོ། །བློ་གྲོས་མཐའ་ཡས་གཞན་ཡང་ཐོགས་པ་མེད་པའི་སྒོ་དང་། རྗེས་སུ་འཐུན་པ་མེད་
པའི་སྒོ་ཞེས་བྱ་བ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཁོང་དུ་ཆུད་པར་བྱས་ནས་རྗེས་སུ་འཇུག་པར་བྱའོ། །དེ་ལ་ཐོགས་པ་མེད་པའི་སྒོ་དང་། ཚོགས་པ་མེད་པའི་སྒོ་ཞེས་བྱ་བ་
གང་ཡིན་ཞེ་ན། འདི་ལྟ་སྟེ་ནམ་མཁའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གཉིས་སུ་མེད་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་རབ་ཏུ་
དབེན་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གཉིས་སུ་མེད་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་རབ་ཏུ་ཞི་བའི་ཕྱག་
རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རབ་ཏུ་ཞི་བའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་རྣམ་པར་ཕྱེ་བ་མེད་པའི་ཕྱག་རྒྱས་ཆོས་
ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གཡོ་བ་མེད་པའི་ཕྱག་རྒྱའི་སྒོར་འཇུག་པར་བྱའོ། འདི་ལྟར་གནས་མེད་པའི་ཕྱག་རྒྱས་ཆོས་ཐམས་ཅད་
ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀུན་ནས་ཉོན་མོངས་པ་མེད་པའི་ཕྱག་རྒྱའི་སྒོར་འཇུག་པར་བྱའོ། །ངོ་བོ་ཉིད་ཀྱི་སྟོང་པའི་ཕྱག་རྒྱས་ཆོས་ཐམས་ཅད་
ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཐོབ་པ་མེད་པའི་ཕྱག་རྒྱའི་སྒོར་འཇུག་པར་བྱའོ། །མཚན་མ་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་

79-1-154b

བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཐབས་མཁས་པས་སྒོམ་པའི་ཕྱག་རྒྱའི་སྒོར་འཇུག་པར་བྱའོ། །སྨོན་པ་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་
བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རབ་ཏུ་ཞི་བའི་སྨོན་ལམ་གྱི་སྣང་བའི་ཕྱག་རྒྱའི་སྒོར་འཇུགས་པར་བྱའོ། །འདོད་ཆགས་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་
སེམས་དཔའ་སེམས་དཔའ་ཆེན་པོ་རྣམས་རྣམ་པར་རྟོག་པ་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པའི་ཕྱག་རྒྱའི་སྒོར་འཇུག་པར་བྱའོ། །སྐྱེ་བ་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་
བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ཤེས་པ་དང་། མཐོང་བ་སྐྱེ་བ་དང་། སྐྱེ་བ་མེད་པའི་ཕྱག་རྒྱའི་སྒོར་འཇུག་པར་བྱའོ། །ཉེ་བར་ཞི་བར་འགྱུར་བའི་ཕྱག་རྒྱས་ཆོས་ཐམས་ཅད་ཕྱག་
རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཕུང་པོ་ཡོངས་སུ་སྤོང་བའི་ཕྱག་རྒྱའི་སྒོར་འཇུག་པར་བྱའོ། །མཚན་མ་ཟད་པར་བྱེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་
བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སྐྱེ་བ་ཟད་པར་བྱེད་པའི་ཕྱག་རྒྱའི་སྒོར་འཇུག་པར་བྱའོ། །ཆོས་ཀྱི་དབྱིངས་ཀྱི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་
བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དབྱིངས་རབ་ཏུ་རྟོགས་པ་ལ་མཁས་པའི་ཕྱག་རྒྱའི་སྒོར་འཇུག་པར་བྱའོ། །རྗེས་སུ་དྲན་པ་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་
པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པར་རྟོག་པ་མེད་ཅིང་མཉམ་པ་ཉིད་དུ་གྱུར་པའི་ཕྱག་རྒྱའི་སྒོར་འཇུག་པར་བྱའོ། །ངོ་བོ་ཉིད་མེད་པའི་ཕྱག་རྒྱས་ཆོས་

79-1-155a

ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རང་བཞིན་ཐམས་ཅད་ཡོངས་སུ་ཤེས་པའི་ཕྱག་རྒྱའི་སྒོར་འཇུག་པར་བྱའོ། །ཡོངས་སུ་མྱ་ངན་ལས་འདས་
པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་ཞི་བ་དང་། འགོག་པའི་རྗེས་སུ་འབྲང་བའི་ཕྱག་རྒྱའི་སྒོར་
འཇུག་པར་བྱ་སྟེ། བློ་གྲོས་མཐའ་ཡས་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཐམས་ཅད་ལ་ཐོགས་པ་མེད་པའི་སྒོ་དང་། རྗེས་སུ་འཐུན་པའི་སྒོ་དང་། རྟག་པ་དང་། ཆད་
པར་ལྟ་བ་ཐམས་ཅད་ལས་ཡང་དག་པར་འདས་པའི་སྒོ་དང་། མཐའ་མེད་པའི་སྒོ་དང་། སྔོན་དང་ཕྱི་མའི་མཐའ་མེད་པའི་སྒོ་ཡིན་ཏེ། འདི་ལྟར་ཡོངས་སུ་སྐྱོ་བར་གྱུར་པའི་ཕྱིར་དང་། འགོག་པར་
བྱེད་པའི་ཕྱིར་དང་། ཞི་བར་བྱེད་པའི་ཕྱིར་དང་བསིལ་བར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ཀྱི་ཕྱག་རྒྱའི་སྒོ་འདིའི་རྗེས་སུ་བསླབ་པར་བྱ་སྟེ། རྗེས་སུ་འཇུག་
པར་བྱ། ལེགས་པར་བསྒོམ་པར་བྱའོ། །ཆོས་ཀྱི་སྒོ་འདི་རྣམས་ཀྱིས་ནི་ཆོས་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་རབ་ཏུ་ཐོབ་པར་བྱེད་དོ། །ཏིང་ངེ་འཛིན་འདི་ཡང་དག་པ་ཇི་ལྟ་བ་བཞིན་དུ་རྗེས་སུ་ཐོབ་
པར་གྱུར་ན། ཆོས་རྣམས་ལ་ཐབས་མཁས་པའི་ཤེས་པ་ཡོངས་སུ་སྤྱོད་པར་བྱེད་དོ། །དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཕྱག་རྒྱའི་སྒོ་འདི་ལེགས་པར་བསྒོམས་ནས་ཆོས་
ཀྱི་རྒྱ་མཚོའི་ཏིང་ངེ་འཛིན་ཐམས་ཅད་ལ་གནས་ཏེ། ཆོས་ཐམས་ཅད་ལ་སོ་སོར་རབ་ཏུ་རྟོག་པར་བྱེད་ན། ཆོས་ཀྱི་སྣང་བ་ཆེན་པོ་ཚད་མེད་དཔག་ཏུ་མེད་པ་སྐྱེ་ཞིང་རབ་ཏུ་འབྱུང་བར་འགྱུར་རོ། །བློ་གྲོས་

79-1-155b

མཐའ་ཡས་འདི་ལྟ་སྟེ། དཔེར་ན་རྒྱ་མཚོ་ཆེན་པོའི་ཆུ་ནི་ཚད་མེད་པས་དེའི་ཚད་གང་གིས་ཀྱང་དཔག་པར་མི་ནུས་སོ། །དེ་བཞིན་དུ་ཆོས་ཐམས་ཅད་ཀྱང་གང་གིས་ཀྱང་དེའི་ཚད་དཔག་པར་མི་ནུས་སོ། །གཞན་ཡང་
འདི་ལྟ་སྟེ། དཔེར་ན་ཆུ་ཀླུང་ཐམས་ཅད་ནི་རྒྱ་མཚོ་ཆེན་པོར་འབབ་ཅིང་འཇུག་པར་འགྱུར་རོ། །དེ་བཞིན་དུ་ཆོས་ཐམས་ཅད་ཀྱང་ཆོས་ཀྱི་ཕྱག་རྒྱར་འཇུག་པར་འགྱུར་བས་དེའི་ཕྱིར་རྒྱ་མཚོའི་ཕྱག་རྒྱ་ཞེས་བྱ་སྟེ། ཆོས་
ཐམས་ཅད་ཕྱག་རྒྱས་བཏབ་ནས་ཆོས་རྣམས་ཀྱི་རྒྱ་མཚོའི་ཕྱག་རྒྱར་ཞུགས་པར་གྱུར་ན་ཕྱག་རྒྱ་འདིས་ཆོས་ཐམས་ཅད་ཆོས་ཀྱི་ཕྱག་རྒྱ་དང་མཚུངས་པར་མཐོང་བས་སོ། །གཞན་ཡང་འདི་ལྟ་སྟེ། དཔེར་
ན་ཀླུ་ཆེན་པོ་དང་། ཀླུའི་འཁོར་ལུས་ཆེན་པོ་དང་ལྡན་པ་རྣམས་ནི་རྒྱ་མཚོ་དང་ལྡན་ཞིང་རྒྱ་མཚོར་འཇུག་པར་ནུས་སམ། རྒྱ་མཚོ་ཆེན་པོ་དེ་དག་ལ་གནས་སུ་བྱེད་དོ། །བྱང་ཆུབ་སེམས་དཔའ་སེམས་དཔའ་
ཆེན་པོ་རྣམས་ཀྱང་དེ་བཞིན་དུ་བསྐལ་པ་བརྒྱ་སྟོང་ཚད་མེད་པ་སྙེད་དུ་ཐེག་པ་རྣམས་ལེགས་པར་བསྒོམས་པས་ཏིང་ངེ་འཛིན་གྱི་ཕྱག་རྒྱའི་སྒོ་འདིར་འཇུག་པར་ནུས་ཤིང་ཕྱག་རྒྱའི་སྒོ་འདི་ཉིད་ལ་གནས་པར་བྱེད་དེ། 
སངས་རྒྱས་ཀྱི་ཆོས་རྣམས་མངོན་དུ་བྱ་བའི་ཕྱིར་དང་། ཐམས་ཅད་མཁྱེན་པ་ལེགས་པར་ཡོངས་སུ་རྫོགས་པར་བྱ་བའི་ཕྱིར་ཆོས་རྣམས་ཀྱིས་ཕྱག་རྒྱའི་སྒོ་དེ་ལྟ་བུ་དག་མངོན་པར་སྒྲུབ་པར་བྱེད་དོ། །བྱང་ཆུབ་
སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་སྒོ་འདི་ནན་ཏན་གྱིས་སྒྲུབ་པར་བྱེད་ན་ཆོས་ཐམས་ཅད་ཀྱི་སྒོ་ལ་ཡང་དག་པར་སློབ་པར་འགྱུར་རོ། །ཆོས་ཀྱི་སྒོ་རྣམས་ཆོས་ཀྱི་སྒོ་འདིར་འདུ་བར་
མཐོང་བའི་ཕྱིར་ཆོས་ཀྱི་སྣང་བ་རྣམས་བསྐྱེད་ནས་ཆོས་ཀྱི་རྒྱ་མཚོ་ཐམས་ཅད་དུ་འཇུག་པར་འགྱུར་བས་དེའི་ཕྱིར་ཆོས་ཀྱི་རྣམ་གྲངས་འདི་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཅེས་

79-1-156a

བྱའོ། །གཞན་ཡང་འདི་ལྟ་སྟེ། དཔེར་ན་རྒྱ་མཚོ་ཆེན་པོ་ནི་རིན་པོ་ཆེ་ཆེན་པོ་རྣམས་འདུ་བའི་གནས་སུ་གྱུར་པ་ཡིན་ནོ། །ཏིང་ངེ་འཛིན་འདི་ཡང་དེ་བཞིན་དུ་ཆོས་ཐམས་ཅད་དང་། ཆོས་ལ་ཐབས་མཁས་པ་རྣམས་
འདུ་བའི་གནས་སུ་གྱུར་པ་ཡིན་ནོ། །བློ་གྲོས་མཐའ་ཡས་སེམས་ཅན་གང་ལ་ལ་ཞིག་སངས་རྒྱས་ཀྱི་མཁྱེན་པ་དང་། གཟིགས་པ་བླ་ན་མེད་པ་འཐོབ་པར་བྱ་བའི་ཕྱིར་ཏིང་ངེ་འཛིན་འདི་ཡོངས་སུ་ཚོལ་བར་གྱུར་
པ་དང་། ཡོངས་སུ་ཚོལ་བར་འགྱུར་བ་དང་། ཡོངས་སུ་ཚོལ་བར་བྱེད་པ་དེ་དག་ནི་ཆོས་ཀྱི་རྒྱ་མཚོ་ཡོངས་སུ་རྫོགས་པའི་ཤེས་རབ་ཐམས་ཅད་ཡོངས་སུ་ཚོལ་བར་བྱེད་པ་ཡིན་པས་དོན་དེའི་ཕྱིར་ངས་ཆོས་ཀྱི་
ཕྱག་རྒྱ་འདི་ཁྱོད་ལ་གཏད་པ་ཡིན་གྱིས་ཁྱོད་ཀྱིས་ཀྱང་མ་འོངས་པའི་དུས་ལྔ་བརྒྱ་ཐ་མ་ལ་ཡང་དག་པའི་ཆོས་འཇིག་པར་འགྱུར་བའི་ཚེ་ཆོས་ཀྱི་ཕྱག་རྒྱ་འདིས་སེམས་ཅན་རྣམས་ལ་ཡོངས་སུ་གདབ་པར་བྱའོ། །
ཆོས་ཀྱི་ཕྱག་རྒྱ་འདིས་གང་ལ་བཏབ་པར་གྱུར་ན་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པར་མི་འགྱུར་ཞིང་སངས་རྒྱས་ཀྱི་ཆོས་ཡོངས་སུ་རྫོགས་པར་བྱེད་པས་
མྱུར་དུ་བྱང་ཆུབ་ཀྱི་སྙིང་པོར་འགྲོ་བ་དང་། བླ་ན་མེད་པའི་ཆོས་ཀྱི་འཁོར་ལོ་བསྐོར་བ་དང་། སངས་རྒྱས་ཀྱི་གདུང་བསབ་པ་དང་། ཐམས་ཅད་མཁྱེན་པའི་ས་ལ་རྗེས་སུ་མཐུན་པར་གནས་པ་དང་། བླ་ན་མེད་
པའི་ཡོངས་སུ་མྱ་ངན་འདས་པ་ཆེན་པོས་ཡོངས་སུ་མྱ་ངན་ལས་འདས་པ་དང་། ལྷ་དང་མི་རྣམས་ཀྱང་ཡང་དག་པའི་ཆོས་ཡོངས་སུ་འཛིན་པ་ལ་གཟུང་བར་བྱེད་དོ། །བློ་གྲོས་མཐའ་ཡས་བྱང་ཆུབ་
སེམས་དཔའ་སེམས་དཔའ་ཆེན་པོ་གང་ཡོན་ཏན་ཁྱད་པར་དུ་འཕགས་པ་དེ་ལྟ་བུ་ཡོངས་སུ་སྡུད་པར་འདོད་པ་དེས་ཆོས་ཟབ་མོ་འདི་ལ་ནན་ཏན་གྱིས་བསླབ་པར་བྱ་ཞིང་བག་ཡོད་པ་དང་ལྡན་པར་བྱའོ།།

79-1-156b

གཞན་ཡང་བློ་གྲོས་མཐའ་ཡས་ངས་མངོན་པར་དྲན་ཏེ། སྔོན་འདས་པའི་དུས་བསྐལ་པ་གྲངས་མེད་པའི་ཡང་ཆེས་གྲངས་མེད་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རི་རབ་ཀྱི་འོད་ལས་
ཡང་དག་པར་འདས་པའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། བསྐལ་པའི་མིང་ནི་དགེ་བ་ལ་གནས་པ་ཞེས་བྱའོ། །འཇིག་རྟེན་གྱི་ཁམས་ནི་ཡིད་དགའ་བར་བྱེད་པ་ཞེས་བྱའོ། །བསྐལ་པ་དེའི་སེམས་
ཅན་རྣམས་ཚེ་རིང་ཞིང་ཚེའི་ཚད་མེད་པ་དང་། རབ་ཏུ་བདེ་ཞིང་འབྱོར་བ་དང་ལྡན་པ་དང་། དགེ་བའི་ཆོས་ལ་རབ་ཏུ་གནས་པས་དེའི་ཕྱིར་བསྐལ་པ་དེའི་མིང་དགེ་བ་ལ་གནས་པ་ཞེས་བྱའོ། །སངས་རྒྱས་ཀྱི་
ཞིང་དེ་ཡངས་ཤིང་རྒྱ་ཆེ་བ་དང་། ཤིན་དུ་མཛེས་པས་མཐོང་བ་རྣམས་ཡིད་བདེ་ཞིང་དགའ་བར་བྱེད་པ་དང་། སྤོས་ཀྱི་ངད་དང་ལྡན་པར་ཀུན་དུ་ཁྱབ་པར་བྱེད་པས་དེའི་ཕྱིར་འཇིག་རྟེན་གྱི་ཁམས་དེ་ཡིད་དགའ་
བར་བྱེད་པ་ཞེས་བྱའོ། །དེའི་ཚེ་གླིང་བཞི་ལས་གླིང་གསུམ་གྱི་ཚད་མཉམ་སྟེ། དཔག་ཚད་བརྒྱད་ཁྲི་བརྒྱད་ཁྲི་ཡོད་དོ། །གླིང་རེ་རེ་ན་ཡང་གྲོང་ཁྱེར་ཉི་ཁྲི་ཉི་ཁྲི་ཡོད་དེ། གྲོང་ཁྱེར་རེ་རེ་འི་ཚད་ཀྱང་དཔག་ཚད་བཅུ་བཅུ་
ཡོད་དོ། །འཛམ་བུའི་གླིང་གི་ཚད་ནི་དཔག་ཚད་བྱེ་བ་ཡོད་དོ། །དེ་ན་གྲོང་ཁྱེར་བརྒྱད་ཁྲི་ཡོད་དོ། །གྲོང་ཁྱེར་རེ་རེའི་ཚད་ཀྱང་དཔག་ཚད་ཉི་ཤུ་ཉི་ཤུ་ཡོད་དོ། །དེ་དག་ཀྱང་གཞལ་མེད་ཁང་བརྩེག་མ་དང་། ར་བས་འཁོར་
བར་བསྐོར་བ། གོས་སྣ་ཚོགས་འབྱུང་བའི་ཤིང་ལྗོན་པ་དང་། རོ་སྣ་ཚོགས་འབྱུང་བའི་ཤིང་ལྗོན་པ་དང་། མེ་ཏོག་སྣ་ཚོགས་ཀྱི་ཤིང་ལྗོན་པ་དང་། རིན་པོ་ཆེའི་ཤིང་ཏ་ལ་དག་གིས་རབ་ཏུ་བརྒྱན་པ། 

79-1-157a

ཡུལ་བདེ་ཞིང་མིས་རབ་ཏུ་གང་བར་གྱུར་ཏོ། །དེ་ན་གྲོང་ཁྱེར་མཆོག་ཏུ་ཆེ་བ་དཔག་ཚད་བརྒྱས་འཁོར་བ་ཡོད་དེ། དེ་ཡང་བསྐྱེད་མོས་ཚལ་ཉི་ཁྲིས་འཁོར་བར་བསྐོར་བ། བསྐྱེད་མོས་ཚལ་དེ་ཀུན་དུ་ཡང་
འབབ་ཆུ་དག་རབ་ཏུ་འབབ་ཅིང་མེ་ཏོག་དང་། འབྲས་བུ་དག་རབ་ཏུ་རྒྱས་པ། སྤོས་མཆོག་དམ་པའི་ངད་ལྡང་བས་ཡིད་དགའ་བར་བྱེད་པ། བྱ་དང་རི་དགས་རྣམས་སྒྲ་སྙན་པ་འབྱིན་པས་རབ་ཏུ་གང་བར་གྱུར་ཏོ། །དེའི་ཚེ་
དེ་བཞིན་གཤེགས་པ་དེ་བསྐྱེད་མོས་ཚལ་དེ་གཅིག་ཏུ་བཞུགས་ནས་འཁོར་རྣམས་ལ་ཆོས་བསྟན་པར་གྱུར་ཏོ། །བློ་གྲོས་མཐའ་ཡས་དེ་བཞིན་གཤེགས་པ་རི་རབ་ཀྱི་འོད་ལས་ཡང་དག་པར་འདས་པའི་རྒྱལ་པོའི་
སྐུ་ཚེའི་ཚད་ནི་བསྐལ་པ་ཆུང་ངུ་བཅུ་ཐུབ་པར་གྱུར་ཏོ། །ཡོངས་སུ་མྱ་ངན་ལས་འདས་པའི་འོག་ཏུ་ཡང་དག་པའི་ཆོས་ནི་བསྐལ་པ་ཆུང་ངུ་གཅིག་གི་བར་དུ་འཇིག་རྟེན་དུ་གནས་པར་གྱུར་ཏོ། །དེ་བཞིན་
གཤེགས་པ་དེས་འཁོར་འདུས་པ་ལ་ལན་བཞིར་ཆོས་བསྟན་ཏེ། འཁོར་འདུས་པ་རེ་རེ་ལ་ཡང་ཉན་ཐོས་སློབ་པའི་ས་ལ་གནས་པ་བྱེ་བ་ཁྲག་ཁྲིག་ཕྲག་ལྔ་ཡོད་དོ། །དགྲ་བཅོམ་པ་དང་། བྱང་ཆུབ་སེམས་
དཔའི་འཁོར་ནི་བྱེ་བ་ཁྲག་ཁྲིག་ཕྲག་ལྔ་བཅུ་ལྔ་བཅུ་ཡོད་དོ། །དེའི་ཚེ་དེ་བཞིན་གཤེགས་པ་དེ་ལ་བྱང་ཆུབ་སེམས་དཔའ་གཉིས་ཡོད་དོ། །གཅིག་གི་མིང་ནི་དཔའ་བོའི་སྡེ་ཞེས་བྱའོ། །གཅིག་གི་མིང་ནི་དཔའ་
བོའི་སྟོབས་ཤེས་བྱ་སྟེ། བྱང་ཆུབ་སེམས་དཔའ་དེ་གཉིས་ཀྱང་རྫུ་འཕྲུལ་དང་ལྡན་ཞིང་མི་སྐྱེ་བའི་ཆོས་ལ་བཟོད་པ་ཐོབ་པ་ཡིན་པས་བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
ཆོས་ཇི་ལྟ་བུ་ཞིག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་ཡོངས་སུ་རྫོགས་པར་བགྱིད་པར་འགྱུར་ལགས། དེ་ནས་

79-1-157b

དེ་བཞིན་གཤེགས་པ་དེས་ཚིག་གི་རྣམ་གྲངས་འདི་རྒྱ་ཆེར་ཡང་དག་པར་རབ་ཏུ་བསྟན་ཏོ། །འདི་ཡང་དག་པར་རབ་ཏུ་བསྟན་པ་ན་བྱང་ཆུབ་སེམས་དཔའ་སྟོང་ཕྲག་བཅུ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །
བྱང་ཆུབ་སེམས་དཔའ་དེ་གཉིས་ཀྱིས་ནི་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་དང་། བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་ཐོབ་པར་གྱུར་ཏོ། །ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་
རྣམས་དང་། བྱང་ཆུབ་སེམས་དཔའི་ཏིང་ངེ་འཛིན་རྣམས་མངོན་དུ་གྱུར་པའི་ཕྱིར་སངས་རྒྱས་ཀྱི་ཞིང་ཐམས་ཅད་དུ་རྫུ་འཕྲུལ་ཆེན་པོ་བསྟན་པ་དང་། འོད་ཟེར་ཆེན་པོ་བཀྱེ་བ་དང་། ཚངས་པའི་སྒྲ་ཤིན་དུ་གྱ་ནོམ་པ་
བསྒྲགས་ནས་སེམས་ཅན་རྣམས་ལ་ཡང་དག་པའི་ཆོས་བསྟན་ཅིང་ཡོངས་སུ་སྨིན་པར་བྱས་པས་སྲོག་ཆགས་བྱེ་བ་ཕྲག་བརྒྱད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་གྱུར་ཏོ། །
དེ་ནས་དེ་བཞིན་གཤེགས་པ་དེས་འདི་སྐད་དུ་ཁྱེད་བསྐལ་པ་བརྒྱ་འདས་པའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། བསྐལ་པ་དེ་རེ་རེ་ལ་ཡང་
དེ་བཞིན་གཤེགས་པ་ལྔ་བརྒྱ་ལྔ་བརྒྱ་ལ་མཆོད་པ་དང་། རིམ་གྲོ་བྱེད་པ་དང་། དེ་བཞིན་གཤེགས་པ་དེ་དག་གིས་དུས་པར་མར་གསུངས་པའི་ཆོས་ཡང་དག་པ་གང་ཡིན་པ་དང་། དུས་ཐ་མར་གསུངས་པའི་
ཆོས་ཡང་དག་པ་གང་ཡིན་པ་དེ་དག་ཀྱང་མ་ལུས་པར་ཡོངས་སུ་བཟུང་ནས་སེམས་ཅན་རྣམས་ལ་ཕན་པ་ཆེན་པོ་བྱེད་པར་འགྱུར་རོ། །བསྐལ་པ་རེ་རེ་ལ་ཡང་སེམས་རྩེ་གཅིག་ཏུ་གྱུར་ཅིང་རྣམ་པར་གཡེང་བ་མེད་
པས་སྐྱེ་བ་ཐམས་ཅད་དུ་ཡང་རྫུས་ཏེ་སྐྱེ་བར་འགྱུར་རོ། །སྐྱེ་བ་ཐམས་ཅད་དུ་ཡང་ཏིང་ངེ་འཛིན་ལས་ལྡོག་པར་མི་འགྱུར་ཞིང་རྫུ་འཕྲུལ་གྱིས་ཆོས་སྟོན་པས་སེམས་ཅན་མང་པོ་རྣམས་ཡོངས་སུ་ཟློས་པར་

79-1-158a

འགྱུར་རོ། །བསྐལ་པ་བརྒྱ་འདས་ནས་གཞན་ཡང་དེ་བཞིན་གཤེགས་པ་ཡོན་ཏན་དཔག་ཏུ་མེད་པ་ཞེས་བྱ་བ་ལ་མཆོད་པ་དང་། རིམ་གྲོ་བྱས་པས་ཏིང་ངེ་འཛིན་དང་། རྫུ་འཕྲུལ་དང་། རྣམ་པར་ཐར་པ་ཚད་མེད་པ། 
རྣམས་ལ་རྣམ་པར་རྩེན་པར་འགྱུར་རོ། །ཞེས་ལུང་བསྟན་ཏོ། །བྱང་ཆུབ་སེམས་དཔའ་དེ་གཉིས་དེ་བཞིན་གཤེགས་པ་དེ་དང་ཕྲད་པར་གྱུར་པའི་ཚེ་གཅིག་གི་མིང་ནི་མྱ་ངན་མེད་པ་ཞེས་བྱའོ། །གཅིག་གི་མིང་ནི་རབ་ཏུ་གནས་པ་
ཞེས་བྱ་སྟེ། དེ་བཞིན་གཤེགས་པའི་རྗེས་སུ་ཆོས་ཀྱི་འཁོར་ལོ་བསྐོར་ནས་སེམས་ཅན་ཚད་མེད་གྲངས་མེད་པ་རྣམས་བཏུལ་ཏེ། ཐེག་པ་གསུམ་པོ་དག་ལ་རབ་ཏུ་བཀོད་པས་དེའི་ཚེ་དེ་བཞིན་གཤེགས་པ་དེས་ཀྱང་འདི་
སྐད་དུ་ང་ཡོངས་སུ་མྱ་ངན་ལས་འདས་པའི་འོག་ཏུ་མྱ་ངན་མེད་པ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་སྤོབས་པ་དཔག་ཏུ་མེད་པ་
ཞེས་བྱ་བར་འགྱུར་རོ། །དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་པའི་འོག་ཏུ་རབ་ཏུ་གནས་པ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། 
དེ་བཞིན་གཤེགས་པ་འོད་ཟེར་ཁྱད་པར་དུ་འཕགས་པ་ཞེས་བྱ་བར་འགྱུར་རོ། །དེ་བཞིན་གཤེགས་པ་དེ་དག་གི་སྐུ་ཚེའི་ཚད་ཀྱང་བསྐལ་པ་རེ་རེ་ཐུབ་པར་འགྱུར་ཏེ། སངས་རྒྱས་ཀྱི་ཞིང་དེ་དག་ཀྱང་ཡོན་ཏན་
ཚད་མེད་པ་བསགས་པ་ལས་མངོན་པར་གྲུབ་པ་ཡིན་ནོ། །ཞེས་ལུང་བསྟན་ཏོ། །བྱང་ཆུབ་སེམས་དཔའ་དེ་གཉིས་ཀྱང་དེ་བཞིན་གཤེགས་པའི་སྤྱན་སྔར་ལུང་བསྟན་པ་ཐོབ་པས་རིམ་གྱིས་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ཏོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་

79-1-158b

ཐམས་ཅད་འཐོབ་པར་འདོད་པས་རབ་ཏུ་དགའ་བ་དང་། བརྩོན་འགྲུས་ཆེན་པོ་བསྐྱེད་ནས་ལུས་དང་སྲོག་ལ་འཕངས་པ་མེད་པ་དང་། བག་ཡོད་པས་མངོན་པར་བསྒྲུབ་པར་བྱའོ། །དེ་ནས་དེའི་ཚེ་འཁོར་འདུས་པ་
དེ་ཉིད་དུ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དོན་གྱི་བློ་གྲོས་ཤེས་བྱ་བ་འདུས་པར་གྱུར་པ་དེ་འདུག་པ་སྟན་ལས་ལངས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ཀྱི་ཡེ་ཤེས་ལ་ཐབས་མཁས་པ་འཐོབ་པར་བགྱི་བ་དང་། དེ་བཞིན་གཤེགས་པའི་ཐམས་ཅད་མཁྱེན་པ་ཐོབ་པར་བགྱི་བའི་
སླད་དུ་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་ཡང་དག་པར་གསུངས་པ་ནི་ངོ་མཚར་ཆེ་ལགས་སོ། །བཅོམ་ལྡན་འདས་གལ་ཏེ་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་རྣམས་
ཐོབ་པར་གྱུར་ན་གདོན་མི་མཚལ་བར་ཆོས་རྣམས་ཀྱི་ཚུལ་ལ་ཐབས་མཁས་པ་ཐོབ་ནས་མྱུར་དུ་བྱང་ཆུབ་ཀྱི་སྙིང་པོར་མཆི་བར་འགྱུར་བས་ཡོན་ཏན་གྱི་རྒྱ་མཚོ་དཔག་ཏུ་མ་མཆིས་པ་འདིས་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བགྱིད་པ་དང་། རྟག་ཏུ་སངས་རྒྱས་རྣམས་མཐོང་ཞིང་ནན་ཏན་གྱིས་ཆོས་ཡང་དག་པར་མངོན་པར་བསྒྲུབ་པ་དང་། དགེ་འདུན་དང་སྤྱོད་
པ་མཚུངས་པས་དེ་བཞིན་གཤེགས་པའི་མཆོད་པ་ཆེན་པོ་ཡོངས་སུ་སྦྱོང་བར་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ས་ལས་ཡང་དག་པར་འདའ་བར་འགྱུར་ལགས་སོ། །དེ་ནས་
བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དོན་གྱི་བློ་གྲོས་ལ་འདི་སྐད་ཅེས་བཀའ་སྩལ་ཏོ། །དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱི་ཇི་སྐད་སྨྲས་པ་དེ་བཞིན་དུ་དོན་

79-1-159a

གྱི་བློ་གྲོས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་ཐོབ་པར་གྱུར་ན་ཡོན་ཏན་ཁྱད་པར་དུ་འཕགས་པ་ཚད་མེད་པ་རྣམས་རབ་ཏུ་འཐོབ་
པར་འགྱུར་རོ། །གལ་ཏེ་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་རྣམས་ལ་གནས་པར་གྱུར་ན་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་རྣམས་ལ་ཐབས་མཁས་པས་གདོན་མི་ཟ་བར་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་རོ། །དོན་གྱི་བློ་གྲོས་འདི་ལྟ་སྟེ། དཔེར་ན་རིའི་རྒྱལ་པོ་རི་རབ་ནི་རིན་པོ་ཆེ་སྣ་ཚོགས་ལས་མངོན་པར་གྲུབ་པ་རྒྱ་མཚོ་ཆེན་པོ་ལས་དཔག་
ཚད་བརྒྱད་ཁྲི་བཞི་སྟོང་གིས་གྱེན་དུ་འཕགས་ཤིང་མཆོག་ཏུ་གསལ་བར་གནས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་དེ་བཞིན་དུ་ཏིང་ངེ་འཛིན་འདིས་ལེགས་པར་གཞོལ་བར་
བྱེད་པའི་ཕྱིར་ཆོས་ཀྱི་གཏེར་གྱི་རྒྱ་མཚོ་ཆེན་པོ་ཐམས་ཅད་ལས་མངོན་པར་འཕགས་ནས་ལྷ་དང་མིར་བཅས་པའི་འཇིག་རྟེན་ཐམས་ཅད་ཟིལ་གྱིས་གནོན་ཅིང་བླ་ན་མེད་པའི་གནས་པས་མཆོག་ཏུ་གསལ་
བར་གནས་སོ། །གཞན་ཡང་འདི་ལྟ་སྟེ། དཔེར་ན་ཟླ་བའི་དཀྱིལ་འཁོར་ནི་སྐར་མའི་ཚོགས་མང་པོས་ཡོངས་སུ་བསྐོར་བ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་དེ་
བཞིན་དུ། ལྷ་དང་མིར་བཅས་པའི་འཇིག་རྟེན་གྱི་འཁོར་འདུས་པ་ཆེན་པོ་ཐམས་ཅད་དུ་རབ་ཏུ་གསལ་བར་གནས་སོ། །དོན་གྱི་བློ་གྲོས་ཁྱོད་ཀྱིས་ཆོས་འདི་ཐོས་པར་གྱུར་ན་འདི་ལས་སུ་ཡང་
མི་དགའ་ཞིང་མོས་པ་མི་སྐྱེ་བ་འམ། བརྩོན་འགྲུས་མི་སྐྱེད་པ་འམ། བག་ཡོད་པ་དང་བཅས་པར་མི་འགྱུར་བ་གང་ཡང་མེད་པར་བལྟ་བར་བྱ་སྟེ། སེམས་ཅན་བསོད་ནམས་ཆུང་ཞིང་དམན་པ་ལ། 

79-1-159b

མོས་པ་ནི་མ་གཏོགས་སོ། །སེམས་ཅན་གང་ཤེས་རབ་ཆེན་པོ་དང་ལྡན་པ་དག་གིས་ནི་ཆོས་རྒྱ་ཆེན་པོ་འདི་མངོན་པར་སྒྲུབ་པར་བྱེད་ལ། ཆོས་རྒྱ་ཆེན་པོ་མངོན་པར་སྒྲུབ་པ་གང་ཡིན་པ་དེ་དག་ནི་ཡོན་
ཏན་ཕུན་སུམ་ཚོགས་པའི་སྐྱེས་བུ་དམ་པ་རྣམས་ཀྱིས་ཡོངས་སུ་གཟུང་བར་འགྱུར་ཏེ། ངས་ཇི་སྐད་དུ་གང་གིས་ཆོས་ཀྱི་ནོར་རྒྱ་ཆེན་པོ་འདི་ཡོངས་སུ་འཛིན་པར་བྱེད་པ་དེ་དག་ནི་ལྷ་དང་མི་རྣམས་ཀྱིས་
ཡོངས་སུ་བསྲུང་ཞིང་རིམ་གྲོ་བྱེད་པ་དང་། ཕྱོགས་བཅུའི་སངས་རྒྱས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་རྗེས་སུ་དགོངས་པར་འགྱུར་རོ་ཞེས་བསྟན་པ་ལྟ་བུའོ། །དེ་ནས་
བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་སྩལ་ཏོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་
གང་ཆོས་ཀྱི་རྣམ་གྲངས་འདི་ལ་ནན་ཏན་གྱིས་སྒྲུབ་ཅིང་སློབ་པར་བྱེད་པ་དེ་དག་ནི་སེམས་ཅན་རྣམས་ལ་ཕན་པ་ཆེན་པོ་བྱེད་ཅིང་ཐེ་ཚོམ་ཐམས་ཅད་རབ་ཏུ་སེལ་བ་དང་། མདུད་པ་ཐམས་ཅད་
རབ་ཏུ་དགྲོལ་བ་དང་། བག་ཆགས་རྣམས་སྤོང་བ་དང་། བག་ལ་ཉལ་བ་རྣམས་གཅོད་པ་དང་། སྲིད་པའི་དགའ་བ་རྣམས་ལས་ཡང་དག་པར་འདས་པ་དང་། སྲིད་པའི་རྒྱ་མཚོ་ལས་ཡང་དག་པར་རྒལ་
བ་དང་། མུན་ནག་རྣམས་གཏན་ཏུ་བསལ་བ་དང་། སྐྲག་ཅིང་འཇིགས་པ་རྣམས་རབ་ཏུ་སྤོང་བ་དང་། ཐབས་མཁས་པས་སེམས་ཅན་ཐམས་ཅད་ཀྱི་སེམས་རབ་ཏུ་ཤེས་པར་འགྱུར་རོ། །
དེ་ནས་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་འོད་ཟེར་ཆེན་པོ་བཀྱེ་བས་འོད་ཟེར་དེས་འཇིག་རྟེན་གྱི་ཁམས་གྲངས་མེད་པ་གསལ་བར་མཛད་ཅིང་ཉི་མ་དང་ཟླ་བའི་འོད་ཟེར་ཐམས་ཅད་

79-1-160a

ཀྱང་ཟིལ་གྱིས་མནན་ཏོ། །འོད་ཟེར་བཀྱེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་སྩལ་ཏོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་
ཆེན་པོ་གང་རྒྱ་མཚོའི་ཕྱག་རྒྱའི་ཏིང་ངེ་འཛིན་འདི་ལ་ནན་ཏན་གྱིས་སྒྲུབ་པར་བྱེད་པ་དེ་དག་ཀྱང་དེ་བཞིན་དུ་རྫུ་འཕྲུལ་ཆེན་པོ་རབ་ཏུ་སྟོན་ཅིང་འོད་ཟེར་ཆེན་པོ་འགྱེད་པ་དང་། སེང་གེའི་སྒྲ་ཆེན་པོ་བསྒྲགས་
ནས་ཆོས་འདི་ཡང་དག་པར་སྟོན་པར་བྱེད་པས་ཁམས་གསུམ་ལས་ཡང་དག་པར་འདས་ཤིང་སྣང་བ་ཆེན་པོ་བྱེད་པར་འགྱུར་ཏེ། དེ་དང་ཇི་ལྟ་བ་བཞིན་པས་བྱེ་བྲག་ཏུ་གྱུར་པ་ཅི་ཡང་མེད་དོ། །དེ་ནས་བཅོམ་ལྡན་
འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་ཆོས་ཀྱིས་རྣམ་གྲངས་འདི་བྱིན་གྱིས་བརླབས་ནས་སླད་
མའི་དུས་ཀྱི་ཚེ་སེམས་ཅན་གང་དག་ཆོས་ཀྱི་རྣམ་གྲངས་འདིའི་མིང་ཐོས་པ་ཙམ་གྱིས་ཀྱང་ཡོན་ཏན་དཔག་ཏུ་མ་མཆིས་པ་ཐོབ་པར་འགྱུར་བར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་ཆོས་ཀྱི་
རྣམ་གྲངས་འདི་བྱིན་གྱིས་བརླབ་པའི་ཕྱིར་ཡང་འོད་ཟེར་ཆེན་པོ་རབ་ཏུ་བཀྱེ་འོ། །གཞན་ཡང་ཕྱག་སོར་གཅིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་ཁམས་རྣམས་རབ་ཏུ་གཡོ་བར་མཛད་པས་
སེམས་ཅན་རྣམས་བདེ་བ་ཆེན་པོ་ཐོབ་པར་གྱུར་ཏོ། །དེའི་ཚེ་འཁོར་དེར་འདུས་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་ཕྱེ་ཆེན་པོ་ལ་
སོགས་པའི་འཁོར་རྣམས་ཀྱིས་ལྷའི་མེ་ཏོག་དམ་པ་དང་། ལྷའི་གོས་དམ་པ་དག་གིས་མངོན་པར་གཏོར་ནས་དུས་གཅིག་ཏུ་ལྷའི་རོལ་མོ་རྣམས་བྱས་སོ། །ལྷ་ཚད་མེད་པ་རྣམས་ཀྱིས་ཀྱང་

79-1-160b

ལྷའི་གོས་རྒྱང་ནས་མངོན་པར་གཏོར་བས་ནམ་མཁའ་ཀུན་དུ་གང་བར་གྱུར་ཏེ། སྐད་འཐུན་པར་འདི་སྐད་དུ་ཀྱེ་མ་སངས་རྒྱས་རྣམས་ཀྱི་སྤྱོད་ཡུལ་ནི་བསམ་གྱིས་མི་ཁྱབ་བོ། །གང་གིས་ཆོས་ཟབ་མོ་འདི་ཡོངས་སུ་
འཛིན་པར་བྱེད་པ་དེ་དག་ནི་སེམས་ཅན་ཐམས་ཅད་ཀྱིས་གུས་པར་མཆོད་ཅིང་ཕྱག་བྱ་བའི་འོས་སུ་གྱུར་པར་རིག་པར་བྱའོ། །ཞེས་སྨྲས་སོ། །དེ་ནས་བཅོམ་ལྡན་འདས་ཀྱིས་ཡང་བྱང་ཆུབ་སེམས་དཔའ་སེམས་
དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་སྩལ་ཏོ། །བློ་གྲོས་མཐའ་ཡས་མ་འོངས་པའི་དུས་ན་གང་བསོད་ནམས་ཆུང་བའི་སེམས་ཅན་དེ་དག་གིས་ནི་གོ་ཆའི་བཀོད་པ་དང་། ཏིང་ངེ་འཛིན་གྱི་
བཀོད་པ་འདི་ཐོས་པར་མི་འགྱུར་གྱི། སེམས་ཅན་གང་ཐབས་མཁས་པ་དང་ལྡན་པ་དང་། ཚོགས་ཆེན་པོ་ཡོངས་སུ་སྡུད་པ་གང་ཡིན་པ་དེ་དག་གིས་མ་འོངས་པའི་དུས་ན་ཆོས་འདི་ཐོས་པར་འགྱུར་རོ། །
ཆོས་འདི་ལ་གང་གིས་ནན་ཏན་དུ་སྒྲུབ་པར་བྱེད་པ་དེ་དག་ནི་དུས་གསུམ་གྱི་སངས་རྒྱས་བཅོམ་ལྡན་འདས་ཀྱིས་ཡོངས་སུ་བཟུང་བར་འགྱུར་རོ། །བློ་གྲོས་མཐའ་ཡས་མ་འོངས་པའི་དུས་ན་འཇིགས་པ་
ཆེན་པོ་འབྱུང་བའི་ཚེ་ངའི་ཆོས་ཀྱི་རྣམ་གྲངས་འདི་ཁྱོད་ལ་སོགས་པ་ལ་ཡོངས་སུ་གཏད་དོ། །ངས་བསྐལ་པ་བྱེ་བ་ཁྲག་ཁྲིག་གྲངས་མེད་པ་ནས་བླ་ན་མེད་པའི་ཆོས་ཀྱི་གཏེར་རབ་ཏུ་བསགས་པས་ཡོན་ཏན་ཕུན་
སུམ་ཚོགས་པ་དང་། དཔག་ཏུ་མེད་པའི་བདེ་བ་ཐོབ་པ་གང་ཡིན་པ་དེ་དག་ཁྱོད་ཀྱིས་ཀྱང་འཐོབ་པར་འགྱུར་གྱིས་སྡུག་བསྔལ་གྱི་ཕུང་པོ་ཐམས་ཅད་ཁྱོད་ཀྱིས་རབ་ཏུ་སྤངས་ཏེ་ཡོན་ཏན་གྱི་རྒྱ་མཚོ་དཔག་ཏུ་
མེད་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ། བློ་གྲོས་མཐའ་ཡས་བྱང་ཆུབ་སེམས་དཔའ་

79-1-161a

སེམས་དཔའ་ཆེན་པོ་ལྔ་བརྒྱ་དང་བཅས་པ་དང་། ཁྱིམ་བདག་མ་སྨད་པ་དང་། ཚོང་དཔོན་བཟང་སྐྱོང་ལ་སོགས་པ་གཙོ་བོར་གྱུར་པ་རྣམས་ཀྱིས་བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་
འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་མཐུ་ཅི་མཆིས་པས་དེ་བཞིན་གཤེགས་པའི་བྱང་ཆུབ་ཆེན་པོའི་ཆོས་ཡོངས་སུ་བཟུང་ནས་སླད་མའི་དུས་ཀྱི་ཚེ་སེམས་ཅན་རྣམས་ལ་
ཕན་གདགས་པར་བགྱིའོ་ཞེས་གསོལ་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདུག་པ་སྟན་ལས་ལངས་ཏེ། མེ་ཏོག་རྣམ་པ་སྣ་ཚོགས་ཀྱིས་དེ་བཞིན་གཤེགས་པ་ལ་
མངོན་པར་གཏོར་ནས་ལུས་ཀྱི་གོས་མཆོག་དམ་པ་ཕུད་དེ། མཆོད་པ་བྱས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ནི་དགེ་བའི་རྩ་བ་འདིས་སེམས་ཅན་ཐམས་ཅད་ལ་ཡོངས་སུ་
བསྔོ་སྟེ། སེམས་ཅན་རྣམས་བྱང་ཆུབ་ཀྱི་ཕྱོགས་ཀྱི་ཆོས་ཕུན་སུམ་ཚོགས་པ་འཐོབ་པར་འགྱུར་བ་དང་། དེ་བཞིན་གཤེགས་པའི་ཐམས་ཅད་མཁྱེན་པའི་ཡེ་ཤེས་མངོན་པར་སྒྲུབ་པར་འགྱུར་བ་དང་། 
སླད་མའི་དུས་ཀྱི་ཚེ་སེམས་ཅན་ཐམས་ཅད་ཀྱི་དགེ་བའི་རྩ་བ་ཇི་སྙེད་པ་དེ་དག་ཡོངས་སུ་རྫོགས་པར་འགྱུར་བར་སྨོན་ལམ་འདེབས་ལགས་སོ། །དེ་སྐད་ཅེས་གསོལ་བ་དང་། དེ་ནས་དེའི་ཚེ་བཅོམ་
ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རབ་ཏུ་དགའ་བ་བསྐྱེད་པའི་ཕྱིར་ཚིགས་སུ་བཅད་དེ་བཀའ་སྩལ་པ། སེམས་ཅན་ཐམས་ཅད་ཀུན་ལ་ནི། །ཕན་པ་ཆེན་
པོ་བྱ་བའི་ཕྱིར། །ང་ཡི་བྱང་ཆུབ་ཆོས་བཟུང་ནས། །ཆོས་རྒྱལ་སེང་གེའི་སྒྲ་སྒྲོགས་ཤིང་། །མ་འོངས་ཐ་མའི་དུས་ཀྱི་ཚེ། །གང་ཞིག་ཆོས་ནི་ཡོངས་ཚོལ་བ། །རྒྱ་ཆེན་ཆོས་འདི་ཐོས་གྱུར་ན། །

79-1-161b

ཐམས་ཅད་བདེ་བ་ཐོབ་པར་འགྱུར། །ངས་ནི་ཇི་སྐད་བསྟན་པ་བཞིན། །གང་གིས་ཐེག་པ་འདི་མཐོང་ཞིང་། །མདོ་སྡེའི་ཆོས་འདི་ཐོས་གྱུར་ན། །ཇི་ལྟར་མོས་པའི་བདེ་བ་འཐོབ། །བློ་དང་ལྡན་པ་གང་ཞིག་གིས། །
ཐབས་མཁས་དག་ནི་རབ་བསྒོམས་ཏེ། །ཆོས་མཆོག་འདི་ནི་ཐོས་གྱུར་ན། །ལུས་དང་སེམས་ནི་རབ་བདེར་འགྱུར། །གང་ཞིག་འཁོར་འདིར་འདུས་གྱུར་པ། །ང་ཡིས་མངོན་སུམ་བཤད་མཐོང་དང་། །ཆོས་འདི་ཐོས་
པར་གྱུར་ནས་ནི། །རབ་ཏུ་དགའ་བ་གང་སྐྱེད་པ། །མ་འོངས་ཐ་མའི་དུས་ཀྱི་ཚེ། །ཁྱོད་ཀྱིས་བསོད་རྣམས་ཚད་མེད་པའི། །ཕུང་པོ་དག་ནི་རབ་བསྐྱེད་ཅིང་། །འཁོར་བ་མཐའ་མེད་སྒྲོལ་བར་འགྱུར། །མ་འོངས་ཐ་མའི་
དུས་ཀྱི་ཚེ། །ཆོས་རྗེས་རབ་ཏུ་གསུངས་པ་ཡི། །ཆོས་འདི་གང་ཞིག་འཛིན་བྱེད་པ། །སངས་རྒྱས་རྣམས་ཀྱིས་གཟུང་བར་འགྱུར། །མ་འོངས་ཐ་མའི་དུས་ཀྱི་ཚེ། །ང་ཡི་བྱང་ཆུབ་ཆོས་འཛིན་པ། །དེ་ནི་སངས་རྒྱས་
ཚད་མེད་པའི། །ཐ་མའི་དུས་ཀྱི་ཆོས་འཛིན་འགྱུར། །བཅོམ་ལྡན་འདས་ཀྱིས་ཆོས་འདི་བསྟན་པ་ན། བྱང་ཆུབ་སེམས་དཔའ་ཚད་མེད་པ་སྙིང་མི་སྐྱེ་བའི་ཆོས་ཀྱི་བཟོད་པ་ཐོབ་པར་གྱུར་ཏོ། །སེམས་ཅན་
ཚད་མེད་པ་སྙེད་ནི་དགེ་བའི་རྩ་བ་ཡོངས་སུ་སྨིན་པར་གྱུར་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་དང་། བྱང་ཆུབ་སེམས་
དཔའ་སེམས་དཔའ་ཆེན་པོ་དེ་དག་དང་། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཀོན་མཆོག་
བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། གོ་ཆའི་བཀོད་པ་བསྟན་པ་ཞེས་བྱ་བའི་ལེའུ་སྟེ་མདུན་པ་རྫོགས་སོ།། །། འཕགས་པ་དཀོན་མཆོག་བརྩེགས་པ་ཆེན་པོའི་

79-1-162a

ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བརྒྱད་པ་སྟེ། ཆོས་ཀྱི་དབྱིངས་ཀྱི་རང་བཞིན་དབྱེར་མེད་པ་བསྟན་པ། ། བམ་པོ་དང་པོ།    ། རྒྱ་གར་སྐད་དུ། ཨཱརྱ་དྷརྨཱ་དྷཱ་ཏུ་
པྲ་ཀྲྀ་ཏི་ཨ་སམ་བྷེ་ད་ནིར་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཆོས་ཀྱི་དབྱིངས་ཀྱི་རང་བཞིན་དབྱེར་མེད་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོའོ། །སངས་རྒྱས་དང་བྱང་ཆུབ་
སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་
སློང་བརྒྱད་སྟོང་གི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སངས་རྒྱས་ཀྱི་ཞིང་སྣ་ཚོགས་ཐ་དད་པ་ནས་འདུས་པ་ཁྲི་ཉིས་སྟོང་དང་། ལྷའི་བུ་ཐམས་ཅད་ཀྱང་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ལ་ཡང་དག་པར་ཞུགས་པ་སུམ་ཁྲི་ཉིས་སྟོང་དང་ཐབས་གཅིག་ཏུ་བཞུགས་སོ། །དེའི་ཚེ་ན་འཇམ་དཔལ་གཞོན་ནུར་གྱུར་བ་དང་། ལྷའི་བུ་རིན་ཆེན་མཆོག་ཅེས་བྱ་བ་ཡང་
འཁོར་དེ་ཉིད་དུ་འདུས་ཏེ་འདུག་པར་གྱུར་ཏོ། །དེ་ནས་ལྷའི་བུ་རིན་ཆེན་མཆོག་འདི་སྙམ་དུ་སེམས་ཏེ། འདི་ལྟར་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་བ་ལ་ཆོས་སྟོན་པར་བསྐུལ་བ་
མཛད་དེ། བསྐུལ་ནས་ཀྱང་བཤད་ལ་ཅི་ནས་ཀྱང་བདུད་ཀྱི་གནས་ཐམས་ཅད་སྤ་བཀོང་བར་འགྱུར་བ་དང་། བདུད་སྡིག་ཅན་ཡི་ཆད་པར་འགྱུར་བ་དང་། ཕས་ཀྱི་རྒོལ་བ་ཐམས་ཅད་ཤིན་དུ་ཚར་
བཅད་པར་འགྱུར་བ་དང་། མངོན་པའི་ང་རྒྱལ་ཅན་ཐམས་ཅད་ང་རྒྱལ་མེད་ཅིང་ཤེས་པ་བརྡ་སྤྲོད་པར་འགྱུར་བ་དང་། རྣལ་འབྱོར་སྤྱོད་པ་དག་འབྲས་བུ་ཐོབ་པར་འགྱུར་བ་དང་། འབྲས་བུ་

79-1-162b

འཐོབ་པ་དག་ཀྱང་ཁྱད་པར་དུ་འགྲོ་བར་འགྱུར་བ་དང་། སངས་རྒྱས་དང་། ཆོས་དང་། དགེ་འདུན་གྱི་གདུང་རྒྱུན་མི་བཅད་པའི་ཕྱིར་སྐྱེ་བོ་མང་པོ་དག་ཀྱང་བྱང་ཆུབ་ཏུ་སེམས་བསྐྱེད་པར་འགྱུར་བ་དང་། དེ་བཞིན་
གཤེགས་པས་བསྐལ་པ་གྲངས་མེད་པར་ཡང་དག་པར་བསྒྲུབས་པའི་བྱང་ཆུབ་འདི་ཡང་ཡུན་རིང་དུ་གནས་པ་དང་། རྒྱས་པར་འགྱུར་བ་དང་། དེ་བཞིན་གཤེགས་པ་བཞུགས་སམ་ཡོངས་སུ་མྱ་ངན་
ལས་འདས་ཀྱང་རུང་སྟེ། ཆོས་བསྟན་པ་དེ་གང་དག་གིས་ཐོས་པར་གྱུར་བ་དེ་དག་ཐེག་པ་གང་ལ་མོས་པས་མྱུར་དུ་ཡོངས་སུ་མྱ་ངན་ལས་འདའ་བར་འགྱུར་བ་དེ་ལྟ་བུའི་ཆོས་སྟོན་ན་ཅི་མ་རུང་སྙམ་མོ། །
དེ་ནས་བཅོམ་ལྡན་འདས་ཀྱིས་ལྷའི་བུ་རིན་ཆེན་མཆོག་གི་སེམས་ཀྱི་ཡོངས་སུ་རྟོག་པ་ཐུགས་ཀྱིས་མཁྱེན་ནས་འཇམ་དཔལ་གཞོན་ནུར་གྱུར་བ་ལ་བཀའ་སྩལ་པ། འཇམ་དཔལ་འཁོར་
འདི་ཁྱོད་ལས་ཆོས་མཉན་པ་ཐོས་པར་འདོད་ཀྱིས་འཁོར་འདི་དག་ལ་གཏམ་གྱི་རྒྱུད་འགའ་ཞིག་ལ་ཁྱོད་སྤོབས་པར་གྱིས་ཤིག །འཇམ་དཔལ་གཞོན་ནུར་གྱུར་པས་གསོལ་པ། བཅོམ་ལྡན་
འདས་ཅི་ལས་བརྩམས་ཏེ་སྤོབས་པར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཀྱི་དབྱིངས་ཀྱི་རང་བཞིན་ལ་སོགས་ལ་ཁྱོད་སྤོབས་པར་གྱིས་ཤིག་འཇམ་
དཔལ་གྱིས་གསོལ་པ། བཅོམ་ལྡན་འདས་ཆོས་ཐམས་ཅད་ཀྱང་ཆོས་ཀྱི་དབྱིངས་ཀྱི་རང་བཞིན་ལེགས་པས་བཅོམ་ལྡན་འདས་ཆོས་ཀྱི་དབྱིངས་ཀྱི་རང་བཞིན་ནི་བརྗོད་པ་འམ་མཉན་པར་
ཅུང་ཟད་ཀྱང་རྔོ་མི་ཐོག་ལགས་ན། བཅོམ་ལྡན་འདས་ཇི་ལྟར་ཆོས་ཀྱི་དབྱིངས་ཀྱི་རང་བཞིན་ལས་བརྩམས་ཏེ་བསྟན་པར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། 

79-1-163a

འཇམ་དཔལ་ཆོས་བསྟན་པ་འདི་ཐོས་ན་གང་ཟག་མངོན་པའི་ང་རྒྱལ་ཅན་དག་ནི་སྐྲག་པར་འགྱུར་རོ། །འཇམ་དཔལ་གྱིས་གསོལ་པ། བཅོམ་ལྡན་འདས་གང་དག་སྐྲག་པར་འགྱུར་བ་དེ་དག་ཀྱང་
ཆོས་ཀྱི་དབྱིངས་ཀྱི་རང་བཞིན་ཅན་ལགས་པས་ཆོས་ཀྱི་དབྱིངས་ཀྱི་རང་བཞིན་ནི་སྐྲག་པར་མི་འགྱུར་ལགས་སོ། །དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་བ་ལ་འདི་སྐད་ཅེས་སྨྲས་སོ། །འཇམ་
དཔལ་གལ་ཏེ་ཆོས་ཐམས་ཅད་ཆོས་ཀྱི་དབྱིངས་ཀྱི་རང་བཞིན་ཡིན་ན་ཆོས་ཀྱི་དབྱིངས་ཀྱི་རང་བཞིན་ལ་ནི་ཀུན་ནས་ཉོན་མོངས་པར་འགྱུར་བ་ཡང་མེད་ལ། རྣམ་པར་བྱང་བར་འགྱུར་བ་ཡང་མེད་ན་སེམས་ཅན་རྣམས་གྱིས་
ཀུན་ནས་ཉོན་མོངས་པ་འམ་རྣམ་པར་བྱང་བ་ཅི་ལས་འབྱུང་བར་འགྱུར། འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་བྱིས་པ་སོ་སོའི་སྐྱེ་བོ་འཇིག་ཚོགས་ལ་ལྟ་བའི་ཕྱིན་ཅི་ལོག་གིས་བསླད་ཅིང་ངར་འཛིན་
པ་དང་། ང་ཡིར་འཛིན་པ་ལ་གནས་པ་རྣམས་ལ་ནི་བདག་དང་གཞན་གྱི་འདུ་ཤེས་འབྱུང་ངོ་། །བདག་དང་གཞན་གྱི་འདུ་ཤེས་པ་ལ་གནས་པ་དེ་དག་ལ་ནི་དགེ་བ་དང་མི་དགེ་བའི་སེམས་དང་སེམས་ལས་བྱུང་བ་དག་
འབྱུང་ཏེ་སེམས་དང་སེམས་ལས་བྱུང་བའི་ཆོས་དེ་དག་གིས་དགེ་བ་དང་མི་དགེ་བའི་ལས་མངོན་པར་འདུ་བྱ་བ་དག་མངོན་པར་འདུ་བྱེད་ཅིང་དེ་དག་ལ་རྒྱུ་དེ་དང་རྐྱེན་དེ་དག་དང་ངོ་བོ་ཉིད་དེའི་རྣམ་པར་སྨིན་པ་ཉིད་མངོན་པར་འགྲུབ་
པར་འགྱུར་རོ། །བཙུན་པ་ཤཱ་ར་དྭ་ཏིའི་བུ་དེ་དག་གིས་ཇི་ཙམ་དུ་སྲིད་པའི་འགྲོ་བར་སྐྱེ་བ་ཡོངས་སུ་བཟུང་བ་དེ་ཙམ་དུ་ཀུན་ནས་ཉོན་མོངས་པ་ཞེས་བྱའོ། །བཙུན་པ་ཤཱ་ར་དྭ་ཏིའི་བུ་ཀུན་ནས་ཉོན་
མོངས་པ་དེ་ཡང་ཆོས་ཀྱི་དབྱིངས་ཀྱི་རང་བཞིན་ཉིད་ཡིན་པས་ཀུན་ནས་ཉོན་མོངས་པ་ཉིད་ཆོས་ཀྱི་དབྱིངས་ཀྱི་རང་བཞིན་དུ་ཡོངས་སུ་ཤེས་པ་གང་ཡིན་པ་དེ་ཉིད་

79-1-163b

རྣམ་པར་བྱང་བ་ཞེས་བྱ་སྟེ། དོན་དམ་པར་ནི་དེ་ལ་ཀུན་ནས་ཉོན་མོངས་པར་འགྱུར་བ་འམ། རྣམ་པར་བྱང་བར་འགྱུར་བ་འམ། གང་ཀུན་ནས་ཉོན་མོངས་པར་འགྱུར་བ་ཅི་ཡང་མེད་དོ། །འཇམ་དཔལ་གཞོན་
ནུར་གྱུར་པས་བསྟན་པ་འདི་བཤད་པ་ན་དགེ་སློང་ལྷག་པའི་ང་རྒྱལ་ཅན་བརྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུས་འཇམ་དཔལ་གཞོན་ནུར་
གྱུར་བ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་བསྟན་པ་འདི་བཤད་པ་ན་དགེ་སློང་ལྷག་པའི་ང་རྒྱལ་ཅན་རྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ཏེ། འཇམ་
དཔལ་ཆོས་ཀྱི་དབྱིངས་ནི་ཁྱོད་ལས་ཕྱད་པར་འབྱུང་ངོ་། །འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་ཅི་ཆོས་ཀྱི་དབྱིངས་ཀྱི་རང་བཞིན་སྔོན་བཅིངས་པར་གྱུར་ལ་དགྲོལ་བ་ཞིག་ཡིན་སྙམ་འམ། །
སྨྲས་པ་འཇམ་དཔལ་ཆོས་ཀྱི་དབྱིངས་ཀྱི་རང་བཞིན་ནི་སྔོན་བཅིངས་པར་གྱུར་བ་ཡང་མ་ཡིན་ལ། དགྲོལ་བ་ཡང་མ་ཡིན་ནོ། །སྨྲས་པ། བཙུན་པ་ཤཱ་ར་དྭ་ཏིའི་བུ་འོ་ན་དགེ་སློང་དེ་དག་གིས་སེམས་ཅི་ཞིག་
ལས་རྣམ་པར་གྲོལ། སྨྲས་པ། འཇམ་དཔལ་དེ་བཞིན་གཤེགས་པས་ཉན་ཐོས་མང་པོ་བཏུལ་ཏེ། དེ་དག་གིས་སེམས་ནི་ལེན་པ་མེད་པར་ཟག་པ་རྣམས་ལས་རྣམ་པར་གྲོལ་ཏོ། །འཇམ་དཔལ་
གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་ཅི་ཁྱོད་བཅོམ་ལྡན་འདས་ཀྱི་ཉན་ཐོས་ཡིན་ནམ། སྨྲས་པ། འཇམ་དཔལ་དེ་དེ་བཞིན་ཏེ། ཁོ་བོ་ནི་བཅོམ་ལྡན་འདས་ཀྱི་ཉན་ཐོས་ཡིན་ནོ། །སྨྲས་པ། བཙུན་པ་
ཤཱ་ར་དྭ་ཏིའི་བུ་ཅི་ཁྱོད་ཀྱིས་སེམས་ལེན་པ་མེད་པར་ཟག་པ་རྣམས་ལས་རྣམ་པར་གྲོལ་ལམ། སྨྲས་པ། འཇམ་དཔལ་རྣམ་པར་གྲོལ་ལོ། །སྨྲས་པ། བཙུན་པ་ཤཱ་ར་དྭ་ཏིའི་བུ་ཅི་ཁྱོད་ཀྱི་སེམས་

79-1-164a

འདས་པ་རྣམ་པར་གྲོལ་ལམ། འོན་ཏེ་མ་འོངས་པ་དང་ད་ལྟར་བྱུང་བ་རྣམ་པར་གྲོལ། བཙུན་པ་ཤཱ་ར་དྭ་ཏིའི་བུ་སེམས་འདས་པ་ནི་ཟད་པའི་མཚན་ཉིད་ཡིན་ལ། སེམས་མ་འོངས་པ་ནི་མ་ཐོབ་
པའི་མཚན་ཉིད་ཡིན། སེམས་ད་ལྟར་བྱུང་བ་ནི་མི་གནས་པའི་མཚན་ཉིད་ཡིན་ན། བཙུན་པ་ཤཱ་ར་དྭ་ཏིའི་བུ་ཁྱོད་ཀྱི་སེམས་རྣམ་པར་གྲོལ་བ་དེ་གང་ཡིན། ཚེ་དང་ལྡན་པ་ཤཱ་ར་དྭ་ཏིའི་བུས་སྨྲས་པ། འཇམ་
དཔལ་སེམས་འདས་པ་ཡང་རྣམ་པར་གྲོལ་བ་མ་ཡིན་ལ། མ་འོངས་པ་དང་། ད་ལྟར་བྱུང་བ་ཡང་མ་ཡིན་ནོ། །འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་འོ་ན་ཁྱོད་ཀྱི་སེམས་རྣམ་པར་
གྲོལ་བ་དེ་གང་ཡིན། སྨྲས་པ། འཇམ་དཔལ་ཀུན་རྫོབ་རྣམ་པར་གཞག་པས་སེམས་རྣམ་པར་གྲོལ་བར་བསྟན་པར་ཟད་ཀྱི། དོན་དམ་པར་ནི་འདི་ལ་གང་བཅིང་བ་འམ། དགྲོལ་བའི་སེམས་དམིགས་
སུ་མེད་དོ། །འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་ཁྱོད་ཆོས་ཀྱི་དབྱིངས་ཀྱི་རང་བཞིན་ལ་ཀུན་རྫོབ་དང་། དོན་དམ་པ་ཡོད་པར་འདོད་དམ། སྨྲས་པ། འཇམ་དཔལ་ཆོས་ཀྱི་དབྱིངས་ཀྱི་
རང་བཞིན་ལ་ནི་ཀུན་རྫོབ་དང་། དོན་དམ་པ་དམིགས་སུ་མེད་དོ། །འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་འོ་ན་ཇི་ལྟར་ཀུན་རྫོབ་རྣམ་པར་གཞག་པས་སེམས་རྣམ་པར་གྲོལ་བར་སྟོན། 
སྨྲས་པ། འཇམ་དཔལ་ནམ་ཡང་སེམས་རྣམ་པར་གྲོལ་བ་ཅི་ཡང་མེད་དམ། འཇམ་དཔལ་གྱིས་སྨྲས་པ་བཙུན་པ་ཤཱ་ར་དྭ་ཏིའི་བུ་གལ་ཏེ་སེམས་ཤིག་ནང་ངམ། ཕྱི་རོལ་ལམ། གཉིས་གའི་
བར་ན་དམིགས་སུ་ཡོད་ན་ནི་སེམས་རྣམ་པར་གྲོལ་བར་ཡང་འགྱུར་བ་ཞིག་ན། བཙུན་པ་ཤཱ་ར་དྭ་ཏིའི་བུ་སེམས་ནི་ནང་ངམ། ཕྱི་རོལ་ལམ། གཉིས་ག་མེད་པར་ཡང་དམིགས་སུ་མེད་པས། 

79-1-164b

དེ་ལ་བཅིངས་པ་འམ། རྣམ་པར་གྲོལ་བ་ཅི་ཡང་མེད་དོ། །དེ་ནས་འཁོར་དེ་ལས་དགེ་སློང་ཉིས་བརྒྱས་འཇམ་དཔལ་གཞོན་ནུར་གྱུར་པས་བསྟན་པ་འདི་ཐོས་པ་དང་། སྟན་ལས་ལངས་ཏེ་དོང་ནས་ཚིག་
འདི་སྐད་ཅེས་ཀྱང་སྨྲས་ཏེ། གལ་ཏེ་འདི་ལ་སུ་ཡང་རྣམ་པར་གྲོལ་བ་མེད་ཅིང་སུ་ཡང་རྣམ་པར་མི་གྲོལ་ན། འོ་བུ་ཅག་གི་རབ་ཏུ་འབྱུང་ཞིང་བསྙེན་པར་རྫོགས་པ་དགེ་སློང་གི་དངོས་པོ་ལ་དོན་
ཅི་ཞིག་ཡོད། གལ་ཏེ་ངེས་པར་འབྱུང་བ་ཅི་ཡང་མེད་ན་ལམ་སྒོམ་པ་ལ་དོན་ཅི་ཡོད་ཅེས་དེ་ལྟར་དགེ་སློང་དེ་དག་སྨོད་ཅིང་ཡི་ཆད་ནས་འཁོར་དེ་ནས་དོང་ངོ་། །དེ་ནས་འཇམ་དཔལ་གཞོན་ནུར་གྱུར་
པས་དགེ་སློང་དེ་དག་འདུལ་བའི་དབང་རིག་ནས་ལམ་གང་ནས་དགེ་སློང་དེ་དག་དོང་བའི་ལམ་དེའི་མདུན་དུ་སྤྲུལ་པའི་དགེ་སློང་ཞིག་སྤྲུལ་ཏོ། །དེ་ནས་དགེ་སློང་དེ་དག་སྤྲུལ་པའི་དགེ་སློང་དེ་དག་ག་
ལ་བ་དེར་དོང་སྟེ་ལྷགས་ནས་སྤྲུལ་བའི་དགེ་སློང་དེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཁྱོད་ག་ལས་འོངས། དེ་ནས་སྤྲུལ་པའི་དགེ་སློང་དེས་དགེ་སློང་དེ་དག་ལ་འདི་སྐད་ཅེས་སྨྲས་སོ། །
ཚེ་དང་ལྡན་པ་དག་ཁོ་བོ་ནི་འཇམ་དཔལ་གཞོན་ནུར་གྱུར་པའི་ཆོས་བསྟན་པ་ལ་མ་ཞུགས། མ་ཤེས། མ་མོས། ཡིད་མ་ཆེས་ནས་ཁོ་བོ་འཁོར་དེ་ནས་སོང་ངོ་། །དེ་ནས་དགེ་སློང་ཉིས་བརྒྱ་པོ་
དེ་དག་གིས་ཀྱང་འདི་སྐད་ཅེས་སྨྲས་སོ། །ཁོ་བོ་ཅག་ཀྱང་འཇམ་དཔལ་གཞོན་ནུར་གྱུར་པའི་ཆོས་བསྟན་པ་ལ་མ་ཞུགས། མ་ཤེས། མ་མོས། ཡིད་མ་ཆེས་ནས་ཁོ་བོ་ཅག་དེ་ནས་དོང་ངོ་། །
དེ་ནས་སྤྲུལ་པའི་དགེ་སློང་དེས་དགེ་སློང་ཉིས་བརྒྱ་པོ་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་གིས་འཇམ་དཔལ་གཞོན་ནུར་གྱུར་པའི་ཆོས་བསྟན་པ་ལ་མི་མཐུན་པ་ཅི་ཞིག་

79-1-165a

ཐོས་ན་ཁྱེད་ཅག་འཁོར་དེ་ནས་དོང་། དེ་དག་གིས་སྨྲས་པ། ཚེ་དང་ལྡན་པ་འཇམ་དཔལ་གཞོན་ནུར་གྱུར་བ་ནི་འདི་ལ་སུ་ལ་ཡང་ཐོབ་པ་མེད། མངོན་པར་རྟོགས་པ་མེད། རྣམ་པར་གྲོལ་བ་མེད་
པར་སྟོན་པས་ཁོ་བོ་ཅག་འདི་སྙམ་དུ་སེམས་ཏེ། གལ་ཏེ་འདི་ལ་སུ་ལ་ཡང་ཐོབ་པ་མེད། མངོན་པར་རྟོགས་པ་མེད། རྣམ་པར་གྲོལ་བ་མེད་ན་འོ་བུ་ཅག་གི་རབ་ཏུ་འབྱུང་ཞིང་བསྙེན་པར་རྫོགས་པ་དགེ་སློང་
གི་དངོས་པོ་ལ་དོན་ཅི་ཡོད། འོ་བུ་ཅག་གི་ཚངས་པར་སྤྱོད་པ་ལ་གནས་པ་ལ་དོན་ཅི་ཡོད། གལ་ཏེ་འདི་ལ་ངེས་པར་འབྱུང་བ་ཅི་ཡང་མེད་ན་ལམ་སྒོམ་པ་ལ་དོན་ཅི་ཡོད་སྙམ་དུ་བསམས་ནས་ཁོ་བོ་ཅག་
འཁོར་དེ་ནས་དོང་ངོ་། །དེ་ནས་སྤྲུལ་བའི་དགེ་སློང་དེས་དགེ་སློང་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་ཅི་ཁྱེད་ཅག་མ་མོས་ནས་དོང་བར་ཟད་དམ། འོན་ཏེ་སྤངས་ཤིང་མི་སྙན་པར་བརྗོད་
ནས་དོང་། དེ་དག་གིས་སྨྲས་པ། ཁོ་བོ་ཅག་ནི་མ་མོས་ནས་དོང་བར་ཟད་ཀྱི། ཁོ་བོ་ཅག་གིས་སྤངས་པ་ཡང་མེད་ལ་མི་སྙན་པར་བརྗོད་པ་ཡང་མེད་དོ། །དེ་ནས་སྤྲུལ་པའི་དགེ་སློང་དེས་དགེ་སློང་དེ་
དག་ལ་ལེགས་སོ་ཞེས་བྱ་བ་བྱིན་ནས་འདི་སྐད་ཅེས་ཀྱང་སྨྲས་སོ། །ཚེ་དང་ལྡན་པ་དག་རྩོད་པ་མེད་པ་ནི་དགེ་སྦྱོང་གི་ཆོས་ཀྱི་མཆོག་ཡིན་པས་མི་སྙན་པར་བརྗོད་པར་མི་བྱ། བརྩད་པར་མི་
བྱའི་རེ་ཤིག་ཇེ་བགྲོ་བར་བྱའོ། །ཚེ་དང་ལྡན་པ་དག་ཅི་སེམས་འདི་སྔོན་པོ་ཞེས་བྱ་བ་ཞིག་གམ། སེར་པོ་ཞེས་བྱ་བ་ཞིག་གམ། དམར་པོ་ཞེས་བྱ་བ་ཞིག་གམ། དཀར་པོ་ཞེས་བྱ་བ་ཞིག་གམ། 
བཙོད་ཀ་ཞེས་བྱ་བ་ཞིག་གམ། ཤེལ་གྱི་ཁ་དོག་ལྟ་བུ་ཞེས་བྱ་བ་ཞིག་གམ། ཡང་དག་པ་ཞེས་བྱ་བ་ཞིག་གམ། ཡང་དག་པ་མ་ཡིན་པ་ཞེས་བྱ་བ་ཞིག་གམ། རྟག་པ་ཞེས་བྱ་བ་ཞིག་གམ། 

79-1-165b

མི་རྟག་པ་ཞེས་བྱ་བ་ཞིག་གམ། གཟུགས་ཅན་ཞེས་བྱ་བ་ཞིག་གམ། གཟུགས་ཅན་མ་ཡིན་པ་ཞེས་བྱ་བ་ཞིག་གམ། ཞེས་རྟོགས་ཤིག་དེ་དག་གིས་སྨྲས་པ། ཚེ་དང་ལྡན་པ་སེམས་ནི་གཟུགས་ཅན་མ་ཡིན་པ། 
བསྟན་དུ་མེད་པ། སྣང་བ་མེད་པ། ཐོགས་པ་མེད་པ། གནས་མེད་པ། རྣམ་པར་རིག་བྱེད་མ་ཡིན་པའོ། །དེ་ནས་སྤྲུལ་བའི་དགེ་སློང་དེས་དགེ་སློང་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་ཅི་གཟུགས་
ཅན་མ་ཡིན་པ། བསྟན་དུ་མེད་པ། སྣང་བ་མེད་པ། ཐོགས་པ་མེད་པ། གནས་མེད་པ། རྣམ་པར་རིག་བྱེད་མ་ཡིན་པའི་སེམས་དེ་ནང་ན་གནས་སོ། །ཞེས་བྱ་བའམ། ཕྱི་རོལ་ན་གནས་སོ་ཞེས་བྱ་བ་འམ། གཉིས་
གའི་བར་ན་གནས་སོ་ཞེས་བྱ་བར་དམིགས་སུ་ཡོད་སྙམ་འམ། སྨྲས་པ་དེ་ནི་མ་ཡིན་ནོ། །སྨྲས་པ། ཚེ་དང་ལྡན་པ་དག་གལ་ཏེ་སེམས་དེ་གཟུགས་ཅན་མ་ཡིན། བསྟན་དུ་མེད། སྣང་བ་མེད། ཐོགས་པ་མེད། །
གནས་མེད། རྣམ་པར་རིག་བྱེད་མ་ཡིན། ནང་ན་ཡང་མེད། ཕྱི་རོལ་ན་ཡང་མེད། གཉིས་ག་མེད་པར་ཡང་དམིགས་སུ་མེད་ན་ཅི་དེ་ལ་ཡང་དག་པར་ཡོངས་སུ་གྲུབ་པ་ཡོད་སྙམ་འམ། དེ་དག་གིས་སྨྲས་པ། 
དེ་ནི་མ་ཡིན་ནོ། །སྨྲས་པ། ཚེ་དང་ལྡན་པ་དག་གང་ཡང་དག་པ་མ་ཡིན་ཞིང་ཡོངས་སུ་གྲུབ་པ་མ་ཡིན་པ་དེ་ལ་ཅི་རྣམ་པར་གྲོལ་བ་ཡོད་སྙམ་འམ། དེ་དག་གིས་སྨྲས་པ། དེ་ནི་མ་ཡིན་ནོ། །སྨྲས་པ། ཚེ་དང་ལྡན་
པ་དག་དེ་ལས་བསམས་ནས། འཇམ་དཔལ་གཞོན་ནུར་གྱུར་པས་འདི་སྐད་དུ་ཆོས་ཀྱི་དབྱིངས་ཀྱི་རང་བཞིན་ལ་ནི་ཀུན་ནས་ཉོན་མོངས་པར་འགྱུར་བ་ཡང་མེད་ལ་རྣམ་པར་བྱང་བར་འགྱུར་བ་ཡང་མེད་དོ། །ཞེས་
བསྟན་ཏོ། །ཚེ་དང་ལྡན་པ་དག་ཡང་བྱིས་པ་སོ་སོའི་སྐྱེ་བོ་ཕྱིན་ཅི་ལོག་གིས་བསླད་པ་རྣམས་ལ་ནི་ངར་འཛིན་པ་དང་། ང་ཡིར་འཛིན་པ་ཡོངས་སུ་འཛིན་པ་འབྱུང་ངོ་། །ངར་འཛིན་པ་དང་། ངར་ཡིར་འཛིན་

79-1-166a

པ་ལ་གནས་ཏེ། རྟག་ཏུ་ཡུལ་རྣམས་ལ་སྤྱོད་ཅིང་གནས་པ་དེ་དག་ལ་ནི་དམིགས་པ་ལས་བྱུང་བའི་སེམས་འབྱུང་སྟེ། དམིགས་པ་ཟད་ན་ཟད་པར་འགྱུར་ལ་བྱུང་ནས་ཞིག་ཅིང་ཞུ་སྟེ་གནས་པ་མེད་དོ། །
སེམས་ཀྱི་དམིགས་པ་གང་གིས་རབ་ཏུ་འབྱུང་ཞིང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་བ་དང་། ལམ་སྒོམ་པར་བྱེད་པའི་སེམས་དེ་ནི་རང་བཞིན་གྱིས་མེད་པ་དང་། ཡང་དག་པ་མ་ཡིན་པ་དང་བྱུང་བ་མ་
ཡིན་པའོ། །མེད་པ་དང་། ཡང་དག་པ་མ་ཡིན་པ་དང་། བྱུང་བ་མ་ཡིན་པ་གང་ཡིན་པ་དེ་ལ་ནི་སྐྱེ་བ་ཡང་མེད། འཇིག་པ་ཡང་མེད། གནས་པ་ཡང་མེད་དོ། །གང་ལ་སྐྱེ་བ་མེད་པ་དང་། འཇིག་པ་མེད་པ་དང་།  གནས་
པ་མེད་པ་དེ་ལ་ནི་བཅིངས་པ་ཡང་མེད། རྣམ་པར་གྲོལ་བ་ཡང་མེད་དོ། །དེ་ལ་ནི་ཐོབ་པ་ཡང་མེད། མངོན་པར་རྟོགས་པ་ཡང་མེད་དེ། ཚེ་དང་ལྡན་པ་དག་དེ་ལས་བསམས་ནས་འཇམ་དཔལ་གཞོན་ནུར་
གྱུར་པས་འདི་སྐད་དུ་ཆོས་ཀྱི་དབྱིངས་ཀྱི་རང་བཞིན་ལ་ནི་ཀུན་ནས་ཉོན་མོངས་པར་འགྱུར་བ་ཡང་མེད། རྣམ་པར་བྱང་བར་འགྱུར་བ་ཡང་མེད་དེ། འདི་ལ་ནི་སུ་ལ་ཡང་ཐོབ་པ་མེད། མངོན་པར་རྟོགས་པ་མེད། 
རྣམ་པར་གྲོལ་བ་མེད་དོ་ཞེས་སྨྲས་སོ། །དེ་ནས་སྤྲུལ་པའི་དགེ་སློང་དེས་བསྟན་པ་འདི་བཤད་པ་ན་དགེ་སློང་དེ་དག་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་དག་སེམས་རྣམ་པར་
གྲོལ་ནས་འཇམ་དཔལ་གཞོན་ནུར་གྱུར་བ་ག་ལ་བ་དེར་དོང་སྟེ་ཕྱིན་པ་དང་། རང་རང་གི་བླ་གོས་འཇམ་དཔལ་གཞོན་ནུར་གྱུར་བ་ལ་མངོན་པར་བཀབ་ནས་ཚིག་འདི་སྐད་ཅེས་ཀྱང་སྨྲས་སོ། །འཇམ་དཔལ་ཁྱོད་
ཀྱིས་ནི་ཁོ་བོ་ཅག་ཡོངས་སུ་བསྐྱབས་སོ། །འདི་ལྟར་ཁོ་བོ་ཅག་ཀྱང་དམ་པའི་ཆོས་སྤོང་བར་མ་ཞུགས་པས་ད་ཕྱིན་ཅད་ཆོས་འདུལ་བ་ཟབ་མོ་ལ་འཇུག་པ་ལས་ཕྱི་རོལ་ཏུ་གྱུར་བ་མ་ཡིན་ནོ། །དེ་ནས་ཚེ་

79-1-166b

དང་ལྡན་པ་རབ་འབྱོར་གྱིས་དགེ་སློང་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་གིས་ཅི་ཞིག་ཐོབ་ཅིང་ཅི་ཞིག་མངོན་པར་རྟོགས་ན་རང་རང་གི་བླ་གོས་འཇམ་དཔལ་གཞོན་ནུར་གྱུར་བ་ལ་མངོན་པར་བཀབ། དེ་དག་གིས་
སྨྲས་པ། བཙུན་པ་རབ་འབྱོར་ཁོ་བོ་ཅག་གིས་ནི་ཅི་ཡང་ཐོབ་པ་མེད་ཅིང་མངོན་པར་རྟོགས་པ་མེད་པས་དེའི་ཕྱིར་ཁོ་བོ་ཅག་གིས་རང་རང་གི་བླ་གོས་འཇམ་དཔལ་གཞོན་ནུར་གྱུར་བ་ལ་མངོན་པར་བཀབ་བོ། །བཙུན་པ་རབ་འབྱོར་
གང་གི་ཚེ་ཁོ་བོ་ཅག་ཐོབ་པའི་འདུ་ཤེས་ཡོད་པར་གྱུར་བ་དེའི་ཚེ་ནི་ཁོ་བོ་ཅག་སྟན་ལས་ལངས་ཏེ་འཁོར་ཏེ་འཁོར་དེ་ནས་དོང་ངོ་། །གང་གི་ཚེ་ཁོ་བོ་ཅག་ཐོབ་པའི་འདུ་ཤེས་དེ་དང་བྲལ་བར་གྱུར་བ་དེའི་ཚེ་སླར་ལྷགས་སོ། །རབ་འབྱོར་
གྱིས་སྨྲས་པ། ཚེ་དང་ལྡན་པ་དག་ཁྱེད་ཅི་ལས་བསམས་ཏེ་དེ་སྐད་སྨྲ། དེ་དག་གིས་སྨྲས་པ། བཙུན་པ་རབ་འབྱོར་ཐོབ་པ་ཞེས་བྱ་བ་དེ་ནི་གཡོ་བ་ཡིན་ནོ། །དེ་ནི་རློམ་སེམས་ཡིན་ཏེ། གང་ལ་གཡོ་བ་ཡོད་པ་དང་། རློམ་
སེམས་ཡོད་པ་དེ་ལ་ནི་ཐོབ་པ་ཡང་མེད་ཅིང་མངོན་པར་རྟོགས་པ་མེད་དོ། །བཙུན་པ་རབ་འབྱོར་གང་ལ་ཐོབ་པ་མེད་ཅིང་མངོན་པར་རྟོགས་པ་མེད་དེ་ནི་རློམ་སེམས་ཐམས་ཅད་ཡང་དག་པར་བཅོམ་པ་ཡིན་ནོ། །
ཚེ་དང་ལྡན་པ་རབ་འབྱོར་གྱིས་སྨྲས་པ། ཚེ་དང་ལྡན་པ་དག་ཁྱེད་ཅག་སུས་བཏུལ། དེ་དག་གིས་སྨྲས་པ། བཙུན་པ་རབ་འབྱོར་གང་ཐོབ་པ་མེད་པ་དང་། མངོན་པར་རྟོགས་པ་མེད་པ་དང་། གང་སྐྱེ་བ་མེད་པ་དང་། །
ཡོངས་སུ་མྱ་ངན་ལས་འདའ་བ་མེད་པ་དང་། གང་མཉམ་པར་བཞག་པ་མེད་པ་དང་། སེམས་རྣམ་པར་གཡེངས་པ་མེད་པ་དེས་རབ་ཏུ་བཏུལ་ཏོ། །སྨྲས་པ། ཚེ་དང་ལྡན་པ་དག་ཅི་ཁྱེད་ཅག་བཏུལ་བ་ཡིན་ནམ། །
དེ་དག་གིས་སྨྲས་པ། འཇམ་དཔལ་གཞོན་ནུར་གྱུར་བ་ལ་དྲིས་ཤིག །དེ་ནས་ཚེ་དང་ལྡན་པ་ཀུན་དགའ་བོས་འཇམ་དཔལ་གཞོན་ནུར་གྱུར་བ་ལ་འདི་སྐད་ཅེས་སྨྲས་སོ། །འཇམ་དཔལ་དགེ་སློང་དེ་དག་

79-1-167a

སུས་བཏུལ། འཇམ་དཔལ་གྱིས་སྨྲས་པ། བཙུན་པ་ཀུན་དགའ་བོ་གང་ལ་ཕུང་པོ་རྣམས་མེད་པ་དང་། ཁམས་རྣམས་མེད་པ་དང་། སྐྱེ་མཆེད་རྣམས་མེད་པ་དང་། གང་སོ་སོའི་སྐྱེ་བོ་མ་ཡིན་པ་དང་། 
སློབ་པ་མ་ཡིན་པ་དང་། མི་སློབ་པ་མ་ཡིན་པ་དང་། ཉན་ཐོས་མ་ཡིན་པ་དང་། བྱང་ཆུབ་སེམས་དཔའ་མ་ཡིན་པ་དང་། དེ་བཞིན་གཤེགས་པ་མ་ཡིན་པ་དང་། གང་ལུས་དང་ལྡན་པ་མ་ཡིན་པ་དང་། ངག་དང་ལྡན་པ་མ་ཡིན་པ་
དང་། སེམས་དང་ལྡན་པ་མ་ཡིན་པ་དང་། མཚུངས་པར་ལྡན་པ་མ་ཡིན་པ་དང་། བྲལ་བ་མ་ཡིན་པ་དེས་བཏུལ་ཏོ། །སྨྲས་པ། འཇམ་དཔལ་དེ་སྟོན་པ་སུ་ཞིག །འཇམ་དཔལ་གྱིས་སྨྲས་པ། བཙུན་པ་ཀུན་དགའ་བོ་འདི་
ཇི་སྙམ་དུ་སེམས། དེ་བཞིན་གཤེགས་པས་སྤྲུལ་པ་ཞིག་སྤྲུལ་ན་དེ་མཚུངས་པར་ལྡན་པ་ཡིན་སྙམ་འམ། སྨྲས་པ། འཇམ་དཔལ་དེ་ནི་ཆོས་གང་དང་ཡང་དག་པར་ལྡན་པ་ཡང་མ་ཡིན། བྲལ་བ་ཡང་མ་ཡིན་ནོ། །འཇམ་
དཔལ་གྱིས་སྨྲས་པ། བཙུན་པ་ཀུན་དགའ་བོ་ཅི་ཆོས་ཐམས་ཅད་སྤྲུལ་པའི་ངོ་བོ་ཉིད་ཡིན་ནམ། སྨྲས་པ། འཇམ་དཔལ་དེ་དེ་བཞིན་ནོ། །འཇམ་དཔལ་གྱིས་སྨྲས་པ། བཙུན་པ་ཀུན་དགའ་བོ་དགེ་སློང་འདི་དག་ནི་སྤྲུལ་
པས་བཏུལ་བ་ཡིན་ཏེ། སྤྲུལ་པའི་འདུལ་བ་ཅི་འདྲ་བར་ཉན་ཐོས་ཐམས་ཅད་ཀྱི་འདུལ་བ་ཡང་དེ་འདྲའོ། །བཙུན་པ་ཀུན་དགའ་བོ་གང་དག་དེ་ལྟར་བཏུལ་བ་དེ་དག་ནི་ཡང་དག་པར་བཏུལ་བ་ཡིན་ནོ། །གང་དག་ཆོས་
འདུལ་བ་འདི་ལ་མོས་པར་མི་བྱེད་པ་དེ་དག་ནི་ལྷག་པའི་ང་རྒྱལ་ཅན་དུ་རིག་པར་བྱའོ། །དེ་ནས་ཚེ་དང་ལྡན་པ་ཀུན་དགའ་བོས་འཇམ་དཔལ་གཞོན་ནུར་གྱུར་བ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་ལྟར་ན་དགེ་
སློང་ལྷག་པའི་ང་རྒྱལ་ཅན་དུ་རིག་པར་བྱ། འཇམ་དཔལ་གྱིས་སྨྲས་པ། བཙུན་པ་ཀུན་དགའ་བོ་འདི་ལ་དགེ་སློང་ཚུལ་ཁྲིམས་ཀྱི་ཕུང་པོ་ཡོངས་སུ་དག་པས་ཡོངས་སུ་དག་པར་རློམ་སེམས་སུ་བྱེད་པ་ནི་ལྷག་

79-1-167b

པའི་ང་རྒྱལ་ཅན་དུ་ཤེས་པར་བྱའོ། །ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ཡོངས་སུ་དག་པར་ཡོངས་སུ་རློམ་སེམས་སུ་བྱེད་པ་ནི་ལྷག་པའི་ང་རྒྱལ་ཅན་
དུ་ཤེས་པར་བྱའོ། །བདག་གིས་ཐོབ་བོ། བདག་གིས་མངོན་སུམ་དུ་བྱས་སོ་སྙམ་དུ་སེམས་ཤིང་རློམ་སེམས་སུ་བྱེད་པ་དང་། ཡོངས་སུ་རྟོག་པར་བྱེད་པ་དེ་ནི་ལྷག་པའི་ང་རྒྱལ་ཅན་དུ་ཤེས་པར་བྱའོ། །འཇིག་ཚོགས་
ལ་ལྟ་བས་སྐྲག་ཅིང་བགྲོད་པ་གཅིག་པའི་ལམ་གྱི་རོ་མྱང་བར་བྱེད་པ་ནི་ལྷག་པའི་ང་རྒྱལ་ཅན་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། སྟོང་པ་ཉིད་གང་གིས་འཇིག་ཚོགས་ལ་ལྟ་བ་སྟོང་པའི་སྟོང་པ་ཉིད་དེས་བགྲོད་པ་
གཅིག་པའི་ལམ་ཡང་སྟོང་པའི་ཕྱིར་ཏེ། སྟོང་པ་དེ་ལྟ་བུ་ལ་སྟོང་པ་ཉིད་ཀྱིས་ཡང་དག་པར་མི་འཇུག་པ་ནི་ལྷག་པའི་ང་རྒྱལ་ཅན་དུ་ཤེས་པར་བྱའོ། །བཙུན་པ་ཀུན་དགའ་བོ་གཞན་ཡང་དགེ་སློང་གང་འཇིག་ཚོགས་
ལ་ལྟ་བའི་སྟོང་པ་ཉིད་གང་ཡིན་པ་དང་། བགྲོད་པ་གཅིག་པའི་ལམ་གྱི་སྟོང་པ་ཉིད་གང་ཡིན་པའི་སྟོང་པ་ཉིད་དེ་ལ་སྟོང་པ་ཉིད་ཀྱིས་མཉམ་པར་བྱེད་པ་ནི་ལྷག་པའི་ང་རྒྱལ་ཅན་དུ་ཤེས་པར་བྱའོ། །དེ་ཅིའི་ཕྱིར་
ཞེ་ན། བཙུན་པ་ཀུན་དགའ་བོ་སྟོང་པ་ཉིད་ཀྱང་གཞན་མ་ཡིན་ལ་འཇིག་ཚོགས་ལ་ལྟ་བ་ཡང་གཞན་མ་ཡིན་ཏེ། འཇིག་ཚོགས་ལ་ལྟ་བ་ཉིད་སྟོང་པ་ཉིད་ཡིན་པ་དང་། སྟོང་པ་ཉིད་ཀྱང་གཞན་མ་
ཡིན་ལ་ལམ་ཡང་གཞན་མ་ཡིན་ཏེ། ལམ་ཉིད་སྟོང་པ་ཉིད་ཡིན་པའི་ཕྱིར་རོ། །བཙུན་པ་ཀུན་དགའ་བོ་གཞན་ཡང་དགེ་སློང་གང་མ་རིག་པ་དང་། སྲིད་པའི་སྲེད་པས་འཇིགས་ཤིང་མ་རིག་པ་ལས་རྣམ་པར་
གྲོལ་བའི་རོ་མྱང་བར་བྱེད་པ་ནི་ལྷག་པའི་ང་རྒྱལ་ཅན་དུ་ཤེས་པར་བྱའོ། །དེ་ཅི་འི་ཕྱིར་ཞེ་ན། གང་ལ་གཉིས་སུ་འདུ་ཤེས་འཇུག་པ་དེ་ནི་རྣམ་པར་གྲོལ་བ་མ་ཡིན་པའི་ཕྱིར་རོ། །བཙུན་པ་ཀུན་དགའ་བོ་གཞན་

79-1-168a

ཡང་དགེ་སློང་གང་འདོད་ཆགས་དང་། ཞེ་སྡང་དང་། གཏི་མུག་རྣམས་ཀྱིས་སྐྲག་ཅིང་རྣམ་པར་ཐར་པའི་སྒོ་གསུམ་པོ་དག་གི་རོ་མྱང་བར་བྱེད་པ་དང་། ཕྱིན་ཅི་ལོག་བཞིས་སྐྲག་ཅིང་འདུ་ཤེས་བཞིའི་
རོ་མྱང་བར་བྱེད་པ་དང་། སྒྲིབ་པ་ལྔས་སྐྲག་ཅིང་དབང་པོ་ལྔའི་རོ་མྱང་བར་བྱེད་པ་དང་། སྐྱེ་མཆེད་དྲུག་གིས་སྐྲག་ཅིང་མངོན་པར་ཤེས་པ་དྲུག་གི་རོ་མྱང་བར་བྱེད་པ་དང་། རྣམ་པར་ཤེས་པའི་གནས་བདུན་
གྱིས་སྐྲག་ཅིང་བྱང་ཆུབ་ཀྱི་ཡན་ལག་བདུན་གྱི་རོ་མྱང་བར་བྱེད་པ་དང་། ལོག་པ་ཉིད་བརྒྱད་ཀྱིས་སྐྲག་ཅིང་འཕགས་པའི་ལམ་ཡན་ལག་བརྒྱད་པའི་རོ་མྱང་བར་བྱེད་པ་དང་། འདུས་བྱས་ཀྱི་དངོས་པོ་
དགུས་སྐྲག་ཅིང་མཐར་གྱིས་གནས་པའི་སྙོམས་པར་འཇུག་པ་དགུའི་རོ་མྱང་བར་བྱེད་པ་དང་། མི་དགེ་བ་བཅུའི་ལས་ཀྱི་ལམ་གྱིས་སྐྲག་ཅིང་མི་སློབ་པའི་ཆོས་བཅུའི་རོ་མྱང་བར་བྱེད་པ་དང་། འདུས་བྱས་
ཀྱི་ཁམས་ཀྱིས་སྐྲག་ཅིང་འདུས་མ་བྱས་ཀྱི་ཁམས་དག་གིས་རོ་མྱང་བར་བྱེད་པ་ནི་ལྷག་པའི་ང་རྒྱལ་ཅན་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། བཙུན་པ་ཀུན་དགའ་བོ་དེ་དག་ཐམས་ཅད་ནི་གཡོ་བ་དང་། 
རློམ་སེམས་དང་། སྤྲོས་པ་ཡིན་ཏེ། བཙུན་པ་ཀུན་དགའ་བོ་ཇི་ཙམ་དུ་གཡོ་བ་དང་། རློམ་སེམས་དང་། སྤྲོས་པ་དང་། སེམས་མཐོ་བ་དང་། དམའ་བ་དང་། འཛིན་པ་དང་། སྤོང་བ་དང་། ཡོངས་སུ་
རྟོག་པ་དང་། རྟེན་པ་དང་། ལྷག་པར་ཞེན་པ་དང་། སྒྲོ་འདོགས་པ་ཡོད་པ་དེ་ཙམ་དུ་ལྷག་པར་བྱེད་པ་དང་ལྡན་པའི་ལྷག་པའི་ང་རྒྱལ་ཡིན་པའི་ཕྱིར་ཏེ། བཙུན་པ་ཀུན་དགའ་བོ་དེ་ལྟ་བུའི་དགེ་
སློང་ནི་ལྷག་པའི་ང་རྒྱལ་ཅན་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། བཙུན་པ་ཀུན་དགའ་བོ་འདུས་བྱས་ཀྱི་ཁམས་ཀྱི་སྟོང་པ་ཉིད་གང་ཡིན་པ་དང་། འདུ་མ་བྱས་ཀྱི་ཁམས་ཀྱི་སྟོང་པ་ཉིད་གང་ཡིན་

79-1-168b

པའི་སྟོང་པ་དང་། སྟོང་པ་ཉིད་ལ་མཉམ་ཉིད་དུ་མི་འཇུག་པ་ནི་ལྷག་པའི་ང་རྒྱལ་ཅན་དུ་ཤེས་པར་བྱ་བ་ཡིན་པའི་ཕྱིར་རོ། །དེ་ནས་ཚེ་དང་ལྡན་པ་ཀུན་དགའ་བོས་འཇམ་དཔལ་གཞོན་ནུར་གྱུར་བ་ལ་འདི་སྐད་ཅེས་
སྨྲས་སོ། །འཇམ་དཔལ་ཇི་ལྟར་ན་དགེ་སློང་ལྷག་པའི་ང་རྒྱལ་མེད་པ་ཡིན། འཇམ་དཔལ་གྱིས་སྨྲས་པ། བཙུན་པ་ཀུན་དགའ་བོ་གང་གི་ཚེ་དགེ་སློང་ནད་ཉེ་བར་ཞི་བས་ཡུལ་ཐམས་ཅད་ཀྱང་ཉེ་བར་ཞི་བར་མཐོང་
ཞིང་མཉམ་པ་ཞེས་བྱ་བ་འམ། མི་མཉམ་པ་ཞེས་བྱ་བ་འམ། རིག་པ་ཞེས་བྱ་བ་འམ། མ་རིག་པ་ཞེས་བྱ་བ་འམ། དམིགས་པ་ཞེས་བྱ་བ་འམ། མི་དམིགས་པ་ཞེས་བྱ་བ་འམ། འདུས་བྱས་ཤེས་བྱ་བ་འམ། 
འདུས་མ་བྱས་ཤེས་བྱ་བར་རློམ་སེམས་སུ་མི་བྱེད། རྟོག་པ་མི་བྱེད། རྣམ་པར་རྟོག་པར་མི་བྱེད། གཉིས་སུ་འབྱེད་པར་མི་བྱེད། གཅིག་ཏུ་སྡུད་པར་མི་བྱེད། ལེན་པར་མི་བྱེད། འདོར་བར་མི་བྱེད། འཕྲོ་བར་
མི་བྱེད། མངོན་པར་ཞེན་པར་མི་བྱེད་ཅིང་ཆོས་ཐམས་ཅད་ཡང་དག་པའི་མཐའ་དང་མཉམ་པར་ཡང་དག་པར་རྗེས་སུ་མཐོང་ལ་མཉམ་པ་མེད་པ་དང་། མི་མཉམ་པ་མེད་པར་མཉམ་པ་ཉིད་ཀྱིས་མཉམ་པར་
བྱ་བ་འམ། མི་མཉམ་པར་བྱ་བའི་ཆོས་གང་ཡང་མེད་དེ། མཉམ་པ་ཉིད་གང་ཡིན་པ་དེ་ཡང་ཡང་དག་པར་རྗེས་སུ་མི་མཐོང་ཞིང་རློམ་སེམས་སུ་མི་བྱེད། རྟོག་པར་མི་བྱེད། རྣམ་པར་རྟོག་པར་མི་བྱེད། མངོན་
པར་ཞེན་པར་ཡང་མི་བྱེད་ན། ཐོབ་པ་འམ། མངོན་པར་རྟོགས་པ་འམ། མངོན་སུམ་བྱ་བས་རློམ་སེམས་སུ་བྱེད་པ་ལྟ་ཅི་སྨོས་ཏེ་དེ་ནི་གནས་མེད་དོ། །བཙུན་པ་ཀུན་དགའ་བོ་དེ་ལྟར་ན་དགེ་སློང་ལྷག་པའི་
ང་རྒྱལ་མེད་ཅིང་གཉེན་པོ་མེད་པ་དང་། ཕྱོགས་མེད་པ་དང་། རང་གི་ཕྱོགས་དང་། གཞན་གྱི་ཕྱོགས་དང་བྲལ་བ་དང་། ཚོར་བ་ཐམས་ཅད་རྒྱུན་བཅད་པ་དང་། ཚོར་བ་དང་། ཚོར་བ་མེད་པ་ཐམས་

79-1-169a

ཅད་དང་། དམིགས་པ་དང་། རྣམ་པར་རྟོག་པ་དང་། ཡིད་ལ་བྱེད་པ་ཐམས་ཅད་དང་བྲལ་བ་དང་། འཆིང་བ་མེད་པ་དང་། ཉེ་བར་ལེན་པ་མེད་པ་དང་། ཞི་བ་དང་། རབ་ཏུ་ཞི་བ་དང་། ཉེ་བར་ཞི་བ་ཡིན་ཏེ། 
དེ་ནི་ངར་འཛིན་པ་དང་། ང་ཡིར་འཛིན་པ་དང་བྲལ་བས་ཆོས་གང་ལ་ཡང་སྤང་བའམ། མངོན་པར་རྟོགས་པ་འམ། མངོན་སུམ་དུ་བྱ་བ་ཡོད་པའི་ཆོས་དེ་ཡང་ཡང་དག་པར་རྗེས་སུ་མི་མཐོང་སྟེ། དེ་ལྟར་ཞུགས་
པའི་དགེ་སློང་ནི་ལྷག་པའི་ང་རྒྱལ་མེད་པ་ཡིན་ནོ། །དེས་ནི་ནམ་མཁའི་ཁམས་མཉམ་པ་ཉིད་ཀྱིས་ཆོས་ཐམས་ཅད་མཉམ་པ་ཉིད་དུ་རྟོགས་པས་ན་ཆོས་གང་ལ་ཡང་དགེ་བ་ཞེས་བྱ་བ་འམ། མི་དགེ་བ་ཞེས་བྱ་
བ་འམ། ཁ་ན་མ་ཐོ་བ་དང་བཅས་པ་ཞེས་བྱ་བ་འམ། ཁ་ན་མ་ཐོ་བ་མེད་པ་ཞེས་བྱ་བ་འམ། ཟག་པ་དང་བཅས་པ་ཞེས་བྱ་བ་འམ། ཟག་པ་མེད་པ་ཞེས་བྱ་བའམ། འཇིག་རྟེན་པ་ཞེས་བྱ་བ་འམ། །
འཇིག་རྟེན་ལས་འདས་པ་ཞེས་བྱ་བ་འམ། འདུས་བྱས་ཤེས་བྱ་བ་འམ། འདུས་མ་བྱས་ཤེས་བྱ་བར་སྒྲོ་འདོགས་པར་མི་བྱེད་དོ། །དེ་ནི་སྒྲོ་འདོགས་པར་མི་བྱེད་པ་ཉིད་ཀྱིས་ཀྱང་རློམ་སེམས་སུ་མི་བྱེད། 
རྟོག་པར་མི་བྱེད། རྣམ་པར་རྟོག་པར་མི་བྱེད་དེ། ཡང་དག་པར་རྗེས་སུ་མི་མཐོང་ངོ་། །དེས་ནི་ཆོས་ཐམས་ཅད་སྒྲོ་བཏགས་པ་མེད་པར་མཉམ་པ་ཉིད་ཀྱིས་མཉམ་ཞིང་ནམ་མཁའ་ལྟར་མཉམ་པ་ཉིད་དུ་
རྟོགས་པ་ཡིན་ནོ། །བཙུན་པ་ཀུན་དགའ་བོ་གང་དེ་ལྟར་མོས་པའི་དགེ་སློང་ནི་ཡང་དག་པར་ཤིན་དུ་རྣམ་པར་གྲོལ་བ་ཞེས་བྱ་སྟེ། དེ་ལྟར་ན་ལྷག་པའི་ང་རྒྱལ་མེད་པ་ཡིན་ནོ། །དེ་ལས་དགོངས་ནས་བཅོམ་
ལྡན་འདས་ཀྱིས་འདི་སྐད་དུ་ཇི་ལྟར་ནམ་མཁའ་ལག་མཐིལ་ལ་མི་ཆགས་པ་ལྟར་དགེ་སློང་གི་ཆོས་ཀྱང་དེ་བཞིན་ནོ་ཞེས་གསུངས་སོ། །བསྟན་པ་འདི་བཤད་པ་ན་དགེ་སློང་ཉིས་བརྒྱ་ལེན་པ་མེད་པར་

79-1-169b

ཟག་པ་རྣམས་ལས་སེམས་རྣམ་པར་གྲོལ་ལོ། །དེ་ནས་ལྷའི་བུ་རིན་ཆེན་མཆོག་གིས་འཇམ་དཔལ་གཞོན་ནུར་གྱུར་བ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ལྷག་པའི་ང་རྒྱལ་
མེད་པ་ཡང་དག་པའི་ཤེས་པ་བརྡ་སྤྲོད་པར་བྱེད་པ་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་ཀྱི་སེམས་མི་མཉམ་པ་དང་མཉམ་པའི་
སེམས་འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པའི་སེམས་ཉན་ཐོས་དང་རང་སངས་རྒྱས་ཐམས་ཅད་ལས་ཡང་དག་པར་འདས་པའི་སེམས་དེ་ནང་ན་གནས་པར་ཡང་མི་མཐོང་། ཕྱི་རོལ་
ན་ཡང་མ་ཡིན། གཉིས་ག་མེད་པར་ཡང་མ་ཡིན། ཕྱི་རོལ་གྱི་ཡུལ་ལ་རྒྱུ་ཞིང་གནས་པར་ཡང་མི་མཐོང་ལ་དགེ་བའི་རྩ་བ་བསགས་པར་བྱ་བ་དང་། སེམས་ཅན་ཡོངས་སུ་སྨིན་པར་བྱ་བ་དང་། དམ་པའི་ཆོས་ཡོངས་
སུ་གཟུང་བའི་ཕྱིར་ཡང་རྒྱུ་ཞིང་ཐམས་ཅད་མཁྱེན་པ་ཉིད་ཀྱི་སེམས་དེ་ཡང་སེམས་ཅན་གཞན་རྣམས་དང་། གང་ཟག་གཞན་དག་ལ་རྗོད་པར་བྱེད་ལ་སེམས་དེ་ཡང་ཡང་དག་པའི་མཐའ་ངོ་བོ་ཉིད་དུ་རྟོགས་པར་
གྱུར་ཏེ། དྲིས་ན་སེམས་ཀྱི་ངོ་བོ་ཉིད་ཀྱིས་སེམས་ཅན་ཐམས་ཅད་ཀྱི་ངོ་བོ་ཉིད་རྟོགས་ཤིང་སེམས་ཅན་ཐམས་ཅད་ཀྱི་ངོ་བོ་ཉིད་ཀྱིས་ཆོས་ཐམས་ཅད་ཀྱི་ངོ་བོ་ཉིད་རྟོགས་ལ་ཆོས་ཐམས་ཅད་ཀྱི་ངོ་བོ་ཉིད་ཀྱིས་
དགེ་བའི་རྩ་བ་ཐམས་ཅད་ཀྱི་ངོ་བོ་ཉིད་རྟོགས་ཤིང་དགེ་བའི་རྩ་བ་ཐམས་ཅད་ཀྱི་ངོ་བོ་ཉིད་ཀྱིས་བྱང་ཆུབ་སེམས་དཔའི་ངོ་བོ་ཉིད་བརྡ་སྤྲོད་པར་བྱེད་པ་དེ་ནི་ལྷའི་བུ་བྱང་ཆུབ་སེམས་དཔའི་ཡང་དག་པའི་ཤེས་པ་བརྡ་
སྤྲོད་པ་ཡིན་ནོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་སྦྱིན་པ་སྦྱིན་པ་ན་གང་གཏོང་བར་བྱེད་པ་དང་། གང་གིས་གཏོང་བར་བྱེད་པ་དང་། གང་ལ་གཏོང་བར་བྱེད་པ་དང་། གང་དུ་གཏོང་བར་བྱེད་པ་དང་། 

79-1-170a

གང་དུ་ཡོངས་སུ་བསྔོ་བར་བྱེད་པ་དེ་དག་ཤིན་དུ་གཏོང་བས་གཏོང་བར་བྱེད་ཅིང་རྟེན་པར་མི་བྱེད། གནས་པར་མི་བྱེད། མངོན་པར་ཞེན་པར་མི་བྱེད། རེག་པར་མི་བྱེད། དམིགས་པར་མི་བྱེད་ལ། ཡང་དག་
པར་རྗེས་སུ་མི་མཐོང་བས་དྲིས་ན་ཤིན་དུ་གཏོང་བ་ཉིད་དང་། ཤིན་དུ་མི་དམིགས་པ་ཉིད་དང་། ཤིན་དུ་སྟོང་པ་ཉིད་གང་ཡིན་པ་དེ་དག་ཉིད་གཏོང་བའི་ངོ་བོ་ཉིད་དུ་རྟོགས་ཤིང་། གཏོང་བའི་ངོ་བོ་ཉིད་ཀྱིས་ཡང་དག་པའི་མཐའི་
ངོ་བོ་ཉིད་རྟོགས་ལ། ཡང་དག་པའི་མཐའི་ངོ་བོ་ཉིད་ཀྱིས་ཆོས་ཐམས་ཅད་ཀྱི་ངོ་བོ་ཉིད་རྟོགས་ཏེ། ཆོས་ཐམས་ཅད་ཀྱི་ངོ་བོ་ཉིད་ཀྱིས་སེམས་ཅན་ཐམས་ཅད་ཀྱི་ངོ་བོ་ཉིད་རྟོགས་ཤིང་སེམས་ཅན་ཐམས་ཅད་ཀྱི་ངོ་བོ་ཉིད་ཀྱིས་བྱང་ཆུབ་སེམས་དཔའི་
ངོ་བོ་ཉིད་བརྡ་སྤྲོད་པར་བྱེད་དེ། ལྷའི་བུ་དེ་ནི་བྱང་ཆུབ་སེམས་དཔའི་ཡང་དག་པའི་ཤེས་པ་བརྡ་སྤྲོད་པ་སྦྱིན་པས་ཡོངས་སུ་དག་པ་ཡིན་ནོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་ལུས་ཉེ་བར་
ཞི་བས་ཚུལ་ཁྲིམས་ཉེ་བར་ཞི་བར་རྟོགས་ཏེ། ངག་ཉེ་བར་ཞི་བ་དང་། སེམས་ཉེ་བར་ཞི་བས་ཚུལ་ཁྲིམས་ཉེ་བར་ཞི་བར་རྟོགས་ཤིང་། ལུས་དང་། ངག་དང་། སེམས་ཉེ་བར་ཞི་བས་བྱང་ཆུབ་ཉེ་བར་ཞི་བར་རྟོགས་ལ། 
བྱང་ཆུབ་ཉེ་བར་ཞི་བས་སེམས་ཅན་ཉེ་བར་ཞི་བར་རྟོགས་ཏེ། སེམས་ཅན་ཉེ་བར་ཞི་བས་ཆོས་ཐམས་ཅད་ཉེ་བར་ཞི་བར་རྟོགས་ཤིང་། ཆོས་ཐམས་ཅད་ཉེ་བར་ཞི་བས་ཡང་དག་པའི་མཐའ་ཉེ་བར་ཞི་བ་ཞེས་བྱ་
བར་རྟོགས་ལ། དེ་ཡང་དག་པའི་མཐའ་ཉེ་བར་ཞི་བས་ཞི་བ་དང་། རབ་ཏུ་ཞི་བ་དང་། ཉེ་བར་ཞི་བར་གྱུར་བས་དྲིས་ན་ཆོས་ཐམས་ཅད་ཉེ་བར་ཞི་བ་ཉིད་དུ་བརྡ་སྤྲོད་པར་བྱེད་དེ། ལྷའི་བུ་དེ་ནི་བྱང་ཆབ་སེམས་དཔའི་
ཡང་དག་པའི་ཤེས་པ་བརྡ་སྤྲོད་པ་ཚུལ་ཁྲིམས་ཀྱིས་ཡོངས་སུ་དག་པ་ཡིན་ནོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་ཤིན་ཏུ་ཟད་པའི་ཆོས་ཉིད་དང་། ཤིན་དུ་སྐད་ཅིག་པའི་ཆོས་ཉིད་དང་། 

79-1-170b

ཤིན་དུ་ཡ་མ་རླའི་ཆོས་ཉིད་དུ་རིག་ནས་སེམས་ཅན་ཐམས་ཅད་ཀྱི་ཉེས་པར་བྱས་པ་ཡང་བཟོད་ཅིང་། གང་གི་ཚེ་ཕྱི་ནང་གི་སེམས་ཀུན་ནས་མི་སློང་བར་བཟོད་པ་དང་། གང་གིས་ཁོང་ཁྲོ་བར་འགྱུར་བའི་ཡིད་ལ་བྱེད་པའི་ཕྱི་རོལ་
དུ་མི་གཏོང་ཞིང་སེམས་ཅན་ཐམས་ཅད་ཀྱི་ཉེས་པར་སྤྱད་པ་བཟོད་པ་དང་། སེམས་ཅན་དེ་དག་གིས་ངོ་བོ་ཉིད་གང་ཡིན་པ་དེ་ནི་བཟོད་པའི་ངོ་བོ་ཉིད་ཡིན་པ་དང་། བཟོད་པའི་ངོ་བོ་ཉིད་གང་ཡིན་པ་དེ་ནི་བྱང་ཆུབ་ཀྱི་ངོ་བོ་ཉིད་ཡིན་
པ་དང་། བྱང་ཆུབ་ཀྱི་ངོ་བོ་ཉིད་གང་ཡིན་པ་དེ་ནི་ཆོས་ཐམས་ཅད་ཀྱི་ངོ་བོ་ཉིད་ཡིན་པར་རྟོགས་ཤིང་། ཆོས་ཐམས་ཅད་ཀྱང་ཡང་དག་པའི་མཐའི་ངོ་བོ་ཉིད་དུ་རྟོགས་ཏེ། དྲིས་ན་ཤིན་དུ་ཟད་པའི་ཆོས་ཉིད་དང་། ཤིན་དུ་སྐད་ཅིག་
པའི་ཆོས་ཉིད་དང་། ཤིན་དུ་ཡ་མ་རླའི་ཆོས་ཉིད་དུ་རྟོགས་པས་རྒྱུ་བ་མེད་པ་ཉིད་ཀྱིས་བཟོད་པ་བརྡ་སྤྲོད་པར་བྱེད་དེ། ལྷའི་བུ་དེ་ནི་བྱང་ཆུབ་སེམས་དཔའི་ཡང་དག་པའི་ཤེས་པ་བརྡ་སྤྲོད་པ་བཟོད་པས་ཡོངས་སུ་དག་
པ་ཡིན་ནོ། །ལྷའི་བུ་གཞན་ཡང་གང་གིས་ཚེ་བྱང་ཆུབ་སེམས་དཔའ་ཡིད་ལ་བྱེད་པ་ཐམས་ཅད་ཀྱིས་དབེན་པའི་ཆོས་རྟོགས་ཤིང་སྒྲོ་འདོགས་པ་མེད་ལ་བཏང་སྙོམས་དང་ལྡན་པའི་བརྩོན་འགྲུས་དང་ལྡན་པས་
བརྩམ་པ་གང་རྩོམ་པ་དེ་དབེན་པ་ཉིད་དུ་ཡང་དག་པར་རྗེས་སུ་མཐོང་བ་དང་། དེ་ནང་དབེན་པས་ཕྱི་རོལ་དུ་རྒྱུ་བ་མེད་པར་སེམས་ཅན་རྣམས་ཡོངས་སུ་སྨིན་པར་བྱ་བའི་ཕྱིར་རྒྱུ་ཞིང་། བརྩོན་འགྲུས་དབེན་པས་སེམས་ཅན་
དབེན་པར་རྟོགས་ལ། སེམས་ཅན་དབེན་པས་བྱང་ཆུབ་དབེན་པར་རྟོགས་པ་དང་། བྱང་ཆུབ་དབེན་པས་ཆོས་ཐམས་ཅད་དབེན་པར་རྟོགས་པ་དང་། ཆོས་ཐམས་ཅད་དབེན་པས་ཡང་དག་པའི་མཐའ་དབེན་པར་
རྟོགས་པས་དྲིས་ན་བརྩོན་འགྲུས་དེ་དག་ཉིད་ཀྱི་རང་བཞིན་དབེན་པ་ཇི་ལྟ་བ་བཞིན་དུ་དབེན་པར་བརྡ་སྤྲོད་པར་བྱེད་དེ། ལྷའི་བུ་དེ་ནི་བྱང་ཆུབ་སེམས་དཔའི་ཡང་དག་པའི་ཤེས་པ་བརྡ་སྤྲོད་པ་བརྩོན་འགྲུས་ཀྱིས་ཡོངས་སུ་

79-1-171a

དག་པ་ཡིན་ནོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་ཆོས་ཐམས་ཅད་མཉམ་ཞིང་བྱེ་བྲག་མེད་པར་གྱུར་པར་བསམ་གཏན་བྱེད་དེ། བསམ་གཏན་དེ་ལ་སེམས་གནས་པར་འཇོག་
ཅིང་གནས་དེ་ལ་ཡང་རྣམ་པར་ཤེས་པ་གནས་པར་མི་བྱེད་པ་དང་། དེས་རྣམ་པར་ཤེས་པ་མི་གནས་ཤིང་སེམས་མཉམ་པ་ཉིད་ཀྱིས་བསམ་གཏན་མཉམ་པ་ཉིད་དུ་རྟོགས་པ་དང་། བསམ་གཏན་མཉམ་པ་
ཉིད་ཀྱིས་བྱང་ཆུབ་མཉམ་པ་ཉིད་དུ་རྟོགས་པ་དང་། བྱང་ཆུབ་མཉམ་པ་ཉིད་ཀྱིས་སེམས་ཅན་ཐམས་ཅད་མཉམ་པ་ཉིད་དུ་རྟོགས་པ་དང་། སེམས་ཅན་ཐམས་ཅད་མཉམ་པ་ཉིད་ཀྱིས་ཆོས་ཐམས་ཅད་མཉམ་
པ་ཉིད་དུ་རྗེས་སུ་རྟོགས་པས་དེ་ལྟར་ཆོས་ཐམས་ཅད་མཉམ་པ་ཞེས་བྱ་བར་རིག་ལ་དྲིས་ན་རང་བཞིན་ཇི་ལྟ་བ་བཞིན་དུ་མཉམ་པ་ཉིད་ཀྱིས་ཆོས་ཐམས་ཅད་མཉམ་པ་ཉིད་དུ་བརྡ་སྤྲོད་པར་བྱེད་དོ། །
ལྷའི་བུ་དེ་ནི་བྱང་ཆུབ་སེམས་དཔའི་ཡང་དག་པའི་ཤེས་པ་བརྡ་སྤྲོད་པ་བསམ་གཏན་གྱིས་ཡོངས་སུ་དག་པ་ཡིན་ནོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་ཤེས་རབ་ཀྱི་མིག་གིས་
རྣམ་པར་སྦྱངས་པའི་ཡེ་ཤེས་ཀྱིས་ཆོས་ཐམས་ཅད་མཐོང་སྟེ། ཇི་ལྟར་ཆོས་གང་ཡང་ཡང་དག་པར་རྗེས་སུ་མི་མཐོང་བ་དེ་ལྟར་མཐོང་ཞིང་གང་གིས་ཚེ་ཆོས་གང་ཡང་ཡང་དག་པར་རྗེས་སུ་མི་མཐོང་
བ་དེའི་ཚེ་ཅི་ཡང་མ་ཡིན་པར་འགྱུར་རོ། །དེ་ཅི་ཡང་མ་ཡིན་པའི་ཤེས་པ་ཐོབ་པས་མི་རྒྱུ། རབ་ཏུ་མི་རྒྱུ། རྣམ་པར་མི་རྒྱུའོ། །དེས་རྒྱུ་བ་དང་། རབ་ཏུ་རྒྱུ་བ་དང་། རྣམ་པར་རྒྱུ་བ་དང་། རྣམ་པར་རྒྱུ་བ་
ཐམས་ཅད་ཡང་དག་པར་རྒྱུན་བཅད་པས་མི་འཁོར་རོ། །རྣམ་པར་མི་འཁོར་རོ། །དེ་ཅིའི་ཕྱིར་ཞེ་ན། དེས་གང་གིས་འཁོར་བར་འགྱུར་བའི་རབ་ཏུ་རྒྱུ་བ་དེ་འདི་ལྟ་སྟེ། འདོད་པ་དང་། ཆགས་པ་དང་། 

79-1-171b

སྨོན་པའི་རྒྱུན་བཅད་པའི་ཕྱིར་ཏེ། དེ་འདོད་པའི་དོན་དུ་གཉེར་བ་ཐམས་ཅད་མེད་པར་སེམས་ཅན་ཡོངས་སུ་སྨིན་པར་བྱ་བ་དང་། བྱང་ཆུབ་ཀྱི་ཕྱོགས་ཀྱི་ཆོས་ཡང་དག་པར་བསྡུ་བ་དང་། དམ་པའི་ཆོས་ཡོངས་སུ་བཟུང་བ་དང་། 
དཀོན་མཆོག་གསུམ་གྱི་གདུང་རྒྱུད་མི་བཅད་པའི་ཕྱིར་བསམ་བཞིན་དུ་སྐྱེ་བ་རྣམས་སུ་རྒྱུ་བར་བྱེད་དེ། དེ་ནི་རྒྱུ་བ་མེད་པ་ཉིད་ཀྱིས་རྒྱུ་བར་བྱེད་ཅིང་ཆོས་རྣམས་ཀྱི་རང་བཞིན་རྣམ་པར་དག་པའི་མཚན་ཉིད་ཀྱང་རྣམ་པར་
འཁྲུག་པར་མི་བྱེད་དེ། དེ་ནི་དེའི་ཤེས་རབ་ཡིན་པས་དེ་ཤེས་རབ་ཀྱི་རང་བཞིན་གྱིས་བྱང་ཆུབ་རབ་ཏུ་ཤེས་པ་དང་། བྱང་ཆུབ་ཀྱི་རང་བཞིན་གྱིས་སེམས་ཅན་གྱི་རང་བཞིན་དང་། སེམས་ཅན་གྱི་རང་བཞིན་གྱིས་ཆོས་
ཐམས་ཅད་ཀྱི་རང་བཞིན་རྟོགས་ཤིང་། ཆོས་ཐམས་ཅད་ཀྱང་ཡང་དག་པའི་མཐའི་རང་བཞིན་རབ་ཏུ་ཤེས་ཏེ། དྲིས་ན་ཆོས་ཀྱི་དབྱིངས་ཀྱི་རང་བཞིན་དབྱེར་མེད་པ་དེ་ཉིད་བརྡ་སྤྲོད་པར་བྱེད་དེ། ལྷའི་བུ་དེ་ནི་བྱང་ཆུབ་
སེམས་དཔའི་ཡང་དག་པའི་ཤེས་པ་བརྡ་སྤྲོད་པ་ཤེས་རབ་ཀྱི་མིག་གིས་ཡོངས་སུ་དག་པ་ཡིན་ནོ། །ལྷའི་བུ་གཞན་ཡང་གང་གིས་ཚེ་བྱང་ཆུབ་སེམས་དཔའི་ལུས་ལ་ལུས་ཀྱི་རྗེས་སུ་ལྟ་ཞིང་དྲན་པ་ཉེ་བར་
གཞག་པས་གནས་པ་ན་དེས་སྔོན་གྱི་མཐའི་ལུས་ནི་མ་སྐྱེས་པར་རབ་ཏུ་ཤེས་སོ། །ཕྱི་མའི་མཐའི་ལུས་ནི་འཕོ་བ་མེད་པར་རབ་ཏུ་ཤེས་སོ། །ད་ལྟར་བྱུང་བའི་ལུས་ལ་ནི་རྩྭ་དང་། ཤིང་དང་། བརྩིག་པ་དང་། བོང་བ་དང་། 
མིག་ཡོར་གྱི་ངོ་བོ་ཉིད་ལྟ་བུར་སོ་སོར་རྟོག་པར་བྱེད་དེ། དེ་དེ་ལྟར་ལུས་ལ་ལུས་ཀྱི་རྗེས་སུ་ལྟ་ཞིང་གནས་པས་ལུས་ཀྱི་རང་བཞིན་སྐྱེ་བ་མེད་པར་རིག་ནས་ལུས་ཀྱི་རྣམ་པར་རིག་པ་དང་ལྡན་པའི་ཡིད་ལ་བྱེད་པ་
ཀུན་ནས་སློང་བར་མི་བྱེད་དོ། །ཡིད་ལ་བྱེད་པ་ཀུན་ནས་སློང་བར་མི་བྱེད་པ་གང་ཡིན་པ་དེ་ནི་ལྷག་པར་བྱེད་པ་ལ་མི་གནས་པ་ཡིན་ཏེ། དེ་ལྷག་པར་བྱེད་པ་དང་བྲལ་ཞིང་རྣམ་པར་ཤེས་པ་མི་གནས་པས་ལུས་ལ་

79-1-172a

ལུས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་སྒོམ་ཡང་ཆོས་གང་ལ་ཡང་སྒོམ་པར་མི་བྱེད། རྣམ་པར་འཇིག་པར་མི་བྱེད་དོ། །དེས་ཆོས་ཐམས་ཅད་དངོས་པོ་མེད་པར་རིག་ནས་ལུས་ལ་
ལུས་ཀྱི་རྗེས་སུ་ལྟ་ཞིང་གནས་པ་ན། སེམས་གང་གིས་དེ་ལྟར་ལུས་ལ་ལུས་ཀྱི་རྗེས་སུ་ལྟ་ཞིང་གནས་པའི་སེམས་དེ་ཡང་སྒྱུ་མའི་ཆོས་ཉིད་དང་། བྲག་ཆའི་ཆོས་ཉིད་ལྟ་བུར་རབ་ཏུ་ཤེས་སོ། །དེ་ལྟར་རབ་
ཏུ་ཤེས་པས་བདེ་བའི་ཚོར་བ་ལ་ཡང་རྗེས་སུ་ཆགས་པ་མེད་པ་སྡུག་བསྔལ་གྱི་ཚོར་བ་ལ་ཡང་ཁོང་ཁྲོ་བ་མེད་ཅིང་། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་ལ་ཡང་རྨོངས་
པ་མེད་པས་མ་རིག་པ་བག་ལ་ཉལ་བར་མི་འགྱུར་ཏེ། གང་གི་ཚེ་ཚོར་བ་རྣམས་ཀྱིས་མི་འཕྲོགས་པ་དེ་ནི་དེའི་ཚོར་བ་རྣམས་ལ་ཚོར་བའི་རྗེས་སུ་ལྟ་བའི་དྲན་པ་ཉེ་བར་གཞག་པ་ཡིན་ནོ། །དེ་དེ་ལྟར་
ཚོར་བའི་རྗེས་སུ་ལྟ་ཞིང་གནས་པ་ན་ཆོས་ཐམས་ཅད་ལ་ཚོར་བའི་རྒྱུ་བ་དག་གི་སེམས་མི་རྒྱུ་བས་དེ་ཆོས་ཐམས་ཅད་ལ་སེམས་མི་གནས་པའི་ཕྱིར་བྱང་ཆུབ་ཀྱི་སེམས་སྤོང་བར་མི་བྱེད། འདོར་
བར་མི་བྱེད། ཡོངས་སུ་གཏོང་བར་མི་བྱེད་དེ། དེ་ནི་དེའི་སེམས་ལ་སེམས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་ཡིན་ནོ། །ཆོས་ཤེས་པ་མངོན་སུམ་དུ་གྱུར་པས་ཆོས་རྣམས་ལ་ཆོས་ཀྱི་
རྗེས་སུ་ལྟ་ཞིང་གནས་པ་ན་དྲན་པ་མེད་ཅིང་ཡིད་ལ་བྱེད་པ་མེད་པས་ཆོས་ཉིད་ལ་འཇུག་བྱེད་ཅིང་། ལུས་དང་། ཚོར་བ་དང་། སེམས་དང་། ཆོས་རྣམས་ལ་འདུ་ཤེས་དང་། ཡིད་ལ་བྱེད་པ་དང་། 
ལྟ་བ་དང་། ཀུན་ནས་དཀྲིས་པ་དག་གིས་གནས་པར་མི་བྱེད་དོ། །དེ་ནི་དེའི་ཆོས་ལ་ཆོས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་ཡིན་ནོ། །དེས་ཆོས་ཐམས་ཅད་རང་བཞིན་གྱིས་མ་བྱུང་ཞིང་

79-1-172b

དངོས་པོ་མེད་པ་དང་། ནམ་མཁའི་ངོ་བོ་ཉིད་ལྟ་བུར་རྟོགས་པས་དྲིས་ན་དྲན་པ་མེད་པ་དང་། མངོན་པར་འདུ་བྱ་བ་མེད་པས་དྲན་པ་ཉེ་བར་གཞག་པ་བརྡ་སྤྲོད་པར་བྱེད་དེ། ལྷའི་བུ་དེ་ནི་བྱང་ཆུབ་སེམས་དཔའི་ཡང་དག་པའི་
ཤེས་པ་བརྡ་སྤྲོད་པ་དྲན་པ་ཉེ་བར་གཞག་པས་ཡོངས་སུ་དག་པ་ཡིན་ནོ། །ལྷའི་བུ་གཞན་ཡང་བྱང་ཆུབ་སེམས་དཔའི་ཡང་དག་པའི་ཤེས་པ་ནི་གང་ཐམས་ཅད་མཁྱེན་པ་ཉིད་ཀྱི་སེམས་དེ་ལ་ཀུན་ཤེས་པར་བྱེད། 
རྣམ་པར་རིག་པར་བྱེད། གནས་པར་བྱེད། མི་སྤོང་བར་བྱེད། རྣམ་པར་མི་གཡེང་བར་བྱེད། མི་རྗེད་པར་བྱེད་པ་དང་། དང་པོར་དགེ་བའི་རྩ་བ་རྣམས་ཀྱི་ཐོག་མར་འགྲོ་བ་དང་། སེར་སྣའི་སེམས་ལ་མི་འཇུག་པ་དང་། 
བདོག་པ་ཐམས་ཅད་ཡོངས་སུ་གཏོང་བའི་རྗེས་སུ་འཇུག་པ་དང་འཆལ་པའི་ཚུལ་ཁྲིམས་ཀྱི་སེམས་སྤོང་བ་དང་། ཚུལ་ཁྲིམས་ཀྱི་ཕུང་པོ་ལ་གནས་པ་མེད་པ་དང་། སེམས་ཅན་ཐམས་ཅད་ལ་གནོད་སེམས་
མེད་ཅིང་རྩོད་པ་མེད་པ་དང་། ལུས་དང་། ངག་དང་། སེམས་ཀྱིས་རྨ་མི་འབྱིན་པ་དང་། ཉན་ཐོས་དང་། རང་སངས་རྒྱས་ཀྱི་བརྩོན་འགྲུས་མི་རྩོམ་པ་དང་། ཐེག་པ་ཆེན་པོའི་བརྩོན་འགྲུས་རྩོམ་པ་དང་། མི་དགེ་བའི་
ཆོས་རྣམས་ཡིད་ལ་མི་བྱེད་ཅིང་མི་དྲན་པ་དང་། བསམ་གཏན་དང་། སྙོམས་པར་འཇུག་པ་ཐམས་ཅད་ལ་མི་གནས་པར་སྒོམ་པ་དང་། ལྟ་བའི་རྣམ་པ་ཐམས་ཅད་ལ་མི་རྒྱུ་བ་དང་། ཆོས་ཐམས་ཅད་འཕྲོ་
བར་མི་བྱེད་པ་དང་། ཆོས་ཐམས་ཅད་ལ་རྣམ་པ་མེད་པར་འཇུག་པ་དང་། སེམས་ཅན་རྣམས་ཀྱི་བསམ་པའི་རྣམ་པ་ལ་འཇུག་པ་དང་། ཡུལ་རྣམས་ལ་མི་རྒྱུ་བ་དང་། འཕགས་པའི་སྐྱེ་བོ་རྣམས་ཀྱི་རྗེས་སུ་
འཇུག་པ་དང་། འཕགས་པ་མ་ཡིན་པའི་སྐྱེ་བོ་རྣམས་དང་མ་འདྲེས་པ་དང་། ལུས་དང་། ངག་དང་། ཡིད་ཀྱི་ལས་མ་སྨད་པ་དང་། བག་ཡོད་པ་ལྷུར་ལེན་ཅིང་སངས་རྒྱས་ཀྱི་ཆོས་ཡོངས་སུ་ཚོལ་བ་དང་། 

79-1-173a

བསྟང་མི་དགོས་པར་དགོས་པ་ཐམས་ཅད་ཉམས་འོག་ཏུ་ཆུད་པར་བྱེད་པ་དང་། འདོད་ཆགས་དང་། ཞེ་སྡང་དང་། གཏི་མུག་སྤངས་པས་རྣམ་པར་དག་པ་དང་། ཚུལ་ཁྲིམས་ལ་སྐྱོན་མེད་པའི་ཕྱིར་
ཡོངས་སུ་གདུང་བ་མེད་པ་དང་། ལོག་པར་ཞུགས་པ་རྣམས་དང་མ་འབྲེལ་བ་དང་། ནང་ཤིན་དུ་དག་པས་ཚུལ་འཆོས་པ་མེད་པ་དང་། ངག་གི་ལས་ཡོངས་སུ་དག་པས་ཁ་གསག་མེད་པ་དང་། རང་གི་རྙེད་
པས་ཆོག་ཤེས་པས་ཚོལ་བ་མེད་པ་དང་། འཚོ་བ་ངན་པ་རྣམ་པར་སྤངས་པས་ཐོབ་ཀྱིས་འཇལ་བར་མེད་པ་དང་། ངན་ངོན་ཙམ་གྱིས་ཆོག་ཤེས་པས་རྣམ་པར་གཡོ་བ་མེད་པ་དང་། ཁམས་གསུམ་ལ་འདུན་པ་
དང་བྲལ་བས་འདོད་པ་ཆུང་བ་དང་། སྡིག་པ་འདོད་པ་དང་བྲལ་བས་ཆོག་ཤེས་པ་དང་། ཆོས་ཐམས་ཅད་དབེན་པར་མོས་པས་དབེན་པ་དང་། འཇིག་རྟེན་པའི་སྤྱོད་པ་སྤངས་པས་དོན་ཉུང་བ་དང་། སྤྲོས་པ་
ཐམས་ཅད་ཡང་དག་པར་བཅད་པས་སྤྲོས་པ་མེད་པ་དང་། འདུན་པ་དང་། ཞེ་སྡང་དང་། འཇིགས་པ་དང་། གཏི་མུག་དང་བྲལ་བས་འགྲོ་བ་མེད་པ་དང་། ང་རྒྱལ་ངེས་པར་བཅོམ་པས་ཆོས་ལ་དགའ་བ་དང་། སེམས་ཤིན་དུ་དུལ་
བས་ཅང་ཤེས་པ་དང་། ཚུལ་ཁྲིམས་ཀྱི་ཕུང་པོས་ཀུན་དུ་སྲུང་བ་དང་། ཏིང་ངེ་འཛིན་གྱི་ཕུང་པོས་སེམས་གནས་པ་མེད་པ་དང་། ཤེས་རབ་ཀྱིས་ཕུང་པོས་སེམས་རྣམ་པར་གྲོལ་བ་དང་། འཕགས་པའི་
རིགས་མི་འདོར་བ་དང་། བྱང་ཆུབ་ཀྱི་སེམས་ལ་དམ་བཅས་པ་མ་ཉམས་པ་དང་། རྙེད་པ་དང་། བཀུར་སྟི་ཐམས་ཅད་དོན་དུ་མི་གཉེར་བ་དང་། སེམས་ཅན་ཕ་རོལ་དག་གིས་ངོར་བྱེད་པ་མེད་པ་དང་། གཞན་ཀུན་དུ་
བསྲུང་བའི་ཕྱིར་བདག་རྗེས་སུ་སྲུང་བ་དང་། རང་གིས་སེམས་ལ་ངེས་པར་སེམས་པས་གཞན་གྱི་འཁྲུལ་པ་རྣམས་མི་ཚོལ་བ་དང་། ཚུལ་ཁྲིམས་ལེགས་པར་བསྡམས་པས་འཇིགས་པ་ཐམས་ཅད་དང་བྲལ་བ་དང་

79-1-173b

སློབ་དཔོན་གྱི་དཔེ་མཁྱུད་མེད་པས་ཆོས་ཀྱི་བགོ་བཤའ་བྱེད་པ་དང་། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་རྣམས་རྗེས་སུ་སྲུང་བ་དང་། དང་པོར་དགེ་བའི་ཆོས་ཐམས་ཅད་ལ་ཐོག་མར་འགྲོ་བ་དང་། ཆོས་
ཐམས་ཅད་རོ་གཅིག་པས་སྤྱོད་པ་ཐ་དད་པ་མེད་པ་དང་། རློམ་སེམས་ཐམས་ཅད་ཡང་དག་པར་བཅོམ་པས་རློམ་སེམས་མེད་པ་དང་། སྐྱེ་བ་མེད་པར་སོ་སོར་རྟོག་ལ་སེམས་ཅན་ཡོངས་སུ་སྨིན་པར་བྱ་བའི་
ཕྱིར་བསམས་བཞིན་དུ་སྐྱེ་བ་ཡང་ཡོངས་སུ་འཛིན་པ་དང་ཆོས་ཐམས་ཅད་ལ་གཟོད་མ་ནས་སྟོང་པ་ཉིད་དུ་སོ་སོར་རྟོག་ལ་ལྟ་བ་ཐམས་ཅད་གདུལ་བའི་ཕྱིར་སེམས་ཅན་ཡོངས་སུ་སྨིན་པར་ཡང་བྱེད་
པ་དང་། མཚན་མ་མེད་པ་ཡོངས་སུ་འདྲིས་པར་ཡང་བྱེད་ལ་མཚན་མ་ལ་སྤྱོད་པའི་སེམས་ཅན་རྣམས་ལ་ཡང་ལྟ་བ་དང་། སྨོན་པའི་ཤེས་པ་ཡང་མེད་ལ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ཀྱི་ཕྱིར་
སྨོན་ལམ་ཐམས་ཅད་ཀྱང་ཡོངས་སུ་རྫོགས་པར་བྱེད་པ་དང་། མངོན་པར་འདུ་བྱེད་པ་མེད་པར་ཡང་སོ་སོར་རྟོག་ལ་དགེ་བའི་རྩ་བ་མངོན་པར་འདུ་བྱ་བས་ཀྱང་ངོམས་མི་མྱོང་བ་དང་། དངོས་པོ་ནི་དངོས་པོ་
མེད་པར་སྣང་བས་དངོས་པོ་དང་དངོས་པོ་མེད་པ་ལ་རྟོག་པ་དང་། ལྷག་པར་བྱེད་པ་དང་དབྲལ་བའི་ཕྱིར་ཡིད་ལ་བྱེད་པ་མེད་པ་དང་། སེམས་ཅན་བདག་མེད་པ་ལ་སྦྱོར་བས་བདག་ལ་བདག་མེད་པ་དང་། 
ཉོན་མོངས་པ་ཡོངས་སུ་བཏང་བ་དང་། སེམས་ཅན་ཡོངས་སུ་མ་བཏང་བས་བཏང་བ་དང་མ་བཏག་པ་དང་། ཐབས་དང་ཤེས་རབ་བསྒོམས་པས་མ་ཞི་ཞིང་ཞི་ལ་ཉེ་བར་ཞི་བ་དང་། ཉན་ཐོས་དང་། རང་སངས་རྒྱས་
ཐམས་ཅད་དང་མ་འདྲེས་པས་འགྲོ་བ་མ་ཡིན་པར་འགྲོ་བ་དང་། བདུད་ཀྱི་ལམ་ལས་ཡང་དག་པར་འདས་པས་ལམ་མ་ཡིན་པའི་ལམ་དང་། བྱིས་པ་སོ་སོ་སྐྱེ་བོ་ཐམས་ཅད་དང་མ་འདྲེས་པ་སྤྱོད་པ་མ་ཡིན་

79-1-174a

པ་སྤྱོད་པ་དང་། ཆོས་ཐམས་ཅད་ལ་རྟོག་པས་འདེག་པ་མེད་ཅིང་གཞག་པ་མེད་པ་མཉམ་པ་ཉིད་དང་། གཞན་ལ་ལྷག་པར་རློམ་སེམས་སུ་མི་བྱེད་པས་བདག་མི་སྒྲོགས་པ་དང་། སངས་རྒྱས་
ཀྱི་ཆོས་རྣམས་ཡོངས་སུ་རྫོགས་པས་ཤེས་པ་མི་མཉམ་པ་དང་མཉམ་པ་དང་། ཆོས་ཐམས་ཅད་མ་སྐྱེས་པ་དང་མ་འགགས་པར་བཟོད་པས་མི་སྐྱེ་བའི་ཆོས་ལ་བཟོད་པ་སྟེ། ལྷའི་བུ་དེ་ནི་བྱང་ཆུབ་སེམས་
དཔའི་ཤེས་པ་ཡིན་ནོ། །ལྷའི་བུ་མི་སྐྱེ་བ་དང་མི་འབྱུང་བ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། སྐྱེ་བའི་འཁོར་བ་ཡོངས་སུ་འཛིན་པ་ནི་བྱང་ཆུབ་སེམས་དཔའི་ཤེས་པ་ཡིན་ཏེ། སངས་རྒྱས་
ཀྱི་ཆོས་ཡོངས་སུ་རྫོགས་པར་འགྱུར་རོ། །སྐྱོ་ཞིང་འདོད་ཆགས་དང་བྲལ་བ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། སངས་རྒྱས་ཀྱི་ཆོས་ཐམས་ཅད་ཡང་དག་པར་རིག་པར་བྱ་བ་ལ་དགའ་ཞིང་མཆོག་
ཏུ་དགའ་བ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །མཚམས་སྦྱོར་བ་མེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། སྐྱེ་བར་མཚམས་སྦྱོར་བའི་ཤེས་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །
ཡོངས་སུ་གཅོད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། དགེ་བའི་རྩ་བ་རྒྱུན་ཆགས་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །དགེ་བའི་རྩ་བ་དང་ཞེ་འགྲས་པ་ནི་བྱང་ཆུབ་སེམས་དཔའི་ཤེས་པ་
མ་ཡིན་གྱི། དགེ་བའི་རྩ་བས་ངོམས་མི་མྱོང་བ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །ཁམས་གསུམ་དུ་མཚམས་སྦྱོར་བར་མི་བྱེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། 
སེམས་ཅན་རྣམས་ཡོངས་སུ་སྨིན་པར་བྱ་བའི་ཕྱིར་བསམས་བཞིན་དུ་སྐྱེ་བ་ཡོངས་སུ་འཛིན་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །རང་གི་ཉོན་མོངས་པ་སྤོང་བ་ནི་བྱང་ཆུབ་སེམས་དཔའི་

79-1-174b

ཤེས་པ་མ་ཡིན་གྱི། སེམས་ཅན་ཐམས་ཅད་ཀྱི་ཉོན་མོངས་པ་སྤང་བའི་ཕྱིར་བརྩོན་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །བདག་གི་ཕྱིར་བྱེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། སེམས་ཅན་
ཐམས་ཅད་ཀྱི་སྡུག་བསྔལ་ཞི་བར་བྱ་བའི་ཕྱིར་བྱེད་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །ཡལ་བར་འདོར་བ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། སེམས་ཅན་ཡོངས་སུ་སྨིན་པར་བྱ་བར་སྦྱོར་བ་ནི། 
བྱང་ཆུབ་སེམས་དཔའི་ཤེས་པ་ཡིན་ནོ། །འདོད་ཆགས་དང་། ཞེ་སྡང་དང་། གཏི་མུག་དང་། ཉོན་མོངས་པ་ཟད་པར་བྱེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། འདོད་ཆགས་དང་། ཞེ་སྡང་དང་། གཏི་མུག་དང་། 
ཉོན་མོངས་པ་ཡོངས་སུ་ཤེས་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །འགོག་པའི་ཆོས་མངོན་སུམ་དུ་བྱེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། འགོག་པ་ཡོངས་སུ་འདྲིས་པར་བྱེད་པ་ནི་བྱང་ཆུབ་
སེམས་དཔའི་ཤེས་པ་ཡིན་ནོ། །ཟག་པ་ཟད་པར་བྱེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། དགེ་བའི་རྩ་བས་ཟག་པ་དབྲི་བར་བྱེད་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །རྣམ་པར་ཐར་པ་གསུམ་མངོན་
སུམ་དུ་བྱེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། རྣམ་པར་ཐར་པ་གསུམ་ལ་ཡོངས་སུ་འདྲིས་པར་བྱེད་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །ཕུང་པོ་ལྔའི་ཁུར་འདོར་བ་ནི་བྱང་ཆུབ་སེམས་དཔའི་
ཤེས་པ་མ་ཡིན་གྱི། སེམས་ཅན་ཐམས་ཅད་ཀྱི་ཁུར་འདོར་བར་བྱེད་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །དབང་པོ་དྲུག་འགོག་པར་བྱེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། སེམས་ཅན་གྱི་དབང་པོ་
མཆོག་དང་མཆོག་མ་ཡིན་པ་ཤེས་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །སྐྱེ་བ་ཟད་པར་བྱེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། སྐྱེ་བའི་མཚམས་སྦྱོར་བར་བྱེད་པ་ནི་བྱང་ཆུབ་སེམས་དཔའི་ཤེས་པ་

79-1-175a

ཡིན་ནོ། །ཉན་ཐོས་དང་། རང་སངས་རྒྱས་ཀྱི་རྣམ་པར་གྲོལ་བའི་འབྲས་བུ་ཐོབ་པར་བྱེད་པ་ནི་བྱང་ཆུབ་སེམས་དཔའི་ཤེས་པ་མ་ཡིན་གྱི། བྱང་ཆུབ་ཀྱི་སྙིང་པོར་རྣམ་པར་གྲོལ་བའི་འབྲས་བུས་སེམས་ཅན་
ཐམས་ཅད་ཉེ་བར་འཚོ་བར་བྱེད་པ་ནི་བྱང་ཆུབ་སེམས་དཔའི་ཤེས་པ་ཡིན་ནོ། །ཡང་དག་པའི་ཤེས་པ་བརྡ་སྤྲོད་པའི་ལེའུ་བསྟན་པ་འདི་བཤད་པ་ན་འཁོར་དེ་ལས་སྲོག་ཆགས་ཁྲིས་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་སེམས་བསྐྱེད་དོ། །བཅོམ་ལྡན་འདས་ཀྱིས་ཀྱང་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ་ལེགས་སོ་ལེགས་སོ། །ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་ཤེས་
པ་བརྡ་སྤྲོད་པ་དེ་ལེགས་པར་སྨྲས་སོ། །འཇམ་དཔལ་བྱང་ཆུབ་སེམས་དཔའ་གང་དག་ཤེས་པ་བརྡ་སྤྲོད་པ་བསྟན་པ་འདི་ཐོས་ན་མོས་པར་འགྱུར་ཞིང་མི་སྐྲག །མི་དངང་ལ་དངང་བར་མི་འགྱུར་བ་དེ་དག་ནི་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་དེ་བཞིན་གཤེགས་པ་རྣམས་ཀྱིས་ཡང་དག་པའི་ཤེས་པ་བརྡ་སྤྲོད་པར་འགྱུར་རོ།། །། བམ་པོ་གཉིས་པ། །དེ་ནས་ལྷའི་བུ་
རིན་ཆེན་མཆོག་གིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཅི་ཁྱོད་ཤེས་པ་བརྡ་སྤྲོད་པར་བྱེད་དམ། འཇམ་དཔལ་གྱིས་སྨྲས་པ། ལྷའི་བུ་གལ་ཏེ་ཁོ་བོས་ཆོས་འགའ་ཞིག་
ཐོབ་བམ་སྤངས་པར་གྱུར་ན་ནི་ཁོ་བོས་ཤེས་པ་བརྡ་སྤྲོད་པར་ཡང་འགྱུར་བ་ཞིག་ན། ལྷའི་བུ་ཁོ་བོས་ནི་ཆོས་འགའ་ཡང་ཐོབ་པ་མེད་ཅིང་སྤངས་པ་མེད་པས་ན་ཁོ་བོས་ཅི་ཞིག་ཤེས་པ་བརྡ་སྤྲོད་པར་བྱ། །
ལྷའི་བུ་སྨྲས་པ། འཇམ་དཔལ་ཁྱོད་ཀྱིས་སངས་རྒྱས་བཅོམ་ལྡན་འདས་གང་གཱའི་ཀླུང་གིས་བྱེ་མ་སྙེད་པོ་དེ་དག་ལས་ཐོབ་པ་དང་། མངོན་པར་རྟོགས་པ་མེད་དམ་འཇམ་དཔལ་གྱིས་སྨྲས་པ། 

79-1-175b

ལྷའི་བུ་སངས་རྒྱས་བཅོམ་ལྡན་འདས་རྣམས་ནི་འཐོབ་པ་འམ་མངོན་པར་རྟོགས་པའི་ཕྱིར་ཆོས་སྟོན་པར་མི་མཛད་དོ། །སྨྲས་པ། འཇམ་དཔལ་འོ་ན་སངས་རྒྱས་བཅོམ་ལྡན་འདས་རྣམས་ཇི་ལྟར་ཆོས་སྟོན་
པར་མཛད། འཇམ་དཔལ་གྱིས་སྨྲས་པ། ལྷའི་བུ་སངས་རྒྱས་བཅོམ་ལྡན་འདས་རྣམས་ནི་ཆོས་ཀྱི་དབྱིངས་ཀྱི་རང་བཞིན་དབྱེར་མེད་པ་ཉིད་ཀྱིས་ཆོས་སྟོན་པར་མཛད་ཀྱིས། སྐྱེ་བ་མེད་པ་དང་། འགག་པ་
མེད་པ་དང་། གདེག་པ་མེད་པ་དང་། གཞག་པ་མེད་པ་དང་། འོང་བ་མེད་པ་དང་། འགྲོ་བ་མེད་པ་དང་། སེམས་ཅན་མེད་པ་དང་། སེམས་ཅན་དང་བྲལ་བ་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་དང་། 
འཁོར་བ་དང་། ཡོངས་སུ་མྱ་ངན་ལས་འདའ་བའི་ཕྱིར་ཆོས་སྟོན་པར་མི་མཛད་དེ། ལྷའི་བུ་སངས་རྒྱས་བཅོམ་ལྡན་འདས་རྣམས་ནི་དེ་ལྟར་ཆོས་སྟོན་པར་མཛད་དོ། །ལྷའི་བུས་སྨྲས་པ། འཇམ་དཔལ་
གལ་ཏེ་སངས་རྒྱས་བཅོམ་ལྡན་འདས་རྣམས་ཡོངས་སུ་མྱ་ངན་ལས་འདའ་བའི་ཕྱིར་ཆོས་སྟོན་པར་མི་མཛད་ན། འོ་ན་གང་གི་དོན་དུ་སངས་རྒྱས་འབྱུང་བར་འགྱུར། འཇམ་དཔལ་གྱིས་སྨྲས་པ། །
ལྷའི་བུ་སངས་རྒྱས་ནི་འཇིགས་ཚོགས་ལ་ལྟ་བའི་རང་བཞིན་གྱི་ངོ་བོ་ཉིད་རྟོགས་པར་བྱ་བའི་དོན་དུ་འབྱུང་ངོ་། །ལྷའི་བུ་སངས་རྒྱས་ནི་མ་རིག་པ་དང་། སྲིད་པའི་སྲེད་པའི་རང་བཞིན་གྱི་ངོ་བོ་ཉིད་ཡང་
དག་པར་བསྟན་པའི་དོན་དུ་འབྱུང་ངོ་། །ལྷའི་བུ་སངས་རྒྱས་ནི་འདོད་ཆགས་དང་། ཞེ་སྡང་དང་། གཏི་མུག་གི་རང་བཞིན་གྱི་ངོ་བོ་ཉིད་རྟོགས་པར་བྱ་བའི་དོན་དུ་འབྱུང་ངོ་། །ལྷའི་བུ་སངས་རྒྱས་ནི་ཕྱིན་ཅི་
ལོག་གི་རང་བཞིན་མཉམ་པ་ཉིད་དུ་བསྟན་པའི་དོན་དུ་འབྱུང་ངོ་། །ལྷའི་བུ་སངས་རྒྱས་ནི་ལྟ་བའི་རྣམ་པ་ཐམས་ཅད་རྟོགས་པར་བྱ་བའི་དོན་དུ་འབྱུང་ངོ་། །ལྷའི་བུ་སངས་རྒྱས་ནི་ཕུང་པོ་དང་། ཁམས་དང་། 

79-1-176a

སྐྱེ་མཆེད་དང་། ཆོས་ཀྱི་དབྱིངས་ཀྱི་རང་བཞིན་གྱི་ངོ་བོ་ཉིད་ཡང་དག་པར་བསྟན་པའི་དོན་དུ་འབྱུང་ངོ་། །ལྷའི་བུ་སངས་རྒྱས་འབྱུང་བ་ཞེས་བྱ་བ་དེ་ནི་ཆོས་ཐམས་ཅད་སྐྱེ་བ་མེད་པའི་ཚིག་བླ་དགས་ཡིན་ཏེ། གང་
ལ་ཆོས་གང་ཡང་སྐྱེ་བ་མེད་པ་དེ་ལ་ནི་འཁོར་བ་ཡང་མེད་ལ་ཡོངས་སུ་མྱ་ངན་ལས་འདའ་བ་ཡང་མེད་དོ། །ལྷའི་བུས་སྨྲས་པ། འཇམ་དཔལ་དེ་ལྟ་ན་སེམས་ཅན་གང་དག་གིས་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཀྱི་ཕྱིར་གོ་ཆ་དགོས་པ་དེ་དག་གི་གོ་ཆ་ནི་དགོས་པ་མེད་པ་ཡིན་ནོ། །དེ་ཅིའི་ཕྱིར་ཞེ་ན། སངས་རྒྱས་འབྱུང་བ་ནི་ཕན་པ་མེད་པའི་ཕྱིར་རོ། །འཇམ་དཔལ་གྱིས་སྨྲས་པ། ལྷའི་བུ་འདི་ཇི་སྙམ་དུ་
སེམས། ཕན་པ་གང་གིས་རབ་ཏུ་ཕྱེ་བ་ཡིན་སྙམ་འམ། སྨྲས་པ། འཇམ་དཔལ་ཕན་པ་ནི་མངོན་པར་འདུ་བྱེད་པས་རབ་ཏུ་ཕྱེ་བ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ་ཁྱོད་དེ་བཞིན་གཤེགས་པ་ལ་མངོན་པར་
འདུ་མཛད་པ་ཡོད་པར་འདོད་དམ། སྨྲས་པ། འཇམ་དཔལ་དེ་ནི་མ་ཡིན་ཏེ། དེ་བཞིན་གཤེགས་པ་ནི་མངོན་པར་འདུ་མཛད་པ་མི་མངའ་བ་ཡིན་པས་དེ་ནི་འདུས་མ་བྱས་པ་བརྙེས་པ་དང་། འདུས་མ་བྱས་ཤིང་མངོན་
པར་འདུ་མཛད་པ་ནི་མི་མངའ་བ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ་ཁྱོད་ཀྱིས་དམ་བཅས་པ་དེ་ཉིད་ཀྱིས་ན་མངོན་པར་འདུས་མ་བྱས་པ་ལ་ནི་ཕན་པ་དང་། གནོད་པ་དམིགས་སུ་མེད་དོ། །ལྷའི་
བུས་སྨྲས་པ། འཇམ་དཔལ་ཆོས་བསྟན་པ་འདི་ནི་ལས་དང་པོ་པ་རྣམས་ཀྱི་མདུན་དུ་བཤད་པར་མི་བྱའོ། །དེ་ཅིའི་ཕྱིར་ཞེ་ན། ཐོས་ནས་སྐྲག་པར་འགྱུར་བ་དང་། སྐྲག་ནས་ཀྱང་ཕྱིར་ལྡོག་པར་འགྱུར་དུ་འོང་བའི་ཕྱིར་རོ། །
འཇམ་དཔལ་གྱིས་སྨྲས་པ། ལྷའི་བུ་ལས་དང་པོ་པའི་བྱང་ཆུབ་སེམས་དཔའ་སྐྲག་པ་དང་། ཕྱིར་ལྡོག་པ་གང་ཡིན་པ་དེ་ནི་ཕྱིར་མི་ལྡོག་པ་ཉིད་ལ་ཡང་དག་པར་གནས་པ་ཡིན་ནོ། །ལྷའི་བུས་སྨྲས་པ། 

79-1-176b

འཇམ་དཔལ་ཁྱོད་ཅི་ལས་བསམས་ཏེ། དེ་སྐད་སྨྲ། འཇམ་དཔལ་གྱིས་སྨྲས་པ། ལྷའི་བུ་ལས་དང་པོ་པའི་བྱང་ཆུབ་སེམས་དཔའ་གང་ཉན་ཐོས་དང་། རང་སངས་རྒྱས་ཀྱི་སས་སྐྲག་ཅིང་སེར་སྣ་དང་། འཆལ་པའི་ཚུལ་
ཁྲིམས་དང་། གནོད་སེམས་དང་། ལེ་ལོ་དང་། རྣམ་པར་གཡེང་བ་དང་། འཆལ་པའི་ཤེས་རབ་དག་ལས་ཕྱིར་ལྡོག་པ་དེ་ནི་ཕྱིར་མི་ལྡོག་པ་ཉིད་ལ་ཡང་དག་པར་གནས་པ་ཡིན་ནོ། །སྨྲས་པ། འཇམ་དཔལ་ཇི་ལྟར་གནས་ན་ཡང་
དག་པར་གནས་པ་ཡིན། སྨྲས་པ། ལྷའི་བུ་མཉམ་པར་གནས་ཤིང་མི་མཉམ་པར་གནས་པ་མ་ཡིན་ན་དེའི་ཕྱིར་ཡང་དག་པར་གནས་པ་ཞེས་བྱའོ། །སྨྲས་པ། འཇམ་དཔལ་ལས་དང་པོ་པའི་བྱང་ཆུབ་སེམས་དཔའ་
ཇི་ལྟར་གནས་པ་ཡིན། སྨྲས་པ། ལྷའི་བུ་གང་གི་ཚེ་ལས་དང་པོ་པའི་བྱང་ཆུབ་སེམས་དཔའ་ཆོས་ཀྱི་དབྱིངས་མཉམ་པ་ཉིད་ལ་མི་གནས་པའི་ཚུལ་གྱིས་མཉམ་པ་ཉིད་དུ་གནས་པ་དེ་ལྟ་བུ་ནི་ལས་དང་པོ་པའི་
བྱང་ཆུབ་སེམས་དཔའི་གནས་པ་ཡིན་ནོ། །སྨྲས་པ། འཇམ་དཔལ་ཇི་ཙམ་གྱིས་ན་བྱང་ཆུབ་སེམས་དཔའ་ལས་དང་པོ་པ་ཡིན། སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་དང་པོ་ཉིད་ནས་སྟོང་པ་
ཉིད་དང་། མཚན་མ་མེད་པ་དང་། སྨོན་པ་མེད་པ་དང་། སྐྱེ་བ་མེད་པ་དང་། འབྱུང་བ་མེད་པའི་ཆོས་ལ་མོས་པ་དེའི་ཕྱིར་ལས་དང་པོ་པ་ཞེས་བྱའོ། །སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ཡུན་རིང་པོ་
ནས་སྤྱད་པ་ཡིན། སྨྲས་པ། ལྷའི་བུ་བྱིས་པ་སོ་སོ་སྐྱེ་བོ་ཐམས་ཅད་ནི་ཡུན་རིང་པོ་ནས་སྤྱད་པ་ཡིན་ཏེ། དེ་དག་གི་འཁོར་བའི་སྔོན་གྱི་མཐའ་མི་མངོན་པའི་ཕྱིར་རོ། །སྨྲས་པ། འཇམ་དཔལ་ཇི་ལྟར་ན་བྱང་ཆུབ་
སེམས་དཔའ་སྤྱད་པ་སྲུང་བ་ཡིན། སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་འདོད་ཆགས་ལ་སྤྱོད་པ་ཡོངས་སུ་སྨིན་པར་བྱ་བའི་ཕྱིར་འདོད་ཆགས་ཀྱི་སྤྱད་པ་ལ་སྤྱོད་ཀྱང་འདོད་ཆགས་ཀྱི་

