46-1-1a

༼ཇ༽ ༄༅། ༈ །མདོ་སྡེ་སྣ་ཚོགས་ཀྱི་སྐོར་བཞུགས་སོ། །
(黃)  經藏第七部

46-1-1b

༄༅༅།   །རྒྱ་གར་སྐད་དུ།  སད་དྷརྨ་པུཎ་ཌ་རཱི་ཀ་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ། དམ་པའི་
ཆོས་པད་མ་དཀར་པོ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། །སངས་རྒྱས་དང་བྱང་ཆུབ་
སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་
འདས་རྒྱལ་པོའི་ཁབ་ན། བྱ་རྒོད་ཀྱི་ཕུང་པོའི་རི་ལ་བཞུགས་ཏེ། དགེ་སློང་ཁྲི་ཉིས་སྟོང་གི་དགེ་སློང་གི་
དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་
གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་
པོ། །བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་
ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཀྱི་དབང་ཐམས་ཅད་ཀྱི་དམ་

46-1-2a

པའི་ཕ་རོལ་ཏུ་སོན་པ། མངོན་པར་ཤེས་པ། མངོན་པར་ཤེས་པའི་ཉན་ཐོས་ཆེན་པོ་ཤ་སྟག་ལ་འདི་ལྟ་སྟེ། ཚེ་དང་ལྡན་པ་ཀུན་ཤེས་ཀཽཎྜི་ནྱི་དང་། ཚེ་དང་ལྡན་པ་རྟ་ཐུལ་དང་། ཚེ་དང་ལྡན་པ་རླངས་པ་དང་། ཚེ་དང་ལྡན་
པ་མིང་ཆེན་དང་། ཚེ་དང་ལྡན་པ་བཟང་པོ་དང་། ཚེ་དང་ལྡན་པ་འོད་བསྲུང་ཆེན་པོ་དང་། ཚེ་དང་ལྡན་པ་ལྟེང་རྒྱས་འོད་སྲུང་དང་། ཚེ་དང་ལྡན་པ་ཆུ་ཀླུང་འོད་སྲུང་དང་། ཚེ་དང་ལྡན་པ་ག་ཡཱ་འོད་སྲུང་དང་། ཚེ་དང་ལྡན་པ་ཤཱ་རིའི་བུ་དང་། ཚེ་དང་ལྡན་
པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་ཀཱ་ཏྱཱའི་བུ་ཆེན་པོ་དང་། ཚེ་དང་ལྡན་པ་མ་འགགས་པ་དང་། ཚེ་དང་ལྡན་པ་ནམ་གྲུ་དང་། ཚེ་དང་ལྡན་པ་ཀ་པི་ན་དང་། ཚེ་དང་ལྡན་པ་བ་ལང་བདག་དང་། ཚེ་དང་ལྡན་པ་པི་ལིན་དའི་བུ་དང་། 
ཚེ་དང་ལྡན་པ་བཀྐུ་ལ་དང་། ཚེ་དང་ལྡན་པ་གསུས་པོ་ཆེ་དང་། ཚེ་དང་ལྡན་པ་བྷ་ར་དྭཱ་ཛ་དང་། ཚེ་དང་ལྡན་པ་དགའ་བོ་དང་། ཚེ་དང་ལྡན་པ་ཉེ་དགའ་དང་། ཚེ་དང་ལྡན་པ་མཛེས་དགའ་དང་། ཚེ་དང་ལྡན་པ་བྱམས་མའི་བུ་གང་པོ་དང་། ཚེ་དང་ལྡན་པ་
རབ་འབྱོར་དང་། ཚེ་དང་ལྡན་པ་སྒྲ་གཅན་ཟིན་དང་། དེ་དག་དང་ཉན་ཐོས་ཆེན་པོ་གཞན་དག་དང་། སློབ་པ་ཚེ་དང་ལྡན་པ་ཀུན་དགའ་བོ་དང་། གཞན་ཡང་སློབ་པ་དང་མི་སློབ་པའི་དགེ་སློང་ཉིས་སྟོང་དང་། སྐྱེ་དགུའི་བདག་མོ་ཆེན་མོ་ལ་སོགས་
པ་དགེ་སློང་མ་དྲུག་སྟོང་དང་། སྒྲ་གཅན་ཟིན་དང་། དགེ་སློང་མ་གྲགས་འཛིན་འཁོར་དང་བཅས་པ་དང་ཐབས་གཅིག་གོ། །བྱང་ཆུབ་སེམས་དཔའ་བརྒྱད་ཁྲི་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་
ཕྱིར་མི་ལྡོག་པ། གཟུངས་ཐོབ་པ། སྤོབས་པ་ཆེན་པོ་ལ་གནས་པ། ཕྱིར་མི་ལྡོག་པའི་ཆོས་ཀྱི་འཁོར་ལོ་སྐོར་བ། སངས་རྒྱས་བརྒྱ་སྟོང་མང་པོ་ལ་བསྙེན་བཀུར་བྱས་པ། སངས་རྒྱས་བརྒྱ་སྟོང་མང་པོ་ལ་དགེ་བའི་རྩ་
བ་བསྐྱེད་པ། སངས་རྒྱས་བརྒྱ་སྟོང་མང་པོས་ཡང་དག་པར་བསྟོད་པ། ལུས་དང་ངག་དང་སེམས་བྱམས་པས་ཡོངསུ་བསྒོས་པ། དེ་བཞིན་གཤེགས་པའི་ཡེ་ཤེས་འཛུད་པ་ལ་མཁས་པ། ཤེས་རབ་ཆེན་པོ། ཤེས་རབ་ཀྱི་ཕ་རོལ་ཏུ་

46-1-2b

ཕྱིན་པ་རྟོགས་པར་ཁོང་དུ་ཆུད་པ། འཇིག་རྟེན་གྱི་ཁམས་བརྒྱ་སྟོང་མང་པོར་རྣམ་པར་གྲགས་པ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་ཡང་དག་པར་སྒྲོལ་བ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་
ཆེན་པོ་འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་མཐུ་ཆེན་ཐོབ་དང་། བྱང་ཆུབ་སེམས་དཔའ་དོན་ཐམས་ཅད་ཅེས་བྱ་བ་དང་། བྱང་ཆུབ་
སེམས་དཔའ་རྟག་ཏུ་བརྩོན་དང་། བྱང་ཆུབ་སེམས་དཔའ་བརྩོན་པ་མི་གཏོང་བ་དང་། བྱང་ཆུབ་སེམས་དཔའ་ལག་ན་རིན་ཆེན་དང་། བྱང་ཆུབ་སེམས་དཔའ་སྨན་གྱི་རྒྱལ་པོ་དང་། བྱང་ཆུབ་སེམས་དཔའ་སྨན་ཡང་དག་
འཕགས་དང་། བྱང་ཆུབ་སེམས་དཔའ་བཀོད་པའི་རྒྱལ་པོ་དང་། བྱང་ཆུབ་སེམས་དཔའ་རབ་ཏུ་སྦྱིན་དཔའ་དང་། བྱང་ཆུབ་སེམས་དཔའ་རིན་ཆེན་ཟླ་བ་དང་། བྱང་ཆུབ་སེམས་དཔའ་རིན་ཆེན་འོད་དང་། བྱང་ཆུབ་སེམས་
དཔའ་ཟླ་གང་དང་། བྱང་ཆུབ་སེམས་དཔའ་གནོན་པ་ཆེན་པོ་དང་། བྱང་ཆུབ་སེམས་དཔའ་མཐའ་ཡས་གནོན་དང་། བྱང་ཆུབ་སེམས་དཔའ་འཇིག་རྟེན་གསུམ་གནོན་དང་། བྱང་ཆུབ་སེམས་དཔའ་སྤོབས་པ་ཆེན་
པོ་དང་། བྱང་ཆུབ་སེམས་དཔའ་རྟག་པར་རྒྱུན་ཏུ་བརྩོན་དང་། བྱང་ཆུབ་སེམས་དཔའ་ས་འཛིན་དང་། བྱང་ཆུབ་སེམས་དཔའ་བློ་གྲོས་མི་ཟད་པ་དང་། བྱང་ཆུབ་སེམས་དཔའ་པད་མའི་དཔལ་དང་། བྱང་ཆུབ་སེམས་
དཔའ་སྐར་མའི་རྒྱལ་པོ་དང་། བྱང་ཆུབ་སེམས་དཔའ་བྱམས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེ་དག་དང་ཡང་ཐབས་གཅིག་གོ། །བཟང་སྐྱོང་ལ་སོགས་པ་སྐྱེས་བུ་དམ་པ་བཅུ་དྲུག་འདི་ལྟ་སྟེ། 
བཟང་སྐྱོང་དང་། དཀོན་མཆོག་འབྱུང་གནས་དང་། དེད་དཔོན་བཟང་པོ་དང་། མེས་བྱིན་དང་། ཕུག་སྦས་དང་། ཆུས་བྱིན་དང་། དབང་པོས་བྱིན་དང་། བླ་མའི་བློ་གྲོས་དང་། ཁྱད་པར་བློ་གྲོས་དང་། འཕེལ་བའི་བློ་གྲོས་དང་། 

46-1-3a

མཐོང་བ་དོན་ཡོད་དང་། ཤིན་ཏུ་ཡང་དག་ཞུགས་དང་། རབ་ཀྱི་རྩལ་གྱིས་རྣམ་པར་གནོན་པ་དང་། དཔེ་མེད་བློ་གྲོས་དང་། ཉི་མའི་སྙིང་པོ་དང་། ས་འཛིན་དག་དང་ཡང་ཐབས་གཅིག་སྟེ། དེ་དག་ལ་སོགས་པ་
བྱང་ཆུབ་སེམས་དཔའ་བརྒྱད་ཁྲི་དག་དང་ཡང་ཐབས་གཅིག་གོ། །ལྷ་རྣམས་ཀྱི་དབང་པོ་བརྒྱ་བྱིན་དང་། འཁོར་ལྷའི་བུ་ཉི་ཁྲི་འདི་ལྟ་སྟེ། ལྷའི་བུ་ཟླ་བ་དང་། ལྷའི་བུ་ཉི་མ་དང་། ཀུན་དུ་དྲི་དང་། རིན་ཆེན་འོད་དང་། ལྷའི་
བུ་སྣང་འོད་དང་། དེ་དག་ལ་སོགས་པ་ལྷའི་བུ་ཉི་ཁྲི་དང་ཡང་ཐབས་གཅིག་གོ། །རྒྱལ་པོ་ཆེན་པོ་བཞི་དང་། འཁོར་ལྷའི་བུ་སུམ་ཁྲི་འདི་ལྟ་སྟེ། རྒྱལ་པོ་ཆེན་པོ་འཕགས་སྐྱེས་པོ་དང་། རྒྱལ་པོ་ཆེན་པོ་མིག་མི་བཟང་
དང་། རྒྱལ་པོ་ཆེན་པོ་ཡུལ་འཁོར་སྲུང་དང་། རྒྱལ་པོ་ཆེན་པོ་རྣམ་ཐོས་ཀྱི་བུ་དང་། ལྷའི་བུ་དབང་ཕྱུག་དང་། ལྷའི་བུ་དབང་ཕྱུག་ཆེན་པོ་དང་། འཁོར་ལྷའི་བུ་སུམ་ཁྲི་དག་དང་ཡང་ཐབས་གཅིག་གོ། །མི་མཇེད་ཀྱི་
བདག་པོ་ཚངས་པ་དང་། འཁོར་ཚངས་རིས་ཀྱི་ལྷའི་བུ་ཁྲི་ཉིས་སྟོང་འདི་ལྟ་སྟེ། ཚངས་པ་གཙུག་ཕུད་ཅན་དང་། ཚངས་པ་སྐར་མའི་འོད་དང་། དེ་དག་ལ་སོགས་པ་ཚངས་རིས་ཀྱི་ལྷའི་བུ་ཁྲི་ཉིས་སྟོང་དང་ཡང་ཐབས་
གཅིག་གོ། །ཀླུའི་རྒྱལ་པོ་བརྒྱད་འདི་ལྟ་སྟེ། ཀླུའི་རྒྱལ་པོ་དགའ་བོ་དང་། ཉེ་དགའ་དང་། རྒྱ་མཚོ་དང་། ནོར་རྒྱས་ཀྱི་བུ་དང་། འཇོག་པོ་དང་། གཟི་ཅན་དང་། མ་དྲོས་པ་དང་། ཀླུའི་རྒྱལ་པོ་ཨུད་པ་ལ་དང་། 
འཁོར་ཀླུ་བྱེ་བ་བརྒྱ་སྟོང་མང་པོ་དག་དང་ཡང་ཐབས་གཅིག་གོ། །མི་འམ་ཅིའི་རྒྱལ་པོ་བཞི་འདི་ལྟ་སྟེ། མི་འམ་ཅིའི་རྒྱལ་པོ་ལྗོན་པ་དང་། མི་འམ་ཅིའི་རྒྱལ་པོ་ཆོས་ཆེན་དང་། མི་འམ་ཅིའི་རྒྱལ་པོ་ཆོས་བཟང་དང་། 
མི་འམ་ཅིའི་རྒྱལ་པོ་ཆོས་འཛིན་དང་། འཁོར་མི་འམ་ཅི་བྱེ་བ་བརྒྱ་སྟོང་མང་པོ་དག་དང་ཡང་ཐབས་གཅིག་གོ། །དྲི་ཟའི་རིས་ཀྱི་ལྷའི་བུ་བཞི་འདི་ལྟ་སྟེ། དྲི་ཟ་ཡིད་དུ་འོང་བ་དང་། ཡིད་འོང་དབྱངས་དང་། འཇམ་སྙན་དང་། 

46-1-3b

དྲི་ཟ་དབྱངས་སྙན་དང་། འཁོར་དྲི་ཟ་བྱེ་བ་བརྒྱ་སྟོང་མང་པོ་དག་དང་ཡང་ཐབས་གཅིག་གོ། །ལྷ་མ་ཡིན་གྱི་དབང་པོ་བཞི་འདི་ལྟ་སྟེ། ལྷ་མ་ཡིན་གྱི་དབང་པོ་སྟོབས་ཅན་དང་། ཕྲག་རྩུབ་དང་། ཐག་བཟང་རིས་དང་། 
ལྷ་མ་ཡིན་གྱི་དབང་པོ་སྒྲ་གཅན་དང་། འཁོར་ལྷ་མ་ཡིན་བྱེ་བ་བརྒྱ་སྟོང་མང་པོ་དག་དང་ཡང་ཐབས་གཅིག་གོ། །ནམཁའ་ལྡིང་གི་དབང་པོ་བཞི་འདི་ལྟ་སྟེ། ནམཁའ་ལྡིང་གི་དབང་པོ་གཟི་བརྗིད་ཆེན་པོ་དང་། ལུས་
ཆེན་པོ་དང་། རྫོགས་ཆེན་དང་། ནམཁའ་ལྡིང་གི་དབང་པོ་འཕྲུལ་ཆེན་ཐོབ་དང་། འཁོར་ནམཁའ་ལྡིང་བྱེ་བ་བརྒྱ་སྟོང་མང་པོ་དག་དང་ཡང་ཐབས་གཅིག་གོ། །ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་
དགྲ་དང་ཡང་ཐབས་གཅིག་གོ། །དེའི་ཚེ་ན་བཅོམ་ལྡན་འདས་འཁོར་བཞི་པོ་དེ་དག་གིས་ཡོངས་སུ་བསྐོར་ཅིང་མདུན་གྱིས་བལྟས་ཏེ། སྟི་སྟང་དུ་བྱས། བཙུན་པར་བྱས། རི་མོར་བྱས། མཆོད་པར་བྱས། རྗེད་པར་
བྱས། གསོལ་བ་བྱས་ཏེ། ངེས་པར་བསྟན་པ་ཆེན་པོ་ཞེས་བྱ་བའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ་བྱང་ཆུབ་སེམས་དཔའ་ལ་གདམས་པ། སངས་རྒྱས་ཐམས་ཅད་ཀྱིས་ཡོངས་སུ་བཟུང་བ་
བཤད་དེ། ཆོས་ཀྱི་གདན་དེ་ཉིད་ལ་སྐྱིལ་མོ་དཀྲུང་བཅས་ནས། མཐའ་ཡས་ངེས་པར་བསྟན་པའི་གནས་ཤེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སྟེ་སྐུ་མི་གཡོ་ཞིང་སེམས་མི་གཡོ་བར་གྱུར་ནས་བཞུགས་
སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ། བཅོམ་ལྡན་འདས་ལ་ལྷའི་མེ་ཏོག་མན་དཱ་ར་དང་། མན་དཱ་ར་ཆེན་པོ་དང་། མཉྫུ་ཥ་ཀ་དང་། མཉྫུ་ཥ་ཀ་ཆེན་པོ་རྣམས་ཀྱི་མེ་ཏོག་གི་ཆར་ཆེན་པོ་མངོན་
པར་བབ་སྟེ། བཅོམ་ལྡན་འདས་དང་འཁོར་བཞི་པོ་དེ་དག་ལ་འཐོར་རོ། །ཐམས་ཅད་དང་ལྡན་པའི་སངས་རྒྱས་ཀྱི་ཞིང་ཡང་རྣམ་པ་དྲུག་ཏུ་གཡོས་པར་གྱུར་ཏེ། འགུལ་ཀུན་ཏུ་རབ་ཏུ་འགུལ། ལྡེག་ཀུན་ཏུ་རབ་ཏུ་ལྡེག །

46-1-4a

འཁྲུགས་ཀུན་ཏུ་རབ་ཏུ་འཁྲུགས་སོ། །དེའི་ཚེ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། ལྷ་དང་ཀླུ་དང་གནོད་སྦྱིན་དང་། དྲི་ཟ་དང་ལྷ་མ་ཡིན་དང་ནམཁའ་ལྡིང་དང་། མི་འམ་
ཅི་དང་ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་དང་། རྒྱལ་ཕྲན་དང་། སྟོབས་ཀྱི་འཁོར་ལོས་སྒྱུར་བ་དང་། གླིང་བཞིའི་འཁོར་ལོས་སྒྱུར་བ་གང་དག་འཁོར་དེར་འདུས་ནས་འཁོད་པར་གྱུར་པ་འཁོར་དང་བཅས་
པ་དེ་དག་ཐམས་ཅད་བཅོམ་ལྡན་འདས་ལ་ལྟ་ཞིང་འཁོད་དེ་ངོ་མཚར་དུ་གྱུར། རྨད་དུ་གྱུར། ཤིན་ཏུ་དགའ་བར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་ཀྱི་སྨིན་མཚམས་ཀྱི་མཛོད་སྤུ་ནས་འོད་ཟེར་གཅིག་བྱུང་ནས། 
དེ་ཤར་ཕྱོགས་སུ་སངས་རྒྱས་ཀྱི་ཞིང་ཁྲི་བརྒྱད་སྟོང་དུ་སོང་སྟེ། སངས་རྒྱས་ཀྱི་ཞིང་དེ་དག་ཐམས་ཅད་མནར་མེད་པའི་སེམས་ཅན་དམྱལ་བ་ཆེན་པོ་ཡན་ཆད་སྲིད་པའི་རྩེ་མོ་མན་ཆད་འོད་ཟེར་དེའི་འོད་ཀྱིས་ཤིན་ཏུ་ཁྱབ་
པར་སྣང་ངོ་། །སངས་རྒྱས་ཀྱི་ཞིང་དེ་དག་གི་འགྲོ་བ་དྲུག་པོ་དེ་དག་ན་སེམས་ཅན་གང་ཡོད་པ་དེ་དག་ཐམས་ཅད་མ་ལུས་པར་སྣང་ངོ་། །སངས་རྒྱས་ཀྱི་ཞིང་དེ་དག་ན་སངས་རྒྱས་བཅོམ་ལྡན་འདས་གང་དག་བཞུགས་ཤིང་
འཚོ་གཞེས་པ་དེ་དག་ཐམས་ཅད་ཀྱང་སྣང་ངོ་། །སངས་རྒྱས་བཅོམ་ལྡན་འདས་དེ་དག་ཆོས་གང་འཆད་པ་དེ་དག་ཐམས་ཅད་ཀྱང་མ་ལུས་པར་གྲག་གོ། །སངས་རྒྱས་ཀྱི་ཞིང་དེ་དག་ན་དགེ་སློང་དང་དགེ་སློང་མ་དང་། དགེ་བསྙེན་
དང་དགེ་བསྙེན་མ་དང་། རྣལ་འབྱོར་ཅན་དང་། རྣལ་འབྱོར་སྤྱོད་པ་གང་དག་འབྲས་བུ་ཐོབ་པ་དང་། འབྲས་བུ་མ་ཐོབ་པ་དེ་དག་ཐམས་ཅད་ཀྱང་སྣང་ངོ་། །སངས་རྒྱས་ཀྱི་ཞིང་དེ་དག་ན། བྱང་ཆུབ་སེམས་དཔའ་སེམས་
དཔའ་ཆེན་པོ་གང་དག་ཉན་པ་དང་། དམིགས་པ་དང་། མོས་པ་རྣམ་པ་སྣ་ཚོགས་དུ་མའི་རྒྱུའི་ཐབས་མཁས་པ་དག་གིས་བྱང་ཆུབ་སེམས་དཔའི་སྤྱད་པ་སྤྱོད་པ་དེ་དག་ཐམས་ཅད་ཀྱང་སྣང་ངོ་། །སངས་རྒྱས་ཀྱི་ཞིང་དེ་དག་ན། 

46-1-4b

སངས་རྒྱས་བཅོམ་ལྡན་འདས་གང་དག་ཡོངས་སུ་མྱ་ངན་ལས་འདའ་བ་དེ་དག་ཐམས་ཅད་ཀྱང་སྣང་ངོ་། །སངས་རྒྱས་ཀྱི་ཞིང་དེ་དག་ན། སངས་རྒྱས་བཅོམ་ལྡན་འདས་གང་དག་ཡོངས་སུ་མྱ་ངན་ལས་འདས་པ་རྣམས་ཀྱི་རིང་
བསྲེལ་གྱི་མཆོད་རྟེན་རིན་པོ་ཆེ་ལས་བྱས་པ་དེ་དག་ཐམས་ཅད་ཀྱང་སྣང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་སྙམ་དུ་སེམས་ཏེ། ཀྱེ་མ་དེ་བཞིན་གཤེགས་པས་ལྟས་ཆོ་འཕྲུལ་
ཆེན་པོ་བསྟན་པ་འདི་འདིར་ཅིའི་རྒྱུར་འགྱུར་ཞིག་གུ། ཅིའི་ཕྱིར་བཅོམ་ལྡན་འདས་ཀྱིས་ལྟས་ཆོ་འཕྲུལ་ཆེན་པོ་འདི་ལྟ་བུ་འདི་བསྟན་ཏེ། བཅོམ་ལྡན་འདས་ཀྱང་ཏིང་ངེ་འཛིན་ལ་སྙོམས་པར་ཞུགས་ཤིང་རྫུ་འཕྲུལ་གྱི་ཆོ་
འཕྲུལ་ཆེན་པོ་ངོ་མཚར་རྨད་དུ་བྱུང་བ་ཆེན་པོས་བསམ་གྱིས་མི་ཁྱབ་པ་འདི་ལྟ་བུ་འདི་དག་ཀྱང་སྣང་བར་གྱུར་པ་འདིའི་དོན་བདག་གིས་སུ་ལ་དྲི་འདི་ན་དོན་འདིའི་ལན་ལྡོན་ནུས་པ་ནི་སུ་ཡོད་སྙམ་མོ། །དེ་ཡང་འདི་སྙམ་དུ་འཇམ་དཔལ་
གཞོན་ནུར་གྱུར་པ་འདི་སྔོན་གྱི་རྒྱལ་བ་རྣམས་ལ་ལྷག་པར་བྱ་བ་བྱས་པ། དགེ་བའི་རྩ་བ་བསྐྱེད་པ། སངས་རྒྱས་མང་པོ་ལ་བསྙེན་བཀུར་བྱས་པ་སྟེ། འཇམ་དཔལ་གཞོན་ནུར་གྱུར་པ་འདིས་སྔོན་ཆད་ཀྱང་སྔོན་གྱི་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ལྟས་འདི་ལྟ་བུ་བྱུང་བ་རྣམས་མཐོང་ཞིང་སྔོན་ཆད་ཆོས་ཆེན་པོའི་འབེལ་བའི་གཏམ་དག་ཀྱང་མྱོང་བས་ན། བདག་གིས་འཇམ་དཔལ་
གཞོན་ནུར་གྱུར་པ་ལ་དེའི་དོན་དྲིའོ་སྙམ་དུ་སེམས་སོ། །དགེ་སློང་དང་དགེ་སློང་མ་དང་། དགེ་བསྙེན་དང་དགེ་བསྙེན་མའི་འཁོར་བཞི་པོ་དེ་དག་དང་། ལྷ་དང་ཀླུ་དང་གནོད་སྦྱིན་དང་། དྲི་ཟ་དང་ལྷ་མ་ཡིན་དང་། ནམཁའ་ལྡིང་དང་། 
མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་མང་པོ་དེ་དག་ཀྱང་། བཅོམ་ལྡན་འདས་ཀྱི་ལྟས་ཀྱི་རྫུ་འཕྲུལ་གྱི་ཆོ་འཕྲུལ་ཆེན་པོའི་སྣང་བ་འདི་ལྟ་བུ་འདི་མཐོང་ནས། ངོ་མཚར་དུ་གྱུར་རྨད་དུ་གྱུར་ལྟད་མོར་གྱུར་ཏེ། 

46-1-5a

འདི་སྙམ་དུ། བཅོམ་ལྡན་འདས་ཀྱིས་རྫུ་འཕྲུལ་གྱི་ཆོ་འཕྲུལ་ཆེན་པོའི་སྣང་བ་འདི་ལྟ་བུ་འདི་བསྟན་པ་བདག་ཅག་གིས་སུ་ལ་དྲི་སྙམ་དུ་སེམས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་
བྱམས་པས་སྐད་ཅིག་ཐང་ཅིག་ཡུད་ཙམ་དེ་ཉིད་ལ་འཁོར་བཞི་པོ་རྣམས་ཀྱི་སེམས་ཀྱི་རྣམ་པར་རྟོག་པ་སེམས་ཀྱི་ཤེས་ནས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་བཅོམ་ལྡན་
འདས་ཀྱིས་ལྟས་ངོ་མཚར་རྨད་དུ་བྱུང་བ་རྫུ་འཕྲུལ་གྱི་སྣང་བ་འདི་ལྟ་བུ་འདི་བསྟན་ཏེ། སངས་རྒྱས་ཀྱི་ཞིང་ཁྲི་བརྒྱད་སྟོང་པོ་འདི་དག་རྣམ་པར་བཀྲ་བ། མཆོག་ཏུ་ལྟ་ན་སྡུག་པ། དེ་བཞིན་གཤེགས་པ་སྔོན་དུ་བཞུད་པ། 
དེ་བཞིན་གཤེགས་པ་ཡོངསུ་འདྲེན་པར་སྣང་བ་འདིའི་རྒྱུ་གང་རྐྱེན་གང་། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འཇམ་དཔལ་གཞོན་ནུར་གྱུར་པ་ལ་ཚིགས་སུ་བཅད་པ་འདི་དག་སྨྲས་སོ། །
འཇམ་དཔལ་ཅི་ཡི་ཕྱིར་ན་འདི་ལྟ་བུ། །མི་ཡི་མགོན་པོས་འོད་ཟེར་གཅིག་པོ་འདི། །ཞལ་གྱི་སྨིན་མཚམས་ཀྱི་ནི་མཛོད་སྤུ་ནས། །ཤིན་ཏུ་སྣང་བའི་འོད་ཟེར་རབ་ཏུ་བཏང་། །ལྷ་རྣམས་དགའ་བས་ཙན་དན་ཕྱེ་མ་དང་། །ལྷ་ཡི་སྤོས་རབ་ཡིད་དུ་འོང་བ་
དང་། །མན་དཱ་ར་དང་མཉྫུ་ཥ་ཀ་ཡི། །མེ་ཏོག་དག་གི་ཆར་ཆེན་རབ་ཏུ་ཕབ། །དེས་ནི་ས་འདི་ཀུན་ཏུ་མཛེས་གྱུར་ཅིང་། །འཁོར་བཞི་འདི་དག་དགའ་བ་རབ་ཏུ་ཐོབ། །ཞིང་རྣམས་འདི་དག་ཐམས་ཅད་རྣམ་དྲུག་ཏུ། །ཤིན་ཏུ་འཇིགས་པའི་གཟུགས་
སུ་ཀུན་ནས་གཡོས། །འོད་ཟེར་དེ་ཡིས་ཤར་གྱི་ཕྱོགས་ལོགས་ཀྱི། །ཞིང་ནི་སྟོང་ཕྲག་བཅྭ་བརྒྱད་ཚང་བ་རྣམས། །སྐད་ཅིག་གཅིག་གིས་ཐམས་ཅད་རབ་ཏུ་སྣང་། །ཞིང་རྣམས་གསེར་གྱི་ཁ་དོག་བཞིན་དུ་མཛེས། །མནར་མེད་ཡན་ཆད་
སྲིད་པའི་རྩེ་མོའི་བར། །ཞིང་དེ་དག་ན་སེམས་ཅན་ཇི་སྙེད་པ། །འགྲོ་བ་དྲུག་པོ་དེ་ན་ཡོད་པ་རྣམས། །གང་དག་དེར་ཡང་ཤི་འཕོ་སྐྱེ་བ་རྣམས། །དེ་དག་ལས་ཀྱི་རྣམ་པ་སྣ་ཚོགས་དང་། །འགྲོ་བ་བདེ་དང་མི་བདེ་རྣམས་ཀྱང་སྣང་། །བཟང་པོ་ངན་པ་

46-1-5b

དེ་བཞིན་བར་མ་ཡང་། །འདི་ན་འདུག་ཀྱང་དེ་དག་ཐམས་ཅད་མཐོང་། །སངས་རྒྱས་སེང་གེ་མི་ཡི་དབང་པོ་རྣམས། །ཆོས་ཉིད་རབ་སྟོན་རྣམ་པར་དབྱེ་བ་མཐོང་། །སེམས་ཅན་བྱེ་བ་མང་ལ་རབ་སྟོན་པ། །སྙན་པའི་སྒྲ་དང་དབྱངས་སུ་གསུང་བ་དག །
ཟབ་ཅིང་རྒྱ་ཆེ་རྨད་དུ་བྱུང་བའི་སྒྲ། །སོ་སོའི་ཞིང་རྣམས་སུ་ཡང་རབ་ཏུ་འབྱིན། །དཔེ་དང་གཏན་ཚིགས་ཁྲག་ཁྲིག་བྱེ་བ་ཡིས། །སངས་རྒྱས་ཆོས་འདིར་རབ་ཏུ་སྟོན་པ་ནི། །སེམས་ཅན་གང་རྣམས་སྡུག་བསྔལ་གཟིར་བ་དག །སྐྱེ་དང་རྒ་བས་ཡིད་
སྐྱོ་མི་ཤེས་ལ། །འདི་ནི་དགེ་སློང་སྡུག་བསྔལ་ཐ་མ་ཞེས། །དེ་ལ་རབ་ཞི་མྱ་ངན་འདས་པ་སྟོན། །མི་རྣམས་གང་གིས་རྒྱ་ཆེ་མཐུ་ཐོབ་ཅིང་། །སངས་རྒྱས་མཐོང་བས་དེ་བཞིན་བསོད་ནམས་ལྡན། །དེ་དག་ལ་ནི་ཆོས་ཚུལ་འདི་བརྗོད་ཅིང་། །རང་རྒྱལ་
ཐེག་པ་ཡང་ནི་སྟོན་པ་མཛད། །གཞན་ཡང་བདེ་བར་གཤེགས་པའི་སྲས་པོ་གང་། །བླ་ན་མེད་པ་ཡེ་ཤེས་ཚོལ་བ་དག །བྱ་བ་སྣ་ཚོགས་རྟག་ཏུ་བྱེད་པ་ལ། །དེ་དག་ལ་ནི་བྱང་ཆུབ་ཕྱིར་བསྔགས་གསུང་། །འདི་ན་འདུག་བཞིན་དེ་ན་འདི་འདྲ་དང་། །
ཁྱད་པར་གཞན་ཡང་སྟོང་ཕྲག་བྱེ་བ་དག །ཤིན་ཏུ་མཐོང་ཞིང་ཐོས་ཏེ་འཇམ་པའི་དབྱངས། །དེ་དག་ལས་ནི་ཕྱོགས་ཙམ་སྨོས་པར་བྱ། །བདག་མཐོང་ཞིང་རྣམས་མང་པོ་དེ་དག་ན་འང་། །བྱང་ཆུབ་སེམས་དཔའ་གང་གཱའི་བྱེ་མ་སྙེད། 
གང་རྣམས་བྱེ་བ་སྟོང་ཕྲག་མི་ཉུང་བ། །བརྩོན་འགྲུས་རྣམ་པ་མང་པོས་བྱང་ཆུབ་སྐྱེད། །ལ་ལ་སྦྱིན་པ་སྦྱིན་པ་འང་དེ་བཞིན་ཏེ། །ནོར་དང་གྲོན་བུ་གསེར་དང་དངུལ་རྣམས་དང་། །མུ་ཏིག་ནོར་བུ་མན་ཤེལ་བྱི་རུ་དང་། །བྲན་ཕོ་བྲན་མོ་རྟ་དང་ཤིང་
རྟ་ལུག །དེ་བཞིན་རིན་ཆེན་དག་གིས་བརྒྱན་པའི་ཁྱོགས། །ཡོངས་སུ་དགའ་བའི་ཡིད་ཀྱིས་སྦྱིན་པ་གཏོང་། །བདག་ཅག་གིས་ཀྱང་ཐེག་པ་ཐོབ་ཤོག་ཅེས། །བྱང་ཆུབ་མཆོག་འདིར་ཡོངསུ་བསྔོ་བར་བྱ། །སྦྱིན་པ་འདི་འདྲ་འདི་དག་བྱིན་བྱས་
ན། ཁམས་གསུམ་ནང་ན་ཐེག་མཆོག་ཁྱད་པར་ཅན། །སངས་རྒྱས་ཐེག་པ་བདེ་གཤེགས་གང་བསྔགས་པ། །དེ་ནི་བདག་གིས་མྱུར་དུ་ཐོབ་གྱུར་ཅིག །ལ་ལ་རྟ་བཞི་ཅན་གྱི་ཤིང་རྟ་ལ། ཁ་ཁྱེར་བཅས་པ་མེ་ཏོག་རྒྱལ་མཚན་

46-1-6a

བརྒྱན། །རིན་ཆེན་དག་ལས་བྱས་པའི་བ་དན་ཅན། །ལ་ལས་དེ་ལྟ་བུ་ཡང་སྦྱིན་པ་བྱིན། །དེ་བཞིན་བུ་དང་ཆུང་མ་རྣམས་ཀྱང་བྱིན། །ལ་ལ་ཕངས་པའི་ཤ་ཡང་སྦྱིན་པར་བྱེད། །བྱང་ཆུབ་དམ་པ་འདི་ནི་
ཚོལ་བའི་ཕྱིར། །ལག་པ་དང་ནི་རྐང་པ་བླངས་ན་བྱིན། །ལ་ལ་དག་གིས་མགོ་དང་ལ་ལས་མིག །ལ་ལ་བདག་གི་ལུས་མཆོག་རབ་ཀྱང་གཏོང་། །དང་བའི་སེམས་ཀྱིས་སྦྱིན་པ་རྣམས་བྱིན་ནས། །དེ་བཞིན་
གཤེགས་ཀྱི་ཡེ་ཤེས་དོན་དུ་གཉེར། །འཇམ་དཔལ་བདག་གིས་མཐོང་བ་ལ་ལ་ན། །རྒྱལ་སྲིད་སྐྱིད་པ་རྣམ་པར་སྤངས་བྱས་ཏེ། །བཙུན་མོའི་འཁོར་དང་དེ་བཞིན་གླིང་ཀུན་དང་། །གཉེན་དང་བློན་པོ་ཐམས་ཅད་རྣམ་
སྤངས་ནས། །འཇིག་རྟེན་རྣམ་པར་འདྲེན་གྱི་དྲུང་དོང་སྟེ། །ཞི་བའི་ཕྱིར་ནི་ཆོས་རབ་མཆོག་འདྲི་ཞིང་། །ངུར་སྨྲིག་གོས་རྣམས་རབ་ཏུ་གྱོན་བྱེད་དེ། །སྐྲ་དང་ཁ་སྤུ་དག་ཀྱང་འདྲེག་པར་བྱེད། །བདག་མཐོང་བྱང་ཆུབ་
སེམས་དཔའ་ལ་ལ་ནི། །དགེ་སློང་གྱུར་ཅིང་ནགས་ཚལ་གནས་པ་དག །དགོན་པ་སྟོང་པ་རྣམས་སུ་གནས་འཆའ་ཞིང་། །ལ་ལ་ལུང་ནོད་ཁ་ཏོན་བྱེད་ལ་དགའ། །བདག་མཐོང་བྱང་ཆུབ་སེམས་དཔའ་ལ་ལ་དག །
རི་སུལ་དག་ཏུ་ཞུགས་པའི་བརྟན་པ་རྣམས། །སངས་རྒྱས་ཡེ་ཤེས་འདི་ལ་རྣམ་པར་སྒོམ། །ཡོངས་སུ་སེམས་ཤིང་ཉེ་བར་རྟོགས་པར་བྱེད། ཁ་ཅིག་གིས་ནི་འདོད་པ་མ་ལུས་སྤངས། །ཡོངས་བསྒོམས་
བདག་ཉིད་སྤྱོད་ཡུལ་རྣམ་པར་དག །མངོན་པར་ཤེས་པ་ལྔ་ཡང་དེར་ཐོབ་ནས། །བདེ་བར་གཤེགས་པའི་སྲས་པོ་དགོན་པར་གནས། །བརྟན་པ་ལ་ལ་རྐང་གཤིབས་དེར་གནས་ཏེ། །འདྲེན་པའི་སྤྱན་སྔར་ཐལ་
མོ་སྦྱར་བྱས་ནས། །དགའ་བ་བསྐྱེད་དེ་རྒྱལ་དབང་རྒྱལ་པོ་ལ། །ཚིགས་སུ་བཅད་པ་སྟོང་གིས་མངོན་པར་བསྟོད། །དྲན་དང་ལྡན་ཞིང་དུལ་བ་མི་འཇིགས་པ། །ལ་ལ་སྤྱོད་པ་ཕྲ་བ་ཤེས་པ་དག །རྐང་

46-1-6b

གཉིས་གཙོ་ལ་ཆོས་ཀྱང་འདྲི་བར་བྱེད། །ཐོས་ནས་དེ་དག་ཆོས་རྣམས་འཛིན་པར་འགྱུར། །ཡོངས་བསྒོམས་བདག་ཉིད་རྒྱལ་དབང་སྲས་པོ་རྣམས། །ལ་ལ་དག་གིས་དེ་དང་དེར་མཐོང་བ། །དཔེ་དང་གཏན་ཚིགས་ཁྲག་ཁྲིག་
དུ་མ་ཡིས། །སྲོག་ཆགས་བྱེ་བ་མང་ལ་ཆོས་རྣམས་སྟོན། །མཆོག་ཏུ་དགའ་སྐྱེས་ཆོས་རྣམས་རབ་སྟོན་ཅིང་། །བྱང་ཆུབ་སེམས་དཔའ་མང་པོ་ཡང་དག་འཛུད། །བདུད་རྣམས་སྟོབས་དང་བཞོན་པར་བཅས་བཅོམ་སྟེ། །ཆོས་ཀྱི་རྔ་འདི་
ཤིན་ཏུ་རྡུང་བར་བྱེད། །ལ་ལ་བདེ་བར་གཤེགས་པའི་བསྟན་པ་ལ། །བདེར་གཤེགས་སྲས་ལ་ལྷ་མི་གནོད་སྦྱིན་དང་། །སྲིན་པོས་མཆོད་ཀྱང་ངོ་མཚར་མི་འཛིན་ཅིང་། །སྙེམས་མེད་ཞི་ཞིང་རབ་ཞི་སྤྱོད་པ་མཐོང་། །ཕལ་ཆེར་ནགས་
གནས་དེ་བཞིན་གཞན་དག་ཀྱང་། །སྣང་བའི་འོད་ནི་ལུས་ལས་རབ་གཏོང་སྟེ། །སེམས་ཅན་དམྱལ་ནས་སེམས་ཅན་རྣམས་འདོན་ཅིང་། །དེ་དག་བྱང་ཆུབ་ལ་ཡང་ཡང་དག་འཛུད། །རྒྱལ་བའི་སྲས་པོ་ལ་ལ་བརྩོན་འགྲུས་གནས། །
ཁ་ཅིག་གིས་ཀྱང་མ་ལུས་གཉིད་སྤངས་ནས། །འཆག་པ་བྱེད་ཅིང་ནགས་ཚལ་གནས་པ་དག །དེ་དག་བརྩོན་པས་བྱང་ཆུབ་མཆོག་ལ་ཞུགས། །ལ་ལ་ཚུལ་ཁྲིམས་མ་རལ་སྲུང་བ་ནི། །རྟག་ཏུ་རྣམ་དག་ནོར་བུ་རིན་ཆེན་བཞིན། །
ལ་ལ་སྤྱད་པ་ཡོངས་སུ་རྫོགས་པར་འགྱུར། །དེ་དག་ཁྲིམས་ཀྱིས་བྱང་ཆུབ་མཆོག་ལ་ཞུགས། །རྒྱལ་སྲས་ལ་ལ་བཟོད་པའི་སྟོབས་ཅན་ཏེ། །དགེ་སློང་ང་རྒྱལ་ཅན་དག་ཁྲོ་བ་དང་། །དེ་བཞིན་གཤེ་ཞིང་སྡིག་པ་འང་བཟོད་པར་
བྱེད། །བཟོད་པས་དེ་དག་བྱང་ཆུབ་མཆོག་ལ་ཞུགས། །བདག་མཐོང་བྱང་ཆུབ་སེམས་དཔའ་ལ་ལ་ནི། །རྩེད་མོ་དགའ་བ་ཐམས་ཅད་རྣམ་སྤངས་ཏེ། །བྱིས་པའི་གྲོགས་པོ་རྣམས་ཀྱང་ཡོངས་སྤངས་ནས། །འཕགས་པ་
རྣམས་དང་འགྲོགས་དགའ་མཉམ་པར་གཞག །རྣམ་པར་གཡེང་བའི་སེམས་ནི་རྣམ་སྤངས་ནས། །ལོ་སྟོང་བྱེ་བར་ནགས་དང་རི་སུལ་ན། །རྩེ་གཅིག་སེམས་སུ་བསམ་གཏན་བྱེད་པ་རྣམས། །དེ་དག་བསམ་གཏན་བྱང་ཆུབ་

46-1-7a

མཆོག་ལ་ཞུགས། །དགེ་འདུན་སློབ་བཅས་རྒྱལ་བ་མངོན་སུམ་དུ། །བཟའ་དང་བཅའ་དང་དེ་བཞིན་ཟས་དང་སྐོམ། །ན་བའི་སྨན་ནི་མི་ཉུང་མང་པོ་དག །ཁ་ཅིག་དེ་ལྟར་སྦྱིན་པ་སྦྱིན་པར་བྱེད། །དགེ་འདུན་སློབ་བཅས་
རྒྱལ་བ་མངོན་སུམ་དུ། །དེ་དག་གོས་བརྒྱ་བྱེ་བ་སྦྱིན་པར་བྱེད། །ལ་ལ་སྟོང་ཕྲག་བྱེ་བ་བརྒྱ་རི་དང་། །རིན་ཐང་མེད་པའི་གོས་རྣམས་རབ་ཏུ་འབུལ། །རིན་པོ་ཆེ་དང་དེ་བཞིན་ཙན་དན་གྱི། །གཙུག་ལག་ཁང་ནི་བྱེ་བ་བརྒྱ་བྱས་ནས། །
སྟན་དང་མལ་ཆ་མང་པོས་བརྒྱན་པ་རྣམས། །བདེ་བར་གཤེགས་པ་རྣམས་ལ་མངོན་སུམ་འབུལ། །ཀུན་དགའ་ར་བ་ཡིད་འོང་གཙང་མ་རྣམས། །མེ་ཏོག་འབྲས་བུ་སྣ་ཚོགས་ལྡན་པ་དག །སྐྱེས་བུ་ཁྱུ་མཆོག་ཉན་ཐོས་བཅས་
པ་ལ། །ལ་ལ་ཉིན་པར་ཞུགས་ཕྱིར་རབ་ཏུ་འབུལ། །དགའ་བ་སྐྱེས་ནས་སྣ་ཚོགས་རྣམ་མང་པོ། །དེ་ལྟ་བུ་ཡི་སྦྱིན་པ་སྦྱིན་པར་བྱེད། །བྱིན་ནས་བྱང་ཆུབ་ཕྱིར་ཡང་བརྩོན་འགྲུས་བསྐྱེད། །སྦྱིན་པས་དེ་དག་བྱང་ཆུབ་མཆོག་ལ་
ཞུགས། །ལ་ལ་ཞི་བའི་ཆོས་ཀྱང་རབ་འཆད་དེ། །དཔེ་དང་གཏན་ཚིགས་ཁྲག་ཁྲིག་དུ་མ་ཡིས། །དེ་དག་སྲོག་ཆགས་བྱེ་བ་སྟོང་ལ་སྟོན། །དེ་དག་ཡེ་ཤེས་བྱང་ཆུབ་མཆོག་ལ་ཞུགས། །བྱེད་པ་མེད་པའི་ཆོས་རབ་ཤེས་པ་
ནི། །གཉིས་མེད་རབ་ཞུགས་ནམཁའ་མཚུངས་འདྲ་བ། །མ་ཆགས་བདེ་བར་གཤེགས་པའི་སྲས་པོ་རྣམས། །དེ་དག་ཤེས་རབ་བྱང་ཆུབ་མཆོག་ལ་ཞུགས། །བདག་གིས་གཞན་ཡང་མཐོང་བ་འཇམ་པའི་དབྱངས། །བདེར་གཤེགས་
མྱ་ངན་འདས་པའི་བསྟན་པ་ལ། །བྱང་ཆུབ་སེམས་དཔའ་བརྟན་པ་མང་བྱུང་ནས། །རྒྱལ་བའི་རིང་བསྲེལ་དག་ལ་རིམ་གྲོ་བྱེད། །མཆོད་རྟེན་བྱེ་བ་སྟོང་ཕྲག་མི་ཉུང་བ། །ཇི་ལྟར་གང་གཱའི་ཀླུང་གི་བྱེ་མ་བཞིན། །གང་གིས་བྱེ་བ་
ཞིང་རྣམས་རྟག་བརྒྱན་པ། །རྒྱལ་སྲས་དེ་དག་བྱེད་དུ་འཇུག་པ་མཐོང་། །རིན་ཆེན་སྣ་བདུན་མཆོག་གི་རྒྱལ་མཚན་གདུགས། །དེ་ན་བྱེ་བ་སྟོང་རྣམས་བསྒྲེང་བ་ནི། །འཕང་དུ་དཔག་ཚད་ལྔ་སྟོང་ཕྱིན་པ་སྟེ། །ཁོར་ཡུག་ཏུ་ནི་དཔག་ཚད་

46-1-7b

ཉིས་སྟོང་ཡོད། །རྣམ་རྒྱལ་བ་དན་བཅས་པ་ཁོར་མོར་མཛེས། །དྲིལ་དང་དྲིལ་བུ་གཡེར་ཁ་རྟག་ཏུ་འཁྲོལ། །མེ་ཏོག་དྲི་དང་དེ་བཞིན་སིལ་སྙན་གྱིས། །ལྷ་མི་སྲིན་པོ་གནོད་སྦྱིན་རྣམས་ཀྱིས་མཆོད། །ཡོངས་འདུས་ཤིང་
གི་མེ་ཏོག་རྒྱས་པ་བཞིན། །དེ་ལྟར་ཕྱོགས་བཅུ་དེ་དག་མཛེས་བྱས་ཏེ། །རྒྱལ་བའི་རིང་བསྲེལ་དག་ལ་འདི་འདྲ་འདིར། །བདེ་གཤེགས་སྲས་ཀྱིས་མཆོད་པ་བྱེད་དུ་བཙུད། །རྒྱལ་བས་འོད་ཟེར་གཅིག་པུ་འདི་བཏང་
བས། །ལྷར་བཅས་འཇིག་རྟེན་འདི་དག་རབ་རྒྱས་པ། །བདག་དང་སྲོག་ཆགས་བྱེ་བ་མང་པོ་འདིས། །འདི་ན་འདུག་བཞིན་དེ་དག་ཐམས་ཅད་མཐོང་། །གང་གིས་འོད་ཟེར་གཅིག་པ་དེར་བཏང་བས། །ཞིང་རྣམས་སྟོང་ཕྲག་མང་
པོར་སྟོན་པ་དེ། །ཀྱེ་མ་སྐྱེས་བུ་ཁྱུ་མཆོག་དེ་ཡི་མཐུ། །ཀྱེ་མ་ཡེ་ཤེས་རྒྱ་ཆེ་ཟག་མེད་དོ། །རྨད་དུ་བྱུང་བ་ཚད་མེད་འདི་འདྲ་བའི། །ལྟས་རྣམས་མཐོང་ནས་བདག་ཅག་ངོ་མཚར་གྱུར། །འདི་ཡི་དོན་རྣམས་འཇམ་དབྱངས་རབ་སྟོན་ཏེ། །
སངས་རྒྱས་སྲས་རྣམས་ཐེ་ཙོམ་གྱུར་པ་སོལ། །འཁོར་བཞི་འདི་དག་རབ་ཏུ་དགའ་སེམས་ཀྱིས། །དཔའ་བོ་ཁྱོད་དང་བདག་ལ་མངོན་པར་ལྟ། །བདེ་བར་གཤེགས་པས་དེ་རིང་ཅི་ཡི་ཕྱིར། །སྣང་བ་འདི་འདྲ་འདི་ནི་རབ་ཏུ་
བཏང་། །བདེ་གཤེགས་སྲས་པོ་ཁྱོད་ཀྱིས་ལུང་སྟོན་ལ། །དགའ་བ་སྐྱེད་ཅིང་ཐེ་ཙོམ་རྣམ་པར་སོལ། །འདི་ལྟར་འོད་ཟེར་རྒྱ་ཆེན་རབ་བཏང་བ། །དེ་དག་ཅི་འདྲའི་དོན་དུ་འགྱུར་བ་ཞིག །བདེ་བར་གཤེགས་པ་སྐྱེས་བུ་དམ་པ་ཡིས། །
བྱང་ཆུབ་སྙིང་པོར་ཆོས་མཆོག་གང་བརྙེས་པ། །དེ་དག་འཇིག་རྟེན་མགོན་པོ་འདིར་འཆད་དམ། །བྱང་ཆུབ་སེམས་དཔའ་འདི་དག་ལུང་སྟོན་ཏམ། །ཞིང་རྣམས་སྟོང་ཕྲག་དུ་མ་གང་བསྟན་པ། །སྣ་ཚོགས་རབ་ཏུ་བཀྲ་བ་རིན་
ཆེན་བརྒྱན། །མཐའ་ཡས་སྤྱན་ཅན་སངས་རྒྱས་རྣམས་སྣང་བ། །འདི་ནི་མི་ཆུད་རྒྱུར་འགྱུར་གོར་མ་ཆག །རྒྱལ་བའི་སྲས་ལ་བྱམས་པས་ཀུན་དྲིས་ནས། །ལྷ་མི་གནོད་སྦྱིན་སྲིན་པོ་དེ་དག་དགའ། །འཇམ་དབྱངས་འདིར་ནི་ཅི་

46-1-8a

ཞིག་ལུང་སྟོན་ཅེས། །འཁོར་རྣམས་བཞི་པོ་དེ་དག་ཤིན་ཏུ་སྡོད། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། ཐམས་ཅད་དང་ལྡན་པའི་བྱང་ཆུབ་སེམས་
དཔའི་ཚོགས་དེ་ལ་སྨྲས་པ། རིགས་ཀྱི་བུ་དག་འདི་ནི་དེ་བཞིན་གཤེགས་པ་ཆོས་ཆེན་པོ་བསྒྲགས་པའི་འབེལ་བའི་གཏམ་མཛད་པར་དགོངས་པའོ། །རིགས་ཀྱི་བུ་དག་འདི་ནི་དེ་བཞིན་གཤེགས་པས་ཆོས་ཀྱི་ཆར་ཆེན་
པོ་མངོན་པར་འབབ་པ་དང་། ཆོས་ཀྱི་རྔ་ཆེན་པོ་རབ་ཏུ་རྡུང་བ་དང་། ཆོས་ཀྱི་རྒྱལ་མཚན་ཆེན་པོ་བསྒྲེང་བ་དང་། ཆོས་ཀྱི་སྒྲོན་མ་ཆེན་པོ་རབ་ཏུ་འབར་བར་མཛད་པ་དང་། ཆོས་ཀྱི་དུང་ཆེན་པོ་རབ་ཏུ་འབུད་པ་དང་། ཆོས་ཀྱི་རྔ་བོ་ཆེ་ཆེན་
པོ་རབ་ཏུ་རྡུང་བ་དང་། ཆོས་བསྟན་པ་ཆེན་པོ་མཛད་པར་དགོངས་པ་སྟེ། རིགས་ཀྱི་བུ་དག་བདག་ཇི་ལྟར་སྤོབས་པ་དང་། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྔ་
ལྟས་འདི་ལྟ་བུ་འདི་བདག་གིས་མཐོང་སྟེ། སྔོན་གྱི་དེ་བཞིན་གཤེགས་པ་དེ་དག་གིས་ཀྱང་། འོད་ཟེར་གྱི་སྣང་བ་འདི་བཏང་བས། བདག་ནི་འདི་ལྟར་དེ་བཞིན་གཤེགས་པ་ཡང་ཆོས་ཆེན་པོ་བསྒྲག་པའི་འབེལ་བའི་
གཏམ་མཛད་པར་བཞེད་པ་དང་། ཆོས་ཆེན་པོ་བསྒྲག་པ་ཐོས་པར་མཛད་བཞེད་པས་འདི་ལྟ་བུའི་སྔ་ལྟས་འདི་མཛད་པ་སྙམ་བྱེད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་འཇིག་རྟེན་ཐམས་ཅད་དང་མི་མཐུན་པའི་ཆོས་ཀྱི་རྣམ་གྲངས་བསྒྲག་པར་བཞེད་པས་སྔ་ལྟས་ཆོ་འཕྲུལ་ཆེན་པོ་འོད་ཟེར་རབ་ཏུ་བཏང་བའི་སྣང་བ་འདི་ལྟ་བུ་འདི་སྟོན་ཏོ། །རིགས་ཀྱི་བུ་དག་བདག་གིས་དྲན་
པའི་དུས་ན་བསྐལ་པ་གྲངས་མེད་པའི་ཡང་ཆེས་གྲངས་མེད་པ་ཡངས་པ་དཔག་ཏུ་མེད་པ་བསམ་གྱིས་མི་ཁྱབ་པ་དཔག་གིས་མི་ལང་བ་ཚད་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ཏུ་གྱུར་པ་དེའི་ཚེ་དེའི་དུས་ན། 

46-1-8b

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་
སངས་རྒྱས་བཅོམ་ལྡན་འདས་ཉི་ཟླ་སྒྲོན་མ་ཞེས་བྱ་བ་འཇིག་རྟེན་དུ་བྱུང་སྟེ། དེས་ཆོས་བསྟན་པ་ཚངས་པར་སྤྱོད་པ་ཐོག་མར་དགེ་བ་བར་དུ་དགེ་བ་ཐ་མར་དགེ་བ་དོན་བཟང་པོ་ཚིག་འབྲུ་བཟང་པོ་མ་འདྲེས་པ་ཡོངས་སུ་རྫོགས་པ་ཡོངས་
སུ་དག་པ་ཡོངས་སུ་བྱང་བ་ཡང་དག་པར་སྟོན་ཏེ་འདི་ལྟ་སྟེ། ཉན་ཐོས་རྣམས་ལ་ནི་སྐྱེ་བ་དང་རྒ་བ་དང་། ན་བ་དང་འཆི་བ་དང་། མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་འཁྲུག་པ་ལས་ཤིན་ཏུ་
བཟླ་བའི་ཕྱིར། མྱ་ངན་ལས་འདས་པའི་མཐར་ཐུག་པ་འཕགས་པའི་བདེན་པ་བཞི་དང་ལྡན་པ། རྟེན་ཅིང་འབྲེལ་པར་འབྱུང་བ་ལ་འཇུག་པའི་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ལ་བརྩམས་ཏེ། ཕ་རོལ་ཏུ་ཕྱིན་པ་དྲུག་དང་ལྡན་པ་ཐམས་ཅད་མཁྱེན་པའི་ཡེ་ཤེས་ཀྱི་མཐར་ཐུག་པའི་ཆོས་སྟོན་ཏོ། །རིགས་ཀྱི་བུ་དག་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་ཉི་ཟླ་སྒྲོན་མ་དེའི་ཕ་རོལ་གྱི་ཡང་ཆེས་ཕ་རོལ་ན། ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་ཞེས་བྱ་བ་ཞིག་འཇིག་རྟེན་དུ་བྱུང་སྟེ་
མ་ཕམ་པ་འདི་ལྟར་སྔ་རོལ་དང་སྔ་རོལ་བརྗོད་པའི་ཚུལ་འདིས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་ཞེས་བྱ་བར་མཚན་གཅིག་པ་རིགས་དང་
གདུང་གཅིག་པ་ཤ་སྟག་སྟེ། འདི་ལྟར་བྷ་ར་དྭཱ་ཛའི་རིགས་སུ་འཐུན་པ་དེ་བཞིན་གཤེགས་པ་ཉི་ཁྲི་བྱུང་ངོ་། །མ་ཕམ་པ་དེ་ལ་དེ་བཞིན་གཤེགས་པ་ཉི་ཁྲི་པོ་དེ་དག་ཐོག་མའི་དེ་བཞིན་

46-1-9a

གཤེགས་པ་ནས་ཐ་མའི་དེ་བཞིན་གཤེགས་པའི་བར་དུ་དེ་དག་གིས་ཆོས་བཤད་པ་ཡང་། ཚངས་པར་སྤྱོད་པ་ཐོག་མར་དགེ་བ་བར་དུ་དགེ་བ་ཐ་མར་དགེ་བ་དོན་བཟང་པོ་ཚིག་འབྲུ་བཟང་པོ་མ་འདྲེས་པ་ཡོངས་སུ་
རྫོགས་པ་ཡོངས་སུ་དག་པ་ཡོངས་སུ་བྱང་བ་ཡང་དག་པར་སྟོན་ཏེ་འདི་ལྟ་སྟེ། ཉན་ཐོས་རྣམས་ལ་ནི་སྐྱེ་བ་དང་རྒ་བ་དང་ན་བ་དང་འཆི་བ་དང་། མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་
འཁྲུག་པ་ལས་ཤིན་ཏུ་བཟླ་བའི་ཕྱིར། །མྱ་ངན་ལས་འདས་པའི་མཐར་ཐུག་པ་འཕགས་པའི་བདེན་པ་བཞི་དང་ལྡན་པ་རྟེན་ཅིང་འབྲེལ་པར་འབྱུང་བ་ལ་འཇུག་པའི་ཆོས་སྟོན་ཏོ། །བྱང་ཆུབ་སེམས་དཔའ་སེམས་
དཔའ་ཆེན་པོ་རྣམས་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བརྩམས་ཏེ། ཕ་རོལ་ཏུ་ཕྱིན་པ་དྲུག་དང་ལྡན་པ་ཐམས་ཅད་མཁྱེན་པའི་ཡེ་ཤེས་ཀྱི་མཐར་ཐུག་པའི་ཆོས་སྟོན་ཏོ། །མ་ཕམ་པ་འདི་ལྟར་
ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་དེ་སྔོན་གཞོན་ནུར་གྱུར་ཅིང་ཁབ་ན་བཞུགས་པ་ལས་མངོན་པར་མ་བྱུང་བའི་ཚེ་སྲས་བརྒྱད་ཡོད་པར་
གྱུར་ཏེ་འདི་ལྟ་སྟེ། རྒྱལ་བུ་གཞོན་ནུ་བློ་གྲོས་ཤེས་བྱ་བ་དང་། བཟང་པོའི་བློ་གྲོས་དང་། མཐའ་ཡས་བློ་གྲོས་དང་། དཀོན་མཆོག་བློ་གྲོས་དང་། ཁྱད་པར་བློ་གྲོས་དང་། ཐེ་ཙོམ་ཀུན་བཅོམ་དང་། དབྱངས་
ཀྱི་བློ་གྲོས་དང་། རྒྱལ་བུ་གཞོན་ནུ་ཆོས་ཀྱི་བློ་གྲོས་ཤེས་བྱ་བ་ཡོད་དོ། །མ་ཕམ་པ་བཅོམ་ལྡན་འདས་ཉི་ཟླ་སྒྲོན་མ་དེའི་སྲས་རྒྱལ་བུ་གཞོན་ནུ་བརྒྱད་པོ་དེ་དག་རྫུ་འཕྲུལ་ཆེན་པོར་གྱུར་ཏེ། དེ་དག་རེ་རེ་ཡང་
གླིང་ཆེན་པོ་བཞི་ལ་ཀུན་ཏུ་ལོངས་སྤྱོད་པར་གྱུར་ཅིང་དེ་དག་ན་རྒྱལ་པོ་བྱེད་དོ། །དེ་དག་གིས་བཅོམ་ལྡན་འདས་དེ་ཁབ་ནས་མངོན་པར་བྱུང་བར་ཤེས་ཤིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་

46-1-9b

མངོན་པར་རྫོགས་པར་སངས་རྒྱས་པར་ཐོས་ནས། རྒྱལ་པོའི་ལོངས་སྤྱོད་ཐམས་ཅད་སྤངས་ཏེ། བཅོམ་ལྡན་འདས་དེའི་རྗེས་སུ་རབ་ཏུ་བྱུང་ནས་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་ཡང་དག་པར་ཞུགས་ཏེ་ཆོས་སྨྲ་བར་གྱུར་ཏོ། །རྒྱལ་བུ་གཞོན་ནུ་དེ་དག་རྟག་ཏུ་ཚངས་པར་སྤྱོད་ཅིང་སངས་རྒྱས་བརྒྱ་སྟོང་མང་པོ་ལ་དགེ་བའི་རྩ་བ་བསྐྱེད་པར་གྱུར་ཏོ། །མ་ཕམ་པ་དེའི་ཚེ་ན་ཡང་བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་དེས། ངེས་པར་བསྟན་པ་ཆེན་པོ་ཞེས་བྱ་བའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ་བྱང་ཆུབ་
སེམས་དཔའ་རྣམས་ལ་གདམས་པ་སངས་རྒྱས་ཐམས་ཅད་ཀྱིས་ཡོངས་སུ་བཟུང་བ་བཤད་ནས། དེའི་ཚེ་སྐད་ཅིག་ཐང་ཅིག་ཡུད་ཙམ་དེ་ཉིད་ལ་འཁོར་འདུས་པ་དེ་ཉིད་དུ་ཆོས་ཀྱི་གདན་ཆེན་པོ་དེ་ཉིད་ལ་སྐྱིལ་མོ་
དཀྲུང་བཅས་ཏེ། མཐའ་ཡས་ངེས་པར་བསྟན་པའི་གནས་ཤེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་སྐུ་མི་གཡོ་ཞིང་སེམས་མི་གཡོ་བར་གྱུར་ནས་བཞུགས་སོ། །བཅོམ་ལྡན་འདས་དེ་
སྙོམས་པར་ཞུགས་མ་ཐག་ཏུ། བཅོམ་ལྡན་འདས་ལ་མེ་ཏོག་མན་དཱ་ར་བ་དང་མན་དཱ་ར་བ་ཆེན་པོ་དང་། མཉྫུ་ཥ་ཀ་དང་། མཉྫུ་ཥ་ཀ་ཆེན་པོ་དང་། ལྷའི་མེ་ཏོག་དག་གི་ཆར་ཆེན་པོ་མངོན་པར་བབ་སྟེ། 
བཅོམ་ལྡན་འདས་འཁོར་དང་བཅས་པ་ལ་མངོན་པར་འཐོར་རོ། །ཐམས་ཅད་དང་ལྡན་པའི་སངས་རྒྱས་ཀྱི་ཞིང་ཡང་རྣམ་པ་དྲུག་ཏུ་རབ་ཏུ་གཡོས་པར་གྱུར་ཏེ། འགུལ་ཀུན་ཏུ་རབ་ཏུ་འགུལ། 
ལྡེག་ཀུན་ཏུ་རབ་ཏུ་ལྡེག །འཁྲུགས་ཀུན་ཏུ་རབ་ཏུ་འཁྲུགས་སོ། །མ་ཕམ་པ་ཡང་དེའི་ཚེ་འཁོར་དེར་དགེ་སློང་དང་དགེ་སློང་མ་དང་། དགེ་བསྙེན་དང་། 

46-1-10a

དགེ་བསྙེན་མ་དང་། ལྷ་དང་ཀླུ་དང་གནོད་སྦྱིན་དང་། དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་མིའམ་ཅི་དང་ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་དང་། རྒྱལ་ཕྲན་དང་། སྟོབས་ཀྱི་
འཁོར་ལོས་སྒྱུར་བ་དང་། གླིང་བཞིའི་འཁོར་ལོས་སྒྱུར་བ་རྣམས་འདུས་ནས་འཁོད་པར་གྱུར་པ་འཁོར་དང་བཅས་པ་དེ་དག་ཐམས་ཅད་བཅོམ་ལྡན་འདས་ལ་ལྟ་ཞིང་ངོ་མཚར་དུ་གྱུར་རྨད་དུ་གྱུར་དགའ་བར་གྱུར་ཏོ། །དེ་
ནས་དེའི་ཚེ་བཅོམ་ལྡན་འདས་དེ་བཞིན་གཤེགས་པ་ཉི་ཟླ་སྒྲོན་མའི་སྨིན་མཚམས་ཀྱི་བར་གྱི་མཛོད་སྤུ་ནས་འོད་ཟེར་གཅིག་བྱུང་ནས་དེ་ཤར་ཕྱོགས་སུ་སངས་རྒྱས་ཀྱི་ཞིང་ཉི་ཁྲི་བྱུང་སྟེ། སངས་རྒྱས་ཀྱི་ཞིང་
དེ་དག་ཐམས་ཅད་འོད་ཟེར་དེའི་འོད་ཀྱིས་ཤིན་ཏུ་ཁྱབ་པར་སྣང་བར་གྱུར་ཏེ། མ་ཕམ་པ་འདི་ལྟ་སྟེ་དཔེར་ན། ད་ལྟར་སངས་རྒྱས་ཀྱི་ཞིང་འདི་དག་སྣང་བར་གྱུར་པ་བཞིན་ནོ། །མ་ཕམ་པ་ཡང་དེའི་ཚེ་བཅོམ་ལྡན་འདས་
དེའི་ཞབས་འབྲིང་ན། བྱང་ཆུབ་སེམས་དཔའ་བྱེ་བ་ཕྲག་ཉི་ཤུ་འཁོད་པ་དང་། འཁོར་དེ་ན་ཆོས་ཉན་པ་དེ་དག་འོད་ཟེར་ཆེན་པོའི་སྣང་བ་དེས་འཇིག་རྟེན་སྣང་བར་བྱས་པ་མཐོང་ནས་ངོ་མཚར་དུ་གྱུར་རྨད་དུ་གྱུར་ཏེ་ལྟད་
མོ་ཆེར་བྱུང་ངོ་། །མ་ཕམ་པ་དེའི་ཚེ་ན་ཡང་བཅོམ་ལྡན་འདས་དེའི་བསྟན་པ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འོད་མཆོག་ཅེས་བྱ་བ་བྱུང་སྟེ་དེའི་སློབ་མ་བརྒྱད་བརྒྱ་ཡོད་དོ། །བཅོམ་ལྡན་འདས་
དེ་ཡང་ཏིང་ངེ་འཛིན་དེ་ལས་བཞེངས་ནས་བྱང་ཆུབ་སེམས་དཔའ་འོད་མཆོག་ལས་བརྩམས་ཏེ། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་ཡང་དག་པར་སྟོན་ཏེ། བར་གྱི་བསྐལ་པ་དྲུག་བཅུ་ཚང་བར་
གདན་གཅིག་ལ་བཞུགས་ནས་སྐུ་མི་བསྐྱོད། སེམས་མི་གཡོ་བར་བཤད་དོ། །འཁོར་དེ་དག་ཐམས་ཅད་ཀྱང་སྟན་གཅིག་ལ་འཁོད་དེ། །ལུས་མི་བསྐྱོད་སེམས་མི་གཡོ་བར་བར་གྱི་བསྐལ་

46-1-10b

པ་དྲུག་བཅུར་བཅོམ་ལྡན་འདས་དེ་ལ་ཆོས་ཉན་ཏེ། འཁོར་དེ་ན་སེམས་ཅན་འགའ་ཡང་ལུས་ངལ་བ་ཡང་མེད། སེམས་སྐྱོ་བ་ཡང་མེད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་ཉི་ཟླ་སྒྲོན་མས་བར་གྱི་བསྐལ་པ་དྲུག་བཅུ་འདས་ཀྱི་བར་དུ། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ་བྱང་ཆུབ་སེམས་དཔའ་རྣམས་
ལ་གདམས་པ། སངས་རྒྱས་ཐམས་ཅད་ཀྱིས་ཡོངས་སུ་བཟུང་བ་བཤད་ནས། སྐད་ཅིག་དེ་ཉིད་ལ་མྱ་ངན་ལས་འདའོ་ཞེས་ལྷ་དང་བཅས་བདུད་དང་བཅས་ཚངས་པ་དང་བཅས་པའི་འཇིག་རྟེན་དང་དགེ་སྦྱོང་
དང་བྲམ་ཟེར་བཅས་པའི་སྐྱེ་དགུའི་མདུན་དུ། དགེ་སློང་དག་དོ་མོད་ནམ་གྱི་གུང་ཐུན་ལ་དེ་བཞིན་གཤེགས་པ་ཕུང་པོའི་ལྷག་མ་མེད་པའི་མྱ་ངན་ལས་འདའ་བའི་དབྱིངས་སུ་ཡོངས་སུ་མྱ་ངན་ལས་འདའོ་ཞེས་
གསུངས་སོ། །མི་ཕམ་པ་དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་དེས། བྱང་ཆུབ་སེམས་དཔའ་སེམས་དཔའ་ཆེན་པོ་དཔལ་གྱི་
སྙིང་པོ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ནས་འཁོར་དེ་དག་ཐམས་ཅད་ལ་བཀའ་སྩལ་པ། དགེ་སློང་དག་བྱང་ཆུབ་སེམས་དཔའ་དཔལ་གྱི་སྙིང་པོ་འདི། 
ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲི་མ་མེད་པའི་སྤྱན་
ཞེས་བྱ་བར་འགྱུར་རོ་ཞེས་བྱ་བར་གསུངས་སོ། །མ་ཕམ་པ་དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླའི་སྒྲོན་མ་དེའི་ནུབ་མོ་ནམ་གྱི་གུང་

46-1-11a

ཐུན་ལ། ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་
འོད་མཆོག་དེས་བླངས་ཏེ། བར་གྱི་བསྐལ་པ་བརྒྱད་བཅུའི་བར་དུ། བཅོམ་ལྡན་འདས་མྱ་ངན་ལས་འདས་པ་དེའི་བསྟན་པ་ལ་ཡང་དག་པར་བསྟན་ཏོ། །མ་ཕམ་པ་དེ་ལ་བཅོམ་ལྡན་འདས་དེའི་སྲས་བློ་གྲོས་ལ་སོགས་
པ་བརྒྱད་པོ་དེ་དག་བྱང་ཆུབ་སེམས་དཔའ་འོད་མཆོག་དེའི་སློབ་མར་གྱུར་ཏེ། དེས་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དེ་དག་གིས་དེའི་འོག་ཏུ་སངས་རྒྱས་བྱེ་བ་ཁྲག་ཁྲིག་བརྒྱ་
སྟོང་མང་པོ་མཐོང་སྟེ། བཀུར་སྟི་བྱས་ནས་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་དག་གི་ཐ་མའི་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་མར་མེ་མཛད་ཡིན་ནོ། །སློབ་མ་བརྒྱད་བརྒྱ་པོ་དེ་དག་ལས་གཅིག་རྙེད་པ་ལ་རབ་ཏུ་གདུ་བ་བཀུར་སྟི་ལ་གདུ་བ་ཤེས་ཀྱི་ཁེ་ལ་གདུ་བ་གྲགས་པ་འདོད་པས་དེ་ལ་བསྟན་པ་
བསྟན་པའི་ཚིག་དང་། ཡི་གེ་མི་ཟིན་མི་ཆགས་ཏེ་དེའི་མིང་ཡང་གྲགས་འདོད་ཅེས་བྱ་བར་གྱུར་ཏོ། །དེས་ཀྱང་དགེ་བའི་རྩ་བ་དེས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་མཉེས་པར་བྱས་སོ། །མཉེས་
པར་བྱས་ནས་སྟི་སྟང་བྱས་བཙུན་པར་བྱས་རི་མོར་བྱས་མཆོད་པ་དང་། བཀུར་བ་དང་། རིམ་གྲོ་བྱས་སོ། །མ་ཕམ་པ་དེའི་ཚེ་དེའི་དུས་ན་བྱང་ཆུབ་སེམས་དཔའ་འོད་མཆོག་ཅེས་བྱ་བ་ཆོས་སྨྲ་བར་
གྱུར་པ་དེ། གཞན་ཞིག་ཡིན་པ་སྙམ་དུ་ཁྱོད་སོམ་ཉི་འམ་ཡིད་གཉིས་སམ་ཐེ་ཚོམ་ཟ་བར་གྱུར་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཁོ་བོ་དེའི་ཚེ་དེའི་དུས་ན་བྱང་ཆུབ་སེམས་དཔའ་འོད་

46-1-11b

མཆོག་ཅེས་བྱ་བ་ཆོས་སྨྲ་བར་གྱུར་ཏོ། །གང་ཡང་བྱང་ཆུབ་སེམས་དཔའ་གྲགས་འདོད་ཅེས་བྱ་བ་ལེ་ལོ་ཅན་དུ་གྱུར་པ་དེ་ནི། མ་ཕམ་པ་ཁྱོད་ཉིད་དེའི་ཚེ་དེའི་དུས་ན། བྱང་ཆུབ་སེམས་དཔའ་གྲགས་འདོད་ཅེས་བྱ་བ་ལེ་ལོ་
ཅན་དུ་གྱུར་པ་ཡིན་ནོ། །མ་ཕམ་པ་དེ་ལྟར་ཁོ་བོས་རྣམ་གྲངས་འདིས་ན་བཅོམ་ལྡན་འདས་ཀྱི་སྔ་ལྟས་འདི་ལྟ་བུའི་འོད་ཟེར་བཏང་བ་མཐོང་ནས། བཅོམ་ལྡན་འདས་ཀྱང་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་
གྲངས་མདོ་སྡེ་ཤིན་ཏུ་རྒྱས་པ་ཆེན་པོ་དེ་བཤད་པར་བཞེད་པ་སྙམ་བྱེད་དོ། །དེ་ནས་འཇམ་དཔལ་གཞོན་ནུར་གྱུར་པ་དོན་དེ་ཉིད་རྒྱས་པར་སྟོན་ཅིང་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འདས་པའི་དུས་
རྣམས་རྗེས་སུ་དྲན་པ་ནི། །ཚད་མེད་བསམ་གྱིས་མི་ཁྱབ་བསྐལ་པ་ན། །དེ་ཚེ་རྒྱལ་བ་བྱུང་བ་སྐྱེ་དགུའི་མཆོག །མཚན་ནི་ཉི་ཟླ་སྒྲོན་མ་ཞེས་བྱ་བ། །སྐྱེ་དགུ་འདྲེན་པ་དེ་ནི་ཆོས་སྟོན་ཏེ། །སེམས་ཅན་
མཐའ་ཡས་བྱེ་བ་རྣམ་པར་འདུལ། །བྱང་ཆུབ་སེམས་དཔའ་བསམ་ཡས་བྱེ་བ་སྟོང་། །མང་པོ་དེ་དག་ཡེ་ཤེས་ཡང་དག་འཛུད། །རྣམ་པར་འདྲེན་པ་གཞོན་ནུར་གྱུར་པ་ཡི། །དེ་ཚེ་དེ་ཡི་སྲས་གྱུར་རྒྱལ་པོ་དག །
ཐུབ་ཆེན་རབ་ཏུ་བྱུང་བ་དེ་མཐོང་ནས། །འདོད་སྤངས་ཐམས་ཅད་མྱུར་བར་རབ་ཏུ་བྱུང་། །འཇིག་རྟེན་མགོན་པོ་དེ་ཡི་ཆོས་བཤད་པ། །མཐའ་ཡས་ངེས་པར་བསྟན་པ་མདོ་སྡེ་མཆོག །དེ་མིང་ཤིན་ཏུ་རྒྱས་
པའི་མདོ་ཞེས་བྱ། །སྲོག་ཆགས་སྟོང་ཕྲག་བྱེ་བ་དག་ལ་སྟོན། །རྣམ་པར་འདྲེན་པ་དེ་ཡིས་བཤད་མ་ཐག །དེ་ཚེ་སྐད་ཅིག་དཀྱིལ་མོ་དཀྲུང་བཅས་ནས། །མཐའ་ཡས་ངེས་བསྟན་ཏིང་འཛིན་དམ་པ་
ལ། །ཐུབ་མཆོག་ཆོས་གདན་བཞུགས་ནས་བསམ་གཏན་མཛད། །ལྷ་ཡི་མེ་ཏོག་མན་དཱ་ར་བ་འབབ། །མ་བརྡུངས་པར་ནི་རྔ་ཡི་སྒྲ་ཡང་བྱུང་། །ལྷ་དང་གནོད་སྦྱིན་པར་སྣང་གནས་འཁོད་པ། །

46-1-12a

རྐང་གཉིས་དམ་པ་ལ་ནི་མཆོད་པ་བྱེད། །ཞིང་རྣམས་ཐམས་ཅད་དེ་མ་ཐག་ཏུ་གཡོས། །དེ་ན་ངོ་མཚར་རྨད་དུ་བྱུང་བར་གྱུར། །སྨིན་མཚམས་ནས་ནི་ཤིན་ཏུ་མཛེས་པ་ཡི། །འདྲེན་པས་འོད་ཟེར་གཅིག་པོ་
རབ་བཏང་བ། །ཤར་གྱི་ཕྱོགས་སུ་འོད་ཟེར་དེ་སོང་བས། །ཞིང་རྣམས་སྟོང་ཕྲག་བཅྭ་བརྒྱད་ཚང་བ་དག །རབ་ཏུ་སྣང་བས་འཇིག་རྟེན་ཐམས་ཅད་མཛེས། །སེམས་ཅན་རྣམས་ཀྱི་ཤི་འཕོ་སྐྱེ་བ་སྟོན། །རྣམ་པར་
འདྲེན་པའི་འོད་ཟེར་དེ་ཡི་མཐུས། །དེ་ལྟར་དེ་ན་ལ་ལ་རིན་ཆེན་ཞིང་། །དེ་བཞིན་ཁ་དོག་བཻ་དཱུརྱ་ཡི་མདོག །བལྟ་ན་སྡུག་པ་སྣ་ཚོགས་སྣང་བར་གྱུར། །ལྷ་དང་མི་དང་དེ་བཞིན་གནོད་སྦྱིན་ཀླུ། །ལྷ་ཡི་བུ་མོ་དྲི་
ཟ་མི་འམ་ཅི། །གང་རྣམས་བདེ་བར་གཤེགས་ལ་མཆོད་བརྩོན་པ། །དེ་དག་འཇིག་རྟེན་ཁམས་ན་མཆོད་བྱེད་སྣང་། །སངས་རྒྱས་རང་འབྱུང་དེ་དག་ཉིད་ཀྱང་སྣང་། །གསེར་གྱི་མཆོད་སྡོང་ལྟ་བུར་བལྟ་ན་
སྡུག །བཻ་དཱུརྱ་ཡི་དབུས་ན་གསེར་གཟུགས་བཞིན། །འཁོར་གྱི་དབུས་ན་ཆོས་ནི་རབ་ཏུ་གསུང་། །དེ་ན་ཉན་ཐོས་གྲངས་ཡོད་མ་ཡིན་ཏེ། །བདེ་གཤེགས་ཉན་ཐོས་དེ་སྙེད་ཚད་མེད་པ། །སོ་སོའི་ཞིང་དུ་རྣམ་པར་
འདྲེན་པ་ཡི། །འོད་ཟེར་འོད་ཀྱིས་དེ་དག་ཐམས་ཅད་སྟོན། །བརྩོན་འགྲུས་ལྡན་ཞིང་ཚུལ་ཁྲིམས་མ་ཉམས་ཏེ། །ཚུལ་ཁྲིམས་སྐྱོན་མེད་ནོར་བུ་རིན་ཆེན་འདྲ། །མི་མགོན་སྲས་དག་རི་ཡི་སུལ་དག་ན། །གནས་ཤིང་སྤྱོད་པ་
དེ་དག་སྣང་བར་གྱུར། །བདོག་པ་ཐམས་ཅད་མ་ལུས་ཡོངསུ་གཏོང་། །བརྟན་པ་བཟོད་པའི་སྟོབས་ཅན་བསམ་གཏན་དགའ། །བྱང་ཆུབ་སེམས་དཔའ་གང་གཱའི་བྱེ་སྙེད་མང་། །འོད་ཟེར་དེ་ཡིས་ཐམས་ཅད་རབ་ཏུ་སྣང་། 
བསྐྱོད་པ་མེད་ཅིང་གཡོ་བ་མེད་པར་ཡང་། །བཟོད་ནས་བསམ་གཏན་དགའ་ཞིང་མཉམ་པར་བཞག །དེ་དག་བསམ་གཏན་བྱང་ཆུབ་མཆོག་ཞུགས་པ། །བདེ་བར་གཤེགས་པའི་ཐུགས་ཀྱི་སྲས་རྣམས་སྣང་། །ཡང་

46-1-12b

དག་ཞི་བ་ཟག་པ་མེད་པའི་གནས། །ཤིན་ཏུ་ཤེས་ནས་ཡང་དག་རབ་སྟོན་ཏེ། །འཇིག་རྟེན་ཁམས་མང་དུ་ནི་ཆོས་ཀྱང་འཆད། དེ་འདྲའི་བྱེད་པ་བདེར་གཤེགས་མཐུ་ཡིས་བྱུང་། །ཉི་མ་ཟླ་བ་སྒྲོན་མ་དེ་ཡི་མཐུས། །
སྐྱོང་བའི་འཁོར་བཞིས་དེ་དག་མཐོང་ནས་སུ། །དེ་ཚེ་ཐམས་ཅད་དགའ་བར་གནས་གྱུར་ཏེ། །འདི་ལྟར་ཅི་ཞིག་ཅེས་ནི་ཕན་ཚུན་འདྲི། །གནོད་སྦྱིན་ལྷ་མིས་དེ་མཆོད་མི་རིང་བར། །འཇིག་རྟེན་འདྲེན་པ་ཏིང་ངེ་འཛིན་ལས་
བཞེངས། །ཆོས་སྨྲ་བྱང་ཆུབ་སེམས་དཔའ་གང་མཁས་པ། །འོད་མཆོག་སྲས་ལ་དེ་ཚེ་འདི་སྐད་གསུངས། །མཁས་པ་ཁྱོད་ནི་འཇིག་རྟེན་མིག་དང་ལམ། །ང་ཡི་ཆོས་འཛིན་ཤིན་ཏུ་ཡིད་བརྟན་པས། །ཇི་ལྟར་སྲོག་
ཆགས་ཕན་ཕྱིར་ངས་བཤད་པ། །ང་ཡི་ཆོས་མཛོད་འདི་ལ་ཁྱོད་མངོན་སུམ། །བྱང་ཆུབ་སེམས་དཔའ་མང་པོ་ཀུན་བཀོད་དེ། །དགའ་བར་བྱས་ཤིང་ཤིན་ཏུ་བསྔགས་བསྟོད་ནས། །བར་གྱི་བསྐལ་པ་དྲུག་བཅུ་ཚང་བར་ནི། །
དེ་ཚེ་རྒྱལ་བ་དེ་ཡིས་ཆོས་མཆོག་བཤད། །གདན་གཅིག་སྟེང་བཞུགས་འཇིག་རྟེན་མགོན་པོ་ཡིས། །ཆོས་མཆོག་དམ་པ་དག་ནི་གང་བཤད་པ། །དེ་དག་ཐམས་ཅད་འོད་མཆོག་རྒྱལ་བའི་སྲས། །ཆོས་སྨྲར་གྱུར་པ་དེ་ཡིས་ཤིན་
ཏུ་བཟུང་། །རྒྱལ་བ་དེས་ནི་ཆོས་ཀྱི་མཆོག་བཤད་དེ། །སྐྱེ་བོ་དུ་མ་རབ་ཏུ་དགའ་བྱས་ནས། །དེ་ཡི་ཉིན་པར་ལྷར་བཅས་འཇིག་རྟེན་མདུན། །རྣམ་པར་འདྲེན་པ་དེ་ནི་འདི་སྐད་གསུང་། །ང་ཡིས་ཆོས་ཀྱི་ཚུལ་འདི་རབ་བསྟན་ཏེ། །
ཆོས་ཀྱི་རང་བཞིན་ཅི་འདྲ་བཤད་ཟིན་གྱིས། །དགེ་སློང་དོ་ནུབ་ནམ་གྱི་གུང་ཐུན་ལ། །ང་ནི་མྱ་ངན་འདའ་བའི་དུས་ལ་བབ། །ང་ཡི་བསྟན་པ་འདི་ལ་རབ་སྦྱོར་ལ། །བག་མེད་མ་ཡིན་དད་པ་སྙིང་པོར་གྱིས། །བསྐལ་པ་
བྱེ་བ་ཁྲག་ཁྲིག་འདས་པར་ཡང་། །རྒྱལ་བ་དྲང་སྲོང་ཆེན་པོ་རྙེད་པར་དཀའ། །རྐང་གཉིས་དམ་པ་ཤིན་ཏུ་མྱུར་བ་རུ། །མྱ་ངན་ལས་ནི་འདའ་བའི་སྒྲ་ཐོས་ནས། 

46-1-13a

སངས་རྒྱས་སྲས་རྣམས་མང་པོ་མྱ་ངན་སྐྱེས། །སྡུག་བསྔལ་རབ་དང་ཤིན་ཏུ་ལྡན་པར་གྱུར། །སྲོག་ཆགས་བསམ་ཡས་བྱེ་མང་དེ་དག་ལ། །མི་ཡི་དབང་པོ་རྒྱལ་པོས་དབུགས་ཕྱུང་བ། །མྱ་ངན་ང་འདས་དགེ་
སློང་མ་འཇིག་ཤིང་། །ང་ཡི་འོག་ཏུ་སངས་རྒྱས་འབྱུང་བ་ནི། །བྱང་ཆུབ་སེམས་དཔའ་དཔལ་སྙིང་མཁས་པ་འདི། །ཟག་མེད་ཡེ་ཤེས་འདི་ནི་རྟོགས་པར་རིག །ང་ཡི་བྱང་ཆུབ་མཆོག་རབ་འཐོབ་འགྱུར་ཏེ། །སྤྱན་དང་
ཡན་ལག་དྲི་མེད་རྒྱལ་བར་འོང་། །དེ་ཚེ་དེ་ཡི་ནམ་གྱི་གུང་ཐུན་ལ། །རྒྱུ་ཟད་མེ་དང་འདྲ་བར་མྱ་ངན་འདས། །དེ་ཡི་སྐུ་གདུང་ཤིན་ཏུ་རྒྱས་གྱུར་ཏེ། མཆོད་རྟེན་བྱེ་བ་ཁྲག་ཁྲིག་མཐའ་ཡས་སོ། །དེ་ན་དགེ་སློང་དེ་
བཞིན་དགེ་སློང་མ། །གང་རྣམས་བྱང་ཆུབ་མཆོག་ལ་རབ་ཞུགས་ཤིང་། །བདེ་གཤེགས་དེ་ཡི་བསྟན་ལ་མངོན་བརྩོན་པ། །དེ་དག་མི་ཉུང་གང་གཱའི་བྱེ་མ་སྙེད། །དེ་ཚེ་ཆོས་སྨྲར་གང་གྱུར་དགེ་སློང་ནི། །གང་གིས་
ཆོས་དེ་བཟུང་བ་འོད་མཆོག་སྟེ། །བར་གྱི་བསྐལ་པ་བརྒྱད་བཅུ་ཚང་བར་དེས། །བསྐལ་པ་དེ་ལ་ཆོས་མཆོག་རབ་ཏུ་སྟོན། །དེ་ཡི་སློབ་མར་གྱུར་པ་བརྒྱད་བརྒྱ་དག །དེ་དག་ཐམས་ཅད་ཡོངས་སུ་སྨིན་པར་བྱས། 
དེ་དག་སངས་རྒྱས་བྱེ་བ་མང་པོ་མཐོང་། །དྲང་སྲོང་ཆེན་པོ་དེ་དག་བཀུར་སྟི་བྱས། །དེ་ཚེ་སྤྱད་པ་རྗེས་སུ་འཐུན་སྤྱད་ནས། །འཇིག་རྟེན་མང་པོ་ཁམས་སུ་སངས་རྒྱས་གྱུར། །གཅིག་འོག་གཅིག་ཏུ་དེ་དག་རྗེས་བཞིན་
དུ། །བྱང་ཆུབ་མཆོག་ཏུ་གཅིག་གིས་གཅིག་ལུང་བསྟན། །སངས་རྒྱས་དེ་དག་རིམ་གྱིས་བྱུང་བ་ཡི། །ཐ་མར་གྱུར་པ་མར་མེ་མཛད་པ་སྟེ། །ལྷ་ཡི་ལྷ་མཆོག་དྲང་སྲོང་མང་པོའི་མཆོག །སྲོག་ཆགས་བྱེ་བ་
སྟོང་ཡང་རྣམ་པར་བཏུལ། །གང་སྔོན་བདེ་བར་གཤེགས་པ་དེ་ཡི་སྲས། །དེ་ཡི་ཚེ་ན་འོད་མཆོག་ཆོས་སྨྲ་བའི། །སློབ་མ་སྲེད་དང་ལྡན་ཞིང་ལེ་ལོ་ཅན། །ཤེས་ཀྱི་ཁེ་དང་རྙེད་པ་ཚོལ་བ་དང་། །ཤིན་ཏུ་གྲགས་པ་འདོད་པའི་ཤས་

46-1-13b

ཆེ་ཞིང་། །གྲོང་ནས་གྲོང་དུ་རྒྱུ་བར་གྱུར་པ་སྟེ། །དེ་ཡི་ཁ་ཏོན་ལུང་ནོས་དེ་བཞིན་ཀུན། །དེ་ཡི་ཚེ་ན་བཤད་པ་རྣམས་མི་ཟིན། །དེ་ཡི་མིང་ཡང་འདི་ཞེས་བྱ་བར་གྱུར། །གྲགས་པ་འདོད་ཅེས་ཕྱོགས་སུ་རྣམ་པར་གྲགས། །
དེ་ཡང་དགེ་བ་རྣམས་ཀྱི་ལས་དེ་དག །འདྲེན་མར་གྱུར་པ་མངོན་པར་འདུས་བྱས་པས། །སངས་རྒྱས་སྟོང་ཕྲག་བྱེ་བ་མཉེས་བྱས་ཏེ། །དེ་དག་མཆོད་པ་རྒྱ་ཆེ་བྱས་པར་གྱུར། །རྗེས་སུ་མཐུན་པའི་སྤྱོད་པ་རབ་སྤྱད་ནས། །སངས་
རྒྱས་ཤཱཀྱ་སེང་གེ་འདི་ཡང་མཐོང་། །དེ་ནི་འདིར་ཡང་ཐ་མར་བྱུང་བ་སྟེ། །རྗེས་བཞིན་བྱང་ཆུབ་མཆོག་ཀྱང་འཐོབ་འགྱུར་བ། །བྱམས་པའི་རིགས་སུ་བཅོམ་ལྡན་འདས་སུ་འགྱུར། །སྲོག་ཆགས་སྟོང་ཕྲག་བྱེ་བ་རྣམ་
པར་འདུལ། །བདེར་གཤེགས་མྱ་ངན་འདས་པའི་བསྟན་པ་ལ། །དེ་ཚེ་ལེ་ལོ་ཅན་དུ་གང་གྱུར་པ། །དེ་ན་དེ་འདྲར་གྱུར་པ་ཁྱོད་ཉིད་དོ། །དེ་ཚེ་ཆོས་སྨྲར་གྱུར་པ་ཁོ་བོ་སྟེ། །ཁོ་བོས་དེ་དང་དེ་ཡི་རྒྱུ་དང་བཞིས། །ཡེ་ཤེས་གྲགས་
པ་དེ་ཡི་ལྟས་བྱུང་བ། །སྔོན་ཚེ་དེ་ན་ཁོ་བོས་མཐོང་གྱུར་པ། །དེ་འདྲའི་ལྟས་འདི་དེང་ཡང་མཐོང་བས་ན། །ངེས་པར་རྒྱལ་བའི་དབང་པོ་ཀུན་ཏུ་སྤྱན། །ཤཱཀྱའི་རྒྱལ་ཆེན་དོན་དམ་གཟིགས་པས་ཀྱང་། །དེ་ཚེ་ཁོ་བོས་རྣམ་
གྲངས་མཆོག་ཐོས་གང་། །དེ་དག་ཉིད་ནི་འདིས་ཀྱང་བཤད་པར་དགོངས། །དེ་ཡི་ལྟས་ཉིད་དེ་རིང་ཡོངས་རྫོགས་ཀྱིས། །རྣམ་པར་འདྲེན་པ་རྣམས་ཀྱི་ཐབས་མཁས་པ། །ཤཱཀྱ་སེང་གེ་ཡང་དག་འཇོག་མཛད་དེ། །ཆོས་ཀྱི་
དངོས་ཉིད་ཕྱག་རྒྱ་སྟོན་པར་འགྱུར། །ཐལ་མོ་སྦྱར་ཏེ་སེམས་བཟང་བརྩོན་པར་གྱིས། །འཇིག་རྟེན་ཕན་ཞིང་ཐུགས་བརྩེ་གནོན་གྱུར་ཏེ། །མཐའ་ཡས་པ་ཡི་ཆོས་ཀྱི་ཆར་པ་བབ། །གང་དག་བྱང་ཆུབ་ཕྱིར་ཞུགས་ངོམས་
པར་མཛད། །བྱང་ཆུབ་སེམས་དཔའ་བྱང་ཆུབ་འདིར་ཞུགས་པ། །གང་དག་མཁས་པ་ཉིད་ལས་སྐྱེས་གྱུར་པ། །དེ་དག་རྣམས་ཀྱི་སོམ་ཉི་གང་ཡིན་དང་། །ཡིད་གཉིས་ཐེ་ཚོམ་གང་ཡིན་དེ་སེལ་གྱུར། །དམ་པའི་ཆོས་པད་མ་དཀར་

46-1-14a

པོའི་ཆོས་ཀྱི་རྣམ་གྲངས་ལས་གླེང་གཞིའི་ལེའུ་ཞེས་བྱ་སྟེ་དང་པོའོ།། །། དམ་པའི་ཆོས་པད་མ་དཀར་པོ་བམ་པོ་གཉིས་པ། དེ་ནས་བཅོམ་ལྡན་འདས་དྲན་པ་དང་ལྡན་ཞིང་མཁྱེན་བཞིན་དུ་ཏིང་
ངེ་འཛིན་དེ་ལས་བཞེངས་སོ། །བཞེངས་ནས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་བཀའ་སྩལ་པ། ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཐུགས་སུ་ཆུད་པ། 
སངས་རྒྱས་ཀྱི་ཡེ་ཤེས་ནི་ཟབ་པ་མཐོང་བར་དཀའ་བ་རྟོགས་པར་དཀའ་བ་སྟེ། ཉན་ཐོས་དང་རང་སངས་རྒྱས་ཐམས་ཅད་ཀྱིས་ཤེས་པར་དཀའོ། །དེ་ཅིའི་ཕྱིར་ཞེ་ན། ཤཱ་རིའི་བུ་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་རྣམས་ནི། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་བསྙེན་བཀུར་མཛད་མཛད་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་སྤྱོད་པ་སྤྱད་སྤྱད་པ། ཡུན་རིང་པོ་ནས་རྗེས་སུ་ཞུགས་པ། བརྩོན་འགྲུས་མཛད་མཛད་པ་སྟེ། ངོ་མཚར་དང་རྨད་དུ་བྱུང་བའི་ཆོས་དང་ལྡན་ཞིང་ཤེས་པར་དཀའ་བའི་ཆོས་རྣམས་
མཁྱེན་པའི་ཕྱིར་རོ། །ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ལྡེམ་པོར་དགོངས་ཏེ་བཤད་པ་ནི་ཤེས་པར་དཀའོ། །དེ་ཅིའི་ཕྱིར་ཞེ་ན། རང་གིས་རིག་
པའི་ཆོས་རྣམས་ཐབས་མཁས་པ་དང་། ཡེ་ཤེས་མཐོང་བ་དང་། རྒྱུ་དང་གཞི་དང་དམིགས་པ་དང་། ངེས་པའི་ཚིག་དང་། རྣམ་པར་རིག་བྱེད་སྣ་ཚོགས་རྣམས་ཀྱིས་ཡང་དག་པར་སྟོན་ཏེ། ཐབས་མཁས་པ་དེ་དང་
དེ་དག་གིས་སེམས་ཅན་དེ་དང་དེ་ལ་ཆགས་པ་རྣམས་རབ་ཏུ་འགྲེལ་པའི་ཕྱིར་རོ། །ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ཐབས་མཁས་པ་ཆེན་པོ་དང་། 

46-1-14b

ཡེ་ཤེས་མཐོང་བ་དམ་པའི་ཕ་རོལ་ཏུ་བྱོན་པའོ། །ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི། ཆགས་པ་མེད་ཅིང་ཐོགས་པ་མེད་པའི་ཡེ་ཤེས་མཐོང་བ་དང་། སྟོབས་
དང་མི་འཇིགས་པ་དང་མ་འདྲེས་པ་དང་དབང་པོ་དང་སྟོབས་དང་བྱང་ཆུབ་ཀྱི་ཡན་ལག་དང་བསམ་གཏན་དང་། རྣམ་པར་ཐར་པ་དང་ཏིང་ངེ་འཛིན་དང་སྙོམས་པར་འཇུག་པ་དང་། རྨད་དུ་བྱུང་བའི་ཆོས་དང་ལྡན་ཏེ། ཆོས་
རྣམ་པ་སྣ་ཚོགས་ཡང་དག་པར་སྟོན་པའོ། །ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ངོ་མཚར་ཆེན་པོ་བརྙེས་པའོ། །ཤཱ་རིའི་བུ་དེ་ཙམ་གྱིས་བཤད་པ་ཆོག་
པར་གྱིས་ཤིག །ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ངོ་མཚར་མཆོག་བརྙེས་པ་སྟེ། ཤཱ་རིའི་བུ་དེ་བཞིན་གཤེགས་པས་ཆོས་གང་མཁྱེན་པའི་ཆོས་དེ་ཡང་
དེ་བཞིན་གཤེགས་པས་དེ་བཞིན་གཤེགས་པ་ཉིད་ལ་འཆད་དོ། །ཤཱ་རིའི་བུ་ཆོས་ཐམས་ཅད་ཀྱང་དེ་བཞིན་གཤེགས་པ་ཉིད་སྟོན་ཏོ། །ཆོས་ཐམས་ཅད་ཀྱང་དེ་བཞིན་གཤེགས་པ་ཉིད་ཀྱིས་མཁྱེན་ཏེ་ཆོས་དེ་
དག་གང་ཡིན་པ་དང་། ཆོས་དེ་དག་ཇི་ལྟ་བུ་ཡིན་པ་དང་། ཆོས་དེ་དག་ཅི་འདྲ་བ་དང་། ཆོས་དེ་དག་གིས་མཚན་ཉིད་གང་ཡིན་པ་དང་། ཆོས་དེ་དག་གི་ངོ་བོ་ཉིད་ཅི་ཡིན་པ་དང་། ཆོས་དེ་དག་གང་ཡིན་པ་དང་། ཇི་ལྟ་བུ་ཡིན་པ་
དང་ཅི་འདྲ་བ་དང་། མཚན་ཉིད་གང་ཡིན་པ་དང་ངོ་བོ་ཉིད་ཅི་ཡིན་པ་ཡང་མཁྱེན་ཏོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱས་པར་སྟོན་ཅིང་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ལྷ་མིར་བཅས་པའི་
འཇིག་རྟེན་ན། །དཔའ་བོ་ཆེན་པོ་དཔག་མེད་པ། །རྣམ་འདྲེན་སེམས་ཅན་ཐམས་ཅད་ཀྱིས། །རྣམ་པ་ཀུན་ཏུ་ཤེས་མི་ནུས། །དེ་དག་སྟོབས་དང་རྣམ་ཐར་དང་། །འཇིགས་མེད་གང་དག་ཅི་འདྲ་དང་། །སངས་རྒྱས་ཆོས་རྣམས་ཅི་འདྲ་བ། །

46-1-15a

སུས་ཀྱང་ཤེས་པར་མི་ནུས་སོ། །སངས་རྒྱས་བྱེ་བ་གང་དག་ན། །ཟབ་ཅིང་ཤིན་ཏུ་ཕྲ་བ་དང་། །རིག་དཀའ་མཐོང་བར་དཀའ་བ་ཡི། །སྤྱོད་པ་དག་ནི་སྔན་ཆད་བསྙེན། །བསྐལ་པ་བྱེ་བ་བསམ་ཡས་སུ། །སྤྱོད་པ་དེ་དག་
སྤྱད་པ་ཡི། །འབྲས་བུ་དེ་ནི་ཅི་འདྲ་བ། །བྱང་ཆུབ་སྙིང་པོར་ངས་མཐོང་ངོ་། །དེ་ནི་འཇིག་རྟེན་རྣམ་འདྲེན་པ། །གཞན་དག་ན་ནི་ངས་ཀྱང་དེ། །ཅི་ལྟ་ཡིན་དང་ཅི་འདྲ་དང་། །དེ་ཡི་མཚན་ཉིད་ཅི་འདྲ་ཤེས། །དེ་ནི་བསྟན་དུ་
མི་ནུས་ཏེ། །དེ་ནི་བརྗོད་ཏུ་ཡོང་མེད་དོ། །མོས་པ་ལ་ནི་གང་གནས་པ། །བྱང་ཆུབ་སེམས་དཔའ་མ་གཏོགས་པར། །གང་ལ་ཆོས་དེ་བསྟན་པ་དང་། །བསྟན་པ་དག་ཀྱང་ཤེས་པ་ཡི། དེ་འདྲའི་སེམས་ཅན་སུ་ཡང་ནི། །
འཇིག་རྟེན་དག་ན་ཡོད་མ་ཡིན། །གང་དག་འཇིག་རྟེན་མཁྱེན་པའི་ཉན་ཐོས་པ། །ལྷག་པར་བྱས་པ་བདེ་བར་གཤེགས་པས་བསྔགས། །ཟག་ཟད་ཐ་མའི་ལུས་འཛིན་དེ་དག་གི། །ཡུལ་ནི་རྒྱལ་བའི་ཡེ་ཤེས་འདི་ལ་མེད། །
གལ་ཏེ་འཇིག་རྟེན་དེ་དག་ཐམས་ཅད་དུ། །ཤཱ་རིའི་བུ་དང་འདྲ་བས་གང་གྱུར་ཏེ། །གཅིག་ཏུ་འདུས་པར་གྱུར་ནས་རྣམ་བསམས་ཀྱང་། །དེ་དག་བདེར་གཤེགས་ཡེ་ཤེས་ཤེས་མི་ནུས། །གལ་ཏེ་ཁྱོད་དང་འདྲ་བའི་མཁས་
རྣམས་ཀྱིས། །ཕྱོགས་རྣམས་བཅུ་ཅར་གང་བར་གྱུར་པ་དང་། །གང་ཡང་ང་ཡི་ཉན་ཐོས་འདི་གཞན་རྣམས། །དེ་དག་གིས་ཀྱང་དེ་བཞིན་གང་གྱུར་ཏེ། །དེ་དག་ཐམས་ཅད་གཅིག་ཏུ་དེང་འདུས་ནས། །བདེ་བར་གཤེགས་པའི་
ཡེ་ཤེས་རྣམས་བསམས་ཀྱང་། །ཇི་ཙམ་ཚད་མེད་ཡེ་ཤེས་ངས་ཤེས་པ། །ཐམས་ཅད་འདུས་པས་ཤེས་པར་མི་ནུས་སོ། །ཟག་པ་མེད་པར་གྱུར་པའི་རང་སངས་རྒྱས། །དབང་པོ་རྣོ་བ་ཐ་མའི་ལུས་འཛིན་པས། །ཇི་ལྟར་
སྨིག་དང་འདམ་བུའི་ཚལ་བཞིན་དུ། །ཕྱོགས་བཅུ་ཐམས་ཅད་གང་བར་གྱུར་པ་དག །གཅིག་ཏུ་འདུས་ནས་རྣམ་པར་བསམས་བྱས་ཀྱང་། །ང་ཡི་ཆོས་ཀྱི་མཆོག་གི་ཕྱོགས་ཙམ་ཡང་། །བསྐལ་པ་བྱེ་བ་ཁྲག་

46-1-15b

ཁྲིག་མཐའ་ཡས་སུ། །དེ་ཡི་ཡང་དག་དོན་ནི་ཡོང་མི་ཤེས། །བྱང་ཆུབ་སེམས་དཔའ་ཐེག་པར་གསར་ཞུགས་པ། །སངས་རྒྱས་བྱེ་བ་མང་ལ་བྱ་བ་བྱས། །ཤིན་ཏུ་ངེས་དོན་ཆོས་སྨྲ་མང་པོ་རྣམས། །དེ་དག་གིས་ཀྱང་ཕྱོགས་བཅུ་
གང་གྱུར་ཏེ། །སྨིག་དང་འདམ་བུ་བཞིན་དུ་འཇིག་རྟེན་ཀུན། །བར་མཚམས་མེད་པར་རྟག་ཏུ་གང་གྱུར་ལ། །གཅིག་ཏུ་འདུས་ནས་རྣམ་པར་སེམས་བྱེད་ཅིང་། །ཤེས་རབ་ཕྲ་བས་གཞན་དུ་མི་སེམས་པར། །བསྐལ་པ་བྱེ་བ་
མང་པོ་དཔག་མེད་པ། །གང་གཱའི་བྱེ་མ་སྙེད་དུ་བསམ་བྱས་ཀྱང་། །ཆོས་གང་བདེ་བར་གཤེགས་པས་མངོན་གཟིགས་པ། །འདི་ལ་དེ་དག་རྣམས་ཀྱི་ཡུལ་མེད་དོ། །ཕྱིར་མི་ལྡོག་པའི་བྱང་ཆུབ་སེམས་དཔའ་གང་། །
མི་ཉུང་གང་གཱའི་བྱེ་མ་སྙེད་རྣམས་ཀྱིས། །གཞན་དུ་མི་སེམས་རྣམ་པར་བསམས་བྱས་ཀྱང་། །འདི་ལ་དེ་དག་གི་ཡང་ཡུལ་མེད་དོ། །ཟབ་ཅིང་ཤིན་ཏུ་ཕྲ་བའི་ཆོས་རྟོགས་ཤིང་། །རྟོག་པ་མེད་ལ་ཐམས་ཅད་ཟག་མེད་པ། །
ཕྱོགས་བཅུའི་འཇིག་རྟེན་རྒྱལ་བ་དེ་དག་དང་། །ངས་ནི་འདི་ན་དེ་དག་ཅི་འདྲ་ཤེས། །གཞན་མིན་གསུང་བ་རྒྱལ་བ་དྲང་སྲོང་ཆེ། །ཡུན་རིང་དུས་ན་མཆོག་གི་དོན་འཆད་ཀྱིས། །བདེ་བར་གཤེགས་པས་གང་བསྟན་དེ་ལ་ནི། །
མོས་པ་ཕུན་སུམ་ཚོགས་འབྱོར་ཤཱ་རིའི་བུ། །ཉན་ཐོས་པ་ནི་འདི་དག་ཐམས་ཅད་དང་། །རང་སངས་རྒྱས་སུ་མི་གང་ཞུགས་པ་དང་། །མྱ་ངན་འདས་ལ་ངས་ནི་གང་བཀོད་ཅིང་། །སྡུག་བསྔལ་རྒྱུད་ལས་ཡང་དག་དཀྲོལ་
ལ་བསྒོའོ། །གང་ཕྱིར་འཇིག་རྟེན་དུ་ནི་ཆོས་མང་བཤད། །དེ་དང་དེ་ལ་ཆགས་པ་རབ་དགྲོལ་ཞིང་། །ཐེག་པ་གསུམ་དག་ཉེ་བར་བསྟན་པ་ནི། །དེ་དག་ང་ཡི་ཐབས་མཁས་མཆོག་ཡིན་ནོ། །དེ་ནས་འཁོར་དེ་ན་ཀུན་ཤེས་
ཀཽཎྜི་ནྱ་ལ་སོགས་པ་ཉན་ཐོས་ཆེན་པོ་གང་དག་དགྲ་བཅོམ་པ་ཟག་པ་ཟད་པ་དབང་དང་ལྡན་པར་གྱུར་པ་སྟོང་ཉིས་བརྒྱ་དང་། གཞན་ཡང་གང་དག་ཉན་ཐོས་ཀྱི་ཐེག་པ་ལ་ཞུགས་པའི་དགེ་སློང་དང་། དགེ་སློང་མ་དང་། 

46-1-16a

དགེ་བསྙེན་དང་དགེ་བསྙེན་མ་དག་དང་། གང་ཡང་རང་སངས་རྒྱས་ཀྱི་ཐེག་པ་ལ་ཞུགས་པ་དེ་དག་ཐམས་ཅད་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་དེ་བཞིན་གཤེགས་པ་རྣམས་ཀྱི་ཐབས་མཁས་པ་ཆེར་བསྔགས་
པ་དང་། ཆོས་ཟབ་མོ་དེ་ཡང་མངོན་པར་རྫོགས་པར་སངས་རྒྱས་སོ་ཞེས་གསུང་ཞིང་ཉན་ཐོས་དང་། རང་སངས་རྒྱས་ཐམས་ཅད་ཀྱིས་ཤེས་པར་དཀའོ་ཞེས་གསུང་བའི་རྒྱུ་ནི་གང་། གཞི་ནི་ཅི་ཞིག །འདི་ལྟར་བཅོམ་ལྡན་འདས་ཀྱིས་
རྣམ་པར་གྲོལ་བ་གཅིག་གོ། །ཞེས་བཀའ་སྩལ་ཏོ། །བདག་ཅག་རྣམས་ཀྱང་སངས་རྒྱས་ཀྱི་ཆོས་རྣམས་རྙེད་པར་འགྱུར་ཞིང་མྱ་ངན་ལས་འདས་པ་ཐོབ་པ་ཡིན་མོད་ཀྱི། བཅོམ་ལྡན་འདས་ཀྱིས་གསུངས་པ་དེའི་དོན་བདག་
ཅག་གིས་མ་རིག་གོ་སྙམ་མོ། །དེ་ནས་ཚེ་དང་ལྡན་པ་ཤཱ་རིའི་བུས་འཁོར་བཞི་པོ་དེ་དག་སོམ་ཉི་དང་ཐེ་ཚོམ་ཟ་བར་རིག་སྟེ་སེམས་ཀྱི་རྣམ་པར་རྟོག་པ་སེམས་ཀྱིས་ཤེས་ནས། བདག་ཉིད་ཀྱང་ཆོས་ལ་ཐེ་ཚོམ་ཟ་བར་གྱུར་ཏེ་དེའི་
ཚེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། བཅོམ་ལྡན་འདས་འདི་ལྟར་བཅོམ་ལྡན་འདས་ཀྱིས་དེ་བཞིན་གཤེགས་པ་རྣམས་ཀྱི་ཐབས་མཁས་པ་མཁྱེན་པའི་ཆོས་བསྟན་པ་ཡང་དང་ཡང་བསྔགས་པ་མཛད་པ་
དང་། ཆོས་ཟབ་མོ་ངས་མངོན་པར་རྫོགས་པར་སངས་རྒྱས་སོ་ཞེས་བགྱི་བ་དང་། ལྡེམ་པོར་དགོངས་ཏེ་བཤད་པ་ཡང་ཤེས་པར་དཀའོ་ཞེས་ཡང་དང་ཡང་གསུངས་པའི་རྒྱུ་གང་ལགས་རྐྱེན་གང་ལགས། བདག་གིས་
བཅོམ་ལྡན་འདས་ལས་ཆོས་ཀྱི་རྣམ་གྲངས་འདི་ལྟ་བུ་སྔན་ཆད་མ་ཐོས་ཏེ། བཅོམ་ལྡན་འདས་འཁོར་བཞི་པོ་འདི་དག་ཀྱང་ཐེ་ཚོམ་དང་སོམ་ཉི་འཚལ་ན། དེ་བཞིན་གཤེགས་པས་ཅི་ལ་དགོངས་ཏེ་དེ་བཞིན་གཤེགས་པའི་ཆོས་
ཟབ་མོ་ཡང་དང་ཡང་གསུང་བ་མཛད་པ་དེ་བཅོམ་ལྡན་འདས་ཀྱིས་ལེགས་པར་བཤད་དུ་གསོལ། དེ་ནས་ཚེ་དང་ལྡན་པ་ཤཱ་རིའི་བུས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །སྟོབས་དང་རྣམ་ཐར་

46-1-16b

བསམ་གཏན་དག །དཔག་ཏུ་མེད་པ་ངས་ཐོབ་ཅེས། །རིང་ནས་མི་ཡི་ཉི་མ་ཡིས། །དེང་གདོད་བཀའ་མཆིད་འདི་འདྲ་མཛད། །ཁྱོད་ལ་ཞུ་བ་མ་མཆིས་པར། །བྱང་ཆུབ་སྙིང་པོའང་བརྗོད་པ་མཛད། །ཁྱོད་ལ་སུ་ཡང་མི་ཞུ་བར། །
ལྡེམ་པོར་དགོངས་ཏེ་བཤད་པ་བརྗོད། །མ་ཞུས་པར་ནི་གསུང་མཛད་དེ། །ཉིད་ཀྱི་སྤྱོད་པ་བསྔགས་པ་མཛད། །ཡེ་ཤེས་བརྙེས་པ་བརྗོད་མཛད་ཅིང་། །ཟབ་མོ་དག་ཀྱང་རབ་བཤད་པས། །དབང་ལྡན་གྱུར་ཅིང་ཟག་མེད་པ། །
མྱ་ངན་འདས་པར་གང་བཞུགས་རྣམས། །རྒྱལ་བ་ཅི་ཞིག་གསུང་སྙམ་སྟེ། །དེ་རིང་འདི་དག་ཐེ་ཚོམ་འགྱུར། །རང་རྒྱལ་བྱང་ཆུབ་གང་འཚལ་བ། །དགེ་སློང་དེ་བཞིན་དགེ་སློང་མ། །ལྷ་དང་ཀླུ་དང་གནོད་སྦྱིན་དང་། །
ལྟོ་འཕྱེ་ཆེ་དང་དྲི་ཟ་དག །ཐེ་ཚོམ་འཚལ་ཞིང་རྣམ་སེམས་ཏེ། །དེ་དག་ཕན་ཚུན་གཏམ་མཆི་ཞིང་། །རྐང་གཉིས་མཆོག་ལ་རབ་ལྟ་ན། །ཐུབ་པ་ཆེན་པོ་ལུང་བསྟན་གསོལ། །བདེ་བར་གཤེགས་པའི་ཉན་
ཐོས་རྣམས། །འདི་ན་ཇི་སྙེད་མཆིས་པ་ཀུན། །དེ་ཡི་ནང་ན་བདག་མཆོག་ཅེས། །དྲང་སྲོང་མཆོག་གིས་བསྟན་ལགས་ན། །མི་ཡི་གཙོ་བོ་ཉིད་ཀྱི་གནས། །འདི་ལ་བདག་ཀྱང་ཐེ་ཚོམ་འཚལ། །མྱ་ངན་འདས་
མཐར་བདག་ཕྱིན་ཏམ། །འོན་ཏེ་བདག་ལ་སྤྱོད་བསྟན་ཏམ། །རྔ་མཆོག་དབྱངས་ཀྱིས་རབ་ཏུ་གསུང་ཕྱུང་སྟེ། །ཆོས་འདི་ཇི་ལྟ་ལགས་པ་བཤད་དུ་གསོལ། །རྒྱལ་སྲས་ཐུགས་སྲས་མཆིས་པ་འདི་དག་རྣམས། །
ཐལ་མོ་སྦྱར་བར་བགྱིས་ནས་རྒྱལ་ལ་ལྟ། །ལྷ་དང་ཀླུ་དང་གནོད་སྦྱིན་སྲིན་པོར་བཅས། །བྱེ་བ་སྟོང་ཕྲག་གང་གཱའི་བྱེ་མ་སྙེད། །བྱང་ཆུབ་མཆོག་འདི་འཚལ་བ་གང་ལགས་པ། །བརྒྱད་ཁྲི་ཚང་བར་གང་མཆིས་དེ་དག་
དང་། །ས་བདག་འཁོར་ལོ་བསྒྱུར་བའི་རྒྱལ་པོ་གང་། །བྱེ་བ་སྟོང་གི་ཞིང་ནས་ལྷགས་པ་དག །སྤྱོད་པ་ཇི་ལྟར་ཡོངས་སུ་རྫོགས་བགྱི་ཞེས། །ཐམས་ཅད་ཐལ་མོ་སྦྱར་ཏེ་གུས་པར་མཆིས། །དེ་སྐད་ཅེས་གསོལ་པ་དང་། 

46-1-17a

བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་དོན་འདི་བཤད་པས་ཅི་ཞིག་བྱ། དེ་ཅིའི་ཕྱིར་ཞེ་ན། ཤཱ་རིའི་བུ་དོན་འདི་བཤད་ན་ལྷ་དང་བཅས་པའི་འཇིག་རྟེན་འདི་དངངས་
པར་འགྱུར་རོ། །ཡང་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལ་ལན་གཉིས་སུ་གསོལ་བ་བཏབ་པ། དོན་འདི་ཉིད་བཅོམ་ལྡན་འདས་བཤད་དུ་གསོལ། བདེ་བར་གཤེགས་པ་བཤད་དུ་གསོལ། དེ་ཅིའི་སླད་དུ་ཞེ་ན། 
བཅོམ་ལྡན་འདས་འཁོར་འདི་ན་སྲོག་ཆགས་བརྒྱ་ཕྲག་མང་པོ། སྲོག་ཆགས་སྟོང་ཕྲག་མང་པོ། སྲོག་ཆགས་བརྒྱ་སྟོང་ཕྲག་མང་པོ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་སྔོན་གྱི་སངས་རྒྱས་མཐོང་བ་
ཤེས་རབ་དང་ལྡན་པ་གང་དག །བཅོམ་ལྡན་འདས་ཀྱིས་བཤད་པ་ལ་དད་པ་དང་ཡིད་ཆེས་པ་དང་འཛིན་པར་འགྱུར་བ་མཆིས་སོ། །དེ་ནས་ཚེ་དང་ལྡན་པ་ཤཱ་རིའི་བུས་ཚིགས་སུ་བཅད་པ་འདི་གསོལ་ཏོ། །སྲོག་ཆགས་སྟོང་
རྣམས་འཁོར་ན་མཆིས་པ་དག །དད་དགའ་བདེ་བར་གཤེགས་ལ་གུས་པ་སྟེ། །ཁྱོད་ཀྱིས་ཆོས་བསྟན་དེ་དག་འཚལ་བར་འགྱུར། །མི་དབང་རྒྱལ་པོ་གསལ་བར་བཤད་ཏུ་གསོལ། །དེ་ནས་བཅོམ་ལྡན་འདས་ཀྱིས་
ཚེ་དང་ལྡན་པ་ཤཱ་རིའི་བུ་ལ་ལན་གཉིས་སུ་ཡང་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་དོན་འདི་བཤད་པས་ཅི་ཞིག་བྱ། ཤཱ་རིའི་བུ་དོན་འདི་བཤད་ན་ལྷ་དང་བཅས་པའི་འཇིག་རྟེན་འདི་དངངས་པར་འགྱུར་ཏེ། 
དགེ་སློང་ལྷག་པའི་ང་རྒྱལ་ཅན་དུ་གྱུར་པ་རྣམས་གཡང་ས་ཆེན་པོར་ལྷུང་བར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ང་ཡི་ཆོས་འདི་བཤད་པས་ཆོག །
ཡེ་ཤེས་འདི་ཕྲ་བརྟག་མི་ནུས། །བྱིས་པ་མང་འཁོད་ང་རྒྱལ་ཅན། །ང་ཡིས་ཆོས་བཤད་མི་ཤེས་སྤོང་། །དེ་ནས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལ་ལན་གསུམ་དུ་ཡང་གསོལ་བ་བཏབ་པ་དོན་འདི་ཉིད། 

46-1-17b

བཅོམ་ལྡན་འདས་བཤད་དུ་གསོལ། བདེ་བར་གཤེགས་པ་བཤད་དུ་གསོལ། བཅོམ་ལྡན་འདས་འཁོར་འདི་ན་བདག་དང་འདྲ་བ་བརྒྱ་ཕྲག་མང་དུ་མཆིས་སོ། །བཅོམ་ལྡན་འདས་སྲོག་ཆགས་བརྒྱ་ཕྲག་མང་པོ་སྲོག་
ཆགས་སྟོང་ཕྲག་མང་པོ་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དག་བཅོམ་ལྡན་འདས་སྔོན་གྱི་སྲིད་པ་དག་ན་ཡོངས་སུ་སྨིན་པར་མཛད་པ་གཞན་དག་ཀྱང་མཆིས་ཏེ། བཅོམ་ལྡན་འདས་ཀྱིས་བཤད་
པ་ལ་དད་པར་འགྱུར་ཡིད་ཆེས་པར་འགྱུར་འཛིན་པར་འགྱུར་རོ། །དེ་ཡང་དེ་དག་གི་ཡུན་རིང་པོའི་དོན་དང་སྨན་པ་དང་བདེ་བར་འགྱུར་རོ། །དེ་ནས་ཚེ་དང་ལྡན་པ་ཤཱ་རིའི་བུས་དེའི་ཚེ་ཚིགས་སུ་བཅད་པ་འདི་དག་གསོལ་
ཏོ། །རྐང་གཉིས་རྣམས་ཀྱི་མཆོག་གིས་ཆོས་བཤད་གསོལ། །ཁྱོད་ལ་སྲས་ཀྱི་ཐུ་བོ་བདག་གསོལ་པ། །འདི་ན་སྲོག་ཆགས་བྱེ་བ་སྟོང་མཆིས་པ། །དེ་དག་ཁྱོད་ཀྱིས་ཆོས་བཤད་འདི་དད་འགྱུར། །སྔོན་གྱི་སྲིད་པ་
རྣམས་སུ་ཁྱོད་ཀྱིས་གང་། །ཡུན་རིང་རྟག་ཏུ་སེམས་ཅན་སྨིན་མཛད་པ། །དེ་ཀུན་ཐལ་མོ་སྦྱར་ཏེ་འདི་ན་མཆིས། །དེ་དག་ཆོས་འདི་ལ་ནི་དད་པར་འགྱུར། །བདག་འདྲ་བརྒྱ་ཕྲག་བཅུ་གཉིས་འདི་དག་དང་། །གང་དག་
བྱང་ཆུབ་མཆོག་ཏུ་ཞུགས་པ་དག །དེ་ལ་གཟིགས་ནས་བདེ་གཤེགས་རབ་བཤད་དེ། །དེ་དག་དགའ་བ་མཆོག་ཀྱང་བསྐྱེད་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུས་ལན་གསུམ་དུ་
གསོལ་བ་བཏབ་པ་མཁྱེན་ནས། ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་འདི་ལྟར་དེ་བཞིན་གཤེགས་པ་ལ་ལན་གསུམ་གྱི་བར་དུ་གསོལ་བ་འདེབས་ན། ཤཱ་རིའི་བུ་དེ་
ལྟར་གསོལ་བ་འདེབས་པ་ལ་ཁྱོད་ལ་ཇི་སྐད་བྱས། ཤཱ་རིའི་བུ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་ཀྱིས་བཀའ་དེ་

46-1-18a

སྩལ་མ་ཐག་ཏུ། འཁོར་དེ་ནས་དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་ལྷག་པའི་ང་རྒྱལ་ཅན་ལྔ་སྟོང་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་
ཕྱག་འཚལ་ནས་འཁོར་དེ་ནས་དོང་ངོ་། །འདི་ལྟར་ལྷག་པའི་ང་རྒྱལ་གྱིས་དགེ་བའི་རྩ་བ་མ་ཐོབ་པར་ནི་ཐོབ་པར་འདུ་ཤེས། ཁོང་དུ་མ་ཆུད་པར་ནི་ཁོང་དུ་ཆུད་པར་འདུ་ཤེས་པ་དེ་དག་རང་གི་སྐྱོན་ཤེས་ཏེ། 
འཁོར་དེ་ནས་དོང་བ་ལ་བཅོམ་ལྡན་འདས་ཀྱིས་ཅང་མི་གསུང་བར་གྱུར་པས་གནང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་ངའི་འཁོར་
ཤིན་ཏེ་མ་མེད་པར་གྱུར་ཏེ། ཤཱ་རིའི་བུ་སྙིང་པོ་མ་ཡིན་པ་མེད་པར་གྱུར་ལ་དད་པའི་སྙིང་པོ་ལ་གནས་ཏེ་ལྷག་པའི་ང་རྒྱལ་ཅན་དག་དོང་བ་ཡང་ལེགས་སོ། །ཤཱ་རིའི་བུ་དེ་ལྟ་བས་ན་དེའི་དོན་བཤད་དོ། །བཅོམ་
ལྡན་འདས་ལེགས་སོ་ཞེས་གསོལ་ནས། ཤཱ་རིའི་བུ་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་དེ་བཞིན་གཤེགས་པ་ནི་བརྒྱ་ལ་རེས་
འགའ་ཞིག་འདི་ལྟ་བུའི་ཆོས་བསྟན་པ་གསུང་ངོ་། །འདི་ལྟ་སྟེ་དཔེར་ན། ཨུ་དུམ་བ་རའི་ཚལ་ལ་མེ་ཏོག་ནི་བརྒྱ་ལ་རེས་འགའ་འབྱུང་ངོ་། །ཤཱ་རིའི་བུ་དེ་བཞིན་གཤེགས་པ་ཡང་བརྒྱ་ལ་རེས་འགའ་ཞིག་ཆོས་བསྟན་
པ་འདི་ལྟ་བུ་གསུང་ངོ་། །ཤཱ་རིའི་བུ་ང་ལ་ཡིད་ཆེས་པར་གྱིས་ཤིག་ང་ནི་བདེན་པར་སྨྲ་བའོ། །ང་ནི་ཡང་དག་པར་སྨྲ་བའོ། །ང་ནི་གཞན་མ་ཡིན་པར་སྨྲ་བའོ། །ཤཱ་རིའི་བུ་དེ་བཞིན་གཤེགས་པའི་ལྡེམ་པོར་དགོངས་ཏེ་བཤད་པའི་
དོན་ཁོང་དུ་ཆུད་པར་དཀའོ། །དེ་ཅིའི་ཕྱིར་ཞེ་ན། ཤཱ་རིའི་བུ་ངས་ངེས་པའི་ཚིག་དང་བསྟན་པ་དང་བརྗོད་པ་དང་དཔེ་སྣ་ཚོགས་དང་ཐབས་ལ་མཁས་པ་རྣམ་པ་བརྒྱ་སྟོང་དག་གིས་ཆོས་རབ་ཏུ་བཤད་པ་ནི་བརྟག་ཏུ་མེད་ཅིང་རྟོག་

46-1-18b

གེའི་སྤྱོད་ཡུལ་མ་ཡིན་པའི་ཕྱིར་ཏེ། ཤཱ་རིའི་བུ་ཆོས་དེ་ནི་དེ་བཞིན་གཤེགས་པས་མཁྱེན་པར་བྱ་བའོ། །དེ་ཅིའི་ཕྱིར་ཞེ་ན། ཤཱ་རིའི་བུ་བྱ་བ་གཅིག་དང་བྱེད་པ་གཅིག་དང་བྱ་བ་ཆེན་པོ་དང་བྱེད་པ་ཆེན་པོའི་ཕྱིར། དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་འབྱུང་བའི་ཕྱིར་རོ། །ཤཱ་རིའི་བུ་དེ་བཞིན་གཤེགས་པའི་བྱ་བ་གཅིག་པོ་དང་བྱེད་པ་གཅིག་པོ་དང་བྱ་བ་ཆེན་པོ་དང་བྱེད་པ་ཆེན་
པོ་དང་བྱ་བ་གང་དང་བྱེད་པ་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་འབྱུང་བ་གང་ཞེ་ན། དེ་ནི་སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་
ཡང་དག་པར་འཛིན་དུ་གཟུད་པའི་རྒྱུའི་ཕྱིར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་འབྱུང་ངོ་། །སེམས་ཅན་རྣམས་ལ་དེ་བཞིན་གཤེགས་པའི་ཡེ་ཤེས་
མཐོང་བ་ཡང་དག་པར་བསྟན་པའི་རྒྱུའི་ཕྱིར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་འབྱུང་ངོ་། །སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་
བ་ལ་ཞུགས་པའི་རྒྱུའི་ཕྱིར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་འབྱུང་ངོ་། །སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ཁོང་དུ་
ཆུད་པར་བྱ་བའི་རྒྱུའི་ཕྱིར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་འབྱུང་ངོ་། །སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བའི་ལམ་དུ་
གཟུད་པའི་རྒྱུའི་ཕྱིར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་འབྱུང་སྟེ། ཤཱ་རིའི་བུ་དེ་ནི་དེ་བཞིན་གཤེགས་པའི་བྱ་བ་གཅིག་པོ་དང་བྱེད་པ་གཅིག་པོ་དང་བྱ་བ་ཆེན་

46-1-19a

པོ་དང་བྱེད་པ་ཆེན་པོ་དང་འཇིག་རྟེན་དུ་འབྱུང་བའི་དགོངས་པ་གཅིག་པའོ། །ཤཱ་རིའི་བུ་དེ་ལྟར་དེ་བཞིན་གཤེགས་པས་བྱ་བ་གཅིག་པོ་དང་བྱེད་པ་གཅིག་པོ་དང་བྱ་བ་ཆེན་པོ་དང་བྱེད་པ་ཆེན་པོ་དེ་དེ་བཞིན་
གཤེགས་པས་མཛད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ་ང་ནི་དེ་བཞིན་གཤེགས་པའི་ཡེ་ཤེས་མཐོང་བ་ཡང་དག་པར་འཛིན་དུ་འཇུག་པའོ། །ཤཱ་རིའི་བུ་ང་ནི་དེ་བཞིན་གཤེགས་པའི་ཡེ་ཤེས་མཐོང་བ་ཡང་དག་པར་
སྟོན་པའོ། །ཤཱ་རིའི་བུ་ང་ནི་དེ་བཞིན་གཤེགས་པའི་ཡེ་ཤེས་མཐོང་བ་ལ་འཇུག་པར་བྱེད་པའོ། །ཤཱ་རིའི་བུ་ང་ནི་དེ་བཞིན་གཤེགས་པའི་ཡེ་ཤེས་མཐོང་བ་ཁོང་དུ་ཆུད་པར་བྱེད་པའོ། །ཤཱ་རིའི་བུ་ང་ནི་དེ་བཞིན་
གཤེགས་པའི་ཡེ་ཤེས་མཐོང་བའི་ལམ་ལ་འཛུད་པའོ། །ཤཱ་རིའི་བུ་ང་ཡང་ཐེག་པ་གཅིག་ལས་བརྩམས་ཏེ་སེམས་ཅན་རྣམས་ལ་ཆོས་སྟོན་པ་འདི་ལྟ་སྟེ། སངས་རྒྱས་ཀྱི་ཐེག་པ་ཐམས་ཅད་མཁྱེན་པ་ཉིད་
ཀྱི་མཐར་ཐུག་པ་སྟེ། ཐེག་པ་གཉིས་སམ་གསུམ་ཞེས་བྱ་བ་གང་ཡང་མེད་དོ། །ཤཱ་རིའི་བུ་ཕྱོགས་བཅུའི་འཇིག་རྟེན་ཐམས་ཅད་ན་ཡང་ཆོས་ཉིད་ནི་འདིའོ། །དེ་ཅིའི་ཕྱིར་ཞེ་ན། ཤཱ་རིའི་བུ་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་གང་དག་འདས་པའི་དུས་ན་ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མེད་གྲངས་མེད་པ་རྣམས་སུ་བྱུང་སྟེ། སེམས་ཅན་མོས་པ་ཐ་དད་པ་དང་ཁམས་དང་བསམ་པ་ཐ་
དད་པ་རྣམས་ཀྱི་བསམ་པ་མཁྱེན་ནས་སྐྱེ་བོ་མང་པོ་ལ་ཕན་པ་དང་སྐྱེ་བོ་མང་པོ་ལ་བདེ་བ་དང་འཇིག་རྟེན་ལ་སྙིང་བརྩེ་བ་དང་སྐྱེ་བོ་ཕལ་པོ་ཆེ་དང་ལྷ་དང་མི་རྣམས་ཀྱི་དོན་དང་ཕན་པ་དང་བདེ་བའི་ཕྱིར་སྣ་ཚོགས་མངོན་པར་བསྒྲུབ་
པ་བསྟན་པ་དང་རྒྱུ་དང་གཞི་དང་དཔེ་དང་དམིགས་པ་དང་ངེས་པའི་ཚིག་དང་ཐབས་མཁས་པ་རྣམ་པ་སྣ་ཚོགས་ཀྱིས་ཆོས་བསྟན་པའི་སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱང་། ཤཱ་རིའི་བུ་ཐེག་པ་གཅིག་ལ་

46-1-19b

བརྩམས་ནས་སེམས་ཅན་རྣམས་ལ་ཆོས་བསྟན་ཏེ་དེ་ཡང་འདི་ལྟར་སངས་རྒྱས་ཀྱི་ཐེག་པ་ཐམས་ཅད་མཁྱེན་པ་ཉིད་ཀྱི་མཐར་ཐུག་པ་སྟེ། གང་འདི་སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཡང་དག་
པར་འཛིན་དུ་འཛུད་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་སྟོན་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་ལ་འཇུག་པར་བྱེད་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཁོང་དུ་
ཆུད་པར་བྱེད་པ། སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཀྱི་ལམ་དུ་འཇུག་པར་བྱེད་པའི་ཆོས་སྟོན་ཏེ། ཤཱ་རིའི་བུ་འདས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་དེ་དག་ལས་སེམས་ཅན་གང་དག་གིས་ཆོས་དེ་ཐོས་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་གྱུར་ཏོ། །ཤཱ་རིའི་བུ་མ་འོངས་པའི་དུས་ན་ཕྱོགས་བཅུའི་
འཇིག་རྟེན་གྱི་ཁམས་དཔག་ཏུ་མེད་གྲངས་མེད་པ་རྣམས་སུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་འབྱུང་བ། སེམས་ཅན་མོས་པ་ཐ་དད་པ་དང་བསམ་པ་ཐ་དད་པ་དང་ཁམས་ཐ་དད་
པ་རྣམས་ཀྱི་བསམ་པ་མཁྱེན་ནས། སྐྱེ་བོ་མང་པོ་ལ་ཕན་པ་དང་སྐྱེ་བོ་མང་པོ་ལ་བདེ་བ་དང་འཇིག་རྟེན་ལ་སྙིང་བརྩེ་བ་དང་སྐྱེ་བོ་ཕལ་པོ་ཆེ་དང་ལྷ་དང་མི་རྣམས་ཀྱི་དོན་དང་ཕན་པ་དང་བདེ་བའི་ཕྱིར་སྣ་ཚོགས་
མངོན་པར་བསྒྲུབ་པ་བསྟན་པ་དང་རྒྱུ་དང་གཞི་དང་དཔེ་དང་དམིགས་པ་དང་ངེས་པའི་ཚིག་དང་ཐབས་མཁས་པ་རྣམ་པ་སྣ་ཚོགས་ཀྱིས་ཆོས་སྟོན་པར་འགྱུར་བའི་སངས་རྒྱས་བཅོམ་ལྡན་འདས་དེ་དག་
ཐམས་ཅད་ཀྱང་། ཤཱ་རིའི་བུ་ཐེག་པ་གཅིག་ལས་བརྩམས་ནས་སེམས་ཅན་རྣམས་ལ་ཆོས་སྟོན་པར་འགྱུར་ཏེ། དེ་ཡང་འདི་ལྟར་སངས་རྒྱས་ཀྱི་ཐེག་པ་ཐམས་ཅད་མཁྱེན་པ་ཉིད་ཀྱི་མཐར་ཐུག་པ་སྟེ། གང་འདི་

46-1-20a

སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཡང་དག་པར་འཛིན་དུ་འཇུག་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་སྟོན་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་
ལ་འཇུག་པར་བྱེད་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཁོང་དུ་ཆུད་པར་བྱེད་པ། སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཀྱི་ལམ་དུ་འཇུག་པར་བྱེད་པའི་ཆོས་སྟོན་པར་འགྱུར་ཏེ། 
ཤཱ་རིའི་བུ་མ་འོངས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལས་སེམས་ཅན་གང་དག་ཆོས་ཉན་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཐོབ་པར་འགྱུར་རོ། །ཤཱ་རིའི་བུ་ད་ལྟར་བྱུང་བའི་དུས་ན་ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མེད་གྲངས་མེད་པ་དག་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་
བཞུགས་ཏེ་འཚོ་ཞིང་བཞེས་པ། སེམས་ཅན་མོས་པ་ཐ་དད་པ་དང་ཁམས་དང་བསམ་པ་ཐ་དད་པ་རྣམས་ཀྱི་བསམ་པ་མཁྱེན་ནས། སྐྱེ་བོ་མང་པོ་ལ་ཕན་པ་དང་སྐྱེ་བོ་མང་པོ་ལ་བདེ་བ་དང་འཇིག་རྟེན་ལ་སྙིང་བརྩེ་བ་དང་
སྐྱེ་བོ་ཕལ་པོ་ཆེ་དང་ལྷ་དང་མི་རྣམས་ཀྱི་དོན་དང་ཕན་པ་དང་བདེ་བའི་ཕྱིར་སྣ་ཚོགས་མངོན་པར་བསྒྲུབ་པ་བསྟན་པ་དང་རྒྱུ་དང་གཞི་དང་དཔེ་དང་དམིགས་པ་དང་ངེས་པའི་ཚིགས་དང་ཐབས་མཁས་པ་རྣམ་པ་སྣ་ཚོགས་ཀྱིས་ཆོས་
སྟོན་པའི་སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱང་། ཤཱ་རིའི་བུ་ཐེག་པ་གཅིག་ལས་བརྩམས་ནས་སེམས་ཅན་རྣམས་ལ་ཆོས་སྟོན་ཏེ། དེ་ཡང་འདི་ལྟར་སངས་རྒྱས་ཀྱི་ཐེག་པ་ཐམས་ཅད་མཁྱེན་པ་ཉིད་
ཀྱི་མཐར་ཐུག་པ་སྟེ། གང་འདི་སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཡང་དག་པར་འཛིན་དུ་འཇུག་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་སྟོན་པ། དེ་བཞིན་

46-1-20b

གཤེགས་པའི་ཡེ་ཤེས་མཐོང་བ་ཉིད་ལ་འཇུག་པར་བྱེད་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཁོང་དུ་ཆུད་པར་བྱེད་པ། སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཀྱི་ལམ་དུ་འཇུག་པར་བྱེད་པའི་
ཆོས་སྟོན་ཏེ། ཤཱ་རིའི་བུ་ད་ལྟར་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལས། སེམས་ཅན་གང་དག་ཆོས་ཉན་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཐོབ་པར་འགྱུར་རོ། །ཤཱ་རིའི་བུ་དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ང་ཡང་སེམས་ཅན་མོས་པ་ཐ་དད་པ་དང་ཁམས་དང་བསམ་པ་ཐ་དད་པ་རྣམས་ཀྱི་བསམ་པ་མཁྱེན་ནས་
སྐྱེ་བོ་མང་པོ་ལ་ཕན་པ་དང་སྐྱེ་བོ་མང་པོ་ལ་བདེ་བ་དང་འཇིག་རྟེན་ལ་སྙིང་བརྩེ་བ་དང་སྐྱེ་བོ་ཕལ་པོ་ཆེ་དང་ལྷ་དང་མི་རྣམས་ཀྱི་དོན་དང་ཕན་པ་དང་བདེ་བའི་ཕྱིར། སྣ་ཚོགས་མངོན་པར་བསྒྲུབ་པ་བསྟན་པ་དང་རྒྱུ་དང་གཞི་དང་དཔེ་
དང་དམིགས་པ་དང་ངེས་པའི་ཚིག་དང་ཐབས་མཁས་པ་རྣམ་པ་སྣ་ཚོགས་ཀྱིས་ཆོས་སྟོན་ཏོ། །ཤཱ་རིའི་བུ་ང་ཡང་ཐེག་པ་གཅིག་ལ་བརྩམས་ནས་སེམས་ཅན་རྣམས་ལ་ཆོས་སྟོན་ཏེ། འདི་ལྟར་སངས་རྒྱས་ཀྱི་ཐེག་པ་
ཐམས་ཅད་མཁྱེན་པ་ཉིད་ཀྱི་མཐར་ཐུག་པ་སྟེ། གང་འདིའི་སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཡང་དག་པར་འཛིན་དུ་འཇུག་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་
སྟོན་པ་དང་། དེ་བཞིན་གཤེགས་པའི་ཡེ་ཤེས་མཐོང་བ་ཉིད་ལ་འཇུག་པར་བྱེད་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཁོང་དུ་ཆུད་པར་བྱེད་པ། སེམས་ཅན་རྣམས་དེ་བཞིན་གཤེགས་པའི་
ཡེ་ཤེས་མཐོང་བ་ཉིད་ཀྱི་ལམ་དུ་འཇུག་པར་བྱེད་པའི་ཆོས་སྟོན་ཏེ། ཤཱ་རིའི་བུ་སེམས་ཅན་གང་དག་ད་ལྟར་ང་ལ་འདི་ལྟར་ཆོས་ཉན་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་

46-1-21a

པར་རྫོགས་པའི་བྱང་ཆུབ་ཐོབ་པར་འགྱུར་རོ། །ཤཱ་རིའི་བུ་རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། འདི་ལྟར་ཕྱོགས་བཅུའི་འཇིག་རྟེན་གང་ན་ཡང་ཐེག་པ་གཉིས་སུ་གདགས་པ་ཡང་མེད་ན་གསུམ་
དུ་ལྟ་ག་ལ་ཡོད། འོན་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནམ་བསྐལ་པའི་སྙིགས་མ་ལས་བྱུང་ངམ་སེམས་ཅན་གྱི་སྙིགས་མ་འམ། ཉོན་མོངས་པའི་སྙིགས་མ་འམ། ལྟ་བའི་
སྙིགས་མ་འམ། ཚེའི་སྙིགས་མ་ལས་བྱུང་ན། ཤཱ་རིའི་བུ་འདི་ལྟ་བུར་བསྐལ་པ་དང་འཁྲུལ་པའི་སྙིགས་མ་དང་དྲི་མ་མང་པོ་དང་བརྐམ་པའི་སེམས་ཅན་དགེ་བའི་རྩ་བ་ཆུང་བ་དེའི་ཚེ། ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རྣམས་ཐབས་མཁས་པས་སངས་རྒྱས་ཀྱི་ཐེག་པ་གཅིག་པོ་དེ་ལས་ཐེག་པ་གསུམ་དུ་བཤད་དེ་བསྟན་ཏོ། །ཤཱ་རིའི་བུ་དེ་ལྟར་གང་ཉན་ཐོས་སམ་དགྲ་བཅོམ་པ་འམ་རང་སངས་རྒྱས་རྣམས་དེ་
བཞིན་གཤེགས་པའི་བྱ་བ་སངས་རྒྱས་ཀྱི་ཐེག་པ་ཡང་དག་པར་འཛིན་དུ་འཇུག་པ་ལ་མི་ཉན་མི་འཇུག་ཁོང་དུ་ཆུད་པར་མི་བྱེད་པ་དེ་དག་ནི། ཤཱ་རིའི་བུ་དེ་བཞིན་གཤེགས་པའི་ཉན་ཐོས་མ་ཡིན་པར་རིག་པར་བྱའོ། །དགྲ་བཅོམ་པ་
ཡང་མ་ཡིན་རང་སངས་རྒྱས་ཀྱང་མ་ཡིན་པར་རིག་པར་བྱའོ། །ཤཱ་རིའི་བུ་ཡང་དགེ་སློང་ངམ་དགེ་སློང་མ་ལ་ལ་དགྲ་བཅོམ་པར་ཁས་འཆེ་ཞིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་ཡོངས་སུ་མི་འཛིན་ཏེ། 
ང་ནི་སངས་རྒྱས་ཀྱི་ཐེག་པ་བཅད་པའོ་ཞེས་ཟེར་ཞིང་ངའི་ལུས་འདི་ཐ་མ་མྱ་ངན་ལས་འདའ་བའོ་ཞེས་ཟེར་བ་ནི། ཤཱ་རིའི་བུ་དེ་ལྷག་པའི་ང་རྒྱལ་ཅན་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ་དགེ་སློང་
དགྲ་བཅོམ་པ་ཟག་པ་ཟད་པ་དེས། དེ་བཞིན་གཤེགས་པ་མངོན་སུམ་དུ་གྱུར་ཏེ། ཆོས་འདི་ཐོས་ནས་དད་པར་མི་འགྱུར་བའི་གོ་སྐབས་མེད་ཅིང་གནས་མ་ཡིན་ཏེ། དེ་བཞིན་གཤེགས་པ་

46-1-21b

ཡོངས་སུ་མྱ་ངན་ལས་འདས་པ་ནི་མ་གཏོགས་སོ། །དེ་ཅིའི་ཕྱིར་ཞེ་ན། ཤཱ་རིའི་བུ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་དེའི་ཚེ། མདོ་སྡེ་འདི་ལྟ་བུ་འདི་འཛིན་པ་འམ་འཆང་བའི་ཉན་ཐོས་མི་འབྱུང་
སྟེ། ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཞན་ལ་ཆོས་འདི་ལ་ཐེ་ཚོམ་མེད་པར་འགྱུར་རོ། །ཤཱ་རིའི་བུ་ང་ལ་དད་པར་གྱིས་ཤིག་ཡིད་ཆེས་པར་གྱིས་ཤིག་
རྟོགས་པར་གྱིས་ཤིག་ཤཱ་རིའི་བུ་དེ་བཞིན་གཤེགས་པ་རྣམས་ལ་རྫུན་དུ་སྨྲ་བ་མེད་དེ། ཤཱ་རིའི་བུ་ཐེག་པ་འདི་ནི་གཅིག་ཏུ་ཟད་དེ་འདི་ལྟ་སྟེ་སངས་རྒྱས་ཀྱི་ཐེག་པའོ། །དེ་ནས་བཅོམ་ལྡན་འདས་དོན་དེ་ཉིད་
རྒྱས་པར་སྟོན་ཅིང་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ང་རྒྱལ་ཅན་གྱི་དགེ་སློང་དང་། །དགེ་སློང་མ་དང་དགེ་བསྙེན་དང་། །དགེ་བསྙེན་མ་རྣམས་མ་དད་པ། །ལྔ་སྟོང་ལས་ནི་མི་ཉུང་བ། །བསླབ་པ་
ཞིག་གྲལ་ལྡན་པ་རྣམས། །ཉེས་པ་འདི་དག་མཐོང་གྱུར་ནས། །སྐྱོན་རྣམས་ཡོངས་སུ་སྦེད་པའི་ཕྱིར། །བྱིས་པའི་བློ་ཅན་དེ་དག་དོང་། །གང་གིས་ཆོས་འདི་ཉན་པར་འགྱུར་བ་ཡི། །དེ་དག་ལ་ནི་དགེ་བ་དེ་བྱེད་དེ། །
འཁོར་གྱི་སྙིགས་མ་ཉིད་དུ་མཁྱེན་ནས་སུ། །འཇིག་རྟེན་མགོན་པོ་ངས་ཀྱང་བསྩལ་བ་ཡིན། །ང་ཡི་འཁོར་ནི་ལེགས་པར་འཁོད། །ཤིན་པ་མེད་ཅིང་དག་པ་སྟེ། །སྙིང་པོ་མ་ཡིན་ཀུན་མེད་གྱུར། །འདི་དག་སྙིང་
པོ་རབ་ཏུ་གནས། །སྐྱེས་བུ་དམ་པ་སྐྱོབ་པ་སངས་རྒྱས་དག །ཐབས་ལ་མཁས་པ་བརྒྱ་ཕྲག་དུ་མ་ཡིས། །རྫོགས་པའི་སངས་རྒྱས་ཆོས་ནི་ཅི་གསུང་བ། །ཅི་འདྲ་ང་ལ་ཉོན་ཅིག་ཤཱ་རིའི་བུ། །དེ་དག་སྤྱོད་པ་
བསམ་པ་ཅི་འདྲ་འང་མཁྱེན། །སྲོག་ཆགས་བྱེ་བ་མོས་པ་ཐ་དད་པ། །དེ་དག་སྔོན་ཆད་དགེ་བ་ཅི་བྱས་དང་། །ལས་རྣམས་སྣ་ཚོགས་དག་ནི་མཁྱེན་ནས་སུ། །ངེས་པའི་ཚིག་དང་གཞི་

46-1-22a

རྣམས་སྣ་ཚོགས་ཀྱིས། །སྲོག་ཆགས་དེ་དག་ཁོང་དུ་ཆུད་པར་བྱེད། །ངས་ནི་རྒྱུ་དང་དཔེ་ཡང་བརྒྱ་དག་གིས། །སེམས་ཅན་དེ་ལྟ་དེ་ལྟར་མགུ་བར་བྱས། །མདོ་སྡེ་དེ་བཞིན་ཚིགས་སུ་བཅད་པ་འང་
བཤད། །དེ་ལྟ་བྱུང་དང་སྐྱེས་རབས་རྨད་བྱུང་དང་། །གླེང་གཞི་དེ་བཞིན་གཏན་ལ་དབབ་པ་དང་། །དབྱངས་སྙན་དཔེ་བརྒྱ་སྣ་ཚོགས་རྣམས་ཀྱིས་བཤད། །མི་མཁས་གང་དག་དམན་ལ་མངོན་དགའ་ཞིང་། །སངས་
རྒྱས་བྱེ་བ་མང་ལ་སྤྱོད་མ་སྤྱད། །འཁོར་བར་ཆགས་ཤིང་ཤིན་ཏུ་སྡུག་བསྔལ་བ། །དེ་ལ་མྱ་ངན་འདའ་བ་ཉེ་བར་བསྟན། །སངས་རྒྱས་ཡེ་ཤེས་རབ་ཏུ་རྟོགས་བྱའི་ཕྱིར། །ད་ལྟར་རང་བྱུང་བ་ནི་ཐབས་
མཛད་དེ། །ཁྱེད་ཅག་སངས་རྒྱས་སུ་ཡང་འགྲུབ་བོ་ཞེས། །དེ་རྣམས་ལ་ནི་རེ་ཤིག་མི་གསུང་ངོ་། །ཅིའི་ཕྱིར་ཞེ་ན་སྐྱོབ་པ་དུས་ལ་བཞེས། །དལ་བ་གཟིགས་ཏེ་དེ་ནས་གདོད་འཆད་དོ། །དལ་བ་དེ་ནི་བརྒྱ་ལ་
དེང་ཐོབ་པས། །དེ་ཕྱིར་ཡང་དག་ངེས་པ་འདིར་བཤད་དོ། །ང་ཡི་བསྟན་པ་ཡན་ལག་དགུ་པོ་ཡང་། །སེམས་ཅན་དག་གི་མཐུ་དང་སྟོབས་ལས་བཤད། །འདི་ལྟར་ཐབས་ཀྱིས་མཆོག་སྦྱིན་ཡེ་ཤེས་ལ། །
རབ་ཏུ་གཟུད་པའི་ཕྱིར་ནི་ངས་བཤད་དོ། །གང་དག་རྟག་ཏུ་རྣམ་པར་དག་གྱུར་པ། །གསལ་གཙང་རབ་ཏུ་དེས་པ་སངས་རྒྱས་སྲས། །སངས་རྒྱས་བྱེ་བ་མང་ལ་ལྷག་བྱས་པ། །དེ་དག་ལ་ནི་རབ་རྒྱས་མདོ་རྣམས་
བཤད། །འདི་ལྟར་དེ་དག་བསམ་པ་རྫོགས་པ་དང་། །རྣམ་པར་དག་པའི་ཚུལ་དང་ལྡན་གྱུར་པ། །དེ་དག་ལ་ནི་མ་འོངས་དུས་ན་ཡང་། །ཕན་ཞིང་བརྩེ་བའི་སངས་རྒྱས་འགྱུར་ཞེས་གསུང་། །ཐོས་ནས་འགྲོ་
མཆོག་སངས་རྒྱས་འགྱུར་སྙམ་སྟེ། །ཐམས་ཅད་ཤིན་ཏུ་དགའ་བས་ཁྱབ་པར་འགྱུར། །དེ་དག་སྤྱོད་པ་རྣམས་ཀྱང་ངས་ཤེས་ནས། །ཤིན་ཏུ་རྒྱས་པའི་མདོ་སྡེ་རབ་ཏུ་བཤད། །འདི་ལྟར་འདྲེན་པའི་

46-1-22b

ཉན་ཐོས་དེ་དག་ལས། །གང་དག་ང་ཡི་བསྟན་པ་འདི་ཐོས་པ། །ཚིགས་བཅད་གཅིག་ཙམ་ཐོས་སམ་བཟུང་ཡང་རུང་། །ཐམས་ཅད་ཐེ་ཚོམ་མེད་པར་བྱང་ཆུབ་འགྱུར། །ཐེག་པ་ཐ་དད་པར་ནི་གང་སྟོན་པ། །སྐྱེས་
མཆོག་རྣམས་ཀྱི་ཐབས་མཁས་མ་གཏོགས་པར། །ཐེག་པ་གཅིག་སྟེ་གཉིས་སུ་ཡོད་མ་ཡིན། །འཇིག་རྟེན་ན་ནི་ནམ་ཡང་གསུམ་དུ་མེད། །སངས་རྒྱས་རྣམས་ཀྱི་ཡེ་ཤེས་བསྟན་པའི་ཕྱིར། །འཇིག་རྟེན་
དུ་ཡང་འཇིག་རྟེན་མགོན་པོ་བྱུང་། །བྱ་བ་གཅིག་སྟེ་གཉིས་སུ་ཡོད་མ་ཡིན། །སངས་རྒྱས་ཐེག་པ་དམན་པས་མི་འདྲེན་ཏོ། །རང་འབྱུང་བདག་ཉིད་ཅི་ལ་གནས་པ་དང་། །སངས་རྒྱས་ཇི་ལྟ་བུ་དང་ཅི་འདྲ་
བ། །སྟོབས་དང་བསམ་གཏན་རྣམ་ཐར་དབང་པོ་རྣམས། །དེ་དག་ཉིད་ལ་སེམས་ཅན་རབ་ཏུ་འཇོག །བྱང་ཆུབ་རྡུལ་མེད་དམ་པ་ཐོབ་ནས་སུ། །ཐེག་པ་དམན་ལ་སེམས་ཅན་གཅིག་བཀོད་ན། །འདི་ནི་ང་ཡི་ལེགས་
པ་མ་ཡིན་ཏེ། །སེར་སྣའི་ཉེས་པའང་ང་ལ་ཡོད་པར་འགྱུར། །ང་ལ་སེར་སྣ་དག་ནི་ཅུང་ཟད་མེད། །ང་ལ་ཕྲག་དོག་མེད་ཅིང་འདོད་ཆགས་མེད། །སྡིག་པའི་ཆོས་རྣམས་ཐམས་ཅད་ངས་བཤད་དེ། །དེ་ཕྱིར་འགྲོ་བ་རྟོགས་
པས་ང་སངས་རྒྱས། །ཇི་ལྟར་མཚན་རྣམས་ཀྱིས་ནི་ང་བརྒྱན་ཏེ། །འཇིག་རྟེན་འདི་དག་ཐམས་ཅད་རབ་སྣང་བྱེད། །སྲོག་ཆགས་བརྒྱ་ཕྲག་དུ་མས་མདུན་བལྟས་ཤིང་། །ཆོས་ཀྱི་རང་བཞིན་ཕྱག་རྒྱ་འདི་བཤད་དོ། །
ང་ནི་འདི་སྙམ་སེམས་ཏེ་ཤཱ་རིའི་བུ། །སུམ་ཅུ་རྩ་གཉིས་མཚན་གྱི་གཟུགས་ལྡན་ཞིང་། །བདག་འོད་རང་བྱུང་འཇིག་རྟེན་རིག་པར་ཡང་། །དེ་ལྟར་ཅི་ནས་སེམས་ཅན་ཀུན་འགྱུར་སྙམ། །ཇི་ལྟར་མཐོང་
ཞིང་ཇི་ལྟར་བསམས་པ་དང་། །ང་ཡིས་སྔན་ཆད་ཇི་ལྟར་བརྣགས་པ་དེ། །ང་ཡི་སྨོན་ལམ་དེ་དག་ཡོངས་རྫོགས་ཏེ། །བྱང་ཆུབ་སངས་རྒྱས་ནས་ནི་མ་བསྟན་ཏོ། །སེམས་ཅན་

46-1-23a

རྣམས་ལ་བྱང་ཆུབ་འདུན་སྐྱེད་ཅེས། །ངས་ནི་དེ་སྐད་སྨྲས་ན་ཤཱ་རིའི་བུ། །མི་ཤེས་སེམས་ཅན་རྣམས་ནི་འདིར་མྱོས་ཏེ། །ང་ཡི་ལེགས་བཤད་འཛིན་པར་གཞར་མི་འགྱུར། །དེ་དག་འདི་འདྲའི་ཚུལ་དུ་
ངས་ཤེས་ཏེ། །ཚེ་རབས་སྔ་མར་སྤྱོད་པ་རྣམས་མ་སྤྱད། །འདོད་པའི་ཡོན་ཏན་རྣམས་ལ་ཆགས་ཤིང་ཞེན། །སྲེད་པས་བརྒྱལ་ཞིང་གཏི་མུག་མྱོས་པ་རྣམས། །དེ་དག་འདོད་རྒྱུས་ངན་འགྲོར་རབ་ཏུ་ལྟུང་། །འགྲོ་
བ་དྲུག་ཏུ་ཀུན་ཏུ་ཉོན་མོངས་ཏེ། །དུར་ཁྲོད་དེ་དག་ཕྱི་ཕྱིར་འཕེལ་བར་བྱེད། །བསོད་ནམས་ཆུངས་བས་སྡུག་བསྔལ་ཀུན་གྱིས་གཟིར། །ལྟ་བའི་ཐིབས་པོར་རྟག་ཏུ་རྣམ་པར་ཆགས། །ཡོད་དང་མེད་དང་དེ་བཞིན་
ཡོད་མེད་པ། །ལྟར་གྱུར་དྲུག་བཅུ་གཉིས་ལ་བརྟེན་ནས་སུ། །དངོས་པོ་མེད་ལ་ཡོངས་སུ་འཛིན་ཅིང་གནས། །སྦྱང་བར་དཀའ་ཞིང་ལོག་བྱེད་ང་རྒྱལ་ཅན། །བྱིས་པ་ཐོས་ཉུང་ཡོན་པོ་གཡོ་བྱེད་རྣམས། །ཚེ་རབས་བྱེ་
བ་ཕྲག་སྟོང་ནམ་དུ་ཡང་། །དེ་དག་སངས་རྒྱས་སྒྲ་འདི་མི་ཐོས་སོ། །ང་ཡི་ཐབས་ཀྱིས་དེ་ལ་ཤཱ་རིའི་བུ། །སྡུག་བསྔལ་མཐར་ཕྱུང་ཤིག་ཅེས་དེ་སྐད་སྨྲས། །སེམས་ཅན་སྡུག་བསྔལ་གཟིར་བ་མཐོང་བས་
ན། །དེ་དག་མྱ་ངན་འདས་པ་ཉེ་བར་བསྟན། །འདི་ལྟར་ངས་ནི་ཆོས་རྣམས་འདི་དག་ཀུན། །གདོད་ནས་རབ་ཞི་མྱ་ངན་རྟག་འདས་བཤད། །སངས་རྒྱས་སྲས་དེ་སྤྱོད་པ་ཀུན་རྫོགས་ནས། །ཕྱི་མའི་
དུས་ཀྱི་ཚེ་ལ་རྒྱལ་བར་འགྱུར། །ཐེག་པ་གསུམ་དུ་གང་རྣམས་བསྟན་པ་ནི། །ང་ཡི་ཐབས་མཁས་ཚུལ་ནི་དེ་འདྲ་སྟེ། །ཐེག་པ་གཅིག་སྟེ་དེ་བཞིན་ཚུལ་ཡང་གཅིག །དེ་ལྟར་འདྲེན་པ་རྣམས་ཀྱིས་
བཤད་པ་གཅིག །གང་འདིར་ལ་ལ་ཐེ་ཚོམ་ཡོད་པ་དག །ཐེ་ཚོམ་ཟ་དང་དེ་བཞིན་སོམ་ཉི་སྤོངས། །གཞན་དུ་མི་གསུང་འཇིག་རྟེན་འདྲེན་པ་རྣམས། །ཐེག་པ་འདི་ནི་གཅིག་སྟེ་གཉིས་སུ་མེད། །སྔོན་གྱི་

46-1-23b

དེ་བཞིན་གཤེགས་པ་གང་འབྱུང་བ། །སངས་རྒྱས་སྟོང་ངམ་མྱ་ངན་ཡོངས་འདས་ཤིང་། །འདས་པའི་དུས་ན་བསྐལ་པ་གྲངས་མེད་ལ། །གང་དག་ཚད་ནི་ནམ་ཡང་ཡོང་མེད་པ། །སྐྱེས་བུ་དམ་པ་དེ་དག་ཐམས་ཅད་
ཀྱིས། །དཔེ་དང་གཞི་དང་རྒྱུ་དང་བཅས་པ་དང་། །ཐབས་ལ་མཁས་པ་བརྒྱ་ཕྲག་དུ་མ་ཡིས། །རྣམ་པར་དག་པའི་ཆོས་རྣམས་རབ་བཤད་པ། །དེ་དག་ཐམས་ཅད་ཐེག་པ་གཅིག་སྟོན་ཅིང་། །སྲོག་ཆགས་སྟོང་
ཕྲག་བྱེ་བ་བསམ་ཡས་རྣམས། །ཐེག་པ་གཅིག་པོ་ལ་ཡང་རབ་འཛུད་དེ། །ཐེག་པ་གཅིག་ལ་ཡོངས་སུ་སྨིན་པར་བྱེད། །མོས་དང་དེ་བཞིན་བསམ་པ་རྣམས་མཁྱེན་ནས། །དེ་བཞིན་གཤེགས་པས་ལྷར་
བཅས་འཇིག་རྟེན་དུ། །རྒྱལ་བའི་ཐབས་གཞན་རྣམ་པ་མང་པོ་དག །གང་གིས་ཆོས་མཆོག་འདི་ནི་རབ་བསྟན་པ། །སེམས་ཅན་གང་གིས་དེ་ལས་མངོན་སུམ་དེར། །ཆོས་ཉན་པ་དང་འོན་ཏེ་ཐོས་ལྡན་པ། །
སྦྱིན་པ་སྦྱིན་ཞིང་ཚུལ་ཁྲིམས་སྤྱོད་པ་དང་། །བཟོད་པས་སྤྱོད་པ་ཐམས་ཅད་བསྒྲུབ་པ་དང་། །བརྩོན་འགྲུས་བསམ་གཏན་ལྷག་པར་བྱས་པ་དང་། །ཤེས་རབ་ཀྱིས་ནི་ཆོས་འདི་རྣམས་བསམས་ཏེ། །རྣམ་པ་ཐ་
དད་བསོད་ནམས་སུས་བྱས་པ། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །མྱ་ངན་འདས་པའི་རྒྱལ་བ་དེ་དག་གི། །བསྟན་པ་དེ་ལ་སེམས་ཅན་གང་ཞུགས་ཏེ། །དེ་ན་བཟོད་ཅིང་ཞི་ལ་དུལ་བ་ནི། །དེ་དག་ཐམས་
ཅད་བྱང་ཆུབ་ཐོབ་པར་འགྱུར། །རྒྱལ་བ་མྱ་ངན་འདས་པ་དེ་དག་གི། །རྒྱལ་བའི་རིང་བསྲེལ་དག་ལ་སུ་མཆོད་ཅིང་། །རིན་ཆེན་མཆོད་རྟེན་སྟོང་ཕྲག་དུ་མ་དག །གསེར་དང་དངུལ་དང་འོན་ཏེ་ཤེལ་གྱི་འམ། ། རྡོ་རྗེ་
འི་སྙིང་པོའི་མཆོད་རྟེན་གང་གིས་བྱས། །བཻ་དཱུརྱ་མཆོག་དེ་བཞིན་ཨན་ད་རྙིལ། །ལ་ལས་མུ་ཏིག་ཀེ་ཀེ་རུ་ལས་བྱས། །དེ་དག་གིས་ཀྱང་བྱང་ཆུབ་ཐོབ་པར་འགྱུར། །གང་གིས་མཆོད་རྟེན་

46-1-24a

རྡོ་ལས་བྱས་པ་དང་། །གང་གིས་ཨ་ག་རུ་དང་ཙན་དན་ནམ། །གང་གིས་ཐང་ཤིང་མཆོད་རྟེན་བྱས་པ་དང་། །ལ་ལས་ཤིང་མང་གཞན་ལས་བྱས་པ་དང་། །ས་དང་ས་ཕག་ལས་ནི་རྩིགས་པ་ཡི། །རྒྱལ་
བའི་མཆོད་རྟེན་དགའ་ཞིང་བྱས་པ་དང་། །དེ་ཕྱིར་ས་རྡུལ་ཕུང་པོ་དག་ལས་ཀྱང་། །མྱ་ངམ་དགོན་པ་དག་ཏུ་བྱས་པ་དང་། །བྱིས་པ་རྩེད་མོར་དེ་དང་དེ་དག་ཏུ། །གང་གིས་རྒྱལ་བ་དེ་ཕྱིར་མཆོད་རྟེན་དག །བྱེ་མ་ལས་ནི་ཕུང་
པོ་བྱས་པ་ཡང་། །དེ་རྣམས་ཀྱིས་ཀྱང་བྱང་ཆུབ་ཐོབ་པར་གྱུར། །ལ་ལས་དེ་བཞིན་རིན་ཆེན་གཟུགས་བྱས་པ། །སུམ་བཅུ་རྩ་གཉིས་མཚན་དང་ལྡན་པའི་གཟུགས། །གང་གིས་དེ་ཕྱིར་བྱས་པ་དེ་དག་ཀྱང་། །དེ་དག་
ཐམས་ཅད་བྱང་ཆུབ་ཐོབ་པར་གྱུར། །ལ་ལས་དེར་ནི་རིན་ཆེན་སྣ་བདུན་དང་། །ལ་ལས་དེ་བཞིན་ཟངས་དང་ཁར་བ་ལས། །བདེ་བར་གཤེགས་པ་རྣམས་ཀྱི་གཟུགས་བྱས་པ། །དེ་དག་ཐམས་ཅད་བྱང་ཆུབ་
ཐོབ་པར་གྱུར། །རོ་ཉེ་དང་ནི་ལྕགས་སམ་ས་ཡང་རུང་། །བདེ་བར་གཤེགས་པ་རྣམས་ཀྱི་གཟུགས་བྱས་ཏེ། །བལྟ་ན་སྡུག་པ་འཇིམ་པའི་ལས་བྱེད་བཅུག །དེ་དག་ཐམས་ཅད་བྱང་ཆུབ་ཐོབ་པར་གྱུར། །
གང་གིས་རྩིག་ངོས་གཟུགས་ཀྱི་རི་མོ་དག །བསོད་ནམས་བརྒྱ་མཚན་ཡོངས་སུ་རྫོགས་པའི་སྐུ། །བདག་གིས་བྲིས་སམ་འདྲི་རུ་བཅུག་ཀྱང་རུང་། །དེ་དག་ཐམས་ཅད་བྱང་ཆུབ་ཐོབ་པར་གྱུར། །སྐྱེས་བུ་
དག་གམ་འོན་ཏེ་གཞོན་ནུ་འང་རུང་། །གང་དག་ལ་ལ་དེ་ནི་སློབ་པའི་ཚེ། །རྩེད་མོ་དགའ་དང་གསང་བར་བྱེད་པ་ན། །རྩིག་ངོས་སེན་མོ་ཤིང་བུས་གཟུགས་བྲིས་པ། །དེ་དག་ཐམས་ཅད་བྱང་ཆུབ་ཐོབ་གྱུར་ཏེ། །
དེ་དག་ཐམས་ཅད་སྙིང་རྗེ་ཅན་དུ་གྱུར། །ཐམས་ཅད་ཀྱང་ནི་སྲོག་ཆགས་བྱེ་བ་སྒྲོལ། །བྱང་ཆུབ་སེམས་དཔའ་མང་པོ་ཡང་དག་འཛུད། །དེ་བཞིན་གཤེགས་པ་རྣམས་ཀྱི་རིང་བསྲེལ་དང་། །

46-1-24b

འཇིམ་པའི་གཟུགས་དང་མཆོད་རྟེན་དག་ལ་འང་རུང་། །རྩིག་ངོས་བྲིས་དང་རྡུལ་ཕུང་མཆོད་རྟེན་ལ། །དེ་ལ་མེ་ཏོག་དང་ནི་སྤོས་གསོལ་ཏེ། །དེར་ནི་གང་གིས་རབ་སྙན་ཅང་ཏེའུ་དང་། །དུང་དང་རྔ་ཆེན་རོལ་མོའི་སྒྲ་བྱེད་
བཅུག །བྱང་ཆུབ་མཆོག་རབ་མཆོད་པར་བྱ་བའི་ཕྱིར། །གང་དག་རྔ་རྣམས་རབ་ཏུ་རྡུང་བྱེད་ཅིང་། །པི་བང་དང་ནི་ཕེག་དང་འཁར་བའི་རྔ། །རྫ་རྔ་རྒྱུད་གཅིག་གླིང་བུ་ཡིད་འོང་དང་། །ཨེ་ཀོ་ན་དང་རབ་ཏུ་སྙན་འབྱིན་
པ། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །བདེ་བར་གཤེགས་པ་རྣམས་ལ་མཆོད་པའི་ཕྱིར། །གང་དག་ལྕགས་ཀྱི་སིལ་ཁྲོལ་རྡུང་བཅུག་དང་། །ཆུ་ལ་བདབས་དང་ཐལ་མོ་བརྡབས་པ་དང་། །ཡིད་ཏུ་
འོང་ཞིང་སྙན་པའི་གླུ་བླངས་དང་། །རིང་བསྲེལ་དེ་དག་རྣམ་མང་མཆོད་བྱས་པ། །དེ་དག་ཐམས་ཅད་འཇིག་རྟེན་སངས་རྒྱས་གྱུར། །བདེ་གཤེགས་རིང་བསྲེལ་ལ་ནི་ཅུང་ཟད་དང་། །སིལ་སྙན་གཅིག་བརྡུངས་པ་ཡི་
སྒྲ་ཕྱུང་ངམ། །མེ་ཏོག་གཅིག་ཙམ་གྱིས་ནི་མཆོད་པ་དང་། །བདེ་གཤེགས་གཟུགས་དག་རྩིག་ངོས་བྲིས་པ་ལ། །འཁྲུག་བཞིན་པ་ཡི་སེམས་ཀྱིས་མཆོད་ན་ཡང་། །དེ་དག་རིམ་གྱིས་སངས་རྒྱས་བྱེ་བ་མཐོང་། །མཆོད་
རྟེན་དག་ལ་གང་གིས་ཐལ་མོ་སྦྱར། །ཡོངས་སུ་ཚང་བའམ་ཐལ་མོ་ཡ་གཅིག་གམ། །ཡང་ན་མགོ་བོ་སྐད་ཅིག་བཏུད་པ་དང་། །དེ་བཞིན་ལེན་གཅིག་ལུས་ཀྱང་བཏུད་པ་དང་། །གང་གིས་རིང་བསྲེལ་གནས་པ་དེ་
དག་ལ། །གཡེངས་པའི་སེམས་ཀྱིས་ཕྱག་འཚལ་སངས་རྒྱས་ཤེས། །ཚིག་གཅིག་ལན་འགའ་བརྗོད་པར་བྱས་པ་ཡང་། །དེ་དག་ཀུན་གྱིས་བྱང་ཆུབ་མཆོག་འདི་འཐོབ། །དེ་ཚེ་བདེ་བར་གཤེགས་པ་
དེ་དག་ནི། །མྱ་ངན་འདས་སམ་ཡང་ན་བཞུགས་ཀྱང་རུང་། །སེམས་ཅན་གང་གིས་ཆོས་འདི་མིང་ཐོས་པ། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །ཕྱིས་འབྱུང་སངས་རྒྱས་བྱེ་བ་མང་པོ་

46-1-25a

རྣམས། །དེ་དག་བསམ་གྱིས་མི་ཁྱབ་ཚད་ཀྱང་མེད། །འཇིག་རྟེན་མགོན་མཆོག་རྒྱལ་བ་དེ་དག་ཀྱང་། །ཐབས་འདི་རྣམས་ནི་རབ་ཏུ་སྟོན་པར་འགྱུར། །གང་གིས་སངས་རྒྱས་ཡེ་ཤེས་ཟག་མེད་པ། 
འདི་ལ་སྲོག་ཆགས་བྱེ་བ་འདུལ་མཛད་པ། །འཇིག་རྟེན་རྣམ་པར་འདྲེན་པ་དེ་དག་གི། །ཐབས་ལ་མཁས་པ་དག་ནི་མཐའ་ཡས་འགྱུར། །ཆོས་འདི་ཐོས་ནས་སངས་རྒྱས་མི་འགྱུར་བ། །སེམས་ཅན་
དེ་དག་ནམ་ཡང་གཅིག་ཀྱང་མེད། །བྱང་ཆུབ་ཕྱིར་སྤྱད་ནས་ནི་སྤྱོད་པར་གཞུག །དེ་ནི་དེ་བཞིན་གཤེགས་རྣམས་སྨོན་ལམ་མོ། །ཆོས་སྒོ་བྱེ་བ་སྟོང་ཕྲག་དུ་མ་དག །མ་འོངས་དུས་ན་རབ་ཏུ་སྟོན་འགྱུར་ཏེ། །
ཐེག་པ་གཅིག་པོ་འདི་ནི་མངོན་སྟོན་ཅིང་། །དེ་བཞིན་གཤེགས་པ་ཉིད་དུ་ཆོས་སྟོན་འགྱུར། །ཆོས་ཀྱི་ཚུལ་འདི་རྟག་ཏུ་གནས་པ་དང་། །ཆོས་ཀྱི་རང་བཞིན་རྟག་ཏུ་འོད་གསལ་བར། །རྐང་གཉིས་དམ་པ་
སངས་རྒྱས་རྣམས་མཁྱེན་ནས། །ང་ཡི་ཐེག་པ་གཅིག་ཅེས་སྟོན་པར་འགྱུར། །ཆོས་ཀྱི་གནས་ཉིད་སྐྱོན་མེད་ཆོས་ཉིད་ནི། །འཇིག་རྟེན་འདི་ན་རྟག་ཏུ་མི་གཡོ་ནས། །ས་ཡི་སྙིང་པོར་བྱང་ཆུབ་
སངས་རྒྱས་ཏེ། །ཐབས་ལ་མཁས་པ་ཤིན་ཏུ་སྟོན་པར་འགྱུར། །ལྷ་མི་རྣམས་ཀྱི་མཆོད་པའི་སངས་རྒྱས་རྣམས། །ཕྱོགས་བཅུ་བཞུགས་པ་གང་གའི་བྱེ་མ་སྙེད། །འདི་ན་སྲོག་ཆགས་ཐམས་ཅད་བདེ་བྱའི་ཕྱིར། །
དེ་དག་རྣམས་ཀྱང་ཐེག་པ་མཆོག་འདི་འཆད། །ཞི་བའི་ས་མཆོག་འདི་ནི་སངས་རྒྱས་ནས། །ཐབས་ལ་མཁས་པས་རབ་ཏུ་སྟོན་མཛད་ཅིང་། །ཐེག་པ་རྣམ་པ་ཐ་དད་མངོན་པར་འཆད། །ཐེག་པ་གཅིག་པོ་འང་
ཡོངས་སུ་སྟོན་མཛད་དོ། །ལུས་ཅན་ཀུན་གྱི་སྤྱོད་པ་རིག་པ་དང་། །དེ་བཞིན་སྔོན་ཆད་ཅི་བསྒོམས་ཅི་བསམས་པ། །དེ་ཡི་མཐུ་དང་བརྩོན་འགྲུས་རྣམས་ཀྱང་རིག །ཤིན་ཏུ་དད་པ་མཁྱེན་ནས་རབ་ཏུ་སྟོན། །

46-1-25b

འདྲེན་པའི་ཡེ་ཤེས་སྟོབས་ཀྱིས་རྒྱུ་མང་དང་། །དཔེ་དང་གཞི་ཡང་མང་པོ་རབ་སྟོན་ཏེ། །སེམས་ཅན་མོས་པ་སྣ་ཚོགས་རིག་ནས་ནི། །སྣ་ཚོགས་མངོན་པར་བསྒྲུབ་པ་ཉེ་བར་སྟོན། །ད་ལྟར་རྒྱལ་དབང་འདྲེན་པ་ང་ཡང་
ནི། །སེམས་ཅན་རྣམས་ལ་བདེ་བྱའི་ཕྱིར་བྱུང་སྟེ། །སྣ་ཚོགས་བསྒྲུབ་པ་བྱེ་བ་ཕྲག་སྟོང་གིས། །སངས་རྒྱས་བྱང་ཆུབ་འདི་ནི་ཡང་དག་བསྟན། །སྲོག་ཆགས་རྣམས་ཀྱི་མོས་དང་བསམ་མཁྱེན་ནས། །ཆོས་རྣམས་
རྣམ་པ་མང་པོ་རབ་བཤད་དེ། །རྣམ་པ་སྣ་ཚོགས་ཐབས་ཀྱིས་དགའ་བ་བསྐྱེད། །དེ་ནི་ང་ཡི་རང་རིག་ཡེ་ཤེས་སྟོབས། །ང་ཡིས་མཐོང་བ་སེམས་ཅན་དབུལ་པོ་རྣམས། །ཤེས་རབ་བསོད་ནམས་རྣམས་དང་བྲལ་
གྱུར་ཅིང་། །འཁོར་བར་བྱིང་ལ་མྱ་ངན་ཞུགས་པ་རྣམས། །སྡུག་བསྔལ་རྒྱུད་ཏུ་ཤིན་དུ་ནུབ་པ་སྟེ། །སྲེད་པས་ཆགས་པ་གཡག་གི་རྔ་མ་བཞིན། །འདོད་པས་འདི་དག་རྟག་ཏུ་ལྡོངས་པར་བྱས། །སངས་རྒྱས་མཐུ་
ཆེན་རྣམས་ཀྱང་མི་ཚོལ་ཞིང་། །སྡུག་བསྔལ་མཐར་འགྲོ་བ་ཡི་ཆོས་མི་ཚོལ། །འགྲོ་བ་དྲུག་པོ་རྣམས་སུ་ཟིན་པའི་སེམས། །ལོག་པར་མཐོང་བའི་ལྟ་ལ་མི་གཡོ་གནས། །སྡུག་བསྔལ་བ་ཡི་སྡུག་བསྔལ་རབ་
མྱོང་བ། །དེ་ལ་ང་ཡི་སྙིང་རྗེ་སྟོབས་ལྡན་ཏེ། །བྱང་ཆུབ་སྙིང་པོར་དེར་ནི་ང་སེམས་ཤིང་། །བདུན་ཕྲག་གསུམ་དུ་ཚང་བར་རབ་གནས་ཏེ། །ང་ནི་འདི་འདྲའི་དོན་ལ་རབ་སེམས་ཤིང་། །དེ་ན་སྡོང་པོ་དེ་ལ་བལྟས་པ་ནི། །ཤིང་
མཆོག་དེ་ལ་མིག་མི་འཛུམས་པར་ལྟ། །དེའི་དྲུང་ན་ཕན་ཚུན་འཆག་ཅིང་གནས། །ཡེ་ཤེས་འདི་ནི་དམ་པ་ངོ་མཚར་ཏེ། །སེམས་ཅན་འདི་དག་མི་མཁས་གཏི་མུག་ལྡོངས། །དེ་ཚེ་ང་ལ་ཚངས་དང་བརྒྱ་བྱིན་དང་། །དབང་
ཕྱུག་ཆེ་དང་འཇིག་རྟེན་སྐྱོང་བཞི་དང་། །དེ་བཞིན་དབང་ཕྱུག་དག་ཀྱང་གསོལ་འདེབས་ཏེ། །ལྷ་རྣམས་བྱེ་བ་སྟོང་ཕྲག་མང་པོ་ཡང་། །ཐམས་ཅད་ཐལ་མོ་སྦྱར་ནས་གུས་པར་འཁོད། །

46-1-26a

དོན་རྣམས་ཇི་ལྟར་བྱ་བ་རབ་ཏུ་བསམས། །ང་ཡིས་བྱང་ཆུབ་ཡོན་ཏན་བསྔགས་པ་ནི། །སེམས་ཅན་འདི་དག་སྡུག་བསྔལ་གཟིར་བ་སྟེ། །ང་ཡི་ཆོས་ལ་བྱིས་པའི་བློ་ཅན་སྐུར། །དེ་ལྟར་སྐུར་བས་ངན་སོང་
གནས་སུ་འགྲོ། །ངས་ནི་ཡོད་མ་བཤད་ན་དགེར་འགྱུར་གྱིས། །ང་དེང་བྱེ་བར་མྱ་ངན་འདའ་སླ་སྙམ། །སྔོན་གྱི་སངས་རྒྱས་རྣམས་དང་དེ་དག་གི། །ཐབས་མཁས་ཇི་ལྟ་བ་ཡང་རབ་དྲན་ཏེ། །ངས་ཀྱང་
འདི་ལྟར་སངས་རྒྱས་བྱང་ཆུབ་འདི། །རྣམ་པ་གསུམ་དུ་འདིར་བྱེད་རབ་ཏུ་བཤད། །ང་ཡིས་དོན་དེ་དེ་ལྟར་བསམས་པ་ན། །ཕྱོགས་བཅུའི་སངས་རྒྱས་དེ་དག་གཞན་གྱིས་ཀྱང་། །དེ་དག་རང་གི་ལུས་ཀྱང་
ང་བསྟན་ནས། །ལེགས་ཤེས་བྱ་བའི་སྒྲ་ཡང་རབ་བསྒྲགས་ཏེ། །ཐུབ་པའི་འཇིག་རྟེན་རྣམ་པར་འདྲེན་པའི་མཆོག །བླ་ན་མེད་པའི་ཡེ་ཤེས་འདི་རྟོགས་ནས། །ཐབས་ལ་མཁས་པ་རྣམ་པར་
བསམས་པ་དང་། །འཇིག་རྟེན་འདྲེན་པ་རྣམས་ཀྱི་རྗེས་སློབ་ལེགས། །ངེད་ཀྱང་དམ་པའི་གནས་ནི་རྟོགས་པའི་ཚེ། །རྣམ་པ་གསུམ་དུ་ཕྱེ་སྟེ་རབ་ཏུ་སྟོན། །མཁས་པ་མ་ཡིན་དད་པ་ཆུང་བའི་མི། །
སངས་རྒྱས་རྣམས་ལ་དད་པར་མི་འགྱུར་ཏེ། །དེ་བས་ངེད་ཀྱིས་རྒྱུ་རྣམས་ཀུན་བསྡུས་པས། །ཐབས་ལ་མཁས་པ་རྣམས་ནི་རབ་སྤྱད་ཅིང་། །འབྲས་བུ་འདོད་པ་ཡོངས་སུ་བརྗོད་བྱས་ཏེ། །བྱང་ཆུབ་སེམས་དཔའ་མང་པོ་
ཡང་དག་བཙུད། །སྐྱེས་བུ་ཁྱུ་མཆོག་དག་གི་ཡིད་འོང་སྒྲ། །ཐོས་ནས་དེ་ཚེ་ང་ནི་དགའ་བར་གྱུར། །དགའ་བའི་སེམས་ཀྱིས་སྐྱོབ་པ་དེ་དག་ལ། །དྲང་སྲོང་ཆེ་མཆོག་དོན་ཡོད་གསུང་བ་སྟེ། །མཁས་པ་འཇིག་
རྟེན་འདྲེན་པས་གསུངས་པ་ལྟར། །བདག་ཀྱང་དེ་བཞིན་སྤྱད་པར་བགྱི་ཞེས་སྨྲས། །ང་ནི་འཁྲུག་དང་མི་བཟད་འདི་ཡི་ཚེ། །སེམས་ཅན་སྙིགས་མར་གྱུར་པའི་ནང་དུ་སྐྱེས། །དེ་ལྟར་ངས་རིག་ནས་ནི་ཤཱ་རིའི་བུ། །

46-1-26b

དེ་ཡི་ཚེ་ན་བཱ་རཱ་ཎ་སཱིར་སོང་། །དེ་ན་དགེ་སློང་ལྔ་པོ་དག་ལ་ཡང་། །རབ་ཞི་ས་ཡི་ཆོས་ནི་ཐབས་ཀྱིས་བཤད། །དེ་ནས་ང་ཡིས་ཆོས་ཀྱི་འཁོར་ལོ་བསྐོར། །མྱ་ངན་འདའ་བའི་སྒྲ་ཡང་འཇིག་རྟེན་བྱུང་། །
དགྲ་བཅོམ་སྒྲ་དང་དེ་བཞིན་ཆོས་ཀྱི་སྒྲ། །དགེ་འདུན་སྒྲ་ཡང་དེ་ཚེ་བྱུང་བར་གྱུར། །ལོ་གྲངས་མི་ཉུང་བར་ནི་རབ་བཤད་དོ། །མྱ་ངན་འདའ་བའི་ས་ཡང་མངོན་པར་བསྟན། །འཁོར་བ་སྡུག་བསྔལ་མཐའ་
ནི་འདི་ཡིན་ཞེས། །དེ་བཞིན་རྟག་པར་དུས་སུ་ངས་སྨྲས་སོ། །ངས་ནི་དེ་ཡི་ཚེ་ན་ཤཱ་རིའི་བུ། །རྐང་གཉིས་དམ་པའི་སྲས་རྣམས་མཐོང་བ་ནི། །གང་དག་བྱང་ཆུབ་དམ་པ་མཆོག་ཞུགས་པ། །བྱེ་བ་ཁྲག་
ཁྲིག་སྟོང་ཕྲག་མཐའ་ཡས་པ། །ང་ཡི་དྲུང་དུ་དེ་དག་ཉེར་ལྷགས་ནས། །ཐལ་མོ་སྦྱར་ཏེ་ཐམས་ཅད་གུས་པར་འཁོད། །གང་དག་ཐབས་ལ་མཁས་པ་རྣམས་མང་པོ། །རྒྱལ་བ་བདག་ལ་ཆོས་
ཐོས་དེ་དག་མཐོང་། །དེ་ནས་སྐད་ཅིག་དེ་ལ་འདི་སྙམ་དུ། །ང་ཡིས་ཆོས་མཆོག་བཤད་པའི་དུས་ལ་བབ། །གང་ཕྱིར་ང་ནི་འཇིག་རྟེན་འདིར་སྐྱེས་པ། །བྱང་ཆུབ་མཆོག་རབ་དེ་ནི་འདིར་བསྟན་ཏོ། །
མཚན་མར་འདུ་ཤེས་བྱིས་པའི་བློ་དང་ལྡན། །མི་མཁས་ལྷག་པའི་ང་རྒྱལ་ལྡན་པ་རྣམས། །དེ་རིང་འདི་ལ་དད་པར་དཀའ་འགྱུར་གྱི། །བྱང་ཆུབ་སེམས་དཔའ་འདི་དག་ཉན་སྙམ་སྟེ། །དེ་ཚེ་ང་ནི་འཇིགས་
མེད་རབ་ཏུ་དགའ། །ཡང་དག་ནང་འཇོག་ཐམས་ཅད་རྣམ་སྤངས་ནས། །བདེ་བར་གཤེགས་པའི་སྲས་ཀྱི་དབུས་སུ་བཤད། །དེ་དག་བྱང་ཆུབ་ལ་ནི་ཡང་དག་བཙུད། །འདི་འདྲའི་སངས་རྒྱས་སྲས་རྣམས་
མཐོང་ནས་ནི། །ཁྱོད་ཀྱང་སོམ་ཉི་རྣམ་པར་སྤངས་བར་འགྱུར། །གང་དག་ཟག་ཟད་བརྒྱ་ཕྲག་བཅུ་གཉིས་པོ། །འདི་དག་ཐམས་ཅད་འཇིག་རྟེན་སངས་རྒྱས་འགྱུར། །སྔ་མའི་སྐྱོབ་པ་དེ་དག་ཅི་འདྲ་དང་། །མ་འོངས་རྒྱལ་བའི་ཆོས་ཉིད་ཇི་ལྟ་བར། །ངས་ཀྱང་དེ་ལ་རྣམ་

46-1-27a

པར་རྟོག་སྤངས་ཏེ། །དེ་བཞིན་དུ་ནི་ཁྱོད་ལ་ངས་དེང་བཤད། །རེས་འགའ་གང་དུ་ཅི་ཡིས་འཇིག་རྟེན་དུ། །སྐྱེས་བུ་ཁྱུ་མཆོག་དག་ནི་འབྱུང་བར་འགྱུར། །མཐའ་ཡས་མིག་ཅན་འཇིག་རྟེན་བྱུང་ན་
ཡང་། །རེས་འགའ་འདི་འདྲ་བ་ཡི་ཆོས་འཆད་དེ། །བསྐལ་པ་བྱེ་བ་ཁྲག་ཁྲིག་སྙེད་དུ་ཡང་། །འདི་འདྲའི་ཆོས་མཆོག་རབ་ཏུ་རྙེད་པར་དཀའ། །གང་དག་ཆོས་མཆོག་ཐོས་ནས་དད་འགྱུར་བ། །དེ་འདྲའི་སེམས་
ཅན་ཤིན་ཏུ་རྙེད་པར་དཀའ། །ཨུ་དུམ་བ་རའི་མེ་ཏོག་རྙེད་དཀའ་བཞིན། །རེས་འགའ་གང་ཞིག་ཅི་ཡིས་སྣང་གྱུར་ན། །གཟུགས་དེ་འགྲོ་བའི་ཡིད་ཏུ་འོང་བ་སྟེ། །ལྷར་བཅས་འཇིག་རྟེན་རྣམས་ལ་ངོ་མཚར་
གྱུར། །དེ་བས་ལེགས་བཤད་ཆོས་འདི་སུས་ཐོས་ནས། །རྗེས་སུ་ཡི་རང་ཚིག་གཅིག་བརྗོད་ན་ཡང་། །ཤིན་ཏུ་ངོ་མཚར་ཆེ་བར་འདིར་བསྟན་ཏེ། །དེས་ནི་སངས་རྒྱས་ཐམས་ཅད་མཆོད་པར་འགྱུར། །འདི་ལ་ཐེ་
ཚོམ་སོམ་ཉི་རྣམ་པར་སྤོངས། །ཆོས་ཀྱི་རྒྱལ་པོ་ངས་ནི་ཀུན་བསྟན་ཏེ། །བྱང་ཆུབ་དམ་པ་འདི་ལ་ཡང་དག་གཟུད། །འདི་ན་ང་ལ་ཉན་ཐོས་གང་ཡང་མེད། །ཤཱ་རིའི་བུ་ཁྱོད་འདི་ནི་གསང་ཆེན་གྱིས། །ང་ཡིས་ཉན་
ཐོས་གང་འདི་ཐམས་ཅད་དང་། །བྱང་ཆུབ་སེམས་དཔའ་གཙོ་བོ་འདི་དག་གིས། །ང་ཡི་གསང་ཆེན་འདི་ནི་ཐུབ་པར་གྱིས། །ཅི་ཕྱིར་ཞེ་ན་སྙིགས་མ་ལྔ་ཡི་ཚེ། །སེམས་ཅན་ངན་པ་གཏུམ་པོ་འབྱུང་བས་ན། །
བྱིས་པའི་བློ་ཅན་འདོད་པས་ལྡོངས་གྱུར་པ། །དེ་དག་རྣམས་ཀྱང་བྱང་ཆུབ་སེམས་མི་སྐྱེ། །ཐེག་པ་གཅིག་པོ་འདི་ནི་རྒྱལ་བ་དེས། །སྔོན་རབ་བཤད་པ་ཡིན་ཞེས་ཐོས་ནས་སུ། །མ་འོངས་དུས་ན་
སེམས་ཅན་མྱོས་གྱུར་ཏེ། །མདོ་སྡེ་སྤངས་པ་སེམས་ཅན་དམྱལ་བར་འགྲོ། །སེམས་ཅན་གང་དག་འཛེམ་ཞིང་གཙང་བ་དང་། །གང་དག་བྱང་ཆུབ་དམ་པ་མཆོག་ཞུགས་པ། །དེ་དག་ལ་ནི་

46-1-27b

འཇིགས་པ་མེད་གྱིས་ལ། །ཐེག་པ་གཅིག་གི་བསྔགས་པ་མཐའ་ཡས་ཤོད། །འདྲེན་པ་རྣམས་ཀྱིས་བཤད་པ་དེ་ལྟ་བུ། །ཐབས་ལ་མཁས་པ་དམ་པ་མཆོག་འདི་ནི། ལྡེམ་པོ་ངག་རྣམས་རབ་ཏུ་མང་
པོར་བཤད། །འདི་ནི་མ་བསླབས་རྣམས་ཀྱིས་རིག་པར་དཀའ། །དེ་བས་འཇིག་རྟེན་སློབ་དཔོན་སངས་རྒྱས་ཀྱི། །སྐྱོབ་པའི་ལྡེམ་པོ་གང་ནི་ཤེས་རབ་ཀྱིས། །ཐེ་ཚོམ་ཆོད་ལ་སོམ་ཉི་རྣམས་སྤོངས་ཏེ། །
སངས་རྒྱས་འགྱུར་གྱིས་དགའ་བ་རབ་ཏུ་སྐྱེད། །དམ་པའི་ཆོས་པད་མ་དཀར་པོ་ལས་ཐབས་ལ་མཁས་པའི་ལེའུ་ཞེས་བྱ་སྟེ་གཉིས་པའོ།། །། དམ་པའི་ཆོས་པད་མ་དཀར་པོ་བམ་པོ་གསུམ་པ། དེ་ནས་
ཚེ་དང་ལྡན་པ་ཤཱ་རིའི་བུ་དེའི་ཚེ་ཚིམ་ཞིང་མགུ་ལ་ཡིད་རངས་ཤིང་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། །བཅོམ་ལྡན་འདས་ཀྱི་
སྤྱན་སྔ་ན་བཅོམ་ལྡན་འདས་ཁོ་ན་ལ་རབ་ཏུ་ལྟ་ཞིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་བུའི་གསུང་འདི་བཅོམ་ལྡན་འདས་ལས་ཐོས་ནས། བདག་ངོ་མཚར་དང་རྨད་དུ་གྱུར་
ཏེ་དགའ་བ་ཐོབ་བོ། །དེ་ཅིའི་སླད་དུ་ཞེ་ན་བཅོམ་ལྡན་འདས་བྱང་ཆུབ་སེམས་དཔའ་གཞན་དག་ཀྱང་མཐོང་། བྱང་ཆུབ་སེམས་དཔའ་རྣམས་ཀྱི་མ་འོངས་པའི་དུས་ཀྱི་སངས་རྒྱས་ཀྱི་མཚན་ཡང་ཐོས་ཏེ། འདི་
ལྟ་བུའི་ཆོས་ནི་བཅོམ་ལྡན་འདས་ལས་བདག་གིས་མ་ཐོས་ལ། བདག་དེ་བཞིན་གཤེགས་པའི་ཡེ་ཤེས་གཟིགས་པ་འདི་ལྟ་བུ་ལས་ཉམས་སོ་སྙམ་ནས་ཤིན་ཏུ་མྱ་ངན་དུ་གྱུར། ཤིན་ཏུ་ཡོངས་
སུ་གདུང་བར་གྱུར་པའི་སླད་དུའོ། །བཅོམ་ལྡན་འདས་བདག་རི་དང་རི་སུལ་དང་། ནགས་ཁྲོད་དང་ཀུན་དགའ་ར་བ་དང་། ཆུ་འགྲམ་དང་། ཤིང་དྲུང་དབེན་པར་གདུགས་ལ་གནས་

46-1-28a

པའི་ཚེ། རྟག་པར་ནམ་འཆི་བ་དེའི་ཚེ་ཡང་བཅོམ་ལྡན་འདས་འདི་ལྟར་ཆོས་ཀྱི་དབྱིངས་ལ་འཇུག་པ་མཚུངས་ན། བཅོམ་ལྡན་འདས་ཀྱིས་བདག་ཅག་ཐེག་པ་དམན་པ་བས་ངེས་པར་བཏོན་པ་སྙམ་
དུ་གནས་པ་དེ་ལྟ་བུས་མང་དུ་གནས་ཏེ། བཅོམ་ལྡན་འདས་དེ་ཡང་བདག་ཅག་གིས་ནོངས་ཀྱིས། བཅོམ་ལྡན་འདས་ཀྱིས་མ་ནོངས་སོ་ཞེས་དེའི་ཚེ་བདག་དེ་སྙམ་དུ་སེམས་སོ། །དེ་ཅིའི་སླད་དུ་ཞེ་ན། གང་འདི་
བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བརྩམས་ཏེ། ཡང་དག་ཕུལ་གྱི་ཆོས་བསྟན་པ་གསུང་བ་བདག་ཅག་གིས་བསྡད་ན་ནི། བཅོམ་ལྡན་འདས་བདག་ཅག་ཀྱང་ཆོས་འདི་
ཉིད་ལ་ངེས་པར་འབྱུང་བར་འགྱུར་བ་ཞིག་ན། བཅོམ་ལྡན་འདས་བྱང་ཆུབ་སེམས་དཔའ་མ་ཚོགས་པར། བཅོམ་ལྡན་འདས་ཀྱིས་ལྡེམ་པོར་དགོངས་ཏེ་བཤད་པ་དེ་བདག་ཅག་གིས་མ་རྟོགས་ཏེ། རིངས་
ཐབས་སུ་དེ་བཞིན་གཤེགས་པས་ཆོས་བསྟན་པ་ཐོག་མར་གསུངས་པ་ཉིད་ཐོས་ནས་གཟུང་ཞིང་བསྒོམས་ཏེ་བསམས་ཤིང་ཡིད་ལ་བཟུང་བས། བཅོམ་ལྡན་འདས་བདག་ཉིད་ལ་དེ་ལྟར་འགྱོད་
པས་མང་དུ་གདུགས་མཚན་བས་པར་འགྱུར་རོ། །བཅོམ་ལྡན་འདས་རྨད་དུ་བྱུང་བའི་ཆོས་ཀྱི་སྒྲ་སྔོན་མ་ཐོས་པ་འདི་ལྟ་བུ་བཅོམ་ལྡན་འདས་ལས་ཐོས་པས། བཅོམ་ལྡན་འདས་དེང་བདག་གིས་མྱ་ངན་
ལས་འདས་པ་ཐོབ་སྟེ། བཅོམ་ལྡན་འདས་དེང་བདག་བསིལ་བར་གྱུར་ཏོ། །བཅོམ་ལྡན་འདས་དེང་བདག་ཡོངས་སུ་མྱ་ངན་ལས་འདས་སོ། །བཅོམ་ལྡན་འདས་དེང་བདག་གིས་དགྲ་བཅོམ་པ་ཐོབ་
བོ། །བཅོམ་ལྡན་འདས་དེང་བདག་བཅོམ་ལྡན་འདས་ཀྱི་སྲས་ཐུ་བོ། ཐུགས་ཀྱི་སྲས་ཞལ་ནས་སྐྱེས་པ་ཆོས་ལས་སྐྱེས་པ། ཆོས་ཀྱི་སྤྲུལ་པ། ཆོས་ཀྱི་བགོ་སྐལ་ལ་སྤྱོད་པ་ཆོས་ཀྱིས་གྲུབ་པ་

46-1-28b

སྟེ། དེང་བདག་ཡོངས་སུ་གདུང་བ་དང་བྲལ་ལོ། །དེ་ནས་ཚེ་དང་ལྡན་པ་ཤཱ་རིའི་བུས་དེའི་ཚེ་བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །སྒྲ་འདི་ཐོས་ནས་ཚིམ་པ་རབ་སྐྱེས་ཏེ། །རྣམ་འདྲེན་ཆེན་པོ་
བདག་ནི་ངོ་མཚར་གྱུར། །བདག་ལ་ཐེ་ཚོམ་ནམ་ཡང་ཕྱིས་མི་འབྱུང་། །ཐེག་པ་མཆོག་འདིར་བདག་ནི་ཡོངས་སྨིན་བགྱིས། །བདེ་བར་གཤེགས་པའི་གསུང་དེ་ངོ་མཚར་ཏེ། །སྲོག་ཆགས་རྣམས་ཀྱི་ཐེ་ཚོམ་མྱ་ངན་
བསལ། །ཟག་པ་ཟད་པ་བདག་གི་མྱ་ངན་ཀྱང་། །གསུང་ཐོས་པས་ནི་ཐམས་ཅད་བསལ་བར་གྱུར། །གདུགས་ལ་གནས་ཤིང་ཕན་ཚུན་མཆི་བ་ཡང་། །ནགས་ཚལ་ཁྲོད་དང་ཀུན་དགའ་ཤིང་དྲུང་དང་། །རི་དང་རི་སུལ་
གནས་པར་འགྱུར་བའི་ཚེ། །བསམ་པ་འདི་དག་ཉིད་ནི་རྗེས་སུ་སེམས། །ཟག་པ་མེད་པའི་ཆོས་སུ་མཚུངས་པ་ལ། །འདི་ལྟར་ཁམས་གསུམ་པ་ཡི་ཆོས་ཀྱི་མཆོག །མ་འོངས་དུས་ན་སྟོན་པར་མི་འགྱུར་བ། །
ཀྱེ་མ་བདག་ནི་སྡིག་པའི་སེམས་ཀྱིས་བསླུས། །མཚུངས་པའི་ཆོས་རྣམས་ལ་ནི་བདག་རྨོངས་པས། །བདག་ནི་སུམ་བཅུ་རྩ་གཉིས་མཚན་ལས་ཉམས། །གསེར་གྱི་ཁ་དོག་མདོག་ཀྱང་རབ་ཏུ་སྟོན། །སྟོབས་དང་
རྣམ་ཐར་འདི་དག་ཀུན་ལས་ཉམས། །ཐུབ་པ་ཆེན་པོ་དཔེ་བྱད་བཟང་པོ་གང་། །མཆོག་རབ་དམ་པ་བརྒྱད་བཅུ་ཚང་བ་དང་། །གང་ཡང་མ་འདྲེས་པ་ཡི་བཅྭ་བརྒྱད་ཆོས། །དེ་ལས་ཀྱེ་མ་བདག་ཅག་ཉམས་ཤིང་བསླུས། །
འཇིག་རྟེན་ཕན་པ་ཐུགས་བརྩེ་ཁྱོད་མཐོང་ནས། །གདུགས་ལ་མཆིས་ནས་གཅིག་ཏུ་གནས་པའི་ཚེ། །མ་ཆགས་ཡེ་ཤེས་བསམ་གྱིས་མི་ཁྱབ་ལས། ཀྱེ་མ་བདག་ནི་བསླུས་ཤེས་རྣམ་པར་སེམས། དེ་ལྟར་མང་དུ་
རྣམ་པར་སེམས་པ་ཡིས། །མགོན་པོ་གདུགས་དང་མཚན་ཡང་བས་པར་གྱུར། །འདི་ལས་བདག་ནི་ཉམས་སམ་མ་ཉམས་ཤེས། །བཅོམ་ལྡན་འདས་ལ་རེ་ཤིག་ཞུ་སྙམ་བགྱིད། །བྱང་ཆུབ་སེམས་

46-1-29a

དཔའ་མང་པོ་གཞན་དག་ལ། །འཇིག་རྟེན་འདྲེན་པས་བསྟོད་པ་མཐོང་ནས་སུ། །རྒྱལ་བ་དབང་པོ་བདག་ནི་དེ་སེམས་ཤིང་། །གདུགས་དང་མཚན་མོ་རྟག་དུ་དེ་བཞིན་པས། །ཡེ་ཤེས་བརྟག་མེད་ཕྲ་ཞིང་ཟག་མེད་པ། །
རྒྱལ་བས་བྱང་ཆུབ་སྙིང་པོར་གསུངས་པས་ན། །འདི་ནི་ལྡེམ་པོར་དགོངས་ཏེ་གསུངས་པ་ཞེས། །སངས་རྒྱས་ཆོས་འདི་ཐོས་ནས་དགའ་བཟོད་དོ། །སྔན་ཆད་བདག་ནི་ལྟ་ལ་ཆགས་གྱུར་པ། །མུ་སྟེགས་ཅན་གྱིས་བཀུར་བའི་
ཀུན་ཏུ་རྒྱུ། །དེ་ནས་མགོན་པོས་བདག་གི་བསམ་མཁྱེན་ནས། །ལྟ་བ་དགྲོལ་ཕྱིར་མྱ་ངན་འདའ་བ་གསུངས། །ལྟ་བར་གྱུར་པ་དེ་དག་ཀུན་ལས་དཀྲོལ། །བདག་གིས་སྟོང་པ་ཉིད་ཀྱི་ཆོས་ཐོབ་སྟེ། །དེ་ཕྱིར་བདག་ནི་མྱ་ངན་
འདས་སྙམ་བགྱིད། །མྱ་ངན་འདས་ཤེས་བགྱི་བ་དེ་མ་ལགས། །གང་ཚེ་སངས་རྒྱས་སེམས་ཅན་གཙོར་གྱུར་ཏེ། །ལྷ་མི་གནོད་སྦྱིན་སྲིན་པོས་མདུན་དུ་བདར། །སུམ་བཅུ་རྩ་གཉིས་མཚན་གྱི་གཟུགས་ལྡན་པ། །
དེ་ཚེ་མ་ལུས་མྱ་ངན་འདས་པ་ལགས། །ལྷར་བཅས་འཇིག་རྟེན་རྣམས་ཀྱི་མདུན་དུ་ཡང་། །གང་ཚེ་བདག་ནི་བྱང་ཆུབ་མཆོག་ལུང་བསྟན། །གསུང་ཐོས་བདག་ནི་དེ་རིང་མྱ་ངན་འདས། །འདི་ལྟར་རློམ་སེམས་ཀུན་
ཀྱང་རྣམ་པར་བསལ། །ཐོག་མ་རྣམ་པར་འདྲེན་གྱི་གསུང་ཐོས་ནས། །ས་འདིར་སངས་རྒྱས་ཆ་བྱད་མངོན་སྤྲུལ་ནས། །འདི་བདུད་རྐྱལ་ཀ་བྱེད་པ་མ་ཡིན་གྲང་། །དེ་ལྟར་བདག་ནི་བག་ཚའི་སྟོབས་སྐྱེས་སོ། །
གང་གི་ཚེ་ན་རྒྱུ་དང་གཞི་རྣམས་དང་། །དཔེ་རྣམས་བྱེ་བ་ཁྲག་ཁྲིག་རྣམས་ཀྱིས་ཀྱང་། །སངས་རྒྱས་བྱང་ཆུབ་མཆོག་དེ་གནས་པར་བསྟན། །དེ་ནས་བདག་ནི་ཆོས་ཐོས་ཐེ་ཚོམ་བྲལ། །གང་ཚེ་བདག་ལ་སངས་
རྒྱས་བྱེ་བ་སྟོང་། །མྱ་ངན་ཡོངས་འདས་རྒྱལ་བ་འདས་པས་བརྗོད། །ཐབས་མཁས་པ་ལ་རབ་ཏུ་གནས་ནས་ནི། །དེ་དག་གིས་ཀྱང་ཆོས་འདི་ཤིན་ཏུ་བཤད། །མ་བྱོན་སངས་རྒྱས་མང་དང་འཇིག་རྟེན་ན། །

46-1-29b

དོན་དམ་གཟིགས་པ་གང་དག་བཞུགས་པ་རྣམས། །ཐབས་ལ་མཁས་པ་བརྒྱ་ཡིས་རང་གི་ཆོས། །ཤིན་ཏུ་སྟོན་པར་འགྱུར་ཞིང་དེ་ལྟར་འཆད། །དེ་ལྟར་ཁྱོད་ཉིད་སྤྱོད་པ་ཅི་འདྲ་བར། །ཁབ་ནས་བྱུང་བ་ཚུན་
ཆད་རབ་བསྟན་ཅིང་། །ཆོས་ཀྱི་འཁོར་ལོ་ཅི་འདྲ་ཁྱོད་ཀྱིས་མཁྱེན། །ཇི་ལྟར་ཁྱོད་ཀྱིས་ཆོས་བཤད་གནས་པ་ལས། །དེ་བས་འདི་ནི་བདུད་མ་ལགས་པར་འཚལ། །འཇིག་རྟེན་མགོན་པོ་ཡང་དག་སྤྱོད་སྟོན་པ། །
འདི་ལ་བདུད་ཀྱི་སྤྱོད་ཡུལ་མ་མཆིས་ན། །བདག་ཉིད་དེ་ལྟར་སེམས་ལ་ཐེ་ཚོམ་སྐྱེས། །གང་ཚེ་འཇམ་ཞིང་ཟབ་མོ་སྙན་པ་ཡི། །སངས་རྒྱས་གསུང་གིས་བདག་གི་དགའ་བ་བསྐྱེད། །དེ་ན་བདག་གི་དོགས་པ་ཀུན་
བསལ་གྱུར། །བདག་ནི་ཐེ་ཚོམ་བྲལ་ཏེ་ཡེ་ཤེས་གནས། །ལྷར་བཅས་འཇིག་རྟེན་དག་གིས་མདུན་བདར་ཏེ། །དེ་བཞིན་གཤེགས་པར་བདག་འགྱུར་ཐེ་ཚོམ་བྲལ། །བྱང་ཆུབ་སེམས་དཔའ་མང་པོ་ཀུན་འཛུད་
ཅིང་། །སངས་རྒྱས་བྱང་ཆུབ་འདི་ཡང་དགོངས་པར་བཤད། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་ལྷ་དང་བཅས་པའི་འཇིག་
རྟེན་འདི་དག་གི་བདུད་དང་བདུད་དུ་བཅས་ཚངས་པར་བཅས་དགེ་སྦྱོང་དང་བྲམ་ཟེར་བཅས་པའི་སྐྱེ་དགུའི་མདུན་དུ་ཁྱོད་མོས་པར་བྱའོ། །ཁྱོད་ཁོང་དུ་ཆུད་པར་བྱའོ། །ཤཱ་རིའི་བུ་ངས་ཁྱོད་སངས་རྒྱས་བྱེ་བ་ཁྲག་ཁྲིག་བརྒྱ་
སྟོང་ཕྲག་ཉི་ཤུའི་དྲུང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱ་སྟེ། ཤཱ་རིའི་བུ་ཁྱོད་ཡུན་རིང་པོ་ནས་ང་ཡི་རྗེས་སུ་སློབ་པར་གྱུར་པ་ཡིན་ཏེ། ཤཱ་རིའི་བུ་ཁྱོད་བྱང་ཆུབ་སེམས་
དཔའི་མན་ངག་དང་། བྱང་ཆུབ་སེམས་དཔའི་གསང་ཆེན་གྱིས། ངའི་གསུང་རབ་འདི་ལ་སྐྱེས་པར་གྱུར་ཏོ། །ཤཱ་རིའི་བུ་འདི་ལྟར་ཁྱོད་བྱང་ཆུབ་སེམས་དཔའི་བྱིན་གྱི་རླབས་ཀྱིས་

46-1-30a

སྔོན་གྱི་སྤྱོད་པ་དང་སྨོན་ལམ་དང་བྱང་ཆུབ་སེམས་དཔའི་མན་ངག་དང་བྱང་ཆུབ་སེམས་དཔའི་གསང་ཆེན་མི་དྲན་ནས། བདག་མྱ་ངན་ལས་འདས་སོ་སྙམ་དུ་སེམས་ཏེ། ཤཱ་རིའི་བུ་ངས་ཁྱོད་སྔོན་གྱི་སྤྱོད་པ་དང་
སྨོན་ལམ་དང་ཡེ་ཤེས་ཁོང་དུ་ཆུད་པ་དྲན་པར་བྱ་བར་འདོད་དེ། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་མདོ་ཤིན་ཏུ་རྒྱས་པ་ཆེན་པོ། བྱང་ཆུབ་སེམས་དཔའ་རྣམས་ལ་གདམས་པ། སངས་རྒྱས་ཐམས་ཅད་
ཀྱིས་ཡོངས་སུ་བཟུང་བ་འདི། ཉན་ཐོས་རྣམས་ལ་ཡང་དག་པར་བསྟན་ཏོ། །ཤཱ་རིའི་བུ་ཁྱོད་ནི་འདི་ལྟར་མ་འོངས་པའི་དུས་ན། བསྐལ་པ་དཔག་ཡས་བསམ་གྱིས་མི་ཁྱབ་པ་དཔག་ཏུ་མེད་པར་དེ་བཞིན་གཤེགས་པ་
བྱེ་བ་ཁྲག་ཁྲིག་བརྒྱ་སྟོང་མང་པོའི་དམ་པའི་ཆོས་བཟུང་ཞིང་། མཆོད་པ་རྣམ་པ་སྣ་ཚོགས་བྱས་ཏེ། བྱང་ཆུབ་སེམས་དཔའི་སྤྱོད་པ་འདི་དག་ཡོངས་སུ་རྫོགས་པར་བྱས་ནས། དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་
ལྡན་འདས་པད་མའི་འོད་ཅེས་བྱ་བར་འཇིག་རྟེན་དུ་འབྱུང་བར་འགྱུར་རོ། །ཤཱ་རིའི་བུ་དེའི་ཚེ་ན། བཅོམ་ལྡན་འདས་དེ་བཞིན་གཤེགས་པ་པད་མའི་འོད་དེའི་སངས་རྒྱས་ཀྱི་ཞིང་རྡུལ་མེད་པ་ཞེས་བྱ་བར་འགྱུར་ཏེ། 
མཉམ་པ་ཉམས་དགའ་བ་བཟང་བ་སྡུག་པ་ཡོངས་སུ་དག་པ་འབྱོར་པ་རྒྱས་པ་བདེ་བ་ལོ་ལེགས་པ་མི་དང་ལྷ་མང་པོས་རབ་ཏུ་གང་བ། གཞི་བཻ་དཱུརྱ་ལ་གསེར་གྱི་སྐུད་པས་མིག་མངས་རིས་སུ་བྲིས་པ། 
མིག་མངས་རིས་དེ་ཀུན་ཏུ་རིན་པོ་ཆེའི་ཤིང་སྐྱེས་ཏེ། རྟག་པར་རྒྱུན་དུ་རིན་པོ་ཆེ་སྣ་བདུན་གྱི་མེ་ཏོག་དང་འབྲས་བུ་དང་ལྡན་པར་འགྱུར་རོ། །ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་

46-1-30b

རྫོགས་པའི་སངས་རྒྱས་པད་མའི་འོད་དེ་ཡང་ཐེག་པ་གསུམ་ལ་བརྩམས་ནས་ཆོས་སྟོན་ཏེ། གཞན་ཡང་ཤཱ་རིའི་བུ་དེ་བཞིན་གཤེགས་པ་དེ་བསྐལ་པའི་སྙིགས་མ་ལ་མི་འབྱུང་མོད་ཀྱི། འོན་ཀྱང་སྔོན་གྱི་སྨོན་ལམ་གྱི་དབང་
གིས་ཆོས་སྟོན་པར་འགྱུར་རོ། །ཤཱ་རིའི་བུ་བསྐལ་པ་དེའི་མིང་ཡང་རིན་པོ་ཆེ་ཆེན་པོས་བརྒྱན་པ་ཞེས་བྱ་བར་འགྱུར་རོ། །ཤཱ་རིའི་བུ་འདི་ཇི་སྙམ་དུ་སེམས། ཅིའི་ཕྱིར་བསྐལ་པ་དེ་རིན་པོ་ཆེ་ཆེན་པོས་བརྒྱན་པ་ཞེས་བྱ་
ཞེ་ན། ཤཱ་རིའི་བུ་སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་རྣམས་ནི་རིན་པོ་ཆེ་ཆེན་པོ་ཞེས་བྱ་སྟེ། དེའི་ཚེ་དེའི་དུས་ན་འཇིག་རྟེན་གྱི་ཁམས་རྡུལ་མེད་པ་དེར། དེ་དག་དཔག་ཏུ་མེད་པ་བགྲང་དུ་མེད་པ་
བསམ་གྱིས་མི་ཁྱབ་པ་བགྲང་བ་ལས་འདས་པ་མང་པོ་འབྱུང་ཏེ། དེ་བཞིན་གཤེགས་པས་བགྲང་བ་ནི་མ་གཏོགས་སོ། །དེའི་ཕྱིར་བསྐལ་པ་དེ་རིན་པོ་ཆེ་ཆེན་པོས་བརྒྱན་པ་ཞེས་བྱའོ། །ཤཱ་རིའི་བུ་འདི་ལྟར་
ཡང་དེའི་ཚེ། བྱང་ཆུབ་སེམས་དཔའ་རྣམས་སངས་རྒྱས་ཀྱི་ཞིང་དེ་ན་ཕལ་ཆེར་རིན་པོ་ཆེའི་པད་མའི་སྟེང་ནས་གོམ་པ་འདོར་ཞིང་འགྲོ་བར་འགྱུར་ཏེ། བྱང་ཆུབ་སེམས་དཔའ་འབྱུང་བ་དེ་དག་ནི་ལས་དང་པོ་
པ་མ་ཡིན་ཏེ། དགེ་བའི་རྩ་བ་ཡུན་རིང་པོ་ནས་སྤྱད་པ། ལོ་བརྒྱ་སྟོང་མང་པོར་ཚངས་པར་སྤྱོད་པ་སྤྱད་པ། དེ་བཞིན་གཤེགས་པས་ཡོངས་སུ་བསྟོད་པ། སངས་རྒྱས་ཀྱི་ཡེ་ཤེས་ལ་བརྩོན་པ། མངོན་
པར་ཤེས་པ་ཆེན་པོ་ཡོངས་སུ་སྦྱངས་པ་ལས་སྐྱེས་པ། ཆོས་ཀྱི་ཚུལ་ཐམས་ཅད་ལ་མཁས་པ། མཉེན་པ་དྲན་པ་དང་ལྡན་པ་ཡིན་ཏེ། ཤཱ་རིའི་བུ་ཕལ་ཆེར་ནི་བྱང་ཆུབ་སེམས་དཔའ་དེ་ལྟ་བུས་སངས་
རྒྱས་ཀྱི་ཞིང་དེ་ཡོངས་སུ་གང་བར་འགྱུར་རོ། །ཤཱ་རིའི་བུ་འདི་ལྟར་ཡང་དེ་བཞིན་གཤེགས་པ་པད་མའི་འོད་དེའི་ཚེའི་ཚད་ནི། གཞོན་ནུར་གྱུར་པ་མ་གཏོགས་པར་བར་གྱི་བསྐལ་

46-1-31a

པ་བཅུ་གཉིས་སུ་འགྱུར་རོ། །སེམས་ཅན་དེ་དག་གི་ཚེའི་ཚད་ནི་བར་གྱི་བསྐལ་པ་བརྒྱད་ཏུ་འགྱུར་རོ། །ཤཱ་རིའི་བུ་དེ་བཞིན་གཤེགས་པ་པད་མའི་འོད་དེའི་བར་གྱི་བསྐལ་པ་བཅུ་གཉིས་འདས་པ་དང་། 
དགེ་སློང་དག་བྱང་ཆུབ་སེམས་དཔའ་སེམས་དཔའ་ཆེན་པོ་མོས་པ་རྫོགས་པ་འདི་ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་
བཅོམ་ལྡན་འདས་པད་མའི་ཁྱུ་མཆོག་རྣམ་པར་གནོན་པ་ཞེས་བྱ་བར་འཇིག་རྟེན་དུ་འབྱུང་ཞེས་བྱང་ཆུབ་སེམས་དཔའ་སེམས་དཔའ་ཆེན་པོ་མོས་པ་རྫོགས་པ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་ལུང་བསྟན་ནས། ཡོངས་སུ་མྱ་ངན་ལས་འདའ་བར་འགྱུར་རོ། །ཤཱ་རིའི་བུ་དེ་བཞིན་གཤེགས་པ་པད་མའི་ཁྱུ་མཆོག་རྣམ་པར་གནོན་པ་དེའི་སངས་རྒྱས་ཀྱི་ཞིང་ཡང་རྣམ་པ་དེ་འདྲ་བར་འགྱུར་རོ། །ཡང་ཤཱ་རི་
འི་བུ་དེ་བཞིན་གཤེགས་པ་པད་མའི་འོད་དེ་ཡོངས་སུ་མྱ་ངན་ལས་འདས་ནས་བར་གྱི་བསྐལ་པ་སུམ་བཅུ་རྩ་གཉིས་སུ་དམ་པའི་ཆོས་གནས་པར་འགྱུར་རོ། །བར་གྱི་བསྐལ་པ་སུམ་བཅུ་རྩ་གཉིས་སུ་དམ་པའི་ཆོས་
ཀྱི་གཟུགས་བརྙན་གནས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །མ་འོངས་དུས་ན་ཤཱ་རིའི་བུ་ཁྱོད་ཀྱང་། །རྒྱལ་བ་དེ་བཞིན་གཤེགས་པར་འབྱུང་
འགྱུར་ཏེ། །པད་མའི་འོད་ཅེས་བྱ་བ་ཀུན་ཏུ་སྤྱན། །སྲོག་ཆགས་བྱེ་བ་སྟོང་དག་རྣམ་པར་འདུལ། །སངས་རྒྱས་བྱེ་བ་མང་ལ་བཀུར་སྟི་བྱས། །དེར་ནི་སྤྱོད་པ་སྟོབས་རྣམས་རབ་བསྒྲུབས་ནས། །སྟོབས་བཅུ་དག་

46-1-31b

ཀྱང་མངོན་པར་བསྐྱེད་བྱས་ཏེ། །བྱང་ཆུབ་དམ་པ་མཆོག་ཀྱང་ཐོབ་པར་འགྱུར། །ཚད་མེད་བསམ་གྱིས་མི་ཁྱབ་བསྐལ་པ་ན། །དེ་ཚེ་བསྐལ་པ་རིན་ཆེན་མང་པོ་འབྱུང་། །འཇིག་རྟེན་མིང་ཡང་དེ་ཚེ་རྡུལ་མེད་པ། །རྐང་གཉིས་
གཙོ་བོའི་ཞིང་ནི་རྣམ་པར་དག །བཻ་དཱུརྱ་ཡིས་དེ་བཞིན་ས་གཞི་ཡོག །གསེར་གྱི་སྐུད་པས་སོ་སོར་རབ་ཏུ་བརྒྱན། །མེ་ཏོག་འབྲས་བུས་བརྒྱན་ཞིང་བལྟ་སྡུག་པའི། །རིན་ཆེན་ཤིང་ལྗོན་བརྒྱ་དང་རབ་ཏུ་ལྡན། །དྲན་
ལྡན་བྱང་ཆུབ་སེམས་དཔའ་དེ་ན་མང་། །སྤྱོད་པ་མངོན་པར་བསྒྲུབ་ལ་རབ་མཁས་ཤིང་། །གང་གིས་སངས་རྒྱས་བརྒྱ་ལས་སྤྱོད་བསླབས་པ། །དེ་དག་སངས་རྒྱས་ཞིང་དེར་སྐྱེ་བར་འགྱུར། །རྒྱལ་བ་དེ་ཡི་ཐ་མའི་དུས་
ཀྱི་ཚེ། །གཞོན་ནུའི་ས་ལས་ཤིན་ཏུ་འདས་གྱུར་ནས། །འདོད་པ་རྣམ་པར་སྤངས་ནས་མངོན་འབྱུང་སྟེ། །བྱང་ཆུབ་དམ་པ་མཆོག་ཀྱང་ཐོབ་པར་འགྱུར། །དེ་ན་རྒྱལ་བ་དེའི་ཚེ་ཚད་ནི། །བར་གྱི་བསྐལ་པ་བཅུ་གཉིས་
ཚང་བར་འགྱུར། །དེ་ན་མི་དེ་དག་གི་ཚེ་ཚད་ནི། །བར་གྱི་བསྐལ་པ་བརྒྱད་ཏུ་ཐུབ་པར་འགྱུར། །རྒྱལ་བ་དེ་ནི་མྱ་ངན་འདས་ནས་ཀྱང་། །བར་གྱི་བསྐལ་པ་སུམ་ཅུ་གཉིས་ཚང་བར། །ལྷར་བཅས་འཇིག་རྟེན་རྣམས་
ལ་ཕན་པའི་ཕྱིར། །དེ་ཡི་ཚེ་ན་དམ་པའི་ཆོས་གནས་སོ། །དམ་པའི་ཆོས་ནུབ་དེ་ཡི་གཟུགས་བརྙན་ཡང་། །བར་གྱི་བསྐལ་པ་སུམ་བཅུ་གཉིས་སུ་གནས། །སྐྱོབ་པ་དེ་ཡི་སྐུ་གདུང་རྒྱས་འགྱུར་ཏེ། །ལྷ་དང་མི་
ཡིས་རྟག་ཏུ་རིམ་གྲོ་བྱས། །བཅོམ་ལྡན་འདས་དེ་དེ་ལྟར་འབྱུང་འགྱུར་གྱིས། །ཤཱ་རིའི་བུ་ཁྱོད་རབ་ཏུ་དགའ་བར་གྱིས། །ཟིལ་གྱིས་མི་ནོན་རྐང་གཉིས་གཙོ་བོ་སྟེ། །དེ་ལྟར་འགྱུར་བ་དེ་ནི་ཁྱོད་ཉིད་ཡིན། །དེ་ནས་དགེ་
སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་འཁོར་བཞི་པོ་དེ་དག་དང་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པ་རྣམས་ཚེ་

46-1-32a

དང་ལྡན་པ་ཤཱ་རིའི་བུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་འདི། བཅོམ་ལྡན་འདས་ལས་མངོན་སུམ་དུ་ཐོས་ནས། ཚིམ་ཞིང་མགུ་ལ་ཡིད་རངས་ཏེ་རབ་ཏུ་དགའ་ནས། དགའ་བ་དང་ཡིད་བདེ་བ་
སྐྱེས་ཏེ། རང་རང་གི་གོས་བཅོམ་ལྡན་འདས་ཀྱི་སྐུ་ལ་གསོལ་ཏོ། །ལྷའི་དབང་པོ་བརྒྱ་བྱིན་དང་མི་མཇེད་ཀྱི་བདག་པོ་ཚངས་པ་དང་ལྷའི་བུ་གཞན་བྱེ་བ་བརྒྱ་སྟོང་དག་གིས་ཀྱང་། བཅོམ་ལྡན་འདས་ཀྱི་སྐུ་ལ་ལྷའི་ན་བཟའ་གསོལ། 
ལྷའི་མེ་ཏོག་མན་ད་ར་དང་མན་དཱ་ར་ཆེན་པོ་དག་ཀྱང་མངོན་པར་གཏོར། སྟེང་གི་བར་སྣང་ལ་ལྷའི་གོས་དག་ཀྱང་བསྐོན། ལྷའི་སིལ་སྙན་བརྒྱ་སྟོང་དང་རྔ་དག་ཀྱང་སྟེང་གི་བར་སྣང་ལ་བརྡུངས་ཏེ། མེ་ཏོག་གི་ཆར་ཆེན་པོ་ཡང་མངོན་པར་ཕབ་
ནས། ཚིག་འདི་སྐད་དུ་བཅོམ་ལྡན་འདས་ཀྱིས། སྔོན་ཡུལ་བཱ་རཱ་ཎ་སཱིར་དྲང་སྲོང་ལྷུང་བ། རི་དགས་ཀྱི་ནགས་སུ་ཆོས་ཀྱི་འཁོར་ལོ་བསྐོར་ཏེ། དེང་འདིར་ཡང་བཅོམ་ལྡན་འདས་ཀྱིས་བླ་ན་མེད་པའི་ཆོས་ཀྱི་འཁོར་ལོ་བསྐོར་ཏོ་ཞེས་སྨྲས་ནས། 
ལྷའི་བུ་དེ་རྣམས་ཀྱིས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །བཱ་རཱ་ཎ་སཱིར་འཇིག་རྟེན་ན། །མཚུངས་མེད་གང་ཟག་དཔའ་ཆེན་གྱིས། །ཕུང་པོའི་སྐྱེ་འཇིག་སྟོན་པ་ཡི། །ཆོས་ཀྱི་འཁོར་ལོ་རབ་བསྐོར་ཏེ། །
དེར་ནི་ཐོག་མར་རབ་ཏུ་བསྐོར། །འདྲེན་པས་འདི་དང་ལན་གཉིས་ཏེ། །ཡིད་ཆེས་དཀའ་བ་གང་ལགས་ཏེ། །རྣམ་འདྲེན་ཁྱོད་ཀྱིས་དེ་བཤད་དོ། །འཇིག་རྟེན་མགོན་པོའི་སྤྱན་སྔར་ནི། །བདག་ཅག་ཆོས་མང་ཐོས་ན་ཡང་། །
འདི་འདྲ་བ་ཡི་ཆོས་འདི་ནི། །སྔན་ཆད་ནམ་ཡང་མ་ཐོས་སོ། །དྲང་སྲོང་ཆེན་པོའི་ལྡེམ་ངག་ལ། །དཔའ་བོ་བདག་ཅག་རྗེས་ཡིད་རང་། །ཇི་ལྟ་འཇིགས་མེད་ཤཱ་རིའི་བུ། །འཕགས་པ་འདི་ལ་ལུང་བསྟན་བཞིན། །
དེ་འདྲ་བདག་ཅག་འཇིག་རྟེན་དུ། །བླ་མེད་སངས་རྒྱས་གྲུབ་འགྱུར་ནས། །དགོངས་ཏེ་བཤད་པ་སངས་རྒྱས་ཀྱི། །བྱང་ཆུབ་བླ་མེད་སྟོན་པར་ཤོག །འཇིག་རྟེན་འདི་དང་གཞན་དག་ཏུ། །རྫོགས་པའི་སངས་རྒྱས་

46-1-32b

མཉེས་བགྱིས་ཏེ། །བདག་ཅག་དགེ་བ་ཅི་བགྱིས་པ། །བྱང་ཆུབ་ཏུ་ཡང་སྨོན་པར་ཤོག །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་ལུང་བསྟན་པ། བཅོམ་ལྡན་འདས་ལས་མངོན་སུམ་དུ་ཐོས་ནས། བཅོམ་ལྡན་འདས་བདག་ཐེ་ཚོམ་མ་མཆིས་པར་གྱུར། སོམ་ཉི་དང་བྲལ་བར་གྱུར་ཏོ། །བཅོམ་ལྡན་འདས་
གང་དག་དབང་དང་ལྡན་པར་གྱུར་པ་སྟོང་ཉིས་བརྒྱ་པོ་སྔོན་བཅོམ་ལྡན་འདས་ཀྱིས་སློབ་པའི་ས་ལ་བཀོད་དེ། དགེ་སློང་དག་གང་འདི་སྐྱེ་བ་དང་། རྒ་བ་དང་ན་བ་དང་འཆི་བ་ལས་ཡང་དག་པར་འདའ་བ། མྱ་ངན་ལས་
འདས་པའི་མཐར་ཐུག་པ། མྱ་ངན་ལས་འདས་པ་ལ་ཡང་དག་པར་གཞོལ་བ་དེ་ནི། ངའི་ཆོས་འདུལ་བའི་མཐར་ཐུག་པ་ཡིན་ནོ་ཞེས་དེ་སྐད་གཏམས་ཤིང་དེ་སྐད་རྗེས་སུ་བསྟན་པ་འདི་དག་དང་། བཅོམ་ལྡན་འདས་
སློབ་པ་དང་མི་སློབ་པའི་དགེ་སློང་བདག་ཏུ་ལྟ་བ་དང་འབྱུང་བར་ལྟ་བ་དང་འཇིག་པར་ལྟ་བའི་ལྟ་བ་ཐམས་ཅད་རྣམ་པར་སྤངས་པ། བཅོམ་ལྡན་འདས་ཀྱི་ཉན་ཐོས་ཉིས་སྟོང་པོ་འདི་དག་ཐམས་ཅད་ཀྱང་བདག་མྱ་ངན་
ལས་འདས་པའི་ས་ལ་གནས་སོ་སྙམ་བགྱིད་དེ། འདི་དག་སྔོན་མ་ཐོས་པའི་ཆོས་འདི་ལྟ་བུ་འདི། བཅོམ་ལྡན་འདས་ལས་ཐོས་ནས། ཐེ་ཚོམ་འཚལ་བར་གྱུར་ན། བཅོམ་ལྡན་འདས་ཅི་ནས་འཁོར་
བཞི་པོ་འདི་དག་ཐེ་ཚོམ་མ་མཆིས། སོམ་ཉི་མ་མཆིས་པར་གནས་པར་འགྱུར་བར། །དགེ་སློང་འདི་དག་གི་དོགས་པ་བསལ་བའི་སླད་དུ། བཅོམ་ལྡན་འདས་ཀྱིས་ལེགས་པར་བཀའ་སྩལ་དུ་གསོལ། 
དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་སེམས་ཅན་མོས་པ་ཐ་དད་པ་དང་། བསམ་པ་ཐ་དད་པ་དང་ཁམས་ཐ་དད་པ་རྣམས་ཀྱི་བསམ་པ་མཁྱེན་ནས་དེ་བཞིན་གཤེག་

46-1-33a

པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འདི་ལྟར་སྣ་ཚོགས་མངོན་པར་བསྒྲུབ་པ་དང་། རྒྱུ་དང་གཞི་དང་དཔེ་དང་དམིགས་པ་དང་ངེས་པའི་ཚིག་དང་ཐབས་མཁས་པ་རྣམ་པ་སྣ་ཚོགས་ཀྱིས་ཆོས་སྟོན་ཏོ། །བླ་ན་མེད་པ་ཡང་དག་པར་རྫོགས་
པའི་བྱང་ཆུབ་འདི་ལས་བརྩམས་ཏེ། ཆོས་བསྟན་པ་ཐམས་ཅད་ཀྱིས་བྱང་ཆུབ་སེམས་དཔའི་ཐེག་པ་འདི་ཉིད་ལ་ཡང་དག་པར་འཛུད་དོ་ཞེས་ངས་ཁྱོད་ལ་བསྟན་ཟིན་པ་མ་ཡིན་ནམ། ཤཱ་རིའི་བུ་འོན་ཀྱང་དོན་དེ་རྒྱས་པར་བསྟན་པའི་ཕྱིར་ཁྱོད་ལ་དཔེ་བསྟན་པར་བྱའོ། །
དེ་ཅིའི་ཕྱིར་ཞེ་ན། སྐྱེས་བུ་མཁས་པ་ལ་ལ་ནི་སྨྲས་པའི་དོན་དཔེས་ཤེས་པར་འགྱུར་བའི་ཕྱིར་རོ། །ཤཱ་རིའི་བུ་འདི་ལྟ་སྟེ་དཔེར་ན་གྲོང་ངམ་གྲོང་ཁྱེར་རམ་གྲོང་བརྡལ་ལམ་ལྗོངས་སམ་ཡུལ་འཁོར་རམ། རྒྱལ་པོའི་ཕོ་བྲང་འཁོར་ལ་ལ་ཞིག་ན་
ཁྱིམ་བདག་རྒན་པོ་འཁོགས་པ་གཏུགས་པ་དུས་ཡོལ་བ་དགོག་ཏུ་ཕྱིན་པ་ཕྱུག་པ་ནོར་ཆེ་བ་ལོངས་སྤྱོད་ཆེ་བ་ཞིག་འདུག་ལ། དེའི་ཁང་པ་ཡང་མཐོ་ཞིང་ཡངས་ལ་བརྩིགས་ནས་རིང་དུ་ལོན་པ་འགྲུམས་པ་སྲོག་ཆགས་བརྒྱ་
ཕྲག་གཅིག་གམ་གཉིས་སམ་གསུམ་འམ་བཞི་འམ་ལྔའི་གནས་སྒོ་གཅིག་པ་ཞིག་ཡོད་དེ། རྩྭས་གཡོགས་པ་ཁྱམས་རྣམས་ཀྱང་འགྲུམས་པ་ཀ་བའི་རྩ་བ་རུལ་བ། རྩིགས་པ་དང་སྒོའི་བརྐྱང་ནུལ་གོགས་པར་གྱུར་པའི་ཁང་
པ་དེ་ལ་བློ་བུར་དུ་མེའི་ཕུང་པོ་ཆེན་པོ་ངོས་ཐམས་ཅད་ཀུན་ནས་རབ་ཏུ་འབར་བར་གྱུར་ལ། །སྐྱེས་བུ་དེ་ལ་ཡང་ཁྱེའུ་ལྔ་འམ་བཅུ་འམ་ཉི་ཤུ་འམ་མང་ཞིག་ཡོད་དེ། སྐྱེས་བུ་དེ་ནི་ཁང་པ་དེ་ནས་བྱུང་བར་གྱུར་ལ། ཤཱ་རིའི་
བུ་དེ་ནས་སྐྱེས་བུ་དེས། བདག་གི་ཁང་པ་ལ་མེའི་ཕུང་པོ་ཆེན་པོ་ཀུན་ནས་འབར་བ་མཐོང་སྟེ། སྔངས་སྐྲག་ནས་སེམས་མི་བདེ་བར་གྱུར་ཏེ། འདི་ལྟར་བདག་ནི་མེའི་ཕུང་པོ་ཆེན་པོ་འདིས་མ་རེག་མ་རེག་མ་ཚིག་ཅིང་བདེ་བར་
མྱུར་དུ་ཁྱིམ་འབར་བ་འདིའི་སྒོར་བྱུང་སྟེ་འགྲོ་ནུས་མོད་ཀྱི། བདག་གི་བུ་བྱིས་པ་གཞོན་ནུ་འདི་དག་ཁྱིམ་འབར་བ་འདི་ན་རྩེད་མོ་དག་གིས་རྩེ་དགའ་ཞིང་དགའ་མགུར་སྤྱོད་དེ། ཁྱིམ་འདི་ཚིག་པར་མ་ཚོར་མི་ཤེས་

46-1-33b

མ་རིག་མ་རྟོགས་ནས་འདི་ལྟར་མེའི་ཕུང་པོ་ཆེན་པོས་ཤིན་ཏུ་གདུངས་ཏེ། སྡུག་བསྔལ་གྱི་ཕུང་པོ་ཆེན་པོས་ཀྱང་མི་དགའ་མི་བྱེད་དེ། སྡུག་བསྔལ་དུ་ཡང་ཡིད་ལ་མི་འཛིན། ཕྱིར་འབྱུང་བར་ཡང་ཡིད་ལ་བྱ་བ་
མི་སྐྱེད་དོ་སྙམ་དུ་སེམས་སོ། །ཤཱ་རིའི་བུ་སྐྱེས་བུ་དེ་ཡང་སྟོབས་དང་ལྡན་ཞིང་ལག་སྟོབས་ཆེ་བ་ཡིན་ཏེ། དེ་འདི་ལྟར་བདག་སྟོབས་དང་ལྡན་ཞིང་ལག་སྟོབས་ཡོད་ན། བདག་གིས་ཁྱེའུ་འདི་དག་
ཐམས་ཅད་གཅིག་ཏུ་བསྡུས་ལ། པང་པར་བླངས་ཏེ་ཁྱེར་ལ་ཁྱིམ་འདི་ནས་བྱུང་ངོ་སྙམ་དུ་བསམས་པ་དང་། དེས་ཀྱང་འདི་སྙམ་དུ་བསམས་ཏེ། ཁང་པ་འདི་སྒོ་གཅིག་པོ་ཡོད་ལ། སྒོ་ཡང་
དོག་གཞོན་ནུ་འདི་དག་ནི་གཡོ་ཞིང་རྒོད་དེ་བྱིས་པར་གྱུར་པས། འཐེན་པར་འགྱུར་དུ་འོང་སྟེ། དེ་དག་མེའི་ཕུང་པོ་ཆེན་པོ་འདིས་ཚུལ་མ་ཡིན་པར་ཉོན་མོངས་པར་འགྱུར་གྱིས། འདི་དག་ལ་སྦྲན་ཏོ་སྙམ་
དུ་དེ་ལྟར་བསམས་ནས། གཞོན་ནུ་དེ་དག་ལ་སྨྲས་པ། ཁྱིམ་འདི་ལ་མེའི་ཕུང་པོ་ཆེན་པོ་འབར་ཏེ། འདིར་ཐམས་ཅད་མེའི་ཕུང་པོ་ཆེན་པོ་འདིས་ཚིག་ནས། ཚུལ་མ་ཡིན་པར་ཉོན་མོངས་པར་
འགྱུར་དུ་འོང་གིས། གཞོན་ནུ་ཁྱེད་ཚུར་ཤོག །ཕྱིར་བྱུང་ཞེས་བྱས་པ་དང་། དེ་ལྟར་ཕན་པར་འདོད་པའི་སྐྱེས་བུ་དེས་དེ་སྐད་དུ་བསྒོ་བ། གཞོན་ནུ་དེ་དག་གིས་དེ་འབར་བ་འདི་ལྟ་གོ་ཅི་ཞིག་ཅེས་མི་ཤེས་ནས་
མི་དགར་མི་བྱེད། མི་འཇིགས་མི་སྐྲག །འཇིགས་པར་མ་གྱུར་ཏེ་མེ་སེམས་ཕྱིར་འབྱུང་དུ་མི་བཏུབ་ཅིང་། མ་རིག་མི་ཤེས་ཏེ། གཞན་དུ་ན་དེ་དང་དེ་དག་ཏུ་འཕྱན་ཞིང་ཕྱི་ཕྱིར་རྒྱུག་ཏེ་
ཕ་དེ་ལ་ལྟའོ། །དེ་ཅིའི་ཕྱིར་ཞེ་ན། དེ་དག་འདི་ལྟར་བྱིས་པར་གྱུར་པའི་ཕྱིར་རོ། །དེ་ནས་ཡང་སྐྱེས་བུ་དེ་འདི་སྙམ་དུ་སེམས་ཏེ། ཁྱིམ་འདི་ལ་

46-1-34a

འདིར་ལ་མེའི་ཕུང་པོ་ཆེན་པོ་འབར་ཏེ། འདིར་བདག་དང་གཞོན་ནུ་འདི་དག །ཚུལ་མ་ཡིན་པར་མེའི་ཕུང་པོ་ཆེན་པོ་འདིས་ཉོན་མོངས་པར་འགྱུར་དུ་འོང་གིས། འདི་ལྟར་བདག་གིས་ཐབས་མཁས་
མཁས་པས་གཞོན་ནུ་འདི་དག་ཁྱིམ་འདི་ནས་གདོན་ཏོ་སྙམ་ནས། སྐྱེས་བུ་དེས་གཞོན་ནུ་དེ་དག་གིས་བསམ་པ་ཤེས། མོས་པ་རིག་པར་གྱུར་ཏེ། གཞོན་ནུ་དེ་དག་གི་བརྩེན་པ་ནི་དུ་མ་སྟེ། རྣམ་པ་ཐ་དད་པ་ཡང་དུ་མ་
ཞིག་ཡིན་ལ། དགའ་བར་འགྱུར་བ་ལ་འདོད་པ་དང་མཛེས་པ་དང་སྡུག་པ་དང་ཡིད་ཏུ་འོང་བ་རྣམས་དུ་མ་ཡིན་ན་དེ་དག་ཀྱང་དཀོན་པར་གྱུར་ཏེ། དེ་ནས་སྐྱེས་བུ་དེས་གཞོན་ནུ་དེ་དག་གི་བསམ་པ་ཤེས་པས་འདི་སྐད་ཅེས་སྨྲས་ཏེ། 
གཞོན་ནུ་དག་ཁྱེད་ཀྱི་རྩེད་མོར་བྱ་བ་དགའ་བར་འགྱུར་བ། ངོ་མཚར་རྨད་དུ་བྱུང་བ། གང་མ་རྙེད་པའི་ཕྱིར་མི་དགའ་བར་གྱུར་པ་དེ་དག་ཁ་དོག་སྣ་ཚོགས་རྣམ་པ་མང་པོ་དེ་འདི་ལྟ་སྟེ། གླང་གི་ཤིང་རྟ་དང་། རའི་ཤིང་རྟ་དང་། 
རི་དགས་ཀྱི་ཤིང་རྟ་ཁྱེད་ཀྱིས་ཇི་ལྟར་བསམས་པ། མཛེས་པ་དང་སྡུག་པ་དང་ཡིད་དུ་འོང་བ་དེ་དག་ཐམས་ཅད་ཁྱེད་རྩེར་བཞུགས་པའི་ཕྱིར། ངས་ཁང་པའི་ཕྱི་སྒོར་བཀོད་ཀྱིས་ཁང་པ་འདི་ནས་ཁྱེད་ཕྱིར་བྱུང་ལ་རྒྱུག་ཏེ་ཤོག་ཤིག་
དང་། ངས་ཁྱེད་ཅག་སུ་ཅི་འདོད་པ་དེ་ལ་དེ་སྦྱིན་གྱིས། དེ་དག་གིས་ཕྱིར་མྱུར་དུ་རྒྱུགས་ཏེ་ཤོག་ཤིག་ཅེས་བྱས་པ་དང་། གཞོན་ནུ་དེ་དག་འདོད་པ་དང་། མཛེས་པ་དང་སྡུག་པ་དང་ཡིད་དུ་འོང་བ་ཇི་ལྟ་བུར་འདོད་པ་དང་ཇི་ལྟ་བུར་
བསམས་པ་རྣམས་ཀྱི་མིང་ཐོས་ནས་འབར་བར་གྱུར་པའི་ཁང་པ་དེ་ནས་རྩེད་མོར་བྱ་བ་དང་། དགའ་བར་བྱ་བའི་ཕྱིར་མྱུར་བ་ཁོ་ནར་བརྩོན་འགྲུས་བརྩམས་ནས། མཐུ་དང་ལྡན་པའི་བང་གིས་
གཅིག་ལ་གཅིག་སྡོད་པ་མེད་པར་སུ་སྔ་བ་དེ་བས་ཀྱང་། སུ་སྔ་ཞེས་ལུས་གཅིག་ལ་གཅིག་བསྔོས་ཤིང་བརྒྱུགས་ཏེ། ཁྱིམ་འབར་བ་དེ་ནས་མྱུར་དུ་ཕྱིར་འཐོན་ཏོ། །དེ་ནས་སྐྱེས་བུ་དེས་བྱིས་

46-1-34b

པ་དེ་དག་བདེ་ཞིང་ལེགས་པར་འཐོན་པ་མཐོང་ནས། འཇིགས་པ་མེད་པར་གྱུར་པར་རིག་སྟེ། གྲོང་གིས་དཔོང་ས་བླ་གབ་མེད་པར་འདུག་ནས་དགའ་བ་དང་རངས་པ་སྐྱེས་ཏེ། མྱ་ངན་མེད་ཅིང་སྒྲིབ་པ་དང་བྲལ་ནས། 
འཇིགས་པ་མེད་པ་ཐོབ་པར་གྱུར་ཏེ། དེ་ནས་བྱིས་པ་དེ་དག་ཕ་དེ་ག་ལ་འདུག་པ་དེར་དོང་ནས་ཕྱིན་པ་དང་། འདི་སྐད་དུ་ཡབ་རྩེད་མོར་བགྱི་བ་རྣམ་པ་མང་པོ་དགའ་བར་འགྱུར་བ་དེ་དག་འདི་ལྟ་སྟེ། གླང་
གི་ཤིང་རྟ་དང་རྟ་དང་རའི་ཤིང་རྟ་དང་། རི་དགས་ཀྱི་ཤིང་རྟ་བདག་ཅག་ལ་སྩལ་དུ་གསོལ་ཞེས་སྨྲས་པ་དང་། ཤཱ་རིའི་བུ་དེ་ནས་སྐྱེས་བུ་དེས་བདག་གི་བུ་རྣམས་ལ་རླུང་ལྟར་མགྱོགས་ཤིང་མཐུ་དང་
ལྡན་པའི་གླང་གི་ཤིང་རྟ་བྱིན་ཏེ། རིན་པོ་ཆེ་སྣ་བདུན་ལས་བྱས་པ། ལོགས་དང་ལྡན་པ། དྲིལ་བུ་གཡེར་ཁའི་དྲ་བ་རབ་ཏུ་སྤྱངས་པ། མཐོ་ཞིང་བརྟེན་པ། རིན་པོ་ཆེ་ངོ་མཚར་རྨད་དུ་བྱུང་
བའི་རྒྱན་གྱིས་བརྒྱན་པ། རིན་པོ་ཆེའི་ཕྲེང་བས་མཛེས་པར་བྱས་པ། མེ་ཏོག་གི་ཕྲེང་བས་བརྒྱན་པ། ཤིང་བལ་གྱི་སྟན་བཏིང་བ་རས་བཅོས་བུ་དང་དར་གྱིས་གཡོགས་པ། རྒྱབ་རྟེན་དམར་པོ་
གཉིས་སུ་གཞག་པ། གླང་དཀར་པོ་ཐལ་ཀར་ཤིན་ཏུ་མགྱོགས་པ་དག་ལ་བཅས་ནས། བ་དན་དང་ལྡན་པ་སྐྱེས་བུ་མང་པོས་བཟུང་བ། གླང་སྟོབས་དང་ལྡན་ཞིང་རླུང་བཞིན་དུ་མགྱོགས་པ། 
ཁ་དོག་མཐུན་པ་རྣམ་པ་སྣ་ཚོགས་པའི་གླང་གི་ཤིང་རྟ་བྱིས་པ་རྣམས་ལ་རེ་རེ་བྱིན་ནོ། །ཤཱ་རིའི་བུ་དེ་ཅིའི་ཕྱིར་ཞེ་ན། མི་དེ་དེ་ལྟར་ཕྱུག་ལ་ནོར་ཆེ་བ་བང་མཛོད་མང་བས་དེས་འདི་སྙམ་བསམས་ཏེ། བདག་གིས་
བྱིས་པ་འདི་རྣམས་ལ་བཞོན་པ་ངན་པ་བྱིན་ཏེ། བདག་ལ་ཅིག་ཞིག་བྱ་སྙམ་མོ། །དེ་ཅིའི་ཕྱིར་ཞེ་ན། གཞོན་ནུ་འདི་དག་ཀུན་ཀྱང་བདག་ཉིད་ཀྱི་བུ་སྟེ། ཐམས་ཅད་ཀྱང་བདག་ལ་སྡུག་ཅིང་ཡིད་ཏུ་འོང་ལ། བདག་ལ་ཡང་བཞོན་པ་ཆེན་པོ་

46-1-35a

ལྟ་བུ་འདི་དག་ཡོད་ན། བདག་གིས་གཞོན་ནུ་འདི་དག་ཐམས་ཅད་ལ་སྙོམས་པར་བསམ་གྱི། མི་སྙོམས་པར་མི་བྱའོ། །བདག་ཀྱང་བང་མཛོད་མང་གིས་བདག་གིས་སེམས་ཅན་ཐམས་ཅད་ལ་ཡང་བཞོན་པ་ཆེན་
པོ་འདི་འདྲ་བ་དག་སྦྱིན་ན། བདག་གི་བུ་རྣམས་ལ་ལྟ་ཅི་སྨོས་སྙམ་པའི་ཕྱིར་རོ། །དེའི་ཚེ་གཞོན་ནུ་དེ་དག་ཀྱང་བཞོན་པ་ཆེན་པོ་དེ་དག་ལ་ཞོན་ནས། ངོ་མཚར་དང་རྨད་དུ་བྱུང་བ་ཐོབ་པར་གྱུར་ན་ཤཱ་རིའི་བུ་འདི་ཇི་སྙམ་དུ་སེམས། 
སྐྱེས་བུ་དེས་གཞོན་ནུ་དེ་དག་ལ་འདི་ལྟར་སྔོན་དུ་བཞོན་པ་རྣམ་པ་གསུམ་བསྟན་ལ། ཕྱིས་ཐམས་ཅད་ཀྱང་བཞོན་པ་ཆེན་པོ་བྱིན་ཏེ། བཞོན་པ་རླབས་པོ་ཆེ་བྱིན་ན་བརྫུན་དུ་སྨྲས་པར་མི་འགྱུར་རམ། ཤཱ་རིའི་བུས་
གསོལ་པ། བཅོམ་ལྡན་འདས་དེ་ལྟར་མ་ལགས་སོ། །བདེ་བར་གཤེགས་པ་དེ་ལྟ་མ་ལགས་སོ། །སྐྱེས་བུ་དེས་འདི་ལྟར་ཐབས་མཁས་པས་བྱིས་པ་དེ་རྣམས་ཁྱིམ་འབར་བ་དེ་ནས་ཕྱུང་སྟེ། སྲོག་སྩལ་བའི་
སླད་དུ་དེ་ཉིད་ཀྱིས་རྒྱུས་སྐྱེས་བུ་དེ་ཤོ་བེ་མཆི་བ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བདག་གི་ལུས་ཐོབ་པ་ཉིད་ཀྱིས། རྩེད་མོར་བགྱི་བ་ཐམས་ཅད་ཀྱང་ཐོབ་པ་ལགས་ཏེ། འདི་ལྟར་བཅོམ་ལྡན་འདས་
སྐྱེས་བུ་དེས་གཞོན་ནུ་དེ་དག་ལ་ཤིང་རྟ་ཅིག་མ་སྩལ་དུ་ལགས་ཀྱང་། བཅོམ་ལྡན་འདས་སྐྱེས་བུ་དེ་ཤོ་བེ་བར་མཆི་བར་མི་འགྱུར་རོ། །དེ་ཅིའི་སླད་དུ་ཞེ་ན། བཅོམ་ལྡན་འདས་སྐྱེས་བུ་དེས་ཐོག་མ་ནས་ཐབས་མཁས་
པས་གཞོན་ནུ་དེ་དག་བདག་གིས་སྡུག་བསྔལ་གྱི་ཕུང་པོ་ཆེན་པོ་ལས་ཐར་བར་བགྱིའོ་སྙམ་དུ་བསམས་པའི་སླད་དུ་སྟེ། རྣམ་གྲངས་འདིས་ཀྱང་སྐྱེས་བུ་དེ་ཤོ་བེ་མཆི་བ་མ་ལགས་ན། སྐྱེས་བུ་དེ་བདག་ལ་བང་
མཛོད་མང་པོ་ཡང་མཆིས་ལ། བུ་ཡང་སྡུག་པར་བསམས་ནས། ལེགས་སུ་འདོད་པས་སྤུ་མདོག་མཐུན་པའི་བཞོན་པ། བཞོན་པ་ཆེན་པོ་སྩལ་བ་ལྟ་སྨོས་ཀྱང་ཅི་འཚལ་ཏེ། བཅོམ་ལྡན་འདས་

46-1-35b

སྐྱེས་བུ་དེ་ཤོ་བེ་མཆི་བ་མ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་ལེགས་སོ་ལེགས་སོ། །དེ་དེ་བཞིན་ཏེ་ཇི་སྐད་སྨྲས་པ་
བཞིན་ནོ། །ཤཱ་རིའི་བུ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་པ་ཐམས་ཅད་སེལ་བ། འཚེ་བ་དང་འཁྲུག་པ་དང་གནོད་པ་དང་སྡུག་བསྔལ་དང་ཡིད་མི་
བདེ་བ་དང་མ་རིག་པའི་མུན་པ་མུན་ནག་གི་རབ་རིབ་སྒྲིབ་པ་དང་། ཡོངས་སུ་དཀྲིས་པ་ཐམས་ཅད་ལས་ཡོང་ཡེ་རྣམ་པར་གྲོལ་བ་དེ་བཞིན་གཤེགས་པའི་ཡེ་ཤེས་དང་སྟོབས་དང་མི་འཇིགས་པ་དང་
སངས་རྒྱས་ཀྱི་ཆོས་མ་འདྲེས་པ་དང་ལྡན་པ། རྫུ་འཕྲུལ་གྱི་སྟོབས་ཀྱིས་ཤིན་ཏུ་སྟོབས་དང་ལྡན་པ་འཇིག་རྟེན་གྱི་ཕ། ཐབས་ཆེན་པོ་ལ་མཁས་པའི་ཡེ་ཤེས་དམ་པའི་ཕ་རོལ་ཏུ་སོན་པ། 
སྙིང་རྗེ་ཆེན་པོ་མི་སྐྱོ་བའི་ཡིད་ཀྱིས་ཕན་པར་འདོད་པ། སྙིང་བརྩེ་བ་དང་ལྡན་པ་དེ། ཁམས་གསུམ་སྡུག་བསྔལ་གྱི་ཕུང་པོ་ཆེན་པོ་འབར་བ་གདུང་ཕྱམ་དང་སྟེང་གི་གཡོགས་མ་ཞིག་པའི་ཁང་པ་དང་
འདྲ་བར་སེམས་ཅན་སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་ཡིད་མི་བདེ་བ་དང་འཁྲུག་པ་དང་། མ་རིག་པའི་མུན་པ་མུག་ནག་གི་རབ་རིབ་སྒྲིབ་པ་དང་ཡོངས་
སུ་དཀྲིས་པར་ཞུགས་པ་རྣམས་འདོད་ཆགས་དང་ཞེ་སྡང་དང་གཏི་མུག་ལས་ཡོངས་སུ་གྲོལ་བར་བྱ་བ་དང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་གཟུད་པའི་ཕྱིར་འབྱུང་སྟེ། དེ་བྱུང་མ་ཐག་ཏུ་
སེམས་ཅན་རྣམས་སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་ཡིད་མི་བདེ་བ་དང་འཁྲུག་པས་སྲེག་པ་དང་བཙོ་བ་དང་གདུང་བ་དང་ཡོངསུ་གདུང་བ་དང་ལོངས་སྤྱོད་ཀྱི་ཕྱིར་འདོད་པའི་

46-1-36a

རྒྱུའི་གཞིས་སྡུག་བསྔལ་རྣམ་པ་མང་པོ་རབ་ཏུ་མྱོང་བ་དང་། ད་ལྟར་གྱི་ཚེ་ལ་ཚོལ་བ་དང་ཡོངས་སུ་བསགས་པའི་ཕྱིར། ཚེ་ཕྱི་མ་ལ་སེམས་ཅན་དམྱལ་བ་དང་དུད་འགྲོའི་སྐྱེ་གནས་དང་གཤིན་རྗེའི་འཇིག་རྟེན་དུ་སྡུག་
བསྔལ་རྣམ་པ་མང་པོ་རབ་ཏུ་མྱོང་བ་དང་། ལྷ་དང་མི་དབུལ་པོ་དང་མི་སྡུག་པ་དང་ཕྲད་པ་དང་སྡུག་པ་དང་བྲལ་བའི་སྡུག་བསྔལ་རབ་ཏུ་མྱོང་བ་དེ་ཉིད་དུ། སྡུག་བསྔལ་གྱི་ཕུང་པོར་འཁོར་ཞིང་། རྩེ་དགའ་ལ་དགའ་མགུར་སྤྱོད་དེ། 
མི་སྐྲག་མི་དངང་དངང་བར་མི་འགྱུར། མ་རིག་མ་ཚོར་སྐྱོ་བར་མི་བྱེད་འབྱུང་བ་མི་ཚོལ་བར་ཁང་པ་འབར་བ་དང་འདྲ་བའི་ཁམས་གསུམ་དེར་མངོན་པར་དགའ་ནས། དེ་དང་དེ་དག་ཏུ་རྒྱུག་སྟེ། སྡུག་བསྔལ་གྱི་ཕུང་
པོ་ཆེན་པོ་དེ་ལྟ་བུས་གཟིར་ཀྱང་། སྡུག་བསྔལ་དུ་འདུ་ཤེས་པ་ཡིད་ལ་བྱ་བ་མི་སྐྱེད་པར་གཟིགས་སོ། །ཤཱ་རིའི་བུ་དེ་ལ་ང་ནི་སེམས་ཅན་འདི་དག་གི་ཕ་སྟེ། ངས་སེམས་ཅན་འདི་དག་སྡུག་བསྔལ་གྱི་ཕུང་པོ་ཆེན་པོ་
འདི་ལྟ་བུ་འདི་ལས་ཡོངས་སུ་ཐར་བར་བྱ་ཞིང་ངས་གང་གི་སེམས་ཅན་འདི་དག་རྩེ་བ་དང་དགའ་བ་དང་དགའ་མགུར་སྤྱོད་པ་དང་རྣམ་པར་རྩེ་བར་བྱེད་པར་འགྱུར་བ་སངས་རྒྱས་ཀྱི་ཡེ་ཤེས་བདེ་བ་དཔག་ཏུ་མེད་ཅིང་བསམ་གྱིས་མི་
ཁྱབ་པ། སེམས་ཅན་འདི་དག་ལ་སྦྱིན་པ་བྱ་བར་དེ་བཞིན་གཤེགས་པས་དེ་ལྟར་གཟིགས་སོ། །ཤཱ་རིའི་བུ་དེ་ལ་ང་ཡེ་ཤེས་ཀྱི་སྟོབས་དང་ལྡན་ཞིང་རྫུ་འཕྲུལ་གྱི་སྟོབས་དང་ལྡན་ཞེས་གལ་ཏེ་ཐབས་མ་ཡིན་པས་སེམས་
ཅན་འདི་དག་ལ་དེ་བཞིན་གཤེགས་པའི་ཡེ་ཤེས་གཟིགས་པ་དང་སྟོབས་དང་མི་འཇིགས་པ་རྣམས་ཐོབ་པར་བྱས་སུ་ཟིན་ན། སེམས་ཅན་འདི་དག་ཆོས་འདི་དག་གིས་ངེས་པར་འབྱུང་བར་མི་འགྱུར་རོ། །
དེ་ཅིའི་ཕྱིར་ཞེ་ན། སེམས་ཅན་འདི་དག་ནི་འདོད་པའི་ཡོན་ཏན་ལྔ་པོ་དག་ལ་ཤིན་ཏུ་ཆགས་པ། སེམས་ཅན་འདི་དག་ནི་ཁམས་གསུམ་གྱི་དགའ་བ་ལ་ཤིན་དུ་ཆགས་པ། སྐྱེ་བ་དང་རྒ་བ་དང་ན་བ་དང་འཆི་བ་དང་། 

46-1-36b

མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་ཡིད་མི་བདེ་བ་དང་འཁྲུག་པ་ལས་མ་ཐར་བ། བསྲེག་བཙོ་གདུང་ཡོངས་སུ་གདུང་བ་སྟེང་གཡོགས་དང་། གདུང་ཕྱམ་འབར་བའི་ཁྱིམ་དང་འདྲ་བའི་ཁམས་གསུམ་
ནས་མ་བྱུང་བ་སྟེ། དེ་དག་གིས་སངས་རྒྱས་ཀྱི་ཡེ་ཤེས་ལ་ཇི་ལྟར་ལོངས་སྤྱོད་པར་འགྱུར་ཞེས་དེ་བཞིན་གཤེགས་པས་དེ་ལྟར་གཟིགས་སོ། །དེ་ལ་ཤཱ་རིའི་བུ་འདི་ལྟར་སྐྱེས་བུ་ལག་སྟོབས་ཅན་དེས་ལག་སྟོབས་བཞག་
སྟེ། ཐབས་མཁས་པས་གཞོན་ནུ་དེ་དག་ཁྱིམ་འབར་བ་དེ་ནས་འདོན་ཏེ་བཏོན་ནས། དེ་དག་ཕྱིས་རླབས་ཆེ་བའི་བཞོན་པ་ཆེན་པོ་བྱིན་པ་དེ་བཞིན་དུ། ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་དེ་བཞིན་གཤེགས་པའི་ཡེ་ཤེས་དང་སྟོབས་དང་། མི་འཇིགས་པ་དང་ལྡན་པ་ཡང་། དེ་བཞིན་གཤེགས་པའི་ཡེ་ཤེས་དང་སྟོབས་དང་མི་འཇིགས་པ་བཞག་སྟེ། ཐབས་མཁས་པའི་
ཡེ་ཤེས་ཀྱིས་གདུང་ཕྱམ་དང་སྟེང་གཡོགས་འབར་བའི་ཁྱིམ་དང་འདྲ་བའི་ཁམས་གསུམ་ནས་སེམས་ཅན་རྣམས་འདོན་པའི་ཕྱིར་ཐེག་པ་གསུམ་སྟོན་པ་འདི་ལྟ་སྟེ། ཉན་ཐོས་ཀྱི་ཐེག་པ་དང་། རང་སངས་
རྒྱས་ཀྱི་ཐེག་པ་དང་། བྱང་ཆུབ་སེམས་དཔའི་ཐེག་པ་སྟེ། ཐེག་པ་གསུམ་གྱིས་སེམས་ཅན་རྣམས་བྲོངས་ཏེ། དེ་དག་ལ་འདི་སྐད་ཅེས་གསུངས་ཏེ། ཁྱེད་ཅག་ཁྱིམ་
འབར་བ་དང་འདྲ་བའི་ཁམས་གསུམ་གྱི་གཟུགས་དང་སྒྲ་དང་དྲི་དང་རོ་དང་རེག་བྱ་ངན་པ་ལ་དགའ་བར་མ་བྱེད་ཅིག །ཁྱེད་ཅག་ཁམས་གསུམ་འདིར་མངོན་པར་དགའ་བས་འདོད་པ་ལྔའི་ཡོན་ཏན་དང་བཅས་
པའི་སྲིད་པས། བསྲེག་བཙོ་གདུང་ཡོངས་སུ་གདུང་བར་གྱུར་གྱིས། ཁམས་གསུམ་འདི་ནས་འབྱུང་བ་འདི་ལྟ་སྟེ། ཉན་ཐོས་ཀྱི་ཐེག་པ་དང་རང་སངས་རྒྱས་

46-1-37a

ཀྱི་ཐེག་པ་དང་བྱང་ཆུབ་སེམས་དཔའི་ཐེག་པ་སྟེ། ཐེག་པ་གསུམ་པོ་དག་ཐོབ་པར་གྱིས་ཤིག །ང་ནི་གནས་འདི་ལ་ཁྱེད་ཀྱི་སྙིང་རྡེང་བ་སྟེ། ངས་ཁྱེད་ལ་ཐེག་པ་འདི་གསུམ་སྦྱིན་གྱིས། ཁམས་གསུམ་
ནས་འབྱུང་བའི་ཕྱིར་བརྩོན་པར་གྱིས་ཤིག །ཀྱེ་སེམས་ཅན་དག་ཐེག་པ་འདི་དག་ནི་གང་འཕགས་པ་རྣམས་ལ། འཕགས་པ་རྣམས་ཀྱིས་རབ་ཏུ་བསྟོད་པ། དགའ་བ་ཆེན་པོ་དང་ལྡན་པ་ཡིན་ཏེ། ཁྱེད་ཅག་མི་འཕོང་
པར་བརྩོན་ཞིང་དགའ་ལ། དགའ་མགུར་སྤྱོད་པར་འགྱུར་གྱིས། དབང་པོ་དང་སྟོབས་དང་བྱང་ཆུབ་ཀྱི་ཡན་ལག་དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པས་དགའ་བ་ཆེན་པོ་
རབ་ཏུ་མྱོང་བར་འགྱུར་རོ། །བདེ་བ་དང་ཡིད་བདེ་བ་ཆེན་པོ་དང་ཡང་ལྡན་པར་འགྱུར་ཞེས་གསུང་ངོ་། །ཤཱ་རིའི་བུ་དེ་ལ་སེམས་ཅན་གང་མཁས་པར་གྱུར་པ་དེ་དག་ནི་དེ་བཞིན་གཤེགས་པ་འཇིག་རྟེན་གྱི་ཕ་ལ་མངོན་
པར་ཡིད་ཆེས་པར་འགྱུར་རོ། །མངོན་པར་ཡིད་ཆེས་ནས་ཀྱང་དེ་བཞིན་གཤེགས་པའི་བསྟན་པ་ལ་བརྩོན་པར་བྱེད་དོ། །དེ་ལ་སེམས་ཅན་ཁ་ཅིག་གཞན་གྱི་སྒྲ་ཐོས་པའི་རྗེས་སུ་འགྲོ་བར་འདོད་པ་དེ་དག་ནི། བདག་
ཡོངས་སུ་མྱ་ངན་ལས་བཟླ་བ་དང་། འཕགས་པའི་བདེན་པ་བཞི་ཁོང་དུ་ཆུད་པར་བྱ་བའི་ཕྱིར། དེ་བཞིན་གཤེགས་པའི་བསྟན་པ་ལ་བརྩོན་པར་བྱེད་དེ། དེ་དག་ནི་ཉན་ཐོས་ཀྱི་ཐེག་པ་འདོད་ཅིང་། ཁམས་གསུམ་ནས་བྱུང་
བ་ཞེས་བྱ་སྟེ། དཔེར་ན་ཁྱིམ་འབར་བ་དེ་ནས་བྱིས་པ་ཁ་ཅིག་རི་དགས་ཀྱི་ཤིང་རྟ་འདོད་དེ་ཕྱིར་བྱུང་བ་ལྟ་བུའོ། །སེམས་ཅན་གཞན་ཡང་སློབ་དཔོན་མེད་པའི་ཡེ་ཤེས་དང་། དུལ་བར་གནས་པ་དང་ཞི་གནས་འདོད་
པ་དག་ནི། བདག་ཡོངས་སུ་མྱ་ངན་ལས་བཟླ་བ་དང་། རྒྱུ་དང་རྐྱེན་ཡོངསུ་ཁོང་དུ་ཆུད་པར་བྱ་བའི་ཕྱིར། དེ་བཞིན་གཤེགས་པའི་བསྟན་པ་ལ་བརྩོན་པར་བྱེད་དེ། དེ་དག་ནི་རང་སངས་རྒྱས་ཀྱི་ཐེག་པ་འདོད་

46-1-37b

ཅིང་ཁམས་གསུམ་ནས་བྱུང་བ་ཞེས་བྱ་སྟེ། དཔེར་ན་ཁྱིམ་འབར་བ་དེ་ནས་བྱིས་པ་ཁ་ཅིག་རའི་ཤིང་རྟ་འདོད་དེ་བྱུང་བ་ལྟ་བུའོ། །ཡང་སེམས་ཅན་ཁ་ཅིག་ཐམས་ཅད་མཁྱེན་པའི་ཡེ་ཤེས་སངས་རྒྱས་ཀྱི་ཡེ་ཤེས་རང་འབྱུང་
གི་ཡེ་ཤེས་སློབ་དཔོན་མེད་པའི་ཡེ་ཤེས་འདོད་པ་དག་ནི། སྐྱེ་བོ་མང་པོ་ལ་ཕན་པ་དང་སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་ལྷ་དང་མི་དང་སྐྱེ་བོ་ཕལ་པོ་ཆེའི་དོན་དང་ཕན་པ་དང་། བདེ་བ་དང་། སེམས་
ཅན་ཐམས་ཅད་ཡོངས་སུ་མྱ་ངན་ལས་བཟླ་བ་དང་། དེ་བཞིན་གཤེགས་པའི་ཡེ་ཤེས་དང་སྟོབས་དང་མི་འཇིགས་པ་ཁོང་དུ་ཆུད་པར་བྱ་བའི་ཕྱིར། དེ་བཞིན་གཤེགས་པའི་བསྟན་པ་ལ་བརྩོན་པར་བྱེད་དེ། དེ་དག་ནི་ཐེག་
པ་ཆེན་པོ་འདོད་ཅིང་། ཁམས་གསུམ་ནས་འབྱུང་བ་ཞེས་བྱའོ། །དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱ་སྟེ། དཔེར་ན་ཁྱིམ་འབར་བ་དེ་ནས་བྱིས་པ་ཁ་ཅིག་གླང་གི་ཤིང་རྟ་འདོད་དེ་ཕྱིར་བྱུང་བ་ལྟ་བུའོ། །
ཤཱ་རིའི་བུ་འདི་ལྟ་སྟེ་དཔེར་ན། མི་དེས་ཁྱིམ་འབར་བ་དེ་ནས་གཞོན་ནུ་དེ་དག་འཐོན་པར་མཐོང་ནས། བདེ་ཞིང་ལེགས་པར་ཐར་ཏེ། འཇིགས་པ་མེད་པར་རིག་ལ། བདག་ཀྱང་ནོར་མང་བར་
ཤེས་ནས། བྱིས་པ་དེ་དག་ལ་བཞོན་པ་རླབས་ཆེན་པོ་གཅིག་བྱིན་པ་དེ་བཞིན་དུ། ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སེམས་ཅན་
བྱེ་བ་དུ་མ་སྡུག་བསྔལ་དང་། འཇིགས་པ་དང་། བག་ཚ་བ་དང་། གཙེ་བས་ཡོངས་སུ་གང་བའི་ཁམས་གསུམ་ནས་ཡོངས་སུ་ཐར་ཏེ། དེ་བཞིན་གཤེགས་པའི་
བསྟན་པའི་སྒོ་ནས་བྱུང་ནས། འཇིགས་པ་དང་གཙེ་བའི་གནོད་པ་དག་ལས་ཡོངས་སུ་ཐར་ཏེ་མྱ་ངན་ལས་འདས་པའི་བདེ་བ་ཐོབ་པར་གཟིགས་ནས། ཤཱ་རིའི་བུ་དེ་དག་ལ་དེའི་ཚེ། དེ་

46-1-38a

བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདག་ལ་ཡེ་ཤེས་དང་སྟོབས་དང་མི་འཇིགས་པའི་མཛོད་མང་བར་མཁྱེན་ཏེ། དེ་དག་ཐམས་ཅད་ཀྱང་བདག་ཉིད་ཀྱི་བུ་ཡིན་པར་ཐུགས་སུ་
ཆུད་ནས་སེམས་ཅན་དེ་དག་ཐམས་ཅད་ཀྱང་སངས་རྒྱས་ཀྱི་ཐེག་པ་ཉིད་ཀྱིས་ཡོངས་སུ་མྱ་ངན་ལས་འདའ་བར་མཛད་ཀྱི། སེམས་ཅན་གང་ལ་ཡང་སོ་སོ་བདག་གི་མྱ་ངན་ལས་འདས་པ་མི་གསུང་སྟེ། སེམས་ཅན་དེ་
དག་ཐམས་ཅད་ཀྱང་དེ་བཞིན་གཤེགས་པའི་མྱ་ངན་ལས་འདའ་བ་མྱ་ངན་ལས་འདའ་བ་ཆེན་པོས་ཡོངས་སུ་མྱ་ངན་ལས་འདའ་བར་མཛད་དོ། །ཤཱ་རིའི་བུ་སེམས་ཅན་གང་དག་ཁམས་གསུམ་ནས་ཐར་བར་གྱུར་པ་དེ་དག་ལ་
ཡང་དེ་བཞིན་གཤེགས་པས་བསམ་གཏན་དང་རྣམ་པར་ཐར་པ་དང་ཏིང་ངེ་འཛིན་དང་སྙོམས་པར་འཇུག་པ། འཕགས་པའི་བདེན་པའི་མཆོག་དང་བརྩེན་པ་དགའ་བར་འགྱུར་བ་ཐམས་ཅད་ཁ་དོག་གཅིག་
པ་སྦྱིན་པར་མཛད་དོ། །ཤཱ་རིའི་བུ་འདི་ལྟ་སྟེ་དཔེར་ན། སྐྱེས་བུ་དེས་འདི་ལྟར་གཞོན་ནུ་དེ་དག་ལ་བཞོན་པ་གསུམ་བསྟན་ནས་དེ་དག་ཐམས་ཅད་ལ་བཞོན་པ་ཆེན་པོ་གཅིག་བྱིན་ཏེ། རིན་པོ་ཆེ་སྣ་བདུན་ལས་
བྱས་པ། རྒྱན་ཐམས་ཅད་ཀྱིས་བརྒྱན་པ། ཁ་དོག་གཅིག་པ། བཞོན་པ་རླབས་པོ་ཆེ་བཞོན་པའི་མཆོག་ཐམས་ཅད་ལ་བྱིན་པའི་ཕྱིར། བརྫུན་སྨྲ་བ་མ་ཡིན་པ་དེ་བཞིན་དུ། ཤཱ་རིའི་བུ་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་། འདི་ལྟར་ཐབས་མཁས་པས། དང་པོ་ཐེག་པ་གསུམ་བསྟན་པས། ཕྱིས་ཐེག་པ་གཅིག་པ་ཉིད་ཀྱིས་སེམས་
ཅན་རྣམས་ཡོངས་སུ་མྱ་ངན་ལས་འདའ་བར་མཛད་པའི་ཕྱིར་བརྫུན་དུ་སྨྲ་བ་མ་ཡིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ་དེ་བཞིན་གཤེགས་པ་ནི་ཡེ་ཤེས་དང་། སྟོབས་དང་མི་འཇིགས་པའི་བང་མཛོད་མང་པོ་

46-1-38b

དང་ལྡན་ཏེ། སེམས་ཅན་ཀུན་ལ་ཐམས་ཅད་མཁྱེན་པའི་ཡེ་ཤེས་དང་ལྡན་པའི་ཆོས་བསྟན་པའི་མཐུ་མངའ་བའི་ཕྱིར་རོ། །ཤཱ་རིའི་བུ་འདི་ལྟར་ཐབས་མཁས་པ་སྣ་ཚོགས་དང་། ཡེ་ཤེས་མངོན་པར་བསྒྲུབས་
པས། དེ་བཞིན་གཤེགས་པ་ཐེག་པ་ཆེན་པོ་གཅིག་དུ་སྟོན་པར་རྣམ་གྲངས་འདིས་ཀྱང་དེ་ལྟ་བུར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །
ཇི་ལྟར་སྐྱེས་བུ་ཞིག་གི་ཁྱིམ་ཡོད་པ། །ཆེ་ལ་རབ་ཏུ་འགྲུམས་ཏེ་ཞིག་ལ་ཐུག །དེ་བཞིན་ཁྱམས་རྣམས་ཞིག་པར་གྱུར་པ་སྟེ། །ཀ་བའི་རྩ་བ་དག་ཀྱང་རུལ་བར་གྱུར། །པུ་ཤུ་དང་ནི་སྐར་ཁུང་ཕྱོགས་
རེར་བྲལ། །རྩིག་པ་རེ་ལྡེ་བརྐྱང་ནུལ་རྣམས་ཀྱང་གོགས། །སྟེགས་བུ་དག་ཀྱང་རྙིངས་ནས་འགྲུམས་ཤིང་ཞིག །རྩྭ་ཡིས་གཡོགས་པ་ཀུན་ཀྱང་འདྲལ་ཞིང་འཛག །བརྒྱ་ཕྲག་ལྔ་དག་ལས་ནི་མི་ཉུང་བ། །
དེ་ན་དེ་དག་གི་ཡང་གནས་སུ་གྱུར། །ཁང་ཕྲན་ཤིན་དུ་དོག་པ་མང་པོ་དག །སྨེ་བས་རབ་ཏུ་གང་ཞིང་སྨད་པར་གྱུར། །དེ་ན་ཕྱམ་རྣམས་དགུ་པོ་ཐམས་ཅད་འགྲུམས། །ར་བ་རྩིག་པ་དག་ཀྱང་དེ་བཞིན་ཞིག །
བྱ་རྒོད་བྱེ་བ་དག་ནི་དེ་ན་གནས། །དེ་བཞིན་ཕུག་རོན་འུག་པ་བྱ་གཞན་དང་། །མི་བཟད་གདུག་པའི་སྦྲུལ་རྣམས་དེ་ན་ཡོད། །དུག་ཆེན་དྲག་པོ་རྣམས་ཀྱང་ཕྱོགས་ཕྱོགས་ན། །སྡིག་པ་དང་ནི་བྱི་བ་སྣ་ཚགས་
དང་། །ཤིན་དུ་གཏུམ་པའི་སྲོག་ཆགས་རྣམ་མང་གནས། །མི་མ་ཡིན་པའང་གནས་དང་གནས་དག་ན། །བཤང་གཅི་དག་གིས་རབ་ཏུ་སྨེ་བར་བྱས། །སྲིན་བུ་མེ་ཁྱེར་གྲོག་མ་སྦུར་བུས་གང་། །ཁྱི་རྣམས་དང་
ནི་བདག་ང་རོ་འང་ན། །ཅི་སྤྱང་མི་བཟད་ཁྲོ་བོ་དེ་ན་འཁོད། །མི་རོ་རྣམས་ལ་འཁྲེན་ཅིང་རབ་ཏུ་ཟ། །དེ་ཡི་ཐེ་རེལ་སྡོད་ཅིང་ལྟ་བ་ཡང་། །ཝ་དང་ཁྱི་དག་དེ་ན་དུ་མ་འཁོད། །དེ་དག་ཉམ་ཆུང་རྟག་ཏུ་བཀྲེས་པས་ཉེན། །

46-1-39a

གནས་དང་གནས་ན་རྣམ་པར་འཆའ་ཞིང་ཟ། །ཐབ་མོ་བྱེད་དེ་རབ་ཏུ་སྒྲ་ཡང་འབྱིན། །རྣམ་པ་དེ་འདྲར་ཁྱིམ་དེ་རབ་ཏུ་འཇིགས། །མི་ཡི་རོ་དག་ལ་ཡང་རྣམ་འཁྲེན་ཞིང་། །ཤིན་ཏུ་དྲག་སེམས་གནོད་སྦྱིན་དེ་ན་
འཁོད། །སྦྲུལ་དང་རྐང་བརྒྱ་པ་དང་གཅན་ཟན་རྣམས། །དེ་ཡི་གནས་དང་གནས་ན་རབ་ཏུ་འཁོད། །དེ་དག་ཕྱོགས་དང་ཕྱོགས་སུ་ཚང་བཅས་ཏེ། །ཕྲུག་གུ་རྣམས་ཀྱང་ཀློག་ཅིང་འཇོག་པར་བྱེད། །དེ་དག་གིས་ནི་
བཞག་ཅིང་བཀོད་པ་ལ། །གནོད་སྦྱིན་རྣམས་ཀྱང་དེ་ལ་ཕལ་ཆེར་ཟ། །རབ་ཏུ་གཏུམ་སེམས་སེམས་ཅན་གཞན་ཟོས་པས། །ཇི་ཙམ་གནོད་སྦྱིན་དེ་དག་འདྲངས་གྱུར་ཏེ། །སེམས་ཅན་གཞན་གྱི་ཤ་ཡིས་ལུས་
རྒྱས་ནས། །དེ་ཚེ་དེ་ན་རབ་ཏུ་ཐབ་མོ་བྱེད། །མི་བཟད་གཏུམ་སེམས་ཁྲོ་བའི་གྲུལ་བུམ་རྣམས། །ཞིག་པའི་ཁྱིམ་དེ་རྣམས་སུ་གནས་འཆའ་སྟེ། །མཐོ་གང་ཚད་དང་དེ་བཞིན་ཁྲུ་གང་ཚད། །ཁྲུ་དོའི་ཚད་ཀྱི་ཕན་
ཚུན་རྒྱུ་ཞིང་འགྲོ། །དེ་དག་ཁྱི་ཡི་རྐང་ནས་བཟུང་ནས་ནི། །དེ་བཞིན་ས་ལ་གན་རྐྱལ་དེ་བཞག་སྟེ། །མགུལ་བར་རབ་ཏུ་བགགས་ཤིང་བསྡིགས་པ་ཡིས། །འཁང་དུ་བཅུག་པ་དེ་ལ་དགའ་བར་བྱེད། །
གཅེར་བུ་གནག་ཅིང་དེ་བཞིན་རིད་པ་ཡི། །ཡི་དགས་ཆེ་ཞིང་རིང་བ་འང་དེར་གནས་ཏེ། །རབ་ཏུ་བཀྲེས་པས་ཁ་ཟས་ཀུན་ཚོལ་ཞིང་། །དེ་དག་དེ་ན་ཉམས་ཐག་ཆོ་ངེས་འདེབས། །ལ་ལ་གླང་གི་མགོ་ལ་ཁབ་
ཀྱི་ཁ། །མི་ཙམ་དང་ནི་དེ་བཞིན་ཁྱི་ཙམ་དག །ཟས་ལ་སྲེད་པས་རབ་ཏུ་གདུངས་པའི་ཕྱིར། །སྐྲ་དག་ལྷུག་པར་བཞིག་ཅིང་སྒྲ་ཡང་འབྱིན། །གནོད་སྦྱིན་ཤ་ཟ་ཡི་དགས་དེ་དག་ཀྱང་། །སྲེད་བརྐམ་
ཁ་ཟས་དག་ནི་ཚོལ་བའི་ཕྱིར། །རྟག་ཏུ་མཐོངས་དང་སྐར་ཁུང་དག་ནས་ཀྱང་། །དེ་ན་ཕྱོགས་བཞིར་རབ་ཏུ་ལྟ་བར་བྱེད། །དེ་ལྟར་ཁྱིམ་དེ་མི་བཟད་འཇིག་གྱུར་ལ། །ཆེ་ཞིང་མཐོ་ལ་རབ་ཏུ་མི་བརྟན་

46-1-39b

ཏེ། །རྣམ་པར་འགྲུམས་ཤིང་འཇིག་ཉེ་འཇིགས་པ་དེ། །སྐྱེས་བུ་གཅིག་ཅིག་ཡོངས་སུ་དབང་གྱུར་ལ། །སྐྱེས་བུ་དེ་ཡང་ཁྱིམ་གྱི་ཕྱི་རོལ་བྱུང་། །ཁྱིམ་དེ་ཀུན་ཀྱང་རབ་ཏུ་འབར་གྱུར་ཏེ། །ངོས་བཞི་ཐམས་ཅད་ནས་ནི་
གློ་བུར་དུ། མེ་ལྕེ་སྟོང་སྙེད་ཀུན་དུ་འབར་བར་འགྱུར། འོད་མ་དང་ནི་ཤིང་དག་མེས་ཚིག་སྟེ། །དྲག་པོའི་སྒྲ་རྣམས་ཤིན་ཏུ་འཇིགས་པར་འབྱུང་། །ཀ་བ་དང་ནི་དེ་བཞིན་རྩིག་པ་འབར། །གནོད་སྦྱིན་ཡི་དགས་
དག་ཀྱང་སྒྲ་དག་འབྱིན། །བྱ་རྒོད་བརྒྱ་ཡང་རག་རོག་ཚིག་པར་འགྱུར། །གྲུལ་བུམ་དག་ནི་གདོང་ཚིག་ལྡོམ་ཞིང་འཕྱན། །དེ་ན་ཀུན་ཏུ་སྦྲུལ་བརྒྱ་མང་པོ་དག །མེ་ཡིས་ཚིག་ནས་ཙེར་ལྷང་སྒྲ་ཡང་འབྱིན། །
བསོད་ནམས་མེད་པ་མེ་ཡིས་ཀུན་ཚིག་ཅིང་། །དེ་ན་ཤ་ཟ་མང་པོ་ཕན་ཚུན་རྒྱུ། །དེ་དག་གཅིག་ལ་གཅིག་ནི་སོས་བཏབ་སྟེ། །ཚིག་པར་གྱུར་པ་དག་ལ་ཁྲག་གིས་འཐོར། །དེ་ན་ལྕེ་སྤྱང་དུས་བྱས་ཤི་བ་
ལ། །སེམས་ཅན་དག་ནི་ཕན་ཚུན་རྣམ་པར་ཟ། །ངན་སྐྱུགས་ཚིག་པའི་དྲི་ང་ཡིད་མི་འོང་། །འཇིག་རྟེན་དག་ན་ཕྱོགས་བཞིར་རབ་ཏུ་འཐུལ། །སྲིན་བུ་རྐང་བརྒྱ་པ་དག་བྲོས་པ་ལ། །
དེ་ལ་གྲུལ་བུམ་དག་ནི་ཤིན་དུ་ཟ། །བཀྲེས་པ་དང་ནི་སྐོམ་པས་རབ་གདུངས་ཤིང་། །ཡི་དགས་རྣམས་ཀྱང་སྒྲ་འབར་ཀུན་འཕྱན་ཏེ། །དེ་ལྟར་ཁྱིམ་དེ་ཤིན་ཏུ་མི་བཟད་འཇིགས། །
མེ་ལྕེ་དག་ནི་སྟོང་སྙེད་འབར་བར་འགྱུར། །སྐྱེས་བུ་ཁྱིམ་དེའི་བདག་པོ་དེ་ཉིད་ནི། །ཤིན་ཏུ་རྣམ་པར་ལྟ་ཞིང་སྒོ་ན་འདུག །དེ་ན་དེ་ཡིས་ཐོས་པ་བདག་གི་བུ། །འདི་ལྟར་བྱིས་པ་དག་ནི་མི་ཤེས་
པས། །རྩེད་མོ་བརྩེན་པ་དག་ལ་དགའ་བའི་བློ། །རྩེད་མོ་དགའ་འམ་རབ་ཏུ་དྲེགས་མྱོས་ཤེས། །དེ་ཐོས་བདག་གི་བྱིས་པ་ཁྱེའུ་འདི་ཀུན། མྱུར་དུ་ཚིག་ཅིང་ཆུད་ཟོས་མི་

46-1-40a

འགྱུར་བར། བདག་གི་བུ་རྣམས་རབ་ཏུ་ཐར་བྱའི་ཕྱིར། །ཁྱིམ་དེའི་ནང་དུ་མྱུར་དུ་ཞུགས་ནས་སུ། །དེ་ལ་དེས་ནི་ཁྱིམ་གྱི་ཉེས་བརྗོད་དེ། །སྡུག་བསྔལ་འདི་དག་མི་བཟད་རིགས་ཀྱི་བུ། །སེམས་
ཅན་རྣམ་པ་མང་ཞིང་མི་འདི་དང་། །སྡུག་བསྔལ་ཆེན་པོ་དག་ཀྱང་གཅིག་ཕྱིར་གཅིག །སྦྲུལ་གདུག་ཤིན་དུ་གཏུམ་སེམས་གནོད་སྦྱིན་དང་། གྲུམ་བུམ་དང་ནི་ཡི་དགས་མང་པོ་གནས། །ཅེ་སྤྱང་དག་དང་ཝ་དང་ཁྱི་
ཡང་མང་། །བྱ་རྒོད་དག་ཀྱང་ཁ་ཟས་ཀུན་དུ་ཚོལ། །དེ་འདྲ་བ་དག་འདི་ན་མང་གནས་ཏེ། །མེ་མེད་ཟིན་ཡང་ཤིན་ཏུ་མི་བཟད་འཇིགས། །འདི་ཡི་ཁོ་ར་ཡུག་ཏུ་མེ་འབར་ཏེ། །འདི་ན་དེ་འདྲའི་སྡུག་བསྔལ་
འབའ་ཞིག་གོ། །དེ་ལྟར་བྱིས་པའི་བློ་ཅན་དེ་སྦྲན་ཏེ། །གཞོན་ནུ་རྣམས་ནི་རྩེད་མོས་རབ་མྱོས་པས། །ཕ་ཡིས་བསྒོ་བ་དེ་ལ་མི་སེམས་ཏེ། །དེ་དག་གི་ནི་ཡིད་ལ་ཅི་མི་སྙམ། །དེ་ཚེ་སྐྱེས་བུ་དེ་ནི་ཡང་སེམས་པ། །
བུ་ཕྱིར་སེམས་པས་བདག་ནི་སྡུག་བསྔལ་ཏེ། །བདག་གི་བུ་དང་རྒྱུད་དག་མེད་པ་རུ། །མེ་འདིས་འདི་དག་ཚིག་ན་མི་རུང་ཞེས། །དེ་ཡི་དུས་ན་དེ་ཡི་ཐབས་བསམས་པ། །རྩེད་མོ་དག་ལ་བྱིས་པ་འདི་ཆགས་ཏེ། །
འདི་ནི་རྩེད་མོ་དགའ་བ་ཅི་ཡང་མེད། །ཀྱེ་མ་འདི་ལྟར་བྱིས་པ་གླེན་ཞིང་རྨོངས། །དེ་ལ་དེ་ཡིས་སྨྲས་པ་གཞོན་ནུ་ཉོན། །བཞོན་པ་རྣམ་པ་གསུམ་པོ་ང་ལ་ཡོད། །ར་དང་གླང་པོ་རི་དགས་མཆོག་ལས་བཅས། །
ཆེ་ཞིང་མཐོ་ལ་ལེགས་པར་བརྒྱན་པ་དག །ཁྱིམ་གྱི་ཕྱི་རོལ་ན་ནི་དེ་དག་ཡོད། །ཕྱི་རོལ་བྱུང་ལ་དེ་ལ་དགོས་པར་སྤྱོད། ཁྱེད་ཅག་རྣམས་ཀྱི་ཕྱིར་ནི་ངས་བྱས་ཀྱིས། །དེ་ལ་དགའ་བར་ལྷན་ཅིག་
ཕྱིར་ཐོང་ཅིག །བཞོན་པ་དེ་འདྲ་ཡོད་པར་ཤེས་ནས་སུ། །དེ་དག་བརྩོན་འགྲུས་བརྩམས་ཏེ་རིངས་གྱུར་ནས། །དེ་ཡི་མོད་ལ་ཐམས་ཅད་ཕྱི་རོལ་འཐོན། །སྡུག་བསྔལ་དག་ལས་ཐར་ཏེ་

46-1-40b

སྟོང་པར་འདུག །མི་དེས་བྱིས་པ་འཐོན་པ་མཐོང་ནས་སུ། །གྲོང་ཁྱེར་དབུས་ཀྱི་དཔོང་སར་གནས་པ་ནི། །སེང་གེའི་ཁྲི་ལ་འདུག་ནས་དེ་སྐད་སྨྲས། །ཀྱེ་མ་ང་ནི་དེ་རིང་མྱ་ངན་འདས། །ང་ཡིས་དཀའ་བར་རྙེད་པ་ཉོན་མོངས་དག །
བུ་སྡུག་ཉི་ཤུ་འདི་དག་སྙིང་གི་བུ། །སྐྱེ་བོ་མང་པོས་གང་ཞིག་འཇིགས་པ་ཡི། །དེ་དག་མི་བཟད་གདོན་དཀའ་ཁྱིམ་ན་འཁོད། །ཀུན་ཏུ་འབར་ཞིང་མེ་ལྕེ་གཅིག་གིས་གང་། །དེ་དག་རྩེད་མོ་དགའ་ལ་ཆགས་པར་གྱུར། 
ངས་ནི་དེ་རིང་དེ་དག་ཐར་བྱས་ཏེ། །དེ་བས་ང་དེང་མྱ་ངན་འདས་པར་གྱུར། །ཕ་དེ་བདེ་བར་འདུག་པར་རིག་ནས་སུ། །བྱིས་པ་དེ་དག་ལྷགས་ནས་འདི་སྐད་སྨྲ། །བཞོན་པ་ཡིད་ཏུ་འོང་བ་གསུམ་པོ་རྣམས། །ཡབ་ཀྱིས་
གསུངས་པ་བཞིན་དུ་བདག་ཅག་སྩོལ། །གཞོན་པ་རྣམ་པ་གསུམ་པོ་ཁྱེད་སྦྱིན་ཞེས། །ཡབ་ཁྱོད་ཀྱིས་ནི་ཁྱིམ་དེར་གང་གསུངས་པ། །གལ་ཏེ་དེ་དག་ཐམས་ཅད་མེད་ན་ནི། །ད་འདིར་དུས་ལ་བབ་ཀྱིས་དེ་དག་སྩོལ། 
མི་དེ་མཛོད་ཀྱི་གཏེར་དང་ལྡན་པ་སྟེ། །གསེར་དང་དངུལ་དང་ནོར་བུ་མུ་ཏིག་དང་། །བྲན་དང་མགྲོན་བུ་དག་ནི་མི་ཉུང་བས། །བཞོན་པ་དེ་ཡང་རྣམ་པ་སྣ་གཅིག་བྱིན། །གླང་གི་ཤིང་རྟ་རིན་ཆེན་དམ་པ་སྟེ། །ལོགས་བཅས་
དྲིལ་བུ་གཡེར་ཁའི་དྲ་བས་བྲེས། །གདུགས་དང་རྒྱལ་མཚན་དག་གིས་ལེགས་པར་བརྒྱན། །མུ་ཏིག་དང་ནི་ནོར་བུའི་དྲ་བས་གཡོགས། །གསེར་གྱི་མེ་ཏོག་རྣམས་ཀྱི་ཕྲེང་བ་དག །ཕྱོགས་དང་ཕྱོགས་རྣམས་སུ་ནི་ཤིན་
དུ་སྤྱངས། །རབ་ཏུ་ཆེ་བའི་གོས་རྒྱུས་དེ་གཡོགས་ཏེ། །དཀར་བཟངས་བཅོས་བུའི་རས་རྣམས་ཤིན་དུ་བཏིང་། །དེ་ན་དེ་བཞིན་འཇམ་པའི་དར་རྣམས་དང་། །ཤིང་རྟ་དེ་ལ་ཤིང་བལ་མཆོག་ཀྱང་བཏིང་། །གོས་རབ་
ཀོ་ཏམ་བ་མཆོག་ངང་པའི་མཚན། །བྱེ་བ་ཕྲག་སྟོང་རི་བ་རྣམས་ཀྱིས་གཡོགས། །རིན་ཆེན་ཤིང་རྟ་བཅས་པ་དེ་དག་ནི། །གླང་པོ་དཀར་ཞིང་ཚོ་ལ་སྟོབས་དང་ལྡན། །བལྟ་ན་སྡུག་ཅིང་ཤིན་དུ་

46-1-41a

བོང་ཡང་ཆེ། །སྐྱེས་བུ་དམ་པ་དག་གིས་རབ་ཏུ་བརྟེན། །སྐྱེས་བུ་དེ་ནི་བུ་རྣམས་ཐམས་ཅད་ལ། །དེ་ལྟ་བུ་ཡི་ཤིང་རྟ་མཆོག་བྱིན་ཏེ། །དེས་ནི་དེ་དག་དགའ་ཞིང་རངས་ནས་སུ། །ཕྱོགས་དང་ཕྱོགས་
མཚམས་དག་ཏུ་རྩེ་ཞིང་དོང་། །དེ་བཞིན་དྲང་སྲོང་ང་ཡང་ཤཱ་རིའི་བུ། །སེམས་ཅན་རྣམས་ཀྱི་སྐྱབས་དང་ཕ་ཡིན་ཏེ། །སྲོག་ཆགས་འདི་དག་ཐམས་ཅད་ང་ཡི་བུ། །བྱིས་པ་དག་ནི་ཁམས་གསུམ་འདོད་ལ་
ཆགས། །ཁམས་གསུམ་དག་ནི་ཁང་པ་དེ་འདྲ་སྟེ། །སྡུག་བསྔལ་ཤིན་ཏུ་མི་བཟད་བརྒྱ་ཡིས་དཀྲུགས། །ན་བ་དང་ནི་སྐྱེ་རྒ་དུ་མ་རྒྱས། །མ་ལུས་ཐམས་ཅད་ནས་ཀྱང་རབ་ཏུ་འབར། །ང་ནི་ཁམས་གསུམ་དག་ལས་
ཐར་ཅིང་ཞི། །ནགས་ཚལ་དག་ན་གནས་ཤིང་དབེན་པར་འདུག །ངས་ནི་ཁམས་གསུམ་འདི་དག་ཡོངས་བཟུང་སྟེ། །འདི་ན་གང་རྣམས་སྲེག་པ་ང་ཡི་བུ། །ང་ཉིད་དེ་ཡི་སྐྱབས་སུ་རིག་ནས་སུ། །དེ་ལ་ཉེས་པ་དག་ནི་ངས་བསྟན་
ཏེ། །འདི་ལྟར་འདོད་ལ་རྣམ་པར་ཆགས་པའི་བློ། །བྱིས་པ་འདི་ཀུན་ང་ཡི་མི་ཉན་ཏོ། །ཐབས་ལ་མཁས་པ་དག་ནི་ངས་སྦྱར་ཏེ། །དེ་དག་ལ་ཡང་ཐེག་པ་གསུམ་དུ་བཤད། །ཁམས་གསུམ་དག་གི་ཉེས་པ་མང་མཁྱེན་ནས། །
གདོན་པར་བྱ་བའི་ཕྱིར་ནི་ཐབས་བཤད་དོ། །བུ་གང་ང་ལ་རྟེན་པར་གྱུར་པ་དག །མངོན་ཤེས་དྲུག་དང་གསུམ་རིག་མཐུ་ཆེན་དང་། །འདི་ན་ང་རྒྱལ་རྣམས་ནི་གང་ཡོད་དང་། །ཕྱིར་མི་ལྡོག་པའི་བྱང་ཆུབ་སེམས་དཔའ་གང་། །
ངས་ནི་བུ་འདྲར་མཁས་པ་དེ་དག་ལ། །དེ་ཡི་ཚེ་ན་དཔེ་མཆོག་འདི་དག་གིས། །སངས་རྒྱས་ཐེག་པ་གཅིག་པུ་འདི་བཤད་དེ། །ཐམས་ཅད་རྒྱལ་བར་འགྱུར་གྱིས་འདི་ཟུང་ཤིག །སངས་རྒྱས་རྐང་གཉིས་མཆོག་གི་ཡེ་ཤེས་
དེ། །ཁྱད་པར་འཕགས་ཤིང་ཤིན་ཏུ་ཡིད་ཏུ་འོང་། །འཇིག་རྟེན་འདི་དག་ཀུན་ན་ཁྱད་པར་ཅན། །ཡངས་པའི་དངོས་པོ་དེ་བཞིན་ཕྱག་བྱར་འོས། །སྟོབས་དང་བསམ་གཏན་དེ་བཞིན་རྣམ་ཐར་དང་། །ཏིང་ངེ་འཛིན་དག་བྱེ་བ་དུ་མ་

46-1-41b

བརྒྱ། །ཤིང་རྟ་དེ་ནི་དེ་འདྲ་མཆོག་ཡིན་ཏེ། །དེ་ལ་སངས་རྒྱས་སྲས་རྣམས་རྟག་ཏུ་དགའ། །དེ་ལ་བརྩོན་པས་ཉིན་མཚན་འདས་པར་བྱེད། །དུས་དང་ཟླ་བ་ཕྱེད་དང་ཟླ་བ་དང་། །དེ་བཞིན་ལོ་དང་བར་གྱི་བསྐལ་པ་དང་། །
བསྐལ་པ་བྱེ་བ་སྟོང་ཡང་འདས་པར་བྱེད། །བདེ་གཤེགས་ཉན་ཐོས་གང་རྣམས་ཉན་པ་དང་། །བྱང་ཆུབ་སེམས་དཔའ་མང་པོ་རྣམ་བརྩེན་ཞིང་། །འདིས་ནི་བྱང་ཆུབ་སྙིང་པོ་དེར་འགྲོ་སྟེ། །རིན་ཆེན་ཐེག་པ་འདི་ནི་
དམ་པ་མཆོག །སྐར་རྒྱལ་ཁྱོད་ཀྱིས་འདི་ལྟར་རིག་པར་གྱིས། །ཕྱོགས་བཅུ་ཐམས་ཅད་དུ་ནི་བཙལ་བྱས་ཀྱང་། །སྐྱེས་བུ་དམ་པའི་ཐབས་རྣམས་མ་གཏོགས་པར། །དེ་ལ་ཐེག་པ་གཉིས་སུ་གང་ན་འང་མེད། །
ཁྱོད་ཀྱི་ཕ་ང་ཁྱེད་ཀྱང་ང་ཡི་བུ། །ཁྱེད་རྣམས་ཁམས་གསུམ་རབ་ཏུ་འཇིགས་པ་ན། །བསྐལ་པ་བྱེ་བ་མང་པོར་བསྲེགས་པ་ཡི། །སྡུག་བསྔལ་དག་ལས་ངས་ནི་རབ་ཏུ་བཏོན། །འདི་ལྟར་མྱ་ངན་འདས་པར་ངས་
བསྟན་པ། །འཁོར་བའི་སྡུག་བསྔལ་དག་ལས་ཁྱེད་ཐར་ཏེ། །ཁྱེད་ནི་ད་དུང་མྱ་ངན་ཡོངས་མ་འདས། །སངས་རྒྱས་ཐེག་པ་ཉིད་ནི་བརྩལ་བར་བྱ། །འདི་ན་བྱང་ཆུབ་སེམས་དཔའ་གང་འཁོད་པ། །ང་ཡི་སངས་
རྒྱས་ཚུལ་འདི་ཀུན་ཉོན་ཅིག །འདིས་ནི་བྱང་ཆུབ་སེམས་དཔའ་མང་པོ་འདུལ། །འདི་ནི་རྒྱལ་བའི་ཐབས་ལ་མཁས་པ་ཡིན། །གང་ཚེ་ཐེག་པ་དམན་པ་སྨད་པ་ལ། །དེ་ལ་སེམས་ཅན་དགའ་བར་གྱུར་པ་ན། །
དེ་ཚེ་སྡུག་བསྔལ་འཕགས་པའི་བདེན་པ་དག །གཞན་མི་གསུང་བ་འཇིག་རྟེན་འདྲེན་པ་འཆད། །གང་རྣམས་བྱིས་པའི་བློ་དག་མི་ཤེས་པས། །སྡུག་བསྔལ་དག་ནི་རྩ་བ་མི་མཐོང་བ། །དེ་དག་ལ་ཡང་ལམ་རྣམས་
བསྟན་པར་བྱ། །སྲེད་པ་ཀུན་འབྱུང་ལས་ནི་སྡུག་བསྔལ་སྐྱེ། །རྟག་ཏུ་མི་གནས་སྲིད་པ་འགོག་པ་ཡང་། །འདི་ནི་ང་ཡི་འགོག་བདེན་གསུམ་པ་ཡིན། །གཞན་མ་ཡིན་པ་གང་གིས་སྐྱེས་བུ་འཐར། །ལམ་རྣམས་བསྒོམས་ནས་རྣམ་

46-1-42a

པར་ཐར་བར་འགྱུར། །དེ་དག་ཅི་ལས་རྣམ་གྲོལ་ཤཱ་རིའི་བུ། །མེད་པར་འཛིན་ལས་དེ་རྣམས་རྣམ་གྲོལ་ཏེ། །ཀུན་ལས་དེ་དག་ད་རུང་ཐར་མ་ཡིན། །མྱ་ངན་དེ་མ་འདས་ཤེས་འདྲེན་པ་གསུང་། །དེ་ལ་ཐར་བར་ཅི་ཕྱིར་
བཤད་མ་མཛད། །བྱང་ཆུབ་དམ་པ་མཆོག་འདི་མ་ཐོབ་ཕྱིར། །འཇིག་རྟེན་བདེ་བྱའི་ཕྱིར་ནི་ང་སྐྱེས་པས། །ཆོས་ཀྱི་རྒྱལ་པོ་ང་ནི་དེ་ལྟར་འདོད། །ཐ་མར་དེ་རིང་ངས་ནི་གང་བཤད་པ། །ང་ཡི་ཆོས་ཀྱི་རྒྱ་འདི་ཤཱ་རིའི་བུ། །ལྷར་
བཅས་འཇིག་རྟེན་དག་ལ་ཕན་བྱའི་ཕྱིར། །ཕྱོགས་དང་ཕྱོགས་མཚམས་དག་ཏུ་བཤད་པར་གྱིས། །ཁྱོད་ཀྱིས་བསྟན་པའི་ཚེ་ན་སེམས་ཅན་གང་། །རྗེས་སུ་ཡི་རང་ངོ་ཞེས་ཚིག་སྨྲ་ཞིང་། །མདོ་འདི་མགོ་བོས་རབ་ཏུ་ལེན་པ་ནི། །
མི་དེ་ཕྱིར་མི་ལྡོག་པར་ཁྱོད་ཟུང་ཤིག །མདོ་སྡེ་འདི་ལ་དད་པར་གང་གྱུར་པ། །དེས་ནི་སྔོན་གྱི་དེ་བཞིན་གཤེགས་པ་མཐོང་། །དེ་དག་ལ་ཡང་བཀུར་སྟི་བྱས་པ་ཡིན། །རྣམ་པ་འདི་ལྟ་བུ་ཡི་ཆོས་ཀྱང་ཐོས། །ང་ཡིས་བཤད་པ་འདི་
ལ་གང་དད་པ། །དེས་ནི་ཁྱོད་དང་ང་ཡང་མཐོང་བ་ཡིན། །ང་ཡི་དགེ་སློང་དགེ་འདུན་འདི་ཀུན་དང་། །བྱང་ཆུབ་སེམས་དཔའ་འདི་དག་ཀུན་ཀྱང་མཐོང་། །མངོན་པར་ཤེས་པས་རིག་ནས་ངས་འདི་བསྟན། །མདོ་འདིས་སྐྱེ་བོ་བྱིས་པ་
མྱོས་པར་འགྱུར། །འདི་ལ་ཉན་ཐོས་རྣམས་ཀྱི་ཡུལ་ཡང་མེད། །འདི་ལ་རང་སངས་རྒྱས་ཀྱི་འགྲོ་བ་མེད། །ཤཱ་རིའི་བུ་ཁྱོད་མོས་པར་མི་བྱེད་ན། །ང་ཡི་ཉན་ཐོས་འདི་དག་གཞན་ཅི་སྨོས། །འདི་དག་ང་ལ་དད་ཕྱིར་འབྲང་
བ་སྟེ། །སོ་སོར་རང་གིས་རིག་པའི་ཡེ་ཤེས་མེད། །ཁྱོད་ཀྱིས་ང་རྒྱལ་ཅན་དང་ཁེངས་པ་དང་། །མི་རིགས་ཞུགས་པ་དག་ལ་འདི་མ་བཤད། །བྱིས་པ་འདོད་ལ་རྟག་ཏུ་རབ་མྱོས་ཤིང་། །མི་ཤེས་པས་ན་ཆོས་བསྟན་སྤོང་བར་
བྱེད། །འཇིག་རྟེན་རྟག་དུ་ལེགས་གནས་སངས་རྒྱས་ཚུལ། །ང་ཡི་ཐབས་མཁས་འདི་ནི་རབ་སྤངས་ཤིང་། །ཁྲོ་གཉེར་བྱས་ཏེ་ཐེག་པ་སྤངས་པ་ཡི། །དེ་ཡི་མི་བཟད་རྣམ་སྨིན་འདིར་ཉོན་ཅིག །ང་ནི་འདུག་གམ་མྱ་ངན་འདས་

46-1-42b

ཀྱང་རུང་། །རྣམ་པ་འདི་འདྲ་མདོ་སྡེ་རབ་སྤངས་ཤིང་། །དགེ་སློང་དེ་དག་ལ་ཡང་སྡང་འདོད་པས། །དེ་ཡི་རྣམ་པར་སྨིན་པ་ང་ལས་ཉོན། །དེ་དག་མི་ལས་འཆི་འཕོས་མནར་མེད་དུ། །བསྐལ་པ་ཚང་བར་རབ་ཏུ་གནས་པར་
འགྱུར། །དེ་ནས་བར་གྱི་བསྐལ་པ་དུ་མར་ཡང་། །བྱིས་པ་ཤི་ཞིང་འཕོས་ནས་དེར་ཡང་ལྷུང་། །སེམས་ཅན་དམྱལ་ལས་ནམ་ཞིག་ཤི་འཕོས་ཀྱང་། །དེ་ནས་དུད་འགྲོ་དག་ཏུ་སྐྱེ་བར་འགྱུར། །ཤིན་ཏུ་རིད་པའི་ཝ་དང་
ཁྱིར་གྱུར་ཅིང་། །གཞན་དག་རྩེད་མོ་བྱེད་པའི་གཞིར་འགྱུར་ཏེ། །དེ་ན་དེ་དག་ཁ་དོག་གནག་པར་འགྱུར། །སྲེ་འོ་རྨ་ཅན་གཡན་པ་དག་གིས་གང་། །སྤུ་ཡང་བྱི་ཞིང་ཤིན་ཏུ་ཉམ་ཆུང་འགྱུར། །ང་ཡི་བྱང་ཆུབ་མཆོག་འདིར་ཞེ་
སྡང་བས། །སྲོག་ཆགས་ནང་ན་རྟག་ཏུ་སྨད་འགྱུར་ཏེ། །རྡོ་དང་བོང་བས་ཕོག་ནས་ཤིན་ཏུ་འཁང་། །དེ་དང་དེ་ན་དབྱིག་པས་ཀུན་བསྡིགས་ལ། །བཀྲེས་ཤིང་སྐོམ་པར་གྱུར་པས་ལུས་ཀྱང་སྐམས། །བྱིས་པའི་བློ་དག་
སངས་རྒྱས་ཚུལ་སྤོང་བ། །རྔ་མོ་དང་ནི་བོང་བུར་ཡང་འགྱུར་ཏེ། །ཁ་ཟས་བསམ་པ་དག་ལ་རྗེས་སེམས་ཤིང་། །ཁལ་རྣམས་བཀལ་ནས་དབྱུག་པ་བརྒྱ་ཡིས་བརྡེགས། །ཕྱིར་ཡང་དེ་དག་དེར་ནི་ཝར་གྱུར་ཏེ། །
ཤིན་ཏུ་མི་སྡུག་ཞར་བ་འཐེང་པོར་འགྱུར། །གྲོང་གི་གཞོན་ནུ་དག་གིས་རབ་གཙེས་ཤིང་། །བྱིས་པ་དེ་དག་རྡོ་དང་བོང་བས་རྡེག །དེ་ནས་བྱིས་པའི་བློ་ཅན་ཤི་འཕོས་ནས། །དཔག་ཚད་དག་ཀྱང་ལྔ་
བརྒྱ་མཉམ་པ་ཡི། །སྲོག་ཆགས་ལུས་རིང་རྣམས་སུ་གྱུར་ནས་སུ། །ཤིན་དུ་བླུན་ཞིང་རྨོངས་པ་འགྲེ་ཞིང་ལྡོག །འདི་འདྲ་བ་ཡི་མདོ་སྡེ་སྤངས་པས་ན། །དེ་དག་རྐང་པ་མེད་པའི་ལྟོ་འཕྱེར་འགྱུར། །
སྲོག་ཆགས་བྱེ་བ་མང་པོས་བཟའ་བས་ན། །དེ་དག་ཤིན་ཏུ་མི་བཟད་ཚོར་བ་མྱོང་། །ནམ་ཞིག་མི་ལུས་ཐོབ་པར་གྱུར་པ་ན། །ང་ཡི་མདོ་སྡེ་འདི་ལ་མ་དད་པས། །དེ་ན་དེ་དག་ལུས་གནག་ཐེང་པོར་འགྱུར། །སྒུར་པོ་ཞར་བ་

46-1-43a

ལྡོངས་པ་གླེན་ཞིང་སྨད། །སངས་རྒྱས་བྱང་ཆུབ་འདི་ལ་མ་དད་པས། །འཇིག་རྟེན་དག་ན་ཡིད་ཀྱང་མི་ཆེས་ཏེ། །དེ་དག་ཁ་ནས་རུལ་མནམ་རྒྱུན་མི་འཆད། །དེ་ཡི་ལུས་ལ་གནོད་སྦྱིན་གདོན་ཀྱང་གནོད། །
དབུལ་ཞིང་གཞན་གྱི་མངག་གཞུག་བྱེད་པ་སྟེ། །ཉམ་ཆུང་གཞན་གྱིས་རྟག་ཏུ་བཀོལ་བར་འགྱུར། །དེ་དག་ཤིན་དུ་ནད་དང་གནོད་པ་མང་། །མགོན་མེད་འགྱུར་ཅིང་འཇིག་རྟེན་དག་ན་རྒྱུ། །དེ་ན་དེ་ཡིས་གང་ལ་
ཉེར་བསྙེན་ཀྱང་། །དེ་ལ་དེ་དག་སྦྱིན་པར་དད་མི་འགྱུར། །བྱིན་ན་ཡང་ནི་མྱུར་དུ་སྟོར་འགྱུར་ཏེ། །དེ་ཡི་སྡིག་པའི་འབྲས་བུ་དེ་འདྲའོ། །དེས་ན་དེ་ཡིས་སྨན་དག་རྙེད་པ་ནི། །ཤིན་ཏུ་སྦྱར་ལེགས་མཁས་པས་བྱིན་ན་
ཡང་། །དེས་ཀྱང་དེ་དག་ནད་ནི་ཕྱིར་ཞིང་སྐྱེ། །ནམ་ཡང་དེ་ཡི་ནད་རྣམས་མཐར་མི་འབྱུང་། །གཞན་གྱིས་རྐུན་པོ་བྱས་པར་གྱུར་པ་དང་། །འཁྲུག་ཅིང་དེ་བཞིན་དཔུང་འཆའ་འཐབ་པ་དང་། །དེ་བཞིན་གཞན་གྱིས་
ནོར་རྣམས་འཕྲོགས་པ་ཡང་། །སྡིག་པའི་ལས་ཀྱིས་དེ་ཡི་སྟེང་དུ་འབབ། །ང་ཡི་སངས་རྒྱས་ཚུལ་འདི་སྤངས་པས་ན། །མི་དབང་རྒྱལ་པོ་འཇིག་རྟེན་སྟོན་པ་ཡི། །འཇིག་རྟེན་མགོན་པོ་དེས་ནི་ཡོང་མི་མཐོང་། །
དེ་ནི་མི་ཁོམ་པར་ཡང་གནས་པར་འགྱུར། །བྱིས་པ་དེས་ནི་ཆོས་ཀྱང་མི་ཐོས་ཏེ། །དེ་དག་སེམས་པ་མེད་ཅིང་འོན་པར་འགྱུར། །བྱང་ཆུབ་འདི་འདྲ་བ་ནི་སྤངས་པས་ན། །དེ་དག་ནམས་ཀྱང་ཞི་བར་མི་འགྱུར་རོ། །བསྐལ་
པ་གང་གཱའི་ཀླུང་གི་བྱེ་མ་སྙེད། །ཁྲག་ཁྲིག་དག་ནི་བརྒྱ་སྟོང་མང་པོ་ཡང་། །ལུས་ནི་མ་གྲིམས་ཡན་ལག་མ་ཚང་འགྱུར། །དེ་ནི་མདོ་སྡེ་འདི་སྤངས་སྡིག་པའི་འབྲས། །དེ་ཡི་སྐྱེད་མོས་ཚལ་ནི་སེམས་ཅན་དམྱལ། །
ངན་སོང་དག་ནི་དེ་ཡི་ཁྱིམ་ཡིན་ཏེ། །ཕག་དང་བོང་བུ་ཝ་དང་ས་འཛུལ་བར། །དེ་ན་དེ་དག་རྟག་ཏུ་གནས་པར་འགྱུར། །དེ་དག་མི་ཡི་ལུས་སུ་གྱུར་ན་ཡང་། །ལྡོངས་པ་དང་ནི་འོན་པ་གླེན་པ་སྟེ། །རྟག་ཏུ་དབུལ་ཞིང་གཞན་

46-1-43b

གྱིས་མངག་པར་འགྱུར། །དེ་ཚེ་དེ་ཡི་རྒྱན་ནི་དེ་དག་གོ། །དེ་ན་དེ་ཡི་གོས་ནི་ནད་ཡིན་ཏེ། །ལུས་ལ་རྨ་ནི་བྱེ་བ་ཁྲག་ཁྲིག་འབྱུང་། །དེ་བཞིན་ཤུ་བ་གཡན་པ་འབྲུམ་བུ་དང་། །དེ་བཞིན་ཤ་བཀྲ་མཛེ་དག་བཤུལ་བར་མནམ། །
དེ་ཡི་འཇིག་ཚོགས་ལྟ་བ་སྟུག་པོར་འགྱུར། །དེ་ཡི་ཁྲོ་བའི་སྟོབས་ཀྱང་ཤིན་དུ་ཆེ། །དེ་ཡི་འདོད་ཆགས་དག་ཀྱང་ཤིན་དུ་བདོ། །དེ་ནི་དུད་འགྲོའི་སྐྱེ་གནས་རྣམས་སུ་རྟག །གང་གིས་ང་ཡི་མདོ་སྡེ་འདི་སྤངས་པ། །དེ་རིང་
གལ་ཏེ་ང་ཡིས་ཤཱ་རིའི་བུ། །དེ་ཡི་ཉེས་པ་བསྐལ་པར་མརྗོད་ན་ཡང་། །ཉེས་པའི་མཐར་ནི་ཕྱིན་པར་ཡོང་མི་ནུས། །ངས་ནི་དེ་ཡི་དོན་རྣམས་རབ་མཐོང་བས། །ཤཱ་རིའི་བུ་ཁྱོད་ཡང་དག་བསྟན་པ་ནི། །ཁྱོད་ཀྱིས་སྐྱེ་བོ་
བྱིས་པའི་མདུན་དུ་ཡང་། །མདོ་སྡེ་འདི་འདྲ་མ་བཤད་ཅིག་ཅེས་བསྒོ། །འདི་ལྟར་གང་དག་བཙལ་ཞིང་མང་ཐོས་པ། །དྲན་དང་ལྡན་ཞིང་གང་མཁས་ཡེ་ཤེས་ལྡན། །བྱང་ཆུབ་དམ་པ་མཆོག་ལ་གང་ཞུགས་པ། །དེ་ལ་ཁྱོད་
ཀྱིས་དོན་དམ་འདི་སྒྲོགས་ཤིག །གང་གིས་སངས་རྒྱས་བྱེ་བ་མང་པོ་མཐོང་། །གང་གིས་དཔག་ཏུ་མེད་པའི་དགེ་བ་བསྐྱེད། །གང་རྣམས་ལྷག་པའི་བསམ་པ་ཤིན་དུ་བརྟན། །དེ་ལ་ཁྱོད་ཀྱིས་དོན་དམ་འདི་སྒྲོགས་ཤིག །
གང་རྣམས་བརྩོན་འགྲུས་ལྡན་ཞིང་རྟག་བྱམས་སེམས། །བྱམས་པ་དེ་ལ་དེ་དག་རིང་དུ་བསྒོམས། །ལུས་དང་དེ་བཞིན་སྲོག་ཀྱང་རབ་ཏུ་བཏང་། །དེ་དག་ལ་ནི་མདོ་འདི་མངོན་སུམ་ཤོད། །ཕན་ཚུན་རྟོག་ཅིང་རིམ་གྲོར་
བཅས་པ་དང་། །གང་རྣམས་བྱིས་པ་དག་ཀྱང་མི་སྟེན་ཞིང་། །གང་དག་རི་སུལ་རྣམས་སུ་དགའ་བ་དག །དེ་ལ་མདོ་སྡེ་བཟང་པོ་འདི་སྒྲོགས་ཤིག །དགེ་བའི་བཤེས་གཉེན་དག་ལ་རབ་བསྙེན་ཞིང་། །སྡིག་པའི་གྲོགས་པོ་
དག་ནི་ཡོངས་སྤོང་བ། །དེ་ལྟ་བུ་ཡི་སངས་རྒྱས་སྲས་མཐོང་ན། །དེ་དག་ལ་ཡང་མདོ་སྡེ་འདི་སྟོན་ཅིག །ཚུལ་ཁྲིམས་མ་ཉམས་ནོར་བུ་རིན་ཆེན་བཞིན། །ཤིན་དུ་རྒྱས་པའི་མདོ་སྡེ་གཟུང་བར་གནས། །དེ་འདྲ་སངས་རྒྱས་སྲས་

46-1-44a

པོ་མཐོང་ན་ཡང་། །དེ་དག་མདུན་དུ་མདོ་སྡེ་འདི་ཤོད་ཅིག །ཁྲོ་བ་མེད་ཅིང་རྟག་ཏུ་དྲང་བ་སྟེ། །སྲོག་ཆགས་ཐམས་ཅད་ལ་ཡང་སྙིང་རྗེར་ལྡན། །བདེ་བར་གཤེགས་པ་དག་ལ་རིམ་གྲོར་བཅས། །དེ་ཡི་མདུན་དུ་མདོ་སྡེ་འདི་ཤོད་
ཅིག །གང་དག་འཁོར་གྱི་དབུས་སུ་ཆོས་སྟོན་པ། །དཔེ་རྣམས་བྱེ་བ་ཁྲག་ཁྲིག་དུ་མ་ཡིས། །མ་ཆགས་གྱུར་ཅིང་ནན་ཏན་ཡིད་ཀྱིས་འཆད། །དེ་དག་ལ་ཡང་མདོ་སྡེ་འདི་ཤོད་ཅིག །ཐམས་ཅད་མཁྱེན་པ་ཉིད་ནི་ཡོངས་ཚོལ་ཞིང་། །
གང་དག་ཐལ་མོ་སྦྱར་ཏེ་མགོ་ལ་འཐུག །ལེགས་པར་སྨྲ་བའི་དགེ་སློང་ཚོལ་བའི་ཕྱིར། །གང་དག་ཕྱོགས་བཅུ་ཀུན་ཏུ་རབ་ཏུ་འགྲོ། །ཤིན་དུ་རྒྱས་པའི་མདོ་སྡེ་ཀུན་འཛིན་ཏེ། །དེ་ནི་ནམ་ཡང་གཞན་ལ་དགའ་མི་བྱེད། །གཞན་ལས་
ཚིགས་བཅད་གཅིག་ཀྱང་མི་འཛིན་པ། །དེ་དག་ལ་ཡང་མདོ་སྡེ་མཆོག་འདི་ཤོད། །ཇི་ལྟར་དེ་བཞིན་གཤེགས་པའི་སྐུ་གདུང་འཛིན། །དེ་ལྟར་མི་དག་ལ་ལ་དེ་ཚོལ་ཏེ། །དེ་བཞིན་དུ་ཡང་འདི་འདྲ་མདོ་སྡེ་ཚོལ། །རྙེད་ནས་ཀྱང་ནི་དེ་
དག་སྤྱི་བོས་ལེན། །མདོ་སྡེ་གཞན་ལ་ནམ་ཡང་མི་སེམས་ཏེ། །འཇིག་རྟེན་རྒྱང་འཕན་པ་དང་བསྟན་བཅོས་གཞན། །དེ་འདྲ་བྱིས་པ་རྣམས་ཀྱི་སྤྱོད་ཡུལ་ཏེ། །དེ་དག་ཁྱོད་ཀྱིས་སྤོངས་ལ་འདི་ཤོད་ཅིག །བསྐལ་པ་ཚང་བར་
ཡང་ནི་ཤཱ་རིའི་བུ། །བྱང་ཆུབ་དམ་པ་མཆོག་འདིར་གང་ཞུགས་པའི། །རྣམ་པ་བྱེ་བ་ཕྲག་སྟོང་མང་སྨྲ་བ། །དེ་དག་མདུན་དུ་མདོ་སྡེ་འདི་ཤོད་ཅིག །དམ་པའི་ཆོས་པད་མ་དཀར་པོ་
ལས་དཔེའི་ལེའུ་ཞེས་བྱ་སྟེ་གསུམ་པའོ།། །། དམ་པའི་ཆོས་པད་མ་དཀར་པོ་བམ་པོ་བཞི་པ། དེ་ནས་ཚེ་དང་ལྡན་པ་རབ་འབྱོར་དང་ཚེ་དང་ལྡན་པ་ཀཱ་ཏྱཱའི་བུ་ཆེན་པོ་དང་ཚེ་དང་ལྡན་པ་འོད་སྲུང་ཆེན་པོ་དང་ཚེ་དང་ལྡན་པ་མཽད་
གལ་གྱི་བུ་ཆེན་པོས། སྔོན་མ་ཐོས་པའི་ཆོས་རྣམ་པ་འདི་ལྟ་བུ་འདི་བཅོམ་ལྡན་འདས་ལས་ཐོས་ཤིང་། ཚེ་དང་ལྡན་པ་ཤཱ་རིའི་བུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་སུམ་དུ་ལུང་བསྟན་པ་ཐོས་ནས། ངོ་མཚར་དུ་གྱུར། 

46-1-44b

རྨད་ཏུ་གྱུར། ཤིན་ཏུ་དགའ་བར་གྱུར་ཏེ། དེའི་ཚེ་སྟན་ལས་ལངས་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང་། བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་
ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་མངོན་དུ་ལྟ་ཞིང་། ལུས་བཏུད་ལུས་མངོན་པར་བཏུད། ལུས་རྣམ་པར་བཏུད། ལུས་ཤིན་དུ་བཏུད་དེ། དེའི་ཚེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་
ལྡན་འདས་བདག་ཅག་རྒས་གཏུགས་འཁོགས་ནས། དགེ་སློང་གི་དགེ་འདུན་འདིའི་ནང་ན་ཡང་གནས་བརྟན་དུ་འཛིན་ཏེ། རྒས་འཁོགས་ཤིང་བདག་ཅག་མྱ་ངན་ལས་འདས་པ་ཐོབ་སྙམ་ནས། བཅོམ་ལྡན་འདས་བདག་ཅག་ལ་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཏུ་བརྩོན་པ་མ་མཆིས་ཏེ། བདག་ཅག་ནི་བརྩོན་འགྲུས་བརྩམ་པའི་རྔོ་མི་ཐོག་པའོ། །གང་གི་ཚེ་བཅོམ་ལྡན་འདས་ཆོས་སྟོན་ཅིང་། བཅོམ་ལྡན་འདས་རིང་དུ་ཡང་བཞུགས་པར་
གྱུར་ཏེ་ཆོས་བཤད་པ་དེ་ལ་བདག་ཅག་ཀྱང་མཆིས་པར་གྱུར་པ་དེའི་ཚེ་ན་ནི། བཅོམ་ལྡན་འདས་བདག་ཅག་ཀྱང་རིང་དུ་མཆིས་ཤིང་། བཅོམ་ལྡན་འདས་ལ་རིང་དུ་བསྙེན་བཀུར་བགྱིས་པས། ཡན་ལག་དང་ཉིང་ལག་
ཀྱང་བྲོ་འཚལ། ཚིགས་དང་ཚིགས་ཕྲེའུ་རྣམས་ཀྱང་བྲོ་འཚལ་ཏོ། །བཅོམ་ལྡན་འདས་དེའི་སླད་དུ། བཅོམ་ལྡན་འདས་ཀྱིས་ཆོས་བསྟན་པ་ན་ཡང་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་ཐམས་ཅད་བདག་ཅག་གིས་
བརྗོད་ཀྱི། སངས་རྒྱས་ཀྱི་ཆོས་འདི་དག་དང་སངས་རྒྱས་ཀྱི་ཞིང་གི་བཀོད་པ་འདི་དག་དང་བྱང་ཆུབ་སེམས་དཔའི་རྣམ་པར་རོལ་པ་དག་དང་དེ་བཞིན་གཤེགས་པའི་རྣམ་པར་རོལ་པ་དག་ལ་བདག་ཅག་གིས་རེ་བ་མ་བསྐྱེད་དོ། །དེ་ཅིའི་སླད་དུ་ཞེ་
ན། བཅོམ་ལྡན་འདས་འདི་ལྟར་བདག་ཅག་ཁམས་གསུམ་ནས་བྱུང་སྟེ། མྱ་ངན་ལས་འདས་པར་འདུ་ཤེས་ཤིང་། བདག་ཅག་ནི་རྒས་འཁོགས་པས། དེའི་སླད་དུ་བཅོམ་ལྡན་འདས་བདག་ཅག་གིས་བྱང་ཆུབ་སེམས་དཔའ་གཞན་བླ་ན་མེད་པ་

46-1-45a

ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཅིང་བཏམས་མོད་ཀྱི། བཅོམ་ལྡན་འདས་དེ་ལ་བདག་ཅག་གིས་རེ་བའི་སེམས་གཅིག་ཀྱང་བསྐྱེད་པར་མ་གྱུར་ཏེ། བཅོམ་ལྡན་འདས་བདག་ཅག་གིས་བཅོམ་ལྡན་འདས་ཀྱི་
དྲུང་ནས། ཉན་ཐོས་རྣམས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བར་ལུང་བསྟན་པ་ཐོས་ནས། ངོ་མཚར་དང་རྨད་དུ་གྱུར་ཏོ། །བཅོམ་ལྡན་འདས་དེང་འཕྲལ་ལ། དེ་བཞིན་གཤེགས་པའི་གསུང་སྔོན་མ་
ཐོས་པ་རྣམ་པ་འདི་ལྟ་བུ་འདི་ཐོས་ནས། བདག་ཅག་གིས་རྙེད་པ་ཆེན་པོ་ཐོབ་པོ། །བཅོམ་ལྡན་འདས་བདག་ཅག་གིས་རིན་པོ་ཆེ་ཆེན་པོ་ཐོབ་པོ། །བཅོམ་ལྡན་འདས་བདག་ཅག་གིས་ཚད་མ་མཆིས་པའི་རིན་པོ་ཆེ་ཆེན་པོ་ཐོབ་པོ། །བཅོམ་
ལྡན་འདས་བདག་ཅག་གིས་མ་བསླབས་མ་བཙལ་མ་བསམས་མ་སྨོན་པར་རྣམ་པ་འདི་ལྟ་བུའི་རིན་པོ་ཆེ་ཆེན་པོ་འདི་ཐོབ་སྟེ། བཅོམ་ལྡན་འདས་བདག་ཅག་སྤོབས་སོ། །བདེ་བར་གཤེགས་པ་སྤོབས་སོ། །བཅོམ་ལྡན་འདས་འདི་
ལྟ་སྟེ་དཔེར་ན། མི་ལ་ལ་ཞིག་འདི་ལྟར་ཕའི་གན་ནས་ལོགས་ཤིག་ཏུ་མཆིས་ལ། དེ་ལོགས་ཤིག་ཏུ་མཆིས་ནས་ཡུལ་ཕྱོགས་གཅིག་ཏུ་ཕྱིན་ཏེ། །དེ་དང་དེར་དགུང་ལོ་མང་དུ་ཉི་ཤུ་འམ། སུམ་ཅུ་འམ་བཞི་བཅུ་ལྔ་བཅུར་
གནས་ཏེ། བཅོམ་ལྡན་འདས་དེ་ནས་མི་དེ་ཆེན་པོ་ཞིག་ཏུ་ལགས་ལ། དེ་ཡང་དབུལ་པོར་གྱུར་ནས་འཚོ་བ་ཚོལ་ཞིང་། འཚལ་མ་དང་རད་པའི་སླད་དུ་ཕྱོགས་དང་ཕྱོགས་མཚམས་སུ་མཆིས་ནས། ཡུལ་ཕྱོགས་གཅིག་
ཅིག་ཏུ་ཕྱིན་ཏེ། དེའི་ཕ་དེ་ཡང་ཡུལ་གཞན་དུ་མཆིས་ལ། ནོར་དང་མགྲོན་བུ་དང་མཛོད་དང་བང་བ་མང་པོར་གྱུར་ཏེ། གསེར་དང་དངུལ་དང་ནོར་བུ་དང་མུ་ཏིག་དང་། བཻ་དཱུརྱ་དང་དུང་དང་མན་ཤེལ་དང་བྱི་རུ་དང་ས་ལེ་སྦྲམ་དང་དངུལ་དགོག་
དང་ལྡན་པར་གྱུར་ལ། བྲན་ཕོ་དང་བྲན་མོ་དང་སུག་ལས་བགྱིད་པ་དང་ཞོ་ཤས་འཚོ་བའི་མི་མང་པོར་གྱུར་ལ། གླང་པོ་ཆེ་དང་རྟ་དང་ཤིང་རྟ་དང་བ་ལང་དང་ལུག་མང་པོ་དང་ལྡན་པར་གྱུར་ཏེ། གཡོག་མང་ཞིང་ཡུལ་ཆེན་པོའི་ནང་ན་ནོར་

46-1-45b

དང་ལྡན་པ་ལགས་ལ། འདུ་བ་དང་འཕེལ་བ་དང་རྨོ་བ་དང་ཚོལ་བ་ཡང་མང་དུ་གྱུར་ཏེ། བཅོམ་ལྡན་འདས་དེ་ནས་མི་དབུལ་པོ་དེ་འཚལ་མ་དང་རད་པ་ཚོལ་བའི་སླད་དུ། གྲོང་དང་གྲོང་ཁྱེར་དང་གྲོང་རྡལ་དང་ལྗོངས་དང་ཡུལ་འཁོར་དང་
རྒྱལ་པོའི་ཕོ་བྲང་དུ་མཐར་གྱིས་འཁྱམ་པ་ལས། དེ་ན་ནོར་དང་མགྲོན་བུ་དང་མཛོད་དང་བང་བ་མང་པོ་མཆིས་པའི་མི་དེ་གང་ན་མཆིས་པའི་གྲོང་ཁྱེར་དེར་ཕྱིན་པར་གྱུར་ཏེ། བཅོམ་ལྡན་འདས་དེ་ནས་མི་དབུལ་པོ་དེའི་ཕ་ནོར་དང་
མགྲོན་བུ་དང་མཛོད་དང་བང་བ་མང་པོ་ཅན་དེ་གྲོང་ཁྱེར་དེ་ན་གནས་ཤིང་། བུ་ལོ་ལྔ་བཅུའི་བར་དུ་སྟོར་བ་དེ་རྟག་པར་རྒྱུན་དུ་དྲན་ཡང་བདག་གཅིག་བུ་ནང་དུ་གདུང་བ་མ་གཏོགས་པར་གཞན་སུ་ལ་ཡང་མི་སྨྲ་བར་འདི་སྙམ་དུ་ཡང་
བདག་ནི་རྒས་ཤིང་འཁོགས་ཏེ་གཏུགས་ན། བདག་ལ་མགྲོན་བུ་དང་གསེར་དང་ནོར་དང་འབྲུ་དང་མཛོད་དང་བང་བ་མང་དུ་ཡོད་ལ། བདག་ལ་བུ་ནི་གཅིག་ཀྱང་མེད་ན། བདག་ནི་འཆི་བའི་དུས་བྱེད་པར་འགྱུར་ཏེ། འདི་དག་
ཐམས་ཅད་མ་སྤྱད་པར་ཆུད་ཟོས་པར་མི་འགྱུར་རམ་སྙམ་དུ་དེའི་ཕྱིར་ཞིང་བུ་དེ་དྲན་ནས། ཀྱེ་མ་གལ་ཏེ་བདག་གི་བུ་དེ་ནོར་གྱི་ཚོགས་འདི་ལ་སྤྱོད་པར་གྱུར་ན་ནི། བདག་མྱ་ངན་མེད་པར་འགྱུར་བར་སེམས་ལ། བཅོམ་
ལྡན་འདས་དེ་ནས་མི་དབུལ་པོ་དེ་རད་པ་དང་འཚལ་མ་ཚོལ་ཞིང་མཐར་གྱིས་འགྲོན་བུ་དང་གསེར་དང་ནོར་དང་འབྲུ་དང་མཛོད་དང་བང་བ་མང་པོ་ཅན་གྱི་མི་དེའི་གནས་ག་ལ་བ་དེར་མཆིས་ཏེ། བཅོམ་ལྡན་འདས་དེ་ནས་མི་
དབུལ་པོའི་ཕ་དེ་བདག་གི་མཆིས་བྲང་གི་སྒོ་ན་བྲམ་ཟེ་དང་རྒྱལ་རིགས་དང་རྗེའུ་རིགས་དང་དམངས་རིགས་ཀྱི་འཁོར་ཆེན་པོས་ཡོངས་སུ་བསྐོར་ཅིང་མདུན་གྱིས་བལྟས་ཏེ། སེང་གེའི་ཁྲི་ཆེན་པོ་སུག་རྟེན་དང་བཅས་
པ་གསེར་དང་དངུལ་གྱིས་ཤིན་དུ་བརྒྱན་པ་ལ་མཆིས་ནས། འགྲོན་བུ་བྱེ་བ་བརྒྱ་སྟོང་གིས་སྤྱོད་པ་བགྱིད་དེ། རྔ་ཡབ་ཀྱིས་གཡོབ་ཅིང་བླ་རེ་བྲེས་པའི་སའི་ཕྱོགས། མེ་ཏོག་སིལ་མ་གཏོར་ཅིང་རིན་པོ་

46-1-46a

ཆེའི་ཕྲེང་བ་སྤྱངས་པ་ན་འབྱོར་ཅིང་ལོངས་སྤྱོད་པ་ཆེན་པོས་མཆིས་ལ་བཅོམ་ལྡན་འདས་མི་དབུལ་པོ་དེས་རང་གི་ཕ་དེ་རང་གི་མཆིས་བྲང་གི་ཆབ་སྒོ་ན་རྣམ་པ་འདི་ལྟ་བུའི་ལོངས་སྤྱོད་མཆིས་ཤིང་། སྐྱེ་བོ་ཕལ་པོ་ཆེས་ཡོངས་སུ་
བསྐོར་ནས་ཁྱིམ་བདག་གི་སུག་ལས་བགྱིད་པ་མཐོང་སྟེ། མཐོང་ནས་ཀྱང་འཇིགས་ཤིང་སྐྲག་ལ་མི་དགའ་ནས་སྤུ་ཟིང་ཞེས་བགྱིད་དེ། རབ་ཏུ་ཡིད་མི་བདེ་ནས་འདི་སྙམ་དུ་སེམས་ཏེ། རྒྱལ་པོ་འམ་བློན་པོ་ཆེན་པོ་འདི་
དང་བདག་བློ་བུར་དུ་ཕྲད་དེ། འདི་ན་བདག་གི་བྱ་བ་ཅི་ཡང་མེད་ཀྱིས་བདག་དབུལ་པོའི་གནས་ག་ལ་བ་དེར་སོང་ལ། དེར་བདག་གི་ཟས་དང་གོས་ཉོན་མི་མོངས་པར་རྙེད་ཀྱི། བདག་འདིར་རིང་དུ་ཐོགས་སུ་ཟིན་ན་མི་རུང་ངོ་། །
འདིར་བག་ཙམ་གཟུངས་སུ་ཟིན་ཏམ། ཉེས་པ་གཞན་ལ་ལ་དང་ཕྲད་པར་གྱུར་དུ་མི་འོང་ངམ་སྙམ་ནས། བཅོམ་ལྡན་འདས་དེ་ནས་མི་དབུལ་པོ་དེ་འཇིགས་པ་བརྒྱུད་མར་ཡིད་ལ་བགྱིད་ཅིང་སྐྲག་ནས། དེ་ན་མི་གནས་པར་རིངས་པར་བྲོས་
ཏེ་མཆིས་པ་དང་། བཅོམ་ལྡན་འདས་དེ་ནས་མི་ཕྱུག་པོ་དེ། བདག་གི་མཆིས་བྲང་གི་ཆབ་སྒོ་ན་སེང་གེའི་ཁྲི་ལ་མཆིས་པས། བདག་གི་བུ་དེ་མཐོང་མ་ཐག་ཏུ་ངོ་མཚར་ཏེ། མཐོང་ནས་ཀྱང་དགའ་མགུ་རངས་ཏེ། རབ་ཏུ་དགའ་ཞིང་
དགའ་བ་དང་། ཡིད་བདེ་བ་སྐྱེས་པར་གྱུར་ནས་འདི་སྙམ་དུ་འགྲོན་བུ་དང་གསེར་དང་། ནོར་དང་། འབྲུ་དང་མཛོད་དང་བང་བའི་ལོངས་སྤྱོད་ཆེན་པོ་འདི་ལ་སྤྱོད་པ་འདི་ལྟར་རྙེད་དེ། བདག་ནི་
རྒས་འཁོགས་གཏུགས་ནས། བདག་ཀྱང་འདི་ཉིད་ཕྱིར་ཞིང་དྲན་ན་འདི་ཡང་ཁོ་བདག་ཉིད་འདིར་འོངས་པ་ངོ་མཚར་ཆེའོ། །སྙམ་དུ་སེམས་སོ། །བཅོམ་ལྡན་འདས་དེ་ནས་མི་དེ་བུ་ལ་
སྲེད་པས་གདུངས་པས། དེའི་ཚེ་སྐད་ཅིག་ཐང་ཅིག་ཡུད་ཙམ་དེ་ཉིད་ལ། མི་མགྱོགས་པ་དག་བཀྱེ་སྟེ། གྲོགས་པོ་དག་དེང་ལ་མི་དེ་མྱུར་དུ་ཁྲིད་དེ་ཤོག་ཅིག་ཅེས་བསྒོ་ནས། བཅོམ་ལྡན་འདས་དེ་ནས་མི་དེ་དག་ཐམས་ཅད་ཀྱིས་མགྱོགས་པར་བརྒྱུག་

46-1-46b

ནས། མི་དབུལ་པོ་དེ་བཟུང་བ་དང་། བཅོམ་ལྡན་འདས། དེ་ནས་མི་དབུལ་པོ་དེ་དེའི་ཚེ་ན་འཇིགས་ཤིང་སྐྲག་ལ་མི་དགའ་ནས་བ་སྤུ་ཟིང་ཞེས་བགྱིད་ཅིང་རབ་ཏུ་ཡིད་མི་བདེ་སྟེ་སྔངས་པའི་སྒྲ་དྲག་པོ་ཕྱུང་ནས། ཀུ་ཅོ་འདོན་ཅིང་
ཁོ་བོས་ཁྱེད་ལ་ཉེས་པ་ཅུང་ཟད་ཀྱང་མ་བྱས་ན་ཞེས་ཚིག་ཏུ་སྨྲས་ཏེ། དེ་ནས་མི་དེ་དག་གིས་ནན་གྱིས་མི་དབུལ་པོ་དེ་ཀུ་ཅོ་འདོན་བཞིན་དུ་ཁྲིད་པ་དང་། དེ་ནས་མི་དབུལ་པོ་དེ་འཇིགས་ཤིང་སྐྲག་ལ་མི་དགའ་ནས། སྤུ་
ཟིང་ཞེས་བགྱིད་ཅིང་རབ་ཏུ་ཡིད་མི་བདེ་སྟེ། འདི་ལྟར་བདག་གསོད་ཏུ་བཅུག་ནས་མ་རུང་བར་མི་བྱ་འམ་སྙམ་སེམས་ཤིང་། དེ་བརྒྱལ་ཏེ་དོགས་ལ་འགྱེལ་ནས་མྱོས་པར་གྱུར་ལ། དེའི་ཕ་དེ་ཡང་ཉེ་བ་ཞིག་ན་མཆིས་
ནས། དེས་མི་དེ་དག་ལ་ཁྱེད་ཀྱིས་མི་འུ་ནི་ཁྲིད་དེ་མ་འོང་བར། འུ་ན་ཆུ་གྲང་མོས་གཏོར་ཅིག་ཅེས་དེ་སྐད་སྨྲས་ནས་གཞན་མི་མཆིས་ཏེ། དེ་ཅིའི་སླད་དུ་ཞེ་ན། ཁྱིམ་བདག་དེ་བདག་ནི་མཐུ་ཆེན་པོ་དང་ལྡན་ལ། 
མི་དབུལ་པོ་འདི་ནི་དམན་པ་ལ་མོས་པར་འཚལ་ནས། ཁྱིམ་བདག་གི་བུ་ལགས་པར་ཡང་འཚལ་ན། བཅོམ་ལྡན་འདས། དེ་ནས་ཁྱིམ་བདག་དེ་ཐབས་མཁས་པའི་སླད་དུ། འདི་བདག་གི་བུ་ལགས་ཤེས་སུ་
ལ་ཡང་མི་མཆི་སྟེ། བཅོམ་ལྡན་འདས་དེ་ནས་ཁྱིམ་བདག་དེས་མི་གཞན་ཞིག་ལ། ཀྱེ་མི་ཁྱོད་སོང་སྟེ་མི་དབུལ་པོ་ཕ་བི་ལ། ཀྱེ་མི་ཁྱོད་བཏང་གིས་གར་དགའ་བར་འགྲོ་ལ་རག་གོ་ཞེས་བསྒོ་ཤིག་ཅེས་མཆི་ནས། 
ལྷ་བཀའ་བཞིན་འཚལ་ཞེས་མི་དེས་དེ་ལས་མཉན་ནས། མི་དབུལ་པོ་དེ་ག་ལ་བ་དེར་མཆིས་ཏེ་ཕྱིན་ནས། མི་དབུལ་པོ་དེ་ལ་ཀྱེ་མི་ཁྱོད་བཏང་གིས་གར་དགའ་བར་འགྲོ་ལ་རག་གོ་ཞེས་བགྱིས་ནས། དེ་ནས་མི་དབུལ་པོ་དེའི་ཚིག་དེ་ཐོས་པ་དང་། 
ངོ་མཚར་དང་རྨད་དུ་བྱུང་བ་ཐོབ་པར་གྱུར་ཏེ། སའི་ཕྱོགས་དེ་ལས་ལངས་ནས། དེ་མི་དབུལ་པོའི་གནས་ག་ལ་བ་དེར་འཚལ་མ་དང་རད་པ་ཚོལ་བའི་སླད་དུ་མཆིས་ཏེ། དེ་ནས་ཁྱིམ་བདག་དེས་མི་དབུལ་པོ་དེ་དགུག་པའི་སླད་དུ་ཐབས་མཁས་པ་སྦྱར་བ། དེས་དེ་ལ་

46-1-47a

མདོག་མི་སྡུག་ཅིང་མདངས་ངན་པའི་མི་གཉིས་ཤིག་མངགས་ཏེ། ཁྱེད་གཉིས་དེང་ལ་གང་འདིར་འོངས་པའི་མི་འདི་ཁྱེད་རང་གིས་ཚིག་གིས་ཉི་མའི་གླ་ཐང་གིས་གླ་གྱིས་ལ། ངའི་ཁྱིམ་འདིར་ལས་བྱེད་དུ་ཆུག་ཅིག་
དེ་གལ་ཏེ་འདི་སྐད་དུ་ལས་ཅི་བྱ་ཞེས་ཟེར་བ་དང་། ཁྱེད་གཉིས་ཀྱིས་དེ་ལ་འདི་སྐད་དུ། ངེད་གཉིས་དང་ལྷན་ཅིག་ཏུ་ཕྱག་དར་གྱི་ཕུང་པོ་ཕྱག་གོ་ཞེས་སྨྲོས་ཤིག་ཅེས་བགྱིས་ནས། མི་དེ་གཉིས་ཀྱིས་མི་དབུལ་པོ་དེ་
བཙལ་ཏེ་སུག་ལས་དེ་བཞིན་དུ་བསྒྲུབས་ནས། དེ་ནས་མི་དེ་གཉིས་དང་མི་དབུལ་པོ་དེས་མི་ནོར་ཆེན་པོ་དེ་ལས་གླ་བླངས་ཏེ། ཁྱིམ་དེ་ཉིད་ན་ཕྱག་དར་གྱི་ཕུང་པོ་འཕྱག་ཅིང་། མི་ནོར་པོ་ཆེ་དེ་ཉིད་ཀྱི་ཁྱིམ་དྲུང་གི་སྤྱིལ་པོ་ན་
གནས་ཤིང་མཆིས་ནས། མི་ཕྱུག་པོ་དེས་མཐོངས་ཁུང་དང་སྐར་ཁུང་དག་ནས་བདག་གི་བུ་ཕྱག་དར་འཕྱག་པ་མཐོང་སྟེ། མཐོང་ནས་ངོ་མཚར་དུ་གྱུར་ཏོ། །དེ་ནས་ཁྱིམ་བདག་དེ་ཕྲེང་བ་དང་རྒྱན་བཀྲོལ་ཏེ། 
རད་པ་བཟང་པོ་འཇམ་པོ་ཆན་པ་ཕུད་ནས། རད་པ་དྲི་མ་ཅན་འཚལ་ཏེ། བདག་གི་གནས་ནས་བབས་ནས་སུག་པ་གཡོན་པ་ན་སྐོན་པ་ཐོགས་ཏེ། ཕྱག་དར་གྱིས་བདག་གི་ལུས་ལ་གོས་པར་བགྱིས་ནས། 
རྒྱང་རིང་པོ་ནས། སྨྲ་ཞིང་བུ་ག་ལ་བ་དེར་མཆིས་ཏེ་ཕྱིན་ནས། འདི་སྐད་དུ་ཁྱོད་མ་འཁོད་པར་སྐོན་པ་ཐོགས་ལ་ཕྱག་དར་སྐྱོས་ཤིག་ཅེས་མཆིས་ཞིང་། ཐབས་འདིས་བུ་དེ་ལ་སྨྲས་ཏེ། ཡང་
འདི་སྐད་བསྒོའོ། །ཀྱེ་མི་ཁྱོད་འདི་ཉིད་ན་ལས་བྱོས་ལ་ཕྱིར་གཞན་དུ་མ་འགྲོ་ཞིག་དང་། ངས་ཁྱོད་གླ་བསྐྱེད་དེ་སྦྱིན་ནོ། །ཁྱོད་ལ་ཅི་དང་ཅི་དགོས་པ་ཡང་ན་བུམ་པའི་རིན་ནམ། ཡང་ན་རིལ་བའི་རིན་ནམ། ཡང་ན་ཕྲུ་བའི་
རིན་ནམ། ཡང་ན་ཤིང་གི་རིན་ནམ། ཡང་ན་ལན་ཚྭའི་རིན་ནམ། ཡང་ན་ཟས་སམ། ཡང་ན་གོས་ཀྱང་རུང་སྟེ། དེ་དག་ང་ལ་མཛེམ་པ་མེད་པར་སློངས་ཤིག །ཀྱེ་སྐྱེས་བུ་ང་ལ་རས་རྙིང་པ་ཡང་ཡོད་དེ། དེ་སྟེ་དེ་ཡང་ཁྱོད་ལ་དགོས་ན་ཡང་སློངས་

46-1-47b

ཤིག་དང་། ངས་ཁྱེད་ལ་སྦྱིན་ནོ། །ཀྱེ་སྐྱེས་བུ་ཡོ་བྱད་ཀྱི་རྣམ་པ་དེ་ལྟ་བུ་དེ་དག་ཁྱོད་ལ་ཅི་དང་ཅི་དགོས་པ་དེ་དང་དེ་དག་ཐམས་ཅད་ངས་ཁྱོད་ལ་སྦྱིན་གྱིས། མི་ཁྱོད་མྱ་ངན་མེད་པར་བྱོས་ལ། ཁྱོད་ཀྱི་ཕ་ཅི་ལྟ་བ་དེ་བཞིན་དུ་ཁྱོད་ཀྱིས་ང་
ལ་སོམས་ཤིག །དེ་ཅིའི་ཕྱིར་ཞེ་ན། ང་ནི་རྒན་ཁྱོད་ནི་གཞོན་ཏེ་ཁྱོད་ཀྱིས་ངའི་ཕྱག་དར་གྱི་ཕུང་པོ་འདི་ཕྱགས་ཤིང་ལས་མང་པོ་བྱས་ཏེ། ཀྱེ་མི་ཁྱོད་ལས་འདི་བྱེད་པའི་ཚེ། སྒྱུ་འམ་གྱ་གྱུ་འམ་གཡོ་འམ་ང་རྒྱལ་ལམ་འཆབ་
པ་སྔོན་བྱས་པ་འམ། བྱེད་པ་ཡང་མེད་དེ་ཀྱེ་སྐྱེས་བུ་ཇི་ལྟར་མི་དག་གཞན་ལས་བྱེད་པའི་ཚེ། སྐྱོན་དེ་དག་ཡོད་པ། ཁྱོད་ལ་རྣམ་པ་ཐམས་ཅད་དུ་ཉེས་པ་དེ་དག་ལས་གཅིག་ཀྱང་མ་མཐོང་གིས་དེང་ཕན་ཆད་ང་ལ་ཁྱོད་ནི་
སྙིང་གི་བུ་ཅི་ལྟ་བ་དེ་དང་འདྲ་བ་ཡིན་ནོ། །བཅོམ་ལྡན་འདས་དེ་ནས་ཁྱིམ་བདག་དེས་མི་དབུལ་པོ་དེ་ལ་བུ་ཞེས་མིང་དུ་བཏགས་སོ། །མི་དབུལ་པོ་དེ་ཡང་ཁྱིམ་བདག་དེ་ལ་ཕར་འདུ་ཤེས་བསྐྱེད་དེ། བཅོམ་ལྡན་འདས་རྣམ་གྲངས་
འདིས་ཁྱིམ་བདག་དེ་བུ་འཚལ་བས་སྐོམ་ནས། དགུང་ལོ་ཉི་ཤུའི་བར་དུ་བུ་དེ་ཕྱག་དར་གྱི་ཕུང་པོ་འཕྱག་ཏུ་སྩལ་ཏེ། དེ་ནས་དགུང་ལོ་ཉི་ཤུ་འདས་པ་དང་། མི་དབུལ་པོ་དེ་ཁྱིམ་བདག་དེའི་མཆིས་བྲང་གི་སླད་
ནང་དུ་མཆི་བ་ལ་མཛེམ་པ་མ་མཆིས་པར་གྱུར་ཏེ། སྤྱིལ་པོ་དེ་ཉིད་ན་གནས་ཤིང་མཆིས་པ་ལས། བཅོམ་ལྡན་འདས་དེ་ནས་ཁྱིམ་བདག་དེ་བྲོ་འཚལ་བར་གྱུར་ཏེ། བདག་འགུམ་
པའི་དུས་ལ་བབ་པར་མཐོང་ནས། དེ་མི་དབུལ་པོ་དེ་ལ་འདི་སྐད་དུ། ཀྱེ་མི་ཁྱོད་ཚུར་ཤོག །ངའི་འགྲོན་བུ་དང་གསེར་དང་ནོར་དང་འབྲུ་དང་མཛོད་དང་བང་བ་ཤིན་ཏུ་མང་དུ་ཡོད་པ་འདི་དག་ང་ནི་ནད་ཚབས་ཆེ་ན། དེ་དག་
སུ་ལ་སྦྱིན་པ་དང་། སུ་ལས་བླང་བ་དང་། གང་སྦ་བར་བྱ་བ་དེ་དག་ཐམས་ཅད་ཁྱོད་ཀྱིས་ཤེས་པར་འདོད་དོ། །དེ་ཅིའི་ཕྱིར་ཞེ་ན། ཇི་ལྟར་ང་ནོར་འདིའི་བདག་པོར་གྱུར་པ་ལྟར་ཁྱེད་ཀྱང་དེ་བཞིན་གྱིས་ངའི་འདི་ལས་ཁྱོད་ཀྱིས་ཅུང་ཟད་ཀྱང་ཆུད་མ་གཟན་

46-1-48a

ཅིག་ཅེས་མཆི་ནས། བཅོམ་ལྡན་འདས་དེ་ནས་མི་དབུལ་པོ་དེ་རྣམ་གྲངས་འདིས། ཁྱིམ་བདག་དེའི་འགྲོན་བུ་དང་གསེར་དང་ནོར་དང་འབྲུ་དང་མཛོད་དང་། བང་བ་རབ་ཏུ་མང་བ་དེ་དག་མཆིས་པར་འཚལ་ལ། བདག་ཉིད་དེ་ལ་རེ་བ་མ་
མཆིས་ཤིང་། །ཐ་ན་ཕྱེ་ཕུལ་གང་གི་རིན་ཐང་ཙམ་ཡང་དེ་ལ་ཅུང་ཟད་ཀྱང་སློང་བ་མ་མཆིས་ཏེ། རྩྭའི་སྤྱིལ་པོ་དེ་ན་གནས་ཤིང་མཆིས་ནས། དབུལ་པོའི་བསམ་པ་དེ་ཉིད་རྗེས་སུ་སེམས་སོ། །བཅོམ་ལྡན་འདས་དེ་ནི་ཁྱིམ་བདག་དེས་
བུ་དེ་སྲུང་ནུས་ཤིང་ཡོངས་སུ་སྨིན་པར་འཚལ། སེམས་བཏུལ་ཏེ། རྒྱ་ཆེན་པོར་སེམས་ཤིང་། སྔོན་དབུལ་པོ་བསམས་ན་ཉམ་ང་ཞིང་ངོ་ཚ་སྟེ་སྨོད་པར་འཚལ་ནས་བདག་འགུམ་པའི་དུས་ལ་བབ་པ་དང་མི་དབུལ་པོ་དེ་བཀུག་སྟེ། ཉེ་དུ་
འདུས་པ་མང་པོ་དང་སྤྲད་ནས། རྒྱལ་པོ་དང་བློན་པོ་དང་གྲོང་རྡལ་གྱི་མི་དང་། ཡུལ་མིའི་མདུན་དུ་མངོན་སུམ་དུ་འདི་སྐད་ཅེས་བསྒྲགས་སོ། །ཁྱོད་ཉོན་ཅིག །འདི་ནི་ཁོ་བོའི་སྙིང་གི་བུ་ཁོ་བོས་བསྐྱེད་པ་སྟེ། གྲོང་ཁྱེར་གྱི་མིང་
འདི་ཞེས་བྱ་བ་ནས་འཁྱམས་ནས་ལོ་ལྔ་བཅུ་ལོན་ཏེ། འདིའི་མིང་འདི་ཞེས་བྱ། ཁོ་བོའི་མིང་ནི་འདི་ཞེས་བྱ་སྟེ། ཁོ་བོ་འདི་ཚོལ་བའི་ཕྱིར་གྲོང་ཁྱེར་དེ་ནས་འདིར་འོངས་སོ། །འདི་ནི་ཁོ་བོའི་བུ། ཁོ་བོ་ནི་འདི་
འི་ཕ་སྟེ། བདག་གི་སྤྱོད་པ་དང་། ལོངས་སྤྱོད་ཅི་ཡོད་པ་ཐམས་ཅད་ནི་མི་འདི་ལ་བྱིནོ། །ཁོ་བོའི་ནང་གི་ནོར་ཅུང་ཟད་ཅི་ཡོད་པ་དེ་ཀུན་ཀྱང་འདི་ཉིད་ཤེས་སོ་ཞེས་བགྱིས་པ་དང་། བཅོམ་ལྡན་འདས་
དེ་ནས་མི་དབུལ་པོ་དེས་དེའི་ཚེ་འདི་ལྟ་བུའི་སྒྲ་ཐོས་ནས། ངོ་མཚར་དང་རྨད་དུ་གྱུར་ཏེ། འདི་ལྟར་བདག་གིས་འཕྲལ་ལ་འགྲོན་བུ་དང་གསེར་དང་ནོར་དང་འབྲུ་དང་མཛོད་དང་། བང་བ་མང་པོ་རྙེད་དོ་སྙམ་དུ་སེམས་སོ། །བཅོམ་ལྡན་
འདས་དེ་བཞིན་དུ་བདག་ཅག་ནི་དེ་བཞིན་གཤེགས་པའི་སྲས་དང་འདྲ་སྟེ། དེ་བཞིན་གཤེགས་པ་བདག་ཅག་ལ་ཁྱེད་ནི་ངའི་བུའོ་ཞེས་བཀའ་སྩལ་ཏེ། ཁྱིམ་བདག་དེ་ཅི་ལྟ་བ་བཞིན་ནོ། །བཅོམ་ལྡན་འདས་བདག་ཅག་ནི་སྡུག་བསྔལ་

46-1-48b

གསུམ་གྱིས་གཟིར་ཏོ། །གསུམ་གང་ཞེ་ན་འདི་ལྟ་སྟེ། སྡུག་བསྔལ་གྱི་སྡུག་བསྔལ་ཉིད་དང་། འདུ་བྱེད་ཀྱི་སྡུག་བསྔལ་ཉིད་དང་། འགྱུར་བའི་སྡུག་བསྔལ་ཉིད་དོ། །འཁོར་བ་ན་དམན་པ་ལ་མོས་པས་བདག་ཅག་བཅོམ་ལྡན་འདས་ཆོས་ངན་
པ་མང་པོ་ཕྱག་དར་གྱི་ཕུང་པོ་དང་འདྲ་བ་ལ་སེམས་སུ་སྩལ་ཏེ། དེ་རྣམས་ལ་བདག་ཅག་ཞུགས་ནས་འབད་ཅིང་བཙལ་ནས། བཅོམ་ལྡན་འདས་བདག་ཅག་མྱ་ངན་ལས་འདས་པ་ཞིག་གདུགས་ཀྱི་གླ་བཞིན་དུ་ཚོལ་ཞིང་གསོལ་ཏེ། 
བཅོམ་ལྡན་འདས་བདག་ཅག་ནི་མྱ་ངན་ལས་འདའ་བ་དེ་རྙེད་པས་ན་དགའ་བར་གྱུར་ཏེ། དེ་བཞིན་གཤེགས་པ་ལས་ཆོས་འདི་དག་ལ་ཞུགས་ཏེ། འབད་ཅིང་བཙལ་བས། མང་པོ་རྙེད་པར་སེམས་སོ། །དེ་བཞིན་གཤེགས་པས་བདག་ཅག་
དམན་པ་ལ་མོས་པར་མཁྱེན་ཏོ། །དེའི་སླད་དུ་བཅོམ་ལྡན་འདས་ཀྱིས་བདག་ཅག་ཡལ་བར་བཞག་སྟེ། འདི་ལྟར་དེ་བཞིན་གཤེགས་པའི་ཡེ་ཤེས་ཀྱི་མཛོད་དུ་ཁྱེད་འགྱུར་རོ་ཞེས་མ་བཏོལ་མ་བསྟན་ཏེ། བཅོམ་ལྡན་འདས་ཐབས་
མཁས་པས་བདག་ཅག་དེ་བཞིན་གཤེགས་པའི་ཡེ་ཤེས་ཀྱི་མཛོད་ལ་བགོ་སྐལ་སྤྱོད་པར་བཀོད་ན། བཅོམ་ལྡན་འདས་བདག་ཅག་དེ་ལ་རེ་བ་མ་མཆིས་ཏེ། འདི་ལྟར་བདག་ཅག་གིས་དེ་བཞིན་གཤེགས་པ་ལས་མྱ་ངན་
ལས་འདའ་བ་གདུགས་ཀྱི་བླ་ཐང་བཞིན་དུ་བགྱིས་པ་ནི། དེ་ཉིད་བདག་ཅག་གིས་མང་དུ་བགྱིས་པར་འཚལ་ཏོ། །བཅོམ་ལྡན་འདས་བདག་ཅག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
ལ། དེ་བཞིན་གཤེགས་པའི་ཡེ་ཤེས་ལ་བརྩམས་ནས། ཆོས་རྒྱ་ཆེན་པོ་བཤད་དེ། དེ་བཞིན་གཤེགས་པའི་ཡེ་ཤེས་འབྱེད་ཅིང་སྟོན་ཏེ། ཉེ་བར་སྟོན་དུ་ལགས་ཀྱང་། བཅོམ་ལྡན་འདས་
བདག་ཅག་དེ་ལ་རེ་བ་མ་མཆིས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཐབས་མཁས་པས་བདག་ཅག་གི་མོས་པ་རབ་ཏུ་མཁྱེན་ན་དེ་བདག་ཅག་གིས་ནི་མ་འཚལ་མ་རྟོགས་སོ། །བཅོམ་ལྡན་

46-1-49a

འདས་ཀྱིས་འདི་ལྟར་བདག་ཅག་ལ་བཅོམ་ལྡན་འདས་ཀྱི་སྲས་ཡང་དག་པ་ཞེས་གསུངས་ཏེ། བཅོམ་ལྡན་འདས་ཀྱིས་བདག་ཅག་དེ་བཞིན་གཤེགས་པའི་ཡེ་ཤེས་ཀྱི་བསྒོ་སྐལ་ལ་སྤྱོད་པ་དྲན་པར་མཛད་དོ། །དེ་ཅིའི་སླད་
དུ་ཞེ་ན། འདི་ལྟར་བདག་ཅག་དེ་བཞིན་གཤེགས་པའི་སྲས་ཡང་དག་པ་ལགས་མོད་ཀྱི། བདག་ཅག་དམན་པ་ལ་མོས་པའི་སླད་དུའོ། །གལ་ཏེ་བཅོམ་ལྡན་འདས་ཀྱིས་བདག་ཅག་གི་མོས་པའི་སྟོབས་གཟིགས་ན། 
བཅོམ་ལྡན་འདས་ཀྱིས་བདག་ཅག་ལ་བྱང་ཆུབ་སེམས་དཔའ་ཞེས་བགྱི་བར་བཀའ་སྩལ་ཏོ། །བཅོམ་ལྡན་འདས་ཀྱིས་བདག་ཅག་བགྱི་བ་རྣམ་གཉིས་བགྱིད་དུ་སྩལ་ཏེ། དེ་དག་བྱང་ཆུབ་སེམས་དཔའ་རྣམས་ཀྱི་མདུན་དུ་
ནི་དམན་པ་ལ་མོས་པ་ཞེས་བཀའ་སྩལ་ཏེ། དེ་དག་ནི་སངས་རྒྱས་ཀྱི་བྱང་ཆུབ་རྒྱ་ཆེན་པོ་ལ་ཡང་དག་པར་བཙུད་དོ། །བཅོམ་ལྡན་འདས་ཀྱིས་བདག་ཅག་གི་མོས་པའི་སྟོབས་མཁྱེན་ནས། དེ་སྐད་ཅེས་བཀའ་སྩལ་ཏོ། །བཅོམ་
ལྡན་འདས་རྣམ་གྲངས་འདིས་བདག་ཅག་འདི་སྐད་ཅེས་བདག་ཅག་རེ་བ་མ་མཆིས་མི་འཚལ་མ་སླངས་མ་བཙལ་མ་བསམས་མ་གསོལ་བར་འཕྲལ་ལ། དེ་བཞིན་གཤེགས་པའི་སྲས་འདི་དག་བཞིན་དུ་ཐམས་ཅད་མཁྱེན་པའི་
རིན་པོ་ཆེ་ཐོབ་བོ་ཞེས་མཆིའོ། །དེ་ནས་ཚེ་དང་ལྡན་པ་འོད་སྲུང་ཆེན་པོས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །ད་ལྟར་འཕྲལ་ལ་དེ་རིང་བདག་ཅག་གིས། །འདྲེན་པའི་གསུང་སྒྲ་ཡིད་དུ་འོང་བ་ཐོས། །གསུང་ཐོས་
པས་ན་བདག་ཅག་དགའ་བ་ཐོབ། །བདག་ཅག་ངོ་མཚར་དེ་བཞིན་རྨད་ཏུ་གྱུར། །རིན་ཆེན་ཆེན་པོ་མཆོག་གི་ཕུང་པོ་རྣམས། །བསམས་པ་མ་མཆིས་ནམ་ཡང་མ་གསོལ་བར། །དེ་དག་ཡུད་ཙམ་གྱིས་ནི་དེང་རྙེད་དེ། །
བདག་ཅག་ཐམས་ཅད་དེང་ཐོས་ངོ་མཚར་གྱུར། །ཇི་ལྟར་བྱིས་པར་གྱུར་པའི་མི་ཞིག་ནི། །སྐྱེ་བོ་བྱིས་པ་རྣམས་ཀྱིས་བསླུས་ནས་སུ། །ཕ་ཡི་གནས་ནས་གར་ཏེ་མཆིས་པ་ནི། །གཞན་གྱི་ཡུལ་ཡང་ཤིན་དུ་རིང་བར་མཆིས། །བདག་

46-1-49b

གི་བུ་ནི་འཁྱམས་པར་བཙལ་བས་ན། །དེ་ཚེ་ཕ་ཡང་དེ་ཡི་མྱ་ངན་བགྱིད། །དགུང་ལོ་ལྔ་བཅུ་ལས་ཀྱང་མི་ཉུང་བར། །མྱ་ངན་དེ་བགྱིད་ཕྱོགས་དང་ཕྱོགས་མཚམས་ཚོལ། །དེ་ནི་དེ་ལྟར་བུ་དེ་ཚོལ་བ་ན། །གྲོང་ཁྱེར་ཆེན་པོ་གཞན་དུ་
མཆིས་པ་དང་། །འདོད་པའི་ཡོན་ཏན་ལྔ་དང་ལྡན་པར་ནི། །ཁྱིམ་རྣམས་རྩིགས་ཤིང་དེ་ན་རབ་ཏུ་གནས། །དེ་ལ་གསེར་རྣམས་དང་ནི་འགྲོན་བུ་དང་། །ནོར་དང་འབྲུ་དང་མན་ཤེལ་བྱི་རུ་དང་། །གླང་པོ་ཆེ་དང་རྟ་དང་དཔུང་བུ་ཆུང་། །
དེ་བཞིན་ཕྱུགས་དང་བ་ལང་ལུག་མང་སྟེ། །འཕེལ་ཞིང་འདུ་བ་དང་ནི་དེ་བཞིན་ཤིང་། །བྲན་ཕོ་བྲན་མོ་དམག་པའི་ཚོགས་མང་སྟེ། །སྲོག་ཆགས་བྱེ་བ་སྟོང་གིས་རི་མོ་བགྱིས། །རྒྱལ་བ་ལ་ཡང་དེ་ནི་རྟག་ཏུ་གནང་། །གྲོང་ན་
སུ་གནས་པ་ཡི་གྲོང་པ་དང་། །གྲོང་ཁྱེར་བས་ནི་དེ་ལ་ཐལ་སྦྱར་གྱུར། །དགོས་པ་མང་ལ་ཤིན་དུ་དབང་བས་ན། །ཚོང་པ་མང་པོ་དེ་ཡི་དྲུང་དུ་མཆི། །དེ་ལྟར་མི་དེ་འབྱོར་པར་ལྡན་པ་སྟེ། །རྒས་ཤིང་འཁོགས་ལ་ཤིན་དུ་
གཏུགས་པར་འགྱུར། །དེ་ནི་བུ་ཡི་མྱ་ངན་བགྱིད་སེམས་པས། །ཉིན་དང་མཚན་མོ་རྟག་ཏུ་བས་པར་གྱུར། །བདག་གི་བུ་ནི་དེ་འདྲ་བློ་གྲོས་ལོག །དེ་ནི་འཁྱམས་ནས་ལོ་ཡང་ལྔ་བཅུ་ལོན། །འདི་ལྟར་བདག་ལ་མཛོད་
ནི་མང་དུ་ཡོད། །བདག་ནི་འཆི་བའི་དུས་ལ་ཉེ་བར་གྱུར། །དེའི་བུ་བྱིས་པ་དེ་ནི་དེ་ཡི་ཚེ། །དབུལ་ཞིང་རྟག་ཏུ་ཕོངས་པར་གྱུར་པས་ན། །ཟས་དང་དེ་བཞིན་གོས་རྣམས་ཚོལ་བའི་ཕྱིར། །གྲོང་དང་གྲོང་རྣམས་སུ་
ཡང་རྗེས་སུ་རྒྱུ། །ཅུང་ཟད་ཙམ་ནི་རེས་འགའ་ཚོལ་བ་ན། །ཅུང་ཟད་རྙེད་ཅིང་རེས་འགའ་ཅི་མི་རྙེད། །བྱིས་པ་དེ་ནི་གཞན་གྱི་ཁྱིམ་ན་རྐེ། །གཡན་པ་དང་ནི་རྐོམ་པོས་ལུས་ཀྱང་ཡོག །གང་ན་ཕ་མཆིས་གྲོང་ཁྱེར་
དེར་མཆི་ཞིང་། །འཚལ་མ་དང་ནི་རད་པ་ཚོལ་བ་ན། །རང་གི་ཕ་ཡི་ཁྱིམ་དེ་ག་ལ་བར། །དེ་ནི་མཐར་གྱིས་དེ་རུ་ཕྱིན་པར་གྱུར། །སྐྱེས་བུ་དེ་ནི་ཕྱུག་ཅིང་ནོར་མང་སྟེ། །སྒོ་ན་སེང་གེའི་ཁྲི་ཡི་སྟེང་ན་མཆིས། །སྲོག་

46-1-50a

ཆགས་བརྒྱ་ཕྲག་དུ་མས་འཁོར་བར་བསྐོར། །དེ་སྟེང་བར་སྣང་ལ་ཡང་བླ་རེ་བྲེས། །སྐྱེ་བོ་ཡིད་བརྟན་དེ་ཡི་གམ་ཡོ་འཁོར། །ལ་ལ་དག་ནི་ནོར་དང་འགྲོན་བུ་འགྲང་། །ལ་ལ་དག་ནི་དེ་ལ་སྤྲིང་བ་འདྲི། །ལ་ལ་སྐྱེད་དང་སྤོགས་
སུ་རབ་ཏུ་གཏོང་། །ཁྱིམ་བདག་དེ་ཁྱིམ་རབ་ཏུ་བརྒྱན་པ་དག །དབུལ་པོ་དེས་ནི་ཁྱིམ་དེ་མཐོང་ནས་སུ། །བདག་ནི་དེང་འདིར་ག་ལས་ཅི་ལྟར་འོངས། །འདི་ནི་རྒྱལ་པོའམ་ཡང་ན་བློན་པོ་ཡིན། །འདི་ནི་ཉེས་པར་གྱུར་ན་
མི་རུང་ཞེས། །ཚམ་ཟུངས་སུ་ཡང་གཟུང་བར་མི་འགྱུར་གྲང་། །མི་དེ་དེ་སྙམ་སེམས་ཤིང་འབྲོས་བགྱིད་ལ། །དབུལ་པོ་རྣམས་ཀྱི་ཤུལ་སྲང་ཀུན་ཏུ་འདྲི། །ཕྱུག་པོ་དེས་ནི་བདག་གི་བུ་མཐོང་ནས། །སེང་གེའི་ཁྲི་ལ་
མཆིས་ཤིང་དགའ་བར་གྱུར། །དེས་ནི་དེ་ཡི་གན་དུ་འཛིན་པར་བཏང་། །སྐྱེས་བུ་དབུལ་པོ་དེ་ནི་ཁྲིད་དེ་ཤོག །དེ་ཡི་མོད་ལ་མི་དེ་བཟུང་བ་དང་། །བཟུང་མ་ཐག་ཏུ་དེ་ནི་བརྒྱལ་བར་གྱུར། །གོར་མ་ཆག་པར་བདག་
གསོད་ཉེ་བར་ལྷགས། །བདག་ལ་ཟས་དང་གོས་ཀྱིས་ཅི་ཞིག་བྱ། །ནོར་མང་མཁས་པ་དེ་ཡིས་དེ་མཐོང་ནས། །བྱིས་པ་ལོག་ཡིད་འདི་ནི་དམན་ལ་མོས། །ང་ཡི་འབྱོར་པ་འདི་ལ་དད་མི་བྱེད། །འདི་ནི་བདག་གི་ཕ་ཞེས་
ཡིད་མི་ཆེས། །དེ་ཡིས་སེམས་ཅན་དམན་ཞིང་གོས་ངན་ལ། །ཡོན་པོ་ཞར་བ་ཐེང་འགྲུམས་གྱུར་པ་ཡི། །དེ་འདྲའི་མི་དག་ཁ་ཅིག་བཏང་ནས་སུ། །ལས་བྱེད་པ་ཡི་མི་དེ་རབ་ཚོལ་ཅིག །ང་ཡི་འདི་ན་ཕྱག་དར་རུལ་པ་དང་། 
གཅིན་དང་བཤང་བས་མ་རུང་གྱུར་པ་རྣམས། །དེ་དག་འཕྱག་པའི་ཕྱིར་ནི་ལས་བྱོས་ཤིག །ཁྱོད་ནི་གླ་ཡང་ཉིས་གྱུར་སྦྱིན་པར་བྱ། །མི་དེས་འདི་ལྟ་བུ་ཡི་སྒྲ་ཐོས་ནས། །འོངས་ཏེ་ས་ཕྱོགས་དེ་དག་དེ་ཡིས་ཕྱགས། །ཁྱིམ་གྱི་
དྲུང་དུ་རྩྭ་ཡི་སྤྱིལ་པོ་ན། །དེར་ཡང་གནས་བཅས་ནས་ནི་འདུག་པར་བྱེད། །སྐར་ཁུང་སྣང་བ་ནས་ནི་རྟག་པར་ཡང་། །ཕྱུག་པོ་དེས་ཀྱང་སྐྱེས་བུ་དེ་བལྟས་ཏེ། །དམན་ལ་མོས་པ་བདག་གི་བུ་འདི་ནི། །ཕྱག་དར་ཕུང་པོ་རྣམས་ནི་

46-1-50b

འཕྱག་པར་བྱེད། །དེ་ནི་བབས་ཏེ་སྐོན་བུ་ཐོགས་བགྱིད་ཅིང་། །དྲི་མ་ཅན་གྱི་གོས་དག་འཚལ་ནས་སུ། །དེ་ཡི་གན་དུ་ཉེ་བར་མཆིས་ནས་ནི། །ལས་རྣམས་མི་བྱེད་ཅེས་ནི་རབ་ཏུ་སྤྱོས། །ཁྱོད་ལས་གླ་ཡང་ཉིས་གྱུར་སྦྱིན་པར་བྱ། །
དེ་བཞིན་རྐང་པ་བསྐུ་བའང་ཉིས་གྱུར་དུ། །ལན་ཚྭ་ཅན་གྱི་ཟས་ནི་ཁྱོད་ལ་སྦྱིན། །རས་དང་ཚོད་མ་དག་ཀྱང་སྦྱིན་པར་བྱ། །དེ་ཚེ་དེ་ལྟར་དེ་ལྟ་སྤྱོས་ནས་ནི། །མཁས་པས་དེ་ནི་སླར་ཡང་རབ་ཏུ་དཀྲིས། །ཁྱོད་ཀྱིས་འདིར་ནི་ཤིན་
དུ་ལས་བྱོས་ཤིག །ང་ཡི་བུ་ཡིན་ཡང་དག་ཐེ་ཙོམ་མེད། །དེ་ནི་བགས་ཀྱིས་བགས་ཀྱིས་ཁྱིམ་བཞག་སྟེ། །ལོ་གྲངས་ཉི་ཤུ་བར་དུ་ཚང་བར་ཡང་། །མི་དེ་ལས་རྣམས་ལེགས་པར་བགྱིད་ཏུ་སྩལ། །བགས་ཀྱིས་མི་དེ་རྣམ་པར་
ཡིད་ཕབ་ནས། །དེས་ནི་ཤེལ་དང་འགྲོན་བུ་མུ་ཏིག་ཀྱང་། །ཁྱིམ་དེ་ཉིད་དུ་རབ་ཏུ་སྦེད་པར་བྱེད། །དེ་ནི་ཐམས་ཅད་བགྲང་ཞིང་བརྩི་བར་བགྱིད། །དོན་དང་ནོར་རྣམས་ཀུན་ལའང་དེ་སེམས་སོ། །དེ་ཡི་མཆིས་བྲང་གི་ནི་སླད་རོལ་ན། །
བྱིས་པ་དེ་ནི་གཅིག་པུ་སྤྱིལ་བུར་གནས། །བདག་ལ་ལོངས་སྤྱོད་འདི་དག་ཡོད་མེད་ཅེས། །དབུལ་པོའི་བསམ་པ་དག་ནི་རྗེས་སུ་སེམས། །བུ་དེ་འདུ་ཤེས་རྒྱ་ཆེར་གྱུར་པ་ནི། །དེ་ཡི་རྣམ་པ་དེ་འདྲ་དེས་འཚལ་ནས། །མཛའ་བོ་
གཉེན་བཤེས་མང་པོ་ཀུན་བསོགས་ཏེ། །ནོར་འདི་ཐམས་ཅད་འདི་ལ་གཏད་པར་བྱ། །དེ་ཡིས་རྒྱལ་པོའི་གྲོང་དང་གྲོང་ཁྱེར་མི། །ཚོང་པ་མང་པོ་དག་ཀྱང་བསོགས་ནས་སུ། །འཁོར་གྱི་དབུས་སུ་འདི་སྐད་
ཚིག་སྨྲས་པ། །བདག་གི་བུ་འདི་སྟོར་ནས་ཡུན་རིང་སྟེ། །སྔར་ནི་ལོ་གྲངས་ལྔ་བཅུ་ཚང་བར་ལོན། །གཞན་ཡང་བདག་གིས་མཐོང་ནས་ཉི་ཤུ་ལགས། །གྲོང་ཁྱེར་འདི་ཞེས་བགྱི་བར་བདག་གིས་སྟོར། །
དེ་ཚོལ་སླད་དུ་བདག་ནི་འདིར་མཆིས་སོ། །བདག་གི་ནོར་འདི་ཀུན་གྱི་བདག་པོ་སྟེ། །འདི་དག་ཐམས་ཅད་མ་ལུས་འདི་ལ་གཏད། །ཕ་ཡི་ནོར་གྱིས་དགོས་དགུར་སྤྱད་པར་གྱིས། །བྲན་གཟའ་འདི་

46-1-51a

དག་ཀུན་ཀྱང་རབ་ཏུ་སྦྱིན། །དམན་ལ་མོས་དང་ཕ་ཡི་ཡོན་ཏན་དང་། །སྔོན་གྱི་དབུལ་ཞིང་ཕོངས་པ་དྲན་ནས་ནི། །མི་དེ་ཤིན་དུ་ངོ་མཚར་ཐོབ་པར་གྱུར། །བྲན་གཟའ་རྙེད་པས་དེ་རིང་ཤིན་དུ་བདེ། །དེ་བཞིན་བདག་
ཅག་རྣམ་པར་འདྲེན་པ་ཡིས། །དམན་པ་ལ་ནི་མོས་པར་མཁྱེན་པས་ན། །སངས་རྒྱས་སུ་ཡང་འགྱུར་ཞེས་མ་བསྟན་ཏེ། །ཁྱོད་ནི་ཉན་ཐོས་ང་ཡི་བུ་ཡིན་ནོ། །བདག་ལ་འཇིག་རྟེན་མགོན་པོས་བཀའ་སྩལ་པ། །
མཆོག་རབ་བྱང་ཆུབ་ལ་ནི་སུ་ཞུགས་རྣམས། །ལམ་གང་བསྒོམས་པས་སངས་རྒྱས་འགྱུར་བ་ཡི། །བླ་མེད་ལམ་ནི་དེ་ལ་འོད་སྲུང་ཤོད། །དེ་ཕྱིར་བདེ་བར་གཤེགས་པས་བཀའ་སྩལ་ནས། །བྱང་ཆུབ་སེམས་
དཔའ་སྟོབས་ཆེན་མང་པོ་ལ། །རྒྱུ་དང་དཔེ་ཡང་བྱེ་བ་ཁྲག་ཁྲིག་གིས། །བདག་ཅག་གིས་ཀྱང་བླ་མེད་ལམ་བསྟན་ཏོ། །རྒྱལ་བའི་སྲས་ཀྱིས་བདག་ལས་ཐོས་ནས་ནི། །བྱང་ཆུབ་མཆོག་ལམ་དེ་ནི་གོམས་པར་
བགྱིད། །སངས་རྒྱས་སུ་ནི་འཇིག་རྟེན་འདི་འགྱུར་ཞེས། །དེ་མ་ཐག་ཏུ་དེ་དག་ལུང་ཡང་བསྟན། །ཆོས་མཛོད་འདི་ནི་ཡང་དག་སྲུང་བགྱིད་ཅིང་། །རྒྱལ་བའི་སྲས་རྣམས་ལ་ནི་བསྟན་པ་ཡང་། །ཇི་ལྟར་མི་དེའི་
ཡིད་བརྟན་དེ་བཞིན་དུ། །རྣམ་པར་འདྲེན་པ་དེ་འདྲའི་ལས་བགྱིད་དོ། །དབུལ་པོ་དག་གི་བསམ་པ་རྣམ་པར་སེམས། །སངས་རྒྱས་མཛོད་འདི་རྣམས་ནི་རབ་སྦྱིན་ཞིང་། །རྒྱལ་བའི་ཡེ་ཤེས་རབ་ཏུ་བཤད་མོད་ཀྱི། །
རྒྱལ་བའི་ཡེ་ཤེས་འདི་ནི་དོན་མི་གཉེར། །བདག་ཉིད་མྱ་ངན་ལས་ཀྱང་འདའ་བར་རྟོག །ཡེ་ཤེས་འདི་ཙམ་ལས་ནི་གཞན་མི་འབྱུང་། །སངས་རྒྱས་རྣམས་ཀྱི་ཞིང་གི་བཀོད་ཐོས་ནས། །བདག་ཅག་ནམ་ཡང་
དགའ་བར་མ་གྱུར་ཏོ། །ཆོས་འདི་ཐམས་ཅད་ཟག་མེད་ཞི་བ་སྟེ། །འགོག་པ་དང་ནི་སྐྱེ་བ་རྣམ་པར་སྤངས། །འདི་ནི་ཆོས་རྣམས་གང་ཡང་མ་མཆིས་ཤིས། །དེ་ལྟར་བསམས་ན་དད་པར་མ་གྱུར་ཏོ། །

46-1-51b

སངས་རྒྱས་ཡེ་ཤེས་བླ་ན་མེད་པ་ལ། །བདག་ཅག་ཡུན་རིང་དུས་ནས་མི་རེ་ཞིང་། །བདག་ཅག་ནམ་ཡང་འདི་ལ་མ་སྨོན་ཏེ། །རྒྱལ་བས་འདི་ནི་དམ་པའི་མཐར་གསུངས་སོ། །མྱ་ངན་འདས་པའི་མཐར་ཐུག་ལུས་
འདི་ལས། །སྟོང་པ་ཉིད་དུ་ཡུན་རིང་ཡོངས་སུ་བསྒོམས། །ཁམས་གསུམ་སྡུག་བསྔལ་གཟིར་ལས་ཡོངས་སུ་ཐར། །བདག་ཅག་གིས་ནི་རྒྱལ་བའི་བསྟན་པ་བགྱིས། །རྒྱལ་བའི་སྲས་ལ་གང་ཚེ་རབ་བསྟན་ཏེ། །
བྱང་ཆུབ་མཆོག་ལ་ཡང་དག་སུ་ཞུགས་པ། །དེ་དག་ལ་ནི་ཆོས་གང་ཅི་བཤད་པ། །དེ་ལ་བདག་ཅག་ནམ་ཡང་རེ་མ་མཆིས། །བདག་ཅག་འཇིག་རྟེན་སློབ་དཔོན་རང་བྱུང་གིས། །དུས་ལ་བཞེས་པ་མཛད་ནས་ཡལ་བར་
བཞག །བདག་ཅག་རྣམས་ཀྱི་དད་པ་རབ་བརྟགས་ནས། །ཡང་དག་ལྡེམ་དགོངས་ཚིག་དོན་དེ་མ་བཤད། །དེ་ཡི་ཐབས་མཁས་པ་ནི་ཇི་ལྟ་བུར། །དུས་སུ་ནོར་མང་པོ་ཡི་སྐྱེས་བུ་ལྟར། །དམན་པར་དད་པ་བུ་དེ་ལེགས་
པར་བཏུལ། །བཏུལ་ནས་དེ་ལ་ནོར་ཡང་རབ་ཏུ་སྩལ། །ཐབས་ལ་མཁས་པས་རབ་ཏུ་སྟོན་མཛད་དེ། །དམན་ལ་མོས་པའི་སྲས་རྣམས་འདུལ་མཛད་ཅིང་། །བཏུལ་ནས་སངས་རྒྱས་ཡེ་ཤེས་འདི་སྩོལ་བ། །
འཇིག་རྟེན་མགོན་པོ་ཤིན་དུ་དཀའ་བ་མཛད། །སངས་རྒྱས་བསྟན་པ་འདི་ལ་བདག་ཅག་རྣམས། །ཐོག་མའི་འབྲས་བུ་ཟག་མེད་དམ་པ་ཐོབ། །ཇི་ལྟར་དབུལ་པོས་ནོར་རྣམས་རྙེད་པ་བཞིན། །དེ་རིང་འཕྲལ་ལ་བདག་
ཅག་ངོ་མཚར་ཐོབ། །བདག་ཅག་ཚུལ་ཁྲིམས་གང་རྣམས་ཡུན་རིང་དུ། །འཇིག་རྟེན་མཁྱེན་པའི་བསྟན་ལ་ལེགས་གསུངས་པ། །མགོན་པོ་སྔོན་ཆད་ཚུལ་ཁྲིམས་སྤྱད་པ་ཡི། །དེ་ཡི་འབྲས་བུ་དེ་རིང་བདག་ཅག་ཐོབ། །ཚངས་པར་
སྤྱོད་པ་མཆོག་རབ་རྣམ་དག་གང་། །འདྲེན་པའི་བསྟན་ལ་ཤིན་དུ་བསྙེན་བགྱིད་པ། །དེ་ཡི་འབྲས་བུ་ཞི་བ་ཁྱད་པར་ཅན། །རྒྱ་ཆེན་ཟག་པ་མ་མཆིས་དེ་རིང་ཐོབ། །མགོན་པོ་དེ་རིང་བདག་ཅག་སྒྲོགས་གྱུར་ཏེ། །བྱང་ཆུབ་དམ་པ་ཡང་དག་བསྒྲག་

46-1-52a

པར་བགྱི། །བྱང་ཆུབ་པ་ཡི་སྒྲ་ཡང་རབ་ཏུ་བརྗོད། །དེ་བས་བདག་ཅག་སྒྲོགས་པ་མི་བཟད་འདྲ། །མགོན་པོ་དེང་ནི་བདག་ཅག་འོས་གྱུར་ཏེ། །ལྷ་དང་བཅས་པའི་འཇིག་རྟེན་བདུད་དང་བཅས། །ཚངས་པར་བཅས་པའི་སེམས་
ཅན་ཐམས་ཅད་ཀྱིས། །བདག་ཅག་ཤིན་དུ་མཆོད་པར་འོས་པ་ལགས། །མི་ཡི་འཇིག་རྟེན་འདི་ན་གང་དཀའ་བ། །དཀའ་བ་འདི་འདྲ་བདག་ཅག་མཛད་པས་ན། །བསྐལ་པ་བྱེ་བ་མང་པོར་འབད་པས་ཀྱང་། །ཁྱོད་ལ་ལན་གློན་རྔོ་
ཐོག་ག་ལ་མཆིས། །མགོ་དང་ལག་པ་དང་ནི་རྐང་པས་ཀྱང་། །ལན་དུ་ཕན་པར་བགྱི་བ་ཤིན་དུ་དཀའ། །གང་གཱའི་བྱེ་སྙེད་བསྐལ་པ་རྫོགས་པར་ཡང་། །མགོ་དང་ཕྲག་ལ་གང་གིས་ཁྱེར་བ་དང་། །བཅའ་དང་བཟའ་དང་སྐོམ་
དང་གོས་རྣམས་དང་། །མལ་ཆ་སྟན་དང་སྟེང་གཡོགས་ཆེན་པོ་ཕུལ། །ཙན་དན་དག་ལས་གཙུག་ལག་ཁང་བགྱིས་ཏེ། །བཅོས་བུའི་རས་ཕྲུགས་རབ་ཏུ་བཏིང་བ་དང་། །ན་བའི་གསོས་སྨན་རྣམ་པ་མང་པོ་ཡང་། །བདེ་བར་
གཤེགས་པ་མཆོད་ཕྱིར་རྟག་ཕུལ་ཏེ། །གང་གཱའི་བྱེ་སྙེད་བསྐལ་པར་ཕུལ་ཡང་ནི། །དེ་ལ་ནམ་ཡང་ལན་གློན་རྔོ་མི་ཐོག །མཚུངས་མེད་མཐུ་མངའ་ཆེ་བའི་ཆོས་ལྡན་པ། །བཟོད་པའི་སྟོབས་གནས་རྫུ་འཕྲུལ་ཆེ་
རྣམས་དང་། །སངས་རྒྱས་རྒྱལ་ཆེན་ཟག་མེད་རྒྱལ་བ་ནི། །བྱིས་པ་དག་གི་འདི་འདྲ་ཤིན་དུ་བཟོད། །དེ་བཞིན་རྟག་ཏུ་རྗེས་སུ་འཐུན་འཇུག་ཅིང་། །མཚན་མ་སྤྱོད་པ་རྣམས་ལ་ཆོས་སྟོན་ཏེ། །ཆོས་ཀྱི་དབང་ཕྱུག་འཇིག་རྟེན་
ཀུན་ལ་དབང་། །དབང་ཕྱུག་ཆེན་པོ་འཇིག་རྟེན་འདྲེན་དབང་པོ། །སེམས་ཅན་གནས་རྣམས་རབ་ཏུ་མཁྱེན་པས་ན། །སོ་སོར་བསྒྲུབ་པ་རྣམ་པ་མང་པོར་སྟོན། །དེ་དག་མོས་པ་སྣ་ཚོགས་མཁྱེན་ནས་སུ། །བརྒྱ་ཕྲག་སྟོང་
གིས་རབ་ཏུ་ཆོས་འཆད་དོ། ། སེམས་ཅན་ཐམས་ཅད་དང་ནི་གང་ཟག་གི། ། དེ་བཞིན་གཤེགས་ཀྱི་སྤྱོད་པ་རབ་མཁྱེན་པས། ། བྱང་ཆུབ་དམ་པ་འདི་ནི་རབ་སྟོན་ཅིང་། ། ཆོས་རྣམས་རྣམ་པ་མང་པོ་ཤིན་དུ་གསུང་། །དམ་པའི་ཆོས་པད་མ་དཀར་

46-1-52b

པོ་ལས་མོས་པའི་ལེའུ་ཞེས་བྱ་སྟེ་བཞི་པའོ།། །། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་དང་། གཞན་ཡང་གནས་བརྟན་ཉན་ཐོས་ཆེན་པོ་དེ་དག་ལ་བཀའ་སྩལ་པ། འོད་སྲུང་ལེགས་སོ་ལེགས་སོ། །ཁྱེད་ཀྱིས་
དེ་བཞིན་གཤེགས་པའི་ཡང་དག་པའི་ཡོན་ཏན་བསྔགས་པ་བརྗོད་པ་ནི། འོད་སྲུང་ཁྱེད་ལེགས་སོ། །འོད་སྲུང་དེ་དག་ནི་དེ་བཞིན་གཤེགས་པའི་ཡོན་ཏན་ནོ། །དེ་བས་གཞན་ཡང་མང་ཞིང་ཚད་མེད་གྲངས་མེད་དེ། བསྐལ་པ་དཔག་ཏུ་མེད་
པར་བཤད་ཀྱང་། དེ་དག་གི་མཐའ་རྟོགས་པར་སླ་བ་མ་ཡིན་ནོ། །འོད་སྲུང་དེ་བཞིན་གཤེགས་པ་ནི་ཆོས་ཀྱི་རྗེ། ཆོས་ཐམས་ཅད་ཀྱི་རྒྱལ་པོ་གཙོ་བོ་མངའ་བ་སྟེ། འོད་སྲུང་དེ་བཞིན་གཤེགས་པས་ཆོས་གང་དུ་བཞག་པ་དང་། ཇི་ལྟར་
བཞག་པ་དེ་དག་དེ་བཞིན་དུ་འགྱུར་རོ། །འོད་སྲུང་དེ་བཞིན་གཤེགས་པ་ཆོས་ཐམས་ཅད་རིག་པར་འཇོག་སྟེ། དེ་བཞིན་གཤེགས་པའི་ཡེ་ཤེས་ཀྱིས་འཇོག་གོ། །ཇི་ལྟར་ཆོས་དེ་དག་ཐམས་ཅད་མཁྱེན་པའི་ས་ཉིད་དུ་འབྱུང་བར་དེ་ལྟར་
འཇོག་གོ། །ཆོས་ཐམས་ཅད་ཀྱི་དོན་གྱི་རིམ་པ་ལ་དེ་བཞིན་གཤེགས་པ་གཟིགས་ཏེ། ཆོས་ཐམས་ཅད་ལ་ལྷག་པའི་བསམ་པ་ཐོབ། ཆོས་ཐམས་ཅད་ངེས་པར་གཏན་ལ་དབབ་པ་ལ་ཐབས་མཁས་པའི་ཡེ་ཤེས་དམ་པ་མཆོག་ཐོབ་
སྟེ། འོད་སྲུང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཐམས་ཅད་མཁྱེན་པའི་ཡེ་ཤེས་སྟོན་པའོ། །ཐམས་ཅད་མཁྱེན་པའི་ཡེ་ཤེས་ལ་འཛུད་པའོ། །ཐམས་ཅད་མཁྱེན་པའི་ཡེ་ཤེས་ལ་འཇོག་
པའོ། །འོད་སྲུང་འདི་ལྟ་སྟེ་དཔེར་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན། རྩྭ་དང་ཤིང་གེལ་པ་དང་སྨན་དང་ནགས་ཚལ་ཁ་དོག་སྣ་ཚོགས་རྣམ་པ་དུ་མ་དང་། སྨན་མང་པོ་མིང་ཐ་དད་ཏུ་བཏགས་པ། ས་དང་རི་སུལ་
དག་ནས་ཇི་སྙེད་སྐྱེས་པ། སྤྲིན་ཆུ་ཆེན་པོས་རྒྱས་པ་འདུས་ནས། ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁེབས་པར་བྱས་སོ། །ཀུན་ཁེབས་པར་བྱས་ནས་དུས་གཅིག་ཏུ་ཆར་

46-1-53a

མཉམ་པར་ཕབ་སྟེ། འོད་སྲུང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་རྩྭ་དང་ཤིང་གེལ་པ་དང་སྨན་དང་ནགས་ཚལ་དེ་ན། སྡོང་བུ་དང་ཡལ་ག་དང་ལོ་མ་དང་འདབ་མ་གཞོན་ཞིང་འཇམ་པ་ཅི་ཡོད་པ་དང་སྡོང་བུ་དང་ཡལ་
ག་དང་ལོ་མ་དང་འདབ་མ་བར་མ་ཅི་ཡོད་པ་དང་སྡོང་བུ་དང་ཡལ་ག་དང་ལོ་མ་དང་འདབ་མ་ཆེན་པོ་དང་རྩྭ་དང་ཤིང་གེལ་པ་དང་སྨན་དང་ནགས་ཚལ་གྱི་སྡོང་པོ་དང་སྡོང་པོ་ཆེན་པོ་ཅི་ཡོད་པ་དེ་དག་ཐམས་ཅད། སྤྲིན་ཆེན་པོ་ལས་ཆར་བབ་པ་ལ་མཐུ་
དང་ཡུལ་ཇི་ལྟ་བ་བཞིན་དུ་ཆུའི་ཁམས་སོ་སོར་འཐུངས་ཏེ། དེ་ཡང་སྤྲིན་ཆེན་པོ་གཅིག་ལས་བྱུང་བ། རོ་གཅིག་པའི་ཆུ་མང་པོས་ས་བོན་ཇི་ལྟ་བར་རྗེས་སུ་འཐུན་པར་སྐྱེས་ཏེ། འཕེལ་ཞིང་རྒྱས་པར་འགྱུར་རོ། །དེ་བཞིན་དུ་མེ་ཏོག་དང་
འབྲས་བུ་འབྱུང་སྟེ། དེ་དག་ཀྱང་སོ་སོའི་མིང་ཐོབ་པོ། །ས་གཅིག་ལ་གནས་པའི་སྨན་མང་པོ་ས་བོན་མང་པོ་དེ་ཐམས་ཅད་ཆུ་རོ་གཅིག་པས་བངས་པ་དེ་བཞིན་དུ། འོད་སྲུང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་འཇིག་རྟེན་དུ་བྱུང་ངོ་། །ཇི་ལྟར་སྤྲིན་ཆེན་པོ་འདུས་པ་དེ་བཞིན་དུ། དེ་བཞིན་གཤེགས་པ་བྱུང་ནས། ལྷ་དང་མི་དང་ལྷ་མ་ཡིན་དུ་བཅས་པ་ཐམས་ཅད་དང་ལྡན་པའི་འཇིག་རྟེན་ལ་དབྱངས་ཀྱིས་གོ་བར་མཛད་དོ། ། འོད་སྲུང་འདི་
ལྟ་སྟེ་དཔེར་ན་སྤྲིན་ཆེན་པོ་དེས་ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁེབས་པ་དེ་བཞིན་དུ། འོད་སྲུང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས། ལྷ་དང་མི་དང་
ལྷ་མ་ཡིན་དུ་བཅས་པའི་འཇིག་རྟེན་གྱི་མདུན་དུ། སྒྲ་འདི་སྐད་འབྱིན་ཅིང་དབྱངས་ཀྱིས་ཐོས་པར་བྱེད་དེ། ལྷ་དང་མི་དག་ང་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཏེ། རྒལ་ནས་བསྒྲལ་ལོ་གྲོལ་ནས་
དགྲོལ་ལོ། །དབུགས་ཕྱིན་ནས་དབུགས་དབྱུང་ངོ་། །ཡོངས་སུ་མྱ་ངན་ལས་འདས་ནས་ཡོངས་སུ་མྱ་ངན་ལས་བཟླའོ། །ང་ནི་ད་ལྟར་གྱི་འཇིག་རྟེན་དང་འཇིག་རྟེན་གཞན་ཡང་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་