79-1-177a

སྤྱོད་པ་དང་ལྷན་ཅིག་མི་གནས་པ་དེ་ལྟ་བུ་ནི་བྱང་ཆུབ་སེམས་དཔའ་སྤྱད་པ་སྲུང་བ་ཡིན་ནོ། །ཞེ་སྡང་ལ་སྤྱོད་པ་ཡོངས་སུ་སྨིན་པར་བྱ་བའི་ཕྱིར་ཞེ་སྡང་གི་སྤྱད་པ་ལ་སྤྱོད་ཀྱང་ཞེ་སྡང་གི་སྤྱོད་པ་དང་། ལྷན་ཅིག་
མི་གནས་པ་དང་། གཏི་མུག་ལ་སྤྱོད་པ་ཡོངས་སུ་སྨིན་པར་བྱ་བའི་ཕྱིར་གཏི་མུག་གི་སྤྱད་པ་ལ་སྤྱོད་ཀྱང་གཏི་མུག་གི་སྤྱོད་པ་དང་ལྷན་ཅིག་མི་གནས་པ་དང་། ཆ་མཉམ་པ་ལ་སྤྱོད་པ་ཡོངས་སུ་སྨིན་པར་བྱ་བའི་ཕྱིར་
ཆ་མཉམ་པའི་སྤྱད་པ་ལ་སྤྱོད་ཀྱང་། ཉོན་མོངས་པ་ཐམས་ཅད་དང་ལྷན་ཅིག་མི་གནས་པ་དེ་ལྟ་བུ་ནི་བྱང་ཆུབ་སེམས་དཔའ་སྤྱད་པ་སྲུང་བ་ཡིན་ནོ། །ལྷའི་བུ་བྱང་ཆུབ་སེམས་དཔའ་གང་སེམས་ཅན་ཡོངས་སུ་སྨིན་པར་
བྱ་བའི་ཕྱིར་སེམས་ཅན་ཐམས་ཅད་ཀྱི་སྤྱོད་པའི་མཚན་ཉིད་ཀྱི་རྗེས་སུ་འཇུག་ཀྱང་ཆོས་ཀྱི་དབྱིངས་ཀྱི་རང་བཞིན་གྱི་མཚན་ཉིད་ཀྱང་རྣམ་པར་འཁྲུག་པར་མི་བྱེད་ན་དེ་ཙམ་གྱིས་ན་བྱང་ཆུབ་སེམས་དཔའ་སྤྱད་པ་སྲུང་བ་ཡིན་ནོ། །
སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ཕྱིར་མི་སྡོག་པ་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་ཆོས་གང་ཡང་འཇིག་པར་མི་བྱེད། ཆགས་
པར་ཡང་མི་བྱེད་ལ་ཆོས་ཀྱི་དབྱིངས་ནི་རང་བཞིན་འཇིག་པ་མེད་ཅིང་ཆགས་པ་མེད་པར་རྟོགས་པ་དེ་ལྟ་བུ་ནི་བྱང་ཆུབ་སེམས་དཔའ་ཕྱིར་མི་ལྡོག་པ་ཡིན་ནོ། །ལྷའི་བུ་གཞན་ཡང་གང་གིས་ཚེ་བྱང་ཆུབ་སེམས་དཔའ་
ལྡོག་པ་དང་། འཇུག་པར་བྱེད་པ་དེའི་ཚེ་བྱང་ཆུབ་སེམས་དཔའ་ཕྱིར་མི་ལྡོག་པ་ཡིན་ནོ། །དེ་ཅིའི་ཕྱིར་ཞེ་ན། འདོད་པའི་ཁམས་སུ་ཡང་ལྡོག་ལ་བསམ་གཏན་རྣམས་ལ་ཡང་འཇུག་པར་བྱེད་པའི་ཕྱིར་རོ། །
ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་མ་རྟོགས་པ་རྟོགས་ཤིང་མི་རྩོད་པ་ལྷུར་ལེན་པ་དེའི་ཚེ་བྱང་ཆུབ་སེམས་དཔའ་ཕྱིར་མི་ལྡོག་པ་ཡིན་ནོ། །དེ་ཅིའི་ཕྱིར་ཞེ་ན། སེམས་ཅན་གྱི་ཁམས་དང་། 

79-1-177b

ཆོས་ཀྱི་ཁམས་དང་། བདག་གི་ཁམས་མ་རྟོགས་པ་དེ་མངོན་སུམ་དུ་གྱུར་པས་ཆོས་ཐམས་ཅད་ལ་ཡང་ཕྱིར་ལྡོག་པ་མེད་པའི་ཕྱིར་ཏེ། དེའི་ཕྱིར་ཕྱིར་མི་ལྡོག་པ་ཞེས་བྱ་སྟེ། དེ་ནི་སངས་རྒྱས་ཀྱི་ཆོས་རྣམས་ལ་
གཞན་གྱི་དྲིང་མི་འཇོག་ཅིང་ནེམ་ནུར་མེད་ལ་ཐེ་ཚོམ་མེད་ཅིང་སོམ་ཉི་དང་བྲལ་བའི་ཕྱིར་གཟོད་མ་ནས་དག་ཅིང་དྲི་མ་མེད་ལ་ཉོན་མོངས་པ་མེད་ཅིང་ཤེས་རབ་ཀྱི་སྣང་བ་གསལ་བར་གྱུར་པས་ཆོས་ཐམས་ཅད་ལ་དབང་སྒྱུར་ཞིང་
སངས་རྒྱས་ཀྱི་ཆོས་ཐམས་ཅད་མངོན་སུམ་དུ་གྱུར་པ་དེའི་ཕྱིར་ཕྱིར་མི་ལྡོག་པ་ཞེས་བྱའོ། །སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེ་བ་གཅིག་གིས་ཐོགས་པ་
ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་སྐྱེ་བ་ཐམས་ཅད་སྐྱེ་བ་མེད་པར་ཤེས་ཤིང་། སེམས་ཅན་ཐམས་ཅད་ཀྱི་འཆི་འཕོ་དང་། སྐྱེ་བ་ཡང་རབ་ཏུ་ཤེས་ལ། 
སེམས་ཅན་ཡོངས་སུ་སྨིན་པར་བྱ་བའི་ཕྱིར། སྐྱེ་བ་ཐམས་ཅད་དུ་སྐྱེ་བ་སྟོན་ཅིང་ལེན་པ་མེད་པར་སྐྱེ་བ་ཡོངས་སུ། འཛིན་པར་བྱེད་པ་དང་། སྐྱེ་བ་དང་། ཚེ་རབས་ཐམས་ཅད་དུ་ལེན་པ་དང་བྲལ་
བ་དང་། སྐྱེ་བ་ལས་ཡང་དག་པར་འདས་པ་དང་། ཆོས་ཐམས་ཅད་ཀྱི་མཉམ་པ་ཉིད་ལས་ཀྱང་མི་འདའ་ཞིང་ཡང་དག་པར་མི་འདའ་བ་དང་། རྒྱུ་དང་རྐྱེན་ཚོགས་པའི་དོན་རྟོགས་པ་དང་། །
སེམས་ཅན་ཐམས་ཅད་དང་ལུས་མཉམ་པ་དང་། སེམས་ཅན་ཐམས་ཅད་དང་། སེམས་མཉམ་པ་དང་། སེམས་ཅན་ཐམས་ཅད་དང་ངག་མཉམ་པ་དང་། སེམས་ཅན་ཐམས་ཅད་དང་ཡུལ་མཉམ་
པ་དང་། སངས་རྒྱས་ཀྱི་ཡུལ་ལ་རབ་ཏུ་གནས་པ་དང་། ཆོས་ཀྱི་དབྱིངས་ཀྱི་ཡུལ་རྟོགས་པ་དང་། ཆོས་ཀྱི་དབྱིངས་མཉམ་པ་ཉིད་ཀྱིས་མཉམ་པ་དང་། སེམས་ཅན་གྱི་

79-1-178a

བསམ་པའི་བྱ་བ་ཤེས་པ་དང་། དུས་ལ་ལྟ་བ་དང་། བྱང་ཆུབ་ཀྱི་སྙིང་པོའི་མཐར་ཐུག་པ་དེ་ནི་སྐྱེ་བ་གཅིག་གིས་ཐོགས་པ་ཞེས་བྱ་སྟེ། ལྷའི་བུ་དེ་ལྟར་ན་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་
ཡིན་ནོ། །དེ་ནས་ལྷའི་བུ་རིན་ཆེན་མཆོག་གིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ཁ་ན་མ་ཐོ་བ་མེད་ཅིང་ཐམས་ཅད་དུ་དཔྱས་མེད་པ་ཡིན། 
འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་ཡེ་ཤེས་ཀྱིས་བྱས་པའི་ལམ་རྣམས་བྱེད་པ་དང་། ང་རྒྱལ་གྱིས་བྱས་པ་དག་མི་བྱེད་པ་དེའི་ཚེ་བྱང་ཆུབ་སེམས་དཔའ་ཁ་ན་མ་ཐོ་བ་
མེད་ཅིང་ཐམས་ཅད་དུ་དཔྱས་མེད་པ་ཡིན་ནོ། །ལྷའི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་བྱང་ཆུབ་ཀྱི་སེམས་ཀྱི་ལྷག་པའི་བསམ་པས་བདོག་པ་ཐམས་ཅད་ཡོངས་སུ་གཏོང་བ་དེ་ལྟ་
བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་སེར་སྣ་དང་ལྷན་ཅིག་མི་གནས་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་སྦྱངས་པའི་ཡོན་ཏན་དང་། བསླབ་པ་དང་། ཚུལ་ཁྲིམས་དང་། ཡི་དམ་ཐམས་
ཅད་དང་ལྡན་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་འཆལ་པའི་ཚུལ་ཁྲིམས་དང་ལྷན་ཅིག་མི་གནས་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་སེམས་ཅན་ཐམས་ཅད་ལ་ཁོང་ཁྲོ་བའི་སེམས་
མེད་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་བརྣབ་སེམས་དང་། གནོད་སེམས་ཀྱི་བག་ལ་ཉལ་དང་ལྷན་ཅིག་མི་གནས་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་དགེ་བའི་རྩ་བ་ཐམས་ཅད་
རྩོམ་པའི་བརྩོན་འགྲུས་ལ་ཡང་དག་པར་སྣང་བ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་ལེ་ལོ་དང་ལྷན་ཅིག་མི་གནས་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་བསམ་གཏན་ཅན་དང་། སྙོམས་པར་

79-1-178b

འཇུག་པ་ལ་སྙོམས་པར་འཇུག་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་བསམ་གཏན་གྱི་བདེ་བའི་རོ་མྱང་བར་མི་བྱེད་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་ཤེས་རབ་ཀྱི་རྩ་བའི་ཐོས་པ་ཡོངས་སུ་
ཚོལ་བ་ལ་བརྩོན་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་འཆལ་པའི་ཤེས་རབ་དང་ལྷན་ཅིག་མི་གནས་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་རྨ་ཕྱུང་ཡང་རྨ་མི་འབྱིན་པ་དེ་ལྟ་བུ་ནི་ཁ་ན་མ་ཐོ་བ་
མེད་པ་ཡིན་ནོ། །གང་ཡང་རྨ་ཕྱུང་ཡང་རྨ་མི་ཕྱིན་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་ཇི་ལྟ་བ་བཞིན་དུ་སྨྲ་བ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་དེ་བཞིན་དུ་བྱེད་པ་དེ་ལྟ་བུ་ནི་དཔྱས་མེད་པ་ཡིན་
ནོ། །གང་གི་ཚེ་ཉེ་བར་ཞི་བ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་ཕྱི་རོལ་གྱི་ཡུལ་རྣམས་ཀྱིས་མི་གོས་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་ཐམས་ཅད་མཁྱེན་པ་ཉིད་ཀྱི་སེམས་ལ་བསམ་
པ་ཐ་དད་པ་མེད་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་ཐེག་པ་དམན་པ་ལ་འདོད་པ་མེད་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་བདུད་ཀྱི་ལས་རྣམས་རྟོགས་པ་དེ་ལྟ་བུ་ནི་ཁ་ན་མ་ཐོ་བ་མེད་པ་
ཡིན་ནོ། །གང་ཡང་བདུད་ཀྱི་ལས་རྣམས་ཟློག་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་འཇིག་རྟེན་ན་སྣང་བ་ཐོབ་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་འཇིག་རྟེན་གྱི་ཆོས་རྣམས་ཀྱིས་མི་གོས་
པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་བྱ་བ་དང་འགལ་བར་མི་བྱེད་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་བྱ་བ་མ་ཡིན་པར་མི་ལྟུང་བ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་ང་རྒྱལ་དང་། 
རྒྱགས་པ་དང་། སྙེམས་པ་ཐམས་ཅད་དང་བྲལ་བ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་ཡེ་ཤེས་དང་། རྣམ་པར་ཤེས་པ་ཕུན་སུམ་ཚོགས་ཤིང་འཕགས་པའི་བདེ་བ་དང་ལྡན་པ་དེ་ལྟ་བུ་ནི་

79-1-179a

དཔྱས་མེད་པ་ཡིན་ནོ། །གང་གི་ཚེ་དམ་བཅས་པ་བརྟན་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་དམ་བཅས་པ་ཉམས་འོག་ཏུ་ཆུད་པར་བྱེད་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་རྟེན་ཅིང་
འབྲེལ་བར་འབྱུང་བ་ལུགས་དང་འཐུན་པར་བྱེད་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་རྟེན་ཅིང་འབྲེལ་བར་འབྱུང་བའི་ཆོས་རྣམས་ལ་མངོན་པར་ཞེན་པ་མེད་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་
ཚེ་ཤེས་རབ་དང་ཡེ་ཤེས་ཀྱིས་ཆོས་ཐམས་ཅད་རང་བཞིན་གྱིས་སྟོང་པར་རབ་ཏུ་ཤེས་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་ཐབས་ཤེས་པས་དགེ་བའི་རྩ་བ་ཐམས་ཅད་ཡང་དག་པར་སྡུད་པ་དེ་ལྟ་བུ་ནི་
དཔྱས་མེད་པ་ཡིན་ནོ། །གང་ཡང་བརྩོན་པ་ཐམས་ཅད་ལ་སྙིང་རྗེ་ཆེན་པོས་འཇུག་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་ཆོས་ཐམས་ཅད་ལ་རྣམ་པར་ཐར་པར་གནས་པ་དེ་ལྟ་བུ་ནི་དཔྱས་མེད་པ་ཡིན་ནོ། །
གང་ཡང་ཆོས་ཐམས་ཅད་མི་དམིགས་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་དམིགས་པའི་ལྟ་བ་སྤང་བའི་ཕྱིར་ཆོས་སྟོན་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་ཡང་ཚུལ་ཁྲིམས་ལ་རབ་ཏུ་སྦྱོར་ཞིང་
ཆོས་གང་ཡང་ཡང་དག་པར་རྗེས་སུ་མི་མཐོང་བ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་འབྲས་བུ་ཐོབ་པ་མངོན་སུམ་དུ་བྱེད་པ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་ཆོས་ཀྱི་དབྱིངས་སྟོང་པ་ཞེས་བྱ་བར་
སོ་སོར་རྟོག་པ་དེ་ལྟ་བུ་ནི་ཁ་ན་མ་ཐོ་བ་མེད་པ་ཡིན་ནོ། །གང་ཡང་སེམས་ཅན་ཐམས་ཅད་ཡོངས་སུ་མི་གཏོང་བ་དེ་ལྟ་བུ་ནི་དཔྱས་མེད་པ་ཡིན་ནོ། །གང་གི་ཚེ་ཁམས་གསུམ་དང་ལྷན་ཅིག་མི་གནས་པ་དེ་ལྟ་བུ་ནི་
ཁ་ན་མ་ཐོ་བ་མེད་པ་ཡིན་ནོ། །གང་ཡང་སེམས་ཅན་ཐམས་ཅད་ལ་ལྟ་བའི་ཕྱིར་ཡོངས་སུ་མྱ་ངན་ལས་མི་འདའ་བ་དེ་ལྟ་བུ་ནི་དཔྱས་མེད་པ་ཡིན་ནོ། །ལྷའི་བུ་གཞན་ཡང་ཇི་ཙམ་དུ་ཚིག་འཇུག་པ་དང་། ཚིག་གིས་

79-1-179b

རློམ་སེམས་སུ་བྱེད་པ་དང་། ཚིག་གིས་རྟོགས་པར་བྱེད་པ་དང་། ཚིག་ལ་མངོན་པར་ཞེན་པར་བྱེད་པ་དེ་ཙམ་དུ་སྐྱོན་ཡིན་ནོ། །ལྷའི་བུ་ཇི་ཙམ་དུ་ཆོས་ཐམས་ཅད་ལ་བསྙད་དུ་མེད་པ་ཉིད་དང་། འཇུག་པ་མེད་པ་ཉིད་དང་། རློམ་
སེམས་མེད་པ་ཉིད་དང་། རྟོག་པ་མེད་པ་ཉིད་དང་། འཕྲོ་བ་མེད་པ་ཉིད་དང་། བརྗོད་དུ་མེད་པ་ཉིད་དང་། སེམས་ཅན་ཡོངས་སུ་མི་གཏང་བའི་ཕྱིར་གཏན་དུ་ཡོངས་སུ་མྱ་ངན་ལས་མི་འདའ་བ་ཉིད་ཡིན་པ་དེ་ཙམ་དུ་ཁ་ན་མ་
ཐོ་བ་མེད་ཅིང་དཔྱས་མེད་པ་ཡིན་ནོ། །ལྷའི་བུ་གང་ལ་ཁ་ན་མ་ཐོ་བ་མེད་ཅིང་དཔྱས་མེད་པ་དེ་ནི་ཡི་གེ་མེད་པ་ཡིན་ནོ། །གང་ལ་ཡི་གེ་མེད་པ་དེ་ནི་བརྗོད་དུ་མེད་པ་ཡིན་ཏེ། བརྗོད་དུ་མེད་པའི་དོན་ལ་ནི་ཁ་ན་མ་ཐོ་བ་མེད་ཅིང་དཔྱས་
མེད་དོ། །ལྷའི་བུ་དེ་ལྟ་བས་ན་བརྗོད་དུ་མེད་པའི་དོན་ལ་རྟོན་པའི་བྱང་ཆུབ་སེམས་དཔའ་ནི་རང་གི་སེམས་གཙོ་བོར་བྱེད་པས་ཁ་ན་མ་ཐོ་བ་མེད་ཅིང་འཕགས་པ་རྣམས་ཀྱིས་དཔྱས་བྱར་མེད་པ་ཡིན་ནོ། །བསྟན་པ་འདི་བཤད་
པ་ན་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ་ལེགས་སོ་ལེགས་སོ། །ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱིས་ཁ་ན་མ་ཐོ་བ་མེད་པ་དང་། །
དཔྱས་མེད་པ་དེ་ལེགས་པར་སྨྲས་སོ། །འཇམ་དཔལ་གང་གི་ཚེ་བྱང་ཆུབ་སེམས་དཔའ་དེ་ལྟར་ཁ་ན་མ་ཐོ་བ་མེད་ཅིང་དཔྱས་མེད་པར་གྱུར་པ་དེའི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །བསྟན་པ་འདི་ཐོས་ནས་འཁོར་དེ་ལས་བྱང་ཆུབ་སེམས་དཔའ་ལྔ་བརྒྱས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ནས་དེ་དག་ཐམས་ཅད་ཀྱང་བཅོམ་ལྡན་
འདས་ཀྱིས་སངས་རྒྱས་ཀྱི་ཞིང་གཞན་དང་། གཞན་དག་ཏུ་མིང་ཐ་དད་པའི་དེ་བཞིན་གཤེགས་པ་དག་ཏུ་འགྱུར་རོ་ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལུང་བསྟན་ཏོ། །དེ་ནས་འཁོར་དེ་ལས་

79-1-180a

ལྷའི་བུ་ཁ་ཅིག་འདི་སྙམ་དུ་སེམས་ཏེ། ལྷའི་བུ་རིན་ཆེན་མཆོག་འདི་ཡུན་རིང་པོ་ཇི་སྲིད་ཅིག་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། འདིའི་སངས་
རྒྱས་ཀྱི་ཞིང་ནི་ཅི་འདྲ་བ་ཞིག་ཏུ་འགྱུར། བྱང་ཆུབ་ཐོབ་པའི་མིང་ནི་ཇི་སྐད་ཅེས་བྱ་བར་འགྱུར་སྙམ་མོ། །དེ་ནས་སངས་རྒྱས་ཀྱི་མཐུས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །
བཅོམ་ལྡན་འདས་ལྷའི་བུ་རིན་ཆེན་མཆོག་འདི་ཡུན་ཇི་སྲིད་ཅིག་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། འདིའི་སངས་རྒྱས་ཀྱི་ཞིང་ནི་ཅི་འདྲ་བ་ཞིག་ཏུ་འགྱུར། 
བྱང་ཆུབ་ཐོབ་པའི་མིང་ནི་ཇི་སྐད་ཅེས་བགྱི་བར་འགྱུར་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ལྷའི་བུ་རིན་
ཆེན་མཆོག་འདི་ནི་བསྐལ་པ་འབུམ་འདས་པའི་འོག་ཏུ་བསྐལ་པ་རིན་ཆེན་འབྱུང་གནས་ཤེས་བྱ་བ་ལ་ཤར་ཕྱོགས་སུ་འཇིག་རྟེན་གྱི་ཁམས་དགའ་བ་བཀོད་པ་ཞེས་བྱ་བར་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་བཀོད་པ་ཞེས་བྱ་བར་འཇིག་རྟེན་དུ་འབྱུང་བར་འགྱུར་རོ། །ཀུན་དགའ་
བོ་འཇིག་རྟེན་གྱི་ཁམས་དགའ་བ་བཀོད་པ་དེ་ཡང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། ལྷ་དང་། མི་རྣམས་ཀྱིས་ཀུན་དུ་གང་བ་དང་། མི་ཁོམ་པ་དང་། ངན་སོང་ཐམས་ཅད་དང་
བྲལ་བར་འགྱུར་རོ། །ཀུན་དགའ་བོ་འཇིག་རྟེན་གྱི་ཁམས་དེ་ནི་རྡོ་བ་དང་། གསེག་མ་དང་། གྱོ་མོ་མེད་ཅིང་ལག་མཐིལ་ལྟར་མཉམ་ལ་རིན་པོ་ཆེ་སྣ་གསུམ་འདི་ལྟ་སྟེ། བཻ་དཱུརྱ་དང་། ཤེལ་དང་། 

79-1-180b

འཛམ་བུ་ཆུ་བོའི་གསེར་གྱི་སྤྲས་ཤིང་བལྟ་ན་སྡུག་ལ་གསེར་གྱི་དྲ་བས་ཀུན་ནས་བཀབ་པར་འགྱུར་རོ། །ཀུན་དགའ་བོ་འདི་ལྟ་སྟེ། དཔེར་ན་འཕྲུལ་དགའི་ལྷ་རྣམས་ཀྱི་ལོངས་སྤྱོད་དང་། ཉེ་བར་སྤྱོད་པ་ཅི་འདྲ་བ་དེ་བཞིན་
དུ་མི་དེ་དག་གི་ལོངས་སྤྱོད་དང་། ཉེ་བར་སྤྱོད་པ་ཡང་དེ་དང་འདྲ་བར་འགྱུར་ཏེ། འཇིག་རྟེན་གྱི་ཁམས་དེར་ནི་བཟའ་བ་དང་། བཏུང་བ་དག་ཀྱང་ཡིད་ལ་བསམས་པ་ཙམ་གྱིས་འབྱོར་པར་འགྱུར་རོ། །འཇིག་རྟེན་གྱི་ཁམས་དེར་ནི་
ཉན་ཐོས་དང་། རང་སངས་རྒྱས་དག་གི་མིང་ཡང་འབྱུང་བར་མི་འགྱུར་རོ། །བྱང་ཆུབ་སེམས་དཔའ་དེ་དག་ཀྱང་ཆོས་ཀྱི་དགའ་བ་སྣ་ཚོགས་དག་གིས་ཆོས་ཀྱི་རྣམ་པར་གྲོལ་བ་སྣ་ཚོགས་དང་། བསམ་གཏན་དང་། 
ཏིང་ངེ་འཛིན་དང་། སྙོམས་པར་འཇུག་པ་སྣ་ཚོགས་དང་། རྫུ་འཕྲུལ་གྱི་རྣམ་པར་འཕྲུལ་བའི་བཀོད་པ་སྣ་ཚོགས་དག་གིས་དགའ་མགུར་སྤྱོད་པར་འགྱུར་ཏེ། ཆོས་ཀྱི་རབ་ཏུ་དགའ་བ་དང་། མཆོག་ཏུ་དགའ་
བ་དང་། དགའ་བ་དག་གིས་དགའ་བར་འགྱུར་བ་མ་གཏོགས་པར་ཚོར་བ་གཞན་དག་མྱོང་བར་མི་འགྱུར་བས་དེའི་ཕྱིར་འཇིག་རྟེན་གྱི་ཁམས་དེ་དགའ་བ་བཀོད་པ་ཞེས་བྱ་བར་འགྱུར་རོ། །དེ་བཞིན་གཤེགས་པ་དེའི་
ཚེའི་ཚད་ནི་ལོ་བྱེ་བ་ཕྲག་དྲུག་བཅུར་འགྱུར་རོ། །དེའི་བྱང་ཆུབ་སེམས་དཔའི་དགེ་འདུན་བྱང་ཆུབ་སེམས་དཔའ་རབ་ཏུ་བྱུང་བ་ནི་བྱང་ཆུབ་སེམས་དཔའ་བྱེ་བ་ཕྲག་དྲུག་བཅུར་འགྱུར་རོ། །དེའི་བྱང་ཆུབ་སེམས་དཔའ་
ཁྱིམ་ན་གནས་པ་ནི་དཔག་ཏུ་མེད་པར་འགྱུར་རོ། །དེ་བཞིན་གཤེགས་པ་རིན་ཆེན་བཀོད་པ་དེ་གང་གི་ཚེ་བྱང་ཆུབ་སེམས་དཔའ་དེ་དག་ལ་ཆོས་སྟོན་པར་འགྱུར་བ་དེའི་ཚེ་སྟེང་གི་བར་སྣང་ལ་ཏ་ལ་བྱེ་བ་ཕྲག་
བརྒྱད་བཅུ་ཙམ་དུ་ནམ་མཁའ་ལ་མངོན་པར་འཕགས་ཏེ། སྟེང་གི་འཇིག་རྟེན་གྱི་ཁམས་སྐྱིལ་མོ་དཀྲུང་གཅིག་གིས་ཁྱབ་པར་བྱས་ནས་འོད་ཟེར་བརྒྱ་སྟོང་དག་གིས་སངས་རྒྱས་ཀྱི་ཞིང་དེར་སྣང་བས་ཁྱབ་

79-1-181a

པར་བྱས་ཤིང་ལྷའི་མེ་ཏོག་དང་། སྤོས་དང་། ཕྱེ་མའི་ཆར་དག་མངོན་པར་རབ་ཏུ་ཕབ་ནས་ལྷའི་སིལ་སྙན་དང་། ཕེག་རྡོབ་པ་དང་། གླུ་དབྱངས་བརྒྱ་སྟོང་དག་གིས་སྒྲ་ཕྱུང་སྟེ། ཐམས་ཅད་དང་ལྡན་པའི་
སངས་རྒྱས་ཀྱི་ཞིང་དེ་སྒྲས་གོ་བར་བྱས་ནས་བྱང་ཆུབ་སེམས་དཔའ་དེ་དག་ལ་འདི་ལྟ་སྟེ། མི་ཟད་པའི་སྒོ་ཞེས་བྱ་བའི་གཟུངས་ཀྱི་སྒོའི་ཆོས་སྟོན་པར་འགྱུར་རོ། །དེ་ལ་མི་ཟད་པའི་སྒོའི་གཟུངས་ཀྱི་སྒོ་གང་ཞེ་ན། 
འདི་ལྟ་སྟེ། ལུས་དང་། སེམས་དབེན་པ་ཉིད་དུ་སྟོན་པར་བྱེད་པ་ཆོས་ཐམས་ཅད་ཀྱི་དབེན་པའི་སྒོ་དང་། ཆོས་རྣམས་ཀྱི་ངེས་པར་རྟོག་པ་ཉིད་སྟོན་པར་བྱེད་པ་ཆོས་ཐམས་ཅད་ལ་སོ་སོར་རྟོག་པའི་སྒོ་དང་། 
ཆོས་རྣམས་ཀྱི་ཉེ་བར་ཞི་བར་སྟོན་པར་བྱེད་པ་ཆོས་ཐམས་ཅད་ཀྱི་ཚུལ་བཞིན་ལ་རབ་ཏུ་སྦྱོར་བའི་སྒོ་དང་། ཆོས་རྣམས་ཀྱི་ཁ་ན་མ་ཐོ་བ་མེད་པ་སྟོན་པར་བྱེད་པ་ཆོས་ཐམས་ཅད་ཀྱི་ཡང་དག་པའི་ནན་ཏན་གྱི་སྒོ་དང་། ཆོས་
རྣམས་ཀྱི་ཤེས་པའི་སྣང་བ་སྟོན་པར་བྱེད་པ་ཆོས་ཐམས་ཅད་ཀྱི་སྣང་བའི་སྒོ་དང་། ཆོས་རྣམས་ཀྱི་བྱེ་བྲག་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་མཉམ་པ་ཉིད་ཀྱི་སྒོ་དང་། ཆོས་རྣམས་ཀྱི་རྣམ་པར་གཡེང་བ་
མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་ཞི་གནས་ཀྱི་སྒོ་དང་། ཆོས་རྣམས་ཀྱི་འགལ་བ་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་ལྷག་མཐོང་གི་སྒོ་དང་། ཆོས་རྣམས་ཀྱི་འཁྲུག་པ་
མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་ངེས་པར་སེམས་དཔའི་སྒོ་དང་། ཆོས་རྣམས་ཀྱི་མི་བརྗེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་དྲན་པའི་སྒོ་དང་། ཆོས་རྣམས་ཀྱི་དོན་རྟོགས་པ་
སྟོན་པར་བྱེད་པ་ཆོས་ཐམས་ཅད་ཀྱི་རྟོགས་པའི་སྒོ་དང་། ཆོས་རྣམས་ཀྱི་ཡིད་རྣམ་པར་དག་པ་སྟོན་པར་བྱེད་པ་ཆོས་ཐམས་ཅད་ཀྱི་བློ་གྲོས་ཀྱི་སྒོ་དང་། །།ཆོས་རྣམས་ཀྱི་ལྟ་བའི་

79-1-181b

རྣམ་པ་ཐམས་ཅད་ཡང་དག་པར་འཇོམས་པ་སྟོན་པར་བྱེད་པ་ཆོས་ཐམས་ཅད་ཀྱི་སྟོང་པ་ཉིད་ཀྱི་སྒོ་དང་། ཆོས་རྣམས་ཀྱི་ཞི་བ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་མཚན་མ་མེད་པའི་སྒོ་དང་། ཆོས་རྣམས་
ཀྱི་འགྲོ་བ་ཐམས་ཅད་ཡང་དག་པར་གཅོད་པ་སྟོན་པར་བྱེད་པ་ཆོས་ཐམས་ཅད་ཀྱི་སྨོན་པ་མེད་པའི་སྒོ་དང་། ཆོས་རྣམས་ཀྱི་མངོན་པར་འདུ་བྱེད་པ་དང་བྲལ་བ་སྟོན་པར་བྱེད་པ་ཆོས་ཐམས་ཀྱི་མངོན་པར་འདུ་བྱེད་
པ་མེད་པའི་སྒོ་དང་། ཆོས་རྣམས་ཀྱི་མངོན་པར་འགྲུབ་པ་མེད་པར་སྟོན་པར་བྱེད་པ་ཆོས་ཐམས་ཅད་ཀྱི་སྐྱེ་བ་མེད་པའི་སྒོ་དང་། ཆོས་རྣམས་ཀྱི་གཉིས་སུ་མེད་པའི་ཆོས་ཉིད་སྟོན་པར་བྱེད་པ་
ཆོས་ཐམས་ཅད་ཀྱི་འབྱུང་བ་མེད་པའི་སྒོ་དང་། ཆོས་རྣམས་ཀྱི་རྟོག་པ་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་འདོད་ཆགས་དང་བྲལ་བའི་སྒོ་དང་། ཆོས་རྣམས་ཀྱི་མངོན་སུམ་གྱི་ཤེས་པ་ཉིད་
སྟོན་པར་བྱེད་པ་ཆོས་ཐམས་ཅད་ཀྱི་སྤྲོས་པ་མེད་པའི་སྒོ་དང་། ཆོས་རྣམས་ཀྱི་གཉིས་དང་བྲལ་བ་སྟོན་པར་བྱེད་པ་ཆོས་ཐམས་ཅད་ཀྱི་གཉིས་སུ་མེད་པ་ཉིད་ཀྱི་སྒོ་དང་། ཆོས་རྣམས་ཀྱི་
གཡོ་བ་མེད་པ་ཉིད་སྟོན་པར་བྱེད་པ་ཆོས་ཐམས་ཀྱི་རྟེན་པ་མེད་པའི་སྒོ་དང་། ཆོས་རྣམས་ཀྱི་སེམས་ཅན་མཉམ་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་སེམས་ཅན་མེད་པ་ཉིད་ཀྱི་སྒོ་དང་། ཆོས་རྣམས་
ཀྱི་འགྱུར་བ་མེད་པ་སྟོན་པར་བྱེད་པ་ཆོས་ཐམས་ཅད་ཀྱི་བྱེད་པ་མེད་པའི་སྒོ་དང་། ཆོས་རྣམས་ཀྱི་སྤྱོད་པ་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་གཟུང་བ་མེད་པའི་སྒོ་དང་། ཆོས་རྣམས་ཀྱི་གཞི་ཡང་
དག་པར་འཇོམས་པར་སྟོན་པར་བྱེད་པ་ཆོས་ཐམས་ཅད་ཀྱི་ལྷག་པར་བྱེད་པ་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་ངེས་པའི་སྒོ་དང་། ཆོས་རྣམས་ཀྱི་འབྲས་བུ་འགྲུབ་པར་སྟོན་པར་བྱེད་པ་

79-1-182a

ཆོས་ཐམས་ཅད་ཀྱི་རྒྱུའི་སྒོ་དང་། ཆོས་རྣམས་ཀྱི་མི་བརྗོད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་མངོན་པར་བརྩོན་པའི་སྒོ་དང་། ཆོས་རྣམས་ཀྱི་ཀུན་ནས་ལྡང་བ་མེད་པ་ཉིད་སྟོན་པར་བྱེད་པ་ཆོས་
ཐམས་ཅད་ཀྱི་ངེས་པར་འབྱུང་བའི་སྒོ་དང་། ཆོས་རྣམས་ཀྱི་མ་ནོར་བ་དེ་བཞིན་ཉིད་སྟོན་པར་བྱེད་པ་ཆོས་ཐམས་ཅད་ཀྱི་དེ་བཞིན་ཉིད་ཀྱི་སྒོ་དང་། ཆོས་རྣམས་ཀྱི་དབྱེར་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་
ཡང་དག་པའི་མཐའི་སྒོ་དང་། ཆོས་རྣམས་ཀྱི་རོ་གཅིག་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་དབྱིངས་ཀྱི་སྒོ་དང་། ཆོས་རྣམས་ཀྱི་དུས་གསུམ་མཉམ་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་ཡང་དག་
པ་ཇི་ལྟ་བ་བཞིན་གྱི་སྒོ་དང་། ཆོས་རྣམས་ཀྱི་སྒྲ་དབྱངས་དང་། ཚིག་གི་ལམ་གྱིས་བརྗོད་པ་ཐམས་ཅད་ལ་མངོན་པར་ཞེན་པ་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་བརྗོད་དུ་མེད་པའི་དོན་གྱི་སྒོ་དང་། ཆོས་
རྣམས་ཀྱི་ཉེ་བར་ཞི་བ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་བསམ་གཏན་གྱི་སྒོ་དང་། ཆོས་རྣམས་ཀྱི་གང་ཟག་མེད་པ་ཉིད་སྟོན་པར་བྱེད་པ་ཆོས་ཐམས་ཅད་ཀྱི་ཆོས་ཉིད་གྱི་སྒོ་དང་། ཆོས་རྣམས་ཀྱི་ཆོས་མཉམ་པ་
ཉིད་རྟོགས་པ་སྟོན་པར་བྱེད་པ་ཆོས་ཐམས་ཅད་ཀྱི་བྱང་ཆུབ་ཀྱི་སྒོ་སྟེ། ཀུན་དགའ་བོ་དེ་ལྟར་དེ་བཞིན་གཤེགས་པ་རིན་ཆེན་བཀོད་པ་དེ་ནམ་མཁའི་དཀྱིལ་དེ་ཉིད་ལས་མ་བཞེངས་པར་བྱང་ཆུབ་སེམས་དཔའ་དེ་དག་
ལ་མི་ཟད་པའི་སྒོའི་གཟུངས་ཀྱི་སྒོ་དེ་དག་རྒྱ་ཆེར་ཡང་དག་པར་རབ་ཏུ་སྟོན་པར་འགྱུར་ཏེ། དེ་ཡང་བྱང་ཆུབ་སེམས་དཔའ་དཔག་ཏུ་མེད་གྲངས་མེད་པ་དག་གིས་བཟོད་པ་ཐོབ་པར་འགྱུར་རོ། །དེ་ནས་བཅོམ་ལྡན་
འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ལ་དེ་བཞིན་གཤེགས་པ་རྣམས་ལྷུན་གྱིས་གྲུབ་ཅིང་མངོན་པར་འདུ་མཛད་པ་མི་མངའ་བས་འདས་པ་དང་། མ་འོངས་པ་དང་། 

79-1-182b

ད་ལྟར་བྱུང་བའི་ཆོས་རྣམས་ལ་ཐོགས་པ་མི་མངའ་བའི་ཡེ་ཤེས་གཟིགས་པ་འཇུག་པ་ནི་ངོ་མཚར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་གང་དེ་བཞིན་གཤེགས་པ་རྣམས་ལྷུན་
གྱིས་གྲུབ་ཅིང་མངོན་པར་འདུ་མཛད་པ་མི་མངའ་བས་འདས་པ་དང་། མ་འོངས་པ་དང་། ད་ལྟར་བྱུང་བའི་ཆོས་རྣམས་ལ་ཐོག་པ་མི་མངའ་བའི་ཡེ་ཤེས་གཟིགས་པ་ལ་འཇུག་པ་དེ་ནི་མ་འདྲེས་པ་ཡིན་ནོ། །དེ་ནས་
ཚེ་དང་ལྡན་པ་ཀུན་དགའ་བོས་ལྷའི་བུ་རིན་ཆེན་མཆོག་ལ་འདི་སྐད་ཅེས་སྨྲས་སོ། །ལྷའི་བུ་ཁྱོད་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ནི་ཁྱོད་ཀྱི་རྙེད་པ་ལེགས་པར་
རྙེད་དོ། །ལྷའི་བུས་སྨྲས་པ། བཙུན་པ་ཀུན་དགའ་བོ་འདི་ལ་ནི་གང་ལུང་བསྟན་པའི་ཆོས་གང་ཡང་དམིགས་སུ་མེད་དོ། །དེ་ཅིའི་ཕྱིར་ཞེ་ན། གཟུགས་བྱང་ཆུབ་སེམས་དཔའ་མ་ཡིན་པས་གཟུགས་ལུང་
བསྟན་དུ་མེད་ལ། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་བྱང་ཆུབ་སེམས་དཔའ་མ་ཡིན་པས་རྣམ་པར་ཤེས་པ་ཡང་ལུང་བསྟན་དུ་མེད་པ་དང་། སའི་ཁམས་བྱང་ཆུབ་
སེམས་དཔའ་མ་ཡིན་པས་སའི་ཁམས་ཀྱང་ལུང་བསྟན་དུ་མེད་པ་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་བྱང་ཆུབ་སེམས་དཔའ་མ་ཡིན་པས་རླུང་གི་ཁམས་ཀྱང་ལུང་བསྟན་དུ་
མེད་པ་དང་། མིག་བྱང་ཆུབ་སེམས་དཔའ་མ་ཡིན་པས་མིག་ཀྱང་ལུང་བསྟན་དུ་མེད་པ་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་བྱང་ཆུབ་སེམས་དཔའ་མ་ཡིན་པས་ཡིད་ཀྱང་ལུང་བསྟན་དུ་
མེད་པ་དང་། མིང་དང་གཟུགས་བྱང་ཆུབ་སེམས་དཔའ་མ་ཡིན་པས་མིང་དང་གཟུགས་ཀྱང་ལུང་བསྟན་དུ་མེད་པ་དང་། འདས་པ་དང་། མ་འོངས་པ་དང་། ད་ལྟར་བྱུང་བ་བྱང་ཆུབ་སེམས་དཔའ་མ་ཡིན་

79-1-183a

པས་དུས་གསུམ་ཡང་ལུང་བསྟན་དུ་མེད་པ་དང་། རྒྱུ་དང་ལྟ་བ་བྱང་ཆུབ་སེམས་དཔའ་མ་ཡིན་པས་རྒྱུ་དང་ལྟ་བ་ཡང་ལུང་བསྟན་དུ་མེད་པ་དང་། འབྱུང་བ་དང་། འཇིག་པ་བྱང་ཆུབ་སེམས་དཔའ་
མ་ཡིན་པས་འབྱུང་བ་དང་། འཇིག་པ་ཡང་ལུང་བསྟན་དུ་མེད་པའི་ཕྱིར་རོ། །བཙུན་པ་ཀུན་དགའ་བོ་བྱང་ཆུབ་སེམས་དཔའ་ཞེས་བྱ་བ་དེ་ནི་བརྡའི་གཞིའི་ཚིག་བླ་དགས་ཡིན་ནོ། །དེ་ནི་ཉེ་བར་ཞི་བའི་གཞི་
ཡིན་ཏེ། ཆོས་གང་ཤིན་དུ་ཉེ་བར་ཞི་བ་དེ་ལ་ནི་ལུང་བསྟན་པ་གང་ཡང་མེད་དོ། །བཙུན་པ་ཀུན་དགའ་བོ་ལུང་བསྟན་པ་ཞེས་བྱ་བ་དེ་ནི་ཆོས་ཐམས་ཅད་གཟུང་དུ་མེད་པའི་ཚིག་བླ་དགས་ཡིན་ཏེ། བཙུན་
པ་ཀུན་དགའ་བོ་གང་གི་ཚེ་བྱང་ཆུབ་སེམས་དཔའ་ནང་ངམ་ཕྱི་རོལ་ལམ། དགེ་བ་འམ། མི་དགེ་བ་འམ། འདུས་བྱས་སམ། འདུས་མ་བྱས་ཀྱི་ཆོས་གང་ཡང་ཡོངས་སུ་འཛིན་པར་མི་བྱེད་ན་དེའི་
འོག་ཏུ་ལུང་བསྟན་པར་འགྱུར་ཏེ། བཙུན་པ་ཀུན་དགའ་བོ་བྱང་ཆུབ་སེམས་དཔའ་རྣམས་ཀྱི་ལུང་བསྟན་པ་ཞེས་བྱ་བ་ནི་ཆོས་ཐམས་ཅད་ཡོངས་སུ་བཟུང་དུ་མེད་པར་ལུང་བསྟན་པ་ཡིན་ནོ། །ལུང་བསྟན་
པ་ནི་ཆོས་ཐམས་ཅད་རྗེས་སུ་གཟུང་བ་མེད་པར་ལུང་བསྟན་པ་ཡིན་ནོ། །ལུང་བསྟན་པ་ནི་ཆོས་ཐམས་ཅད་གནས་མེད་པར་ལུང་བསྟན་པ་ཡིན་ནོ། །ལུང་བསྟན་པ་ནི་ཆོས་ཐམས་ཅད་སྐྱེ་བ་མེད་པར་
ལུང་བསྟན་པ་ཡིན་ནོ། །ལུང་བསྟན་པ་ནི་ཆོས་ཐམས་ཅད་རྟོག་པ་མེད་པ་དང་། རྣམ་པར་རྟོག་པ་མེད་པར་ལུང་བསྟན་པ་ཡིན་ཏེ། བཙུན་པ་ཀུན་དགའ་བོ་བྱང་ཆུབ་སེམས་དཔའ་རྣམས་ཀྱི་ལུང་བསྟན་པ་
ནི་དེ་ལྟ་བུ་ཡིན་ནོ། །དེ་ནས་བཅོམ་ལྡན་འདས་ཀྱིས་ལྷའི་བུ་རིན་ཆེན་མཆོག་ལ་ལེགས་སོ་ཞེས་བྱ་བ་བྱིན་ཏེ། ལྷའི་བུ་ལེགས་སོ་ལེགས་སོ། །དེ་ལྟ་བུའི་ཆོས་རྟོགས་པའི་བྱང་ཆུབ་སེམས་དཔའ་ནི་

79-1-183b

སངས་རྒྱས་བཅོམ་ལྡན་འདས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །གཏམ་འདི་བརྗོད་པར་གྱུར་པ་ན་བདུད་སྡིག་ཅན་དཔུང་དང་། བཞོན་པ་དང་བཅས། འཁོར་དང་
བཅས་པར་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་བདུད་སྡིག་ཅན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་
ཅི་ཅིའི་སླད་དུ་བྱང་ཆུབ་སེམས་དཔའ་ལུང་སྟོན་པར་མཛད་ཅིང་། ཉན་ཐོས་ལུང་སྟོན་པར་མི་མཛད་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བདུད་སྡིག་ཅན་ལ་འདི་སྐད་ཅེས་བཀའ་སྩལ་
ཏོ། །སྡིག་ཅན་བྱང་ཆུབ་སེམས་དཔའ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ལྷ་དང་། མི་རྣམས་ཀྱིས་ལེགས་པར་རྟོགས་ཤིང་རིག་པ་ཡིན་པས་ན་དེའི་ཕྱིར་བྱང་ཆུབ་སེམས་དཔའ་
ལུང་སྟོན་པར་མཛད་ཀྱི། ཉན་ཐོས་ནི་ལྷ་དང་། མི་རྣམས་ཀྱིས་རིག་པ་མ་ཡིན་པས་དེའི་ཕྱིར་ཉན་ཐོས་ལུང་སྟོན་པར་མི་མཛད་དོ། །བདུད་སྡིག་ཅན་བྱང་ཆུབ་སེམས་དཔའ་ལུང་བསྟན་ན་ནི་སེམས་ཅན་མང་
པོ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱེད་ཀྱི། ཉན་ཐོས་ལུང་བསྟན་པས་ནི་དེ་ལྟ་མ་ཡིན་ལ། ཐེག་པ་ཆེན་པོ་ལ་ཡང་དག་པར་ཞུགས་པའི་སེམས་ཅན་རྣམས་
ཀྱང་། ཕྱིར་མི་ལྡོག་པར་འགྱུར་བས་ནི་དེའི་ཕྱིར་བྱང་ཆུབ་སེམས་དཔའ་ལུང་སྟོན་པར་མཛད་ཀྱི། ཉན་ཐོས་ལུང་སྟོན་པར་མི་མཛད་དོ། །དེ་ནས་འཇམ་དཔལ་གཞོན་ནུར་གྱུར་པས་བདུད་སྡིག་ཅན་ལ་འདི་
སྐད་ཅེས་སྨྲས་སོ། །སྡིག་ཅན་ཁྱོད་ཅིའི་ཕྱིར་འཁོར་འདིར་འོངས། དེ་སྐད་ཅེས་སྨྲས་པ་དང་། བདུད་སྡིག་ཅན་གྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་གང་གི་ཚེ་

79-1-184a

བཅོམ་ལྡན་འདས་ཀྱིས་ལྷའི་བུ་རིན་ཆེན་མཆོག་འདི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་བཀོད་པ་ཞེས་བྱ་བར་འགྱུར་རོ་ཞེས་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་ལུང་བསྟན་པའི་ཚེ་དེ་ལྟར་ལུང་བསྟན་པའི་སྒྲས་བདག་གི་གནས་དང་གཞལ་མེད་ཁང་ཐམས་ཅད་དང་། སྐར་ཁུང་དང་། རྟ་བབས་ཐམས་ཅད་དང་། རིན་པོ་ཆེའི་ཤིང་ལྗོན་པ་དང་། 
དགའ་ཞིང་རྩེ་བའི་ལོངས་སྤྱོད་ཀྱི་གནས་ཐམས་ཅད་ལས་འདི་སྐད་ཅེས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་ལྷའི་བུ་རིན་ཆེན་མཆོག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་
བསྟན་ཟིན་ཏོ། །བྱང་ཆུབ་སེམས་དཔའ་གཞན་དག་ཀྱང་ལུང་བསྟན་དུ་འོང་གིས་སྡིག་ཅན་ཁྱོད་སོང་ཤིག་ཅེས་སྒྲ་བྱུང་ངོ་། འཇམ་དཔལ་གྱིས་སྨྲས་པ། སྡིག་ཅན་ཁྱོད་བྱང་ཆུབ་སེམས་དཔའ་རྣམས་ལུང་བསྟན་
པས་ཡི་མ་རངས་པར་གྱུར་ཏམ། བདུད་སྡིག་ཅན་གྱིས་སྨྲས་པ། འཇམ་དཔལ་གལ་ཏེ་འཛམ་བུའི་གླིང་ན་སེམས་ཅན་ཇི་སྙེད་པ་རྣམས་དགྲ་བཅོམ་པ་ཉིད་དུ་ལུང་བསྟན་ན་ནི་བདག་ཀྱང་ཡི་རངས་པར་འགྱུར་
གྱི། བྱང་ཆུབ་སེམས་དཔའ་ནི་གཅིག་གཅིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཀྱང་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་གང་གི་ཚེ་བྱང་ཆུབ་སེམས་དཔའ་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དེའི་ཚེ་བདག་གི་གནས་ཐམས་ཅད་སྤ་བསྐོང་པའི་ཕྱིར་ཏེ། འདི་ལྟར་བྱང་ཆུབ་སེམས་དཔའ་དེས་ནི་སེམས་ཅན་ཚད་མེད་གྲངས་མེད་དཔག་ཏུ་མེད་
པ་དག་ཐེག་པ་གསུམ་པོ་དག་གིས་ཁམས་གསུམ་ནས་ངེས་པར་འབྱིན་པར་འགྱུར་བས་འཇམ་དཔལ་དེ་ལྟར་ན་བདག་གི་ཡིད་ལ་གཅགས་པ་ཆེན་པོར་གྱུར་ཏོ། །འཇམ་དཔལ་གྱིས་སྨྲས་པ། 

79-1-184b

སྡིག་ཅན་ཁྱོད་འོངས་ཀྱང་རུང་། མ་འོངས་ཀྱང་རུང་སྟེ། སྡིག་ཅན་ཁྱོད་ཀྱིས་ནི་ལྷག་པའི་བསམ་པས་ཡང་དག་པར་ཞུགས་ཤིང་ཐབས་ལ་མཁས་པ་དང་ལྡན་ལ་ཤེས་རབ་ཀྱི་ཕ་རོལ་དུ་ཕྱིན་པས་ངེས་པར་བྱུང་བའི་
བྱང་ཆུབ་སེམས་དཔའ་ལ་བར་ཆད་བྱ་བར་མི་ནུས་སོ། །དེ་ཅིའི་ཕྱིར་ཞེ་ན། ལྷག་པའི་བསམ་པས་ཡང་དག་པར་ཞུགས་པ་དང་། ཐབས་ལ་མཁས་པ་དང་། ཤེས་རབ་ཀྱི་ཕ་རོལ་དུ་ཕྱིན་པས་ངེས་པར་བྱུང་
བའི་བྱང་ཆུབ་སེམས་དཔའ་ནི་བདུད་ཀྱི་ལམ་ལས་ཡང་དག་པར་འདས་པའི་ཕྱིར་རོ། །དེ་ནས་སངས་རྒྱས་ཀྱི་མཐུས་བདུད་སྡིག་ཅན་གྱིས་འཇམ་དཔལ་གཞོན་ནུར་གྱུར་བ་ལ་འདི་སྐད་ཅེས་སྨྲས་སོ། །
འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ལྷག་པའི་བསམ་པས་ཡང་དག་པར་ཞུགས་པ་དང་། ཐབས་ལ་མཁས་པ་དང་། ཤེས་རབ་ཀྱི་ཕ་རོལ་དུ་ཕྱིན་པས་ངེས་པར་བྱུང་བ་ཡིན། འཇམ་དཔལ་
གྱིས་སྨྲས་པ། སྡིག་ཅན་གང་གི་ཚེ་བྱང་ཆུབ་སེམས་དཔའ་ཉི་ཚེ་བའི་སྤྱོད་པ་ཐམས་ཅད་ལ་ལྷག་པར་མི་སྤྱོད་པ་དེ་ལྟ་བུ་ནི་ལྷག་པའི་བསམ་པས་ཡང་དག་པར་ཞུགས་པ་ཡིན་ནོ། །གང་གི་ཚེ་ཉོན་མོངས་
པ་ཐམས་ཅད་དང་། བདུད་ཀྱི་ལས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཕན་པར་གྱུར་པར་མཐོང་བ་དེ་ལྟ་བུ་ནི་ཐབས་ལ་མཁས་པ་ཡིན་ནོ། །གང་གི་ཚེ་ཉོན་མོངས་པ་
ཐམས་ཅད་དང་ལྷན་ཅིག་མི་གནས་པ་དེ་ལྟ་བུ་ནི་ཤེས་རབ་ཀྱི་ཕ་རོལ་དུ་ཕྱིན་པས་ངེས་པར་བྱུང་བ་ཡིན་ནོ། །སྡིག་ཅན་གཞན་ཡང་གང་གི་ཚེ་བྱང་ཆུབ་སེམས་དཔའ་ལྷག་པའི་བསམ་པས་
སེམས་ཅན་ཐམས་ཅད་བསྒྲལ་བའི་ཕྱིར་གོ་ཆ་ཆེན་པོ་དགོས་པ་དེ་ལྟ་བུ་ནི་ལྷག་པའི་བསམ་པས་ཡང་དག་པར་ཞུགས་པ་ཡིན་ནོ། །གང་གི་ཚེ་བསྡུ་བའི་དངོས་པོ་བཞིས་སེམས་ཅན་སྡུད་པ་

79-1-185a

དེ་ལྟ་བུ་ནི་ཐབས་ལ་མཁས་པ་ཡིན་ནོ། །གང་གི་ཚེ་སེམས་ཅན་ཐམས་ཅད་ལ་ཤིན་དུ་ཡོངས་སུ་མྱ་ངན་ལས་འདས་པའི་ངོ་བོ་ཉིད་དུ་སོ་སོར་རྟོག་པ་དེ་ལྟ་བུ་ནི་ཤེས་རབ་ཀྱི་ཕ་རོལ་དུ་
ཕྱིན་པས་ངེས་པར་བྱུང་བ་ཡིན་ནོ། །སྡིག་ཅན་གཞན་ཡང་གང་གི་ཚེ་བྱང་ཆུབ་སེམས་དཔའ་ནང་དང་ཕྱིའི་དངོས་པོ་རྣམས་ལ་མི་ལྟ་བར་གྱུར་ཅིང་བྱང་ཆུབ་ཀྱི་སེམས་ཀྱི་ལྷག་པའི་བསམ་པས་བདོག་པ་
ཐམས་ཅད་ཡོངས་སུ་གཏོང་བ་དེ་ལྟ་བུ་ནི་ལྷག་པའི་བསམ་པས་ཡང་དག་པར་ཞུགས་པ་ཡིན་ནོ། །གང་གི་ཚེ་སེམས་ཅན་ཐམས་ཅད་ལ་སྦྱིན་གནས་སུ་འདུ་ཤེས་སྐྱེད་པར་བྱེད་པ་དེ་ལྟ་བུ་ནི་ཐབས་ལ་མཁས་པ་
ཡིན་ནོ། །གང་གི་ཚེ་སྦྱིན་པ་པོ་དང་། ལེན་པ་པོ་ཡང་དག་པའི་མཐའ་དང་མཉམ་པ་ཉིད་དུ་མོས་པ་དེ་ལྟ་བུ་ནི་ཤེས་རབ་ཀྱི་ཕ་རོལ་དུ་ཕྱིན་པས་ངེས་པར་བྱུང་བ་ཡིན་ནོ། །སྡིག་ཅན་གཞན་ཡང་གང་གི་ཚེ་བྱང་ཆུབ་
སེམས་དཔའ་དགེ་བའི་རྩ་བ་བརྩམས་པ་དག་ལས་ཕྱིར་མི་ལྡོག་པ་དེ་ལྟ་བུ་ནི་ལྷག་པའི་བསམ་པས་ཡང་དག་པར་ཞུགས་པ་ཡིན་ནོ། །གང་གི་ཚེ་གཞན་གྱི་དོན་གྱིས་ཟིན་ཅིང་རང་གི་དོན་ལས་ལྡོག་པར་བྱེད་པ་
དེ་ལྟ་བུ་ནི་ཐབས་ལ་མཁས་པ་ཡིན་ནོ། །གང་གི་ཚེ་དོན་ལ་རྟོན་པ་ཡིན་གྱི། ཚིག་འབྲུ་ལ་རྟོན་པ་མ་ཡིན་པ་དེ་ལྟ་བུ་ནི་ཤེས་རབ་ཀྱི་ཕ་རོལ་དུ་ཕྱིན་པས་ངེས་པར་འབྱུང་བ་ཡིན་ནོ། །སྡིག་ཅན་གཞན་ཡང་གང་གི་
ཚེ་བྱང་ཆུབ་སེམས་དཔའ་སློང་བ་པོ་མཐོང་ན་ཁོང་ཁྲོ་བ་མེད་ཅིང་ཡི་རངས་པར་བྱེད་པ་དེ་ལྟ་བུ་ནི་ལྷག་པའི་བསམ་པས་ཡང་དག་པར་ཞུགས་པ་ཡིན་ནོ། །གང་གི་ཚེ་དགེ་བའི་རྩ་བ་ཡང་དག་པར་སྡུད་ཅིང་
ཐམས་ཅད་མཁྱེན་པ་ཉིད་དུ་ཡོངས་སུ་བསྔོ་བར་བྱེད་པ་དེ་ལྟ་བུ་ནི་ཐབས་ལ་མཁས་པ་ཡིན་ནོ། །གང་གི་ཚེ་ཆོས་ཐམས་ཅད་བྱང་ཆུབ་ཀྱི་རང་བཞིན་དུ་རབ་ཏུ་ཤེས་པ་དེ་ལྟ་བུ་ནི་ཤེས་རབ་ཀྱི་ཕ་རོལ་དུ་ཕྱིན་

79-1-185b

པས་ངེས་པར་བྱུང་བ་ཡིན་ནོ། །དེ་ནས་ལྷའི་བུ་རིན་ཆེན་མཆོག་གིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་གལ་ཏེ་བདུད་སྡིག་ཅན་དཔུང་དང་བཅས། བཞོན་པ་དང་བཅས། 
འཁོར་དང་བཅས། གནས་དང་བཅས་པ་འདི་ལྟོ་བའི་ནང་དུ་བཅུག་ན་ནི་འདི་ཐེག་པ་ཆེན་པོ་ལ་ཡང་དག་པར་ཞུགས་པའི་རིགས་ཀྱི་བུ་དང་། རིགས་ཀྱི་བུ་མོ་དག་ལ་བར་ཆད་བྱེད་པར་མི་འགྱུར་རོ། །འཇམ་དཔལ་
གྱིས་སྨྲས་པ། རིགས་ཀྱི་བུ་བདུད་སྡིག་ཅན་ལྟོ་བའི་ནང་དུ་གཞུག་པར་ནི་བྱང་ཆུབ་སེམས་དཔའི་ཆ་མ་ཡིན་པས་རིགས་ཀྱི་བུ་ཁོ་བོས་ཅི་ནས་ཀྱང་བདུད་སྡིག་ཅན་འདི་སངས་རྒྱས་ཀྱི་གཟུགས་ཀྱི་མཚན་གྱིས་
ལེགས་པར་བརྒྱན་ཅིང་བདེ་བ་མཆོག་དང་ལྡན་པས་སེང་གེའི་ཁྲི་ལ་འདུག་སྟེ། སངས་རྒྱས་ཀྱི་སྤོབས་པས་ཆོས་སྟོན་པར་འགྱུར་བ་དེ་ལྟར་བྱིན་གྱིས་བརླབ་པར་བྱའོ། །དེ་ནས་བདུད་སྡིག་ཅན་གྱིས་ཚིག་དེ་
ཐོས་ནས་མི་སྣང་བར་བྱ་བར་འདོད་ཅིང་འབྲོས་པར་འདོད་ན་འཇམ་དཔལ་གཞོན་ནུར་གྱུར་པའི་བྱིན་གྱི་བརླབས་ཀྱི་འཁོར་དེ་ནས་མི་སྣང་བར་བྱ་བ་དང་། འབྲོས་པར་ཡང་མ་ནུས་སོ། །དེ་ནས་དེའི་ཚེ་འཇམ་དཔལ་
གཞོན་ནུར་གྱུར་པ་བསམ་པ་འདི་སྙམ་དུ་བསམས་ཏེ། བདུད་སྡིག་ཅན་སངས་རྒྱས་ཀྱི་གཟུགས་ཀྱི་མཚན་དང་ལྡན་ཞིང་སེང་གེའི་ཁྲི་ལ་འདུག་པར་ཐམས་ཅད་དང་ལྡན་པའི་འཁོར་གྱིས་མཐོང་བར་བསམས་
ནས། དེ་ནས་འཇམ་དཔལ་གཞོན་ནུར་གྱུར་པས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན་ཁྱོད་ཀྱིས་ནི་དེ་བཞིན་གཤེགས་པ་རྣམས་ཀྱི་བྱང་ཆུབ་ཐོབ་སྟེ། ཁྱོད་ནི་སངས་རྒྱས་ཀྱི་གཟུགས་ཀྱི་
མཚན་དང་ལྡན་ཞིང་སེང་གེའི་ཁྲི་ལ་འདུག་གོ། དེ་ནས་འཇམ་དཔལ་གཞོན་ནུར་གྱུར་པའི་བྱིན་གྱིས་བརླབས་ཀྱིས་བདུད་སྡིག་ཅན་གྱིས་འདི་སྐད་ཅེས་སྨྲས་སོ། །འཇམ་དཔལ་བཅོམ་ལྡན་འདས་ཉིད་

79-1-186a

ཀྱིས་ཀྱང་བྱང་ཆུབ་མ་བརྙེས་ན་ཁོ་བོས་ལྟ་འཐོབ་པར་འགྱུར་རེ་སྐན། དེ་ཅིའི་ཕྱིར་ཞེ་ན། བྱང་ཆུབ་ནི་འཐོབ་པའི་འདོད་ཆགས་དང་བྲལ་བའི་མཚན་ཉིད་ཡིན་པས་ན་འདོད་ཆགས་དང་བྲལ་བ་ལ་ནི་འཐོབ་
པ་ཡང་མེད། མངོན་པར་རྟོགས་པ་ཡང་མེད་དེ། བྱང་ཆུབ་ནི་འདུས་མ་བྱས་པ་ཐོབ་པ་ཡིན་ལ་དེ་ཡང་འཐོབ་པ་མེད་པ་ཉིད་ཀྱི་མཚན་ཉིད་ཡིན་པ་དང་། བྱང་ཆུབ་ནི་སྟོང་པ་ཉིད་རྟོགས་པའི་མཚན་ཉིད་ཡིན་པས་
ན་སྟོང་པ་ཉིད་ཀྱིས་སྟོང་པ་ཉིད་མངོན་པར་རྫོགས་པར་འཚང་མི་རྒྱ་བ་དང་། བྱང་ཆུབ་ནི་མཚན་མ་མེད་པའི་མཚན་ཉིད་ཡིན་པས་ན་མཚན་མ་མེད་པས་མཚན་མ་མེད་པ་མངོན་པར་རྫོགས་པར་འཚང་མི་རྒྱ་བ་དང་། 
བྱང་ཆུབ་ནི་སྨོན་པ་མེད་པའི་མཚན་ཉིད་ཡིན་པས་ན་སྨོན་པ་མེད་པས་སྨོན་པ་མེད་པ་མངོན་པར་རྫོགས་པར་འཚང་མི་རྒྱ་བ་དང་། བྱང་ཆུབ་ནི་ཆོས་ཀྱི་དབྱིངས་ཀྱི་རང་བཞིན་ཡིན་པས་ན་རང་བཞིན་གྱིས་རང་བཞིན་མངོན་པར་
རྫོགས་པར་འཚང་མི་རྒྱ་བ་དང་། བྱང་ཆུབ་ནི་དེ་བཞིན་ཉིད་དབྱེར་མེད་པའི་མཚན་ཉིད་ཡིན་པས་ན་དེ་བཞིན་ཉིད་ཀྱིས་དེ་བཞིན་ཉིད་མངོན་པར་རྫོགས་པར་འཚང་མི་རྒྱ་བ་དང་། བྱང་ཆུབ་ནི་ཡང་དག་པའི་
མཐའ་ལ་གནས་པ་ཡིན་པས་ན་ཡང་དག་པའི་མཐའ་ཡང་དག་པའི་མཐའ་མངོན་པར་རྫོགས་པར་འཚང་མི་རྒྱ་བ་དང་། བྱང་ཆུབ་ནི་བདག་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གསོ་བ་
མེད་པ་དང་། སྐྱེས་བུ་མེད་པ་དང་། གང་ཟག་མེད་པའི་ངོ་བོ་ཉིད་ཡིན་པས་ན་དེ་ལ་ནི་མངོན་པར་རྫོགས་པར་འཚང་རྒྱ་བ་གང་ཡང་མེད་པའི་ཕྱིར་རོ། །འཇམ་དཔལ་གཞན་ཡང་བྱང་ཆུབ་སེམས་དཔའ་
གང་གིས་བྱང་ཆུབ་ཀྱི་མཚན་ཉིད་བསྟན་པ་འདི་ཐོས་ནས་ཆོས་ཐམས་ཅད་ཀྱི་ངོ་བོ་ཉིད་ཀྱི་མཚན་ཉིད་རྣམ་པར་འཁྲུགས་པར་མི་བྱེད་པ་དེ་ནི་སངས་རྒྱས་ཉིད་ཡིན་པར་བརྗོད་པར་བྱའོ། །བདུད་ཀྱིས་

79-1-186b

བསྟན་པ་འདི་བཤད་པ་ན་བྱང་ཆུབ་སེམས་དཔའ་ལྔ་བརྒྱས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །
འཇམ་དཔལ་ཁྱོད་ཀྱི་བྱིན་གྱིས་བརླབས་ཀྱིས་བདུད་སྡིག་ཅན་དེ་བཞིན་གཤེགས་པའི་ཁ་དོག་དང་། གཟུགས་ཀྱི་མཚན་དང་ལྡན་ཞིང་སེང་གེའི་ཁྲི་ལ་འདུག་ནས་ཟབ་མོ་འི་གནས་འདི་ལྟ་བུ་འདི་དག་
སྟོན་པ་ནི་ངོ་མཚར་ཏོ། །འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་ཁོ་བོས་ནི་སེམས་མེད་པའི་དངོས་པོ་ཤིང་དང་། རྩྭ་དང་། ནགས་ཚལ་འདི་དག་ལ་དེ་ལྟ་དེ་ལྟར་བྱིན་གྱིས་བརླབས་ན་ཡང་
འདི་དག་ཀྱང་དེ་ལྟ་བུའི་མཚན་དང་ལྡན་ཞིང་སངས་རྒྱས་ཀྱི་སྤོབས་པས་ཆོས་སྟོན་པར་འགྱུར་རོ། །ཁོ་བོས་གནས་བརྟན་ཤཱ་ར་དྭ་ཏིའི་བུ་འདི་ལ་དེ་ལྟ་དེ་ལྟར་བྱིན་གྱིས་བརླབས་ན་ཡང་གནས་བརྟན་
ཤཱ་ར་དྭ་ཏིའི་བུ་ཡང་སངས་རྒྱས་ཀྱི་གཟུགས་དང་། སྐུའི་མཚན་དང་ལྡན་ཞིང་སངས་རྒྱས་ཀྱི་སྤོབས་པས་ཆོས་སྟོན་པར་འགྱུར་རོ། །དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུ་འདི་སྙམ་དུ་སེམས་ཏེ། བདག་ཀྱང་
འཇམ་དཔལ་གཞོན་ནུར་གྱུར་པས་སངས་རྒྱས་ཀྱི་གཟུགས་དང་། སྐུའི་མཚན་དང་ལྡན་པར་བྱིན་གྱིས་བརླབས་ན་ཉན་ཐོས་སྟོན་པའི་གཟུགས་སུ་གནས་པ་ནི་མི་མཐུན་པ་ཡིན་པས་བདག་འཁོར་འདི་ནས་
མི་སྣང་བར་བྱའོ། །སྙམ་དུ་བསམས་པ་དང་། འཇམ་དཔལ་གཞོན་ནུར་གྱུར་པའི་བྱིན་གྱིས་བརླབས་ཀྱིས་དེས་མི་སྣང་བར་བྱེད་མ་ནུས་སོ། །དེ་ནས་འཇམ་དཔལ་གཞོན་ནུར་གྱུར་པས་ཚེ་དང་ལྡན་པ་ཤཱ་ར་
དྭ་ཏིའི་བུའི་སེམས་ཀྱི་ཡོངས་སུ་རྟོག་པ་སེམས་ཀྱིས་ཤེས་ནས་ཚེ་དང་ལྡན་པ་ཤཱ་ར་དྭ་ཏིའི་བུ་སངས་རྒྱས་ཀྱི་གཟུགས་དང་། སྐུའི་མཚན་དང་ལྡན་ཞིང་སེང་གེའི་ཁྲི་ལ་འདུག་པར་ཐམས་ཅད་དང་ལྡན་པའི་འཁོར་རྣམས་ཀྱིས་མཐོང་བར་

79-1-187a

བྱིན་གྱིས་བརླབས་སོ། །དེ་ནས་འཇམ་དཔལ་གཞོན་ནུར་གྱུར་པས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་ར་དྭ་ཏིའི་བུ་ཇི་ལྟར་དེ་བཞིན་གཤེགས་པ་ཆོས་སྟོན་པར་མཛད་པ་དེ་བཞིན་
དུ་བདུད་སྡིག་ཅན་དང་ལྷན་ཅིག་ཏུ་སྟོན་ཅིག །དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུ་སངས་རྒྱས་ཀྱི་གཟུགས་དང་། སྐུའི་མཚན་དང་ལྡན་པས་བདུད་སྡིག་ཅན་སངས་རྒྱས་ཀྱི་གཟུགས་དང་། སྐུའི་མཚན་དང་ལྡན་པ་ལ་འདི་སྐད་ཅེས་
སྨྲས་སོ། །སྡིག་ཅན་དེ་བཞིན་གཤེགས་པ་རྣམས་ཀྱི་བྱང་ཆུབ་ཅི་ཞིག་གིས་རབ་ཏུ་ཕྱེ་བ་ཡིན་སྨྲས་པ། བཙུན་པ་ཤཱ་ར་དྭ་ཏིའི་བུ་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་ནི་ཆོས་ཐམས་ཅད་མཉམ་པ་ཉིད་དུ་རྟོགས་
པས་རབ་ཏུ་ཕྱེ་བ་ཡིན་ནོ། །ཆོས་དང་ཆོས་མ་ཡིན་པ་གཉིས་སུ་མེད་པར་རྟོགས་པས་རབ་ཏུ་ཕྱེ་བ་ཡིན་ནོ། །ཐམས་ཅད་མཁྱེན་པ་ཉིད་ཀྱི་ཡེ་ཤེས་ཀྱི་དབང་བསྐུར་བས་རབ་ཏུ་ཕྱེ་བ་ཡིན་ནོ། །སེམས་ཅན་ཐམས་ཅད་ཀྱི་སེམས་ཀྱི་
སྤྱོད་པ་རྟོགས་པས་རབ་ཏུ་ཕྱེ་བ་ཡིན་ནོ། །དངོས་པོ་དང་དངོས་པོ་མེད་པ་ཐམས་ཅད་རྟོགས་པས་རབ་ཏུ་ཕྱེ་བ་ཡིན་གྱི། དངོས་པོ་རྣམ་པར་འཇིག་པས་རབ་ཏུ་ཕྱེ་བ་མ་ཡིན་ནོ། །བསྒོམ་པ་དངོས་པོ་མེད་པས་རབ་ཏུ་ཕྱེ་
བ་མ་ཡིན་ཏེ། རབ་ཏུ་ཕྱེ་བ་ཡང་མ་ཡིན། རབ་ཏུ་མ་ཕྱེ་བ་ཡང་མ་ཡིན། རྒྱུ་བ་མེད་པ་རྒྱུ་བ་དང་བྲལ་བ་རྒྱུ་བ་ཐམས་ཅད་ཡང་དག་པར་ཆད་པ་སྟེ། འོང་མེད་ཅིང་འགྲོ་བ་མེད་པ་ཡིན་ནོ། །དེ་ནས་བདུད་སྡིག་ཅན་གྱིས་ཚེ་དང་ལྡན་པ་
ཤཱ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་ར་དྭ་ཏིའི་བུ་དེ་བཞིན་གཤེགས་པ་ཅི་ཞིག་ལ་གནས་པ་ཡིན། ཚེ་དང་ལྡན་པ་ཤཱ་ར་དྭ་ཏིའི་བུས་སྨྲས་པ། སྡིག་ཅན་དེ་བཞིན་གཤེགས་པ་ནི་འཁོར་བ་མཉམ་པ་ཉིད་ལ་གནས་པ་ཡིན་
ནོ། །མྱ་ངན་ལས་འདས་པས་རློམ་སེམས་མེད་པ་ལ་གནས་པ་ཡིན་ནོ། །ལྟ་བའི་རྣམ་པ་ཐམས་ཅད་ཀྱི་ངོ་བོ་ཉིད་ཀྱི་མཚན་ཉིད་ལ་གནས་པ་ཡིན་ནོ། །ཉོན་མོངས་པ་ཐམས་ཅད་ཀྱི་གནས་ལ་གནས་པ་ཡིན་ནོ། །

79-1-187b

ཆོས་ཐམས་ཅད་ཀྱི་ཡང་དག་པ་ཇི་ལྟ་བའི་རྩ་བའི་གནས་ལ་གནས་པ་ཡིན་ནོ། །འདུས་བྱས་དང་། འདུས་མ་བྱས་གཉིས་སུ་མེད་པའི་གནས་པ་ཡིན་ནོ། །གནས་ཐམས་ཅད་ལ་མི་གནས་པ་ལ་གནས་པ་ཡིན་ཏེ་
སྡིག་ཅན་དེ་བཞིན་གཤེགས་པ་ནི་དེ་ལྟ་བུ་ལ་གནས་པ་ཡིན་ནོ། །ཚེ་དང་ལྡན་པ་ཤཱ་ར་དྭ་ཏིའི་བུས་ཡང་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན་བྱང་ཆུབ་ག་ལས་གཙལ་བར་བྱ། བདུད་སྡིག་ཅན་གྱི་སྨྲས་
པ། བཙུན་པ་ཤཱ་ར་དྭ་ཏིའི་བུ་བྱང་ཆུབ་ནི་འཇིག་ཚོགས་ལ་ལྟ་བའི་རྩ་བ་ལ་གནས་པ་དང་། མ་རིག་པ་དང་། སྲིད་པའི་སྲེད་པའི་ཀུན་དུ་སྦྱོར་བ་དང་། ཕྱིན་ཅི་ལོག་གི་ཀུན་ནས་དཀྲིས་པ་དང་། སྒྲིབ་པ་དང་། ཆོད་པ་
དག་ལས་བཙལ་བར་བྱའོ། །སྨྲས་པ། སྡིག་ཅན་ཁྱོད་ཅི་ལས་བསམས་ཏེ་དེ་སྐད་སྟོན། སྨྲས་པ། བཙུན་པ་ཤཱ་ར་དྭ་ཏིའི་བུ་ཆོས་དེ་དག་ཡང་དག་པ་ཇི་ལྟ་བ་བཞིན་དུ་རྟོགས་པ་གང་ཡིན་པ་དེ་ཉིད་བྱང་ཆུབ་ཡིན་པའི་
ཕྱིར་རོ། །བསྟན་པ་འདི་བཤད་པ་ན་དགེ་སློང་བརྒྱད་བརྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །ཤཱ་ར་དྭ་ཏིའི་བུ་ལ་དད་པའི་ལྷའི་བུ་རྣམས་དང་། བདུད་ཀྱི་རིས་ལ་དད་པའི་ལྷའི་བུ་རྣམས་ལས་
སྲོག་ཆགས་སུམ་ཁྲི་ཉིས་སྟོང་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སེམས་བསྐྱེད་དོ། །ལྷའི་བུ་དེ་དག་གདུལ་བའི་དབང་གི་ཕྱིར་འཇམ་དཔལ་གཞོན་ནུར་གྱུར་པས་བདུད་སྡིག་ཅན་དང་། གནས་
བརྟན་ཤཱ་ར་དྭ་ཏིའི་བུ་གཉིས་སངས་རྒྱས་ཀྱི་གཟུགས་དང་། སྐུའི་མཚན་གྱིས་བརྒྱན་པར་བྱིན་གྱིས་བརླབས་སོ། །དེ་ནས་འཇམ་དཔལ་གཞོན་ནུར་གྱུར་པས་བྱིན་གྱིས་བརླབས་ཏེ་ཕྱིར་བསྡུས་སོ། །དེ་ནས་གནས་
བརྟན་ཤཱ་ར་དྭ་ཏིའི་བུ་དང་། བདུད་སྡིག་ཅན་ཡང་རང་རང་གི་གཟུགས་ཀྱི་མཚན་དང་ལྡན་པར་གྱུར་ཏོ། །དེ་ནས་དེའི་ཚེ་ཕྱོགས་བཞིའི་སངས་རྒྱས་ཀྱི་ཞིང་ཐ་དད་པ་དག་ནས་

79-1-188a

བྱང་ཆུབ་སེམས་དཔའ་སྟོང་ཕྲག་མང་པོ་དག་ལྷགས་ཤིང་འདུས་ཏེ་དེ་དག་ནམ་མཁའ་ལས་བབས་ནས་བཅོམ་ལྡན་འདས་ག་ལ་བར་དོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་
ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོར་གྱུར་ཏོ། །ཕྱོགས་གཅིག་ཏུ་འཁོད་ནས་ཀྱང་བཅོམ་ལྡན་འདས་ལ་བྱང་ཆུབ་སེམས་དཔའ་དེ་དག་གིས་འདི་སྐད་
ཅེས་གསོལ་ཏོ། །བཅོམ་ལྡན་འདས་བདག་ཅག་ནི་ཆོས་ཀྱི་དབྱིངས་ཀྱི་རང་བཞིན་དབྱེར་མ་མཆིས་པར་བསྟན་པའི་ཆོས་ཀྱི་རྣམ་གྲངས་འདི་ཐོས་ནས་དམ་པའི་ཆོས་ཡོངས་སུ་བཟུང་བའི་སླད་དུ་འདིར་མཆིས་
ལགས་ཏེ། བཅོམ་ལྡན་འདས་བདག་ཅག་གིས་ཆོས་ཀྱི་རྣམ་གྲངས་འདི་བཟུང་བར་བགྱི། བཅང་བར་བགྱི། བཀླག་པར་བགྱི། ཀུན་ཆུབ་པར་བགྱི་ཞིང་དམ་པའི་ཆོས་ཡོངས་སུ་བཟུང་བའི་སླད་དུ་གཞན་དག་
ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བགྱིའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་འདི་དག་
གང་ནས་འདིར་མཆིས་ལགས། བཅོམ་ལྡན་འདས་ཀྱིས་སྩལ་པ། ཀུན་དགའ་བོ་བྱང་ཆུབ་སེམས་དཔའ་འདི་དག་ནི་སངས་རྒྱས་ཀྱི་ཞིང་ཐ་དད་པ་དག་ནས་འདུས་པ་སྟེ་འཇམ་དཔལ་
གཞོན་ནུར་གྱུར་པས་ཡོངས་སུ་སྨིན་པར་བྱས་ཤིང་ཆོས་ཀྱི་དབྱིངས་ཀྱི་རང་བཞིན་དབྱེར་མེད་པར་བསྟན་པའི་ཆོས་ཀྱི་རྣམ་གྲངས་འདི་ཉིད་ཀྱིས་ཡོངས་སུ་སྨིན་པར་བྱས་པ་དག་ཡིན་པས། འདི་དག་
ནི་ཆོས་ཀྱི་རྣམ་གྲངས་འདི་ལ་བྱས་པ་གཟོ་བ་དང་། བྱས་པ་ཚོར་བའི་ཕྱིར་དེ་བཞིན་གཤེགས་པ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། འཇམ་དཔལ་གཞོན་ནུར་གྱུར་པ་ལ་ཡང་

79-1-188b

བསྙེན་བཀུར་བྱ་བ་དང་ཆོས་ཀྱི་རྣམ་གྲངས་འདི་ལ་རྗེས་སུ་ཡི་རང་བར་བྱ་བའི་ཕྱིར་འདིར་ལྷགས་སོ། །ཀུན་དགའ་བོ་བྱང་ཆུབ་སེམས་དཔའ་འདི་དག་གིས་ནི་ང་ཡོངས་སུ་མྱ་ངན་ལས་འདས་པའི་འོག་ཏུ་ཡང་
དམ་པའི་ཆོས་ཡོངས་སུ་གཟུང་བའི་ཕྱིར་ཆོས་ཀྱི་རྣམ་གྲངས་འདི་འཛམ་བུའི་གླིང་དུ་རྒྱས་པར་བྱེད་པར་འགྱུར་ཏེ། ཀུན་དགའ་བོ་བྱང་ཆུབ་སེམས་དཔའ་འདི་དག་ནི་སངས་རྒྱས་འབུམ་ཕྲག་མང་པོ་དག་གི་དམ་པའི་ཆོས་
ཡོངས་སུ་འཛིན་པ་ལ་མངོན་པར་བརྩོན་པ་ཡིན་ནོ། །དེ་ནས་བཅོམ་ལྡན་འདས་ལ་འཁོར་དེ་ནས་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་གང་ཇི་སྙེད་པ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་
བདག་ཅག་གིས་ཀྱང་དམ་པའི་ཆོས་ཡོངས་སུ་འཛིན་པའི་སྐྱེས་བུ་དམ་པ་དང་། རིགས་ཀྱི་བུ་དང་། རིགས་ཀྱི་བུ་མོ་འདི་དག་དང་། གཞན་དག་ལ་ཡང་རིམ་གྱིས་བསྙེན་བཀུར་བགྱི་ཞིང་ཀུན་བསྲུང་བ་དང་། སྦ་བ་དང་། 
འཚེ་བ་མ་མཆིས་པར་བགྱི་བའི་སླད་དུ་བརྩོན་པར་བགྱི་ལགས་སོ། །དེ་ནས་བཅོམ་ལྡན་འདས་ཀྱིས་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དེ་དག་ལ་ལེགས་སོ་ཞེས་བྱ་བ་བྱིན་ཏེ། གྲོགས་པོ་དག་ཁྱེད་ཅག་
དམ་པའི་ཆོས་ཡོངས་སུ་འཛིན་པའི་སྐྱེས་བུ་དམ་པ་རྣམས་ཀུན་དུ་སྲུང་བ་ནི་ལེགས་སོ་ལེགས་སོ། །གང་དག་དམ་པའི་ཆོས་ཡོངས་སུ་གཟུང་བ་ལ་བརྩོན་པར་བྱེད་པ་དེ་དག་གིས་ནི། འདས་པ་དང་། མ་བྱོན་པ་དང་། 
ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་ཡང་མཆོད་པ་བྱས་པ་ཡིན་ནོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཁྱོད་ཀྱིས་ཅི་ནས་ཀྱང་ཆོས་
ཀྱི་རྣམ་གྲངས་འདི་ཕྱི་མའི་ཚེ་ཕྱི་མའི་དུས་འཛམ་བུའི་གླིང་ན་རྒྱ་ཆེར་སྤྱོད་པར་འགྱུར་བ་དེ་ལྟར་བྱིན་གྱིས་རློབས་ཤིག །འཇམ་དཔལ་གྱིས་གསོལ་པ། བཅོམ་ལྡན་འདས་འདི་ལྟ་སྟེ། དཔེར་བགྱི་ན་བསྲེག་པའི་བསྐལ་

79-1-189a

པ་བྱུང་བར་གྱུར་པ་ན་ནམ་མཁའི་ཁམས་མི་ཚིག་པར་བགྱི་བའི་སླད་དུ་བྱིན་གྱིས་བརླབ་པར་བགྱི་མི་འཚལ་བ་དེ་བཞིན་དུ་བཅོམ་ལྡན་འདས་ཆོས་ཐམས་ཅད་ཀྱང་ནམ་མཁའི་ཁམས་ཀྱི་རང་བཞིན་ལགས་
པས་དེ་དག་ལ་ནི་སྐྱེ་བ་ཡང་མི་མངོན། འགག་པ་ཡང་མི་མངོན་ལགས་ཏེ། གང་ལ་སྐྱེ་བ་མ་མཆིས་ཤིང་འགག་པ་མ་མཆིས་པ་དེ་ལ་ནི་བྱིན་གྱིས་བརླབས་ཀྱི་རང་བཞིན་ཅི་ཡང་མ་མཆིས་
ལགས་སོ། །བཅོམ་ལྡན་འདས་ཆོས་ཐམས་ཅད་ནི་བྱིན་གྱིས་བརླབས་མ་མཆིས་ལགས་པས་དེ་དག་གི་ངོ་བོ་ཉིད་གང་ལགས་པ་དེ་ཉིད་བྱིན་གྱིས་བརླབས་ལགས་སོ། །བཅོམ་ལྡན་འདས་འོན་དུ་ལགས་
ཀྱིས་ཀྱང་གང་དག་ཆོས་ལ་གུས་ཤིང་ཆོས་ལས་ངེས་པར་བྱུང་ལ་མདོ་སྡེ་ཟབ་མོ་འདི་ལྟ་བུ་འདི་ནོད་པར་འགྱུར་བའི་རིགས་ཀྱི་བུ་དང་། རིགས་ཀྱི་བུ་མོ་དགེ་བའི་རྩ་བ་སྐྱེད་པ་དེ་དག་གི་སླད་དུ་དེ་བཞིན་གཤེགས་
པ་ཉིད་ཀྱིས་ཆོས་ཀྱི་རྣམ་གྲངས་འདི་བྱིན་གྱིས་བརླབ་དུ་གསོལ། བཅོམ་ལྡན་འདས་ཅི་ནས་ཀྱང་བདུད་དང་། ཕྱིར་རྒོལ་བ་ངེས་པར་བཅོམ་ཞིང་བར་ཆད་མ་མཆིས་པ་དང་། མ་འོངས་པའི་དུས་ན་འཛམ་བུའི་
གླིང་ན་སྤྱོད་པར་འགྱུར་བ་དེ་ལྟ་དེ་ལྟར་བཅོམ་ལྡན་འདས་ཀྱིས་འདི་བྱིན་གྱིས་བརླབ་དུ་གསོལ། དེ་ནས་དེའི་ཚེ་བཅོམ་ལྡན་འདས་ཀྱིས་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་འོད་
གསེར་གྱི་ཁ་དོག་ལྟ་བུས་སྣང་བར་འགྱུར་བ་དེ་ལྟ་བུའི་འོད་དག་སྐུ་ལས་རབ་ཏུ་ཕྱུང་ངོ་། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཇི་ལྟར་
དེ་བཞིན་གཤེགས་པའི་འོད་འདི་ཐམས་ཅད་དུ་རྗེས་སུ་སོང་བ་དེ་བཞིན་དུ་ཆོས་ཀྱི་རྣམ་གྲངས་འདི་ཡང་སངས་རྒྱས་ཀྱི་ཆོས་ལ་ཤེས་པ་དང་། བསམ་པ་མ་ཉམས་པའི་རིགས་ཀྱི་བུ་དང་། རིགས་

79-1-189b

ཀྱི་བུ་མོ་དེ་དག་གི་ལག་ཏུ་འོང་བར་འགྱུར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ཆོས་ཀྱི་རྣམ་གྲངས་འདི་ཟུང་ཤིག ། ཆོངས་ཤིག །ལྷོགས་
ཤིག །ཀུན་ཆུབ་པར་གྱིས་ཤིག །གཞན་དག་ལ་ཡང་རྒྱ་ཆེར་རབ་ཏུ་སྟོན་ཅིག་དང་། དེ་ལྟ་ན་ཁྱོད་ཀྱིས་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་ཡང་མཆོད་པ་བྱས་པར་
འགྱུར་རོ། །ཀུན་དགའ་བོས་གསོལ་པ། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཁྱོད་ཀྱིས་
ཆོས་ཀྱི་རྣམ་གྲངས་འདི་ནི་ཆོས་ཀྱི་དབྱིངས་ཀྱི་རང་བཞིན་དབྱེར་མེད་པར་བསྟན་པ་ཞེས་བྱ་བར་ཟུང་ཤིག །ལྷའི་བུ་རིན་ཆེན་མཆོག་གིས་ཞུས་པ་ཞེས་བྱ་བར་ཡང་ཟུང་ཤིག །འཇམ་དཔལ་གཞོན་ནུར་གྱུར་པའི་
མན་ངག་ཅེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཀུན་དགའ་བོ་དང་། འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་རིན་ཆེན་མཆོག་དང་། 
སངས་རྒྱས་ཀྱི་ཞིང་ཐ་དད་པ་ནས་འདུས་པའི་བྱང་ཆུབ་སེམས་དཔའ་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་
པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ཆོས་ཀྱི་དབྱིངས་ཀྱི་རང་བཞིན་དབྱེར་མེད་པ་བསྟན་པ་ཞེས་བྱ་སྟེ། ལེའུ་བརྒྱད་པ་རྫོགས་སོ།། །།
རྒྱ་གར་གྱི་མཁན་པོ་འཛི་ན་མི་ཏྲ་དང་། སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །། འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་

79-1-190a

༄༅། །རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་དགུ་པ་སྟེ་འཕགས་པ་ཆོས་བཅུ་པ་ཞེས་བྱ་བ། བམ་པོ་དང་པོ།    ། རྒྱ་གར་སྐད་དུ། ཨཱརྱ་ད་ཤ་དྷརྨཱ་ཀ་ནཱ་མ་མ་ཧཱ་ཡཱ་ན་སཱུ་ཏྲ། 
བོད་སྐད་དུ། འཕགས་པ་ཆོས་བཅུ་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། 
བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང་ཐབས་གཅིག་ཏུ་བཞུགས་ཏེ། 
དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོ་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་
པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་པད་མའི་སྙིང་པོ་ལ་བཙུགས་ཏེ། བཅོམ་ལྡན་འདས་ག་ལ་བ་
དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ལས་བརྩམས་ཏེ་ཞུ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་
བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེ་བཞིན་གཤེགས་པས་ཁྱོད་ལ་རྟག་ཏུ་སྐབས་ཕྱེས་ཅི་དང་

79-1-190b

ཅི་འདོད་པ་དྲིས་ཤིག་དང་། །ངས་དྲིས་པ་དེ་དང་དེ་ཉིད་ཀྱིས་ལུང་བསྟན་པས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་
ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་ཐེག་པ་ཆེན་པོ་ལ་ཡང་དག་པར་ཞུགས་པ་དགེ་སློང་ཐེག་པ་ཆེན་པོ་ལ་ཡང་དག་པར་ཞུགས་པ་
ཞེས་བགྱི་བ་བཅོམ་ལྡན་འདས་ཇི་ཙམ་གྱིས་ན་དགེ་སློང་ཐེག་པ་ཆེན་པོ་ལ་ཡང་དག་པར་ཞུགས་པ་ལགས། དེ་བཞིན་གཤེགས་པས་ཇི་ལྟར་ཐེག་པ་ཆེན་པོ་ལ་ཡང་དག་པར་ཞུགས་པ་ལགས་པར་འདོགས་
པར་མཛད། དོན་གང་གིས་ན་ཐེག་པ་ཆེན་པོ་འདི་ལ་ཐེག་པ་ཆེན་པོ་ཞེས་བགྱི་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་
རིན་ཆེན་ཟླ་འོད་རྒྱལ་པོ་ལ་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ་ཁྱོད་ཀྱི་ལྷག་པར་གཡོ་བ་ནི་བཟང་བ་ཡིན། ཡོངས་སུ་དཔྱད་པ་ཡང་བཟང་བ་ཡིན། དྲིས་པ་ལུང་བསྟན་པ་ལ་སྤོབས་པ་ཡང་བཟང་བ་ཡིན་
ཏེ། རིགས་ཀྱི་བུ་ཁྱོད་འདི་ལྟ་སྟེ། སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་། མི་རྣམས་ལ་ཕན་པ་དང་། བདེ་བའི་ཕྱིར་ཞུགས་ཏེ། ཁྱོད་དེ་བཞིན་གཤེགས་
པ་ལ་དོན་དེ་ལྟ་བུ་ཡོངས་སུ་དྲི་བར་སེམས་པ་ནི་ལེགས་སོ་ལེགས་སོ། །རིགས་ཀྱི་བུ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་
དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་བཅོམ་ལྡན་འདས་ལེགས་སོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །

79-1-191a

རིགས་ཀྱི་བུ་བྱང་ཆུབ་སེམས་དཔའ་ཆོས་བཅུ་དང་ལྡན་ན་ཐེག་པ་ཆེན་པོ་ལ་ཡང་དག་པར་ཞུགས་པ་ཡིན་ཏེ། བཅུ་གང་ཞེ་ན། འདི་ལྟ་སྟེ། དད་པ་དང་ལྡན་པ་ཡིན། ནན་ཏན་སྙིང་པོར་བྱེད་པ་ཡིན། 
རིགས་ཕུན་སུམ་ཚོགས་པ་ཡིན། བྱང་ཆུབ་ཀྱི་སེམས་འདོད་པ་ཡིན། ཆོས་འདོད་པ་ཡིན། ཆོས་ལ་ཉེ་བར་རྟོག་པར་བྱེད་པ་ཡིན། ཆོས་ཀྱི་རྗེས་སུ་འཐུན་པའི་ཆོས་ལ་ཞུགས་པ་ཡིན། ང་རྒྱལ་དང་། ཆེ་བའི་
ང་རྒྱལ་དང་བྲལ་བ་ཡིན། དགོངས་ཏེ་གསུངས་པ་རྟོགས་པར་བྱ་བ་ལ་མཁས་པ་ཡིན། ཉན་ཐོས་དང་། རང་སངས་རྒྱས་དང་ལྡན་པའི་ཐེག་པས་ཡོངས་སུ་མྱ་ངན་ལས་འདའ་བར་མི་འདོད་པ་ཡིན་ནོ། །
གསོལ་པ། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་དད་པ་དང་ལྡན་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་
པོ་ནི་རང་བཞིན་གྱིས་གཡོ་མེད་ཅིང་རྒྱུ་མེད་ལ། དྲང་ཞིང་དྲང་པོའི་རང་བཞིན་ཅན་ཡིན་ཏེ། དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བྱང་ཆུབ་ལ་ཡང་
མངོན་པར་ཡིད་ཆེས། དེ་བཞིན་གཤེགས་པ་རྣམས་ཀྱི་ཡེ་ཤེས་སྐད་ཅིག་ལ་དུས་གསུམ་དང་ལྡན་པ་ལ་ཡང་མངོན་པར་ཡིད་ཆེས། དེ་བཞིན་གཤེགས་པའི་སྙིང་པོ་རྒ་བ་མེད་པ་དང་། འཆི་བ་མེད་
པ་དང་། ཟད་པ་མེད་པ་དང་། འགོག་པ་མེད་པ་དང་། ཆད་པ་མེད་པ་ལ་ཡང་མངོན་པར་ཡིད་ཆེས། ཡང་དག་པའི་མཐའ་དང་། ཆོས་ཀྱི་དབྱིངས་དང་། ཐམས་ཅད་ཤེས་པ་ཉིད་དང་། རྣམ་པ་ཐམས་
ཅད་མཁྱེན་པ་ཉིད་དང་། སྟོབས་རྣམས་དང་། མི་འཇིགས་པ་རྣམས་དང་། སངས་རྒྱས་ཀྱི་ཆོས་མ་འདྲེས་པ་རྣམས་ལ་ཡང་མངོན་པར་ཡིད་ཆེས། དེ་བཞིན་གཤེགས་པ་རྣམས་ཀྱི་

79-1-191b

དབུའི་གཙུག་ཏོར་བལྟར་མི་མཐོང་བ་ལ་ཡང་མངོན་པར་ཡིད་ཆེས། དེ་བཞིན་གཤེགས་པ་རྣམས་ཀྱི་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་བརྒྱན་པ་དང་། དཔེ་བྱད་བཟང་པོ་བརྒྱད་བཅུ་
ཕུན་སུམ་ཚོགས་པ་དང་། འོད་འདོམ་གང་བ་ཉིད་ལ་ཡང་མངོན་པར་ཡིད་ཆེས། ཉན་ཐོས་ཀྱིས་བཤད་པ་འམ། རང་སངས་རྒྱས་ཀྱིས་བཤད་པ་འམ། བྱང་ཆུབ་སེམས་དཔའ་བཤད་པ་འམ། དེ་ལས་
གཞན་པ་དྲང་སྲོང་ཆེན་པོ་དག་གིས་སྨྲས་པ་ལེགས་པར་བཤད་པ་ལ་ཡང་མངོན་པར་ཡིད་ཆེས། འཇིག་རྟེན་འདི་དང་། འཇིག་རྟེན་ཕ་རོལ་ལ་ཡང་མངོན་པར་ཡིད་ཆེས། དགེ་སྦྱོང་དང་། བྲམ་ཟེ་ཡང་
དག་པར་སོང་བ་རྣམས་དང་། ཡང་དག་པར་ཞུགས་པ་དག་ལ་ཡང་མངོན་པར་ཡིད་ཆེས། དགེ་བའི་ལས་ཀྱི་རྣམ་པར་སྨིན་པ་འདོད་པ་དང་། དགའ་བ་དང་། ཡིད་དུ་འོང་བ་རྣམས་ཀྱི་ནང་དུ་ལྷའི་དབང་
པོ་འམ་མི་རྣམས་ཀྱི་ནང་དུ་མིའི་དབང་པོར་འགྱུར་བའི་འབྲས་བུ་ལ་ཡང་མངོན་པར་ཡིད་ཆེས། མི་དགེ་བའི་ལས་ཀྱི་རྣམ་པར་སྨིན་པའི་འབྲས་བུ་སེམས་ཅན་དམྱལ་བ་དང་། དུད་འགྲོ་དང་། 
ཡི་དགས་རྣམས་ཀྱི་ནང་དུ་མི་འདོད་པ་དང་། མི་སྡུག་པ་དང་། མི་དགའ་བ་དང་། ཡིད་དུ་མི་འོང་བ་དང་། མི་བཟང་བ་དང་། དྲག་པ་དང་། རྩུབ་པ་དང་། ཚ་བར་འགྱུར་བ་ལ་ཡང་མངོན་པར་ཡིད་ཆེས་སོ། །
དེ་དེ་ལྟར་མངོན་པར་ཡིད་ཆེས་པས་ཆོས་གསུམ་སྤངས་པ་ཡིན་ཏེ། གསུམ་གང་ཞེ་ན། འདི་ལྟ་སྟེ། ནེམ་ནུར་དང་། ཡིད་གཉིས་དང་། ཐེ་ཚོམ་མོ། །རིགས་ཀྱི་བུ་དེ་ནི་བྱང་ཆུབ་སེམས་དཔའ་དད་
པས་རྗེས་སུ་འབྲང་བ་ཞེས་བྱ་སྟེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་དད་པ་དང་ལྡན་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །

79-1-192a

དད་པ་ཐེག་པ་མཆོག་ཡིན་ཏེ། །དེས་ནི་འདྲེན་རྣམས་ངེས་པར་བྱུང་། །དེ་ཕྱིར་བློ་གྲོས་ལྡན་པའི་མིས། །དད་པའི་རྗེས་འབྲང་ཉིད་ལ་བསྟེན། །འཇིག་རྟེན་དག་ན་དད་པ་མཆོག །དད་ལྡན་རྣམ་པར་
ཉམས་པ་མེད། །དེ་ལྟ་བས་ན་མཁས་པའི་མིས། །དད་པས་རྗེས་སུ་འབྲང་བ་སྟེན། །དད་པ་མེད་པའི་མི་ལ་ནི། །དཀར་པོའི་ཆོས་རྣམས་མི་སྐྱེ་སྟེ། །མེ་ཡིས་ས་བོན་ཚིག་རྣམས་ལ། །མྱུ་གུ་སྔོན་པོ་
ཇི་བཞིན་ནོ། །རིགས་ཀྱི་བུ་ཇི་ལྟར་ན་བྱང་ཆུབ་སེམས་དཔའ་ནན་ཏན་སྙིང་པོར་བྱེད་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་སྐྲ་དང་། ཁ་སྤུ་བྲེགས་ཏེ། གོས་ངུར་སྨྲིག་དག་བགོས་ནས་
དད་པས་ཁྱིམ་ནས་ཁྱིམ་མེད་པར་ལེགས་པ་ཁོ་ནར་རབ་ཏུ་འབྱུང་ངོ་། །རབ་ཏུ་བྱུང་ནས་ཀྱང་ཉན་ཐོས་ཀྱི་བསླབ་པ་དང་། ཆོ་ག་དང་། སྤྱོད་ཡུལ་དང་། ཀུན་སྤྱོད་པ་དག་ལ་ཡང་སློབ་པར་བྱེད། རང་སངས་རྒྱས་
ཀྱི་བསླབ་པ་དང་། ཆོ་ག་དང་། སྤྱོད་ཡུལ་དང་། ཀུན་སྤྱོད་པ་དག་ལ་ཡང་སློབ་པར་བྱེད་དོ། །དེ་དེ་ལྟར་སློབ་པས་ལུས་དང་། ངག་དང་། སེམས་དང་ལྡན་པའི་གནས་ངན་ལེན་དག་ཐམས་ཅད་ཀྱི་ཐམས་ཅད་རྣམ་
པ་ཐམས་ཅད་ཀྱི་ཐམས་ཅད་དུ་སྤངས་པ་ཡིན་ནོ། །དེ་ལ་ལུས་དང་ལྡན་པའི་གནས་ངན་ལེན་གང་ཞེ་ན། འདི་ལྟ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། དབྱིག་པ་དང་། མཚོན་
ཆ་དང་། བོང་བ་དང་། ལག་པ་དག་གིས་གཞན་ལ་གནོད་པར་བྱེད་པ་དང་། ལག་པ་རྒོད་པ་དང་། རྐང་པ་རྒོད་པ་དང་། རྒྱུག་པ་དང་། དཀྱུ་བ་དང་། མཆོང་བ་དང་། མགྱོག་པར་འགྲོ་བ་དང་། རྐྱལ་བ་སྟེ། དེ་དག་ནི་
ལུས་དང་ལྡན་པའི་གནས་ངན་ལེན་ཅེས་བྱའོ། །དེ་ལ་ངག་གི་གནས་ངན་ལེན་གང་ཞེ་ན། འདི་ལྟ་སྟེ། བརྫུན་དུ་སྨྲ་བ་དང་། ཕྲ་མ་དང་། ངག་རྩུབ་པོ་དང་། ཚིག་ཀྱལ་བ་དང་། ཉེས་པར་སྨྲ་བ་བརྗོད་པ་དང་། 

79-1-192b

མདོ་སྡེ་ཟབ་མོ་ཟབ་མོ་དག་སྤོང་བར་བྱེད་པ་དང་། མཁན་པོ་དང་། སློབ་དཔོན་དང་། བླ་མ་ལྟ་བུ་རྣམས་དང་། ཚངས་པ་མཚུངས་པར་སྤྱོད་པ་རྣམས་ལ་མི་སྙན་བརྗོད་པར་བྱེད་པ་སྟེ། དེ་ནི་ངག་གི་གནས་
ངན་ལེན་ཅེས་བྱའོ། །དེ་ལ་ཡིད་ཀྱི་གནས་ངན་ལེན་གང་ཞེ་ན། འདི་ལྟ་སྟེ། བརྣབ་སེམས་དང་། གནོད་སེམས་དང་། ལོག་པར་ལྟ་བ་དང་། ཕྲག་དོག་དང་། སེར་སྣ་དང་། རྙེད་པ་འདོད་པ་དང་། གྲགས་པ་
འདོད་པ་དང་། ཤེས་ཀྱི་ཁེ་འདོད་པ་དང་། རིགས་ཀྱིས་རྒྱགས་པ་དང་། གཟུགས་ཀྱིས་རྒྱགས་པ་དང་། ལང་ཚོས་རྒྱགས་པ་དང་། ནད་མེད་པས་རྒྱགས་པ་དང་། གསོན་པས་རྒྱགས་པ་དང་། མང་དུ་
ཐོས་པས་རྒྱགས་པ་དང་། བསྒོམས་པས་རྒྱགས་པ་དང་། འདོད་པའི་རྣམ་པར་རྟོག་པ་དང་། གནོད་སེམས་ཀྱི་རྣམ་པར་རྟོག་པ་དང་། རྣམ་པར་འཚེ་བའི་རྣམ་པར་རྟོག་པ་དང་། ཉེ་དུའི་རྣམ་པར་རྟོག་
པ་དང་། ཡུལ་གྱི་རྣམ་པར་རྟོག་པ་དང་། ཆོས་གོས་དང་། བསོད་སྙོམས་དང་། མལ་ཆ་དང་། སྟན་དང་། ན་པའི་གསོས་སྨན་དང་། ཡོ་བྱད་ཀྱི་རྣམ་པར་རྟོག་པ་དང་། གནས་ལ་ལྷག་པར་ཞེན་པ་དང་། 
བཞོན་པ་ལ་ལྷག་པར་ཞེན་པ་དང་། མལ་ཆ་ལ་ལྷག་པར་ཞེན་པ་དང་། བཏུང་བ་ལ་ལྷག་པར་ཞེན་པ་དང་། བཟའ་བ་ལ་ལྷག་པར་ཞེན་པ་དང་། ཆེ་བའི་བདག་ཉིད་ལ་ལྷག་པར་ཞེན་པ་དང་། 
ཆུང་མ་དང་། བུ་དང་། བུ་མོ་དང་། ཐོང་གཤོལ་དང་། ཞིང་ལས་དང་། བྲན་དང་། བྲན་མོ་དང་། ལས་མི་དང་། ཞོ་ཤས་འཚོ་བ་དང་། མཛའ་བཤེས་དང་། གྲོས་གྲོགས་དང་། ཉེ་དུ་དང་། སྣག་གི་
གཉེན་མཚམས་དག་ལ་ལྷག་པར་ཞེན་པ་དང་། ནོར་དང་། འབྲུ་དང་། མཛོད་དང་། བང་བ་དག་ལ་ལྷག་པར་ཞེན་པ་དང་། འཚོ་བའི་ཡོ་བྱད་རྣམ་པ་སྣ་ཚོགས་ཀྱི་བར་དག་ལ་ལྷག་པར་ཞེན་པ་སྟེ། 

79-1-193a

དེ་དེ་ལྟར་ལྷག་པར་ཞེན་པས་ཇི་སྐད་སྨོས་པའི་དངོས་པོ་དེ་དག་ལས་དངོས་པོ་གང་ཡང་རུང་བ་དག་ཆུད་ཟོས་པ་ན་མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། 
འཁྲུག་པ་དག་འབྱུང་བར་འགྱུར་ཞིང་དེ་ལྟར་དེའི་ཡིད་སྲེད་པའི་བརླན་གྱིས་ཡོངས་སུ་བརླན་པས་སྲེད་པར་ཉིད་མཚམས་སྦྱོར་བར་འགྱུར་བ་སྟེ། རིགས་ཀྱི་བུ་མདོར་ན་ཡིད་ཀྱི་ལས་ཀྱི་འཁྲུལ་འཁོར་གྱིས་
འཕངས་ནས་འཁོར་བའི་འཁོར་ལོར་ཡོངས་སུ་འཁྱམ་པར་འགྱུར་བ་དེ་ནི་ཡིད་ཀྱི་གནས་ངན་ལེན་ཅེས་བྱའོ། །དེ་དེ་ལྟར་ལུས་དང་། ངག་དང་། སེམས་ཀྱི་གནས་ངན་ལེན་དང་བྲལ་བས་ན་མཁན་པོ་ལ་
སྟོན་པའི་འདུ་ཤེས་སྐྱེད་པ་དང་། སློབ་དཔོན་ལ་མཁན་པོའི་འདུ་ཤེས་སྐྱེད་པ་དང་། ཚངས་པ་མཚུངས་པར་སྤྱོད་པ་རྒན་རབས་དང་། བར་མ་དང་། གསར་བུ་རྣམས་ལ་རྗེས་དང་བཅས་པ་དང་། གུས་
པ་དང་བཅས་པར་འགྱུར་ཞིང་དེ་གཅིག་པུ་དབེན་པར་གནས་ནས་འདི་སྙམ་དུ་སེམས་ཏེ། འདི་ལྟར་བདག་སེམས་ཅན་ཐམས་ཅད་བསྒྲལ་བའི་ཕྱིར་བརྩོན་པ་དང་། སེམས་ཅན་ཐམས་ཅད་དགྲོལ་བའི་ཕྱིར་བརྩོན་པ་དང་། སེམས་ཅན་ཐམས་ཅད་དུལ་བ་དང་
ཞི་བ་ལ་དགོད་པའི་ཕྱིར་བརྩོན་པར་བྱེད་པ་ན་བདག་ཉིད་མ་དུལ་བ་དང་། མ་ཞི་བ་དང་། མ་སྲུངས་པ་དང་། མ་བཏུལ་བ་ནི་བདག་གི་ཆ་མ་ཡིན་པས་བདག་གིས་ཅི་ནས་ཀྱང་བདག་མཐོང་བ་ཙམ་གྱིས་
སེམས་ཅན་རྣམས་འདུལ་བར་འགྱུར་བ་དང་། དེ་བཞིན་གཤེགས་པ་རྣམས་ཀྱི་བཀའ་བཞིན་བྱེད་པར་གྱུར་བ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་ལ་སོགས་པ་དག་ཡི་རངས་པར་འགྱུར་
པ་དེ་ལྟར་བྱ་ཞིང་། དེ་ལྟར་བསྒྲུབ་པར་བྱ། དེ་ལྟར་བརྩོན་འགྲུས་བརྩམ་པར་བྱའོ། །སྙམ་དུ་སེམས་ཏེ། རིགས་ཀྱི་བུ་དེ་ནི་བྱང་ཆུབ་སེམས་དཔའི་ངོ་ཚ་ཤེས་པ་ཡིན་ནོ། །དེ་ཡང་འདི་སྙམ་དུ་སེམས་

79-1-193b

ཏེ། བདག་ལ་ཁྱིམ་པ་འམ་རབ་ཏུ་བྱུང་བ་འགའ་ཡང་འདི་ལྟ་སྟེ། ཚུལ་ཁྲིམས་ཉམས་པ་ཀུན་དུ་སྤྱོད་པ་འམ། ལྟ་བ་ཉམས་པ་ཀུན་དུ་སྤྱོད་པ་འམ། འཚོ་བ་ཉམས་པ་ཀུན་དུ་སྤྱོད་པ་འམ། ཆོ་ག་
ཉམས་པ་ཀུན་དུ་སྤྱོད་པ་འམ། སྤྱོད་ཡུལ་ཉམས་པ་ཀུན་དུ་སྤྱོད་པ་འམ། ཉམས་པ་ཀུན་དུ་སྤྱོད་པ་གང་ཡང་རུང་བ་དག་གིས་ཀུན་དུ་གླེང་བར་མི་འགྱུར་བར་བྱའོ། །སྙམ་དུ་སེམས་ཏེ། དེ་དེ་ལྟར་ཁྲེལ་ཡོད་
པར་གྱུར་བ་ན་ཉིན་ལན་གསུམ། མཚན་ལན་གསུམ་ཚུལ་ཁྲིམས་ལ་སོ་སོར་རྟོག་པར་བྱེད་དོ། །དེ་ཚུལ་ཁྲིམས་ཡོངས་སུ་དག་པས་འགྱོད་པ་མེད་ཅིང་དེ་སྒྲིབ་པ་མེད་ལ་ལམ་གྱི་རྒྱུན་བཅད་དེ། དེ་བཞིན་གཤེགས་
པའི་ཆོས་འདུལ་བ་ལ་ཉེ་བར་རྟེན་ཅིང་གནས་པར་བྱེད་དོ། །རིགས་ཀྱི་བུ་དེ་ནི་བྱང་ཆུབ་སེམས་དཔའི་ཁྲེལ་ཡོད་པ་ཞེས་བྱ་སྟེ། རིགས་ཀྱི་བུ་དེ་ལྟར་བྱང་ཆུབ་སེམས་དཔའ་ནན་ཏན་སྙིང་པོར་བྱེད་པ་ཡིན་ནོ། །དེ་ནས་
དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །རྫོགས་སངས་རྒྱས་དང་སངས་རྒྱས་ཀྱི། །ཉན་ཐོས་ནན་ཏན་སྙིང་པོར་བྱེད། །དེ་ཕྱིར་ནན་ཏན་ཐོབ་བྱའི་ཕྱིར། །ཤེས་རབ་ཅན་གྱིས་
རྟག་བརྩོན་གྱིས། །ནན་ཏན་ལ་ནི་འཇིགས་མེད་པའི། །བྱང་ཆུབ་སེམས་དཔའ་ཤེས་རབ་ཆེ། །སངས་རྒྱས་ཀུན་གྱིས་བསྟེན་པ་ཡི། །བྱང་ཆུབ་རྡུལ་མེད་རྟོགས་པར་འགྱུར། །རིགས་ཀྱི་བུ་དེ་ལ་ཇི་ལྟར་ན་
བྱང་ཆུབ་སེམས་དཔའ་རིགས་ཕུན་སུམ་ཚོགས་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་རང་བཞིན་གྱིས་འདོད་ཆགས་དང་། ཞེ་སྡང་དང་། གཏི་མུག་ཆུང་བ་དང་། ཕྲག་དོག་མེད་པ་དང་། སེར་
སྣ་མེད་པ་དང་། གཡོ་མེད་པ་དང་། སྒྱུ་མེད་པ་ཡིན། མི་རྩུབ་པ་དང་། མི་བརླང་པ་དང་། མི་རྒོད་པ་དང་། མ་ཁེངས་པ་ཡིན། མི་ཅོར་ཞིང་མུ་ཅོར་མི་སྨྲ་བ་ཡིན། དྲང་བ་དག་མཉེན་པ་ཡིན། དེས་པ་དང་། འགྲོགས་ན་བདེ་བ་ཡིན། རང་བཞིན་

79-1-194a

གྱིས་མཆོད་པ་དང་། རིམ་གྲོ་བྱ་བ་རྒྱ་ཆེན་པོ་དག་ལ་སེམས་འཇུག་པ་དང་། ལོངས་སྤྱོད་པ་དང་། འཚོ་བའི་ཡོ་བྱད་ཡོད་ཅིང་བདོག་པ་དག་གཞན་དག་ལ་བགེད་པའི་ངང་ཚུལ་ཅན་ཡིན། ལག་པ་དང་། 
རྐང་པ་དང་། མིག་དང་། ཡན་ལག་གི་དམ་པ་མགོ་ཤིན་དུ་དང་ཞིང་གསལ་བ་ཡིན། དེས་དེ་བཞིན་གཤེགས་པ་འམ། དེ་བཞིན་གཤེགས་པའི་ཉན་ཐོས་དག་མཐོང་ན་མཐོང་མ་ཐག་ཁོ་ནར་དད་པ་དང་། དང་བ་
ཐོབ་པར་འགྱུར་ཞིང་། དེ་དད་པ་དང་དང་བ་དེས་རིགས་ཕུན་སུམ་ཚོགས་པ་འཐོབ་པར་འགྱུར་བ་སྟེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་རིགས་ཕུན་སུམ་ཚོགས་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་
ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །དུ་བ་ལས་ནི་མེར་ཤེས་ཤིང་། །ཆུ་སྐྱར་ལས་ནི་ཆུར་ཤེས་ལྟར། །བློ་ལྡན་བྱང་ཆུབ་སེམས་དཔའ་ཡི། །རིགས་ནི་མཚན་མ་རྣམས་ལས་ཤེས། །
མི་རྩུབ་བརླང་བ་མ་ཡིན་ལ། །གཡོ་དང་སྒྱུ་ནི་རྣམ་སྤངས་ཤིང་། །སེམས་ཅན་ཀུན་ལས་རབ་དང་བ། །དེ་ནི་བྱང་ཆུབ་སེམས་དཔའ་ཡིན། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་བྱང་ཆུབ་
ཀྱི་སེམས་འདོད་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་རིགས་ལ་གནས་ཤིང་བྱང་ཆུབ་ཏུ་སེམས་བསྐྱེད་པའི་ཚེ་དེ་བཞིན་གཤེགས་པ་འམ། དེ་བཞིན་གཤེགས་པའི་ཉན་ཐོས་ཀྱིས་
ཡང་དག་པར་བསྐུལ་བ་དང་། ཡང་དག་པར་སྐྱོ་བ་སྐྱེད་པ་དང་། ཡང་དག་པར་འཛིན་དུ་འཇུག་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བྱེད་ན། དེ་ནི་བྱང་ཆུབ་སེམས་
འདོད་པའི་རྒྱུ་དང་པོ་ཡིན་ནོ། །གཞན་ཡང་བྱང་ཆུབ་དང་བྱང་ཆུབ་ཀྱི་སེམས་ཀྱི་བསྔགས་པ་བརྗོད་པ་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བྱེད་ན་དེ་ནི་བྱང་ཆུབ་ཀྱི་སེམས་

79-1-194b

འདོད་པའི་རྒྱུ་གཉིས་པ་ཡིན་ནོ། །གཞན་ཡང་སེམས་ཅན་སྐྱོབ་པ་མེད་པ་དང་། སྐྱབས་མེད་པ་དང་། གནས་མེད་པ་དང་། དཔུང་གཉེན་མེད་པ་དང་། གླིང་མེད་པ་དག་མཐོང་ན་བདག་སེམས་ཅན་འདི་དག་གི་སྐྱོབ་པ་དང་། སྐྱབས་
དང་། གནས་དང་། དཔུང་གཉེན་དང་། གླིང་དུ་གྱུར་ཅིག་ཅེས་སྙིང་རྗེའི་སེམས་ཉེ་བར་གཞག་ནས་རྒྱུ་དེ་དང་། རྐྱེན་དེ་དང་། གཞི་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བྱེད་ན་དེ་ནི་བྱང་ཆུབ་ཀྱི་
སེམས་འདོད་པའི་རྒྱུར་གསུམ་པ་ཡིན་ནོ། །གཞན་ཡང་དེ་བཞིན་གཤེགས་པའི་སྐུ་རྣམ་པ་ཐམས་ཅད་ཡོངས་སུ་རྫོགས་པ་མཐོང་ན་དགའ་བ་སྐྱེད་པར་བྱེད། མཆོག་ཏུ་དགའ་བ་སྐྱེད་པར་བྱེད། སེམས་ཤིན་དུ་སྦྱངས་
པ་སྐྱེད་པར་བྱེད། །སེམས་སྤྲོ་བ་སྐྱེད་པར་བྱེད་ཅིང་དེ་རྒྱུ་དེ་དང་། རྐྱེན་དེ་དང་། གཞི་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བྱེད་ན་དེ་ནི་བྱང་ཆུབ་ཀྱི་སེམས་འདོད་པའི་རྒྱུ་བཞི་
པ་ཡིན་ནོ། །གཞན་ཡང་དེ་སེམས་ཅན་རྣམས་ལ་ཕན་པ་དང་། བདེ་བ་ཁོ་ནའི་དོན་དུ་སྦྱིན་པ་སྦྱིན་པར་བྱེད། ཚུལ་ཁྲིམས་སྲུང་བར་བྱེད། བཟོད་པ་སྒོམ་པར་བྱེད། བརྩོན་འགྲུས་རྩོམ་པར་བྱེད། བསམ་
གཏན་ལ་མཉམ་པར་འཇོག་པར་བྱེད། ཤེས་རབ་སྒོམ་པར་བྱེད་པ་ཡིན་ཏེ། དེ་ལ་ཇི་ལྟར་ན་སྦྱིན་པ་སྦྱིན་པར་བྱེད་པ་ཡིན་ཞེ་ན། ཟས་འདོད་པ་རྣམས་ལ་ཟས་དང་། སྐོམ་འདོད་པ་རྣམས་ལ་སྐོམ་དང་། གཞོན་
པ་འདོད་པ་རྣམས་ལ་གཞོན་པ་དང་། མལ་ཆ་འདོད་པ་རྣམས་ལ་མལ་ཆ་དང་། གོས་འདོད་པ་རྣམས་ལ་གོས་དང་། གདུ་བུ་དང་། དཔུང་རྒྱན་དང་། རྣ་ཆ་གདུབ་ཀོར་དང་། རྒྱན་འདོད་པ་རྣམས་ལ་རྒྱན་སྦྱིན་
པར་བྱེད་པ་ཡིན་ཏེ། རིགས་ཀྱི་བུ་མདོར་ན་རང་གི་ཤ་དག་གིས་ཀྱང་སེམས་ཅན་རྣམས་ལ་ཕན་འདོགས་པར་བྱེད་དེ། དེ་ལྟར་སྦྱིན་པ་སྦྱིན་པར་བྱེད་དོ། །སྦྱིན་པ་དེ་ཡང་བླ་ན་མེད་པ་ཡང་དག་པར་རྫོགས་པའི་

79-1-195a

བྱང་ཆུབ་ཏུ་ཡོངས་སུ་བསྔོ་བར་བྱེད་ལ་སྦྱིན་པ་དེས་ཀྱང་རློམ་སེམས་སུ་མི་བྱེད་དོ། །དེ་ལ་ཇི་ལྟར་ན་ཚུལ་ཁྲིམས་སྲུང་བར་བྱེད་པ་ཡིན་ཞེ་ན། དེ་ལུས་ཀྱིས་ལེགས་པར་བསྡམས་པ་དང་། ངག་གིས་ལེགས་
པར་བསྡམས་པ་དང་། ཡིད་ཀྱིས་ལེགས་པར་བསྡམས་པ་དང་། དེ་ལུས་ཀྱིས་ཉེས་པར་སྤྱོད་པ་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་ཡོངས་སུ་སྤོང་བར་བྱེད་པ་དང་། ངག་གིས་ཉེས་པར་སྤྱོད་པ་དང་། 
ཡིད་ཀྱིས་ཉེས་པར་སྤྱོད་པ་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་ཡོངས་སུ་སྤོང་བར་བྱེད་ལ་ཚུལ་ཁྲིམས་མ་ཉམས་པ་དང་། མ་རལ་པ་དང་། མ་འདྲེས་པ་དང་། ནག་ནོག་ཏུ་མ་གྱུར་པར་སྲུང་བར་
བྱེད་དེ། དེ་ལྟར་ཚུལ་ཁྲིམས་སྲུང་བར་བྱེད་དོ། །ཚུལ་ཁྲིམས་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱེད་ལ་ཚུལ་ཁྲིམས་དེས་ཀྱང་རློམ་སེམས་སུ་མི་བྱེད་དོ། །དེ་ལ་ཇི་ལྟར་ན་བཟོད་པ་སྒོམ་
པར་བྱེད་པ་ཡིན་ཞེ་ན། དེ་ལ་ཁྱིམ་ན་གནས་པ་འམ། རབ་ཏུ་བྱུང་བ་དག་གིས་སྤྱོས་སམ། བརྒྱད་བཀག་གམ། བརྡེགས་སམ། བཅོགས་སམ། བཅིངས་སམ། གོ་རར་བཅུག་གམ། གཞུས་སམ། རྣམ་པར་གཙེས་ན་ཡང་
བཟོད་པར་བྱེད། དང་དུ་ལེན་པར་བྱེད་དེ། དེ་ལྟར་བཟོད་པ་སྒོམ་པར་བྱེད་དོ། །བཟོད་པ་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་བར་བྱེད་ལ་བཟོད་པ་དེས་ཀྱང་རློམ་སེམས་སུ་མི་བྱེད་དོ། །དེ་ལ་ཇི་ལྟར་
ན་བརྩོན་འགྲུས་རྩོམ་པར་བྱེད་པ་ཡིན་ཞེ་ན། དེ་འདི་སྙམ་དུ་སེམས་ཏེ། འདི་ལྟ་སྟེ། དཔེར་ན་ནམ་མཁའི་ཁམས་མཐའ་ཡས་མུ་མེད་པ་དེ་བཞིན་དུ་སེམས་ཅན་གྱི་ཁམས་ཀྱང་མཐའ་ཡས་མུ་མེད་པ་ཡིན་པས། དེ་དག་བདག་གཅིག་
པུ་གཉིས་སུ་མེད་པས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་དགོད་པར་བྱའོ་སྙམ་དུ་སེམས་ཏེ། དེ་རྒྱུ་དེ་དང་། རྐྱེན་དེ་དང་། གཞི་དེས་བརྩོན་འགྲུས་རྩོམ་པར་བྱེད་ཅིང་དེ་ལུས་ཀྱི་ཚོར་བ་ལ་ལུས་དང་ལྡན་པའི་དྲན་

79-1-195b

པས་ཉེ་བར་རྟོག་པར་བྱེད་དོ། །དེ་ཚོར་བ་ལ་ཉེ་བར་རྟོག་པ་ལ་བརྩོན་པར་བྱེད་པ་ན་སེམས་ལ་སེམས་ཀྱི་རྗེས་སུ་ལྟ་ཞིང་གནས་པ་དང་། ཆོས་ལ་ཆོས་ཀྱི་རྗེས་སུ་ལྟ་བ་ལ་ཡང་བརྩོན་པར་བྱེད་དོ། །དེ་དེ་ལྟར་དྲན་པ་ཤིན་ཏུ་ཉེ་བར་གཞག་པ་
དང་། སྡིག་པ་མི་དགེ་བའི་ཆོས་མ་སྐྱེས་པ་རྣམས་མི་སྐྱེད་པའི་ཕྱིར་འདུན་པ་སྐྱེད། འབད་པར་བྱེད། བརྩོན་འགྲུས་རྩོམ། སེམས་རབ་ཏུ་འཛིན་ཅིང་ཡང་དག་པར་རབ་ཏུ་འཇོག་པར་བྱེད་དོ། །སྡིག་པ་མི་དགེ་བའི་ཆོས་སྐྱེས་
པ་རྣམས་སྤང་བའི་ཕྱིར་འདུན་པ་སྐྱེད། འབད་པར་བྱེད། བརྩོན་འགྲུས་རྩོམ། སེམས་རབ་ཏུ་འཛིན་ཅིང་ཡང་དག་པར་རབ་ཏུ་འཇོག་པར་བྱེད་དོ། །དགེ་བའི་ཆོས་མ་སྐྱེས་པ་རྣམས་བསྐྱེད་པའི་ཕྱིར་འདུན་པ་སྐྱེད། འབད་པར་
བྱེད། བརྩོན་འགྲུས་རྩོམ། སེམས་རབ་ཏུ་འཛིན་ཅིང་ཡང་དག་པར་རབ་ཏུ་འཇོག་པར་བྱེད་དོ། །དགེ་བའི་ཆོས་སྐྱེས་པ་རྣམས་གནས་པ་དང་། ཕྱིར་ཞིང་འབྱུང་བ་དང་། ཉམས་པར་མི་འགྱུར་བ་དང་། བརྗེད་པར་མི་འགྱུར་བ་དང་། 
ཡོངས་སུ་རྫོགས་པར་བྱ་བའི་ཕྱིར་འདུན་པ་སྐྱེད། འབད་པར་བྱེད། བརྩོན་འགྲུས་རྩོམ། སེམས་རབ་ཏུ་འཛིན་ཅིང་ཡང་དག་པར་རབ་ཏུ་འཇོག་པར་བྱེད་དོ། །དེ་དེ་ལྟར་བརྩོན་འགྲུས་བརྩམས་པ་ན་རྫུ་འཕྲུལ་གྱི་རྐང་པ་དང་པོ་སྒོམ་
པར་བྱེད་དོ། །དེ་བཞིན་དུ་རྫུ་འཕྲུལ་གྱི་རྐང་པ་གཉིས་པ་དང་། གསུམ་པ་དང་། བཞི་པ་ཡང་སྒོམ་པར་བྱེད་དོ། །དེ་དེ་ལྟར་རྫུ་འཕྲུལ་གྱི་རྐང་པ་ཡོངས་སུ་གྲུབ་པས་བསྐལ་པ་འམ། བསྐལ་པ་ལས་ལྷག་པར་གནས་ཤིང་
དེ་བསྐལ་པ་འམ། བསྐལ་པ་ལས་ལྷག་པར་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །དེ་ལྟར་བརྩོན་འགྲུས་རྩོམ་པར་བྱེད་དོ། །བརྩོན་འགྲུས་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
ཡོངས་སུ་བསྔོ་བར་བྱེད་ལ་བརྩོན་འགྲུས་དེས་ཀྱང་རློམ་སེམས་སུ་མི་བྱེད་དོ། །དེ་ལ་ཇི་ལྟར་ན་བསམ་གཏན་ལ་མཉམ་པར་འཇོག་པར་བྱེད་པ་ཡིན་ཞེ་ན། འདོད་ཆགས་དང་བྲལ་བ་ལ་མི་གནས་པ་དང་། འགོག་པ་ལ་མི་གནས་པ་དང་། 

79-1-196a

རྣམ་པར་སྤངས་པར་ཡོངས་སུ་མ་བསྔོས་པ་དང་། ནང་ལ་མི་གནས་པ་དང་། ཕྱི་རོལ་ལ་མི་གནས་པ་དང་། གཟུགས་ལ་མི་གནས་པ་དང་། ཚོར་བ་ལ་མི་གནས་པ་དང་། འདུ་ཤེས་ལ་མི་གནས་པ་དང་། འདུ་བྱེད་ལ་
མི་གནས་པ་དང་། རྣམ་པར་ཤེས་པ་ལ་མི་གནས་པ་དང་། འདོད་པའི་ཁམས་ལ་མི་གནས་པ་དང་། གཟུགས་ཀྱི་ཁམས་ལ་མི་གནས་པ་དང་། གཟུགས་མེད་པའི་ཁམས་ལ་མི་གནས་པ་དང་། སྟོང་པ་ཉིད་ལ་མི་གནས་པ་དང་། མཚན་མ་མེད་
པ་ལ་མི་གནས་པ་དང་། སྨོན་པ་མེད་པ་ལ་མི་གནས་པ་དང་། འཇིག་རྟེན་འདི་ལ་མི་གནས་པ་དང་། འཇིག་རྟེན་ཕ་རོལ་ལ་མི་གནས་པ་དང་། གཟུགས་ལ་མི་གནས་པ་དང་། སྒྲ་ལ་མི་གནས་པ་དང་། དྲི་ལ་མི་གནས་པ་དང་། རོ་ལ་མི་
གནས་པ་དང་། རེག་ལ་མི་གནས་པ་དང་། ཆོས་ལ་མི་གནས་པ་དང་། སྦྱིན་པ་ལ་མི་གནས་པ་དང་། ཚུལ་ཁྲིམས་ལ་མི་གནས་པ་དང་། བཟོད་པ་ལ་མི་གནས་པ་དང་། བརྩོན་འགྲུས་ལ་མི་གནས་པ་དང་། བསམ་གཏན་ལ་
མི་གནས་པ་དང་། ཤེས་རབ་ལ་མི་གནས་པ་ཡིན་ནོ། །རིགས་ཀྱི་བུ་མདོར་ན་ཆགས་པ་ཐམས་ཅད་སྤངས་ནས་མི་གནས་པར་བསམ་གཏན་བྱེད་དེ། དེ་ལྟར་བསམ་གཏན་ལ་བསམ་གཏན་དུ་བྱེད་དོ། །བསམ་
གཏན་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱེད་ལ་བསམ་གཏན་དེས་ཀྱང་རློམ་སེམས་སུ་མི་བྱེད་དོ། །རིགས་ཀྱི་བུ་དེ་ལ་ཇི་ལྟར་ན་ཤེས་རབ་སྒོམ་པར་བྱེད་པ་ཡིན་ཞེ་ན་
དེ་འདི་སྙམ་དུ་སེམས་ཏེ། སེམས་ཅན་གྱི་ཁམས་མུ་མེད་པ་དག་ཡོངས་སུ་མྱ་ངན་ལས་བཟླས་ཀྱང་སེམས་ཅན་གཅིག་ཀྱང་ཡོངས་སུ་མྱ་ངན་ལས་བཟླས་པ་མེད་དོ། །དེ་ཅིའི་ཕྱིར་ཞེ་ན། བཅོམ་ལྡན་འདས་ཀྱིས་ཆོས་ཐམས་ཅད་ནི་བདག་མེད་
པའོ། །ཆོས་ཐམས་ཅད་ནི་སེམས་ཅན་མེད་པའོ། །ཆོས་ཐམས་ཅད་ནི་གང་ཟག་མེད་པའོ་ཞེས་གསུངས་པའི་ཕྱིར་རོ་སྙམ་སྟེ། དེ་ལྟར་ཤེས་རབ་སྒོམ་པར་བྱེད་དོ། །ཤེས་རབ་དེ་ཡང་བླ་ན་མེད་པ་ཡང་དག་པར་རྫོགས་པའི་

79-1-196b

བྱང་ཆུབ་ཏུ་ཡོངས་སུ་བསྔོ་བར་བྱེད་ལ་ཤེས་རབ་དེས་ཀྱང་རློམ་སེམས་སུ་མི་བྱེད་དེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་བྱང་ཆུབ་ཀྱི་སེམས་འདོད་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་
པ་འདི་དག་བཀའ་སྩལ་ཏོ། །ནོར་བུ་རིན་ཆེན་རང་བཞིན་གྱིས། །འོད་འབར་འབྱུང་གནས་ཉིད་ན་འདུག ། བྱི་དོར་བྱས་ན་དེ་བས་ནི། །ཉིས་འགྱུར་གྱིས་ཀྱང་མཛེས་པ་ལྟར། །དེ་བཞིན་རིགས་དང་ལྡན་པ་ཡང་། །བྱང་ཆུབ་སེམས་ནི་ཚོལ་
བྱེད་དེ། །མཐའ་གཉིས་རྣམ་པར་དག་པ་ཡི། །སྤྱོད་ཡུལ་དུ་ནི་བདུད་མི་འོང་། །རིགས་གྱི་བུ་དེ་ལ་ཇི་ལྟར་བྱང་ཆུབ་སེམས་དཔའ་ཆོས་འདོད་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་རང་བཞིན་གྱིས་ཆོས་དོན་དུ་
གཉེར་བ་དང་། ཆོས་འདོད་པ་དང་། ཆོས་ལ་དགའ་བ་དང་། ཆོས་ཀྱི་ཀུན་དགའ་ལ་སྦྱོར་བའི་རྗེས་སུ་བརྩོན་པ་ཡིན་ཏེ། དེས་དགེ་སྦྱོང་ངམ། བྲམ་ཟེ་འམ། བཀྲེས་པས་ཉེན་ཅིང་ཟས་འདོད་པ་གཞན་དག་མཐོང་ན་དེས་དེ་དག་ལ་
ལྡམ་ལྡུམ་འམ། སྔོ་རྔད་དམ། བཟའ་བཅའ་ཅི་བདོག་ཅིང་ཡོད་པ་དག་སྦྱིན་པར་བྱེད་ཅིང་དེ་འཇིག་རྟེན་གྱི་འཚོ་བ་དང་། ཡོ་བྱེད་འདི་ལྟ་སྟེ། རྩ་བ་དང་འབྲས་བུ་དང་། སྡོང་བུ་ལ་སོགས་པ་གང་དག་ཡིན་པ་དེ་དག་ཀྱང་བསགས་ཤིང་བསགས་
ཤིང་སེམས་ཅན་རྣམས་ལ་སྦྱིན་པར་བྱེད་པ་དང་། དེ་དམ་པའི་ཆོས་འཛིན་པ་རྣམས་ཀྱི་དྲུང་དུ་སོང་སྟེ་གུས་པར་སྨྲ་བ་དང་། ཕྱག་བྱ་བ་དང་། མངོན་པར་ལྡང་བ་དང་། ཐལ་མོ་སྦྱར་བ་དང་། གུས་པར་བྱ་བའི་ལས་དག་བྱས་ནས་རྗེས་དང་བཅས། གུས་པ་
དང་བཅས་པས་ཚུལ་བཞིན་དུ་དྲི་བ་འདྲི་བར་བྱེད་ཅིང་དེའི་འོག་ཏུ་དེ་ལ་དམ་པའི་ཆོས་འཛིན་པ་དེ་ཡང་ཇི་ལྟར་དྲི་བ་དྲིས་པ་དེ་བཞིན་དུ་ལན་འདེབས་པར་བྱེད་ལ། དེ་ཡང་དམ་པའི་ཆོས་འཛིན་པ་དེ་ལ་སྟོན་པར་འདུ་ཤེས་སྐྱེད་པར་བྱེད། དགེ་བའི་
བཤེས་གཉེན་དུ་འདུ་ཤེས་སྐྱེད་པར་བྱེད། འཁོར་བའི་རྒྱ་མཚོ་ལས་སྒྲོལ་བར་བྱེད་པར་འདུ་ཤེས་སྐྱེད་པར་བྱེད། མཁན་པོར་འདུ་ཤེས་སྐྱེད་པར་བྱེད། སློབ་དཔོན་དུ་འདུ་ཤེས་སྐྱེད་པར་བྱེད། བདག་ཡུན་རིང་པོ་ནས་འཁོར་བའི་དགོན་པར་

79-1-197a

འཁྱམས་པ་ཚོལ་བར་བྱེད་པ་ཡིན་པར་འདུ་ཤེས་སྐྱེད་པར་བྱེད་བདག་ཡུན་རིང་པོ་ནས་གཏི་མུག་གིས་བསྒྲིབས་ཤིང་གཉིད་ལོག་པའི་གཉིད་སད་པར་བྱེད་པ་ཡིན་ནོ་ཞེས་སད་པར་བྱེད་པ་ཡིན་པར་འདུ་ཤེས་སྐྱེད་པར་བྱེད། བདག་འཁོར་བའི་རྒྱ་མཚོའི་
འདམ་དུ་བྱིང་བར་འབྱིན་པར་བྱེད་པ་ཡིན་ནོ་ཞེས་འབྱིན་པར་བྱེད་པ་ཡིན་པར་འདུ་ཤེས་སྐྱེད་པར་བྱེད། བདག་ལམ་ངན་པར་ཞུགས་པ་ལ་ལམ་བཟང་པོ་སྟོན་པར་བྱེད་པ་ཡིན་ནོ་ཞེས་ལམ་སྟོན་པར་བྱེད་པ་ཡིན་པར་འདུ་ཤེས་སྐྱེད་པར་བྱེད། བདག་
འཁོར་བའི་བཙོན་རར་བཅིངས་པ་འགྲོལ་བ་ཡིན་ནོ་ཞེས་འགྲོལ་བར་བྱེད་པ་ཡིན་པར་འདུ་ཤེས་སྐྱེད་པར་བྱེད། བདག་ཡུན་རིང་པོ་ནས་ཉམ་ཐག་པའི་སྨན་པ་དམ་པ་ཡིན་ནོ་ཞེས་སྨན་པ་དམ་པ་ཡིན་པར་འདུ་ཤེས་སྐྱེད་པར་བྱེད། བདག་འདོད་
ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེས་ཀུན་དུ་འབར་བར་འགྱུར་བ་རབ་ཏུ་ཞི་བར་བྱེད་པ་ཡིན་ནོ་ཞེས་ཆར་སྤྲིན་ཆེན་པོ་ཡིན་པར་འདུ་ཤེས་སྐྱེད་པར་བྱེད་ཅིང་དེ་ཆོས་ཀྱི་རྒྱུ་དང་། ཆོས་ཀྱི་གཞི་དང་། ཆོས་ཀྱི་ཆེད་ཀྱི་ཕྱིར་ཚབ་
ཡང་ཁྱད་དུ་གསོད། གྲང་བ་དང་། རླུང་དང་། ཉི་མ་དང་། ཤ་སྤྲང་དང་། སྤྲང་བུ་མཆུ་རིངས་དང་། སྡིག་སྦྲུལ་གྱིས་རེག་པ་ཡང་ཁྱད་དུ་གསོད། བཀྲེས་པ་ཡང་ཁྱད་དུ་གསོད། སྐོམ་པ་ཡང་ཁྱད་དུ་གསོད། གཞན་དག་བདེ་བ་དག་མཐོང་
ན་ཡང་འདོད་པའི་སེམས་སྐྱེད་པར་མི་བྱེད་པར་དེ་འདི་སྙམ་དུ་སེམས་ཏེ། བདག་ལ་དམ་པའི་ཆོས་མཉན་པའི་སྣང་བ་འཆར་བས་ན་བདག་ནི་འཇིག་རྟེན་ན་བདེ་བ་ཡིན་ནོ་སྙམ་དུ་སེམས་ཏེ། དེ་རྒྱུ་དེ་དང་། རྐྱེན་དེ་དང་། གཞི་དེས་
མྱ་ངན་མི་བྱེད། སྨྲེ་སྔགས་མི་འདོན་ཅིང་སྡུག་བསྔལ་བ་དང་། ཡིད་མི་བདེ་བའི་སེམས་སྐྱེད་པར་མི་བྱེད་ལ་དེ་མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་བྲལ་བས་བདག་དེ་བཞིན་གཤེགས་
པས་གསུངས་པའི་ཆོས་ཚིག་གཅིག་ཙམ་གྱི་ཕྱིར་ཡང་བསྐལ་པ་འམ། བསྐལ་པ་ལས་ལྷག་པར་སེམས་ཅན་དམྱལ་བ་ཆེན་པོ་མནར་མེད་པར་གནས་པར་སྤྲོའོ་སྙམ་པ་དེ་ལྟ་བུའི་སེམས་སྐྱེ་བར་འགྱུར་ཞིང་དེ་དེ་ལྟར་

79-1-197b

ཡིད་ཡོངས་སུ་སྐྱོ་བ་མེད་པས་ན་བསྒྲིམ་མི་དགོས་པ་ཁོ་ནར་རྣམ་པ་ཐམས་ཅད་མཁྱེན་པ་ཉིད་ཡང་དག་པར་སྒྲུབ་པར་བྱེད་ཅིང་སངས་རྒྱས་ཀྱི་ཆོས་མ་ཐོབ་པ་རྣམས་ཀྱང་ཐོབ་པར་བྱེད་པ་ཡིན་ཏེ། རིགས་ཀྱི་བུ་དེ་ལྟར་ན་བྱང་ཆུབ་སེམས་
དཔའ་ཆོས་འདོད་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །རྒྱལ་བའི་སྲས་པོ་ཤེས་རབ་ཆེ། །ཆོས་འདོད་པར་ནི་གྱུར་བ་རྣམས། །དམ་ཆོས་ཡོངས་སུ་ཚོལ་བ་ན། །
སྐྱོ་བ་སྐྱེད་པར་མི་བྱེད་དོ། །གུས་པས་དམ་ཆོས་ཡོངས་ཚོལ་བའི། །རྒྱལ་བའི་ཐུགས་ལས་སྐྱེས་པ་རྣམས། །སེམས་ཀྱིས་འཛིན་པར་བྱེད་པ་དང་། །ནན་ཏན་གྱིས་ནི་སྒྲུབ་པ་ཡིན། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་
སེམས་དཔའ་ཆོས་ལ་ཉེ་བར་རྟོག་པར་བྱེད་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་ཆོས་ལ་ཉེ་བར་རྟོག་པར་བྱེད་དེ། ཆོས་ཐམས་ཅད་ནི་བྱིས་པ་སོ་སོའི་སྐྱེ་བོ་ཀུན་དུ་རྨོངས་པར་བྱེད་པའི་ཕྱིར་སྒྱུ་མ་ལྟ་
བུའོ། །ཆོས་ཐམས་ཅད་ནི་ཡོད་པ་མ་ཡིན་པའི་ཕྱིར་རྨི་ལམ་ལྟ་བུའོ། །ཆོས་ཐམས་ཅད་ནི་དངོས་པོ་མེད་པའི་ཕྱིར་ཆུ་ཟླ་ལྟ་བུའོ། །ཆོས་ཐམས་ཅད་ནི་སེམས་ཅན་མེད་པའི་ཕྱིར་མིག་ཡོར་ལྟ་བུའོ། །ཆོས་ཐམས་
ཅད་ནི་ཡང་དག་པ་མ་ཡིན་པ་ཀུན་དུ་བརྟགས་པའི་ཕྱིར་གཟུགས་བརྙན་ལྟ་བུའོ། །ཆོས་ཐམས་ཅད་ནི་བྱུང་ནས་འཇིག་ཅིང་འཇུ་བའི་ཕྱིར་བྲག་ཆ་ལྟ་བུའོ། །ཆོས་ཐམས་ཅད་ནི་རྟེན་ཅིང་འབྲེལ་བར་འབྱུང་བ་ཡིན་
པའི་ཕྱིར་བྱུང་ནས་འཇིག་ཅིང་འཇུ་བ་ཡིན་ནོ། །ཆོས་ཐམས་ཅད་ནི་དེ་བཞིན་ཉིད་ལ་ཡང་དག་པར་གཞོལ་བའི་ཕྱིར་མ་སྐྱེས་པ་ཡིན་ནོ། །ཆོས་ཐམས་ཅད་ནི་མི་སྐྱེས་པའི་ཕྱིར་མ་འགགས་པ་ཡིན་ནོ། །ཆོས་ཐམས་ཅད་ནི་བྱེད་
པ་པོ་མེད་པའི་ཕྱིར་བཅོས་མ་མ་ཡིན་ནོ། །ཆོས་ཐམས་ཅད་ནི་གོས་པ་མེད་པའི་ཕྱིར་ནམ་མཁའ་ལྟ་བུ་ཡིན་ནོ། །ཆོས་ཐམས་ཅད་ནི་རང་བཞིན་གྱིས་ཀུན་དུ་འབར་བ་མ་ཡིན་པའི་ཕྱིར་ཞི་བ་ཡིན་ནོ། །ཆོས་ཐམས་ཅད་ནི་རང་བཞིན་

79-1-198a

གྱིས་ཀུན་ནས་ཉོན་མོངས་པ་ཅན་མ་ཡིན་པའི་ཕྱིར་གཟོད་མ་ནས་ཡོངས་སུ་དག་པ་ཡིན་ནོ། །ཆོས་ཐམས་ཅད་ནི་དྲི་མ་ཐམས་ཅད་དང་བྲལ་བའི་ཕྱིར་དྲི་མ་མེད་པ་ཡིན་ནོ། །ཆོས་ཐམས་ཅད་ནི་ཉོན་མོངས་པ་དང་
བྲལ་བའི་ཕྱིར་གཟོད་མ་ནས་ཡོངས་སུ་མྱ་ངན་ལས་འདས་པ་ཡིན་ནོ། །ཆོས་ཐམས་ཅད་ནི་ངེས་པར་སྣང་བ་མ་ཡིན་པའི་ཕྱིར་གཟུགས་ཅན་མ་ཡིན་ནོ། །ཆོས་ཐམས་ཅད་ནི་ལུས་མེད་པའི་ཕྱིར་རྣམ་པར་ཤེས་པའི་
ཡུལ་ལས་ཡང་དག་པར་འདས་པ་ཡིན་ནོ། །ཆོས་ཐམས་ཅད་ནི་གནས་ཡང་དག་པར་བཅོམ་པའི་ཕྱིར་མི་གནས་པ་ཡིན་ནོ། །ཆོས་ཐམས་ཅད་ནི་རྗེས་སུ་ཆགས་པ་དང་། ཁོང་ཁྲོ་བ་སྤངས་པའི་ཕྱིར་རྣམ་པར་ཤེས་པར་བྱ་བ་
མ་ཡིན་པ་ཡིན་ནོ། །ཆོས་ཐམས་ཅད་ནི་ཉོན་མོངས་པའི་སྤྱོད་ཡུལ་ལས་ཡང་དག་པར་འདས་པའི་ཕྱིར་གནས་མེད་པ་ཡིན་ནོ། །ཆོས་ཐམས་ཅད་ནི་ཐབས་ལ་མཁས་པའི་རིག་པ་དང་བྲལ་བའི་ཕྱིར་སྦྲུལ་གདུག་པ་ལྟ་
བུ་ཡིན་ནོ། །ཆོས་ཐམས་ཅད་ནི་སྙིང་པོ་མེད་པའི་ཕྱིར་ཆུ་ཤིང་གི་སྡོང་བུ་ལྟ་བུ་ཡིན་ནོ། །ཆོས་ཐམས་ཅད་ནི་རང་བཞིན་གྱིས་ཉམ་ཆུང་བའི་ཕྱིར་དབུ་བ་རྡོས་པ་ལྟ་བུ་ཡིན་ནོ། །ཞེས་ཉེ་བར་རྟོག་པར་བྱེད་པ་ཡིན་ཏེ། རིགས་ཀྱི་བུ་དེ་ལྟར་
ན་བྱང་ཆུབ་སེམས་དཔའ་ཆོས་ལ་ཉེ་བར་རྟོག་པར་བྱེད་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །ཆོས་ཀུན་སྒྱུ་མ་ལྟ་བུ་སྟེ། །བྱིས་པ་རྣམས་ཀྱི་སེམས་རྨོངས་བྱེད། །ཡང་དག་མ་
ཡིན་རྨི་འདྲ་བ། །དེ་ལྟར་ལྟོས་ཤིག་དགེ་སློང་དག །ཆོས་རྣམས་ཆུ་ཟླ་ལྟ་བུ་སྟེ། །མིག་ཡོར་གྱིས་ནི་ཀུན་ནས་བསླང་། །ཆོས་རྣམས་གཟུགས་བརྙན་ལྟ་བུར་ནི། །མཁས་པ་སུ་ཞིག་རྟོག་མི་བྱེད། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་
དཔའ་ཆོས་ཀྱི་རྗེས་སུ་འཐུན་པའི་ཆོས་ལ་ཞུགས་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་གཟུགས་མི་རྟག་གོ་ཞེས་ཡང་དག་པར་རྗེས་སུ་ལྟ་ཞིང་གཟུགས་ལ་འདོད་ཆགས་དང་བྲལ་བའི་ཕྱིར་ཆོས་ཀྱི་དབྱིངས་མངོན་སུམ་དུ་མི་བྱེད་པར་ཆོས་ཀྱི་དབྱིངས་

79-1-198b

ཀྱི་འཁོར་གྱི་ཆོས་རྣམས་ཡང་དག་པའི་ཤེས་རབ་ཀྱིས་ལེགས་པར་རྟོགས་པར་བྱེད་ཅིང་དེ་དག་གི་མཚན་མ་རྣམས་དང་། ལེགས་པར་བཤད་པ་རྣམས་དང་། ལེགས་པར་མཚན་བཏབ་པ་རྣམས་ལེགས་པར་ཟིན་པར་བྱེད་ལ་མཚན་
མ་དང་ལེགས་པར་བཤད་པ་དང་། ལེགས་པར་མཚན་བཏབ་པ་ལེགས་པར་བཟུང་བ་དེ་དག་ལ་དེའི་ཆོས་ཀྱི་དབྱིངས་ཀྱི་ལམ་རྩོམ་པ་མེད་པ་ཁོ་ནར་འཇུག་པ་དང་། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་
པ་མི་རྟག་གོ་ཞེས་ཡང་དག་པར་རྗེས་སུ་ལྟ་ཞིང་རྣམ་པར་ཤེས་པ་ལ་འདོད་ཆགས་དང་བྲལ་བའི་ཕྱིར་ཆོས་ཀྱི་དབྱིངས་མངོན་སུམ་དུ་མི་བྱེད་པར་ཆོས་ཀྱི་དབྱིངས་ཀྱི་འཁོར་གྱི་ཆོས་རྣམས་ཡང་དག་པའི་ཤེས་རབ་ཀྱིས་ལེགས་པར་
རྟོགས་པར་བྱེད་ཅིང་དེ་དག་གི་མཚན་མ་དང་། ལེགས་པར་བཤད་པ་དང་། ལེགས་པར་མཚན་བཏབ་པ་དེ་དག་ལེགས་པར་ཟིན་པར་བྱེད་ལ་མཚན་མ་དང་། ལེགས་པར་བཤད་པ་དང་། ལེགས་པར་མཚན་བཏབ་པ་ལེགས་པར་བཟུང་
བ་དེ་དག་ལ་དེའི་ཆོས་ཀྱི་དབྱིངས་ཀྱི་ལམ་རྩོམ་པ་མེད་པ་ཁོ་ནར་འཇུག་པ་དང་། མི་རྟག་པ་ལ་ཇི་ལྟ་བ་བཞིན་དུ་སྡུག་བསྔལ་བ་དང་། སྟོང་པ་དང་། བདག་མེད་པ་ལ་ཡང་དེ་བཞིན་ཏེ། དེ་གཟུགས་བདག་མེད་དོ་ཞེས་ཡང་དག་པར་
རྗེས་སུ་ལྟ་ཞིང་གཟུགས་བདག་མེད་དོ། །ཞེས་ཡང་དག་པར་རྗེས་སུ་ལྟ་བ་ན་གཟུགས་ཀྱིས་མི་སྐྲག་མི་དངང་ཞིང་དངང་བར་མི་འགྱུར་རོ། །དེ་ཅིའི་ཕྱིར་ཞེ་ན། གཟུགས་ནི་ཡང་དག་པ་མ་ཡིན་པའི་ཡོངས་སུ་རྟོགས་པས་ཀུན་ནས་
བསླང་བ་ཡིན་ལ། དེས་དེ་ཡང་དག་པ་ཇི་ལྟ་བ་བཞིན་དུ་ཤེས་པའི་ཕྱིར་རོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་བདག་མེད་དོ་ཞེས་བྱ་བར་ཡང་དག་པར་རྗེས་སུ་ལྟ་ཞིང་རྣམ་པར་ཤེས་པ་བདག་མེད་
དོ། །ཞེས་ཡང་དག་པར་རྗེས་སུ་ལྟ་བ་ན་རྣམ་པར་ཤེས་པས་མི་སྐྲག་མི་དངང་ཞིང་དངང་བར་མི་འགྱུར་རོ། །དེ་ཅིའི་ཕྱིར་ཞེ་ན། རྣམ་པར་ཤེས་པ་ནི་ཡང་དག་པ་མ་ཡིན་པ་ཡོངས་སུ་རྟོག་པས་ཀུན་ནས་བསླང་བ་ཡིན་ལ། དེས་དེ་ཡང་

79-1-199a

དག་པ་ཇི་ལྟ་བ་བཞིན་དུ་ཤེས་པའི་ཕྱིར་རོ། །རིགས་ཀྱི་བུ་འདི་ལྟ་སྟེ། དཔེར་ན་སྒྱུ་མ་མཁན་ནམ་སྒྱུ་མ་མཁན་གྱི་སློབ་མ་མཁས་པ་ཞིག་གིས་སྐྱེ་བོ་ཕལ་པོ་ཆེའི་མདུན་དུ་སྒྱུ་མར་བྱས་པ་རྣམ་པ་སྣ་ཚོགས་འདི་ལྟ་སྟེ། 
གླང་པོ་ཆེའི་ཚོགས་སམ། རྟའི་ཚོགས་སམ། ཤིང་རྟའི་ཚོགས་སམ། དཔུང་བུ་ཆུང་གི་ཚོགས་དག་མངོན་པར་སྤྲུལ་ཏེ་བསྟན་པར་གྱུར་ན་སྐྱེས་བུ་མཁས་པའི་རང་བཞིན་ཅན་ནི་དེ་མཐོང་ན་མི་སྐྲག་མི་དངང་ཞིང་དངང་བར་མི་འགྱུར་
རོ། །དེ་ཅིའི་ཕྱིར་ཞེ་ན། དེས་དེ་ནི་སྒྱུ་མར་བྱས་པ་སྟེ། ཡང་དག་པ་མ་ཡིན་པ་དང་། ཡོད་པ་མ་ཡིན་པ་དང་། བརྫུན་པ་དང་། སླུ་བར་བྱེད་པའི་ཆོས་ཡིན་པར་རིག་ཅིང་ཀུན་དུ་ཤེས་པའི་ཕྱིར་རོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་
ཡང་གཟུགས་བདག་མེད་དོ་ཞེས་ཡང་དག་པར་རྗེས་སུ་ལྟ་བ་ན་མི་སྐྲག་མི་དངང་ཞིང་དངང་བར་མི་འགྱུར་རོ། །དེ་ཅིའི་ཕྱིར་ཞེ་ན། གཟུགས་ནི་ཡང་དག་པ་མ་ཡིན་པ་ཡོངས་སུ་རྟོག་པས་ཀུན་ནས་བསླང་པ་ཡིན་ལ། དེས་དེ་ཡང་དག་པ་
ཇི་ལྟ་བ་བཞིན་དུ་ཤེས་པའི་ཕྱིར་རོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་བདག་མེད་དོ། །ཞེས་ཡང་དག་པར་རྗེས་སུ་ལྟ་བ་ན། རྣམ་པར་ཤེས་པས་མི་སྐྲག་མི་དངང་ཞིང་དངང་བར་མི་འགྱུར་རོ། །
དེ་ཅིའི་ཕྱིར་ཞེ་ན། རྣམ་པར་ཤེས་པ་ནི་ཡང་དག་པ་མ་ཡིན་པ་ཡོངས་སུ་རྟོག་པས་ཀུན་ནས་བསླང་བ་ཡིན་ལ། དེས་དེ་ཡང་དག་པ་ཇི་ལྟ་བ་བཞིན་དུ་ཤེས་པའི་ཕྱིར་རོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་
སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་གཟུགས་མི་རྟག་པར་ཡང་དག་པར་རྗེས་སུ་ལྟ་ཞིང་གཟུགས་ལ་འདོད་ཆགས་དང་
བྲལ་བའི་སླད་དུ་ཆོས་ཀྱི་དབྱིངས་མངོན་སུམ་དུ་མི་བགྱིད་པར་ཆོས་ཀྱི་དབྱིངས་ཀྱི་འཁོར་གྱི་ཆོས་རྣམས་ཡང་དག་པའི་ཤེས་རབ་ཀྱིས་ལེགས་པར་རྟོགས་པར་བགྱིད་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་

79-1-199b

འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་འདི་ན་སྐྱེས་བུ་མཁས་པ་ལ་ལ་དཔེས་བཤད་པའི་དོན་ཀུན་ཤེས་པར་འགྱུར་
བས་ན་དེའི་ཕྱིར་དཔེ་བརྗོད་པར་བྱས་ཉོན་ཅིག་རིགས་ཀྱི་བུ་འདི་ལྟ་སྟེ་དཔེར་ན་ཤེས་རབ་དང་ལྡན་པའི་རང་བཞིན་ཅན་གྱི་མི་ལ་ལ་ཞིག་དུག་སྤྱོད་པར་གྱུར་ན་དེས་དུས་དུས་སུ་དུག་དེ་བྱི་དོར་བྱེད། སྦེད་པར་བྱེད། ནོར་དུ་བྱེད། བདག་གིར་བྱེད་
ཅིང་ཡོ་བྱེད་རྣམ་པ་སྣ་ཚོགས་དག་ཏུ་འཚོད་པར་བྱེད་ཀྱི་དེ་ཟ་བར་མི་བྱེད་དོ། །དེ་ཅིའི་ཕྱིར་ཞེ་ན། གཞི་འདིས་བདག་གི་སྲོག་གི་བར་ཆད་དུ་འགྱུར་དུ་འོང་ངོ་སྙམ་དུ་སེམས་པའི་ཕྱིར་རོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་ཡང་
མྱ་ངན་ལས་འདས་པ་ལ་སེམས་པ་དང་། མྱ་ངན་ལས་འདས་པ་ལ་གཞོལ་བ་དང་། མྱ་ངན་ལས་འདས་པ་ལ་འབབ་པ་དང་། མྱ་ངན་ལས་འདས་པ་འབབ་པར་ཡང་བྱེད་མོད་ཀྱི། མྱ་ངན་ལས་འདས་པ་དེ་མངོན་སུམ་དུ་ནི་མི་བྱེད་དོ། །
དེ་ཅིའི་ཕྱིར་ཞེ་ན། གཞི་འདིས་བདག་བྱང་ཆུབ་ལས་ལྡོག་པར་འགྱུར་དུ་འོང་ངོ་སྙམ་དུ་སེམས་པའི་ཕྱིར་རོ། །རིགས་ཀྱི་བུ་འདི་ལྟ་སྟེ། དཔེར་ན་ཤེས་རབ་དང་ལྡན་པའི་རང་བཞིན་ཅན་གྱི་མི་ལ་ལ་ཞིག་མེ་སྤྱོད་པར་གྱུར་ན་དེ་དུས་དུས་སུ་
མེ་དེ་ལ་བཀུར་སྟི་བྱེད། བླ་མར་བྱེད། རི་མོར་བྱེད། མཆོད་པ་བྱེད། ལེགས་པར་རིམ་གྲོ་བྱེད་ཀྱང་། དེ་འདི་སྙམ་དུ་བདག་གིས་མེ་འདི་ལ་བཀུར་སྟི་བྱས། བླ་མར་བྱས། རི་མོས་བྱས། མཆོད་པ་བྱས། ལེགས་པར་རིམ་གྲོ་བྱས་མོད་ཀྱི། འདི་ལ་
ལག་པ་གཉིས་ཀྱིས་ནི་གཟུང་བར་མི་བྱའོ་སྙམ་དུ་སེམས་སོ། །དེ་ཅིའི་ཕྱིར་ཞེ་ན། གཞི་འདིས་བདག་ལ་ལུས་ཀྱི་སྡུག་བསྔལ་དང་། ཡི་སེམས་ཀྱི་ཡིད་མི་བདེ་བ་འབྱུང་བར་འགྱུར་དུ་འོང་ངོ་སྙམ་དུ་སེམས་པའི་ཕྱིར་རོ། །རིགས་ཀྱི་བུ་དེ་བཞིན་
དུ་བྱང་ཆུབ་སེམས་དཔའ་ཡང་མྱ་ངན་ལས་འདས་པ་ལ་སེམས་པ་དང་། མྱ་ངན་ལས་འདས་པ་ལ་གཞོལ་བ་དང་། མྱ་ངན་ལས་འདས་པ་ལ་འབད་པ་དང་མྱ་ངན་ལས་འདས་པ་ལ་བབ་པར་ཡང་བྱེད་མོད་ཀྱི། མྱ་ངན་ལས་

79-1-200a

འདས་པ་དེ་མངོན་སུམ་དུ་ནི་མི་བྱེད་དོ། །དེ་ཅིའི་ཕྱིར་ཞེ་ན། གཞི་འདིས་བདག་བྱང་ཆུབ་ལས་ལྡོག་པར་གྱུར་དུ་འོང་ངོ་སྙམ་དུ་སེམས་པའི་ཕྱིར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་བྱང་ཆུབ་
སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་བཅོམ་ལྡན་འདས་ཀྱིས་གསུངས་པའི་དོན་འཚལ་བ་ལྟར་ན། བྱང་ཆུབ་སེམས་
དཔའ་ནི་འཁོར་བ་ཁོ་ནར་གནས་པར་བགྱི་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། བྱང་ཆུབ་སེམས་དཔའ་ནི་འཁོར་བ་ཁོ་ནར་གནས་པར་བྱ་བ་ཡིན་ནོ། །
གསོལ་པ། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་འཁོར་བ་ན་འཁོར་བའི་ཚེ་འཁོར་བའི་སྐྱོན་རྣམས་ཀྱིས་མི་གོས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེའི་ཕྱིར་དཔེ་བརྗོད་པར་
བྱས་ཉོན་ཅིག་རིགས་ཀྱི་བུ་འདི་ལྟ་སྟེ། དཔེར་ན་སྦྲུལ་འཛིན་པའི་མིས་གསང་སྔགས་དང་། སྨན་གྱི་སྟོབས་བསྐྱེད་པ་ཆེན་པོ་དང་ལྡན་པ་ནི་སྦྲུལ་གདུག་པ་དག་དང་། ལྷན་ཅིག་ཏུ་རྩེ་ཞིང་དགའ་ལ་དགའ་མགུར་སྐྱོད་པར་བྱེད་
ཀྱང་གཞི་དེས་དེའི་སྲོག་གི་བར་ཆད་བྱེད་པར་ཡང་མི་འགྱུར་རོ། །དེ་ཅིའི་ཕྱིར་ཞེ་ན། འདི་ལྟ་སྟེ། ཤེས་རབ་དང་། ཐབས་དང་། རིག་པའི་གསང་སྔགས་དང་། སྨན་གྱི་སྟོབས་བསྐྱེད་པའི་ཕྱིར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་
ལ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དག་མྱ་ངན་ལས་འདས་པ་
དེ་ཡང་མངོན་སུམ་དུ་མི་བགྱིད་ལ། འཁོར་བའི་སྐྱོན་དེ་དག་གིས་ཀྱང་མི་གོས་པ་ནི་བཅོམ་ལྡན་འདས་ངོ་མཚར་ལགས་སོ། །བདེ་བར་གཤེགས་པ་ངོ་མཚར་ལགས་སོ། །བཅོམ་ལྡན་འདས་ཤིན་དུ་ངོ་མཚར་ལགས་སོ། །བདེ་བར་