46-1-53b

མཁྱེན་ཏོ། །ཐམས་ཅད་མཁྱེན་ཅིང་ཐམས་ཅད་གཟིགས་སོ། །ལྷ་དང་མི་དག་ཆོས་ཉན་པའི་ཕྱིར་ངའི་དྲུང་དུ་ཤོག་ཅིག །ང་ནི་ལམ་སྟོན་པའོ། །ལམ་འཆད་པའོ། །ལམ་རིག་པའོ། །ལམ་མཁས་པའོ། །འོད་སྲུང་དེ་ལྟར་སྲོག་ཆགས་བྱེ་བ་ཁྲག་
ཁྲིག་བརྒྱ་སྟོང་མང་པོ། །དེ་བཞིན་གཤེགས་པ་ལ་ཆོས་ཉན་ཞིང་ཉེ་བར་ལྷགས་པའི་སེམས་ཅན་དེ་དག་གི་དབང་པོ་དང་། བརྩོན་འགྲུས་ཀྱི་རིམ་པ་དེ་བཞིན་གཤེགས་པས་མཁྱེན་ནས། དེ་དག་ལ་ཆོས་ཀྱི་རྣམ་གྲངས་ཉེ་བར་སྦྱོར་རོ། །དེ་དག་ལ་ཆོས་ཀྱི་
གཏམ་མང་པོ་སྣ་ཚོགས་དགའ་བ་ཚིམ་པ་མགུ་བར་བྱེད་པ་ཕན་པ་དང་བདེ་བར་འགྱུར་བའི་གཏམ་གང་གིས། སེམས་ཅན་ཚེ་འདི་ལ་བདེ་བར་འགྱུར་ཞིང་འཆི་བའི་དུས་བྱས་ནས་ཀྱང་བདེ་འགྲོར་སྐྱེ་ལ། གར་སྐྱེས་པ་དེར་འདོད་པ་མང་པོ་སྤྱོད་ཀྱང་ཆོས་
ཉན་ཞིང་། ཆོས་དེ་ཐོས་ནས་སྒྲིབ་པ་མེད་པར་འགྱུར་ཏེ། མཐར་གྱིས་ཐམས་ཅད་མཁྱེན་པའི་ཆོས་ལ་སྟོབས་ཇི་ལྟ་བ་དང་ཡུལ་ཇི་ལྟ་བ་དང་མཐུ་ཇི་ལྟ་བ་བཞིན་དུ་འཇུག་པ་འགྱུར་བ་གསུང་ངོ་། །འོད་སྲུང་འདི་ལྟ་སྟེ་དཔེར་ན། 
སྤྲིན་ཆེན་པོ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁེབས་ནས་ཆར་མཉམ་པར་ཕབ་སྟེ། རྩྭ་བ་དང་ཤིང་གེལ་པ་དང་སྨན་དང་ནགས་ཚལ་ཐམས་ཅད་ཆུས་ངོམས་ཏེ། སྟོབས་ཇི་ལྟ་བ་དང་ཡུལ་ཇི་ལྟ་བ་དང་
མཐུ་ཇི་ལྟ་བ་བཞིན་དུ་རྩྭ་དང་ཤིང་གེལ་པ་དང་སྨན་དང་ནགས་ཚལ་ལ་སོགས་པས་ཆུ་འཐུང་སྟེ། བདག་བདག་གི་རིགས་དང་ཚད་ཏུ་སྐྱེའོ། །འོད་སྲུང་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་ཀྱིས་ཆོས་བཤད་པ། ཆོས་ཐམས་ཅད་རོ་གཅིག་པ་སྟེ། དེ་ནི་རྣམ་པར་གྲོལ་བ་དང་འདོད་ཆགས་དང་བྲལ་བ་དང་། འགོག་པ་
དང་། ཐམས་ཅད་མཁྱེན་པའི་ཡེ་ཤེས་ཀྱི་མཐར་རོ་གཅིག་གོ། །འོད་སྲུང་དེ་བཞིན་དུ་དེ་བཞིན་གཤེགས་པས་ཆོས་བཤད་

46-1-54a

པ་དེ་ལ། སེམས་ཅན་གང་ཉན་པ་དང་འཛིན་པ་དང་འཛུད་པ་དེ་དག་བདག་གིས་བདག་ཤེས་པ་འམ་རིག་པ་འམ་རྟོགས་པ་མེད་དོ། །དེ་ཅིའི་ཕྱིར་ཞེ་ན། འོད་སྲུང་དེ་བཞིན་གཤེགས་པས་འདི་ལྟར་སེམས་ཅན་དེ་དག་དེ་
བཞིན་དུ་མཁྱེན་ཏེ། དེ་དག་སུ་ཡིན་པ་དང་དེ་དག་ཅི་ལྟ་བུ་ཡིན་པ་དང་དེ་དག་ཅི་འདྲ་བ་དང་དེ་དག་ཅི་ལ་སེམས་པ་དང་དེ་དག་ཇི་ལྟར་སེམས་པ་དང་དེ་དག་ཅིས་སེམས་པ་དང་དེ་དག་ཅི་ལ་སྒོམ་པ་དང་དེ་དག་ཇི་ལྟར་སྒོམ་པ་དང་དེ་
དག་ཅིས་སྒོམ་པ་དང་དེ་དག་ཅི་འཐོབ་པ་དང་དེ་དག་ཇི་ལྟར་འཐོབ་པ་དང་དེ་དག་ཅིས་འཐོབ་པ་དེ་དག་ཐམས་ཅད་ནི་འོད་སྲུང་དེ་བཞིན་གཤེགས་པ་ལ་མངོན་སུམ་སྟེ། མངོན་སུམ་དུ་གཟིགས། ཇི་ལྟ་བ་བཞིན་དུ་
གཟིགས་པའི་ཕྱིར་རོ། །འོད་སྲུང་འདི་ལྟ་སྟེ། རྣམ་པར་གྲོལ་བའི་རོ་དང་མྱ་ངན་ལས་འདས་པའི་མཐར་ཐུག་པ་དང་རྟག་པར་ཡོངས་སུ་མྱ་ངན་ལས་འདས་པ་དང་། ས་གཅིག་པ་དང་ནམ་མཁའི་སྤྱོད་ཡུལ་དུ་ངས་ཆོས་
རྣམས་རོ་གཅིག་པར་རྟོགས་ཀྱང་། སེམས་ཅན་རྣམས་ཀྱི་དད་པ་བསྲུང་བའི་ཕྱིར། ས་དེ་དང་དེ་དག་ན་གནས་པའི་སེམས་ཅན་རྩྭ་དང་ཤིང་གེལ་པ་དང་སྨན་དང་ནགས་ཚལ་རབ་འབྲིང་ཐ་མ་དེ་དག་ལྟ་བུ་ལ། ཐམས་ཅད་
མཁྱེན་པའི་ཡེ་ཤེས་བློ་བུར་དུ་མི་སྟོན་ཏོ། །འོད་སྲུང་དེ་བཞིན་གཤེགས་པས་ལྡེམ་པོར་དགོངས་ཏེ་བཤད་པ་ལ། ཁྱེད་འཇུག་མི་ནུས་པས་ཁྱེད་ངོ་མཚར་དུ་གྱུར་ཏོ། །དེ་ཅིའི་ཕྱིར་ཞེ་ན། འོད་སྲུང་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་དགོངས་ཏེ་བཤད་པ་ནི་ཤེས་པར་དཀའ་བའི་ཕྱིར་རོ། །དེ་ནས་བཅོམ་ལྡན་འདས་ཀྱིས་དེའི་དོན་རྒྱས་པར་སྟོན་ཅིང་། དེའི་ཚེ་ཚིགས་སུ་
བཅད་པ་འདི་དག་བཀའ་སྩལ་ཏོ། །ཆོས་རྒྱལ་སྲིད་པ་འཇོམས་མཛད་པ། །ང་ནི་འཇིག་རྟེན་བྱུང་ནས་སུ། །མོས་པ་རྣམ་པར་མཁྱེན་གྱུར་ནས། །སེམས་ཅན་རྣམས་ལ་ཆོས་འཆད་དོ། །

46-1-54b

དཔའ་བོ་ཆེན་པོ་བློ་བརྟན་པས། །བཤད་པ་རྣམས་ནི་ཡུན་རིང་སྲུང་། །གསང་ཆེན་དག་ཀྱང་འཛིན་མཛད་ཅིང་། །སྲོག་ཆགས་རྣམས་ལ་མི་སྟོན་ཏོ། །ཡེ་ཤེས་དེ་ནི་ཤེས་དགའ་སྟེ། །བྱིས་པ་རྣམས་ཀྱིས་འཕྲ་ལ་ཐོས། །མི་ཤེས་
པས་ན་ཐེ་ཚོམ་གྱུར། །དེ་ལས་ཉམས་ཤིང་དེ་དགའ་འཁྱམ། །དེ་ཡི་སྟོབས་ཀྱང་ཅི་འདྲ་དང་། །ཡུལ་ཡང་ཇི་བཞིན་བཤད་པར་བྱ། །ཐ་དད་པ་ཡི་དོན་རྣམས་ཀྱིས། །ལྟ་བ་དག་ནི་དྲང་པོར་བྱ། །འོད་སྲུང་སྤྲིན་ནི་ཇི་ལྟ་བུར། །
འདུས་ནས་འཇིག་རྟེན་ཁམས་རྣམས་སུ། །ས་རྣམས་རབ་ཏུ་ཡོག་པར་ནི། །ཐམས་ཅད་དུ་ཡང་ཁེབས་པར་གྱུར། །དེ་ནི་རབ་ཏུ་ཆུས་རྒྱས་ཏེ། །སྤྲིན་ཆེན་གློག་གི་ཕྲེང་བར་བཅས། །སྐད་ཀྱིས་ཤིན་དུ་སྒྲ་འབྱིན་ཅིང་། །
ལུས་ཅན་རྣམས་ལ་དགའ་བར་བྱེད། །ཉི་མའི་འོད་ནི་བསྒྲིབས་པས་ན། །དཀྱིལ་འཁོར་དག་ཀྱང་བསིལ་བར་བྱས། །ལག་གིས་སླེབས་པར་འདུག་ནས་སུ། །ཐམས་ཅད་དུ་ནི་ཆར་ཡང་འབེབས། །དེ་ནི་སྙོམས་པར་
འབེབས་པ་ཡང་། །ཆུ་ཡི་ཕུང་པོ་མི་ཆུང་བར། །ཀུན་དུ་བབ་པར་གྱུར་པས་ན། །ས་འདི་རྣམས་ཀྱང་ངོམས་པར་བྱས། །གང་དག་ས་འདི་རྣམས་ལས་ནི། །སྐྱེ་བར་གྱུར་པ་སྨན་རྣམས་དང་། །རྩྭ་དང་གེལ་
པ་ནགས་ཚལ་དང་། །སྡོང་པོ་དང་ནི་སྡོང་ཆེན་དང་། །འབྲུ་ཡི་རྣམ་པ་མང་པོ་དང་། །སྔོན་པོར་གྱུར་པ་དག་ཀྱང་རུང་། །རི་དང་རི་སུལ་ནགས་རྣམས་སམ། །སྨན་ལྗོངས་ནས་ནི་གང་འཁྲུངས་པ། །
སྤྲིན་གྱིས་ཐམས་ཅད་ངོམས་པར་བྱེད། །རྩྭ་དང་གེལ་པ་ནགས་ཚལ་དང་། །གདུངས་པའི་ས་ཡང་ངོམས་པར་བྱས། །སྨན་རྣམས་ལ་ཡང་ཀུན་ཏུ་ཕབ། །ཆུ་དེ་རྣམས་ཀྱང་རོ་གཅིག་སྟེ། །སྤྲིན་ལས་
བབ་པ་འདི་ན་གནས། །ཇི་ལྟར་སྟོབས་དང་ཡུལ་གཞན་དུ། །རྩྭ་དང་གེལ་པ་དེ་འཐུང་ངོ་། །སྡོང་པོ་དང་ནི་སྡོང་པོ་ཆེན་པོ་རྣམས། །ཆུང་ངུ་བར་མ་ན་ཚོད་ཇི་བཞིན་དུ། །ཇི་ལྟར་སྟོབས་བཞིན་ཐམས་ཅད་ཆུ་འཐུང་སྟེ། །

46-1-55a

འཐུངས་ནས་ཇི་ལྟར་འདོད་པ་བཞིན་དུ་སྐྱེ། །སྤྲིན་ལས་ཆར་པ་བབ་པས་རྩི་ཆེན་རྣམས། སྡོང་བུ་སྦུ་གུ་ཤུན་པ་ཅི་ལྟ་བར། །ཡལ་ག་གྱེས་དང་འདབ་མ་ཇི་བཞིན་དུ། །འབྲས་བུ་མེ་ཏོག་རྣམས་ཀྱང་དེ་བཞིན་
འཕེལ། །ཆར་པ་རོ་གཅིག་པ་ཡང་བབ་པས་ན། །ཇི་ལྟའི་སྟོབས་དང་ཡུལ་ནི་ཅི་འདྲ་བར། །གང་གིས་ས་བོན་དག་ནི་ཅི་འདྲ་ལས། །དེ་དག་རང་རང་ལས་ནི་སྐྱེ་བ་འབྱིན། །འོད་སྲུང་དེ་བཞིན་སངས་རྒྱས་འཇིག་
རྟེན་འདིར། །འཇིག་རྟེན་ཆར་འཛིན་སྤྲིན་དང་འདྲ་བར་འབྱུང་། །འཇིག་རྟེན་མགོན་པོ་བྱུང་ནས་ཆད་པར་འགྱུར། །སྲོག་ཆགས་ལ་ནི་ཡང་དག་སྤྱོད་པར་སྟོན། །ལྷར་བཅས་འཇིག་རྟེན་དག་གིས་མདུན་བདར་
ནས། །དེ་ལྟར་དྲང་སྲོང་ཆེན་པོ་རབ་སྒྲོགས་ཏེ། །དེ་ནི་རྐང་གཉིས་མཆོག་རྒྱལ་དེ་བཞིན་གཤེགས། །སྤྲིན་ལྟ་བུར་ནི་འཇིག་རྟེན་འདིར་བྱུང་ཏེ། །རབ་ཏུ་ལུས་སྐམས་སྲིད་པ་གསུམ་ཆགས་པ། །སེམས་
ཅན་ཐམས་ཅད་ངས་ནི་ངོམས་པར་བྱས། །སྡུག་བསྔལ་དག་གིས་སྐམས་པ་བདེ་ལ་དགོད། །ངས་ནི་འདོད་དང་མྱ་ངན་འདས་པ་འང་སྦྱིན། །ལྷ་དང་མི་ཚོགས་རྣམས་ཀྱང་ང་ལ་ཉོན། །ང་ལ་ལྟ་བའི་ཕྱིར་ནི་ཉེ་བར་ཤོག །
དེ་བཞིན་གཤེགས་པ་བཅོམ་ལྡན་ཟིལ་མི་ནོན། །བསྒྲལ་བའི་ཕྱིར་ནི་འཇིག་རྟེན་འདིར་སྐྱེས་ཏེ། །རྣམ་དག་ཤིན་དུ་མཐོང་བར་བྱ་བའི་ཆོས། །སྲོག་ཆགས་བྱེ་བ་སྟོང་ལ་བཤད་པར་བྱ། །དེ་ཡི་མཉམ་པ་ཉིད་
དང་ཡང་དག་གཅིག །དེ་ནི་རྣམ་གྲོལ་མྱ་ངན་འདའ་བ་ཡིན། །རྟག་ཏུ་བྱང་ཆུབ་ཕྱིར་ནི་ཞུགས་པར་ཡང་། །དབྱངས་གཅིག་གིས་ནི་རབ་ཏུ་ཆོས་བཤད་དེ། དེ་ནི་མཉམ་པ་ཉིད་དེ་མི་མཉམ་མེད། །འདོད་
ཆགས་མེད་ཅིང་ཞེ་སྡང་དག་ཀྱང་མེད། །ནམ་ཡང་ང་ལ་རྗེས་སུ་ཆགས་པ་མེད། །སུ་ལ་འང་ང་ནི་མཛའ་ཞིང་སྡང་བ་མེད། །སེམས་ཅན་གཅིག་བཞིན་འགྲོ་བ་གཞན་ལ་སྟེ། །ལུས་ཅན་རྣམས་ལ་ཆོས་

46-1-55b

ནི་སྙོམས་པར་འཆད། །ལས་གཞན་མི་བྱེད་རབ་ཏུ་ཆོས་འཆད་དེ། །འགྲོ་བ་དང་ནི་འགྲེང་དང་འདུག་པ་དང་། །མལ་དུ་ཞུགས་ཏེ་ཉལ་བའི་ཚེ་ན་ཡང་། །ནམ་ཡང་ང་ལ་སྐྱོ་བར་གྱུར་པ་མེད། །སྤྲིན་གྱིས་ཆར་
པ་མཉམ་པར་ཕབ་པ་བཞིན། །འཇིག་རྟེན་འདི་རྣམས་ཐམས་ཅད་ངོམས་པར་བྱ། །འཕགས་པ་དང་ནི་མ་རབས་མཚུངས་པའི་བློ། །ཚུལ་ཁྲིམས་ལྡན་དང་ཚུལ་ཁྲིམས་འཆལ་པ་དང་། །དེ་བཞིན་མི་གང་
སྤྱོད་པ་ཉམས་པ་དང་། །སྤྱོད་དང་ཆོ་ག་རྣམས་སུ་ལྡན་པ་དང་། །ལྟ་ལ་གནས་ཤིང་ལྟ་བ་གང་ཉམས་དང་། །ཡང་དག་གང་ལྟ་ལྟ་བ་རྣམ་དག་དང་། །བློ་གྲོས་ངན་པ་དང་ནི་དམ་པ་འང་རུང་། །དབང་པོ་བརྟུལ་པོ་རྣམས་
ལ་ཆོས་བཤད་དེ། །སྐྱོ་བ་ཐམས་ཅད་རབ་ཏུ་རྣམ་སྤངས་ནས། །ངས་ནི་ཡང་དག་ཆོས་ཀྱི་ཆར་པ་ཕབ། །ཇི་ལྟའི་སྤོབས་བཞིན་ང་ལ་མཉན་ནས་ནི། །ལྷ་མི་ནང་ན་ཡང་ཏུ་འོང་བ་དང་། །འཁོར་ལོས་བསྒྱུར་དང་བརྒྱ་བྱིན་ཚངས་པ་
ཡི། །རྣམ་པ་མང་པོའི་ས་ལ་གནས་པར་འགྱུར། །ཕྲན་ཚེགས་ཕྲན་ཚེགས་སྨན་རྣམས་འདི་དག་དང་། །འཇིག་རྟེན་འདི་ན་གང་ཆུང་འདི་དག་དང་། །བར་མ་ཆེན་པོ་དམན་རྣམས་གཞན་དག་ཀྱང་། །དེ་དག་ཐམས་ཅད་རབ་ཏུ་བཤད་ཀྱིས་ཉོན། །
ཟག་པ་མེད་པའི་ཆོས་རྣམས་རབ་ཤེས་ནས། །མི་དག་མྱ་ངན་འདས་ཐོབ་གནས་པ་དང་། །དྲུག་མངོན་ཤེས་ཤིང་གསུམ་རིག་གང་འགྱུར་བ། །དེ་ནི་བར་མའི་སྨན་ཞེས་བྱ་བ་ཡིན། །གང་དག་རི་སུལ་རྣམས་ན་གནས་པ་དང་། །མི་གང་རང་རྒྱལ་
བྱང་ཆུབ་འདོད་བྱེད་པ། །དེ་འདྲ་འབྲིང་དུ་རྣམ་པར་དག་པའི་བློ། །དེ་ནི་བར་མའི་སྨན་ཞེས་བྱ་བ་ཡིན། །བརྩོན་འགྲུས་དང་ནི་བསམ་གཏན་རྣམས་བསྟེན་ཅིང་། །ལྷ་དང་མི་མགོན་སངས་རྒྱས་འགྱུར་བྱ་ཞེས། །སྐྱེས་བུ་ཁྱུ་མཆོག་ཏུ་ཡང་གང་སྨོན་པ། །
དེ་ནི་སྨན་གྱི་མཆོག་ཅེས་བྱ་བ་ཡིན། །བདེ་བར་གཤེགས་པའི་སྲས་པོ་གང་ཞུགས་པ། །བྱམས་པ་བསྙེན་ཅིང་འདི་ལ་ཞི་བ་སྤྱོད། །སྐྱེས་བུ་ཁྱུ་མཆོག་ཏུ་ཡང་ཐེ་ཚོམ་མེད། །དེ་འདྲ་འདི་ན་སྡོང་པོ་ཡིན་ཞེས་བྱ། །ཕྱིར་མི་ལྡོག་པའི་འཁོར་ལོ་རབ་སྐོར་ཞིང་། །རྫུ་འཕྲུལ་སྟོབ་

46-1-56a

ལ་གནས་པ་གང་དཔའ་བ། སྲོག་ཆགས་བྱེ་བ་མང་པོ་རབ་ཏུ་འགྲོལ། །དེ་ནི་འདི་ན་སྡོང་པོ་ཆེན་པོ་ཡིན། །རྒྱལ་བས་ཆོས་དེ་མཉམ་པར་བཤད་པ་ནི། །སྤྲིན་གྱིས་ཆར་པ་མཉམ་པ་ཕབ་པ་བཞིན། །སྣ་ཚོགས་མངོན་ཤེས་
འདི་འདྲ་འདི་དག་ཀྱང་། །ས་སྟེང་སྨན་རྣམས་ཇི་ལྟར་གནས་པ་བཞིན། །དེ་ལྟ་བུ་ཡི་དཔེ་དག་བསྟན་པ་ཡིས། །དེ་བཞིན་གཤེགས་པའི་ཐབས་རྣམས་ཤེས་པར་གྱིས། །ཇི་ལྟར་དེ་ཡིས་ཆོས་གཅིག་བཤད་པ་ཡང་། །སྣ་ཚོགས་ཚིག་
ནི་ཆར་གྱི་ཐིགས་པ་བཞིན། །ངས་ཀྱང་ཆོས་ཀྱི་ཆར་པ་ཕབ་པས་ན། །འཇིག་རྟེན་འདི་དག་ཐམས་ཅད་ངོམས་པར་གྱུར། །རབ་ཏུ་བཤད་པ་རོ་གཅིག་ཆོས་ལ་ཡང་། །ཅི་འདྲ་སྟོབས་བཞིན་རྗེས་སུ་རྣམ་པར་སེམས། །ཇི་ལྟར་
རྩྭ་དང་གེལ་པའི་ཤིང་རྣམས་དང་། །བར་མའི་སྨན་རྣམས་ལ་ཡང་ཇི་ལྟ་བར། །སྡོང་པོ་དང་ནི་སྡོང་པོ་ཆེན་པོ་དེ། །ཆར་བབ་ཕྱོགས་བཅུ་ཀུན་ནའང་མཛེས་པ་བཞིན། །འདི་ནི་རྟག་ཏུ་འཇིག་རྟེན་ཕན་པའི་ཆོས། །འཇིག་རྟེན་
འདི་ཀུན་ཆོས་ཀྱིས་ངོམས་པར་བྱེད། །འཇིག་རྟེན་ཐམས་ཅད་ངོམས་པར་བྱས་ནས་ནི། །སྨན་རྣམས་ལས་ནི་མེ་ཏོག་རབ་ཏུ་འབྱུང་། །བར་མ་སྨན་རྣམས་རབ་ཏུ་སྐྱེ་བ་ནི། དགྲ་བཅོམ་གང་དག་ཟག་པ་ཟད་གནས་དང་། །
ནགས་ཚལ་ཁྲོད་ནས་རང་སངས་རྒྱས་རྣམས་ལ། །ལེགས་པར་གསུངས་པའི་ཆོས་རྣམས་བསྟན་པར་བྱ། །བྱང་ཆུབ་སེམས་དཔའ་མང་པོ་དྲན་ལྡན་བརྟན། །བྱང་ཆུབ་མཆོག་འདི་ཡོངས་སུ་ཚོལ་བ་ན། །ཁམས་གསུམ་ཐམས་
ཅད་རྟོགས་པར་ཁོང་ཆུད་པ། །དེ་དག་རྟག་ཏུ་སྐྱེ་བ་སྡོང་པོ་བཞིན། །རྫུ་འཕྲུལ་གང་ལྡན་བསམ་གཏན་བཞིར་ཞུགས་པ། །གང་དག་སྟོང་པ་ཉིད་ཐོས་དགའ་སྐྱེད་ཅིང་། །འོད་ཟེར་སྟོང་ཕྲག་རབ་ཏུ་གཏོང་བ་རྣམས། །
དེ་དག་སྡོང་པོ་ཆེན་པོ་ཞེས་ཀྱང་བྱ། །འོད་སྲུང་འདི་ལྟ་བུ་ཡི་ཆོས་བཤད་པ། །སྤྲིན་གྱིས་ཆར་པ་མཉམ་པར་ཕབ་པ་བཞིན། །མི་ཡི་མེ་ཏོག་མང་པོ་མཐའ་ཡས་པ། །དེས་ནི་མང་པོའི་སྨན་བཞིན་རྣམ་པར་སྐྱེད། །

46-1-56b

རང་གིས་རིག་པའི་ཆོས་རྣམས་རབ་ཏུ་བཤད། །སངས་རྒྱས་བྱང་ཆུབ་དག་ནི་དུས་སུ་བསྟན། །དེ་ནི་འཇིག་རྟེན་འདྲེན་པ་ཐམས་ཅད་དང་། །ང་ཡི་ཐབས་ལ་མཁས་པ་མཆོག་ཡིན་ནོ། །འདི་ལྟར་དོན་དམ་ཡང་དག་ངས་བཤད་པ། །
ཉན་ཐོས་དེ་ཀུན་མྱ་ངན་མ་འདས་ཏེ། །དེ་དག་བྱང་ཆུབ་སྤྱོད་པ་རབ་སྤྱད་ནས། །ཉན་ཐོས་འདི་དག་ཐམས་ཅད་སངས་རྒྱས་འགྱུར། །འོད་སྲུང་གཞན་ཡང་དེ་བཞིན་གཤེགས་པ་ནི། སེམས་ཅན་འདུལ་བར་མཚུངས་ཏེ་མི་
མཚུངས་པ་མེད་དོ། །འོད་སྲུང་འདི་ལྟ་སྟེ་དཔེར་ན། ཉི་མ་དང་ཟླ་བའི་འོད་ཀྱིས་འཇིག་རྟེན་ཐམས་ཅད་ཏུ་སྣང་བར་བྱེད་པ་ནི། དགེ་བ་བྱེད་པ་དང་མི་དགེ་བ་བྱེད་པ་དང་སྟེང་ན་གནས་པ་དང་འོག་ན་གནས་པ་དང་དྲི་ཞིམ་པ་དང་དྲི་མི་
ཞིམ་པ་ཐམས་ཅད་ལ་མཉམ་པར་འོད་ཀྱིས་ཕོག་སྟེ། མི་མཉམ་པ་མ་ཡིན་ནོ། །འོད་སྲུང་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐམས་ཅད་མཁྱེན་པའི་ཡེ་ཤེས་ཀྱི་སེམས་ཀྱི་
འོད་ཀྱིས་འགྲོ་བ་ལྔར་སྐྱེས་པའི་སེམས་ཅན་ཐམས་ཅད་ཇི་ལྟར་མོས་པ་དེ་བཞིན་དུ་ཐེག་པ་ཆེན་པོ་པ་དང་རང་སངས་རྒྱས་ཀྱི་ཐེག་པ་ཅན་དང་། ཉན་ཐོས་ཀྱི་ཐེག་པ་ཅན་རྣམས་ལ་ཆོས་བཤད་པ་དེ་མཉམ་པར་འཇུག་ལ་དེ་
བཞིན་གཤེགས་པའི་ཡེ་ཤེས་ནི་སྐྱེ་བ་ཡང་མེད། འབྲི་བ་ཡང་མེད་དེ། འདི་ལྟར་བསོད་ནམས་དང་ཡེ་ཤེས་ཡང་དག་པར་སྡུད་པར་འགྱུར་རོ།། །། དམ་པའི་ཆོས་པད་མ་དཀར་པོ་བམ་པོ་ལྔ་པ། 
འོད་སྲུང་ཐེག་པ་ནི་གསུམ་དུ་མེད་དེ། སེམས་ཅན་སྤྱོད་པ་ཐ་དད་པས། དེའི་ཕྱིར་གྱི་ན་ཐེག་པ་གསུམ་དུ་བཏགས་པར་ཟད་དོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་
པོས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་ཐེག་པ་གསུམ་དུ་མ་མཆིས་ན། ཅིའི་སླད་དུ་ད་ལྟར་བྱུང་བའི་དུས་ན། ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔར་

46-1-57a

གདགས་པས་རབ་ཏུ་གདགས། དེ་སྐད་ཅེས་གསོལ་ནས། བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་འདི་ལྟ་སྟེ་དཔེར་ན། རྫ་མཁན་གྱིས་འཇི་བ་
མཚུངས་པ་ལ་སྣོད་བྱས་ཏེ། དེ་ལས་ཁ་ཅིག་ནི་བུ་རམ་གྱི་སྣོད་ཏུ་གྱུར། ཁ་ཅིག་ནི་མར་གྱི་སྣོད་ཁ་ཅིག་ནི་ཞོ་དང་འོ་མའི་སྣོད་ཁ་ཅིག་ནི་ངན་པ་མི་གཙང་བའི་སྣོད་ཏུ་གྱུར། འཇི་བ་ལ་ཐ་དད་པ་མེད་མོད་ཀྱི། རྫས་བཅུག་པ་ཙམ་གྱིས་
སྣོད་ཐ་དད་པར་སྣང་ངོ་། །འོད་སྲུང་དེ་བཞིན་དུ་ཐེག་པ་གཅིག་པུ་འདི་ཉིད་དེ། འདི་ལྟ་སྟེ་སངས་རྒྱས་ཀྱི་ཐེག་པ་སྟེ། ཐེག་པ་གཉིས་སམ་གསུམ་དུ་མེད་དོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་ཚེ་དང་ལྡན་པ་འོད་
སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་སེམས་ཅན་མོས་པ་ཐ་དད་པ་གང་དག་ཁམས་གསུམ་ནས་བྱུང་བ་དེ་དག་གི་མྱ་ངན་ལས་འདས་པ་གཅིག་གམ། འོན་ཏེ་གཉིས་སམ་གསུམ། བཅོམ་
ལྡན་འདས་ཀྱིས་བཀའ་སྩལ་པ། འོད་སྲུང་ཆོས་ཐམས་ཅད་མཉམ་པ་ཉིད་དུ་ཁོང་དུ་ཆུད་པའི་ཕྱིར། མྱ་ངན་ལས་འདའ་བས་ན། དེ་ནི་གཅིག་སྟེ་གཉིས་སུ་མེད་གསུམ་དུ་ཡང་མེད་དོ། །འོད་སྲུང་སྐྱེས་བུ་མཁས་
པ་མཁས་ཅིག་ནི་དཔེས་བཤད་པའི་དོན་རིག་པར་འགྱུར་ཏེ། དེའི་ཕྱིར་ཁྱོད་ལ་དཔེ་བསྟན་པར་བྱའོ། །འོད་སྲུང་འདི་ལྟ་སྟེ། དཔེར་ན། མི་དམུས་ལོང་ཞིག་འདི་སྐད་དུ་ཁ་དོག་བཟང་པོ་དང་ཁ་དོག་ངན་
པའི་གཟུགས་མེད་ཁ་དོག་བཟང་པོ་དང་། ཁ་དོག་ངན་པའི་གཟུགས་མཐོང་བ་ཡང་མེད་ཉི་མ་དང་ཟླ་བ་ཡང་མེད་སྐར་མ་ཡང་མེད་གཟའ་མཐོང་བ་ཡང་མེད་དོ་ཞེས་ཟེར་རོ། །དེ་ནས་མི་གཞན་དག་གིས་
དམུས་ལོང་དེའི་མདུན་དུ་འདི་སྐད་ཅེས། ཁ་དོག་བཟང་པོ་དང་ཁ་དོག་ངན་པ་དག་ཀྱང་ཡོད། ཁ་དོག་བཟང་པོ་དང་ཁ་དོག་ངན་པའི་གཟུགས་མཐོང་བ་ཡང་ཡོད། དེ་བཞིན་དུ་ཉི་མ་དང་ཟླ་བ་དང་སྐར་མ་ཡང་ཡོད་གཟའ་ཡང་ཡོད་གཟའ་མཐོང་བ་ཡང་ཡོད་དོ་

46-1-57b

ཞེས་སྨྲས་ན། མི་དམུས་ལོང་དེ་མི་དེ་དག་ལ་ཡིད་མི་ཆེས་ཤིང་སྨྲས་པ་བཞིན་མི་འཛིན་ཏོ། །དེ་ནས་སྨན་པ་ནད་ཐམས་ཅད་ཤེས་པ་ལ་ལ་ཞིག་གིས་མི་དམུས་ལོང་དེ་མཐོང་ནས་དེ་འདི་སྙམ་དུ་སེམས་ཏེ། མི་དེ་སྔོན་གྱི་སྡིག་
པའི་ལས་ཀྱིས་ནད་ཏུ་གྱུར་ཏེ། གང་ཅུང་ཟད་ནད་དུ་གྱུར་པ་དེ་ཐམས་ཅད་རྣམ་པར་ཞི་སྟེ། རླུང་ལས་གྱུར་པ་དང་མཁྲིས་པ་ལས་གྱུར་པ་དང་བད་ཀན་ལས་གྱུར་པ་དང་འདུས་པ་ལས་གྱུར་པའོ་སྙམ་མོ། །དེ་ནས་སྨན་པས་དེའི་
ནད་ཞི་བར་བྱ་བའི་ཕྱིར་ཡང་དང་ཡང་ཐབས་བསམས་ཏེ། གང་འདི་ན་སྨན་ཡོད་པ་རྣམས་ཀྱིས་ནི་ནད་དེ་ཕྱིན་པར་མི་ནུས་ཀྱི། གངས་ཀྱི་རིའི་རྒྱལ་པོ་ལ་སྨན་སྣ་བཞི་ཡོད་དེ། བཞི་གང་ཞེ་ན་འདི་ལྟ་སྟེ། གཅིག་ཏུ་
ནི་ཁ་དོག་དང་རོ་ཐམས་ཅད་ཀྱི་གནས་དང་ལྡན་པ་ཞེས་བྱ་བ་དང་གཉིས་སུ་ན་ནད་ཐམས་ཅད་ལས་རབ་ཏུ་ཐར་བར་བྱེད་པ་ཞེས་བྱ་བ་དང་གསུམ་དུ་ན་དུག་ཐམས་ཅད་ལས་ཐར་བར་བྱེད་པ་ཞེས་བྱ་བ་དང་བཞིར་ན་གནས་གང་ན་འདུག་
པར་བདེ་བ་སྦྱིན་པ་ཞེས་བྱ་བ་དང་དེ་བཞི་ཡོད་དོ་སྙམ་མོ། །དེ་ནས་དམུས་ལོང་དེ་ལ་སྨན་པ་དེས་སྙིང་རྗེ་བསྐྱེད་ནས། ཐབས་གང་གིས་གངས་ཀྱི་རིའི་རྒྱལ་པོ་ལ་འགྲོ་ནུས་པ་དེ་ལྟ་བུའི་ཐབས་བསམས་ཏེ། 
སོང་ནས་ཡར་ཡང་འཛེགས་མར་ཡང་བབས་ངོས་ལ་ཡང་བཙལ་ཏོ། །དེ་ལྟར་བཙལ་ཏེ་སྨན་དེ་སྣ་བཞི་རྙེད་ནས། རྙེད་པ་དང་ཁ་ཅིག་ནི་སོས་བཅས་ཏེ་བྱིན། ཁ་ཅིག་ནི་བཏགས་ཁ་ཅིག་
ནི་ཕྲད་གཞན་དང་སྦྱར་ལ་བཙོས་ཏེ་སྦྱིན་ནོ་ཁ་ཅིག་ནི་ཕྲད་རློན་པ་དང་སྦྱར་ཏེ་བྱིན། ཁ་ཅིག་ནི་ལུས་ཀྱི་གནས་ཐུར་མས་ཕུག་སྟེ་བླུགས། ཁ་ཅིག་ནི་མེས་བསྲེགས་ཏེ་བྱིན་ཁ་ཅིག་ནི་ཕྲད་གཞན་དང་སྦྱར་ཏེ། 
ཟས་དང་སྐོམ་ལ་སོགས་པ་དང་བསྲེས་ཏེ་བྱིན་ནོ། དེ་ནས་དམུས་ལོང་དེ་ཐབས་སྦྱར་བ་དེས་མིག་ཐོབ་བོ། །དེས་མིག་ཐོབ་ནས། ཕྱི་དང་ནང་དང་རིང་པོ་དང་ཉེ་བ་དང་ཟླ་བ་དང་ཉི་མའི་འོད་དང་སྐར་མ་དང་གཟའི་

46-1-58a

གཟུགས་ཐམས་ཅད་ཀྱང་མཐོང་ནས། འདི་སྐད་ཅེས་ཀྱེ་མ་ཨ་ལ་ལ་བླུན་པོ་ཁོ་བོ་སྔོན་ནི་བསྟན་ཀྱང་ཡིད་མི་ཆེས་ཤིང་སྨྲས་པ་བཞིན་མི་འཛིན་ན་ད་ནི་ཁོ་བོས་ཐམས་ཅད་མཐོང་ནས་དམུས་ལོང་
ལས་ཐར་ཏེ་ཁོ་བོས་མིག་ཐོབ་པས། ཁོ་བོ་ལྟ་བུར་ཁྱད་པར་དུ་འཕགས་པ་གང་ཡང་མེད་དོ་ཞེས་སྨྲས་སོ། །དེའི་ཚེ་ན་དྲང་སྲོང་མངོན་པར་ཤེས་པ་ལྔ་དང་ལྡན་པ་ལྷའི་མིག་དང་ལྷའི་རྣ་བ་དང་ཕ་རོལ་གྱི་སེམས་ཤེས་པ་དང་
སྔོན་གྱི་གནས་དྲན་པའི་ཤེས་པ་དང་། རྫུ་འཕྲུལ་མངོན་སུམ་དུ་བྱ་བ་ལ་མཁས་པ་དག་ཅིག་ཡོད་དེ། དེ་དག་གིས་མི་དེ་ལ་འདི་སྐད་ཅེས་སྨྲས་ཏེ། ཀྱེ་མི་ཁྱོད་ནི་མིག་རྙེད་པ་འབའ་ཞིག་ཏུ་ཟད་ཀྱི་ཁྱོད་གཞན་ཅི་ཡང་མི་ཤེས་ན་
ཁྱོད་ཀྱི་ང་རྒྱལ་དེ་ཅི་ལས་བྱུང་ཁྱོད་ལ་ནི་ཤེས་རབ་ཀྱང་མེད། མཁས་པ་ཡང་མ་ཡིན་ནོ། །དེ་དག་གིས་ཡང་དེ་ལ་འདི་སྐད་ཅེས་སྨྲས་ཏེ། ཀྱེ་མི་ཁྱོད་གང་གི་ཚེ་ཁྱིམ་གྱི་ནང་ན་འདུག་པ་ན། ཕྱི་ལོགས་ཀྱི་གཟུགས་གཞན་
དག་མི་མཐོང་མི་ཤེས། ཁྱོད་ཀྱིས་སེམས་ཅན་གང་དག་བྱམས་པར་སེམས་པ་དང་། གནོད་པར་སེམས་པ་དེ་དག་ཀྱང་མི་ཤེས། དཔག་ཚད་ལྔའི་བར་ན་འདུག་པའི་སྨྲ་བ་དང་རྔ་དང་དུང་ལ་སོགས་པའི་སྒྲ་ཡང་མི་ཤེས་
མི་ཐོས། རྒྱང་གྲགས་གཅིག་གི་བར་དུ་གོམ་པ་མི་འདོར་བར་འགྲོ་ཡང་མི་ནུས། མའི་ལྟོ་ན་སྐྱེ་ཞིང་འཕེལ་བའི་བྱེད་པ་དེ་དག་ཀྱང་མི་དྲན་ན། ཇི་ལྟར་མཁས་པ་ཡིན། ཇི་ལྟར་ན་ཐམས་ཅད་
མཐོང་ཞེས་སྨྲ། ཀྱེ་མི་ཁྱོད་ཀྱིས་སྣང་བ་གང་ཡིན་པ་དེ་ནི་མུན་པར་ཤེས་སོ། །མུན་པ་གང་ཡིན་པ་དེ་ནི་སྣང་བར་ཤེས་སོ་ཞེས་སྨྲས་པ་དང་། དེ་ནས་མི་དེས་དྲང་སྲོང་དེ་དག་ལ་འདི་སྐད་ཅེས་སྨྲས་ཏེ། 
ཐབས་གང་དང་དགེ་བའི་ལས་ཅི་བྱས་ན། འདི་འདྲ་བའི་ཤེས་རབ་འཐོབ། ཁྱོད་ཀྱི་བྱ་དགའ་ལ་ཡོན་ཏན་དེ་དག་ཐོབ་པར་གྱིས་ཤིག་དེ་ནས་དྲང་སྲོང་དེ་དག་གིས་མི་དེ་ལ་འདི་སྐད་ཅེས་སྨྲས་སོ། །གལ་ཏེ་འདོད་ན་འབྲོག་

46-1-58b

དགོན་པར་གནས་པར་གྱིས། ཡང་ན་བྲག་ཕུག་ཏུ་འདུག་ལ་ཆོས་སེམས་ཤིང་ཁྱོད་ཀྱིས་ཉོན་མོངས་པ་རྣམས་སྤང་བར་བྱ་སྟེ། དེ་བཞིན་དུ་སྦྱངས་པའི་ཡོན་ཏན་དང་ལྡན་ན། མངོན་པར་ཤེས་པ་རབ་ཏུ་འཐོབ་བོ། །
དེ་ནས་མི་དེས་དེའི་དོན་བླངས་ཏེ། རབ་ཏུ་བྱུང་ནས་དགོན་པ་ལ་གནས་ཏེ། སེམས་རྩེ་གཅིག་པས་འཇིག་རྟེན་གྱི་སྲེད་པ་སྤངས་ཏེ། མངོན་པར་ཤེས་པ་ལྔ་ཐོབ་བོ། །མངོན་པར་ཤེས་པ་ལྔ་ཐོབ་ནས་བསམས་
པ། སྔོན་བདག་གིས་ལས་གཞན་བྱས་པ་དེས་བདག་གིས་ཡོན་ཏན་གང་ཡང་མ་ཐོབ་བོ། །ད་ནི་གར་བསམས་པར་འགྲོའོ། །སྔོན་བདག་ནི་ཤེས་རབ་ཆུང་ཞིང་རྟོགས་པ་ཆུང་སྟེ། བདག་གི་ནི་དམུས་ལོང་དུ་གྱུར་པའོ་སྙམ་མོ། །
འོད་སྲུང་དེ་ལྟར་དོན་དེ་རིག་པར་བྱ་བའི་ཕྱར། དཔེ་འདི་བྱས་ཏེ་དེའི་དོན་ནི་འདི་ལྟར་བལྟའོ། །འོད་སྲུང་དམུས་ལོང་ཞེས་བྱ་བ་དེ་ནི་སེམས་ཅན་འགྲོ་བ་ལྔའི་འཁོར་བ་ན་གནས་པ་རྣམས་ཀྱི་ཚིག་བླ་དགས་ཏེ། 
གང་དག་དམ་པའི་ཆོས་མི་ཤེས་ཤིང་། ཉོན་མོངས་པའི་མུན་པ་མུན་ནག་སྐྱེད་པ་དེ་དག་མ་རིག་པས་ལྡོངས་སོ། །མ་རིག་པས་ལྡོངས་པས་འདུ་བྱེད་སྩོགས་སོ། །འདུ་བྱེད་ཀྱི་རྐྱེན་གྱིས་མིང་དང་གཟུགས་ནས། 
དེ་བཞིན་དུ་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པ་དེའི་བར་དུ་འབྱུང་བར་འགྱུར་རོ། །དེ་ལྟར་མ་རིག་པས་ལྡོངས་ཏེ། སེམས་ཅན་འཁོར་བ་ན་གནས་པ་རྣམས་ལ་དེ་བཞིན་གཤེགས་པས་
ཐུགས་རྗེ་བསྐྱེད་ནས། ཁམས་གསུམ་ལས་འདས་ཀྱང་བུ་གཅིག་པའི་ཕ་བྱམས་པ་བཞིན་དུ། ཐུགས་རྗེ་ཆེན་པོ་བསྐྱེད་ནས་ཁམས་གསུམ་དུ་གཤེགས་ཏེ། སེམས་ཅན་རྣམས་འཁོར་བའི་འཁོར་ལོ་ན་འཁྱམ་
ཞིང་ཉོན་མོངས་ཀྱང་དེ་དག་འཁོར་བ་ལས་འབྱུང་བ་ཡང་དག་པ་ཇི་ལྟ་བ་བཞིན་དུ་མི་ཤེས་པར་དེ་དག་བཅོམ་ལྡན་འདས་ཀྱི་ཤེས་རབ་ཀྱི་སྤྱན་གྱིས་གཟིགས་སོ། །གཟིགས་ནས་ཀྱང་སེམས་ཅན་འདི་དག་སྔོན་དགེ་བ་བྱས་པས་ཞེ་སྡང་

46-1-59a

ཆུང་ལ་འདོད་ཆགས་ཆེ་བ་དང་། འདོད་ཆགས་ཆུང་ལ་ཞེ་སྡང་ཆེ་བ་དང་ཁ་ཅིག་ཤེས་རབ་ཆུང་བ་དང་ཁ་ཅིག་མཁས་པ་དང་ཁ་ཅིག་ཡོངས་སུ་སྨིན་ཅིང་དག་པ་དང་ཁ་ཅིག་ལོག་པར་ལྟ་བ་མཁྱེན་ནས། སེམས་ཅན་དེ་དག་ལ་
དེ་བཞིན་གཤེགས་པ་ཐབས་མཁས་པས་ཐེག་པ་གསུམ་དུ་བཤད་དོ། །དེ་ལ་ཇི་ལྟར་དྲང་སྲོང་ཆེན་པོ་དེ་དག་མངོན་པར་ཤེས་པ་ལྔ་དང་ལྡན་ཞིང་མིག་རྣམ་པར་དག་པ་དེ་བཞིན་དུ་བྱང་ཆུབ་སེམས་དཔས་བྱང་ཆུབ་ཏུ་སེམས་བསྐྱེད་
དེ། མི་སྐྱེ་བའི་ཆོས་ལ་བཟོད་པ་ཐོབ་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བལྟའོ། །དེ་ལ་སྨན་པ་ཆེན་པོ་དེ་ཅི་ལྟ་བ་བཞིན་དུ་དེ་བཞིན་གཤེགས་པར་བལྟའོ། །དམུས་
ལོང་ཇི་ལྟ་བ་བཞིན་དུ་གཏི་མུག་གིས་ལྡོངས་པའི་སེམས་ཅན་དུ་བལྟའོ། །རླུང་དང་མཁྲིས་པ་དང་བད་ཀན་ཇི་ལྟ་བ་དེ་བཞིན་དུ་འདོད་ཆགས་དང་ཞེ་སྡང་དང་གཏི་མུག་དང་ལྟ་བ་དྲུག་བཅུ་རྩ་གཉིས་སུ་གྱུར་པར་བལྟའོ། །ཇི་
ལྟར་སྨན་སྣ་བཞི་པོ་དེ་ལྟར་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་དང་མྱ་ངན་ལས་འདས་པའི་སྒོར་བལྟའོ། །ཇི་ལྟ་ཇི་ལྟ་བུར་སྨན་རྣམས་བཏང་བས། དེ་ལྟ་དེ་ལྟ་བུར་ནད་རབ་ཏུ་ཞི་བ་དེ་བཞིན་དུ་རྣམ་པར་ཐར་
པའི་སྒོ་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་བསྒོམས་པས་མ་རིག་པ་འགག་པར་བྱེད་ཅིང་། མ་རིག་པ་འགག་པས་འདུ་བྱེད་འགག་པ་ནས། དེ་བཞིན་དུ་སྡུག་བསྔལ་གྱི་ཕུང་པོ་ཆེན་པོ་
འབའ་ཞིག་པ་དེའི་བར་དུ་འགག་པར་གྱུར་ཏེ། དེ་བཞིན་དུ་དེའི་སེམས་དགེ་བ་ལ་ཡང་མི་གནས་སྡིག་པ་ལ་ཡང་མི་གནས་ཏེ། ཇི་ལྟར་དམུས་ལོང་གིས་མིག་མཐོང་བ་དེ་བཞིན་དུ་ཉན་ཐོས་དང་རང་སངས་རྒྱས་
ཀྱི་ཐེག་པ་ཅན་དུ་བལྟའོ། །འཁྱོར་བའི་ཉོན་མོངས་པས་བཅིངས་པ་གཅོད་ཅིང་ཉོན་མོངས་པའི་བཅིང་པ་ལས་རྣམ་པར་གྲོལ་ཏེ་ཁམས་གསུམ་གྱི་འགྲོ་བ་དྲུག་ལས་རབ་ཏུ་ཐར་བས་ན། དེའི་ཕྱིར་ཉན་ཐོས་ཀྱི་ཐེག་པ་ཅན་གྱི་

46-1-59b

འདི་ལྟར་ཤེས་ནས། འདི་སྐད་ཅེས་མངོན་པར་རྫོགས་པར་འཚང་རྒྱ་བར་བྱ་བའི་ཆོས་གཞན་མེད་དེ་བདག་ནི་མྱ་ངན་ལས་འདས་པ་ཐོབ་པོ་ཞེས་ཟེར་རོ། །དེ་ནས་དེ་བཞིན་གཤེགས་པ་དེ་ལ་ཆོས་སྟོན་ཏེ། གང་གིས་ཆོས་ཐམས་ཅད་
མ་ཐོབ་པ་དེ་ལ་མྱ་ངན་ལས་འདས་པ་ག་ལ་ཡོད་ཅེས་དེ་བཞིན་གཤེགས་པས་དེ་དག་བྱང་ཆུབ་ཏུ་བཙུད་དེ། དེ་བྱང་ཆུབ་ཀྱི་སེམས་བསྐྱེད་ནས་འཁོར་བ་ལ་ཡང་མི་གནས་མྱ་ངན་ལས་འདའ་བ་ཐོབ་པར་ཡང་མི་འགྱུར་རོ། །དེས་
ཁམས་གསུམ་རབ་ཏུ་རྟོགས་ནས་ཕྱོགས་བཅུའི་འཇིག་རྟེན་སྟོང་པ་དང་སྤྲུལ་པ་ལྟ་བུ་དང་སྒྱུ་མ་ལྟ་བུ་དང་རྨི་ལམ་དང་སྨིག་རྒྱུ་དང་བྲག་ཅ་ལྟ་བུ་དང་ཆོས་ཐམས་ཅད་མ་སྐྱེས་པ་དང་མ་འགགས་པ་དང་མ་བཅིངས་པ་དང་མ་གྲོལ་བ་དང་
མུན་པ་ཡང་མ་ཡིན་སྣང་བ་ཡང་མ་ཡིན་པར་མཐོང་ངོ་། །གང་གིས་དེ་ལྟར་ཆོས་ཟབ་མོ་མཐོང་བ་དེས་ཁམས་གསུམ་ཐམས་ཅད་གང་བའི་སེམས་ཅན་གྱི་བསམ་པ་དང་མོས་པ་ཐ་དད་པ་མི་མཐོང་བའི་ཚུལ་གྱིས་མཐོང་ངོ་། 
དེ་ནས་བཅོམ་ལྡན་འདས་ཀྱིས་དེའི་དོན་རྒྱས་པར་སྟོན་ཅིང་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཇི་ལྟར་ཉི་མ་ཟླ་བའི་འོད། །ཡོན་ཏན་ལྡན་དང་སྡིག་ཅན་གྱི། །མི་ལ་མཉམ་པར་རབ་འཆར་ཏེ། །དེ་ལ་སྐྱེ་ཞིང་
འབྲི་བ་མེད། །དེ་བཞིན་གཤེགས་ཀྱི་ཤེས་རབ་འོད། །སྙོམས་པ་ཉི་མ་ཟླ་བ་བཞིན། །ལྷག་ཅིང་ཆད་པ་མེད་པར་ནི། །སེམས་ཅན་ཐམས་ཅད་རྣམ་པར་འདུལ། །ཇི་ལྟར་ཁམ་སྣོད་རྫ་མཁན་གྱིས། །
འཇི་བ་མཚུངས་ལས་བྱས་པ་དག །དེ་ལས་སྣོད་ཏུ་གྱུར་པ་ནི། །བུ་རམ་འོ་མ་མར་དང་ཆུ། །ཡང་ན་ལ་ལ་མི་གཙང་དང་། །ཁ་ཅིག་ཞོ་ཡི་སྣོད་ཏུ་གྱུར། །ཁམ་པ་སྣ་གཅིག་དེས་བླངས་ཏེ། །རྫ་མཁན་
གྱིས་ནི་སྣོད་ཏུ་བྱས། །ཇི་ལྟར་དངོས་པོ་བཅུག་པ་བཞིན། །དེས་ནི་སྣོད་ཀྱང་སོ་སོར་རྟོགས། །དེ་བཞིན་སེམས་ཅན་བྱེ་བྲག་མེད། །ཐ་དད་མོས་པས་དེ་བཞིན་གཤེགས། །ཐེག་པ་ཐ་དད་རབ་སྟོན་ཀྱང་། །

46-1-60a

ཐེག་པ་སངས་རྒྱས་ཐེག་པར་དེས། །འཁོར་བའི་འཁོར་ལོ་མི་ཤེས་པས། །མྱ་ངན་འདས་པ་འང་ཤེས་མ་ཡིན། །ཆོས་རྣམས་བདག་ཉིད་རྣམ་སྲངས་ཤིང་། །སྟོང་པར་གང་དག་རྣམ་ཤེས་པ། །དེ་དག་
སངས་རྒྱས་བཅོམ་ལྡན་གྱི། །བྱང་ཆུབ་ཡང་དག་ཉིད་ཏུ་ཤེས། །ཤེས་རབ་བར་མར་གདགས་པ་ནི། །དེ་ནི་རང་རྒྱལ་ཞེས་ཀྱང་བྱ། །སྟོང་པར་ཤེས་ནས་རྣམས་བཏུལ་བ། །དེ་ནི་ཉན་ཐོས་ཉིད་ཏུ་བཞག །ཆོས་
རྣམས་ཐམས་ཅད་རྟོགས་པ་ནི། །ཡང་དག་རྫོགས་པའི་སངས་རྒྱས་ཡིན། །ཇི་ལྟར་དམུས་ལོང་ལ་ལས་ནི། །ཉི་ཟླ་གཟའ་དང་སྐར་མ་རྣམས། །དེས་མ་མཐོང་བས་འདི་སྐད་ཅེས། །གཟུགས་ནི་རྣམས་ཀུན་མེད་ཅེས་
སྨྲ། །སྨན་པ་ཆེན་པོས་དམུས་ལོང་ལ། །སྙིང་རྗེ་ཆེན་པོ་བསྐྱེད་ནས་སུ། །གངས་ཀྱི་རི་ལ་དེ་སོང་སྟེ། །གྱེན་འཛེགས་ཐུར་བབས་ཐད་ཀར་སོང་། །ཁ་དོག་རོ་ཀུན་གནས་ལྡན་པ། །དེ་ལ་སོགས་པ་སྣ་བཞི་དག །རི་
ལས་སྨན་ཡང་ཀུན་རྙེད་དེ། །དེ་ནས་དེ་དག་རབ་ཏུ་སྦྱར། །ཁ་ཅིག་དག་ནི་སོས་ཀྱང་བཅས། །ཁ་ཅིག་བཏབས་ཏེ་དེ་བཞིན་གཞན། །ཡན་ལག་ཏུ་ཡང་ཁབ་རྩེ་བཅུག །དམུས་ལོང་ལ་ནི་རབ་ཏུ་གཏོང་། །
དེ་ཡིས་མིག་ཐོབ་ཉི་ཟླ་དང་། །སྐར་མ་གཟའ་རྣམས་མཐོང་བར་གྱུར། །མི་ཤེས་པས་ན་སྔོན་སྨྲས་ཤེས། །དེ་ནི་དེ་ལྟར་སེམས་པར་གྱུར། །དེ་བཞིན་སེམས་ཅན་མི་ཤེས་ཚེ། །དམུས་ལོང་
འདྲ་དག་འདི་ན་འཁོར། །རྟེན་འབྱུང་འཁོར་ལོ་མི་ཤེས་པས། །སྡུག་བསྔལ་ཆུ་བོའི་ལམ་དུ་གྱུར། །དེ་བཞིན་མི་ཤེས་རྨོངས་པ་ཡི། །འཇིག་རྟེན་དུ་ནི་ཀུན་གྱི་མཆོག །སྨན་པ་ཆེན་པོ་དེ་བཞིན་
གཤེགས། །སྙིང་རྗེ་བདག་ཉིད་འདིར་བྱུང་སྟེ། །སྟོན་པ་ཐབས་ལ་མཁས་པས་ན། །དེས་ནི་དམ་པའི་ཆོས་བཤད་དེ། །བླ་མེད་ཡང་དག་རྫོགས་བྱང་ཆུབ། །ཐེག་པ་དམ་པར་ཞུགས་ལ་བཤད། །འདྲེན་པས་ཤེས་

46-1-60b

རབ་འབྲིང་ལ་ཡང་། །བར་མ་དག་གི་རབ་ཏུ་བཤད། །འཁོར་བས་འཇིགས་ལ་བྱང་ཆུབ་ཀྱང་། །གཞན་དུ་རབ་ཏུ་བཤད་པ་ཡིན། །ཁམས་གསུམ་ལས་ནི་བྱུང་བ་ཡི། །ཉན་ཐོས་རྣམས་ཀྱིས་འདི་ལྟར་ཤེས། །མྱ་ངན་འདས་པའི་དྲི་མེད་
ཞི། །བདག་གིས་རབ་ཏུ་ཐོབ་སྙམ་སེམས། །ཆོས་ཀུན་ཁོང་དུ་ཆུད་གྱུར་ན། །མི་འཆི་མྱ་ངན་འདས་པ་ཐོབ། །དྲང་སྲོང་ཆེ་རྣམས་དེ་ལ་ནི། །ཤིན་དུ་སྙིང་རྗེ་བསྐྱེད་ནས་སུ། །དེ་ལ་སྨྲས་པ་བླུན་པོ་ཁྱོད། །ཡེ་ཤེས་ཅན་དུ་བདག་
མ་སེམས། །གང་ཚེ་ཁྱོད་ནི་ཁང་པ་ཡི། །ནང་ན་འདུག་པར་གྱུར་པ་ན། །ཕྱི་རོལ་དག་ན་གང་ཡོད་པ། །ཤེས་རབ་ཆུང་ཁྱོད་དེ་མི་ཤེས། །གང་ཞིག་ནང་ན་འདུག་པ་དེས། །བྱས་དང་མ་བྱས་ཕྱི་རོལ་གྱི། །ཤེས་བྱ་ད་དུང་
མི་ཤེས་ནས། །ཤེས་ཆུང་ཁྱོད་ཀྱིས་ག་ལ་ཤེས། །དཔག་ཚད་ལྔ་ཙམ་བར་དག་གི། །སྒྲ་གང་བྱུང་བ་དེ་རྣམས་ཀྱང་། །དེ་ཡང་ཐོས་པར་མི་ནུས་ན། །དེ་བས་རིང་བ་གཞན་ཅི་སྨོས། །ཁྱོད་ལ་གང་དག་ཉེས་སེམས་དང་། །དེ་བཞིན་
ན་གཞན་དག་བྱམས་པ་ཡང་། །ཁྱོད་ཀྱིས་དེ་དག་ཤེས་མི་ནུས། །ཅི་ཕྱིར་ཁྱོད་ཀྱིས་ང་རྒྱལ་བྱ། །རྒྱང་གྲགས་ཙམ་དུ་འགྲོ་ན་ཡང་། །གོམ་པ་མ་བོར་འགྲོ་མི་ནུས། །མ་ཡི་མངལ་དུ་ཅི་བྱུང་བ། །དེ་དག་དེ་མ་ཐག་ཏུ་
བརྗེད། །སུ་ལ་མངོན་ཤེས་འདི་ལྔ་ཡོད། །དེ་འདིར་ཐམས་ཅད་ཤེས་ཤེས་བྱ། །ཁྱོད་ནི་གཏི་མུག་ཅང་མི་ཤེས། །བདག་ནི་ཐམས་ཅད་ཤེས་ཤེས་སྨྲ། །ཐམས་ཅད་མཁྱེན་པར་ཁྱེད་འདོད་ན། །འདི་ལྟར་མངོན་
པར་ཤེས་པ་སྒྲུབས། །མངོན་པར་ཤེས་པ་དེ་བསྒྲུབས་ན། །དགོན་པར་གནས་ཤིང་རྣམ་དག་ཆོས། །བསམ་པར་བྱ་སྟེ་དེ་ཡིས་ཁྱོད། །མངོན་པར་ཤེས་པ་ཐོབ་པར་འགྱུར། །དོན་གཟུང་དགོན་
པར་དེ་སོང་སྟེ། །ཤིན་ཏུ་མཉམ་བཞག་རྣམ་པར་སེམས། །མངོན་པར་ཤེས་པ་ལྔ་ཐོབ་སྟེ། །རིང་པོར་མི་ཐོགས་ཡོན་ཏན་ལྡན། །དེ་བཞིན་ཉན་ཐོས་ཐམས་ཅད་ཀྱང་། །མྱ་ངན་འདས་ཐོབ་འདུ་ཤེས་ཏེ། །རྒྱལ་བས་བཤད་པ་

46-1-61a

དེ་དག་ལ། །མྱ་ངན་མ་འདས་དེ་ངལ་བསོ། །གང་ཡང་ཚུལ་འདི་གསུང་བ་ནི། །སངས་རྒྱས་རྣམས་ཀྱི་ཐབས་འདི་སྟེ། །ཐམས་ཅད་མཁྱེན་པ་མ་གཏོགས་པར། །མྱ་ངན་འདའ་མེད་འདི་རྩོམས་ཤིག །
དུས་གསུམ་ཡེ་ཤེས་མཐའ་ཡས་དང་། །ཕ་རོལ་ཕྱིན་དྲུག་དགེ་བ་དང་། །སྟོང་པ་ཉིད་དང་མཚན་མ་མེད། །སྨོན་ལམ་རྣམ་པར་སྤངས་པ་དང་། །བྱང་ཆུབ་སེམས་དང་གཞན་ཡང་གང་། །མྱ་ངན་འདའ་བར་འགྲོ་བའི་
ཆོས། །ཚངས་པའི་གནས་པ་རྣམ་བཞི་དང་། །བསྡུ་བ་རྣམས་སུ་གང་བརྗོད་པ། །སེམས་ཅན་རྣམས་ནི་འདུལ་བའི་ཕྱིར། །དྲང་སྲོང་མཆོག་གིས་རབ་ཏུ་བརྗོད། །རྨི་ལམ་སྒྱུ་མའི་རང་བཞིན་དང་། །སྙིང་པོ་མེད་པ་
ཆུ་ཤིང་ཕུང་། །བྲག་ཆ་དང་ཡང་མཚུངས་པར་ནི། །གང་གིས་ཆོས་རྣམས་རབ་ཤེས་ཤིང་། །ཁམས་གསུམ་ལྷག་མ་མ་ལུས་པར། །དེ་ཡི་རང་བཞིན་ཤེས་པར་ཡང་། །བཅིངས་མེད་རྣམ་གྲོལ་མེད་པའི། །མྱ་ངན་འདས་
པ་མི་ཤེས་སོ། །ཆོས་ཀུན་སྟོང་ཞིང་མཉམ་པ་སྟེ། །ཐ་དད་དབྱེར་མེད་བདག་ཉིད་དོ། །དེ་དག་ལ་ནི་མི་རྟོགས་ཏེ། །ཆོས་ནི་གང་ཡང་མཐོང་མེད་ན། །ཆོས་ཀྱི་སྐུ་ནི་མ་ལུས་པར། །ཤེས་རབ་ཆེན་པོ་དེས་མཐོང་ངོ་། །ཐེག་པ་
གསུམ་དུ་ཡོང་མེད་དེ། །འདི་ན་ཐེག་པ་གཅིག་པུ་ཡོད། །ཆོས་ཀུན་མཉམ་སྟེ་ཐམས་ཅད་ཀྱང་། །མཉམ་ཞིང་སྙོམས་ཏེ་རྟག་ཏུ་མཉམ། །དེ་ལྟར་རིག་ནས་ཞི་བ་ཡི། །མི་འཆི་མྱ་ངན་འདའ་བ་ཤེས། །དམ་པའི་ཆོས་
པད་མ་དཀར་པོ་ལས་སྨན་གྱི་ལེའུ་ཞེས་བྱ་སྟེ་ལྔ་པའོ།། །། དེ་ནས་བཅོམ་ལྡན་འདས་ཀྱིས་ཚིགསུ་བཅད་པ་དེ་དག་བཀའ་སྩལ་ནས། ཐམས་ཅད་དང་ལྡན་པའི་དགེ་སློང་གི་དགེ་འདུན་ལ་བཀའ་སྩལ་པ། ཀྱེ་དགེ་སློང་
དག་ཁྱེད་མོས་པར་བྱ། ཁོང་དུ་ཆུད་པར་བྱའོ། །ངའི་ཉན་ཐོས་དགེ་སློང་འོད་སྲུང་འདི། སངས་རྒྱས་བྱེ་བ་སྟོང་ཕྲག་སུམ་བཅུ་ལ་བཀུར་སྟི་བྱེད་བཙུན་པར་བྱེད་རི་མོ་བྱེད་མཆོད་པ་བྱེད་པར་འགྱུར་ཏེ། སངས་རྒྱས་བཅོམ་

46-1-61b

ལྡན་འདས་དེ་དག་གི་དམ་པའི་ཆོས་འཛིན་པར་འགྱུར་རོ། །དེ་ལུས་ཐ་མའི་ཚེ་བསྐལ་པ་བཀོད་པ་ཆེན་པོ་ཞེས་བྱ་བ་ལ་འཇིག་རྟེན་གྱི་ཁམས་སྣང་བ་ཐོབ་པ་ཞེས་བྱ་བར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་ཟེར་རབ་ཏུ་སྣང་བ་ཞེས་
བྱ་བ་འཇིག་རྟེན་དུ་འབྱུང་ངོ་། །དེའི་ཚེའི་ཚད་ནི་བར་གྱི་བསྐལ་པ་བཅུ་གཉིས་སུ་འགྱུར་རོ། །བར་གྱི་བསྐལ་པ་ཉི་ཤུར་ནི་དམ་པའི་ཆོས་གནས་པར་འགྱུར་རོ། །བར་གྱི་བསྐལ་པ་ཉི་ཤུར་ནི་དམ་པའི་ཆོས་ཀྱི་གཟུགས་བརྙན་
གནས་པར་འགྱུར་རོ། །དེའི་སངས་རྒྱས་ཀྱི་ཞིང་དེ་ཡང་དག་པར་འགྱུར་ཏེ། གཙང་ཞིང་གྱོ་མོ་དང་གསེག་མ་མེད་པ་ངམ་གྲོག་དང་གཡང་ས་མེད་པ་འཇིམ་ངན་དང་སྨེ་བ་མེད་དེ་མཉམ་པ་ཉམས་དགའ་བ་མཛེས་པ་བལྟ་ན་སྡུག་པ་
བཻ་དཱུརྱའི་གཞི་ལ་རིན་པོ་ཆེའི་ཤིང་ལྗོན་པས་རབ་ཏུ་བརྒྱན་པ་གསེར་གྱི་སྐུད་པས་མིག་མངས་རིས་སུ་བྲིས་པ་མེ་ཏོག་གིས་གང་བ་སྟེ། དེར་བྱང་ཆུབ་སེམས་དཔའ་བརྒྱ་སྟོང་མང་པོ་འབྱུང་བར་འགྱུར་རོ། །དེར་ཉན་ཐོས་བྱེ་བ་ཁྲག་
ཁྲིག་བརྒྱ་སྟོང་གྲངས་མེད་པར་འབྱུང་ངོ་། །དེ་ན་བདུད་སྡིག་ཅན་དང་བདུད་ཀྱི་དཀྱིལ་འཁོར་ཡང་མི་སྣང་ངོ་། །དེར་བདུད་དང་བདུད་ཀྱི་འཁོར་དག་བྱུང་ན་ཡང་། བཅོམ་ལྡན་འདས་དེ་བཞིན་གཤེགས་པ་འོད་ཟེར་རབ་ཏུ་སྣང་
བ་དེའི་བསྟན་པ་ལ་དམ་པའི་ཆོས་ཡོངས་སུ་འཛིན་པ་ལ་བརྩོན་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དགེ་སློང་ཁྱེད་དག་
སངས་རྒྱས་ཀྱི་སྤྱན་གྱིས་ངས། །གྲངས་མེད་བསྐལ་པར་གནས་བརྟན་འོད་སྲུང་འདིས། །རྐང་གཉིས་རྣམས་ཀྱི་དམ་པ་མཆོད་བྱས་ནས། །མ་འོངས་དུས་ན་སངས་རྒྱས་འགྱུར་བར་མཐོང་། །

46-1-62a

སྟོང་ཕྲག་གསུམ་དུ་ཡོངསུ་ཚང་བ་ཡི། །རྒྱལ་བ་རྣམས་ནི་འོད་སྲུངས་འདི་ཡིས་མཐོང་། །སངས་རྒྱས་ཡེ་ཤེས་ཕྱིར་ནི་དགེ་སློང་འདི། །དེ་ན་ཚངས་པར་སྤྱད་པ་སྤྱོད་འགྱུར་ཞིང་། །རྐང་གཉིས་གཙོ་བོ་རྣམས་ལ་མཆོད་བྱས་
ནས། །བླ་ན་མེད་ཀྱི་ཡེ་ཤེས་འདི་བསྒྲུབ་ཏེ། །དེ་ནི་ཐ་མའི་ལུས་ཚེ་འཇིག་རྟེན་མགོན། །མཚུངས་པ་མེད་པ་དྲང་སྲོང་ཆེན་པོར་འགྱུར། །དེ་ཡི་ཞིང་ཡང་རྣམ་བཀྲ་མཆོག་འགྱུར་ཏེ། །བཟང་ཞིང་རྣམ་དག་ཉམས་
དགའ་བལྟ་ན་སྡུགས། །རྟག་ཏུ་དགའ་བྱེད་ཡིད་ཏུ་འོང་བའི་གཟུགས། །གསེར་གྱི་སྐུད་པ་དག་གིས་ལེགས་པར་རྒྱན། །དེ་ཡི་རིན་ཆེན་ཤིང་ལྗོན་སྣ་ཚོགས་པ། །མིག་མངས་རིས་བྲེས་དེ་ནང་རེ་རེ་སྟེ། །ཡིད་ཏུ་འོང་
བའི་དྲི་ཡང་རྣམས་པར་འབྱུང་། །དེ་ནི་དགེ་སློང་འདི་ཡི་ཞིང་དུ་འགྱུར། །མེ་རྟོག་མང་པོས་ལེགས་པར་བརྒྱན་པ་སྟེ། །མེ་ཏོག་སྣ་ཚོགས་རྣམས་ཀྱིས་མཛེས་པར་བྱས། །ངམ་གྲོག་གཡང་ས་རྣམས་ཀྱང་དེ་ན་
མེད། །མཉམ་ཞིང་བཟང་ལ་བལྟ་ན་སྡུག་པར་འགྱུར། །དེ་ན་བྱང་ཆུབ་སེམས་དཔའ་བྱེ་བ་སྟོང་། །རྫུ་འཕྲུལ་ཆེ་ཞིང་ཤིན་ཏུ་དུལ་བའི་སེམས། །སྐྱོབ་པའི་མདོ་སྡེ་ཤིན་ཏུ་རྒྱས་འཛིན་པ། །སྟོང་ཕྲག་དུ་མ་
མང་པོ་འབྱུང་བར་འགྱུར། །དེ་ཚེ་ཆོས་ཀྱི་རྒྱལ་པོའི་ཉན་ཐོས་ནི། །ཟག་མེད་ཐ་མའི་ལུས་འཛིན་རྣམས་འབྱུང་འགྱུར། །བསྐལ་པར་ལྷ་ཡི་ཤེས་པས་བགྲངས་ན་ཡང་། །དེ་དག་ཚད་ནི་ནམས་ཀྱང་མི་ཟིན་ཏོ། །
དེ་ནི་བར་གྱི་བསྐལ་པ་བཅུ་གཉིས་གནས། །དམ་པའི་ཆོས་ནི་ཉི་ཤུ་ཚང་བར་གནས། །བར་གྱི་བསྐལ་པ་ཉི་ཤུར་གཟུགས་བརྙན་ཏེ། །འོད་ཟེར་རབ་སྣང་དེ་ཡི་བཀོད་པ་དེ་ལྟར་འགྱུར། །དེ་ནས་ཚེ་དང་ལྡན་པ་གནས་རྟེན་མཽད་གལ་
གྱི་བུ་ཆེན་པོ་དང་། ཚེ་དང་ལྡན་པ་རབ་འབྱོར་དང་། ཚེ་དང་ལྡན་པ་ཀཱ་ཏྱཱ་ཡའི་བུ་ཆེན་པོ་ལུས་འདར་ནས་མིག་མི་འཛུམས་པར་བཅོམ་ལྡན་འདས་ལ་ལྟ་ཞིང་། དེའི་ཚེ་སོ་སོའི་ཡིད་ལ་བརྗོད་ནས། ཚིགསུ་བཅད་པ་འདི་དག་གསོལ་ཏོ། །

46-1-62b

དཔའ་བོ་ཆེན་པོ་དགྲ་བཅོམ་པ། །ཤཱཀྱ་སེང་གེ་མི་ཡི་མཆོག །བདག་ཅག་ལ་ནི་ཐུགས་བརྩེའི་ཕྱིར། །སངས་རྒྱས་སྒྲ་ནི་བསྒྲག་ཏུ་གསོལ། །སྐབས་མཁྱེན་པས་ན་ངེས་པར་ཡང་། །བདག་ཅག་ལ་ནི་མི་མཆོག་གིས། །བདུད་རྩི་
དག་གིས་རབ་གཏོར་ཏེ། །རྒྱལ་བས་བདག་ཅག་ལུང་བསྟན་འགྱུར། །མུ་གེ་བྱུང་ཚེ་མི་འགའ་ཞིག །ཁ་ཟས་བཟང་པོ་རྙེད་ནས་སུ། །བདག་གིས་ཁ་ཟས་རྙེད་དོ་ཞེས། །དེ་ཡང་བསྟན་ནས་རབ་ཏུ་སྨྲ། །དེ་བཞིན་བདག་ཅག་
སྤྲོ་བ་ནི། །ཐེག་པ་དམན་པར་སེམས་པ་ལས། །སངས་རྒྱས་ཡེ་ཤེས་ཐོབ་འགྱུར་ཏེ། །དུས་ངན་སེམས་ཅན་ཟས་རྙེད་བཞིན། །བདག་ཅག་རྫོགས་པའི་སངས་རྒྱས་ཀྱི། །ཐུབ་པ་ཆེན་པོས་ལུང་མ་བསྟན། །ཇི་ལྟར་སུག་པ་
བཅུག་ནས་ནི། །ཁ་ཟས་དེ་ཡང་མ་བརྩལ་བཞིན། །དཔའ་བོ་བདག་ཅག་སྤྲོ་བ་ཡང་། །བླ་ན་མེད་པའི་གསུང་ཐོས་ཤིང་། །གང་ཚེ་ལུང་བསྟན་གྱུར་པ་ན། །དེ་ཚེ་མྱ་ངན་འདས་པར་འགྱུར། །ཕན་པར་བཞེད་པ་ཐུགས་བརྩེ་བ། །
དཔའ་བོ་ཆེན་པོ་ལུང་བསྟན་གསོལ། །དབུལ་པོར་སེམས་པ་རྣམས་ཀྱང་ནི། །ཐུབ་པ་ཆེན་པོ་མཐར་འགྱུར་རོ། །དེ་ནས་བཅོམ་ལྡན་འདས་ཀྱི་གནས་བརྟེན་ཉན་ཐོས་ཆེན་པོ་དེ་དག་གི་སེམས་ཀྱི་རྟོག་པ་དེ་ལྟ་བུ་དེ་ཐུགས་ཀྱིས་
ཐུགསུ་ཆུད་ནས། ཡང་ཐམས་ཅད་དང་ལྡན་པའི་དགེ་སློང་གི་དགེ་འདུན་ལ་བཀའ་སྩལ་པ། དགེ་སློང་དག་ངའི་ཉན་ཐོས་ཆེན་པོ་གནས་བརྟེན་རབ་འབྱོར་འདི་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་སུམ་བཅུ་ལ་བཀུར་སྟི་བྱེད་
རི་མོ་བྱེད་མཆོད་པ་བྱེད་རྗེད་པ་བྱེད་གསོལ་བ་བྱེད་ཅིང་དེ་ན་ཚངས་པར་སྤྱོད་པ་སྤྱད་དེ་བྱང་ཆུབ་སྒྲུབ་པར་འགྱུར་རོ། །དེ་ལྟ་བུར་ལྷག་པར་བྱ་བ་བྱས་ཏེ། ལུས་ཐ་མ་ལ་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་

46-1-63a

དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཟླ་བའི་ཏོག་ཅེས་བྱ་བ་འཇིག་རྟེན་དུ་འབྱུང་སྟེ། སངས་རྒྱས་ཀྱི་ཞིང་རིན་པོ་ཆེ་འབྱུང་བ་ཞེས་བྱ་བར་འགྱུར་རོ། །བསྐལ་པ་དེ་ནི་རིན་པོ་ཆེ་སྣང་བ་ཞེས་བྱ་བར་འགྱུར་རོ། །
སངས་རྒྱས་ཀྱི་ཞིང་དེ་ནི་མཉམ་པ་ཉམས་དགའ་བ། ཤེལ་གྱི་གཞི་ལ་རིན་པོ་ཆེའི་ཤིང་ལྗོན་པས་རྣམ་པར་སྤྲས་པ། ངམ་གྲོག་དང་གཡང་ས་མེད་པ། འཇིམ་ངན་དང་སྨེ་བ་མེད་པ། ཡིད་ཏུ་འོང་བའི་མེ་ཏོག་དག་བཀྲམ་པར་
འགྱུར་ཏེ། ཁང་པ་བརྩེགས་པའི་ཡོངས་སུ་སྤྱོད་པ་དག་ན། མི་རྣམས་གནས་པར་འགྱུར་རོ། །དེར་ཉན་ཐོས་མང་པོ་ཚད་མེད་པར་འབྱུང་བར་འགྱུར་ཏེ། དེ་དག་གི་མཐའ་ནི་བགྲང་བར་རྟོགས་པར་མི་ནུས་སོ། །དེར་བྱང་
ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་འབྱུང་བར་འགྱུར་རོ། །བཅོམ་ལྡན་འདས་དེའི་ཚེའི་ཚད་ནི། བར་གྱི་བསྐལ་པ་བཅུ་གཉིས་སུ་འགྱུར། དམ་པའི་ཆོས་འདི་ནི་བར་གྱི་བསྐལ་པ་ཉི་ཤུར་གནས་
པར་འགྱུར། དམ་པའི་ཆོས་ཀྱི་གཟུགས་བརྙན་ཡང་བར་གྱི་བསྐལ་པ་ཉི་ཤུར་གནས་པར་འགྱུར་རོ། །བཅོམ་ལྡན་འདས་དེ་ནམ་མཁའ་བར་སྣང་ལ་གནས་ནས་རྟག་ཏུ་ཆོས་སྟོན་ཏེ། །བྱང་ཆུབ་སེམས་དཔའ་བརྒྱ་
སྟོང་མང་པོ་དང་། ཉན་ཐོས་བརྒྱ་སྟོང་མང་པོ་འབྱུང་བར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ངས་དེང་དགེ་སློང་དག་ནི་མོས་པར་བྱ། །ཁོང་དུ་ཆུད་པར་བྱ་འོ་ང་
ལས་ཉོན། །ང་ཡི་ཉན་ཐོས་གནས་བརྟན་རབ་འབྱོར་ནི། །མ་འོངས་དུས་ཀྱི་ཚེ་ན་སངས་རྒྱས་འགྱུར། །བྱེ་བ་ཁྲག་ཁྲིག་སུམ་བཅུ་ཚང་བ་ཡི། །སངས་རྒྱས་མཐུ་ཆེན་རྣམས་ཀྱང་རབ་ཏུ་མཐོང་། །ཡེ་ཤེས་འདི་
ཡི་ཕྱིར་ཡང་འདི་ཉིད་ནི། །དེ་ཚེ་མཐུན་པའི་སྤྱོད་པ་སྤྱད་པར་འགྱུར། །ཐ་མའི་ལུས་ཀྱི་ཚེ་ན་དཔའ་བོ་དེ། །སུམ་བཅུ་རྩ་གཉིས་མཚན་གྱི་གཟུགས་དང་ལྡན། །དྲང་སྲོང་ཆེན་པོ་གསེར་གྱི་མཆོད་སྡོང་འདྲ། །

46-1-63b

འཇིག་རྟེན་རྣམས་ལ་ཕན་ཞིང་ཐུགས་བརྩེར་འགྱུར། །སྲོག་ཆགས་བྱེ་བ་ཁྲག་ཁྲིག་བསྒྲལ་ནས་ནི། །འཇིག་རྟེན་རྩ་ལག་དེ་ནི་གནས་པ་ཡི། །ཞིང་དེ་ཤིན་ཏུ་བལྟ་ན་སྡུག་པ་དང་། །སྐྱེ་བོ་མང་པོའི་ཡིད་འོང་མཛེས་པར་འགྱུར། 
དེ་ན་བྱང་ཆུབ་སེམས་དཔའ་མཐུ་ཆེན་མང་། །ཕྱིར་མི་ལྡོག་པའི་འཁོར་ལོ་སྐོར་བྱེད་པ། །རྒྱལ་བ་དེ་ཡི་བསྟན་ལ་དབང་པོ་རྣོ། །དེ་དག་རྣམས་ཀྱིས་སངས་རྒྱས་ཞིང་མཛེས་འགྱུར། །དེ་ཡི་ཉན་ཐོས་མང་པོ་གྲངས་མེད་དེ། །
དེ་དག་ཚད་ནི་ནམས་ཀྱང་མི་ཟིན་ནོ། །དྲུག་མངོན་ཤེས་ཤིང་གསུམ་རིག་རྫུ་འཕྲུལ་ཆེ། །རྣམ་ཐར་བརྒྱད་ལ་ཤིན་དུ་གནས་པའོ། །བྱང་ཆུབ་མཆོག་འདི་རབ་ཏུ་བཤད་པ་ན། རྫུ་འཕྲུལ་སྟོབས་ནི་བསམ་གྱིས་མི་ཁྱབ་
འགྱུར། །གང་གཱའི་བྱེ་མ་སྙེད་ཀྱི་ལྷ་དང་མི། །དེ་ལ་རྟག་ཏུ་ཐལ་མོ་སྦྱོར་བར་འགྱུར། །དེ་ནི་བར་གྱི་བསྐལ་པ་བཅུ་གཉིས་གནས། །དམ་ཆོས་བར་གྱི་བསྐལ་པ་ཉི་ཤུར་གནས། །དེ་བཞིན་རྐང་གཉིས་མཆོག་གི་
གཟུགས་བརྙན་ཡང་། །བར་གྱི་བསྐལ་པ་ཉི་ཤུར་གནས་པར་འགྱུར། །དེ་ནས་ཡང་བཅོམ་ལྡན་འདས་ཀྱིས། ཐམས་ཅད་དང་ལྡན་པའི་དགེ་སློང་གི་དགེ་འདུན་ལ་བཀའ་སྩལ་པ། དགེ་སློང་དག་ཁྱེད་མོས་པར་བྱ། 
ཁྱེད་ཁོང་དུ་ཆུད་པར་བྱའོ། །ང་ཡི་ཉན་ཐོས་གནས་བརྟན་ཀཱ་ཏྱཱ་ཡའི་བུ་ཆེན་པོ་འདི། སངས་རྒྱས་བྱེ་བ་སྟོང་ཕྲག་བརྒྱད་ལ་བཀུར་སྟི་བྱེད་བཙུན་པར་བྱེད་རི་མོར་བྱེད་མཆོད་པར་བྱེད་རྗེད་པར་བྱེད་གསོལ་བ་བྱེད་པར་འགྱུར་
རོ། །དེ་བཞིན་གཤེགས་པ་དེ་དག་ཡོངས་སུ་མྱ་ངན་ལས་འདས་ནས་ཀྱང་། རིན་པོ་ཆེ་སྣ་བདུན་འདི་ལྟ་སྟེ། གསེར་དང་དངུལ་དང་བཻ་དཱུརྱ་དང་ཤེལ་དང་མུ་ཏིག་དམར་པོ་དང་རྡོའི་སྙིང་པོ་དང་རིན་པོ་ཆེ་སྣ་བདུན་པ་
སྤུག་ལས་མཆོད་རྟེན་འཕང་དུ་དཔག་ཚད་སྟོང་། ཁོར་ཡུག་ཏུ་དཔག་ཚད་ལྔ་བརྒྱ་བ་དག་བྱེད་པར་འགྱུར་ཏེ་མཆོད་རྟེན་དེ་དག་ལ་མེ་ཏོག་དང་བདུག་པ་དང་སྤོས་དང་ཕྲེང་བ་དང་བྱུག་པ་དང་ཕྱེ་མ་དང་གོས་དང་

46-1-64a

གདུགས་དང་རྒྱལ་མཚན་དང་ལྷའི་བ་དན་དང་རྣམ་པར་རྒྱལ་བའི་བ་དན་དག་གིས་མཆོད་པ་བྱེད་པར་འགྱུར་རོ། །དེའི་ཕ་རོལ་གྱི་ཡང་ཆེས་ཕ་རོལ་ཏུ། སངས་རྒྱས་བྱེ་བ་ཕྲག་ཉི་ཤུ་ལ་དེ་ལྟ་བུའི་བཀུར་སྟི་
བྱེད་བཙུན་པར་བྱེད་རི་མོ་བྱེད་མཆོད་པ་བྱེད་རྗེད་པ་བྱེད་གསོལ་བ་བྱེད་པར་འགྱུར་རོ། །དེ་ནས་ལུས་ཐ་མ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་
པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཛམ་བུའི་ཆུ་བོའི་གསེར་གྱི་འོད་ཅེས་བྱ་བར་
འཇིག་རྟེན་དུ་འབྱུང་ངོ་། །དེའི་སངས་རྒྱས་ཀྱི་ཞིང་ཡང་ཡོངས་སུ་དག་པར་འགྱུར་ཏེ་མཉམ་པ་ཉམས་དགའ་བ་མཛེས་པ་བལྟ་ན་སྡུག་པ་ཤེལ་གྱི་གཞི་ལ་རིན་པོ་ཆེའི་ཤིང་ལྗོན་པས་རྣམ་པར་སྤྲས་པ། གསེར་
གྱི་སྐུད་པ་བྲིས་པ་མེ་ཏོག་གིས་ཆལ་པར་བཀྲམ་པ། སེམས་ཅན་དམྱལ་བ་དང་དུད་འགྲོའི་སྐྱེ་གནས་དང་གཤིན་རྗེའི་འཇིག་རྟེན་དང་ལྷ་མ་ཡིན་གྱི་རིས་མེད་དེ་ལྷ་དང་མི་མང་པོས་ཡོངས་སུ་གང་བ་ཉན་ཐོས་
བརྒྱ་སྟོང་མང་པོས་མཛེས་པར་བྱས་པ་བྱང་ཆུབ་སེམས་དཔའ་བརྒྱད་སྟོང་མང་པོས་བརྒྱན་པར་འགྱུར་རོ། །དེའི་ཚེའི་ཚད་ནི་བར་གྱི་བསྐལ་པ་བཅུ་གཉིས་སུ་འགྱུར། དེའི་དམ་པའི་ཆོས་ནི་བར་གྱི་བསྐལ་པ་ཉི་
ཤུར་གནས་པར་འགྱུར། དམ་པའི་ཆོས་ཀྱི་གཟུགས་བརྙན་ཡང་བར་གྱི་བསྐལ་པ་ཉི་ཤུར་གནས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གཞན་
དུ་མི་འགྱུར་བ་ཡི་ཚིག་བརྗོད་ཀྱིས། །དེ་རིང་ང་ལས་དགེ་སློང་ཀུན་ཉོན་ཅིག །ང་ཡི་ཉན་ཐོས་གནས་བརྟན་ཀཱ་ཏྱཱ་ཡི་བུ། །འདི་ནི་རྣམ་འདྲེན་རྣམས་ལ་མཆོད་པར་འགྱུར། །འཇིག་རྟེན་འདྲེན་པ་མྱ་ངན་ཡོངས་འདས་ནས། །

46-1-64b

དེ་དག་རྣམས་ཀྱི་མཆོད་རྟེན་རྣམ་མང་བྱེད། །བཀུར་སྟི་རྣམ་པ་མང་པོ་བྱེད་འགྱུར་ཞིང་། །སྤོས་དང་མེ་ཏོག་གིས་ཀྱང་མཆོད་པར་འགྱུར། །དེ་ཡིས་ཐ་མ་ཡི་ནི་ལུས་ཐོབ་ནས། །ཡོངས་སུ་དག་པའི་ཞིང་དུ་རྒྱལ་བར་འགྱུར། །
ཡེ་ཤེས་འདི་ཉིད་ཡོངས་སུ་རྫོགས་བྱས་ཏེ། །སྲོག་ཆགས་བྱེ་བ་སྟོང་ལ་འཆད་པར་བྱེད། །ལྷར་བཅས་འཇིག་རྟེན་དག་ན་བཀུར་སྟི་བྱས། །འོད་བྱེད་གཙོ་བོ་བཅོམ་ལྡན་འདས་སུ་འགྱུར། །དེ་མིང་འཛམ་བུའི་ཆུ་བོ་གསེར་གྱི་
འོད། །ལྷ་མི་བྱེ་བ་དག་ཀྱང་ཤིན་ཏུ་སྒྲོལ། །བྱང་ཆུབ་སེམས་དཔའ་དེ་བཞིན་ཉན་ཐོས་མང་། །སངས་རྒྱས་ཞིང་དེར་ཚད་མེད་གྲངས་མེད་དེ། །ཐམས་ཅད་འབྱུང་དང་འཇིགས་པ་རབ་སྤངས་ནས། །སངས་རྒྱས་བསྟན་པ་
མཛེས་པར་བྱེད་པར་འགྱུར། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་དགེ་སློང་གི་དགེ་འདུན་ལ་བཀའ་སྩལ་པ། དགེ་སློང་དག་ཁྱེད་མོས་པར་བྱ་ཁོང་དུ་ཆུད་པར་བྱའོ། །ང་ཡི་ཉན་ཐོས་གནས་བརྟན་མཽད་གལ་གྱི་བུ་ཆེན་པོ་
འདི། སངས་རྒྱས་ཉི་ཁྲི་བརྒྱད་སྟོང་མཉེས་པར་བྱེད་པར་འགྱུར་ཏེ། སངས་རྒྱས་བཅོམ་ལྡན་འདས་དེ་དག་ལ་རྣམ་པ་མང་པོས་བཀུར་སྟི་བྱེད། བཙུན་པར་བྱེད་རི་མོར་བྱེད་མཆོད་པ་བྱེད་རྗེད་པ་བྱེད་གསོལ་བར་བྱེད་པར་འགྱུར་རོ། །
སངས་རྒྱས་བཅོམ་ལྡན་འདས་དེ་དག་ཡོངས་སུ་མྱ་ངན་ལས་འདས་ནས་ཀྱང་། རིན་པོ་ཆེ་སྣ་བདུན་འདི་ལྟ་སྟེ། གསེར་དང་དངུལ་དང་བཻ་དཱུརྱ་དང་ཤེལ་དང་མུ་ཏིག་དམར་པོ་དང་རྡོའི་སྙིང་པོ་དང་སྤུག་གི་མཆོད་རྟེན་འཕང་དུ་དཔག་
ཚད་སྟོང་། ཁོར་ཡུག་ཏུ་དཔག་ཚད་ལྔ་བརྒྱ་བ་དག་བྱེད་པར་འགྱུར་ཏེ། མཆོད་རྟེན་དེ་དག་ལ་མེ་ཏོག་དང་བདུག་པ་དང་སྤོས་དང་ཕྲེང་བ་དང་བྱུག་པ་དང་ཕྱེ་མ་དང་གོས་དང་། གདུགས་དང་། རྒྱལ་མཚན་དང་ལྷའི་བ་དན་དང་། རྣམ་
པར་རྒྱལ་བའི་བ་དན་དག་གིས་མཆོད་པར་བྱེད་པར་འགྱུར་རོ། །དེའི་ཕ་རོལ་གྱི་ཡང་ཆེས་ཕ་རོལ་དུ་ཡང་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་ཉི་ཤུ་རྣམས་ལ། དེ་བཞིན་དུ་འདི་ལྟར་བཀུར་སྟི་བྱེད་བཙུན་པར་

46-1-65a

བྱེད་རི་མོར་བྱེད་མཆོད་པར་བྱེད་རྗེད་པ་བྱེད་གསོལ་བ་བྱེད་པར་འགྱུར་རོ། །དེའི་འོག་ཏུ་ལུས་ཐ་མ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་
གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་བསྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཏ་མ་ལའི་ལོ་མ་དང་ཙན་དན་གྱི་དྲི་ཞེས་བྱ་བར་འཇིག་རྟེན་དུ་འབྱུང་སྟེ། 
དེའི་སངས་རྒྱས་ཀྱི་ཞིང་ནི་མངོན་པར་དགའ་བ་ཞེས་བྱ་བར་འགྱུར་རོ། །བསྐལ་པ་དེ་ནི་དགའ་བས་གང་བ་ཞེས་བྱ་བར་འགྱུར་རོ། །དེའི་སངས་རྒྱས་ཀྱི་ཞིང་དེ་ཡོངས་སུ་དག་པ་སྟེ་མཉམ་པ་ཉམས་དགའ་བ་མཛེས་པ་
བལྟ་ན་སྡུག་པ་ཤེལ་གྱི་གཞི་ལ་རིན་པོ་ཆེའི་ཤིང་ལྗོན་པས་རྣམ་པར་སྤྲས་པ་མེ་ཏོག་སིལ་མས་གཏོར་བ་ལྷ་དང་མི་མང་པོས་རབ་ཏུ་གང་བ་སྟེ། འདི་ལྟར་ཉན་ཐོས་དང་བྱང་ཆུབ་སེམས་དཔའི་དྲང་སྲོང་བརྒྱ་སྟོང་གནས་པར་འགྱུར་
རོ། །དེའི་ཚེའི་ཚད་ནི་བར་གྱི་བསྐལ་པ་ཉི་ཤུ་རྩ་བཞིར་འགྱུར། དེའི་དམ་པའི་ཆོས་ནི་བར་གྱི་བསྐལ་པ་བཞི་བཅུར་གནས་པར་འགྱུར། དམ་པའི་ཆོས་ཀྱི་གཟུགས་བརྙན་ཡང་བར་གྱི་བསྐལ་པ་བཞི་བཅུར་
གནས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ང་ཡི་ཉན་ཐོས་མཽད་གལ་རིགས་འདི་ནི། །མི་ཡི་ལུས་སུ་གྱུར་པ་དེ་བོར་ནས། །
སྐྱོབ་པ་རྒྱལ་བ་སྟོང་ཕྲག་ཉི་ཤུ་དང་། །གཞན་ཡང་རྡུལ་དང་བྲལ་བ་བརྒྱད་རྣམས་མཐོང་། །ཚངས་པར་སྤྱད་པ་ཡང་ནི་དེར་སྤྱད་དེ། །སངས་རྒྱས་ཡེ་ཤེས་འདི་ནི་ཚོལ་བྱེད་ཅིང་། །རྐང་
གཉིས་གཙོ་བོ་འདྲེན་པ་དེ་དག་ལ། །དེ་ཚེ་བཀུར་སྟི་རྣམ་པ་མང་པོ་བྱེད། །དེ་དག་གསུངས་པ་དམ་ཆོས་དྲི་མེད་པ། །བསྐལ་པ་བྱེ་བ་སྟོང་དུ་འཛིན་པར་འགྱུར། །བདེ་གཤེགས་དེ་དག་མྱ་ངན་ཡོངས་འདས་ནས། །མཆོད་རྟེན་

46-1-65b

དག་ལ་དེ་ཚེ་མཆོད་བྱེད་འགྱུར། །རྒྱལ་མཆོག་དེ་དག་རྣམས་ཀྱི་མཆོད་རྟེན་ནི། །རིན་ཆེན་མཆོད་རྟེན་བ་དན་བཅས་པ་བྱེད། །འཇིག་རྟེན་ཕན་པ་མཛད་པ་སྐྱོབ་རྣམས་ལ། །རོལ་མོའི་སྒྲ་དང་མེ་ཏོག་སྤོས་ཀྱིས་མཆོད། །དེ་ནས་འདི་
ལྟར་ཐ་མའི་ལུས་ཀྱི་ཚེ། །བལྟ་སྡུག་ཡིད་དུ་འོང་བའི་ཞིང་དེར་ནི། །འཇིག་རྟེན་ཕན་པ་ཐུགས་བརྩེར་དེར་འགྱུར་ཏེ། །མིང་ནི་ཏ་མ་ལའི་ལོ་མ་ཙན་དན་དྲི། །བར་གྱི་བསྐལ་པ་ཉི་ཤུ་བཞི་ཚང་བར། །བདེ་བར་གཤེགས་པའི་ཚེའི་
ཚད་ཏུ་འགྱུར། །རྟག་ཏུ་ལྷ་རྣམས་དང་ནི་མི་དག་ལ། །སངས་རྒྱས་ཚུལ་འདི་རབ་ཏུ་སྟོན་པར་འགྱུར། །དེ་ནས་རྒྱལ་བ་དེ་ཡི་ཉན་ཐོས་མང་། །བྱེ་བ་སྟོང་ཕྲག་གང་གཱའི་བྱེ་མ་སྙེད། །དྲུག་མངོན་ཤེས་ཤིང་གསུམ་རིག་རྫུ་འཕྲུལ་ཆེ། །བདེ་
གཤེགས་བསྟན་ལ་མངོན་པར་ཤེས་པ་ཐོབ། །ཕྱིར་མི་ལྡོག་པའི་བྱང་ཆུབ་སེམས་དཔའ་མང་། །བརྩོན་འགྲུས་བརྩམས་ཤིང་རྟག་ཏུ་ཤེས་བཞིན་ཅན། །བདེ་བར་གཤེགས་ཀྱི་བསྟན་ལ་བརྩོན་བྱེད་པ། །སྟོང་ཕྲག་མང་པོ་དེ་དག་
དེ་ན་ཡོད། །རྒྱལ་བ་དེ་དག་མྱ་ངན་ཡོངས་འདས་ནས། །བར་གྱི་བསྐལ་པ་བཞི་བཅུ་ཚང་བར་ནི། །དེ་ཡི་ཚེ་ན་དམ་ཆོས་གནས་པར་འགྱུར། །གཟུགས་བརྙན་ཚད་ཀྱང་དེ་དང་མཉམ་པར་འགྱུར། །ང་ཡི་ཉན་ཐོས་འཕྲུལ་ཆེན་ལྔ་པོ་འདི། 
ངས་ནི་དེ་དག་བྱང་ཆུབ་མཆོག་ལུང་བསྟན། །མ་འོངས་དུས་ན་རང་འབྱུང་རྒྱལ་བ་ཡི། །དེ་དག་གི་ནི་སྤྱོད་པ་ང་ལས་ཉོན། །དམ་པའི་ཆོས་པད་མ་དཀར་པོ་ལས་ཉན་ཐོས་ལུང་བསྟན་པའི་ལེའུ་ཞེས་བྱ་བ་སྟེ་དྲུག་པའོ།། །། 
དགེ་སློང་དག་སྔོན་བྱུང་བ་འདས་པའི་དུས་ན། བསྐལ་པ་གྲངས་མེད་པའི་ཡང་ཆེས་གྲངས་མེད་པ་དཔག་ཏུ་མེད་བསམ་གྱིས་མི་ཁྱབ་པ་གཞལ་དུ་མེད་པ་ཚད་མེད་པའི་ཕ་རོལ་གྱི་ཡང་ཆེས་ཕ་རོལ་དུ་གྱུར་པ། དེའི་ཚེ་དེའི་དུས་ན་
བསྐལ་པ་གཟུགས་ཆེན་པོ་ཞེས་བྱ་བ་ལ། འཇིག་རྟེན་གྱི་ཁམས་འབྱུང་བ་ཞེས་བྱ་བར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་

46-1-66a

བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་ཞེས་བྱ་བ་
འཇིག་རྟེན་དུ་བྱུང་ངོ་། །དགེ་སློང་དག་དེ་བཞིན་གཤེགས་པ་དེ་བྱུང་ནས་ཇི་སྲིད་ལོན་ཞེ་ན། དགེ་སློང་དག་འདི་ལྟ་སྟེ་དཔེར་ན། མི་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་སའི་ཁམས་ཐམས་ཅད་
བཏབས་ཏེ་ཕྱེ་མར་བྱས་ལ། དེ་ནས་མི་དེས་འཇིག་རྟེན་གྱི་ཁམས་དེ་ནས་རྡུལ་ཕྲ་རབ་ཀྱི་རྡུལ་ཅིག་བླངས་ཏེ། ཤར་ཕྱོགས་སུ་འཇིག་རྟེན་གྱི་ཁམས་སྟོང་འདས་ནས། དེར་རྡུལ་ཕྲ་རབ་ཀྱི་རྡུལ་ཅིག་བཞག །དེ་ནས་ཡང་
མི་དེས་རྡུལ་ཕྲ་རབ་ཀྱི་རྡུལ་ཅིག་བླངས་ཏེ། དེའི་ཕ་རོལ་གྱི་ཡང་ཆེས་ཕ་རོལ་འཇིག་རྟེན་གྱི་ཁམས་སྟོང་འདས་ནས་རྡུལ་ཕྲ་རབ་ཀྱི་རྡུལ་ཅིག་བཞག་ལ། རྣམ་གྲངས་འདིས་མི་དེས་ཤར་ཕྱོགས་སུ་སའི་ཁམས་དེ་ཐམས་ཅད་བཞག་ན། 
དགེ་སློང་དག་དེ་ཇི་སྙམ་དུ་སེམས། འཇིག་རྟེན་གྱི་ཁམས་དེ་དག་གི་མཐའ་མ་དང་མུ་བགྲང་བས་རྟོགས་པར་ནུས་སམ། དེ་དག་གིས་གསོལ་པ། བཅོམ་ལྡན་འདས་དེ་རྔོ་མི་ཐོག་གོ། །བདེ་བར་གཤེགས་པ་དེ་རྔོ་མི་ཐོག་གོ། །
བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གང་དག་ཏུ་རྡུལ་ཕྲ་རབ་བཞག་པ་དང་གང་དག་ཏུ་མ་བཞག་པའི་འཇིག་རྟེན་གྱི་ཁམས་དེ་རྣམས་ནི་རྩིས་པ་འམ་རྩིས་པ་ཆེན་པོ་ལ་ལ་ཞིག་གིས་བགྲང་ཞིང་རྟོགས་པར་ནུས་ཀྱི། 
བཅོམ་ལྡན་འདས་དེ་བཞིན་གཤེགས་པ་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ། ཡོངས་སུ་མྱ་ངན་ལས་འདས་ནས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཇི་སྙེད་ལོན་པའི་བསྐལ་པ་ནི་བགྲང་བའི་ཚུལ་
གྱིས་མཐའ་རྟོགས་པར་མི་ནུས་ཏེ། དགེ་སློང་དག་དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་ནས། དེ་ཙམ་དུ་ཡུན་རིང་བ་ནི་དེ་ལྟར་བསམ་གྱིས་མི་ཁྱབ་ཅིང་དེ་ལྟར་ཚད་མེད་དེ། ངས་ནི་དེ་བཞིན་

46-1-66b

གཤེགས་པའི་ཡེ་ཤེས་མཐོང་བའི་སྟོབས་བསྐྱེད་པས། ཁར་སང་ངམ་དེ་རིང་ཡོངས་སུ་མྱ་ངན་ལས་འདས་པ་བཞིན་དྲན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །རྗེས་སུ་དྲན་པ་
འདས་པའི་བསྐལ་པ་མང་། །དེ་ཚེ་ཐུབ་ཆེན་རྐང་གཉིས་རྣམས་ཀྱི་མཆོག །མངོན་ཤེས་ཡེ་ཤེས་ཆེན་པོས་ཟིལ་གྱིས་གནོན། །རྒྱལ་བ་དམ་པ་འཇིག་རྟེན་བྱུང་བར་འགྱུར། །འདི་ལྟར་སྟོང་གསུམ་འདི་ཡི་འཇིག་
རྟེན་ཁམས། །ལ་ལས་ཕྲ་རབ་རྡུལ་གྱི་རྡུལ་དུ་བྱས། །དེ་ནས་ཕྲ་རབ་རྡུལ་ཅིག་ཁྱེར་ནས་སུ། །ཞིང་སྟོང་རྣམས་ནི་འདས་ནས་དེ་བཞག་ལ། །དེ་བཞིན་དུ་ནི་གཉིས་དང་གསུམ་བཞག་སྟེ། །དེས་ནི་རྡུལ་དུ་གྱུར་པ་
ཀུན་བཞག་པས། །འཇིག་རྟེན་འདི་ཡི་ཁམས་ནི་སྟོངས་གྱུར་ཅིང་། །རྡུལ་ཕྲན་དེ་ཡང་ཐམས་ཅད་ཟད་གྱུར་ལ། །འཇིག་རྟེན་ཁམས་དེ་དག་ན་ཡོད་པ་ཡི། །རྡུལ་ཕྲན་ཕྱེ་མ་དེ་ཡང་ཚད་མེད་པ། །དེ་དག་མ་
ལུས་གང་གིས་རྡུལ་བྱས་ཏེ། །བསྐལ་པ་བརྒྱ་འདས་མཚན་མར་འཇོག་བྱེད་པ། །དེ་ལྟར་བདེ་གཤེགས་མྱ་ངན་དེ་འདས་ནས། །བསྐལ་པ་བྱེ་བ་མང་པོ་དཔག་ཏུ་མེད། །ཕྲ་རབ་རྡུལ་ཀུན་མཚན་མར་མི་ཆོག་
སྟེ། །དེ་སྙེད་བསྐལ་པ་མང་པོ་ཟད་པར་གྱུར། །འདྲེན་པ་མྱ་ངན་འདས་རིང་དེ་སྲིད་ལོན། །ཉན་ཐོས་བྱང་ཆུབ་སེམས་དཔའ་དེ་དག་ཀྱང་། །དེ་འདྲ་དེ་བཞིན་གཤེགས་ཀྱི་ཡེ་ཤེས་ཀྱིས། །ཐམས་ཅད་དྲན་པ་ཁར་སང་དེ་
རིང་བཞིན། །དགེ་སློང་གང་དག་ཡེ་ཤེས་མཐའ་ཡས་ཅན། །དེ་བཞིན་གཤེགས་ཀྱི་ཡེ་ཤེས་འདི་འདྲའོ། །དྲན་པ་ཕྲ་ཞིང་ཟག་པ་མེད་པ་ཡིས། །བསྐལ་པ་དུ་མ་བརྒྱས་ནི་ང་སངས་རྒྱས། །དགེ་སློང་དག་འདི་ལྟར་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེའི་ཚེའི་ཚད་ནི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་རྩ་བཞིར་གྱུར་ཏོ། །བཅོམ་ལྡན་འདས་དེ་བླ་ན་མེད་པ་ཡང་

46-1-67a

དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་པར། སྔར་བྱང་ཆུབ་ཀྱི་སྙིང་པོ་མཆོག་དམ་པར་སོང་ནས། བདུད་ཀྱི་སྡེ་ཐམས་ཅད་རབ་ཏུ་བཅོམ་ཞིང་ཕམ་པར་བྱས་སོ། །རབ་ཏུ་བཅོམ་ཞིང་ཕམ་
པར་བྱས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་བྱའོ་སྙམ་ན་ཡང་། དེ་སྲིད་ཏུ་དེ་ལ་ཆོས་དེ་དག་མངོན་སུམ་དུ་ནི་མ་གྱུར་ཏོ། །དེ་བྱང་ཆུབ་ཀྱི་ཤིང་དྲུང་དུ་བྱང་ཆུབ་ཀྱི་སྙིང་པོར་
བར་གྱི་བསྐལ་པ་གཅིག་ཏུ་གནས། བར་གྱི་བསྐལ་པ་གཉིས་སུ་གནས་ཀྱང་དེ་སྲིད་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་མ་རྒྱས་ནས། བར་གྱི་བསྐལ་པ་གསུམ་དང་བཞི་དང་ལྔ་དང་དྲུག་
དང་བདུན་དང་བརྒྱད་དང་དགུ་དང་བཅུ་ཡང་བྱང་ཆུབ་ཀྱི་ཤིང་དྲུང་དུ་བྱང་ཆུབ་ཀྱི་སྙིང་པོ་དཀྱིལ་མོ་དཀྲུང་ལན་ཅིག་བཅས་པ་ལས། བར་དུ་མ་ལངས་པར་འདུག་ཅིང་སེམས་མི་གཡོ་ལུས་མི་འགུལ་ཞིང་། མི་འགྱུར་བར་འདུག་ཀྱང་དེ་སྲིད་ཏུ་
ཡང་དེ་ལ་ཆོས་དེ་དག་མངོན་དུ་མ་གྱུར་ནས། དགེ་སློང་དག་སུམ་བཅུ་རྩ་གསུམ་པའི་ལྷ་རྣམས་ཀྱིས། བཅོམ་ལྡན་འདས་བྱང་ཆུབ་ཀྱི་སྙིང་པོ་མཆོག་དམ་པར་སོང་བའི་བཅོམ་ལྡན་འདས་དེ་གང་ལ་འདུག་སྟེ། བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པའི་སེང་གེའི་ཁྲི་ཆེན་པོ་འཕང་དུ་དཔག་ཚད་ལྔ་བརྒྱ་པ་བཤམས་ཏེ། བཅོམ་ལྡན་འདས་དེ་བྱང་ཆུབ་ཀྱི་སྙིང་པོར་འདུག་མ་ཐག་ཏུ། དེ་ནས་ཚངས་རིས་ཀྱི་
ལྷའི་བུ་དག་གིས། བྱང་ཆུབ་ཀྱི་སྙིང་པོ་དེའི་ཁོར་ཡུག་དཔག་ཚད་བཅུ་ཚུན་ཆད་དུ་མེ་ཏོག་གི་ཆར་མངོན་པར་ཕབ་བོ། །བར་སྣང་ལས་རླུང་ལངས་པས་མེ་ཏོག་གང་དག་རྙིས་པ་དེ་དག་སེལ་ཏོ། །དེ་ལྟར་མེ་ཏོག་གི་ཆར་དེ་རབ་ཏུ་ཕབ་
པ་དེ་བཅོམ་ལྡན་འདས་བྱང་ཆུབ་ཀྱི་སྙིང་པོ་ལ་འདུག་པ་དེ་ལ། རྒྱུན་མི་འཆད་པར་རབ་ཏུ་ཕབ་སྟེ། བཅོམ་ལྡན་འདས་དེ་ལ་བར་གྱི་བསྐལ་པ་བཅུ་ཚང་བར་མངོན་པར་ཕབ་བོ། །དེ་ལྟར་མེ་ཏོག་གི་ཆར་དེ་རབ་ཏུ་ཕབ་སྟེ་བཅོམ་ལྡན་

46-1-67b

འདས་དེ་དེ་ཡོངས་སུ་མྱ་ངན་ལས་འདའ་བའི་དུས་ཀྱི་བར་དུ་རབ་ཏུ་ཕབ་ཅིང་། བཅོམ་ལྡན་འདས་དེ་ལ་མངོན་པར་འཐོར་རོ། །རྒྱལ་ཆེན་བཞིའི་རིས་ཀྱི་ལྷའི་བུ་དག་ཀྱང་། བཅོམ་ལྡན་འདས་བྱང་ཆུབ་ཀྱི་སྙིང་པོ་མཆོག་དམ་པ་ན་འདུག་
པ་དེ་ལ་བཀུར་སྟི་བྱ་བའི་ཕྱིར། ལྷ་ཡུལ་པའི་ལྷའི་རྔ་རབ་ཏུ་བརྡུངས་ཏེ་བར་གྱི་བསྐལ་པ་བཅུ་ཚང་བར་རབ་ཏུ་བརྡུངས་ནས། དེ་ནས་བཅོམ་ལྡན་འདས་དེ་ནམ་ཡོངས་སུ་མྱ་ངན་ལས་འདའ་བ་ཆེན་པོའི་དུས་ཀྱི་བར་དུ། ལྷའི་སིལ་
སྙན་དག་རྒྱུན་མི་འཆད་པར་རབ་ཏུ་བསིལ་ཏོ། །དགེ་སློང་དག་དེ་ནས་བར་གྱི་བསྐལ་པ་བཅུ་འདས་པ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་
ཡེ་ཤེས་ཆེན་པོས་ཟིལ་གྱིས་གནོན་པ་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །མངོན་པར་རྫོགས་པར་སངས་རྒྱས་མ་ཐག་ཏུ། བཅོམ་ལྡན་འདས་དེ་གཞོན་ནུར་གྱུར་པའི་
ཚེ། དེ་ལ་སྙིང་གི་བུ་ཤ་སྟག་བཅུ་དྲུག་ཡོད་དེ། དེ་དག་གི་བུ་ཐུ་བོ་ནི་ཡེ་ཤེས་འབྱུང་གནས་ཤེས་བྱ་བར་འགྱུར་ཏེ། དགེ་སློང་དག་འདི་ལྟར་རྒྱལ་བུ་གཞོན་ནུ་བཅུ་དྲུག་པོ་དེ་དག་རེ་རེ་ལ་ཡང་རྩེད་མོར་བྱ་བ། སྣ་ཚོགས་བཀྲ་
བ་དགའ་བར་འགྱུར་བ་བལྟ་ན་སྡུག་པ་རྣམ་པ་དུ་མ་ཡོད་ལ། དགེ་སློང་དག་དེ་ནས་རྒྱལ་བུ་གཞོན་ནུར་གྱུར་པ་བཅུ་དྲུག་པོ་དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་
པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་རིག་ནས། རྩེད་མོར་བྱ་བ་དགའ་བར་འགྱུར་བ་རྣམ་པ་མང་པོ་དེ་
དག་སྤངས་ཏེ། མ་དང་མ་མ་དག་ཏུ་དུ་བཞིན་དུ་ཡོངས་སུ་བསྐོར་ཅིང་མདུན་དུ་བདར་ནས། འཁོར་ལོ་བསྒྱུར་བའི་རྒྱལ་པོ་འཕགས་པའི་མཛོད་མང་པོ་དང་རྒྱལ་པོའི་བློན་པོ་དང་སྲོག་

46-1-68a

ཆགས་བྱེ་བ་ཁྲག་ཁྲིག་བརྒྱ་སྟོང་མང་པོས་ཡོངས་སུ་བསྐོར་ཅིང་མདུན་དུ་བདར་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་
ཡེ་ཤེས་ཆེན་པོས་ཟིལ་གྱིས་གནོན་པ་བྱང་ཆུབ་ཀྱི་སྙིང་པོ་མཆོག་དམ་པ་ན་འདུག་པ་ག་ལ་བ་དེར་དོང་ངོ་། །བཅོམ་ལྡན་འདས་དེ་ལ་བཀུར་སྟིར་བྱ་བ་དང་བཙུན་པར་བྱ་བ་དང་རི་མོར་བྱ་བ་དང་མཆོད་པ་དང་རྗེད་པ་དང་གསོལ་བའི་
ཕྱིར་དེར་དོང་སྟེ་ལྷགས་ནས། བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཐལ་མོ་སྦྱར་ཏེ། བཅོམ་ལྡན་འདས་དེའི་སྤྱན་སྔར་ཚུལ་དང་འདྲ་བའི་ཚིགས་
སུ་བཅད་པ་འདི་དག་གིས་མངོན་པར་བསྟོད་དོ། །མངོན་པ་ཆེན་པོ་དྲུག་ལྡན་བླ་ན་མེད། །བསྐལ་པ་མཐའ་ཡས་དག་གིས་ཡང་དག་བསྒྲུབས། །ལུས་ཅན་ཐམས་ཅད་མ་ལུས་བསྒྲལ་བའི་ཕྱིར། །ཁྱོད་ཀྱི་བརྣག་པ་
བཟང་དེ་འདིར་རྫོགས་སོ། །རབ་ཏུ་དཀའ་མཛད་བསྐལ་པ་བར་མ་བཅུར། །གདན་ཅིག་དེ་ལ་བཞུགས་ཏེ་མཛད་པ་ན། །བར་དུ་ནམ་ཡང་ཁྱོད་ཀྱི་སྐུ་མ་གཡོས། །ཕྱག་ཞབས་མ་གཡོས་དེ་བཞིན་གར་མ་གཤེགས། །
ཁྱོད་ཐུགས་ཞི་བར་གྱུར་ཅིང་ཤིན་དུ་གནས། །རྟག་པར་མི་གཡོ་གྱུར་ཅིང་མི་འགུལ་ཏེ། །ཁྱོད་ལ་ནམ་ཡང་གཡེང་བ་མི་མངའ་ལ། །ཁྱོད་ནི་རབ་ཞི་ཟག་པ་མེད་ལ་གནས། །དགེ་བ་དང་ནི་བདེ་བ་དགའ་བ་དང་། །གནོད་
པ་མེད་པར་བྱང་ཆུབ་མཆོག་འདི་བརྙེས། །དེ་ལྟ་བུ་ནི་བདག་ཅག་རྣམས་ཀྱི་ཁེ། །མི་དབང་སེང་གེ་བདག་ཅག་དགེ་བར་སྐྱེས། །སྐྱེ་དགུ་འདི་ཀུན་མགོན་མེད་སྡུག་བསྔལ་ཏེ། །མིག་ཕྱུང་བདེ་བ་དག་ལས་རྣམ་པར་
ཉམས། །སྡུག་བསྔལ་མཐར་མཆི་ལམ་རྣམས་མི་འཚལ་བས། །ཐར་པའི་ཕྱིར་ནི་བརྩོན་འགྲུས་མི་སྐྱེད་དོ། །ཡུན་རིང་དུ་ནི་ངན་སོང་འཕེལ་བར་བགྱིད། །ལྷ་ཡི་ལུས་ལས་ཡོངས་སུ་ཉམས་པའི་ཆོས། །

46-1-68b

དེ་ན་རྒྱལ་བའི་སྒྲ་ནི་ཡོང་མི་གྲག །འཇིག་རྟེན་འདི་ཀུན་གཏི་མུག་མུན་གནག་གོ། །ཟག་མེད་དམ་པ་ཞི་བའི་གོ་འཕང་ནི། །འཇིག་རྟེན་རིག་པ་ཁྱོད་ཀྱིས་དེང་བརྙེས་པས། །བདག་ཅག་རྣམས་དང་འཇིག་རྟེན་རྗེས་སུ་བཟུང་། །
མགོན་པོ་ཁྱོད་ལ་རབ་ཏུ་སྐྱབས་སུ་མཆི། །དགེ་སློང་དག་དེ་ནས་རྒྱལ་བུ་གཞོན་ནུར་གྱུར་པ་བྱིས་པ་བཅུ་དྲུག་པོ་དེ་རྣམས་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་
པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེ་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་ནས། སྐྱེ་བོ་མང་པོ་ལ་ཕན་པ་དང་སྐྱེ་བོ་མང་པོ་ལ་བདེ་བ་དང་འཇིག་རྟེན་ལ་ཐུགས་བརྩེ་བ་དང་ལྷ་དང་མི་
དང་སྐྱེ་བོ་ཕལ་པོ་ཆེའི་དོན་དང་ཕན་པ་དང་བདེ་བའི་སླད་དུ། བཅོམ་ལྡན་འདས་ཆོས་བཤད་ཏུ་གསོལ། བདེ་བར་གཤེགས་པ་ཆོས་བཤད་ཏུ་གསོལ་ཞེས་བཅོམ་ལྡན་འདས་དེ་ལ་ཆོས་ཀྱི་འཁོར་ལོ་བསྐོར་བར་གསོལ་བ་བཏབ་སྟེ། དེའི་ཚེ་ཚིགས་
སུ་བཅད་པ་འདི་དག་གསོལ་ཏོ། །བསོད་ནམས་བརྒྱ་ཡི་མཚན་ཅན་ཆོས་བཤད་གསོལ། །རྣམ་པར་འདྲེན་པ་མཚུངས་མེད་དྲང་སྲོང་ཆེ། །ཡེ་ཤེས་དམ་པ་ཁྱད་པར་འཕགས་བརྙེས་པ། །ལྷ་དང་བཅས་པ་འཇིག་རྟེན་རྣམས་ལ་སྟོན། །བདག་ཅག་རྣམས་
དང་སེམས་ཅན་འདི་དག་སྒྲོལ། །ཅི་ནས་བྱང་ཆུབ་མཆོག་འདི་བདག་ཅག་དང་། །སེམས་ཅན་འདི་རྣམས་ཀྱིས་ཀྱང་ཐོབ་འགྱུར་བར། །དེ་བཞིན་གཤེགས་ཀྱི་ཡེ་ཤེས་བསྟན་དུ་གསོལ། །སྤྱོད་པ་དང་ནི་ཡེ་ཤེས་ཀུན་ཀྱང་མཁྱེན། །བསམ་པ་རྣམས་དང་
སྔོན་གྱི་བསོད་ནམས་དང་། །སྲོག་ཆགས་ཀུན་གྱི་མོས་པ་རྣམས་མཁྱེན་པ། །བླ་མེད་འཁོར་ལོ་དམ་པ་བསྐོར་དུ་གསོལ།། །།དམ་པའི་ཆོས་པ་དམ་དཀར་པོ་བམ་པོ་དྲུག་པ། །དགེ་སློང་དག་དེ་ནས་ཡང་དེའི་ཚེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དང་། ཕྱོགས་བཅུའི་ཕྱོགས་རེ་རེར་ཡང་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་

46-1-69a

བཅུ་རྣམ་པ་དྲུག་ཏུ་གཡོས་ནས་སྣང་བ་ཆེན་པོས་ཁྱབ་པར་གྱུར་ཏེ། འཇིག་རྟེན་གྱི་ཁམས་དེ་དག་ཐམས་ཅད་ཀྱི་འཇིག་རྟེན་གྱི་བར་མི་ཁོམ་པར་གྱུར་ཅིང་། མུན་པ་མུན་ནག་ཏུ་གྱུར་པ་གང་དག་ན། ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་བ། འདི་
ལྟར་མཐུ་ཆེ་བ་འདི་ལྟར་གཟི་བརྗིད་ཆེ་བ། དེ་དག་གི་འོད་ཀྱིས་ཀྱང་སྣང་བར་མི་ནུས་ཏེ། དེ་དག་གི་ཁ་དོག་གིས་ཀྱང་ཁ་དོག་དང་གཟི་བརྗིད་ཏུ་བྱེད་མི་ནུས་པ་དེ་དག་ཏུ་ཡང་དེའི་ཚེ་སྣང་བ་ཆེན་པོར་འབྱུང་བར་གྱུར་ཏོ། །འཇིག་རྟེན་གྱི་བར་དེ་དག་ཏུ་སེམས་
ཅན་གང་དག་སྐྱེས་པ་དེ་དག་ཀྱང་། གཅིག་གིས་གཅིག་མཐོང་ནས། ཨེ་མ་ཀྱེ་སེམས་ཅན་གཞན་དག་ཅིག་ཀྱང་འདིར་སྐྱེས་ཤིང་འཁོད་པ་ལྟེ། ཨེ་མ་ཀྱེ་སེམས་ཅན་གཞན་དག་ཅིག་ཀྱང་འདིར་སྐྱེས་ཤིང་འཁོད་པ་ལྟ་ཞེས་གཅིག་གིས་གཅིག་ཤེས་
སོ། །འཇིག་རྟེན་གྱི་ཁམས་དེ་དག་ཐམས་ཅད་ན་ལྷའི་གནས་དང་ལྷའི་གཞལ་མེད་ཁང་གང་དག་ཡོད་པ་ནས། ཚངས་པའི་འཇིག་རྟེན་གྱི་བར་དུ་ཡང་རྣམ་པར་དྲུག་ཏུ་གཡོས་པར་གྱུར་ནས། སྣང་བ་ཆེན་པོས་ཁྱབ་སྟེ། ལྷ་རྣམས་ཀྱི་ལྷའི་མཐུ་ལས་ཀྱང་
འདས་སོ། །དགེ་སློང་དག་དེ་ལྟར་དེའི་ཚེ། འཇིག་རྟེན་གྱི་ཁམས་དེ་དག་ཏུ་ས་ཆེར་གཡོས་ཤིང་སྣང་བ་ཆེན་པོ་ཡང་བྱུང་བར་གྱུར་ཏོ། །དེ་ནས་ཤར་ཕྱོགས་སུ་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་དེ་དག་ན་ཚངས་པའི་གཞལ་མེད་ཁང་གང་དག་ཡོད་པ་དེ་དག་
ཤིན་ཏུ་མཛེས་ཤིང་ལྷན་ནེ་ལྷང་ངེར་གྱུར་ལ། དཔལ་དང་ལྡན་ཞིང་གཟི་བརྗིད་ཅན་དུ་གྱུར་ཏོ། །དགེ་སློང་དག་དེ་ནས་ཚངས་པ་དེ་དག་འདི་སྙམ་དུ། ཚངས་པའི་གཞལ་མེད་ཁང་འདི་དག་ཤིན་དུ་མཛེས་ཤིང་ལྷན་ནེ་
ལྷང་ངེར་གྱུར་ལ། དཔལ་དང་ལྡན་ཞིང་གཟི་བརྗིད་ཅན་དུ་གྱུར་པ་འདི་སུའི་སྔ་ལྟས་སུ་འགྱུར་སྙམ་སེམས་སོ། །དགེ་སློང་དག་དེ་ནས་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་
དེ་དག་ན། ཚངས་པ་ཆེན་པོ་གང་དག་འཁོད་པ་དེ་དག་ཐམས་ཅད་གནས་དག་ཏུ་ཕན་ཚུན་དོང་ནས་སྨྲའོ། །དགེ་སློང་དག་དེ་ནས་ཚངས་པ་ཆེན་པོ་སེམས་

46-1-69b

ཅན་ཐམས་ཅད་སྐྱོབ་པ་ཞེས་བྱ་བས། །ཚངས་པ་ཆེན་པོའི་ཚོགས་དེ་ལ་ཚིགས་སུ་བཅད་དེ་སྨྲས་པ། བདག་ཅག་ཐམས་ཅད་དེ་རིང་ཤིན་དུ་དགའ། །གཞལ་མེད་ཁང་མཆོག་འདི་དག་རབ་ཏུ་འབར། །དཔལ་ལྡན་ལྷམ་མེ་ཡིད་དུ་འོང་བ་སྟེ། །ཅི་
ཡི་ཕྱིར་ན་དེ་རིང་འདི་འདྲར་གྱུར། །དོན་འདི་བཙལ་བར་བྱས་ན་རབ་ཏུ་ལེགས། །ལྷ་ཡི་བུ་ཞིག་དེ་རིང་སྐྱེས་གྱུར་ཏེ། །འདི་འདྲ་བར་ནི་དེ་ཡི་མཐུས་གྱུར་ཏམ། །སྔོན་ཆད་མ་བྱུང་འདི་ནི་དེ་རིང་སྣང་། །གལ་ཏེ་སངས་རྒྱས་མི་དབང་རྒྱལ་
པོ་དེ། །འཇིག་རྟེན་ག་ཤེད་ཏུ་ནི་དེང་བྱུང་སྟེ། །དེ་རིང་ཕྱོགས་བཅུ་དག་ན་དཔལ་འབར་བ། །འདི་འདྲ་འདི་ནི་དེ་ཡི་ལྟས་ཡིན་ནམ། དགེ་སློང་དག་དེ་ནས་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་ན། 
ཚངས་པ་ཆེན་པོ་གང་དག་འཁོད་པ་དེ་དག་ཐམས་ཅད་ལྷན་ཅིག་འདུས་ནས། དེ་དག་རང་རང་གི་ཚངས་པའི་ལྷའི་གཞལ་མེད་ཁང་དེ་དག་ཏུ་བཞུགས་ཏེ། ལྷའི་མེ་ཏོག་གི་ཕུར་མ་རི་རབ་ཙམ་བཀོད་ནས། ཕྱོགས་བཞིར་རྒྱུ་ཞིང་འདོང་
བ་ལས། ནུབ་ཕྱོགས་ལོགས་སུ་དོང་བ་དང་། དགེ་སློང་དག་དེ་ནས་ཚངས་པ་ཆེན་པོ་དེ་དག་གིས། ནུབ་ཕྱོགས་ལོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་
ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ། བྱང་ཆུབ་ཀྱི་སྙིང་པོ་མཆོག་དམ་པར་གཤེགས་ཤིང་། བྱང་ཆུབ་ཀྱི་ཤིང་དྲུང་ན་སེང་གེའི་ཁྲི་ལ་བཞུགས་ཏེ། ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་
མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པ་དག་གིས་ནི་ཡོངས་སུ་བསྐོར་ཅིང་མདུན་གྱིས་བལྟས་ཏེ། སྲས་རྒྱལ་བུ་གཞོན་ནུ་བཅུ་དྲུག་པོ་དེ་དག་གིས་ནི། ཆོས་ཀྱི་འཁོར་ལོ་བསྐོར་བར་གསོལ་བ་འདེབས་
པར་མཐོང་ངོ་། །མཐོང་ནས་ཀྱང་བཅོམ་ལྡན་འདས་དེ་ག་ལ་བ་དེར་དོང་ནས་ལྷགས་པ་དང་། བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་དེ་ལ་ལན་བརྒྱ་སྟོང་དུ་མ་བསྐོར་བ་བྱས་ནས། མེ་ཏོག་གི་ཕུར་མ་རི་རབ་ཙམ་དེ་དག་

46-1-70a

གིས་བཅོམ་ལྡན་འདས་དེ་ལ་གཏོར་རབ་ཏུ་གཏོར་ཏེ། བྱང་ཆུབ་ཀྱི་ཤིང་དེའི་དཔག་ཚད་བཅུ་ཚུན་ཆད་གཏོར་ནས། ཚངས་པའི་གཞལ་མེད་ཁང་དེ་དག་ཀྱང་བཅོམ་ལྡན་འདས་དེ་ལ་ཕུལ་ཏེ། བཅོམ་ལྡན་འདས་བདག་ཅག་ལ་ཐུགས་
བརྩེ་བའི་སླད་ཏུ། ཚངས་པའི་གཞལ་མེད་ཁང་འདི་དག་བཞེས་སུ་གསོལ། བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་ཏུ། ཚངས་པའི་གཞལ་མེད་ཁང་འདི་དག་ཡོངས་སུ་སྤྱད་ཏུ་གསོལ། བདེ་བར་གཤེགས་པ་ཡོངས་
སུ་སྤྱད་ཏུ་གསོལ་ཞེས་གསོལ་ཏོ། །དགེ་སློང་དག་དེ་ནས་ཚངས་པ་ཆེན་པོ་དེ་དག་གིས་རང་རང་གི་གཞལ་མེད་ཁང་དེ་དག་བཅོམ་ལྡན་འདས་དེ་ལ་ཕུལ་ནས། དེའི་ཚེ་བཅོམ་ལྡན་འདས་དེའི་སྤྱན་སྔར་ཚུལ་དང་འདྲ་བའི་ཚིགས་སུ་བཅད་
པ་འདི་དག་གིས་མངོན་པར་བསྟོད་དོ། །ངོ་མཚར་གྱུར་པ་རྒྱལ་བ་ཚད་མེད་པ། །འཇིག་རྟེན་ཕན་པ་ཐུགས་བརྩེ་འདིར་བྱུང་སྟེ། །མགོན་པོ་བླ་མ་སྟོན་པ་བྱུང་གྱུར་པས། །དེང་ནི་ཕྱོགས་བཅུ་པོ་དག་རྗེས་སུ་གཟུང་། །འདི་དག་ནས་ཀྱང་
འཇིག་རྟེན་མཁས་རྣམས་ནི། །བྱེ་བ་ཁྲག་ཁྲིག་ལྔ་བཅུ་ཚང་བ་ནས། །བདག་ཅག་དེ་ནས་རྒྱལ་ལ་ཕྱག་འཚལ་ལྷགས། །གཞལ་མེད་ཁང་མཆོག་རྣམ་པ་ཀུན་ཏུ་སྤངས། །བདག་ཅག་རྣམས་ཀྱིས་སྔོན་ཆད་ལས་
བགྱིས་པས། །གཞལ་མེད་ཁང་པ་རི་མོ་བཀྲ་འདི་དག །བདག་ཅག་རྣམས་ལ་ཐུགས་བརྩེའི་སླད་ཏུ་བཞེས། །འཇིག་རྟེན་མཁྱེན་པ་ཅི་དགྱེས་སྤྱད་ཏུ་གསོལ། །དགེ་སློང་དག་དེ་ནས་ཚངས་པ་
ཆེན་པོ་དེ་དག །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེའི་སྤྱན་སྔར་ཚུལ་དང་འདྲ་བའི་ཚིགས་སུ་
བཅད་པ་དེ་དག་གིས་མངོན་པར་བསྟོད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་དུ་ཆོས་ཀྱི་འཁོར་ལོ་བསྐོར་དུ་གསོལ། བཅོམ་ལྡན་འདས་མྱ་ངན་ལས་འདའ་བ་བཤད་དུ་

46-1-70b

གསོལ། བཅོམ་ལྡན་འདས་སེམས་ཅན་རྣམས་བསྒྲལ་དུ་གསོལ། བཅོམ་ལྡན་འདས་འཇིག་རྟེན་འདི་དག་རྗེས་སུ་གཟུང་དུ་གསོལ། བཅོམ་ལྡན་འདས་ལྷ་དང་བཅས་བདུད་དང་བཅས་ཚངས་པ་དང་བཅས་པའི་འཇིག་རྟེན་
དང་དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་རྣམས་དང་ལྷ་དང་མི་དང་ལྷ་མ་ཡིན་དུ་བཅས་པ་ལ་ཆོས་བསྟན་དུ་གསོལ། དེ་ནི་སྐྱེ་བོ་མང་པོ་ལ་སྨན་པ་དང་སྐྱེ་བོ་མང་པོ་ལ་བདེ་བ་དང་འཇིག་རྟེན་ལ་ཐུགས་བརྩེ་བ་དང་སྐྱེ་བོ་ཕལ་པོ་ཆེ་དང་། 
ལྷ་དང་མི་རྣམས་ཀྱི་དོན་དང་སྨན་པ་དང་བདེ་བར་འགྱུར་རོ། །དགེ་སློང་དག་དེ་ནས་ཚངས་པ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་གིས་སྒྲ་སྐད་གཅིག་ཏུ་མཐུན་པར་བརྗོད་དེ། བཅོམ་ལྡན་འདས་དེ་ལ་ཚིགས་སུ་བཅད་པ་
འདི་དག་གསོལ་ཏོ། །བཅོམ་ལྡན་འདས་ཀྱིས་ཆོས་བཤད་གསོལ། །རྐང་གཉིས་གཙོ་བོས་བསྟན་དུ་གསོལ། །བྱམས་པའི་སྟོབས་ཀྱིས་བཤད་ཏུ་གསོལ། །སེམས་ཅན་སྡུག་བསྔལ་རྣམས་ལས་སྒྲོལ། །འཇིག་རྟེན་སྒྲོན་
མ་རྙེད་དཀའ་སྟེ། ཨུ་དུམ་བ་རའི་མེ་ཏོག་བཞིན། །དཔའ་བོ་ཆེན་པོ་བྱུང་བས་ན། །དེ་བཞིན་གཤེགས་ལ་གསོལ་བར་འཚལ། །དགེ་སློང་དག་དེ་ནས་ཚངས་པ་ཆེན་པོ་དེ་དག་ལ། བཅོམ་ལྡན་འདས་དེས་ཅང་མི་གསུང་བར་
གྱུར་པས་གནང་ངོ་། །དགེ་སློང་དག་དེའི་ཚེ་ན་ཤར་ལྷོའི་ཕྱོགས་མཚམས་ཀྱི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་དག་ན། ཚངས་པའི་གཞལ་མེད་ཁང་གང་དག་ཡོད་པ་དེ་དག་ཤིན་དུ་མཛེས་ཤིང་
ལྷན་ནེ་ལྷང་ངེར་གྱུར་ལ། དཔལ་དང་ལྡན་ཞིང་གཟི་བརྗིད་ཅན་དུ་གྱུར་ཏོ། །དགེ་སློང་དག་དེ་ནས་ཚངས་པ་ཆེན་པོ་དེ་དག་འདི་སྙམ་དུ། ཚངས་པའི་གཞལ་མེད་ཁང་གང་དག་ཡོད་པ་དེ་དག་ཤིན་དུ་མཛེས་ཤིང་། ལྷན་ནེ་ལྷང་ངེར་གྱུར་ལ་
དཔལ་དང་ལྡན་ཞིང་གཟི་བརྗིད་ཅན་དུ་གྱུར་པ་འདི། སུའི་སྔ་ལྟས་སུ་འགྱུར་སྙམ་དུ་སེམས་སོ། །དགེ་སློང་དག་དེ་ནས་འཇིག་རྟེན་གྱི་ཁམས། བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་ན་ཚངས་པ་ཆེན་པོ་གང་དག་འཁོད་པ་དེ་དག་ཐམས་ཅད་གནས་དག་ཏུ་ཕན་

46-1-71a

ཚུན་དོང་ནས་སྨྲའོ། །དགེ་སློང་དག་དེ་ནས་ཚངས་པ་ཆེན་པོ་རབ་ཏུ་སྙིང་རྗེ་ཅན་ཞེས་བྱ་བས། ཚངས་པའི་ཚོགས་ཆེན་པོ་དེ་ལ་ཚིགསུ་བཅད་དེ་སྨྲས་པ། གྲོགས་དག་སུ་ཡི་སྔ་ལྟས་ཀྱིས། །གཞལ་མེད་ཁང་རྣམས་
དེང་མཛེས་ཤིང་། །ཤིན་དུ་གཟི་བརྗིད་ལྡན་གྱུར་པར། །དེ་རིང་འདི་ན་སྣང་བར་འགྱུར། །ཅི་སྟེ་དེ་རིང་ལྷ་ཡི་བུ། །བསོད་ནམས་ཅན་ཞིག་འདིར་འོངས་ཏེ། །དེའི་མཐུ་ནི་གཞལ་མེད་ཁང་། །འདི་དག་ཐམས་ཅད་མཛེས་གྱུར་
ཏམ། །འོན་ཏེ་སངས་རྒྱས་རྐང་གཉིས་མཆོག །འཇིག་རྟེན་འདིར་ནི་བྱུང་འགྱུར་ཏམ། །གང་གི་མཐུས་ནི་འདི་ལྟར་དེང་། །གཞལ་མེད་ཁང་འདི་འདི་འདྲར་གྱུར། །ཐམས་ཅད་འདུས་ཏེ་བརྟག་པར་བྱ། །འདི་ནི་དོན་ཆུང་
མ་ཡིན་ཏེ། །སྔན་ཆད་དག་ནི་འདི་འདྲ་བའི། །ལྟས་ནི་ནམ་ཡང་མ་མཐོང་ངོ་། །ཕྱོགས་བཞི་དག་ཏུ་འདོང་བར་བྱ། །བྱེ་བ་སྙེད་ཀྱི་ཞིང་ཡང་བསྐོར། །དེ་རིང་སངས་རྒྱས་འཇིག་རྟེན་དུ། །གདོན་མི་ཟ་བར་འབྱུང་བར་འགྱུར། །
དགེ་སློང་དག་དེ་ནས་ཚངས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག །རང་རང་གི་ཚུངས་པའི་ལྷའི་གཞལ་མེད་ཁང་དེ་དག་ཏུ་ཞུགས་ཏེ། ལྷའི་མེ་ཏོག་གི་ཕུར་མ་རི་རབ་ཙམ་ཐོགས་ནས། ཕྱོགས་བཞིར་རྒྱུ་ཞིང་
འདོང་བ་ལས། ནུབ་བྱང་གི་ཕྱོགས་མཚམས་སུ་དོང་བ་དང་། དགེ་སློང་དག་དེ་ནས་ཚངས་པ་ཆེན་པོ་དེ་དག་གིས། ནུབ་བྱང་གི་ཕྱོགས་མཚམས་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེ། བྱང་ཆུབ་ཀྱི་སྙིང་པོ་མཆོག་དམ་པར་གཤེགས་ཤིང་། བྱང་ཆུབ་ཀྱི་ཤིང་དྲུང་ན། སེང་གེའི་ཁྲི་ལ་བཞུགས་ཏེ། ལྷ་དང་ཀླུ་དང་གནོད་སྦྱིན་དང་དྲི་ཟ་དང་། 
ལྷ་མ་ཡིན་དང་ནམཁའ་ལྡིང་དང་མིའམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པ་དག་གིས་ནི་ཡོངས་སུ་བསྐོར་ཅིང་མདུན་གྱིས་བལྟས་ཏེ། སྲས་རྒྱལ་བུ་གཞོན་ནུ་བཅུ་དྲུག་པོ་དེ་དག་ནི། ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པ་མཐོང་ངོ་། །

46-1-71b

མཐོང་ནས་ཀྱང་བཅོམ་ལྡན་འདས་དེ་ག་ལ་བ་དེར་དོང་སྟེ་ལྷག་ནས། བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་དེ་ལ་ལན་བརྒྱ་སྟོང་དུ་མར་བསྐོར་བ་བྱས་ནས་མེ་ཏོག་གི་ཕུར་མ་རི་རབ་ཙམ་དེ་དག་གིས་
བཅོམ་ལྡན་འདས་དེ་ལ་གཏོར་རབ་ཏུ་གཏོར་ཏེ། བྱང་ཆུབ་ཀྱི་ཤིང་དེའི་དཔག་ཚད་བཅུ་ཚུན་ཆད་གཏོར་ནས། ཚངས་པའི་གཞལ་མེད་ཁང་དག་ཀྱང་བཅོམ་ལྡན་འདས་དེ་ལ་ཕུལ་ཏེ། བཅོམ་ལྡན་འདས་བདག་ཅག་ལ་ཐུགས་བརྩེ་བའི་
སླད་དུ་ཚངས་པའི་གཞལ་མེད་ཁང་འདི་དག་བཞེས་སུ་གསོལ། བདེ་བར་གཤེགས་པ་བདག་ཅག་ལ་ཐུགས་བརྩེ་བའི་སླད་དུ་ཚངས་པའི་གཞལ་མེད་ཁང་འདི་དག་ཡོངསུ་སྤྱད་ཏུ་གསོལ་ཞེས་གསོལ་ཏོ། །དགེ་སློང་དག་དེ་ནས་
ཚངས་པ་ཆེན་པོ་དེ་དག་གིས་རང་རང་གི་གཞལ་མེད་ཁང་དེ་དག་བཅོམ་ལྡན་འདས་དེ་ལ་ཕུལ་ནས། དེའི་ཚེ་བཅོམ་ལྡན་འདས་དེའི་སྤྱན་སྔར་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །མཚུངས་མེད་དྲང་
སྲོང་ཆེ་ལ་ཕྱག་འཚལ་ལོ། །ཀ་ལ་པིང་ཀའི་དབྱངས་སྙན་ལྷ་ཡི་ལྷ། །རྣམ་པར་འདྲེན་པ་ལྷར་བཅས་འཇིག་རྟེན་ན། །འཇིག་རྟེན་ཕན་བརྩེ་ཁྱོད་ལ་ཕྱག་འཚལ་ལོ། །མགོན་པོ་ཤིན་དུ་ཡུན་རིང་རྒྱ་ལམ་ན། །ངོ་མཚར་གྱུར་པ་དེ་རིང་
འཇིག་རྟེན་བྱུང་། །བསྐལ་པ་བརྒྱ་ཚང་ཚོལ་བའི་འཇིག་རྟེན་འདི། །སངས་རྒྱས་བརྒྱད་བཅུ་དག་དང་མཚུངས་པར་གྱུར། །བསྐལ་པ་ཁྲག་ཁྲིག་བརྒྱད་བཅུ་རྫོགས་པར་ནི། །རྐང་གཉིས་གཙོ་བོས་སྔོན་ཆད་སྟོངས་པར་
གྱུར། །དེ་སྲིད་ངན་སོང་ས་འདི་རྣམ་པར་འཕེལ། །ལྷ་ཡི་ལུས་ནི་རྟག་ཏུ་ཉམས་པར་གྱུར། །ད་ནི་བདག་ཅག་རྣམས་ཀྱི་བསོད་ནམས་ཀྱིས། །ཆོས་ཀྱི་རྒྱལ་པོ་མིག་དང་རྟེན་དང་གནས། །སྐྱོབ་དང་ཕ་དང་རྩ་ལག་
ཕན་མཛད་པ། །ཐུགས་བརྩེར་ལྡན་པ་འཇིག་རྟེན་འདིར་བྱུང་ངོ་། །དགེ་སློང་དག་དེ་ནས་ཚངས་པ་ཆེན་པོ་དེ་དག་གིས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་

46-1-72a

པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེའི་སྤྱན་སྔར་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་ནས། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
འཇིག་རྟེན་དུ་ཆོས་ཀྱི་འཁོར་ལོ་བསྐོར་དུ་གསོལ། བཅོམ་ལྡན་འདས་མྱ་ངན་ལས་འདའ་བ་བཤད་དུ་གསོལ། བཅོམ་ལྡན་འདས་སེམས་ཅན་རྣམས་བསྒྲལ་དུ་གསོལ། བཅོམ་ལྡན་འདས་འཇིག་རྟེན་འདི་དག་རྗེས་སུ་
གཟུང་དུ་གསོལ། བཅོམ་ལྡན་འདས་ལྷ་དང་བཅས་བདུད་དང་བཅས་ཚངས་པ་དང་བཅས་པའི་འཇིག་རྟེན་དང་དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་རྣམས་དང་ལྷ་དང་མི་དང་ལྷ་མ་ཡིན་དུ་བཅས་པ་ལ་ཆོས་བཤད་དུ་གསོལ། དེ་ནི་སྐྱེ་བོ་
མང་པོ་ལ་སྨན་པ་དང་སྐྱེ་བོ་མང་པོ་ལ་བདེ་བ་དང་འཇིག་རྟེན་ལ་ཐུགས་བརྩེ་བ་དང་། སྐྱེ་བོ་ཕལ་པོ་ཆེ་དང་ལྷ་དང་མི་རྣམས་ཀྱི་དོན་དང་སྨན་པ་དང་བདེ་བར་འགྱུར་རོ། །དགེ་སློང་དག་དེ་ནས་ཚངས་པ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་
ལྔ་བཅུ་པོ་དེ་དག་གིས་སྒྲ་སྐད་གཅིག་ཏུ་མཐུན་པར་བརྗོད་དེ། བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །ཐུབ་པ་ཆེན་པོ་འཁོར་ལོ་མཆོག་བསྐོར་གསོལ། །ཕྱོགས་བཅུ་རྣམས་སུ་ཆོས་རབ་བཤད་ཏུ་
གསོལ། །སྡུག་བསྔལ་ཆོས་ཀྱིས་གཟིར་བའི་སེམས་ཅན་སྒྲོལ། །ལུས་ཅན་རྣམས་ལ་དགའ་ཞིང་རངས་པ་སྐྱེད། །དེ་ཐོས་པས་ན་བྱང་ཆུབ་ཐོབ་འགྱུར་ཏེ། །ལྷ་ཡི་གནས་རྣམས་སུ་ཡང་མཆི་བར་འགྱུར། །
ཀུན་གྱིས་ལྷ་མ་ཡིན་གྱིས་ལུས་སྤངས་ཏེ། །དུལ་ཞིང་ཞི་ལ་རབ་ཏུ་བདེ་བར་འགྱུར། །དགེ་སློང་དག་དེ་ནས་ཚངས་པ་དེ་དག་ལ་ཡང་། བཅོམ་ལྡན་འདས་དེས་ཅང་མི་གསུང་བར་གྱུར་པས་གནང་ངོ་། །དགེ་སློང་དག་དེའི་ཚེ་ལྷོ་
ཕྱོགས་ཀྱི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་ན་ཚངས་པའི་གཞལ་མེད་ཁང་གང་དག་ཡོད་པ་དེ་དག་ཤིན་དུ་མཛེས་ཤིང་ལྷན་ནེ་ལྷང་ངེར་གྱུར་ལ་དཔལ་དང་ལྡན་ཞིང་གཟི་བརྗིད་ཅན་དུ་གྱུར་ཏོ། །

46-1-72b

དགེ་སློང་དག་དེ་ནས་ཚངས་པ་ཆེན་པོ་དེ་དག་འདི་སྙམ་དུ་ཚངས་པའི་གཞལ་མེད་ཁང་འདི་དག་ནི་ཤིན་དུ་མཛེས་ཤིང་ལྷན་ནེ་ལྷང་ངེར་གྱུར་ལ་དཔལ་དང་ལྡན་ཞིང་གཟི་བརྗིད་ཅན་དུ་གྱུར་པ་འདི་སུའི་སྔ་ལྟས་སུ་འགྱུར་སྙམ་དུ་སེམས་སོ། །དགེ་སློང་
དག་དེ་ནས་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་ན། ཚངས་པ་ཆེན་པོ་གང་དག་འཁོད་པ་དེ་དག་ཐམས་ཅད་གནས་དག་ཏུ་ཕན་ཚུན་དོང་ནས་སྨྲའོ། །དགེ་སློང་དག་དེ་ནས་ཚངས་པ་ཆེན་པོ་ཆོས་
བཟང་ཞེས་བྱ་བས་ཚངས་པའི་ཚོགས་ཆེན་པོ་དེ་ལ་ཚིགས་སུ་བཅད་པ་སྨྲས་པ། གྲོགས་པོ་དེ་རིང་རྒྱུ་མེད་རྐྱེན་མེད་པར། །གཞལ་མེད་ཁང་འདི་ཐམས་ཅད་གཟི་ཅན་གྱུར། །འཇིག་རྟེན་འདིར་ནི་ཅུང་ཟད་ལྟས་ཅི་སྟོན། །
དེ་ཡི་དོན་ནི་ལེགས་པར་བཙལ་བར་བྱ། །བསྐལ་པ་བརྒྱ་ཕྲག་མི་ཉུང་འདས་པ་ནས། །འདི་འདྲའི་ལྟས་སྔོན་ནམ་ཡང་བྱུང་མ་གྱུར། །ཡང་ན་འདིར་ནི་ལྷ་ཡི་བུ་ཞིག་སྐྱེས། །ཡང་ན་འཇིག་རྟེན་འདིར་ནི་སངས་རྒྱས་བྱུང་། །
དགེ་སློང་དག་དེ་ནས་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་ན་ཚངས་པ་ཆེན་པོ་གང་དག་འཁོད་པ་དེ་དག་ཐམས་ཅད་ལྷན་གཅིག་ཏུ་འདུས་ནས། རང་རང་གི་ཚངས་པའི་གཞལ་མེད་ཁང་དེ་དག་ཏུ་བཞུགས་
ཏེ། ལྷ་ཡི་མེ་ཏོག་གི་ཕུར་མ་རི་རབ་ཙམ་དེ་དག་ཐོགས་ནས། ཕྱོགས་བཞིར་རྒྱུ་ཞིང་འདོང་བ་ལས་བྱང་ཕྱོགས་སུ་དོང་བ་དང་། དགེ་སློང་དག་དེ་ནས་ཚངས་པ་ཆེན་པོ་དེ་དག་གིས་བྱང་ཕྱོགས་ལོགས་ན་བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེ། བྱང་ཆུབ་ཀྱི་སྙིང་པོ་མཆོག་དམ་པར་གཤེགས་ཤིང་བྱང་ཆུབ་ཀྱི་ཤིང་དྲུང་
ན་སེང་གེའི་ཁྲི་ལ་བཞུགས་ཏེ། ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པ་དག་གིས་ནི་ཡོངས་སུ་བསྐོར་ཅིང་མདུན་གྱིས་བལྟ་

46-1-73a

ཏེ། སྲས་རྒྱལ་བུ་གཞོན་ནུ་བཅུ་དྲུག་པོ་དེ་དག་ནི་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པ་མཐོང་ངོ་། །མཐོང་ནས་ཀྱང་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་དེའི་ཞབས་
ལ་མགོ་བོས་ཕྱག་འཚལ་ཏེ། བཅོམ་ལྡན་འདས་དེ་ལ་ལན་བརྒྱ་སྟོང་དུ་མར་བསྐོར་བ་བྱས་ནས། མེ་ཏོག་གི་ཕུར་མ་རི་རབ་ཙམ་དེ་དག་གིས་བཅོམ་ལྡན་འདས་དེ་ལ་གཏོར་རབ་ཏུ་གཏོར་ཏེ། བྱང་ཆུབ་ཀྱི་ཤིང་དེའི་དཔག་
ཚད་བཅུ་ཚུན་ཆད་གཏོར་ནས་ཚངས་པའི་གཞལ་མེད་ཁང་དེ་དག་ཀྱང་བཅོམ་ལྡན་འདས་དེ་ལ་ཕུལ་ཏེ། བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་ཏུ་ཚངས་པའི་གཞལ་མེད་ཁང་འདི་དག་བཞེས་སུ་
གསོལ། བདེ་བར་གཤེགས་པ་བདག་ཅག་ལ་ཐུགས་བརྩེ་བའི་སླད་ཏུ་ཚངས་པའི་གཞལ་མེད་ཁང་འདི་དག་ཡོངས་སུ་སྤྱད་ཏུ་གསོལ་ཞེས་གསོལ་ཏོ། །དགེ་སློང་དག་དེ་ནས་ཚངས་པ་ཆེན་པོ་དེ་དག་གིས་ཀྱང་རང་རང་གི་
གཞལ་མེད་ཁང་དེ་དག་བཅོམ་ལྡན་འདས་དེ་ལ་ཕུལ་ནས། དེའི་ཚེ་བཅོམ་ལྡན་འདས་དེའི་སྤྱན་སྔར་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །འདྲེན་པ་མཐོང་བ་ཤིན་དུ་རྙེད་པར་དཀའ། །
ལེགས་གཤེགས་ཁྱོད་ནི་སྲིད་པའི་འདོད་ཆགས་འཇོམས། །འཇིག་རྟེན་གྱི་ནི་རིང་ལོན་ཁྱོད་དེ་མཐོང་། །བསྐལ་པ་བརྒྱ་སྙེད་ཚང་ནས་སྣང་བར་འགྱུར། །འཇིག་རྟེན་མགོན་པོ་སྐྱེ་དགུ་སྐོམ་ངོམས་མཛོད། །
སྔོན་ཆད་མ་མཐོང་བརྒྱ་ལམ་སྣང་བར་གྱུར། །རྙེད་དཀའ་ཨུ་དུམ་བ་རའི་མི་རྟོག་བཞིན། །དེ་བཞིན་རྣམ་པར་འདྲེན་པ་བརྒྱ་ལ་མཐོང་། །རྣམ་པར་འདྲེན་པ་བདག་ཅག་གཞལ་མེད་ཁང་། །ཁྱོད་ཀྱི་མཐུས་ནི་དེ་རིང་མཛེས་
པར་གྱུར། །ཀུན་ཏུ་སྤྱན་གྱིས་འདི་དག་བཞེས་སུ་གསོལ། །བདག་ཅག་ཐུགས་བརྩེའི་སླད་ཏུ་སྤྱད་པ་མཛོད། །དགེ་སློང་དག་དེ་ནས་ཚངས་པ་ཆེན་པོ་དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་

46-1-73b

པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེའི་སྤྱན་སྔར། ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་ནས། བཅོམ་ལྡན་འདས་དེ་ལ་འདི་སྐད་
ཅེས་གསོལ་ཏོ། །བཅོམ་ལྡན་འདས་འཇིག་རྟེན་དུ་ཆོས་ཀྱི་འཁོར་ལོ་བསྐོར་དུ་གསོལ། བཅོམ་ལྡན་འདས་མྱ་ངན་ལས་འདའ་བ་བཤད་དུ་གསོལ། བཅོམ་ལྡན་འདས་སེམས་ཅན་རྣམས་བསྒྲལ་དུ་གསོལ། བཅོམ་ལྡན་འདས་
འཇིག་རྟེན་འདི་དག་རྗེས་སུ་གཟུང་དུ་གསོལ། བཅོམ་ལྡན་འདས་ལྷ་དང་བཅས་བདུད་དང་བཅས་ཚངས་པ་དང་བཅས་པའི་འཇིག་རྟེན་དང་དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་རྣམས་དང་ལྷ་དང་མི་དང་ལྷ་མ་ཡིན་དུ་བཅས་པ་ལ་
ཆོས་བཤད་དུ་གསོལ། དེ་ནི་སྐྱེ་བོ་མང་པོ་ལ་སྨན་པ་དང་སྐྱེ་བོ་མང་པོ་ལ་བདེ་བ་དང་འཇིག་རྟེན་ལ་ཐུགས་བརྩེ་བ་དང་སྐྱེ་བོ་ཕལ་པོ་ཆེ་དང་ལྷ་དང་མི་རྣམས་ཀྱི་དོན་དང་སྨན་པ་དང་བདེ་བར་འགྱུར་རོ། །དགེ་སློང་དག་དེ་ནས་ཚངས་པ་
བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་གིས་སྒྲ་སྐད་གཅིག་ཏུ་མཐུན་པར་བརྗོད་དེ། བཅོམ་ལྡན་འདས་དེ་ལ་ཚིགས་སུ་བཅད་པ་འདི་དག་གསོལ་ཏོ། །རྣམ་པར་འདྲེན་པ་བཅོམ་ལྡན་ཆོས་བཤད་གསོལ། །
ཆོས་ཀྱི་འཁོར་ལོ་རབ་ཏུ་བསྐོར་དུ་གསོལ། །ཆོས་ཀྱི་རྔ་རྣམས་རབ་ཏུ་བརྡུང་དུ་གསོལ། །ཆོས་ཀྱི་དུང་ཡང་རབ་ཏུ་བུད་པར་གསོལ། །དམ་ཆོས་ཆར་པ་འཇིག་རྟེན་དབབ་ཏུ་གསོལ། །དབྱངས་སྙན་པས་ནི་ལེགས་པར་བསྟན་དུ་གསོལ། །
གསོལ་བ་བཞིན་དུ་ཆོས་ནི་བཤད་དུ་གསོལ། །སེམས་ཅན་བྱེ་བ་ཁྲག་ཁྲིག་དགྲོལ་དུ་གསོལ། །དགེ་སློང་དག་དེ་ནས་ཚངས་པ་ཆེན་པོ་དག་ལ་ཡང་བཅོམ་ལྡན་འདས་དེས་ཅང་མི་གསུང་བར་གྱུར་པས་གནང་ངོ་། །དེ་བཞིན་དུ་སྦྱར་ཏེ་དེ་བཞིན་དུ་
ལྷོ་ནུབ་ཀྱི་ཕྱོགས་དང་དེ་བཞིན་དུ་ནུབ་ཀྱི་ཕྱོགས་དང་དེ་བཞིན་དུ་ནུབ་བྱང་གིས་ཕྱོགས་དང་དེ་བཞིན་དུ་བྱང་གིས་ཕྱོགས་དང་དེ་བཞིན་དུ་བྱང་ཤར་གྱི་ཕྱོགས་དང་འོག་གི་ཕྱོགས་ཀྱང་དེ་བཞིན་ནོ། །དགེ་སློང་དག་དེ་ནས་སྟེང་གི་ཕྱོགས་ཀྱི་འཇིག་རྟེན་གྱིས་

46-1-74a

ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་ན་ཚངས་པའི་གཞལ་མེད་ཁང་གང་དག་ཡོད་པ་དེ་དག་ཤིན་དུ་མཛེས་ཤིང་ལྷན་ནེ་ལྷང་ངེར་གྱུར་ལ་དཔལ་དང་ལྡན་ཞིང་གཟི་བརྗིད་ཅན་དུ་གྱུར་ཏོ། །དགེ་སློང་དག་དེ་ནས་
ཚངས་པ་ཆེན་པོ་དེ་དག་འདི་སྙམ་དུ་ཚངས་པའི་གཞལ་མེད་ཁང་འདི་དག་ཤིན་དུ་མཛེས་ཤིང་ལྷན་ནེ་ལྷང་ངེར་གྱུར་ལ་དཔལ་དང་ལྡན་ཞིང་གཟི་བརྗིད་ཅན་དུ་གྱུར་པ་འདི་སུའི་སྔ་ལྟས་སུ་འགྱུར་སྙམ་དུ་སེམས་སོ། །དགེ་སློང་དག་དེ་ནས་
འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་ན། ཚངས་པ་ཆེན་པོ་གང་དག་འཁོད་པ་དེ་དག་ཐམས་ཅད་གནས་དག་ཏུ་ཕན་ཚུན་དོང་ནས་སྨྲའོ། །དགེ་སློང་དག་དེ་ནས་ཚངས་པ་ཆེན་པོ་གཙུག་ཏོར་ཅན་ཞེས་བྱ་བས་
ཚངས་པའི་ཚོགས་ཆེན་པོ་དེ་དག་ལ་ཚིགས་སུ་བཅད་དེ་སྨྲས་པ། གྲོགས་པོ་ཅི་ཡི་རྒྱུ་ཡིས་འདི་ལྟར་གྱུར། །གཞལ་མེད་ཁང་རྣམས་གང་གིས་ཡོངས་སུ་ཁྱབ། །གཟི་དང་ཁ་དོག་དང་ནི་འབར་བས་ཀྱང་། །ཤིན་དུ་རྒྱས་པ་རྒྱུ་ཅི་ཡོད། །
འདི་འདྲ་སྔོན་ཆད་བདག་ཅག་ཡོང་མ་མཐོང་། །སུས་ཀྱང་སྔོན་ཆད་འདི་འདྲ་མ་ཐོས་ཏེ། །དེ་རིང་འདི་ལྟར་འོད་ཀྱིས་འདི་ཁྱབ་པ། །ཤིན་དུ་ཆེར་མཛེས་འདི་ལ་རྒྱུ་ཅི་ཡོད། །ཅི་སྟེ་དགེ་བའི་ལས་དང་ལྡན་པ་ཡི། །ལྷའི་བུ་ཞིག་དེ་རིང་འདིར་བྱུང་སྟེ། །
བྱུང་བ་དེ་ཡི་མཐུ་ནི་འདི་ཡིན་ནམ། །ཡང་ན་བརྒྱ་ལ་སངས་རྒྱས་འཇིག་རྟེན་བྱུང་། །དགེ་སློང་དག་དེ་ནས་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་ན་ཚངས་པ་ཆེན་པོ་གང་དག་འཁོད་པ་དེ་དག་ཐམས་ཅད་ལྷན་
ཅིག་འདུས་ནས། རང་རང་གི་ཚངས་པའི་གཞལ་མེད་ཁང་དེ་དག་ཏུ་ཞུགས་ཏེ། ལྷའི་མེ་ཏོག་གི་ཕུར་མ་རི་རབ་ཙམ་ཐོགས་ནས། ཕྱོགས་བཞིར་རྒྱུ་ཞིང་འདོང་བ་ལས། འོག་གི་ཕྱོགས་ལོགས་སུ་དོང་བ་དང་། 
དགེ་སློང་དག་དེ་ནས་ཚངས་པ་ཆེན་པོ་དེ་དག་གིས་འོག་གི་ཕྱོགས་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་

46-1-74b

གྱིས་གནོན་པ་བྱང་ཆུབ་ཀྱི་སྙིང་པོ་མཆོག་དམ་པར་གཤེགས་ཤིང་། བྱང་ཆུབ་ཀྱི་ཤིང་དྲུང་ན་སེང་གེའི་ཁྲི་ལ་བཞུགས་ཏེ། ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་
ཆེན་པོ་དང་མི་དང་མི་མ་ཡིན་པ་དག་གིས་ནི་ཡོངས་སུ་བསྐོར་ཅིང་མདུན་གྱིས་བལྟས་ཏེ། སྲས་རྒྱལ་བུ་གཞོན་ནུ་བཅུ་དྲུག་པོ་དེ་དག་ནི་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པ་མཐོང་ངོ་། །མཐོང་ནས་ཀྱང་
བཅོམ་ལྡན་འདས་དེ་ག་ལ་བ་དེར་དོང་སྟེ། ལྷག་ནས་བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་དེ་ལ་ལན་བརྒྱ་སྟོང་དུ་མར་བསྐོར་བ་བྱས་ནས། མེ་ཏོག་གི་ཕུར་མ་རི་རབ་
ཙམ་དེ་དག་གིས་བཅོམ་ལྡན་འདས་དེ་ལ་གཏོར་རབ་ཏུ་གཏོར་ཏེ། བྱང་ཆུབ་ཀྱི་ཤིང་དེའི་དཔག་ཚད་བཅུ་ཚུན་ཆད་གཏོར་ནས། ཚངས་པའི་གཞལ་མེད་ཁང་དེ་དག་ཀྱང་བཅོམ་ལྡན་འདས་དེ་ལ་ཕུལ་ཏེ། བཅོམ་ལྡན་འདས་
བདག་ཅག་ལ་ཐུགས་བརྩེ་བའི་སླད་ཏུ་ཚངས་པའི་གཞལ་མེད་ཁང་འདི་དག་བཞེས་སུ་གསོལ། བདེ་བར་གཤེགས་པ་བདག་ཅག་ལ་ཐུགས་བརྩེ་བའི་སླད་ཏུ་ཚངས་པའི་གཞལ་མེད་ཁང་འདི་དག་ཡོངས་སུ་སྤྱད་ཏུ་
གསོལ་ཞེས་གསོལ་ཏོ། །དགེ་སློང་དག་དེ་ནས་ཚངས་པ་ཆེན་པོ་དེ་དག་རང་རང་གི་གཞལ་མེད་ཁང་དེ་དག་བཅོམ་ལྡན་འདས་དེ་ལ་ཕུལ་ནས། དེའི་ཚེ་བཅོམ་ལྡན་འདས་དེ་ལ་ཚུལ་དང་འདྲ་བའི་ཚིགས་སུ་བཅད་པ་
འདི་དག་གིས་མངོན་པར་བསྟོད་དོ། །ཁམས་གསུམ་དག་ན་སེམས་ཅན་རྣམས། །བཅིངས་པ་གང་དག་འགྲོལ་བ་ཡི། །འཇིག་རྟེན་མགོན་པོ་སྐྱོབ་མཛད་པ། །སངས་རྒྱས་རྣམས་ནི་མཐོང་
བ་ལེགས། །འཇིག་རྟེན་དབང་པོ་ཀུན་ཏུ་སྤྱན། །ཕྱོགས་བཅུར་རྣམ་པར་གཟིགས་མཛད་ཅིང་། །འཆི་བ་མེད་པའི་སྒོ་ཕྱེ་ནས། །སྐྱེ་བོ་མང་པོ་ཤིན་དུ་སྒྲོལ། །སྔན་ཆད་བསྐལ་པ་བསམ་མི་ཁྱབ། །འདས་པ་དེ་དག་

46-1-75a

སྟོངས་གྱུར་ཏེ། །རྒྱལ་བ་དབང་པོ་མ་མཐོང་བས། །ཕྱོགས་བཅུ་དག་ནི་ལྡོངས་པར་གྱུར། །མི་བཟད་སེམས་ཅན་དམྱལ་བ་དང་། །ལྷ་མིན་དུད་འགྲོ་སྐྱེ་གནས་འཕེལ། །སྲོག་ཆགས་བྱེ་བ་ཕྲག་སྟོང་ནི། །ཡི་དག་རྣམས་
སུ་སྐྱེ་བར་འགྱུར། །ལྷ་མི་ལུས་ལས་ཉམས་ནས་ནི། །འཆི་ཞིང་འཕོས་ནས་ངན་འགྲོར་མཆིས། །སངས་རྒྱས་རྣམས་ཀྱི་ཆོས་མ་ཐོས། །དེ་ཡི་འགྲོ་བ་སྡིག་ཅན་གྱུར། །སྲོག་ཆགས་ཀུན་གྱི་སྤྱོད་དག་པའི། །
རྒྱུད་ཀྱི་ཤེས་རབ་ཉམས་པར་གྱུར། །དེ་དག་བདེ་བ་རྣམ་པར་ཞིག །བདེ་བའི་འདུ་ཤེས་ཞིག་པར་གྱུར། །དེ་དག་ཆོ་ག་ལོག་པ་ལགས། །དམ་ཆོས་མ་ལགས་རྣམས་ལ་གནས། །འཇིག་རྟེན་མགོན་གྱིས་མ་
བརྟུལ་བས། །ངན་འགྲོ་རྣམས་སུ་དེ་དག་ལྟུང་། །དགེ་བ་འཇིག་རྟེན་སྒྲོན་མ་ཡི། །ཤིན་དུ་རིང་ནས་བྱོན་པར་འགྱུར། །སེམས་ཅན་ཀུན་གྱི་སླད་ཏུ་ཡང་། །རྗེས་སུ་ཐུགས་བརྩེ་འདིར་བྱུང་ངོ་། །སངས་རྒྱས་ཡེ་ཤེས་
བླ་མེད་པ། །དགའ་ཞིང་བདེ་བར་རབ་ཏུ་བརྙེས། །ལྷ་དང་བཅས་པའི་འཇིག་རྟེན་དང་། །བདག་ཅག་ཁྱོད་ལ་རྗེས་ཡིད་རང་། །གཙོ་བོ་ཁྱོད་ཀྱི་མཐུ་ཡིས་ནི། །གཞལ་མེད་ཁང་དག་རྣམ་བཀྲ་བ། །དཔའ་བོ་ཆེན་པོ་ཁྱོད་
ལ་འབུལ། །ཐུབ་པ་ཆེན་པོ་བཞེས་སུ་གསོལ། །བདག་ཅག་རྣམས་ལ་ཐུགས་བརྩེའི་སླད། །རྣམ་འདྲེན་ཡོངས་སུ་སྤྱད་ཏུ་གསོལ། །བདག་ཅག་རྣམས་དང་སེམས་ཅན་ཀུན། །བྱང་ཆུབ་མཆོག་ལ་རེག་པར་བགྱི། །
དགེ་སློང་དག་དེ་ནས་ཚངས་པ་ཆེན་པོ་དེ་དག་གིས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེའི་སྤྱན་སྔར་ཚུལ་དང་
འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་ནས། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་དུ་ཆོས་ཀྱི་འཁོར་ལོ་བསྐོར་དུ་གསོལ། བཅོམ་ལྡན་འདས་མྱ་ངན་ལས་འདའ་བ་བཤད་དུ་

46-1-75b

གསོལ། བཅོམ་ལྡན་འདས་སེམས་ཅན་ཐམས་ཅད་བསྒྲལ་དུ་གསོལ། བཅོམ་ལྡན་འདས་འཇིག་རྟེན་འདི་དག་རྗེས་སུ་གཟུང་དུ་གསོལ། བཅོམ་ལྡན་འདས་ལྷ་དང་བཅས་བདུད་དང་བཅས་ཚངས་པ་དང་བཅས་པའི་འཇིག་
རྟེན་དང་དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་རྣམས་དང་ལྷ་དང་མི་དང་ལྷ་མ་ཡིན་དུ་བཅས་པ་ལ་ཆོས་བཤད་དུ་གསོལ། དེ་ནི་སྐྱེ་བོ་མང་པོ་ལ་སྨན་པ་དང་སྐྱེ་བོ་མང་པོ་ལ་བདེ་བ་དང་འཇིག་རྟེན་ལ་ཐུགས་བརྩེ་བ་དང་སྐྱེ་བོ་ཕལ་
པོ་ཆེ་དང་ལྷ་དང་མི་རྣམས་ཀྱི་དོན་དང་སྨན་པ་དང་བདེ་བར་འགྱུར་རོ། །དགེ་སློང་དག་དེ་ནས་ཚངས་པ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་གིས་སྒྲ་སྐད་གཅིག་ཏུ་མཐུན་པར་བརྗོད་དེ། བཅོམ་ལྡན་འདས་དེ་
ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གསོལ་ཏོ། །འཁོར་ལོ་བླ་མེད་དམ་པ་བསྐོར་དུ་གསོལ། །འཆི་བ་མེད་པའི་རྔ་ཡང་བརྡུང་དུ་གསོལ། །སེམས་ཅན་སྡུག་བསྔལ་བརྒྱ་ལས་ཐར་བར་མཛོད། །མྱ་ངན་འདས་
པའི་ལམ་ཡང་བསྟན་དུ་གསོལ། །བདག་ཅག་གསོལ་བ་བཞིན་དུ་ཆོས་གསུང་ཞིང་། །འཇིག་རྟེན་འདི་དང་བདག་ཅག་རྗེས་སུ་གཟུང་། །བསྐལ་པ་བྱེ་བ་སྟོང་དུ་བསྒྲུབས་པ་ཡི། །གསུང་སྙན་འཇམ་པ་དེ་དག་དབྱུང་དུ་
གསོལ། །དགེ་སློང་དག་དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེ། ཚངས་པ་བྱེ་བ་ཁྲག་
ཁྲིག་བརྒྱ་སྟོང་ཕྲག་མང་པོ་དེ་དག་དང་སྲས་རྒྱལ་བུ་གཞོན་ནུ་བཅུ་དྲུག་པོ་དེ་དག་གིས་གསོལ་བ་བཏབ་པར་མཁྱེན་ནས། དེའི་ཚེ་དགེ་སྦྱོང་ངམ་བྲམ་ཟེ་འམ་ལྷ་འམ་བདུད་དམ་མཚངས་པ་འམ་གང་གིས་ཀྱང་འཇིག་རྟེན་དུ་ཆོས་
དང་མཐུན་པས་མ་བསྐོར་བའི་ཆོས་ཀྱི་འཁོར་ལོ་འདི་ལྟ་སྟེ། འདི་ནི་སྡུག་བསྔལ་བའོ། །འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་མོ་ཞེས་བྱ་བ་ལན་

46-1-76a

གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་རོ། །དགེ་སློང་དག་འདི་ལྟར་མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་
གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། 
སྐྱེ་བའི་རྐྱེན་གྱིས་རྒ་ཤི་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་ཡིད་མི་བདེ་བ་དང་འཁྲུག་པ་རྣམས་འབྱུང་སྟེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཤིག་པོ་འདི་འབྱུང་བར་འགྱུར་རོ། །མ་རིག་པ་འགག་
པས་འདུ་བྱེད་འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགག་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་འགག །སྐྱེ་མཆེད་དྲུག་
འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་
འགག །སྐྱེ་བ་འགགས་པས་རྒ་ཤི་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་ཡིད་མི་བདེ་བ་དང་འཁྲུག་པ་རྣམས་འགག་སྟེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཤིག་པོ་འདི་འགག་པར་འགྱུར་རོ། །
ཞེས་བྱ་བ་རྟེན་ཅིང་འབྲེལ་བར་འབྱུང་བ་ལ་འཇུག་པ་ཡང་རྒྱ་ཆེར་རབ་ཏུ་སྟོན་ཏོ། །དགེ་སློང་དག་དེ་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་
ཡེ་ཤེས་ཆེན་པོས་ཟིལ་གྱིས་གནོན་པ་དེས། ཆོས་ཀྱི་འཁོར་ལོ་འདི་ལྷ་དང་བཅས་བདུད་དང་བཅས་ཚངས་པ་དང་བཅས་པའི་འཇིག་རྟེན་དང་དགེ་སྦྱོང་དང་བྲམ་ཟེར་བཅས་པའི་འཁོར་གྱིས་མདུན་དུ་བསྐོར་ནས། སྐད་ཅིག་ཐང་ཅིག་ཡུད་ཙམ་

46-1-76b

དེ་ལ་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་བཅུ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ནས། དེ་དག་ཐམས་ཅད་ཀྱང་རིག་པ་གསུམ་དང་ལྡན་པ་དང་མངོན་པར་ཤེས་པ་དྲུག་དང་ལྡན་པ་དང་
རྣམ་པར་ཐར་པ་བརྒྱད་ལ་བསམ་གཏན་པར་གྱུར་ཏོ། །དགེ་སློང་དག་དེ་ནས་ཡང་མཐར་གྱིས། བཅོམ་ལྡན་འདས་དེ་ཆོས་བསྟན་པ་ལན་གཉིས་སུ་མཛད་དེ། དེ་བཞིན་ལན་གསུམ་ལན་བཞིའི་བར་དུ་ཆོས་བསྟན་
པ་མཛད་དོ། །དགེ་སློང་དག་དེ་ནས་བཅོམ་ལྡན་འདས་དེའི་ཆོས་བསྟན་པ་ལན་རེ་རེ་ལ་ཡང་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་གང་གཱའི་ཀླུང་གི་བྱེ་མ་སྙེད་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་
ལོ། །དགེ་སློང་དག་དེའི་འོག་ཏུ་བཅོམ་ལྡན་འདས་དེའི་ཉན་ཐོས་ཀྱི་དགེ་འདུན་བགྲང་བ་ལས་འདས་པ་བྱུང་ངོ་། །དགེ་སློང་དག་དེ་ནས་ཡང་དེའི་ཚེ་རྒྱལ་བུ་བཅུ་དྲུག་པོ་དེ་དག་གཞོན་ནུར་གྱུར་བཞིན་དུ་དད་དེ་ཁྱིམ་ནས་ཁྱིམ་མེད་
པར་རབ་ཏུ་བྱུང་ནས་དེ་དག་ཐམས་ཅད་དགེ་ཚུལ་ཕར་གྱུར་ཏེ། འཛངས་ཤིང་གསལ་ལ་ཡིད་རྣོ་ཞིང་མཁས་ཏེ་སངས་རྒྱས་བརྒྱ་སྟོང་མང་པོ་ལ་སྤྱད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བ་སྟེ། 
དགེ་སློང་དག་དེ་ནས་དགེ་ཚུལ་བཅུ་དྲུག་པོ་དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེ་ལ་
འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པའི་ཉན་ཐོས་བྱེ་བ་ཁྲག་ཁྲིག་བརྒྱ་སྟོང་མང་པོ་འདི་དག་བཅོམ་ལྡན་འདས་ཀྱིས་ཆོས་བསྟན་པས་རྫུ་འཕྲུལ་ཆེ་ཞིང་མཐུ་ཆེ་བ་དང་དབང་ཆེ་བར་ཡོངས་སུ་གྲུབ་པོ། །
བཅོམ་ལྡན་འདས་དེ་ལྟར་ལགས་པས་བདག་ཅག་ལ་ཐུགས་བརྩེ་བའི་སླད་ཏུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བརྩམས་ཏེ་ཆོས་བསྟན་དུ་གསོལ། བདག་ཅག་ཀྱང་དེ་བཞིན་གཤེགས་པའི་

46-1-77a

རྗེས་སུ་སློབ་བོ། །བཅོམ་ལྡན་འདས་དེ་བཞིན་གཤེགས་པའི་ཡེ་ཤེས་བདག་ཅག་མཐོང་བར་འཚལ་ལོ། །བདག་ཅག་གི་དོན་འདི་ལ་བཅོམ་ལྡན་འདས་ཉིད་མངོན་སུམ་སྟེ། བཅོམ་ལྡན་འདས་ཁྱོད་
སེམས་ཅན་ཐམས་ཅད་ཀྱི་བསམ་པ་མཁྱེན་པས། བདག་ཅག་གི་བསམ་པ་ཡང་མཁྱེན་ཏོ། །དགེ་སློང་དག་དེ་ནས་དེའི་ཚེ་ན་རྒྱལ་བུ་གཞོན་ནུ་བྱིས་པ་ཁྱེའུ་རབ་ཏུ་བྱུང་བ་དགེ་ཚུལ་དེ་དག་མཐོང་ནས། འཁོར་ལོས་
བསྒྱུར་བའི་རྒྱལ་པོ་དེའི་འཁོར་དུ་གྱུར་པ་ཇི་སྙེད་ཡོད་པའི་ཕྱེད་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་བཅུ་རྩ་བཞི་རབ་ཏུ་བྱུང་བར་གྱུར་ཏོ། །དགེ་སློང་དག་དེ་ནས་བཅོམ་ལྡན་འདས་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེས་དགེ་ཚུལ་དེ་དག་གིས་གསོལ་བ་བཏབ་པ་མཁྱེན་ཏེ། བསྐལ་པ་ཉི་ཁྲི་འདས་ནས་དམ་པའི་
ཆོས་པད་མ་དཀར་པོ་ཞེས་བྱ་བའི་ཆོས་ཀྱི་རྣམ་གྲངས་མདོ་སྡེ་ཤིན་དུ་རྒྱས་པ་ཆེན་པོ་བྱང་ཆུབ་སེམས་དཔའ་རྣམས་ལ་གདམས་པ། སངས་རྒྱས་ཐམས་ཅད་ཀྱིས་ཡོངས་སུ་གཟུང་བ་དེ་འཁོར་བཞི་པོ་དེ་དག་ཐམས་
ཅད་ལ་རྒྱ་ཆེར་རབ་ཏུ་བསྟན་ཏོ། །དགེ་སློང་དག་དེ་ནས་ཡང་དེའི་ཚེ་ན་བཅོམ་ལྡན་འདས་ཀྱིས་བཤད་པ་དགེ་ཚུལ་བཅུ་དྲུག་པོ་དེ་དག་གིས་བླངས་སོ་བཟུང་ངོ་། །ཀུན་ཆུབ་པར་བྱས་སོ། །དགེ་སློང་དག་དེ་ནས་བཅོམ་ལྡན་འདས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེས། དགེ་ཚུལ་བཅུ་དྲུག་པོ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ་དགེ་
སློང་དག་དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པས་ཆོས་ཀྱིས་རྣམ་གྲངས་འདི་བཤད་པ་ལ། ཉན་ཐོས་རྣམས་

46-1-77b

དགེ་ཚུལ་བཅུ་དྲུག་པོ་དེ་དག་མོས་པར་གྱུར་ཏོ། །སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་ནི་ཐེ་ཚོམ་ཟ་བར་གྱུར་ཏོ། །དགེ་སློང་དག་དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེས། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་བསྐལ་པ་བརྒྱ་སྟོང་གི་བར་དུ་མི་མནའ་བར་བསྟན་ནས། ནང་དུ་ཡང་དག་འཇོག་ལ་
འཇུག་པའི་ཕྱིར་གཙུག་ལག་ཁང་དུ་ཞུགས་སོ། །དགེ་སློང་དག་དེ་བཞིན་གཤེགས་པ་དེ་འདི་ལྟར། བསྐལ་པ་བརྒྱད་ཁྲི་བཞི་སྟོང་གི་བར་དུ་གཙུག་ལག་ཁང་དུ་གནས་ཏེ་ནང་དུ་ཡང་དག་འཇོག་ལ་ཞུགས་སོ། །དགེ་སློང་
དག་དེ་ནས་དགེ་ཚུལ་བཅུ་དྲུག་པོ་དེ་དག་གིས། བཅོམ་ལྡན་འདས་དེ་ནང་དུ་ཡང་དག་འཇོག་ལ་ཞུགས་པར་རིག་ནས་སོ་སོ་ནས་ཆོས་ཀྱི་སྟན་སེང་གེའི་ཁྲི་བཤམས་ཏེ། དེ་དག་ལ་འཁོད་ནས་དམ་པའི་ཆོས་པད་མ་དཀར་
པོའི་ཆོས་ཀྱི་རྣམ་གྲངས་འདི་འཁོར་བཞི་པོ་དག་ལ་བསྐལ་པ་བརྒྱད་ཁྲི་བཞི་སྟོང་དུ་རྒྱ་ཆེར་རབ་ཏུ་བསྟན་ཏོ། །དགེ་སློང་དག་དེ་ན་དགེ་ཚུལ་བྱང་ཆུབ་སེམས་དཔའ་རེ་རེས་ཀྱང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་
གང་གཱའི་ཀླུང་དྲུག་བཅུ་དྲུག་བཅུའི་བྱེ་མ་སྙེད་ལ་ཡང་དག་པར་བསྟན་ཏེ། ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་བྱས། ཡང་དག་པར་འཛིན་དུ་བཅུག །ཞུགས་པར་བྱས་ནས་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དགེ་སློང་དག་དེའི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་
གྱིས་གནོན་པ་དེ། བསྐལ་པ་བརྒྱད་ཁྲི་བཞི་སྟོང་པོ་དེ་དག་འདས་ནས། དྲན་པ་དང་ལྡན་ཞིང་མཁྱེན་བཞིན་དུ་ཏིང་ངེ་འཛིན་དེ་ལས་བཞེངས་སོ། །བཅོམ་ལྡན་འདས་དེ་བཞེངས་ནས་ཆོས་ཀྱི་གདན་ག་ལ་བ་དེར་བཞུད་དེ་

46-1-78a

བྱོན་ནས་གདན་བཤམས་པ་ལ་བཞུགས་སོ། །དགེ་སློང་དག་དེ་ནས་བཅོམ་ལྡན་འདས་དེ་ཆོས་ཀྱི་གདན་དེ་ལ་བཞུགས་མ་ཐག་ཏུ། དེ་ནས་འཁོར་འདུས་པ་ཐམས་ཅད་ལ་གཟིགས་ནས་དགེ་སློང་གི་དགེ་འདུན་ལ་
བཀའ་སྩལ་པ། དགེ་སློང་དག་དགེ་ཚུལ་བཅུ་དྲུག་པོ་འདི་དག་ངོ་མཚར་དུ་གྱུར་པ་རྨད་དུ་གྱུར་པ་ཤེས་རབ་དང་ལྡན་པ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་བསྙེན་བཀུར་བྱས་པ་ཤིན་དུ་སྤྱོད་པ་སྤྱད་པ་སངས་རྒྱས་
ཀྱི་ཡེ་ཤེས་འཛིན་དུ་འཛུད་པ་སངས་རྒྱས་ཀྱི་ཡེ་ཤེས་ཡང་དག་པར་སྟོན་པ་ཡིན་གྱིས། དགེ་སློང་དག་དགེ་ཚུལ་བཅུ་དྲུག་པོ་འདི་དག་ལ་ཕྱིར་ཞིང་བསྙེན་བཀུར་གྱིས་ཤིག །དགེ་སློང་དག་ཉན་ཐོས་ཀྱིས་ཐེག་པ་ཅན་ནམ་རང་
སངས་རྒྱས་ཀྱི་ཐེག་པ་ཅན་ནམ། བྱང་ཆུབ་སེམས་དཔའི་ཐེག་པ་ཅན་ཡང་རུང་སྟེ། གང་དག་ཁ་ཅིག་རིགས་ཀྱི་བུ་འདི་དག་གིས་ཆོས་བཤད་པ་ལ་མི་སྤོང་མི་སྨོད་པ་དེ་དག་ཐམས་ཅད་མྱུར་དུ་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཐོབ་པར་འགྱུར་རོ། །དེ་དག་ཐམས་ཅད་དེ་བཞིན་གཤེགས་པའི་ཡེ་ཤེས་ཐོབ་པར་འགྱུར་རོ། །དགེ་སློང་དག་རིགས་ཀྱི་བུ་བཅུ་དྲུག་པོ་དེ་དག་གིས་བཅོམ་ལྡན་འདས་དེའི་བསྟན་པ་ལ་དམ་པའི་ཆོས་པད་མ་དཀར་
པོའི་ཆོས་ཀྱི་རྣམ་གྲངས་འདི་ཡང་དང་ཡང་དུ་རབ་ཏུ་བསྟན་ཏོ། །དགེ་སློང་དག་དགེ་ཚུལ་བྱང་ཆུབ་སེམས་དཔའ་སེམས་དཔའ་ཆེན་པོ་བཅུ་དྲུག་པོ་བྱང་ཆུབ་སེམས་དཔའ་དེ་དག་རེ་རེས་ཀྱང་སེམས་ཅན་བྱེ་བ་ཁྲག་
ཁྲིག་བརྒྱ་སྟོང་ཕྲག་གང་གཱའི་ཀླུང་དྲུག་ཅུ་དྲུག་བཅུའི་བྱེ་མ་སྙེད་བྱང་ཆུབ་ཏུ་ཡང་དག་པར་བཙུད་པར་གྱུར་སྟེ། དེ་དག་ཐམས་ཅད་ཀྱང་དེ་དག་ཉིད་དང་། ཚེ་རབས་དེ་དང་དེ་དག་ཏུ་རབ་ཏུ་བྱུང་སྟེ་དེ་དག་ལ་ལྟ་ཞིང་དེ་དག་ལ་ཆོས་
ཉན་ཏོ། །དེ་དག་གིས་སངས་རྒྱས་བྱེ་བ་སྟོང་ཕྲག་བཞི་བཅུ་མཉེས་པར་བྱས་སོ། །ཁ་ཅིག་ནི་ད་དུང་ཡང་མཉེས་པར་བྱེད་དོ། །དགེ་སློང་དག་ཁྱེད་མོས་པར་བྱ་ཁོང་དུ་ཆུད་པར་བྱའོ། །རྒྱལ་བུ་

46-1-78b

གཞོན་ནུ་བཅུ་དྲུག་པོ་དེ་དག་གཞོན་ནུར་གྱུར་བཞིན་དུ་བཅོམ་ལྡན་འདས་དེའི་བསྟན་པ་ལ་དགེ་ཚུལ་ཆོས་སྨྲ་བར་གྱུར་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་
སངས་རྒྱས་ནས། དེ་དག་ཐམས་ཅད་ད་ལྟ་ན་བཞུགས་ཏེ་འཚོ་ཞིང་གཞེས་སོ། །ཕྱོགས་བཅུའི་སངས་རྒྱས་ཀྱི་ཞིང་ཐ་དད་པ་དག་ན་ཉན་ཐོས་དང་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་ལ་
ཆོས་སྟོན་ཏོ། །དགེ་སློང་དག་འདི་ལྟ་སྟེ། ཤར་ཕྱོགས་ན་འཇིག་རྟེན་གྱི་ཁམས་མངོན་པར་དགའ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ཞེས་བྱ་བ་དང་། 
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྷུན་པོ་བརྩེག་པ་ཞེས་བྱ་བའོ། །དགེ་སློང་དག་ཤར་ལྷོའི་ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་སེང་གེའི་སྒྲ་ཞེས་བྱ་བ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་རྒྱལ་མཚན་ཞེས་བྱ་བའོ། །དགེ་སློང་དག་ལྷོ་ཕྱོགས་ན་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ནམཁའ་ལ་གནས་པ་ཞེས་བྱ་བ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྟག་པར་ཡོངས་སུ་མྱ་ངན་ལས་འདས་པ་ཞེས་
བྱ་བའོ། །དགེ་སློང་དག་ལྷོ་ནུབ་ཀྱི་ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་པོའི་རྒྱལ་མཚན་ཞེས་བྱ་བ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་ཚངས་པའི་རྒྱལ་མཚན་ཞེས་བྱ་བའོ། །དགེ་སློང་དག་ནུབ་ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཅེས་བྱ་བ་དང་། དེ་བཞིན་

46-1-79a

གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་གྱི་ཁམས་ཐམས་ཅད་ཀྱི་གནོད་པ་དང་སྐྱོ་བ་ལས་རབ་ཏུ་རྒལ་བ་ཞེས་བྱ་བའོ། །དགེ་སློང་དག་ནུབ་བྱང་གི་ཕྱོགས་ན་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཏ་མ་ལའི་འདབ་མ་དང་ཙན་དན་གྱི་དྲི་མངོན་པར་ཤེས་པ་ཞེས་བྱ་བ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྷུན་པོ་ལྟ་བུ་ཞེས་བྱ་བའོ། །
དགེ་སློང་དག་བྱང་ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྲིན་སྒྲ་མར་མེ་ཞེས་བྱ་བ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྲིན་སྒྲ་
རྒྱལ་པོ་ཞེས་བྱ་བའོ། །དགེ་སློང་དག་བྱང་ཤར་གྱི་ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་ཐམས་ཅད་ཀྱི་འཇིགས་པ་དང་ཕམ་པ་དང་བག་ཚ་བ་རྣམ་པར་འཇོམས་པ་ཞེས་
བྱ་བའོ། །དགེ་སློང་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ན་བཅུ་དྲུག་པ་སྟེ། དབུས་ཀྱི་འཇིག་རྟེན་གྱི་ཁམས་མི་མཇེད་འདིར། བླ་ན་མེད་པ་ཡང་དག་
པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །དགེ་སློང་དག་དགེ་ཚུལ་དུ་གྱུར་པ་ངེད་ལས་སེམས་ཅན་གང་དག་གིས་ཆོས་ཐོས་ཤིང་། བཅོམ་ལྡན་འདས་དེའི་བསྟན་པ་ལ་བྱང་ཆུབ་སེམས་
དཔའ་རེ་རེས་ཀྱང་། སེམས་ཅན་བརྒྱ་སྟོང་ཕྲག་མང་པོ་གང་གཱའི་ཀླུང་གི་བྱེ་མ་སྙེད་ངེད་ཀྱིས་སོ་སོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་བཙུད་པ་དེ་དག །དགེ་སློང་དག་ད་དུང་ཉན་ཐོས་ཀྱི་ས་
ན་གནས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡོངས་སུ་སྨིན་པར་བྱེད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་གོ་རིམ། ནི་དེ་ལྟའོ། །

46-1-79b

དེ་ཅིའི་ཕྱིར་ཞེ་ན། དགེ་སློང་དག་འདི་ལྟར་དེ་བཞིན་གཤེགས་པའི་ཡེ་ཤེས་ལ་མོས་པར་དཀའ་བའི་ཕྱིར་རོ། །དགེ་སློང་དག་ང་བྱང་ཆུབ་སེམས་དཔར་གྱུར་པས། བཅོམ་ལྡན་འདས་དེའི་བསྟན་པ་ལ་སེམས་ཅན་བྱེ་བ་ཁྲག་ཁྲིག་
བརྒྱ་སྟོང་ཕྲག་དཔག་ཏུ་མེད་བགྲང་དུ་མེད་པ་གང་གཱའི་ཀླུང་གི་བྱེ་མ་སྙེད་གང་དག་ཐམས་ཅད་མཁྱེན་པའི་ཆོས་ཐོས་པར་བྱ་བའི་སེམས་ཅན་དེ་དག་གང་ཞེ་ན། དགེ་སློང་དག་དེ་དག་ནི་ཁྱེད་ཡིན་ཏེ་དེའི་ཚེ་དེའི་དུས་ན་སེམས་ཅན་དག་
ཏུ་གྱུར་ཏོ། །དགེ་སློང་དག་ང་མྱ་ངན་ལས་འདས་ནས་མ་འོངས་པའི་དུས་ན་ཉན་ཐོས་གང་དག་འབྱུང་བ་དེ་དག །བྱང་ཆུབ་སེམས་དཔའི་སྤྱོད་པ་ཉན་ཡང་བདག་ཅག་བྱང་ཆུབ་སེམས་དཔའ་ཡིན་པར་མི་ཤེས་པས། 
དེ་དག་ཐམས་ཅད་ཀྱང་ཡོངས་སུ་མྱ་ངན་ལས་འདའ་བར་འདུ་ཤེས་ནས་ཡོངས་སུ་མྱ་ངན་ལས་འདའ་བར་འགྱུར་རོ། །དགེ་སློང་དག་འོན་ཀྱང་འཇིག་རྟེན་གྱི་ཁམས་གཞན་དག་ན། ང་མིང་གཞན་དང་གཞན་དག་གིས་གནས་
པ་དེར་དེ་དག་དེ་བཞིན་གཤེགས་པའི་ཡེ་ཤེས་ཚོལ་ཞིང་སྐྱེ་བར་འགྱུར་རོ། །དེ་ན་ཡང་དེ་བཞིན་གཤེགས་པ་རྣམས་ཀྱི་ཡོངས་སུ་མྱ་ངན་ལས་འདས་པ་འདི་གཅིག་པུ་སྟེ། འདི་ལས་གུད་ན་མྱ་ངན་ལས་འདའ་བ་གཉིས་
སུ་གཞན་མེད་དོ། །ཞེས་དེ་ལྟ་བུའི་བྱ་བ་འདི་ཉན་པར་འགྱུར་རོ། །དགེ་སློང་དག་ཆོས་བསྟན་པ་མངོན་པར་བསྒྲུབ་པ་དེ་ནི། དེ་བཞིན་གཤེགས་པ་རྣམས་ཀྱི་ཐབས་མཁས་པར་རིག་པར་བྱ་སྟེ། དགེ་སློང་དག་གང་གི་
ཚེ་ན་དེ་བཞིན་གཤེགས་པ་བདག་ཉིད་ཡོངས་སུ་མྱ་ངན་ལས་འདའ་བའི་དུས་ཀྱང་གཟིགས་ལ་འཁོར་ཡོངས་སུ་དག་ཅིང་མོས་པ་སྙིང་པོར་བྱེད་པ། སྟོང་པའི་ཆོས་རྟོགས་པར་བྱེད་པ།  སྟོང་པའི་ཆོས་རྟོགས་པར་ཁོང་དུ་ཆུད་པ། བསམ་གཏན་དང་ལྡན་པ་
བསམ་གཏན་ཆེན་པོ་དང་ལྡན་པ་ཡང་གཟིགས་ན། དགེ་སློང་དག་དེ་བཞིན་གཤེགས་པ་དུས་ལ་བབ་པར་མཁྱེན་ནས། བྱང་ཆུབ་སེམས་དཔའ་ཐམས་ཅད་དང་ཉན་ཐོས་ཐམས་ཅད་ལ་སོགས་ཏེ་ཕྱིས་དོན་འདི་ཡང་དག་པར་

46-1-80a

སྒྲོགས་སོ། །དགེ་སློང་དག་འཇིག་རྟེན་ན་ཐེག་པ་འམ་ཡོངས་སུ་མྱ་ངན་ལས་འདས་པ་གཉིས་སུ་གང་ཡང་མེད་ན། གསུམ་དུ་ལྟ་ཅི་སྨོས། དགེ་སློང་དག་འདི་ནི་དེ་བཞིན་གཤེགས་པ་རྣམས་ཀྱི་ཐབས་མཁས་པ་
སྟེ། སེམས་ཅན་རིང་དུ་མ་རུང་ཞིང་དམན་པ་ལ་དགའ་བ་འདོད་པ་ལ་ཆགས་པར་མཁྱེན་ནས། དགེ་སློང་དག་དེ་དག་གང་ལ་མོས་པ་བཞིན་དུ་དེ་དག་ལ་དེ་བཞིན་གཤེགས་པ་མྱ་ངན་ལས་འདས་པ་དེ་འཆད་དོ། །དགེ་སློང་དག་འདི་
ལྟ་སྟེ་དཔེར་ན། འདི་ལྟར་རིན་པོ་ཆེའི་གླིང་ལ་འདོང་བའི་ཕྱིར་འབྲོག་དགོན་པ་དཔག་ཚད་ལྔ་བརྒྱ་པ་དེར་སྐྱེ་བོའི་ཚོགས་ལྷགས་པར་གྱུར་ཏེ། དེ་དག་གི་ནང་ན་ལམ་མཚོན་པ་འཛངས་ཤིང་གསལ་ལ། ཡིད་གཞུངས་ཤིང་མཁས་པ་
གཅིག་པུ་ཡོད་པ་དེས་མྱ་ངམ་དགོན་པ་དེ་ལས་འགྲོན་པ་མང་པོ་དེ་དག་སྒྲོལ་ལོ། །དེ་ནས་སྐྱེ་བོ་ཕལ་པོ་ཆེ་དེ་དག་ངལ་ཞིང་ཆད་དེ་སྐྲག་ནས་འདི་སྐད་ཅེས། ཀྱེ་འཕགས་པ་མཚོན་མ་ཡོངས་སུ་འདྲེན་པ་བདག་ཅག་ངལ་ཞིང་ཆད་དེ་འཇིགས་
ཤིང་སྐྲག་པས་མྱ་ངན་དེ་ལས་མ་འདས་པར་མཁྱེན་པར་མཛོད་ཅིག །འབྲོག་དགོན་པ་འདི་ནི་ཤིན་དུ་རིང་བས་སླར་ལྡོག་གོ་ཞེས་བྱས་པ་དང་། དགེ་སློང་དག་དེ་ནས་མཚོན་མ་དེ་དག་ཐབས་མཁས་པས་མི་དེ་དག་སླར་ལྡོག་པར་འདོད་པར་
ཤེས་ནས། འདི་སྙམ་དུ་ཉོན་མོངས་འདི་དག་རིན་པོ་ཆེའི་གླིང་ཆེན་པོ་དེ་ལྟ་བུར་མི་འགྲོ་བར་གྱུར་ན་མི་རུང་ངོ་སྙམ་དུ་བསམས་ནས་དེས་དེ་དག་ལ་སྙིང་བརྩེ་བའི་ཕྱིར་ཐབས་མཁས་པ་སྦྱར་ཏེ། དགོན་པའི་དབུས་སུ་དཔག་ཚད་
བརྒྱ་འམ་དཔག་ཚད་ཉིས་བརྒྱ་འདས་པ་དང་རྫུ་འཕྲུལ་གྱི་གྲོང་ཁྱེར་མངོན་པར་སྤྲུལ་ནས་དེ་ནས་དེས་མི་དེ་དག་ལ་འདི་སྐད་ཅེས། ཁྱེད་ཅག་མ་འཇིགས་ཤིག །སླར་མ་ལྡོག་པར་ཡུལ་ཆེན་པོ་འདིར་ངལ་སོ་ཤིག་བྱ་བ་གང་
དག་ཅི་ཡོད་པ་དེ་དག་ཐམས་ཅད་ཀྱང་འདིར་གྱིས་ཤིག །འདིར་མྱ་ངན་ལས་འདའ་བ་ཐོབ་པར་གནས་པར་གྱིས་ཤིག །འདིར་ངལ་སོས་ནས་སུ་ལ་དགོངས་པར་གྱུར་པ་དེ་ནི་རིན་པོ་ཆེའི་གླིང་ཆེན་པོ་འདིར་འདོང་ངོ་ཞེས་བསྒོ་བ་དང་། དགེ་སློང་

46-1-80b

དག་དེ་ནས་དགོན་པར་ཕྱིན་པའི་མི་དེ་དག་བདག་ཅག་ནི་འབྲོག་དགོན་པ་ལས་ཐར་ནས་འདིར་མྱ་ངན་ལས་འདའ་བ་ཐོབ་སྟེ་གནས་སོ་སྙམ་ནས་ངོ་མཚར་ཐོབ་པར་གྱུར་ཏོ། །དགེ་སློང་དག་དེ་ནས་མི་དེ་དག་རྫུ་འཕྲུལ་གྱི་གྲོང་ཁྱེར་དེར་
ཞུགས་ནས་ཕྱིན་པ་སྙམ་དུ་འདུ་ཤེས་པར་གྱུར། རྒལ་བ་སྙམ་དུ་འདུ་ཤེས་པར་གྱུར། མྱ་ངན་ལས་འདས་པར་འདུ་ཤེས་པར་གྱུར། བདག་ཅག་མྱ་ངན་ལས་འདས་ཤིང་བསིལ་བར་གྱུར་པར་སེམས་པར་གྱུར་ཏོ། །དེ་ནས་མཚོན་
མས་དེ་དག་ངལ་སོས་པར་ཤེས་ནས་རྫུ་འཕྲུལ་གྱི་གྲོང་ཁྱེར་དེ་མི་སྣང་བར་བྱས་སོ། །མི་སྣང་བར་བྱས་ནས་མི་དེ་དག་ལ་འདི་སྐད་ཅེས་གྲོང་ཁྱེར་ཆེན་པོ་འདི་ནི་ཁྱེད་ངལ་བསོ་བའི་ཕྱིར་ཁོ་བོས་སྤྲུལ་པ་ཡིན་ཏེ། རིན་པོ་ཆེའི་
གླིང་ཆེན་པོ་དེ་དང་ཡང་ཉེ་བས་སེམས་ཅན་ཁྱེད་འདོང་ངོ་ཞེས་བསྒོ་བ་དེ་བཞིན་དུ་དགེ་སློང་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་། ཁྱེད་དང་སེམས་ཅན་ཐམས་ཅད་ཀྱི་མཚོན་མའོ། །དགེ་སློང་དག་དེ་ནས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས། འདི་ལྟར་ཉོན་མོངས་པའི་དགོན་པ་ཆེན་པོ་འདི་ལ་སྐྱོབ་པར་བྱ། བཟླ་བར་བྱ་སྤང་བར་བྱ་ན། སེམས་ཅན་འདི་དག་སངས་རྒྱས་ཀྱི་ཡེ་ཤེས་གཅིག་པུ་
ཐོས་ནས་སྔངས་ཏེ་ཕྱིར་ལྡོག་ཅིང་། སངས་རྒྱས་ཀྱི་ཡེ་ཤེས་བསྒྲུབ་པ་འདི་ཉོན་མོངས་པ་མང་ངོ་ཞེས་མི་འཇུག་པར་མི་འགྱུར་གྲང་ཞེས་གཟིགས་ཏེ། དེ་ལ་དེ་བཞིན་གཤེགས་པས་སེམས་ཅན་བསམ་པའི་སྟོབས་
ཆུང་བར་མཁྱེན་ནས། ཇི་ལྟར་མཚོན་མ་དེས་སེམས་ཅན་དེ་དག་ངལ་བསོ་བའི་ཕྱིར་རྫུ་འཕྲུལ་གྱི་གྲོང་ཁྱེར་དེ་མངོན་པར་སྤྲུལ་ཏེ། སེམས་ཅན་དེ་དག་ངལ་བསོ་ནས་འདི་ནི་རྫུ་འཕྲུལ་གྱི་གྲོང་ཁྱེར་
ཡིན་ནོ། །ཞེས་བསྒོ་བ་དེ་བཞིན་དུ་དགེ་སློང་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐབས་མཁས་པ་ཆེན་པོས་སེམས་ཅན་

46-1-81a

རྣམས་ངལ་བསོ་བའི་ཕྱིར། བར་དུ་མྱ་ངན་ལས་འདའ་བའི་ས་གཉིས་བཤད་ཅིང་རབ་ཏུ་བསྟན་ཏེ། འདི་ལྟར་ཉན་ཐོས་ཀྱི་ས་དང་རང་སངས་རྒྱས་ཀྱི་ས་སྟེ། དགེ་སློང་དག་གང་གི་དུས་ན་སེམས་ཅན་དེ་དག་དེ་ལ་གནས་པར་གྱུར་པ་
དེ་ན། དགེ་སློང་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་འདི་སྐད་ཏུ། དགེ་སློང་དག་ཁྱེད་བྱ་བ་བྱས་པ་མ་ཡིན་ཏེ་བྱེད་པ་བྱས་པ་མ་ཡིན་ལ། དགེ་སློང་དག་ཁྱེད་དེ་བཞིན་
གཤེགས་པའི་ཡེ་ཤེས་ལ་ཉེ་བར་གྱུར་གྱིས་ལྟོས་ཤིག །རྟོགས་ཤིག །གང་ཁྱེད་ཀྱི་མྱ་ངན་ལས་འདས་པ་མྱ་ངན་ལས་འདས་པ་མ་ཡིན་ཏེ། དགེ་སློང་དག་གང་ཐེག་པ་གསུམ་དུ་བཤད་པ་དེ་ནི་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐབས་མཁས་པའོ་ཞེས་ཡང་དག་པར་སྒྲོགས་སོ། །དེ་ནས་བཅོམ་ལྡན་འདས་ཀྱིས་དོན་འདི་ཉིད་རྒྱས་པར་བསྟན་ཅིང་དེའི་ཚེ་ཚིགས་སུ་བཅད་པ་འདི་དག་བཀའ་
སྩལ་ཏོ། །མངོན་ཤེས་ཡེ་ཤེས་ཟིལ་གནོན་འཇིག་རྟེན་འདྲེན། །འདི་ལྟར་བྱང་ཆུབ་སྙིང་པོར་ཞུགས་གྱུར་པ། །དེ་ཡང་བར་གྱི་བསྐལ་པ་བཅུ་ཚང་བར། །དོན་དམ་གཟིགས་པ་བྱང་ཆུབ་མ་བརྙེས་སོ། །ལྷ་དང་ཀླུ་དང་
ལྷ་མིན་གསང་བ་པ། །རྒྱལ་བ་དེ་ལ་རབ་ཏུ་མཆོད་པར་བརྩོན། །མི་ཡི་འདྲེན་པ་བྱང་ཆུབ་སངས་རྒྱས་ལ། །དེར་ནི་མེ་ཏོག་ཆར་པ་རབ་ཏུ་ཕབ། །རྒྱལ་བ་དེ་ལ་མཆོད་ཅིང་བཀུར་སྟིའི་ཕྱིར། །སྟེང་གི་མཁའ་
ལ་དེ་དག་རྔ་རྡུང་ངོ་། །རིང་ནས་བླ་ན་མེད་པའི་གནས་རྟོགས་ཕྱིར། །དེ་ནས་རྒྱལ་བ་ཤིན་དུ་སྡུག་བསྔལ་གྱུར། །དེ་ནས་བར་གྱི་བསྐལ་པ་བཅུ་འདས་ནས། །བཅོམ་ལྡན་ཟིལ་གནོན་དེ་ཡིས་བྱང་ཆུབ་ཐོབ། །
དེ་ཚེ་ལྷ་མིན་ཀླུ་དང་ལྷ་མ་ཡིན། །ཐམས་ཅད་རབ་ཏུ་དགའ་ཞིང་མགུ་བར་གྱུར། །ཡོན་ཏན་ཕྱུག་པ་མི་གཙོ་དེ་ཡི་སྲས། །གཞོན་ནུར་གྱུར་པ་དཔའ་བོ་བཅུ་དྲུག་རྣམས། །སྲོག་ཆགས་བྱེ་བ་སྟོང་གིས་མདུན་བདར་ཏེ། །

46-1-81b

རྐང་གཉིས་དབང་པོ་མཆོག་དེའི་དྲུང་དུ་འདོང་། །རྣམ་པར་འདྲེན་གྱི་ཞབས་ལ་ཕྱག་འཚལ་ནས། །མི་དབང་སེང་གེས་འདིར་ནི་ལེགས་བཤད་པས། བདག་ཅག་འཇིག་རྟེན་འདི་རྣམས་ཚིམ་མཛད་ཅིང་། །ཆོས་རབ་བསྟན་དུ་གསོལ་
ཞེས་གསོལ་བ་བཏབ། །རིང་ནས་ཕྱོགས་བཅུའི་འཇིག་རྟེན་འདི་རྣམས་སུ། །རྣམ་འདྲེན་ཆེན་པོ་བྱུང་བར་རབ་ཏུ་རིག །ལྟས་ཀྱིས་སྲོག་ཆགས་རྣམས་ནི་བསྐུལ་བའི་ཕྱིར། །ཚངས་པའི་གཞལ་མེད་ཁང་རྣམས་རབ་ཏུ་བསྐྱོད། །
ཤར་གྱི་ཕྱོགས་སུ་ཞིང་རྣམས་བྱེ་བ་ཕྲག །སྟོང་ཕྲག་ལྔ་བཅུ་དེ་དག་གཡོས་པར་གྱུར། །དེ་ནས་ཚངས་པ་གཞལ་མེད་ཁང་མཆོག་དག །དེ་དག་རབ་ཏུ་གཟི་བརྗིད་ལྡན་པར་གྱུར། །དེ་དག་སྔ་ལྟས་འདི་འདྲ་རིག་གྱུར་ནས། །
འཇིག་རྟེན་འདྲེན་དབང་དྲུང་དུ་ཉེ་བར་ལྷགས། །འདྲེན་པ་དེ་ལ་མེ་ཏོག་མངོན་པར་འཐོར། །དེ་ལ་གཞལ་མེད་ཁང་དེ་ཐམས་ཅད་ཕུལ། །འཁོར་ལོ་རབ་ཏུ་བསྐོར་བར་གསོལ་བ་འདེབས། །ཚིགས་སུ་བཅད་པའི་དབྱངས་ཀྱིས་
མངོན་པར་བསྟོད། །ད་དུང་ང་ཡི་ཆོས་བཤད་དུས་མིན་ཞེས། །མི་དབང་རྒྱལ་པོ་དེ་ནི་མི་གསུང་གྱུར། །དེ་བཞིན་དུ་ནི་ལྷོ་ཡི་ཕྱོགས་ལོགས་དང་། །དེ་བཞིན་དུ་ཡང་ནུབ་དང་འོག་དང་བྱང་། །སྟེང་གི་ཕྱོགས་དང་ཕྱོགས་མཚམས་
དེ་བཞིན་ཏེ། ཚངས་པ་བྱེ་བ་ཕྲག་སྟོང་ལྷགས་གྱུར་ནས། །འདྲེན་པ་དེ་ལ་མངོན་པར་ཡང་གཏོར་ཏེ། །རྣམ་པར་འདྲེན་པའི་ཞབས་ལ་ཕྱག་འཚལ་ནས། །གཞལ་མེད་ཁང་རྣམས་ཐམས་ཅད་དེར་ཕུལ་ཏེ། །མངོན་པར་བསྟོད་
པ་བྱས་ནས་ཡང་གསོལ་པ། །མཐའ་ཡས་སྤྱན་ལྡན་འཁོར་ལོ་བསྐོར་དུ་གསོལ། །བསྐལ་པ་བྱེ་བ་མང་ཁྱོད་རྙེད་རབ་དཀའ། །སྔོན་ཆད་བྱམས་པའི་སྟོབས་བསྙེན་བསྟན་དུ་གསོལ། །འཆི་བ་
མེད་པའི་སྒོ་ཡང་དབྱེ་བར་གསོལ། །གསོལ་བ་མཐའ་ཡས་སྤྱན་གྱིས་མཁྱེན་ནས་ནི། །རྣམ་པ་མང་པོར་ཆོས་རྣམས་རབ་བསྟན་པ། །བདེན་པ་བཞི་རྣམས་རབ་ཏུ་རྒྱས་པ་དང་། དངོས་པོ་འདི་དག་ཐམས་

46-1-82a

ཅད་རྟེན་ནས་བྱུང་། །མ་རིག་ལ་སོགས་འཆི་བཞི་སྡུག་བསྔལ་ཡང་། །མཐའ་ཡས་པར་ནི་སྤྱན་དང་ལྡན་པས་གསུངས། །སྐྱེ་བ་ལས་ནི་ཉེས་པ་འདི་ཀུན་བྱུང་། །མི་ཡི་འཆི་བདག་འདི་ཡང་ཤེས་པར་གྱིས། །
རྣམ་པ་མང་པོ་སྣ་ཚོགས་མཐའ་ཡས་པ། །ཆོས་རྣམས་དེ་ཡིས་བཤད་མ་ཐག་ཏུ་ཡང་། །ཐོས་ནས་སེམས་ཅན་བྱེ་བ་ཁྲག་ཁྲིག་ཕྲག །བརྒྱད་བཅུ་ཉན་ཐོས་ས་ལ་མྱུར་དུ་གནས། །རྒྱལ་བ་དེ་ཡི་ཆོས་མང་བཤད་པ་ནི། །
གཞན་ཡང་ལན་གཉིས་སུ་ནི་གྱུར་པ་ན། །སེམས་ཅན་གང་གཱའི་བྱེ་སྙེད་རྣམ་དག་སྟེ། །སྐད་ཅིག་གིས་ནི་དེ་ཀུན་ཉན་ཐོས་གྱུར། །དེ་ཡི་འོག་ཏུ་དེ་ཚེ་འཇིག་རྟེན་གྱི། །རྣམ་འདྲེན་དེ་ཡི་དགེ་འདུན་གྲངས་མེད་བྱུང་། །
བསྐལ་པ་ཁྲག་ཁྲིག་བྱེ་བར་བགྲངས་ན་ཡང་། །རེ་རེ་ལ་ཡང་དེ་དག་མཐར་མི་ཕྱིན། །རྒྱལ་བུ་བཅུ་དྲུག་པོ་ནི་དེ་དག་ཀྱང་། །ཐམས་ཅད་གཞོན་ནུར་གྱུར་པ་སྙིང་གི་བུ། །འདྲེན་པ་ཁྱོད་ཀྱིས་ཆོས་མཆོག་བསྟན་གསོལ་ཞེས། །
རྒྱལ་བ་དེ་ལ་དགེ་ཚུལ་དེ་དག་གསོལ། །ཇི་ལྟར་སྐྱེ་དགུ་ཀུན་མཆོག་ཁྱོད་བཞིན་དུ། །བདག་ཅག་འཇིག་རྟེན་མཁྱེན་པར་འགྱུར་བར་ཤོག །ཇི་ལྟར་དཔའ་བོ་སྤྱན་དག་ཁྱེད་བཞིན་དུ། སེམས་ཅན་འདི་དག་ཐམས་
ཅད་དེ་བཞིན་ཤོག །དེ་སྲས་གཞོན་ནུར་གྱུར་པ་དེ་དག་གི། །བསམ་པ་དག་ནི་རྒྱལ་བ་དེས་མཁྱེན་པས། །དཔེ་རྣམས་བྱེ་བ་ཁྲག་ཁྲིག་དུ་མ་ཡིས། །བྱང་ཆུབ་དམ་པ་མཆོག་ནི་རབ་ཏུ་བསྟན། །རྒྱུ་ནི་མང་པོ་
སྟོང་གིས་ཉེར་བསྟན་ཏེ། །མངོན་པར་ཤེས་དང་ཡེ་ཤེས་རབ་ཏུ་བསྒྲགས། །བྱང་ཆུབ་སེམས་དཔའ་མཁས་པ་སྤྱོད་པ་བཞིན། །འཇིག་རྟེན་མགོན་པོས་ཡང་དག་སྤྱོད་པ་བསྟན། །གང་དག་ཚད་ནི་གང་
གའི་བྱེ་སྙེད་ཀྱི། །ཚིགས་སུ་བཅད་པ་སྟོང་ཕྲག་མི་ཉུང་བར། །རབ་རྒྱས་མདོ་སྡེ་དམ་ཆོས་པད་མ་དཀར། །འདི་ཉིད་བཅོམ་ལྡན་འདས་ཀྱིས་རབ་ཏུ་བཤད། །རྒྱལ་བ་དེས་ཀྱང་མདོ་སྡེ་འདི་བཤད་ནས། །

46-1-82b

འཇིག་རྟེན་མགོན་པོ་གཙུག་ལག་ཁང་བཞུགས་ཏེ། །སྟན་གཅིག་སྟེང་དུ་མཉམ་པར་གཞག་ནས་སུ། །བསྐལ་པ་བརྒྱད་བཅུ་རྩ་བཞིར་ཚང་བར་བརྟགས། །འདྲེན་པ་གཙུག་ལག་ཁང་བཞུགས་མི་འབྱུང་བར། །དགེ་ཚུལ་
དེ་དག་རྣམས་ཀྱིས་རིག་གྱུར་ནས། །སངས་རྒྱས་ཡེ་ཤེས་ཟག་མེད་ཞི་བ་འདི། །སྲོག་ཆགས་བྱེ་བ་མང་པོ་རྣམས་ལ་བསྒྲགས། །སོ་སོར་ཁྲི་སྟན་བཤམས་ཏེ་འདུག་ནས་ནི། །དེ་དག་ལ་ཡང་མདོ་སྡེ་འདི་ཉིད་བཤད། །
བདེ་བར་གཤེགས་པ་དེ་ཡི་བསྟན་པ་ལ། །དེ་དག་དེ་འདྲའི་ཚུལ་དུ་དབང་བྱེད་དོ། །བདེ་གཤེགས་སྲས་པོ་དེ་དག་རེ་རེས་ཀྱང་། །དེ་ཡི་ཚེ་ན་སེམས་ཅན་སྟོང་ཕྲག་ནི། །གང་གཱ་དྲུག་བཅུའི་བྱེ་མ་སྙེད་ལ་བསྒྲགས། །སེམས་
ཅན་མཐའ་ཡས་པ་དག་རྣམ་པར་འདུལ། །རྒྱལ་བ་དེ་དག་མྱ་ངན་ཡོངས་འདས་ནས། །དེ་དག་སྤྱན་ནས་སངས་རྒྱས་བྱེ་བ་མཐོང་། །དེ་ཚེ་ཐོས་བྱས་རྣམས་དང་ལྷན་ཅིག་ཏུ། །རྐང་གཉིས་དམ་པ་ལ་ཡང་མཆོད་པ་བྱེད། །
སྤྱོད་པ་ཡངས་པ་ཁྱད་པར་འཕགས་སྤྱད་ནས། །དེ་དག་ཕྱོགས་བཅུར་བྱང་ཆུབ་སངས་རྒྱས་ཏེ། །རྒྱལ་བ་དེ་ཡི་སྲས་དེ་བཅུ་དྲུག་པོ། །ཕྱོགས་རྣམས་ཀུན་ན་རྒྱལ་བ་གཉིས་གཉིས་སོ། །དེ་ཚེ་གང་དག་ཐོས་
བྱས་དེ་དག་ཀྱང་། །རྒྱལ་བ་དེ་ཡི་ཉན་ཐོས་ཐམས་ཅད་དེ། །བདག་གིས་རྣམ་པ་ཐ་དད་ཐབས་རྣམས་ཀྱིས། །བྱང་ཆུབ་འདི་ཉིད་རབ་ཏུ་ཐོབ་པར་བྱས། །ང་ཡང་དེ་དག་ནང་དུ་གཏོགས་པར་གྱུར། །
ངས་ཀྱང་ཁྱེད་རྣམས་ཐམས་ཅད་ཐོས་པར་བྱས། །དེ་ཕྱིར་ད་དུང་ང་ཡི་ཉན་ཐོས་ཁྱེད། །བྱང་ཆུབ་འདི་ལ་ཐམས་ཅད་ཐབས་ཀྱིས་དགྲ། །གང་གི་ཕྱིར་ན་ང་ནི་ཆོས་འཆད་ཅིང་། །གང་ཕྱིར་བྱང་ཆུབ་
མཆོག་འདི་ངས་དཀྲི་བ། །རྒྱུ་འདི་རྐྱེན་འདི་དེ་ཚེ་སྔོན་བྱུང་ངོ་། །དགེ་སློང་དག་གི་གནས་འདིར་མ་འཇིགས་ཤིག །ཇི་ལྟར་དགོན་པ་མ་རུངས་བཟོད་རླག་པ། །སྟོང་པ་གནས་མེད་རྟེན་ཀྱང་མེད་པ་ལ། །

46-1-83a

གཅན་ཟན་རབ་ཏུ་མང་ཞིང་ཆུ་མེད་དོ། །དེ་ནི་བྱིས་པ་འཇིགས་པར་བྱེད་པ་ཡིན། །དེ་ལ་སྐྱེས་བུ་སྟོང་ཕྲག་དུ་མ་རྣམས། །དགོན་པ་དེར་ནི་དེ་དག་ཞུགས་པར་གྱུར། །དགོན་པ་དེ་ཡང་སྟོང་ཞིང་རིང་བ་ནི། །
དཔག་ཚད་ལྔ་བརྒྱ་སྙེད་ཏུ་ཚང་བར་གྱུར། །མྱ་ངམ་དགོན་པ་རབ་ཏུ་འཇིགས་པ་ན། །དེ་ན་དེ་ཡི་མཚོན་མར་གང་གྱུར་པ། །སྐྱེས་བུ་ཕྱུག་ཅིང་དྲན་ལྡན་གསལ་བ་སྟེ། ཤིན་ཏུ་དཔའ་ཞིང་རྟུལ་ལ་འཇིགས་པ་མེད། །
སྲོག་ཆགས་བྱེ་བ་མང་པོ་དེ་དག་སྐྱོ། །དེ་ཚེ་མཚོན་མ་དེ་ལ་སྨྲས་པ་ནི། །འཕགས་པ་བདག་ཅག་སྐྱོ་སྟེ་མི་ནུས་ན། །བདག་ཅག་དེ་རིང་འདི་ནས་ལྡོག་པར་དགའ། །དེ་ཚེ་མཁས་ཤིང་ཤིན་དུ་འཛངས་པ་ཡི། །འདྲེན་པ་དེ་
ཡང་དེ་ཚེ་ཐབས་སེམས་ཏེ། །ཀྱི་ཧུད་བྱིས་པ་འདི་དག་ཐམས་ཅད་ནི། །བདག་ཉིད་ལྡོག་པར་རིན་པོ་ཆེ་ལས་ཉམས། །འདི་ལྟར་ང་ཡིས་རྫུ་འཕྲུལ་སྟོབས་ཀྱིས་དེང་། །ཁང་པ་བྱེ་བ་སྟོང་གིས་རབ་བརྒྱན་ཞིང་། །
གཙུག་ལག་ཁང་དང་ཚལ་བུས་བརྒྱན་པ་ཡི། །གྲོང་ཁྱེར་ཆེན་པོ་མངོན་པར་སྤྲུལ་ནས་སུ། །རྫིང་དང་འབབ་ཆུ་དག་ཀྱང་མངོན་པར་སྤྲུལ། །ཀུན་དགའ་དང་ནི་མེ་ཏོག་དག་གིས་བརྒྱན། །སྒོ་དང་རྩིག་པས་ཤིན་
དུ་མཛེས་བྱས་ཤིང་། །སྐྱེས་པ་བུད་མེད་མཚུངས་མེད་རྣམས་ལྡན་པ། །སྤྲུལ་ནས་དེ་དག་རྣམས་ལ་འདི་སྐད་དུ། །འཇིགས་པར་མ་བྱེད་རབ་ཏུ་དགའ་བར་བྱོས། །གྲོང་ཁྱེར་མཆོག་ཏུ་ཁྱེད་རྣམས་ད་ཕྱིན་གྱིས། །
ཞུགས་ཏེ་དོན་རྣམས་མྱུར་དུ་གྱིས་ཤེས་སྨྲས། །ཅི་ནས་དེ་དག་ཐམས་ཅད་ཕར་འགྲོ་བར། །དབུགས་ཕྱུང་བྱ་བའི་ཕྱིར་ནི་ཚིག་སྨྲས་པ། །དགོན་པ་མ་ལུས་ཀུན་ལས་རྒལ་ཟིན་ཏེ། །མྱ་ངན་འདས་ཟིན་
སེམས་ནི་དགའ་བར་བྱོས། །ཐམས་ཅད་ངལ་སོས་གྱུར་པའི་ཚུལ་རིག་ནས། ཤིན་ཏུ་རི་མོ་བྱས་ཏེ་ཡང་སྨྲས་པ། །ཚུར་ཤོག་ཁོ་བོས་སྨྲས་པ་རྣམས་ལ་ཉོན། །འདི་ནི་རྫུ་འཕྲུལ་གྲོང་ཁྱེར་སྤྲུལ་པ་སྟེ། །

46-1-83b

ཁྱེད་རྣམས་སྐྱོ་བར་ཁོ་བོས་རིག་པས་ན། །ཁྱེད་རྣམས་ཕྱིར་མི་ལྡོག་པར་བྱ་བའི་ཕྱིར། །འདི་འདྲ་འདི་ནི་ཁོ་བོས་ཐབས་མཁས་ཡིན། །གླིང་དུ་འགྲོ་བའི་ཕྱིར་ནི་བརྩོན་འགྲུས་བསྐྱེད། །དགེ་སློང་ང་ཡང་དེ་བཞིན་མཚོན་
མ་སྟེ། །སྲོག་ཆགས་བྱེ་བ་སྟོང་གི་འདྲེན་པ་ཡིན། །ཉོན་མོངས་སྒོ་ངའི་སྦུབས་རྟོལ་མི་ནུས་ཞིང་། །སྐྱོ་བའི་སེམས་ཅན་དག་ཀྱང་དེ་བཞིན་མཐོང་། །དེ་ཕྱིར་དེ་ཡི་དོན་དུ་ངས་བསམས་ཏེ། །བསྟི་བའི་གནས་སུ་
མྱ་ངན་འདས་འདི་བྱས། །སྡུག་བསྔལ་ཐམས་ཅད་རྗེས་སུ་རྟོགས་པ་འདི། །དགྲ་བཅོམ་ས་ལ་ཁྱེད་ཅག་བྱ་བ་བྱས། །གང་གི་ཚེ་ན་ཁྱེད་ཅག་ལུགས་གནས་འདིར། །གནས་པར་དགྲ་བཅོམ་ཐམས་ཅད་མཐོང་ནས་
ནི། །དེ་ཡི་འོག་ཏུ་ཐམས་ཅད་འདིར་བསྡུས་ཏེ། །ཆོས་འདི་ཇི་བཞིན་ཡང་དག་དོན་བཤད་དོ། །དྲང་སྲོང་ཆེན་པོས་ཐེག་པ་གསུམ་བསྟན་པ། །རྣམ་འདྲེན་རྣམས་ཀྱི་ཐབས་ལ་མཁས་པ་སྟེ། །ཐེག་པ་གཅིག་སྟེ་གཉིས་
སུ་ཡོད་མ་ཡིན། །བསྟི་བའི་དོན་དུ་ཐེག་པ་གཉིས་བསྟན་ཏོ། །དགེ་སློང་དག་གི་དེ་ཕྱིར་དེ་རིང་ངས། །འདི་ཙམ་གྱིས་ནི་མྱ་ངན་མི་འདའ་སྟེ། །ཁྱོད་ཀྱིས་ཐམས་ཅད་མཁྱེན་གྱི་ཡེ་ཤེས་ཕྱིར། །བརྩོན་འགྲུས་
རླབས་ཆེན་དམ་པ་བསྐྱེད་པར་གྱིས། །ནམ་ཞིག་ཐམས་ཅད་མཁྱེན་གྱི་ཡེ་ཤེས་ཐོབ། །རྒྱལ་བའི་ཆོས་རྣམས་གང་དག་སྟོབས་བཅུ་དང་། །སུམ་བཅུ་རྩ་གཉིས་མཚན་གྱི་གཟུགས་ལྡན་པ། །སངས་རྒྱས་གྱུར་
ནས་མྱ་ངན་འདས་པ་ཡིན། །འདྲེན་པ་རྣམས་ཀྱི་བསྟན་པ་འདི་འདྲ་སྟེ། །བསྟི་བའི་ཕྱིར་ནི་མྱ་ངན་འདས་པ་གསུང་། །ངལ་སོས་རིག་ནས་མྱ་ངན་བཟླ་ཕྱིར་ཀུན། །ཐམས་ཅད་མཁྱེན་གྱི་ཤེས་ལ་དཀྲི་
ཞེས་བཤད། །དམ་པའི་ཆོས་པད་མ་དཀར་པོ་ལས་སྔོན་གྱི་སྦྱོར་བའི་ལེའུ་ཞེས་བྱ་སྟེ་བདུན་པའོ།། །། དམ་པའི་ཆོས་པད་མ་དཀར་པོ་བམ་པོ་བདུན་པ། དེ་ནས་ཚེ་དང་ལྡན་པ་བྱམས་མའི་བུ་གང་

46-1-84a

པོས། བཅོམ་ལྡན་འདས་ཐབས་མཁས་པའི་ཡེ་ཤེས་གཟིགས་པ་དང་། ལྡེམ་པོར་དགོངས་ཏེ་གསུངས་པ་བསྟན་པ་འདི་ལྟ་བུ་འདི་ཡང་ཐོས་ཉན་ཐོས་ཆེན་པོ་དེ་དག་ལུང་བསྟན་པ་ཡང་ཐོས་སྔོན་གྱི་སྦྱོར་བ་དང་ལྡན་
པའི་གཏམ་འདི་དང་བཅོམ་ལྡན་འདས་ཀྱི་ཁྱུ་མཆོག་ཏུ་གྱུར་པ་འདི་ཡང་ཐོས་ནས། ངོ་མཚར་དུ་གྱུར་རྨད་ཏུ་གྱུར་ཏེ་ཟང་ཟིང་མེད་པའི་སེམས་ཀྱིས་དགའ་བ་དང་མཆོག་ཏུ་དགའ་བས་ཁྱབ་པར་གྱུར་ནས། 
དེ་མཆོག་ཏུ་དགའ་བ་ཆེན་པོ་དང་ཆོས་ལ་གུས་པ་ཆེན་པོས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་འདི་སྙམ་དུ་འདི་ལྟར་ཁམས་ཐ་དད་པའི་འཇིག་རྟེན་གྱི་རྗེས་སུ་འཐུན་པར་འཇུག་པ་དང་ཐབས་
མཁས་པའི་ཡེ་ཤེས་གཟིགས་པ་མང་པོས་སེམས་ཅན་རྣམས་ལ་ཆོས་སྟོན་པ་དང་དེ་དང་དེ་ལ་ཆགས་པའི་སེམས་ཅན་རྣམས་རབ་ཏུ་འགྲེལ་པ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་
ཤིན་དུ་དཀའ་བ་མཛད་དེ། བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་ངོ་མཚར་ཏོ། །བཅོམ་ལྡན་འདས་འདི་ལ་ནི་བདག་ཅག་གིས་བགྱིད་པའི་རྔོ་ག་ལ་ཐོག །དེ་བཞིན་གཤེགས་པ་ཉིད་ཀྱིས་བདག་ཅག་གི་བསམ་
པ་དང་སྔོན་གྱི་སྦྱོར་བའི་སྤྱོད་པ་མཁྱེན་ཏོ་སྙམ་དུ་སེམས་བསྐྱེད་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་ནས་བཅོམ་ལྡན་འདས་ཉིད་ལ་ཕྱག་འཚལ་ཞིང་མིག་མི་
འཛུམས་པར་ལྟའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་བྱམས་མའི་བུ་གང་པོའི་སེམས་ཀྱི་བསམ་པ་ལ་གཟིགས་ནས་ཐམས་ཅད་དང་ལྡན་པའི་དགེ་སློང་གི་དགེ་འདུན་ལ་བཀའ་སྩལ་པ། དགེ་སློང་དག་
ཁྱེད་ངའི་ཉན་ཐོས་བྱམས་མའི་བུ་གང་པོ་འདི་ལ་ལྟོས། འདི་ནི་ངས་དགེ་སློང་གི་དགེ་འདུན་འདིའི་ནང་ན་ཆོས་སྒྲོག་པ་རྣམས་ཀྱི་མཆོག་ཏུ་བསྟན་པ་ཡང་དག་པའི་ཡོན་ཏན་མང་པོས་བསྟོད་པ། ངའི་བསྟན་པ་འདི་ལ་

46-1-84b

རྣམ་པ་མང་པོས་དམ་པའི་ཆོས་ཡོངས་སུ་འཛིན་པར་མངོན་པར་བརྩོན་པ། འཁོར་བཞི་ཡང་དག་པར་རབ་ཏུ་དགའ་བར་བྱེད་པ་ཡང་དག་པར་འཛིན་དུ་འཇུག་པ་ཡང་དག་པར་གཟེང་སྟོད་པ་ཆོས་འཆད་པས་ངལ་བ་མེད་པ་ཆོས་འདི་འཆད་
ནུས་པ་ཚངས་པ་མཚངས་པར་སྤྱོད་པ་རྣམས་ལ་ཕན་འདོགས་ནུས་པ་སྟེ། དགེ་སློང་དག་དེ་བཞིན་གཤེགས་པ་མ་གཏོགས་པར་གཞན་གྱིས་བྱམས་མའི་བུ་གང་པོ། དོན་ནམ་ཚིག་འབྲུས་ཡོངས་སུ་གཏུག་པར་
མི་ནུས་སོ། །དགེ་སློང་དག་འདི་ཇི་སྙམ་དུ་སེམས། འདི་ང་འབའ་ཞིག་གི་དམ་པའི་ཆོས་འཛིན་པ་ཡིན་སྙམ་དུ་སེམས་ན་དགེ་སློང་དག་ཁྱེད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དགེ་སློང་དག་ངས་མངོན་
པར་དྲན་ཏེ། འདས་པའི་དུས་ན་སངས་རྒྱས་བྱེ་བ་ཕྲག་དགུ་བཅུ་རྩ་དགུ་བྱུང་བའི་སངས་རྒྱས་བཅོམ་ལྡན་འདས་དེ་དག་གི་བསྟན་པ་ལ་འདི་ཉིད་ཀྱིས་དམ་པའི་ཆོས་ཡོངས་སུ་བཟུང་སྟེ། ཇི་ལྟར་ད་ལྟར་ང་ཡི་ཆོས་
སྒྲོག་པ་རྣམས་ཀྱི་མཆོག་ཏུ་གྱུར་པ་བཞིན་དུ་ཐམས་ཅད་དུ་ཡང་གྱུར་ཏོ། །ཐམས་ཅད་དུ་ཡང་སྟོང་པ་ཉིད་རྟོགས་པར་ཁོང་དུ་ཆུད་པར་གྱུར་ཏོ། །ཐམས་ཅད་དུ་ཡང་སོ་སོ་ཡང་དག་པར་རིག་པ་ཐོབ་པར་གྱུར་
ཏོ། །ཐམས་ཅད་ཏུ་ཡང་བྱང་ཆུབ་སེམས་དཔའི་མངོན་པར་ཤེས་པ་ལེགས་པར་རྟོགས་པར་ཁོང་དུ་ཆུད་པར་གྱུར་ཏོ། །ཤིན་ཏུ་ངེས་པར་ཆོས་སྟོན་པ་དང་ཐེ་ཚོམ་མེད་པར་ཆོས་སྟོན་པ་དང་ཡོངས་སུ་དག་པར་ཆོས་
སྟོན་པར་གྱུར་ཏོ། །སངས་རྒྱས་བཅོམ་ལྡན་འདས་དེ་དག་གི་བསྟན་པ་ལ་ཆོས་གཅལ་ཏེ་ཚངས་པར་སྤྱོད་པ་སྤྱད་དོ། །ཐམས་ཅད་དུ་ཡང་ཉན་ཐོས་སུ་ཀུན་གྱིས་ཤེས་ཏེ། དེ་ཐབས་འདིས་
སེམས་ཅན་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་གྲངས་མེད་པ་རྣམས་ཀྱི་དོན་བྱས་སོ། །སེམས་ཅན་དཔག་ཏུ་མེད་གྲངས་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་

46-1-85a

བྱས་སོ། །ཐམས་ཅད་ཏུ་ཡང་སངས་རྒྱས་ཀྱི་བྱ་བས་སེམས་ཅན་རྣམས་ལ་ཉེ་བར་གནས་པར་གྱུར་ཏོ། །ཐམས་ཅད་དུ་ཡང་བདག་གིས་སངས་རྒྱས་ཀྱི་ཞིང་ཡོངས་སུ་དག་པར་བྱས་སོ། །སེམས་
ཅན་དག་ཡོངས་སུ་སྨིན་པར་བྱ་བ་ལ་བརྩོན་པར་གྱུར་ཏོ། །དགེ་སློང་དག་རྣམ་པར་གཟིགས་ལ་སོགས་པ་དེ་བཞིན་གཤེགས་པ་བདུན་པོ་དེ་དག་གི་ཐ་མ་ནི་ང་ཡིན་ཏེ། དེ་དག་གི་ཡང་ཆོས་རྗོད་པའི་མཆོག་ཏུ་གྱུར་ཏོ། །
དགེ་སློང་དག་བསྐལ་པ་བཟང་པོ་འདི་ལ་མ་འོངས་པའི་དུས་ན་སངས་རྒྱས་སྟོང་དུ་སངས་རྒྱས་བཞིས་མ་ཚང་བ་གང་དག་འབྱུང་བ་དེ་དག་གི་བསྟན་པ་ལ་ཡང་། བྱམས་མའི་བུ་གང་པོ་འདི་ཉིད་ཆོས་སྟོན་པའི་མཆོག་ཏུ་འགྱུར། 
དམ་པའི་ཆོས་ཡོངས་སུ་འཛིན་པར་འགྱུར་རོ། །དེ་བཞིན་དུ་མ་འོངས་པའི་དུས་ན་སངས་རྒྱས་བཅོམ་ལྡན་འདས་དཔག་ཏུ་མེད་གྲངས་མེད་པའི་དམ་པའི་ཆོས་ཀུན་འཛིན་པར་འགྱུར་རོ། །སེམས་ཅན་དཔག་ཏུ་མེད་གྲངས་
མེད་པ་རྣམས་ཀྱི་དོན་བྱེད་པར་འགྱུར་རོ། །སེམས་ཅན་དཔག་ཏུ་མེད་གྲངས་མེད་པ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱེད་པར་འགྱུར་རོ། །རྟག་ཏུ་རྒྱུན་མི་ཆད་པར་འགྱུར་རོ། །
བདག་གི་སངས་རྒྱས་ཀྱི་ཞིང་ཡོངས་སུ་དག་པར་བྱ་བ་དང་། སེམས་ཅན་ཡོངས་སུ་སྨིན་པར་བྱ་བ་ལ་བརྩོན་པར་འགྱུར་རོ། །དེས་བྱང་ཆུབ་སེམས་དཔའི་སྤྱོད་པ་འདི་ལྟ་བུ་ཡོངས་སུ་རྫོགས་པར་བྱས་ཏེ། 
བསྐལ་པ་གྲངས་མེད་དཔག་ཏུ་མེད་པ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། 

46-1-85b

སངས་རྒྱས་བཅོམ་ལྡན་འདས་ཆོས་རབ་ཏུ་སྣང་བ་ཞེས་བྱ་བ་འཇིག་རྟེན་དུ་འབྱུང་སྟེ། སངས་རྒྱས་ཀྱི་ཞིང་འདི་ཉིད་ཏུ་འབྱུང་བར་འགྱུར་རོ། །དགེ་སློང་དག་ཡང་དེའི་ཚེ་སངས་རྒྱས་ཀྱི་ཞིང་འདི་སྟོང་གསུམ་གྱི་སྟོང་ཆེན་
པོའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་སངས་རྒྱས་ཀྱི་ཞིང་གཅིག་ཏུ་འགྱུར་ཏེ། དེ་རིན་པོ་ཆེ་སྣ་བདུན་གྱི་གཞི་ལ་ལག་མཐིལ་ལྟར་མཉམ་པ་རི་མེད་པ་རིན་པོ་ཆེ་སྣ་བདུན་གྱི་ཁང་པ་བརྩེགས་པས་
ཡོངས་སུ་གང་བར་འགྱུར་རོ། །ལྷའི་གཞལ་མེད་ཁང་དག་དང་ཉེ་བར་གྱུར་ཏེ། ལྷ་དག་གིས་ཀྱང་མི་མཐོང་མི་དག་གིས་ཀྱང་ལྷ་མཐོང་བར་འགྱུར་རོ། །དགེ་སློང་དག་དེའི་ཚེ་སངས་རྒྱས་ཀྱི་ཞིང་འདི་ན་ངན་
སོང་མེད་པར་འགྱུར་བུད་མེད་ཀྱང་མེད་དེ་སེམས་ཅན་དེ་དག་ཐམས་ཅད་ཀྱང་བརྫུས་ཏེ་སྐྱེ་བ། ཚངས་པར་སྤྱོད་པ་ཡིད་ལ་བྱེད་པའི་ལུས་འོད་རང་ལ་ཡོད་པ་རྫུ་འཕྲུལ་ཅན་ནམ་མཁའ་ལ་འགྲོ་བ་བརྩོན་འགྲུས་དང་ལྡན་པ་
དྲན་པ་དང་ལྡན་པ་ཤེས་རབ་དང་ལྡན་པ་ལུས་གསེར་གྱི་ཁ་དོག་ཅན་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལུས་བརྒྱན་པར་འགྱུར་རོ། །དགེ་སློང་དག་ཡང་དེའི་ཚེ་སངས་རྒྱས་ཀྱི་ཞིང་འདིར་སེམས་ཅན་དེ་དག་གི་
ཟས་རྣམ་པ་གཉིས་སུ་འགྱུར་ཏེ་གཉིས་གང་ཞེ་ན། འདི་ལྟ་སྟེ། ཆོས་ཀྱི་དགའ་བའི་ཟས་དང་བསམ་གཏན་གྱི་དགའ་བའི་ཟས་སོ། །དེའི་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་དཔག་ཏུ་མེད་པ་
འབྱུང་སྟེ། ཐམས་ཅད་ཀྱང་མངོན་པར་ཤེས་པ་ཆེན་པོ་ཐོབ་པ་སོ་སོ་ཡང་དག་པར་རིག་པ་རྣམས་རྟོགས་པར་ཁོང་དུ་ཆུད་པ་སེམས་ཅན་ལ་འདེམས་མཁས་པ་ཤ་སྟག་སྟེ། དེའི་ཉན་ཐོས་བགྲང་བ་ལས་འདས་པ་
འབྱུང་སྟེ། རྫུ་འཕྲུལ་ཆེ་བ་མཐུ་ཆེ་བ་རྣམ་པར་ཐར་པ་བརྒྱད་ལ་བསམ་གཏན་པ་ཤ་སྟག་གོ། །སངས་རྒྱས་ཀྱི་ཞིང་དེ། དེ་ལྟ་བུའི་ཡོན་ཏན་ཚད་མེད་པ་དང་ལྡན་པར་འགྱུར་རོ། །བསྐལ་པ་ནི་རིན་པོ་ཆེ་སྣང་བ་ཞེས་བྱ་

46-1-86a

བར་འགྱུར་རོ། །འཇིག་རྟེན་གྱི་ཁམས་དེ་ནི་ཤིན་ཏུ་རྣམ་པར་དག་པ་ཞེས་བྱ་བར་འགྱུར་རོ། །དེའི་ཚེའི་ཚད་ནི་བསྐལ་པ་གྲངས་མེད་དཔག་ཏུ་མེད་པར་འགྱུར་རོ། །བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རབ་ཏུ་སྣང་བ་དེ་ཡོངས་སུ་མྱ་ངན་ལས་འདས་ནས་ཀྱང་། དམ་པའི་ཆོས་ཡུན་རིང་དུ་གནས་པར་འགྱུར། འཇིག་རྟེན་གྱི་ཁམས་དེ་རིན་པོ་ཆེའི་མཆོད་རྟེན་གྱིས་
གང་བར་འགྱུར་རོ། །དགེ་སློང་དག་དེ་ལྟར་བཅོམ་ལྡན་འདས་དེའི་སངས་རྒྱས་ཀྱི་ཞིང་དེ་ཡོན་ཏན་བསམ་གྱིས་མི་ཁྱབ་པ་དང་ལྡན་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་
གཤེགས་པས་དེ་སྐད་ཅེས་གསུངས་ནས། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །ང་ཡི་བུ་ནི་ཐབས་མཁས་ལེགས་བསླབས་པས། །ཇི་ལྟར་སྤྱོད་པ་སྤྱད་པར་གྱུར་པ་དང་། །
ཇི་ལྟར་བྱང་ཆུབ་སྤྱོད་པ་འདིར་སྤྱད་པ། །དོན་དེ་ང་ལས་ཉོན་ཅིག་དགེ་སློང་དག །ཐེག་པ་རླབས་པོ་ཆེས་ནི་སྐྲག་འགྱུར་ཞིང་། །འདི་ན་སེམས་ཅན་དམན་ལ་མོས་རིག་ནས། །བྱང་ཆུབ་སེམས་དཔའ་འདི་
དག་ཉན་ཐོས་གྱུར། །རང་རྒྱལ་བྱང་ཆུབ་པར་ཡང་རབ་ཏུ་སྟོན། །ཐབས་ལ་མཁས་པ་བརྒྱ་ཕྲག་དུ་མ་ཡིས། །བྱང་ཆུབ་སེམས་དཔའ་མང་པོ་སྨིན་པར་བྱེད། །འདི་སྐད་བདག་ཅག་ཉན་ཐོས་བདག་
ཅག་ནི། །བྱང་ཆུབ་དམ་པ་མཆོག་ལས་རིང་ཞེས་སྨྲ། །དེ་དག་རྗེས་སུ་སྤྱོད་པ་དེ་སློབ་པས། །སེམས་ཅན་བྱེ་བ་འདི་དག་སྨིན་པར་འགྱུར། །དམན་ལ་མོས་ཤིང་ལེ་ལོ་ཅན་གྱི་ཚུལ། །དེ་དག་ཐམས་ཅད་
མཐར་གྱིས་སངས་རྒྱས་འགྱུར། །དེ་དག་མི་ཚོར་བར་ནི་སྤྱད་པ་སྤྱོད། །བདག་ཅག་ཉན་ཐོས་བྱེད་པ་ཆུང་བ་ཡིན། །ཤི་འཕོ་སྐྱེ་བ་ཀུན་ལས་རབ་ཏུ་སྐྱོ། །བདག་གི་ཞིང་ཡང་ཡོངས་སུ་དག་པར་བྱེད། །བདག་ཉིད་འདོད་ཆགས་བཅས་

46-1-86b

ཤིང་ཞེ་སྡང་བཅས། །གཏི་མུག་བཅས་པར་ཡང་ནི་རབ་ཏུ་སྟོན། །སེམས་ཅན་ལྟ་ལ་ཆགས་པར་རིག་ནས་ཀྱང་། །དེ་ཡི་ལྟ་བ་རྣམས་ལ་ཉེ་བར་གནས། །ང་ཡི་ཉན་ཐོས་མང་དུ་དེ་ལྟར་སྤྱོད། །སེམས་ཅན་ཐབས་ཀྱིས་རྣམ་
པར་གྲོལ་བར་བྱེད། །དེ་ཡིས་སྤྱོད་པ་ཐམས་ཅད་རབ་བསྟན་ན། །མི་མཁས་མི་རྣམས་ཤིན་ཏུ་མྱོས་པར་འགྱུར། །དགེ་སློང་གང་པོ་ང་ཡི་ཉན་ཐོས་འདི། །སངས་རྒྱས་རྣམས་ཀྱི་ཡེ་ཤེས་འདི་ཚོལ་ཕྱིར། །སྔོན་གྱི་
སངས་རྒྱས་བྱེ་བ་སྟོང་ལ་སྤྱད། །དེ་དག་རྣམས་ཀྱི་དམ་ཆོས་ཡོངས་སུ་བཟུང་། །ཀུན་དུ་འདི་ནི་ཉན་ཐོས་མཆོག་ཏུ་གྱུར། །མང་དུ་ཐོས་ཤིང་འཇིགས་མེད་སྣ་ཚོགས་རྗོད། །རྟག་ཏུ་མི་སྐྱོ་ཡང་དག་དགའ་བར་བྱེད། །
རྟག་ཏུ་སངས་རྒྱས་བྱེ་བས་ཉེ་བར་གནས། །རྟག་ཏུ་མངོན་ཤེས་ཆེན་པོས་རྟོགས་པར་རིག །སོ་སོ་ཡང་དག་རིག་པ་ཐོབ་པར་གྱུར། །སེམས་ཅན་རྣམས་ཀྱི་དབང་པོ་སྤྱད་ཡུལ་ཤེས། །རྟག་ཏུ་རྣམ་པར་དག་པའི་ཆོས་
ཀྱང་འཆད། །དམ་པའི་ཆོས་ཀྱི་མཆོག་ཀྱང་རབ་འཆད་ཅིང་། །བླ་ན་མེད་པའི་ཐེག་པ་མཆོག་འདི་ལ། །སེམས་ཅན་བྱེ་བ་ཕྲག་སྟོང་ཡོངས་སྨིན་བྱེད། །བདག་གི་ཞིང་མཆོག་རྣམ་པར་དག་པར་བྱེད། །མ་འོངས་དུས་ཀྱི་
ཚེ་ཡང་དེ་བཞིན་དུ། །སངས་རྒྱས་བྱེ་བ་ཕྲག་སྟོང་མཆོད་པར་འགྱུར། །དམ་པའི་ཆོས་མཆོག་རྣམས་ཀྱང་རབ་ཏུ་འཛིན། །བདག་གི་ཞིང་ཡང་ཡོངས་སུ་དག་བྱེད་འགྱུར། །རྟག་ཏུ་འཇིགས་པ་མེད་པར་ཆོས་འཆད་དེ། །
ཐབས་ལ་མཁས་པ་བྱེ་བ་ཕྲག་སྟོང་གིས། །ཐམས་ཅད་མཁྱེན་གྱི་ཡེ་ཤེས་ཟག་མེད་ལ། །སེམས་ཅན་མང་པོ་ཡོངས་སུ་སྨིན་པར་བྱེད། །མི་ཡི་འདྲེན་པ་རྣམས་ལ་དེས་མཆོད་ནས། །དམ་པའི་ཆོས་མཆོག་རྟག་ཏུ་
བཟུང་ནས་ནི། །འཇིག་རྟེན་དུ་ཡང་རང་བྱུང་སངས་རྒྱས་འགྱུར། །ཆོས་རབ་སྣང་ཞེས་ཕྱོགས་སུ་རབ་ཏུ་གྲགས། །དེ་ཡི་ཞིང་ཡང་ཤིན་དུ་རྣམ་དག་འགྱུར། །རིན་ཆེན་སྣ་བདུན་རྟག་ཏུ་ཁྱད་པར་འཕགས། །བསྐལ་པ་དེ་ནི་རིན་ཆེན་སྣང་

46-1-87a

བ་ཡིན། །འཇིག་རྟེན་ཁམས་དེ་ཤིན་དུ་རྣམ་དག་ཡིན། །མངོན་ཤེས་ཆེ་ལ་ཤིན་དུ་མཁས་པ་ཡིན། །བྱང་ཆུབ་སེམས་དཔའ་བྱེ་བ་སྟོང་མང་སྟེ། །རྣམ་དག་བློ་ཅན་རྫུ་འཕྲུལ་ཆེ་རྣམས་ཀྱིས། །འཇིག་རྟེན་ཁམས་
དེ་ཡོངས་སུ་གང་བར་འགྱུར། །དེ་བཞིན་ཉན་ཐོས་དག་ཀྱང་བྱེ་བ་སྟོང་། །དེ་ཚེ་འདྲེན་པའི་དགེ་འདུན་འབྱུང་བ་ནི། །རྣམ་ཐར་བརྒྱད་ལ་བསམ་གཏན་རྫུ་འཕྲུལ་ཆེ། །སོ་སོ་ཡང་དག་རིག་པ་རྟོགས་པར་རིག །སེམས་ཅན་
ཐམས་ཅད་སངས་རྒྱས་ཞིང་དེ་ན། །ཚངས་པར་སྤྱོད་ཅིང་རབ་ཏུ་དགའ་བར་འགྱུར། །ཐམས་ཅད་གསེར་གྱི་མདོག་ཅན་བརྫུས་ཏེ་སྐྱེ། །སུམ་བཅུ་རྩ་གཉིས་མཚན་གྱི་གཟུགས་དང་ལྡན། །ཆོས་ལ་མངོན་ཤེས་དགའ་བ་
མ་གཏོགས་པར། །དེ་ན་ཟས་ཀྱི་འདུ་ཤེས་མེད་པར་འགྱུར། །དེར་ནི་བུད་མེད་རྣམས་ཀྱང་མི་འབྱུང་སྟེ། །ངན་སོང་དང་ནི་ངན་འགྲོས་འཇིགས་པ་མེད། །སེམས་ཅན་རབ་ཏུ་དགེ་བས་ཀུན་གང་སྟེ། །གང་པོ་ཡོན་ཏན་ཡང་
དག་རྫོགས་ལྡན་གྱི། །ཞིང་མཆོག་དེ་ནི་དེ་འདྲར་འགྱུར་བ་སྟེ། །འདི་ནི་ཅུང་ཟད་ཙམ་ཞིག་བཤད་པ་ཡིན། །དེ་ནས་དབང་དང་ལྡན་པར་གྱུར་པ་སྟོང་ཉིས་བརྒྱ་པོ་དེ་དག་འདི་སྙམ་དུ་སེམས་ཏེ། གལ་ཏེ་བདག་ཅག་ཀྱང་
བཅོམ་ལྡན་འདས་ཀྱིས་ཉན་ཐོས་ཆེན་པོ་གཞན་དག་ཇི་ལྟར་ལུང་བསྟན་པ་དེ་བཞིན་དུ། དེ་བཞིན་གཤེགས་པས་བདག་ཅག་སོ་སོར་ལུང་བསྟན་ན་ངོ་མཚར་དུ་གྱུར་རྨད་དུ་གྱུར་སྙམ་མོ། །དེ་ནས་བཅོམ་ལྡན་འདས་ཀྱིས་ཉན་
ཐོས་ཆེན་པོ་དེ་དག་གི་སེམས་ཀྱི་རྣམ་པར་རྟོག་པ་ཐུགས་ཀྱིས་ཐུགས་སུ་ཆུད་ནས། ཚེ་དང་ལྡན་པ་འོད་སྲུང་ཆེན་པོ་ལ་བཀའ་སྩལ་པ། འོད་སྲུང་དབང་དང་ལྡན་པར་གྱུར་པ་སྟོང་ཉིས་བརྒྱ་པོ་གང་དག་དེ་ལྟར་ང་མངོན་སུམ་དུ་གྱུར་པའི་
འོད་སྲུང་དབང་དང་ལྡན་པར་གྱུར་པ་སྟོང་ཉིས་བརྒྱ་པོ་གང་དག་ད་ལྟར་ང་མངོན་སུམ་དུ་གྱུར་པའི་སྟོང་ཉིས་བརྒྱ་པོ་འདི་དག་ཐམས་ཅད་འདིའི་འོག་ཏུ་ལུང་བསྟན་ཏོ། །འོད་སྲུང་དེ་ལ་ཉན་ཐོས་ཆེན་པོ་དགེ་སློང་ཀཽཎྜི་ནྱ་སངས་རྒྱས་བྱེ་བ་ཁྲག་ཁྲིག་

46-1-87b

བརྒྱ་སྟོང་ཕྲག་དྲུག་བཅུ་རྩ་གཉིས་ཀྱི་ཕ་རོལ་གྱི་ཡང་ཆེས་ཕ་རོལ་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་
ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཀུན་ཏུ་སྣང་བ་ཞེས་བྱ་བར་འཇིག་རྟེན་དུ་འབྱུང་སྟེ། འོད་སྲུང་དེ་ན་མིང་འདི་གཅིག་ཏུ་བཏགས་པ་དེ་བཞིན་གཤེགས་པ་ལྔ་བརྒྱ་འབྱུང་བར་
འགྱུར་རོ། །ཉན་ཐོས་ཆེན་པོ་ལྔ་བརྒྱ་པོ་ཐམས་ཅད་གཅིག་གི་འོག་ཏུ་གཅིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། ཐམས་ཅད་ཀྱང་ཀུན་དུ་སྣང་བ་ཞེས་བྱ་བར་འགྱུར་རོ། །
འདི་ལྟ་སྟེ་ག་ཡཱ་འོད་སྲུང་དང་ཆུ་ཀླུང་འོད་སྲུང་དང་ལྟེང་རྒྱས་འོད་སྲུང་དང་ནག་པོ་དང་འཆར་ཀ་ནག་པོ་དང་མ་འགགས་པ་དང་ནམ་གྲུ་དང་ཀ་པི་ན་དང་བ་ཀུ་ལ་དང་སྐུལ་བྱེད་དང་ལེགས་འོངས་ལ་སོགས་པ་དབང་དང་ལྡན་པར་གྱུར་པ་ལྔ་བརྒྱའོ། །
དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཀཽཎྜི་ནྱ་རིགས་ང་ཡི་ཉན་ཐོས་འདི། །མ་འོངས་དུས་ཀྱི་བསྐལ་པ་མཐའ་ཡས་ན། །དེ་བཞིན་གཤེགས་པ་འཇིག་རྟེན་མགོན་དུ་འགྱུར། །སྲོག་ཆགས་
བྱེ་བ་ཕྲག་སྟོང་རྣམ་པར་འདུལ། །མ་འོངས་དུས་ཀྱི་མཐའ་ཡས་བསྐལ་པ་ན། །སངས་རྒྱས་མང་པོ་མཐའ་ཡས་མཐོང་ནས་ནི། །ཀུན་དུ་སྣང་ཞེས་བྱ་བའི་རྒྱལ་བར་འགྱུར། །དེ་ཡི་ཞིང་ཡང་ཡོངས་
སུ་དག་པར་འགྱུར། །སངས་རྒྱས་སྟོབས་དང་འོད་ཏུ་ལྡན་པར་འགྱུར། །ཕྱོགས་བཅུ་དག་ཏུ་སྒྲ་ཡང་རྣམ་པར་བསྒྲགས། །སྲོག་ཆགས་བྱེ་བ་སྟོང་གིས་མདུན་གྱིས་བལྟས། །བྱང་ཆུབ་དམ་
པ་མཆོག་ཀྱང་སྟོན་པར་འགྱུར། །དེ་ནས་བྱང་ཆུབ་སེམས་དཔའ་བརྩོན་པ་རྣམས། །གཞལ་མེད་ཁང་མཆོག་དུ་ནི་མངོན་ཞུགས་ནས། །དེ་ན་གནས་ཤིང་རྗེས་སུ་རྣམ་པར་སེམས། །རྣམ་

46-1-88a

དག་ཚུལ་ཁྲིམས་རྟག་ཏུ་ལེགས་པའི་ཚུལ། །རྐང་གཉིས་གཙོ་བོ་དེ་ཡི་ཆོས་ཐོས་ནས། །ཞིང་གཞན་དུ་ནི་དེ་དག་རྟག་ཏུ་ཡང་། །དེ་དག་སངས་རྒྱས་སྟོང་ལ་ཕྱག་འཚལ་འགྲོ། །དེ་དག་ལ་ནི་རྒྱ་ཆེའི་
མཆོད་བྱས་ཏེ། །སྐད་ཅིག་གིས་ནི་རྣམ་པར་འདྲེན་པ་ཡིན། །ཞིང་དེར་དེ་དག་ཕྱིར་ཡང་འོང་བར་འགྱུར། །རབ་ཏུ་སྣང་ཞེས་བྱ་བ་མི་ཡི་གཙོ། །སྤྱོད་པའི་སྟོབས་ནི་དེ་ལྟར་དེ་འདྲར་འགྱུར། །བདེ་གཤེགས་དེ་ཡི་ཚེ་ཚད་
འགྱུར་བར་ནི། །བསྐལ་པ་སྟོང་ཕྲག་དྲུག་བཅུ་ཚང་བར་འགྱུར། །སྐྱོབ་པ་ཡོངས་སུ་མྱ་ངན་འདས་ནས་ནི། །དེ་ལས་ཉིས་གྱུར་དམ་ཆོས་དེར་གནས་འགྱུར། །དེ་ཡི་གཟུགས་བརྙན་འབྱུང་བར་འགྱུར་བ་ནི། །
དེ་ཡི་སུམ་འགྱུར་དེ་སྲིད་དུས་སུའོ། །སྐྱོབ་པ་དེ་ཡི་དམ་ཆོས་མེད་གྱུར་ནས། །ལྷ་རྣམས་དང་ནི་མི་དག་སྡུག་བསྔལ་འགྱུར། །སྐྱེས་མཆོག་ཀུན་དུ་སྣང་ཞེས་བྱ་བར་ཡང་། །མིང་གཅིག་པ་ཡི་རྒྱལ་བ་འབྱུང་བ་ནི། །
འདྲེན་པ་ལྔ་བརྒྱ་ཡོངས་སུ་ཚང་བ་སྟེ། །དེ་དག་གཅིག་གི་འོག་ཏུ་གཅིག་འབྱུང་འགྱུར། །དེ་དག་ཀུན་གྱི་བཀོད་པ་དེ་འདྲ་སྟེ། །རྫུ་འཕྲུལ་སྟོབས་དང་དེ་བཞིན་སངས་རྒྱས་ཞིང་། །འདུས་པ་དེ་བཞིན་དམ་ཆོས་དེ་འདྲ་
སྟེ། །དམ་པའི་ཆོས་གནས་པ་ཡང་མཉམ་པར་འགྱུར། །ཀུན་ཏུ་སྣང་བ་སྐྱེས་བུ་དམ་པ་ཡི། །ཇི་ལྟར་ང་ཡིས་སྔར་ནི་བཤད་པ་བཞིན། །དེ་ཚེ་སྒྲ་ནི་ལྷར་བཅས་འཇིག་རྟེན་དུ། །ཐམས་ཅད་དེ་དག་ལྟ་བུར་འགྱུར་བ་ཡིན། །
ཇི་ལྟར་འཇིག་རྟེན་ཐམས་ཅད་ངས་བསྟན་བཞིན། །འདི་ནི་ང་ཡི་འོག་ཏུ་འབྱུང་ངོ་ཞེས། །མཐར་གྱིས་དེ་ལྟར་དེ་དག་གཅིག་ནས་གཅིག །ཕན་ཞིང་སྙིང་བརྩེ་བ་དག་ལུང་བསྟན་འགྱུར། །འོད་སྲུང་ཁྱོད་ཀྱིས་དེ་རིང་དབང་ལྡན་པ། །
ལྔ་བརྒྱ་ལས་ནི་མི་ཉུང་འདི་དག་དང་། །ང་ཡི་ཉན་ཐོས་གཞན་ཡང་དེ་ལྟར་ཟུང་། །དེ་བཞིན་དུ་ཡང་ཉན་ཐོས་གཞན་ལ་བསྒོ། །དེ་ནས་དགྲ་བཅོམ་པ་ལྔ་བརྒྱ་པོ་དེ་དག །བཅོམ་ལྡན་འདས་ལས་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་

46-1-88b

མངོན་སུམ་དུ་ལུང་བསྟན་པ་ཐོས་ནས་ཚིམ་ཞིང་མགུ་ལ་ཡིད་རང་སྟེ། དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་འདི་སྐད་ཅེས་གསོལ་
ཏོ། །བཅོམ་ལྡན་འདས་བདག་ཅག་གིས་རྟག་ཏུ་རྒྱུན་མི་ཆད་པར་འདི་ནི་བདག་ཅག་གི་མྱ་ངན་ལས་འདའ་བ་ལགས་ཏེ། བདག་ཅག་ནི་ཡོངས་སུ་མྱ་ངན་ལས་འདས་སོ་སྙམ་སེམས་ལ། ཡོངས་སུ་བསྒོམས་པའི་ནོངས་པ་དེ་དག་
བདག་ཅག་གིས་བཤགས་སོ། །བཅོམ་ལྡན་འདས་འདི་ནི་བདག་གིས་མི་རྟོགས་མ་འཚལ་མི་མཁས་པ་ལགས་ཏེ། དེ་ཅིའི་སླད་དུ་ཞེ་ན། འདི་ལྟར་བདག་ཅག་དེ་བཞིན་གཤེགས་པའི་ཡེ་ཤེས་ཀྱིས་མངོན་པར་རྫོགས་པར་འཚང་
རྒྱ་བར་བགྱི་བ་ལགས་ན། འདི་ལྟ་བུའི་ཡེ་ཤེས་ཆུང་ངུས་འཚལ་ལོ་སྙམ་མོ། །འདི་ལྟ་སྟེ་དཔེར་ན། མི་ལ་ལ་ཞིག་མཛའ་བོའི་མཆིས་བྲང་དུ་མཆིས་ནས། དེ་ཕྱག་ལས་ཁོམ་འམ་མཆིས་ཉལ་བ་ལ་མཛའ་བོ་དེས། འདིའི་ནོར་བུ་
རིན་པོ་ཆེར་འདི་བྱའོ་ཞེས་རིན་ཐང་མ་མཆིས་པའི་ནོར་བུ་རིན་པོ་ཆེ་དེ་གོས་ཀྱི་མཐའ་མར་ཕུར་རོ། །བཅོམ་ལྡན་འདས་དེ་ནས་མི་དེ་མཆིས་ལངས་ཏེ་འཕགས་ནས་ཡུལ་ཕྱོགས་གཞན་དུ་མཆིས་ཏེ། དེ་དེ་ན་ཉོན་མོངས་པར་གྱུར་
ནས་འཚལ་མ་དང་རད་པ་ཚོལ་བའི་སླད་དུ། ཤིན་ཏུ་ཉོན་མོངས་ཤིང་ཆེར་འབད་དེ། གཞིག་ནས་ཁ་ཟས་ཅུང་ཟད་རྙེད་ནས་དེས་མགུ་སྟེ་རབ་ཏུ་དགའ་བར་གྱུར་ཏོ། །བཅོམ་ལྡན་འདས་དེ་ནས་མི་དེའི་མཛའ་བོ་རྙིང་པས་དེའི་
གོས་ཀྱི་མཐའ་མར་རིན་ཐང་མ་མཆིས་པའི་ནོར་བུ་རིན་པོ་ཆེ་ཕུར་མ་བགྱིས་པའི་མི་དེས་ཡང་མཐོང་ནས། དེས་དེ་ལ་འདི་སྐད་ཅེས། ཀྱེ་མི་ཁྱོད་ཟས་དང་སྐོམ་ཚོལ་བའི་ཕྱིར། ཅི་སྟེ་ཉོན་མོངས་སུ་འོང་ཞེས། 
ཀྱེ་མི་ཁྱོད་བདེ་བར་གནས་པར་བྱ་བའི་ཕྱིར་ངས་འདོད་པ་ཐམས་ཅད་གྲུབ་པར་བྱེད་པ་རིན་ཐང་མེད་པའི་ནོར་བུ་རིན་པོ་ཆེ་གོས་ཀྱི་མཐའ་མར་ཕུར་ཏེ། ཀྱེ་མི་ཁྱོད་ངས་ནོར་བུ་རིན་པོ་ཆེ་དེ་བྱིན་ནས། 

46-1-89a

ཀྱེ་མི་ཁྱོད་ཀྱི་གོས་ཀྱི་མཐའ་མ་ལ་ནོར་བུ་རིན་པོ་ཆེ་རིན་ཐང་མེད་པ་ཕུར་ན། བདག་ལ་ནམ་ཕུར། སུ་ཞིག་གིས་ཕུར། ཅིའི་རྒྱུ་ཅིའི་ཕྱིར་ཕུར་བ། ཀྱེ་མི་ཁྱོད་ཅུང་ཟད་ཀྱང་མི་ལྟ་འམ། ཀྱེ་མི་ཁྱོད་བྱིས་པའི་རང་བཞིན་ཅན་ཏེ། 
ཀྱེ་མི་ཁྱོད་ཉོན་མོངས་པར་ཟས་དང་གོས་ཚོལ་བ་ཙམ་གྱིས་ཆོག་པར་འཛིན་ཏམ། ཀྱེ་མི་ཁྱོད་སོང་ལ་རིན་ཐང་མེད་པའི་རིན་པོ་ཆེ་འདི་ཁྱེར་ཏེ། གྲོང་ཁྱེར་ཆེན་པོར་སོང་ལ་ནོར་དེས་ནོར་གྱི་བྱ་བ་ཐམས་ཅད་བྱོས་ཤིག་ཅེས་མཆི་
བ་དེ་བཞིན་དུ། བཅོམ་ལྡན་འདས་བདག་ཅག་ཀྱང་། དེ་བཞིན་གཤེགས་པས་ཐོག་མ་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཐམས་ཅད་མཁྱེན་པ་ཉིད་ཀྱི་སེམས་བསྐྱེད་པར་གྱུར་པ་སྟེ། བདག་ཅག་གིས་མ་རྟོགས་མ་འཚལ་
ཏེ། བཅོམ་ལྡན་འདས་དེའི་སླད་དུ་བདག་ཅག་ཀྱང་དགྲ་བཅོམ་པའི་ས་ནས་མྱ་ངན་ལས་འདས་པ་སྙམ་བགྱིད་དོ། །བཅོམ་ལྡན་འདས་བདག་ཅག་ཉོན་མོངས་པར་ཚོལ་ཞིང་། བཅོམ་ལྡན་འདས་འདི་ལྟ་བུའི་ཡེ་ཤེས་ཆུང་ངུས་འཚལ་
བར་འཛིན་ཏོ། །ཐམས་ཅད་མཁྱེན་པའི་ཡེ་ཤེས་སུ་སྨོན་པ་རྟག་ཏུ་མ་ཉམས་པ་དེས་བཅོམ་ལྡན་འདས་བདག་ཅག་དེ་བཞིན་གཤེགས་པས་ཁོང་དུ་ཆུད་པར་བསྟན་པ། དགེ་སློང་དག་ཁྱོད་འདི་ལྟར་མྱ་ངན་ལས་འདས་པར་མ་སེམས་
ཤིག་དགེ་སློང་དག་ངས་སྔོན་ཡོངས་སུ་སྨིན་པར་བྱས་པའི་དགེ་བའི་རྩ་བ་དེ་དག་ཁྱེད་ཀྱི་སེམས་ལ་ཡོད་དོ། །ཆོས་བཤད་ཅིང་བརྗོད་པས་ད་ལྟར་མྱ་ངན་ལས་འདའ་བ་ཡིན་པར་སེམས་པ་དེ་ཡང་། ང་ཡི་ཐབས་མཁས་པའོ་ཞེས་
དེ་ལྟར་བཅོམ་ལྡན་འདས་ཀྱིས་བདག་ཅག་ཁོང་དུ་ཆུད་པར་བགྱིས་ཏེ། དེ་རིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་ཀུན་ཤེས་ཀཽཎྜི་ནྱ་ལ་སོགས་པ་དབང་དང་ལྡན་པར་གྱུར་པ་ལྔ་བརྒྱ་པོ་དེ་དག་
གིས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །གང་ཕྱིར་མཆོག་རབ་བྱང་ཆུབ་ལུང་བསྟན་ཏེ། །འདི་འདྲ་བ་ཡི་དབུགས་འབྱིན་བླ་མེད་པ། །འདི་ཐོས་ནས་ནི་བདག་ཅག་དགའ་མགུ་སྟེ། །བཅོམ་ལྡན་མཐའ་ཡས་སྤྱན་ལ་ཕྱག་

46-1-89b

འཚལ་ལོ། །ཅི་ལྟར་བྱིས་པ་མི་མཁས་མ་འཚལ་བཞིན། །བདེ་བར་གཤེགས་པའི་བསྟན་ལ་བདག་ཅག་ནི། །མྱ་ངན་འདས་པ་ཙམ་གྱིས་འཚལ་འཛིན་པ། །ནོངས་པ་དེ་དག་ཁྱེད་ལ་རབ་ཏུ་བཤགས། །ཇི་ལྟར་དཔེར་ན་མི་འགའ་ལ་ལ་ཞིག །
དེ་ཡི་མཛའ་བོའི་ཁྱིམ་དེར་ཕྱིན་གྱུར་ནས། །གྲོགས་པོ་དེ་ནི་ནོར་བདག་ཕྱུག་པོ་སྟེ། །དེས་ནི་དེ་ལ་བཟའ་བཅའ་མང་སྩལ་ནས། །ཟས་ཀྱིས་དེ་ནི་ཡང་དག་ཚིམ་པར་བགྱིས། །རིན་ཆེན་དུ་མ་རི་བ་དེ་སྩལ་ཏེ། །དེ་ཡི་བླ་གོས་མཐའ་མར་ཕུར་ཏེ་
མདུད། །དེ་ལ་སྩལ་ནས་དེ་ནི་དགའ་བར་གྱུར། །བྱིས་པ་དེ་ཡང་དེ་ནས་མཆིས་གྱུར་པ། །ལངས་ནས་དེ་ཡང་གྲོང་ཁྱེར་གཞན་དུ་མཆིས། །དེ་ནི་ཉོན་མོངས་གྱུར་ཏེ་ཕོངས་ཤིང་ཚོལ། །འཚལ་མ་ཡོངས་སུ་ཚོལ་བས་ཤིན་ཏུ་སྐྱོ། །
ཁ་ཟས་དེ་བཙལ་མྱ་ངན་འདས་པར་གྱུར། །དེ་ནི་ཁ་ཟས་རྒྱ་ཆེ་མི་སེམས་ཤིང་། །དེ་ཡི་རིན་པོ་ཆེ་ཡང་མི་དྲན་གྱུར། །བླ་གོས་ལ་ནི་ཕུར་བར་དྲན་མ་མཆིས། །དེ་ནི་གྲོགས་པོ་སྔ་མ་དེ་མཐོང་ནས། །བདག་གི་ཁྱིམ་དུ་
རིན་ཆེན་བྱིན་པ་དེ། །དེ་ལ་ཤིན་དུ་ཡོངས་སུ་སྤྱོས་བརྒྱད་ནས། །རིན་ཆེན་གོས་ཀྱི་མཐའ་ན་མཆིས་པ་བསྟན། །དེ་ཡིས་མཐོང་ནས་བདེ་བ་མཆོག་དང་ལྡན། །རིན་ཆེན་དེ་ཡི་མཐུ་ནི་དེ་འདྲ་སྟེ། །ནོར་མང་
མཛོད་སྟོབས་ཅན་དུ་དེ་གྱུར་ནས། །འདོད་པའི་ཡོན་ཏན་ལྔ་དང་ཤིན་དུ་ལྡན། །དེ་བཞིན་བཅོམ་ལྡན་བདག་ཅག་འདི་ལྟ་བུར། །སྔོན་གྱི་སྲིད་པ་ཤིན་དུ་ཡུན་རིང་ནས། །དེ་བཞིན་གཤེགས་པ་ཉིད་ཀྱི་འདི་སྩལ་ཏེ། །
སྔོན་གྱི་སྨོན་ལམ་རྣམས་ནི་མ་འཚལ་བས། །བཅོམ་ལྡན་བདག་ཅག་འདི་ན་བྱིས་པའི་བློ། །བདག་ཅག་བདེ་གཤེགས་བསྟན་པ་མ་འཚལ་བས། །བདག་ཅག་མྱ་ངན་འདས་ཙམ་འཚལ་བར་གཟུང་། །བླ་མ་
མི་རེ་མི་ཚོལ་མི་སེམས་སོ། །འདི་འདྲའི་མྱ་ངན་འདས་པ་ཡོད་མེད་ཅེས། །འཇིག་རྟེན་གཉེན་གྱིས་བདག་ཅག་འཚལ་བར་བགྱིས། །མྱ་ངན་འདས་གང་མཆོག་ཏུ་བདེ་བ་དེ། །སྐྱེས་བུ་དམ་པ་རྣམས་ཀྱི་ཡེ་ཤེས་མཆོག །འདི་ལྟར་ཡངས་པ་རྒྱ་ཆེན་

46-1-90a

རྣམ་མངས་ཀྱི། ། བླ་ན་མེད་པའི་ལུང་བསྟན་རབ་ཐོས་ཏེ། ། མགོན་པོ་གཅིག་ལ་གཅིག་ལུང་སྟོན་པ་ཡིས། ། བདག་ཅག་དགའ་ཞིང་མགུ་བ་རངས་པ་སྐྱེས། ། དམ་པའི་ཆོས་པད་མ་དཀར་པོ་ལས་དགེ་སློང་ལྔ་བརྒྱ་ལུང་བསྟན་པའི་ལེ་འུ་ཞེས་
བྱ་སྟེ་བརྒྱད་པའོ།། །། དེ་ནས་དེའི་ཚེ་ཚེ་དང་ལྡན་པ་ཀུན་དགའ་བོ་འདི་སྙམ་དུ་བདག་ཀྱང་ལུང་བསྟན་པ་འདི་ལྟ་བུ་ཐོབ་པར་བྱའོ་སྙམ་དུ་སེམས། དེ་སྙམ་དུ་བསམས་ཏེ་རྗེས་སུ་རྣམ་པར་བསམས་ཏེ་སྨོན་ནས་སྟན་ལས་ལངས་ཏེ། བཅོམ་ལྡན་འདས་
ཀྱི་ཞབས་ལ་གཏུགས། །ཚེ་དང་ལྡན་པ་སྒྲ་གཅན་ཟིན་གྱིས་ཀྱང་། དེ་སྙམ་དུ་བསམས་ཏེ་རྗེས་སུ་རྣམ་པར་བསམས་ཤིང་སྨོན་ནས། བཅོམ་ལྡན་འདས་ཀྱི་ཞབས་ལ་གཏུགས་ཏེ་ཚིག་འདི་སྐད་ཅེས་གསོལ་ཏོ། །བཅོམ་ལྡན་འདས་
བདག་ཅག་ལ་ཡང་སྐབས་དབྱེ་བར་གསོལ། བདེ་བར་གཤེགས་པ་བདག་ཅག་ལ་སྐབས་དབྱེ་བར་གསོལ། བཅོམ་ལྡན་འདས་ནི་བདག་ཅག་གི་ཕ་དང་སྐྱེད་པ་དང་སྐྱབས་དང་གནས་དང་དཔུང་གཉེན་ལགས་སོ། །བཅོམ་ལྡན་འདས་བདག་
ཀྱང་བཅོམ་ལྡན་འདས་ཀྱི་སྲས། བཅོམ་ལྡན་འདས་ཀྱི་ཞབས་འབྲིང་བ་སྟེ། བཅོམ་ལྡན་འདས་ཀྱི་ཆོས་ཀྱི་མཛོད་འཛིན་པ་ལགས་སོ། །ཞེས་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ན་ཤིན་དུ་རི་མོ་བགྱིད་པར་གྱུར་ཏོ། །དེའི་སླད་
ཏུ་བཅོམ་ལྡན་འདས་ཀྱིས་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མྱུར་དུ་ལུང་བསྟན་ན། བཅོམ་ལྡན་འདས་མཐུན་པ་ལགས་སོ། །གཞན་ཡང་དགེ་སློང་ཉིས་སྟོང་ལྷག་ཙམ་སློབ་པ་དང་མི་སློབ་པ་དེ་དག་སྟན་ལས་ལངས་ཏེ་བླ་
གོས་ཕྲག་པ་གཅིག་ཏུ་གཟར་ནས་ཐལ་མོ་སྦྱར་ཏེ་བཅོམ་ལྡན་འདས་ཀྱི་སྤྱན་སྔ་ན། བཅོམ་ལྡན་འདས་ལ་ལྟ་ཞིང་འདུག་ནས་བསམས་པ་འདི་ཉིད་འདི་ལྟ་སྟེ། སངས་རྒྱས་ཀྱི་ཡེ་ཤེས་འདི་ཉིད་ལ་རྗེས་སུ་སེམས་ཏེ། 
བདག་ཅག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་པར་གྱུར་ཅིག་སྙམ་མོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་མ་འོངས་

46-1-90b

པའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་
ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རྒྱ་མཚོ་མཆོག་འཆང་བློ་རྣམ་པར་རོལ་པའི་མངོན་པར་ཤེས་པ་ཞེས་བྱ་བར་འཇིག་རྟེན་དུ་འབྱུང་སྟེ། སངས་རྒྱས་བྱེ་བ་
ཕྲག་དྲུག་བཅུ་རྩ་གཉིས་ལ་བསྟི་སྟང་དུ་བྱས། བཙུན་པར་བྱས། རི་མོར་བྱས་མཆོད་པར་བྱས་ཏེ། སངས་རྒྱས་བཅོམ་ལྡན་འདས་དེ་དག་གི་དམ་པའི་ཆོས་བླངས་ཤིང་བསྟན་པ་ཡོངས་སུ་བཟུང་སྟེ། བླ་ན་མེད་པ་ཡང་
དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་ཉི་ཤུའི་བྱེ་མ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
ཡོངས་སུ་སྨིན་པར་བྱེད་པར་འགྱུར་རོ། །ཁྱོད་ཀྱི་སངས་རྒྱས་ཀྱི་ཞིང་དེ་ཤིན་དུ་འབྱོར་ཅིང་། ས་གཞི་བཻ་དཱུརྱ་ལས་གྲུབ་པར་འགྱུར་རོ། །འཇིག་རྟེན་གྱི་ཁམས་དེ་ནི་མ་བསྙལ་བའི་རྒྱལ་མཚན་ཞེས་བྱ་བར་འགྱུར་རོ། །བསྐལ་
པ་དེ་ནི་ཡིད་ཏུ་འོང་བའི་སྒྲ་མངོན་པར་བསྒྲགས་པ་ཞེས་བྱ་བར་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱ་མཚོ་མཆོག་འཆང་བློ་རྣམ་པར་རོལ་པའི་མངོན་
པར་ཤེས་པ་དེའི་ཚེའི་ཚད་ནི་བསྐལ་པ་དཔག་ཏུ་མེད་པར་འགྱུར་ཏེ། བཅོམ་ལྡན་འདས་དེའི་ཚེའི་ཚད་བགྲང་བས་མཐར་ཕྱིན་པར་མི་ནུས་པའི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པར་འགྱུར་རོ། །ཀུན་དགའ་བོ་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱ་མཚོ་མཆོག་འཆང་བློ་རྣམ་པར་རོལ་པའི་མངོན་པར་ཤེས་པ་དེའི་ཚེའི་ཚད་ཇི་ཙམ་དུ་འགྱུར་བ་དེའི་ཉིས་འགྱུར་དུ་ཡོངས་སུ་མྱ་ངན་ལས་

46-1-91a

འདས་ནས་དམ་པའི་ཆོས་གནས་པར་འགྱུར་རོ། །བཅོམ་ལྡན་འདས་དེའི་དམ་པའི་ཆོས་ཅི་ཙམ་དུ་གནས་པར་འགྱུར་བ་དེའི་ཉིས་གྱུར་དུ་དམ་པའི་ཆོས་ཀྱི་གཟུགས་བརྙན་གནས་པར་འགྱུར་རོ། །ཡང་ཀུན་དགའ་བོ་
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱ་མཚོ་མཆོག་འཆང་བློ་རྣམ་པར་རོལ་པའི་མངོན་པར་ཤེས་པ་དེ་ལ་ཕྱོགས་བཅུའི་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་
ཕྲག་མང་པོ་གང་གཱའི་ཀླུང་གི་བྱེ་མ་སྙེད་དག་བསྔགས་པ་བརྗོད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ངས་ནི་དགེ་སློང་དགེ་འདུན་མོས་པར་བྱ། །ཀུན་
དགའ་བཟང་པོ་ང་ཡི་ཆོས་འཛིན་པ། །བདེ་གཤེགས་བྱེ་བ་དྲུག་བཅུ་མཆོད་བྱས་ནས། །མ་འོངས་དུས་ཀྱི་ཚེ་ན་རྒྱལ་བར་འགྱུར། །དེ་ཡི་མིང་ནི་རྒྱ་མཚོ་བློ་འཛིན་ཏེ། །མངོན་པར་ཤེས་ཐོབ་ཅེས་ཀྱང་དེ་ན་གྲགས། །
བལྟ་ན་སྡུག་པ་ཡོངས་སུ་དག་པའི་ཞིང་། །མ་བསྙལ་རྒྱལ་མཚན་རྒྱལ་བའི་བ་དན་ནོ། །བྱང་ཆུབ་སེམས་དཔའ་གང་གཱའི་བྱེ་སྙེད་དེར། །དེ་བས་ལྷག་པར་ཡོངས་སུ་སྨིན་པར་བྱེད། །རྒྱལ་བ་དེ་ནི་རྫུ་འཕྲུལ་ཆེ་བར་འགྱུར། །
ཕྱོགས་བཅུའི་འཇིག་རྟེན་དུ་ནི་སྒྲ་ཡང་གྲགས། །དེ་ཚེ་ཚེ་ཡང་དཔག་ཏུ་མེད་པར་འགྱུར། །འཇིག་རྟེན་རྣམས་ལ་ཕན་ཞིང་བརྩེ་ཕྱིར་གནས། །སྐྱོབ་པ་དེ་ནི་མྱ་ངན་འདས་འོག་ཏུ། །ཉིས་གྱུར་དེ་ཡི་དམ་ཆོས་གནས་པར་
འགྱུར། །དེ་ནས་གཟུགས་བརྙན་དེ་ཡི་ཉིས་གྱུར་དུ། །གནས་ཏེ་རྒྱལ་བ་དེ་ཡི་བསྟན་པ་ལ། །དེ་ནས་སེམས་ཅན་གང་གཱའི་བྱེ་མ་སྙེད། །སངས་རྒྱས་བྱང་ཆུབ་འདི་ལ་རྒྱུ་ཡང་སྐྱེད། །དེ་ནས་འཁོར་དེ་ན་བྱང་
ཆུབ་སེམས་དཔའ་ཐེག་པ་ལ་གསར་དུ་ཡང་དག་པར་ཞུགས་པ་བརྒྱ་སྟོང་འདི་སྙམ་དུ་སེམས་ཏེ། བྱང་ཆུབ་སེམས་དཔའ་རྣམས་ལ་ཡང་དེ་ལྟ་བུར་རྒྱ་ཆེར་ལུང་བསྟན་པ། བདག་ཅག་གིས་སྔོན་མ་ཐོས་

46-1-91b

ན་ཉན་ཐོས་རྣམས་ལ་ལྟ་ཅི་སྨོས་ཏེ། འདི་ལ་རྒྱུ་གང་དང་རྐྱེན་ཅི་ཞིག་ཡོད་སྙམ་མོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་གི་སེམས་ཀྱི་རྣམ་པར་རྟོག་པ་ཐུགས་ཀྱིས་ཐུགས་སུ་ཆུད་
ནས། བྱང་ཆུབ་སེམས་དཔའ་དེ་དག་ལ་བཀའ་སྩལ་པ། རིགས་ཀྱི་བུ་དག་སྐད་ཅིག་ཡུད་ཙམ་གཅིག་ལ་མཉམ་དུ་ང་དང་ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་
ནམ་མཁའ་མངོན་འཕགས་རྒྱལ་པོའི་སྤྱན་སྔར། བླ་ན་མེད་པར་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དེ་ནས་རིགས་ཀྱི་བུ་འདི་ནི་རྟག་ཏུ་རྒྱུན་མི་ཆད་པར་མང་དུ་ཐོས་པ་ལ་བརྩོན་པར་གྱུར་ཏོ། །ང་ནི་བརྩོན་འགྲུས་རྩོམ་པ་ལ་བརྩོན་
ཏེ། དེའི་ཕྱིར་ང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སངས་རྒྱས་སོ། །ཀུན་དགའ་བོ་བཟང་པོ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་དམ་པའི་ཆོས་ཀྱི་མཛོད་འཛིན་པར་འགྱུར་ཏེ་རིགས་ཀྱི་བུ་དག་འདི་ལྟ་སྟེ། བྱང་ཆུབ་
སེམས་དཔའ་རྣམས་ཡོངས་སུ་གྲུབ་པར་བྱ་བའི་ཕྱིར། རིགས་ཀྱི་བུ་འདིའི་སྨོན་ལམ་ནི་འདི་ཡིན་ནོ། །དེ་ནས་ཚེ་དང་ལྡན་པ་ཀུན་དགའ་བོས། བཅོམ་ལྡན་འདས་ལས་བདག་ཉིད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོས། 
བདག་གི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཐོས། སྔོན་གྱི་སྤྱོད་ལམ་དང་སྤྱོད་པ་ཡང་ཐོས་ནས་ཚིམ་ཞིང་མགུ་ལ་ཡིད་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་པར་གྱུར་ཏེ། དེའི་ཚེ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་
མང་པོའི་དམ་པའི་ཆོས་དང་བདག་གི་སྔོན་གྱི་སྨོན་ལམ་དྲན་ནོ། །དེ་ནས་ཚེ་དང་ལྡན་པ་ཀུན་དགའ་བོས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །ངོ་མཚར་གྱུར་པ་རྒྱལ་བ་དཔག་མེད་པས། །སྐྱོབ་པ་ཡོངས་སུ་མྱ་ངན་འདས་རྣམས་ཀྱི། །
ཆོས་བསྟན་པ་དག་བདག་ལ་དྲན་མཛད་པས། །ཁར་སང་དེ་རིང་བཞིན་དུ་དྲན་པར་གྱུར། །ཐེ་ཙོམ་མ་མཆིས་བྱང་ཆུབ་དོན་དུ་གནས། །བདག་གི་ཐབས་ལ་མཁས་པ་འདི་འདྲ་སྟེ། །བདག་ནི་བདེ་བར་གཤེགས་པའི་ཞབས་འབྲིང་ལགས། །

46-1-92a

བྱང་ཆུབ་དོན་དུ་དམ་པའི་ཆོས་ཀྱང་འཛིན། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་སྒྲ་གཅན་ཟིན་ལ་བཀའ་སྩལ་པ། སྒྲ་གཅན་ཟིན་ཁྱོད་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་འཇིག་རྟེན་གྱི་ཁམས་བཅུའི་རྡུལ་ཕྲ་རབ་ཀྱི་རྡུལ་སྙེད་ལ་སྟི་སྟང་དུ་བྱས་བཙུན་པར་བྱས་རི་མོ་བྱས་མཆོད་པར་བྱས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་
པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་པོ་ཆེ་སྣ་བདུན་གྱི་པད་མ་ལ་གོམ་པས་འགྲོ་བ་ཞེས་བྱ་བར་འགྱུར་
རོ། །རྟག་ཏུ་ཡང་སངས་རྒྱས་བཅོམ་ལྡན་འདས་དེ་དག་གི་སྲས་ཐུ་བོར་འགྱུར་ཏེ་འདི་ལྟ་སྟེ་དཔེར་ན། ད་ལྟར་ཡི་བཞིན་ནོ། །སྒྲ་གཅན་ཟིན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་རིན་པོ་ཆེ་སྣ་བདུན་གྱི་པད་མ་ལ་གོམ་པས་འགྲོ་བ་དེའི་ཚེའི་ཚད་ཀྱང་འདི་ལྟ་བུར་འགྱུར། ཡོན་ཏན་རྣམ་པ་ཐམས་ཅད་ཕུན་སུམ་ཚོགས་པ་ཡང་འདི་ལྟ་བུར་འགྱུར་ཏེ། ཇི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་རྒྱ་མཚོ་མཆོག་འཆང་བློ་རྣམ་པར་རོལ་པའི་མངོན་པར་ཤེས་པའི་ཡོན་ཏན་རྣམ་པ་ཐམས་ཅད་དང་ལྡན་པའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་བཞིན་དུ་འགྱུར་རོ། །སྒྲ་གཅན་
ཟིན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱ་མཚོ་མཆོག་འཆང་བློ་རྣམ་པར་རོལ་པའི་མངོན་པར་ཤེས་པ་དེ་ཡི་སྲས་ཐུ་བོར་ཡང་ཁྱོད་ཉིད་འགྱུར་ཏེ། དེ་ཡི་འོག་ཏུ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སྒྲ་གཅན་ཟིན་འདི་ངའི་བུ་ཐུ་བོ་སྟེ། །གཞོན་ནུར་གྱུར་པའི་ཚེ་ན་སྙིང་གི་

46-1-92b

བུ། །བྱང་ཆུབ་ཐོབ་ཀྱང་ང་ཡི་བུ་ཡིན་ཏེ། །དྲང་སྲོང་ཆེན་པོ་ཆོས་ཀྱི་བསྒོ་སྐལ་འཛིན། །མ་འོངས་དུས་ན་སངས་རྒྱས་བྱེ་མང་པོ། །དེ་དག་ཚད་མེད་པ་ནི་མཐོང་བར་འགྱུར། །བྱང་ཆུབ་ཡོངས་སུ་བཙལ་བར་བྱ་བའི་ཕྱིར། །རྒྱལ་བ་དེ་དག་ཀུན་གྱི་
སྲས་སུ་འགྱུར། །སྒྲ་གཅན་ཟིན་གྱིས་སྤྱོད་འདི་མི་ཤེས་ཏེ། །འདི་ཡི་སྨོན་ལམ་དག་ནི་ངས་ཤེས་སོ། །བདག་ནི་དེ་བཞིན་གཤེགས་པའི་སྲས་པོ་ཞེས། །འཇིག་རྟེན་གཉེན་ལ་ཡང་དག་སྤྱོམས་པར་བྱེད། །སྒྲ་གཅན་ཟིན་པ་ང་ཡི་བུ་འདི་ཡི། 
ཡོན་ཏན་བྱེ་བ་ཁྲག་ཁྲིག་དཔག་ཏུ་མེད། །དེ་ལ་ནམ་ཡང་ཚད་གཟུང་ཡོད་མེད་དེ། །དེ་ལྟར་འདི་ནི་བྱང་ཆུབ་དོན་དུ་གནས། །དེ་ནས་བཅོམ་ལྡན་འདས་ཀྱིས་ཉན་ཐོས་སློབ་པ་དང་མི་སློབ་པ་ཉིས་སྟོང་པོ་དེ་དག་བཅོམ་ལྡན་འདས་ཀྱི་སྤྱན་སྔ་ན། བཅོམ་ལྡན་
འདས་ལ་ལྟ་ཞིང་སེམས་དང་བ་དང་སེམས་མཉེན་པ་དང་སེམས་འཇམ་པར་བཅོམ་ལྡན་འདས་ཀྱིས་གཟིགས་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཉན་ཐོས་སློབ་པ་དང་མི་སློབ་པ་ཉིས་
སྟོང་པོ་འདི་དག་མཐོང་ངམ། གསོལ་པ་བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དགེ་སློང་ཉིས་སྟོང་པོ་དེ་དག་ཐམས་ཅད་མཉམ་དུ་བྱང་ཆུབ་
སེམས་དཔའི་སྤྱོད་པ་ཡང་དག་པར་སྒྲུབ་པར་འགྱུར་ཏེ། སངས་རྒྱས་བཅོམ་ལྡན་འདས་འཇིག་རྟེན་གྱི་ཁམས་ལྔ་བཅུའི་རྡུལ་ཕྲ་རབ་ཀྱི་རྡུལ་སྙེད་ལ་སྟི་སྟང་བྱས་བཙུན་པར་བྱས་རི་མོར་བྱས་མཆོད་པ་བྱས། དམ་པའི་ཆོས་བཟུང་ནས། ལུས་
ཐ་མ་ལ་སྐད་ཅིག་ཐང་ཅིག་ཡུད་ཙམ་གཅིག་ལ་ཕྱོགས་བཅུའི་འཇིག་རྟེན་གྱི་ཁམས་གཞན་དང་གཞན་དག་གི་སངས་རྒྱས་ཀྱི་ཞིང་རྣམས་སུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་མེ་ཏོག་གི་རྒྱལ་པོ་ཞེས་བྱ་བར་འཇིག་རྟེན་དུ་འབྱུང་སྟེ། དེ་དག་གི་ཚེའི་ཚད་ནི་བསྐལ་པ་ཚང་བར་འགྱུར། དེ་དག་གི་སངས་རྒྱས་ཀྱི་ཞིང་གི་ཡོན་ཏན་བཀོད་

46-1-93a

པ་ཡང་མཚུངས་པར་འགྱུར་རོ། །དེ་དག་གི་ཉན་ཐོས་ཀྱི་ཚོགས་དང་། བྱང་ཆུབ་སེམས་དཔའི་ཚོགས་ཀྱང་མཉམ་པར་འགྱུར་རོ། །དེ་དག་མཉམ་དུ་ཡོངས་སུ་མྱ་ངན་ལས་འདའ་བར་འགྱུར་རོ། །དེ་དག་གི་དམ་པའི་ཆོས་ཀྱང་མཉམ་པར་
གནས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཀུན་དགའ་གང་དག་ང་ཡི་མདུན་འཁོད་པ། །ཉན་ཐོས་ཉིས་སྟོང་འདི་དག་ཐམས་ཅད་ནི། །མ་འོངས་དུས་ན་དེ་བཞིན་གཤེགས་
འགྱུར་ཞེས། །ངས་ནི་མཁས་རྣམས་དེ་རིང་ལུང་བསྟན་ནོ། །དཔེ་བསྟན་པ་ནི་མཐའ་ཡས་རྣམ་དག་གིས། །སངས་རྒྱས་རྣམས་ལ་མཆོད་པ་མཆོག་བྱས་ནས། །ཐ་མའི་ལུས་དེ་ལ་ནི་གནས་ནས་སུ། །ང་ཡི་བྱང་ཆུབ་མཆོག་འདི་ཐོབ་
པར་འགྱུར། །ཕྱོགས་བཅུ་རྣམས་སུ་མིང་ནི་གཅིག་འགྱུར་ཏེ། །སྐད་ཅིག་དེ་བཞིན་ཡུད་ཙམ་ཅིག་ལ་ནི། །ཤིང་མཆོག་རྣམས་ཀྱི་དྲུང་དུ་འཁོད་ནས་སུ། །ཡེ་ཤེས་ཐོབ་སྟེ་སངས་རྒྱས་རྣམས་སུ་འགྱུར། །དེ་དག་རྣམས་ཀྱི་མིང་ནི་གཅིག་
གྱུར་ཏེ། །རིན་ཆེན་ཏོག་ཅེས་བྱ་བར་འཇིག་རྟེན་གྲགས། །དེ་དག་རྣམས་ཀྱི་ཞིང་མཆོག་མཚུངས་པར་འགྱུར། །ཉན་ཐོས་བྱང་ཆུབ་སེམས་དཔའི་ཚོགས་ཀྱང་མཉམ། །རྫུ་འཕྲུལ་གྱུར་པའང་འཇིག་རྟེན་འདི་ཀུན་ན། །མཉམ་ཞིང་དེ་དག་ཕྱོགས་
བཅུ་རྣམས་སུ་ཡང་། །ཆོས་བཤད་ནས་ནི་མཉམ་དུ་མྱ་ངན་འདའ། །དེ་དག་དམ་ཆོས་མཉམ་དུ་གནས་པར་འགྱུར། །དེ་ནས་སློབ་པ་དང་མི་སློབ་པའི་ཉན་ཐོས་དེ་དག །བཅོམ་ལྡན་འདས་ལས་མངོན་སུམ་དུ་རང་རང་གི་ལུང་བསྟན་པ་ཐོས་ནས་
ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས། བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །ལུང་བསྟན་པ་འདི་ཐོས་པས་ན། །འཇིག་རྟེན་སྒྲོན་མ་བདག་ཅག་ངོམས། །བདུད་རྩི་ཇི་ལྟར་
གཏོར་བ་བཞིན། །དེ་བཞིན་གཤེགས་པ་བདག་ཅག་བདེ། །བདག་ཅག་མི་མཆོག་མི་འགྱུར་ཞེས། །བདག་ཅག་ཡིད་གཉིས་དོགས་མ་མཆིས། །ལུང་བསྟན་པ་ནི་འདི་ཐོས་པས། །དེ་རིང་བདག་ཅག་བདེ་བ་ཐོབ། །དམ་པའི་ཆོས་

46-1-93b

པད་མ་དཀར་པོ་ལས། ཀུན་དགའ་བོ་དང་སྒྲ་གཅན་ཟིན་དང་དགེ་སློང་ཉིས་སྟོང་ལུང་བསྟན་པའི་ལེའུ་ཞེས་བྱ་སྟེ་དགུ་པའོ།། །། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སྨན་གྱི་རྒྱལ་པོ་ལ་སོགས་པ་བྱང་ཆུབ་སེམས་དཔའ་
བརྒྱད་ཁྲི་པོ་དེ་དག་ལ་བཀའ་སྩལ་པ། སྨན་གྱི་རྒྱལ་པོ་འཁོར་འདིའི་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པ་དང་དགེ་སློང་དང་དགེ་སློང་མ་དང་དགེ་བསྙེན་དང་
དགེ་བསྙེན་མ་ཉན་ཐོས་ཀྱི་ཐེག་པ་ཅན་དང་བྱང་ཆུབ་སེམས་དཔའི་ཐེག་པ་ཅན་མང་པོ་འདི་དག་གིས་ཆོས་ཀྱི་རྣམ་གྲངས་འདི་དེ་བཞིན་གཤེགས་པ་ལས་མངོན་སུམ་དུ་ཐོས་པ་དེ་དག་མཐོང་ངམ། གསོལ་པ་བཅོམ་ལྡན་འདས་མཐོང་
ལགས་སོ། །བདེ་བར་གཤེགས་པ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྨན་གྱི་རྒྱལ་པོ་འདི་དག་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་སྟེ། འཁོར་འདིའི་ནང་ན་གང་དག་ཐ་ན་
ཚིགས་སུ་བཅད་པ་གཅིག་ཐོས་པ་དང་། ཚིག་གཅིག་ཐོས་པ་དང་གང་དག་གིས་ཐ་ན་མདོ་སྡེ་འདི་ལ་སེམས་བསྐྱེད་པ་གཅིག་ཙམ་གྱི་རྗེས་སུ་ཡི་རང་བའི་འཁོར་བཞི་པོ་དེ་དག་ཐམས་ཅད་ནི་སྨན་གྱི་རྒྱལ་པོ་ངས་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་ལུང་བསྟན་ཏོ། །སྨན་གྱི་རྒྱལ་པོ་གང་ལ་ལ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། ཆོས་ཀྱི་རྣམ་གྲངས་འདི་ཉན་པ་དང་ཐ་ན་ཚིགས་སུ་བཅད་པ་གཅིག་ཐོས་ནས། སེམས་བསྐྱེད་པ་གཅིག་
ཙམ་གྱིས་ཀྱང་རྗེས་སུ་ཡི་རང་བར་འགྱུར་བའི་རིགས་ཀྱི་བུ་འམ་རིགས་ཀྱི་བུ་མོ་དེ་དག་སྨན་གྱི་རྒྱལ་པོ་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །སྨན་གྱི་རྒྱལ་པོ་རིགས་
ཀྱི་བུ་འམ་རིགས་ཀྱི་བུ་མོ་དེ་དག་གིས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཚང་བ་ལ་བསྙེན་བཀུར་བྱས་པ་ཡིན་ནོ། །སྨན་གྱི་རྒྱལ་པོ་རིགས་ཀྱི་བུ་འམ་རིགས་ཀྱི་བུ་མོ་དེ་དག་སངས་རྒྱས་བྱེ་བ་ཁྲག་

46-1-94a

ཁྲིག་བརྒྱ་སྟོང་མང་པོ་ལ་སྨོན་ལམ་བཏབ་པ་ཡིན་ཏེ། སྨན་གྱི་རྒྱལ་པོ་རིགས་ཀྱི་བུ་འམ་རིགས་ཀྱི་བུ་མོ་དེ་དག་སེམས་ཅན་རྣམས་ལ་སྙིང་བརྩེ་བའི་ཕྱིར། འཛམ་བུའི་གླིང་འདིར་མིར་སྐྱེས་པར་རིག་པར་བྱའོ། །གང་
དག་ཆོས་ཀྱི་རྣམ་གྲངས་འདི་ལས་ཐ་ན་ཚིགས་སུ་བཅད་པ་གཅིག་ཙམ་ཡང་འཛིན་ཏམ་ཀློག་གམ་སྟོན་ཏམ་ཡང་དག་པར་རྗོད་དམ་ཡི་གེར་འདྲི་འམ་བྲིས་ནས་རྗེས་སུ་དྲན་པར་བྱེད་དམ་དུས་དུས་སུ་ལྟ་འམ། གླེགས་
བམ་དེ་ལ་དེ་བཞིན་གཤེགས་པ་ལ་བྱ་བ་བཞིན་དུ་གུས་པ་སྐྱེད་དམ་སྟོན་པ་ལ་བྱ་བ་བཞིན་དུ་གུས་པར་བཀུར་སྟི་བྱེད་དམ་བཙུན་པར་བྱེད་དམ་རིམ་གྲོར་བྱེད་དམ་མཆོད་དམ་གླེགས་བམ་དེ་ལ་མེ་ཏོག་དང་བདུག་པ་དང་སྤོས་དང་
ཕྲེང་བ་དང་བྱུག་པ་དང་ཕྱེ་མ་དང་གོས་དང་གདུགས་དང་རྒྱལ་མཚན་དང་ལྷའི་བ་དན་དང་རོལ་མོའི་སྒྲ་ལ་སོགས་པ་དང་ཕྱག་འཚལ་བ་དང་ཐལ་མོ་སྦྱོར་བར་བྱེད་པས་མཆོད་དམ། སྨན་གྱི་རྒྱལ་པོ་རིགས་ཀྱི་བུ་འམ་རིགས་ཀྱི་བུ་
མོ་གང་ལ་ལ་ཆོས་ཀྱི་རྣམ་གྲངས་འདི་ལས་ཐ་ན་ཚིགས་སུ་བཅད་པ་གཅིག་ཙམ་ཡང་འཛིན་ཏམ་རྗེས་སུ་ཡི་རང་ན་སྨན་གྱི་རྒྱལ་པོ་དེ་དག་ཐམས་ཅད་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །སྨན་
གྱི་རྒྱལ་པོ་དེ་ལ་སྐྱེས་པ་འམ་བུད་མེད་གང་ལ་ལ་ཞིག་འདི་སྐད་དུ་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱསུ་འགྱུར་བའི་སེམས་ཅན་དེ་དག་ཅི་ལྟ་བུ་དག་ཅིག་
ཅེས་ཟེར་ན། སྨན་གྱི་རྒྱལ་པོ་སྐྱེས་པ་འམ་བུད་མེད་དེ་ལ་རིགས་ཀྱི་བུ་འམ་རིགས་ཀྱི་བུ་མོ་དེ་བསྟན་པར་བྱ་སྟེ་གང་གིས་ཆོས་ཀྱི་རྣམ་གྲངས་འདི་ལས་ཐ་ན་ཚིག་བཞི་པའི་ཚིགས་སུ་བཅད་པ་གཅིག་ཙམ་ཡང་འཛིན་
ཏམ་ཐོས་པར་བྱེད་དམ་བཤད་དམ་ཆོས་ཀྱི་རྣམ་གྲངས་འདི་ལ་རི་མོ་བྱེད་ན། རིགས་ཀྱི་བུ་འམ་རིགས་ཀྱི་བུ་མོ་དེ་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འཇིག་རྟེན་དུ་འབྱུང་བར་

46-1-94b

ལྟོས་ཤིག་ཅེས་བྱའོ། །དེ་ཅིའི་ཕྱིར་ཞེ་ན། སྨན་གྱི་རྒྱལ་པོ་རིགས་ཀྱི་བུ་འམ་རིགས་ཀྱི་བུ་མོ་དེ་དེ་བཞིན་གཤེགས་པར་རིག་པར་བྱ་བའི་ཕྱིར་ཏེ། གང་གིས་ཆོས་ཀྱི་རྣམ་གྲངས་འདི་ལས་ཐ་ན་ཚིགས་སུ་བཅད་པ་གཅིག་ཙམ་བཟུང་ན་
ཡང་ལྷ་དང་བཅས་པའི་འཇིག་རྟེན་གྱིས། དེ་བཞིན་གཤེགས་པ་ལ་བཀུར་སྟི་བྱ་བ་བཞིན་དུ་བྱ་ན། གང་ཞིག་ཆོས་ཀྱི་རྣམ་གྲངས་འདི་མཐའ་དག་ཆུབ་པར་འཛིན་ཏམ་འཆང་བ་འམ་ཀུན་ཆུབ་པར་བྱེད་པ་འམ་རབ་ཏུ་སྟོན་པ་འམ་ཡི་གེར་
འདྲི་འམ་བྲིས་ནས་རྗེས་སུ་དྲན་པར་བྱེད་པ་འམ། གླེགས་བམ་དེ་ལ་མེ་ཏོག་དང་བདུག་པ་དང་སྤོས་དང་ཕྲེང་བ་དང་བྱུག་པ་དང་ཕྱེ་མ་དང་གོས་དང་གདུགས་དང་རྒྱལ་མཚན་དང་ལྷའི་བ་དན་དང་རོལ་མོའི་སྒྲ་དང་ཐལ་མོ་སྦྱར་ཏེ། ཕྱག་འཚལ་
ཞིང་རབ་ཏུ་འདུད་པ་དག་གི་རི་མོ་བྱེད་པ་ལྟ་ཅི་སྨོས། སྨན་གྱི་རྒྱལ་པོ་རིགས་ཀྱི་བུ་འམ་རིགས་ཀྱི་བུ་མོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་གྲུབ་པར་རིག་པར་བྱའོ། །དེས་དེ་བཞིན་གཤེགས་པ་
མཐོང་བར་རིག་པར་བྱའོ། །འཇིག་རྟེན་ལ་ཕན་ཞིང་སྙིང་བརྩེ་བ་སྨོན་ལམ་གྱི་དབང་གིས་ཆོས་ཀྱི་རྣམ་གྲངས་འདི་རབ་ཏུ་བསྟན་པའི་ཕྱིར། འཛམ་བུའི་གླིང་འདིར་མིར་སྐྱེས་ཏེ། བདག་ཉིད་རྒྱ་ཆེར་ཆོས་མངོན་པར་འདུ་
བྱེད་པ་དང་སངས་རྒྱས་ཀྱི་ཞིང་རྒྱ་ཆེན་པོར་སྐྱེ་བ་བཞག་སྟེ། ཆོས་ཀྱི་རྣམ་གྲངས་འདི་ཤིན་དུ་ཡང་དག་པར་བསྟན་པའི་ཕྱིར་ང་ཡོངས་སུ་མྱ་ངན་ལས་འདས་ནས་སེམས་ཅན་རྣམས་ཕན་ཞིང་སྙིང་བརྩེ་བའི་དོན་
དུ་སྐྱེས་པར་རིག་པར་བྱའོ། །སྨན་གྱི་རྒྱལ་པོ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། གང་གིས་ཆོས་ཀྱི་རྣམ་གྲངས་འདི་བཤད་དམ་ཐ་ན་གསང་སྟེ་རྐུན་བུར་སེམས་ཅན་གཅིག་ལ་ཡང་ཡང་
དག་པར་བཤད་དམ་བསྟན་ན་ཡང་། སྨན་གྱི་རྒྱལ་པོ་རིགས་ཀྱི་བུ་འམ་རིགས་ཀྱི་བུ་མོ་དེ། དེ་བཞིན་གཤེགས་པའི་ཕོ་ཉ་ཡིན་པར་རིག་པར་བྱའོ། །རིགས་ཀྱི་བུ་འམ་རིགས་ཀྱི་བུ་མོ་དེ་དེ་བཞིན་གཤེགས་པའི་བྱ་བ་བྱེད་པ་

46-1-95a

སྟེ། དེ་བཞིན་གཤེགས་པས་མངགས་པར་རིག་པར་བྱའོ། །སྨན་གྱི་རྒྱལ་པོ་སེམས་ཅན་སྡང་བའི་སེམས་དང་ལྡན་པ་དང་སྡིག་པའི་སེམས་དང་ལྡན་པ་དང་དྲག་ཤུལ་གྱི་སེམས་དང་ལྡན་པ་གང་ལ་ལས། དེ་བཞིན་གཤེགས་
པ་ལ་མངོན་དུ་བསྐལ་པར་མི་སྙན་པར་སྨྲ་བ་བས། གང་ཞིག་མདོ་སྡེ་འདི་འཛིན་པ་ཆོས་སྨྲ་བ་དེ་ལྟ་བུ་ཁྱིམ་ན་གནས་པ་འམ་རབ་ཏུ་བྱུང་བ་དེ་དག་ལ་བདེན་པ་འམ་མི་བདེན་པའི་ཚིག་མི་སྙན་པ་གཅིག་བསྒྲགས་པ་དེ་སྡིག་པའི་
ལས་ཤིན་ཏུ་མི་ཟད་པར་བཤད་དོ། དེ་ཅིའི་ཕྱིར་ཞེ་ན། སྨན་གྱི་རྒྱལ་པོ་རིགས་ཀྱི་བུ་འམ་རིགས་ཀྱི་བུ་མོ་དེ་ནི་དེ་བཞིན་གཤེགས་པའི་རྒྱན་གྱིས་བརྒྱན་པར་རིག་པར་བྱ་བའི་ཕྱིར་ཏེ། སྨན་གྱི་རྒྱལ་པོ་གང་གིས་ཆོས་
ཀྱི་རྣམ་གྲངས་འདི་ཡི་གེར་བྲིས་ནས་གླེགས་བམ་དུ་བྱས་ཏེ་ཕྲག་པ་ལ་ཐོགས་པ་དེས། དེ་བཞིན་གཤེགས་པ་ཕྲག་པ་ལ་ཐོགས་པར་འགྱུར་ཏེ། དེ་གང་དང་གང་དུ་འགྲོ་བ་དེ་དང་དེར་སེམས་ཅན་རྣམས་ཀྱིས་ཐལ་མོ་སྦྱར་
བར་བྱ་བཀུར་སྟིར་བྱ་བཙུན་པར་བྱ་རི་མོ་བྱ་མཆོད་པར་བྱའོ། །ལྷ་དང་མིའི་མེ་ཏོག་དང་སྤོས་དང་ཕྲེང་བ་དང་བྱུག་པ་དང་ཕྱེ་མ་དང་གོས་དང་གདུགས་དང་རྒྱལ་མཚན་དང་ལྷའི་བ་དན་དང་རོལ་མོའི་སྒྲ་དང་བཟའ་བ་དང་བཅའ་བ་དང་ཁ་
ཟས་དང་བཏུང་བ་དང་བཞོན་པ་དང་མཆོག་ཏུ་འགྱུར་བའི་ལྷའི་རིན་པོ་ཆེའི་ཕུང་པོ་དག་གིས་ཆོས་སྨྲ་བ་དེ་ལ་བསྐུར་སྟི་བྱ། ཆོས་སྨྲ་བ་དེ་ལ་ལྷའི་རིན་པོ་ཆེའི་ཕུང་པོ་དག་དབུལ་བར་བྱའོ། །དེ་ཅིའི་ཕྱིར་ཞེ་ན། ཆོས་ཀྱི་རྣམ་གྲངས་འདི་
ལན་ཅིག་ཡང་དག་པར་རབ་ཏུ་བསྟན་ན་ཡང་འདི་ཐོས་པས་དཔག་ཏུ་མེད་གྲངས་མེད་པའི་སེམས་ཅན་རྣམས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་འགྲུབ་པར་འགྱུར་བའི་ཕྱིར་རོ། །དེ་ནས་བཅོམ་ལྡན་
འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སངས་རྒྱས་ཉིད་ཏུ་གནས་འདོད་ཅིང་། །རང་འབྱུང་ཡེ་ཤེས་འདོད་པ་ཡིས། །གང་རྣམས་ཚུལ་འདི་འཛིན་བྱེད་པ། །སེམས་ཅན་དེ་དག་བཀུར་སྟི་བྱ། །ཐམས་ཅད་

46-1-95b

མཁྱེན་ཉིད་གང་འདོད་དེ། །ཇི་ལྟར་མྱུར་དུ་ཐོབ་སྙམ་པ། །དེས་ནི་མདོ་སྡེ་འདི་བཟུང་སྟེ། །འཛིན་པ་ལ་ཡང་བཀུར་སྟི་བྱ། །སེམས་ཅན་རྣམས་ལ་བརྩེ་དོན་དུ། །མདོ་སྡེ་འདི་ནི་སུ་ཀློག་པ། །སེམས་ཅན་རྣམ་པར་འདུལ་བའི་ཕྱིར། །འཇིག་རྟེན་
མགོན་གྱིས་བཀྱེ་བ་ཡིན། །སེམས་ཅན་རྣམས་ལ་སྙིང་བརྩེའི་ཕྱིར། །གང་ཞིག་མདོ་སྡེ་འདི་འཛིན་པ། །སྐྱེ་བ་བཟང་པོ་བཏང་ནས་སུ། །དཔའ་བོ་དེ་ནི་འདིར་འོངས་སོ། །བླ་ན་མེད་པའི་མདོ་སྡེ་འདི། །ཕྱི་མའི་དུས་ལ་རབ་
འཆད་ཅིང་། །གང་ཕྱིར་དེ་ན་དེ་སྣང་བ། །སྐྱེ་བ་ལ་ནི་དེ་དབང་ངོ་། །ཆོས་སྨྲ་བ་ལ་རིན་ཆེན་འཐོར། །མི་ཡི་སྤོས་རབ་ཐམས་ཅད་དང་། །ལྷ་ཡི་མེ་ཏོག་དག་གིས་མཆོད། །ལྷ་ཡི་གོས་ཀྱིས་ཀུན་དུ་འགེབས། །ཕྱི་དུས་
འཇིགས་པ་དེ་ན་ཡང་། །མྱ་ངན་ང་འདས་མདོ་འཛིན་པ། །ཇི་ལྟར་རྒྱལ་དབང་རང་བྱུང་བཞིན། །དེ་ལ་རྟག་ཏུ་ཐལ་སྦྱོར་འགྱུར། །ལན་ཅིག་མདོ་སྡེ་འདི་སྨྲ་བ། །རྒྱལ་སྲས་དེ་ནི་མཆོད་པའི་ཕྱིར། །བཟའ་བཅའ་དེ་བཞིན་
ཟས་དང་སྐོམ། །གནས་དང་མལ་ཆ་གོས་བྱེ་སྦྱིན། །གང་རྣམས་མདོ་འདི་ཕྱི་དུས་ན། །ཡི་གེར་འདྲི་འཆང་ཉན་པ་ནི། །མི་ཡི་སྲིད་པར་ངས་བཏང་སྟེ། །དེ་བཞིན་གཤེགས་པའི་བྱ་བ་བྱེད། །གང་ཞིག་ང་ཡི་མདུན་འདུག་
ནས། །ཁྲོ་གཉེར་བྱས་ཤིང་གནོད་སེམས་ཀྱིས། །བསྐལ་པ་ཚང་བར་མི་སྙན་བསྒྲགས། །མི་དེ་སྡིག་པ་མང་དུ་འཕེལ། །མདོ་སྡེ་འདི་ནི་རབ་སྟོན་པ། །གང་རྣམས་མདོ་འཛིན་དེ་དག་ལ། །གཤེ་ཞིང་མི་བསྔགས་སྨྲ་བ་དེ། །
སྡིག་པ་ཤིན་ཏུ་དེ་མང་བཤད། །བྱང་ཆུབ་མཆོག་འདི་ཡོངས་ཚོལ་ཞིང་། །བསྐལ་པ་རྫོགས་པར་ཐལ་སྦྱར་ཏེ། །ཚིགས་བཅད་དུ་མ་ཁྲག་ཁྲིག་གིས། །མི་གང་ལ་ལ་མངོན་པར་བསྟོད། །དགའ་སྐྱེས་ང་ལ་བསྟོད་པ་ནི། །དེ་ལས་
བསོད་ནམས་ཆེས་མང་རྙེད། །མི་གང་དེ་ཡི་བསྔགས་བརྗོད་པ། །དེ་བས་བསོད་ནམས་མང་དུ་འཕེལ། །བསྐལ་པ་བྱེ་སྟོང་བཅྭ་བརྒྱད་ཏུ། །སྒྲ་དང་གཟུགས་དང་བྲོ་རྣམས་དང་། །ལྷ་ཡི་རེག་དང་ལྷ་སྤོས་ཀྱིས། །གཟུགས་བརྟེན་དེ་དག་སུས་མཆོད་དེ། །བསྐལ་པ་

46-1-96a

བྱེ་སྟོང་བཅྭ་བརྒྱད་ཏུ། །རྟེན་ལ་དེ་ལྟར་མཆོད་པ་བས། །ལན་ཅིག་མདོ་སྡེ་འདི་ཐོས་ན། །ངོ་མཚར་ཆེན་པོ་དེས་ཐོབ་འགྱུར། །སྨན་གྱི་རྒྱལ་པོ་ཁྱོད་མོས་པར་བྱ། ཁྱོད་ཀྱིས་ཁོང་དུ་ཆུད་པར་བྱའོ། །སྨན་གྱི་རྒྱལ་པོ་ངས་ཆོས་ཀྱི་རྣམ་གྲངས་
མང་པོ་བཤད་དོ་འཆད་དོ་བཤད་པར་བྱའོ། །སྨན་གྱི་རྒྱལ་པོ་ཆོས་ཀྱི་རྣམ་གྲངས་དེ་དག་ཐམས་ཅད་ཀྱི་ནང་ན། ཆོས་ཀྱི་རྣམ་གྲངས་འདི་ནི་འཇིག་རྟེན་ཐམས་ཅད་དང་མི་མཐུན་པ་སྟེ། འཇིག་རྟེན་ཐམས་ཅད་ཡིད་ཆེས་པར་མི་འགྱུར་
བའོ། །སྨན་གྱི་རྒྱལ་པོ་འདི་ནི་དེ་བཞིན་གཤེགས་པའི་མངོན་པར་ཤེས་པའི་ནང་གི་གསང་ཆེན་ཏེ། དེ་བཞིན་གཤེགས་པའི་སྟོབས་ཀྱིས་བསྲུངས་པ་སྔོན་མ་འཕེལ་བའོ། །གནས་འདི་ནི་སྔོན་མ་བསྟན་པ་སྟེ། སྨན་གྱི་རྒྱལ་
པོ་དེ་བཞིན་གཤེགས་པ་བཞུགས་པ་ན་ཡང་། ཆོས་ཀྱི་རྣམ་གྲངས་འདི་ལ་སྐྱེ་བོ་མང་པོ་སྤོང་ན། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་ལྟ་ཅི་སྨོས། སྨན་གྱི་རྒྱལ་པོ་དེ་བཞིན་གཤེགས་པ་ཡོངས་སུ་མྱ་ངན་
ལས་འདས་ནས། གང་དག་ཆོས་ཀྱི་རྣམ་གྲངས་འདི་ལ་དད་པ་དང་ཀློག་པ་དང་ཡི་གེར་འདྲི་བ་དང་བཀུར་སྟི་བྱེད་པ་དང་། གཞན་དག་ལ་ཡང་ཐོས་པར་བྱེད་པའི་རིགས་ཀྱི་བུ་འམ་རིགས་ཀྱི་བུ་མོ་དེ་དག་ནི། དེ་བཞིན་གཤེགས་པ་
འི་ཆོས་གོས་ཀྱིས་གཡོགས་པར་རིག་པར་བྱའོ། །འཇིག་རྟེན་གྱི་ཁམས་གཞན་ན་བཞུགས་པའི་དེ་བཞིན་གཤེགས་པ་རྣམས་ཀྱིས་གཟིགས་ཤིང་བྱིན་གྱིས་བརླབས་པའོ། །དེ་དག་སོ་སོ་རང་གི་
དད་པའི་སྟོབས་དང་དགེ་བའི་རྩ་བའི་སྟོབས་དང་སྨོན་ལམ་གྱི་སྟོབས་ཅན་དུ་འགྱུར་རོ། །སྨན་གྱི་རྒྱལ་པོ་རིགས་ཀྱི་བུ་འམ་རིགས་ཀྱི་བུ་མོ་དེ་དག་དེ་བཞིན་གཤེགས་པ་དང་གནས་གཅིག་ན་འདུག་པར་འགྱུར་
ཏེ། དེ་དག་གི་སྤྱི་བོ་ལ་དེ་བཞིན་གཤེགས་པའི་ཕྱག་གིས་སྙུགས་པར་འགྱུར་རོ། །སྨན་གྱི་རྒྱལ་པོ་ས་ཕྱོགས་གང་ན་ཆོས་ཀྱི་རྣམ་གྲངས་འདི་འཆད་དམ་སྟོན་ཏམ་ཡི་གེར་འདྲི་འམ་ཁ་ཏོན་བྱེད་དམ་ཡང་དག་པར་རྗོད་པའི་

46-1-96b

ས་ཕྱོགས་དེར། སྨན་གྱི་རྒྱལ་པོ་དེ་བཞིན་གཤེགས་པའི་མཆོད་རྟེན་རིན་པོ་ཆེ་ལས་བྱས་པ་མཐོ་ཞིང་ཆེ་བ་བྱའོ། །དེར་དེ་བཞིན་གཤེགས་པའི་སྐུ་གདུང་ངེས་པར་གཞག་མི་དགོས་སོ། །དེ་ཅིའི་ཕྱིར་ཞེ་ན། དེར་དེ་བཞིན་གཤེགས་པའི་
སྐུ་གདུང་གཅིག་ཏུ་འདུས་པ་གཞག་པར་འགྱུར་བའི་ཕྱིར་རོ། །ས་ཕྱོགས་གང་ན་ཆོས་ཀྱི་རྣམ་གྲངས་འདི་འཆད་དམ་སྟོན་ཏམ་ཀློག་གམ་ཡང་དག་པར་རྗོད་དམ་ཡི་གེར་འདྲི་འམ་གླེགས་བམ་དུ་བྱས་ཏེ་གཞག་པ་དེར་མཆོད་
རྟེན་བཞིན་དུ། བཀུར་སྟི་དང་བཙུན་པར་བྱ་བ་དང་རི་མོ་དང་མཆོད་པར་བྱའོ། །མེ་ཏོག་དང་བདུག་པ་དང་སྤོས་དང་ཕྲེང་བ་དང་བྱུག་པ་དང་ཕྱེ་མ་དང་གོས་དང་གདུགས་དང་རྒྱལ་མཚན་དང་ལྷའི་བ་དན་དང་རྣམ་པར་རྒྱལ་བའི་བ་དན་ཐམས་ཅད་དང་། 
གླུ་དང་རོལ་མོའི་སྒྲ་དང་གར་དང་སིལ་སྙན་དང་ཕེག་བརྡོབ་པ་ཐམས་ཅད་ཀྱིས་མཆོད་པར་བྱའོ། །སྨན་གྱི་རྒྱལ་པོ་སེམས་ཅན་གང་དག་དེ་བཞིན་གཤེགས་པའི་མཆོད་རྟེན་དེ་ལ་ཕྱག་འཚལ་བ་འམ་མཐོང་བ་རྙེད་པ་དེ་དག་ཐམས་
ཅད་ནི། སྨན་གྱི་རྒྱལ་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཤིན་དུ་ཉེ་བར་གྱུར་པར་རིག་པར་བྱའོ། །དེ་ཅིའི་ཕྱིར་ཞེ་ན། སྨན་གྱི་རྒྱལ་པོ་ཁྱིམ་ན་གནས་པ་དང་རབ་ཏུ་བྱུང་བའི་བྱང་ཆུབ་སེམས་དཔའ་མང་
པོ་དག །བྱང་ཆུབ་སེམས་དཔའི་སྤྱད་པ་སྤྱོད་ཀྱང་ཆོས་ཀྱི་རྣམ་གྲངས་འདི་ལྟ་བ་འམ་མཉན་པ་འམ་ཡི་གེར་འདྲི་བ་འམ་མཆོད་པར་ཡང་མི་རྙེད་དོ། །སྨན་གྱི་རྒྱལ་པོ་ཇི་ཙམ་དུ་ཆོས་ཀྱི་རྣམ་གྲངས་
འདི་མི་ཉན་པ་དེ་ཙམ་དུ། བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་ལ་མཁས་པ་མ་ཡིན་ནོ། །གང་གི་ཚེ་ཆོས་ཀྱི་རྣམ་གྲངས་འདི་མཉན་ཏེ་ཐོས་ནས་མོས་པ་དང་རྟོགས་
པ་དང་འཇུག་པ་དང་ཤེས་པ་དང་ཡོངས་སུ་འཛིན་པ་དེའི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྙེན་པར་འགྱུར་ཏེ། ཉེ་བར་གནས་པ་ཡིན་ནོ། །སྨན་གྱི་རྒྱལ་པོ་འདི་ལྟ་སྟེ་དཔེར་ན། མི་ལ་ལ་ཞིག་

46-1-97a

ཆུ་འདོད་པར་གྱུར་ཏེ་ཆུ་ཚོལ་ཞིང་། དེས་ཆུའི་ཕྱིར་སྐམ་སའི་ཕྱོགས་ཤིན་ཏུ་ཁྲོན་པ་རྐོར་བཅུག་སྟེ། དེ་རྐོ་བ་ན་སྐམ་ཞིང་སྐྱ་བའི་ས་འབྱིན་པར་མཐོང་སྟེ། མཐོང་ནས་འདི་ལྟར་འདི་ནས་ཆུ་ད་དུང་ཐག་རིང་ངོ་
སྙམ་དུ་སེམས་སོ། །དེ་ནས་དུས་གཞན་ཞིག་ན། མི་དེས་ས་གཤེར་བ་དང་འདྲེས་པ་འདམ་རྫབ་དང་ཆུའི་ཐིགས་པ་ཟག་པ་འབྱིན་ཅིང་ཁྲོན་པ་རྐོ་བའི་མི་དེ་དག་ལུས་ལ་འདམ་རྫབ་ཀྱིས་གོས་པར་མཐོང་སྟེ། དེ་ནས་
ཡང་སྨན་གྱི་རྒྱལ་པོ་མི་དེས་སྔ་ལྟས་དེ་མཐོང་ནས། དགོས་པ་དང་ཐེ་ཚོམ་མེད་དེ་འདི་ནས་ཆུ་ནི་ཉེའོ་སྙམ་མོ། །སྨན་གྱི་རྒྱལ་པོ་དེ་བཞིན་དུ་ཅི་ཙམ་དུ་ཆོས་ཀྱི་རྣམ་གྲངས་འདི་མི་ཉན། མི་འཛིན་ཁོང་དུ་ཆུད་པར་མི་བྱེད་
མི་འཇུག་མི་སེམས་པའི་བར་དུ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་རིང་བ་ཡིན་ནོ། །སྨན་གྱི་རྒྱལ་པོ་གང་གི་ཚེ་བྱང་ཆུབ་སེམས་དཔའ་
སེམས་དཔའ་ཆེན་པོ་དག་ཆོས་ཀྱི་རྣམ་གྲངས་འདི་ཉན་ཅིང་འཛིན་པ་དང་འཇུག་པ་དང་ཁ་ཏོན་དུ་བྱེད་པ་དང་སེམས་པ་དང་སྒོམ་པ་དེའི་ཚེ། དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཉེ་བར་གྱུར་པ་ཡིན་ཏེ། སྨན་
གྱི་རྒྱལ་པོ་ཆོས་ཀྱི་རྣམ་གྲངས་འདི་ལས་སེམས་ཅན་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྐྱེའོ། །དེ་ཅིའི་ཕྱིར་ཞེ་ན། ཆོས་ཀྱི་རྣམ་གྲངས་འདི་ནི་ལྡེམ་པོར་དགོངས་ཏེ་བཤད་པ་འགྲེལ་བའི་
མཆོག་ཡིན་པའི་ཕྱིར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡོངས་སུ་གྲུབ་པར་བྱ་བའི་ཕྱིར་ཆོས་གསང་བའི་གནས་བཤད་པ་
འོ། །སྨན་གྱི་རྒྱལ་པོ་བྱང་ཆུབ་སེམས་དཔའ་གང་ལ་ལ་ཞིག་ཆོས་ཀྱི་རྣམ་གྲངས་འདིས་སྐྲག་ཅིང་སྔངས་ཏེ་སྔངས་པར་གྱུར་ན། སྨན་གྱི་རྒྱལ་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཐེག་པ་ལ་གསེར་དུ་ཞུགས་པར་རིག་པར་བྱའོ། །གལ་

46-1-97b

ཏེ་ཡང་ཉན་ཐོས་ཀྱི་ཐེག་པ་ཅན་ཞིག་ཆོས་ཀྱི་རྣམ་གྲངས་འདིས་སྐྲག་ཅིང་སྔངས་ཏེ་སྔངས་པར་གྱུར་ན། སྨན་གྱི་རྒྱལ་པོ་དེ་ནི་ཉན་ཐོས་ཀྱི་ཐེག་པ་ཅན་གྱི་གང་ཟག་ང་རྒྱལ་ཅན་དུ་རིག་པར་བྱའོ། །སྨན་གྱི་རྒྱལ་པོ་བྱང་ཆུབ་སེམས་དཔའ་སེམས་དཔའ་
ཆེན་པོ་གང་ལ་ལ་ཞིག །དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་ཕྱི་མའི་དུས་ཕྱི་མའི་ཚེ་ན། ཆོས་ཀྱི་རྣམ་གྲངས་འདི་འཁོར་བཞི་ལ་ཡང་དག་པར་སྟོན་ན། སྨན་གྱི་རྒྱལ་པོ་བྱང་ཆུབ་སེམས་དཔའ་དེས་དེ་བཞིན་
གཤེགས་པའི་གནས་སུ་ཞུགས་ཏེ། དེ་བཞིན་གཤེགས་པའི་ཆོས་གོས་བགོས་ལ་དེ་བཞིན་གཤེགས་པའི་སྟན་ལ་འདུག་སྟེ་ཆོས་ཀྱི་རྣམ་གྲངས་འདི་ཕྱིས་འཁོར་བཞི་ལ་ཡང་དག་པར་བཤད་པར་བྱའོ། །སྨན་གྱི་རྒྱལ་པོ་དེ་བཞིན་གཤེགས་
པའི་གནས་གང་ཞེ་ན། སྨན་གྱི་རྒྱལ་པོ་སེམས་ཅན་ཐམས་ཅད་ལ་བྱམས་པར་གནས་པ་ནི་སྨན་གྱི་རྒྱལ་པོ་དེ་བཞིན་གཤེགས་པའི་གནས་ཏེ་སྨན་གྱི་རྒྱལ་པོ་དེར་རིགས་ཀྱི་བུ་དེ་འཇུག་པར་བྱའོ། །སྨན་གྱི་རྒྱལ་པོ་དེ་བཞིན་གཤེགས་པའི་
ཆོས་གོས་གང་ཞེ་ན། སྨན་གྱི་རྒྱལ་པོ་བཟོད་པ་དང་དེས་པ་ཆེན་པོ་ནི་དེ་བཞིན་གཤེགས་པའི་ཆོས་གོས་ཏེ། སྨན་གྱི་རྒྱལ་པོ་དེ་ཡང་རིགས་ཀྱི་བུ་དེས་བགོ་བར་བྱའོ། །སྨན་གྱི་རྒྱལ་པོ་དེ་བཞིན་གཤེགས་པའི་ཆོས་ཀྱི་སྟན་གང་
ཞེ་ན། ཆོས་ཐམས་ཅད་སྟོང་པ་ཉིད་དུ་འཇུག་པ་སྟེ། སྨན་གྱི་རྒྱལ་པོ་དེ་བཞིན་གཤེགས་པའི་ཆོས་ཀྱི་སྟན་དེ་ལ་རིགས་ཀྱི་བུ་དེས་འདུག་པར་བྱའོ། །འདུག་ནས་ཆོས་ཀྱི་རྣམ་གྲངས་འདི་འཁོར་བཞི་པོ་དག་ལ་ཡང་དག་པར་
བསྟན་པར་བྱའོ། །བྱང་ཆུབ་སེམས་དཔའ་མི་ཞན་པའི་སེམས་ཀྱིས་བྱང་ཆུབ་སེམས་དཔའི་ཚོགས་དང་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་འཁོར་བཞི་པོ་དག་གི་མདུན་དུ་རབ་ཏུ་བསྟན་པར་
བྱའོ། །སྨན་གྱི་རྒྱལ་པོ་ང་འཇིག་རྟེན་གྱི་ཁམས་གཞན་ན་འདུག་ན་ཡང་སྤྲུལ་པས་རིགས་ཀྱི་བུ་དེའི་འཁོར་དང་མཐུན་པར་བྱའོ། །སྤྲུལ་པའི་དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་དག་ཆོས་ཉན་དུ་དགྱེའོ། །

46-1-98a

ཆོས་སྨྲ་བ་དེས་བཤད་པ་དེ་ལ་དེ་དག་ཕྱིར་མི་ཟློག་ཅིང་སྤོང་བར་མི་བྱེད་དོ། །གལ་ཏེ་དེ་དགོན་པ་ན་འདུག་པར་གྱུར་ན་དེར་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་མང་པོ་
ཆོས་ཉན་དུ་དགྱེའོ། །སྨན་གྱི་རྒྱལ་པོ་ང་འཇིག་རྟེན་གྱི་ཁམས་གཞན་ན་འདུག་ན་ཡང་རིགས་ཀྱི་བུ་དེ་ལ་ང་ཡི་ངོ་ཉེ་བར་བསྟན་ཏོ། །གང་དག་ཆོས་ཀྱི་རྣམ་གྲངས་འདི་ལས་ཚིག་དང་ཡི་གེ་འཆད་པར་གྱུར་པ་དེ་དག་ཁ་ཏོན་བྱེད་པ་
ན་སླར་ཐོན་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཞེན་པ་ཐམས་ཅད་རྣམ་སྤངས་ཏེ། །འདི་འདྲ་བ་ཡི་མདོ་སྡེ་ཉོན། །འདི་ནི་ཤིན་དུ་ཐོས་པར་དཀའ། །མོས་པ་རྙེད་པར་ཤིན་དུ་དཀའ། །
ཇི་ལྟར་ལ་ལ་ཆུ་འདོད་པས། །སྐམ་སར་ཁྲོན་པ་རྐོར་བཅུག་ལ། །ཕྱི་ཕྱིར་རབ་ཏུ་རྐོ་བ་ན། །ས་སྐམ་དག་ནི་འབྱུང་བར་མཐོང་། །དེས་མཐོང་དེ་ན་སེམས་པ་ནི། །འདི་ནས་ཆུ་ཡང་རྒྱང་རིང་སྟེ། །ས་སྐམ་རྐོ་བར་བྱེད་པ་ཡང་། །
འདི་ནི་རྒྱང་རིང་མཚན་མ་སྙམ། །ཕྱི་ཕྱིར་ས་དག་སྣུམ་པ་ཡི། །གཤེར་བ་གང་ཚེ་མཐོང་གྱུར་པ། །དེ་ན་དེ་ལ་ཐུག་པར་འགྱུར། །དེ་ནས་ཆུ་ཡང་ཐག་མི་རིང་། །དེ་བཞིན་མདོ་འདི་མི་ཉན་ཅིང་། །ཕྱི་ཕྱིར་ཤིན་དུ་མ་བསྒོམས་
པ། །དེ་དག་སངས་རྒྱས་ཡེ་ཤེས་ནི། །འདི་འདྲ་བ་ལས་ཤིན་དུ་རིང་། །གང་ཚེ་ཉན་ཐོས་རྣམས་ཀྱི་ནི། །གཏན་ལ་ཕབ་པ་མདོ་སྡེའི་རྒྱལ། །ཟབ་མོ་འདི་ནི་ཉན་འགྱུར་ཞིང་། །ལན་གཅིག་མ་ཡིན་སེམས་བྱེད་པ། །
མཁས་པ་དེ་དག་སངས་རྒྱས་ཀྱི། །ཡེ་ཤེས་ལ་ནི་ཉེ་བར་གྱུར། །ཇི་ལྟར་ས་ནི་གཤེར་བ་ཡིས། །ཆུ་དང་ཉེ་ཞེས་བྱ་བ་བཞིན། །རྒྱལ་བའི་གནས་དེར་རབ་ཞུགས་ཏེ། །ཆོས་གོས་དག་ཀྱང་བགོ་ནས་སུ། །ང་ཡི་
བསྟན་ལ་འདུག་ནས་ནི། །མདོ་སྡེ་འདི་ནི་མི་འཇིགས་ཤོད། །བྱམས་པའི་སྟོབས་ནི་ང་ཡི་གནས། །བཟོད་དང་དེས་པ་ཆོས་གོས་ཏེ། །སྟོང་པ་ཉིད་ནི་ང་ཡི་སྟན། །དེ་ལ་འདུག་ནས་རབ་ཏུ་སྟོན། །དབྱིག་པ་བོང་བ་མདུང་

46-1-98b

ཐུང་དང་། །གཤེ་བ་སྡིག་པར་བྱེད་པ་ནི། །གང་དུ་བཤད་པ་དེ་བྱུང་ཡང་། དེ་དྲན་ནས་ནི་དེ་བཟོད་བྱ། །བྱེ་བ་ཕྲག་སྟོང་ཞིང་དུ་ཡང་། །ང་ཡི་ལུས་ཀྱི་དངོས་པོ་བརྟན། །བསྐལ་པ་བྱེ་བ་བསམ་ཡས་སུ། །སེམས་ཅན་རྣམས་ལ་ཆོས་སྟོན་ཏོ། །ཡོངས་སུ་
མྱ་ངན་ང་འདས་ནས། །མདོ་སྡེ་འདི་ནི་གང་སྟོན་པ། །ངས་ནི་དཔའ་བོ་དེ་ལ་ཡང་། །སྤྲུལ་པ་མང་པོ་དགྱེ་བར་བྱ། །དགེ་སློང་རྣམས་དང་དགེ་སློང་མ། །དགེ་བསྙེན་རྣམས་དང་དགེ་བསྙེན་མ། །དེ་དག་དེ་ལ་མཆོད་པ་བྱེད། །འཁོར་རྣམས་
ལ་ཡང་རི་མོ་བྱེད། །བོང་དབྱུག་དེ་བཞིན་གཤེ་བ་དང་། །སྡིགས་པར་བྱེད་ཅིང་སྤྱོས་པ་དག །དེ་ལ་གང་རྣམས་བྱེད་པ་ཡང་། །སྤྲུལ་པ་རྣམས་ཀྱིས་དེ་དག་ཟློག །མི་དང་བྲལ་བའི་ཡུལ་ཕྱོགས་དང་། །དགོན་པ་རྣམས་དང་རི་དག་
ལ། །ནམ་ཞིག་གཅིག་ཏུ་གནས་ནས་སུ། ཁ་ཏོན་བྱེད་པར་འགྱུར་བ་ན། །དེ་ན་འོད་གསལ་ང་ཡི་ལུས། །ངས་ནི་དེ་ལ་བསྟན་པར་བྱ། །དེ་ཡི་ཁ་ཏོན་ནོར་བ་ཡང་། །ཕྱིར་ཞིང་ཐོན་པར་འགྱུར་བར་བྱ། །གཅིག་པུར་
ནགས་ན་རྒྱུ་བྱེད་ཅིང་། །དེ་ནི་དེ་ན་གནས་པའི་ཚེ། །ལྷ་དང་གནོད་སྦྱིན་དུ་མ་དག །དེ་ཡི་གྲོགས་སུ་དགྱེ་བར་བྱ། །འཁོར་བཞི་ལ་ནི་རབ་སྟོན་པ། །དེ་ཡི་ཡོན་ཏན་དེ་འདྲར་འགྱུར། །ནགས་ཚལ་རི་སུལ་གཅིག་གནས་
ཤིང་། །ཁ་ཏོན་བྱེད་པ་དེས་ང་མཐོང་། །ང་ཡི་སྤོབས་པ་ཐོགས་མེད་འགྱུར། །ཆོས་དང་ངེས་ཚིག་མང་པོ་ཤེས། །འདི་ལྟར་སངས་རྒྱས་བྱིན་བརླབས་པས། །སྲོག་ཆགས་བྱེ་སྟོང་དེས་ཚིམ་བྱེད། །སེམས་
ཅན་གང་དག་དེར་རྟེན་པ། །བྱང་ཆུབ་སེམས་དཔར་དེ་མྱུར་འགྲོ། །དེ་དང་སྟེན་ཅིང་འགྲོགས་པ་ཀུན། །སངས་རྒྱས་གང་གཱའི་བྱེ་སྙེད་མཐོང་། །དམ་པའི་ཆོས་པད་མ་དཀར་པོ་ལས། །ཆོས་སྨྲ་བའི་ལེའུ་ཞེས་བྱ་སྟེ་བཅུ་པའོ།། །། 
དམ་པའི་ཆོས་པ་དམ་དཀར་པོ་བམ་པོ་བརྒྱད་པ། དེ་ནས་བཅོམ་ལྡན་འདས་ཀྱི་སྤྱན་སྔར་ས་ཕྱོགས་དེའི་འཁོར་གྱི་དབུས་ནས་རིན་པོ་ཆེ་སྣ་བདུན་གྱི་མཆོད་རྟེན་བྱུང་སྟེ། འཕང་དུ་ནི་དཔག་ཚད་ལྔ་བརྒྱ་ཁོར་ཡུག་ཏུ་ནི་དེ་དང་འཚམ་པ་བཀྲ་བ་བལྟ་ན་སྡུག་པ་

46-1-99a

མེ་ཏོག་བཀྲམ་པའི་སྟེགས་བུ་ལྔ་སྟོང་གིས་ལེགས་པ་བརྒྱན་པ་རྟ་བབས་སྟོང་ཕྲག་མང་པོས་བརྒྱན་པ། ལྷའི་བ་དན་དང་རྣམ་པར་རྒྱལ་བའི་བ་དན་སྟོང་གིས་བརྒྱན་པ་རིན་པོ་ཆེའི་ཕྲེང་བ་སྟོང་སྤྱངས་པ་དར་དང་དྲིལ་བུ་སྟོང་
རབ་ཏུ་སྤྱངས་པ་མངོན་པར་བྱུང་ནས་ནམ་མཁའ་བར་སྣང་ལ་གནས་ཏེ། ཏ་མ་ལའི་འདབ་མ་དང་ཙན་དན་གྱི་དྲི་རབ་ཏུ་བྱུང་བས་དྲི་དེས་ཐམས་ཅད་དང་ལྡན་པའི་འཇིག་རྟེན་འདི་ཁྱབ་པར་གྱུར་ཏོ། །དེ་ཡི་གདུགས་ཀྱི་ཕྲེང་བ་རྒྱལ་ཆེན་
བཞིའི་རིས་ཀྱི་ལྷའི་ཁང་པའི་བར་དུ་འཕགས་པར་གྱུར་ཏོ། །རིན་པོ་ཆེ་སྣ་བདུན་ལས་བྱས་པ་འདི་ལྟ་སྟེ། གསེར་དང་དངུལ་དང་བཻ་དཱུརྱ་དང་སྤུག་དང་རྡོའི་སྙིང་པོ་དང་མུ་ཏིག་དམར་པོ་དང་ཀེ་ཀེ་རུའོ། །མཆོད་རྟེན་དེ་ལ་སུམ་བཅུ་རྩ་གསུམ་རིས་ཀྱི་
ལྷའི་བུ་རྣམས་ལྷའི་མེ་ཏོག་མན་དཱ་ར་བ་དང་མན་དཱ་ར་བ་ཆེན་པོས་རིན་པོ་ཆེའི་མཆོད་རྟེན་དེ་ལ་འཐོར་རོ། །མངོན་པར་རབ་ཏུ་འཐོར་རོ། །རིན་པོ་ཆེའི་མཆོད་རྟེན་དེ་ལས་བཅོམ་ལྡན་འདས་ཤཱཀྱ་ཐུབ་པ་ཁྱོད་ཀྱིས་དམ་པའི་ཆོས་པད་མ་དཀར་པོ་ཞེས་བྱ་བ་
འི་ཆོས་ཀྱི་རྣམ་གྲངས་འདི་ལེགས་པར་གསུངས་པ་ལེགས་སོ་ལེགས་སོ། །བཅོམ་ལྡན་འདས་དེ་དེ་ལྟའོ། །བདེ་བར་གཤེགས་པ་དེ་དེ་ལྟའོ་ཞེས་བྱ་བའི་སྒྲ་འདི་འདྲ་བ་བྱུང་ངོ་། །དེ་ནས་འཁོར་བཞི་པོ་དེ་དག་གིས་རིན་པོ་ཆེའི་མཆོད་རྟེན་ཆེན་
པོ་ནམཁའ་བར་སྣང་ལ་འདུག་པ་དེ་མཐོང་ནས། དགའ་བ་སྐྱེས་ཤིང་མགུ་བ་དང་རངས་པ་དང་མཆོག་ཏུ་དགའ་བར་གྱུར་ཏེ། དེའི་ཚེ་སྟན་ལས་ལངས་ནས་ཐལ་མོ་སྦྱར་ཏེ་འཁོད་དོ། །དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་
སྤོབས་པ་ཆེན་པོ་ཞེས་བྱ་བས། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ངོ་མཚར་དུ་འཛིན་པར་གྱུར་པར་རིག་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རིན་པོ་ཆེའི་མཆོད་རྟེན་
ཆེན་པོ་འདི་ལྟ་བུ་འདི་བྱུང་བའི་རྒྱུ་གང་ལགས་རྐྱེན་གང་ལགས། བཅོམ་ལྡན་འདས་རིན་པོ་ཆེའི་མཆོད་རྟེན་ཆེན་པོ་འདི་ལྟ་བུའི་སྒྲ་འབྱིན་པ་སུ་ལགས། དེ་སྐད་ཅེས་གསོལ་པ་དང་བཅོམ་ལྡན་འདས་ཀྱིས་བྱང་ཆུབ་སེམས་

46-1-99b

དཔའ་སེམས་དཔའ་ཆེན་པོ་སྤོབས་པ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །སྤོབས་པ་ཆེན་པོ་རིན་པོ་ཆེའི་མཆོད་རྟེན་ཆེན་པོ་འདིའི་ནང་ན་དེ་བཞིན་གཤེགས་པའི་སྐུ་གཅིག་ཏུ་འདུས་པ་ཞུགས་སོ། །འདི་ནི་དེའི་མཆོད་རྟེན་ཏེ། 
དེས་སྒྲ་འདི་ཕྱུང་ངོ་། །སྤོབས་པ་ཆེན་པོ་ཤར་ཕྱོགས་སུ་འཇིག་རྟེན་གྱི་ཁམས་སྟོང་ཕྲག་གྲངས་མེད་པ་འདས་པ་ན། འཇིག་རྟེན་གྱི་ཁམས་རིན་པོ་ཆེ་རྣམ་པར་དག་པ་ཞེས་བྱ་བ་ཡོད་དེ། དེར་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རིན་ཆེན་མང་ཞེས་བྱ་བ་བྱུང་སྟེ། བཅོམ་ལྡན་འདས་དེས་སྨོན་ལམ་འདི་སྐད་ཏུ། ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཇི་སྲིད་ཏུ་ངས་དམ་པའི་ཆོས་པད་མ་དཀར་པོའི་ཆོས་ཀྱི་
རྣམ་གྲངས་བྱང་ཆུབ་སེམས་དཔའ་རྣམས་ལ་གདམས་པ་འདི་མ་ཐོས་པ་དེ་སྲིད་ཏུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ངེས་པར་འབྱུང་བར་མི་བྱའི། གང་གི་ཚེ་ངས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་
གྲངས་འདི་ཐོས་པ་དེའི་འོག་ཏུ། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་གྲུབ་པར་གྱུར་ཅིག་ཅེས་སྨོན་ལམ་བཏབ་པོ། །སྤོབས་པ་ཆེན་པོ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེ་ཡོངས་སུ་མྱ་ངན་ལས་འདའ་བའི་དུས་ཀྱི་ཚེ། ལྷ་དང་བཅས་པའི་འཇིག་རྟེན་གྱི་མདུན་དུ་འདི་སྐད་ཅེས་དགེ་སློང་དག་ང་ཡོངས་སུ་མྱ་ངན་ལས་འདས་ནས། དེ་
བཞིན་གཤེགས་པའི་ལུས་གཟུགས་ཀྱི་རིན་པོ་ཆེའི་མཆོད་རྟེན་ཆེན་པོ་གཅིག་བྱོས་ཤིག །མཆོད་རྟེན་ལྷག་མ་རྣམས་ནི་ང་ཡི་ཕྱིར་གྱིས་ཤིག་ཅེས་མོས་པར་བྱས་སོ། །སྤོབས་པ་ཆེན་པོ་ཡང་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེས། ང་ཡི་མཆོད་རྟེན་འདི་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། སངས་

46-1-100a

རྒྱས་ཀྱི་ཞིང་གང་དང་གང་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་དག་པར་རབ་ཏུ་སྟོན་པ་དེ་དང་དེ་དག་ཏུ། ངའི་ལུས་གཟུགས་ཀྱི་མཆོད་རྟེན་འདི་མངོན་པར་བྱུང་སྟེ། སངས་རྒྱས་བཅོམ་ལྡན་
འདས་དེ་དང་དེ་དག་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་འཆད་པ་ན། འཁོར་གྱི་དཀྱིལ་འཁོར་གྱི་སྟེང་གི་ནམ་མཁའ་ལ་འདུག་ནས། སངས་རྒྱས་བཅོམ་ལྡན་འདས་དེ་དང་དེ་དག་དམ་པའི་ཆོས་པད་མ་དཀར་
པོའི་ཆོས་ཀྱི་རྣམ་གྲངས་འདི་སྟོན་པ་ལ་ངའི་ལུས་གཟུགས་ཀྱིས་ལེགས་སོ་ཞེས་བྱ་བ་སྦྱིན་ནོ་ཞེས་དེ་ལྟར་བྱིན་གྱིས་བརླབས་སོ། །སྤོབས་པ་ཆེན་པོ་དེའི་ཕྱིར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་རིན་ཆེན་མང་དེའི་སྐུ་གདུང་གི་མཆོད་རྟེན་འདི། འཇིག་རྟེན་གྱི་ཁམས་མི་མཇེད་འདིར་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ངས་བཤད་པ་ན། འཁོར་གྱི་དཀྱིལ་འཁོར་
འདིའི་དབུས་ནས་མངོན་པར་བྱུང་སྟེ། སྟེང་གི་ནམ་མཁའ་བར་སྣང་ལ་འདུག་ནས་ལེགས་སོ་ཞེས་བྱ་བ་བྱིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་ཆེན་པོས་འདི་སྐད་ཅེས་
གསོལ་ཏོ། །བཅོམ་ལྡན་འདས་བདག་ཅག་བཅོམ་ལྡན་འདས་ཀྱི་མཐུས་དེ་བཞིན་གཤེགས་པའི་སྐུ་འདི་བལྟའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་
ཆེན་པོ་སྤོབས་པ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །སྤོབས་པ་ཆེན་པོ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེའི་སྨོན་ལམ་ལྕི་
བར་གྱུར་ཏོ། །དེའི་སྨོན་ལམ་ནི་འདི་ལྟ་སྟེ། གང་གི་ཚེ་སངས་རྒྱས་ཀྱི་ཞིང་གཞན་དག་ཏུ་སངས་རྒྱས་བཅོམ་ལྡན་འདས་རྣམས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་འཆད་པ་དེའི་

46-1-100b

ཚེ། ང་ཡི་ལུས་གཟུགས་ཀྱི་མཆོད་རྟེན་འདི་དམ་པའི་ཆོས་པད་མ་དཀར་པོ་འདི་མཉན་པའི་ཕྱིར་དེ་བཞིན་གཤེགས་པ་རྣམས་ཀྱི་གན་དུ་འགྲོ་བར་གྱུར་ཅིག །གང་གི་ཚེ་ཡང་སངས་རྒྱས་བཅོམ་ལྡན་འདས་དེ་དག་
འཁོར་བཞི་ལ་ང་ཡི་ལུས་གཟུགས་ཕྱེ་སྟེ་བསྟན་པར་འདོད་པར་གྱུར་ན། དེ་ནས་དེ་བཞིན་གཤེགས་པ་དེ་དག་གིས་ཕྱོགས་བཅུའི་སངས་རྒྱས་ཀྱི་ཞིང་སོ་སོ་ན་དེ་བཞིན་གཤེགས་པའི་སྐུ་ལུས་སྤྲུལ་པ་མིང་ཐ་
དད་པ་གང་དག་སངས་རྒྱས་ཀྱི་ཞིང་དེ་དང་དེ་དག་ན་ཆོས་སྟོན་པ་དེ་དག་ཐམས་ཅད་སོགས་ལ་དེའི་འོག་ཏུ། དེ་བཞིན་གཤེགས་པའི་སྐུ་ལུས་སྤྲུལ་པ་དེ་དག་དང་ལྷན་ཅིག་དུ་ང་ཡི་ལུས་གཟུགས་ཀྱི་མཆོད་རྟེན་འདི་
ཕྱེ་སྟེ་འཁོར་བཞི་ལ་བསྟན་པར་བྱའོ་ཞེས་སྨོན་ལམ་བཏབ་བོ། །སྤོབས་པ་ཆེན་པོ་དེའི་ཕྱིར་ངས་དེ་བཞིན་གཤེགས་པའི་གཟུགས་སྤྲུལ་པ་མང་པོ་གང་དག་ཕྱོགས་བཅུའི་སངས་རྒྱས་ཀྱི་ཞིང་འཇིག་རྟེན་གྱི་
ཁམས་གཞན་དང་གཞན་སྟོང་དག་ན་སེམས་ཅན་རྣམས་ལ་ཆོས་སྟོན་པ་དེ་དག་ཐམས་ཅད་འདིར་བསྡུ་བར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་ཆེན་པོས་
འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པའི་སྐུ། དེ་བཞིན་གཤེགས་པས་སྤྲུལ་པ་དེ་དག་ཐམས་ཅད་ལ་བདག་ཅག་གིས་ཕྱག་བགྱིའོ། །དེ་ནས་དེའི་ཚེ་བཅོམ་ལྡན་འདས་
ཀྱིས་ཞལ་གྱི་མཛོད་སྤུ་ནས་འོད་ཟེར་བཏང་སྟེ། འོད་ཟེར་བཏང་མ་ཐག་ཏུ་ཤར་ཕྱོགས་ཀྱི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་ལྔ་བཅུའི་བྱེ་མ་སྙེད་དག་ན། སངས་རྒྱས་བཅོམ་
ལྡན་འདས་གང་དག་བཞུགས་པ་དེ་དག་ཐམས་ཅད་སྣང་ངོ་། །སངས་རྒྱས་ཀྱི་ཞིང་དེ་དག་ནི་ཤེལ་གྱི་གཞི་ལ་རིན་པོ་ཆེའི་ཤིང་ལྗོན་པས་བརྒྱན་པ། རས་བཅོས་བུ་དང་དར་གྱི་ལྡ་ལྡིས་ལེགས་པར་བརྒྱན་པ་བྱང་ཆུབ་སེམས་

46-1-101a

དཔའ་བརྒྱ་སྟོང་མང་པོས་ཡོངསུ་གང་བ། བླ་རེ་བྲེས་པ་རིན་པོ་ཆེ་སྣ་བདུན་དང་གསེར་གྱི་དྲ་བས་གཡོགས་པར་སྣང་ངོ་། །དེ་དག་ན་སངས་རྒྱས་བཅོམ་ལྡན་འདས་དེ་དག་དབྱངས་སྙེན་ཅིང་འཇམ་པས་སེམས་
ཅན་རྣམས་ལ་ཆོས་སྟོན་པར་སྣང་ངོ་། །སངས་རྒྱས་ཀྱི་ཞིང་དེ་དག་བྱང་ཆུབ་སེམས་དཔའ་བརྒྱ་སྟོང་གིས་ཡོངསུ་གང་བར་སྣང་ངོ་། །དེ་བཞིན་དུ་ཤར་ལྷོའི་ཕྱོགས་དང་དེ་བཞིན་དུ་ལྷོ་ཕྱོགས་དང་དེ་
བཞིན་དུ་ལྷོ་ནུབ་ཀྱི་ཕྱོགས་དང་དེ་བཞིན་དུ་ནུབ་ཀྱི་ཕྱོགས་དང་དེ་བཞིན་དུ་ནུབ་བྱང་གི་ཕྱོགས་དང་དེ་བཞིན་དུ་བྱང་གི་ཕྱོགས་དང་དེ་བཞིན་དུ་བྱང་ཤར་གྱི་ཕྱོགས་དང་དེ་བཞིན་དུ་སྟེང་གི་ཕྱོགས་དང་དེ་བཞིན་དུ་འོག་གི་ཕྱོགས་ཏེ། ཕྱོགས་
བཅུ་ཐམས་ཅད་ཀྱི་ཕྱོགས་རེ་རེ་ན་ཡང་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་གང་གཱའི་ཀླུང་གི་བྱེ་མ་སྙེད་དག་ན་སངས་རྒྱས་བཅོམ་ལྡན་འདས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་གང་གཱའི་ཀླུང་གི་བྱེ་མ་སྙེད་གང་
དག་བཞུགས་པ་དེ་དག་ཐམས་ཅད་སྣང་ངོ་། །དེ་ནས་ཕྱོགས་བཅུའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་རང་རང་གི་བྱང་ཆུབ་སེམས་དཔའི་ཚོགས་ལ་བཀའ་སྩལ་པ། རིགས་ཀྱི་བུ་
དག་ངེད་ནི་དེ་བཞིན་གཤེགས་པ་རིན་ཆེན་མང་གི་སྐུ་གདུང་གི་མཆོད་རྟེན་ལ་ཕྱག་བྱ་བའི་ཕྱིར། འཇིག་རྟེན་གྱི་ཁམས་མི་མཇེད་ཏུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་
ཐུབ་པའི་གན་དུ་འདོང་ངོ་། །དེ་ནས་སངས་རྒྱས་བཅོམ་ལྡན་འདས་དེ་དག་བདག་བདག་གི་ཞབས་འབྲིང་བ་དང་ལྷན་ཅིག་ཏུ་བདག་དང་གཉིས་སམ་བདག་དང་གསུམ་འཇིག་རྟེན་གྱི་ཁམས་མི་མཇེད་འདིར་གཤེགས་སོ། །འདི་ལྟར་
དེའི་ཚེ་ཐམས་ཅད་དང་ལྡན་པའི་འཇིག་རྟེན་གྱི་ཁམས་མི་མཇེད་འདི་རིན་པོ་ཆེའི་ཤིང་ལྗོན་པས་རབ་ཏུ་བརྒྱན་པར་གྱུར་ཏོ། །བཻ་དཱུརྱའི་གཞི་ལ་རིན་པོ་ཆེ་སྣ་བདུན་དང་གསེར་གྱི་དྲ་བས་བྲེས་པ། རིན་པོ་ཆེ་ཆེན་པོའི་སྤོས་དང་བདུག་པས་བདུག་

46-1-101b

པ། མེ་ཏོག་མན་དཱ་ར་བ་དང་མན་དཱ་ར་བ་ཆེན་པོས་ཀུན་དུ་བཀྲམ་པ། དྲིལ་བུ་གཡེར་ཀའི་དྲ་བས་བརྒྱན་པ། གསེར་གྱི་སྐུད་པས་མིག་མངས་རིས་སུ་བྲིས་པར་གྱུར་ཏེ་གྲོང་དང་གྲོང་ཁྱེར་དང་གྲོང་རྡལ་དང་ལྗོངས་དང་ཡུལ་འཁོར་དང་
རྒྱལ་པོའི་ཕོ་བྲང་འཁོར་ཀྱང་མེད་པར་གྱུར། རི་ནག་པོ་ཡང་མེད་པར་གྱུར། རི་བཏང་ཟུང་དང་བཏང་ཟུང་ཆེན་པོ་ཡང་མེད་པར་གྱུར། ཁོར་ཡུག་དང་ཁོར་ཡུག་ཆེན་པོ་ཡང་མེད་པར་གྱུར། རིའི་རྒྱལ་པོ་རི་རབ་ཀྱང་མེད་པར་གྱུར། 
རི་ཆེན་པོ་དང་རི་གཞན་ཡང་མེད་པར་གྱུར། རྒྱ་མཚོ་ཆེན་པོ་ཡང་མེད་པར་གྱུར། །འབབ་ཆུ་དང་འབབ་ཆུ་ཆེན་པོ་ཡང་མེད་པར་ཡོངས་སུ་གནས་པར་གྱུར་ཏོ། །ལྷ་དང་མི་དང་ལྷ་མ་ཡིན་གྱི་ཚོགས་ཀྱང་མེད་པར་གྱུར། སེམས་
ཅན་དམྱལ་བ་དང་དུད་འགྲོའི་སྐྱེ་གནས་དང་གཤིན་རྗེའི་འཇིག་རྟེན་ཡང་མེད་པར་གྱུར་ཏོ། །འདི་ལྟར་དེའི་ཚེ་འཇིག་རྟེན་གྱི་ཁམས་མི་མཇེད་འདིར་འགྲོ་བ་དྲུག་ཏུ་སྐྱེས་པའི་སེམས་ཅན་དེ་དག་ཐམས་ཅད་ཀུན་འཇིག་རྟེན་གྱི་
ཁམས་གཞན་དག་ཏུ་བཀོད་པར་གྱུར་ཏོ། །གང་དག་འཁོར་དེར་འདུས་པ་དེ་དག་ནི་མ་གཏོགས་སོ། །དེ་ནས་སངས་རྒྱས་བཅོམ་ལྡན་འདས་དེ་དག་ཞབས་འབྲིང་བ་དང་གཉིས་སམ་ཞབས་འབྲིང་བ་དང་གསུམ་འཇིག་རྟེན་གྱི་
ཁམས་མི་མཇེད་འདིར་གཤེགས་སོ། །དེ་བཞིན་གཤེགས་པ་གཤེགས་ཤིང་བྱོན་པ་དེ་དག་རིན་པོ་ཆེའི་ཤིང་ལྗོན་པའི་དྲུང་ན་གནས་ཤིང་བཞུགས་ཏེ། རིན་པོ་ཆེའི་ཤིང་ལྗོན་པ་རེ་རེའི་འཕང་ཡང་དཔག་ཚད་ལྔ་བརྒྱ་པར་གྱུར་ཏེ། 
ཡལ་ག་དང་ལོ་མ་དང་འདབ་མ་དང་སྦོམས་ནི་རི་བཞིན། མེ་ཏོག་དང་འབྲས་བུས་ནི་རབ་ཏུ་བརྒྱན་པ་སྟེ། རིན་པོ་ཆེའི་ཤིང་ལྗོན་པ་རེ་རེའི་དྲུང་ན་ཡང་སེང་གེའི་ཁྲི་འཕང་དུ་དཔག་ཚད་ལྔ་བརྒྱ་པ། རིན་པོ་ཆེ་ཆེན་པོས་བརྒྱན་པ་བཤམས་པ་དེ་
ལ་དེ་བཞིན་གཤེགས་པ་ཀྱིལ་མོ་དཀྲུང་བཅས་ཏེ་བཞུགས་པར་གྱུར་ཏོ། །རྣམ་གྲངས་འདིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ན་རིན་པོ་ཆེའི་ཤིང་ལྗོན་པ་ཐམས་ཅད་ཀྱི་དྲུང་ན། དེ་བཞིན་གཤེགས་

46-1-102a

པ་རྣམས་ཀྱིལ་མོ་དཀྲུང་བཅས་ཏེ་བཞུགས་པར་གྱུར་ཏོ། །དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད། དེ་བཞིན་གཤེགས་པས་རབ་ཏུ་གང་བར་གྱུར་ཀྱང་། བཅོམ་
ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའི་སྐུ་སྤྲུལ་པ་ཕྱོགས་གཅིག་ནས་ཀྱང་ཐམས་ཅད་ཆོགས་པ་ནི་མ་ཡིན་ནོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་ཤཱཀྱ་ཐུབ་པས་དེ་བཞིན་གཤེགས་པའི་སྐུ་གཤེགས་ཤིང་བྱོན་པ་དེ་དག་གི་མངོན་པར་སྤྲུལ་ཏེ་ཕྱོགས་བཅུ་ཐམས་ཅད་ཏུ་སངས་རྒྱས་ཀྱི་ཞིང་བྱེ་བ་སྟོང་ཕྲག་ཉི་ཤུ་ཐམས་ཅད་བཱཻ་དུརྱ་ལས་ནི་བྱས། རིན་པོ་ཆེ་སྣ་བདུན་དང་གསེར་གྱི་
དྲ་བ་ནི་བྲེས་དྲིལ་བུ་གཡེར་ཀའི་དྲ་བས་ནི་བརྒྱན། མེ་ཏོག་མན་དཱ་ར་བ་དང་མན་ད་ར་བ་ཆེན་པོ་ནི་ཀུན་དུ་བཀྲམ་ལྷའི་བླ་རེ་ནི་བྲེས། ལྷའི་མེ་ཏོག་གི་ཕྲེང་བ་ནི་སྤྱངས། ལྷའི་སྤོས་དང་བདུག་པས་ནི་བདུགས་ཏེ། སངས་རྒྱས་ཀྱི་ཞིང་བྱེ་
བ་སྟོང་ཕྲག་ཉི་ཤུ་པོ་དེ་དག་ཐམས་ཅད་ན་གྲོང་དང་གྲོང་ཁྱེར་དང་གྲོང་རྡལ་དང་ལྗོངས་དང་ཡུལ་འཁོར་དང་རྒྱལ་པོའི་ཕོ་བྲང་འཁོར་ཀྱང་མེད། རི་ནག་པོ་ཡང་མེད། རི་བཏང་ཟུང་དང་བཏང་ཟུང་ཆེན་པོ་ཡང་མེད། རི་ཁོར་ཡུག་དང་། 
ཁོར་ཡུག་ཆེན་པོ་ཡང་མེད། རིའི་རྒྱལ་པོ་རི་རབ་ཀྱང་མེད། རི་ཆེན་པོ་དང་རི་གཞན་ཡང་མེད། རྒྱ་མཚོ་ཆེན་པོ་ཡང་མེད་པར་གྱུར་ཅིང་། འབབ་ཆུ་དང་འབབ་ཆུ་ཆེན་པོ་ཡང་མེད་པར་ཡོངས་སུ་གཞག་གོ། །ལྷ་དང་མི་དང་
ལྷ་མ་ཡིན་གྱི་ཚོགས་ཀྱང་མེད་པར་གྱུར། སེམས་ཅན་དམྱལ་བ་དང་དུད་འགྲོའི་སྐྱེ་གནས་དང་གཤིན་རྗེའི་འཇིག་རྟེན་ཡང་མེད་པར་གྱུར་ཏེ། སངས་རྒྱས་ཀྱི་ཞིང་དེ་ཐམས་ཅད་སངས་རྒྱས་ཀྱི་ཞིང་གཅིག་དང་མཚུངས་ཤིང་
ཕྱོགས་གཅིག་དང་འདྲ་བར་ཡོངས་སུ་གནས་པར་གྱུར་ཏེ། མཉམ་ཞིང་ཉམས་དགའ་ལ། རིན་པོ་ཆེ་སྣ་བདུན་གྱི་ཤིང་ལྗོན་པ་དག་གིས་བརྒྱན་པར་གྱུར་ཏེ། ཤིང་ལྗོན་པ་དེ་དག་འཕང་དུ་ནི་དཔག་ཚད་ལྔ་བརྒྱ་པ་

46-1-102b

སྦོམས་ནི་རི་བཞིན། ཡལ་ག་དང་ལོ་མ་དང་མེ་ཏོག་དང་འབྲས་བུ་དང་ནི་ལྡན་ནོ། །རིན་པོ་ཆེའི་ཤིང་ལྗོན་པ་ཐམས་ཅད་ཀྱི་དྲུང་ན། སེང་གེའི་ཁྲི་ཁོར་ཡུག་ཏུ་ནི་དཔག་ཚད་ལྔ་བརྒྱ་པ། ལྷའི་རིན་པོ་ཆེ་ལས་བྱས་པ་བཀྲ་བ་
བལྟ་ན་སྡུག་པ་བཤམས་པར་གྱུར་ཏེ། དེ་བཞིན་གཤེགས་པ་གཤེགས་ཤིང་བྱོན་པ་རྣམས་ཤིང་དྲུང་དེ་དག་ན་སེང་གེའི་ཁྲི་དག་ལ་ཀྱིལ་མོ་དཀྲུང་བཅས་ཏེ་བཞུགས་སོ། །རྣམ་གྲངས་འདིས་གཞན་ཡང་ཕྱོགས་རེ་རེར་ཡང་འཇིག་རྟེན་
གྱི་ཁམས་བྱེ་བ་སྟོང་ཕྲག་ཉི་ཤུ་དེ་བཞིན་གཤེགས་པ་ཤཱཀྱ་ཐུབ་པས་ཡོངས་སུ་གང་བར་མཛད་དོ། །དེ་བཞིན་གཤེགས་པ་བྱོན་ཅིང་གཤེགས་པ་དེ་དག་གི་གོ་དབྱེ་བའི་ཕྱིར། གཞན་ཡང་ཕྱོགས་རེ་རེར་ཡང་འཇིག་རྟེན་
གྱི་ཁམས་བྱེ་བ་སྟོང་ཕྲག་ཉི་ཤུར་གྲོང་དང་གྲོང་ཁྱེར་དང་གྲོང་རྡལ་དང་ལྗོངས་དང་ཡུལ་འཁོར་དང་རྒྱལ་པོའི་ཕོ་བྲང་འཁོར་ཀྱང་མེད་པར་གྱུར། རི་ནག་པོ་ཡང་མེད་པར་གྱུར། རི་བཏང་ཟུང་དང་བཏང་ཟུང་ཆེན་པོ་ཡང་
མེད་པར་གྱུར། རི་ཁོར་ཡུག་དང་རི་ཁོར་ཡུག་ཆེན་པོ་ཡང་མེད་པར་གྱུར། རིའི་རྒྱལ་པོ་རི་རབ་ཀྱང་མེད་པར་གྱུར། རི་ཆེན་པོ་གཞན་ཡང་མེད་པར་གྱུར། རྒྱ་མཚོ་ཆེན་པོ་ཡང་མེད་པར་གྱུར། འབབ་ཆུ་དང་འབབ་ཆུ་ཆེན་པོ་
ཡང་མེད་པར་ཡོངས་སུ་བཞག་གོ། །ལྷ་དང་མི་དང་ལྷ་མ་ཡིན་གྱི་ཚོགས་ཀྱང་མེད་པར་གྱུར། སེམས་ཅན་དམྱལ་བ་དང་དུད་འགྲོའི་སྐྱེ་གནས་དང་གཤིན་རྗེའི་འཇིག་རྟེན་ཡང་མེད་པར་གྱུར་ཏེ། སེམས་ཅན་དེ་དག་
ཐམས་ཅད་འཇིག་རྟེན་གྱི་ཁམས་གཞན་དག་ཏུ་བཀོད་དོ། །སངས་རྒྱས་ཀྱི་ཞིང་དེ་དག་ནི་བཻ་དཱུརྱ་ལས་གྲུབ་པ་རིན་པོ་ཆེ་སྣ་བདུན་དང་གསེར་གྱི་དྲ་བས་བྲེས་པ། དྲིལ་བུ་གཡེར་ཀའི་དྲ་བས་བརྒྱན་པ། མེ་ཏོག་
མན་དཱ་ར་བ་དང་མན་དཱ་ར་བ་ཆེན་པོས་ཀུན་དུ་བཀྲམ་པ། ལྷའི་བླ་རེ་བྲེས་པ། ལྷའི་མེ་ཏོག་གི་ཕྲེང་བ་མངོན་པར་སྤྱངས་པ། ལྷའི་སྤོས་དང་བདུག་པས་བདུགས་པ། རིན་པོ་ཆེའི་ཤིང་ལྗོན་པས་མཛེས་པར་བྱས་པ་སྟེ། 

46-1-103a

རིན་པོ་ཆེའི་ཤིང་ལྗོན་པ་དེ་དག་ཐམས་ཅད་ཀྱི་ཚད་ཀྱང་དཔག་ཚད་ལྔ་བརྒྱ་པའོ། །སེང་གེའི་ཁྲི་དཔག་ཚད་ལྔ་བརྒྱ་པ་དེ་དག་ཀྱང་མངོན་པར་སྤྲུལ་ཏེ། རིན་པོ་ཆེའི་ཤིང་ལྗོན་པའི་དྲུང་དག་ན། སོ་
སོའི་སེང་གེའི་ཁྲི་ལ་དེ་བཞིན་གཤེགས་པ་དེ་དག་ཀྱིལ་མོ་དཀྲུང་བཅས་ཏེ་བཞུགས་སོ། །ཡང་དེའི་ཚེ་བཅོམ་ལྡན་འདས་ཤཱཀྱ་ཐུབ་པས་སྤྲུལ་པའི་དེ་བཞིན་གཤེགས་པ་གང་དག་ཤར་ཕྱོགས་ན་སངས་
རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་གི་བྱེ་མ་སྙེད་དག་ན་ཆོས་སྟོན་པ་དེ་དག་ཐམས་ཅད་གཤེགས་སོ། །དེ་བཞིན་དུ་ཕྱོགས་བཅུ་ནས་གཤེགས་ཤིང་བྱོན་པ་དེ་དག་ནི་ཕྱོགས་བརྒྱད་ན་
བཞུགས་པར་གྱུར་ཏོ། །དེའི་ཚེ་ཕྱོགས་བརྒྱད་ནས་གཤེགས་པའི་དེ་བཞིན་གཤེགས་པ་དེ་དག་གི་ཕྱོགས་རེ་རེར་ཡང་འཇིག་རྟེན་གྱི་ཁམས་བྱེ་བ་ཕྲག་སུམ་བཅུ་ཀུན་དུ་ནོན་པར་གྱུར་ཏོ། །དེ་ནས་དེ་བཞིན་གཤེགས་
པ་དེ་དག་རང་རང་གི་སེང་གེའི་ཁྲི་ལ་བཞུགས་ནས་རང་རང་གི་ཞབས་འབྲིང་བ་དག་བཅོམ་ལྡན་འདས་ཤཱཀྱ་ཐུབ་པའི་ཐད་ཏུ་བཀྱེ་སྟེ། རིན་པོ་ཆེའི་མེ་ཏོག་གི་ཕུར་མ་བསྐུར་ནས་འདི་སྐད་ཅེས་བཀའ་སྩལ་ཏོ། །
རིགས་ཀྱི་བུ་དག་ཁྱེད་རྒྱལ་པོའི་ཁབ་ཀྱི་བྱ་རྒོད་ཀྱི་ཕུང་པོའི་རི་ལ་སོང་སྟེ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་ཕྱག་འཚོལ་ལ། 
ང་ཡི་ཚིག་གིས་བྱང་ཆུབ་སེམས་དཔའི་ཚོགས་དང་ཉན་ཐོས་ཀྱི་ཚོགས་དང་བཅས་པ་ལ། གནོད་པ་ཉུང་ངམ་སྙུན་ཉུང་ངམ་སྟོབས་དང་ལྡན་ནམ་བདེ་བར་རེག་པ་ལ་གནས་སམ་ཞེས་དྲིས་ལ། རིན་པོ་ཆེའི་ཕུང་པོ་འདིས་
གཏོར་ཏེ་འདི་སྐད་ཅེས། བཅོམ་ལྡན་འདས་ཀྱིས་དེ་བཞིན་གཤེགས་པ་རིན་པོ་ཆེའི་མཆོད་རྟེན་ཆེན་པོ་འདི་དབྱེ་བར་དད་པ་དབུལ་ལོ་ཞེས་གསོལ་ཅིང་། དེ་ལྟར་དེ་བཞིན་གཤེགས་པ་དེ་དག་ཐམས་ཅད་ཀྱིས་

46-1-103b

རང་རང་གི་ཞབས་འབྲིང་བཀྱེའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་དེའི་དུས་ན། བདག་གིས་སྤྲུལ་པ་མ་ལུས་པར་ཚོགས་པར་མཁྱེན། སོ་སོར་སེང་གེའི་ཁྲི་དག་ལ་བཞུགས་པར་
མཁྱེན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་ཞབས་འབྲིང་བ་ལྷགས་པར་མཁྱེན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
དེ་དག་གིས་དད་པ་ཕུལ་བར་མཁྱེན་ནས། དེའི་ཚེ་རང་གི་ཆོས་ཀྱི་གདན་ལས་བཞེངས་ཏེ་ནམ་མཁའ་བར་སྣང་ལ་བཞུགས་སོ། །འཁོར་བཞི་པོ་དེ་དག་ཐམས་ཅད་ཀྱང་སྟན་ལས་ལངས་ནས། ཐལ་མོ་སྦྱར་ཏེ་
བཅོམ་ལྡན་འདས་ལ་ལྟ་ཞིང་འཁོད་དོ། །དེ་ནས་བཅོམ་ལྡན་འདས་ཀྱིས་རིན་པོ་ཆེའི་མཆོད་རྟེན་ཆེན་པོ་ནམ་མཁའ་ལ་འདུག་པ་དེ་ཕྱག་གཡས་པའི་སོར་མོས་དབུས་ནས་ཕྱེའོ། ཕྱེ་ནས་ལོགས་གཉིས་སོ་སོར་གདངས་སོ། །འདི་ལྟ་
སྟེ་དཔེར་ན། གྲོང་ཁྱེར་ཆེན་པོའི་སྒོ་འཕར་ཆེན་པོ་བཅད་པའི་གཏན་པ་ཕྱུང་ནས་སོ་སོར་དབྱེ་བ་དེ་བཞིན་དུ། བཅོམ་ལྡན་འདས་ཀྱིས་རིན་པོ་ཆེའི་མཆོད་རྟེན་ཆེན་པོ་དེ་ཕྱག་གཡས་པའི་སོར་མོས་དབུས་ནས་ཕྱེ་སྟེ་ས་ལེར་
མཛད་དོ། །དེ་བཞིན་གཤེགས་པའི་རིན་པོ་ཆེའི་མཆོད་རྟེན་ཆེན་པོ་དེ་ཕྱེ་མ་ཐག་ཏུ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་སེང་གེའི་ཁྲི་ལ་
བཞུགས་ཏེ། སྐྱིལ་མོ་དཀྲུང་བཅས་ནས་སྐུ་ཀུན་བསྐམས་ཤིང་སྐུ་མ་གཡོས་པར། ཇི་ལྟར་ཏིང་ངེ་འཛིན་ལ་སྙོམས་པར་ཞུགས་པ་དེ་བཞིན་དུ་སྣང་སྟེ། འདི་སྐད་ཅེས་བཅོམ་ལྡན་འདས་ཤཱཀྱ་ཐུབ་པ་ཁྱོད་ཀྱིས། དམ་
པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ལེགས་པར་བཤད་པ་ལེགས་སོ་ལེགས་སོ། །བཅོམ་ལྡན་འདས་ཤཱཀྱ་ཐུབ་པ་ཁྱོད་ཀྱིས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་བཤད་

46-1-104a

པ་ཡང་ལེགས་སོ། །བཅོམ་ལྡན་འདས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཉན་པའི་ཕྱིར་ཁོ་བོ་འདིར་འོངས་སོ་ཞེས་གསུང་ངོ་། །དེ་ནས་འཁོར་བཞི་པོ་དེ་དག་བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་ནས། ཡོངསུ་མྱ་ངན་ལས་འདས་པ་དེ་སྐད་གསུངས་པ་ཐོས་ནས་ངོ་མཚར་དང་རྨད་
ཏུ་གྱུར་ཏེ། དེའི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
ཤཱཀྱ་ཐུབ་པ་ལ་ལྷ་དང་མིའི་རིན་པོ་ཆེའི་ཕུང་པོས་མངོན་པར་གཏོར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་གིས་བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་སེང་གེའི་ཁྲི་དེ་ཕྱེད་བདར་ཏེ་རིན་པོ་ཆེའི་མཆོད་རྟེན་ཆེན་པོ་དེའི་ནང་ནས། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་འདིར་བཞུགས་
ཞེས་དེ་སྐད་གསུང་ངོ་། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་གདན་དེའི་ཕྱེད་ལ་བཞུགས་སོ། །དེ་བཞིན་གཤེགས་པ་དེ་དང་ལྷན་ཅིག་ཏུ་དེ་བཞིན་གཤེགས་པ་གཉི་ག་རིན་པོ་ཆེའི་མཆོད་རྟེན་
ཆེན་པོ་དེའི་དབུས་ན། སེང་གེའི་ཁྲི་ལ་བཞུགས་ནས་ནམ་མཁའ་བར་སྣང་ལ་གནས་པར་སྣང་ངོ་། །དེ་ནས་འཁོར་བཞི་པོ་དེ་དག་འདི་སྙམ་དུ་བདག་ཅག་དེ་བཞིན་གཤེགས་པ་འདི་དག་དང་ཐག་རིང་ན་བདག་ཅག་ཀྱང་
དེ་བཞིན་གཤེགས་པའི་མཐུས། ནམ་མཁའ་ལ་འཕགས་པར་བྱའོ་སྙམ་དུ་སེམས་སོ། །དེ་ནས་བཅོམ་ལྡན་འདས་ཀྱིས་འཁོར་བཞི་པོ་དེ་དག་གི་སེམས་ཀྱི་རྟོག་པ་ཐུགས་ཀྱིས་ཐུགས་སུ་ཆུད་ནས། དེའི་

46-1-104b

དུས་ན་རྫུ་འཕྲུལ་གྱི་སྟོབས་ཀྱིས་འཁོར་བཞི་པོ་དེ་དག་ནམ་མཁའ་བར་སྣང་ལ་བཀོད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་དེའི་ཚེ་འཁོར་བཞི་པོ་དེ་དག་ལ་བཀའ་སྩལ་པ། 
དགེ་སློང་དག་ཁྱེད་ཀྱི་ནང་ན་འཇིག་རྟེན་གྱི་ཁམས་མི་མཇེད་འདིར། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་དག་པར་འཆད་པར་སྤྲོ་བ་སུ་ཡོད། དེ་བཞིན་གཤེགས་པ་མངོན་སུམ་དུ་
བཞུགས་ཏེ། དེའི་དུས་འདིའོ་དེའི་ཚེ་འདིའོ། །དགེ་སློང་དག་དེ་བཞིན་གཤེགས་པ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་བཞག་སྟེ་ཡོངསུ་མྱ་ངན་ལས་འདའ་བར་འདོད་དོ། །དེ་ནས་བཅོམ་ལྡན་
འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དགེ་སློང་གང་དག་འདྲེན་པ་དྲང་སྲོང་ཆེ། །མྱ་ངན་འདས་འདི་རིན་ཆེན་མཆོད་རྟེན་འདིར། །བཞུགས་ནས་ཆོས་འདི་གསན་ཅིང་གཤེགས་མཛད་ན། །
ཆོས་ཀྱི་ཆེད་དུ་བརྩོན་འགྲུས་སུ་མི་སྐྱེད། །མྱ་ངན་ཡོངས་འདས་བསྐལ་པ་བྱེ་བ་མང་། །འོན་ཀྱང་ད་དུང་དེ་ནི་ཆོས་གསན་ཏེ། །ཆོས་ཀྱི་ཆེད་ཏུ་དེ་དང་དེར་ཡང་གཤེགས། །འདི་འདྲའི་ཆོས་འདི་ཤིན་དུ་རྙེད་པར་དཀའ། །
རྣམ་པར་འདྲེན་པ་འདི་ཡི་སྨོན་ལམ་ནི། །སྲིད་པ་སྔ་མ་དག་ལ་བསྙེན་གྱུར་པས། །མྱ་ངན་འདས་ཀྱང་འཇིག་རྟེན་འདི་ཀུན་ན། ཕྱོགས་བཅུ་ཐམས་ཅད་དུ་ཡང་ཡོངས་སུ་རྒྱུ། །བྱེ་བ་སྟོང་ཕྲག་གང་གཱའི་བྱེ་མ་སྙེད། །
འདི་དག་ཐམས་ཅད་ང་ཡི་ལུས་ཡིན་ཏེ། །མགོན་པོ་མྱ་ངན་འདས་པ་འདི་ལྟ་དང་། །ཆོས་ཀྱི་བྱ་བ་བྱ་ཕྱིར་དེ་དག་ལྷགས། །ཅི་ནས་ཆོས་ཚུལ་ཡུན་རིང་གནས་འགྱུར་བར། །ཐམས་ཅད་དམ་པའི་ཆོས་འདི་
བསྲུང་བའི་ཕྱིར། །ཉན་ཐོས་དེ་བཞིན་མི་དང་ལྷ་ཀུན་དང་། །སོ་སོ་རང་རང་གི་ནི་ཞིང་བོར་ཏེ། །སངས་རྒྱས་འདི་དག་བཞུགས་པར་བྱ་བའི་ཕྱིར། །ངས་ནི་རྫུ་འཕྲུལ་སྟོབས་ཀྱིས་འདི་ལྟ་བུར། །འཇིག་

46-1-105a

རྟེན་ཁམས་མང་སྟོང་ཕྲག་བྱེ་བ་ནས། །སེམས་ཅན་ཐམས་ཅད་སྤོས་ཤིང་ཡང་དག་བྱས། །ཆོས་ཀྱི་ཚུལ་འདི་ཇི་ལྟར་བསྟན་བྱ་ཞེས། །དེ་ལྟ་བུར་ནི་ང་ཡང་ཤིན་ཏུ་བརྩོན། །ཤིང་དབང་དྲུང་ན་སངས་རྒྱས་
ཚད་མེད་པ། །ཇི་ལྟར་པད་མའི་ཕུང་པོ་བཞིན་དུ་བཞུགས། །བྱེ་བ་ཕྲག་ནི་མི་ཉུང་ཤིང་དྲུང་ན། །སེང་གེའི་ཁྲི་ལ་འདྲེན་པ་བཞུགས་པ་ནི། །རབ་ཏུ་མཛེས་པར་རྟག་ཏུ་དེར་བཞུགས་ཏེ། །མུན་ནག་ཆེན་པོའི་ནང་ན་མེ་བཞིན་
ནོ། །འཇིག་རྟེན་རྣམ་འདྲེན་རྣམས་ཀྱི་ཡིད་འོང་དྲི། །ཕྱོགས་བཅུ་རྣམས་སུ་རབ་ཏུ་ལྡང་བ་དེ། །སེམས་ཅན་འདི་དག་ཀུན་དང་འདྲེས་པར་གྱུར། །རླུང་རྣམས་འདིར་ནི་རྟག་པར་ལངས་པ་བཞིན། །ང་ནི་མྱ་ངན་འདས་ནས་
གང་། །ཆོས་ཀྱི་རྣམ་གྲངས་འདི་འཛིན་པ། །འཇིག་རྟེན་མགོན་པོའི་སྤྱན་སྔ་འདིར། །ཚིག་གི་མྱུར་དུ་སྨྲ་བར་གྱིས། །སངས་རྒྱས་མྱ་ངན་ཡོངས་འདས་པ། །ཐུབ་པ་རིན་ཆེན་མང་པོ་ཡང་། །འདི་ལ་སྤྲོ་བར་སུ་
བྱེད་པ། །དེ་ཡི་སེང་གེའི་སྒྲ་གསན་ཏོ། །གཉིས་པ་ང་དང་འདྲེན་པ་བྱེ་བ་ཕྲག །མང་པོ་གང་དག་ལྷགས་པ་འདི་དག་ཀྱང་། །གང་རྣམས་ཆོས་འདི་བཤད་པར་སྤྲོ་བ་ཡི། །རྒྱལ་བའི་སྲས་ཀྱི་བརྩོན་པ་ཉན་པར་བྱེད། །
འདི་ལྟ་བུ་ཡི་ཆོས་འདི་མཉན་པའི་ཕྱིར། །ཕྱོགས་དང་ཕྱོགས་མཚམས་རྟག་ཏུ་སུ་འགྲོ་བ། །དེས་ནི་ང་དང་རིན་ཆེན་མང་བ་ཡི། །རྒྱལ་བ་རང་བྱུང་རྟག་ཏུ་མཆོད་པ་ཡིན། །མདོ་སྡེ་རབ་ཏུ་བསྟན་པས་འཇིག་རྟེན་མགོན། །
གང་འདི་ལྷགས་པར་གྱུར་ཅིང་གང་དག་གིས། །ས་འདི་བཀྲ་མཛེས་བྱས་པ་དེ་ཀུན་ལ། །མཆོད་པ་རྒྱ་ཆེ་མི་ཆུང་བྱས་པར་འགྱུར། །མཆོད་རྟེན་ནང་བཞུགས་བཅོམ་ལྡན་འདས་འདི་དང་། ང་ཡང་སྟན་གྱི་སྟེང་ན་འདུག་པ་དང་། །ཞིང་
བརྒྱ་དུ་མ་དག་ནས་གང་ལྷགས་པ། །འཇིག་རྟེན་མགོན་གཞན་མང་པོ་འདི་མཐོང་བ། །སེམས་ཅན་ཀུན་ལ་སྙིང་བརྩེའི་ཕྱིར། །རིགས་ཀྱི་བུ་དག་ཁྱེད་ཅག་སོམས། །ཤིན་ཏུ་བྱ་དཀའ་གནས་འདི་ལ། །རྣམ་པར་འདྲེན་པས་

46-1-105b

སྤྲོ་བར་མཛད། །མདོ་སྡེ་སྟོང་ཕྲག་མང་པོ་དག །གང་གཱའི་བྱེ་མ་ཇི་བཞིན་པ། །དེ་དག་གང་ཞིག་སྟོན་བྱེད་པ། །དེ་ནི་དཀའ་བ་མ་ཡིན་ནོ། །གང་གི་ལག་གིས་རི་རབ་རི། །ཆང་པར་བླངས་པར་བྱས་ནས་སུ། །ཞིང་རྣམས་
བྱེ་བར་འཕེན་བྱེད་པ། །དེ་ནི་དཀའ་བ་མ་ཡིན་ནོ། །གང་གིས་སྟོང་གསུམ་འདི་དག་ཀྱང་། །རྐང་པའི་མཐེ་བོས་བསྐྱོད་ནས་སུ། །ཞིང་རྣམས་བྱེ་བར་འཕེན་པ་ཡང་། །དེ་ནི་དཀའ་བ་མ་ཡིན་ནོ། །མི་གང་སྲིད་པའི་རྩེར་གནས་ནས། །
མདོ་སྡེ་གཞན་དག་སྟོང་རྣམས་ཀྱི། །ཆོས་འདི་རབ་ཏུ་འཆད་པ་ཡང་། །དེ་ནི་དཀའ་བ་མ་ཡིན་ནོ། །འཇིག་རྟེན་དབང་པོ་མྱ་ངན་འདས། །ཕྱི་དུས་ཤིན་དུ་མི་བཟད་ལ། །གང་ཞིག་མདོ་སྡེ་འདི་འཛིན་ཏམ། །འཆད་པ་དེ་ནི་ཤིན་དུ་དཀའ། །གང་
ཞིག་ནམ་མཁའི་ཁམས་ཀུན་ཡང་། །ཆང་པ་གཅིག་གི་ནང་བཅུག་ཅིང་། །རབ་ཏུ་བཅུག་སྟེ་འགྲོ་བ་ནི། །དེ་ནི་དཀའ་བ་མ་ཡིན་ནོ། །ང་ནི་མྱ་ངན་འདས་པའི་ཚེ། །གང་ཞིག་མདོ་སྡེ་འདི་འདྲ་བ། །ཕྱི་དུས་ཡི་གེར་འདྲིར་འཇུག་པ། དེ་ནི་ཤིན་དུ་
དཀའ་བ་ཡིན། །གང་ཞིག་ས་ཡི་ཁམས་རྣམས་ཀུན། །སེན་མོའི་རྩེ་མོར་འཇུག་བྱེད་ལ། །རབ་ཏུ་བཅུ་ནས་འགྲོ་བྱེད་ཅིང་། །ཚངས་པའི་འཇིག་རྟེན་འཛེག་བྱེད་པ། །འཇིག་རྟེན་ཀུན་གྱི་མདུན་དུ་འདིར། །དེ་ལྟར་དཀའ་བ་བྱས་པ་ཡང་། །དེས་ནི་
དཀའ་བ་བྱས་མ་ཡིན། །བརྩོན་འགྲུས་དག་ཀྱང་དེ་ཙམ་མིན། །ང་ནི་མྱ་ངན་འདས་པའི་ཚེ། །ཕྱི་མའི་དུས་ན་མདོ་སྡེ་འདི། །སུ་ཞིག་སྨྲ་བར་བྱེད་པ་དེ། །དེ་བས་ཤིན་དུ་དཀའ་བར་བྱེད། །བསྐལ་པས་བསྲེག་པར་མི་གང་ཞིག །རྩྭ་ཡི་ཁུར་
བུ་ཐོགས་ནས་སུ། །ཚིག་བཞིན་དུ་ནི་དབུས་འགྲོ་བ། །འཇིག་རྟེན་ན་ནི་དེ་མི་དཀའ། །ང་ནི་མྱ་ངན་འདས་པའི་ཚེ། །གང་གིས་མདོ་འདི་བཟུང་ནས་ཀྱང་། །སེམས་ཅན་ཅིག་ལ་འང་ཐོས་བྱེད་པ། །དེ་བས་ཤིན་དུ་དཀའ་བ་ཡིན། །ཆོས་ཀྱི་ཕུང་
པོ་སྟོང་ཕྲག་ནི། །བརྒྱད་བཅུ་རྩ་བཞི་འཛིན་བྱེད་ཅིང་། །ལུང་བཅས་ཇི་སྐད་གསུངས་པ་བཞིན། །སྲོག་ཆགས་བྱེ་བ་རྣམས་ལ་འཆད། །དེ་ཚེ་གང་ཞིག་དགེ་སློང་རྣམས། །འདུལ་བྱེད་ང་ཡི་ཉན་ཐོས་རྣམས། །མངོན་པར་ཤེས་ལ་བཀོད་

46-1-106a

པ་ཡང་། །དེ་ནི་དཀའ་བ་མ་ཡིན་ནོ། །གང་ཞིག་མདོ་འདི་འཛིན་པ་འམ། །དད་དམ་མོས་པར་བྱེད་པ་འམ། །ཡང་དང་ཡང་དུ་འཆད་བྱེད་པ། །འདི་ནི་དེ་བས་ཤིན་དུ་དཀའ། །སྟོང་ཕྲག་བྱེ་བ་མང་པོ་རྣམས། །གང་གཱའི་
བྱེ་མ་ཇི་བཞིན་པ། །མངོན་ཤེས་དྲུག་ལྡན་སྐལ་ཆེན་དང་། །དགྲ་བཅོམ་ཉིད་ལ་དགོད་པ་བས། །ང་ནི་མྱ་ངན་འདས་འོག་ཏུ། །གང་ཞིག་མདོ་མཆོག་འདི་འཛིན་པ། །མི་མཆོག་དེ་ནི་དེ་བས་ཀྱང་། །ཤིན་ཏུ་ལས་མང་བྱེད་པ་
ཡིན། །སངས་རྒྱས་ཡེ་ཤེས་ཆེད་ཀྱི་ཕྱིར། །འཇིག་རྟེན་ཁམས་ནི་སྟོང་རྣམས་སུ། །ང་ཡིས་ཤིན་དུ་ཆོས་མང་བཤད། །ད་དུང་དུ་ཡང་ང་འཆད་དོ། །འདི་ནི་མདོ་སྡེ་ཐམས་ཅད་ལས། །མདོ་སྡེ་དམ་པ་མཆོག་ཅེས་བྱ། །མདོ་
སྡེ་འདི་ནི་སུ་འཛིན་པ། །དེ་ནི་རྒྱལ་བའི་སྐུ་འཛིན་ཏོ། །རིགས་ཀྱི་བུ་དག་ཕྱི་དུས་ན། །ཁྱེད་ཅག་རྣམས་ལས་གང་སུ་ཞིག །མདོ་སྡེ་འཛིན་པར་སྤྲོ་བ་ཁྱེད། །དེ་བཞིན་གཤེགས་པའི་སྤྱན་སྔར་སྨྲོས། །ཤིན་དུ་གཟུང་དཀའ་
མདོ་འདི་ནི། །གང་ཞིག་ཡུད་ཙམ་འཛིན་པ་ཡང་། །འཇིག་རྟེན་མགོན་ལ་རྣམ་ཀུན་དུ། །དཀའ་བ་ཆེན་པོ་བྱས་པར་གྱུར། །འཇིག་རྟེན་མགོན་གྱིས་ཐམས་ཅད་དུ། །དེ་ནི་ཤིན་ཏུ་བསྔགས་པ་ཡིན། །ཤིན་དུ་དཔའ་ཞིང་ནུས་
པ་སྟེ། །བྱང་ཆུབ་ཏུ་ནི་མངོན་ཤེས་མྱུར། །མདོ་སྡེ་འདི་ནི་སུ་འཛིན་པ། །གཅེས་པ་ཁྱེར་བ་དེ་ཡིན་ཏེ། །འཇིག་རྟེན་མགོན་གྱི་ཐུགས་ཀྱི་སྲས། །དུལ་བའི་ས་ཡང་རྗེས་སུ་ཐོབ། །མི་གཙོ་མྱ་ངན་འདས་པ་ན། །མདོ་
སྡེ་འདི་ནི་རབ་སྟོན་པ། །ལྷ་དང་མིར་བཅས་འཇིག་རྟེན་ན། །དེ་ནི་མིག་ཏུ་གྱུར་པ་ཡིན། །གང་ཞིག་ཕྱི་མའི་དུས་ཀྱི་ཚེ། །མདོ་སྡེ་འདི་ནི་ཡུད་ཙམ་ཞིག །འཆད་པ་བྱེད་པ་མཁས་པ་དེ། །སེམས་ཅན་ཀུན་གྱིས་
ཕྱག་བྱའི་འོས། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའི་ཚོགས་མ་ལུས་པ་དང་ལྷ་དང་ལྷ་མ་ཡིན་དུ་བཅས་པའི་འཇིག་རྟེན་ལ་བོས་ཏེ་འདི་སྐད་ཅེས་བཀའ་སྩལ་ཏོ། །དགེ་སློང་དག་སྔོན་བྱུང་བ་འདས་པ་