79-1-200b

གཤེགས་པ་ཤིན་དུ་ངོ་མཚར་ལགས་ཏེ། བཅོམ་ལྡན་འདས་བདག་བྱང་ཆུབ་སེམས་དཔའ་དེ་དག་ལ་སྐྱབས་སུ་མཆི་ལགས་སོ། །བཅོམ་ལྡན་འདས་སེམས་ཅན་གང་དག་ཆོས་ཀྱི་རྣམ་གྲངས་འདི་ཐོས་ནས་ཐ་ན་སེམས་དང་བ་གཅིག་
ཙམ་རྙེད་པར་གྱུར་བ་དེ་དག་ནི་དགེ་བའི་རྩ་བ་ངན་ངོན་དང་ལྡན་པ་མ་ལགས་སོ། །བཅོམ་ལྡན་འདས་རིགས་ཀྱི་བུ་དང་། རིགས་ཀྱི་བུ་མོ་གང་དག་ཆོས་བསྟན་པ་འདི་བཤད་པ་ན་ཉན་པར་བགྱིད་པ་དེ་དག་ནི་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་ལུང་བསྟན་པར་འགྱུར་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། རིགས་ཀྱི་བུ་དང་། རིགས་ཀྱི་བུ་མོ་གང་དག་ཆོས་བསྟན་པ་འདི་བཤད་
པ་ན་ཉན་པར་བྱེད་པ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་འགྱུར་བ་ཡིན་ནོ། །ཆོས་བསྟན་པ་འདི་བཤད་པ་ན་དགེ་སློང་ལྔ་བརྒྱ་པོ་དེ་དག་ལེན་པ་མེད་པར་ཟག་པ་རྣམས་ལས་སེམས་རྣམ་པར་
གྲོལ་བར་གྱུར་ནས་སེམས་རྣམ་པར་གྲོལ་བ་དེ་དག་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་དག་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་དག་
བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཕྱག་བགྱི་བར་འོས་པ་ལགས་སོ། །བདེ་བར་གཤེགས་པ་བྱང་ཆུབ་སེམས་དཔའ་སེམས་
དཔའ་ཆེན་པོ་རྣམས་ནི་ཕྱག་བགྱི་བར་འོས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་དེ་བཞིན་ཏེ། ཇི་སྐད་སྨྲས་པ་དེ་བཞིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་
འདི་དག་བཀའ་སྩལ་ཏོ། །གྲགས་ཆེན་ཐབས་ལ་མཁས་པ་དང་། །ཤེས་རབ་ཁྱད་པར་འཕགས་པ་ཡིས། །ཉན་ཐོས་རྣམས་ཀྱི་ས་དག་ལས། །ཡང་དག་འདས་པར་གྱུར་བ་དང་། །ཕུང་པོ་སྐྱེ་འཇིག་ཟད་འགྱུར་བར། །ཡང་དག་ཇི་བཞིན་

79-1-201a

ཤེས་གྱུར་ཀྱང་། །འགྲོ་བ་ཉམ་ཐག་འདི་མཐོང་ནས། །མྱ་ངན་འདའ་བར་མི་འགྲོ་བའི། །ཤེས་རབ་ཆེ་རྣམས་ཕྱག་བྱའི་འོས། །འཇིགས་པ་མེད་རྣམས་ཕྱག་བྱའི་འོས། །སྤྱན་ཡངས་ལྡན་རྣམས་ཕྱག་བྱའི་འོས། །
རྒྱལ་བའི་སྲས་རྣམས་ཕྱག་བྱའི་འོས། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་ཆོས་ཀྱི་རྗེས་སུ་འཐུན་པའི་ཆོས་ལ་ཞུགས་པ་ཡིན་ནོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་ང་རྒྱལ་དང་། ཆེ་བའི་ང་རྒྱལ་དང་བྲལ་
བ་ཡིན་ཞེ་ན། རིགས་ཀྱི་བུ་འདི་ལ་ང་རྒྱལ་ཞེས་བྱ་བ་ནི་བདག་ནི་གཞན་དག་དང་། རིགས་དང་། རུས་དང་། གཟུགས་དང་། མགྲོན་བུ་དང་། གསེར་དང་། ནོར་དང་། ཡོ་བྱད་གང་ཡང་རུང་བ་དག་གམ། གླང་པོ་ཆེའི་ཚོགས་སམ། རྟའི་ཚོགས་སམ། 
ཤིང་རྟའི་ཚོགས་སམ། དཔུང་བུ་ཆུང་གི་ཚོགས་དག་མི་མཚུངས་སོ་སྙམ་དུ་འགྲན་པར་བྱེད་ཅིང་དེ་ལྟར་སེམས་མངོན་པར་མཐོ་བར་བྱེད་པ་གང་ཡིན་པ་སྟེ། དེ་ནི་ང་རྒྱལ་ཞེས་བྱའོ། །ཆེ་བའི་ང་རྒྱལ་ཞེས་བྱ་བ་ནི་བདག་ནི་གཞན་
དག་པས་རིགས་དང་། རུས་དང་། གཟུགས་དང་། འགྲོན་བུ་དང་། གསེར་དང་། ནོར་དང་། འབྲུ་ཕུན་སུམ་ཚོགས་པ་དག་གམ། གླང་པོ་ཆེའི་ཚོགས་སམ། རྟའི་ཚོགས་སམ། ཤིང་རྟའི་ཚོགས་སམ། དཔུང་བུ་ཆུང་གི་ཚོགས་
དག་གིས་ཁྱད་པར་དུ་འཕགས་པ་ཡིན་ནོ་སྙམ་དུ་སེམས་ལ། དེ་ལྟར་སེམས་ཁེངས་ཤིང་མི་འདུད་པ་གང་ཡིན་པ་སྟེ། དེ་ནི་ཆེ་བའི་ང་རྒྱལ་ཞེས་བྱའོ། །བྱང་ཆུབ་སེམས་དཔའི་ནི་དེ་དག་བྲལ་བས་ན་དེའི་ཕྱིར་ང་རྒྱལ་དང་། 
ཆེ་བའི་ང་རྒྱལ་དང་བྲལ་བ་ཞེས་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱི་ཚིགས་སུ་བཅད་པ་འདི་དག་བཀའ་སྩལ་ཏོ། །ང་རྒྱལ་ཆེ་བའི་ང་རྒྱལ་བྲལ་ཞིང་རྟག་ཏུ་བྱམས་པའི་སེམས། །སྙིང་རྗེའི་ཡིད་དང་ལྡན་ཞིང་འགྲོ་
བ་དག་ལ་བག་ཡོད་པའི། །སེམས་དཔའ་གཙོ་བོ་ཡངས་པ་འདི་ན་བསོད་སྙོམས་སྤྱོད་བྱེད་ཅིང་། །ལྷ་དང་མི་རྣམས་དག་ལ་ཕན་བརྗོད་པར་བྱེད་པ་ཡིན།། །། །། བམ་པོ་གཉིས་པ།། །། །།

79-1-201b

རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་དགོངས་ཏེ་གསུངས་པ་རྟོགས་པར་བྱ་བ་ལ་མཁས་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་བཞིན་གཤེགས་པས་དགོངས་ཏེ་གསུངས་བའི་མདོ་སྡེ་
ཟབ་མོ་ཟབ་མོ་གང་དག་ཡིན་པ་དེ་དག་ལ་སྒྲ་ཇི་བཞིན་ཁོ་ནར་མངོན་པར་ཞེན་པར་མི་བྱེད་པ་ཡིན་ཏེ། དེ་ལ་དེ་བཞིན་གཤེགས་པས་དགོངས་ཏེ་གསུངས་པ་དེ་དག་ཀྱང་གང་ཞེ་ན། འདི་ལྟ་སྟེ། དེ་བཞིན་གཤེགས་པས་ཉན་ཐོས་
རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །ཞེས་གསུངས་པ་ནི་དེ་ལྟར་མི་བལྟའོ། །ཀུན་དགའ་བོ་ང་ནི་རོ་རྒྱབ་ནའོ་ཞེས་གསུངས་པ་ཡང་དེ་ལྟར་མི་བལྟའོ། །ང་ནི་རྒས་འཁོགས་ཏེ་གཏུགས་
པ་ཡིན་གྱིས། ངའི་བསྙེན་བཀུར་བ་ཚོལ་ཅིག་ཅེས་གསུངས་པ་ཡང་དེ་ལྟར་མི་བལྟའོ། །མཽད་གལ་གྱི་བུ་ཁྱོད་སོང་ལ་སྨན་པའི་རྒྱལ་པོ་འཚོ་བྱེད་ཀྱི་གན་ནས་སྨན་ལོང་ཤིག་དང་བཟའ་བར་བྱའོ། །ཞེས་གསུངས་པ་ཡང་
དེ་ལྟར་མི་བལྟའོ། །དེ་བཞིན་གཤེགས་པ་ནི་གཞན་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུ་དག་དང་ལྷན་ཅིག་ཏུ་ཚིགས་གིས་རྩོད་པར་བྱེད་དོ། །ཞེས་གསུངས་པ་ཡང་དེ་ལྟར་མི་བལྟའོ། །དེ་བཞིན་གཤེགས་པའི་ཞབས་
ལ་སེང་ལྡེང་གི་ཚལ་པ་ཟུག་གོ་ཞེས་གསུངས་པ་ཡང་དེ་ལྟར་མི་བལྟའོ། །སྐྱེས་བུ་དམ་པ་མ་ཡིན་པ་ལྷས་བྱིན་ནི་ཡུན་རིང་པོ་ནས་དེ་བཞིན་གཤེགས་པའི་གཤེད་མ་དང་། གཅུགས་ཅན་དང་། ཕྱིར་རྒོལ་བ་དང་། 
དགྲ་བོར་གྱུར་བ་ཡིན་ནོ། །ཞེས་གསུངས་པ་ཡང་དེ་ལྟར་མི་བལྟའོ། །དེ་བཞིན་གཤེགས་པ་ནི་བསོད་སྙོམས་ཀྱི་ཕྱིར་བྲམ་ཟེའི་གྲོངས་ལ་ཅན་དུ་ཇི་ལྟར་ལྷུང་བཟེད་བཀྲུས་པས་ཞུགས་པ་བཞིན་དུ་ཕྱིར་བྱུང་ངོ་། །
ཞེས་གསུངས་པ་ཡང་དེ་ལྟར་མི་བལྟའོ། །བྲམ་ཟེའི་བུ་མོ་དྲེགས་མས་ཤིང་གི་གཞོང་བུ་ལྟོ་བར་བཅིངས་ཏེ། དེ་བཞིན་གཤེགས་པའི་སྐུར་བ་བཏབ་པོ་ཞེས་གསུངས་པ་ཡང་དེ་ལྟར་མི་བལྟའོ། །

79-1-202a

དེ་བཞིན་གཤེགས་པ་ཉོན་མོངས་མེད་ཀྱི་ལྗོངས་སུ་དབྱར་གནས་པར་ཞལ་གྱིས་བཞེས་པ་ན་ཟླ་བ་གསུམ་དུ་རྟ་ཆས་ཀྱི་ནས་དག་གསོལ་ཏོ། །ཞེས་གསུངས་པ་ཡང་དེ་ལྟར་མི་བལྟའོ། །དེ་སྐད་ཅེས་བཀའ་
སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་ཉན་ཐོས་རྣམས་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དེ་ཇི་ལྟར་བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་ཉན་ཐོས་རྣམས་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་ལུང་བསྟན་པ་གང་ཡིན་པ་དེ་ནི་རིགས་ལས་བརྟག་ཏེ་ལུང་བསྟན་ཏོ། །གསོལ་པ་བཅོམ་ལྡན་འདས་ཉན་ཐོས་ཟག་པ་ཟད་པ། སྲིད་པར་ཀུན་དུ་སྦྱོར་བ་ཡང་དག་པར་རྒྱུན་ཆད་པ་དག་ལ་རིགས་མཆིས་སུ་
ལགས་ཀྱང་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེའི་ཕྱིར་དཔེ་ཉོན་ཅིག་རིགས་ཀྱི་བུ་འདི་ལྟ་སྟེ། 
དཔེར་ན་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཞིག་ལ་བུ་ཞིག་བདོག་པར་གྱུར་ལ་དེ་ཡང་བཟོའི་གནས་ཐམས་ཅད་སློབ་པར་བྱེད་ཅིང་དེ་དབང་པོ་རྟུལ་ལ་དབང་པོ་མི་རྣོ་བ་ཞིག་ཡིན་པས་དེ་ཕྱིས་བསླབ་པར་བྱ་བ་གང་ཡིན་པ་དེ་ནི་
སྔར་སློབ་པར་བྱེད་ལ། སྔར་བསླབ་པར་བྱ་བ་གང་ཡིན་པ་དེ་ནི་ཕྱིས་སློབ་པར་བྱེད་ན་རིགས་ཀྱི་བུ་འདི་ཇི་སྙམ་དུ་སེམས། དེ་གཞི་ངེས་རྒྱལ་པོའི་བུ་མ་ཡིན་ནོ། །ཞེས་བརྗོད་པར་བྱ་བ་ཡིན་སྙམ་འམ་
གསོལ་པ་བཅོམ་ལྡན་འདས་དེ་ནི་མ་ལགས་སོ། །བདེ་བར་གཤེགས་པ་དེ་ནི་མ་ལགས་ཏེ། དེ་ནི་རྒྱལ་པོའི་བུ་ཞེས་བགྱི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་དུ་རིགས་དང་ལྡན་པའི་བྱང་ཆུབ་

79-1-202b

སེམས་དཔའ་དབང་པོ་རྟུལ་པོ་ཡང་སྒོམ་པའི་ལམ་གྱིས་སྔར་ཉོན་མོངས་པ་རྣམས་ཟད་པར་བྱེད་ཅིང་ཕྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱེད་ན་རིགས་ཀྱི་བུ་འདི་ཇི་སྙམ་
དུ་སེམས། དེས་གཞི་དེས་མངོན་པར་རྫོགས་པར་འཚང་མི་རྒྱའོ་ཞེས་བྱ་སྙམ་འམ། གསོལ་པ། བཅོམ་ལྡན་འདས་བདག་གིས་གང་འདོད་ཆེན་པ་མ་གཏོགས་པར་མངོན་པར་རྫོགས་པར་འཚང་མི་རྒྱའོ་ཞེས་དེ་སྐད་མཆི་
བའི་སེམས་ཅན་དེ་དག་ནི་ལྷ་དང་བཅས་པ་དང་། བདུད་དང་བཅས་པ་དང་། དགེ་སྦྱོང་དང་། བྲམ་ཟེར་བཅས་པའི་སྐྱེ་དགུ་དང་། ལྷ་དང་མི་དང་། ལྷ་མ་ཡིན་དུ་བཅས་པའི་འཇིག་རྟེན་ན་ཡང་དག་པར་རྗེས་སུ་མ་མཐོང་ལགས་སོ། །
བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དཔེ་གཞན་ཡང་ཉོན་ཅིག །རིགས་ཀྱི་བུ་འདི་ཇི་སྙམ་དུ་སེམས། བྱང་ཆུབ་སེམས་དཔའ་ས་བཅུ་པ་ལ་གནས་པ་ཉོན་མོངས་པའི་སྒྲིབ་པ་ཟད་ནས་བྱང་ཆུབ་ཀྱི་སྙིང་
པོ་ལ་འཇུག་གམ། འོན་ཏེ་མ་ཟད་པས་འཇུག་སྙམ། གསོལ་པ། བཅོམ་ལྡན་འདས་བས་ནས་མཆིས་ལགས་སོ། །བདེ་བར་གཤེགས་པ་བས་ནས་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་
ཀྱི་བུ་དེ་ཇི་སྙམ་དུ་སེམས། དེ་གཞི་དེས་མངོན་པར་རྫོགས་པར་འཚང་མི་རྒྱ་སྙམ་འམ། གསོལ་པ། བཅོམ་ལྡན་འདས་མངོན་པར་རྫོགས་པར་འཚང་རྒྱ་ལགས་སོ། །བདེ་བར་གཤེགས་པ་མངོན་པར་རྫོགས་པར་འཚང་
རྒྱ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ལ་ཡང་དེ་དང་འདྲ་བར་བལྟ་བར་བྱའོ། །གསོལ་པ། བཅོམ་ལྡན་འདས་ཀུན་དགའ་བོ་ང་ནི་རོ་རྒྱབ་ནའོ་ཞེས་གསུངས་པ་དེ་ཇི་ལྟར་བལྟ་བར་བགྱི་ལགས་
བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་ཕྱི་མའི་སྐྱེ་བོ་དེ་བཞིན་གཤེགས་པའི་སྐུ་རྡོ་རྗེ་ལྟར་སྲ་བ་ཡང་སྐུ་རོ་རྒྱབ་བསྙུང་ན་གཞན་དག་ལྟ་སྨོས་ཀྱང་ཅི་དགོས་སྙམ་དུ་སེམས་པ་ལ་ཐུགས་བརྩེ་བས་དེ་སྐད་

79-1-203a

གསུངས་པ་ཡིན་ན། དེ་ལ་མི་བླུན་པོ་ཁ་ཅིག་དེ་བཞིན་གཤེགས་པའི་སྐུ་རོ་རྒྱབ་བསྙུང་ཞེའོ། །ཞེས་སྒྲ་ཇི་བཞིན་ཁོ་ནར་འཛིན་པར་བྱེད་དེ། དེ་དག་ནི་རང་ཡང་ཉམས་པར་བྱས་ལ་གཞན་
ཡང་ཉམས་པར་བྱེད་པ་ཡིན་ཏེ། དེ་བཞིན་གཤེགས་པས་དེ་ལས་དགོངས་ནས་དེ་སྐད་གསུངས་སོ། །གསོལ་པ་བཅོམ་ལྡན་འདས་ང་ནི་རྒས་འཁོགས་ཏེ་གཏུགས་པ་ཡིན་གྱིས། ངའི་བསྙེན་བཀུར་བ་ཚོལ་ཅིག་ཅེས་
གསུངས་པ་དེ་ཇི་ལྟར་བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ཡང་ངས་ཕྱི་མའི་སྐྱེ་བོ་རྣམས་ལ་ཐུགས་བརྩེ་བས་ངའི་ཉན་ཐོས་རྒས་འཁོགས་ཏེ་གཏུགས་པ་གང་དག་གི་ལུས་ལ་
བསྙེན་བཀུར་བ་དགོས་པ་དག་འབྱུང་བར་འགྱུར་བ་དེ་དག་དེ་བཞིན་གཤེགས་པས་རྗེས་སུ་མ་གནང་ངོ་། །ཞེས་འཕོངས་པར་མི་འགྱུར་བར་བྱ་བའི་ཕྱིར་དེ་སྐད་གསུངས་ཏེ། དེ་བཞིན་གཤེགས་པས་དེ་ལས་དགོངས་ནས་དེ་
སྐད་གསུངས་པ་ཡིན་ན། དེ་ལ་མི་བླུན་པོ་ཁ་ཅིག་དེ་བཞིན་གཤེགས་པ་བགྲེས་འཁོགས་ཏེ། གཏུགས་སོ་ཞེས་སྒྲ་ཇི་བཞིན་ཁོ་ནར་འཛིན་པར་བྱེད་དེ། དེ་དག་ཀྱང་རང་ཡང་ཉམས་པར་བྱས་ལ་གཞན་ཡང་
ཉམས་པར་བྱེད་པ་ཡིན་ནོ། །གསོལ་པ། བཅོམ་ལྡན་འདས་མཽད་གལ་གྱི་བུ་ཁྱོད་སོང་ལ་སྨན་པའི་རྒྱལ་པོ་འཚོ་བྱེད་ཀྱི་གན་ནས་སྨན་ལོང་ཤིག་དང་། བཟའ་བར་བྱའོ་ཞེས་གསུངས་པ་དེ་ཇི་ལྟར་བལྟ་བར་
བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ཡང་ངས་ཕྱི་མའི་སྐྱེ་བོ་རྣམས་ལ་ཐུགས་བརྩེ་བས་ངའི་ཉན་ཐོས་གང་དག་ལ་སྨན་དགོས་པ་དག་འབྱུང་བར་འགྱུར་བ་དེ་དག་
དེ་བཞིན་གཤེགས་པས་རྗེས་སུ་མ་གནང་ངོ་། །ཞེས་འཕོངས་བར་མི་འགྱུར་བར་བྱ་བའི་ཕྱིར་དེ་སྐད་གསུངས་ཏེ། དེ་བཞིན་གཤེགས་པས་དེ་ལས་དགོངས་ནས་དེ་སྐད་གསུངས་པ་ཡིན་ན། 

79-1-203b

དེ་ལ་མི་བླུན་པོ་ཁ་ཅིག་སྨན་པའི་རྒྱལ་པོ་འཚོ་བྱེད་ཀྱིས་དགེ་སློང་མཽད་གལ་གྱི་བུ་ལ་རྗེ་ས་མེད་པ་དང་། གུས་པར་སྒྲིམ་པ་མེད་པ་མ་ཡིན་པར་བསྟན་ཅིང་དྲིས་ན་ཡང་རིངས་པ་རིངས་
པ་ཁོ་ནར་བསྙུན་གྱི་གསོས་སྨན་བསྟན་པ་ལས་ན། དེ་བཞིན་གཤེགས་པ་ནི་སྐུ་ལ་བསྙུན་མངའ་བ་ཡིན་ནོ་སྙམ་པ་དང་། དེ་བཞིན་གཤེགས་པའི་སྐུ་དེ་ལ་
ཡང་ཉེས་དམིགས་དག་སྣང་སྟེ། ཆེས་མཐོང་བ་རྣམས་ལ་ཡང་དེ་ལྟ་བུའི་བག་མེད་པ་དག་འབྱུང་བར་གྱུར་ན། སོ་སོའི་སྐྱེ་བོ་དག་ལ་ལྟ་སྨོས་ཀྱང་ཅི་དགོས། ཞེས་སྒྲ་ཇི་བཞིན་
ཁོ་ནར་འཛིན་པར་བྱེད་དེ། དེ་དག་ཀྱང་རང་ཡང་ཉམས་པར་བྱས་ལ་གཞན་ཡང་ཉམས་པར་བྱེད་པ་ཡིན་ནོ། །གསོལ་པ། བཅོམ་ལྡན་འདས་དེ་བཞིན་གཤེགས་པ་ནི་གཞན་མུ་སྟེགས་ཅན་
སྤྱོད་པ་པ་དང་། ཀུན་དུ་རྒྱུ་དག་དང་ལྷན་ཅིག་ཏུ་ཚིག་གིས་རྩོད་པར་བྱེད་དོ། །ཞེས་གསུངས་པ་དེ་ཇི་ལྟར་བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ཡང་
ངས་ཕྱི་མའི་སྐྱེ་བོ། དེ་བཞིན་གཤེགས་པ་ཉིད་ལ་སྐྱེ་བོ་དགྲ་བོ་དང་། ཕྱིར་རྒོལ་བ་དག་ཡོད་ན་བདག་ཅག་ལ་ལྟ་སྨོས་ཀྱང་ཅི་དགོས། སྙམ་དུ་སེམས་པ་དག་ལ་ཐུགས་བརྩེ་
བས་དེ་སྐད་ཅེས་གསུངས་པ་དག་ཡིན་ན། དེ་ལ་མི་བླུན་པོ་དེ་དག་དེ་བཞིན་གཤེགས་པ་ལ་ཡང་དགྲ་བོ་དང་། ཕྱིར་རྒོལ་བ་དག་ཡོད་དོ། །ཞེས་སྒྲ་ཇི་བཞིན་ཁོ་ནར་འཛིན་པར་བྱེད་དེ། 
རིགས་ཀྱི་བུ་འཁོར་ལོས་བསྒྱུར་བའི་རྒྱལ་པོ་དགེ་བའི་རྩ་བ་ཆུང་ངུ་དང་ལྡན་པ་ལ་ཡང་དགྲ་བོ་དང་། ཕྱིར་རྒོལ་བ་བདག་མེད་ན་དེ་བཞིན་གཤེགས་པ་བསོད་ནམས་ཀྱི་ཆུ་བོ་ཆེན་

79-1-204a

པོ་དང་ལྡན་པ་ལ་ལྟ་སྨོས་ཀྱང་ཅི་དགོས། གསོལ་པ། བཅོམ་ལྡན་འདས་དེ་བཞིན་གཤེགས་པའི་ཞབས་ལ་སེང་ལྡེང་གི་ཚལ་པ་ཟུག་གོ། ཞེས་གསུངས་པ་དེ་ཇི་ལྟར་
བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་ནི་ལས་བདག་གིར་བྱ་བ་ཉིད་སྟོན་པར་མཛད་དེ། དེ་བཞིན་གཤེགས་པ་ཉིད་ལ་ཡང་སྔོན་
བྱས་པའི་ལས་དག་ཡོད་ན། གཞན་དག་ལ་ལྟ་སྨོས་ཀྱང་ཅི་དགོས། ཤེས་རྒྱུ་དེ་དང་རྐྱེན་དེ་དང་། གཞི་དེས་སྡིག་པའི་ལས་ལ་མི་དགའ་ཞིང་དགའ་བར་མི་འགྱུར་བའི་དོན་གྱི་དབང་དེ་གཟིགས་
པས་ན། དེ་བཞིན་གཤེགས་པ་ལས་བདག་གིར་བྱ་བ་ཉིད་སྟོན་པར་མཛད་པ་ཡིན་ན། དེ་ལ་མི་བླུན་པོ་དེ་དག་དེ་བཞིན་གཤེགས་པའི་ཞབས་ལ་སེང་ལྡེང་གི་ཚལ་པ་ཟུག་གོ། ཞེས་སྒྲ་ཇི་བཞིན་ཁོ་
ནར་འཛིན་པར་བྱེད་དོ། །གསོལ་པ། བཅོམ་ལྡན་འདས་སྐྱེས་བུ་དམ་པ་མ་ཡིན་པ་ལྷས་བྱིན་ནི་ཡུན་རིང་པོ་ནས་དེ་བཞིན་གཤེགས་པའི་གཤེད་མ་དང་། གཅུགས་ཅན་དང་། ཕྱིར་
རྒོལ་བ་དང་། དགྲ་བོར་གྱུར་བ་ཡིན་ནོ། །ཞེས་གསུངས་པ་དེ་ཇི་ལྟར་བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གལ་ཏེ་སྐྱེས་བུ་དམ་
པ་ལྷས་བྱིན་མེད་པར་གྱུར་ན། དེ་བཞིན་གཤེགས་པ་ལ་སངས་རྒྱས་ཀྱི་ཆེ་བའི་བདག་ཉིད་གཅིག་ཀྱང་ཡོད་པར་མི་མངོན་ཏེ། རིགས་ཀྱི་བུ་གང་གི་ཕྱིར་སྐྱེས་བུ་དམ་པ་ལྷས་བྱིན་གྱིས་
དེ་བཞིན་གཤེགས་པ་ལ་བརྩད་པ་དང་། བསྒྲུན་པ་དང་། ཕྱིར་བརྒལ་བ་དག་བསྟན་པ་དེའི་ཕྱིར། དེ་བཞིན་གཤེགས་པ་ལ་སངས་རྒྱས་ཀྱི་ཆེ་བའི་བདག་ཉིད་དག་ཡོད་པར་མངོན་ནོ། །

79-1-204b

རིགས་ཀྱི་བུ་རྒྱལ་པོའི་ཚིག་གིས་སྐྱེས་བུ་དམ་པ་ལྷས་བྱིན་འདིས་དེ་བཞིན་གཤེགས་པ་རྣམ་པར་གཞོམ་པར་བྱའོ། །སྙམ་ནས་གྲོང་བར་གྱི་དབུས་ནས་དེ་བཞིན་གཤེགས་པ་ལ་གླང་པོ་ཆེ་
ཆེན་པོ་ནོར་སྐྱོང་སྤད་པར་གྱུར་བ་གང་ཡིན་པ་དེ་དེ་བཞིན་གཤེགས་པས་བཏུལ་ཅིང་རྣམ་པར་བཏུལ་ནས་དུལ་བར་མཛད་དེ། སྐྱེ་བོ་ཕལ་པོ་ཆེས་དེ་མཐོང་ནས་ངོ་མཚར་དུ་འཛིན་ཅིང་རྨད་དུ་བྱུང་བར་
མཛད་ནས་དཀོན་མཆོག་གསུམ་པོ་འདི་ལྟ་སྟེ། སངས་རྒྱས་དཀོན་མཆོག་དང་། ཆོས་དཀོན་མཆོག་དང་། དགེ་འདུན་དཀོན་མཆོག་ལ་སྐྱབས་སུ་དོང་སྟེ། དེ་ཡང་སྐྱེས་བུ་དམ་
པ་ལྷས་བྱིན་གྱི་སྐྱེས་བུའི་རྩལ་ཡིན་པར་བལྟ་བར་བྱའོ། །དེ་ལ་མི་བླུན་པོ་དེ་དག་ནི་དེ་བཞིན་གཤེགས་པའི་གཤེད་མ་དང་། གཅུགས་ཅན་དང་། ཕྱིར་རྒོལ་བ་ཡིན་ནོ། །ཞེས་སྒྲ་ཇི་
བཞིན་ཁོ་ནར་འཛིན་པར་བྱེད་དོ། །དེ་བཞིན་དུ་དེ་བཞིན་གཤེགས་པ་བྱང་ཆུབ་སེམས་དཔར་གྱུར་བ་ན་ཚེ་རབས་ལྔ་བརྒྱར་སྐྱེས་བུ་དམ་པ་ལྷས་བྱིན་གྱིས་གནོད་པ་བྱས་པ་གང་ཡིན་པ་དེ་ཡང་བྱང་ཆུབ་
སེམས་དཔའི་ཡོན་ཏན་ཐམས་ཅད་བསྟན་པར་བྱ་བའི་ཕྱིར་བྱས་པ་ཡིན་ན་དེ་ལ་མི་བླུན་པོ་ཁ་ཅིག་ཀྱེ་མ་ལྷས་བྱིན་ནི་དེ་བཞིན་གཤེགས་པའི་གཤེད་མ་དང་། གཅུགས་ཅན་དང་། ཕྱིར་རྒོལ་བ་ཡིན་ནོ། །
ཞེས་སྒྲ་ཇི་བཞིན་ཁོ་ནར་འཛིན་ཏེ། དེ་དག་ནི་གཞི་དེས་ལུས་ཞིག་ནས་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་སུ་སྐྱེ་བར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་སྐྱེས་
བུ་དམ་པ་ལྷས་བྱིན་ཀྱི་ཚོགས་ཤིན་དུ་བསགས་པ། དགེ་བའི་རྩ་བ་ཤིན་དུ་བསགས་པ། རྒྱལ་བ་དུ་མ་ལ་ལྷག་པར་བྱ་བ་བྱས་པ། དགེ་བའི་རྩ་བ་བསྐྱེད་པ། ཐེག་པ་ཆེན་པོ་ལ་ཡང་དག་

79-1-205a

པར་ཞུགས་པ། བྱང་ཆུབ་ཆེན་པོ་ལ་གཞོལ་བ། བྱང་ཆུབ་ཆེན་པོ་ལ་འབབ་པ། བྱང་ཆུབ་ཆེན་པོ་ལ་བབ་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཉེ་བ་ཡིན་པས་ན་དེ་ལ་སྡང་བའི་སེམས་བསྐྱེད་པ་
དེ་དག་ནི་ལུས་ཞིག་ནས་སེམས་ཅན་དམྱལ་བ་དང་། དུད་འགྲོ་དང་ཡི་དགས་རྣམས་སུ་སྐྱེ་བར་འགྱུར་བའི་ཕྱིར་རོ། །གསོལ་པ། བཅོམ་ལྡན་འདས་དེ་བཞིན་གཤེགས་པ་གསོད་སྙོམས་ཀྱི་ཕྱིར་བྲམ་ཟེའི་གྲོང་ས་ལ་ཅན་
དུ་ཇི་ལྟར་ལྷུང་བཟེད་བཀྲུས་པས་ཞུགས་པ་བཞིན་དུ་ཕྱིར་བྱུང་ངོ་ཞེས་གསུངས་པ་དེ་ཇི་ལྟར་བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ཡང་ངས་ཕྱི་མའི་སྐྱེ་བོ་རྣམས་ལ་བལྟས་ཏེ་
དེ་ལྟ་བུ་བསྟན་ཏོ། །དེ་ཅིའི་ཕྱིར་ཞེ་ན། རིགས་ཀྱི་བུ་དེ་བཞིན་གཤེགས་པ་ལ་ལས་ཀྱི་སྒྲིབ་པ་ཅུང་ཟད་ཀྱང་མེད་པའི་ཕྱིར་ཏེ། འོན་ཀྱང་དེ་བཞིན་གཤེགས་པས་ཕྱི་མའི་སྐྱེ་བོ་རྣམས་ལ་བལྟས་ནས་དེ་ལྟ་བུ་བསྟན་ཏེ། དགེ་སློང་
བསོད་སྙོམས་པ་ཁ་ཅིག་བསོད་སྙོམས་ཀྱི་ཕྱིར་གྲོང་དང་། གྲོང་ཁྱེར་དང་། གྲོང་བརྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དག་ཏུ་ཞུགས་པའི་ཚེ་བདག་ཉིད་བསོད་ནམས་ཆུང་བས་བསོད་སྙོམས་མ་རྙེད་པ་ན། 
དེ་དག་དེའི་ཚེ་དེ་བཞིན་གཤེགས་པ་ཡིད་ལ་བྱས་ནས་འདི་སྐད་ཅེས་དེ་བཞིན་གཤེགས་པ་དགེ་བའི་རྩ་བའི་ཚོགས་ཐམས་ཅད་ཡོངས་སུ་རྫོགས་པ་དེ་ཉིད་ཀྱང་ཇི་ལྟར་ལྷུང་བཟེད་བཀྲུས་པས་ཞུགས་པ་བཞིན་དུ་ཕྱིར་བྱུང་ན། བདག་ཅག་
དགེ་བའི་རྩ་བ་ཆུང་ངུ་དང་། ལྡན་པ་རྣམས་ལྟ་སྨོས་ཀྱང་ཅི་དགོས་ཏེ། བསོད་སྙོམས་མ་རྙེད་པ་འདིས་བདག་ཅག་ཡོངས་སུ་གདུང་བར་མི་བྱའོ་ཞེས་བརྗོད་པར་འགྱུར་བའི་དོན་གྱི་དབང་འདི་གཟིགས་པས་དེ་བཞིན་གཤེགས་པ་བསོད་
སྙོམས་ཀྱི་ཕྱིར་བྲམ་ཟེའི་གྲོང་ས་ལ་ཅན་དུ་ཇི་ལྟར་ལྷུང་བཟེད་བཀྲུས་པས་ཞུགས་པ་བཞིན་དུ་ཕྱིར་བྱུང་བར་བསྟན་ཏོ། །གཞན་ཡང་བདུད་སྡིག་ཅན་གྱིས་བྲམ་ཟེ་དང་། ཁྱིམ་བདག་རྣམས་བྱིན་གྱིས་བརླབས་པས་ན་དེ་ལྟར་བསོད་སྙོམས་མི་སྟེར་ཏོ།།

79-1-205b

ཞེས་ཟེར་ན་དེ་ཡང་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བདུད་སྡིག་ཅན་གྱིས་དེ་བཞིན་གཤེགས་པའི་བསོད་སྙོམས་ཀྱི་བར་ཆད་བྱེད་པར་མི་ནུས་པའི་ཕྱིར་ཏེ། འོན་ཀྱང་དེ་བཞིན་གཤེགས་པའི་བྱིན་གྱི་བརླབས་ཀྱིས་བདུད་སྡིག་ཅན་གྱིས་བྲམ་ཟེ་དང་
ཁྱིམ་བདག་རྣམས་ཀུན་དུ་བྱིན་གྱིས་བརླབས་པ་ཡིན་གྱི། དེ་བཞིན་གཤེགས་པ་ལ་ནི་ལས་ཀྱི་སྒྲིབ་པ་ཅུང་ཟད་ཀྱང་མེད་དེ། སེམས་ཅན་དེ་དག་ཉིད་ཡོངས་སུ་སྨིན་པར་བྱ་བའི་ཕྱིར་དེ་བཞིན་གཤེགས་པས་ཐབས་ལ་མཁས་པ་དེ་ལྟ་བུ་
བསྟན་པར་མཛད་དོ། །དེ་བཞིན་གཤེགས་པས་ཞལ་ཟས་བཅད་ཅིང་ཆད་པ་དེ་ན་བདུད་དང་བདུད་ཀྱི་རིས་ཀྱི་ལྷ་དང་། ལྷའི་བུ་གཞན་དག་ཀྱང་དགེ་སྦྱོང་གཽ་ཏ་མ་དང་། ཉན་ཐོས་དག་ཡིད་མི་བདེ་བར་མི་འདུག་གམ་ཞེས་དེ་
བཞིན་གཤེགས་པ་ཉན་ཐོས་ཀྱི་དགེ་འདུན་དང་བཅས་པའི་ཐུགས་ལ་སེམས་པར་བྱེད་དེ། དེ་དག་ཉིན་མཚན་དུ་དེ་བཞིན་གཤེགས་པ་ཉན་ཐོས་ཀྱི་དགེ་འདུན་དང་བཅས་པའི་ཐུགས་ལ་སེམས་ཀྱིས་སེམས་པར་བྱེད་པ་ན་ཐུགས་ཀྱི་
གནས་གཅིག་ཙམ་ལ་ཡང་མཐོ་བ་མེད་ཅིང་དམའ་བ་མེད་ལ་སྔོན་ཇི་ལྟ་བ་བཞིན་དུ་ཕྱིས་ཀྱང་དེ་བཞིན། ཕྱིས་ཇི་ལྟ་བ་བཞིན་སྔོན་ཡང་དེ་བཞིན་ཏེ། ཡིད་མི་བདེ་བ་མེད་པར་ཡང་དག་པར་རྗེས་སུ་མཐོང་ནས་དེའི་ཚེ་ན་ལྷའི་བུ་བདུན་ཁྲི་
འདུས་པར་གྱུར་བ་དག་གིས་དེ་བཞིན་གཤེགས་པ་ལ་རབ་ཏུ་བཏུད་པ་དང་། དེ་བཞིན་གཤེགས་པས་ཀྱང་དེ་དག་ལ་ཅི་ནས་ཀྱང་དེ་དག་ཐམས་ཅད་ཆོས་རྣམས་ལ་ཆོས་ཀྱི་མིག་རྣམ་པར་དག་པར་འགྱུར་བ་དེ་ལྟ་དེ་ལྟར་ཆོས་
བཤད་དེ། དེ་ལྟར་ན་དེ་བཞིན་གཤེགས་པ་ཕྱི་མའི་སྐྱེ་བོ་ལ་གཟིགས་པ་ཡིན་གྱི། དེ་བཞིན་གཤེགས་པ་ལ་ལས་ཀྱི་སྒྲིབ་པ་ཡོད་པ་མ་ཡིན་ནོ། །གསོལ་པ། བཅོམ་ལྡན་འདས་བྲམ་ཟེའི་བུ་མོ་དྲེགས་མས་ཤིང་གི་
གཞོང་བུ་ལྟོ་བར་བཅིངས་ཏེ། དེ་བཞིན་གཤེགས་པ་ལ་སྐུར་པ་བཏབ་བོ་ཞེས་གསུངས་པ་དེ་ཇི་ལྟར་བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་ལ་ནི་ལས་ཀྱི་སྒྲིབ་

79-1-206a

པའི་ཉེས་པ་མེད་དེ། དེ་བཞིན་གཤེགས་པས་བྲམ་ཟེའི་བུ་མོ་དྲེགས་མ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དུ་འཕང་བར་ཡང་སྤྱོད་མོད་ཀྱི། དེ་བཞིན་གཤེགས་པས་ཐབས་ལ་མཁས་པས་
ལས་ཀྱི་བྱ་བ་བསྟན་ཏེ། ངའི་བསྟན་པ་འདི་ལ་རབ་ཏུ་བྱུང་བ་ལ་སྐུར་པ་བཏབ་པ་དག་འབྱུང་བར་འགྱུར་བ་དེ་དག་ཡང་དག་པ་མ་ཡིན་པའི་བསྐུར་པས་སྐུར་པར་འགྱུར་བས་དེ་དག་འགྱོད་པ་ཙམ་དུ་གྱུར་བའི་ཚེ་དེ་དག་སྐུར་པ་བཏབ་པ་ན་འདི་
སྐད་དུ་དེ་བཞིན་གཤེགས་པ་དཀར་པོའི་ཆོས་ཐམས་ཅད་དང་ལྡན་པ་དེས་ཀྱང་རེ་ཤིག་མངོན་སུམ་དུ་སྐུར་པ་བརྙེས་པར་གྱུར་ན་བདག་ཅག་གིས་ལྟ་ཅིའི་ཕྱིར་མི་རྙེད་ཅེས་ཟེར་ཞིང་དེ་དག་དེའི་ཚེ་སྐུར་པ་དེ་ཟིལ་གྱིས་མནན་ནས་ཚངས་པར་
སྤྱོད་པ་ཡོངས་སུ་དག་པ། ཡོངས་སུ་བྱང་བ་སྤྱོད་པར་འགྱུར་བ་དང་། ཉམས་པར་མི་འགྱུར་པར་བྱ་བའི་ཕྱིར་རོ། །བྲམ་ཟེའི་བུ་མོ་དྲེགས་མ་ནི་རེ་ཤིག་སྡིག་པའི་ལས་ཀུན་དུ་རྒྱས་པ་ཡིན་པས་རྨི་ལམ་ན་ཡང་དེ་བཞིན་གཤེགས་
པ་ལ་སྐུར་པ་འདེབས་པར་བྱེད་པ་ཡིན་ཏེ། ཤི་འཕོས་ནས་ཀྱང་སེམས་ཅན་དམྱལ་བར་འགྲོ་བར་འགྱུར་རོ། །རིགས་ཀྱི་བུ་གལ་ཏེ་དེ་བཞིན་གཤེགས་པ་དེ་ཀུན་དུ་སྲུང་བར་སྤྱོད་དོ་ཞེས་མཁྱེན་པར་གྱུར་ན་ནི་དེ་ཀུན་དུ་སྲུང་བར་ཡང་
མཛད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་སེམས་ཅན་འགའ་ཡང་ཡོངས་སུ་མ་བཏང་བའི་ཕྱིར་རོ། །གསོལ་པ། བཅོམ་ལྡན་འདས་དེ་བཞིན་གཤེགས་པ་ཉོན་མོངས་མེད་ཀྱི་ལྗོངས་སུ་དབྱར་གནས་པར་ཞལ་གྱིས་བཞེས་
པ་ན་ཟླ་བ་གསུམ་དུ་རྟ་ཆས་ཀྱི་ནས་དག་གསོལ་ཏོ་ཞེས་གསུངས་པ། དེ་ཇི་ལྟར་བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་བྲམ་ཟེ་དང་། ཁྱིམ་བདག་དེ་དག་དེ་བཞིན་གཤེགས་པ་སྤྱན་དྲང་བར་མི་
སེམས་པར་ཤེས་ཏེ། ཤེས་བཞིན་དུ་དེ་བཞིན་གཤེགས་པ་དེར་དབྱར་གནས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པས་ཟླ་བ་གསུམ་གྱི་བར་དུ་གང་དག་གི་ཆས་གསོལ་པའི་རྟ་ལྔ་བརྒྱ་

79-1-206b

པོ་དེ་དག་ཐམས་ཅད་ནི་བྱང་ཆུབ་སེམས་དཔའི་ཐེག་པ་པ་སྔོན་གྱི་རྒྱལ་པོ་ལ་བསྙེན་བཀུར་བྱས་པ་ཤ་སྟག་ཡིན་ཏེ། དེ་དག་སྡིག་པའི་གྲོགས་པོའི་དབང་དུ་སོང་ནས་སྡིག་པའི་ལས་བྱས་པས་དེས་དེ་དག་དུད་འགྲོའི་སྐྱེ་གནས་
སུ་སྐྱེས་ཏེ། རྟ་ལྔ་བརྒྱ་པོ་དག་གི་ནང་ན་རྟ་ཅང་ཤེས་གང་ཡིན་པ་དེ་ནི་བྱང་ཆུབ་སེམས་དཔའ་ཉི་མའི་སྙིང་པོ་ཞེས་བྱ་བ་སྨོན་ལམ་གྱི་དབང་གིས་བསམས་བཞིན་དུ་དེར་སྐྱེས་པ་ཡིན་ལ། རྟ་ལྔ་བརྒྱ་པོ་དེ་དག་ཀྱང་བྱང་ཆུབ་
སེམས་དཔའ་ཉི་མའི་སྙིང་པོ་དེ་ཉིད་ཀྱིས་བྱང་ཆུབ་ཡང་དག་པར་འཛིན་དུ་བཅུག་པ་ཡིན་པས་དེ་དེ་དག་ཡོངས་སུ་སྨིན་པར་བྱ་བའི་ཕྱིར་དེར་སྐྱེས་ཏེ་རྟ་ཅང་ཤེས་དེ་ཉིད་ཀྱི་མཐུས་རྟ་ལྔ་བརྒྱ་པོ་དེ་དག་ཐམས་ཅད་ཀྱིས་སྔོན་གྱི་ཚེ་རབས་
རྗེས་སུ་དྲན་པར་གྱུར་ཅིང་དེ་དག་གི་བྱང་ཆུབ་ཀྱི་སེམས་དེ་ཡང་མངོན་དུ་གྱུར་བའི་ཕྱིར་ཏེ། རིགས་ཀྱི་བུ་དེ་ལྟ་བས་ན་དེ་བཞིན་གཤེགས་པ་རྟ་ལྔ་བརྒྱ་པོ་དེ་དག་ལ་ཐུགས་བརྩེ་བའི་ཕྱིར་དབྱར་དེར་གནས་སོ། །དེ་ན་རྟ་ཅང་ཤེས་ཀྱི་ཆས་
ཀྱི་ནས་གང་དག་ཡིན་པ་དེ་དག་ལས་ཕྱེད་ནི་དེ་བཞིན་གཤེགས་པ་ལ་འབུལ་ལོ། །རྟ་ལྔ་བརྒྱ་པོ་དེ་དག་གི་ཆས་ཀྱི་ནས་གང་དག་ཡིན་པ་དེ་དག་ལས་ཕྱེད་ཕྱེད་ནི་དགེ་སློང་ལྔ་བརྒྱ་པོ་དག་ལ་འབུལ་ཞིང་རྟ་ཅང་ཤེས་དེས་རྟའི་སྐད་དེས་རྟ་ལྔ་
བརྒྱ་པོ་དེ་དག་སྡིག་པ་འཆགས་སུ་བཅུག་ཅིང་སངས་རྒྱས་ལ་སོགས་པ་དགེ་སློང་ལྔ་བརྒྱ་པོ་དག་ལ་ཕྱག་འཚལ་དུ་བཅུག་གོ། རིགས་ཀྱི་བུ་དེ་ནས་ཟླ་བ་གསུམ་པོ་དེ་དག་འདས་པ་དང་། རྟ་ལྔ་བརྒྱ་པོ་དེ་དག་ཤི་འཕོས་ཏེ། 
དགའ་ལྡན་གྱི་ལྷ་རྣམས་དང་བསྐལ་པ་མཉམ་པར་སྐྱེས་ནས་ལྷར་གྱུར་བ་དེ་དག་གིས་ཡང་དེ་བཞིན་གཤེགས་པ་ལ་བཀུར་བསྟི་བྱས། །བླ་མར་བྱས། རི་མོར་བྱས། མཆོད་པ་བྱས་པ་དང་། དེ་བཞིན་གཤེགས་
པས་ཀྱང་དེ་དག་ལ་ཅི་ནས་ཀྱང་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བ་དེ་ལྟ་དེ་ལྟར་ཆོས་བསྟན་ཏོ། །རྟ་ལྔ་བརྒྱ་པོ་དེ་དག་འདུལ་ཞིང་འཚོ་བར་བྱེད་པའི་རྟ་རྫི། 

79-1-207a

གང་ཡིན་པ་དེ་ཡང་དེ་བཞིན་གཤེགས་པས་རང་སངས་རྒྱས་རབ་ཏུ་སེམས་དུལ་ཞེས་བྱ་བར་འགྱུར་རོ་ཞེས་ལུང་བསྟན་ཏོ། །རིགས་ཀྱི་བུ་དེ་ལྟ་མོད་ཀྱི་འོན་ཀྱང་དེ་བཞིན་གཤེགས་པའི་ཞལ་ཟས་གང་
ཡིན་པ་དེ་ལ་ནི་མི་བསོད་པ་ཅུང་ཟད་ཀྱང་མེད་དེ། རིགས་ཀྱི་བུ་གལ་ཏེ་དེ་བཞིན་གཤེགས་པས་ཤིང་དང་། བོང་བ་དང་། གསེག་མ་དང་། གྱོ་མོ་ལ་སོགས་པ་ཡོངས་སུ་ལོངས་སྤྱད་པར་གྱུར་ན་ཡང་ཤིང་དང་། 
བོང་བ་དང་། གསེག་མ་དང་། གྱོ་མོ་ལ་སོགས་པ་དེ་དག་གི་རོ་དེ་ལྟ་བུ་དང་། རོ་བྲོ་བའི་མཆོག་གང་དག་ཡིན་པ་དེ་ལྟ་བུ་དག་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཡང་མེད་དོ། །དེ་ཅིའི་ཕྱིར་ཞེ་ན། 
འདི་ལྟར་དེ་བཞིན་གཤེགས་པས་སྐྱེས་བུ་ཆེན་པོའི་མཚན་རོ་བྲོ་བའི་མཆོག་དང་ལྡན་པ་ཞེས་བྱ་བ་བརྙེས་པའི་ཕྱིར་ཏེ། རིགས་ཀྱི་བུ་དེའི་ཕྱིར་རྣམ་གྲངས་དེས་ན་ཁྱེད་ཀྱིས་འདི་ལྟར་འདི་ལྟ་སྟེ། དེ་བཞིན་གཤེགས་པའི་
ཞལ་ཟས་ཐམས་ཅད་ནི་བསོད་པ་ཡིན་པར་རིག་པར་བྱའོ། །རིགས་ཀྱི་བུ་གཞན་ཡང་དགེ་སློང་ཀུན་དགའ་བོ་འདི་སྙམ་དུ་དེ་བཞིན་གཤེགས་པས་འཁོར་ལོས་སྒྱུར་བའི་རྒྱལ་སྲིད་སྤངས་ནས་རྟ་ཆས་ཀྱི་ནས་དག་
གསོལ་བར་མཛད་པ་ལྟ་ཞེས་སྙིང་རྗེ་བར་གྱུར་བ་དང་། དེ་བཞིན་གཤེགས་པས་དེའི་སེམས་ལ་རྣམ་པར་གཟིགས་ནས་ཀུན་དགའ་བོ་འདི་ཅིའི་རོ་ཡིན་ཤེས་སམ་ཞེས་ནས་ཀྱི་འབྲུ་ཅིག་བྱིན་པ་དང་། དེས་དེ་ཟོས་ནས་ངོ་
མཚར་དུ་འཛིན་པར་འགྱུར་ཏེ། །ང་ལ་འདི་སྐད་ཅེས་བཅོམ་ལྡན་འདས་བདག་ནི་རྒྱལ་པོའི་ཁྱིམ་དུ་སྐྱེས་ཤིང་རྒྱལ་པོའི་ཁྱིམ་དུ་ལེགས་པར་རྒྱས་པ་ལགས་ན་བདག་གིས་རོ་འདི་ལྟ་བུ་ནི་སྔོན་ཆད་མ་མྱོང་པ་ལགས་སོ་ཞེས་
ཟེར་ཏེ། དེ་བྱིན་པས་ཚེ་དང་ལྡན་པ་ཀུན་དགའ་བོ་ཟས་མི་ཟ་བར་དགའ་བ་དང་བདེ་བས་ཞག་བདུན་འདས་པར་འགྱུར་ཏོ། །རིགས་ཀྱི་བུ་དེའི་ཕྱིར་རྣམ་གྲངས་དེས་ཀྱང་ཁྱོས་ཀྱིས་འདི་ལྟར་འདི་ལྟ་སྟེ། དེ་བཞིན་གཤེགས་པ་ནི་གང་ལ་

79-1-207b

ཡང་ལས་ཀྱི་སྒྲིབ་པ་མི་མངའ་བ་ཡིན་པར་རིག་པར་བྱ་སྟེ། སེམས་ཅན་གང་དག་དགེ་སྦྱོང་དང་། བྲམ་ཟེ་ཚུལ་ཁྲིམས་དང་ལྡན་པ་དག་མགྲོན་དུ་གཉེར་ལ་ཟས་འབུལ་བར་མི་བྱེད་པ་དེ་དག་གིས་ཇི་སྐད་སྨྲས་པ་དེ་བཞིན་
བྱེད་པ་ཉིད་ཀུན་དུ་བསྟན་པར་བྱ་བའི་ཕྱིར་ལས་ཀྱི་རྒྱུད་དེ་ལྟ་བུ་དག་ཉེ་བར་སྟོན་པར་མཛད་དོ། །རིགས་ཀྱི་བུ་གང་གིས་དེ་བཞིན་གཤེགས་པ་སྤྱན་དྲངས་ལ་ཞལ་ཟས་མ་གསོལ་བ་དེ་ཡང་དེ་བཞིན་གཤེགས་པས་ལོག་
པར་ལྟུང་བར་མི་འགྱུར་བའི་ཆོས་སུ་ལུང་བསྟན་པའི་དེ་བཞིན་གཤེགས་རྣམས་ཀྱི་དེ་བཞིན་གཤེགས་པའི་ཚ་བའི་བདག་ཉིད་ཀྱི་ཁྱད་པར་ལ་ལྟོས། རིགས་ཀྱི་བུ་གཞན་ཡང་དེ་བཞིན་གཤེགས་པ་དང་ཐབས་གཅིག་
ཏུ་དབྱར་ཟླ་བ་གསུམ་གནས་པར་ཁས་བླངས་པའི་དགེ་སློང་ལྔ་བརྒྱ་པོ་གང་དག་ཡིན་པ་དེ་དག་ལས་དགེ་སློང་བཞི་བཅུ་ནི་འདོད་ཆགས་སྤྱོད་པ་དང་། སྡུག་པའི་མཚན་མ་སྤྱོད་པ་ཡིན་པས་གལ་ཏེ་དེའི་ཚེ་ན་དེ་དག་གིས་
ཟས་བསོད་པ་དག་ཟོས་པར་གྱུར་ན། འདོད་ཆགས་དང་ལྡན་པའི་རྣམ་པར་རྟོག་པ་ཤིན་དུ་ཤས་ཆེན་པོ་དག་སྐྱེ་བར་འགྱུར་བ་ཞིག་ན་དེ་དག་གིས་ཟས་ངན་པ་ཟོས་པ་དེས་འདོད་ཆགས་དང་ལྡན་པའི་རྣམ་པར་རྟོག་པ་དེ་དག་
སྲབ་མོར་གྱུར་ནས་དེ་དག་གིས་ཞག་བདུན་གྱིས་དགྲ་བཅོམ་པ་ཉིད་མངོན་དུ་བྱས་སོ། །རིགས་ཀྱི་བུ་དེ་ལྟ་བས་ན་གང་གིས་དེ་བཞིན་གཤེགས་པ་རྣམས་ཀྱིས་གསུངས་པ་ངེས་པར་རྟོགས་པ་དེས་ནི་ལེགས་པ་ཁོ་ནར་ངེས་
པར་རྟོགས་པ་ཡིན་ཏེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔས་དགོངས་ཏེ་གསུངས་པ་རྟོགས་པར་བྱ་བ་ལ་མཁས་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །བྱང་ཆུབ་
སེམས་དཔའ་སྙིང་རྗེའི་བདག །བཀྲི་དོན་གསུངས་པ་གང་ཡིན་དང་། །ངེས་དོན་གསུངས་པ་གང་ཡིན་པ། །ལེགས་པ་ཁོ་ནར་རྟོགས་པར་བྱེད། །བརྟན་པ་དགོངས་ལ་མཁས་གྱུར་པ། །ཉིང་མཚམས་སྦྱོར་བ་སྤངས་པ་རྣམས།།

79-1-208a

རྫོགས་པའི་སངས་རྒྱས་གྲགས་ལྡན་གྱིས། །གསུངས་པ་ཁོང་དུ་ཆུད་པ་ཡིན། རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་ཉན་ཐོས་དང་། རང་སངས་རྒྱས་དང་ལྡན་པའི་ཐེག་པས་ཡོངས་སུ་མྱ་ངན་ལས་
འདའ་བར་མི་འདོད་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་ནི་སེམས་ཅན་དམྱལ་བའི་སྡུག་བསྔལ་དག་གམ། དུད་འགྲོའི་སྡུག་བསྔལ་དག་གམ། ཡི་དགས་ཀྱི་སྡུག་བསྔལ་དག་གིས་ཀུན་དུ་གདུངས་
ཤིང་ཚ་བར་གྱུར་ཀྱང་ཉན་ཐོས་དང་། རང་སངས་རྒྱས་དང་ལྡན་པའི་ཐེག་པས་མྱ་ངན་ལས་འདའ་བར་འདོད་པ་མི་སྐྱེད་ཅིང་ཨེ་མའོ་ཀྱེ་མ་བདག་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་བར་གྱུར་ཅིག་
ཅེས་དོན་ཉུང་ངུར་མི་བྱེད་བྱ་བ་ཉུང་ངུར་མི་བྱེད་ཅིང་དོན་ཉུང་བ་ཉིད་དང་། བྱ་བ་ཉུང་བ་ཉིད་ལ་བརྩོན་པར་མི་བྱེད་ཀྱི། དེ་ནི་སེམས་ཅན་རྣམས་ཀྱི་དགེ་བའི་ལས་བྱ་བ་དག་ལ་གྲོགས་སུ་འགྱུར་ཞིང་སེམས་ཅན་དེ་དག་ཀྱང་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་འཇུག །ཡང་དག་པར་གཟེང་སྟོད། ཡང་དག་པར་རབ་ཏུ་དགའ་བར་བྱེད་དེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་ཉན་ཐོས་དང་། རང་སངས་
རྒྱས་དང་ལྡན་པའི་ཐེག་པས་ཡོངས་སུ་མྱ་ངན་ལས་འདའ་བར་མི་འདོད་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །སྙིང་རྗེའི་བདག་ཉིད་ཅན་དང་ནི། རི་འདྲའི་སེམས་
ཀྱིས་སྤྱོད་བྱེད་ལ། །སེམས་ཅན་དོན་ལ་མི་སྐྱོ་ཞིང་། །བྱང་ཆུབ་ལས་ནི་ཕྱིར་མི་ལྡོག །བྱང་ཆུབ་སེམས་དཔའ་སེམས་ཅན་ལ། །ཕན་པར་འདོད་པས་སྐྱོ་མི་བྱེད། །སེམས་ཅན་གཞན་ལ་ཕན་པའི་ཕྱིར། །བག་མེད་
པ་ཡང་མི་བྱེད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་

79-1-208b

དཔའ་ཆོས་གང་དག་དང་ལྡན་ན་ཐེག་པ་ཆེན་པོ་ལ་ཡང་དག་པར་ཞུགས་པའི་ཆོས་བཅུ་པོ་དག་ནི་བཅོམ་ལྡན་འདས་ཀྱིས་བཀའ་སྩལ་ལགས་ན། དོན་གང་གིས་ན་ཐེག་པ་ཆེན་པོ་འདི་ལ་ཐེག་པ་ཆེན་པོ་ཞེས་བགྱི་བ་དེ་
ནི་བཅོམ་ལྡན་འདས་ཀྱིས་བཀའ་མ་སྩལ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོ་ལ་འདི་སྐད་
ཅས་བཀའ་སྩལ་ཏོ། །རིགས་ཀྱི་བུ་དེའི་ཕྱིར་དེ་ཁྱོད་ཉིད་ལ་དྲི་ཡིས་ཁྱོད་ཀྱིས་ཇི་ལྟར་བཟོད་པ་དེ་བཞིན་དུ་ལན་ཐོབ་ཤིག །རིགས་ཀྱི་བུ་འདི་ཇི་སྙམ་དུ་སེམས། འཁོར་ལོས་སྒྱུར་བའི་རྒྱལ་པོ་དཔུང་གི་ཚོགས་
ཡན་ལག་བཞི་དང་ལྷན་ཅིག་ཏུ་ལམ་གང་ནས་འགྲོ་བའི་ལམ་དེ་ཇི་སྐད་བརྗོད་པར་བྱ་སྙམ། གསོལ་པ། བཅོམ་ལྡན་འདས་དེ་ནི་རྒྱལ་པོའི་གཤེགས་ཤུལ་ཞེས་བརྗོད་པར་བགྱི་ལགས་སོ། །ཤུལ་
པོ་ཆེ་ཞེས་བརྗོད་པར་བགྱི། ཤུལ་བདེ་བ་ཞེས་བརྗོད་པར་བགྱི། ཤུལ་བཟང་པོ་ཞེས་བརྗོད་པར་བགྱི། ཞེ་འགྲས་པ་མ་མཆིས་པའི་ཤུལ་ཞེས་བརྗོད་པར་བགྱི། འཁྲུགས་ལོང་མ་མཆིས་
པའི་ཤུལ་ཞེས་བརྗོད་པར་བགྱི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐེག་པ་གང་གིས་
གཤེགས་པའི་ཐེག་པ་དེ་ཡང་ཐེག་པ་ཆེན་པོ་ཞེས་བྱའོ། །ཐེག་པ་མཆོག་ཅེས་བྱ། །ཐེག་པ་རབ་ཅེས་བྱ། ཐེག་པ་རབ་མཆོག་ཅེས་བྱ། ཐེག་པ་ཐུ་བོ་ཞེས་བྱ། ཐེག་པ་
གཙོ་བོ་ཞེས་བྱ། ཐེག་པ་བླ་ན་མེད་པ་ཞེས་བྱ། ཐེག་པ་གོང་ན་མེད་པ་ཞེས་བྱ། ཐེག་པ་མཉམ་པ་ཞེས་བྱ། ཐེག་པ་མི་མཉམ་པ་མེད་པ་ཞེས་བྱ། ཐེག་པ་མི་མཉམ་པ་དང་མཉམ་པ་ཞེས་བྱ་སྟེ།  

79-1-209a

རིགས་ཀྱི་བུ་དེའི་ཕྱིར་ཐེག་པ་ཆེན་པོ་འདི་ལ་ཐེག་པ་ཆེན་པོ་ཞེས་བྱའོ། །གསོལ་པ། བཅོམ་ལྡན་འདས་ཐེག་པ་ཆེན་པོ་ནི་བཟང་བ་ལགས་སོ། །བདེ་བར་གཤེགས་པ་ཐེག་པ་ཆེན་པོ་འདི་ནི་
བཟང་བ་ལགས་སོ། །དེ་ནས་བདུད་སྡིག་ཅན་འདི་སྙམ་དུ་སེམས་ཏེ། དགེ་སྦྱོང་གཽ་ཏ་མ་ནི་བདག་གི་བདུད་ཀྱི་ཡུལ་ལས་ཡང་དག་པར་འདས་ཤིང་གཞན་དག་ཀྱང་ཡང་དག་པར་འདའ་བར་བྱེད་པ་ཡིན་གྱིས་
དཔུང་གི་ཚོགས་ཡན་ལག་བཞི་དང་བཅས་ཏེ། དགེ་སྦྱོང་གཽ་ཏ་མ་དེ་དང་། ཆོས་ཀྱི་རྣམ་གྲངས་དེ་ལ་མཐོ་བརྩམ་དུ་འགྲོ་བར་བྱའོ་སྙམ་མོ། །དེ་ནས་བདུད་སྡིག་ཅན་དཔུང་གི་ཚོགས་ཡན་ལག་བཞི་དང་བཅས་
པ་གོ་གྱོན་ནས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་། བྱ་རྒོད་ཀྱི་ཕུང་པོའི་རི་ག་ལ་བ་དེ་ལོགས་སུ་སོང་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་
པོས་བདུད་སྡིག་ཅན་དཔུང་གི་ཚོགས་ཡན་ལག་བཞི་དང་བཅས་པ་བཅོམ་ལྡན་འདས་ལ་མཐོ་བརྩམ་པ་དང་། ཆོས་ཀྱི་རྣམ་གྲངས་འདི་ནུབ་པར་བྱ་བའི་བསམ་པས་འོང་བར་མཐོང་ངོ་། །མཐོང་ནས་ཀྱང་རྫུ་འཕྲུལ་
མངོན་པར་འདུ་བྱ་བ་འདི་ལྟ་བུ་མངོན་པར་འདུ་བྱས་ཏེ། ཇི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་དུ་བྱས་པས་བདུད་སྡིག་ཅན་དཔུང་གི་ཚོགས་ཡན་ལགས་བཞི་དང་བཅས་པ་རྒྱལ་པོའི་ཁབ་
ཀྱི་གྲོང་ཁྱེར་ཆེན་པོར་སོང་ནས་ལམ་པོ་ཆེ་དང་། ལམ་སྲང་གི་བཞི་མདོ་དང་། སུམ་མདོ་དག་ཏུ་སྒྲ་སྒྲོགས་པར་བྱེད། དབྱངས་བརྗོད་པར་བྱེད་ཅིང་འདི་སྐད་ཅེས་རྒྱལ་པོའི་ཁབ་ཀྱི་མི་ཁྱེད་ཅག་ཤེས་པར་གྱིས་ཤིག་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ནི་བྱ་རྒོད་ཀྱི་ཕུང་པའི་རི་ལ་འཁོར་བཞི་པོ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་དང་། གཞན་

79-1-209b

མུ་སྟེགས་ཅན་རྣམས་ལ་ཚངས་པར་སྤྱོད་པ་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ་ཡོངས་སུ་དག་པ། ཡོངས་སུ་བྱང་བའི་ཆོས་སྟོན་
པར་མཛད་རབ་ཏུ་སྟོན་པར་མཛད་ཀྱིས་དེའི་ཕྱིར་ཁྱེད་ཅག་ཀྱང་དམ་པའི་ཆོས་མཉན་པའི་ཕྱིར་དེ་བཞིན་གཤེགས་པའི་སྤྱན་སྔར་དེང་ཤིག་དང་། དེས་ཁྱེད་ཅག་ལ་ཡུན་རིང་པོའི་དོན་དང་། ཕན་པ་དང་། བདེ་བར་འགྱུར་རོ། །
ཞེས་ཀྱང་རྗེས་སུ་བསྒྲགས་སོ། །དེ་ནས་རྒྱལ་པོའི་ཁབ་ཀྱི་རྒྱལ་རིགས་དང་། བྲམ་ཟེ་དང་། ཁྱིམ་བདག་དང་། གྲོང་རྡལ་གྱི་མི་དང་། ཡུལ་གྱི་མི་རྣམས་བདུད་སྡིག་ཅན་གྱིས་བསྐུལ་བ་ན་མེ་ཏོག་དང་། 
བདུག་པ་དང་། སྤོས་དང་། མེ་ཏོག་ཕྲེང་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། བ་དན་དག་ཐོགས་ཏེ། རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་ནས་བྱ་རྒོད་ཀྱི་ཕུང་
པོའི་རི་ག་ལ་བ་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ཕྱག་བྱས། བླ་མར་བྱས། རི་མོར་བྱས། མཆོད་
པ་བྱས་ནས་ཕྱོགས་གཅིག་ཏུ་འཁོད་དོ། །བདུད་སྡིག་ཅན་ཡང་དཔུང་གི་ཚོགས་ཡན་ལག་བཞི་དང་བཅས་པར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་ནས་བྱ་རྒོད་ཀྱི་ཕུང་པོའི་རི་ག་ལ་བ་དང་། 
བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། ལྷའི་མེ་ཏོག་མན་དཱ་ར་བ་དག་མངོན་པར་སྤྲུལ་ནས་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། །བཅོམ་ལྡན་འདས་
ལ་གཏོར། མངོན་པར་གཏོར། མངོན་པར་རབ་ཏུ་གཏོར་ནས་དཔུང་གི་ཚོགས་ཡན་ལག་བཞི་དང་ལྷན་ཅིག་ཏུ་ཕྱོགས་གཅིག་ཏུ་འདུག་གོ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་

79-1-210a

དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་བདུད་སྡིག་ཅན་ཕྱོགས་གཅིག་ཏུ་འདུག་པ་དེ་ལ་འདི་སྐད་ཅེས་སྨྲས་སོ། །སྡིག་ཅན་ཁྱོད་དཔུང་གི་ཚོགས་ཡན་ལག་བཞི་དང་བཅས་ཏེ་བཅོམ་ལྡན་འདས་ཀྱི་སྤྱན་
སྔར་ཅི་ལ་འོངས། བདུད་ཀྱིས་སྨྲས་པ། བཅོམ་ལྡན་འདས་ལ་མཐོ་བརྩམ་པ་དང་། ཆོས་ཀྱི་རྣམ་གྲངས་འདི་ལ་བར་ཆད་བྱ་བའི་བསམ་པས་འོངས་སོ། །བྱང་ཆུབ་སེམས་དཔའ་དགེ་བ་དྲི་མེད་རྣམ་དག་རིན་
ཆེན་ཟླ་འོད་རྒྱལ་པོས་སྨྲས་པ། སྡིག་ཅན་དེ་བཞིན་གཤེགས་པ་ལ་མཐོ་བརྩམ་པ་དང་།  ཆོས་ཀྱི་རྣམ་གྲངས་འདིའི་བར་ཆད་བྱས་པས་ཁྱོད་ལ་ཅི་བྱ། སྡིག་ཅན་ཁྱོད་ལ་དེས་ཡུན་རིང་པོར་དོན་མེད་པ་དང་། 
གནོད་པ་དང་། སྡུག་བསྔལ་བར་མི་འགྱུར་པར་ཁྱོད་ཀྱིས། །བཅོམ་ལྡན་འདས་ཀྱི་སྤྱན་སྔར་ཉེས་པ་ལ་ཉེས་པར་ཤོགས་ཤིག །དེ་ནས་བདུད་སྡིག་ཅན་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དག་
པ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོ་ལས་རྗེས་སུ་འཐུན་པའི་གདམས་ངག་རྗེས་སུ་བསྟན་པ་དེ་ཐོས་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་
ས་ལ་བཙུགས་ཏེ། བཅོམ་ལྡན་འདས་ཀྱི་ཞབས་ལ་གཏུགས་ནས་བཅོམ་ལྡན་འདས་ཀྱི་སྤྱན་སྔར་བཅོམ་ལྡན་འདས་བྱིས་པ་རྨོངས་པ། མི་གསལ་པ། མི་མཁས་པ། བདག་གི་ཆོད་མ་འཚལ་བ། 
བདག་གིས་བཅོམ་ལྡན་འདས་ལ་ཞེ་སྡང་གི་སེམས་བསྐྱེད་པ་དང་། མདོ་སྡེ་འདི་ལྟ་བུ་ལ་བར་ཆད་བགྱི་པར་འཚལ་བ། བཅོམ་ལྡན་འདས་ནོངས་པ་ལ་ནོངས་པར་བཤགས་པར་འཚལ་ལོ། །བདེ་བར་གཤེགས་
པ་ནོངས་པ་ལ་ནོངས་པར་བཤགས་པར་འཚལ་ཞིང་སླན་ཆད་ཀྱང་སྡོམ་པར་འཚལ་ལགས་ན། བཅོམ་ལྡན་འདས་ཀྱིས་བདག་གི་ནོངས་པ་ལ་ནོངས་པར་བཤགས་པ་དེ་ལེགས་པར་རྗེས་སུ་གཟུང་བར་གསོལ་

79-1-210b

ཞེས་ཉེས་པ་ལ་ཉེས་པའི་སྒོ་ནས་བཤགས་པ་དང་། བཅོམ་ལྡན་འདས་ཀྱིས་བཀའ་སྩལ་པ། སྡིག་ཅན་འདི་ལྟ་སྟེ། རིགས་ཀྱི་བུ་འམ་རིགས་ཀྱི་བུ་མོ་ཉེས་པ་བྱུང་ན་རྣམ་པར་ལྟ་བ་དང་། ཉེས་པ་ལ་ཉེས་པར་
ལྟ་བ་ན་འཆགས་པར་བྱེད། སྦྱོང་བར་བྱེད་ཅིང་ཕྱིན་ཆད་ཀྱང་སྡོམ་པར་བྱེད་ན་འཕགས་པ་ལེགས་པར་གསུངས་པའི་ཆོས་འདུལ་བ་འདི་འཕེལ་པར་འགྱུར་རོ། །དེ་ནས་བདུད་སྡིག་ཅན་སྟན་ལས་ལངས་
ཏེ། བཅོམ་ལྡན་འདས་ཀྱི་སྤྱན་སྔར་འདུག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཀྱིས་ངག་རྩུབ་པོ་ནི་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་
ཀྱི་ཐམས་ཅད་དུ་མི་དགེ་བའི་ལས་ཀྱི་ལམ་དུ་གདགས་པ་མཛད་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། སྡིག་ཅན་དེ་དེ་བཞིན་ནོ། །བདུད་ཀྱིས་གསོལ་པ། བཅོམ་ལྡན་འདས་དེ་ལྟ་ལགས་
ན་བཅོམ་ལྡན་འདས་ཆོས་ཀྱི་མངའ་བདག་ཅིའི་སླད་དུ་བདག་ལ་སྡིག་ཅན་ཞེས་བགྱི་བའི་སྒྲས་ཀུན་དུ་རྗོད་པར་མཛད་ལགས། བཅོམ་ལྡན་འདས་ཀྱིས་བཀའ་སྩལ་པ། སྡིག་ཅན་དེའི་ཕྱིར་འདི་ནི་སྐྱེས་བུ་
མཁས་པ་ལ་ལ་བཤད་པའི་དོན་དཔེས་ཀུན་ཤེས་པར་འགྱུར་བ་དག་ཡོད་པས་དཔེ་ཉོན་ཅིག །སྡིག་ཅན་འདི་ལྟ་སྟེ། །དཔེར་ན་ཚོང་དཔོན་ནམ། ཁྱིམ་བདག་ཕྱུག་པོ་ནོར་མང་བ་ལོངས་སྤྱོད་ཆེ་བ་ཞིག་ལ་བུ་
སྡུག་པ། འདོད་པ། དགའ་བ། ཡིད་དུ་འོང་བ། མཐོང་ན་མི་མཐུན་པ་མེད་པ། གཅིག་པུ་ཞིག་བདོག་པར་གྱུར་ཅིང་དེ་ཡང་དེ་དང་འབྲེལ་བའི་འཚོ་བས་འཚོ་བར་འགྱུར་ལ། དེའི་བུ་གཅིག་པ་དེ་ཡང་གདུལ་
དཀའ་བ་དང་། བཅོས་དཀའ་བ་དང་། གཡོ་སྒྱུ་ཅན་ཞིག་ཡིན་པར་གྱུར་ནས་ཚོང་དཔོན་ནམ་ཁྱིམ་བདག་དེས་བུ་གཅིག་པ་དེ་འདི་ལྟ་སྟེ། ཉེས་པ་དེ་ལས་བཟློག་པར་བྱ་བའི་ཕྱིར་ལག་པས་ཀྱང་རྡེག་པར་བྱེད། 

79-1-211a

དབྱིག་པ་དང་། ཁུ་ཚུར་དང་། རྡེག་པ་གང་ཡང་རུང་བ་དག་གིས་ཀྱང་རྡེག་པར་བྱེད་ཅིང་ངག་རྩུབ་པོ་དག་གིས་ཀྱང་སྡིགས་པར་བྱེད་ན་སྡིག་ཅན་འདི་ཇི་སྙམ་དུ་སེམས། ཚོང་དཔོན་ནམ། ཁྱིམ་བདག་དེ་བུ་
གཅིག་པ་དེ་ལ་ཁྲོ་བ་དང་། འཁྲུག་པ་དང་། སྡང་བ་དང་། རྔམ་པའི་བསམ་པས་རྡེག་པར་བྱེད་པ་ཡིན་སྙམ་འམ། །བདུད་ཀྱིས་གསོལ་པ། བཅོམ་ལྡན་འདས་དེ་ལྟ་མ་ལགས་སོ། །བདེ་བར་གཤེགས་པ་དེ་ལྟ་
མ་ལགས་ཏེ། བཅོམ་ལྡན་འདས་དེ་ནི་དེ་ལ་སྨན་པར་བགྱི་བའི་སླད་དུ་རྡེག་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྡིག་ཅན་དེ་བཞིན་དུ་དེ་བཞིན་གཤེགས་པ་སེམས་ཅན་ཐམས་ཅད་ཀྱི་བསམ་པ་དང་
བག་ལ་ཉལ་མཁྱེན་པ་ཡང་སེམས་ཅན་ངག་རྩུབ་པོས་གདུལ་བ་རྣམས་ནི་ངག་རྩུབ་པོས་འདུལ་བར་མཛད་དོ། །སེམས་ཅད་སྨ་དབབ་པས་འདུལ་བ་རྣམས་ནི་སྨ་དབབ་པས་འདུལ་བར་མཛད་དོ། །སེམས་ཅན་བསྡུ་བས་འདུལ་
བ་རྣམས་ནི་བསྡུ་བས་འདུལ་བར་མཛད་དོ། །སེམས་ཅན་གཟུགས་ཀྱིས་འདུལ་བ་རྣམས་ནི་གཟུགས་ཀྱིས་འདུལ་བར་མཛད་དོ། །སེམས་ཅན་སྒྲ་དང་། དྲི་དང་། རོ་དང་། རེག་བྱ་དང་། ཆོས་ཀྱིས་འདུལ་པ་རྣམས་ནི་སྒྲ་དང་། དྲི་དང་། རོ་དང་། རེག་བྱ་དང་། 
ཆོས་ཀྱིས་འདུལ་བར་མཛད་དོ། །དེ་ནས་བདུད་སྡིག་ཅན་དགའ་བ་དང་། མགུ་བ་དང་། ཡི་རངས་པ་དང་། མཆོག་ཏུ་ཡི་རངས་པ་དང་། རབ་ཏུ་དགའ་བ་དང་། དགའ་བ་དང་། ཡིད་བདེ་བ་སྐྱེས་ནས་ཡང་བཅོམ་ལྡན་འདས་ཀྱི་
ཞབས་ལ་མགོ་བོས་གཏུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། ལྗོངས་ཀྱི་ཕྱོགས་གང་ཡང་རུང་བ་ན་ཆོས་ཀྱི་རྣམ་
གྲངས་འདི་ཀློག་གམ། འཆད་པ་དེར་བདག་ཀྱང་ཆོས་མཉན་པ་དང་། ཆོས་ཀྱི་རྣམ་གྲངས་འདི་བསྲུང་ཞིང་བསྐྱབ་པ་དང་། སྦ་བ་དང་། ཆོས་སྨྲ་བ་དེ་ལ་ཡང་སྨན་གདགས་པའི་སླད་དུ་མཆི་བར་བགྱི་ལགས་སོ། །དེ་ལ་སྔ་ལྟས་

79-1-211b

ནི་འདི་དག་ལེགས་པར་རིག་པར་བགྱི་སྟེ། དེའི་འཁོར་ཞི་བ་དང་། གཉིད་དང་རྨུགས་པ་དང་བྲལ་བ་དང་། དེ་ལ་ཆོས་ཉན་པ་རྒྱ་ཆེན་པོ་དག་འབྱུང་བར་འགྱུར་བ་དང་། འཛིན་པ་དང་། འཆང་བ་དང་། ཀློག་པ་དང་། 
འཆང་པ་དག་གིས་དེའི་ལུས་དུབ་པར་མི་འགྱུར་བ་དང་། སེམས་ཀྱང་དུབ་པར་མི་འགྱུར་བ་དང་། ཇི་ལྟ་ཇི་ལྟར་ཆོས་ཀྱི་རྣམ་གྲངས་འདི་ཀློག་པ་དང་། སྟོན་པ་དང་། གཞན་དག་ལ་རྒྱ་ཆེར་ཡང་དག་པར་རབ་ཏུ་སྟོན་
པར་བགྱིད་པ་དེ་ལྟ་དེ་ལྟར་དེའི་སེམས་དགའ་བ་དང་། མཆོག་ཏུ་དགའ་བ་དང་། གཟེང་མཐོ་བ་ཉིད་དུ་ཡང་འགྱུར་ལགས་སོ། །དེ་ནས་གཞན་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུ་གང་དག་འཁོར་དེར་འདུས་པར་
གྱུར་བ་དེ་དག་གིས་བདུད་ཀྱིས་བཤད་པ་འདི་ཐོས་ནས་དེ་བཞིན་གཤེགས་པ་ལ་དང་བ་དང་། དགའ་བ་དང་། མཆོག་ཏུ་དགའ་བ་ཐོབ་པར་གྱུར་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་
འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱུ་གང་དང་། རྐྱེན་གང་གིས་ཆོས་ཀྱི་རྣམ་གྲངས་འདི་བཤད་པ་ལ་གཞན་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུ་འདི་དག་གིས་དགའ་བ་དང་། མཆོག་
ཏུ་དགའ་བ་ཐོབ་པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་སྔོན་བྱུང་བ་འདས་པའི་དུས་ན་རྒྱལ་པོའི་ཁབ་འདི་ཉིད་དང་བྱ་རྒོད་ཀྱི་ཕུང་པོའི་རི་འདི་ཉིད་དུ་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རབ་ཀྱི་རྩལ་གྱིས་རྣམ་པར་གནོན་པ་ཞེས་བྱ་བ་ཞིག་བྱུང་བས་ཆོས་ཀྱི་རྣམ་གྲངས་འདི་ཉིད་བཤད་དོ། །དེས་ཆོས་ཀྱི་རྣམ་གྲངས་འདི་བཤད་པ་ན་ཡང་
གཞན་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུ་མཐོ་བརྩམ་པའི་བསམ་པ་ཅན་དག་ལྷགས་ཏེ། ལྷགས་པ་དེ་དག་གིས་ཆོས་ཀྱི་རྣམ་གྲངས་འདི་ཐོས་ནས་ལེགས་སོ་ལེགས་པར་གསུངས་སོ་ཞེས་བྱ་

79-1-212a

བའི་ཚིག་ནི་བརྗོད་ཀྱི། དེ་བཞིན་གཤེགས་པ་དེ་ལ་སེམས་དང་བ་དང་། དགའ་བ་དང་། མཆོག་ཏུ་དགའ་བ་ནི་མ་ཐོབ་བོ། །དེ་དག་རྒྱུ་དེ་དང་རྐྱེན་དེས་བསྐལ་པ་དྲུག་བཅུ་རྩ་བརྒྱད་ཀྱི་བར་དུ་ལྷ་དང་། 
མི་རྣམས་སུ་སྐྱེས་པ་མ་གཏོགས་པར་ནམ་ཡང་སེམས་ཅན་དམྱལ་བ་རྣམས་དང་། དུད་འགྲོ་རྣམས་དང་། ཡི་དགས་རྣམས་སུ་མ་སྐྱེས་སོ། །དེ་དག་དེ་བཞིན་གཤེགས་པ་ལ་སེམས་དང་བ་དང་། དགའ་བ་དང་། 
མཆོག་ཏུ་དགའ་བ་མ་ཐོབ་པས་ནི་ཚེ་རབས་གཞན་དེ་དང་། དེ་དག་ཏུ་དགེ་བའི་བཤེས་གཉེན་དང་བྲལ་བར་གྱུར་ཏོ། །ཀུན་དགའ་བོ་དེའི་ཚེ་དེའི་དུས་ན་གཞན་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུར་གྱུར་བ་དེ་དག་གཞན་
དག་ཅིག་ཡིན་སྙམ་དུ་ཁྱོད་ནེམ་ནུར་དང་། ཡིད་གཉིས་དང་། ཐེ་ཚོམ་ཟ་བར་གྱུར་ན་ཀུན་དགའ་བོ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རིགས་ཀྱི་བུ་འདི་དག་ཉིད་དེའི་ཚེ་དེའི་དུས་ན་གཞན་མུ་སྟེགས་ཅན་སྤྱོད་པ་
པ་དང་། ཀུན་དུ་རྒྱུ་དེ་དག་ཏུ་གྱུར་བའི་ཕྱིར་རོ། །ཀུན་དགའ་བོ་འདི་དག་ནི་དེ་བཞིན་གཤེགས་པ་ལ་སེམས་དང་བ་སྐྱེས་ཤིང་དགའ་བ་ཡང་སྐྱེས། མཆོག་ཏུ་དགའ་བ་ཡང་སྐྱེས་པས་དེ་བཞིན་གཤེགས་པས་
འདི་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་ཡང་མཛད་དོ། །དེ་ནས་གཞན་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུ་དེ་དག་ལ་ལུང་བསྟན་པའི་མདོ་ལ་སྐྱེས་པའི་དང་བ་དང་། 
དགའ་བ་དང་། མཆོག་ཏུ་དགའ་བ་དེ་ཉིད་ཀྱིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ཆོས་ཀྱི་རྣམ་གྲངས་འདི་བཤད་པ་ན་སྲོག་ཆགས་ཁྲི་ཉིས་སྟོང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་
བྲལ་བ་རྣམ་པར་དག་གོ །།སྔོན་སེམས་མ་བསྐྱེད་པའི་སྲོག་ཆགས་ཉི་ཁྲི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་

79-1-212b

འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་གང་ཆོས་ཀྱི་རྣམ་གྲངས་འདི་འཛིན་པ་དང་། འཆང་བ་དང་། ཀློག་པ་དང་། གཞན་དག་ལ་ཡང་རྒྱ་ཆེར་ཡང་དག་པར་སྟོན་པར་བགྱིད་པ་དེ་
བསོད་ནམས་ཇི་ཙམ་ཞིག་སྐྱེད་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་སེམས་ཅན་གྱི་ཁམས་མ་ལུས་པ་ཐམས་
ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཀོད་པ་དེ་བས་ནི་རིགས་ཀྱི་བུ་འམ་རིགས་ཀྱི་བུ་མོ་གཞན་གང་ཞིག་གིས་ཆོས་ཀྱི་རྣམ་གྲངས་འདི་འཛིན་པ་དང་། འཆང་བ་དང་། ཀློག་པ་དང་། གཞན་
དག་ལ་རྒྱ་ཆེར་ཡང་དག་པར་སྟོན་པར་བྱེད་པ་དེ་བསོད་ནམས་ཆེས་གྲངས་མེད་པ་དང་ཆེས་མང་དུ་སྐྱེད་དོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་ཆོས་ཀྱི་རྣམ་གྲངས་འདི་ནི་ཐམས་ཅད་མཁྱེན་པའི་ཡེ་ཤེས་
འདྲེན་པར་བྱེད་པ་ཡིན་པའི་ཕྱིར་རོ། །ཀུན་དགའ་བོས་གསོལ་པ། བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་གང་ཞིག་ཆོས་ཀྱི་རྣམ་གྲངས་འདི་དང་། ཆོས་སྨྲ་བ་དེ་ལ་སྡང་བའི་སེམས་སྐྱེད་པར་བགྱིད་ན། 
བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་དེས་བསོད་ནམས་མ་ལགས་པ་ཇི་ཙམ་ཞིག་སྐྱེད་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་རིགས་ཀྱི་བུ་འམ། རིགས་
ཀྱི་བུ་མོ་གང་ལ་ལ་ཞིག་གིས་སེམས་ཅན་ཐམས་ཅད་ཀྱི་མིག་ཕྱུང་བར་གྱུར་བ་དེ་བས་ནི་རིགས་ཀྱི་བུ་འམ། རིགས་ཀྱི་བུ་མོ་གང་གིས་ཆོས་ཀྱི་རྣམ་གྲངས་འདི་དང་། ཆོས་སྨྲ་བ་དེ་ལ་སྡང་པའི་སེམས་སྐྱེད་པར་
བྱེད་པ་དེ་བསོད་ནམས་མ་ཡིན་པ་ཆེས་གྲངས་མེད་པ་དང་། ཆེས་མང་དུ་སྐྱེད་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་ཆོས་ཀྱི་རྣམ་གྲངས་འདི་ནི་སེམས་ཅན་ཐམས་ཅད་ཀྱི་སྣང་བར་གྱུར་བ་ཡིན་པའི་

79-1-213a

ཕྱིར་རོ། །ཀུན་དགའ་བོས་གསོལ་པ། བཅོམ་ལྡན་འདས་ཆོས་ཀྱི་རྣམ་གྲངས་འདི་ནི་མ་དད་པ་རྣམས་ཀྱི་མདུན་དུ་བརྗོད་པར་མི་བགྱི་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་སེམས་ཅན་
ཐམས་ཅད་ཀྱིས་ཆོས་ཀྱིས་ཕོངས་པར་འགྱུར་བའི་སུག་ལས་བགྱིས་ནས་ལུས་ཞིག་སྟེ། གུམ་པའི་འོག་ཏུ་སེམས་ཅན་དམྱལ་བ་རྣམས་སུ་སྐྱེ་བར་མི་འགྱུར་བར་རྗེས་སུ་བསྲུང་བར་བགྱི་འཚལ་བའི་སླད་དུའོ། །
བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཆོས་ཀྱི་རྣམ་གྲངས་འདི་ནི་དེ་དག་གི་མདུན་དུ་བརྗོད་པར་བྱ་བ་ཁོ་ན་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ནི་སྐྱེས་བུ་དམ་པ་མ་ཡིན་པ་དེ་དག་གི་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུར་འགྱུར་བ་ཡིན་པའི་ཕྱིར་རོ། །ཀུན་དགའ་བོས་གསོལ་པ། །བཅོམ་ལྡན་འདས་ཆོས་ཀྱི་རྣམ་གྲངས་འདི་འི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་
ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་ཆོས་བཅུ་པ་ཞེས་བྱ་བར་ཟུང་ཤིག །བྱང་ཆུབ་སེམས་དཔའ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་ཞུས་པ་ཞེས་བྱ་
ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཀུན་དགའ་བོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོ་དང་། དགེ་སློང་
དེ་དག་དང་། བྱང་ཆུབ་སེམས་དཔའ་དེ་དག་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་
བསྟོད་དོ། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། ཆོས་བཅུ་པའི་ལེའུ་སྟེ་དགུ་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་སུ་རེན་དྲ་བོ་དྷི་དང་

79-1-213b

ཞུས་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ། འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱིས་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཅུ་པ་སྟེ་ཀུན་ནས་སྒོའི་ལེའུ་བསྟན་པ། ། 
བམ་པོ་གཅིག་པ། རྒྱ་གར་སྐད་དུ། ཨཱརྱ་ས་མན་ཏ་མུ་ག་པ་རི་བརྟ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཀུན་ནས་སྒོའི་ལེའུ་ཞེས་བྱ་བ་ཐེག་པ་ཆེན་པོའི་མདོ། ། སངས་རྒྱས་དང་བྱང་ཆུབ་སེམས་དཔའ་
ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་བརྒྱད་བརྒྱའི་དགེ་སློང་གི་དགེ་འདུན་ཆེན་པོ་དང་། 
བྱང་ཆུབ་སེམས་དཔའ་བཞི་ཁྲི་ཉིས་སྟོང་དང་ཐབས་གཅིག་ཏུ་བཞུགས་ཏེ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་པའི་སྙིང་པོ་ཞེས་བྱ་བ་བྱང་ཆུབ་སེམས་དཔའ་དགུ་ཁྲི་ཉིས་སྟོང་
དང་ལྷན་ཅིག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཏོག་ཀུན་དུ་རྒྱས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་སྤྱོད་པ་ཡོངས་སུ་དག་པ་དང་ལྡན་པ་ནས་འཇིག་རྟེན་
གྱི་ཁམས་མི་མཇེད་འདིའི་བྱ་རྒོད་ཀྱི་ཕུང་པོའི་རི་ག་ལ་བ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བ་དེར་སོང་ངོ་། །བྱང་ཆུབ་
སེམས་དཔའ་སེམས་དཔའ་ཆེན་པོ་དྲི་མ་མེད་པའི་སྙིང་པོ་བྱང་ཆུབ་སེམས་དཔའི་ཚོགས་ཆེན་པོས་ཡོངས་སུ་བསྐོར་ཅིང་། བྱང་ཆུབ་སེམས་དཔའི་ཚོགས་ཀྱིས་མདུན་དུ་བདར་ནས་ནམ་མཁའ་ལས་
འོང་བར་བཅོམ་ལྡན་འདས་ཀྱིས་གཟིགས་སོ། །གཟིགས་ནས་ཀྱང་བཅོམ་ལྡན་འདས་འདི་སྙམ་དུ་དགོངས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་པའི་སྙིང་པོ་འདི་དེ་བཞིན་གཤེགས་

79-1-214a

པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཏོག་ཀུན་དུ་རྒྱས་པས་ཀུན་ནས་སྒོའི་ལེའུ་ཡི་ཆོས་ཀྱི་རྣམ་གྲངས་འདི་ཡང་དག་པར་ཡོངས་སུ་གཟུང་བའི་ཕྱིར་འདིར་འོང་བར་གནང་སྟེ་བཏང་
གིས། ངས་ཀྱང་བྱང་ཆུབ་སེམས་དཔའ་དག་བསྡུ་བར་བྱ་བར་ངེས་སོ་སྙམ་དུ་དགོངས་སོ། །དེ་ནས་བཅོམ་ལྡན་འདས་ཀྱིས་དགོངས་པ་དེ་ལྟ་བུ་དགོངས་ནས་དེས་འཇིག་རྟེན་གྱི་ཁམས་མཐའ་ཡས་མུ་
མེད་པ་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་འཁོད་པ་དེ་དག་འཇིག་རྟེན་གྱི་ཁམས་མི་མཇེད་འདིའི་བྱ་རྒོད་ཀྱི་ཕུང་པོའི་རི་ག་ལ་བ་དང་། བཅོམ་ལྡན་འདས་ག་ལ་བ་དེར་
ལྷགས་སོ། །ལྷགས་ནས་ཀྱང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བྱ་རྒོད་ཀྱི་ཕུང་པོའི་རི་ལ་
ནང་དུ་ཡང་དག་འཇོག་ལ་ཞུགས་པ་དེ་དག་ཐམས་ཅད་ཀྱང་འདུས་སོ། །དེ་ནས་བྱང་ཆུབ་སེམས་དཔའ་སེམས་ཆེན་པོ་དྲི་མ་མེད་པའི་སྙིང་པོ་རིན་པོ་ཆེ་སྣ་བདུན་ལས་བྱས་པའི་པད་མ་འདབ་མ་སྟོང་དང་ལྡན་པ་
ཐོགས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། པད་མ་འདབ་མ་
སྟོང་དང་ལྡན་པ་དེ་ཕུལ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་གྱི་ཁམས་སྤྱོད་པ། ཡོངས་སུ་དག་པ་དང་ལྡན་པ་ནས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་མེ་ཏོག་ཀུན་དུ་རྒྱས་པ་བཅོམ་ལྡན་འདས་ལ་སྙུན་གསོལ་ཏེ། གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། འཚོ་འམ། སྟོབས་དང་ལྡན་པར་

79-1-214b

བདེ་བ་ལ་རེག་པར་གནས་སམ། བཅོམ་ལྡན་འདས་ལ་སྙུན་མི་མངའ་འམ། གནོད་པ་ཆུང་ངམ་ཞེས་སྙུན་གསོལ་ཞིང་འདི་སྐད་ཅེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ཤཱཀྱ་ཐུབ་པ་ཀུན་ནས་སྒོའི་ལེའུ་བསམ་གྱིས་མི་ཁྱབ་པ་ལ་འཇུག་པའི་ཆོས་ཀྱི་རྣམ་གྲངས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་སྟོན་ཏམ་ཞེས་ཀྱང་གསུང་ངོ་། །དེ་ནས་
བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་པའི་སྙིང་པོས་བཅོམ་ལྡན་འདས་ལ་རྣམ་པ་དེ་དག་གསོལ་ནས་བྱང་ཆུབ་སེམས་དཔའ་དེ་དག་དང་ལྷན་ཅིག་ཏུ་འཁོར་དང་བཅས་ཏེ་ནམ་མཁའ་ལ་སྐྱིལ་མོ་
དཀྲུང་བཅས་ནས་འདུག་གོ། ཡང་དེའི་ཚེ་ན་འཇམ་དཔའ་གཞོན་ནུར་གྱུར་པ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ། དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བླ་གོས་
ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བྱང་ཆུབ་
སེམས་དཔའ་རྣམས་རྗེས་སུ་བཟུང་བའི་སླད་དུ་བཅོམ་ལྡན་འདས་དེ་བཞིན་གཤེགས་པས་ཀུན་ནས་སྒོའི་ལེའུ་བསམ་གྱིས་མི་ཁྱབ་པ་ལ་འཇུག་པའི་ཆོས་ཀྱི་རྣམ་གྲངས་ལེགས་པར་བཤད་དུ་གསོལ། 
བཅོམ་ལྡན་འདས་བདག་གིས་མངོན་པར་འཚལ་ཏེ། འདས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་དུ་སྣང་བའི་སྒྲོན་མ་ལས་ཆོས་ཀྱི་རྣམ་གྲངས་འདི་ཐོས་
ནས་ཏིང་ངེ་འཛིན་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་བཅུ་རྩ་བཞི་བསྐྱེད་པར་གྱུར། གཟུངས་སྒྲུབ་པའི་སྒོ་བྱེ་བ་ཁྲག་ཁྲིག་བརྒྱ་སྟོང་ཕྲག་བདུན་བཅུ་རྩ་བདུན་ཡང་རྟོགས་པར་གྱུར་ཏོ། །དེ་ལྟ་ལགས་

79-1-215a

པས་བཅོམ་ལྡན་འདས་ཀྱིས་ཀྱང་བྱང་ཆུབ་སེམས་དཔའ་རྣམས་རྗེས་སུ་གཟུང་བའི་སླད་དུ་ལེགས་པར་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔའ་གཞོན་
ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །དེའི་ཕྱིར་འཇམ་དཔལ་ཁྱོད་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །འཇམ་དཔལ་གཞོན་ནུར་གྱུར་པས་བཅོམ་ལྡན་འདས་དེ་བཞིན་ནོ་
ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་གཟུགས་ཏིང་
ངེ་འཛིན་དུ་རྟོགས་པར་བྱའོ། །སྒྲ་ཏིང་ངེ་འཛིན་དུ་རྟོགས་པར་བྱའོ། །དྲི་ཏིང་ངེ་འཛིན་དུ་རྟོགས་པར་བྱའོ། །རོ་ཏིང་ངེ་འཛིན་དུ་རྟོགས་པར་བྱའོ། །རེག་བྱ་ཏིང་ངེ་འཛིན་དུ་རྟོགས་པར་བྱའོ། །ཡིད་ཀྱི་ཁམས་
ཏིང་ངེ་འཛིན་དུ་རྟོགས་པར་བྱའོ། །བུད་མེད་ཏིང་ངེ་འཛིན་དུ་རྟོགས་པར་བྱའོ། །སྐྱེས་པ་ཏིང་ངེ་འཛིན་དུ་རྟོགས་པར་བྱའོ། །ཁྱེའུའི་གཟུགས་ཏིང་ངེ་འཛིན་དུ་རྟོགས་པར་བྱའོ། །བུ་མོའི་གཟུགས་ཏིང་ངེ་
འཛིན་དུ་རྟོགས་པར་བྱའོ། །ལྷའི་གཟུགས་ཏིང་ངེ་འཛིན་དུ་རྟོགས་པར་བྱའོ། །ཀླུའི་གཟུགས་ཏིང་ངེ་འཛིན་དུ་རྟོགས་པར་བྱའོ། །གནོད་སྦྱིན་གྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །དྲི་ཟའི་
གཟུགས་ཏིང་ངེ་འཛིན་དུ་རྟོགས་པར་བྱའོ། །ལྷ་མ་ཡིན་གྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །ནམ་མཁའ་ལྡིང་གི་གཟུགས་ཏིང་ངེ་འཛིན་དུ་རྟོགས་པར་བྱའོ། །མི་འམ་ཅིའི་གཟུགས་ཏིང་ངེ་
འཛིན་དུ་རྟོགས་པར་བྱའོ། །ལྟོ་འཕྱེ་ཆེན་པོའི་གཟུགས་ཏིང་ངེ་འཛིན་དུ་རྟོགས་པར་བྱའོ། །སེམས་ཅན་དམྱལ་བའི་གཟུགས་ཏིང་ངེ་འཛིན་དུ་རྟོགས་པར་བྱའོ། །དུད་འགྲོའི་སྐྱེ་གནས་ཀྱི་གཟུགས་

79-1-215b

ཏིང་ངེ་འཛིན་དུ་རྟོགས་པར་བྱའོ། །གཤིན་རྗེའི་འཇིག་རྟེན་གྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །འདོད་ཆགས་ཏིང་ངེ་འཛིན་དུ་རྟོགས་པར་བྱའོ། །ཞེ་སྡང་ཏིང་ངེ་འཛིན་དུ་རྟོགས་པར་བྱའོ། །
གཏི་མུག་ཏིང་ངེ་འཛིན་དུ་རྟོགས་པར་བྱའོ། །དགེ་བ་ཐམས་ཅད་ཏིང་ངེ་འཛིན་དུ་རྟོགས་པར་བྱའོ། །མི་དགེ་བ་ཐམས་ཅད་ཏིང་ངེ་འཛིན་དུ་རྟོགས་པར་བྱའོ། །འདུས་བྱས་ཐམས་ཅད་ཏིང་ངེ་འཛིན་དུ་རྟོགས་པར་
བྱའོ། །འདུས་མ་བྱས་ཐམས་ཅད་ཏིང་ངེ་འཛིན་དུ་རྟོགས་པར་བྱའོ། །དེ་ལྟར་ཆོས་ཐམས་ཅད་ཏིང་ངེ་འཛིན་དུ་རྟོགས་པར་བྱ་སྟེ། འཇམ་དཔལ་དེ་ལྟ་བུའི་ཏིང་ངེ་འཛིན་ཐམས་ཅད་དང་ལྡན་པའི་བྱང་ཆུབ་
སེམས་དཔའ་སེམས་དཔའ་ཆེན་པོ་ནི་ཐམས་ཅད་དུ་འགྲོ་བའི་བློ་དང་ལྡན་པ་ཡིན་ལ་ཀུན་ནས་སྒོའི་ལེའུའི་ཆོས་ཀྱི་རྣམ་གྲངས་འདི་ཉིད་ལ་ཡང་བསླབས་པ་ཡིན་ནོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་
དཔས་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། གཟུགས་ནི་དབུ་བ་ལྟ་བུར་གསུངས། དེ་ལ་སྙིང་པོ་མི་རྙེད་དོ། །སྙིང་པོ་མེད་ཕྱིར་གཟུང་མེད་ཕྱིར། །དེས་ན་ཏིང་ངེ་འཛིན་ཅེས་བསྟན། །འཇམ་དཔལ་དེ་ལྟར་
ན་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་སྒྲ་ཏིང་ངེ་འཛིན་དུ་རྟོགས་པར་བྱ་ཞེ་ན། སྒྲ་ནི་བྲག་ཆ་ལྟ་བུ་སྟེ། དེ་ལ་དངོས་པོ་ཡོད་མ་ཡིན། །ཐ་དད་དབྱེ་བ་
མེད་ཤེས་ཤིང་། །མཚན་ཉིད་མེད་པར་བྱེ་བྲག་མེད། །མཚན་ཉིད་མེད་ཅིང་བྱུང་བ་མེད། །ཡ་མ་རླ་དང་འདུས་མ་བྱས། །བྲག་ཆ་ལྟ་བུར་ཤེས་པ་ན། །དེས་ན་ཏིང་ངེ་འཛིན་ཅེས་བསྟན། འཇམ་དཔལ་དེ་ལྟར་ན་སྒྲ་
ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་དྲི་ཏིང་ངེ་འཛིན་དུ་རྟོགས་པར་བྱ་ཞེ་ན། ཇི་ལྟར་རྒྱ་མཚོའི་གཏིང་དག་ནི། །ནམ་ཡང་ཅིས་ཀྱང་གང་མེད་ལྟར། །བསྐལ་པ་བྱེ་

79-1-216a

བར་བསྣམ་བྱས་ཀྱང་། །སྣ་ནི་ཚིམ་པར་འགྱུར་བ་མེད། །སྣ་ཡི་རྣམ་རིག་གཟུང་མེད་དེ། །སླུ་བའི་ཆོས་དེ་ཡོད་མ་ཡིན། །གལ་ཏེ་ཡང་དག་ཡིན་གྱུར་ན། །དེ་ལས་མྱུར་དུ་ཚིམ་པར་འགྱུར། །གཟུང་བ་
མེད་ཅིང་ཡང་དག་མིན། །སྣ་ཡང་ཡོད་མིན་གསོག་ཏུ་ཤེས། །གསོབ་དང་སྟོང་པར་ཤེས་པས་ན། །དེས་ན་ཏིང་ངེ་འཛིན་ཅེས་བསྟན། །འཇམ་དཔལ་དེ་ལྟར་ན་དྲི་ཏིང་ངེ་འཛིན་དུ་རྟོགས་པར་བྱའོ། །འཇམ་
དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་རོ་ཏིང་ངེ་འཛིན་དུ་རྟོགས་པར་བྱ་ཞེ་ན། ལྕེ་ནི་ཚྭ་དང་ཁ་བའང་མིན། །སྐྱུར་དང་ལན་ཚྭ་འང་མ་ཡིན་ཏེ། །ཅི་འདྲའི་རྐྱེན་དག་ལྡན་པ་ལས། །ལྕེ་ཡང་དེ་དང་འདྲ་བར་འགྱུར། །
རོ་འདི་རྒྱུ་ལས་བྱུང་བ་དང་། །རྐྱེན་ལས་རག་ལས་ཤེས་གྱུར་ཅིང་། །བསམ་གྱིས་མི་ཁྱབ་ཤེས་པས་ན། །དེས་ན་ཏིང་ངེ་འཛིན་ཅེས་བསྟན། །འཇམ་དཔལ་དེ་ལྟར་ན་རོ་ཏིང་ངེ་འཛིན་དུ་རྟོགས་པར་བྱའོ། །འཇམ་
དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་རེག་བྱ་ཏིང་ངེ་འཛིན་དུ་རྟོགས་པར་བྱ་ཞེ་ན། རྣམ་རིག་ལས་བྱུང་རེག་བྱ་ནི། །ངོ་བོ་ཉིད་ཀྱིས་ཡོད་མ་ཡིན། །འཇམ་པ་དང་ནི་རྩུབ་པ་ཉིད། །རྐྱེན་རྣམས་ལས་ནི་བྱུང་
བ་ཡིན། །རེག་བྱ་གནས་པ་མེད་པ་སྟེ། །བདག་མེད་ཉེ་བར་གནས་པ་ཡིན། །ཚོགས་རྣམས་སྦྱོར་བར་ཤེས་པས་ན། །དེས་ན་ཏིང་ངེ་འཛིན་ཅེས་བསྟན། །འཇམ་དཔལ་དེ་ལྟར་ན་རེག་བྱ་ཏིང་ངེ་འཛིན་དུ་རྟོགས་
པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་ཡིད་ཀྱི་ཁམས་ཏིང་ངེ་འཛིན་དུ་རྟོགས་པར་བྱ་ཞེ་ན། གང་དག་སྟོང་གསུམ་སེམས་ཅན་རྣམས། །དེ་དག་གནས་གཅིག་གནས་གྱུར་ཏེ། །ཡིད་
ཁམས་རྣམ་པར་ཤེས་བྱེད་ཀྱང་། །དེ་ཡི་དངོས་པོ་རྙེད་མི་འགྱུར། །བསགས་པ་དང་ནི་གོང་བུ་ཡང་། །རྣམ་པར་རིག་ལ་གནས་པ་མེད། །ཁ་དོག་སྣ་ཚོགས་རྣམས་སྟོན་ཀྱང་། །ཕྱི་དང་ནང་ན་གནས་མ་ཡིན།།

79-1-216b

གནས་པ་མེད་ཅིང་གནས་ཀྱང་མེད། །སྒྱུ་མ་ལྟ་བུར་དངོས་པོ་མེད། །མེད་ཅིང་ཡ་མ་རླར་ཤེས་པས། །དེས་ན་ཏིང་ངེ་འཛིན་ཅེས་བསྟན། །འཇམ་དཔལ་དེ་ལྟར་ན་ཡིད་ཀྱི་ཁམས་ཏིང་ངེ་འཛིན་དུ་རྟོགས་པར་བྱའོ། །
འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་བུད་མེད་ཀྱི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། འབྱུང་བ་ཆེན་པོ་བཞི་པོ་དག །དེ་ལ་བུད་མེད་ཡོད་མིན་ཡང་། །བྱིས་པ་རྣམས་ནི་རྨོངས་པའི་བློས། །འདོད་
པའི་གསོག་ལ་སྤྱོད་པར་བྱེད། །སྒྱུ་མའི་བུད་མེད་མཚན་མེད་ཀྱང་། །བུད་མེད་གཟུགས་སུ་སྣང་བ་ལགས། །གང་དག་མུན་པས་བསྒྲིབས་པའི་མི། །དེ་ལ་ཀུན་དུ་ཆགས་པ་སྐྱེད། །ཇི་ལྟར་སྒྱུ་མའི་བུད་མེད་ལ། །འདོད་
ཆགས་ལྡན་པའི་སེམས་བསྐྱེད་ཀྱང་། །དེ་ལ་བུད་མེད་ཡོད་མ་ཡིན། །ཕྱིན་ཅི་ལོག་གི་སེམས་ཀྱིས་ནི། །བསྐལ་པ་བྱེ་བ་གྲངས་མེད་དུ། །བློ་གྲོས་ཆུང་རྣམས་འཁོར་བར་བྱེད། །དེ་ནས་དངོས་པོ་མེད་ཤེས་ན། །བུད་མེད་
ཐམས་ཅད་མཚན་ཉིད་མེད། །ཏིང་འཛིན་ཞི་བ་རྗོད་པ་ནི། །བུད་མེད་གཟུགས་ཀྱིས་རབ་ཏུ་བསྟན། །འཇམ་དཔལ་དེ་ལྟར་ན་བུད་མེད་ཀྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་
སེམས་དཔས་སྐྱེས་པའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། འདི་ནི་བུད་མེད་བདག་སྐྱེས་པར། །ཇི་ལྟར་སྐྱེས་པས་བརྗོད་པ་ལས། །དེ་ཡི་ཚེ་ན་དེ་ཡི་སེམས། །འདོད་ཆགས་ལྡན་པ་བརྫུན་པ་འབྱུང་། །སེམས་
ནི་གཟུགས་མེད་གཟུང་བ་མེད། །བུད་མེད་སྐྱེས་པར་བསྟན་པ་མེད། །ཀུན་དུ་རྟོག་པས་སྒྲོ་བཏགས་ནས། །སྐྱེས་པའི་འདུ་ཤེས་འབྱུང་བར་འགྱུར། །འདི་ནི་བུད་མེད་བདག་དཔའ་ཞེས། །འདུ་ཤེས་གང་གིས་
རྣམ་བརྟགས་པ། །དེ་ངས་སྨིག་རྒྱུ་འདྲར་གསུངས་ཏེ། །དེ་ལ་སྐྱེས་པ་ཡོད་མ་ཡིན། །སྐྱེས་པ་ཉིད་ནི་བརྫུན་པས་ན། །དེ་ནི་མེད་ལས་བྱུང་བ་ཡིན། །ཏིང་འཛིན་ཞི་བ་བརྗོད་པ་ནི། །དཔའ་བོའི་གཟུགས་ཀྱིས་

79-1-217a

རབ་ཏུ་བསྟན། །འཇམ་དཔལ་དེ་ལྟར་ན་སྐྱེས་པའི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་ཁྱེའུའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། 
ལྗོན་པའི་མྱུ་གུ་ཡོད་མིན་ན། །མེ་ཏོག་འབྱུང་བར་ག་ལ་འགྱུར། །མེ་ཏོག་ཡོད་པ་མ་ཡིན་ན། །འབྲས་བུ་འཐོབ་པའང་མེད་པ་ལྟར། །བུད་མེད་ཡོད་པ་མ་ཡིན་པས། །ཁྱེའུ་ཡང་དམིགས་པར་མི་འགྱུར་ཏེ། །བརྟགས་
པའི་དབང་དུ་སོང་རྣམས་ཀྱིས། ཁྱེའུ་ཞེས་བྱ་བར་བཏགས་པ་ཡིན། །བུད་མེད་སྐྱེ་བ་མེད་ཤེས་ན། །ཁྱེའུ་ཡང་འབྱུང་བ་ཡོད་མིན་ཏེ། །དངོས་པོ་ཐམས་ཅད་མེད་རྟོགས་པས། །དེས་ན་ཁྱེའུ་ནི་ཏིང་འཛིན་བསྟན། །
འཇམ་དཔལ་དེ་ལྟར་ན་ཁྱེའུ་ཡི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་བུ་མོའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། ཇི་ལྟར་ཏ་ལའི་མགོ་བཅད་པ། །
དེ་ནི་ནམ་ཡང་མི་སྐྱེ་སྟེ། །མཁས་པས་ཤེས་ནས་དེ་ལ་ནི། །འབྲས་བུ་ཐོབ་པར་འདོད་པ་མེད། །དེ་བཞིན་མཁས་པས་བུད་མེད་ཀྱང་། །རྣམ་ཀུན་སྐྱེ་བ་མེད་ཤེས་པས། །བརྟན་པ་བུ་མོ་སྐྱེས་སོ་ཞེས། །ཕྱིན་
ཅད་རྟོག་པར་མི་བྱེད་དོ། །ས་བོན་སྐམས་པར་གྱུར་པ་ལ། །རྣམ་ཀུན་སྐྱེ་བ་མེད་ཤེས་པས། །ཏིང་འཛིན་ཞི་བ་བརྗོད་པ་ནི། །བུ་མོའི་གཟུགས་ཀྱིས་རབ་ཏུ་བསྟན། །འཇམ་དཔལ་དེ་ལྟར་ན་བུ་མོའི་གཟུགས་
ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་ལྷའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། རྣམ་རྟོག་དགེ་ལས་བྱུང་བ་ཡི། །ལས་དགེའི་འབྲས་བུ་ལྷ་རྣམས་ཏེ། 
རབ་ཏུ་དང་བའི་ཡིད་ཀྱིས་ནི། །མཛེས་པའི་ལྷ་རྣམས་མངོན་པར་གྲུབ། །གཞལ་མེད་ཁང་པ་ཉམ་དགའ་བ། །དེ་དག་གཞན་སུས་བྱས་པ་མིན། །མེ་ཏོག་མན་དཱ་ར་བ་ཡང་། །དེ་དག་གཞན་སུས་བསྐྱེད་པ་མིན། །

79-1-217b

སྒྱུ་མའི་ལས་ལས་ཀུན་བྱུང་བས། །བྱུང་བ་རྣམས་ཀྱང་བསམ་དུ་མེད། །བཟང་པོར་སྣང་བའི་བཻ་དཱུ་རྱ། །ལོག་པས་གྲུབ་པ་རྣམས་ཀྱང་རྫུན། །ཡང་དག་མིན་པས་ཀུན་བསྐྱེད་པས། །ལྷ་རྣམས་བརྫུན་
པར་ཤེས་པས་ན། །ཏིང་འཛིན་ཞི་བ་བརྗོད་པ་ནི། །ལྷ་ཡི་གཟུགས་ཀྱིས་བསྟན་པ་ཡིན། །འཇམ་དཔལ་དེ་ལྟར་ན་ལྷའི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་
སེམས་དཔས་ཀླུའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། མི་བཟོད་བསྐྱེད་པ་བྱས་ནས་ནི། །ཡོད་མིན་སྤྲིན་གྱི་གཟུགས་བསྟན་ཅིང་། །ཆར་པའི་རྒྱུན་དག་རབ་འབེབས་པ། །དེ་དག་ནང་ན་མི་གནས་
ཀྱང་། །འཛམ་བུའི་གླིང་འདིར་རྒྱ་མཚོ་དང་། །ཀླུང་དང་དུག་ཅན་ཡོངས་སུ་འགེངས། །སྔོན་གྱི་མཐའ་འམ་ཕྱི་མའི་མཐར། །ཆུ་ནི་འབྱུང་བ་ཡོད་མ་ཡིན། །དེ་དང་མཚུངས་པའི་སེམས་ཅན་ཀུན། །རྩོམ་པ་སྣ་ཚོགས་
བསླབས་པ་རྣམས། །ལས་རྣམས་སྣ་ཚོགས་སྟོན་བྱེད་ཀྱང་། །ལས་དེ་འབྱུང་བ་ཡོད་མ་ཡིན། །མཁས་པས་བྱིས་པ་རྨོངས་བྱེད་པའི། །སྒྱུ་འདི་མ་བྱུང་ཤེས་པས་ན། །བདེན་པ་མ་ཡིན་བདེན་སྣང་བས། །
ཀླུ་ནི་ཏིང་ངེ་འཛིན་དུ་བསྟན། །འཇམ་དཔལ་དེ་ལྟར་ན་ཀླུའི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་གནོད་སྦྱིན་གྱི་གཟུགས་ཏིང་ངེ་འཛིན་དུ་རྟོགས་པར་
བྱ་ཞེ་ན། སེམས་ནི་རྣམ་པར་གྱུར་པ་ལས། །འཇིགས་པའི་གཟུགས་ནི་མངོན་གྲུབ་པ། །ལུས་ཀྱི་བོང་ཚོད་ཆེ་བ་ཡང་། །སེམས་གཅིག་གིས་ནི་ཀུན་དུ་བསྐྱེད། །སེམས་ལ་འཇིགས་པ་ཡོད་མིན་ཏེ། །ཚོགས་
པ་དག་ལས་འཇིགས་པ་སྐྱེ། །ཡོད་པ་མིན་པའི་ལས་རྣམས་ལས། །མི་སྡུག་རྣམ་པ་བསམ་ཡས་ལྟོས། །མི་སྡུག་རྣམ་པ་བསམ་ཡས་པ། ཤིན་ཏུ་སྟོང་པར་ཤེས་པས་ན། །ཏིང་འཛིན་ཞི་བ་བརྗོད་པ་ནི། །

79-1-218a

གནོད་སྦྱིན་གཟུགས་ཀྱིས་བསྟན་པ་ཡིན། །འཇམ་དཔལ་དེ་ལྟར་ན་གནོད་སྦྱིན་གྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་དྲི་ཟའི་
གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། ཆོས་དེ་ཤིན་དུ་འགྲོ་མེད་ཀྱང་། །འགྲོ་བའི་སྒྲར་ནི་བརྗོད་པས་ན། །འགྲོ་བས་འགྲོ་བ་མེད་ཤེས་པས། །དྲི་ཟས་ཏིང་འཛིན་བསྟན་པ་ཡིན། །འཇམ་དཔལ་དེ་ལྟར་
ན་དྲི་ཟའི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་ལྷ་མ་ཡིན་གྱི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། ཨ་ཡི་རྒྱས་བཏབ་ལྷ་མིན་ཏེ། །སྐྱེ་བ་
མེད་ལས་ཡང་དག་བྱུང་། །འགག་མེད་འབྱུང་བ་ཡོད་མིན་པས། །ལྷ་མ་ཡིན་གྱི་ཏིང་འཛིན་བསྟན། །འཇམ་དཔལ་དེ་ལྟར་ན་ལྷ་མ་ཡིན་གྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་
ལྟར་ན་བྱང་ཆུབ་སེམས་དཔས་ནམ་མཁའ་ལྡིང་གི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། འཛིན་པ་མེད་ལ་འཛིན་བྱས་ནས། །བརྗོད་པས་མིང་དུ་བཏགས་པས་ན། །མིང་དང་གཟུགས་ནི་ཡོད་མིན་པས། །
ནམ་མཁའ་ལྡིང་གིས་ཏིང་འཛིན་བསྟན། །འཇམ་དཔལ་དེ་ལྟར་ན་ནམ་མཁའ་ལྡིང་གི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་མི་འམ་ཅིའི་གཟུགས་ཏིང་
ངེ་འཛིན་དུ་རྟོགས་པར་བྱ་ཞེ་ན། བྱས་མིན་བྱས་པའི་ལས་རྣམས་ཀྱིས། །མི་འམ་ཅི་ཉིད་ཀུན་དུ་བསྐྱེད། །འདི་དག་སྐྱེ་བ་མེད་ཤེས་པས། །མི་འམ་ཅི་ཡིས་ཏིང་འཛིན་བསྟན། །འཇམ་དཔལ་དེ་ལྟར་ན་མི་འམ་
ཅིའི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་ལྟོ་འཕྱེ་ཆེན་པོའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། མིང་གང་གིས་ནི་ཆོས་འདི་དག །

79-1-218b

འཇིག་རྟེན་དག་ཏུ་སྣ་ཚོགས་བཞག །ཆོས་དེ་འདི་ལ་ཡོད་མ་ཡིན། །མེད་ལས་ཐམས་ཅད་ཀུན་དུ་བརྟགས། །ཀུན་དུ་བརྟགས་པར་ཀུན་ཤེས་ན། །ངོ་བོ་ཉིད་ཀྱིས་ཀུན་རྟོག་མེད། །ཏིང་འཛིན་ཞི་བ་བརྗོད་པ་
ནི། །ལྟོ་འཕྱེ་ཆེན་པོའི་གཟུགས་ཀྱིས་བསྟན། །འཇམ་དཔལ་དེ་ལྟར་ན་ལྟོ་ཕྱེ་ཆེན་པོའི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་སེམས་ཅན་དམྱལ་བའི་
གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། རྡུལ་དང་བྲལ་ཞིང་རྡུལ་མེད་གསོག །དེ་ལ་བྱེད་པོ་འགའ་ཡང་མེད། །རང་གི་རྟོག་པས་ཀུན་བསྐྱེད་དེ། །རྟོག་པ་དེ་ཡང་ཡོད་མ་ཡིན། །དམྱལ་བ་དྲི་མེད་དྲི་བྲལ་
ཞིང་། །དག་དང་ཡང་དག་འོད་གསལ་དང་། །མཚན་ཉིད་མེད་ཅིང་མཚན་མེད་པར། །བྱང་ཆུབ་སྙིང་པོར་ངས་ཤེས་ཏེ། །མཚན་ཉིད་མེད་ཅིང་བྱུང་མེད་དེ། །ནམ་མཁའ་འདྲ་བར་ཤེས་པས་ན། །ཏིང་འཛིན་ཞི་བ་བརྗོད་པ་ནི། །
སེམས་ཅན་དམྱལ་བའི་གཟུགས་ཀྱིས་བསྟན། །འཇམ་དཔལ་དེ་ལྟར་ན་སེམས་ཅན་དམྱལ་བའི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་དུད་འགྲོའི་སྐྱེ་གནས་ཀྱི་
གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། དཔེར་ན་ཇི་ལྟར་སྤྲིན་གྱི་གཟུགས། །ཁ་དོག་སྣ་ཚོགས་བྱུང་བ་དག །དེ་ལ་ཁ་དོག་ཡོད་མིན་ཡང་། །མི་མཁས་པ་དག་རྨོངས་པར་བྱེད། །དེ་བཞིན་སེམས་ཀྱང་མེད་པའི་ཕྱིར། །
སྤྲིན་གྱི་གཟུགས་དང་མཚུངས་འདྲ་ཡང་། །དུད་འགྲོའི་སྐྱེ་གནས་རྣམས་སུ་ནི། །རྣམ་པ་སྣ་ཚོགས་ལུས་ཀྱང་སྟོན། ལས་ནི་སྒྱུ་མའི་རང་བཞིན་དང་། །བྱུང་མེད་མཚན་ཉིད་མེད་པར་ཤེས། །ཏིང་འཛིན་ཞི་བ་བརྗོད་པ་ནི། །དུད་
འགྲོའི་གཟུགས་ཀྱིས་བསྙན་པ་ཡིན། །འཇམ་དཔལ་དེ་ལྟར་ན་དུད་འགྲོའི་སྐྱེ་གནས་ཀྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་གཤིན་རྗེའི་འཇིག་རྟེན་

79-1-219a

གྱི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། ནག་པོ་དང་ནི་དཀར་པོ་ཡི། །སྡིག་དང་ཁ་ན་མ་ཐོ་དང་། །ཁ་ན་མ་ཐོ་མེད་པའི་ལས། །རབ་འབྲིང་ཐ་མ་འདྲེས་བྱས་པས། །གཤིན་རྗེའི་འཇིག་རྟེན་སྡུག་བསྔལ་
ཞིང་། །ཚོལ་བར་ཀུན་དུ་འཁོར་བ་ཡིན། །དེ་ལ་གཤིན་རྗེའི་འཇིག་རྟེན་མེད། །དེ་ནི་ངོ་བོ་ཉིད་ཀྱིས་སྟོང་། །རྨི་ལམ་ན་ནི་མྱོང་བ་བཞིན། །འཇུག་པ་མེད་ཅིང་གྲུབ་པ་མེད། །གཤིན་རྗེའི་འཇིག་རྟེན་ཡོད་མིན་པས། །དེས་ན་ཏིང་
ངེ་འཛིན་དུ་བསྟན། །འཇམ་དཔལ་དེ་ལྟར་ན་གཤིན་རྗེའི་འཇིག་རྟེན་གྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་འདོད་ཆགས་ཏིང་ངེ་འཛིན་དུ་རྟོགས་པར་བྱ་ཞེ་ན། 
ཡོངས་སུ་རྟོག་ལས་འདོད་ཆགས་འབྱུང་། །རྟོག་པ་དེ་ཡང་འབྱུང་བ་མེད། །འབྱུང་བ་མེད་ལ་གནས་པ་མེད། །དེ་ཡི་གནས་ཀྱང་རྙེད་མི་འགྱུར། །གནས་མེད་གནས་པ་ཡོད་མིན་པས། །འདོད་ཆགས་ནམ་མཁའ་འདྲ་བ་ཡིན། །
བྱིས་པ་བསླད་པར་གྱུར་རྣམས་ཀྱིས། །ཀུན་ནས་ཉོན་མོངས་ཡོངས་སུ་བརྟགས། །ཀུན་ནས་ཉོན་མོངས་མེད་ཆོས་དེ། །འདོད་ཆགས་ཞེས་བྱའི་མིང་གིས་བརྗོད། །ཕྱོགས་བཅུ་དག་ཏུ་བཙལ་བྱས་ཀྱང་། །དེ་ཡི་དངོས་པོ་རྙེད་མི་འགྱུར། །འདོད་ཆགས་དངོས་པོ་
མེད་པ་ལ། །བྱིས་པ་རྨོངས་པ་འཇིགས་བྱེད་དེ། །འཇིགས་མེད་འཇིགས་པའི་འདུ་ཤེས་ཅན། །དེ་དག་ལ་ནི་བདེ་བ་མེད། །ཇི་ལྟར་སྐྱེས་བུ་ལ་ལ་དག །མཁའ་ལ་འཇིགས་པར་འདུ་ཤེས་ནས། །སྐྲག་ཅིང་བདག་གིས་
ནམ་མཁའ་ནི། །མི་མཐོང་བྱ་ཞེས་འབྲོས་བྱེད་ཀྱང་། །ནམ་མཁས་ཀུན་དུ་ཁྱབ་པས་ན། །སུ་ཡང་དེ་ལས་མི་ཐར་ཏེ། །བྱིས་པ་བསླད་པར་གྱུར་རྣམས་ཀྱིས། །ཕྱིན་ཅི་ལོག་ཏུ་རྣམ་པར་བརྟགས། །དེ་ལྟར་ཆོས་རྣམས་
མཁའ་འདྲ་བར། །ཤེས་པར་མ་གྱུར་བྱིས་པ་རྣམས། །དངོས་པོ་མེད་པའི་འདོད་ཆགས་ལ། །ཡོངས་སུ་སྤང་བར་མངོན་པར་འདོད། །འདོད་ཆགས་ནམ་མཁའ་འདྲ་བས་ན། །སུ་ཡང་དེ་ལས་གྲོལ་བ་མེད། །གྲོལ་ཞིང་

79-1-219b

རྣམ་གྲོལ་ཕུན་སུམ་ཚོགས། །ཆོས་རྣམས་མྱ་ངན་འདས་དང་འདྲ། །སངས་རྒྱས་གང་དག་འདས་པ་དང་། །འདྲེན་པ་གང་དག་བཞུགས་པ་དང་། །གང་དག་འབྱུང་འགྱུར་རྫོགས་སངས་རྒྱས། །དེ་ཀུན་སྤྱོད་ཡུལ་འདོད་ཆགས་
ཡིན། །འདོད་ཆགས་སྟོང་པར་ཤེས་གྱུར་ན། །ཆགས་ལས་གྲོལ་བ་གང་ཡང་མེད། །གང་དག་ཆགས་ལ་འཇིགས་འདུ་ཤེས། །དེ་དག་ཆགས་ལས་གྲོལ་བྱར་སེམས། །ཅི་ཡང་མེད་པའི་མཐའ་འདི་ནི། །འདོད་ཆགས་མཐའ་
སྟེ་འོད་གསལ་ཞིང་། །མཚན་མ་མེད་ལ་རྟག་མཉམ་པར། །བྱང་ཆུབ་སྙིང་པོར་ང་ཡིས་མཐོང་། །དངོས་པོར་འདུ་ཤེས་སེམས་ཅན་གང་། །དེ་དག་འདོད་ཆགས་འབྲི་བར་འགྱུར། །ཡོད་པ་མིན་པ་ཡོངས་བརྟགས་པས། །
དེ་དག་གིས་ནི་སྤོང་བ་བརྟགས། །བདག་གིས་འདོད་ཆགས་སྤང་བྱ་ཞེས། །དེ་འདྲའི་འདུ་ཤེས་སྐྱེས་ནས་ནི། །དེ་ལ་སྤངས་ཤེས་བརྗོད་པར་བྱ། །འགྲོ་བ་འདི་དག་འདུ་ཤེས་ཙམ། །འདོད་ཆགས་མཐའ་ནི་བསམ་
ཡས་ཏེ། །མཐའ་དེ་འཇིག་པ་མེད་པས་ན། །ཡང་དག་མཐའ་དང་དེ་མཉམ་པས། །དེ་ལས་གྲོལ་བར་མ་གཏོགས་ཤིག །གལ་ཏེ་ཆགས་ལས་གྲོལ་གྱུར་ན། །སྟོང་པ་ཉིད་ལས་གྲོལ་བར་འགྱུར། །འདོད་ཆགས་
དང་ནི་སྟོང་པ་ཉིད། །དེ་གཉིས་གཉིས་སུ་ཡོད་མ་ཡིན། །འདི་ལྟར་སྐྱེ་བ་མེད་པ་ལ། །དེ་དག་སྐྱེ་བར་རྣམ་བརྟགས་པས། །བྱིས་པ་གཉིས་སུ་ཤེས་རྣམས་ལ། །ངས་ནི་སྤོང་བ་རབ་ཏུ་བསྟན། །འདོད་ཆགས་དེ་ནི་སྐྱེ་མེད་ན། འདོད་ཆགས་ཤེས་བྱའི་
མིང་དུ་བརྗོད། །མིང་རྣམས་ཀུན་དུ་ཆགས་མེད་པས། །མིང་ལ་སུ་ཡང་ཆགས་པ་མེད། །འདོད་ཆགས་ཆགས་པ་མེད་ཤེས་ཤིང་། །མཐའ་ལས་འདས་པའི་སྟོང་མཐོང་ན། །འདོད་ཆགས་རྣམ་པར་གཞིག་པའི་ཕྱིར། །
ཐར་པ་མཁས་པས་མི་མཐོང་ངོ་། །འདོད་ཆགས་སངས་རྒྱས་ཆོས་མཚུངས་ཤིང་། །མྱ་ངན་འདས་པ་འདྲར་ཤེས་ནས། །རྡུལ་དང་བྲལ་བའི་ཏིང་ངེ་འཛིན། །འདོད་ཆགས་སྒྲས་ནི་ངས་བསྟན་ཏོ། །ཞི་བའི་དབྱིངས་ལ་

79-1-220a

རྟེན་པ་ཡི། །འདོད་ཆགས་རབ་ཏུ་ཞི་ཤེས་ནས། །མཁས་པ་རྣམས་ལ་ང་ཡིས་ནི། །ཏིང་འཛིན་འདོད་ཆགས་སྒྲར་བསྟན་ཏོ། །འཇམ་དཔལ་དེ་ལྟར་ན་བྱང་ཆུབ་སེམས་དཔས་འདོད་ཆགས་ཏིང་ངེ་འཛིན་དུ་རྟོགས་
པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་ཞེ་སྡང་ཏིང་ངེ་འཛིན་དུ་རྟོགས་པར་བྱ་ཞེ་ན། སྤོང་ལས་ཞེ་སྡང་ཀུན་དུ་འབྱུང་། །ཉོན་མོངས་པ་ཡང་རྐྱེན་ལས་སྐྱེ། །བདག་མེད་པ་ལས་བྱུང་བའི་བདག །མང་
པོའི་ཚོགས་ལས་སྐྱེས་པ་ཡིན། །རྩུབ་པོའི་སྒྲ་ལས་ཞེ་སྡང་ནི། །དུག་རྣོན་ལྟ་བུ་ཀུན་དུ་འབྱུང་། །སྒྲ་ནི་ང་རོའི་རང་བཞིན་པས། །ཤིན་དུ་ཡོད་པ་མ་ཡིན་ནོ། །ཇི་ལྟར་ཚོགས་པས་གཙུབ་ཤིང་དང་། །གཙུབ་སྟན་ལས་ནི་མེ་
བྱུང་སྟེ། །ཚོགས་དང་བྲལ་བར་གྱུར་ན་ནི། །དེ་ན་མེ་ཡང་ཡོད་མིན་ལྟར། །དེ་བཞིན་ཡིད་དུ་མི་འོང་བའི། །སྒྲ་ལས་ཞེ་སྡང་གསོག་འབྱུང་ཞིང་། །སྲོག་གི་སྒྲ་ལས་ཡོངས་བརྟགས་ན། །དེ་ལ་ཞེ་སྡང་རྙེད་མི་འགྱུར། །
ཞེ་སྡང་སྒྲ་ལས་མ་བྱུང་ཞིང་། །ནང་ནའང་གནས་པ་མ་ཡིན་ལ། །ཞེ་སྡང་ཕྱི་རོལ་མ་འོངས་ཏེ། །བྱུང་བ་མེད་པས་གསོག་ཡིན་ནོ། །རྒྱུ་རྣམས་ཕན་ཚུན་འདུས་པ་ལས། །ཞེ་སྡང་ཀུན་དུ་བྱུང་བ་ཡིན། །ཕན་
ཚུན་བྲལ་བར་གྱུར་ན་ནི། །དེ་ལ་ཞེ་སྡང་རྙེད་མི་འགྱུར། །ཇི་ལྟར་ཞོ་དང་འོ་མ་ལ། །སྐྱེས་བུས་བཙལ་ཏེ་སྲུབ་ཤིང་གིས། །བསྲུབ་པ་བྱས་པས་རྐྱེན་རྣམས་ལས། །མར་ནི་ཀུན་དུ་བྱུང་བ་ལྟར། །དེ་བཞིན་ཡིད་
དུ་མི་འཐད་པའི། །སྒྲ་ལ་ཞེ་སྡང་གསོག་འབྱུང་ཞིང་། །ཡོངས་སུ་བརྟགས་པས་དེ་གནས་ལ། །མི་མཁས་པ་དག་རབ་ཏུ་འབར། །ཀུན་དུ་བརྟགས་པས་ཞེ་སྡང་ནི། །ཤིན་དུ་དངོས་མེད་ཤེས་པས་ན། །ཏིང་འཛིན་ཞི་བ་
བརྗོད་པ་ནི། །ཞེ་སྡང་སྒྲ་ཡིས་རབ་ཏུ་བསྟན། །ཞེ་སྡང་ཡང་དག་མཐའ་དང་མཉམ། །དེ་བཞིན་ཉིད་ལ་རྟེན་པ་ཡིན། །ཆོས་ཀྱི་དབྱིངས་དང་འདྲར་ཤེས་པས། །དེ་ན་ཏིང་ངེ་འཛིན་ཅེས་བསྟན། །འཇམ་དཔལ་དེ་

79-1-220b

ལྟར་ན་ཞེ་སྡང་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་གཏི་མུག་ཏིང་ངེ་འཛིན་དུ་རྟོགས་པར་བྱ་ཞེ་ན། མ་རིག་པ་ལས་གཏི་མུག་བྱུང་། །མ་རིག་པ་ཡང་
ཡོད་མ་ཡིན། །གང་ན་གཏི་མུག་ཡོད་མིན་པ། །དེ་ན་གང་ཡང་རྨོངས་པ་མེད། །རྨོངས་མེད་སེམས་ཅན་རྨོངས་གྱུར་ཅིང་། །ཆགས་མེད་ཆགས་པར་འདུ་ཤེས་པ། །ཇི་ལྟར་བྱིས་པས་ནམ་མཁའ་ལ། །མདུད་པ་བོར་བས་
གསོག་བཞིན་ནོ། །ཡོད་པ་མ་ཡིན་ཆོས་རྣམས་ལ། །ཀུན་ནས་ཉོན་མོངས་རྣམ་བརྟགས་པ། །བྱིས་པ་རྣམས་ཀྱིས་འདི་མཚར་ཏེ། །མཆོག་ཏུ་ཤིན་དུ་བྱ་བར་དཀའ། །ཇི་ལྟར་སྐྱེས་བུ་ལ་ལ་ཞིག །ནམ་མཁའ་ལ་
ནི་མཇལ་བྱེད་ཅིང་། །བསྐལ་པ་བྱེ་བར་གཞལ་བྱས་ཀྱང་། །དེ་ལ་ཕུང་པོ་མི་རྙེད་ལྟར། །དེ་བཞིན་རྨོངས་པས་བྱིས་པ་ཡི། །སྔོན་གྱི་མཐའ་ནི་བསམ་མི་ཁྱབ། །གཏི་མུག་ཕུང་པོར་འབྱུང་མེད་དེ། །དེས་ནི་ཅི་ཡང་བཀང་
བ་མེད། །ཇི་ལྟར་ནམ་མཁའ་གཞལ་བྱས་ཀྱང་། །དེ་ལ་སྔོན་གྱི་མཐའ་མེད་ཅིང་། །དེ་ན་ཅི་ཡང་བཀང་བ་མེད། །གཞལ་བར་ནུས་པ་མེད་པ་ལྟར། །དེ་བཞིན་བསྐལ་པ་སྟོང་རྣམས་སུ། །ཀུན་དུ་རྨོངས་པར་དགང་བྱས་
ཀྱང་། །དེ་ལ་བཀང་བ་ཅི་ཡང་མེད། །ངོམས་པའང་ཅུང་ཟད་ཡོད་མ་ཡིན། །ཇི་ལྟར་སྐྱེས་བུ་ལ་ལ་ཡིས། །སྦུད་པ་སྟོང་པ་བུད་བྱས་ཤིང་། །བཞག་ནས་སྦུད་པ་རྙོངས་པ་ན། །དེ་ཡི་ནང་ན་རྙེད་མིན་ལྟར། །དེ་བཞིན་
འདོད་པ་སྦུད་འདྲ་བ། །ཀུན་དུ་རྨོངས་པས་སྤྱོད་པར་བྱེད། །དེ་ནི་ངོམས་པར་མི་འགྱུར་ཏེ། །ཕྱིར་ཞིང་འདོད་པ་ཚོལ་བར་བྱེད། །གཏི་མུག་ཡོད་པ་མིན་ཞེས་བརྗོད། །རྩ་བ་ཆད་ཅིང་དངོས་པོ་མེད། །རྩ་བ་མེད་ཅིང་གནས་ཀྱང་
མེད། །དེས་ན་གཏི་མུག་ཟད་པ་མེད། །འདི་ལྟར་གཏི་མུག་མི་ཟད་པས། །དེ་ཡི་མཐའ་མ་རྙེད་མི་འགྱུར། །དེ་ཕྱིར་སེམས་ཅན་ཐམས་ཅད་ལ། །ཟད་པར་བྱ་བར་ངས་མི་ནུས། །གལ་ཏེ་དཔེ་ཙམ་བརྗོད་བྱ་ན། །བསྐལ་

79-1-221a

པ་བྱེ་བ་བསམ་ཡས་སུ། །ང་ཡི་ཚེ་ནི་གནས་གྱུར་ལ། །ཉིན་གཅིག་བཞིན་དུ་ཉིན་རེ་ལ། །སྟོང་གསུམ་སེམས་ཅན་ཇི་སྙེད་པ། །ཐམས་ཅད་མྱ་ངན་བཟླ་བྱས་ཞིང་། །ཐམས་ཅད་དེ་ལྟར་བྱས་ཀྱང་ནི། །སེམས་ཅན་
ཁམས་ལ་ཟད་པ་མེད། །གཏི་མུག་གིས་ནི་བསྐྱེད་པའི་ཁམས། །སེམས་ཅན་ཁམས་ལ་མཚན་ཉིད་མེད། །གཏི་མུག་དེ་ནི་སྒྱུ་མ་འདྲ། །དེས་ན་དེ་ཡི་མཐའ་མི་རྙེད། །སངས་རྒྱས་གཏི་མུག་མཉམ་པས་ན། །དེ་དག་གཉིས་
སུ་མེད་པར་བསྟན། །རྨོངས་གྱུར་བྱིས་པ་དེ་དག་གིས། །འདིར་ནི་སངས་རྒྱས་རྣམ་པར་བརྟགས། །ཐམས་ཅད་མཁྱེན་ཉིད་གཏི་མུག་མཉམ། །གཏི་མུག་ཐམས་ཅད་ཡོད་མ་ཡིན། །གཏི་མུག་སེམས་ཅན་ཀུན་དང་མཉམ། །
སེམས་ཅན་ཀུན་ཀྱང་བསམ་མི་ཁྱབ། །བསམ་མི་ཁྱབ་དང་གཏི་མུག་ནི། །སེམས་བསྐྱེད་པ་ཡིས་རྣམ་པར་བརྟགས། །སེམས་ཀུན་བསམ་གྱིས་མི་ཁྱབ་སྟེ། །དེ་ཡི་ཚད་ནི་ཡོད་མ་ཡིན། །གཏི་མུག་དེ་ལ་ཚད་མེད་པས། །
དེ་ཡི་འབྱུང་བ་རྙེད་མི་འགྱུར། །འབྱུང་བ་ཡོད་པ་མ་ཡིན་ན། །སྐྱེ་བ་ཡོད་པར་ག་ལ་འགྱུར། །གཏི་མུག་སྐྱེས་པ་མ་ཡིན་ན། །དེ་ཡི་རྨོངས་བྱེད་ཅི་འདྲ་ཞིག །དེ་ཡི་རྨོངས་བྱེད་ཅི་འདྲ་བ། །སངས་རྒྱས་ཀུན་ཀྱང་དེ་དང་
འདྲ། །ཐ་དད་དབྱེ་བ་མེད་ཤེས་ན། །ཆོས་རྣམས་ཐམས་ཅད་གཉིས་སུ་མེད། །ཏིང་འཛིན་ཞི་བ་བརྗོད་པ་ནི། །གཏི་མུག་སྒྲ་ཡིས་རབ་ཏུ་བསྟན། །གང་ཚེ་ང་ཡིས་མཉམ་ཉིད་ཤེས། །དེ་ནི་དེ་དང་གཏི་མུག་མཉམ། །
དེ་དག་ཐམས་ཅད་མཉམ་ཤེས་ནས། །ཏིང་འཛིན་དེ་ལྟར་ཤེས་པར་གྱིས། །འཇམ་དཔལ་དེ་ལྟར་ན་གཏི་མུག་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་མི་དགེ་
བ་ཐམས་ཅད་ཏིང་ངེ་འཛིན་དུ་རྟོགས་པར་བྱ་ཞེ་ན། འདོད་ཆགས་སྤྱོད་པའི་རྟགས་གང་དང་། །ཞེ་སྡང་སྤྱོད་པའི་གཡོ་བ་དང་། །གཏི་མུག་སྤྱོད་པ་གང་ཡིན་པ། །ཐམས་ཅད་ཏིང་འཛིན་ཤེས་པར་གྱིས། །ཉོན་

79-1-221b

མོངས་ཀུན་གྱི་སྒྲུབ་པ་ནི། །ཏིང་འཛིན་ཡིན་པར་མོས་པར་གྱིས། །བརྫུན་དང་ཡང་དག་མ་ཡིན་པར། །ཐམས་ཅད་དེ་བཞིན་བསྒོམ་པར་གྱིས། །འཇམ་དཔལ་དེ་ལྟར་ན་མི་དགེ་བ་ཐམས་ཅད་ཏིང་ངེ་འཛིན་དུ་
རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་དགེ་བ་ཐམས་ཅད་ཏིང་ངེ་འཛིན་དུ་རྟོགས་པར་བྱ་ཞེ་ན། སེམས་ཅན་རྣམས་ཀྱི་ཇི་སྙེད་དགེ། སེམས་དང་སྤྱོད་པ་ཅི་འདྲ་བ། །སྤྱོད་པ་
ཐམས་ཅད་སྤྱོད་གཅིག་སྟེ། །དེ་ལྟར་ཏིང་འཛིན་ཤེས་པར་གྱིས། །སེམས་ཅན་ཀུན་གྱི་སྤྱོད་པ་དག །བསྒྲུབ་པ་གཅིག་ཏུ་ཤེས་པས་ན། །ཏིང་འཛིན་ཞི་བ་བརྗོད་པ་ནི། །ཀུན་གྱི་སྒྲ་ཡིས་བསྟན་པ་ཡིན། །
འཇམ་དཔལ་དེ་ལྟར་ན། དགེ་བ་ཐམས་ཅད་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་འདུས་བྱས་ཐམས་ཅད་ཏིང་ངེ་འཛིན་དུ་རྟོགས་པར་བྱ་ཞེ་ན། འདུ་བྱེད་
ཐམས་ཅད་འདུ་བྱེད་མིན། །དེ་དག་བགྲང་བས་གཞལ་བྱས་ན། །གཞལ་དུ་མེད་ཅིང་དཔག་ཏུ་མེད། །དེ་ལྟར་ཏིང་འཛིན་ཤེས་པར་གྱིས། །དཔག་ཏུ་མེད་པར་ཤེས་ན་ནི། །ལུས་མེད་དངོས་པོ་ཡོད་མིན་པས། །
ཏིང་འཛིན་ཞི་བ་བརྗོད་པ་ནི། །འདུ་བྱེད་ཀུན་གྱིས་བསྟན་པ་ཡིན། །འཇམ་དཔལ་དེ་ལྟར་ན་འདུས་བྱས་ཐམས་ཅད་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་
འདུས་མ་བྱས་ཐམས་ཅད་ཏིང་ངེ་འཛིན་དུ་རྟོགས་པར་བྱ་ཞེ་ན། ཆོས་འདི་རང་བཞིན་ཞི་བས་ན། །དེ་ལ་གྲངས་ནི་ཡོད་མ་ཡིན། །མ་རིག་པ་ཡིས་བསྒྲུབ་ཞི་བ། །ཏིང་ངེ་འཛིན་གྱིས་བསྒྲུབ་པར་བསྟན། །
འདུས་བྱས་ཀུན་ལ་བརྗོད་མེད་ཅིང་། །བསྒྲུབ་པ་མེད་པར་ཤེས་ནས་ནི། །སེམས་ཅན་གང་དག་བརྗོད་ལ་ཆགས། །དེ་དག་རྣམས་ལ་དེ་ལྟར་བསྟན། །འཇམ་དཔལ་དེ་ལྟར་ན་འདུས་མ་བྱས་

79-1-222a

ཐམས་ཅད་ཏིང་ངེ་འཛིན་དུ་རྟོགས་པར་བྱའོ། །ཚིགས་སུ་བཅད་པ་མངོན་པར་བསྒྲུབས་པའི་སྒྲ་བསམ་གྱིས་མི་ཁྱབ་པ་བསྟན་པ་འདི་བཤད་པ་ན་བྱང་ཆུབ་སེམས་དཔའ་དགུ་ཁྲི་ཉིས་
སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་བོ། །ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་བདུན་བཅུ་རྩ་གཉིས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དགེ་སློང་
སུམ་ཁྲི་དྲུག་སྟོང་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དགེ་སློང་མ་དྲུག་སྟོང་ཉིས་བརྒྱས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དགེ་བསྙེན་
ས་ཡ་བརྒྱད་འབུམ་གྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དགེ་བསྙེན་མ་ས་ཡ་ཕྲག་བཞི་དང་ཉིས་འབུམ་གྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་སེམས་བསྐྱེད་དོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བྱང་ཆུབ་སེམས་དཔའ་དབང་པོ་རྣོན་པོ་གང་དག་འབྱུང་བ་དེ་དག་གིས་ཏིང་ངེ་འཛིན་རྣམས་ཀྱི་མིང་
ཐོས་ན་ཆོས་ཐམས་ཅད་ལ་སྣང་བ་འཐོབ་པར་འགྱུར་བ་དང་། བདུད་ཀྱི་རིས་ཀྱི་ལྷའི་བུ་ཐམས་ཅད་དང་། གང་ཟག་དམིགས་པའི་ལྟ་བ་ཅན་རྣམས་ཀྱིས་ཐུལ་བར་དཀའ་བ་དང་། ཡི་གེ་གཅིག་གིས་ཡི་གེ་
ཐམས་ཅད་རྟོགས་པར་འགྱུར་བ་དང་། ཡི་གེ་ཐམས་ཅད་ཀྱིས་ཡི་གེ་གཅིག་རྟོགས་པར་འགྱུར་བ་དང་། ཐོགས་པ་མ་མཆིས་པའི་སྤོབས་པས་སེམས་ཅན་ཐམས་ཅད་ལ་ཆོས་སྟོན་པ་ལ་མཁས་
པར་འགྱུར་བ་དང་། ཆོས་ཟབ་མོ་ལ་བཟོད་པར་འགྱུར་བ་དང་། སྤྱོད་པ་ཐམས་ཅད་ལ་མཚན་ཉིད་གཅིག་ཏུ་རྟོགས་ཤིང་སོ་སོ་ཡང་དག་པར་རིག་པ་བཞིས་མུན་པ་མ་མཆིས་པར་འཐོབ་པར་འགྱུར་བའི་

79-1-222b

ཏིང་ངེ་འཛིན་རྣམས་ཀྱི་མིང་བཅོམ་ལྡན་འདས་ཀྱིས་བསྟན་དུ་གསོལ། །དེ་སྐད་ཅེས་གསོལ་པ་དང་། །བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །
འཇམ་དཔལ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །འཇམ་དཔལ་གཞོན་ནུར་གྱུར་པས་བཅོམ་ལྡན་འདས་དེ་བཞིན་ནོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་
པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་མཐའ་ཡས་དྲི་མེད་ཅེས་བྱ་བའི་ཏིང་ངེ་འཛིན་ཡོད་དེ། ཏིང་ངེའི་འཛིན་དེ་ཐོབ་ན་བྱང་ཆུབ་སེམས་དཔའ་གཟུགས་ཐམས་ཅད་
ཡོངས་སུ་དག་པར་སྟོན་ཏོ། །འཇམ་དཔལ་མགྱོགས་པར་འགྲོ་བ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན་བྱང་ཆུབ་སེམས་དཔའ་ཉི་མ་དང་། ཟླ་བའི་འོད་ཟིལ་གྱིས་གནོན་པར་བྱེད་དོ། །འཇམ་
དཔལ་འོད་ཟེར་འབྱུང་བ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན་བྱང་ཆུབ་སེམས་དཔའ་བརྒྱ་བྱིན་དང་། ཚངས་པ་དག་གི་གཟི་བརྗིད་ཟིལ་གྱིས་གནོན་པར་བྱེད་དོ། །འཇམ་དཔལ་ཡུལ་སྟོན་པ་
ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན་བྱང་ཆུབ་སེམས་དཔའ་འཁོར་འདུས་པ་ཐམས་ཅད་ཀྱི་འདོད་ཆགས་དང་། ཞེ་སྡང་དང་། གཏི་མུག་ཞི་བར་བྱེད་དོ། །འཇམ་དཔལ་འོད་ཟེར་ཐོགས་
པ་མེད་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན་བྱང་ཆུབ་སེམས་དཔའ་སངས་རྒྱས་ཀྱི་ཞིང་ཐམས་ཅད་འོད་ཟེར་གྱིས་སྣང་བར་བྱེད་དོ། །འཇམ་དཔལ་ཆོས་ཐམས་ཅད་མི་བརྗེད་པ་ཞེས་བྱ་བའི་
ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན་བྱང་ཆུབ་སེམས་དཔའ་སངས་རྒྱས་ཀྱི་ཆོས་བསྟན་པ་ཐམས་ཅད་འཛིན་ཅིང་གཞན་ལ་ཡང་སྟོན་པར་བྱེད་དོ། །འཇམ་དཔལ་སེང་གེའི་སྒྲ་མངོན་པར་བསྒྲགས་པའི་

79-1-223a

དབྱངས་ཡིད་དུ་འོང་བ་རྗེས་སུ་སྒྲོགས་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན་བྱང་ཆུབ་སེམས་དཔའ་ཚངས་པའི་འཇིག་རྟེན་གྱི་བར་དུ་སྒྲས་མངོན་པར་གོ་བར་བྱེད་དོ། །འཇམ་དཔལ་
དགའ་བ་དང་། མགུ་བ་དང་། ཚིམ་པ་ཐམས་ཅད་ཡང་དག་པར་སྐྱེད་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན་བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་སེམས་དང་བསམ་པ་སྣ་
ཚོགས་ཡང་དག་པར་མགུ་བར་བྱེད་དོ། །འཇམ་དཔལ་ལྟ་བས་ཆོག་མི་ཤེས་ཤིང་མཆོག་ཏུ་དགའ་བ་དང་ལྡན་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན་བྱང་ཆུབ་སེམས་དཔའ་བལྟ་བ་དང་། །མཉན་
པས་ཆོག་མི་ཤེས་པར་འགྱུར་རོ། །འཇམ་དཔལ་ཡོན་ཏན་བསམ་གྱིས་མི་ཁྱབ་པའི་འབྱུང་གནས་ཤེས་རབ་ཀྱི་ཡུལ་རིན་པོ་ཆེའི་འབྱུང་ཁུང་རྒྱུན་ཅིག་པ་ཉོན་མོངས་པ་མེད་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་
ངེ་འཛིན་དེ་ཐོབ་ན་བྱང་ཆུབ་སེམས་དཔའ་རྫུ་འཕྲུལ་བསྟན་པ་ཐམས་ཅད་སྟོན་པ་དང་། སེམས་ཅན་རྣམས་འདུལ་བར་བྱེད་དོ། །འཇམ་དཔལ་སྒྲ་སྐད་ཐམས་ཅད་ཀྱི་བརྡ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་
འཛིན་དེ་ཐོབ་ན་བྱང་ཆུབ་སེམས་དཔའ་སྒྲ་སྐད་དང་བརྗོད་པ་དང་། བརྡ་ཐམས་ཅད་རྟོགས་ཤིང་ཡི་གེ་ཐམས་ཅད་ཀྱིས་ཡི་གེ་གཅིག་སྟོན་པ་དང་། ཡི་གེ་གཅིག་གིས་ཡི་གེ་ཐམས་ཅད་སྟོན་པར་བྱེད་དོ། །འཇམ་
དཔལ་ལས་ཀྱི་རྣམ་པར་སྨིན་པ་ལས་བྱུང་བའི་བསོད་ནམས་དང་། དགེ་བའི་རྩ་བ་ཐམས་ཅད་བསགས་ཤིང་སྟོན་པར་བྱེད་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན་བྱང་ཆུབ་སེམས་དཔའ་ཅང་མི་
སྨྲ་བར་སྙོམས་པར་ཞུགས་ཏེ། ཡི་གེ་གཅིག་ཙམ་ཡང་མི་བརྗོད་པར་སེམས་ཅན་ཐམས་ཅད་ཀྱིས་སངས་རྒྱས་ཀྱི་སྒྲ་དང་། ཆོས་ཀྱི་སྒྲ་དང་། དགེ་འདུན་གྱི་སྒྲ་དང་། ཉན་ཐོས་ཀྱི་སྒྲ་དང་། རང་སངས་རྒྱས་ཀྱི་སྒྲ་དང་། 

79-1-223b

བྱང་ཆུབ་སེམས་དཔའི་སྒྲ་དང་། ཕ་རོལ་དུ་ཕྱིན་པའི་སྒྲ་ཐོས་པར་བྱེད་དོ། །འཇམ་དཔལ་གཟུངས་ཐམས་ཅད་ལས་མངོན་པར་འཕགས་པའི་རྒྱལ་པོ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་
དེ་ཐོབ་ན་བྱང་ཆུབ་སེམས་དཔའ་གཟུངས་མཐའ་ཡས་པ་བསྒྲུབ་པ་ལ་འཇུག་པ་ཁོང་དུ་ཆུད་པར་འགྱུར་རོ། །འཇམ་དཔལ་ཆོས་ཐམས་ཅད་ལ་སྤོབས་པ་བཀོད་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་
ཐོབ་ན་བྱང་ཆུབ་སེམས་དཔའ་ཡི་གེ་ཐམས་ཅད་ལ་སྤོབས་ཤིང་སྒྲ་སྐད་ཐམས་ཅད་དང་། དབྱངས་ཐམས་ཅད་དང་། བརྗོད་པ་ཐམས་ཅད་ལ་ཡང་སྤོབས་པར་འགྱུར་རོ། །དེ་ནས་བཅོམ་ལྡན་འདས་ལ་
འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཆོས་ཀྱི་རྣམ་གྲངས་འདིའི་ཡོན་ཏན་བརྗོད་པའི་ཁྱད་པར་ལ་སྤོབས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ་
འཇམ་དཔལ་ཁྱོད་སྤོབས་པར་བྱོས་ཤིག །འཇམ་དཔལ་གྱིས་གསོལ་པ། བཅོམ་ལྡན་འདས་བྱང་ཆུབ་སེམས་དཔའ་གང་དག་ནེམ་ནུར་མ་མཆིས་པ་དང་། ཐེ་ཆོམ་མ་མཆིས་པའི་སེམས་ཀྱིས་ཆོས་ཀྱི་རྣམ་གྲངས་འདི་
སྟོན་པ་དང་། །འཆང་བ་དང་། ཀློག་པ་དང་། ཀུན་ཆུབ་པར་བགྱིད་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པར་བགྱིད་པ་དེ་ཚེ་འདི་ཉིད་ལ་གདོན་མི་འཚལ་བར་སྤོབས་པ་འཐོབ་པར་རེ་བར་བགྱི་སྟེ། སྤོབས་པ་
མྱུར་བ་དང་། སྤོབས་པ་རྒྱ་ཆེ་བ་དང་། ཟབ་མོ་ལ་སྤོབས་པ་དང་། མི་བརྗེད་པའི་སྤོབས་པ་དང་། སྤོབས་པ་སྣ་ཆོགས་ཐོབ་པར་རེ་བར་བགྱིའོ། །དེ་ནི་སེམས་ཅན་ཐམས་ཅད་ལ་ཞེ་འགྲས་པ་མ་མཆིས་པའི་སེམས་སུ་གྱུར་པར་
རེ་བར་བགྱིའོ། །དེ་ཅིའི་སླད་དུ་ཞེ་ན། གང་ཇི་ཙམ་དུ་ཆོས་ཀྱི་རྣམ་གྲངས་འདི་བསྒྲུབ་པ་དེ་ནི་སྤྱོད་པ་འདི་ཉིད་དང་རྗེས་སུ་འབྲེལ་པ་ལགས་པའི་སླད་དུའོ། །བཅོམ་ལྡན་འདས་ཀྱི་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་

79-1-224a

ཏེ། འཇམ་དཔལ་ལེགས་སོ་ལེགས་སོ། །ཁྱོད་ཀྱིས་ཚིག་འདི་ལེགས་པར་སྨྲས་སོ། །འཇམ་དཔལ་འདི་ལྟ་སྟེ། དཔེར་ན་སྦྱིན་པ་ནི་ལོངས་སྤྱོད་ཆེན་པོ་འཐོབ་པར་སླུ་བ་མེད་དོ། །ཚུལ་ཁྲིམས་ནི་མཐོ་
རིས་སུ་སྐྱེ་བར་སླུ་བ་མེད་དོ། །ཐོས་པ་ནི་ཤེས་རབ་ཆེན་པོར་འགྱུར་བར་སླུ་བ་མེད་དོ། །སྒོམ་པ་ནི་འབྲལ་བར་འགྱུར་བར་སླུ་བ་མེད་དོ། །འཇམ་དཔལ་དེ་བཞིན་དུ་ཆོས་ཀྱི་རྣམ་གྲངས་འདི་ཡང་ཚེ་འདི་ཉིད་ལ་སྤོབས་
པ་སྐྱེ་བར་སླུ་བ་མེད་དོ། །འཇམ་དཔལ་འདི་ལྟ་སྟེ། དཔེར་ན་ཉི་མ་ཤར་བས་ནི་མུན་པ་མུན་ནག་ཐམས་ཅད་སེལ་བར་བྱེད་དོ། །འཇམ་དཔལ་དེ་བཞིན་དུ་ཆོས་ཀྱི་རྣམ་གྲངས་འདི་ཡང་བསྟན་མ་ཐག་ཏུ་སྤོབས་པ་སྐྱེ་བར་རེ་བར་བྱའོ། །
འཇམ་དཔལ་འདི་ལྟ་སྟེ། །དཔེར་ན་བྱང་ཆུབ་ཀྱི་སྙིང་པོ་ལ་འདུག་པའི་བྱང་ཆུབ་སེམས་དཔའ་ནི་ངེས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །འཇམ་དཔལ་དེ་བཞིན་
དུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་རྣམ་གྲངས་འདི་རབ་ཏུ་འདོན་པ་དེ་ཡང་ཐེ་ཚོམ་མེད་པར་ངེས་པར་ཚེ་འདི་ཉིད་ལ་སྤོབས་པ་ཐོབ་པར་འགྱུར་རོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་
སེམས་དཔའ་ཆེན་པོ་ཚེ་འདི་ཉིད་ལ་སྤོབས་པ་ཐོབ་པར་འདོད་པས་ནེམ་ནུར་མེད་པ་དང་། ཐེ་ཚོམ་མེད་པའི་སེམས་ཀྱིས་ཆོས་ཀྱི་རྣམ་གྲངས་འདི་གཟུང་བར་བྱ། བཅང་བར་བྱ། ཁ་ཏོན་དུ་བྱ། བཀླག་པར་བྱ། ཀུན་ཆུབ་
པར་བྱ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་པའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་
བདག་གིས་ཀྱང་བཅོམ་ལྡན་འདས་ཡོངས་སུ་མྱ་ངན་ལས་འདས་ནས་བྱང་ཆུབ་སེམས་དཔའ་གང་ནེམ་ནུར་མ་མཆིས་པ་དང་། ཐེ་ཚོམ་མ་མཆིས་པའི་སེམས་ཀྱིས་ཆོས་ཀྱི་རྣམ་གྲངས་འདི་འཛིན་པ་དང་། འཆང་བ་དང་། 

79-1-224b

ཀློག་པ་དང་། ཀུན་ཆུབ་པར་བགྱིད་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པར་འགྱུར་བ་དེ་ལ་སྤོབས་པ་ཉེ་བར་བསྒྲུབ་པར་བགྱིའོ། །དེ་ནས་བདུད་སྡིག་ཅན་དུ་ཞིང་སྨྲེ་སྔགས་འདོན་བཞིན་དུ་
བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཐུགས་རྗེ་དང་ལྡན་ཞིང་
སེམས་ཅན་སྡུག་བསྔལ་བ་རྣམས་ལ་བདེ་བ་རབ་ཏུ་སྩོལ་བ་ལགས་ན། བཅོམ་ལྡན་འདས་ཀྱིས་བདག་གི་ཡིད་མི་བདེ་བ་དེ་ལེགས་པར་བསལ་བའི་སླད་དུ་ཆོས་ཀྱི་རྣམ་གྲངས་འདི་སླར་ཞིང་བྱིན་གྱིས་མི་བརླབ་ཏུ་གསོལ། །
བཅོམ་ལྡན་འདས་གང་གི་ཚེ་བཅོམ་ལྡན་འདས་བྱང་ཆུབ་ཀྱི་སྙིང་པོ་ལ་བཞུགས་པ་དང་། ད་ལྟར་ཆོས་ཀྱི་རྣམ་གྲངས་འདི་བསྟན་པའི་ཚེ་བདག་འདིར་ཤིན་དུ་ཆེར་སྡུག་བསྔལ་ཞིང་ཡིད་མི་བདེ་བ་དང་། མྱ་ངན་གྱི་ཟུག་རྔུས་
གཟིར་བར་གྱུར་ལགས་སོ། །བཅོམ་ལྡན་འདས་ཐ་ན་ཆོས་ཀྱི་རྣམ་གྲངས་འདི་སེམས་ཅན་གང་དག་གི་རྣ་ལམ་དུ་གྲག་པར་གྱུར་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་སླར་མི་ལྡོག་
པར་འགྱུར་ལགས་ན། གང་དག་གིས་ཐོས་ནས་འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བགྱིད་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པར་བགྱིད་པ་དེ་ཐམས་ཅད་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ལས་སླར་མི་ལྡོག་པར་འགྱུར་བ་ལྟ་སྨོས་ཀྱང་ཅི་འཚལ་ཏེ། སེམས་ཅན་དེ་དག་ཐམས་ཅད་ནི་ཡོངས་སུ་མྱ་ངན་ལས་འདའ་བར་འགྱུར་ལགས་སོ། །བཅོམ་ལྡན་འདས་དེའི་
སླད་དུ་བདག་གི་བདུད་ཀྱི་གནས་སྟོངས་པར་འགྱུར་བ་ལགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཐུགས་རྗེ་དང་ལྡན་ཞིང་སྡུག་བསྔལ་བ་རྣམས་ལ་བདེ་བ་སྩོལ་བ་ལགས་