46-1-106b

པའི་དུས་ན། བསྐལ་པ་ཚད་མེད་གྲངས་མེད་པར་ངས་དམ་པའི་ཆོས་པད་མ་དཀར་པོའི་མདོ་ཡོངས་སུ་བཙལ་ཏེ་སྐྱོ་མ་མྱོང་ལ་ངལ་བ་མེད་པར་གྱུར་ཏོ། །སྔོན་བསྐལ་པ་དུ་མ་བསྐལ་པ་བརྒྱ་སྟོང་ཕྲག་དུ་མར། ང་རྒྱལ་
པོར་གྱུར་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་ནས་ངའི་སེམས་ལྡོག་པར་མ་གྱུར་ཏོ། །ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་བྱ་བའི་ཕྱིར་བརྩོན་པར་གྱུར་ནས། སྦྱིན་པ་ཚད་མེད་པ་རབ་ཏུ་
བྱིན་ཏེ། གསེར་དང་ནོར་བུ་དང་མུ་ཏིག་དང་བཻ་དཱུརྱ་དང་དུང་དང་མན་ཤེལ་དང་བྱི་རུ་དང་ས་ལེ་སྦྲམ་དང་དངུལ་དང་རྡོའི་སྙིང་པོ་དང་སྤུག་དང་མུ་ཏིག་དམར་པོ་དང་། གྲོང་དང་གྲོང་ཁྱེར་དང་གྲོང་རྡལ་དང་ལྗོངས་དང་ཡུལ་འཁོར་དང་རྒྱལ་པོའི་ཕོ་
བྲང་འཁོར་དང་ཆུང་མ་དང་བུ་ཕོ་དང་བུ་མོ་དང་བྲན་ཕོ་དང་བྲན་མོ་དང་གླང་པོ་ཆེ་དང་རྟ་དང་ཤིང་རྟ་དང་བདག་གི་ལུས་ཀྱི་བར་དུ་ཡོངསུ་བཏང་སྟེ། ལག་པ་དང་རྐང་པ་དང་མགོ་དང་ཡན་ལག་དང་ཉིང་ལག་ཐམས་ཅད་དང་སྲོག་
སྦྱིན་པ་པོར་གྱུར་ནས་ང་ནམ་དུ་ཡང་ཀུན་འཛིན་པའི་སེམས་མ་སྐྱེས་སོ། །དེའི་ཚེ་འཇིག་རྟེན་འདི་ཚེ་རིང་པོར་གྱུར་ཏེ། ལོ་བརྒྱ་སྟོང་དུ་མར་འཚོའོ། །དེའི་ཚེ་ངས་ཆོས་ཀྱི་ཕྱིར་རྒྱལ་པོ་བྱས་ཀྱི། ཡུལ་འཁོར་གྱི་ཕྱིར་ནི་མ་ཡིན་ཏེ། 
བུ་ཐུ་བོ་དབང་བསྐུར་ནས་ང་ཕྱོགས་བཞིར་ཆོས་ཀྱི་མཆོག་ཚོལ་བ་ལ་བརྩོན་པར་གྱུར་ཏོ། །ངས་དྲིལ་བུ་བརྡུངས་ཏེ་འདི་སྐད་ཅེས། ང་ལ་སུས་ཆོས་ཀྱི་མཆོག་རབ་ཏུ་བྱིན་པ་དང་དོན་དམ་པར་བཤད་པ་དེའི་བྲན་ངས་བྱའོ་ཞེས་
གྲགས་པར་བྱས་སོ། །དེ་ནས་དེའི་ཚེ་དྲང་སྲོང་ཞིག་ཡོད་པ་ང་ལ་འདི་སྐད་ཅེས། རྒྱལ་པོ་ཆེན་པོ་དམ་པའི་ཆོས་པད་མ་དཀར་པོ་ཞེས་བྱ་བའི་མདོ་མཆོག་གི་ཆོས་བསྟན་པ་ཡོད་དེ། བྲན་དུ་ཁས་ལེན་ན་ཆོས་དེ་ཁོ་
བོས་ཁྱོད་ཐོས་པར་བྱའོ་ཞེས་ཟེར་བ་དང་། ངས་དྲང་སྲོང་དེའི་ཚིག་ཐོས་ནས་དགའ་མགུ་རངས་ཡིད་རབ་ཏུ་དགའ་སྟེ། དྲང་སྲོང་དེ་ག་ལ་བ་དེར་བསྙེན་ནས་འདི་སྐད་ཅེས། བྲན་གྱི་ལས་ཅི་བྱེད་པ་དེ་བྱའོ་ཞེས་སྨྲས་

46-1-107a

ཏེ། དེ་ལྟར་ང་དྲང་སྲོང་དེའི་བྲན་དུ་ཁས་བླངས་ནས་རྩྭ་དང་ཤིང་དང་ཆུ་དང་རྩ་བ་དང་རྡོག་གུ་དང་འབྲས་བུ་ལ་སོགས་པ་ལེན་པའི་ལས་བྱས་ཏེ། ངས་སྒོ་བསྲུང་བ་ཡན་ཆེད་བྱས་སོ། །ཉིན་པར་རྣམ་པ་དེ་ལྟ་བུའི་ལས་
བྱས་ནས་མཚན་མོ་མལ་ཁྲིའི་རྐང་པ་ཡང་བཟུང་ངོ་། །འོན་ཀྱང་ངའི་ལུས་ངལ་བར་གྱུར་པ་ཡང་མེད། སེམས་ངལ་བར་གྱུར་པ་ཡང་མེད་དེ། ལས་དེ་ལྟར་བྱས་པས་ལོ་སྟོང་ཚང་བར་འདས་སོ། །དེ་ནས་བཅོམ་ལྡན་འདས་
ཀྱིས། དེའི་ཚེ་དོན་འདི་ཡོངས་སུ་བསྟན་པའི་ཕྱིར་ཚིགས་སུ་བཅད་པ་འདི་དག་བཀའ་སྩལ་ཏོ། །བསྐལ་པ་འདས་པ་ཡང་དག་རྗེས་དྲན་ཏེ། །ངས་སྔོན་ཆོས་ཕྱིར་ཆོས་རྒྱལ་གྱུར་པ་ན། །ཆོས་ཀྱི་ཕྱིར་ནི་ང་ཡིས་རྒྱལ་པོ་བྱས། །
འདོད་ཕྱིར་མ་ཡིན་ཆོས་མཆོག་དོན་དུའོ། །གང་ཞིག་ཆོས་སྨྲ་དེ་ཡི་བྲན་བྱ་ཞེས། །ངས་ནི་ཕྱོགས་བཞིར་དེ་སྐད་བསྒྲགས་པར་བྱས། །དེ་ཡི་ཚེ་ན་དྲང་སྲོང་མཁས་ཡོད་པ། །དམ་པ་ཆོས་ཤེས་བྱ་བ་མདོ་སྡེ་སྨྲ། །དེ་ནི་ང་ལ་གལ་
ཏེ་ཆོས་འདོད་ན། །བྲན་དུ་ཁས་ལོང་དེ་ནས་ཆོས་བཤད་ཟེར། །ཚིག་དེ་ཐོས་ནས་ང་ནི་རབ་ཏུ་དགའ། །དེ་ན་བྲན་གྱིས་བྱ་བའི་ལས་དེ་བྱས། །དམ་པའི་ཆོས་ཕྱིར་བྲན་ནི་བྱེད་པ་ན། །ལུས་དང་སེམས་ལ་ངལ་བས་མ་རེག་གོ། །དེ་ཚེ་
ང་ནི་སེམས་ཅན་ཕྱིར་སྨོན་གྱི། །བདག་གི་ཕྱིར་མིན་འདོད་ཕྱིར་མ་ཡིན་ཏེ། །ལས་གཞན་མེད་པར་ཕྱོགས་བཅུ་རྣམས་སུ་རྒྱུ། །བསྐལ་པ་སྟོང་དུ་རྫོགས་པར་མི་སྐྱོ་བར། །ཆོས་ཤེས་བྱ་བ་མདོ་སྡེ་སྙེད་ཀྱི་བར། །རྒྱལ་
པོ་དེས་ནི་དེ་སྙེད་བརྩོན་འགྲུས་བརྩམས། །དགེ་སློང་དག་འདི་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོར་གྱུར་པ་གཞན་ཞིག་ཡིན་སྙམ་དུ་འཛིན་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེའི་ཚེ་དེའི་དུས་ན་རྒྱལ་པོར་གྱུར་
པ་དེ་ནི་ང་ཡིན་ནོ། །དགེ་སློང་དག་དེའི་ཚེ་དེའི་དུས་ན་དྲང་སྲོང་དུ་གྱུར་པ་དེ་གཞན་ཡིན་སྙམ་དུ་འཛིན་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དགེ་སློང་དག་ལྷས་བྱིན་འདི་དེའི་ཚེ་དེའི་དུས་ན་དྲང་སྲོང་དུ་གྱུར་ཏེ། 

46-1-107b

དགེ་སློང་དག་ལྷས་བྱིན་ཡང་ངའི་དགེ་བའི་བཤེས་གཉེན་ནོ། །ལྷས་བྱིན་ལ་བརྟེན་ཏེ་ངས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱས་སོ། །བྱམས་པ་ཆེན་པོ་དང་སྙིང་རྗེ་ཆེན་པོ་དང་དགའ་བ་ཆེན་པོ་དང་
བཏང་སྙོམས་ཆེན་པོ་དང་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང་དཔེ་བྱད་བཟང་པོ་བརྒྱད་བཅུ་དང་འོད་འདོམ་གང་བ་དང་མདོག་གསེར་གྱི་ཁ་དོག་དང་སྟོབས་བཅུ་དང་མི་འཇིགས་པ་བཞི་དང་བསྡུ་བའི་དངོས་པོ་བཞི་དང་སངས་
རྒྱས་ཀྱི་ཆོས་མ་འདྲེས་པ་བཅྭོ་བརྒྱད་དང་རྫུ་འཕྲུལ་གྱི་སྟོབས་ཆེན་པོ་དང་ཕྱོགས་བཅུའི་སེམས་ཅན་བསྒྲལ་བ་དེ་ཐམས་ཅད་ཀྱང་ལྷས་བྱིན་ལ་བརྟེན་ཏེ་རྫོགས་པར་བྱས་སོ། །དགེ་སློང་དག་ཁྱེད་མོས་པར་བྱའོ། །ཁོང་དུ་ཆུད་
པར་བྱའོ། །དགེ་སློང་དག་ལྷས་བྱིན་འདི་མ་འོངས་པའི་དུས་བསྐལ་པ་ཚད་མེད་གྲངས་མེད་པ་ན། འཇིག་རྟེན་གྱི་ཁམས་ལྷའི་ཐེམ་སྐས་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྷའི་
རྒྱལ་པོ་ཞེས་བྱ་བར་འགྱུར་རོ། །དགེ་སློང་དག་དེ་བཞིན་གཤེགས་པ་ལྷའི་རྒྱལ་པོ་དེའི་ཚེའི་ཚད་ནི་བར་གྱི་བསྐལ་པ་ཉི་ཤུར་འགྱུར་རོ། །ཆོས་ཀྱང་རྒྱས་པར་སྟོན་པར་འགྱུར་རོ། །སེམས་ཅན་གང་གཱའི་ཀླུང་གི་བྱེ་མ་སྙེད་དག་ནི་ཉོན་
མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །སེམས་ཅན་དུ་མ་ནི་རང་བྱང་ཆུབ་ཏུ་སེམས་བསྐྱེད་པར་འགྱུར་རོ། །སེམས་ཅན་གང་གཱའི་ཀླུང་གི་བྱེ་མ་སྙེད་དག་ནི་བླ་ན་མེད་པ་ཡང་དག་པར་རྫོགས་པ་
འི་བྱང་ཆུབ་ཏུ་སེམས་བསྐྱེད་པར་འགྱུར་ཞིང་ཕྱིར་མི་ལྡོག་པའི་བཟོད་པ་ཡང་ཐོབ་པར་འགྱུར་རོ། །དགེ་སློང་དག་དེ་བཞིན་གཤེགས་པ་ལྷའི་རྒྱལ་པོ་ཡོངས་སུ་མྱ་ངན་ལས་འདས་ནས། དམ་པའི་ཆོས་བར་གྱི་བསྐལ་པ་ཉི་ཤུར་གནས་སོ། །དེའི་
སྐུ་གདུང་གི་རིང་བསྲེལ་ནི་འགྱེས་པར་མི་འགྱུར་ཞིང་དེའི་སྐུ་གདུང་གཅིག་ཏུ་འདུས་པར་འགྱུར་ཏེ། རིན་པོ་ཆེ་སྣ་བདུན་གྱི་མཆོད་རྟེན་དུ་བཅུག་ནས། མཆོད་རྟེན་དེ་ཡང་འཕང་དུ་ནི་དཔག་ཚད་དྲུག་བཅུ། རྒྱར་ནི་དཔག་ཚད་བཞི་བཅུ་པར་འགྱུར་རོ། །

46-1-108a

དེ་ལ་མི་དང་ལྷ་ཐམས་ཅད་ཀྱིས་སྤོས་དང་བདུག་པ་དང་མེ་ཏོག་དང་ཕྲེང་བ་དང་བྱུག་པ་དང་ཕྱེ་མ་དང་གོས་དང་གདུགས་དང་རྒྱལ་མཚན་དང་ལྷའི་བ་དན་ལ་སོགས་པས་མཆོད་པ་བྱེད་པར་འགྱུར་རོ། །ཚིགས་སུ་བཅད་པའི་དབྱངས་ཀྱིས་
བསྟོད་པར་འགྱུར་རོ། །གང་དག་མཆོད་རྟེན་དེ་ལ་སྐོར་བ་བྱེད་པ་འམ་འདུད་པ་དེ་དག་ཀྱང་ལ་ལ་ནི་འབྲས་བུའི་མཆོག་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །ལ་ལ་ནི་རང་བྱང་ཆུབ་ཐོབ་པར་འགྱུར་རོ། །ལྷ་དང་མི་བསམ་
གྱིས་མི་ཁྱབ་དཔག་ཏུ་མེད་པ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ་ཕྱིར་མི་ལྡོག་པར་འགྱུར་རོ། །དེ་ནས་ཡང་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་མ་འོངས་པའི་དུས་ན་རིགས་
ཀྱི་བུ་འམ་རིགས་ཀྱི་བུ་མོ་གང་ལ་ལ་དམ་པའི་ཆོས་པད་མ་དཀར་པོའི་མདོའི་ལེའུ་འདི་ཉན་པ་དང་ཐོས་ནས་སོམ་ཉི་མི་ཟ་བ་དང་རྣམ་པར་དག་པའི་སེམས་ཀྱིས་མོས་པ་དེ་དག་གིས་ངན་འགྲོ་གསུམ་གྱི་སྒོ་བཅད་པར་འགྱུར་ཏེ། སེམས་ཅན་དམྱལ་
བ་དང་དུད་འགྲོའི་སྐྱེ་གནས་དང་གཤིན་རྗེའི་འཇིག་རྟེན་དུ་སྐྱེ་བར་མི་འགྱུར་རོ། །ཕྱོགས་བཅུའི་སངས་རྒྱས་ཀྱི་ཞིང་དུ་སྐྱེས་ན་ཡང་ཚེ་རབས་ཚེ་རབས་སུ་མདོ་སྡེ་འདི་ཐོས་པར་འགྱུར་རོ། །ལྷ་དང་མིའི་འཇིག་རྟེན་དུ་སྐྱེས་ན་ཡང་དེས་གནས་ཁྱད་པར་ཅན་
ཐོབ་པར་འགྱུར་རོ། །སངས་རྒྱས་ཀྱི་ཞིང་གང་དུ་སྐྱེ་བ་དེར་ཡང་དེ་བཞིན་གཤེགས་པའི་སྤྱན་སྔར་རིན་པོ་ཆེ་སྣ་བདུན་གྱི་པད་མའི་ནང་ནས་བརྫུས་ཏེ་སྐྱེ་བར་འགྱུར་རོ། །དེ་ནས་དེའི་ཚེ་འོག་གི་ཕྱོགས་ནས་དེ་བཞིན་གཤེགས་པ་རིན་ཆེན་མང་གི་སངས་
རྒྱས་ཀྱི་ཞིང་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་བརྩེགས་ཞེས་བྱ་བ་འོངས་པ་དེས། དེ་བཞིན་གཤེགས་པ་རིན་ཆེན་མང་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཉིད་ཀྱི་སངས་རྒྱས་ཀྱི་ཞིང་དུ་གཤེགས་སོ། །དེ་ནས་བཅོམ་
ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་བྱང་ཆུབ་སེམས་དཔའ་ཤེས་རབ་བརྩེགས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཡུད་ཙམ་ཞིག་སྡོད་ཅིག །ང་ཡི་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་

46-1-108b

གཞོན་ནུར་གྱུར་པ་དང་། ཆོས་རྣམ་པར་གཏན་ལ་དབབ་པ་འགའ་ཞིག་གྱིས་ལ། ཕྱིས་བདག་གི་སངས་རྒྱས་ཀྱི་ཞིང་དུ་སོང་ཤིག །དེ་ནས་དེའི་ཚེ་འཇམ་དཔལ་གཞོན་ནུར་གྱུར་པ་པད་མ་འདབ་མ་སྟོང་ཡོད་པ། ཚད་ཤིང་རྟའི་འཕང་ལོ་ཙམ་ལ་འདུག་
སྟེ། བྱང་ཆུབ་སེམས་དཔའ་དུ་མས་ཡོངས་སུ་བསྐོར་ནས། རྒྱལ་མཚོའི་ནང་ནས་ཀླུའི་རྒྱལ་པོ་རྒྱ་མཚོའི་ཁང་པ་ནས་སྟེང་གི་ནམ་མཁའ་ལ་འཕགས་ཏེ། ནམ་མཁའ་ལས་བྱ་རྒོད་ཀྱི་ཕུང་པོའི་རི་ལ་བཅོམ་ལྡན་འདས་ཀྱི་གན་དུ་སོང་ངོ་། །དེ་ནས་
འཇམ་དཔལ་གཞོན་ནུར་གྱུར་པ་པད་མ་ལས་བབས་ཏེ། བཅོམ་ལྡན་འདས་ཤཱཀྱ་ཐུབ་པ་དང་དེ་བཞིན་གཤེགས་པ་རིན་ཆེན་མང་གི་ཞབས་ལ་མགོ་བོས་ཕྱག་འཚལ་ནས། བྱང་ཆུབ་སེམས་དཔའ་ཤེས་རབ་བརྩེགས་ག་ལ་བ་དེར་སོང་སྟེ་ཕྱིན་
ནས་བྱང་ཆུབ་སེམས་དཔའ་ཤེས་རབ་བརྩེགས་དང་མངོན་སུམ་དུ་ཀུན་དགའ་ཞིང་ཡང་དག་པར་མགུ་བའི་གཏམ་རྣམ་པ་མང་པོ་བྱས་ཏེ་ཕྱོགས་གཅིག་ཏུ་འདུག་གོ། །དེ་ནས་བྱང་ཆུབ་སེམས་དཔའ་ཤེས་རབ་བརྩེགས་ཀྱིས་འཇམ་དཔལ་གཞོན་ནུར་
གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་རྒྱ་མཚོར་ཞུགས་ཏེ། སེམས་ཅན་གྱི་ཁམས་ཇི་སྙེད་བཏུལ། འཇམ་དཔལ་གྱིས་སྨྲས་པ། ཇི་ཙམ་དུ་ཚིག་གིས་བརྗོད་མི་ནུས་ཤིང་སེམས་ཀྱིས་བསམ་མི་ནུས་པ་དེ་སྙེད་ཏུ། ཚད་མེད་གྲངས་
མེད་པའི་སེམས་ཅན་དུ་མ་དག་བཏུལ་ལོ། །རིགས་ཀྱི་བུ་སྐད་ཅིག་སྡོད་ཅིག་དང་སྔ་ལྟས་ཀྱི་བར་དུ་མཐོང་བར་འགྱུར་རོ། །འཇམ་དཔལ་གཞོན་ནུར་གྱུར་པས་དེ་སྐད་ཅེས་སྨྲས་མ་ཐག་ཏུ་དེའི་ཚེ་པད་མ་སྟོང་ཕྲག་དུ་མ་རྒྱ་མཚོའི་ནང་ནས་སྟེང་
གི་ནམ་མཁའ་ལ་བྱུང་སྟེ། པད་མ་དེ་དག་ལ་བྱང་ཆུབ་སེམས་དཔའ་སྟོང་ཕྲག་དུ་མ་འཁོད་དོ། །དེ་ནས་བྱང་ཆུབ་སེམས་དཔའ་དེ་དག་ནམ་མཁའ་ལས། བྱ་རྒོད་ཀྱི་ཕུང་པོའི་རི་ག་ལ་བ་དེར་ལྷགས་ཏེ་སྟེང་གི་ནམཁའ་ལ་འཁོད་པར་སྣང་ངོ་། །དེ་དག་
ཐམས་ཅད་ཀྱང་འཇམ་དཔལ་གཞོནུར་གྱུར་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བཏུལ་བ་ཤ་སྟག་གོ། །དེ་ནས་བྱང་ཆུབ་སེམས་དཔའ་གང་དག་སྔོན་ཐེག་པ་ཆེན་པོ་ལ་ཡང་དག་པར་ཞུགས་པར་གྱུར་པ་དེ་དག་ནི་ཐེག་པ་ཆེན་པོའི་ཡོན་ཏན་དང་ཕ་

46-1-109a

རོལ་དུ་ཕྱིན་པ་དྲུག་པོ་དག་གི་བསྔགས་པ་བརྗོད་དོ། །གང་དག་སྔོན་ཉན་ཐོས་བྱེད་བྱེད་པའི་བྱང་ཆུབ་སེམས་དཔའ་དེ་དག་ནི་ཉན་ཐོས་ཀྱི་ཐེག་པ་ཉིད་རྗོད་དེ། དེ་དག་ཐམས་ཅད་ཀྱང་ཆོས་ཐམས་ཅད་
སྟོང་པ་ཉིད་དང་ཐེག་པ་ཆེན་པོའི་ཡོན་ཏན་ཡང་ཡང་དག་པར་ཤེས་པ་ཤ་སྟག་གོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ཤེས་རབ་བརྩེགས་ལ་འདི་སྐད་ཅེས་སྨྲས་སོ། །རིགས་
ཀྱི་བུ་འདི་དག་ཐམས་ཅད་ནི་ཁོ་བོས་རྒྱ་མཚོར་ཞུགས་ནས། སེམས་དུལ་བར་བྱས་པ་ཡིན་ཏེ་དེ་དག་ཀྱང་འདི་ན་སྣང་ངོ་། །དེ་ནས་བྱང་ཆུབ་སེམས་དཔའ་ཤེས་རབ་བརྩེགས་ཀྱིས་འཇམ་དཔལ་གཞོན་ནུར་གྱུར་པ་
ལ་ཚིགསུ་བཅད་པའི་དབྱངས་ཀྱིས་ཡོངས་སུ་དྲིས་པ། བཟང་པོ་ཆེན་པོ་ཤེས་རབ་དཔེར་བརྗོད་པ། །ཁྱོད་ཀྱིས་སེམས་ཅན་གྲངས་མེད་དེང་བཏུལ་བ། །མི་ཡི་ལྷ་ཁྱོད་ལ་ནི་དེ་འདྲི་ཡིས། །འདི་ནི་སུ་ཡི་མཐུ་
ལགས་དེ་གསུངས་ཤིག །བྱང་ཆུབ་ལམ་བསྟན་པ་ཡི་མདོ་གང་དང་། །ཆོས་ནི་གང་ཞིག་ཁྱོད་ཀྱིས་རབ་བསྟན་ན། །དེ་ཐོས་འདི་དག་བྱང་ཆུབ་སེམས་སྐྱེས་ཤིང་། །ཐམས་ཅད་མཁྱེན་ཉིད་དེས་ཏེ་གཏིང་ཡང་རྙེད། །འཇམ་དཔལ་གྱིས་
སྨྲས་པ། རྒྱ་མཚོའི་ནང་དུ་དམ་པའི་ཆོས་པད་མ་དཀར་པོའི་མདོ་བཤད་དེ། གཞན་མ་ཡིན་ནོ་ཤེས་རབ་བརྩེགས་ཀྱིས་སྨྲས་པ། མདོ་འདི་ཟབ་ཅིང་ཕྲ་ལ་མཐོང་བར་དཀའ་སྟེ་མདོ་སྡེ་འདི་དང་མཚུངས་པའི་མདོ་སྡེ་གཞན་གང་ཡང་མེད་ན། སེམས་ཅན་གང་ལ་ལ་
མདོ་སྡེ་དཀོན་མཆོག་འདི་ཁོང་དུ་ཆུད་པ་འམ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྗོགས་པར་འཚང་རྒྱ་བར་ནུས་པ་ཡོད་དམ། འཇམ་དཔལ་གྱིས་སྨྲས་པ། རིགས་ཀྱི་བུ་ཡོད་དེ་ཀླུའི་རྒྱལ་པོ་རྒྱ་མཚོའི་བུ་མོ་སྐྱེས་ནས་ལོ་བརྒྱད་ལོན་པ་ཤེས་རབ་ཆེ་བ་དབང་
པོ་རྣོ་བ་ཡེ་ཤེས་སྔོན་དུ་འགྲོ་བའི་ལུས་དང་ངག་དང་ཡིད་ཀྱི་ལས་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་བཤད་པའི་ཚིག་འབྲུ་དང་དོན་འཛིན་པའི་གཟུངས་ཐོབ་པ་ཆོས་ཐམས་ཅད་དང་སེམས་ཅན་ཐམས་ཅད་ལ་མཉམ་པར་གཞག་པའི་ཏིང་ངེ་འཛིན་སྟོང་སྐད་ཅིག་གཅིག་

46-1-109b

གིས་ཐོབ་པ། བྱང་ཆུབ་ཀྱི་སེམས་ལས་ཕྱིར་མི་ལྡོག་པ། སྨོན་ལམ་རྒྱ་ཆེ་བ་སེམས་ཅན་ཐམས་ཅད་ལ་བདག་དང་འདྲ་བར་ཕངས་པར་སེམས་པ་དང་ལྡན་པ། ཡོན་ཏན་བསྐྱེད་པར་ནུས་ཤིང་དེ་དག་ལས་ཡོངས་སུ་མི་ཉམས་པ། བཞིན་
འཛུམ་པ་ཁ་དོག་རྒྱས་པ་མཆོག་དང་ལྡན་པ་བྱམས་པའི་སེམས་དང་ལྡན་པ་སྙིང་རྗེའི་ཚིག་སྨྲ་བ་དེ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བར་ནུས་སོ། །ཤེས་རབ་བརྩེགས་ཀྱིས་སྨྲས་པ། ཁོ་བོས་མཐོང་བ་བཅོམ་
ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་བྱང་ཆུབ་ཀྱི་ཕྱིར་འབད་ཅིང་བྱང་ཆུབ་སེམས་དཔར་གྱུར་པ་ན་བསོད་ནམས་དུ་མ་མཛད་དེ། བསྐལ་པ་སྟོང་ཕྲག་དུ་མར་ནམ་ཡང་བརྩོན་འགྲུས་མ་ཉམས་སོ། །སྟོང་གསུམ་གྱི་སྟོང་ཆེན་
པོའི་འཇིག་རྟེན་གྱི་ཁམས་སུ། ཐ་ན་ཡུངས་དཀར་ཙམ་གྱི་ཕྱོགས་གང་དུ་ཡང་སེམས་ཅན་གྱི་ཕྱིར་སྐུ་མ་བོར་བ་ཅུང་ཟད་ཀྱང་མེད་དེ། ཕྱིས་བྱང་ཆུབ་མངོན་པར་རྫོགས་པར་སངས་རྒྱས་ནས། དེས་ཡུད་ཙམ་གྱིས་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ནུས་ཞེས་བྱ་བ་དེ་ལ་སུ་ཞིག་ཡིད་ཆེས། དེ་ནས་དེའི་ཚེ་ཀླུའི་རྒྱལ་པོ་རྒྱ་མཚོའི་བུ་མོ་མདུན་ན་འདུག་པར་སྣང་སྟེ། དེས་བཅོམ་ལྡན་འདས་ཀྱི་ཞབས་ལ་མགོ་བོས་
ཕྱག་འཚལ་ནས། ཕྱོགས་གཅིག་ཏུ་འདུག་ནས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །བསོད་ནམས་བསོད་ནམས་ཤིན་དུ་ཟབ། །ཕྱོགས་རྣམས་ཀུན་དུ་ཁྱབ་པ་ལགས། །སུམ་བཅུ་རྩ་གཉིས་མཚན་རྣམས་
ཀྱིས། །ཕྲ་བའི་སྐུ་ནི་ལེགས་པར་བརྒྱན། །དཔེ་བྱད་བཟང་པོ་རྣམས་དང་ལྡན། །སེམས་ཅན་ཀུན་གྱིས་ཕྱག་ཀྱང་བགྱིས། །སེམས་ཅན་ཐམས་ཅད་འདུ་བ་ནི། །དཔེར་ན་གྲོང་བར་འདྲ་བ་ལགས། །བདག་ནི་འདོད་བཞིན་བྱང་
ཆུབ་སྟེ། །དེ་བཞིན་གཤེགས་པ་བདག་གི་དབང་། །སྡུག་བསྔལ་རྣམས་ལས་གྲོལ་བའི་ཆོས། །རྒྱ་ཆེར་རབ་ཏུ་བསྟན་པར་བགྱི། །དེ་ནས་དེའི་ཚེ་ཚེ་དང་ལྡན་པ་ཤཱ་རིའི་བུས། ཀླུའི་རྒྱལ་པོ་རྒྱ་མཚོའི་བུ་མོ་ལ་འདི་སྐད་ཅེས་སྨྲས་སོ། །ཆེ་ཞེ་ཁྱོད་

46-1-110a

ཕྱིར་མི་ལྡོག་པར་བྱང་ཆུབ་ཏུ་སེམས་སྐྱེས་ཤིང་ཤེས་རབ་དཔག་ཏུ་མེད་པ་ཡོད་དུ་ཟད་དེ་ཡང་དག་པར་རྫོགས་པའི་སངས་རྒྱས་ཉིད་ནི་རྙེད་པར་དཀའོ། །ཆེ་ཞེ་བུད་མེད་བརྩོན་འགྲུས་མི་འདོར་ཞིང་བསྐལ་པ་སྟོང་ཕྲག་དུ་མར་
བསོད་ནམས་དག་བྱེད་ལ། ཕ་རོལ་དུ་ཕྱིན་པ་དྲུག་པོ་དག་ཡོངས་སུ་རྫོགས་པར་བྱེད་ཀྱང་ད་དུང་སངས་རྒྱས་ཉིད་མི་ཐོབ་པ་ཡོད་དེ། དེ་ཅིའི་ཕྱིར་ཞེ་ན། བུད་མེད་ཀྱིས་ད་དུང་གནས་ལྔ་མ་ཐོབ་པའི་ཕྱིར་ཏེ། ལྔ་གང་ཞེ་ན། དང་པོ་ཚངས་པའི་
གནས་དང་། གཉིས་པ་བརྒྱ་བྱིན་གྱི་གནས་དང་། གསུམ་པ་རྒྱལ་ཆེན་བཞིའི་གནས་དང་། བཞི་པ་འཁོར་ལོ་སྒྱུར་བའི་གནས་དང་། ལྔ་པ་ཕྱིར་མི་ལྡོག་པའི་བྱང་ཆུབ་སེམས་དཔའི་གནས་སོ། །དེ་ནས་དེའི་ཚེ་ཀླུའི་རྒྱལ་པོ་རྒྱ་
མཚོའི་བུ་མོ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མ་ལུས་པའི་རིན་དུ་ཆོག་པའི་ནོར་བུ་གཅིག་ཡོད་པ་དེ། ཀླུའི་རྒྱལ་པོའི་བུ་མོ་དེས་བཅོམ་ལྡན་འདས་ལ་ཕུལ་ནས། བཅོམ་ལྡན་འདས་ཀྱིས་ཀྱང་ཐུགས་བརྩེ་
བའི་ཕྱིར་དེ་བཞེས་སོ། །དེ་ནས་ཀླུའི་རྒྱལ་པོ་རྒྱ་མཚོའི་བུ་མོས། བྱང་ཆུབ་སེམས་དཔའ་ཤེས་རབ་བརྩེགས་དང་གནས་བརྟན་ཤཱ་རིའི་བུ་ལ་འདི་སྐད་ཅེས་སྨྲས་སོ། །གང་བདག་གིས་བཅོམ་ལྡན་འདས་ལ་ནོར་བུ་ཕུལ་
བ་དེ། བཅོམ་ལྡན་འདས་ཀྱིས་མྱུར་དུ་བཞེས་སམ། འོན་ཏེ་མ་བཞེས་གནས་བརྟན་གྱིས་སྨྲས་པ། ཁྱོད་ཀྱིས་ཀྱང་མྱུར་དུ་ཕུལ་ལོ། །བཅོམ་ལྡན་འདས་ཀྱིས་ཀྱང་མྱུར་དུ་བཞེས་སོ། །ཀླུའི་རྒྱལ་པོ་རྒྱ་མཚོའི་བུ་མོས་སྨྲས་པ། 
བཙུན་པ་ཤཱ་རིའི་བུ་གལ་ཏེ་བདག་གི་རྫུ་འཕྲུལ་ཆེ་བར་གྱུར་ན། དེ་བས་ཀྱང་ཆེས་མྱུར་དུ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ་ནོར་བུ་འདི་བཞེས་པ་ནི་དེ་ལྟ་མ་ཡིན་ནོ། །དེ་ནས་དེའི་ཚེ་འཇིག་རྟེན་
ཐམས་ཅད་དང་གནས་བརྟན་ཤཱ་རིའི་བུའི་མངོན་སུམ་དུ་ཀླུའི་རྒྱལ་པོ་རྒྱ་མཚོའི་བུ་མོའི་བུད་མེད་ཀྱི་དབང་པོ་མི་སྣང་བར་གྱུར་ཏེ་སྐྱེས་པའི་དབང་པོ་བྱུང་ནས། བདག་ཉིད་བྱང་ཆུབ་སེམས་དཔར་གྱུར་པར་ཡང་དག་པར་བསྟན་ཏེ་དེའི་ཚེ་ལྷོ་ཕྱོགས་

46-1-110b

སུ་སོང་ངོ་། །དེ་ནས་ལྷོ་ཕྱོགས་སུ་འཇིག་རྟེན་གྱི་ཁམས་དྲི་མ་མེད་ཞེས་བྱ་བ་དེར། རིན་པོ་ཆེ་སྣ་བདུན་གྱི་ཤིང་དྲུང་དུ་འདུག་ནས་བདག་ཉིད་མངོན་པར་རྫོགས་པར་སངས་རྒྱས་པར་ཀུན་དུ་བསྟན་ཏེ། སྐྱེས་བུ་ཆེན་པོའི་མཚན་སུམ་བཅུ་
རྩ་གཉིས་དང་དཔེ་བྱད་བཟང་པོ་ཐམས་ཅད་དང་ལྡན་པའི་གཟུགས་ཀྱི་ལུས་ཀྱི་འོད་ཀྱིས་ཕྱོགས་བཅུར་ཁྱབ་པར་བྱས་ཏེ་ཆོས་སྟོན་པར་བྱེད་དོ། །གང་དག་འཇིག་རྟེན་གྱི་ཁམས་མི་མཇེད་ན་འཁོད་པའི་སེམས་ཅན་དེ་དག་ཐམས་
ཅད་ཀྱིས་ཀྱང་། དེ་བཞིན་གཤེགས་པ་དེ་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པ་དེ་དག་ཐམས་ཅད་ཀྱིས་ཕྱག་བྱས་ཤིང་དེ་དག་ལ་ཆོས་སྟོན་པར་
མཛད་པར་མཐོང་ངོ་། །སེམས་ཅན་གང་དག་དེ་བཞིན་གཤེགས་པ་དེས་ཆོས་བསྟན་པ་ཉན་པ་དེ་དག་ཐམས་ཅད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །འཇིག་རྟེན་གྱི་ཁམས་དྲི་མ་མེད་པ་
དེ་དག་དང་འཇིག་རྟེན་གྱི་ཁམས་མི་མཇེད་འདི་ཡང་རྣམ་པ་དྲུག་ཏུ་གཡོས་སོ། །བཅོམ་ལྡན་འདས་ཤཱཀྱ་ཐུབ་པའི་འཁོར་གྱི་དཀྱིལ་འཁོར་ལས་ཀྱང་སྲོག་ཆགས་སུམ་སྟོང་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །
སྲོག་ཆགས་སུམ་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་བརྩེགས་དང་གནས་བརྟན་ཤཱ་རིའི་བུ་ཅང་མི་སྨྲ་བར་གྱུར་ཏོ། །
མཆོད་རྟེན་བསྟན་པའི་ལེའུ་ཞེས་བྱ་སྟེ་བཅུ་གཅིག་པའོ།། །། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་དང་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་ཆེན་པོ་གཡོག་བྱང་ཆུབ་སེམས་དཔའ་
ཉིས་འབུམ་དང་ལྷན་ཅིག་བཅོམ་ལྡན་འདས་ཀྱི་སྤྱན་སྔར་ཚིག་འདི་སྐད་ཅེས་གསོལ་ཏོ། །བཅོམ་ལྡན་འདས་དོན་འདི་ལ་ཐུགས་ལས་ཆུང་ངུར་མཛད་དུ་གསོལ། བཅོམ་ལྡན་འདས་བདག་ཅག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། ཆོས་ཀྱི་

46-1-111a

རྣམ་གྲངས་འདི་སེམས་ཅན་རྣམས་ལ་བསྟན་པར་བགྱིའོ། །ཡང་དག་པར་བསྟན་པར་བགྱིའོ། །བཅོམ་ལྡན་འདས་འདི་ལྟར་ཡང་དེའི་ཚེ། སེམས་ཅན་དམུ་རྒོད་དགེ་བའི་རྩ་བ་ཆུང་བ་ལྷག་པའི་ང་རྒྱལ་ཅན། 
རྙེད་པ་དང་བཀུར་སྟི་ལ་གནས་པ། མི་དགེ་བའི་རྩ་བ་ལ་ཞུགས་པ། གདུལ་དཀའ་བ་མོས་པ་དང་བྲལ་བ་མ་མོས་པ་མང་བ་དག་འབྱུང་ལགས་མོད་ཀྱི། བཅོམ་ལྡན་འདས་བདག་ཅག་གིས་བཟོད་པའི་སྟོབས་སྟན་ཏེ། དེའི་དུས་ན་
མདོ་འདི་བསྟན་པར་བགྱི་གཟུང་བར་བགྱི་བཤད་པར་བགྱི་ཡི་གེར་བྲི་བར་བགྱི་སྟི་སྟང་དུ་བགྱི་རིམ་གྲོ་བགྱི། མཆོད་པར་བགྱིའོ། །བཅོམ་ལྡན་འདས་བདག་ཅག་གིས་ལུས་དང་སྲོག་ཀྱང་བོར་ཏེ་མདོ་འདི་བཤད་པར་བགྱི་ཡིས། 
བཅོམ་ལྡན་འདས་ཐུགས་ལས་ཆུང་ངུར་མཛད་དུ་གསོལ། དེ་ནས་འཁོར་དེའི་དགེ་སློང་སློབ་པ་དང་མི་སློབ་པ་དང་དགེ་སློང་ལྔ་བརྒྱ་ཙམ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་
འཇིག་རྟེན་གྱི་ཁམས་གཞན་དག་ཏུ། ཆོས་ཀྱི་རྣམ་གྲངས་འདི་རབ་ཏུ་བསྟན་པར་སྤྲོ་ལགས་སོ། །དེ་ནས་བཅོམ་ལྡན་འདས་ཀྱི་ཉན་ཐོས་སློབ་པ་དང་མི་སློབ་པ་ཇི་སྙེད་པ་དེ་དག་དང་གང་དག་བཅོམ་ལྡན་འདས་ཀྱིས་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ། དགེ་སློང་བརྒྱད་སྟོང་པོ་དེ་དག་ཐམས་ཅད་ཀྱིས་བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་
ལྡན་འདས་ཐུགས་ལས་ཆུང་ངུར་མཛད་དུ་གསོལ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་སླད་མའི་ཚེ་སླད་མའི་དུས་ན་བདག་ཅག་གིས་ཀྱང་ཆོས་ཀྱི་རྣམ་གྲངས་འདི་འཇིག་རྟེན་གྱི་ཁམས་གཞན་དག་ཏུ་བཤད་པར་
བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འཇིག་རྟེན་གྱི་ཁམས་མི་མཇེད་འདིའི་སེམས་ཅན་དག་ནི་ལྷག་པའི་ང་རྒྱལ་ཅན་དགེ་བའི་རྩ་བ་ཆུང་བ། རྟག་ཏུ་གནོད་སེམས་ཀྱི་སེམས་དང་ལྡན་པ། གཡོན་ཅན་ཡོན་པོའི་རང་བཞིན་ཅན་ལགས་པའི་

46-1-111b

སླད་ཏུའོ། །དེ་ནས་བཅོམ་ལྡན་འདས་ཀྱིས་སྲུ་སྐྱེ་དགུའི་བདག་མོ་ཆེན་མོ་གཽ་ཏ་མཱི་དགེ་སློང་མ་སློབ་པ་དང་མི་སློབ་པ་དགེ་སློང་མ་དྲུག་སྟོང་དང་ལྷན་ཅིག་ཏུ་སྟན་ལས་ལངས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་
བཏུད་ནས་བཅོམ་ལྡན་འདས་ལ་ལྟ་ཞིང་འཁོད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་བཀའ་སྩལ་པ། གཽ་ཏ་མཱི་ཁྱོད་བདག་ནི་དེ་བཞིན་གཤེགས་པས་ཡོངས་སུ་མ་བརྗོད་དོ། བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་ལུང་མ་བསྟན་སྙམ་དུ་ཡིད་མི་བདེ་བར། དེ་བཞིན་གཤེགས་པ་ལ་ལྟ་ཞིང་མ་འདུག་ཤིག །གཽ་ཏ་མཱི་འདི་ལྟར་འཁོར་ཐམས་ཅད་ལུང་བསྟན་པས་ཁྱོད་ཀྱང་ལུང་བསྟན་ཟིན་ཏོ། །གཽ་ཏ་མཱི་ཁྱོད་འདི་ནས་བཟུང་སྟེ་སངས་རྒྱས་
བྱེ་བ་ཁྲག་ཁྲིག་སྟོང་ཕྲག་སུམ་བཅུ་རྩ་བརྒྱད་ཀྱི་ཐད་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སྨྲ་བར་འགྱུར་རོ། །སློབ་པ་དང་མི་སློབ་པའི་དགེ་སློང་མ་དྲུག་སྟོང་འདི་དག་དང་ཁྱོད་ལྷན་ཅིག་ཏུ་དེ་བཞིན་གཤེགས་པ་དེ་དག་གི་ཐད་ནས་བྱང་
ཆུབ་སེམས་དཔའ་ཆོས་སྨྲ་བར་འགྱུར་རོ། །དེའི་ཕ་རོལ་གྱི་ཡང་ཆེས་ཕ་རོལ་ནས་བྱང་ཆུབ་སེམས་དཔའི་སྤྱོད་པ་ཡོངས་སུ་རྫོགས་པར་བྱས་ཏེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། 
བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བར་འཇིག་རྟེན་དུ་འབྱུང་བར་འགྱུར་ཏེ། 
གཽ་ཏ་མཱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེམས་ཅན་ཐམས་ཅད་ཀྱིས་མཐོང་ན་དགའ་བ་དེས། བྱང་ཆུབ་སེམས་དཔའ་དྲུག་སྟོང་པོ་དེ་དག་གཅིག་ནས་གཅིག་ཏུ་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་ལུང་སྟོན་པས་ལུང་སྟོན་པར་འགྱུར་རོ། །དེ་ནས་སྒྲ་གཅན་ཟིན་གྱི་མ་དགེ་སློང་མ་གྲགས་འཛིན་འདི་སྙམ་དུ། བཅོམ་ལྡན་འདས་ཀྱིས་བདག་གི་མིང་མ་སྨོས་སོ་སྙམ་དུ་སེམས་སོ། །དེ་ནས་བཅོམ་ལྡན་འདས་ཀྱིས་

46-1-112a

དགེ་སློང་མ་གྲགས་འཛིན་གྱི་སེམས་ཀྱི་རྟོག་པ་ཐུགས་ཀྱིས་ཐུགས་སུ་ཆུད་ནས། དགེ་སློང་མ་གྲགས་འཛིན་ལ་འདི་སྐད་ཅེས་བཀའ་སྩལ་ཏོ། །གྲགས་འཛིན་ཁྱོད་མོས་པར་བྱའོ། །ཁོང་དུ་ཆུད་པར་བྱའོ། །ཁྱོད་ཀྱང་
སངས་རྒྱས་བྱེ་བ་སྟོང་ཕྲག་བཅུའི་ཐད་ན་བྱང་ཆུབ་སེམས་དཔའ་ཆོས་སྨྲ་བར་འགྱུར་རོ། །བྱང་ཆུབ་སེམས་དཔའི་སྤྱོད་པ་རིམ་གྱིས་ཡོངས་སུ་རྫོགས་པར་བྱས་ནས། འཇིག་རྟེན་གྱི་ཁམས་བཟང་པོ་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་
ཟེར་བརྒྱ་སྟོང་ཡོངས་སུ་རྫོགས་པའི་རྒྱལ་མཚན་ཞེས་བྱ་བར་འཇིག་རྟེན་དུ་འབྱུང་བར་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་བརྒྱ་སྟོང་ཡོངས་སུ་རྫོགས་
པའི་རྒྱལ་མཚན་དེའི་ཚེའི་ཚད་ནི་དཔག་ཏུ་མེད་པར་འགྱུར་རོ། །དེ་ནས་དགེ་སློང་མ་སྐྱེ་དགུའི་བདག་མོ་ཆེན་མོ་གཽ་ཏ་མའི་དགེ་སློང་མ་གཡོག་འཁོར་དགེ་སློང་མ་དྲུག་སྟོང་དང་། དགེ་སློང་མ་གྲགས་འཛིན་གཡོག་འཁོར་དགེ་སློང་
མ་བཞི་སྟོང་དང་། བཅོམ་ལྡན་འདས་ལས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བདག་ལུང་བསྟན་པ་ཐོབ་ནས་ངོ་མཚར་དང་རྨད་དུ་གྱུར་ཏེ། དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །བཅོམ་ལྡན་
འདྲེན་པ་རྣམ་པར་འདྲེན་པ་སྟེ། །ལྷར་བཅས་འཇིག་རྟེན་དག་གི་སྟོན་པ་ལགས། །དབུགས་འབྱིན་ལྷ་དང་མི་ཡིས་མཆོད་པ་སྟེ། །མགོན་པོ་བདག་ཅག་རྣམས་ཀྱང་དེང་ཚིམ་བགྱིས། །དེ་ནས་དགེ་སློང་མ་རྣམས་ཀྱིས་
ཚིགས་སུ་བཅད་པ་འདི་གསོལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་སླད་མའི་དུས་སླད་མའི་ཚེ་ན། ཆོས་ཀྱི་རྣམ་གྲངས་འདི་འཇིག་རྟེན་གྱི་ཁམས་གཞན་དག་ཏུ་སྟོན་པར་སྤྲོ་ལགས་སོ། །

46-1-112b

དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་གཟུངས་ཐོབ་པ་ཕྱིར་མི་ལྡོག་པའི་ཆོས་ཀྱི་འཁོར་ལོ་བསྐོར་བའི་བྱང་ཆུབ་སེམས་དཔའ་བརྒྱད་ཁྲི་པོ་དེ་དག་ག་ལ་བ་དེ་ལོགས་སུ་གཟིགས་སོ། །དེ་ནས་བཅོམ་ལྡན་འདས་ཀྱིས་གཟིགས་
མ་ཐག་ཏུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་སྟན་ལས་ལངས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་འདི་སྙམ་དུ། ཆོས་ཀྱི་རྣམ་གྲངས་འདི་བཤད་པར་བྱ་བའི་ཕྱིར། བཅོམ་ལྡན་འདས་ཀྱིས་
བདག་ཅག་ལ་བསྐུལ་བ་མཛད་དོ་སྙམ་དུ་སེམས་སོ། །དེ་དག་དེ་སྙམ་དུ་བསམས་ནས་ཀུན་གཡོས་ཏེ་ཕན་ཚུན་དུ་སྨྲས་པ། རིགས་ཀྱི་བུ་དག་མ་འོངས་པའི་དུས་ན་ཆོས་ཀྱི་རྣམ་གྲངས་འདི་བཤད་པར་བྱ་བའི་ཕྱིར། བཅོམ་ལྡན་འདས་ཀྱིས་
བདག་ཅག་ལ་བསྐུལ་བ་མཛད་ན་བདག་ཅག་གིས་ཇི་ལྟར་བྱ། དེ་ནས་རིགས་ཀྱི་བུ་དེ་དག་བཅོམ་ལྡན་འདས་ལ་གུས་པ་དང་བདག་ཉིད་ཀྱི་སྔོན་གྱི་སྤྱོད་པ་དང་སྨོན་ལམ་གྱིས་བཅོམ་ལྡན་འདས་ཀྱི་སྤྱན་སྔར་སེང་གེའི་སྒྲ་ཕྱུང་བ། 
བཅོམ་ལྡན་འདས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་བདག་ཅག་ཕྱོགས་བཅུར་མཆིས་ཏེ། བཅོམ་ལྡན་འདས་ཀྱི་མཐུས་ཆོས་ཀྱི་རྣམ་གྲངས་འདི་སེམས་ཅན་རྣམས་ཡི་གེར་འདྲིར་སྩལ་བར་བགྱི་ཀློག་ཏུ་སྩལ་
བར་བགྱི་སེམས་སུ་སྩལ་བར་བགྱི་འཆད་དུ་སྩལ་བར་བགྱིའོ། །བཅོམ་ལྡན་འདས་ཀྱང་འཇིག་རྟེན་གྱི་ཁམས་གཞན་ན་བཞུགས་ཏེ། བདག་ཅག་ལ་བསྲུང་བ་དང་སྐྱོབ་པ་དང་སྦེད་པ་མཛད་དོ། །དེ་ནས་བྱང་ཆུབ་
སེམས་དཔའ་སེམས་དཔའ་ཆེན་པོ་དེ་དག་གིས་བཅོམ་ལྡན་འདས་ལ་དབྱངས་མཐུན་པར་ཚིགས་སུ་བཅད་པ་འདི་དག་གསོལ་ཏོ། །བཅོམ་ལྡན་འདས་ཁྱོད་ཐུགས་ལས་ཆུང་མཛད་གསོལ། །ཁྱོད་ནི་མྱ་ངན་འདས་ནས་བདག་ཅག་
རྣམས། །ཤིན་དུ་མ་རུངས་སླད་མའི་དུས་ཀྱི་ཚེ། །མདོ་སྡེ་དམ་པ་འདི་ནི་བཤད་པར་བགྱི། །བྱིས་པ་རྣམས་ཀྱིས་སྤྱོས་པ་དང་། །བརྡེག་པ་དང་ནི་དབྱུག་ཐོགས་ཏེ། །གཟས་པ་རྣམས་ནི་བཟོད་པར་བགྱི། །འདྲེན་པ་བག་ལ་ཞ་བར་བགྱི། །མ་རུངས་

46-1-113a

སླད་མའི་དུས་ལ་ནི། །ལོག་པའི་བློ་དང་ཡོན་པོ་ནི། །བྱིས་པ་གཡོ་དང་ང་རྒྱལ་ཅན། །མ་ཐོབ་ཐོབ་པར་འདུ་ཤེས་པ། །དགོན་པ་དག་ལ་རབ་སེམས་ཤིང་། །ཚེམ་བུ་དག་ཀྱང་དགོས་ནས་ནི། །ཡོ་བྱད་བསྙུངས་ཚུལ་སྤྱོད་
དོ་ཞེས། །བློ་ངན་དེ་སྐད་སྨྲ་བར་འགྱུར། །རོ་བྲོ་ཆགས་ཤིང་ཞེན་པ་རྣམས། །ཁྱིམ་པ་དག་ལ་ཆོས་ཀྱང་འཆད། །མངོན་ཤེས་དྲུག་ཅན་ཇི་བཞིན་དུ། །བསྟི་སྟང་དག་ཀྱང་བགྱིད་པར་འགྱུར། །གཏུམ་པའི་སེམས་དང་སྡང་
སེམས་ལྡན། །ཁྱིམ་དང་ནོར་ལ་རྣམ་པར་སེམས། །དགོན་པ་དབེན་པར་རབ་ཞུགས་ཏེ། །བདག་ཅག་རྣམས་ལ་སྐུར་པ་འདེབས། །བདག་ཅག་ལ་ནི་འདི་སྐད་མཆི། །རྙེད་དང་བཀུར་སྟི་གནས་པ་སྟེ། །དགེ་སློང་འདི་དག་མུ་
སྟེགས་ཅན། །བདག་གི་རང་བཟོ་རབ་ཏུ་འཆད། །རྙེད་པ་དང་ནི་བཀུར་སྟིའི་ཕྱིར། །རང་གིས་མདོ་སྡེ་བྱས་ནས་སུ། །འཁོར་གྱི་དབུས་སུ་འཆད་བྱེད་ཅེས། །བདག་ཅག་རྣམས་ལ་ཤིན་དུ་འཕྱ། །རྒྱལ་པོ་དང་ནི་རྒྱལ་བུ་
དང་། །དེ་བཞིན་རྒྱལ་པོའི་བློན་པོ་དང་། །བྲམ་ཟེ་དང་ནི་ཁྱིམ་བདག་དང་། །དགེ་སློང་གཞན་དག་དྲུང་དུ་ནི། །བདག་ཅག་རྣམས་ལ་མི་བསྔགས་བརྗོད། །མུ་སྟེགས་ཅན་ཞེས་ཚིག་ཀྱང་བརྗོད། །དྲང་སྲོང་ཆེ་ལ་
གུས་པས་ན། །ཐམས་ཅད་བདག་ཅག་བཟོད་པར་བགྱི། །དེ་ཚེ་ངན་པའི་བློ་གྲོས་ཅན། །བདག་ཅག་རྣམས་ལ་སྨོད་པར་འགྱུར། །འདི་དག་སངས་རྒྱས་འགྱུར་ཞེས་ཏེ། །རྣམ་པ་ཐམས་ཅད་བཟོད་པར་བགྱི། །
འཁྲུག་པའི་བསྐལ་པ་འཇིགས་པ་ལ། །མ་རུངས་འཇིགས་པ་ཆེན་པོའི་ཚེ། །གནོད་སྦྱིན་གཟུགས་ཅན་དགེ་སློང་མང་། །བདག་ཅག་ལ་ནི་མི་སྙན་བརྗོད། །འཇིག་རྟེན་དབང་ལ་གུས་པ་ཡིས། །ཤིན་ཏུ་དགའ་བ་སྤྲོ་བར་
བགྱི། །བཟོད་པའི་གོ་ཆ་བགོས་ནས་སུ། །མདོ་འདི་རབ་ཏུ་བཤད་པར་བགྱི། །འདྲེན་པ་བདག་ཅག་ལུས་དང་ནི། །སྲོག་ཀྱང་དོན་དུ་གཉེར་མ་ལགས། །བདག་ཅག་བྱང་ཆུབ་དོན་གཉེར་བས། །ཁྱོད་ཀྱིས་བཏམས་གཏད་འཛིན་པ་ལགས། །

46-1-113b

ལྡེམ་པོར་དགོངས་བཤད་མ་འཚལ་བ། །དགེ་སློང་སྡིག་ཅན་ཅི་འདྲ་དག །སླད་མའི་དུས་ན་འབྱུང་བ་ནི། །བཅོམ་ལྡན་ཉིད་ཀྱིས་རབ་ཏུ་མཁྱེན། །གཙུག་ལག་ཁང་ནས་བསྐྲད་པ་དང་། །བཅིང་དང་བརྡེག་པ་རྣམ་མང་དང་། །ཕྱིར་ཞིང་བཅས་པ་མ་
ལགས་དང་། །ཁྲོ་གཉེར་ཐམས་ཅད་བཟོད་པར་བགྱི། །འཇིག་རྟེན་མགོན་གྱིས་བཀའ་སྩལ་པ། །དྲན་པར་བགྱིད་པས་སླད་དུས་ན། །འཁོར་གྱི་དབུས་སུ་མི་འཇིགས་པར། །མདོ་འདི་རབ་ཏུ་བཤད་པར་བགྱི། །འདྲེན་པ་འདི་ནི་འདི་ཚོལ་བ། །
གྲོང་ཁྱེར་གྲོང་དུ་གང་བྱུང་བ། །དེ་དག་དུ་ནི་མཆིས་ནས་སུ། །ཁྱོད་ཀྱིས་གཏམས་པ་སྩལ་བར་བགྱི། །འཇིག་རྟེན་དབང་པོ་ཐུབ་པ་ཆེ། །ཁྱོད་ཀྱི་མངག་གཞུག་བདག་ཅག་འཚལ། །མྱ་ངན་རབ་འདས་ཞི་བརྙེས་པ། །ཐུགས་ལས་ཆུང་ངུར་མཛད་ཏུ་གསོལ། །
ཕྱོགས་བཅུ་དག་ནས་གང་གཤེགས་པ། །འཇིག་རྟེན་སྒྲོན་མ་ཐམས་ཅད་ཀྱི། །མོས་པ་རྣམ་པར་མཁྱེན་པས་ན། །བདེན་པའི་ཚིག་ནི་སྨྲ་བར་བགྱིད། །དམ་པའི་ཆོས་པད་མ་དཀར་པོ་ལས་སྤྲོ་བར་བྱ་བའི་ལེའུ་ཞེས་བྱ་སྟེ། བཅུ་གཉིས་
པའོ།། །། དམ་པའི་ཆོས་པད་མ་དཀར་པོ་བམ་པོ་དགུ་པ། དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་
བཅོམ་ལྡན་འདས་ལ་གུས་པར་སྤྲོ་བ་ནི་དཀའ་བར་བགྱིད་པ་ཤིན་དུ་དཀའ་བར་བགྱིད་པ་ལགས་སོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་གིས། སླད་མའི་ཚེ་སླད་མའི་དུས་ན་ཆོས་ཀྱི་རྣམ་གྲངས་
འདི་ཇི་ལྟར་རབ་ཏུ་བཤད་པར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཆོས་བཞི་ལ་གནས་ཏེ་བྱང་ཆུབ་སེམས་དཔའ་སེམས་
དཔའ་ཆེན་པོས་ཆོས་ཀྱི་རྣམ་གྲངས་འདི་ཕྱི་མའི་ཚེ་ཕྱི་མའི་དུས་ན་ཡང་དག་པར་རབ་ཏུ་བསྟན་པར་བྱའོ། །བཞི་གང་ཞེ་ན། འཇམ་དཔལ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དག །ཆོ་ག་དང་སྤྱོད་ཡུལ་ལ་གནས་ཏེ། 

46-1-114a

ཆོས་ཀྱི་རྣམ་གྲངས་འདི་ཡང་དག་པར་རབ་ཏུ་བསྟན་པར་བྱའོ། །འཇམ་དཔལ་ཇི་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་དག །ཆོ་ག་དང་སྤྱོད་ཡུལ་ལ་གནས་པ་ཡིན་ཞེ་ན། འཇམ་དཔལ་གང་གི་ཚེ་
བྱང་ཆུབ་སེམས་དཔའ་སེམས་དཔའ་ཆེན་པོ་བཟོད་པ་དང་དུལ་བ་དང་དུལ་བའི་ས་ཐོབ་ཅིང་ཡིད་མི་སྡང་ལ་ཕྲག་དོག་མེད་པར་འགྱུར་ཏེ། འཇམ་དཔལ་གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དག །ཆོས་གང་ལ་ཡང་མི་
སྤྱོད་ཅིང་ཆོས་ཀྱི་རྣམ་གྲངས་ཀྱི་རང་གི་མཚན་ཉིད་ལ་ཡང་དག་པར་ཇི་ལྟ་བ་བཞིན་དུ་བལྟ་སྟེ། གང་ཆོས་རྣམས་ལ་རྣམ་པར་མི་དཔྱོད་རྣམ་པར་མི་རྟོག་པ་དེ་ནི་འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོའི་ཆོ་
ག་ཞེས་བྱའོ། །འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོའི་སྤྱོད་ཡུལ་གང་ཞེ་ན། འཇམ་དཔལ་གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྒྱལ་པོ་ལ་མི་སྟེན་རྒྱལ་བུ་དང་རྒྱལ་པོའི་བློན་
པོ་ཆེན་པོ་དང་རྒྱལ་པོའི་ཞབས་འབྲིང་བ་ལ་མི་སྟེན་མི་སྙེན་བསྙེན་བཀུར་མི་བྱེད་ཉེ་བར་མི་འགྲོ། གཞན་མུ་སྟེགས་ཅན་སྤྱོད་པ་པ་དང་ཀུན་དུ་རྒྱུ་དང་འཚོ་བ་པ་དང་གཅེར་བུ་པ་རྣམས་དང་སྙན་དངགས་ཀྱིས་བསྟན་བཅོས་
ལ་ཞུགས་པའི་སེམས་ཅན་རྣམས་དང་མི་སྟེན་མི་སྙེད་བཀུར་སྟིར་མ་བྱེད། འཇིག་རྟེན་རྒྱང་པན་པའི་གསང་ཚིག་འཆང་བའི་འཇིག་རྟེན་རྒྱང་པན་པ་ལ་མི་སྟེན་མི་སྙེན་བཀུར་སྟིར་མི་བྱེད། དེ་དག་དང་ལྷན་ཅིག་ཏུ་འདྲིས་པར་
མི་བྱེད། གདོལ་པ་པ་དང་ཟོལ་པ་རྣམས་དང་མ་ཡིན། ཕག་འཚོང་བ་རྣམས་དང་མ་ཡིན། བྱ་གག་འཚོང་བ་རྣམས་དང་མ་ཡིན། རི་དགས་ཀྱི་རྔོན་པ་རྣམས་དང་མ་ཡིན། ཉ་པ་རྣམས་དང་མ་ཡིན། གླུ་མཁན་དང་
གར་མཁན་དང་ལྕགས་ཀྱི་སིལ་ཁྲོལ་བྱེད་པ་རྣམས་དང་མ་ཡིན། གྱད་རྣམས་དང་མ་ཡིན། གཞན་དག་གི་དགའ་བ་དང་རྩེ་བའི་གནས་རྣམས་སུ་མི་འགྲོ། དེ་དག་དང་ལྷན་ཅིག་འདྲིས་པར་ཡང་མི་བྱེད་དེ། དྲུང་དུ་ལྷགས་

46-1-114b

པ་ལ་དུས་སུ་ཆོས་བཤད་པ་ནི་མ་གཏོགས་ཏེ། དེ་ཡང་མི་གནས་པར་འཆད་པའོ། །ཉན་ཐོས་ཀྱི་ཐེག་པ་ཅན་གྱི་དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་ལ་མི་སྙེན་མི་སྟེན་བཀུར་སྟི་མི་བྱེད་དེ་དག་དང་འདྲིས་པར་མི་
བྱེད་དེ། འཆག་སའམ་གནས་ཁང་ངམ་གཙུག་ལག་ཁང་ན་ཡང་དེ་དག་དང་འགྲོགས་པའི་སྤྱོད་ཡུལ་བ་མ་ཡིན་ནོ། །དྲུང་དུ་ལྷགས་པ་ལ་དུས་སུ་ཆོས་འཆད་པ་ནི་མ་གཏོགས་ཏེ་དེ་ཡང་མི་གནས་པར་འཆད་པའོ། །འཇམ་དཔལ་
དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་སྤྱོད་ཡུལ་ལོ། །འཇམ་དཔལ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བུད་མེད་ལ་རྗེས་སུ་ཆགས་པ་གང་ཡང་རུང་བ་མཚན་མར་བཟུང་ནས་རྟག་ཏུ་ཆོས་
འཆད་པ་མ་ཡིན། བུད་མེད་ལ་རྟག་ཏུ་ལྟ་བར་འདོད་པ་མ་ཡིན། ཁྱིམ་དག་ཏུ་སོང་སྟེ་བུད་མེད་དམ་བུ་མོ་འམ་ཁྱིམ་མི་མོ་ལ་རྟག་ཏུ་ཆོས་བཤད་པར་སེམས་པ་མ་ཡིན། ཡང་དག་པར་མགུ་བར་བྱེད་པ་མ་ཡིན། མ་ནིང་ལ་ཆོས་མི་
སྟོན་དེ་དག་དང་ལྷན་ཅིག་འདྲིས་པར་མི་བྱེད་ཡང་དག་པར་མགུ་བར་བྱེད་པ་མ་ཡིན། སློང་བའི་ཕྱིར་གཅིག་པུ་ཁྱིམ་དུ་མི་འཇུག །དེ་བཞིན་གཤེགས་པ་རྗེས་སུ་དྲན་པ་བསྒོམ་པ་ནི་མ་གཏོགས་སོ། །གལ་ཏེ་བུད་མེད་ལ་ཆོས་
སྟོན་ན་ཡང་དེ་ཐ་ན་ཆོས་ལ་འདོད་ཆགས་པས་ཀྱང་ཆོས་མི་སྟོན་ན་དེ་བུད་མེད་ལ་འདོད་ཆགས་པས་ལྟ་ཅི་སྨོས། དེ་ཆོས་སྟོན་པ་ན་ཐ་ན་སོའི་ཕྲེང་བ་ཡང་མི་སྟོན་ན་བཞིན་གྱི་འགྱུར་བ་ཆེན་པོ་ལྟ་ཅི་སྨོས། དགེ་ཚུལ་དང་དགེ་
ཚུལ་མ་དང་དགེ་སློང་དང་དགེ་སློང་མ་དང་གཞོན་ནུ་དང་གཞོན་ནུ་མ་དང་མི་སྟེན། དེ་དག་དང་གཏམ་ཡང་མི་བྱེད་ལ་ནང་དུ་ཡང་དག་འཇོག་ལ་འཇུག་པར་དགའ་ཞིང་ནང་དུ་ཡང་དག་འཇོག་ལ་རྟག་ཏུ་བསྟེན་པ་ཡིན་ཏེ། 
འཇམ་དཔལ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་སྤྱོད་ཡུལ་དང་པོའོ། །འཇམ་དཔལ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ལ་སྟོང་པར་བལྟ་སྟེ། ཇི་ལྟར་གནས་པ་བཞིན་དང་མ་

46-1-115a

ལོག་པར་གནས་པ་དང་ཡང་དག་པ་ཇི་ལྟ་བ་བཞིན་དུ་གནས་པ་དང་། མི་བསྐྱོད་པ་དང་མི་གཡོ་བ་མི་ལྡོག་པ་མི་འགྱུར་བ་རྟག་ཏུ་ཡང་དག་པ་ཇི་ལྟ་བ་བཞིན་དུ་གནས་པ་དང་ནམ་མཁའི་ངོ་བོ་ཉིད་ལྟ་བུ་ངེས་པའི་ཚིག་དང་། 
ཐ་སྙད་རྣམ་པར་སྤངས་པ་མ་སྐྱེས་པ་མ་བྱུང་བ་ཡང་དག་པར་མ་བྱུང་བ་མེད་པ་འདུས་མ་བྱས་པ་རྒྱུན་མེད་པ་མེད་པ་ལ་ཚིག་གིས་བརྗོད་པ་མི་ཆགས་པའི་གནས་ལ་འདུག་པ་འདུ་ཤེས་ཕྱིན་ཅི་ལོག་ལས་བྱུང་བར། དེ་ལྟར་འཇམ་
དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ཆོས་ཐམས་ཅད་ལ་ལྟ་ཞིང་གནས་པ་འདིས་གནས་ན། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་ཡུལ་ལ་གནས་པ་ཡིན་ཏེ། འཇམ་དཔལ་དེ་ནི་བྱང་ཆུབ་སེམས་
དཔའ་སེམས་དཔའ་ཆེན་པོའི་སྤྱོད་ཡུལ་གཉིས་པའོ། །དེ་ནས་བཅོམ་ལྡན་འདས་ཀྱིས་དོན་འདི་ཉིད་རྒྱས་པར་སྟོན་ཅིང་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཕྱི་དུས་ཤིན་དུ་འཇིགས་པ་ལ། །ཞུམ་པ་མེད་ཅིང་
མི་འཇིགས་པར། །མདོ་སྡེ་འདི་ནི་བསྟན་པར་ཡང་། །བྱང་ཆུབ་སེམས་དཔའ་གང་འདོད་པ། །ཆོ་ག་སྤྱོད་ཡུལ་བསྲུང་བྱ་ཞིང་། །འདུ་འཛི་མེད་ལ་གཙང་བར་བྱ། །རྒྱལ་པོ་དང་ནི་རྒྱལ་བུ་དང་། །འདྲིས་བྱེད་རྟག་ཏུ་སྤང་བར་
བྱ། །རྒྱལ་པོའི་ཞབས་འབྲིང་གང་ཡིན་དང་། །གདོལ་པ་དང་ནི་ཟོལ་པ་དང་། །མུ་སྟེགས་ཅན་ནི་དེ་དག་དང་། རྣམ་པ་ཀུན་དུ་འདྲིས་མི་བྱ། །དགེ་སློང་འདུལ་དང་ལུང་གནས་པ། །དགྲ་བཅོམ་སྙམ་དུ་སེམས་བྱེད་ཅིང་། །ང་རྒྱལ་
ཅན་རྣམས་བསྟེན་མི་བྱ། །ཚུལ་ཁྲིམས་འཆལ་རྣམས་རྣམ་པར་སྤང་། །རྒོད་ཅིང་སྨྲ་བའི་སྤྱོད་ཡུལ་ཅན། །དགེ་སློང་མ་རྣམས་རྟག་ཏུ་སྤང་། །མི་བརྟན་པར་ནི་མངོན་པ་ཡི། །དགེ་བསྙེན་རྣམས་ཀྱང་སྤང་བར་བྱ། 
དགེ་བསྙེན་མ་གང་ཚེ་འདི་ལ། །མྱ་ངན་འདས་པ་གང་ཚོལ་བ། །དེ་དག་དང་ནི་འདྲིས་བྱེད་སྤང་། །འདི་ནི་ཆོ་ག་ཡིན་ཞེས་བྱ། །གང་ཞིག་དེ་ཡི་ཐད་འོངས་ནས། །བྱང་ཆུབ་མཆོག་ཕྱིར་ཆོས་འདྲི་ན། །གནས་པ་མེད་ཅིང་མི་ཞན་པར། །

46-1-115b

དཔའ་བོ་རྟག་ཏུ་དེ་ལ་ཤོད། །བུད་མེད་མ་ནིང་སེམས་ཅན་གང་། །དེ་དང་འདྲིས་བྱེད་རྣམ་པར་སྤང་། །ཁྱིམ་རྣམས་སུ་ནི་མནའ་མ་དང་། །གཞོན་ནུ་མ་རྣམས་རྣམ་པར་སྤང་། །དེ་ལ་ནམ་དུ་འང་དགའ་མི་བྱེད། །མཁས་དང་
རྒོད་པ་འདྲི་བ་དང་། ཕག་འཚོང་བ་དང་ཤན་པ་དང་། །འདྲིས་པར་བྱེད་པ་རྣམ་པར་སྤང་། །གང་དག་སྲོག་ཆགས་རྣམ་མང་དག །ལོངས་སྤྱོད་ཕྱིར་ནི་གསོད་པ་དང་། །བཟའ་ཕྱིར་ཤ་རྣམས་འཚོང་བྱེད་པ། །དེ་དག་འདྲིས་བྱེད་
རྣམ་པར་སྤང་། །གང་དག་བུད་མེད་གསོ་བྱེད་དང་། །གར་མཁན་གྱད་དང་སིལ་ཁྲོལ་བ། །གང་གཞན་དེ་དང་འདྲ་བ་ཡང་། །དེ་དག་རྣམས་དང་འདྲིས་བྱེད་སྤང་། །རེས་མའི་གཙོ་བོ་བསྟེན་མི་བྱ། །ཇི་སྙེད་ལོངས་སྤྱོད་འཚོ་བ་གཞན། །
ཤིན་ཏུ་དགའ་བ་དེ་དག་ཀྱང་། །རྣམ་པ་ཀུན་དུ་ཡོངས་སུ་སྤང་། །མཁས་པ་བུད་མེད་རྣམས་ལ་ཡང་། །གང་གི་དུས་ན་ཆོས་འཆད་པ། །དེ་ནི་གཅིག་པུ་མི་འགྲོ་སྟེ། །རྒོད་ཅིང་འདུག་པར་མི་བྱའོ། །གང་ཚེ་ཟས་ཕྱིར་ཡང་དང་
ཡང་། །གྲོང་དུ་འཇུག་པར་བྱེད་པ་ན། །དགེ་སློང་གཉིས་པ་བཙལ་བར་བྱ། །ཡང་ན་སངས་རྒྱས་དྲན་པར་བྱ། །གང་གིས་ཤེས་རབ་ལྡན་པ་དག །མདོ་སྡེ་འདི་འདྲ་འཛིན་གནས་པའི། །ཆོ་ག་དང་ནི་སྤྱོད་ཡུལ་
དག །ཐོག་མར་ངས་བཤད་འདི་ཡིན་ནོ། །གང་ཚེ་འདུས་བྱས་འདུས་མ་བྱས། །ཡང་དག་ཡང་དག་མ་ཡིན་དང་། །རབ་འབྲིང་ཐ་མའི་ཆོས་རྣམས་ལ། །རྣམ་པ་ཀུན་དུ་སྤྱོད་པ་མེད། །བརྟན་པ་བུད་མེད་ཅེས་
མི་སྤྱོད། །སྐྱེས་པ་ཞེས་ཀྱང་མི་རྟོག་སྟེ། །ཆོས་སོ་ཅོག་ནི་མ་སྐྱེས་ཕྱིར། །བཙལ་བ་བྱས་ཀྱང་མི་མཐོང་བ། །འདི་ནི་བྱང་ཆུབ་སེམས་དཔའ་ཡི། །ཆོ་གར་རྣམ་པ་ཀུན་དུ་བསྟན། །དེ་དག་སྤྱོད་ཡུལ་ཅི་འདྲ་བ། །དེ་ནི་རྣམ་པར་མཉན་པར་གྱིས། །
ཆོས་འདི་དག་ནི་ཡོད་པ་མ་ཡིན་བསྟན། །ཐམས་ཅད་འབྱུང་བ་མེད་ཅིང་སྐྱེ་བ་མེད། །རྟག་ཏུ་མི་གཡོ་སྟོང་པ་ཉིད་དུ་གནས། །དེ་ནི་མཁས་པ་རྣམས་ཀྱི་སྤྱོད་ཡུལ་ཡིན། །འདི་དག་འདུ་ཤེས་ལོག་པར་བརྟགས་པ་སྟེ། །ཡང་དག་མིན་ལ་ཡང་དག་ཡོད་ལ་མེད། །མ་བྱུང་བ་

46-1-116a

དང་མ་སྐྱེས་ཆོས་རྣམས་ལ། །ཡང་དག་ཉིད་དང་འབྱུང་བར་ལོག་པར་བརྟགས། །སེམས་ནི་རྟག་ཏུ་རྩེ་གཅིག་མཉམ་གཞག་སྟེ། །རི་རབ་ཕུང་པོ་ཇི་བཞིན་རབ་ཏུ་གནས། །དེ་བཞིན་འདུག་ནས་ནམ་མཁའ་ལྟ་
བུར་ནི། །ཆོས་རྣམས་འདི་དག་ཀུན་ལ་བརྟག་པར་བྱ། །རྟག་ཏུ་ནམ་མཁའ་མཚུངས་པར་སྙིང་པོ་མེད། །མི་གཡོ་རློམ་སེམས་རྣམ་པར་སྤངས་པ་སྟེ། །ཆོས་རྣམས་འདི་དག་རྟག་པའི་དུས་གནས་པ། །
འདི་ནི་མཁས་པ་རྣམས་ཀྱི་སྤྱོད་ཡུལ་ཡིན། །ང་ནི་མྱ་ངན་འདས་ནས་དགེ་སློང་གང་། །ང་ཡི་སྤྱོད་ཡུལ་འདི་ནི་རབ་སྲུང་ཞིང་། ། དེ་ནི་ནམ་ཡང་ཞུམ་པ་མེད་པ་ཡིས། ། འཇིག་རྟེན་དུ་ཡང་མདོ་འདི་རབ་ཤོད་ཅིག །མཁས་པ་
དུས་སུ་སེམས་པར་བྱེད་པ་ན། །ཁང་བུར་ཞུགས་ཏེ་དེ་བཞིན་སྒོ་བཅད་ནས། །ཆོས་འདི་ཐམས་ཅད་ལ་ནི་ཚུལ་བཞིན་བལྟ། །ལངས་ནས་ཞུམ་པ་མེད་པའི་སེམས་ཀྱིས་ཤོད། །རྒྱལ་པོ་རྣམས་དང་རྒྱལ་པོའི་བུ་
གང་དག །ཆོས་ཉན་པ་རྣམས་འདི་ནི་དེ་ལ་སྲུང་། །གཞན་ཡང་ཁྱིམ་བདག་དག་དང་བྲམ་ཟེ་རྣམས། །ཐམས་ཅད་དེ་ཡི་གཡོག་ཏུ་འཁོད་པར་འགྱུར། །འཇམ་དཔལ་གཞན་ཡང་དེ་བཞིན་གཤེགས་པ་ཡོངས་
སུ་མྱ་ངན་ལས་འདས་ནས། ཕྱི་མའི་དུས་ཕྱི་མའི་ཚེ་དམ་པའི་ཆོས་རབ་ཏུ་འཇིག་པར་འགྱུར་བ་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྣམ་གྲངས་འདི་རབ་ཏུ་སྟོན་པར་འདོད་པ་ནི་བདེ་བ་ལ་
གནས་པ་ཡིན་ནོ། །བདེ་བ་ལ་གནས་ཏེ་ཆོས་འཆད་དོ། །ལུས་ལ་ཡོད་དམ་གླེགས་བམ་དུ་བྱས་སམ་གཞན་དག་ལ་ཡང་སྟོན་ན་ཡང་། ཤིན་དུ་གླན་ཀ་ཚོལ་བའི་རང་བཞིན་ཅན་མ་ཡིན། དགེ་སློང་ཆོས་སྨྲ་བ་གཞན་དག་ལ་
སྐུར་བར་མི་བྱེད། མི་སྙན་པ་མི་སྨྲ། མི་སྙན་པ་མི་རྗོད། གཞན་ཉན་ཐོས་ཀྱི་ཐེག་པ་ཅན་གྱི་དགེ་སློང་དག་གི་མིང་སྨོས་ཏེ་མི་སྙན་པ་མི་སྨྲ། མི་སྙན་པ་དག་མི་རྗོད་ཅིང་དེ་དག་ལ་ཕྱིར་རྒོལ་བར་འདུ་ཤེས་པ་མ་ཡིན་ནོ། །

46-1-116b

དེ་ཅིའི་ཕྱིར་ཞེ་ན། འདི་ལྟར་བདེ་བའི་གནས་ལ་གནས་པའི་ཕྱིར་ཏེ། དེ་ཆོས་ཉན་དུ་འོངས་ཤིང་ལྷགས་པ་རྣམས་ལ་ཕན་འདོགས་པ་དང་ཕྲག་དོག་མེད་པར་ཆོས་སྟོན་ཏོ། །མི་རྩོད་ཅིང་དྲི་བ་དྲིས་ཀྱང་ཉན་ཐོས་ཀྱི་ཐེག་པས་ལན་མི་ལྡོན་ཏེ། 
ཅི་ནས་སངས་རྒྱས་ཀྱི་ཡེ་ཤེས་མངོན་པར་རྫོགས་པར་འཚང་རྒྱ་བ་དེ་ལྟ་བུར་ལན་ལྡོན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །མཁས་པ་བདེ་ལ་རྟག་ཏུ་གནས་པར་འགྱུར། །དེ་ལ་འདུག་
ནས་དེ་བཞིན་ཆོས་ཀྱང་སྟོན། །གཙང་ཞིང་ཡིད་ཏུ་འོང་བའི་ས་ཕྱོགསུ། །ཡངས་པའི་སྟན་ནི་རབ་ཏུ་བཤམས་བཏིང་སྟེ། །བཟང་པོའི་ཚོན་གྱིས་ལེགས་པར་ཁ་བསྒྱུར་བ། །ཆོས་གོས་གཙང་མ་དེ་ནི་རབ་བགོས་ནས། །རྔུལ་ཟན་
ནག་པོ་དེ་བཞིན་བཤམས་བྱས་ལ། །ཤམ་ཐབས་ཆེ་ཚད་ལེགས་པར་རབ་བགོས་ནས། །བཅོས་བུའི་རས་རྣམས་སྣ་ཚོགས་ལེགས་བཏིང་བ། །རྐང་རྟེན་བཅས་པའི་ཁྲི་ལ་རབ་འདུག་ཅིང་། །རྐང་པ་ལེགས་པར་བཀྲུས་
ཏེ་སྟེང་འཛེགས་ནས། །མགོ་དང་བཞིན་གྱི་མདངས་ནི་རབ་སྣུམ་ཞིང་། །ཆོས་ཀྱི་སྟན་དེ་ལ་ནི་རབ་འདུག་ནས། །སེམས་ཅན་ལྷགས་པ་རྩེ་གཅིག་གྱུར་རྣམས་ལ། །གཏམ་མང་རྣམ་པ་སྣ་ཚོགས་ཉེ་བར་སྟོན། །དགེ་སློང་
དག་དང་དགེ་སློང་མ་རྣམས་དང་། །དགེ་བསྙེན་རྣམས་དང་དགེ་བསྙེན་མ་དག་དང་། །རྒྱལ་པོ་དག་དང་རྒྱལ་བུ་རྣམས་ལ་ཡང་། །མཁས་ཏེ་རྟག་ཏུ་ཕྲག་དོག་མེད་པར་ནི། །སྣ་ཚོགས་དོན་ལྡན་སྙན་པའི་གཏམ་ཡང་སྟོན། །དེ་ཚེ་དེ་ལ་
དེ་དག་དྲི་དྲི་ནས། །དེ་ལ་མཐུན་པའི་དོན་རྣམས་རབ་ཏུ་སྟོན། །ཅི་ནས་ཐོས་པ་བྱང་ཆུབ་འཐོབ་འགྱུར་བ། །དེ་ལྟར་དོན་གྱི་རྣམ་པར་རབ་ཏུ་སྟོན། །ལེ་ལོ་དག་ཀྱང་རྣམ་པར་རབ་སྤངས་ནས། །སྐྱོ་བ་སྙམ་པའི་འདུ་ཤེས་བསྐྱེད་མི་བྱ། 
མཁས་པས་མི་དགའ་ཐམས་ཅད་རྣམ་པར་སྤང་། །བྱམས་པའི་སྟོབས་ནི་འཁོར་ལ་བསྒོམ་པར་བྱ། །ཉིན་མཚན་དུ་ཡང་ཆོས་མཆོག་རབ་ཏུ་བསྒོམ། །མཁས་པ་དེས་ནི་བྱེ་བ་ཁྲག་ཁྲིག་དཔེས། །འཁོར་རྣམས་མགུ་

46-1-117a

ཞིང་དེ་བཞིན་དགའ་བར་བྱེད། །དེ་ལ་ནམ་ཡང་འདོད་པ་ཅུང་ཟད་མེད། །ཟས་དང་སྐོམ་དང་བཟའ་དང་བཅའ་བ་དང་། །གོས་དང་མལ་ཆ་ཆོས་གོས་རྣམས་དང་ནི། །ན་བའི་གསོས་སྨན་དག་ཀྱང་མི་བསམ་སྟེ། །འཁོར་
རྣམས་ལ་ནི་ཅི་ཡང་མི་བསླང་ངོ་། །གཞན་དུ་མཁས་པ་རྟག་ཏུ་བདག་ཉིད་དང་། །སེམས་ཅན་འདི་དག་སངས་རྒྱས་གྲུབ་པར་ཤོག །ཕན་ཕྱིར་འཇིག་རྟེན་ཆོས་གང་བསྟན་པ་དེ། །བདག་གི་བདེ་བའི་ཡོ་བྱད་ཀུན་སྙམ་
སེམས། །དགེ་སློང་གང་ཞིག་མྱ་ངན་ང་འདས་ནས། །ཕྲག་དོག་མེད་པར་འདི་ནི་རབ་སྟོན་པ། །དེ་ལ་སྡུག་བསྔལ་མེད་ཅིང་བར་ཆད་མེད། །ནམ་ཡང་མྱ་ངན་རྣམས་ཀྱང་འཁྲུག་པ་མེད། །དེ་ལ་སུ་ཡང་བསྔགས་པར་
མི་བྱེད་དེ། །རྡེག་པ་མེད་ཅིང་མི་སྙན་སྨྲ་བའང་མེད། །དེ་ནི་ནམ་ཡང་བསྐྲད་པར་མི་འགྱུར་ཏེ། །འདི་ལྟར་དེ་ནི་བཟོད་པའི་སྟོབས་ལ་གནས། །རྟག་ཏུ་མཁས་པ་བདེ་ལ་གནས་པ་དེ། །ཇི་ལྟར་ངེས་བཤད་བཞིན་དུ་གནས་པ་ནི། 
ཡོན་ཏན་བྱེ་བ་དུ་མ་བརྒྱ་འབྱུང་སྟེ། །དེ་ནི་བསྐལ་པ་བརྒྱར་ཡང་བརྗོད་མི་ནུས། །འཇམ་དཔལ་གཞན་ཡང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། དམ་པའི་ཆོས་ཟད་པའི་མཐའ་མའི་དུས་ཀྱི་ཚེ་མདོ་
སྡེ་འདི་འཆང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཕྲག་དོག་དང་གཡོ་དང་སྒྱུ་མེད་པ་ཡིན། བྱང་ཆུབ་སེམས་དཔའི་ཐེག་པ་ཅན་གྱི་གང་ཟག་གཞན་དག་ལ་མི་སྙན་པ་མི་སྨྲ། སྐུར་པ་མི་འདེབས། བརྙེས་པར་
མི་བྱེད་དོ། །དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་ཉན་ཐོས་ཀྱི་ཐེག་པ་ཅན་ནམ། རང་སངས་རྒྱས་ཀྱི་ཐེག་པ་ཅན་ནམ། བྱང་ཆུབ་སེམས་དཔའི་ཐེག་པ་ཅན་གཞན་དག་ལ་འགྱོད་པ་སྐྱེད་པར་མི་བྱེད་དེ། རིགས་ཀྱི་བུ་དག་
ཁྱེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་རིང་སྟེ་ཁྱེད་དེ་ན་མི་སྣང་ངོ་། །ཁྱེད་ནི་རབ་ཏུ་བག་མེད་པར་གནས་པ་སྟེ། ཁྱེད་ནི་དེ་བཞིན་གཤེགས་པའི་ཡེ་ཤེས་མངོན་པར་རྫོགས་པར་འཚང་རྒྱ་བའི་མཐུ་མེད་པའོ་

46-1-117b

ཞེས་བྱང་ཆུབ་སེམས་དཔའི་ཐེག་པ་ཅན་གང་ལ་ཡང་ཐེ་ཚོམ་སྐྱེ་བར་མི་བྱེད་དོ། །ཆོས་ཀྱིས་རྩོད་པ་ལ་དགའ་བ་མ་ཡིན་ཏེ་ཆོས་ལ་རྩོད་པར་མི་བྱེད་དོ། །སེམས་ཅན་ཐམས་ཅད་ལ་བྱམས་པའི་སྟོབས་མི་མཐོང་ངོ་། །དེ་བཞིན་གཤེགས་
པ་ཐམས་ཅད་ལ་ཕར་འདུ་ཤེས་སྐྱེད་དོ། །བྱང་ཆུབ་སེམས་དཔའ་ཐམས་ཅད་ལ་སྟོན་པར་འདུ་ཤེས་སྐྱེད་དོ། །ཕྱོགས་བཅུའི་འཇིག་རྟེན་རྣམས་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་འཁོད་པ་དེ་དག་ལ་རྒྱུན་མི་
ཆད་པར་ལྷགས་པའི་བསམ་པས་གུས་པར་ཕྱག་འཚལ་ལོ། །ཆོས་འཆད་པ་ན་ལྷག་ཆད་མེད་པར་ཆོས་འཆད་དོ། །ཆོས་ཀྱི་རྣམ་གྲངས་འདི་རབ་ཏུ་བསྟན་པ་ན་ཆོས་ཀྱི་དགའ་བ་སྙོམས་པར་བྱེད་དེ། ཐ་ན་འགའ་ཙམ་ལ་ཡང་
ཆོས་ཀྱི་དགའ་བས་ལྷག་པར་ཕན་འདོགས་པར་མི་བྱེད་དོ། །འཇམ་དཔལ་ཆོས་འདི་གསུམ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་དམ་པའི་ཆོས་
ཟད་པའི་མཐའ་མའི་དུས་ཀྱི་ཚེ། ཆོས་ཀྱི་རྣམ་གྲངས་འདི་ཡང་དག་པར་སྟོན་པ་ན། བདེ་བར་རེག་པ་ལ་གནས་ཤིང་གཙེ་བ་མེད་པར་ཆོས་ཀྱི་རྣམ་གྲངས་འདི་རབ་ཏུ་སྟོན་ཏེ། དེའི་ཆོས་ཡང་དག་པར་འགྲོ་བའི་གྲོགས་དག་ཀྱང་འབྱུང་
བར་འགྱུར་རོ། །གང་དག་དེ་ལ་ཆོས་ཉན་པའི་ཆོས་ཀྱི་རྣམ་གྲངས་འདི་ཉན་པ་དང་དད་པ་དང་ཡིད་ཆེས་པ་དང་འཛིན་པ་དང་། ཀུན་ཆུབ་པར་བྱེད་པ་དང་། ཡི་གེར་འདྲི་བ་དང་། ཡི་གེར་འདྲིར་འཇུག་པ་དང་གླེགས་བམ་དུ་བྱས་ཏེ་སྟི་བསྟང་
བྱེད་པ་དང་བཙུན་པར་བྱེད་པ་དང་། རིམ་གྲོར་བྱེད་པ་དང་མཆོད་པར་བྱེད་པ་དེ་དག་ཀྱང་འབྱུང་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་ཅེས་གསུངས་ནས། སྟོན་
པས་གཞན་ཡང་འདི་སྐད་ཅེས་བཀའ་སྩལ་ཏོ། །གང་ཞིག་མདོ་འདི་ཆད་འདོད་ཆོས་སྨྲ་བས། །གཡོ་དང་ང་རྒྱལ་དེ་བཞིན་འཕྱ་བ་དག །མ་ལུས་པར་ནི་ཡོངས་སུ་སྤང་བར་བྱ། །དེ་བཞིན་མཁས་པས་ཕྲག་དོག་གཞན་མི་བྱ། །

46-1-118a

ནམ་དུའང་སུ་ལ་འང་མི་སྙན་བརྗོད་མི་བྱ། །ལྟ་བས་རྩོད་པ་ནམ་ཡང་མི་བྱའོ། །བླ་མེད་ཡེ་ཤེས་ཁྱོད་ཐོབ་མི་འགྱུར་ཞེས། །ཐེ་ཚོམ་གནས་ནི་ནམ་ཡང་མི་བྱའོ། །དེ་ནི་རྟག་ཏུ་དྲན་ཞིང་མཉེན་པ་སྟེ། །
བདེ་བར་གཤེགས་ཀྱི་སྲས་པོ་བཟོད་ལྡན་འགྱུར། །ཆོས་འདི་ཡང་དང་ཡང་དུ་རབ་སྟོན་ཀྱང་། །དེ་འདིར་སྐྱོ་བར་འགྱུར་བ་ཅུང་ཟད་མེད། །བྱང་ཆུབ་སེམས་དཔའ་གང་དག་ཕྱོགས་བཅུ་ཡི། །འཇིག་
རྟེན་དག་ན་སེམས་ཅན་སྙིང་བརྩེས་རྒྱུ། །དེ་ཀུན་བདག་གི་སྟོན་ཅེས་དེ་དག་ལ། །མཁས་པ་རྣམས་ནི་བླ་མར་གུས་པ་སྐྱེད། །སངས་རྒྱས་རྐང་གཉིས་མཆོག་རྣམས་དྲན་བྱས་ལ། །རྒྱལ་བ་རྣམས་
ལ་རྟག་ཏུ་ཕར་སེམས་བསྐྱེད། །ང་རྒྱལ་འདུ་ཤེས་ཐམས་ཅད་རྣམ་སྤངས་ན། །དེ་ཚེ་དེ་ལ་བར་ཆད་འབྱུང་མི་འགྱུར། །རྣམ་པ་འདི་འདྲའི་ཆོས་འདི་ཐོས་ནས་ནི། །མཁས་པས་དེ་ཚེ་ལེགས་པར་བསྲུང་བར་
བྱ། །བདེ་བར་གནས་པའི་ཕྱིར་དང་མཉམ་གཞག་ན། །སྲོག་ཆགས་བྱེ་བས་རབ་ཏུ་བསྲུངས་པར་འགྱུར། །འཇམ་དཔལ་གཞན་ཡང་དེ་བཞིན་གཤེགས་པ་ཡོངས་སུ་མྱ་ངན། ལས་འདས་ནས། དམ་པའི་ཆོས་སྤོང་བའི་
དུས་ཀྱི་ཚེ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྣམ་གྲངས་འདི་འཛིན་པར་འདོད་པའི་དགེ་སློང་དེས། ཁྱིམ་ན་གནས་པ་དང་རབ་ཏུ་བྱུང་བ་རྣམས་ལས་རིང་བ་བས་ཀྱང་རིང་དུ་གནས་པར་བྱའོ། །བྱམས་པ་ལ་
གནས་པས་གནས་པར་བྱའོ། །སེམས་ཅན་གང་དག་བྱང་ཆུབ་ཏུ་ཡང་དག་པར་མ་ཞུགས་པ་དེ་དག་ཐམས་ཅད་ལ་སྙིང་རྗེ་བསྐྱེད་པར་བྱའོ། །དེས་འདི་སྙམ་དུ་ཀྱེ་མ་གང་དག་དེ་བཞིན་གཤེགས་པའི་ཐབས་མཁས་པ། ལྡེམ་པོར་
དགོངས་ཏེ་བཤད་པ་མི་ཉན་པ་དང་མི་ཤེས་པ་དང་མི་རྟོགས་པ་དང་མི་འདྲི་བ་དང་མ་དད་པ་དང་མ་མོས་པའི་སེམས་ཅན་དེ་དག་ནི་ཤིན་དུ་ཤེས་རབ་འཆལ་པའི་རང་བཞིན་ཅན་དག་གོ། །གཞན་ཡང་སེམས་ཅན་འདི་དག་ནི་ཆོས་ཀྱི་རྣམ་

46-1-118b

གྲངས་འདི་ལ་མི་འཇུག་ཅིང་ཁོང་དུ་མི་ཆུད་པ་དག་སྟེ། འདི་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་གང་ལ་གང་གནས་པར་འགྱུར་བ་དེ་ལ་རྫུ་འཕྲུལ་གྱི་སྟོབས་ཀྱིས་འདུན་
པར་བྱའོ། །ཡིད་ཆེས་པར་བྱའོ། །འཇུག་པར་བྱའོ། །ཡོངས་སུ་སྨིན་པར་བྱའོ། །སྙམ་དུ་བསམ་པར་བྱའོ། །འཇམ་དཔལ་ཆོས་བཞི་པོ་འདི་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པ་ཡོངས་སུ་
མྱ་ངན་ལས་འདས་ནས། ཆོས་ཀྱི་རྣམ་གྲངས་འདི་ཡང་དག་པར་སྟོན་ན་གནོད་པ་མེད་པར་འགྱུར་རོ། །དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་དང་རྒྱལ་པོ་དང་རྒྱལ་བུ་དང་རྒྱལ་པོའི་བློན་པོ་ཆེན་པོ་དང་རྒྱལ་པོའི་སྣ་ཆེན་པོ་ལ་
གཏོགས་པ་དང་གྲོང་རྡལ་གྱི་མི་དང་ཡུལ་གྱི་མི་དང་བྲམ་ཟེ་དང་ཁྱིམ་བདག་རྣམས་སྟི་སྟང་དུ་བྱེད་བཙུན་པར་བྱེད་རི་མོ་བྱེད་མཆོད་པ་བྱེད་པར་འགྱུར་རོ། །བར་སྣང་ལ་གནས་པའི་ལྷ་དད་པ་དག་ཀྱང་ཆོས་ཉན་པའི་ཕྱིར་དེའི་ཕྱི་བཞིན་འབྲང་
བར་འགྱུར་རོ། །ལྷའི་བུ་རྣམས་ཀྱང་དེ་བསྲུང་བའི་ཕྱིར་རྟག་ཏུ་ཕྱི་བཞིན་དུ་འབྲང་བར་འགྱུར་རོ། །གྲོང་ན་འདུག་ཀྱང་རུང་གཙུག་ལག་ཁང་ན་འདུག་ཀྱང་རུང་ཆོས་ཡོངས་སུ་འདྲི་བ་དག་ཉིན་མཚན་དུ་དེའི་དྲུང་དུ་འདོང་བར་འགྱུར། དེས་ལན་
བཏབ་པས་དགའ་མགུ་རངས་པར་འགྱུར་རོ། །དེ་ཅིའི་ཕྱིར་ཞེ་ན་འཇམ་དཔལ་ཆོས་ཀྱི་རྣམ་གྲངས་འདི་ནི་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པའི་ཕྱིར་རོ། །འཇམ་དཔལ་ཆོས་ཀྱི་རྣམ་གྲངས་འདི་ནི་འདས་པ་དང་། 
མ་བྱོན་པ་དང་ད་ལྟར་བྱུང་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་རྟག་ཏུ་བྱིན་གྱིས་བརླབས་པའི་ཕྱིར་རོ། །འཇམ་དཔལ་ཆོས་ཀྱི་རྣམ་གྲངས་འདི་ནི་འཇིག་རྟེན་གྱི་ཁམས་
མང་པོར་ཡང་སྒྲའམ་དབྱངས་སམ་མིང་ཐོས་པ་ཡང་རྙེད་པར་དཀའོ། །འཇམ་དཔལ་འདི་ལྟ་སྟེ་དཔེར་ན། སྟོབས་ཀྱི་འཁོར་ལོ་སྒྱུར་བའི་རྒྱལ་པོ་ནི་སྟོབས་ཀྱིས་བདག་གི་རྒྱལ་སྲིད་ཐུབ་སྟེ། དེ་ལ་ཕྱིར་རྒོལ་བ་

46-1-119a

རྒྱལ་པོ་ཟླ་དག་དང་དེ་འཐབ་མོ་བྱེད་པར་གྱུར་ན། སྟོབས་ཀྱི་འཁོར་ལོ་སྒྱུར་བའི་རྒྱལ་པོ་དེ་ལ་དམག་མི་མང་པོ་ཡོད་དེ། དེ་དག་དང་དགྲ་དེ་དག་འཐབ་བོ། །རྒྱལ་པོ་དེས་དམག་མི་འཐབ་པ་དེ་མཐོང་ནས། དམག་མི་དེ་དག་ལ་དགའ་
ཞིང་མགུ་བར་འགྱུར་རོ། །དེ་དགའ་ཞིང་རངས་ནས་དམག་མི་དེ་དག་ལ་སྦྱིན་པ་རྣམ་པ་དུ་མ་སྦྱིན་པར་བྱེད་དེ། འདི་ལྟ་སྟེ་གྲོང་དང་གྲོང་གི་ཞིང་རྣམས་སྦྱིན་ནོ། །གྲོང་ཁྱེར་དང་གྲོང་ཁྱེར་གྱི་ཞིང་དང་གོས་དང་ཐོད་དང་ལག་པའི་རྒྱན་དང་
མགུལ་རྒྱན་དང་གསེར་གྱི་ཚོང་ཚོང་དང་རྣ་རྒྱན་དང་སེ་མོ་དོ་དང་དོ་ཤལ་དང་མགྲོན་བུ་དང་གསེར་དང་དངུལ་དང་ནོར་བུ་དང་མུ་ཏིག་དང་བཻ་དཱུརྱ་དང་དུང་དང་མན་ཤེལ་དང་བྱི་རུ་ཡང་སྦྱིན་པར་བྱེད། གླང་པོ་ཆེ་དང་རྟ་དང་ཤིང་རྟ་དང་རྐང་ཐང་དང་། 
བྲན་ཕོ་དང་བྲན་མོ་ཡང་སྦྱིན་པར་བྱེད། བཞོན་པ་དང་ཁྱོགས་ཀྱང་སྦྱིན་པར་བྱེད་དེ། གཙུག་གི་ནོར་བུ་ནི་སུ་ལ་ཡང་སྦྱིན་པར་མི་བྱེད་དོ། །དེ་ཅིའི་ཕྱིར་ཞེ་ན། རྒྱལ་པོའི་གཙུག་ཏུ་བཏགས་པའི་ནོར་བུ་དེ་ནི་གཅིག་པུ་ཁོ་
ན་ཡིན་པའི་ཕྱིར་རོ། །འཇམ་དཔལ་གང་གི་ཚེ་རྒྱལ་པོས་གཙུག་གི་ནོར་བུ་དེ་ཡང་སྦྱིན་པར་བྱེད་པ་ན། རྒྱལ་པོའི་དཔུང་གི་ཚོགས་ཡན་ལག་བཞི་པོ་དེ་དག་ཐམས་ཅད་ངོ་མཚར་དུ་འགྱུར་རྨད་དུ་འགྱུར་རོ། །འཇམ་དཔལ་
དེ་བཞིན་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉིད་ཀྱི་ལག་སྟོབས་ཀྱི་བསོད་ནམས་ལས་བྱུང་བའི་ཁམས་གསུམ་ན། ཆོས་ཀྱི་རྒྱལ་པོ་མཛད་པའི་ཁམས་གསུམ་
དེ་དག་ལ་བདུད་སྡིག་ཅན་གནོན་ཏེ། དེ་ནས་དེ་བཞིན་གཤེགས་པའི་འཕགས་པའི་དམག་མི་རྣམས་དང་བདུད་ཏུ་ཐབ་མོ་བྱེད་དོ། །འཇམ་དཔལ་དེས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་ཆོས་ཀྱི་རྒྱལ་པོ་ཆོས་ཀྱི་བདག་པོ་འཕགས་པའི་དམག་མི་ཐབ་མོ་བྱེད་པ་དེ་དག་ལ་མདོ་སྡེ་བརྒྱ་སྟོང་རྣམ་པ་དུ་མ་འཆད་དོ། །འཁོར་བཞི་ཡང་དག་པར་དགའ་བར་བྱ་བའི་ཕྱིར་དེ་དག་ལ་མྱ་ངན་ལས་འདས་

46-1-119b

པའི་གྲོང་ཁྱེར་དང་ཆོས་ཀྱི་གྲོང་ཁྱེར་ཆེན་པོའི་སྦྱིན་པ་སྦྱིན་ཏེ། མྱ་ངན་ལས་འདས་པས་དེ་དག་ལ་རྡོད་ཅིང་ཆོས་ཀྱི་རྣམ་གྲངས་འདི་ལྟ་བུ་འདི་ནི་མི་འཆད་དོ། །འཇམ་དཔལ་དེ་ལ་ཇི་ལྟར་སྟོབས་ཀྱི་འཁོར་ལོ་སྒྱུར་བའི་རྒྱལ་པོ་
དམག་མི་དེ་དག་འཐབ་པ་ན་སྐྱེས་བུའི་རྩལ་ཆེན་པོས་ངོ་མཚར་དུ་གྱུར་ནས་ཕྱིས་བདོག་པ་ཐམས་ཅད་ཀྱི་མཆོག །གཙུག་གི་ནོར་བུ་འཇིག་རྟེན་ཐམས་ཅད་ཡིད་མི་ཆེས་ཤིང་ངོ་མཚར་དུ་གྱུར་པ་དེ་སྦྱིན་པར་བྱེད་དོ། །འཇམ་
དཔལ་ཇི་ལྟར་རྒྱལ་པོ་དེའི་གཙུག་གི་ནོར་བུ་གཙུག་ན་འདུག་པ་དེ་ཡུན་རིང་དུ་བསྲུངས་པ་དེ་བཞིན་དུ། འཇམ་དཔལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཁམས་གསུམ་ན་ཆོས་ཀྱི་རྒྱལ་
པོ་ཆེན་པོ་ཆོས་ཀྱི་རྒྱལ་པོ་མཛད་པ། གང་གི་ཚེ་ཉན་ཐོས་དག་དང་བྱང་ཆུབ་སེམས་དཔའ་དག །ཕུང་པོའི་བདུད་དམ་ཉོན་མོངས་པའི་བདུད་དང་འཐབ་པ་གཟིགས་ཏེ། དེ་དག་དང་ལྷན་གཅིག་ཏུ་འཐབ་པ་ན། གང་གི་ཚེ་འདོད་
ཆགས་དང་ཞེ་སྡང་དང་གཏི་མུག་ཟད་དེ། ཁམས་གསུམ་པ་ཐམས་ཅད་ནས་བྱུང་ཞིང་བདུད་ཐམས་ཅད་འཇོམས་པ་སྐྱེས་བུའི་རྩལ་ཆེན་པོ་བྱས་པར་གྱུར་པ་དེའི་ཚེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་མཉེས་ནས་འཕགས་པའི་དམག་མི་དེ་དག་ལ་འཇིག་རྟེན་ཐམས་ཅད་དང་མི་མཐུན་པ། འཇིག་རྟེན་ཐམས་ཅད་ལ་ཡིད་མི་ཆེས་པ། སྔོན་མ་བཤད་སྔོན་མ་བསྟན་པའི་ཆོས་ཀྱི་རྣམ་གྲངས་
འདི་བཤད་དེ། ཀུན་གྱིས་ཐམས་ཅད་མཁྱེན་པ་ཉིད་ཐོབ་པར་བྱེད་པ། སྤྱི་གཙུག་གི་ནོར་བུ་ཆེན་པོ་དང་འདྲ་བ། དེ་བཞིན་གཤེགས་པས་ཉན་ཐོས་རྣམས་ལ་རབ་ཏུ་སྦྱིན་ནོ། །འཇམ་དཔལ་འདི་ནི་དེ་བཞིན་
གཤེགས་པ་རྣམས་ཀྱིས་ཆོས་བསྟན་པའི་མཆོག་སྟེ། འདི་ནི་དེ་བཞིན་གཤེགས་པ་རྣམས་ཀྱིས་ཆོས་ཀྱི་རྣམ་གྲངས་ཀྱི་མཐུའོ། །ཆོས་ཀྱི་རྣམ་གྲངས་ཐམས་ཅད་ཀྱི་ནང་ན་ཆོས་ཀྱི་རྣམ་གྲངས་འདི་ཟབ་སྟེ། 

46-1-120a

འཇིག་རྟེན་ཐམས་ཅད་དང་མི་མཐུན་པའོ། །འཇམ་དཔལ་སྟོབས་ཀྱི་འཁོར་ལོ་སྒྱུར་བའི་རྒྱལ་པོ་དེ་ཉིད་ཀྱིས་རིང་དུ་བསྲུངས་པའི་གཙུག་གི་ནོར་བུ་བཀྲོལ་ཏེ། དམག་མི་མཆོག་རྣམས་ལ་བྱིན་པ་དེ་བཞིན་དུ། 
དེ་བཞིན་གཤེགས་པའི་ཆོས་ཀྱི་རྣམ་གྲངས་གསང་བ་ཡུན་རིང་པོར་གསུངས་པ། ཆོས་ཀྱི་རྣམ་གྲངས་ཐམས་ཅད་ཀྱི་སྤྱི་བོ་ལ་འདུག་པ། དེ་བཞིན་གཤེགས་པས་མཁྱེན་པ་དེ། དེ་བཞིན་གཤེགས་པས་དེ་རིང་
ཡང་དག་པར་རབ་ཏུ་སྟོན་ཏོ། །དེ་ནས་བཅོམ་ལྡན་འདས་དོན་འདི་ཉིད་རྒྱས་པར་སྟོན་ཅིང་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བྱམས་པའི་སྟོབས་ནི་རབ་ཏུ་སྟོན་པར་བྱེད། །རྟག་ཏུ་སེམས་ཅན་ཀུན་ལ་
སྙིང་ཡང་བརྩེ། །བདེ་བར་གཤེགས་པས་བསྔགས་པའི་མདོ་སྡེའི་མཆོག །འདི་འདྲའི་ཆོས་འདི་རབ་ཏུ་སྟོན་པར་བྱེད། །གང་དག་ཁྱིམ་ན་གནས་དང་རབ་བྱུང་དང་། །བྱང་ཆུབ་སེམས་དཔའ་མ་ཡིན་ཕྱི་དུས་དེར། །ཆོས་འདི་ཐོས་
ནས་སྨོད་པར་འགྱུར་འོང་ཞེས། །ཐམས་ཅད་ལ་ཡང་དེས་ནི་བྱམས་སྟོབས་བསྟན། །བདག་གིས་བྱང་ཆུབ་རྗེས་སུ་འཐོབ་འགྱུར་ཏེ། །དེ་བཞིན་གཤེགས་ལ་འཇུག་པར་ནམ་གྱུར་པ། །དེ་ཚེ་ཐབས་ལ་གནས་ནས་ཁྱེད་ལ་སྦྱིན། །
བྱང་ཆུབ་མཆོག་འདི་ཀུན་དུ་བསྒྲགས་པར་བྱའོ། །དཔེར་ན་སྟོབས་ཀྱི་འཁོར་ལོ་སྒྱུར་རྒྱལ་གྱིས། །མགུ་ནས་དམག་མི་རྣམས་ལ་མགྲོན་མང་བྱིན། །གླང་ཆེན་རྟ་དང་ཤིང་རྟ་རྐང་ཐང་དང་། །གྲོང་རྣམས་དང་ནི་གྲོང་ཁྱེར་རྣམས་
ཀྱང་བྱིན། །དགའ་ནས་ཁ་ཅིག་ལ་ནི་ལག་པའི་རྒྱན། །དངུལ་དང་གསེར་གྱི་ཚོང་ཚོང་རྣམས་ཀྱང་བྱིན། །མུ་ཏིག་ནོར་བུ་བྱི་རུ་མན་ཤེལ་དང་། །སྦྱིན་པར་བྱ་བ་རྣམ་པ་མང་པོ་བྱིན། །གང་ཚེ་དེ་ན་དེ་ལ་གང་ཞིག་གིས། །ཚམ་
ཚོམ་མེད་པའི་མཆོག་གིས་ངོ་མཚར་གྱུར། །དེ་ཡིས་ངོ་མཚར་བྱས་པར་ཤེས་ནས་སུ། །ཅོད་པན་ལས་ནི་ནོར་བུ་བཀྲོལ་ཏེ་བྱིན། །བཟོད་པའི་སྟོབས་དང་ཤེས་རབ་མཛོད་མང་པོ། །སངས་རྒྱས་ཆོས་རྒྱལ་ངས་ཀྱང་དེ་བཞིན་དུ། །

46-1-120b

ཕན་ཞིང་སྙིང་རྗེའི་རྗེས་སུ་ཐུགས་བརྩེའི་ཕྱིར། །ཆོས་ཀྱིས་འཇིག་རྟེན་འདི་དག་ཐམས་ཅད་བསྟན། །འཚེ་བའི་སེམས་ཅན་དག་ཀྱང་གཟིགས་ནས་སུ། །མདོ་སྡེ་བྱེ་བ་ཕྲག་སྟོང་རྣམས་ཀྱང་བཤད། །སེམས་ཅན་གང་འདིར་ཉོན་མོངས་
འཇོམས་གཙང་བ། །སྲོག་ཆགས་དེ་དག་རྣམས་ཀྱི་མཐུ་མཁྱེན་ནས། །དེ་ནས་ཆོས་རྒྱལ་སྨན་པ་ཆེན་པོ་ཡང་། །རྣམ་གྲངས་བྱེ་བ་ཕྲག་བརྒྱ་འཆད་མཛད་ཅིང་། །སེམས་ཅན་སྟོབས་དང་ཡེ་ཤེས་ལྡན་མཁྱེན་ནས། །གཙུག་གི་ནོར་བུ་
ལྟ་བུའི་མདོ་འདི་བཤད། །མདོ་སྡེ་ཀུན་གྱི་མཆོག་གྱུར་འདི་ཡིན་ཏེ། །འཇིག་རྟེན་དུ་ནི་མདོ་སྡེ་མཐའ་འདི་བཤད། །ངས་ནི་ནམ་ཡང་མ་བཤད་རབ་བསྲུངས་པ། །དེ་ནི་དེ་རིང་བསྒྲགས་ཀྱིས་ཐམས་ཅད་ཉོན། །ང་ནི་ཡོངས་སུ་
མྱ་ངན་འདས་གྱུར་ནས། །འདི་འདྲའི་ཆོས་བཞི་འདི་དག་བསྟན་པར་བྱ། །གང་ཞིག་བྱང་ཆུབ་མཆོག་འདོད་དང་། །དེ་དག་ང་ཡི་བྱ་བ་རྣམས་བྱེད་པ། །དེ་ལ་མྱ་ངན་མེད་ཅིང་བར་ཆད་མེད། །མདོག་མི་སྡུག་ཅིང་ན་བར་མི་འགྱུར་དང་། །
དེ་ཡི་མདོག་ཀྱང་ནག་པོར་མི་འགྱུར་ཏེ། །དེ་ནི་གྲོང་ཁྱེར་ངན་པར་ཡོངས་མི་གནས། །རྟག་ཏུ་མཐོང་དགའ་དྲང་སྲོང་ཆེན་པོ་དེ། །དེ་བཞིན་གཤེགས་པ་བཞིན་དུ་མཆོད་པར་འགྱུར། །ལྷ་ཡི་བུ་ཕོ་གཞོན་ནུ་དེ་དག་ཀྱང་། རྟག་ཏུ་
དེ་ཡི་གཡོག་ཀྱང་བྱེད་པར་འགྱུར། །དེ་ལ་ནམ་ཡང་མཚོན་དང་དུག་མི་ཚུགས། །ལུས་ལ་བོང་རྡོ་དབྱུག་པས་མི་ཕོག་གོ། །དེ་ལ་གང་དག་ཁ་ངན་ཟེར་བ་ནི། །དེ་དག་ཁ་ཡང་ལྐུགས་ཤིང་ཟུམས་པར་འགྱུར། །མྱ་ངན་
ང་འདས་མདོ་འདི་གང་འཛིན་པ། །དེ་ནི་སྲོག་ཆགས་རྣམས་ཀྱི་གཉེན་དུ་འགྱུར། །སྣང་བ་ཐོབ་ཅིང་ས་འདིའི་སྟེང་ན་རྒྱུ། །སྲོག་ཆགས་བྱེ་བ་མང་པོའི་རབ་རིབ་སེལ། །དེ་ཡིས་རྨི་ལམ་བཟང་པོའི་དངོས་མཐོང་སྟེ། །
དེས་ནི་དགེ་སློང་དགེ་སློང་མ་ཡང་མཐོང་། །དེ་བཞིན་བདག་ལུས་སེང་གེའི་ཁྲི་ལ་འདུག །རྣམ་པ་མང་པོའི་ཆོས་རྣམས་སྟོན་པར་བྱེད། །དེ་ནི་རྨི་ལམ་ན་ཡང་ལྷ་ཀླུ་དང་། །གནོད་སྦྱིན་ལྷ་མིས་གང་གཱའི་བྱེ་མ་སྙེད། །

46-1-121a

ཐམས་ཅད་ཐལ་མོ་སྦྱར་བ་དེ་དག་ལ། །ཆོས་ཀྱི་དམ་པ་རྣམ་པ་མང་པོ་འཆད། །དེ་ནི་རྨི་ལམ་དེ་བཞིན་གཤེགས་མཐོང་། །སྲོག་ཆགས་བྱེ་བ་མང་ལ་ཆོས་སྟོན་ཅིང་། །འོད་ཟེར་སྟོང་དག་རབ་ཏུ་འགྱེད་མཛད་ལ། །
མགོན་པོ་དབྱངས་སྙན་གསེར་གྱི་མདོག་འདྲ་མཐོང་། །དེ་ཡང་དེ་ན་ཐལ་མོ་སྦྱར་འདུག་ནས། །ཐུབ་པ་རྐང་གཉིས་མཆོག་ལ་མངོན་པར་བསྟོད། །རྒྱལ་བ་སྨན་པ་ཆེན་པོ་དེ་ཡང་ནི། །འཁོར་བཞི་དག་ལ་ཆོས་མཆོག་
སྟོན་པ་མཛད། །དེ་ཡིས་ཐོས་ནས་རབ་ཏུ་དགའ་བར་འགྱུར། །རབ་ཏུ་མགུ་བ་སྐྱེས་ནས་མཆོད་པ་བྱེད། །ཕྱིར་མི་ལྡོག་པའི་ཡེ་ཤེས་མྱུར་རེག་ནས། །རྨི་ལམ་དུ་ནི་དེ་ཡིས་གཟུངས་ཐོབ་པོ། །འཇིག་རྟེན་མགོན་པོས་
དེ་ཡིས་བསམ་མཁྱེན་ནས། །རིགས་ཀྱི་བུ་ཁྱོད་མ་འོངས་དུས་ན་འདིར། །ཡེ་ཤེས་བླ་མེད་ཞི་བ་རེག་འགྱུར་ཞེས། །སྐྱེས་བུ་ཁྱུ་མཆོག་ཉིད་ཏུ་དེ་ལུང་སྟོན། །ཁྱོད་ཀྱི་ཞིང་ཡང་ཤིན་དུ་རྒྱ་ཆེར་འགྱུར། །འཁོར་བཞི་རྣམས་
ཀྱང་ཇི་ལྟར་ང་ཡི་བཞིན། །གུས་པར་གྱུར་ཅིང་ཐལ་མོ་རབ་སྦྱར་ཏེ། །དེ་དག་ཟག་མེད་ཆོས་མང་ཉན་པར་འགྱུར། །དེས་ནི་བདག་གི་ལུས་ཀྱང་ཡང་མཐོང་བ། །རི་སུལ་དག་ན་ཆོས་ནི་སྒོམ་བྱེད་ཅིང་། །ཆོས་ལ་གོམས་
པར་བྱས་པས་ཆོས་ཉིད་རེག །དེ་ཡིས་ཏིང་ངེ་འཛིན་རྙེད་རྒྱལ་བ་མཐོང་། །གསེར་གྱི་ཁ་དོག་བསོད་ནམས་རྒྱལ་མཚན་ལྡན། །རྨི་ལམ་དག་ན་མཐོང་ནས་ཆོས་ཀྱང་ཉན། །ཐོས་ནས་དེ་ཡང་འཁོར་ལ་རབ་ཏུ་སྟོན། 
དེ་ཡི་རྨི་ལམ་དུ་ནི་དེ་འདྲ་རྨི། །རྨི་ལམ་ན་ཡང་རྒྱལ་སྲིད་ཐམས་ཅད་དང་། །བཙུན་མོའི་འཁོར་དང་དེ་བཞིན་གཉེན་ཚོགས་སྤངས། །འདོད་པ་ཐམས་ཅད་སྤངས་ཏེ་མངོན་པར་བྱུང་། །བྱང་ཆུབ་སྙིང་
པོ་ག་ལ་ཡོད་པར་སོང་། །བྱང་ཆུབ་འདོད་པའི་ཕྱིར་ནི་ཤིང་དྲུང་དེར། །དེ་ན་སེང་གེའི་ཁྲི་ལ་འདུག་ནས་སུ། །དེ་བཞིན་དུ་ཡང་ཞག་བདུན་འདས་ནས་ནི། །དེ་བཞིན་གཤེགས་ཀྱི་ཡེ་ཤེས་རྗེས་སུ་ཐོབ། །བྱང་ཆུབ་ཐོབ་སྟེ་

46-1-121b

དེ་ནས་ལངས་ནས་སུ། །ཟག་པ་མེད་པའི་འཁོར་ལོ་རབ་བསྐོར་ཏེ། །བསྐལ་པ་བསམ་གྱིས་མི་ཁྱབ་བྱེ་སྟོང་དུ། །འཁོར་བཞི་དག་ལ་དེ་ནི་ཆོས་སྟོན་ནོ། །དེར་ནི་ཟག་པ་མེད་པའི་ཆོས་བསྟན་ནས། །སྲོག་ཆགས་
བྱེ་བ་མང་པོ་མྱ་ངན་བཟླས། །རྒྱུ་ཟད་མར་མེ་བཞིན་དུ་མྱ་ངན་འདའ། །དེ་ནི་རྨི་ལམ་རྣམ་པ་དེ་འདྲ་རྨི། །ང་ཡིས་ལེགས་བཤད་ང་ཡིས་ཆོས་མདོ་མཆོག །གང་ཞིག་ཕྱི་མའི་དུས་ན་རབ་སྟོན་པ། །དེ་ཡི་ཕན་ཡོན་
མང་ཞིང་མཐའ་ཡས་ཏེ། །འཇམ་དབྱངས་དེ་དག་འདྲ་བར་དེ་རྟག་འགྱུར། །དམ་པའི་ཆོས་པད་མ་དཀར་པོ་ལས་བདེ་བར་གནས་པའི་ལེའུ་ཞེས་བྱ་སྟེ་བཅུ་གསུམ་པའོ།། །། དེ་ནས་འཇིག་རྟེན་གྱི་ཁམས་
གཞན་དག་ནས་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་གཱའི་ཀླུང་བརྒྱད་ཀྱི་བྱེ་མ་སྙེད། དེའི་ཚེ་འཁོར་གྱི་དཀྱིལ་འཁོར་དེ་ནས་ལངས་ཏེ་དེ་དག་ཐལ་མོ་སྦྱར་ནས་བཅོམ་ལྡན་འདས་ལ་ཕྱག་འཚལ་ཏེ། 
བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་བཅོམ་ལྡན་འདས་ཀྱིས་བདག་ཅག་ལ་གནང་ན། བཅོམ་ལྡན་འདས་བདག་ཅག་གིས་ཀྱང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། ཆོས་ཀྱི་
རྣམ་གྲངས་འདི་འཇིག་རྟེན་གྱི་ཁམས་མི་མཇེད་འདིར་ཡང་དག་པར་རབ་ཏུ་བསྟན་པར་བགྱིའོ། །ཀླག་པར་བགྱིའོ། །ཡི་གེར་བྲི་བར་བགྱིའོ། །མཆོད་པར་བགྱིའོ། །ཆོས་ཀྱི་རྣམ་གྲངས་འདི་ལ་བརྩོན་པར་བགྱིའོ། །
བཅོམ་ལྡན་འདས་ཆོས་ཀྱི་རྣམ་གྲངས་འདི་བདག་ཅག་ལ་ལེགས་པར་བཀའ་སྩལ་དུ་གསོལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །
རིགས་ཀྱི་བུ་དག་ཁྱེད་ཀྱིས་འདི་བྱ་ཅི་དགོས། འཇིག་རྟེན་གྱི་ཁམས་མི་མཇེད་འདི་ན་ང་ཡི་བྱང་ཆུབ་སེམས་དཔའ་སྟོང་ཕྲག་གང་གཱའི་ཀླུང་དྲུག་བཅུའི་བྱེ་མ་སྙེད་ཡོད་དེ། བྱང་ཆུབ་སེམས་དཔའ་དེ་ལྟ་བུ་རྣམས་ཀྱི་

46-1-122a

བྱང་ཆུབ་སེམས་དཔའ་རེ་རེའི་གཡོག་ཀྱང་། །བྱང་ཆུབ་སེམས་དཔའ་སྟོང་ཕྲག་གང་གཱའི་ཀླུང་དྲུག་བཅུའི་བྱེ་མ་སྙེད་ཁོ་ན་སྟེ། བྱང་ཆུབ་སེམས་དཔའ་དེ་དག་རེ་རེའི་གཡོག་ཀྱང་དེ་སྙེད་དོ། །དེ་དག་ང་ཡོངས་
སུ་མྱ་ངན་ལས་འདས་ནས་ཕྱི་མའི་དུས་ཕྱི་མའི་ཚེ་ན། ཆོས་ཀྱི་རྣམ་གྲངས་འཛིན་ཏོ། །ཡང་དག་པར་རབ་ཏུ་སྟོན་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་མ་ཐག་ཏུ། འཇིག་རྟེན་གྱི་ཁམས་མི་མཇེད་
འདི་ཀུན་དུ་གས། རྣམ་པར་གས་པར་གྱུར་ཏོ། །གས་པ་དེ་དག་གི་བར་ནས་གང་དག་འཇིག་རྟེན་གྱི་ཁམས་མི་མཇེད་འདི་ཉིད་ལ་བརྟེན་ཅིང་། ས་ཆེན་པོ་འདིའི་འོག་གི་ནམ་མཁའི་ཁམས་ལ་གནས་པའི་བྱང་ཆུབ་
སེམས་དཔའ་ལུས་གསེར་གྱི་ཁ་དོག་ལྟ་བུ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང་ལྡན་པ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་འཐོན་ཏེ། དེ་དག་བཅོམ་ལྡན་འདས་ཀྱི་གསུང་འདི་ལྟ་བུ་འདི་ཐོས་ནས་ས་
རུམ་ནས་འཐོན་ཏེ། དེ་དག་ལ་བྱང་ཆུབ་སེམས་དཔའ་རེ་རེ་ཡང་། གཡོག་བྱང་ཆུབ་སེམས་དཔའ་གང་གཱའི་ཀླུང་དྲུག་བཅུའི་བྱེ་མ་སྙེད་ཡོད་ཅིང་། ཚོགས་དང་ཚོགས་ཆེན་པོ་དང་། ཚོགས་ཀྱི་སློབ་དཔོན་ནོ། །བྱང་ཆུབ་
སེམས་དཔའ་སེམས་དཔའ་ཆེན་པོ་ཚོགས་དང་ཚོགས་ཆེན་པོ་དང་། ཚོགས་ཀྱི་སློབ་དཔོན་འདི་ལྟ་བུའི་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་དྲུག་བཅུའི་བྱེ་མ་སྙེད་དེ་དག་འཇིག་
རྟེན་གྱི་ཁམས་མི་མཇེད་འདིའི་ས་རུམ་ནས་འཐོན་པར་གྱུར་ན། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་གང་གཱའི་ཀླུང་ལྔ་བཅུའི་བྱེ་མ་སྙེད་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་
དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་གང་གཱའི་ཀླུང་བཞི་བཅུའི་བྱེ་མ་སྙེད་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་གང་གཱའི་ཀླུང་སུམ་

46-1-122b

བཅུའི་བྱེ་མ་སྙེད་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་གང་གཱའི་ཀླུང་ཉི་ཤུའི་བྱེ་མ་སྙེད་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་
ཆེན་པོ་གཡོག་བྱང་ཆུབ་སེམས་དཔའ་གང་གཱའི་ཀླུང་བཅུའི་བྱེ་མ་སྙེད་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་གང་གཱའི་ཀླུང་ལྔ་དང་བཞི་དང་གསུམ་
དང་གཉིས་ཀྱི་བྱེ་མ་སྙེད་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་གང་གཱའི་ཀླུང་གཅིག་གི་བྱེ་མ་སྙེད་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་
དཔའ་ཆེན་པོ་གཡོག་བྱང་ཆུབ་སེམས་དཔའ་གང་གཱའི་ཀླུང་ཕྱེད་ཀྱི་བྱེ་མ་སྙེད་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་གང་གཱའི་ཀླུང་གི་བྱེ་མའི་བཞི་ཆ་དང་དྲུག་ཆ་དང་བརྒྱད་
ཆ་དང་ཉི་ཤུ་ཆ་དང་ལྔ་བཅུ་ཆ་དང་བརྒྱ་ཡི་ཆ་དང་སྟོང་གི་ཆ་དང་བརྒྱ་ཕྲག་སྟོང་གི་ཆ་དང་བྱེ་བའི་ཆ་དང་བྱེ་བ་བརྒྱའི་ཆ་དང་བྱེ་བ་སྟོང་གི་ཆ་དང་བྱེ་བ་བརྒྱ་སྟོང་གི་ཆ་དང་བྱེ་བ་ཁྲག་ཁྲིག་བརྒྱ་ཕྲག་སྟོང་གི་ཆ་ཡོད་པ་རྣམས་ལྟ་ཅི་སྨོས། 
བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་མང་པོ་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱེ་བ་ཡོད་པ་རྣམས་ལྟ་ཅི་སྨོས། 
བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་སྟོང་ཕྲག་བརྒྱ་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་སྟོང་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་
དཔའ་སེམས་དཔའ་ཆེན་པོ་གཡོག་ལྔ་བརྒྱ་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བཞི་བརྒྱ་དང་སུམ་བརྒྱ་དང་ཉིས་བརྒྱ་ཡོད་པ་རྣམས་ལྟ་ཅི་སྨོས། བྱང་ཆུབ་

46-1-123a

སེམས་དཔའ་སེམས་དཔའ་ཆེན་པོ་གཡོག་བརྒྱ་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་ལྔ་བཅུ་ཡོད་པ་རྣམས་ལྟ་ཅི་སྨོས། དེ་བཞིན་དུ་སྦྱར་ཏེ། 
བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་བཞི་བཅུ་པ་དང་སུམ་བཅུ་པ་དང་ཉི་ཤུ་པ་དང་བཅུ་པ་དང་ལྔ་པ་དང་བཞི་པ་དང་གསུམ་པ་དང་གཉིས་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་
དཔའ་ཆེན་པོ་བདག་དང་གཉིས་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་མེད་པ་དེ་གཅིག་པུ་གནས་པ་རྣམས་ལྟ་ཅི་སྨོས་ཏེ། དེ་དག་གི་གྲངས་སམ་བགྲང་བའམ་དཔེ་འམ་ཟླ་འང་མི་དམིགས་
པའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་འཇིག་རྟེན་གྱི་ཁམས་མི་མཇེད་འདིའི་ས་རུམ་ནས་འཐོན་ནོ། །དེ་དག་འཐོན་ནས་བཅོམ་ལྡན་འདས་དེ་བཞིན་གཤེགས་པ་རིན་ཆེན་མང་ཡོངས་སུ་མྱ་ངན་ལས་འདས་
པ་དང་། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དང་ལྷན་གཅིག་ཏུ་སེང་གེའི་ཁྲི་གང་ལ་བཞུགས་པའི་རིན་པོ་ཆེའི་མཆོད་རྟེན་ཆེན་པོ་ནམ་མཁའ་བར་སྣང་ལ་གནས་པ་ག་ལ་བ་དེར་དོང་སྟེ་ལྷགས་ནས། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་གཉིས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ཉིད་ཀྱི་སྤྲུལ་པ། དེ་བཞིན་གཤེགས་པའི་སྐུ་གང་དག་
ཕྱོགས་བཅུ་ཀུན་གྱི་འཇིག་རྟེན་གྱི་ཁམས་གཞན་དང་གཞན་དག་ནས་འདུས་པ། རིན་པོ་ཆེ་སྣ་ཚོགས་ཀྱི་ཤིང་ལྗོན་པའི་དྲུང་དག་ན་སེང་གེའི་ཁྲི་དག་ལ་བཞུགས་པའི་བཅོམ་ལྡན་འདས་དེ་དག་ཐམས་ཅད་ལ་བཏུད་ཅིང་
ཕྱག་འཚལ་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ། ལན་བརྒྱ་སྟོང་དུ་མར་བསྐོར་བ་བྱས་ནས། བྱང་ཆུབ་སེམས་དཔའི་བསྟོད་པ་རྣམས་པ་དུ་མས་

46-1-123b

མངོན་པར་བསྟོད་དེ་ཕྱོགས་གཅིག་ཏུ་འཁོད་ནས་ཐལ་མོ་སྦྱར་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང་། བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་ལ་མངོན་དུ་ཕྱག་འཚལ་ལོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ས་རུམ་ནས་འཐོན་ནས། བར་གྱི་བསྐལ་པ་ལྔ་བཅུ་རྫོགས་
པར་འདས་ཀྱི་བར་དུ་དེ་བཞིན་གཤེགས་པ་རྣམས་ལ་ཕྱག་འཚལ་ཞིང་བྱང་ཆུབ་སེམས་དཔའི་བསྟོད་པ་རྣམ་པ་དུ་མས་བསྟོད་དོ། །བར་གྱི་བསྐལ་པ་ལྔ་བཅུ་པོ་དེ་དག་ལ། བཅོམ་ལྡན་འདས་ཤཱཀྱ་ཐུབ་པ་དེ་ཅང་མི་གསུང་བར་
གྱུར་ཏོ། །འཁོར་བཞི་པོ་དེ་དག་ཀྱང་བར་གྱི་བསྐལ་པ་ལྔ་བཅུ་པོ་དེ་དག་ཉིད་ལ་ཅང་མི་སྨྲ་བར་འཁོད་པར་གྱུར་ཏོ། །དེ་ནས་བཅོམ་ལྡན་འདས་ཀྱི་རྫུ་འཕྲུལ་མངོན་པར་འདུ་བྱ་བ་འདི་ལྟ་བུ་མཛད་དེ། རྫུ་འཕྲུལ་ཇི་ལྟ་བུ་མངོན་པར་
འདུ་བྱ་བ་མངོན་པར་མཛད་པས་འཁོར་བཞི་པོ་དེ་དག་གིས་དེ་དག་ཕྱི་དྲོ་གཅིག་ཁོ་ན་སྙམ་དུ་ཤེས་སོ། །འཇིག་རྟེན་གྱི་ཁམས་མི་མཇེད་འདི་ཡང་འཇིག་རྟེན་གྱི་ཁམས་སྟོང་ཕྲག་བརྒྱའི་ནམ་མཁའ་ཙམ་དུ་གྱུར་ཏེ། 
བྱང་ཆུབ་སེམས་དཔས་ཡོངས་སུ་གང་བར་མཐོང་ངོ་། །བྱང་ཆུབ་སེམས་དཔའི་ཚོགས་ཆེན་པོ་དང་བྱང་ཆུབ་སེམས་དཔའི་ཕུང་པོ་ཆེན་པོ་དེའི་གཙོ་བོ། བྱང་ཆུབ་སེམས་དཔའ་སེམས་དཔའ་ཆེན་པོ་བཞི་གང་དག་
བྱུང་བ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པ་ཁྱད་པར་ཅན་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པ་མཐའ་ཡས་ཤེས་བྱ་བ་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་སྤྱོད་པ་རྣམ་དག་ཅེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པ་བརྟན་པ་ཞེས་བྱ་བ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་བཞི་པོ་དེ་དག་ནི་

46-1-124a

བྱང་ཆུབ་སེམས་དཔའི་ཚོགས་ཆེན་པོ་དང་བྱང་ཆུབ་སེམས་དཔའི་ཕུང་པོ་ཆེན་པོ་དེའི་གཙོ་བོར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཞི་པོ་དེ་དག་བྱང་ཆུབ་སེམས་དཔའི་ཚོགས་ཆེན་པོ་
དང་བྱང་ཆུབ་སེམས་དཔའི་ཕུང་པོ་དེའི་མདུན་དུ་འདུག་སྟེ། བཅོམ་ལྡན་འདས་ཀྱི་སྤྱན་སྔར་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལ་གནོད་པ་ཆུང་ལགས་
སམ་སྙུན་ཉུང་ལགས་སམ་བདེ་བར་རེག་པ་ལ་གནས་ལགས་སམ། བཅོམ་ལྡན་འདས་ཁྱོད་ཀྱི་སེམས་ཅན་རྣམས་ཚུལ་མཛེས་ལགས་སམ་ལེགས་པར་གོ་བ་ལགས་སམ་གདུལ་སླ་བ་ལགས་སམ་
རྣམ་པར་སྦྱང་སླ་བ་ལགས་སམ་བཅོམ་ལྡན་འདས་ལ་སྐྱོ་བ་སྐྱེད་པར་མི་བགྱིད་ལགས་སམ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཞི་པོ་དེ་དག་གིས། བཅོམ་ལྡན་འདས་ལ་ཚིགས་སུ་བཅད་པ་
འདི་དག་གསོལ་ཏོ། །འཇིག་རྟེན་མགོན་པོ་འོད་མཛད་པ། །བདེ་བར་རེག་ལ་གནས་ལགས་སམ། །གནོད་ལས་རྣམ་པར་རབ་གྲོལ་ལམ། །སྡིག་པ་མི་མངའ་སྐུ་བདེ་འམ། །ཁྱོད་ཀྱི་སེམས་ཅན་ཚུལ་
མཛེས་སམ། །གདུལ་སླ་སྦྱང་བར་སླ་ལགས་སམ། །འཇིག་རྟེན་མགོན་གྱིས་བཤད་པ་ན། །སྐྱོ་བ་སྐྱེད་པར་མི་བགྱིད་དམ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའི་ཚོགས་ཆེན་པོ་དང་བྱང་ཆུབ་
སེམས་དཔའི་ཕུང་པོ་དེའི་གཙོ་བོ། བྱང་ཆུབ་སེམས་དཔའ་བཞི་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་དེ་བཞིན་ཏེ་བདེ་བར་རེག་པ་ལ་གནས་སོ། །གནོད་པ་ཆུང་ངོ་། །སྙུན་ཉུང་ངོ་། །ངའི་སེམས་ཅན་འདི་དག་
ཚུལ་མཛེས་སོ། །གོ་སླའོ་གདུལ་སླའོ། །རྣམ་པར་སྦྱང་སླའོ། །རྣམ་པར་སྦྱོང་བ་ན་ང་ལ་སྐྱོ་བ་མི་སྐྱེད་དོ། །དེ་ཅིའི་ཕྱིར་ཞེ་ན། རིགས་ཀྱི་བུ་དག་ང་ཉིད་ཀྱིས་སེམས་ཅན་འདི་དག་སྔོན་གྱི་ཡང་དག་པར་རྫོགས་པའི་སངས་རྒྱས་ཀྱི་ཚེ་ཡོངས་སུ་སྦྱང་བ་བྱས་

46-1-124b

པའི་ཕྱིར་ཏེ། རིགས་ཀྱི་བུ་དག་ང་མཐོང་བ་དང་ཐོས་པ་ཙམ་གྱིས་ཀྱང་མོས་པར་འགྱུར་ལ། སངས་རྒྱས་ཀྱི་ཡེ་ཤེས་ལ་འབབ་ཅིང་འཇུག་སྟེ། གང་དག་ཉན་ཐོས་ཀྱི་ས་ལ་ཡོངས་སུ་འདྲིས་པར་བྱས་པ་རྣམས་ནི་མ་གཏོགས་སོ། །
དེ་དག་ཀྱང་ངས་ད་ལྟར་སངས་རྒྱས་ཀྱི་ཡེ་ཤེས་ལ་བཙུད་དོ་དོན་དམ་པ་ཐོས་པར་བྱས་སོ། །དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་ཚིགས་སུ་བཅད་པ་འདི་དག་གསོལ་ཏོ། །དཔའ་བོ་ཆེན་པོ་ལེགས་
སོ་ལེགས་ཁྱོད་ཀྱི་སེམས་ཀྱི་ཚུལ་མཛེས་ཤིང་། །གདུལ་སླ་རྣམ་པར་སྦྱང་སླ་དང་། །འདྲེན་པ་གང་དག་ཁྱོད་ཀྱི་ནི། །ཡེ་ཤེས་ཟབ་མོ་འདི་ཉན་ཅིང་། །ཐོས་ནས་མོས་པར་འགྱུར་བ་དང་། །འདྲེན་པར་འཇུག་པར་འགྱུར་བ་ལ། །
བདག་ཅག་རྗེས་སུ་ཡི་རང་ངོ་། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའི་ཚོགས་ཆེན་པོ་དང་བྱང་ཆུབ་སེམས་དཔའི་ཕུང་པོ་ཆེན་པོ་དེའི་གཙོ་བོ། བྱང་ཆུབ་སེམས་དཔའ་སེམས་དཔའ་
ཆེན་པོ་བཞི་པོ་དེ་དག་ལ། རིགས་ཀྱི་བུ་དག་ལེགས་སོ་ལེགས་སོ། །རིགས་ཀྱི་བུ་དག་ཁྱེད་དེ་བཞིན་གཤེགས་པ་ལ་མངོན་པར་བསྟོད་པ་ཡང་ལེགས་སོ་ལེགས་སོ་ཞེས་བྱ་བ་བྱིན་ནོ། །དེའི་ཚེ་བྱང་ཆུབ་སེམས་དཔའ་
སེམས་དཔའ་ཆེན་པོ་བྱམས་པ་དང་གཞན་ཡང་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་བརྒྱད་ཀྱི་བྱེ་མ་སྙེད་དག་འདི་སྙམ་དུ་སེམས་ཏེ། བྱང་ཆུབ་སེམས་དཔའི་ཚོགས་ཆེན་པོ་དང་བྱང་ཆུབ་
སེམས་དཔའི་ཕུང་པོ་ཆེན་པོ་གང་ས་རུམ་ནས་འཐོན་ཏེ། བཅོམ་ལྡན་འདས་ཀྱི་སྤྱན་སྔར་འདུག་ནས། བཅོམ་ལྡན་འདས་ལ་སྟི་སྟང་དུ་བྱེད། བཙུན་པར་བྱེད། བཅོམ་ལྡན་འདས་ལ་དགྱེས་པར་བྱེད་པ་འདི་དག །བདག་
ཅག་གིས་སྔོན་མ་མཐོང་སྔོན་མ་ཐོས་ན། བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ག་ལས་ལྷགས་སྙམ་སེམས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་བདག་ཉིད་

46-1-125a

ཐེ་ཚོམ་དང་སོམ་ཉིར་གྱུར་པ་ཡང་ཤེས། བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་བརྒྱད་ཀྱི་བྱེ་མ་སྙེད་དེ་དག་གི་སེམས་ཀྱི་རྣམ་པར་རྟོག་པ་ཡང་སེམས་ཀྱིས་རིག་ནས་དེའི་ཚེ་
ཐལ་མོ་སྦྱར་ཏེ། བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་དོན་དེ་ཞུས་པ། བྱང་ཆུབ་སེམས་དཔའ་སྔོན་མ་བྱུང་། །བརྒྱ་སྟོང་ཕྲག་ནི་མང་པོ་དང་། །བྱེ་བ་ཕྲག་ནི་མཐའ་ཡས་པ། །རྐང་གཉིས་མཆོག་
གིས་བསྟན་དུ་གསོལ། །རྫུ་འཕྲུལ་ཆེན་པོ་འདི་དག་རྣམས། །གང་ནས་ཇི་ལྟར་ལྷགས་པར་གྱུར། །རབ་ཏུ་ཆེ་བའི་ལུས་ཀྱི་གཟུགས། །འདི་དག་གང་ནས་ཇི་ལྟར་ལྷགས། །འདི་དག་ཐམས་ཅད་བརྟན་ལྡན་ཞིང་། །
དྲན་དང་ལྡན་ལ་དྲང་སྲོང་ཆེ། །ཤིན་དུ་བལྟ་ན་སྡུག་པའི་གཟུགས། །འདི་དག་གང་ནས་ལྷགས་པར་གྱུར། །བྱང་ཆུབ་སེམས་དཔའ་མཁས་གྱུར་པ། །རེ་རེའི་གཡོག་ཀྱང་དཔག་མི་ལང་། །གང་གཱའི་བྱེ་མ་ཇི་སྙེད་པ། །དེ་སྙེད་མཆིས་སོ་
འཇིག་རྟེན་དབང་། །བྱང་ཆུབ་སེམས་དཔའི་གཡོག་རྣམས་ནི། །གྲགས་ལྡན་དྲུག་བཅུར་ཡོངས་ཚང་བ། །གང་གཱའི་ཀླུང་གི་བྱེ་མ་སྙེད། །ཀུན་ཀྱང་བྱང་ཆུབ་ཞུགས་པ་ལགས། །དཔའ་བོ་གཡོག་དང་ལྡན་གྱུར་པ། །རྣམ་པ་འདི་འདྲའི་སྐྱོབ་
རྣམས་ཀྱི། །འདི་དག་ཚད་ནི་གང་གཱའི་ཀླུང་། །དྲུག་བཅུ་ཁོ་ནའི་བྱེ་མ་སྙེད། །གཞན་དག་དེ་བས་ཆེས་མང་སྟེ། །གཡོག་རྣམས་མཐའ་ཡས་ལྡན་པ་ལགས། །གང་གཱ་ཕྲག་ནི་ལྔ་བཅུ་དང་། །བཞི་བཅུ་དང་ནི་སུམ་བཅུ་དང་། གང་གཱ་ཉི་ཤུ་
འི་བྱེ་སྙེད་དེ། །གཡོག་འཁོར་དེ་དག་དེ་སྙེད་ལགས། །གཞན་དག་དེ་བས་ཆེས་མང་སྟེ། །དེ་དག་རྣམས་ཀྱི་བཅུ་དང་ལྔ། །སྐྱོབ་པ་སངས་རྒྱས་སྲས་རྣམས་ཀྱི། །སོ་སོ་རེ་རེའི་གཡོག་གྱུར་པ། །གང་ནས་འདི་
འདྲའི་འཁོར་འདི་རྣམས། །རྣམ་པར་འདྲེན་པ་དེ་རིང་ལྷགས། །སོ་སོ་རེ་རེའི་གཡོག་གྱུར་པ། །རྗེས་སུ་སློབ་པའི་གྲོགས་པོ་དག །གང་གཱ་བཞི་དང་གསུམ་རྣམས་དང་། །གཉིས་ཀྱི་བྱེ་མ་སྙེད་ཀྱང་མཆིས། །

46-1-125b

གཞན་ཡང་དེ་བས་ཆེས་མང་བ། །དེ་ཡི་གྲངས་ནི་མཐའ་ཡས་ཏེ། །བསྐལ་པ་བྱེ་བ་སྟོང་དུ་ཡང་། །དེ་དག་དཔག་པར་ནུས་མ་ལགས། །བྱང་ཆུབ་སེམས་དཔའ་དཔའ་བོ་པ། །སྐྱོབ་པ་དག་གི་གཡོག་རྣམས་ནི། །
གང་གཱ་ཕྱེད་དང་སུམ་ཆ་དང་། །བཅུ་དང་ཉི་ཤུའི་ཆ་ཡང་མཆིས། །གཞན་ཡང་དེ་བས་ཆེས་མང་སྟེ། །བསྐལ་པ་བྱེ་བ་བརྒྱ་རྣམས་སུ། །རེ་རེ་བགྲང་བར་བགྱིས་ན་ནི། །དེ་དག་རྣམས་ལ་ཚད་མ་
མཆིས། །གཞན་ཡང་དེ་བས་ཆེས་མང་སྟེ། །གཡོག་རྣམས་ཉུང་བ་མ་ལགས་པ། །བྱེ་བ་བྱེ་བ་བྱེ་བ་དང་། །དེ་བཞིན་བྱེ་བ་ཕྱེད་པའང་མཆིས། །གཞན་ཡང་དྲང་སྲོང་ཆེ་རྣམས་ཀྱི། །བྱང་ཆུབ་སེམས་དཔའ་ཤེས་རབ་
ཆེ། །བགྲང་བ་ལས་ནི་འདས་པ་རྣམས། །ཐམས་ཅད་གུས་དང་བཅས་པར་གནས། །གཡོག་འཁོར་སྟོབས་དང་ལྡན་པ་དང་། །དེ་བཞིན་བརྒྱ་དང་ལྔ་བཅུ་དང་། །བསྐལ་པ་བྱེ་བ་ཕྲག་བརྒྱར་ཡང་། །དེ་དག་
བགྲང་བར་ནུས་མ་ལགས། །དཔའ་བོ་དག་གི་གཡོག་རྣམས་ནི། །ཉི་ཤུ་དག་དང་བཅུ་དང་ལྔ་། །དེ་བཞིན་བཞི་གསུམ་གཉིས་པ་ཡང་། །དེ་དག་ལ་ནི་གྲངས་མ་མཆིས། །གང་དག་བདག་ཉིད་གཅིག་རྒྱུ་ཞིང་། །
གཅིག་པུ་ཞི་བ་མྱོང་བགྱིད་པ། །གང་དག་དེ་རིང་འདིར་ལྷགས་པ། །དེ་དག་ལ་ཡང་གྲངས་མ་མཆིས། །གྲངས་ཤིང་ལག་ན་ཐོགས་ནས་སུ། །གང་གཱའི་བྱེ་མ་སྙེད་རྣམས་ཀྱི། །བསྐལ་པར་གལ་ཏེ་མིས་བགྲངས་ཀྱང་། །
དེས་ནི་མཐའ་མ་རྙེད་མ་ལགས། །ཀུན་ཀྱང་ཆེ་བའི་བདག་ཉིད་ཅན། །སྐྱོབ་པ་བརྩོན་འགྲུས་ལྡན་པ་སྟེ། །བྱང་ཆུབ་སེམས་དཔའ་དཔའ་བོ་པ། །འདི་རྣམས་གང་ལས་བྱུང་བ་ལགས། །གང་གིས་འདི་དག་ཆོས་རྣམ་
བསྟན། །བྱང་ཆུབ་ལ་ནི་སུ་ཡིས་བཀོད། །འདི་དག་སུ་ཡི་བསྟན་ལ་མོས། །གང་གིས་བསྟན་པ་འཛིན་པ་ལགས། །ས་འདི་ཐམས་ཅད་བརྟོལ་ནས་སུ། །ཕྱོགས་བཞི་དག་ནི་ཀུན་ནས་ཀྱང་། །མཁས་ཤིང་རྫུ་འཕྲུལ་ལྡན་པ་དང་། །

46-1-126a

ཤེས་རབ་ཆེན་པོ་རྣམས་ཀྱང་འཐོན། །བྱང་ཆུབ་སེམས་དཔའ་འཇིགས་བྲལ་བ། །དེ་ལྟར་འཐོན་པ་འདི་དག་གིས། །ཐུབ་པ་འཇིག་རྟེན་ཁམས་འདི་ཡང་། །ཀུན་ཏུ་སང་སེང་བགྱིས་ལགས་སོ། །འདི་དག་ནམ་ཡང་བདག་ཅག་
གིས། །སྔོན་ཆད་ཡེ་ཡོང་མ་མཐོང་ན། །དེ་ཡི་ཞིང་གི་མི་རྣམས་ནི། །འཇིག་རྟེན་འདྲེན་པ་བསྟན་དུ་གསོལ། །ཕྱོགས་བཅུ་དག་ཏུ་བདག་ཅག་རྣམས། །འདི་ལྟར་ཡང་དང་ཡང་མཆིས་ན། །བྱང་ཆུབ་སེམས་དཔའ་འདི་དག་ནི། །བདག་
ཅག་རྣམས་ཀྱིས་ཡོང་མ་མཐོང་། །ཁྱོད་ཀྱི་སྲས་རྣམས་གཅིག་ཀྱང་ནི། །བདག་ཅག་ནམ་ཡང་མ་མཐོང་བ། །འདི་དག་དེ་རིང་འཕྲལ་ལ་མཐོང་། །ཐུབ་པ་དེ་ཡི་སྤྱོད་པ་གསུངས། །བྱང་ཆུབ་སེམས་དཔའ་ཁྲག་ཁྲིག་ཕྲག །སྟོང་གི་ཕྲག་ནི་བརྒྱ་རྣམས་
ཀྱང་། །ཐམས་ཅད་ངོ་མཚར་ལྟད་མོར་གྱུར། །རྐང་གཉིས་མཆོག་ལ་དེ་དག་ལྟ། །བྱང་ཆུབ་སེམས་དཔའ་འཇིགས་བྲལ་བ། །དཔའ་བོ་འདི་དག་ག་ལས་མཆིས། །ཕུང་པོ་མི་མངའ་དཔག་ཡས་པ། །དཔའ་བོ་ཆེན་པོ་ལུང་བསྟན་གསོལ། །ཡང་དེའི་
ཚེ་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའི་སྤྲུལ་པ་གང་དག་ཕྱོགས་བཅུའི་འཇིག་རྟེན་གྱི་ཁམས་གཞན་དག་ན་སེམས་ཅན་རྣམས་ལ་ཆོས་སྟོན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་འཇིག་རྟེན་གྱི་ཁམས་གཞན་དག་ནས་གཤེགས་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་ཕྱོགས་
བརྒྱད་ཀུན་ན་རིན་པོ་ཆེའི་སེང་གེའི་ཁྲི་ཆེན་པོ་ལ་སྐྱིལ་མོ་དཀྲུང་བཅས་ཏེ་བཞུགས་པ། དེ་བཞིན་གཤེགས་པ་དེ་དག་གི་སོ་སོའི་ཞབས་འབྲིང་བ་དེ་དག་གིས་ཀྱང་བྱང་ཆུབ་སེམས་དཔའི་ཚོགས་ཆེན་པོ་དང་། །བྱང་ཆུབ་སེམས་
དཔའི་ཕུང་པོ་ཆེན་པོ་ས་རུམ་ནས་འཐོན་ཏེ་ནམ་མཁའ་ལ་འཁོད་པ་དེ་དག་མཐོང་ནས། ངོ་མཚར་དང་རྨད་ཏུ་གྱུར། སོ་སོའི་དེ་བཞིན་གཤེགས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་

46-1-126b

དཔའ་ཆེན་པོ་དཔག་ཏུ་མ་མཆིས་གྲངས་མ་མཆིས་པ་འདི་སྙེད་གང་ནས་ལྷགས། དེ་སྐད་ཅེས་གསོལ་པ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས། རང་རང་གི་ཞབས་
འབྲིང་བ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ཁྱེད་ཡུད་ཙམ་ཞིག་སྡོད་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ། བཅོམ་ལྡན་འདས་ཤཱཀྱ་ཐུབ་པའི་འོག་ཏུ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་ལུང་བསྟན་དེ། བཅོམ་ལྡན་འདས་ཤཱཀྱ་ཐུབ་པ་དེ་ལ་དོན་འདི་འདྲི་སྟེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་དེའི་ལན་ལྡོན་པར་
འགྱུར་གྱིས་དེ་ལས་ཁྱེད་ཉོན་ཅིག །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་བཀའ་སྩལ་པ། མ་ཕམ་པ་གང་ཁྱོད་ཀྱིས་ང་ལ་གནས་རྒྱ་ཆེན་པོ་འདི་དྲིས་པ་མ་ཕམ་པ་
ལེགས་སོ་ལེགས་སོ། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་ལ་བཀའ་སྩལ་པ། རིགས་ཀྱི་བུ་དག་དེ་བཞིན་གཤེགས་པའི་ཡེ་ཤེས་མཐོང་བ་དང་། དེ་བཞིན་གཤེགས་
པའི་ཁྱུ་མཆོག་ཏུ་གྱུར་པ་དང་། དེ་བཞིན་གཤེགས་པའི་ཕྲིན་ལས་དང་། དེ་བཞིན་གཤེགས་པའི་རྣམ་པར་རོལ་པ་དང་། དེ་བཞིན་གཤེགས་པའི་མཐུ་བགྱིངས་པ་དང་། དེ་བཞིན་གཤེགས་པའི་ཕ་རོལ་གནོན་པ། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ཡང་དག་པར་རབ་ཏུ་སྟོན་གྱིས། རིགས་ཀྱི་བུ་དག་དེའི་ཕྱིར། བྱང་ཆུབ་སེམས་དཔའི་ཚོགས་འདི་ཐམས་ཅད་སྒྲིམས་ཤིག །ཤིན་ཏུ་གོ་གྱོན་ལ་མཐུ་
བརྟན་པར་གྱིས་ཤིག །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གཞན་མ་ཡིན་པའི་ཚིག་རྣམས་ངས་བཤད་ཀྱིས། །རིགས་ཀྱི་བུ་དག་ཐམས་ཅད་རབ་ཏུ་བསྒྲིམས། །

46-1-127a

དེ་བཞིན་གཤེགས་ཀྱི་ཡེ་ཤེས་བསམ་མི་ཁྱབ། །འདི་ལ་མཁས་རྣམས་ཞུམ་པར་མ་བྱེད་ཅིག །ཀུན་ཀྱང་བརྟན་དང་ལྡན་ཞིང་དྲན་ལྡན་བྱོས། །ཀུན་ཀྱང་མཉམ་པར་གཞག་ཅིང་གནས་པར་གྱིས། །དེ་བཞིན་གཤེགས་
པ་རྣམས་ཀྱི་ངོ་མཚར་བ། །སྔོན་ཆད་མ་བྱུང་ཆོས་ནི་མཉན་པར་བྱོས། །ངས་ནི་ཁྱེད་ཅག་ལེགས་པར་ཡོངས་དགོད་ཀྱིས། །ཐམས་ཅད་ཐེ་ཚོམ་ནམ་ཡང་མ་བྱེད་ཅིག །རྣམ་པར་འདྲེན་པ་གཞན་དུ་གསུང་མ་ཡིན། །ང་ཡི་
ཡེ་ཤེས་ནམས་ཀྱང་གྲངས་ཡོད་མིན། །བདེ་བར་གཤེགས་པས་ཆོས་ཟབ་ཐུགས་ཆུད་དེ། །བརྟག་མི་ནུས་ཤིང་དེ་ལ་ཚད་ཀྱང་མེད། །ངས་ནི་ཆོས་དེ་རབ་ཏུ་བསྟན་པར་བྱས། །དེ་དག་ཅི་འདྲ་ཅི་ལྟ་ང་ལས་ཉོན། །དེ་ནས་
བཅོམ་ལྡན་འདས་ཀྱིས་ཚིགས་སུ་བཅད་པ་དེ་དག་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་བཀའ་སྩལ་པ། མ་ཕམ་པ་ཁྱོད་མོས་པར་བྱ། ཁྱོད་ཁོང་དུ་ཆུད་པར་བྱའོ། །མ་ཕམ་
པ་བྱང་ཆུབ་སེམས་དཔའ་སེམས་དཔའ་ཆེན་པོ་དཔག་ཏུ་མེད། གྲངས་མེད་བསམ་གྱིས་མི་ཁྱབ་གཞལ་དུ་མེད། བགྲང་དུ་མེད་པ་གང་དག་ཁྱོད་ཀྱིས་སྔོན་མ་མཐོང་བ་ས་རུམ་ནས་གདོད་འཐོན་པའི་བྱང་ཆུབ་སེམས་
དཔའ་སེམས་དཔའ་ཆེན་པོ་འདི་དག་ཐམས་ཅད་ནི། མ་ཕམ་པ་ང་འཇིག་རྟེན་གྱི་ཁམས་མི་མཇེད་འདིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། ང་ཉིད་ཀྱིས་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ལ་བཙུད་དེ་ཡོངས་སུ་བསྔོས་སོ། །རིགས་ཀྱི་བུ་འདི་དག་ནི་ངས་བྱང་ཆུབ་སེམས་དཔའི་ཆོས་འདི་ལ་ཡོངས་སུ་སྨིན་པར་བྱས་པ། རབ་ཏུ་བཀོད་པ་བཞག་པ། ཡོངས་སུ་གནས་པར་
བྱས་པ། བཙུད་པ་ཁོང་དུ་ཆུད་པར་བྱས་པ་དག་གོ། །མ་ཕམ་པ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ནི་འཇིག་རྟེན་གྱི་ཁམས་མི་མཇེད་འདིའི་འོག་གི་ནམ་མཁའི་ཁམས་ཀྱིས་ཡོངས་སུ་ཟིན་པ་ན་

46-1-127b

གནས་ཏེ། ཁ་དོན་དང་ལུང་ནོད་པ་དང་ཚུལ་བཞིན་དུ་ཡིད་ལ་བྱེད་པ་ལ་ཞུགས་པ་དག་གོ། །རིགས་ཀྱི་བུ་འདི་དག་ནི་འདུ་འཛི་ལ་མི་དགའ་ཞིང་འདུ་འཛི་མེད་པ་ལ་དགའ་བ་བརྩོན་པ་མི་འདོར་ཞིང་བརྩོན་འགྲུས་བརྩམས་པ་དག་
མ་ཕམ་པ་རིགས་ཀྱི་བུ་འདི་དག་ནི་བདེན་པ་ལ་མངོན་པར་དགའ་ཞིང་བདེན་པ་ལ་མོས་པ་སྟེ། རིགས་ཀྱི་བུ་འདི་དག་ནི་ལྷ་དང་མི་ལ་བརྟེན་ཅིང་མི་གནས་སོ། །རིགས་ཀྱི་བུ་འདི་དག་ནི་འདུ་འཛི་མེད་པའི་སྤྱོད་པ་ལ་དགའ་བ་
ཆོས་ཀྱི་ཀུན་དགའ་བ་ལ་མོས་པ་སངས་རྒྱས་ཀྱི་ཡེ་ཤེས་ལ་བརྩོན་པ་དག་གོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བྱང་ཆུབ་སེམས་དཔའ་འདི་དག་དཔག་མེད་པ། །འདི་
དག་བསམ་གྱིས་མི་ཁྱབ་ཚད་ཀྱང་མེད། །རྫུ་འཕྲུལ་ཤེས་རབ་ཐོས་པ་རྣམས་དང་ལྡན། །བསྐལ་པ་བྱེ་བ་མང་པོར་ཡེ་ཤེས་སྤྱད། །ང་ཡིས་འདི་དག་ཐམས་ཅད་བྱང་ཆུབ་ལ། །ཡོངས་སུ་སྨིན་བྱས་ང་ཡི་ཞིང་ན་འཁོད། །
འདི་དག་ཐམས་ཅད་ང་ཡིས་སྨིན་བྱས་ཏེ། །བྱང་ཆུབ་སེམས་དཔའ་འདི་དག་ང་ཡི་བུ། །འདི་དག་ཐམས་ཅད་དགོན་དང་སྦྱངས་ལ་མོས། །འདུ་འཛི་ས་ནི་རྟག་ཏུ་སྤོང་བར་བྱེད། །ང་ཡི་སྤྱོད་པ་མཆོག་གི་རྗེས་སློབ་ཅིང་། །
ང་བུ་འདི་དག་འདུ་འཛི་མེད་པར་སྤྱོད། །ནམ་མཁས་ཡོངས་སུ་འཛིན་པ་དེར་གནས་ཏེ། །ཞིང་འདིའི་འོག་ན་དཔའ་རྣམས་ཡོངས་སུ་སྤྱོད། །བྱང་ཆུབ་དམ་པ་འདི་ནི་ཀུན་སྒྲུབ་ཅིང་། །ཉིན་མཚན་དུ་ནི་བག་ཡོད་ཤིན་དུ་
བརྩོན། །ཐམས་ཅད་བརྩོན་འགྲུས་བརྩམས་པ་དྲན་དང་ལྡན། །དཔག་ཏུ་མེད་པའི་ཤེས་རབ་སྟོབས་ལ་གནས། །འདི་དག་མི་འཇིགས་པར་ཡང་ཆོས་འཆད་པའི། །འོད་གསལ་འདི་དག་ཐམས་ཅད་ང་ཡི་བུ། །
བྱང་ཆུབ་དམ་པ་འདི་ནི་ངས་ཐོབ་ནས། །གྲོང་ཁྱེར་ག་ཡ་དེ་ཡི་ཤིང་དྲུང་དེར། །ཆོས་ཀྱི་འཁོར་ལོ་བླ་ན་མེད་པ་བསྐོར། །ཐམས་ཅད་བྱང་ཆུབ་མཆོག་འདིར་སྨིན་པར་བྱས། །ཟག་མེད་ཡང་དག་ང་ཡི་ཚིག་འདི་

46-1-128a

ནི། །ཐོས་ནས་ཐམས་ཅད་ང་ལ་དད་པར་གྱིས། །ང་ཡིས་དེ་ལྟར་བྱང་ཆུབ་མཆོག་ཐོབ་རིང་། །ངས་ནི་འདི་དག་ཐམས་ཅད་ཡོངས་སྨིན་བྱས། །དེ་ནས་བྱང་ཆུབ་སེམས་དཔའ་སེམས་དཔའ་
ཆེན་པོ་བྱམས་པ་དང་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་མང་པོ་དེ་དག་ངོ་མཚར་དུ་གྱུར་རྨད་ཏུ་གྱུར་ནས། ཇི་ལྟར་ན་བཅོམ་ལྡན་འདས་སྐད་ཅིག་བཞུགས་ནས། ཡུན་རིང་པོ་མ་ལོན་པར་བྱང་
ཆུབ་སེམས་དཔའ་གྲངས་མེད་པ་འདི་སྙེད་འདི་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་བཙུད་དེ་ཡོངས་སུ་སྨིན་པར་མཛད་སྙམ་མོ། །དེ་ནས་བཅོམ་ལྡན་འདས་ལ། བྱང་ཆུབ་སེམས་དཔའ་
སེམས་དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་གཞོན་ནུར་གྱུར་པ་ན། སེར་སྐྱའི་གནས་ཀྱི་ཤཱཀྱའི་གྲོང་ཁྱེར་ནས་མངོན་པར་བྱུང་སྟེ། ག་ཡཱའི་གྲོང་ཁྱེར་ནས་ཤིན་དུ་མི་རིང་བ་
བྱང་ཆུབ་ཀྱི་སྙིང་པོ་མཆོག་དམ་པར་གཤེགས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སངས་རྒྱས་ནས། བཅོམ་ལྡན་འདས་དེང་དུ་དེའི་དུས་ནས་ལོ་བཞི་བཅུ་ལྷག་ཙམ་ལགས་ན། བཅོམ་ལྡན་འདས་ཇི་ལྟར་
དེ་བཞིན་གཤེགས་པས་དུས་འདི་ཙམ་གྱིས། དེ་བཞིན་གཤེགས་པའི་མཛད་པ་དཔག་ཏུ་མ་མཆིས་པ་འདི་དང་། དེ་བཞིན་གཤེགས་པའི་ཁྱུ་མཆོག་ཏུ་གྱུར་པ་དང་། དེ་བཞིན་གཤེགས་པའི་ཕ་རོལ་གནོན་པ་མཛད་ཅིང་བྱང་
ཆུབ་སེམས་དཔའི་ཚོགས་དང་བྱང་ཆུབ་སེམས་དཔའི་ཕུང་པོ་འདི་བཅོམ་ལྡན་འདས་ཀྱིས་དུས་དེ་ཙམ་གྱིས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བཙུད་ཅིང་ཡོངས་སུ་སྨིན་པར་མཛད། བཅོམ་ལྡན་འདས་
བྱང་ཆུབ་སེམས་དཔའི་ཚོགས་དང་། བྱང་ཆུབ་སེམས་དཔའི་ཕུང་པོ་འདི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲངས་ཀྱང་མཐའ་མི་རྙེད་པ་དེ་ཙམ་དུ། བཅོམ་ལྡན་འདས་དཔག་ཏུ་མ་མཆིས་པ། དེ་ལྟར་གྲངས་

46-1-128b

མ་མཆིས་པའི་བྱང་ཆུབ་སེམས་དཔའ་འདི་དག་ནི། ཡུན་རིང་པོར་ཚངས་པར་སྤྱོད་པ་སྤྱད་པ་སངས་རྒྱས་བརྒྱ་སྟོང་མང་པོ་ལ་དགེ་བའི་རྩ་བ་བསྐྲུན་པ། བསྐལ་པ་བརྒྱ་སྟོང་མང་པོར་ཡོངས་སུ་གྲུབ་པ་ལགས་སོ། །བཅོམ་
ལྡན་འདས་འདི་ལྟ་སྟེ་དཔེར་ན། མི་གཞན་ཞིག་བཙས་ནས་ལོ་ཉི་ཤུ་རྩ་ལྔ་ལོན་པ་གཞོན་ནུ་ཐོར་བུ་ལང་ཚོ་སྐྲ་ནག་པོ་ཐོག་མའི་ན་ཚོད་དང་ལྡན་པ་འགའ་ཞིག་མཆིས་ལ། དེས་བུ་ལོ་བརྒྱ་ལོན་པ་དག་སྟོན་ཅིང་རིགས་ཀྱི་
བུ་འདི་དག་ནི་ངའི་བུའོ་ཞེས་དེ་སྐད་སྨྲས་ལ། མི་ལོ་བརྒྱ་ལོན་པ་དེ་དག་ཀྱང་འདི་སྐད་ཏུ། འདི་ནི་བདག་གི་ཕ་སྟེ་སྐྱེད་པ་ཡིན་ནོ་ཞེས་མཆི་ན། བཅོམ་ལྡན་འདས་མི་དེའི་ཚིག་ལ་འཇིག་རྟེན་ཡིད་ཆེས་པར་མི་འགྱུར་ཏེ་ཡིད་
ཆེས་པར་དཀའ་བ་ལགས་སོ། །བཅོམ་ལྡན་འདས་དེ་བཞིན་དུ། དེ་བཞིན་གཤེགས་པ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། རིང་པོར་མ་ལགས་པར་བྱང་ཆུབ་
སེམས་དཔའ་སེམས་དཔའ་ཆེན་པོ་དཔག་ཏུ་མ་མཆིས་པ་མང་པོ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོར་ཚངས་པར་སྤྱོད་པ་སྤྱད་པ། ཡུན་རིང་པོར་སངས་རྒྱས་ཀྱི་ཡེ་ཤེས་ལ་ངེས་པར་བགྱིས་པ། ཏིང་ངེ་འཛིན་གྱི་སྒོ་
བརྒྱ་སྟོང་ལ་མཉམ་པར་གཞག་པ་དང་ལྡན་པ་ལ་མཁས་པ། མངོན་པར་ཤེས་པ་ཆེན་པོ་དང་ཡོངས་སུ་སྦྱང་བ་བགྱིས་པ། སངས་རྒྱས་ཀྱི་ས་ལ་མཁས་པ། དེ་བཞིན་གཤེགས་པའི་ཆོས་རྣམས་ཡང་དག་པར་རྗོད་པ་
ལ་མཁས་པ། འཇིག་རྟེན་ན་ངོ་མཚར་དང་རྨད་དུ་གྱུར་པ་བརྩོན་འགྲུས་དང་སྟོབས་དང་མཐུ་ཆེན་པོ་ཐོབ་པ་དེ་དག་ལ། བཅོམ་ལྡན་འདས་ཀྱིས་འདི་སྐད་དུ། ངས་འདི་དག་ཐོག་མ་ནས་བྱང་ཆུབ་སེམས་དཔའི་ས་
འདི་ལ་ཡང་དག་པར་བཙུད་དེ། ཡོངས་སུ་སྨིན་པར་བྱས་ཤིང་ཡོངས་སུ་བསྔོས་ཏེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། ང་ཉིད་ཀྱིས་བརྩོན་འགྲུས་དང་

46-1-129a

ཕ་རོལ་གནོན་པ་འདི་དག་ཐམས་ཅད་བྱས་སོ་ཞེས་གསུང་བ་ལ། བཅོམ་ལྡན་འདས་བདག་ཅག་ནི་དེ་བཞིན་གཤེགས་པ་གཞན་མ་ལགས་པར་གསུང་པ་སྟེ། དོན་འདི་དེ་བཞིན་གཤེགས་པ་ཉིད་ཀྱིས་མཁྱེན་ཏོ་ཞེས་དེ་
བཞིན་གཤེགས་པ་ལ་ཡིད་ཆེས་ལགས་མོད་ཀྱི། བཅོམ་ལྡན་འདས་བྱང་ཆུབ་སེམས་དཔའ་ཐེག་པ་ལ་གསར་དུ་ཡང་དག་པར་ཞུགས་པ་རྣམས་གནས་འདི་ལ་ཐེ་ཚོམ་འཚལ་བར་འགྱུར་རོ། །དེ་བཞིན་གཤེགས་པ་ཡོངས་སུ་མྱ་ངན་
ལས་འདས་ནས། ཆོས་ཀྱི་རྣམ་གྲངས་འདི་ཐོས་ན་ཡིད་མི་ཆེས་མི་དད་མི་མོས་པར་འགྱུར་ཏེ། བཅོམ་ལྡན་འདས་དེའི་སླད་ཏུ་དེ་དག་ནི་ཆོས་ཀྱིས་ཕོངས་པར་འགྱུར་བའི་ལས་མངོན་པར་འདུ་བགྱིད་པ་དང་ལྡན་པར་འགྱུར་རོ། །ཅི་
ནས་བདག་ཅག་ཀྱང་ཆོས་འདི་ལ་ཐེ་ཚོམ་འཚལ་བར་མི་འགྱུར་བ་དང་། མ་འོངས་པའི་དུས་ན་ཡང་རིགས་ཀྱི་བུ་འམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ཅན་དག་གིས་ཐོས་ན་ཡང་། ཐེ་ཚོམ་འཚལ་བར་མི་འགྱུར་
བར་བཅོམ་ལྡན་འདས་ཀྱིས་དོན་འདི་ལེགས་པར་བཤད་ཏུ་གསོལ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས། དེའི་ཚེ་བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །གང་ཚེ་
སེར་སྐྱའི་གནས་སུ་བལྟམ་གྱུར་ཅིང་། །ཤཱཀྱའི་གནས་ནས་མངོན་པར་བྱུང་ནས་སུ། །གྲོང་ཁྱེར་ག་ཡཱར་བྱང་ཆུབ་བརྙེས་གྱུར་པ། །འཇིག་རྟེན་མགོན་པོ་དེ་ནས་ཡུན་མི་རིང་། །འཇིགས་བྲལ་འདི་དག་དང་ནི་གཞན་
མང་བ། །ཚོགས་ཆེ་བསྐལ་པ་བྱེ་བར་སྤྱད་པ་སྟེ། །རྫུ་འཕྲུལ་སྟོབས་ལ་གནས་ཤིང་མི་གཡོ་བ། །ལེགས་བསླབས་ཤེས་རབ་སྟོབས་ཀྱང་རྟོགས་པར་རིག །ཆུ་ཡི་པད་མ་ལྟ་བུར་མ་གོས་པ། །དེ་དག་ས་འདི་
བརྟོལ་ནས་དེང་འདིར་ལྷགས། །འཇིག་རྟེན་བདག་པོ་དྲན་ལྡན་སློབ་མ་སྲས། །ཐམས་ཅད་ཐལ་སྦྱར་གུས་དང་བཅས་ཏེ་མཆིས། །ཁྱོད་ཀྱི་རྨད་བྱུང་འདི་འདྲ་དེ་དག་ལ། །བྱང་ཆུབ་སེམས་དཔའ་ཇི་ལྟར་ཡིད་

46-1-129b

ཆེས་འགྱུར། །ཐེ་ཚོམ་གཞོམ་པའི་སླད་ཏུ་བཀའ་སྩོལ་ཏེ། །དོན་འདི་ཅི་བཞིན་ཁྱོད་ཀྱིས་འདིར་བཤད་གསོལ། །དཔེར་ན་འདི་ན་སྐྱེས་བུ་ལ་ལ་ཞིག །བཙས་ནས་ལོ་ནི་ཉི་ཤུ་ལྷག་ལོན་པ། །གཞོན་ནུ་ཐོར་བུ་ལང་
ཚོ་སྐྲ་གནག་དེས། །བཙས་ནས་ལོ་བརྒྱ་ལོན་ལ་བུར་སྟོན་ཅིང་། །སྐྲ་སྐྱ་གཉེར་མ་ཅན་དག་འདི་སྐད་ཏུ། །འདི་ནི་བདག་ཅག་ལུས་བསྐྱེད་ཡིན་མཆི་ན། །ཐོར་བུའི་བུ་ནི་འདི་འདྲ་འདི་དག་ལ། །འཇིག་རྟེན་མགོན་པོ་ཤིན་
ཏུ་ཡིད་ཆེས་དཀའ། །དེ་བཞིན་བཅོམ་ལྡན་འདས་ཀྱང་སྐུ་གཞོན་ལ། །བྱང་ཆུབ་སེམས་དཔའ་མཁས་པ་མང་པོ་འདི། །དྲན་དང་ལྡན་ཞིང་མི་འཇིགས་ཤེས་རབ་ཅན། །བསྐལ་པ་བྱེ་བ་སྟོང་དུ་ལེགས་པར་བསླབས། །
བརྟན་དང་ལྡན་ཞིང་ཤེས་རབ་མཁས་གྱུར་པ། །ཐམས་ཅད་བྱད་བཞིན་བཟང་ཞིང་བལྟ་ན་སྡུག །ཆོས་རྣམས་གཏན་ལ་དབབ་ཅིང་མི་འཇིགས་པ། །འཇིག་རྟེན་རྣམ་པར་འདྲེན་པས་ཡོངས་སུ་བསྟོད། །རླུང་ལྟར་ཆགས་པ་
མ་མཆིས་རྒྱུ་བ་སྟེ། །ནམ་མཁའི་ཁམས་ལ་རྟག་ཏུ་གནས་མ་ལགས། །སངས་རྒྱས་བྱང་ཆུབ་འདི་ནི་ཡོངས་ཚོལ་ཞིང་། །བདེ་བར་གཤེགས་ཀྱི་སྲས་རྣམས་བརྩོན་འགྲུས་སྐྱེད། །འཇིག་རྟེན་མགོན་པོའི་མངོན་སུམ་ཐོས་
པས་ན། །བདག་ཅག་ལ་ནི་ཐེ་ཚོམ་གཞར་མ་མཆིས། །འཇིག་རྟེན་རྣམ་འདྲེན་མྱ་ངན་འདས་པ་ན། །འདི་ལ་ཇི་ལྟ་བུར་ནི་ཡིད་ཆེས་འགྱུར། །གནས་འདི་ལ་ནི་ཐེ་ཚོམ་འཚལ་བ་ཡིས། །བྱང་ཆུབ་སེམས་དཔའ་ངན་འགྲོར་
མཆིས་ས་རེ། །བཅོམ་ལྡན་ཇི་ལྟར་བྱང་ཆུབ་སེམས་དཔའ་རྣམས། །སྨིན་མཛད་ཇི་བཞིན་དེ་ནི་ལུང་བསྟན་གསོལ། །དམ་པའི་ཆོས་པད་མ་དཀར་པོ་ལས། བྱང་ཆུབ་སེམས་དཔའ་ས་རུམ་ནས་འཐོན་པའི་ལེའུ་
ཞེས་བྱ་སྟེ་བཅུ་བཞི་པའོ།། །། དམ་པའི་ཆོས་པ་དམ་དཀར་པོ་བམ་པོ་བཅུ་པ། དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་

46-1-130a

ལ་བཀའ་སྩལ་པ། རིགས་ཀྱི་བུ་དག་དེ་བཞིན་གཤེགས་པ་ངས་ཡང་དག་པའི་ཚིག་སྨྲས་པ་ལ་དད་ཅིང་ཡིད་ཆེས་པར་གྱིས་ཤིག །ལན་གཉིས་ལན་གསུམ་དུ་ཡང་བཅོམ་ལྡན་འདས་ཀྱིས་བྱང་ཆུབ་
སེམས་དཔའ་དེ་དག་ལ་བཀའ་སྩལ་པ། རིགས་ཀྱི་བུ་དག་དེ་བཞིན་གཤེགས་པ་ངས་ཡང་དག་པའི་ཚིག་སྨྲས་པ་ལ་དད་ཅིང་ཡིད་ཆེས་པར་གྱིས། དེ་ནས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་
ཀྱིས། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་མདུན་དུ་བཞག་ནས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་དོན་འདི་བཤད་
དུ་གསོལ། བདེ་བར་གཤེགས་པས་བཤད་ཏུ་གསོལ། དེ་བཞིན་གཤེགས་པས་བཀའ་སྩལ་པ་ལ་བདག་ཡིད་མ་ཆེས་པར་བགྱིད་དོ། །ལན་གཉིས་སུ་ཡང་ཐམས་ཅད་དང་ལྡན་པའི་བྱང་ཆུབ་སེམས་
དཔའི་ཚོགས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་དོན་འདི་ཉིད་བཤད་ཏུ་གསོལ། བདེ་བར་གཤེགས་པས་བཤད་ཏུ་གསོལ། དེ་བཞིན་གཤེགས་པས་བཀའ་སྩལ་པ་ལ་
བདག་ཅག་ཡིད་ཆེས་པར་བགྱིད་དོ། །ལན་གསུམ་དུ་ཡང་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་ཀྱིས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་དོན་འདི་
བཤད་ཏུ་གསོལ། བདེ་བར་གཤེགས་པས་བཤད་ཏུ་གསོལ། དེ་བཞིན་གཤེགས་པས་བཀའ་སྩལ་པ་ལ་བདག་ཅག་ཡིད་ཆེས་པར་བགྱིད་དོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་
དེ་རྣམས་ཀྱིས་ལན་གསུམ་གྱི་བར་དུ་གསོལ་བ་བཏབ་པ་མཁྱེན་ནས། བྱང་ཆུབ་སེམས་དཔའ་དེ་དག་ལ་བཀའ་སྩལ་པ། རིགས་ཀྱི་བུ་དག་དེའི་ཕྱིར་ཏིང་ངེ་འཛིན་གྱི་སྟོབས་བསྐྱེད་པ་འདི་ལྟ་བུ་

46-1-130b

འདི་ཉོན་ཅིག །རིགས་ཀྱི་བུ་དག་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་འདིས་ནི། བཅོམ་ལྡན་འདས་ཤཱཀྱ་ཐུབ་པ་ཤཱཀྱའི་ཁྱིམ་ནས་མངོན་པར་བྱུང་སྟེ། གྲོང་ཁྱེར་ག་ཡ་ཞེས་བྱ་བར་བྱང་ཆུབ་ཀྱི་
སྙིང་པོ་མཆོག་དམ་པར་གཤེགས་ནས་ད་གདོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་སྙམ་དུ་དེ་ལྟར་ཤེས་མོད་ཀྱི། རིགས་ཀྱི་བུ་དག་ང་ནི་བསྐལ་པ་བྱེ་བ་ཁྲག་ཁྲིག་
བརྒྱ་སྟོང་མང་པོ་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །རིགས་ཀྱི་བུ་དག་འདི་ལྟ་སྟེ་དཔེར་ན། མི་ལ་ལ་ཞིག་བྱུང་ལ་དེས་འཇིག་རྟེན་གྱི་ཁམས་གྲངས་མེད་
པ་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུའི་སའི་ཁམས་ཀྱི་རྡུལ་ཕྲ་རབ་དག་ལས་རྡུལ་ཕྲ་རབ་གཅིག་ཁྱེར་ཏེ། ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་ཁོ་
ན་འདས་ནས་རྡུལ་ཕྲ་རབ་ཀྱི་རྡུལ་དེ་བཞག་ལ། མི་དེས་རྣམ་གྲངས་འདིས་འཇིག་རྟེན་གྱི་ཁམས་དེ་དག་ཐམས་ཅད་ཀྱི་སའི་ཁམས་རྣམས་ཟད་པར་བྱས་ནས། སའི་ཁམས་ཀྱི་རྡུལ་ཕྲ་རབ་ཀྱི་རྡུལ་དེ་དག་
ཐམས་ཅད་རྣམ་གྲངས་འདི་དང་གཞག་པའི་ཚུལ་འདིས་ཤར་ཕྱོགས་སུ་བཞག་ན། རིགས་ཀྱི་བུ་དག་འདི་ཇི་སྙམ་དུ་སེམས། འཇིག་རྟེན་གྱི་ཁམས་དེ་དག་ལ་ལ་ཞིག་གིས་བསམ་པ་འམ་དཔག་པ་འམ། 
བགྲང་བ་འམ་བརྟག་པར་ནུས་སམ། དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེས། བཅོམ་ལྡན་འདས་
ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་གྱི་ཁམས་དེ་དག་ནི་གྲངས་མ་མཆིས་པ་བགྲང་དུ་མ་མཆིས་པ་སེམས་ཀྱི་ས་ལས་ཡང་དག་པར་འདས་པ་སྟེ། བཅོམ་ལྡན་འདས་ཉན་ཐོས་དང་རང་སངས་

46-1-131a

རྒྱས་ཐམས་ཅད་ཀྱིས་ཀྱང་། འཕགས་པའི་ཡེ་ཤེས་ཀྱི་བསམ་པ་འམ་དཔག་པ་འམ་བགྲང་བ་འམ་བརྟག་པར་མི་ནུས་སོ། །བཅོམ་ལྡན་འདས་གནས་འདི་ནི། བདག་ཅག་ཕྱིར་མི་ལྡོག་པའི་ས་ལ་གནས་པའི་
བྱང་ཆུབ་སེམས་དཔའ་རྣམས་ཀྱི་བསམ་པའི་སྤྱོད་ཡུལ་དུ་ཡང་མི་འགྱུར་ཏེ། བཅོམ་ལྡན་འདས་འཇིག་རྟེན་གྱི་ཁམས་དེ་དག་དེ་ཙམ་དུ་ཚད་མ་མཆིས་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་
བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ཁྱེད་མོས་པར་བྱའོ། །ཁྱེད་ཀྱི་ཁོང་དུ་ཆུད་པར་བྱའོ། །རིགས་ཀྱི་བུ་དག་འཇིག་རྟེན་གྱི་ཁམས་ཇི་སྙེད་པ་དེ་
དག་ལས། མི་དེས་གང་དག་ཏུ་རྡུལ་ཕྲ་རབ་དེ་དག་བཞག་པ་དང་། རིགས་ཀྱི་བུ་དག་གང་དག་ཏུ་མ་བཞག་པའི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་དེ་དག་ཐམས་ཅད་ན་རྡུལ་ཕྲ་རབ་ཀྱི་རྡུལ་ཡོད་པ་
དག་ནི། རིགས་ཀྱི་བུ་དག་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་ཇི་སྙེད་པ་དེ་སྙེད་ཏུ་མེད་དོ། །རིགས་ཀྱི་བུ་དག་
གང་ཚུན་ཆད་ངས་འཇིག་རྟེན་གྱི་ཁམས་མི་མཇེད་འདི་དང་། འཇིག་རྟེན་གྱི་ཁམས་གཞན་བྱེ་བ་ཁྲག་ཁྲིག་བརྒྱ་སྟོང་དག་ཏུ་སེམས་ཅན་རྣམས་ལ་ཆོས་བསྟན་པ་དེའི་བར་དུ། རིགས་ཀྱི་བུ་དག་ངས་དེ་བཞིན་གཤེགས་པ་མར་
མེ་མཛད་ལ་སོགས་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་ཡོངས་སུ་བརྗོད་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ཡོངས་སུ་
མྱ་ངན་ལས་འདའ་བར་བྱ་བའི་ཕྱིར། རིགས་ཀྱི་བུ་དག་ངས་ཐབས་མཁས་པས་ཆོས་བསྟན་པ་མངོན་པར་བསྒྲུབ་པ་དེ་དག་སྤྲུལ་ཏོ། །རིགས་ཀྱི་བུ་དག་ཡང་དེ་བཞིན་གཤེགས་པ་ནི། སེམས་ཅན་འོངས་ཤིང་ལྷགས་པ་

46-1-131b

རྣམས་ཀྱི་དབང་པོ་དང་བརྩོན་འགྲུས་ཀྱི་རིམ་པ་ལ་གཟིགས་ནས། དེ་དང་དེ་དག་ཏུ་བདག་གི་མིང་བརྗོད་ཅིང་དེ་དང་དེ་དག་ཏུ་བདག་ཉིད་ཡོངས་སུ་མྱ་ངན་ལས་འདས་པར་བརྗོད་དོ། །ཆོས་ཀྱི་རྣམ་
གྲངས་རྣམ་པ་མང་པོས་དེ་ལྟ་དེ་ལྟ་བུར་སེམས་ཅན་རྣམས་ཡོངས་སུ་ཚིམ་པར་མཛད་དོ། །རིགས་ཀྱི་བུ་དག་དེ་ལ་དེ་བཞིན་གཤེགས་པས་མོས་པ་ཐ་དད་པའི་སེམས་ཅན་དགེ་བའི་རྩ་བ་ཆུང་བ། ཉེ་བའི་ཉོན་མོངས་པ་མང་
བ་རྣམས་ལ་འདི་སྐད་ཏུ། དགེ་སློང་དག་ང་ནི་ན་གཞོན་ཏེ། མངོན་པར་བྱུང་བ་དང་དགེ་སློང་དག་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་ནོ་ཞེས་གསུང་ངོ་། །རིགས་
ཀྱི་བུ་དག་དེ་ལྟར་དེ་བཞིན་གཤེགས་པ་མངོན་པར་རྫོགས་པར་སངས་རྒྱས་ནས་ཡུན་རིང་མོད་ཀྱི། ང་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་ནོ་ཞེས་གསུངས་ཏེ། སེམས་ཅན་རྣམས་ཡོངས་སུ་སྨིན་པར་བྱ་
བ་དང་གཟུད་པའི་དོན་མ་གཏོགས་པར་ཆོས་ཀྱི་རྣམ་གྲངས་འདི་དག་མ་བཤད་དོ། །རིགས་ཀྱི་བུ་དག་ཆོས་ཀྱི་རྣམ་གྲངས་དེ་དག་ཐམས་ཅད་ཀྱང་དེ་བཞིན་གཤེགས་པས་སེམས་ཅན་རྣམས་གདུལ་བའི་ཕྱིར་གསུངས་སོ། །རིགས་ཀྱི་བུ་
དག་དེ་བཞིན་གཤེགས་པས་སེམས་ཅན་རྣམས་གདུལ་བའི་ཕྱིར་ཚིག་གང་གསུངས་པ། བདག་ལས་སྨོས་ཀྱང་རུང་གཞན་ལས་སྨོས་ཀྱང་རུང་། བདག་ལ་དམིགས་ཀྱང་རུང་གཞན་ལ་དམིགས་ཀྱང་རུང་སྟེ། དེ་བཞིན་གཤེགས་
པས་གང་ཅི་བཤད་པའི་ཆོས་ཀྱི་རྣམ་གྲངས་དེ་དག་ཐམས་ཅད་ནི་བདེན་པ་དེ་བཞིན་གཤེགས་པས་གསུངས་པ་སྟེ། འདི་ལ་དེ་བཞིན་གཤེགས་པ་ལ་བརྫུན་དུ་སྨྲ་བ་མེད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་
པས་ཁམས་གསུམ་པ་སྐྱེ་བ་མེད་པ་དང་འཆི་བ་མེད་པ་དང་འཆི་འཕོ་བ་མེད་པ་དང་འབྱུང་བ་མེད་པ་དང་འཁོར་བ་མེད་པ་དང་ཡོངས་སུ་མྱ་ངན་འདའ་བ་མེད་པ་དང་བྱུང་བ་མ་ཡིན་པ་དང་མ་བྱུང་བ་མ་ཡིན་པ་དང་ཡོད་པ་

46-1-132a

མ་ཡིན་པ་དང་མེད་པ་མ་ཡིན་པ་དང་དེ་བཞིན་དུ་མ་ཡིན་པ་དང་གཞན་དུ་མ་ཡིན་པ་དང་མ་ནོར་བ་དེ་བཞིན་ཉིད་མ་ཡིན་པ་དང་མ་ནོར་བ་དེ་བཞིན་ཉིད་མ་ཡིན་པ་ཡང་མ་ཡིན་པར་ཡང་དག་པ་ཇི་ལྟ་བ་བཞིན་དུ་གཟིགས་
ཤིང་། ཇི་ལྟར་བྱིས་པ་སོ་སོའི་སྐྱེ་བོས་མཐོང་བ་དེ་ལྟར་དེ་བཞིན་གཤེགས་པས་ཁམས་གསུམ་པ་གཟིགས་པ་མ་ཡིན་པའི་ཕྱིར་རོ། །དེ་བཞིན་གཤེགས་པ་ནི་གནས་འདི་ལ་མངོན་སུམ་གྱི་ཆོས་དང་ལྡན་དེ་བསྙེལ་བ་མི་
མངའ་བའི་ཆོས་ཅན་ནོ། །དེ་ལ་དེ་བཞིན་གཤེགས་པས་གང་ཅི་གསུངས་པ་དེ་དག་ཐམས་ཅད་བདེན་ཏེ་མི་བརྫུན་ནོ། །ཡང་སེམས་ཅན་སྤྱོད་པ་ཐ་དད་པ་དང་བསམ་པ་ཐ་དད་པ་དང་འདུ་ཤེས་དང་རྣམ་པར་རྟོག་པ་སྤྱོད་
པ་རྣམས་ཀྱི་དགེ་བའི་རྩ་བ་བསྐྱེད་པའི་ཕྱིར། ཆོས་ཀྱི་རྣམ་གྲངས་རྣམ་པ་མང་པོ་དམིགས་པ་རྣམ་པ་མང་པོས་བཤད་དོ། །རིགས་ཀྱི་བུ་དག་དེ་བཞིན་གཤེགས་པས་མཛད་པ་གང་ཡིན་པ་དེ་ནི་དེ་བཞིན་གཤེགས་
པ་མཛད་དོ། །ཡུན་རིང་པོ་དེ་སྲིད་ནས་མངོན་པར་རྫོགས་པར་སངས་རྒྱས་ཏེ། དེ་བཞིན་གཤེགས་པའི་ཚེའི་ཚད་ནི་དཔག་ཏུ་མེད་དོ། །དེ་བཞིན་གཤེགས་པ་ནི་ཡོངས་སུ་མྱ་ངན་ལས་མི་འདའ་སྟེ་རྟག་ཏུ་བཞུག་
མོད་ཀྱི། འདུལ་བའི་དབང་གིས་ཡོངས་སུ་མྱ་ངན་ལས་འདས་པའང་སྟོན་ཏོ། །རིགས་ཀྱི་བུ་དག་ངས་ད་དུང་ཡང་སྔོན་གྱི་བྱང་ཆུབ་སེམས་དཔའི་སྤྱོད་པ་ཡོངས་སུ་རྫོགས་པར་བྱས་པའི་ཚེའི་ཚད་ཏུ་ཡང་མ་ཕྱིན་ཏེ། 
རིགས་ཀྱི་བུ་དག་ངས་ད་དུང་ཡང་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དེ་ཉིས་གྱུར་གྱིས་ངའི་ཚེའི་ཚད་ཚང་བར་འགྱུར་རོ། །རིགས་ཀྱི་བུ་དག་ངས་འདི་ལྟར་ཡོངས་སུ་མྱ་ངན་ལས་ནི་མི་འདའ་མོད་ཀྱི་ཡོངས་སུ་མྱ་ངན་
ལས་འདའ་བར་སྨྲས་སོ། །དེ་ཅིའི་ཕྱིར་ཞེ་ན། རིགས་ཀྱི་བུ་དག་ངས་རྣམ་གྲངས་འདིས་སེམས་ཅན་རྣམས་ཡོངས་སུ་སྨིན་པར་བྱ་བའི་ཕྱིར་ཏེ། ང་ཡོངས་སུ་མྱ་ངན་ལས་མི་འདའ་བར་ཧ་ཅང་ཡང་ཡུན་རིང་དུ་འདུག་

46-1-132b

ཅིང་རྒྱུན་དུ་མཐོང་ན་སེམས་ཅན་དགེ་བའི་རྩ་བ་མ་བྱས་པ། བསོད་ནམས་དང་བྲལ་བ་དབུལ་པོར་གྱུར་པ་འདོད་པ་ལ་བརྐམ་པ། ལྡོངས་པ། ལྟ་བ་མང་པོའི་དྲ་བས་ཁེབས་པ་རྣམས་དེ་བཞིན་གཤེགས་པ་བཞུགས་སོ་སྙམ་
སྟེ། སླབས་པར་འཛིན་པའི་འདུ་ཤེས་ཅན་དུ་འགྱུར་ཞིང་རྙེད་དཀའ་བའི་འདུ་ཤེས་མི་སྐྱེད་དེ། དེ་བཞིན་གཤེགས་པ་བདག་ཅག་དང་ཉེའོ་ཞེས་ཁམས་གསུམ་ནས་འབྱུང་བའི་ཕྱིར་བརྩོན་འགྲུས་མི་བརྩོམ་ཞིང་། དེ་བཞིན་
གཤེགས་པ་དཀོན་པར་འདུ་ཤེས་མི་སྐྱེད་པར་འགྱུར་རོ་སྙམ་སྟེ། རིགས་ཀྱི་བུ་དག་དེའི་ཕྱིར་དེ་བཞིན་གཤེགས་པ་ཐབས་མཁས་པས། དགེ་སློང་དག་དེ་བཞིན་གཤེགས་པ་དག་འབྱུང་བ་ནི་ཤིན་དུ་རྙེད་པར་དཀའོ་ཞེས་
ཚིག་དེ་སྐད་གསུང་ངོ་། །དེ་ཅིའི་ཕྱིར་ཞེ་ན། འདི་ལྟར་སེམས་ཅན་དེ་དག་གིས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོས། དེ་བཞིན་གཤེགས་པ་མཐོང་བར་འགྱུར་ཡང་སྲིད་མི་འགྱུར་ཡང་སྲིད་དེ། རིགས་ཀྱི་བུ་དག་
དེའི་ཕྱིར་ངས་དེ་དག་ལ་དམིགས་པ་བྱས་ཏེ། དགེ་སློང་དག་དེ་བཞིན་གཤེགས་པ་རྣམས་འབྱུང་བ་ནི། རྙེད་པར་དཀའོ་ཞེས་སྨྲས་པས། དེ་དག་གིས་དེ་བཞིན་གཤེགས་པ་དག་འབྱུང་བ་རབ་ཏུ་རྙེད་པར་དཀའ་བར་
རིག་ནས་ངོ་མཚར་དུ་འདུ་ཤེས་སྐྱེད་པར་འགྱུར། མྱ་ངན་གྱི་འདུ་ཤེས་སྐྱེད་པར་འགྱུར་རོ། །དེ་བཞིན་གཤེགས་པ་མི་མཐོང་ན་ཡང་། དེ་བཞིན་གཤེགས་པ་ལ་ལྟ་བས་སྐོམ་པར་འགྱུར་རོ། །དེ་དག་གི་དེ་
བཞིན་གཤེགས་པ་ལ་དམིགས་པ་ཡིད་ལ་བྱེད་པའི་དགེ་བའི་རྩ་བ་དེ་དག་ཡུན་རིང་པོའི་དོན་དང་ཕན་པ་དང་བདེ་བར་གྱུར་པའི་དོན་དུ་རིག་ནས། དེ་བཞིན་གཤེགས་པ་ཡོངས་སུ་མྱ་ངན་ལས་མི་འདའ་མོད་ཀྱི་སེམས་
ཅན་རྣམས་འདུལ་བའི་དབང་གིས་ཡོངས་སུ་མྱ་ངན་ལས་འདའ་བར་གསུངས་སོ། །རིགས་ཀྱི་བུ་དག་གང་འདི་སྐད་ཏུ་གསུང་བ་དེ་ནི་དེ་བཞིན་གཤེགས་པའི་ཆོས་ཀྱི་རྣམ་གྲངས་ཏེ། དེ་ལ་དེ་བཞིན་གཤེགས་པ་

46-1-133a

བརྫུན་དུ་སྨྲ་བ་མེད་དོ། །རིགས་ཀྱི་བུ་དག་འདི་ལྟ་སྟེ་དཔེར་ན། སྐྱེས་བུ་སྨན་པ་ནད་ཐམས་ཅད་རབ་ཏུ་ཞི་བར་བྱ་བ་ལ་མཁས་པ་གསལ་བ་ཡིད་གཞུངས་པ་ཤིན་དུ་བྱུང་བ་འགའ་ཞིག་ཡོད་ལ། སྐྱེས་བུ་དེ་ལ་ཡང་
བུ་མང་པོ་བཅུ་འམ་ཉི་ཤུ་འམ་སུམ་བཅུ་འམ་བཞི་བཅུ་འམ་ལྔ་བཅུ་འམ་བརྒྱ་འམ་སྟོང་ཡོད་པར་གྱུར་ལ། སྨན་པ་དེ་ལོགས་ཤིག་ཏུ་སོང་སྟེ་དེའི་བུ་དེ་དག་ཐམས་ཅད་དབྱིག་དུག་འཐུངས་སམ་མདའ་དུག་འཐུངས་ནས། 
དེ་རྣམས་དབྱིག་དུག་དང་མདའ་དུག་དེ་དག་གིས་སྡུག་བསྔལ་གྱི་ཚོར་བ་དེ་དག་གིས་ཉོན་མོངས་ཤིང་གདུངས་ཏེ་ས་ལ་འགྲེ་ལྡོག་ལ། དེ་ནས་དེ་དག་གི་ཕ་སྨན་པ་ལོགས་ཤིག་ནས་འོངས་ནས། བུ་དེ་རྣམས་དབྱིག་དུག་
གམ་མདའ་དུག་དེའི་སྡུག་བསྔལ་གྱིས་ཉམས་ཐག་སྟེ། ཁ་ཅིག་ནི་འདུ་ཤེས་ལོག་པར་གྱུར། ཁ་ཅིག་ནི་འདུ་ཤེས་མ་ལོག་སྟེ་དེ་དག་ཐམས་ཅད་སྡུག་བསྔལ་དེ་ཉིད་ཀྱིས་ཉམ་ཐག་ལ་ཕ་དེ་མཐོང་ནས་
མངོན་པར་དགའ་སྟེ། དེ་ལ་འདི་སྐད་ཅེས་ཡབ་བདེ་ཞིང་གནོད་པ་མི་མངའ་སྟེ་ལེགས་པར་བྱོན་ཏམ། བདག་ཅག་གི་ལུས་འཇིག་པར་བྱེད་པ་དབྱིག་དུག་གམ་མདའ་དུག་འདི་ལས་ཡོངས་སུ་དགྲོལ་བར་གསོལ་
ཡབ་ཀྱིས་བདག་ཅག་ལ་སྲོག་སྩལ་དུ་གསོལ་ཞེས་སྨྲས་པ་དང་། དེ་ནས་སྨན་པ་དེས་བུ་དེ་དག་སྡུག་བསྔལ་གྱིས་ཉམས་ཐག་སྟེ། ན་བས་ཉོན་མོངས་ཤིང་གདུངས་ཏེ་ས་ལ་འགྲེ་ལྡོག་པ་མཐོང་ནས། དེས་སྨན་
ཆེན་པོ་ཁ་དོག་དང་ལྡན་པ་དྲི་དང་ལྡན་པ་རོ་དང་ལྡན་པ་བསྡུས་ནས་རྡོ་ལ་བཏགས་ཏེ། བུ་དེ་དག་འཐུང་དུ་བཅུག་ནས་འདི་སྐད་ཅེས་བུ་ཁྱོད་རྣམས་སྨན་ཆེན་པོ་ཁ་དོག་དང་ལྡན་པ་དྲི་དང་ལྡན་པ་རོ་དང་ལྡན་པ་འདི་འཐུང་ཅིག་
རིགས་ཀྱི་བུ་དག་ཁྱེད་སྨན་བཟང་པོ་འདི་འཐུངས་ན། མྱུར་དུ་དབྱིག་དུག་གམ་མདའ་དུག་ལས་ཐར་ཏེ། བདེ་ཞིང་ནད་མེད་པར་འགྱུར་རོ་ཞེས་སྨྲས་ན། དེ་ནས་སྨན་པ་དེའི་བུ་གང་དག་འདུ་ཤེས་མ་ལོག་པ་དེ་དག་ནི་སྨན་