79-1-225a

ན། བཅོམ་ལྡན་འདས་བདག་དབུགས་དབྱུང་དུ་གསོལ། བདེ་བར་གཤེགས་པ་བདག་དབུག་དབྱུང་དུ་གསོལ། དེ་ནས་བཅོམ་ལྡན་འདས་ཀྱིས་བདུད་སྡིག་ཅན་ལ་འདི་སྐད་ཅེས་བཀའ་སྩལ་ཏོ། །སྡིག་ཅན་མ་འཇིགས་
ཤིག །སེམས་སེམས་ཅན་ཐམས་ཅད་ཀྱང་ཡོངས་སུ་མྱ་ངན་ལས་འདའ་བར་མི་འགྱུར་ལ། །སྡིག་ཅན་ང་ཡང་ཆོས་ཀྱི་རྣམ་གྲངས་འདི་ལ་བྱིན་གྱིས་རློབ་པར་མི་བྱེད་ཀྱིས་སྡིག་ཅན་མ་འཇིགས་ཤིག །དེ་ནས་བཅོམ་ལྡན་
འདས་ཀྱིས་དབུགས་དབྱུང་བ་མཛད་པས་བདུད་སྡིག་ཅན་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་། ཡིད་བདེ་བ་སྐྱེས་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་ལ་འཇམ་དཔལ་
གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་ལས་དགོངས་ཏེ་དེ་སྐད་དུ་ང་ཆོས་ཀྱི་རྣམ་གྲངས་འདི་ལ་བྱིན་གྱིས་རློབ་པར་མི་བྱེད་དོ་ཞེས་བདུད་སྡིག་ཅན་ལ་བཀའ་སྩལ། བཅོམ་ལྡན་འདས་ཀྱིས་བཀའ་
སྩལ་པ། འཇམ་དཔལ་ཆོས་ཐམས་ཅད་ནི་བྱིན་གྱིས་བརླབས་མེད་པས་བྱིན་གྱིས་བརླབས་པ་ཡིན་ཏེ། ཆོས་ཀྱི་རྣམ་གྲངས་འདི་ཡང་བྱིན་གྱིས་བརླབས་མེད་པས་བྱིན་གྱིས་བརླབས་པ་ཡིན་པས། འཇམ་དཔའ་དེའི་ཕྱིར་ངས་
བདུད་སྡིག་ཅན་ལ་འདི་སྐད་དུ་ང་ཆོས་ཀྱི་རྣམ་གྲངས་འདི་ལ་བྱིན་གྱིས་རློབ་པར་མི་བྱེད་དོ་ཞེས་སྨྲས་སོ། །འཇམ་དཔལ་བདེན་པ་དང་བདེན་པའི་ཚིག་གང་གིས་ཆོས་ཐམས་ཅད་བྱིན་གྱིས་བརླབས་མེད་པས་བྱིན་གྱིས་བརླབས་པ་དང་
ཐ་དད་དུ་དབྱེར་མེད་པ་དང་། བརྗོད་དུ་མེད་པ་དང་། མཚན་ཉིད་མེད་པ་དང་། བསྙད་དུ་མེད་པ་དང་། སྨྲར་མེད་པ་དང་། གཉིས་སུ་མེད་པ་དང་། གཉིས་དང་བྲལ་བ་དང་། ཡང་དག་པའི་མཐའ་དང་མཉམ་པ་དང་། དེ་བཞིན་ཉིད་དུ་ཞུགས་
པ་དང་། ཆོས་ཀྱི་དབྱིངས་ཀྱི་མཚན་ཉིད་ཡིན་པའི་བདེན་པ་དང་བདེན་པའི་ཚིག་དེས་ཆོས་ཀྱི་རྣམ་གྲངས་འདི་འཛམ་བུའི་གླིང་ན་རབ་ཏུ་སྤྱོད་པར་གྱུར་ཅིག །དེ་ནས་བཅོམ་ལྡན་འདས་ཀྱིས་བདེན་པའི་བྱིན་གྱིས་བརླབས་དེ་

79-1-225b

མཛད་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གང་ཡིན་པ་དང་། ཆོས་ཀྱི་རྣམ་གྲངས་འདི་གང་ཡིན་པ་དེ་དག་ནི་མཉམ་པའི་ཕྱིར་ཁྱོད་ཀྱིས་ཀུན་ནས་
སྒོའི་ཆོས་ཀྱི་རྣམ་གྲངས་འདི་ཟུང་ཤིག །ཆོངས་ཤིག །ལྷོགས་ཤིག །ཀུན་ཆུབ་པར་གྱིས་ཤིག །གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཅིག །དེ་ཅིའི་ཕྱིར་ཞེ་ན། ཀུན་དགའ་བོ་དེ་བཞིན་གཤེགས་
པ་ནི་ཀུན་ནས་སྒོའི་ཆོས་ཀྱི་དབྱིངས་འདི་ལེགས་པར་ཐུགས་སུ་ཆུད་ནས་སེམས་ཅན་རྣམས་ལ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་སྟོན་པར་མཛད་པའི་ཕྱིར་རོ། །ཀུན་དགའ་བོ་དེ་ལྟ་བས་ན་ཆོས་ཀྱི་རྣམ་གྲངས་འདི་
ལེགས་པར་བསྲུང་བ་དང་། ལེགས་པར་གཟུང་བ་དང་། ལེགས་པར་ཀུན་ཆུབ་པར་གྱིས་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་པའི་
སྙིང་པོ་དང་། འཇམ་དཔལ་གཞོན་ནུར་གྱུར་པ་དང་། ཚེ་དང་ལྡན་པ་ཀུན་དགའ་བོ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་
བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། ཀུན་ནས་སྒོའི་ལེའུ་ཞེས་བྱ་བ་སྟེ་ལེའུ་བཅུ་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་
དང་། སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ། །ཡེ་དྷརྨཱ་ཧེ་ཧུ་པྲ་བྷ་བཱ་ཧེ་ཏུནྷེ་ཥཱ་ན་ཏ་ཐཱ་ག་ཏོ་ཧྱ་བ་ད་ཏ། ཏེ་ཥཱཉྩ ཡོ་ནི་རོ་དྷ་ཨེ་བྃ་བཱ་དཱི་མ་ཧཱ་ཤྲ་མུ་ཎཿ །། 
༄། ཧ། འཕགས་པ་དཀོན་མཆོག་བརྩེགས་པ་ཆེན་པོ་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཅུ་གཅིག་པ་སྟེ། འོད་ཟེར་ཀུན་དུ་བཀྱེ་བ་བསྟན་པ། བམ་པོ་དང་པོ།  རྒྱ་གར་སྐད་དུ། ཨཱརྱ་རཤྨི་ས་མན་ཏ་

79-1-226a

མུཀ་ཏོ་ནིར་དེ་ཤ་ནཱ་མ་མཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་འོད་ཟེར་ཀུན་དུ་བཀྱེ་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་
འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཕུང་པོའི་རི་ལ། དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་རང་དབང་ཆེན་པོ་ཐོབ་པ་ལྔ་བརྒྱ་དང་། 
གཞན་ཡང་ཚེ་གཅིག་གིས་ཐོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སོགས་པ་ཁྲག་ཁྲིག་ཕྲག་བརྒྱད་བཅུ་དང་། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་
གཞོན་ནུར་གྱུར་པ་ལ་སོགས་པ་ཁྲག་ཁྲིག་ཕྲག་བཞི་བཅུ་དང་ཐབས་གཅིག་ཏུ་བཞུགས་ཏེ། དེའི་ཚེ་འཁོར་འདུས་པ་དེ་ཉིད་དུ་ཟླ་འོད་གཞོན་ནུར་གྱུར་པ་ཞེས་བྱ་བ་ཞིག་འདུས་པར་གྱུར་པ་དེ་འདུག་པའི་སྟན་ལས་ལངས་ནས་
བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བརྩུགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ། གུས་པས་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་སྔོན་ཕྲིན་ལས་ཅི་ཞིག་མཛད་ན་འདི་ལྟར་རྣམ་པར་ངེས་པའི་འོད་ཟེར་དང་། ཡོངས་སུ་སྡུད་པའི་འོད་ཟེར་དང་། ཀུན་ནས་སློང་བའི་འོད་ཟེར་དང་། རབ་ཏུ་སྟོན་
པའི་འོད་ཟེར་དང་། ཁ་དོག་སྣ་ཚོགས་ཀྱི་འོད་ཟེར་དང་། ཁ་དོག་འདྲེས་པ་མ་མཆིས་པའི་འོད་ཟེར་དང་། རྒྱ་ཆུང་ངུའི་འོད་ཟེར་དང་། རྒྱ་ཆེན་པོའི་འོད་ཟེར་དང་། རྣམ་པར་དག་པའི་འོད་ཟེར་དང་། ཤིན་དུ་རྣམ་པར་དག་པའི་འོད་
ཟེར་དང་། དྲི་མ་མ་མཆིས་པའི་འོད་ཟེར་དང་། ཤིན་དུ་དྲི་མ་མ་མཆིས་པའི་འོད་ཟེར་དང་། དྲི་མ་དང་བྲལ་བའི་འོད་ཟེར་དང་། རིགས་ཀྱིས་འཕེལ་བའི་འོད་ཟེར་དང་། གསལ་བའི་འོད་ཟེར་དང་། ཤིན་དུ་གསལ་བའི་འོད་ཟེར་

79-1-226b

དང་། མཐའ་མ་མཆིས་པའི་འོད་ཟེར་དང་། ཤིན་དུ་མཐའ་མ་མཆིས་པའི་འོད་ཟེར་དང་། ཚད་མ་མཆིས་པའི་འོད་ཟེར་དང་། ཤིན་དུ་ཚད་མ་མཆིས་པའི་འོད་ཟེར་དང་། གྲངས་ཀྱི་ཚད་མ་མཆིས་པའི་འོད་ཟེར་དང་། 
ཤིན་དུ་གྲངས་ཀྱི་ཚད་མ་མཆིས་པའི་འོད་ཟེར་དང་། མྱུར་བའི་འོད་ཟེར་དང་། ཤིན་དུ་མྱུར་བའི་འོད་ཟེར་དང་། གནས་པ་མ་མཆིས་པའི་འོད་ཟེར་དང་། གནས་མ་མཆིས་པའི་འོད་ཟེར་དང་། རབ་ཏུ་འབར་བའི་
འོད་ཟེར་དང་། སྣང་བར་བགྱིད་པའི་འོད་ཟེར་དང་། མོས་པར་བགྱིད་པའི་འོད་ཟེར་དང་། ཕ་རོལ་དུ་ཕྱིན་པར་བགྱིད་པའི་འོད་ཟེར་དང་། ཐོགས་པ་མ་མཆིས་པའི་འོད་ཟེར་དང་། གཡོ་བ་མ་མཆིས་པའི་འོད་
ཟེར་དང་། དྲང་པོའི་འོད་ཟེར་དང་། དཔག་ཏུ་མ་མཆིས་པ་ལ་གནས་པའི་འོད་ཟེར་དང་། གཟུགས་ཀྱི་མཚན་གྱི་འོད་ཟེར་དང་། གཟུགས་ཀྱི་མཚན་སྣ་ཚོགས་ཀྱི་འོད་ཟེར་དང་། གཟུགས་ཀྱི་མཚན་ཚད་མ་མཆིས་
པའི་འོད་ཟེར་དང་། ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོའི་མཚན་ཉིད་ཀྱི་འོད་ཟེར་དང་། ཁ་དོག་ལེ་བརྒན་གྱི་མཚན་ཉིད་ཀྱི་འོད་ཟེར་དང་། ཆུ་ཤེལ་གྱི་ཁ་དོག་གི་མཚན་ཉིད་ཀྱི་འོད་ཟེར་དང་། 
ནམ་མཁའི་ཁ་དོག་གི་མཚན་ཉིད་ཀྱི་འོད་ཟེར་དང་། འདི་ལྟ་བུ་ལ་སོགས་པ་རྣམ་པ་སྣ་ཚོགས་ཀྱི་འོད་ཟེར་རེ་རེ་ཀུན་ཀྱང་ཁ་དོག་རྣམ་པ་ལྔའི་འོད་ཟེར་འདྲེས་པར་གྱུར་པ་སྟོན་པར་མཛད་པ་ནས་ཁ་དོག་སྔོན་པོ་དང་། སེར་པོ་དང་། 
དམར་པོ་དང་། དཀར་པོའི་དངོས་པོ་རེ་རེ་ཀུན་ཀྱང་འོད་ཟེར་ཁ་དོག་རྣམ་པ་སྣ་ཚོགས་ཚད་མ་མཆིས་པ་དཔག་ཏུ་མ་མཆིས་པ་དག་དང་འདྲེས་པར་གྱུར་པ་རབ་ཏུ་སྟོན་པར་མཛད་པའི་བར་དུ་བརྙེས་པར་གྱུར་ལགས། དེ་ནས་བཅོམ་
ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་ཚིགས་སུ་བཅད་དེ་བཀའ་སྩལ་པ། ང་ནི་བསམ་གྱིས་མི་ཁྱབ་པའི། །དགེ་བའི་ལས་ཀྱི་རྒྱུ་རྐྱེན་གྱིས། །རྨོངས་པ་རྣམས་ནི་རབ་སྤངས་པས། །འོད་ཟེར་སྣ་ཚོགས་གྲུབ་པ་ཡིན། །

79-1-227a

གཞན་ཡང་སྤྱོད་པ་སྣ་ཚོགས་ཀྱིས། །སངས་རྒྱས་ལམ་ལ་རབ་གནས་ཤིང་། །སྟོང་པ་བྱེད་མེད་ཤེས་རབ་ཀྱིས། །འདྲེས་པའི་འོད་ཟེར་བསྟན་པ་ཡིན། །ཇི་ལྟར་ཕྱི་རོལ་ཆོས་དག་ལ། །མཚན་ཉིད་བྱེ་བྲག་སྣ་
ཚོགས་སྣང་། །དེ་ནི་སྟོང་ཞིང་བདག་ཀྱང་མེད། །བྱེད་པ་མེད་ཅིང་སེམས་ཡིད་མེད། །གཞན་ཡང་ཇི་ལྟར་ནང་གི་ལུས། །སྟོང་ཞིང་བདག་མེད་བྱེད་མེད་ཀྱང་། །དེ་ལས་རྣམ་པ་སྣ་ཚོགས་ཀྱི། །སྒྲ་སྐད་དག་ནི་རབ་ཏུ་སྟོན། དེ་ལྟར་བྱེད་མེད་
དབང་གིས་ན། །ཁ་དོག་དཔག་མེད་འོད་བསྟན་ནས། །མོས་པ་དག་ནི་ཇི་བཞིན་དུ། །རེ་བ་དག་ནི་སྐོང་བར་མཛད། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་གཉིས་བསྐྱེད་ནས། །སོ་སོར་རབ་འབྲིང་ཐ་མ་ཡི། །བྱེ་
བྲག་ཡོད་པ་རབ་ཏུ་སྟོན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་གསུམ་བསྐྱེད་ནས། །སོ་སོར་རབ་འབྲིང་ཐ་མ་ཡི། །བྱེ་བྲག་ཡོད་པ་རབ་ཏུ་སྟོན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་བཞི་བསྐྱེད་ནས། །
སོ་སོར་རབ་འབྲིང་ཐ་མ་ཡི། །བྱེ་བྲག་ཡོད་པ་རབ་ཏུ་སྟོན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་ལྔ་འབྱུང་བ། །སོ་སོར་རབ་འབྲིང་ཐ་མ་ཡང་། །ལས་གཙང་ལས་ནི་སྐྱེས་པ་ཡིན། །རེས་འགའ་འོད་ཟེར་གཅིག་ལས་ནི། །
ཁ་དོག་རྣམ་པ་དྲུག་འབྱུང་བ། །སོ་སོར་རབ་འབྲིང་ཐ་མ་ཡང་། །ཐབས་མཁས་ལས་ནི་སྐྱེས་པ་ཡིན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་བདུན་འབྱུང་བ། །སོ་སོར་རབ་འབྲིང་ཐ་མ་ཡང་། །ལས་དགེ་ལས་ནི་སྐྱེས་པ་ཡིན། །རེས་འགའ་
འོད་ཟེར་གཅིག་ལས་ནི། །ཁ་དོག་རྣམ་པ་བརྒྱད་འབྱུང་བ། །སོ་སོར་རབ་འབྲིང་ཐ་མ་ཡང་། །དགེ་བའི་ཆོས་ལས་སྐྱེས་པ་ཡིན། །རེས་འགའ་འོད་ཟེར་གཅིག་ལས་ནི། །ཁ་དོག་རྣམ་པ་དགུ་འབྱུང་བ། །སོ་སོར་རབ་འབྲིང་ཐ་མ་ཡང་། །ཚོགས་དག་ལས་ནི་སྐྱེས་པ་ཡིན། །རེས་འགའ་
འོད་ཟེར་གཅིག་ལས་ནི། །ཁ་དོག་རྣམ་པ་བཅུ་འབྱུང་བ། །སོ་སོར་རབ་འབྲིང་ཐ་མ་ཡང་། །སྦྱིན་པ་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་ཉི་ཤུ་གང་འབྱུང་བ། །སོ་སོར་རབ་འབྲིང་ཐ་མ་ཡང་། །

79-1-227b

ཚུལ་ཁྲིམས་བསྲུངས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་སུམ་བཅུ་གང་འབྱུང་བ། །སོ་སོར་རབ་འབྲིང་ཐ་མ་ཡང་། །བཟོད་པ་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་
ལས་ནི། །ཁ་དོག་བཞི་བཅུ་གང་འབྱུང་བ། །སོ་སོར་རབ་འབྲིང་ཐ་མ་ཡང་། །བརྩོན་འགྲུས་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་ལྔ་བཅུ་གང་འབྱུང་བ། །སོ་སོར་རབ་འབྲིང་ཐ་མ་
ཡང་། །བསམ་གཏན་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་དྲུག་བཅུ་གང་འབྱུང་བ། །སོ་སོར་རབ་འབྲིང་ཐ་མ་ཡང་། །ཤེས་རབ་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་
ནི། །ཁ་དོག་བདུན་བཅུ་གང་འབྱུང་བ། །སོ་སོར་རབ་འབྲིང་ཐ་མ་ཡང་། །བྱམས་སེམས་ལས་ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བརྒྱད་བཅུ་གང་འབྱུང་བ། །སོ་སོར་རབ་འབྲིང་ཐ་
མ་ཡང་། །སྙིང་རྗེའི་སེམས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་དགུ་བཅུ་གང་འབྱུང་བ། །སོ་སོར་རབ་འབྲིང་ཐ་མ་ཡང་། །དགའ་བའི་སེམས་ལས་སྐྱེས་པ་ཡིན། །རེས་འགའ་དངོས་
པོ་གཅིག་ལས་ནི། །ཁ་དོག་རྣམ་བརྒྱ་གང་འབྱུང་བ། །སོ་སོར་རབ་འབྲིང་ཐ་མ་ཡང་། །བཏང་སྙོམས་སེམས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་སྟོང་ནི་གང་འབྱུང་བ། །སོ་
སོར་རབ་འབྲིང་ཐ་མ་ཡང་། །ཡོན་ཏན་སྟོན་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་ཁྲི་ནི་གང་འབྱུང་བ། །སོ་སོར་རབ་འབྲིང་ཐ་མ་ཡང་། །བསོད་ནམས་ཚོགས་ལས་སྐྱེས་པ་ཡིན། །
རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་གང་སྟོན་པ། །སོ་སོར་རབ་འབྲིང་ཐ་མ་ཡང་། །ཡིད་ཆེས་པ་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་གཉིས་སྟོན་པ། །

79-1-228a

སོ་སོར་རབ་འབྲིང་ཐ་མ་ཡང་། །རྗེས་སུ་ཡི་རང་ལས་སྐྱེས་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་གསུམ་སྟོན་པ། །སོ་སོར་རབ་འབྲིང་ཐ་མ་ཡང་། །ཤིན་དུ་སྦྱངས་ལས་སྐྱེས་
པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་བཞི་སྟོན་པ། །སོ་སོར་རབ་འབྲིང་ཐ་མ་ཡང་། །སངས་རྒྱས་གུས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་
ལྔ་སྟོན་པ། །སོ་སོར་རབ་འབྲིང་ཐ་མ་ཡང་། །ཆོས་ལ་གུས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་དྲུག་སྟོན་པ། །སོ་སོར་རབ་འབྲིང་ཐ་མ་ཡང་། །དགེ་འདུན་གུས་ལས་
སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་བདུན་སྟོན་པ། །སོ་སོར་རབ་འབྲིང་ཐ་མ་ཡང་། །ཚུལ་ཁྲིམས་གུས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་
དོག་བྱེ་བ་བརྒྱད་སྟོན་པ། །སོ་སོར་རབ་འབྲིང་ཐ་མ་ཡང་། །ཏིང་འཛིན་གུས་ལས་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་དགུ་སྟོན་པ། །སོ་སོར་རབ་འབྲིང་ཐ་མ་ཡང་། །ཀུན་བརྩེ་ལས་
ནི་སྐྱེས་པ་ཡིན། །རེས་འགའ་དངོས་པོ་གཅིག་ལས་ནི། །ཁ་དོག་བྱེ་བ་བཅུ་སྟོན་པ། །སོ་སོར་རབ་འབྲིང་ཐ་མ་ཡང་། །བག་ཡོད་ལས་ནི་སྐྱེས་པ་ཡིན། །གཞན་ཡང་སྤུ་ཁུང་གཅིག་ལས་ནི། །འོད་ཟེར་མང་པོ་
གང་སྟོན་པ། །འོད་ཟེར་སྣ་ཚོགས་མིང་དེ་དག །དེང་འདིར་ཁྱོད་ལ་བཤད་པར་བྱ། །ང་ལ་འོད་ཟེར་གཅིག་ཡོད་དེ། །དེ་མིང་སྤྲིན་གཙང་སྣང་ཞེས་བྱ། །འོད་ཟེར་དེ་ནི་དགེ་བའི་རྩ། །དཔག་མེད་བསགས་ལས་སྐྱེས་
པ་ཡིན། །འདི་ལྟར་འདས་པའི་དུས་ཀྱི་ཚེ། །སེམས་ཅན་རྣམ་པ་ཇི་སྙེད་པ། །ནད་རྣམས་སྣ་ཚོགས་བཏབ་པ་ལས། །སྙིང་བརྩེའི་སེམས་ནི་རབ་བསྐྱེད་ནས། །སྨན་ནི་མང་པོ་རབ་བཏང་ཞིང་། །དེ་དག་སོས་

79-1-228b

པར་བྱས་པ་ཡི། །རྒྱུ་དང་རྐྱེན་ནི་འདི་ཡི་ཕྱིར། །དེ་འདྲའི་འོད་ཟེར་ཐོབ་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་མིག་ཅེས་བྱ། །མར་མེས་སངས་རྒྱས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །
ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་རྣ་ཞེས་བྱ། །སྒྲ་དབྱངས་དག་གིས་མཆོད་བྱས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་སྣ་ཞེས་བྱ། །སྤོས་ཆུ་དག་གིས་མཆོད་
བྱས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ལྕེ་ཞེས་བྱ། །རོ་མཆོག་དག་གིས་མཆོད་བྱས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་
དག་ལུས་ཤེས་བྱ། །འདི་ལྟར་གོས་ཀྱིས་མཆོད་བྱས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་སེམས་ཤེས་བྱ། །རྟག་ཏུ་སངས་རྒྱས་ཡིད་ཆེས་པས། །དེ་ཕྱིར་དེ་
ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་གཟུགས་ཤེས་བྱ། །སངས་རྒྱས་གཟུགས་ནི་བྲིས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་སྒྲ་ཞེས་
བྱ། །རྟག་ཏུ་ཆོས་ལ་བསྔགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་དྲི་ཞེས་བྱ། །རྟག་ཏུ་དགེ་འདུན་གུས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་
དེ། །དེ་མིང་རྣམ་དག་རོ་ཞེས་བྱ། །ཡིད་བཞིན་དུ་ནི་སྦྱིན་བཏང་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་རེག་ཅེས་བྱ། །བྱུག་སྤོས་དག་གིས་མཆོད་པས་ན། །དེ་ཕྱིར་དེ་ལས་སྐྱེས་
པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཆོས་ཤེས་བྱ། །ཆོས་རྣམས་ཡོངས་སུ་བཟུང་བས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ས་ཞེས་བྱ། །སངས་རྒྱས་དགེ་

79-1-229a

འདུན་ས་ཕྱགས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཆུ་ཞེས་བྱ། ཆུ་མིག་ཁྲོན་པར་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་
ཡང་ཡོད་དེ། །དེ་མིང་རྣམ་དག་མེ་ཞེས་བྱ། །མེ་འཛིན་མཆོད་ཅིང་སྦྱིན་བཏང་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་རླུང་ཞེས་བྱ། །རླུང་ཡབ་ཐོགས་ནས་
མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཕུང་ཞེས་བྱ། །ལུས་ཀྱིས་སངས་རྒྱས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །
དེ་མིང་རྣམ་དག་ཁམས་ཤེས་བྱ། །རྟག་ཏུ་བྱམས་པས་སེམས་བསྒོམས་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་བདེན་ཞེས་བྱ། །རྟག་ཏུ་བརྫུན་ནི་སྤངས་པས་ན། །དེ་ཕྱིར་དེ་
ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཞི་ཞེས་བྱ། །རྟག་ཏུ་སྦྱིན་པ་བཏང་བས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་སྒྲ་ཞེས་བྱ། །སངས་རྒྱས་
རྣམས་ཀྱིས་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་དྲན་ཞེས་བྱ། །ཏིང་འཛིན་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་
ཡང་ཡོད་དེ། །དེ་མིང་རྣམ་དག་སྤོབས་ཤེས་བྱ། །ཀུན་འཛིན་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་འཐུན་ཞེས་བྱ་བ་ཡིན། །རྩོད་པ་དག་ནི་བསྡུམས་
པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་དོན་རབ་བསྟན་ཅེས་བྱ། །སྟོང་ཉིད་རབ་ཏུ་རྟོགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཁ་དོག་སྔོ་

79-1-229b

ཞེས་བྱ། །པད་མ་སྔོན་པོས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཁ་དོག་སེར་ཞེས་བྱ། །ཙམ་པ་ཀས་ནི་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །
ང་ལ་འོད་ཟེར་ཡང་ཡོད་དེ། །དེ་མིང་ཁ་དོག་དམར་ཞེས་བྱ། །མུ་ཏིག་དག་གིས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཁ་དོག་དཀར་ཞེས་བྱ། །གསེར་གྱི་
གདུགས་ཀྱིས་མཆོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཡོན་ཏན་མཆོག་ཅེས་བྱ། །ཚོན་སྣ་མང་པོས་བརྒྱན་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་
འོད་ཟེར་ཡང་ཡོད་དེ། །དེ་མིང་ཀླུའི་གཟི་ཞེས་བྱ། །ཀླུ་ཡི་བ་དན་གྱིས་མཆོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་གླང་པོའི་གཟི་ཞེས་བྱ། །གླང་པོའི་བ་དན་གྱིས་མཆོད་
པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་སེང་གེ་རྒྱལ་ཞེས་བྱ། །སེང་གེའི་བ་དན་གྱིས་མཆོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་
མིང་ཁྱུ་མཆོག་རྒྱལ་ཞེས་བྱ། །ཁྱུ་མཆོག་བ་དན་གྱིས་མཆོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་རྣམ་དག་ཟླ་བ་ཡིན། །སངས་རྒྱས་མཆོད་རྟེན་ཕྱགས་པས་
ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཀླུ་གདུལ་ཞེས་བྱའོ། །དར་གྱི་ལྡ་ལྡི་ཕུལ་བས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་གནོད་
སྦྱིན་འདུལ་ཞེས་བྱ། །སོ་སོར་ལེགས་པར་བརྟགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་བུད་མེད་རྟོགས་ཞེས་བྱ། །བུད་མེད་མཚན་མ་སྤངས་པས་ན། །

79-1-230a

དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་སྐྱེས་པ་རྟོགས་ཤེས་བྱ། །སྐྱེས་པའི་མཚན་མ་སྤངས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །
དེ་མིང་རྡོ་རྗེ་སྟོབས་ཤེས་བྱ། །ལས་ཀྱི་ཤེས་པ་དག་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་སྟོང་པ་སྟོན་ཞེས་བྱ། འཇིག་རྟེན་རྣམ་སྨིན་སྟོན་པས་ན། །དེ་ཕྱིར་དེ་ལས་སྐྱེས་
པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཡང་དག་རྟོགས་ཤེས་བྱ། །ཕྱིན་ཅི་ལོག་ནི་སྤངས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །སངས་རྒྱས་གསུང་ནི་སྟོན་ཞེས་བྱ། །
ཆོས་དབྱིངས་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །སྐྱོན་རྣམས་སྤངས་པ་ཞེས་བྱའོ། །མོས་པའི་བསྔགས་པ་བརྗོད་པས་ན། །དེ་ཕྱིར་དེ་ལས་
སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །བཀོད་པ་ཀུན་ཏུ་སྣང་ཞེས་བྱ། །མར་མེ་ཕུལ་བའི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་སྲེད་པ་སྤངས་
ཤེས་བྱ། །ཏིང་འཛིན་ཤེས་རབ་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་བག་ཆགས་སྤངས་ཤེས་བྱ། །སྔོན་མཐའི་ཤེས་པ་སྤངས་པས་ན། །དེ་ཕྱིར་
དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་ཆགས་པ་སྤངས་ཤེས་བྱ། །མི་སྐྱེ་ཡེ་ཤེས་བསྔགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །འགྲོ་བ་
རྣམས་ནི་སྤངས་ཤེས་བྱ། །ཟག་ཟད་ཡེ་ཤེས་བསྔགས་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་གནས་སྤངས་ཞེས་བྱ་སྟེ། །སྡུག་བསྔལ་ཤེས་པ་བསྔགས་

79-1-230b

པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །སངས་རྒྱས་ཆོས་འཕྲུལ་ཞེས་བྱའོ། །རྫུ་འཕྲུལ་མཐུ་ཡི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་
ཟེར་ཡང་ཡོད་དེ། །དེ་མིང་གཟུགས་མེད་སྟོན་ཅེས་བྱ། །རྫུ་འཕྲུལ་རྐང་གི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དགེ་བའི་གྲོགས་ལ་མོས་ཤེས་བྱ། །
རྟོགས་པའི་རང་བཞིན་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །མིག་གི་སྔོན་མཐའ་ཞེས་བྱའོ། །མིག་གི་སྔོན་མཐའ་བསྔགས་བརྗོད་པས། །དེ་ཕྱིར་དེ་
ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །མིག་གི་མཐའ་ཟད་ཅེས་བྱའོ། །མིག་ཟད་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་སྲིད་པའི་
མཐའ་ཞེས་བྱ། །སྲིད་མེད་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་འཇིག་པ་མེད་ཅེས་བྱ། །འགོག་པ་མེད་ཀྱི་བསྔགས་བརྗོད་པས། །དེ་ཕྱིར་
དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་མཐའ་མེད་ཅེས་བྱའོ། །མཐའ་མེད་བསྔགས་པ་བརྗོད་པས་ན། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །
དེ་མིང་མཚན་མ་མེད་ཅེས་བྱ། །འདུས་མ་བྱས་ཀྱི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་འགྱུར་བ་མེད་ཅེས་བྱ། །ཁྱད་པར་མེད་པའི་བསྔགས་
བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་འགྱུར་བ་མེད་ཅེས་བྱ། །ཞེན་པ་མེད་པའི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །

79-1-231a

ང་ལ་འོད་ཟེར་ཡང་ཡོད་དེ། །དེ་མིང་འབྱུང་བ་མེད་ཅེས་བྱ། །སྐྱེ་བ་མེད་པའི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་ཡང་ཡོད་དེ། །དེ་མིང་སྐྱེ་བ་མེད་ཅེས་བྱ། །
འབྱུང་བ་མེད་པའི་བསྔགས་བརྗོད་པས། །དེ་ཕྱིར་དེ་ལས་སྐྱེས་པ་ཡིན། །ང་ལ་འོད་ཟེར་བསྟན་མེད་ཅེས་བྱ་ཡོད། །སྐྱེ་དགུ་རྣམས་ནི་ཡོངས་སུ་སྨིན་པར་བྱེད། །ང་ལ་འོད་ཟེར་ཆོས་ཉིད་ཅེས་བྱ་ཡོད། །
སངས་རྒྱས་ཞིང་ནི་བྱེ་བ་གཡོ་བར་བྱེད། །ང་ལ་འོད་ཟེར་བདུད་འདུལ་ཞེས་བྱ་ཡོད། །འོད་ཟེར་དེ་ཡི་གཟིས་ནི་བདུད་སྐྲག་བྱེད། །ང་ལ་འོད་ཟེར་བསོད་ནམས་རྒྱལ་མཚན་ཡོད། །དེ་ཡི་མིང་འཛིན་དག་ནི་གནོད་པ་སྤོང་། །
ང་ལ་འོད་ཟེར་སྟོབས་ལྡན་རྒྱལ་མཚན་ཡོད། །དེ་ཡི་མིང་འཛིན་དག་ནི་དགྲ་རབ་སྤོང་། །ང་ལ་འོད་ཟེར་རབ་ཞི་རྒྱལ་མཚན་ཡོད། །དེ་ཡི་མིང་འཛིན་དག་ནི་འདོད་ཆགས་སྤོང་། །ང་ལ་འོད་ཟེར་བསམ་གཏན་རྒྱལ་
མཚན་ཡོད། །དེ་ཡི་མིང་འཛིན་དག་ནི་ལོག་སྤྱོད་སྤོང་། །ང་ལ་འོད་ཟེར་གྲགས་པའི་རྒྱལ་མཚན་ཡོད། །དེ་ཡི་མིང་འཛིན་དག་ནི་གྲགས་པ་འཐོབ། །ང་ལ་འོད་ཟེར་ཡིད་དགའ་རྒྱལ་མཚན་ཡོད། །དེ་ཡི་མིང་
འཛིན་དག་ནི་མྱ་ངན་མེད། །ང་ལ་འོད་ཟེར་སྡོམ་གཙང་རྒྱལ་མཚན་ཡོད། །དེ་ཡི་མིང་འཛིན་ཚུལ་ཁྲིམས་འཆལ་པ་སྤོང་། །ང་ལ་འོད་ཟེར་སྤོས་མཆོག་རྒྱལ་མཚན་ཡོད། །དེ་ཡི་མིང་འཛིན་མི་གཙང་མེད་པར་
འགྱུར། །ང་ལ་འོད་ཟེར་ཆོས་ཟབ་ཅེས་བྱ་ཡོད། །དེ་ཡི་མིང་འཛིན་ཐེ་ཚོམ་མེད་པར་འགྱུར། །ང་ལ་འོད་ཟེར་གནས་པ་མེད་པ་ཡོད། །དེ་ཡི་མིང་འཛིན་སྲེད་པ་སྤོང་བར་འགྱུར། །ང་ལ་འོད་ཟེར་རྟོག་བྲལ་ཞེས་བྱ་
ཡོད། །དེ་ཡི་མིང་འཛིན་འཛིན་པ་མེད་པར་འགྱུར། །ང་ལ་འོད་ཟེར་རི་རབ་ཅེས་བྱ་ཡོད། །དེ་ཡི་མིང་འཛིན་གཡོ་བ་མེད་པར་འགྱུར། །ང་ལ་འོད་ཟེར་གསང་བའི་སྤྱོད་པ་ཡོད། །དེ་ཡི་མིང་འཛིན་མངོན་པར་ཞེན་པ་མེད། །

79-1-231b

ང་ལ་འོད་ཟེར་རྣམ་གྲོལ་སྤྱོད་པ་ཡོད། །དེ་ཡི་མིང་འཛིན་འཆིང་བ་མེད་པར་འགྱུར། །ང་ལ་འོད་ཟེར་ལེགས་འདུལ་ཞེས་བྱ་ཡོད། །དེ་ཡི་མིང་འཛིན་གཉེན་ངེས་ཐོབ་པར་འགྱུར། །ང་ལ་འོད་ཟེར་མི་གཡོ་ཞེས་བྱ་
ཡོད། །དེ་ཡི་མིང་འཛིན་འདོད་ཆགས་ཞེན་སྤོང་འགྱུར། །ང་ལ་འོད་ཟེར་རབ་འདུལ་ཞེས་བྱ་ཡོད། །དེ་ཡི་མིང་འཛིན་ཚུལ་ཁྲིམས་རྫོགས་པར་འགྱུར། །ང་ལ་འོད་ཟེར་དགེ་མང་སྤྱོད་པ་ཡོད། །དེ་ཡི་མིང་འཛིན་གོས་པ་མེད་
པར་འགྱུར། །ང་ལ་འོད་ཟེར་ཕན་མང་བྱེད་པ་ཡོད། །གང་གིས་མིང་ཐོས་ཉེས་པ་རྣམ་སྤོང་འགྱུར། །ང་ལ་འོད་ཟེར་མཆོག་ཤེས་མཐོང་བ་ཡོད། །གང་གིས་མིང་ཐོས་རྨོངས་པ་མེད་པར་འགྱུར། །ང་ལ་འོད་ཟེར་
ཕན་ཚོལ་ཞེས་བྱ་ཡོད། །གང་གིས་མིང་ཐོས་ཞེ་སྡང་མེད་པར་འགྱུར། །ང་ལ་འོད་ཟེར་སེམས་དགའ་བྱེད་པ་ཡོད། །གང་གིས་མིང་ཐོས་བདེ་བ་ཐོབ་པར་འགྱུར། །ང་ལ་འོད་ཟེར་གདུང་བ་མེད་པ་ཡོད། །གང་གིས་
མིང་འཛིན་སྟོང་ཉིད་རྟོགས་པར་འགྱུར། །ང་ལ་འོད་ཟེར་ངོ་བོ་ཉིད་མེད་ཡོད། །གང་གིས་མིང་འཛིན་སྤྲོས་ལས་འདའ་བར་འགྱུར། །ང་ལ་འོད་ཟེར་རྟེན་པ་མེད་པ་ཡོད། །གང་གིས་མིང་འཛིན་གཡོ་བ་མེད་པར་
འགྱུར། །ང་ལ་འོད་ཟེར་རྨོངས་དང་བྲལ་བ་ཡོད། །གང་གིས་མིང་འཛིན་སོམ་ཉི་མེད་པར་འགྱུར། །ང་ལ་འོད་ཟེར་གནས་མེད་ཅེས་བྱ་ཡོད། །གང་གིས་མིང་འཛིན་གཏི་མུག་མུན་པ་སྤོང་། །ང་ལ་འོད་ཟེར་
ནང་ལུས་སྐྱོ་བ་ཡོད། །གང་གིས་མིང་འཛིན་དེ་ནི་ལེན་མི་འགྱུར། །ང་ལ་འོད་ཟེར་འཛིན་མེད་ཅེས་བྱ་ཡོད། །གང་གིས་མིང་འཛིན་ཡི་གེ་ཚིག་འབྲུ་སྤོང་། །ང་ལ་འོད་ཟེར་རྨོངས་པ་མེད་པ་ཡོད། །གང་གིས་མིང་འཛིན་
བརྗོད་དང་བྲལ་བར་འགྱུར། །ང་ལ་འོད་ཟེར་འགྲོ་མེད་ཅེས་བྱ་ཡོད། །གང་གིས་མིང་འཛིན་མ་འོངས་ཤེས་པར་འགྱུར། །ང་ལ་འོད་ཟེར་ཀུན་མཐའ་ཞེས་བྱ་ཡོད། །གང་གིས་མིང་འཛིན་འདས་པ་ཤེས་པར་འགྱུར། །

79-1-232a

ང་ལ་འོད་ཟེར་མཚུངས་མེད་ཅེས་བྱ་ཡོད། །གང་གིས་མིང་འཛིན་ཟག་མེད་རྟོགས་པར་འགྱུར། །ང་ལ་འོད་ཟེར་འཕགས་ཐོབ་ཅེས་བྱ་ཡོད། །གང་གིས་མིང་འཛིན་མཆོག་གྱུར་ཤེས་པར་འགྱུར། །ང་ལ་འོད་ཟེར་
དྲི་མ་མེད་པ་ཡོད། །གང་གིས་མིང་འཛིན་མངོན་པར་ཞེན་པ་སྤོང་། །ང་ལ་འོད་ཟེར་རྡུལ་སྤོང་ཞེས་བྱ་ཡོད། །གང་གིས་མིང་འཛིན་མུན་པ་མེད་པར་འགྱུར། །ང་ལ་འོད་ཟེར་སྲེད་པ་མེད་པ་ཡོད། །གང་གིས་མིང་འཛིན་རྟེན་
དག་སྤོང་བར་འགྱུར། །ང་ལ་འོད་ཟེར་མཆོག་རྒྱལ་ཞེས་བྱ་ཡོད། །གང་གིས་མིང་འཛིན་ཕ་རོལ་སྨྲ་བ་གནོན། །ང་ལ་འོད་ཟེར་དར་ལ་བབ་པ་ཡོད། །གང་གིས་མིང་འཛིན་སྤྱོད་པ་དྲུག་འགྲུབ་འགྱུར། །ང་ལ་འོད་ཟེར་མཆོག་
བཙུན་ཞེས་བྱ་ཡོད། །གང་གིས་མིང་འཛིན་ཤེས་པ་ཐོགས་མེད་འགྱུར། །ང་ལ་འོད་ཟེར་མྱུར་བ་ཞེས་བྱ་ཡོད། །གང་གིས་མིང་འཛིན་དགེ་སློང་མཆོག་འགྲུབ་འགྱུར། །ང་ལ་འོད་ཟེར་མཚན་ལྡན་ཞེས་བྱ་ཡོད། །
གང་གིས་མིང་འཛིན་ཆོས་ཟབ་རྟོགས་པར་འགྱུར། །ང་ལ་འོད་ཟེར་མཚན་མ་མེད་པ་ཡོད། །གང་གིས་མིང་འཛིན་ང་རྒྱལ་སྤོང་བར་འགྱུར། །ང་ལ་འོད་ཟེར་སྐྱེ་མེད་ཅེས་བྱ་ཡོད། །གང་གིས་མིང་འཛིན་འཐོབ་མེད་རྙེད་པར་
འགྱུར། །ང་ལ་འོད་ཟེར་སངས་རྒྱས་དྲན་པ་ཡོད། །དེ་བཞིན་གཤེགས་པ་རྣམས་ཀྱིས་རབ་ཏུ་བསྔགས། །སངས་རྒྱས་མང་ལ་སྤྱོད་པ་རྣམས་བསྒྲུབས་པས། །འདི་ལྟ་བུ་ཡི་འོད་ཟེར་གྲུབ་པ་ཡིན། །
སངས་རྒྱས་སྐུ་ལས་བྱུང་བའི་འོད་ཟེར་རྣམས། །རྡུལ་ཕྲན་གྲངས་ནི་བརྒྱ་སྟོང་བྱེ་སྙེད་མངའ། །དེ་བཞིན་ཞིང་ནི་ཚད་མེད་བྱེ་སྙེད་མངའ། །དེ་ཡི་གྲངས་ནི་རྒྱ་མཚོའི་བྱེ་མ་སྙེད། །རྡུལ་དེ་སྙེད་ཀྱི་འོད་ཟེར་རྣམས་ཀྱང་ནི། །སོ་
སོ་ལ་ཡང་འཁོར་ནི་མང་པོ་ཡོད། །འོད་ཟེར་དེས་ནི་སངས་རྒྱས་མེད་ཞིང་དུ། །དེ་བཞིན་གཤེགས་པའི་རྣམ་དག་སྐུར་སྤྲུལ་ནས། །ཤིན་ཏུ་ཟབ་མོའི་ཆོས་ནི་སྟོན་མཛད་པས། །སེམས་ཅན་བཟོད་ལ་རབ་ཏུ་འགོད་པར་

79-1-232b

མཛད། །ང་ལ་འོད་ཟེར་སངས་རྒྱས་ཞེས་བྱ་ཡོད། །སེམས་ཅན་སངས་རྒྱས་ལམ་ལ་གནས་པར་མཛད། །ང་ལ་འོད་ཟེར་ཆོས་ཤེས་བྱ་བ་ཡོད། །ཤིན་དུ་རྣམ་དག་གསལ་བྱེད་དྲི་མ་མེད། །ང་ལ་འོད་ཟེར་དགེ་འདུན་
ཞེས་བྱ་ཡོད། །དེ་བཞིན་གཤེགས་པ་རྣམས་ཀྱིས་རབ་ཏུ་བསྔགས། །ང་ལ་འོད་ཟེར་རྣམ་དག་ཅེས་བྱ་ཡོད། །འོད་ཟེར་དེ་ནི་ཁྱད་འཕགས་རྙེད་པར་དཀའ། །ང་ལ་འོད་ཟེར་པད་མ་ཞེས་བྱ་ཡོད། །སེམས་ཅན་ཕན་
འདོགས་ཡོངས་སུ་སྨིན་པར་བྱེད། །ང་ལ་འོད་ཟེར་ཚངས་པ་ཞེས་བྱ་ཡོད། །ཁ་ཅིག་བརྒྱ་བྱིན་ཡང་ན་ལྷ་ཞེས་བྱ། །ཟླ་བ་ཀླུ་དང་གནོད་སྦྱིན་ཞེས་ཀྱང་བྱ། །ལྷ་མ་ཡིན་དང་ནམ་མཁའ་ལྡིང་ཞེས་བྱ། །ཁ་ཅིག་རྒྱལ་པོ་
བུད་མེད་ཞེས་ཀྱང་བྱ། །ཁ་ཅིག་བུ་མོ་ཁ་ཅིག་ཁྱེའུ་ཞེས་བྱའོ། །དེ་ལྟར་འོད་ཟེར་སྣ་ཚོགས་མང་པོ་རྣམས། །སོ་སོར་དགེ་ཆོས་དག་གིས་སྐལ་མཚུངས་འདུལ། །འཁོར་ནི་ཚད་མེད་བྱེ་བ་སྙེད་དག་ཀྱང་། །ཐམས་
ཅད་བྱང་ཆུབ་ཡོངས་སུ་སྨིན་པར་བྱེད། །ང་ལ་འོད་ཟེར་ཤེས་རབ་ཅེས་བྱ་ཡོད། །ཁ་ཅིག་ཚུལ་ཁྲིམས་ཁ་ཅིག་མིང་བྱམས་པ། །ཁ་ཅིག་སྙིང་རྗེ་དགའ་དང་སྒྲོན་ཞེས་བྱ། །ཁ་ཅིག་བྱུག་སྤོས་ཁ་ཅིག་རོལ་མོ་སྒྲ། །
འདི་ལྟ་བུ་ལ་སོགས་པའི་འོད་ཟེར་རྣམས། །སྔོན་གྱི་སྤྱོད་པའི་རྗེས་སུ་འཐུན་པར་ནི། །སྐྱེ་དགུའི་རྣམ་པ་ཚད་མེད་ཡོངས་བསྡུས་པས། །དེས་ན་འོད་ཟེར་འདི་དག་རྫོགས་པ་ཡིན། །ང་ལ་འོད་ཟེར་གཙོ་བོ་
ཞེས་བྱ་ཡོད། །དེ་བཞིན་གཤེགས་པ་རྣམས་ཀྱིས་རབ་ཏུ་བསྔགས། །སངས་རྒྱས་བསྟན་པ་རྣམས་ལ་རྟག་གུས་པས། །དེས་ན་འོད་ཟེར་འདི་ནི་རྫོགས་པ་ཡིན། །སངས་རྒྱས་སྤྱན་གྱིས་སེམས་ཅན་
གྲངས་གཟིགས་ནས། །སྤུ་ཁུང་ཀུན་ནས་འོད་ཟེར་སྣ་ཚོགས་གཏོང་། །འོད་ཟེར་མང་པོ་དེ་དག་རེ་རེ་ཡང་། །སོ་སོར་འཁོར་མང་དག་གིས་རབ་ཏུ་བསྐོར། །སེམས་ཅན་རྣམས་ཀྱི་མོས་པ་ཇི་བཞིན་དུ། །སངས་རྒྱས་

79-1-233a

འོད་ཟེར་གཏོང་ཞིང་སྨྱིན་པར་མཛད། །གང་གིས་འོད་ཟེར་བསྟན་པ་འདི་ཐོས་ནས། །རབ་ཏུ་དགའ་ཞིང་མོས་པར་གང་བྱེད་པ། །དེ་སྔོན་སངས་རྒྱས་མང་པོ་དག་ལས་ནི། །མདོ་སྡེ་འདི་ནི་ཐོས་པར་གྱུར་
པ་ཡིན། །ང་ལ་འོད་ཟེར་ཁྱད་པར་འཕགས་པ་ཡོད། །འཁོར་ནི་བྱེ་བ་བརྒྱད་བཅུ་གྲངས་སྙེད་ཡོད། །སྔོན་གྱི་སངས་རྒྱས་དག་ལ་ཚིགས་བཅད་གཅིག །བསྔགས་པས་དེ་ཕྱིར་འོད་ཟེར་འདི་གྲུབ་པོ། །ང་ལ་འོད་ཟེར་
མྱ་ངན་མེད་པ་ཡོད། །འཁོར་ནི་ཁྲག་ཁྲིག་བརྒྱད་བཅུ་སྙེད་ཡོད་དེ། །དེ་བཞིན་གཤེགས་པའི་བསྟན་པ་གཅིག་བཟུང་བས། །དེ་ཕྱིར་འོད་ཟེར་འདི་ནི་གྲུབ་པ་ཡིན། །ང་ལ་འོད་ཟེར་རྣམ་དག་མཆོག་ཡོད་དེ། །འཁོར་ནི་བྱེ་བ་
བརྒྱད་བཅུ་གྲངས་སྙེད་ཡོད། །ཏིང་འཛིན་གཅིག་ནི་ཡོངས་སུ་བཟུང་བས་ན། །དེ་ཕྱིར་འོད་ཟེར་འདི་ནི་གྲུབ་པ་ཡིན། །འདས་པའི་དུས་ཀྱི་སངས་རྒྱས་མཚན། །ཁྱད་པར་འཕགས་པ་ཞེས་བྱ་བྱུང་། །སངས་རྒྱས་དེས་ནི་འཇིག་
རྟེན་ན། །སྐུ་ཚེའི་ཚད་ནི་མེད་པར་བཞུགས། །དང་པོ་མངོན་པར་སངས་རྒྱས་ཚེ། །ཆོས་བསྟན་འཁོར་དུ་འདུས་པ་ཡི། །གྲངས་ནི་ཁྲག་ཁྲིག་བརྒྱད་བཅུ་སྙེད། །དེ་ཉིད་དུ་ནི་འདུས་པར་གྱུར། །དེ་ཡི་ཚེ་ན་འཛམ་བུ་ཡི། །གླིང་ཆེན་དག་
ནི་འདི་དག་ཏུ། །ཡུལ་གྱི་རྒྱལ་པོ་དེ་ཡི་མིང་། །སྒྲ་ལ་མོས་ཤེས་བྱ་བ་བྱུང་། །རྒྱལ་པོ་ཆེན་པོ་དེ་ལ་ནི། །བུ་ཕོ་དག་ནི་ལྔ་བརྒྱ་ཡོད། །བྱེད་བཞིན་དག་ནི་སྡུག་མཛེས་པས། །མཐོང་བ་དག་ནི་དགའ་བར་འགྱུར། །དེ་ཡི་ཚེ་ན་རྒྱལ་པོའི་ཡབ། །
གཟི་བྱིན་རང་དབང་རབ་ལྡན་ཞིང་། །དཀོན་མཆོག་དག་ནི་གསུམ་པོ་ལ། །ཤིན་དུ་དང་བ་སྐྱེས་པར་གྱུར། །རྒྱལ་པོ་དེ་ལ་བསྐྱེད་མོས་ཚལ། །མཆོག་ཏུ་གྱུར་པ་ཇི་སྙེད་པ། །དེ་དག་ཐམས་ཅད་གུས་པས་ནི། །བཅོམ་ལྡན་དེ་ལ་རབ་ཏུ་
ཕུལ། །བསྐྱེད་མོས་ཚལ་ནི་དེ་དག་ཏུ། །འཆག་ས་དག་ནི་ཇི་སྙེད་པ། །དེ་དག་ཐམས་ཅད་ཀུན་ཏུ་ནི། །ལྗོན་ཤིང་ཙམ་པ་ཀ་དག་དང་། །ལྗོན་ཤིང་ནྱ་གྲོ་དྷ་དག་དང་། །ལྗོན་ཤིང་ཀྱེན་ཤུ་ཀ་དང་ནི། །ལྗོན་ཤིང་ཨུ་དུམ་བ་ར་དང་།།

79-1-233b

ལྗོན་ཤིང་པ་ལ་ས་ཏྲ་དང་། །ལྗོན་ཤིང་ཤི་རི་ཤ་དག་དང་། །ལྗོན་ཤིང་མྱ་ངན་ཚངས་ལ་སོགས། །དེ་དག་གྲངས་ནི་སོ་སོར་ཡང་། །བྱེ་བ་ཕྲག་ནི་བརྒྱད་བཅུ་ཡོད། །ལྗོན་ཤིང་མང་པོ་དེ་དག་ཀྱང་། །དབྱར་དང་
དགུན་ནི་འདྲ་བར་ཡང་། །མེ་ཏོག་འབྲས་བུ་ཡལ་ག་དག །ཁ་དོག་དག་ནི་གསལ་ཞིང་རྒྱས། །དྲི་མཆོག་དག་པ་རབ་འབྱུང་ཞིང་། །དེ་བཞིན་གཤེགས་པའི་སྐུ་ལ་འཐུལ། །དགེ་སློང་དག་ནི་ཇི་སྙེད་པ། །ལུས་ཀྱི་ཁ་
དོག་གསེར་དང་འདྲ། །དེ་དག་ཐམས་ཅད་ཀུན་ཀྱང་ནི། །ལྗོན་ཤིང་དག་ནི་དེ་དྲུང་དུ། །འདུག་ནས་རབ་ཏུ་བརྩོན་པས་ན། །གཟུངས་ནི་རབ་ཏུ་ཐོབ་པར་གྱུར། །དེ་ཚེ་དེ་བཞིན་གཤེགས་པ་དེ། །རྒྱལ་པོ་ཡབ་དང་སྲས་རྣམས་
དང་། །གཞན་ཡང་འཁོར་ནི་མང་པོ་ལ། །ཤིན་དུ་ཐུགས་ནི་བརྩེ་བའི་ཕྱིར། །རྣམ་པར་ངེས་པའི་འོད་ཟེར་མདོ། །དེ་དག་ལ་ནི་རབ་ཏུ་བསྟན། །རྒྱལ་པོ་དེས་ནི་ཐོས་གྱུར་ནས། །སེམས་ནི་རབ་ཏུ་དགའ་བར་གྱུར། །ཚིགས་སུ་བཅད་
པ་ཚད་མེད་པས། །དེ་བཞིན་གཤེགས་པའི་བསྔགས་པ་བརྗོད། །གཞན་ཡང་རྒྱལ་པོ་ཆེན་པོ་དེས། །རིན་པོ་ཆེ་ཡི་གདུགས་དམ་པ། །བྱེ་བ་ཕྲག་ནི་བརྒྱད་བཅུ་སྙེད། །བཅོམ་ལྡན་དེ་ལ་རབ་ཏུ་ཕུལ། །རིན་ཆེན་གདུགས་
ནི་རེ་རེ་ལ། །ཡིད་བཞིན་ནོར་བུའི་དྲ་བ་དག །མཐའ་མ་འཁོར་བར་རབ་ཏུ་བརྒྱན། །ཡིད་བཞིན་ནོར་བུ་རིན་པོ་ཆེ། །དེ་དག་རེ་རེའི་རིན་ཐང་ཡང་། །འཛམ་བུའི་གསེར་ནི་བཙོ་མ་དག །སྲང་ནི་བྱེ་བ་བརྒྱད་བཅུ་རི། །རིན་ཆེན་གདུགས་
ནི་རེ་རེ་ཡང་། །ཡིད་བཞིན་ནོར་བུ་རིན་པོ་ཆེ། །བྱེ་བ་ཕྲག་ནི་བརྒྱད་བཅུ་སྙེད། །ཕྲེང་བ་དག་ཏུ་བྱས་པར་གྱུར། །ཡིད་བཞིན་རིན་ཆེན་དེ་དག་ཀྱང་། །ཁ་དོག་དག་ནི་རབ་གསལ་བས། །ཉིན་མཚན་དག་ནི་མེད་པར་ཡང་། །
རྟག་ཏུ་འོད་ཟེར་རབ་ཏུ་གཏོད། །འོད་ཟེར་དེ་དག་རེ་རེས་ཀྱང་། །དཔག་ཚད་བརྒྱ་ནི་སྣང་བར་བྱེད། །འོད་ཟེར་དེ་དག་རབ་གསལ་བས། །ཉི་ཟླ་དག་ནི་ཟིལ་གྱིས་གནོན། །གཞན་ཡང་རིན་ཆེན་གདུགས་དེ་དག །

79-1-234a

སེང་གེ་རིན་ཆེན་ཆུན་འཕྱང་ནི། །བྱེ་བ་ཕྲག་ནི་བརྒྱད་བཅུ་དང་། །གསེར་སྐུད་རིན་ཆེན་ཕྲེང་བ་ཡང་། །བྱེ་བ་ཕྲག་ནི་བརྒྱད་བཅུ་དག །ངོས་བཞི་དག་ནི་རབ་ཏུ་བརྒྱན། །གཞན་ཡང་རིན་ཆེན་དམ་པ་ནི། །འདི་ལྟར་རྣམ་
པ་སྣ་ཚོགས་ཀྱིས། །མུ་ཏིག་རིན་ཆེན་དྲ་བ་དག །སྤེལ་མ་དག་ཏུ་རྣམ་པར་བརྒྱན། །འདི་ལྟ་བུ་ཡི་གདུགས་དག་གིས། །བསྐྱེད་མོས་ཚལ་ནི་ཀུན་ཏུ་གཡོགས། །དེ་ཡི་སྟེང་དུ་གཞན་ཡང་ནི། །པད་མ་སུ་མ་ན་དང་ནི། །
པད་མ་ཨ་ཏི་མུག་ཏ་ཀ །བཏང་བཟུང་ཞེས་ནི་བྱ་བ་དང་། །པད་མ་ཨུ་དུམ་བ་ར་དང་། །པད་མ་སྔོན་པོ་ལ་སོགས་དང་། །དེ་བཞིན་རྣམ་པ་སྣ་ཚོགས་ཀྱི། །པད་མའི་གདུགས་ནི་ཚད་མེད་པ། །རེ་རེ་ཐམས་ཅད་ཀུན་ཀྱང་ནི། །
རིན་ཆེན་དྲ་བ་འཚམ་པར་བྱས། །གཞན་ཡང་གསེར་གྱི་སྐུད་པ་ལས། །བྱས་པའི་གོས་དག་གིས་ཀྱང་ནི། །བླ་རེ་དག་ཏུ་རབ་བྱས་ནས། །དེ་ཡི་སྟེང་དུ་ཁྱབ་པར་གཡོགས། །གཞན་ཡང་ཙན་དན་རིན་ཆེན་ཁྲི། །གསེར་དག་
ལས་ནི་རྐང་བྱས་པ། །དེ་ཡི་གྲངས་ཀྱང་བྱེ་བ་ཕྲག །བརྒྱད་བཅུ་སྙེད་ནི་རབ་ཏུ་བཤམས། །རིན་ཆེན་ཁྲི་ནི་དེ་དག་ལ། །ཟབ་དར་དག་ལས་བྱས་པ་ཡི། །སྟན་ནི་བྱེ་བ་ཕྲག་བརྒྱད་བཅུ། །དེ་ཡི་སྟེང་དུ་རབ་བརྒྱན་ཏོ། །
དེ་ཡི་ཚེ་ན་སེམས་ཅན་གྱི། །རྣམ་པ་དག་ནི་ཇི་སྙེད་པ། །སྲིད་པའི་རྩེ་མོ་མན་ཆད་ཀྱང་། །ཐམས་ཅད་དེར་ནི་འདུས་གྱུར་ནས། །དེ་བཞིན་གཤེགས་པ་དེ་ལས་ནི། །མདོ་སྡེ་འདི་ནི་རབ་ཏུ་མཉན། །ལྷ་དང་ཀླུ་དང་གནོད་སྦྱིན་དང་། །དྲི་ཟ་
ཡི་ནི་རྒྱལ་པོ་དང་། །ལྟོ་འཕྱེ་ཆེན་པོ་ལྷ་མ་ཡིན། །དེ་དག་མདོ་སྡེ་འདི་ཐོས་ནས། །རབ་ཏུ་དགའ་བའི་སེམས་སྐྱེས་པས། །ཚིགས་སུ་བཅད་པ་བརྒྱད་སྟོང་གིས། །དེ་བཞིན་གཤེགས་པའི་བསྔགས་བརྗོད་ནས། །དེ་དག་
ཐམས་ཅད་ཀུན་གྱིས་ཀྱང་། །བྱང་ཆུབ་ཆེན་པོར་སྨོན་ལམ་བཏབ། །ལྷ་དང་ཀླུ་དང་ལྷ་མ་ཡིན། །དེ་ལ་སོགས་པ་ཐམས་ཅད་ཀྱང་། །ཡོངས་སུ་དང་བའི་སེམས་ཀྱིས་ནི། །མེ་ཏོག་མན་དཱ་ར་བ་དང་། །མུ་ཏིག་རིན་ཆེན་ལ་སོགས་

79-1-234b

པའི། །ཆར་ཕབ་མཆོད་པ་རབ་ཏུ་བྱས། །དེ་ཡི་ཚེ་ན་གཞན་ཡང་ནི། །ལྷ་ཆེན་མཐུ་དང་གཟི་ལྡན་པ། །བྱེ་བ་ཕྲག་ནི་བརྒྱད་བཅུ་སྙེད། །མདོ་སྡེ་འདི་ནི་ཐོས་པས་ན། །རབ་ཏུ་དགའ་བའི་སེམས་བསྐྱེད་ནས། །བྱང་ཆུབ་
ཆེན་པོར་སྨོན་ལམ་བཏབ། །མ་འོངས་པ་ཡི་དུས་ཀྱི་ཚེ། །འོད་ཟེར་འདི་འདྲ་ཐོབ་པར་ཤོག །དེ་བཞིན་གཤེགས་པས་དེ་ཡི་ཚེ། །དེ་ཡི་བསམ་པ་ཐུགས་ཆུད་པས། །མ་འོངས་སངས་རྒྱས་འགྲུབ་འགྱུར་ཞེས། །བྱང་
ཆུབ་ཏུ་ནི་ལུང་ཡང་བསྟན། །དེ་ཡི་ཚེ་ན་གཞན་ཡང་ནི། །བརྒྱ་བྱིན་ལྷ་ཡི་དབང་པོ་དང་། །ཚངས་པ་འཁོར་དང་བཅས་པ་ཡང་། །བྱེ་བ་ཕྲག་ནི་བརྒྱད་བཅུ་སྙེད། །འོད་ཟེར་རབ་ཏུ་སྟོན་པ་ཡི། །མདོ་སྡེ་འདི་ནི་ཐོས་
པས་ན། །རབ་ཏུ་དགའ་བའི་སེམས་བསྐྱེད་ནས། །བྱང་ཆུབ་ཏུ་ནི་སེམས་ཀྱང་བསྐྱེད། །མ་འོངས་སངས་རྒྱས་འགྲུབ་འགྱུར་ཞེས། །བྱང་ཆུབ་ཏུ་ནི་ལུང་ཡང་བསྟན། །དེ་ཡི་ཚེ་ན་གཞན་ཡང་ནི། །ཀླུ་ནི་བྱེ་བ་
ཁྲག་ཁྲིག་ཕྲག །བརྒྱད་བཅུ་སྙེད་ནི་འདུས་པ་དག །མདོ་སྡེ་འདི་ནི་ཐོས་པས་ན། །བྱང་ཆུབ་ཏུ་ནི་སེམས་བསྐྱེད་པས། །ལུང་བསྟན་པ་ཡང་ཐོབ་པར་གྱུར། །དེ་ཡི་ཚེ་ན་གཞན་ཡང་ནི། །གསེར་འདབ་
རྒྱལ་པོ་བྱེ་བ་ཕྲག །བརྒྱད་བཅུ་སྙེད་ནི་འདུས་པ་དག །མདོ་སྡེ་འདི་ནི་ཐོས་པས་ན། །སྡོམ་པ་ལྔ་ནི་རབ་བསྲུངས་ཏེ། །ལུང་བསྟན་པ་ཡང་ཐོབ་པར་གྱུར། །དེ་ཡི་ཚེ་ན་གཞན་ཡང་ནི། དྲི་ཟའི་རྒྱལ་པོ་བྱེ་བ་
ཕྲག །བརྒྱད་བཅུ་སྙེད་ནི་འདུས་པ་དག །མདོ་སྡེ་འདི་ནི་ཐོས་པས་ན། །རོལ་མོ་བརྒྱ་སྟོང་རྣམས་བྱས་ཏེ། །སྒྲ་སྙན་དག་ནི་རབ་ཕྱུང་ནས། །བཅོམ་ལྡན་དེ་ལ་མཆོད་བྱས་པས། །ལུང་བསྟན་པ་ཡང་ཐོབ་པར་
གྱུར། །དེ་ཡི་ཚེ་ན་གཞན་ཡང་ནི། །གནོད་སྦྱིན་རྒྱལ་པོ་ཁྲག་ཁྲིག་སྙེད། །མདོ་སྡེ་འདི་ནི་ཐོས་པས་ན། །སངས་རྒྱས་ཡེ་ཤེས་དག་ལས་ནི། །ཤིན་དུ་དད་པ་སྐྱེས་པར་གྱུར། །དེ་དག་ཐམས་ཅད་ཀུན་གྱིས་ཀྱང་།།

79-1-235a

བྱང་ཆུབ་ལུང་བསྟན་ཐོབ་པར་གྱུར། །ཟླ་འོད་འདི་ལྟར་ཤེས་པར་གྱིས། །དེ་ཚེ་རྒྱལ་པོ་སྒྲ་མོས་པས། །མཆོད་པ་རྣམ་པ་སྣ་ཚོགས་ཀྱིས། །བཅོམ་ལྡན་དེ་ལ་མཆོད་བྱས་པ། །གཞན་ཡིན་སྙམ་
དུ་མི་བལྟ་སྟེ། །དེ་ནི་ཁྱོད་བདག་ཉིད་ཡིན་ནོ། །ཁྱོད་ནི་སྔོན་འདས་དུས་ཀྱི་ཚེ། །མདོ་སྡེ་འདི་ནི་ཐོས་པའི་རྒྱུས། །དེ་ལྟ་བས་ན་དེང་འདིར་ཡང་། །འདི་ཉིད་སླར་ཡང་ཞུས་པ་ཡིན། །ང་ནི་མྱ་ངན་འདས་པའི་འོག །གང་ཡང་
རུང་བ་སུ་ཞིག་གིས། །དམ་པའི་ཆོས་ཀྱི་འཁོར་ལོ་དག །རྣམ་པར་འཇིག་པའི་དུས་ཀྱི་ཚེ། །ཆོས་ཀྱི་བསྟན་པ་འདི་དག་ནི། །དང་བའི་སེམས་ནི་གང་བསྐྱེད་པ། །འདི་ལྟ་བུ་ཡི་མདོ་སྡེ་དག །རྒྱ་ཆེར་ཡང་དག་སྟོན་པར་
ནུས། །མ་འོངས་མདོ་སྡེ་འདི་ནི་གང་སྟོན་པ། །དེས་ནི་ང་ཡི་ཆོས་འཛིན་སྲུང་བར་བྱེད། །དེ་ནི་འདྲོན་མང་དེད་པའི་དེད་དཔོན་འདྲ། །རིན་ཆེན་གཏེར་འཛིན་སྲུང་བ་ཞེས་ཀྱང་བྱ། །མ་འོངས་དུས་ཚེ་མདོ་འདི་གང་ཐོས་ནས། །
སྐད་ཅིག་ཙམ་དུ་མོས་པ་སྐྱེད་བྱེད་པ། །དེ་ནི་སངས་རྒྱས་བྱིན་གྱིས་བརླབས་པ་ཡིན། །འཇམ་དཔལ་བྱིན་གྱིས་བརླབས་པར་རིག་པར་བྱ། །དེས་ནི་སངས་རྒྱས་མང་པོ་མཐོང་འགྱུར་བས། །གསང་བའི་ཆོས་གཏད་ཤེས་
རབ་རྣོ་བར་འགྱུར། །སེམས་ཅན་གང་དག་སེམས་དྲང་མཉེན་དེས་ཤིང་། །རྟག་ཏུ་སངས་རྒྱས་རིམ་གྲོ་བྱེད་ལ་བརྩོན། །བདག་མེད་སྒོམ་ཞིང་བྱམས་དང་བཟོད་སྐྱེད་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་
ཞིག་རྟག་ཏུ་མི་དགེའི་སེམས་འཆང་ཞིང་། །རྙེད་ལ་གདུ་ཞིང་ཆོག་མི་ཤེས་པ་དང་། །རབ་དབེན་རྣམས་ལ་མོས་པར་མི་འགྱུར་བ། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་དེ་བཞིན་གཤེགས་པ་རྣམས་
མཆོད་དང་། །དམ་ཆོས་ཟབ་མོ་ལེགས་པར་རྟོགས་པ་དང་། །སངས་རྒྱས་ཡང་དག་ཡེ་ཤེས་ཡིད་ཆེས་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་སེམས་གཡེང་དང་བའི་སེམས་མེད་ཅིང་། །རྟག་

79-1-235b

ཏུ་སྲོག་གཅོད་གདུལ་བར་རབ་དཀའ་དང་། །འདོད་པའི་ཡུལ་རྣམས་ཀུན་གྱི་བྲན་བྱེད་པ། །དེས་ནི་མདོ་སྡེའི་འདི་ལ་མོས་མི་འགྱུར། །གང་ཞིག་རྟག་ཏུ་དགོན་གནས་རབ་མོས་ཤིང་། །གཅིག་པུ་དབེན་པར་འདུག་ཅིང་
སེམས་ཞི་དང་། །རྙེད་དང་གཉེན་ལ་མངོན་པར་ཞེན་མེད་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་གྲོགས་ངན་དག་གི་རྗེས་འབྲང་ཞིང་། །བདག་དང་གཞན་གྱི་དགེ་བ་འཇིག་བྱེད་དང་། །ཚུལ་ཁྲིམས་ཏིང་འཛིན་དག་
ནི་ཆེར་ཉམས་པ། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་ཡིད་མོས་ཤིན་དུ་རྣམ་དག་ཅིང་། །རྟག་ཏུ་ཤེས་རབ་ཆོས་རྣམས་རབ་འབྱེད་དང་། །དགེ་བའི་བཤེས་གཉེན་དག་གིས་རབ་བསྲུངས་པ། །དེས་ནི་མདོ་སྡེ་འདི་
ལ་མོས་པར་འགྱུར། །གང་ཞིག་གཉེན་གྱི་ཁྱིམ་ལ་རབ་ཆགས་ཤིང་། །མེ་ཏོག་འབྲས་བུ་བྱིན་ནས་དགའ་བྱེད་དང་། །སེམས་ལ་དྲང་པོ་མེད་ཅིང་སྒྱུ་འཆང་བ། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་རྟག་ཏུ་
སངས་རྒྱས་དྲིན་དྲན་ཞིང་། །དགེ་བའི་རྩ་བ་མཆོག་ལ་མོས་པ་དང་། །བྱང་ཆུབ་བསྔོ་ཞིང་གཡོ་སྒྱུ་མེད་གྱུར་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་ཆུང་མ་བུ་མོ་སྲེད་ཆགས་ཤིང་། །གོས་
མཆོག་སྣ་ཚོགས་དག་གིས་རབ་བརྒྱན་ནས། །རྟག་ཏུ་དེ་དང་ལྷན་ཅིག་རྩེ་སྨོན་པ། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་སེམས་ཟབ་གནས་པ་མེད་གྱུར་ཅིང་། །འདོད་པའི་ཡུལ་གྱིས་གོས་
པ་མེད་པ་དང་། །ཟས་སྐོམ་དག་གིས་གཡོ་སྒྱུ་མི་སྐྱེད་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་སྐྱེ་དགུ་རྣམས་ལ་འདི་སྐད་དུ། །འདོད་ཆགས་སྤྱད་ཀྱང་ཉེས་མེད་གང་ཟེར་བ། །དུས་གསུམ་
སངས་རྒྱས་རྣམས་ལ་སྐུར་བ་ཡིན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་ཡིད་ཆེས་རྟག་ཏུ་རབ་བརྟན་ཞིང་། །ནན་ཏན་བསྐྱེད་ནས་ཆོས་རྣམས་ཚོལ་བ་ལ། །སྐྱོ་བ་མེད་ཅིང་བརྙས་པར་མི་

79-1-236a

བྱེད་པ། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་ཆུང་མ་བུ་མོ་མངོན་ཞེན་ཅིང་། །རྟག་ཏུ་འདོད་པའི་ཡུལ་ནི་རྗེས་དྲན་དང་། །ཤེས་རབ་མི་སྒོམ་རྒྱ་ཆེར་ཕན་མི་འདོགས། །དེས་
ནི་མདོ་སྡེ་འདི་ལ་མོས་མི་འགྱུར། །གང་ཞིག་རི་དང་ནགས་ཁྲོད་རབ་གནས་ཤིང་། །ཤེས་རབ་བསྒོམས་ནས་ཤིན་དུ་དག་འགྱུར་དང་། །འཚོ་བའི་ཡོ་བྱད་དག་ལ་འདོད་མེད་པ། །དེས་ནི་མདོ་སྡེ་འདི་ལ་མོས་
པར་འགྱུར། །གང་ཞིག་མིག་གི་སྔོན་དང་ཕྱི་མའི་མཐའ། །རྟག་ཏུ་རྨོངས་དང་མི་རྟོགས་གང་ཡིན་པ། །དེ་ནི་གཏི་མུག་བདུད་ཀྱིས་བཅིངས་པས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་
གི་སྔོན་དང་ཕྱི་མའི་མཐའ། །རྟག་ཏུ་རྟོགས་ཤིང་རྨོངས་པ་མེད་གྱུར་པ། །དེ་ནི་བདུད་ཀྱིས་བཅིངས་ལས་གྲོལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་མཐའ་ཡོད་དང་མེད་པ་ལ། །རྟག་
ཏུ་རྨོངས་ནས་ཁོང་དུ་མ་ཆུད་པ། །དེ་ནི་གཏི་མུག་བདུད་ཀྱིས་བཅིངས་པས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་མཐའ་ཡོད་དང་མེད་པ་དག །རྟག་ཏུ་རྟོགས་ཤིང་རྨོངས་པ་མེད་གྱུར་
པ། །དེ་ནི་བདུད་ཀྱིས་བཅིངས་ལས་གྲོལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མི་གནས་འཇིག་པའི་མཚན་ཉིད་ལ། །རྟག་ཏུ་རྨོངས་ཤིང་ཁོང་དུ་མི་ཆུད་པ། །དེ་ནི་གཏི་མུག་བདུད་ཀྱིས་
བཅིངས་པས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མི་གནས་འཇིག་པའི་མཚན་ཉིད་དག །རྟག་ཏུ་ཁོང་དུ་ཆུད་ཅིང་རྨོངས་མེད་པ། །དེ་ནི་བདུད་ཀྱིས་བཅིངས་ལས་གྲོལ་བས་ན། །དེས་ནི་མདོ་སྡེ་
འདི་ལ་མོས་པར་འགྱུར། །རྣ་བ་སྣ་དང་ལྕེ་ལུས་ཡིད་དག་དང་། །གཟུགས་སྒྲ་དྲི་རོ་རེག་བྱ་ཆོས་རྣམས་དང་། །ས་ཆུ་མེ་རླུང་ངོ་བོ་ཉིད་དག་དང་། །དངོས་པོ་སེམས་ཅན་སྡུག་བསྔལ་ཕུང་པོ་དང་། །ཁམས་དང་

79-1-236b

འཇིག་རྟེན་སྐྱེ་སྒྲ་མི་བདེན་དང་། །འདོད་ཆགས་ཞེ་སྡང་གཏི་མུག་ང་རྒྱལ་སྲིད། །འཆབ་རྒྱགས་སེར་སྣ་ཕྲག་དོག་གཡོ་སྒྱུ་དང་། །ཁྲོ་སོགས་པར་ཡང་དེ་བཞིན་རིག་པར་གྱིས། །གཞན་ཞིག་མི་ཟད་མཐའ་ནི་དེ་དག་ལ། །
རྟག་ཏུ་རྨོངས་ཤིང་ཁོང་དུ་མི་ཆུད་པ། །དེ་ནི་སྐྱེ་བོའི་སྤྱོད་པར་ལྷུང་བས་ན། །དེ་ནི་མདོ་སྡེ་འདི་ལ་མོས་མི་འགྱུར། །གང་ཞིག་མི་ཟད་མཐའ་ནི་དེ་དག་ལ། །རྟག་པར་ཁོང་དུ་ཆུད་ཅིང་རྨོངས་མེད་པ། །དེ་ནི་སྐྱེ་བོའི་སྤྱོད་དང་བྲལ་
བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་གི་འཇིག་པ་དེ་དག་ལ། །རྟག་ཏུ་རྨོངས་ཤིང་ཁོང་དུ་མ་ཆུད་པ། །དེ་ནི་སྐྱེ་བོའི་སྤྱོད་པར་ལྷུང་བས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་
གི་འཇིག་པ་དེ་དག་ལ། །རྟག་པར་ཁོང་དུ་ཆུད་ཅིང་རྨོངས་མེད་པ། །དེ་ནི་སྐྱེ་བོའི་སྤྱོད་དང་བྲལ་བས་ན། །དེ་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་གི་རབ་དབེན་དེ་དག་ལ། །རྟག་ཏུ་རྨོངས་ཤིང་ཁོང་
དུ་མ་ཆུད་པ། །དེ་ནི་སྐྱེ་བོའི་སྤྱོད་པར་ལྷུང་བས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་གི་རབ་དབེན་དེ་དག་ལ། །རྟག་པར་ཁོང་དུ་ཆུད་ཅིང་རྨོངས་མེད་པ། །དེ་ནི་སྐྱེ་བོའི་སྤྱོད་དང་བྲལ་བས་ན། །
དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་གི་འགྲོ་འོང་མེད་པ་ལ། །རྟག་ཏུ་རྨོངས་ཤིང་ཁོང་དུ་མ་ཆུད་པ། །དེ་ནི་སྐྱེ་བོའི་སྤྱོད་པར་ལྷུང་བས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་གི་འགྲོ་
འོང་མེད་པ་དག །རྟག་ཏུ་ཁོང་དུ་ཆུད་ཅིང་རྨོངས་མེད་པ། །དེ་ནི་སྐྱེ་བོའི་སྤྱོད་དང་བྲལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་ལ་བདག་མེད་མ་རྟོགས་ནས། །མི་ཟད་ངོ་བོ་ཉིད་ལ་རྟག་
རྨོངས་པ། །དེ་ནི་སྐྱེ་བོའི་སྤྱོད་པར་ལྷུང་བས་ན། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་ལ་བདག་མེད་རབ་རྟོགས་ནས། །མི་ཟད་ངོ་བོ་རྟག་ཏུ་རྟོགས་གྱུར་པ། །དེ་ནི་སྐྱེ་བོའི་སྤྱོད་དང་

79-1-237a

བྲལ་བས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་ལ་བདག་མེད་མ་རྟོགས་ནས། །བཟོད་པའི་གནས་ལ་རྟག་ཏུ་རྨོངས་གྱུར་པ། །དེ་ནི་སྐྱེ་བོའི་སྤྱོད་པར་ལྷུང་བས་ན། །
དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་ལ་བདག་མེད་རབ་རྟོགས་ནས། །བཟོད་པའི་གནས་ནི་རྟག་ཏུ་རྟོགས་གྱུར་པ། །དེ་ནི་སྐྱེ་བོའི་སྤྱོད་དང་བྲལ་བས་ན། །དེས་ནི་མདོ་སྡེ་འདི་ལ་མོས་པར་
འགྱུར། །གང་ཞིག་མིག་ཟད་ངོ་བོ་མ་རྟོགས་པ། །དེ་ནི་མི་གནས་ཚུལ་ཁྲིམས་བསྒྲུབ་མི་ནུས། །མི་གནས་ཚུལ་ཁྲིམས་མངོན་པར་མི་བསྒྲུབ་པས། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་ཟད་
ངོ་བོ་རབ་རྟོགས་པ། །དེས་ནི་མི་གནས་ཚུལ་ཁྲིམས་བསྒྲུབ་པར་ནུས། །མི་གནས་ཚུལ་ཁྲིམས་མངོན་པར་བསྒྲུབ་པས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་ཟད་ངོ་བོ་མ་རྟོགས་པ། །དེས་ནི་ཟག་མེད་
ཚུལ་ཁྲིམས་བསྒྲུབ་མི་ནུས། །ཟག་མེད་ཚུལ་ཁྲིམས་མངོན་པར་མི་བསྒྲུབ་པས། །དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་ཟད་ངོ་བོ་རབ་རྟོགས་པ། །དེས་ནི་ཟག་མེད་ཚུལ་ཁྲིམས་བསྒྲུབ་པར་ནུས། །ཟག་མེད་
ཚུལ་ཁྲིམས་མངོན་པར་བསྒྲུབས་པས་ན། །དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་ཟད་ངོ་བོ་མ་རྟོགས་པ། །དེས་ནི་ཟག་མེད་ཤེས་རབ་བསྒྲུབ་མི་ནུས། །ཟག་མེད་ཤེས་རབ་མངོན་པར་མི་བསྒྲུབ་པས། །
དེས་ནི་མདོ་སྡེ་འདི་ལ་མོས་མི་འགྱུར། །གང་ཞིག་མིག་ཟད་ངོ་བོ་རབ་རྟོགས་པ། །དེས་ནི་ཟག་མེད་ཤེས་རབ་བསྒྲུབ་པར་ནུས། །ཟག་མེད་ཤེས་རབ་མངོན་པར་བསྒྲུབས་པས་ན། །དེས་ནི་མདོ་སྡེ་འདི་ལ་མོས་མི་འགྱུར། །
གང་ཞིག་མིག་ཟད་ངོ་བོ་མ་རྟོགས་པ། །མིག་སོད་ཉིད་ལ་རྟག་ཏུ་རྨོངས་པར་འགྱུར། །དེས་ནི་ཀུན་འཛིན་ཡེ་ཤེས་མི་སྐྱེད་པས། །མདོ་སྡེ་འདི་ལ་རབ་ཏུ་མོས་མིན་འགྱུར། །གང་ཞིག་མིག་ཟད་ངོ་བོ་རབ་རྟོགས་པ། །

79-1-237b

མིག་སྟོང་ཉིད་ནི་རྟག་པར་རྟོགས་པར་འགྱུར། །དེས་ནི་ཀུན་འཛིན་ཡེ་ཤེས་རབ་བསྐྱེད་པས། །མདོ་སྡེ་འདི་ལ་རབ་ཏུ་མོས་པར་འགྱུར། །གང་ཞིག་མིག་ཟད་ངོ་བོ་ཉིད་རྟོགས་པ། །དེས་ནི་ཀུན་འཛིན་ཡེ་ཤེས་བསྒྲུབ་པ་ན། །
བླ་མེད་མ་ཆགས་ཡེ་ཤེས་རབ་བསྒྲུབས་པས། །མདོ་སྡེ་འདི་ལ་རབ་ཏུ་མོས་པར་འགྱུར། །གང་ཞིག་མདོ་སྡེ་འདི་ལ་མ་མོས་པ། །མིག་ཟད་ངོ་བོ་ཉིད་ལ་རྟག་ཏུ་རྨོངས། །དེ་ནི་ཏིང་འཛིན་རྣམས་ལས་ཉམས་པས་ན། །
བླ་མེད་ཡེ་ཤེས་ཐོབ་པར་ཤིན་ཏུ་དཀའ། །གང་ཞིག་མདོ་སྡེ་འདི་ལ་རབ་མོས་ཤིང་། །མིག་ཟད་ངོ་བོ་ཉིད་ནི་མངོན་རྟོགས་པ། །དེས་ནི་ཏིང་འཛིན་མངོན་པར་བསྒྲུབས་པས་ན། །བླ་མེད་ཡེ་ཤེས་མངོན་བྱེད་དཀའ་བ་མེད། །
གང་ཞིག་མིག་ཟད་ངོ་བོ་ཉིད་རྟོགས་ཤིང་། །བདག་མེད་པ་ཡི་མཚན་ཉིད་རབ་ཤེས་པ། །དེས་ནི་རྟག་ཏུ་ཆོས་འདི་ཐོས་པས་ན། །མངོན་པར་ཡིད་ཆེས་ཐེ་ཙོམ་མེད་པ་འཐོབ། །གང་ཞིག་མིག་ཟད་ངོ་བོ་ཉིད་སེམས་
ཤིང་། །ཉིན་མཚན་རབ་བརྩོན་ལེ་ལོ་མེད་གྱུར་པ། །དེས་ནི་ཀུན་འཛིན་སྤོབས་པ་མངོན་བསྒྲུབས་ནས། །མདོ་སྡེ་འདི་ནི་རྟག་ཏུ་སྟོན་པར་འགྱུར། །གང་ཞིག་མདོ་སྡེ་འདི་ནི་སེམས་བྱེད་པ། །འོད་ཟེར་འབྱིན་
པའི་ཡེ་ཤེས་རྫོགས་པར་འགྱུར། །དེས་ནི་དེ་བཞིན་གཤེགས་པ་རབ་སྟོན་ཅིང་། །མིག་སྟོང་ཉིད་ནི་རབ་ཏུ་རྟོགས་པར་འགྱུར། །གང་ཞིག་མཆོད་རྟེན་བརྒྱ་སྟོང་རབ་བྱས་ཤིང་། །སངས་རྒྱས་ཐམས་ཅད་མཆོད་
པ་བྱས་པ་བས། །གང་ཞིག་མདོ་སྡེ་འདི་ནི་སེམས་བྱེད་ན། །འདི་ཡི་ཡོན་ཏན་དེ་བས་ཁྱད་པར་འཕགས། །གང་གིས་རོལ་མོ་བརྒྱ་སྟོང་རབ་བྱས་ནས། །དེ་བཞིན་གཤེགས་པའི་རིང་སྲེལ་མཆོད་པ་བྱས། །
གང་ཞིག་མདོ་སྡེ་འདི་ནི་ཐོས་གྱུར་ན། །འདི་ཡི་ཡོན་ཏན་དེ་བས་ཁྱད་པར་འཕགས། །སངས་རྒྱས་སྤྱན་གྱིས་གཟིགས་པའི་སེམས་ཅན་རྣམས། །བསྐལ་པ་དག་ནི་བྱེ་བ་ཚད་མེད་པར། །དེ་བཞིན་གཤེགས་དང་

79-1-238a

ཚུངས་པར་མཆོད་པ་པས། །མདོ་སྡེ་འདི་བཟུང་བསོད་ནམས་ཁྱད་པར་འཕགས། །གང་ཞིག་མདོ་སྡེ་འདི་ལ་ཚིག་བཞི་པའི། །ཚིགས་བཅད་གཅིག་ཙམ་འཛིན་ཅིང་སྟོན་བྱེད་ན། །དེ་ལ་རྒྱལ་བ་ཐུགས་རྗེས་
ཆེན་པོ་ཡི། །གཙོ་ལྟར་གུས་པ་རབ་ཏུ་བསྐྱེད་པར་བྱ། །ང་ནི་འདས་པའི་བསྐལ་པ་བརྒྱ་སྟོང་དུ། །སྲིད་པ་གསུམ་དུ་འཁོར་བར་གྱུར་པའི་ཚེ། །སངས་རྒྱས་དག་ནི་ཚད་མེད་པ་རྣམས་ལ། །མདོ་སྡེ་འདི་ཡི་ཕྱིར་ནི་རིམ་གྲོ་
བྱས། །རེས་འགའ་མར་མེ་བརྒྱ་སྟོང་ཚད་མེད་པ། །སྙིང་པོ་རེ་རེའི་ཚད་ཀྱང་དཔག་ཚད་ཙམ། །སྤར་ནས་མདོ་སྡེ་འདི་ལ་རང་དབང་དག །འཐོབ་པར་བྱ་ཕྱིར་འདྲེན་པ་རྣམས་ལ་མཆོད། །རེས་འགའ་མེ་ཏོག་ཙམ་པ་
ཀ་དང་ནི། །སུ་མ་ན་དང་མྱ་ངན་མེད་པ་ཡི། །ཕྲེང་བ་རྒྱལ་མཚན་གདུགས་ནི་སྣ་ཚོགས་ཀྱིས། །དེ་བཞིན་གཤེགས་པའི་མཆོད་རྟེན་མཆོད་པ་བྱས། །ང་སྔོན་འཁོར་བའི་འཁོར་བར་གྱུར་པའི་ཚེ། །སློང་དུ་འོངས་པ་དག་
ལ་སྦྱིན་བཏང་སྟེ། །རེས་འགའ་མེ་ཏོག་འབྲས་བུ་དག་ཀྱང་བཏང་། །རེས་འགའ་ཟག་པ་ཁྲོན་པ་ཆུ་མི་བཏང་། །རེས་འགའ་གླང་པོ་ཆེ་དང་བཞོན་པ་བཏང་། །རེས་འགའ་རིན་ཆེན་རྟ་དང་ཆུང་མ་བཏང་། །རེས་འགའ་གསེར་གྱི་ཁྲི་
དང་རིན་ཆེན་གུར། །རེས་འགའ་སེ་མོ་དོ་དང་ཕྲེང་བ་བཏང་། །དེ་བཞིན་བསྐལ་པ་བརྒྱ་སྟོང་རྫོགས་པར་ནི། །མདོ་སྡེ་འདི་ཕྱིར་སེམས་ལ་སེར་སྣ་མེད།། །། བམ་པོ་གཉིས་པ། ང་སྔོན་མདོ་སྡེ་
འདི་ཡི་ཕྱིར། །ཚུལ་ཁྲིམས་ཡོངས་སུ་དག་པར་བསྲུངས། །ཏིང་འཛིན་ཤེས་རབ་རྟག་ཏུ་བསྒོམས། །སེམས་ཅན་རྣམས་ལ་སྦྱིན་པ་བཏང་། །ང་སྔོན་མདོ་སྡེ་འདི་ཡི་ཕྱིར། །གཏུམ་པོ་དག་གིས་བརྒྱད་བཀག་
ཀྱང་། །དེ་ཚེ་ད་ནི་སྙིང་བརྩེ་བས། །དེ་ལ་གནོད་པ་ཡོང་མ་བྱས། །ང་སྔོན་མདོ་སྡེ་འདི་ཡི་ཕྱིར། །སློང་དུ་འོངས་པ་དག་ལ་ནི། །ཇི་ལྟར་མོས་བཞིན་རབ་གཏང་བས། །ཐམས་ཅད་རབ་ཏུ་

79-1-238b

དགའ་བར་བྱས། །ང་སྔོན་མདོ་སྡེ་འདི་ཡི་ཕྱིར། །གཞལ་མེད་ཁང་ཆེན་རྣམས་ལ་ནི། །རིན་ཆེན་དྲ་བས་རབ་བརྒྱན་ནས། །སངས་རྒྱས་རྣམས་ལ་ཡོངས་སུ་ཕུལ། །ང་སྔོན་མདོ་སྡེ་འདི་ཡི་ཕྱིར། །རིན་ཆེན་རྣམ་པ་
སྣ་ཚོགས་དང་། །ཡིད་བཞིན་ནོར་བུ་རིན་པོ་ཆེས། །སངས་རྒྱས་རྣམས་ལ་མཆོད་པ་བྱས། །ང་སྔོན་མདོ་སྡེ་འདི་ཡི་ཕྱིར། །དྲིན་ཡོད་རྣམས་ལ་རྟག་དྲན་པས། །ཐ་ན་ཚིགས་བཅད་གཅིག་མཉན་པ། །
དེ་ལ་ཡང་ནི་བཀུར་སྟི་བྱས། །ང་སྔོན་མདོ་སྡེ་འདི་ཡི་ཕྱིར། །ཚུལ་ཁྲིམས་ལྡན་ལ་རབ་བཀུར་བས། །ཐ་ན་འཆག་པའི་ཚེ་ན་ཡང་། །དེ་ལ་རྟག་ཏུ་གུས་པ་བསྐྱེད། །ང་སྔོན་མདོ་སྡེ་འདི་ཡི་ཕྱིར། །འཁོར་བ་
དག་ན་འཁོར་བའི་ཚེ། །དྲིན་ནི་ཅུང་ཟད་ཡོད་པ་ལ་འང་། །དེ་ལ་རྟག་ཏུ་དྲིན་དུ་གཟོས། །ང་སྔོན་མདོ་སྡེ་འདི་ཡི་ཕྱིར། །རྙེད་པ་མ་བཙལ་ཆོས་མ་སྐུར། །ཉེ་བཤེས་སེམས་ཅན་རྣམས་ལ་ནི། །སྙིང་བརྩེ་དག་ནི་རབ་
ཏུ་བསྐྱེད། །ང་སྔོན་མདོ་སྡེ་འདི་ཡི་ཕྱིར། །མང་ཐོས་ལེགས་བཤད་ལྡན་པས་ན། །ཆོས་ལ་མངོན་པར་ཞེན་བྱེད་ཅིང་། །བཤེས་པའི་ཁྱིམ་ལ་སེར་སྣ་མེད། །ང་སྔོན་མདོ་སྡེ་འདི་ཡི་ཕྱིར། །མི་དགེའི་
སེམས་ནི་སྐྱེས་གྱུར་ན། །མྱུར་བ་ཉིད་དུ་རབ་བཤགས་པས། །འཕེལ་བར་ཡང་ནི་ཡོད་མ་བྱས། །ང་སྔོན་མདོ་སྡེ་འདི་ཡི་ཕྱིར། །རྒྱལ་པོའི་བུར་ནི་གྱུར་བ་ན། །རིན་པོ་ཆེ་དང་བྱུག་སྤོས་དང་། །སྤོས་ཀྱི་
ཕྱེ་མ་ཇི་སྙེད་པ། །དད་པའི་སེམས་ནི་ངས་བསྐྱེད་ནས། །སངས་རྒྱས་རྣམས་ལ་བསྔོས་ཤིང་ཕུལ། །ང་སྔོན་མདོ་སྡེ་འདི་ཡི་ཕྱིར། །ཁྲི་མོན་བཙོན་ལ་སྙིང་བརྩེ་བས། །སྡུག་བསྔལ་སྣ་ཚོགས་གང་མྱོང་བ། །ལུས་
ཀྱི་སྐྱིན་པར་དང་དུ་བླངས། །ང་སྔོན་མདོ་སྡེ་འདི་ཡི་ཕྱིར། །འདོད་པའི་ཡོན་ཏན་ལྔ་སྤངས་ནས། །རྟག་ཏུ་དུས་དྲུག་དག་གི་ཚེ། །སྡོམ་པ་དག་ནི་རབ་ཏུ་བླངས། །ང་སྔོན་མདོ་སྡེ་འདི་ཡི་ཕྱིར། །རྟག་ཏུ་བཟོད་

79-1-239a

པ་རབ་བསྒོམས་པས། །ཐ་ན་ཆུང་མ་དག་ལ་ཡང་། །འདོད་པའི་སེར་སྣ་ཡོང་མ་བསྐྱེད། །ང་སྔོན་མདོ་སྡེ་འདི་ཡི་ཕྱིར། །དབུལ་ཕོངས་དག་ནི་ཐམས་ཅད་ཀུན། །བདེ་བ་དག་ནི་ཐོབ་བྱའི་ཕྱིར། །
ནོར་དག་གིས་ནི་ཕྱུག་པོར་བྱས། །ང་སྔོན་མདོ་སྡེ་འདི་ཡི་ཕྱིར། །དགེ་སྦྱོང་དང་ནི་བྲམ་ཟེ་དང་། །སྐྱེ་དགུ་རྣམ་པ་སྣ་ཚོགས་ཀུན། །ཐམས་ཅད་དག་ནི་རབ་ཏུ་བསྡུས། །ང་སྔོན་མདོ་སྡེ་འདི་ཡི་ཕྱིར། །ཐམས་
ཅད་ཀུན་ལ་ཕན་གདགས་ཕྱིར། །རྟག་ཏུ་སྦྱིན་བདག་ཆེར་བྱས་ནས། །སློང་བ་དག་ལ་ཡོངས་སུ་བཏང་། །རེས་འགའ་མེ་ཏོག་འབྲས་བུ་དག །གཞན་དག་གཅོད་དུ་མི་གཞུག་པར། །སེམས་ཅན་རྣམས་ལ་
ཡོངས་བཏང་ཞིང་། །ཡིད་བཞིན་དུ་ནི་ཚིམ་པར་བྱས། །ང་སྔོན་སྦྱིན་པ་བཏང་བའི་ཚེ། །སེམས་ནི་རྟག་ཏུ་སྙོམས་པས་ན། །ཚུལ་ཁྲིམས་ཡོན་ཏན་ལྡན་པ་དང་། །ཚུལ་ཁྲིམས་འཆལ་དང་ངོ་ཚ་མེད། །རྫུ་འཕྲུལ་ཆེན་པོ་
ཐོབ་པ་ནས། །སོ་སོའི་སྐྱེ་བོའི་བར་དག་ལ། །ངོ་མཚར་སྙམ་པའི་སེམས་བསྐྱེད་ནས། །གུས་པས་ཀུན་ལ་སྦྱིན་པ་བཏང་། །ང་སྔོན་སྦྱིན་པ་གཏོང་བའི་ཚེ། །སེམས་ལ་མཐོ་དམའ་མེད་པས་ན། །སྡུག་བསྔལ་
འགྲོ་བ་མི་ཚོལ་ཞིང་། །མདོ་སྡེ་འདི་ལ་རྩེ་གཅིག་མོས། །རེས་འགའ་ཡུལ་ཁམས་དག་ཏུ་ནི། །ཕྱིར་རྒོལ་ཐམས་ཅད་མེད་བྱས་ཤིང་། །ཀླུ་རྣམས་ཀུན་ནི་རབ་བཏུལ་ནས། །དུས་བཞིན་ཆར་ནི་རབ་ཏུ་ཕབ། །
ཟླ་འོད་ཁྱོད་ཀྱིས་ཤེས་པར་གྱིས། །ངས་ནི་ཚེ་རབས་དཔག་མེད་ནས། །མདོ་སྡེ་འདི་ནི་གཉེར་བའི་ཕྱིར། །དཀའ་བ་རྣམས་ནི་རབ་ཏུ་སྤྱད། །བསྐལ་པ་བརྒྱ་སྟོང་སྙེད་དུ་ནི། །བརྗོད་ཀྱང་མཐར་ཐུག་མི་འགྱུར་རོ། །
ཡིད་ཆེས་པ་ལ་ཁྱོད་གནས་ནས། །མ་འོངས་ཐ་མ་དུས་ཀྱི་ཚེ། །ཡང་དག་དྲན་པའི་སེམས་སྐྱེད་ལ། །མདོ་སྡེ་འདི་ནི་བཤད་པར་གྱིས། །ངས་ནི་སངས་རྒྱས་སྤྱན་དག་གིས། །མ་འོངས་དུས་ནི་གསལ་གཟིགས་

79-1-239b

པས། །སྤྱོད་པ་སྣ་ཚོགས་ཇི་ལྟ་བ། །ཐམས་ཅད་རབ་ཏུ་མཁྱེན་པ་ཡིན། །དགེ་སློང་དག་ནི་གང་ཞིག་གིས། །བླ་མེད་ཡེ་ཤེས་བཙལ་བའི་ཕྱིར། །ཤིན་དུ་དང་བའི་སེམས་ཀྱིས་ནི། །མདོ་སྡེ་འདི་ནི་གང་སྟོན་
པ། །གང་ཟག་དེ་དང་ཕྱོགས་རྣམས་ཀྱང་། །ཐམས་ཅད་མ་ལུས་ཐུགས་སུ་ཆུད། །མ་འོངས་ཐ་མ་དུས་ཀྱི་ཚེ། །མདོ་འདི་ཐོས་ནས་གང་མོས་པ། །བསམ་པ་དང་ནི་ཐབས་རྣམས་ཀྱང་། །ཐམས་ཅད་མ་ལུས་ཐུགས་སུ་
ཆུད། །དམན་པ་དག་ནི་གང་ཞིག་གིས། །མདོ་སྡེ་འདི་ནི་མ་ཐོས་པས། །ཆོས་བསྟན་པ་ལ་སྐུར་འདེབས་པ། །ཐམས་ཅད་མ་ལུས་ཐུགས་སུ་ཆུད། །དགེ་སློང་རྣམས་ནི་གང་ཞིག་དང་། །དགེ་སློང་མ་ནི་གང་ཞིག་གིས། །མདོ་
སྡེ་འདི་ནི་ཐོས་གྱུར་ནས། །ཤིན་དུ་གདུང་བས་དུ་བྱེད་པ། །དེ་ཀུན་ངས་ནི་ལུང་བསྟན་ནས། །རྒྱལ་བ་གཙོ་བོ་མཐོང་བར་འགྱུར། །ཟླ་འོད་ཁྱོད་ཀྱིས་ཤེས་པར་གྱིས། །སངས་རྒྱས་རྫུ་འཕྲུལ་སྟོབས་ཀྱིས་ནི། །གང་དག་
ཡིད་ནི་དག་པ་དང་། །གང་དག་གི་ནི་མ་དག་དང་། །ཐ་ན་མོས་པ་གང་ཡིན་པ། །ཐམས་ཅད་མ་ལུས་ཐུགས་སུ་ཆུད། །སེམས་ཅན་དག་ནི་གང་ཞིག་གིས། །རབ་ཞི་དབེན་ལ་རྟག་མོས་ཤིང་། །ཏིང་འཛིན་
རྣམས་ལ་རབ་གནས་ནས། །འཁོར་བ་དག་ལ་མ་ཆགས་པས། །ཐ་ན་བག་ཆགས་རྣམས་ཀྱང་ནི། །གཏན་ནས་རབ་ཏུ་གང་སྤངས་དང་། །དེ་ལ་སོགས་པའི་ཡོན་ཏན་རྣམས། །སེམས་ཅན་དག་ནི་གང་
ཞིག་གིས། །མི་བདེན་ཆོས་ལ་ཞེན་པ་དང་། །སེམས་ཅན་དག་ནི་གང་ཞིག་གིས། །སངས་རྒྱས་ལ་ནི་རབ་མོས་པ། །མ་འོངས་དངོས་པོ་འདི་ལྟ་བུ། །ཐམས་ཅད་མ་ལུས་ཐུགས་སུ་ཆུད། །སེམས་ཅན་དག་
ནི་གང་ཞིག་གིས། །འཇིག་རྟེན་བདེ་ལ་རབ་ཆགས་པས། །སངས་རྒྱས་བྱང་ཆུབ་ས་བོན་དག །ལེགས་པ་ཉིད་དུ་མི་སྐྱེད་པ། །རྒྱུ་དང་རྐྱེན་ནི་དེ་ཡི་ཕྱིར། །སྦྱོར་བ་རྣམས་ནི་ཉམས་པར་འགྱུར། །སུ་ཡང་རུང་བ་གང་

79-1-240a

ཞིག་གིས། །བྱང་ཆུབ་ས་བོན་རྟོགས་གྱུར་ན། །གང་ཟག་དེ་ཡིས་ངེས་པར་ནི། །རྣམ་དག་འོད་ཟེར་དཔག་མེད་ཐོབ། །ཟླ་འོད་ཁྱོད་ཀྱིས་འདི་ལྟ་བུར། །འོད་ཟེར་འདི་ལ་སོགས་པ་ཡི། །རྒྱུ་དང་རྐྱེན་ནི་རེ་རེ་ཀུན། །
སོ་སོ་ཐ་དད་ཉིད་དུ་ལྟོས། །ཁྱོད་ཀྱིས་ཤེས་རབ་སྟོབས་ཀྱིས་ནི། །ཐམས་ཅད་དེ་ལྟར་རིག་པར་གྱིས། །གང་ཞིག་མི་དགེ་གྲོགས་སྤངས་ཏེ། །དགེ་བའི་བཤེས་གཉེན་ལ་བསྟེན་བྱས། །ཚུལ་ཁྲིམས་རྣམ་དག་གང་སྲུང་བ། །
སངས་རྒྱས་འོད་ཟེར་སྒྲུབ་པར་འགྱུར། །ཁྱོད་ཀྱིས་དབང་པོ་རབ་བསྲུངས་ལ། །ངོ་ཚ་ཁྲེལ་མེད་རབ་ཏུ་སྤོངས། །དགེ་བའི་ཆོས་ནི་རབ་སྒོམས་ལ། །སེམས་ཅན་རྣམས་ནི་བསྲུང་བར་གྱིས། །ཁྱོད་ཀྱིས་རྩོད་པ་རབ་སྤོངས་ལ། །
སྟོང་ཉིད་དག་ནི་རྟོགས་པར་གྱིས། །རྙེད་པ་དག་ལ་མ་གདུ་བར། །མང་ཐོས་ལེགས་བཤད་ལྡན་པར་གྱིས། །ཁྱོད་ཀྱིས་རྙེད་པ་དག་ལ་ནི། །མི་གཙང་ལྟ་བུར་བལྟ་བར་གྱིས། །རྙེད་པའི་དྲི་མ་དག་གིས་ནི། །རྣམ་དག་
སེམས་ནི་སྤགས་མ་བྱེད། །རྣམ་པར་གྲོལ་བ་བཙལ་བར་བྱོས། །བླ་མེད་རྙེད་པ་ཐོབ་པར་འགྱུར། །ཁྱོད་ཀྱིས་སངས་རྒྱས་ལམ་བསྒྲུབས་ལ། །སངས་རྒྱས་ཆོས་ཉིད་འདྲ་བར་ལྟོས། །ཆོས་ཀྱི་སྒྲོན་ཆེན་རྟག་སྦར་ལ། །
འཇིག་རྟེན་ཀུན་ནི་སྣང་བར་གྱིས། །ཁྱོད་ཀྱི་སེམས་ནི་རི་རྒྱལ་ལྟར། །མི་གཡོ་ཉིད་དུ་རབ་ཏུ་བྱོས། །ཁ་ངན་དང་ནི་བརྡེགས་པ་ཡང་། །ཐམས་ཅད་བཟོད་པ་དང་དུ་ལོང་། །ཁྱོད་ནི་སེམས་ཅན་རྣམས་ཀྱི་ཕྱིར། །དགེ་
བཤེས་ཡང་དག་རབ་ཏུ་བྱོས། །དམན་པའི་སེམས་ནི་ཡོངས་སྤོངས་ལ། །རྣམ་དག་ལས་ནི་རྟག་ཏུ་བསྒྲུབས། །ཁྱོད་ཀྱི་སེམས་ནི་བརྟན་བྱོས་ལ། །བླ་མེད་ཆོས་ནི་རབ་ཏུ་སྟོན། །མདོ་སྡེ་དམ་པ་འདི་ལྟ་བུ། །བརྩེ་བ་ཅན་ལ་
སྦྱིན་པར་གྱིས། །བླ་མེད་ཡེ་ཤེས་གང་ཚོལ་བ། །འཁོར་བ་དག་ལ་འཇིགས་མ་བྱེད། །དེས་ནི་སྡིག་པ་རྣམ་སྤངས་ནས། །ཕན་ཡོན་མཆོག་ནི་ཐོབ་པར་འགྱུར། །དཔེར་ན་བློ་དང་ལྡན་པ་དག །མེ་ལ་སྤྱོད་པར་མཁས་པ་གང་། །

79-1-240b

རོ་རྣམས་སྣ་ཚོགས་སྦྱིན་བྱེད་ཀྱང་། །མེས་ནི་སྲེག་པར་ཡོད་མི་འགྱུར། །གང་ཞིག་བློ་དང་མི་ལྡན་པ། །ཐབས་དག་ལ་ནི་མི་མཁས་པས། །མེ་ཁྱེར་ལག་མཐིལ་གང་བཞག་པ། །མེས་ནི་རབ་ཏུ་སྲེག་པར་འགྱུར། །
ཇི་ལྟར་མི་ཞིག་དུག་དག་གིས། །སེམས་ནི་འཁྲུགས་ནས་མྱོས་པ་གང་། །མེ་ལ་རབ་ཏུ་བསྲོས་ན་ནི། །དེ་ཡི་རྒྱུ་ཡིས་སོས་པར་འགྱུར། ཟླ་འོད་ཁྱོད་ཀྱིས་ཤེས་པར་གྱིས། །བློ་དང་ལྡན་པའང་དེ་བཞིན་དུ། །ཡིད་
བརྟེན་ཡིད་ནི་སྟོང་པར་རིག །དེ་ཕྱིར་འཁོར་བར་གནས་ཀྱང་ནི། །མིག་བརྟེན་མིག་ནི་སྟོང་རིག་པས། །མིག་ལ་མངོན་པར་ཞེན་པ་མེད། །གལ་ཏེ་དེ་ལྟར་རབ་ཤེས་ན། །མིག་ལ་གནས་ཀྱང་ཉོན་མོངས་མེད། །གལ་
ཏེ་མིག་ཉིད་སྟོང་རིག་ན། །ཡང་དག་ཡེ་ཤེས་སྒྲུབ་པར་འགྱུར། །ཡང་དག་ཡེ་ཤེས་ཐོབ་པའི་ཕྱིར། །འོད་ཟེར་དག་ནི་འབྱུང་བར་འགྱུར། །གལ་ཏེ་མིག་ཉིད་སྟོང་རིག་ན། །འདོད་ཆགས་དག་ནི་གཏན་ནས་སྤོང་། །
འདོད་ཆགས་དག་ནི་མེད་པའི་ཕྱིར། །འོད་ཟེར་དག་ནི་འབྱུང་བར་འགྱུར། །དེ་བཞིན་ཞེ་སྡང་གཏི་མུག་དང་། །ངར་འཛིན་འཆབ་དང་ཁྲོ་བ་དང་། །སེར་སྣ་ཕྲག་དོག་ངོ་ཚ་མེད། །མི་བཟོད་སེམས་ནི་མཐོ་བ་དང་། །རྒྱགས་
དང་མངོན་པའི་ང་རྒྱལ་དང་། །གཡོ་སྒྱུ་དང་ནི་བག་མེད་དང་། །གྱ་གྱུ་ལ་སོགས་པར་དུ་ཡང་། །ཐམས་ཅད་འདོད་ཆགས་བཞིན་དུ་བཤད། །ཡང་དག་ཡེ་ཤེས་ཐོབ་གྱུར་ན། །མིག་ནི་ཞི་བ་ཉིད་དུ་རྟོགས། །ཞི་བ་ཉིད་དུ་རྟོགས་
པའི་ཕྱིར། །འོད་ཟེར་དག་ནི་འབྱུང་བར་འགྱུར། །ཡང་དག་ཡེ་ཤེས་ཐོབ་གྱུར་ན། །སངས་རྒྱས་ཚུལ་ལ་རབ་ཏུ་གནས། །ཚུལ་ལ་རབ་ཏུ་གནས་པའི་ཕྱིར། །འོད་ཟེར་དག་ནི་འབྱུང་བར་འགྱུར། །ཡང་དག་ཡེ་ཤེས་
ཐོབ་གྱུར་ན། །སངས་རྒྱས་ཐབས་ལ་གནས་པར་འགྱུར། །ཐབས་ལ་རབ་ཏུ་གནས་པའི་ཕྱིར། །འོད་ཟེར་དག་ནི་འབྱུང་བར་འགྱུར། །ཡང་དག་ཡེ་ཤེས་མ་བསྒྲུབས་པར། །སྒྲིབ་པ་དག་ནི་གཏན་སྤོང་ཞིང་། །འོད་

79-1-241a

ཟེར་འབྱུང་བ་སྒྲུབ་པར་ནི། །ངས་སྔོན་མ་ཐོས་མ་མཐོང་ངོ་། །ཡང་དག་ཡེ་ཤེས་རབ་བསྒྲུབས་ནས། །སྒྲིབ་པའི་གནོད་པ་གཏན་སྤོང་ཞིང་། །སྤྱོད་པ་འདི་རྗེས་གང་འབྲང་བ། །འོད་ཟེར་འགྱེད་པ་
ཐོབ་པར་འགྱུར། །རྒྱལ་བའི་སྤྱོད་པ་ཡོངས་ཚོལ་ཞིང་། །མདོ་སྡེ་འདི་ལ་བསླབ་བྱས་ནས། །དེ་བཞིན་གཤེགས་ལ་གང་མཆོད་པ། །ཡང་དག་ཡེ་ཤེས་ཐབས་ཐོབ་འགྱུར། །ཡང་དག་ཡེ་ཤེས་གང་བསྒྲུབས་
པ། །སངས་རྒྱས་རྣམས་ལ་མཆོད་པར་གྱིས། །འོད་ཟེར་འགྱེད་པ་རྫོགས་པར་འགྱུར། །ལག་མཐིལ་འབྲས་བུ་ཇི་བཞིན་ནོ། །མིག་ལ་བདག་མེད་གང་རྨོངས་པ། །དགེ་སྦྱོང་ཆོས་ནི་ཉམས་པར་འགྱུར། །གང་
ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་མི་འགྱུར། །མིག་ལ་བདག་མེད་གང་རྟོགས་པ། །དགེ་སློང་ཆོས་ནི་སྒྲུབ་པར་འགྱུར། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་པར་འགྱུར། །
མིག་གི་མཐའ་ཟད་གང་རྟོགས་པ། །རྣ་བ་སྐྱེ་བའི་མཐའ་ཡང་རྟོགས། །རྣ་བ་སྐྱེ་བའི་མཐའ་རྟོགས་པས། །དགེ་སྦྱོང་ཆེན་པོའི་ཆོས་ཤེས་བྱ། །གལ་ཏེ་མིག་གི་ངོ་བོ་ཉིད། །མཐའ་ནི་ཡོངས་སུ་མ་ཤེས་ན། །མིག་
ནི་སྐྱེ་བའི་མཐའ་དག་ཀྱང་། །ཡོངས་སུ་ཤེས་པར་མི་འགྱུར་བས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་མི་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་ཡོངས་སུ་ཤེས་གྱུར་ན། །མིག་ནི་སྐྱེ་
བའི་མཐའ་དག་ཀྱང་། །ཡོངས་སུ་ཤེས་པ་ཉིད་དུ་འགྱུར། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་པར་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་ལེགས་པར་མ་ཤེས་ན། །མིག་ནི་སྐྱེ་བའི་
མཐའ་དག་ཀྱང་། །ལེགས་པ་ཉིད་དུ་མི་ཤེས་པས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་མི་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་ལེགས་པར་ཤེས་གྱུར་ན། །མིག་ནི་སྐྱེ་བའི་མཐའ་དག་

79-1-241b

ཀྱང་། །ལེགས་པ་ཉིད་དུ་ཤེས་འགྱུར་བས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་པར་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་མངོན་སུམ་མ་ཤེས་ན། །མིག་ནི་སྐྱེ་བའི་མཐའ་དག་ཀྱང་། །
མངོན་སུམ་ཉིད་དུ་མི་ཤེས་པས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་མི་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་མངོན་སུམ་ཤེས་གྱུར་ན། །མིག་ནི་སྐྱེ་བའི་མཐའ་དག་ཀྱང་། །མངོན་སུམ་
ཉིད་དུ་རབ་ཤེས་པས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་པར་འགྱུར། །གལ་ཏེ་མིག་གི་ངོ་བོ་ཉིད། །མཐའ་ནི་ལེགས་པར་མ་ཤེས་ན། །མིག་ནི་སྐྱེ་བའི་མཐའ་དག་ཀྱང་། །ཡོངས་སུ་ཤེས་
པར་མི་འགྱུར་བས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་མི་འགྱུར། གལ་ཏེ་མིག་གི་ངོ་བོ་ཉིད། །མཐའ་ནི་ལེགས་པར་ཤེས་གྱུར་ན། །མིག་ནི་སྐྱེ་བའི་མཐའ་དག་ཀྱང་། །མངོན་སུམ་ཉིད་དུ་ཤེས་
འགྱུར་བས། །གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་པར་འགྱུར། །གལ་ཏེ་མིག་གི་ངོ་བོ་ཉིད། །རྣམ་དག་ལེགས་པར་མ་ཤེས་ན། །རྣ་བའི་ངོ་བོ་རྣམ་དག་པ། །ལེགས་པ་ཉིད་དུ་མི་ཤེས་བས།། 
གང་ཟག་དེ་ཡིས་དེ་ལྟ་བུའི། །འོད་ཟེར་འགྱེད་པ་ཐོབ་མི་འགྱུར། །གལ་ཏེ་མིག་གི་ངོ་བོ་ཉིད། །རྣམ་དག་ལེགས་པར་ཤེས་གྱུར་ན། །རྣ་བའི་ངོ་བོ་རྣམ་དག་པ། །ལེགས་པ་ཉིད་དུ་རྟོགས་འགྱུར་བས། །གང་ཟག་དེ་
ཡིས་དེ་ལྟ་བུའི། །འོད་ཟེར་འགྱེད་པ་ཐོབ་པར་འགྱུར། །དེ་བཞིན་སྣ་དང་ལྕེ་དང་ལུས། །ཡིད་དང་གཟུགས་སྒྲ་དྲི་རོ་དང་། །རེག་བྱ་ཆོས་དང་ས་ཆུ་དང་། །མེ་རླུང་དག་གི་དངོས་པོ་དང་། །འཇིག་རྟེན་སྡུག་བསྔལ་ཕུང་པོ་དང་། 
ཁམས་དང་འཇིག་རྟེན་སྐྱེ་བ་དང་། །སྒྲ་དང་མིང་ལ་སོགས་པ་ཡང་། །ཐམས་ཅད་དེ་བཞིན་རིག་པར་གྱིས། །དེ་ནས་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་

79-1-242a

སེམས་ཅན་གང་ཐེག་པ་ཆེན་པོ་ལ་ཡང་དག་པར་གཞོལ་ཞིང་འོད་ཟེར་འགྱེད་པ་དེ་ལྟ་བུ་ཡོངས་སུ་རྫོགས་པར་བྱ་བར་འདོད་པ་དེས་དགེ་བའི་རྩ་བའི་ཚོགས་རྣམ་པ་བརྒྱད་བཅུ་པོ་འདི་དག་མངོན་
པར་བསྒྲུབ་པར་བྱའོ། །རྣམ་པ་བརྒྱད་བཅུ་གང་ཞེ་ན། འདི་ལྟ་སྟེ། སེམས་ཅན་ཡོངས་སུ་སྲུང་ཞིང་རྗེས་སུ་དྲན་པ་དང་། གནོད་སེམས་མེད་པ་དང་། ཚུལ་ཁྲིམས་ཡོངས་སུ་དག་པ་སྲུང་ཞིང་ཉམས་པར་མི་
བྱེད་པ་དང་། སེམས་ཤིན་ཏུ་མཉམ་པ་དང་། གཡོ་རྒྱུ་མེད་པ་དང་། སེར་སྣ་མེད་པ་དང་། ཕྲག་དོག་མེད་པ་དང་། འདོད་ཆགས་ཀྱི་བསམ་པ་མེད་པ་དང་། བསླུ་བའི་བསམ་པ་མེད་པ་དང་། ཐེག་པ་
ཆེན་པོའི་མདོ་སྡེ་དམ་པ་དག་ལ་མངོན་པར་ཡིད་ཆེས་པ་དང་། དབང་ཕྱུགས་དང་། རྒྱགས་པ་ལ་ཞེན་ཅིང་སྲེད་པ་མེད་པ་དང་། བཟོད་པའི་སྟོབས་ཕུན་སུམ་ཚོགས་པ་དང་། སྨོན་ལམ་ལས་ཕྱིར་མི་ལྡོག་པ་དང་། 
བསམ་པ་ཤིན་ཏུ་རྣམ་པར་དང་པར་གྱུར་པ་དང་། དགོན་པ་ན་གནས་པ་དང་། འཁོར་རྣམས་ལ་མི་རྟེན་པ་དང་། རྙེད་པ་ལ་མི་རྟེན་པ་དང་། གྲགས་པ་ལ་མི་རྟེན་པ་དང་། བསམ་གཏན་རྣམས་ལ་རབ་ཏུ་གནས་པ་དང་། 
འོད་ཟེར་གྱི་ཏིང་ངེ་འཛིན་རབ་ཏུ་སྟོན་པ་དང་། ཚུལ་ཁྲིམས་དང་ལྡན་པ་དག་ལ་སྒྱུ་མེད་པར་རིམ་གྲོ་བྱེད་པ་དང་། ཚངས་པ་མཚུངས་པར་སྤྱོད་པ་དག་ལ་མཆོག་གི་བསམ་པ་སྐྱེད་པ་དང་། ཆོས་ལ་གུས་པའི་ཕྱིར་
མཁན་པོ་དང་སློབ་དཔོན་དག་ལ་ཤིན་ཏུ་བཀུར་བ་དང་། མདོ་སྡེའི་དོན་རབ་ཏུ་རྟོགས་པ་དང་། ཡང་དག་པར་བསྟན་པ་ལ་རབ་ཏུ་མཁས་པ་དང་། ཚིག་སྨྲས་པ་དག་ལ་མི་བདེན་པ་མེད་པ་དང་། ཡང་དག་པའི་བསམ་
པ་ལ་གནས་པ་དང་། དགེ་བའི་རྩ་བ་བསྐྱེད་པ་དང་། བརྩོན་པ་དང་། རྟག་ཏུ་སྦྱིན་པ་གཏོང་བ་དང་། བདུད་ཀྱི་ལས་རབ་ཏུ་རྟོགས་པ་དང་། དབང་པོ་རྣམས་དམ་དུ་སྲུང་བ་དང་། ཚིག་རབ་ཏུ་བརྟགས་པ་དང་། དོན་དམ་པའི་

79-1-242b

བདེན་པ་ལ་མཁས་པ་དང་། ས་རྣམས་ཀྱི་རང་གི་མཚན་ཉིད་རབ་ཏུ་རྟོགས་པ་དང་། གཟུངས་ཟད་མི་ཤེས་པ་ཡོངས་སུ་ཚོལ་བ་དང་། ལུས་དང་སྲོག་ལ་ཕངས་པ་མེད་པ་དང་། འཁོར་བཞི་པོ་དག་ལ་རྗེས་སུ་
སྟོན་པར་བྱེད་པ་དང་། འཇིག་རྟེན་པའི་བསམ་པ་ཡོངས་སུ་བཅད་པ་དང་། འཇིག་རྟེན་ཕྱི་མའི་ཆོས་མེད་དོ་ཞེས་ཟེར་བའི་ལོག་པར་ལྟ་བ་རྣམས་སྤངས་པ་དང་། ད་དུང་མ་བསླབས་པ་དག་ལ་གྱ་གྱུའི་མཚན་
མ་མི་སྟོན་པ་དང་། གང་བསླབ་པར་འདོད་པ་དག་ལ་ཅི་ནུས་ཀྱིས་རྣམ་པར་ཕྱེ་ནས་རབ་ཏུ་སྟོན་པ་དང་། གླུ་དང་རོལ་མོའི་སྒྲ་དག་གི་བསྔགས་པ་མི་བརྗོད་པ་དང་། རྒྱན་དང་ཡོ་བྱད་ཀྱི་བསྔགས་པ་མི་བརྗོད་པ་དང་། 
བདེན་པ་རྣམས་ལ་ཡང་དག་པར་ཞུགས་པ་དང་། མང་དུ་ཐོས་པ་ཕུན་སུམ་ཚོགས་པ་དང་། གཉིད་རབ་ཏུ་སྤངས་པ་དང་། ཡང་དག་པའི་ཆོས་ཡོངས་སུ་ཚོལ་བ་ལ་རབ་ཏུ་བརྩོན་པ་དང་། སངས་རྒྱས་ལ་གུས་པ་དང་། 
བྱང་ཆུབ་ཏུ་སེམས་བསྐྱེད་པ་དང་། འཇིག་རྟེན་པའི་ལས་ཡོངས་སུ་སྤངས་པ་དང་། བསླབ་པའི་གནས་རྣམས་ལ་ཡང་དག་པར་བརྩོན་པ་དང་། ཆོས་ལ་སྲེད་པའི་ཕྱིར་གྲོགས་ཁྱད་པར་ཅན་ལ་རྟེན་པར་
བྱེད་པ་དང་། དགེ་བའི་རྩ་བ་རྣམས་ཡོངས་སུ་ཚོལ་བ་ལ་སྐྱོ་བ་མེད་པ་དང་། རབ་ཏུ་འབྱུང་བ་ལ་ཤིན་དུ་མོས་པ་དང་། སངས་རྒྱས་ཀྱི་ཆོས་སྲུང་ཞིང་ཡོངས་སུ་འཛིན་པར་བྱེད་པ་དང་། སྡིག་པའི་ལས་མི་སློང་བ་དང་། 
བསྟན་པ་རྣམས་ལ་ཐེ་ཚོམ་མེད་པ་དང་། དཔེས་སྟོན་པ་ལ་རབ་ཏུ་མཁས་པ་དང་། གསང་བ་རྣམས་རྣམ་པར་ཕྱེ་ནས་སྟོན་པར་བྱེད་པ་དང་། བྱང་ཆུབ་ཆེན་པོ་ཡོངས་སུ་ཚོལ་བ་ལ་ངལ་བ་མེད་པ་དང་། མདོ་
སྡེ་ཡང་དག་པར་བཟུང་བ་རྣམས་བརྗེད་པར་མི་བྱེད་པ་དང་། རང་གི་བསླབ་པ་མི་སྤོང་བ་དང་། ཕ་རོལ་གྱི་སྨྲ་བ་རྣམས་ཚར་གཅོད་པ་དང་། ངེས་པར་འབྱུང་བའི་ལམ་ཡོངས་སུ་ཚོལ་བ་དང་། སྤྱོད་པ་ཚད་མེད་པ་རྣམས་

79-1-243a

མངོན་པར་སྒྲུབ་པ་དང་། ཆོས་ཀྱི་ཡེ་ཤེས་དེ་དག་ལ་སེམས་ངེས་པར་གྱུར་པ་དང་། རྒྱུ་དང་འབྲས་བུ་གསལ་བར་མཐོང་ཞིང་འཁོར་བའི་རྒྱུན་མི་གཅོད་པ་དང་། སྲིད་པ་གསུམ་པོ་དག་ལ་ཆགས་པ་མེད་པ་དང་། 
མངོན་པའི་ང་རྒྱལ་སྤངས་པ་དང་། མངོན་པར་ཡིད་ཆེས་པ་དག་ལ་མཉེན་པོ་རྣམ་པར་གཞག་པ་དག་སྟོན་པར་བྱེད་པ་དང་། མ་འོངས་པའི་འབྲས་བུ་རྣམ་པར་སྨིན་པའི་བྱེ་བྲག་རྟོགས་པར་ཁོང་དུ་ཆུད་པ་དང་། 
སྔོན་གྱི་མཐའ་ཡོངས་སུ་ལེགས་པར་ཤེས་པ་དང་། གཞན་གྱི་དྲིང་ལ་མི་ལྟོས་པ་དང་། ཡོངས་སུ་སྤོང་བའི་སྤྱོད་པ་དག་ལ་བརྩོན་འགྲུས་ཀྱིས་གྲུབ་པར་བྱེད་པ་དང་། སངས་རྒྱས་ཀྱི་མཚན་དང་དཔེ་བྱད་
ཀྱི་བཀོད་པ་དག་ཕུན་སུམ་ཚོགས་པར་བྱེད་པ་གང་ཡིན་པ་འདི་ནི་རྣམ་པ་བརྒྱད་བཅུ་ཞེས་བྱའོ། །གཞན་ཡང་ཟླ་འོད་གཞོན་ནུ་ཆོས་བརྒྱད་བཅུ་པོ་འདི་དག་ནི་ཆོས་ལྔའི་ནང་དུ་འཇུག་པར་འགྱུར་རོ། །
ཆོས་ལྔ་གང་ཞེ་ན། འདི་ལྟ་སྟེ། འཁོར་བ་ཤེས་པ་དང་། མྱ་ངན་ལས་འདས་པ་ཤེས་པ་དང་། ཉོན་མོངས་པ་ཟད་པ་ཤེས་པ་དང་། མཆོག་ཏུ་གྱུར་པ་ཤེས་པ་དང་། བསོད་ནམས་ཀྱི་འབྲས་བུ་ཤེས་པ་གང་ཡིན་
པའོ། །གཞན་ཡང་ཟླ་འོད་གཞོན་ནུ་ཆོས་ལྔ་པོ་དེ་དག་ནི་ཆོས་གཉིས་ཀྱི་ནང་དུ་འཇུག་པར་འགྱུར་རོ། །གཉིས་གང་ཞེ་ན། འདི་ལྟ་སྟེ། སེམས་ཡོངས་སུ་དག་པས་རབ་ཏུ་བརྒྱན་པ་དང་། གཟུགས་ཡོངས་སུ་དག་
པས་རབ་ཏུ་བརྒྱན་པ་གང་ཡིན་པའོ། །གཞན་ཡང་ཟླ་འོད་གཞོན་ནུ་ཆོས་གཉིས་པོ་དེ་དག་ནི་ཆོས་གཅིག་གི་ནང་དུ་འཇུག་པར་འགྱུར་རོ། །གཅིག་གང་ཞེ་ན། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་ཐོགས་པ་མི་
མངའ་བའི་རྣམ་པར་གྲོལ་བ་མངོན་པར་གྲུབ་པ་གང་ཡིན་པའོ། །གཞན་ཡང་ཟླ་འོད་གཞོན་ནུ་ཡང་ཆོས་རྣམ་པ་བརྒྱད་བཅུ་ཡོད་དེ། དེ་དག་གིས་དེ་བཞིན་གཤེགས་པ་རྣམས་ཀྱི་ཐོགས་པ་མི་མངའ་བའི་

79-1-243b

རྣམ་པར་གྲོལ་བ་ལེགས་པར་ཡོངས་སུ་རྫོགས་པར་བྱེད་པའོ། །རྣམ་པར་བརྒྱད་བཅུ་གང་ཞེ་ན། འདི་ལྟ་སྟེ། སྦྱིན་པའི་ཚོགས་དང་། ཤེས་རབ་རྒྱ་ཆེན་པོར་གྱུར་པ་དང་། ཚུལ་ཁྲིམས་རྣམ་པར་དག་
པ་ཡོངས་སུ་སྒྲུབ་པ་དང་། ཉོན་མོངས་པའི་གདུང་བ་དང་བྲལ་བ་དང་། ང་རྒྱལ་རབ་ཏུ་བཅོམ་པ་དང་། ཚིག་མཉེན་པ་དང་། དངོས་པོ་སྣ་ཚོགས་རབ་ཏུ་ཤེས་པ་དང་། དགེ་བའི་གྲོགས་པོ་ཡོངས་སུ་ཤེས་པ་དང་། 
ཐེག་པ་ཆེན་པོ་ལ་ཡང་དག་པར་གཞོལ་བ་དང་། བརྩོན་འགྲུས་ཀྱི་གོ་ཆ་བགོས་པ་དང་། སྤྱོད་ལམ་གྱིས་སེམས་ཅན་འདུལ་བ་དང་། ཉོན་མོངས་པར་ལྟུང་བ་རྣམས་ཀྱི་ཐེ་ཚོམ་རབ་ཏུ་གཅོད་པ་དང་། མི་དགེ་བ་
རྣམས་ལ་སྨོད་ཅིང་ཆོས་དཀར་པོ་རྣམས་མངོན་པར་བསྒྲུབ་པ་དང་། མི་དགེ་བའི་གྲོགས་པོ་དང་མི་འགྲོགས་པ་དང་། དགེ་བའི་རྩ་བ་རྣམས་བསྐྱེད་པ་ལ་ཡོངས་སུ་སྐྱོ་བ་མེད་པ་དང་། བྱང་ཆུབ་ཏུ་སེམས་
བསྐྱེད་པ་དང་། བརྩོན་འགྲུས་རབ་ཏུ་རྩོམ་པ་དང་། བདུད་ཀྱི་དངོས་པོ་རབ་ཏུ་རྟོགས་པ་དང་། བདེན་པ་རྣམས་མངོན་དུ་གྱུར་པ་དང་། ཡང་དག་པ་ཁོ་ནར་མཆོད་པ་བྱེད་པ་དང་། ཐེ་ཚོམ་ཡོངས་སུ་གཅོད་པ་དང་། 
སེམས་ཀྱིས་རྟག་ཏུ་སེམས་ཅན་ཡོངས་སུ་བཟླ་བར་སེམས་པ་དང་། སྲིད་པ་རྣམས་ལ་མངོན་པར་ཞེན་པ་མེད་པ་དང་། སེམས་རྒྱ་ཆེན་པོ་ཡོངས་སུ་བསྐྱེད་པ་དང་། སེམས་ཅན་མི་དགེ་བ་རྣམས་ལ་ཉེས་དམིགས་
ཡང་དག་པར་སྟོན་པ་དང་། འདོད་ཆགས་དང་། ཞེ་སྡང་དང་། གཏི་མུག་རབ་ཏུ་སྤོང་བ་དང་། འདོད་པའི་ཕན་པ་ཡོངས་སུ་མི་ཚོལ་བ་དང་། སེམས་ཅན་ཡོངས་སུ་སྨིན་པར་བྱེད་པ་དང་། དེ་བཞིན་གཤེགས་པའི་
མཆོད་རྟེན་འཆོས་པ་དང་། འཕགས་པ་རྣམས་ལ་གུས་པ་སྐྱེད་པ་དང་། ཐེག་པ་ཆེན་པོ་ལ་གནས་པ་དག་ལ་རྟེན་ཅིང་རིམ་གྲོ་བྱེད་པ་དང་། ཐེག་པ་དམན་པ་དག་གི་བསྔགས་པ་མི་བརྗོད་པ་དང་། ཉན་ཐོས་ཀྱི་ཐེག་

79-1-244a

པ་པ་དག་ཐག་རིང་དུ་སྤོང་བ་དང་། ཕྱིར་རྒོལ་བ་རྣམས་ཚར་གཅོད་པ་དང་། སངས་རྒྱས་བཅོམ་ལྡན་རྣམས་ལ་མཆོད་པ་རྒྱ་ཆེན་པོ་བཤམས་ནས་ཁྱད་པར་དུ་འཕགས་པའི་སེམས་ཀྱིས་
དབུལ་བར་བྱེད་པ་དང་། ཐོགས་པ་མེད་པའི་ཡེ་ཤེས་ཐོབ་པ་དང་། སྤོབས་པ་ཕུན་སུམ་ཚོགས་པ་དང་། དཔེ་སྣ་ཚོགས་ཀྱིས་ཡང་དག་པའི་ཆོས་རབ་ཏུ་སྟོན་པར་བྱེད་པ་དང་། སྟོན་པའི་ངོ་བོ་ཉིད་དང་འགལ་
བར་མི་བྱེད་པ་དང་། ཆོས་ཡོངས་སུ་ཚོལ་བ་ལ་ལེ་ལོ་མེད་པ་དང་། དོན་ཟབ་མོ་ཡང་དག་པར་སྟོན་པ་དང་། གཟུངས་ཆེན་པོ་དང་ལྡན་པ་དང་། ཆོས་ཡང་དག་པར་སྟོན་པར་བྱེད་ཀྱང་མངོན་པར་ཞེན་པ་མེད་པ་དང་། 
ཆོས་རྒྱ་ཆེར་སྤེལ་བར་བྱེད་པ་དང་། ཡོངས་སུ་འདྲེན་པ་ལ་ཆོག་ཤེས་པ་མེད་པ་དང་། སྤྱོད་པ་རྣམས་ཡོངས་སུ་རྫོགས་པ་དང་། གཟི་བྱིན་ཆེན་པོ་དང་ལྡན་པ་དང་། སྤོབས་པ་ཐོགས་པ་མེད་པ་དང་། མང་དུ་ཐོས་
པ་ཕུན་སུམ་ཚོགས་པ་དང་། མི་དགེ་བ་རྣམས་ཀྱི་བསྔགས་པ་མི་རྗོད་པ་དང་། དགེ་བའི་ལས་ཡང་དག་པར་སྒྲུབ་པ་དང་། ཕུང་པོ་རྣམས་ཁོང་དུ་ཆུད་པ་དང་། ལྟ་བ་རྣམས་རབ་ཏུ་སྤངས་པ་དང་། 
རྒྱུའི་ངོ་བོ་ཉིད་རབ་ཏུ་རྟོགས་པ་དང་། སྤྱོད་ཡུལ་ལས་ཡང་དག་པར་འདས་པ་དང་། སྤྱོད་ཡུལ་མ་ཡིན་པ་ཡོངས་སུ་སྤངས་པ་དང་། ཡོངས་སུ་དང་བ་སྐྱེད་པ་དང་། ཡང་དག་པའི་ལམ་ལ་གནས་པ་དང་། 
ཐེག་པ་ཆེན་པོ་ལ་རབ་ཏུ་དགའ་བ་དང་། མཉམ་པ་ཉིད་དུ་ཡོངས་སུ་སྡུད་པར་བྱེད་པ་དང་། བདག་མེད་པ་ལ་མངོན་པར་མ་ཆགས་པ་དང་། འཁོར་བ་ལ་ཡོངས་སུ་སྐྱོ་བ་མེད་པ་དང་། མྱ་ངན་ལས་འདས་པ་ཡོངས་
སུ་ཚོལ་བ་ལ་མོས་པ་དང་། འདོད་པ་ཆུང་བའི་ཕྱིར་དགོན་པ་ལ་གནས་པ་དང་། རྟག་ཏུ་བསོད་སྙོམས་སློང་ཞིང་ལེ་ལོ་མེད་པར་གྱུར་པ་དང་། ཇི་ཙམ་རྙེད་པ་དེ་ཉིད་ཀྱིས་ཆོག་པར་འཛིན་པ་དང་། ངོ་ཚ་མེད་པ་དང་། 

79-1-244b

ཁྲེལ་མེད་པ་སྤངས་པ་དང་། སངས་རྒྱས་རྣམས་ལ་བསྙེན་པར་བྱེད་པ་དང་། དགེ་བའི་གྲོགས་པོ་དང་ལྷན་ཅིག་གནས་པ་དང་། བདག་གི་ཟླ་མ་ཡིན་པ་རྣམས་རབ་ཏུ་སྤོང་བ་དང་། སོ་སོའི་སྐྱེ་བོ་རྣམས་ལ་སྙིང་
བརྩེ་བ་དང་། སེམས་ཅན་གྱི་སྤྱོད་པ་དང་མཐུན་པར་བྱེད་པ་དང་། སངས་རྒྱས་ལ་ཤིན་དུ་དང་བ་དང་། སྣོད་མ་ཡིན་པ་ཡོངས་སུ་སྤོང་བ་དང་། མི་མཐུན་པ་རྣམས་ལ་ཚིག་སྦྱིན་པར་མི་བྱེད་པ་དང་། གསོལ་
བ་མི་འདེབས་པ་དག་ལ་ཡང་དག་པར་སྟོན་པར་མི་བྱེད་པ་དང་། གསོལ་བ་འདེབས་པ་ཞིག་འོངས་ནས་ཅི་རིགས་པར་སྟོན་པར་བྱེད་པ་དང་། ཟས་ལ་སྙོམས་པར་གྱུར་པ་དང་། རྟག་ཏུ་གཏོང་ཞིང་མཉམ་པ་
ཉིད་དུ་གཏོང་བ་དང་། སྒོ་ཆེན་པོ་ཕྱེ་ནས་གཏོང་བར་བྱེད་པ་གང་ཡིན་པ་དེ་དག་ནི་གཞོན་ནུ་ཆོས་རྣམ་པ་བརྒྱད་བཅུ་ཞེས་བྱ་སྟེ། འདི་དག་གིས་དེ་བཞིན་གཤེགས་པ་རྣམས་ཀྱི་ཐོགས་པ་མི་མངའ་བའི་རྣམ་པར་
གྲོལ་བ་ཐོབ་པར་བྱེད་དོ། །དེའི་ཚེ་ཟླ་འོད་གཞོན་ནུར་གྱུར་པས་ཆོས་དེ་ལྟ་བུ་ཐོས་པས་རབ་ཏུ་དགའ་བར་གྱུར་ནས་བཅོམ་ལྡན་འདས་ཀྱི་སྤྱན་སྔར་ཚིགས་སུ་བཅད་དེ་མངོན་པར་བསྟོད་པ། དེ་བཞིན་གཤེགས་
པ་མི་ཟད་མཐའ་མཁྱེན་པས། །དེ་སླད་རྣམ་དག་ཡེ་ཤེས་སྟོན་མཛད་ལགས། །རྣམ་དག་ཡེ་ཤེས་སྟོན་པར་མཛད་པས་ན། རྣམ་དག་འོད་ཟེར་ཕུན་སུམ་ཚོགས་པ་ལགས། དེ་བཞིན་གཤེགས་པས་མིག་
བདག་མེད་མཁྱེན་པས། དེ་སླད་རྣམ་དག་དབྱངས་ནི་སྟོན་མཛད་ལགས། །རྣམ་དག་དབྱངས་ནི་སྟོན་པར་མཛད་པས་ན། །ཚངས་དབྱངས་མཚན་ཉིད་ཕུན་སུམ་ཚོགས་པ་ལགས། །བཅོམ་ལྡན་སྔོན་ནི་སེམས་
ཅན་ཕན་བཏགས་པས། །དེ་སླད་རྣམ་དག་གསུང་ནི་རྫོགས་པ་ལགས། །རྣམ་དག་གསུང་ནི་ཡོངས་སུ་རྫོགས་པས་ན། །འཇིག་རྟེན་ཚད་མེད་རྣམས་ལ་ཕན་འདོགས་མཛད། །དེ་བཞིན་གཤེགས་པས་མིག་

79-1-245a

ཉིད་སྟོང་མཁྱེན་པས། །དེ་སླད་ཀུན་འཛིན་མཁྱེན་པ་རྫོགས་པ་ལགས། །ཀུན་འཛིན་མཁྱེན་པ་ཡོངས་སུ་རྫོགས་པས་ན། །དེ་བཞིན་གཤེགས་པའི་འོད་ཟེར་དཔག་མེད་སྟོན། །དེ་བཞིན་
གཤེགས་པས་མིག་གི་ཁྱད་པར་མཁྱེན། །མིག་གི་ཁྱད་པར་དག་ཀྱང་མཐའ་མ་མཆིས། །མཁྱེན་པའི་མིང་ནི་དཔག་ཏུ་མ་མཆིས་པས། །དེ་བཞིན་གཤེགས་པའི་འོད་ཟེར་དཔག་མེད་སྟོན། །སངས་རྒྱས་ཡི་གེ་
ཁྱད་པར་སྒོ་མཁྱེན་པས། །མིག་སྟོང་ཡི་གེ་བྲལ་བར་རབ་ཏུ་མཁྱེན། །མིག་སྟོན་ཡི་གེ་བྲལ་བར་མཁྱེན་པས་ན། །དེ་བཞིན་གཤེགས་པའི་འོད་ཟེར་དཔག་མེད་སྟོན། །གང་ཞིག་མིག་ལ་བདག་མེད་
རབ་སེམས་པ། །སངས་རྒྱས་གསུང་ནི་བདེན་པ་ཉིད་དུ་རྟོགས། །དེ་བཞིན་གཤེགས་པའི་འོད་ཟེར་ངེས་པ་སྟོན། །བཅོམ་ལྡན་རྫུ་འཕྲུལ་མཆོག་ནི་ཡོངས་རྫོགས་པས། །མིག་གི་འཇིག་པ་དཔག་མེད་
ཐུགས་སུ་ཆུད། །མིག་གིས་འཇིག་པ་རབ་ཏུ་མཁྱེན་པས་ན། །འཇིག་རྟེན་ཐམས་ཅད་ལ་ནི་ཕན་འདོགས་མཛད། །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །མིག་གི་སྐྱེ་བ་དཔག་མེད་རབ་ཏུ་མཁྱེན། །ཇི་
ལྟར་བཅོམ་ལྡན་མིག་གི་སྐྱེ་མཁྱེན་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །དེ་བཞིན་རྣ་བ་སྣ་དང་ལྕེ་ལུས་ཡིད། །གཟུགས་སྒྲ་དྲི་རོ་རེག་བྱ་དག་དང་ཆོས། །འཇིག་རྟེན་སྐྱེ་དང་སྒྲ་དང་མིང་ལ་
སོགས། །ཐམས་ཅད་ལ་ཡང་དེ་བཞིན་རབ་ཏུ་མཁྱེན། ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །སྦྱིན་པའི་ཕ་རོལ་བྱོན་པ་ཕུན་སུམ་ཚོགས། །ཇི་ལྟར་བཅོམ་ལྡན་སྦྱིན་པའི་ཕ་རོལ་བྱོན། །བདག་
ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །ཚུལ་ཁྲིམས་རྣམ་དག་ཕ་རོལ་བྱོན་དང་ལྡན། །ཇི་ལྟར་བཅོམ་ལྡན་ཚུལ་ཁྲིམས་ཕ་རོལ་བྱོན། །བདག་ཀྱང་རིང་

79-1-245b

པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །བཟོད་པའི་ཕ་རོལ་བྱོན་པ་ཕུན་སུམ་ཚོགས། །ཇི་ལྟར་བཅོམ་ལྡན་བཟོད་པའི་ཕ་རོལ་བྱོན། །བདག་ཀྱང་རིང་པོར་
མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །བརྩོན་འགྲུས་ཕ་རོལ་བྱོན་པ་ཕུན་སུམ་ཚོགས། ཇི་ལྟར་བཅོམ་ལྡན་བརྩོན་འགྲུས་ཕ་རོལ་བྱོན། །བདག་ཀྱང་རིང་པོར་མི་ཐོགས་
དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །བསམ་གཏན་ཕ་རོལ་བྱོན་པ་ཕུན་སུམ་ཚོགས། །ཇི་ལྟར་བཅོམ་ལྡན་བསམ་གཏན་ཕ་རོལ་བྱོན། །བདག་ཀྱང་རིང་པོར་མི་ཐོགས་དེ་
བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །ཤེས་རབ་ཕ་རོལ་བྱོན་པ་ཕུན་སུམ་ཚོགས། །ཇི་ལྟར་བཅོམ་ལྡན་ཤེས་རབ་ཕ་རོལ་བྱོན། །བདག་ཀྱང་རིང་པོར་མི་ཐོགས་དེ་བཞིན་
ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །ཆོས་སྐུའི་ཕ་རོལ་བྱོན་པ་ཕུན་སུམ་ཚོགས། །ཇི་ལྟར་བཅོམ་ལྡན་ཆོས་སྐུའི་ཕ་རོལ་བྱོན། །བདག་ཀྱང་རིང་པོར་མི་ཐོགས་དེ་བཞིན་ཤོག །
ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །རྣམ་དག་གཟུགས་ནི་དཔག་མེད་ཕུན་སུམ་ཚོགས། །ཇི་ལྟར་བཅོམ་ལྡན་རྣམ་དག་གཟུགས་ལྡན་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །
ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །རྣམ་དག་ཡིད་ནི་དཔག་མེད་ཕུན་སུམ་ཚོགས། །ཇི་ལྟར་བཅོམ་ལྡན་རྣམ་དག་ཡིད་ལྡན་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་
རྗེ་ཆེན་པོ་རྐང་གཉིས་མཆོག་གྱུར་པ། །ཡོན་ཏན་མཆོག་ནི་དཔག་མེད་ཕུན་སུམ་ཚོགས། །ཇི་ལྟར་བཅོམ་ལྡན་ཡོན་ཏན་མཆོག་ལྡན་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །

79-1-246a

ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །གཟུགས་ཀྱི་མཚན་ནི་དཔག་མེད་ཕུན་སུམ་ཚོགས། །ཇི་ལྟར་བཅོམ་ལྡན་གཟུགས་ཀྱི་མཚན་ལྡན་པ། །བདག་ཀྱང་རིང་པོར་མི་
ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །རྣམ་དག་སྒྲ་ནི་དཔག་མེད་ཕུན་སུམ་ཚོགས། །ཇི་ལྟར་བཅོམ་ལྡན་རྣམ་དག་སྒྲ་ལྡན་པ། །བདག་ཀྱང་རིང་པོར་མི་ཐོགས་
དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །རྫུ་འཕྲུལ་ཆེན་པོ་དཔག་མེད་ཕུན་སུམ་ཚོགས། །ཇི་ལྟར་བཅོམ་ལྡན་རྫུ་འཕྲུལ་མཆོག་ལྡན་པ། །བདག་ཀྱང་རིང་པོར་མི་ཐོགས་
དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །སེམས་ཅན་གདུལ་སླད་སྲིད་པ་གསུམ་ན་བཞུགས། །ཇི་ལྟར་བཅོམ་ལྡན་སེམས་ཅན་གདུལ་མཛད་པ། །བདག་ཀྱང་རིང་པོར་མི་ཐོགས་དེ་
བཞིན་ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །འཁོར་བའི་སྤྱོད་པ་དཔག་མེད་དག་ལས་འདས། ཇི་ལྟར་བཅོམ་ལྡན་འཁོར་བའི་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་
ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །འདོད་ཆགས་སྤྱོད་པ་དཔག་མེད་དག་ལས་འདས། །ཇི་ལྟར་བཅོམ་ལྡན་འདོད་ཆགས་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་
ཤོག །ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །ཞེ་སྡང་སྤྱོད་པ་དཔག་མེད་དག་ལས་འདས། །ཇི་ལྟར་བཅོམ་ལྡན་ཞེ་སྡང་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །
ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །གཏི་མུག་སྤྱོད་པ་དཔག་མེད་དག་ལས་འདས། །ཇི་ལྟར་བཅོམ་ལྡན་གཏི་མུག་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག ། 

79-1-246b

ཐུགས་རྗེ་ཆེན་པོ་རྐང་གཉིས་མཆོག་གྱུར་པ། །འདོད་ཆགས་ཞེ་སྡང་སྤྱོད་པ་དཔག་མེད་འདས། །ཇི་ལྟར་བཅོམ་ལྡན་འདོད་སྡང་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་
ཆེན་པོ་རྐང་གཉིས་མཆོག་གྱུར་པ། །ཞེ་སྡང་གཏི་མུག་སྤྱོད་པ་དཔག་མེད་འདས། །ཇི་ལྟར་བཅོམ་ལྡན་སྡང་རྨོངས་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་
རྐང་གཉིས་མཆོག་གྱུར་པ། །འདོད་ཆགས་གཏི་མུག་སྤྱོད་པ་དཔག་མེད་འདས། །ཇི་ལྟར་བཅོམ་ལྡན་འདོད་རྨོངས་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །ཐུགས་རྗེ་ཆེན་པོ་རྐང་གཉིས་
མཆོག་གྱུར་པ། །ཆ་མཉམ་སྤྱོད་པ་དཔག་མེད་ཡང་དག་འདས། །ཇི་ལྟར་བཅོམ་ལྡན་ཆ་མཉམ་སྤྱོད་འདས་པ། །བདག་ཀྱང་རིང་པོར་མི་ཐོགས་དེ་བཞིན་ཤོག །འདྲེན་པ་འདོད་ཆགས་དག་ལས་ཡོངས་
འདས་པས། །འཇིག་རྟེན་ཀུན་ལ་ཤིན་ཏུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག །འདྲེན་པ་ཞེ་སྡང་དག་ལས་ཡོངས་འདས་པས། །
འཇིག་རྟེན་ཀུན་ལ་ཤིན་དུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག །འདྲེན་པ་གཏི་མུག་སྤྱོད་ལས་ཡོངས་འདས་པས། །འཇིག་
རྟེན་ཀུན་ལ་ཤིན་དུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག །འདྲེན་པ་འདོད་ཆགས་ཞེ་སྡང་སྤྱོད་འདས་པས། །འཇིག་རྟེན་ཀུན་
ལ་ཤིན་དུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག །འདྲེན་པ་ཞེ་སྡང་གཏི་མུག་སྤྱོད་འདས་པས། །འཇིག་རྟེན་ཀུན་ལས་ཤིན་ཏུ་ཕན་

79-1-247a

འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག །འདྲེན་པ་འདོད་ཆགས་གཏི་མུག་སྤྱོད་འདས་པས། །འཇིག་རྟེན་ཀུན་ལས་
ཤིན་དུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག །འདྲེན་པ་ཆགས་སྡང་གཏི་མུག་སྤྱོད་འདས་པས། །འཇིག་རྟེན་ཀུན་ལས་
ཤིན་དུ་ཕན་འདོགས་མཛད། །ཇི་ལྟར་བཅོམ་ལྡན་འཇིག་རྟེན་ཕན་འདོགས་པ། །བདག་ཀྱང་དེ་འདྲའི་ཡེ་ཤེས་གྲུབ་པར་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །ལྷ་ཚོགས་མང་
པོ་ཐམས་ཅད་འདུལ་བར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ལྷ་མི་ཁ་ལོ་སྒྱུར་བའི་སྟོན་པར་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །ཀླུ་ཚོགས་མང་པོ་ཐམས་
ཅད་འདུལ་བར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ལྷ་མི་ཁ་ལོ་སྒྱུར་བའི་སྟོན་པར་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །གནོད་སྦྱིན་མང་པོ་ཐམས་ཅད་
འདུལ་བར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ལྷ་མི་ཁ་ལོ་སྒྱུར་བའི་སྟོན་པར་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །དྲི་ཟ་ཐམས་ཅད་རབ་ཏུ་འདུལ་མཛད་ཅིང་། །
དེ་བཞིན་གྲུལ་བུམ་དཔག་ཏུ་མ་མཆིས་པ། །འཁོར་བཅས་ཇི་སྙེད་རབ་ཏུ་འདུལ་བར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ལྷ་མི་ཁ་ལོ་སྒྱུར་བའི་སྟོན་པར་ཤོག །དེ་བཞིན་གཤེགས་
པ་མཁྱེན་པ་མཆོག་ལྡན་པས། །ཆོས་རྣམས་ཡང་དག་དོན་ནི་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ཡང་དག་དེ་ལ་ཐེ་ཚོམ་མ་མཆིས་ཤོག །དེ་བཞིན་གཤེགས་པ་སྡུག་བསྔལ་

79-1-247b

ཟད་མཐའ་མཁྱེན། །སྐྱེ་དགུ་ཐམས་ཅད་ལ་ནི་ཕན་འདོགས་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །སྡུག་བསྔལ་ཟད་ལ་ཐེ་ཚོམ་མ་མཆིས་ཤོག །དེ་བཞིན་གཤེགས་པས་རྒྱུ་ཟད་
མཐའ་མཁྱེན་པས། །སྐྱེ་དགུ་ཐམས་ཅད་ལ་ནི་ཕན་འདོགས་མཛད། །བདག་ཀྱང་དེ་འདྲའི་གྲུབ་གྱུར་ནས། །རྒྱུ་ཟད་དེ་ལ་ཐེ་ཚོམ་མ་མཆིས་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །
འཇིག་རྟེན་སྤྱོད་པ་དག་ནི་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་སྤྱོད་ལ་ཐེ་ཚོམ་མ་མཆིས་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །འཇིག་རྟེན་གནས་
དང་གནས་མེད་རབ་ཏུ་མཁྱེན། བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །འཇིག་རྟེན་ལས་དང་
འབྲས་བུ་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །འཇིག་རྟེན་རང་བཞིན་སྣ་ཚོགས་
རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །ཐམས་ཅད་ཀུན་དུ་འགྲོ་བའི་སྤྱོད་པ་མཁྱེན། །
བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །འཇིག་རྟེན་མོས་པ་སྣ་ཚོགས་རབ་ཏུ་མཁྱེན། །བདག་
ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །དབང་པོ་རྣམས་ཀྱི་རང་བཞིན་ཐམས་ཅད་མཁྱེན། །བདག་

79-1-248a

ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །བསམ་གཏན་སྤྱོད་པ་དག་ནི་རབ་ཏུ་མཁྱེན། །
བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །རྣམ་པར་ཐར་པའི་སྤྱོད་པ་རབ་ཏུ་མཁྱེན། །
བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །ཆ་མཉམ་སྤྱོད་པ་དག་ནི་རབ་ཏུ་མཁྱེན། །
བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །སྙོམས་འཇུག་སྤྱོད་པ་དག་ནི་རབ་ཏུ་མཁྱེན། །
བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་འཁོར་བ་རབ་མཁྱེན་པས། །འཁོར་བ་ཉོན་མོངས་རྒྱུ་ལས་སྐྱེས་པར་མཁྱེན། །
བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་ཐམས་ཅད་རབ་མཁྱེན་པས། །འཇིག་རྟེན་ཕན་འདོགས་དཔེ་ཟླ་ཡོངས་མ་
མཆིས། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་ཏིང་འཛིན་རབ་གནས་པས། །ཁྱད་པར་ཐབས་ཀྱི་ཡེ་ཤེས་སྐྱེད་པར་མཛད། །
བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །སྔོན་གྱི་གནས་ཀྱི་སྤྱོད་པ་དཔག་མེད་མཁྱེན། །བདག་ཀྱང་

79-1-248b

དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །འཆི་འཕོ་སྐྱེ་བ་དཔག་མེད་རབ་ཏུ་མཁྱེན། །བདག་ཀྱང་དེ་འདྲའི་
ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །ཉོན་མོངས་ཟད་པ་ཐམས་ཅད་རབ་ཏུ་མཁྱེན། །བདག་ཀྱང་དེ་འདྲའི་
ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །བླ་མེད་བྱང་ཆུབ་ཡང་དག་མངོན་སངས་རྒྱས། །བདག་ཀྱང་དེ་འདྲའི་
ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །ཉོན་མོངས་བག་ཆགས་དག་ནི་རབ་ཏུ་སྤངས། །བདག་ཀྱང་དེ་འདྲའི་
ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་མཁྱེན་པ་མཆོག་ལྡན་པས། །འཁོར་བ་ངེས་འབྱུང་ཆོས་ནི་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་
གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པ་ཆོས་དོན་རབ་མཁྱེན་པས། །སེམས་ཅན་དཔག་མེད་རྣམས་ནི་གོ་བར་མཛད། །བདག་ཀྱང་དེ་འདྲའི་ཡེ་ཤེས་གྲུབ་
གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པས་ཆོས་ཉིད་སྒྱུ་མ་དང་། །རྨི་ལམ་སྨིག་རྒྱུ་ལྟ་བུར་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་
རྟེན་ཐམས་ཅད་ལ་ནི་ཕན་བགྱིད་ཤོག །དེ་བཞིན་གཤེགས་པས་འཇིག་རྟེན་ཐམས་ཅད་ཀྱི། །ཡི་གེ་དག་དང་བརྗོད་པ་རབ་ཏུ་མཁྱེན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་

79-1-249a

ལ་ནི་ཕན་བགྱིད་ཤོག །དེ་བཞིན་གཤེགས་པ་སྤོབས་པ་མཆོག་ལྡན་པས། །དམ་ཆོས་ཟབ་མོ་དག་ནི་སྟོན་པར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་
ནི་ཕན་བགྱིད་ཤོག །དེ་བཞིན་གཤེགས་པ་སྐུ་གསུང་ཐུགས་དུལ་བས། །ཐམས་ཅད་ཡེ་ཤེས་རྗེས་སུ་འབྲང་བར་མཛད། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་
བགྱིད་ཤོག །དེ་བཞིན་གཤེགས་པས་དུས་གསུམ་རབ་མཁྱེན་པས། །འཛིན་དང་ཆགས་པ་མི་མངའ་ཐོགས་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཇིག་རྟེན་ཐམས་ཅད་ལ་ནི་ཕན་བགྱིད་ཤོག །
དེ་བཞིན་གཤེགས་པས་ཚུལ་ཁྲིམས་ཏིང་འཛིན་དང་། །ཤེས་རབ་བསྒྲུབས་པས་དེ་ལ་ལྡོག་མི་འགྱུར། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ཁམས་གསུམ་ཐུགས་རྗེ་ཆེན་པོའི་གཙོར་གྱུར་
ཅིག །དེ་བཞིན་གཤེགས་པས་རྣམ་གྲོལ་རབ་བསྒྲུབས་པས། །རྣམ་གྲོལ་མཁྱེན་དང་གཟིགས་པ་ལྡོག་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ཁམས་གསུམ་ཐུགས་རྗེ་
ཆེན་པོའི་གཙོར་གྱུར་ཅིག །དེ་བཞིན་གཤེགས་པས་ཞི་གནས་ལྷག་མཐོང་བསྒྲུབས། །ལྷ་མི་འཇིག་རྟེན་དག་ན་མཚུངས་མ་མཆིས། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ཁམས་
གསུམ་ཐུགས་རྗེ་ཆེན་པོའི་གཙོར་གྱུར་ཅིག །དེ་བཞིན་གཤེགས་པ་མཁྱེན་པ་མཆོག་ལྡན་པས། །འཇིག་རྟེན་ཆོས་རྣམས་ལ་ནི་ཞེན་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །ཁམས་
གསུམ་ཐུགས་རྗེ་ཆེན་པོའི་གཙོར་གྱུར་ཅིག །དེ་བཞིན་གཤེགས་པས་འཇིག་རྟེན་མཁྱེན་ལྡན་པས། །འགྲོ་བ་སྣ་ཚོགས་དག་ནི་གསལ་བར་གཟིགས། །བདག་ཀྱང་དེ་འདྲའི་ཡེ་ཤེས་གྲུབ་

79-1-249b

གྱུར་ནས། །འགྲོ་བ་དེ་ལ་ཐེ་ཚོམ་མ་མཆིས་ཤོག །དེ་བཞིན་གཤེགས་པ་སྐྱེ་ཟད་མཐའ་མཁྱེན་པས། །དེ་སླད་དེ་ལ་རྨོངས་པ་ཡོང་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །སྐྱེ་ཟད་ཉིད་
ལ་ཐེ་ཚོམ་མ་མཆིས་ཤོག །དེ་བཞིན་གཤེགས་པས་རབ་ཞི་མཐའ་མཁྱེན་པས། །དེ་སླད་དེ་ལ་རྨོངས་པ་ཡོང་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །རབ་ཞི་དེ་ལ་ཐེ་ཚོམ་མ་མཆིས་
ཤོག །དེ་བཞིན་གཤེགས་པ་འཁོར་བའི་མཐའ་མཁྱེན་པས། །དེ་སླད་དེ་ལ་རྨོངས་པ་ཡོང་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །འཁོར་བ་དེ་ལ་ཐེ་ཚོམ་མ་མཆིས་ཤོག །དེ་བཞིན་
གཤེགས་པས་སྔོན་དང་ཕྱི་མཐའ་མཁྱེན། །དེ་སླད་སློབ་དཔོན་མ་མཆིས་མཁྱེན་དང་ལྡན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །སྔ་ཕྱིའི་མཐའ་ལ་ཐེ་ཚོམ་མ་མཆིས་ཤོག །དེ་བཞིན་གཤེགས་
པས་སྐྱོན་ཟློག་མཐའ་རབ་མཁྱེན། །དེ་སླད་སློབ་དཔོན་མ་མཆིས་མཁྱེན་དང་ལྡན། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །སྐྱོན་ཟློག་དེ་ལ་ཐེ་ཚོམ་མ་མཆིས་ཤོག །དེ་བཞིན་གཤེགས་པས་སྔོན་
དང་ཕྱི་མཐའ་མཁྱེན། །མིག་གི་རྟག་ཆད་དག་ལ་འཛིན་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །སྔ་ཕྱི་མཐའ་ལ་ཐེ་ཚོམ་མ་མཆིས་ཤོག །དེ་བཞིན་གཤེགས་པས་སྐྱེ་ཟད་མཐའ་མཁྱེན་པས། །
མིག་གི་རྟག་ཆད་དག་ལས་འཛིན་མི་མངའ། །བདག་ཀྱང་དེ་འདྲའི་ཡེ་ཤེས་གྲུབ་གྱུར་ནས། །སྐྱེ་ཟད་ཉིད་ལ་ཐེ་ཚོམ་མ་མཆིས་ཤོག །གང་ཞིག་སྔོན་དང་ཕྱི་མཐའ་མ་རྟོགས་པས། །དེས་ནི་འདོད་པ་དག་
ལ་ཞེན་པ་སྐྱེད། །དེ་བཞིན་གཤེགས་པས་དེ་ནི་རབ་མཁྱེན་པས། །དེ་སླད་འདོད་པ་དག་ལ་ཞེན་མི་མངའ། །གང་ཞིག་ཡོད་མེད་མཐའ་ནི་མ་རྟོགས་པ། །དེས་ནི་འདོད་པ་དག་ལ་ཞེན་པ་སྐྱེད། །དེ་བཞིན་

79-1-250a

གཤེགས་པས་དེ་ནི་རབ་མཁྱེན་པས། །དེ་སླད་འདོད་པ་དག་ལ་ཞེན་མི་མངའ། །གང་ཞིག་ཟད་དང་མི་ཟད་མ་རྟོགས་པ། །དེས་ནི་འདོད་པ་དག་ལ་ཞེན་པ་སྐྱེད། །དེ་བཞིན་གཤེགས་པས་དེ་ནི་རབ་མཁྱེན་
པས། །དེ་སླད་འདོད་པ་དག་ལ་ཞེན་མི་མངའ། །གང་ཞིག་འཇུག་དང་མི་འཇུག་མ་རྟོགས་པ། །དེས་ནི་འདོད་པ་དག་ལ་ཞེན་པ་སྐྱེད། །དེ་བཞིན་གཤེགས་པས་དེ་ནི་རབ་མཁྱེན་པས། །དེ་སླད་འདོད་པ་དག་
ལ་ཞེན་མི་མངའ། །ཞེ་སྡང་གཏི་མུག་ཁོང་ཁྲོ་འཆབ་པ་དང་། །གཡོ་སྒྱུ་ཕྲག་དོག་ང་རྒྱལ་ཁེངས་པ་དང་། སྦྱིན་དང་ཚུལ་ཁྲིམས་བཟོད་དང་བརྩོན་འགྲུས་དང་། །བསམ་གཏན་ཤེས་རབ་དག་ཀྱང་དེ་བཞིན་ནོ། །དེ་ནས་
བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པའི་སེམས་ཀྱི་རྟོག་པ་ཐུགས་ཀྱིས་མཁྱེན་ནས་འཛུམ་པ་མཛད་དེ། འོད་ཟེར་གསེར་གྱི་ཁ་དོག་ལྟ་བུ་རབ་ཏུ་བཀྱེའོ། །འོད་ཟེར་དེས་ཀྱང་སངས་རྒྱས་
ཀྱི་ཞིང་ཚད་མེད་དཔག་ཏུ་མེད་པ་རྣམས་སྣང་བར་བྱས་ཏེ། འཇིག་རྟེན་གྱི་ཁམས་དེ་དག་ཏུ་ཕན་པ་དག་བྱས་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། དེ་བཞིན་གཤེགས་པའི་
གཙུག་ཏོར་ཉིད་དུ་ཐིམ་པར་གྱུར་ཏོ། །དེ་ནས་དེའི་ཚེ་བྱང་ཆུབ་སེམས་དཔའ་བྱམས་པ་འདུག་པའི་སྟན་ལས་ལངས་ནས། བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་
བཙུགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ། གུས་པས་ཐལ་མོ་སྦྱར་ནས། ཚིགས་སུ་བཅད་པ་འདི་དག་གིས་མངོན་པར་བསྟོད་དེ། བཅོམ་ལྡན་འདས་ལ་ཞུ་བ་ཞུས་པ།   
འབྲུག་དང་སེང་གེའི་སྒྲ་སྒྲོགས་ཤིང་། །ཀ་ལ་པིང་ཀའི་སྒྲ་ཕྱུང་བས། །ཆོས་རྔ་ཆེན་པོའི་སྒྲ་འབྱིན་པ། །ཅི་ཡི་སླད་དུ་འཛུམ་པ་མཛད། །ཉི་མ་སྟོང་བས་ཁྱད་པར་འཕགས། །རྣམ་པར་སྒྲ་རབ་དག་དང་ལྡན། །

79-1-250b

ཡོན་ཏན་ངོ་མཚར་རབ་མངའ་བ། །ཅི་སླད་འོད་ཟེར་བཀྱེ་བ་མཛད། །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་རབ་བརྒྱན་པས། །ཐམས་ཅད་དག་ནི་ཡོངས་རྫོགས་
པས། །ཅི་སླད་འོད་ཟེར་བཀྱེ་བ་མཛད། །དེ་བཞིན་གཤེགས་པ་དབྱངས་མཉེན་པས། །ངག་རྩུབ་རྣམས་ནི་རྟག་ཏུ་སྤངས། །སེམས་ཅན་ནད་ནི་ལེགས་གསོ་བ། །ཅི་སླད་འོད་ཟེར་བཀྱེ་བར་མཛད། །
ཐུགས་རྗེ་ཆེན་པོ་རྐང་གཉིས་གཙོ། །མིག་ནི་རྟག་ཏུ་སྟོང་དབེན་མཁྱེན། །རྣམ་དག་ཚངས་པའི་དབྱངས་མངའ་བས། །སེམས་ཅན་རྣམས་ལ་ཆོས་སྟོན་མཛད། །རྣ་བ་སྣ་ལྕེ་ལུས་དང་ཡིད། །སྒྲ་དང་མིང་
ལ་སོགས་པ་ནས། །ཀུན་འབྱུང་འགོག་པ་ལམ་དག་དང་། །ཡེ་ཤེས་བཟོད་པའི་བར་དེ་བཞིན། །ཐུགས་རྗེ་ཆེན་པོ་རྐང་གཉིས་གཙོ། །མིག་ཟད་སྐྱེ་བའི་མཐའ་དག་དང་། །རབ་ཞི་དག་ནི་འཁོར་བ་དག །
ཐམས་ཅད་སྟོང་དབེན་ཉིད་དུ་མཁྱེན། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་ལ་སོགས་པའི་བར། །ཐམས་ཅད་ཀྱང་ནི་དེ་བཞིན་ནོ། །གཞན་ཡང་རྟེན་ཅིང་འབྲེལ་
འབྱུང་ཆོས། །ཆད་དང་རྟག་པ་ཡོངས་བྲལ་ནས། །བདག་དང་གཞན་གྱིས་བྱས་མིན་པས། །རྐྱེན་མེད་ལས་བྱུང་ཉིད་དུ་གསུང་། །རེས་འགའ་རྣམ་གྲངས་སྣ་ཚོགས་ཀྱིས། །སྡུག་བསྔལ་གཞི་ནི་སྟོན་པར་
མཛད། །རེས་འགའ་དོན་ནི་སྣ་ཚོགས་ཀྱིས། །སངས་རྒྱས་འོད་ཟེར་བསྔགས་པར་མཛད། །རེས་འགའ་ཚིག་ནི་ཚད་མེད་ཀྱིས། །རབ་དབེན་ཆོས་ནི་སྟོན་མཛད་ཅིང་། །གང་ཟག་སྲོག་དང་བདག་མེད་དང་། 
སེམས་ཅན་མེད་པ་ཉིད་དུ་སྟོན། །འདས་པའི་སངས་རྒྱས་ཚད་མེད་ཀྱང་། །བསམ་གྱིས་མི་ཁྱབ་པ་དག་གིས། །ཚིགས་སུ་བཅད་པ་བརྒྱ་སྟོང་གིས། །དེ་འདྲའི་ཆོས་ནི་སྟོན་པར་མཛད། །དེ་བཞིན་གཤེགས་པས་

79-1-251a

ཡོན་ཏན་ཆོས། །ཡང་དག་ཉིད་ནི་སྟོན་མཛད་ཀྱང་། །རྗོད་དང་བརྗོད་བྱ་མི་མངའ་བས། །བརྗོད་མཛད་ཆོས་ཀྱང་ཡོང་མི་མངའ། །བཅོམ་ལྡན་ཡང་དག་ཆོས་སྲུང་ཞིང་། །སྐྱེ་དགུ་རྣམས་
ནི་གོ་མཛད་པས། །ལྷ་རྣམས་དང་ནི་གནོད་སྦྱིན་དག །གང་ཐོས་དེ་དག་རྟོགས་པར་འགྱུར། །ལྷ་མ་ཡིན་ནི་ཐམས་ཅད་ཀྱང་། །མོས་པ་དག་ནི་རྣམ་པར་དག །མི་ནི་མང་པོ་ཚད་མེད་ཀྱང་། །ཐེ་
ཚོམ་དྲ་བ་ཆད་པར་གྱུར། །འདོད་ཆགས་རང་བཞིན་རབ་ཏུ་རྟོགས། །ཞེ་སྡང་གཏི་མུག་རྣམ་པར་བཤིག །སྲེད་དང་ང་རྒྱལ་མ་རིག་དང་། །གཡོ་སྒྱུ་ཕྲག་དོག་སྤྲོས་པ་ནས། །སྡུག་བསྔལ་ཕུང་པོ་ལ་སོགས་
པར། །ཐམས་ཅད་ཀྱང་ནི་ཡོངས་སུ་སྤངས། །འདི་ལ་སོགས་པའི་ཚིག་གི་དོན། །མཐར་ནི་ཀུན་ཀྱང་རྣམ་པར་དག །དེ་བཞིན་གཤེགས་པས་ཆོས་གཅིག་ལ། །སྣ་ཚོགས་མིང་ནི་རབ་མཁྱེན་པས། །གྲངས་ནི་བརྒྱ་
སྟོང་མང་པོ་རྣམས། །བསམ་གྱིས་མི་ཁྱབ་རབ་ཏུ་སྟོན། །སངས་རྒྱས་ཚད་མེད་མང་པོ་ལས། །དེ་འདྲའི་ཆོས་ནི་ལེགས་བསླབས་པས། །ཆོས་ཀྱི་དངོས་པོ་གཅིག་ལ་ཡང་། །བརྗོད་པ་ཐུག་པ་མེད་པ་སྟོན། །དེ་བཞིན་
གཤེགས་པས་ཆོས་རྣམས་ཀྱི། །རྣམ་གྲངས་སྣ་ཚོགས་རབ་མཁྱེན་པས། །མིང་ཚིག་དང་པོ་བར་མ་དང་། །ཐ་མ་རྣམ་འབྱེད་རབ་ཏུ་མཁྱེན། །ཐ་དད་ཚིག་ནི་སྣ་ཚོགས་དག །ཐམས་ཅད་རབ་ཏུ་བསླབས་
པས་ན། །དོན་མཆོག་དག་ནི་གྱ་ནོམ་པ། །སྟོན་པ་དག་ནི་རབ་ཏུ་མཁྱེན། །དེ་འདྲའི་དབྱངས་ནི་རྣམ་དག་པ། །རྒྱུ་རྐྱེན་ཚོགས་པ་ལས་བྱུང་བས། །ལྕེ་འབའ་ཞིག་ལ་རྟེན་པ་ནས། །ལུས་སེམས་པར་ལ་
རྟེན་པའང་མིན། །ས་ནི་རྣམ་པ་དྲུག་ཏུ་གཡོས། །ཕྱོགས་བཅུའི་འཁོར་ནི་ཡོངས་འདུས་ནས། །ཐལ་སྦྱར་བཅོམ་ལྡན་ཞལ་ལྟ་ན། །ཐེ་ཚོམ་དག་ནི་བསལ་དུ་གསོལ། །དེ་བཞིན་གཤེགས་པས་མི་བཟད་དང་། །

79-1-251b

སྐྱེ་མཐའ་དག་ནི་རང་བཞིན་གྱིས། །རྟག་ཏུ་སྟོང་ཞིང་དབེན་པ་དང་། །འགྲོ་འོང་མེད་པར་རབ་ཏུ་མཁྱེན། །བཞུགས་དང་གནས་ནི་མི་མངའ་བས། །ཡང་དག་མཐའ་ལ་རབ་ཏུ་བཞུགས། །བཅོམ་ལྡན་སྤྱན་
ནི་ཐོགས་མི་མངའ། །དེ་སླད་དེང་བདག་ཞུ་བ་ལགས། །དེ་བཞིན་གཤེགས་པས་མིག་ཉིད་ཀྱི། །སྔོན་དང་ཕྱི་མའི་མཐའ་དག་དང་། །ཟད་དང་མ་ཟད་འཁོར་བ་ནི། །རང་བཞིན་སྟོང་དབེན་རབ་མཁྱེན་པས། །ཆོས་ཀྱི་
དོན་རྣམས་རབ་ཕྱེ་ནས། །འཇིག་རྟེན་རྣམས་ནི་དགའ་བར་མཛད། །ཐུབ་པ་དབྱངས་སྙན་རབ་མངའ་བས། །ཅི་སླད་འཛུམ་པ་སྟན་པར་མཛད། །བཅོམ་ལྡན་སྔོན་དང་ཕྱི་མཐའ་དང་། །མིག་ཉིད་སྟོང་དབེན་རབ་མཁྱེན་
ཅིང་། །རྣམ་རྟོག་ཚིག་དང་བྲལ་ལགས་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་མིག་ནི་དཔག་མེད་དང་། །བརྗོད་པ་སྣ་ཚོགས་རང་བཞིན་གྱིས། །རྟག་ཏུ་སྟོང་དབེན་མཁྱེན་ལགས་ན། །ཅི་སླད་འཛུམ་
པ་སྟོན་པར་མཛད། །བཅོམ་ལྡན་ཟད་དང་སྐྱེ་མཐའ་དང་། །མིག་ཉིད་སྟོང་དབེན་རབ་མཁྱེན་ཅིང་། །ཉོན་མོངས་རྣམས་ནི་ཡོངས་སྤངས་པས། །སངས་རྒྱས་བྱང་ཆུབ་མཁྱེན་པ་བརྙེས། །གྲགས་པ་
མཆོག་ནི་ཕུན་སུམ་ཚོགས། །ཅི་སླད་འཛུམ་པ་སྟོན་པར་མཛད། །བཅོམ་ལྡན་ཡུན་རིང་བསྒོམ་བསླབས་པས། །བསམ་གྱིས་མི་ཁྱབ་སྟོན་པར་མཛད། །མིག་ཉིད་སྟོང་པ་ཉིད་དུ་མཁྱེན། །དྲི་བྲལ་རྟག་
ཏུ་རྣམ་པར་དག །སེམས་ཀྱི་སྤྱོད་པ་ཚད་མེད་རྣམས། །དགོངས་པ་གཅིག་གིས་ཐམས་ཅད་མཁྱེན། །འོད་ཟེར་འཇིག་རྟེན་སྣང་མཛད་པ། །འདི་ནི་གང་གི་སྔ་རྟགས་ལགས། །དྲང་སྲོང་ཆེན་པོ་མངོན་སངས་
རྒྱས། །རྐང་གཉིས་གཙོ་བོ་ཁྱད་པར་འཕགས། །ཉོན་མོངས་དག་ནི་རབ་བསལ་བས། །ཐུགས་ནི་རྟག་ཏུ་ཞི་ཞིང་དབེན། །དེ་བཞིན་གཤེགས་པ་མཁྱེན་མཆོག་གིས། །མིག་ཟད་མཐའ་ནི་རབ་ཏུ་རྟོགས། །

79-1-252a

རྒྱུ་དང་རྐྱེན་ནི་གང་ནི་སླད། །དེང་འདིར་འཛུམ་པ་སྟོན་པར་མཛད། །རྣ་བ་སྣ་ལྕེ་ལུས་དང་ཡིད། །ཡུལ་དྲུག་དང་ནི་འབྱུང་ཆེན་བཞི། །སྒྲ་དང་མིང་ལ་སོགས་པའི་བར། །ཐམས་ཅད་ཀྱང་ནི་དེ་བཞིན་ནོ། །
བཅོམ་ལྡན་མིག་ལ་བདག་མེད་མཁྱེན། །རྣ་བ་མི་རྟག་ཉིད་དུ་རྟོགས། །སྣ་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་ལྕེ་ལ་བདག་མེད་མཁྱེན། །ལུས་ཀྱང་མི་རྟག་ཉིད་
དུ་རྟོགས། །སེམས་ཡིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་གཟུགས་ལ་བདག་མེད་མཁྱེན། །སྒྲ་ཡང་མི་རྟག་ཉིད་དུ་རྟོག །དྲི་ཉིད་སྟོང་པར་རབ་མཁྱེན་ན། །
ཅི་སླད་འཛུམ་པ་སྟོན་པར་མཛད། །བཅོམ་ལྡན་རོ་ལ་བདག་མེད་མཁྱེན། །རེག་བྱ་མི་རྟག་ཉིད་དུ་རྟོགས། །ཆོས་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་ས་ལ་བདག་མེད་
མཁྱེན། །ཆུ་ཡང་མི་རྟག་ཉིད་དུ་རྟོགས། །མེ་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་རླུང་ལ་བདག་མེད་མཁྱེན། །ངོ་བོ་མི་རྟག་ཉིད་དུ་རྟོགས། །དངོས་ཉིད་སྟོང་པར་
རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་འཇིག་རྟེན་བདག་མེད་མཁྱེན། །སྡུག་བསྔལ་མི་རྟག་ཉིད་དུ་རྟོགས། །ཕུང་པོ་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །
བཅོམ་ལྡན་ཁམས་ལ་བདག་མེད་མཁྱེན། །འཇིག་རྟེན་མི་རྟག་ཉིད་དུ་རྟོགས། །སྐྱེ་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་སྒྲ་ལ་བདག་མེད་མཁྱེན། །མིང་ཡང་མི་
རྟག་ཉིད་དུ་རྟོགས། །ལམ་ཉིད་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །བཅོམ་ལྡན་ཡེ་ཤེས་བདག་མེད་མཁྱེན། །རབ་དབེན་མི་རྟག་ཉིད་དུ་རྟོགས། །སེམས་ཅན་སྟོང་པར་རབ་མཁྱེན་ན། །

79-1-252b

ཅི་སླད་འཛུམ་པ་སྟོན་པར་མཛད། །བཅོམ་ལྡན་རང་བཞིན་རང་བཞིན་མེད། །བདག་དང་བདག་མེད་པ་ཡང་མཁྱེན། །མོས་པ་སྟོང་པར་རབ་མཁྱེན་ན། །ཅི་སླད་འཛུམ་པ་སྟོན་པར་མཛད། །འཁོར་བ་
བདག་མེད་ཉིད་དུ་གཟིགས། །རྟག་དང་མི་རྟག་པ་ཡང་མཁྱེན། །མྱ་ངན་འདས་པ་སྟོང་མཁྱེན་ན། །ཅི་སླད་འཛུམ་པ་སྟོན་པར་མཛད། །དེ་བཞིན་གཤེགས་པ་ཐུགས་རྣམ་གྲོལ། །གྲགས་པ་ཁམས་
གསུམ་ཀུན་དུ་གང་། །བརྒྱ་བྱིན་མི་ཡི་དབང་པོ་དང་། །ཀླུ་རྣམས་ལ་སོགས་ཀུན་གྱིས་མཆོད། །དེ་བཞིན་གཤེགས་པས་མིག་ཟད་དང་། །སྐྱེ་མཐའ་རབ་དབེན་མཁྱེན་ལགས་ན། །ཅི་སླད་འཛུམ་པ་
སྟོན་པར་མཛད། །སངས་རྒྱས་སྲས་ནི་ཚད་མེད་པ། །འཁོར་འདིར་ཐམས་ཅད་རབ་ཏུ་འདུས། །སངས་རྒྱས་གསུང་ལས་སྐྱེས་པ་དང་། །ཆོས་ལས་སྤྲུལ་ཏེ་གང་བྱུང་བ། །ཐམས་ཅད་བཅོམ་ལྡན་སྤྱན་
སྔར་མཆིས། །གུས་པས་ཐལ་མོ་རབ་སྦྱར་ལགས། །འཁོར་འདུས་དེ་དག་སླད་དུ་ནི། །འོད་ཟེར་རྒྱུ་རྐྱེན་འདི་ཞུ་ལགས། །དེ་བཞིན་གཤེགས་པས་མིག་ཉིད་ནི། །སྟོང་ཞིང་བདག་མེད་མཁྱེན་པས་ན། །ཁྱིམ་ན་
གནས་པའི་རྣལ་འབྱོར་པ། །ཐམས་ཅད་ལས་ནི་ཡང་དག་འདས། །དེ་བཞིན་གཤེགས་པས་ཆོས་རྣམས་ནི། །བྱེ་བྲག་མེད་ཅིང་མཉམ་མཁྱེན་པས། །བཅོམ་ལྡན་དགོངས་པ་རབ་མཁྱེན་གྱི། །རྫུ་འཕྲུལ་
དག་གིས་གཟིགས་མ་ལགས། །བཅོམ་ལྡན་མིག་ལ་བདག་མེད་མཁྱེན། །ངོ་བོ་ཉིད་སྟོང་འགྲོ་འོང་མེད། །རྣམ་དག་མཁྱེན་པ་ཚད་མ་མཆིས། །ཅི་སླད་འཛུམ་པ་སྟོན་པར་མཛད།། །། བམ་པོ་གསུམ་པ།། 
དེ་བཞིན་གཤེགས་པ་སྐྱེ་མཐའ་རབ་ཟད་པ། །ཐུགས་རྗེ་ཆེན་པོས་འཇིག་རྟེན་ཀུན་སྐྱོབ་མཛད། །ཆོས་རྗེ་མཆོག་གྱུར་མི་ཡི་གཙོར་གྱུར་པ། །ཅི་སླད་འཛུམ་པ་སྟན་མཛད་བཤད་དུ་གསོལ། །བྱང་ཆུབ་སེམས་

79-1-253a

དཔའ་ཆེན་པོ་ཚད་མ་མཆིས། །གཞན་ཡང་ལྷ་ཚོགས་གཟི་བྱིན་ཆེ་བ་རྣམས། །མཁའ་ལ་གདུགས་ནི་དམ་པ་དག་ཀྱང་ཐོགས། །ས་ཆེན་འདི་ནི་རབ་ཏུ་གཡོས་པར་གྱུར། །གང་ཞིག་སྔོན་
ནི་དེ་བཞིན་གཤེགས་པ་ལས། །ཡུན་རིང་དགེ་བའི་ཆོས་ནི་གང་བསྒྲུབས་པ། །མཉམ་པར་དགའ་མཛད་ཐུགས་རྗེ་ཆེན་པོའི་གཙོ། །ཅི་སླད་འཛུམ་པ་བསྟན་མཛད་བཤད་དུ་གསོལ། །
གང་ཞིག་སྔོན་ནི་སངས་རྒྱས་རབ་མཆོད་ནས། །ཆོས་འདི་ཐོས་ནས་དགའ་བ་རབ་སྐྱེས་པས། །འདྲེན་པ་རབ་མཆོག་མི་ཡི་གཙོར་གྱུར་པ། །ཅི་སླད་འཛུམ་པ་བསྟན་མཛད་བཤད་དུ་གསོལ། །བཅོམ་ལྡན་
གསུང་ནི་མང་པོ་དགའ་མཛད་པས། །བྱ་རྒྱལ་དད་པ་ཤིན་དུ་དབྱངས་རབ་སྙན། །སྒྲ་སྙན་ཚད་མེད་རང་གི་ངང་གིས་འབྱུང་། །ཅི་སླད་འོད་ཟེར་འདི་བཀྱེ་བཤད་དུ་གསོལ། །ཚིགས་བཅད་བྱེ་བ་ཚད་མ་མཆིས་
པ་ཡིས། །རྗེས་འཐུན་གསུང་གི་བསྔགས་པ་བརྗོད་གྱུར་ཅིང་། །ཀུ་ཙི་ར་ཡི་སྒྲ་སྐད་མཆོག་ལྡན་པ། །ཅི་སླད་འོད་ཟེར་བཀྱེ་བ་བཤད་དུ་གསོལ། །འབྲུག་སྒྲ་ཟབ་མོས་ཆོས་ནི་བསྟན་པའི་སྒྲ། །འཇིག་
རྟེན་བརྒྱ་སྟོང་དཔག་མེད་གྲགས་གྱུར་པ། །ཐུགས་རྗེས་ཚིག་རྩུབ་ཡང་ན་འཇམ་སྟོན་པ། །ཅི་སླད་འོད་ཟེར་གསེར་གྱི་ཁ་དོག་བཀྱེ། །སྐྱེ་དང་མི་སྐྱེ་ཟད་དང་མི་ཟད་མཁྱེན། །མིག་ཉིད་བྲལ་ཞིང་འགྲོ་འོང་མེད་
པར་རྟོགས། །འཇིག་རྟེན་སྣང་མཛད་བདུད་རྩིའི་མཆོག་གྱུར་པ། །ཅི་སླད་འོད་ཟེར་གསེར་གྱི་ཁ་དོག་བཀྱེ། །མིག་གི་བྱུང་བ་རྟག་ཏུ་སྟོང་དབེན་དང་། །འགྲོ་འོང་མ་མཆིས་གནས་པ་མ་མཆིས་དང་། །སྨིག་རྒྱུ་ཆུ་བུར་ལྟ་
བུར་རབ་མཁྱེན་པ། །རྒྱུ་རྐྱེན་གང་གི་སླད་དུ་འཛུམ་བསྟན་ལགས། །དེ་བཞིན་རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ཆོས་རྣམས་ནས། །སྒྲ་དང་མིང་ལ་སོགས་པའི་བར་དུ་ཡང་། །ཐམས་ཅད་དེ་

79-1-253b

བཞིན་དུ་ནི་རིག་པར་བགྱི། །རྡོ་རྗེ་རྟག་པའི་སྐུ་དང་མི་འཇིག་སྐུ། །མཚན་མཆོག་བརྒྱ་སྟོང་དག་ནི་ཕུན་སུམ་ཚོགས། །སྐུ་ལ་འཁྲུལ་འཁོར་མི་མངའ་གཡོ་མཛད་པ། །རྒྱུ་རྐྱེན་གང་སླད་འཛུམ་པ་བཤད་དུ་གསོལ། །
བྱིན་པ་ཟླུམ་ཞིང་ཞབས་ཀྱི་རྟིང་པ་རིང་། །ཕྱལ་གྱི་མཚན་མ་མི་གདའ་སེང་གེ་འདྲ། །ལྟེ་བ་ཤིན་དུ་ཟབ་ཅིང་རྐེད་རྒྱས་པ། །རྒྱུ་རྐྱེན་གང་སླད་འཛུམ་མཛད་བཤད་དུ་གསོལ། །གསེར་སྐུ་རྣམ་དག་རྡུལ་དང་དྲི་མ་སྤངས། །
བ་སྤུ་རེ་རེ་ཁ་དོག་མཐོན་མཐིང་ལྡན། །གཡས་སུ་འཁྱིལ་ཅིང་སྤོས་ཀྱི་ངད་ལྡང་བ། །རྒྱུ་རྐྱེན་གང་སླད་འཛུམ་མཛད་བཤད་དུ་གསོལ། །སྐུ་མཆོག་དམ་པ་ཡོངས་རྫོགས་རྟག་གནས་པ། །དཔེར་ན་ནྱ་གྲོ་དྷ་ཡི་ཤིང་རྒྱལ་
བཞིན། །ཡོན་ཏན་ཐམས་ཅད་ཀྱིས་ནི་རབ་ཏུ་བརྒྱན། །གསུང་དབྱངས་དག་གིས་འཁོར་ནི་དགའ་བར་མཛད། །དཔུང་པ་ཟླུམ་ཞིང་ཕྲག་པ་སྟུག་ལ་མཛེས། །གཙུག་ཏོར་ཡོངས་རྫོགས་གཡས་སུ་འཁྱིལ་བར་གདའ། །
ཞིང་ནི་བརྒྱ་སྟོང་དཔག་མེད་རྒྱུ་བར་མཛད། །སེམས་ཅན་ལོག་དང་ཡང་དག་ལམ་སྟོན་མཛད། །ཚེམས་དཀར་དྲི་མི་མངའ་བས་དུང་དང་འདྲ། །ལྗགས་མཚན་སྲིད་རིད་ཞལ་ནི་ཀུན་དུ་ཁེབས། །འགྲམ་པ་སེང་གེ་
འདྲ་ཞིང་ཤངས་ནི་མཐོ། །ཐམས་ཅད་ཐབས་དང་རྣམ་དག་ཐུགས་ལས་སྐྱེས། །ཨུད་པ་ལ་ཡི་བསུང་ནི་ཞལ་ནས་འབྱུང་། །ཙན་དན་དྲི་དག་སྐུ་ནི་ཀུན་དུ་ཁྱབ། །སྔོན་ནི་བྱམས་པ་རྒྱ་ཆེར་བསྒོམས་པས་ན། །རྣམ་
དག་མོས་པ་རྟག་ཏུ་རྒྱུན་མི་འཆད། །དེ་བཞིན་གཤེགས་པས་ཞབས་མཐིལ་ཤིན་དུ་མཉམ། །ས་ལ་རེག་ཀྱང་རྡུལ་ནི་གོས་མི་འགྱུར། །གོམ་པ་སེང་གེ་གླང་པོ་ཆེ་འདྲ་བས། །འཇིག་རྟེན་ཐམས་ཅད་ལ་ནི་ཡང་དག་
འདས། །འཁོར་ལོ་རྩིབས་སྟོང་མཚན་གྱིས་མཛེས་པར་བརྒྱན། །ཁྱད་འཕགས་འོད་ཟེར་དག་ནི་རབ་ཏུ་གསལ། །དགེ་བ་དག་གིས་སྐྱེ་དགུ་ཕན་འདོགས་པས། །གང་གིས་མཐོང་བ་དང་བ་རབ་ཏུ་སྐྱེ། །སོར་གཅིག་

79-1-254a

འོད་ཟེར་བརྒྱ་སྟོང་རབ་བཀྱེ་ནས། །སངས་རྒྱས་ཞིང་ནི་དཔག་མེད་སྣང་བར་མཛད། །སྔོན་ནི་དགེ་སྦྱོང་མང་པོ་རབ་བསྒྲུབས་པས། །མཚན་གྱི་བཀོད་པ་སྣ་ཚོགས་འདི་བརྙེས་ལགས། །གཟུགས་སྐུ་ཡོངས་
རྫོགས་དཔེ་ཟླ་ཡོང་མ་མཆིས། །ཞལ་མཚན་རབ་མཛེས་ཤིན་དུ་ཁྱད་པར་འཕགས། །རྫུ་འཕྲུལ་དག་གིས་འཇིག་རྟེན་ཕན་འདོགས་པ། །ཅི་སླད་འཛུམ་པ་བསྟན་མཛད་བཤད་དུ་གསོལ། །བྱིན་པ་རི་དགས་ཨེ་ན་ཡ་དང་
འདྲ། །སྐུ་དབྱིབས་མི་རྒུ་སེང་གེ་ཇི་ལྟ་བཞིན། །འཇིག་རྟེན་བྱུང་ནས་འཇིག་རྟེན་སྣང་མཛད་པ། །ཅི་སླད་འཛུམ་པ་བསྟན་མཛད་བཤད་དུ་གསོལ། །ཅང་ཤེས་བཞིན་དུ་མཚན་སྦས་རྡུལ་མི་མངའ། །ཕྱག་མཐིལ་མཉམ་རྒྱས་
ཕྱག་ནི་པུས་མོ་འདས། །མི་ཡི་སེང་གེ་ངོ་མཚར་ཁྱད་པར་འཕགས། །ཅི་སླད་འཛུམ་པ་བསྟན་མཛད་བཤད་དུ་གསོལ། །སྐུ་ལས་འོད་ཟེར་དཔག་མེད་རབ་འགྱེད་ཅིང་། །ཁ་དོག་གྱ་ནོམ་རབ་ཞི་རྟག་གསལ་བ། །རྣམ་དག་
ཐུགས་ནི་རྟག་ཏུ་རྒྱུན་མི་འཆད། །མདོ་སྡེ་ཚད་མེད་པ་དག་སྟོན་པར་མཛད། །རྟག་དང་ཆད་པ་དག་ལ་གནས་པ་ཡིས། །དེ་འདྲའི་ཆོས་ནི་སྒྲུབ་པར་འགྱུར་མ་ལགས། །གང་གིས་མཐར་ལྟ་རྣམས་ནི་རབ་སྤངས་ན། །བཅོམ་
ལྡན་རྣམ་དག་སྐུ་ནི་མྱུར་ཐོབ་འགྱུར། །ལྷ་རྔ་འབྲུག་སྒྲ་གསུང་ནི་ཀུན་གྲགས་ཤིང་། །ཀ་ལན་འདའ་ཀའི་དབྱངས་སྙན་རབ་ཏུ་གསལ། །ལྷ་ཡི་གླུ་སྒྲ་བརྒྱ་སྟོང་མང་ལྡན་པ། །ཅི་སླད་འོད་ཟེར་བཀྱེ་བ་བཤད་དུ་གསོལ། །
འདྲེན་པས་གསུང་གཅིག་ཏུ་ནི་ཆོས་བསྟན་པས། །འཆལ་བའི་ཚུལ་ཁྲིམས་ཅན་དག་རྒྱུན་ཡང་བཅད། །དེ་བཞིན་གཤེགས་པས་དབྱངས་རབ་གང་གསུངས་པ། །དེ་ཀུན་ཟབ་ཅིང་ངོ་མཚར་ཆོས་ལགས་སོ། །ཁྱུ་མཆོག་
སྨིན་མཚམས་འོད་ཟེར་རབ་བཀྱེ་བས། །སངས་རྒྱས་ཞིང་ནི་བརྒྱ་སྟོང་གསལ་བར་མཛད། །སྤྱན་མཆོག་དག་ནི་ཁ་དོག་མཐོན་མཐིང་འདྲ། །གཙུག་ཏོར་མཚན་ནི་མཁའ་ཡི་ལྷས་མི་མཐོང་། །ཚེམས་དཀར་གཏམས་

79-1-254b

པ་བཞི་བཅུ་དག་དང་ལྡན། །དཔེར་ན་རིན་ཆེན་ཆུ་ཤེལ་དག་དང་མཚུངས། །དགེ་བའི་ཕྲིན་ལས་ཚད་མེད་དག་ལས་སྐྱེས། །ཅི་སླད་འཛུམ་པ་བསྟན་མཛད་བཤད་དུ་གསོལ། །དེ་བཞིན་གཤེགས་པ་ཡོན་ཏན་
རྫོགས་པའི་སྐུ། །ཁ་དོག་དམ་པ་དཔག་མེད་ཕུན་ཚོགས་ཤིང་། །འོད་ཟེར་རྣམ་དག་ངོ་མཚར་རབ་བཀྱེ་བ། །ཅི་སླད་འཛུམ་པ་བསྟན་མཛད་བཤད་དུ་གསོལ། །ཐུགས་རྗེ་ཆེན་པོ་མཆོག་རྒྱལ་རྐང་གཉིས་གཙོ། །སེམས་
ཅན་ཡང་དག་བསམ་པ་ཐུགས་སུ་ཆུད། །ཐོགས་པ་མ་མཆིས་སྤོབས་པ་མཆོག་བརྙེས་པ། །ཅི་སླད་འཛུམ་པ་བསྟན་མཛད་བཤད་དུ་གསོལ། །དེ་བཞིན་གཤེགས་པས་ཕ་རོལ་རབ་བྱོན་པས། །རིག་པ་གསུམ་དང་མངོན་ཤེས་
དྲུག་ཕུན་ཚོགས། །རྣམ་དག་འོད་ཟེར་དཔག་མེད་སྟོན་མཛད་པ། །ཅི་སླད་འཛུམ་པ་བསྟན་མཛད་བཤད་དུ་གསོལ། །བཅོམ་ལྡན་སྔོན་ནི་བསྐལ་པ་དཔག་མེད་སྙེད། །བཅོམ་ལྡན་བརྒྱ་སྟོང་སྙེད་འི་མཆོད་པ་མཛད། །དེ་འདྲའི་
རྒྱུ་འབྲས་ཆབ་ནི་མི་འཚལ་བ། །ཅི་སླད་འཛུམ་པ་བསྟན་མཛད་བཤད་དུ་གསོལ། །བཅོམ་ལྡན་སྔོན་ནི་བསྐལ་པ་དཔག་མེད་སྙེད། །ཏིང་འཛིན་མཆོག་རྣམས་ལ་ནི་རབ་བཞུགས་པས། །མིག་གི་སྐྱེ་མཐའ་ཟད་པའི་
མཐའ་མཁྱེན་ན། །ཅི་སླད་འཛུམ་པ་བསྟན་མཛད་བཤད་དུ་གསོལ། །འདས་པ་དང་ནི་མ་འོངས་ད་ལྟར་དུས། །འདྲེན་པས་དེ་དག་ཀུན་ནི་རབ་ཏུ་མཁྱེན། །རྣམ་དག་མཁྱེན་པ་ཐོགས་མེད་བསམ་མི་ཁྱབ། །ཅི་སླད་འཛུམ་པ་བསྟན་
མཛད་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་འཁོར་མང་པོའི་མདུན་དུ་ཕྱག་གསེར་གྱི་ཁ་དོག་ལྟ་བུ་བརྐྱང་སྟེ། ཟླ་འོད་གཞོན་ནུར་གྱུར་པའི་སྤྱི་བོ་ལ་བཞག་ནས་ཚིགས་སུ་བཅད་དེ་བཀའ་སྩལ་པ། གཞོན་
ནུ་ཤིན་དུ་ལེགས་པར་ཉོན། །ངས་ནི་དེང་འདིར་བྱང་ཆུབ་ཆོས། །འོད་ཟེར་རབ་ཏུ་སྟོན་པའི་མདོ། །ཁྱོད་ལ་ཤིན་དུ་ཡོངས་གཏད་ཀྱིས། །མ་འོངས་ཐ་མ་དུས་ངན་ཚེ། །ཆོས་ནི་རྣམ་པར་འཇིག་པ་ན། །ཁྱོད་ཀྱིས་སེམས་ཅན་

79-1-255a

རྣམས་ལ་ནི། །རབ་ཏུ་ཕྱི་ནས་བཤད་པར་གྱིས། །ངས་ནི་སངས་རྒྱས་སྤྱན་དག་གིས། །མ་འོངས་ཐ་མ་དུས་ཀྱི་ཚེ། །ཤིན་དུ་ཟབ་ཅིང་གྱ་ནོམ་པའི། །མདོ་སྡེ་དམ་པ་འདི་དག་ལ། །གང་མོས་གང་ནི་མི་མོས་
པ། །ཐམས་ཅད་ཀུན་ཀྱང་གཟིགས་ཤིང་མཁྱེན། །སེམས་ཅན་དག་ནི་གང་ཞིག་གིས། །བྱང་ཆུབ་ལམ་ནི་རབ་ཚོལ་བ། །རྟག་ཏུ་སངས་རྒྱས་རྗེས་དྲན་ཞིང་། །མདོ་སྡེ་འདི་ནི་གཟུང་བར་གྱིས། །གང་ཞིག་དད་པ་རབ་
འཇིག་ཅིང་། །འདུ་འཛི་ལ་ནི་མོས་འགྱུར་དང་། །ཉིན་མཚན་གཉིད་ལ་གང་དགའ་བ། །མདོ་སྡེ་འདི་ལ་མོས་མི་འགྱུར། །ང་ཡི་བསྟན་པ་དག་ལས་ནི། །རབ་ཏུ་བྱུང་བར་གྱུར་ནས་ཀྱང་། །མྱ་ངན་འདས་པའི་ཆོས་དག་
ལ། །མོས་པ་དག་ནི་མི་སྐྱེ་བ། །སྐྱེས་བུ་བླུན་པོ་དེ་དག་ནི། །དད་པས་བྱིན་པ་ཆུད་གཟོན་འགྱུར། །འདུས་བྱས་རྣམས་ཀྱི་ཆོས་དག་ལ། །ཉེས་དམིགས་མང་བར་ཐོས་ཀྱང་ནི། །འཇིག་རྟེན་དག་ལ་མངོན་ཞེན་ནས། །
འཇིགས་པ་དག་ནི་མི་སྐྱེ་བ། །སྐྱེས་བུ་བླུན་པོ་དེ་དག་ནི། །མཁས་པ་རྣམས་ཀྱིས་སྨོད་པར་འགྱུར། །ཆོས་གོས་དག་ནི་བགོས་གྱུར་ཀྱང་། །དེ་ལ་ཤེས་རབ་ཅི་ཡང་མེད། །ཐུབ་པས་ལེགས་པར་གསུངས་པ་ཡི། །ཡང་དག་
བཀའ་ནི་གང་ཡིན་པ། །ཤེས་པ་མེད་པས་ཐོས་གྱུར་ན། །ཡིད་ཆེས་ལེན་པར་མི་འགྱུར་ཏེ། །སྐྱེས་བུ་བླུན་པོ་དེ་དག་དང་། །ལྷན་ཅིག་གནས་པར་མི་བྱའོ། །ཁྱད་པར་འཕགས་པའི་ཆོས་འདི་དག །གལ་ཏེ་ཐོས་པར་
གྱུར་ནས་ཀྱང་། །རབ་ཏུ་དགའ་ཞིང་མོས་པ་ཡི། །སེམས་ཀྱང་སྐྱེ་བར་མི་འགྱུར་པ། །དེ་འདྲའི་གང་ཟག་དག་ལ་ནི། །དས་ནི་རབ་ཏུ་སྨོད་པར་བྱེད། །མི་ལུས་ཐོབ་པར་གྱུར་མོད་ཀྱང་། །དེ་ནི་དོན་མེད་ཆུད་ཟོས་ཡིན། གལ་
ཏེ་ཤིན་དུ་ཟབ་པའི་ཆོས། །འདི་དག་ཐོས་པར་གྱུར་ནས་ནི། །རབ་ཏུ་དགའ་ཞིང་མོས་པ་ཡི། །སེམས་ནི་རབ་ཏུ་སྐྱེ་འགྱུར་པ། །དེ་འདྲའི་གང་ཟག་དེ་དག་ནི། །སྔོན་ཆད་སངས་རྒྱས་ཕྲད་པས་ན། །གདོན་མི་ཟ་བ་

79-1-255b

ཁོ་ནར་ནི། །བླ་མེད་བྱང་ཆུབ་ཐོབ་པར་འགྱུར། །སྐྱེས་བུ་བླུན་པོ་གང་དག་ཅིག །ལྟ་བ་ངན་པས་རབ་སྨས་ནས། །ཤེས་རབ་སྲོག་ནི་གཅོད་བྱེད་པ། །བྱང་ཆུབ་ཡོངས་སུ་སྤོང་བར་འགྱུར། །དེ་ལྟ་བས་ན་མི་དགེ་བའི། །
བཤེས་གཉེན་དག་ནི་རབ་སྤངས་ནས། །བློ་ལྡན་མཁས་པ་དག་ལ་ནི། །བསྟེན་ཅིང་གུས་པ་བསྐྱེད་པར་བྱ། །འཇིག་རྟེན་དག་ནི་ཐམས་ཅད་ན། །ཉེས་དམིགས་ཚད་མེད་གང་ཡོད་དང་། །སེམས་ཅན་ངན་སོང་གསུམ་པོར་ནི། །
རྟག་ཏུ་བྱིང་བར་གང་བྱེད་པ། །ཐམས་ཅད་གཏི་མུག་རྨོངས་པ་ཡི། །རྒྱུ་དང་རྐྱེན་ལས་བྱུང་བས་ན། །ཉོན་མོངས་རྗེས་སུ་འཇུག་བྱེད་ཅིང་། །རང་དབང་དག་ནི་འཐོབ་མི་འགྱུར། །ཡང་དག་ཆོས་ནི་སྤོང་བྱེད་ཅིང་། །ཆོས་མ་
ཡིན་པ་སྤྱོད་པར་བྱེད། །དེ་ལྟ་བས་ན་རྨོངས་པ་ཡི། །སྐྱེས་བུ་དམན་པ་སྤང་བར་བྱ། །ཇི་ལྟར་ཁ་ལོ་སྒྱུར་པ་ཡིས། །རང་གི་སྲོག་ཤིང་བཅག་པ་བཞིན། །མི་དགེ་ལས་ནི་བྱས་པས་ན། །སེམས་ཅན་དམྱལ་བར་སྐྱེ་
བར་འགྱུར། །ཁ་ནས་ཚིག་ངན་ཕྱུང་ནས་ནི། །རྟག་ཏུ་བདག་ལ་གནོད་བྱེད་པ། །ཇི་ལྟར་སྟ་རེ་རྣོ་ཐོགས་ནས། །རང་གི་ལུས་ནི་གཅོད་བྱེད་འདྲ། །ཆོས་རྣམས་རྒྱུ་དང་རྐྱེན་དག་གིས། །བྱས་པའི་ལས་ཀྱི་རྗེས་སུ་ནི། །
རྣམ་སྨིན་མྱོང་བ་སྐྱབས་མེད་པར། །དེ་ལྟར་ཁོང་དུ་མ་ཆུད་པས། །འཇིག་རྟེན་དྲང་སྲོང་ལ་བསྟེན་ནས། །དགེ་བའི་གྲོགས་པོ་ཡིན་སྙམ་སེམས། །དེ་ནས་རང་ཉིད་འདི་སྙམ་དུ། །སྟོང་པ་ཉིད་ནི་གང་བསྒོམ་པ། །
འདུས་མ་བྱས་ནི་རྟོགས་སྙམ་ནས། །ཆད་པར་ལྟ་བ་སྐྱེད་པར་བྱེད། །ལུས་ནི་སྣོད་ཆག་པ་དང་འདྲ། །སེམས་ཀྱང་རྗེས་སུ་འགག་གྱུར་ཞེས། །ཕལ་ཆེར་ཀྱལ་བའི་ཚིག་དག་ལ། །མོས་པ་ཉིད་དུ་རབ་འགྱུར་ཞིང་། །
འདི་ལ་མངོན་པར་ཞེན་པས་ན། །ཕན་པའི་དོན་ནི་ཅི་ཡང་མེད། །གལ་ཏེ་སྦྲུལ་ནི་གདུག་པ་ཡིས། །གནོད་པ་དག་ནི་རབ་བྱས་ཀྱང་། །ནམ་ཡང་སྐྱེ་དགུ་མང་པོ་རྣམས། །ངན་འགྲོ་དག་ཏུ་ལྟུང་མི་བྱེད། །བླུན་པོ་གང་

79-1-256a

ཞིག་ཆོས་སྟོན་པ། །དགེ་བའི་རྩ་བ་འཇིག་བྱེད་པས། །སྐྱེ་དགུ་མང་པོ་ཚད་མེད་སྙེད། །སེམས་ཅན་དམྱལ་བར་ལྟུང་བར་བྱེད། །ཁྱེད་ལ་སོགས་པ་འཁོར་འདུས་པ། །འདི་ལྟ་བུར་ནི་ལྟ་བར་གྱིས། །དེང་
འདིར་ང་ཡི་སྤྱན་སྔར་ནི། །ཟླ་འོད་གཞོན་ནུ་གང་འདུག་པ། །འདིས་ནི་སྔོན་ཆད་འདས་པ་ཡི། །སངས་རྒྱས་དག་ནི་བཅོམ་ལྡན་འདས། །ཚད་མེད་གང་གཱའི་ཀླུང་བྱེ་སྙེད། །མཆོད་པ་རིམ་གྲོ་རབ་བྱས་ཤིང་། །
ཤིན་དུ་བསྟན་པར་ཡོངས་བསྒོམས་ནས། །བླ་མེད་ཡེ་ཤེས་བཙལ་བས་ན། །སྲིད་པ་དག་ནི་ཐམས་ཅད་ལ། །སེམས་ཀྱིས་གནས་པ་ཅི་ཡང་མེད། །མིག་གི་སྐྱེ་མཐའ་གཏན་དུ་ནི། །རྣམ་པར་དག་པར་ཤེས་པས་
ན། །སྤྲོས་པ་དག་ནི་ཡོངས་སྤངས་ནས། །མངོན་པར་ཞེན་པ་ཅི་ཡང་མེད། །སེམས་ཅན་དག་ནི་ཚད་མེད་ལ། །ཕན་པ་དག་ནི་བྱ་བའི་ཕྱིར། །བླ་མེད་འོད་ཟེར་སྟོན་པ་ཡི། །མདོ་སྡེ་དག་ནི་སྟོན་པར་བྱེད། །སྐྱེས་
བུ་བླུན་པོ་གང་ཡིན་པ། །ཆོས་འདི་སློབ་པར་མི་ནུས་པས། །རྣལ་འབྱོར་བསྒོམ་པ་དག་ལ་ནི། །སྐྱོན་ཉིད་དུ་ཡང་ལྟ་བར་བྱེད། །དེ་ལྟ་བས་ན་བླུན་པོ་དག །ཐག་རིང་པོར་ནི་ཡོངས་སྤངས་ནས། །དེ་དག་ལ་ནི་
བསྟེན་མི་བྱ། །དེ་ཡི་ཆོས་ཀྱང་མི་བསླབ་བོ། །སྐྱེས་བུ་བླུན་པོ་གང་ཡིན་པ། །རྩོད་པའི་སྨྲ་ལ་མོས་པས་ན། །རྩོད་སྨྲ་མེད་པའི་སྤྱོད་པ་ལ། །ནན་ཏན་བསྒྲུབ་པར་མི་ནུས་པས། །སྐྱེས་བུ་དེ་དག་རྣམས་ལ་ནི། །
ཚུལ་བཞིན་སེམས་ནི་ཅི་ཡང་མེད། །དེ་ལྟ་བས་ན་དེ་དག་ལ། །བསྙེན་བཀུར་མི་བྱ་བསྔགས་མི་བརྗོད། །སྐྱེས་བུ་བླུན་པོ་གང་ཡིན་པ། །ལེ་ལོ་སྙོམས་ལས་ལ་གནས་པས། །རྟག་ཏུ་ལུས་དང་ངག་ཡིད་ཀྱི། །
མི་དགེ་ལས་ནི་སྤྱོད་པས་ན། །དེ་ལ་ཚུལ་ཁྲིམས་དག་པ་དང་། །ཤེས་རབ་མང་ཐོས་ཅི་ཡང་མེད། །རྟག་ཏུ་འདོད་པའི་ཡུལ་སེམས་ཤིང་། །འདུ་འཛི་དག་ལ་མོས་པར་བྱེད། །ཁྱེད་ཀྱིས་འདི་ལྟར་བླུན་པོ་དེ། །

79-1-256b

རིགས་དང་རུས་དང་ལུས་ཀྱང་ནི། །དམན་པ་ཡིན་པར་རབ་ཏུ་ལྟོས། །ཁོང་ཁྲོ་བཀའ་བློ་མི་བདེ་ཞིང་། །བྱད་བཞིན་དག་ནི་མི་སྡུག་ལ། །གང་ཏེ་དགེ་བའི་གནས་སྐྱེས་ཀྱང་། །ལུས་ནི་རྟག་ཏུ་མ་རབས་འགྱུར། །
བདག་ཏུ་འདུ་ཤེས་ལ་ཞེན་པས། །ཡང་དག་དོན་ལ་རྨོངས་པར་འགྱུར། །བློ་གྲོས་དག་དང་མི་ལྡན་པས། །ཚིག་གི་བྱེ་བྲག་འབྱེད་མི་ནུས། །རང་བཞིན་སྟོང་པའི་ཆོས་ཐོས་ཀྱང་། །དེ་ལ་མོས་པ་སྐྱེད་མི་འགྱུར། །
དེ་བཞིན་གཤེགས་པ་བཅོམ་ལྡན་འདས། །ཡུན་རིང་པོ་ནས་འཇིག་རྟེན་པའི། །ཚིག་གི་སྤྲོས་པ་གང་ཡིན་པ། །ཐམས་ཅད་རབ་ཏུ་སྤངས་པ་ཡིན། །སོ་སོའི་སྐྱེ་བོས་འདི་དག་ལ། །ཤིན་དུ་ཞེན་ཅིང་ཆགས་
པས་ན། །ཇི་སྲིད་འཚོ་བའི་བར་དུ་ཡང་། །རྟོགས་ཤིང་ཁོང་དུ་ཆུད་མི་འགྱུར། །ཚུལ་ཁྲིམས་བསྔགས་པ་རྗོད་བྱེད་ཀྱང་། །ཚངས་པར་སྤྱོད་པ་སྒྲུབ་མི་བྱེད། །ཁ་ནས་ཆོས་ནི་སྟོན་བྱེད་ཀྱང་། །ལུས་ཀྱིས་ཆོས་མིན་
སྤྱོད་པར་བྱེད། །རང་གིས་འདུལ་བ་སྟོན་བྱེད་ཀྱང་། །རྟག་ཏུ་འདུལ་མིན་སྤྱོད་པར་བྱེད། །སངས་རྒྱས་སློབ་མ་དག་ལ་ནི། །ཁ་དོག་སྒྱུར་བའི་གོས་གྱོན་གསུངས། །འཆལ་བའི་ཚུལ་ཁྲིམས་ཅན་དག་གིས། །གོས་
འདི་རབ་ཏུ་བགོས་གྱུར་ཀྱང་། །ང་རྒྱལ་དང་ནི་བག་མེད་པའི། །སེམས་ནི་རབ་ཏུ་འཕེལ་བར་བྱེད། །དད་པས་བྱིན་པ་ཅི་ཟོས་པ། །ཐུ་ལུམ་འབར་བ་མེད་པ་འདྲ། །དེ་ལྟར་ཁྱིམ་གྱི་གནས་སྤངས་ནས། །འདོད་པ་ལྔ་ཡི་
བདེ་བའང་མེད། །གཞན་ཡང་སངས་རྒྱས་ཆོས་དག་ལ། །མཆོག་གི་བདེ་བ་མ་ཐོབ་ནས། །སྤྱོད་པ་འདྲེན་མ་མོས་བྱེད་པས། །མཐའ་གཉིས་དག་ནི་སྤོང་མི་འགྱུར། །ཡིད་ཀྱི་མོས་པ་ཇི་སྙེད་པ། །ཐམས་ཅད་ཀྱང་
ནི་དག་མི་འགྱུར། །དེ་འདྲའི་གང་ཟག་བླུན་པོ་ནི། །འཁོར་མང་ནང་དུ་གནས་གྱུར་ཀྱང་། །དཔེར་ན་ཇི་ལྟར་ཝ་སྐྱེས་དག །སེང་གེའི་ཁྱུར་ནི་ཞུགས་པ་བཞིན། །དེ་ལྟར་རབ་ཏུ་ཞི་བ་ཡི། །ཆོས་ནི་ཡང་དག་བསྟན་

79-1-257a

བྱས་ཀྱང་། །དེ་བཞིན་ཉིད་དང་སྟོང་པའི་དོན། །རྟོགས་ཤིང་ཁོང་དུ་མ་ཆུད་པས། །འཁོར་མང་དག་ལ་བསྟན་བསྔགས་ཀྱང་། །ཁེངས་པའི་སེམས་ནི་སྐྱེད་པར་བྱེད། །སྟོན་པ་ཆེན་པོ་མི་དྲན་པས། །ངོ་ཚ་
དམན་པའི་སེམས་ཀྱང་མེད། །མི་གཙང་དངོས་པོ་ལེན་བྱེད་ཀྱང་། །ཡིད་བཞིན་ནོར་བུ་ཐོབ་པ་བཞིན། །ཤིན་དུ་དགའ་བས་འཛིན་བྱེད་པས། །སེམས་ཀྱིས་ཆུང་ཟད་སྟོང་མི་བྱེད། །འདི་ལྟ་བུ་ཡི་མ་རབས་
དག །ཁྱིམ་ནས་རབ་ཏུ་བྱུང་ནས་ནི། །སྤྱོད་ལམ་དག་ཀྱང་སྲུང་བ་དང་། །ཆོས་གོས་ལྷུང་བཟེད་འཛིན་བྱེད་ཀྱང་། །ཆ་བྱད་ཙམ་དང་ལྡན་པས་ན། །ཡང་དག་ཤེས་རབ་ཅི་ཡང་མེད། །ཁ་སྤུ་དག་ནི་བྲེགས་གྱུར་
ཀྱང་། སྡིག་པའི་སེམས་ནི་མི་སྤོང་ཞིང་། །དགེ་སྦྱོང་མ་ཡིན་པ་ཡི་ཆོས། །ལོག་ལྟ་དག་ཏུ་ལྷུང་གྱུར་ན། །རབ་དབེན་མྱ་ངན་འདས་པའི་ལམ། །དེ་དག་རབ་ཏུ་ཉམས་པར་འགྱུར། །དགེ་སྦྱོང་སྔོན་དུ་བྱ་བ་ཡི། །
འབྲས་བུ་དག་ཀྱང་འཐོབ་མི་འགྱུར། །མ་རིག་ཉོན་མོངས་རྣམས་ཀྱང་ནི། །རྡུལ་ཙམ་ཉམས་པར་མི་འགྱུར་རོ། །གྲོང་ཁྱེར་དག་ཏུ་རྣམ་རྒྱུ་ཞིང་། །རང་ཉིད་དབེན་པའི་བསྔགས་བརྗོད་ཀྱང་། །སྐྱེས་བུ་བློན་པོ་
བློ་མེད་པས། །ཡང་དག་བགྲོད་པ་ཤེས་མི་འགྱུར། །སེམས་ཀྱི་འདུན་པ་ཅི་ཡོད་པ། །དེ་དག་ཐམས་ཅད་མི་དགེ་ཡིན། །རྙེད་པ་འདོད་པའི་རྒྱུ་ཡི་ཕྱིར། །དགོན་པ་དག་ན་གནས་བྱེད་ཀྱི། །མྱ་ངན་འདས་པའི་ཡང་དག་
རྒྱུ། །བསྒྲུབ་པའི་ཕྱིར་ནི་མ་ཡིན་ནོ། །རྨུགས་དང་གཉིད་ལ་རབ་ཏུ་དགའ། །ལུས་ནི་ཇི་ལྟར་བདེ་སྙམ་ནས། །རྟག་ཏུ་དེ་ལྟའི་དངོས་པོ་དག །སྒྲུབ་པ་ལ་ནི་མོས་པར་བྱེད། །དགོན་པའི་གནས་ནི་དེ་དག་ཏུ། །ལོ་ནི་
མང་པོར་གནས་བྱེད་ཀྱང་། །ཕྱིན་ལོག་ལྟ་བར་གྱུར་པའི་ཕྱིར། །མྱ་ངན་འདས་ལམ་སྟོང་བས་ན། །ནམས་ཀྱང་དགེ་སྦྱོང་ལམ་དག་གི། འབྲས་བུ་དག་ནི་ཐོབ་མི་འགྱུར། །ཡང་དག་ལྟ་བ་རབ་ཉམས་ཤིང་། །

79-1-257b

ཚུལ་ཁྲིམས་དག་དང་འགལ་བྱས་པས། །གོས་བཟང་དག་གིས་ལུས་བརྒྱན་པ། །དེ་ལ་ཤིན་དུ་སྲེད་པར་འགྱུར། །འདོད་པའི་བདེ་བ་རྣམས་ལ་ནི། །རྟག་ཏུ་སྲེད་པ་སྐྱེད་པར་བྱེད། །གལ་ཏེ་གྲོང་ཁྱེར་ཞུགས་ན་ཡང་། །ང་རྒྱལ་
མཚན་མ་སྟོན་བྱེད་ཅིང་། །ལུས་ཀྱི་ལས་ནི་མི་སྲུང་བས། །སྤྱོད་ལམ་དག་ལ་གནས་མི་བྱེད། །རེས་འགའ་གྲོང་ཁྱེར་ཞུགས་ནས་ནི། །རྒྱུ་ཚེ་རང་ཉིད་འདི་སྐད་དུ། །དགོན་པའི་གནས་ནི་དེ་དག་ན། །རི་ཕུག་དག་ནི་གང་ཡོད་
པ། །ཁྱེད་རྣམས་འདི་ལྟར་ཤེས་པར་གྱིས། །དེ་ནི་བདག་གི་གནས་ཡིན་ཏེ། །མཐོ་དམའ་རན་པར་ལྟ་བ་དང་། །འགྲོ་གོམ་ཚུལ་ལ་གནས་སོ་ཞེས། །ཐ་དད་མཚན་མའི་ཚིག་བརྗོད་དེ། །དགྲ་བཅོམ་པ་ཡི་རྟགས་བསྟན་པས། །
ཁྱིམ་པ་དག་ནི་ཇི་སྙེད་པ། །ཕན་ཚུན་དུ་ནི་འདི་སྐད་དུ། །དགོན་པའི་དགེ་སློང་གང་ཡིན་པ། །ཡང་དག་འཕགས་པ་ཡིན་ཞེས་ཟེར། །རེས་འགའ་དགོན་པ་དེ་དག་ན། །གནས་པར་གྱུར་པ་དེ་ཡི་ཚེ། །གལ་ཏེ་གཞན་དག་
འོངས་གྱུར་ན། །འདི་ལྟ་བུར་ནི་སྟོན་པར་བྱེད། །བདག་ནི་དགོན་གནས་འདི་དག་ཏུ། །ཉིན་མཚན་འཆག་པར་བྱེད་ཅེ་འམ། །ཡང་ན་རྩྭ་འཇམ་བཏིང་ནས་ནི། །འདིར་ནི་འདུག་པར་བྱེད་ཅེས་ཟེར། །རེས་འགའ་གྲོང་ཁྱེར་
ཞུགས་གྱུར་ནས། །ཁྱིམ་པའི་དེར་ནི་ཕྱིན་པའི་ཚེ། །གཡོ་སྒྱུས་ནན་ཏན་འདི་སྐད་དུ། །བདེ་འམ་ཞེས་ནི་འདྲི་བར་བྱེད། །འཇིག་རྟེན་པ་ཡི་འདུ་འཛིའི་གཏམ། །རྒྱལ་པོ་ཆོས་རྐུན་ལ་སོགས་པའི། །སྣ་ཚོགས་དག་ནི་རྗོད་པར་བྱེད། །
རེས་འགའ་ཆགས་པའི་སེམས་དག་གིས། །བུད་མེད་རྣམས་ཀྱི་མདུན་དག་ཏུ། །ཐབས་ནི་རྣམ་པ་སྣ་ཚོགས་ཀྱིས། །རང་གི་ཡོན་ཏན་རྗོད་པར་བྱེད། །བདག་ནི་འཇིག་རྟེན་ཐམས་ཅད་ཀྱི། །བསོད་ནམས་ཞིང་ནི་ཆེན་པོ་བྱེད། །
བདག་ནི་རྒྱལ་ཐབས་རབ་སྤངས་ནས། །རབ་ཏུ་བྱུང་ནས་ལམ་སྒོམ་ཡིན། །བཙུན་མོ་དང་ནི་སླས་རྣམས་ཀྱང་། །མཐོ་རིས་སྐྱེས་པར་གྱུར་ཅེས་ཟེར། །དེ་དག་དེ་སྐད་ཐོས་ནས་ནི། །ཤིན་དུ་གུས་པ་རབ་བསྐྱེད་དེ། །གོས་ཟས་དང་ནི་བཏུང་བདག །

79-1-258a

སྣ་ཚོགས་སྦྱར་ནས་མཆོད་པར་བྱེད། །བཙུན་པས་ཐུགས་རྗེར་རབ་དགོངས་ཤིང་། །བདག་ཅག་ཐད་དུ་ཡང་གཤེགས་ཟེར། །རོ་ཞིམ་དག་ལ་ཞེན་ཆགས་ཤིང་། །ཉེས་དམིགས་རྣམས་ནི་མི་ཤེས་པས། །བདུད་ཀྱིས་
གླགས་ཀྱང་རྙེད་འགྱུར་ཏེ། །རུ་སྦལ་རྒྱ་མོས་ཟིན་པ་འདྲ། །དགོན་པར་གནས་པ་དག་ལ་ཡང་། །རྙེད་པ་དག་གིས་སྙེམས་པར་བྱེད། །དགེ་སློང་བརྩོན་འགྲུས་ཅན་དག་ལ། །བརྙས་ཤིང་སྐུར་པ་འདེབས་པར་བྱེད། །རྙེད་དང་གྲགས་པས་
སེམས་རྨོངས་པས། །ཡང་ནས་ཡང་དུ་ཞེན་པ་སྐྱེད། །ལུས་ནི་ཡོངས་སུ་གསོ་བའི་ཕྱིར། །རྟག་ཏུ་གཡོ་སྒྱུ་སྤྱོད་པས་ན། །ལུས་དང་ངག་གི་མི་དགེ་ལས། །ཡང་ནས་ཡང་དུ་འཕེལ་བར་བྱེད། །གལ་ཏེ་སྦྱིན་དག་དད་པ་ཡིས། །དང་
བའི་སེམས་ཀྱིས་མཆོད་ན་ཡང་། །ལེ་ལོ་སྙོམས་ལས་དབང་གིས་ནི། །དེ་ཡི་བསོད་ནམས་འབྲི་བར་བྱེད། །སྐྱེས་བུ་བླུན་པོ་དེ་དག་ནི། །རྟག་ཏུ་མི་དགེ་འདོད་བསྐྱེད་པས། །སྟོང་པ་ཉིད་ཀྱི་ཆོས་འདི་ལ། །རྗེས་འཐུན་བཟོད་སེམས་
འཐོབ་མི་འགྱུར། །གང་དག་ང་ཡི་བསྟན་པ་ལས། །ཉེས་དམིགས་དེ་དག་རབ་སྤངས་ནས། །ནན་ཏན་བག་ཡོད་སྒྲུབ་བྱེད་ན། །ཆོས་འདི་ཐོས་པར་དཀའ་མི་འགྱུར། །རྙེད་པ་དང་ནི་མི་རྙེད་དང་། །བསྟོད་སྨད་སྡུག་བསྔལ་བདེ་ལ་སོགས། །
འཇིག་རྟེན་ཆོས་ཀྱིས་མི་གཡོས་པ། །ཆོས་འདི་ཐོབ་པར་དཀའ་མི་འགྱུར། །ལུས་ལ་མི་གཙང་འདུ་ཤེས་དང་། །ཕུང་པོ་རྨ་ཡི་འདུ་ཤེས་དང་། །ཟས་ནི་རྨ་བསྐུས་འདུ་ཤེས་པ། །ཆོས་འདི་ཐོབ་པར་དཀའ་མི་འགྱུར། །གོས་བཟངས་དག་ནི་
ཐོབ་གྱུར་ཀྱང་། །དྲེགས་པ་དག་ནི་མི་སྐྱེད་ཅིང་། །ངོ་ཚ་དགབ་པའི་ཕྱིར་གྱོན་པ། །ཆོས་འདི་ཐོབ་པར་དཀའ་མི་འགྱུར། །གཟུགས་དང་སྟོབས་ནི་མི་སྙེམས་ཤིང་། །ཟས་ལ་ཆགས་པ་མེད་པ་དང་། །སྲོག་གནས་ཕྱིར་ནི་གང་ཟ་བ། །ཆོས་འདི་
ཐོབ་པར་དཀའ་མི་འགྱུར། །སྲེད་པ་རྣམས་ནི་སྟོང་ཤེས་ནས། །འདོད་པ་དག་ལ་བླང་དོར་མེད། །རྟག་ཏུ་སྟོང་དབེན་གང་སྤྱོད་པ། །ཆོས་འདི་ཐོབ་པར་དཀའ་མི་འགྱུར། །དཔག་ཚད་གཅིག་འདས་རི་ཁྲོད་དུ། །གཅིག་པུ་འདུག་གནས་མཉམ་བཞག་

79-1-258b

ཅིང་། །འདུས་བྱས་བདག་མེད་གང་རྟོགས་པ། །ཆོས་འདི་ཐོབ་པར་དཀའ་མི་འགྱུར། །མི་ཟད་སྐྱེ་བའི་མཐའ་དག་དང་། མིག་འཇུག་མཚན་ཉིད་རྟོགས་བྱེད་ཅིང་། །མིག་གཙང་ལམ་ནི་རབ་སྒྲུབ་པ། །ཆོས་འདི་ཐོབ་པར་དཀའ་མི་
འགྱུར། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང་། །ཐམས་ཅད་ཀུན་ཀྱང་དེ་བཞིན་ནོ། །དེ་བཞིན་མ་འོངས་དུས་ཀྱི་ཚེ། །དགེ་སློང་དག་ནི་ཚད་མེད་སྙེད། །བརྩོན་པ་དང་ནི་ལེ་ལོ་ཅན། །ཐམས་
ཅད་དེ་བཞིན་ཤེས་པར་གྱིས། །དགེ་དང་མི་དགེའི་གྲོགས་པོ་དག །སྒྲུབ་པ་དང་ནི་མི་སྒྲུབ་པ། །ཡིད་ཆེས་པ་དང་ཡིད་མི་ཆེས། །ཐམས་ཅད་དེ་བཞིན་ཤེས་པར་གྱིས། །དགེ་དང་མི་དགེའི་གྲོགས་པོ་དག །མིག་ཟད་ལམ་ནི་གང་ཡིན་པ། །སྒྲུབ་
པ་དང་ནི་མི་སྒྲུབ་པ། །ཐམས་ཅད་དེ་བཞིན་ཤེས་པར་གྱིས། །གང་ཞིག་བྱང་ཆུབ་རབ་མོས་ཤིང་། །ཟླ་གཅིག་གཉིས་གསུམ་འདས་ནས་ནི། །དུས་གཞན་ཕྱིར་ནི་གང་ལྡོག་པ། །ཐམས་ཅད་དེ་བཞིན་ཤེས་པར་གྱིས། །གང་ཞིག་ཆོས་འདི་
ཐོས་གྱུར་ནས། །མོས་པའི་སེམས་ནི་གང་རྙེད་པ། །གལ་ཏེ་ཉམས་པར་གྱུར་ན་ཡང་། །སླར་ནི་དང་བ་ཐོབ་པར་འགྱུར། །གང་ཞིག་ཆོས་འདི་ཐོས་གྱུར་ནས། །བག་མེད་སྤོང་བར་མི་བྱེད་པ། །མདོ་འདི་སངས་རྒྱས་བཀའ་མ་ཡིན། །དེ་སྙམ་དུ་ནི་
སེམས་པར་འགྱུར། །གང་ཞིག་ཆོས་འདི་ཐོས་གྱུར་ནས། །བདུད་ཀྱིས་ཡོངས་སུ་གང་བཟུང་བ། །དང་པོ་དད་པ་སྐྱེས་གྱུར་ཀྱང་། །ཕྱིས་ནི་རབ་ཏུ་སྤོང་བར་འགྱུར། །གང་ཞིག་ཆོས་ལ་མ་མོས་པ། །མི་བདེན་གྲགས་དང་རྙེད་པ་ཚོལ། །གྲོང་
ཁྱེར་གྲོང་རྡལ་རབ་རྒྱུ་ཞིང་། །གཟུངས་རྣམས་དང་ནི་ཏིང་འཛིན་དང་། །ཀུན་འཛིན་འོད་ཟེར་བསྔགས་བརྗོད་ཀྱང་། །དེ་ཡིས་ཡང་དག་རྟོགས་མི་འགྱུར། །འདོད་པ་ལྔ་པོས་བཅིངས་པ་དང་། །འཇིག་རྟེན་ལས་ནི་འདོད་ཚོལ་བ། །བརྗོད་པ་
དག་ནི་རྟོགས་བྱེད་པས། །སྟོང་ཉིད་སྒོམ་ལ་སྐུར་པ་འདེབས། །དྲན་དང་ཤེས་རབ་སེམས་མེད་པས། །ཚེ་ཚད་རབ་ཏུ་དོན་མེད་འདས། །བླུན་པོ་སྟོང་པའི་ཆོས་སྤོང་བ། །དེ་ནི་ཚུལ་ཁྲིམས་བགེགས་བྱས་པས། །མནར་མེད་དག་ཏུ་ལྟུང་བར་

79-1-259a

འགྱུར། །ནམ་ཡང་མཐོ་རིས་ཡོང་མི་སྐྱེ། །གང་གིས་སྐད་ཅིག་གཅིག་ལ་ནི། །མཆོད་རྟེན་སྟོང་ནི་བྱས་པ་བས། །གང་གིས་མདོ་སྡེ་འདི་ཐོས་ནས། །ཚིག་བཞི་ཚིགས་བཅད་གཅིག་འཛིན་འཕགས། །མེ་ཏོག་ཕྲེང་བ་བརྒྱ་
སྟོང་དག །སངས་རྒྱས་མཆོད་རྟེན་མཆོད་པ་བས། །གང་གིས་མདོ་སྡེ་འདི་ཐོས་ནས། །ཚིག་བཞི་ཚིགས་བཅད་སེམས་པ་འཕགས། །གང་གིས་རིན་ཆེན་མཆོད་རྟེན་དག །གང་གཱའི་བྱེ་སྙེད་བྱས་པ་བས། །གང་གིས་ཐ་ན་སྐད་
ཅིག་ཙམ། །མདོ་སྡེ་འདི་སེམས་ཁྱད་པར་འཕགས། །སངས་རྒྱས་ཞིང་ནི་འབུམ་ཕྲག་བརྒྱ། །མེ་ཏོག་གཏོར་ནས་མཆོད་པ་བས། །གང་གིས་ཐ་ན་སྐད་ཅིག་ཙམ། །མདོ་སྡེ་འདི་སེམས་ཁྱད་པར་འཕགས། །ཆོས་གོས་འབུམ་
ཕྲག་བརྒྱ་མང་པོ། །སངས་རྒྱས་རྣམས་ལ་ཕུལ་བ་ལས། །གང་གིས་ཐ་ན་སྐད་ཅིག་ཙམ། །མདོ་སྡེ་འདི་སེམས་ཁྱད་པར་འཕགས། །སངས་རྒྱས་སྤྱན་ནི་རྣམ་དག་འཕགས། །མི་མཁྱེན་མི་གཟིགས་གང་ཡང་མེད། །གང་གིས་མདོ་
སྡེ་འདི་མོས་ན། །སངས་རྒྱས་སྤྱན་ནི་ཐོབ་པར་འགྱུར། །འདས་པའི་བསྐལ་པ་གྲངས་མེད་ཚེ། །སངས་རྒྱས་མར་མེ་མཛད་པ་བྱུང་། །ང་ནི་བྲམ་ཟེའི་ཁྱེ་འུར་གྱུར། །མེ་ཏོག་ཐོགས་ནས་མཆོད་པ་བྱས། །ཤཱག་ཀྱ་ཐུབ་པ་ཞེས་བྱ་བ། །
བྱང་ཆུབ་སྙིང་པོ་ལ་འདུག་ནས། །མདོ་སྡེ་འདི་ནི་སྟོན་འགྱུར་ཞེས། །ང་ལ་བྱང་ཆུབ་ལུང་ཡང་བསྟན། །ཁྱོད་ནི་དེ་ཚེ་གཞོན་ནུར་གྱུར། །ང་ལུང་བསྟན་པ་ཐོས་གྱུར་ནས། །དགའ་ཞིང་དད་པའི་སེམས་བསྐྱེད་དེ། །ཐལ་མོ་སྦྱར་ནས་འདི་སྐད་དུ། །
གལ་ཏེ་བྲམ་ཟེའི་ཁྱེའུ་འདི་ནི། །མངོན་པར་རྫོགས་པར་སངས་རྒྱས་ཚེ། །བདག་ནི་དེ་ཡི་གྲོགས་གྱུར་ནས། །མྱ་ངན་འདས་པའི་འོག་ཏུ་ཡང་། །ཆོས་ཀྱི་སྡེ་སྣོད་རབ་འཛིན་ཅིང་། །སྲུང་བར་ཤོག་ཅེས་སྨོན་ལམ་བཏབ། །སངས་རྒྱས་མར་མེ་མཛད་དེ་ཡིས། །
འོད་ཟེར་སྟོན་པའི་མདོ་འདི་ནི། །ཇི་སྐད་གསུངས་བཞིན་དེ་ཡི་ཚེ། །བྲམ་ཟེའི་ཁྱེའུ་དང་གཞོན་ནུ་གཉིས། །ལེགས་པར་མཉན་ཅིང་ཡོངས་སུ་བཟུང་། །ང་སྔོན་འདས་པའི་དུས་ཀྱི་ཚེ། །མེ་ཏོག་ཨུད་པ་ལ་དག་གིས། །སངས་རྒྱས་དེ་ལ་མཆོད་པ་བྱས། །

79-1-259b

དེ་ཚེ་ཁྱོད་ཀྱང་དེར་འདུག་སྟེ། །འདི་སྐད་དུ་ནི་སྨོན་ལམ་བཏབ། །ང་ཡི་བསྟན་པ་ཐ་མ་ལ། །མདོ་སྡེ་འདི་ནི་རབ་བཟུང་ནས། །རྒྱ་ཆེར་སྟོན་པར་ཤོག་ཅེས་སྨྲས། །གང་གིས་ཆོས་འདི་ཐོས་གྱུར་ནས། །ཞེ་སྡང་སེམས་ནི་མི་སྐྱེད་
པར། །གཟུང་འཛིན་ཀློག་ཅིང་གང་འདོན་པ། །དེ་ནི་སྐྱེས་བུ་དམ་པ་ཡིན། །ཁྱོད་ཀྱིས་མ་འོངས་དུས་ཀྱི་ཚེ། །ཐོས་དཀའི་ཆོས་འདི་རབ་བཟུང་ནས། །སེམས་ཅན་དག་ལ་དོན་གྱི་ཚུལ། །རྒྱ་ཆེར་དབྱེ་ཞིང་བསྟན་པར་བྱ། །ངས་ཀྱང་འདས་
པའི་དུས་ཀྱི་ཚེ། །ཡང་དག་ཆོས་ནི་ནུབ་པ་ན། །འོད་ཟེར་སྟོན་པའི་མདོ་འདི་ནི། །སེམས་ཅན་དག་ལ་རྒྱ་ཆེར་བསྟན། །བླུན་པོས་ནན་ཏན་མི་སྒྲུབ་པས། །འདི་ལ་སྐུར་བ་འདེབས་པར་བྱེད། །ངས་ནི་དེ་སྐད་ཐོས་གྱུར་ཀྱང་། །ཞེ་སྡང་
དག་ནི་སྐྱེད་མི་བྱེད། །ངས་ནི་རྟག་ཏུ་བཟོད་སྒོམས་ནས། །འཇིག་རྟེན་རྣམས་ལ་ཕན་འདོགས་བྱེད། །བཟོད་པའི་སྟོབས་ནི་རྫོགས་པས་ན། །མཚན་དང་དཔེ་བྱད་དག་གིས་བརྒྱན། །གཞོན་ནུ་ཁྱོད་ཀྱིས་སངས་རྒྱས་སྐུ། །གྱ་ནོམ་ཡོངས་
སུ་རྫོགས་གྱུར་ཅིང་། །གསེར་གྱི་ཁ་དོག་རྣམ་དག་འཕགས། །བཟོད་པའི་སྟོབས་ལས་བྱུང་བར་ལྟོས། །ང་ཡི་ཞབས་ནི་ས་རེག་ནས། །ཞིང་ནི་ཚད་མེད་གཡོ་བྱེད་ཀྱང་། །སེམས་ཅན་རྣམས་ནི་མི་ལྟུང་བ། །ཐམས་ཅད་བཟོད་པའི་སྟོབས་
ལས་སྐྱེས། །ང་ཡི་སྤུ་ཁུང་གཅིག་ནས་ནི། །འོད་ཟེར་བརྒྱ་སྟོང་རབ་བཀྱེ་ནས། །ཐམས་ཅད་གསལ་བར་གང་བྱེད་པ། །ཐམས་ཅད་བཟོད་མཆོག་སྟོབས་ལས་བྱུང་། །སྲིན་པོ་བཞིན་དུ་འཇིགས་པའི་གཟུགས། །སྲོག་ཆགས་གཟི་
བྱིན་འཕྲོག་བྱེད་པ། །ང་ལ་རྟག་ཏུ་གུས་པ་ཡང་། །ཐམས་ཅད་བཟོད་མཆོག་སྟོབས་ལས་བྱུང་། །ང་ཡི་འཁོར་ནི་ཇི་སྙེད་པ། །སེམས་ནི་རབ་ཏུ་དུལ་གྱུར་ནས། །དེ་བཞིན་གཤེགས་ལ་གུས་པ་ཡང་། །ཐམས་ཅད་བཟོད་མཆོག་
སྟོབས་ལས་བྱུང་། །རོལ་མོའི་སྒྲ་ནི་བརྒྱ་སྟོང་དག །འཁོར་འདུས་ཆེན་པོའི་ནང་དག་ཏུ། །སངས་རྒྱས་ཡོན་ཏན་བསྔགས་བརྗོད་པ། །ཐམས་ཅད་བཟོད་མཆོག་སྟོབས་ལས་བྱུང་། །ཀླུ་ཡི་རྒྱལ་པོ་བརྒྱ་སྟོང་དག །རབ་ཏུ་གདུག་ཅིང་

79-1-260a

འཇིགས་རུང་བ། །སངས་རྒྱས་མཐོང་ན་དགའ་བ་ཡང་། །ཐམས་ཅད་བཟོད་མཆོག་སྟོབས་ལས་བྱུང་། །སྲིན་པོ་གནོད་སྦྱིན་ལ་སོགས་པས། །མེ་ཏོག་ཕྲེང་བ་བརྒྱ་སྟོང་ཐོགས། །འོངས་ནས་ང་ལ་མཆོད་བྱེད་པ། །ཐམས་ཅད་
བཟོད་མཆོག་སྟོབས་ལས་བྱུང་། །ཞིང་ནི་བརྒྱ་སྟོང་ཚད་མེད་པར། །བཞུགས་པའི་དེ་བཞིན་གཤེགས་པ་རྣམས། །ང་ཡི་ཡོན་ཏན་བསྔགས་པ་ཡང་། །ཐམས་ཅད་བཟོད་མཆོག་སྟོབས་ལས་བྱུང་། །ལྟོ་འཕྱེ་དང་ནི་ལུས་སྲུལ་པོ། །
བརྒྱ་སྟོང་དག་ནི་འདུས་གྱུར་ནས། །མེ་ཏོག་གཏོར་ནས་ང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང་། །གནོད་སྦྱིན་རྒྱལ་པོ་ལ་སོགས་པ། །བྱེ་བ་བརྒྱ་ཕྲག་དྲུག་བཅུ་རྣམས། །འོངས་ནས་ང་ལ་གང་མཆོད་པ། །
ཐམས་ཅད་བཟོད་མཆོག་སྟོབས་ལས་བྱུང་། །གཞན་ཡང་ཀླུ་ཡི་རྒྱལ་པོ་ནི། །མ་ན་པ་ག་ལ་སོགས་པས། །མུ་ཏིག་དམར་པོས་ང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང་། །དུ་མུ་རུ་དང་ཤི་ཁྱི་བའི། །བརྒྱ་སྟོང་
སྙེད་ནི་འདུས་གྱུར་ནས། །རོལ་མོ་དག་གིས་ང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང་། །ལྟོ་འཕྱེ་དང་ནི་ལུས་སྲུལ་པོ། །བརྒྱ་སྟོང་སྙེད་ནི་འདུས་གྱུར་ནས། །མེ་ཏོག་སྤོས་ཀྱིས་ང་མཆོད་པ། །ཐམས་ཅད་བཟོད་
མཆོག་སྟོབས་ལས་བྱུང་། །ས་ཆེན་འཛིན་པ་ཀླུ་ཡི་རྒྱལ། །ལུས་ཕྱེད་དག་ནི་རབ་བསྟན་ནས། །ཐལ་སྦྱར་ང་ལ་གུས་པ་ཡང་། །ཐམས་ཅད་བཟོད་མཆོག་སྟོབས་ལས་བྱུང་། །ལུས་མེད་སྒྲ་གཅན་ཟིན་ལ་སོགས། །བྱེ་བ་ཕྲག་ནི་བརྒྱ་
སྟོང་རྣམས། །དང་བའི་སེམས་ཀྱིས་ང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང་། །གཞོན་ནུ་ཁྱོད་ཀྱིས་འདི་ལྟར་ལྟོས། །སངས་རྒྱས་འོད་ཟེར་གང་རེག་པ། །སྡུག་བསྔལ་བྲལ་ནས་བདེ་ཐོབ་པ། །ཐམས་ཅད་བཟོད་
མཆོག་སྟོབས་ལས་བྱུང་། །ས་མུ་ཏ་དང་རླུང་གི་ལྷ། །བརྒྱ་སྟོང་ནམ་མཁའ་གང་བར་ནི། །སྤོས་ཀྱི་ཆར་ཕབ་ང་མཆོད་པ། །ཐམས་ཅད་བཟོད་མཆོག་སྟོབས་ལས་བྱུང་། ལྷ་ཡི་འཁོར་ནི་བརྒྱ་སྟོང་དག །ལྷ་ཡི་མེ་ཏོག་གཏོར་

79-1-260b

མཆོད་དེ། །སྲེད་སྤངས་སངས་རྒྱས་སྟེན་བྱེད་པ། །ཐམས་ཅད་བཟོད་མཆོག་སྟོབས་ལས་བྱུང་། །ཁྱེད་ཀྱིས་སངས་རྒྱས་རྫུ་འཕྲུལ་དང་། །སྦྱིན་དང་ཚུལ་ཁྲིམས་སྒྲ་བསྒྲགས་ནས། །ཐམས་ཅད་ཀུན་དུ་ཐོས་མཛད་པ། །
བཟོད་མཆོག་སྟོབས་ལས་བྱུང་བར་ལྟོས། །ཕུང་པོ་ཁམས་ཀྱི་སྒྲ་དག་དང་། །བདེན་པ་བཞི་ཡི་སྒྲ་དག་གིས། །ཐམས་ཅད་ཀུན་ནི་གོ་མཛད་པ། །ཐམས་ཅད་བཟོད་མཆོག་སྟོབས་ལས་བྱུང་། །ང་ཡི་རྫུ་འཕྲུལ་སྟོབས་ཀྱིས་ནི། །
མཁའ་ལས་མིག་ཟད་མཐའ་དག་དང་། །རབ་ཞིའི་སྒྲ་ནི་ཐོས་གྱུར་ཏེ། །སྐྱེ་བའི་མཐའ་ཡང་དེ་བཞིན་ནོ། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་ནི་རྒྱུ་དང་རྐྱེན། །དེ་ལས་སྐྱེ་ཡང་འགྲོ་འོང་མེད། །དེ་སྐད་དུ་ནི་ཐོས་པར་འགྱུར། །
ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་ཞི་རྟོགས་བྱེད་ན། །སངས་རྒྱས་རྣམས་ཀྱང་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་ཟད་མཐའ་ཞི་བས། །སངས་
རྒྱས་རྣམས་ནི་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་མཐའ་རབ་ཞི་བས། །སངས་རྒྱས་རྣམས་ནི་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་
འཕྲུལ་སྟོབས་ཀྱིས་ནི། །མཁའ་ལས་མིག་སྐྱེ་མཐའ་ཞི་བས། །སངས་རྒྱས་རྣམས་ནི་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་འཇུག་རབ་ཞི་ན། །སངས་རྒྱས་
རྣམས་ནི་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་ནི་སྐྱེ་ཞི་བས། །སངས་རྒྱས་རྣམས་ནི་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །ང་ཡི་རྫུ་འཕྲུལ་སྟོབས་ཀྱིས་ནི། །མཁའ་ལས་མིག་
དབེན་རབ་ཞི་བས། །སངས་རྒྱས་རྣམས་ནི་དེ་ལས་སྐྱེས། །དེ་སྐད་དུ་ནི་ཐོས་པར་འགྱུར། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་ལ་སོགས་པའི་བར། །ཐམས་ཅད་ཀུན་ཀྱང་དེ་བཞིན་ནོ། །

79-1-261a

འདོད་སྡང་གཏི་མུག་ཁོང་ཁྲོ་དང་། །འཆབ་དང་ཕྲག་དོག་གཡོ་སྒྱུ་དང་། །ཁེངས་དང་ང་རྒྱལ་ལ་སོགས་པ། །རྒྱ་ཆེར་བཤད་པ་འང་དེ་བཞིན་ནོ། །དེ་ནས་ཟླ་འོད་གཞོན་ནུར་གྱུར་པས་དེ་ལྟ་བུའི་ཆོས་ཁྱད་པར་དུ་
འཕགས་པ་ཐོས་པས་རབ་ཏུ་དགའ་བར་གྱུར་ནས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སང་གི་གདུགས་ལ་བདག་དེ་བཞིན་གཤེགས་པ་དང་། །འཁོར་མང་པོ་དང་བཅས་པར་
གདུགས་ཚོད་ལ་སྤྱན་འདྲེན་ན། ཐུགས་བརྩེ་བར་དགོངས་ཏེ་བདག་གིས་སྦྱར་བའི་གདུགས་ཚོད་གསོལ་བར་ཅི་གནང་། །དེ་སྐད་ཅེས་གསོལ་པ་དང་། དེ་ནས་བཅོམ་ལྡན་འདས་ཀྱིས་གཞོན་ནུ་དེའི་བསམ་པ་རྣམ་པར་དག་
པ་དང་། སེམས་ཅན་ཚད་མེད་པ་རྣམས་ལ་ཡང་ཕན་པ་མཛད་པར་འགྱུར་བར་ཐུགས་ཀྱིས་མཁྱེན་ནས་ཐུགས་བརྩེ་བར་དགོངས་ཏེ་ཅང་མི་གསུང་བས་གནང་ངོ་། །དེ་ནས་ཟླ་འོད་གཞོན་ནུར་གྱུར་པ་སྟན་ལས་ལངས་ནས། 
བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ། ལན་གསུམ་བསྐོར་བ་བྱས་ནས། རབ་ཏུ་དགའ་བས་རང་གི་ཁྱིམ་དུ་སོང་སྟེ། རང་གི་འཁོར་དང་བཅས་པ་དང་། ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། 
ལྟོ་འཕྱེ་ཆེན་པོ་ལ་སོགས་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་བཞི་མདོར་དར་གྱི་ལྡིང་ཁང་བྲེས་ཏེ་ལྡིང་ཁང་དེ་ཡང་ཤིན་དུ་མཐོ་ཞིང་རྒྱ་ཆེ་ལ་ཐམས་ཅད་ཀུན་དུ་ཁྱབ་པ། གསེར་གྱི་ཙོང་ཙོང་དྲ་བར་བྲེས་པ། །ནོར་
བུ་རིན་པོ་ཆེའི་ཕྲེང་བ་སྤྱངས་པ། སེང་གེའི་བ་དན་དང་། གསེར་གྱི་ཕྲེང་བ་ལུ་གུ་རྒྱུད་ཅན་འབུམ་ཕྲག་བརྒྱ་སྟོང་སྣ་ཚོགས་ཀྱིས་བརྒྱན་པ། གཞན་ཡང་རིན་པོ་ཆེའི་མེ་ཏོག་ཁ་དོག་ཁྱད་པར་དུ་འཕགས་པའི་ཕྲེང་བའི་
ཕུང་པོ་དག་གཅལ་དུ་བཀྲམ་མོ། །མེ་ཏོག་ཙམ་པ་ཀ་དང་ཨ་ཏི་མུག་ཏ་ལ་སོགས་པ་རྣམ་པ་སྣ་ཚོགས་ཀྱི་ཕྲེང་བ་ཚད་མེད་གྲངས་མེད་པ་ཡང་རིན་པོ་ཆེའི་ལྡིང་ཁང་གི་ནང་ཐམས་ཅད་དང་། འཁོར་འདུས་པ་ཐམས་ཅད་ཀུན་དུ་

79-1-261b

ཁྱབ་པར་སྤྱངས་ཤིང་རྒྱན་དུ་བྲིས་སོ། །གཞན་ཡང་དེའི་ནང་དུ་ཁྲི་སྟན་རྣམས་བཤམས་ནས། རིན་པོ་ཆེའི་སྤོས་བྱི་ལི་ཀ་དང་། དུ་མ་ཙ་དང་། ཙན་དན་དང་། གུར་གུམ་རྣམ་པར་དག་ཅིང་ཡིད་དགའ་བར་བྱེད་པ་སྣ་
ཚོགས་བསྲེགས་སོ། །དེ་བཞིན་དུ་སྦྱར་སྤོས་མཆོག་དམ་པ་སྣ་ཚོགས་ཀྱང་མཆོད་པའི་ཡོ་བྱད་དུ་སྦྱར་ཏོ། །གཞན་ཡང་སྤོས་ཀྱི་ཆུས་ལམ་སྲང་རྣམས་ཀུན་དུ་ཁྱབ་པར་ཆག་ཆག་བཏབ་བོ། །ས་བཞི་ཀུན་
དུ་མེ་ཏོག་སྣ་ཚོགས་བཅལ་དུ་བཀྲམ་མོ། །དེའི་ཚེ་ལྷའི་བུ་མོ་དང་། ལྷ་མ་ཡིན་གྱི་བུ་མོ་དང་། སྒྲ་གཅན་ཟིན་གྱི་བུ་མོ་གྲངས་མེད་ཚད་མེད་པ་ཡང་རབ་ཏུ་དགའ་བའི་སེམས་བསྐྱེད་ནས། བྱང་ཆུབ་ཀྱི་རྒྱུ་མངོན་པར་བསྒྲུབ་
པར་འདོད་པའི་ཕྱིར་དེར་འོངས་ནས་གྲོང་ཁྱེར་ཆེན་པོ་ཁྱད་པར་དུ་འཕགས་པ་དེ་རབ་ཏུ་བརྒྱན་ཏོ། །དེ་ནས་ཟླ་འོད་གཞོན་ནུར་གྱུར་པ་གྲོང་ཁྱེར་དེ་ཀུན་དུ་ཁྱབ་པར་བརྒྱན་ཅིང་ཡོངས་སུ་དག་པ་དང་གདུགས་ཚོད་ལ་བབ་པར་རིག་
ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་རྣམས་ལ་སྨན་པར་མཛད་པའི་སླད་དུ་གྲོང་ཁྱེར་ཆེན་པོར་གཤེགས་སུ་གསོལ། །དེ་ནས་བཅོམ་ལྡན་འདས་འཁོར་མང་པོ་དང་ཐབས་
གཅིག་ཏུ་གྲོང་ཁྱེར་དུ་གཤེགས་ནས་སྒོའི་ཐེམ་པ་ལ་ཞབས་བཞག་མ་ཐོག་ཏུ་གྲོང་ཁྱེར་ཆེན་པོ་དེའི་ས་ཆེན་པོ་ཡང་རབ་ཏུ་གཡོས་པར་གྱུར། ཕྱོགས་བཅུའི་འཇིག་རྟེན་གྱི་ཁམས་འབུམ་ཕྲག་བརྒྱ་སྟོང་ཚད་མེད་པ་ཡང་
རབ་ཏུ་གཡོས་པར་གྱུར་ཏེ། དེའི་ཚེ་ལོང་བ་དག་ནི་གཟུགས་མཐོང་བར་གྱུར། སྡུག་བསྔལ་བ་རྣམས་ནི་བདེ་བ་ཐོབ་པར་གྱུར། འོན་པ་རྣམས་ནི་སྒྲ་ཐོས་པར་གྱུར། བྱད་བཞིན་མི་སྡུག་པ་རྣམས་ནི་བྱད་བཞིན་
བཟང་པོ་ཐོབ་པར་གྱུར། །ནོར་མེད་པ་རྣམས་ནི་ནོར་དང་ལྡན་པར་གྱུར། བུ་མེད་པ་རྣམས་ནི་བུ་ཡོད་པར་གྱུར། གོས་མེད་པ་རྣམས་ནི་གོས་ཐོབ་པར་གྱུར། རིན་པོ་ཆེ་མེད་པ་རྣམས་ནི་རིན་པོ་ཆེ་ཐོབ་པར་གྱུར། ཉེ་བཤེས་

79-1-262a

མེད་པ་རྣམས་ནི་ཉེ་བཤེས་དང་ལྡན་པར་གྱུར། ལུས་ཀྱི་རྒྱན་ཐམས་ཅད་ཀྱིས་ཕོངས་པ་རྣམས་ནི་ལུས་ཀྱི་རྒྱན་ཐམས་ཅད་དང་ལྡན་པར་གྱུར་ཏོ། །གཞན་ཡང་ངང་པ་དང་། ཁྲུང་ཁྲུང་དང་། ནེ་ཙོ་དང་། རྨ་བྱ་དང་། 
ཀ་རི་ཀ་ལ་སོགས་པ་བྱའི་ཚོགས་མང་པོ་རྣམས་དེ་བཞིན་གཤེགས་པ་མཐོང་བ་དང་། རབ་ཏུ་དགའ་བའི་སེམས་བསྐྱེད་ནས་སྒྲ་སྙན་ཅིང་ཡིད་དུ་འོང་བ་མཆོག་དམ་པ་ཕྱུང་སྟེ། གང་གིས་སྒྲ་དེ་དག་ཐོས་པ་ཡང་
ཡིད་ཤིན་དུ་བདེ་བར་གྱུར་ཏོ། །གཞན་ཡང་དེ་བཞིན་གཤེགས་པས་རྫུ་འཕྲུལ་གྱི་སྟོབས་ཀྱིས་ཙམ་པ་ཀའི་ལྗོན་ཤིང་ཚད་མེད་པ་སྙེད་མངོན་པར་སྤྲུལ་པས། སེམས་ཅན་བརྒྱ་སྟོང་མང་པོ་རྣམས་མེ་ཏོག་ཡོངས་སུ་དག་
པ་དེ་དག་དང་། གཞན་ཡང་སྤོས་མཆོག་དམ་པ་ཐོགས་ནས་བཅོམ་ལྡན་འདས་ལ་མངོན་པར་གཏོར་ཏེ་མཆོད་པ་བྱས་སོ། །གཞན་ཡང་ལྷ་མ་ཡིན་གྱི་བུ་མོ་དབང་ཕྱུག་ཐོབ་པ་བརྒྱ་སྟོང་དུ་མ་མུ་ཏིག་དམར་པོ་དང་། ཙན་
དན་གྱི་ཕྱེ་མ་ཐོགས་ནས་དེ་བཞིན་གཤེགས་པ་ལ་རབ་ཏུ་དགའ་བས་མངོན་པར་གཏོར་ཏོ། །ལྷ་མ་ཡིན་མང་པོ་དང་། གཞན་ཡང་ལྷ་མང་པོ་རྣམས་རིན་པོ་ཆེའི་གདུགས་གསེར་དང་། དངུལ་གྱིས་རབ་ཏུ་བརྒྱན་པ་ཐོགས་ནས་
བར་སྣང་ལ་འདུག་སྟེ། དེ་བཞིན་གཤེགས་པའི་སྟེང་དུ་ཁེབས་པར་གཡོགས་སོ། །གཞན་ཡང་བཅོམ་ལྡན་འདས་ཀྱི་རྫུ་འཕྲུལ་གྱི་སྟོབས་ཀྱིས་ཙན་དན་གྱི་ལྗོན་ཤིང་དང་། རིན་པོ་ཆེའི་སྣོད་དང་། གོས་ལ་སོགས་པའི་
ལྗོན་ཤིང་བརྒྱ་སྟོང་ཚད་མེད་དཔག་ཏུ་མེད་པ་རིན་པོ་ཆེ་རྣམས་ཀྱིས་བརྒྱན་པ། མེ་ཏོག་དང་། ལོ་མ་ཕུན་སུམ་ཚོགས་ཤིང་རྒྱས་པ། སེམས་ཅན་ཚད་མེད་པའི་བསོད་ནམས་ཀྱི་རྣམ་པར་སྨིན་པའི་འབྲས་བུ་ཐུན་མོང་དུ་མངོན་
པར་གྲུབ་པ། རླུང་གི་ངད་ལངས་པ་ཙམ་གྱིས་སྤོས་མཆོག་དམ་པའི་དྲིས་སངས་རྒྱས་ཀྱི་ཞིང་ཚད་མེད་པ་རྣམས་ཀུན་དུ་ཁྱབ་པར་གང་བ་མངོན་པར་སྤྲུལ་ཏོ། །སེམས་ཅན་བརྒྱ་སྟོང་ཚད་མེད་པ་རྣམས་ཀྱིས་ཀྱང་དུས་

79-1-262b

གཅིག་ཏུ་མེ་ཏོག་ཐོགས་ནས་བཅོམ་ལྡན་འདས་ལ་མངོན་པར་གཏོར་ཏོ། །དེ་བཞིན་དུ་སེམས་ཅན་མ་ཡིན་པ་ཚད་མེད་པ་རྣམས་ཀྱང་དེ་བཞིན་གཤེགས་པའི་རྫུ་འཕྲུལ་གྱི་སྟོབས་ཀྱིས་མངོན་པར་སྤྲུལ་པ་ཤ་སྟག་གོ །
གང་དག་ཅི་དང་ཅི་སྨོན་པ་དེ་དག་ཀྱང་རྫུ་འཕྲུལ་གྱི་དབང་གིས་དེ་དག་གི་བསམ་པ་ཇི་ལྟ་བ་བཞིན་དུ་རེ་བ་ཡོངས་སུ་རྫོགས་པར་གྱུར་ཏོ། །བཅོམ་ལྡན་འདས་གྲོང་ཁྱེར་དུ་གཤེགས་པའི་ཚེ་འཁོར་འདུས་པ་ཐམས་ཅད་
ནམ་མཁའ་ལ་ཁྱད་པར་དུ་འཕགས་པའི་སྒྲས་བསམ་གྱིས་མི་ཁྱབ་པར་ཡང་དག་པར་སྟོན་པའི་སྒྲ་ཐོས་པར་གྱུར་ཀྱང་དེ་གང་ནས་བྱུང་བ་ཤེས་པར་ཡང་མ་གྱུར་ལ་ཚིགས་སུ་བཅད་པ་བརྒྱ་སྟོང་དུ་མས་ཀྱང་ཆོས་རྣམས་
ཡང་དག་པར་བསྟན་པར་གྱུར་ཏོ། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་ཟད་མཐའ་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་
པར་འགྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་སྐྱེ་མཐའ་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་
ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་མཐའ་ནི་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་
གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་རབ་ཞི་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་གྲོང་ཁྱེར་
ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་འཇུག་པ་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་གྲོང་ཁྱེར་ཞུགས་

79-1-263a

པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་མེད་ཅིང་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་
ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་སྐྱེ་མེད་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་
ནི་འདི་སྐད་གྲགས་པར་གྱུར། །འདོད་ཆགས་རབ་འགོག་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །ཞེ་སྡང་གཏི་མུག་ཁོང་ཁྲོ་འཆབ་སེར་སྣ། །གཡོ་སྒྱུ་ཁེངས་དང་ང་རྒྱལ་མྱ་ངན་དང་། 
སྡུག་བསྔལ་ཀུན་འབྱུང་འགོག་པ་ལམ་སེམས་ཅན། །ཁྱེའུ་དང་བུ་མོ་བུད་མེད་དག་དང་ནི། །སྐྱེས་བུ་གསོ་བ་དག་དང་དབང་པོ་དྲུག །ཡུལ་དྲུག་འབྱུང་ཆེན་བཞི་ཡི་དངོས་པོ་དང་། །འཇིག་རྟེན་སྡུག་བསྔལ་ཕུང་པོ་ཁམས་
དག་དང་། །འཇིག་རྟེན་སྐྱེ་སྒྲ་མིང་སོགས་ཀྱང་དེ་བཞིན། །ཆོས་རྗེ་དམ་པའི་ཆོས་ནི་བསྟན་པས་ན། །སེམས་ཅན་ཐམས་ཅད་རབ་ཏུ་དགའ་བར་འགྱུར། །ལྷ་ཡི་འཇིག་རྟེན་ཀུན་ཀྱང་ཐོས་གྱུར་ནས། །དེ་བཞིན་གཤེགས་པའི་
ཐེག་ལ་གནས་པར་མོས། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་སྦྱིན་སྟོབས་དག་ལ་རབ་མོས་པས། །སྦྱིན་པའི་སྟོབས་ཀྱིས་བྱང་ཆུབ་
བརྙེས་པར་གྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་ཚུལ་ཁྲིམས་རྣམ་དག་རབ་མོས་པས། །ཚུལ་ཁྲིམས་རྣམ་དག་སྟོབས་ཀྱིས་བྱང་ཆུབ་
བརྙེས། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་བཟོད་པ་དག་ལ་རབ་མོས་པས། །བཟོད་པའི་སྟོབས་ཀྱིས་བྱང་ཆུབ་བརྙེས་པར་གྱུར། །བཅོམ་ལྡན་

79-1-263b

འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་བརྩོན་འགྲུས་དག་ལ་རབ་མོས་པས། །བརྩོན་འགྲུས་སྟོབས་ཀྱིས་བྱང་ཆུབ་བརྙེས་པར་གྱུར། །བཅོམ་ལྡན་འདས་
ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་བསམ་གཏན་དག་ལ་རབ་མོས་པས། །བསམ་གཏན་སྟོབས་ཀྱིས་བྱང་ཆུབ་བརྙེས་པར་གྱུར། །བཅོམ་ལྡན་འདས་ནི་
གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་ཤེས་རབ་དག་ལ་རབ་མོས་པས། །ཤེས་རབ་སྟོབས་ཀྱིས་བྱང་ཆུབ་བརྙེས་པར་གྱུར། །རྫུ་འཕྲུལ་མངོན་ཤེས་ཡོན་ཏན་
གནས་ཤེས་སྟོབས། །ཐབས་དང་གཟུངས་ཀྱི་སྟོབས་དང་གྲགས་པའི་སྟོབས། །ལས་དང་རྟེན་འབྱུང་ཡན་ལག་དད་དང་ཐོས། །སྟོང་དང་འཐུན་པའི་སྟོབས་དང་རབ་ཞི་སྟོབས། །རབ་དུལ་ཡང་དག་མཐའ་དང་དབེན་མཁས་
སྟོབས། །འཇིགས་དང་དགའ་དང་ཕན་འདོགས་ལ་མོས་དང་། །བྱམས་དང་སྙིང་རྗེ་དགའ་སྙོམས་བཟོད་འཚེ་མེད། །སྟོང་དང་མཚན་མ་མེད་སོགས་ཀྱང་དེ་བཞིན། །སྟོབས་བཅུ་འཕགས་པའི་མངའ་བདག་ལྷ་
ཡི་གཙོ། །ཡོན་ཏན་གྲགས་པ་དཔེ་ཟླ་མ་མཆིས་པ། །གྲོང་ཁྱེར་མཆོག་གཤེགས་ཞབས་ནི་བཞག་པའི་ཚེ། །སེམས་ཅན་རྣམས་ལ་རྒྱ་ཆེར་ཕན་པ་མཛད། །སྔོན་ཆད་སྲིད་གསུམ་ལས་དགེ་རབ་བསྒྲུབས་པས། །
ལྷ་ཡི་དགེ་བ་སྣ་ཚོགས་འཕེལ་བར་མཛད། །འཇིག་རྟེན་ཐམས་ཅད་ཀྱིས་ནི་རབ་ཏུ་བཀུར། །ང་ཡི་བསྟན་པ་འདི་ཐོས་ཐམས་ཅད་དགའ། །བཅོམ་ལྡན་གྲོང་ཁྱེར་གཤེགས་ནས་ཞབས་བཞག་ཚེ། །གྲོང་ཁྱེར་ས་ཆེན་
དག་ནི་རབ་ཏུ་གཡོས། །བཅོམ་ལྡན་རྣམ་དག་འོད་ཟེར་མཐོང་བས་ན། །ངོ་མཚར་མི་འཛིན་མི་དགའ་གང་ཡང་མེད། །བཅོམ་ལྡན་གྲོང་གཤེགས་ཕན་པ་ཆེར་མཛད་པས། །ལྷ་མིའི་འཁོར་རྣམས་སེམས་ནི་དགའ་

79-1-264a

བར་འགྱུར། །ས་དང་མཁའ་འགྲོ་དག་གིས་སྲིད་གསུམ་ན། །བཅོམ་ལྡན་ཤིན་དུ་བདེ་ཞེས་བསྔགས་པར་གྱུར། །བཅོམ་ལྡན་ཞབས་ཀྱི་འཁོར་ལོ་ས་བཞག་ཚེ། །རྣམ་དག་འོད་ཟེར་ཀུན་གསལ་
ངོ་མཚར་གྱུར། །རྟ་ནི་ཅང་ཤེས་གྲོང་ཁྱེར་སྒྲ་སྙན་ཕྱུང་། །བྱ་ཚོགས་དག་ཀྱང་མཁའ་ལས་རབ་ཏུ་དགའ། །གཞན་ཡང་རབ་དང་བུད་མེད་མང་པོ་ཡི། །ལག་དང་རྐང་དང་གདུབ་འཁོར་ཕྲེང་བ་དང་། །དེ་བཞིན་རིན་
ཆེན་རྒྱན་ནི་སྣ་ཚོགས་ལས། །མ་དཀྲོལ་པ་ཡང་རང་ལས་སྒྲ་སྙན་བྱུང་། །སོ་སོར་ཕན་ཚུན་དགའ་བའི་གཏམ་བརྗོད་ཅིང་། །སྐད་མང་བཀྲ་ཤིས་མཆོག་གིས་བསྔགས་པ་བརྗོད། །འོན་ལོང་དབང་པོ་མ་
ཚང་དབང་པོ་ཐོབ། །ཐམས་ཅད་བཅོམ་ལྡན་ཁྱད་འཕགས་འབྲས་བུ་དབང་། །བཅོམ་ལྡན་གྲོང་ཁྱེར་གཤེགས་ཚེ་ཀུན་དགའ་བས། །ལྷ་མིས་མེ་ཏོག་མངོན་པར་མཆོད་པ་བྱས། །མཁའ་ལས་ཀུན་དུ་སྒྲ་
སྙན་བྱུང་བས་ན། །ལྷ་ཚོགས་ཚད་མེད་རབ་ཏུ་དགའ་བར་གྱུར། །གཞན་ཡང་སེམས་ཅན་དྲན་པ་ཉམས་པ་དག །སྨྱོས་འཁྲུགས་རབ་ཞི་ཕན་ཚུན་གཏམ་སྙན་བརྗོད། །བུད་མེད་གང་སྦྲུམ་མྱ་ངན་འཇིགས་གྱུར་པ། །འོད་ཟེར་
བྱིན་གྱིས་བདེ་བ་ཐོབས་པར་གྱུར། །སྐྱེས་པ་བུད་མེད་ངོ་ཚ་ཁྲེལ་བཅས་ལ། །དྲི་མ་སྤངས་པའི་ཆོས་དག་རབ་བཤད་པས། །ཐམས་ཅད་དགའ་ནས་དག་པའི་སེམས་བསྐྱེད་དེ། །ཐུབ་མཆོག་ཞབས་ལ་སྤྱི་བཏུད་ཕྱག་
བྱས་ནས། །ཁ་ཅིག་བཅོམ་ལྡན་བླ་མེད་ལམ་རབ་ཚོལ། །ཁ་ཅིག་བྱང་ཆུབ་སེམས་དཔའ་ཉན་ཐོས་ཚོལ། །བཅོམ་ལྡན་གྲོང་ཁྱེར་མཆོག་ཏུ་གཤེགས་པས་ན། །བཅོམ་ལྡན་ཞལ་དུ་ལྟ་ཞིང་རང་ཉིད་དགའ། །བཅོམ་
ལྡན་མཁྱེན་པས་ས་ཡི་སྤྱོད་རྟོགས་པས། །འཇིག་རྟེན་རྗེས་མཐུན་ཕན་པ་རབ་ཏུ་མཛད། །ཆོས་ཀྱི་ནོར་མཆོག་བྱང་ཆུབ་སེམས་དཔའ་བྱིན། །རིན་ཆེན་མཆོག་ནི་སེམས་ཅན་རྣམས་ལ་བཏང་། །བཅོམ་ལྡན་གྲོང་

79-1-264b

ཁྱེར་གཤེགས་པའི་ཚེ། །མཁའ་ལས་སྒྲ་ནི་འདི་སྐད་བྱུང་། །གང་ཞིག་མིག་ཟད་མཐའ་སྲེད་པ། །སངས་རྒྱས་ལ་ནི་གུས་པ་ཡིན། །བཅོམ་ལྡན་གྲོང་ཁྱེར་གཤེགས་པའི་ཚེ། །མཁའ་ལས་སྒྲ་ནི་འདི་སྐད་བྱུང་། །
གང་ཞིག་མིག་སྐྱེ་མཐའ་སྲེད་པ། །སངས་རྒྱས་ལ་ནི་གུས་པ་ཡིན། །གང་ཞིག་མིག་ཟད་མཐའ་སྲེད་པ། །སངས་རྒྱས་ཡིད་ཆེས་མི་འཇིགས་འཐོབ། །མིག་ཟད་མཐའ་ནི་ལྟ་བས་ན། །ཤིན་དུ་དད་པ་རྒྱུན་མི་འཆད། །
གང་ཞིག་མིག་ཟད་མཐའ་སྲེད་པ། །ཆོས་ལ་ཡིད་ཆེས་མི་འཇིགས་འཐོབ། །མིག་ཟད་མཐར་ནི་ལྟ་བས་ན། །ཤིན་དུ་དང་བ་རྒྱུན་མི་འཆད། །གང་ཞིག་མིག་ཟད་མཐའ་སྲེད་པ། །དགེ་འདུན་ཡིད་ཆེས་མི་འཇིགས་
འཐོབ། །མིག་ཟད་མཐའ་ནི་ལྟ་བས་ན། །ཤིན་དུ་དང་བ་རྒྱུན་མི་འཆད། །གང་ཞིག་མིག་ཟད་མཐའ་སྲེད་པ། །ཚུལ་ཁྲིམས་འཛིན་མེད་ཐོབ་པར་འགྱུར། །མིག་ཟད་མཐར་ནི་ལྟ་བས་ན། །ཤིན་དུ་དང་བ་རྒྱུན་མི་འཆད། །
གང་ཞིག་མིག་ཟད་མཐའ་སྲེད་པ། །ངན་འགྲོའི་འདོད་ཆགས་སྤོང་བར་འགྱུར། །མིག་ཟད་མཐར་ནི་ལྟ་བས་ན། །འདོད་ཆགས་རྒྱུན་ནི་སྤོང་བར་བྱེད། །གང་ཞིག་མིག་ཟད་མཐར་སྲེད་པ། །ངན་འགྲོའི་ཞེ་སྡང་སྤོང་
བར་འགྱུར། །མིག་ཟད་མཐར་ནི་ལྟ་བས་ན། །ཞེ་སྡང་རྒྱུན་ནི་སྤོང་བར་བྱེད། །གང་ཞིག་མིག་ཟད་མཐར་སྲེད་པ། །ངན་འགྲོའི་གཏི་མུག་སྤོང་བར་འགྱུར། །མིག་ཟད་མཐར་ནི་ལྟ་བས་ན། །གཏི་མུག་རྒྱུན་ནི་སྤོང་བར་
བྱེད། །གང་ཞིག་མིག་ཟད་མཐར་སྲེད་པ། །བྱང་ཆུབ་ཡེ་ཤེས་དག་ལ་གནས། །མིག་ཟད་མཐར་ནི་ལྟ་བས་ན། །བྱང་ཆུབ་ཡེ་ཤེས་རྒྱུན་མི་འཆད། །མིག་སྐྱེ་མཐའ་དང་མིག་གི་མཐའ། །འཇུག་པ་དང་ནི་རབ་
དབེན་དང་། །ཡོད་པ་ཉིད་དུ་མི་འགྱུར་དང་། །མི་སྐྱེ་རབ་ཏུ་ཞི་བ་དང་། །འདི་ལ་སོགས་པའི་སྒོ་རྣམས་ཀྱང་། །ཐམས་ཅད་མིག་ཟད་འདྲ་བར་བསྟན། །གང་ཞིག་མིག་ཟད་མཐར་སྲེད་པ། །དེ་ནི་རྟག་ཏུ་ཐེ་ཚོམ་མེད། །

79-1-265a

དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་ཐོབ་པར་འགྱུར། །གང་ཞིག་མིག་སྐྱེ་མཐའ་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་འཐོབ་
པར་འགྱུར། །གང་ཞིག་མིག་གི་མཐའ་སྲིད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་འཐོབ་པར་འགྱུར། །གང་ཞིག་མིག་གི་འཇུག་སྲེད་པ། །དེ་ནི་རྟག་ཏུ་ཐེ་ཚོམ་མེད། །
དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་འཐོབ་པར་འགྱུར། །གང་ཞིག་མི་དབེན་རབ་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་འཐོབ་
པར་འགྱུར། །གང་ཞིག་མིག་མི་སྐྱེ་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་འཐོབ་པར་འགྱུར། །གང་ཞིག་མིག་མེད་ལ་སྲེད་པ། །དེ་ནི་རྟག་
ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་འཐོབ་པར་འགྱུར། །གང་ཞིག་མིག་ཞི་ལ་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །
སངས་རྒྱས་རྫུ་འཕྲུལ་འཐོབ་པར་འགྱུར། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང་། །ཐམས་ཅད་དེ་བཞིན་སྦྱར་བར་བྱ། །མིག་སྐྱེ་དཔག་
མེད་གང་སྐྱེད་པ། །ཡེ་ཤེས་དཔག་མེད་སྐྱེད་པར་བྱེད། །ཡེ་ཤེས་དཔག་ཏུ་མེད་པའི་ཕྱིར། །ཆོས་འདི་བསྟན་པ་འང་དེ་བཞིན་ནོ། །མིག་ཟད་དཔག་མེད་གང་ཤེས་པ། །མིག་ལ་སྒྲིབ་པ་མེད་པར་
འགྱུར། །དེ་ལྟར་སྒྲིབ་པ་མེད་པའི་ཕྱིར། །སངས་རྒྱས་མཁྱེན་པ་ཐོགས་མེད་འཐོབ། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང་། །ཐམས་ཅད་དེ་བཞིན་སྦྱར་བར་བྱ། །བཅོམ་

79-1-265b

ལྡན་གྲོང་ཁྱེར་གཤེགས་པའི་ཚེ། །སེམས་ཅན་དག་ནི་བརྒྱ་སྟོང་སྙེད། །མཁའ་ལས་ཆོས་བཤད་སྒྲ་ཐོས་པས། །སངས་རྒྱས་ཡོན་ཏན་ཐེ་ཚོམ་མེད། །ཁ་ཅིག་འདོད་ཆགས་སེམས་བྱུང་ཡང་། །སངས་རྒྱས་
ཡེ་ཤེས་འཇིགས་མི་བྱེད། །གང་ཞིག་འདོད་ཆགས་སེམས་བྱུང་ཡང་། །སངས་རྒྱས་ཡོན་ཏན་སྟོར་མ་གྱུར། །ཁ་ཅིག་འདོད་ཆགས་སེམས་བྱུང་ཡང་། །བླ་མེད་ཡེ་ཤེས་ཚོལ་བྱེད་ཅིང་། །མ་འདྲེས་ཆོས་ནི་
བསྒྲུབ་པ་དང་། །ཉན་ཐོས་ཐེག་པ་མོས་མི་བྱེད། །བྱིས་པ་བསམ་གཏན་སྒོམ་བྱེད་ཀྱང་། །བསམ་གཏན་བདེ་ལ་མོས་པས་ན། །མངོན་པའི་ང་རྒྱལ་རབ་བསྐྱེད་ནས། །དགེ་སྦྱོང་འབྲས་བུ་ཐོབ་སྙམ་སེམས། །
བྱིས་པ་བསམ་གཏན་སྒོམ་བྱེད་ཀྱང་། །མི་ཟད་མཐའ་ཡི་ཤེས་མེད་ན། །བསྐལ་པ་བརྒྱ་སྟོང་སྒོམ་བྱེད་ཀྱང་། །དེ་ལ་རྣམ་གྲོལ་ཅི་ཡང་མེད། །སྐྱེ་བ་ལེན་པ་ཐམས་ཅད་ནི། །དེ་ལ་ཞེན་ཆགས་སྐྱེད་པར་བྱེད། །
གལ་ཏེ་སྐྱེ་ཉིད་སྟོང་རིག་ན། །མཐོང་བ་རྣམས་ནི་རྣམ་དག་འགྱུར། །གང་ཞིག་བསམ་གཏན་བཞི་བསྒྲུབས་ཀྱང་། །མིག་ཟད་མཐའ་ཤེས་མེད་གྱུར་ན། །བསྐལ་པ་བརྒྱ་སྟོང་ལོན་ཡང་ནི། །བསམ་གཏན་ཡོངས་
སུ་དག་མི་འགྱུར། །གང་ཞིག་ཉེར་བསྔོགས་ཐོབ་གྱུར་ཀྱང་། །ཟད་མཐའ་ཤེས་པ་འཐོབ་མི་འགྱུར། །ཟད་པ་ཐོས་པ་མ་ཤེས་ཕྱིར། །ཟག་པ་ཐོབ་ལ་རྟག་ཏུ་སྤྱོད། །གང་ཞིག་འདུ་ཤེས་ཞེན་བྱེད་པ། །འདུ་ཤེས་ཟད་མཐའི་ཤེས་
པ་མེད། །འདུ་ཤེས་ཟད་པ་མ་ཤེས་ཕྱིར། །རྟག་ཏུ་འདུ་ཤེས་ཟག་ལ་སྤྱོད། །གང་ཞིག་འཇིག་རྟེན་ཞེན་ཆགས་པ། །འཇིག་རྟེན་ཟད་མཐའ་ཤེས་པ་མེད། །འཇིག་རྟེན་ཟད་མཐའ་མ་ཤེས་ཕྱིར། །རྟག་ཏུ་འཇིག་རྟེན་ཟག་ལ་
སྤྱོད། །གང་ཞིག་ཟག་བཅས་སེམས་ལ་གནས། །སེམས་ཟད་མཐའ་ཡི་ཤེས་པ་མེད། །སེམས་ཟད་པ་ནི་མ་ཤེས་ཕྱིར། །རྟག་ཏུ་སེམས་ནི་ཟག་ལ་སྤྱོད། །གང་ཞིག་ཟག་བཅས་ཆོས་ལ་གནས། །ཆོས་ཟད་མཐའ་ཡི་ཤེས་པ་མེད། །

79-1-266a

ཆོས་ཟད་པ་ནི་མ་ཤེས་ཕྱིར། །རྟག་ཏུ་ཟག་བཅས་ཆོས་ལ་སྤྱོད། །སྦྱངས་པའི་ཆོས་ལ་གནས་གྱུར་ཀྱང་། །མིག་ཟད་མཐའ་ཡི་ཤེས་མེད་ན། །མིག་ཟད་པ་ནི་མ་ཤེས་ཕྱིར། །ཡང་དག་སྦྱངས་ལ་གནས་པ་མིན། །ཁ་དོག་སྒྱུར་
བའི་གོས་བགོས་ཀྱང་། །མིག་ཟད་མཐའ་ཡི་ཤེས་མེད་ན། །མིག་ཟད་པ་ནི་མ་ཤེས་ཕྱིར། །ཡང་དག་ཆོས་གོས་བགོས་མ་ཡིན། །ཡ་རབས་རིགས་སུ་སྐྱེས་གྱུར་ཀྱང་། །མིག་ཟད་མཐའ་ཡི་ཤེས་མེད་ན། །མིག་ཟད་པ་ནི་མ་ཤེས་ཕྱིར། །
དེ་ནི་དག་པའི་རིགས་མ་ཡིན། །འཁོར་མང་དག་ནི་བདོག་གྱུར་ཀྱང་། །མིག་ཟད་མཐའ་ཡི་ཤེས་མེད་ན། །མྱུར་དུ་ངན་འགྲོར་ལྟུང་འགྱུར་ཏེ། །འཁོར་དག་གིས་ནི་སྐྱོབ་མི་ནུས། །སྒྲ་ཡི་རིག་པ་མཁས་གྱུར་ཀྱང་། །མིག་ཟད་མཐའ་ཡི་ཤེས་
མེད་ན། །མིག་ཟད་པ་ནི་མ་ཤེས་ཕྱིར། །སྒྲ་ཡི་རིག་པ་རྟོགས་མ་ཡིན། །བཟོ་རྣམས་ལ་ནི་མཁས་གྱུར་ཀྱང་། །མིག་ཟད་མཐའ་ཡི་ཤེས་མེད་ན། །མིག་ཟད་པ་ནི་མ་ཤེས་ཕྱིར། །དེ་ནི་བཟོ་ལ་མཁས་མ་ཡིན། །འདྲི་བ་མང་ལ་
མཁས་གྱུར་ཅིང་། །ཡི་གེ་གཅིག་གིས་རྣམ་འབྱེད་ཀྱང་། །མིག་ཟད་མཐའ་ཡི་ཤེས་མེད་ན། །དེ་ནི་དོན་འཐུན་བཤད་མ་ཡིན། །མཁས་པའི་རྗེས་སུ་སློབ་བྱེད་ཀྱང་། །གསང་དང་གསང་མིན་མི་ཤེས་ཤིང་། །མིག་ཟད་མཐའ་
ཡི་ཤེས་མེད་ན། །ཆོས་འདི་རྟོགས་པར་མི་འགྱུར་རོ། །རྗོད་པ་སྣ་ཚོགས་རྒྱང་པན་དང་། །ཆོས་རྣམས་རབ་ཏུ་ཤེས་གྱུར་ཀྱང་། །མིག་ཟད་མཐའ་ཡི་ཤེས་མེད་ན། །འཁྲི་ཤིང་སྟུག་པོར་ལྷུང་བ་འདྲ། །སྒྲ་ཡི་རིག་པ་མཁས་གྱུར་ཅིང་། །
དགེ་དང་མི་དགེའི་རྟགས་སྟོན་དང་། །ཚིག་འབྲུ་ཡི་གེ་སྒྲ་སྐད་དང་། །ཀློག་དང་འདོན་པའི་མཐར་ཐུག་ཀྱང་། །མིག་ཟད་མཐའ་ནི་མ་ཤེས་ན། །དེ་དག་རྣམས་ནི་ཤེས་མེད་ཡིན། །བུད་མེད་དག་གི་མཚན་མ་དང་། །ཚིག་མཁན་
རྨོངས་པར་བྱེད་པ་དང་། །ལུས་མཉེས་ངལ་སོས་ཆོས་རྣམས་དང་། །མཁྱུད་དཔྱད་དག་ལ་མཁས་གྱུར་ཀྱང་། །མིག་ཟད་མཐའ་ནི་མ་ཤེས་ན། །དེ་དག་རྣམས་ནི་ཤེས་མེད་ཡིན། །གཞུང་ལུགས་བརྒྱ་མང་སྟོན་བྱེད་ཅིང་། །ཡི་གེ་འབྲུ་གཅིག་

79-1-266b

མི་བརྗེད་ཀྱང་། །མིག་ཟད་མཐའ་ནི་མ་ཤེས་ན། །བཤད་པ་དེ་ནི་དོན་མེད་ཡིན། །དེ་བཞིན་མིག་སྐྱེ་མཐའ་དག་དང་། །མིག་མཐའ་དང་ནི་འཇུག་པ་ནས། །རབ་ཏུ་ཞི་བའི་བར་དུ་ཡང་། །དེ་བཞིན་དུ་ནི་རིག་པར་གྱིས། །རྣ་བ་སྣ་ལྕེ་ལུས་དང་
ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང་། །ཐམས་ཅད་དེ་བཞིན་སྦྱར་བར་བྱ། སྒྲ་ཡི་རིག་པ་ཀློག་འདོན་ཅིང་། །དེ་ཡི་དོན་ནི་རྟོགས་གྱུར་ཀྱང་། །མིག་ཟད་མཐའ་ནི་མ་ཤེས་ན། །དེ་ནི་ནམ་ཡང་དམན་པ་ཡིན། །སྨྲང་
བཞི་དག་ནི་འདོན་བྱེད་ཅིང་། །གསང་སྔགས་དག་ནི་རྟོགས་གྱུར་ཀྱང་། །མིག་ཟད་མཐའ་ནི་མ་ཤེས་ན། །དེ་ནི་ནམ་ཡང་དམན་པ་ཡིན། །དེ་བཞིན་མིག་སྐྱེ་མཐའ་དག་དང་། །མིག་གི་མཐའ་དང་འཇུག་པ་ནས། །རབ་ཏུ་ཞི་བའི་བར་དུ་
ཡང་། །དེ་བཞིན་དུ་ནི་རིག་པར་གྱིས། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང་། །ཐམས་ཅད་དེ་བཞིན་སྦྱར་བར་བྱ།། །། བམ་པོ་བཞི་པ། བཅོམ་ལྡན་གྲོང་ཁྱེར་
གཤེགས་པའི་ཚེ། །སེམས་ཅན་དག་ནི་ཚད་མེད་སྙེད། །མཁའ་ལས་ཆོས་བསྟན་སྒྲ་ཐོས་པས། །མིག་ཟད་མཐའ་ཡི་ཤེས་པ་ཐོབ། །བཅོམ་ལྡན་གྲོང་ཁྱེར་གཤེགས་པའི་ཚེ། །སེམས་ཅན་དག་ནི་ཚད་མེད་སྙེད། །མཁའ་ལས་
ཆོས་བསྟན་སྒྲ་ཐོས་པས། །མིག་མི་རང་བཞིན་རྟོགས་པར་གྱུར། །སྟོང་དང་བདག་མེད་རབ་རྟོགས་པས། །ཐམས་ཅད་རྣམ་དག་མིག་ཐོབ་འགྱུར། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་
བར་དུ་ཡང་། །ཐམས་ཅད་དེ་བཞིན་སྦྱར་བར་བྱ། །འདོད་སྡང་གཏི་མུག་ཁོང་ཁྲོ་དང་། །ང་རྒྱལ་ཁེངས་དང་གཡོ་སྒྱུ་ནས། །བག་མེད་པ་ཡི་བར་དུ་ཡང་། །དེ་བཞིན་དུ་ནི་རིག་པར་གྱིས། །བཅོམ་ལྡན་གྲོང་ཁྱེར་གཤེགས་པའི་ཚེ། །
སེམས་ཅན་དག་ནི་ཚད་མེད་སྙེད། །སྟེང་གི་ནམ་མཁའ་དག་ལས་ནི། །སངས་རྒྱས་མཚན་ནི་སྣ་ཚོགས་ཐོས། །ཁ་ཅིག་འདོད་ཆགས་འཇིགས་པ་ཡི། །དཔེ་ཟླ་མེད་པ་མིང་ཡང་ཐོས། །ཁ་ཅིག་ཞེ་སྡང་འཇིགས་བྱེད་ཅིང་། །འཇིག་རྟེན་

79-1-267a

ཕན་འདོགས་མིང་དག་ཐོས། །ཁ་ཅིག་གཏི་མུག་རབ་རྟོགས་ཤིང་། །ང་རྒྱལ་འདུལ་བའི་མིང་དག་ཐོས། །ཁ་ཅིག་འཇིག་རྟེན་དག་ལ་ནི། །རབ་ཞི་སྟོན་པའི་འདྲེན་མིང་ཐོས། །ཁ་ཅིག་ཤེས་རབ་དག་བསྟན་ནས། །
འཇིག་རྟེན་ཕན་འདོགས་མིང་དག་ཐོས། །ཁ་ཅིག་ཐབས་དག་རབ་བསྟན་ནས། །སེམས་ཅན་ཕན་འདོགས་མིང་དག་ཐོས། །ཁ་ཅིག་བདུད་ནི་རབ་བཏུལ་ཀྱང་། །འཁོན་འཛིན་མེད་པའི་མིང་དག་ཐོས། །ཁ་ཅིག་གསུང་རབ་ཆོས་དག་གིས། །
རྣམ་གྲོལ་བསྟན་པའི་མིང་དག་ཐོས། །ཁ་ཅིག་སེམས་ཅན་སྡུག་བསྔལ་བ། །རྒྱ་ཆེར་སྒྲོལ་བའི་མིང་དག་ཐོས། །ཁ་ཅིག་མི་ཡི་གཙོ་བོ་ཡིས། །འཇིག་རྟེན་སྒྲོལ་བའི་མིང་དག་ཐོས། །མིང་ནི་དེ་དག་ཐོས་གྱུར་ན། །ཐམས་ཅད་
རྣམ་དག་མིག་ཐོབ་གྱུར། །ནམ་མཁའ་དང་ནི་རྒྱ་མཚོའི་ཆུ། །རི་རབ་ལྷུན་པོའི་བར་དུ་ཡང་། །ཐམས་ཅད་གཞལ་དུ་རུང་སྲིད་ཀྱི། །སངས་རྒྱས་མཁྱེན་པ་ཐུབ་མི་འགྱུར། །གང་ཞིག་མི་བཟད་ངེས་པ་ཐོབ་གྱུར་ན། །ཆོས་སྐུ་
མངོན་པར་འགྲུབ་པ་དཀའ་མི་འགྱུར། །གང་ཞིག་ཆོས་སྐུ་མཆོག་ནི་གྲུབ་གྱུར་ན། །ཀུན་འཛིན་ཡེ་ཤེས་དཔག་མེད་ཐོབ་པར་འགྱུར། །གང་ཞིག་ཀུན་འཛིན་ཡེ་ཤེས་དཔག་མེད་ཐོབ། །དེས་ནི་མདོ་སྡེ་དཔག་མེད་གོ་བར་འགྱུར། །
གང་ཞིག་མདོ་སྡེ་དཔག་མེད་གོ་གྱུར་པས། །སངས་རྒྱས་རྫུ་འཕྲུལ་འཐོབ་པ་དཀའ་མི་འགྱུར། །གང་ཞིག་མིག་སྐྱེ་ངེས་པ་ཐོབ་གྱུར་ན། །ཆོས་སྐུ་མངོན་པར་འགྲུབ་པ་དཀའ་མི་འགྱུར། །གང་ཞིག་ཆོས་སྐུ་མཆོག་ནི་གྲུབ་གྱུར་ན། །
ཀུན་འཛིན་ཡེ་ཤེས་དཔག་མེད་འཐོབ་པར་འགྱུར། །གང་ཞིག་ཀུན་འཛིན་ཡེ་ཤེས་དཔག་མེད་ཐོབ། །དེས་ནི་མདོ་སྡེ་དཔག་མེད་གོ་བར་འགྱུར། །གང་ཞིག་མདོ་སྡེ་དཔག་མེད་གོ་གྱུར་བས། །སངས་རྒྱས་རྫུ་འཕྲུལ་ཐོབ་པ་དཀའ་མི་
འགྱུར། །དེ་བཞིན་རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ཆོས་དག་ནས། །སྒྲ་རྣམས་དང་ནི་མིང་གི་བར་དུ་ཡང་། །ཐམས་ཅད་དེ་བཞིན་དུ་ནི་སྦྱར་བར་བྱ། །དེ་ཚེ་ས་ཆེན་དག་ནི་རབ་ཏུ་གཡོས། །རྒྱ་མཚོ་རི་རྣམས་ཀྱང་ནི་དེ་བཞིན་ནོ། །ལྷ་མ་ཡིན་དང་ལྷ་ནི་མང་

79-1-267b

པོ་རྣམས། །ཐམས་ཅད་རབ་ཏུ་དགའ་བ་སྐྱེས་པར་གྱུར། །བདུད་དང་བདུད་དཔུང་གཡོ་སྒྱུ་རབ་བཅོམ་ནས། །ཐམས་ཅད་སངས་རྒྱས་བཀོད་པ་བསྒྲུབ་པར་མོས། །ལྷ་རྣམས་སོ་སོར་གཞལ་མེད་ཁང་ཞུགས་ནས། །ཕན་ཚུན་དགའ་བའི་གཏམ་ནི་འདི་སྐད་སྨྲས། །
འདྲེན་པ་དེང་ནི་འཇིག་རྟེན་བྱུང་བས་ན། །ལྷ་མི་ཐམས་ཅད་ལ་ནི་ཕན་པ་མཛད། །ས་བླའི་ལྷ་འཁོར་གཞལ་མེད་ཁང་གནས་ནས། །དང་བའི་སེམས་ཀྱིས་དགའ་ནས་འདི་སྐད་དུ། །འདྲེན་པ་འཇིག་རྟེན་དེང་བྱུང་ཤིན་དུ་ལེགས། །འཇིག་རྟེན་ཀུན་བདེ་རྒྱུ་ནི་རབ་ཏུ་མཛད། །
མཁའ་ལ་སྤྱོད་པའི་ལྷ་རྣམས་དེ་ཐོས་ནས། །ཐམས་ཅད་དགའ་ནས་རབ་ཏུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །རྒྱལ་ཆེན་རིགས་བཞིའི་ལྷ་རྣམས་དེ་ཐོས་ནས། །ཐམས་ཅད་དགའ་ནས་
ཤིན་དུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །སུམ་བཅུ་རྩ་གསུམ་ལྷས་ནི་དེ་ཐོས་ནས། །ཐམས་ཅད་དགའ་ནས་ཤིན་དུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་
བརྗོད་ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །འཐབ་བྲལ་ལྷ་དག་དེ་སྐད་ཐོས་ནས་ནི། །ཐམས་ཅད་དགའ་ནས་ཤིན་དུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་ནས་འཇིག་རྟེན་ཕན་མཛད་ཟེར། །
བདག་ཅག་བྱང་ཆུབ་སེམས་ནི་རབ་བསྐྱེད་ནས། །བཅོམ་ལྡན་བླ་མེད་མཁྱེན་པ་ཉེ་བར་བགྱི། །ལྷ་མིའི་གཙོ་མཆོག་ལ་ནི་བརྟེན་ནས་སུ། །སེམས་ཅན་ཐམས་ཅད་སྒྲོལ་བར་བགྱིད་ཅེས་ཟེར། །དགའ་ལྡན་ལྷ་རྣམས་དེ་སྐད་ཐོས་ནས་ཀྱང་། །ཐམས་ཅད་
དགའ་ནས་ཤིན་དུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །བཅོམ་ལྡན་འདས་ཀྱིས་བསྐལ་པ་བྱེ་བར་ནི། །སྤྱོད་མཆོག་ཁྱད་འཕགས་
མེད་མངོན་བསྒྲུབས་ནས་ནི། །སེམས་ཅན་སྡུག་བསྔལ་བ་ལ་བདེ་ལམ་བསྟན། །འཁོར་བ་བསྒྲལ་ནས་མྱ་ངན་འདས་ལ་བཀོད། །འཕྲུལ་དགའི་ལྷ་རྣམས་དེ་སྐད་ཐོས་ནས་ནི། །ཐམས་ཅད་དགའ་ནས་ཤིན་དུ་དང་བ་སྐྱེས། །ཁྱད་འཕགས་

79-1-268a

སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །གཞན་འཕྲུལ་དབང་བྱེད་ལྷས་ནི་དེ་ཐོས་ནས། །ཐམས་ཅད་དགའ་ནས་ཤིན་དུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །
འདྲེན་པ་བྱུང་ནས་འཇིག་རྟེན་ཕན་མཛད་ཟེར། །དེ་བཞིན་གཤེགས་པ་སྐྱེ་ཤི་འདས་པས་ན། །བདུད་དང་མུ་སྟེགས་མང་པོ་ཕམ་པར་མཛད། །བླ་མེད་བྱང་ཆུབ་དག་ནི་ཡོངས་རྫོགས་ནས། །སྐྱེ་དགུ་དྲངས་ནས་ཕ་རོལ་འཇོག་ཅེས་ཟེར། །ཚངས་རིས་
ལྷ་རྣམས་དེ་སྐད་ཐོས་ནས་ཀྱང་། །ཐམས་ཅད་དགའ་ནས་ཤིན་དུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །དེ་བཞིན་གཅིག་ནས་གཅིག་ཏུ་སྒྲ་ཐོས་པས། །
ཚངས་པའི་འཁོར་རྣམས་དགའ་ནས་འདི་སྐད་དུ། །འདྲེན་པ་བྱུང་བས་འཇིག་རྟེན་ཕན་པ་མཛད། །བདུད་དཔུང་འཇིགས་སྐྲག་མྱ་ངན་བྱེད་ཅེས་ཟེར། །སྲིད་པའི་རྩེ་མོའི་ལྷ་ཡི་བར་དུ་ཡང་། །སངས་རྒྱས་བྱུང་ནས་འཇིག་རྟེན་ཕན་མཛད་ཐོས། །
དེ་བཞིན་སྒྲ་ནི་ཀུན་དུ་གྲགས་པས་ན། །ལྷ་མ་ཡིན་དག་འགྲིབས་ཤིང་ལྷ་རྣམས་འཕེལ། །བདུད་ཀྱི་ཁང་པ་དག་ནི་ཡོངས་སྟོངས་ཤིང་། །ལྷ་རྣམས་འཁོར་ནི་རབ་ཏུ་རྒྱས་པར་གྱུར། །མི་འཇིགས་སྟོབས་ཀྱིས་ལོག་པ་རབ་བཏུལ་ནས། །
བྱང་ཆུབ་ཆེན་པོ་མཆོག་ནི་མྱུར་དུ་བརྙེས། །དེ་བཞིན་སྐད་ཅིག་ཡུད་ཙམ་ལྷ་རྣམས་ཀྱིས། །བཅོམ་ལྡན་བྱུང་ནས་ཕན་མཛད་ཐོས་གྱུར་ནས། །འཇིག་རྟེན་འདྲེན་པར་མཛད་པ་ཤིན་དུ་ལེགས། །རྣམ་དག་མིག་ནི་སེམས་ཅན་སྦྱིན་ཞེས་
ཟེར། །བཅོམ་ལྡན་གྲོང་ཁྱེར་གཤེགས་པའི་ཚེ། །འདོད་པས་ཡོངས་སུ་གདུངས་པ་རྣམས། །མི་གཙང་བསྒོམ་པ་བཤད་ཐོས་པས། །འདོད་ཆགས་ཞི་སྟེ་མ་ལུས་སྤངས། །བཅོམ་ལྡན་གྲོང་ཁྱེར་གཤེགས་པའི་ཚེ། །ཞེ་སྡང་དག་གིས་གདུངས་
བ་རྣམས། །བྱམས་པ་བསྟན་པའི་ཆོས་ཐོས་པས། །ཞེ་སྡང་ཞི་སྟེ་མ་ལུས་སྤངས། །བཅོམ་ལྡན་གྲོང་ཁྱེར་གཤེགས་པའི་ཚེ། །གཏི་མུག་དག་གི་གདུངས་པ་རྣམས། །ཤེས་རབ་ཆོས་ནི་བསྟན་ཐོས་པས། །གཏི་མུག་ཞི་སྟེ་མ་ལུས་སྤངས། །

79-1-268b

བཅོམ་ལྡན་གྲོང་ཁྱེར་གཤེགས་པའི་ཚེ། །ང་རྒྱལ་དག་གིས་གདུངས་པ་རྣམས། །ང་རྒྱལ་སྤངས་པའི་ཆོས་ཐོས་པས། །ང་རྒྱལ་ཞི་སྟེ་མ་ལུས་སྤངས། །བཅོམ་ལྡན་གྲོང་ཁྱེར་གཤེགས་པའི་ཚེ། །ཕྲག་དོག་དག་གིས་གདུངས་པ་རྣམས། །ཕྲག་
དོག་སྤངས་པའི་ཆོས་ཐོས་པས། །ཕྲག་དོག་ཞི་སྟེ་མ་ལུས་སྤངས། །བཅོམ་ལྡན་གྲོང་ཁྱེར་གཤེགས་པའི་ཚེ། །ཁོང་ཁྲོ་དག་གིས་གདུངས་པ་རྣམས། །ཁོང་ཁྲོ་སྤངས་པའི་ཆོས་ཐོས་པས། །ཁོང་ཁྲོ་ཞི་སྟེ་མ་ལུས་སྤངས། །བཅོམ་ལྡན་གྲོང་
ཁྱེར་གཤེགས་པའི་ཚེ། །སེར་སྣ་དག་གིས་གདུངས་པ་རྣམས། །སེར་སྣ་སྤངས་པའི་ཆོས་ཐོས་པས། །སེར་སྣ་ཞི་སྟེ་མ་ལུས་སྤངས། །གང་ཞིག་དུལ་བའི་སྤྱོད་གྲུབ་པ། །དཔག་མེད་ཆོས་ནི་འདི་ཐོས་པས། །མང་དུ་ཐོས་པའི་
མཚོར་ཞུགས་ནས། །ཀུན་འཛིན་སྒོ་ནི་སྒྲུབ་པར་བྱེད། །གཞན་ཡང་མཁའ་ལས་སྒྲ་ཐོས་པས། །མེ་ཏོག་དག་གིས་སངས་རྒྱས་མཆོད། །ཡོན་ཏན་ཁྱད་པར་འཕགས་སྒྲུབ་ཅིང་། །སྙིང་རྗེ་ཆེན་པོའི་རྫུ་འཕྲུལ་སྟོན། །གཞན་ཡང་
མཁའ་ལས་སྒྲ་ཐོས་པས། །བཅོམ་ལྡན་སྐུ་དང་སྐྱེ་གནས་དང་། །གདུད་རྒྱུད་དང་ནི་གསུང་སྒྲ་རྣམས། །ཁྱད་པར་འཕགས་པའི་བསྔགས་པ་བརྗོད། །སེམས་ཅན་འགྲོ་བ་ཇི་ལྟ་བར། །རྫུ་འཕྲུལ་དག་ཀྱང་ཅི་རིགས་བཤད། །མིག་དང་རྣ་བ་
སྣ་ལྕེ་ལུས། །གཟུགས་དང་སྒྲ་ལ་སོགས་པ་དང་། །བསྐུམ་པ་དང་ནི་བཀྱང་བ་བདག །སྟོན་པར་མཛད་པ་ཁྱད་པར་འཕགས། །བཅོམ་ལྡན་འཇིག་རྟེན་འདས་པས་ན། །འཇིག་རྟེན་སྒྲོན་མ་རབ་མཛད་ཅིང་། །གཟུགས་ནི་མང་པོ་སྟོན་པ་ཡང་། །
ཐམས་ཅད་སངས་རྒྱས་རྫུ་འཕྲུལ་ཡིན། །སྣོད་དང་སྣོད་མིན་དེ་རྗེས་སུ། །མི་མཐུན་ཆོས་ནི་སྟོན་མཛད་པས། །སེམས་ཅན་ཚེ་རབས་ཚད་མེད་ནས། །སངས་རྒྱས་མཆོད་པ་མ་བྱས་ཤིང་། །དམུ་རྒོད་གདུལ་བར་དཀའ་བ་ལ། །སེམས་ཅན་
དམྱལ་བར་བཤད་པས་མཛད། །གང་ཞིག་ལས་ལམ་རྨོངས་གྱུར་ཅིང་། །ལྟ་ལ་བརྟེན་ནས་སྤྲོས་དགའ་བ། བཅོམ་ལྡན་དེ་དག་ལྟ་བ་དང་། སྤྲོས་པ་ཞི་བའི་སྒྲ་ཐོས་མཛད། །གཞན་ཡང་མཁའ་ལས་ངོ་བོ་ཉིད། །ངེས་པ་ཉིད་དུ་སྟོང་བ་དང་། །འགྲོ་འོང་མེད་

79-1-269a

ཅིང་མཚན་མེད་དང་། །ཅི་ཡང་མེད་པའི་སྒྲ་ཡང་ཐོས། །གཞན་ཡང་སེམས་ཅན་བརྒྱ་སྟོང་དག །མཁའ་ལས་ཤ་དང་ཤེས་རབ་སྤྱན། །དེ་བཞིན་ཆོས་ཀྱི་སྤྱན་པར་དུ། །ཡང་དག་སྟོན་པའི་སྒྲ་ཡང་ཐོས། །བཅོམ་ལྡན་རྫུ་འཕྲུལ་སྟོབས་
ཀྱིས་ནི། །ཚུལ་ཁྲིམས་ཏིང་འཛིན་ཤེས་རབ་སྒྲ། །རྣམ་གྲོལ་རྣམ་གྲོལ་མཐོང་བའི་སྒྲ། །སྟོན་པ་དག་ཀྱང་ཐོས་པར་གྱུར། །སེམས་ཅན་དག་ནི་ཇི་སྙེད་ལ། །ཇི་བཞིན་རྫུ་འཕྲུལ་རབ་བསྟན་ནས། །ཇི་ལྟར་རྗེས་འཐུན་སྒྲ་སྐད་ཀྱིས། །ཡང་དག་ཆོས་
ནི་བསྟན་པར་མཛད། །སེམས་ཅན་ལ་ལ་གང་ཞིག་ནི། །སྦྱིན་དང་ཚུལ་ཁྲིམས་བཟོད་བསྒྲུབ་མོས། །རྫུ་འཕྲུལ་མོས་པ་ཇི་ལྟ་བཞིན། །སྦྱིན་དང་ཚུལ་ཁྲིམས་བཟོད་སྒྲ་སྟོན། །བཅོམ་ལྡན་རྫུ་འཕྲུལ་སྟོབས་ཀྱིས་ནི། །སེམས་ཅན་དབང་
པོ་ཇི་ལྟ་བཞིན། །རྒྱ་ཆེར་ཡང་དག་འབྱེད་མཛད་པས། །ལེན་འཛིན་སྟོན་ལ་དགོད་པར་མཛད། །བཅོམ་ལྡན་རྫུ་འཕྲུལ་སྟོབས་ཀྱིས་ནི། །ཕུང་པོ་ཁམས་དང་སྐྱེ་མཆེད་ཀྱི། །བཅིངས་དང་གྲོལ་དང་ཉེ་རིང་དང་། །ས་ཡི་གནས་སྐབས་བྱེ་བྲག་གི། །མཚན་
ཉིད་སྟོན་པ་ཐོས་པར་གྱུར། །གཞན་ཡང་ས་དང་ཡེ་ཤེས་ཀྱི། །འོད་ཟེར་ཚད་མེད་སྟོན་པ་དང་། །ཉོན་མོངས་བག་ཆགས་སྤངས་པ་དང་། །སྤངས་མིན་སྟོན་པ་ཐོས་པར་གྱུར། །བཅོམ་ལྡན་རྫུ་འཕྲུལ་སྟོབས་ཀྱིས་ནི། །ལྷ་དང་མི་ཡི་ངོ་བོ་ཉིད། །ལས་དང་
འབྲས་བུ་མི་མཚུངས་མི། །སྐྱེ་ལེན་ཐ་དད་ཐོས་པར་གྱུར། །རེས་འགའ་བུད་མེད་མདུན་དག་ཏུ། །བུད་མེད་བརྒྱན་པའི་ལུས་སྤྲུལ་ནས། །མཁའ་ལས་སྐྱོ་སྟོན་སྒྲ་བསྒྲགས་པས། །གང་ཐོས་འདོད་ཆགས་སེལ་བར་མཛད། །ཤཱ་རིའི་བུ་ནི་ཇི་ལྟ་བཞིན། །ཤིན་ཏུ་དང་
བ་སྐྱེས་གྱུར་པ། །ཐུགས་རྗེས་མོས་པ་ཇི་བཞིན་དུ། །བླ་མེད་ཆོས་ནི་སྟོན་པར་མཛད། །མཽད་གལ་བུ་དང་འོད་སྲུང་དང་། །ཀ་པི་ན་དང་ཀུན་དགའ་དང་། །འོད་སྲུང་ཆེན་པོ་དག་དང་ནི། །ཀུན་ཤེས་ཀཽདིནྱ་ལ་སོགས། །དེ་དག་མོས་པ་ཇི་བཞིན་དུ། །ཉན་ཐོས་ཆོས་སྟོན་ཐོས་
པར་གྱུར། །ལྷ་རྣམས་དང་ནི་ལྷ་མ་ཡིན། །གནོད་སྦྱིན་དག་ནི་མང་པོ་དང་། །བེ་རོ་ཀ་ནི་འཁོར་བཅས་དང་། །གྲུལ་བུམ་དག་ནི་ཚད་མེད་རྣམས། །བཅོམ་ལྡན་རྫུ་འཕྲུལ་སྟོབས་ཀྱིས་ནི། །གཟུངས་སྔགས་སྒྲ་ནི་ཐོས་པར་གྱུར། །ཨི་དི་སི། བི་དི་སི། ཨིར་སུ་

79-1-269b

ཨི་ར། ཨཽ་ན་སི། །མ་ནི་སི། ཨུ་ཁྱི། ཨ་ནོ་ཁྱི། ཨཱ་ཁི་ཙ་ལ་མང་ནཾ་ཡེ། ང་ར་ནི་ཤྠ་ནི་མི། ཏ་ཀ་ནི། ཨེ་མི་མན་ཏྲ། ནི་ཧ་ར། ཨ་བུ་རེ། བྷཱུད་དྷེ། ནི་རེ། ཨ་ཁི་ཚ་ར། བི་ཡ་ཀི་རི་ཡ་ཏེ། ཨ་ཁི་ཚར་བར་མཱི་ཏེ། ཀ་ལཱ་བ་ཧི་ནི། སརྦོ་བིད་ཤི་ནིར་དྷེ་པཽན། པ་ར་ཤས་ད་ཏེ། ཤ་སཱ་ཏ། བྷ་ར་ཤ་སད་ཏ། 
ཏ་ར་སད་ཏ། བྷཱུ་མི། ཨཱ་མ་བྷ་ར། ལི་ལ་བྷན། ཤི་ཙི་ཙིད་ཏ། བི་བ་མ་ཏི། ཙིད་ཏ་ཨ་ནན་ཏ། ཨོ་བེ་ར་ཧ་བ་མཱི་ཏ་བྷཱུ་མི། ན་ནམ་ཀཱ་ནི། ཨ་ཀ་ནི་བི་བྷི་མིད་ཏ། ཤ་རི་བེ་ཤྠ། ཨ་མ་ལ་ནི་མ་ལཱ། བཱུ་ལི་ཏེ་ན་ར་ཤི་ཙ། ཧ་ཧ་རི། མ་མ་ལཱི། བྷ་ར་ནི་ཏིཤྠ། ཙཀྵུ་ནི་ཧ་ར། ཨཱུ་དྷ་རི་ཏ་པ་ཙི། ཨཱན་
ཏ་རི། ཀེ་ཏུ་སུ་ཀེ་ཏུ་སུ་པ་རི་ནི། ཀ་རི་ནི། སུ་སུ་མ་ནི་ཡཻ། ཀ་ཀ་རི། ཀ་ཁཱ་རི། ཨུ་པ་ལ་མཱུ་རི། ཏིཤྠ་ད་རི་ན། ན་ག་ནིར་ཧ་རེ། པར་བྷད་ཏེ། ཨཱ་ཏེ་པ་ར་ཡ་ཏེ། ཨཱན་ཏ་ར་བྷན་དྷེ། ཨཱན་ཏ་ར་ཏ་བྷ་ཏི་ཤི་ཙ། ཧ་སཱི་རི་མ་ཁ་ལཱི། ཨཱི་ནི་སམ་བྷ་རེ། ཏིཤྠ་སིཏྟ་ར་ནི། 
ཀུ་བྷུ་ལོ་ཙ་ཏེ། གཞན་ཡང་རྒྱལ་པོ་རྣམ་ཐོས་བུ། །ཡུལ་འཁོར་སྲུང་ནི་ལ་སོགས་པས། །ཁྱད་འཕགས་སྒྲ་ནི་གྲངས་མེད་ཀྱིས། །བདེན་པའི་སྔགས་ཚིགས་རབ་ཏུ་སྨྲས། །ཚད་མེད་སྒྲ་ནི་དེ་དག་ཀྱང་། །བདེ་གཤེགས་རྫུ་འཕྲུལ་དབང་གིས་བྱུང་། །
རྫུ་འཕྲུལ་དག་ནི་ཚད་མེད་པས། །བསྟན་པ་དག་ཀྱང་ཚད་མེད་པས། །རེས་འགའ་སངས་རྒྱས་མེད་ཞིང་དུ། །རྫུ་འཕྲུལ་རོལ་པའི་སྟོབས་དག་གིས། །འཁོར་བསྐོར་སངས་རྒྱས་སྐུ་སྟོན་པ། །ད་ལྟར་མཐོང་བ་ཇི་བཞིན་ནོ། །བསམ་གྱིས་མི་ཁྱབ་
ཞིང་དག་ཏུ། །སྤྲུལ་པ་ཚད་མེད་སྟོན་མཛད་པས། །བལྟམ་ནས་གོམ་པ་བདུན་གཤེགས་དང་། །རྒྱལ་སྲིད་སྤངས་ནས་རབ་བྱུང་དང་། །བྱང་ཆུབ་སྙིང་པོར་སངས་རྒྱས་ནས། །བརྙེས་པའི་ཆོས་དག་རབ་དགོངས་ཏེ། །ཆོས་ཀྱི་འཁོར་ལོ་བསྐོར་མཛད་དང་། །
མྱ་ངན་འདས་པ་སྟོན་པར་མཛད། །རྫུ་འཕྲུལ་གྱི་ནི་སྟོབས་དག་གིས། །སྣ་ཚོགས་ཆོས་ནི་སྟོན་མཛད་པས། །སེམས་ཅན་དག་ནི་ཚད་མེད་རྣམས། །ཁྱད་འཕགས་ཡེ་ཤེས་གྲུབ་པར་མཛད། །དེ་ཚེ་ཐུགས་རྗེ་ཆེན་པོ་ཡིན། །ཚངས་པའི་འཁོར་གྱིས་
ཡོངས་བསྐོར་ནས། །བྱམས་ཆོས་བསྒོམ་པ་བཤད་བསྟན་པས། །བྱམས་པའི་སེམས་ནི་འཕེལ་བར་མཛད། །དེ་ཚེ་ཐུགས་རྗེ་ཆེན་པོ་ཡིས། །ལྷ་རྣམས་ཀྱིས་ནི་ཡོངས་བསྐོར་ནས། །བསྡུ་བའི་དངོས་བཞི་བསྟན་མཛད་པས། །བསྡུ་བའི་

79-1-270a

སྤྱོད་བཞི་འཕེལ་བར་མཛད། །དེ་ཚེ་ཐུགས་རྗེ་ཆེན་པོ་ཡིས། །ཀླུ་རྣམས་ཀྱིས་ནི་ཡོངས་བསྐོར་ནས། །ཞེ་སྡང་ཉེས་དམིགས་བཤད་བསྟན་པས། །ཞེ་སྡང་སེམས་ནི་སྤངས་པར་གྱུར། །དེ་ཚེ་ཐུགས་རྗེ་ཆེན་པོ་ཡིས། །གནོད་
སྦྱིན་རྣམས་ཀྱིས་ཡོངས་བསྐོར་ནས། །རྣམ་འཚེ་ཉེས་དམིགས་བཤད་བསྟན་པས། །རྣམ་འཚེ་སེམས་ནི་སྤངས་བར་གྱུར། །དེ་ཚེ་ཐུགས་རྗེ་ཆེན་པོ་ཡིས། །ལྷ་མ་ཡིན་གྱིས་ཡོངས་བསྐོར་ནས། །འཐབ་པའི་ཉེས་དམིགས་བཤད་
བསྟན་ཏེ། བཟོད་པ་བསྒོམས་པའི་བསྔགས་པ་བརྗོད། །དེ་ཚེ་ཐུགས་རྗེ་ཆེན་པོ་ཡིས། །ནམ་མཁའ་ལྡིང་གིས་ཡོངས་བསྐོར་ནས། །འགལ་བྱས་ཉེས་དམིགས་བཤད་བསྟན་ཏེ། །འདུམ་པའི་སེམས་ཀྱིས་བསྔགས་པ་མཛད། །
དེ་ཚེ་ཐུགས་རྗེ་ཆེན་པོ་ཡིས། །དྲི་ཟའི་འཁོར་གྱིས་ཡོངས་བསྐོར་ནས། །དགའ་བའི་ཚིག་ནི་དཔག་མེད་ཀྱིས། དེ་བཞིན་གཤེགས་པའི་བསྔགས་བརྗོད་བསྟན། །དེ་ཚེ་ཐུགས་རྗེ་ཆེན་པོ་ཡིས། ལྟོ་འཕྱེ་འཁོར་གྱིས་ཡོངས་བསྐོར་ནས། །
མུ་སྟེགས་ཆོས་ལ་སྨོད་མཛད་ཅིང་། །བཅོམ་ལྡན་གསུང་རབ་བསྔགས་བརྗོད་བསྟན། །དེ་ཚེ་ཐུགས་རྗེ་ཆེན་པོ་ཡིས། །འདྲེ་སྲིན་འཁོར་གྱིས་ཡོངས་བསྐོར་ནས། །དེ་བཞིན་གཤེགས་པའི་ཡོན་ཏན་མཆོག །རྒྱ་ཆེར་བསྔགས་པ་བསྟན་པར་
མཛད། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མི་བཟད་མཐའ་བསྟན་ཐོས་པས་ན། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོ་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་སྐྱེ་
མཐའ་ནི་བསྟན་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་གི་མཐའ་ནི་བསྟན་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་
འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་འཇུག་བསྟན་པ་ཐོས་གྱུར་ནས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་དབེན་བསྟན་པ་ཐོས་པས་ན། །

79-1-270b

མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ལ་སྐྱེ་མེད་བསྟན་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་
ཅན་དག་ནི་བརྒྱ་སྟོང་སྙེད། །མིག་མེད་བསྟན་པ་ཐོས་པས་ན། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ནི་ཉེར་ཞི་བསྟན་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་
ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ལ་བདག་མེད་བསྟན་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ལ་གང་ཟག་མེད་ཐོས་པས། །
མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ལ་སེམས་ཅན་མེད་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་
ནི་བརྒྱ་སྟོང་སྙེད། །མིག་ལ་སྲོག་མེད་ཐོས་པས་ན། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ལ་གསོ་བ་མེད་ཐོས་པས། །མཐར་ཕྱིན་དོན་ནི་རྟོགས་པར་གྱུར། །
ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་རྣམས་ལ་རྒྱ་ཆེར་ནི། །འཇིག་རྟེན་ཞེན་པ་རབ་སྨད་དེ། །ཞེན་པ་མི་སྐྱེད་ཉིད་དུ་མཛད། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་རྣམས་ལ་རྒྱ་ཆེར་ནི། །འཇིག་
རྟེན་རྙེད་པ་རབ་སྨད་དེ། །འདུས་མ་བྱས་ཀྱི་བསྔགས་བརྗོད་མཛད། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་རྣམས་ལ་རྒྱ་ཆེར་ནི། །ཟག་བཅས་ཤེས་པ་རབ་སྨད་དེ། །ཟག་མེད་ཤེས་རབ་བསྔགས་པར་མཛད། །
ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་རྣམས་ལ་རྒྱ་ཆེར་ནི། །འཇིག་རྟེན་བསམ་གཏན་རབ་སྨད་དེ། །འཇིག་རྟེན་འདས་པའི་ཏིང་འཛིན་བསྔགས། །ཐུགས་རྗེ་ཆེན་པོ་འཕྲུལ་བསྟན་པས། སེམས་ཅན་རྣམས་ལ་བརྒྱ་ཆེར་ནི། །ཟག་