46-1-133b

དེའི་ཁ་དོག་མཐོང་དྲི་སྣམས་རོ་མྱངས་ནས་མྱུར་དུ་འཐུངས་པ་དང་། དེ་དག་ནད་ཐམས་ཅད་ལས་ཐམས་ཅད་ཀྱི་ཐམས་ཅད་དུ་ཐར་བར་གྱུར་ཏོ། །དེའི་བུ་གང་དག་འདུ་ཤེས་ལོག་པར་གྱུར་པ་དེ་དག་གིས་ཕ་དེ་ལ་མངོན་
པར་བསྟོད་དེ། འདི་སྐད་ཏུ་ཡབ་བདེ་ཞིང་གནོད་པ་མི་མངའ་སྟེ་ལེགས་པར་བྱོན་ཏམ། བདག་ཅག་གསོར་གསོལ་ཞེས་ཚིག་དེ་སྐད་སྨྲས་སྟེ་སྨན་བྱིན་པ་དེ་མི་འཐུང་ངོ་། །དེ་ཅིའི་ཕྱིར་ཞེ་ན། འདི་ལྟར་དེ་དག་འདུ་ཤེས་ལོག་
པར་གྱུར་པ་དེས་སྨན་དེའི་ཁ་དོག་ཀྱང་མི་འདོད་དྲི་ཡང་མི་འདོད་རོ་ཡང་མི་འདོད་དོ། །དེ་ནས་སྐྱེས་བུ་སྨན་པ་དེས་འདི་སྙམ་དུ་བསམས་ཏེ། བདག་གི་བུ་འདི་དག་དབྱིག་དུག་གམ་མདའ་དུག་དེས་འདུ་ཤེས་ལོག་པར་གྱུར་པས་
སྨན་འདི་ཡང་འཐུང་དུ་མ་རུང་སྟེ་ང་ལ་ནི་མངོན་པར་བསྟོད་ན། བདག་གིས་བུ་འདི་དག་ལ་ཐབས་མཁས་པས་སྨན་འདི་གླུད་སྙམ་མོ། །དེ་ནས་སྨན་པ་དེ་བུ་དེ་དག་ལ་ཐབས་མཁས་པས་སྨན་གླུད་པར་འདོད་ནས་
འདི་སྐད་ཅེས་རིགས་ཀྱི་བུ་དག་ང་ནི་རྒས་འཁོགས་གཏུགས་ཏེ། ངའི་འཆི་བའི་དུས་ཉེ་བར་གནས་ཀྱིས་བུ་ཁྱེད་རྣམས་མྱ་ངན་མ་བྱེད་ཅིག །མི་བདེ་བར་མ་གྱུར་ཅིག །སྨན་ཆེན་པོ་བྱིན་པ་འདི་ཁྱེད་འདོད་ན་
སྨན་འདི་འཐུང་ཅིག་ཅེས་སྨྲས་ཏེ། བུ་དེ་དག་ལ་ཐབས་མཁས་པས་དེ་སྐད་བསྒོ་ནས། ཡུལ་གཞན་དུ་སོང་སྟེ་ཕྱིན་ནས་བདག་ཤིའོ་ཞེས་བུ་ནད་པ་དེ་དག་ཐོས་པར་བྱས་པ་དང་། དེ་དག་དེའི་ཚེ་ཤིན་དུ་མྱ་ངན་དུ་
གྱུར། ཤིན་དུ་སྨྲེ་སྔགས་འདོན་པར་གྱུར་ཏེ། བདག་ཅག་གི་ཕ་མགོན་པོ་སྐྱེད་པ། རྗེས་སུ་སྙིང་བརྩེ་བ་གཅིག་པུ་དེ་ཡང་ཤི་བས། དེའི་ཕྱིར་ད་བདག་ཅག་མགོན་མེད་པར་གྱུར་ཏོ་སྙམ་མོ། །དེ་དག་བདག་ཉིད་
མགོན་མེད་པར་མཐོང་བདག་ཉིད་སྐྱབས་མེད་པར་མཐོང་ནས་ཕྱིར་ཞིང་མྱ་ངན་བྱེད་པས་གཟིར་བར་གྱུར་ཏེ། དེ་དག་ཕྱིར་ཞིང་མྱ་ངན་བྱེད་པས་གཟིར་བ་དེས་འདུ་ཤེས་ལོག་པ་འདུ་ཤེས་མ་ལོག་པར་གྱུར་ཏེ། 

46-1-134a

སྨན་གང་ཁ་དོག་དང་དྲི་དང་རོར་ལྡན་པ་དེ་ཡང་ཁ་དོག་དང་དྲི་དང་རོར་ལྡན་པར་ཤེས་ནས་དེ་ནས་དེའི་ཚེ་དེ་འཐུངས་སོ། །དེ་འཐུངས་ནས་ནད་དེ་ལས་ཐར་བར་གྱུར་ཏོ། །དེ་ནས་སྨན་པ་དེས་བུ་དེ་དག་ནད་སོས་
པར་རིག་ནས་སླར་བདག་ཉིད་བསྟན་ན། རིགས་ཀྱི་བུ་དག་འདི་ཇི་སྙམ་དུ་སེམས། སྨན་པ་ཐབས་མཁས་པ་བྱེད་པ་དེ་ལ་ལ་ལ་དག་དེ་བརྫུན་དུ་སྨྲའོ་ཞེས་ཟེར་རམ། གསོལ་པ་བཅོམ་ལྡན་འདས་དེ་ནི་མ་ལགས་
སོ། །བདེ་བར་གཤེགས་པ་དེ་ནི་མ་ལགས་སོ། །བཀའ་སྩལ་པ། རིགས་ཀྱི་བུ་དག་དེ་བཞིན་དུ་ང་ཡང་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་དཔག་ཏུ་མེད་པ་ནས། བླ་ན་མེད་པ་ཡང་དག་པར་རྫོགས་པའི་
བྱང་ཆུབ་འདི་མངོན་པར་རྫོགས་པར་སངས་རྒྱས་མོད་ཀྱི། ངས་སྐབས་སྐབས་སུ་ཐབས་མཁས་པ་འདི་ལྟ་བུ་དག་སེམས་ཅན་རྣམས་གདུལ་བའི་ཕྱིར་བསྟན་ཏེ། གནས་དེར་ང་ལ་བརྫུན་དུ་སྨྲ་བར་འགྱུར་བ་གང་ཡང་མེད་དོ། །དེ་
ནས་བཅོམ་ལྡན་འདས་དོན་གྱི་རྣམ་པ་འདི་ཉིད་རྒྱས་པར་སྟོན་ཅིང་། དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བསྐལ་པ་བྱེ་སྟོང་བསམ་གྱིས་མི་ཁྱབ་པ། དེ་ཡི་ཚད་ནི་ནམ་ཡང་མེད་པ་ནས། །བྱང་ཆུབ་མཆོག་རབ་འདི་ནི་
ངས་ཐོབ་སྟེ། །ང་ནི་རྟག་ཏུ་ཆོས་ཀྱང་རབ་འཆད་དོ། །བྱང་ཆུབ་སེམས་དཔའ་མང་འདི་ཡང་དག་གཟུང་། །སངས་རྒྱས་ཡེ་ཤེས་ལ་ནི་དེ་དག་དགོད། །སེམས་ཅན་བྱེ་བ་ཁྲག་ཁྲིག་མཐའ་ཡས་པ། །བསྐལ་པ་བྱེ་བ་མང་པོར་སྨིན་པར་བྱ། 
མྱ་ངན་འདས་པའི་ས་ཡང་བསྟན་བྱ་སྟེ། །སེམས་ཅན་རྣམ་པར་གདུལ་ཕྱིར་ཐབས་བརྗོད་དོ། །དེ་ཚེ་ང་ནི་མྱ་ངན་མི་འདའ་སྟེ། །འདི་ཉིད་ན་ནི་ཆོས་རྣམས་རབ་སྟོན་ཏོ། །དེ་ན་ང་བདག་ཉིད་ཀྱང་བྱིན་གྱིས་བརླབ། །ང་ཡིས་སེམས་ཅན་ཀུན་
ཀྱང་བྱིན་གྱིས་བརླབ། །ལོག་པའི་བློ་ལྡན་བླུན་པོའི་མི་རྣམས་ཀྱིས། །འདི་ན་ང་འདུག་པ་ཡང་མི་མཐོང་ངོ་། །ང་ལུས་ཡོངས་སུ་མྱ་ངན་འདས་མཐོང་ནས། །རིང་བསྲེལ་རྣམས་ལ་མཆོད་པ་རྣམ་མང་བྱེད། །ང་མ་མཐོང་བས་དེ་དག་

46-1-134b

སྲེད་པ་སྐྱེད། །དེ་ནས་དེ་དག་སེམས་ཀྱང་དྲང་པོར་འགྱུར། །ནམ་ཞིག་དེ་དག་འཇམ་ཞིང་མཉེན་དྲང་སྟེ། །སེམས་ཅན་ལུས་ཀྱང་བཏང་བར་གྱུར་པ་ན། །དེ་ན་ང་ནི་ཉན་ཐོས་དགེ་འདུན་བྱས། །བྱ་རྒོད་ཕུང་པོར་ང་ཉིད་དེར་བསྟན་ཏེ། །དེ་ལ་
ང་ཡིས་ཕྱིས་ནི་འདི་སྐད་སྨྲས། །འདི་ཉིད་ན་སྟེ་མྱ་ངན་ང་མ་འདས། །དགེ་སློང་གང་དག་དེ་ནི་ང་ཐབས་མཁས། །ཡང་ཡང་ང་འབྱུང་འཚོ་བའི་འཇིག་རྟེན་དུ། །སེམས་ཅན་གཞན་གྱི་ང་ནི་མདུན་དུ་བྱས། །དེ་ལ་བྱང་ཆུབ་མཆོག་
འདི་རབ་ཏུ་བཤད། །འཇིག་མགོན་མྱ་ངན་མ་འདས་མ་རྟོགས་པར། །ཁྱོད་ཀྱིས་ང་ཡི་སྒྲ་ཡང་མི་ཐོས་སོ། །སེམས་ཅན་རྣམ་པར་འཇིག་པར་ངས་མཐོང་ཡང་། །ངས་ནི་བདག་གི་ལུས་ཉིད་མ་བསྟན་ཏེ། །རེ་ཤིག་ང་
མཐོང་བར་ནི་འདོད་བྱོས་ལ། །སྐོམ་པར་གྱུར་ནས་དམ་པའི་ཆོས་བཤད་དོ། །རྟག་ཏུ་ང་ཡི་བྱིན་བརླབས་དེ་འདྲ་སྟེ། །བསྐལ་པ་བསམ་ཡས་བྱེ་བ་སྟོང་དུ་ནི། །བྱ་རྒོད་ཕུང་པོ་འདི་ལས་མི་འཕོ་ཡང་། །གུད་ན་བྱེ་བ་སྙེད་ཀྱི་
མལ་ཆ་ཡོད། །གང་ཚེ་འཇིག་རྟེན་ཁམས་འདི་སེམས་ཅན་གྱིས། །བསྐལ་པས་སྲེག་པར་མཐོང་ཞིང་རྟོག་པ་ན། །དེ་ཚེ་ང་ཡི་སངས་རྒྱས་ཞིང་འདི་ནི། །ལྷ་དང་མི་ཡིས་ཡོངས་སུ་གང་བར་འགྱུར། །དེ་དག་རྩེ་ཞིང་དགའ་
བ་སྣ་ཚོགས་ལྡན། །བསྐྱེད་མོས་ཁང་བཟངས་གཞལ་མེད་བྱེ་བ་ཡོད། །རིན་ཆེན་རི་བོ་རྣམས་དང་དེ་བཞིན་དུ། །མེ་ཏོག་འབྲས་ལྡན་ཤིང་ལྗོན་རྣམས་ཀྱིས་བརྒྱན། །སྟེང་ནས་ལྷ་རྣམས་རྔ་ཆེན་རབ་ཏུ་རྡུང་། །
མན་དཱ་ར་ཡི་ཆར་ཡང་ཤིན་དུ་འབབས། །མཁས་པ་གཞན་གང་བྱང་ཆུབ་འདིར་ཞུགས་དང་། །ང་དང་ཉན་ཐོས་རྣམས་ལ་མངོན་པར་འཐོར། །ང་ཡི་ཞིང་འདི་དེ་ལྟར་རྟག་གནས་ཀྱང་། །གཞན་དག་འདི་ལ་བསྐལ་པས་
སྲེག་པར་རྟོག །མྱ་ངན་བརྒྱ་ཡིས་གང་ཞིག་གཙེས་པ་དང་། །འཇིག་རྟེན་ཁམས་ནི་ཤིན་དུ་འཇིག་པར་མཐོང་། །ལོ་མང་བྱེ་བར་དེ་བཞིན་གཤེགས་རྣམ་དང་། །ཆོས་དང་ང་ཡི་དགེ་འདུན་ཚོགས་རྣམས་ཀྱི། །མིང་ནི་ནམ་ཡང་

46-1-135a

ཐོས་པར་མི་འགྱུར་ཏེ། །སྡིག་པའི་ལས་ཀྱི་འབྲས་བུ་དེ་འདྲའོ། །ནམ་ཞིག་སེམས་ཅན་འཇམ་ཞིང་མཉན་པ་རྣམས། །མི་ཡི་འཇིག་རྟེན་འདིར་ནི་སྐྱེས་གྱུར་ཏེ། །དགེ་བའི་ལས་ཀྱིས་དེ་ལྟར་སྐྱེས་མ་
ཐག །ང་ནི་ཆོས་རྣམས་རབ་ཏུ་འཆད་པར་མཐོང་། །དེ་དག་ལ་ནི་ནམ་ཡང་ང་མི་འཆད། །བྱ་བ་འདི་འདྲ་མཐའ་ཡས་འདི་དག་སྟེ། །དེ་ཡིས་ཡུན་རིང་ནས་ནི་ང་མཐོང་ངོ་། །དེ་ལ་རྒྱལ་བ་ཤིན་དུ་རྙེད་དཀར་བཤད། །ང་
ཡི་ཡེ་ཤེས་སྟོབས་ནི་འདི་འདྲ་སྟེ། །དེ་ནི་ཤིན་དུ་འོད་གསལ་མཐའ་ཡོང་མེད། ། ང་ཡི་ཚེ་རིང་བསྐལ་པ་མཐའ་ཡས་ཏེ། །དེ་ནི་སྔོན་གྱི་སྤྱོད་པ་སྤྱད་པས་བསྒྲུབས། །མཁས་རྣམས་འདི་ལ་སོམ་ཉི་མ་བྱེད་
པར། །ཐེ་ཚོམ་ཟ་བ་རྣམས་ནི་མ་ལུས་སྤོངས། །ངས་ནི་ཚིག་དེ་ཡང་དག་རབ་སྨྲས་ཏེ། །བརྫུན་གྱི་ཚིག་ནི་ང་ལས་གཞར་མི་འབྱུང་། །དཔེར་ན་ཐབས་བསླབས་པ་ཡི་སྨན་པ་དེས། །འདུ་ཤེས་ལོག་པར་
གྱུར་པའི་བུ་རྣམས་ཕྱིར། །བདག་ཉིད་མ་ཤི་བཞིན་དུ་ཤི་ཞེས་བརྗོད། །དེ་བརྫུན་མི་སྨྲ་སྙམ་དུ་མཁས་པས་རིག །དེ་བཞིན་ང་ཡང་རང་འབྱུང་འཇིག་རྟེན་ཕ། །སྐྱེ་དགུ་ཀུན་གྱི་གསོ་བྱེད་མགོན་པོ་སྟེ། །བུས་པ་གཏི་
མུག་ལོག་པར་རྣམ་རིག་ནས། །མྱ་ངན་མ་འདས་མྱ་ངན་འདའ་བར་བསྟན། །ཅི་ཕྱིར་ཞེ་ན་རྟག་པར་ང་མཐོང་ན། །མི་ཤེས་མ་རིག་པ་རྣམས་ལེ་ལོར་འགྱུར། །འདོད་པ་ལ་ཡང་བག་མེད་ཡིད་རྟོན་ཏེ། །བག་མེད་རྒྱུ་ཡིས་
ངན་འགྲོ་རབ་ཏུ་ལྟུང་། །སྤྱོད་དང་སྤྱོད་པ་རིག་ནས་རྟག་པར་ཡང་། །ཅི་ནས་བྱང་ཆུབ་ལ་ནི་དགོད་པ་དང་། །ཅི་ནས་སངས་རྒྱས་ཆོས་རྣམས་ཐོབ་བྱའི་ཕྱིར། །སེམས་ཅན་རྣམས་ལ་ང་ནི་དེ་བཞིན་སྨྲ། །དམ་པའི་ཆོས་པད་མ་
དཀར་པོ་ལས་དེ་བཞིན་གཤེགས་པའི་སྐུ་ཚེའི་ཚད་ཀྱི་ལེའུ་ཞེས་བྱ་སྟེ་བཅྭོ་ལྔ་པའོ།། །། དེ་བཞིན་གཤེགས་པའི་སྐུ་ཚེའི་ཚད་བསྟན་པ་བཤད་པ་ན། སེམས་ཅན་གྲངས་མེད་དཔག་ཏུ་མེད་པ་རྣམས་ཀྱི་དོན་

46-1-135b

བྱས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་བཀའ་སྩལ་པ། མ་ཕམ་པ་དེ་བཞིན་གཤེགས་པའི་ཚེའི་ཚད་བསྟན་པའི་ཆོས་ཀྱི་རྣམ་གྲངས་འདི་
བཤད་པ་ན། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་དྲུག་བཅུ་རྩ་བརྒྱད་ཀྱི་བྱེ་མ་སྙེད་དག་མི་སྐྱེ་བའི་ཆོས་ལ་བཟོད་པ་སྐྱེས་སོ། །དེ་སྟོང་དུ་བསྒྲེས་པའི་བྱང་ཆུབ་སེམས་དཔའ་སེམས་
དཔའ་ཆེན་པོ་དག་གིས་གཟུངས་ཐོབ་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ཡང་སྟོང་གི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་ཆོས་ཀྱི་རྣམ་གྲངས་འདི་ཐོས་ནས། ཐོགས་པ་
མེད་པའི་སྤོབས་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ཡང་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་བྱེ་བ་བརྒྱ་སྟོང་དུ་ཡོངས་སུ་བསྒྱུར་བའི་གཟུངས་ཐོབ་པར་གྱུར་ཏོ། །བྱང་ཆུབ་སེམས་
དཔའ་སེམས་དཔའ་ཆེན་པོ་གཞན་ཡང་སྟོང་གི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས། ཆོས་ཀྱི་རྣམ་གྲངས་འདི་ཐོས་ནས་ཕྱིར་མི་ལྡོག་པའི་འཁོར་ལོ་བསྐོར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ཡང་སྟོང་བར་མའི་
འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་ཆོས་ཀྱི་རྣམ་གྲངས་འདི་ཐོས་ནས། དྲི་མ་མེད་པའི་སྣང་བ་ཞེས་བྱ་བའི་ཆོས་ཀྱི་འཁོར་ལོ་བསྐོར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ཡང་སྟོང་ཆུང་ངུའི་འཇིག་རྟེན་གྱི་ཁམས་
ཀྱི་རྡུལ་ཕྲ་རབ་ཀྱི་རྡུལ་སྙེད་དགིས་ཆོས་ཀྱི་རྣམ་གྲངས་འདི་ཐོས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེ་བ་བརྒྱད་ཀྱིས་ཐོགས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ཡང་གླིང་བཞི་པ་བཞིའི་འཇིག་རྟེན་གྱི་
ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་ཆོས་ཀྱི་རྣམ་གྲངས་འདི་ཐོས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེ་བ་བཞིས་ཐོགས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ཡང་གླིང་བཞི་པ་གསུམ་གྱི་

46-1-136a

འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་ཆོས་ཀྱི་རྣམ་གྲངས་འདི་ཐོས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེ་བ་གསུམ་གྱིས་ཐོགས་པར་གྱུར་ཏོ། །བྱང་ཆུབ་སེམས་དཔའ་
སེམས་དཔའ་ཆེན་པོ་གཞན་ཡང་གླིང་བཞི་པ་གཉིས་ཀྱི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་ཆོས་ཀྱི་རྣམ་གྲངས་འདི་ཐོས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེ་བ་གཉིས་ཀྱིས་ཐོགས་པར་གྱུར་ཏོ། །
བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ཡང་། གླིང་བཞི་པ་གཅིག་གི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་ཆོས་ཀྱི་རྣམ་གྲངས་འདི་ཐོས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
སྐྱེ་བ་གཅིག་གིས་ཐོགས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བརྒྱད་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་ཆོས་ཀྱི་རྣམ་གྲངས་འདི་ཐོས་ནས། 
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་ཆོས་མངོན་པར་རྟོགས་པའི་གནས་བསྟན་མ་ཐག་ཏུ། དེའི་མོད་ལ་
སྟེང་གི་ནམ་མཁའ་བར་སྣང་ལས། མེ་ཏོག་མན་དཱ་ར་དང་མན་དཱ་ར་ཆེན་པོའི་མེ་ཏོག་གི་ཆར་ཆེན་པོ་མངོན་པར་བབ་སྟེ། འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་དེ་དག་ན། སངས་རྒྱས་བྱེ་བ་ཁྲག་ཁྲིག་བརྒྱ་
སྟོང་རིན་པོ་ཆེའི་ཤིང་ལྗོན་པའི་དྲུང་དག་ན་སེང་གེའི་ཁྲི་ལ་བཞུགས་པ་དེ་དག་ཐམས་ཅད་ལ་འཐོར་མངོན་པར་རབ་ཏུ་འཐོར་རོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
ཤཱཀྱ་ཐུབ་པ་དང་། ཡོངས་སུ་མྱ་ངན་ལས་འདས་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་སེང་གེའི་ཁྲི་ལ་བཞུགས་པ་ལ་ཡང་འཐོར་མངོན་པར་རབ་ཏུ་འཐོར་རོ། །

46-1-136b

ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེ་དང་། འཁོར་བཞི་པོ་དེ་དག་ལ་ཡང་འཐོར་མངོན་པར་རབ་ཏུ་འཐོར་རོ། །བར་སྣང་ལས་ལྷའི་ཙན་དན་དང་ཨ་ག་རུའི་ཕྱེ་མ་ཡང་རབ་ཏུ་བབ་བོ། །སྟེང་གི་ནམ་མཁའི་
བར་སྣང་ལས་རྔ་དག་ཀྱང་མ་བརྡུངས་པར་ཡིད་ཏུ་འོང་བ་སྙན་ཅིང་འཇམ་པའི་སྒྲ་འབྱིན་ཏོ། །སྟེང་ནས་ལྷའི་རས་བཅོས་བུ་ཟུང་བརྒྱ་སྟོང་དག་ཀྱང་ལྟུང་ངོ་། །སྟེང་གི་ནམ་མཁའ་བར་སྣང་ལས་རྒྱན་ཕྲེང་དང་སེ་མོ་དོ་དང་མུ་
ཏིག་གི་ཕྲེང་བ་དང་ནོར་བུ་རིན་པོ་ཆེ་དང་ནོར་བུ་རིན་པོ་ཆེ་ཆེན་པོ་དག་ཀྱང་ཕྱོགས་ཐམས་ཅད་ཀུན་ནས་རབ་ཏུ་འཕྱང་ངོ་། །རིན་ཐང་མེད་པའི་བདུག་པའི་པོག་ཕོར་རིན་པོ་ཆེ་ལས་བྱས་པ་བརྒྱ་སྟོང་དག་ཀྱང་ཀུན་ནས་རང་རྒྱུའོ། །
དེ་བཞིན་གཤེགས་པ་རེ་རེ་ལ་ཡང་རིན་པོ་ཆེའི་གདུགས་ཀྱི་ཕྲེང་བ་ཚངས་པའི་འཇིག་རྟེན་ལ་ཐུག་པ། སྟེང་གི་ནམ་མཁའ་བར་སྣང་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འཛིན་ཏོ། །རྣམ་གྲངས་འདིས་
སངས་རྒྱས་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་དེ་དག་ཐམས་ཅད་ལ་ཡང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་རིན་པོ་ཆེའི་གདུགས་ཀྱི་ཕྲེང་བ་ཚངས་པའི་འཇིག་རྟེན་ལ་ཐུག་པ་སྟེང་གི་ནམ་
མཁའ་བར་སྣང་ལ་འཛིན་ཏོ། །སོ་སོ་ནས་ཚིགས་སུ་བཅད་པ་མངོན་པར་བསྒྲུབ་པ་ཡང་དག་པར་སངས་རྒྱས་ལ་བསྟོད་པ་དག་གིས་ཀྱང་དེ་བཞིན་གཤེགས་པ་དེ་དག་ལ་མངོན་པར་བསྟོད་དོ། །དེ་ནས་བྱང་ཆུབ་སེམས་
དཔའ་སེམས་དཔའ་ཆེན་པོ་བྱམས་པས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །བདེ་བར་གཤེགས་པས་ངོ་མཚར་ཆོས་བསྒྲགས་པ། །འདྲེན་པ་རྣམས་ཀྱི་མཐུ་ཆེན་ཅི་འདྲ་དང་། །ཇི་ལྟར་སྐུ་ཚེའི་ཚད་
ཀྱང་མཐའ་ཡས་པ། །བདག་ཅག་རྣམས་ཀྱིས་འདི་སྔོན་ཡོང་མ་ཐོས། །བདེ་བར་གཤེགས་པས་མངོན་དུ་རྣམ་ཕྱེ་བ། །འདི་འདྲའི་ཆོས་དེ་དེ་རིང་ཐོས་པས་ན། །སྲོག་ཆགས་བྱེ་བ་སྟོང་རྣམས་དགའ་བས་ཁྱབ། །

46-1-137a

འཇིག་རྟེན་རྣམ་པར་འདྲེན་གྱི་ཐུགས་སྲས་ནི། །ཁ་ཅིག་མི་ལྡོག་བྱང་ཆུབ་མཆོག་ལ་འཁོད། །ཁ་ཅིག་གཟུངས་རྣམས་ཀྱི་ནི་མཆོག་ལ་གནས། །ཁ་ཅིག་སྤོབས་པ་ཐོགས་པ་མེད་ལ་འཁོད། །ཁ་ཅིག་བྱེ་བ་
སྟོང་གི་གཟུངས་ལ་གནས། །དེ་བཞིན་གཞན་ཡང་ཞིང་རྡུལ་ཕྲ་རབ་རྙེད། །དེ་དག་སངས་རྒྱས་ཡེ་ཤེས་མཆོག་ལ་གནས། །དེ་བཞིན་ཁ་ཅིག་སྐྱེ་བ་བརྒྱད་ཀྱིས་ན། །མཐའ་ཡས་གཟིགས་པ་རྒྱལ་བ་རྣམས་སུ་འགྱུར། །
རྣམ་པར་འདྲེན་པའི་ཆོས་འདི་ཐོས་ནས་སུ། །ཁ་ཅིག་སྐྱེ་བ་བཞི་ལས་རབ་ཏུ་འདས། །གཞན་དག་ཁ་ཅིག་གསུམ་དང་གཉིས་ཀྱིས་ན། །དོན་དམ་གཟིགས་པ་བྱང་ཆུབ་ཐོབ་པར་འགྱུར། །ཁ་ཅིག་དེ་ན་སྐྱེ་བ་གཅིག་གནས་ནས། །
སྲིད་པ་གཞན་ལ་ཐམས་ཅད་མཁྱེན་དུ་འགྱུར། །འདྲེན་པའི་སྐུ་ཚེའི་ཚད་འདི་ཐོས་པས་ན། །འབྲས་བུ་ཟག་མེད་དེ་འདྲ་རབ་ཏུ་ཐོབ། །སེམས་ཅན་བྱེ་བ་གང་རྣམས་ཆོས་ཐོས་ནས། །བྱང་ཆུབ་སེམས་དཔའ་ལ་ནི་སེམས་
བསྐྱེད་པ། །ཞིང་བརྒྱད་དག་གི་ཕྲ་རབ་རྡུལ་སྙེད་དེ། །བགྲངས་ན་དཔག་མི་ལང་བ་དེ་སྙེད་དོ། །སངས་རྒྱས་བྱང་ཆུབ་འདི་ནི་རབ་བསྟན་པས། །མཐའ་ཡས་གང་ལ་ཚད་ཀྱང་མ་མཆིས་པ། །ནམ་མཁའི་ཁམས་
ལྟར་དཔག་ཏུ་མ་མཆིས་ཏེ། །དྲང་སྲོང་ཆེན་པོས་དེ་འདྲའི་ཕྲིན་ལས་མཛད། །མན་དཱ་ར་བའི་ཆར་པ་རབ་ཏུ་འབབ། །ལྷ་ཡི་བུ་དག་བྱེ་སྟོང་མང་པོ་དང་། །བརྒྱ་བྱིན་ཚངས་པ་གང་གཱའི་བྱེ་མ་སྙེད། །ཞིང་སྟོང་བྱེ་བ་
དག་ནས་དེ་དག་ལྷགས། །ཙན་དན་དང་ནི་སྤོས་མཆོག་ཕྱེ་མ་དང་། །ཨ་ག་རུ་ཡི་ཕྱེ་མས་འཐོར་བཞིན་དུ། །ནམ་མཁའ་ལ་ནི་བྱ་བཞིན་རབ་རྒྱུ་ཞིང་། །རྒྱལ་བའི་དབང་པོ་ལ་ཡང་ཚུལ་བཞིན་འཐོར། །སྟེང་གི་ནམ་མཁའ་
ལས་ནི་རྔ་རྣམས་ཀྱང་། །མ་བརྡུངས་པར་ནི་སྒྲ་སྙན་ཉིད་ལས་གྲག །ལྷ་རས་བཅོས་བུ་བྱེ་བ་སྟོང་རྣམས་ཀྱང་། །འདྲེན་པ་རྣམས་ལ་བསྐོར་ཞིང་འཐོར་བར་བགྱིད། །བདུག་པ་རིན་ཐང་མ་མཆིས་རི་བ་ཡི། །རིན་ཆེན་

46-1-137b

པོག་ཕོར་བྱེ་བ་སྟོང་རྣམས་ཀྱང་། །སྐྱོབ་པ་འཇིག་རྟེན་བདག་པོ་མཆོད་སླད་ཏུ། །དེ་ན་ཀུན་དུ་བདག་ཉིད་རབ་ཏུ་རྒྱུ། །བདུགས་རྣམས་བྱེ་བ་ཁྲག་ཁྲིག་མཐའ་ཡས་པ། །རིན་ཆེན་དག་ལས་བགྱིས་པ་མཐོ་ཞིང་ཆེ། །ཕལ་ཆེན་
ཚངས་པའི་འཇིག་རྟེན་བར་ཐུག་པ། །བྱང་ཆུབ་སེམས་དཔའ་མཁས་པ་འདི་དག་འཛིན། །རྒྱལ་བའི་བ་དན་བལྟ་སྡུག་བཅས་པ་ཡི། །འདྲེན་པ་རྣམས་ཀྱི་རྒྱལ་མཚན་རབ་ཏུ་བཙུགས། །བདེ་གཤེགས་སྲས་རྣམས་
རབ་ཏུ་སེམས་དགའ་བས། །ཚིགས་སུ་བཅད་པ་སྟོང་རས་མངོན་པར་བསྟོད། །དེ་འདྲ་ངོ་མཚར་ཁྱད་འཕགས་རྨད་བྱུང་བ། །སྣ་ཚོགས་འདི་དག་འདྲེན་པ་དེ་རིང་གདའ། །སྐུ་ཚེའི་ཚད་ནི་ངེས་པར་བསྟན་མཛད་པས། །
སེམས་ཅན་འདི་ཀུན་རབ་ཏུ་དགའ་བ་ཐོབ། །ཕྱོགས་བཅུ་དག་ན་དེ་རིང་དོན་རྒྱ་ཆེ། །འདྲེན་པ་རྣམས་ཀྱི་གསུང་ཡང་མངོན་པར་འཕགས། །སྲོག་ཆགས་བྱེ་བ་སྟོང་རྣམས་ཚིམ་པར་གྱུར། །བྱང་ཆུབ་ཕྱིར་ནི་དགེ་བ་རྣམས་
དང་ལྡན། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་བཀའ་སྩལ་པ། མ་ཕམ་པ་དེ་བཞིན་གཤེགས་པའི་ཚེའི་ཚད་བསྟན་པའི་ཆོས་ཀྱི་རྣམ་གྲངས་འདི་བཤད་པ་ན། སེམས་
ཅན་གང་དག་གིས་སེམས་བསྐྱེད་པ་གཅིག་ཙམ་ཞིག་མོས་པ་བསྐྱེད་དམ། མངོན་པར་དད་ན་རིགས་ཀྱི་བུ་འམ་རིགས་ཀྱི་བུ་མོ་དེ་དག་བསོད་ནམས་ཇི་ཙམ་ཞིག་སྐྱེ་བར་འགྱུར་བ་དེ་ལེགས་པར་ཉོན་ལ་ཡིད་ལ་ཟུང་ཤིག་དང་། 
དེ་དག་བསོད་ནམས་ཇི་ཙམ་སྐྱེད་པར་འགྱུར་བ་དེ་བཤད་དོ། །མ་ཕམ་པ་འདི་ལྟ་སྟེ་དཔེར་ན། རིགས་ཀྱི་བུ་འམ་རིགས་ཀྱི་བུ་མོ་ལ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་དེ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་
ཕྲག་བརྒྱད་ཏུ་ཕ་རོལ་དུ་ཕྱིན་པ་ལྔ་པོ་འདི་ལྟ་སྟེ། སྦྱིན་པའི་ཕ་རོལ་དུ་ཕྱིན་པ་དང་ཚུལ་ཁྲིམས་ཀྱི་ཕ་རོལ་དུ་ཕྱིན་པ་དང་བཟོད་པའི་ཕ་རོལ་ཏུ་ཕྱིན་པ་དང་བརྩོན་འགྲུས་ཀྱི་ཕ་རོལ་དུ་ཕྱིན་པ་དང་བསམ་གཏན་གྱི་ཕ་རོལ་དུ་ཕྱིན་པ་ལ་

46-1-138a

སྤྱད་དེ། ཤེས་རབ་ཀྱི་ཕ་རོལ་དུ་ཕྱིན་པ་དང་བྲལ་ན། མ་ཕམ་པ་རིགས་ཀྱི་བུ་འམ་རིགས་ཀྱི་བུ་མོ་གང་གིས། དེ་བཞིན་གཤེགས་པའི་ཚེའི་ཚད་བསྟན་པའི་ཆོས་ཀྱི་རྣམ་གྲངས་འདི་ཐོས་ནས། སེམས་སྐྱེད་པ་གཅིག་
ཙམ་ཞིག་མོས་པ་བསྐྱེད་དམ་མངོན་པར་དད་ན་དེའི་བསོད་ནམས་མངོན་པར་འདུ་བྱས་པ་འདི་ལ། ཕ་རོལ་དུ་ཕྱིན་པ་ལྔ་དང་ལྡན་པ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཏུ་ཡོངས་སུ་རྫོགས་པར་བསོད་ནམས་མངོན་པར་
བྱས་པ་དང་དགེ་བ་མངོན་པར་བྱས་པ་དང་སྔ་མ་དེས་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆ་དང་བརྒྱ་སྟོང་གི་ཆ་དང་བྱེ་བའི་ཆ་དང་བྱེ་བ་བརྒྱའི་ཆ་དང་བྱེ་བ་སྟོང་གི་ཆ་དང་བྱེ་བ་བརྒྱ་སྟོང་གི་ཆ་དང་བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་
ཉེ་བར་མི་འགྲོ་སྟེ། གྲངས་སུ་ཡང་ཆར་ཡང་བགྲང་བར་ཡང་དཔེར་ཡང་རྒྱུར་ཡང་མི་བཟོད་དོ། །མ་ཕམ་པ་དེ་ལྟ་བུའི་བསོད་ནམས་མངོན་པར་འདུ་བྱེད་པ་དང་ལྡན་པའི་རིགས་ཀྱི་བུ་འམ་རིགས་ཀྱི་བུ་མོ་དེ། བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ལས་ཕྱིར་ལྡོག་པ་དེ་ནི་གནས་མེད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སངས་རྒྱས་ཡེ་ཤེས་བླ་ན་མེད། །ཡེ་ཤེས་འདི་ནི་ཚོལ་བའི་ཕྱིར། 
གང་གིས་ཕ་རོལ་ཕྱིན་པ་ལྔ་། །ཡི་དམ་བཅས་ནས་དེར་ཞུགས་ཏེ། །བསྐལ་པ་བྱེ་བ་སྟོང་ཕྲག་ཀྱང་། །བརྒྱད་ཏུ་ཚང་བར་རབ་ཏུ་སྦྱོར། །ཕྱི་ཕྱིར་ཉན་ཐོས་རྣམས་དང་ནི། །སངས་རྒྱས་རྣམས་ལ་སྦྱིན་པ་སྦྱིན། 
བྱང་ཆུབ་སེམས་དཔའ་བྱེ་བ་དང་། །རང་སངས་རྒྱས་ནི་མང་པོ་ལ། །བཟའ་བཅའ་ཟས་དང་སྐོམ་རྣམས་དང་། །གོས་དང་མལ་ཆས་མགུ་བར་བྱེད། །གནས་དང་གཙུག་ལག་ཁང་རྣམས་ཀྱང་། །ཙན་དན་
ལས་ནི་འདིར་བྱས་དང་། །ཀུན་དགའ་ར་བ་ཉམས་དགའ་དང་། །འཆག་ས་མཛེས་པར་བྱས་པ་རྣམས། །སྦྱིན་པ་སྣ་ཚོགས་རྣམ་པ་མང་། །དེ་ལྟ་བུ་ཡི་སྦྱིན་འདིར་བྱིན། །བསྐལ་པ་བྱེ་བ་ཕྲག་སྟོང་དུ། །

46-1-138b

བྱིན་ནས་བྱང་ཆུབ་ཕྱིར་ཡང་བསྔོས། །སངས་རྒྱས་ཡེ་ཤེས་ཆེད་ཀྱི་ཕྱིར། །རྫོགས་སངས་རྒྱས་ཀྱིས་བསྔགས་དག་ཅིང་། །མ་ཉམས་ཡང་དག་བསྟོད་པ་ཡི། །ཚུལ་ཁྲིམས་ཕྱིར་ཞིང་སྲུང་བར་བྱེད། །ཕྱིར་ཞིང་བཟོད་པ་
སྒོམ་པར་བྱེད། །འདུལ་བའི་ས་ལ་རབ་ཏུ་གནས། །བརྟན་དང་ལྡན་ཞིང་དྲན་དང་ལྡན། །ཁ་ངན་མང་པོ་བཟོད་པར་བྱེད། །དམིགས་པ་ཅན་གྱི་སེམས་ཅན་དག །ང་རྒྱལ་དག་ལ་རབ་གནས་པས། །སྨད་པ་བྱས་པ་དེ་
དག་ཀྱང་། །སངས་རྒྱས་ཡེ་ཤེས་ཕྱིར་བཟོད་དོ། །བརྩོན་འགྲུས་ལ་ནི་རྟག་ཏུ་འབད། །དྲན་པ་བརྟན་ཞིང་མངོན་པར་བརྩོན། །ཡིད་ལ་གཞན་དུ་རྟོག་པ་མེད། །བསྐལ་པ་བྱེ་བར་དེ་བཞིན་གྱུར། །དགོན་པའི་
གནས་ན་རབ་ཏུ་འདུག །འཆག་སར་མངོན་པར་སོང་ནས་སུ། །གཉིད་དང་རྨུགས་པ་རབ་སྤངས་ཏེ། །བསྐལ་པ་བྱེ་བར་དེ་དག་སྤྱོད། །བསམ་གཏན་བསམ་གཏན་ཆེན་པོ་པ། །བསམ་གཏན་དགའ་ཞིང་
མཉམ་པར་གཞག །བསྐལ་པ་བྱེ་བ་སྟོང་ཕྲག་བརྒྱད། །དེ་ལས་མི་ཉུང་བསམ་གཏན་བྱེད། །དཔའ་བོ་དེ་ནི་བསམ་གཏན་དེས། །ཐམས་ཅད་མཁྱེན་པར་བདག་བསྒྱུར་ཞེས། །བྱང་ཆུབ་དམ་པ་དོན་དུ་གཉེར། །
བསམ་གཏན་དག་གི་ཕ་རོལ་སོང་། །བསྐལ་པ་བྱེ་བ་ཕྲག་སྟོང་དུ། །བྱ་བ་འདི་ལ་རབ་གནས་པའི། །དེ་དག་བསོད་ནམས་གང་ཡིན་པ། །གང་སྔར་ཡོངས་སུ་བསྒྲགས་པ་བས། །སྐྱེས་པ་རྣམས་སམ་བུད་མེད་དག །
གང་གིས་ང་ཡི་ཚེ་ཐོས་ནས། །སྐད་ཅིག་དད་པར་བྱེད་པ་ཡང་། །བསོད་ནམས་དེ་ནི་མཐའ་ཡས་སོ། །གཡོ་བ་དང་ནི་རློམ་སེམས་དང་། །ཐེ་ཚོམ་དག་ཀྱང་རྣམ་སྤངས་ཏེ། །ཡུད་ཙམ་ཤིན་ཏུ་མོས་པ་ཡང་། །དེ་ཡི་
འབྲས་བུ་འདི་འདྲའོ། །བསྐལ་པ་བྱེ་བར་སྤྱོད་པ་ཡི། །བྱང་ཆུབ་སེམས་དཔའ་གང་ཡིན་པ། །ང་ཚེ་བསམ་གྱིས་མི་ཁྱབ་པ། །འདི་ཐོས་དེ་དག་མི་སྤང་ངོ་། །སྤྱི་བོ་ཡིས་ཀྱང་ཕྱག་འཚལ་ཏེ། །མ་འོངས་པ་ཡི་དུས་ན་ཡང་། །བདག་ཅག་

46-1-139a

འདི་འདྲར་རབ་གྱུར་ཅིག །སྲོག་ཆགས་བྱེ་བ་བསྒྲལ་བར་བགྱི། །ཇི་ལྟར་མགོན་པོ་ཤཱཀྱ་ཐུབ། །ཐུབ་ཆེན་ཤཱཀྱ་སེང་གེ་ཡིས། །བྱང་ཆུབ་སྙིང་པོར་བཞུགས་ནས་སུ། །སེང་གེའི་ཁྲི་ལ་སྒྲ་བསྒྲོགས་གྱུར། །
བདག་ཀྱང་མ་འོངས་དུས་ཀྱི་ཚེ། །ལུས་ཆེན་ཀུན་གྱིས་བཀུར་བསྟི་ཞིང་། །བྱང་ཆུབ་སྙིང་པོར་འདུག་ནས་ནི། །འདི་ལྟ་བུ་ཡི་ཆོས་བཤད་དོ། །མི་གང་ཐོས་པ་འཛིན་གྱུར་ཞིང་། །ལྷག་པའི་བསམ་པ་ཕུན་སུམ་ཚོགས། །
ལྡེམ་པོར་དགོངས་ཏེ་བཤད་ཞེས་པ། །དེ་དག་རྣམས་ནི་ཐེ་ཚོམ་མེད། །མ་ཕམ་པ་གཞན་ཡང་དེ་བཞིན་གཤེགས་པའི་ཚེའི་ཚད་བསྟན་པའི་ཆོས་ཀྱི་རྣམ་གྲངས་འདི་ཐོས་ནས་འབབ་པ་དང་འཇུག་པ་དང་ཁོང་དུ་ཆུད་པ་དེ་ནི་
དེ་བས་སངས་རྒྱས་ཀྱི་ཡེ་ཤེས་སུ་འགྱུར་བའི་བསོད་ནམས་མངོན་པར་འདུ་བྱེད་པ་ཆེས་དཔག་ཏུ་མེད་པ་སྐྱེད་ན། གང་ཆོས་ཀྱི་རྣམ་གྲངས་འདི་ལྟ་བུ་འདི་ཉན་ཏམ་སྒྲོགས་སམ་འཛིན་ཏམ་ཡི་གེར་འདྲི་འམ་ཡི་གེར་འདྲིར་འཇུག་
གམ་གླེགས་བམ་ལ་མེ་ཏོག་དང་བདུག་པ་དང་སྤོས་དང་ཕྲེང་བ་དང་བྱུག་པ་དང་ཕྱེ་མ་དང་གོས་དང་གདུགས་དང་རྒྱལ་མཚན་དང་ལྷའི་བ་དན་དང་འབྲུ་མར་གྱི་མར་མེ་དང་མར་གྱི་མར་མེ་དང་སྤོས་མར་གྱི་མར་མེ་དག་གིས་སྟི་སྟང་བྱེད་
དམ་སྟི་སྟང་བྱེད་ཏུ་འཇུག་པ་ལྟ་ཅི་སྨོས་ཏེ། སངས་རྒྱས་ཀྱི་ཡེ་ཤེས་སུ་འགྱུར་བའི་བསོད་ནམས་མངོན་པར་འདུ་བྱེད་པ་ཆེས་མང་དུ་སྐྱེད་དོ། །མ་ཕམ་པ་གང་གི་ཚེ་རིགས་ཀྱི་བུ་འམ་རིགས་ཀྱི་བུ་མོ་དེ་བཞིན་གཤེགས་
པའི་ཚེའི་ཚད་བསྟན་པའི་ཆོས་ཀྱི་རྣམ་གྲངས་འདི་ཐོས་ནས་ལྷག་པའི་བསམ་པས་མོས་པར་བྱེད་པ་དེའི་ཚེ། དེའི་ལྷག་པའི་བསམ་པའི་མཚན་ཉིད་ནི་འདི་ཡིན་པར་རིག་པར་བྱ་སྟེ། འདི་ལྟ་སྟེ་ང་བྱ་རྒོད་ཀྱི་ཕུང་པོའི་རི་ལ་འདུག་སྟེ། 
བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་བ་དང་། བྱང་ཆུབ་སེམས་དཔའི་ཚོགས་ཀྱིས་མདུན་གྱིས་བལྟས་པ་དང་། ཉན་ཐོས་ཀྱི་དགེ་འདུན་གྱི་དབུས་ན་འདུག་ཅིང་ཆོས་སྟོན་པར་མཐོང་བ་དང་། ངའི་སངས་རྒྱས་ཀྱི་ཞིང་འཇིག་

46-1-139b

རྟེན་གྱི་ཁམས་མི་མཇེད་འདི་གཞི་བཻ་དཱུརྱ་ལས་གྲུབ་ཅིང་མཉམ་པར་གནས་ལ། གསེར་སྐུད་མིག་མངས་རིས་སུ་བྲིས་ཤིང་རིན་པོ་ཆེའི་ཤིང་ལྗོན་པ་རྣམས་ཀྱིས་རྣམ་པར་བཀྲ་བར་མཐོང་བ་དང་། འདི་ན་ཡོངས་སུ་སྤྱད་པའི་ཁང་པ་
བརྩེགས་པ་དག་ན་བྱང་ཆུབ་སེམས་དཔའ་དག་གནས་པར་མཐོང་བ་སྟེ། མ་ཕམ་པ་འདི་ནི་ལྷག་པའི་བསམ་པས་མོས་པའི་རིགས་ཀྱི་བུ་འམ་རིགས་ཀྱི་བུ་མོའི་ལྷག་པའི་བསམ་པའི་མཚན་ཉིད་ཏུ་རིག་པར་བྱའོ། །མ་ཕམ་པ་ཡང་དེ་
བཞིན་གཤེགས་པ་ཡོངས་སུ་མྱ་ངན་ལས་འདས་ནས། གང་དག་ཆོས་ཀྱི་རྣམ་གྲངས་འདི་ཐོས་ན་མི་སྤོང་གི་སྟེང་དུ་རྗེས་སུ་ཡི་རང་བ་དེ་དག་ཀྱང་། ལྷག་པའི་བསམ་པས་མོས་པའི་རིགས་ཀྱི་བུར་ངས་བཤད་ན། གང་འཛིན་པ་དང་ཀློག་པ་
ལྟ་ཅི་སྨོས་ཏེ་དེ་ནི་དེ་བཞིན་གཤེགས་པ་ཕྲག་པ་ལ་ཐོགས་པ་ཡིན་ནོ། །མ་ཕམ་པ་གང་ཆོས་ཀྱི་རྣམ་གྲངས་འདི་གླེགས་བམ་དུ་བྱས་ཤིང་ཕྲག་པ་ལ་ཐོགས་པའི་རིགས་ཀྱི་བུ་འམ་རིགས་ཀྱི་བུ་མོ་དེས་ངའི་མཆོད་རྟེན་བྱ་མི་དགོས། གཙུག་
ལག་ཁང་བྱ་མི་དགོས། དགེ་སློང་གི་དགེ་འདུན་གྱི་ན་བའི་གསོས་སྨན་དང་ཡོ་བྱད་དག་སྦྱིན་མི་དགོས་སོ། །དེ་ཅིའི་ཕྱིར་ཞེ་ན། མ་ཕམ་པ་རིགས་ཀྱི་བུ་འམ་རིགས་ཀྱི་བུ་མོ་དེས་ངའི་སྐུ་གདུང་ལ་སྐུ་གདུང་གི་མཆོད་པ་བྱས་པ་ཡིན། 
རིན་པོ་ཆེ་སྣ་བདུན་གྱི་མཆོད་རྟེན་འཕང་དུ་ནི་ཚངས་པའི་འཇིག་རྟེན་ལ་ཐུག་པ་ཁོ་ར་ཁོར་ཡུག་ཏུ་ནི་རིམ་བཞིན་དུ་གདུགས་ཡོངས་སུ་བཟུང་བ་དང་བཅས་པ་ལྷའི་བ་དན་དང་བཅས་པ་དྲིལ་བུའི་སྒྲ་གསལ་བར་འབྱུང་བ་དག་བྱས་པ་ཡིན་ནོ། །
སྐུ་གདུང་གི་མཆོད་རྟེན་དེ་དག་ལ་ལྷ་དང་མིའི་མེ་ཏོག་དང་སྤོས་དང་བདུག་པ་དང་ཕྲེང་བ་དང་བྱུག་པ་དང་ཕྱེ་མ་དང་གོས་དང་གདུགས་དང་རྒྱལ་མཚན་དང་ལྷའི་བ་དན་དང་རྣམ་པར་རྒྱལ་བའི་བ་དན་རྣམ་པ་མང་པོ་དག་གིས་བཀུར་
བསྟི་རྣམ་པ་མང་པོ་བྱས་པ་ཡིན་ནོ། །ཡིད་ཏུ་འོང་བ་སྙན་ཅིང་གསལ་བའི་རྔ་དང་། རྔ་བོ་ཆེ་རྣམ་པ་མང་པོ་དག་དང་རོལ་མོའི་སྒྲ་དང་ཕེག་རྡོབ་པ་དང་རྣམ་པ་ཐ་དད་པའི་གླུ་དང་། གར་དང་། 

46-1-140a

བཞད་གད་དང་རོལ་མོ་རྣམ་པ་མང་པོ་ཚད་མེད་པས། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་མང་པོར་བཀུར་བསྟིར་བྱས་པར་འགྱུར་རོ། །མ་ཕམ་པ་ང་ཡོངས་སུ་མྱ་ངན་ལས་འདས་ནས་ཆོས་ཀྱི་རྣམ་གྲངས་འདི་
བཟུང་བ་དང་བཀླགས་པ་དང་ཡི་གེར་བྲིས་པ་དང་རབ་ཏུ་སྟོན་པ་དེས་ངའི་ཕྱིར་ཙན་དན་དམར་པོའི་གཙུག་ལག་ཁང་རྒྱ་ཆེན་པོ་ཡངས་པ་མཐོན་པོ། ཁང་བཟངས་སུམ་བཅུ་རྩ་གཉིས་ཡོད་པ་བརྒྱད་རྩེགས། དགེ་སློང་སྟོང་གི་གནས་ཀུན་དགའ་ར་
བ་དང་མེ་ཏོག་གིས་མཛེས་པར་བྱས་པ། འཆག་སའི་ནགས་ཚལ་དང་ལྡན་པ། མལ་སྟན་དང་བཅས་པ་བཟའ་བ་དང་བཅའ་བ་དང་ཟས་དང་སྐོམ་དང་ན་བའི་གསོས་སྨན་གྱིས་ཡོངས་སུ་གང་བ། བདེ་བའི་ཡོ་བྱད་ཐམས་ཅད་ཀྱིས་རབ་ཏུ་
བརྒྱན་པ་དག་བྱས་པར་གྱུར་ཏེ། །དེ་དག་མང་ཞིང་དཔག་ཏུ་མེད་དེ། བརྒྱ་འམ་སྟོང་ངམ་སྟོང་ཕྲག་བརྒྱ་འམ་བྱེ་བ་འམ་བྱེ་བ་བརྒྱ་འམ་བྱེ་བ་སྟོང་ངམ་བྱེ་བ་བརྒྱ་སྟོང་ངམ་བྱེ་བ་ཁྲག་ཁྲིག་བརྒྱ་སྟོང་དེ་དག་ངའི་མདུན་དུ་ཉན་ཐོས་ཀྱི་དགེ་འདུན་ལ་ཕུལ་
ཏེ། དེ་དག་ཀྱང་ངས་ཡོངས་སུ་སྤྱད་པར་རིག་པར་བྱའོ། །མ་ཕམ་པ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། གང་ཞིག་ཆོས་ཀྱི་རྣམ་གྲངས་འདི་འཛིན་ཏམ་གློག་གམ་སྟོན་ཏམ་ཡི་གེར་འབྲི་འམ་ཡི་
གེར་འདྲིར་འཇུག་ཀྱང་རུང་སྟེ། རྣམ་གྲངས་འདིས་དེས་ང་ཡོངས་སུ་མྱ་ངན་ལས་འདས་ནས་རིང་བསྲེལ་གྱི་མཆོད་རྟེན་དག་བྱ་མི་དགོས་སོ། །དགེ་འདུན་ལ་མཆོད་པ་བྱ་མི་དགོས་སོ་ཞེས་ང་དེ་སྐད་འཆད་ན། མ་ཕམ་པ་
གང་ཆོས་ཀྱི་རྣམ་གྲངས་འདི་འཛིན་ཅིང་། སྦྱིན་པ་སྒྲུབ་པ་འམ་ཚུལ་ཁྲིམས་སམ་བཟོད་པ་འམ་བརྩོན་འགྲུས་སམ་བསམ་གཏན་ནམ་ཤེས་རབ་སྒྲུབ་པ་ལྟ་ཅི་སྨོས་ཏེ། རིགས་ཀྱི་བུ་འམ་རིགས་ཀྱི་བུ་མོ་དེ་བསོད་ནམས་
མངོན་པར་འདུ་བྱེད་པ་ཆེས་དཔག་ཏུ་མེད་པ་གྲངས་མེད་པ་མཐའ་ཡས་པ་སྐྱེད་པ་ལྟ་ཅི་སྨོས། མ་ཕམ་པ་འདི་ལྟ་སྟེ་དཔེར་ན། ནམ་མཁའི་ཁམས་ནི་ཤར་དང་ལྷོ་དང་ནུབ་དང་བྱང་དང་སྟེང་དང་འོག་གི་ཕྱོགས་དང་ཕྱོགས་མཚམས་རྣམས་སུ་ཡང་

46-1-140b

མུ་མེད་པ་དེ་བཞིན་དུ། རིགས་ཀྱི་བུ་འམ་རིགས་ཀྱི་བུ་མོ་དེ་བསོད་ནམས་མངོན་པར་འདུ་བྱེད་པ། སངས་རྒྱས་ཀྱི་ཡེ་ཤེས་སུ་འགྱུར་བ་གྲངས་མེད་དཔག་ཏུ་མེད་པ་སྐྱེད་དོ། །གང་ཆོས་ཀྱི་རྣམ་གྲངས་འདི་འཛིན་ཏམ་ཀློག་གམ་
སྟོན་ཏམ་ཡི་གེར་འདྲི་འམ་ཡི་གེར་འདྲིར་འཇུག་ན། དེ་ནི་དེ་བཞིན་གཤེགས་པའི་མཆོད་རྟེན་ལ་སྟི་སྟང་བྱ་བའི་ཕྱིར་མངོན་པར་བརྩོན་པ་ཡིན་ནོ། །དེ་བཞིན་གཤེགས་པའི་ཉན་ཐོས་རྣམས་ཀྱི་བསྔགས་པ་སྨྲ་བའོ། །བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་ཀྱི་ཡོན་ཏན་བྱེ་བ་ཁྲག་ཁྲིག་བརྒྱ་སྟོང་ཡོངས་སུ་བརྗོད་ཅིང་གཞན་དག་ལ་ཡང་ཡང་དག་པར་རབ་ཏུ་སྟོན་པ་ཡིན་ནོ། །བཟོད་པ་བསྒྲུབས་པ་དང་ཚུལ་ཁྲིམས་དང་ལྡན་པ་དང་དགེ་བའི་ཆོས་ཅན་དང་འགྲོགས་
ན་བདེ་བ་དང་བཟོད་པ་ཅན་དང་དུལ་བ་དང་ཕྲག་དོག་མེད་པ་དང་ཁྲོ་བ་ཡིད་ལ་བྱེད་པ་དང་བྲལ་བ་དང་གནོད་སེམས་མེད་པ་ཡིད་ལ་བྱེད་པ་དང་དྲན་པ་དང་ལྡན་པ་དང་མཐུ་དང་ལྡན་པ་ཡིན་བརྩོན་འགྲུས་དང་ལྡན་པ་ཡིན་ཏེ། སངས་རྒྱས་ཀྱི་ཆོས་ཚོལ་
བ་ལ་རྟག་ཏུ་བརྩོན་པ་ཡིན་བསམ་གཏན་པ་ཡིན་ནང་དུ་ཡང་དག་འཇོག་ལྷུར་ལེན་པ་དང་ནང་དུ་ཡང་དག་འཇོག་མང་དུ་བྱེད་པ་དང་འདྲི་བ་རབ་ཏུ་དབྱེ་བ་ལ་མཁས་པ་ཡིན་འདྲི་བ་བྱེ་བ་ཁྲག་ཁྲིག་བརྒྱ་སྟོང་གི་ལན་ལྡོན་པ་ཡིན་ནོ། །མ་ཕམ་པ་
བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་ལ་ཞིག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། ཆོས་ཀྱི་རྣམ་གྲངས་འདི་འཛིན་པའི་ཡོན་ཏན་དག་ནི་གང་དག་ངས་ཡོངས་སུ་བརྗོད་པ་འདི་ལྟ་བུ་འདི་དག་
ཡིན་ནོ། །མ་ཕམ་པ་རིགས་ཀྱི་བུ་འམ་རིགས་ཀྱི་བུ་མོ་དེ་འདི་ལྟར་རིག་པར་བྱ་སྟེ། རིགས་ཀྱི་བུ་འམ་རིགས་ཀྱི་བུ་མོ་དེ་བྱང་ཆུབ་ཀྱི་སྙིང་པོར་ཡང་དག་པར་ཞུགས་ཏེ་བྱང་ཆུབ་མངོན་པར་རྫོགས་པར་སངས་རྒྱས་པར་བྱ་བའི་
ཕྱིར། བྱང་ཆུབ་ཀྱི་ཤིང་དྲུང་དུ་འགྲོ་བ་ཡིན་པར་རིག་པར་བྱའོ། །མ་ཕམ་པ་རིགས་ཀྱི་བུ་འམ་རིགས་ཀྱི་བུ་མོ་དེ་གང་ན་འགྲེང་ངམ་འདུག་གམ་འཆག་པ་དེར་མ་ཕམ་པ་དེ་བཞིན་གཤེགས་པའི་ཕྱིར་མཆོད་རྟེན་

46-1-141a

བརྩིག་གོ། །ལྷ་དང་བཅས་པའི་འཇིག་རྟེན་གྱིས་ཀྱང་འདི་དེ་བཞིན་གཤེགས་པའི་མཆོད་རྟེན་ཡིན་ནོ་ཞེས་དེ་ལ་བརྗོད་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་
སྩལ་ཏོ། །མི་མགོན་མྱ་ངན་འདས་པ་ན། །མདོ་སྡེ་འདི་ནི་གང་འཛིན་ལ། །བསོད་ནམས་ཕུང་པོ་མུ་མེད་པར། །ང་ཡིས་ཡང་དང་ཡང་དུ་བསྔགས། །དེས་ནི་ང་ལ་མཆོད་པ་བྱས། །རིང་བསྲེལ་གྱི་ནི་མཆོད་
རྟེན་ཡང་། །རིན་ཆེན་བྱས་པ་སྣ་ཚོགས་པ། །བལྟ་ན་སྡུག་ཅིང་མཛེས་རྣམས་བྱས། །འཕང་དུ་ཚངས་པའི་འཇིག་རྟེན་མཉམ། །གདུགས་ཕྲེང་རྣམས་དང་རབ་ཏུ་ལྡན། །ཁོ་ར་ཡུག་ལྡན་དཔལ་ཅན་
ཏེ། །རྣམ་རྒྱལ་བ་དན་རྣམས་དང་ལྡན། །དྲིལ་བུ་གསལ་བའི་སྒྲ་འབྱུང་སྟེ། །དར་གྱི་ལྡ་ལྡིས་མཛེས་པར་བྱས། །དེ་བཞིན་དྲིལ་བུ་རླུང་བསྐྱོད་པས། །རྒྱལ་བའི་རིང་བསྲེལ་ཤིན་དུ་མཛེས། །སྤོས་དང་མེ་
ཏོག་བྱུག་པ་དང་། །གོས་དང་རོལ་མོའི་སྒྲ་རྣམས་དང་། །རྔ་རྣམས་ཀྱིས་ཀྱང་ཡང་དང་ཡང་། །དེ་དག་མཆོད་པ་རྒྱ་ཆེན་བྱས། །རོལ་མོ་སྒྲ་སྙན་ཆ་བྱད་རྣམས། །རིང་བསྲེལ་དེ་ལ་བརྡུངས་ཤིང་བསིལ། །
སྤོས་དང་འབྲུ་མར་མར་མེ་རྣམས། །དེ་དག་ལ་ནི་ཀུན་ནས་ཕུལ། །གང་གིས་མདོ་སྡེ་འདི་བཟུང་ཞིང་། །ཟད་པའི་དུས་ལ་སྟོན་པ་ཡིས། །དེས་ནི་མཆོད་པ་རྣམ་མང་པོ། །དེ་འདྲ་མཐའ་ཡས་ང་ལ་བྱས། །
གཙུག་ལག་ཁང་མང་བྱི་བ་དག །ཙན་དན་ལས་ནི་བྱས་པ་ཡིན། །ཁང་བཟངས་སུམ་བཅུ་རྩ་གཉིས་ཏེ། །དེ་དག་འཕང་དུ་བརྒྱད་རྩེག་གོ། །མལ་ཆ་དག་གིས་ཉེ་བར་བརྟན། །བཟའ་བཅའ་
རྣམས་ཀྱང་ཚོགས་པར་ལྡན། །ཡོལ་བ་བཟང་པོ་རབ་ཏུ་བཤམས། །གནས་རྣམས་ཀྱང་ནི་རྣམ་པར་སྟོང་། །མེ་ཏོག་ཀུན་དགས་མཛེས་བྱས་པའི། །ཀུན་དགའ་དག་དང་འཆག་ས་བྱིན། །

46-1-141b

གཟུགས་མང་རྣམ་པ་སྣ་ཚོགས་ཀྱི། །གདིང་གཡོགས་མང་པོ་དེ་བཞིན་ནོ། །རྣམ་འདྲེན་མྱ་ངན་འདས་པ་ན། །གང་ཞིག་མདོ་འདི་འཛིན་པ་དེས། །ང་ཡི་མདུན་དུ་དགེ་འདུན་ལ། །མཆོད་པ་མང་པོ་བྱས་པ་ཡིན། །མོས་པ་སྙིང་
པོར་གང་གྱུར་ཏེ། །གང་ཞིག་མདོ་འདི་ཀློག་པ་འམ། །ཡི་གེར་འདྲི་བར་བྱེད་པ་སྟེ། །དེ་བས་བསོད་ནམས་མང་དུ་ཐོབ། །མི་འགའ་ལ་ལས་གླེགས་བམ་ལ། །ཤིན་དུ་ངེས་ཚིག་འདྲིར་བཅུག་སྟེ། །སྤོས་དང་ཕྲེང་བ་བྱུག་
པ་ཡིས། །གླེགས་བམ་དེ་ལ་མཆོད་པ་བྱེད། །སྤོས་ཀྱི་འབྲུ་མར་བཀང་བ་ཡི། །མར་མེ་རྟག་ཏུ་སུ་འབུལ་ཞིང་། །སྣ་མ་ཨུད་པལ་སིལ་མ་དང་། །ཙམ་པ་ཀས་ཀྱང་རབ་ཏུ་གཏོར། །གླེགས་བམ་དག་ལ་འདི་འདྲ་
བའི། །མཆོད་པ་བྱེད་པའི་མི་དེ་ནི། །བསོད་ནམས་མང་པོ་རབ་འཕེལ་ཏེ། །དེ་ལ་ཚད་ཀྱང་ཡོང་མེད་དོ། །ཇི་ལྟར་ནམ་མཁའི་ཁམས་ཀྱི་ཚད། །ཕྱོགས་བཅུ་དག་ནི་ཐམས་ཅད་ཏུ། །རྟག་ཏུ་རྙེད་པར་འགྱུར་མ་ཡིན། །བསོད་
ནམས་ཕུང་པོ་འདི་དེ་འདྲ། །བཟོད་ཅིང་དུལ་ཏེ་མཉམ་པར་གཞག །ཚུལ་ཁྲིམས་ལྡན་ཞིང་བསམ་གཏན་པ། །ཡང་དག་ནང་འཇོག་སྤྱོད་ཡུལ་ཅན། །དེ་འདྲ་བ་ལྟ་སྨོས་ཅི་དགོས། །ཁྲོ་བ་མེད་ཅིང་ཕྲ་མ་མེད། །མཆོད་རྟེན་
དག་ལ་གུས་པར་གནས། །དགེ་སློང་རྣམས་ལ་འང་རྟག་ཏུ་འདུད། །ང་རྒྱལ་མེད་ཅིང་ལེ་ལོ་མེད། །ཤེས་རབ་ལྡན་ཞིང་བདེ་བཞིན་བརྟན། །དྲི་བ་དྲིས་ན་མི་ཁྲོ་སྟེ། །སྙིང་རྗེ་བློ་ཡིས་སྲོག་ཆགས་ལ། །རྗེས་སུ་འཐུན་པར་རབ་
ཏུ་སྟོན། །གང་ཞིག་དེ་འདྲར་གྱུར་ནས་སུ། །མདོ་འདི་ཡང་ནི་གང་འཛིན་པ། །དེ་ཡི་བསོད་ནམས་ཕུང་པོ་ནི། །ཚད་ཀྱང་རྙེད་པར་མི་འགྱུར་རོ། །མདོ་འདི་འཛིན་པར་བྱེད་པ་ཡི། །དེ་ལྟ་བུ་ཡི་ཆོས་སྨྲ་བ། །གལ་ཏེ་མི་འགས་མཐོང་ན་
ཡང་། །དེ་ལ་ཤིན་དུ་བཀུར་བསྟི་བྱ། །ལྷ་ཡི་མེ་ཏོག་རྣམས་ཀྱིས་དེ་ལ་གཏོར། །ལྷ་ཡི་གོས་རྣམས་ཀྱིས་ཀྱང་མངོན་པར་དགའ། །དེ་ཡི་རྐང་པར་མགོ་བོས་ཕྱག་འཚལ་ཏེ། །དེ་ལ་དེ་བཞིན་གཤེགས་པར་འདུ་ཤེས་སྐྱེད། །དེ་མཐོང་ནས་ནི་དེ་ཚེ་འདི་སྙམ་དུ། །དེ་ནི་ཤིང་

46-1-142a

ལྗོན་དྲུང་དུ་འགྲོར་འགྱུར་ཏེ། །ལྷ་དང་བཅས་པའི་འཇིག་རྟེན་ཕན་པའི་ཕྱིར། །བླ་མེད་བྱང་ཆུབ་ཞིང་འཚང་རྒྱ་སྙམ་བསམ། །མདོ་སྡེ་འདི་ལས་ཚིགས་བཅད་གཅིག་བརྗོད་ཅིང་། །དེ་འདྲའི་མཁས་དེ་
གང་ན་འཆག་པ་འམ། །གང་ན་འགྲེང་ངམ་འོན་ཏེ་འདུག་པ་འམ། །དཔའ་བོ་གང་དུ་ཉལ་བར་བྱེད་པའང་རུང་། །དེར་ནི་འདྲེན་པ་སངས་རྒྱས་བཅོམ་ལྡན་གྱི། །ཆེད་ཏུ་སྐྱེས་བུ་དམ་པའི་མཆོད་རྟེན་ནི། །བལྟ་ན་སྡུག་
པ་སྣ་ཚོགས་བྱེད་ཏུ་གཞུག ། །དེ་བཞིན་དེར་ནི་མཆོད་པ་སྣ་ཚོགས་བྱས། །གང་ན་སངས་རྒྱས་བུ་དེ་འདུག་པ་ཡི། །ས་ཕྱོགས་དེ་ནི་ང་ཡིས་ཡོངས་སུ་སྤྱད། །ངས་ནི་དེ་ཉིད་དུ་ཡང་འཆག་པ་བྱས། །དེ་ཉིད་ཏུ་
འང་ང་ནི་འདུག་པར་གྱུར། །དམ་པའི་ཆོས་པད་མ་དཀར་པོ་ལས་བསོད་ནམས་ཀྱི་རྣམ་གྲངས་ཀྱི་ལེའུ་ཞེས་བྱ་སྟེ་བཅུ་དྲུག་པའོ།། །། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་
བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུ་འམ་རིགས་ཀྱི་བུ་མོ་གང་གིས་ཆོས་ཀྱི་རྣམ་གྲངས་འདི་བཤད་པ་ཐོས་ནས་རྗེས་སུ་ཡི་རང་ན། རིགས་ཀྱི་བུ་འམ་རིགས་ཀྱི་བུ་མོ་དེ་བསོད་ནམས་ཇི་
སྙེད་གཅིག་བསྐྱེད་པར་འགྱུར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །དཔའ་ཆེན་མྱ་ངན་འདས་ནས་གང་། །མདོ་འདི་འདྲ་བ་ཉན་པ་དང་། །ཐོས་ནས་
རྗེས་སུ་ཡི་རང་བ། །དེ་ཡི་དགེ་བ་ཅི་ཙམ་འགྱུར། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ། །མ་ཕམ་པ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་
ནས། རིགས་ཀྱི་བུ་འམ་རིགས་ཀྱི་བུ་མོ་འམ་དགེ་སློང་ངམ་དགེ་སློང་མ་འམ་དགེ་བསྙེན་ནམ་དགེ་བསྙེན་མ་འམ་སྐྱེས་བུ་མཁས་པ་འམ་གཞོན་ནུ་འམ་གཞོན་ནུ་མ་གང་ལ་ལ་ཆོས་ཀྱི་རྣམ་གྲངས་འདི་བཤད་པ་ཉན་ཅིང་ཐོས་ནས་ཀྱང་རྗེས་སུ་ཡི་རང་ལ་

46-1-142b

ཆོས་ཉན་པ་དེ་ནས་སོང་སྟེ། གཙུག་ལག་ཁང་ན་འདུག་གམ་ཁྱིམ་ན་འདུག་གམ་དགོན་པ་ན་འདུག་གམ་སྲང་ན་འདུག་གམ་གྲོང་ན་འདུག་གམ་ལྗོངས་ན་འདུག་ཀྱང་རུང་སྟེ། རྒྱུ་དེ་དག་དང་བྱེད་རྒྱུ་དེ་དག་དང་ཆོས་དེ་ཇི་ལྟར་ཐོས་པ་དང་ཇི་
ལྟར་ཟིན་པ་བཞིན་དུ་ཅི་ནུས་ཀྱིས། ཕ་འམ་མ་འམ་ཉེ་དུ་འམ་ཡང་དག་པར་མགུ་བར་འགྱུར་བ་འམ་འདྲིས་པ་འམ་གཞན་གང་ཡང་རུང་སྟེ། སེམས་ཅན་ཕ་རོལ་ལ་བསྟན་ནས་དེས་དེ་ཐོས་ཏེ། རྗེས་སུ་ཡི་རང་ལ་རྗེས་སུ་ཡི་རང་
ནས་ཀྱང་གཞན་ལ་སྨྲས་ཏེ། དེས་ཀྱང་དེ་ཐོས་ནས་རྗེས་སུ་ཡི་རང་ལ་དེས་ཀྱང་གཞན་ལ་སྨྲས་ཏེ། དེས་ཀྱང་དེ་ཐོས་ནས་རྗེས་སུ་ཡི་རང་ལ་དེ་ལྟར་ན་རྣམ་གྲངས་འདིས་གཅིག་ནས་གཅིག་ཏུ་བརྒྱུད་དེ་ལྔ་བཅུ་ལ་ཐུག་ན། མ་ཕམ་པ་
གཅིག་ནས་གཅིག་ཏུ་བརྒྱུད་དེ་ཐོས་པ། རྗེས་སུ་ཡི་རང་བ་ལྔ་བཅུ་པའི་མིར་གྱུར་པ་གང་ཡིན་པ། མ་ཕམ་པ་རིགས་ཀྱི་བུ་འམ་རིགས་ཀྱི་བུ་མོ་དེའི་རྗེས་སུ་ཡི་རང་བ་དང་ལྡན་པའི་བསོད་ནམས་མངོན་པར་འདུ་བྱེད་པ་དེ། ངས་བཤད་ཀྱིས་
ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །མ་ཕམ་པ་འདི་ལྟ་སྟེ་དཔེར་ན། འཇིག་རྟེན་གྱི་ཁམས་གྲངས་མེད་པ་བརྒྱ་སྟོང་ཕྲག་བཞི་ན་སེམས་ཅན་འཁོད་ཅིང་ཡོད་པ་འགྲོ་བ་དྲུག་ཏུ་སྐྱེས་པ། 
སྒོ་ང་ལས་སྐྱེས་པ་འམ་མངལ་ནས་སྐྱེས་པ་འམ་དྲོད་གཤེར་ལས་སྐྱེས་པ་འམ་བརྫུས་ཏེ་སྐྱེས་པ་འམ་གཟུགས་ཅན་ནམ་གཟུགས་མེད་པ་འམ་འདུ་ཤེས་ཅན་ནམ་འདུ་ཤེས་མེད་པ་འམ། འདུ་ཤེས་མེད་འདུ་ཤེས་མེད་མིན་ནམ་
རྐང་མེད་དམ་རྐང་གཉིས་པ་འམ་རྐང་བཞི་པ་འམ་རྐང་མངས་སམ་སེམས་ཅན་ཇི་ཙམ་སེམས་ཅན་གྱི་ཁམས་སུ་བསྡུས་ཤིང་། ཡང་དག་པར་འདུ་བར་འགྱུར་བ་རྣམས། མི་བསོད་ནམས་འདོད་པ། ཕན་པར་འདོད་པ་འགའ་
ཞིག་བྱུང་བས། སེམས་ཅན་གྱི་ཚོགས་དེ་ལ་འདོད་པའི་རྩེད་མོ་དང་དགའ་བའི་ལོངས་སྤྱོད་སྡུག་པ་མཛེས་པ་གཅེས་པ་ཡིད་ཏུ་འོང་བ་དག་བྱིན་ལ། འདོད་པའི་རྩེད་མོ་ལ་དགའ་བ་ཡོངས་སུ་ལོངས་སྤྱོད་པར་བྱ་བའི་ཕྱིར་སེམས་ཅན་རེ་རེ་ལ་ཡང་འཛམ་བུའི་གླིང་ཡོངས་སུ་

46-1-143a

གང་བ་བྱིན་ཏེ། མགྲོན་བུ་དང་གསེར་དང་དངུལ་དང་ནོར་བུ་དང་མུ་ཏིག་དང་བཻ་དཱུརྱ་དང་དུང་དང་མན་ཤེལ་དང་བྱི་རུ་དང་རྟའི་ཤིང་རྟ་དང་གླང་གི་ཤིང་རྟ་དང་གླང་པོ་ཆེའི་ཤིང་རྟ་དང་ཁང་པ་བརྩེགས་པ་དང་ཁང་པ་ཡང་བྱིན་ཏེ། མ་ཕམ་
པ་རྣམ་གྲངས་འདིས་སྦྱིན་པའི་བདག་པོ་སྦྱིན་བདག་ཆེན་པོའི་མི་དེས་ལོ་བརྒྱད་བཅུ་ཚང་བར་སྦྱིན་པ་བྱིན་ལ། མ་ཕམ་པ་དེ་ནས་སྦྱིན་པའི་བདག་པོ་སྦྱིན་བདག་ཆེན་པོའི་མི་དེ་འདི་སྙམ་དུ་སེམས་ཏེ། སེམས་ཅན་འདི་དག་
ཐམས་ཅད་ཀྱང་བདག་གིས་བརྩེན་དུ་བཅུག་དགའ་བར་བྱས་བདེ་བར་གསོས་ན། སེམས་ཅན་འདི་དག་མགོ་སྐྱ་ཞིང་གཉེར་མས་གང་སྟེ། ན་ཚོད་ལོ་བརྒྱད་བཅུ་ལོན་པས་རྒས་ཏེ། འཆི་བའི་དུས་བྱེད་པར་ཡང་ཉེ་བར་གྱུར་ན་
བདག་གིས་འདི་དག་དེ་བཞིན་གཤེགས་པས་གསུངས་པའི་ཆོས་འདུལ་བ་ལ་རབ་ཏུ་བཙུད་དེ་རྗེས་སུ་བསྟན་ཏོ་སྙམ་ནས། མ་ཕམ་པ་དེ་ནས་མི་དེས་སེམས་ཅན་དེ་དག་ཐམས་ཅད་དེ་བཞིན་གཤེགས་པས་གསུངས་པའི་
ཆོས་འདུལ་བ་ལ་ཡང་དག་པར་བཙུད་དེ། ཡང་དག་པར་བཙུད་ནས་འཛིན་དུ་བཅུག་ལ། སེམས་ཅན་དེ་དག་གིས་ཀྱང་ཆོས་དེ་མཉན་ཏེ་ཐོས་ནས་སྐད་ཅིག་ཐང་ཅིག་ཡུད་ཙམ་གཅིག་ལ་འདུས་ཏེ་ཐམས་ཅད་རྒྱུན་དུ་ཞུག་
པར་གྱུར། ལན་ཅིག་ཕྱིར་འོང་བ་དང་ཕྱིར་མི་འོང་བའི་འབྲས་བུ་ཐོབ་པར་གྱུར་པ་ནས། ཟག་པ་ཟད་པ་བསམ་གཏན་པ་བསམ་གཏན་པ་ཆེན་པོ་རྣམ་པར་ཐར་པ་བརྒྱད་ལ་བསམ་གཏན་པའི་དགྲ་བཅོམ་པའི་བར་ཏུ་གྱུར་
ན། མ་ཕམ་པ་འདི་ཇི་སྙམ་དུ་སེམས། སྦྱིན་པའི་བདག་པོ་སྦྱིན་པའི་བདག་པོ་ཆེན་པོའི་མི་དེ་གཞི་དེ་ལས་བསོད་ནམས་མང་པོ་དཔག་ཏུ་མེད་གྲངས་མེད་པ་སྐྱེད་དམ། དེ་སྐད་ཅེས་བཀའ་སྩལ་ནས་བཅོམ་ལྡན་འདས་
ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་ཏེ། སྦྱིན་པའི་བདག་པོ་སྦྱིན་པའི་བདག་པོ་ཆེན་པོའི་མི་དེ་སེམས་

46-1-143b

ཅན་དེ་སྙེད་ལ་བདེ་བའི་ཡོ་བྱད་ཐམས་ཅད་སྩལ་བའི་སླད་ཏུ་རྒྱུ་དེས་ཀྱང་བསོད་ནམས་མང་དུ་སྐྱེད་ན། བཅོམ་ལྡན་འདས་དེའི་གོང་དུ་དགྲ་བཅོམ་པ་ཉིད་ལ་རབ་ཏུ་བཀོད་པ་ལྟ་སྨོས་ཀྱང་ཅི་འཚལ། དེ་སྐད་ཅེས་གསོལ་ནས། 
བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པ་ལ་འདི་སྐད་ཅེས་བཀའ་སྩལ་ཏོ། །མ་ཕམ་པ་ཁྱོད་མོས་པར་བྱ་ཁོང་དུ་ཆུད་པར་བྱའོ། །སྦྱིན་པའི་བདག་པོ་སྦྱིན་བདག་ཆེན་པོའི་མི་གང་གིས། 
འཇིག་རྟེན་གྱི་ཁམས་གྲངས་མེད་པ་བརྒྱ་སྟོང་ཕྲག་བཞིའི་སེམས་ཅན་ཐམས་ཅད་ལ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོ་བྱས་ཏེ། དགྲ་བཅོམ་པ་ཉིད་ལ་རབ་ཏུ་བཀོད་ནས་བསོད་ནམས་སྐྱེད་ལ། གང་ཡང་
གཅིག་ནས་གཅིག་ཏུ་བརྒྱུད་དེ་ཐོས་པ་ལྔ་བཅུ་པར་གྱུར་པའི་མིས། ཆོས་ཀྱི་རྣམ་གྲངས་འདི་ལས་ཚིགས་སུ་བཅད་པ་གཅིག་གམ། ཚིག་གཅིག་ཙམ་ཐོས་ཏེ་རྗེས་སུ་ཡི་རང་ན། གང་མི་དེའི་རྗེས་སུ་ཡི་རང་བ་དང་ལྡན་
པའི་བསོད་ནམས་བྱ་བའི་དངོས་པོ་ནི། སྦྱིན་པའི་བདག་པོ་སྦྱིན་བདག་ཆེན་པོའི་མི་དེའི་སྦྱིན་པ་དང་ལྡན་པ་དང་། དགྲ་བཅོམ་པ་ཉིད་ལ་བཀོད་པ་དང་ལྡན་པའི་བསོད་ནམས་བྱ་བའི་དངོས་པོ་དེ་བས་གང་མི་གཅིག་ནས་གཅིག་
ཏུ་བརྒྱུད་པའི་ལྔ་བཅུ་པའི་མིས། ཆོས་ཀྱི་རྣམ་གྲངས་འདི་ལས་ཚིགས་སུ་བཅད་པ་གཅིག་གམ་ཚིག་གཅིག་ཐོས་ནས་རྗེས་སུ་ཡི་རང་བ་ནི་ཆེས་མང་སྟེ། མ་ཕམ་པ་རྗེས་སུ་ཡི་རང་བ་དང་ལྡན་པའི་བསོད་ནམས་མངོན་པར་
འདུ་བྱེད་པ་དང་དགེ་བ་མངོན་པར་འདུ་བྱེད་པ་འདིའི་མདུན་ན། སྔ་མའི་སྦྱིན་པ་དང་ལྡན་པ་དང་དགྲ་བཅོམ་པ་ཉིད་ལ་བཀོད་པ་དང་ལྡན་པའི་བསོད་ནམས་མངོན་པར་འདུ་བྱེད་པ་དེས་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆར་ཡང་བརྒྱ་སྟོང་གི་ཆར་
ཡང་བྱེ་བའི་ཆར་ཡང་བྱེ་བ་བརྒྱའི་ཆར་ཡང་བྱེ་བ་སྟོང་གི་ཆར་ཡང་བྱེ་བ་བརྒྱ་སྟོང་གི་ཆར་ཡང་བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་མི་འགྲོ་སྟེ། བགྲང་བར་ཡང་ཆར་ཡང་གྲངས་སུ་ཡང་དཔེར་ཡང་རྒྱུར་ཡང་མི་བཟོད་དོ། །

46-1-144a

མ་ཕམ་པ་དེ་ལྟར་ལྔ་བཅུ་པའི་མི་དེ་ཐ་ན་ཆོས་ཀྱི་རྣམ་གྲངས་འདི་ལས་ཚིགས་སུ་བཅད་པ་གཅིག་གམ་ཚིག་གཅིག་ལ་རྗེས་སུ་ཡི་རང་བ་ཡང་། བསོད་ནམས་འདི་སྙེད་སྐྱེད་ན་མ་ཕམ་པ་གང་གིས་ངའི་མངོན་སུམ་དུ་ཆོས་ཀྱི་རྣམ་
གྲངས་འདི་མཉན་ཏེ་ཐོས་ནས་རྗེས་སུ་ཡི་རང་བ་ལྟ་ཅི་སྨོས་ཏེ། མ་ཕམ་པ་དེའི་བསོད་ནམས་མངོན་པར་འདུ་བྱེད་པ་ནི་ཆེས་དཔག་ཏུ་མེད་ཆེས་གྲངས་མེད་ཅེས་ངས་བཤད་དོ། །མ་ཕམ་པ་ཡང་རིགས་ཀྱི་བུ་འམ་རིགས་
ཀྱི་བུ་མོ་གང་གིས་ཆོས་ཀྱི་རྣམ་གྲངས་འདི་མཉན་པའི་ཕྱིར། བདག་གི་ཁྱིམ་ནས་བྱུང་སྟེ། གཙུག་ལག་ཁང་དུ་སོང་ལ། དེ་ཕྱིན་ནས་དེར་འགྲེང་ངམ་འདུག་སྟེ་ཆོས་ཀྱི་རྣམ་གྲངས་འདི་ཡུད་ཙམ་མཉན་ན། སེམས་ཅན་དེ་བསོད་ནམས་མངོན་པར་
འདུ་བྱ་བ་དེ་ཙམ་བྱས་ཤིང་བསགས་པས། དེ་ཚེ་རྗེས་ནས་ལུས་ཕྱི་མ་དང་བདག་གི་ངོ་བོ་ཕྱི་མ་ཐོབ་པ་ལ་གླང་གི་ཤིང་རྟ་འཐོབ་པར་འགྱུར་རོ། །རྟའི་ཤིང་རྟ་དང་གླང་པོ་ཆེའི་ཤིང་རྟ་དང་ཁྱོགས་ཀྱི་བཞོན་པ་དང་གྲུའི་བཞོན་པ་དང་ཁྱུ་མཆོག་གི་
བཞོན་པ་དང་ལྷའི་གཞལ་མེད་ཁང་ཐོབ་པར་འགྱུར་རོ། །གལ་ཏེ་ཡང་མདོའི་ཆོས་སྒྲོག་པ་དེར་ཡུད་ཙམ་ཞིག་འདུག་སྟེ། ཆོས་ཀྱི་རྣམ་གྲངས་འདི་ཉན་ཏམ་ཕ་རོལ་འདུག་ཏུ་བཅུག་གམ་སེམས་ཅན་གཞན་ལ་སྟན་བགོས་ན། བསོད་
ནམས་མངོན་པར་འདུ་བྱེད་པ་དེས། བརྒྱ་བྱིན་གྱི་སྟན་དང་ཚངས་པའི་སྟན་དང་འཁོར་ལོ་སྒྱུར་བའི་སེང་གེའི་ཁྲི་ཐོབ་པར་འགྱུར་རོ། །མ་ཕམ་པ་གལ་ཏེ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལས་མི་གཞན་ཞིག་ལ་འདི་སྐད་ཏུ། ཀྱེ་མི་ཁྱོད་
ཚུར་ཤོག །དམ་པའི་ཆོས་པད་མ་དཀར་པོ་ཞེས་བྱ་བའི་ཆོས་ཀྱི་རྣམ་གྲངས་འདི་ཉོན་ཅིག་ཅེས་སྨྲས་ལ། མི་དེ་ཡང་སྤྲོ་བ་རྙེད་ནས་གལ་ཏེ་ཡུད་ཙམ་ཞིག་མཉན་ན་སེམས་ཅན་དེ་སྤྲོ་བའི་དགེ་བའི་རྩ་བ་མངོན་པར་འདུ་
བྱས་པ་དེས། གཟུངས་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་ལྷན་ཅིག་འགྲོགས་པ་འཐོབ་པོ། །བླུན་པོར་མི་འགྱུར་རོ། །དབང་པོ་རྣོ་ཞིང་ཤེས་རབ་དང་ལྡན་པར་འགྱུར་རོ། །

46-1-144b

ཚེ་རབས་བརྒྱ་སྟོང་དུ་ཡང་ཁ་རུལ་ཅིང་མནམ་པར་མི་འགྱུར། དེ་ལ་ལྕེ་ནད་མེད་པར་འགྱུར། ཁ་ནད་མེད་པར་འགྱུར། སོ་སྔོན་པོར་མི་འགྱུར། སོ་མི་མཉམ་པ་མེད་པ་དང་། སོ་མི་སེར་བ་དང་སོ་གྱེད་འདུམས་མེད་པ་དང་སོ་ངོ་ལེ་
མེད་པ་དང་སོ་བྱུང་བ་མེད་པ་དང་སོ་ཡོ་བ་མེད་པར་འགྱུར་རོ། །མཆུ་འཕྱང་དུ་མི་འགྱུར་མཆུ་ནང་དུ་སོང་བ་མ་ཡིན་པ་དང་མཆུ་ལོག་པ་མེད་པ་དང་མཆུ་ཤོ་རེར་མ་གྱུར་པ་དང་མཆུ་ཡོ་བ་མེད་པ་དང་མཆུ་གནག་པ་མེད་པ་དང་
མཆུ་མི་སྡུག་པ་མེད་པར་འགྱུར་རོ། །སྣ་ལེབ་ལེབ་པོར་མི་འགྱུར་སྣ་ཡོན་པོར་མི་འགྱུར་རོ། །གདོང་རིང་པོར་མི་འགྱུར། གདོང་ཡོན་པོར་མི་འགྱུར། གདོང་ནག་པོར་མི་འགྱུར་གདོང་བལྟ་ན་མི་སྡུག་པར་མི་འགྱུར་རོ། །
མ་ཕམ་པ་འདི་ལྟར་ལྕེ་དང་སོ་དང་མཆུ་སྲབ་ཅིང་ཤིན་དུ་ལེགས་པར་འགྱུར། སྣ་ཆེ་བ་དང་བཞིན་དབྱིབས་ལེགས་པ་དང་སྨིན་མ་ལེགས་པ་དང་དཔྲལ་བའི་དབྱེས་ཆེ་བར་འགྱུར། དཔེ་བྱད་རྫོགས་པ་ཐོབ་པར་འགྱུར་རོ། །
དེ་བཞིན་གཤེགས་པས་གདམས་པ་དང་རྗེས་སུ་བསྟན་པ་ཡང་ཐོབ་པར་འགྱུར་རོ། །སངས་རྒྱས་བཅོམ་ལྡན་འདས་རྣམ་དང་ཡང་མྱུར་དུ་ཕྲད་པར་འགྱུར་རོ། །མ་ཕམ་པ་ལྟོས། སེམས་ཅན་གཅིག་སྤྲོ་བར་བྱས་པས་ཀྱང་། 
བསོད་ནམས་དེ་ཙམ་སྐྱེད་ན་གང་གིས་སྟི་སྟང་དུ་བྱས་ཏེ་མཉན་ཏམ་སྟི་སྟང་དུ་བྱས་ཏེ་ཀློག་གམ་སྟི་སྟང་དུ་བྱས་ཏེ་སྟོན་ཏམ་སྟི་སྟང་དུ་བྱས་ཏེ་རབ་ཏུ་འཆད་པ་ལྟ་ཅི་སྨོས། དེ་ནས་བཅོམ་ལྡན་འདས་ཀྱིས་དེའི་ཚེ་
ཚིགས་སུ་བཅད་པ་འདི་དག་བཀའ་སྩལ་ཏོ། །གཅིག་ནས་གཅིག་ཏུ་བརྒྱུད་པ་ལྔ་བཅུ་པ། །གང་གིས་མདོ་འདིའི་ཚིགས་བཅད་གཅིག་མཉན་ཏེ། ཐོས་ནས་སེམས་དང་རྗེས་སུ་ཡི་རང་བའི། །བསོད་ནམས་
ཇི་སྙེད་འབྱུང་བ་དེ་ཉོན་ཅིག །གལ་ཏེ་སྦྱིན་བྱེད་མི་ཞིག་བྱུང་གྱུར་ཏེ། །རྟག་ཏུ་སེམས་ཅན་བྱེ་བ་ཁྲག་ཁྲིག་ལ། །གང་སྔར་ང་ཡིས་དཔེ་བྱས་དེ་དག་རྣམས། །དེ་ཀུན་ལོ་ཡང་བརྒྱད་བཅུ་ཚིམ་པར་བྱས། །མགོ་ལ་སྐྲ་དཀར་

46-1-145a

མཉེར་མ་ཀུན་བྱུང་སྟེ། །དེ་དག་རྒ་ལ་ཉེར་གནས་དེས་མཐོང་ནས། །ཀྱེ་མ་སེམས་ཅན་ཉོན་མོངས་འདི་དག་ཀུན། །ཆོས་ཀྱིས་འདི་དག་རབ་ཏུ་བསྟན་པར་བྱ། །དེ་ཡིས་དེ་རྣམས་ལ་ནི་ཕྱི་ཆོས་སྨྲས། །མྱ་
ངན་འདའ་བའི་ས་ཡང་རབ་ཏུ་བཤད། །སྲིད་པ་ཐམས་ཅད་དབུ་བ་སྨིག་རྒྱུ་འདྲ། །སྲིད་པ་ཀུན་ལ་མྱུར་དུ་ཡིད་བྱུང་བྱོས། །སྦྱིན་པ་བྱེད་པའི་མི་དེའི་གན་ནས་སུ། །སེམས་ཅན་དེ་དག་ཀུན་གྱིས་ཆོས་ཐོས་ནས། །
ཟག་པ་ཟད་ཅིང་ཐ་མའི་ལུས་འཛིན་པར། །དུས་གཅིག་དུ་ན་དགྲ་བཅོམ་ཐོབ་གྱུར་ཀྱང་། །གང་ཞིག་བརྒྱུད་དེ་ཚིགས་བཅད་གཅིག་ཐོས་ཤིང་། །རྗེས་སུ་ཡི་རང་བསོད་ནམས་ཇི་སྙེད་པ། །དེ་ཡི་བསོད་ནམས་དེ་བས་ཆེས་མང་སྟེ། །བསོད་
ནམས་ཕུང་པོ་སྔ་མས་ཆར་མི་ཕོད། །གང་གིས་བརྒྱུད་དེ་ཚིགས་བཅད་གཅིག་ཐོས་པ། །དེ་ལྟར་དེ་ཡི་བསོད་ནམས་མང་གྱུར་ཏེ། །དེ་དག་མཐའ་ཡས་ཚད་ཀྱང་ཡོང་མེད་ན། །མངོན་སུམ་ཐོས་པ་དེ་ནི་སྨོས་ཅི་
དགོས། །གང་དེར་སེམས་ཅན་གཅིག་ལ་འང་སྨྲས་པ་ནི། །བསྐལ་པ་བྱེ་བ་ཁྲག་ཁྲིག་དུ་མར་ཡང་། །མདོ་འདི་ཡང་ནི་ཤིན་ཏུ་རྙེད་དཀའ་ཡིས། །སོང་སྟེ་ཆོས་ཉོན་ཅེས་ནི་སྤྲོ་བར་བྱས། །སེམས་ཅན་དེ་དག་དེ་ཡིས་
སྤྲོ་བྱས་ནས། །མདོ་འདི་ཡང་ནི་ཡུད་ཙམ་ཉན་བྱེད་པ། །དེ་ཡི་ལས་ཀྱི་འབྲས་བུ་མཉན་པར་གྱིས། །ནམ་ཡང་དེ་ལ་ཁ་ཡི་ནད་མེད་འགྱུར། །དེ་ཡི་ལྕེ་ཡང་ན་བར་གཞར་མི་འགྱུར། །དེ་ཡི་སོ་རྣམས་འབྱུང་བར་མི་
འགྱུར་རོ། །སྔོན་པོ་སེར་པོ་མི་མཐུན་གཞར་མི་འགྱུར། །མཆུ་མི་སྡུག་པར་ཡང་ནི་ཡོང་མི་འགྱུར། །དེ་གདོང་ཡོ་འམ་སྐམ་ཞིང་རིང་བ་མེད། །ནམ་ཡང་སྣ་ལེབ་དུ་ནི་ཡོང་མི་འགྱུར། །སོ་དང་མཆུ་དང་བཞིན་གྱི་དཀྱིལ་འཁོར་
དང་། །དེ་ཡི་སྣ་དང་དཔྲལ་བའི་དབྱིབས་ཀྱང་ལེགས། །མི་རྣམས་ཀྱིས་ནི་བལྟ་ན་སྡུག་པར་འགྱུར། །དེ་ཡི་ཁ་ནི་རུལ་བར་གཞར་མི་འགྱུར། །ཨུད་པལ་བཞིན་དུ་རྟག་ཏུ་དྲི་ཞིམ་པ། །དེ་ཡི་ཁ་ནས་དྲི་ཡང་འབྱུང་བར་འགྱུར། །དཔའ་བོ་

46-1-145b

ཁྱིམ་ནས་གཙུག་ལག་ཁང་དུ་སོང་། །མདོ་སྡེ་ཉན་པའི་ཕྱིར་ནི་དེར་སོང་སྟེ། །སོང་ནས་དེར་ནི་ཡུད་ཙམ་དེས་ཆོས་མཉན། །དད་པའི་སེམས་ཀྱི་འབྲས་བུ་མཉན་པར་གྱིས། །དེ་ཡི་ལུས་ནི་ཤིན་དུ་དཀར་བར་འགྱུར། །བརྟན་པ་དེ་ནི་རྟ་ཡི་ཤིང་
རྟས་འགྲོ། །གླང་ཆེན་ཤིང་རྟ་མཐོན་པོར་འདུག་ནས་སུ། །རིན་པོ་ཆེ་ཡིས་བརྒྱན་པ་ཞོན་ཞིང་ཆག ། །ཤིན་དུ་སྦུད་པའི་ཁྱོགས་ཀྱང་དེས་ཐོབ་ནས། །དེ་དག་དུ་མ་མི་ཡིས་བཏེག་ཅིང་བཀུར། །ཆོས་ཉན་ཕྱིར་ནི་སོང་བ་གྱུར་པ་དེའི། །
འབྲས་བུ་དགེ་བ་འདི་འདྲར་འགྱུར་བ་ཡིན། །དེ་ནི་འཁོར་གྱི་ནང་དེར་འདུག་ནས་སུ། །དཀར་པོའི་ལས་རྣམས་བྱས་པ་དེ་དག་གིས། །ཚངས་པའི་སྟན་དང་རྒྱལ་པོའི་སྟན་རྣམས་དང་། །བརྒྱ་བྱིན་སྟན་རྣམས་ཀྱང་ནི་དེས་ཐོབ་འགྱུར། །
དམ་པའི་ཆོས་པད་མ་དཀར་པོ་ལས་རྗེས་སུ་ཡི་རང་བའི་བསོད་ནམས་བསྟན་པའི་ལེའུ་ཞེས་བྱ་སྟེ་བཅུ་བདུན་པའོ།། །། དམ་པའི་ཆོས་པ་དམ་དཀར་པོ་བ་བམ་པོ་བཅུ་གཅིག་པ། དེ་ནས་བཅོམ་ལྡན་འདས་ཀྱིས་བྱང་ཆུབ་
སེམས་དཔའ་སེམས་དཔའ་ཆེན་པོ་རྟག་པར་རྒྱུན་དུ་བརྩོན་ལ་བཀའ་སྩལ་པ། རིགས་ཀྱི་བུ་གང་ལ་ལ་ཆོས་ཀྱི་རྣམ་གྲངས་འདི་འཛིན་པའམ་ཀློག་པའམ་སྟོན་པའམ་ཡི་གེར་འདྲི་བ་ཡང་རུང་སྟེ། རིགས་ཀྱི་བུ་དེ་མིག་གི་ཡོན་ཏན་
བརྒྱད་བརྒྱ་ཐོབ་པར་འགྱུར་རོ། །རྣ་བའི་ཡོན་ཏན་སྟོང་ཉིས་བརྒྱ་ཐོབ་པར་འགྱུར་རོ། །སྣའི་ཡོན་ཏན་བརྒྱད་བརྒྱ་ཐོབ་པར་འགྱུར་རོ། །ལྕེའི་ཡོན་ཏན་སྟོང་ཉིས་བརྒྱ་ཐོབ་པར་འགྱུར་རོ། །ལུས་ཀྱི་ཡོན་ཏན་བརྒྱད་བརྒྱ་ཐོབ་པར་འགྱུརོ། །
ཡིད་ཀྱི་ཡོན་ཏན་སྟོང་ཉིས་བརྒྱ་ཐོབ་པར་འགྱུར་རོ། །དེ་ཡོན་ཏན་བརྒྱ་ཕྲག་མང་པོས་དབང་པོ་དྲུག་གི་གྲོང་ཡོངས་སུ་དག་ཅིང་། ཤིན་དུ་ཡོངས་སུ་དག་པར་འགྱུར་རོ། །དེའི་ཕ་དང་མ་ལས་བྱུང་བའི་ཤའི་མིག་ཐ་མལ་པ་དེ་ལྟར་ཡོངས་སུ་
དག་པའི། མིག་གི་དབང་པོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཕྱི་ནང་དང་བྲག་དང་ནགས་སྟུག་པོར་བཅས་པ་དང་འོག་ཏུ་མནར་མེད་པའི་སེམས་ཅན་དམྱལ་བ་ཆེན་པོ་ལ་ཐུག་པ་ཡན་ཆད། སྟེང་དུ་སྲིད་

46-1-146a

པའི་རྩེ་མོར་ཐུག་པའི་བར་དུ་དེ་དག་ཐམས་ཅད་མཐོང་ངོ་། །ཤའི་མིག་ཐ་མལ་པས་སེམས་ཅན་གང་དག་དེར་སྐྱེས་པ་དེ་དག་ཐམས་ཅད་ཀྱང་མཐོང་སྟེ། དེ་དག་གི་ལས་ཀྱི་རྣམ་པར་སྨིན་པ་ཤེས་སོ། །དེ་ནས་བཅོམ་ལྡན་འདས་ཀྱིས་དེའི་
ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །འཁོར་གྱི་དབུས་སུ་མི་འཇིགས་པ། །གང་ཞིག་མདོ་སྡེ་འདི་འཆད་ཅིང་། །ལེ་ལོ་མེད་པར་རབ་འཆད་པ། །དེ་ཡི་ཡོན་ཏན་ང་ལས་ཉོན། །ཡོན་ཏན་དག་ནི་བརྒྱད་བརྒྱ་ཡི། །དེ་ཡི་མིག་ནི་
ཀུན་དུ་མཛེས། །དེས་ནི་དེ་མིག་དྲི་མ་མེད། །རྙོག་པ་མེད་ཅིང་དག་པར་འགྱུར། །ཕ་དང་མ་ལས་བྱུང་བ་ཡི། །དེ་ཡི་ཤ་ཡི་མིག་དེས་ནི། །འཇིག་རྟེན་ཁམས་འདི་ཐམས་ཅད་ཀྱང་། །ཕྱི་ནང་བཅས་པ་རབ་ཏུ་མཐོང་། །ལྷུན་པོའི་རི་རབ་
ཐམས་ཅད་དང་། །ཁོ་ར་ཡུག་ཀྱང་དེས་མཐོང་སྟེ། །རི་གཞན་གང་རྣམས་གྲགས་པ་དང་། །རྒྱ་མཚོ་དག་ཀྱང་མཐོང་བར་འགྱུར། །འོག་ཏུ་མནར་མེད་དམྱལ་བར་ཐུག །སྟེང་དུ་སྲིད་པའི་རྩེར་གནས་པ། །བརྟན་པ་དེས་ནི་ཀུན་མཐོང་
སྟེ། །ཤ་ཡི་མིག་ནི་དེ་འདྲའོ། །ད་དུང་དེ་ལ་ལྷ་ཡི་མིག །མེད་པས་ཤེས་པ་མ་ཡིན་ནོ། །དེ་ཡི་ཤ་ཡི་མིག་གི་ཡུལ། །དེ་དག་དེ་ལྟར་འགྱུར་བ་ཡིན། །རྟག་པར་རྒྱུན་དུ་བརྩོན་གཞན་ཡང་། །རིགས་ཀྱི་བུའམ་རིགས་ཀྱི་བུ་མོ་དེས་ཆོས་ཀྱི་རྣམ་
གྲངས་འདི་ཡང་དག་པར་བསྟན་ཅིང་གཞན་དག་ལ་ཡང་དག་པར་བཤད་ན། རྣ་བའི་ཡོན་ཏན་སྟོང་ཉིས་བརྒྱ་པོ་དེ་དག་དང་ལྡན་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་མནར་མེད་པའི་སེམས་ཅན་དམྱལ་བ་ཆེན་པོ་ལ་
ཐུག་པ་ཡན་ཆད། སྲིད་པའི་རྩེ་མོ་ལ་ཐུག་པ་མན་ཆད། ཕྱི་ནང་གི་སྒྲ་རྣམ་པ་མང་པོ་གང་དག་འབྱུང་བ་འདི་ལྟ་སྟེ། གླང་པོ་ཆེའི་སྒྲའམ་རྟའི་སྒྲ་འམ་རྔ་མོའི་སྒྲའམ་བ་གླང་གི་སྒྲའམ་རའི་སྒྲའམ་ཤིང་རྟའི་སྒྲའམ་ངུ་བའི་སྒྲའམ། 
མྱ་ངན་གྱི་སྒྲའམ་འཇིགས་པའི་སྒྲའམ་དུང་གི་སྒྲའམ་དྲིལ་བུའི་སྒྲའམ་རྔའི་སྒྲའམ་རྩེད་མོའི་སྒྲའམ་གླུའི་སྒྲའམ་རོལ་མོའི་སྒྲའམ་སྐྱེས་པའི་སྒྲའམ་བུད་མེད་ཀྱི་སྒྲའམ་ཁྱེ་འུའི་སྒྲའམ་བུ་མོའི་སྒྲའམ་ཆོས་ཀྱི་སྒྲའམ་ཆོས་མ་ཡིན་པའི་

46-1-146b

སྒྲའམ་བདེ་བའི་སྒྲའམ་སྡུག་བསྔལ་བའི་སྒྲའམ་བྱིས་པའི་སྒྲའམ་འཕགས་པའི་སྒྲའམ་ཡིད་ཏུ་འོང་བའི་སྒྲའམ་ཡིད་ཏུ་མི་འོང་བའི་སྒྲའམ་ལྷའི་སྒྲའམ་ཀླུའི་སྒྲའམ་གནོད་སྦྱིན་གྱི་སྒྲའམ་དྲི་ཟའི་སྒྲའམ་ལྷ་མ་ཡིན་གྱི་སྒྲའམ་
ནམ་མཁའ་ལྡིང་གི་སྒྲའམ་མིའམ་ཅིའི་སྒྲའམ་ལྟོ་འཕྱེ་ཆེན་པོའི་སྒྲའམ་མིའི་སྒྲའམ་མི་མ་ཡིན་པའི་སྒྲའམ་མེའི་སྒྲའམ་ཆུའི་སྒྲའམ་རླུང་གི་སྒྲའམ་གྲོང་གི་སྒྲའམ་གྲོང་ཁྱེར་གྱི་སྒྲའམ་དགེ་སློང་གི་སྒྲའམ་ཉན་ཐོས་ཀྱི་སྒྲའམ་
རང་སངས་རྒྱས་ཀྱི་སྒྲའམ་བྱང་ཆུབ་སེམས་དཔའི་སྒྲའམ་དེ་བཞིན་གཤེགས་པའི་སྒྲའམ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཕྱི་ནང་ན། སྒྲ་ཅི་བྱུང་བ་ཇི་སྙེད་པ་དེ་དག་ཐམས་ཅད་རྣ་བའི་དབང་པོ་ཐ་མལ་
པ་ཡོངས་སུ་དག་པ་དེས་ཐོས་ཏེ། རེ་ཤིག་ལྷའི་རྣ་བ་ནི་མི་སྒྲུབ་མོད་ཀྱི་སེམས་ཅན་དེ་དང་དེ་དག་གི་སྐད་དུ་རབ་ཏུ་རྟོགས་སོ། །སེམས་ཅན་དེ་དང་དེ་དག་གིས་སྐད་ལ་རྣམ་པར་རྟོག་གོ་རྣམ་པར་འབྱེད་དོ། །རྣ་བའི་དབང་པོ་ཐ་
མལ་པ་དེས་སེམས་ཅན་དེ་དང་དེ་དག་གིས་སྐད་རྣམས་ཐོས་ཀྱང་། དེའི་རྣ་བའི་དབང་པོ་ལ་སྒྲ་དེ་དག་ཐམས་ཅད་ཀྱིས་ཟིལ་གྱིས་མི་ནོན་ཏོ། །རྟག་པར་རྒྱུན་དུ་བརྩོན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་
རྣ་བའི་དབང་པོ་འདི་ལྟ་བུ་ཐོབ་པར་འགྱུར་ཏེ། རེ་ཤིག་ལྷའི་རྣ་བ་ནི་མངོན་པར་མི་སྒྲུབ་པོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས་སྟོན་པས་གཞན་ཡང་འདི་སྐད་ཅེས་བཀའ་
སྩལ་ཏོ། །དེ་ཡི་རྣ་བའི་དབང་པོ་ཐ་མལ་པ་རྙོག་པ་མེད་ཅིང་རྣམ་པར་དག་པར་འགྱུར། །འཇིག་རྟེན་ཁམས་འདི་དག་ན་མ་ལུས་པར། །རྣམ་པ་མང་པོའི་སྒྲ་རྣམས་དེས་ཐོས་ཏེ། །རྔ་བོ་ཆེ་དང་རྫ་རྔ་སྒྲ་སྙན་དང་། །པི་བང་གླིང་བུ་དང་ནི་
པ་ལ་ཀི། །ཤིང་རྟ་བ་ལང་ར་དང་ལུག་དག་དང་། །རྟ་དང་གླང་ཆེན་དག་གི་སྒྲ་ཡང་ཐོས། །འཇམ་ཞིང་ཡིད་འོང་གླུ་ཡི་དབྱངས་ཀྱང་ཐོས། །བརྟན་པ་དེ་ནི་དེ་ལ་ཆགས་པ་མེད། །གང་དང་གང་ན་སུ་དང་སུ་སྨྲ་བ། །བྱེ་བ་སྙེད་ཀྱི་མི་ཡི་སྒྲ་

46-1-147a

རྣམས་ཐོས། །ལྷ་ཡི་སྒྲ་དང་ཀླུའི་དབྱངས་རྣམས་ཀྱང་། །སྙན་ཅིང་ཡིད་ཏུ་འོང་བ་རྟག་པར་ཐོས། །སྐྱེས་པ་བུད་མེད་དག་གི་སྒྲ་རྣམས་དང་། །ཁྱེའུ་དང་བུ་མོའི་སྒྲ་ཡང་དེ་བཞིན་ཐོས། །རི་དང་ཕུག་ན་གང་གནས་དེ་དག་
དང་། །ཁུ་བྱུག་རྨ་བྱ་ཀ་ལ་པིང་ཀ་དང་། །བྱ་རྣམས་གང་དག་ཤང་ཤང་ཏེའུ་རྣམས་དང་། །དེ་དག་རྣམས་ཀྱི་སྒྲ་སྙན་འདིར་ཐོས་སོ། །སེམས་དམྱལ་དག་ན་སྡུག་བསྔལ་གང་མྱོང་བ། །ཤིན་དུ་མི་བཟད་པ་ཡི་སྒྲ་རྣམས་དང་། །
ཟས་ཀྱི་སྡུག་བསྔལ་དག་གིས་ཉེན་པ་ཡི། །ཡི་དགས་རྣམས་ཀྱི་སྒྲ་ཕྱུང་དེ་བཞིན་ཐོས། །ལྷ་མ་ཡིན་དང་རྒྱ་མཚོའི་ནང་གནས་དང་། །སྒྲ་འབྱིན་པ་དང་དེ་བཞིན་གཞན་དག་དང་། །ཆོས་སྨྲ་བ་དེ་འདི་ན་འདུག་བཞིན་དུ། །སྒྲ་
རྣམས་ཐམས་ཅད་ཐོས་ཏེ་ཆོད་པ་མེད། །དུད་འགྲོའི་སྐྱེ་གནས་དག་ན་ཕན་ཚུན་དུ། །སྨྲ་བར་བྱེད་པའི་སྒྲ་རྣམས་གང་ཡིན་པ། །རྣམ་པ་ཐ་དད་སྒྲ་རྣམས་མང་པོ་དག །དེ་ནི་འདི་ན་འདུག་བཞིན་དེ་དག་ཐོས། །ལྷ་གང་
ཚངས་པའི་འཇིག་རྟེན་གནས་པ་དང་། །གང་དག་འོག་མིན་དང་ནི་འོད་གསལ་ལྷ། །ཕན་ཚུན་དུ་ནི་སྒྲ་སྐད་གང་འབྱིན་པ། །དེ་དག་མ་ལུས་ཐམས་ཅད་དེས་ཐོས་སོ། །བདེ་བར་གཤེགས་ཀྱི་བསྟན་ལ་རབ་བྱུང་ནས། །དགེ་
སློང་གང་དག་ཁ་དོན་བྱེད་པ་དང་། །འཁོར་གྱི་ནང་ན་ཆོས་སྟོན་གང་ཡིན་པ། །དེ་དག་སྒྲ་ཡང་རྟག་ཏུ་དེ་ཡིས་ཐོས། །འཇིག་རྟེན་ཁམས་འདིར་བྱང་ཆུབ་སེམས་དཔའ་གང་། ཁ་དོན་དག་ཀྱང་བྱེད་ཅིང་ཕན་ཚུན་དུ། །ཆོས་
རྣམས་ཡང་དག་རྫོགས་པར་གང་བྱེད་པ། །དེ་དག་སྒྲ་རྣམས་རྣམ་པ་ཐ་དད་ཐོས། །བྱང་ཆུབ་སེམས་དཔའ་མདོ་འདི་གང་འཛིན་པས། །སངས་རྒྱས་བཅོམ་ལྡན་མི་འདུལ་ཁ་ལོ་སྒྱུར། །འཁོར་རྣམས་ལ་ཡང་ཆོས་
མཆོག་གང་གསུང་བ། །དུས་གཅིག་ཏུ་ནི་དེ་ཡང་དེ་ཡིས་ཐོས། །མནར་མེད་ཡན་ཆད་སྟེང་དུ་སྲིད་པའི་རྩེ། །སྟོང་གསུམ་གྱི་ནི་ཞིང་འདི་ཐམས་ཅད་ན། །ནང་ལོགས་དག་དང་ཕྱི་ལོགས་དག་ནས་ཀྱང་། །སེམས་ཅན་གང་གིས་

46-1-147b

སྒྲ་མང་ཕྱུང་བ་དང་། །སེམས་ཅན་ཀུན་གྱི་སྒྲ་རྣམས་ཐོས་གྱུར་ཀྱང་། །འོན་ཀྱང་དེ་ཡི་རྣ་བ་འགག་པ་མེད། །དབང་པོ་གསལ་ཞིང་གནས་དང་གནས་ཀྱང་ཤེས། །རྣ་བའི་དབང་པོ་ཐ་མལ་དེ་ཙམ་མོ། །རེ་ཤིག་ལྷ་ཡི་ལ་ནི་འབད་མི་བྱེད། །ཐ་
མལ་རྣ་བ་དེ་ནི་དེ་ལྟར་འདུག །འཇིགས་མེད་གང་གིས་མདོ་འདི་བཟུང་བ་ནི། །དེ་ཡི་ཡོན་ཏན་དག་ནི་དེ་འདྲར་འགྱུར། །རྟག་པར་རྒྱུན་དུ་བརྩོན་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྣམ་གྲངས་འདི་
འཛིན་ཏམ་རབ་ཏུ་སྟོན་ཏམ་ཁ་ཏོན་བྱེད་དམ་ཡི་གེར་འདྲི་བ་དེ། སྣའི་ཡོན་ཏན་བརྒྱད་བརྒྱ་དང་ལྡན་ཞིང་སྣའི་དབང་པོ་ཡོངས་སུ་དག་པར་འགྱུར་ཏེ། དེའི་སྣའི་དབང་པོ་ཡོངས་སུ་དག་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་
གྱི་ཁམས་ཀྱི་ཕྱི་ནང་གི་དྲི་རྣམ་པ་མང་པོ་ཡོད་པ་འདི་ལྟ་སྟེ། རུལ་བའི་དྲི་འམ་ཡིད་ཏུ་འོང་བའི་དྲི་འམ་ཡིད་ཏུ་མི་འོང་བའི་དྲི་འམ་མེ་ཏོག་རྣམ་པ་ཐ་དད་པའི་དྲི་འདི་ལྟ་སྟེ། སྣ་མའི་མེ་ཏོག་དང་མ་ལི་ཀ་དང་ཙམ་པ་ཀ་དང་སྐྱ་སྣར་
གྱི་དྲི་རྣམས་ཀྱང་ཚོར་རོ། །ཆུ་ལས་སྐྱེས་པའི་མེ་ཏོག་རྣམ་པ་མང་པོའི་དྲི་རྣམས་ཀྱང་ཚོར་ཏེ་འདི་ལྟ་སྟེ། ཨུད་པ་ལ་དང་པད་མ་དང་ཀུ་མུ་ཏ་དང་པད་མ་དཀར་པོ་རྣམས་ཀྱི་དྲི་དག་ཀྱང་ཚོར་རོ། །མེ་ཏོག་དང་འབྲས་བུའི་ཤིང་
རྣམ་པ་མང་པོའི་མེ་ཏོག་དང་འབྲས་བུའི་དྲི་རྣམས་ཀྱང་ཚོར་ཏེ། འདི་ལྟ་སྟེ། ཙན་དན་དང་ཏ་མ་ལའི་འདབ་མ་དང་རྒྱ་སྤོས་དང་ཨ་ག་རུའི་དྲི་ཞིམ་པོ་རྣམས་ཀྱང་ཚོར་རོ། །སྤོས་རྣམ་པ་ཐ་དད་པ་བརྒྱ་སྟོང་གནས་གཅིག་ན་
འདུག་པ་ཐམས་ཅད་ཀྱང་ཚོར་རོ། །ཐམས་ཅད་ཀྱང་ཤེས་སོ། །སེམས་ཅན་གྱི་དྲི་རྣམ་པ་མང་པོ་ཡང་ཚོར་ཏེ་འདི་ལྟ་སྟེ། གླང་པོ་ཆེ་དང་རྟ་དང་བ་ལང་དང་ར་ལུག་དང་ཕྱུགས་ཀྱི་དྲི་རྣམས་ཀྱང་ཚོར་རོ། །དུད་འགྲོའི་སྐྱེ་གནས་
སུ་སོང་བའི་སྲོག་ཆགས་རྣམ་པ་མང་པོའི་ལུས་ཀྱི་དྲི་རྣམས་ཀྱང་ཚོར་རོ། །སྐྱེས་པ་དང་བུད་མེད་ཀྱི་ལུས་ཀྱི་དྲི་རྣམས་ཀྱང་ཚོར་རོ། །ཁྱེའུ་དང་བུ་མོའི་ལུས་ཀྱི་དྲི་རྣམས་ཀྱང་ཚོར་རོ། །རྩྭ་དང་ཤིང་གེལ་པ་དང་སྨན་དང་ནགས་ཐག་རིང་པོ་ན་

46-1-148a

འདུག་པའི་དྲི་རྣམས་ཀྱང་ཚོར་རོ། །དྲི་ཡང་དག་པར་ཚོར་ཏེ་དྲི་ཡང་དག་པར་ཤེས་མོད་ཀྱི། དྲི་དེ་དག་གིས་མི་འཕྲོགས། དེ་དག་གིས་མྱོས་པར་མི་འགྱུར་རོ། །དེ་འདི་ན་འདུག་བཞིན་དུ་ལྷ་དག་གི་དྲི་རྣམས་ཀྱང་ཚོར་ཏེ་འདི་ལྟ་སྟེ། ཡོངས་
འདུས་བརྟོལ་གྱི་དྲི་རྣམས་ཀྱང་ཚོར་རོ། །མེ་ཏོག་མན་དཱ་ར་དང་མན་དཱ་ར་ཆེན་པོ་དང་མཉྫུ་ཥ་ཀ་དང་མཉྫུ་ཥ་ཀ་ཆེན་པོ་རྣམས་ཀྱི་ལྷའི་དྲི་རྣམས་ཀྱང་ཚོར་རོ། །ལྷའི་ཨ་ག་རུའི་ཕྱེ་མ་དང་ཙན་དན་གྱི་ཕྱེ་མ་དག་གི་དྲི་རྣམས་ཀྱང་ཚོར་རོ། །ལྷའི་མེ་ཏོག་
རྣམ་པ་ཐ་དད་པ་བརྒྱ་སྟོང་གི་དྲི་དག་ཀྱང་ཚོར་རོ། །དེ་དག་གི་མིང་རྣམས་ཀྱང་ཤེས་སོ། །ལྷའི་བུའི་ལུས་ཀྱི་དྲི་རྣམས་ཀྱང་ཚོར་ཏེ་འདི་ལྟ་སྟེ། ལྷའི་དབང་པོ་བརྒྱ་བྱིན་གྱི་ལུས་ཀྱི་དྲི་ཡང་ཚོར་རོ། །རྣམ་པར་རྒྱལ་བའི་ཁང་བཟང་ན་རྩེ་དགའ་ཞིང་
དགའ་མགུར་སྤྱོད་པ་འམ། ཆོས་བཟངས་ལྷའི་མདུན་ས་ན་སུམ་བཅུ་རྩ་གསུམ་པའི་ལྷ་རྣམས་ལ་ཆོས་སྟོན་པ་འམ། རྩེ་བའི་ཕྱིར་སྐྱེད་མོས་ཚལ་གྱི་སར་བྱུང་བ་དེ་ཡང་ཤེས་སོ། །ལྷའི་བུ་གཞན་རྣམས་ཀྱི་སོ་སོའི་ལུས་ཀྱི་དྲི་རྣམས་ཀྱང་ཚོར་
རོ། །ལྷའི་བུ་མོ་རྣམས་དང་ལྷའི་ཆུང་མ་རྣམས་ཀྱི་ལུས་ཀྱི་དྲི་རྣམས་ཀྱང་ཚོར་རོ། །ལྷ་གཞོན་ནུ་རྣམས་ཀྱི་ལུས་ཀྱི་དྲི་རྣམས་ཀྱང་ཚོར་རོ། །ལྷ་གཞོན་ནུ་མ་རྣམས་ཀྱི་ལུས་ཀྱི་དྲི་རྣམས་ཀྱང་ཚོར་རོ། །དྲི་དེ་དག་གི་ཀྱང་མི་འཕྲོགས་ཤིང་
མྱོས་པར་ཡང་མི་འགྱུར་རོ། །རྣམ་གྲངས་འདིས་སྲིད་པའི་རྩེ་མོའི་བར་དུ་སྐྱེས་པའི་སེམས་ཅན་དག་གི་ལུས་ཀྱི་དྲི་རྣམས་ཀྱང་ཚོར་རོ། །ཚངས་རིས་ཀྱི་ལྷའི་བུ་རྣམས་དང་། ཚངས་པ་ཆེན་པོ་རྣམས་ཀྱི་ལུས་ཀྱི་དྲི་རྣམས་ཀྱང་ཚོར་རོ། །
རྣམ་གྲངས་འདིས་ལྷའི་རིས་ཐམས་ཅད་ཀྱི་ལུས་ཀྱི་དྲི་རྣམས་ཀྱང་ཚོར་རོ། །ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་དང་དེ་བཞིན་གཤེགས་པ་དག་གི་སྐུའི་དྲི་རྣམས་ཀྱང་ཚོར་རོ། །དེ་བཞིན་གཤེགས་པ་དག་གི་
གདན་གྱི་དྲི་རྣམས་ཀྱང་ཚོར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གང་ན་བཞུགས་པ་དེ་ཡང་རབ་ཏུ་ཤེས་སོ། །དེའི་སྣའི་དབང་པོ་དེ་ཡང་དྲི་རྣམ་པ་མང་པོ་དེ་དང་དེ་དག་གིས་མི་འཕྲོགས་ཏེ་

46-1-148b

ཉམས་པའམ་གནོད་པར་འགྱུར་བ་ཡང་མེད་དོ། །དེ་འདོད་ན་དྲི་དེ་དང་དེ་དག་གཞན་དག་ལ་ཡང་སྟོན་ཏེ། དེ་དྲན་པ་ཉམས་པར་འགྱུར་བ་མེད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དེ་ཡི་སྣ་ཡི་དབང་
པོ་རྣམ་དག་འགྱུར། །གང་རྣམས་འཇིག་རྟེན་ཁམས་འདི་ཐམས་ཅད་ན། །དྲི་ཞིམ་དྲི་མི་ཞིམ་པ་ཅི་ཡོད་པ། །དེས་ནི་རྣམ་པ་མང་པོའི་དྲི་ཡང་ཚོར། །སྣ་མའི་མེ་ཏོག་དྲི་དང་མ་ལི་ཀ །ཙན་དན་ཏ་མ་ལ་ཡི་འདབ་མ་དང་། །རྒྱ་སྤོས་དག་དང་ཨ་ག་
རུ་ཡི་དྲི། །མེ་ཏོག་འབྲས་བུ་སྣ་མང་དེ་དག་དང་། །སྐྱེས་པ་བུད་མེད་རིང་ན་འདུག་པ་དང་། །ཁྱེའུ་རྣམས་དང་ནི་བུ་མོ་དེ་དག་དང་། །སེམས་ཅན་རྣམས་ཀྱི་དྲི་ཡང་དེ་བཞིན་ཤེས། །དེ་ཡི་གནས་ཀྱང་དེས་ནི་དྲི་ལས་ཤེས། །འཁོར་ལོས་བསྒྱུར་རྒྱལ་རྣམས་ཀྱང་
དེ་ཡིས་ཤེས། །སྟོབས་ཀྱི་འཁོར་ལོས་བསྒྱུར་དང་རྒྱལ་ཕྲན་དང་། །དེ་བཞིན་ཁྱེའུ་དང་བུ་མོ་དེ་དག་དང་། །ཆུང་མའི་འཁོར་ཀུན་དྲི་ལས་དེ་ཡིས་ཤེས། །ཡོངས་སུ་ལོངས་སྤྱོད་རིན་ཆེན་རྣམ་མང་དང་། །སྤ་བ་གང་དག་ས་ལ་འདུག་རྣམས་དང་། །བུད་མེད་རིན་
པོ་ཆེར་གྱུར་དེ་དག་ཀྱང་། །བྱང་ཆུབ་སེམས་དཔའ་དེ་ཡིས་དྲི་ལས་ཤེས། །དེ་དག་རྣམས་ཀྱི་རྒྱན་རྣམས་ཅི་ཡོད་པ། །ལུས་ལ་བཏབས་པ་རྣམ་པ་སྣ་ཚོགས་གཟུགས། །གོས་དང་ཕྲེང་བ་བྱུག་པ་སྤོས་རྣམས་ཀྱང་། །དྲི་ལས་བྱང་ཆུབ་སེམས་དཔའ་
དེ་ཡིས་ཤེས། །དེ་བཞིན་འགྲིང་དང་འདུག་དང་ཉལ་བ་དང་། །རྩེད་མོ་དགའ་བ་མཐུ་སྟོབས་ཐམས་ཅད་ཀྱང་། །མདོ་སྡེ་དམ་པ་འདི་ནི་གང་འཛིན་པ། །བརྟན་པ་དེ་ཡི་སྣ་ཡི་སྟོབས་ཀྱིས་ཤེས། །སྤོས་མཆོག་འབྲུ་མར་དྲི་ཡང་དེ་བཞིན་ཏེ། །མེ་
ཏོག་འབྲས་བུ་རྣམ་པ་མང་པོའི་དྲི། །དྲི་འདི་ག་གེ་མོ་ན་ཡོད་ཅེས་ཀྱང་། །འདུག་བཞིན་དུ་ནི་ཅིག་ཅར་ཤེས་ཤིང་ཚོར། །རི་ཡི་ཕྲག་ནི་རྣམ་པ་སྣ་ཚོགས་ན། །ཙན་དན་མེ་ཏོག་རྒྱས་མང་གང་ཡོད་དང་། །སེམས་ཅན་གང་དག་དེ་ན་གནས་པ་ཡང་། 
མཁས་དེས་དེ་དག་ཐམས་ཅད་དྲི་ལས་ཤེས། །ཁོར་ཡུག་ངོས་ལ་གང་དག་གནས་པ་དང་། །རྒྱ་མཚོའི་དབུས་ན་ཡང་དག་འཁོད་པ་དང་། །ས་ཡི་དབུས་ན་སེམས་ཅན་གང་གནས་པ། །མཁས་པ་དེས་ནི་ཐམས་ཅད་དྲི་ལས་ཤེས། །ལྷ་དང་

46-1-149a

ལྷ་མ་ཡིན་ཡང་དེ་བཞིན་ཤེས། །དེས་ནི་ལྷ་མིན་བུ་མོ་དག་ཀྱང་ཤེས། །ལྷ་མ་ཡིན་གྱི་རྩེད་མོ་དགའ་བ་འང་ཤེས། །དེ་ཡི་སྣ་ཡི་དབང་པོའི་མཐུ་དེ་འདྲ། །ནགས་ཁྲོད་དག་ན་རྐང་བཞི་གང་ཡོད་པ། །སེང་གེ་སྟག་དང་དེ་བཞིན་གླང་ཆེན་
མཆོག །དེ་ན་མ་ཧེ་བ་ལང་བ་མེན་རྣམས། །དེ་དག་གནས་པ་དེ་ཡི་སྣ་ཡིས་ཤེས། །བུད་མེད་གང་དག་སྦྲུམ་པར་གྱུར་པ་དང་། །ཁྱེའུ་འམ་འོན་ཏེ་བུ་མོ་གང་ཡིན་པ། །རུམ་ན་འཆང་བ་ཤིན་དུ་ངལ་བའི་ལུས། །དེ་ལ་གང་ཡོད་དེ་ཡི་
དྲི་ལས་ཤེས། །སེམས་ཅན་མངལ་དུ་ཞུགས་པ་འང་དེས་ཤེས་ཏེ། །རྣམ་པར་འཇིག་པའི་ཆོས་ཀྱང་དེ་ཡིས་ཤེས། །བུད་མེད་འདི་ནི་སྡུག་བསྔལ་རྣམས་དང་བྲལ། །བསོད་ནམས་ལྡན་པའི་བུ་ནི་འབྱུང་བར་ཤེས། །
སྐྱེས་བུའི་བསམ་པ་མང་པོ་རབ་ཤེས་ཏེ། །བསམ་པའི་དྲི་ཡང་དེ་བཞིན་དེ་ཡིས་ཚོར། །འདོད་ཆགས་ཞེ་སྡང་དེ་བཞིན་འཆབ་པ་དང་། །ཉེ་བར་ཞི་བའི་སེམས་ཀྱི་དྲི་ཡང་ཚོར། །ས་ལ་གཏེར་རྣམས་གང་དག་ཡོད་གྱུར་པ། །
ནོར་རྣམས་དང་ནི་གསེར་དངུལ་འགྲོན་བུ་ཡིས། །ལྕགས་ཀྱི་སྒྲོམ་རྣམས་དེ་བཞིན་གང་བ་དག །དྲི་ལས་བྱང་ཆུབ་སེམས་དཔའ་དེ་ཡིས་ཤེས། །མུ་ཏིག་ནོར་བུ་དོ་ཤལ་སེ་མོ་དོ། །རིན་ཐང་མེད་པའི་རིན་ཆེན་རྣམ་མང་པོ། །
རིན་ཐང་མེད་པའི་མིང་དང་འོད་དབྱིབས་ཀྱང་། །དེ་དག་ཐམས་ཅད་དེ་ཡི་དྲི་ལས་ཤེས། །དེ་བཞིན་སྟེང་གི་ལྷ་ཡི་མེ་ཏོག་རྣམས། །མན་དཱ་ར་དང་མཉྫུ་ཥ་ཀ་དང་། །ཡོངས་འདུའི་མེ་ཏོག་གང་དག་ཡོད་གྱུར་པ། །དཔའ་བོ་འདི་ན་འདུག་
བཞིན་དེ་དག་ཚོར། །གང་གི་གཞལ་མེད་ཁང་རྣམས་ཅི་འདྲ་བ། །ཡངས་དང་འབྲིང་དང་དེ་བཞིན་ཆུང་ངུ་དང་། །དེ་ན་རྣམ་པ་སྣ་ཚོགས་གཟུགས་ཡོད་པ། །འདི་ན་འདུག་བཞིན་སྣ་ཡི་སྟོབས་ཀྱིས་ཚོར། །སྐྱེད་མོས་ཚལ་གྱི་ས་
ཡང་དེ་བཞིན་ཤེས། །ཆོས་བཟངས་དང་ནི་རྣམ་པར་རྒྱལ་བ་ཡི། །ཁང་བཟངས་མཆོག་ན་ལྷ་གང་འཁོད་པ་དག །དེ་ན་ལྷ་བུ་བརྩེན་པ་འང་རྟག་ཏུ་ཤེས། །གང་ཞིག་གང་ན་ལས་ནི་བྱེད་པ་འམ། །འདུག་དང་ཉལ་དང་གང་དུ་འགྲོ་བ་

46-1-149b

ཡང་། །འདི་ན་འདུག་བཞིན་དེ་དག་དྲི་ཡིས་ཚོར། །ལྷ་ཡི་བུ་རྣམས་དེས་ནི་དྲི་ལས་ཤེས། །མེ་ཏོག་མང་བརྒྱན་ལྷ་ཡི་བུ་མོ་གང་། །ཕྲེང་བ་ཐོགས་ཤིང་ལྷབ་ལྷུབ་རྣམས་ཀྱིས་བརྒྱན། །གང་དང་གང་དུ་བརྩེན་ཞིང་འདོང་བ་དག །བྱང་ཆུབ་
སེམས་དཔའ་དེ་ཡིས་དྲི་ལས་ཤེས། །སྟེང་དུ་སྲིད་པའི་རྩེ་མོའི་བར་གྱི་ལྷ། །ཚངས་པ་ཚངས་ཆེན་གཞལ་མེད་ཁང་རྒྱུ་བ། །བསམ་གཏན་གནས་སམ་འོན་ཏེ་ལངས་པ་ཡང་། །དེ་དག་དེར་ནི་དྲི་ལས་རབ་ཏུ་ཤེས། །འོད་གསལ་
གྱི་ནི་ལྷ་ཡི་བུ་རྣམས་ཀྱང་། །འཆི་འཕོས་སྐྱེས་པ་གསར་དུ་འོངས་པ་ཤེས། །བྱང་ཆུབ་སེམས་དཔའ་མདོ་འདི་འཛིན་པ་ཡི། །སྣ་ཡི་དབང་པོ་འདི་འདྲར་འགྱུར་བ་ཡིན། །དགེ་སློང་གང་རྣམས་བདེ་གཤེགས་བསྟན་པ་ལ། །
མངོན་པར་བརྩོན་པ་འཆག་ཅིང་འདུག་པ་དང་། །ལུང་ནོད་ཁ་དོན་མོས་པའི་དགེ་སློང་རྣམས། །ཐམས་ཅད་བྱང་ཆུབ་སེམས་དཔའ་དེ་ཡིས་ཤེས། །རྒྱལ་བའི་སྲས་པོ་ཉན་ཐོས་གང་ཡོད་པ། །ལ་ལ་རྟག་ཏུ་ཤིང་དྲུང་གནས་པ་
དག །དགེ་སློང་འདི་ཞེས་བྱ་བར་འདིར་གནས་ཤེས། །དེ་དག་ཐམས་ཅད་མཁས་པ་དེས་ཤེས་སོ། །བྱང་ཆུབ་སེམས་དཔའ་དྲན་ལྡན་བསམ་གཏན་པ། །རྟག་ཏུ་ལུང་ནོད་ཁ་དོན་དགའ་གང་དག །འཁོར་གྱི་ནང་ན་ཆོས་ཀྱང་རབ་
འཆད་པ། །དེ་དག་དྲི་ལས་བྱང་ཆུབ་སེམས་དཔས་ཤེས། །བདེ་བར་གཤེགས་པ་ཐུབ་ཆེན་ཕྱོགས་གང་ན། །ཉན་ཐོས་དགེ་འདུན་མདུན་གྱིས་བལྟས་དབུས་ན། །ཕན་ཞིང་ཐུགས་བརྩེ་རབ་ཏུ་ཆོས་འཆད་པ། །འཇིག་རྟེན་མགོན་པོ་དེ་ཡང་
དྲི་ལས་ཤེས། །སེམས་ཅན་གང་རྣམས་ཆོས་འདི་ཉན་པ་དག །གང་རྣམས་ཐོས་ནས་དགའ་བའི་ཡིད་གྱུར་པ། །དེ་ན་རྒྱལ་བའི་འཁོར་རྣམས་ཐམས་ཅད་ཀྱང་། །འདི་ན་འདུག་བཞིན་བྱང་ཆུབ་སེམས་དཔའ་ཤེས། །དེ་ཡི་སྣ་ཡི་
སྟོབས་ནི་དེ་འདྲར་འགྱུར། །དེ་ལ་ལྷ་ཡི་སྣ་ནི་ད་དུང་མེད། །ཟག་པ་མེད་པར་གྱུར་པ་ལྷ་ཡི་སྣ། །དེ་ཡི་སྡུན་དུ་འགྲོ་བར་འདི་འགྱུར་རོ། །རྟག་པར་རྒྱུན་དུ་བརྩོན་གཞན་ཡང་རིགས་ཀྱི་བུ་འམ་རིགས་ཀྱི་བུ་མོ་དེ། ཆོས་ཀྱི་རྣམ་གྲངས་འདི་འཛིན་

46-1-150a

ཏམ་སྟོན་ཏམ་རབ་ཏུ་འཆད་དམ་ཡི་གེར་འདྲིར་འཇུག་ན། ལྕེའི་ཡོན་ཏན་སྟོང་ཉིས་བརྒྱ་པོ་དེ་དག་དང་ལྡན་པའི་ལྕེའི་དབང་པོ་ཐོབ་པར་འགྱུར་ཏེ། དེ་ལྕེའི་དབང་པོ་དེ་ལྟ་བུས་རོ་གང་དག་མྱངས་པ་དང་རོ་གང་དག་ཚོར་བ་དང་རོ་གང་དག་
ལྕེའི་དབང་པོ་ལ་རེག་པ་དེ་ཐམས་ཅད་ལྷའི་རོ་བྲོ་བ་དམ་པར་འགྱུར་རོ། །ཇི་ལྟར་ཡིད་དུ་མི་འོང་བའི་རོ་གང་དག་ཡང་མི་མྱོང་བ་དེ་ལྟ་བུ་མྱོང་བར་འགྱུར་རོ། །ཡིད་ཏུ་མི་འོང་བའི་རོ་གང་ཡིན་པ་དེ་དག་ཀྱང་། དེའི་ལྕེའི་དབང་པོའི་སྟེང་དུ་རེག་ན་
ལྷའི་རོ་བྲོ་བར་འགྱུར་རོ། །འཁོར་གྱི་ནང་དུ་སོང་ནས་ཆོས་གང་བཤད་པ་དེས། སེམས་ཅན་དེ་དག་དབང་པོ་ཚིམ་པར་འགྱུར་རོ། །མགུ་བ་དང་ཡོངས་སུ་མགུ་བ་དང་མཆོག་ཏུ་དགའ་བ་སྐྱེའོ། །དེའི་སྒྲ་ཡང་ཟབ་ཅིང་ཡིད་ཏུ་འོང་ལ་གཉེན་
ཞིང་སྙན་པར་འགྱུར་ཏེ། སྙིང་ལ་འབབ་པ་དང་དགའ་བར་འགྱུར་བ་དེས་སེམས་ཅན་དེ་དག་དགའ་མགུ་ཡིད་རངས་པའི་སེམས་སུ་འགྱུར་རོ། །གང་དག་ལ་ཆོས་བཤད་པ་དེ་དག་གིས་ཀྱང་དེའི་དབྱངས་འཇམ་ཞིང་སྙན་པ་ཡིད་ཏུ་འོང་བ་
ཐོས་ནས། ལྷ་རྣམས་ཀྱང་བལྟ་བ་དང་ཕྱག་བྱ་བ་དང་བསྙེན་བཀུར་བྱ་བ་དང་ཆོས་མཉན་པའི་ཕྱིར་དེའི་དྲུང་དུ་འགྲོ་བར་སེམས་སོ། །ལྷའི་བུ་དང་ལྷའི་བུ་མོ་རྣམས་ཀྱང་བལྟ་བ་དང་ཕྱག་བྱ་བ་དང་བསྙེན་བཀུར་བྱ་བ་དང་། ཆོས་
མཉན་པའི་ཕྱིར་དྲུང་དུ་འགྲོ་བར་སེམས་སོ། །བརྒྱ་བྱིན་དང་ཚངས་པ་དང་ཚངས་རིས་ཀྱི་ལྷའི་བུ་རྣམས་ཀྱང་བལྟ་བ་དང་ཕྱག་བྱ་བ་དང་བསྙེན་བཀུར་བྱ་བ་དང་ཆོས་མཉན་པའི་ཕྱིར་དྲུང་དུ་འགྲོ་བར་སེམས་སོ། །ཀླུ་དང་ཀླུའི་བུ་མོ་རྣམས་
ཀྱང་བལྟ་བ་དང་ཕྱག་བྱ་བ་དང་བསྙེན་བཀུར་བྱ་བ་དང་ཆོས་མཉན་པའི་ཕྱིར་དྲུང་དུ་འགྲོ་བར་སེམས་སོ། །ལྷ་མ་ཡིན་དང་ལྷ་མ་ཡིན་གྱི་བུ་མོ་རྣམས་ཀྱང་བལྟ་བ་དང་ཕྱག་བྱ་བ་དང་བསྙེན་བཀུར་བྱ་བ་དང་ཆོས་མཉན་པའི་ཕྱིར་
དྲུང་དུ་འགྲོ་བར་སེམས་སོ། །ནམ་མཁའ་ལྡིང་དང་ནམ་མཁའ་ལྡིང་གི་བུ་མོ་རྣམས་ཀྱང་བལྟ་བ་དང་ཕྱག་བྱ་བ་དང་བསྙེན་བཀུར་བྱ་བ་དང་ཆོས་མཉན་པའི་ཕྱིར་དྲུང་དུ་འགྲོ་བར་སེམས་སོ། །མི་འམ་ཅི་དང་མིའམ་ཅིའི་བུ་མོ་

46-1-150b

དང་གནོད་སྦྱིན་དང་གནོད་སྦྱིན་གྱི་བུ་མོ་དང་ཤ་ཟ་དང་ཤ་ཟའི་བུ་མོ་རྣམས་ཀྱང་བལྟ་བ་དང་ཕྱག་བྱ་བ་དང་བསྙེན་བཀུར་བྱ་བ་དང་ཆོས་མཉན་པར་བྱ་བའི་ཕྱིར་དྲུང་དུ་འགྲོ་བར་སེམས་ཏེ། དེ་དག་ཀྱང་དེ་ལ་བཀུར་བསྟི་བྱེད་སྟི་སྟང་དུ་བྱེད་བཙུན་པར་བྱེད་
མཆོད་པ་དང་། གསོལ་བར་བྱེད་དབུལ་བར་བྱེད་དོ། །དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་རྣམས་ཀྱང་ལྟ་འདོད་པར་འགྱུར་རོ། །རྒྱལ་པོ་དང་རྒྱལ་བུ་དང་བློན་པོའི་བློན་པོ་རྣམས་ཀྱང་ལྟ་འདོད་པར་འགྱུར་རོ། །སྟོབས་
ཀྱི་འཁོར་ལོ་སྒྱུར་བའི་རྒྱལ་པོ་དང་འཁོར་ལོ་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་བུ་དང་བཅས་པ་བློན་པོ་དང་བཅས་པ་བཙུན་མོའི་འཁོར་དང་གཡོག་འཁོར་དང་བཅས་པ་ཡང་བཀུར་བསྟི་བྱ་བའི་ཕྱིར་ལྟ་འདོད་པར་
འགྱུར་རོ། །ཆོས་སྨྲ་བ་དེ་དེ་བཞིན་གཤེགས་པས་ཇི་སྐད་གསུངས་པ་བཞིན་ཡང་དག་པ་ཇི་ལྟ་བ་བཞིན་དུ་སྙན་པའི་ཆོས་འཆད་དོ། །བྲམ་ཟེ་དང་ཁྱིམ་བདག་དང་ཡུལ་གྱི་མི་གཞན་དག་ཀྱང་རྟག་ཏུ་རྒྱུན་མི་འཆད་པར་ཚེའི་
མཐའ་མར་ཕྱིན་གྱི་བར་དུ། ཆོས་སྨྲ་བ་དེའི་ཕྱི་བཞིན་དུ་འབྲང་བར་འགྱུར་རོ། །དེ་བཞིན་གཤེགས་པའི་ཉན་ཐོས་རྣམས་ཀྱང་དེ་ལ་ལྟ་འདོད་པར་འགྱུར་རོ། །རང་སངས་རྒྱས་རྣམས་ཀྱང་དེ་ལ་ལྟ་འདོད་པར་འགྱུར་རོ། །སངས་རྒྱས་
བཅོམ་ལྡན་འདས་རྣམས་ཀྱང་དེ་ལ་གཟིགས་བཞེད་པར་འགྱུར་རོ། །རིགས་ཀྱི་བུའམ་རིགས་ཀྱི་བུ་མོ་དེ་ཕྱོགས་གང་ན་འདུག་པ་དེའི་ཕྱོགས་སུ་དེ་བཞིན་གཤེགས་པ་གཟིགས་ཏེ་ཆོས་འཆད་དོ། །སངས་རྒྱས་
ཀྱི་ཆོས་རྣམས་ཀྱི་སྣོད་ཏུ་འགྱུར་ཏེ། དེ་ལྟར་དེ་ཟབ་ཅིང་ཡིད་ཏུ་འོང་བའི་ཆོས་རྣམས་ཀྱི་སྒྲ་འབྱིན་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དེ་ཡི་ལྕེ་ཡི་དབང་
པོ་མཆོག་ཏུ་འགྱུར། །ནམ་ཡང་ངན་པའི་རོ་ནི་ཡོང་མི་མྱོང་། །རེག་མ་ཐག་ཏུ་ལྷ་ཡི་རོ་བྲོར་འགྱུར། །ལྷ་ཡི་རོ་བྲོ་ཤིན་དུ་ལྡན་པ་ཡིན། །རྣ་བར་སྙན་ཅིང་ཡིད་ཏུ་འོང་བ་དང་། །འཇམ་ཞིང་མཉེན་པའི་སྒྲ་སྐད་རབ་ཏུ་སྨྲ། །འཁོར་གྱི་

46-1-151a

དབུས་དེར་དགའ་བར་འགྱུར་བ་ཡི། །ཟབ་མོའི་དབྱངས་ནི་རྟག་པར་རབ་ཏུ་སྨྲ། །བྱེ་བ་ཁྲག་ཁྲིག་དུ་མའི་དཔེ་རྣམས་ཀྱིས། །དེས་བཤད་པ་ལ་ཆོས་རྣམས་གང་ཉན་པ། །དེ་ན་དེ་ལ་མཆོག་ཏུ་དགའ་བ་སྐྱེད། །དེ་ལ་མཆོད་པ་
དཔག་ཏུ་མེད་པ་བྱེད། །ལྷ་དང་ཀླུ་དང་གནོད་སྦྱིན་ལྷ་མིན་དང་། །གསང་བ་པ་དག་རྟག་ཏུ་དེ་ལྟ་འདོད། །ཆོས་འདི་ཤིན་དུ་གུས་པར་ཉན་པ་དེ། །ཡོན་ཏན་འདི་དག་ཐམས་ཅད་དེ་ཡིར་འགྱུར། །འདོད་པར་གྱུར་ན་འཇིག་རྟེན་ཁམས་འདི་
དག །དབྱངས་ཀྱིས་ཐམས་ཅད་དུ་ཡང་གོ་བར་བྱེད། །དེ་ཡི་དབྱངས་ནི་མཉེན་ཞིང་འཇམ་པ་སྟེ། །ཟབ་ཅིང་སྙན་ལ་ཤིན་དུ་དགའ་བར་འགྱུར། །རྒྱལ་པོ་ས་བདག་འཁོར་ལོ་སྒྱུར་བ་རྣམས། །མཆོད་པའི་ཕྱིར་ནི་དེ་ཡི་དྲུང་དུ་འདོང་། །
བུ་དང་ཆུང་མར་བཅས་ཏེ་ཐལ་མོ་སྦྱར། །རྟག་ཏུ་དེ་ལ་ཆོས་ནི་ཉན་པར་འགྱུར། །གནོད་སྦྱིན་རྣམས་ཀྱིས་རྟག་ཏུ་བཀུར་བསྟི་བྱེད། །ཀླུ་དང་དྲི་ཟ་དག་གི་ཚོགས་རྣམས་དང་། །ཤ་ཟ་ཕོ་དང་ཤ་ཟ་མོ་རྣམས་ཀྱིས། །སྟི་སྟང་
རི་མོ་མཆོད་པ་རྣམས་ཀྱང་བྱས། །ཚངས་པ་རྣམས་ལ་དེ་ནི་དབང་བྱེད་འགྱུར། །ལྷ་བུ་དབང་ཕྱུག་ཆེ་དང་དབང་ཕྱུག་དང་། །བརྒྱ་བྱིན་དེ་བཞིན་ལྷ་ཡི་བུ་གཞན་དང་། །ལྷ་ཡི་བུ་མོ་མང་པོ་དྲུང་དུ་འགྲོ། །སངས་རྒྱས་འཇིག་རྟེན་ཕན་
ཞིང་ཐུགས་བརྩེ་གང་། །ཉན་ཐོས་བཅས་པས་དེ་ཡི་དབྱངས་ཐོས་ནས། །ཞལ་སྟོན་པ་དང་བསྲུང་བ་དག་ཀྱང་མཛད། །ཆོས་འདི་འཆད་པ་ལ་ནི་དགྱེས་པར་འགྱུར། །རྟག་པར་རྒྱུན་དུ་བརྩོན་གཞན་ཡང་བྱང་ཆུབ་སེམས་
དཔའ་སེམས་དཔའ་ཆེན་པོ་ཆོས་ཀྱི་རྣམ་གྲངས་འདི་འཛིན་ཏམ་ཀློག་གམ་རབ་ཏུ་འཆད་དམ་སྟོན་ཏམ་ཡི་གེར་བྲིས་ན། དེ་ཡི་ལུས་ཀྱི་ཡོན་ཏན་བརྒྱད་བརྒྱ་ཐོབ་པར་འགྱུར་རོ། ། དེ་ཡི་ལུས་ཡོངས་སུ་དག་
སྟེ་ལྤགས་པའི་མདོག་བཻ་དཱུརྱ་ལྟར་དག་ཅིང་སེམས་ཅན་རྣམས་ཀྱིས་མཐོང་ན་དགའ་བར་འགྱུར་རོ། །དེ་ཡི་ལུས་ཡོངས་སུ་དག་པ་དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་སྣང་སྟེ། སྟོང་གསུམ་གྱི་

46-1-151b

སྟོང་ཆེན་པོའི་འཇིག་རྟེན་གྱི་ཁམས་ན། སེམས་ཅན་གང་དག་འཆི་འཕོ་བ་དང་སྐྱེ་བ་དང་ངན་པ་དང་བཟང་པོ་དང་མདོག་བཟང་པོ་དང་མདོག་ངན་པ་དང་བདེ་འགྲོ་དང་ངན་འགྲོ་དང་རི་ཁོར་ཡུག་དང་ཁོར་ཡུག་ཆེན་པོ་དང་ལྷུན་པོ་དང་རིའི་རྒྱལ་པོ་རི་རབ་ལ་
སེམས་ཅན་གང་དག་གནས་པ་རྣམས་དང་། འོག་ཏུ་མནར་མེད་པའི་སེམས་ཅན་དམྱལ་བ་ལ་ཐུག་པ་དང་། སྟེང་དུ་སྲིད་པའི་རྩེ་མོའི་བར་དུ་སེམས་ཅན་གང་དག་གནས་པ་དེ་དག་ཐམས་ཅད་ཀྱང་བདག་གི་ལུས་ལ་སྣང་བར་འགྱུར་རོ། །
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ཉན་ཐོས་སམ་རང་སངས་རྒྱས་སམ་བྱང་ཆུབ་སེམས་དཔའ་འམ་དེ་བཞིན་གཤེགས་པ་གང་ལ་ལ་དག་བཞུགས་པ་དང་། དེ་བཞིན་གཤེགས་པ་དེ་དག་ཆོས་གང་སྟོན་པ་དང་། 
སེམས་ཅན་གང་དག་དེ་བཞིན་གཤེགས་པ་དེ་དག་ལ་བསྙེན་བཀུར་བྱེད་པ་དང་། སེམས་ཅན་དེ་དག་ཐམས་ཅད་ཀྱི་ལུས་སོ་སོར་ཐོབ་པ་ཡང་། བདག་གི་ལུས་ལ་སྣང་བར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་ཡི་ལུས་ཡོངས་སུ་
དག་པའི་ཕྱིར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །གང་ཞིག་རྒྱ་ཆེ་མདོ་འདི་འཛིན་བྱེད་པ། །དེ་ཡི་ལུས་ནི་ཡོངས་སུ་དག་པར་འགྱུར། །རྣམ་དག་བཻ་དཱུརྱ་ལྟར་གྲུབ་པ་སྟེ། །
རྟག་ཏུ་སེམས་ཅན་རྣམས་ཀྱིས་མཐོང་ན་དགའ། །མེ་ལོང་ཕྱིས་པར་གཟུགས་བརྙན་སྣང་བ་བཞིན། །ལུས་ལ་འཇིག་རྟེན་དེ་དག་དེ་བཞིན་སྣང་། །སེམས་ཅན་གཞན་མིན་རང་བྱུང་དེ་ཡིས་མཐོང་། །ཡོངས་སུ་དག་པའི་
ལུས་ནི་དེ་འདྲའོ། །འཇིག་རྟེན་ཁམས་འདིའི་སེམས་ཅན་ཅི་ཡོད་པ། །ལྷ་མི་ལྷ་མ་ཡིན་དང་གསང་བ་པ། །སེམས་དམྱལ་ཡི་དགས་དུད་འགྲོའི་སྐྱེ་གནས་རྣམས། །ལུས་དེ་ལ་ནི་གཟུགས་བརྙན་སོ་སོར་སྣང་། །སྲིད་
པའི་རྩེ་བར་གཞལ་མེད་ཁང་གི་ལྷ། །བྲག་རྣམས་དང་ནི་རི་དང་ཁོ་ར་ཡུག །གངས་རི་རི་རབ་ལྷུན་པོ་ཆེན་པོ་རྣམས། །དེ་ཡི་ལུས་ལས་རྣམ་པ་ཐམས་ཅད་སྣང་། །དེ་ཡི་ལུས་ལ་ཉན་ཐོས་བཅས་པ་ཡི། །སངས་རྒྱས་

46-1-152a

རྣམས་དང་སངས་རྒྱས་སྲས་གཞན་ཡང་། །བྱང་ཆུབ་སེམས་དཔའ་གཅིག་པུ་གང་གནས་དང་། །ཚོགས་ལ་གང་དག་ཆོས་སྟོན་རྣམས་ཀྱང་སྣང་། །དེ་ཡི་རྣམ་དག་ལུས་ནི་དེ་འདྲ་སྟེ། །འཇིག་རྟེན་ཁམས་རྣམས་
ཐམས་ཅད་དེ་ལ་སྣང་། །དེ་ནི་ད་དུང་ལྷ་ཡིས་མ་ཐོབ་སྟེ། །དེ་ཡི་རང་བཞིན་ལུས་ནི་དེ་འདྲའོ། །རྟག་པར་རྒྱུན་དུ་བརྩོན་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པ་ཡོངས་སུ་མྱ་ངན་ལས་
འདས་ནས། ཆོས་ཀྱི་རྣམ་གྲངས་འདི་འཛིན་ཏམ་སྟོན་ཏམ་རབ་ཏུ་འཆད་དམ་ཡི་གེར་འདྲི་འམ་ཀློག་ན། ཡིད་ཀྱི་ལས་ཀྱི་ཡོན་ཏན་སྟོང་ཉིས་བརྒྱ་པོ་དེ་དག་དང་ལྡན་ཞིང་ཡིད་ཀྱི་དབང་པོ་ཡོངས་སུ་དག་པར་འགྱུར་རོ། །དེ་ཡིད་
ཀྱི་དབང་པོ་ཡོངས་སུ་དག་པ་དེས། ཐ་ན་ཚིགས་སུ་བཅད་པ་གཅིག་ཐོས་པས་ཀྱང་དེའི་དོན་མང་པོར་ཤེས་སོ། །དེས་དེ་དག་ཁོང་དུ་ཆུད་ནས་དེའི་ཕྱིར་ཟླ་བ་གཅིག་ཏུ་ཆོས་སྟོན་ཏོ། །ཟླ་བ་བཞི་འམ་ལོར་ཡང་ཆོས་སྟོན་ཏོ། །ཆོས་
གང་བཤད་པ་དེ་ལ་དེ་བརྗེད་ངས་པར་མི་འགྱུར་རོ། །འཇིག་རྟེན་པའི་འཇིག་རྟེན་གྱི་ཐ་སྙད་གང་དག་སྐད་དམ་སྔགས་ཅི་ཡོད་པ་དེ་དག་ཐམས་ཅད་ཆོས་ཀྱི་ཚུལ་དང་སྦྱོར་རོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
ན། སེམས་ཅན་འགྲོ་བ་དྲུག་ཏུ་སྐྱེས་ཤིང་འཁོར་བའི་སེམས་ཅན་གང་ཇི་སྙེད་པ་དེ་དག་ཐམས་ཅད་ཀྱི་སེམས་ཀྱི་སྤྱོད་པའི་གཡོ་བ་རྣམས་ཀྱང་ཤེས་སོ། །གཡོས་པ་དང་བསམ་པ་དང་སྤྲོས་པ་རྣམས་ཀྱང་ཤེས་ཤིང་རབ་ཏུ་
རྟོགས་སོ། །རེ་ཤིག་འཕགས་པའི་ཡེ་ཤེས་མ་ཐོབ་ཀྱང་དེའི་ཡིད་ཀྱི་དབང་པོ་འདི་ལྟ་བུར་ཡོངས་སུ་དག་པར་འགྱུར་རོ། །ཆོས་ཀྱི་ངེས་པའི་ཚིག་གང་དང་གང་རྗེས་སུ་བསམས་ཏེ། གཏམ་སྟོན་པ་དེ་དག་ཐམས་ཅད་ཀྱང་
ཡང་དག་པར་སྟོན་ཏོ། །དེ་བཞིན་གཤེགས་པས་གསུངས་པ་ཐམས་ཅད་སྟོན་ཏོ། །སྔོན་གྱི་རྒྱལ་བས་མདོ་སྡེའི་རྣམ་གྲངས་བསྟན་པ་ཐམས་ཅད་འཆད་དོ། །དེ་ནས་བཅོམ་ལྡན་འདས་ཀྱི་དེའི་ཚེ་ཚིགས་སུ་བཅད་

46-1-152b

པ་འདི་དག་བཀའ་སྩལ་ཏོ། །དེ་ཡི་ཡིད་ཀྱི་དབང་པོ་རྣམ་དག་འགྱུར། །གསལ་ཞིང་འོད་གསལ་རྙོག་པ་མེད་པ་སྟེ། །ངན་པ་བཟང་པོ་དེ་བཞིན་བར་མ་དང་། །དེས་ནི་རྣམ་པ་མང་པོའི་ཆོས་རབ་ཤེས། །བརྟན་པ་དེས་ནི་ཚིགས་བཅད་
གཅིག་ཐོས་ཀྱང་། །དེ་དོན་རྣམ་པ་མང་པོ་དེ་ཡིས་ཤེས། །ཟླ་བ་བཞི་འམ་དེ་བཞིན་ལོ་ཡི་བར། །རྟག་ཏུ་ཡང་དག་འབྲེལ་པར་རབ་ཏུ་སྨྲ། །སེམས་ཅན་གང་རྣམས་འཇིག་རྟེན་ཁམས་འདི་ཡི། །ཕྱི་རོལ་དག་དང་ནང་ན་གང་གནས་པ། །
ལྷ་མི་ལྷ་མ་ཡིན་དང་གསང་བ་པ། །ཀླུ་དང་དུད་འགྲོའི་སྐྱེ་གནས་གར་སོང་དང་། །འགྲོ་བ་དྲུག་ན་གནས་པའི་སེམས་ཅན་རྣམས། །དེ་དག་རྣམས་ཀྱིས་རྣམ་པར་ཅི་བསམས་པ། །སྐད་ཅིག་ཏུ་ནི་ཐམས་ཅད་མཁས་པས་ཤེས། །
མདོ་འཛིན་པ་ཡི་ཕན་ཡོན་འདི་དག་གོ། །བསོད་ནམས་བརྒྱ་ཡི་མཚན་ལྡན་སངས་རྒྱས་ཀྱིས། །འཇིག་རྟེན་ཀུན་ལ་ཆོས་གང་རབ་བཤད་པ། །དེ་ཡི་རྣམ་པར་དག་པའི་སྒྲ་ཡང་ཐོས། །དེ་ཡིས་ཅི་བསྟན་པ་ཡང་དེས་བཟུང་སྟེ། །
ཆོས་ཀྱི་མཆོག་ཀྱང་མང་དུ་རྣམ་པར་སེམས། །དེ་ནི་རྟག་ཏུ་མང་པོ་སྟོན་པར་འགྱུར། །དེ་ནི་རྨོངས་པར་ནམ་ཡང་མི་འགྱུར་ཏེ། །མདོ་འཛིན་པ་ཡི་ཕན་ཡོན་འདི་དག་གོ། །དེས་ནི་མཚམས་དང་ཚིགས་ཀྱང་རབ་ཏུ་ཤེས། །ཆོས་
རྣམས་ཀུན་གྱི་མཚན་ཉིད་མི་མཐུན་དང་། །དོན་དང་ངེས་པའི་ཚིག་ཀྱང་རབ་ཏུ་ཤེས། །ཇི་ལྟར་དེ་དག་ཤེས་པ་བཞིན་དུ་འཆད། །སྔོན་གྱི་འཇིག་རྟེན་དག་གི་སློབ་དཔོན་གྱིས། །ཡུན་རིང་འདིར་ནི་མདོ་སྡེ་གང་བཤད་པ། །དེ་ཡི་ཆོས་
རྣམས་འཁོར་གྱི་དབུས་སུ་ཡང་། །འཇིགས་པ་མེད་པར་རྟག་ཏུ་དེ་འཆད་དོ། །མདོ་འདི་བཟུང་བ་དང་ནི་བཀླགས་པ་ཡིས། །དེ་ཡི་ཡིད་ཀྱི་དབང་པོ་དེ་འདྲར་འགྱུར། །ད་དུང་མ་ཆགས་ཡེ་ཤེས་མ་ཐོབ་སྟེ། །འདི་ནི་དེ་ཡི་སྔོན་དུ་
འགྲོ་བར་འགྱུར། །བདེ་བར་གཤེགས་པའི་མདོ་འདི་འཛིན་པ་ཡང་། སློབ་དཔོན་གྱི་ནི་ས་ལ་འདུག་པ་ཡིན། །སེམས་ཅན་ཐམས་ཅད་ལ་ཡང་ཆོས་སྨྲ་སྟེ། །ངེས་ཚིག་བྱེ་བ་སྙེད་ལ་མཁས་པར་འགྱུར། །དམ་པའི་ཆོས་པད་མ་

46-1-153a

དཀར་པོ་ལས་སྐྱེ་མཆེད་དྲུག་རྣམ་པར་དག་པའི་ཕན་ཡོན་གྱི་ལེའུ་ཞེས་བྱ་སྟེ་བཅྭ་བརྒྱད་པའོ།། །། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་
མཐུ་ཆེན་ཐོབ་ལ་བཀའ་སྩལ་པ། མཐུ་ཆེན་ཐོབ་རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། གང་དག་ཁ་ཅིག་ཆོས་ཀྱི་རྣམ་གྲངས་འདི་ལྟ་བུ་འདི་སྤོང་བ་དང་མདོ་སྡེ་འདི་ལྟ་བུ་འཛིན་པའི་དགེ་སློང་དང་དགེ་སློང་
མ་དང་དགེ་བསྙེན་དང་དགེ་བསྙེན་མ་ལ་གཤེ་ཞིང་མི་སྙན་པར་སྨྲ་བ་དང་ཚོགས་པ་མི་དབྱུང་བའི་ཚིག་རྩུབ་པོ་ཟེར་བ་དེ་དག་གི་རྣམ་པར་སྨིན་པ་འདོད་པ་མ་ཡིན་པར་འགྱུར་ཏེ། དེ་ནི་ཚིག་གིས་བརྗོད་ཏུ་ཡང་མི་ནུས་
སོ། །གང་དག་མདོ་སྡེ་འདི་ལྟ་བུ་འདི་འཛིན་པ་དང་ཀློག་པ་དང་ཀུན་ཆུབ་པར་བྱེད་པ་དང་འཆད་པ་དང་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དེ་དག་གི་རྣམ་པར་སྨིན་པ་ནི་འདོད་པར་འགྱུར་ཏེ། ཇི་ལྟར་ངས་སྔར་བརྗོད་
པ་དེ་ལྟ་བུར་མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་ཡོངས་སུ་དག་པ་ཐོབ་པར་འགྱུར་རོ། །མཐུ་ཆེན་ཐོབ་སྔོན་བྱུང་བ་འདས་པའི་དུས་ན། བསྐལ་པ་གྲངས་མེད་པའི་ཡང་ཆེས་གྲངས་མེད་པ་ཡངས་པ་ཚད་མེད་པ་བསམ་
གྱིས་མི་ཁྱབ་པ་དེ་དག་གི་ཡང་ཆེས་ཕ་རོལ་དུ་གྱུར་པ་དེའི་ཚེ་དེའི་དུས་ན་ཐ་དད་ཏུ་གནས་པའི་བསྐལ་པ་ལ། འཇིག་རྟེན་གྱི་ཁམས་ཆེར་འབྱུང་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིགས་
བསྒྲགས་དབྱངས་ཀྱི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། མཐུ་ཆེན་ཐོབ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་བསྒྲགས་དབྱངས་ཀྱི་རྒྱལ་པོ་དེ་

46-1-153b

འཇིག་རྟེན་གྱི་ཁམས་ཆེར་བྱུང་བ་དེ་ན། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་གྱི་མདུན་ན་ཆོས་སྟོན་ཏོ། །ཉན་ཐོས་རྣམས་ལ་ནི་སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་
བ་དང་ཡིད་མི་བདེ་བ་དང་འཁྲུག་པ་ལས་ཤིན་དུ་བཟླ་བའི་ཕྱིར། མྱ་ངན་ལས་འདས་པའི་མཐར་ཐུག་པ་འཕགས་པའི་བདེན་པ་བཞི་དང་ལྡན་པ་རྟེན་ཅིང་འབྲེལ་པར་འབྱུང་བ་ལ་འཇུག་པའི་ཆོས་སྟོན་ཏོ། །བྱང་ཆུབ་སེམས་དཔའ་སེམས་
དཔའ་ཆེན་པོ་རྣམས་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བརྩམས་ཏེ། ཕ་རོལ་ཏུ་ཕྱིན་པ་དྲུག་དང་ལྡན་པ་དེ་བཞིན་གཤེགས་པའི་ཡེ་ཤེས་ཀྱི་མཐར་ཐུག་པའི་ཆོས་སྟོན་ཏོ། །མཐུ་ཆེན་ཐོབ་བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་བསྒྲགས་དབྱངས་ཀྱི་རྒྱལ་པོ་དེའི་ཚེའི་ཚད་ནི། བསྐལ་པ་བྱེ་བ་ཁྲག་ཁྲིག་བརྒྱ་ཕྲག་སྟོང་གང་གཱའི་ཀླུང་བཞིའི་བྱེ་མ་སྙེད་ཏུ་གྱུར་ཏོ། །དེ་ཡོངས་སུ་མྱ་
ངན་ལས་འདས་ནས་ཀྱང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་འཛམ་བུའི་གླིང་གི་རྡུལ་ཕྲ་རབ་སྙེད་ཏུ་དམ་པའི་ཆོས་གནས་པར་གྱུར་ཏོ། །བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་གླིང་བཞིའི་རྡུལ་ཕྲ་རབ་སྙེད་ཏུ་དམ་པའི་
ཆོས་ཀྱི་གཟུགས་བརྙེན་གནས་པར་གྱུར་ཏོ། །མཐུ་ཆེན་ཐོབ་འཇིག་རྟེན་གྱི་ཁམས་ཆེར་འབྱུང་བ་དེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་བསྒྲགས་དབྱངས་
ཀྱི་རྒྱལ་པོ་དེ། ཡོངས་སུ་མྱ་ངན་ལས་འདས་པའི་དམ་པའི་ཆོས་དང་དམ་པའི་ཆོས་ཀྱི་གཟུགས་བརྙན་ཡང་མེད་པར་གྱུར་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་བསྒྲགས་
དབྱངས་ཀྱི་རྒྱལ་པོ་གཞན་ཡང་འཇིག་རྟེན་དུ་བྱུང་ངོ་། །མཐུ་ཆེན་ཐོབ་དེ་ལྟ་བུ་གཅིག་ནས་གཅིག་ཏུ་ཆེར་འབྱུང་བའི་འཇིག་རྟེན་གྱི་ཁམས་དེར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་

46-1-154a

སངས་རྒྱས་འཇིགས་བསྒྲགས་དབྱངས་ཀྱི་རྒྱལ་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་ཉི་ཤུ་བྱུང་ངོ་། །མཐུ་ཆེན་ཐོབ་ཐ་དད་ཏུ་གནས་པའི་བསྐལ་པ་ལ། འཇིག་རྟེན་གྱི་ཁམས་ཆེར་འབྱུང་བ་དེར་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་འཇིགས་
བསྒྲགས་དབྱངས་ཀྱི་རྒྱལ་པོ། དེ་བཞིན་གཤེགས་པ་ཐམས་ཅད་ཀྱི་ཐོག་མར་གང་བྱུང་བའི་བཅོམ་ལྡན་འདས་ཡོངས་སུ་མྱ་ངན་ལས་འདས་པ་དེའི་དམ་པའི་ཆོས་ནུབ་པར་གྱུར་ཏེ། དམ་པའི་ཆོས་ཀྱི་གཟུགས་བརྙན་
ཡང་ནུབ་པར་གྱུར་པའི་ཚེ། དེའི་བསྟན་པ་ལ་ང་རྒྱལ་ཅན་གྱི་དགེ་སློང་གིས་ཤིན་དུ་ནོན་པར་གྱུར་ཏེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་ཞེས་བྱ་བའི་དགེ་སློང་ཞིག་བྱུང་ངོ་། །མཐུ་ཆེན་ཐོབ་ཅི་
འི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྟག་ཏུ་བརྙས་པ་ཞེས་བྱ་ཞེ་ན། མཐུ་ཆེན་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། དགེ་སློང་ངམ་དགེ་སློང་མ་འམ་དགེ་བསྙེན་ནམ་དགེ་བསྙེན་མ་སུ་མཐོང་ཡང་རུང་
སྟེ་དེ་དག་གི་དྲུང་དུ་སོང་ནས་འདི་སྐད་ཏུ། ཁོ་བོ་ནི་ཚེ་དང་ལྡན་པ་ཁྱེད་ལ་བརྙས་པར་མི་བྱེད་དེ་ཁྱེད་ནི་མ་བརྙས་པའོ། །དེ་ཅིའི་ཕྱིར་ཞེ་ན། ཁྱེད་ཐམས་ཅད་ཀྱིས་བྱང་ཆུབ་སེམས་དཔའི་སྤྱད་པ་སྤྱོད་ཅིག་དང་། ཁྱེད་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ། །ཞེས་སྨྲའོ། །མཐུ་ཆེན་ཐོབ་རྣམ་གྲངས་འདིས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་སློང་དུ་གྱུར་པ་དེ། སེམས་ཅན་རྒྱང་རིང་པོ་
ན་འདུག་པ་སུ་མཐོང་ཡང་རུང་སྟེ། དེའི་དྲུང་དུ་སོང་ཞིང་དེ་སྐད་ཏུ་ཡང་དག་པར་སྒྲོགས་པ་མ་གཏོགས་པར། ལུང་ཡང་མི་ནོད། ཁ་དོན་ཡང་མི་བྱེད་དེ། དགེ་སློང་ངམ་དགེ་སློང་མ་འམ་དགེ་བསྙེན་ནམ་དགེ་བསྙེན་མ་དེ་དང་དེ་དག་གི་དྲུང་དུ་

46-1-154b

སོང་ནས། འདི་སྐད་ཏུ་ཁོ་བོ་ནི་ཚེ་དང་ལྡན་པ་ཁྱེད་ལ་བརྙས་པར་མི་བྱེད་དེ་ཁྱེད་ནི་མ་བརྙས་པའོ། །དེ་ཅིའི་ཕྱིར་ཞེ་ན། ཁྱེད་ཐམས་ཅད་ཀྱིས་བྱང་ཆུབ་སེམས་དཔའི་སྤྱད་པ་སྤྱོད་ཅིག་དང་། ཁྱེད་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་སྨྲའོ། །མཐུ་ཆེན་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་དེས་དེའི་ཚེ་དགེ་སློང་ངམ་དགེ་སློང་མ་འམ་དགེ་བསྙེན་ནམ་དགེ་བསྙེན་མ་འམ་སུ་དང་སུ་ལ་
དེ་སྐད་བསྒྲགས་པ་དེ་དག་ཐམས་ཅད་ལས་ཕལ་ཆེར་དེ་ལ་ཁྲོ་ཞིང་གནོད་པར་སེམས་ལ་མ་དད་པ་སྐྱེད་དེ། དེ་ལ་གཤེ་ཞིང་སྤྱོས་ཏེ། ཅིའི་ཕྱིར་དགེ་སློང་འདི་མ་དྲིས་པར་བརྙས་པའི་སེམས་མེད་དོ། །ཞེས་བདག་ཅག་ལ་སྟོན་ཏེ། 
བདག་ཉིད་ལ་བརྙས་པར་བྱེད་ཅིང་འདི་ལྟར་མ་བསམས་མི་འདོད་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བདག་ཅག་ལ་ལུང་སྟོན་ཅེས་སྨྲའོ། །མཐུ་ཆེན་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དེ་ལྟ་
བུར་གཤེ་ཞིང་སྤྱོ་བས་ལོ་མང་པོ་འདས་ཏེ། །སུ་ལ་ཡང་མི་ཁྲོ་ཞིང་གནོད་སེམས་མི་བསྐྱེད་དོ། །དེ་ལྟར་དེ་ཡང་དག་པར་སྒྲོགས་པ་ལ་བོང་བ་དང་དབྱུག་པ་འཕེན་ཀྱང་། དེས་དེ་དག་ལ་ཐག་རིང་པོ་ནས་སྒྲ་ཆེན་པོར་བྱས་ཏེ། ཁོ་བོ་ཁྱེད་
ལ་བརྙས་པར་མི་བྱེད་དོ་ཞེས་ཡང་དག་པར་སྒྲོག་གོ། །དེས་ང་རྒྱལ་ཅན་གྱི་དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་དེ་དག་ལ་རྟག་ཏུ་རྒྱུན་མི་འཆད་པར་ཡང་དག་པར་བསྒྲགས་པས་དེ་དག་གིས་དེ་ལ་མིང་རྟག་ཏུ་
བརྙས་པ་ཞེས་བཏགས་སོ། །མཐུ་ཆེན་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་དེ་འཆི་བའི་དུས་བྱེད་པ་ཉེ་བར་གནས་ཏེ། འཆི་བའི་དུས་ཀྱི་ཚེ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་
འདི་ཐོས་པར་གྱུར་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་བསྒྲགས་དབྱངས་ཀྱི་རྒྱལ་པོ་དེས་ཆོས་ཀྱི་རྣམ་གྲངས་འདི་ཚིགསུ་བཅད་པ་དཀྲིགས་ཕྲག་བྱེ་བ་

46-1-155a

ཁྲག་ཁྲིག་བརྒྱ་སྟོང་ཕྲག་ཉི་ཤུ་བཤད་པ་དེ་ཡང་། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་དེ། འཆི་བའི་དུས་ཉེ་བར་གནས་པའི་ཚེ་བར་སྣང་གི་སྒྲ་ལས་ཆོས་ཀྱི་རྣམ་གྲངས་འདི་ཐོས་སོ། །སུས་ཀྱང་མ་
སྨྲས་པར་དེས་བར་སྣང་ལས་སྒྲ་ཐོས་ཏེ། ཆོས་ཀྱི་རྣམ་གྲངས་འདི་བཟུང་ནས་མིག་རྣམ་པར་དག་པ་དང་རྣ་བ་རྣམ་པར་དག་པ་དང་སྣ་རྣམ་པར་དག་པ་དང་ལྕེ་རྣམ་པར་དག་པ་དང་ལུས་རྣམ་པར་དག་པ་དང་ཡིད་རྣམ་པར་དག་པ་
དེ་ལྟ་བུ་ཐོབ་བོ། །རྣམ་པར་དག་པ་དེ་དག་ཐོབ་མ་ཐག་ཏུ་ཕྱིར་ཡང་ལོ་བྱེ་བ་ཁྲག་ཁྲིག་བརྒྱ་སྟོང་ཕྲག་ཉི་ཤུར་བདག་གི་སྲོག་གི་འདུ་བྱེད་བྱིན་གྱིས་བརླབས་ཏེ། ཆོས་ཀྱི་རྣམ་གྲངས་འདི་ཡང་དག་པར་བསྒྲགས་སོ། །དགེ་སློང་ངམ་དགེ་སློང་
མ་འམ་དགེ་བསྙེན་ནམ་དགེ་བསྙེན་མ་ང་རྒྱལ་ཅན་གང་དག་ལ་སྔོན་ཁྱེད་ལ་ཁོ་བོས་བརྙས་པར་མི་བྱེད་དོ། །ཞེས་བསྒྲགས་པ་གང་དག་གིས། དེའི་མིང་རྟག་ཏུ་བརྙས་པར་བཏགས་པ་དེ་དག་གིས། དེའི་རྫུ་འཕྲུལ་གྱི་སྟོབས་
ཀྱི་མཐུ་དང་དམ་བཅས་པའི་སྟོབས་ཀྱི་མཐུ་དང་སྤོབས་པའི་སྟོབས་ཀྱི་མཐུ་དང་ཤེས་རབ་ཀྱི་མཐུ་རྒྱ་ཆེན་པོ་མཐོང་ནས། ཐམས་ཅད་ཀྱང་ཆོས་མཉན་པའི་ཕྱིར་ཕྱི་ན་འཁོད་པར་གྱུར་ཏོ། །དེས་གཞན་ཡང་སྲོག་ཆགས་བྱེ་
བ་ཁྲག་ཁྲིག་བརྒྱ་སྟོང་མང་པོ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་བཙུད་དོ། །མཐུ་ཆེན་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་དེ། དེ་ནས་ཤི་འཕོས་ནས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བའི་དབྱངས་ཀྱི་རྒྱལ་པོ་ཞེས་བྱ་བར་མཚན་མཐུན་པ་བྱེ་བ་བརྒྱ་ཕྲག་ཉི་ཤུ་མཉེས་པར་བྱས་ཏེ། ཐམས་ཅད་དུ་ཡང་ཆོས་ཀྱི་རྣམ་གྲངས་འདི་ཡང་དག་པར་
རབ་ཏུ་བསྟན་ཏོ། །དེ་སྔོན་གྱི་དགེ་བའི་རྩ་བ་དེས་རིམ་གྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྔ་སྒྲ་རྒྱལ་པོ་ཞེས་བྱ་བར་མཚན་མཐུན་པ་བྱེ་བ་བརྒྱ་ཕྲག་ཉི་ཤུ་མཐར་གྱིས་མཉེས་པར་བྱས་ནས་

46-1-155b

དེ་ཐམས་ཅད་དུ་ཡང་། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་བཟུང་སྟེ། འཁོར་བཞི་ལ་ཡང་དག་པར་རབ་ཏུ་བཤད་དོ། །དེ་སྔོན་གྱི་དགེ་བའི་རྩ་བ་དེས་མཐར་གྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་སྤྲིན་སྒྲ་རྒྱལ་པོ་ཞེས་བྱ་བར་མཚན་མཐུན་པ་བྱེ་བ་བརྒྱ་ཕྲག་ཉི་ཤུ་མཉེས་པར་བྱས་ནས། ཐམས་ཅད་དུ་ཡང་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཉིད་བཟུང་སྟེ། འཁོར་བཞི་ལ་ཡང་དག་
པར་རབ་ཏུ་བཤད་དོ། །ཐམས་ཅད་ན་ཡང་མིག་ཡོངས་སུ་དག་པ་དང་ལྡན་པར་གྱུར་ཏོ། །རྣ་བ་ཡོངས་སུ་དག་པ་དང་སྣ་ཡོངས་སུ་དག་པ་དང་ལྕེ་ཡོངས་སུ་དག་པ་དང་ལུས་ཡོངས་སུ་དག་པ་དང་ཡིད་ཡོངས་སུ་དག་པ་དེ་ལྟ་བུ་དང་ལྡན་པར་
གྱུར་ཏོ། །མཐུ་ཆེན་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་དེས། དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་དེ་སྙེད་ལ་སྟི་སྟང་བྱས་བླ་མར་བྱས་རི་མོ་དང་མཆོད་པ་དང་གསོལ་བ་དང་དབུལ་བ་བྱས་ཏེ་
གཞན་ཡང་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་སྟི་སྟང་དུ་བྱ་བ་དང་བླ་མར་བྱ་བ་དང་རི་མོ་དང་མཆོད་པ་དང་གསོལ་བ་བྱས་ནས། དེ་དག་ཐམས་ཅད་དུ་ཡང་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་བཟུང་སྟེ་
སྔོན་གྱི་དགེ་བའི་རྩ་བ་དེ་ཉིད་ཡོངས་སུ་སྨིན་པས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །མཐུ་ཆེན་ཐོབ་དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་བསྒྲགས་དབྱངས་ཀྱི་རྒྱལ་པོའི་བསྟན་པ་ལ། འཁོར་བཞི་རྣམས་ཀྱིས་རྟག་ཏུ་བརྙས་པར་གྲགས་ཤིང་། གང་གིས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་དེ་སྙེད་མཉེས་པར་བྱས་པ། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་དེ། གཞན་ཞིག་ཡིན་སྙམ་དུ་སོམ་ཉི་འམ་ཡིད་གཉིས་སམ་

46-1-156a

ཐེ་ཚོམ་ཟ་བར་གྱུར་ན། མཐུ་ཆེན་ཐོབ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་ཞེས་བྱ་བར་གྱུར་ཏོ། །མཐུ་ཆེན་ཐོབ་གལ་
ཏེ་ངས་སྔོན་ཆོས་ཀྱི་རྣམ་གྲངས་འདི་མ་བླངས་མ་བཟུང་བར་གྱུར་ན། ང་འདི་ལྟར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་མི་འགྱུར་ཏེ། མཐུ་ཆེན་ཐོབ་དེ་ལྟར་ངས་སྔོན་
གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་གནང་ནས་ཆོས་ཀྱི་རྣམ་གྲངས་འདི་བཟུང་སྟེ། བཀླགས་པ་དང་བསྟན་པས་དེའི་ཕྱིར་ང་འདི་ལྟར་མྱུར་དུ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །མཐུ་ཆེན་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་དེས་དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་བརྒྱ་ཕྲག་མང་
པོ་དག་ལ། བཅོམ་ལྡན་འདས་དེའི་བསྟན་པ་ལ་ཆོས་ཀྱི་རྣམ་གྲངས་འདི་ཡང་དག་པར་བསྒྲགས་ཤིང་། ཁོ་བོ་ཁྱེད་ལ་བརྙས་པར་མི་བྱེད་དོ། །ཁྱེད་ཐམས་ཅད་ཀྱང་བྱང་ཆུབ་སེམས་དཔའི་སྤྱད་པ་སྤྱོད་ཅིག་དང་། ཁྱེད་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་བྱས་པ་དང་། གང་གིས་བྱང་ཆུབ་སེམས་དཔའ་དེ་ལ་གནོད་སེམས་བསྐྱེད་པར་གྱུར་པ་དེ་དག་གིས་བསྐལ་པ་བྱེ་བ་བརྒྱ་ཕྲག་ཉི་ཤུར་ནམ་ཡང་དེ་
བཞིན་གཤེགས་པ་མ་འཐོང་ཆོས་ཀྱི་སྒྲ་ཡང་མ་ཐོས། དགེ་འདུན་གྱི་སྒྲ་ཡང་མ་ཐོས་སོ་བསྐལ་པ་སྟོང་ཕྲག་བཅུར་མནར་མེད་པའི་སེམས་ཅན་དམྱལ་བ་ཆེན་པོར་སྡུག་བསྔལ་མི་བཟད་པ་མྱོང་ངོ་། །དེ་དག་ཐམས་ཅད་ཀྱི་ལས་ཀྱི་སྒྲིབ་པ་
དེ་ལས་ཡོངས་སུ་ཐར་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཉིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །མཐུ་ཆེན་ཐོབ་དེའི་ཚེ་དེའི་དུས་ན་སེམས་

46-1-156b

ཅན་དུ་གྱུར་པ། བྱང་ཆུབ་སེམས་དཔའ་སེམས་དཔའ་ཆེན་པོ་ལ་བསྟིང་བ་དང་། འཕྱ་བ་བྱས་པ་དེ་དག་གང་ཡིན་སྙམ་དུ་སོམ་ཉི་འམ་ཡིད་གཉིས་སམ་ཐེ་ཚོམ་ཟ་བར་གྱུར་ན། མཐུ་ཆེན་ཐོབ་འཁོར་འདི་ཉིད་ཀྱི་ནང་ན། བཟང་
སྐྱོང་ལ་སོགས་པ་བྱང་ཆུབ་སེམས་དཔའ་ལྔ་བརྒྱ་དང་སེང་གེའི་ཟླ་བ་ལ་སོགས་པ་དགེ་སློང་མ་ལྔ་བརྒྱ་དང་བདེ་གཤེགས་སེམས་པ་ལ་སོགས་པ་དགེ་བསྙེན་མ་ལྔ་བརྒྱ་སྟེ། ཐམས་ཅད་ཀྱང་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ལས་ཕྱིར་མི་ལྡོག་པར་བྱས་སོ། །མཐུ་ཆེན་ཐོབ་ཆོས་ཀྱི་རྣམ་གྲངས་འདི་འཛིན་པ་དང་སྟོན་པ་དང་ལྡན་པའི་བསོད་ནམས་ཀྱི་ཕུང་པོ་དེ་ལྟར་དོན་ཆེ་སྟེ། བྱང་ཆུབ་སེམས་དཔའ་སེམས་དཔའ་ཆེན་
པོ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱེད་པར་འགྱུར་རོ། །མཐུ་ཆེན་ཐོབ་དེ་ལྟ་བས་ན་དེ་བཞིན་གཤེགས་པ་ང་ཡོངས་སུ་མྱ་ངན་ལས་འདས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
ཀྱིས་ཆོས་ཀྱི་རྣམ་གྲངས་འདི་རྒྱུན་མི་འཆད་པར་གཟུང་བར་བྱའོ། །བསྟན་པར་བྱའོ། །ཀླག་པར་བྱའོ། །བཤད་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ། ཚིགས་སུ་བཅད་པ་འདི་དག་བཀའ་སྩལ་ཏོ། །འདས་པའི་དུས་
རྣམས་རྗེས་སུ་དྲན་པ་ནི། །འཇིགས་བསྒྲགས་དབྱངས་རྒྱལ་རྒྱལ་བ་གང་བྱུང་བ། །ལྷ་མི་གནོད་སྦྱིན་སྲིན་པོའི་འདྲེན་པ་སྟེ། །མཐུ་ཆེན་དེ་ལ་ལྷ་དང་མི་ཡིས་མཆོད། །རྒྱལ་བ་དེ་ནི་མྱ་ངན་ཡོངས་འདས་ནས། །དམ་
ཆོས་འཁྲུགས་པར་གྱུར་པ་ཐ་མ་ལ། །དེ་ན་བྱང་ཆུབ་སེམས་དཔའ་དགེ་སློང་བྱུང་། །དེ་ཡི་མིང་ནི་རྟག་ཏུ་བརྙས་ཤེས་བྱ། །དེ་ན་དགེ་སློང་གཞན་དང་དེ་བཞིན་དུ། །དམིགས་པར་ལྟ་བའི་དགེ་སློང་དེ་གན་སོང་། །
ཁོ་བོས་ཁྱེད་ལ་ནམ་ཡང་བརྙས་པ་མེད། །ཁྱེད་ཀྱིས་བྱང་ཆུབ་མཆོག་ཕྱིར་སྤྱད་པ་སྤྱོད། །དེ་བཞིན་རྟག་ཏུ་ཡང་དག་བསྒྲགས་པ་ན། །གཤེ་ཞིང་བརྒྱད་པ་དེ་དག་བཟོད་པར་བྱེད། །འཆི་བའི་དུས་བྱེད་ཉེ་བར་གནས་པ་དང་། །དེ་ཡིས་

46-1-157a

མདོ་སྡེ་འདི་ནི་ཐོས་གྱུར་ནས། །དེ་ཚེ་མཁས་པས་འཆི་བའི་དུས་མ་བྱས། །ཚེ་ཡང་ཤིན་དུ་རིང་པོར་བྱིན་བརླབས་ཏེ། །རྣམ་པར་འདྲེན་པ་དེ་ཡི་བསྟན་པ་ལ། །དེ་ཚེ་མདོ་འདི་ཡང་ནི་རབ་ཏུ་བཤད། །དམིགས་ཅན་མང་པོ་དེ་དག་
ཐམས་ཅད་ཀྱང་། །དེ་ཡིས་བྱང་ཆུབ་ཏུ་ནི་ཡོངས་སྨིན་བྱས། །དེ་ནས་བྱང་ཆུབ་སེམས་དཔའ་ཤི་འཕོས་ནས། །སངས་རྒྱས་བྱེ་བ་ཕྲག་སྟོང་མཉེས་བྱས་ཏེ། །མཐར་གྱིས་བསོད་ནམས་བྱས་པ་དེ་དག་གིས། །མདོ་འདི་ཡང་ནི་
རྟག་པར་རབ་ཏུ་བཤད། །རྒྱལ་བའི་སྲས་དེས་བྱང་ཆུབ་ཡང་དག་ཐོབ། །ཤཱཀྱ་ཐུབ་པ་ང་ཉིད་དེ་ཡིན་ནོ། །དེ་ཚེ་གང་དག་དམིགས་ཅན་དགེ་སློང་དང་། །དགེ་སློང་མ་དང་དགེ་བསྙེན་གང་རྣམས་དང་། །དེ་ན་དགེ་བསྙེན་མ་རྣམས་
གང་བྱུང་བ། །མཁས་པས་དེ་ཚེ་བྱང་ཆུབ་བསྒྲགས་གྱུར་པ། །དེ་དག་རྣམས་ཀྱི་སངས་རྒྱས་བྱེ་མང་མཐོང་། །དེ་དག་ལྔ་བརྒྱ་མི་ཉུང་འདི་རྣམས་དང་། །དེ་བཞིན་དགེ་སློང་ཕ་དང་དགེ་སློང་མ། །ང་ཡི་མངོན་སུམ་དགེ་བསྙེན་འདི་དག་
སྟེ། །ཐམས་ཅད་ང་ཡིས་ཆོས་མཆོག་ཐོས་བྱས་ནས། །ངས་ནི་འདི་དག་ཐམས་ཅད་ཡོངས་སྨིན་བྱས། །མྱ་ངན་ང་འདས་དཔའ་བོ་འདི་ཀུན་ནི། །འདི་ན་མདོ་སྡེ་མཆོག་འདི་འཛིན་པར་འགྱུར། །བསྐལ་པ་མཐའ་ཡས་བྱེ་བ་མང་པོར་
ཡང་། །འདི་འདྲའི་ཆོས་ནི་ནམ་ཡང་མི་ཐོས་ཏེ། །སངས་རྒྱས་བྱེ་བ་ཕྲག་བརྒྱ་འབྱུང་ན་ཡང་། །དེ་དག་ཀྱང་ནི་མདོ་འདི་མི་འཆད་དོ། །དེ་ཕྱིར་རང་བྱུང་ཉིད་ཀྱིས་བརྗོད་པའི་ཆོས། །འདི་ལྟ་བུ་ཡི་རྣམ་པ་ཐོས་ནས་སུ། །ཡང་དང་ཡང་
ནི་རབ་ཏུ་འདི་ཟུང་ལ། །མྱ་ངན་ང་འདས་མདོ་འདི་རབ་ཤོད་ཅིག །དམ་པའི་ཆོས་པད་མ་དཀར་པོ་ལས་རྟག་ཏུ་བརྙས་པའི་ལེའུ་ཞེས་བྱ་སྟེ་བཅུ་དགུ་པའོ།། །། དེ་ནས་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་སྟོང་གི་
འཇིག་རྟེན་གྱི་ཁམས་ཀྱི་རྡུལ་ཕྲ་རབ་སྙེད་གང་དག །ས་རུམ་ནས་འཐོད་པ་དེ་དག་ཐམས་ཅད་ཀྱིས་བཅོམ་ལྡན་འདས་ཀྱི་སྤྱན་སྔར་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་

46-1-157b

པ་ཡོངས་སུ་མྱ་ངན་ལས་འདས་ནས། བདག་ཅག་གིས་སངས་རྒྱས་ཀྱི་ཞིང་ཐམས་ཅད་ན། བཅོམ་ལྡན་འདས་ཀྱིས་སངས་རྒྱས་ཀྱི་ཞིང་གང་དག་ལགས་པ་གང་དུ། བཅོམ་ལྡན་འདས་ཡོངས་སུ་མྱ་ངན་ལས་འདའ་བར་འགྱུར་བ་དེ་དང་དེར་ཆོས་
ཀྱི་རྣམ་གྲངས་འདི་རབ་ཏུ་བཤད་པར་བགྱིའོ། །བཅོམ་ལྡན་འདས་བདག་ཅག་ནི་ཆོས་ཀྱི་རྣམ་གྲངས་རྒྱ་ཆེན་པོ་འདི་ལྟ་བུ་བཟུང་བ་དང་ཀླག་པ་དང་བསྟན་པ་དང་རབ་ཏུ་བཤད་པ་དང་ཡི་གེར་བྲི་བར་འཚལ་བ་ལགས་སོ། །དེ་ནས་འཇམ་དཔལ་ལ་སོགས་
པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་མང་པོ་གང་དག་འཇིག་རྟེན་གྱི་ཁམས་མི་མཇེད་འདི་ན་གནས་པ་དག་དང་དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་དང་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་
མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པ་རྣམས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གང་གཱའི་ཀླུང་གི་བྱེ་མ་སྙེད་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་
གཤེགས་པ་ཡོངས་སུ་མྱ་ངན་ལས་འདས་ནས། བདག་ཅག་གིས་ཀྱང་ཆོས་ཀྱི་རྣམ་གྲངས་འདི་ཡང་དག་པར་རབ་ཏུ་བཤད་པར་བགྱིའོ། །བཅོམ་ལྡན་འདས་ལས་མི་གདའ་བར་བར་སྣང་ལ་གནས་ཏེ་དབྱངས་ཀྱིས་ཡང་དག་པར་
བསྒྲག་པར་བགྱིའོ། །དགེ་བའི་རྩ་བ་མ་བསྐྲུན་པའི་སེམས་ཅན་རྣམས་དགེ་བའི་རྩ་བ་བསྐྲུན་པར་བགྱིའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ། །སྔ་མ་ཚོགས་དང་ཚོགས་ཆེན་པོ་
དང་ཚོགས་ཀྱི་སློབ་དཔོན་དེ་དག་གི་གཙོ་བོ་གཅིག་པོ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པ་ཁྱད་པར་ཅན་ཞེས་བྱ་བ། ཚོགས་དང་ཚོགས་ཆེན་པོ་དང་ཚོགས་ཀྱི་སློབ་དཔོན་ལ་འདི་སྐད་ཅེས་
བཀའ་སྩལ་ཏོ། །སྤྱོད་པ་ཁྱད་པར་ཅན་ལེགས་སོ་ལེགས་སོ། །ཁྱོད་ཀྱིས་དེ་ལྟར་གྱིས་ཤིག་ཆོས་ཀྱི་རྣམ་གྲངས་འདིའི་ཕྱིར་ཁྱེད་དེ་བཞིན་གཤེགས་པས་ཡོངས་སུ་སྨིན་པར་བྱས་སོ། །

46-1-158a

དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དང་། བཅོམ་ལྡན་འདས་ཡོངས་སུ་མྱ་ངན་ལས་འདས་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེ་མཆོད་
རྟེན་གྱི་དབུས་ན་སེང་གེའི་ཁྲི་ལ་བཞུགས་པ་གཉི་ག་འཛུམ་པ་མཛད་ནས། གཉིས་ཀ་ཞལ་གྱི་སྒོ་ནས་ལྗགས་ཀྱི་དབང་པོ་ཕྱུང་སྟེ། ལྗགས་ཀྱི་དབང་པོ་དེ་ཉིད་ཀྱིས་ཚངས་པའི་འཇིག་རྟེན་གྱི་བར་དུ་ཕྱིན་ནས། ལྗགས་ཀྱི་དབང་
པོ་དེ་གཉིས་ལས་འོད་ཟེར་བྱེ་བ་ཁྲག་ཁྲིག་བརྒྱ་སྟོང་མང་པོ་བྱུང་ངོ་། །འོད་ཟེར་དེ་དག་ལས་འོད་ཟེར་རེ་རེ་ལས་ཀྱང་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་མང་པོ་ལུས་ཀྱི་མདོག་གསེར་གྱི་ཁ་དོག་འདྲ་བ། སྐྱེས་བུ་ཆེན་
པོའི་མཚན་སུམ་བཅུ་རྩ་གཉིས་དང་ལྡན་པ། པད་མའི་སྙིང་པོའི་སེང་གེའི་ཁྲི་ལ་འཁོད་པ་དག་བྱུང་ངོ་། །བྱང་ཆུབ་སེམས་དཔའ་དེ་དག་ཀྱང་ཕྱོགས་དང་ཕྱོགས་མཚམས་ཀྱི་འཇིག་རྟེན་གྱི་ཁམས་བརྒྱ་སྟོང་དག་ཏུ་དོང་སྟེ། 
ཕྱོགས་དང་ཕྱོགས་མཚམས་དེ་དག་ཐམས་ཅད་ན་བར་སྣང་ལ་འཁོད་ནས་ཆོས་སྟོན་ཏོ། །ཇི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང་། 
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་གི་ལྗགས་ཀྱི་དབང་པོས་རྫུ་འཕྲུལ་གྱི་ཆོ་འཕྲུལ་མཛད་པ་དེ་བཞིན་དུ། འཇིག་རྟེན་གྱི་ཁམས་བྱེ་བ་ཁྲག་ཁྲིག་
བརྒྱ་སྟོང་གཞན་དག་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་གཤེགས་པའི་རིན་པོ་ཆེའི་ཤིང་ལྗོན་པའི་དྲུང་དག་ན། སེང་གེའི་ཁྲི་ལ་སོ་སོར་བཞུགས་པ་དེ་དག་ཀྱང་ལྗགས་
ཀྱི་དབང་པོས་རྫུ་འཕྲུལ་གྱི་ཆོ་འཕྲུལ་མཛད་དོ། །དེ་ནས་བཅོམ་ལྡན་འདས་ཤཱཀྱ་ཐུབ་པ་དང་། དེ་བཞིན་གཤེགས་པ་རིན་ཆེན་མང་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ཐམས་