79-1-271a

བཅས་ཚུལ་ཁྲིམས་རབ་སྨད་དེ། །ཟག་མེད་བསླབ་གནས་བསྔགས་པར་མཛད། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་རྣམས་ལ་རྒྱ་ཆེར་ནི། །སེམས་རྒྱ་ཆུང་ངུའི་སྐྱོན་བརྗོད་དེ། །
སེམས་རྒྱ་ཆེན་པོའི་ཡོན་ཏན་བསྔགས། །ཐུགས་རྗེ་ཆེན་པོས་འཕྲུལ་བསྟན་ནས། །ལུས་ཀྱི་ཚུལ་ཁྲིམས་སེམས་ཤེས་རབ། །ཟག་མེད་རྟེན་པ་མེད་པ་ཡི། །བསྔགས་པ་དག་ནི་བརྗོད་པར་མཛད། །ཐུགས་རྗེ་ཆེན་པོས་
འཕྲུལ་བསྟན་ནས། །སྡུག་བསྔལ་འགོག་པའི་ལམ་བསྔགས་ཤིང་། །སྤྲོས་ལ་དགའ་ཞིང་ཞེན་པ་དག །སངས་རྒྱས་སྨད་པར་རབ་ཏུ་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་
རྒྱ་ཆེར་ནི། །མི་བཟད་སྐྱོན་ནི་རབ་འབྱེད་ཅིང་། །རབ་ཞི་མཚན་ཉིད་བསྟན་པར་མཛད། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གིས་བར་དུ་ཡང་། །ཐམས་ཅད་དེ་བཞིན་སྦྱར་བར་བྱ། །
ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །དར་ལ་བབ་ཅིང་གཞོན་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་
ལ་རྒྱ་ཆེར་ནི། །ཆོ་རིགས་དག་ནི་སྙེམས་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །ལོངས་སྤྱོད་བག་མེད་གྱུར་པ་ལ། །ཉེས་
དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །རང་དབང་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་
འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །གཟུགས་ཀྱིས་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་

79-1-271b

ཆེར་ནི། །བུད་མེད་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །གོས་ཀྱིས་བག་མེད་གྱུར་པ་ལ། །ཉེས་དམིགས་
དཔག་མེད་ཡོད་པར་བསྟན། །ཐུག་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །ཆང་གིས་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུག་རྗེ་ཆེན་པོ་འཕྲུལ་བསྟན་
ནས། །སེམས་ཅན་རྣམས་ལ་རྒྱ་ཆེར་ནི། །རྒྱལ་པོ་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུག་རྗེ་ཆེན་པོ་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །ཚུལ་ཁྲིམས་སྙེམས་
པར་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུག་རྗེ་ཆེན་པོ་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །ཤེས་རབ་སྙེམས་པར་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །
དེ་བཞིན་རྟོགས་དང་རྫུ་འཕྲུལ་དང་། །བསམ་གཏན་མཁས་པའི་ང་རྒྱལ་དང་། །ནོར་དང་བཤད་དང་རིགས་དང་འཁོར། །རོལ་མོ་གླུ་དང་ལྕེ་རྒྱང་དང་། །གྲགས་པ་ཕུན་ཚོགས་བསྔགས་པ་དང་། །བཀུར་སྟི་དང་ནི་རྙེད་པ་དང་། །
མཛེས་དང་གཡོ་སྒྱུ་ང་རྒྱལ་དང་། །ངོ་ཚ་མེད་དང་ཁྲེལ་མེད་དང་། །ཁེངས་དང་ཕུན་ཚོགས་ང་རྒྱལ་དང་། །བག་མེད་འདོད་ཆགས་དེ་བཞིན་ནོ། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་གང་ཞིག་སེམས་
དང་ཡིད། །དམན་པར་གྱུར་པ་དེ་དག་ལ། །ཁྱད་པར་འཕགས་པའི་འདུ་ཤེས་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་གང་ཞིག་རབ་ཞུམ་ཞིང་། །རྩོལ་བར་མི་བྱེད་དེ་དག་ལ། །
བརྩོན་འགྲུལ་སྟོབས་ནི་སྟོན་པར་མཛད། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་གང་ཞིག་ནོར་རྣམས་ལ། །ཆགས་པར་གྱུར་པ་དེ་དག་ལ། །ཆོག་ཤེས་ཆོས་ནི་སྟོན་པར་མཛད། །གཞན་ཡང་

79-1-272a

སྤོས་ཀྱི་དྲི་གཙང་ཁང་། །མེ་ཏོག་དག་ནི་གཞལ་མེད་ཁང་། །ཁང་པ་བརྩེགས་མ་མཆོག་སྤྲུལ་ནས། །སྤྲུལ་པའི་སངས་རྒྱས་བཞུགས་པར་བསྟན། །གཞན་ཡང་ལྷ་ཡི་བུ་མོ་རྣམས། །མེ་ཏོག་ཙམ་པ་ཁང་པ་
ན། །གནས་པའི་ལུས་ཕྱེད་མངོན་སྤྲུལ་ནས། །མེ་ཏོག་ཕྲེང་ཐོགས་མཆོད་བྱེད་བསྟན། །གཞན་ཡང་ལྷ་མིན་བུ་མོ་དག །མེ་ཏོག་མ་ལི་ཁང་པ་ན། །གནས་པ་ལུས་ཕྱེད་བསྟན་སྤྲུལ་ནས། །མེ་ཏོག་ཕྲེང་ཐོགས་
མཆོད་བྱེད་བསྟན། །གཞན་ཡང་ལྷ་ཡི་བུ་རྣམས་དག །པད་མ་སྔོན་པོའི་ཁང་པ་ན། །གནས་པ་ལུས་ཕྱེད་བསྟན་སྤྲུལ་ནས། །སངས་རྒྱས་ཡོན་ཏན་བསྔགས་པ་བསྟན། །གཞན་ཡང་ཚངས་པ་རྣམས་ཀྱི་ལྷ། །
གསེར་གྱི་གཞལ་མེད་ཁང་པ་ན། །གནས་པ་ལུས་ཀུན་བསྟན་སྤྲུལ་ནས། །སྒྲ་སྙན་སངས་རྒྱས་བསྔགས་པ་བསྟན། །གཞན་ཡང་ལྷ་ཡི་བུ་མོ་དག །སྣ་ཚོགས་རྒྱན་གྱིས་ལུས་བརྒྱན་ཅིང་། །རྒྱན་
ནི་ཕན་ཚུན་རེག་པ་ལས། །སྒྲ་སྙན་དག་ནི་རབ་བྱུང་ནས། །འདུས་བྱས་རྣམས་ཀྱི་ཆོས་དག་ནི། །འགྱུར་ཞིང་མི་བརྟན་ཡིན་ན་ཡང་། །བྱིས་པ་མི་བདེན་རྟོག་པ་ཡིས། །ཡང་དག་ཇི་བཞིན་མི་ཤེས་ཟེར། །རྒྱན་གྱི་སྒྲ་
ནི་དེ་དག་ཀྱང་། །ལུས་དང་སེམས་ལས་བྱུང་མ་ཡིན། །འགྲོ་བ་མེད་ཅིང་འོང་བ་མེད། །ཕྱོགས་ཀྱང་ཡོད་པ་མ་ཡིན་ཏེ། །གཟུགས་དང་སེམས་ཀྱི་བར་དུ་ཡང་། །ཐམས་ཅད་དེ་བཞིན་སྦྱར་བར་བྱ། །བྱིས་པ་
རྣམས་ནི་མི་ཤེས་པས། །འདི་ལ་ཐེ་ཚོམ་སྐྱེ་བར་འགྱུར། །རྒྱན་གྱི་རྣམས་པ་དེ་དག་ལས། །སྒྲ་སྙན་བྱུང་བ་དེ་ཡིས་ནི། །སངས་རྒྱས་ཞིང་ཀུན་གྲགས་པས་ན། །སེམས་ཅན་ཚད་མེད་གྲོལ་བར་གྱུར། །དེ་ལྟ་
བས་ན་ཁྱོད་རྣམས་ཀྱིས། །འདྲེན་པའི་རང་བྱུང་ཡེ་ཤེས་དང་། །ཡོན་ཏན་དཔག་མེད་སྐུ་དག་ནི། །སྲེད་པའི་སྤྲོས་ལས་འདས་པ་དང་། །རབ་དབེན་སྐྱོན་ནི་མེད་པ་དང་། །ལྟ་བྲལ་སེམས་ནི་རབ་སྦྱངས་དང་། །

79-1-272b

མཚན་དང་དཔེ་བྱེད་བརྒྱན་པ་དང་། །སྐུ་དང་ཐུགས་ནི་དག་པར་ལྟོས། །ཁྱེད་ཀྱིས་བཅོམ་ལྡན་གྲོང་གཤེགས་ཚེ། །གོམ་པ་དག་ནི་སེང་གེ་འདྲ། །གཤེགས་སྟབས་ངང་པ་གླང་ཆེན་འདྲ། །སེམས་ཅན་རེ་བ་བསྐོང་
བར་མཛད། །བསོད་ནམས་ཁྱད་འཕགས་ཡོངས་སུ་རྫོགས། །ཡང་དག་མཚན་གྱིས་རབ་ཏུ་བརྒྱན། །སེམས་ཅན་དག་ནི་ཐམས་ཅད་ཀུན། །ལྟ་བས་མི་ངོམས་ཉིད་དུ་ལྟོས། །ཁྱོད་ཀྱིས་རྐང་གཉིས་གཙོ་
ཡི་མཆོག །ཐུགས་རྗེ་ཆེན་པོ་ལྟ་བས་ན། །དངོས་པོ་ཆུང་ངུས་མཆོད་བྱས་ཀྱང་། །ཡོན་ཏན་ཚད་མེད་འཐོབ་མཛད་པས། །སེམས་ཅན་དག་ནི་མང་པོ་རྣམས། །བསྐལ་པ་བརྒྱ་སྟོང་མང་པོར་ནི། །མྱ་ངན་
འདས་པ་འཐོབ་པར་དུ། །རྣམས་སྨིན་ཐུག་པ་མེད་པར་ལྟོས། །ཁྱེད་ཀྱིས་རྐང་གཉིས་གཙོ་མཆོག་ནི། །ཟག་མེད་ཚུལ་ཁྲིམས་རྫོགས་པས་ན། །སེམས་ཅན་དག་ནི་མང་པོ་རྣམས། །གུས་པས་སྤྱི་བོས་
ཕྱག་བྱེད་དང་། །ལྷ་ཡི་འཁོར་ནི་མང་པོ་རྣམས། །སོ་སོའི་གཞལ་མེད་ཁང་སྤངས་ནས། རྩེ་བ་དག་ལ་ཆགས་མེད་པར། །འདྲེན་པ་ལ་ནི་སྟེན་བྱེད་ལྟོས། །ཁྱེད་གྱིས་བདུད་དང་བདུད་ཀྱི་འཁོར། །
བཅོམ་ལྡན་འདས་ལ་དད་སྐྱེས་ནས། །གསེར་གྱི་རླུང་ཡབ་དག་ཐོགས་ཏེ། །གཡས་གཡོན་དུ་ནི་འཁོད་པ་དང་། །བདུད་ཀྱི་བུ་ནི་ལྔ་བརྒྱ་ཡིས། །ལྷ་ཡི་མེ་ཏོག་ཡིད་འོང་བས། །དེ་བཞིན་གཤེགས་ལ་
མངོན་གཏོར་ནས། །བླ་མེད་ཡེ་ཤེས་ཚོལ་ལ་ལྟོས། །འདས་པའི་སངས་རྒྱས་རྣམས་ལ་ནི། །བསྔགས་པ་བརྗོད་ཅིང་མཆོད་པས་ན། །དེང་ནི་བཅོམ་ལྡན་ཕྲད་གྱུར་ནས། །སོ་སོར་དགའ་བར་
གྱུར་པ་ཡིན། །སྤོབས་པ་དག་ནི་ཚད་མེད་ཀྱིས། །དེ་བཞིན་གཤེགས་པའི་བསྔགས་པ་བརྗོད། །དེ་ཡི་ཚེ་ན་བདུད་ཀྱི་བུ། །སྲེད་པ་སྤངས་པ་ཞེས་བྱ་བ། །ཐོག་མར་བཅོམ་ལྡན་བསྔགས་བརྗོད་ནས། །

79-1-273a

མིག་ཟད་མཐའ་ནི་ཤེས་པར་གྱུར། །མིག་གི་སྐྱེ་མཐའ་ཤེས་པ་ནས། །རབ་ཞི་མཚན་ཉིད་བར་དུ་རྟོགས། །གཞན་ཡང་མིག་ཟད་ལ་སོགས་པའི། །མིག་དོན་དག་ནི་དཔག་མེད་རྟོགས། །དེས་ན་ཚིག་མཁས་དག་
གིས་ནི། །སེམས་ཅན་རྣམས་ལ་ཡང་དག་བསྟན། །མིང་དང་དོན་རྣམས་ལ་ཡང་ནི། །ཞེན་དང་ཐེ་ཚོམ་མེད་པས་ན། །འགྲོ་འོང་མེད་པར་རབ་རྟོགས་ཤིང་། །བླང་དོར་མེད་པ་ཉིད་དུ་གྱུར། །རང་བཞིན་དག་ནི་སྟོང་དབེན་པས། །
ཡི་གེ་རྣམས་ནི་སྤངས་པ་དང་། །ལེན་དང་འཛིན་དང་ཀློག་པ་དང་། །ཁ་ཏོན་འདོན་ཅིང་བསྒྲུབ་མེད་རྟོགས། །འདས་པའི་དེ་བཞིན་གཤེགས་རྣམས་ཀྱིས། །སྔོན་ཡང་རབ་ཏུ་ཕྱེ་སྟེ་བསྟན། །བཏགས་པའི་མིང་ཙམ་
ཡིན་པས་ན། །ཡང་དག་བརྗོད་དུ་ཅི་ཡང་མེད། །རང་བཞིན་སྟོང་པ་དེ་དག་ནི། །ཕུང་པོ་ཁམས་དང་སྐྱེ་མཆེད་འདས། །བརྫུན་པ་མེད་ཅིང་བདེན་པའང་མེད། །གནས་དང་གནས་པ་ཡོད་པ་མིན། །ཚིགས་གིས་སྨྲ་
བའི་ལམ་ཆད་ཅི། །སེམས་ཀྱི་སྤྱོད་པའང་རབ་ཏུ་ཞི། །སྐྱེ་བོའི་མཚན་མ་ཞེན་པའི་ཕྱིར། །བཅོམ་ལྡན་གྲོང་ཁྱེར་གཤེགས་པར་མཐོང་། །བཅོམ་ལྡན་མཚན་མ་ཡོངས་སྤངས་ཀྱང་། །བྱིས་པ་ཡང་དག་མ་
ཡིན་རྟོག །བཅོམ་ལྡན་གྲོང་ཁྱེར་གཤེགས་པའི་ཚེ། །གང་ཞིག་དགའ་བ་སྐྱེ་འགྱུར་བ། །དེ་ཡི་མཚན་མར་རྟོག་པ་སྟེ། །མྱ་ངན་གདུང་དང་བཅས་པར་འགྱུར། །གང་གིས་མཚན་མའི་རྟོག་སྤངས་པ། །
གྲོང་ཁྱེར་གཤེགས་པ་མཐོང་མི་འགྱུར། །གཤེགས་ཤིང་བསྐྱོད་པའི་མཚན་མ་ལ། །རྣམ་རྟོག་མེད་པ་ཤེས་རབ་འཐོབ། །གང་གིས་མཚན་མར་སངས་རྒྱས་མཐོང་། །དེས་ནི་གྲོང་ཁྱེར་གཤེགས་པ་མཐོང་། །
སྐྱེ་ཞིང་འཁོར་བའི་ཆོས་དག་ལ། །རྣམ་པར་རྟོག་པ་སྐྱེད་པར་བྱེད། །གང་གིས་སངས་རྒྱས་མཚན་མར་མཐོང་། །དགའ་བ་དག་ནི་སྐྱེ་འགྱུར་བ། །དེ་ནི་བདུད་ཀྱི་སྤྱོད་ལ་གནས། །བདུད་ཀྱི་སྤྱོད་ཡུལ་སྣང་

79-1-273b

བ་ཡིན། །གང་གིས་མཚན་མར་སངས་རྒྱས་མཐོང་། །དེ་ནི་འགྱུར་བ་མཐོང་བ་ཡིན། །དེ་ནི་མྱ་ངན་གདུངས་བཅས་པས། །མཁས་པས་སྙིང་བརྩེར་བྱ་བ་ཡིན། །ཆོས་ལ་ཐོབ་པར་གང་ལྟ་བ། །དེ་ལ་ཆོས་སྟོར་མྱ་ངན་ཡོད། །སངས་
རྒྱས་མཐོང་བ་སྐྱེས་པ་ལ། །མྱ་ངན་འདས་པའི་སྡུག་བསྔལ་ཡོད། །བསྐལ་པ་མང་པོ་གང་བསྒོམས་པས། །མཚན་མ་ཐམས་ཅད་རྟོགས་པས་ན། །གྲོང་ཁྱེར་གཤེགས་པར་མི་རྟོག་ཅིང་། །མྱ་ངན་འདའ་བའི་འདུ་
ཤེས་མེད། །སེམས་ཀྱི་མཚན་ཉིད་སྟོང་རྟོགས་པ། །སངས་རྒྱས་སྤྱོད་ལ་གནས་པས་ན། །གྲོང་ཁྱེར་གཤེགས་པར་མི་རྟོག་ཅིང་། །མྱ་ངན་འདས་པའི་འདུ་ཤེས་མེད། །གང་གིས་དེ་ལྟར་རབ་ཤེས་པ། །སངས་རྒྱས་
རྣམས་ནི་མཐོང་འགྱུར་ཞིང་། །ངོ་བོ་ཉིད་ཀྱང་སྟོང་རྟོགས་པས། །མཐར་ནི་སྐྱེ་འགག་ཅི་ཡང་མེད། །བཅོམ་ལྡན་བསྐལ་པ་དཔག་མེད་ནས། །དཀའ་བ་རྣམས་ནི་རབ་སྤྱད་ནས། །ངོ་བོ་ཉིད་ནི་སྟོང་མཁྱེན་ན། །བྱིས་པ་རྣམས་ཀྱི་
ཀྱིས་མི་རྟོགས་སོ། །བཅོམ་ལྡན་གྲོང་ཁྱེར་གཤེགས་པའི་ཚེ། །འཁོར་ནི་བརྒྱ་སྟོང་མང་གིས་བསྐོར། །མི་དང་མི་མ་ཡིན་ལ་སོགས། །དང་བའི་སེམས་ཀྱིས་མཆོད་པ་བས། །གང་གིས་སྐད་ཅིག་ཙམ་དུ་ནི། །མིག་ཟད་
མཐའ་ནི་རབ་སེམས་ཤིང་། །མཚན་མ་རྣམས་ནི་སྟོང་རྟོགས་ན། །འདི་ཡི་བསོད་ནམས་དེ་བས་འཕགས། །བགྲང་བ་དང་ནི་གྲངས་ཀྱི་ཆ། །རྒྱུ་ཙམ་དུ་ཡང་མི་བཟོད་དོ། །དེ་བཞིན་མིག་གི་སྐྱེ་མཐའ་དང་། །མིག་གི་མཐའ་
དང་འཇུག་པ་ནས། །རབ་ཏུ་ཞི་བའི་བར་དུ་ཡང་། །དེ་བཞིན་དུ་ནི་རིག་པར་བྱ། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང་། །ཐམས་ཅད་དེ་བཞིན་སྦྱར་བར་བྱ། །དེ་ནས་དེ་ཚེ་
བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །ཞབས་ནི་ས་ལ་རེག་ཙམ་གྱིས། །ས་ནི་ཀུན་ཏུ་རབ་ཏུ་གཡོས། །རི་རྣམས་གང་ཡིན་དེ་དག་ཀྱང་། །ཐམས་ཅད་བཅོམ་ལྡན་འདས་ལ་ཕྱོགས། །

79-1-274a

ལྷ་དང་མི་ནི་ཆོས་ཀྱི་ཕྱིར། །ཐམས་ཅད་འོངས་ནས་གུས་མཆོད་བྱས། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །ལྷ་ཡི་དབང་པོ་མི་ཡི་རྒྱལ། །ལྷ་མ་ཡིན་ནི་མང་པོ་དང་། །
གནོད་སྦྱིན་དག་ནི་མང་པོ་རྣམས། །རང་གི་གྲོང་ཁྱེར་སྤངས་ནས་ནི། །བཅོམ་ལྡན་སྤྱན་སྔར་འདུས་གྱུར་ཏེ། །རབ་ཏུ་དགའ་བས་མཆོད་པ་བྱས། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །
གཞན་ཡང་རྣམ་པ་ཐ་དད་པའི། །བྱ་ཡི་ཚོགས་ནི་ཚད་མེད་པ། །ནེ་ཙོ་དང་ནི་རྨ་བྱ་དང་། །ཀ་ལ་པིང་ཀ་བྱ་ཡི་རྣམས། །བཅོམ་ལྡན་དེ་བཞིན་གཤེགས་པ་ཡི། །ཡོན་ཏན་མཆོག་ནི་མཐོང་བས་ན། །ཐམས་ཅད་
ནམ་མཁའ་དག་ལ་ནི། །རབ་ཏུ་དགའ་བས་རྣམ་པར་རྩེ། །ཐམས་ཅད་རྣམ་པ་སྣ་ཚོགས་ཀྱི། །སྒྲ་སྙན་དག་ནི་རབ་ཏུ་ཕྱུང་། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །བཅོམ་
ལྡན་འདས་ཀྱི་ཡོན་ཏན་དང་། །རྫུ་འཕྲུལ་གྱི་ནི་སྟོབས་དག་གིས། །སེམས་ཅན་ཚད་མེད་བརྒྱ་སྟོང་སྙེད། །ལྡོངས་བ་དག་ནི་མཐོང་བར་འགྱུར། །འོན་པ་རྣམས་ནི་ཐོས་པར་གྱུར། །དབང་པོ་མ་ཚང་གང་ཡིན་པ། །
ཐམས་ཅད་དབང་པོ་ཚང་བར་གྱུར། །སྡུག་བསྔལ་ལ་ནི་གནས་པ་དག །ཐམས་ཅད་བདེ་བ་ཐོབ་པར་གྱུར། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །ནམ་མཁའ་བར་སྣང་དག་ལས་ནི། །འདི་སྐད་
སྨྲ་བ་ཐོས་པར་གྱུར། །གང་གིས་མཚན་མ་རྣམས་ཀྱིས་ནི། །དེ་བཞིན་གཤེགས་པ་རྟོགས་བྱེད་པ། །དེ་ཡིས་བཅོམ་ལྡན་འདས་ལ་ནི། །མཆོད་པ་བྱས་ཤེས་བརྗོད་མི་བྱ། །མིག་ཟད་མཐའ་ཡི་ངོ་བོ་ཉིད། །རྟོགས་
པར་ཡང་ནི་མི་འགྱུར་རོ། །མཚན་མ་རྣམས་ནི་གང་སྤངས་པ། །ཡོན་ཏན་བཞི་ནི་བསགས་པས་ན། །མིག་ཟད་མཐའ་ཡི་ངོ་བོ་ཉིད། །རབ་ཏུ་རྟོགས་པར་ཡང་འགྱུར་རོ། །འདི་ལྟར་མིག་ནི་ཟད་པའི་མཐའ། །

79-1-274b

རབ་ཏུ་རྟོགས་པར་གྱུར་པའི་ཕྱིར། །སངས་རྒྱས་རྣམས་ཀྱི་ཡོན་ཏན་ཡང་། །རབ་ཏུ་རྟོགས་པར་ཁོང་དུ་ཆུད། །མིག་ནི་ཟད་པའི་མཐའ་དག་ལ། །མི་འཛིན་སྦེད་པ་མེད་པ་དང་། །མིག་ནི་སྐྱེ་བའི་མཐའ་དག་ལ། །
རྟེན་ཅིང་གནས་པ་མེད་པ་དང་། །མིག་ནི་རབ་ཏུ་དབེན་པ་ལ། །གཡོ་བའི་བསམ་པ་མེད་གྱུར་པ། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །མིག་ནི་སྐྱེ་བའི་མཐའ་དག་ལ། །རྣམ་པར་
རྟོག་པ་མེད་པ་དང་། །མིག་གི་མཐའ་ནི་གང་ཡིན་པ། །དེ་ལ་ཡིད་ཀྱི་རྟོག་མེད་དང་། །མིག་ནི་རྣམ་པར་འཇིག་པ་ལ། །བསྟན་པར་བྱ་བ་མེད་གྱུར་པ། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་
གྱུར་པ་ཡིན། །མིག་ནི་མེད་པར་གྱུར་པ་ལ། །མངོན་པར་ཞེན་པ་མེད་པ་དང་། །མིག་ནི་སྐྱེ་བ་མེད་པ་ལ། །ཡོངས་སུ་སྡུད་པ་མེད་པ་དང་། །མིག་ནི་རབ་ཏུ་ཞི་བ་ལ། །འཛིན་པ་དག་ནི་མེད་གྱུར་པ། །དེས་ནི་དེ་བཞིན་
གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །མིག་ནི་ཟད་པར་ཤེས་པའི་ཕྱིར། །མཚན་རྣམས་མངོན་པར་བསྒྲུབ་པ་དང་། །མིག་གི་མཐའ་ནི་ཤེས་པའི་ཕྱིར། །དབང་པོ་དག་ནི་ངེས་གྱུར་དང་། །མིག་
ནི་སྐྱེ་བ་ཤེས་པའི་ཕྱིར། །དབང་པོ་རང་དབང་ཐོབ་གྱུར་པ། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །མིག་ནི་མེད་པར་རྟོགས་གྱུར་ནས། །གཟུགས་ནི་ཁོང་དུ་ཆུད་པ་དང་། །མིག་
ནི་འཇིག་པར་རབ་ཤེས་ནས། །ཆོས་ལ་སོ་སོར་རྟོག་པ་དང་། །མིག་ནི་སྐྱེ་མེད་ཤེས་གྱུར་ནས། །ལམ་ནི་སྒྲུབ་པར་གང་བྱེད་པ། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །
མིག་ཟད་མཐའ་ནི་གང་ཡིན་པ། །ཡང་དག་ཇི་བཞིན་རྟོགས་པའི་ཕྱིར། །ལས་ཀྱི་བྱེ་བྲག་ཐ་དད་པ། །དེ་ཡང་རབ་ཏུ་རྟོགས་པར་འགྱུར། །ལས་ཀྱི་བྱེ་བྲག་ཐ་དད་པ། །རབ་ཏུ་རྟོགས་པར་གྱུར་པའི་

79-1-275a

ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །མིག་སྐྱེ་མཐའ་ནི་གང་ཡིན་པ། །ཡང་དག་ཇི་བཞིན་རྟོགས་པའི་ཕྱིར། །སྡུག་བསྔལ་བྱེ་བྲག་ཐ་དད་པ། །དེ་ཡང་རབ་ཏུ་རྟོགས་
པར་འགྱུར། །སྡུག་བསྔལ་བྱེ་བྲག་ཐ་དད་པ། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །མིག་གིས་འཇིག་པ་གང་ཡིན་པ། །ཡང་དག་ཇི་བཞིན་
རྟོགས་པའི་ཕྱིར། །སྡུག་བསྔལ་འཇིག་པ་གང་ཡིན་པ། །དེ་ཡང་རབ་ཏུ་རྟོགས་པར་འགྱུར། །སྡུག་བསྔལ་འཇིག་པ་གང་ཡིན་པ། །རབ་ཏུ་རྟོགས་པར་གྱུར་པ་ཡི། །དེས་ནི་དེ་བཞིན་གཤེགས་པ་རྣམས། །མཐོང་
བ་ཉིད་དུ་གྱུར་པ་ཡིན། །མིག་གི་མེད་པ་གང་ཡིན་པ། །ཡང་དག་ཇི་བཞིན་རྟོགས་པའི་ཕྱིར། །མཚན་མ་སྤངས་པ་གང་ཡིན་པ། །དེ་ཡང་རབ་ཏུ་རྟོགས་པ་འགྱུར། །མཚན་མ་སྤངས་པ་གང་ཡིན་པ། །རབ་ཏུ་རྟོགས་པར་
གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །མིག་གི་སྐྱེ་མེད་གང་ཡིན་པ། །ཡང་དག་ཇི་བཞིན་རྟོགས་པའི་ཕྱིར། །བག་ཆགས་སྤངས་པ་གང་ཡིན་པ། །དེ་ཡང་རབ་ཏུ་རྟོགས་
པར་འགྱུར། །བག་ཆགས་སྤངས་པ་གང་ཡིན་པ། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །གཞན་ཡང་མིག་གི་མི་རྟོག་ཉིད། །ཡང་དག་ཇི་བཞིན་
རྟོགས་པའི་ཕྱིར། །སྒྲིབ་པ་སྤངས་པ་གང་ཡིན་པ། །དེ་ཡང་རབ་ཏུ་རྟོགས་པར་འགྱུར། །སྒྲིབ་པ་སྤངས་པ་གང་ཡིན་པ། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་
ཉིད་དུ་གྱུར་པ་ཡིན། །གཞན་ཡང་མིག་ལ་ཡི་གེ་མེད། །ཡང་དག་ཇི་བཞིན་རྟོགས་པའི་ཕྱིར། །སངས་རྒྱས་ཡེ་ཤེས་སྟོབས་དག་ཀྱང་། །རབ་ཏུ་རྟོགས་པར་གྱུར་པ་ཡིན། །སངས་རྒྱས་ཡེ་ཤེས་སྟོབས་

79-1-275b

དག་ནི། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །གཞན་ཡང་མིག་གི་མི་འོང་ཉིད། །ཡང་དག་ཇི་བཞིན་རྟོགས་པའི་ཕྱིར། །འདོད་རྣམས་
སྤངས་པ་གང་ཡིན་པ། །དེ་ཡང་རབ་ཏུ་རྟོགས་པར་འགྱུར། །འདོད་རྣམས་སྤངས་པ་གང་ཡིན་པ། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །
གཞན་ཡང་བསམ་གཏན་བསྒོམ་པ་དག །ཡང་དག་ཇི་བཞིན་རྟོགས་པའི་ཕྱིར། །ཉོན་མོངས་སྤངས་པ་གང་ཡིན་པ། །དེ་ཡང་རབ་ཏུ་རྟོགས་པར་འགྱུར། །ཉོན་མོངས་སྤངས་པ་གང་ཡིན་པ། །རབ་ཏུ་རྟོགས་པར་
གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །གང་ཟག་དེས་ནི་དེ་བཞིན་དུ། །མིག་གིས་སྔོན་མཐའ་ཤེས་པ་དང་། །མིག་གི་མི་གནས་ཤེས་པ་དང་། །མིག་
གི་སྐྱེ་བ་ཤེས་པ་དང་། །སངས་རྒྱས་རྫུ་འཕྲུལ་ཤེས་པ་དང་། །མིག་གི་དམན་པ་ཤེས་པ་དང་། །མིག་གི་ཁྱད་པར་འཕགས་ཤེས་དང་། །ཡེ་ཤེས་དམན་པ་ཤེས་པ་དང་། །རྣམ་དག་ཡེ་ཤེས་ཤེས་པ་
དང་། །ཚུལ་ཁྲིམས་རྣམ་དག་ཤེས་པ་དང་། །ལུས་ཀྱི་སྡོམ་པའི་ཤེས་པ་དང་། །རྣམ་དག་སྒྲ་ཡི་ཤེས་པ་དང་། །ངག་གི་སྡོམ་པའི་ཤེས་པ་དང་། །རྣམ་དག་སེམས་ཀྱི་
ཤེས་པ་དང་། །གནས་ཀྱི་བྱེ་བྲག་ཤེས་པ་དང་། །སེམས་ཀྱི་ཆོས་ཀྱི་ཤེས་པ་དང་། །སེམས་སྐྱོན་ཤེས་པའི་ཤེས་པ་དང་། །རྣམ་དག་ལས་ནི་ཤེས་པ་དང་། །སེམས་ཀྱི་སྡོམ་པའི་
ཤེས་པ་དང་། །ཉེས་དམིགས་ཤེས་པའི་ཤེས་པ་དང་། །རྣམ་དག་སྒྲ་ཡི་ཤེས་པ་དང་། །ཕུང་པོའི་བྱེ་བྲག་ཤེས་པ་དང་། །ཕུང་པོའི་རྒྱུ་རྐྱེན་ཤེས་པ་དང་། །མིག་ནི་ཡོངས་ཤེས་ཤེས་པ་དང་། །སྡུག་བསྔལ་འབྱུང་གནས་ཤེས་པ་དང་། །

79-1-276a

ཟག་མེད་ཚུལ་ཁྲིམས་ཤེས་པ་དང་། །ཚུལ་ཁྲིམས་རྒྱུ་རྐྱེན་ཤེས་པ་དང་། །སྡུག་བསྔལ་རྒྱུ་རྐྱེན་ཤེས་པ་དང་། །སྡུག་བསྔལ་ཟད་པའི་རྒྱུ་ཤེས་དང་། །འདུས་བྱས་རྣམས་ཀྱི་ཤེས་པ་དང་། །ཟག་པ་ཟད་པའི་ཤེས་པ་
དག །ཡོངས་སུ་རྫོགས་པར་བྱེད་པ་ཡིན། །གཞན་ཡང་རྒྱུ་རྐྱེན་བཅུ་གཉིས་ཀྱི། །སྤྱོད་དང་བཅས་པའི་ཤེས་པ་དང་། །སྤྱོད་པ་མེད་པའི་ཤེས་པ་དང་། །མཚན་མ་བཅས་དང་མཚན་མ་མེད། །འདུས་བྱས་དང་ནི་འདུས་མ་
བྱས། །རྣམ་པར་གཞག་དང་ཡོངས་སྡུད་དང་། །བདག་དང་གཞན་གྱི་སེམས་ཤེས་པ། །ཡང་དག་ཇི་བཞིན་ཤེས་པ་ཡིན། །གཞན་ཡང་མིག་ཟད་སྐྱེ་མཐའ་དང་། །མིག་གི་མཐའ་དང་རབ་དབེན་དང་། །འཇུག་པ་དང་ནི་
མེད་པ་དང་། །མི་སྐྱེ་བ་དང་ཉེར་ཞི་ཉིད། །ཡང་དག་ཇི་བཞིན་ཤེས་པས་ན། །སེམས་ཅན་དག་ནི་མང་པོ་རྣམས། །རྣམ་པར་དག་པའི་ཡེ་ཤེས་དང་། །མཐུ་དང་བཅས་པའི་ཡེ་ཤེས་དང་། །བརྩོན་འགྲུས་ཡེ་ཤེས་འཐོབ་
པར་བྱེད། །གཞན་ཡང་གཅིག་དང་ཐ་དད་ཤེས། །སེམས་ཅན་དག་ནི་ཐམས་ཅད་ཀྱི། །མོས་པའི་ཤེས་པ་གང་ཡིན་པ། །ཡང་དག་ཇི་བཞིན་ཤེས་པ་ཡིན། །གཞན་ཡང་སེམས་ཅན་ཐམས་ཅད་ཀྱི། །མོས་པ་
ཁྱད་པར་འཕགས་པ་དང་། །རྣམ་དག་སེམས་ཀྱི་ཤེས་པ་དང་། །ལས་དང་རྣམ་སྨིན་ཤེས་པ་དང་། །དབང་པོ་ཁམས་ཀྱི་ཤེས་པ་དང་། །སེམས་ཀྱི་འགྱུར་བ་ཤེས་པ་དང་། །ཤེས་རབ་མོས་པའི་ཤེས་པ་དང་། །
ཤིན་ཏུ་རྣམ་གྲོལ་ཤེས་པ་དང་། །སྤོབས་པ་མཆོག་གི་ཤེས་པ་དག །ཡང་དག་ཇི་བཞིན་ཤེས་པ་ཡིན། །གཞན་ཡང་སེམས་ཅན་མ་རུངས་དང་། །ཆོས་ལ་མོས་པ་མེད་གྱུར་པ། །ཡང་དག་ཇི་བཞིན་ཤེས་པས་ན། །
མོས་པའི་ཤེས་པ་སྐྱེད་པར་བྱེད། །གཞན་ཡང་དོན་གྱི་ཚུལ་དག་ནི། །ཡང་དག་ཇི་བཞིན་ཤེས་པས་ན། །ལེ་ལོ་མེད་པའི་ཤེས་པ་དག །དུས་ཤེས་སྒྲུབ་པར་བྱེད་པ་ཡིན། །གཞན་ཡང་རྫུ་འཕྲུལ་སྟོབས་དག་གིས། །

79-1-276b

ཆོས་རྣམས་རབ་ཏུ་འབྱེད་པ་དང་།  ཐོགས་པ་མེད་པའི་ཡེ་ཤེས་དག །ཡང་དག་ཇི་བཞིན་ཤེས་པ་ཡིན། །གཞན་ཡང་རྒྱ་ཆེན་དོན་དག་དང་། །ཚིག་གིས་བསྟན་པ་གང་ཡིན་པ། །རྗེས་སུ་ཤེས་པའི་ཤེས་པ་དག །
ཡང་དག་ཇི་བཞིན་ཤེས་པ་ཡིན། །གཞན་ཡང་གྲོགས་བཟང་འཐུན་གནས་དང་། །གོས་དང་ཟས་དང་བཏུང་བ་དག །ཚོད་ཤེས་པ་ཡི་ཤེས་པ་རྣམས། །ཡང་དག་ཇི་བཞིན་ཤེས་པ་ཡིན། །གཞན་ཡང་
བྱ་བ་མེད་པ་ཡི། །གཟུགས་ཀྱི་ཆོས་ནི་གང་ཡིན་པ། །ནན་ཏན་བསྒྲུབ་པའི་ཤེས་པ་དག །ཡང་དག་ཇི་བཞིན་ཤེས་པ་ཡིན། །གཞན་ཡང་ལུས་སེམས་སྐྱོན་མེད་ཅིང་། །སྒྲོ་འདོགས་སྐུར་འདེབས་
ཡོངས་སྤངས་ནས། །བླ་མེད་ཡེ་ཤེས་གང་ཚོལ་བ། །ཡང་དག་ཇི་བཞིན་ཤེས་པ་ཡིན། །གཞན་ཡང་རྫུ་འཕྲུལ་སྟོབས་དག་གིས། །ནམ་མཁའ་བར་སྣང་དག་ལས་ནི། །སྤྲུལ་པའི་སྐུ་ནི་རབ་
བསྟན་ནས། །སེམས་ཅན་དག་ནི་བརྒྱ་སྟོང་སྙེད། །ཡོངས་སུ་སྨིན་པར་མཛད་པས་ན། །ཐམས་ཅད་རབ་ཏུ་དགའ་གྱུར་ནས། །དད་པ་སྐྱེས་པའི་ཤེས་པ་དང་། །དེ་བཞིན་གཤེགས་པ་རྣམས་ལ་ཡང་། །མོས་ཤིང་
གུས་པའི་ཤེས་པ་དང་། །འདོད་ཆགས་སྤངས་པའི་ཆོས་དག་ལ། །རབ་མོས་བསྒྲུབ་པའི་ཤེས་པ་དང་། །འཕགས་པའི་དགེ་འདུན་ཚོགས་ལ་ཡང་། །མཆོད་པར་མོས་པའི་ཤེས་པ་དང་། །བྱང་ཆུབ་ཆེན་པོ་དག་
ལ་ཡང་། །རབ་མོས་བསྔོ་བའི་ཤེས་པ་དང་། །གཟུངས་རྣམས་ཀྱི་ནི་སྒོ་དག་ལ། །རབ་མོས་སྟོན་པའི་ཤེས་པ་དང་། །མོས་པ་རྣམས་ནི་གང་ཡིན་པ། །སོ་སོར་རབ་རྟོགས་ཤེས་པ་དང་།  འཕགས་པའི་ཏིང་
འཛིན་གང་ཡིན་པ། །ལེགས་པར་རྟོགས་པའི་ཤེས་པ་དང་། །བསྲུང་དང་རྗེས་སུ་དྲན་རྣམས་ལ། །ངེས་པར་བྱེད་པའི་ཤེས་པ་དང་། །དཔག་ཏུ་མེད་པའི་སེམས་དག་ལ། །ལེགས་པར་འཇུག་པའི་

79-1-277a

ཤེས་པ་དང་། །ཚིགས་སུ་བཅད་པ་ཚད་མེད་རྣམས། །ཡང་དག་སྟོན་པའི་ཤེས་པ་དང་། །འདོད་པའི་མཚམས་སྦྱོར་གང་ཡིན་པ། །རྟོགས་ཤིང་གོ་བའི་ཤེས་པ་དང་། །འགྲོ་བ་དམན་པ་དེ་དག་ཏུ། །
ལྟུང་བར་མི་འགྱུར་ཤེས་པ་དང་། །མི་དགེ་བཤེས་གཉེན་གང་ཡིན་པ། །ཡོངས་སུ་སྤོང་བྱེད་ཤེས་པ་དང་། །དགེ་བའི་བཤེས་གཉེན་གང་ཡིན་པ། །སྟེན་པར་བྱེད་པའི་ཤེས་པ་དང་། །འདྲི་ཞིང་ལན་ལྡོན་གང་
ཡིན་པ། །རབ་ཏུ་རྣམ་འབྱེད་ཤེས་པ་དང་། །གནས་དང་གནས་མིན་གང་ཡིན་པ། །ལེགས་པར་རྟོགས་པའི་ཤེས་པ་དང་། །ས་དང་ས་མིན་གང་ཡིན་པ། །ལེགས་པར་རྟོགས་པའི་ཤེས་པ་དང་། །རབ་
འབྲིང་ཐ་མ་གང་ཡིན་པ། །རྣམ་པར་འབྱེད་པའི་ཤེས་པ་དང་། །འདུས་བྱས་ཤེས་པ་གང་ཡིན་དང་། །འདུས་མ་བྱས་ཀྱི་ཤེས་པ་དང་། །དངོས་པོ་དང་ནི་རྫས་ཀྱི་ཤེས། །དངོས་དང་རྫས་མིན་ཤེས་པ་དང་། །
ཡོངས་སུ་སྡུད་བྱེད་ཤེས་པ་དང་། །ཡོངས་སུ་སྡུད་མིན་ཤེས་པ་དང་། །མངོན་པར་སྒྲུབ་པའི་ཤེས་པ་དང་། །ཡང་དག་སྒྲུབ་མིན་ཤེས་པ་དང་། །མིག་དང་མིག་མིན་ཤེས་པ་དང་། །མིག་དང་ལྷན་
ཅིག་ཤེས་པ་དང་། །མིག་གི་བྱེ་བྲག་ཤེས་པ་དང་། །མིག་གི་རང་བཞིན་ཤེས་པ་དང་། །ཡང་དག་ཇི་བཞིན་ཤེས་པ་ཡིན། །རྣ་བ་སྣ་ལྕེ་ལུས་ནས་ནི། །སྒྲ་དང་མིང་ལ་སོགས་པའི་བར། །ཆོས་ནི་
རྣམ་པ་ཉི་ཤུ་ལྔ། །ཐམས་ཅད་དེ་བཞིན་སྦྱར་བར་བྱ། །གང་ཞིག་མིག་གི་རྒྱུ་རྐྱེན་ཉིད། །ཡང་དག་སྟོང་ཞིང་དབེན་པ་དང་། །མཐར་ནི་བདག་ཡོད་མ་ཡིན་པར། །སེམས་པར་བྱེད་པ་གང་ཡིན་པ། །
གང་ཟག་དེས་ནི་བཞིན་དུ། །ཡང་དག་ངེས་པ་ཁོ་ནར་ནི། །སེམས་ཀྱི་ཏིང་འཛིན་གང་ཡིན་པ། །ཡོངས་སུ་རྫོགས་པར་བྱེད་པར་འགྱུར། །གང་ཞིག་མིག་གི་རྟེན་འབྲེལ་དང་། །མིག་མི་རྟག་

79-1-277b

པའི་མཚན་ཉིད་དག །དེས་པ་ཉིད་དུ་རྟོགས་གྱུར་ནས། །སེམས་པར་བྱེད་པ་གང་ཡིན་པ། །གང་ཟག་དེས་ནི་དེ་བཞིན་དུ། །མིག་གི་རྒྱུ་རྐྱེན་གང་ཡིན་དང་། །མཐར་ནི་ཡོད་པ་མ་ཡིན་པ། །ཡང་དག་ཇི་བཞིན་རྟོགས་པར་
འགྱུར། །རྣ་བ་སྣ་ལྕེ་ལུས་ནས་ནི། །སྒྲ་དང་མིང་ལ་སོགས་པའི་བར། །ཆོས་ནི་རྣམ་པ་ཉི་ཤུ་ལྔ། །ཐམས་ཅད་དེ་བཞིན་སྦྱར་བར་བྱ། །དེ་ཡི་ཚེ་ན་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །ཞབས་
ནི་ས་ལ་རེག་ཙམ་གྱིས། །དངོས་པོ་ངོ་མཚར་རབ་བསྟན་པ། །དེང་འདིར་བདག་གི་མདོར་བསྡུས་ནས། །ཡོན་ཏན་ཕྱོགས་ནི་ཅུང་ཟད་ཅིག །སེམས་ཅན་དགའ་བ་བསྐྱེད་པའི་ཕྱིར། །ཡང་དག་པར་ནི་སྟན་པར་བྱ། །
དེ་ཚེ་ལྷ་མི་འདྲེན་པ་ཡིས། །སྤུ་ཡི་ཁུང་བུ་གཅིག་ནས་ནི། །འོད་ཟེར་བརྒྱ་སྟོང་ཚད་མེད་སྙེད། །རབ་ཏུ་བཀྱེ་བར་གྱུར་པས་ན། །འོད་ཟེར་དག་ནི་རེ་རེས་ཀྱང་། །ཞིང་ནི་ཚད་མེད་གསལ་མཛད་ནས། །སེམས་ཅན་
མང་པོ་ཀུན་གྱི་ཕྱིར། །སངས་རྒྱས་མཛད་པ་རབ་ཏུ་མཛད། །གང་ཞིག་འདས་པའི་དུས་སུ་ནི། །སངས་རྒྱས་རྣམས་ལ་མཆོད་པ་དང་། །ཡུན་རིང་སྦྱིན་དང་ཚུལ་ཁྲིམས་དག །མངོན་པར་བསྒྲུབས་པ་གང་ཡིན་པ། །
དེ་ལྟ་བུ་ཡི་གང་ཟག་དག །དེས་ནི་ཇི་སྐད་བསྟན་པ་ཡི། །རྫུ་འཕྲུལ་དངོས་པོ་ཐོས་གྱུར་ན། །རབ་ཏུ་དགའ་ཞིང་མོས་པར་འགྱུར། །གང་ཞིག་སངས་རྒྱས་རྫུ་འཕྲུལ་རྣམས། །ཉན་ཐོས་དང་ནི་རང་རྒྱལ་གྱི། །
སྤྱོད་ཡུལ་མིན་པར་རབ་ཤེས་ནས། །དེ་ལྟ་བུ་ཡི་གང་ཟག་ནི། །དེས་ནི་ཇི་སྐད་བསྟན་པ་ཡི། །རྫུ་འཕྲུལ་དག་ནི་ཐོས་གྱུར་ན། །མོས་པ་དག་ནི་སྐྱེ་འགྱུར་ཞིང་། །ངོ་མཚར་འཛིན་པའི་སེམས་ཀྱང་སྐྱེད། །
ལྷ་དང་མི་ནི་འདྲེན་པ་ཡིན། །བསམ་གྱིས་མི་ཁྱབ་མཐུ་དག་གིས། །དེ་ལྟ་བུ་ལ་སོགས་པ་ཡི། །རྫུ་འཕྲུལ་སྣ་ཚོགས་རབ་བསྟན་པས། །སེམས་ཅན་དག་ནི་བརྒྱ་སྟོང་དང་། །ཚད་མེད་གྲངས་མེད་པ་

79-1-278a

རྣམས་ཀྱིས། །དེ་བཞིན་གཤེགས་པ་རྣམས་ལ་ནི། །བསྟེན་ཅིང་རིམ་གྲོ་མཆོད་པ་བྱས། །ལྷ་དང་མི་ནི་འདྲེན་པ་ཡིས། །བསམ་གྱིས་མི་ཁྱབ་མཐུ་དག་གིས། །མདོ་སྡེ་དག་ནི་བརྒྱ་
སྟོང་དང་། །ཚད་མེད་གྲངས་མེད་རབ་བཤད་པས། །སེམས་ཅན་དག་ནི་མང་པོ་རྣམས། །བསྟན་པ་དེ་ནི་ཐོས་པས་ན། །ཐམས་ཅད་དང་བས་རབ་བླངས་ཏེ། །སེམས་ནི་རབ་ཏུ་དགའ་བར་གྱུར། །དེ་ཡི་
ཚེ་ན་བཅོམ་ལྡན་འདས། །གྲོངས་ཁྱེར་དུ་ནི་གཤེགས་པའི་ཚེ། །རྫུ་འཕྲུལ་གྱི་ནི་མཐུ་དག་གིས། །ནམ་མཁའ་ལས་ནི་འདི་སྐད་དུ། །མིག་ཟད་མཐའ་ནི་ཤེས་པ་ནས། །མིག་ནི་ཉེ་བར་ཞི་བ་དང་། །
མིག་ཉིད་རྒྱུ་ཡི་བར་དུ་ཡང་། །འགྲོ་བ་མེད་ཅིང་འོང་མེད་དང་། །མཐར་ནི་སྟོང་དབེན་ཤེས་པར་གྱིས། །དེ་སྐད་དུ་ནི་ཐོས་པར་གྱུར། །རྣ་བ་སྣ་ལྕེ་ལུས་ནས་ནི། །སྒྲ་དང་མིང་ལ་སོགས་པའི་བར། །ཆོས་ནི་
རྣམ་པ་ཉི་ཤུ་ལྔ། །ཐམས་ཅད་དེ་བཞིན་སྦྱར་བར་བྱ། །དེ་ཡི་ཚེ་ན་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །ནམ་མཁའ་བར་སྣང་དག་ལས་ནི། །སྒྲ་སྙན་དམ་པ་མཆོག་བྱུང་ནས། །དེ་བཞིན་
གཤེགས་པའི་མཚན་སྣ་ཚོགས། །བསྔགས་པ་བརྗོད་པར་གྱུར་པས་ན། །འཁོར་ནི་འདུས་པ་ཆེན་པོ་རྣམས། །ཐམས་ཅད་དད་མོས་སེམས་ཀྱང་སྐྱེས། །ད་ལྟར་འཇིག་རྟེན་བཞུགས་པ་ཡི། །མི་ཡི་
སེང་གེ་གང་ཡིན་པ། །མཚན་ནི་བདུད་དང་བདུད་དཔུང་དག །ཕམ་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ལོག་པར་ལྟ་བའི་ཚོགས་ཐམས་ཅད། །
རབ་ཏུ་འདུལ་བར་ནུས་ཤེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་འདོད་ཆགས་གཞོམ་པ་དང་། ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་

79-1-278b

མཚན། །ཐོས་པར་གྱུར་བ་དེ་དག་ནི། །འདོད་པའི་འདོད་ཆགས་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་ཞེ་སྡང་
གཞོམ་པ་དང་། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཞེ་སྡང་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་
པ་ཡི། །མི་ཡི་སེང་གེ་གང་ཡིན་པ། །མཚན་ནི་གཏི་མུག་གཞོམ་པ་དང་། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །གཏི་མུག་དག་ནི་གང་ཡིན་པ། །ཐམས་
ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་ང་རྒྱལ་གཞོམ་པ་དང་། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །
ཐོས་པར་གྱུར་པ་དེ་དག་ནི། །ང་རྒྱལ་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་ཁོང་ཁྲོ་གཞོམ་པ་དང་། །
ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཁོང་ཁྲོ་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །
མི་ཡི་སེང་གེ་གང་ཡིན་པ། །མཚན་ནི་ཕྲག་དོག་གཞོམ་པ་དང་། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཕྲག་དོག་དག་ནི་གང་ཡིན་པ། །ཐམས་
ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་མི་བདེན་གཞོམ་པ་དང་། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །

79-1-279a

ཐོས་པར་གྱུར་པ་དེ་དག་ནི། །མི་བདེན་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་ལྟ་རྣམས་གཞོམ་པ་དང་། །
ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ལྟ་བ་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །
མི་ཡི་སེང་གེ་གང་ཡིན་པ། །མཚན་ནི་སྤྲོས་པ་གཞོམ་པ་དང་། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །སྤྲོས་པ་དག་ནི་གང་ཡིན་པ། །ཐམས་ཅད་
སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་ཡང་དག་པ་ཡི་ཆོས། །རྣམ་དག་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་
པར་གྱུར་པ་དེ་དག་ནི། །རྣམ་དག་ཆོས་ནི་གང་ཡིན་པ། །རབ་ཏུ་རྟོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་ལས་རྣམས་རྟོགས་པ་ཡི། །ཆོས་ཀྱི་རྒྱལ་
ཞེས་བྱ་བ་ཡིན། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ལས་རྣམས་ཐམས་ཅད་གང་ཡིན་པ། །རབ་ཏུ་རྟོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་
སེང་གེ་གང་ཡིན་པ། །མཚན་ནི་རྫུ་འཕྲུལ་ཕུན་ཚོགས་པའི། །ཆོས་ཀྱི་རྒྱལ་ཞེས་བྱ་བ་ཡིན། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །རྫུ་འཕྲུལ་ཡོན་ཏན་གང་ཡིན་པ། །ཡོངས་
སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་ཕ་རོལ་ཕྱིན་པ་རྣམས། །ཕུན་ཚོགས་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་

79-1-279b

ཡི་མཚན། །ཐོས་པར་གྱུར་པ་དེ་དག་ནི། །ཕ་རོལ་ཕྱིན་དྲུག་གང་ཡིན་པ། །ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་འདུ་བྱེད་
གང་ཡིན་པ། །རབ་རྟོགས་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །འཛིན་པར་བྱེད་པ་དེ་དག་ནི། །འདུ་བྱེད་དག་ནི་ཐམས་ཅད་ཀུན། །རབ་ཏུ་རྟོགས་པར་འགྱུར་ཞེས་ཟེར། །ད་ལྟར་འཇིག་
རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་རྣམ་པར་དག་པ་ཡི། །འོད་ཟེར་ཀུན་འཛིན་སྐྱེད་ཅེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཁྱད་པར་འཕགས་
པའི་སྐྱེ་ལེན་དག །ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་ཁ་དོག་དག་པ་ཡི། །འོད་ཟེར་ཀུན་འཛིན་ཞེས་ཀྱང་བྱ། །གང་
གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཁྱད་པར་འཕགས་པའི་གཟུགས་དམ་པ། །ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་
གེ་གང་ཡིན་པ། །མཚན་ནི་སྐུ་ཉིད་དག་པ་ཡི། །འོད་ཟེར་ཀུན་འཛིན་ཞེས་ཀྱང་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཁྱད་པར་འཕགས་པའི་གཟུགས་སྐུ་དག །ཡོངས་སུ་
རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་གདུང་ཉིད་དག་པ་ཡི། །འོད་ཟེར་ཀུན་འཛིན་ཞེས་ཀྱང་བྱ། །གང་གིས་འདི་ལྟ་བུ་ཡི་མཚན། །ཐོས་
པར་གྱུར་པ་དེ་དག་ནི། །ཁྱད་པར་འཕགས་པའི་རུས་རིགས་རྣམས། །ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་རྒྱ་ཆེར་གྲགས་

79-1-280a

པ་ཡི། །འོད་ཟེར་ཀུན་འཛིན་ཞེས་ཀྱང་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །རྒྱ་ཆེར་གྲགས་པའི་གྲགས་པ་རྣམས། །ཡོངས་སུ་རྫོགས་པར་འགྱུར་ཞེས་ཟེར། །ད་
ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་སྦྱིན་པ་གཏོང་བ་དང་། །ཚུལ་ཁྲིམས་ཅན་དང་བཟོད་བསྒོམས་དང་། །བརྩོན་འགྲུས་བརྩམས་དང་བསམ་གཏན་དང་། །ཤེས་རབ་ཀུན་
འཛིན་ཞེས་ཀྱང་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །སྦྱིན་པ་དང་ནི་ཚུལ་ཁྲིམས་ནས། །ཤེས་རབ་ཕ་རོལ་ཕྱིན་པ་དང་། །གཟུངས་ཀྱི་སྒོ་ནི་གང་ཡིན་པ། །ཡོངས་སུ་རྫོགས་
པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་སྟོང་ཉིད་རྫོགས་པ་ཡི། །ཆོས་ཀྱི་རྗེ་ཞེས་བྱ་བ་ཡིན། །གང་གིས་འདི་ལྟ་བུ་ཡི་མཚན། །འཛིན་པར་བྱེད་
པ་དེ་དག་ནི། །ཆོས་རྣམས་སྟོང་པའི་དོན་དག་ཀྱང་། །ཡང་དག་སྟོན་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་བདག་མེད་རྫོགས་པ་ཡི། །
ཆོས་ཀྱི་རྗེ་ཞེས་བྱ་བ་ཡིན། །གང་གིས་འདི་ལྟ་བུ་ཡི་མཚན། །འཛིན་པར་བྱེད་པ་དེ་དག་ནི། །སྐྱེ་འགག་མེད་དོན་གང་ཡིན་པ། །ཡང་དག་སྟོན་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་
པ་ཡི། །མི་ཡི་སེང་གེ་གང་ཡིན་པ། །མཚན་ནི་སྤྱན་ཉིད་དག་པ་ཡི། །ཀུན་འཛིན་ཆོས་ཀྱི་རྗེ་ཞེས་བྱ། །གང་གིས་འདི་ལྟ་བུ་ཡི་མཚན། །འཛིན་པར་བྱེད་པ་དེ་དག་ནི། །མིག་ཟད་མཐའ་དོན་གང་
ཡིན་པ། །ཡང་དག་སྟོན་པར་འགྱུར་ཞེས་ཟེར། །རྣ་བ་སྣ་ལྕེ་ལུས་ནས་ནི། །སྒྲ་དང་མིང་ལ་སོགས་པའི་བར། །ཆོས་ནི་ཉི་ཤུ་རྩ་ལྔ་དང་། །མེ་ཏོག་ཕྲེང་བ་སྤོས་དག་དང་། །མར་མེ་གདུག་དང་གོས་

79-1-280b

རྣམས་ཀྱང་། །ཐམས་ཅད་དེ་བཞིན་སྦྱར་བར་བྱ། །། །། བམ་པོ་ལྔ་པ་སྟེ་ཐ་མ།། དེ་ཡི་ཚེ་ན་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །བསམ་གྱིས་མི་ཁྱབ་པ་དག་ནི། །རྫུ་འཕྲུལ་
གྱི་ནི་སྟོབས་རྣམས་ཀྱིས། །ནམ་མཁའ་བར་སྣང་དག་ལས་ནི། །སྒྲ་སྙན་དམ་པ་རབ་བྱུང་སྟེ། །གཟུགས་ཀྱི་སྤྱོད་པ་སྣ་ཚོགས་དག །ཡང་དག་པར་ནི་བསྟན་པས་ན། །འཁོར་ནི་འདུས་པ་ཆེན་པོ་རྣམས། །འདི་ལྟ་བུ་
ཡི་ཚིག་ཐོས་ཏེ། །གཟུངས་ནི་གང་ཡིན་འདི་དག་གིས། །མིག་གི་ཟད་མཐའ་གང་ཡིན་དང་། །སྐྱེ་མཐའ་དང་ནི་མཐའ་རྣམས་དང་། །རབ་དབེན་དང་ནི་འཇུག་པ་ནས། །ཉེ་བར་ཞི་བའི་བར་རྣམས་ཀྱི། །
ཆོས་རྣམས་གང་ཡིན་དེ་དག་གིས། །མཐར་ཕྱིན་གནས་ནི་གང་ཡིན་པ། །ཐམས་ཅད་རབ་ཏུ་རྟོགས་པར་བྱེད། །སྦྱིན་པའི་སྟོབས་ནི་གང་དག་གིས། །མཐར་ནི་གང་དག་སྡུད་པ་དང་། །ཚུལ་ཁྲིམས་སྟོབས་
ནི་གང་དག་གིས། །མཐར་ནི་གང་དག་འགྲུབ་པ་དང་། །བཟོད་པའི་སྟོབས་ནི་གང་དག་གིས། །མཐར་ནི་གང་དག་བཀོད་པ་དང་། །བརྩོན་འགྲུས་སྟོབས་ནི་གང་དག་གིས། །མཐར་ནི་གང་དག་སློང་བ་དང་། །
ཤེས་རབ་སྟོབས་ནི་གང་དག་གིས། །མཐར་ནི་གང་དག་སྟོན་པ་དང་། །ཡི་གེ་རྣམས་དང་བརྗོད་པ་དང་། །སྒྲ་སྐད་རྣམས་ནི་སྤངས་པ་ནས། །གཟུགས་དང་སེམས་ཀྱི་བར་དུ་ཡང་། །མཐར་ནི་རྣམ་དག་ཉིད་དུ་
རྟོགས། །ཟག་དང་བཅས་དང་ཟག་མེད་དང་། །དོན་རྣམས་དང་ནི་ཕན་པ་དག །ཐམས་ཅད་སྟོང་ཞིང་དབེན་པ་དང་། །མཐར་ནི་རྣམ་དག་ཉིད་དུ་རྟོགས། །སྲིད་པ་དག་ནི་ཐམས་ཅད་ལ། །རྟེན་ཅིང་གནས་པར་མི་
བྱེད་དང་། །གཟུགས་དང་ཏིང་འཛིན་དག་ལ་ནི། །རབ་ཏུ་དབེན་པར་གནས་པར་བྱེད། །འགྲོ་བ་མེད་ཅིང་འོང་མེད་དང་། །དགེ་བ་མ་ཡིན་མི་དགེ་མིན། །ལུང་དུ་མི་སྟོན་པ་ཡང་མིན། །བདག་དང་གཞན་ལ་ཕན་འདོགས་པའི།།

79-1-281a

དེ་ལྟ་བུ་ཡི་མཚན་མ་རྣམས། །ཐམས་ཅད་ཡོངས་སུ་དག་པས་ན། །དབང་ཕྱུག་ཡོན་ཏན་དག་ལ་ཡང་། །གནས་པར་ཡང་ནི་མི་བྱེད་དོ། །ཉན་ཐོས་དང་ནི་སྐྱེ་བོ་དང་། །སངས་རྒྱས་རྣམས་ཀྱི་ཆོས་ལ་
ཡང་། །གནས་པར་ཡང་ནི་མི་བྱེད་དོ། །མིག་ནི་ཟད་པའི་མཐའ་དག་དང་། །སྐྱེ་མཐའ་དང་ནི་མཐའ་རྣམས་ནས། །ཉེ་བར་ཞི་བའི་བར་རྣམས་ཀྱི། །སྤྱོད་པ་དག་ནི་གང་ཡིན་པ། །ཐམས་ཅད་ཡོངས་སུ་ཞི་བར་
བྱེད། །སྐྱེ་བ་དང་ནི་མི་སྐྱེ་དང་། །སྡུག་བསྔལ་དང་ནི་བདེ་བ་དང་། །བསྟོད་པ་དག་ནི་སྨད་པ་དག །ཐམས་ཅད་ཡོངས་སུ་སྤོང་ཞེས་ཟེར། །མཐར་ཕྱིན་སྣང་བ་གང་ཡིན་དང་། །སྟོང་པའི་གཟུངས་ནི་གང་ཡིན་
པ། །ཐམས་ཅད་རབ་ཏུ་གང་རྟོགས་པ། །འདི་ཉིད་སངས་རྒྱས་སྤྱོད་ཡུལ་ལ། །རབ་ཏུ་གནས་པར་བྱེད་པ་ཡིན། །འདི་ཉིད་སངས་རྒྱས་རོལ་པ་ཡི། །གནས་ལ་རབ་ཏུ་གནས་པ་ཡིན། །འདི་ཉིད་སངས་
རྒྱས་རྫུ་འཕྲུལ་ལ། །རབ་ཏུ་གནས་པར་གྱུར་པ་ཡིན། །འདི་ཉིད་སངས་རྒྱས་མཁྱེན་པ་ལ། །རབ་ཏུ་གནས་པར་གྱུར་པ་ཡིན། །མིག་ཟད་མཐའ་ཡི་སྟོབས་དག་ལ། །དེ་བཞིན་དུ་ནི་གནས་པ་དང་། །མིག་
སྐྱེ་མཐའ་ཡི་སྟོབས་དག་ལ། །དེ་བཞིན་དུ་ནི་གནས་པ་དང་། །མིག་གི་མཐའ་ཡི་སྟོབས་དག་ལ། །དེ་བཞིན་དུ་ནི་གནས་པ་ནས། །ཉེ་བར་ཞི་བའི་སྟོབས་ཀྱི་བར། །དེ་ལ་རབ་ཏུ་གནས་པ་དང་། །རྣ་བ་སྣ་ལྕེ་
ལུས་ནས་ནི། །སྒྲ་དང་མིང་ལ་སོགས་པའི་བར། །ཆོས་ནི་རྣམས་པ་ཉི་ཤུ་ལྔ། །ཐམས་ཅད་དེ་བཞིན་སྦྱར་ཞེས་ཟེར། །གཟུངས་ནི་གང་ཡིན་འདི་དག་གིས། །དེ་བཞིན་གཤེགས་པ་རྣམས་ཀྱི་སྟོབས། །
ཁྱད་པར་འཕགས་པ་གང་ཡིན་པ། །ཡོངས་སུ་རྫོགས་པར་བྱེད་ཅེས་ཟེར། །གཟུངས་ནི་གང་ཡིན་འདི་དག་གིས། །གཟི་བྱིན་མཐུ་སྟོབས་དེ་ལྟ་བུ། །ཡོངས་སུ་རྫོགས་པར་བྱས་ནས་ནི། །དེ་བཞིན་གཤེགས་

79-1-281b

པ་ཐམས་ཅད་ཀྱི། གནས་ཀུན་ལ་ནི་འཇུག་པ་དང་། །དེ་བཞིན་གཤེགས་པ་ཐམས་ཅད་ཀྱི། །སྤྱོད་ཡུལ་ཀུན་ལ་གནས་འགྱུར་བས། འཇིག་རྟེན་པ་ནི་ཐམས་ཅད་ཀུན། །ལྷ་མ་ཡིན་གྱི་ཚོགས་དག་ལ། །བརྟན་པར་འཛིན་པའི་སེམས་སྤངས་ནས། །ཚངས་པའི་སྤྱོད་ལ་གནས་པར་བྱེད། །
གནོད་སྦྱིན་བརྒྱ་སྟོང་ཚད་མེད་དང་། །གྲུལ་བུམ་དག་ནི་ཚད་མེད་རྣམས། །དེ་དག་ཐམས་ཅད་ཀུན་ཀྱང་ནི། །རབ་ཏུ་དགའ་བ་སྐྱེད་པར་བྱེད། །དྲི་ཟའི་འཁོར་ནི་གང་ཡིན་དང་། །སྲིན་པོའི་འཁོར་ནི་གང་ཡིན་པ། །
ཚད་མེད་གྲངས་མེད་དེ་དག་ཀྱང་། །རབ་ཏུ་དུལ་ལ་དགའ་བར་བྱེད། །གལ་ཏེ་ཚངས་པའི་འཁོར་རྣམས་ཀྱིས། །སྒྲ་སྙན་དག་ནི་དམ་པ་ཡིས། །ཚིགས་དང་དོན་ནི་རྗོད་བྱེད་ཀྱང་། །ཡང་དག་བསྟན་པར་མི་ནུས་ཏེ། །སེམས་
ལས་བྱུང་བའི་ཆོས་རྣམས་ཀྱིས། །དཔག་པར་བྱ་བ་མ་ཡིན་དང་། །སེམས་ལས་བྱུང་བའི་ཆོས་རྣམས་ཀྱིས། །གཟུངས་བར་བྱ་བ་མིན་ཞེས་ཟེར། །གཟུངས་ནི་གང་ཡིན་འདི་དག་ནི། །མིག་གིས་དམིགས་པར་བྱ་བ་མིན། །
གཟུངས་ནི་གང་ཡིན་འདི་དག་ནི། །ལུས་ཀྱི་བར་གྱིས་དམིགས་བྱ་མིན། །གཟུངས་ནི་གང་ཡིན་འདི་དག་ནི། །མིག་གིས་དམིགས་པར་བྱ་བ་མིན། །མིག་གི་སྤྱོད་ཡུལ་བར་གྱིས་ཀྱང་། །དམིགས་པར་བྱ་བ་མ་ཡིན་ཏེ། །
རྣ་བ་སྣ་ལྕེ་ལུས་ནས་ནི། །སྒྲ་དང་མིང་ལ་སོགས་པའི་བར། །ཆོས་ནི་རྣམ་པ་ཉི་ཤུ་ལྔ། །ཐམས་ཅད་དེ་བཞིན་སྦྱར་ཞེས་ཟེར། །གཞན་ཡང་མིག་གིས་ཟད་མཐའ་དང་། །མིག་རྣམས་ཀྱི་ནི་སྐྱེ་མཐའ་དང་། །མིག་
གི་མཐའ་དང་འཇུག་པ་ནས། །ཉེ་བར་ཞི་བའི་བར་དག་ལ། །བདག་དང་སྐྱེས་བུ་མེད་པ་དང་། །སེམས་དང་སྲོག་ནི་མེད་པ་དང་། །དེ་བཞིན་གང་ཟག་མེད་པ་དང་། །མཚན་མ་མེད་ཅིང་བྱེད་མེད་དང་། །འགྲོ་བ་མེད་
ཅིང་འོང་མེད་དང་། །འདི་ལྟ་བུ་ལ་སོགས་པའི་མཚན། །ཐམས་ཅད་རྟོགས་པར་འགྱུར་ཞེས་ཟེར། །གཞན་ཡང་འདི་སྐད་ཆོས་ཉིད་ཀྱི། །མིག་ནི་རྟོགས་པར་འགྱུར་ཞེས་ཟེར། །གཞན་ཡང་འདི་སྐད་ཆོས་

79-1-282a

རྣམས་ལས། །གྲུབ་པའི་མིག་ནི་གང་ཡིན་དང་། །ཡེ་ཤེས་མིག་དང་ཤེས་རབ་མིག །ཚངས་པའི་མིག་དང་ལྷ་མིག་དང་། །ཚངས་པའི་སྐྱེས་ནས་ཐོབ་མིག་དང་། །ལྷར་ནི་སྐྱེས་ནས་ཐོག་མིག་དང་། །ཚངས་པའི་
རྣམ་སྨིན་མིག་དག་དང་། །ལྷ་ཡི་རྣམ་སྨིན་མིག་དག་དང་། །ཚངས་པའི་རྒྱུ་ལས་སྐྱེས་མིག་དང་། །ལྷ་ཡི་རྒྱུ་ལས་སྐྱེས་པའི་མིག །ལྷ་ཡི་རྫུ་འཕྲུལ་མི་དག་དང་། །ལྷ་ཡི་བརྩོན་འགྲུས་དག་གི་མིག །དམན་པར་སྐྱེས་པའི་མིག་
དག་དང་། །ཁྱད་འཕགས་སྐྱེས་པའི་མིག་དག་དང་། །གཤིན་རྗེའི་འཇིག་རྟེན་གང་ཡིན་པ། །ཡོངས་སུ་སྤངས་པའི་མི་དག་དང་། །ཀླུ་དང་གནོད་སྦྱིན་མི་དག་དང་། །གྲུལ་བུམ་གྱི་ནི་མི་དག་དང་། །ཡོངས་སུ་གདུང་བཅས་
མིག་དག་དང་། །ཡོངས་སུ་གདུང་མིན་མིག་དག་དང་། །རྣམ་པར་དག་པའི་མིག་དག་དང་། །རྣམ་པར་དག་མིན་མིག་དག་དང་། །ཆུར་རིང་ཞིང་ཐུང་མིག་དག་དང་། །ཉན་ཐོས་ཐེག་པའི་མིག་དག་དང་། །བསམ་གཏན་པ་ཡི་མིག་དག་
དང་། ཏིང་ངེ་འཛིན་གྱི་མིག་དག་དང་། །སྤྱོད་ཡུལ་ལས་བྱུང་མིག་དག་དང་། །འདུ་ཤེས་ལས་བྱུང་མིག་དག་དང་། འདོད་ཆགས་ལས་བྱུང་མིག་དག་དང་། །འདོད་ཆགས་བྲལ་བའི་མིག་དག་དང་། །རྒྱུ་ལས་བྱུང་བའི་མིག་དག་
དང་། །རྒྱུ་མིན་ལས་བྱུང་མིག་དག་དང་། །མཚུངས་པར་ལྡན་པའི་མིག་དག་དང་། །མཚུངས་པར་ལྡན་མིན་མིག་དག་དང་། །བསྒོ་བརྟེན་ལས་བྱུང་མིག་དག་དང་། །བསྒོ་ལས་བྱུང་མིན་མིག་དག་དང་། །རྒྱུ་རྐྱེན་ལས་བྱུང་མིག་དག་
དང་། །ཤ་ལས་གྲུབ་མིན་མིག་དག་དང་། །ཡེ་ཤེས་རྣམ་པར་དག་མིག་དང་། །ཡོད་པ་མིན་པའི་མིག་དག་དང་། །དམིགས་མེད་མིག་ནི་གང་ཡིན་པ། །ཐམས་ཅད་རྟོགས་པར་བྱེད་ཅེས་ཟེར། །རྣ་བ་སྣ་ལྕེ་ལུས་ནས་ནི། །སྒྲ་དང་
མིང་ལ་སོགས་པའི་བར། །ཆོས་ནི་རྣམ་པར་ཉི་ཤུ་ལྔ། ཐམས་ཅད་དེ་བཞིན་སྦྱར་ཞེས་ཟེར། །དེ་ཡི་ཚེ་ན་བཅོམ་ལྡན་འདས། །ནམ་མཁའ་བར་སྣང་དག་ལས་ནི། །གཞན་ཡང་དཔག་ཏུ་མེད་པའི་སྒྲ། །སྒྲ་སྙན་དམ་པ་

79-1-282b

མཆོག་བྱུང་ནས། །ཁྱད་པར་འཕགས་པ་གཟུངས་ཀྱི་ཆོས། །འདི་སྐད་དུ་ནི་བཀའ་སྩལ་ཏེ། །འདི་ཡང་དེ་བཞིན་གཤེགས་པ་ཡིས། །རྫུ་འཕྲུལ་དག་གིས་སྤྲུལ་པ་ཡིན། །འདི་ལྟ་སྟེ། སི་ལེ། མ་ལེ་མ་ལེ། སིད་
དྷེ་ཨཻ་ནི། སི་ཎེ་ཀུ་ལུ་ནི་ཡུ། ཀུ་ལུ་ནེ་ཡུ། ཀུ་ལེ་མ་ལེ།   ཀུ་ནོ་ཏེ། ཨ་ལ་ཤི་ཨ་སི་ལེ། སི་སི་ལེ་ཏེ། སུ་སི་ལེ། སི་ལེ་སི་ལེ། ཁྱི་པི་ལེ། ཨཱ་པཱི་ལེ་སུ་ཊེ་ཙ་ན། དྷ་ནི་མ་ནི། ཀ་ནི། ཀ་ལེ་ཏེ། སུ་
ཀ་ལེ། པྲ་ཡ། །ཤ་ནང་ནི། ཨ་ནུ་ལོ་སི་ཀྱི། བི་ལོ་མི། སུ་བྷ་ནི་རེ་ཤྷེ། ཨ་ཤི་རི་ལེ། སར་མ་པ་ར་ཕན་ཏེ། པ་རི་བྷ་ཧེ། དྷ་ར་ནི། དྷེ་ཤུ་ཙི་ཧ།   སུ་དྷེ། ཨ་ཙ་ན། བྷུ་པོ་ག་གནང་། ཀུར་བ་ནོ། བྷ་ས་བྷ་ནང་། 
པན་རི་དྷུ་རི་ཡ། ནི་པ་རི་ཀ་ནོ་ནི། མ་ན་བྷ། སུ་རུ་ཙི་ཊ། བ་ན་ཨཱ་ཙ་ར། ཨཱ་བྷཱེ་ལ་བིརྱ་པྲ་ཊི་ཤྠ་ཧ། དྷ་རི་ནི། ཨ་སི་ཊ། ལོ་ཎི་བྷི། །།གཟུངས་རྣམས་གང་ཡིན་འདི་དག་ནི། །སངས་རྒྱས་རྣམས་ཀྱིས་རབ་ཏུ་བརྙེས། །མཐུ་
ཆེན་དག་ནི་ཕུན་སུམ་ཚོགས། །ཤེས་རབ་དག་ནི་ཚད་ཀྱང་མེད། །འཛིན་པ་དག་ནི་ཡོངས་སུ་སྤོང་། །དྲན་པ་དག་ནི་དག་པར་བྱེད། །གཟུངས་མེད་འགྲོ་དང་འོང་བ་མེད། །ཕྱོགས་དང་ཕྱོགས་མཚམས་ཡོད་པ་མིན། མཚན་
མ་མེད་ཅིང་བརྗོད་དང་བྲལ། །སྤྲོས་པ་དག་ལས་ཡང་དག་འདས། །བྱང་ཆུབ་སེམས་དཔས་སྒྲུབ་བྱེད་ན། །མཐར་ནི་གསིལ་བ་འཐོབ་པར་འགྱུར། །ཚིགས་སུ་བཅད་པ་བྱེ་བ་ཕྲག །བརྒྱ་སྟོད་མང་པོ་དག་གི་ནི། །
ཚིགས་ཅིག་ཙམ་ནི་རབ་བསྟན་ཀྱང་། །མཐའ་ནི་དམིགས་པར་ཡོད་མི་ནུས། །འཕགས་པ་མང་པོས་རབ་ཏུ་བསྔགས། །རྣམ་པར་དག་ཅིང་ཞེན་པ་མེད། །འཁོར་འདུས་མང་པོ་ཐམས་ཅད་ཀྱིས། །ཤིན་ཏུ་
གུས་པ་སྐྱེད་པར་བྱེད། །གཟུངས་ནི་གང་ཡིན་འདི་དག་གི། །དགེ་བའི་ཆོས་ཀྱི་མཐུ་སྟོབས་ཀྱིས། །ཉོན་མོངས་རབ་བཅོམ་ཉེར་ཞི་ནས། །ཁྱད་འཕགས་ཕན་ཡོན་ཐོས་པར་བྱེད། །ཡོན་ཏན་དང་ནི་ཤེས་རབ་དག །

79-1-283a

ཤིན་ཏུ་རྒྱ་ཆེ་རྒྱ་མཚོ་འདྲ། །བཟོད་པ་དག་ནི་སྒྲུབ་པར་བྱེད། །སེམས་ནི་རབ་བདེ་གཡོ་མེད་འགྱུར། །བྱང་ཆུབ་སེམས་དཔས་རྟག་ཏུ་བསྒོམས། །མཁས་པ་དག་གིས་རབ་ཏུ་བསྔགས། །དབུལ་ཕོངས་
དག་ནི་སྤོང་བྱེད་ཅིང་། །ནོར་དང་རིན་ཆེན་འཐོབ་པར་བྱེད། །གཟུངས་ནི་གང་ཡིན་འདི་དག་གིས། །ཡོན་ཏན་རྣམས་ནི་འཕེལ་བར་བྱེད། །རྟག་ཏུ་སྟོང་ཉིད་ལ་སོགས་པའི། །བདེན་ཚིག་དག་གིས་རབ་ཏུ་
བརྒྱན། །ཡི་གེ་དག་ནི་སྤངས་པས་ན། །སྟོང་པའི་ངོ་བོ་ཉིད་ཅེས་བྱ། །སེམས་དང་རྣམ་ཤེས་སྤངས་པས་ན། ཆོས་ཀྱི་ངོ་བོ་ཉིད་ཅེས་བྱ། །གཟུངས་ནི་གང་ཡིན་འདི་དག་གིས། །དྲི་བྲལ་རྟག་ཏུ་རྣམ་དག་བྱེད། །ཡང་དག་ཡེ་
ཤེས་ལ་གནས་ནས། །ཕན་པ་སྣ་ཚོགས་སྟོན་པར་བྱེད། །སེམས་ཅན་དག་ནི་མང་པོ་རྣམས། །དགའ་ཞིང་དང་བ་སྐྱེད་པར་བྱེད། །གནོད་སྦྱིན་འཁོར་ནི་ཚད་མེད་དང་། །གྲུལ་བུམ་འཁོར་ནི་གང་ཡིན་པ། །འདི་ལ་སོགས་
པ་ཡི་དགས་རྒྱལ། །དགའ་བ་ཆེན་པོ་སྐྱེད་ཅེས་ཟེར། །གཟུངས་སྔགས་གང་ཡིན་འདི་དག་ནི། །རབ་ཏུ་ཞི་ཞིང་སྤྲོས་པ་མེད། །སེམས་ཅན་དག་ལ་བྱམས་པས་ན། །ཀུན་ལ་བདེ་བ་སྦྱིན་པར་བྱེད། །བསྐལ་བ་མང་
པོ་བརྒྱ་སྟོང་དུ། །འགྲོ་བ་རྣམས་སུ་རྟགས་གནས་ཤིང་། །ཕན་པ་ཚད་མེད་པ་བྱེད་ཀྱང་། །རྣམ་པར་དག་ཅིང་གོས་པ་མེད། ཚིགས་སུ་བཅད་པ་བརྒྱ་སྟོང་གིས། །བདུད་རྩིའི་ཆོས་ནི་རབ་བསྟན་ནས། །སེམས་
ཅན་དག་ནི་ཚད་མེད་རྣམས། །དགའ་བ་ཆེན་པོ་སྐྱེད་པར་བྱེད། །སྔོན་གྱི་སངས་རྒྱས་ཚད་མེད་རྣམས། །ཤིན་ཏུ་རྣམ་དག་མོས་པ་ཡིས། །གཟུངས་འདི་ལ་ནི་བརྟེན་ནས་སུ། །རྟག་ཏུ་ཆོས་ཉིད་དགོངས་
པར་མཛད། །ཚངས་དང་བརྒྱ་བྱིན་ལྷ་རྣམས་དང་། །ཀླུ་ཡི་རྒྱལ་པོ་ལྷ་མ་ཡིན། །གཟུངས་འདི་ཐོས་པར་གྱུར་ནས་ཀྱང་། །སེམས་ཀྱིས་དགའ་བ་སྐྱེད་ཅེས་ཟེར། །གཟུངས་སྔགས་གང་ཡིན་འདི་དག་རྣམས། །

79-1-283b

གང་དུ་གནས་པའི་ཡུལ་དེར་ནི། །རྟག་ཏུ་གནོད་དང་འཁྲུགས་པ་དང་། །ནད་དང་སྡུག་བསྔལ་མྱ་ངན་མེད། །སེམས་ཅན་དག་ནི་ཐམས་ཅད་ཀུན། །སོ་སོར་དགའ་བའི་སེམས་བསྐྱེད་ནས། །གཟུངས་འདི་
རྟག་ཏུ་བདག་ཅག་གི། སེམས་ལ་གནས་པར་སྨོན་ལམ་འདེབས། གཟུངས་སྔགས་གང་ཡིན་འདི་དག་ནི། ལུས་དང་སེམས་དང་རྐན་དག་དང་། །ཁ་མཆུ་དག་ལ་གནས་གྱུར་ན། །ཡོན་ཏན་དཔག་མེད་སྐྱེད་པར་
བྱེད། །གལ་ཏེ་རྟག་ཏུ་འཛིན་བྱེད་ན། །ཡོན་ཏན་ཚད་མེད་ཐོབ་གྱུར་ནས། །སེམས་ཅན་མང་ལ་ཕན་འདོགས་ཤིང་། །ཐམས་ཅད་དགའ་བ་ཐོབ་ཅེས་ཟེར། །གཟུངས་སྔགས་གང་ཡིན་འདི་དག་གིས། །སྡིག་པ་
རྣམས་ནི་རབ་སྤོང་ཞིང་། །དམ་ཆོས་དག་ནི་སྟོན་བྱེད་པས། །ཐུག་པ་མེད་པའི་སྤོབས་པ་འཐོབ། །སེམས་ཅན་དག་ནི་རྒྱ་སྟོང་རྣམས། །ཐེ་ཚོམ་དག་ནི་རབ་བསལ་ནས། །ང་རྒྱལ་རྣམས་ནི་རབ་བཅོམ་སྟེ། །
ཡོན་ཏན་དཔག་མེད་འཐོབ་ཅེས་ཟེར། །ཤིན་ཏུ་ཟབ་ཅིང་གསང་བའི་ཆོས། །གཟུངས་སྔགས་གང་ཡིན་འདི་དག་ནི། མཁས་པས་རྟག་ཏུ་སེམས་བྱེད་ཅིང་། །ནན་ཏན་གྱིས་ནི་སྒྲུབ་པར་བྱེད། །ཤེས་རབ་གོ་
ཆ་རབ་བགོས་ནས། །ཉོན་མོངས་རབ་ཏུ་འཇོམས་པར་བྱེད། །ཡོན་ཏན་སེམས་ནི་འཕེལ་བྱེད་པས། །རབ་ཏུ་མོས་ཤིང་སྐྱོ་བ་མེད། །གཟུངས་སྔགས་གང་ཡིན་འདི་དག་ནི། །གྲགས་པ་ཆེན་པོ་ཕུན་ཚོགས་
པས། །ཟད་པ་དང་ནི་མི་ཟད་དང་། །སྐྱེ་དང་མི་སྐྱེ་མཐའ་རབ་རྟོགས། །འདི་འདྲའི་ཤེས་རབ་སྣ་ཚོགས་ཀྱིས། །བདག་ཉིད་རབ་ཏུ་བརྒྱན་པས་ན། །དེ་བཞིན་གཤེགས་པ་བརྒྱ་སྟོང་རྣམས། །ཤིན་ཏུ་གུས་ཤིང་
མཆེད་པ་མཛད། །དེ་འདྲའི་གཟུངས་ནི་གང་ཡིན་པ། །རིག་པ་དག་གིས་རྐང་གཉིས་བྱེད། །ཏིང་འཛིན་མཆོག་ལ་རབ་གནས་ནས། །བྱང་ཆུབ་ལམ་ལ་གཞོལ་བར་བྱེད། །ཞི་གནས་ལྷག་མཐོང་རྗེས་འབྲང་ཞིང་། །

79-1-284a

ཟག་མེད་ཤེས་རབ་རྟོགས་པར་བྱེད། །རབ་དང་དབང་པོ་སྟོབས་ཀྱིས་ནི། །ལག་གཉིས་ཡོངས་སུ་གྲུབ་པར་བྱེད། །བརྩོན་འགྲུས་དང་ནི་བཟོད་པ་ཡིས། །ནུ་མ་གཉིས་ནི་གྲུབ་པར་བྱེད། །ཤེས་
རབ་ཕ་རོལ་ཕྱིན་པས་ནི། །སྤྱི་གཙུག་མཚན་ཉིད་རབ་ཏུ་བྱེད། །མདོ་སྡེ་དག་གིས་སྐུར་བྱས་ནས། །སོ་སོར་རིག་བཞི་ཕྲེང་བར་རྒྱུས། །སྔོན་ནི་མངོན་པར་བསྒྲུབས་པ་ཡི། །ཡོན་ཏན་རྣམ་པ་སྣ་ཚོགས་དང་། །དཔེ་
ནི་ཚད་མེད་ཇི་སྙེད་པ། །ཐམས་ཅད་རབ་ཏུ་བརྒྱན་ཅེས་ཟེར། །གཟུངས་སྔགས་གང་ཡིན་འདི་དག་ནི། །ཡོན་ཏན་ཚད་མེད་ཕུན་ཚོགས་པས། །མིག་གི་སྔོན་དང་ཕྱི་མཐའ་དང་། །ཟད་དང་མི་ཟད་མཐའ་
དག་དང་། །སྐྱེ་བ་དང་ནི་མི་སྐྱེ་དང་། །མཐའ་དང་མཐའ་མིན་གང་ཡིན་དང་། དབེན་པ་དང་ནི་མི་དབེན་དང་། །འཇུག་པ་དང་ནི་འཇུག་མིན་དང་། །ཅི་ཡང་མེད་དང་མི་འབྱུང་དང་། །ཉེར་ཞི་དང་ནི་བདག་མེད་དང་། །གང་
ཟག་མེད་དང་སྲོག་མེད་དང་། །སེམས་ཅན་མེད་པའི་བར་དག་དང་། །འདི་ལ་སོགས་པའི་ཚད་མེད་སྒོ། །ཐམས་ཅད་རབ་ཏུ་རྟོགས་པར་འགྱུར། །རྣ་བ་སྣ་ལྕེ་ལུས་དང་ཡིད། །ཡུལ་དྲུག་དང་ནི་འབྱུང་ཆེན་
བཞི། །འཇིག་རྟེན་སྐྱེ་བའི་མིང་བར་དུ། །ཐམས་ཅད་དེ་བཞིན་སྦྱར་ཞེས་ཟེར། །གོང་དུ་བསྔགས་པ་བརྗོད་པ་ཡི། །གཟུངས་མཆོག་དམ་པ་གང་ཡིན་པ། །རབ་དབེན་ཡོན་ཏན་མཆོག་ལྡན་ཞིང་། །
སངས་རྒྱས་སྤྱོད་ཡུལ་ཡིན་པས་ན། །གཟུངས་དོན་ཡང་དག་གང་ཡིན་པ། །ཡི་གེས་བརྗོད་བྱ་མ་ཡིན་ཡང་། །འཇིག་རྟེན་པ་ཡི་རྗེས་སུ་ནི། །བཏགས་པའི་མིང་གིས་བརྗོད་པ་ཡིན། །དེ་ནས་བཅོམ་
ལྡན་འདས་འཁོར་མང་པོ་དང་ཐབས་གཅིག་ཏུ་ཟླ་འོད་གཞོན་ནུའི་ཁྱིམ་དུ་བྱོན་པ་དང་། གདན་ཤམས་པ་ལ་རབ་ཏུ་བཞུགས་སོ། །དེ་ཡི་ཚེ་ཟླ་འོད་གཞོན་ནུར་གྱུར་པས་བཅོམ་ལྡན་འདས་གདན་ལ་བཞུགས་པར་རིག་

79-1-284b

སྟེ། བདག་ཉིད་མཆོད་པའི་ཡོ་བྱད་མཆོག་དམ་པ་ཐོགས་ནས། དེ་བཞིན་གཤེགས་པ་དང་འཁོར་འདུས་པ་ཆེན་པོ་རྣམས་ལ་རབ་ཏུ་ཕུལ་ཏེ་མཆོད་པ་དེ་ཡང་བསམ་གཏན་དང་། །ཏིང་ངེ་འཛིན་དང་། བསམ་གཏན་གྱི་ཡོན་ཏན་
ཁྱད་པར་དུ་འཕགས་པའི་དགེ་བའི་རྩ་བ་དང་བསམ་གྱིས་མི་ཁྱབ་པའི་མཐུ་ལས་མངོན་པར་གྲུབ་པ་ཤ་སྟག་གོ། དེ་ལྟར་མཆོད་པ་ཕུལ་བ་ཡང་བདག་འབའ་ཤིག་གི་ཕྱིར་མ་ཡིན་གྱི་སེམས་ཅན་ཚད་མེད་པ་ཐམས་ཅད་བླ་
ན་མེད་པའི་བྱང་ཆུབ་ལ་གཞོལ་ཞིང་ཕན་ཡོན་ཆེན་པོ་འཐོབ་པར་བྱ་བའི་ཕྱིར་མཆོད་ཅིང་ཕུལ་བས་ན་མཆོད་པ་དེས་ཀུན་དུ་ཁྱབ་ཅིང་ཐམས་ཅད་རབ་ཏུ་ཚིམ་པར་གྱུར་ཏོ། །དེ་ནས་བཅོམ་ལྡན་འདས་གདུགས་ཆོད་གསོལ་
བའི་འོག་ཏུ་འཁོར་འདུས་པ་མང་པོའི་མདུན་དུ་ཟླ་འོད་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །གཞོན་ནུ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་ཐེག་པ་ཆེན་པོ་ལ་གནས་ནས་སྦྱིན་པའི་ཚོགས་
མངོན་པར་སྒྲུབ་པར་བྱེད་ན་ཡོན་ཏན་ཁྱད་པར་དུ་འཕགས་པ་རྣམ་པ་བརྒྱད་བཅུ་དང་ལྡན་པར་འགྱུར་རོ། །རྣམ་པ་བརྒྱད་བཅུ་གང་ཞེ་ན། འདི་ལྟ་སྟེ། སེམས་ཅན་ཡོངས་སུ་སྨིན་པར་བྱེད་ཅིང་ཚིག་སྙན་པས་ཡོངས་སུ་སྡུད་པར་བྱེད་པ་དང་། མཚན་གྱ་
ནོམ་པ་ཡོངས་སུ་རྫོགས་པ་དང་། དབང་པོ་རྣམས་མ་ཚང་བ་མེད་པ་དང་། འཁོར་བ་སྤངས་ནས་མྱ་ངན་འདས་པ་མངོན་དུ་བྱེད་པ་དང་། ཉོན་མོངས་པ་རྣམས་ཟད་ནས་དབང་ཕྱུག་མཆོག་འཐོབ་པ་དང་། ཡོན་ཏན་ཕུན་སུམ་ཚོགས་ཤིང་སངས་རྒྱས་ཀྱི་ཞིང་རབ་ཏུ་བརྒྱན་པ་དང་། འཁོར་
རྣམ་པར་དག་པ་དང་། གཟི་བྱིན་ཆེན་པོ་དང་ལྡན་པ་དང་། ཤེས་རབ་ཕུན་སུམ་ཚོགས་པ་དང་། སྤྱོད་པ་ཁྱད་པར་དུ་འཕགས་པ་མཆོག་མངོན་པར་གྲུབ་པ་དང་། སྤྱོད་པ་བླ་ན་མེད་ཅིང་མཚུངས་པ་མེད་པ་ཡོངས་སུ་རྫོགས་པ་དང་། བག་ཆགས་ཡང་དག་པར་བཅོམ་ནས་དེ་བཞིན་གཤེགས་པའི་
ཐམས་ཅད་མཁྱེན་པའི་སྤྱོད་པ་འཕེལ་བར་བྱེད་པ་དང་། ལུས་དང་རིང་བསྲེལ་འཇིག་རྟེན་ཐམས་ཅད་དང་། ཉན་ཐོས་དང་། རང་སངས་རྒྱས་རྣམས་ཀྱིས་མཆོད་པར་འགྱུར་བ་དང་། མ་རུངས་པ་རྣམས་རབ་ཏུ་བཏུལ་བས་མིའི་རྒྱལ་པོ་དང་། ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་གི་རྒྱལ་པོ་དང་། ཚངས་

79-1-285a

པའི་རྒྱལ་པོ་རྣམས་ཡོངས་སུ་དང་བ་སྐྱེ་བར་འགྱུར་བ་དང་། མཐུ་ཆེན་པོ་དང་ལྡན་པ་དང་། མདོའི་སྡེ་དང་། ཚིགས་སུ་བཅད་པ་དང་། ལུང་དུ་བསྟན་པ་དང་། ཆེད་དུ་བརྗོད་པ་དང་། དབྱངས་ཀྱིས་བསྙད་པ་
དང་། རྟོགས་པ་བརྗོད་པ་དང་། གླེང་གཞི་དང་། དེ་ལྟ་བུ་བྱུང་བ་དང་། སྐྱེས་པའི་རབས་དང་། ཤིན་ཏུ་རྒྱས་པ་དང་། རྨད་དུ་བྱུང་བ་དང་། གཏན་ལ་ཕབ་པར་བསྟན་པའི་སྡེའི་བར་དུ་ལེན་པ་དང་། འཛིན་པ་དང་། ཡང་དག་
པར་སྟོན་པར་འགྱུར་བ་དང་། སེམས་ལ་ལེ་ལོ་མེད་པ་དང་། ཆོས་ལ་སེར་སྣ་མེད་པ་དང་། སངས་རྒྱས་ཀྱི་ལམ་ལ་ཡང་དག་པར་གནས་པ་དང་། འཇིག་རྟེན་ན་མཆོག་ཏུ་གྱུར་ཅིང་མིང་དང་གཟུགས་ཡོངས་སུ་དག་པར་འགྱུར་བ་དང་། 
ཆོས་ཀྱི་སྐུ་མངོན་དུ་བྱེད་པར་འགྱུར་བ་དང་། མི་འཇིགས་པ་ཐོབ་པར་འགྱུར་བ་དང་། བསོད་ནམས་ཕུན་སུམ་ཚོགས་པར་འགྱུར་བ་དང་། མུ་སྟེགས་ཅན་རྣམས་ཟིལ་གྱིས་གནོན་པ་དང་། སྐྱེས་བུ་དམ་པའི་ཆོས་ཕུན་སུམ་ཚོགས་པ་
དང་། སྡིག་པ་ཅན་གྱི་སྤྱོད་པ་སྤོང་བར་འགྱུར་བ་དང་། བསོད་ནམས་དང་ཡེ་ཤེས་ཀྱི་རྒྱུ་ལ་མངོན་པར་ཡིད་ཆེས་པ་དང་། སངས་རྒྱས་ཀྱི་ཆོས་སྡུད་པར་བྱེད་པ་དང་། བདུད་མང་པོ་ཕམ་པར་བྱེད་པ་དང་། སངས་རྒྱས་ཀྱིས་
གསུངས་པའི་ཆོས་བདེན་པ་དག་ལ་ཐེ་ཚོམ་དང་། ནེམ་ནུར་མེད་པ་དང་། འདོད་པ་ངན་པ་རྣམས་རབ་ཏུ་བཅོམ་པ་དང་། གཟི་བྱིན་ཆེན་པོ་དང་ལྡན་པ་དང་། བྱང་ཆུབ་སེམས་དཔའི་སྤྱོད་པ་མངོན་པར་བསྒྲུབས་པས་རྫུ་འཕྲུལ་
ཁྱད་པར་དུ་འཕགས་པ་འཐོབ་པར་འགྱུར་བ་དང་། སྐྱེ་ཤི་སྤོང་བར་འགྱུར་བ་དང་། སེམས་ཅན་ཡོངས་སུ་སྨིན་པར་བྱེད་པ་དང་། སྤྱོད་པ་དཔག་ཏུ་མེད་པའི་བསྔགས་པ་བརྗོད་པ་དང་། ཡོན་ཏན་རྣམས་ཡོངས་སུ་སྡུད་
པར་འགྱུར་བ་དང་། སེམས་ཅན་རྣམས་ལ་སྤྲོ་བ་བསྐྱེད་པ་དང་། ཆོས་ཀྱི་དགའ་བ་ལ་ཡོངས་སུ་སྤྱོད་པར་འགྱུར་བ་དང་། སྦྱིན་པ་གཏོང་བ་མངོན་པར་སྒྲུབ་པར་འགྱུར་བ་དང་། ཡེ་ཤེས་ཆེན་པོའི་སྒོར་འཇུག་པར་

79-1-285b

འགྱུར་བ་དང་། བྲོ་བར་གྱུར་བའི་ཆོས་ལ་གནས་པར་འགྱུར་བ་དང་། རིགས་ངེས་པ་ཉིད་དུ་འགྱུར་བ་དང་། ཆོས་ཀྱི་བཟོད་པ་བསྒྲུབ་པར་འགྱུར་བ་དང་། སངས་རྒྱས་ཀྱི་ལམ་ལ་བདེ་བར་གནས་པ་གང་ཡིན་པའོ། །གཞོན་
ནུ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་སྦྱིན་པའི་ཚོགས་མངོན་པར་སྒྲུབ་པར་བྱེད་ན་ཡོན་ཏན་ཁྱད་པར་དུ་འཕགས་པ་རྣམ་པ་བརྒྱད་བཅུ་པོ་འདི་དག་ཕུན་སུམ་ཚོགས་ཤིང་ཡོངས་སུ་རྫོགས་པར་འགྱུར་རོ། །
དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། བྱང་ཆུབ་སེམས་དཔའ་བློ་ཆེན་གང་། །སྦྱིན་པའི་ཚོགས་དང་ལྡན་པ་ལ། །ཕན་ཡོན་མཆོག་ནི་བརྒྱད་བཅུ་ཡོད། །ངས་མདོར་བསྡུས་
ཏེ་བསྟན་པ་ཡིན། །གཞན་ཡང་དཔག་མེད་བསམ་བཀའ་ཡི། །ཡོན་ཏན་དག་ནི་གང་ཡིན་པ། ཐམས་ཅད་སྦྱིན་པ་ལས་སྐྱེས་སྟེ། །དེང་འདིར་ཅུང་ཟད་བསྟན་པར་བྱ། །ཁྱོད་ཀྱིས་འཁོར་འདུས་མང་པོ་ལ། །མཉམ་
པའི་སེམས་ཀྱིས་གང་མཆོད་པ། །སྦྱིན་པའི་ཚོགས་ནི་དེ་དག་ལ། །མཁས་པ་རྣམས་ཀྱིས་བསྒྲུབ་པར་བྱ། །སྦྱིན་པ་འདི་ཡིས་བསགས་པ་ཡི། །བསོད་ནམས་ཕུང་པོ་བསམ་མི་ཁྱབ། །མཚན་དང་དཔེ་བྱད་
ལུས་བརྒྱན་པ། །ཐམས་ཅད་ཡོངས་སུ་རྫོགས་པར་འགྱུར། །སྐྱེ་གནས་དང་ནི་རུས་རིགས་དང་། །ཡུལ་རྣམས་དང་ནི་ཁྱིམ་དག་དང་། གྲགས་པ་དང་ནི་གཟུགས་དང་སེམས། །ཐམས་ཅད་ཡོངས་སུ་དག་
པར་འགྱུར། །ལྷ་རྣམས་རྫུ་འཕྲུལ་དངོས་པོ་དང་། །གཞལ་མེད་ཁང་དང་ལྷ་མོ་དང་། །རྣམ་དག་ཐོག་མེད་སྤོབས་པ་ཡང་། །སྦྱིན་པ་ལས་ནི་བྱུང་བ་ཡིན། །སྦྱིན་པའི་ཚོགས་མཆོག་གང་ཡིན་པ། །སངས་
རྒྱས་རྣམས་ཀྱིས་འདི་སྐད་དུ། །འདི་ནི་དང་པོར་བྱང་ཆུབ་རྣམས། །གནས་པའི་གཞི་ཞེས་བསྔགས་པར་མཛད། །བྱང་ཆུབ་སེམས་དཔའ་བརྩོན་འགྲུས་ཅན། །སྦྱིན་ལ་ཐེ་ཚོམ་མེད་པ་དག །ངེས་པའི་

79-1-286a

སེམས་ལ་རབ་གནས་ནས། །སྦྱིན་པ་ནན་ཏན་བསྒྲུབ་པར་གྱིས། །སྦྱིན་པའི་སེམས་ནི་གང་དག་གིས། །བསོད་ནམས་ཚོགས་ནི་རྫོགས་བྱེད་པ། །བྱང་ཆུབ་སེམས་དཔས་སྒྲུབ་བྱེད་ན། །སངས་
རྒྱས་བྱང་ཆུབ་འཐོབ་པར་འགྱུར། །སྦྱིན་པའི་མཐུ་ཡི་སྟོབས་ཀྱིས་ནི། །རྫུ་འཕྲུལ་མཆོག་ནི་རྫོགས་བྱེད་པས། །ཞིང་ནི་བྱེ་བ་བསྒུལ་བྱས་ཀྱང་། །སེམས་ཅན་རྣམས་ལ་གནོད་མི་འགྱུར། །སྦྱིན་པ་གཏང་བའི་དབང་
གིས་ན། །རྣམ་དག་ཚུལ་ཁྲིམས་མང་ཐོས་དང་། །ཡང་དག་ཡིད་ཆེས་བརྩོན་འགྲུས་དང་། །ཏིང་འཛིན་ཟག་མེད་ཤེས་རབ་འདྲེན། །སྦྱིན་པ་གཏང་བའི་དབང་གིས་ན། །དབང་པོ་སྟོབས་དང་ཡང་དག་ལམ། །ཡང་དག་
སྤོང་དང་རྫུ་འཕྲུལ་རྐང་། །བག་ཆགས་སྤོང་བ་འདྲེན་པར་བྱེད། །སྦྱིན་པ་གཏང་བའི་དབང་གིས་ན། །རྣམ་དག་སྒྲ་སྙན་དག་གིས་ནི། །ཞིང་ནི་བྱེ་བ་བརྒྱ་ཕྲག་ཏུ། །དཔག་མེད་ཆོས་སྟོན་འདྲེན་པར་བྱེད། ། ཡོངས་སུ་
དང་བས་སྦྱིན་གཏང་བས། །རྫུ་འཕྲུལ་རྣམས་ནི་མྱུར་དུ་འཐོབ། །རྫུ་འཕྲུལ་ཡོངས་སུ་རྫོགས་བྱའི་ཕྱིར། །ནན་ཏན་སྦྱིན་པ་གཏང་བར་གྱིས། །ལྷ་ནི་མང་པོ་ཚད་མེད་རྣམས། །ལྷ་མ་ཡིན་དང་ཀླུ་རྣམས་དང་། །གནོད་
སྦྱིན་བརྒྱ་སྟོང་མང་པོ་དང་། །འཁོར་རྣམས་ཀྱིས་ནི་ཡོངས་བསྐོར་ནས། །གཞལ་མེད་ཁང་མཆོག་རབ་ཞུགས་ཏེ། རང་དབང་དག་གིས་རྩེ་བྱེད་པ། །འདི་ལ་སོགས་པའི་རྒྱལ་པོ་རྣམས། །སྦྱིན་ལ་བརྩོན་པ་
མཐོང་གྱུར་ན། ཐམས་ཅད་ལངས་ནས་བསུ་ནས་ནི། །སྟན་བཏིང་མཆོད་པ་དག་ཀྱང་བྱེད། །སྦྱིན་གཏོང་གང་ཟག་གང་ཡིན་པ། །གཟི་བྱིན་ཆེན་པོ་ཕུན་ཚོགས་ཤིང་། །རྫུ་འཕྲུལ་སྟོབས་ལ་དབང་ཐོབ་པས། །
ལྷ་རྒྱལ་རྣམས་ནི་སྡུད་པར་བྱེད། །གྲུལ་བུམ་དང་ནི་གནོད་སྦྱིན་རྣམས། །ཐམས་ཅད་སྐྱབས་སུ་འགྲོ་བར་འགྱུར། །དྲི་ཟ་འཁོར་བཅས་རྣམས་ཀྱིས་ཀྱང་། །རོལ་མོ་དག་གིས་མཆོད་པར་བྱེད། །ཆོམ་རྐུན་དག་ནི་བྱམས་

79-1-286b

སེམས་བསྐྱེད། །མ་རུངས་པ་རྣམས་རིང་དུ་འགྲོ། །ནོར་རྣམས་ཉམས་པར་མི་གྱུར་ཏེ། །བང་མཛོད་དག་ནི་གང་བར་འགྱུར། །སྦྱིན་པ་ཡོངས་སུ་བཏང་བའི་ཕྱིར། །ཚོགས་མཆོག་དག་ནི་རྫོགས་པར་འགྱུར། །སངས་རྒྱས་
ཡེ་ཤེས་ཐུག་པར་མུ་སྟེགས་ཆོས་ནི་སྤྱོད་མི་བྱེད། །དེ་ལ་ན་བ་ཡོད་མེད་དེ། །གཟུངས་རྣམས་ཡོངས་སུ་སྲུང་བར་བྱེད། །ཁྱད་པར་འཕགས་པའི་སྟོབས་རྣམས་ཀྱང་། །སྦྱིན་པ་ལས་ནི་བྱུང་བ་ཡིན། །དེ་ལྟར་སྦྱིན་པ་
གང་གཏོང་བ། །བྱང་ཆུབ་ལམ་ནི་སྒྲུབ་པར་བྱེད། །མི་དགེ་བཤེས་གཉེན་ཕྲད་མི་འགྱུར། སྤྱོད་མཐུན་གྲོགས་པོ་འཐོབ་པར་འགྱུར། །གཞན་ཡང་བྱང་ཆུབ་སེམས་དཔའ་རྣམས། །སྦྱིན་པའི་ཚོགས་ནི་སོགས་བྱེད་པ། །
བསམ་གྱིས་མི་ཁྱབ་གཟུངས་དག་དང་། །ཤེས་རབ་ཡོངས་སུ་རྫོགས་བྱེད་པས། །ཚིགས་སུ་བཅད་པ་ཚད་མེད་ཀྱིས། །ཀུན་འཛིན་ཡང་དག་སྟོན་པར་བྱེད། ཐམས་ཅད་ལ་ནི་ཐོགས་མེད་པས། །ངོ་བོ་ཉིད་དོན་སྟོར་མི་འགྱུར། །
བྱང་ཆུབ་སེམས་ནི་རྒྱ་ཆེ་ལ། །མོས་པའི་སེམས་ནི་བརྟན་པར་འགྱུར། །ཚུལ་ཁྲིམས་དག་པ་ཕུན་ཚོགས་ཤིང་། །བདུད་ཀྱི་ལས་རྣམས་སྤོང་བར་བྱེད། །འདོད་པ་ལྔ་ལ་ཞེན་མེད་ཅིང་། །རྩེ་གཅིག་ཡང་དག་དྲན་པ་ཚོལ། །
སེམས་ལ་རྟག་ཏུ་རྨོངས་མེད་པས། །འདོད་པ་དག་ལ་སྲེད་མི་སྐྱེད། །ཞེ་སྡང་ཉོན་མོངས་གང་ཡིན་པ། །ཡང་དག་ཇི་བཞིན་རབ་ཏུ་རྟོགས། །སྤྱོད་ཡུལ་དག་ནི་ཐམས་ཅད་ལ། །ཞེན་པ་མེད་ཅིང་རྨོངས་པ་མེད། །གང་
ཟག་དེས་ནི་ཉོན་མོངས་རྣམས། །ལེགས་པ་ཉིད་དུ་རྟོགས་པར་འགྱུར། །རྒྱུ་དང་རྐྱེན་ནི་འདུས་པ་ལ། །ཉེས་དམིགས་རྣམས་ནི་སྐྱེ་བ་ནས། །སངས་རྒྱས་ཆོས་ཀྱི་བར་དག་གི། །རྒྱུ་དང་རྒྱུ་ཡི་རྒྱུ་ཉིད་དང་། །དེ་བཞིན་
རྒྱུ་ཡི་བྱ་བ་རྣམས། །ཐམས་ཅད་རབ་ཏུ་རྟོགས་པར་འགྱུར། །དེས་ནི་མིག་ཟད་མཐའ་ཡི་རྒྱུ། །གང་ཡིན་རབ་ཏུ་རྟོགས་པས་ན། །རྨོངས་པ་རྣམས་ནི་ཡོངས་སྤངས་ནས། །མིག་ལ་མངོན་པར་ཞེན་མི་འགྱུར། །དེས་

79-1-287a

ནི་མིག་གི་སྐྱེ་མཐའ་དང་། མཐའ་དང་རབ་ཏུ་དབེན་པ་དང་། །འཇུག་པ་དང་ནི་མེད་པ་དང་། །མི་སྐྱེ་བ་ནས་ཉེར་ཞིའི་བར། །འདི་ལ་སོགས་པའི་རྒྱུ་ཉིད་ཀྱང་། །རབ་ཏུ་རྟོགས་པར་གྱུར་བས་ན། །
རྨོངས་པ་རྣམས་ནི་ཡོངས་སྤངས་ནས། །མིག་ལ་མངོན་པར་ཞེན་མི་འགྱུར། །དེས་ནི་མིག་གི་སྔོན་མཐའ་ཡི། །བརྗོད་པ་འཇིག་རྟེན་རྗེས་སུ་ནི། །བཏགས་པ་ཡིན་པས་དེ་ལ་ནི། །ཡང་དག་ཅི་ཡང་མེད་པར་རྟོགས། །
དེས་ནི་མིག་གི་ཕྱི་མཐའ་ཡི། །བརྗོད་པ་འཇིག་རྟེན་རྗེས་སུ་ནི། །ཡང་དག་ཅི་ཡང་མེད་པར་རྟོགས། །དེས་ནི་མིག་གི་སྐྱེ་མཐའ་དང་། །མཐའ་དང་རབ་དབེན་འཇུག་པ་དང་། །ཅི་ཡང་མེད་དང་སྐྱེ་མེད་ནས། །ཉེ་བར་ཞི་
བའི་བར་དག་དང་། །འདི་ལ་སོགས་པའི་བརྗོད་པ་རྣམས། །འཇིག་རྟེན་རྗེས་སུ་བཏགས་པས་ན། །དེ་ལ་ཡང་དག་མེད་པར་ནི། །རབ་ཏུ་རྟོགས་པར་འགྱུར་བ་ཡིན། །དེས་ནི་མིག་གི་སྔོན་མཐའ་ཡི། །བརྗོད་པ་
རྒྱུ་རྐྱེན་འདུས་པ་ལས། །བྱུང་བ་ཉིད་དུ་རྟོགས་པས་ན། །དེ་ལ་ཞེན་པ་ཅི་ཡང་མེད། །དེས་ནི་མིག་གི་ཕྱི་མཐའ་ཡི། །བརྗོད་པ་རྒྱུ་རྐྱེན་འདུས་པ་ལས། །བྱུང་བ་ཉིད་དུ་རྟོགས་པས་ན། །དེ་ལ་ཞེན་པ་ཅི་ཡང་མེད། །དེས་
ནི་མིག་གི་སྐྱེ་མཐའ་དང་། །མཐའ་དང་རབ་དབེན་འཇུག་པ་དང་། །ཅི་ཡང་མེད་དང་སྐྱེ་མེད་ནས། །ཉེ་བར་ཞི་བའི་བར་དག་དང་། །འདི་ལ་སོགས་པའི་བརྗོད་པ་རྣམས། །རྒྱུ་དང་རྐྱེན་ནི་འདུས་པ་ལས། །བྱུང་བ་ཉིད་
དུ་རྟོགས་པས་ན། །དེ་ལ་ཞེན་པ་ཅི་ཡང་མེད། །དེས་ནི་མིག་གི་སྔོན་མཐའ་ཡི། །བརྗོད་པའི་རང་བཞིན་བསྟན་མེད་པར། །རབ་ཏུ་རྟོགས་པར་གྱུར་པས་ན། །དེ་ལ་ཞེན་པ་ཅི་ཡང་མེད། དེས་ནི་མིག་གི་ཕྱི་
མཐའ་ཡི། །བརྗོད་པ་རང་བཞིན་བསྟན་མེད་པར། །རབ་ཏུ་རྟོགས་པར་གྱུར་པས་ན། །དེ་ལ་ཞེན་པ་ཅི་ཡང་མེད། །དེས་ནི་མིག་གི་སྐྱེ་མཐའ་དང་། །མཐའ་དང་རབ་དབེན་འཇུག་པ་དང་། །ཅི་ཡང་མེད་དང་སྐྱེ་

79-1-287b

མེད་ནས། །ཉེ་བར་ཞི་བའི་བར་དག་དང་། འདི་ལ་སོགས་པའི་བརྗོད་པ་རྣམས། །རང་བཞིན་གྱིས་ནི་བསྟན་མེད་པར། །རབ་ཏུ་རྟོགས་པར་གྱུར་པས་ན། །དེ་ལ་ཞེན་པ་ཅི་ཡང་མེད། །རྣ་བ་སྣ་ལྕེ་ལུས་དང་ཡིད། །
ཡུལ་དྲུག་དང་ནི་འབྱུང་ཆེན་བཞི། །འཇིག་རྟེན་སྐྱེ་བའི་མིང་གི་བར། །ཐམས་ཅད་དེ་བཞིན་སྦྱར་བར་བྱ། །དེས་ནི་འདོད་ཆགས་སངས་རྒྱས་ལམ། །རང་བཞིན་དབྱེར་མེད་ཡིན་པར་ནི། །རབ་ཏུ་རྟོགས་པར་གྱུར་པས་ན། །
འདོད་ཆགས་ལ་ནི་ཞེན་པ་མེད། །སངས་རྒྱས་ལམ་ནི་ཐམས་ཅད་ཀུན། །ཉོན་མོངས་ལས་ནི་བཙལ་བར་བྱ། །རང་བཞིན་དབྱེར་མེད་རབ་ཤེས་ན། །ཀུན་འཛིན་སྒོར་ནི་ཞུགས་པ་ཡིན། །འདོད་ཆགས་ཀུན་འཛིན་
ཡིན་པ་དང་། །ཀུན་འཛིན་འདོད་ཆགས་ཡིན་སྟོན་ཅིང་། །རང་བཞིན་དབྱེར་མེད་རབ་ཤེས་ན། །ཀུན་འཛིན་སྒོར་ནི་སློབ་པ་ཡིན། །དེ་བཞིན་འདོད་ཆགས་གང་མཆོད་པ། །དེ་ནི་སངས་རྒྱས་མཆོད་པ་ཡིན། །
སངས་རྒྱས་ལ་ནི་མཆོད་པའི་ཕྱིར། །ཀུན་འཛིན་སྒོར་ནི་རྫོགས་པར་འགྱུར། །དེས་ནི་ཞེ་སྡང་སངས་རྒྱས་ལམ། །རང་བཞིན་དབྱེར་མེད་ཡིན་པར་ནི། །རབ་ཏུ་རྟོགས་པར་གྱུར་བས་ན། །ཞེ་སྡང་ལ་ནི་ཞེན་པ་མེད། །
ཞེ་སྡང་ཀུན་འཛིན་ཡིན་པ་དང་། །ཀུན་འཛིན་ཞེ་སྡང་ཡིན་སྟོན་ཅིང་། །རང་བཞིན་དབྱེར་མེད་རབ་ཤེས་ན། །ཀུན་འཛིན་སྒོ་ནི་སློབ་པ་ཡིན། །དེ་བཞིན་ཞེ་སྡང་གང་མཆོད་པ། །དེ་ནི་སངས་རྒྱས་མཆོད་པ་ཡིན། །
སངས་རྒྱས་ལ་ནི་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེས་ནི་གཏི་མུག་སངས་རྒྱས་ལམ། །རང་བཞིན་དབྱེར་མེད་ཡིན་པར་ནི། །རབ་ཏུ་རྟོགས་པར་གྱུར་པས་ན། །གཏི་མུག་ལ་ནི་ཞེན་པ་
མེད། །གལ་ཏེ་གཏི་མུག་ཉིད་ཀྱི་མཐའ། །ཡང་དག་ཇི་བཞིན་རྟོགས་གྱུར་ན། །དེས་ནི་སངས་རྒྱས་ལམ་བསྒྲུབས་པས། །ཀུན་འཛིན་སྒོ་ནི་རྫོགས་པར་འགྱུར། །གཏི་མུག་ཀུན་འཛིན་ཡིན་པ་དང་། །ཀུན་འཛིན་

79-1-288a

གཏི་མུག་ཡིན་སྟོན་ཅིང་། །རང་བཞིན་དབྱེར་མེད་རབ་ཤེས་ན། །ཀུན་འཛིན་སྒོ་ནི་སློབ་པ་ཡིན། །དེ་བཞིན་གཏི་མུག་གང་མཆོད་པ། །དེ་ནི་སངས་རྒྱས་མཆོད་པ་ཡིན། །སངས་རྒྱས་ལ་ནི་མཆོད་པའི་
ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །དེ་ནི་ཆོས་ལ་མཆོད་པ་ཡིན། །ཆོས་ལ་མཆོད་པ་བྱས་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་
མཆོད་པ། །དེ་ནི་དགེ་འདུན་མཆོད་པ་ཡིན། །དགེ་འདུན་ལ་ནི་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །དེ་ནི་ཚུལ་ཁྲིམས་མཆོད་པ་ཡིན། །ཚུལ་ཁྲིམས་ལ་ནི་
མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །བརྩོན་འགྲུས་ལ་ནི་མཆོད་པ་ཡིན། །བརྩོན་འགྲུས་ལ་ནི་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །
དེ་བཞིན་གཏི་མུག་གང་མཆོད་པ། །བསྔགས་པ་བརྗོད་ཅིང་མཆོད་པ་ཡིན། བསྔགས་པ་བརྗོད་ཅིང་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །སངས་རྒྱས་
ཆོས་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། དེ་བཞིན་གཏི་མུག་གང་མཆོད་པ། །ཆོས་ཉིད་ལ་ནི་མཆོད་པ་ཡིན། ཆོས་ཉིད་ལ་ནི་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་
གཏི་མུག་གང་མཆོད་པ། །དེ་བཞིན་ཉིད་ལ་མཆོད་པ་ཡིན། །དེ་བཞིན་ཉིད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །སྐྱེ་བ་མེད་ལ་མཆོད་པ་ཡིན། །སྐྱེ་བ་མེད་ལ་
མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །འགག་པ་མེད་ལ་མཆོད་པ་ཡིན། འགག་པ་མེད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་

79-1-288b

བཞིན་གཏི་མུག་གང་མཆོད་པ། །ཟག་པ་མེད་ལ་མཆོད་པ་ཡིན། །ཟག་པ་མེད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །ཅི་ཡང་མེད་ལ་མཆོད་པ་ཡིན། །ཅི་ཡང་མེད་ལ་མཆོད་པའི་ཕྱིར། །ཀུན་འཛིན་
སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །དཔག་ཏུ་མེད་ལ་མཆོད་པ་ཡིན། །དཔག་ཏུ་མེད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །སྲིད་པ་
གསུམ་ལ་མཆོད་པ་ཡིན། །སྲིད་པ་གསུམ་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །རབ་དབེན་ལ་ནི་མཆོད་པ་ཡིན། །རབ་དབེན་ལ་ནི་མཆོད་པའི་ཕྱིར། །ཀུན་
འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །འཁོར་བར་འཇུག་ལ་མཆོད་པ་ཡིན། །འཁོར་བར་འཇུག་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་
གང་མཆོད་པ། །འཇུག་པ་མེད་ལ་མཆོད་པ་ཡིན། །འཇུག་པ་མེད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །ཡོད་པ་མིན་ལ་མཆོད་པ་ཡིན། །ཡོད་པ་
མིན་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །བྱུང་བ་མེད་ལ་མཆོད་པ་ཡིན། །བྱུང་བ་མེད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །
དེ་བཞིན་གཏི་མུག་གང་མཆོད་པ། །ཉེ་བར་ཞི་ལ་མཆོད་པ་ཡིན། །ཉེ་བར་ཞི་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། འོང་བ་མེད་ལ་མཆོད་པ་ཡིན། །
འོང་བ་མེད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །འགྲོ་བ་མེད་ལ་མཆོད་པ་ཡིན། །འགྲོ་བ་མེད་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་

79-1-289a

འགྱུར། །དེ་བཞིན་གཏི་མུག་གང་མཆོད་པ། །འདུས་བྱས་ལ་ནི་མཆོད་པ་ཡིན། །འདུས་བྱས་ལ་ནི་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །སྡུག་
བསྔལ་ལ་སོགས་མཆོད་པ་ཡིན། །སྡུག་བསྔལ་ལ་སོགས་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །སྡུག་བསྔལ་ཤེས་ལ་མཆོད་པ་ཡིན། །སྡུག་བསྔལ་
ཤེས་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །ཀུན་འབྱུང་ཤེས་ལ་མཆོད་པ་ཡིན། །ཀུན་འབྱུང་ཤེས་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་
འགྱུར། །དེ་བཞིན་གཏི་མུག་གང་མཆོད་པ། །འགོག་པ་ཤེས་ལ་མཆོད་པ་ཡིན། །འགོག་པ་ཤེས་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །ལམ་ཤེས་ལ་ནི་
མཆོད་པ་ཡིན། །ལམ་ཤེས་ལ་ནི་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །ཆོས་ཤེས་ལ་ནི་མཆོད་པ་ཡིན། །ཆོས་ཤེས་ལ་ནི་མཆོད་པའི་ཕྱིར། །ཀུན་འཛིན་
སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །རྗེས་ལ་ཤེས་ལ་མཆོད་པ་ཡིན། །རྗེས་ལ་ཤེས་ལ་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །སྐྱེ་
མེད་ཡེ་ཤེས་མཆོད་པ་ཡིན། །སྐྱེ་མེད་ཡེ་ཤེས་མཆོད་པའི་ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་གཏི་མུག་གང་མཆོད་པ། །ཟད་པའི་ཡེ་ཤེས་མཆོད་པ་ཡིན། །ཟད་པའི་ཡེ་ཤེས་མཆོད་པའི་
ཕྱིར། །ཀུན་འཛིན་སྒོ་ནི་རྫོགས་པར་འགྱུར། །དེ་བཞིན་ཡང་དག་སྤོང་བ་དང་། །དྲན་པ་ཉེར་གཞག་རྫུ་འཕྲུལ་རྐང་། །དབང་པོ་ལྔ་དང་སྟོབས་ལྔ་དང་། །བྱང་ཆུབ་ཡན་ལག་བདུན་པོ་དང་། །ཡན་ལག་བརྒྱད་པའི་

79-1-289b

ལམ་དག་དང་། །ཞི་གནས་ལྷག་མཐོང་ལ་སོགས་པ། །ཆོས་ནི་རྣམ་པར་དགུ་པོ་རྣམས། །ཐམས་ཅད་དེ་བཞིན་སྦྱར་པར་བྱ། །དེ་ནས་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། རིགས་ཀྱི་བུ་སེམས་
ཅན་གང་ལ་ལ་ཞིག་ཐེག་པ་ལ་གནས་ནས། གོང་དུ་ཇི་སྐད་བསྟན་པའི་གཟུངས་མངོན་པར་བསྒྲུབ་པར་འདོད་པས་གང་ཟག་རྣམ་པ་བརྒྱད་བཅུ་ཡོངས་སུ་སྡང་བར་བྱའོ། །རྣམ་པ་བརྒྱད་བཅུ་གང་ཞེ་ན། འདི་ལྟ་སྟེ། ཕ་བསད་པ་
དང་། མ་བསད་པ་དང་། དགྲ་བཅོམ་བ་བསད་པ་དང་། གནོད་སེམས་ཀྱིས་དེ་བཞིན་གཤེགས་པའི་སྐུ་ལ་མཚལ་ཕྱུང་བ་དང་། དགེ་འདུན་འཐུན་པ་གཤིག་པ་དང་། རྐུན་བུར་རབ་ཏུ་བྱུང་བ་དང་། དབང་པོ་མ་ཚང་བ་དང་། དབང་པོ་
གཉིས་དང་ལྡན་པ་དང་། ལོག་པར་ལྟ་བ་དང་། ལོག་པར་སེམས་པ་དང་། ལོག་པར་སྨྲ་བ་དང་། ལོག་པའི་ལམ་ཅན་དང་། ལོག་པར་འཚོ་བ་དང་། ལོག་པར་བརྩོན་པ་དང་། །ལོག་པའི་དྲན་པ་ཅན་དང་། ལོག་པའི་ཏིང་ངེ་འཛིན་
ལ་གནས་པ་དང་། གནས་མི་ཤེས་པ་དང་། །དུས་མི་ཤེས་པ་དང་། ཚོད་མི་ཤེས་པ་དང་། ལམ་མི་ཤེས་པ་དང་། ཚད་མི་ཤེས་པ་དང་། བདག་དང་གཞན་མི་ཤེས་པ་དང་། སངས་རྒྱས་དང་། ཆོས་དང་། དགེ་འདུན་དང་། 
བསླབ་པའི་གནས་རྣམས་ལ་གུས་པ་མེད་པ་དང་། བག་ཡོད་པ་དང་སྤྱོད་ཡུལ་ཁྱད་པར་དུ་འཕགས་པ་དག་ལ་བཙུན་པར་མི་འཛིན་པ་དང་། ཆོས་མི་ཤེས་པ་དང་། འདུལ་བ་མི་ཤེས་པ་དང་། བསླབ་པའི་གནས་མི་ཤེས་
པ་དང་། ཁ་ན་མ་ཐོ་བ་དང་ལྕི་བ་དང་ཡང་བ་མི་ཤེས་པ་དང་། ཚུལ་ཁྲིམས་ཉམས་པ་དང་རལ་བ་མི་ཤེས་པ་དང་། གཞན་ཡང་སྤྱོད་པ་ཤིན་ཏུ་ཕྲ་བ་དང་རགས་པ་མི་ཤེས་པ་དང་། ལས་མ་འོངས་པ་དང་ད་ལྟར་བྱུང་བ་མི་
ཤེས་པ་དང་། དངོས་པོ་དམན་པ་རྣམས་མི་ཤེས་པ་དང་། ཉན་ཐོས་ཀྱི་ཐེག་པའི་བསྔགས་པ་བརྗོད་ཅིང་དེ་བཞིན་གཤེགས་པའི་ཆོས་ལ་སྐུར་པ་འདེབས་པ་དང་། རང་སངས་རྒྱས་ཀྱི་ཐེག་པ་སྒྲུབ་པར་བསྐུལ་བ་དང་། 

79-1-290a

བླ་ན་མེད་པའི་ལམ་ཡང་དག་པ་ལ་སྐྱོ་ཞིང་སྤོང་བར་བྱེད་པ་དང་། ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་ལམ་ཉམས་པ་དང་། ལམ་མ་ཡིན་པ་སྤྱོད་པ་དང་། བདག་ཡོད་པར་
སྨྲ་བ་དང་། སེམས་ཅན་ཡོད་པར་སྨྲ་བ་དང་། སྲོག་ཡོད་པར་སྨྲ་བ་དང་། གང་ཟག་ཡོད་པར་སྨྲ་བ་དང་། བསམ་པ་ཤིན་དུ་དམན་ཞིང་འདོད་ཆགས་དང་། ཞེ་སྡང་དང་། གཏི་མུག་སྐྱེད་པར་བྱེད་པ་དང་། ཆད་པར་ལྟ་བ་དང་། 
རྟག་པར་ལྟ་བ་དང་། སྟོང་ཞིང་རྒྱུ་མེད་པར་ལྟ་བ་དང་། ཡོད་པ་མི་མཐོང་བ་དང་། མེད་པ་མི་མཐོང་བ་དང་། ལས་མི་མཐོང་བ་དང་། བརྩོན་འགྲུས་མི་མཐོང་བ་དང་། ལས་མི་ཤེས་པ་དང་། ལས་ཀྱི་རྒྱུ་མི་ཤེས་པ་
དང་། རྣམ་པར་སྨིན་པ་མི་ཤེས་པ་དང་། རྣམ་པར་སྨིན་པའི་རྒྱུ་མི་ཤེས་པ་དང་། དབང་པོ་རྣམས་མི་ཤེས་པ་དང་། དབང་པོ་རྣམས་ཀྱི་རྒྱུ་མི་ཤེས་པ་དང་། ཁམས་མི་ཤེས་པ་དང་། ཁམས་ཀྱི་རྒྱུ་མི་ཤེས་པ་དང་། 
རྣམ་པར་གྲོལ་བ་མི་ཤེས་པ་དང་། རྣམ་པར་གྲོལ་བའི་རྒྱུ་མི་ཤེས་པ་དང་། ལམ་མི་ཤེས་པ་དང་། ལམ་གྱི་རྒྱུ་མི་ཤེས་པ་དང་། ཉོན་མོངས་པ་མི་ཤེས་པ་དང་། ཉོན་མོངས་པའི་རྒྱུ་མི་ཤེས་པ་དང་། གཏོང་བ་
མི་ཤེས་པ་དང་། གཏོང་བའི་རྒྱུ་མི་ཤེས་པ་དང་། སྔོན་གྱི་མཐའ་དང་ཕྱི་མའི་མཐའ་མི་ཤེས་པ་དང་། སྔོན་གྱི་མཐའ་དང་ཕྱི་མའི་མཐའི་རྒྱུ་མི་ཤེས་པ་དང་། སྐྱེ་ཤི་མི་ཤེས་པ་དང་། སྐྱེ་ཤིའི་རྒྱུ་མི་ཤེས་པ་
དང་། ཟག་པ་དང་བཅས་པ་མི་ཤེས་པ་དང་། ཟག་པ་དང་བཅས་པའི་རྒྱུ་མི་ཤེས་པ་དང་། ཟད་པ་དང་ཟད་པ་མ་ཡིན་པ་མི་ཤེས་པ་དང་། ཡོད་པ་དང་ཡོད་པ་མ་ཡིན་པ་མི་ཤེས་པ་དང་། མཐའ་དང་མཐའ་
མ་ཡིན་པ་མི་ཤེས་པ་དང་། དབེན་པ་དང་དབེན་པ་མ་ཡིན་པ་མི་ཤེས་པ་དང་། འཇུག་པ་དང་འཇུག་པ་མ་ཡིན་པ་མི་ཤེས་པ་དང་། ངོ་བོ་ཉིད་དང་ངོ་བོ་ཉིད་མ་ཡིན་པ་མི་ཤེས་པ་དང་། སྐྱེ་བ་དང་སྐྱེ་བ་མ་ཡིན་པ་མི་

79-1-290b

ཤེས་པ་དང་། འགག་པ་དང་འགག་པ་མ་ཡིན་པ་མི་ཤེས་པ་གང་ཡིན་པ་སྟེ། གཞོན་ནུ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གོང་དུ་ཇི་སྐད་དུ་བསྟན་པའི་གཟུངས་མངོན་པར་བསྒྲུབ་པར་འདོད་པས་ཆོས་མ་ཡིན་པ་སྤྱོད་པའི་གང་ཟག་
བརྒྱད་བཅུ་པོ་འདི་དག་ཡོངས་སུ་སྤང་བར་བྱའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། གང་ཞིག་མིག་གི་སྐྱེ་མཐའ་དང་། །ཟད་མཐའ་དག་ནི་མི་རྟོགས་པ། །དེ་ནི་ཀུན་འཛིན་ལ་རྨོངས་པས། །
མཁས་པས་ཡོངས་སུ་སྤང་བར་བྱ། །གང་ཞིག་མིག་ལ་བདག་མེད་དང་། །སེམས་ཅན་མེད་པར་རྟོགས་གྱུར་པ། །དེས་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་ནི་སྐྱེ་ཟད་དང་། །ཡི་གེ་སྤངས་པར་
རྟོགས་གྱུར་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་གི་དབེན་པ་དང་། །གནས་པ་མེད་པར་རྟོགས་གྱུར་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་
ཞིག་མིག་གི་རང་བཞིན་ཉིད། །གནས་པ་མེད་པར་རྟོགས་གྱུར་པས། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་ལ་འཇུག་མེད་དང་། །གཟུགས་ཀྱི་མཚན་ཉིད་མེད་རྟོགས་པ། །དེ་ནི་ཀུན་འཛིན་ལ་གནས་
པས། །མཁས་པ་ཡོངས་སུ་བསྟེན་པར་བྱ། །གང་ཞིག་མིག་ལ་སྐྱེ་མེད་དང་། །རང་བཞིན་ཞི་བར་རྟོགས་གྱུར་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་ནི་རང་བཞིན་གྱིས། །མིག་གི་མཚན་ཉིད་སྤངས་པས་ན། །
སངས་རྒྱས་རྣམས་ཀྱི་བསྔགས་པ་དང་། །བསྟན་དུ་མེད་པར་རྟོགས་གྱུར་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་ནི་རང་བཞིན་གྱིས། །མིག་གི་མཚན་ཉིད་སྤངས་པས་ན། །སུ་ཡང་སེམས་ཤིང་འཛིན་པ་དང་། །
བཤད་དུ་མེད་པར་རྟོགས་གྱུར་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །དེ་བཞིན་གཟུངས་ཀྱི་ངོ་བོ་ཉིད། །ཡི་གེས་བརྗོད་བྱ་མ་ཡིན་པས། །ཕྱོགས་ཀྱང་ཡོད་པ་མ་ཡིན་ལ། །སེམས་ཀྱིས་ཀྱང་ནི་ཕྱིན་མི་འགྱུར། །

79-1-291a

ཆོས་དེ་ལ་ནི་དགའ་བ་མེད། །ཞེ་སྡང་ལ་ཡང་གནས་པ་མིན། །རི་རྒྱལ་བཞིན་དུ་མི་གཡོ་བས། །རྗོད་པར་བྱེད་ཀྱང་དམིགས་སུ་མེད། །ཀུན་འཛིན་ཡང་དག་ཡོད་མ་ཡིན། །བདག་ཀྱང་ཡོད་པ་མ་ཡིན་ཏེ། །
གལ་ཏེ་བདག་ནི་རང་བཞིན་སྟོང་། །ཀུན་འཛིན་ཡང་ནི་ཡོད་མི་འགྱུར། །ཀུན་འཛིན་རང་བཞིན་སྟོང་ཡིན་ན། །བྱིས་པས་ཡོད་པར་རབ་ཏུ་བརྟགས། །ཡང་དག་མ་ཡིན་བརྟགས་པས་ན། །མ་ཐོས་པར་ཡང་མྱ་ངན་སྐྱེད། །གང་
ཞིག་འདོད་དང་ཀུན་འཛིན་དག །སྟོང་པ་ཉིད་དུ་རྣམ་རྟོག་པ། །རྟོག་པ་གཉིས་པོ་དེ་དག་ཀྱང་། །མཐར་ནི་གང་ཡང་དམིགས་མི་འགྱུར། །གལ་ཏེ་སྟོང་ཉིད་སྟོང་རྟོགས་ན། །ཀུན་འཛིན་དག་ཀྱང་ཡོད་མི་འགྱུར། །བྱང་ཆུབ་
ཡན་ལག་བར་དག་དང་། །ཏིང་འཛིན་དག་ཀྱང་སྟོང་པ་ཡིན། །གང་ཞིག་ཀུན་འཛིན་སྟོང་ཉིད་དང་། །ཏིང་འཛིན་དག་གི་བར་དག་ཀྱང་། །རབ་ཏུ་རྟོགས་པར་གྱུར་ན་ནི། །མིག་ཀྱང་རབ་ཏུ་རྟོགས་པར་འགྱུར། །གང་ཞིག་མིག་ནི་ཟད་
པའི་མཐའ། །ཡང་དག་ཇི་བཞིན་རབ་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་ནི་སྐྱེ་བའི་མཐའ། །ཡང་དག་ཇི་བཞིན་རབ་རྟོགས་ན། །ཀུན་འཛིན་སྒོ་ནི་གང་
ཡིན་པ། །མཐར་ནི་ཡོངས་སུ་རྟོགས་པར་བྱེད། །གང་ཞིག་མིག་གི་མཐའ་ཡི་རྣམས། །ཡང་དག་ཇི་བཞིན་རབ་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་ནི་
རབ་དབེན་པ། །ཡང་དག་ཇི་བཞིན་རབ་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་གི་འཇུག་པ་དག །ཡང་དག་ཇི་བཞིན་རབ་རྟོགས་ན། །ཀུན་འཛིན་སྒོ་ནི་
གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་ནི་ཡོད་མིན་པ། །ཡང་དག་ཇི་བཞིན་རབ་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་

79-1-291b

ནི་ཉེར་ཞི་བ། །ཡང་དག་ཇི་བཞིན་རབ་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་ནི་འགྱུར་བ་ཡི། །ཟད་མཐའ་ཡང་དག་བཞིན་རྟོགས་ན། །ཀུན་འཛིན་སྒོ་ནི་གང་
ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་གི་འགྱུར་བ་ཡི། །སྐྱེ་མཐའ་ཡང་དག་བཞིན་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་
གི་འགྱུར་བ་ཡི། །མཐར་ནི་ཡང་དག་བཞིན་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་གི་འགྱུར་བ་ཡི། །རབ་དབེན་ཡང་དག་བཞིན་རྟོགས་ན། །ཀུན་འཛིན་སྒོ་ནི་གང་
ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་གི་འགྱུར་བ་ཡི། །འཇུག་པ་ཡང་དག་བཞིན་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་གི་འགྱུར་
བ་ཡི། །མེད་པ་ཡང་དག་བཞིན་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །གང་ཞིག་མིག་གི་འགྱུར་བ་ཡི། །སྐྱེ་མེད་ཡང་དག་བཞིན་རྟོགས་ན། །ཀུན་འཛིན་སྒོ་ནི་གང་ཡིན་པ། །
མཐར་ནི་ཡོངས་སུ་རྫོགས་པར་བྱེད། གང་ཞིག་མིག་གི་འགྱུར་བ་ཡི། །ཉེར་ཞི་ཡང་དག་བཞིན་རྟོགས་ན། །ཀུན་འཛིན་སྒོ་ནི་གང་ཡིན་པ། །མཐར་ནི་ཡོངས་སུ་རྫོགས་པར་བྱེད། །རྣ་བ་སྣ་ལྕེ་ལུས་དང་ཡིད། །ཡུལ་དྲུག་དང་ནི་
འབྱུང་ཆེན་བཞི། །འཇིག་རྟེན་སྐྱེ་བའི་མིང་གི་བར། །ཐམས་ཅད་དེ་བཞིན་སྦྱར་བར་བྱ། །གང་ཞིག་མིག་གི་སྔོན་མཐའ་ལ། །འགྱུར་དང་ཐ་དང་མཚན་ཉིད་མེད། །ལེན་དང་རྣམ་རྟོག་མེད་གྱུར་པ། །ཀུན་འཛིན་
སྒོ་ལ་གནས་པ་ཡིན། །གང་ཞིག་མིག་གི་ཟད་མཐའ་ལ། །འགྱུར་དང་ཐ་དད་མཚན་ཉིད་མེད། །ལེན་དང་རྣམ་རྟོག་མེད་འགྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་སྐྱེ་མཐའ་ལ། །འགྱུར་

79-1-292a

དང་ཐ་དད་མཚན་ཉིད་མེད། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་མཐའ་དག་ལ། །འགྱུར་དང་ཐ་དད་མཚན་ཉིད་མེད། །ལེན་དང་རྣམ་རྟོག་མེད་
གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་ཉེར་ཞི་ལ། །འགྱུར་དང་ཐ་དད་མཚན་ཉིད་མེད། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་འཇུག་པ་ལ། །འགྱུར་
དང་ཐ་དད་མཚན་ཉིད་མེད། །ལེན་དང་རྣམ་རྟོག་མེད་གྱུར་པ། ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་མེད་པ་ལ། །འགྱུར་དང་ཐ་དད་མཚན་ཉིད་མེད། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་
པ་ཡིན། །གང་ཞིག་མིག་གི་སྐྱེ་མེད་ལ། །འགྱུར་དང་ཐ་དད་མཚན་ཉིད་མེད། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་ཉེར་ཞི་ལ། །འགྱུར་དང་ཐ་དད་མཚན་ཉིད་མེད། །ལེན་དང་
རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །རྣ་བ་སྣ་ལྕེ་ལུས་དང་ཡིད། །ཡུལ་དྲུག་དང་ནི་འབྱུང་ཆེན་བཞི། འཇིག་རྟེན་སྐྱེ་བའི་མིང་གི་བར། །ཐམས་ཅད་དེ་བཞིན་སྦྱར་བར་བྱ། །འདོད་སྡང་གཏི་མུག་ང་རྒྱལ་ཆེ། །
ཕྲག་དོག་སེར་སྣ་སྒྱུ་མྱ་ངན། །ཉེས་དམིགས་དྲི་མ་ཟུག་རྔུ་དང་། །ཆུ་བོ་དཀར་ནག་ལས་རྣམས་དང་། །སྐྱེ་བ་མེད་དང་འགག་མེད་དང་། །འགྲོ་བ་མེད་དང་འོང་མེད་དང་། །མི་གཡོ་ཐ་དད་མི་འགྱུར་དང་། །བྱས་མིན་སྤྱོད་པ་མ་ཡིན་
དང་། །སྣང་མིན་མུན་པ་མ་ཡིན་དང་། །འཇུག་མིན་ཆུ་བོ་སྤངས་པ་དང་། །ཟག་པ་མེད་དང་གནས་མེད་དང་། །འགྲོ་མིན་མི་འགྲོ་མ་ཡིན་དང་། །ཡི་གེ་མ་ཡིན་དམིགས་མིན་དང་། །འབྱུང་བ་མ་ཡིན་འཇུག་མིན་དང་། །ཡང་
དག་མ་ཡིན་རྣམ་རྟོག་སོགས། །སྒོ་ནི་དྲུག་བཅུ་རྩ་གཉིས་རྣམས། །སོ་སོའི་དོན་དང་ཅི་རིགས་པར། །ཐམས་ཅད་དེ་བཞིན་སྦྱར་བར་བྱ། །གང་ཞིག་མིག་གི་སྔོན་མཐའ་ཡི། །རབ་དང་ཐ་མའི་བར་ཤེས་ཤིང་། །ལེན་དང་

79-1-292b

རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་ཟད་མཐའ་ཡི། །རབ་དང་ཐ་མའི་བར་ཤེས་ཤིང་། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་སྐྱེ་
མཐའ་ཡི། །རབ་དང་ཐ་མའི་བར་ཤེས་ཤིང་། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་མཐའ་དག་གི། །རབ་དང་ཐ་མའི་བར་ཤེས་ཤིང་། །ལེན་དང་རྣམ་རྟོག་མེད་གྱུར་པ། །ཀུན་
འཛིན་སྒོ་ལ་གནས་པ་ཡིན། །གང་ཞིག་མིག་གི་རབ་དབེན་པའི། །རབ་དང་ཐ་མའི་བར་ཤེས་ཤིང་། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་འཇུག་པ་ཡི། །རབ་དང་ཐ་མའི་
བར་ཤེས་ཤིང་། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་ནི་མེད་པ་ཡི། རབ་དང་ཐ་མའི་བར་ཤེས་ཤིང་། །ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་
མིག་ནི་མི་སྐྱེ་བའི། །རབ་དང་ཐ་མའི་བར་ཤེས་ཤིང་། ལེན་དང་རྣམ་རྟོག་མེད་གྱུར་པ། །ཀུན་འཛིན་སྒོ་ལ་གནས་པ་ཡིན། །གང་ཞིག་མིག་གི་ཉེར་ཞི་བའི། །རབ་དང་ཐ་མའི་རབ་ཤེས་ཤིང་། །ལེན་དང་རྣམ་རྟོག་མེད་གྱུར་པ། །
ཀུན་འཛིན་སྒོ་ལ་གནས་པ་ཡིན། །རྣ་བ་སྣ་ལྕེ་ལུས་དང་ཡིད། །ཡུལ་དྲུག་དང་ནི་འབྱུང་ཆེན་བཞི། །འཇིག་རྟེན་སྐྱེ་བའི་མིང་གི་བར། ཐམས་ཅད་དེ་བཞིན་སྦྱར་བར་བྱ། །ས་ལ་འགྱུར་བ་མེད་པ་དང་། །ལེན་དང་རྣམ་རྟོག་མེད་
པར་ནི། །དེ་ལྟར་གང་ཞིག་རྟོག་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །ས་ནི་མི་སྐྱེ་འདུ་ཤེས་ཤིང་། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །ས་
ནི་འགག་མེད་འདུ་ཤེས་ཤིང་། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །ས་ལ་འཇུག་པར་འདུ་ཤེས་ཤིང་། །ལེན་དང་རྣམ་རྟོག་མེད་པར་ནི། །དེ་ལྟར་གང་

79-1-293a

ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །ས་ལ་ངེས་འབྱུང་འདུ་ཤེས་ཤིང་། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །ས་
ལ་སྨོན་མེད་འདུ་ཤེས་ཤིང་། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །ས་ལ་གནས་མེད་འདུ་ཤེས་ཤིང་། །འགྲོ་བ་མེད་དང་འོང་མེད་དང་། །མཐའ་མེད་དང་ནི་ཟད་
མེད་དང་། །མཚུངས་པར་ལྡན་དང་མཚུངས་མི་ལྡན། །མིང་དང་ཡི་གེ་བརྟགས་བྲལ་དང་། །སོ་སོར་བརྟགས་དང་འཇུག་པ་དང་། །གཉེན་པོ་མི་འཐུན་ཕྱོགས་མེད་དང་། །བརྗོད་དུ་མེད་ཅིང་བསྟན་མེད་དང་། །རབ་དབེན་
གནས་པ་མེད་པ་དང་། །དྲན་པ་ཉེ་གཞག་ཡང་དག་སྤོང་། །རྫུ་འཕྲུལ་རྐང་དང་དབང་པོ་སྟོབས། །བྱང་ཆུབ་ཡན་ལག་མི་འཇིགས་ལམ། །དེ་ལྟར་སའི་ཆོས་རྣམས་ལ། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་
རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །གལ་ཏེ་བདག་ལ་འཇུག་མེད་པས། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །གལ་ཏེ་བདག་ལ་འབྱུང་མེད་
པས། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །གལ་ཏེ་བདག་ལ་མཚན་མེད་པས། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་
འཛིན་སྒོ་ནི་རྫོགས་པར་བྱེད། །གལ་ཏེ་བདག་ལ་སྨོན་མེད་པས། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །གལ་ཏེ་བདག་ལ་གནས་མེད་པས། །ལེན་དང་རྣམ་
རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །གལ་ཏེ་བདག་ལ་སྐྱེ་མེད་པས། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་

79-1-293b

པར་བྱེད། །གལ་ཏེ་བདག་ལ་འགག་མེད་པས། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །གལ་ཏེ་བདག་ལ་ཡིག་མེད་པས། །ལེན་དང་རྣམ་རྟོག་མེད་པར་ནི། །
དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །གལ་ཏེ་བདག་ནི་ཡིག་བྲལ་བས། །ལེན་དང་རྣམ་རྟོག་མེད་པར་ནི། །དེ་ལྟར་གང་ཞིག་རྟོགས་གྱུར་པ། །ཀུན་འཛིན་སྒོ་ནི་རྫོགས་པར་བྱེད། །མིག་གི་སྔོན་དང་
ཕྱི་མཐའ་དག །རྟག་ཆད་དག་ནི་སྤངས་པ་དང་། །རྒྱུ་རྐྱེན་རང་བཞིན་སྟོང་པར་ནི། །འདྲེན་པས་ཐབས་ཀྱིས་བསྟན་རིག་བྱོས། །གལ་ཏེ་ཆོས་ནི་སྟོན་པའི་ཚེ། །མིག་གི་མཚན་ཉིད་རྟོགས་བྱེད་ན། དེ་ནི་མི་བདེན་རྟོག་ཡིན་པས། །
ཡང་དག་ཆོས་བསྟན་ཞེས་མི་བྱ། །གལ་ཏེ་ཆོས་ནི་སེམས་པའི་ཚེ། །མིག་གི་མཚན་ཉིད་རྟོག་བྱེད་ན། དེ་ནི་མི་བདེན་རྟོག་ཡིན་པས། །ཆོས་སེམས་པ་ཞེས་མི་བྱའོ། །གལ་ཏེ་ཆོས་ནི་སྒོམ་པའི་ཚེ། །མིག་གི་མཚན་ཉིད་
རྟོགས་བྱེད་ན། །དེ་ནི་མི་བདེན་རྟོག་ཡིན་པས། །ཆོས་སྒོམ་པ་ཞེས་མི་བྱའོ། །གང་ཞིག་མིག་གི་སྟོང་ཉིད་རྟོགས། །བྱང་ཆུབ་གཞོལ་བར་མི་བྱེད་ན། །སངས་རྒྱས་གང་ཟག་དེ་དག་ལ། །རྟག་ཏུ་མངོན་སུམ་ཆོས་སྟོན་
མཛད། །གལ་ཏེ་མིག་ནི་མ་རྟོགས་ན། །གཟུགས་ཀྱང་རྟོགས་པར་མི་འགྱུར་ལ། །གལ་ཏེ་མིག་ནི་རྟོགས་གྱུར་ན། །གཟུགས་ཀྱང་རབ་ཏུ་རྟོགས་པར་འགྱུར། །གལ་ཏེ་མིག་ནི་རྟོག་གྱུར་ན། །གཟུགས་ཀྱང་རབ་
ཏུ་རྟོགས་འགྱུར་ལ། །གལ་ཏེ་གཟུགས་ནི་རྟོགས་གྱུར་ན། །མིག་ཀྱང་རབ་ཏུ་རྟོགས་པར་འགྱུར། །རྣ་བ་སྣ་ལྕེ་ལུས་དང་ཡིད། ཡུལ་དྲུག་དང་ནི་འབྱུང་ཆེན་བཞི། །འཇིག་རྟེན་སྐྱེད་པའི་མིང་གི་བར། །ཐམས་ཅད་དེ་
བཞིན་སྦྱར་བར་བྱ། །གལ་ཏེ་ཆོས་ནི་སྟོན་པའི་ཚེ། །རྒྱུ་ཡི་མཚན་ཉིད་རྟོགས་བྱེད་ན། །དེ་ནི་མི་བདེན་རྟོག་ཡིན་པས། །ཆོས་སྟོན་པ་ཞེས་མི་བྱའོ། །གལ་ཏེ་ཆོས་ནི་སྟོན་པའི་ཚེ། །འབྲས་བུའི་མཚན་

79-1-294a

ཉིད་རྟོགས་བྱེད་ན། །དེ་ནི་མི་བདེན་རྟོག་ཡིན་པས། །ཆོས་སྟོན་པ་ཞེས་མི་བྱའོ། །གལ་ཏེ་ཆོས་ནི་སྟོན་པའི་ཚེ། །ལམ་གྱི་མཚན་ཉིད་རྟོགས་བྱེད་ན། །དེ་ནི་མི་བདེན་རྟོག་ཡིན་པས། །ཆོས་
སྟོན་པ་ཞེས་མི་བྱའོ། །གལ་ཏེ་ཆོས་ནི་སྟོན་པའི་ཚེ། །སྟོང་པའི་མཚན་ཉིད་རྟོགས་བྱེད་ན། །དེ་ནི་མི་བདེན་རྟོག་ཡིན་པས། །ཆོས་སྟོན་པ་ཞེས་མི་བྱའོ། །གལ་ཏེ་ཆོས་ནི་སྟོན་པའི་ཚེ། །བསགས་པ་དག་ཏུ་རྟོགས་
བྱེད་ན། །དེ་ནི་མི་བདེན་རྟོག་ཡིན་པས། །ཆོས་སྟོན་པ་ཞེས་མི་བྱའོ། །གལ་ཏེ་ཆོས་ནི་སྟོན་པའི་ཚེ། །རྫས་ཀྱི་དངོས་པོར་རྟོགས་བྱེད་ན། །དེ་ནི་མི་བདེན་རྟོག་ཡིན་པས། །ཆོས་སྟོན་པ་ཞེས་མི་བྱའོ། །གལ་ཏེ་
ཆོས་ནི་སྟོན་པའི་ཚེ། །མིག་གི་འཛིན་པར་རྟོགས་བྱེད་ན། །དེ་ནི་མི་བདེན་རྟོག་ཡིན་པས། །ཆོས་སྟོན་པ་ཞེས་མི་བྱའོ། །མིག་ནི་ཤེས་པར་མ་གྱུར་ན། །འདོད་ཆགས་དག་ནི་སྐྱེ་བར་འགྱུར། །གལ་ཏེ་མིག་ནི་ཤེས་གྱུར་
ན། །འདོད་ཆགས་དག་ནི་སྐྱེ་མི་འགྱུར། །རྣ་བ་སྣ་ལྕེ་ལུས་དང་ཡིད། །ཡུལ་དྲུག་དང་ནི་འབྱུང་ཆེན་བཞི། །འཇིག་རྟེན་སྐྱེ་བའི་མིང་གི་བར། །ཐམས་ཅད་དེ་བཞིན་སྦྱར་བར་བྱ། །གལ་ཏེ་ཆོས་ནི་སྟོན་པའི་ཚེ། །ཁམས་
ནི་སྣ་ཚོགས་རྟོགས་བྱེད་ན། །དེ་ནི་མི་བདེན་རྟོག་ཡིན་པས། །ཆོས་སྟོན་པ་ཞེས་མི་བྱའོ། །ཡི་དམ་དག་ནི་མི་ཉམས་ཤིང་། ངོ་བོ་ཉིད་སྟོང་རྟོགས་པ་དང་། །ཏིང་འཛིན་སྒོ་རྣམས་ཐོབ་གྱུར་པ། །དེས་ནི་ཆོས་ལེགས་སྟོན་
པར་འགྱུར། །ཡི་དམ་དག་ནི་མི་ཉམས་ཤིང་། །མིག་ལ་རྟོག་པ་སྤངས་པ་ནི། །རྣམ་རྟོག་མེད་པར་གྱུར་པའི་ཕྱིར། །དེས་ནི་ཆོས་ལེགས་སྟོན་པར་འགྱུར། །མིག་ཉིད་སྟོང་པར་མ་ཤེས་ན། །མིག་གི་རང་བཞིན་དག་ལ་
རྨོངས། །འདི་ལྟར་ཁོང་དུ་མ་ཆུད་ཕྱིར། །དེས་ནི་ཆོས་རྣམས་བསྟན་མི་བྱ། །གལ་ཏེ་མིག་ཉིད་སྟོང་ཤེས་ན། །མིག་གི་རང་བཞིན་ཤེས་པར་འགྱུར། །འདི་ལྟར་རབ་ཏུ་ཤེས་པའི་ཕྱིར། །དེས་ནི་ཆོས་རབ་བསྟན་

79-1-294b

པར་བྱ། །མིག་ཉིད་སྟོང་པར་མ་ཤེས་ན། །མིག་གི་རང་བཞིན་དག་ལ་རྨོངས། །འདི་ལྟར་ཁོང་དུ་མ་ཆུད་ཕྱིར། །དེས་ནི་ཆོས་རྣམས་བསྟན་མི་བྱ། །གལ་ཏེ་མིག་ཉིད་སྟོང་ཤེས་ན། །ཚིག་གི་རང་བཞིན་ཤེས་པར་འགྱུར། །
འདི་ལྟར་རབ་ཏུ་ཤེས་པའི་ཕྱིར། །དེས་ནི་ཆོས་རབ་བསྟན་པར་བྱ། །མིག་ཉིད་སྟོང་པར་མ་ཤེས་ན། །མིག་གི་རང་བཞིན་དག་ལ་རྨོངས། །འདི་ལྟར་ཁོང་དུ་མ་ཆུད་ཕྱིར། །དེས་ནི་ཆོས་རྣམས་བསྟན་མི་བྱ། །གལ་ཏེ་མིག་ཉིད་
སྟོང་ཤེས་ན། །མིག་གི་རང་བཞིན་ཤེས་པར་འགྱུར། །འདི་ལྟར་རབ་ཏུ་ཤེས་པའི་ཕྱིར། །དེས་ནི་ཆོས་རབ་བསྟན་པར་བྱ། །མིག་ཉིད་སྟོང་པར་མ་ཤེས་ན། །གཟུགས་ཀྱི་རང་བཞིན་དག་ལ་རྨོངས། །འདི་ལྟར་ཁོང་དུ་མ་ཆུད་ཕྱིར། །དེས་
ནི་ཆོས་རྣམས་བསྟན་མི་བྱ། །གལ་ཏེ་མིག་ཉིད་སྟོང་ཤེས་ན། །གཟུགས་ཀྱི་རང་བཞིན་ཤེས་པར་འགྱུར། །འདི་ལྟར་རབ་ཏུ་ཤེས་པའི་ཕྱིར། །དེས་ནི་ཆོས་རབ་བསྟན་པར་བྱ། །མིག་ཉིད་སྟོང་པར་མ་ཤེས་ན། །འཇིག་རྟེན་
མཚན་གནས་རྟོག་བྱེད་པས། །རྗེས་སུ་འཐུན་པ་ཁོ་ནར་ནི། །སེམས་ཅན་རྣམས་ནི་གདུལ་མི་ནུས། །མིག་གི་ཡོད་མེད་མ་རྟོགས་པར། །འཁོར་གྱི་ནང་དུ་ཆོས་སྟོན་པ། །དེ་ནི་རྙིང་ལ་གདུ་བས་ན། །ཐམས་ཅད་ཡིད་ཆེས་ལེན་
མི་བྱེད། །མིག་གི་ཡོད་མེད་རྟོགས་གྱུར་ན། །འཁོར་གྱི་ནང་དུ་ཆོས་སྟོན་པས། །དེས་ནི་མངོན་ཞེན་མེད་པས་ན། །ཐམས་ཅད་ཡིད་ཆེས་ལེན་པར་བྱེད། །མིག་ཉིད་སྟོང་པར་མ་རྟོགས་པར། །ཆོས་ཀྱི་སྟན་ལ་འདུག་ནས་ནི། །
དཔེ་མང་དག་གིས་རབ་བསྟན་ཀྱང་། །ཐམས་ཅད་ཡིད་ཆེས་ལེན་མི་བྱེད། །གལ་ཏེ་མིག་ཉིད་སྟོང་ཤེས་ན། །ཆོས་ཀྱི་སྟན་ལ་འདུག་ནས་ནི། །དཔེ་རྣམས་ཀྱིས་ནི་སྟོན་བྱེད་ན། །ཐམས་ཅད་ཡིད་ཆེས་ལེན་པར་བྱེད། །
རྣ་བ་སྣ་ལྕེ་ལུས་དང་ཡིད། །ཡུལ་དྲུག་དང་ནི་འབྱུང་ཆེན་བཞི། །འཇིག་རྟེན་སྐྱེད་པའི་མིང་གི་བར། །ཐམས་ཅད་དེ་བཞིན་སྦྱར་བར་བྱ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཟླ་འོད་གཞོན་

79-1-295a

ནུར་གྱུར་པ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་འཁོར་འདུས་པ་ཆེན་པོ་ཐམས་ཅད་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །
འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་འོད་ཟེར་ཀུན་ཏུ་བཀྱེ་བའི་ལེའུ་སྟེ་བཅུ་གཅིག་པ་རྫོགས་སོ།། གསུམ་ཞུས་རྒྱ། །།འཕགས་
པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཅུ་གཉིས་པ་སྟེ། བྱང་ཆུབ་སེམས་དཔའི་སྡེ་སྣོད་བསྟན་པ། བམ་པོ་དང་པོ། རྒྱ་གར་སྐད་དུ། ཨཱརྱ་བོ་དྷི་
ས་ཏྭ་པི་ཊ་ཀ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བྱང་ཆུབ་སེམས་དཔའི་སྡེ་སྣོད་ཅེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་
སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་ཡོད་ན་དབྱར་གནས་སུ་གནས་ནས་ཟླ་བ་གསུམ་འདས་ཏེ་དགག་དབྱེ་མཛད་ནས། ཆོས་གོས་མཛད་དེ། ཆོས་གོས་ཟིན་ནས་དགེ་སློང་སྟོང་ཉིས་བརྒྱ་
ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་ལྗོངས་རྒྱུ་ཞིང་གཤེགས་ཏེ། བཅོམ་ལྡན་འདས་ལ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། རྒྱལ་པོ་དང་། བློན་པོ་དང་། 
མུ་སྟེགས་ཅན་སྣ་ཚོགས་དང་། དགེ་སྦྱོང་དང་། བྲམ་ཟེ་དང་། ཁྱིམ་བདག་རྣམས་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་
རྣམས་ཀྱིས་བླ་མར་བྱས། བཀུར་སྟིར་བྱས། རི་མོར་བྱས། མཆོད་པར་བྱས་སོ། །བཅོམ་ལྡན་འདས་ཀྱིས་ཆོས་གོས་དང་། ཞལ་ཟས་དང་། མལ་སྟན་དང་། ན་བའི་གསོས་སྨན་དང་། ཡོ་བྱད་བཟང་པོ་

79-1-295b

མང་པོ་ཡང་བརྙེས་སོ། །འདི་ལྟར་བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་
བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཡིན་ཏེ། དེས་ལྷར་བཅས་པ་དང་། བདུད་དུ་བཅས་པ་དང་། ཚངས་པར་བཅས་པ་དང་། དགེ་སྦྱོང་དང་། བྲམ་ཟེར་བཅས་
པའི་སྐྱེ་དགུའི་འཇིག་རྟེན་འདི་དང་། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་རྣམས་ཟིལ་གྱིས་མནན་ཏེ། རང་གི་མངོན་པར་ཤེས་པས་མངོན་དུ་བྱས་ནས་བསྒྲུབས་ཏེ། བཞུགས་ཤིང་དེ་ཆོས་སྟོན་པ་ནི་ཚངས་
པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་རབ་ཏུ་སྟོན་ཏོ་ཞེས་བཅོམ་ལྡན་འདས་
ཀྱི་དགེ་བར་གྲགས་པའི་སྒྲ་ཚིགས་སུ་བཅད་པ་རྒྱ་ཆེན་པོ་ཡང་མངོན་པར་བྱུང་ངོ་། །དེ་ནས་བཅོམ་ལྡན་འདས་ཡུལ་མ་ག་དྷཱའི་ལྗོངས་རྒྱུ་ཞིང་མཐར་ཀྱིས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་གང་ན་ཡོད་པ་དེར་གཤེགས་ཏེ་
བྱོན་ནས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་བྱ་རྒོད་ཕུང་པོའི་རི་ལ་བཞུགས་སོ། །དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་ཁྱིམ་བདག་ཚོང་དཔོན་བཟང་སྐྱོང་ཞེས་བྱ་བ། སྔོན་དགེ་བའི་རྩ་བ་བསྐྱེད་པ། སྔོན་
གྱི་སངས་རྒྱས་ལ་བྱ་བ་བྱས་པ། ཕྱུག་ཅིང་ནོར་མང་བ། ལོངས་སྤྱོད་ཆེ་བ། བདག་དབང་བ་མང་བ། ནོར་དང་། ཡོ་བྱད་མང་བ། གསེར་དངུལ་མང་བ། ནོར་དང་འབྲུས་ཡོངས་སུ་གང་བའི་མཛོད་དང་། བང་བ་མང་བ། ནོར་
བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་མང་བ། གླང་པོ་ཆེ་དང་། རྟ་དང་། བ་ལང་དང་། ལུག་མང་བ། བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་མང་པ་ཞིག་གནས་ཏེ། 