46-1-158b

ཅད་ཀྱིས་ལོ་འབུམ་ཚང་གི་བར་དུ་རྫུ་འཕྲུལ་མངོན་པར་འདུ་བྱེད་པ་མཛད་དོ། །དེ་ནས་ལོ་འབུམ་འདས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་ལྗགས་ཀྱི་དབང་པོ་དེ་དག་བསྡུས་ཏེ། 
དུས་གཅིག་ཏུ་སྐད་ཅིག་ཐང་ཅིག་ཡུད་ཙམ་གཅིག་ལ། ཐམས་ཅད་ཀྱི་མགུར་གསལ་བའི་སྒྲ་ཆེན་པོ་ཕྱུང་སྟེ་སེ་གོལ་གཏོགས་པའི་སྒྲ་གཅིག་མཛད་དོ། །མགུར་གསལ་བའི་སྒྲ་ཆེན་པོ་དེ་དང་སེ་གོལ་གཏོགས་པའི་སྒྲ་ཆེན་པོ་
དེས། ཕྱོགས་བཅུའི་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཇི་སྙེད་པ་དེ་དག་ཐམས་ཅད་གཡོས་པར་གྱུར་ཏེ། གཡོས་རབ་ཏུ་གཡོས་ཀུན་དུ་རབ་ཏུ་གཡོས། འགུལ་རབ་ཏུ་འགུལ་ཀུན་ཏུ་རབ་ཏུ་འགུལ། ལྡེག་རབ་ཏུ་ལྡེག་
ཀུན་དུ་རབ་ཏུ་ལྡེག་གོ། །སངས་རྒྱས་ཀྱི་ཞིང་དེ་དག་ན་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པ་སེམས་ཅན་ཇི་སྙེད་འཁོད་པ་དེ་དག་དེ་ན་འདུག་བཞིན་དུ་
སངས་རྒྱས་ཀྱི་མཐུས་དེ་དག་ཐམས་ཅད་ཀྱིས་འཇིག་རྟེན་གྱི་ཁམས་མི་མཇེད་འདི་མཐོང་སྟེ། དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་རིན་པོ་ཆེའི་ཤིང་ལྗོན་པའི་དྲུང་ན་སེང་གེའི་ཁྲི་སོ་སོ་ལ་བཞུགས་པ་དེ་དག་དང་
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང་། བཅོམ་ལྡན་འདས་ཡོངས་སུ་མྱ་ངན་ལས་འདས་པ་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་རིན་ཆེན་མང་རིན་པོ་ཆེའི་མཆོད་རྟེན་ཆེན་པོ་དེའི་དབུས་ན་སེང་གེའི་ཁྲི་ལ་བཞུགས་པ་དེ་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དང་ལྷན་ཅིག་ཏུ་བཞུགས་
པ་དང་། འཁོར་བཞི་པོ་དེ་དག་ཀྱང་མཐོང་ངོ་། །དེ་མཐོང་ནས་ངོ་མཚར་དུ་གྱུར་རྨད་ཏུ་གྱུར་ཤིན་དུ་དགའ་བ་ཐོབ་པར་གྱུར་ཏེ་བར་སྣང་ལས་སྒྲ་འདི་སྐད་ཅེས་ཐོས་ཏ། ཀྱེ་གྲོགས་པོ་དག་འཇིག་རྟེན་གྱི་ཁམས་བྱེ་བ་

46-1-159a

ཁྲག་ཁྲིག་བརྒྱ་སྟོང་དཔག་ཏུ་མེད་གྲངས་མེད་པ་དག་འདས་པ་ན། འཇིག་རྟེན་གྱི་ཁམས་མི་མཇེད་ཅེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་
བྱ་བ་དེ། ད་ལྟར་དམ་པའི་ཆོས་པད་མ་དཀར་པོ་ཞེས་བྱ་བའི་ཆོས་ཀྱི་རྣམ་གྲངས་ཤིན་དུ་རྒྱས་པ་ཆེན་པོའི་མདོ་སྡེ། བྱང་ཆུབ་སེམས་དཔའ་རྣམས་ལ་གདམས་པ། སངས་རྒྱས་ཐམས་ཅད་ཀྱིས་ཡོངས་སུ་བཟུང་བ། 
བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཡང་དག་པར་རབ་ཏུ་འཆད་ཀྱིས། དེ་ལ་ཁྱེད་ཀྱང་ལྷག་པའི་བསམ་པས་རྗེས་སུ་ཡི་རང་བར་གྱིས་ཤིག །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་ཕྱག་ཚོལ་ཅིག །མཆོད་པ་གྱིས་ཤིག་ཅེས་ཐོས་སོ། །དེ་ནས་སེམས་ཅན་དེ་དག་ཐམས་ཅད་ཀྱིས་བར་སྣང་ལས་དེ་ལྟ་བུའི་སྒྲ་ཐོས་ནས་དེ་ན་འཁོད་བཞིན་དུ། 
བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ལ་ཕྱག་འཚལ་ལོ་ཞེས་ཚིག་དེ་སྐད་སྨྲས་སོ། །བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དང་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ལ་
མཆོད་པའི་ལས་ཀྱི་ཕྱིར་ཐལ་མོ་སྦྱར་ཏེ། མེ་ཏོག་དང་བདུག་པ་དང་སྤོས་དང་ཕྲེང་བ་དང་བྱུག་པ་དང་ཕྱེ་མ་དང་ན་བཟའ་དང་གདུགས་དང་རྒྱལ་མཚན་དང་ལྷའི་བ་དན་དང་རྣམ་པར་རྒྱལ་བའི་བ་དན་མང་པོ། འཇིག་རྟེན་གྱི་ཁམས་
མི་མཇེད་འདི་ག་ལ་བ་དེ་ལོགས་སུ་འཐོར་རོ། །ཕྱང་ཕྲུལ་དང་བགོ་བ་དང་སེ་མོ་དོ་དང་དོ་ཤལ་དང་ནོར་བུ་རིན་པོ་ཆེ་རྣམ་པ་མང་པོ་ཡང་གཏོར་ཏོ། །མེ་ཏོག་དང་བདུག་པ་དང་སྤོས་དང་ཕྲེང་བ་དང་བྱུག་པ་དང་ཕྱེ་མ་དང་ཆོས་གོས་དང་
གདུགས་དང་རྒྱལ་མཚན་དང་ལྷའི་བ་དན་དང་རྣམ་པར་རྒྱལ་བའི་བ་དན་དང་སེ་མོ་དོ་དང་དོ་ཤལ་དང་ནོར་བུ་དང་རིན་པོ་ཆེ་གཏོར་བ་དེ་དག་ཐམས་ཅད་ལ་འཇིག་རྟེན་གྱི་ཁམས་མི་མཇེད་འདིར་འོངས་ཏེ། མེ་ཏོག་དང་བདུག་པ་དང་སྤོས་དང་ཕྲེང་བ་དང་བྱུག་པ་དང་ཕྱེ་

46-1-159b

མ་དང་ན་བཟའ་དང་གདུགས་དང་རྒྱལ་མཚན་དང་ལྷའི་བ་དན་དང་རྣམ་པར་རྒྱལ་བའི་བ་དན་གྱི་ཕུང་པོ་དང་སེ་མོ་དོ་དང་དོ་ཤལ་དང་ནོར་བུ་དང་རིན་པོ་ཆེ་དེ་དག་གིས་ཐམས་ཅད་དང་ལྡན་པའི་འཇིག་རྟེན་གྱི་ཁམས་མི་མཇེད་འདི་ཁེབས་པར་
གྱུར་ཏེ། འཇིག་རྟེན་གྱི་ཁམས་གཞན་བྱེ་བ་ཁྲག་ཁྲིག་བརྒྱ་སྟོང་དེ་དག་དང་ལྷན་ཅིག་ཏུ་ཁེབས་པར་གྱུར་ནས་གཅིག་ཏུ་གྱུར་ཏེ། གང་དག་ན་དེ་བཞིན་གཤེགས་པ་དེ་དག་བཞུགས་པ། འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་
སྟོང་དེ་དག་ཐམས་ཅད་ཀྱི་སྟེང་གི་ནམ་མཁའ་བར་སྣང་ལ་མེ་ཏོག་གི་བླ་རེ་ཆེན་པོས་ཀུན་དུ་ཁེབས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་སྤྱོད་པ་ཁྱད་པར་ཅན་ལ་སོགས་པ། བྱང་ཆུབ་སེམས་དཔའ་སེམས་དཔའ་ཆེན་
པོ་རྣམས་ལ་བཀའ་སྩལ་པ། རིགས་ཀྱི་བུ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་མཐུ་བསམ་གྱིས་མི་ཁྱབ་པ་སྟེ། རིགས་ཀྱི་བུ་དག་ཆོས་ཀྱི་རྣམ་གྲངས་འདི་ཡོངས་སུ་གཏད་པའི་
ཕྱིར། ངས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོར་ཆོས་ཀྱི་སྒོ་རྣམ་པ་ཐ་དད་པ་དག་གིས་ཕན་ཡོན་གྱི་རྣམ་གྲངས་མང་པོ་བཤད་མོད་ཀྱི། ངས་ཆོས་ཀྱི་རྣམ་གྲངས་འདིའི་ཡོན་ཏན་བཤད་ཀྱང་ཡོན་ཏན་གྱི་ཕ་རོལ་དུ་མི་ཕྱིན་ཏོ། །
རིགས་ཀྱི་བུ་དག་མདོར་ན་སངས་རྒྱས་ཀྱི་ཆོས་ཐམས་ཅད་དང་། སངས་རྒྱས་ཀྱི་ཁྱུ་མཆོག་ཏུ་གྱུར་པ་ཐམས་ཅད་དང་། སངས་རྒྱས་ཀྱི་གསང་ཆེན་ཐམས་ཅད་དང་། སངས་རྒྱས་ཀྱི་ཟབ་མོའི་གནས་ཐམས་ཅད། ངས་ཆོས་ཀྱི་རྣམ་
གྲངས་འདིར་བཤད་དོ། །རིགས་ཀྱི་བུ་དག་དེ་ལྟ་བས་ན་ཁྱེད་ཀྱིས་ཀྱང་། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། ཆོས་ཀྱི་རྣམ་གྲངས་འདི་ལ་གུས་པར་གཟུང་བར་བྱའོ། །བསྟན་པར་བྱའོ། །
ཡི་གེར་བྲི་བར་བྱའོ། །ཀླག་པར་བྱའོ། །རབ་ཏུ་བཤད་པར་བྱའོ། །བསྒོམ་པར་བྱའོ། །མཆོད་པར་བྱའོ། །རིགས་ཀྱི་བུ་དག་ས་ཕྱོགས་གང་ན་ཆོས་ཀྱི་རྣམ་གྲངས་འདི་ཀློག་གམ་སྟོན་ཏམ་རབ་ཏུ་འཆད་དམ་ཡི་གེར་འདྲི་འམ་སེམས་

46-1-160a

སམ་འདོན་ཏམ་ཁ་ཏོན་བྱེད་དམ་གླེགས་བམ་དུ་བྱས་པ། ཀུན་དགའ་ར་བའམ་གཙུག་ལག་ཁང་ངམ་ཁྱིམ་འམ་གནས་སམ་ཤིང་དྲུང་ངམ་ཁང་པ་འམ་གནས་ཁང་ངམ་ཕུག་ན་འདུག་ཀྱང་རུང་སྟེ། ས་ཕྱོགས་དེར་དེ་བཞིན་
གཤེགས་པའི་ཕྱིར་མཆོད་རྟེན་བྱའོ། །དེ་ཅིའི་ཕྱིར་ཞེ་ན། ས་ཕྱོགས་དེ་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སྙིང་པོར་རིག་པར་བྱ་བ་དང་། ས་ཕྱོགས་དེར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་རིག་པར་བྱ་བ་དང་། ས་ཕྱོགས་དེར་དེ་བཞིན་གཤེགས་པ་ཐམས་ཅད་ཀྱིས་ཆོས་ཀྱི་འཁོར་ལོ་རབ་ཏུ་བསྐོར་བ་དང་། 
ས་ཕྱོགས་དེར་དེ་བཞིན་གཤེགས་པ་ཐམས་ཅད་ཡོངས་སུ་མྱ་ངན་ལས་འདས་པར་རིག་པར་བྱ་བ་ཡིན་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །མངོན་ཤེས་ཡེ་ཤེས་རབ་
ཏུ་གནས་རྣམས་ཀྱི། །འཇིག་རྟེན་ཕན་པའི་ཆོས་ནི་བསམ་མི་ཁྱབ། །ལུས་ཅན་འདི་ཀུན་མཆོག་ཏུ་དགའ་བའི་ཕྱིར། །མཐའ་ཡས་སྤྱན་གྱིས་རྫུ་འཕྲུལ་རབ་ཏུ་བསྟན། །འོད་ཟེར་སྟོང་རྣམས་རབ་ཏུ་ཀུན་འགྱེད་ཅིང་། །
ལྗགས་ཀྱི་དབང་པོས་ཚངས་པའི་འཇིག་རྟེན་ཕྱིན། །བྱང་ཆུབ་མཆོག་ལ་ཞུགས་པ་དེ་དག་ཕྱིར། །ངོ་མཚར་གྱུར་པའི་རྫུ་འཕྲུལ་དེ་དག་བསྟན། །སངས་རྒྱས་རྣམས་ཀྱི་མགུར་སེལ་སྒྲ་མཛད་ཅིང་། །སེ་གོལ་གཅིག་
གི་སྒྲ་དག་གང་ཕྱུང་བ། །དེ་དག་ཕྱོགས་བཅུའི་འཇིག་རྟེན་ཇི་ཙམ་པ། །འཇིག་རྟེན་ཁམས་དེ་ཐམས་ཅད་གོ་བར་བྱས། །ཅི་ནས་དེ་དག་དགའ་ནས་ཕྱི་དུས་ན། །བདེ་གཤེགས་མྱ་ངན་འདས་ནས་མདོ་འཛིན་པར། །དེ་དག་དང་ནི་
ཆོ་འཕྲུལ་གཞན་རྣམས་དང་། །ཡོན་ཏན་རྣམས་ནི་ཕན་ཞིང་ཐུགས་བརྩེ་བསྟན། །འཇིག་རྟེན་རྣམ་འདྲེན་མྱ་ངན་འདས་པ་ན། །མདོ་སྡེ་མཆོག་འདི་གང་དག་འཛིན་པ་ཡི། །བདེ་གཤེགས་སྲས་པོ་རྣམས་ཀྱི་བསྔགས་

46-1-160b

པ་ནི། །བསྐལ་པ་བྱེ་བ་སྟོང་ཕྲག་མང་བརྗོད་ཀྱང་། །དེ་དག་གི་ནི་ཡོན་ཏན་མཐའ་ཡས་ཏེ། །ཇི་ལྟར་ཕྱོགས་རྣམས་སུ་ནི་ནམ་མཁའ་བཞིན། །གང་དག་རྟག་ཏུ་མདོ་སྡེ་འདི་འཛིན་པ། །དེ་དག་ཡོན་ཏན་བསམ་གྱིས་མི་ཁྱབ་
འགྱུར། །འཇིག་རྟེན་འདྲེན་པ་མྱ་ངན་འདས་འདི་དང་། །ང་དང་འདྲེན་པ་འདི་དག་ཐམས་ཅད་མཐོང་། །བྱང་ཆུབ་སེམས་དཔའ་མང་པོ་འདི་ཀུན་དང་། །འཁོར་བཞི་རྣམས་ཀྱང་དེ་ཡིས་མཐོང་བ་ཡིན། །དེ་ཡིས་དེང་འདིར་ང་
ནི་མཉེས་པར་བྱས། །རྒྱལ་བའི་དབང་པོ་མྱ་ངན་འདས་འདི་དང་། །ཕྱོགས་བཅུ་རྣམས་དང་དེ་དག་གཞན་བཞུགས་པ། །འདྲེན་པ་དེ་དག་ཐམས་ཅད་མཉེས་པར་བྱས། །གང་ཞིག་མདོ་སྡེ་འདི་ནི་འཛིན་བྱེད་པ། །འདས་
དང་ད་ལྟར་མ་བྱོན་སངས་རྒྱས་དང་། །ཕྱོགས་བཅུ་དག་ན་གང་དག་བཞུགས་པ་ཡང་། །དེ་ཀུན་མཐོང་ཞིང་ཤིན་དུ་མཆོད་པར་འགྱུར། །མདོ་སྡེ་ཡང་དག་ཆོས་འདི་གང་འཛིན་པས། །བྱང་ཆུབ་སྙིང་པོ་རྣམ་པར་གང་
དགོངས་པ། །སྐྱེས་མཆོག་རྣམས་ཀྱི་གསང་ཆེན་ཤེས་པར་འགྱུར། །དེ་ནི་དེ་ཡང་མྱུར་དུ་རྗེས་སུ་སེམས། །གང་ཞིག་མདོ་སྡེ་དམ་པ་འདི་འཛིན་པ། །དེ་ཡི་སྤོབས་པ་དག་ནི་མཐའ་ཡས་འགྱུར། །ཇི་ལྟར་རླུང་
ནི་གང་དུ་འང་ཐོགས་མེད་བཞིན། །ཆོས་དང་དོན་དང་ངེས་པའི་ཚིག་ཀྱང་ཤེས། །འདྲེན་པ་རྣམས་ཀྱིས་དགོངས་ཏེ་གང་གསུངས་པ། །མདོ་སྡེ་རྣམས་ཀྱི་མཚམས་སྦྱར་རྟག་ཏུ་ཤེས། །རྣམ་པར་འདྲེན་པ་མྱ་ངན་འདས་པ་ཡི། །
མདོ་སྡེ་རྣམས་ཀྱི་ཡང་དག་དོན་དེ་ཤེས། །ཟླ་བ་ཉི་མ་འདྲ་བར་དེ་འགྱུར་ཏེ། །དེ་ནི་ཤིན་དུ་སྣང་ཞིང་གསལ་བྱེད་འགྱུར། །དེ་ནི་ས་ལ་རྒྱུ་ཞིང་དེ་དང་དེར། །བྱང་ཆུབ་སེམས་དཔའ་མང་པོ་ཡང་དག་འཛུད། །དེ་བས་བྱང་ཆུབ་སེམས་
དཔའ་ཡང་དག་ཀྱང་། །འདི་འདྲ་བ་ཡི་ཕན་ཡོན་འདི་ཐོས་ནས། །མྱ་ངན་ང་འདས་མདོ་འདི་ཟུང་ཤིག་དང་། །དེ་དག་ཐེ་ཚོམ་མེད་པར་བྱང་ཆུབ་འགྱུར། །དམ་པའི་ཆོས་པད་མ་དཀར་པོ་ལས་དེ་བཞིན་གཤེགས་པའི་རྫུ་འཕྲུལ་མངོན་པར་འདུ་བྱེད་པའི་ལེའུ་ཞེས་བྱ་སྟེ་ཉི་ཤུ་

46-1-161a

པའོ།། །། དམ་པའི་ཆོས་པད་མ་དཀར་པོ་བམ་པོ་བཅུ་གཉིས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་
ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི། ལུས་ལ་ཐོགས་སམ་
གླེགས་བམ་དུ་བགྱིས་ཏེ་འཛིན་པའི་རིགས་ཀྱི་བུ་འམ་རིགས་ཀྱི་བུ་མོ་དེ་བསོད་ནམས་ཇི་སྙེད་ཅིག་སྐྱེད་པར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་
རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །སྨན་གྱི་རྒྱལ་པོ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་བརྒྱད་བཅུའི་བྱེ་མ་སྙེད་ལ་བསྟི་སྟང་དུ་བྱེད་བཙུན་པར་བྱེད་རི་མོར་
བྱེད་མཆོད་པ་བྱེད་ན། སྨན་གྱི་རྒྱལ་པོ་འདི་ཇི་སྙམ་དུ་སེམས། རིགས་ཀྱི་བུ་འམ་རིགས་ཀྱི་བུ་མོ་དེ་གཞི་དེ་ལས་བསོད་ནམས་མང་དུ་སྐྱེད་དམ། གསོལ་པ་བཅོམ་ལྡན་འདས་མང་ལགས་སོ། །བདེ་བར་གཤེགས་
པ་མང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྨན་གྱི་རྒྱལ་པོ་ཁྱོད་མོས་པར་བྱའོ། །ཁོང་དུ་ཆུད་པར་བྱའོ། །སྨན་གྱི་རྒྱལ་པོ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ། དམ་པའི་ཆོས་པད་མ་དཀར་
པོའི་ཆོས་ཀྱི་རྣམ་གྲངས་འདི་ལས། ཐ་ན་ཚིག་བཞི་པའི་ཚིགས་སུ་བཅད་པ་གཅིག་ཙམ་ཡང་འཛིན་པ་དང་ཀློག་པ་དང་ཀུན་ཆུབ་པར་བྱེད་པ་དང་ནན་ཏན་གྱིས་བསྒྲུབ་ན། སྨན་གྱི་རྒྱལ་པོ་རིགས་ཀྱི་བུའམ་རིགས་ཀྱི་བུ་མོ་དེ་གཞི་དེ་ལས་དེ་
བས་ཆེས་བསོད་ནམས་མང་དུ་སྐྱེད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་དམ་པའི་ཆོས་ཀྱི་རྣམ་གྲངས་འདི་ལུས་ལ་ཐོགས་སམ་

46-1-161b

གླེགས་བམ་དུ་བགྱིས་ཏེ། འཛིན་པའི་རིགས་ཀྱི་བུ་འམ་རིགས་ཀྱི་བུ་མོ་དེ་བདག་གིས་བསྲུང་བ་དང་བསྐྱབ་པ་དང་སྦ་བའི་སླད་ཏུ་གཟུངས་སྔགས་ཀྱི་ཚིག་རྣམས་སྩལ་བར་བགྱིའོ། །ཏདྱ་ཐཱ། ཨནྱེ། མནྱེ། མ་ནེ་མ་མ་ནེ། ཙིཏྟེ་ཙི་རཏེ། 
ཤ་མེ་ཤ་མ་ཡི་ཏཱ་བི། ཤཱནྟཻ། མུཀྟེ། མུཀྟ་ཏ་མེ་ས་མེ། ཨ་བི་ཤ་མེ་ས་མ་ས་མེ། ཛ་ཡེ། ཀྵ་ཡེ་ཨ་ཀྵ་ཡེ། ཨཀྵི་ཎོ། ཤཱནྟ། ཤ་མི་ཏེ་དྷཱ་ར་ཎཱི། ཨཱ་ལོ་ཀ་བྷཱ་སེ། པྲ་ཏྱ་བེཀྵ་ཎཱི། བི་བི་རུ་ཨ་བྷྱནྟ། ར་ནི་བིཥྚེ། ཨ་བྷྱནྟ་ར་ནི་བིཥྚི་ཨ་ཏྱནྟ་པཱེ་རི་
ཤུད་དྷི། ཨུད་ཀུ་ལོ། མུད་ཀུ་ལེ། ཨར་ཏེ། མ་ར་ཏེ། ཤུ་ཀཱ་ཀྵཱི། ཨ་ས་མ་ས་མེ། བུད་དྷ་བི་ལོ་ཀི་ཏེ། དྷརྨ་པ་རཱི་ཀྵི་ཏེ། སང་གྷ་ནི་ར་གྷོ་ཥ་ཎཱི། ནི་ར་གྷོ་ཥ་ཎི། བྷ་ཡཱ་བྷ་ཡ། ཤོ་དྷ་ནཱི་མནྟྲེ་མནྟྲཱ། ཀྵ་ཡ་ཏེ་རུ་ཏྲ་ཀཽ་ཤ་ལེ། ཨ་ཀྵ་ཡེ་ཨ་ཀྵ་བ་ར་ཏཱ་ཡཱ་
པ་ལོ། ཨ་མནྱ་ན་ཏཱ་ཡཱ། བཅོམ་ལྡན་འདས་གཟུངས་སྔགས་ཀྱི་ཚིག་འདི་དག་ནི། སངས་རྒྱས་བཅོམ་ལྡན་འདས་གང་གཱའི་ཀླུང་དྲུག་བཅུའི་བྱེ་མ་སྙེད་ཀྱིས་བཤད་པ་སྟེ། གང་གིས་མདོ་སྡེ་འདི་ལྟ་བུ་འཛིན་པ་ཆོས་སྨྲ་བ་འདི་ལྟ་བུ་དེ་
དག་དང་འགལ་བར་བགྱིས་ན། སངས་རྒྱས་བཅོམ་ལྡན་འདས་དེ་དག་ཐམས་ཅད་ལ་དེ་འཁུས་པ་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་ལ་འདི་སྐད་ཅེས་བཀའ་
སྩལ་ཏོ། །སྨན་གྱི་རྒྱལ་པོ་ཁྱོད་ཀྱིས་གཟུངས་སྔགས་ཀྱི་ཚིག་རྣམས་སྨྲས་པས། སེམས་ཅན་མང་པོའི་དོན་བྱས་ཤིང་སྨན་གྱི་རྒྱལ་པོ་སེམས་ཅན་རྣམས་ལ་སྙིང་བརྩེ་བའི་ཕྱིར་བསྲུང་བ་དང་བསྐྱབ་པ་དང་སྦ་བ་བྱས་པ་
ལེགས་སོ་ལེགས་སོ་ཞེས་བྱ་བ་བྱིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་སྦྱིན་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀྱང་། ཆོས་སྨྲ་བ་འདི་
ལྟ་བུ་དག་གི་ཆེད་ཏུ་གཟུངས་སྔགས་ཀྱི་ཚིག་རྣམས་སྩལ་བར་བགྱི་སྟེ། དེས་ཆོས་སྨྲ་བ་འདི་ལྟ་བུ་དེ་དག་ལ་གླགས་ལྟ་བ་གང་གིས་ཀྱང་གླགས་མི་རྙེད་པ་འདི་ལྟ་སྟེ། གནོད་སྦྱིན་ནམ་སྲིན་པོ་འམ་སྲུལ་པོ་འམ་གཤེད་བྱེད་དམ་གྲུལ་

46-1-162a

བུམ་འམ་ཡི་དགས་གླགས་ལྟ་བ་རྣམས་ཀྱིས་གླགས་མི་རྙེད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་སྦྱིན་པས་དེའི་ཚེ་གཟུངས་སྔགས་ཀྱི་ཚིག་འདི་དག་སྨྲས་སོ། །ཏདྱ་ཐཱ། ཛྭ་ལེ་མ་ཧཱ་ཛྭ་ལེ། ཨུཀྐེ། 
མུཀྐེ། ཨ་ཏེ་ཨ་ཏཱ་བ་ཏི། ནྲྀ་ཊྱོ་ནྲཱྀ་ཊཱ་པ་ཏི། ཨིཊྚི་ནི། བིཊྚི་ཙིཊྚི་ནི། ནྲྀ་ཊ་ཊི་ནི། ནྲྀ་ཊ་ཊཱ་བ་ཏི་སྭཱ་ཧཱ། བཅོམ་ལྡན་འདས་གཟུངས་སྔགས་ཀྱི་ཚིག་འདི་དག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་
གི་བྱེ་མ་སྙེད་ཀྱིས་གསུངས་ཤིང་རྗེས་སུ་ཡི་རང་བ་སྟེ། གང་གིས་ཆོས་སྨྲ་བ་འདི་ལྟ་བུ་འདི་དག་དང་འགལ་བར་བགྱིས་ན། དེ་དེ་བཞིན་གཤེགས་པ་དེ་དག་ཐམས་ཅད་ལ་འཁུས་པ་ལགས་སོ། །དེ་ནས་བཅོམ་ལྡན་འདས་ལ་རྒྱལ་པོ་ཆེན་
པོ་རྣམ་ཐོས་ཀྱི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་ཆོས་སྨྲ་བ་དེ་དག་ལ་གློ་བ་བརྩེ་བས་སྨན་པ་དང་བདེ་བ་དང་བསྲུང་བ་དང་བསྐྱབ་པ་དང་སྦ་བའི་སླད་ཏུ་གཟུངས་སྔགས་ཀྱི་ཚིག་རྣམས་བརྗོད་པར་བགྱིའོ། །
ཏདྱ་ཐཱ། ཨཊ་ཊ། ནཊ་ཊེ། ཏ་ནཊ་ཊེ། ཨ་ན་ཏེ་ནཱ་ཏི། ཀུ་ན་ཊི་སྭཱ་ཧཱ། བཅོམ་ལྡན་འདས་གཟུངས་སྔགས་ཀྱི་ཚིག་འདི་དག་གིས་ཆོས་སྨྲ་བ་དེ་དག་ལ་དཔག་ཚད་བརྒྱ་ཚུན་ཆད་བསྲུང་བར་བགྱིའོ། །རིགས་ཀྱི་བུ་འམ་རིགས་ཀྱི་བུ་མོ་
མདོ་སྡེ་འདི་ལྟ་བུ་འཛིན་ཅིང་། ཆོས་སྨྲ་བ་དེ་དག་ལ་ཡང་བསྲུང་བ་བགྱིས་པར་འགྱུར། བདེ་ལེགས་སུ་བགྱིས་པར་འགྱུར་རོ། །དེ་ནས་རྒྱལ་པོ་ཆེན་པོ་འཕགས་སྐྱེས་པོ་དྲི་ཟ་བྱེ་བ་ཁྲག་ཁྲིག་བརྒྱ་སྟོང་གིས་ཡོངས་སུ་བསྐོར་ཅིང་
མདུན་དུ་བདར་ནས། འཁོར་དེར་འདུས་པར་གྱུར་ཏེ། འདུག་པ་དེ་སྟན་ལས་ལངས་ནས་བླ་གོས་ཕྲག་པ་གཅིག་ཏུ་བཟར་ཏེ། པུས་མོ་གཡས་པའི་ལྷ་ང་ས་ལ་བརྩུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་
སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་མདོ་སྡེ་འདི་ལྟ་བུ་འཛིན་པ། ཆོས་སྨྲ་བ་འདི་ལྟ་བུ་དེ་དག་བསྲུང་བ་དང་བསྐྱབ་པ་དང་། སྦ་བའི་སླད་ཏུ་གཟུངས་སྔགས་ཀྱི་ཚིག་རྣམས་

46-1-162b

བརྗོད་པར་བགྱིའོ། །ཏདྱ་ཐཱ། ཨ་ག་ཎོ་ག་ཎོ། གཽ་རི་གན་དྷཱ་རི། ཙཎྜ་ལི། མཱ་ཏང་གི། པུཀ་ཀ་སི། ཀུ་ལེ། བྲུ་ཧི་སྭཱ་ཧཱ། བཅོམ་ལྡན་འདས་གཟུངས་སྔགས་ཀྱི་ཚིག་འདི་དག་ནི་སངས་རྒྱས་བྱེ་བ་ཕྲག་བཞི་བཅུ་རྩ་གཉིས་ཀྱིས་
གསུངས་ཏེ། གང་ཞིག་ཆོས་སྨྲ་བ་འདི་ལྟ་བུ་འདི་དག་དང་འགལ་བར་བགྱིད་ན། དེ་དག་ཐམས་ཅད་ལ་འཁུས་པ་ལགས་སོ། །དེ་ནས་སྲིན་མོ་འཕྱང་མ་ཞེས་བྱ་བ་དང་སྲིན་མོ་རྣམ་པར་འཕྱང་མ་ཞེས་བྱ་བ་དང་སྲིན་མོ་སོ་
བརྩེགས་ཞེས་བྱ་བ་དང་སྲིན་མོ་མེ་ཏོག་སོ་ཞེས་བྱ་བ་དང་སྲིན་མོ་ཅོད་པན་སོ་ཞེས་བྱ་བ་དང་སྲིན་མོ་སྒྲ་ཅན་ཞེས་བྱ་བ་དང་སྲིན་མོ་མེ་ཞེས་བྱ་བ་དང་སྲིན་མོ་ཕྲེང་བ་འཆང་ཞེས་བྱ་བ་དང་སྲིན་མོ་མདུང་ཅན་ཞེས་བྱ་བ་དང་སྲིན་མོ་སེམས་
ཅན་ཐམས་ཅད་ཀྱི་མདངས་འཕྲོག་ཅེས་བྱ་བ་དང་འཕྲོག་མ་བུ་དང་གཡོག་ཏུ་བཅས་པ་དང་སྲིན་མོ་དེ་དག་ཐམས་ཅད་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། སྲིན་མོ་དེ་དག་ཐམས་ཅད་ཀྱིས་སྒྲ་སྐད་གཅིག་ཏུ་བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀྱང་མདོ་སྡེ་འདི་འཛིན་པ་ཆོས་སྨྲ་བ་འདི་ལྟ་བུ་དེ་དག་བསྲུང་བ་དང་བསྐྱབ་པ་དང་སྦ་བར་བགྱིའོ། །བདེ་ལེགས་སུ་འགྱུར་བར་བགྱིའོ། །ཅི་ནས་ཆོས་སྨྲ་
བ་དེ་དག་ལ་གླགས་ལྟ་བ་དང་སྐབས་ཚོལ་བ་དག་གིས་ཀྱང་གླགས་མི་རྙེད་པར་བགྱིའོ། །དེ་ནས་སྲིན་མོ་དེ་དག་ཐམས་ཅད་ཀྱིས་སྒྲ་སྐད་གཅིག་ཏུ་ཚིག་མཐུན་པར་བཅོམ་ལྡན་འདས་ལ་གཟུངས་སྔགས་ཀྱི་ཚིག་འདི་དག་ཕུལ་
ལོ། །ཏདྱ་ཐཱ། ཨི་ཏི་མེ། ཨི་ཏི་མེ། ཨི་ཏི་མེ། ཨི་ཏི་མེ། ཨི་ཏི་མེ། ནི་མེ་ནི་མེ། ནི་མེ། ནི་མེ། ནི་མེ། རུ་ཧེ། རུ་ཧེ། རུ་ཧེ། རུ་ཧེ། རུ་ཧེ། ཧ་སྟེ། ཧ་སྟེ། ཧ་སྟེ། ཧ་སྟེ། ཧ་སྟེ་སྭཱ་ཧཱ། འདི་སྤྱི་བོར་བཞག་ནས་ཆོས་སྨྲ་བ་རྣམས་ལ་
སུ་ཡང་འཁུ་བར་མ་གྱུར་ཅིག །གནོད་སྦྱིན་ནམ་སྲིན་པོ་འམ་ཡི་དགས་སམ་ཤ་ཟ་འམ་སྲུལ་པོ་འམ་གཤེད་བྱེད་དམ་རོ་ལངས་སམ་རེངས་པ་འམ་གནོན་པོ་འམ་བརྗེད་བྱེད་ཀྱི་གཟུགས་སམ་གནོད་སྦྱིན་གྱིས་བྱས་པ་འམ་

46-1-163a

མིས་བྱས་པ་འམ་མི་མ་ཡིན་པས་བྱས་པ་འམ་རིམས་ནད་ཉིན་གཅིག་པ་འམ་ཉིན་གཉིས་པ་འམ་ཉིན་གསུམ་པ་འམ་ཉིན་བཞི་པ་འམ་རྟག་པའི་རིམས་སམ། ཐ་ན་རྨི་ལམ་ན་ཡང་བུད་མེད་ཀྱི་གཟུགས་སམ་སྐྱེས་
པའི་གཟུགས་སམ་ཁྱེའུའི་གཟུགས་སམ་བུ་མོའི་གཟུགས་ཀྱིས་མཐོ་འཚམ་པར་འགྱུར་བ་དེ་ནི་གནས་མ་མཆིས་སོ། །དེ་ནས་སྲིན་མོ་དེ་དག་གིས་སྒྲ་སྐད་གཅིག་ཏུ་ཚིག་མཐུན་པར་བཅོམ་ལྡན་འདས་ལ་ཚིགས་སུ་བཅད་པ་འདི་
དག་གསོལ་ཏོ། །གང་གིས་གསང་སྔགས་འདི་ཐོས་ནས། །ཆོས་སྨྲ་བ་དང་འགལ་བགྱིད་པ། །དེའི་མགོ་ཚལ་པ་བདུན་དུ་འགས། ཨརྫ་ཀ་ཡི་དོག་པ་བཞིན། །གང་ཞིག་ཆོས་སྨྲ་འགལ་བགྱིད་པ། །མ་བསད་པ་ཡི་འགྲོ་
གང་དང་། །ཕ་བསད་འགྲོ་བ་གང་ལགས་པའི། །འགྲོ་བ་དེ་ནི་དེར་མཆིའོ། །གང་ཞིག་ཆོས་སྨྲ་འགལ་བགྱིད་པ། །ཏིལ་འཚིར་དག་གི་འགྲོ་གང་དང་། །ཏིལ་རྡུང་འགྲོ་བ་གང་ལགས་པའི། །འགྲོ་བ་དེར་ནི་དེ་མཆིའོ། །
གང་ཞིག་ཆོས་སྨྲ་འགལ་བགྱིད་པ། །སྲང་ལ་གཡོ་བགྱིད་འགྲོ་གང་དང་། །བྲེ་འཆོས་འགྲོ་བ་གང་ལགས་པའི། །འགྲོ་བ་དེར་ནི་དེ་མཆིའོ། །དེ་སྐད་ཅེས་གསོལ་ནས། མདུང་ཅན་ལ་སོགས་པ་སྲིན་མོ་དེ་དག་གིས་
བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀྱང་ཆོས་སྨྲ་བ་འདི་ལྟ་བུ་དེ་དག་ལ་བསྲུང་བར་བགྱིའོ། །བདེ་ལེགས་སུ་འགྱུར་བ་དང་ཆད་པ་སྤང་བ་དང་དུག་གཞིལ་བར་བགྱིའོ། །
དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་སྲིན་མོ་དེ་དག་ལ་འདི་སྐད་ཅེས་བཀའ་སྩལ་ཏོ། ཀྱེ་སྲིན་མོ་དག་ལེགས་སོ་ལེགས་སོ། །ཁྱོད་ཀྱིས་ཆོས་སྨྲ་བ་དེ་དག་ལ་བསྲུང་བ་དང་བསྐྱབ་པ་དང་སྦ་བ་གྱིས་
ཤིག །གང་དག་ཐ་ན་ཆོས་ཀྱི་རྣམ་གྲངས་འདིའི་མིང་ཙམ་འཛིན་པ་དེ་དག་ལ་ཡང་། མདུང་ཅན་ཁྱོད་འཁོར་དང་བཅས་པས་བསྲུང་བར་བྱ་ན། གང་དག་ཆོས་ཀྱི་རྣམ་གྲངས་འདི་མཐའ་དག་ཆུབ་པར་འཛིན་པ་དང་གླེགས་

46-1-163b

བམ་དུ་བྱས་ཏེ། རིམ་གྲོ་བྱེད་པ་དང་མེ་ཏོག་དང་བདུག་པ་དང་སྤོས་དང་ཕྲེང་བ་དང་བྱུག་པ་དང་ཕྱེ་མ་དང་ན་བཟའ་དང་གདུགས་དང་རྒྱལ་མཚན་དང་ལྷའི་བ་དན་དང་འབྲུ་མར་གྱི་མར་མེ་འམ་མར་གྱི་མར་མེ་འམ། སྤོས་མར་གྱི་མར་
མེ་འམ་ཙམ་པ་ཀའི་མར་གྱི་མར་མེ་འམ་པར་ཤ་ཀའི་མར་གྱི་མར་མེ་འམ་ཨུད་པ་ལའི་མར་གྱི་མར་མེ་འམ་སྣ་མའི་མར་གྱི་མར་མེ་འམ། དེ་ལྟ་བུའི་མཆོད་པའི་ཡོ་བྱད་རྣམ་པ་མང་པོ་བརྒྱ་སྟོང་གིས་རིམ་གྲོ་བྱེད་པ་ལྟ་ཅི་
སྨོས་ཏེ། མདུང་ཅན་ཁྱོད་གཡོག་དང་བཅས་པས་བསྲུང་བར་བྱའོ། །གཟུངས་སྔགས་ཀྱི་ལེའུ་འདི་བཤད་པ་ན་སྲོག་ཆགས་དྲུག་ཁྲི་བརྒྱད་སྟོང་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དམ་པའི་ཆོས་པད་མ་དཀར་པོ་
ལས་གཟུངས་སྔགས་ཀྱི་ལེའུ་ཞེས་བྱ་སྟེ་ཉི་ཤུ་རྩ་གཅིག་པའོ།། །། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པས་
འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་འཇིག་རྟེན་གྱི་ཁམས་མི་མཇེད་འདི་ན་རྒྱུ་བ་དང་། བཅོམ་ལྡན་འདས་འདི་དཀའ་བ་
བགྱིད་པ་བྱེ་བ་ཁྲག་ཁྲིག་བརྒྱ་སྟོང་མང་པོ་དག་གདའ། བཅོམ་ལྡན་འདས་གང་ཐོས་པས་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་དང་མི་དང་མི་
མ་ཡིན་པ་རྣམས་དང་འཇིག་རྟེན་གྱི་ཁམས་གཞན་ནས་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། ཉན་ཐོས་ཆེན་པོ་འདི་དག་གིས་ཐོས་ནས་ཐམས་ཅད་དགའ་མགུ་རངས་ཤིང་ཡིད་བདེ་བར་
འགྱུར་བ། བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོའི་སྤྱོད་པ་གང་ཅི་ལགས་པའི་ཕྱོགས་ཙམ་ཞིག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྗོགས་པའི་སངས་རྒྱས་ཀྱིས་ལེགས་པར་བཤད་

46-1-164a

ཏུ་གསོལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པས་གསོལ་བ་བཏབ་པར་མཁྱེན་ནས། དེའི་ཚེ་བྱང་ཆུབ་སེམས་དཔའ་སེམས་དཔའ་
ཆེན་པོ་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་སྔོན་བྱུང་བ་འདས་པའི་དུས་ན། བསྐལ་པ་གང་གཱའི་ཀླུང་གི་བྱེ་མ་སྙེད་དུ་གྱུར་པ་དེའི་ཚེ་དེའི་དུས་ན། དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཉི་
ཟླ་དྲི་མ་མེད་པའི་འོད་དཔལ་ཞེས་བྱ་བ་འཇིག་རྟེན་དུ་བྱུང་སྟེ། སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་
འོད་དཔལ་དེའི། བྱང་ཆུབ་སེམས་དཔའ་བྱེ་བ་བརྒྱད་ཅུའི་འདུས་པ་ཆེན་པོ་བྱུང་ངོ་། །གང་གཱའི་ཀླུང་བདུན་ཅུ་རྩ་གཉིས་ཀྱི་བྱེ་མ་སྙེད་ཀྱི་ཉན་ཐོས་འདུས་པ་བྱུང་ངོ་། །དེའི་བསྟན་པ་ལ་བུད་མེད་མེད་པར་གྱུར་ཏོ། །སེམས་ཅན་དམྱལ་བ་དང་དུད་འགྲོའི་
སྐྱེ་གནས་དང་ཡི་དགས་དང་ལྷ་མ་ཡིན་གྱི་རིས་མེད་དོ། །སངས་རྒྱས་ཀྱི་ཞིང་ཡང་ལག་མཐིལ་ལྟར་མཉམ་ལ་ཉམས་དགའ་བར་གྱུར་ཏོ། །ལྷའི་བཻ་དཱུརྱ་ལས་གྲུབ་པའི་ས་ཕྱོགས་རིན་པོ་ཆེ་དང་ཙན་དན་གྱི་ཤིང་ལྗོན་པས་
བརྒྱན་ཞིང་། རིན་པོ་ཆེའི་དྲ་བས་བྲེས་པ་དར་གྱི་ལྡ་ལྡི་མངོན་པར་རབ་ཏུ་སྤྱངས་པ་རིན་པོ་ཆེའི་པོག་ཕོར་ནས་བདུག་པས་བདུགས་པ་རིན་པོ་ཆེའི་ཤིང་ལྗོན་པའི་དྲུང་ཐམས་ཅད་ན་རིན་པོ་ཆེའི་མཁའ་རྟེན་མདའ་རྒྱང་གང་གི་
ཚད་ཙམ་བྱས་པ་ཡོད་པ། རིན་པོ་ཆེའི་མཁའ་རྟེན་ཐམས་ཅད་ཀྱི་སྟེང་ན་ལྷའི་བུ་བྱེ་བ་བརྒྱ་དག །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་

46-1-164b

དཔལ་ལ་མཆོད་པ་བྱ་བའི་ཕྱིར། སིལ་སྙན་བྱེད་ཅིང་ཕེག་རྡོབ་པ་དང་རོལ་མོའི་སྒྲ་འབྱིན་ཅིང་འཁོད་དོ། །བཅོམ་ལྡན་འདས་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ལ་
བརྩམས་ཏེ། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི། ཉན་ཐོས་ཆེན་པོ་དེ་དག་དང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་རྒྱས་པར་རབ་ཏུ་སྟོན་ཏོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་
ཤེས་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་དེའི་ཚེའི་ཚད་ནི་བསྐལ་པ་བཞི་ཁྲི་ཉིས་སྟོང་དུ་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་
དང་ཉན་ཐོས་ཆེན་པོ་དེ་དག་གི་ཚེའི་ཚད་ཀྱང་དེ་ཙམ་དུ་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེ་ཡང་། བཅོམ་ལྡན་འདས་དེའི་གསུང་རབ་ལ་དཀའ་བ་བྱེད་པ་ལ་བརྩོན་
པར་གྱུར་ཏེ། དེ་ལོ་ཁྲི་ཉིས་སྟོང་དུ་འཆག་པ་ལ་ཞུགས་ཤིང་བརྩོན་འགྲུས་ཆེན་པོ་བརྩམས་པས་རྣལ་འབྱོར་ལ་བརྩོན་པར་གྱུར་ཏོ། །དེ་ལོ་ཁྲི་ཉིས་སྟོང་འདས་ནས་གཟུགས་ཐམས་ཅད་ཡང་དག་པར་སྟོན་པ་ཞེས་བྱ་བའི་
ཏིང་ངེ་འཛིན་ཐོབ་སྟེ། ཏིང་ངེ་འཛིན་དེ་ཐོབ་མ་ཐག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེ་ཚིམ་ཞིང་མགུ་སྟེ་ཡིད་རངས་ནས་རབ་ཏུ་དགའ་
ཞིང་དགའ་བ་དང་ཡིད་བདེ་བ་སྐྱེས་ནས། དེའི་ཚེ་འདི་སྙམ་དུ་སེམས་ཏེ། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ལ་བརྟེན་ནས་གཟུངས་
ཐམས་ཅད་ཡང་དག་པར་སྟོན་པ་ཞེས་བྱ་བའི་ཏིང་ངེ་འཛིན་བདག་གིས་ཐོབ་པོ་སྙམ་མོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་

46-1-165a

ཐམས་ཅད་ཀྱིས་མཐོང་ན་དགའ་བ་ཡང་འདི་སྙམ་དུ་སེམས་ཏེ། འདི་ལྟར་བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་དང་དམ་པའི་ཆོས་པད་མ་
དཀར་པོའི་ཆོས་ཀྱི་རྣམ་གྲངས་འདི་མཆོད་པར་བྱའོ་སྙམ་ནས། དེའི་ཚེ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བའི་ཏིང་ངེ་
འཛིན་དེ་ལ་སྙོམས་པར་ཞུགས་མ་ཐག་ཏུ། དེའི་མོད་ལ་སྟེང་གི་བར་སྣང་ལས་མེ་ཏོག་མན་དཱ་ར་དང་མན་དཱ་ར་ཆེན་པོའི་ལྷའི་མེ་ཏོག་གི་ཆར་ཆེན་པོ་མངོན་པར་བབ་པོ། །དུས་ཀྱི་རྗེས་སུ་འབྲང་བའི་ཙན་དན་གྱིས་སྤྲིན་བྱས་ཏེ། ཙན་དན་སྦྲུལ་
གྱི་སྙིང་པོའི་ཆར་མངོན་པར་བབ་སྟེ། སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་ལྟ་བུའི་སྤོས་ཀྱི་རྣམ་པ་ཞོ་གཉིས་ཀྱི་རིན་དུ་འཇིག་རྟེན་གྱི་ཁམས་མི་མཇེད་འདིས་མི་ཆོག་གོ། །སྐར་མའི་རྒྱལ་པོ་མེ་ཏོག་ཀུན་
དུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དྲན་པ་དང་ལྡན་ཞིང་ཤེས་བཞིན་དུ་ཏིང་ངེ་འཛིན་དེ་ལས་ལངས་སོ། །ལངས་ནས་འདི་སྙམ་དུ་
སེམས་ཏེ་ཅི་ལྟར་ལུས་ཡོངས་སུ་བཏང་བ་ལྟར་ནི་རྫུ་འཕྲུལ་གྱི་ཆོ་འཕྲུལ་དག་གིས། བཅོམ་ལྡན་འདས་ལ་མཆོད་པ་བྱས་པ་མ་ཡིན་ནོ་སྙམ་མོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་
སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེ་དེའི་ཚེ། ཨ་ག་རུ་དང་དུ་རུས་ཀ་དང་པོག་གི་ཁུ་བ་ཟ་ཞིང་ཙམ་པ་ཀའི་མར་ཡང་འཐུང་ངོ་། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་
པ་མངོན་པར་ཤེས་པ། རྣམ་གྲངས་འདིས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ། རྟག་ཏུ་སྤོས་ཟ་ཞིང་ཙམ་པ་ཀའི་མར་འཐུང་བས་ལོ་བཅུ་གཉིས་འདས་པར་གྱུར་ཏོ། །

46-1-165b

སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ། ལོ་བཅུ་གཉིས་པོ་དེ་འདས་ནས་རང་གི་ལུས་ལྷའི་རས་ཀྱིས་ཀུན་
དཀྲིས་ནས་འབྲུ་མར་གྱིས་ཞེན་པར་བྱས་ཏེ་བདག་གི་བྱིན་གྱི་བརླབས་བྱས་སོ། །བདག་གིས་བྱིན་གྱི་བརླབས་བྱས་ནས། དེ་བཞིན་གཤེགས་པ་དང་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་མཆོད་པའི་ལས་
ཀྱི་ཕྱིར་བདག་གི་ལུས་ལ་མེ་འབར་བར་བྱས་སོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བའི་ལུས་ཀྱི་མར་
མེ་འབར་བ་དེའི་འོད་ཀྱིས། འཇིག་རྟེན་གྱི་ཁམས་གང་གཱའི་ཀླུང་བརྒྱད་བཅུའི་བྱེ་མ་སྙེད་ཁྱབ་པར་གྱུར་ཏེ། འཇིག་རྟེན་གྱི་ཁམས་དེ་དག་གི་སངས་རྒྱས་བཅོམ་ལྡན་འདས་གྃ་གཱའི་ཀླུང་བརྒྱད་བཅུའི་བྱེ་མ་སྙེད་ཐམས་ཅད་ཀྱིས་ལེགས་སོ་
ཞེས་བྱ་བ་བྱིན་ཏེ། ལེགས་སོ་ལེགས་སོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བརྩོན་འགྲུས་རྩོམ་པ་ཡང་དག་པའོ། །འདི་ནི་དེ་བཞིན་གཤེགས་པ་ལ་མཆོད་པ་དང་ཆོས་ལ་མཆོད་པ་
ཡང་དག་པ་སྟེ། མེ་ཏོག་དང་བདུག་པ་དང་སྤོས་དང་ཕྲེང་བ་དང་བྱུག་པ་དང་ཕྱེ་མ་དང་ན་བཟའ་དང་གདུགས་དང་རྒྱལ་མཚན་དང་ལྷའི་བ་དན་གྱིས་མཆོད་པ་དང་ཟང་ཟིང་གིས་མཆོད་པ་དང་ཙན་དན་སྦྲུལ་གྱི་སྙིང་པོས་མཆོད་པ་ནི་དེ་ལྟ་མ་
ཡིན་ནོ། །རིགས་ཀྱི་བུ་སྦྱིན་པ་འདི་ནི་མཆོག་སྟེ། རྒྱལ་སྲིད་ཡོངས་སུ་གཏོང་བའི་སྦྱིན་པ་ནི་དེ་ལྟ་མ་ཡིན་ནོ། །བུ་དང་ཆུང་མ་ཕངས་པ་ཡོངས་སུ་གཏོང་བའི་སྦྱིན་པ་ཡང་དེ་ལྟ་མ་ཡིན་ནོ། །
རིགས་ཀྱི་བུ་གང་བདག་གི་ལུས་གཏོང་བའི་ཆོས་ཀྱི་མཆོད་པ་འདི་ནི་མཆོད་པ་ཁྱད་པར་ཅན་ནོ། །དམ་པའོ། །མཆོག་གོ། །ཕུལ་ལོ། །གྱ་ནོམ་པའོ། །སྐར་མའི་རྒྱལ་པོ་མེ་ཏོག་ཀུན་དུ་

46-1-166a

རྒྱས་པ་མངོན་པར་ཤེས་པ། སངས་རྒྱས་བཅོམ་ལྡན་འདས་དེ་དག་གིས་ཚིག་དེ་སྐད་ཅེས་གསུངས་ནས་དེ་ནས་ཅང་མི་གསུང་བར་གྱུར་ཏོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ་བྱང་ཆུབ་
སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བའི་ལུས་ལ་འབར་བ་ལོ་བཅུ་གཉིས་ཀྱི་བར་དུ་ཞི་བར་མ་སོང་ངོ་། །དེ་ཕྱིས་ལོ་བཅུ་གཉིས་འདས་ནས་ཞི་བར་གྱུར་ཏོ། །སྐར་མའི་རྒྱལ་
པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེས། དེ་བཞིན་གཤེགས་པ་ལ་འདི་ལྟ་བུའི་མཆོད་པ་དང་ཆོས་ཀྱི་མཆོད་པ་བྱས་
ཏེ། དེ་ནས་ཤི་འཕོས་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་གྱི་གསུང་རབ་ལ་རྒྱལ་པོ་དྲི་མ་མེད་པས་བྱིན་པའི་ཁྱིམ་དུ་སྐྱེས་ཏེ། 
སྐྱིལ་མོ་དཀྲུང་བཅས་བཞིན་དུ་པང་པར་རྫུས་ཏེ་སྐྱེས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་སྐྱེས་མ་ཐག་ཏུ། དེའི་ཚེ་རང་གི་ཕ་མ་ལ་ཚིགས་སུ་
བཅད་དེ་སྨྲས་པ། རྒྱལ་མཆོག་འདི་ན་བདག་འཆག་ཅིང་། །དེར་གནས་བདག་གིས་ཏིང་འཛིན་ཐོབ། །བདག་གི་ལུས་ཕངས་ཡོངས་བཏང་སྟེ། །བརྩོན་འགྲུས་སྲ་བརྩམས་བརྟུལ་ཞུགས་ཆེ། །སྐར་མའི་རྒྱལ་པོ་མེ་ཏོག་
ཀུན་དུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བས་ཚིགས་སུ་བཅད་པ་དེ་སྨྲས་ནས། རང་གི་ཕ་མ་ལ་འདི་སྐད་ཅེས། ཡབ་ཡུམ་
བཅོམ་ལྡན་འདས་གང་ལ་བདག་གིས་མཆོད་ནས། སྒྲ་ཐམས་ཅད་ལ་མཁས་པའི་གཟུངས་ཐོབ་ཅིང་། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་ཚིགས་སུ་བཅད་པ་བྱེ་བ་ཁྲག་ཁྲིག་བརྒྱ་སྟོང་གཏམས་

46-1-166b

པ་དང་། དཀྲིགས་པ་དང་མི་འཁྲུགས་པ་བྱེ་བ་ཕྲག་བརྒྱད་བཅུས། བཅོམ་ལྡན་འདས་དེ་ལས་ཐོས་པར་གྱུར་པའི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་
འོད་དཔལ་དེ་ད་ལྟར་ཡང་བཞུགས་ཏེ་འཚོ་ཞིང་གཞེས་ཀྱིས། ཡབ་ཡུམ་བདག་བཅོམ་ལྡན་འདས་དེའི་དྲུང་དུ་མཆིས་ན་ལེགས་སོ། །དེར་མཆིས་ནས་ཡང་བཅོམ་ལྡན་འདས་དེ་ལ་མཆོད་པ་བགྱིའོ་ཞེས་སྨྲས་སོ། །སྐར་མའི་རྒྱལ་པོ་མེ་ཏོག་ཀུན་དུ་
རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེའི་ཚེ། ནམ་མཁའ་ལ་ཤིང་ཏ་ལ་བདུན་ཙམ་དུ་མངོན་པར་འཕགས་ཏེ། རིན་པོ་ཆེ་སྣ་བདུན་
གྱི་ཁང་པ་བརྩེགས་པར་སྐྱིལ་མོ་དཀྲུང་བཅས་ནས་བཅོམ་ལྡན་འདས་དེའི་དྲུང་དུ་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་དེ་ལ་ལན་བདུན་བསྐོར་བ་བྱས་ནས། བཅོམ་ལྡན་འདས་
ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ཕྱག་འཚལ་ཏེ་ཚིགས་སུ་བཅད་པ་འདིས་མངོན་པར་བསྟོད་དོ། །དཔའ་བོ་མི་དབང་ཤིན་དུ་དྲི་མེད་ཞལ། །ཕྱོགས་བཅུ་འདིར་ནི་ཁྱོད་ཀྱི་འོད་ཟེར་མཛེས། །
བདེ་གཤེགས་ཁྱོད་ལ་བདག་གིས་མཆོད་མཆོག་བགྱིས། །མགོན་པོ་ལྟ་བའི་སླད་ཏུ་བདག་འདིར་མཆིས། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་
སེམས་ཅན་ཐམས་ཅད་ཀྱིས་མཐོང་ན་དགའ་བས་ཚིགས་སུ་བཅད་པ་འདི་སྨྲས་ནས། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་ལ་འདི་སྐད་
ཅེས་གསོལ་ཏོ། །བཅོམ་ལྡན་འདས་ཁྱོད་ད་དུང་བཞུགས་སམ། སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་

46-1-167a

མེད་པའི་འོད་དཔལ་གྱིས། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ང་ཡོངས་སུ་མྱ་ངན་ལས་འདའ་བའི་དུས་ལ་
བབ་སྟེ། རིགས་ཀྱི་བུ་ང་ཚེ་ཟད་པའི་དུས་ལ་བབ་ཀྱིས་རིགས་ཀྱི་བུ་ཁྱོད་སོང་ལ། ངའི་ཁྲི་ཤོམས་ཤིག་དང་ང་ཡོངས་སུ་མྱ་ངན་ལས་འདའོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་ནས་བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་གྱིས། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་
བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་བསྟན་པ་འདི་ངས་ཁྱོད་ལ་ཡོངས་སུ་གཏད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་དང་། ཉན་ཐོས་ཆེན་པོ་འདི་དག་དང་སངས་རྒྱས་ཀྱི་བྱང་ཆུབ་འདི་
དག་དང་། འཇིག་རྟེན་གྱི་ཁམས་འདི་དྲག་དང་། རིན་པོ་ཆེའི་མཁའ་རྟེན་འདི་དག་དང་། རིན་པོ་ཆེའི་ཤིང་ལྗོན་པ་འདི་དག་དང་ངའི་བསྙེན་བཀུར་བྱེད་པའི་ལྷའི་བུ་འདི་རྣམས་ཀྱང་ཡོངས་སུ་གཏད་དོ། །རིགས་ཀྱི་བུ་ང་ཡོངས་སུ་
མྱ་ངན་ལས་འདས་པའི་རིང་བསྲེལ་གང་ཡིན་པ་དེ་དག་ཀྱང་ཡོངས་སུ་གཏད་དོ། །རིགས་ཀྱི་བུ་ངའི་རིང་བསྲེལ་ལ་ཁྱོད་བདག་གིས་ཀྱང་ཁྱེད་མཆོད་པ་རྒྱ་ཆེར་གྱིས་ཤིག །རིང་བསྲེལ་དེ་དག་ཀྱང་རྒྱས་པར་གྱིས་
ཤིག་མཆོད་རྟེན་སྟོང་ཕྲག་མང་པོ་གྱིས་ཤིག །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
ཉི་ཟླ་དྲི་མ་མེད་པའི་འོད་དཔལ་གྱིས། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེ་ལ་དེ་ལྟར་རྗེས་སུ་བསྟན་ནས། དེའི་ནུབ་མོ་ནམ་གྱི་ཆ་སྨད་ལ་ཕུང་པོ་ལྷག་མ་མེད་

46-1-167b

པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་
ཀྱིས་མཐོང་ན་དགའ་བས། བཅོམ་ལྡན་འདས་དེ་བཞིན་གཤེགས་པ་ཉི་ཟླ་དྲི་མ་མེད་པའི་འོད་དཔལ་དེ་ཡོངས་སུ་མྱ་ངན་ལས་འདས་པར་རིག་སྟེ། ཙན་དན་སྦྲུལ་གྱི་སྙིང་པོ་སྤུངས་ནས་དེ་བཞིན་གཤེགས་པའི་སྐུ་བསྲེགས་
ཏེ། དེ་བཞིན་གཤེགས་པའི་སྐུ་ཚིག་པ་ཞི་བར་རིག་ནས་རིང་བསྲེལ་བསྡུས་ཏེ་ངུ་ཞིང་ཆོ་ངེས་བཏབ་ནས་སྨྲེ་སྔགས་འདོན་ཏོ། །སྐར་མའི་རྒྱལ་པོ་མེ་རྟོག་ཀུན་དུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་
སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ངུས་ཏེ་ཆོ་ངེས་བཏབ་ནས་སྨྲེ་སྔགས་འདོན་ཏོ། རིན་པོ་ཆེ་སྣ་བདུན་གྱི་བུམ་པ་བརྒྱད་ཁྲི་བཞི་སྟོང་བྱེད་ཏུ་བཅུག་ནས། དེ་དག་གི་ནང་དུ་དེ་བཞིན་
གཤེགས་པའི་རིང་བསྲེལ་བཅུག་སྟེ། རིན་པོ་ཆེ་སྣ་བདུན་གྱི་མཆོད་རྟེན་འཕང་དུ་ཚངས་པའི་འཇིག་རྟེན་ལ་ཐུག་པ་གདུགས་ཀྱི་ཕྲེང་བས་ལེགས་པར་བརྒྱན་པ་དར་དང་དྲིལ་བུ་ལེགས་པར་སྤྱངས་པ་བརྒྱད་ཁྲི་
བཞི་སྟོང་བྱས་ཏེ། དེས་མཆོད་རྟེན་དེ་དག་བྱས་ནས་འདི་སྙམ་དུ་བསམས་ཏེ་བདག་གིས་བཅོམ་ལྡན་འདས་ཉི་ཟླ་དྲི་མ་མེད་པའི་འོད་དཔལ། དེ་བཞིན་གཤེགས་པའི་སྐུ་གདུང་ལ་མཆོད་པ་ནི་བྱས་ན་དེ་བས་ཀྱང་ལྷག་པ་
ཆེས་ཁྱད་པར་དུ་འཕགས་པས་དེ་བཞིན་གཤེགས་པའི་རིང་བསྲེལ་ལ་མཆོད་པ་བྱའོ་སྙམ་མོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་
ཅན་ཐམས་ཅད་ཀྱིས་མཐོང་ན་དགའ་བ་དེས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེ་དང་། ཉན་ཐོས་ཆེན་པོ་དེ་དག་དང་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་དང་

46-1-168a

ལྟོ་འཕྱེ་ཆེན་པོ་དང་མི་དང་མི་མ་ཡིན་པའི་ཚོགས་དེ་དག་ལ་སྨྲས་པ། རིགས་ཀྱི་བུ་དག་ཁྱེད་ཐམས་ཅད་ཀྱིས། བཅོམ་ལྡན་འདས་དེའི་རིང་བསྲེལ་རྣམས་ལ་མཆོད་པ་བྱ་བར་སོམས་ཤིག་སྐར་མའི་རྒྱལ་པོ་
མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེས། དེའི་ཚེ་དེ་བཞིན་གཤེགས་པའི་མཆོད་རྟེན་བརྒྱད་ཁྲི་བཞི་སྟོང་
གི་མདུན་དུ། རང་གི་ལག་པ་བསོད་ནམས་བརྒྱས་བརྒྱན་པ་འབར་བར་བྱས་ཏེ། འབར་བར་བྱས་པས་ལོ་བདུན་ཁྲི་ཉིས་སྟོང་གི་བར་དུ་དེ་བཞིན་གཤེགས་པའི་མཆོད་རྟེན་དེ་དག་ལ་མཆོད་པ་བྱས་སོ། །དེས་མཆོད་པ་དེ་
བྱས་པས་འཁོར་དེ་ལས་ཉན་ཐོས་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་བཏུལ་ཏོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱིས་ཀྱང་གཟུགས་ཐམས་ཅད་ཡང་དག་པར་སྟོན་པའི་ཏིང་ངེ་འཛིན་ཐོབ་པར་
གྱུར་ཏོ། ། སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་ནས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེ་དང་ཉན་ཐོས་ཆེན་པོ་དེ་དག་གིས་བྱང་ཆུབ་སེམས་དཔའ་སེམས་དཔའ་
ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེ་ཡན་ལག་མ་ཚང་བར་མཐོང་ནས་ངུས་ཏེ་ཆོ་ངེས་བཏབ་ནས་སྨྲེ་སྔགས་འདོན་ཅིང་གཅིག་ལ་གཅིག་འདི་སྐད་སྨྲས་ཏེ་བདག་ཅག་གི་སློབ་དཔོན་རྗེས་སུ་སྟོན་
པ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་འདི་ད་ལྟར་ཡན་ལག་མ་ཚང་ཞིང་ལག་པ་མེད་པར་གྱུར་ཏོ་ཞེས་ཟེར་རོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་
ཤེས་པ་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ཉན་ཐོས་དེ་དག་དང་ལྷའི་བུ་དེ་དག་ལ་སྨྲས་

46-1-168b

པ་རིགས་ཀྱི་བུ་དག་ཁོ་བོའི་ཡན་ལག་ཉམས་པར་མཐོང་བས་མ་ངུ་ཤིག །ཆོ་ངེས་མ་འདེབས་ཤིག །སྨྲེ་སྔགས་མ་འདོན་ཅིག །རིགས་ཀྱི་བུ་དག་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན། སངས་རྒྱས་
བཅོམ་ལྡན་འདས་གང་དག་བཞུགས་ཤིང་འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་དེ་དག་ཐམས་ཅད་ཁོ་བོས་དཔང་དུ་བཞུགས་ཏེ། དེ་དག་གི་སྤྱན་སྔར་བདེན་པའི་བྱིན་གྱིས་བརླབས་སོ། །བདེན་པ་དང་བདེན་པའི་ཚིག་གང་གིས་
བདག་གི་ལག་པ་དེ་བཞིན་གཤེགས་པ་ལ་མཆོད་པའི་ཕྱིར་ཡོངས་སུ་བཏང་བས། བདག་གི་ལུས་གསེར་གྱི་ཁ་དོག་ཏུ་འགྱུར་བའི་བདེན་པ་དང་བདེན་པའི་ཚིག་དེས། བདག་གི་ལག་པ་འདི་སྔོན་གྱི་བཞིན་དུ་གྱུར་ཅིག །ས་ཆེན་པོ་
འདི་ལན་དྲུག་ཏུ་གཡོས་པར་གྱུར་ཅིག །བར་སྣང་ལ་གནས་པའི་ལྷའི་བུ་རྣམས་ཀྱིས་མེ་ཏོག་གི་ཆར་ཆེན་པོ་ཕོབ་ཤིག་ཅེས་བྱས་སོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་
སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེས། བདེན་པའི་བྱིན་གྱིས་བརླབས་དེ་བྱས་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་སོ། །སྟེང་གི་བར་སྣང་
ལས་ཀྱང་མེ་ཏོག་གི་ཆར་ཆེན་པོ་མངོན་པར་བབ་པོ། །བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེའི་ལག་པ་དེ་ཡང་། འདི་ལྟ་སྟེ་བྱང་ཆུབ་སེམས་དཔའ་སེམས་དཔའ་
ཆེན་པོ་དེ་ཉིད་ཀྱི་བསོད་ནམས་ཀྱི་སྟོབས་བསྐྱེད་པ་དང་། ཡེ་ཤེས་ཀྱི་སྟོབས་བསྐྱེད་པ་དེས་སྔོན་གྱི་བཞིན་དུ་གྱུར་ཏོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱུས་པ་མངོན་པར་ཤེས་པ། 
དེའི་ཚེ་དེའི་དུས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་སོམ་ཉི་འམ་ཡིད་གཉིས་སམ་ཐེ་ཚོམ་ཟ་

46-1-169a

བར་གྱུར་ན་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། བྱང་ཆུབ་སེམས་དཔའ་སེམས་དཔའ་
ཆེན་པོ་སྨན་གྱི་རྒྱལ་པོ་འདི་ཉིད་དེའི་ཚེ་དེའི་དུས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བར་གྱུར་ཏོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ་
བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་བྱ་དཀའ་བ་བྱེ་བ་ཁྲག་ཁྲིག་བརྒྱ་སྟོང་དེ་སྙེད་བྱེད་དོ་ལུས་ཡོངས་སུ་གཏོང་བ་ཡང་བྱེད་དོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། རིགས་ཀྱི་བུ་
འམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་འདོད་པས། དེ་བཞིན་གཤེགས་པའི་མཆོད་རྟེན་དེ་དག་ལ་རྐང་པའི་མཐེ་བོང་བར་བྱའོ། །
ལག་པའི་སོར་མོའམ་རྐང་པའི་སོར་མོ་གཅིག་གམ་ཡན་ལག་གཅིག་གམ་ལག་པ་འབར་བར་བྱའོ། །བྱང་ཆུབ་སེམས་དཔའི་ཐེག་པ་ལ་ཞུགས་པའི་རིགས་ཀྱི་བུ་འམ་རིགས་ཀྱི་བུ་མོ་དེ་ནི་བསོད་ནམས་མངོན་པར་འདུ་བྱེད་
པ་ཆེས་མང་དུ་སྐྱེད་དོ། །རྒྱལ་སྲིད་ཡོངས་སུ་བཏང་བས་ནི་དེ་ལྟ་མ་ཡིན་ནོ། །ཆུང་མ་དང་བུ་ཕོ་དང་བུ་མོ་ཕངས་པ་ཡོངས་སུ་བཏང་བས་ནི་དེ་ལྟ་མ་ཡིན་ནོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་
ནགས་ཚལ་དང་བཅས་པ་རྒྱ་མཚོ་དང་བཅས་པ་རི་དང་བཅས་པ་འབབ་ཆུའི་དངོ་དང་མཚོ་དང་མཚེའུ་དང་ཁྲོན་པ་དང་ཀུན་དགའི་ར་བ་དང་བཅས་པ་ཡོངས་སུ་བཏང་བས་ནི་དེ་ལྟ་མ་ཡིན་ནོ། །སྐར་མའི་རྒྱལ་པོ་མེ་
ཏོག་ཀུན་དུ་རྒྱས་པ་མངོན་པར་ཤེས་པ། རིགས་ཀྱི་བུ་འམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་

46-1-169b

རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ། སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་ཐམས་ཅད་ལ་སྦྱིན་པ་བྱིན་ན། སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། 
རིགས་ཀྱི་བུ་འམ་རིགས་ཀྱི་བུ་མོ་དེ་ནི་རིགས་ཀྱི་བུ་འམ་རིགས་ཀྱི་བུ་གང་གིས། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ལས། ཐ་ན་ཚིག་བཞི་པའི་ཚིགས་སུ་བཅད་པ་གཅིག་ཙམ་འཛིན་པ་དེ་བསོད་
ནམས་ཇི་སྙད་ཅིག་སྐྱེད་པ་དེ་སྙེད་དུ་མི་སྐྱེད་དེ། དེའི་བསོད་ནམས་མངོན་པར་འདུ་བྱེད་པ་འདི་ནི་དེ་བས་ཆེས་མང་བར་བཤད་ཀྱི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གང་བར་བྱས་ཏེ། སངས་
རྒྱས་དང་བྱང་ཆུབ་སེམས་དཔའ་དང་། ཉན་ཐོས་དང་རང་སངས་རྒྱས་ཐམས་ཅད་ལ་སྦྱིན་པ་བྱིན་པ་ནི་དེ་ལྟ་མ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ་འདི་ལྟ་སྟེ་དཔེར་ན་འབབ་ཆུའི་ངོས་
དང་མཚོ་དང་མཚེ་འུ་ཐམས་ཅད་ཀྱི་ནང་ན་རྒྱ་མཚོ་ནི་མཆོག་ཏུ་གྱུར་པ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་བཞིན་དུ་དེ་བཞིན་གཤེགས་པས་བཤད་པའི་མདོ་སྡེ་ཐམས་ཅད་ཀྱི་ནང་ན་དམ་པའི་
ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་མཆོག་ཏུ་གྱུར་པ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། འདི་ལྟ་སྟེ་དཔེར་ན་རི་ནག་པོ་དང་འཁོར་ཡུག་དང་ཁོ་ཆེན་པོ་ཐམས་ཅད་ཀྱི་ནང་
ན་རི་རབ་ནི་རིའི་རྒྱལ་པོ་སྟེ་མཆོག་ཏུ་གྱུར་པ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ་དེ་བཞིན་དུ། དེ་བཞིན་གཤེགས་པས་གསུངས་པའི་མདོ་སྡེ་ཐམས་ཅད་ཀྱི་ནང་ན། དམ་པའི་ཆོས་པད་
མ་དཀར་པོའི་ཆོས་ཀྱི་རྣམ་གྲངས་འདི་རྒྱལ་པོ་སྟེ་མཆོག་ཏུ་གྱུར་པ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། འདི་ལྟ་སྟེ་དཔེར་ན་སྐར་མ་ཐམས་ཅད་ཀྱི་ནང་ན་ཟླ་བ་ནི་འོད་བྱེད་པའི་མཆོག་ཏུ་

46-1-170a

གྱུར་པ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་བཞིན་དུ་དེ་བཞིན་གཤེགས་པས་གསུངས་པའི་མདོ་སྡེ་ཐམས་ཅད་ཀྱི་ནང་ན། དམ་པའི་ཆོས་པད་མ་དཀར་པོའི་ཆོས་
ཀྱི་རྣམ་གྲངས་འདི་ནི་ཟླ་བ་བྱེ་བ་ཁྲག་ཁྲིག་བརྒྱ་སྟོང་བས་ལྷག་པར་འོད་བྱེད་པའི་མཆོག་ཏུ་གྱུར་པ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། འདི་ལྟ་སྟེ་དཔེར་ན་ཉི་མའི་དཀྱིལ་
འཁོར་ནི་མུན་པ་མུན་གནག་ཐམས་ཅད་སེལ་བར་བྱེད་དོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་བཞིན་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་མི་དགེ་བའི་མུན་པ་མུན་གནག་
ཐམས་ཅད་སེལ་བར་བྱེད་དོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། འདི་ལྟ་སྟེ་དཔེར་ན། སུམ་བཅུ་རྩ་གསུམ་པའི་ལྷ་རྣམས་ཀྱི་ནང་ན་བརྒྱ་བྱིན་ནི་ལྷ་རྣམས་ཀྱི་དབང་པོ་ཡིན་ནོ་སྐར་མའི་རྒྱལ་པོ་
མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་བཞིན་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་དེ་བཞིན་གཤེགས་པས་གསུངས་པའི་མདོ་སྡེ་ཐམས་ཅད་ཀྱི་ནང་ན་དབང་པོ་ཡིན་ནོ། །
སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ་འདི་ལྟ་སྟེ་དཔེར་ན། མི་མཇེད་ཀྱི་བདག་པོ་ཚངས་པ་ནི་ཚངས་རིས་ཀྱི་ལྷ་ཐམས་ཅད་ཀྱི་རྒྱལ་པོ་སྟེ་ཚངས་པའི་འཇིག་རྟེན་ན་ཕའི་བྱ་བ་བྱེད་དོ། །སྐར་
མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་བཞིན་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་སེམས་ཅན་སློབ་པ་དང་མི་སློབ་པ་ཐམས་ཅད་དང་ཉན་ཐོས་དང་བྱང་ཆུབ་སེམས་
དཔའི་ཐེག་པ་ལ་ཡང་དག་པར་ཞུགས་པ་ཐམས་ཅད་ལ་ཕའི་བྱ་བ་བྱེད་དོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། འདི་ལྟ་སྟེ་དཔེར་ན། རྒྱུན་དུ་ཞུགས་པ་དང་ལན་ཅིག་ཕྱིར་འོང་བ་དང་

46-1-170b

ཕྱིར་མི་འོང་བ་དང་དགྲ་བཅོམ་པ་དང་རང་སངས་རྒྱས་རྣམས་ནི་བྱིས་པ་སོ་སོའི་སྐྱེ་བོ་ཐམས་ཅད་ལས་འདས་པའོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ་དེ་བཞིན་དུ་དམ་པའི་ཆོས་པད་མ་དཀར་པོའི་
ཆོས་ཀྱི་རྣམ་གྲངས་འདི་ཡང་དེ་བཞིན་གཤེགས་པས་གསུངས་པའི་མདོ་སྡེ་ཐམས་ཅད་ལས་འདས་ཤིང་མངོན་པར་འཕགས་ཏེ། མཆོག་ཏུ་གྱུར་པར་རིག་པར་བྱའོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ་
གང་དག་མདོ་སྡེའི་རྒྱལ་པོ་འདི་འཛིན་པ་དེ་དག་ཀྱང་སེམས་ཅན་ཐམས་ཅད་ཀྱི་གཙོ་བོར་གྱུར་པར་རིག་པར་བྱའོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། འདི་ལྟ་སྟེ་དཔེར་ན། ཉན་ཐོས་དང་རང་སངས་
རྒྱས་ཐམས་ཅད་ཀྱི་ནང་ན་བྱང་ཆུབ་སེམས་དཔའ་ནི་མཆོག་ཅེས་བྱའོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་བཞིན་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་དེ་བཞིན་
གཤེགས་པས་གསུངས་པའི་མདོ་སྡེ་ཐམས་ཅད་ཀྱི་ནང་ན་མཆོག་ཅེས་བྱའོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། འདི་ལྟ་སྟེ་དཔེར་ན། ཉན་ཐོས་དང་རང་སངས་རྒྱས་དང་། བྱང་ཆུབ་སེམས་
དཔའ་ཐམས་ཅད་ཀྱི་ནང་ན་དེ་བཞིན་གཤེགས་པ་ནི་ཆོས་ཀྱི་རྒྱལ་པོར་ཐབས་གསོལ་བ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་བཞིན་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་
ཡང་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་རྣམས་ལ་དེ་བཞིན་གཤེགས་པ་དང་འདྲ་བ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དམ་པའི་ཆོས་པད་མ་
དཀར་པོའི་ཆོས་ཀྱི་རྣམ་གྲངས་འདི་ནི་སེམས་ཅན་ཐམས་ཅད་འཇིགས་པ་ཐམས་ཅད་ལས་སྐྱོབ་པ། སྡུག་བསྔལ་ཐམས་ཅད་ལས་ཐར་བར་བྱེད་པ་སྟེ། སྐོམ་པ་རྣམས་ལ་མཚེའུ་དང་འདྲའོ། །གྲང་བས་ཉེན་པ་

46-1-171a

རྣམས་ལ་མེ་དང་འདྲའོ། །གཅེར་བུ་རྣམས་ལ་གོས་དང་འདྲའོ། །ཚོང་པ་རྣམས་ལ་དེད་དཔོན་དང་འདྲའོ། །བུ་རྣམས་ལ་མ་དང་འདྲའོ། །ཕ་རོལ་དུ་འགྲོ་བ་རྣམས་ལ་གྲུ་དང་འདྲའོ། །ནད་པ་རྣམས་ལ་སྨན་པ་དང་འདྲའོ་མུན་
པ་མུན་གནག་གིས་བསྒྲིབས་པ་རྣམས་ལ་མར་མེ་དང་འདྲའོ། །ནོར་འདོད་པ་རྣམས་ལ་རིན་པོ་ཆེ་དང་འདྲའོ། །ཁམས་ཀྱི་རྒྱལ་པོ་ཐམས་ཅད་ལ་འཁོར་ལོ་སྒྱུར་བ་དང་འདྲའོ། །འབབ་ཆུ་རྣམས་ལ་རྒྱ་མཚོ་དང་འདྲའོ། །
མུན་པ་མུན་གནག་ཐམས་ཅད་སེལ་བའི་ཕྱིར་སྒྲོན་མ་དང་འདྲའོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་བཞིན་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་སྡུག་
བསྔལ་ཐམས་ཅད་ལས་རབ་ཏུ་ཐར་བར་བྱེད་པའོ། །ནད་ཐམས་ཅད་གཅོད་པའོ། །འཁོར་བའི་བཅིང་བ་ཉམ་ང་བ་ཐམས་ཅད་ལས་རབ་ཏུ་ཐར་བར་བྱེད་པའོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་
ཤེས་པ། གང་གིས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཐོས་པ་དང་གང་ཡི་གེར་འདྲི་བ་དང་གང་ཡི་གེར་འདྲིར་འཇུག་པ་དང་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་
པ། གང་གིས་ཆོས་ཀྱི་རྣམ་གྲངས་འདི་བཟུང་ངམ་བསྟན་ཏམ་ཐོས་སམ་ཡི་གེར་བྲིས་སམ་ཡི་གེར་འདྲིར་འཇུག་གམ་གླེགས་བམ་དུ་བྱས་ཏེ་སྟི་སྟང་དུ་བྱེད་པ་དང་བཙུན་པར་བྱེད་པ་དང་བཀུར་སྟིར་བྱེད་པ་
དང་མཆོད་པ་དང་མེ་ཏོག་དང་བདུག་པ་དང་སྤོས་དང་ཕྲེང་བ་དང་བྱུག་པ་དང་ཕྱེ་མ་དང་གོས་དང་གདུགས་དང་རྒྱལ་མཚན་དང་བ་དན་དང་རོལ་མོའི་སྒྲ་དང་ན་བཟའ་དང་ཐལ་མོ་སྦྱར་བའི་ལས་དང་མར་གྱི་མར་
མེ་འམ་འབྲུ་མར་གྱི་མར་མེ་འམ་སྤོས་མར་གྱི་མར་མེ་འམ་ཙམ་པ་ཀའི་མར་གྱི་མར་མེ་འམ། སྣ་མ་དང་སྐྱ་ནར་དང་པར་ཤ་ཀ་དང་ན་པ་མ་ལི་ཀའི་མར་གྱི་མར་མེ་འམ་མཆོད་པ་རྣམ་པ་མང་པོ་དག་གིས་སྟི་སྟང་

46-1-171b

དུ་བྱེད་བཙུན་པར་བྱེད་རིམ་གྲོར་བྱེད་མཆོད་པར་བྱེད་པའི་བསོད་ནམས་མངོན་པར་འདུ་བྱེད་པ་ཇི་སྙེད་ཅིག་འཕེལ་བར་འགྱུར་བའི་བསོད་ནམས་མངོན་པར་འདུ་བྱེད་པ་དེ་དག་གི་མཐའ་ནི། སངས་རྒྱས་ཀྱི་
ཡེ་ཤེས་ཀྱིས་ཀྱང་རྟོགས་པར་མི་ནུས་སོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། གང་ཞིག་སྨན་གྱི་རྒྱལ་པོའི་སྔོན་གྱི་སྦྱོར་བའི་ལེའུ་འདི་འཛིན་པ་དང་སྟོན་པ་དང་ཉན་པའི་རིགས་
ཀྱི་བུ་འམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་དེ་བསོད་ནམས་མང་དུ་སྐྱེད་པར་འགྱུར་རོ། །གལ་ཏེ་བུད་མེད་གཅིག་གིས་ཆོས་ཀྱི་རྣམ་གྲངས་འདི་ཐོས་ནས་འཛིན་ན། དེ་ཉིད་
བུད་མེད་ཀྱི་ལུས་ཀྱི་མཐའ་མར་འགྱུར་རོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། བུད་མེད་གང་ལ་ལས་སྨན་གྱི་རྒྱལ་པོའི་སྔོན་གྱི་སྦྱོར་བའི་ལེའུ་འདི་ལྔ་བརྒྱ་པ་ཐ་མ་ལ་ཐོས་
ནས་ནན་ཏན་བྱེད་པ་དེ། འདི་ནས་ཤི་འཕོས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། གང་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
ཚེ་དཔག་མེད། བྱང་ཆུབ་སེམས་དཔའི་ཚོགས་ཀྱིས་ཡོངསུ་བསྐོར་ཅིང་བཞུགས་ཏེ་འཚོ་ཞིང་བཞེས་པ་དེར། དེ་པད་མའི་སྙིང་པོའི་སེང་གེའི་ཁྲི་ལ་འདུག་བཞིན་དུ་སྐྱེ་བར་འགྱུར་རོ། །དེ་འདོད་ཆགས་ཀྱིས་གཟིར་བར་
མི་འགྱུར་ཏེ། ཞེ་སྡང་གིས་མ་ཡིན་གཏི་མུག་གིས་མ་ཡིན་ང་རྒྱལ་གྱིས་མ་ཡིན་སེར་སྣས་མ་ཡིན་ཁྲོ་བས་མ་ཡིན་གནོད་སེམས་ཀྱིས་མ་ཡིན་ཏེ། དེ་སྐྱེས་མ་ཐག་ཏུ་མངོན་པར་ཤེས་པ་ལྔ་ཐོབ་པར་འགྱུར་
རོ། །མི་སྐྱེ་བའི་ཆོས་ལ་བཟོད་པ་ཡང་ཐོབ་པར་འགྱུར་རོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། བྱང་ཆུབ་སེམས་དཔའ་སེམས་དཔའ་ཆེན་པོ་དེས། མི་སྐྱེ་བའི་ཆོས་ལ་བཟོད་པ་

46-1-172a

ཐོབ་ནས། དེ་བཞིན་གཤེགས་པ་གང་གཱའི་ཀླུང་བདུན་བཅུ་རྩ་གཉིས་ཀྱི་བྱེ་མ་སྙེད་མཐོང་བར་འགྱུར་རོ། །མིག་གི་དབང་པོ་ཡོངས་སུ་དག་པ་གང་གིས། སངས་རྒྱས་བཅོམ་ལྡན་འདས་དེ་དག་མཐོང་བར་འགྱུར་བ་དེ་འདྲ་
བར་དེའི་མིག་གི་དབང་པོ་ཡོངས་སུ་དག་པར་འགྱུར་རོ། །སངས་རྒྱས་བཅོམ་ལྡན་འདས་དེ་དག་གིས་ཀྱང་དེ་ལ་ལེགས་སོ་ཞེས་བྱ་བ་སྦྱིན་པར་འགྱུར་ཏེ། གང་ཁྱོད་ཀྱིས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་
ཐོས་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེའི་གསུང་རབ་ལ་ལུང་མནོས་པ་དང་ཁ་དོན་བྱས་པ་དང་བསྒོམས་པ་དང་བསམས་པ་དང་ཡིད་ལ་བྱས་
པ་དང་སེམས་ཅན་གཞན་དག་ལ་ཡང་རབ་ཏུ་བསྟན་པ། རིགས་ཀྱི་བུ་ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱི་བསོད་ནམས་མངོན་པར་འདུ་བྱེད་པ་འདི་ནི་མེས་ཚིག་པ་འམ་ཆུས་ཁྱེར་བར་མི་ནུས་སོ། །རིགས་ཀྱི་བུ་
ཁྱོད་ཀྱི་བསོད་ནམས་མངོན་པར་འདུ་བྱེད་པ་འདི་ནི་སངས་རྒྱས་བརྒྱ་སྟོང་གིས་ཀྱང་བཤད་པར་མི་ནུས་སོ། །རིགས་ཀྱི་བུ་ཁྱོད་ཀྱིས་བདུད་ཕྱིར་རྒོལ་བ་བཅོམ་མོ། །སྲིད་པའི་རྒྱ་མཚོ་ལས་རྒལ་ཏོ། །དགྲའི་ཚེར་མ་དཀྲུགས་སོ། །
སངས་རྒྱས་བརྒྱ་སྟོང་གིས་བྱིན་གྱིས་བརླབས་སོ། །རིགས་ཀྱི་བུ་ལྷ་དང་བཅས་པའི་འཇིག་རྟེན་ན་ཁྱོད་འདྲ་བ་མེད་དོ། །དེ་བཞིན་གཤེགས་པ་གཅིག་པུ་མ་གཏོགས་པར་གཞན་ཉན་ཐོས་སམ་རང་སངས་རྒྱས་སམ་བྱང་
ཆུབ་སེམས་དཔའ་གང་གིས་ཀྱང་། ཁྱོད་ལ་བསོད་ནམས་ཀྱིས་ཀྱང་རུང་ཡེ་ཤེས་ཀྱིས་ཀྱང་རུང་ཤེས་རབ་ཀྱིས་ཀྱང་རུང་ཏིང་ངེ་འཛིན་གྱི་ཀྱང་རུང་སྟེ་ཟིལ་གྱིས་གནོན་པར་མི་ནུས་སོ་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་
པར་ཤེས་པ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཡེ་ཤེས་ཀྱི་སྟོབས་བསྐྱེད་པ་འདི་ལྟ་བུ་ཐོབ་པར་འགྱུར་རོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། གང་ལ་ལས་སྨན་གྱི་རྒྱལ་པོའི་

46-1-172b

སྔོན་གྱི་སྦྱོར་བའི་ལེའུ་འདི་བཤད་པ་ཐོས་ནས། ལེགས་སོ་ལེགས་སོ་ཞེས་བྱ་བ་བྱིན་པ་དེའི་ཁ་ནས་ཨུད་པ་ལའི་དྲི་འབྱུང་བར་འགྱུར། དེའི་ལུས་ལས་ཀྱང་ཙན་དན་གྱི་དྲི་འབྱུང་བར་འགྱུར་རོ། །གང་གིས་ཆོས་ཀྱི་རྣམ་གྲངས་འདི་
འཆད་པ་ན་ལེགས་སོ་ཞེས་བྱ་བ་བྱིན་པ་དེའི་ཆོས་ཅན་གྱི་ཡོན་ཏན་གྱི་ཕན་ཡོན་དེ་དག་ནི། ངས་ད་ལྟར་གང་དག་བཤད་པ་དེ་འདྲ་བར་འགྱུར་རོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། དེ་ལྟ་བས་ན་བྱང་
ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བའི་སྔོན་གྱི་སྦྱོར་བའི་ལེའུ་འདི་ཅི་ནས། ཕྱི་མའི་ཚེ་ཕྱི་མའི་དུས་ལྔ་བརྒྱ་པ་ཐ་མ་ལ་འཛམ་བུའི་གླིང་འདི་ན་སྤྱོད་ཅིང་ནུབ་པར་མི་འགྱུར་བ་
དང་། བདུད་སྡིག་ཅན་གྱིས་གླགས་མི་རྙེད་པ་དང་བདུད་ཀྱི་རིས་ཀྱི་ལྷ་དང་ཀླུ་དང་གནོད་སྦྱིན་དང་དྲི་ཟ་དང་གྲུལ་བུམ་རྣམས་ཀྱིས་གླགས་མི་རྙེད་པར་བྱ་བའི་ཕྱིར་ངས་ཁྱོད་ལ་ཡོངས་སུ་གཏད་དོ། །སྐར་མའི་རྒྱལ་པོ་མེ་ཏོག་
ཀུན་དུ་རྒྱས་པ་མངོན་པར་ཤེས་པ། དེ་ལྟ་བས་ན་ཆོས་ཀྱི་རྣམ་གྲངས་འདི་འཛམ་བུའི་གླིང་འདིར་སེམས་ཅན་ནད་པ་ནད་ཀྱིས་བཏབ་པ་རྣམས་ལ་སྨན་ལྟ་བུར་འགྱུར་བར་བྱིན་གྱིས་བརླབ་པར་བྱས་ཏེ། ཆོས་ཀྱི་རྣམ་
གྲངས་འདི་ཐོས་ནས་ལུས་ལ་ནད་ཀྱིས་མི་ཟུག་གོ། །རྒ་བས་མ་ཡིན་དུས་མ་ཡིན་པར་འཆི་བས་མ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ། གལ་ཏེ་བྱང་ཆུབ་སེམས་དཔའི་ཐེག་
པ་ལ་ཡང་དག་པར་ཞུགས་པ་གང་ལ་ལས། མདོ་སྡེ་འདི་འཛིན་པའི་དགེ་སློང་དེ་ལྟ་བུ་དེ་མཐོང་ན། དེ་ལ་ཙན་དན་གྱི་ཕྱེ་མ་དང་ཨུད་པ་ལ་སྔོན་པོས་མངོན་པར་གཏོར་བར་བྱའོ། །མངོན་པར་གཏོར་ནས་ཀྱང་འདི་སྙམ་
དུ་རིགས་ཀྱི་བུ་འདི་ནི་བྱང་ཆུབ་ཀྱི་སྙིང་པོར་འགྲོ་བར་འགྱུར། འདི་ནི་རྩྭ་ལེན་པར་འགྱུར། འདི་ནི་བྱང་ཆུབ་ཀྱི་སྙིང་པོར་རྩྭ་འདིང་བར་འགྱུར། འདི་ནི་བདུད་ཀྱི་ཕྱོགས་ཕམ་པར་བྱེད་པར་འགྱུར། འདི་ནི་ཆོས་ཀྱི་དུང་

46-1-173a

འབུད་པར་འགྱུར། འདི་ནི་ཆོས་ཀྱི་རྔ་རྡུང་བར་འགྱུར། འདི་ནི་འཁོར་བའི་རྒྱ་མཚོ་ལས་རྒལ་བར་འགྱུར་རོ་སྙམ་དུ་སེམས་བསྐྱེད་པར་བྱའོ། །སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ་
རིགས་ཀྱི་བུ་འམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པས། མདོ་སྡེ་འདི་ལྟ་བུ་འཛིན་པའི་དགེ་སློང་མཐོང་ནས་དེ་ལྟར་སེམས་བསྐྱེད་པར་བྱས་ཏེ། དེ་ལྟར་ན་དེའི་ཡོན་ཏན་དག་
ནི་དེ་བཞིན་གཤེགས་པས་ཅི་འདྲ་བ་དག་བཤད་པ་དེ་འདྲ་བ་དག་ཏུ་འགྱུར་རོ། །སྨན་གྱི་རྒྱལ་པོའི་སྔོན་གྱི་སྦྱོར་བའི་ལེའུ་འདི་བཤད་པ་ན། བྱང་ཆུབ་སེམས་དཔའ་བརྒྱད་ཁྲི་བཞི་སྟོང་གིས། སྒྲ་ཐམས་ཅད་
ལ་མཁས་པ་དང་ལྡན་པའི་གཟུངས་ཐོབ་པར་གྱུར་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེས་ཀྱང་། སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་
མངོན་པར་ཤེས་པ། དེ་ལྟར་ཁྱོད་ཀྱིས་དེ་བཞིན་གཤེགས་པ་ལ་བསམ་གྱིས་མི་ཁྱབ་པའི་ཡོན་ཏན་གྱི་ཆོས་དྲིས་པ་ལེགས་སོ་ལེགས་སོ་ཞེས་ལེགསོ་ཞེས་བྱ་བ་བྱིན་ནོ། །སྨན་གྱི་རྒྱལ་པོའི་སྔོན་གྱི་སྦྱོར་བའི་ལེའུ་ཞེས་བྱ་སྟེ་ཉི་ཤུ་
རྩ་གཉིས་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་དེའི་ཚེ། སྐྱེས་བུ་ཆེན་པོའི་མཚན་སྨིན་མཚམས་ཀྱི་མཛོད་སྤུ་ནས་འོད་ཕྱུང་སྟེ། 
འོད་དེས་ཤར་ཕྱོགས་སུ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་བཅྭ་བརྒྱད་ཀྱི་བྱེ་མ་སྙེད་དག་ཁྱབ་པར་བྱས་སོ། སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་བཅྭ་བརྒྱད་
ཀྱི་བྱེ་མ་སྙེད་དེ་དག་འདས་པ་དེ་ན་འཇིག་རྟེན་གྱི་ཁམས་རྣམ་པར་སྣང་བའི་འོད་ཟེར་གྱིས་བརྒྱན་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་འདབ་མ་དྲི་མ་

46-1-173b

མེད་པ་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་བྱང་ཆུབ་སེམས་དཔའི་དགེ་འདུན་རྒྱ་ཆེན་པོ་ཚད་མེད་པས་ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏོ། །དེ་ནས་བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེས་མཛོད་སྤུ་ནས་འོད་གང་བཏང་བ་དེས། དེའི་ཚེ་འཇིག་རྟེན་གྱི་ཁམས་རྣམ་པར་སྣང་བའི་འོད་ཟེར་གྱིས་བརྒྱན་པ་དེ་སྣང་བ་ཆེན་པོས་ཁྱབ་
པར་གྱུར་ཏོ། །འཇིག་རྟེན་གྱི་ཁམས་རྣམ་པར་སྣང་བའི་འོད་ཟེར་གྱིས་བརྒྱན་པ་དེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཞེས་བྱ་བ་དགེ་བའི་རྩ་བ་བསྐྱེད་པ་སྔོན་ཡང་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་མང་པོའི་འོད་ཟེར་དེ་ལྟ་བུ་མཐོང་ཞིང་། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་ཏིང་ངེ་འཛིན་མང་པོ་ཐོབ་པ་འདི་ལྟ་སྟེ། རྒྱལ་མཚན་གྱི་རྩེ་མོའི་
དཔུང་རྒྱན་གྱི་ཏིང་ངེ་འཛིན་ཐོབ་དམ་པའི་ཆོས་པད་མ་དཀར་པོའི་ཏིང་ངེ་འཛིན་ཐོབ། དྲི་མ་མེད་པས་བྱིན་པའི་ཏིང་ངེ་འཛིན་ཐོབ། སྐར་མའི་རྒྱལ་པོ་རྣམ་པར་རོལ་པའི་ཏིང་ངེ་འཛིན་ཐོབ། རླུང་ལྟ་བུའི་ཏིང་ངེ་འཛིན་ཐོབ། ཡེ་ཤེས་ཀྱི་ཕྱག་
རྒྱའི་ཏིང་ངེ་འཛིན་ཐོབ། ཟླ་བ་སྒྲོན་མའི་ཏིང་ངེ་འཛིན་ཐོབ། སྒྲ་ཐམས་ཅད་ལ་མཁས་པའི་ཏིང་ངེ་འཛིན་ཐོབ། བསོད་ནམས་ཐམས་ཅད་ཀུན་ལས་བསྡུས་པའི་ཏིང་ངེ་འཛིན་ཐོབ་དད་པ་ཅན་གྱི་ཏིང་ངེ་འཛིན་ཐོབ། རྫུ་འཕྲུལ་གྱིས་རྣམ་པར་རོལ་པའི་
ཏིང་ངེ་འཛིན་ཐོབ། ཡེ་ཤེས་ཏ་ལ་ལའི་ཏིང་ངེ་འཛིན་ཐོབ། བཀོད་པའི་རྒྱལ་པོའི་ཏིང་ངེ་འཛིན་ཐོབ། དྲི་མ་མེད་པའི་འོད་ཀྱི་ཏིང་ངེ་འཛིན་ཐོབ། དྲི་མ་མེད་པའི་སྙིང་པོའི། ཏིང་ངེ་འཛིན་ཐོབ། 
ཟད་པར་ཆུའི་ཏིང་ངེ་འཛིན་ཐོབ། །ཉེ་མ་འཁོར་བའི་ཏིང་ངེ་འཛིན་ཐོབ། དེ་བཞིན་དུ་སྦྱར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་

46-1-174a

སང་སང་པོའི་དབྱངས་ཀྱིས། ཏིང་ངེ་འཛིན་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་གི་བྱེ་མ་སྙེད་ཀྱི་བར་དུ་ཐོབ་པར་འདུག་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་
དེའི་ལུས་ལ་འོད་དེས་ཕོག་པར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་དུ་རྒྱས་
པ་ལ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ཤཱཀྱ་ཐུབ་པ་ལ་བལྟ་བ་དང་ཕྱག་བགྱི་བ་དང་བསྙེན་བཀུར་བགྱི་བ་དང་འཇམ་དཔལ་གཞོན་ནུར་གྱུར་པ་དེ་ཡང་བལྟ་བ་དང་། བྱང་ཆུབ་སེམས་དཔའ་སྨན་གྱི་རྒྱལ་པོ་དེ་ཡང་བལྟ་བ་དང་། བྱང་
ཆུབ་སེམས་དཔའ་རབ་ཏུ་སྦྱིན་པ་དེ་ཡང་བལྟ་བ་དང་། བྱང་ཆུབ་སེམས་དཔའ་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་མངོན་པར་ཤེས་པ་དེ་ཡང་བལྟ་བ་དང་། བྱང་ཆུབ་སེམས་དཔའ་སྤྱོད་པ་ཁྱད་པར་ཅན་དེ་ཡང་
བལྟ་བ་དང་། བྱང་ཆུབ་སེམས་དཔའ་བཀོད་པའི་རྒྱལ་པོ་དེ་ཡང་བལྟ་བ་དང་། བྱང་ཆུབ་སེམས་དཔའ་སྨན་ཡང་དག་འཕགས་དེ་ཡང་བལྟ་བའི་སླད་དུ། འཇིག་རྟེན་གྱི་ཁམས་མི་མཇེད་ཏུ་མཆིའོ། །དེ་ནས་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པས། བྱང་ཆུབ་སེམས་དཔའ་སེམས་དཔའ་ཆེན་
པོ་སང་སང་པོའི་དབྱངས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་འཇིག་རྟེན་གྱི་ཁམས་མི་མཇེད་དེར་སོང་སྟེ་ཕྱིན་ནས། ངན་པའི་འདུ་ཤེས་བསྐྱེད་པར་མི་བྱའོ། །རིགས་ཀྱི་བུ་འཇིག་རྟེན་གྱི་ཁམས་

46-1-174b

མི་མཇེད་དེ་ནི་མཐོན་དམན་ཅན་དང་ས་ལས་གྲུབ་པ་དང་རི་ནག་པོས་གང་བ་དང་འཇིམ་ངན་གྱིས་ཡོངས་སུ་གང་བའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
ཤཱཀྱ་ཐུབ་པ་དེ་ཡང་སྐུ་ཐུང་ངོ་། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་ལུས་ཐུང་ངོ་། །རིགས་ཀྱི་བུ་ཁྱོད་ཀྱི་ལུས་ཐོབ་པ་ནི་དཔག་ཚད་བཞི་ཁྲི་ཉིས་སྟོང་ངོ་། །རིགས་ཀྱི་བུ་ངའི་ལུས་ནི་དཔག་ཚད་
འབུམ་ཕྲག་དྲུག་བཅུ་རྩ་བརྒྱད་ཡོད་དོ། །རིགས་ཀྱི་བུ་ཁྱོད་ནི་མཛེས་པ་བལྟ་ན་སྡུག་པ་གཟུགས་བཟང་བ་ཁ་དོག་བཟང་པོ་རྒྱས་པ་མཆོག་དང་ལྡན་པ། བསོད་ནམས་བརྒྱ་སྟོང་བས་ཤིན་དུ་ལྷག་པའི་དཔལ་དང་
ལྡན་པའོ། །རིགས་ཀྱི་བུ་དེ་ལྟ་བས་ན་འཇིག་རྟེན་གྱི་ཁམས་མི་མཇེད་ཏུ་ཕྱིན་ནས། དེ་བཞིན་གཤེགས་པ་དང་བྱང་ཆུབ་སེམས་དཔའ་རྣམས་དང་སངས་རྒྱས་ཀྱི་ཞིང་དེ་ལ་ངན་པའི་འདུ་ཤེས་མ་སྐྱེད་ཅིག །
དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་
མའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་དེ་བཞིན་གཤེགས་པའི་བྱིན་གྱི་བརླབས་དང་། དེ་བཞིན་གཤེགས་པའི་སྟོབས་
བསྐྱེད་པ་དང་། དེ་བཞིན་གཤེགས་པའི་རྣམ་པར་རོལ་པ་དང་། དེ་བཞིན་གཤེགས་པའི་བཀོད་པ་དང་། དེ་བཞིན་གཤེགས་པའི་མངོན་པར་འཕགས་པའི་ཡེ་ཤེས་ཀྱིས་འཇིག་རྟེན་གྱི་ཁམས་མི་མཇེད་དེར་
མཆིའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས། དེའི་ཚེ་སངས་རྒྱས་ཀྱི་ཞིང་དེ་ནས་མ་གཡོས་ཤིང་། སྟན་དེ་ལས་མ་ལངས་པར་འདི་ལྟ་བུའི་ཏིང་ངེ་འཛིན་ལ་

46-1-175a

སྙོམས་པར་ཞུགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་དེ་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ། དེའི་མོད་ལ་འཇིག་རྟེན་གྱི་ཁམས་མི་མཇེད་ཏུ། བྱ་རྒོད་
ཀྱི་ཕུང་པོའི་རི་ལ་དེ་བཞིན་གཤེགས་པའི་ཆོས་ཀྱི་གདན་གྱི་དྲུང་དུ། པད་མ་ཆུ་བ་ནི་གསེར་འདབ་མ་ནི་དངུལ་སྙིང་པོ་ནི་པད་མ་དང་ནེ་ཙོ་འམ་ཅི་ལས་གྲུབ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་བཅུ་རྩ་བཞི་བྱུང་བར་གྱུར་ཏོ། །
དེ་ནས་འཇམ་དཔལ་གཞོན་ནུར་གྱུར་པས། པད་མ་བཀོད་པ་བྱུང་བ་དེ་མཐོང་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་འདི་སྐད་
ཅེས་གསོལ་ཏོ། །བཅོམ་ལྡན་འདས་འདི་ལྟར་ཆུ་བ་ནི་གསེར་འདབ་མ་ནི་དངུལ་སྙིང་པོ་ནི་པད་མ་དང་ནེ་ཙོ་འམ་ཅི་ལས་གྲུབ་པའི་པད་མ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་བཅུ་རྩ་བཞི་གདའ་བ་འདི་སུའི་སྔ་
ལྟས་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་འདི་ནི་ཤར་ཕྱོགས་ལོགས་ནས་འཇིག་རྟེན་གྱི་ཁམས་
རྣམ་པར་སྣང་བའི་འོད་ཟེར་གྱིས་བརྒྱན་པ་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་དུ་
རྒྱས་པ་དེའི་སངས་རྒྱས་ཀྱི་ཞིང་ནས། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་གིས་ཡོངས་སུ་བསྐོར་ཅིང་མདུན་དུ་བདར་ཏེ། ང་ལ་བལྟ་
བ་དང་ཕྱག་བྱ་བ་དང་བསྙེན་བཀུར་བྱ་བ་དང་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་མཉན་པའི་ཕྱིར། འཇིག་རྟེན་གྱི་ཁམས་མི་མཇེད་འདིར་འོང་བ་དེའི་སྔ་ལྟས་སོ། །དེ་ནས་བཅོམ་

46-1-175b

ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུ་དེས་དགེ་བའི་རྩ་བའི་ཚོགས་ཅི་བགྱིས་ན། དགེ་བའི་རྩ་བའི་ཚོགས་བསགས་པ་དེས་འདི་ལྟ་བུའི་
ཁྱད་པར་འདི་ཐོབ། བཅོམ་ལྡན་འདས་བྱང་ཆུབ་སེམས་དཔའ་དེ་ཏིང་ངེ་འཛིན་གང་ལ་སྤྱོད་པའི་ཏིང་ངེ་འཛིན་དེ་བཅོམ་ལྡན་འདས་བདག་གིས་མཉན་པར་བགྱིའོ། །བཅོམ་ལྡན་འདས་བདག་གིས་ཏིང་ངེ་འཛིན་དེ་ལ་
སྤྱད་པར་བགྱིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཅི་འདྲ་བ་དང་ཁ་དོག་ཅི་འདྲ་བ་དང་གཟུགས་ཅི་འདྲ་བ་དང་རྟགས་ཅི་འདྲ་བ་དང་དབྱིབས་ཅི་འདྲ་བ་དང་དེའི་སྤྱོད་པ་ཅི་ལགས་པ། བདག་གིས་བྱང་ཆུབ་
སེམས་དཔའ་སེམས་དཔའ་ཆེན་པོ་དེ་བལྟ་བར་བགྱིའོ། །བཅོམ་ལྡན་འདས་བརྡ་ལྟས་གང་གིས་བསྐུལ་མ་ཐག་ཏུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་འཇིག་རྟེན་གྱི་ཁམས་མི་མཇེད་འདིར་མཆི་བར་
འགྱུར་བ་དེ་ལྟ་བུའི་བརྡ་ལྟས་ཤིག་དེ་བཞིན་གཤེགས་པས་ལེགས་པར་མཛད་དུ་གསོལ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས། 
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པ་རིན་ཆེན་མང་ལ་འདི་སྐད་ཅེས་གསུངས་སོ། །ཅི་ནས་བརྡ་ལྟས་གང་གིས་བྱང་ཆུབ་སེམས་དཔའ་སེམས་
དཔའ་ཆེན་པོ་སང་སང་པོའི་དབྱངས་འཇིག་རྟེན་གྱི་ཁམས་མི་མཇེད་འདིར་མཆི་བ་དེ་ལྟ་བུའི་བརྡ་ལྟས་བཅོམ་ལྡན་འདས་ཀྱིས་མཛོད་ཅིག །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པ་རིན་ཆེན་མང་གིས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་བསྐུལ་བའི་ཕྱིར། འཇམ་དཔལ་གཞོན་ནུར་གྱུར་པ་

46-1-176a

འདི་རིགས་ཀྱི་བུ་ཁྱོད་ཀྱི་མཐུ་མཐོང་བར་དགའ་བས་རིགས་ཀྱི་བུ་ཁྱོད་འཇིག་རྟེན་གྱི་ཁམས་མི་མཇེད་འདིར་ཤོག་ཅིག་ཅེས་དེ་ལྟ་བུའི་བརྡ་མཛད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་
ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་དེའི་ཞབས་ལ་མགོ་བོས་ཕྱག་འཚལ་ནས་
ལན་གསུམ་བསྐོར་བ་བྱས་ཏེ། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་བཅུ་རྩ་བཞི་པོ་དེ་དག་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་འཇིག་རྟེན་གྱི་ཁམས་རྣམ་པར་སྣང་
བའི་འོད་ཟེར་གྱིས་བརྒྱན་པ་དེ་ནས་མི་སྣང་བར་གྱུར་ནས། འཇིག་རྟེན་གྱི་ཁམས་མི་མཇེད་འདིར་འོངས་ཏེ། ཞིང་དག་ནི་རབ་ཏུ་གཡོ་བར་བྱེད། པད་མའི་ཆར་ནི་རབ་ཏུ་འབེབས། སིལ་སྙན་བྱེ་བ་ཁྲག་ཁྲིག་བརྒྱ་སྟོང་ནི་
ལེན་ཅིང་། མིག་ནི་ཨུད་པ་ལ་སྔོན་པོའི་འདབ་མ་འདྲ། བཞིན་ནི་ཟླ་བ་བྱེ་བ་ཁྲག་ཁྲིག་བརྒྱ་སྟོང་བས་ལྷག །ལུས་ཀྱི་མདོག་ནི་གསེར་གྱི་ཁ་དོག་འདྲ་ལ། ལུས་བསོད་ནམས་བརྒྱ་སྟོང་གིས་ནི་བརྒྱན། དཔལ་གྱི་ས་
ནི་རབ་ཏུ་འབར། གཟི་བརྗིད་ཀྱིས་ནི་ཤིན་དུ་ལྷག་གེར་གྱུར། ལུས་ནི་མཚན་རྣམས་ཀྱིས་རྣམ་པར་སྤྲས། ལུས་སྲེད་མེད་ཀྱི་བུའི་ལུས་ལྟར་ནི་འཁྲེགས་པ། རིན་པོ་ཆེ་སྣ་བདུན་གྱི་ཁང་པ་བརྩེགས་པར་ཞུགས་
ཏེ། ནམ་མཁའ་ལ་ཏ་ལ་བདུན་ཙམ་ནས་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཅིང་མདུན་དུ་བདར་ནས་འོངས་ཏེ། དེ་འཇིག་རྟེན་གྱི་ཁམས་མི་མཇེད་འདི་ག་ལ་བ་དང་བྱ་རྒོད་ཕུང་པོའི་རི་ག་ལ་བ་
དེར་འོངས་ཏེ་ཕྱིན་ནས། ཁང་པ་བརྩེགས་པ་དེ་ནས་བབས་ཏེ། བརྒྱ་སྟོང་རི་བའི་མུ་ཏིག་གི་ཕྲེང་བ་ཐོགས་ཤིང་། བཅོམ་ལྡན་འདས་ག་ལ་བ་དེར་སོང་ནས་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་

46-1-176b

ཕྱག་འཚལ་ཏེ། ལན་བདུན་བསྐོར་བ་བྱས་ནས་བཅོམ་ལྡན་འདས་ལ་མཆོད་པ་བྱ་བའི་ཕྱིར་མུ་ཏིག་གི་ཕྲེང་བ་ཕུལ་ལོ། །ཕུལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་བཅོམ་ལྡན་འདས་ལ་གནོད་པ་ཉུང་ངམ་ཉམ་ང་བ་ཉུང་ངམ་བསྐྱོད་པ་ཡང་ངམ། སྟོབས་དང་
བདེ་བར་གནས་སམ་ཞེས་སྙུན་གསོལ་ལོ། །བཅོམ་ལྡན་འདས་དེ་འདི་སྐད་ཅེས་ཀྱང་གསུང་སྟེ། བཅོམ་ལྡན་འདས་ཁྱོད་བཟོད་དམ་གཞེས་སམ་ཁམས་རྣམས་མཐུན་ནམ་ཁྱོད་ཀྱི་སེམས་ཅན་རྣམས་གོ་སླ་འམ་
གདུལ་སླ་འམ་གསོའ་སླ་འམ་གཙང་མ་འདོད་དམ་ཧ་ཅང་འདོད་ཆགས་མི་སྤྱོད་དམ་ཧ་ཅང་ཞེ་སྡང་མི་སྤྱོད་དམ་ཧ་ཅང་གཏི་མུག་མི་སྤྱོད་དམ། བཅོམ་ལྡན་འདས་ཁྱོད་ཀྱི་སེམས་ཅན་དག་ཤིན་དུ་ཕྲག་དོག་ཅན་མ་ཡིན་ནམ་སེར་སྣ་ཅན་མ་
ཡིན་ནམ་མར་མི་འཛིན་པ་མ་ཡིན་ནམ་ཕར་མི་འཛིན་པ་མ་ཡིན་ནམ་དགེ་སློང་དུ་མི་འཛིན་པ་མ་ཡིན་ནམ་བྲམ་ཟེར་མི་འཛིན་པ་མ་ཡིན་ནམ་ལོག་པར་ལྟ་བ་མ་ཡིན་ནམ་སེམས་མ་དུལ་བ་མ་ཡིན་ནམ་དབང་པོ་མ་བསྲུངས་
པ་མ་ཡིན་ནམ་བཅོམ་ལྡན་འདས་ཁྱོད་ཀྱིས་སེམས་ཅན་དེ་དག་གིས་བདུད་ཕྱིར་རྒོལ་བ་བཅོམ་འམ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་
ལས་འདས་པ་རིན་ཆེན་མང་དེ། རིན་པོ་ཆེ་སྣ་བདུན་གྱི་མཆོད་རྟེན་གྱི་ནང་ན་བཞུགས་པ་ཆོས་གསན་པའི་ཕྱིར་འཇིག་རྟེན་གྱི་ཁམས་མི་མཇེད་ཏུ་གཤེགས་སམ། བཅོམ་ལྡན་འདས་དེ་བཞིན་གཤེགས་པ་རིན་ཆེན་
མང་ལ་ཡང་བཅོམ་ལྡན་འདས་དེ་འདྲི་བ། བཅོམ་ལྡན་འདས་དེ་བཞིན་གཤེགས་པ་རིན་ཆེན་མང་དེ་བཟོད་དམ་གཤེགས་སམ། བཅོམ་ལྡན་འདས་དེ་བཞིན་གཤེགས་པ་རིན་ཆེན་མང་རིང་དུ་གཞེས་སམ་

46-1-177a

ཞེས་གསུང་ངོ་། །བཅོམ་ལྡན་འདས་བདག་གིས་ཀྱང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེའི་རིང་བསྲེལ་གྱི་སྐུ་
བལྟ་བར་བགྱིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེའི་རིང་བསྲེལ་གྱི་སྐུ། དེ་བཞིན་གཤེགས་པས་ལེགས་པར་བསྟན་དུ་
གསོལ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ཡོངས་སུ་མྱ་ངན་ལས་འདས་པ་རིན་ཆེན་མང་དེ་ལ་འདི་སྐད་ཅེས་གསུངས་སོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདི་བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པ་རིན་ཆེན་མང་མཐོང་བར་འཚལ་ནས་མཆིས་སོ། །དེ་ནས་བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ང་དང་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་མཐོང་བར་འདོད་པ་དང་། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་མཉན་པ་དང་། འཇམ་དཔལ་
གཞོན་ནུར་གྱུར་པ་བལྟ་བའི་ཕྱིར་འོངས་པ་ལེགས་སོ་ལེགས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་

46-1-177b

སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས། དེ་བཞིན་གཤེགས་པ་གང་གི་དྲུང་དུ་སྔོན་དགེ་བའི་རྩ་བ་ཇི་ལྟ་བུ་ཞིག་བསྐྲུན། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ཤཱཀྱ་ཐུབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་སྔོན་བྱུང་བ་འདས་པའི་དུས་ན་བསྐལ་པ་མཐོང་ན་དགའ་བ་ལ། འཇིག་
རྟེན་གྱི་ཁམས་གཟུགས་ཐམས་ཅད་ཤིན་དུ་སྟོན་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་
བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སྤྲིན་དང་རྔ་སྒྲ་རྒྱལ་པོ་ཞེས་བྱ་བ་འདི་འཇིག་རྟེན་དུ་བྱུང་སྟེ། རིགས་ཀྱི་བུ་བཅོམ་ལྡན་འདས་དེ་བཞིན་གཤེགས་པ་
སྤྲིན་དང་རྔ་སྒྲ་རྒྱལ་པོ་དེ་ལ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་སིལ་སྙན་བརྒྱ་སྟོང་རབ་ཏུ་བླངས་ཏེ། ལོ་ཁྲི་ཉིས་སྟོང་དུ་མཆོད་པ་བྱས་སོ། །རིན་པོ་ཆེ་སྣ་བདུན་གྱི་
སྣོད་བརྒྱད་ཁྲི་བཞི་སྟོང་ཕུལ་ལོ། །རིགས་ཀྱི་བུ་དེ་བཞིན་གཤེགས་པ་སྤྲིན་དང་རྔ་སྒྲ་རྒྱལ་པོའི་གསུང་རབ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་དེ་ལྟ་བུའི་དད་པ་ཐོབ་བོ། །
དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྲིན་དང་རྔ་སྒྲ་རྒྱལ་པོ་ལ་མཆོད་པ་བྱས་ཤིང་སྣོད་བརྒྱད་ཁྲི་བཞི་སྟོང་དེ་དག་ཕུལ་བ་དེ། གཞན་
ཞིག་ཡིན་སྙམ་དུ་ཁྱོད་སོམ་ཉི་འམ་ཡིད་གཉིས་སམ་ཐེ་ཚོམ་ཟ་བར་གྱུར་ན་རིགས་ཀྱི་བུ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རིགས་ཀྱི་བུ་གང་གིས་བཅོམ་ལྡན་འདས་དེ་བཞིན་གཤེགས་པ་དགྲ་

46-1-178a

བཅོམ་པ་ཡང་དག་པར་རྫོགས་པའི་སངས་རྒྱས་སྤྲིན་དང་རྔ་སྒྲ་རྒྱལ་པོ་དེ་ལ་མཆོད་པ་བྱས་པ་དང་། སྣོད་དེ་དག་ཀྱང་ཕུལ་བ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདི་
ཉིད་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་དེ་ནི། སངས་རྒྱས་མང་པོ་ལ་བསྙེན་བཀུར་བྱས་པ། སངས་རྒྱས་བརྒྱ་སྟོང་མང་པོ་ལ་དགེ་བའི་རྩ་བ་བསྐྱེད་པ། ཡོངས་
སུ་སྦྱང་བ་བྱས་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདིས་སྔོན་ཡང་། སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་མཐོང་ངོ་། །པད་མའི་དཔལ་ཁྱོད་ཀྱིས་
བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདི་མཐོང་ངམ། པད་མའི་དཔལ་གྱིས་གསོལ་པ། བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །བཅོམ་
ལྡན་འདས་ཀྱིས་བཀའ་སྩལ་པ། པད་མའི་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདི་ནི། གཟུགས་མང་པོས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་སྟོན་ཏེ། 
འདི་ལྟ་སྟེ། ལ་ལར་ནི་ཚངས་པའི་གཟུགས་ཀྱིས། ལ་ལར་ནི་བརྒྱ་བྱིན་གྱི་གཟུགས་ཀྱིས་ལ་ལར་ནི་དབང་ཕྱུག་གི་གཟུགས་ཀྱིས། ལ་ལར་ནི་དབང་ཕྱུག་ཆེན་པོའི་གཟུགས་ཀྱིས། ལ་ལར་ནི་དམག་དཔོན་གྱི་གཟུགས་
ཀྱིས། ལ་ལར་ནི་མཆོག་གི་གཟུགས་ཀྱིས། ལ་ལར་ནི་འཁོར་ལོས་སྒྱུར་བའི་གཟུགས་ཀྱིས། ལ་ལར་ནི་ཁམས་ཀྱི་རྒྱལ་པོའི་གཟུགས་ཀྱིས། ལ་ལར་ནི་ཚོང་དཔོན་གྱི་གཟུགས་ཀྱིས། ལ་ལར་ནི་ཁྱིམ་
བདག་གི་གཟུགས་ཀྱིས། ལ་ལར་ནི་གྲོང་མིའི་གཟུགས་ཀྱིས། ལ་ལར་ནི་བྲམ་ཟེའི་གཟུགས་ཀྱིས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་སྟོན་ཏོ། །ལ་ལར་ནི་དགེ་སློང་གི་གཟུགས་ཀྱིས། 

46-1-178b

ལ་ལར་ནི་དགེ་སློང་མའི་གཟུགས་ཀྱིས། ལ་ལར་ནི་དགེ་བསྙེན་གྱི་གཟུགས་ཀྱིས། ལ་ལར་ནི་དགེ་བསྙེན་མའི་གཟུགས་ཀྱིས། ལ་ལར་ནི་ཚོང་དཔོན་གྱི་ཆུང་མའི་གཟུགས་ཀྱིས། ལ་ལར་ནི་ཁྱིམ་བདག་གི་
ཆུང་མའི་གཟུགས་ཀྱིས། ལ་ལར་ནི་གྲོང་མིའི་ཆུང་མའི་གཟུགས་ཀྱིས། ལ་ལར་ནི་ཁྱེའུའི་གཟུགས་ཀྱིས། ལ་ལར་ནི་བུ་མོའི་གཟུགས་ཀྱིས། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱང་
དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་སེམས་ཅན་རྣམས་ལ་སྟོན་ཏེ། རིགས་ཀྱི་བུ་གཟུགས་འདི་སྙེད་ཅིག་ཀུན་དུ་སྟོན་པས། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོ་
འི་དབྱངས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་སེམས་ཅན་རྣམས་ལ་སྟོན་ཏོ། །ཁ་ཅིག་ལ་ནི་གནོད་སྦྱིན་གྱི་གཟུགས་ཀྱི་བར་གྱིས། བྱང་ཆུབ་སེམས་དཔའ་སེམས་དཔའ་ཆེན་
པོ་སང་སང་པོའི་དབྱངས་ཀྱིས། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་སེམས་ཅན་རྣམས་ལ་སྟོན་ཏོ། །ཁ་ཅིག་ལ་ལྷ་མ་ཡིན་གྱི་གཟུགས་ཀྱིས། ཁ་ཅིག་ལ་ནམ་མཁའ་ལྡིང་གི་གཟུགས་ཀྱིས། 
ཁ་ཅིག་ལ་མི་འམ་ཅིའི་གཟུགས་ཀྱིས། ཁ་ཅིག་ལ་ལྟོ་འཕྱེ་ཆེན་པོའི་གཟུགས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་
འདི་སེམས་ཅན་རྣམས་ལ་སྟོན་ཏོ། །སེམས་ཅན་དམྱལ་བ་དང་དུད་འགྲོའི་སྐྱེ་གནས་དང་གཤིན་རྗེའི་འཇིག་རྟེན་དང་མི་ཁོམ་པར་སྐྱེས་པའི་བར་གྱི་སེམས་ཅན་རྣམས་ལ་ཡང་། བྱང་ཆུབ་སེམས་དཔའ་སེམས་དཔའ་
ཆེན་པོ་སང་སང་པོའི་དབྱངས་སྐྱོབ་པར་འགྱུར་རོ། །བཙུན་མོའི་འཁོར་གྱི་ནང་ན་འདུག་པའི་བར་གྱི་སེམས་ཅན་རྣམས་ལ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་བུད་མེད་ཀྱི་གཟུགས་

46-1-179a

སུ་མངོན་པར་སྤྲུལ་ཏེ། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་འཇིག་རྟེན་གྱི་ཁམས་མི་མཇེད་འདིར་སེམས་ཅན་རྣམས་ལ་ཆོས་སྟོན་ཏོ། །པད་མའི་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་
དབྱངས་ནི། འཇིག་རྟེན་གྱི་ཁམས་མི་མཇེད་ཏུ་སྐྱེས་པའི་སེམས་ཅན་རྣམས་ལ་སྐྱོབ་པ་སྟེ། འཇིག་རྟེན་གྱི་ཁམས་མི་མཇེད་འདི་ན། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདི་དེ་སྙེད་ཀྱི་གཟུགས་སུ་སྤྲུལ་
པས། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་སེམས་ཅན་རྣམས་ལ་སྟོན་ཏེ། སྐྱེས་བུ་དམ་པ་འདི་རྫུ་འཕྲུལ་ཡང་ཉམས་པ་མེད། ཤེས་རབ་ཀྱང་ཉམས་པ་མེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་
པོའི་དབྱངས་ནི་ཡེ་ཤེས་ཀྱི་སྣང་བ་འདི་སྙེད་ཀྱིས་འཇིག་རྟེན་གྱི་ཁམས་མི་མཇེད་འདི་ན་སྣང་ངོ་། །འཇིག་རྟེན་གྱི་ཁམས་གཞན་གང་གཱའི་ཀླུང་གི་བྱེ་མ་སྙེད་དག་ན་ཡང་། བྱང་ཆུབ་སེམས་དཔས་འདུལ་བའི་སེམས་ཅན་རྣམས་ལ་འདི་བྱང་ཆུབ་སེམས་
པའི་གཟུགས་ཀྱིས་ཆོས་སྟོན་ཏོ། །ཉན་ཐོས་ཀྱིས་འདུལ་བའི་སེམས་ཅན་རྣམས་ལ་ཉན་ཐོས་ཀྱི་གཟུགས་ཀྱིས་ཆོས་སྟོན་ཏོ། །རང་སངས་རྒྱས་ཀྱིས་འདུལ་བའི་སེམས་ཅན་རྣམས་ལ་རང་སངས་རྒྱས་ཀྱི་གཟུགས་ཀྱིས་ཆོས་སྟོན་ཏོ། །དེ་བཞིན་གཤེགས་
པའི་གཟུགས་ཀྱིས་འདུལ་བའི་སེམས་ཅན་རྣམས་ལ་དེ་བཞིན་གཤེགས་པའི་གཟུགས་ཀྱིས་ཆོས་སྟོན་ཏོ། །དེ་བཞིན་གཤེགས་པའི་རིང་བསྲེལ་གྱི་བར་གྱིས་འདུལ་བའི་སེམས་ཅན་རྣམས་ལ་དེ་བཞིན་གཤེགས་པའི་རིང་བསྲེལ་སྟོན་ཏོ། །ཡོངས་སུ་
མྱ་ངན་ལས་འདའ་བའི་བར་གྱིས་འདུལ་བའི་སེམས་ཅན་རྣམས་ལ་བདག་ཡོངས་སུ་མྱ་ངན་ལས་འདས་པར་སྟོན་ཏོ། །པད་མའི་དཔལ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོའི་སང་སང་པོའི་དབྱངས་ནི་ཡེ་ཤེས་ཀྱི་སྟོབས་བསྐྱེད་པ་ཐོབ་པའོ། །
དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་པད་མོའི་དཔལ་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་དགེ་བའི་རྩ་བ་བསྐྲུན་པ་འདི། བཅོམ་ལྡན་འདས་ཏིང་ངེ་འཛིན་གང་ལ་གནས་ཏེ། བྱང་ཆུབ་

46-1-179b

སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས། སེམས་ཅན་འདི་སྙེད་བཏུལ་བའི་ཏིང་ངེ་འཛིན་དེ་གང་ལགས། དེ་སྐད་ཅེས་གསོལ་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས། བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཏིང་ངེ་འཛིན་གང་ལ་
གནས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་འདི་ལྟར་སེམས་ཅན་དཔག་ཏུ་མེད་པའི་དོན་བྱས་པ་ནི། གཟུགས་ཐམས་ཅད་ཡང་དག་པར་སྟོན་པ་ཞེས་བྱ་བའི་
ཏིང་ངེ་འཛིན་འདི་ཡིན་ནོ། །སང་སང་པོའི་དབྱངས་ཀྱི་ལེའུ་འདི་བཤད་པ་ན། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་དང་ལྷན་ཅིག་ཏུ། བྱང་ཆུབ་སེམས་དཔའ་བྱེ་བ་ཁྲག་
ཁྲིག་བརྒྱ་སྟོང་ཕྲག་བརྒྱད་བཅུ་རྩ་བཞི་གང་དག་འཇིག་རྟེན་གྱི་ཁམས་མི་མཇེད་འདིར་ལྷགས་པ་དེ་དག་ཐམས་ཅད་ཀྱིས་གཟུགས་ཐམས་ཅད་ཡང་དག་པར་སྟོན་པའི་ཏིང་ངེ་འཛིན་ཐོབ་པར་གྱུར་ཏོ། །
འཇིག་རྟེན་གྱི་ཁམས་མི་མཇེད་ན་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བགྲང་བ་ལས་འདས་པ་དེ་དག་གིས་ཀྱང་། གཟུགས་ཐམས་ཅད་ཡང་དག་པར་སྟོན་པའི་ཏིང་ངེ་འཛིན་ཐོབ་པར་གྱུར་ཏོ། །
དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང་། བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་གི་རིང་བསྲེལ་གྱི་མཆོད་རྟེན་ལ་ཡངས་ཤིང་རྒྱ་ཆེ་བའི་མཆོད་པ་བྱས་ནས། རིན་པོ་ཆེ་སྣ་བདུན་གྱི་ཁང་པ་

46-1-180a

བརྩེགས་པར་ཞུགས་ཏེ། ཞིང་རྣམས་ནི་རབ་ཏུ་གཡོ་བར་བྱེད། པད་མའི་ཆར་ནི་རབ་ཏུ་འབེབས། སིལ་སྙན་བྱེ་བ་ཁྲག་ཁྲིག་བརྒྱ་སྟོང་ནི་ལེན་ཅིང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་
བཅུ་རྩ་བཞིས་ཡོངས་སུ་བསྐོར་ཏེ་མདུན་དུ་བདར་ནས། ལྷན་ཅིག་ཏུ་སླར་རང་རང་གི་སངས་རྒྱས་ཀྱི་ཞིང་དུ་སོང་སྟེ་ཕྱིན་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་
འི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་གྱི་ཁམས་མི་མཇེད་ཏུ་བདག་གིས་སེམས་ཅན་གྱི་དོན་བྱས་སོ། །བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་གི་རིང་བསྲེལ་གྱི་མཆོད་རྟེན་ཡང་མཐོང་ཕྱག་ཀྱང་བགྱིས་སོ། །བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ཡང་མཐོང་སྟེ་ཕྱག་
བགྱིས་སོ། །འཇམ་དཔལ་གཞོན་ནུར་གྱུར་པ་དེ་ཡང་མཐོང་ངོ་། །བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་བརྩོན་འགྲུས་ཀྱི་སྟོབས་ཀྱི་ཤུགས་ཐོབ་པ་དེ་དང་། བྱང་ཆུབ་སེམས་དཔའ་སེམས་དཔའ་
ཆེན་པོ་རབ་ཏུ་སྦྱིན་པ་དེ་ཡང་མཐོང་ངོ་། །བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་བཅུ་རྩ་བཞི་པོ་དེ་དག་ཐམས་ཅད་ཀྱིས་ཀྱང་གཟུགས་ཐམས་ཅད་ཡང་དག་པར་སྟོན་པའི་ཏིང་ངེ་འཛིན་ཐོབ་པར་
གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འགྲོ་བ་དང་འོང་བའི་ལེའུ་འདི་བཤད་པ་ན། བྱང་ཆུབ་སེམས་དཔའ་བཞི་ཁྲི་ཉིས་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །
བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་གྱིས་ཀྱང་། དམ་པའི་ཆོས་པད་མ་དཀར་པོའི་ཏིང་ངེ་འཛིན་ཐོབ་པར་གྱུར་ཏོ། །སང་སང་པོའི་དབྱངས་ཀྱི་ལེའུ་ཞེས་བྱ་སྟེ་ཉི་ཤུ་རྩ་གསུམ་པའོ།། །། 

46-1-180b

དམ་པའི་ཆོས་པད་མ་དཀར་པོ་བམ་པོ་བཅུ་གསུམ་པ་སྟེ་ཐ་མ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟེར་ནས་པུས་མོ་གཡས་པའི་ལྷ་ང་ས་ལ་
བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་
དབང་ཕྱུག་ཅིའི་སླད་ཏུ་སྤྱན་རས་གཟིགས་ཀྱི་དབང་ཕྱུག་ཅེས་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་ལ་འདི་སྐད་ཅེས་བཀའ་སྩལ་
ཏོ། །རིགས་ཀྱི་བུ་འདི་ལ་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཇི་སྙེད་ཅིག་སྡུག་བསྔལ་གང་དག་མྱོང་བར་གྱུར་པ་དེ་དག་གིས། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་
གི་མིང་ཐོས་ན། དེ་དག་ཐམས་ཅད་སྡུག་བསྔལ་གྱི་ཕུང་པོ་དེ་ལས་ཡོངས་སུ་ཐར་བར་འགྱུར་རོ། །རིགས་ཀྱི་བུ་སེམས་ཅན་གང་དག་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཀྱི་
མིང་འཛིན་པ་དེ་དག །གལ་ཏེ་མེའི་ཕུང་པོ་ཆེན་པོར་ལྷུང་ན་ཡང་། དེ་དག་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་གཟི་བརྗིད་ཀྱིས། མེའི་ཕུང་པོ་རབ་ཏུ་འབར་
བ་ལས་ཐར་བར་འགྱུར་རོ། །རིགས་ཀྱི་བུ་གལ་ཏེ་ཆུ་ཀླུང་གིས་ཁྱེར་ལ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་ལ་བོས་ན། ཆུ་ཀླུང་དེ་དག་ཐམས་ཅད་ཀྱིས་སེམས་
ཅན་དེ་དག་ཐམས་ཅད་གཏིང་ཚུགས་པར་བྱེད་དོ། །རིགས་ཀྱི་བུ་གལ་ཏེ་སེམས་ཅན་བྱེ་བ་ཁྲག་ཁྲིག་བརྒྱ་སྟོང་རྒྱ་མཚོའི་ནང་དུ་གྲུར་ཞུགས་ཏེ། མགྲོན་བུ་དང་གསེར་དང་ནོར་བུ་དང་མུ་ཏིག་དང་བཻ་དཱུརྱ་དང་དུང་དང་

46-1-181a

མན་ཤེལ་དང་རྡོའི་སྙིང་པོ་དང་བྱི་རུ་དང་སྤུག་དང་མུ་ཏིག་དམར་པོ་ལ་སོགས་པའི་ཕྱིར་དོང་བ་དེ་རྣམས། རླུང་ནག་པོས་སྲིན་མོའི་གླིང་དུ་འཕངས་པར་གྱུར་ལ། དེ་ན་སེམས་ཅན་གཅིག་འགའ་ཞིག་གིས་སྤྱན་རས་གཟིགས་
དབང་ཕྱུག་ལ་བོས་ན། དེ་དག་ཐམས་ཅད་སྲིན་མོའི་གླིང་དེ་ནས་ཐར་བར་འགྱུར་རོ། །རིགས་ཀྱི་བུ་དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་སྤྱན་རས་གཟིགས་དབང་ཕྱུག་
ཅེས་བཏགསོ། །རིགས་ཀྱི་བུ་གལ་ཏེ་བསད་པར་དཀྲི་བ་ལས་སྤྱན་རས་གཟིགས་དབང་ཕྱུག་ལ་བོས་ན། གཤེད་མ་དེ་དག་གི་མཚོན་དེ་དག་དུམ་བུ་དུམ་བུར་ཆག་ཅིང་གྲུགས་པར་འགྱུར་རོ། །རིགས་ཀྱི་བུ་གལ་ཏེ་སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གནོད་སྦྱིན་དང་སྲིན་པོས་གང་བར་གྱུར་ཀྱང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་མིང་འཛིན་པ་ལ། དེ་དག་ཐམས་ཅད་ཀྱི་
སྡང་བའི་སེམས་ཀྱིས་ལྟ་ཡང་མི་ཕོད་དོ། །རིགས་ཀྱི་བུ་སེམས་ཅན་ལ་ལ་ལྕག་སྒྲོག་དང་། ཤིང་སྒྲོག་ཏུ་བཅུག་པར་གྱུར་ན་ཉེས་ཡོད་ཀྱང་རུང་ཉེས་མེད་ཀྱང་རུང་ན། བྱང་ཆུབ་སེམས་དཔའ་སེམས་དཔའ་ཆེན་པོ་
སྤྱན་རས་གཟིགས་དབང་ཕྱུག་གི་མིང་ནས་ཕྱུང་བས། ལྕགས་སྒྲོག་དང་ཤིང་སྒྲོག་ཏུ་བཅུག་པ་དག་གི་བུ་ག་བྱེ་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་
ཕྱུག་གི་མཐུ་ནི་དེ་འདྲའོ། །རིགས་ཀྱི་བུ་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གཡོན་ཅན་དང་ཆོམ་རྐུན་དང་དགྲ་ལག་ན་མཚོན་ཐོགས་པས་ས་གང་བར་གྱུར་ཏེ། དེར་དེད་དཔོན་གཅིག་གིས་
འགྲོན་པོ་མང་པོ་ཕལ་པོ་ཆེ་རིན་པོ་ཆེས་ཕྱུག་པ་དེད་དེ་དོང་བ་ལས། འདོང་བ་དེ་དག་གིས་གཡོན་ཅན་ཆོམ་རྐུན་དང་དགྲ་ལག་ན་མཚོན་ཐོགས་པ་དེ་དག་མཐོང་སྟེ། མཐོང་ནས་ཀྱང་འཇིགས་ཤིང་སྐྲག་སྟེ་

46-1-181b

བདག་ཅག་སྐྱབས་མེད་པར་ཤེས་པ་ལས་དེད་དཔོན་དེས་འགྲོན་པོ་མང་པོ་ལ་འདི་སྐད་ཅེས་མ་འཇིགས་ཤིག །རིགས་ཀྱི་བུ་དག་མ་འཇིགས་ཤིག་མི་འཇིགས་པ་སྦྱིན་པ། བྱང་ཆུབ་སེམས་དཔའ་སེམས་དཔའ་ཆེན་
པོ་སྤྱན་རས་གཟིགས་དབང་ཕྱུག་ལ་སྒྲ་སྐད་གཅིག་ཏུ་བོས་ཤིག་དང་། དེས་ཁྱེད་ཆོམ་རྐུན་གྱིས་འཇིགས་པ་དང་དགྲའི་འཇིགས་པ་འདི་ལས་ཡོངས་སུ་ཐར་བར་འགྱུར་རོ་ཞེས་བསྒོ་ལ། དེ་ནས་འགྲོན་པོ་མང་པོ་
ཐམས་ཅད་ཀྱིས་སྒྲ་སྐད་གཅིག་ཏུ་སྤྱན་རས་གཟིགས་དབང་ཕྱུག་ལ་བོས་ཏེ། འཇིགས་པ་མེད་པའི་སྦྱིན་པ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དེ་ལ་ཕྱག་འཚལ་ལོ་ཕྱག་འཚལ་ལོ་
ཞེས་མིང་ནས་ཕྱུང་མ་ཐག་ཏུ། འགྲོན་པོ་ཕལ་པོ་ཆེ་དེ་དག་ཐམས་ཅད་འཇིགས་པ་ཐམས་ཅད་ལས་ཡོངས་སུ་ཐར་བར་འགྱུར་ཏེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་
ཕྱུག་གི་མཐུ་ནི་དེ་འདྲའོ། །རིགས་ཀྱི་བུ་སེམས་ཅན་གང་དག་འདོད་ཆགས་སྤྱོད་པ་དེ་དག་གིས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་བྱས་ན་འདོད་ཆགས་དང་
བྲལ་བར་འགྱུར་རོ། །སེམས་ཅན་གང་དག་ཞེ་སྡང་སྤྱོད་པ་དེ་དག་གིས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་བྱས་ན་ཞེ་སྡང་དང་བྲལ་བར་འགྱུར་རོ། །སེམས་
ཅན་གང་དག་གཏི་མུག་སྤྱོད་པ་དེ་དག་གིས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་བྱས་ན་གཏི་མུག་དང་བྲལ་བར་འགྱུར་རོ། །རིགས་ཀྱི་བུ་དེ་ལྟར་བྱང་ཆུབ་
སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ནི་རྫུ་འཕྲུལ་ཆེ་བའོ། །རིགས་ཀྱི་བུ་བུད་མེད་བུ་ཕོ་འདོད་པ་གང་ལ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་

46-1-182a

དབང་ཕྱུག་ལ་ཕྱག་འཚལ་ན་དེ་ལས་བུ་ཕོ་འབྱུང་སྟེ། གཟུགས་བཟང་བ་མཛེས་པ་བལྟ་ན་སྡུག་པ་ཁྱེའུའི་མཚན་དང་ལྡན་པ། སྐྱེ་བོ་མང་པོའི་ཡིད་ཏུ་འོང་ཞིང་སྡུག་པ་དགེ་བའི་རྩ་བ་བསྐྱེད་པར་
འབྱུང་ངོ་། །གང་བུ་མོ་འདོད་པ་དེ་ཡང་བུ་མོ་འབྱུང་སྟེ། གཟུགས་བཟང་བ་མཛེས་པ་བལྟ་ན་སྡུག་པ་བུ་མོའི་མཚན་དང་ལྡན་པ། སྐྱེ་བོ་མང་པོའི་ཡིད་ཏུ་འོང་ཞིང་སྡུག་པ་དགེ་བའི་རྩ་བ་བསྐྱེད་པ་འབྱུང་ངོ་། །
རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་གི་མཐུ་ནི་དེ་འདྲའོ། །གང་དག་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་
འཚལ་བ་དེ་དག་དོན་ཡོད་པའི་འབྲས་བུར་འགྱུར་རོ། །རིགས་ཀྱི་བུ་གང་ཞིག་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་འཚལ་ཞིང་མིང་འཛིན་ལ། གང་ཞིག་སངས་རྒྱས་
བཅོམ་ལྡན་འདས་གང་གཱའི་ཀླུང་དྲུག་བཅུ་རྩ་གཉིས་ཀྱི་བྱེ་མ་སྙེད་དག་ལ་ཕྱག་འཚལ་ཞིང་མིང་འཛིན་པ་དང་། ཡང་གང་ཞིག་གིས་སངས་རྒྱས་བཅོམ་ལྡན་འདས་གང་གཱའི་ཀླུང་དྲུག་བཅུ་རྩ་གཉིས་ཀྱི་བྱེ་མ་སྙེད་
བཞུགས་ཏེ། འཚོ་ཞིང་གཞེས་པ་དེ་དག་ལ་ན་བཟའ་དང་བསོད་སྙོམས་དང་གཟིམས་ཆ་དང་སྙུན་གྱི་གསོས་སྨན་དང་ཡོ་བྱད་ཀྱིས་མཆོད་པ་བྱེད་ན། རིགས་ཀྱི་བུ་འདི་ཇི་སྙམ་དུ་སེམས། རིགས་ཀྱི་བུ་འམ་རིགས་ཀྱི་བུ་མོ་དེ་དག་
བསོད་ནམས་མངོན་པར་འདུ་བྱེད་པ་དེ་ཙམ་ཞིག་སྐྱེད། དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །རིགས་ཀྱི་བུ་འམ་
རིགས་ཀྱི་བུ་མོ་དེ་དག་གཞི་དེ་ལས་བསོད་ནམས་སྐྱེད་པ་ནི་བཅོམ་ལྡན་འདས་མང་ལགས་སོ། །བདེ་བར་གཤེགས་པ་མང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གང་གིས་སངས་

46-1-182b

རྒྱས་བཅོམ་ལྡན་འདས་དེ་སྙེད་ལ་བཀུར་སྟི་བྱས་པའི་བསོད་ནམས་མངོན་པར་འདུ་བྱེད་པ་དང་། གང་གིས་ཐ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་ལ་ཕྱག་ལན་གཅིག་བྱས་པ་དང་། མིང་འཛིན་
པའི་བསོད་ནམས་མངོན་པར་འདུ་བྱེད་པ་གཉི་ག་མཉམ་སྟེ་ལྷག་པ་ཡང་མེད་འཕགས་པ་ཡང་མེད་དོ། །གང་གིས་སངས་རྒྱས་བཅོམ་ལྡན་འདས་གང་གཱའི་ཀླུང་དྲུག་བཅུ་རྩ་གཉིས་ཀྱི་བྱེ་མ་སྙེད་ལ་ཕྱག་འཚལ་ཞིང་མིང་འཛིན་པ་དང་། གང་
བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་འཚལ་ཞིང་མིང་འཛིན་པའི་བསོད་ནམས་ཀྱི་ཕུང་པོ་དེ་གཉི་ག་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་ཟད་པར་བྱ་བ་སླ་བ་མ་ཡིན་ནོ། །རིགས་
ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་གི་མིང་འཛིན་པའི་བསོད་ནམས་དེ་ལྟར་དཔག་ཏུ་མེད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་
པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་འཇིག་རྟེན་གྱི་ཁམས་མི་མཇེད་འདི་ན་རྣམ་པར་རྒྱུ། ཇི་ལྟར་སེམས་ཅན་རྣམས་ལ་ཆོས་
སྟོན། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་གི་ཐབས་མཁས་པའི་ཡུལ་ནི་ཅི་འདྲ་བ་ཞིག་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་
དཔའ་ཆེན་པོ་བློ་གྲོས་མི་ཟད་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་གང་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་སངས་རྒྱས་ཀྱི་གཟུགས་ཀྱིས་སེམས་ཅན་རྣམས་ལ་ཆོས་
སྟོན་པའི་འཇིག་རྟེན་གྱི་ཁམས་དག་ཡོད་དོ། །གང་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་བྱང་ཆུབ་སེམས་དཔའ་སེམས་དཔའ་ཆེན་པོའི་གཟུགས་ཀྱིས་ཆོས་སྟོན་པའི་འཇིག་

46-1-183a

རྟེན་གྱི་ཁམས་དག་ཀྱང་ཡོད་དོ། །སེམས་ཅན་ཁ་ཅིག་ལ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་རང་སངས་རྒྱས་ཀྱི་གཟུགས་ཀྱིས་ཆོས་སྟོན་ཏོ། །ཁ་ཅིག་ལ་ཉན་ཐོས་
ཀྱི་གཟུགས་ཀྱིས། ཁ་ཅིག་ལ་ཚངས་པའི་གཟུགས་ཀྱིས། ཁ་ཅིག་ལ་བརྒྱ་བྱིན་གྱི་གཟུགས་ཀྱིས། སེམས་ཅན་ཁ་ཅིག་ལ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དྲི་ཟའི་གཟུགས་ཀྱིས་
ཆོས་སྟོན་ཏོ། །གནོད་སྦྱིན་གྱིས་འདུལ་བའི་སེམས་ཅན་རྣམས་ལ་ནི་གནོད་སྦྱིན་གྱི་གཟུགས་ཀྱིས་ཆོས་སྟོན་ཏོ། །དབང་ཕྱུག་གིས་འདུལ་བའི་སེམས་ཅན་རྣམས་ལ་ནི་དབང་ཕྱུག་གི་གཟུགས་ཀྱིས་ཆོས་སྟོན་ཏོ། །དབང་ཕྱུག་ཆེན་
པོས་འདུལ་བའི་སེམས་ཅན་རྣམས་ལ་ནི་དབང་ཕྱུག་ཆེན་པོའི་གཟུགས་ཀྱིས་ཆོས་སྟོན་ཏོ། །འཁོར་ལོས་སྒྱུར་བའི་རྒྱལ་པོས་འདུལ་བའི་སེམས་ཅན་རྣམས་ལ་ནི་འཁོར་ལོས་སྒྱུར་བའི་རྒྱལ་པོའི་གཟུགས་ཀྱིས་ཆོས་སྟོན་ཏོ། །ཤ་
ཟས་འདུལ་བའི་སེམས་ཅན་རྣམས་ལ་ནི་ཤ་ཟའི་གཟུགས་ཀྱིས་ཆོས་སྟོན་ཏོ། །མཆོག་གིས་འདུལ་བའི་སེམས་ཅན་རྣམས་ལ་ནི་མཆོག་གི་གཟུགས་ཀྱིས་ཆོས་སྟོན་ཏོ། །དམག་དཔོན་གྱིས་འདུལ་བའི་སེམས་ཅན་རྣམས་ལ་ནི་
དམག་དཔོན་གྱི་གཟུགས་ཀྱིས་ཆོས་སྟོན་ཏོ། །བྲམ་ཟེས་འདུལ་བའི་སེམས་ཅན་རྣམས་ལ་ནི་བྲམ་ཟེའི་གཟུགས་ཀྱིས་ཆོས་སྟོན་ཏོ། །ལག་ན་རྡོ་རྗེས་འདུལ་བའི་སེམས་ཅན་རྣམས་ལ་ནི་ལག་ན་རྡོ་རྗེའི་གཟུགས་ཀྱིས་ཆོས་སྟོན་ཏོ། །རིགས་
ཀྱི་བུ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་ཡོན་ཏན་བསམ་གྱིས་མི་ཁྱབ་པ་དང་ལྡན་ནོ། །རིགས་ཀྱི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་
ཀྱི་དབང་ཕྱུག་ལ་མཆོད་ཅིག །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་འདི་འཇིགས་པའི་སེམས་ཅན་རྣམས་ལ་མི་འཇིགས་པ་སྦྱིན་པ་སྟེ། དེའི་ཕྱིར་འཇིག་རྟེན་གྱི་ཁམས་མི་མཇེད་འདི་

46-1-183b

ན་མི་འཇིགས་པ་སྦྱིན་པ་ཞེས་ཀུན་གྱིས་ཤེས་སོ། །དེ་ནས་བཅོམ་ལྡན་འདས་ལ་བློ་གྲོས་མི་ཟད་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་
དབང་ཕྱུག་ལ་ཆོས་ཀྱི་དགབ་པ་སྩལ་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེའི་དུས་ལ་བབ་པར་ཤེས་ན་བྱིན་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པས་བདག་གི་མགུལ་ནས་བརྒྱ་
སྟོང་རི་བའི་མུ་ཏིག་གི་དོ་ཤལ་བཀྲོལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཆོས་ཀྱི་དགབ་པར་བྱིན་ཏེ། སྐྱེས་བུ་དམ་པ་བདག་ལས་ཆོས་ཀྱི་དགབ་པ་འདི་ལོང་ཤིག །དེས་མ་བླངས་ནས་དེ་ནས་
བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་མུ་ཏིག་གི་དོ་ཤལ་འདི་
བདག་ལ་སྙིང་བརྩེ་བའི་ཕྱིར་ལོང་ཤིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་ལ་སྙིང་བརྩེ་བ་དང་། འཁོར་
བཞི་པོ་དེ་དག་དང་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པ་ལ་སྙིང་བརྩེ་བའི་ཕྱིར། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་
ཟད་པ་ལས་མུ་ཏིག་གི་དོ་ཤལ་བླངས་སོ། །བླངས་ནས་ཆ་གཉིས་སུ་བགོས་ཏེ་བགོས་ནས་ཆ་གཅིག་ནི་བཅོམ་ལྡན་འདས་ཤཱཀྱ་ཐུབ་པ་ལ་ཕུལ་ལོ། །ཆ་གཅིག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་
ཆེན་མང་གི་རིན་པོ་ཆེའི་མཆོད་རྟེན་ལ་ཕུལ་ལོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་འཇིག་རྟེན་གྱི་ཁམས་མི་མཇེད་འདི་ནི་དེ་ལྟ་བུའི་རྣམ་པར་འཕྲུལ་པས་རྣམ་པར་རྒྱུའོ། །དེ་ལ་དེ་

46-1-184a

འི་ཆོས་ཉིད་ནི་འདི་སྐད་ཅེས་བྱའོ། །རྒྱལ་མཚན་ཁྲ་བོས་བློ་གྲོས་མི་ཟད་ལ། །དེ་ཡི་དོན་གྱི་རྒྱུ་ནི་ཀུན་དྲིས་པ། །རྒྱལ་བའི་སྲས་པོ་འདི་ལྟར་ཅི་ཡི་ཕྱིར། །སྤྱན་རས་གཟིགས་ཀྱི་དབང་པོ་ཞེས་འདི་བགྱི། །དེ་ནས་དེ་ཡིས་ཕྱོགས་རྣམས་
ཀུན་བལྟས་ཏེ། །སྨོན་ལམ་རྒྱ་མཚོ་བློ་གྲོས་མི་ཟད་པས། །རྒྱལ་མཚན་ཁྲ་བོ་དེ་ལ་འདི་སྐད་སྨྲས། །སྤྱན་རས་གཟིགས་ཀྱི་དབང་པོའི་སྤྱོད་པ་ཉོན། །བསྐལ་པ་བསམ་ཡས་བྱེ་བ་དུ་མ་བརྒྱར། །སངས་རྒྱས་སྟོང་ཕྲག་བྱེ་བ་མང་པོ་ལ། །
སྨོན་ལམ་ཇི་ལྟར་རབ་ཏུ་རྣམ་པར་སྦྱངས། །དེ་དག་ཁོ་བོས་རབ་ཏུ་བཤད་ཀྱིས་ཉོན། །མཉན་པར་བྱེད་ཅིང་ལྟ་བར་བྱེད་པ་དང་། །རིམས་ཀྱིས་དེ་ལྟར་རྗེས་སུ་དྲན་པ་ཡང་། །སྲོག་ཆགས་རྣམས་ནི་འབྲས་བུ་ཡོད་པར་འགྱུར། །སྡུག་
བསྔལ་དང་ནི་མྱ་ངན་ཐམས་ཅད་སོལ། །གལ་ཏེ་གསོད་པས་མེ་ཡི་དོང་དུ་ཡང་། །གསད་པར་བྱ་བའི་ཕྱིར་ནི་བོར་བའི་མིས། །སྤྱན་རས་གཟིགས་ཀྱི་དབང་པོ་དྲན་ན་ནི། །ཆུས་བཏབ་བཞིན་དུ་མེ་དག་ཞི་བར་འགྱུར། །རྒྱ་མཚོ་དང་ནི་མྱ་
ངམ་རྒལ་ན་ཡང་། །ཀླུ་དང་འབྱུང་པོ་ལྷ་མ་ཡིན་གནས་སུ། །སྤྱན་རས་གཟིགས་ཀྱི་དབང་པོ་དྲན་ན་ནི། །ཆུ་ཡི་ནང་དུ་ནམ་ཡང་མི་ནུབ་བོ། །རབ་ཏུ་སྡང་བའི་ཡིད་ཀྱིས་གསད་པའི་ཕྱིར། །རི་རབ་ལྷུན་པོའི་རྩེ་ནས་བོར་ན་ཡང་། །སྤྱན་རས་
གཟིགས་ཀྱི་དབང་པོ་དྲན་ན་ནི། །ཉི་མ་ལྟ་བུར་ནམ་མཁའ་གནས་པར་འགྱུར། །གལ་ཏེ་རྡོ་རྗེ་ཡི་ནི་རི་དག་ཀྱང་། །གསད་པའི་ཕྱིར་ནི་སྤྱི་བོར་འོངས་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །བ་སྤུའི་ཁུང་ཙམ་བརྩེགས་པར་
མི་ནུས་སོ། །གསད་པའི་སེམས་ཀྱིས་ལག་ན་མཚོན་ཐོགས་ཏེ། །དགྲ་ཚོགས་མང་པོས་ཀུན་དུ་བསྐོར་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་མ་ཐག་ཏུ་བྱམས་པའི་སེམས་སུ་འགྱུར། །གལ་ཏེ་གསོད་པ་ཉེ་
བར་འོངས་ནས་སུ། །གཤེད་མ་མི་ཡི་དབང་དུ་གྱུར་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་ཡི་མཚོན་ཆ་དུམ་བུ་དུམ་བུར་འགྱུར། །དེ་སྟེ་ཤིང་ངམ་ལྕགས་ལས་བྱས་པ་ཡི། །ཁོང་སྒྲིལ་དང་ནི་གདོས་ཀྱིས་

46-1-184b

བཅིངས་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །བཅིངས་པ་མྱུར་དུ་རྣམ་པར་བཅད་པར་འགྱུར། །སྔགས་དང་སྟོབས་དང་སྨན་དང་རིག་སྔགས་དང་། །རོ་ལངས་པ་དང་འབྱུང་པོ་ལུས་འཇིགས་པ། །སྤྱན་རས་
གཟིགས་ཀྱི་དབང་པོ་དྲན་ན་ནི། །གང་ནས་རབ་ཏུ་བཏང་བ་དེ་སླར་འགྲོ། །གནོད་སྦྱིན་ལྷ་མིན་འབྱུང་པོ་ཀླུ་འབར་བ། །མདངས་འཕྲོག་པ་ཡིས་ཡོངས་སུ་བསྐོར་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །བ་སྤུ་
འི་ཁུང་ཙམ་གཙེས་པར་ཡོང་མི་ནུས། །མཆེ་བ་སེན་རྣོན་རབ་ཏུ་འཇིགས་པ་ཡི། །གཅན་ཟན་མ་རུངས་པ་ཡིས་བསྐོར་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །མྱུར་བར་ཕྱོགས་ཀུན་དུ་ཡང་འགྲོ་བར་འགྱུར། །
མིག་འཇིགས་མེ་ལྕེ་ལྟ་བུར་འོད་འཕྲོ་བ། །མིག་དུག་ཅན་གྱིས་ཡོངས་སུ་བསྐོར་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །ཤིན་དུ་མྱུར་བར་གདུག་པ་མེད་པར་འགྱུར། །བཟང་པོའི་ཀློག་ཀྱང་འབྱུང་ཞིང་
སྟུག་པ་ཡི། །སྤྲིན་ལས་ལྕེ་དང་སེར་བ་ཆར་འབབ་པ། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་མ་ཐག་ཏུ་མྱུར་བར་རབ་ཏུ་ཞི། །སྡུག་བསྔལ་མང་པོ་བརྒྱ་ཡིས་གཙེས་པ་དང་། །སྡུག་བསྔལ་མང་པོས་གཟིར་
བའི་སེམས་ཅན་མཐོང་། །ཡེ་ཤེས་དགེ་བའི་སྟོབས་ཀྱིས་སྤྱན་རས་གཟིགས། །དེ་བས་ལྷར་བཅས་འགྲོ་བ་སྐྱོབ་པའོ། །རྫུ་འཕྲུལ་སྟོབས་ཀྱིས་ཕ་རོལ་སོང་བ་སྟེ། །ཐབས་དང་ཡེ་ཤེས་ཡངས་པ་བསླབས་
པས་ན། །ཕྱོགས་བཅུའི་འགྲོ་བ་མང་པོ་ཐམས་ཅད་དང་། །མ་ལུས་ཞིང་ཀུན་དུ་ཡང་རབ་ཏུ་སྣང་། །སྲོག་ཆགས་རྣམས་ཀྱི་ངན་འགྲོའི་འཇིགས་པ་དང་། །མི་ཁོམ་པ་དང་སེམས་ཅན་དམྱལ་བ་དང་། །བྱོལ་
སོང་དང་ནི་གཤིན་རྗེས་བསྐོར་བ་ཡང་། །སྐྱེ་རྒ་ན་བས་གཟིར་བ་མཐར་ཞི་བྱེད། །ཤིན་དུ་དགེ་བའི་སྤྱན་དེ་བྱམས་པའི་སྤྱན། །ཐབས་དང་ཤེས་རབ་ཁྱད་པར་ཡོད་པའི་སྤྱན། །སྙིང་རྗེའི་སྤྱན་དང་བྱམས་

46-1-185a

པའི་སྤྱན་བས་ན། །ཞལ་བཟང་སྤྱན་བཟང་ཤིན་དུ་ལྟ་འདོད་པ། །དྲི་མ་མེད་པ་དྲི་མ་བྲལ་བའི་འོད། །རབ་རིབ་མེད་པ་ཡེ་ཤེས་ཉི་མའི་འོད། །སྤྲིན་གྱིས་ཆོད་པར་གྱུར་པ་མེད་པའི་འོད། །འཇིག་རྟེན་
དག་ན་ལྷག་གེ་ལྷང་ངེར་མཛེས། །སྙིང་རྗེ་ལས་བྱུང་ཚུལ་ཁྲིམས་གྲགས་པ་སྟེ། །དགེ་བའི་ཡོན་ཏན་བྱམས་ཡིད་སྤྲིན་ཆེན་པོ། །སྲོག་ཆགས་རྣམས་ཀྱི་ཉོན་མོངས་མེ་ཞི་བྱེད། །ཆོས་ཀྱི་ཆར་པ་བདུད་རྩི་རབ་
ཏུ་འབེབས། །ཐབ་མོ་དང་ནི་རྩོད་ཅིང་འགྱེད་པ་ཡི། །འཇིགས་ཆེན་གཡུལ་ངོར་སྐྱེས་བུ་སོང་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་མ་ཐག་ཏུ་དགྲ་རྣམས་རབ་ཏུ་ཞི། །སྤྲིན་གྱི་སྒྲ་དང་རྔ་བོ་ཆེ་ཡི་
སྒྲ། །འབྲུག་གི་སྒྲ་དང་ཚངས་པའི་དབྱངས་སྙན་པ། །དབྱངས་ཀྱི་དཀྱིལ་འཁོར་ཕ་རོལ་ཕྱིན་པ་སྟེ། །སྤྱན་རས་གཟིགས་ཀྱི་དབང་པོ་དྲན་པར་བྱ། །དག་པའི་སེམས་དཔའ་སྤྱན་རས་གཟིགས་དབང་པོ། །ཐེ་ཚོམ་
མ་ཟ་དྲན་བྱོས་དྲན་པར་གྱིས། །འཆི་བའི་ཚེ་དང་ཉོན་མོངས་གཙེས་པའི་ཚེ། །མགོན་དང་སྐྱབས་དང་དཔུང་གཉེན་དུ་ཡང་འགྱུར། །ཡོན་ཏན་ཐམས་ཅད་ཀྱི་ནི་ཕ་རོལ་ཕྱིན། །སེམས་ཅན་ཀུན་ལ་སྙིང་རྗེ་བྱམས་པའི་སྤྱན། །
ཡང་དག་ཡོན་ཏན་ཡོན་ཏན་རྒྱ་མཚོ་ཆེ། །སྤྱན་རས་གཟིགས་ཀྱི་དབང་པོར་ཕྱག་བྱར་འོས། །འདི་ལྟར་འགྲོ་བ་རྣམས་ལ་སྙིང་བརྩེ་བ། །ཕྱི་མའི་དུས་ན་སངས་རྒྱས་སུ་ཡང་འགྱུར། །འཇིགས་དང་མྱ་ངན་ཐམས་ཅད་འཇིག་
བྱེད་པ། །སྤྱན་རས་གཟིགས་དབང་དེ་ནི་དྲན་པར་བྱ། །འཇིག་རྟེན་དབང་གི་རྒྱལ་པོ་གཙོ་བོ་སྟེ། །དགེ་སློང་ཆོས་ཀྱི་འབྱུང་གནས་འཇིག་རྟེན་མཆོད། །བསྐལ་པ་བརྒྱ་ཕྲག་མང་པོ་སྤྱད་ནས་སུ། །རྡུལ་བྲལ་བླ་ན་
མེད་པའི་བྱང་ཆུབ་འཐོབ། །འདྲེན་པ་སྣང་བ་མཐའ་ཡས་གཡས་གཡོན་ནས། །བསིལ་ཡབ་ཐོགས་ཏེ་དེ་བཞིན་གཡོབ་ཅིང་འདུག །སྒྱུ་མ་ལྟ་བུའི་ཏིང་ངེ་འཛིན་གྱིས་ཀྱང་། །ཞིང་རྣམས་ཀུན་དུ་སོང་ནས་

46-1-185b

རྒྱལ་བ་མཆོད། །ནུབ་ཀྱི་ཕྱོགས་ན་བདེ་བའི་འབྱུང་གནས་ཏ། །རྡུལ་བྲལ་འཇིག་རྟེན་ཁམས་འདི་བདེ་བ་ཅན། །དེ་ན་སེམས་ཅན་ཁ་ལོ་སྒྱུར་བ་ཡི། །འདྲེན་པ་ཚེ་མཐའ་ཡས་པ་འང་ད་ལྟར་བཞུགས། །དེར་ནི་
བུད་མེད་རྣམས་ཀྱང་མི་འབྱུང་སྟེ། །རྣམ་པ་ཀུན་དུ་གཡེམ་པའི་ཆོས་མེད་དོ། །རྒྱལ་བའི་སྲས་པོ་དེ་དག་རྫུས་ཏེ་སྐྱེ། །དྲི་མ་མེད་པའི་པད་མའི་སྙིང་པོར་འདུག །འདྲེན་པ་ཚེ་མཐའ་ཡས་པ་དེ་ཉིད་ཀྱང་། །
པད་མའི་སྙིང་པོ་དྲི་མེད་དགའ་བ་ལ། །སེང་གེའི་ཁྲི་ལ་རབ་ཏུ་བཞུགས་པ་ཡང་། །ས་ལའི་རྒྱལ་པོ་ལྟ་བུར་རྣམ་པར་མཛེས། །འཇིག་རྟེན་འདྲེན་པ་འདི་ཡང་དེ་བཞིན་ཏེ། །སྲིད་པ་གསུམ་ན་དེ་ཡང་
ཡོང་མེད་དོ། །གང་གིས་སྤྱན་རས་གཟིགས་དབང་མིང་ཐོས་པ། །དེ་ཡི་བསོད་ནམས་དག་ནི་ཟད་མི་འགྱུར། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ས་འཛིན་སྟན་ལས་ལངས་ཏེ། 
བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ། ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་
འདི་སྐད་ཅེས་གསོལ་ཏོ། །བཅོམ་ལྡན་འདས་སུ་དག །བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་ལེའུ། 
བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་རྣམ་པར་འཕྲུལ་པ་བསྟན་པ་ཀུན་ནས་སྒོའི་ལེའུ། སྤྱན་རས་གཟིགས་དབང་ཕྱུག་
རྣམ་པར་སྤྲུལ་པའི་ཆོ་འཕྲུལ་འདི་།། །།

46-1-186a

ཐོས་པའི་སེམས་ཅན་དེ་དག་ནི་དགེ་བའི་རྩ་བ་ངན་ངོན་དང་ལྡན་པ་མ་ལགས་སོ། །ཀུན་ནས་སྒོའི་ལེའུ་བསྟན་པ་འདི་བཅོམ་ལྡན་འདས་ཀྱིས་བཤད་པ་ན། འཁོར་དེ་ལས་སྲོག་ཆགས་བརྒྱད་ཁྲི་བཞི་སྟོང་གིས་
མི་མཉམ་པ་དང་མཉམ་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་རོ། །དམ་པའི་ཆོས་པད་མ་དཀར་པོ་ལས་སྤྱན་རས་གཟིགས་དབང་ཕྱུགི་རྣམ་པར་འཕྲུལ་པ་བསྟན་པ་ཀུན་
ནས་སྒོའི་ལེའུ་སྟེ་ཉི་ཤུ་རྩ་བཞི་པའོ།། །། དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་ལ་བཀའ་སྩལ་པ། རིགས་ཀྱི་བུ་དག་སྔོན་བྱུང་བ་འདས་པའི་དུས་ན། བསྐལ་པ་གྲངས་མེད་པར་གྱུར་པ་དེའི་ཚེ་དེའི་དུས་ན། 
བསྐལ་པ་མཐོང་ན་དགའ་བ་ལ་འཇིག་རྟེན་གྱི་ཁམས་རྣམ་པར་སྣང་བའི་འོད་ཟེར་གྱིས་བརྒྱན་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་
པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་
ཀུན་དུ་རྒྱས་པ་ཞེས་བྱ་བ་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་དེའི་གསུང་རབ་ལ། རྒྱལ་པོ་དགེ་བ་བཀོད་པ་ཞེས་བྱ་བ་
བྱུང་སྟེ། རིགས་ཀྱི་བུ་དག་རྒྱལ་པོ་དགེ་བ་བཀོད་པ་དེའི་ཆུང་མ་དྲི་མ་མེད་པས་བྱིན་པ་ཞེས་བྱ་བ་ཞིག་ཡོད་དོ། །རིགས་ཀྱི་བུ་དག་རྒྱལ་པོ་དགེ་བ་བཀོད་པ་དེ་ལ་བུ་གཉིས་ཤིག་ཡོད་དེ། གཅིག་གི་
མིང་ནི་དྲི་མ་མེད་པའི་སྙིང་པོ། གཅིག་གི་མིང་ནི་དྲི་མ་མེད་པའི་མིག་སྟེ། ཁྱེའུ་དེ་གཉིས་རྫུ་འཕྲུལ་དང་ལྡན་ཤེས་རབ་དང་ལྡན་བསོད་ནམས་དང་ལྡན་ཡེ་ཤེས་དང་ལྡན་ཏེ། བྱང་ཆུབ་སེམས་དཔའི་

46-1-186b

སྤྱོད་པ་ལ་བརྩོན་པར་གྱུར་ཏོ། །འདི་ལྟ་སྟེ་སྦྱིན་པའི་ཕ་རོལ་དུ་ཕྱིན་པ་དང་ཚུལ་ཁྲིམས་ཀྱི་ཕ་རོལ་དུ་ཕྱིན་པ་དང་བཟོད་པའི་ཕ་རོལ་དུ་ཕྱིན་པ་དང་། བརྩོན་འགྲུས་ཀྱི་ཕ་རོལ་དུ་ཕྱིན་པ་དང་བསམ་གཏན་གྱི་ཕ་རོལ་དུ་ཕྱིན་པ་དང་ཤེས་
རབ་ཀྱི་ཕ་རོལ་ཏུ་ཕྱིན་པ་དང་ཐབས་མཁས་པའི་ཕ་རོལ་དུ་ཕྱིན་པ་དང་བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་དང་བྱང་ཆུབ་ཀྱི་ཕྱོགས་ཀྱི་ཆོས་སུམ་བཅུ་རྩ་བདུན་པོ་དག་ལ་བརྩོན་པར་གྱུར་ཏེ། ཐམས་ཅད་ཀྱི་ཕ་རོལ་ཏུ་སོན་པར་
གྱུར་ཏོ། །དྲི་མ་མེད་པའི་ཏིང་ངེ་འཛིན་གྱི་ཕ་རོལ་དུ་སོང་ངོ་། །རྒྱུ་སྐར་དང་སྐར་མ་དང་ཉི་མའི་ཏིང་ངེ་འཛིན་གྱི་ཕ་རོལ་དུ་སོང་ངོ་། །དྲི་མ་མེད་པའི་འོད་ཀྱི་ཏིང་ངེ་འཛིན་གྱི་ཕ་རོལ་དུ་སོང་ངོ་། །དྲི་མ་མེད་པའི་འོད་གསལ་བའི་ཏིང་ངེ་འཛིན་
གྱི་ཕ་རོལ་དུ་སོང་ངོ་། །དཔའ་རྒྱན་གྱི་ཏིང་ངེ་འཛིན་གྱི་ཕ་རོལ་དུ་སོང་ངོ་། །གཟི་བརྗིད་ཆེན་པོའི་ཏིང་ངེ་འཛིན་གྱི་ཕ་རོལ་དུ་སོང་བར་གྱུར་ཏོ། །བཅོམ་ལྡན་འདས་དེ་ཡང་དེའི་ཚེ་དེའི་དུས་ན་སེམས་ཅན་དེ་དག་ལ་ཐུགས་བརྩེ་བ་དང་། 
རྒྱལ་པོ་དགེ་བ་བཀོད་པ་དེ་ལ་ཐུགས་བརྩེ་བའི་ཕྱིར། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་སྟོན་ཏོ། །རིགས་ཀྱི་བུ་དག་དེ་ནས་ཁྱེའུ་དྲི་མ་མེད་པའི་སྙིང་པོ་དང་ཁྱེའུ་དྲི་མ་མེད་པའི་མིག །བདག་ཅག་སྐྱེད་
པའི་མ་ག་ལ་བ་དེར་སོང་སྟེ་ཕྱིན་ནས་སོར་མོ་བཅུ་ལས་ཐལ་མོ་སྦྱར་ཏེ། བདག་ཅག་སྐྱེད་པའི་མ་ལ་འདི་སྐད་ཅེས་སྨྲས་སོ། །ཡུམ་ཚུར་སྤྱོན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་དེ་ལ་བལྟ་བ་དང་ཕྱག་བགྱི་བ་དང་བསྙེན་བཀུར་བགྱི་བའི་སླད་དུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེའི་དྲུང་དུ་བཞུད་དེ། ཅིའི་སླད་དུ་ཞེ་ན་ཡུམ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་

46-1-187a

སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེ། ལྷ་དང་བཅས་པའི་འཇིག་རྟེན་གྱི་མདུན་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་རྒྱས་པར་རབ་ཏུ་འཆད་ཀྱིས་དེ་མཉན་པའི་ཕྱིར་བཞུད་དོ། །
རིགས་ཀྱི་བུ་དག་ལ་དེ་སྐད་ཅེས་སྨྲས་ནས། རྒྱལ་པོའི་ཆུང་མ་དྲི་མ་མེད་པས་བྱིན་པས། ཁྱེའུ་དྲི་མ་མེད་པའི་སྙིང་པོ་དང་དྲི་མ་མེད་པའི་མིག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་ཁྱེད་ཀྱི་ཕ་རྒྱལ་པོ་དགེ་བ་
བཀོད་པ་འདི་བྲམ་ཟེ་ལ་དད་པས། དེ་བཞིན་གཤེགས་པ་དེ་ལ་བལྟ་བའི་ཕྱིར་འགྲོར་མི་སྟེར་རོ། །རིགས་ཀྱི་བུ་དག་དེ་ནས། ཁྱེའུ་དྲི་མ་མེད་པའི་སྙིང་པོ་དང་ཁྱེའུ་དྲི་མ་མེད་པའི་མིག་གིས་སོར་མོ་བཅུའི་ཐལ་མོ་སྦྱར་ནས། 
བདག་ཅག་སྐྱེད་པའི་མ་ལ་འདི་སྐད་ཅེས་སྨྲས་སོ། །བདག་ཅག་ལོག་པར་ལྟ་བའི་ཁྱིམ་དུ་སྐྱེས་ཏེ། བདག་ཅག་ཆོས་ཀྱི་རྒྱལ་པོའི་བུ་མ་ལགས་པ་སྟེ། རིགས་ཀྱི་བུ་དག་དེ་ནས་རྒྱལ་པོའི་ཆུང་མ་དྲི་མ་མེད་པས་བྱིན་པས། 
ཁྱེའུ་དེ་དག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་ཁྱེད་ཀྱིས་བདག་ཅག་གི་ཕ་རྒྱལ་པོ་དགེ་བ་བཀོད་པ་ལ་སྙིང་བརྩེ་བའི་ཕྱིར། ཆོ་འཕྲུལ་ཅི་ཞིག་ལེགས་པར་སྟོན་ཅིག་དང་ཁྱེད་ལ་དད་པར་འགྱུར་ཡང་སྲིད་ཀྱིས། 
སེམས་དད་པར་གྱུར་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེའི་གན་དུ་འདོང་དུ་གནང་ངོ་། །རིགས་ཀྱི་བུ་དག་
དེ་ནས་ཁྱེའུ་དྲི་མ་མེད་པའི་སྙིང་པོ་དང་ཁྱེའུ་དྲི་མ་མེད་པའི་མིག་གིས། དེའི་ཚེ་ཏ་ལ་བདུན་ཙམ་དུ་ནམ་མཁའ་ལ་འཕགས་ནས། ཕ་རྒྱལ་པོ་དགེ་བ་བཀོད་པ་དེ་ལ་སྙིང་བརྩེ་བའི་ཕྱིར། སངས་རྒྱས་ཀྱིས་གནང་
བའི་ཆོ་འཕྲུལ་ཟུང་དུ་བྱེད་དེ། དེ་དག་ནམ་མཁའ་བར་སྣང་དེ་ལ་དོང་ནས་ཉལ་བར་བྱེད་དོ། །བར་སྣང་དེ་ལ་འཆག་གོ། །བར་སྣང་དེ་ལ་རྡུལ་སྤྲུག་གོ། །བར་སྣང་དེ་ཉིད་ལ་ལུས་ཀྱི་སྨད་ནས་ཆུའི་རྒྱུན་གཏོང་

46-1-187b

ཞིང་། ལུས་ཀྱི་སྟོད་ནས་མེའི་ཕུང་པོ་རབ་ཏུ་འབར་བར་བྱེད་དོ། །ལུས་ཀྱི་སྟོད་ནས་ཆུའི་རྒྱུན་གཏོང་ཞིང་། ལུས་ཀྱི་སྨད་ནས་མེའི་ཕུང་པོ་རབ་ཏུ་འབར་བར་བྱེད་དོ། །དེ་དག་ནམ་མཁའ་དེ་ཉིད་ལ་ཆེན་པོར་གྱུར་ནས་ཆུང་ངུར་
གྱུར། ཆུང་ངུར་གྱུར་ནས་ཆེན་པོར་གྱུར་ཏོ། །བར་སྣང་དེ་ཉིད་ལ་མི་སྣང་བར་གྱུར་ཏེ་ས་ལས་བྱུང་ངོ་། །ས་ལས་བྱུང་ནས་ནམ་མཁའ་ལ་འཕགས་སོ། །རིགས་ཀྱི་བུ་དག་ཁྱེའུ་དེ་གཉིས་ཀྱིས་རྫུ་འཕྲུལ་གྱི་ཆོ་འཕྲུལ་
དེ་སྙེད་ཀྱིས། རང་གི་ཕ་རྒྱལ་པོ་དགེ་བ་བཀོད་པ་བཏུལ་ལོ། །རིགས་ཀྱི་བུ་དག་དེ་ནས་རྒྱལ་པོ་དགེ་བ་བཀོད་པས། ཁྱེའུ་དེ་གཉིས་ཀྱི་རྫུ་འཕྲུལ་གྱི་ཆོ་འཕྲུལ་དེ་དག་མཐོང་ནས། དེའི་ཚེ་ཚིམ་ཞིང་མགུ་ལ་ཡི་
རངས་ཏེ་རབ་ཏུ། དགའ་ཞིང་བདེ་བ་དང་ཡིད་བདེ་བ་སྐྱེས་ནས། སོར་མོ་བཅུའི་ཐལ་མོ་སྦྱར་ཏེ། ཁྱེའུ་དེ་དག་ལ་འདི་སྐད་ཅེས། རིགས་ཀྱི་བུ་དག་ཁྱེད་ཀྱི་སྟོན་པ་སུ། ཁྱེད་སུའི་སློབ་མ་ཞེས་སྨྲས་སོ། །རིགས་ཀྱི་བུ་
དག་དེ་ནས་ཁྱེའུ་དེ་གཉིས་ཀྱིས་རྒྱལ་པོ་དགེ་བ་བཀོད་པ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་
སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་དེ་བཞུགས་ཏེ་འཚོ་ཞིང་གཞེས་ལ་རིན་པོ་ཆེའི་ཤིང་བྱང་ཆུབ་ཀྱི་ཤིང་དྲུང་ན་ཆོས་ཀྱི་གདན་ལ་བཞུགས་ཏེ། ལྷ་དང་བཅས་བདུད་དང་བཅས་ཚངས་པ་དང་བཅས་པའི་མདུན་ན་
དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་རྒྱས་པར་རབ་ཏུ་འཆད་པའི་བཅོམ་ལྡན་འདས་དེ་ནི་བདག་ཅག་གི་སྟོན་པ་སྟེ། རྒྱལ་པོ་ཆེན་པོ་བདག་ཅག་ནི་དེའི་སློབ་མའོ། །རིགས་ཀྱི་བུ་དག་དེ་ནས་རྒྱལ་པོ་
དགེ་བ་བཀོད་པས་ཁྱེའུ་དེ་གཉིས་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་ཁྱེད་ཀྱི་སྟོན་པ་ལྟ་ཞིང་བཅོམ་ལྡན་འདས་དེའི་དྲུང་དུ་བདག་ཀྱང་འགྲོའོ། །རིགས་ཀྱི་བུ་དག་དེ་ནས་ཁྱེའུ་དེ་གཉིས་བར་སྣང་དེ་ལས་བབས་ནས། བདག་ཅག་

46-1-188a

སྐྱེད་པའི་མ་ག་ལ་བ་དེར་སོང་སྟེ་ཕྱིན་ནས་སོར་མོ་བཅུ་ཐལ་མོ་སྦྱར་ཏེ། བདག་ཅག་སྐྱེད་པའི་མ་ལ་འདི་སྐད་ཅེས་སྨྲས་སོ། །ཡུམ་བདག་ཅག་གི་ཡབ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་བཏུལ་ལགས་སོ། །བདག་ཅག་གིས་ཡབ་ཀྱི་སྟོན་པའི་བགྱི་བ་བགྱིས་སོ། །བདག་ཅག་བཅོམ་ལྡན་འདས་དེ་ལས་རབ་ཏུ་འབྱུང་ན་ཡུལ་དེ་ནི་བདག་ཅག་གཏང་བའི་རིགས་སོ། །རིགས་ཀྱི་བུ་དག་དེ་ནས་ཁྱེའུ་དྲི་མ་
མེད་པའི་སྙིང་པོ་དང་ཁྱེའུ་དྲི་མ་མེད་པའི་མིག་གིས། དེའི་ཚེ་བདག་ཅག་སྐྱེད་པའི་མ་ལ་ཚིགས་སུ་བཅད་པ་འདི་དག་སྨྲས་སོ། །ཁྱིམ་མེད་རབ་ཏུ་འབྱུང་བར་ནི། །ཡུམ་གྱིས་བདག་ཅག་གནང་བར་མཛོད། །
དེ་བཞིན་གཤེགས་པ་རྙེད་པར་དཀའ། །བདག་ཅག་རབ་ཏུ་འབྱུང་བར་བགྱི། །ཨུ་དུམ་བ་རའི་མེ་ཏོག་བཞིན། །རྒྱལ་བ་ཤིན་དུ་རྙེད་པར་དཀའ། །དལ་བ་འབྱོར་པའང་རྙེད་དཀའ་བས། །རབ་ཏུ་འབྱུང་གིས་གཏང་དུ་གསོལ། །
རྒྱལ་པོའི་ཆུང་མ་དྲི་མ་མེད་པས་སྨྲས་པ། དེ་རིང་ཁྱེད་གཉིས་གཏང་བར་བྱ། །བྱིས་པ་བདག་དང་ལེགས་པར་དེང་། །དེ་བཞིན་གཤེགས་པ་རྙེད་དཀའ་བས། །བདག་ཀྱང་རབ་ཏུ་བྱུང་བར་བྱ། །རིགས་ཀྱི་བུ་དག་ཁྱེའུ་དེ་དག་
གིས་ཚིགས་སུ་བཅད་པ་འདི་དག་སྨྲས་ནས། བདག་གི་ཕ་དང་མ་ལ་འདི་སྐད་ཅེས་སྨྲས་སོ། །ཡབ་ཡུམ་ལེགས་སོ་ཚུར་སྤྱོན། །ཁྱེད་དང་ཐམས་ཅད་ལྷན་ཅིག་བཞུད་དོ། །བཅོམ་ལྡན་འདས་དེ་ལ་བལྟ་བ་དང་ཕྱག་བགྱི་བ་དང་
བསྙེན་བཀུར་བགྱི་བའི་སླད་ཏུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་དེའི་དྲུང་དུ་བཞུད་དོ། །དེ་ཅིའི་སླད་ཏུ་ཞེ་ན། 
ཡབ་ཡུམ་སངས་རྒྱས་འབྱུང་བ་རྙེད་པར་དཀའ་སྟེ། ཨུ་དུམ་བ་རའི་མེ་ཏོག་དང་འདྲ་ཞིང་གཉའ་ཤིང་གི་བུ་གར་རུ་སྦལ་གྱི་མགྲིན་པ་ཆུད་པ་དང་འདྲ་བའི་སླད་ཏུའོ། །ཡབ་ཡུམ་སངས་རྒྱས་བཅོམ་ལྡན་འདས་དག་འབྱུང་བ་རྙེད་པར་དཀའ་

46-1-188b

སྟེ། དེ་བས་ན་ཡབ་ཡུམ་བདག་ཅག་བསོད་ནམས་མཆོག་གིས་བརྟན་པས་གསུང་རབ་འདི་ལྟ་བུ་ལ་སྐྱེས་ཏེ། ཡབ་ཡུམ་བདག་ཅག་བཏང་ན་ལེགས་ཏེ་བདག་ཅག་མཆི་ཞིང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པའི་བསྟན་པ་ལ་རབ་ཏུ་བྱུང་ངོ་། །དེ་ཅིའི་སླད་ཏུ་ཞེ་ན། ཡབ་ཡུམ་དེ་བཞིན་གཤེགས་པ་མཐོང་བ་རྙེད་པར་དཀའ་བ་དང་། 
ད་ལྟར་གྱི་དུས་ན་འདི་འདྲ་བའི་ཆོས་ཀྱི་རྒྱལ་པོ་རྙེད་པར་དཀའ་བ་དང་། འདི་ལྟ་བུའི་དལ་བ་འབྱོར་པ་ཤིན་དུ་རྙེད་པར་དཀའ་བའི་སླད་ཏུའོ། །རིགས་ཀྱི་བུ་དག་དེའི་ཚེ་ན། རྒྱལ་པོ་དགེ་བ་བཀོད་པ་དེའི་བཙུན་མོའི་འཁོར་ལས་སྲས་བརྒྱད་
ཁྲི་བཞི་སྟོང་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདིའི་སྣོད་ཏུ་གྱུར་ཏོ། །ཁྱེའུ་དྲི་མ་མེད་པའི་སྙིང་པོ་དང་དྲི་མ་མེད་པའི་མིག་གིས་ཆོས་ཀྱི་རྣམ་གྲངས་འདི་ལ་སྤྱད་དེ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ངན་སོང་
ཐམས་ཅད་ཇི་ལྟར་བསལ་སྙམ་ནས། སེམས་ཅན་ཐམས་ཅད་ཀྱི་ངན་སོང་ཐམས་ཅད་སེལ་བའི་ཏིང་ངེ་འཛིན་ལ་སྤྱད་པར་གྱུར་ཏོ། །ཁྱེའུ་དེ་དག་གི་མ་དྲི་མ་མེད་པས་བྱིན་པ་རྒྱལ་པོའི་ཆུང་མ་དེ་ཡང་སངས་རྒྱས་ཐམས་ཅད་
ཀྱིས་ཀུན་བསྟན་པ། སངས་རྒྱས་ཐམས་ཅད་ཀྱི་ཆོས་གསང་བའི་གནས་ཤེས་སོ། །རིགས་ཀྱི་བུ་དག་དེ་ནས་ཁྱེའུ་དེ་གཉིས་ཀྱིས་རྒྱལ་པོ་དགེ་བ་བཀོད་པ་དེ་བཞིན་གཤེགས་པའི་བསྟན་པ་ལ་བཏུལ་ཏེ་ཞུགས་པར་བྱས་ནས་ཡོངསུ་
སྨིན་པར་བྱས་ཏེ། གཉེན་འདབ་དང་རྒྱལ་པོའི་ཆུང་མ་དྲི་མ་མེད་པས་བྱིན་པ་དེ་དང་གཉེན་འདབ་དང་རྒྱལ་པོ་དགེ་བ་བཀོད་པའི་ཁྱེའུ་དེ་གཉིས་ཀྱང་། སྲོག་ཆགས་བཞི་ཁྲི་ཉིས་སྟོང་དང་བཙུན་མོའི་འཁོར་དང་བཅས་བློན་པོ་དང་བཅས་ཏེ་
ཐམས་ཅད་འགྲོགས་ནས་ལྷན་ཅིག་ཏུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་དེ་ག་ལ་བ་དེར་དོང་སྟེ། ལྷགས་ནས་

46-1-189a

བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་བདུན་དུ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །རིགས་ཀྱི་བུ་དག་དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་དེས། རྒྱལ་པོ་དགེ་བ་བཀོད་པ་འཁོར་དང་བཅས་ཏེ་ལྷགས་པར་མཁྱེན་ནས། ཆོས་ཀྱི་གཏམ་གྱིས་ཤིན་དུ་ལེགས་པར་
ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེང་སྟོད། ཡང་དག་པར་རབ་ཏུ་དགའ་བར་མཛད་དོ། །རིགས་ཀྱི་བུ་དག་དེ་ནས་བཅོམ་ལྡན་འདས་དེས་རྒྱལ་པོ་དགེ་བ་བཀོད་པ་ལ། ཆོས་ཀྱི་གཏམ་གྱིས་ཤིན་ཏུ་
ལེགས་པར་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེང་སྟོད། ཡང་དག་པར་རབ་ཏུ་དགའ་བར་མཛད་པས། དེའི་ཚེ་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས། 
ནུ་བོ་ཅོད་པན་གྱིས་བཅིངས་ཏེ། རྒྱལ་པོར་བཅུག་ནས་བུ་དང་གཉེན་འདབ་དང་འཁོར་དང་བཅས་པ་དང་། རྒྱལ་པོའི་ཆུང་མ་དྲི་མ་མེད་པས་བྱིན་པ་དེ་ཡང་། བུད་མེད་ཀྱི་ཚོགས་ཐམས་ཅད་དང་འཁོར་དང་ཁྱེའུ་དེ་གཉིས་དང་
ལྷན་ཅིག་ཏུ། སྲོག་ཆགས་བརྒྱད་ཁྲི་བཞི་སྟོང་དང་ལྷན་ཅིག་འགྲོགས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་
མེ་ཏོག་ཀུན་དུ་རྒྱས་པ་དེའི་གསུང་རབ་ལ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། རབ་ཏུ་བྱུང་ནས་རྒྱལ་པོ་དགེ་བ་བཀོད་པ་འཁོར་དང་བཅས་པས། ལོ་བརྒྱད་ཁྲི་བཞི་སྟོང་དུ་དམ་པའི་ཆོས་པདྨ་
དཀར་པོའི་ཆོས་ཀྱི་རྣམ་གྲངས་འདི་ལ་བསམ་པ་དང་བསྒོམ་པ་དང་ཀུན་ཆུབ་པར་བྱ་བ་ལ་བརྩོན་པར་འགྱུར་རོ། །རིགས་ཀྱི་བུ་དག་དེ་ནས་རྒྱལ་པོ་དགེ་བ་བཀོད་པ་ལོ་བརྒྱད་ཁྲི་བཞི་སྟོང་འདས་ནས། ཡོན་ཏན་གྱི་

46-1-189b

བརྒྱན་ཐམས་ཅད་བཀོད་པ་ཞེས་བྱ་བའི་ཏིང་ངེ་འཛིན་ཐོབ་སྟེ། ཏིང་ངེ་འཛིན་དེ་ཐོབ་མ་ཐག་ཏུ་དེའི་ཚེ་ནམ་མཁའ་ལ་ཏ་ལ་བདུན་ཙམ་དུ་འཕགས་སོ། །དེ་ནས་རིགས་ཀྱི་བུ་དག་རྒྱལ་པོ་དགེ་བ་བཀོད་པ་ནམ་མཁའི་དཀྱིལ་དུ་འདུག་ནས། 
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་བུ་
འདི་གཉིས་སྟོན་པ་ལགས་ཏེ། གང་འདི་དག་གིས་རྫུ་འཕྲུལ་གྱིས་ལྟ་བར་གྱུར་པ་ཆེན་པོ་དེ་ལས་བཟློག་སྟེ། དེ་བཞིན་གཤེགས་པའི་བསྟན་པ་ལ་རབ་ཏུ་བཞག་གོ། །ཡོངས་སུ་སྨིན་པར་བགྱིས། །ཞུགས་པར་བགྱིས་སོ། །
དེ་བཞིན་གཤེགས་པ་ལ་བལྟ་བ་དང་། ཕྱག་བགྱི་བའི་སླད་དུ་ཡང་བསྐུལ་ལོ། །བཅོམ་ལྡན་འདས་ཁྱེའུ་འདི་གཉིས་བདག་གི་དགེ་བའི་བཤེས་གཉེན་ཏེ། སྔོན་གྱི་དགེ་བའི་རྩ་བ་དྲན་པར་བགྱི་བའི་སླད་དུ། བུའི་གཟུགས་
ཀྱིས་བདག་གི་ཁྱིམ་དུ་སྐྱེས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་
རྒྱས་པས་རྒྱལ་པོ་དགེ་བ་བཀོད་པ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་དེ་དེ་བཞིན་ཏེ། ཇི་སྐད་སྨྲས་པ་བཞིན་ནོ། །དགེ་བའི་རྩ་བ་སྐྱེད་པའི་རིགས་ཀྱི་བུ་འམ་རིགས་ཀྱི་བུ་མོ་རྣམས་ནི་སྲིད་པའི་འགྲོ་བ་དང་འཆི་བའི་གནས་
ཐམས་ཅད་དུ་སྐྱེས་པ་ན་ཡང་། གང་དག་སྟོན་པའི་བྱེད་པས་ཉེ་བར་གནས་པ་དང་། གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པ་དང་། འཛུད་པ་དང་ཡོངས་སུ་སྨིན་པར་བྱེད་པའི་དགེ་བའི་བཤེས་གཉེན་རྣམས་
རྙེད་པར་སླ་བར་འགྱུར་རོ། །རྒྱལ་པོ་ཆེན་པོ་འདི་ལྟ་སྟེ་དགེ་བའི་བཤེས་གཉེན་གྱིས་ཡོངས་སུ་ཟིན་པ། དེ་བཞིན་གཤེགས་པ་ལྟར་འཛུད་པ་གནས་འདི་ནི་རྒྱ་ཆེ་བའོ། །རྒྱལ་པོ་ཆེན་པོ་ཁྱེའུ་འདི་གཉིས་མཐོང་ངམ། གསོལ་པ་བཅོམ་ལྡན་འདས་མཐོང་ལགསོ། །

46-1-190a

སོ། བདེ་བར་གཤེགས་པ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཁྱེའུ་འདི་གཉིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་དྲུག་
ཅུ་རྩ་ལྔའི་བྱེ་མ་སྙེད་ལ་མཆོད་པ་བྱེད་དོ། །སེམས་ཅན་རྣམས་ལ་སྙིང་བརྩེ་བའི་ཕྱིར། ལོག་པར་ལྟ་བའི་སེམས་ཅན་རྣམས་ཡང་དག་པའི་ལྟ་བ་ལ་བརྩོན་འགྲུས་བསྐྱེད་པའི་ཕྱིར་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་
འདི་འཛིན་པར་འགྱུར་རོ། །རིགས་ཀྱི་བུ་དག་དེ་ནས་རྒྱལ་པོ་དགེ་བ་བཀོད་པ་ནམ་མཁའི་དཀྱིལ་དེ་ནས་བབས་ཏེ། སོར་མོ་བཅུའི་ཐལ་མོ་སྦྱར་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཇི་ལྟ་བུའི་ཡེ་ཤེས་དང་ལྡན་པས། དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་གང་གི་སླད་ཏུ། དབུའི་གཙུག་ཏོར་རྣམ་པར་མཛེས་སྤྱན་དྲི་མ་མ་མཆིས་པ་ལགས། སྨིན་མཚམས་ཀྱི་མཛོད་སྤུ་མཛེས་ཤིང་། ཟླ་བ་དུང་ལྟར་དཀར་ལ་མཛེས། མཉམ་ཞིང་ཐགས་བཟང་
པའི་ཚེམས་ཀྱི་ཕྲེང་བ་ཞལ་གྱི་ནང་ནས་མཛེས། བཅོམ་ལྡན་འདས་ཀྱི་སྒྲོས་མེ་ཏོག་བིམ་པ་ལྟར་དམར་བ་དང་། བདེ་བར་གཤེགས་པའི་སྤྱན་མཛེས་པ། དེ་བཞིན་གཤེགས་པས་ལེགས་པར་བཤད་ཏུ་གསོལ། 
རིགས་ཀྱི་བུ་དག་དེ་ནས་རྒྱལ་པོ་དགེ་བ་བཀོད་པས་ཡོན་ཏན་དེ་སྙེད་ཀྱིས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་དུ་
རྒྱས་པ་དེ་ལ་མངོན་པར་བསྟོད་ནས། ཡོན་ཏན་བྱེ་བ་ཁྲག་ཁྲིག་བརྒྱ་སྟོང་གཞན་དག་གིས་ཀྱང་བཅོམ་ལྡན་འདས་དེ་ལ་བསྟོད་དོ། །དེའི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་

46-1-190b

སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་དུ་རྒྱས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ཙམ་དུ་དེ་བཞིན་གཤེགས་པའི་བསྟན་པ་འདི་དོན་ཆེ་ཞིང་། ཡོན་ཏན་བསམ་གྱིས་མི་ཁྱབ་པ་དང་
ལྡན་པའི་ཆོས་འདུལ་བ་གསུངས་ཏེ། ཇི་ཙམ་དུ་དེ་བཞིན་གཤེགས་པས་བསླབ་པ་ལེགས་པར་བཅས་པ་ནི་ངོ་མཚར་ཏོ། །བཅོམ་ལྡན་འདས་དེང་སླན་ཆད་བདག་སླར་སེམས་ཀྱི་དབང་དུ་མཆི་བར་མི་བགྱིའོ། །
སླར་ལོག་པར་ལྟ་བའི་དབང་དུ་མཆི་བར་མི་བགྱིའོ། །སླར་ཁྲོ་བའི་དབང་དུ་མཆི་བར་མི་བགྱིའོ། །སླར་སྡིག་པའི་སེམས་བསྐྱེད་པའི་དབང་དུ་མཆི་བར་མི་བགྱིའོ། །བཅོམ་ལྡན་འདས་བདག་མི་དགེ་བའི་ཆོས་འདི་
སྙེད་དང་ལྡན་ན། བཅོམ་ལྡན་འདས་ཀྱི་དྲུང་དུ་མཆི་བར་མི་འཚལ་ལོ་ཞེས་སྨྲས་ཏེ། དེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་
རྒྱལ་པོ་མེ་ཏོག་ཀུན་ཏུ་རྒྱས་པའི་ཞབས་ལ་མགོ་བོས་ཕྱག་འཚལ་ནས་བར་སྣང་ལ་སོང་སྟེ་འཆག་གོ། །དེ་ནས་རྒྱལ་པོ་དགེ་བ་བཀོད་པ་དང་། རྒྱལ་པོའི་ཆུང་མ་དྲི་མ་མེད་པས་བྱིན་པ་དེས། བརྒྱ་སྟོང་རི་བའི་མུ་ཏིག་གི་རྒྱན་
ཕྲེང་བཅོམ་ལྡན་འདས་ཀྱི་སྟེང་གི་བར་སྣང་ལ་གཏོར་ཏོ། །མུ་ཏིག་གི་རྒྱན་ཕྲེང་དེ་གཏོར་མ་ཐག་ཏུ་བཅོམ་ལྡན་འདས་ཀྱི་སྟེང་ན། མུ་ཏིག་གི་རྒྱན་ཕྲེང་གི་ཁང་པ་བརྩེགས་པ་གྲུ་བཞི་ལྷམ་པ་ཀ་བ་བཞི་ཟུག་པ་ངོས་
མཉམ་པ་ཤིན་དུ་རྣམ་པར་ཕྱེ་བ་བལྟ་ན་སྡུག་པ་གནས་པར་གྱུར་ཏེ། ཁང་པ་བརྩེགས་པ་དེར་རས་བཅོས་བུ་བརྒྱ་སྟོང་དུ་མ་བཏིང་བའི་ཁྲི་བྱུང་ངོ་། །ཁྲི་དེ་དག་ལ་དེ་བཞིན་གཤེགས་པའི་སྐུ་དཀྱིལ་མོ་དཀྲུང་བཅས་ཏེ་བཞུགས་
པར་སྣང་ངོ་། །དེ་ནས་རྒྱལ་པོ་དགེ་བ་བཀོད་པ་འདི་སྙམ་དུ་སེམས་ཏེ། སངས་རྒྱས་ཀྱི་ཡེ་ཤེས་འདི་ནི་མཐུ་ཆེ་ཞིང་། དེ་བཞིན་གཤེགས་པ་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་པས་འདི་ལྟར་དེ་བཞིན་གཤེགས་པའི་སྐུ་ཁང་