79-1-296a

དགེ་སྦྱོང་གཽ་ཏ་མ་ཤཱཀྱའི་རིགས་ལས་མངོན་པར་བྱུང་ནས། །དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་ཡུལ་མ་ག་དྷཱའི་ལྗོངས་རྒྱུ་ཞིང་གཤེགས་ཏེ། རྒྱལ་པོའི་
ཁབ་ཀྱི་གྲོང་ཁྱེར་ཆེན་པོར་བྱོན་ནས་དེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་བྱ་རྒོད་ཕུང་པོའི་རི་ལ་བཞུགས་ཏེ། འདི་ལྟར་བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཡིན་ཏེ། དེ་ཆོས་སྟོན་པ་ནི་ཚངས་
པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིགས་འབྲུ་བཟང་པོ། མ་འདྲེས་པ་ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་རབ་ཏུ་སྟོན་ཏོ་ཞེས་དགེ་སྦྱོང་གཽ་ཏ་མ་དེའི་དགེ་
བར་གྲགས་པའི་སྒྲ་ཚིགས་སུ་བཅད་པ་རྒྱ་ཆེན་པོ་དེ་ལྟ་བུ་ཡང་མངོན་པར་བྱུང་བ་ཁྱིམ་བདག་བཟང་སྐྱོང་གིས་ཐོས་ནས་དེ་འདི་སྙམ་དུ་སེམས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
དེ་ལྟ་བུ་དག་མཐོང་ན་ལེགས་པར་འགྱུར་གྱིས་བདག་དགེ་སྦྱོང་གཽ་ཏ་མ་དེ་བལྟ་བའི་ཕྱིར་འགྲོའོ་སྙམ་མོ། །དེ་ནས་ཁྱིམ་བདག་ཚོང་དཔོན་བཟང་སྐྱོང་ཁྱིམ་བདག་ལྔ་བརྒྱ་ཙམ་དང་ལྷན་ཅིག་ཏུ་བཅོམ་ལྡན་འདས་ལ་བལྟ་
བའི་ཕྱིར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་ངོ་། །བཅོམ་ལྡན་འདས་ཀྱང་སྔ་དྲོའི་དུས་ཀྱི་ཚེ། ཤམ་ཐབས་མནབས། ཆོས་གོས་དང་། ལྷུང་བཟེད་བསྣམས་ནས་དགེ་སློང་གི་དགེ་འདུན་གྱིས་བསྐོར་ཅིང་དགེ་
སློང་གི་དགེ་འདུན་གྱིས་མདུན་དུ་བདར་ཏེ། སྤྱོད་ལམ་མཛེས་པ་དང་། མངོན་དུ་གཤེགས་པ་དང་། ཕྱིར་ལྡོག་པ་མཛེས་པ་དང་། གཟིགས་པས་རྣམ་པར་གཟིགས་པ་མཛེས་པ་དང་། སྙད་བ་དང་། བསྐུམ་པ་མཛེས་

79-1-296b

པ་དང་། ཆོས་གོས་སྣམ་སྦྱར་དང་། ན་བཟའ་དང་། ལྷུང་བཟེད་བསྣམས་པ་མཛེས་པ་དང་། ཀུན་ནས་མཛེས་པ་བསོད་སྙོམས་ཀྱི་ཕྱིར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་གཤེགས་སོ་ཁྱིམ་བདག་ཚོང་དཔོན་བཟང་སྐྱོང་
དང་། ཁྱིམ་བདག་ལྔ་བརྒྱ་ཙམ་པོ་དེ་དག་གིས་བཅོམ་ལྡན་འདས་མཛེས་ཤིང་དགའ་བར་འགྱུར་བ། དབང་པོ་ཞི་བ། ཡིད་ཞི་བ། དུལ་བ་དང་། ཞི་གནས་དམ་པ་བརྙེས་པ། གླང་པོ་ལྟར་དབང་པོ་ཐུལ་བ། མཚོ་ལྟར་དང་ཞིང་གསལ་
པ། རྙོག་པ་མེད་པ། ལྷ་དུ་མས་མཆོད་པ། གནོད་སྤྱིན་དུ་མས་མཆོད་པ། མི་དུ་མས་མཆོད་པ། གསེར་གྱི་ཁ་དོག་གི་སྐུ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང་ལྡན་པ། དཔེ་བྱད་བཟང་པོ་བརྒྱད་བཅུས་བརྒྱན་
བ། མེ་ཏོག་གི་ཆར་རབ་ཏུ་འབེབས་ཤིང་། མེ་ཏོག་གི་ཆུ་བོ་ཆེན་པོ་རབ་ཏུ་འབེབས་བཞིན་དུ་རིན་པོ་ཆེ་སྣ་བདུན་གྱི་པད་མ་འདབ་མ་བྱེ་བ་བརྒྱ་ཕྲག་སྟོང་ཡོད་པ་ལ་ཞབས་འདོར་ཞིང་གཤེགས་པ་རྒྱང་རིང་པོ་ནས་
མཐོང་སྟེ། སྤྱོད་ལམ་བརྒྱ་སྟོང་མང་པོས་གཤེགས་པ་རྒྱང་རིང་པོ་ནས་མཐོང་ནས་བཅོམ་ལྡན་འདས་ལ་སེམས་དད་པར་གྱུར་ཏོ། །དེ་དག་སེམས་དད་པར་གྱུར་ནས། བཅོམ་ལྡན་འདས་ག་ལ་དེར་དོང་སྟེ་ལྷགས་
ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ལ་ཁྱིམ་བདག་བཟང་སྐྱོང་དང་། 
ཁྱིམ་བདག་ལྔ་བརྒྱ་ཙམ་པོ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་གཽ་ཏ་མ་དཔལ་གྱིས་འཁོར་འདི་ཟིལ་གྱིས་གནོན་པར་མཛད་དོ། །བཅོམ་ལྡན་འདས་གཽ་ཏ་མ་གཟི་བརྗིད་ཀྱིས་འཁོར་འདི་
ཟིལ་གྱིས་གནོན་པར་མཛད་དོ། །བཅོམ་ལྡན་འདས་གཽ་ཏ་མ་འོད་ཀྱིས་འཁོར་འདི་ཟིལ་གྱིས་གནོན་པར་མཛད་དོ། །བཅོམ་ལྡན་འདས་གཽ་ཏ་མ་གཟུགས་ཀྱིས་འཁོར་འདི་ཟིལ་གྱིས་མནོན་པར་མཛད་དོ། །

79-1-297a

བཅོམ་ལྡན་འདས་གཽ་ཏ་མ་ནི་སྐུའི་ཁ་དོག་གསེར་ལྟ་བུའོ། །བཅོམ་ལྡན་འདས་གཽ་ཏ་མ་ནི་སྐུ་ལུས་ཅན་བདེ་བ་མྱོང་བར་མཛད་པའོ། །བཅོམ་ལྡན་འདས་གཽ་ཏ་མ་ནི་དངོས་པོ་ཐམས་ཅད་
ཀྱིས་མི་མཉམ་པ་དང་མཉམ་པའོ། །བཅོམ་ལྡན་འདས་གཽ་ཏ་མ་ནི་འཇིག་རྟེན་ཐམས་ཅད་ཀྱིས་ངོ་མཚར་རྨད་ཏུ་བྱུང་བའི་ཆོས་དང་ལྡན་པ་ལགས་ན། བཅོམ་ལྡན་འདས་གཽ་ཏ་མ་བདག་འདི་སྙམ་དུ་སེམས་
ཏེ། བཅོམ་ལྡན་འདས་གཽ་ཏ་མ་ཅི་ཞིག་གཟིགས་ན་ཁབ་ནས་ཁབ་མ་མཆིས་པར་རབ་ཏུ་བྱུང་སྙམ་སེམས་སོ། །དེ་ནས་བཅོམ་ལྡན་འདས་ལ་ཁྱིམ་བདག་ཚོང་དཔོན་བཟང་སྐྱོང་གིས་ཚིགས་སུ་བཅད་
པ་དག་གིས་མངོན་པར་བསྟོད་དོ། །རྒྱལ་པོའི་དཔལ་དང་གྲགས་དང་གཟུགས་དག་ནི། །སྔོན་ཆད་བདག་གིས་ཇི་སྐད་ཐོས་པ་བས། །དེ་བས་ལྷག་པར་གསེར་གྱི་གཟུགས་བཞིན་དུ། །མཛེས་
དང་ལྡན་པར་ལྷམ་མེད་རབ་ཏུ་གདའ། །གཟུགས་ནི་ཤིན་དུ་མཛེས་ཤིང་བལྟ་ན་སྡུག །སྐུ་ཡི་ཁ་དོག་གསེར་གྱི་མདོག་འདྲ་བས། །སྐར་མང་དག་གི་དབུས་ན་ཟླ་བ་ལྟར། །དགེ་སློང་
མང་པོའི་དབུས་ན་མཛེས་པར་མཛད། །མི་མཆོག་གི་ནི་སྤྱི་བོ་བལྟར་མི་གདའ། །རི་རབ་བཞིན་དུ་མངོན་པར་འཕགས་པར་གདའ། །གཙུག་གི་སྤྱི་བོ་ལྷ་ཡི་གདུགས་བཞིན་དུ། །ཀུན་ནས་
བྱིན་གྱིས་གཞོལ་བར་གྱུར་པ་ལགས། །དབུ་ཡི་སྐྲ་ནི་འཇམ་ཞིང་རབ་མཉེན་ལ། །ཨན་ད་རྙིལ་དང་སྟང་ཟིལ་ཁ་དོག་འདྲ། །གཡས་སུ་འཁྱིལ་ལ་ཤིན་དུ་འཇམ་པ་སྟེ། །རྨ་བྱའི་མགྲིན་པ་
ཇི་བཞིན་ཉིད་ཏུ་གདའ། །སྨྲ་བ་མཆོག་གི་དཔྲལ་བ་ཤིན་དུ་མཉམ། །ཁྱོད་ཀྱི་སྨིན་ཚུགས་འཇའ་ཁུགས་ལྟ་བུ་སྟེ། །འོད་གསལ་བ་ནི་སྐར་མའི་རྒྱལ་པོ་ལྟར། །རྡུལ་བྲལ་སྨན་

79-1-297b

མཚམས་སྤུ་ནི་ཤིན་དུ་མཛེས། །སྤྱན་བཟང་ཁྱོད་ཀྱི་སྤྱན་ནི་དགར་འགྱུར་བ། །འགྲོ་བ་རྣམས་ལ་མཛེས་ཤིག་མཐོང་ན་དགའ། །བདག་ནི་ལྟ་བས་ངོམས་པར་མི་འགྱུར་ཏེ། །མགོན་པོ་རྣམ་དག་
སྤྱན་ལ་བདག་ཕྱག་འཚལ། །སྐྱེས་བུ་དམ་པའི་ཤངས་ནི་བྱིན་གྱིས་མཉམ། །ཇི་ལྟར་གསེར་གྱི་རི་ལྟར་རབ་ཏུ་གདའ། །ཁྱོད་ཀྱི་སྒྲོས་ནི་བིམ་པ་བྱི་རུ་བཞིན། །དག་ཅིང་རྣམ་དག་
ནོར་བུ་རིན་ཆེན་འདྲ། །དུལ་ལ་དགྱེས་པའི་ཚེམས་ནི་མཛེས་པ་སྟེ། །སྣང་བར་བྱེད་པ་རབ་ཏུ་དཀར་བའི་ཚེམས། །པད་མའི་རྩ་བ་བ་ཞོ་ཆུ་སྐྱར་འདྲ། །སྲ་ཞིང་དམ་ལ་ཐགས་
བཟངས་ཤིན་དུ་དག །ཚེམས་དང་ཚེམས་ཀྱི་བར་ནི་ཤིན་དུ་འབྱོར། །རྒྱལ་བའི་མཆེ་བ་མཛེས་ཤིང་རྡུལ་མི་མངའ། །ངང་པའི་ཁྱུ་ན་ངང་པའི་རྒྱལ་པོ་ནི། །རྣམ་དག་དཀར་ཞིང་རབ་ཏུ་དཀར་བ་བཞིན། །བདེ་བར་གཤེགས་པའི་ལྗགས་
ཀྱིས་ཞལ་ཁེབས་ཏེ། །སྲབ་ལ་དམར་པོ་རྣམ་དག་ཟངས་ཀྱི་མདོག ། ཉི་མ་འཆར་ཚེ་ནོར་བུ་དག་མདོག་བཞིན། །སྲབ་ལ་རིང་ཞིང་སྐྱོན་མེད་ཤིན་དུ་ཡངས། །གཽ་ཏ་མའི་སྙན་ནི་རབ་ཏུ་ལེགས། །སེང་གེའི་འགྲམ་པ་སེང་གེའི་འཇིགས་མེད་
བཞིན། །ཚངས་བཅས་འཇིག་རྟེན་ལྷ་དང་མི་ལ་ཡང་། །བདག་གིས་གང་ཡང་མ་ཐོས་མ་མཐོང་ངོ་། །བདེ་གཤེགས་མཐུ་ཡིས་མགུར་ན་མཐོང་བ་ནི། །མགུར་གྱི་མིང་པ་གཙང་ལ་འོད་གསལ་ཏེ། །དྲང་པོ་དབུས་སུ་འགྲོ་བ་ཡོན་པོ་བསལ། །
རོ་ཡི་རོ་མཆོག་མི་དང་ལྷ་ཡི་ལྷ། །དཔུང་མགོ་རབ་ཏུ་ཟླུམ་ཞིང་ཐལ་གོང་རྒྱས། །བདུན་པོ་མཐོ་བ་འཇིག་རྟེན་ཀུན་དུ་གྲགས། །མགོན་པོ་མི་དབང་སྙིང་པོ་དཔལ་གྱིས་ཀྱང་། །རི་ཡི་རྩེ་ལ་ཉི་མ་འཆར་བ་བཞིན། །མཐོ་བ་གཉིས་ནི་ཞབས་ཀྱི་མཐིལ་
ནས་སྐྱེས། །ཕྱག་ལས་གཉིས་སྐྱེས་ཐལ་གོང་གཉིས་སྐྱེས་ཏེ། །མཐོ་བ་གཅིག་ནི་ལྟག་པ་ཉིད་ན་གཅིག །དགེ་ཞིང་དག་སྟེ་འོད་གསལ་རབ་ཏུ་རྒྱས། །བཅོམ་ལྡན་གཽ་ཏ་མ་ཡི་ཕྱག་རིང་བ། །ཇི་ལྟར་གླང་པོ་རྒྱལ་པོའི་སྣ་བཞིན་ཏེ། །ཕྱག་གཉིས་པོ་ནི་འདུད་

79-1-298a

པ་མ་བགྱིས་པར། །པུས་མོ་གཉིས་སུ་ཕྱག་གིས་རབ་ཏུ་རེག །སྐུ་ཡི་རོ་སྟོད་སེང་གེ་བཞིན་དུ་འཕགས། །སྐུ་ནི་སྲེད་མེད་བུ་ལྟར་རབ་ཏུ་བརྟན། །ནྱ་གྲོ་དྷ་བཞིན་ཆུ་ཞེང་གབ་པའི་སྐུ། །བཟོད་པའི་སྟོབས་དང་ལྡན་པ་སྟོབས་པོ་ཆེ། །སྐུ་ཡི་
སྤུ་རྣམས་གཡས་འཁྱིལ་གྱེན་དུ་ཕྱོགས། །རེ་རེར་སྐྱེས་ཤིང་ཤིན་དུ་འཇམ་པ་སྟེ། །ཇི་ལྟར་པད་མ་ཆུ་དང་འདམ་མི་གོས། །དེ་བཞིན་རྡུལ་དང་དུ་བས་མི་གོས་སོ། །རྟ་མཆོག་དུལ་བ་ཡི་ནི་ཇི་ལྟ་བར། །འདོམས་ཀྱི་སྦ་བ་སྦུབས་སུ་ནུབ་ཅེས་གདའ། །བརླ་
ནི་རབ་ཟླུམ་སྨྱིག་མའི་སྙིང་པོ་བཞིན། །ཁྱོད་ཀྱི་རྗེ་ངར་བྱིན་གྱིས་རིམ་བཞིན་མཆིས། །ཞབས་གོང་དུད་ལྟར་མཐོ་ཞིང་རྟིང་པ་ཆེ། །ཁྱོད་ཀྱི་ཕྱག་དང་ཞབས་ནི་དྲ་བས་འབྲེལ། །སོར་མོ་རིང་ཞིང་སོར་མོ་ཉི་ཤུ་མཉམ། །སེན་མོ་ཟངས་འདྲ་སོར་སེན་མེ་ཏོག་ཅན། །
ཁྱོད་ཀྱི་ཞབས་མཐིལ་འཁོར་ལོ་རབ་ཀྱི་མཚན། །རྩིབ་མ་སྟོང་ལྡན་རབ་ཏུ་འོད་གསལ་བ། །ལོང་བུས་ལོང་བུ་འཐབ་པར་མི་འགྱུར་ཞིང་། །གོམ་པས་གོམ་པ་ས་ལ་ཡོད་མི་འདོར། །ས་ལ་ཀུན་དུ་སོར་བཞིས་མི་རེག་པར། །འཇིག་རྟེན་རྣམས་ཀྱི་གཙོ་བོ་རབ་
གཤེགས་ཏེ། །ཁྱོད་ནི་གང་དུ་གོམ་པ་བོར་བ་ཡང་། །རིན་ཆེན་པད་མ་སྐྱེས་པ་ངོ་མཚར་ཏོ། །རྒོད་པར་མ་གྱུར་དལ་ཞིང་བརྟན་པར་གཤེགས། །སྟག་དང་ལྷ་དབང་འགྲོས་ཀྱིས་གཞན་གནོན་ཅིང་། །བག་ཚ་མེད་པར་སྟབས་ནི་བསྒྱིང་ཏེ་གཤེགས། །དཔའ་བོ་ཁྱོད་ཀྱི་
འགྲོས་འདྲ་སུ་ལའང་མེད། །མི་མ་ལགས་པ་རྣམས་ཀྱིས་བར་སྣང་ལ། །ལྷ་ཡི་མེ་ཏོག་ཆར་ནི་རབ་འབེབས་ཤིང་། །གླུ་དབྱངས་སྒྲས་ནི་ཁྱོད་ལ་མཆོད་པར་བགྱིད། །ཆོ་འཕྲུལ་འདི་འདྲ་འདི་དག་རྨད་ཏུ་བྱུང་། །ཁྱོད་ཀྱི་གཟུགས་ནི་རྣམ་ཐོས་བུ་བས་ལྷག །གཟི་བརྗིད་དག་ནི་ཉི་
མ་བརྒྱ་བས་འཕགས། །ཚངས་བཅས་ལྷ་མིར་བཅས་པའི་འཇིག་རྟེན་ན། །ཁྱོད་འདྲའང་མེད་ན་ལྷག་པ་ག་ལ་མཆིས། །བདག་གིས་ཁྱོད་ཀྱི་ཆོ་འཕྲུལ་མཆོག་མཐོང་ནས། །ཡོན་ཏན་ལྷག་པ་གང་དག་གཟིགས་
གྱུར་ན། །དེ་བཞེད་པས་ན་མི་དབང་རབ་བྱུང་སྙམ། །བདག་ནི་དེ་ལ་ཐེ་ཚོམ་འཚལ་བར་གྱུར། །དེ་ནས་བཅོམ་ལྡན་འདས་ཀྱིས་ཁྱིམ་བདག་ཚོང་དཔོན་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །ཀྱེ་མའོ་

79-1-298b

ཁྱིམ་བདག་འཇིག་རྟེན་གནས་པ་འདི་གཙེ་པ་བཅུས་གཙེས་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། སྐྱེ་བས་གཙེ་བ་དང་། རྒ་བས་གཙེ་བ་དང་། ན་བས་གཙེ་བ་དང་། འཆི་བས་གཙེ་བ་དང་། 
མྱ་ངན་གྱིས་གཙེ་བ་དང་། སྨྲེ་སྔགས་འདོན་པས་གཙེ་བ་དང་། སྡུག་བསྔལ་གྱིས་གཙེ་བ་དང་། ཡིད་མི་བདེ་བས་གཙེ་བ་དང་། འཁྲུག་པས་གཙེ་བ་དང་། འཁོར་བའི་གཙེ་བ་དང་བཅུ་སྟེ། ཁྱིམ་
བདག་འཇིག་རྟེན་གནས་པ་གཙེ་བ་འདི་བཅུས་གཙེས་པར་མཐོང་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱའོ་ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་ནས་བཅོམ་ལྡན་
འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །འཁོར་བའི་སྒྲོམ་དུ་ཆུད་པ་ཡི། །བྱིས་པ་སོ་སོའི་སྐྱེ་བོ་ཀུན། །སྐྱེ་བས་ཉེ་བར་གཙེ་བ་དང་། ནད་དང་རྒ་བས་རབ་དུ་གཟིར། །མྱ་ངན་བྱེད་
ཅིང་སྨྲེ་སྔགས་འདོན། །འཆི་བའི་དབང་དུ་སོང་མཐོང་ནས། །སྲིད་པའི་སྒྲོམ་ལས་ཐར་བྱ་ཞེས། །བསྐྱབ་པའི་ཕྱིར་ནི་མངོན་པར་བྱུང་། །ཀྱེ་མའོ་ཁྱིམ་བདག་གི་འཇིག་རྟེན་གནས་པ་འདི་ནི་ཞེ་སྡང་ཞིང་
ཀུན་ནས་མནར་སེམས་ཀྱི་དངོས་པོ་བཅུས་གཅིག་ལ་གཅིག་མནར་སེམས་སུ་བྱེད་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། བདག་ཉིད་ལ་གནོད་པ་བྱས་ཤེས་སེམས་ལ་ཀུན་ནས་མནར་
སེམས་སྐྱེ་བ་དང་། གནོད་པ་བྱེད་དོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། གནོད་པ་བྱེད་པར་འགྱུར་རོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་གི་མཛའ་
བོ་ལ་གནོད་པ་བྱས་སོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་གི་མཛའ་བོ་ལ་གནོད་པ་བྱེད་དོ་ཞེས་སེམས་ལ་ཀུན་མནར་སེམས་སྐྱེ་བ་དང་བདག་གི་མཛའ་བོ་ལ་གནོད་

79-1-299a

པ་བྱེད་པར་འགྱུར་རོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་དང་མི་མཛའ་བའི་དོན་བྱས་སོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་དང་མི་
མཛའ་བའི་དོན་བྱེད་དོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་དང་མི་མཛའ་བའི་དོན་བྱེད་པར་འགྱུར་རོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། གནོད་པའི་རབ་ཏུ་སྡང་བ་
ཉིད་དང་བཅུའོ། །ཁྱིམ་བདག་ཀུན་ནས་མནར་སེམས་ཀྱི་དངོས་པོ་བཅུ་ནི་དེ་དག་ཡིན་ཏེ། ཀུན་ནས་མནར་སེམས་ཐམས་ཅད་སེལ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་
པར་བྱའོ། །ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རབ་ཏུ་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །།
ཀྱེ་མའོ་སེམས་ཅན་ཞེ་སྡང་སྟེ། །གཅིག་ལ་གཅིག་ནི་ཕན་ཚུན་དུ། །ཀུན་ནས་མནར་སེམས་དངོས་པོ་བཅུས། །ཀུན་ལ་ཀུན་ནས་མནར་སེམས་གྱུར། །བདག་དང་བདག་གི་ཉེ་དུ་ལ། །
གནོད་པ་བྱས་དང་བྱེད་པ་དང་། །གནོད་པ་བྱེད་པར་འགྱུར་རོ་ཞེས། །དེ་ཡི་ཀུན་ནས་མནར་སེམས་སྐྱེ། །གང་རྣམས་བདག་དང་མི་མཛའ་བ། །དེ་དག་གི་ནི་དོན་བྱས་དང་། །བྱེད་དོ་བྱེད་པར་
འགྱུར་རོ་ཞེས། །དེ་ཡི་ཀུན་ནས་མནར་སེམས་སྐྱེ། །གནོད་པའི་སྡང་དང་བཅུ་ཡིན་ཏེ། །གང་གིས་མནར་སེམས་འཕེལ་འགྱུར་བ། །དེ་མཐོང་ཀུན་ནས་མནར་སེམས་རྣམས། །མི་
འདོད་པས་ན་རབ་ཏུ་བྱུང་། །ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་ལྟ་བར་བྱས་པ་ལྟ་བ་ངན་པ་ཐིབས་པོ་བཅུས་ལྟ་བར་བྱས་པ་སྣ་ཚོགས་དང་། ལྟ་བ་ངན་པ་ཐིབས་པོ་དག་གིས་

79-1-299b

ནོན་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། །བདག་ཏུ་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། སེམས་ཅན་དུ་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། སྲོག་ཏུ་ལྟ་བར་
གྱུར་པ་ལྟ་བ་ངན་པ་ཐིབས་པོ་དང་། གང་ཟག་ཏུ་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། ཆད་པར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། རྟག་པར་ལྟ་བར་གྱུར་པ་ལྟ་བ་
ངན་པ་ཐིབས་པོ་དང་། བྱ་བ་མེད་པར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། རྒྱུ་མེད་པར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། མི་མཐུན་པའི་རྒྱུར་ལྟ་བར་གྱུར་པ་ལྟ་བ་ངན་པ་
ཐིབས་པོ་དང་། ལོག་པར་ལྟ་བར་གྱུར་པ་ལྟ་བ་ངན་པའི་ཐིབས་པོ་དང་བཅུའོ། །ཁྱིམ་བདག་ལྟ་བར་གྱུར་པ་ལྟ་བ་ངན་པའི་ཐིབས་པོ་དེ་དག་ཡིན་ཏེ། ལྟ་བ་ཐམས་ཅད་གཞིག་པའི་ཕྱིར་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱའོ། །ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །།དེ་ནས་བཅོམ་ལྡན་འདས་ཀྱི་དོན་དེ་ཉིད་རྒྱ་ཆེར་བསྟན་པའི་ཕྱིར་དེའི་ཚེ་
ཚིགས་སུ་བཅད་པ་འདི་དག་གསུངས་སོ། །བྱིས་པ་སོ་སོའི་སྐྱེ་བོ་ཀུན། །བདག་ཏུ་ལྟ་དང་སེམས་ཅན་ལྟ། །སྲོག་ཏུ་ལྟ་བ་རྣམས་ཀྱི་ཡང་། །ལྟ་བ་ཐིབས་པོས་རབ་ཏུ་གཡོགས། །
རྟག་དང་ཆད་པར་ལྟ་བ་དང་། །བྱ་མེད་ལྟ་ལ་གནས་པ་དག །ཡང་དག་ལྟ་བར་དགོད་དོ་ཞེས། །དེ་ཕྱིར་ང་ནི་རབ་ཏུ་བྱུང་། །ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་ཟུག་རྔུ་ཆེན་པོ་
བཅུས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་ཟུག་རྔུས་ཟུག་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། སྲིད་པའི་ཟུག་རྔུ་དང་། མ་རིག་པའི་ཟུག་རྔུ་དང་། འདོད་པའི་ཟུག་རྔུ་དང་། །

79-1-300a

འདོད་ཆགས་ཀྱི་ཟུག་རྔུ་དང་། ཞེ་སྡང་གི་ཟུག་རྔུ་དང་། གཏི་མུག་གིས་ཟུག་རྔུ་དང་། ང་རྒྱལ་གྱི་ཟུག་རྔུ་དང་། ལྟ་བའི་ཟུག་རྔུ་དང་། འབྱུང་བའི་ཟུག་རྔུ་དང་། འཇིགས་པའི་
ཟུག་རྔུ་དང་བཅུའོ། །ཁྱིམ་བདག་ཟུག་རྔུ་ཆེན་པོ་བཅུ་པོ་ནི་དེ་དག་ཡིན་ཏེ། ཟུག་རྔུ་ཐམས་ཅད་བསལ་བའི་ཕྱིར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱའོ་ཞེས་དད་པས་
ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སྲིད་པའི་ཟུག་རྔུས་ཟུག་པ་རྣམས། །ཐོག་མའི་མཐའ་ནི་མི་ཤེས་
ཏེ། །མ་རིག་པ་ཡིས་ལྡོངས་བྱས་ནས། །མུན་པ་ནས་ནི་མུན་པར་འགྲོ། །སྲེད་པའི་ཟུག་རྔུས་ཟུག་པ་དང་། །འདོད་ཆགས་ཟུག་རྔུས་རྒྱུས་པ་དང་། །ཞེ་སྡང་ཟུག་རྔུས་བརྒྱལ་བས་ན། །ཕུང་པོ་དག་
ནི་ལེན་པར་བྱེད། །གཏི་མུག་གི་ནི་ཟུག་རྔུས་དཀྲིས། །ང་རྒྱལ་དག་གི་ཟུག་རྔུས་སྙེམས། །འབྱུང་བ་དང་ནི་འཇིག་པ་ན། །ལྟ་བའི་ཟུག་རྔུས་མེ་འཕྲོད་འགྱུར། །བྱིས་པ་སོ་སོའི་སྐྱེ་བོ་ཀུན། །ཕན་
ཚུན་ཚིག་གི་མཚོན་ཆ་ཡིས། །འདི་ནི་བརྫུན་གྱིས་འདི་བདེན་ཞེས། །ཕན་ཚུན་དུ་ནི་རྩོད་པར་བྱེད། །ཟུག་རྔུས་ཟུག་པའི་སེམས་ཅན་གྱི། །སྐྱབས་དང་དཔུང་གཉེན་འགྱུར་བ་ཡི། །ཟུག་རྔུ་འབྱིན་
པ་དེ་བཞིན་གཤེགས། །འཇིག་རྟེན་འདིར་ནི་འབྱུང་བར་འགྱུར། །གཞན་ཡང་ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི། སྲེད་པའི་རྩ་བ་ལས་བྱུང་བའི་ཆོས་བཅུ་པོ་དག་གིས་རྩ་བའི་
གནས་ལ་རབ་ཏུ་གནས་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། སྲེད་པ་ལ་བརྟེན་ནས་ཀུན་དུ་འཚོལ་བ་དང་། ཀུན་ཏུ་ཚོལ་བ་ལ་བརྟེན་ནས་རྙེད་པ་དང་། རྙེད་པ་ལ་བརྟེན་ནས་ང་ཡིར་འཛིན་པ་

79-1-300b

དང་། ང་ཡིར་འཛིན་པ་ལ་བརྟེན་ནས་རྣམ་པར་ངེས་པ་དང་། རྣམ་པར་གདོན་མི་ཟ་བ་ལ་བརྟེན་ནས་འདུན་པའི་འདོད་ཆགས་དང་། འདུན་པའི་འདོད་ཆགས་ལ་བརྟེན་ནས་ལྷག་པར་ཆགས་པ་དང་། ལྷག་
པར་ཆགས་པ་ལ་བརྟེན་ནས་སེར་སྣ་དང་། སེར་སྣ་ལ་བརྟེན་ནས་ཡོངས་སུ་འཛིན་པ་དང་། ཡོངས་སུ་འཛིན་པ་ལ་བརྟེན་ནས་ཡོངས་སུ་སྲུང་བ་དང་། ཡོངས་སུ་སྲུང་བ་ལ་བརྟེན་ནས་སྡུག་བསྔལ་
བ་སྟེ། ཡོངས་སུ་སྲུང་བའི་གཞི་ལས་དབྱིག་པ་ཐོགས་པ་དང་། མཚོན་ཆ་ཐོགས་པ་དང་། འཐབ་པ་དང་། འཚང་འདྲུ་བ་དང་། འགྱེད་པ་དང་། བརྩོད་པ་རྣམས་འབྱུང་ངོ་། །དེའི་ཕྱིར་ཕྲ་མ་ལ་སོགས་
པ་སྡིག་པ་མི་དགེ་བའི་ཆོས་རྣམ་པ་མང་པོ་འབྱུང་བར་འགྱུར་ཏེ། ཁྱིམ་བདག་སྲེད་པའི་རྩ་བ་ལས་བྱུང་བའི་ཆོས་བཅུ་པོ་དེ་དག་གིས་འཇིག་རྟེན་གནས་པ་རབ་ཏུ་གནས་པར་མཐོང་ནས་རྩ་བ་མེད་པ་
གནས་མེད་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱའོ་ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །འདི་ལ་ཆོས་ཉིད་ནི་འདི་ཡིན་ཏེ། དེ་ལ་འདི་སྐད་ཅེས་བྱའོ། །སྲེད་པས་མིང་
པའི་སེམས་ཅན་རྣམས། །འདི་ནས་འདི་ནི་ཀུན་དུ་ཚོལ། །རྙེད་པ་རྙེད་ནས་ང་ཡིར་འཛིན། །དེ་ལས་རྣམ་པར་ངེས་པར་འགྱུར། །བྱ་བ་འདི་དག་བྱའོ་ཞེས། །འདུན་པའི་འདོད་ཆགས་རབ་ཏུ་འཕེལ། །འདུན་པའི་
འདོད་ཆགས་འཕེལ་བས་ན། །ལྷག་པར་ཆགས་ཕྱིར་སེར་སྣ་འགྱུར། །སེར་སྣའི་ཉེས་པས་འཇིག་རྟེན་ན། །ཀུན་ཏུ་འཛིན་པ་སྲ་བར་འགྱུར། །ཡོངས་སུ་འཛིན་པས་ཀུན་སྲུང་བ། །རྒྱུན་མི་འཆད་པར་འབྱུང་བར་འགྱུར། 
བྱིས་པ་ཀུན་དུ་བསྲུང་བའི་ཕྱིར། །དབྱིག་པ་དང་ནི་མཚོན་འདེབས་ཤིང་། །སྡིག་པ་ཐམས་ཅད་བྱེད་པས་ན། །དེ་ལས་སྡུག་བསྔལ་འཕེལ་བར་འགྱུར། །སྲིད་པའི་གཞི་ལས་སྡུག་བསྔལ་ཀུན། ཤིན་དུ་འབྱུང་བར་མཐོང་

79-1-301a

བས་ན། །རྩ་བ་མེད་ཅིང་གནས་མེད་པའི། །བྱང་ཆུབ་དམ་པ་རྟོགས་པར་འདོད། །གཞན་ཡང་ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་ལོག་པའི་ཆོས་བཅུས་ལོག་པ་ཉིད་དུ་ངེས་པར་མཐོང་སྟེ། བཅུ་
གང་ཞེ་ན། །འདི་ལྟ་སྟེ། ལོག་པའི་ལྟ་བ་དང་། ལོག་པའི་རྟོག་པ་དང་། ལོག་པའི་ངག་དང་། ལོག་པའི་ལས་ཀྱི་མཐའ་དང་། ལོག་པའི་འཚོ་བ་དང་། ལོག་པའི་རྩོལ་བ་དང་། ལོག་པའི་དྲན་པ་དང་། ལོག་པའི་ཏིང་ངེ་འཛིན་
དང་། ལོག་པའི་རྣམ་པར་གྲོལ་བ་དང་། ལོག་པའི་ཤེས་པ་དང་བཅུ་སྟེ། ཁྱིམ་བདག་འཇིག་རྟེན་གནས་པ་འདི་ནི་ལོག་པའི་ཆོས་བཅུ་པོ་དེ་དག་གིས་ལོག་པར་ངེས་པར་མཐོང་ནས། ལོག་པ་ཐམས་ཅད་ལས་ཡང་དག་པར་བཟླ་
བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ་ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་ནས་བཅོམ་ལྡན་འདས་ཀྱིས་དོན་འདི་ཉིད་རྒྱ་ཆེར་བསྟན་པའི་ཕྱིར་དེའི་ཚེ་
ཚིགས་སུ་བཅད་པ་འདི་དག་གསུངས་སོ། །གང་དག་ལོག་པའི་ལྟ་ཆགས་དང་། །ལོག་པར་རྟོག་པའི་སྤྱོད་ཡུལ་དང་། །ལོག་པའི་ཚིག་ཏུ་སྨྲ་བ་དང་། །ལོག་པའི་ལས་མཐའ་སྤྱོད་པ་དང་། །ལོག་པའི་འཚོ་དང་ལོག་པའི་རྩོལ། །
ལོག་པའི་དྲན་དང་མཉམ་པར་འཇོག །ལོག་པའི་རྣམ་གྲོལ་རྫོགས་པ་དང་། །ལོག་པའི་ཤེས་ལ་གཞོལ་བ་ཡི། །ལོག་པར་ངེས་པའི་ཕུང་པོ་ནི། །བྱིས་པ་དེ་ལ་གནས་པ་དག །ཡང་དག་ཉིད་ལ་དགོང་ངོ་ཞེས། །དེ་ཕྱིར་ང་ནི་རབ་
ཏུ་བྱུང་། །གཞན་ཡང་ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་ལམ་ངན་པར་ཞུགས་ཤིང་། མི་དགེ་བ་བཅུའི་ལས་ཀྱི་ལམ་རྣམས་ཀྱིས་ཕལ་ཆེར་ངན་སོང་དུ་གཞོལ་བ། ངན་སོང་དུ་འབབ་པ། ངན་སོང་དུ་འབབ་པར་
མཐོང་སྟེ། བཅུ་གང་ཞེ་ན། འདི་ལྟ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་དང་། བརྫུན་དུ་སྨྲ་བ་དང་། ཕྲ་མ་ཟེར་བ་དང་། ངག་རྩུབ་པོ་དང་། ཚིག་ཀྱལ་བ་དང་། བརྣབ་སེམས་དང་གནོད་

79-1-301b

སེམས་དང་། ལོག་པར་ལྟ་བ་དང་བཅུ་སྟེ། ཁྱིམ་བདག་མི་དགེ་བ་བཅུའི་ལས་ཀྱི་ལམ་རྣམས་ཀྱིས་འཇིག་རྟེན་གནས་པ་འདི་ལམ་ངན་པར་ཞུགས་ཤིང་ཕལ་ཆེར་ངན་སོང་དུ་གཞོལ་བ། ངན་སོང་དུ་འབབ་པ། ངན་སོང་དུ་བབ་པར་མཐོང་ནས་ངན་སོང་
ཐམས་ཅད་ལས་ཡང་དག་པར་ཟླ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ་ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་
བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སྲོག་གཅོད་པའི་སེམས་ཅན་དང་། །གཞན་གྱི་ནོར་ལ་འཕྲོག་པ་དང་། །འདོད་པ་ལོག་པར་གཡེམ་པ་དག །སེམས་ཅན་དམྱལ་བར་མྱུར་དུ་འགྲོ། །དབྱེན་བྱེད་པ་དང་ཚིག་རྩུབ་དང་། །བརྫུན་དུ་
སྨྲ་ཞིང་མི་སྡོམ་པ། །བྱིས་པ་ཀྱལ་བ་སྨྲ་བ་རྣམས། །སོ་སོ་སྐྱེ་བོ་སླུ་བས་བཅིངས། །གཞན་གྱི་སྤྱོད་ལ་བརྣབ་སེམས་དང་། །གནོད་སེམས་དག་ནི་མང་བ་དང་། །མི་མང་ལྟ་བ་ལོག་ཞུགས་པ། །ངན་འགྲོ་དག་ཏུ་འགྲོ་བར་འགྱུར། །ལུས་ཀྱིས་སྡིག་པ་རྣམས་
གསུམ་དང་། །ངག་གིས་སྡིག་པ་རྣམ་བཞི་དང་། །ཡིད་ཀྱིས་སྡིག་པ་རྣམས་གསུམ་ནི། །སྡིག་བྱེད་པ་དག་རབ་ཏུ་བྱེད། །སྡིག་པའི་ལས་རྣམས་བྱས་པས་ན། །དེ་ཕྱིར་ངན་འགྲོར་འགྲོ་བར་འགྱུར། །ཅི་ནས་ངན་འགྲོར་མི་གཏང་བར། །བསྐྱབ་པའི་ཕྱིར་ན་རབ་ཏུ་
བྱུང་། །གཞན་ཡང་ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་ཀུན་ནས་ཉོན་མོངས་པ་བཅུ་དག་གིས་ཉོན་མོངས་པ་དང་། ཉེ་བའི་ཉོན་མོངས་པ་དང་། ཀུན་ནས་ཉོན་མོངས་པའི་དྲི་མ་དང་ལྡན་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། 
སེར་སྣའི་དྲི་མ་ཀུན་ནས་ཉོན་མོངས་པ་དང་། འཆལ་བའི་ཚུལ་ཁྲིམས་ཀྱི་དྲི་མ་ཀུན་ནས་ཉོན་མོངས་པ་དང་། གནོད་སེམས་ཀྱི་དྲི་མ་ཀུན་ནས་ཉོན་མོངས་པ་དང་། ལེ་ལོའི་དྲི་མ་ཀུན་ནས་ཉོན་མོངས་པ་དང་། གཡེང་བའི་དྲི་མ་ཀུན་ནས་ཉོན་
མོངས་པ་དང་། འཆལ་བའི་ཤེས་རབ་ཀྱི་དྲི་མ་ཀུན་ནས་ཉོན་མོངས་པ་དང་། སྲི་ཞུ་མེད་པའི་དྲི་མ་ཀུན་ནས་ཉོན་མོངས་པ་དང་། ཐེ་ཚོམ་གྱི་དྲི་མ་ཀུན་ནས་ཉོན་མོངས་པ་དང་། མ་མོས་པའི་དྲི་མ་ཀུན་ནས་ཉོན་མོངས་པ་དང་། 

79-1-302a

མ་གུས་པའི་དྲི་མ་ཀུན་ནས་ཉོན་མོངས་པ་དང་བཅུ་སྟེ། ཁྱིམ་བདག་འཇིག་རྟེན་གནས་པ་འདི་ནི་ཀུན་ནས་ཉོན་མོངས་པ་བཅུ་པོ་དེ་དག་གིས་ཀུན་ནས་ཉོན་མོངས་པར་མཐོང་ནས་ཀུན་ནས་ཉོན་མོངས་
པ་མེད་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ་ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །འདི་ལ་ཆོས་ཉིད་ནི་འདི་ཡིན་ཏེ། །དེ་ལ་འདི་སྐད་ཅེས་
བྱའོ། །འཇིག་རྟེན་འདི་དག་ཕལ་ཆེར་ནི། །ཀུན་ནས་ཉོན་མོངས་བཅུ་ཡིས་གཟེར། །འདུས་བྱས་ཀུན་ནས་ཉོན་མོངས་དགའ། །ནམ་ཡང་སྐྱོ་བར་བྱེད་མི་འགྱུར། །བྱིས་པ་སོ་སོའི་སྐྱེ་བོ་ཀུན། །སེར་སྣའི་
དྲི་མས་ཉོན་མོངས་ཏེ། །བསླབ་པ་ཡང་དག་བཟུང་ནས་ཀྱང་། །སྡོམ་པ་མེད་ཅིང་ཉམས་པར་སྤྱོད། །བྱིས་པ་བཟོད་ལ་རྒྱབ་ཀྱིས་ཕྱོགས། །བརྩོན་འགྲུས་ཆུང་བ་ལེ་ལོ་ཅན། །སེམས་ཀྱང་གནས་པ་མ་
ཡིན་པ། །ཤེས་རབ་འཆལ་བ་བླུན་ཞིང་རྨོངས། །ཕ་དང་མ་དང་བུ་མོ་དང་། །བླ་མ་ལ་ནི་སྲི་ཞུམ་སྤངས། །འཇིག་རྟེན་སྣང་མཛད་སངས་རྒྱས་དག །མཐོང་ནས་བློ་ངན་ནེམ་ནུར་བྱེད། །ཟབ་མོ་
རྒྱལ་བས་གསུངས་པ་ཡི། །དམ་པའི་ཆོས་ནི་སྤོང་བར་བྱེད། །མུན་པའི་ཕུང་པོས་རབ་ཏུ་ཁེབས། །འཕགས་པའི་ཆོས་ལ་གུས་མི་བྱེད། །ཀུན་ནས་ཉོན་མོངས་འདི་གཟིགས་ནས། །འདུས་བྱས་
གང་ལ་འང་མི་དགའ་སྟེ། །ཉོན་མོངས་མེད་པ་འདུས་མ་བྱས། །མྱ་ངན་འདས་པ་ཐོབ་པར་བྱ། །གཞན་ཡང་ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། ཕྲག་དོག་དང་སེར་སྣའི་ཀུན་དུ་སྦྱོར་
བ་དང་ལྡན་པར་ཤེས། ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། མ་རིག་པའི་ལིང་ཏོག་གིས་ཁེབས་པར་མཐོང་། ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། གཏི་མུག་གི་

79-1-302b

འོབས་སུ་ནུབ་པར་མཐོང་། ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། འདོད་པའི་ཀླུང་གིས་དེད་པར་མཐོང་། ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། འདོད་པའི་
ཟུག་རྔུས་གཤིས་སུ་ཟུག་པར་མཐོང་། ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། ཁྲོ་བ་དང་འཁོན་དུ་འཛིན་པའི་དུ་བས་ཤིན་དུ་བདུགས་པར་མཐོང་། ཀྱེ་མའོ་ཁྱིམ་བདག་འཇིག་རྟེན་གནས་
པ་འདི་ནི་འདི་ལྟ་སྟེ། འདོད་ཆགས་ཀྱི་མེས་ཀུན་དུ་འབར་བར་མཐོང་། ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། ཞེ་སྡང་གི་དུག་གིས་ཀུན་དུ་ཁེབས་པར་མཐོང་། ཀྱེ་མའོ་ཁྱིམ་བདག་
འཇིག་རྟེན་གནས་པ་འདི་ནི་འདི་ལྟ་སྟེ། སྒྲིབ་པའི་ཚེར་མས་བསྐོར་བར་མཐོང་། ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། འཁོར་བའི་འབྲོག་དགོན་པས་བརྩོན་འགྲུས་ཉམས་པར་
མཐོང་སྟེ། ཁྱིམ་བདག་འཇིག་རྟེན་གནས་པའི་ཡོངས་སུ་འཁྲི་བ་བཅུ་པོ་དེ་དག་གིས་ཡོངས་སུ་བཀྲིས་པར་མཐོང་ནས་དད་པའི་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་ནས་བཅོམ་ལྡན་འདས་ཀྱིས་དོན་དེ་
ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །རྒ་བས་སྐྱེས་བུ་རྣམས་ཀྱི་གཞོན་པ་འཇོམ། །གཟུགས་ཀྱང་རྣམ་པར་འཇིག་ཅིང་གཟུགས་ངན་བྱེད། །དྲན་དང་བློ་དང་དགའ་བ་མེད་
པར་བྱེད། །འགྲོ་བ་རྣམས་ནི་འཆི་བའི་སྒོ་མོར་ཁྲིད། །ནད་ནི་སྟོབས་དང་དྲག་ཤུལ་རབ་ཏུ་འཇོམ། །མཐུ་དང་ཕ་རོལ་གནོད་པ་ཐམས་ཅད་འཕྲོག །དབང་པོའི་གྲོང་རྣམས་མཐའ་དག་འཇོམ་པར་བྱེད། །མགོན་
མེད་ཤིན་དུ་བརྟུལ་བ་ཞན་པར་འགྱུར། །འཆི་བ་སྲིན་མོ་ལྟ་བུར་མི་བཟད་དེ། །རྟག་ཏུ་སྐྱེ་དགུ་རྣམས་ཀྱི་ཕྱི་བཞིན་འབྲང་། །སྟོབས་ཀྱིས་རབ་ཏུ་མནན་ནས་འགྲོ་བ་ཡི། །ཕངས་པའི་ཚེ་ནི་མ་ལུས་ཟད་པར་འཐུང་། །

79-1-303a

རྒ་བ་དང་ནི་འཆི་བས་སྐྱོ་གྱུར་ཏེ། །འཇིག་རྟེན་དག་ནི་ནད་ཀྱིས་གཙེས་རིག་ནས། །མི་རྒ་མི་འཆི་ཞི་ཞིང་བདེ་བ་ཡིས། །ཆོས་རྣམས་ཚོལ་ཕྱིར་ང་ནི་རབ་ཏུ་བྱུང་། །མེ་གསུམ་གྱིས་ནི་འཇིག་རྟེན་རབ་ཚིག་པ། །
འགྲོ་བ་དག་ལ་སྐྱབས་གཞན་མ་མཐོང་ནས། །ང་ནི་སྐྱབས་དང་དཔུང་གཉེན་གྱུར་བྱས་ཏེ། །བདུད་རྩིའི་ཆར་ཕབ་མེ་རྣམས་ཞི་བར་བྱ། །སྐྱེ་དགུ་དག་ནི་ལམ་རྣམས་རབ་སྟོར་ཅིང་། །མིག་མེད་ལྡོངས་པ་རྨོངས་པར་གྱུར་པར་མཐོང་། །
ང་ནི་འཇིག་རྟེན་དག་ལ་མིག་སྦྱིན་ཅིང་། །ལམ་རྣམས་བསྟན་ཕྱིར་ང་ནི་རབ་ཏུ་བྱུང་། །སྒྲིབ་པ་དག་གིས་སྒྲིབས་ཤིང་ཀུན་སྒྲིབས་ནས། །ཐེ་ཚོམ་ཀུན་ནས་ལངས་པའི་སེམས་ཅན་དག །ཐེ་ཚོམ་རབ་ཏུ་བསལ་བར་འགྱུར་
བ་དང་། །ཆོས་རྣམས་བསྟན་ཕྱིར་ང་ནི་རབ་ཏུ་བྱུང་། །སེམས་ཅན་འདི་དག་ཕན་ཚུན་མི་མཐུན་ཏེ། །གླགས་དང་སྐབས་ཚོལ་གནོད་པའི་ཉེས་པ་ཅན། །འགྲས་པ་དག་གི་སྡུམས་ནི་བྱ་བ་དང་། །འགྲོ་ལ་ཕན་འདོད་ཕྱིར་ནི་ང་རབ་བྱུང་། །
ཕ་དང་མ་དང་སྡུག་པའི་མཆོག་རྣམས་ལ། །ང་རྒྱལ་རྒྱལ་མཚན་རབ་ཏུ་བསྙལ་བའི་ཕྱིར། །ཁྱིམ་བདག་དེ་ཕྱིར་ང་ནི་རབ་ཏུ་བྱུང་། །ཆགས་པ་ཡིས་ནི་སྒྲིབས་པའི་སེམས་ཅན་རྣམས། །རྫས་ཕྱིར་ལྟུང་བར་བྱེད་པ་མཐོང་བ་དང་། །
ནོར་བདུན་རྒྱ་ཆེར་རབ་ཏུ་རྙེད་གྱུར་ཏེ། །ངེས་ནི་སེམས་ཅན་དབུལ་བ་མེད་པར་བྱ། །སེམས་ཅན་འདི་དག་ཕན་ཚུན་གསོད་བྱེད་ཅིང་། །ལུས་ནི་གདོན་མི་ཟ་བར་དོར་དགོས་ཀྱང་། །བྱིས་པ་དོན་མེད་བདག་ལུས་གསོ་མཐོང་ནས། །སྲིད་པ་
གསུམ་ལས་ང་ནི་རྣམ་པར་ལོག །ཇི་ལྟར་ཁྱོད་ནི་དོན་མི་ཤེས་པ་བཞིན། །དེ་འདྲ་བས་ནི་འཇིག་རྟེན་གསུམ་པོ་གང་། །འཇིག་རྟེན་དག་ལ་དོན་རྣམས་བསྟན་པའི་ཕྱིར། །ཕན་པར་འདོད་པས་ང་ནི་རབ་ཏུ་བྱུང་། །སེམས་ཅན་
དམྱལ་བར་ལྟུང་བའི་སེམས་ཅན་དག །མི་བཟད་རྣམ་པ་སྣ་ཚོགས་མཐའ་ཡས་ཀྱི། །སྡུག་བསྔལ་དྲག་པོ་བྱེད་པར་མཐོང་བས་ན། །དེ་དག་ཐར་བར་བྱ་ཕྱིར་ང་རབ་བྱུང་། །གཅིག་ལ་གཅིག་ནི་གནོད་བྱེད་སེམས་ཅན་རྣམས། །

79-1-303b

བྱོལ་སོང་འགྲོ་བར་རྣམ་པར་སྤྱོད་མཐོང་ནས། །སྐྱེ་དགུ་མགོན་མེད་མགོན་ནི་བྱ་བའི་ཕྱིར། །སྙིང་རྗེའི་བསམ་པས་ང་ནི་རབ་ཏུ་བྱུང་། །གཤེན་རྗེ་ཡིས་ནི་གཙེས་པའི་སེམས་ཅན་རྣམས། །བཀྲེས་སྐོམ་མི་བཟད་སྡུག་བསྔལ་
གཟེར་མཐོང་སྟེ། །བྱང་ཆུབ་དམ་པ་ཐོབ་ནས་དེ་དག་ལ། །བདུད་རྩིའི་རོ་མཆོག་ཁ་ཟས་སྦྱིན་པར་བྱ། །མི་ཡི་ཀུན་དུ་ཚོལ་བའི་སྡུག་བསྔལ་དང་། །ལྷ་རྣམས་འཆི་འཕོ་སྡུག་བསྔལ་རིག་ནས་ནི། །འཇིག་རྟེན་
གསུམ་ཀུན་སྡུག་བསྔལ་སྡུག་བསྔལ་གྱིས། །ཉེན་པར་མཐོང་ནས་ང་ནི་རབ་ཏུ་བྱུང་། །ཁྲེལ་བ་དང་ནི་ངོ་ཚ་མེད་པ་དག །འདོད་པས་རབ་ཏུ་བརྒྱལ་བའི་སེམས་ཅན་རྣམས། །མ་དང་སྲིང་མོ་བླ་མའི་ཆུང་མ་ལ། །ཉལ་བ་ཁྱི་
དང་ཕག་རྣམས་ཇི་བཞིན་ནོ། །འདོད་པའི་དགའ་བ་ཡིས་ནི་འདི་དག་མིང་། །སེམས་ཅན་བུད་མེད་དབང་སོང་འདི་མཐོང་ནས། །ཚོང་དཔོན་བུད་མེད་དག་ནི་མི་འདོད་པས། །ཁྱིམ་ཡང་སྤངས་ནས་ང་ནི་རབ་ཏུ་བྱུང་། །
བྱིས་པ་རྣམས་ནི་འདོད་པའི་དགའ་ལ་གནས། །ཐམས་ཅད་སྡིག་པ་རྩོད་པའི་དབང་དུ་སོང་། །བདུད་རྣམས་ཐམས་ཅད་ལ་ནི་དབང་བྱས་ཏེ། །བྱང་ཆུབ་རིམ་པར་འཚང་རྒྱར་ང་རབ་བྱུང་། །ཁྱིམ་ན་གནས་པ་
དག་ནི་ཉེས་པ་སྟོང་། འདི་འདྲ་བ་ཡི་གནོད་པ་འདི་མཐོང་ནས། །ས་རྣམས་ཐམས་ཅད་རྣམ་པར་སྤངས་ནས་ནི། །སྐྱེ་བ་ཟད་པར་བྱ་ཕྱིར་ང་རབ་བྱུང་། །དེ་ནས་ཁྱིམ་བདག་ལྔ་བརྒྱ་ཙམ་པོ་དེ་དག་ཀྱེ་མའོ་
འདི་ནི་སངས་རྒྱས་ཡིན་ནོ་ཞེས་ངོ་མཚར་ཐོབ་པར་གྱུར་ཏེ། དེ་དག་གིས་སངས་རྒྱས་སོ་སངས་རྒྱས་སོ་སྙམ་དུ་རིག་ནས་སྒྲ་སྐད་མགྲིན་གཅིག་ཏུ་བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །
ཚོང་དཔོན་འདུས་པ་ལྔ་བརྒྱ་ཙམ་པོ་དག །རྒ་བས་འཇིགས་སྐྲག་རྒྱལ་བའི་དྲུང་དུ་མཆིས། །འདི་ལ་ཆོས་མཆོག་དམ་པ་རྒྱ་ཆེ་བ། །རྒ་ཤིས་མཐར་འབྱིན་རབ་ཏུ་བཤད་དུ་གསོལ། །སྲིད་པའི་

79-1-304a

འགྲོ་བ་ཡོངས་དག་བསམ་པ་དག །བཅོམ་ལྡན་སྲིད་བྲལ་འཇིགས་ལས་རྣམ་པར་གྲོལ། །འབྱུང་བ་འཇིག་པར་མཛད་པ་སྐྱབས་མཛོད་དེ། །སྲིད་པའི་ཁྱིམ་ཞུགས་འགྲོ་བ་ཐར་བར་མཛོད། །དཔའ་བོ་འདོད་
ཆགས་བྲལ་ཞིང་རྣམ་པར་གྲོལ། །རྡུལ་བྲལ་དྲི་མ་མི་མངའ་རྣམ་དག་སེམས། །འདུལ་ལ་མཁས་པ་ཁ་ལོ་སྒྱུར་བའི་མཆོག །བདུད་རྩི་དམ་པ་ཆོས་ཀྱི་རྒྱུན་ཕྱེ་ཤིག །སྐྱེས་བུ་དམ་པ་གཟུགས་རབ་མཆོག་འཛིན་པ། །
ཁྱོད་འདྲ་ས་དང་ལྷ་ཡུལ་གང་ནའང་མེད། །མི་མཉམ་མཉམ་པ་དམ་པ་འཇིག་རྟེན་གཙོ། །བདེ་བར་གཤེགས་པ་རབ་མཆོག་ཆོས་གསུངས་ཤིག །དྲི་གསུམ་དྲི་མ་སྤངས་ཤིང་སྐྱོན་མི་མངའ། །མུན་པ་རབ་རིབ་མི་མངའ་
རྣམ་དག་སྤྱན། །མུན་དང་བྲལ་ཞིང་གཏི་མུག་དྲ་བ་བསལ། །རྡུལ་མི་མངའ་བ་མཚུངས་མེད་ཆོས་རྣམས་གསུངས། །འགྲོ་བ་མགོན་མེད་སྡུག་བསྔལ་གྱུར་པ་རྣམས། །སྲིད་པའི་མཚོར་ལྷུང་སྐྱབས་མེད་ཐམས་ཅད་ལ། །
ཐུགས་རྗེ་བརྩེ་བ་བསྐྱེད་དེ་བྱམས་པའི་ཐུགས། །རྒྱལ་བ་མྱུར་དྲོངས་ཕ་རོལ་དགོད་པར་མཛོད། །ང་རྒྱལ་གཏི་མུག་རྒྱགས་པས་རྒལ་བཀའ་ཞིང་། །ནད་དང་རྩོད་མང་དབའ་ཀློང་སྲིད་པའི་ཆུར། །འགྲོ་བ་ལྷུང་ནས་ཁྱེར་བ་
སྐྱབས་མེད་ལ། །ཐུགས་བརྩེ་སྐྱེད་ལ་སྲིད་པའི་རྒྱུན་ལས་སྒྲོལ། །གསེར་གྱི་རི་ལྟར་རྣམ་པར་དག་པའི་སྐུ། །གཟི་བརྗིད་ཉི་མ་བྱེ་བ་བརྒྱ་བས་ལྷག །འཇམ་ཞིང་སྙན་པ་ཚངས་དབྱངས་མཆོག་མངའ་བ། །ཆོས་མཆོག་
བརྗོད་པ་མཛེས་པ་རབ་ཏུ་གསུངས། །ཆོས་འདི་ཀུན་ནི་རང་བཞིན་རྣམ་པར་དག །རང་བཞིན་འོད་གསལ་ཡེ་ནས་རྩ་བ་དག །མ་བྱས་བྱེད་དང་ཚོར་བ་པོ་དང་བྲལ། །གཞན་ལས་མ་གསན་རྣམ་དག་ཐམས་ཅད་གཟིགས། །
སྤྱད་པ་རབ་སྤྱད་གྲགས་པ་མཐའ་ཡས་པ། །རབ་བྱུང་སྟོབས་བཅུ་མངའ་ཞིང་འཇིགས་མེད་པ། །མཐའ་ཡས་ཡེ་ཤེས་ནམ་མཁའ་མཚུངས་པའི་ཐུགས། །རབ་སྦྱིན་དགེ་སྦྱོང་མཆོག་གི་ཆོས་བཤད་གསོལ། །དེ་ནས་

79-1-304b

བཅོམ་ལྡན་འདས་འདི་སྙམ་དུ་གྱུར་ཏེ། ཨེ་མའོ་ཁྱིམ་བདག་ལྔ་བརྒྱ་ཙམ་པོ་འདི་དག་དགེ་བའི་རྩ་བ་ཡོངས་སུ་སྨིན་གྱིས་ཅི་ནས་ས་ཕྱོགས་འདི་ཉིད་དུ་ཁྱིམ་པའི་མཚན་མ་སྤངས་ཏེ་རབ་ཏུ་བྱུང་བ་ཐོབ་ནས་ཐམས་ཅད་
ཟག་པ་ཟད་པའི་མཐར་བྱེད་པ་དེ་ལྟ་དེ་ལྟ་བུར་ངས་ཆོས་བསྟན་ཏོ། །སྙམ་དུ་དགོངས་སོ། །དེ་ནས་བཅོམ་ལྡན་འདས་དེའི་ཚེ་སྟེང་གི་བར་སྣང་ལ་སྐྱིལ་མོ་དཀྲུང་བཅས་ཏེ་བཞུགས་སོ། །དེ་ནས་ཁྱིམ་བདག་ལྔ་བརྒྱ་
ཙམ་པོ་དེ་དག་བཅོམ་ལྡན་འདས་ལ་ལྷག་པར་དགའ་བ་དང་། དད་པ་དང་། རི་མོ་དང་། གུས་པ་ཉེ་བར་གཞོག་གོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་ལྔ་བརྒྱ་ཙམ་པོ་དེ་དག་ལ་བཀའ་བསྩལ་པ། ཁྱིམ་བདག་
ཁྱེད་རྣམས་གཙེ་བ་བཅུ་ལས་ཐར་བར་འདོད་དམ། བཅུ་གང་ཞེ་ན། འདི་ལྟ་སྟེ། སྐྱེ་བས་གཙེ་བ་དང་། རྒ་བས་གཙེ་བ་དང་། ན་བས་གཙེ་བ་དང་། འཆི་བས་གཙེ་བ་དང་། མྱ་ངན་གྱིས་གཙེ་བ་དང་། སྨྲེ་སྔགས་འདོན་པས་གཙེ་
བ་དང་། སྡུག་བསྔལ་གྱིས་གཙེ་བ་དང་། ཡིད་མི་བདེ་བས་གཙེ་བ་དང་། འཁྲུག་པས་གཙེ་བ་དང་། འཁོར་བས་གཙེ་བ་སྟེ། ཁྱིམ་བདག་ཁྱེད་རྣམས་གཙེ་བ་བཅུ་པོ་འདི་དག་ལས་ཐར་བར་འདོད་དམ། གཞན་ཡང་ཁྱིམ་བདག་ཁྱེད་
རྣམས་ཀུན་ནས་མནར་སེམས་ཀྱི་དངོས་པོ་བཅུ་ལས་ཐར་བར་འདོད་དམ། བཅུ་གང་ཞེ་ན། འདི་ལྟ་སྟེ། བདག་ཉིད་ལ་གནོད་པ་བྱས་ཤེས་སེམས་ལ་ཀུན་ནས་མནར་སེམས་སྐྱེ་བ་དང་། གནོད་པ་བྱེད་དོ་ཞེས་སེམས་ལ་
ཀུན་ནས་མནར་སེམས་སྐྱེ་བ་དང་། གནོད་པ་བྱེད་པར་འགྱུར་རོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་གི་མཛའ་བོ་ལ་གནོད་པ་བྱས་ཤེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་གི་མཛའ་
བོ་ལ་གནོད་པ་བྱེད་དོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་གི་མཛའ་བོ་ལ་གནོད་པ་བྱེད་པར་འགྱུར་རོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་དང་མི་མཛའ་བའི་དོན་བྱས་

79-1-305a

ཤེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་དང་མི་མཛའ་བའི་དོན་བྱེད་དོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་དང་མི་མཛའ་བའི་དོན་བྱེད་པར་འགྱུར་རོ་ཞེས་སེམས་ལ་ཀུན་
ནས་མནར་སེམས་སྐྱེ་བ་དང་། གནོད་པའི་རབ་ཏུ་སྡང་བ་ཉིད་དང་བཅུ་སྟེ། ཁྱིམ་བདག་ཁྱེད་རྣམས་ཀུན་ནས་མནར་སེམས་ཀྱི་དངོས་པོ་བཅུ་པོ་འདི་དག་ལས་ཐར་བར་འདོད་དམ། གཞན་ཡང་ཁྱིམ་བདག་ཁྱེད་རྣམས་
ལྟ་བ་སྣ་ཚོགས་སུ་གྱུར་པ། ལྟ་བ་ངན་པའི་ཐིབས་པོ་བཅུ་ལས་ཐར་བར་འདོད་དམ། བཅུ་གང་ཞེ་ན། འདི་ལྟ་སྟེ། བདག་ཏུ་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། སེམས་ཅན་དུ་ལྟ་བར་གྱུར་པ་ལྟ་བ་ངན་པ་
ཐིབས་པོ་དང་། སྲོག་ཏུ་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། གང་ཟག་ཏུ་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། ཆད་པར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། རྟག་པར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། 
བྱ་བ་མེད་པར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། རྒྱུ་མེད་པར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། མི་མཐུན་པའི་རྒྱུར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། ལོགས་པར་ལྟ་བར་གྱུར་པ་ལྟ་བ་ངན་པ་
ཐིབས་པོ་སྟེ། ཁྱིམ་བདག་ཁྱེད་རྣམས་ལྟ་བར་གྱུར་པ་ལྟ་བ་ངན་པ་ཐིབས་པོ་བཅུ་པོ་འདི་དག་ལས་ཐར་བར་འདོད་དམ། གཞན་ཡང་ཁྱིམ་བདག་ཁྱེད་རྣམས་ཟུག་རྔུ་བཅུ་ལས་ཐར་བར་འདོད་དམ། བཅུ་གང་ཞེ་ན། 
འདི་ལྟ་སྟེ། སྲིད་པའི་ཟུག་རྔུ་དང་། མ་རིག་པའི་ཟུག་རྔུ་དང་། འདོད་པའི་ཟུག་རྔུ་དང་། འདོད་ཆགས་ཀྱི་ཟུག་རྔུ་དང་། ཞེ་སྡང་གི་ཟུག་རྔུ་དང་། གཏི་མུག་གི་ཟུག་རྔུ་དང་། ང་རྒྱལ་གྱི་ཟུག་རྔུ་དང་། ལྟ་བའི་ཟུག་རྔུ་དང་། འབྱུང་བའི་ཟུག་
རྔུ་དང་། འཇིག་པའི་ཟུག་རྔུ་དང་བཅུ་སྟེ། ཁྱིམ་བདག་ཁྱེད་རྣམས་ཟུག་རྔུ་བཅུ་པོ་དག་ལས་ཐར་བར་འདོད་དམ། གཞན་ཡང་ཁྱིམ་བདག་ཁྱེད་རྣམས་སྲེད་པའི་རྩ་བ་ལས་བྱུང་བའི་ཆོས་བཅུ་པོ་འདི་དག་ལས་

79-1-305b

ཐར་བར་འདོད་དམ། བཅུ་གང་ཞེ་ན། འདི་ལྟ་སྟེ། སྲེད་པ་ལ་བརྟེན་ནས་ཀུན་དུ་ཚོལ་བ་དང་། ཀུན་དུ་ཚོལ་བ་ལ་བརྟེན་ནས་རྙེད་པ་དང་། རྙེད་པ་ལ་བརྟེན་ནས་ང་ཡིར་འཛིན་པ་དང་། ང་ཡིར་འཛིན་པ་ལ་བརྟེན་ནས་རྣམ་
པར་ངེས་པ་དང་། རྣམ་པར་ངེས་པ་ལ་བརྟེན་ནས་འདུན་པའི་འདོད་ཆགས་དང་། འདུན་པའི་འདོད་ཆགས་ལ་བརྟེན་ནས་ལྷག་པར་ཆགས་པ་དང་། ལྷག་པར་ཆགས་པ་ལ་བརྟེན་ནས་སེར་སྣ་དང་། སེར་སྣ་ལ་བརྟེན་
ནས་ཡོངས་སུ་འཛིན་པ་དང་། ཡོངས་སུ་འཛིན་པ་ལ་བརྟེན་ནས་ཡོངས་སུ་སྲུང་བ་དང་། ཡོངས་སུ་སྲུང་བ་ལ་བརྟེན་ནས་སྡུག་བསྔལ་བ་དང་བཅུ་སྟེ། ཡོངས་སུ་སྲུང་བའི་གཞི་ལས་དབྱུག་པ་ཐོགས་པ་དང་། མཚོན་ཆ་
ཐོགས་པ་དང་། འཐབ་པ་དང་འཚང་འདྲུ་བ་དང་། འགྱེད་པ་དང་རྩོད་པ་རྣམས་འབྱུང་ངོ་། །དེའི་ཕྱིར་ཕྲ་མ་ལ་སོགས་པ་སྡིག་པ་མི་དགེ་བའི་ཆོས་རྣམ་པ་མང་པོ་འབྱུང་བར་འགྱུར་ཏེ། ཁྱིམ་བདག་ཁྱེད་རྣམས་སྲེད་པའི་རྩ་བ་ལས་
བྱུང་བའི་ཆོས་བཅུ་པོ་འདི་དག་ལས་ཐར་བར་འདོད་དམ། གཞན་ཡང་ཁྱིམ་བདག་ཁྱེད་རྣམས་ལོག་པ་ཉིད་བཅུ་ལས་ཐར་བར་འདོད་དམ། བཅུ་གང་ཞེ་ན་འདི་ལྟ་སྟེ། ལོག་པའི་ལྟ་བ་དང་། ལོག་པའི་རྟོག་པ་དང་། 
ལོག་པའི་ངག་དང་། ལོག་པའི་ལས་ཀྱི་མཐའ་དང་། ལོག་པའི་འཚོ་བ་དང་། ལོག་པའི་རྩོལ་བ་དང་། ལོག་པའི་དྲན་པ་དང་། ལོག་པའི་ཏིང་ངེ་འཛིན་དང་། ལོག་པའི་རྣམ་པར་གྲོལ་བ་དང་། ལོག་པའི་ཤེས་པ་དང་བཅུ་སྟེ། 
ཁྱིམ་བདག་ཁྱེད་རྣམས་ལོག་པ་ཉིད་བཅུ་པོ་འདི་དག་ལས་ཐར་བར་འདོད་དམ། གཞན་ཡང་ཁྱིམ་བདག་ཁྱེད་རྣམས་མི་དགེ་བའི་ལས་ཀྱི་ལམ་བཅུ་ལས་ཐར་བར་འདོད་དམ། བཅུ་གང་ཞེ་ན། འདི་ལྟ་སྟེ། སྲོག་
གཅོད་པ་དང་། མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་དང་། བརྫུན་དུ་སྨྲ་བ་དང་། ཕྲ་མ་དང་། ངག་རྩུབ་པོ་དང་། ཚིག་ཁྱལ་བ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་སྟེ། 

79-1-306a

ཁྱིམ་བདག་ཁྱེད་རྣམས་མི་དགེ་བའི་ལས་ཀྱི་ལམ་བཅུ་པོ་འདི་དག་ལས་ཐར་བར་འདོད་དམ། གཞན་ཡང་ཁྱིམ་བདག་ཁྱེད་རྣམས་ཀུན་ནས་ཉོན་མོངས་པ་བཅུ་ལས་ཐར་བར་འདོད་དམ། བཅུ་གང་ཞེ་ན། 
འདི་ལྟ་སྟེ། སེར་སྣའི་དྲི་མ་ཀུན་ནས་ཉོན་མོངས་པ་དང་། འཆལ་བའི་ཚུལ་ཁྲིམས་ཀྱི་དྲི་མ་ཀུན་ནས་ཉོན་མོངས་པ་དང་། གནོད་སེམས་ཀྱི་དྲི་མ་ཀུན་ནས་ཉོན་མོངས་པ་དང་། ལེ་ལོའི་དྲི་མ་ཀུན་ནས་ཉོན་མོངས་
པ་དང་། གཡེང་བའི་དྲི་མ་ཀུན་ནས་ཉོན་མོངས་པ་དང་། འཆལ་བའི་ཤེས་རབ་ཀྱི་དྲི་མ་ཀུན་ནས་ཉོན་མོངས་པ་དང་། སྲི་ཞུ་མེད་པའི་དྲི་མ་ཀུན་ནས་ཉོན་མོངས་པ་དང་། ཐེ་ཚོམ་གྱི་དྲི་མ་ཀུན་ནས་ཉོན་མོངས་
པ་དང་། མ་མོས་པའི་དྲི་མ་ཀུན་ནས་ཉོན་མོངས་པ་དང་། མ་གུས་པའི་དྲི་མ་ཀུན་ནས་ཉོན་མོངས་པ་སྟེ། ཁྱིམ་བདག་ཁྱེད་རྣམས་ཀུན་ནས་ཉོན་མོངས་པ་བཅུ་པོ་འདི་དག་ལས་ཐར་བར་འདོད་དམ། 
གཞན་ཡང་ཁྱིམ་བདག་ཁྱེད་རྣམས་འཁོར་བའི་འཇིགས་པ་བཅུ་ལས་ཐར་བར་འདོད་དམ། བཅུ་གང་ཞེ་ན། འདི་ལྟ་སྟེ། ཕྲག་དོག་དང་། སེར་སྣའི་ཀུན་དུ་སྦྱོར་བ་ལས་ཐར་བར་འདོད་དམ། འདི་ལྟ་སྟེ། ཁྱིམ་
བདག་ཁྱེད་རྣམས་མ་རིག་པའི་ལིང་ཏོག་ལས་ཐར་བར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་གཏི་མུག་གི་འོབས་ལས་ཐར་བར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་འདོད་པའི་ཆུ་
བོ་ལས་ཐར་བར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་ལོག་པའི་ཟུག་རྔུ་ལས་ཐར་བར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་ཁྲོ་བ་དང་འཁོན་དུ་འཛིན་པ་ལས་ཐར་བར་འདོད་དམ། 
འདི་ལྟ་སྟེ། ཁྱིམ་བདག་ཁྱེད་རྣམས་འདོད་ཆགས་ཀྱི་མེ་ལས་ཐར་བར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་ཞེ་སྡང་གི་དུག་ལས་ཐར་བར་འདོད་དམ། འདི་ལྟ་སྟེ། ཁྱིམ་བདག་

79-1-306b

ཁྱེད་རྣམས་སྒྲིབས་པའི་ཚེར་མ་ལས་ཐར་བར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་འཁོར་བའི་འབྲོག་དགོན་པ་ལས་ཐར་བར་འདོད་དམ། ཁྱིམ་བདག་ཁྱེད་རྣམས་འཁོར་བའི་འཇིགས་པ་བཅུ་པོ་འདི་དག་
ལས་ཐར་བར་འདོད་དམ། དེ་ནས་བཅོམ་ལྡན་འདས་ལ་ཁྱིམ་བདག་ལྔ་བརྒྱ་ཙམ་པོ་དེ་དག་གིས་སྒྲ་སྐད་མགྲིན་གཅིག་ཏུ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གཙེ་བ་བཅུ་ལས་ཐར་བར་འཚལ་ཏེ། 
བཅུ་གང་ཞེ་ན། འདི་ལྟ་སྟེ། སྐྱེ་བས་གཙེ་བ་དང་། རྒ་བས་གཙེ་བ་དང་། ན་བས་གཙེ་བ་དང་། འཆི་བས་གཙེ་བ་དང་། མྱ་ངན་གྱིས་གཙེ་བ་དང་། སྨྲེ་སྔགས་འདོན་པས་གཙེ་བ་དང་། སྡུག་བསྔལ་གྱིས་གཙེ་བ་དང་། ཡིད་མི་
བདེ་བས་གཙེ་བ་དང་། འཕྲུགས་པས་གཙེ་བ་དང་། འཁོར་བའི་གཙེ་བ་ལས་བཅོམ་ལྡན་འདས་བདག་ཅག་ཐར་བར་འཚལ་ལོ། །དེ་བཞིན་དུ་འཁོར་བའི་འབྲོག་དགོན་པའི་བར་དུ་ཆོས་བཅུ་པོ་འདི་དག་ལས་ཐམས་ཅད་
རྒྱས་པར་བྱའོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་ལྔ་བརྒྱ་ཙམ་པོ་དེ་དག་ལ་བཀའ་སྩལ་པ། ཁྱིམ་བདག་རྣམས་མིག་ནི་ཐར་བར་མི་འདོད་དོ། །དེ་ཅིའི་ཕྱིར་ཞེ་ན། མིག་ནི་བྱེད་པ་མེད་པ་གཡོ་བ་མེད་པ་སྟེ། 
མིག་ནི་མི་སེམས་ཤིང་རྣམ་པར་མི་རིག་གོ། དེ་བས་ན་ཁྱིམ་བདག་རྣམས་མིག་ལ་བདག་མེད་དོ་ཞེས་གནས་པར་བྱའོ། །ཁྱིམ་བདག་རྣམས་རྣ་བ་དང་། སྣ་དང་། ལྕེ་དང་། ལུས་དང་ཡིད་ནི་ཐར་བར་མི་འདོད་དོ། །དེ་ཅིའི་
ཕྱིར་ཞེ་ན། ཡིད་ནི་བྱེད་པ་མེད་པ་གཡོ་བ་མེད་པ་སྟེ། ཡིད་ནི་མི་སེམས་ཤིང་རྣམ་པར་མི་རིག་གོ། དེ་བས་ན་ཁྱིམ་བདག་རྣམས་ཡིད་ལ་ཡང་བདག་མེད་དོ་ཞེས་གནས་པར་བྱའོ། །ཁྱིམ་བདག་རྣམས་གཟུགས་ནི་
ཐར་བར་འདོད་དོ། །དེ་ཅིའི་ཕྱིར་ཞེ་ན། གཟུགས་ནི་བྱེད་པ་མེད་པ་གཡོ་བ་མེད་པ་སྟེ། གཟུགས་ནི་མི་སེམས་ཤིང་རྣམ་པར་མི་རིག་གོ། དེ་བས་ན་ཁྱིམ་བདག་རྣམས་གཟུགས་ལ་ཡང་བདག་མེད་དོ་ཞེས་གནས་པར་བྱའོ། །

79-1-307a

ཁྱིམ་བདག་རྣམས་སྒྲ་དང་། དྲི་དང་། རོ་དང་། རེག་བྱ་དང་ཆོས་ནི་ཐར་བར་མི་འདོད་དོ། །དེ་ཅིའི་ཕྱིར་ཞེ་ན། ཆོས་ཀྱི་བར་དུ་བྱེད་པ་མེད་པ་གཡོ་བ་མེད་པ་སྟེ། ཆོས་ནི་མི་སེམས་ཤིང་རྣམ་པར་མི་རིག་གོ། དེ་བས་ན་ཁྱིམ་
བདག་རྣམས་ཆོས་ཀྱི་བར་དུ་ཡང་བདག་མེད་དོ་ཞེས་གནས་པར་བྱའོ། །ཁྱིམ་བདག་རྣམས་གཟུགས་ཀྱི་ཕུང་པོ་ནི་ཐར་བར་མི་འདོད་དོ། །དེ་ཅིའི་ཕྱིར་ཞེ་ན། གཟུགས་ཀྱི་ཕུང་པོ་ནི་བྱེད་པ་མེད་པ་གཡོ་བ་མེད་པ་སྟེ། གཟུགས་
ཀྱི་ཕུང་པོ་ནི་མི་སེམས་ཤིང་རྣམ་པར་མི་རིག་གོ། དེ་བས་ན་ཁྱིམ་བདག་རྣམས་གཟུགས་ཀྱི་ཕུང་པོ་ལ་ཡང་བདག་མེད་དོ་ཞེས་གནས་པར་བྱའོ། །ཁྱིམ་བདག་རྣམས་ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་
བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་ནི་ཐར་བར་མི་འདོད་དོ། །དེ་ཅིའི་ཕྱིར་ཞེ་ན། རྣམ་པར་ཤེས་པའི་ཕུང་པོ་ནི་བྱེད་པ་མེད་པ་གཡོ་བ་མེད་པ་སྟེ། རྣམ་པར་ཤེས་པའི་ཕུང་པོ་ནི་མི་སེམས་ཤིང་རྣམ་པར་
མི་རིག་གོ། དེ་བས་ན་ཁྱིམ་བདག་རྣམས་རྣམ་པར་ཤེས་པའི་ཕུང་པོ་ལ་ཡང་བདག་མེད་དོ་ཞེས་གནས་པར་བྱའོ། །ཁྱིམ་བདག་རྣམས་སའི་ཁམས་ནི་ཐར་བར་མི་འདོད་དོ། །དེ་ཅིའི་ཕྱིར་ཞེ་ན། སའི་ཁམས་
ནི་བྱེད་པ་མེད་པ་གཡོ་བ་མེད་པ་སྟེ། སའི་ཁམས་ནི་མི་སེམས་ཤིང་རྣམ་པར་མི་རིག་གོ། དེ་བས་ན་ཁྱིམ་བདག་རྣམས་སའི་ཁམས་ལ་ཡང་བདག་མེད་དོ་ཞེས་གནས་པར་བྱའོ། །ཁྱིམ་བདག་རྣམས་
ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། རྣམ་པར་ཤེས་པའི་ཁམས་ནི་ཐར་བར་མི་འདོད་དོ། །དེ་ཅིའི་ཕྱིར་ཞེ་ན། རྣམ་པར་ཤེས་པའི་ཁམས་ནི་བྱེད་པ་མེད་པ་
གཡོ་བ་མེད་པ་སྟེ། རྣམ་པར་ཤེས་པའི་ཁམས་ནི་མི་སེམས་ཤིང་རྣམ་པར་མི་རིག་གོ། དེ་བས་ན་ཁྱིམ་བདག་རྣམས་རྣམ་པར་ཤེས་པའི་ཁམས་ལ་ཡང་བདག་མེད་དོ་ཞེས་གནས་པར་བྱའོ། །

79-1-307b

དེ་ལྟར་ཁྱིམ་བདག་རྣམས་ཆོས་ཐམས་ཅད་ནི་ཡང་དག་པ་མ་ཡིན་པ་ཡོངས་སུ་རྟོག་པ་ལས་བྱུང་སྟེ། རྐྱེན་ལ་རག་ལས་པ་སྟོབས་མེད་པ། ཉམས་ཆུང་བ། རྐྱེན་རྣམས་ལས་བྱུང་བ། རྐྱེན་རྣམས་ཡོད་ན་ཆོས་རྣམས་
གདགས་པར་འགྱུར་གྱི། རྐྱེན་མེད་ན་ཆོས་རྣམས་གདགས་པར་མི་འགྱུར་རོ། །ཁྱིམ་བདག་རྣམས་ཆོས་ཐམས་ཅད་ནི་བཏགས་པ་ཙམ་སྟེ། འདི་ལ་ལམ་ཆད་པ་མྱ་ངན་ལས་འདས་པ་མ་གཏོགས་པར་
སྐྱེ་བ་འམ། རྒ་བ་འམ། འཆི་བ་འམ། འཕོ་བ་འམ། འབྱུང་བ་གང་ཡང་མེད་དོ། །དེ་ལྟར་ཁྱིམ་བདག་རྣམས་ཁྱེད་རྣམ་གྲངས་འདིས་ཆོས་ཐམས་ཅད་ནི་ཡང་དག་པ་མ་ཡིན་པ། ཀུན་བརྟགས་པ་ལས་བྱུང་བ། 
རྐྱེན་ལ་རག་ལས་པ། སྟོབས་མེད་པ། ཉམ་ཆུང་བ། རྐྱེན་རྣམས་ལས་བྱུང་བ་སྟེ། རྐྱེན་རྣམས་ཡོད་ན་ཆོས་རྣམས་བདགས་པར་འགྱུར་གྱི་རྐྱེན་མེད་ན་ཆོས་རྣམས་བདགས་པར་མི་འགྱུར་རོ། །ཆོས་ཐམས་ཅད་ནི་བཏགས་
པ་ཙམ་སྟེ། འདི་ལ་ལམ་ཆད་པ། མྱ་ངན་ལས་འདས་པ་མ་གཏོགས་པར་སྐྱེ་བ་འམ། རྒ་བ་འམ། འཆི་བ་འམ། འཕོ་བ་འམ། འབྱུང་བ་གང་ཡང་མེད་པར་རིག་པར་བྱའོ། །དེ་ལྟར་ན་ཁྱིམ་བདག་རྣམས་ཡང་དག་པ་མ་ཡིན་
པར་ཀུན་རྟོག་པ་ཡོད་ན། ཚུལ་བཞིན་མ་ཡིན་པ་ཡིད་ལ་བྱེད་པ་གདགས་པར་འགྱུར་གྱི། ཡང་དག་པ་མ་ཡིན་པ་ཀུན་རྟོག་པ་མེད་ན་ཚུལ་བཞིན་མ་ཡིན་པ་ཡིད་ལ་བྱེད་པ་གདགས་པར་མི་འགྱུར་རོ། །ཚུལ་
བཞིན་མ་ཡིན་པ་ཡིད་ལ་བྱེད་པ་ཡོད་ན་མ་རིག་པ་གདགས་པར་འགྱུར་གྱི། ཚུལ་བཞིན་མ་ཡིན་པ་ཡིད་ལ་བྱེད་པ་མེད་ན་མ་རིག་པ་གདགས་པར་མི་འགྱུར་རོ། །མ་རིག་པ་ཡོད་ན་འདུ་བྱེད་རྣམས་གདགས་
པར་འགྱུར་གྱི། མ་རིག་པ་མེད་ན་འདུ་བྱེད་རྣམས་སུ་གདགས་པར་མི་འགྱུར་རོ། །འདུ་བྱེད་ཡོད་ན་རྣམ་པར་ཤེས་པ་གདགས་པར་འགྱུར་གྱི། འདུ་བྱེད་མེད་ན་རྣམ་པར་ཤེས་པ་གདགས་པར་མི་འགྱུར་རོ། །

79-1-308a

རྣམ་པར་ཤེས་པ་ཡོད་ན་མིང་དང་གཟུགས་གདགས་པར་འགྱུར་གྱི། རྣམ་པར་ཤེས་པ་མེད་ན་མིང་དང་གཟུགས་སུ་གདགས་པར་མི་འགྱུར་རོ། །མིང་དང་གཟུགས་ཡོད་ན་སྐྱེ་མཆེད་དྲུག་གདགས་
པར་འགྱུར་གྱི། མིང་དང་གཟུགས་མེད་ན་སྐྱེ་མཆེད་དྲུག་ཏུ་གདགས་པར་མི་འགྱུར་རོ། །སྐྱེ་མཆེད་དྲུག་ཡོད་ན་རེག་པ་གདགས་པར་འགྱུར་གྱི། སྐྱེ་མཆེད་དྲུག་མེད་ན་རེག་པ་གདགས་པར་མི་འགྱུར་རོ། །རེག་
པ་ཡོད་ན་ཚོར་བ་གདགས་པར་འགྱུར་གྱི། རེག་པ་མེད་ན་ཚོར་བ་གདགས་པར་མི་འགྱུར་རོ། །ཚོར་བ་ཡོད་ན་སྲེད་པ་གདགས་པར་འགྱུར་གྱི། ཚོར་བ་མེད་ན་སྲེད་པར་གདགས་པར་མི་འགྱུར་རོ། །སྲེད་པ་ཡོད་ན་ལེན་པ་གདགས་པར་འགྱུར་གྱི། སྲེད་པ་མེད་
ན་ལེན་པར་གདགས་པར་མི་འགྱུར་རོ། །ལེན་པ་ཡོད་ན་སྲིད་པ་གདགས་པར་འགྱུར་གྱི། ལེན་པ་མེད་ན་སྲིད་པར་གདགས་པར་མི་འགྱུར་རོ། །སྲིད་པ་ཡོད་ན་སྐྱེ་བ་གདགས་པར་འགྱུར་གྱི། སྲིད་པ་མེད་
ན་སྐྱེ་བར་གདགས་པར་མི་འགྱུར་རོ། །སྐྱེ་བ་ཡོད་ན་རྒ་ཤི་གདགས་པར་འགྱུར་གྱི། སྐྱེ་བ་མེད་ན་རྒ་ཤི་གདགས་པར་མི་འགྱུར་རོ། །རྒ་བ་ཞེས་བྱ་བ་གང་ཞེ་ན་རྒས་པ་དང་། གཏུགས་པ་དང་། སྤྱི་ཐེར་བ་དང་། 
སྐྲ་སྐྱ་བ་དང་གཉེར་མ་མང་བ་དང་། ཚེ་ཉམས་པ་དང་། དབང་པོ་ཡོངས་སུ་སྨིན་པ་དང་། འདུ་བྱེད་རྣམས་ཀྱི་དངོས་པོ་རྙིངས་པ་སྟེ། དེ་ནི་རྒ་བ་ཞེས་བྱའོ། །འཆི་བ་ཞེས་བྱ་བ་གང་ཞེ་ན། འདི་ལྟ་སྟེ། འཆི་བ་དང་། 
འཕོ་བ་དང་། འཆི་བའི་དུས་བྱེད་པ་དང་། ཕུང་པོ་རྣམས་ཞིག་པ་དང་། ལུས་བོར་བ་དང་རིས་མཐུན་པའི་སྐལ་པ་མཉམ་པ་དང་བྲལ་བ་སྟེ། འདི་ནི་འཆི་བ་ཞེས་བྱའོ། །དེ་ལ་རྒ་བ་འདི་དང་། འཆི་བ་འདི་ལ་
རྒ་ཤི་ཞེས་བྱའོ། །དེ་ལྟར་སྐྱེ་བ་ཡོད་ན་རྒ་ཤི་གདགས་པར་འགྱུར་གྱི། སྐྱེ་བ་མེད་ན་རྒ་ཤི་གདགས་པར་མི་འགྱུར་ཏེ། སྐྱེ་བ་ཞེས་བྱ་བ་གང་ཞེ་ན། སྐྱེ་བ་དང་། རྫོགས་པར་སྐྱེ་བ་དང་། འཇུག་པ་དང་། 

79-1-308b

མངོན་པར་འགྲུབ་པ་དང་། ཕུང་པོ་རྣམས་འབྱུང་བ་དང་། སྐྱེ་མཆེད་རྣམས་རབ་ཏུ་ཐོབ་པ་དང་། རིས་མཐུན་པ་དང་ཕྲད་པ་སྟེ། དེ་ནི་སྐྱེ་བ་ཞེས་བྱའོ། །སྲིད་པ་ཡོད་ན་སྐྱེ་བ་གདགས་པར་འགྱུར་གྱི། སྲིད་པ་མེད་ན་སྐྱེ་བར་
གདགས་པར་མི་འགྱུར་ཏེ། སྲིད་པ་ཞེས་བྱ་བ་གང་ཞེ་ན། འདི་ལྟ་སྟེ། འདོད་པའི་སྲིད་པ་དང་། གཟུགས་ཀྱི་སྲིད་པ་དང་། གཟུགས་མེད་པའི་སྲིད་པ་སྟེ། དེ་ནི་སྲིད་པ་ཞེས་བྱའོ། །ལེན་པ་ཡོད་ན་སྲིད་པ་གདགས་
པར་འགྱུར་གྱི། ལེན་པ་མེད་ན་སྲིད་པར་གདགས་པར་མི་འགྱུར་ཏེ། ལེན་པ་ཞེས་བྱ་བ་གང་ཞེ་ན། འདོད་པའི་ལེན་པ་དང་། ལྟ་བའི་ལེན་པ་དང་། ཚུལ་ཁྲིམས་དང་། བརྟུལ་ཞུགས་ཀྱི་ལེན་པ་དང་། བདག་ཏུ་སྨྲ་
བའི་ལེན་པ་སྟེ། དེ་ནི་ལེན་པ་ཞེས་བྱའོ། །སྲེད་པ་ཡོད་ན་ལེན་པ་གདགས་པར་འགྱུར་གྱི། སྲེད་པ་མེད་ན་ལེན་པར་གདགས་པར་མི་འགྱུར་ཏེ། སྲེད་པ་ཞེས་བྱ་བ་གང་ཞེ་ན་འདི་ལྟ་སྟེ། གཟུགས་ལ་སྲེད་པ་དང་། 
སྒྲ་ལ་སྲེད་པ་དང་། དྲི་ལ་སྲེད་པ་དང་། རོ་ལ་སྲེད་པ་དང་རེག་བྱ་ལ་སྲེད་པ་དང་། ཆོས་ལ་སྲེད་པ་སྟེ། དེ་ནི་སྲེད་པ་ཞེས་བྱའོ། །ཚོར་བ་ཡོད་ན་སྲེད་པ་གདགས་པར་འགྱུར་གྱི། ཚོར་བ་མེད་ན་སྲིད་པར་གདགས་པར་
མི་འགྱུར་ཏེ། ཚོར་བ་ཞེས་བྱ་བ་གང་ཞེ་ན། འདི་ལྟ་སྟེ། མིག་གི་འདུས་ཏེ་རེག་པ་ལས་བྱུང་བའི་ཚོར་བ་དང་། རྣ་བའི་འདུས་ཏེ་རེག་པ་ལས་བྱུང་བའི་ཚོར་བ་དང་། སྣའི་འདུས་ཏེ་རེག་པ་ལས་བྱུང་བའི་ཚོར་
བ་དང་། ལྕེའི་འདུས་ཏེ་རེག་པ་ལས་བྱུང་བའི་ཚོར་བ་དང་། ལུས་ཀྱི་འདུས་ཏེ་རེག་པ་ལས་བྱུང་བའི་ཚོར་བ་དང་། ཡིད་ཀྱི་འདུས་ཏེ་རེག་པ་ལས་བྱུང་བའི་ཚོར་བ་སྟེ། དེ་ནི་ཚོར་བ་ཞེས་བྱའོ། །རེག་པ་ཡོད་ན་
ཚོར་བ་གདགས་པར་འགྱུར་གྱི། རེག་པ་མེད་ན་ཚོར་བར་གདགས་པར་མི་འགྱུར་ཏེ། རེག་པ་ཞེས་བྱ་བ་གང་ཞེ་ན། འདི་ལྟ་སྟེ། མིག་གི་འདུས་ཏེ་རེག་པ་དང་། རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་འདུས་

79-1-309a

ཏེ་རེག་པ་སྟེ། དེ་ནི་རེག་པ་ཞེས་བྱའོ། །སྐྱེ་མཆེད་དྲུག་ཡོད་ན་རེག་པ་གདགས་པར་འགྱུར་གྱི། སྐྱེ་མཆེད་དྲུག་མེད་ན་རེག་པ་གདགས་པར་མི་འགྱུར་ཏེ། སྐྱེ་མཆེད་དྲུག་ཅེས་བྱ་བ་གང་ཞེ་
ན། འདི་ལྟ་སྟེ། མིག་གི་སྐྱེ་མཆེད་དང་། རྣ་བའི་སྐྱེ་མཆེད་དང་། སྣའི་སྐྱེ་མཆེད་དང་། ལྕེའི་སྐྱེ་མཆེད་དང་། ལུས་ཀྱི་སྐྱེ་མཆེད་དེ། ཡིད་ཀྱི་སྐྱེ་མཆེད་དེ། དེ་ནི་སྐྱེ་མཆེད་དྲུག་ཅེས་བྱའོ། །མིང་དང་གཟུགས་ཡོད་ན་སྐྱེ་མཆེད་
དྲུག་གདགས་པར་འགྱུར་གྱི། མིང་དང་གཟུགས་མེད་ན་སྐྱེ་མཆེད་དྲུག་ཏུ་གདགས་པར་མི་འགྱུར་ཏེ། མིང་དང་གཟུགས་ཤེས་བྱ་བ་གང་ཞེ་ན། འདི་ལྟ་སྟེ། ཚོར་བ་དང་འདུ་ཤེས་དང་། སེམས་དང་རེག་པ་དང་། 
ཡིད་ལ་བྱེད་པ་དང་། འབྱུང་བ་ཆེན་པོ་བཞི་དང་། འབྱུང་བ་ཆེན་པོ་བཞི་ལ་གནས་པའི་མི་དང་གཟུགས་ཏེ། དེ་ནི་མིང་དང་གཟུགས་ཤེས་བྱའོ། །རྣམ་པར་ཤེས་པ་ཡོད་ན་མིང་དང་གཟུགས་གདགས་པར་འགྱུར་
གྱི། རྣམ་པར་ཤེས་པ་མེད་ན་མིང་དང་གཟུགས་སུ་གདགས་པར་མི་འགྱུར་ཏེ། རྣམ་པར་ཤེས་པ་ཞེས་བྱ་བ་གང་ཞེ་ན། འདི་ལྟ་སྟེ། མིག་གི་རྣམ་པར་ཤེས་པ་དང་། རྣ་བའི་རྣམ་པར་ཤེས་པ་དང་། 
སྣའི་རྣམ་པར་ཤེས་པ་དང་། ལྕེའི་རྣམ་པར་ཤེས་པ་དང་། ལུས་ཀྱི་རྣམ་པར་ཤེས་པ་དང་། ཡིད་ཀྱི་རྣམ་པར་ཤེས་པ་སྟེ། དེ་ནི་རྣམ་པར་ཤེས་པ་ཞེས་བྱའོ། །འདུ་བྱེད་རྣམས་ཡོད་ན་རྣམ་པར་ཤེས་པར་
གདགས་པར་འགྱུར་གྱི། འདུ་བྱེད་རྣམས་མེད་ན་རྣམ་པར་ཤེས་པར་གདགས་པར་མི་འགྱུར་ཏེ། འདུ་བྱེད་རྣམས་ཤེས་བྱ་བ་གང་ཞེ་ན། འདི་ལྟ་སྟེ། གཟུགས་ལ་ཀུན་སེམས་པ་དང་། སྒྲ་ལ་ཀུན་
སེམས་པ་དང་། དྲི་ལ་ཀུན་སེམས་པ་དང་། རོ་ལ་ཀུན་སེམས་པ་དང་། རེག་བྱ་ལ་ཀུན་སེམས་པ་དང་། ཆོས་ལ་ཀུན་སེམས་པ་སྟེ། དེ་དག་ནི་འདུ་བྱེད་རྣམས་ཤེས་བྱའོ། །མ་རིག་པ་

79-1-309b

ཡོད་ན་འདུ་བྱེད་རྣམས་གདགས་པར་འགྱུར་ཏེ། མ་རིག་པ་མེད་ན་འདུ་བྱེད་རྣམས་སུ་གདགས་པར་མི་འགྱུར་ཏེ། མ་རིག་པ་ཞེས་བྱ་བ་གང་ཞེ་ན། འདི་ལྟ་སྟེ། སྔོན་གྱི་མཐའ་མི་ཤེས་པ་དང་། ཕྱི་མའི་
མཐའ་མི་ཤེས་པ་དང་། ནང་མི་ཤེས་པ་དང་། ཕྱི་མི་ཤེས་པ་དང་། ནང་དང་ཕྱི་མི་ཤེས་པ་དང་། སྡུག་བསྔལ་མི་ཤེས་པ་དང་། ཀུན་འབྱུང་མི་ཤེས་པ་དང་། འགོག་པ་མི་ཤེས་པ་དང་། ལམ་མི་ཤེས་པ་སྟེ། 
དེ་ལྟར་རྐྱེན་མི་ཤེས་པ་དང་། རྟེན་ཅིང་འབྲེལ་བར་འབྱུང་བ་མི་ཤེས་པ་དང་། རྟེན་ཅིང་འབྲེལ་བར་འབྱུང་བའི་ཆོས་རྣམས་མི་ཤེས་པ་དང་། ནག་པོ་དང་། དཀར་པོ་དང་། རྐྱེན་དང་རྐྱེན་མ་ཡིན་པ་དང་། སྣང་བ་དང་། མི་སྣང་
བ་དང་། ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་དང་། བསྟེན་པར་བྱ་བ་དང་། བསྟེན་པར་བྱ་བ་མ་ཡིན་པའི་ཆོས་རྣམས་གང་མི་ཤེས་པ་དང་། མི་མཐོང་བ་དང་། མངོན་པར་མི་རྟོགས་པ་དང་། 
ཁོང་དུ་མི་ཆུད་པ་དེ་ནི་མ་རིག་པ་ཞེས་བྱའོ། །ཚུལ་བཞིན་མ་ཡིན་པ་ཡིད་ལ་བྱེད་པ་ཡོད་ན་མ་རིག་པ་གདགས་པར་འགྱུར་གྱི། ཚུལ་བཞིན་མ་ཡིན་པ་ཡིད་ལ་བྱེད་པ་མེད་ན་མ་རིག་པར་གདགས་པར་མི་འགྱུར་
ཏེ། ཚུལ་བཞིན་མ་ཡིན་པ་ཡིད་ལ་བྱེད་པ་ཞེས་བྱ་བ་གང་ཞེ་ན། འདི་ལྟ་སྟེ། བདག་འདས་པའི་དུས་ན་བྱུང་བ་ཞིག་གམ། བདག་འདས་པའི་དུས་ན་མ་བྱུང་བ་ཞིག་གམ། ཅི་བདག་འདས་པའི་དུས་ན་བྱུང་བ་ཞིག་ན། 
བདག་འདས་པའི་དུས་ན་གང་དུ་བྱུང་བ་ཞིག །བདག་འདས་པའི་དུས་ན་ཅིར་གྱུར་པ་ཞིག །བདག་མ་འོངས་པའི་དུས་ན་འབྱུང་བར་འགྱུར་རམ། བདག་མ་འོངས་པའི་དུས་ན་འབྱུང་བར་མི་འགྱུར་རམ། ཅི་བདག་
མ་འོངས་པའི་དུས་ན་འབྱུང་བ་ཞིག་ན། བདག་མ་འོངས་པའི་དུས་ན་གང་དུ་འབྱུང་བར་འགྱུར། བདག་མ་འོངས་པའི་དུས་ན་ཅི་འདྲ་བར་འགྱུར་ཞེས་ནང་དུ་བདག་ཅི། བདག་སུ་ཞིག་ཅི་ཡོད་དམ་ཅི་མེད་དམ་

79-1-310a

ཅི་བྱུང་ངམ་མ་བྱུང་ངམ། ཅིར་གྱུར་གང་དུ་བྱུང་། བདག་ཅིར་གྱུར། གང་དུ་བྱུང་བ་ཞིག །ཅི་བདག་བྱུང་བ་ཞིག་ན། བདག་གང་དུ་བྱུང་བ་ཞིག །བདག་ད་རེ་བྱུང་བ་ཞིག་གམ་ཞེས་ཐེ་ཚོམ་ཟ་ཞིང་ཡིད་གཉིས་སུ་འགྱུར་
ཏེ། དེ་དེ་ལྟར་ཚུལ་བཞིན་མ་ཡིན་པ་ཡིད་ལ་བྱས་པས་ལྟ་བར་གྱུར་པ་དྲུག་ལས་ལྟ་བ་གང་ཡང་རུང་བས་གཅིག་འབྱུང་བར་འགྱུར་ཏེ། བདག་ཡོད་ཅེས་ལྟ་བར་འགྱུར་བ་དང་། བདག་མེད་ཅེས་ལྟ་བར་འགྱུར་བ་དང་། བདག་ལ་
བདག་ཡང་དག་པར་རྗེས་སུ་མཐོང་ཞེས་ལྟ་བར་འགྱུར་བ་དང་། བདག་ལ་བདག་ཡང་དག་པར་རྗེས་སུ་མི་མཐོང་ཞེས་ལྟ་བར་འགྱུར་བ་དང་། དེ་ནི་བདག་སྟེ་དེ་འཇིག་རྟེན་ནོ་ཞེས་ལྟ་བར་འགྱུར་བ་དང་། གལ་ཏེ་རྐྱེན་ལ་བརྟེན་ཏེ་
འབྱུང་བ་ནི་རྟག་པ། བརྟན་པ། ཐེར་ཟུག་པ། མི་འགྱུར་བའི་ཆོས་ཅན། ཐེར་ཟུག་པ་ཡང་དག་པར་འདུག་པ་འམ། འདུག་པར་འགྱུར་བ་ཞེས་ལྟ་བར་འགྱུར་བ་དེ་ནི་ཚུལ་བཞིན་མ་ཡིན་པ་ཡིད་ལ་བྱེད་པ་ཞེས་བྱའོ། །
ཡང་དག་པ་མ་ཡིན་པ་ཀུན་དུ་རྟོག་པ་ཡོད་ན་ཚུལ་བཞིན་མ་ཡིན་པ་ཡིད་ལ་བྱེད་པ་གདགས་པར་འགྱུར་གྱི། ཡང་དག་པ་མ་ཡིན་པ་ཀུན་དུ་རྟོག་པ་མེད་ན་ཚུལ་བཞིན་མ་ཡིན་པ་ཡིད་ལ་བྱེད་པར་གདགས་པར་མི་འགྱུར་ཏེ། ཡང་དག་
པ་མ་ཡིན་པ་ཀུན་དུ་རྟོག་པ་གང་ཞེ་ན། འདི་ལྟ་སྟེ། བདག་དང་སེམས་ཅན་དང་སྲོག་དང་། སྐྱེས་བུ་དང་གང་ཟག་དང་། སྐྱེ་བ་པོ་དང་ཤེད་ལས་སྐྱེས་དང་། ཤེད་བུ་དང་བྱེད་པ་པོ་དང་། ཚོར་བ་པོ་སྟེ། དེ་ནི་ཡང་དག་པ་མ་ཡིན་པ་
ཞེས་བྱའོ། །སོ་སོའི་སྐྱེ་བོ་ཐོས་པ་དང་། མི་ལྡན་པ་རྣམས་བདག་ཅེས་རྟོག་ཅིང་ཡོངས་སུ་རྟོག་པ་དང་། སེམས་ཅན་དང་སྲོག་དང་། སྐྱེས་བུ་དང་ཤེད་ལས་སྐྱེས་དང་། ཤེད་བུ་དང་བྱེད་པ་པོ་དང་། ཚོར་བ་པོ་ཞེས་རྟོག་ཅིང་ཡོངས་སུ་རྟོག་པ་དེ་
ནི་ཡང་དག་པ་མ་ཡིན་པ་ཀུན་དུ་རྟོག་པ་ཞེས་བྱའོ། །དེ་ལྟར་ཡང་དག་པ་མ་ཡིན་པ་ཀུན་དུ་རྟོག་པ་ཡོད་ན་ཚུལ་བཞིན་མ་ཡིན་པ་ཡིད་ལ་བྱེད་པ་གདགས་པར་འགྱུར་གྱི། ཡང་དག་པ་མ་ཡིན་པ་ཀུན་དུ་རྟོག་པ་མེད་ན་ཚུལ་བཞིན་

79-1-310b

མ་ཡིན་པ་ཡིད་ལ་བྱེད་པ་གདགས་པར་མི་འགྱུར་ཏེ། ཚུལ་བཞིན་མ་ཡིན་པ་ཡིད་ལ་བྱེད་པ་ཡོད་ན། མ་རིག་པ་གདགས་པར་འགྱུར་གྱི། ཚུལ་བཞིན་མ་ཡིན་པ་ཡིད་ལ་བྱེད་པ་མེད་ན། མ་རིག་པར་གདགས་པར་མི་འགྱུར་
རོ། །མ་རིག་པ་ཡོད་ན་འདུ་བྱེད་རྣམས་གདགས་པར་འགྱུར་གྱི། མ་རིག་པ་མེད་ན་འདུ་བྱེད་རྣམས་སུ་གདགས་པར་མི་འགྱུར་བ་ནས། སྐྱེ་བ་ཡོད་ན་རྒ་ཤི་གདགས་པར་འགྱུར་གྱི། སྐྱེ་བ་མེད་ན་རྒ་ཤི་གདགས་པར་
མི་འགྱུར་བའི་བར་དུ་གོང་མ་བཞིན་དུ་སྦྱར་རོ།། །། བམ་པོ་གཉིས་པ། དེ་ལྟར་ན་ཁྱིམ་བདག་རྣམས་ཆོས་ཐམས་ཅད་ནི་ཡང་དག་པ་མ་ཡིན་པ་ཀུན་དུ་རྟོག་པ་ལས་བྱུང་བ། རྐྱེན་ལ་རག་ལས་པ། སྟོབས་མེད་པ། 
རྐྱེན་རྣམས་ལས་བྱུང་བ་ཡིན་ཏེ། རྐྱེན་མེད་ན་ཆོས་རྣམས་གདགས་པར་མི་འགྱུར་རོ། །ཁྱིམ་བདག་རྣམས་ཆོས་ཐམས་ཅད་ནི་བཏགས་པ་ཙམ་སྟེ། འདི་ལ་ལམ་ཆད་པ་མྱ་ངན་ལས་འདས་པ་མ་གཏོགས་པར་སྐྱེ་བ་འམ། 
རྒ་བ་འམ། འཆི་བ་འམ། འཕོ་བ་འམ། འབྱུང་བ་གང་ཡང་མེད་དོ། །ཁྱིམ་བདག་རྣམས་འདི་ལྟ་སྟེ་དཔེར་ན་ཆུའི་མཚོ་ཆེན་པོ་ལ་ཉ་གནས་པར་གྱུར་པ་ཁྱིམ་བདག་རྣམས་དེ་ཅི་སྙམ་དུ་སེམས། ཉ་དེ་དག་ཅི་ཞིག་
གི་མཐུ། དེ་དག་གིས་གསོལ་པ། བཅོམ་ལྡན་འདས་ཆབ་ཀྱི་མཐུའོ། །བདེ་བར་གཤེགས་པ་ཆབ་ཀྱི་མཐུའོ། །དེ་ལ་ཁྱིམ་བདག་རྣམས་ཅི་ཆུ་དེ་སེམས་སམ། དེ་དག་གིས་གསོལ་པ། བཅོམ་ལྡན་འདས་དེ་ལྟ་མ་ལགས་སོ། །
བདེ་བར་གཤེགས་པ་དེ་ལྟ་མ་ལགས་སོ། །བཀའ་སྩལ་པ། ཁྱིམ་བདག་རྣམས་དེ་ལྟར་ཆུ་སེམས་པ་མེད་པ་ལ་ཅིའི་སྟོབས་ཤིག་ཡོད། བཅོམ་ལྡན་འདས་སྟོབས་མ་མཆིས་སོ། །བདེ་བར་གཤེགས་པ་སྟོབས་ཆུང་ངོ་། །
བཀའ་སྩལ་པ། ཁྱིམ་བདག་རྣམས་དེ་བཞིན་དུ་ཆོས་ཐམས་ཅད་ནི་ཡང་དག་པ་མ་ཡིན་པ། ཀུན་རྟོག་པ་ལས་བྱུང་བ། སྟོབས་མེད་པ། ཉམ་ཆུང་བ། རྐྱེན་རྣམས་ལས་འབྱུང་བ་སྟེ། རྐྱེན་རྣམས་ཡོད་

79-1-311a

ན་ཆོས་རྣམས་གདགས་པར་འགྱུར་རོ། །ཁྱིམ་བདག་རྣམས་ཆོས་ཐམས་ཅད་ནི་བཏགས་པ་ཙམ་སྟེ། འདི་ལ་ལམ་ཆད་པ་མྱ་ངན་ལས་འདས་པ་མ་གཏོགས་པར་སྐྱེ་བ་འམ། རྒ་བ་འམ། འཆི་བ་འམ། 
འཕོ་བ་འམ། འབྱུང་བ་གང་ཡང་མེད་དོ། །ཁྱིམ་བདག་ཁྱེད་རྣམས་དེ་བས་ན་རྐྱེན་དེ་དག་ལ་ཚུལ་བཞིན་སོ་སོར་རྟོགས་ལ་དེའི་ཚེ་ཡིད་བརྟན་དུ་མི་རུང་བ་དང་། ཡིད་བརྟན་པ་མ་ཡིན་པས་སྐྲག་པར་གྱིས་ཤིག སྐྲག་
པར་གྱུར་པ་དེ་ན་འབྲོས་པར་གྱིས་ཤིག །ཆོས་གང་ལས་འབྲོས་པའི་ཆོས་དེ་གང་ཞེས་ཚུལ་བཞིན་དུ་སོ་སོར་རྟོགས་ཤིག །ཚུལ་བཞིན་སོ་སོར་རྟོག་པ་དེ་ན་ཆོས་གང་ཆོས་དེ་ལས་འབྲོས་པའི་ཆོས་དེ་རྟོགས་པར་
གྱིས་ཤིག དེ་ཅིའི་ཕྱིར་ཞེ་ན། ཁྱིམ་བདག་རྣམས་རྣམ་པ་ཐམས་ཅད་ཏུ་མི་དམིགས་པའི་ཕྱིར་ཆོས་ཐམས་ཅད་ནི་དམིགས་སུ་མེད་པའོ། །ཁྱིམ་བདག་རྣམས་རྡུལ་དང་བྲལ་བའི་ཕྱིར་ཆོས་ཐམས་ཅད་ནི་བདག་མེད་
པའོ། །ཁྱིམ་བདག་རྣམས་བདག་དང་བྲལ་བའི་ཕྱིར་ཆོས་ཐམས་ཅད་ནི་སེམས་ཅན་མེད་པའོ། །ཁྱིམ་བདག་རྣམས་སྐྱེ་བ་དང་། རྒ་བ་དང་། ན་པ་དང་། འཆི་བ་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་། 
ཡིད་མི་བདེ་བ་དང་འཁྲུག་པ་ལས་ཤིན་དུ་འདས་པའི་ཕྱིར་ཆོས་ཐམས་ཅད་ནི་སྲོག་མེད་པའོ། །ཁྱིམ་བདག་རྣམས་དུས་གསུམ་ཡང་དག་པར་ཆད་པའི་ཕྱིར་ཆོས་ཐམས་ཅད་ནི་གང་ཟག་མེད་པའོ། །ཁྱིམ་བདག་
རྣམས་སྒྲ་དང་། སྐད་དང་དབྱངས་དང་། ཚིག་གི་ལམ་ནས་བརྗོད་དུ་མེད་པའི་ཕྱིར་ཆོས་ཐམས་ཅད་ནི་ཡི་གེ་མེད་པའོ། །ཁྱིམ་བདག་རྣམས་དམིགས་པ་མེད་པའི་ཕྱིར་ཆོས་ཐམས་ཅད་ནི་ཆགས་པ་མེད་པའོ། །ཁྱིམ་བདག་རྣམས་
ཉེ་བར་ཞི་བའི་མཚན་ཉིད་ཀྱི་ཕྱིར་ཆོས་ཐམས་ཅད་ནི་ཞི་བའོ། །ཁྱིམ་བདག་རྣམས་ནམ་མཁའི་རང་བཞིན་གྱི་ཕྱིར་ཆོས་ཐམས་ཅད་ནི་ཀུན་དུ་སོང་བའོ། །ཁྱིམ་བདག་རྣམས་ངེས་པར་འབྱུང་བ་མ་ཡིན་པའི་ཕྱིར་

79-1-311b

ཆོས་ཐམས་ཅད་ནི་སྟོང་པ་ཉིད་ལ་ཡང་དག་པར་གནས་པའོ། །ཁྱིམ་བདག་རྣམས་གནས་པ་མེད་པའི་ཕྱིར་ཆོས་ཐམས་ཅད་ནི་མ་གཡོས་པའོ། །ཁྱིམ་བདག་རྣམས་མི་གནས་ཤིང་གཡོ་བ་མེད་པ་དང་ལྡན་པའི་ཕྱིར་
ཆོས་ཐམས་ཅད་ནི་ཡང་དག་པའི་མཐའ་ལ་གནས་པའོ། །ཁྱིམ་བདག་རྣམས་རྦ་ཀློང་དང་བྲལ་བའི་ཕྱིར་ཆོས་ཐམས་ཅད་ནི་བརྗོད་དུ་མེད་པའོ། །ཁྱིམ་བདག་རྣམས་མཚན་མ་མེད་དབྱིབས་མེད་པ་ལ་སྣང་བ་
རྒྱུ་བ་དང་བྲལ་བའི་ཕྱིར་ཆོས་ཐམས་ཅད་ནི་ཁ་དོག་མེད་པའོ། །ཁྱིམ་བདག་རྣམས་ང་ཡིར་འཛིན་པ་དང་བྲལ་བའི་ཕྱིར་ཆོས་ཐམས་ཅད་ནི་ངའི་བ་མེད་པའོ། །ཁྱིམ་བདག་རྣམས་སེམས་དང་ཡིད་དང་རྣམ་
པར་ཤེས་པ་དང་བྲལ་བའི་ཕྱིར་ཆོས་ཐམས་ཅད་ནི་ཤེས་པར་བྱ་བ་མ་ཡིན་པའོ། །ཁྱིམ་བདག་རྣམས་མིག་གི་ལམ་ལས་ཤིན་དུ་འདས་པ་དང་། རྣ་བ་དང་སྣ་དང་ལྕེ་དང་ལུས་དང་། ཡིད་ཀྱི་ལམ་ལས་ཤིན་དུ་
འདས་པའི་ཕྱིར། ཆོས་ཐམས་ཅད་ནི་ཀུན་གཞི་མེད་པའོ། །ཁྱིམ་བདག་རྣམས་སྐྱེ་བ་དང་། འཇིག་པ་དང་གནས་པ་དང་བྲལ་བའི་ཕྱིར་ཆོས་ཐམས་ཅད་ནི་དོར་བ་མེད་ཅིང་བསྣན་པ་མེད་པའོ། །ཁྱིམ་
བདག་རྣམས་སེམས་དང་ཡིད་དང་རྣམ་པར་ཤེས་པ་དང་བྲལ་བའི་ཕྱིར་ཆོས་ཐམས་ཅད་ནི་བྱེད་པ་མེད་པ་གཡོ་བ་མེད་པའོ། །ཁྱིམ་བདག་རྣམས་རང་བཞིན་གྱིས་ཉམས་ཆུང་བའི་ཕྱིར་ཆོས་ཐམས་ཅད་ནི་རྐྱེན་
ལ་རག་ལས་པའོ། །ཁྱིམ་བདག་རྣམས་མིག་ནི་འབྱུང་བ་ཆེན་པོ་བཞི་ལས་གྱུར་པ། མི་རྟག་པ། མི་བརྟན་པ། ཐེར་ཟུག་མ་ཡིན་པ། སྙིང་པོ་མེད་པ། ཉམ་ཆུང་བ། ཞིགས་པ། ཡུན་ཐུང་བ། ཡིད་བརྟན་དུ་མི་
རུང་བ། སྡུག་བསྔལ་བ། ནད་མང་བ། གཙེ་བ་མང་བ་ཡིན་ཏེ། ཁྱིམ་བདག་ཁྱེད་རྣམས་ཀྱིས་མིག་དེ་ལ་གནས་པར་མི་བྱའོ། །ཁྱིམ་བདག་རྣམས་རྣ་བ་དང་། སྣ་དང་ལྕེ་དང་ལུས་དང་ཡིད་ནི་འབྱུང་བ་ཆེན་

79-1-312a

པོ་བཞི་ལས་གྱུར་པ། མི་རྟག་པ། མི་བརྟན་པ། ཐེར་ཟུག་མ་ཡིན་པ། ཡིད་བརྟན་དུ་མི་རུང་བ། སྙིང་པོ་མེད་པ། ཞིགས་པ། ནད་ཅན། སྡུག་བསྔལ་བ། ནད་མང་བ། གཙེ་བ་མང་བ་ཡིན་ཏེ། ཁྱིམ་
བདག་ཁྱེད་རྣམས་ཀྱིས་ཡིད་དེ་ལ་གནས་པར་མི་བྱའོ། །ཡང་ཁྱིམ་བདག་རྣམས་འདི་ལྟར་བསླབ་པར་བྱ་སྟེ། མིག་འདི་ནི་མཉེར་མི་བཟོད་དེ་དབུ་བ་རྡོས་པ་ལྟ་བུའོ། །མིག་འདི་ནི་རིང་དུ་མི་གནས་ཏེ་ཆུའི་ཆུ་བུར་ལྟ་བུའོ། །
མིག་འདི་ནི་ལས་དང་ཉོན་མོངས་པ་དང་། སྲེད་པ་ལས་བྱུང་བ་སྟེ་སྨིག་རྒྱུ་ལྟ་བུའོ། །མིག་འདི་ནི་རང་བཞིན་གྱིས་སྙིང་པོ་མེད་དེ་ཆུ་ཤིང་ལྟ་བུའོ། །མིག་འདི་ནི་ཕྱིན་ཅི་ལོག་ལས་བྱུང་བ་སྟེ། སྒྱུ་མ་ལྟ་བུའོ། །
མིག་འདི་ནི་ལོག་པ་དང་། ཡང་དག་པ་མ་ཡིན་པ་མཐོང་བ་སྟེ་རྨི་ལམ་ལྟ་བུའོ། །མིག་འདི་ནི་རྐྱེན་ལ་རག་ལས་པ་སྟེ་བྲག་ཆ་ལྟ་བུའོ། །མིག་འདི་ནི་ལས་ཀྱི་མིག་གཡོར་གྱིས་ཀུན་དུ་སྣང་བ་སྟེ་མིག་གཡོར་ལྟ་བུའོ། །
མིག་འདི་ནི་སེམས་འཁྲུག་པ་མེད་པར་འགྱུར་བའི་མཚན་ཉིད་དེ་སྤྲིན་ལྟ་བུའོ། །མིག་འདི་ནི་སྐད་ཅིག་ཏུ་འཇིག་པ་དང་ལྡན་པ་སྟེ། གློག་ལྟ་བུའོ། །མིག་འདི་ནི་བདག་པོ་མེད་དེ། ས་དང་མཚུངས་སོ། །མིག་འདི་ནི་
བདག་མེད་དེ་ཆུ་དང་མཚུངས་སོ། །མིག་འདི་ནི་སེམས་ཅན་མེད་དེ་མེ་དང་མཚུངས་སོ། །མིག་འདི་ནི་སྲོག་མེད་དེ་རླུང་དང་མཚུངས་སོ། །མིག་འདི་ནི་གང་ཟག་མེད་དེ་ནམ་མཁའ་དང་མཚུངས་སོ། །མིག་འདི་ནི་འབྱུང་
པ་ཆེན་པོའི་ཀུན་བཞི་སྟེ་ཡང་དག་པ་མ་ཡིན་པའོ། །མིག་འདི་ནི་བདག་དང་བདག་གི་དང་བྲལ་བ་སྟེ་སྟོང་པའོ། །མིག་འདི་ནི་རྩྭ་དང་བརྩིག་པ་དང་། ཤིང་དང་རྡོ་དང་། མིག་ཡོར་ལྟ་བུ་སྟེ་བེམས་པོའོ། །མིག་འདི་ནི་རླུང་གི་འཁྲུལ་
འཁོར་དང་ལྡན་པར་འབྱུང་སྟེ། བྱེད་པ་མེད་པའོ། །མིག་འདི་ནི་གསོག་སྟེ་མི་གཙང་བ་དང་། རྣག་བསགས་པའོ། །མིག་འདི་ནི་གསོབ་སྟེ་གཡོག་པ་ཀུན་དུ་མཉེ་བ་གཞིག་པ་རྣམ་པར་འཐོར་འཇིག་པའི་ཆོས་ཅན་ནོ། །

79-1-312b

མིག་འདི་ནི་རྟག་ཏུ་རྒ་བའི་ཟིལ་གྱིས་ནོན་པ་སྟེ་ཁྲོན་པ་རྙིང་པ་དང་མཚུངས་སོ། །མིག་འདི་ནི་མཐར་འཆི་བ་སྟེ་མཐར་མི་གནས་པའོ། །ཁྱིམ་བདག་རྣམས་མིག་ཇི་ལྟ་བ་དེ་བཞིན་དུ་རྣ་བ་དང་སྣ་དང་ལྕེ་དང་ལུས་དང་
ཡིད་ཀྱང་རིག་པར་བྱའོ། །གོང་མ་བཞིན་དུ་སྦྱར་ཏེ་ཆོས་ཐམས་ཅད་ཀྱི་བར་དུ་རིག་པར་བྱའོ། །ཁྱིམ་བདག་རྣམས་གཞན་ཡང་འདི་ལྟ་སྟེ། མིག་འདི་དང་འདི་ལྟ་སྟེ། རྣ་བ་དང་སྣ་དང་ལྕེ་དང་ལུས་འདི་ནི་བྱིས་པ་
སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཡིད་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། གཟུགས་འདི་དང་འདི་ལྟ་སྟེ། སྒྲ་དང་དྲི་དང་རོ་དང་རེག་བྱ་དང་། ཆོས་
འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་རྣམས་གཟུགས་ཀྱི་ཕུང་པོ་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་རྣམས་
ཚོར་བའི་ཕུང་པོ་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་རྣམས་འདུ་ཤེས་ཀྱི་ཕུང་པོ་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་
རྣམས་འདུ་བྱེད་ཀྱི་ཕུང་པོ་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་རྣམས་རྣམ་པར་ཤེས་པའི་ཕུང་པོ་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་
མོ། །འདི་ལྟ་སྟེ། ཁྱིམ་བདག་རྣམས་སའི་ཁམས་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་རྣམས་ཆུའི་ཁམས་དང་། མེའི་ཁམས་དང་རླུང་གི་ཁམས་འདི་ནི་
བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་རྣམས་འདུས་བྱས་དང་། འདུས་མ་བྱས་ཀྱི་ཁམས་ཤེས་བྱ་བའི་ཆོས་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །

79-1-313a

དེ་བས་ན་ཁྱིམ་བདག་ཁྱེད་རྣམས་མི་འདོད་པར་གྱིས་ཤིག །མི་འདོད་པར་གྱུར་ནས་བུ་དང་ཆུང་མ་རྣམས་ཉེ་བར་མ་ལེན་ཅིག །ནོར་རྣམས་མ་ལེན་ཅིག །དེ་དག་མི་ལེན་པར་གྱུར་ནས་དད་པས་ཁྱིམ་
ནས་ཁྱིམ་མེད་པར་རབ་ཏུ་འབྱུང་བར་གྱིས་ཤིག །དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་མི་འདོད་པར་གྱིས་ཤིག །ཁྱིམ་བདག་རྣམས་རབ་ཏུ་བྱུང་བའི་མི་འདོད་པ་གང་ཞེ་ན། གང་སོ་སོར་ཐར་པའི་
སྡོམ་པས་བསྡམས་ཤིང་ཆོ་ག་དང་། སྤྱོད་ཡུལ་ཕུན་ཚོགས་པ། ཁ་ན་མ་ཐོ་བ་རྡུལ་ཙམ་ལ་ཡང་འཇིགས་པར་ལྟ་ཞིང་བསླབ་པའི་གཞི་ཡང་དག་པར་བཟུང་ནས་སློབ་སྟེ། ཚུལ་ཁྲིམས་དང་ལྡན་པར་གནས་
པའོ། །ཚུལ་ཁྲིམས་ཀྱི་ཕུང་པོ་དང་ལྡན་པ་ནི་མིག་མི་ལེན། རྣ་བ་དང་སྣ་དང་། ལྕེ་དང་ལུས་དང་ཡིད་མི་ལེན། གཟུགས་མི་ལེན། སྒྲ་དང་དྲི་དང་རོ་དང་། རེག་བྱ་དང་ཆོས་མི་ལེན། གཟུགས་དང་། ཚོར་བ་དང་འདུ་ཤེས་དང་། 
འདུ་བྱེད་དང་རྣམ་པར་ཤེས་པའི་ཕུང་པོ་མི་ལེན། སའི་ཁམས་མི་ལེན་ཆུའི་ཁམས་མི་ལེན། མེའི་ཁམས་དང་། རླུང་གི་ཁམས་དང་ནམ་མཁའི་ཁམས་དང་། རྣམ་པར་ཤེས་པའི་ཁམས་མི་ལེན་ཏེ། ཁྱིམ་
བདག་རྣམས་འདི་ནི་རབ་ཏུ་བྱུང་བའི་མི་འདོད་པའོ། །མི་འདོད་ནས་མིག་གི་ཁམས་མི་ལེན་ཏོ། །གོང་མ་བཞིན་དུ་སྦྱར་ཏེ། ཡིད་ཀྱི་ཁམས་ཀྱི་བར་དུ་མི་ལེན་ཏེ། གོང་མ་བཞིན་དུ་སྦྱར་ཏེ། གང་མི་ལེན་པ་དེ་
ཡོངས་སུ་མི་སྤོང་ངོ་། །ཅི་ཡོངས་སུ་མི་སྤོང་ཞེ་ན། མིག་ཡོངས་སུ་མི་སྤོང་། རྣ་བ་དང་སྣ་དང་ལྕེ་དང་། ལུས་དང་ཡིད་ཡོངས་སུ་མི་སྤོང་། གཟུགས་ཡོངས་སུ་མི་སྤོང་། སྒྲ་དང་དྲི་དང་རོ་དང་རེག་བྱ་དང་། ཆོས་
ཡོངས་སུ་མི་སྤོང་། གཟུགས་ཀྱི་ཕུང་པོ་ཡོངས་སུ་མི་སྤོང་། ཚོར་བའི་ཕུང་པོ་ཡོངས་སུ་མི་སྤོང་། འདུ་ཤེས་ཀྱི་ཕུང་པོ་ཡོངས་སུ་མི་སྤོང་། འདུ་བྱེད་ཀྱི་ཕུང་པོ་ཡོངས་སུ་མི་སྤོང་། རྣམ་པར་ཤེས་

79-1-313b

པའི་ཕུང་པོ་ཡོངས་སུ་མི་སྤོང་། སའི་ཁམས་ཡོངས་སུ་མི་སྤོང་། ཆུའི་ཁམས་ཡོངས་སུ་མི་སྤོང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། རྣམ་པར་ཤེས་པའི་ཁམས་ཀྱི་བར་དུ་ཡོངས་
སུ་མི་སྤང་ངོ་། །དེ་ནམ་མི་སྤོང་བ་དེ་ན་དེ་ཀུན་ནས་ཉོན་མོངས་པར་མི་འགྱུར། ཀུན་ནས་ཉོན་མོངས་པ་མེད་ན་ཡང་བར་འགྱུར་རོ། །དེ་ནམ་ཡང་བར་གྱུར་པ་དེ་དེ་མི་སྣང་བར་འགྱུར་རོ། །དེ་ནམ་མི་སྣང་བ་དེ་ན་གང་ལ་ཡང་
ཁོང་ཁྲོ་བར་མི་བྱེད་དོ། །དེ་ནམ་ཁོང་ཁྲོ་བར་མི་བྱེད་པ་དེ་ན་བདག་ལ་གནོད་པར་མི་སེམས། གཞན་ལ་གནོད་པར་མི་སེམས། གཉིས་ག་ལ་གནོད་པར་མི་སེམས་ཏེ། དེ་གནོད་པར་མི་སེམས་པས་ཕུང་པོའི་ལྷག་མ་
མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའོ། །ཁྱིམ་བདག་རྣམས་དེ་ལ་གང་ཡོངས་སུ་མྱ་ངན་ལས་འདའ་ཞེ་ན། དེ་ལ་མིག་ཡོངས་སུ་མྱ་ངན་ལས་མི་འདའ། རྣ་བ་དང་སྣ་དང་
ལྕེ་དང་ལུས་དང་། ཡིད་ཡོངས་སུ་མྱ་ངན་ལས་མི་འདའ་མོད་ཀྱི། ཁྱིམ་བདག་རྣམས་གང་མིག་ལ་བརྟེན་ནས་ང་ཞེ་འམ། ངའི་ཞེས་ཡང་དག་པ་མ་ཡིན་པ་འཛིན་པ་དེ་དང་བྲལ་བ་ནི་ཡོངས་སུ་མྱ་ངན་ལས་འདའ་བའོ། །
གང་དང་བྲལ་བ་ཡོངས་སུ་མྱ་ངན་ལས་འདས་པ་ཡིན་ཞེ་ན། འདོད་ཆགས་དང་བྲལ་བ་ནི་ཡོངས་སུ་མྱ་ངན་ལས་འདས་པའོ། །ཞེ་སྡང་དང་བྲལ་བ་ནི་ཡོངས་སུ་མྱ་ངན་ལས་འདས་པའོ། །གཏི་མུག་དང་བྲལ་བ་ནི་ཡོངས་
སུ་མྱ་ངན་ལས་འདས་པའོ། །མི་ཤེས་པ་དང་བྲལ་བ་ནི་ཡོངས་སུ་མྱ་ངན་ལས་འདས་པ་སྟེ། ཡང་ཁྱིམ་བདག་རྣམས་མི་ཤེས་པ་ནི་འདས་པ་ལ་མེད་པར་མ་གྱུར། ད་ལྟར་བྱུང་བ་དང་མ་འོངས་པ་ལ་མེད་པར་
མ་གྱུར་མོད་ཀྱི། མི་ཤེས་པ་དང་བྲལ་ནས་ཤེས་པ་སྐྱེས་སོ། །ཁྱིམ་བདག་རྣམས་དེ་ལ་ཤེས་པ་གང་ཞེ་ན། འདི་ལྟ་སྟེ། ཟད་པ་ཤེས་པའོ། །དེ་ལ་ཟད་པ་ཤེས་པ་གང་ཞེ་ན། ཟད་པ་ཤེས་པ་ནི་འདས་པ་མ་ཡིན། 

79-1-314a

ཟད་པ་ཤེས་པ་ནི་མ་འོངས་པ་མ་ཡིན། ཟད་པ་ཤེས་པ་ནི་ད་ལྟར་བྱུང་བ་མ་ཡིན་མོད་ཀྱི། ཁྱིམ་བདག་རྣམས་གང་ལ་བརྟེན་ཏེ་མི་ཤེས་པ་དང་བྲལ་ནས་ཤེས་པ་སྐྱེས་པར་གྱུར་པ་དེ་ནི་མི་ཤེས་པ་དང་
བྲལ་བའི་ཤེས་པའོ། །མིག་ལ་བརྟེན་ནས་མི་ཤེས་པ་དང་བྲལ་ཞིང་ཤེས་པ་སྐྱེས་ཀྱང་མིག་ནི་ངའི་བ་མ་ཡིན་ནོ། །གང་ངའི་བ་མ་ཡིན་པ་དེ་ཡོངས་སུ་མ་བཟུང་བའོ། །གང་ཡོངས་སུ་མ་བཟུང་བ་དེ་སྤངས་པའོ། །
གང་སྤངས་པ་དེ་གྲོལ་བའོ། །གང་ལས་གྲོལ་ཞེ་ན། བདག་ཏུ་འཛིན་པ་ལས་གྲོལ། སེམས་ཅན་དུ་འཛིན་པ་ལས་གྲོལ། སྲོག་ཏུ་འཛིན་པ་དང་། གང་ཟག་ཏུ་འཛིན་པ་དང་། ཆད་པར་འཛིན་པ་དང་། རྟག་པར་འཛིན་པ་ལས་
གྲོལ། འཛིན་པ་ཐམས་ཅད་ལས་གྲོལ། ཡོངས་སུ་རྟོག་པ་ལས་གྲོལ་ཏེ། དེ་ཡོངས་སུ་མི་རྟོག་གོ། ཡོངས་སུ་མི་རྟོག་པས་མི་རྟོག་རྣམ་པར་མི་རྟོག་གོ། ཅི་ལ་མི་རྟོག་ཅེ་ན། ང་དང་ངའི་ཞེས་མི་རྟོག་སྟེ། དེ་མི་
སོགས་ཤིང་སོགས་པར་མི་བྱེད་ལ་སྤོང་ཞིང་མི་ལེན་ཏོ། །སྤངས་པས་ཡོངས་སུ་མྱ་ངན་ལས་འདས་སོ། །གྲོལ་ལོ་བྱུང་ངོ་། །རབ་ཏུ་རྣམ་པར་གྲོལ་ལོ། །བྲལ་ལོ་གང་ལས་བྱུང་ཞེ་ན། སྡུག་བསྔལ་ཐམས་ཅད་
ལས་བྱུང་ངོ་། །ཁྱིམ་བདག་ཁྱེད་རྣམས་འབྱུང་བར་འདོད་ན། ཆོས་གང་ཡང་བླང་བར་མི་བྱའོ། །དེ་ཅིའི་ཕྱིར་ཞེ་ན། ཁྱིམ་བདག་རྣམས་ལེན་པས་ནི་སྲིད་པར་འགྱུར་རོ། །མི་ལེན་པས་ནི་སྲིད་པ་མེད་དོ། །དེ་ལ་ཁྱིམ་བདག་
རྣམས་མིག་ཡོངས་སུ་མྱ་ངན་ལས་འདས་པ་མ་ཡིན་ནོ། །གོང་མ་བཞིན་དུ་སྦྱར་ཏེ། རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་བར་དུ་ཡོངས་སུ་མྱ་ངན་ལས་འདས་པ་མ་ཡིན་པ་ནས། རྣམ་པར་ཤེས་པའི་ཁམས་
ཀྱི་བར་དུ་ཡོངས་སུ་མྱ་ངན་ལས་འདས་པ་མ་ཡིན་མོད་ཀྱི། ཁྱིམ་བདག་རྣམས་གང་རྣམ་པར་ཤེས་པ་ལ་བརྟེན་ཏེ། ང་དང་ངའི་ཞེས་ཡང་དག་པ་མ་ཡིན་པར་འཛིན་པ་དེ་དང་བྲལ་བ་དེ་ནི་ཡོངས་སུ་མྱ་ངན་

79-1-314b

ལས་འདས་པའོ། །གང་དང་བྲལ་ན་ཡོངས་སུ་མྱ་ངན་ལས་འདས་པ་ཡིན་ཞེ་ན། འདོད་ཆགས་དང་བྲལ་བ་ནི་ཡོངས་སུ་མྱ་ངན་ལས་འདས་པའོ། །ཞེ་སྡང་དང་བྲལ་བ་ནི་ཡོངས་སུ་མྱ་ངན་ལས་འདས་པའོ། །
གཏི་མུག་དང་བྲལ་བ་ནི་ཡོངས་སུ་མྱ་ངན་ལས་འདས་པའོ། །མི་ཤེས་པ་དང་བྲལ་བ་ནི་ཡོངས་སུ་མྱ་ངན་ལས་འདས་པ་སྟེ། ཡང་ཁྱིམ་བདག་རྣམས་མི་ཤེས་པ་ནི་འདས་པ་དང་། ད་ལྟར་དང་། མ་འོངས་པ་
ལ་མེད་པར་གྱུར་པ་མ་ཡིན་མོད་ཀྱི། མི་ཤེས་པ་དང་བྲལ་ནས་ཤེས་པ་སྐྱེས་སོ། །ཁྱིམ་བདག་རྣམས་དེ་ལ་ཤེས་པ་གང་ཞེ་ན། འདི་ལྟ་སྟེ། ཟད་པ་ཤེས་པའོ། །དེ་ལ་ཟད་པ་ཤེས་པ་གང་ཞེ་ན། ཟད་པ་
ཤེས་པ་ནི་འདས་པ་མ་ཡིན། ཟད་པ་ཤེས་པ་ནི་མ་འོངས་པ་མ་ཡིན། ཟད་པ་ཤེས་པ་ནི་ད་ལྟར་བྱུང་བ་མ་ཡིན་མོད་ཀྱི། ཁྱིམ་བདག་རྣམས་མིག་ལ་བརྟེན་ཏེ། མི་ཤེས་པ་དང་བྲལ་ནས་ཤེས་པ་སྐྱེས་
པར་གྱུར་པ་དེ་ནི་མི་ཤེས་པ་དང་བྲལ་བའི་ཤེས་པའོ། །མིག་ལ་བརྟེན་ཏེ་མི་ཤེས་པ་དང་བྲལ་ནས་ཤེས་པ་སྐྱེས་ཀྱང་ཤེས་པའི་དབྱིངས་ནི་ངའི་བ་མ་ཡིན་ནོ། །གང་ངའི་བ་མ་ཡིན་པ་དེ་ཡོངས་སུ་མ་བཟུང་བའོ། །
གང་ཡོངས་སུ་མ་བཟུང་བ་དེ་སྤངས་པའོ། །གང་སྤངས་པ་དེ་གྲོལ་བའོ། །གང་ལས་གྲོལ་ཞེ་ན། བདག་ཏུ་འཛིན་པ་ལས་གྲོལ། སེམས་ཅན་དུ་འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པ་དང་། 
ཆད་པར་འཛིན་པ་དང་། རྟག་པར་འཛིན་པ་ལས་གྲོལ། ཡོངས་སུ་རྟོག་པ་ལས་གྲོལ་ཏེ། དེ་ཡོངས་སུ་མི་རྟོག་གོ ཡོངས་སུ་མི་རྟོག་པས་མི་རྟོག་རྣམ་པར་མི་རྟོག་ག ། ཅི་ལ་མི་རྟོག་ཅེ་ན། ང་ཞེས་
མི་རྟོག  །ངའི་ཞེས་མི་རྟོག་སྟེ། དེ་མི་སོགས་ཤིང་སོགས་པ་མེད་དེ། ལེན་པ་མེད་ཅིང་སྤངས་པས་ཡོངས་སུ་མྱ་ངན་ལས་འདས་སོ། །གྲོལ་ལོ། །བྱུང་ངོ་། །རབ་ཏུ་རྣམ་པར་གྲོལ་ལོ། །བྲལ་ལོ། །གང་

79-1-315a

ལས་བྱུང་ཞེ་ན། སྡུག་བསྔལ་ཐམས་ཅད་ལས་བྱུང་ངོ་། །ཁྱིམ་བདག་ཁྱེད་རྣམས་འབྱུང་བར་འདོད་ན་ཆོས་གང་ཡང་བླང་བར་མི་བྱའོ། །དེ་ཅིའི་ཕྱིར་ཞེ་ན། ཁྱིམ་བདག་རྣམས་ལེན་པས་ནི་
སྲིད་པར་འགྱུར་གྱི། མི་ལེན་པས་ནི་མ་ཡིན་ནོ། །དེ་ནས་བཅོམ་ལྡན་འདས་ཀྱི་དོན་འདི་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ལེན་པ་ལས་ནི་འཇིགས་སྐྱེ་སྟེ། །
དེ་ཕྱིར་ངན་འགྲོར་འགྲོ་བར་འགྱུར། །འཇིགས་བཅས་གནས་ནི་འདི་མཐོང་ནས། །མཁས་པས་དེ་ནི་མི་ལེན་ཏོ། །ལམ་གང་ཉིད་ལ་བསྒོམ་བྱ་བ། །ཤེས་རབ་ཀྱིས་ནི་དེ་བལྟ་སྟེ། །ཤེས་རབ་ཀྱིས་ནི་མཐོང་འགྱུར་བས། །
རྣམ་པ་གཞན་དུ་མི་འགྱུར་རོ། །སྐྱེ་མཆེད་ཐམས་ཅད་སྟོང་པ་སྟེ། །སྙིང་པོ་མེད་པ་གཡོ་ཞིང་གསོག །སྐྱེ་དགུ་རྣམས་ནི་སྲེད་པས་བསླུས། །དེ་ལ་ཆགས་པར་མི་བྱའོ། །ཆོས་རྣམས་སྟོང་པར་ངས་
མཁྱེན་ཏེ། །ཆོས་རྣམས་སྙིང་པོ་མེད་པར་མཁྱེན། །བདེ་བརྙེས་མྱ་ངན་མི་མཛད་དེ། །ངས་ནི་མི་གཡོ་བདེ་བ་བརྙེས། །གང་གིས་འདི་ལྟར་ཆོས་རྣམས་ཀུན། །སྟོང་པ་ཉིད་དུ་ཤེས་པ་དེ། །སྡུག་བསྔལ་དག་ནི་ཀུན་ལས་
ཐར། །དེ་ལ་བརྩོད་པ་མེད་པ་ཡིན། །འདོད་པ་འདི་ནི་ཡོངས་སུ་འཛིན་ཀུན་དང་། །གཙེ་བ་ཐམས་ཅད་ཀྱི་ཡང་སྐྱེད་པ་ཡིན། །ཡོངས་སུ་འཛིན་པ་དག་ལས་ལེན་པར་གསུངས། །ལེན་པ་དག་ལས་སྲིད་པ་འབྱུང་བར་
འགྱུར། །སྲིད་པ་ལས་ནི་རྫོགས་སྐྱེ་སྐྱེ་བ་སྟེ། །དེ་ནི་འཇུག་པ་དག་དང་འགྲུབ་པར་འགྱུར། །སྐྱེས་ནས་ནད་དང་རྒ་དང་འཆི་བ་དང་། །མི་འདོད་སྡུག་བསྔལ་ཆེན་པོ་གཞན་དག་གནོད། །འདོད་པ་མེད་ན་ལེན་པ་ཡོད་
མ་ཡིན། །ལེན་པ་མེད་ན་སྲིད་པར་མི་འགྱུར་ཏེ། །སྲིད་པ་མངོན་པར་འགྲུབ་ལས་འདས་པ་ནི། །སྐྱེ་རྒ་ན་དང་འཆི་བར་མི་འགྱུར་རོ། །དེ་ཕྱིར་ཁྱེད་ཀུན་གཅིག་ཏུ་འདུས་གྱུར་ནས། །ཡོངས་སུ་འཛིན་པ་རྣམ་པར་

79-1-315b

སྤང་བྱོས་ལ། །བུ་དང་ཆུང་མ་དག་ལ་དགའ་སྤོངས་ཏེ། །དགེ་སློང་ཚུལ་འདི་མྱུར་དུ་བླང་བར་བྱོས། །ཤེས་ཀྱི་ཁེ་འདོད་རྙེད་པ་འདོད་མ་བྱེད། །ངན་ངོན་ཙམ་དག་གིས་ནི་ཆོག་བྱོས་ལ། །གདོལ་པ་དག་དང་འདྲ་བའི་
དམའ་སེམས་ཀྱིས། །གཞན་གྱི་གྲོང་དུ་ཉེ་བར་འགྲོ་བར་བྱ། །ང་ནི་ཚུལ་ཁྲིམས་ལྡན་ཞེས་བདག་གམ་སྙེམས། །འདི་ནི་ཚུལ་ཁྲིམས་ངན་ཞེས་གཞན་མ་བརྙས། །ཚུལ་ཁྲིམས་ཙམ་གྱིས་གཞན་ལ་གང་བརྙས་
པ། །སྙེམས་ཕྱིར་དེ་ནི་ཚུལ་ཁྲིམས་འཆལ་ཅེས་བྱ། །ཇི་ལྟར་རི་དགས་དག་ནི་རྒྱས་ཟིན་པ། །དེ་དག་ཉིད་དུ་དེ་ཟིན་གསོད་པ་ལྟར། །དེ་བཞིན་བདུད་ཀྱི་ཞགས་པས་ཟིན་པ་དེ། །སྙེམས་པ་དེ་ཉིད་ཀྱིས་ནི་དེ་
བཅོམ་མོ། །འཕྱ་བའི་བསམ་པ་ཅན་གྱི་གང་ཟག་དག །གཞན་ལ་བརྙས་པས་བདག་ཉིད་ཉམས་པར་བྱེད། །དེ་བས་ཚུལ་ཁྲིམས་འཆལ་ལ་འང་མི་བརྙས་ན། །ཁྲིམས་ལྡན་ཚངས་པར་སྤྱོད་ལ་སྨོས་
ཅིང་གོས། །དྲང་སྲོང་ངེས་པའི་རྗེས་སུ་སློབ་པ་དག །རྣམ་པར་གྲོལ་བ་ཞི་བ་འདི་ཚོལ་ཞིང་། །ལུས་དང་སྲོག་རྣམས་ལ་ཡང་མི་ལྟ་བར། །རྟག་ཏུ་དབེན་པ་དགོན་པར་གནས་པར་བྱ། །གནོད་པའི་རྩ་བ་གཅིར་
བུའི་གསུང་ཚིག་དང་། །འཇིག་རྟེན་རྒྱང་པན་གསང་ཚིག་རྣམས་སྤོངས་ལ། །སྟོང་པ་ཉིད་དང་ལྡན་པར་གང་གསུངས་པ། །ཟབ་མོའི་ཆོས་ལ་དགའ་བ་བསྐྱེད་པར་བྱོས། །ནང་དང་ཕྱི་རོལ་དག་གི་སྐྱེ་མཆེད་ནི། །
བཅུ་གཉིས་པོ་སྟེ་སེམས་ཀྱི་རྩ་བར་བཤད། །དེ་དག་ཀུན་ཀྱང་ལས་ཀྱི་རྒྱུ་ལས་བྱུང་། །ལས་ཀྱང་ཡུན་རིང་སེམས་པས་བཞག་པའོ། །མིག་དང་གཟུགས་གཉིས་ལ་ནི་བརྟེན་བྱས་ནས། །རྐྱེན་
རྣམས་ལས་ཀྱང་རྣམ་པར་ཤེས་པ་སྐྱེ། །འདུ་བ་མ་ཚང་བས་ནི་ནུབ་གྱུར་ཏེ། །ཇི་ལྟར་ཤིང་མེད་མེ་ནི་མི་འབར་བཞིན། །དེ་ལྟར་ཆོས་འདི་ཐམས་ཅད་རབ་སྐྱེས་པ། །ཕུན་ཚུན་འདུས་པ་ལས་ནི་

79-1-316a

འབྱུང་བར་འགྱུར། །བྱེད་པ་པོ་དག་ཚོར་བ་མི་དམིགས་ཏེ། །བྱ་བ་དག་ནི་སྒྱུ་མ་ལྟ་བུར་སྣང་། །ངས་ནི་ནང་དང་ཕྱི་རོལ་ཆོས་རྣམས་ཀུན། །སྟོང་པ་ཉིད་དེ་སྒྱུ་མ་འདྲ་བར་མཁྱེན། །བྱིས་པ་མི་ཤེས་ལོག་པར་
འཛིན་པ་དག །ང་དང་ང་ཡི་ཞེས་ཀྱང་རྣམ་པར་རྟོག །མིག་ནི་ནང་ན་ཅུང་ཟད་ཡོད་མ་ཡིན། །ཕྱི་རོལ་གང་དུ་འང་སེམས་ཅན་མི་དམིགས་ཏེ། །མིག་ནི་བདག་མེད་བྱེད་མེད་སྲོག་མེད་དེ། །ཆོས་རྣམས་ཀུན་ཀྱང་དེ་ལྟར་
ཤེས་པར་བྱོས། །མིག་ནི་སེམས་ཤིང་གྲོལ་བར་འདོད་མ་ཡིན། །དེ་བཞིན་རྣ་བ་དང་ནི་སྣ་དང་ལྕེ། །ལུས་དང་ཡིད་དང་གཟུགས་ཀྱང་བྱེད་མེད་དེ། །ཆོས་རྣམས་ཐམས་ཅད་དེ་དང་འདྲ་བར་ལྟོས། །ཇི་ལྟར་རྒྱ་མཚོ་དག་གི་
ཆུ་ལས་ནི། །དབུ་བ་རྡོས་པ་ཆེན་པོ་མང་བྱུང་བ། །དེ་ལ་མིག་ལྡན་ཚུལ་བཞིན་དེས་བརྟགས་ན། །དབུ་བ་རྡོས་པ་ཉམ་ཆུང་སྙིང་པོ་མེད། །དེ་བཞིན་ཕུང་པོ་ལྔ་ཡི་ངོ་བོ་ཉིད། །དབུ་བ་ལྟ་བུར་ཉམ་ཆུང་གང་ཤེས་པ། །གཙེ་
བ་ཐམས་ཅད་དག་ནི་སྐྱེ་བ་དང་། །རྒ་དང་མྱ་ངན་གཙེ་ལས་གྲོལ་བར་འགྱུར། །གང་དང་ང་ཡི་བསྟན་ལ་རབ་བྱུང་ནས། །ཆོས་ཀུན་སྒྱུ་མ་ལྟ་བུར་ཤེས་པ་དེ། །ཡུལ་གྱི་བསོད་སྙོམས་འབྲས་བུ་ཡོད་པར་ཟ། །དེ་ནི་ཕྱོགས་
བཅུའི་སངས་རྒྱས་མཆོད་པར་བྱེད། །དེ་ནས་ཁྱིམ་བདག་ལྔ་བརྒྱ་ཙམ་པོ་ས་ཕྱོགས་དེ་ཉིད་ན་གནས་པ་དེ་དག་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། འདི་ལྟ་སྟེ་དཔེར་ན། 
གོས་དག་པ་ནག་པོ་དང་བྲལ་བ་ཚོན་དུ་བཅུག་ན་མྱུར་དུ་ཚོན་འཛིན་པ་དེ་བཞིན་དུ་ཁྱིམ་བདག་ལྔ་བརྒྱ་ཙམ་པོ་ས་ཕྱོགས་དེ་ཉིད་ན་གནས་པ་དེ་དག་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་
རྣམ་པར་དག་གོ། དེ་ནས་བཅོམ་ལྡན་འདས་ཀྱིས་ཁྱིམ་བདག་ལྔ་བརྒྱ་ཙམ་པོ་དེ་དག་ལ་ཆོས་ཀྱི་གཏམ་གྱིས་ཡང་དག་པར་བསྟན། ཡང་དག་པར་གཟེང་སྟོད། ཡང་དག་པར་རབ་ཏུ་དགའ་བར་བྱས་སོ། །

79-1-316b

དེ་ལས་བཅོམ་ལྡན་འདས་ཀྱི་གཏམ་ནི་འདི་ཡིན་ཏེ། ཁྱིམ་བདག་རྣམས་མིག་ཀུན་དུ་འབར་ཏེ། ཅིས་ཀུན་དུ་འབར་ཞེ་ན། འདོད་ཆགས་ཀྱི་མེ་དང་ཞེས་སྡང་གི་མེ་དང་། གཏི་མུག་གི་མེས་ཀུན་དུ་འབར་རོ། །སྐྱེ་བ་དང་། 
རྒ་བ་དང་། ན་པ་དང་། འཆི་བ་དང་མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པས་ཀུན་དུ་འབར་ཏེ། བདག་གིར་བྱ་བ་སྡུག་བསྔལ་ལོ་ཞེས་བཤད་དོ། །ཁྱིམ་བདག་རྣམས་རྣ་བ་
དང་སྣ་དང་ལྕེ་དང་ལུས་དང་། ཡིད་ཀྱི་བར་དུ་ཀུན་དུ་འབར་ཏེ། ཅིས་ཀུན་དུ་འབར་ཞེ་ན། འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེ་དང་། སྐྱེ་བ་དང་རྒ་བ་དང་ན་པ་དང་འཆི་བ་དང་། མྱ་ངན་དང་སྨྲེ་སྔགས་འདོན་
པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པས་ཀུན་དུ་འབར་ཏེ། བདག་གིར་བྱ་བ་སྡུག་བསྔལ་ལོ་ཞེས་བཤད་དོ། །ཁྱིམ་བདག་རྣམས་གཟུགས་ཀུན་དུ་འབར་ཏེ། ཅིས་ཀུན་དུ་འབར་ཞེ་ན། འདོད་ཆགས་ཀྱི་མེ་
དང་། ཞེ་སྡང་གི་མེ་དང་། གཏི་མུག་གི་མེས་ཀུན་དུ་འབར་རོ། །དེ་ལྟར་སྒྲ་དང་དྲི་དང་རོ་དང་རེག་བྱ་དང་། ཆོས་རྣམས་ཀྱང་གོང་མ་བཞིན་དུ་སྦྱར་རོ། །ཁྱིམ་བདག་རྣམས་གཟུགས་ཀྱི་ཕུང་པོ་ཀུན་དུ་འབར་ཏེ། ཅིས་ཀུན་དུ་འབར་
ཞེ་ན། འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེས་ཀུན་དུ་འབར་རོ། །ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་ཡང་དེ་བཞིན་ནོ། །ཁྱིམ་བདག་རྣམས་
སའི་ཁམས་ཀུན་དུ་འབར་ཏེ། ཅིས་ཀུན་དུ་འབར་ཞེ་ན། འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེས་ཀུན་དུ་འབར་རོ། །ཁྱིམ་བདག་རྣམས་ཆུའི་ཁམས་དང་། མེའི་ཁམས་དང་རླུང་གི་ཁམས་དང་ནམ་མཁའི་
ཁམས་ཀུན་དུ་འབར་ཏེ། ཅིས་ཀུན་དུ་འབར་ཞེ་ན། འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེས་ཀུན་དུ་འབར་རོ། །སྐྱེ་བ་དང་རྒ་བ་དང་ན་པ་དང་འཆི་བ་དང་མྱ་ངན་དང་། སྨྲེ་སྔགས་འདོན་དང་། སྡུག་བསྔལ་བ་དང་། ཡིད་

79-1-317a

མི་བདེ་བ་དང་འཁྲུག་པས་ཀུན་དུ་འབར་ཏེ། བདག་གིར་བྱ་བ་སྡུག་བསྔལ་ལོ་ཞེས་བཤད་དོ། །དེ་བས་ན་ཁྱིམ་བདག་རྣམས་མིག་བླང་བར་མི་བྱའོ་ཞེས་ཁྱིམ་བདག་རྣམས་དེ་ལྟར་བསླབས་པར་བྱའོ། །དེ་བཞིན་དུ་
ཁྱིམ་བདག་རྣམས་རྣ་བ་དང་སྣ་དང་ལྕེ་དང་ལུས་དང་ཡིད་བླང་བར་མི་བྱའོ་ཞེས་དེ་ལྟར་བསླབ་པར་བྱའོ། །དེ་བས་ན་ཁྱིམ་བདག་རྣམས་གཟུགས་བླང་བར་མི་བྱ། སྒྲ་དང་དྲི་དང་རོ་དང་རེག་བྱ་དང་། ཆོས་བླང་བར་མི་བྱའོ་
ཞེས་དེ་ལྟར་བསླབ་པར་བྱའོ། །ཁྱིམ་བདག་རྣམས་གཟུགས་ཀྱི་ཕུང་པོ་བླང་བར་མི་བྱ། ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་བླང་བར་མི་བྱའོ་ཞེས་
དེ་ལྟར་བསླབ་པར་བྱའོ། །དེ་བས་ན་ཁྱིམ་བདག་རྣམས་སའི་ཁམས་བླང་བར་མི་བྱ། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་བླང་བར་མི་བྱའོ་ཞེས་དེ་ལྟར་བསླབ་པར་བྱའོ། །དེ་བས་ན་ཁྱིམ་བདག་
རྣམས་རྣམ་པར་ཤེས་པའི་ཁམས་བླང་བར་མི་བྱའོ་ཞེས་དེ་ལྟར་བསླབ་པར་བྱའོ། །དེ་བས་ན་ཁྱིམ་བདག་རྣམས་འཇིག་རྟེན་འདི་བླང་བར་མི་བྱ། འཇིག་རྟེན་ཕ་རོལ་བླང་བར་མི་བྱའོ་ཞེས་ཁྱིམ་བདག་རྣམས་དེ་ལྟར་བསླབ་པར་
བྱའོ། །ཁྱིམ་བདག་ཁྱེད་རྣམས་ནམ་མིག་མི་ལེན་ཅིང་། རྣ་བ་དང་སྣ་དང་ལྕེ་དང་ལུས་དང་ཡིད་མི་ལེན་པ་དེ་ན་ཁྱེད་རྣམས་མི་གནས་ཡིད་ཀྱི་བར་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་ནམ་གཟུགས་མི་ལེན་ཅིང་། 
སྒྲ་དང་དྲི་དང་རོ་དང་རེག་བྱ་དང་། ཆོས་རྣམས་མི་ལེན་པ་དེ་ན་ཁྱེད་རྣམས་ཆོས་ཐམས་ཅད་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་ནམ་གཟུགས་ཀྱི་ཕུང་པོ་མི་ལེན་ཅིང་ཚོར་བའི་ཕུང་པོ་དང་འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་
ཕུང་པོ་མི་ལེན་པ་དེ་ན་ཁྱེད་རྣམས་ཕུང་པོ་རྣམས་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་རྣམ་པར་ཤེས་པའི་ཕུང་པོ་མི་ལེན་པ་དེ་ན་ཁྱེད་རྣམས་རྣམ་པར་ཤེས་པའི་ཕུང་པོ་ལ་མི་གནས་པར་འགྱུར་རོ། །ཁྱིམ་བདག་ཁྱེད་

79-1-317b

རྣམས་ནམ་སའི་ཁམས་མི་ལེན་ཅིང་ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་མི་ལེན་པ་དེ་ན་ཁྱེད་རྣམས་ཁམས་རྣམས་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་ནམ་རྣམ་པར་ཤེས་པའི་ཁམས་
མི་ལེན་པ་དེ་ན་ཁྱེད་རྣམས་རྣམ་པར་ཤེས་པའི་ཁམས་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་ནམ་འཇིག་རྟེན་འདི་མི་ལེན་ཅིང་འཇིག་རྟེན་ཕ་རོལ་མི་ལེན་པ་དེ་ན་ཁྱེད་རྣམས་འཇིག་རྟེན་ཐམས་ཅད་ལ་མི་གནས་པར་འགྱུར་རོ། །ཁྱིམ་བདག་
ཁྱེད་རྣམས་ནམ་ཆོས་ཐམས་ཅད་མི་ལེན་པ་དེ་ན་ཁྱེད་རྣམས་ཆོས་ཐམས་ཅད་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་ནམ་ཆོས་ཐམས་ཅད་ལ་མི་གནས་པ་དེ་ན་ཁྱེད་རྣམས་མི་འབྱུང་མི་འཇིག་གོ།   ཁྱེད་རྣམས་ནམ་མི་འབྱུང་མི་འཇིག་
པ་དེ་ན་ཁྱེད་རྣམས་སྐྱེ་བ་དང་རྒ་བ་དང་ན་པ་དང་འཆི་བ་དང་མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་ཐར་པར་འགྱུར་ཏེ། སྡུག་བསྔལ་ལས་ཡོངས་སུ་ཐར་བར་འགྱུར་རོ། །ཞེས་བཤད་དོ། །
དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སྐྱེ་བ་དང་ནི་འཆི་བ་ཡིས། །འཇིག་རྟེན་འདི་ཀུན་ཀུན་ནས་འབར། །བྱིས་པ་སྐྱབས་མེད་གཙེ་བ་སྟེ། །དེ་དག་འཕགས་པའི་
ལམ་ལས་ཉམས། །བརྒྱ་ལམ་འཇིག་རྟེན་སྣང་མཛད་པ། །དེ་བཞིན་གཤེགས་པ་འབྱུང་བར་འགྱུར། །ངལ་བ་ཆུད་ཟོས་མ་བྱེད་པར། །བརྩོན་འགྲུས་བརྟན་པ་རྩོམ་བྱོས་ཤིག །གང་ལ་གནས་ཏེ་རྣམ་སྒོམ་པ། །ཤེས་རབ་ཀྱིས་ནི་དེ་ཡང་ལྟོས། །
ཤེས་རབ་ཀྱིས་ནི་དེ་མཐོང་སྟེ། །རྣམ་པར་གཞན་དུ་མི་འགྱུར་རོ། །གང་ལ་གནས་ཏེ་སེམས་སྒོམ་པ། །ཐམས་ཅད་སྟོང་པར་ཤེས་པར་བྱ། །ཆོས་རྣམས་སྟོང་པར་རིག་ནས་ནི། །བྱང་ཆུབ་ཉིད་ཀྱང་སྟོང་པ་ཡིན། །འདོད་ཆགས་ཞེ་སྡང་དེ་བཞིན་གཏི་མུག་དང་། །
མེ་གསུམ་དེ་དག་ཤིན་དུ་མི་བཟད་པ། །དེས་ནི་འཇིག་རྟེན་འདི་ཀུན་རབ་འབར་ཡང་། །བྱིས་པ་རིང་ནས་གཉིད་ལོག་ཁོང་མི་ཆུད། སྐྱེ་དང་རྒ་དང་ན་དང་འཆི་བ་དང་། །སྨྲེ་སྔགས་འདོན་དང་སྡུག་བསྔལ་ཡིད་མི་བདེས། །འཇིག་རྟེན་འདི་དག་གཙེས་པར་

79-1-318a

རིག་ནས་ནི། །ཆོས་རྣམས་ཀུན་ལ་གནས་པར་མ་བྱེད་ཅིག །དེ་ནས་བཅོམ་ལྡན་འདས་ཁྱིམ་བདག་ལྔ་བརྒྱ་ཙམ་པོ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་ཀྱིས་བཅོམ་ལྡན་འདས་ལས་རབ་ཏུ་བྱུང་བ་རྙེད་པར་
གྱུར་ཅིག་བདག་ཅག་རྣམས་ཀྱིས་བདེ་བར་གཤེགས་པ་ལས་བསྙེན་པར་རྫོགས་པ་དགེ་སློང་གི་དངོས་པོ་རྙེད་པར་གྱུར་ཅིག །བཅོམ་ལྡན་འདས་ཀྱིས་དགེ་སློང་དག་ཚུར་ཤོག་ཅེས་གསུངས་པ་དང་། དེ་ཉིད་ཀྱིས་ཚེ་དང་ལྡན་པ་དེ་དག་རབ་ཏུ་བྱུང་བར་གྱུར་ཏེ། དེ་ཉིད་ཀྱིས་བསྙེན་པར་
རྫོགས་པ་དང་། དེ་ཉིད་ཀྱིས་དགེ་སློང་གི་དངོས་པོར་གྱུར་ཏོ། །འདི་ལ་ཆོས་ཉིད་ནི་འདི་ཡིན་ཏེ། དེ་ལ་སྐད་ཅེས་བྱའོ། །དེ་དག་གིས་ནི་ངུར་སྨྲིག་བགོས། །དེ་དག་གིས་ནི་སྐྲ་ཡང་བྲེགས། །ཀུན་ཀྱང་ལྷུང་བཟེད་ཐོགས་གྱུར་ནས། །དེ་ཉིད་ཏུ་ནི་དགྲ་བཅོམ་གྱུར། །སྟོན་པས་དགྲ་བཅོམ་རབ་
མཁྱེན་ནས། །དགེ་སློང་གི་ནི་དགེ་འདུན་དང་། །ལྷ་རྣམས་མདུན་དུ་མངོན་སུམ་དུ། །ཆེད་དུ་རྗོད་པ་ཆེད་ཏུ་བརྗོད། །འཇིག་རྟེན་གྱི་ནི་མགོན་པོ་ལ། །སྔོན་ཆད་སྦྱིན་པ་བྱིན་པས་ན། །གང་ན་བདེ་བ་མང་བ་དེར། །ཤིན་དུ་དགའ་ཞིང་འོངས་བར་གྱུར། །དེ་དག་གིས་ནི་ང་མཐོང་ནས། །དད་
པས་རབ་ཏུ་སྐྱེད་པར་གྱུར། །དེ་དག་སེམས་ནི་དད་པ་ལ། །ཆོས་རྣམས་ཀྱི་ནི་མཆོག་བསྟན་ཏོ། །དགྲ་བཅོམ་གྱི་ནི་གསུངས་ཐོས་ན། །བདག་ཏུ་ལྟ་བ་རྣམ་པར་བཤིག །སྟོང་ཉིད་མངོན་དུ་བྱས་ནས་ནི། །དེ་དག་སྐྱེ་བ་ཀུན་ལས་གྲོལ། །ཁྱིམ་བདག་གི་ལེའུ་ཞེས་བྱ་སྟེ། །
དང་པོའོ།། །། དེ་ནས་བཅོམ་ལྡན་འདས་ཀྱིས་ལམ་གྱི་བར་དུ་ཁྱིམ་བདག་ལྔ་བརྒྱ་པོ་མི་གཡོ་བའི་གནས་ལ་བཀོད་ནས་ཀུན་ནས་མཛེས་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་གཤེགས་སོ། །དེ་ནས་རྒྱལ་པོའི་ཁབ་ཀྱི་གྲོང་ཁྱེར་གྱི་ལྷ་རྣམས་དང་། 
གནོད་སྦྱིན་ཅི་འཇིགས་འདི་སྙམ་དུ་སེམས་ཏེ། བདག་ཅག་གིས་འདི་ལྟ་བུ་སྦྱིན་གནས་འཇིག་རྟེན་ཤིན་དུ་དཀོན་པའི་བཅོམ་ལྡན་འདས་ལ་བསོད་སྙོམས་དབུལ་ལོ་སྙམ་མོ། །དེ་ནས་གནོད་སྦྱིན་ཅི་འཇིགས་ཀྱིས་བསོད་སྙོམས་ཁ་དོག་ཕུན་སུམ་ཚོགས་
པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ། རེག་ཕུན་སུམ་ཚོགས་པ། བཅོམ་ལྡན་འདས་ལ་ཕུལ་ནས་གནོད་སྦྱིན་ཅི་འཇིགས་ལ་ཐུགས་བརྩེ་བའི་སླད་ཏུ་བཅོམ་ལྡན་འདས་ཀྱིས་བསོད་སྙོམས་དེ་བཞེས་སོ། །བཅོམ་ལྡན་

79-1-318b

འདས་ལ་གནོད་སྦྱིན་ཅི་འཇིགས་ཀྱི་བསོད་སྙོམས་ཕུལ་མ་ཐག་ཏུ་དེ་ནས་དེའི་ཚེ་སྟེང་གི་བར་སྣང་ལས་ཅི་འཇིགས་ཀྱི་འཁོར་མང་པོ་གནོད་སྦྱིན་དྲུག་ཁྲི་བརྒྱད་སྟོང་གིས་ལེགས་སོ་ཞེས་བྱ་བ་བྱིན་ཏེ། རྗེས་སུ་ཡི་རང་བའི་སྒྲ་ཕྱུང་ངོ་། །དེ་ནས་དེའི་ཕྱིར་གནོད་སྦྱིན་
ཅི་འཇིགས་ཀྱིས་རང་གི་འཁོར་རྣམས་ལ་བོས་ཏེ། བདག་གིས་ནི་བཟོད་དེ་བཞིན་གཤེགས་པ་ལ་བསོད་སྙོམས་ཕུལ་གྱིས། །ཁྱེད་ཀྱིས་ནི་དགེ་སློང་གི་དགེ་འདུན་རྣམས་ལ་ཕུལ་ཅིག །དེ་ནི་ཁྱེད་རྣམས་ཀྱི་ཡུན་རིང་པོའི་དོན་དང་། ཕན་པ་དང་བདེ་
བར་འགྱུར་རོ། །གནོད་སྦྱིན་རྣམས་ཀྱིས་དགེ་སློང་གི་དགེ་འདུན་ལ་བསོད་སྙོམས་ཕུལ་ནས་གནོད་སྦྱིན་དེ་དག་ལ་སྙིང་བརྩེ་བའི་ཕྱིར་དགེ་སློང་གི་དགེ་འདུན་གྱིས་ཀྱང་བསོད་སྙོམས་བླངས་སོ། །དེ་ནས་བཅོམ་ལྡན་འདས་རྒྱལ་པོའི་ཁབ་ཀྱི་གྲོང་
ཁྱེར་ཆེན་པོར་གཤེགས་པ་ལས་དེས་བསོད་སྙོམས་བླངས་པར་མཁྱེན་ནས་ཕྱོགས་དེ་ནས་སླར་ལོག་གོ། །དེ་ལྟར་དེའི་ཚེ་ལྷ་སྟོང་ཕྲག་དུ་མ་དང་།  ཀླུ་སྟོང་ཕྲག་དུ་མ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་
དང་། མི་འམ་ཅི་དང་། ལྟོ་འཕྱེ་ཆེན་པོ་སྟོང་ཕྲག་དུ་མ་དང་། མི་དང་མི་མ་ཡིན་པ་སྟོང་ཕྲག་དུ་མ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་རྣམས་བཅོམ་ལྡན་འདས་གཤེགས་པའི་ཞབས་འབྲིང་དུ་དོད་དོ། །དེ་ནས་བཅོམ་
ལྡན་འདས་ས་ཕྱོགས་ཡངས་ཤིང་རྒྱ་ཆེ་བ་ཞིག་ཏུ་གཤེགས་ཏེ། བྱོན་ནས་གང་ན་བཤམས་པ་ལ་བཞུགས་སོ། །དེ་ནས་གནོད་སྦྱིན་ཅི་འཇིགས་འཁོར་དང་བཅས་པས་ལྷའི་མེ་ཏོག་མན་དཱ་ར་དང་། ཨུད་པ་ལ་དང་། པད་མ་དང་། ཀུ་མུ་ད་དང་། པད་
མ་དཀར་པོ་དང་། ལྷའི་ཙན་དན་གྱི་ཕྱེ་མ་བླངས་ཏེ། བཅོམ་ལྡན་འདས་ལ་མཆོད་པ་བྱ་བའི་ཕྱིར། བཅོམ་ལྡན་འདས་ལ་གཏོར་མངོན་པར་གཏོར། མངོན་པར་རབ་ཏུ་གཏོར་ཏོ། །གཏོར་མངོན་པར་གཏོར། །མངོན་པར་རབ་ཏུ་གཏོར་ནས་ཐལ་མོ་སྦྱར་ཏེ་ཕྱག་
འཚལ་ནས་བཅོམ་ལྡན་འདས་ཀྱི་སྤྱན་སྔར་འདུག་གོ། །དེ་ནས་བཅོམ་ལྡན་འདས་ཀྱིས་གནོད་སྦྱིན་ཅི་འཇིགས་ཀྱི་བསམ་པ་ཡང་མཁྱེན། དེའི་འཁོར་གནོད་སྦྱིན་མང་པོའི་བསམ་པ་ཡང་མཁྱེན་ནས་འཛུམ་པ་མཛད་དོ། །ཆོས་

79-1-319a

ཉིད་ནི་འདི་ཡིན་ཏེ། ནམ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེ་ན་ཞལ་གྱི་སྒོ་ནས་འོད་ཟེར་ཁ་དོག་དུ་མ་ཁ་དོག་སྣ་ཚོགས་འདི་ལྟ་སྟེ། སྔོན་པོ་དང་། སེར་པོ་དང་། 
དམར་པོ་དང་། དཀར་པོ་དང་། ལེབ་རྒན་དང་། ཤེལ་དང་། དངུལ་གྱི་ཁ་དོག་ལྟ་བུར་བྱུང་སྟེ། དེས་འཇིག་རྟེན་གྱི་ཁམས་མཐའ་ཡས་མུ་མེད་པ་སྣང་བས་ཁྱབ་པར་བྱས་ནས་ཉི་མ་དང་ཟླ་བའི་
གཟི་བརྗིད་མེད་པར་བྱས་ཏེ། སེམས་ཅན་དམྱལ་བ་པའི་སེམས་ཅན་ནས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་ཏེ། སླར་ལོག་ནས་བཅོམ་ལྡན་འདས་ལ་ལན་བདུན་བསྐོར་བ་
བྱས་ཏེ། ཁ་ཅིག་ནི་བཅོམ་ལྡན་འདས་ཀྱིས་དབུའི་གཙུག་ཏུ་ནུབ་པོ། །ཁ་ཅིག་ནི་ཕྲག་པར་ནུབ་པོ། །ཁ་ཅིག་ནི་པུས་མོར་ནུབ་པོ། །ཆོས་ཉིད་ནི་འདི་ཡིན་ཏེ། ནམ་སངས་རྒྱས་བཅོམ་ལྡན་
འདས་རྣམས་སེམས་ཅན་དམྱལ་བ་པའི་སེམས་ཅན་རྣམས་ལ་ལུང་སྟོན་པ་དེ་ན་འོད་ཟེར་ཞབས་གཉིས་ཀྱི་འོག་ཏུ་ནུབ་པར་འགྱུར་རོ། །ནམ་དུད་འགྲོའི་སྐྱེ་གནས་པའི་སེམས་ཅན་རྣམས་ལ་ལུང་
སྟོན་པ་དེ་ན་འོད་ཟེར་སྣམ་ལོགས་སུ་ནུབ་པར་འགྱུར་རོ། །ནམ་གཤིན་རྗེའི་འཇིག་རྟེན་པའི་སེམས་ཅན་རྣམས་ལ་ལུང་སྟོན་པ་དེ་ན་འོད་ཟེར་མདུན་དུ་ནུབ་པར་འགྱུར་རོ། །ནམ་མི་རྣམས་ལ་ལུང་
སྟོན་པ་དེ་ན་འོད་ཟེར་གཡོན་དུ་ནུབ་པར་འགྱུར་རོ། །ནམ་ལྷ་རྣམས་ལ་ལུང་སྟོན་པ་དེ་ན་འོད་ཟེར་གཡས་སུ་ནུབ་པར་འགྱུར་རོ། །ནམ་ཉན་ཐོས་རྣམས་ལ་ལུང་སྟོན་པ་དེ་ན་འོད་ཟེར་པུས་མོར་
ནུབ་པར་འགྱུར་རོ། །ནམ་རང་སངས་རྒྱས་རྣམས་ལ་ལུང་སྟོན་པ་དེ་ན་འོད་ཟེར་ཕྲག་པ་ནུབ་པར་འགྱུར་རོ། །ནམ་སངས་རྒྱས་བཅོམ་ལྡན་འདས་རྣམས་ཀྱིས་བྱང་ཆུབ་སེམས་དཔའ་བླ་ན་མེད་པ་ཡང་དག་

79-1-319b

པར་རྫོགས་པའི་བྱང་ཆུབ་ཏུ་ལུང་སྟོན་པ་དེ་ན་འོད་ཟེར་སྟེང་གི་དབུའི་གཙུག་གི་མཚམས་སུ་ནུབ་པར་འགྱུར་རོ། །ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་འཛུམ་པ་མཛད་པ་མཐོང་སྟེ། མཐོང་ནས་
ཆོས་གོས་ཕྲག་པ་གཅིག་ཏུ་བགོས་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་
ཏོ། །ཅི་རྒྱུས་འཇིག་རྟེན་སྣང་མཛད་པ། །འཇིག་རྟེན་ཀུན་ལ་སྨན་པའི་སླད། །འཇིག་རྟེན་མགོན་པོ་འོད་མཛད་པ། །ཅི་ཞིག་སླད་དུ་འཛུམ་པ་བསྟན། །སངས་རྒྱས་ཀྱི་ནི་བྱང་ཆུབ་ཕྱིར། །
དེ་རིང་སུ་ཡིས་ས་བོན་བཏབ། །དེ་རིང་སུ་ལ་ལུང་ཡང་སྟོན། །གང་ཞིག་ཐར་ཕྱིར་རབ་ཏུ་ཞུགས། །དཔའ་བོ་རྣམ་པར་འདྲེན་པ་རྣམས། །རྒྱུ་མ་མཆིས་པར་འཛུམ་མི་མཛད། །ཐུབ་པ་ཅི་
སླད་འཛུམ་པ་བསྟན། །འོད་ཟེར་དོན་ནི་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་ཚིགས་སུ་བཅད་པ་འདི་དག་གིས་སླར་གསུངས་པ། འཇིག་རྟེན་
མགོན་པོ་སྐྱོབ་པ་ལ། །ཅི་འཇིགས་རབ་ཏུ་དང་སེམས་ཀྱིས། །བསོད་སྙོམས་དག་ནི་ཕུལ་བས་ན། །དེ་ལྟར་དེ་ཕྱིར་འཛུམ་པ་མཛད། །གནོད་སྦྱིན་འདི་ནས་ཤི་འཕོས་ནས། །སུམ་བཅུ་རྩ་
གསུམ་འགྲོ་བར་འགྱུར། །སུམ་བཅུ་གསུམ་ནས་ཤི་འཕོས་ནས། །འཐབ་བྲལ་དུ་ཡང་འགྲོ་བར་འགྱུར། །འཐབ་བྲལ་ནས་ནི་དགའ་ལྡན་འགྲོ། །འདོད་ལ་འདོད་པས་དགར་བྱས་ནས། །མི་ཡི་ནང་
དུ་སྐྱེ་འགྱུར་ཏེ། །རྒྱལ་པོ་རྫུ་འཕྲུལ་ལྡན་པར་འགྱུར། །འཁོར་ལོས་སྒྱུར་བ་མི་ཡི་དབང་། །གླིང་བཞི་དག་གི་དབང་པོ་སྟེ། །མི་ཡི་འཇིག་རྟེན་ཤི་འཕོས་ནས། །ཚངས་པའི་འཇིག་རྟེན་འགྲོ་བར་

79-1-320a

འགྱུར། །བསྐལ་པ་བྱེ་བ་ཉི་ཤུར་ནི། །རྟག་ཏུ་སྟི་སྟང་བྱས་པར་འགྱུར། །ལྷ་ཡི་ནང་དང་མི་ནང་དུ། །ཡང་དང་ཡང་ནི་ཀུན་ཏུ་འགྲོ། །ཕྱིས་དེ་རྒྱལ་སྲིད་བོར་ནས་ནི། །ཁྱིམ་མེད་
པར་ཡང་རབ་ཏུ་འབྱུང་། །རྐྱེན་གྱིས་བྱང་ཆུབ་ཐོབ་འགྱུར་ཏེ། །དེར་ནི་མཐའ་ཡང་ཐུག་པར་འགྱུར། །གནོད་སྦྱིན་དག་ནི་སུམ་ཁྲི་རྣམས། །གནོད་སྦྱིན་སྐྱེ་གནས་འཕོས་གྱུར་ནས། །སུམ་བཅུ་རྩ་
གསུམ་སྐྱེ་བར་འགྱུར། །སངས་རྒྱས་ལ་ནི་གུས་བྱས་ནས། །སངས་རྒྱས་བྱམས་པ་མཐོང་གྱུར་ཅིང་། །དེ་ན་མཐར་ནི་ཐུག་འགྱུར་ཏེ། །དགྲ་བཅོམ་པ་ཡང་ཐོབ་འགྱུར་ན། །སྟོན་པ་ལ་ནི་སུ་མི་
མཆོད། །གནོད་སྦྱིན་སྟོང་དུ་ཚངས་པ་རྣམས། །བྱང་ཆུབ་མཆོག་ལ་རབ་ཞུགས་པས། །དེ་དག་དགེ་བའི་རྩ་བ་དེས། །ནམ་དུའང་ངན་འགྲོར་འགྲོ་མི་འགྱུར། །ཁ་ཅིག་སྲོག་ཆགས་ཀུན་ཕན་ཕྱིར། །བྱང་
ཆུབ་དམ་པ་རབ་ཚོལ་ཞིང་། །སངས་རྒྱས་འདྲེན་པ་སྟོང་རྣམས་ལ། །བཀུར་སྟི་དག་ནི་བྱེད་པར་འགྱུར། །ཁ་ཅིག་སངས་རྒྱས་བྱང་ཆུབ་ཕྱིར། །སྟོང་ཕྲག་གཉིས་དང་གསུམ་དག་ཀྱང་། །མེ་ཏོག་ཕྲེང་བ་དྲི་རྣམས་ཀྱིས། །
མཆོད་པ་དག་ནི་བྱེད་པར་འགྱུར། །དག་པ་བསྒོམས་པའི་བདག་ཉིད་ཅན། །འདྲེན་པ་བྱེ་བ་ཕྲག་སྟོང་ལ། །ཁ་ཅིག་བཀུར་སྟི་བྱེད་འགྱུར་ཏེ། །འདི་དག་ཕྱིས་ནི་བྱང་ཆུབ་རེག །དེ་ན་ཅི་འཇིག་དེ་ཡི་བུ། །རི་བོ་ཞེས་བྱ་
རྫུ་འཕྲུལ་ཆེ། །འཇིག་རྟེན་སངས་རྒྱས་བདག་འགྱུར་ཅེས། །དེས་ཀྱང་སེམས་ནི་བསྐྱེད་པར་གྱུར། །དེས་ནི་སངས་རྒྱས་སྟི་སྟང་བྱས། །ཐམས་ཅད་དུ་ཡང་སྨོན་ལམ་བཏབ། །ང་མཐོང་ནས་ནི་མཆོད་བྱས་
ཏེ། །བྱང་ཆུབ་ཕྱིར་ནི་སེམས་བཏུད་དོ། །དེ་ནི་དགེ་བའི་རྩ་བ་དེས། །ངན་འགྲོ་ཐམས་ཅད་སྤངས་གྱུར་ནས། །སངས་རྒྱས་བྱམས་པ་མཐོང་ནས་ནི། །གདུགས་རྣམས་བྱེ་བ་འབུལ་བར་འགྱུར། །གདུགས་རྣམས་

79-1-320b

བྱེ་བ་ཕུལ་ནས་ནི། །ན་བཟའ་བྱེ་བ་འབུལ་བར་འགྱུར། །ན་བཟའ་བྱེ་བ་ཕུལ་ནས་ནི། །དེ་ཉིད་ཏུ་ཡང་རབ་ཏུ་འབྱུང་། །སྲོག་ཆགས་ཀུན་ལ་ཕན་པའི་ཕྱིར། །བྱང་ཆུབ་དམ་པ་རབ་ཚོལ་ཞིང་། །ལོ་ཡང་ལྔ་
བརྒྱ་ཚང་བར་ནི། །ཚངས་པར་སྤྱད་པ་སྤྱོད་པར་འགྱུར། །འདི་ལྟ་བུ་ཡི་རྣམ་གྲངས་ཀྱིས། །སྦྱིན་དང་ཚུལ་ཁྲིམས་ཡང་དག་སྤྱོད། །གང་གཱའི་བྱེ་མ་ཇི་སྙེད་པ། །དེ་སྙེད་བསྐལ་པར་སྤྱོད་པར་འགྱུར། །དཔེར་
གསུངས་པ་ནི་དེ་སྙེད་དུ། །དེ་དག་ཁྱེད་ཀྱིས་ཤེས་པར་གྱིས། །དེ་དག་དཔེར་ཡང་ཤེས་ནས་ནི། །དེ་བས་ལྷག་པར་སྤྱད་པར་གྱིས། །སྡར་ནི་དཔེ་རྣམས་གང་བརྗོད་པ། །གང་གཱ་ཡེ་ནི་བྱེ་སྙེད་ཀྱི། །དེ་སྙེད་སངས་
རྒྱས་མཐོང་གྱུར་ནས། །དེ་དག་ཀུན་ལ་སྟི་སྟང་བྱེད། །ཨེ་མའོ་ཡེ་ཤེས་ཨེ་མ་ཤེས། །ཨེ་མའོ་བླ་ན་མེད་པའི་སེམས། །སེམས་ཅན་ཀུན་གྱི་འདྲེན་པ་ནི། །དེ་ལྟར་ཞུམ་པར་མི་འགྱུར་རོ། །དེ་ཕྱིས་སེམས་
ཅན་ཀུན་གྱི་མཆོག །སངས་རྒྱས་སུ་ཡང་དེ་འགྱུར་ཏེ། །དེ་ན་དེ་ཡི་མཚན་བཏགས་པ། །སྨན་པའི་རྒྱལ་པོར་རྣམ་པར་གྲགས། །ལོ་ནི་བྱེ་བ་བདུན་བཅུར་ཡང་། །སྲོག་ཆགས་རྣམས་ལ་ཆོས་བསྟན་ཏེ། །ཕྱིས་
གདོད་རྐང་གཉིས་གཙོ་བོ་ནི། །དེ་ན་མྱ་ངན་འདས་པར་འགྱུར། །རབ་ཏུ་དུལ་བའི་སེམས་རྣམས་ཀྱི། །འདུས་པ་དག་ནི་ཉི་ཤུར་འགྱུར། །དེ་ལ་ཐ་མ་གཅིག་པོ་ནི། །དགེ་སློང་བྱེ་བ་ཉི་ཤུར་འགྱུར། །འདུས་པ་རྣམས་
ནི་གང་བརྗོད་པའི། །ཉན་ཐོས་དཔག་ཏུ་མེད་པ་སྟེ། །དེ་ཡི་ཉན་ཐོས་ཇི་སྙེད་པ། །བྱང་ཆུབ་ཞུགས་པ་འང་དེ་སྙེད་དོ། །སེམས་ཅན་རྣམས་ཀྱི་དོན་མཛད་ནས། །དེ་བཞིན་གཤེགས་པ་མྱ་ངན་འདས། །ལོ་ནི་བརྒྱ་
ཕྲག་སྟོང་དག་དུ། །དེ་ཡི་དམ་ཆོས་གནས་པར་འགྱུར། །བསྐལ་པ་ལྔ་བརྒྱ་ཚང་བར་ནི། །སངས་རྒྱས་མང་པོར་འབྱུང་བར་འགྱུར། །བསྐལ་པ་ཅིག་ལ་འང་འབྱུང་བ་ནི། །དེ་ན་སྟོང་རྣམས་འབྱུང་བར་འགྱུར། །མི་

79-1-321a

རྣམས་མཁས་པ་གང་དག་ནི། །སངས་རྒྱས་ཆོས་རྣམས་བསྙེན་འདོད་པ། །ཚུལ་བཞིན་མང་དུ་ཐོས་པ་དང་། །རབ་ཏུ་འདུན་པ་ཉིད་དུ་བྱ། །ཚུལ་བཞིན་མ་ཡིན་རྣམ་པར་སྤོངས། །ཚུལ་
བཞིན་ལ་ནི་རྟག་ཏུ་སྒོམས། །མང་དུ་ཐོས་པ་རབ་ཏུ་བྱ། །དེས་ནི་ཤེས་རབ་རྣམ་པར་འཕེལ། །བྱང་ཆུབ་སེམས་དཔའ་སྐྱོབ་པ་ཡི། །རྩ་བའི་དོན་ནི་ཆོས་བཞི་སྟེ། །སྦྱིན་དང་ཚུལ་ཁྲིམས་ཐོས་དང་གཏོང་། །
བྱང་ཆུབ་ཀྱི་ནི་ལམ་ལ་བཟང་། །བླ་ན་མེད་པའི་ཐེག་པ་མཆོག །བྱང་ཆུབ་ཀྱི་ནི་ལམ་ཡང་བསྟན། །ཐེ་ཚོམ་གཅོད་པ་བཟང་པོ་ཡིས། །ཉན་ཐོས་ཀྱིས་ནི་ལམ་བསྟན་ཏོ། །སེམས་ཅན་གང་
དག་འདི་འདོད་པ། །དེ་ལ་ངས་ནི་སྐབས་དབྱེ་འོ། །ཆོས་རྣམས་ཀྱི་ནི་མཆོག་སྟོན་པ། །འཇིག་རྟེན་སྣང་མཛད་རྙེད་པར་དཀའ། །དེ་ནས་གནོད་སྦྱིན་ཅི་འཇིགས་ཀྱི་བུ་རི་བོ་འདི་སྙམ་དུ་སེམས་པར་གྱུར་ཏེ། བཅོམ་
ལྡན་འདས་འདི་ནས་རིའི་རྒྱལ་པོ་བྱ་རྒོད་ཀྱི་ཕུང་པོའི་རི་ལ་གཤེགས་ཤེས་གྲག་གིས། བདག་གིས་བཅོམ་ལྡན་འདས་ལ་དགེ་བའི་རྩ་བ་རྒྱ་ཆེན་པོ་ཞིག་བསྐྱེད་དོ་སྙམ་མོ། །དེ་ནས་གནོད་སྦྱིན་ཅི་འཇིགས་
ཀྱི་བུ་རི་བོས་རང་གི་འཁོར་ལ་སྨྲས་པ། གྲོགས་པོ་དག་ཤེས་པར་གྱིས་ཤིག །བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་རིའི་རྒྱལ་པོ་བྱ་རྒོད་ཀྱི་ཕུང་པོའི་རི་ལ་གཤེགས་ཀྱིས། དེ་ལ་
གྲོགས་པོ་དག་མཐུ་ཅི་ཡོད་པ་དང་། ཅི་ནུས་ཀྱིས་བཅོམ་ལྡན་འདས་ལ་མཆོད་པའི་ལས་ལ་སྤྲོ་བ་སྐྱེད་ཅིག །དེ་ནས་གནོད་སྦྱིན་ཅི་འཇིགས་ཀྱི་བུ་རི་བོ་གཡོགས་དང་བཅས་པས་རྒྱལ་པོའི་ཁབ་ཀྱི་
གྲོང་ཁྱེར་ཆེན་པོ་ནས་གཟུང་སྟེ། རིའི་རྒྱལ་པོ་བྱ་རྒོད་ཀྱི་ཕུང་པོའི་བར་གྱི་ལམ་དེ་ཐམས་ཅད་གསེག་མ་དང་། གྱོ་མོ་དང་། སྡོང་དུམ་དང་། ཚེར་མ་རྣམས་མེད་པར་བྱས་སོ། །མེ་ལོང་གི་དཀྱིལ་འཁོར་ལྟར་དག་

79-1-321b

པར་བྱས་སོ། །ལམ་དེ་དག་ཐམས་ཅད་བསལ་ནས་སྤོས་ཀྱི་ཆུས་ཀུན་དུ་ཆག་ཆག་བཏབ་བོ། །ལམ་དེར་གོས་ནི་མཚམས་མེད་པར་བཏིང་ངོ་། །ལམ་དེར་མི་གང་ཙམ་དུ་མེ་ཏོག་གིས་ཆལ་པར་བཀྲམ་
མོ། །ལམ་དེ་དག་གདུགས་དང་། རྒྱལ་མཚན་དང་། བ་དན་གྱིས་ཤིན་དུ་བརྒྱན་ཏོ། །ལམ་དེ་བདུག་སྤོས་དམ་པའི་སྙིང་པོ་རབ་ཀྱི་སྣོད་ནས་བདུགས་སོ། །སྟེང་གི་བར་སྣང་ལས་དར་གྱི་ལྡ་ལྡིར་
སྤྱངས་ཏེ། ཤིན་ཏུ་བརྒྱན་ཏོ། །ལམ་དེར་སིལ་སྙན་སྣ་ཚོགས་ཀྱི་སྒྲ་འཁྲོལ་བར་བྱས་སོ། །ལམ་དེ་ནས་མདའ་རྒྱང་གང་ཚུན་ཆད་ཙམ་མེ་ཏོག་ཨུད་པ་ལ་དང་། ཀུ་མུ་ཏ་དང་། པད་མ་དཀར་པོས་ཁེབས་
ཤིང་དུར་པ་སྒྲ་འབྱིན་པར་བྱས་སོ། །ལམ་དེ་གསེར་གླེབས་པས་རབ་ཏུ་གཡོགས་སོ། །ལམ་དེ་གསེར་གྱི་དྲ་བ་དང་། རིན་པོ་ཆེ་སྣ་བདུན་གྱི་དྲ་བས་རབ་ཏུ་གཡོགས་སོ། །དེ་ནས་གནོད་སྦྱིན་ཅི་འཇིགས་ཀྱི་
བུ་དེ་ལྟ་བུའི་བཀོད་པ་བྱས་ནས་ལུས་ཆེན་པོ་མངོན་པར་སྤྲུལ་ཏེ། འཁོར་དང་བཅས་པ་དགའ་མགུ་རངས་རབ་ཏུ་དགའ་སྟེ། མོས་ཤིང་ཡིད་བདེ་བ་སྐྱེས་ནས། །དགའ་བའི་སེམས་དང་། བདེ་བའི་སེམས་
དང་། མཉེན་པའི་སེམས་དང་། རྣམ་པར་དང་བའི་སེམས་དང་། སྒྲིབ་པ་མེད་པའི་སེམས་དང་། རབ་ཏུ་སིམ་པའི་སེམས་དང་། སངས་རྒྱས་ལ་གཞོལ་བའི་སེམས་དང་། ཆོས་ལ་གཞོལ་བའི་སེམས་
དང་། དགེ་འདུན་ལ་གཞོལ་བའི་སེམས་དང་། བྱང་ཆུབ་ལས་མི་གཡོ་བའི་སེམས་དང་། མི་བསྐྱོད་པའི་སེམས་དང་། མི་མཉམ་པ་དང་མཉམ་པའི་སེམས་དང་། འཇིག་རྟེན་གསུམ་པོ་ཐམས་ཅད་ལས་
ཁྱད་པར་དུ་འཕགས་པའི་སེམས་དང་། སེམས་ཅན་ཐམས་ཅད་ལ་བྱམས་པའི་སེམས་དང་། སྙིང་རྗེའི་སེམས་དང་། དགའ་བའི་སེམས་དང་། བཏང་སྙོམས་ཀྱི་སེམས་དང་། སངས་རྒྱས་ཀྱི་ཆོས་ཐམས་ཅད་

79-1-322a

ཀྱི་སྣོད་ཏུ་གྱུར་པའི་སེམས་དང་། སྙིང་པོའི་སེམས་དང་། བརྟན་པའི་སེམས་དང་། མི་ཕྱེད་པའི་སེམས་དང་། མ་ཞིགས་པའི་སེམས་དང་། ཉན་ཐོས་དང་། རང་སངས་རྒྱས་ཀྱི་སར་མི་
ལྟུང་བའི་སེམས་དང་། བྱང་ཆུབ་སེམས་དཔའི་ས་ཐམས་ཅད་བསྒྲུབ་པའི་སེམས་ཀྱིས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་
ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ། ཕྱོགས་གཅིག་ཏུ་འདུག་ནས་གནོད་སྦྱིན་ཅི་འཇིགས་ཀྱི་བུ་རི་བོས་ཐལ་མོ་སྦྱར་ཏེ། བཅོམ་ལྡན་འདས་ལ་
ཚིགས་སུ་བཅད་པ་འདི་དག་གསོལ་ཏོ། །སངས་རྒྱས་འཇིག་རྟེན་རྣམས་ཀྱི་མཆོག །ཆོས་རྣམས་ཀྱི་ནི་དམ་པ་སྟོན། །འཇིག་རྟེན་མགོན་ལ་བདག་གིས་ནི། །བླ་ན་མ་མཆིས་མཆོད་པ་བགྱིས། །
འདྲེན་པ་ཇི་ལྟར་མཛད་པ་བཞིན། །སྟོབས་བཅུ་དང་ནི་རབ་ལྡན་ཏེ། །མི་འཇིགས་པ་ལ་རབ་གནས་ནས། །སེམས་ཅན་དོན་རྣམས་བགྱིད་པར་ཤོག །སུམ་བཅུ་རྩ་གཉིས་མཚན་རྣམས་དང་། །དཔེ་
བྱད་བཟང་པོ་བརྒྱད་བཅུར་ལྡན། །འཇིག་རྟེན་མགོན་པོ་འོད་བྱེད་པ། །འཇིག་རྟེན་སྣང་བར་བྱེད་པར་ཤོག །སྲོག་ཆགས་ཀུན་ལ་ཕན་པའི་ཕྱིར། །སྙན་པའི་ཆོས་ནི་རབ་སྟོན་ཅིང་། །རྣམ་པ་བཅུ་གཉིས་
དམ་པ་ཡི། །ཆོས་ཀྱི་འཁོར་ལོ་བསྐོར་བར་ཤོག །རྒྱལ་བ་ཇི་ལྟར་དེ་བཞིན་དུ། །ཆོས་འཕྲུལ་རྣམས་ནི་རབ་སྟོན་ཅིང་། །སྲོག་ཆགས་བྱེ་བ་དུ་མ་ཡི། །སེམས་ཅན་རྣམས་ཀྱི་དོན་བགྱིད་ཤོག །དཔའ་ཆེན་གང་
རྣམས་མ་བྱོན་པ། །འཇིག་རྟེན་མགོན་པོ་འོད་མཛད་ལྟར། །བྱང་ཆུབ་དམ་པ་རབ་རྟོགས་ནས། །ལམ་དེ་རབ་ཏུ་སྟོན་པར་ཤོག །སེམས་ཅན་ལྡོངས་པ་ཀུན་གྱི་ཕྱིར། །མིག་དང་ལྡན་པ་ཉིད་གྱུར་ཏེ། །གནས་

79-1-322b

དང་རྟེན་དང་སྐྱབས་དག་དང་། །དེ་བཞིན་དཔུང་གཉེན་འགྱུར་བར་ཤོག །ཇི་ལྟར་འདྲེན་པ་གྲོལ་མཛད་བཞིན། །འགྲོ་བ་ལྔར་ནི་སྐྱེས་པ་ཡི། །སྲོག་ཆགས་རྣམས་ཀྱི་མགོན་དུ་ཤོག །བདག་གིས་སྡུག་
བསྔལ་ཀུན་ལས་དགྲོལ། །འཇིག་རྟེན་ན་ནི་མཚུངས་པ་ཡོད་མེད་པ། །ལྷ་དབང་ལྷ་མ་ཡིན་དང་ཀླུས་མཆོད་པ། །གཟི་བརྗིད་དག་ནི་མཐའ་ཡས་འོད་མཛད་པ། །རྐང་གཉིས་མཆོག་ལ་བདག་གིས་མཆོད་
པ་བགྱིས། །བདག་ནི་ལས་མཆོག་དམ་པ་འདི་དག་གིས། །མི་དབང་ས་སྟེང་མཆོག་ཏུ་གྱུར་པ་བཞིན། །བསོད་ནམས་རབ་མཆོག་སུམ་བཅུ་གཉིས་མཚན་ལྡན། །ཆོས་ཀྱི་བདག་པོ་དེ་དང་འདྲ་བར་ཤོག །
དེ་ནས་བཅོམ་ལྡན་འདས་ཀྱིས་གནོད་སྦྱིན་ཅི་འཇིགས་ཀྱི་བུ་རི་བོ་ལ་ཚིགས་སུ་བཅད་པ་དག་གིས་གསུངས་པ། ཆོས་ཀྱི་དམ་པ་རྣམས་ཀྱི་ཕྱིར། །སྟོན་པའི་རིམ་གྲོ་གང་བྱེད་པ། སེམས་ཅན་རྣམས་
ཀྱི་མཆོག་ཡིན་ཏེ། །དེ་དག་བྱང་ཆུབ་རྙེད་མི་དཀའ། །འཇིག་རྟེན་མགོན་པོ་འོད་མཛད་པ། །འཇིག་རྟེན་སྣང་མཛད་མཆོག་ལ་ནི། །ལྷ་དང་ཀླུ་དང་མི་རྣམས་ཀྱིས། །མཆོད་པར་བྱ་བར་འོས་པར་འགྱུར། །བྱང་
ཆུབ་མཆོག་ཏུ་སངས་རྒྱས་ནས། །ཤིང་མཆོག་དྲུང་དུ་རབ་འདུག་སྟེ། །སྡིག་ཅན་བདུད་ལས་རྒྱལ་ནས་སུ། །སྲོག་ཆགས་རྣམས་ལ་ཆོས་སྟོན་ཏོ། །དེ་ནས་བཅོམ་ལྡན་འདས་ལྷ་སྟོང་ཕྲག་དུ་མ་དང་། གནོད་
སྦྱིན་དང་། སྲིན་པོ་སྟོང་ཕྲག་དུ་མ་དང་། དྲི་ཟ་དང་། མི་འམ་ཅི་དང་། ལྟོ་འཕྱེ་ཆེན་པོ་སྟོང་ཕྲག་དུ་མ་དང་། མི་དང་མི་མ་ཡིན་པ་སྟོང་ཕྲག་དུ་མ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་བསྐོར་ཅིང་མདུན་
དུ་བདར་ནས་སངས་རྒྱས་ཀྱི་མཐུ་ཆེན་པོ་དང་། སངས་རྒྱས་ཀྱི་རྫུ་འཕྲུལ་ཆེན་པོ་དང་། སངས་རྒྱས་ཀྱི་ཆོ་འཕྲུལ་ཆེན་པོ་དང་། སངས་རྒྱས་ཀྱི་རྣམ་པར་འཕྲུལ་བ་ཆེན་པོ་དང་། སངས་རྒྱས་ཀྱི་གཟི་བརྗིད་ཆེན་

79-1-323a

པོས། འོད་ཟེར་ནི་རབ་ཏུ་འགྱེ། ཞིང་ནི་རབ་ཏུ་གཡོ་བར་བྱས། མེ་ཏོག་གི་ཆར་ནི་རབ་ཏུ་འབེབས། སིལ་སྙན་བྱེ་བ་ཁྲག་ཁྲིག་ནི་རབ་ཏུ་འཁྲོལ་བར་བྱས་ཏེ། གནོད་སྦྱིན་ཅི་
འཇིགས་ཀྱི་བུ་རི་བོས་ལམ་དུ་བཀོད་པ་ཇི་ལྟར་མངོན་པར་བྱས་པ་བཞིན་དུ་ཤིང་རྟའི་འཕང་ལོ་ཙམ་གྱི་པད་མ་ལ་ཞབས་བཞག་སྟེ། རིའི་རྒྱལ་པོ་བྱ་རྒོད་ཀྱི་ཕུང་པོ་ག་ལ་བ་དེར་གཤེགས་ཏེ་བྱོན་ནས། ཚེ་
དང་ལྡན་པ་ཀུན་དགའ་བོ་ལ་ཀུན་དགའ་བོ་ཁྱོད་ཀྱིས་དེ་བཞིན་གཤེགས་པའི་གདན་མཆོག་ཆོས་ཀྱི་གདན། གདན་དམ་པ། གདན་བཟང་པོ། འཇིག་རྟེན་གསུམ་པོ་ཀུན་ལས་ཁྱད་པར་དུ་འཕགས་
པའི་གདན། སངས་རྒྱས་ཀྱི་གདན་ཤོམས་ཤིག །དེ་བཞིན་གཤེགས་པ་གདན་དེ་ལ་བཞུགས་ཏེ། སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་རྣམས་ལ་སྙིང་བརྩེ་བ་དང་། 
ལྷ་དང་མི་རྣམས་ཀྱི་དོན་དང་། ཕན་པའི་ཕྱིར་བྱང་ཆུབ་སེམས་དཔའི་སྡེ་སྣོད་ཅེས་བྱ་བའི་མདོ་སྡེ་སེམས་ཅན་ཐམས་ཅད་ལ་ཕན་པར་རབ་ཏུ་བསྔགས་པ། བྱང་ཆུབ་སེམས་དཔའི་སྤྱོད་པའི་རྒྱུ་འཐུན་པ་འཆད་པར་
འགྱུར་ཏེ། དེ་ཡང་སེམས་ཅན་ཐམས་ཅད་ཐེ་ཚོམ་དུ་གྱུར་པ་ལ་རབ་ཏུ་སྟོན་པ། སེམས་ཅན་ཐམས་ཅད་ཀྱི་ཐེ་ཚོམ་གཅོད་པ། སེམས་ཅན་ཐམས་ཅད་ཀྱི་ཐེ་ཚོམ་སྐྱེ་བ་གཅོད་པ། དེ་བཞིན་གཤེགས་
པའི་མདོ་སྡེ་འདི་འཆད་པར་འགྱུར་རོ། །ཞེས་བཀའ་སྩལ་པ་དང་། ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་གདན་བཤམས་ཏེ། དེ་ན་ལྷ་བྱེ་བ་དྲུག་བཅུ་རྩ་བརྒྱད་ཀྱིས་རས་བཅོས་མ་རེ་རེ་དེ་བཞིན་གཤེགས་པ་
ལ་ཕུལ་ཏེ། དེ་དག་ཀྱང་དེར་གདན་དུ་བཏིང་བར་གྱུར་ནས་བཅོམ་ལྡན་འདས་གདན་བཤམས་པ་དེ་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་ལྷའི་བུ་དེ་རྣམས་ལ་ཚིགས་སུ་བཅད་པ་དག་གིས་གསུངས་པ། 

79-1-323b

འཇིག་རྟེན་མགོན་གྱི་གདན་དུ་ནི། །ལྷ་ཡི་གོས་རབ་དམ་པ་མཆོག །ལྷ་ཡིས་རབ་ཏུ་བཏིང་བ་ལ། །དེ་ལ་རྣམ་པར་འདྲེན་པ་བཞུགས། །ཐམས་ཅད་ཆོས་ཀྱི་ཕ་རོལ་ཕྱིན། །སངས་རྒྱས་བཞུགས་པར་
གྱུར་མ་ཐག །འཇིག་རྟེན་རྣམ་པ་དྲུག་གཡོས་ཤིང་། །སྐྱེ་བོ་རབ་ཏུ་དགའ་བར་གྱུར། །སངས་རྒྱས་ཞིང་ནི་རི་དང་བཅས། །དེ་ན་རབ་ཏུ་སྣང་བར་གྱུར། །དེ་ན་ཆོས་འདོད་རྣམས་ལ་ནི། །སྐྱོབ་པ་སངས་རྒྱས་རྫུ་
འཕྲུལ་སྟོན། །ལྷ་དང་ཀླུ་དང་མི་རྣམས་དང་། །གྲུལ་བུམ་ཡི་དགས་སྲུལ་པོ་རྣམས། །དེ་དག་གཅིག་གིས་གཅིག་མཐོང་སྟེ། །སྒྲིབ་པ་དག་ནི་མེད་པར་གྱུར། །ལྷ་རྣམས་བྱེ་བ་ཕྲག་སྟོང་དང་། ཁྲག་ཁྲིག་ཕྲག་ནི་
བརྒྱ་རྣམས་དག །རྙེད་དགའ་ཡི་ནི་ཚིག་གསུང་པ། །སངས་རྒྱས་ལ་ནི་དགའ་བས་ལྟ། །རྒྱལ་པོ་གཟུགས་ཅན་སྙིང་པོ་ཡང་། དེ་ཚེ་བློན་པོས་ཡོངས་བསྐོར་ཅིང་། །འཇིག་རྟེན་གྱི་ནི་མགོན་པོ་མཆོག །
སངས་རྒྱས་དྲུང་དུ་འོངས་པར་གྱུར། །སྟོན་པས་ལྷ་དང་ཀླུ་རྣམས་དང་། །མི་རྣམས་འདུས་པར་མཁྱེན་པ་དང་། སྲོག་ཆགས་ཀུན་ལ་ཕན་པའི་ཕྱིར། །ཕྱོགས་བཞི་དག་ཏུ་རབ་གཟིགས་ནས། །འཇིག་རྟེན་ཐེ་
ཚོམ་གང་ཡོད་པ། །རྐང་གཉིས་མཆོག་ལ་དྲིས་ཤིག་དང་། །ཐེ་ཚོམ་དག་ནི་དྲིས་པ་རྣམས། །རྣམ་པར་འདྲེན་པ་ངས་བཅད་དོ། །དེ་ལྟར་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་
སྙེད་འདུས་ནས། ཆོས་ཉན་པ་དེ་དག་ཐམས་ཅད་ཀྱིས་དལ་བར་ཤེས་ནས། སེམས་ཅན་ཐམས་ཅད་ཀྱིས་བསམས་ཏེ། ཕྱག་འཚལ་ནས་ཆོས་མཉན་པའི་ཕྱིར་རྣ་བ་བླགས་ཏེ་འདུག་པར་གྱུར་ཏོ། །དེ་ནས་
བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ཆེན་པོ་དགེ་སློང་མ་འདུས་པ་རྣམས་ལ་སོམས་ལ་མ་ལྷགས་པ་རྣམས་ཀྱང་ཚོལ་ཏེ། རྒྱང་རིང་པོ་ན་

79-1-324a

གནས་པ་རྣམས་ཀྱང་སྡུས་ཤིག །།དེའི་ཚེ་ཚེ་དང་ལྡན་པ་འོད་སྲུང་ཆེན་པོ་རིའི་རྒྱལ་པོ་ཁ་བ་ཅན་གྱི་ལྷོ་ཕྱོགས་ཀྱི་ངོས་ལ་གནས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་
བསམས་ཏེ། བསམས་ནས་རྫུ་འཕྲུལ་གྱི་སྟོབས་ཀྱི་ཚེ་དང་ལྡན་པ་འོད་སྲུང་ཆེན་པོ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་འོད་སྲུང་ཆེན་
པོ་ལོངས་ཤིག བཅོམ་ལྡན་འདས་འདི་ལྷར་བཅས་པའི་འཇིག་རྟེན་དང་། བདུད་ཏུ་བཅས་པ་དང་། ཚངས་པར་བཅས་པ་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་རྣམས་དང་། ལྷ་དང་མི་
དང་ལྷ་མ་ཡིན་དུ་བཅས་པའི་འཁོར་གྱི་མདུན་དུ་ཆོས་སྟོན་ཏེ། སྟོན་པས་བཀའ་སྩལ་གྱིས། བཙུན་པ་འོད་སྲུང་བདག་ཅག་གཉིས་ཀྱི་ཆོས་ཀྱི་བར་ཆད་ཏུ་འགྱུར་དུ་འོང་གིས་འདོད་དོ། །དེ་སྐད་ཅེས་སྨྲས་
པ་དང་། ཚེ་དང་ལྡན་པ་འོད་སྲུང་ཆེན་པོས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་མཽད་གལ་གྱི་བུ་ཆེན་པོ་ཁྱོད་སོང་ཤིག་དང་། ཁོ་བོ་ཡང་ཁྱོད་སོང་བའི་རྗེས་བཞིན་
དུ་འོང་ངོ་། །དེ་ནས་ཚེ་དང་ལྡན་པ་འོད་སྲུང་ཆེན་པོས་སྟན་དེ་ལ་འཕྲུལ་པ་སྤྲུལ་ཏེ། རྫུ་འཕྲུལ་གྱི་སྟོབས་ཀྱིས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་བཞུགས་སོ། །དེ་ནས་ཚེ་དང་ལྡན་པ་འོད་སྲུང་ཆེན་པོ་འཁོར་
བཞིས་བསྐོར་ཅིང་མདུན་དུ་བདར་ནས་རིའི་རྒྱལ་པོ་བྱ་རྒོད་གྱི་ཕུང་པོ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔར་འཁོར་གྱི་ནང་
དུ་ཧ་ཅང་ཡང་མི་རིང་བ་ཞིག་ཏུ་ཕྱོགས་གཅིག་ཏུ་གདུག་གོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་སྤྲུལ་པ་དེ་མཐོང་ནས་རྫུ་འཕྲུལ་གྱི་སྟོབས་ཀྱིས་བཅོམ་ལྡན་འདས་ག་ལ་བ་དེར་སོང་ངོ་། །ཚེ་

79-1-324b

དང་ལྡན་པ་མཽད་གལ་གྱི་བུ་ཆེན་པོས། ཚེ་དང་ལྡན་པ་འོད་སྲུང་ཆེན་པོ་བཅོམ་ལྡན་འདས་ཀྱི་སྤྱན་སྔར་ཧ་ཅང་ཡང་མི་རིང་བ་ཞིག་ཏུ་འཁོར་གྱི་ནང་ན་ཕྱོགས་གཅིག་ཏུ་འདུག་པར་མཐོང་སྟེ། མཐོང་ནས་
འདི་སྐད་ཅེས་སྨྲས་སོ། །བཙུན་པ་འོད་སྲུང་ཁྱོད་སྟན་ག་ལ་བ་དེ་ནས་སྤྲུལ་ཏེ། སྤྲུལ་ནས་མགྱོགས་པར་བཅོམ་ལྡན་འདས་ཀྱི་དྲུང་དུ་ཕྱིན་ཏེ། སྤྱན་སྔར་ཧ་ཅང་ཡང་མི་རིང་བཞིན་ཏུ་འཁོར་ཀྱི་ནང་
ན་ཕྱོགས་གཅིག་ཏུ་འདུག་པ་ནི་མྱུར་བ་ལ་སྟེན་པའི་རྫུ་འཕྲུལ་དང་ལྡན་ནོ། །དེ་སྐད་ཅེས་སྨྲས་པ་དང་། ཚེ་དང་ལྡན་པ་འོད་སྲུང་ཆེན་པོས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་
སོ། །ཚེ་དང་ལྡན་པ་མཽད་གལ་གྱི་བུ་ཆེན་པོ་ནི། བཅོམ་ལྡན་འདས་ཀྱིས་རྫུ་འཕྲུལ་དང་ལྡན་པའི་མཆོག་ཏུ་གསུངས་ན་འདི་ལ་ཁོ་བོའི་རྫུ་འཕྲུལ་རྣམ་པར་སྤྲུལ་པ་ལྟ་ཅི་ཞིག་ཏུ་འགྱུར། གནོད་སྦྱིན་ཅི་འཇིགས་ཀྱི་
ལེའུ་སྟེ། གཉིས་པའོ།། །། བམ་པོ་གསུམ་པ། །དེ་ནས་ཚེ་དང་ལྡན་པ་ཤཱ་རིའི་བུ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་
ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་ཏུ་བཅོམ་ལྡན་འདས་ཀྱིས་བདག་ལ་
སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་
དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཅི་དང་ཅི་འདོད་པ་དྲིས་ཤིག་དང་། དྲིས་པ་དེ་དང་དེའི་ལུང་

79-1-325a

བསྟན་པས་ངས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་དུ་
དང་ལྡན་ན་བྱང་ཆུབ་སེམས་དཔའ་རྣམས་ལུས་ཀྱི་ལས་ཁ་ན་མ་ཐོ་བ་མ་མཆིས་པ་དག་ལགས། ངག་གི་ལས་ཁ་ན་མ་ཐོ་བ་མ་མཆིས་པ་དང་། ཡིད་ཀྱི་ལས་ཁ་ན་མ་ཐོ་བ་མ་མཆིས་པ་དང་། ལུས་ཀྱི་
ལས་ཡོངས་སུ་དག་པ་དང་། ངག་གི་ལས་ཡོངས་སུ་དག་པ་དང་། ཡིད་ཀྱི་ལས་ཡོངས་སུ་དག་པ་དང་། ལུས་ཀྱི་ལས་མ་གཡོས་པ་དང་། ངག་གི་ལས་མ་གཡོས་པ་དང་། ཡིད་ཀྱི་ལས་མ་གཡོས་པ་རྣམས་
ལགས། ཐམས་ཅད་མཁྱེན་པའི་སེམས་བསྐྱེད་པ་དེ་ལས་བདུད་དང་། བདུད་ཀྱི་རིས་ཀྱི་ལྷ་རྣམས་ཀྱིས་བསྐྱོད་མི་ནུས་པ་རྣམས་ལགས། ས་ནས་སར་འཕར་བ་ལ་མཁས་པ་རྣམས་ལགས། སེམས་ཅན་ཐམས་ཅད་
ཀྱི་འདྲེན་པར་གྱུར་པ་དང་། རྣམ་པར་འདྲེན་པར་གྱུར་པ་དང་། ཡོངས་སུ་འདྲེན་པར་གྱུར་པ་དང་། སྒྲོན་མར་གྱུར་པ་དང་། མུ་སྟེགས་སུ་གྱུར་པ་དང་། ཟམ་པར་གྱུར་པ་དང་། གྲུར་གྱུར་པ་དང་། སྒྲོལ་བ་པོ་དང་། ཕ་རོལ་དུ་
འགྲོ་བར་གྱུར་པ་དང་། གནས་དང་མགོན་དང་སྐྱབས་དང་། དཔུང་གཉེན་དུ་གྱུར་པ་དང་། ཐམས་ཅད་མཁྱེན་པའི་སེམས་བསྐྱེད་པ་དེ་ལས་བཟློག་པར་མི་ནུས་པ་རྣམས་ལགས། དེ་ནས་བཅོམ་ལྡན་འདས་ལ་ཚེ་དང་ལྡན་
པ་ཤཱ་རིའི་བུས་ཚིགས་སུ་བཅད་པའི་དབྱངས་ཀྱིས་དོན་དེ་ཉིད་ཀུན་ཞུས་པ། གང་གིས་བྱང་ཆུབ་རབ་ཞུགས་པ། །དཔའ་བོ་དེ་ཡི་དོན་ཅི་ལགས། །གང་གིས་དམ་པ་འཚང་རྒྱ་བ། །ཡོན་ཏན་ཆོས་རྣམས་བརྗོད་
དུ་གསོལ། །སྲོག་ཆགས་ཀུན་ལ་སྨན་སླད་དུ། །དཔའ་བོ་དེ་དག་ཇི་ལྟར་སྤྱོད། །ཇི་ལྟ་བུ་ཡི་ཆོས་བསྒོམས་པས། །མི་ཡི་དམ་པ་སངས་རྒྱས་འགྱུར། །བྱང་ཆུབ་སྙིང་པོར་རབ་གནས་ནས། །

79-1-325b

སྡིག་ཅན་དག་ནི་ཇི་ལྟར་འདུལ། །བྱེ་བ་དག་གི་ཞིང་བསྐྱོད་ནས། །ཇི་ལྟར་བྱང་ཆུབ་མཆོག་འཚང་རྒྱ། །བྱང་ཆུབ་སེམས་དཔའ་གང་གི་དོན། །འདི་འདྲའི་ཚིག་ནི་ཅི་ཞིག་ལགས། །སངས་རྒྱས་
ཆོས་ཀྱི་མཆོག་རྣམས་དང་། །བྱང་ཆུབ་དག་ནི་འདིར་བརྗོད་གསོལ། །སྲོག་ཆགས་ཀུན་ལས་སྨན་སླད་དུ། །པད་མ་བཞིན་དུ་མ་ཆགས་ཤིང་། །སེམས་ཅན་བྱེ་བ་གྲོལ་མཛད་པར། །
འཇིག་རྟེན་འདི་ནི་ཇི་ལྟར་སྤྱོད། །མཁས་པ་ལྷ་དང་ཀླུ་དག་དང་། །མི་དང་མི་མ་ལགས་རྣམས་ཀྱིས། །ཇི་ལྟ་བུར་ནི་མཆོད་འགྱུར་བ། །ཞུས་པ་དེ་དག་བཤད་དུ་གསོལ། །དེ་ནས་བཅོམ་
ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་བྱང་ཆུབ་སེམས་དཔའ་ཆོས་གཅིག་དང་ལྡན་ན་སངས་རྒྱས་ཀྱི་ཆོས་འདི་དག་དང་གཞན་ཡང་དཔག་ཏུ་མེད་
པ་དག་ཡོངས་སུ་འཛིན་ཏོ། །ཆོས་གཅིག་པོ་གང་ཞེ་ན། འདི་ལྟ་སྟེ། བསམ་པ་ཕུན་སུམ་ཚོགས་པའི་བྱང་ཆུབ་ཀྱི་སེམས་ཏེ། ཤཱ་རིའི་བུ་བྱང་ཆུབ་སེམས་དཔའ་ཆོས་གཅིག་པོ་དེ་དང་ལྡན་ན་སངས་
རྒྱས་ཀྱི་ཆོས་འདི་དག་དང་། གཞན་ཡང་དཔག་ཏུ་མེད་པ་དག་ཡོངས་སུ་འཛིན་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བསམ་པ་ཇི་ལྟ་
བུ། བྱང་ཆུབ་ཀྱི་སེམས་ཇི་ལྟ་བུ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་བསམ་པ་ཞེས་བྱ་བ་ནི་མི་ཕྱེད་པའི་ཕྱིར་
སྙིང་པོའོ། །བརྟན་པའི་ཕྱིར་མི་ཕྱེད་པའོ། །མི་གཡོ་བའི་ཕྱིར་བརྟན་པའོ། །མ་འཁྲུལ་བའི་ཕྱིར་མི་གཡོ་བའོ། །ཤིན་དུ་གནས་པའི་ཕྱིར་མ་འཁྲུལ་པའོ། །མི་ཟློགས་པའི་ཕྱིར་ཤིན་ཏུ་གནས་

79-1-326a

པའོ། །སེམས་ཅན་ལ་ལྟ་བའི་ཕྱིར་མི་ཟློགས་པའོ། །སྙིང་རྗེ་ཆེན་པོའི་རྩ་བ་ལས་བྱུང་བའི་ཕྱིར་སེམས་ཅན་ལ་ལྟ་བའོ། །ཡོངས་སུ་མི་སྐྱོ་བའི་ཕྱིར་སྙིང་རྗེ་ཆེན་པོའི་རྩ་བའོ། །སེམས་ཅན་
ཡོངས་སུ་སྨིན་པར་བྱ་བའི་ཆོ་ག་ཤེས་པའི་ཕྱིར་ཡོངས་སུ་མི་སྐྱོ་བའོ། །བདག་ལ་བདེ་བ་མ་ཡིན་པའི་ཕྱིར་སེམས་ཅན་ཡོངས་སུ་སྨིན་པར་བྱ་བའི་ཆོ་ག་ཤེས་པའོ། །ལན་དུ་ཕན་འདོགས་པར་རེ་བ་མེད་པའི་
ཕྱིར་བདག་བདེ་བ་མ་ཡིན་པའོ། །ཟང་ཟིང་མེད་པའི་ཕྱིར། ལན་དུ་ཕན་འདོགས་པར་རེ་བ་མེད་པའོ། །སེམས་ཅན་གྱི་ཕྱིར་འབྲང་པས་ཟང་ཟིང་མེད་པའོ། །མཐུ་ཆུང་བའི་སེམས་ཅན་ལ་ལྟ་བའི་ཕྱིར་སེམས་ཅན་
གྱི་ཕྱིར་འབྲང་བའོ། །མགོན་དུ་གྱུར་པའི་ཕྱིར་མཐུ་ཆུང་བའི་སེམས་ཅན་ལ་ལྟ་བའོ། །སྐྱབས་དང་དཔུང་གཉེན་གྱི་ཕྱིར་མགོན་དུ་གྱུར་པའོ། །མ་འཁྲུགས་པའི་ཕྱིར་སྐྱབས་དང་དཔུང་གཉེན་ནོ། །ཤིན་ཏུ་ཡང་དག་
པར་བརྟགས་པའི་ཕྱིར་མ་འཁྲུགས་པའོ། །རྩོད་པ་མེད་པའི་ཕྱིར་ཤིན་ཏུ་ཡང་དག་པར་བརྟགས་པའོ། །བསམ་པ་དགེ་བའི་ཕྱིར་རྩོད་པ་མེད་པའོ། །ཅི་ཡང་མེད་པའི་ཕྱིར་བསམ་པ་དགེ་བའོ། །ཤིན་དུ་ཡོངས་
སུ་དག་པའི་ཕྱིར་ཅི་ཡང་མེད་པའོ། །རབ་ཏུ་བྱུང་བར་བྱས་པའི་ཕྱིར་ཤིན་ཏུ་ཡོངས་སུ་དག་པའོ། །ནང་དྲི་མ་མེད་པའི་ཕྱིར་རབ་ཏུ་བྱང་བར་བྱས་པའོ། །ཕྱི་ཤིན་དུ་ཡོངས་སུ་དག་པའི་ཕྱིར་ནང་དྲི་མ་མེད་པའོ། །དེ་ལྟར་ཤཱ་
རིའི་བུ་མི་ཕྱེད་པས་སྙིང་པོ་ཞེས་བྱ་བ་ནས་ཕྱི་ཤིན་དུ་ཡོངས་སུ་དག་པའི་ཕྱིར་ནང་དྲི་མ་མེད་པའི་བར་དུ་སྟེ། བསམ་པ་ནི་དེ་ལྟ་བུའོ། །བྱང་ཆུབ་ཀྱི་སེམས་ཇི་ལྟ་བུ་ཞེ་ན། སེམས་དེ་ནི་ཉོན་མོངས་པ་ཐམས་ཅད་
ཀྱིས་མི་རྫི་བའོ། །སེམས་དེ་ནི་ཐེག་པ་གཞན་མི་འདོད་པའི་ཕྱིར་འབྲེལ་བ་མེད་པའོ། །སེམས་དེ་ནི་ཕ་རོལ་རྒོལ་བ་ཐམས་ཅད་ཀྱིས་མི་འཕྲོགས་པའི་ཕྱིར་བརྟན་པའོ། །སེམས་དེ་ནི་བདུད་ཐམས་ཅད་ཀྱིས་མི་ཕྱེད་

79-1-326b

པའོ། །སེམས་དེ་ནི་དགེ་བའི་རྩ་བའི་ཚོགས་བསགས་པའི་ཕྱིར་རྟག་པའོ། །སེམས་དེ་ནི་སངས་རྒྱས་ཀྱི་ཆོས་ལ་མོས་པའི་ཕྱིར་མི་གཡོ་བའོ། །སེམས་དེ་ནི་བྱང་ཆུབ་སེམས་དཔའི་ས་ལ་རབ་ཏུ་གནས་པའོ། །
སེམས་དེ་ནི་གཉེན་པོ་མེད་པའི་ཕྱིར་བླ་ན་མེད་པའོ། །སེམས་དེ་ནི་སངས་རྒྱས་ཐམས་ཅད་ཀྱི་ཆོས་ཐམས་ཅད་ངེས་པར་ཕིགས་པའི་ཕྱིར་རྡོ་རྗེ་ལྟ་བུའོ། །སེམས་དེ་ནི་སེམས་ཅན་ཐམས་ཅད་ཀྱི་བསམ་པ་ལ་མི་
མཉམ་པ་མེད་པའི་ཕྱིར་མཉམ་པའོ། །སེམས་དེ་ནི་རང་བཞིན་གྱིས་ཀུན་ནས་ཉོན་མོངས་པ་མེད་པའི་ཕྱིར་རྣམ་པར་དག་པའོ། །སེམས་དེ་ནི་ཤེས་རབ་ཀྱིས་སྣང་བར་བྱེད་པའི་ཕྱིར་དྲི་མ་མེད་པའོ། །སེམས་
དེ་ནི་སེམས་ཅན་ཐམས་ཅད་ལ་བསྐབས་འབྱེད་པའི་ཕྱིར་རྒྱ་ཆེ་བའོ། །སེམས་དེ་ནི་ནམ་མཁའ་དང་མཚུངས་པའི་ཕྱིར་ཡངས་པའོ། །སེམས་དེ་ནི་ཐམས་ཅད་མཁྱེན་པའི་ཡེ་ཤེས་ལ་བཏང་བའི་ཕྱིར་སྒྲིབ་པ་མེད་
པའོ། །སེམས་དེ་ནི་སྙིང་རྗེ་ཆེན་པོ་མ་བཅད་པའི་ཕྱིར་ཐམས་ཅད་ཀྱི་རྗེས་སུ་སོང་བའོ། །སེམས་དེ་ནི་མཁས་པས་བསྔགས་པའི་ཕྱིར་མངོན་དུ་འགྲོ་བར་བྱའོ། །སེམས་དེ་ནི་སངས་རྒྱས་ཀྱི་ཆོས་ཐམས་
ཅད་ཀྱི་ས་བོན་དུ་གྱུར་པའོ། །སེམས་དེ་ནི་བདེ་བའི་དངོས་པོ་ཐམས་ཅད་ཀྱི་གནས་སོ། །སེམས་དེ་ནི་ཚུལ་ཁྲིམས་ཀྱིས་སྨོན་ལམ་ལས་བྱུང་པའོ། །སེམས་དེ་ནི་བཟོད་པས་བསྙེན་པར་དཀའ་བའོ། །
སེམས་དེ་ནི་བརྩོན་འགྲུས་ཀྱིས་ཐུལ་བར་དཀའ་བའོ། །སེམས་དེ་ནི་བསམ་གཏན་དག་གིས་ཉེ་བར་ཞི་བའོ། །སེམས་དེ་ནི་ཤེས་རབ་ཀྱི་ཚོགས་ཀྱིས་གནོད་པ་མེད་པའོ། །ཡང་སེམས་དེ་ནི་དེ་བཞིན་
གཤེགས་པའི་ཚུལ་ཁྲིམས་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོའི་རྩ་བའོ། སེམས་དེ་ནི་དེ་བཞིན་གཤེགས་པའི་རྣམ་པར་གྲོལ་

79-1-327a

བའི་ཡེ་ཤེས་གཟིགས་པའི་ཕུང་པོའི་རྩ་བའོ། །སེམས་དེ་ནི་དེ་བཞིན་གཤེགས་པའི་སྟོབས་བཅུ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་
རྣམས་ཀྱི་རྩ་བའོ། །ཡང་ཤཱ་རིའི་བུ་སེམས་དེ་ནི་བྱང་ཆུབ་ཀྱི་རང་བཞིན་ཏེ། དེའི་ཕྱིར་བྱང་ཆུབ་ཀྱི་སེམས་ཤེས་བྱའོ། །ཤཱ་རིའི་བུ་བྱང་ཆུབ་སེམས་དཔའ་བསམ་པ་དང་། བྱང་ཆུབ་ཀྱི་སེམས་དེ་ལྟ་
བུ་དང་ལྡན་པ་ནི་བྱང་ཆུབ་སེམས་དཔའ་ཞེས་བྱའོ། །སེམས་ཅན་རྒྱ་ཆེན་པོ་སེམས་ཅན་མཆོག་རབ་ཅེས་བྱའོ། །འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་གྱུར་པའི་སེམས་ཅན་ཞེས་བྱའོ། །ལུས་
ཀྱི་ལས་ཁ་ན་མ་ཐོ་བ་མེད་པ་ཡིན། ངག་གི་ལས་ཁ་ན་མ་ཐོ་བ་མེད་པ་ཡིན། ཡིད་ཀྱི་ལས་ཁ་ན་མ་ཐོ་བ་མེད་པ་ཡིན། ལུས་ཀྱི་ལས་ཡོངས་སུ་དག་པ་ཡིན། ངག་གི་ལས་ཡོངས་སུ་དག་
པ་ཡིན། ཡིད་ཀྱི་ལས་ཡོངས་སུ་དག་པ་ཡིན། ལུས་ཀྱི་ལས་མ་གཡོས་པ་ཡིན། ངག་གི་ལས་མ་གཡོས་པ་ཡིན། ཡིད་ཀྱི་ལས་མ་གཡོས་པ་ཡིན་ཏེ། ཐམས་ཅད་མཁྱེན་པའི་
སེམས་བསྐྱེད་པ་དེ་ལས་བདུད་དང་བདུད་ཀྱི་རིས་ཀྱི་ལྷ་རྣམས་ཀྱིས་བསྐྱོད་མི་ནུས་པ་ཡིན། ས་ནས་སར་འཕར་བ་ལ་མཁས་པ་ཡིན། འཇིག་རྟེན་གྱི་ཆོས་ཐམས་ཅད་ཀྱིས་མ་གོས་པ་ཡིན། སེམས་
ཅན་ཐམས་ཅད་ཀྱི་འདྲེན་པར་གྱུར་པ་ཡིན། རྣམ་པར་འདྲེན་པར་གྱུར་པ་དང་། ཡོངས་སུ་འདྲེན་པར་གྱུར་པ་དང་། སྒྲོན་མར་གྱུར་པ་དང་། མུ་སྟེགས་སུ་གྱུར་པ་དང་། ཟམ་པར་གྱུར་པ་དང་། གྲུར་གྱུར་པ་
དང་། སྒྲོལ་བར་གྱུར་པ་དང་ཕ་རོལ་ཏུ་འགྲོ་བ་དང་། གནས་དང་མགོན་དང་། སྐྱབས་དང་དཔུང་གཉེན་ཡིན་ནོ། །ཐམས་ཅད་མཁྱེན་པའི་སེམས་བསྐྱེད་པ་དེ་ལས་བདུད་དང་བདུད་ཀྱི་རིས་ཀྱི་ལྷ་རྣམས་ཀྱིས་

79-1-327b

བསྐྱོད་པར་མི་ནུས་པ་ཡིན་ནོ། །དེ་ལྟར་ན་ཤཱ་རིའི་བུ་བྱང་ཆུབ་སེམས་དཔའ་བསམ་པ་ཐག་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་དད་པ་ཡིན་ནོ། །དད་པ་མང་བ་དང་། 
འཕགས་པ་རྣམས་མཐོང་བར་འདོད་པ་དང་། ཆོས་ཉན་པར་འདོད་པ་ཡིན། སེར་སྣ་མེད་ཅིང་ལྷུག་པར་གཏོང་བ་དང་། ལག་བརྐྱང་ཞིང་རྣམ་པར་གཏོང་བ་ལ་དགའ་བ་དང་། སྦྱིན་པ་བགེད་པ་ལ་
དགའ་བ་ཡིན། སེམས་ཅན་ཐམས་ཅད་ལ་ཁོང་ཁྲོ་བ་མེད་པའི་སེམས་ཡིན། རྙོག་པ་མེད་པའི་སེམས་དང་། འཁྲུགས་པ་མེད་པའི་སེམས་དང་། མ་འདྲེས་པའི་སེམས་དང་། དེ་ལས་དང་ལས་ཀྱི་
རྣམ་པར་སྨིན་པ་ལ་མངོན་པར་དད་པ་དང་། རབ་ཏུ་རྟོག་ཅིང་ཡིད་ཆེས་པ་དང་། ཐེ་ཚོམ་མེད་ཅིང་སོམ་ཉི་མེད་པ་ཡིན་ནོ། །དེ་ནག་པོ་དང་། དཀར་པོའི་ཆོས་རྣམས་ཀྱི་འབྲས་བུ་མི་སྟོར་བར་ཤེས་པས་
སྲོག་གིས་ཕྱིར་ཡང་སྡིག་པའི་ལས་མི་བྱེད་པ་ཡིན་ཏེ། དེ་སྲོག་གཅོད་པ་སྤོང་བ་ཡིན། མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་དང་། བརྫུན་ཏུ་སྨྲ་བ་དང་། ཕྲ་མ་དང་། ངག་རྩུབ་
པོ་དང་། ཚིལ་ཀྱལ་བ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་སྤོང་བ་ཡིན་ཏེ། མི་དགེ་བ་བཅུའི་ལས་ཀྱི་ལམ་འདི་དག་སྤངས་ནས་། དགེ་བ་བཅུའི་ལས་ཀྱི་ལམ་རྣམས་ཡང་
དག་པར་ལེན་ཅིང་སྤྱོད་དོ། །དེ་དད་པ་དང་ལྡན་པས་གང་དགེ་སྦྱོང་དང་། བྲམ་ཟེ་དག་ཡང་དག་པར་སོང་བ་དང་། ཡང་དག་པར་ཞུགས་པ་དང་། ཚུལ་ཁྲིམས་དང་ལྡན་པ་དང་། དགེ་བའི་ཆོས་ཅན་དང་། 
མང་དུ་ཐོས་པ་དང་། ཐོས་པ་ལ་བརྩོན་པ་དང་། ཚུལ་བཞིན་ཡིད་ལ་བྱེད་པ་དང་ལྡན་པ་དང་དུལ་བ་དང་། ཞི་བ་དང་ཉེ་བར་ཞི་བ་དང་། རྩོད་པའི་སྨྲ་བ་མེད་པ་དང་། མི་སྙན་པར་སྨྲ་བ་མེད་པ་དང་། 

79-1-328a

བསམ་པ་དགེ་ཞིང་མི་དགེ་བའི་བསམ་པ་མེད་པ་དང་། དགེ་བ་ལ་ཡང་དག་པར་སྦྱོར་བ་དང་། མི་དགེ་བའི་ཆོས་ཐམས་ཅད་ཡོངས་སུ་སྤངས་པ་དང་། རྒོད་པ་མེད་པ་དང་། 
ཁེངས་པ་མ་ཡིན་པ་དང་། ཡབ་ཡབ་པོ་མེད་པ་དང་། མུ་ཅོར་མི་སྨྲ་བ་དང་། ཚིག་མ་འདྲེས་པ་དང་། དྲན་པ་ཉེ་བར་གནས་པ་དང་། སེམས་ཤིན་དུ་མཉམ་པར་བཞག་པ་དེ་དག་དང་། ཇི་ལྟར་
སྲིད་པར་འདྲེན་པ་བཅད་པ་དང་། ཟུག་རྔུ་ཕྱུང་བ་དང་། ཁུར་བོར་བ་དང་། ཐེ་ཚོམ་ལས་རྒལ་བ་དང་། སོམ་ཉི་ལས་རྒལ་བ་དང་། ཡང་སྲིད་པ་ཟད་པའི་སངས་རྒྱས་བཅོམ་ལྡན་འདས་དང་། བྱང་ཆུབ་
སེམས་དཔའ་སེམས་དཔའ་ཆེན་པོ་དག་དང་། དེ་ལྟ་བུའི་དགེ་སྦྱོང་དང་། བྲམ་ཟེ་དགེ་བའི་བཤེས་གཉེན་དུ་རིག་ནས་དེ་དག་ལ་བསྙེན་ཅིང་བསྟེན་ཏེ། བསྙེན་བཀུར་བྱེད་ཅིང་མགུ་བར་བྱེད་ཀྱི། ཡིད་
བྱུང་བར་མི་བྱེད་དོ། །དགའ་བར་བྱེད་ཀྱི། མི་དགའ་བར་མི་བྱེད་དེ། དེས་དགེ་བའི་བཤེས་གཉེན་མགུ་བར་བྱས་པས་དེ་ལ་ཆོས་ཀྱིས་ཕན་འདོགས་པར་བྱེད་དེ། ཆོས་ཀྱི་གཏམ་གྱིས་ཡང་དག་པར་སྟོན་པར་བྱེད། 
ཡང་དག་པར་འཛིན་དུ་འཇུག །ཡང་དག་པར་གཟེང་སྟོད། ཡང་དག་པར་རབ་ཏུ་དགའ་བར་བྱེད་དེ། སྦྱིན་པས་ལོངས་སྤྱོད་ཆེན་པོ་འགྱུར་བ་དང་། ཚུལ་ཁྲིམས་ཀྱིས་མཐོ་རིས་སུ་སྐྱེ་བ་དང་། ཐོས་པས་
ཤེས་རབ་ཆེན་པོར་འགྱུར་བ་དང་། སྒོམ་པས་འབྲལ་བར་འགྱུར་རོ་ཞེས་ཡང་དག་པར་རབ་ཏུ་སྟོན་ཏོ། །འདི་ནི་སྦྱིན་པ། འདི་ནི་སྦྱིན་པའི་འབྲས་བུ་དང་། འདི་ནི་སེར་སྣ། འདི་ནི་སེར་སྣའི་འབྲས་བུ། འདི་ནི་
ཚུལ་ཁྲིམས། འདི་ནི་ཚུལ་ཁྲིམས་ཀྱི་རྣམ་པར་སྨིན་པ། འདི་ནི་འཆལ་བའི་ཚུལ་ཁྲིམས། འདི་ནི་འཆལ་བའི་ཚུལ་ཁྲིམས་ཀྱི་རྣམ་པར་སྨིན་པ། འདི་ནི་བཟོད་པ། འདི་ནི་བཟོད་པའི་རྣམ་པར་སྨིན་པ། 

79-1-328b

འདི་ནི་གནོད་སེམས། འདི་ནི་གནོད་སེམས་ཀྱི་རྣམ་པར་སྨིན་པ། འདི་ནི་བརྩོན་འགྲུས། འདི་ནི་བརྩོན་འགྲུས་ཀྱི་རྣམ་པར་སྨིན་པ། འདི་ནི་ལེ་ལོ། །འདི་ནི་ལེ་ལོའི་རྣམ་པར་སྨིན་པ། འདི་ནི་བསམ་
གཏན། འདི་ནི་བསམ་གཏན་རྣམས་ཀྱི་རྣམ་པར་སྨིན་པ། འདི་ནི་སེམས་གཡེང་བ། འདི་ནི་སེམས་གཡེང་བའི་རྣམ་པར་སྨིན་པ། འདི་ནི་ཤེས་རབ། འདི་ནི་ཤེས་རབ་ཀྱི་རྣམ་པར་སྨིན་པ། འདི་ནི་འཆལ་
བའི་ཤེས་རབ། འདི་ནི་འཆལ་བའི་ཤེས་རབ་ཀྱི་རྣམ་པར་སྨིན་པ། འདི་ནི་ལུས་ཀྱི་ལེགས་པར་སྤྱོད་པ། འདི་ནི་ལུས་ཀྱིས་ལེགས་པར་སྤྱོད་པའི་རྣམ་པར་སྨིན་པ། འདི་ནི་ལུས་ཀྱིས་ཉེས་པར་སྤྱོད་པ། འདི་ནི་ལུས་ཀྱིས་ཉེས་པར་སྤྱོད་
པའི་རྣམ་པར་སྨིན་པ། འདི་ནི་ངག་གིས་ལེགས་པར་སྤྱོད་པ། འདི་ནི་ངག་གིས་ལེགས་པར་སྤྱོད་པའི་རྣམ་པར་སྨིན་པ། འདི་ནི་ངག་གིས་ཉེས་པར་སྤྱོད་པ། འདི་ནི་ངག་གིས་ཉེས་པར་སྤྱོད་པའི་
རྣམ་པར་སྨིན་པ། འདི་ནི་ཡིད་ཀྱིས་ལེགས་པར་སྤྱོད་པ། འདི་ནི་ཡིད་ཀྱིས་ལེགས་པར་སྤྱོད་པའི་རྣམ་པར་སྨིན་པ། འདི་ནི་ཡིད་ཀྱིས་ཉེས་པར་སྤྱོད་པ། འདི་ནི་ཡིད་ཀྱིས་ཉེས་པར་སྤྱོད་པའི་རྣམ་པར་
སྨིན་པ། འདི་ནི་དགེ་བ། འདི་ནི་མི་དགེ་བ། འདི་ནི་བྱ་བ། འདི་ནི་མི་བྱ་བ། འདི་བྱས་ན་ཡུན་རིང་པོའི་དོན་དང་། ཕན་པ་དང་། བདེ་བར་འགྱུར། འདི་ནི་བྱས་ན་ཡུན་རིང་པོར་གནོད་པ་དང་། མི་ཕན་པ་དང་། 
མི་བདེ་བར་འགྱུར་རོ་ཞེས་དེ་ལྟར་དེ་ལ་དགེ་བའི་བཤེས་གཉེན་དེ་དག་གིས་ཆོས་ཀྱི་གཏམ་གྱིས་ཡང་དག་པར་སྟོན་ཏེ། ཡང་དག་པར་འཛིན་དུ་འཇུག །ཡང་དག་པར་གཟེང་སྟོད། ཡང་དག་པར་རབ་ཏུ་དགའ་བར་
བྱེད་དེ། སྣོད་ཏུ་གྱུར་པར་ཡང་ཤེས་ནས་ཟབ་མོའི་གཏམ་ཡང་དག་པར་འཛིན་དུ་འཇུག་སྟེ། འདི་ལྟ་སྟེ། སྟོང་པ་ཉིད་ཀྱི་གཏམ་དང་། མཚན་མ་མེད་པའི་གཏམ་དང་། སྨོན་པ་མེད་པའི་གཏམ་དང་། 

79-1-329a

མངོན་པར་འདུ་མི་བྱེད་པའི་གཏམ་དང་། མ་སྐྱེས་པའི་གཏམ་དང་། མ་བྱུང་བའི་གཏམ་དང་། བདག་མེད་པའི་གཏམ་དང་། སེམས་ཅན་མེད་པའི་གཏམ་དང་། སྲོག་མེད་པའི་གཏམ་
དང་། གང་ཟག་མེད་པའི་གཏམ་དང་། རྟེན་ཅིང་འབྲེལ་བར་འབྱུང་བ་ཟབ་མོའི་གཏམ་རབ་ཏུ་སྟོན་ཏོ། །འདི་ལྟ་སྟེ། འདི་ཡོད་པས་འདི་འབྱུང་། འདི་སྐྱེས་པའི་ཕྱིར་འདི་སྐྱེ་བ་སྟེ། འདི་ལྟར་མ་རིག་པའི་
རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་
རེག་པ་རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ་ལེན་པ་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་
སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུགས་པ་རྣམས་འབྱུང་བར་འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་འདི་འབའ་ཤིག་འབྱུང་བར་འགྱུར་རོ། །འདི་ལྟ་སྟེ། འདི་ཡོད་
ན་འདི་འབྱུང་། འདི་འགགས་པས་འདི་འགག་སྟེ། འདི་ལྟ་སྟེ། མ་རིག་པ་འགགས་པས་འདུ་བྱེད་འགག་པ་ནས། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཤིག་འགག་པར་འགྱུར་རོ་ཞེས་བྱ་
བའི་བར་དུ་སྟེ། འདི་ལ་ནི་ཆོས་གང་ཡང་སྐྱེ་བ་འམ། འགག་པ་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་རྟེན་ཅིང་འབྲེལ་བར་འབྱུང་བ་སྟེ། བདག་པོ་མེད་པ། བྱེད་པ་པོ་མེད་པ། ཚོར་བ་པོ་མེད་པ། 
རྒྱུ་དང་རྐྱེན་ལས་བྱུང་བ་སྟེ། འདི་ལ་ཆོས་གང་ཡང་འགྲུབ་པ་མེད། ལྡོག་པ་མེད། རྗེས་སུ་འཇུག་པ་མེད་དེ། ཡང་དག་པ་མ་ཡིན་པའི་རྨོངས་པས་ཁམས་གསུམ་འདོགས་པར་འགྱུར་རོ། །ཉོན་མོངས་པའི་

79-1-329b

ལམ་དང་། སྡུག་བསྔལ་གྱི་ལམ་འདོགས་པར་འགྱུར་རོ། །ཡང་དག་པ་མ་ཡིན་པའི་རྨོངས་པ་ཡང་དག་པ་ཇི་ལྟ་བ་བཞིན་དུ་བརྟགས་ནས་ཆོས་གང་ཡང་ཆོས་གང་གི་བྱེད་པ་པོ་མ་ཡིན་ནོ། །གང་ལ་བྱེད་པ་པོ་
མེད་པ་དེ་ལ་དོན་དམ་པ་བྱ་བ་ཡང་མི་དམིགས་ཏེ། དེ་ལ་ཆོས་གང་ཡང་འབྱུང་བ་མེད། འཇིག་པ་མེད་དོ་ཞེས་བརྗོད་དོ། །དེས་དེ་ལྟ་བུའི་ཆོས་ཟབ་མོ་ཐོས་ནས་ཐེ་ཚོམ་མི་ཟ། སོམ་ཉི་མི་བྱེད་ཅིང་ཆོས་
ཐམས་ཅད་ལ་ཆགས་པ་མེད་པར་འཇུག་སྟེ། དེ་གཟུགས་ལ་མི་ཆགས། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ལ་མི་ཆགས། མིག་དང་གཟུགས་དང་། མིག་གི་རྣམ་པར་ཤེས་
པ་ལ་མི་ཆགས། རྣ་བ་དང་སྣ་དང་ལྕེ་དང་ལུས་དང་ཡིད་དང་། ཆོས་དང་ཡིད་ཀྱི་རྣམ་པར་ཤེས་པ་ལ་མི་ཆགས་ཏེ། འདི་ལྟར་ཆོས་ཐམས་ཅད་ནི་རང་བཞིན་གྱིས་སྟོང་པའོ་ཞེས་དད་ངོ་། །ཤཱ་རིའི་བུ་དེ་ལྟར་དད་པ་
ལ་གནས་པའི་བྱང་ཆུབ་སེམས་དཔའ་ནི་སངས་རྒྱས་ལ་ལྟ་བ་ལས་ཡོངས་སུ་མི་ཉམས། ཆོས་ཉན་པ་ལས་ཡོངས་སུ་མི་ཉམས། དགེ་འདུན་ལ་བསྙེན་བཀུར་བྱེད་པ་ལས་ཡོངས་སུ་མི་ཉམས་སོ། །དེ་
གང་དང་གང་དུ་སྐྱེ་བ་དེ་དང་དེ་དག་ཏུ་སངས་རྒྱས་ལ་ལྟ་བ་དང་བྲལ་བར་མི་འགྱུར། ཆོས་ཉན་པ་དང་བྲལ་བར་མི་འགྱུར། དགེ་འདུན་ལ་བསྙེན་བཀུར་བྱེད་པ་དང་བྲལ་བར་མི་འགྱུར། སངས་རྒྱས་བཅོམ་ལྡན་
འདས་རྣམས་ཀྱི་སྤྱན་སྔར་སྐྱེ་བར་འགྱུར་ཏེ། དེ་དང་དེ་དག་ཏུ་སྐྱེས་ནས་ཀྱང་བརྩོན་འགྲུས་རྩོམ་ཞིང་དགེ་བའི་ཆོས་ཡོངས་སུ་ཚོལ་བ་ལ་བརྩོན་པར་འགྱུར་རོ། །དེ་བརྩོན་འགྲུས་བརྩམས་པས་ཁྱིམ་གྱི་གནས་
མི་འདོད་པར་འགྱུར། བུ་ཕོ་དང་། བུ་མོ་འདོད་པར་མི་འགྱུར། བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་དག་མི་འདོད་པར་འགྱུར། ཡོངས་སུ་གཟུང་བ་ཐམས་ཅད་ཀྱི་ངོར་ལྟ་བ་མི་འདོད་

79-1-330a

པར་འགྱུར་ཏེ། དེ་སྐྱེས་ནས་འདོད་པ་ལ་མ་རྩེས་པར་ན་ཚོད་གཞོན་ནུར་སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་ལ་དད་པས་ཁྱིམ་ནས་ཁྱིམ་མེད་པར་མྱུར་དུ་རབ་ཏུ་འབྱུང་ངོ་། །དེ་དད་པས་
རབ་ཏུ་བྱུང་ནས་དགེ་བའི་བཤེས་གཉེན་མཆོག་དང་ལྡན་ཞིང་དགེ་བའི་བཤེས་གཉེན་དང་འགྲོགས་དགེ་བའི་བཤེས་གཉེན་ལ་རྟོག་པས་དགེ་བའི་བསམ་པ་རྙེད་པར་འགྱུར་རོ། །དེ་དགེ་བའི་བསམ་པ་དང་ལྡན་པས་
དགེ་བའི་ཆོས་རྣམས་ཉན་ཅིང་སྒྲུབ་པ་སྙིང་པོར་བྱེད་པར་འགྱུར་ཏེ། ཚིག་ལྷུར་བྱེད་པའི་བློ་དང་ལྡན་པར་མི་འགྱུར། །མང་དུ་ཐོས་པ་ཡོངས་སུ་ཚོལ་བས་ངོམས་པར་མི་འགྱུར་ཇི་ལྟར་ཐོས་པའི་ཆོས་
རྣམས་གཞན་ལ་ཡང་རྒྱ་ཆེན་ཡང་དག་པར་རབ་ཏུ་སྟོན་ཏེ། ཟང་ཟིང་མེད་པའི་སེམས་ཀྱིས་རྙེད་པ་དང་། བཀུར་སྟི་དང་། ཚིགས་སུ་བཅད་པ་ལ་མི་རེ་ཞིང་རང་གི་ཚིག་ཡོངས་སུ་མི་
སྤོང་བར་གཞན་ལ་ཆོས་སྟོན་ཏེ། ཇི་ལྟར་ཐོས་པ་དང་ཇི་ལྟར་གནས་པ་དེ་བཞིན་དུ་གཞན་ལ་ཆོས་སྟོན་ཏོ། །ཆོས་ཉན་པ་རྣམས་ལ་བྱམས་པ་ཆེན་པོ་རྙེད་པར་འགྱུར། སེམས་ཅན་ཐམས་
ལ་སྙིང་རྗེ་ཆེན་པོ་འཇུག་པར་འགྱུར་རོ། །དེ་མང་དུ་ཐོས་པས་ལུས་དང་སྲོག་ལ་མི་ལྟ་བར་འགྱུར། འདོད་པ་ཉུང་ཞིང་ཆོགས་ཤེས་པར་འགྱུར། རབ་ཏུ་དབེན་པ་དང་། ངེས་པར་འགྱུར། གསོ་
སླ་བ་དང་། དགང་སླ་བ་དང་། དགོན་པ་ལ་དགའ་བ་དང་། ཇི་ལྟར་ཐོས་པའི་ཆོས་རྣམས་ཀྱི་དོན་ལ་ཉེ་བར་རྟོག་པ་དང་དོན་ལ་རྟོན་གྱི་ཡི་གེ་ལ་མི་རྟོན་པ་ཡིན། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་
རྟེན་གྱི་རྟེན་དུ་འགྱུར། བདག་འབའ་ཤིག་གི་ཕྱིར་ཞུགས་པ་མ་ཡིན་གྱི། སེམས་ཅན་ཐམས་ཅད་ཀྱི་ཕྱིར་འདི་ལྟ་སྟེ། ཐེག་པ་ཆེན་པོ་བླ་ན་མེད་པ་སངས་རྒྱས་ཀྱི་ཡེ་ཤེས་མི་མཉམ་པ་དང་། མཉམ་པའི་

79-1-330b

ཡེ་ཤེས་འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པའི་ཡེ་ཤེས་ཡོངས་སུ་ཚོལ་ལོ། །བག་ཡོད་པ་ལྷུར་བྱེད་པར་འགྱུར་ཏེ། དེ་ལ་བག་ཡོད་པ་གང་ཞེ་ན། འདི་ལྟ་སྟེ། 
དབང་པོ་ཡང་དག་པར་སྡོམ་པའོ། །དེ་ལ་དབང་པོ་ཡང་དག་པར་སྡོམ་པ་གང་ཞེ་ན། གང་མིག་གིས་གཟུགས་མཐོང་ནས་མཚན་མར་མི་འཛིན། མངོན་རྟགས་སུ་མི་འཛིན། གཟུགས་ལ་ཆགས་པ་དང་། ཉེས་
དམིགས་དང་། འབྱུང་བ་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་བཞིན་དུ་རྣ་བས་སྒྲ་དང་། སྣས་དྲི་དང་། ལྕེས་རོ་དང་། ལུས་ཀྱིས་རིག་བྱ་དང་། ཡིད་ཀྱིས་ཆོས་ཤེས་ནས་མཚན་མར་མི་
འཛིན། མངོན་རྟགས་སུ་མི་འཛིན། ཆོས་རྣམས་ལ་ཆགས་པ་དང་། ཉེས་དམིགས་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་འདི་ནི་བག་ཡོད་པ་ཞེས་བྱའོ། །གཞན་ཡང་ཤཱ་རིའི་བུ་བག་ཡོད་
པ་ཞེས་བྱ་བ་ནི་གང་བདག་གི་སེམས་འདུལ་བ་དང་། གཞན་གྱི་སེམས་བསྲུང་བ་དང་། ཉོན་མོངས་པ་ལ་དགའ་བ་སྤོང་བ་དང་། ཆོས་ལ་དགའ་བའི་རྗེས་སུ་འགྲོ་བ་དང་། འདོད་པ་ལ་རྣམ་པར་རྟོག་པ་དང་། 
གནོད་སེམས་ཀྱི་རྣམ་པར་རྟོག་པ་རྣམས་མི་འབྱུང་བ་དང་། རྣམ་པར་འཚེ་བའི་རྣམ་པར་རྟོག་པ་རྣམས་མི་འབྱུང་བ་དང་། ཆགས་པའི་མི་དགེ་བའི་རྩ་བ་རྣམས་མི་འབྱུང་བ་དང་། ཞེ་སྡང་གི་མི་དགེ་བའི་རྩ་བ་
རྣམས་མི་འབྱུང་བ་དང་། གཏི་མུག་གི་མི་དགེ་བའི་རྩ་བ་རྣམས་མི་འབྱུང་བ་དང་། ལུས་ཀྱིས་ཉེས་པར་སྤྱོད་པ་དང་། ངག་གི་ཉེས་པར་སྤྱོད་པ་དང་། ཡིད་ཀྱི་ཉེས་པར་སྤྱོད་པ་མི་འབྱུང་བ་དང་། ཚུལ་བཞིན་མ་ཡིན་པ་ཡིད་ལ་བྱེད་པ་
མི་འབྱུང་བ་དང་། སྡིག་པ་མི་དགེ་བའི་ཆོས་ཐམས་ཅད་མི་འབྱུང་བ་དེ་ནི་བག་ཡོད་པ་ཞེས་བྱའོ། །དེ་ལྟར་ཤཱ་རིའི་བུ་བག་ཡོད་པའི་བྱང་ཆུབ་སེམས་དཔའ་ཚུལ་བཞིན་ཡིད་ལ་བྱེད་པ་ལ་རབ་ཏུ་སྦྱོར་བ་ནི་གང་ཡོད་པ་དེ་ཡང་ཡོད་

79-1-331a

པར་རབ་ཏུ་ཤེས། གང་མེད་པ་དེ་ཡང་མེད་པར་རབ་ཏུ་ཤེས་སོ། །དེ་ལ་ཅི་ཡོད་ཅི་མེད་ཅེ་ན། ཡང་དག་པ་ལ་རབ་ཏུ་སྦྱོར་བ་ལ་ནི་འཕགས་པའི་རྣམ་པར་གྲོལ་བ་ཡོད་དོ། །ལོག་པ་ལ་རབ་
ཏུ་སྦྱོར་བ་ལ་ནི་འཕགས་པའི་རྣམ་པར་གྲོལ་བ་མེད་དོ། །ལས་ཀྱི་རྣམ་པར་སྨིན་པ་ནི་ཡོད་དོ། །གང་གི་ལས་རྣམ་པར་སྨིན་པ་དེ་ནི་མེད་དོ། །གཞན་ཡང་མིག་ནི་ཡོད་དོ། །གང་གི་མིག་དེ་ནི་མེད་དོ། །རྣ་བ་
དང་སྣ་དང་ལྕེ་དང་ལུས་དང་ཡིད་ནི་ཡོད་དོ། །གང་གི་ཡིད་དེ་ནི་མེད་དོ། །གཞན་ཡང་གཟུགས་མི་རྟག་པ་དང་། སྡུག་བསྔལ་བ་དང་འགྱུར་བའི་ཆོས་ཅན་དེ་ནི་ཡོད་དོ། །གཟུགས་རྟག་པ་དང་། བརྟན་པ་
དང་། མི་འགྱུར་བའི་ཆོས་ཅན་དང་། ཐེར་ཟུག་པ་དང་། དེ་བཞིན་དུ་གནས་སོ་ཞེས་བྱ་བ་དེ་ནི་མེད་དོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་མི་རྟག་པ་དང་། སྡུག་བསྔལ་
བ་དང་། འགྱུར་བའི་ཆོས་ཅན་དེ་ནི་ཡོད་དོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རྟག་པ་དང་། བརྟན་པ་དང་། ཐེར་ཟུག་པ་དང་། མི་འགྱུར་བའི་ཆོས་ཅན་དང་། ཡང་དག་
པར་དེ་བཞིན་དུ་གནས་སོ་ཞེས་བྱ་བ་དེ་ནི་མེད་དོ། །གཞན་ཡང་མ་རིག་པའི་རྐྱེན་གྱིས་འདུ་བྱེད་རྣམས་ཡོད་ཀྱི། མ་རིག་པ་མེད་ན། འདུ་བྱེད་མེད་པ་ནས་སྐྱེ་བའི་རྐྱེན་གྱིས་རྒ་ཤིའི་བར་དུ་ཡོད་ཀྱི། སྐྱེ་བ་མེད་ན་རྒ་ཤི་མེད་
དོ། །གཞན་ཡང་སྦྱིན་པས་ལོངས་སྤྱོད་ཆེན་པོར་འགྱུར་བ་ནི་ཡོད་དོ། །སྦྱིན་པས་དབུལ་པོར་འགྱུར་བ་ནི་མེད་དོ། །ཚུལ་ཁྲིམས་ཀྱིས་མཐོ་རིས་སུ་སྐྱེ་བ་ནི་ཡོད་དོ། །འཆལ་བའི་ཚུལ་ཁྲིམས་ཀྱིས་མཐོ་རིས་སུ་
སྐྱེ་བ་ནི་མེད་དོ། །ཐོས་པས་ཤེས་རབ་ཆེན་པོར་འགྱུར་བ་ནི་ཡོད་དོ། །འཆལ་བའི་ཤེས་རབ་ཀྱིས་ཤེས་རབ་ཆེན་པོར་འགྱུར་བ་ནི་མེད་དོ། །སྒོམ་པས་འབྲལ་བར་འགྱུར་བ་ནི་ཡོད་དོ། །སྒོམ་པས་འབྲལ་བར་མི་འགྱུར་

79-1-331b

བ་ནི་མེད་དོ། །ཚུལ་བཞིན་མ་ཡིན་པ་ཡིད་ལ་བྱེད་པས་ཀུན་ཏུ་སྦྱོར་བ་ནི་ཡོད་དོ། །ཚུལ་བཞིན་མ་ཡིན་པ་ཡིད་ལ་བྱེད་པས་འབྲལ་བ་ནི་མེད་དོ། །བརྩོན་འགྲུས་བརྩམས་པའི་བྱང་ཆུབ་སེམས་དཔའ་ལ་ནི་བྱང་
ཆུབ་ཡོད་དོ། །ལེ་ལོ་ཅན་ལ་ནི་བྱང་ཆུབ་མེད་དོ། །ང་རྒྱལ་མེད་པ་ལ་ནི་རབ་ཏུ་བྱུང་བར་ལུང་བསྟན་པ་ཡོད་དོ། །ང་རྒྱལ་ཅན་ལ་ནི་མྱ་ངན་ལས་འདའ་བ་མེད་དོ། །གཞན་ཡང་ཐམས་ཅད་ཏུ་སོང་བའི་སྟོང་པ་ཉིད་
ནི་ཡོད་དོ། །ལེ་ལོ་ལ་ནི་བདག་དང་། སེམས་ཅན་དང་། སྲོག་དང་། སྐྱེས་བུ་དང་། གང་ཟག་གོ་ཞེས་བྱ་བ་དེ་ནི་མེད་དོ། །དེ་ལྟར་ཤཱ་རིའི་བུ་བག་ཡོད་པའི་བྱང་ཆུབ་སེམས་དཔའ་ཚུལ་བཞིན་ཡིད་ལ་བྱེད་པ་དང་
ལྡན་པ་ནི་གང་ཡོད་པར་འཇིག་རྟེན་གྱི་མཁས་པ་རྣམས་ཀྱིས་ཀུན་ཤེས་པ་དེ་ལ་ནི་ཡོད་དོ་ཞེས་འདོགས་སོ། །གང་མེད་པར་འཇིག་རྟེན་ན་མཁས་པ་རྣམས་ཀྱིས་ཀུན་ཤེས་པ་དེ་ལ་ནི་མེད་དོ་ཞེས་འདོགས་སོ། །
དེ་ཡོད་ཅེས་ཐ་སྙད་དུ་འདོགས་པ་ལ་ཡང་ཡང་དག་པར་ཤེས་པར་མི་བྱེད། མེད་ཅེས་ཐ་སྙད་ཏུ་འདོགས་པ་ལ་ཡང་ཡང་དག་པར་ཤེས་པར་མི་བྱེད་དོ། །སངས་རྒྱས་བཅོམ་ལྡན་འདས་ཐམས་ཅད་ཀྱིས་གསུངས་
པའི་ཡང་དག་པའི་དོན་ཀྱང་ཁོང་དུ་ཆུད་དེ། ཆོས་ཐམས་ཅད་ནི་དེ་བཞིན་གཤེགས་པས་བསྡུས་ཏེ་ཆོས་ཀྱི་མདོ་བཞིར་འདུས་པར་བྱས་སོ། །བཞི་གང་ཞེ་ན། འདི་ལྟ་སྟེ། འདུ་བྱེད་ཐམས་ཅད་མི་རྟག་པ་དང་། འདུ་
བྱེད་ཐམས་ཅད་སྡུག་བསྔལ་བ་དང་། ཆོས་ཐམས་ཅད་བདག་མེད་པ་དང་མྱ་ངན་ལས་འདས་པ་ཞི་བའོ། །འདུ་བྱེད་ཐམས་ཅད་མི་རྟག་པ་ཞེས་བྱ་བ་ནི་རྟག་པར་འདུ་ཤེས་པའི་སེམས་ཅན་རྣམས་ཀྱི་རྟག་པར་འདུ་
ཤེས་པ་སྤང་བའི་ཕྱིར་དེ་བཞིན་གཤེགས་པས་བཤད་དོ། །འདུ་བྱེད་ཐམས་ཅད་སྡུག་བསྔལ་བ་ཞེས་བྱ་བ་ནི་བདེ་བར་འདུ་ཤེས་པའི་སེམས་ཅན་རྣམས་ཀྱི་བདེ་བར་འདུ་ཤེས་པ་སྤང་བའི་ཕྱིར། དེ་བཞིན་གཤེགས་པས་བཤད་

79-1-332a

དོ། །ཆོས་ཐམས་ཅད་བདག་མེད་པ་ཞེས་བྱ་བ་ནི་བདག་ཏུ་འདུ་ཤེས་པའི་སེམས་ཅན་རྣམས་ཀྱི་བདག་ཏུ་འདུ་ཤེས་པ་སྤོང་བའི་ཕྱིར་དེ་བཞིན་གཤེགས་པས་བཤད་དོ། །མྱ་ངན་ལས་འདས་
པ་ཞི་བ་ཞེས་བྱ་བ་ནི་དམིགས་པས་ཕྱིན་ཅི་ལོག་ཏུ་གྱུར་པའི་སེམས་ཅན་རྣམས་ཀྱི་དམིགས་པའི་ཕྱིན་ཅི་ལོག་ཏུ་གྱུར་པ་སྤང་བའི་ཕྱིར་དེ་བཞིན་གཤེགས་པས་བཤད་དོ། །དེ་འདུ་བྱེད་ཐམས་ཅད་མི་རྟག་
གོ་ཞེས་ཐོས་ནས་ཤིན་ཏུ་མི་རྟག་པ་ཉིད་ལ་འཇུག་གོ། །འདུ་བྱེད་ཐམས་ཅད་སྡུག་བསྔལ་བའོ་ཞེས་ཐོས་ནས་སྨོན་ལམ་དང་བྲལ་བ་སྐྱེད་དོ། །ཆོས་ཐམས་ཅད་བདག་མེད་པའོ་ཞེས་ཐོས་ནས་སྟོང་པ་ཉིད་ཀྱི་
ཏིང་ངེ་འཛིན་དང་། རྣམ་པར་ཐར་པའི་སྒོ་ལ་སྒོམ་མོ། །མྱ་ངན་ལས་འདས་པ་ཞི་བ་ཞེས་ཐོས་ནས་མཚན་མ་མེད་པ་ཡོངས་སུ་འདྲིས་པར་བྱེད་དོ། །དུས་མ་ཡིན་པར་ནི་ཡང་དག་པའི་མཐའ་མངོན་སུམ་དུ་
མི་བྱེད་དོ། །དེ་ལྟར་ཤཱ་རིའི་བུ་དེ་ལྟ་བུའི་ཆོས་ལ་བརྩོན་པའི་བྱང་ཆུབ་སེམས་དཔའ་ནི་དགེ་བའི་ཆོས་ལས་ཡོངས་སུ་མི་ཉམས་ཏེ། མྱུར་དུ་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱེད་དོ། །བྱང་ཆུབ་
སེམས་དཔའ་བརྟག་པ་ཞེས་བྱ་བའི་ལེའུ་སྟེ། གསུམ་པའོ།། །། གཞན་ཡང་ཤཱ་རིའི་བུ་དེ་ལྟར་དད་པ་ལ་གནས་པའི་བྱང་ཆུབ་སེམས་དཔའ་ནི། དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བསམ་གྱིས་མི་ཁྱབ་པའི་ཆོས་བཅུ་ལ་མངོན་པར་དང་། ཡིད་ཆེས་རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས་ངོ་མཚར་དང་རྨད་ཏུ་འདུ་ཤེས་
སྐྱེད་དོ། །བཅུ་གང་ཞེ་ན། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་ལ་མངོན་པར་དང་། ཡིད་ཆེས་རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། 

79-1-332b

རངས་པ་རྙེད་ནས། ངོ་མཚར་དང་རྨད་ཏུ་འདུ་ཤེས་སྐྱེད་དོ། །འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་དབྱངས་བསམ་གྱིས་མི་ཁྱབ་པ་ལ་མངོན་པར་དད་པ་ནས་ངོ་མཚར་དང་། 
རྨད་དུ་འདུ་ཤེས་སྐྱེད་པའི་བར་དུའོ། །འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་
གཤེགས་པའི་འོད་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཚུལ་ཁྲིམས་དང་། ཏིང་ངེ་འཛིན་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་
གཤེགས་པ་རྣམས་ཀྱི་དེ་བཞིན་གཤེགས་པའི་རྫུ་འཕྲུལ་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་བསམ་གྱིས་མི་ཁྱབ་པ་དང་། འདི་
ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྙིང་རྗེ་ཆེན་པོ་བསམ་
གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བསམ་གྱིས་མི་ཁྱབ་པ་ལ་མངོན་པར་དང་། ཡིད་ཆེས་རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་
དགའ་མགུ་སྟེ། རངས་པ་རྙེད་ནས་ངོ་མཚར་དང་། རྨད་དུ་འདུ་ཤེས་སྐྱེད་པའོ། །དེ་བཞིན་གཤེགས་པའི་ངོ་མཚར་དང་། རྨད་ཀྱི་ཆོས་བཅུ་པོ་འདི་རྣམས་ཀྱི་ཕྱིར་བརྩོན་འགྲུས་ཚར་རྩོམ་ཞིང་མི་ཞམ་མི་འགོང་མི་སྐྱོ་སྟེ། དེ་
བཞིན་གཤེགས་པའི་བསམ་གྱིས་མི་ཁྱབ་པ། ངོ་མཚར་དང་རྨད་ཀྱི་ཆོས་བཅུ་པོ་མ་ཐོབ་ཀྱི་བར་དུ་ལུས་ཀྱི་ལྤགས་པ་དང་། རྒྱུས་པ་དང་། བྲི་དང་། དབུགས་དང་། རུས་པ་དག་ཞིག་ལ། ལུས་ཀྱི་ཤ་དང་། ཁྲག་

79-1-333a

སྐམས་ཀྱང་སླའི། བརྩོན་འགྲུས་ཉམས་པར་མི་བྱའོ། །སྙམ་དུ་དེ་ལྟར་སེམས་སྐྱེད་དོ། །ཤཱ་རིའི་བུ་དེ་ལྟར་དད་པས་མོས་པའི་བྱང་ཆུབ་སེམས་དཔའ་ནི་དེ་བཞིན་གཤེགས་པའི་བསམ་
གྱིས་མི་ཁྱབ་པ་ངོ་མཚར་དང་རྨད་ཀྱི་ཆོས་བཅུ་པོ་འདི་རྣམས་ལ་མངོན་པར་དང་། ཡིད་ཆེས་རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་དོ། །དེ་ནས་བཅོམ་ལྡན་འདས་ཀྱི་དོན་འདི་ཉིད་རྒྱ་
ཆེར་རབ་ཏུ་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སངས་རྒྱས་སྐུ་ནི་བསམ་མི་ཁྱབ། །ཆོས་ཀྱི་སྐུ་ཡིས་རབ་ཏུ་ཕྱེ། །མཚན་མ་མེད་ཅིང་སྣང་མེད་ལ། །རྒྱལ་བའི་ཐུགས་སྲས་
དད་པར་བྱེད། །འགྲོ་བ་ཐ་དད་ཇི་སྙེད་ཀྱི། །སྒྲ་སྐད་བསམ་གྱིས་མི་ཁྱབ་པ། །ཐམས་ཅད་ཏུ་ནི་ཆོས་སྒྲོགས་ཏེ། །སངས་རྒྱས་ཀྱི་ནི་སྤྱོད་ཡུལ་དང་། །ཇི་རྩམ་སེམས་ཅན་ཐམས་ཅད་ཀྱི། །དུས་
གསུམ་དག་གི་དབང་པོ་ཀུན། །སངས་རྒྱས་ཀྱིས་ནི་རབ་མཁྱེན་ཏེ། །བསམ་མི་ཁྱབ་ལ་རབ་ཏུ་དང་། །སངས་རྒྱས་རྣམས་ཀྱི་འོད་མཐའ་ཡས། །འོད་ཟེར་དྲ་བས་བསམ་མི་ཁྱབ། །ཞིང་རྣམས་རྒྱ་མཚོ་
མཐའ་ཡས་པ། །ཐམས་ཅད་ཀྱི་ནི་ཕྱོགས་སུ་ཁྱབ། །ཐུབ་པའི་ཚུལ་ཁྲིམས་འཇིག་རྟེན་འདས། །འཇིག་རྟེན་ཆོས་ལ་མི་གནས་ཏེ། །རྫུ་འཕྲུལ་རྐང་པ་བསམ་ཡས་ལ། །བྱང་ཆུབ་
སེམས་དཔའ་རབ་ཏུ་དད། །སངས་རྒྱས་རྟག་ཏུ་མཉམ་པར་གཞག །རྣམ་པར་ཐར་པ་བསམ་མི་ཁྱབ། །སངས་རྒྱས་རྣམས་ཀྱི་སྤྱོད་ཡུལ་ནི། །སེམས་ཅན་ཀུན་གྱིས་ཤེས་མི་ནུས། །ཆོས་ཀྱི་
དབྱིངས་ནི་དབྱེར་མེད་ལ། །གང་གི་སྟོབས་ཀྱིས་ཤེས་འགྱུར་བ། །དྲང་སྲོང་ཆེན་པོའི་ཡེ་ཤེས་སྟོབས། །ནམ་མཁའ་བཞིན་དུ་མཐའ་ཡས་པ། །སེམས་ཅན་གཅིག་གི་དོན་ཕྱིར་ཡང་། །བསྐལ་

79-1-333b

པ་རྒྱ་མཚོ་མཐའ་ཡས་པར། །འདུལ་བའི་དོན་ཕྱིར་བཞུགས་པས་ན། །དེ་དག་སྙིང་རྗེ་དེ་འདྲའོ། །སེམས་ཅན་ཐམས་ཅད་གཞན་དང་གཞན། །དྲི་བ་རྒྱ་མཚོ་འདྲི་བྱེད་ཀྱང་། །དྲིས་ལན་གཅིག་གི་ཚིན་བྱེད་དེ། །མི་འཇིགས་པ་ནི་བསམ་
མི་ཁྱབ། །རྣམ་པ་ཐམས་ཅད་མཆོག་ལྡན་པ། །ཆོས་རྣམས་ཐམས་ཅད་ཐུགས་སུ་ཆུད། །སངས་རྒྱས་ཆོས་རྣམས་མ་འདྲེས་པ། །ཐམས་ཅད་ཏུ་ནི་ཡེ་ཤེས་གཟིགས། །དད་པ་ལ་ནི་རབ་གནས་པས། །སངས་རྒྱས་
ཀུན་ཆོས་ཆོས་ཉིད་རྣམས། །བསམ་གྱིས་མི་ཁྱབ་འདི་དག་ལ། །དེ་དག་ཐམས་ཅད་དད་པར་བྱེད། །ཤཱ་རིའི་བུ་ཇི་ལྟར་བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་ལ་
མངོན་པར་དང་། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས་ངོ་མཚར་དང་རྨད་ཏུ་འདུ་ཤེས་སྐྱེ་ཅེ་ན། འདི་ལྟ་སྟེ། དེ་བཞིན་གཤེགས་པའི་སྐུ་ནི་མི་དགེ་བའི་ཆོས་ཐམས་ཅད་སྤངས་པ། 
དགེ་བའི་ཆོས་ཐམས་ཅད་དང་ལྡན་པའོ། །འདི་ལྟ་སྟེ། མི་གཙང་བ་དང་། མཆིལ་མ་དང་། ངར་སྣབས་དང་། སྣབས་དང་། རྣག་དང་། ཁྲག་དང་། བཤང་བ་དང་། གཅི་བ་དང་བྲལ་བ། རུས་པ་དང་། ཤ་དང་། ཁྲག་དང་། 
རྒྱུས་པ་ལས་རྣམ་པར་གྲོལ་བའོ། །འདི་ལྟ་སྟེ། དེ་བཞིན་གཤེགས་པའི་སྐུ་ནི་རང་བཞིན་གྱིས་འོད་གསལ་བ། ཡོངས་སུ་དག་པ། ཉོན་མོངས་པ་ཐམས་ཅད་ཀྱི་དྲི་མ་དང་བྲལ་བའོ། །འདི་ལྟ་སྟེ། དེ་བཞིན་གཤེགས་
པའི་སྐུ་ནི་འཇིག་རྟེན་ལས་འདས་པ་སྟེ། འཇིག་རྟེན་གྱི་ཆོས་ཐམས་ཅད་ཀྱི་མ་གོས་པའོ། །འདི་ལྟ་སྟེ། དེ་བཞིན་གཤེགས་པའི་སྐུ་ནི་ཡོན་ཏན་དཔག་ཏུ་མེད་པ་དང་། བསོད་ནམས་དང་། ཡེ་ཤེས་ཀྱི་ཚོགས་བསགས་
པས་སེམས་ཅན་ཐམས་ཅད་ཀྱི་འཚོ་བའོ། །འདི་ལྟ་སྟེ། དེ་བཞིན་གཤེགས་པའི་སྐུ་ནི་ཚུལ་ཁྲིམས་དཔག་ཏུ་མེད་པ་ཡོངས་སུ་བསྒོམས་པ་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་

79-1-334a

པར་གྲོལ་བའི་ཡེ་ཤེས་གཟིགས་པ་དཔག་ཏུ་མེད་པ། ཡོངས་སུ་བསྒོམས་པས་ཡོན་ཏན་ཐམས་ཅད་རབ་ཏུ་རྒྱས་པའོ། །འདི་ལྟ་སྟེ། དེ་བཞིན་གཤེགས་པའི་སྐུ་ནི་ཡོངས་སུ་དག་པའི་མེ་
ལོང་གི་དཀྱིལ་འཁོར་གྱི་གཟུགས་བརྙན་ལྟ་བུ་དང་། ཆུ་ལ་ཟླ་བ་སྣང་བ་ལྟ་བུའོ། །འདི་ལྟ་སྟེ། དེ་བཞིན་གཤེགས་པའི་སྐུ་ནི་ནམ་མཁའི་དབྱིངས་སུ་ཡང་དག་པར་འདུ་ཞིང་ཆོས་ཀྱི་དབྱིངས་ཀྱིས་ཀླས་པས་བསམ་གྱིས་
མི་ཁྱབ་པའོ། །འདི་ལྟ་སྟེ། དེ་བཞིན་གཤེགས་པའི་སྐུ་ནི་ཟག་པ་ཐམས་ཅད་ལས་ལོག་པས་ཟག་པ་མེད་པའོ། །འདི་ལྟ་སྟེ། དེ་བཞིན་གཤེགས་པའི་སྐུ་ནི་འདུས་བྱས་ཐམས་ཅད་དང་བྲལ་བས་འདུས་མ་བྱས་
པའོ། །ནམ་མཁའི་ལྟ་བུའི་སྐུའོ། །མཉམ་པ་མེད་པའི་སྐུའོ། །འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པའི་སྐུའོ། །དེ་བཞིན་གཤེགས་པའི་སྐུ་ནི་དཔེ་མེད་པ། ཟླ་མེད་པ། མཚུངས་པ་
མེད་པའི་སྐུ་སྟེ། དག་པ། དྲི་མ་མེད་པ། ཀུན་ནས་ཉོན་མོངས་པ་མེད་པ། རང་བཞིན་གྱི་འོད་གསལ་བའོ། །དེ་ནི་སྔོན་གྱི་མཐས་རབ་ཏུ་ཕྱེ་བ་མ་ཡིན། ཕྱི་མའི་མཐས་རབ་ཏུ་ཕྱེ་བ་མ་ཡིན། ད་ལྟར་
བྱུང་བས་རབ་ཏུ་ཕྱེ་བ་མ་ཡིན། སྐྱེ་བ་དང་། རུས་དང་། རིགས་ཀྱིས་རབ་ཏུ་ཕྱེ་བ་མ་ཡིན། གཟུགས་ཀྱི་རབ་ཏུ་ཕྱེ་བ་མ་ཡིན། མཚན་གྱིས་རབ་ཏུ་ཕྱེ་བ་མ་ཡིན། དཔེ་བྱད་བཟང་པོས་རབ་ཏུ་ཕྱེ་བ་མ་ཡིན། སེམས་
ཀྱིས་རབ་ཏུ་ཕྱེ་བ་མ་ཡིན། ཡིད་ཀྱིས་རབ་ཏུ་ཕྱེ་བ་མ་ཡིན། རྣམ་པར་ཤེས་པས་རབ་ཏུ་ཕྱེ་བ་མ་ཡིན། ལྟ་བས་རབ་ཏུ་ཕྱེ་བ་མ་ཡིན། ཐོས་པས་རབ་ཏུ་ཕྱེ་བ་མ་ཡིན། དྲན་པས་རབ་ཏུ་ཕྱེ་བ་མ་ཡིན། རྣམ་པར་རིག་
པས་རིག་པས་རབ་ཏུ་ཕྱེ་བ་མ་ཡིན། ཕུང་པོས་རབ་ཏུ་ཕྱེ་བ་མ་ཡིན། ཁམས་ཀྱིས་རབ་ཏུ་ཕྱེ་བ་མ་ཡིན། སྐྱེ་མཆེད་ཀྱིས་རབ་ཏུ་ཕྱེ་བ་མ་ཡིན། སྐྱེ་བས་རབ་ཏུ་ཕྱེ་བ་མ་ཡིན། གནས་པས་རབ་ཏུ་ཕྱེ་བ་མ་ཡིན། འཇིག་

79-1-334b

པས་རབ་ཏུ་ཕྱེ་བ་མ་ཡིན། འཛིན་པས་རབ་ཏུ་ཕྱེ་བ་མ་ཡིན། འདོར་བས་རབ་ཏུ་ཕྱེ་བ་མ་ཡིན། ངེས་པར་འབྱུང་བས་རབ་ཏུ་ཕྱེ་བ་མ་ཡིན། སྤྱོད་པས་རབ་ཏུ་ཕྱེ་བ་མ་ཡིན། ཁ་དོག་གིས་རབ་ཏུ་ཕྱེ་བ་མ་ཡིན། རྟགས་ཀྱིས་རབ་ཏུ་ཕྱེ་བ་
མ་ཡིན། དབྱིབས་ཀྱིས་རབ་ཏུ་ཕྱེ་བ་མ་ཡིན། འོང་བས་རབ་ཏུ་ཕྱེ་བ་མ་ཡིན། འགྲོ་བས་རབ་ཏུ་ཕྱེ་བ་མ་ཡིན། ཚུལ་ཁྲིམས་ཡིད་ལ་བྱེད་པས་རབ་ཏུ་ཕྱེ་བ་མ་ཡིན། ཏིང་ངེ་འཛིན་གྱིས་རབ་ཏུ་ཕྱེ་བ་མ་ཡིན། ཤེས་རབ་ཀྱིས་རབ་ཏུ་ཕྱེ་
བ་མ་ཡིན། རྣམ་པར་གྲོལ་བས་རབ་ཏུ་ཕྱེ་བ་མ་ཡིན། རྣམ་པར་གྲོལ་བའི་ཡེ་ཤེས་མཐོང་བ་ཡིད་ལ་བྱེད་པས་རབ་ཏུ་ཕྱེ་བ་མ་ཡིན། མཚན་ཉིད་ཀྱིས་རབ་ཏུ་ཕྱེ་བ་མ་ཡིན། མཚན་ཉིད་མི་འཐུན་པས་རབ་ཏུ་ཕྱེ་བ་མ་ཡིན། ཆོས་ཀྱི་མཚན་ཉིད་
ཀྱིས་རབ་ཏུ་ཕྱེ་བ་མ་ཡིན། སྟོབས་སུ་སྒྲོ་བཏགས་པས་རབ་ཏུ་ཕྱེ་བ་མ་ཡིན། མི་འཇིགས་པས་རབ་ཏུ་ཕྱེ་བ་མ་ཡིན། སོ་སོ་ཡང་དག་པར་རིག་པས་རབ་ཏུ་ཕྱེ་བ་མ་ཡིན། རྫུ་འཕྲུལ་གྱིས་རབ་ཏུ་ཕྱེ་བ་མ་ཡིན། སྙིང་རྗེ་ཆེན་
པོས་རབ་ཏུ་ཕྱེ་བ་མ་ཡིན། སངས་རྒྱས་ཀྱི་ཆོས་མ་འདྲེས་པར་སྒྲོ་བཏགས་པས་རབ་ཏུ་ཕྱེ་བ་མ་ཡིན། སྒྱུ་མ་དང་། སྨིག་རྒྱུ་དང་། ཆུ་ཟླ་དང་། རྨི་ལམ་གྱི་རང་བཞིན་ལྟ་བུར་སྐྱེ་བའི་སྐུའོ། །སྟོང་པ་ཉིད་དང་། མཚན་མ་མེད་པ་
དང་། སྨོན་པ་མེད་པ་ལས་བྱུང་བའི་སྐུའོ། །མི་འགྱུར་བའི་སྐུའོ། །མི་འཁྲུགས་པའི་སྐུའོ། །རྣམ་པར་མི་རྟོག་པའི་སྐུའོ། །མི་གནས་པའི་སྐུའོ། །མི་སྙེམས་པའི་སྐུའོ། །གནས་
པ་དང་། རབ་ཏུ་གནས་པ་དང་། མི་གཡོ་བ་ཐོབ་པའི་སྐུའོ། །གཟུགས་མེད་པ་གཟུགས་ཀྱི་རང་བཞིན་མ་ཡིན་པའི་སྐུའོ། །ཚོར་བ་མ་ཡིན། འདུ་ཤེས་མ་
ཡིན། འདུ་བྱེད་མ་ཡིན། རྣམ་པར་ཤེས་པ་མ་ཡིན། རྣམ་པར་ཤེས་པའི་རང་བཞིན་མ་ཡིན་པའི་སྐུའོ། །བྱུང་བ་མ་ཡིན། ཀུན་དུ་བྱུང་བ་མ་ཡིན། མ་བྱུང་བ་མ་ཡིན་པའི་སྐུའོ། 

79-1-335a

རྨད་ཏུ་བྱུང་བ་རྨད་ཏུ་བྱུང་བའི་ཆོས་ཀྱི་སྐུའོ། །མིག་ལས་བྱུང་བ་མ་ཡིན། གཟུགས་སུ་གཏོགས་པ་མ་ཡིན། ཕྱི་རོལ་མ་ཡིན། རྣ་བ་ལ་གནས་པ་མ་ཡིན། སྒྲར་
གཏོགས་པ་མ་ཡིན། ཕྱི་རོལ་མ་ཡིན། སྣས་རྣམ་པར་ཤེས་པར་བྱ་བ་མ་ཡིན། དྲིར་གཏོགས་པ་མ་ཡིན། ཕྱིར་རོལ་མ་ཡིན། ལྕེས་བསྐྱེད་པ་མ་ཡིན། རོར་གཏོགས་པ་མ་ཡིན། ཕྱི་རོལ་མ་ཡིན། ལུས་དང་ལྡན་པ་མ་ཡིན། 
རེག་བྱར་གཏོགས་པ་མ་ཡིན། ཕྱི་རོལ་མ་ཡིན། སེམས་ལ་འཇུག་པ་མ་ཡིན། ཡིད་ལ་འཇུག་པ་མ་ཡིན། རྣམ་པར་ཤེས་པ་ལ་འཇུག་པ་མ་ཡིན། ལྡོག་པ་མ་ཡིན། རྗེས་སུ་འཇུག་པ་མ་ཡིན། གནས་པ་དང་། མི་
གཡོ་བ་ཐོབ་པ། ཆོས་ཀྱི་དབྱིངས་ཀྱིས་ཀླས་པ། ནམ་མཁའི་ཁམས་ཀྱི་མཐའ་གཏུགས་པ། ནམ་མཁའ་དང་མཉམ་པའི་སྐུ་སྟེ། ཤཱ་རིའི་བུ་འདི་ནི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྐུ་
བསམ་གྱིས་མི་ཁྱབ་པ་སྟེ། དེ་ལ་བྱང་ཆུབ་སེམས་དཔའ་མངོན་པར་དང་། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས་ངོ་མཚར་དང་། རྨད་ཏུ་འདུ་ཤེས་སྐྱེད་དོ། །བཅོམ་ལྡན་
འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས་སྟོན་པ་ཡང་འདི་སྐད་གསུང་ངོ་། །བསྐལ་པ་བྱེ་བ་ཁྲག་ཁྲིག་དཔག་མེད་པར། །བྱང་ཆུབ་སེམས་དཔའི་སྤྱོད་པ་རྣམས་སྤྱད་ཅིང་། །ལས་རྣམས་
གསུམ་ནི་ཤིན་ཏུ་ཡོངས་དག་པར། །མཚུངས་མེད་བདེ་བར་གཤེགས་པའི་སྐུ་ཚོལ་ལོ། །ཕྱོགས་བཅུ་འགྲོ་བ་ཀུན་ལ་བྱམས་པ་དང་། །སྙིང་རྗེ་རྒྱ་ཆེར་བསྐྱེད་ནས་སྦྱིན་པ་བྱིན། །འདོད་ལ་ལོག་པར་གཡེམ་པ་བརྟག་སྤོང་ཞིང་། །
ནམ་མཁའ་ལྟ་བུ་མཆོག་གི་སྐུ་ཚོལ་ལོ། །གསེར་ལྟར་དག་ཅིང་མཛེས་པའི་གོས་རྣམས་ནི། །དཔག་ཏུ་མེད་པ་གང་གཱའི་བྱེད་མ་སྙེད། །སྦྱིན་པའི་ཕ་རོལ་ཕྱིན་པ་རབ་སྦྱོར་ཅིང་། །རྒྱལ་བའི་སྲས་ཀྱིས་འཇིག་རྟེན་མཆོག་ལ་ཕུལ། 

79-1-335b

གཡག་གི་རྔ་མ་བཞིན་དུ་ཚུལ་ཁྲིམས་སྲུང་། །ཡན་ལག་ཉིང་ལག་བཅད་ཀྱང་དགྲ་ལ་བཟོད། །བརྩོན་འགྲུས་ཀྱི་ནི་ཕ་རོལ་ཕྱིན་སྤྱོད་ཅིང་། །སངས་རྒྱས་སྐུ་ལ་སྨོན་པས་ཡོངས་མི་སྐྱོ། །ཤེས་རབ་ཐབས་དགའ་རྒྱ་ཆེན་བསམ་གཏན་པ། །
བསམ་གཏན་སྤྱོད་ཡུལ་དགའ་རྒྱལ་རྣམ་པ་ལྟ། །ཆོས་དབྱིངས་དམ་པ་བདེ་བར་གཤེགས་པའི་སྐུ། །དེ་འདྲར་བདག་གྱུར་ཅེས་ནི་དེ་ལ་སྨོན། །སྲིད་པར་འགྲོ་བ་དག་ཏུ་དགེ་བྱེད་ཅིང་། །མི་མཆོག་གིས་ནི་བྱང་ཆུབ་མཚུངས་མེད་ཐོབ། །
དག་པ་དྲི་མེད་གཙང་ཞིང་རྡུལ་གྲོལ་བ། །ནམ་མཁའ་འདྲ་བ་ཡངས་པའི་སྐུ་ཐོབ་བོ། །རང་བཞིན་སྟོང་པ་དག་དང་སེམས་ཅན་བྲལ། །མཚན་མ་མེད་ཅིང་སྒྲ་དང་བྲལ་བ་ཐོབ། །མིག་གི་ཡུལ་ཀུན་ལས་ནི་རབ་འདས་པ། །དེ་འདྲའི་
སྐུ་ནི་ཐུབ་པས་ཡང་དག་ཐོབ། །གཟོད་མ་ནས་སྟོང་མ་བྱས་མ་བྱུང་བ། །གཟུགས་དང་སྒྲ་བྲལ་ཡིད་ཀྱང་རྣམ་དག་པ། །དེ་བཞིན་གཤེགས་སྐུ་མི་གཡོ་གང་མཐོང་བ། །དེས་ནི་ཕྱོགས་བཅུའི་བདེ་བར་གཤེགས་པ་མཐོང་། །ཇི་ལྟར་སྒྱུ་མ་སྤྲུལ་པ་སྣ་
ཚོགས་ལུས། །རྟ་དང་གླང་པོ་བུད་མེད་སྐྱེས་པའི་གཟུགས། །བྱིས་པ་སླུ་བ་བརྫུན་ཞིང་ཕྱིན་ཅི་ལོག །དེ་བཞིན་སྟོབས་བཅུ་རྣམས་ལ་བལྟ་བར་བྱོས། །གང་དག་འདས་པའི་བདེ་གཤེགས་དཔག་མེད་དང་། །མ་བྱོན་རྒྱལ་བ་དེ་བཞིན་གང་སྣང་
དག །ཆོས་ཉིད་གཅིག་གྱུར་མཉམ་པ་མེད་པའི་སྐུ། །ཆོས་ཀྱི་དབྱིངས་ཀྱིས་ཀླས་ཤིང་ནམ་མཁའ་འདྲ། །དེ་ལྟར་བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་ལ་མངོན་
པར་དང་། ཡིད་ཆེས་རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས་ངོ་མཚར་དང་། རྨད་ཏུ་འདུ་ཤེས་སྐྱེད་དོ། །ཤཱ་རིའི་བུ་ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་
དབྱངས་བསམ་གྱིས་མི་ཁྱབ་པ་ལ་མངོན་པར་དང་། ཡིད་ཆེས། རབ་ཏུ་རྟོག་པ་ནས་ངོ་མཚར་དང་རྨད་ཏུ་འདུ་ཤེས་ཀྱི་བར་དུ་འདུ་ཤེས་སྐྱེད་ཅེ་ན། འདི་ལྟར་ཤཱ་རིའི་བུ་དེ་བཞིན་གཤེགས་པ་ནི་འདུལ་བའི་དབང་གི་ཕྱིར་འཁོར་ཇི་ལྟ་བ་དེ་བཞིན་དུ་

79-1-336a

སྒྲ་འབྱུང་སྟེ། སེམས་ཅན་ཐམས་ཅད་རབ་ཏུ་དགའ་བར་བྱ་བའི་ཕྱིར་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཏུ་ཁྱབ་པར་བྱེད་མོད་ཀྱི། ཤཱ་རིའི་བུ་དེ་བཞིན་གཤེགས་པ་འདི་སྙམ་དུ་ངས་དགེ་སློང་གི་འཁོར་ལ་ནི་འདི་བཤད། 
དགེ་སློང་མའི་འཁོར་ལ་ནི་འདི། དགེ་བསྙེན་གྱི་འཁོར་ལ་ནི་འདི། དགེ་བསྙེན་མའི་འཁོར་ལ་ནི་འདི། བྲམ་ཟེའི་འཁོར་ལ་ནི་འདི། རྒྱལ་རིགས་ཀྱི་འཁོར་ལ་ནི་འདི། ཁྱིམ་བདག་གི་འཁོར་ལ་ནི་འདི། ལྷའི་འཁོར་ལ་ནི་འདི། ཚངས་པའི་འཁོར་ལ་ནི་འདི་
སྟེ། འདི་ལྟ་སྟེ། མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་དུ་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་ཏུ་བརྗོད་པའི་སྡེ་དང་། གླེང་གཞིའི་སྡེ་དང་། རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པའི་རབས་
ཀྱི་སྡེ་དང་། ཤིན་དུ་རྒྱས་པའི་སྡེ་དང་། རྨད་དུ་བྱུང་བའི་ཆོས་ཀྱི་སྡེ་དང་། གཏན་ལ་དབབ་པར་བསྟན་པའི་སྡེ་རྣམས་བཤད་པར་བྱའོ་སྙམ་དུ་མི་དགོངས་མོད་ཀྱི། འོན་ཀྱང་ཤཱ་རིའི་བུ་འཁོར་ཇི་ལྟ་བུ་འདུས་པར་གྱུར་པ། ཚངས་པའི་འཁོར་གྱི་བར་དུ་
འདུས་པར་གྱུར་པ། དེ་དག་གི་དབང་པོའི་རིམ་པ་ཅི་འདྲ་བ་དང་། སེམས་ཅན་དེ་དག་ལ་ཆོས་ཀྱི་མདོ་ཇི་ལྟ་བུ་ཐོས་པར་བྱ་དགོས་པར་འགྱུར་བ་དེ་ལྟ་བུའི་ཆོས་ཀྱི་མདོ་ཐོས་པར་བྱ་བ་དེ་བཞིན་གཤེགས་པའི་ཞལ་གྱི་སྒོ་ནས་འབྱུང་བར་ཡང་དག་པར་
ཤེས་ཀྱང་ཆོས་བསྟན་པ་དེ་གཅིག་ངེས་པའི་ཚིག་གནོད་པར་གྱུར་པ་ཡང་མེད་དེ། ཐམས་ཅད་ཀྱང་རང་རང་གི་ཆོས་རྣམ་པར་རིག་པར་ཀུན་ཤེས་སོ། །དེ་བཞིན་གཤེགས་པའི་དབྱངས་ནི་དེ་བཞིན་གཤེགས་པའི་སྔོན་གྱི་བསོད་
ནམས་ཀྱི་འབྲས་བུ་རྣམ་པར་སྨིན་པ་ལས་མངོན་པར་གྲུབ་པ་བདེན་པའི་རྗེས་སུ་འབྲང་བས་འཇུག་གོ། །ཡང་ཤཱ་རིའི་བུ་དེ་བཞིན་གཤེགས་པའི་དབྱངས་དེ་ནི་འཇམ་པར་འབྱུང་། ཡིད་ཏུ་འོང་བ་དང་། ཡིད་དགའ་བ་དང་། དག་པ་དང་། དྲི་མ་
མེད་པ་དང་། སྙན་པ་དང་། མཉན་པར་འོས་པ་དང་། ཤེས་པར་བྱ་བར་འོས་པ་དང་། མི་རྩུབ་པ་དང་། མི་བརླང་བ་དང་། ལུས་སིམ་པར་བྱེད་པ་དང་། སེམས་ཚིམ་པར་བྱེད་པ་དང་། སྙིང་དགའ་བར་བྱེད་པ་དང་། དགའ་བ་དང་བདེ་བ་སྐྱེད་པ་

79-1-336b

དང་། ཀུན་ཤེས་པར་བྱེད་པ་དང་། གསལ་ཞིང་འཐད་པ་དང་། མངོན་པར་དགའ་བར་འགྱུར་བ་དང་། ཡིད་དུ་འོང་བ་དང་། སེ་གེའི་སྐད་ཀྱི་དྲག་ཤུལ་གྱི་ང་རོའི་སྒྲ་དང་། སྤྲིན་གྱི་སྒྲ་དབྱངས་དང་། རྒྱ་མཚོའི་སྒྲ་བསྒྲགས་པའི་དབྱངས་དང་། མི་འམ་ཅིའི་གླུའི་དབྱངས་དང་། 
ཀ་ལ་པིང་ཀའི་ང་རོའི་སྒྲ་དབྱངས་དང་། ཚངས་པའི་ང་རོའི་སྒྲ་དབྱངས་དང་། རྔའི་སྒྲ་དབྱངས་དང་། དཔལ་དང་ལྡན་པ་དང་། མཉེན་པ་དང་། ཟུར་ཕྱིན་པ་དང་། བསྒྲགས་པ་དང་། སེམས་ཅན་ཐམས་ཅད་ཀྱི་དབང་པོ་མགུ་བར་བྱེད་པ་དང་། འཁོར་ཐམས་ཅད་ཏུ་གྲགས་
པ་དང་། རྣམ་པ་ཐམས་ཅད་ཀྱི་མཆོག་དང་ལྡན་པ་དང་། དེ་དག་དང་གཞན་ཡོན་ཏན་དཔག་ཏུ་མེད་པ་དང་ལྡན་པའི་དེ་བཞིན་གཤེགས་པའི་གསུང་གི་དབྱངས་འབྱུང་སྟེ། ཤཱ་རིའི་བུ་འདི་ནི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་དབྱངས་
བསམ་གྱིས་མི་ཁྱབ་པ་སྟེ། དེ་ལ་བྱང་ཆུབ་སེམས་དཔའ་མངོན་པར་དང་། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས་ངོ་མཚར་དང་རྨད་ཏུ་འདུ་ཤེས་སྐྱེད་དོ། །འདི་ལ་ཆོས་ཉིད་ནི་འདི་ཡིན་ཏེ། །དེ་ལ་འདི་སྐད་ཅེས་
བྱའོ། །ཚངས་པ་ཡི་ནི་སྒྲ་དབྱངས་སུ། །འདྲེན་པ་གསུང་སྒྲ་རབ་འབྱིན་ཏེ། །ཚངས་པ་རྣམས་ནི་ཚིམ་པར་བྱེད། །འདི་འདྲའི་ཆོས་ནི་ཕུན་སུམ་ཚོགས། །དེ་ཡི་དབྱངས་ནི་བྱམས་དང་ལྡན། །སྙིང་རྗེ་ལས་ནི་ཡང་དག་འབྱུང་། །བཏང་སྙོམས་དང་ནི་དགའ་ལྡན་པ། །
ཐུབ་པའི་དབྱངས་ནི་རབ་ཏུ་འབྱུང་། །སྲོག་ཆགས་ཀུན་གྱི་འདོད་ཆགས་མེ། །ཞེ་སྡང་དུག་ནི་ཞི་བྱེད་ཅིང་། །གཏི་མུག་མུན་པ་སེལ་བ་སྟེ། །ཕུན་སུམ་ཚོགས་དབྱངས་འདི་འདྲའོ། །འཛམ་བུའི་གླིང་གི་སྣ་ཚོགས་ཕྱོགས་རྣམས་ན། །མིར་གྱུར་པ་ཡི་
སྐད་ནི་མཐའ་ཡས་པ། །ཀུན་ན་དེ་ཡི་སྒྲ་རྣམས་སྣ་ཚོགས་པ། །དབྱངས་འདི་ཐོས་ན་རྗེས་སུ་རྟོགས་པར་འགྱུར། །ས་བླ་དང་ནི་དེ་བཞིན་བར་སྣང་ལྷ། །དེ་དག་ཅི་འདྲའི་སྐད་ལ་འཇུག་པ་ལྟར། །དེ་ཕྱིར་ཐུབ་དབང་དབྱངས་ནི་རབ་ཞུགས་ཏེ། །རྣམ་པར་
དེས་ཐོས་མྱ་ངན་འདས་རེག་འགྱུར། །རྐང་གཉིས་དག་དང་རྐང་བཞི་རྣམས་དང་ནི། །རྐང་མདས་དག་དང་རྐང་པ་མེད་པ་རྣམས། །ཐམས་ཅད་ལ་ནི་དེ་ཡི་སྒྲ་དབྱངས་འཇུག །བསྐུལ་ནས་རབ་ཏུ་འཆོས་ཤིང་ཚར་གཅོད་བྱེད། །སྟོང་གསུམ་འདི་ཡི་སྒྲ་རྣམས་ཇི་སྙེད་པ། །ཐ་མ་དང་ནི་

79-1-337a

འབྲིང་དང་དེ་བཞིན་རབ། །དེ་དག་རྗེས་སུ་འཇུག་དབྱངས་དེ་སྒྲོག་སྟེ། །འདུལ་བའི་སེམས་ཅན་ཐར་པ་རེག་པར་བྱེད། །རྟོག་པ་མེད་ཅིང་རྣམ་པར་མི་རྟོག་སྟེ། །གཟུང་བ་དང་ནི་བཅིངས་ལས་བྱུང་མ་ཡིན། །མཉམ་པར་བཞག་
པས་འཕགས་པའི་བདེན་པ་འཆང་། །སེམས་ཅན་ཐོས་ན་ཉོན་མོངས་ཞི་བར་བྱེད། །སངས་རྒྱས་ཆོས་དང་དེ་བཞིན་དགེ་འདུན་སྒྲ། །སྦྱིན་ཐོས་ཚུལ་ཁྲིམས་དེ་བཞིན་བཟོད་པ་དག །མཐའ་ཡས་སྒྲ་ནི་སེམས་ཅན་ཐོས་
བྱེད་དེ། །དེ་བཞིན་གཤེགས་པའི་དབྱངས་ནི་དེ་འདྲའོ། །དབྱངས་ཀྱང་མཐའ་ཡས་ཡེ་ཤེས་མཐའ་ཡས་པ། །དེ་ཡི་དབྱངས་ཀྱི་ཚད་ནི་ཡོད་མེད་དེ། །དེ་ལ་བྱང་ཆུབ་སེམས་དཔའ་མཁས་དད་ཅིང་། །དེ་བཞིན་
གཤེགས་པའི་དབྱངས་ལ་ཐེ་ཚོམ་མེད། །ཤཱ་རིའི་བུ་ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པ་ལ་མངོན་པར་དད། ཡིད་
ཆེས། རབ་ཏུ་རྟོག །ཐེ་ཚོམ་མི་ཟ། ཐོས་ན་རྒྱ་ཆེར་དགའ་མགུ་སྟེ། །རངས་པ་རྙེད་ནས་ངོ་མཚར་དང་། རྨད་ཏུ་འདུ་ཤེས་སྐྱེད་ཅེས་ན། འདི་ལྟར་ཤཱ་རིའི་བུ་ཆོས་ཐམས་ཅད་ལ་དེ་བཞིན་གཤེགས་པའི་ཆགས་
པ་མེད་པའི་ཡེ་ཤེས་གཟིགས་པ་འཇུག་སྟེ། དེ་ལ་བྱང་ཆུབ་སེམས་དཔའ་མངོན་པར་དད། ཡིད་ཆེས། རབ་ཏུ་རྟོག་པ་ནས། དད་པས་ངོ་མཚར་དང་། རྨད་ཀྱི་བར་དུ་འདུ་ཤེས་སྐྱེད་དོ། །དེ་བཞིན་གཤེགས་པའི་
ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་བརྩམས་ཏེ་ཁྱོད་ལ་དཔེ་བསྟན་པར་བྱའོ། །ཤཱ་རིའི་བུ་ཡོངས་སུ་བརྟག་པ་བཟུང་སྟེ། གང་གཱའི་ཀླུང་གིས་བྱེ་མ་སྙེད་ཀྱི་འཇིག་རྟེན་གྱི་ཁམས་ཀྱི་རྩྭ་དང་། ཤིང་དང་། 
ཡལ་ག་དང་། ལོ་མ་དང་། འདབ་མ་དང་། ཆུང་ངུ་ན་སོར་བཞིའི་ཚད་ཙམ་ཡན་ཆད་ཇི་སྙེད་ཡོད་པ་སྐྱེས་བུ་ལ་ལ་ཞིག་གིས་དེ་དག་གཅིག་ཏུ་སྤུངས་ཏེ། གཅིག་ཏུ་སྤུངས་ནས་མེས་བསྲེགས་ཏེ་ཚིག་པར་

79-1-337b

གྱུར་ནས་ཐལ་བར་བྱས་སོ། །ཐལ་བར་བྱས་ནས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ཀྱི་རྒྱ་མཚོ་ཆེན་པོ་གང་ན་ཡོད་པ་དེ་དག་ཏུ་བླུགས་ཏེ། ལོ་སྟོང་དུ་དཀྲུགས་ཀྱང་ཤཱ་རིའི་བུ་དེ་བཞིན་གཤེགས་པ་རྣམས་
ཀྱི་དེ་བཞིན་གཤེགས་པའི་ཡེ་ཤེས་འདི་ལྟ་བུ་ཡོད་དེ། དེ་བཞིན་གཤེགས་པ་ཡེ་ཤེས་དེ་དང་ལྡན་པས་རྒྱ་མཚོ་ཆེན་པོ་དང་། དེ་དག་ནས་ཐལ་བ་དེ་དག་བླངས་ཏེ། འཇིག་རྟེན་གྱི་ཁམས་དེ་དང་དེ་དག་ཏུ་
འདི་ནི་འཇིག་རྟེན་གྱི་ཁམས་ཆེ་གེ་མོ་ཞིག་གི་ཤིང་འདི་འདྲ་བ་ཞིག་གི་ཐལ་བའོ། །འདི་ནི་འཇིག་རྟེན་གྱི་ཁམས་ཆེ་གེ་མོ་ཞིག་གི་ཤིང་ཆེ་གེ་མོ་ཞིག་གི་རྩ་བ་དང་། ཆེ་གེ་མོ་ཞིང་གི་སྡོང་པོ་དང་། ཆེ་གེ་མོ་ཞིག་
གི་ཡལ་ག་དང་། ཆེ་གེ་མོ་ཞིག་གི་ལོ་མ་དང་། ཆེ་གེ་མོ་ཞིག་གི་འབྲས་བུའི་ཐལ་བའོ། །འདི་ནི་ཕྱོགས་ཆེ་གེ་མོ་ཞིག་གི་འདབ་མ་འདི་འདྲ་བ་ཞིག་གི་ཐལ་བའོ། །ཞེས་རབ་ཏུ་འབྱེད་དོ། །དེ་ཅིའི་ཕྱིར་ཞེ་ན། འདི་ལྟར་
ཤ་རིའི་བུ་དེ་བཞིན་གཤེགས་པས་ཆོས་ཀྱི་དབྱིངས་རབ་ཏུ་རྟོགས་ཏེ། དེ་རབ་ཏུ་རྟོགས་ནས། དེ་བཞིན་གཤེགས་པས་འདི་ལྟར་འདི་ནི་འཇིག་རྟེན་གྱི་ཁམས་ཆེ་གེ་མོ་ཞིག་གི་ཐལ་བའོ། །ཞེས་རབ་ཏུ་
མཁྱེན་པ་ནས་རྒྱས་པར་བྱས་ཏེ། དེ་ལྟར་ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་དེ་ལྟར་རྫུ་འཕྲུལ་ཆེའོ། །དེ་ལྟར་མཐུ་ཆེའོ། །འདི་ལྟར་དབང་ཆེ་བར་གྲགས་
པ་སྟེ། ཤཱ་རིའི་བུ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་དེ་བཞིན་གཤེགས་པའི་ཡེ་ཤེས་འདི་ལ་དད། ཡིད་ཆེས། རབ་ཏུ་རྟོག་ཅིང་དེ་བཞིན་གཤེགས་པ་བྱམས་པས་ཡིད་ལ་བྱེད་པ་
དག་ཐམས་ཅད་ནི། དགེ་བའི་རྩ་བ་འདིའི་མཐའ་མ་ཐོབ་པར་སྡུག་བསྔལ་མཐར་འབྱིན་ཏོ། །དེ་ཅིའི་ཕྱིར་ཞེ་ན། འདི་ལྟར་ཤཱ་རིའི་བུ། དེ་བཞིན་གཤེགས་པས་ཆོས་ཀྱི་དབྱངས་ཤིན་དུ་རྟོགས་ཏེ། དེ་ཤིན་དུ་རྟོགས་

79-1-338a

པས། དེ་བཞིན་གཤེགས་པ་རྣམས་ལས་སེམས་བསྐྱེད་པ་ཅིག་ཀྱང་ཆུད་མི་ཟའོ། །ཤཱ་རིའི་བུ་ཁྱོད་ལ་དཔེར་བྱ་སྟེ། འདི་ལ་སྐྱེས་བུ་མཁས་པ་ཁ་ཅིག་དཔེས་བཤད་པའི་དོན་རྣམས་ཀུན་ཤེས་
ཏེ། འདི་ལྟ་སྟེ། དཔེར་ན་ཤཱ་རིའི་བུ་སྐྱེས་བུ་ལ་ལ་ཚེ་ལོ་བརྒྱ་པ་ལོ་བརྒྱར་འཚོ་བ་ཞིག་གིས་སྐྲའི་རྩེ་མོ་བྱེ་བ་བརྒྱར་བཙལ་བས་ཆུའི་ཐིགས་པ་བླངས་ཏེ། ང་གང་ན་བ་དེར་འོངས་ནས་ཕྱིན་པ་དང་། འདི་
སྐད་ཅེས་ཀྱེ་གཽ་ཏ་མ་བདག་གིས་ཆུའི་ཐིགས་པ་འདི་ཁྱོད་ལ་གདམས་ཀྱིས་ནམས་བདག་ལ་དགོས་པར་གྱུར་པ་དེ་ན་སླར་བྱིན་ཅིག་ཅེས་ཟེར་བ་དང་། དེ་བཞིན་གཤེགས་པས་དེ་བླངས་ཏེ་རྒྱ་
མཚོ་ཆེན་པོར་བོར་ནས་དེ་ཆུའི་རྒྱུན་གྱིས་བདས་ཏེ་འདྲེས་ནས་ལྷན་ཅིག་ཏུ་མཐར་གྱིས་རྒྱ་མཚོ་ཆེན་པོར་ཞུགས་སོ། །དེ་ནས་སྐྱེས་བུ་ཚེ་ལོ་བརྒྱ་པ་དེ་ལོ་བརྒྱ་ལོན་པ་དང་ང་ག་ལ་བ་དེར་འོངས་ཏེ། ཕྱིན་ནས་
འདི་སྐད་ཅེས་གཽ་ཏ་མ་བདག་གི་ཆུའི་ཐིགས་པ་དེ་དགོས་ཀྱིས་བདག་ལ་བྱིན་ཅིག་ཅེས་ཟེར་ན། ཤཱ་རིའི་བུ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་ཡོད་དེ། ཡེ་ཤེས་དེ་དང་ལྡན་
པས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སྐྲའི་རྩེ་མོ་བྱེ་བ་བརྒྱར་བཙལ་བས་ཆུའི་ཐིགས་པ་དེ་རྒྱ་མཚོ་ཆེན་པོ་དེ་ནས་ཆུ་གཞན་དང་མ་འདྲེས་པར་བླངས་ཏེ་
སྐྱེས་བུ་དེ་ལ་སླར་བྱིན་ནོ། །ཤཱ་རིའི་བུ་འདི་ལྟར་དོན་ཤེས་པར་བྱ་བའི་ཕྱིར་ཁྱོད་ལ་དཔེར་བསྟན་ཏེ། དེ་གང་གི་དོན་དུ་བལྟ་ཞེ་ན། འདི་ལྟ་སྟེ། ཤཱ་རིའི་བུ་སྐྱེས་བུའི་ཆུའི་ཐིགས་པ་དེ་བཞིན་
གཤེགས་པའི་ལག་ཏུ་བཞག་པ་ཡུན་རིང་མོ་ཞིག་ལོན་ཡང་ཆུད་མི་ཟ་བ་དེ་བཞིན་དུ་ཤཱ་རིའི་བུ། རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་དེ་བཞིན་གཤེགས་པའི་ཡེ་ཤེས་འདི་ལྟ་བུ་ལ་དད། 

79-1-338b

ཡིད་ཆེས། རབ་ཏུ་རྟོག་ཅིང་དེ་བཞིན་གཤེགས་པ་བྱམས་པས་ཡིད་ལ་བྱེད་པ་དང་། དེ་བཞིན་གཤེགས་པ་ཉིད་ལ་དམིགས་ནས་དེའི་ཕྱིར་ནམ་མཁའ་ལ་མེ་ཏོག་འཐོར་བ་དེ་དག་ཐམས་ཅད་དགེ་
བའི་རྩ་བ་འདི་མཐའ་མ་ཐོབ་པར་སྡུག་བསྔལ་མཐར་འབྱིན་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཤཱ་རིའི་བུ་དེ་བཞིན་གཤེགས་པས་ཆོས་ཀྱི་དབྱིངས་རབ་ཏུ་རྟོགས་ཏེ། 
དེ་རབ་ཏུ་རྟོགས་པས་དེ་བཞིན་གཤེགས་པ་རྣམས་ལས་སེམས་གཅིག་བསྐྱེད་པ་ཡང་ཆུད་མི་ཟའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །
བཅོམ་ལྡན་འདས་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་གང་རྣམ་པར་ཤེས་པ་མ་མཆིས་པར་འཇུག་པ་མཆིས་སམ། བཀའ་སྩལ་པ། ཤཱ་རིའི་བུ་དེ་ནི་
མ་ཡིན་ནོ། །བཅོམ་ལྡན་འདས་ཡེ་ཤེས་ནི་གང་ལགས། རྣམ་པར་ཤེས་པ་ནི་གང་ལགས། ཤཱ་རིའི་བུ་འདི་བཞི་ནི་རྣམ་པར་ཤེས་པའི་གནས་ཏེ། རྣམ་པར་ཤེས་པ་དེ་ལ་གནས་སོ། །
འདི་ལྟ་སྟེ། རྣམ་པར་ཤེས་པའི་གཟུགས་ལ་ཉེ་བར་སོང་ཞིང་གནས། གཟུགས་ལ་དམིགས། གཟུགས་ལ་གནས། དགའ་བ་ལ་བསྟེན་པས་སྐྱེ་ཞིང་འཕེལ་ཏེ་རྒྱས་པར་འགྱུར་བ་དང་། རྣམ་
པར་ཤེས་པ་ཚོར་བ་ལ་ཉེ་བར་སོང་ཞིང་གནས། ཚོར་བ་ལ་དམིགས། ཚོར་བ་ལ་གནས། དགའ་བ་ལ་བསྟན་པས་སྐྱེ་ཞིང་འཕེལ་ཏེ་རྒྱས་པར་འགྱུར་བ་དང་། རྣམ་པར་ཤེས་པ་འདུ་ཤེས་ལ་ཉེ་བར་
སོང་ཞིང་གནས། འདུ་ཤེས་ལ་དམིགས། འདུ་ཤེས་ལ་གནས། དགའ་བ་ལ་བསྟེན་པས། སྐྱེ་ཞིང་འཕེལ་ཏེ་རྒྱས་པར་འགྱུར་བ་དང་། རྣམ་པར་ཤེས་པ་འདུ་བྱེད་ལ་ཉེ་བར་སོང་

79-1-339a

ཞིང་གནས། འདུ་བྱེད་ལ་དམིགས། འདུ་བྱེད་ལ་གནས། དགའ་བ་ལ་བསྟེན་པས་སྐྱེ་ཞིང་འཕེལ་ནས་རྒྱས་པར་འགྱུར་བ་སྟེ། ཤཱ་རིའི་བུ་འདི་ནི་རྣམ་པར་ཤེས་པ་ཞེས་བྱའོ། །གང་
ལེན་པའི་ཕུང་པོ་ལྔ་ལ་མི་གནས་པར། རྣམ་པར་ཤེས་པའི་ཕུང་པོ་ཡོངས་སུ་ཤེས་པ་དེ་ནི་ཡེ་ཤེས་ཞེས་བྱའོ། །གཞན་ཡང་རྣམ་པར་ཤེས་པ་ཞེས་བྱ་བ་ནི་སའི་ཁམས་རྣམ་པར་ཤེས་པ་དང་། ཆུའི་
ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་རྣམ་པར་ཤེས་པ་སྟེ། འདི་ནི་རྣམ་པར་ཤེས་པ་ཞེས་བྱའོ། །གང་ཁམས་བཞི་ལ་མི་གནས་པར་རྣམ་པར་ཤེས་པའི་ཆོས་ཀྱི་ཁམ་
ཀུན་དུ་དབྱེ་བ་ཤེས་པ་འདི་ནི་ཡེ་ཤེས་ཞེས་བྱའོ། །གཞན་ཡང་ཤཱ་རིའི་བུ་རྣམ་པར་ཤེས་པ་ཞེས་བྱ་བ་ནི་གང་མིག་གིས་ཤེས་པར་བྱ་བའི་གཟུགས་རྣམ་པར་རིག་པ་དང་། རྣ་བས་ཤེས་པར་བྱ་བའི་སྒྲ་རྣམ་
པར་རིག་པ་དང་། སྣས་ཤེས་པར་བྱ་བའི་དྲི་རྣམ་པར་རིག་པ་དང་། ལྕེས་ཤེས་པར་བྱ་བའི་རོ་རྣམ་པར་རིག་པ་དང་། ལུས་ཀྱིས་ཤེས་པར་བྱ་བའི་རེག་བྱ་རྣམ་པར་རིག་པ་དང་། ཡིད་ཀྱིས་ཤེས་པར་བྱ་བའི་
ཆོས་རྣམ་པར་རིག་པ་སྟེ། འདི་ནི་རྣམ་པར་ཤེས་པ་ཞེས་བྱའོ། །གང་ནང་ཉེ་བར་ཞི་ཞིང་ཕྱི་རོལ་དུ་མི་རྒྱུ་སྟེ། ཡེ་ཤེས་ཀྱི་ཕྱིར་འབྲང་ཞིང་ཆོས་གང་ལ་ཡང་མི་རྟོག །རྣམ་པར་མི་རྟོག་པ་དེ་ནི་
ཡེ་ཤེས་ཤེས་བྱའོ། །རྣམ་པར་ཤེས་པ་ནི་དམིགས་པ་ལས་སྐྱེའོ། །རྣམ་པར་ཤེས་པ་ནི་ཡིད་ལས་བྱེད་པ་ལས་སྐྱེའོ། །རྣམ་པར་ཤེས་པ་ནི་ཡོངས་སུ་རྟོག་པ་ལས་སྐྱེ་སྟེ། དེ་ནི་
རྣམ་པར་ཤེས་པ་ཞེས་བྱའོ། །གང་འཛིན་པ་མེད་པས་སྙེམས་པ་དང་། དམིགས་པ་མེད། རྣམ་པར་རིག་པ་མེད་ཅིང་མི་རྟོག་པ་དེ་ནི་ཡེ་ཤེས་ཤེས་བྱའོ། །གཞན་ཡང་འདུས་བྱས་ལ་སྤྱོད་

79-1-339b

པའི་ཆོས་ལ་རྣམ་པར་ཤེས་པ་ལ་གནས་ཤིང་གང་འདུས་བྱས་ལ་སྤྱོད་པའི་ཆོས་རྣམ་པར་ཤེས་པ་དེ་ནི་རྣམ་པར་ཤེས་པ་ཞེས་བྱའོ། །འདུས་མ་བྱས་ལ་ནི་རྣམ་པར་ཤེས་པ་རྒྱུ་བ་མེད་དེ། གང་
འདུས་མ་བྱས་ཤེས་པ་དེ་ནི་ཡེ་ཤེས་ཞེས་བྱའོ། །གཞན་ཡང་གང་སྐྱེ་བ་དང་། འཇིག་པ་ལ་རབ་ཏུ་གནས་པ་དེ་ནི་རྣམ་པར་ཤེས་པའོ། །གང་སྐྱེ་བ་མེད་པ་དང་། འགག་པ་མེད་པ་ལ་
གནས་པ་དེ་ནི་ཡེ་ཤེས་ཞེས་བྱའོ། །དེ་ལྟར་ཤཱ་རིའི་བུ་འདི་ནི་རྣམ་པར་ཤེས་པ། འདི་ནི་ཡེ་ཤེས་ཏེ། བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་
ཤེས་བསམ་གྱིས་མི་ཁྱབ་པ་དེ་ལ་མངོན་པར་དང་། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས་ངོ་མཚར་དང་། རྨད་ཏུ་འདུས་ཤེས་སྐྱེད་དོ། །དེ་ནས་བཅོམ་
ལྡན་འདས་ཀྱིས་དོན་དེ་ཉིད་རྒྱ་ཆེར་བསྟན་པའི་ཕྱིར། དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཇི་ལྟར་གང་གཱའི་ཀླུང་གི་བྱེ་མ་དཔག་མེད་པ། །དེ་བཞིན་ཕྱོགས་བཅུའི་འཇིག་རྟེན་ཁམས་ཀྱི་རྩྭ་
རྣམས་ནི། །དེ་དག་སྐྱེས་བུ་ལ་ལས་མེར་བསྲེགས་ཐལ་བར་བྱས། །ལོ་ནི་བརྒྱ་སྟོང་དག་ཏུ་རྒྱ་མཚོར་དཀྲུགས་པ་རྣམས། །དེ་འདྲ་བ་ཡི་སྟོབས་བཅུ་ཡེ་ཤེས་ཕྲ་མངའ་བས། །ཐལ་བ་བླངས་
ནས་འགྲོ་བ་དག་ལ་ལུང་སྟོན་པ། །ཞིང་རྣམས་རབ་འབྱམས་དག་གི་ཤིང་རིགས་འདི། །དེ་ཚིག་ཐལ་བ་འདི་ཞེས་རྣམ་པ་ཐམས་ཅད་མཁྱེན། །འདི་ལྟར་ཕྱོགས་བཅུ་དག་གི་འཇིག་རྟེན་ཁམས་
ཀྱི་རྡུལ། །ཐམས་ཅད་རྡུལ་དུ་བྱས་ནས་རྒྱལ་བ་རྣམས་སྟོན་ཏེ། །དེ་དག་ཐམས་ཅད་འགྲང་ཡང་ཆགས་མེད་ཐེ་ཚོམ་མེད། །དེ་ལྟར་བདེ་བར་གཤེགས་ཀྱི་ཡེ་ཤེས་ནམ་མཁའ་

79-1-340a

བཞིན། །ཇི་སྙེད་ཕྱོགས་བཅུའི་འགྲོ་བ་རྣམས་ཀྱི་སེམས་ཀྱི་རྒྱུད། །གང་དག་འདོད་ཆགས་སྤྱོད་དང་ཞེ་སྡང་གཏི་མུག་ལྡན། །སྤྱོད་པ་ཀུན་གྱི་ཚུལ་ཤེས་བསམ་པ་རྣམས་དང་ནི། །
གང་གིས་བློ་ཉམས་གང་གིས་ཐར་བར་འགྱུར་བ་མཁྱེན། །འཇིག་རྟེན་ཀུན་མཆོག་སྟོབས་བཅུ་རྣམས་ཀྱི་ཡེ་ཤེས་ནི། །ཇི་སྙེད་ཕྱོགས་བཅུའི་ཆོས་ཀྱི་དབྱིངས་སུ་རབ་ཞུགས་ཀྱང་། །འདྲེན་
པ་རྣམས་ལ་རྟོག་དང་རྣམ་པར་རྟོག་མི་འབྱུང་། །བདེ་གཤེགས་སྲས་པོ་དད་པ་རྒྱལ་ལ་དད་པར་བྱེད།།                །།              །།               །།                  །།

80-1-1a