46-1-191a

པ་བརྩེགས་པའི་དབུས་ན་མཛེས་ཤིང་བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པར་གདའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་དུ་
རྒྱས་པས་འཁོར་བཞི་པོ་དེ་དག་ལ་བཀའ་སྩལ་པ། དགེ་སློང་དག་རྒྱལ་པོ་དགེ་བ་བཀོད་པ་ནམ་མཁའི་དཀྱིལ་ནས་འདུག་ཅིང་སེང་གེའི་སྒྲ་སྒྲོགས་པ་མཐོང་ངམ། གསོལ་པ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། 
དགེ་སློང་དག་རྒྱལ་པོ་དགེ་བ་བཀོད་པས་ངའི་བསྟན་པ་ལ་དགེ་སློང་གི་ཚུལ་དུ་བྱས་ནས། བསྐལ་པ་མངོན་འཕགས་རྒྱལ་པོ་ཞེས་བྱ་བ་ལ་འཇིག་རྟེན་གྱི་ཁམས་ཡངས་ལྡན་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ས་ལའི་དབང་པོ་རྒྱལ་པོ་ཞེས་
བྱ་བ་འཇིག་རྟེན་དུ་འབྱུང་སྟེ། དགེ་སློང་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ས་ལའི་དབང་པོའི་རྒྱལ་པོ་དེའི་བྱང་ཆུབ་སེམས་དཔའི་དགེ་འདུན་དཔག་ཏུ་མེད་པ་དང་། ཉན་ཐོས་ཀྱི་དགེ་འདུན་
དཔག་ཏུ་མེད་པར་འགྱུར་རོ། །འཇིག་རྟེན་གྱི་ཁམས་ཡངས་ལྡན་ཡང་། ལག་མཐིལ་ལྟར་མཉམ་པར་འགྱུར་རོ། །དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ཡོན་ཏན་བསམ་གྱིས་
མི་ཁྱབ་པར་འགྱུར་རོ། །རིགས་ཀྱི་བུ་དག་དེའི་ཚེ་དེའི་དུས་ན་རྒྱལ་པོ་དགེ་བ་བཀོད་པ་ཞེས་བྱ་བར་གྱུར་པ་དེ། གཞན་ཞིག་ཡིན་སྙམ་དུ་ཁྱོད་སོམ་ཉི་འམ་ཡིད་གཉིས་སམ་ཐེ་ཚོམ་ཟ་བར་གྱུར་ན། རིགས་ཀྱི་བུ་དག་ཁྱེད་ཀྱིས་དེ་ལྟར་
མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་འདི་ཉིད་དེའི་ཚེ་དེའི་དུས་ན་རྒྱལ་པོ་དགེ་བ་བཀོད་པ་ཞེས་བྱ་བར་གྱུར་ཏོ། །རིགས་ཀྱི་བུ་དག་དེའི་ཚེ་དེའི་དུས་ན། རྒྱལ་པོའི་ཆུང་མ་

46-1-191b

དྲི་མ་མེད་པས་བྱིན་པ་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་སོམ་ཉི་འམ་ཡིད་གཉིས་སམ་ཐེ་ཙོམ་ཟ་བར་གྱུར་ན། རིགས་ཀྱི་བུ་དག་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་
དཔའ་ཆེན་པོ་རྣམ་པར་སྣང་བའི་འོད་ཟེར་གྱིས་བརྒྱན་པའི་རྒྱལ་མཚན་ཞེས་བྱ་བ་འདི་ཉིད་དེའི་ཚེ་དེའི་དུས་ན། རྒྱལ་པོའི་ཆུང་མ་དྲི་མ་མེད་པས་བྱིན་པ་ཞེས་བྱ་བར་གྱུར་ཏེ། རྒྱལ་པོ་དགེ་བ་བཀོད་པ་དང་སེམས་ཅན་དེ་དག་ལ་སྙིང་བརྩེ་བའི་
ཕྱིར། རྒྱལ་པོ་དགེ་བ་བཀོད་པའི་ཆུང་མར་ཁས་བླངས་པར་གྱུར་ཏོ། །རིགས་ཀྱི་བུ་དག་དེའི་ཚེ་དེའི་དུས་ན། ཁྱེའུ་དེ་གཉིས་སུ་གྱུར་པ་དེ། གཞན་དག་ཞིག་ཡིན་པ་སྙམ་དུ་ཁྱེད་སོམ་ཉི་འམ་ཡིད་གཉིས་སམ་ཐེ་ཚོམ་ཟ་
བར་གྱུར་ན། རིགས་ཀྱི་བུ་དག་ཁྱེད་ཀྱིས་དེ་ལྟར་མི་ལྟའོ། །དེ་ཅིའི་ཕྱིར་ཞེ་ན། སྨན་གྱི་རྒྱལ་པོ་དང་སྨན་ཡང་དག་འཕགས་འདི་གཉིས་དེའི་ཚེ་དེའི་དུས་ན། རྒྱལ་པོ་དགེ་བ་བཀོད་པའི་བུར་གྱུར་ཏོ། །རིགས་ཀྱི་བུ་དེས་
དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་དང་། སྨན་ཡང་དག་འཕགས་ཡོན་ཏན་བསམ་གྱིས་མི་ཁྱབ་པ་དང་ལྡན་ཏེ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་དགེ་བའི་རྩ་བ་བསྐྱེད་པའོ། །
སྐྱེས་བུ་དམ་པ་འདི་གཉི་ག་ཡང་བསམ་གྱིས་མི་ཁྱབ་པའི་ཆོས་ཀྱིས་ཡང་དག་པར་འཕགས་སོ། །གང་དག་སྐྱེས་བུ་དམ་པ་འདི་གཉིས་ཀྱི་མིང་འཛིན་པ་དེ་དག་ཐམས་ཅད་ཀྱིས་ཀྱང་ལྷ་དང་བཅས་པའི་འཇིག་རྟེན་གྱིས་ཕྱག་
བྱས་པར་འགྱུར་རོ། །སྔོན་གྱི་སྦྱོར་བའི་ལེའུ་འདི་བཤད་པ་ན། སྲོག་ཆགས་བརྒྱད་ཁྲི་བཞི་སྟོང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །འཕགས་པ་དམ་པའི་ཆོས་པད་མ་དཀར་པོ་
ལས། རྒྱལ་པོ་དགེ་བ་བཀོད་པའི་སྔོན་གྱི་སྦྱོར་བའི་ལེའུ་ཞེས་བྱ་སྟེ་ཉི་ཤུ་རྩ་ལྔ་པའོ།། །། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ། བྱང་ཆུབ་སེམས་དཔའ་སེམས་དཔའ་ཆེན་པོ་

46-1-192a

བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར། ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པ་དག་གིས་ཀྱང་
ཡོངས་སུ་བསྐོར་ཅིང་མདུན་དུ་བདར་ཏེ། ལྷན་ཅིག་ཏུ་ཤར་ཕྱོགས་ནས་ཞིང་དག་ནི་རབ་ཏུ་གཡོ་བར་བྱེད། པད་མའི་ཆར་ནི་རབ་ཏུ་འབེབས། སིལ་སྙན་བྱེ་བ་ཁྲག་ཁྲིག་བརྒྱ་སྟོང་ནི་རབ་ཏུ་ལེན་ཅིང་། བྱང་ཆུབ་སེམས་
དཔའི་མཐུ་ཆེན་པོ་དང་། བྱང་ཆུབ་སེམས་དཔའི་རྣམ་པར་འཕྲུལ་པ་ཆེན་པོ་དང་། བྱང་ཆུབ་སེམས་དཔའི་རྫུ་འཕྲུལ་ཆེན་པོ་དང་། བྱང་ཆུབ་སེམས་དཔའི་ཆེ་བ་ཉིད་དང་། བྱང་ཆུབ་སེམས་དཔའི་གཟི་བརྗིད་ཆེན་པོ་འབར་བ་
དང་། བྱང་ཆུབ་སེམས་དཔའི་ཐེག་པ་ཆེན་པོ་དང་། བྱང་ཆུབ་སེམས་དཔའི་རྫུ་འཕྲུལ་ཆེན་པོ་དང་། ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པའི་
རྣམ་པར་འཕྲུལ་པ་ཆེན་པོ་དང་། དེ་ལྟར་རྫུ་འཕྲུལ་གྱི་ཆོ་འཕྲུལ་བསམ་གྱིས་མི་ཁྱབ་པ་དག་གིས། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་འཇིག་རྟེན་གྱི་ཁམས་མི་མཇེད་འདིར་ཕྱིན་ནས། དེ་རིའི་རྒྱལ་པོ་
བྱ་རྒོད་ཀྱི་ཕུང་པོ་ག་ལ་བ་དང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་བདུན་བསྐོར་བ་བྱས་ནས་བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཅོམ་ལྡན་འདས་བདག་བཅོམ་ལྡན་འདས་དེ་བཞིན་གཤེགས་པ་དཀོན་མཆོག་གཟི་བརྗིད་མངོན་འཕགས་རྒྱལ་པོའི་སངས་རྒྱས་ཀྱི་ཞིང་ནས་འདིར་མཆིས་ཏེ། བཅོམ་ལྡན་འདས་འཇིག་རྟེན་གྱི་ཁམས་མི་མཇེད་
འདི་ན་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་སྟོན་པ་དེ་མཉན་པའི་སླད་ཏུ་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའི་དྲུང་དུ་བདག་མཆིས་སོ། །བཅོམ་ལྡན་འདས་བྱང་ཆུབ་སེམས་དཔའ་བརྒྱ་སྟོང་འདི་སྙེད་འདི་དག་ཀྱང་། 

46-1-192b

དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་མཉན་པའི་སླད་ཏུ་མཆིས་སོ། །དེའི་སླད་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས། དམ་པའི་ཆོས་པད་མ་དཀར་པོའི་
ཆོས་ཀྱི་རྣམ་གྲངས་འདི་བྱང་ཆུབ་སེམས་དཔའ་སེམས་དཔའ་ཆེན་པོ་འདི་རྣམས་ལ་རྒྱ་ཆེར་ལེགས་པར་བཤད་ཏུ་གསོལ། དེ་སྐད་ཅེས་གསོལ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་
ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ནི་མགོ་སྨོས་པ་ཙམ་གྱིས་ཁོང་དུ་ཆུད་པ་ཤ་སྟག་གོ། །དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ནི་འདི་ལྟ་སྟེ། དེ་བཞིན་
ཉིད་དང་ཡང་དག་པའི་མཐའ་དང་ཆོས་ཀྱི་དབྱིངས་དང་དབྱེར་མེད་པའོ། །བྱང་ཆུབ་སེམས་དཔའ་དེ་དག་གིས་གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་སོ། །དེ་ནས་འཁོར་དེར་དགེ་སློང་དང་
དགེ་སློང་མ་དང་དགེ་བསྙེན་དང་དགེ་བསྙེན་མ་འདུས་པ་དེ་དག །དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ལ་རབ་ཏུ་དགོད་པའི་ཕྱིར། ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་
པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཆོས་བཞི་དང་ལྡན་པའི་བུད་མེད་ཀྱིས། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ལག་ཏུ་ཐོབ་པར་འགྱུར་རོ། །བཞི་གང་ཞེ་ན་འདི་ལྟ་སྟེ། སངས་རྒྱས་བཅོམ་ལྡན་འདས་
རྣམས་ཀྱིས་བྱིན་གྱིས་བརླབས་པར་འགྱུར་བ་དང་། དགེ་བའི་རྩ་བ་བསྐྱེད་པར་འགྱུར་བ་དང་། ངེས་པའི་ཕུང་པོ་ལ་གནས་པར་འགྱུར་བ་དང་སེམས་ཅན་ཐམས་ཅད་ཡོངས་སུ་བསྐྱབ་པའི་ཕྱིར། བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་བ་སྟེ། རིགས་ཀྱི་བུ་ཆོས་བཞི་པོ་དེ་དག་དང་ལྡན་པའི་བུད་མེད་ཀྱིས། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ལག་ཏུ་ཐོབ་པར་འགྱུར་རོ། །

46-1-193a

དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་སླད་མའི་ཚེ་སླད་མའི་དུས་ལྔ་བརྒྱའི་ཐ་མ་ལ། མདོ་སྡེ་འདི་ལྟ་བུ་འཛིན་
པའི་དགེ་སློང་རྣམས་ལ་བསྲུང་བར་བགྱིའོ། །བདེ་ལེགས་སུ་འགྱུར་བར་བགྱིའོ། །ཆད་པ་སྤང་བར་བགྱིའོ། །དུག་གཞིལ་བར་བགྱིའོ། །ཅི་ནས་ཆོས་སྨྲ་བ་དེ་དག་ལ་གླགས་ལྟ་བ་དང་། སྐབས་ཚོལ་བ་གང་གིས་ཀྱང་གླག་
རྙེད་པར་མི་འགྱུར་བ་དང་། བདུད་སྡིག་ཅན་དང་བདུད་ཀྱི་བུ་རྣམས་དང་བདུད་ཀྱི་རིས་ཀྱི་ལྷའི་བུ་རྣམས་དང་བདུད་ཀྱི་བུ་མོ་རྣམས་དང་བདུད་ཀྱི་འཁོར་གླགས་ལྟ་བ་དང་། སྐབས་ཚོལ་བ་རྣམས་ཀྱིས་གླགས་མི་རྙེད་པར་འགྱུར་བས་ན། 
བདུད་ཀྱི་ཀུན་ནས་ལྡན་པའི་བར་དུ་འབྱུང་བར་མི་འགྱུར་བ་དང་ལྷའི་བུ་དང་གནོད་སྦྱིན་དང་ཡི་དགས་དང་སྲུལ་པོ་དང་གཤེད་བྱེད་དང་རོ་ལངས་དག །ཆོས་སྨྲ་བ་དེ་ལ་གླགས་ལྟ་བ་དང་སྐབས་ཚོལ་བ་ན་ཡང་སྐབས་རྙེད་པར་མི་འགྱུར་བར། 
བཅོམ་ལྡན་འདས་བདག་གིས་ཆོས་སྨྲ་བ་དེ་ལ་རྟག་པར་རྒྱུན་དུ་དུས་ཐམས་ཅད་ཏུ་བསྲུང་བར་བགྱིའོ། །བཅོམ་ལྡན་འདས་གང་གི་ཚེ་ཆོས་སྨྲ་བ་དེ། ཆོས་ཀྱི་རྣམ་གྲངས་འདི་ལ་སེམས་ཤིང་། རྣལ་འབྱོར་ལ་བརྩོན་པ་དང་། 
འཆག་པ་ལ་ཞུགས་པར་གྱུར་པ་དེའི་ཚེ་ཆོས་ཀྱི་རྣམ་གྲངས་འདི་བསྲུང་བའི་སླད་ཏུ་བདག་གླང་པོ་ཆེའི་རྒྱལ་པོ་ཐལ་ཀར་མཆེ་བ་དྲུག་པ་ལ་འཚལ་ཏེ། བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ནས། ཆོས་སྨྲ་
བ་དེའི་འཆག་པའི་གནས་སུ་ཆོས་སྨྲ་བ་དེའི་དྲུང་དུ་མཆི་བར་བགྱིའོ། །གང་གི་ཚེ་ཆོས་སྨྲ་བ་དེ་ཆོས་ཀྱི་རྣམ་གྲངས་འདི་ལ་སེམས་ཤིང་རྣལ་འབྱོར་གྱི་རྗེས་སུ་ཞུགས་པ་དེས། ཆོས་ཀྱི་རྣམ་གྲངས་འདི་ལས་ཐ་ན་ཚིག་
དང་ཡི་གེ་གཅིག་ཙམ་ཡང་ལན་འགའ་ནོར་བར་གྱུར་པ་དེའི་ཚེ། བདག་གླང་པོ་ཆེའི་རྒྱལ་པོ་ཐལ་ཀར་མཆི་བ་དྲུག་པ་ལ་འཚལ་ནས། ཆོས་སྨྲ་བ་དེ་ལ་བདག་གི་ངོ་བསྟན་ཏེ། ཆོས་ཀྱི་རྣམ་གྲངས་འདི་མ་ཉམས་

46-1-193b

པར་ཟློས་སུ་སྩལ་ཏོ། །ཆོས་སྨྲ་བ་དེས་བདག་གི་ལུས་མཐོང་ཞིང་ཆོས་ཀྱི་རྣམ་གྲངས་འདི་མ་ཉམས་པར་བདག་ལ་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་ཆོས་ཀྱི་རྣམ་
གྲངས་འདི་ལ་བརྩོན་འགྲུས་རྩོམ་མོ། །བདག་མཐོང་མ་ཐག་ཏུ་ཏིང་ངེ་འཛིན་ཐོབ་པར་འགྱུར་རོ། །གཟུངས་འཁྱིལ་པ་ཞེས་བགྱི་བའི་གཟུངས་ཐོབ་པར་འགྱུར་རོ། །བྱེ་བ་བརྒྱ་སྟོང་དུ་འཁྱིལ་པ་ཞེས་བགྱི་བའི་གཟུངས་
ཐོབ་པར་འགྱུར་རོ། །སྒྲ་ཐམས་ཅད་ལ་མཁས་པ་ཞེས་བགྱི་བའི་གཟུངས་ཐོབ་པར་འགྱུར་རོ། ། བཅོམ་ལྡན་འདས་སླད་མའི་ཚེ་སླད་མའི་དུས་ལྔ་བརྒྱ་པ་ཐ་མ་ལ། དགེ་སློང་ངམ་དགེ་སློང་མ་འམ་དགེ་བསྙེན་ནམ་དགེ་བསྙེན་
མ་གང་དག་མདོ་སྡེ་འདི་ལྟ་བུ་འཛིན་པ་དང་མདོ་སྡེ་འདི་ལྟ་བུ་ཡི་གེར་འདྲི་བ་དང་མདོ་སྡེ་འདི་ལྟ་བུ་ཚོལ་བ་དང་མདོ་སྡེ་འདི་ལྟ་བུ་ཀློག་པ་དང་གང་དག་སླད་མའི་ཚེ་སླད་མའི་དུས་ལྔ་བརྒྱ་པ་ཐ་མ་ལ། ཆོས་ཀྱི་རྣམ་གྲངས་འདིའི་ཆེད་ཏུ། 
གདུགས་བདུན་གསུམ་ཉི་ཤུ་གཅིག་ཏུ་འཆག་ཅིང་བརྩོན་པར་གྱུར་ན། དེ་དག་ལ་བདག་གིས་སེམས་ཅན་ཐམས་ཅད་ཀྱིས་མཐོང་ན་དགའ་བའི་ལུས་བསྟན་པར་བགྱིའོ། །གླང་པོ་ཆེའི་རྒྱལ་པོ་ཐལ་ཀར་མཆེ་བ་དྲུག་པ་ལ་
འཚལ་ཏེ། བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ནས། གདུགས་ཉི་ཤུ་རྩ་གཅིག་པ་ལ་ཆོས་སྨྲ་བ་དེ་དག་འཆག་པའི་ཐད་ཏུ་མཆིའོ། །མཆིས་ནས་ཆོས་སྨྲ་བ་དེ་དག་ལ་ཡང་དག་པར་བསྟན་པར་བགྱིའོ། །
ཡང་དག་པར་འཛིན་དུ་སྩལ་བར་བགྱིའོ། །ཡང་དག་པར་གཟེང་བསྟོད་པར་བགྱིའོ། །ཡང་དག་པར་རབ་ཏུ་དགའ་བར་བགྱིའོ། །དེ་དག་ལ་གཟུངས་ཀྱང་སྩལ་བར་བགྱིའོ། །ཅི་ནས་ཆོས་སྨྲ་བ་དེ་དག་ལ་སུས་ཀྱང་མི་ཚུགས་པར་འགྱུར་
བ་དང་དེ་དག་ལ་མི་འམ་མི་མ་ལགས་པས་གླགས་མི་རྙེད་པར་འགྱུར་བ་དང་། བུད་མེད་ཀྱིས་འཕྲོགས་པར་མི་འགྱུར་བར་དེ་དག་ལ་བསྲུང་བར་བགྱིའོ། །བདེ་ལེགས་སུ་འགྱུར་བར་བགྱིའོ། །ཆད་པ་སྤང་བར་བགྱིའོ། །དུག་གཞིལ་བར་བགྱིའོ། །

46-1-194a

བཅོམ་ལྡན་འདས་ཆོས་སྨྲ་བ་དེ་དག་ལ་བདག་གིས་གཟུངས་སྔགས་ཀྱི་ཚིག་འདི་དག་སྩལ་བར་བགྱིའོ། །བཅོམ་ལྡན་འདས་གཟུངས་སྔགས་ཀྱི་ཚིག་འདི་དག་གསན་དུ་གསོལ། ཏདྱ་ཐཱ། སུ་དཎ་ཌཱ། དཎ་ཌཱ་བ་ཏི་དཎ་ཌཱ་བརྟ་ནི། དཎ་
ཌ་ཀུ་ཤ་ལ། དཎ་ཌ་སུ་དྷཱ་རི། སུ་དྷཱ་ར་པ་ཏི་བུད་དྷ་པ་ཤྱ་ནེ། དྷཱ་ར་ཎི། ཨཱ་བརྟ་ནི། ཨཱ་བརྟ་ནི། སང་གྷ་པ་རཱི་ཀྵི་ཏེ། སང་གྷ་ནི་ར་ག་ས་ཏེ། དྷརྨ་པ་རཱི་ཀྵི་ཏེ། སརྦ་སཏྭ་རུ་ཏ། ཀཽ་ཤལྱ། ཀཽ་ཤལྱཱ་ནུ་ག་ཏེ། སིང་ཧ་བི་ཀྲཱི་ཌི་ཏེ། ཨ་ནུ་བརྟེ། བརྟ་ནི། བརྟ་ལི་སྭཱ་ཧཱ། བཅོམ་
ལྡན་འདས་གཟུངས་སྔགས་ཀྱི་ཚིག་འདི་དག་བྱང་ཆུབ་སེམས་དཔའ་གང་གི་རྣ་བའི་དབང་པོ་ལ་གྲགས་པ་དེ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོའི་བྱིན་གྱིས་བརླབས་སུ་རིག་པར་བགྱིའོ། །བཅོམ་ལྡན་འདས་དམ་
པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ཡང་འཛམ་བུའི་གླིང་འདི་ན་སྤྱོད་པ་ན། བྱང་ཆུབ་སེམས་དཔའ་གང་དག་གི་ལག་ཏུ་ཐོབ་པར་གྱུར་པ་ན། བཅོམ་ལྡན་འདས་ཆོས་སྨྲ་བ་དེ་དག་གིས་བྱང་ཆུབ་སེམས་དཔའ་ཀུན་དུ་བཟང་པོའི་
མཐུ་དང་། བྱང་ཆུབ་སེམས་དཔའ་ཀུན་དུ་བཟང་པོའི་གཟི་བརྗིད་ཀྱིས། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་བདག་ཅག་གི་ལག་ཏུ་ཐོབ་བོ་སྙམ་དུ་དེ་ལྟར་རིག་པར་བགྱིའོ། །བཅོམ་ལྡན་འདས་གང་དག་མདོ་སྡེ་འདི་
ཡི་གེར་འདྲི་བ་དང་འཛིན་པའི་སེམས་ཅན་དེ་དག་གིས་བྱང་ཆུབ་སེམས་དཔའ་ཀུན་དུ་བཟང་པོའི་སྤྱོད་པ་ཐོབ་པར་འགྱུར་རོ། །སེམས་ཅན་དེ་དག་གིས་སངས་རྒྱས་མང་པོ་ལ་དགེ་བའི་རྩ་བ་བསྐྱེད་པར་འགྱུར་རོ། །བཅོམ་ལྡན་འདས་
སེམས་ཅན་དེ་དག་ནི། དེ་བཞིན་གཤེགས་པའི་ཕྱག་གིས་སྤྱི་བོ་ལ་བྱུགས་པར་འགྱུར་རོ། །བཅོམ་ལྡན་འདས་དེ་དག་གིས་བདག་ཀྱང་དགའ་བར་བགྱིས་པར་འགྱུར་རོ། །གང་དག་མདོ་འདི་ཡི་གེར་འདྲིར་སྩོལ་བ་དང་། 
གང་དག་འདིའི་དོན་ཁོང་དུ་ཆུད་པར་བགྱིད་པ་དང་། བཅོམ་ལྡན་འདས་མདོ་སྡེ་འདི་ཡི་གེར་བྲིས་པ་དེ་དག །འདི་ནས་ཤི་འཕོས་ནས་སུམ་བཅུ་རྩ་གསུམ་པའི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་ཏེ། སྐྱེས་མ་ཐག་ཏུ་དེའི་

46-1-194b

དྲུང་དུ་ལྷའི་བུ་མོ་བརྒྱད་ཁྲི་བཞི་སྟོང་མཆི་བར་འགྱུར། ལྷའི་བུ་མོ་དེ་དག་རྔ་བོ་ཆེ་ཙམ་གྱི་ཅོད་པན་ཅན་ལྷའི་བུ་མོ་དེ་དག་གི་ནང་ན་གནས་པར་འགྱུར་རོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་ཡི་གིར་བྲིས་པའི་བསོད་ནམས་
ཀྱི་ཕུང་པོ་ཡང་འདི་འདྲ་ལགས་ན། གང་དག་ལུང་ནོད་པ་དང་ཁ་དོན་བགྱིད་པ་དང་སེམས་པ་དང་ཡིད་ལ་བགྱིད་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས་དེ་ལྟ་ལགས་པས། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་
གྲངས་འདི་སེམས་ཀྱིས་ཀུན་བསམས་ཏེ་ཡི་གེར་བྲི་བར་བགྱིའོ། །གང་མི་གཡེང་བར་ཡིད་ལ་བགྱིད་པས་ཡི་གེར་བྲིས་ན། དེ་ལ་སངས་རྒྱས་བརྒྱ་སྟོང་ཕྱག་རྐྱོང་བར་འགྱུར་རོ། །འཆི་བའི་ཚེ་ཡང་སངས་རྒྱས་སྟོང་གི་ཞལ་མཐོང་བར་
འགྱུར་རོ། །ངན་འགྲོ་ལོག་པར་ལྟུང་བར་མཆི་བར་མི་འགྱུར་རོ། །འདི་ནས་ཤི་འཕོས་ནས་ཀྱང་དགའ་ལྡན་གྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་ཏེ། གང་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་
མཚན་བཟང་པོ་སུམ་བཅུ་རྩ་གཉིས་དང་ལྡན་པ་དེ། བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཅིང་། ལྷའི་བུ་མོ་བྱེ་བ་ཁྲག་ཁྲིག་བརྒྱ་སྟོང་གིས་མདུན་གྱིས་བལྟས་ཏེ་ཆོས་འཆད་པ་དེར་སྐྱེའོ། །དེ་ལྟ་ལགས་
པས་རིགས་ཀྱི་བུ་འམ་རིགས་ཀྱི་བུ་མོ་མཁས་པས། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་གུས་པར་ཡི་གེར་བྲི་བར་བགྱིའོ། །གུས་པར་ལུང་ནོད་པར་བགྱིའོ། །གུས་པར་ཁ་
དོན་དུ་བགྱིའོ། །གུས་པར་ཡིད་ལ་བགྱིའོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་ཡི་གེར་བྲིས་པ་དང་ལུང་མནོས་པ་དང་ཁ་དོན་བགྱིས་པ་དང་བསྒོམས་པ་དང་ཡིད་ལ་བགྱིས་པ་ནི། དེ་ལྟར་ཡོན་
ཏན་དཔག་ཏུ་མ་མཆིས་པར་འགྱུར་རོ། །བཅོམ་ལྡན་འདས་དེ་ལྟ་ལགས་པས། རིགས་ཀྱི་བུ་འམ་རིགས་ཀྱི་བུ་མོ་མཁས་པས། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་བཟུང་

46-1-195a

བར་བགྱིས་ཏེ། དེ་དག་གི་ཡོན་ཏན་གྱི་ཕན་ཡོན་འདི་སྙེད་ཏུ་འགྱུར་རོ། །བཅོམ་ལྡན་འདས་དེ་ལྟ་ལགས་པས། ཅི་ནས་བདག་གི་བྱིན་གྱི་བརླབས་ཀྱིས་ཆོས་ཀྱི་རྣམ་གྲངས་འདི་འཛམ་བུའི་གླིང་འདི་ན་སྤྱོད་པར་འགྱུར་བར་
བདག་གིས་ཆོས་ཀྱི་རྣམ་གྲངས་འདི་བྱིན་གྱིས་བརླབ་པར་བགྱིའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས། བྱང་ཆུབ་སེམས་དཔའ་སེམས་
དཔའ་ཆེན་པོ་ཀུན་དུ་བཟང་པོ་ལ་ཀུན་དུ་བཟང་པོ་ཁྱོད་སྐྱེ་བོ་མང་པོ་ལ་ཕན་པའི་ཕྱིར་ཞུགས་པ་དང་། འདི་ལྟར་བསམ་གྱིས་མི་ཁྱབ་པའི་ཆོས་དང་ལྡན་ཞིང་སྙིང་རྗེ་ཆེན་པོས་ཟིན་པའི་ལྷག་པའི་བསམ་པ་དང་། བསམ་གྱིས་
མི་ཁྱབ་པས་ཟིན་པའི་སེམས་བསྐྱེད་པས། ཁྱོད་ཀྱིས་ཆོས་སྨྲ་བ་དེ་དག་ལ་བྱིན་གྱིས་རློབ་པ་བྱེད་པ་ལེགས་སོ་ལེགས་སོ་ཞེས་བྱ་བ་བྱིན་ནོ། །རིགས་ཀྱི་བུ་གང་ལ་ལ་དག་བྱང་ཆུབ་སེམས་དཔའ་སེམས་དཔའ་
ཆེན་པོ་ཀུན་དུ་བཟང་པོའི་མིང་འཛིན་པ་དེ་དག་གིས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་མཐོང་བ་དང་། དམ་པའི་ཆོས་པད་མ་དཀར་པོའི་ཆོས་
ཀྱི་རྣམ་གྲངས་འདི་ཡང་བཅོམ་ལྡན་འདས་ཤཱཀྱ་ཐུབ་པའི་གན་ནས་ཐོས་པ་དང་། དེ་དག་གིས་དེ་བཞིན་གཤེགས་པ་ཤཱཀྱ་ཐུབ་པ་མཆོད་པ་དང་། དེ་བཞིན་གཤེགས་པ་ཤཱཀྱ་ཐུབ་པས་ཆོས་བསྟན་པ་ལ་ལེགས་
སོ་ཞེས་བྱ་བ་བྱིན་པ་དང་། ཆོས་ཀྱི་རྣམ་གྲངས་འདི་ལ་རྗེས་སུ་ཡི་རང་བ་དང་། དེ་བཞིན་གཤེགས་པ་ཤཱཀྱ་ཐུབ་པས་དེ་དག་གི་སྤྱི་བོར་ཕྱག་བཞག་པ་དང་། དེ་དག་གིས་བཅོམ་ལྡན་འདས་ཤཱཀྱ་ཐུབ་པ་ཆོས་གོས་ཀྱིས་
གཡོགས་པར་རིག་པར་བྱའོ། །ཀུན་དུ་བཟང་པོ་རིགས་ཀྱི་བུ་འམ་རིགས་ཀྱི་བུ་མོ་དེ་དག །དེ་བཞིན་གཤེགས་པའི་བསྟན་པ་འཛིན་པར་རིག་པར་བྱའོ། །དེ་དག་འཇིག་རྟེན་རྒྱང་ཕན་པ་ལ་དགའ་བར་མི་འགྱུར་རོ། །དེ་དག་སྙན་དངགས་ལ་

46-1-195b

ཞུགས་པའི་སེམས་ཅན་རྣམས་ལ་དགའ་བར་མི་འགྱུར་རོ། །དེ་དག་གར་བྱེད་པ་དང་རོལ་མོ་བྱེད་པ་དང་གྱད་དང་ཤ་འཚོང་བ་དང་ཤན་པ་དང་བྱ་གག་འཚོང་བ་དང་ཕག་འཚོང་བ་དང་བུད་མེད་དག་གསོ་བའི་སེམས་ཅན་རྣམས་ལ་
དགའ་བར་མི་འགྱུར་རོ། །མདོ་སྡེ་འདི་ལྟ་བུ་ཐོས་པ་དང་ཡི་གེར་བྲིས་པ་དང་འཛིན་པ་དང་ཀླགས་པ་དེ་དག་གཞན་ལ་སྲེད་པར་མི་འགྱུར་རོ། སེམས་ཅན་དེ་དག་ཆོས་ཀྱི་ངོ་བོ་ཉིད་དང་ལྡན་པར་འགྱུར་རོ། །དེ་དག་སོ་སོའི་བདག་
ཉིད་ཚུལ་བཞིན་ཡིད་ལ་བྱེད་པར་འགྱུར་རོ། །རང་གི་བསོད་ནམས་ཀྱི་སྟོབས་བསྐྱེད་པར་འགྱུར་རོ། །དེ་དག་སེམས་ཅན་རྣམས་ཀྱིས་མཐོང་ན་དགའ་བར་འགྱུར་རོ། །དགེ་སློང་གང་དག་མདོ་སྡེ་འདི་ལྟ་བུ་འཛིན་པ་དེ་དག་འདོད་
ཆགས་ཀྱིས་གཟིར་བར་མི་འགྱུར་རོ། །ཞེ་སྡང་མེད་པ་དང་གཏི་མུག་མེད་པ་དང་སེར་སྣ་མེད་པ་དང་འཆབ་པ་མེད་པ་དང་ང་རྒྱལ་མེད་པ་དང་ཆེ་བའི་ང་རྒྱལ་མེད་པ་དང་ལོག་པའི་ང་རྒྱལ་མེད་པར་འགྱུར་རོ། །ཀུན་དུ་བཟང་པོ་
ཆོས་སྨྲ་བ་དེ་དག་བདག་གི་རྙེད་པས་ཆོག་ཤེས་པར་འགྱུར་རོ། །ཀུན་དུ་བཟང་པོ་གང་གིས་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མ་ལ། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་འཛིན་པའི་དགེ་སློང་
མཐོང་ན། འདི་སྙམ་དུ་རིགས་ཀྱི་བུ་འདི་ནི་བྱང་ཆུབ་ཀྱི་སྙིང་པོར་འགྲོ་བར་འགྱུར་རོ། །རིགས་ཀྱི་བུ་འདི་ནི་བདུད་ཀྱི་ཐབ་མོའི་ཚོགས་ལས་རྒྱལ་བར་འགྱུར་རོ། །རིགས་ཀྱི་བུ་འདི་ནི་ཆོས་ཀྱི་འཁོར་ལོ་སྐོར་བར་འགྱུར་རོ། །
འདི་ནི་ཆོས་ཀྱི་རྔ་རྡུང་བར་འགྱུར་རོ། །འདི་ནི་ཆོས་ཀྱི་དུང་འབུད་པར་འགྱུར་རོ། །འདི་ནི་ཆོས་ཀྱི་ཆར་རབ་ཏུ་འབེབས་པར་འགྱུར་རོ། །འདི་ནི་ཆོས་ཀྱི་སེང་གེའི་ཁྲི་ལ་འདུག་པར་འགྱུར་རོ། །སྙམ་དུ་སེམས་བསྐྱེད་པར་
བྱའོ་གང་དག་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མ་ལ། ཆོས་ཀྱི་རྣམ་གྲངས་འདི་འཛིན་པའི་དགེ་སློང་དེ་དག་བརྐམ་པར་མི་འགྱུར་རོ། །ཆོས་གོས་ལ་ཆགས་པ་དང་། ལྷུང་བཟེད་ལ་ཆགས་པར་མི་འགྱུར་རོ། །ཆོས་སྨྲ་བ་

46-1-196a

དེ་དག་དྲང་པོར་འགྱུར་རོ། །ཆོས་སྨྲ་བ་དེ་དག་རྣམ་པར་ཐར་པ་གསུམ་ཐོབ་པར་འགྱུར་རོ། །དེ་དག་གི་ཚེ་འདི་པ་བཟློག་པར་འགྱུར་རོ། །གང་དག་མདོ་སྡེ་འདི་ལྟ་བུ་འཛིན་པ་ཆོས་སྨྲ་བའི་དགེ་སློང་རྣམས་རྨོངས་པར་
བྱེད་པའི་སེམས་ཅན་དེ་དག་དམུས་ལོང་དུ་འགྱུར་རོ། །གང་དག་གིས་མདོ་སྡེ་འདི་ལྟ་བུ་འཛིན་པའི་དགེ་སློང་རྣམས་ལ་མི་སྙན་པ་བསྒྲགས་ན། དེ་དག་ཚེ་འདི་ཉིད་ལ་ལུས་ལ་ཤ་བཀྲ་འབྱུང་བར་འགྱུར་རོ། །གང་དག་
མདོ་སྡེ་འདི་ལྟ་བུ་ཡི་གེར་འདྲི་བ་རྣམས་ལ་འཕྱ་བ་དང་བསྟིང་བ་དེ་དག་སོ་ཆག་པར་འགྱུར་རོ། །སོ་ཐགས་ངན་པར་འགྱུར་རོ། །མཆུ་མི་སྡུག་པར་འགྱུར་རོ། །སྣ་ལེབ་པར་འགྱུར་རོ། །ལག་པ་དང་རྐང་པ་ལོག་པར་
འགྱུར་རོ་མིག་ལོག་པར་འགྱུར་རོ། །ལུས་དྲི་མི་ཞིམ་པར་འགྱུར་རོ། །ལུས་ལ་འབྲས་དང་འབྲུམ་བུ་ཕྲ་མོ་དང་རྐང་ཤུ་དང་ཤུ་བ་དང་གཡན་པས་གང་བར་འགྱུར་རོ། །གང་དག་མདོ་སྡེ་འདི་ལྟ་བུ་འཛིན་པ་དང་། མདོ་སྡེ་འདི་
ལྟ་བུ་ཡི་གེར་འདྲི་བ་དང་། མདོ་སྡེ་འདི་ལྟ་བུ་ཀློག་པ་དང་མདོ་སྡེ་འདི་ལྟ་བུ་འཆད་པ་རྣམས་ལ་མི་སྙན་པའི་ཚིག་བདེན་པ་འམ། མི་བདེན་པ་བསྒྲགས་ན་སྡིག་པའི་ལས་ཤིན་དུ་ལྕི་བར་རིག་པར་བྱའོ། །ཀུན་དུ་བཟང་པོ་དེ་
བས་ན་ཆོས་ཀྱི་རྣམ་གྲངས་འདི་འཛིན་པའི་དགེ་སློང་ལ་རྒྱང་མ་ནས་ཀྱང་ལྡང་བར་བྱའོ། །ཇི་ལྟར་དེ་བཞིན་གཤེགས་པ་ལ་གུས་པར་བྱ་བ་དེ་བཞིན་དུ་མདོ་སྡེ་འདི་ལྟ་བུ་འཛིན་པའི་དགེ་སློང་ལ་ཡང་གུས་པར་བྱའོ་ཀུན་དུ་བཟང་
པོ་སྤྲོ་བར་བྱ་བའི་ལེའུ་འདི་བཤད་པ་ན། བྱང་ཆུབ་སེམས་དཔའ་སེམས་དཔའ་ཆེན་པོ་གང་གཱའི་ཀླུང་གི་བྱེ་མ་སྙེད་ཀྱིས་བྱེ་བ་བརྒྱ་སྟོང་དུ་འཁྱིལ་པ་ཞེས་བྱ་བའི་གཟུངས་ཐོབ་པར་འགྱུར་རོ། །དམ་པའི་ཆོས་པད་མ་དཀར་པོ་ལས་
ཀུན་དུ་བཟང་པོས་སྤྲོ་བར་བྱ་བའི་ལེའུ་ཞེས་བྱ་བ་སྟེ་ཉི་ཤུ་རྩ་དྲུག་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཆོས་ཀྱི་གདན་དེ་ལས་བཞེངས་ཏེ་ཐམས་

46-1-196b

ཅད་དང་ལྡན་པའི་བྱང་ཆུབ་སེམས་དཔའ་དེ་དག་བསྡུས་ནས་རྫུ་འཕྲུལ་མངོན་པར་འདུ་མཛད་པ་ཡོངས་སུ་གྲུབ་པའི་ཕྱག་གཡས་པས། དེ་དག་གི་ལག་པ་གཡས་པ་ནས་བཟུང་ནས་དེའི་ཚེ་འདི་སྐད་ཅེས་བཀའ་སྩལ་ཏོ། །
རིགས་ཀྱི་བུ་དག་ངས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་དག་པར་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཁྱེད་ཀྱི་ལག་ཏུ་གཏད་དོ། །ཡོངས་སུ་གཏད་དོ་རྗེས་སུ་གཏད་དོ། །
བཞག་གོ། །གཏམས་སོ། །རིགས་ཀྱི་བུ་དག་ཁྱེད་ཀྱིས་ཅི་ནས་ཀྱང་རྒྱ་ཆེར་རྒྱས་པར་འགྱུར་བ་དེ་ལྟར་གྱིས་ཤིག །ལན་གཉིས་ལན་གསུམ་དུ་ཡང་བཅོམ་ལྡན་འདས་ཀྱི་ཕྱག་གཡས་པས་ཐམས་ཅད་དང་ལྡན་པའི་བྱང་ཆུབ་
སེམས་དཔའི་ཚོགས་ཀྱི་ལག་པ་གཡས་པ་ནས་བཟུང་སྟེ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ངས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་དག་པར་བསྒྲུབས་པ་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་འདི་ཁྱེད་ཀྱི་ལག་ཏུ་གཏད་དོ། །ཡོངས་སུ་གཏད་དོ། །རྗེས་སུ་གཏད་དོ། །བཞག་གོ། །གཏམས་སོ། །རིགས་ཀྱི་བུ་དག་ཁྱེད་ཀྱིས་བླངས་ལ་བཟུང་ངོ་། །ཀླག་གོ། །ཀུན་ཆུབ་པར་བྱའོ། །
བསྟན་པར་བྱའོ། །བཤད་པར་བྱའོ། །སེམས་ཅན་ཐམས་ཅད་ལ་བསྒྲགས་པར་བྱའོ། །རིགས་ཀྱི་བུ་དག་ང་ལ་སེར་སྣ་མེད་དོ། །འཛིན་པའི་སེམས་མེད་དོ། །འཇིགས་པ་མེད་
པར་སངས་རྒྱས་ཀྱི་ཡེ་ཤེས་སྦྱིན་པའོ་དེ་བཞིན་གཤེགས་པའི་ཡེ་ཤེས་དང་རང་བྱུང་གི་ཡེ་ཤེས་སྦྱིན་པའོ། །རིགས་ཀྱི་བུ་དག་ང་ནི་སྦྱིན་པའི་བདག་པོ་ཆེན་པོ་སྟེ། རིགས་ཀྱི་བུ་དག་ཁྱེད་ཀྱང་ངའི་རྗེས་སུ་སློབས་ཤིག་སེར་སྣ་མེད་པར་
གྱིས་ལ་དེ་བཞིན་གཤེགས་པའི་ཡེ་ཤེས་མཐོང་བ་ཐབས་མཁས་པ་ཆེན་པོའི་ཆོས་ཀྱི་རྣམ་གྲངས་འདི་འོངས་ཤིང་ལྷགས་པའི་རིགས་ཀྱི་བུ་དང་རིགས་ཀྱི་བུ་མོ་དག་ལ་ཡང་དག་པར་སྒྲོགས་ཤིག་རིག་ཀྱི་བུ་འམ་རིགས་ཀྱི་བུ་མོ་གང་དག་

46-1-197a

དད་པ་དང་། སེམས་ཅན་གང་དག་དད་པ་དེ་དག་ཆོས་ཀྱི་རྣམ་གྲངས་འདི་ལ་ཡང་དག་པར་གཟུད་པར་བྱའོ་རིགས་ཀྱི་བུ་དག་ཁྱེད་ཀྱིས་དེ་ལྟར་བྱས་ན་དེ་བཞིན་གཤེགས་པ་ལ་ལན་ལོན་པར་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་ཤཱཀྱ་ཐུབ་པས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དགའ་བ་དང་། མཆོག་ཏུ་དགའ་བས་ཁྱབ་པར་བྱས་པར་གྱུར་ནས། རྗེས་ཆེར་བསྐྱེད་དེ་བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བ་དེ་ལོགས་སུ་ལུས་བཏུད་ལུས་རབ་ཏུ་བཏུད་ནས་ལུས་བཅུམས་ཏེ་མགོ་སྨད་ནས་ཐལ་མོ་སྦྱར་ཏེ། ཐམས་ཅད་ཀྱིས་སྒྲ་སྐད་གཅིག་ཏུ་
བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་ཇི་སྐད་བཀའ་སྩལ་པ་དེ་བཞིན་འཚལ་ལོ། །དེ་བཞིན་གཤེགས་པ་ཐམས་ཅད་ཀྱི་བཀའ་ཡོངས་སུ་རྫོགས་
པར་བགྱིའོ། །བཅོམ་ལྡན་འདས་ཐུགས་ལས་ཆུང་ངུར་ཅི་བདེར་བཞུགས་སུ་གསོལ། ལན་གཉིས་ལན་གསུམ་དུ་ཡང་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེས་སྒྲ་སྐད་གཅིག་ཏུ་ཚིག་འདི་སྐད་ཅེས་
བཅོམ་ལྡན་འདས་ཐུགས་ལས་ཆུང་ངུར་ཅི་བདེར་བཞུགས་སུ་གསོལ། བཅོམ་ལྡན་འདས་ཇི་སྐད་དུ་དེ་བཞིན་གཤེགས་པས་བཀའ་སྩལ་པ་དེ་བཞིན་དུ་བགྱིའོ། །དེ་བཞིན་གཤེགས་པ་ཐམས་ཅད་ཀྱི་བཀའ་ཡོངས་སུ་རྫོགས་
པར་བགྱིའོ་ཞེས་གསོལ་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས། འཇིག་རྟེན་གྱི་ཁམས་གཞན་དག་ནས་བྱོན་པའི་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ཐམས་ཅད་སླར་གཤེགས་སུ་གསོལ་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཅི་བདེར་གནས་པར་མཛོད་ཅིག་ཅེས་དེ་བཞིན་

46-1-197b

གཤེགས་པ་དེ་དག་ལ་ཅི་བདེར་གནས་པར་མཛོད་ཅིག་ཅེས་བྱ་བར་གསུངས་སོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེའི་མཆོད་རྟེན་ཡང་གནས་ཇི་ལྟ་བ་
བཞིན་དུ་གཞག་གོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་ཅི་བདེར་བཞུགས་ཤིག་ཅེས་གསུངས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་གྲངས་མེད་དཔག་ཏུ་མེད་པ་འཇིག་རྟེན་གྱི་ཁམས་གཞན་དག་ནས་བྱོན་ཏེ། རིན་པོ་ཆེའི་ཤིང་ལྗོན་པ་དག་གི་དྲུང་ན་སེང་གེའི་ཁྲི་ལ་བཞུགས་པ་དེ་དག་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རིན་ཆེན་མང་དང་། ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེ་དག་དང་། སྤྱོད་པ་ཁྱད་པར་ཅན་ལ་སོགས་པ་ས་རུམ་ནས་འཐོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་
དེ་དག་དང་ཉན་ཐོས་ཆེན་པོ་དེ་དག་དང་འཁོར་བཞི་པོ་དེ་དག་དང་ལྷ་དང་མི་དང་ལྷ་མ་ཡིན་དང་དྲི་ཟར་བཅས་པའི་འཇིག་རྟེན་ཐུགས་ཡིད་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོདོ། །འཕགས་པ་དམ་པའི་ཆོས་པད་
མ་དཀར་པོ་ལས་ཡོངས་སུ་གཏད་པའི་ལེའུ་ཞེས་བྱ་སྟེ་ཉི་ཤུ་བདུན་པའོ།། །།གང་ན་མདོ་སྡེ་འདི་ཡོད་པར་མེ་མར་མུར་གྱི་དོང་འབོགས་ཤིང་། །སྤུ་གྲི་གཏམས་ལས་འཛེགས་ནས་ཀྱང་། །རིགས་ཀྱི་བུ་དག་འགྲོ་བར་བྱ། །འཕགས་པ་དམ་པའི་ཆོས་
པད་མ་དཀར་པོའི་ཆོས་ཀྱི་རྣམ་གྲངས་ཡོངས་སུ་རྒྱས་པ་ཆེན་པོའི་མདོ་སྡེ་བྱང་ཆུབ་སེམས་དཔའ་རྣམས་ལ་གདམས་པ། སངས་རྒྱས་ཐམས་ཅད་ཀྱིས་ཡོངས་སུ་བཟུང་བ་སངས་རྒྱས་ཐམས་ཅད་ཀྱི་གསང་ཆེན། སངས་རྒྱས་ཐམས་
ཅད་ཀྱི་སྦ་བ་སངས་རྒྱས་ཐམས་ཅད་ཀྱི་རིགས། སངས་རྒྱས་ཐམས་ཅད་ཀྱི་གསང་བའི་གནས། སངས་རྒྱས་ཐམས་ཅད་ཀྱི་བྱང་ཆུབ་ཀྱི་སྙིང་པོ་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་སྐོར་བ། སངས་རྒྱས་ཐམས་ཅད་

46-1-198a

ཀྱི་སྐུ་གཅིག་ཏུ་འདུས་པ། ཐབས་མཁས་པ་ཆེན་པོ་ཐེག་པ་གཅིག་ཏུ་བསྟན་པ། དོན་དམ་པ་བསྒྲུབ་པ་བསྟན་པའི་མདོ་རྫོགས་སོ།། །། རྒྱ་གར་གྱི་མཁན་པོ་སུ་རེན་དྲ་བོདྷི་དང་། ཞུ་ཆེན་གྱི་ལོ་ཙྪ་བ་བན་དེ་སྣ་ནམ་ཡེ་ཤེས་
སྡེས་བསྒྱུར་ཞིང་ཞུས་ཏེ་གཏན་ལ་ཕབ་པ།། །། རྒྱ་གར་སྐད་དུ། ཨཱརྱ་སརྦ་དྷརྨ་གུ་ཎ་བྱཱུ་ཧ་རཱ་ཛ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཆོས་ཐམས་ཅད་ཀྱི་ཡོན་ཏན་བཀོད་པའི་རྒྱལ་པོ་ཞེས་བྱ་བ་ཐེག་པ་
ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལན་ད་ཀ་གནས་པ་ན། དགེ་སློང་ལྔ་བརྒྱ་ཐམ་
པའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སྟོང་ཉིས་བརྒྱ་ཐམས་ཅད་ཀྱང་གཟུངས་ཐོབ་པ། ཆགས་པ་མེད་པའི་ཡེ་ཤེས་མཐོང་བ། སྤྱོད་ཡུལ་ཆགས་པ་མེད་པ། ཐབས་མཁས་པ། ཁམས་གསུམ་ཐམས་ཅད་ལ་སེམས་
སྙོམས་པ། ཕན་པ་དང་སྙིང་རྗེའི་ལྷག་པའི་བསམ་པ་ལ་ཞུགས་པ། དེ་བཞིན་གཤེགས་པའི་ཆོས་ཀྱི་འབྲེལ་བའི་གཏམ་འདྲི་བ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་རྟག་ཏུ་བརྩོན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཉམ་པ་ཉིད་ལ་གནས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མི་གཡོ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་
བཟང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་མཐའ་ཡས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་གནོན་བློ་གྲོས་དང་། 
བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང་། དེ་དག་ལ་སོགས་པ་བྱང་ཆུབ་སེམས་དཔའ་སྟོང་ཉིས་བརྒྱ་དང་། བརྒྱ་བྱིན་དང་། ཚངས་པ་དང་འཇིག་རྟེན་སྐྱོང་བ་རྣམས་དང་། ཀླུའི་རྒྱལ་པོ་རྣམས་དང་། སྲིན་པོའི་བདག་པོ་ཐམས་

46-1-198b

ཅད་དང་། གནོད་སྦྱིན་མོ་སུམ་བརྒྱ་དང་། གཞན་མུ་སྟེགས་ཅན་སྤྱོད་པ་པ་དང་། ཀུན་ཏུ་རྒྱུ་དང་། གཅེར་བུ་པ་དྲུག་སྟོང་དང་། ནམ་མཁའ་ལྡིང་གི་རྒྱལ་པོ་བདུན་དང་ཐབས་གཅིག་ཏུ་བཞུགས་ཏེ། དེ་དག་ཐམས་ཅད་ཀྱིས་དེ་བཞིན་གཤེགས་པ་ལ་
བསྐོར་བ་བྱས་ནས། དེ་བཞིན་གཤེགས་པ་ལ་མཆོད་པའི་ལས་བྱ་བའི་ཕྱིར་ལྷའི་མེ་ཏོག་གི་ཆར་མངོན་པར་ཕབ་བོ། །ཙན་དན་གྱི་ཕྱེ་མའི་ཆར་ཡང་མངོན་པར་ཕབ་བོ། །ལྷའི་སིལ་སྙན་དང་ཕེག་རྡོབ་པ་དག་ཀྱང་དེ་བཞིན་གཤེགས་པ་
ལ་མཆོད་པའི་ལས་བྱ་བའི་ཕྱིར་བསྒྲགས་སོ། །གང་དག་དེ་བཞིན་གཤེགས་པའི་བསྟན་པ་ལ་མངོན་པར་དད་པ་དེ་དག་ཐམས་ཅད་ཀྱིས་ཀྱང་ཚིག་འདི་སྐད་ཅེས་གསོལ་ཏོ། །བཅོམ་ལྡན་འདས་ལེགས་སོ་ལེགས་སོ། །བཅོམ་ལྡན་
འདས་དེ་བཞིན་གཤེགས་པའི་བསྟན་པ་ཉོན་མོངས་པ་ཐམས་ཅད་ཟད་པར་བགྱིད་པ་འདི་ནི་རྫུ་འཕྲུལ་ཆེ་སྟེ་ལེགས་སོ་ལེགས་སོ། །དེ་ནས་བཅོམ་ལྡན་འདས་དེའི་ཚེ་ཉོན་མོངས་པ་ཐམས་ཅད་རྣམ་པར་འཇོམ་པས་རྡུལ་མེད་པའི་
རྒྱལ་མཚན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཏིང་ངེ་འཛིན་དེའི་མཐུས་ས་ཆེན་པོ་འདི་མཐོ་བ་དང་དམའ་བར་བྱས་ཏེ། འགུལ། རབ་ཏུ་འགུལ། ཀུན་ཏུ་རབ་ཏུ་འགུལ། གཡོས། རབ་ཏུ་གཡོས། ཀུན་ཏུ་རབ་ཏུ་
གཡོས། ལྡེག་རབ་ཏུ་ལྡེག །ཀུན་ཏུ་རབ་ཏུ་ལྡེག །འཁྲུགས། རབ་ཏུ་འཁྲུགས། ཀུན་ཏུ་རབ་ཏུ་འཁྲུགས། འུར་འུར། རབ་ཏུ་འུར་འུར། ཀུན་ཏུ་རབ་ཏུ་འུར་འུར། ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ། མོ། །ལྷའི་
ཙན་དན་གྱི་ཕྱེ་མའི་ཆར་ཡང་བབ་བོ། །ལྷའི་མེ་ཏོག་གི་ཆར་ཡང་བབ་བོ། །ལྷའི་འོད་ཀྱི་སྣང་བ་ཡང་བྱུང་ངོ་། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་སེམས་ཅན་གང་སུ་དག་ངན་སོང་དུ་སྐྱེས་པ་དེ་དག་ཐམས་ཅད་ཀྱང་
ངན་སོང་རྣམས་ལས་ཡོངས་སུ་གྲོལ་བར་གྱུར་ཏོ། །ལྷའི་དབང་པོ་དང་། ཀླུའི་དབང་པོ་དང་། གནོད་སྦྱིན་གྱི་དབང་པོ་དང་། སྲིན་པོའི་དབང་པོ་དང་། མིའི་དབང་པོ་དེ་དག་ཐམས་ཅད་ཀྱི་གནས་རྣམས་ཀྱང་སྣང་བར་གྱུར་ཏོ། །ལྷའི་སིལ་སྙན་གྱི་སྒྲ་དག་

46-1-199a

ཀྱང་གྲག་གོ། །ལྷའི་འོད་དག་ཀྱང་སྣང་བར་གྱུར་ཏོ། །ལྷའི་སྤོས་ཀྱི་ངད་ལྡན་པར་གྱུར་ཏོ། །དེ་ནས་དེ་དག་ཐམས་ཅད་ཀྱང་ཆོ་འཕྲུལ་ཆེན་པོ་དེ་མཐོང་ནས་ཡ་མཚན་དུ་གྱུར་ཏེ་འདི་སྙམ་དུ་སེམས་སོ། །གནས་འདི་དག་
སྣང་བར་གྱུར་པ་འདི་དང་། ཆོ་འཕྲུལ་ཆེན་པོ་སྣང་བར་གྱུར་པ་འདི་དང་། ས་ཆེན་པོ་གཡོས་པ་འདི་དང་། མེ་ཏོག་གི་ཆར་ཆེན་པོ་བབ་པ་འདི་སུའི་མཐུ་ཡིན། སུའི་བྱིན་གྱི་བརླབས་ཡིན་ཞིག་གུ་སྙམ་ནས། དེ་དག་ཐང་ཅིག་ཅང་མི་ཟེར་
སེམས་ནས་གཅིག་ལ་གཅིག་འདི་སྐད་དུ་འདི་ནི་དེ་བཞིན་གཤེགས་པའི་མཐུ་ཡིན་ནོ། །འདི་ནི་དེ་བཞིན་གཤེགས་པའི་རྣམ་པར་འཕྲུལ་པ་ཡིན་ནོ་ཞེས་སྨྲས་སོ། །དེ་ནས་རྒྱལ་པོ་ཆེན་པོ་བཞི་འདི་སྙམ་དུ་སེམས་ཏེ། བདག་ཅག་
དེ་བཞིན་གཤེགས་པ་ལ་བལྟ་བ་དང་། ཕྱག་བྱ་བ་དང་། མཆོད་པ་དང་། ཆོས་ཉན་པའི་ཕྱིར་བཅོམ་ལྡན་འདས་ག་ལ་བ་དེར་འདོང་གོར་མ་ཆག་སྙམ་མོ། །དེ་ནས་ལྷའི་དབང་པོ་དང་། ཀླུའི་དབང་པོ་དང་། གནོད་སྦྱིན་གྱི་དབང་པོ་དང་། སྲིན་པོའི་
དབང་པོ་རྫུ་འཕྲུལ་ཆེ་ཞིང་མཐུ་ཆེ་བ་དེ་དག་ཐམས་ཅད་ཀྱིས་ལྷའི་མེ་ཏོག་ཨུད་པ་ལ་དང་། པད་མ་དང་ཀུ་མུ་ད་དང་། པད་མ་དཀར་པོ་དང་། དྲི་མཆོག་དང་། མན་དཱ་ར་བ་དང་། མན་དཱ་ར་བ་ཆེན་པོ་དག་ཁྱེར་ནས་འོད་མའི་ཚལ་བྱ་ཀ་ལན་ད་ཀ་གནས་
པ་ག་ལ་བ་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ལ་མངོན་པར་མཆོད་དེ་ཕྱག་བྱས་སོ། །མེ་ཏོག་གི་ཆར་ཆེན་པོ་དེས་ཀྱང་ས་ཆེན་པོ་འདི་པུས་མོ་ནུབ་ཙམ་དུ་ཁྱབ་པར་འདུག་གོ། །དེ་ནས་བྱང་
ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཆོས་མཉན་པའི་ཕྱིར་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་
བྱང་ཆུབ་སེམས་དཔའ་བྱེ་བ་ཕྲག་དུ་མས་བསྐོར་ཅིང་། ལྷ་བྱེ་བ་ཕྲག་དུ་མས་བསྐོར་ཏེ། རིག་སྔགས་འཆང་བརྒྱ་ཕྲག་དུ་མས་མདུན་དུ་བདར་བས་རྫུ་འཕྲུལ་དང་མཐུ་ཆེན་པོ་དང་། བཀོད་པ་ཆེན་པོ་དང་། མེ་ཏོག་དང་། སྤོས་དང་། མེ་ཏོག་ཕྲེང་དང་བདུག་

46-1-199b

པ་དང་། རོལ་མོའི་སྒྲ་དང་། སིལ་སྙན་དང་། ཕེག་རྡོབ་པ་ཆེན་པོས་དེ་བཞིན་གཤེགས་པ་དགེ་སློང་གི་དགེ་འདུན་དང་། བྱང་ཆུབ་སེམས་དཔའི་ཚོགས་དང་བཅས་པ་ལ་མངོན་པར་མཆོད་དོ། །དེ་ནས་དེའི་ཚེ་བྱང་ཆུབ་སེམས་དཔའ་
བཀོད་པའི་རྒྱལ་པོས་ལྷའི་བཀོད་པ་དང་། བཀོད་པའི་མཐུ་དང་། མེ་ཏོག་གི་ཆར་ཆེན་པོས་དེ་བཞིན་གཤེགས་པ་ལ་མཆོད་པ་བྱས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་འདུས་པ་ཆེན་པོ་དེ་མཐོང་
ནས། ཆོས་ཀྱི་འབེལ་བའི་གཏམ་འདོད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་གི་སེམས་ཐུགས་ཀྱིས་མཁྱེན་ནས། བྱང་ཆུབ་སེམས་དཔའ་བཀོད་པའི་རྒྱལ་པོ་དེ་ལ་འདི་སྐད་ཅེས་བཀའ་
སྩལ་ཏོ། །རིགས་ཀྱི་བུ་སོང་ལ་ས་ཆེན་པོ་འདི་ལྟོས་ཤིག །དེ་ནས་བྱང་ཆུབ་སེམས་དཔའ་བཀོད་པའི་རྒྱལ་པོས་ས་ཆེན་པོ་བལྟས་སོ། །བལྟས་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་
གིས་ས་ཆེན་པོ་བལྟས་ལགས་ཏེ། བཅོམ་ལྡན་འདས་བཅོམ་ལྡན་འདས་ཀྱིས་སེམས་ཅན་ཐམས་ཅད་ལ་བདེ་བའི་འདུས་པ་ཆེན་པོ་མཛད་པ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བཀོད་པའི་རྒྱལ་པོ་
སྲོག་ཆགས་དྲུག་ཁྲི་བཞི་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དེང་ཁོ་ན་ལུང་བསྟན་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ཀྱི་ཞབས་
གཉིས་ལ་གཏུགས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷ་དང་། ཀླུ་དང་གནོད་སྦྱིན་དང་། སྲིན་པོ་དང་། མི་དང་། སྤྱོད་པ་པ་དང་། ཀུན་ཏུ་རྒྱུ་མང་པོ་འདུས་ལགས་སོ། །བདེ་བར་གཤེགས་པ་
སེམས་ཅན་མང་པོ་འདུས་ལགས་སོ། །བཅོམ་ལྡན་འདས་ཆོས་མཉན་པའི་དུས་ནི་འདི་ལགས་སོ། །བདེ་བར་གཤེགས་པ་ཆོས་མཉན་པའི་དུས་ནི་འདི་ལགས་སོ། །དེ་ནས་བཅོམ་ལྡན་འདས་ཅང་མི་གསུང་བར་གྱུར་ནས། བྱང་ཆུབ་སེམས་

46-1-200a

དཔའ་ལག་ན་རྡོ་རྗེས་ལན་གཉིས་ལན་གསུམ་གྱི་བར་དུ་དེ་བཞིན་གཤེགས་པ་ལ་གསོལ་བ་བཏབ་སྟེ། བཅོམ་ལྡན་འདས་བསྟན་དུ་གསོལ། བདེ་བར་གཤེགས་པ་བསྟན་དུ་གསོལ། སེམས་ཅན་ཐམས་ཅད་ཀྱི་བསམ་པ་གྲུབ་པར་
མཛད་དུ་གསོལ། བཅོམ་ལྡན་འདས་འགྱོད་པ་བསལ་བ་དང་། སེམས་ཅན་ཐམས་ཅད་ལ་སྨན་པ་དང་བདེ་བའི་སླད་དུ་ཆོས་ཐམས་ཅད་ཀྱི་ཡོན་ཏན་བཀོད་པའི་རྒྱལ་པོ་ཞེས་བགྱི་བའི་མདོ། ཉོན་མོངས་པ་ཐམས་ཅད་ཟད་པར་བགྱིད་པ། བདུད་
ཐམས་ཅད་ཡང་དག་པར་འཇོམས་པ། སྡིག་པ་ཐམས་ཅད་ཟད་པར་བགྱིད་པ། སེམས་ཅན་མ་དད་པ་རྣམས་དད་པར་བགྱིད་པ། མུ་གེའི་གནོད་པ་ཞི་བར་བགྱིད་པ། ནད་ཐམས་ཅད་ཞི་བར་བགྱིད་པ། དུས་མ་ལགས་པར་འཆི་བ་ཐམས་ཅད་ཟློག་
པ། བདག་གིས་དེ་བཞིན་གཤེགས་པ་གློག་སྣང་བ་ལས་ཐོས་ནས། ཐོས་པའི་མོད་ལ་ཆོས་ཐམས་ཅད་མངོན་དུ་གྱུར་ཅིང་། ངན་སོང་ཐམས་ཅད་ཡང་དག་པར་ཆད་དེ། ལས་ཀྱི་སྒྲིབ་པ་ཐམས་ཅད་ཡང་དག་པར་ཆད་པ་གང་ལགས་པ་དེ་བསྟན་
པར་གསོལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཕྱི་མའི་དུས་ཕྱི་མའི་ཚེ་སེམས་ཅན་ངའི་བསྟན་པ་ལ་མ་དད་པ་དང་། དེ་བཞིན་གཤེགས་པས་གསུངས་པའི་
མདོ་སྡེ་དག་ལ་མངོན་པར་མ་དད་ཅིང་ཡིད་མི་ཆེས་ལ། ཚིག་འདི་སྐད་དུ་འདི་ནི་དེ་བཞིན་གཤེགས་པས་གསུངས་པའི་མདོ་སྡེ་མ་ཡིན་ནོ། །འདི་ལ་ནི་ལེགས་པ་བྱས་པ་དང་། ཉེས་པ་བྱས་པའི་ལས་ཀྱི་འབྲས་བུ་རྣམ་པར་སྨིན་པ་ཅི་ཡང་
མེད་དོ་ཞེས་ཟེར་བ་དག་འབྱུང་བར་འགྱུར་ཏེ། དེ་དག་ནི་ཆགས་པས་ཟིལ་ཀྱིས་ནོན་ནས། མཆོད་པ་ཡང་མངོན་པར་འདུ་བྱེད་པར་མི་འགྱུར་ལ། ཆོས་སྨྲ་བ་དེ་དག་ལ་ཡང་མཆོད་པ་བྱེད་པར་མི་འགྱུར་ཏེ། དེ་དག་ནི་ཚེ་འདི་ཉིད་ལ་
ཡང་འཁྲུག་པ་མང་པོ་འབྱུང་བར་འགྱུར་ལ། ཕྱིས་ཀྱང་སེམས་ཅན་དམྱལ་བ་རྣམས་སུ་བཙོ་བར་འགྱུར་ཏེ། རིགས་ཀྱི་བུ་འདི་ནི་དེ་བཞིན་གཤེགས་པ་རྣམས་ཀྱི་ཡབ་ཡུམ་དང་འདྲ་ལ། ལས་ཐམས་ཅད་ཟད་པར་བྱེད་པའི་མདོ་

46-1-200b

སྡེའི་རྒྱལ་པོ་ཆེན་པོ་མཉན་པའི་དུས་མ་ཡིན་ཏེ། གཞན་མུ་སྟེགས་ཅན་སྤྱོད་པ་པ་དང་། ཀུན་ཏུ་རྒྱུ་དེ་དག་དང་། སེམས་ཅན་མང་པོ་གཞན་དག་ཀྱང་ངན་སོང་དུ་འགྲོ་བར་འོང་ངོ་། །རིགས་ཀྱི་བུ་དེ་དག་ནི་མདོ་སྡེའི་རྒྱལ་པོ་འདི་ལ་དད་པར་མི་
འགྱུར་ཏེ། འདོད་པས་ལྡོངས་པའི་ཡིད་ཀྱིས་ཁྱིམ་ཡོངས་སུ་སྐྱོང་བར་བྱེད་ཅིང་། རྨོ་རྐོ་དང་། ཚོང་དང་། གཡུལ་འགྱེད་པ་དང་། འཐབ་པ་ལ་སྲེད་པར་འགྱུར་རོ། །དེ་ནས་ཤི་འཕོས་ནས་ཀྱང་སེམས་ཅན་དམྱལ་བ་ཆེན་པོ་བརྒྱད་པོ་
དག་ཏུ་བཙོ་བར་འགྱུར་རོ། །དེ་ནས་དེའི་ཚེ་སྲོག་ཆགས་བརྒྱད་ཁྲི་སྟན་ལས་ལངས་ནས། བཅོམ་ལྡན་འདས་ཀྱི་ཞབས་ལ་གཏུགས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ནི་དད་པར་བགྱིད་ལགས་སོ། །མངོན་
པར་མཆོད་པར་བགྱིད་ལགས་སོ། །རྒྱས་པར་ཡང་བགྱིད་ལགས་སོ། །འདྲི་བ་དང་། ཀློག་པ་དང་། ཉན་དུ་སྩལ་བ་དང་། འདོན་པ་ལ་སྤྲོ་བར་བགྱིད་ལགས་སོ། །སླད་ཀྱིས་ཆོས་མ་ལགས་པའི་དུས་དེ་ལ་བབ་ན། སྤྱོ་བ་དང་། བརྒྱད་
བཀག་པ་དང་། བསྡིགས་པ་བཟོད་པར་བགྱིད་ལགས་སོ། །བཅོམ་ལྡན་འདས་བདག་ཅག་ནི་བཀའ་དྲིན་གཟོ་བར་བགྱིད་ཀྱི། བཀའ་དྲིན་མི་གཟོ་བར་མི་བགྱིད་དེ། བདག་སླད་ཀྱིས་འགྱོད་པར་འགྱུར་བར་མི་བགྱིད་ལགས་སོ། །
བཅོམ་ལྡན་འདས་ཆོས་ཐམས་ཅད་ཀྱི་ཡོན་ཏན་བཀོད་པའི་རྒྱལ་པོ་ཞེས་བགྱི་བའི་མདོ་བསྟན་དུ་གསོལ། འདི་ནི་སླད་མའི་དུས་སླད་མའི་ཚེ་དེ་བཞིན་གཤེགས་པའི་ཕྲིན་ལས་བགྱིད་པར་འགྱུར་བ་ལགས་སོ། །དེ་ནས་བཅོམ་
ལྡན་འདས་ལ་བྱང་ཆུབ་སེམས་དཔའ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་དགེ་བའི་བཤེས་གཉེན་ཇི་ལྟར་ཡོངས་སུ་བཙལ་བར་བགྱི། བཅོམ་ལྡན་འདས་
ཀྱིས་བཀའ་སྩལ་པ། རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་རྒྱུན་མི་འཆད་པར་དགེ་བའི་བཤེས་གཉེན་ལ་ལྟ་བར་འདོད་པ་དང་། བརྩོན་འགྲུས་བརྩམས་པ་དང་། བསམ་པ་ཡོངས་སུ་དག་པ་དང་། 

46-1-201a

ཆོས་འདོད་པར་བྱས་ཏེ། ཆོས་བཞི་པོ་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོས་དགེ་བའི་བཤེས་གཉེན་ཡོངས་སུ་བཙལ་བར་བྱའོ། །བྱང་ཆུབ་སེམས་དཔའ་ལག་ན་རྡོ་རྗེས་གསོལ་པ། བཅོམ་ལྡན་འདས་
བྱང་ཆུབ་སེམས་དཔའ་དགོན་པ་ན་གནས་པས་ཇི་ལྟར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། འདི་ལྟ་སྟེ། ཁྱིམ་ན་གནས་པ་ཡོངས་སུ་སྤངས་པ་དང་། མི་དགེ་བའི་བཤེས་གཉེན་གྱི་འདུ་འཛི་ཡོངས་སུ་སྤང་བ་དང་། བདོག་པ་ཐམས་
ཅད་ཡོངས་སུ་གཏང་བར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ནི་གང་གིས་ཆོས་ཀྱི་
རྣམ་གྲངས་འདི་ཐོས་ནས་ངན་སོང་དུ་མཆི་བར་འགྱུར་བ་དེ་མ་མཐོང་སྟེ། དེ་ནི་གནས་མ་མཆིས་སོ། །བཅོམ་ལྡན་འདས་གང་ལ་ལ་ཆོས་ཀྱི་རྣམ་གྲངས་འདི་ཉན་པ་དང་། འདི་ལ་ཕྱག་འཚལ་བ་དེ་ནི་རྫུ་འཕྲུལ་ཆེ་ཞིང་མཐུ་ཆེ་བ་ལགས་ན། གང་ཡི་
གེར་འདྲི་བ་དང་། ཡི་གེར་འདྲིར་སྩོལ་བ་དང་། འཆང་བ་དང་། ཀློག་པ་དང་། གདུགས་དང་། རྒྱལ་མཚན་དང་། བ་དན་རྣམས་ཀྱིས་མཆོད་པ་བགྱིད་པ་དང་། ཆོས་སྨྲ་བ་དེ་ལ་ཡང་གོས་དང་། རྒྱན་རྣམས་ཀྱིས་མཆོད་པར་བགྱིད་པ་
ལྟ་སྨོས་ཀྱང་ཅི་འཚལ་ཏེ། དེ་ནི་སངས་རྒྱས་ཐམས་ཅད་ཀྱི་བྱིན་གྱིས་བརླབས་པ་ལགས་སོ། །དེ་ནི་དེ་བཞིན་གཤེགས་པས་བདེ་བ་ཅན་གྱི་འཇིག་རྟེན་གྱི་ཁམས་སུ་ལུང་བསྟན་པ་ཁོ་ན་ལགས་སོ། །ཆོས་སྨྲ་བ་དེ་ནི་དེ་བཞིན་
གཤེགས་པ་དང་འདྲ་བ་ཁོ་ནར་ལྟ་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ནི་དེ་བཞིན་ཏེ། ལེགས་སོ་ལེགས་སོ། །ཆོས་སྨྲ་བ་དེ་ལ་ནི་ངས་ཀྱང་མཆོད་པར་བྱའོ། །འཇིག་རྟེན་གྱི་
ཁམས་བདེ་བ་ཅན་དུ་ཡང་ལུང་བསྟན་པར་བྱའོ། །གང་དེ་བཞིན་གཤེགས་པ་ལ་བླ་མའི་སྲི་ཞུ་བྱེད་ཅིང་མེ་ཏོག་དང་། བདུག་སྤོས་དང་། སྤོས་དང་། མེ་ཏོག་ཕྲེང་དང་། བྱུག་པ་དང་། གོས་དང་། རྒྱན་རྣམས་དང་། གདུགས་

46-1-201b

དང་རྒྱལ་མཚན་དང་། བ་དན་རྣམས་ཀྱིས་མཆོད་པ་བྱེད་པ་དེ་ནི་དུས་མ་ཡིན་པར་འཆི་བས་འཆི་བར་མི་འགྱུར་རོ། །ཕ་རོལ་གྱི་དམག་ཚོགས་ཀྱིས་འཇིགས་པ་ཡང་མེད། མུ་གེའི་གནོད་པའི་འཇིགས་པ་ཡང་མེད། བུ་ལས་གྱུར་
པའི་ཡིད་མི་བདེ་བ་ཡང་མེད། ཆུང་མ་ལས་གྱུར་པའི་ཡིད་མི་བདེ་བ་ཡང་མེད་ལ། བསམ་པ་ཐམས་ཅད་ཀྱང་ཡོངས་སུ་རྫོགས་པར་འགྱུར་རོ། །རིགས་ཀྱི་བུ་དེ་བཞིན་གཤེགས་པ་རྣམས་འབྱུང་བ་དང་། མདོ་སྡེའི་རྒྱལ་པོ་འདི་ཐོས་
པ་ནི་དཀའོ། །རིགས་ཀྱི་བུ་གྲོང་ངམ། གྲོང་ཁྱེར་རམ། གྲོང་རྡལ་ལམ། ཁྱིམ་འམ། དགོན་པའི་གནས་གང་ལ་ལར་ཆོས་ཀྱི་རྣམ་གྲངས་འདི་སྤྱོད་པའི་ས་ཕྱོགས་དེ་ནི་དེ་བཞིན་གཤེགས་པས་ཡོངས་སུ་བཟུང་བ་ཡིན་ནོ། །དེ་ནས་བཅོམ་
ལྡན་འདས་ལ་བྱང་ཆུབ་སེམས་དཔའ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་སྤྱན་རས་གཟིགས་དབང་ཕྱུག་སྤྱན་རས་གཟིགས་དབང་ཕྱུག་ཅེས་བགྱི་བ་ཅིའི་སླད་དུ་དེ་སྐད་ཅེས་བགྱི་ལགས། 
བཀའ་སྩལ་པ། གང་གི་ཕྱིར་འདི་ལྟར་འཇིག་རྟེན་ཐམས་ཅད་ལ་ལྟ་བར་བྱེད། རྟོག་པར་བྱེད། ཚིམ་པར་བྱེད། ཡོངས་སུ་སྐྱོང་བར་བྱེད། ཡང་དག་པར་དབུགས་འབྱིན་པར་བྱེད་ཅིང་། སྙིང་རྗེའི་སེམས་དང་། བདེ་བའི་སེམས་
དང་། བྱམས་པའི་སེམས་དང་། སྙིང་བརྩེ་བའི་སེམས་དང་ལྡན་ལ། བསམ་པ་ཐམས་ཅད་ཡོངས་སུ་རྫོགས་པར་བྱེད་པས་ན་དེའི་ཕྱིར་སྤྱན་རས་གཟིགས་དབང་ཕྱུག་ཅེས་བྱའོ། །དེ་ནས་བྱང་ཆུབ་སེམས་
དཔའ་ལག་ན་རྡོ་རྗེས་གསོལ་པ། བཅོམ་ལྡན་འདས་སྤྱན་རས་གཟིགས་དབང་ཕྱུག་གི་མིང་ཙམ་ལ་རྟོག་པ་གང་ལགས་པ་དེ་ཡང་བསམ་པ་ཐམས་ཅད་ཡོངས་སུ་རྫོགས་པར་འགྱུར་ན། གང་དག་དེ་བཞིན་གཤེགས་པ་ལ་
མངོན་པར་མཆོད་པ་དང་། ཆོས་ཀྱི་རྣམ་གྲངས་འདི་ལ་མངོན་པར་དད་པ་དང་། འཆང་བ་དང་། ཀློག་པ་དང་། ཡི་གེར་འདྲི་བ་དང་། ཡི་གེར་འདྲིར་སྩོལ་བ་དང་། གོས་དང་། རྒྱན་གྱི་མཆོད་པ་ཆེན་པོ་དག་གིས་མཆོད་པར་བགྱིད་པ་དང་། རྒྱན་གྱིས་

46-1-202a

བརྒྱན་ནས་ཡི་གེར་འདྲི་བ་དང་། ཡི་གེར་འདྲིར་སྩོལ་བ་ལྟ་སྨོས་ཀྱང་ཅི་འཚལ་ལགས། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་
གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་ནི་མཐུ་ཆེ་སྟེ། དེ་བཞིན་གཤེགས་པའི་ཕྲིན་ལས་བགྱིད་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་རྒྱལ་བ་ཅན་ཞེས་བྱ་བའི་གཟུངས་
ཡོད་དེ། དེ་ནི་ང་བྱང་ཆུབ་སེམས་དཔར་གྱུར་པ་ན་དེ་བཞིན་གཤེགས་པ་རྒྱལ་བའི་དབྱངས་ལས། བླངས་ཏེ། ཐོབ་པའི་མོད་ལ་ཡང་ས་བཅུ་ཐོབ་པར་གྱུར་ལ། སྲོག་ཆགས་སྟོང་ཕྲག་དུ་མས་ཀྱང་ཆོས་ལ་བཟོད་པ་ཐོབ་པར་གྱུར་ཏོ། །
དེ་ནས་བྱང་ཆུབ་སེམས་དཔའ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་གཟུངས་མཐུ་ཆེན་པོ་བསྟན་པར་གསོལ། དེ་ནས་བཅོམ་ལྡན་འདས་དེ་བཞིན་གཤེགས་པ་བྱ་ཀ་ལ་པིང་ཀའི་སྒྲ་དང་གདངས་སྒྲོགས་
པས་གཟུངས་འདི་བཀའ་སྩལ་པ། ཏད་ཡ་ཐཱ། ཛ་ཡ་ཛ་ཡ། ཛ་ཡ་བ་ཧ། ཁ་བ་ཧ། ཛ་ཡ་བ་ཧ། ཧུ་ལུ་ཧུ་ལུ། པད་མ་པེ། ཨ་བ་མ་བ་མེ། ས་ར་ས་ར་ཎེ། དྷི་རི་དྷི་རི། དྷི་རི་དྷི་རི། དེ་བ་ཏཱ་ཨ་ནུ་པ་ལ་ནི། ཡུད་དྷ་ཨུད་ཏ་རེ་ཎེ། པ་ར་ཙཀྲ་ནི་པ་ར་ཎེ། 
པཱུ་ར་ཡ་བྷ་ག་བཱན་སརྦ་ཨ་ཤ་ན། མ་མ་སརྦ་ཀརྨ་ཀྵ་པ་ཡ། བུད་དྷ་ཨ་དྷིཥྠ་ནེ་ན་སྭཱ་ཧཱ། རིགས་ཀྱི་བུ་འདི་ནི་རྒྱལ་བ་ཅན་ཞེས་བྱ་བའི་གཟུངས་ཡིན་ཏེ། སྡིག་པ་ཐམས་ཅད་ཟད་པར་བྱེད་པ། ནོར་དང་། འབྲུ་
རྣམ་པར་འཕེལ་བར་བྱེད་པ། ཕ་རོལ་གྱི་དམག་ཚོགས་ཟློག་པར་བྱེད་པ། མུ་གེའི་གནོད་པ་རབ་ཏུ་ཞི་བར་བྱེད་པ། ཚེ་ནུར་བར་བྱེད་པ་སྟེ། འདི་ནི་དེ་བཞིན་གཤེགས་པ་རྣམས་ཀྱི་ཡབ་ཡུམ་དང་འདྲ་བའི་ཆོས་ཀྱི་རྣམ་གྲངས་ཡིན་ནོ། །རིགས་
ཀྱི་བུ་ལ་ལ་ཞིག་གིས་ཆོས་ཀྱི་རྣམ་གྲངས་འདི་དང་། གཟུངས་ཀྱི་གསང་སྔགས་ཀྱི་ཚིག་རྣམས་ལ་ཕྱག་འཚལ་ཞིང་བསམ་པ་ཡོངས་སུ་དག་པས་མཆོད་པར་བྱེད་དེ། ཡི་གེར་འདྲི་བ་དང་། ཡི་གེར་འདྲིར་འཇུག་པ་དང་། མཆོད་པ་ཆེན་པོས་ཆོས་སྨྲ་

46-1-202b

བ་དེ་ལ་མཆོད་པ་དེ་ནི་ལས་ཀྱི་སྒྲིབ་པ་ཐམས་ཅད་ཟད་པར་འགྱུར་རོ། །དུས་མ་ཡིན་པར་འཆི་བས་འཆི་བར་མི་འགྱུར་རོ། ཚེ་འདི་ཉིད་ལ་ཡང་བདེ་བ་མྱོང་བར་འགྱུར་ཏེ། བུས་ཡིད་བདེ་བར་འགྱུར་བ་དང་། ཆུང་མས་ཡིད་བདེ་བར་འགྱུར་བ་དང་། 
ཁྱིམ་གྱིས་ཡིད་བདེ་བར་འགྱུར་བ་དང་། རྒྱལ་སྲིད་ཀྱིས་ཡིད་བདེ་བར་འགྱུར་ལ། བསམ་པ་ཐམས་ཅད་ཀྱང་ཡོངས་སུ་རྫོགས་པར་འགྱུར་རོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལག་ན་རྡོ་རྗེས་འདི་སྐད་ཅེས་གསོལ་ཏོ། །
བཅོམ་ལྡན་འདས་ཆོས་ཀྱི་རྣམ་གྲངས་འདི་ལ་ཕྱག་འཚལ་ལོ། །ཆོས་སྨྲ་བ་དེ་དག་དང་། ཆོས་ཀྱི་རྣམ་གྲངས་འདི་ཡི་གེར་འདྲི་བ་རྣམས་དང་། འཆང་བ་རྣམས་དང་། ཀློག་པ་རྣམས་ལ་ཡང་མཆོད་པར་འཚལ་ལོ། །གང་ལ་ལ་ཆོས་ཀྱི་
རྣམ་གྲངས་འདི་ལ་མཆོད་པ་བགྱིད་པ་དང་། ཆོས་སྨྲ་བ་དེ་དག་ལ་ཡང་གོས་དང་། རྒྱན་རྣམས་དང་། གདུགས་དང་། བཞོན་པ་རྣམས་ཀྱིས་མཆོད་པར་བགྱིད་པ་དེ་དག་གིས་ནི། དེ་བཞིན་གཤེགས་པ་ཐམས་ཅད་ལ་མཆོད་པ་བགྱིད་པ་ལགས་སོ། །
བཅོམ་ལྡན་འདས་དེ་ནི་བདག་དང་བྱང་ཆུབ་སེམས་དཔའ་ཐམས་ཅད་ལ་ཡང་མཆོད་པའི་མཆོག་གིས་མཆོད་པ་བགྱིད་པ་ལགས་སོ། །རྒྱལ་སྲིད་ཐམས་ཅད་ལ་ཡང་བདག་གིས་བསྲུང་བར་བགྱིའོ། །བསམ་པ་ཐམས་ཅད་ཀྱང་
ཡོངས་སུ་རྫོགས་པར་བགྱིའོ། །རྒྱལ་སྲིད་ཐམས་ཅད་ལ་ཡང་མཆོད་པར་འགྱུར་བར་བགྱིའོ། །བཅོམ་ལྡན་འདས་བདག་གིས་ཀྱང་ཆོས་ཉན་པ་དེ་དག་གི་དོན་དུ་གཟུངས་ཀྱི་གསང་སྔགས་ཀྱི་ཚིག་རྣམས་རྗེས་སུ་སྩལ་བར་འཚལ་ལོ། །
བསམ་པ་ཐམས་ཅད་ཀྱང་ཡོངས་སུ་རྫོགས་པར་བགྱིའོ། །སྙིང་བླས་སུ་ཡང་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སེམས་ཅན་རྣམས་ཀྱི་དོན་གྱི་ཕྱིར་སྨྲོས་ཤིག །དེ་ནས་བྱང་ཆུབ་སེམས་དཔའ་ལག་ན་རྡོ་རྗེས་
གཟུངས་ཀྱི་གསང་སྔགས་ཀྱི་ཚིག་འདི་དག་སྨྲས་སོ། །ན་མཿསརྦ་ཏ་ཐཱ་ག་ཏ་ནཱཾ། ན་མོ་ཨ་མ་ཏཱི་བྷ་ཡ། ཏ་ཐཱ་ག་ཏཱ་ཡ། ན་མཿསརྦ་བུད་དྷ་བོ་དྷི་ས་ཏྭཱ་ནཱཾ། ན་མཿསརྦ་མ་ཧཱ་ར་དྷི་ཀེ་བྷྱཿཏདྱ་ཐཱ། ཧུ་ཧུ་ཧེ་ཧེ། མ་ཏི་མ་ཏི། མ་ཧཱ་མ་ཏི། བཛྲ་མ་ཏི། དྲི་དྱཱ་བཛྲ་མ་ཏི། ཏ་ཐཱ་ག་ཏ་ཨ་

46-1-203a

ནུ་པ་རི་པ་ལི་ཏེ། ས་ར་ས་ར། ཨ་ཡོ་མུ་ཁི་བྷྲྀ་ཀུ་ཊི། བྷྲྀ་ཀུ་ཊ་མུ་ཁི། ཀྲི་པེ་ཀྲི་པཱ་མུ་ཁི། སད་ཏྱ་བ་ཙ་ན། མ་ནུ་སྨ་ར། བྷ་ག་བཱན་བཛྲ་པཱ་ཎི། སརྦ་ཀརྨ་ཨ་བ་ར་ཎ་ནི་ཀྵཱ་པ། སརྦ་ཨ་ཤ་མ་པ་ར་པུ་ར་ཡ། དེ་ཧི་མེ་བ་ར་མ། བུད་དྷ་སང་
ཏྱེ་ན། བོ་དྷི་ས་ཏྭཱ་སད་ཏྱེ་ན་སྭཱ་ཧཱ། བཙུན་པ་བཅོམ་ལྡན་འདས་གང་ལ་ལ་བྱང་ཆུབ་སེམས་དཔའི་ས་བཙལ་འཚལ་བ་དང་། དེ་བཞིན་གཤེགས་པ་བལྟ་བ་དང་། སངས་རྒྱས་ཀྱི་ཞིང་དུ་སྐྱེ་བ་དང་། རྒྱལ་སྲིད་དང་། ལོངས་སྤྱོད་འཚལ་བ་དང་། 
ཡུལ་གྲུ་འཚལ་བ་དང་། ནོར་འཚལ་བ་དང་། འབྲུ་འཚལ་བ་དེས་ནི་ཆོས་ཀྱི་རྣམ་གྲངས་འདི་དང་། ཆོས་སྨྲ་བ་དེ་ལ་མཆོད་པ་ཆེན་པོས་མཆོད་པར་བགྱིའོ། །གང་ཡི་གེར་འདྲི་བ་དང་། འཆང་བ་དང་། ཀློག་པ་དེ་ལ་ཡང་སྤོས་དང་། མེ་ཏོག་ཕྲེང་
དང་། བྱུག་པ་དང་། མལ་ཆ་དང་། སྟན་དང་། གོས་དང་། རྒྱན་རྣམས་དང་། གདུགས་དང་། བཞོན་པ་རྣམས་ཀྱིས་མཆོད་པར་བགྱི་སྟེ། བཅོམ་ལྡན་འདས་དེ་ལ་ནི་བདག་གིས་བསྲུང་བར་བགྱིའོ། །རྒྱལ་སྲིད་ཐམས་ཅད་ལ་ཡང་ཆེས་
མཆོད་པར་འགྱུར་བར་བགྱིའོ། །ཇི་ལྟར་འཚལ་བ་བཞིན་དུ་སེམས་དང་། ཡིད་བདེ་བར་བགྱིའོ། །བུ་གཅིག་པ་བཞིན་དུ་ཡོངས་སུ་བསྐྱང་བར་བགྱིའོ། །གང་ལ་ལ་བདག་མཐོང་བར་འཚལ་བ་དང་། སྟོབས་ཀྱིས་འཁོར་ལོས་སྒྱུར་བར་
འགྱུར་བ་དང་། ཏིང་ངེ་འཛིན་འཐོབ་པ་དང་། ཐོས་པ་འཛིན་པར་འགྱུར་བ་དང་། ཁམས་རྣམ་པར་སྨིན་པར་འགྱུར་བ་དང་། ལུས་མི་སྣང་བར་འགྱུར་བ་དང་། ནམ་མཁའ་ལས་མཆི་བར་འཚལ་བ་དེས་ནི་ཟླ་བ་ཡར་གྱི་ངོ་ཚེས་བརྒྱད་ལ་ཉིན་མཚན་
དུ་སྨྱུང་བ་བགྱིས་ལ་གཟུགས་བགྱིད་དུ་སྩལ་ཏེ། རྡོ་རྗེ་འཆང་གི་གཟུགས་འདམ་བུ་མདའ་རྒྱུའི་མདོག་ཅན་རྒྱན་ཐམས་ཅད་ཀྱིས་བརྒྱན་པ། ཞི་བའི་ཚུལ་ཅན་སྐུ་གདུང་དང་ལྡན་པར་བགྱིའོ། །དབུས་སུ་ནི་དེ་བཞིན་གཤེགས་པ་
ཤཱཀྱ་ཐུབ་པ་བཞུགས་པར་བགྱིའོ། །གཡས་ལོགས་སུ་ནི་འཕགས་པ་སྤྱན་རས་གཟིགས་དབང་ཕྱུག་ལག་པ་བཞི་པ་རྒྱན་ཐམས་ཅད་ཀྱིས་བརྒྱན་པ། སྐུ་གདུང་དང་བཅས་པ་གཞག་གོ། །གཡས་གཡོན་དག་ཏུ་ནི་རྒྱལ་པོ་ཆེན་པོ་བཞི་མཆོད་

46-1-203b

པ་བགྱིད་པ་གཞག་གོ། །སྒྲུབ་པ་པོའི་རིགས་ཀྱི་བུ་དེས་ཀྱང་གཙང་སྦྲ་བགྱི་བ་དང་། དུས་གསུམ་དུ་ཁྲུས་བགྱི་བ་དང་། དུས་གསུམ་དུ་གོས་བརྗེ་བར་བགྱིའོ། །སེམས་ཅན་ཐམས་ཅད་ལ་ཡང་བྱམས་པའི་སེམས་སུ་བགྱིའོ། །ཟླ་བ་ཡར་
གྱི་ངོ་ཚེས་བརྒྱད་ནས་བརྩམས་ཏེ། ཟླ་བ་ཕྱི་མ་ཉ་བ་ཚེས་བཅྭ་ལྔའི་བར་དུ་ཟས་སུ་ནས་ཀྱི་འོ་ཐུག་འཚལ་ཞིང་། དུས་གསུམ་དུ་བཟླས་བརྗོད་བགྱིའོ། །བདུག་པ་ནི་ཨ་ག་རུ་དང་། ཙན་དན་དང་ཅེ་པོག་དང་། གུ་གུལ་དབུལ་ལོ། །ལན་སུམ་
འབུམ་གྱི་བར་དུ་བཟླས་བརྗོད་བགྱི་སྟེ། དེ་ནི་སྔར་བསྙེན་པ་བགྱི་བ་ལགས་སོ། །སྐུ་གདུང་དང་ལྡན་པའི་མཆོད་རྟེན་ནམ། དགོན་པའི་གནས་སུ་སྤོས་དང་། བདུག་པ་དང་མེ་ཏོག་སྣ་ཚོགས་དང་། བ་དན་སྣ་ཚོགས་ཀྱིས་ཀྱང་མཆོད་
པར་བགྱིའོ། །དཀར་བག་གི་ལྷ་བཤོས་དག་ཀྱང་དབུལ་བར་བགྱིའོ། །ཆོས་ཀྱི་རྣམ་གྲངས་འདི་ཡང་ཡི་གེར་འདྲིར་སྩལ་ཅིང་། གོས་དང་རྒྱན་དང་། ལྷབ་ལྷུབ་དང་། གདུགས་དང་། བཞོན་པ་རྣམ་པ་སྣ་ཚོགས་ཀྱིས་མཆོད་པ་བགྱིའོ། །དེ་ནས་ཟླ་
བ་ཉ་བ་ཚེས་བཅྭ་ལྔའི་བར་དུ་སེམས་ཅན་ཐམས་ཅད་ལ་སྙིང་རྗེའི་སེམས་དང་ལྡན་པ་དང་། དུས་གསུམ་དུ་ཁྲུས་བགྱི་བ་དང་། དུས་གསུམ་དུ་གོས་བརྗེ་བར་བགྱི་སྟེ། དཀྱིལ་འཁོར་གྲུ་བཞི་པ་བ་ལང་གི་ལྕི་བས་བསྐུས་ལ་མེ་ཏོག་སྣ་ཚོག་
ཀྱིས་ཁེབས་པར་བགྱི་སྟེ། བུམ་པ་གང་བ་བཅུ་དྲུག་དང་། མར་མེ་བཅུ་དྲུག་ཀྱང་གཞག་པར་བགྱིའོ། །གདུགས་དང་རྒྱལ་མཚན་དང་བ་དན་སྣ་ཚོགས་ཀྱིས་ཀྱང་ས་ཕྱོགས་དེ་བརྒྱན་པར་བགྱིའོ། །རོ་སྣ་ཚོགས་སྦྱར་བའི་ལྷ་བཤོས་རྒྱ་ཆེན་པོ་ཕབ་ལ་སྤོས་
ཆབ་ཀྱིས་ཕྱོགས་དེར་ཆག་ཆག་བཏབ་ནས། ནམ་སྐུ་གཟུགས་དང་། ས་གཞི་འགུལ་བ་དང་། བདག་ཉིད་ཀྱང་དགའ་བར་གྱུར་པའི་བར་དུ་བཟླས་བརྗོད་བགྱིའོ། །དེ་ནས་དེས་འདི་ནི་གཅིག་ཏུ་ངེས་པར་འགྲུབ་པར་འགྱུར་རོ་སྙམ་དུ་ཤེས་པར་བགྱིའོ། །དེ་ནས་དེའི་
འོག་ཏུ་བདག་གིས་རྨི་ལམ་དུ་བསྟན་པར་བགྱི་ཞིང་འབེལ་བའི་གཏམ་བགྱིའོ། །བསམ་པ་ཐམས་ཅད་ཀྱང་ཡོངས་སུ་རྫོགས་པར་བགྱིའོ། །བུ་གཅིག་པ་བཞིན་དུ་ཡོངས་སུ་བསྐྱང་བར་བགྱིའོ། །དམ་པ་ཅི་འཚལ་བ་ཡང་སྩལ་བར་བགྱི་སྟེ། གང་ཆོས་ཀྱི་རྣམ་གྲངས་འདི་ལ་མ་དད་ཅིང་སྤོང་

46-1-204a

བར་བགྱིད་པ་ནི་མ་གཏོགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ཁྱོད་ཀྱིས་ཚིག་དེ་སྐད་ཅེས་སྨྲས་པ་ལེགས་སོ་ལེགས་སོ། །དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་
དབང་ཕྱུག་གིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཆོས་ཀྱི་རྣམ་གྲངས་འདི་ནི་སེམས་ཅན་བསོད་ནམས་ཆུང་ངུ་རྣམས་ཀྱི་ཡུལ་ན་སྤྱོད་པར་མི་འགྱུར་རོ། །འདི་ནི་སེམས་ཅན་བསོད་ནམས་ཆུང་ངུ་
རྣམས་ཀྱིས་ཡི་གེར་འདྲི་བ་འམ། ཡི་གེར་འདྲིར་འཇུག་པ་འམ་འཆང་བ་འམ། ཀློག་པར་མི་ནུས་ཏེ། དེ་དག་ལ་བདུད་ཀྱིས་བར་ཆད་བྱེད་པར་འགྱུར་རོ། །རིགས་ཀྱི་བུ་བཞི་པོ་འདི་དག་ནི་ཆོས་ཀྱི་རྣམ་གྲངས་འདི་ཡི་གེར་འདྲི་བ་དང་། 
ཀློག་པ་དང་། ཉན་དུ་འཇུག་པའི་བདུད་ཀྱི་ལས་ཡིན་ཏེ། བཞི་གང་ཞེ་ན། འདི་ལྟ་སྟེ། ལེ་ལོ་དང་། མ་དད་པ་དང་། བླ་མ་ལ་སྲི་ཞུ་མེད་པ་དང་། ཆོས་སྨྲ་བའི་སེམས་མི་བརྟན་པ་སྟེ། རིགས་ཀྱི་བུ་དེས་དེ་ལ་འདི་ནི་བདུད་ཀྱི་ལས་ཡིན་ནོ། །
སྙམ་དུ་ཤེས་པར་བྱའོ། །གཞན་ཡང་བདུད་ཀྱི་ལས་བཞི་ཡོད་དེ། བཞི་གང་ཞེ་ན། འདི་ལྟ་སྟེ། དགེ་བའི་བཤེས་གཉེན་ལ་འདུན་པ་མེད་པ་དང་ཡིད་ལ་མི་བྱེད་པ་དང་། ཁེངས་པའི་ཚིག་སྨྲ་བ་དང་། འཇིག་རྟེན་འདི་ལ་སེམས་པ་སྟེ། འདི་སྙམ་དུ་འཇིག་རྟེན་འདི་ལ་
ཡང་འཇིགས་པ་མེད་དོ། །འཇིག་རྟེན་ཕ་རོལ་ལ་ཡང་འཇིགས་པ་མེད་དོ། །སྡིག་པའི་ལས་རྣམས་ཀྱི་འབྲས་བུ་རྣམ་པར་སྨིན་པ་ཡང་མེད་དོ། །བདག་ལ་ཚིག་མི་གསལ་བ་ཡང་མེད་དོ། །ཡིད་རྟུལ་བ་ཡང་མེད་དོ་བདག་ནི་མཛེས་
པ་ཡིན་ནོ། །བདག་ནི་དབང་ཕྱུག་དང་ལྡན་ནོ་སྙམ་དུ་སེམས་ཤིང་། ཁྱིམ་དང་བུ་སྨད་རྣམས་ལ་ཞེན་ཏོ། །དེ་དག་ནི་བསྐལ་པ་དུ་མར་སྡུག་བསྔལ་མྱོང་བར་འགྱུར་ཏེ། བཞི་པོ་དེ་དག་ནི་དེ་དག་གི་མི་དགེ་བའི་བཤེས་གཉེན་
ཡིན་པར་བལྟ་བར་བྱའོ། །གཞན་ཡང་བདུད་ཀྱི་ལས་བཞི་ཡོད་དེ། བཞི་གང་ཞེ་ན། འདི་ལྟ་སྟེ། ནོར་ལ་བརྐམ་པ་སྟེ། དེ་དག་བསྐལ་པ་དུ་མར་སྡུག་བསྔལ་མྱོང་བར་འགྱུར་བ་དང་། དེ་དག་མི་དགེ་བའི་བཤེས་གཉེན་དང་

46-1-204b

རྒོད་ཅིང་སྨྲ་བ་དང་། ཆུང་མས་ཡིད་བདེ་བ་དང་། ཆོས་ཉན་པ་དེ་དག་གི་འདུན་པ་ཟློག་པར་བྱེད་པ་སྟེ། འདི་ལྟ་སྟེ། བློན་པོ་དང་། འཁོར་རྣམས་འདུས་པ་དེ་དག་གི་ཐད་དུ་ལྷགས་ནས་འདི་སྐད་དུ་སྦྱིན་པའི་རྣམ་པར་སྨིན་པ་མེད་དོ་ཆོས་
སྨྲ་བ་འདི་ནི་སྡིག་པ་བྱེད་པ་དབང་ཕྱུག་གི་རྒྱགས་པས་མྱོས་པ་འདོད་པ་ལ་ལོག་པར་གཡེམ་པ། ཕྲ་མ་ལ་དགའ་བ་ཡིན་ཏེ། འདི་ནི་ཁྱོད་ཀྱི་སྲོག་གི་བར་ཆད་བྱེད་པར་འདོད་ལ། ཁྱོད་ནི་ཆོས་ལ་གནས་པ་སྟེ་ཁྱོད་ཀྱིས་ཆོས་
མང་དུ་བྱས་སོ། །ཁྱོད་ནི་མདོ་སྡེ་ཀློག་པ་དང་། འདྲིར་འཇུག་པ་ཡིན་ནོ་ཞེས་འཛེར་ཏེ། དེ་དག་མདོ་སྡེ་འདི་ཡི་གེར་འདྲིར་འཇུག་པར་མི་བྱེད། མཆོད་པར་མི་བྱེད་དེ་དེ་དག་ལ་ནི་ཚེ་འདི་ཉིད་ལ་ཡང་བར་ཆད་མང་པོ་འབྱུང་བར་འགྱུར་ལ་
ཕྱི་མ་ལ་ཡང་སེམས་ཅན་དམྱལ་བར་བཙོ་བར་འགྱུར་ཏེ། དེ་ཡང་རིགས་ཀྱི་བུ་དེས་བདུད་ཀྱི་ལས་ཡིན་པར་རིག་པར་བྱས་ལ་དེའི་དབང་དུ་འགྱུར་བར་མི་བྱའོ། །བཅོམ་ལྡན་འདས་ཀྱིས་བཀའ་སྩལ་པ། གྲོགས་པོ་དག་ངས་ལན་གཉིས་ལན་
གསུམ་དུ་ཚིག་གིས་བསྒོ་སྟེ། བག་ཡོད་པར་གྱིས་ཤིག །ཕྱིས་སེམས་ཅན་དམྱལ་བ་དག་ཏུ་བཙོ་བ་ན་འགྱོད་པར་གྱུར་ཏ་རེ། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ་ངས་ནི་མདོ་སྡེའི་
རྒྱལ་པོ་མང་པོ་བསྟན་བྱང་ཆུབ་ལ་ནི་སེམས་ཅན་དུ་མ་བཀོད། །སངས་རྒྱས་ཚུལ་ཡང་ང་ཡིས་བསྟན་པར་གྱུར། །དེ་ཐོས་ནས་ནི་བག་ཀྱང་ཡོད་པར་གྱིས། །ཁྱོད་རྣམས་ཕྱི་དུས་རབ་ཏུ་འཇིགས་པའི་ཚེ། །ལོག་པར་ལྟུང་བར་འགྲོ་བར་
གྱུར་ཏ་རེ། །མདོ་འདི་ལ་ནི་རྟག་ཏུ་གང་དད་པ། །དེ་ནི་ངེས་པར་ང་ཡི་བུ་ཡང་ཡིན། །མདོ་འདི་ལ་ནི་རྟག་ཏུ་གང་མཆོད་པ། །དེ་ནི་སངས་རྒྱས་ཞིང་དུའང་སྐྱེ་བར་འགྱུར། །གང་ཕྱོགས་མདོ་སྡེའི་རྒྱལ་པོ་འདི་གནས་པ། །དེར་ནི་འབྱུང་པོ་གནོད་སྦྱིན་
སྲིན་པོ་དང་། །ཡི་དགས་གྲུལ་བུམ་ལྟོ་འཕྱེ་ཆེན་པོ་དང་། །གཤེད་བྱེད་བྱད་སྟེམ་རྣམས་ཀྱིས་ཡོངས་མི་ཚུགས། །དེ་ནི་བསམ་པ་ཐམས་ཅད་ཡོངས་རྫོགས་ཤིང་། །དེ་ནི་བདེ་བར་བྱང་ཆུབ་འཚང་ཡང་རྒྱ། །དེའི་ཚེ་རྒྱལ་པོ་ཆེན་པོ་བཞིས་

46-1-205a

ཚིགས་སུ་བཅད་པ་འདི་དག་ཐོས་ནས། ཆོས་ཀྱི་ཤུགས་ཀྱིས་མཆི་མ་བླགས་ཏེ། ལུས་འདར་བཞིན་དུ་བཅོམ་ལྡན་འདས་ཀྱི་ཞབས་ལ་གཏུགས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
བདག་ཅག་རྒྱལ་པོ་ཆེན་པོ་བཞིས་ཆོས་སྨྲ་བ་དེ་ལ་མཆོད་པར་བགྱིའོ། །ཆོས་ཉན་པ་དེ་དག་ལ་ཡང་བསྲུང་བར་བགྱིའོ། །བཅོམ་ལྡན་འདས་གང་ལ་ལ་ཆོས་ཀྱི་རྣམ་གྲངས་འདི་ཡི་གེར་འདྲི་བ་དང་། ཡི་གེ་འདྲིར་སྩོལ་བ་དང་། གཟུགས་
འཆང་བ་དང་། ཀློག་པ་དང་། ཀུན་ཆུབ་པར་བགྱིད་པ་དང་། ཆོས་སྨྲ་བ་དེ་ལ་ཡང་གོས་དང་། རྒྱན་དག་གིས་མཆོད་པ་བགྱིད་པ་དེ་ལ་ཡང་བདག་ཅག་གིས་བསྲུང་བར་བགྱིའོ། །དེའི་ཡུལ་ཡང་ཡོངས་སུ་བསྐྱང་བར་བགྱིའོ། །ནོར་དང་འབྲུ་ཐམས་ཅད་
ཀྱང་སྩལ་བར་བགྱིའོ། །བུ་གཅིག་པ་བཞིན་དུ་ཡོངས་སུ་བསྐྱང་བར་བགྱིའོ། །གཡུལ་འགྱེད་པ་ཐམས་ཅད་དུ་ཡང་མདུན་དུ་མཆི་བར་བགྱིའོ། །རྒྱལ་སྲིད་ཐམས་ཅད་དུ་ཡང་ཆེས་བཀུར་བསྟིར་བགྱིད་པར་འགྱུར་བར་བགྱི་སྟེ། 
བདག་ཅག་ནི་དེ་བཞིན་གཤེགས་པ་ལ་བཀའ་དྲིན་གཟོ་བར་བགྱིད་ཀྱི་བཀའ་དྲིན་མི་གཟོ་བར་མི་བགྱིད་ལགས་སོ། །བཅོམ་ལྡན་འདས་གང་ལ་ལ་ཆོས་ཀྱི་རྣམ་གྲངས་འདི་ཐོས་ནས་མཆོད་པར་མི་བགྱིད་པ་དང་། ཆོས་སྨྲ་བ་དེ་དག་ལ་ཡང་
མཆོད་པ་མི་བགྱིད་པ་དེ་ལ་ནི་བདག་ཅག་གིས་སེམས་མི་བདེ་བར་བགྱིའོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་པོ་དེ་དག་ལ་ལེགས་སོ་ཞེས་བྱ་བ་བྱིན་ཏེ། རྒྱལ་པོ་ཆེན་པོ་དག་ལེགས་སོ། །རྒྱལ་པོ་ཆེན་པོ་དག་ཁྱོད་ལེགས་
ཀྱིས་རྟག་ཏུ་ཁྱོད་ཀྱིས་དེ་ལྟར་རྒྱིས་ཤིག །དེ་ནས་དྲི་ཟའི་བདག་པོ་ཆེན་པོ་ཡུལ་འཁོར་སྲུང་གིས་བཅོམ་ལྡན་འདས་ཀྱི་ཞབས་ལ་གཏུགས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སླད་མའི་
དུས་སླད་མའི་ཚེ་སེམས་ཅན་མི་དགེ་བ་སྤྱོད་པ་དང་། དེ་བཞིན་གཤེགས་པ་ལ་མ་དད་ཅིང་གློ་བར་མ་ཆུད་པ་དག་ཀྱང་འབྱུང་བར་འགྱུར་ཏེ། དེ་དག་ནི་ཆོས་ཀྱི་རྣམ་གྲངས་འདི་ལྟ་བུ་འཛིན་པར་མི་བགྱིད། ཀློག་པར་མི་བགྱིད་ཡི་གེར་

46-1-205b

འདྲིར་སྩོལ་བར་མི་བགྱིད། སྦྱིན་པ་སྦྱིན་པར་མི་བགྱིད། སྦྱིན་པའི་འབྲས་བུ་རྣམ་པར་སྨིན་པ་ལ་ཡིད་མི་ཆེས་ཤིང་། འཇིག་རྟེན་འདིའི་བདེ་བ་ལ་ལྟ་བར་བགྱིད་དེ། སེམས་ཅན་དེ་ལྟ་བུ་དེ་དག་གི་དོན་དུ་དེ་བཞིན་གཤེགས་པ་དང་འདྲ་བའི་མདོ་སྡེའི་
རྒྱལ་པོ་ཆེན་པོ་འདི་བཀའ་སྩལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཆོས་གཉིས་ཀྱིས་སེམས་ཅན་དམྱལ་བར་ལྟུང་བར་བྱེད་དེ། གཉིས་གང་ཞེ་ན་འདོད་ཆགས་དང་། ཞེ་སྡང་སྟེ། རིགས་ཀྱི་བུ་ཆོས་དེ་གཉིས་ཀྱིས་སེམས་
ཅན་དམྱལ་བར་ལྟུང་བར་བྱེད་དོ། །རིགས་ཀྱི་བུ་ཆོས་འདི་བཞིས་ནི་བདེ་འགྲོར་འགྲོ་བར་བྱེད་དེ། བཞི་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ལ་སེམས་སྙོམས་པ་དང་། བསམ་པ་ཡོངས་སུ་དག་པ་དང་། བདོག་པ་ཐམས་ཅད་ཡོངས་སུ་
གཏོང་བ་དང་། ཚངས་པར་སྤྱོད་པ་ལ་གནས་པའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །རྒྱལ་ཆེན་སྦྱིན་པ་འདི་ནི་རྫུ་འཕྲུལ་ཆེ། །ངན་སོང་ངན་འགྲོ་ཀུན་ལས་རབ་གྲོལ་བྱེད། །རྨོངས་པའི་
སེམས་ཅན་རྟག་ཏུ་འདོད་ལ་ཆགས། །ཆགས་པ་སྣ་ཚོགས་བརྒྱ་ཡིས་དེ་དག་མྱོས། །མདོ་སྡེ་འདི་ལ་དད་པར་མི་བྱེད་ཅིང་། །སངས་རྒྱས་བསྟན་ལ་སྦྱིན་པ་སྦྱིན་མི་བྱེད། །སེམས་ཅན་དེ་འདྲ་བ་དག་ངན་སོང་སར། །སྐྱེས་ནས་ཚོར་བ་དག་ཀྱང་མྱོང་བར་
འགྱུར། །སེམས་ཅན་དེ་དག་ལ་ནི་ཕན་པའི་ཕྱིར། །དེ་ལྟར་མདོ་སྡེ་མཐུ་ཆེན་རབ་ཏུ་བསྟན། །མདོ་སྡེ་འདི་ལ་རྟག་ཏུ་དད་པ་གང་། །དེ་ལ་གཤེད་བྱེད་མེད་ཅིང་སྡིག་བྱེད་མེད། །འབྱུང་པོ་གྲུལ་བུམ་ལྟོ་འཕྱེ་ཆེན་པོ་མེད། །རྒྱལ་པོ་དེ་ལ་སྡིག་པ་
བྱེད་པ་མེད། །ལེགས་འདྲི་ཉན་དུ་འཇུག་དང་མཆོད་པ་དང་། །ལེགས་པར་འཛིན་པའི་བསོད་ནམས་གང་ཡིན་པ། །སངས་རྒྱས་ཡེ་ཤེས་ཀྱིས་ནི་བསྔགས་པ་དེ། །སེམས་ཅན་ཀུན་གྱིས་བསྐལ་མང་བརྗོད་མ་ནུས། །གང་དག་རྟག་ཏུ་
སངས་རྒྱས་བྱང་ཆུབ་རྣམས། །རྗེད་ཅིང་མཆོད་པ་བྱེད་པ་དེ་དག་དང་། །ལ་ལ་གཞན་འགས་མདོ་སྡེ་འདི་ཉིད་ལས། །ཡི་གེ་འབྲུ་གཅིག་ཙམ་ཡང་ལེགས་བྲིས་ན། །དེ་ལ་བསོད་ནམས་སྔ་མ་དེ་ཡིས་ནི། །དེ་ཡི་བརྒྱ་སྟོང་ཆར་ཡང་མི་ཕོད་དོ། །དེ་ནས་བཅོམ་ལྡན་

46-1-206a

འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཆོས་ཀྱི་རྣམ་གྲངས་འདི་ལ་དད་དེ། 
མེ་ཏོག་དང་། བདུག་པ་དང་། སྤོས་དང་། མེ་ཏོག་ཕྲེང་དང་། བྱུག་པ་དང་། གདུགས་དང་། རྒྱལ་མཚན་དང་། བ་དན་རྣམས་ཀྱིས་མངོན་པར་མཆོད་པ་དང་ཆོས་སྨྲ་བ་དེ་དག་དང་། འདྲི་བ་རྣམས་དང་། འཛིན་པ་རྣམས་ལ་མཆོད་པ་ཆེན་
པོས་མཆོད་པ་བགྱིད་པ་དེ་དག་ནི་ཚེ་འདི་ཉིད་ལ་ཡོན་ཏན་དང་ཕན་ཡོན་མང་པོ་མཐོང་བར་འགྱུར་ཏེ། དེའི་ལུས་ལ་མིག་ནད་དང་། རྣ་ནད་དང་། ལྕེ་ནད་དང་། རིམས་ནད་དང་། དུག་དང་། མཚོན་དང་། མེས་མི་ཚུགས་ལགས་སོ། །དེ་དག་ལ་ཕ་མས་
ཡིད་བདེ་བ་དང་། བུ་དང་ཆུང་མས་ཡིད་བདེ་བ་དང་ཁྱིམ་གྱིས་ཡིད་བདེ་བ་འབྱུང་བར་འགྱུར་ལགས་སོ། །གཡུལ་འགྱེད་པ་ཐམས་ཅད་དུ་ཡང་རྒྱལ་བར་འགྱུར་རོ། །འགུམ་པའི་ཚེ་ཡང་དེ་བཞིན་གཤེགས་པ་མི་འཁྲུགས་པས་ཡང་
དག་པར་དབུགས་འབྱིན་པར་མཛད་དེ། ཀྱེ་མི་ཁྱོད་ཚུར་ཤོག །འཇིག་རྟེན་གྱི་ཁམས་བདེ་བ་ཅན་དུ་སོང་ཤིག །སྐྱེས་བུ་ཆེན་པོ་ཁྱོད་ནི་དགེ་བའི་རྩ་བ་འབར་བ་དང་ལྡན་ཏེ། གང་དུ་འདོད་པའི་གནས་རྣམས་སུ་སྐྱེ་བར་འགྱུར་རོ་ཞེས་
གསུངས་སོ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ལེགས་སོ་ལེགས་སོ། །དེ་བཞིན་གཤེགས་པས་འདི་འཛམ་
བུ་གླིང་དུ་བཞག་པ་ནི་དེ་བཞིན་གཤེགས་པའི་ཕྲིན་ལས་བགྱིད་པ་ལགས་སོ། །བཅོམ་ལྡན་འདས་རིག་སྔགས་ཆེན་པོ་འདི་ནི་ལས་ཐམས་ཅད་རྣམ་པར་དག་པར་བགྱིད་པ་ལགས་སོ། །བཅོམ་ལྡན་འདས་ཀྱིས་
བཀའ་སྩལ་པ། རིགས་ཀྱི་བུ་འདི་ནི་སེམས་ཅན་བསོད་ནམས་ཆུང་ངུ་དག་གི་ཡུལ་ན་སྤྱོད་པར་མི་འགྱུར་རོ། །སེམས་ཅན་བསོད་ནམས་ཆུང་ངུ་དག་གིས་ཐོས་པར་མི་འགྱུར་ལག་དུ་འོང་བར་མི་འགྱུར་རོ་སངས་རྒྱས་ཀྱི་

46-1-206b

མཐུས་གང་གི་ལག་ཏུ་འོངས་སམ། དེ་བཞིན་གཤེགས་པས་ཉན་དུ་བཅུག་ན། དེས་ཐོས་པའི་མོད་ཁོ་ན་ལ་བྲི་བར་བྱ། ཡི་གེར་འདྲིར་གཞུག་པར་བྱ་བཀླག་པར་བྱའོ། །རིགས་ཀྱི་བུ་དེ་བཞིན་གཤེགས་པ་དང་འདྲ་བའི་ཆོས་ཀྱི་རྣམ་
གྲངས་འདིའི་མིང་ཙམ་ཐོས་ན་ཡང་ངན་འགྲོས་འཇིགས་པར་མི་འགྱུར་རོ། །ལ་ལ་ཞིག་གིས་ཆོས་ཀྱི་རྣམ་གྲངས་འདི་ལས་ཡིག་འབྲུ་གཅིག་ཙམ་འམ། མིང་ཙམ་ཉན་དུ་བཅུག་གམ། ཕྱོགས་སམ། ཡུལ་འགའ་ཞིག་ཏུ་
ལུང་འབོག་པར་བྱེད་ན་དེ་ནི་དེ་བཞིན་གཤེགས་པ་དང་འདྲ་བར་བལྟ་བར་བྱའོ། །དེ་ནི་དེ་བཞིན་གཤེགས་པ་དང་འདྲ་བ་ཁོ་ནར་མཆོད་པར་བྱའོ། །དེ་ནི་ཕ་མ་དང་འདྲ་བར་བལྟ་བར་བྱའོ། །རིགས་ཀྱི་བུ་ཆོས་ཀྱི་རྣམ་གྲངས་འདི་ནི་དེ་བཞིན་
གཤེགས་པ་བདུན་པ་རྣམས་ཀྱིས་གསུངས་སོ། །བྱང་ཆུབ་སེམས་དཔའ་ཐམས་ཅད་ཀྱིས་རྗེས་སུ་ཡི་རང་ངོ་། །ལྷ་ཐམས་ཅད་ཀྱིས་རྗེས་སུ་བཟུང་ངོ་། །ཡོངས་སུ་བསྐྱངས་སོ། །ཆོས་ཀྱི་རྣམ་གྲངས་འདི་ནི་བྱང་ཆུབ་སེམས་
དཔའ་རྣམས་ཀྱི་ཕ་མ་ལྟ་བུའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་སླད་མའི་དུས་སླད་མའི་ཚེ་ཆོས་ཀྱི་རྣམ་གྲངས་འདི་རྟག་ཏུ་རྒྱུན་མི་འཆད་པར་ཐམས་
ཅད་རྫོགས་པར། གང་དུ་སྤྱོད་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཆོས་ཀྱི་རྣམ་གྲངས་འདི་ནི་ཀླུའི་རྒྱལ་པོ་རྒྱ་མཚོའི་གནས་དང་། སུམ་བཅུ་རྩ་གསུམ་པའི་ལྷ་རྣམས་ཀྱི་གནས་
སུ་ཐམས་ཅད་རྫོགས་པར་གནས་པར་འགྱུར་རོ། །ལྷོ་ཕྱོགས་སུ་ཡང་སྤྱོད་པར་འགྱུར་རོ། །འཛམ་བུའི་གླིང་དུ་ནི་ཅུང་ཟད་ཙམ་གནས་པར་འགྱུར་ཏེ། གནས་ཁ་ཅིག་ཏུ་ནི་སྤྱོད་ཁ་ཅིག་ཏུ་ནི་མི་སྤྱོད་པར་འགྱུར་རོ། །དེ་ནས་
བཅོམ་ལྡན་འདས་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་ཆོས་ཀྱི་རྣམ་གྲངས་འདི་གཟུང་བར་བྱ་བ་དང་། བཀླག་པར་བྱ་བ་དང་། མཆོད་པར་བྱ་བ་དང་། ཉན་ཏུ་གཞུག་པར་བྱ་བའི་

46-1-207a

ཕྱིར་ཁྱོད་ལ་གཏད་དོ། །དེ་བཞིན་གཤེགས་པ་དང་འདྲ་བའི་ཆོས་ཀྱི་རྣམ་གྲངས་འདི་ནུབ་པར་གྱུར་ཏ་རེ། འདི་ནི་དེ་བཞིན་གཤེགས་པའི་བྱ་བ་བྱེད་པ་ཡིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལག་
ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་གཟུང་བར་བགྱི་བ་དང་། བཀླག་པར་བགྱི་བ་དང་། མཆོད་པར་བགྱི་བ་དང་། ཉན་དུ་གཞུག་པར་བགྱི་བའི་སླད་དུ་བདག་གིས་གཟུང་ལགས་སོ། །
ཆོས་སྨྲ་བ་དེ་དག་ལ་ཡང་མཆོད་པར་བགྱི། རྗེད་པར་བགྱིའོ། །གང་ཆོས་ཀྱི་རྣམ་གྲངས་འདི་དང་། ཆོས་སྨྲ་བ་དེ་དག་ལ་མཆོད་པར་བགྱིད་པ་དེ་ནི་བདག་ལ་ཡང་མཆོད་པར་བགྱིད་པ་ལགས་ཏེ་དེ་ནི་བདག་གིས་བསྲུང་བར་བགྱི་སྟེ། ཡོངས་སུ་བསྐྱང་བར་བགྱི་སྟེ། 
བདག་ནི་དེ་བཞིན་གཤེགས་པ་ལ་བཀའ་དྲིན་གཟོ་བར་བགྱིད་དོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་ལེགས་སོ་ཞེས་བྱ་བ་བྱིན་ཏེ། ལག་ན་རྡོ་རྗེ་ལེགས་སོ་ལེགས་སོ། །ཁྱོད་ཀྱིས་དེ་ལྟར་གྱིས་ཤིག །
དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་ལ་ཕྱག་འཚལ་ལོ། །ཆོས་ཉན་པ་དེ་དག་དང་། ཡི་གེར་འདྲི་
བ་རྣམས་དང་། འཛིན་པ་རྣམས་དང་། ཀློག་པ་རྣམས་དང་། ཉན་དུ་འཇུག་པ་རྣམས་ལ་ཡང་མངོན་པར་མཆོད་པར་བགྱིའོ། །བཅོམ་ལྡན་འདས་གལ་ཏེ་སེམས་ཅན་བསོད་ནམས་ཆུང་ངུ་དག་གི་ཡུལ་དུ་ཆོས་ཀྱི་རྣམ་གྲངས་འདི་བྱུང་ངམ་
གལ་ཏེ་རྒྱལ་པོ་ཆོས་དང་མི་ལྡན་པའི་ཡུལ་དུ་ཆོས་ཀྱི་རྣམ་གྲངས་འདི་བྱུང་སྟེ་སྤྱོད་པ་ན་ཆོས་ཀྱི་རྣམ་གྲངས་འདི་ལ་རྒྱལ་པོ་དེ་མཆོད་པར་མི་བགྱིད། དད་པར་མི་བགྱིད་ལ། ཆོས་སྨྲ་བ་དེ་དག་དང་། ཡི་གེར་འདྲི་བ་རྣམས་དང་འཛིན་པ་
རྣམས་དང་། ཀློག་པ་རྣམས་དང་། ཉན་དུ་འཇུག་པ་རྣམས་དང་། ལུང་འབོག་པ་རྣམས་ལ་ཡང་མཆོད་པར་མི་བགྱིད། །བླ་མའི་འདུ་ཤེས་སྐྱེད་པར་མི་བགྱིད་ན། དེས་ན་ཆོས་ཀྱི་རྣམ་གྲངས་འདི་ནུབ་པར་འགྱུར་ལགས་སོ། །དེའི་ཡུལ་དུ་

46-1-207b

སྡིག་པའི་ཆོས་མང་པོ་དང་། ཡིད་མི་བདེ་བ་མང་པོ་འབྱུང་བར་འགྱུར་ཏེ། དེས་ན་རྒྱལ་རིགས་རྒྱལ་པོ་དེས་བདག་གི་ཡུལ་དུ་ཆོས་ནུབ་པར་གྱུར་ཏོ་སྙམ་དུ་འཚལ་བར་བགྱི་སྟེ། དེས་ཆོས་སྤྱད་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། 
རིགས་ཀྱི་བུ་ལེགས་སོ་ལེགས་སོ། །དེ་ནི་དེ་བཞིན་ཏེ། རིགས་ཀྱི་བུ་དཔེར་ན་རིགས་ཀྱི་བུ་འམ། རིགས་ཀྱི་བུ་མོ་དད་པ་ཅན་ལ་ལ་ཞིག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་སྙེད་ལ་
ལོ་བརྒྱ་འམ་ལོ་སྟོང་གི་བར་དུ་བླ་ན་མེད་པའི་མཆོད་པས་མཆོད་པ་བྱེད་ལ། འཛམ་བུའི་གླིང་འདི་རིན་པོ་ཆེས་ཡོངས་སུ་གང་བར་བྱས་ཏེ། ཉན་ཐོས་རྣམས་དང་། རང་སངས་རྒྱས་རྣམས་ལ་སྦྱིན་པ་བྱིན་པ་དང་བདག་ཉིད་ཡོངས་སུ་གཏོང་བ་གང་ཡིན་པ་དང་། ཆུང་མ་དང་། 
བུ་དང་། བུ་མོ་ཡོངས་སུ་གཏོང་བ་གང་ཡིན་པ་དང་། གང་གིས་ཆོས་ཀྱི་རྣམ་གྲངས་འདི་མཆོད་པ་འམ་ཡི་གེར་འདྲིའམ་ཡི་གེར་འདྲིར་འཇུག་པ་འམ། ཀློག་པ་འམ། མེ་ཏོག་དང་། བདུག་པ་དང་། སྤོས་དང་། མེ་ཏོག་ཕྲེང་བ་རྣམས་ཀྱིས་མཆོད་དེ་ཆོས་
ཀྱི་རྣམ་གྲངས་འདིའི་ཕྱིར་ཞོའི་བརྒྱད་ཆ་ཅིག་ཙམ་སྦྱིན་པ་བྱིན་ན་དེ་ནི་དེ་བས་ཆེས་བསོད་ནམས་མང་དུ་སྐྱེད་པར་འགྱུར་ཏེ། དགེ་བའི་རྩ་བ་སྔ་མ་ཤོས་དེ་ནི་བརྒྱའི་ཆར་ཡང་མི་ཕོད་ན། གང་བླ་མའི་འདུ་ཤེས་བསྐྱེད་དེ། ཆོས་ཀྱི་རྣམ་གྲངས་འདི་ལ་གདུགས་
དང་། རྒྱལ་མཚན་དང་། བ་དན་རྣམས་ཀྱིས་མཆོད་པ་བྱེད་ཅིང་། ཆོས་སྨྲ་བ་དེ་དག་ལ་ཡང་གོས་སམ། རྒྱན་ནམ། གདུགས་སམ། བཞོན་པ་འམ། གྲོང་ངམ། གྲོང་ཁྱེར་རམ། ས་གཞི་བ་ལང་གི་རྨིག་རྗེས་ཙམ་ཡང་ཆོས་ཀྱི་རྣམ་གྲངས་འདིའི་
ཕྱིར་སྦྱིན་པ་བྱེད་ལ། ལུས་འདི་ནི་སྙིང་པོ་མེད་པའོ་སྙམ་དུ་ཤེས་ཤིང་རྨི་ལམ་ལྟ་བུའོ། །སྒྱུ་མ་ལྟ་བུའོ། །ཆུའི་ཆུ་བུར་ལྟ་བུའོ་སྙམ་དུ་ཤེས་ཏེ། ལུས་འདི་ལ་ནི་སྙིང་པོ་མེད་དོ་ཆོས་ཐམས་ཅད་ནི་མི་རྟག་པའོ་སྙམ་དུ་ཤེས་ན། དེ་ནི་དེ་བཞིན་གཤེགས་པས་ལུང་བསྟན་པ་
ཁོ་ན་ཡིན་ནོ། །དེ་བཞིན་གཤེགས་པས་དབུགས་ཕྱུང་བ་ཁོ་ན་ཡིན་ནོ། །དེས་ནི་དེ་བཞིན་གཤེགས་པ་ཐམས་ཅད་མཆོད་པ་ཡིན་ནོ། །ཕྱིས་ཀྱང་མཐར་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་མངོན་པར་རྫོགས་པར་འཚང་

46-1-208a

རྒྱ་བར་འགྱུར་རོ། །དེ་ནས་དེའི་ཚེ་བྱང་ཆུབ་སེམས་དཔའ་ཐམས་ཅད་དང་། ལྷའི་དབང་པོ་རྣམས་དང་། ཀླུའི་དབང་པོ་རྣམས་དང་། གནོད་སྦྱིན་གྱི་དབང་པོ་རྣམས་དང་། ལྷ་མ་ཡིན་གྱི་དབང་པོ་རྣམས་དང་། ནམ་མཁའ་ལྡིང་གི་
དབང་པོ་རྣམས་དང་། མི་འམ་ཅིའི་དབང་པོ་རྣམས་ཀྱིས་ཚིག་འཐུན་པར་བཅོམ་ལྡན་འདས་ལ་ལེགས་སོ་ཞེས་བྱ་བ་གསོལ་ཏེ། བཅོམ་ལྡན་འདས་ལེགས་སོ་ལེགས་སོ། །འདི་ནི་ཆོས་ཀྱི་འཁོར་ལོ་ལན་གཉིས་བསྐོར་བར་གྱུར་ཏོ། །བཅོམ་ལྡན་
འདས་བདག་ཅག་ཀྱང་གཅིག་ཏུ་མཐུན་པར་བགྱིས་ཏེ། ཆོས་ཀྱི་རྣམ་གྲངས་འདི་ལ་མཆོད་པར་བགྱིའོ། །ཡུལ་དེ་ཡང་བསྐྱང་བར་བགྱིའོ། །ཆོས་སྨྲ་བ་དེ་ལ་ཡང་མཆོད་པར་བགྱི། བསྲུང་བར་བགྱི། ལུང་བསྟན་པར་བགྱི། 
དབུགས་དབྱུང་བར་བགྱིའོ། །གང་ལ་ལ་ཆོས་སྨྲ་བ་དང་། ཡི་གེར་འདྲི་བ་དང་། འཛིན་པ་དང་། ཀློག་པ་དེ་ལ་བླ་མའི་འདུ་ཤེས་སྐྱེད་པ་དང་། ཕའི་འདུ་ཤེས་དང་། བུའི་འདུ་ཤེས་སྐྱེད་པ་དེ་ལ་ནི་བདག་ཅག་གིས་ཀྱང་ཕའི་འདུ་ཤེས་བསྐྱེད་
པར་བགྱིའོ། །གལ་ཏེ་ཆོས་ཀྱི་རྣམ་གྲངས་དེ་མ་རུང་བར་བགྱིད་ན་ནི་དེའི་ཡུལ་ཐམས་ཅད་དུ་བུ་དང་མཆིས་འབྲང་དང་ཕ་མ་ཡིད་མི་བདེ་བར་འགྱུར་ལ། དེའི་འོག་ཏུ་སེམས་ཅན་དམྱལ་བར་སྐྱེ་བར་འགྱུར་རོ། །དེ་ནས་བཅོམ་ལྡན་འདས་
ཀྱིས་བྱང་ཆུབ་སེམས་དཔའ་དེ་དག་དང་། ལྷའི་དབང་པོ་ནས་མིའི་དབང་པོའི་བར་དེ་དག་ལ་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ་དག་ལེགས་སོ་ལེགས་སོ། །གྲོགས་པོ་དག་ཁྱེད་ཀྱིས་དེ་ལྟར་གྱིས་ཤིག །ཆོས་ཀྱི་རྣམ་
གྲངས་འདི་ཉན་དུ་གཞུག་པ་དང་། མཆོད་པར་བྱ་བའི་ཕྱིར་ཁྱོད་ལ་གཏད་དོ། །དེ་བཞིན་གཤེགས་པ་དང་འདྲ་བའི་ཆོས་ཀྱི་རྣམ་གྲངས་འདི་མྱུར་དུ་ནུབ་པར་གྱུར་ཏ་རེ། ལ་ལ་ཞིག་གིས་སྤངས་ཏེ། སེམས་ཅན་དམྱལ་བར་ལྷུང་ང་རེ། 
ཆོས་ཀྱི་རྣམ་གྲངས་འདི་ནི་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བར་འགྱུར་བའོ། །ཁྱེད་ཕྱིས་འགྱོད་པར་གྱུར་ཏ་རེ། ཆོས་ཀྱི་རྣམ་གྲངས་འདི་བསྟན་པ་ན། ས་ཆེན་པོ་འདི་གཡོས་ཏེ། གཡོས་རབ་ཏུ་གཡོས་སོ། །

46-1-208b

སྲོག་ཆགས་དྲུག་སྟོང་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བཅོམ་ལྡན་
འདས་གང་ལ་ལ་ཆོས་ཀྱི་རྣམ་གྲངས་འདི་ཡི་གེར་འདྲི་བ་དང་། ཡི་གེར་འདྲིར་སྩོལ་བ་དང་། འཛིན་པ་དང་། ཀློག་པ་དང་། ཀུན་ཆུབ་པར་བགྱིད་པ་དང་། གཞན་དག་ལ་ཡང་རྒྱས་པར་ཡང་དག་པར་སྟོན་པ་དང་མེ་ཏོག་དང་། བདུག་པ་དང་། སྤོས་དང་། མེ་ཏོག་
ཕྲེང་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་རྣམས་ཀྱིས་མཆོད་པར་བགྱིད་ན། བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་དེ་བསོད་ནམས་ཇི་སྙེད་ཅིག་སྐྱེད་པར་འགྱུར་
ལགས། གང་དུ་ནི་སྐྱེ་བར་འགྱུར་ལགས། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ལ་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ་ལེགས་སོ་ལེགས་སོ། །ཁྱོད་ཀྱིས་དེ་བཞིན་
གཤེགས་པ་ལ་འདི་ཞུས་པ་ལ་འདི་ཞུས་པ་ནི་ལེགས་སོ། །རིགས་ཀྱི་བུ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་བཤད་དོ། །རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཆོས་ཀྱི་རྣམ་གྲངས་འདི་ཡི་
གེར་འདྲི་བ་དང་། ཡི་གེར་འདྲིར་འཇུག་པ་དང་། འཛིན་པ་དང་། ཀློག་པ་དང་། ཀུན་ཆུབ་པར་བྱེད་པ་དང་། གཞན་དག་ལ་ཡང་རྒྱ་ཆེར་ཡང་དག་པར་སྟོན་པ་དང་། མེ་ཏོག་དང་། བདུག་པ་དང་། སྤོས་དང་། མེ་ཏོག་ཕྲེང་དང་། བྱུག་
པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་རྣམས་ཀྱིས་མཆོད་པ་བྱེད་པ་དེ་ནི་འདི་ནས་ཤི་འཕོས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །རིགས་ཀྱི་བུ་གང་ལ་ལས་སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེས་ཡོངས་སུ་གང་བར་བྱས་ཏེ། ཉན་ཐོས་རྣམས་དང་། རང་སངས་རྒྱས་རྣམས་ལ་སྦྱིན་པ་བྱིན་པ་བས་ནི་ཆོས་ཀྱི་རྣམ་གྲངས་འདི་འཛིན་པ་དང་། མཆོད་པ་དང་ཡི་གེར་

46-1-209a

འདྲི་བ་དང་། ཡི་གེར་འདྲིར་འཇུག་པ་དང་། ཆོས་སྨྲ་བ་དེ་དག་ལ་ཡང་མེ་ཏོག་དང་། བདུག་པ་དང་། སྤོས་དང་། མེ་ཏོག་ཕྲེང་དང་། བྱུག་པ་ལ་སོགས་པས་མཆོད་པ་འདི་རིགས་ཀྱི་བུ་འམ། རིགས་ཀྱི་
བུ་མོ་དེའི་བསོད་ནམས་ཆེས་མང་དུ་འཕེལ་བར་འགྱུར་གྱི། །རིགས་ཀྱི་བུ་སྔ་མ་གང་ཡིན་པ་དེས་ནི་དེ་སྙེད་བསགས་པ་མ་ཡིན་ནོ། །རིགས་ཀྱི་བུ་གཞན་ཡང་རིགས་ཀྱི་བུ་འམ། རིགས་ཀྱི་བུ་མོ་གང་གིས་བྱང་ཆུབ་
སེམས་དཔའི་སྤྱོད་པ་སྤྱད་དེ། བུ་དང་། བུ་མོ་དང་། ཆུང་མ་ཡོངས་སུ་གཏོང་བ་དང་། ལག་པ་དང་། རྐང་པ་དང་། མགོ་བོ་ཡོངས་སུ་གཏོང་བ་བས་ནི་གང་གིས་ཆོས་ཀྱི་རྣམ་གྲངས་འདི་ཡི་གེར་འདྲི་བ་འམ། །ཡི་གེར་
འདྲིར་འཇུག་གམ་ཀློག་གམ། དད་པར་བྱེད་པ་འདི་བསོད་ནམས་ཆེས་མང་དུ་འཕེལ་བར་འགྱུར་གྱི། རིགས་ཀྱི་བུ་སྔ་མ་གང་ཡིན་པ་དེས་ནི་དེ་སྙེད་བསགས་པ་མ་ཡིན་ནོ། །ཆོས་སྨྲ་བའི་རིགས་ཀྱི་བུ་དེ་ནི་དེ་བཞིན་གཤེགས་
པ་དང་འདྲ་བ་ཁོ་ནར་བལྟ་བར་བྱའོ། །དེ་བཞིན་གཤེགས་པ་དང་འདྲ་བ་ཁོ་ནར་མཆོད་པ་མངོན་པར་འདུ་བྱ་བར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་
གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་ནི་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱིས་ཕྱག་བགྱི་བའི་འོས་ལགས་སོ། །ཆོས་སྨྲ་བ་དེ་ལ་ཡང་ཕྱག་
བགྱི་བ་དང་མཆོད་པར་བགྱི་བའི་འོས་ལགས་སོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་ནི་རྫུ་འཕྲུལ་ཆེ་བ་ལགས་ཏེ། དེ་བས་ན་རིགས་ཀྱི་བུ་འམ། རིགས་ཀྱི་བུ་མོ་དད་པ་ཅན་གྱིས་ཆོས་ཀྱི་རྣམ་གྲངས་འདི་གུས་པར་
བགྱིས་ཏེ་མཉན་པར་བགྱིའོ། །གུས་པར་བགྱིས་ཏེ་ཡིད་ལ་བགྱིའོ། །བཅོམ་ལྡན་འདས་ས་ཕྱོགས་གང་ན་ཆོས་ཀྱི་རྣམ་གྲངས་འདི་སྤྱོད་པའི་ས་ཕྱོགས་དེ་ནི་དེ་བཞིན་གཤེགས་པས་བྱིན་གྱིས་བརླབས་པ་ལགས་སོ། །

46-1-209b

ས་ཕྱོགས་དེ་ནི་མཆོད་རྟེན་དུ་གྱུར་པར་བལྟ་བར་བགྱིའོ། །ས་ཕྱོགས་དེ་ནི་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱིས་ཕྱག་བགྱི་བའི་གནས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་
དེ་དེ་བཞིན་ནོ། །དེ་དེ་བཞིན་ཏེ། རིགས་ཀྱི་བུ་ས་ཕྱོགས་དེ་ནི་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱིས་ཕྱག་བྱ་བའི་གནས་ཡིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འཕགས་པ་སྤྱན་རས་
གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ལ་ལ་ཆོས་ཀྱི་རྣམ་གྲངས་འདི་ལ་ཡང་མཆོད་པ་བགྱིད་ལ་འདིའི་སླད་དུ་མཆོད་པ་དང་བཀུར་སྟི་ལ་བརྩོན་པའི་སེམས་ཀྱིས་སྦྱིན་པ་ཡུངས་འབྲུ་
ཙམ་སྩལ་ན། དེའི་མཚམས་མེད་པ་ལྔའི་ལས་རྣམས་ཡོངས་སུ་ཟད་པར་འགྱུར་ལ། བསྐལ་པ་དགུ་ཁྲིའི་བར་དུ་ལོངས་སྤྱོད་ཆེ་བའི་རིགས་རྣམས་སུ་སྐྱེ་བར་འགྱུར་རོ། །བསྐལ་པ་བརྒྱད་ཁྲིའི་བར་དུ་འཁོར་ལོས་སྒྱུར་བའི་རྒྱལ་
པོར་འགྱུར་རོ། །སངས་རྒྱས་ཀྱི་ཞིང་ཡོངས་སུ་དག་པ་རྣམས་སུ་སྐྱེ་བར་འགྱུར་རོ། །གཤིས་ངན་དུ་འགུམ་པར་མི་འགྱུར་རོ། །ངན་སོང་དུ་སྐྱེ་བར་མི་འགྱུར། བསམ་པ་ཐམས་ཅད་ཡོངས་སུ་རྫོགས་པར་འགྱུར་རོ། །
དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་སྔོན་བྱུང་བ་འདས་པའི་དུས་བསྐལ་པ་བགྲང་བ་ལས་
འདས་པ་ན། དེ་བཞིན་གཤེགས་པ་ཆོས་ཀྱི་ཡེ་ཤེས་མཐའ་ཡས་པ་ཆགས་པ་མེད་ཅིང་རྡུལ་དང་བྲལ་བའི་རྒྱལ་པོའི་ཏོག་ཅེས་བྱ་བ་བྱུང་སྟེ། དེར་ངས་བྲམ་ཟེའི་གཟུགས་ཀྱིས་ཆོས་ཀྱི་རྣམ་གྲངས་འདི་ཐོས་སོ། །ཐོས་ནས་
ཀྱང་སེམས་ཅན་རྣམས་ལ་བཤད་དོ། །དེར་ངས་རྙེད་པའི་མོད་ལ་ཆོས་ལ་བཟོད་པ་ཐོབ་སྟེ། ཆོས་རྣམས་ལ་ཆོས་ཀྱི་མིག་རྣམ་པར་དག་གོ། །སེམས་ཅན་གང་དག་གིས་ཐོས་པ་དེ་དག་ཐམས་ཅད་ཀྱང་ངན་སོང་ཐམས་ཅད་ལས་

46-1-210a

ཡོངས་སུ་གྲོལ་ཏེ། ནམ་ཡང་ངན་སོང་དུ་མི་འགྲོ་བར་འགྱུར་ལ། ཆོས་རྣམས་ལ་ཆོས་ཀྱི་མིག་རྣམ་པར་དག་སྟེ། སེམས་ཅན་དེ་དག་ཐམས་ཅད་མཐར་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
སངས་རྒྱས་སོ། །མངོན་པར་རྫོགས་པར་འཚང་རྒྱ་བར་འགྱུར་རོ། །རིགས་ཀྱི་བུ་ངས་ཀྱང་ལོ་མང་པོ། ལོ་བརྒྱ་ཕྲག་མང་པོ། ལོ་སྟོང་ཕྲག་མང་པོ། ལོ་འབུམ་ཕྲག་མང་པོར་སེམས་ཅན་འདོད་ཆགས་དང་། ཞེ་སྡང་དང་། གཏི་མུག་
གིས་དཀྲིས་པ་རྣམས་ཀྱི་ཕྱིར་ནོར་དང་། འབྲུ་དང་། འགྲོན་བུ་དང་། གསེར་ཡོངས་སུ་གཏང་བ་བྱས་ནས། མཐར་ཀྱིས་ལག་པ་དང་། རྐང་པ་དང་། མིག་དང་། མགོ་བོ་དང་། སྡུག་པའི་བུ་དང་། བུ་མོའི་བར་དུ་ཡོངས་སུ་གཏང་བར་བྱས་སོ། །རྐང་
དང་། རུས་པ་ཡོངས་སུ་གཏོང་བ་དང་། ཁྱིམ་དང་། གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་ཡོངས་སུ་གཏོང་བ་བྱས་སོ། །ལོ་འབུམ་ཕྲག་དུ་མར་ཚངས་པར་སྤྱོད་པ་ཡང་སྤྱད་དོ། །ཁྱིམ་པ་དང་འདྲིས་
པར་མ་བྱས། རྒྱལ་སྲིད་ལ་དགའ་བ་དང་། ནོར་ལ་དགའ་བ་དང་། ཡུལ་འཁོར་དང་། ཕོ་བྲང་འཁོར་ལ་དགའ་བ་དང་། བུ་དང་བུ་མོ་ལ་དགའ་བ་དང་། ཆུང་མ་ལ་དགའ་བར་མ་བྱས་སོ། །གཅིག་ཏུ་ངེས་པར་ཚངས་པར་སྤྱོད་པ་ལ་གནས་
པ་བརྟེན་ཏོ། །གཅིག་ཏུ་ངེས་པར་སྦྱིན་པ་བྱིན་ནོ། །གཅིག་ཏུ་ངེས་པར་སངས་རྒྱས་དང་། ཆོས་དང་། དགེ་འདུན་རྣམས་ལ་མཆོད་པ་དང་། བསྙེན་བཀུར་བྱས་སོ། །གཅིག་ཏུ་ངེས་པར་ངས་ཆོས་སྨྲ་བ་རྣམས་ལ་མེ་ཏོག་དང་། བདུག་པ་དང་། 
སྤོས་དང་། མེ་ཏོག་ཕྲེང་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་རྣམས་ཀྱིས་བཀུར་སྟིར་བྱས། བླ་མར་བྱས། རི་མོ་བྱས། མཆོད་པ་བྱས་སོ། །དགེ་བའི་བཤེས་གཉེན་མང་ངོ་ཡང་ངས་
བསྙེན་བཀུར་བྱས་སོ། །དེ་ཡང་ངས་འཁོར་བ་ལ་སྐྱོ་བའི་ལུས་ཀྱིས་ལུས་རྣམས་བྱིན་ལ། མིག་རྣམས་དང་རང་གི་ཤ་རྣམས་དང་། རྐང་དང་། རུས་པ་རྣམས་དང་། རང་གི་ལྤགས་པ་རྣམས་ཀྱང་བྱིན་ན། ཕྱི་རོལ་གྱི་དངོས་པོ་གཞན་དག་ལྟ་ཅི་སྨོས་ཏེ། 

46-1-210b

ང་འགྱོད་པར་གྱུར་པ་ཡང་མེད་དོ། །དེ་ནས་བྱང་ཆུབ་སེམས་དཔའ་དེ་དག་དང་། ལྷའི་དབང་པོ་རྣམས་དང་། ཀླུའི་དབང་པོ་རྣམས་དང་། གནོད་སྦྱིན་གྱི་དབང་པོ་རྣམས་དང་། ལྷ་མ་ཡིན་གྱི་དབང་པོ་རྣམས་དང་། མིའི་དབང་པོ་རྣམས་དང་། 
སྤྱོད་པ་པ་དང་། ཀུན་དུ་རྒྱུ་དང་། གཅེར་བུ་པ་རྣམས་ཀྱིས་དེ་བཞིན་གཤེགས་པའི་སྔོན་གྱི་ཚུལ་འདི་ཐོས་ནས། ཆོས་ཀྱི་ཤུགས་ཀྱིས་མཆི་མ་བླགས་ཏེ། དེ་དག་ཐམས་ཅད་ཀྱིས་ཆོས་ལ་བཟོད་པ་ཐོབ་པར་གྱུར་ཏོ། །བཅོམ་
ལྡན་འདས་ཀྱིས་བཀའ་སྩལ་པ། གྲོགས་པོ་དག་ཆོས་ཀྱི་རྣམ་གྲངས་འདི་ཟུང་ཤིག །འདི་ནི་སེམས་ཅན་རྣམས་ལ་དེ་བཞིན་གཤེགས་པའི་བྱ་བ་བྱེད་པ་ཡིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འཕགས་
པ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་ལ་དད་པ་དང་། མཆོད་པ་བགྱིད་པ་དང་། འཛིན་པ་དང་། ཀློག་པ་དང་། ཀུན་ཆུབ་པར་བགྱིད་པའི་སེམས་ཅན་དེ་
དག་ནི་དཀོན་ལགས་སོ། །གང་དག་སུག་པར་མཆིས་པ་དེ་དག་ནི་སངས་རྒྱས་བྱུང་བ་དང་འདྲ་བར་བལྟ་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །རིགས་ཀྱི་བུ་དེ་དེ་
བཞིན་ཏེ། རིགས་ཀྱི་བུ་འམ། རིགས་ཀྱི་བུ་གང་ཆོས་ཀྱི་རྣམ་གྲངས་འདི་ལ་མཆོད་པ་བྱེད་པ་དང་། ཡི་གེར་འདྲི་བ་དང་། ཡི་གེར་འདྲིར་འཇུག་པ་དང་འཛིན་པ་དང་། ཀློག་པ་དང་། ཆོས་སྨྲ་བ་དེ་དག་ལ་ཡང་མེ་ཏོག་དང་། བདུག་
པ་དང་། སྤོས་དང་། མེ་ཏོག་ཕྲེང་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་རྣམས་ཀྱིས་མཆོད་པ་བྱེད་པ་དེ་དག་ནི་དཀོན་ཏེ། དེ་དག་ནི་དེ་བཞིན་གཤེགས་པ་དང་འདྲ་བ་ཁོ་ནར་བལྟ་
བར་བྱའོ། །རིགས་ཀྱི་བུ་སེམས་ཅན་གང་དག་ཆོས་ཀྱི་རྣམ་གྲངས་འདི་ལ་མཆོད་པ་མི་བྱེད་པ་དང་། འཛིན་པར་མི་བྱེད་པ་དང་། ཀློག་པར་མི་བྱེད་པ་དང་། སྦྱིན་པ་མི་བྱེད་པ་དག་འབྱུང་བར་འགྱུར་ཏེ། དེ་དག་ནི་བསྐལ་པ་དུ་མ་

46-1-211a

དང་། བསྐལ་པ་བརྒྱ་དང་། བསྐལ་པ་སྟོང་གི་བར་དུ་འཁོར་བ་ན་འཁོར་བར་འགྱུར་ཏེ། སྡུག་བསྔལ་བརྒྱ་དག་ཉམས་སུ་མྱོང་བར་འགྱུར་རོ། །འདི་ལྟ་སྟེ་དཔེར་ན་བུད་མེད་སྦྲུམ་མ་ཞིག་ཡོད་ལ། བུད་མེད་སྦྲུམ་མ་དེའི་ལྟོ་ན་བུ་
ཆགས་པ་དེ་ཡང་ཁྱེའུ་འམ། བུ་མོ་ཞིག་ཏུ་གྱུར་ན། བུད་མེད་དེའི་བུ་དེ་གང་གི་ཚེ་ཟླ་བ་གཅིག་ལོན་ནམ། ཟླ་བ་གཉིས་ལོན་ནམ། ཟླ་བ་གསུམ་ལོན་ནམ། ཟླ་བ་ལྔ་ལོན་ནམ། ཟླ་བ་ཚང་བའི་བར་དུ་གྱུར་པ་དེ་ཙམ་དུ་བུད་མེད་དེའི་ལུས་
ནོན་པར་འགྱུར་ཏེ། ཚིགས་ཀྱང་འབྱེ་བར་འགྱུར། ལྟོ་ཡང་ཆུང་བར་འགྱུར། སྐད་ཀྱི་གཅོམ་ཡང་ཆུང་བར་འགྱུར་ཏེ། ཚོར་བ་དེ་དག་གིས་ཡོངས་སུ་གཟིར་བའི་ལུས་ཀྱིས་དེ་ཙམ་དུ་སྡུག་བསྔལ་གྱི་ཚོར་བ་མྱོང་བཞིན་དུ་ལུས་
འཛིན་པར་བྱེད་དེ། བུ་བཙའ་བའི་དུས་ཀྱི་བར་དུ་སེམས་ཅན་དམྱལ་བའི་སྡུག་བསྔལ་མྱོང་ངོ་། །དེ་འདི་སྙམ་དུ་སེམས་ཏེ། གང་གི་ཚེ་བདག་གི་བུ་བཙའ་བར་འགྱུར་ཏེ། བདག་བདེ་བར་བཙས་པར་གྱུར་ན་དེའི་ཚེ་ཚངས་པར་སྤྱད་པར་
བྱའོ་སྙམ་མོ། །དེ་ཕྱིས་ཡང་འདོད་པའི་འདོད་ཆགས་ཀྱིས་ཆགས་པར་གྱུར་པ་ན་སྡུག་བསྔལ་དེ་དག་ཕྱིས་མི་དྲན་ཏེ། བདེ་བའི་འདུ་ཤེས་སྐྱེད་པར་བྱེད་དོ། །དེ་བཞིན་དུ་ཕྱི་མའི་ཚེ་ཕྱི་མའི་དུས་ན་སེམས་ཅན་འབྱུང་བར་འགྱུར་
བ་དེ་དག་ཆོས་ཀྱི་རྣམ་གྲངས་འདི་ལ་དད་པར་མི་བྱེད། མཆོད་པར་མི་བྱེད། འཛིན་པར་མི་བྱེད། ཀློག་པར་མི་བྱེད་དེ། དེ་དག་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་རྣམས་སུ་
སྐྱེ་བར་འགྱུར་རོ། །དེ་དག་ཀྱང་འདོད་ཆགས་ཀྱིས་མྱོས་ནས། ཚོར་བ་དེ་དག་བཟོད་པར་གྱུར་ཏེ། བདག་གིས་ཁྱིམ་དང་། བུ་སྨད་ཡོངས་སུ་བསྐྱང་བར་བྱའོ། །ཆུང་མ་དང་། བུ་དང་། བུ་མོ་ཡོངས་སུ་བསྐྱང་བར་བྱའོ་སྙམ་
མོ། །གང་གི་ཚེ་ཡང་སེམས་ཅན་དམྱལ་བར་སྐྱེས་པ་དེའི་ཚེ་ནི་འགྱོད་པར་འགྱུར་ཏོ་གང་གི་ཚེ་ཕྱིར་ཐར་བར་གྱུར་པ་དེའི་ཚེ་ནི་འདོད་ཆགས་ཀྱིས་ཆགས་ནས་སེམས་ཅན་དམྱལ་བའི་སྡུག་བསྔལ་བརྗེད་པར་འགྱུར་ཏེ། སྦྱིན་པ་ཡང་

46-1-211b

སྦྱིན་པར་མི་བྱེད། ཚུལ་ཁྲིམས་ཀྱང་སྲུང་བར་མི་བྱེད་དོ། །འདི་ལྟ་སྟེ་དཔེར་ན་མི་ཆང་གིས་ར་རོ་ཞིང་མྱོས་ཏེ། ཚབས་ཆེར་ར་རོ་ཞིང་མྱོས་ལ་གཏུ་ལུམ་པར་གྱུར་ན། མི་དེས་སེམས་ཀྱིས་ཀྱང་ཁྱིམ་ཚོལ་མི་ནུས་
ལམ་ཡང་མི་ཚོལ། ཕ་མ་དང་། ཆུང་མ་དང་། བུ་དང་། བུ་མོའི་འདུ་ཤེས། ཀྱང་མེད། སངས་རྒྱས་དང་། ཆོས་དང་། དགེ་འདུན་ཡང་མི་དྲན་ཏེ། དེ་ཆང་གིས་མྱོས་པའི་མཐུས་དུར་ཁྲོད་ན་འདུག་ན་ཡང་འཇིགས་པ་མེད་
ལ། འདི་སྙམ་དུ་སེམས་ཏེ། ལྷ་འམ། ཀླུ་འམ། གནོད་སྦྱིན་ང་སྐྲག་པར་བྱེད་པ་སུ་ཞིག་ཡོད་སྙམ་མོ། །དེ་བོང་བ་དང་། ཤིང་དང་། རྩྭ་དང་། ཚེར་མའི་མལ་གཞན་དག་ལ་བདེ་བའི་འདུ་ཤེས་སྐྱེད་པ་ལས། ལུས་སོར་ཆུད་
ཅིང་ར་རོ་བ་དེ་སངས་ནས་གང་གི་ཚེ་དྲན་པ་རྙེད་པར་གྱུར་པ་དེའི་ཚེ་འགྱོད་པར་བྱེད་དེ། བདག་ནི་སྲོག་ལ་ཐུག་ཀྱང་བླ། བདག་གིས་ཆང་འདི་བཏུང་བར་མི་བྱའོ་སྙམ་མོ། །དེ་བཞིན་དུ་སེམས་ཅན་འདོད་ཆགས་ཀྱིས་རྒྱགས་པས་
མྱོས་ཤིང་། ཁྱིམ་ན་གནས་པས་རྣམ་པར་འཁྲུལ་པ་ནོར་གྱིས་སེམས་མྱོས་པ་རྣམས་ཀྱིས་ནི་སངས་རྒྱས་དང་། ཆོས་དང་། དགེ་འདུན་ཡང་ཡོངས་སུ་ཚོལ་བར་མི་བྱེད། སྦྱིན་པ་ཡང་མི་དྲན། མཐོ་རིས་སུ་སྐྱེ་བ་དང་། རྒྱལ་
པོར་འགྱུར་བ་དང་། སངས་རྒྱས་ཀྱི་ཞིང་དུ་སྐྱེ་བ་ཡང་ཡོངས་སུ་ཚོལ་བར་མི་བྱེད་དེ། འཁོར་བ་དེ་ཉིད་ན་འཁོར་ཞིང་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་རྣམས་སུ་སྐྱེས་པའི་སྡུག་
བསྔལ་མྱོང་བར་འགྱུར་ལ། འདི་སྙམ་དུ་འཛིན་ཏེ། བདག་གི་ལུས་ནི་བདེ་སྟེ། སྡུག་བསྔལ་བ་མེད་དོ་སྙམ་མོ། །གང་གི་ཚེ་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དེ་དག་ནས་ཐར་ཏེ། 
བརྒྱ་ལ་བརྒྱ་ལམ་ན་མིའི་ལུས་ཐོབ་པར་གྱུར་པ་དེའི་ཚེ་མངལ་ན་གནས་པས་ལུས་ཡོངས་སུ་གཟིར་ཅིང་མུན་ནག་གིས་སྐྱོ་བར་གྱུར་པའི་ལུས་ལ་བད་ཀན་དང་། མཁྲིས་པ་དང་། ལྗན་ལྗིན་དང་། ཁྲག་དང་། ཕྱིས་ས་བདས་

46-1-212a

པས་སྐྱོ་བར་གྱུར་ནས། འདི་སྙམ་དུ་སེམས་ཏེ། བདག་ཅག་ལོ་བརྒྱ་འམ། བསྐལ་པ་འམ། བསྐལ་པ་བརྒྱ་འམ། བསྐལ་པ་སྟོང་ངམ། བསྐལ་པ་འབུམ་གྱི་བར་དུ་འཁོར་བ་ན་འཁོར་ཞིང་སྡུག་བསྔལ་གྱི་ཚོར་བ་མི་བཟད་ཅིང་། 
ཡིད་དུ་མི་འོང་བ་མྱོང་ལ། གང་དུ་ཡང་བདག་ཅག་གིས་སྐྱབས་མེད་པ་འདི་ལས་གང་དག་གི་འབྲས་བུ་རྣམ་པར་སྨིན་པ་ཡིན་ཞིག་གུ། བདག་ཅག་གིས་ཀྱང་སྔོན་སྡིག་པ་མང་དུ་བྱས་སོ་སྙམ་སྟེ། དེ་ལྟར་མངལ་ན་གནས་
ནས་སེམས་ཅན་དམྱལ་བ་དང་འདྲ་བར་འགྱོད་པ་སྐྱེད་པར་བྱེད་དེ། གང་གི་ཚེ་བདག་ཅག་མངལ་ན་གནས་པའི་སེམས་ཅན་དམྱལ་བ་འདི་ལས་ཐར་བར་གྱུར་པ་དེའི་ཚེ་སངས་རྒྱས་དང་། ཆོས་དང་། དགེ་འདུན་ལ་མི་ཕྱེད་པའི་དད་པས་
བསྒྲུབ་པ་དང་བཙལ་བར་བྱ་སྟེ། ཅི་ནས་ཀྱང་བདག་ཅག་ཕྱིན་ཆད་མངལ་གྱི་སེམས་ཅན་དམྱལ་བར་གནས་པར་མི་འགྱུར་བར་བྱའོ་སྙམ་མོ། །དེ་དག་ཕྱིས་མངལ་གྱི་གནས་རྣམས་ལས་ཐར་ནས་བག་མེད་པར་བྱེད་དེ། དེ་དག་
ཡང་སེམས་ཅན་དམྱལ་བ་རྣམས་སུ་སྡུག་བསྔལ་མྱོང་བར་འགྱུར་རོ། །དེ་ལྟ་བས་ན་ནམས་ཀྱང་བག་མེད་པར་མི་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་
ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཆོས་ཀྱི་རྣམ་གྲངས་འདི་སེམས་ཅན་ཐམས་ཅད་ཀྱི་སྐྱབས་བྱེད་པ་ཞེས་བྱ་
བར་ཟུང་ཤིག །བྱང་ཆུབ་སེམས་དཔས་ཞུས་པ་ཞེས་བྱ་བར་ཡང་ཟུང་ཤིག །བཀོད་པའི་རྒྱལ་པོའི་རྣམ་པར་འཕྲུལ་པའི་རྒྱལ་པོ་ཞེས་བྱ་བར་ཡང་ཟུང་ཤིག །དེ་བཞིན་གཤེགས་པ་མངོན་པར་རྫོགས་པར་བྱང་ཆུབ་
པ་ཞེས་བྱ་བར་ཡང་ཟུང་ཤིག །ཆོས་ཐམས་ཅད་ཀྱི་ཡོན་ཏན་བཀོད་པའི་རྒྱལ་པོ་ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་དེ་དག་དང་། ཉན་ཐོས་ཆེན་པོ་དེ་དག་དང་། 

46-1-212b

བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་ཐམས་ཅད་དང་། ཐམས་ཅད་དང་ལྡན་པའི་འཁོར་དང་། ལྷ་དང་མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་
བསྟོད་དོ། །འཕགས་པ་ཆོས་ཐམས་ཅད་ཀྱི་ཡོན་ཏན་བཀོད་པའི་རྒྱལ་པོ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། རྒྱ་གར་གྱི་མཁན་པོ་པྲཛྙཱ་བར་མ་དང་། སུ་རེན་དྲ་བོདྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་
ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།     ། རྒྱ་གར་སྐད་དུ།  ཨཱརྱ་སུ་ཁཱ་བ་ཏི་བྱུ་ཧ་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ།  འཕགས་པ་བདེ་བ་ཅན་གྱི་བཀོད་པ་ཞེས་བྱ་བ་ཐེག་པ་ཆེན་པོའི་
མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་
གྱི་ཀུན་དགའ་ར་བ་ན། དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་གནས་བརྟན་ཉན་ཐོས་ཆེན་པོ་དགྲ་བཅོམ་པ་ཤ་སྟག་ལ་འདི་ལྟ་སྟེ། གནས་བརྟན་ཤཱ་རིའི་བུ་དང་། མཽད་གལ་གྱི་བུ་ཆེན་པོ་དང་། 
འོད་སྲུང་ཆེན་པོ་དང་། ཀཱ་ཏྱཱའི་བུ་ཆེན་པོ་དང་། ཀ་པི་ན་ཆེན་པོ་དང་། གསུས་པོ་ཆེ་དང་། ནམ་གྲུ་དང་། ལམ་ཕྲན་བསྟན་དང་། དགའ་བོ་དང་། ཀུན་དགའ་བོ་དང་། སྒྲ་གཅན་ཟིན་དང་། བ་ལང་བདག་
དང་། བྷ་ར་དྭཱ་ཛ་དང་། འཆར་བྱེད་ནག་པོ་དང་། བ་ཀུ་ལ་དང་། མ་འགགས་པ་དང་། དེ་དག་དང་ཉན་ཐོས་ཆེན་པོ་གཞན་དག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མང་པོ་ལ་འདི་ལྟ་སྟེ། འཇམ་དཔལ་གཞོན་ནུར་
གྱུར་པ་དང་བྱང་ཆུབ་སེམས་དཔའ་སེམས་དཔའ་ཆེན་པོ་མི་ཕམ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྩོན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་

46-1-213a

མི་འདོར་བ་དང་། དེ་དག་དང་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་མང་པོ་དག་དང་། ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དང་། དེ་དག་དང་ལྷ་བྱེ་བ་ཁྲག་ཁྲིག་འབུམ་ཕྲག་མང་པོ་གཞན་
དག་དང་ཡང་ཐབས་གཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་སངས་རྒྱས་ཀྱི་ཞིང་འདི་ནས་ནུབ་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་ཕྲག་འབུམ་འདས་པ་ན་
འཇིག་རྟེན་གྱི་ཁམས་བདེ་བ་ཅན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །ཤཱ་རིའི་བུ་འདི་ཇི་སྙམ་དུ་
སེམས། འཇིག་རྟེན་གྱི་ཁམས་དེ་ཅིའི་ཕྱིར་བདེ་བ་ཅན་ཞེས་བྱ་ཞེ་ན། ཤཱ་རིའི་བུ་འཇིག་རྟེན་གྱི་ཁམས་བདེ་བ་ཅན་དེ་ན་སེམས་ཅན་རྣམས་ཀྱི་ལུས་ལ་སྡུག་བསྔལ་མེད། སེམས་ལ་སྡུག་བསྔལ་མེད་ཅིང་བདེ་བའི་རྒྱུ་ཚད་མེད་པར་ཡོད་དེ། དེའི་
ཕྱིར་འཇིག་རྟེན་གྱི་ཁམས་བདེ་བ་ཅན་ཞེས་བྱའོ། །ཤཱ་རིའི་བུ་གཞན་ཡང་འཇིག་རྟེན་གྱི་ཁམས་བདེ་བ་ཅན་ནི་ཁ་ཁྱེར་རིམ་པ་བདུན་དང་། ཤིང་ཏ་ལའི་ཕྲེང་བ་རིམ་པ་བདུན་དང་། དྲིལ་བུ་གཡེར་ཀའི་དྲ་བ་རྣམས་ཀྱིས་ཀུན་ནས་ཡོངས་སུ་
བསྐོར་བ། བཀྲ་བ་བལྟ་ན་སྡུག་པའོ། །ཤཱ་རིའི་བུ་སངས་རྒྱས་ཀྱི་ཞིང་དེ་ནི་རིན་པོ་ཆེ་སྣ་བཞི་ལ་འདི་ལྟ་སྟེ། གསེར་དང་། དངུལ་དང་། བཻ་དཱུརྱ་དང་། ཤེལ་དང་རྣམ་པ་དེ་ལྟ་བུའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་གིས་ལེགས་
པར་བརྒྱན་པའོ། །ཤཱ་རིའི་བུ་གཞན་ཡང་འཇིག་རྟེན་གྱི་ཁམས་བདེ་བ་ཅན་ན་རིན་པོ་ཆེ་སྣ་བདུན་གྱི་རྫིང་ཡན་ལག་བརྒྱད་དང་ལྡན་པའི་ཆུས་ཡོངས་སུ་གང་བ། རིན་པོ་ཆེའི་པད་མས་ཁེབས་པ། བྱ་རོག་གིས་བཏུང་དུ་
རུང་བར་ཁ་ད་ཅད་དུ་གྱུར་པ་གསེར་གྱི་བྱེ་མ་བདལ་བ་དག་ཡོད་དེ། རྫིང་དེ་དག་གི་ཕྱོགས་བཞི་ཀུན་ན་ཐེམ་སྐས་བཀྲ་བ། བལྟ་ན་སྡུག་པ། གསེར་དང་། དངུལ་དང་། བཻ་དཱུརྱ་དང་། ཤེལ་དང་། རིན་པོ་ཆེ་སྣ་བཞི་ལས་བྱས་པ་བཞི་བཞི་

46-1-213b

ཡོད་དེ། །རྫིང་དེ་དག་གི་འགྲམ་ན་རིན་པོ་ཆེའི་ཤིང་ལྗོན་པ་རིན་པོ་ཆེ་སྣ་བདུན་ལ་འདི་ལྟ་སྟེ། གསེར་དང་། དངུལ་དང་། བཻ་དཱུརྱ་དང་། ཤེལ་དང་། མུ་ཏིག་དམར་པོ་དང་། རྡོའི་སྙིང་པོ་དང་། སྤུག་གི་ཤིང་བཀྲ་བ། བལྟ་ན་སྡུག་པ། དག་སྐྱེས་
སོ། །རྫིང་དེ་དག་ཀུན་ནས་པད་མ་སྐྱེས་པ་འདི་ལྟ་སྟེ། གསེར་གྱི་ཁ་དོག །གསེར་གྱི་འོད་འབྱུང་བ། གསེར་ལྟ་བུར་སྟོན་པ། སྔོན་པོ་ཁ་དོག་སྔོན་པོ། འོད་སྔོན་པོ་འབྱུང་བ། སྔོན་པོ་ལྟ་བུར་སྟོན་པ། སེར་པོ་ཁ་དོག་སེར་པོ། འོད་
སེར་པོ་འབྱུང་བ། སེར་པོ་ལྟ་བུར་སྟོན་པ། དམར་པོ་ཁ་དོག་དམར་པོ། འོད་དམར་པོ་འབྱུང་བ། དམར་པོ་ལྟ་བུར་སྟོན་པ། དཀར་པོ། ཁ་དོག་དཀར་པོ། འོད་དཀར་པོ་འབྱུང་བ། དཀར་པོ་ལྟ་བུར་སྟོན་པ། བཀྲ་བ། ཁ་དོག་བཀྲ་བ། 
འོད་བཀྲ་བ། འབྱུང་བ། བཀྲ་བ་ལྟ་བུར་སྟོན་པ། ཤིང་རྟའི་འཕང་ལོ་ཙམ་དག་སྐྱེས་སོ། །ཤཱ་རིའི་བུ་སངས་རྒྱས་ཀྱི་ཞིང་དེ་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་རྣམ་པ་དེ་ལྟ་བུ་དག་གིས་ལེགས་པར་བརྒྱན་པའོ། །ཤཱ་རིའི་བུ་གཞན་
ཡང་འཇིག་རྟེན་གྱི་ཁམས་བདེ་བ་ཅན་ན་ལྷའི་སིལ་སྙན་གྱི་སྒྲ་རྟག་ཏུ་འབྱུང་ངོ་། །ས་ཆེན་པོ་ནི་གསེར་གྱི་ཁ་དོག་ལྟ་བུ་སྟེ་ཉམས་དགའ་བའོ། །ཤཱ་རིའི་བུ་སངས་རྒྱས་ཀྱི་ཞིང་དེ་ནི་སངས་རྒྱས་ཀྱི་ཞིང་གི་ཡོན་ཏན་བཀོད་པ་རྣམ་པ་དེ་ལྟ་
བུ་དག་གིས་ལེགས་པར་བརྒྱན་པའོ། །ཤཱ་རིའི་བུ་གཞན་ཡང་སངས་རྒྱས་ཀྱི་ཞིང་དེ་ན་ཉིན་ལན་གསུམ། མཚན་ལན་གསུམ་དུ་ལྷའི་མེ་ཏོག་མན་དཱ་ར་བའི་ལྷའི་མེ་ཏོག་གི་ཆར་འབབ་བོ། །དེར་སེམས་ཅན་གང་དག་སྐྱེས་པ་དེ་
དག་ཀྱང་སྔ་དྲོ་གཅིག་བཞིན་དུ་སངས་རྒྱས་ཀྱི་ཞིང་གཞན་དང་གཞན་དུ་དོང་སྟེ་སངས་རྒྱས་བྱེ་བ་ཕྲག་འབུམ་ལ་ཕྱག་འཚལ་ཞིང་། དེ་བཞིན་གཤེགས་པ་རེ་རེ་ལ་ཡང་མེ་ཏོག་སྐུན་བུ་བྱེ་བ་ཕྲག་འབུམ་མངོན་པར་འཐོར་ཏེ། གཏོར་ནས་
ཉིན་མོ་གནས་པའི་ཕྱིར་སླར་འཇིག་རྟེན་གྱི་ཁམས་དེ་ཉིད་དུ་འདོང་ངོ་། །ཤཱ་རིའི་བུ་སངས་རྒྱས་ཀྱི་ཞིང་དེ་ནི་སངས་རྒྱས་ཀྱི་ཞིང་གི་ཡོན་ཏན་བཀོད་པ་རྣམ་པ་དེ་ལྟ་བུ་དག་གིས་ལེགས་པར་བརྒྱན་པའོ། །ཤཱ་རིའི་བུ་གཞན་ཡང་

46-1-214a

འཇིག་རྟེན་གྱི་ཁམས་བདེ་བ་ཅན་ན་ངང་པ་དང་། ཁྲུང་ཁྲུང་དང་། རྨ་བྱ་དག་ཡོད་པ་དེ་དག་ཀྱང་ཉིན་ལན་གསུམ། མཚན་ལན་གསུམ་འདུས་ནས་ཡང་དག་པར་བགྲོ་བར་བྱེད་དེ། རང་རང་གི་སྐད་དག་གིས་སྨྲའོ། །དེ་དག་སྨྲ་བ་ན་དབང་པོ་དང་
སྟོབས་དང་། བྱང་ཆུབ་ཀྱི་ཡན་ལག་གི་སྒྲ་དག་འབྱུང་ངོ་། །སེམས་ཅན་གང་དག་དེར་སྐྱེས་པ་དེ་དག་གིས་སྒྲ་དེ་ཐོས་ནས་སངས་རྒྱས་ཡིད་ལ་བྱེད་པ་སྐྱེ། ཆོས་ཡིད་ལ་བྱེད་པ་སྐྱེ། དགེ་འདུན་ཡིད་ལ་བྱེད་པར་སྐྱེའོ། །ཤཱ་རིའི་བུ་འདི་ཇི་སྙམ་དུ་སེམས། 
སེམས་ཅན་དེ་དག་དུད་འགྲོའི་སྐྱེ་གནས་སུ་གྱུར་པ་ཡིན་སྙམ་དུ་སེམས་བལྟ་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཤཱ་རིའི་བུ་སངས་རྒྱས་ཀྱི་ཞིང་དེ་ན་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་
དུ་སྐྱེ་བའི་མིང་ཡང་མེད་དོ། །བྱའི་ཚོགས་དེ་དག་ནི་དེ་བཞིན་གཤེགས་པ་ཚེ་དཔག་མེད་དེ་ཉིད་ཀྱིས་ཆོས་ཀྱི་སྒྲ་འབྱུང་བའི་ཕྱིར་སྤྲུལ་པ་དག་གོ། །ཤཱ་རིའི་བུ་སངས་རྒྱས་ཀྱི་ཞིང་དེ་ནི་སངས་རྒྱས་ཀྱི་ཞིང་གི་ཡོན་ཏན་བཀོད་པ་རྣམ་པ་དེ་ལྟ་བུ་
དག་གིས་ལེགས་པར་བརྒྱན་པའོ། །ཤཱ་རིའི་བུ་གཞན་ཡང་སངས་རྒྱས་ཀྱི་ཞིང་དེའི་ཏ་ལའི་ཕྲེང་བ་དེ་དག་དང་། དྲིལ་བུ་གཡེར་ཀའི་དྲ་བ་དེ་དག་ལ་རླུང་གིས་ཕོག་ཅིང་རླུང་གིས་བསྐྱོད་ན་སྒྲ་སྙན་པ་ཡིད་དུ་འོང་བ། ཉམས་དགའ་བ་འབྱུང་སྟེ། 
འདི་ལྟ་སྟེ་དཔེར་ན། རོལ་མོ་མཁན་གྱིས་ཡན་ལག་བྱེ་བ་འབུམ་དང་ལྡན་པའི་ལྷའི་སིལ་སྙན་བླངས་པ་བཞིན་ནོ། །དེར་མི་དེ་དག་གིས་སྒྲ་དེ་ཐོས་ནས་སངས་རྒྱས་རྗེས་སུ་དྲན་པ་དང་། ཆོས་རྗེས་སུ་དྲན་པ་དང་། དགེ་འདུན་རྗེས་སུ་
དྲན་པ་ལུས་ལ་གནས་སོ། །ཤཱ་རིའི་བུ་སངས་རྒྱས་ཀྱི་ཞིང་དེ་ནི་སངས་རྒྱས་ཀྱི་ཞིང་གི་ཡོན་ཏན་བཀོད་པའི་རྒྱན་རྣམ་པ་དེ་ལྟ་བུ་དག་གིས་ལེགས་པར་བརྒྱན་པའོ། །ཤཱ་རིའི་བུ་འདི་ཇི་སྙམ་དུ་སེམས། ཅིའི་ཕྱིར་དེ་བཞིན་གཤེགས་
པ་ཚེ་དཔག་ཏུ་མེད་ཅེས་བྱ་ཞེ་ན། ཤཱ་རིའི་བུ་དེ་བཞིན་གཤེགས་པ་ཚེ་དཔག་མེད་དེའི་ཚེའི་ཚད་དཔག་ཏུ་མེད་དེ། དེའི་ཕྱིར་དེ་བཞིན་གཤེགས་པ་ཚེ་དཔག་མེད་ཅེས་བྱའོ། །ཤཱ་རིའི་བུ་གཞན་ཡང་ཅིའི་ཕྱིར་དེ་བཞིན་གཤེགས་པ་དེ་འོད་དཔག་མེད་

46-1-214b

ཅེས་བྱ་ཞེ་ན། ཤཱ་རིའི་བུ་དེ་བཞིན་གཤེགས་པ་འོད་དཔག་མེད་དེའི་འོད་སངས་རྒྱས་ཀྱི་ཞིང་ཐམས་ཅད་དུ་ཐོགས་པ་མེད་དེ། དེའི་ཕྱིར་དེ་བཞིན་གཤེགས་པ་འོད་དཔག་མེད་ཅེས་བྱའོ། །བཅོམ་ལྡན་འདས་དེ་བཞིན་གཤེགས་པ་འོད་དཔག་
མེད་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་བསྐལ་པ་བཅུ་ལོན་ནོ། །ཤཱ་རིའི་བུ་གཞན་ཡང་བཅོམ་ལྡན་འདས་དེའི་ཉན་ཐོས་ཀྱི་དགེ་འདུན་དག་པ་དགྲ་བཅོམ་པ་ཤ་སྟག་ཚད་མེད་དེ། དེ་དག་གི་
ཚད་བརྗོད་པར་སླ་བ་མ་ཡིན་ནོ། །ཤཱ་རིའི་བུ་གཞན་ཡང་སངས་རྒྱས་ཀྱི་ཞིང་དེར་སྐྱེས་པའི་སེམས་ཅན་དག་ནི་ཕྱིར་མི་ལྡོག་པ། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་དག་པ་ཤ་སྟག་གོ། །ཤཱ་རིའི་བུ་བྱང་ཆུབ་སེམས་
དཔའ་དེ་དག་གི་ཚད་ནི་བརྗོད་པར་སླ་བ་མ་ཡིན་ཏེ། གཞན་དུ་ན་ཚད་མེད་གྲངས་མེད་ཅེས་བྱ་བའི་གྲངས་སུ་འགྲོའོ། །ཤཱ་རིའི་བུ་སངས་རྒྱས་ཀྱི་ཞིང་དེ་ནི་སངས་རྒྱས་ཀྱི་ཞིང་གི་ཡོན་ཏན་བཀོད་པ་རྣམ་པ་དེ་ལྟ་བུ་དག་གིས་ལེགས་པར་བརྒྱན་
པའོ། །ཤཱ་རིའི་བུ་དེ་ལྟ་བས་ན་རིགས་ཀྱི་བུ་འམ་རིགས་ཀྱི་བུ་མོས་སངས་རྒྱས་ཀྱི་ཞིང་དེར་སྐྱེ་བར་བྱ་བའི་ཕྱིར་དགེ་བའི་རྩ་བ་རྣམས་གུས་པར་ཡོངས་སུ་བསྔོ་བར་བྱའོ། །དེ་ཅིའི་ཕྱིར་ཞེ་ན། འདི་ལྟར་སྐྱེས་བུ་དམ་པ་དེ་ལྟ་བུ་དག་དང་
ཕྲད་པར་འགྱུར་བའི་ཕྱིར་རོ། །ཤཱ་རིའི་བུ་དགེ་བའི་རྩ་བ་ངན་ངོན་ཙམ་གྱིས་ནི་བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་དེའི་ཞིང་དུ་སྐྱེ་བར་མི་འགྱུར་རོ། །ཤཱ་རིའི་བུ་རིགས་ཀྱི་བུ་འམ་རིགས་ཀྱི་བུ་མོ་གང་གིས་བཅོམ་
ལྡན་འདས་དེ་བཞིན་གཤེགས་པ་ཚེ་དཔག་མེད་དེའི་མཚན་ཐོས་ནས་ཀྱང་ཡིད་ལ་བྱེད་ཅིང་ནུབ་གཅིག་གམ། ནུབ་གཉིས་སམ། ནུབ་གསུམ་འམ། ནུབ་བཞི་འམ། ནུབ་ལྔ་འམ། ནུབ་དྲུག་གམ། ནུབ་བདུན་དུ་གཡེང་བ་མེད་པའི་སེམས་
ཀྱིས་ཡིད་ལ་བྱེད་ན། རིགས་ཀྱི་བུ་འམ། རིགས་ཀྱི་བུ་མོ་དེ་འཆི་བའི་དུས་ཀྱི་ཚེ་ཕྱིན་ཅི་ལོག་མེད་པའི་སེམས་ཀྱིས་འཆི་བའི་དུས་བྱས་ནས་འཆི་བའི་དུས་བྱས་པ་དེ་དེ་བཞིན་གཤེགས་པ་འོད་དཔག་མེད་ཉན་ཐོས་ཀྱི་དགེ་འདུན་གྱིས་ཡོངས་སུ་

46-1-215a

བསྐོར་ཅིང་བྱང་ཆུབ་སེམས་དཔའི་ཚོགས་ཀྱིས་མདུན་གྱིས་བལྟས་པའི་མདུན་ན་བཞུགས་པ་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་དེའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་
འགྱུར་རོ། །ཤཱ་རིའི་བུ་དེ་ལྟ་བས་ན་དོན་གྱི་དབང་དེ་མཐོང་ནས་རིགས་ཀྱི་བུ་འམ། རིགས་ཀྱི་བུ་མོས་སངས་རྒྱས་ཀྱི་ཞིང་དེར་གུས་པར་སྨོན་ལམ་གདབ་པར་བྱའོ་ཞེས་དེ་སྐད་བརྗོད་དོ། །ཤཱ་རིའི་བུ་ཇི་ལྟར་དེ་བཞིན་གཤེགས་པ་ངས་ད་ལྟར་ཡོངས་
སུ་བརྗོད་པ་དེ་བཞིན་དུ་ཤཱ་རིའི་བུ་ཤར་ཕྱོག་ན་བཅོམ་ལྡན་འདས་དེ་བཞིན་གཤེགས་པ་མི་འཁྲུགས་པ་ཞེས་བྱ་བ་དང་། དེ་བཞིན་གཤེགས་པ་ལྷུན་པོའི་རྒྱལ་མཚན་ཞེས་བྱ་བ་དང་། དེ་བཞིན་གཤེགས་པ་ལྷུན་པོ་ཞེས་བྱ་བ་དང་། 
དེ་བཞིན་གཤེགས་པ་ལྷུན་པོ་ཆེན་པོ་ཞེས་བྱ་བ་དང་། དེ་བཞིན་གཤེགས་པ་ལྷུན་པོ་ཆེན་པོ་སྣང་བ་ཞེས་བྱ་བ་དང་། དེ་བཞིན་གཤེགས་པ་འཇམ་སྒྲ་ཞེས་བྱ་བ་དང་། དེ་བཞིན་གཤེགས་པ་འཇམ་དབྱངས་ཤེས་བྱ་བ་དང་། 
དེ་དག་ལ་སོགས་པ་ཤར་ཕྱོགས་ཀྱི་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་དག་རང་རང་གི་སངས་རྒྱས་ཀྱི་ཞིང་རྣམས་ལྗགས་ཀྱི་དབང་པོས་ཁེབས་པར་མཛད་དེ། ཁྱེད་ཅག་ཡོན་ཏན་བསམ་གྱིས་མི་ཁྱབ་པ་
ཡོངས་སུ་བརྗོད་པ་སངས་རྒྱས་ཐམས་ཅད་ཀྱིས་ཡོངས་སུ་བཟུང་བའི་ཆོས་ཀྱི་རྣམ་གྲངས་འདི་ལ་ཡིད་ཆེས་པར་གྱིས་ཤིག་ཅེས་གསུང་བ་མཛད་དོ། །དེ་བཞིན་དུ་ལྷོ་ཕྱོགས་ན་དེ་བཞིན་གཤེགས་པ་ཉི་ཟླའི་སྒྲོན་མ་ཞེས་བྱ་བ་
དང་། དེ་བཞིན་གཤེགས་པ་གྲགས་པ་ཞེས་བྱ་བ་དང་། དེ་བཞིན་གཤེགས་པ་གྲགས་པའི་འོད་ཅེས་བྱ་བ་དང་། དེ་བཞིན་གཤེགས་པ་འོད་འཕྲོ་ཕུང་པོ་ཞེས་བྱ་བ་དང་། དེ་བཞིན་གཤེགས་པ་ལྷུན་པོའི་སྒྲོན་མ་ཞེས་བྱ་བ་དང་། 
དེ་བཞིན་གཤེགས་པ་བརྩོན་འགྲུས་མཐའ་ཡས་ཤེས་བྱ་བ་དང་། དེ་དག་ལ་སོགས་པ་ལྷོ་ཕྱོགས་ཀྱི་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་དག་རང་རང་གི་སངས་རྒྱས་ཀྱི་ཞིང་རྣམས་ལྗགས་ཀྱི་དབང་པོས་

46-1-215b

ཁེབས་པར་མཛད་དེ། ཁྱེད་ཅག་ཡོན་ཏན་བསམ་གྱིས་མི་ཁྱབ་པ་ཡོངས་སུ་བརྗོད་པ་སངས་རྒྱས་ཐམས་ཅད་ཀྱིས་ཡོངས་སུ་བཟུང་བའི་ཆོས་ཀྱི་རྣམ་གྲངས་འདི་ལ་ཡིད་ཆེས་པར་གྱིས་ཤིག་ཅེས་གསུང་བ་མཛད་དོ། །དེ་བཞིན་དུ་ནུབ་
ཕྱོགས་ན་དེ་བཞིན་གཤེགས་པ་ཚེ་དཔག་མེད་ཅེས་བྱ་བ་དང་། དེ་བཞིན་གཤེགས་པ་ཕུང་པོ་དཔག་མེད་ཅེས་བྱ་བ་དང་། དེ་བཞིན་གཤེགས་པ་རྒྱལ་མཚན་དཔག་མེད་ཅེས་བྱ་བ་དང་། དེ་བཞིན་གཤེགས་པ་འོད་ཆེན་ཞེས་བྱ་བ་དང་དེ་
བཞིན་གཤེགས་པ་འོད་ཟེར་སྣང་བ་ཞེས་བྱ་བ་དང་དེ་བཞིན་གཤེགས་པ་རིན་པོ་ཆེའི་ཏོག་ཅེས་བྱ་བ་དང་། དེ་བཞིན་གཤེགས་པ་འོད་ཟེར་དག་པ་ཞེས་བྱ་བ་དང་། དེ་དག་ལ་སོགས་པ་ནུབ་ཕྱོགས་ཀྱི་སངས་རྒྱས་བཅོམ་ལྡན་འདས་གང་གཱའི་
ཀླུང་གི་བྱེ་མ་སྙེད་དག་རང་རང་གི་སངས་རྒྱས་ཀྱི་ཞིང་རྣམས་ལྗགས་ཀྱི་དབང་པོས་ཁེབས་པར་མཛད་དེ། ཁྱེད་ཅག་ཡོན་ཏན་བསམ་གྱིས་མི་ཁྱབ་པ་ཡོངས་སུ་བརྗོད་པ་སངས་རྒྱས་ཐམས་ཅད་ཀྱིས་ཡོངས་སུ་བཟུང་བའི་ཆོས་
ཀྱི་རྣམ་གྲངས་འདི་ལ་ཡིད་ཆེས་པར་གྱིས་ཤིག་ཅེས་གསུང་བ་མཛད་དོ། །དེ་བཞིན་དུ་བྱང་ཕྱོགས་ན་དེ་བཞིན་གཤེགས་པ་འོད་འཕྲོའི་ཕུང་པོ་ཆེན་པོ་ཞེས་བྱ་བ་དང་། དེ་བཞིན་གཤེགས་པ་ཐམས་ཅད་སྒྲོལ་བའི་དབྱངས་
ཤེས་བྱ་བ་དང་། དེ་བཞིན་གཤེགས་པ་རབ་ཏུ་ཐུལ་དཀའ་ཞེས་བྱ་བ་དང་། དེ་བཞིན་གཤེགས་པ་ཉི་མ་འབྱུང་ཞེས་བྱ་བ་དང་། དེ་བཞིན་གཤེགས་པ་དྲ་བ་ཅན་གྱི་འོད་ཅེས་བྱ་བ་དང་། དེ་བཞིན་གཤེགས་པ་འོད་ཀྱི་
འབྱུང་གནས་ཤེས་བྱ་བ་དང་། དེ་དག་ལ་སོགས་པ་བྱང་ཕྱོགས་ཀྱི་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་དག་རང་རང་གི་སངས་རྒྱས་ཀྱི་ཞིང་རྣམས་ལྗགས་ཀྱི་དབང་པོས་ཁེབས་པར་མཛད་དེ། ཁྱེད་ཅག་ཡོན་ཏན་
བསམ་གྱིས་མི་ཁྱབ་པ་ཡོངས་སུ་བརྗོད་པ་སངས་རྒྱས་ཐམས་ཅད་ཀྱིས་ཡོངས་སུ་བཟུང་བའི་ཆོས་ཀྱི་རྣམ་གྲངས་འདི་ལ་ཡིད་ཆེས་པར་གྱིས་ཤིག་ཅེས་གསུང་བ་མཛད་དོ། །དེ་བཞིན་དུ་འོག་གི་ཕྱོགས་ན་དེ་བཞིན་གཤེགས་པ་སེང་གེ་ཞེས་

46-1-216a

བྱ་བ་དང་། དེ་བཞིན་གཤེགས་པ་གྲགས་པ་ཞེས་བྱ་བ་དང་། དེ་བཞིན་གཤེགས་པ་གྲགས་འོད་ཅེས་བྱ་བ་དང་། དེ་བཞིན་གཤེགས་པ་ཆོས་ཤེས་བྱ་བ་དང་། དེ་བཞིན་གཤེགས་པ་ཆོས་འཛིན་ཅེས་བྱ་བ་དང་། དེ་
བཞིན་གཤེགས་པ་ཆོས་ཀྱི་རྒྱལ་མཚན་ཞེས་བྱ་བ་དང་། དེ་དག་ལ་སོགས་པ་འོག་གི་ཕྱོགས་ཀྱི་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་དག་རང་རང་གི་སངས་རྒྱས་ཀྱི་ཞིང་རྣམས་ལྗགས་ཀྱི་དབང་པོས་ཁེབས་
པར་མཛད་དོ། ཁྱེད་ཅག་ཡོན་ཏན་བསམ་གྱིས་མི་ཁྱབ་པ་ཡོངས་སུ་བརྗོད་པ་སངས་རྒྱས་ཐམས་ཅད་ཀྱིས་ཡོངས་སུ་བཟུང་བའི་ཆོས་ཀྱི་རྣམ་གྲངས་འདི་ལ་ཡིད་ཆེས་པར་གྱིས་ཤིག་ཅེས་གསུང་བ་མཛད་དོ། །དེ་བཞིན་དུ་སྟེང་གི་
ཕྱོགས་ན་དེ་བཞིན་གཤེགས་པ་ཚངས་པའི་དབྱངས་ཤེས་བྱ་བ་དང་། དེ་བཞིན་གཤེགས་པ་སྐར་མའི་རྒྱལ་པོ་ཞེས་བྱ་བ་དང་། དེ་བཞིན་གཤེགས་པ་སྤོས་མཆོག་ཅེས་བྱ་བ་དང་། དེ་བཞིན་གཤེགས་པ་སྤོས་འོད་ཅེས་བྱ་བ་དང་། 
དེ་བཞིན་གཤེགས་པ་སྤོས་ཀྱི་ཕུང་པོ་ཞེས་བྱ་བ་དང་། དེ་བཞིན་གཤེགས་པ་རིན་ཆེན་མེ་ཏོག་ཤིན་དུ་རྒྱས་པའི་རིགས་ཤེས་བྱ་བ་དང་། དེ་བཞིན་གཤེགས་པའི་ས་ལའི་དབང་པོའི་རྒྱལ་པོ་ཞེས་བྱ་བ་དང་། དེ་བཞིན་གཤེགས་
པ་རིན་ཆེན་ཨུད་པ་ལའི་དཔལ་ཞེས་བྱ་བ་དང་། དེ་བཞིན་གཤེགས་པ་མཐོང་བ་དོན་ཡོད་ཅེས་བྱ་བ་དང་། དེ་བཞིན་གཤེགས་པ་རི་རབ་ལྟ་བུ་ཞེས་བྱ་བ་དང་། དེ་དག་ལ་སོགས་པ་སྟེང་གི་ཕྱོགས་ཀྱི་སངས་རྒྱས་བཅོམ་ལྡན་འདས་གང་
གཱའི་ཀླུང་གི་བྱེ་མ་སྙེད་དག་རང་རང་གི་སངས་རྒྱས་ཀྱི་ཞིང་རྣམས་ལྗགས་ཀྱི་དབང་པོས་ཁེབས་པར་མཛད་དེ། ཁྱེད་ཅག་ཡོན་ཏན་བསམ་གྱིས་མི་ཁྱབ་པ་ཡོངས་སུ་བརྗོད་པ་སངས་རྒྱས་ཐམས་ཅད་ཀྱིས་ཡོངས་སུ་བཟུང་བའི་ཆོས་
ཀྱི་རྣམ་གྲངས་འདི་ལ་ཡིད་ཆེས་པར་གྱིས་ཤིག་ཅེས་གསུང་བ་མཛད་དོ། །ཤཱ་རིའི་བུ་འདི་ཇི་སྙམ་དུ་སེམས། ཅིའི་ཕྱིར་ཆོས་ཀྱི་རྣམ་གྲངས་འདི་སངས་རྒྱས་ཐམས་ཅད་ཀྱིས་ཡོངས་སུ་བཟུང་བ་ཞེས་བྱ་ཞེ་ན། ཤཱ་རིའི་བུ་རིགས་ཀྱི་བུ་འམ་རིགས་ཀྱི་

46-1-216b

བུ་མོ་གང་དག་ཆོས་ཀྱི་རྣམ་གྲངས་འདི་དང་། སངས་རྒྱས་བཅོམ་ལྡན་འདས་དེ་དག་གི་མཚན་ཐོས་པར་གྱུར་པ་དང་། ཐོས་པ་དང་ཐོས་པར་འགྱུར་བ་དེ་དག་ཐམས་ཅད་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བཟུང་
བར་འགྱུར་རོ། །ཤཱ་རིའི་བུ་སེམས་ཅན་གང་དག་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་དེའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདེ་བ་ཅན་དུ་སེམས་ཀྱིས་སྨོན་པར་བྱེད་པ་འམ། བྱས་པ་འམ། བྱེད་པ་འམ། བྱེད་པར་
འགྱུར་བ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་གོ། །ཕྱིར་མ་ལོག་གོ་ཕྱིར་མི་ལྡོག་པར་འགྱུར་རོ། །ཤཱ་རིའི་བུ་ཇི་ལྟར་ད་ལྟ་རང་སངས་རྒྱས་བཅོམ་ལྡན་འདས་དེ་དག་གི་ཡོན་ཏན་
བསམ་གྱིས་མི་ཁྱབ་པ་ཡོངས་སུ་བརྗོད་པ་དེ་བཞིན་དུ། ཤཱ་རིའི་བུ་སངས་རྒྱས་བཅོམ་ལྡན་འདས་དེ་དག་ཀྱང་ངའི་ཡོན་ཏན་བསམ་གྱིས་མི་ཁྱབ་པ་ཡོངས་སུ་བརྗོད་དོ། །ཤ་རིའི་བུས་གསོལ་པ། བཅོམ་ལྡན་འདས་ཤཱཀྱ་ཐུབ་པ་ཤཱཀྱའི་
རྒྱལ་པོས་བསྐལ་པའི་སྙིགས་མ་དང་། ཉོན་མོངས་པའི་སྙིགས་མ་དང་། སེམས་ཅན་གྱི་སྙིགས་མ་དང་། ལྟ་བའི་སྙིགས་མ་དང་། ཚེའི་སྙིགས་མའི་ཚེ་འཇིག་རྟེན་གྱི་ཁམས་མི་མཇེད་དུ་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་མངོན་པར་རྫོགས་པར་སངས་རྒྱས་ཏེ། འཇིག་རྟེན་ཐམས་ཅད་དང་མི་མཐུན་པའི་ཆོས་བསྟན་པ་ནི་ངོ་མཚར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་སྙིགས་མ་ལྔའི་ཚེ་འཇིག་རྟེན་དུ་ངས་གང་འཇིག་
རྟེན་གྱི་ཁམས་མི་མཇེད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། འཇིག་རྟེན་ཐམས་ཅད་དང་མི་མཐུན་པའི་ཆོས་བསྟན་པ་དེ་ནི་མཆོག་ཏུ་དཀའ་བ་བྱེད་པའོ། །བཅོམ་ལྡན་འདས་ཀྱིས་དེ་སྐད་ཅེས་
བཀའ་སྩལ་ནས་ཚེ་དང་ལྡན་པ་ཤཱ་རིའི་བུ་དང་། ཉན་ཐོས་ཆེན་པོ་དེ་དག་དང་། བྱང་ཆུབ་སེམས་དཔའ་དེ་དག་དང་། ལྷ་དང་མི་དང་ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་བདེ་བ་

46-1-217a

ཅན་གྱི་བཀོད་པ་ཞེས་བྱ་བ་ཐེག་པ་ཆོན་པོའི་མདོ་རྫོགས་སོ།། །། རྒྱ་གར་སྐད་དུ། ཨཱརྱ་ཀ་རཎ་ཌ་བྱུ་ཧ་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ།  འཕགས་པ་ཟ་མ་ཏོག་བཀོད་པ་ཞེས་བྱ་བ་ཐེག་པ་ཆེན་
པོའི་མདོ། བམ་པོ་དང་པོ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པའི་འཛེ་ཏའི་ཚལ་མགོན་མེད་པ་ལ་ཟས་སྦྱིན་པའི་ཀུན་དགའ་ར་བ་ན་དགེ་སློང་བརྒྱ་ཕྲག་ཕྱེད་དང་བཅུ་གསུམ་གྱི་
དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མང་པོ་རྣམས་དང་ཡང་ཐབས་གཅིག་པ་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་བློ་གྲོས་དང་། བྱང་ཆུབ་སེམས་དཔའ་སེམས་
དཔའ་ཆེན་པོ་ཡེ་ཤེས་མཐོང་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྡེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གསང་སྦེན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་དང་། 
བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་མི་གཏོང་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རིན་པོ་ཆེ་དང་། བྱང་ཆུབ་
སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་དང་། 
བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་དཔའ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་སྡེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་དང་། བྱང་
ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྒྱ་མཚོ་མཆིང་རྣམ་བློ་གྲོས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཛིན་དང་། བྱང་ཆུབ་སེམས་དཔའ་

46-1-217b

སེམས་དཔའ་ཆེན་པོ་སའི་སྤྱན་མཆོག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དབུགས་ཕྱིན་པའི་ལག་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། དེ་ལྟ་བུ་དག་ལ་སོགས་པ་བྱང་ཆུབ་
སེམས་དཔའ་སེམས་དཔའ་ཆེན་པོ་བྱེ་བ་རྣམས་ཀྱང་ཚོགས་སོ། །གཞན་ཡང་དབང་ཕྱུག་དང་། མཐུ་བོ་ཆེ་ལ་སོགས་པ་ལྷའི་སྡེ་སུམ་བཅུ་རྩ་གཉིས་ཀྱི་ལྷའི་སྲས་པོ་རྣམས་ཀྱང་ཚོགས་སོ། །གཞན་ཡང་ལྷའི་སྡེ་སུམ་བཅུ་རྩ་
གསུམ་གྱི་ལྷའི་བུ་རྣམས་ཚོགས་ཏེ། ལྷའི་བུ་དབང་ཕྱུག་ཆེན་པོ་དང་། ཉི་མ་དང་ཟླ་བ་དང་། རླུང་གི་ལྷ་དང་། ཆུའི་ལྷ་ལ་སོགས་པ་ལྷའི་བུ་དེ་དག་ཚོགས་པ་དང་ལྷན་ཅིག་ཏུ་བརྒྱ་བྱིན་ལྷའི་དབང་པོ་དང་། ཚངས་པ་མི་མཇེད་ཀྱི་བདག་པོ་དག་ཀྱང་
ཚོགས་སོ། །འཁོར་དེ་ན་ཀླུའི་རྒྱལ་པོ་བརྒྱ་སྟོང་དུ་མ་ཚོགས་པ་རྣམས་འདི་ལྟ་སྟེ། ཀླུའི་རྒྱལ་པོ་ཨུད་པ་ལ་དང་། ཀླུའི་རྒྱལ་པོ་ཤིང་ཨེ་ལའི་ལོ་མ་ཅན་དང་། ཀླུའི་རྒྱལ་པོ་ཉ་ཟན་དང་། ཀླུའི་རྒྱལ་པོ་བ་ལང་གི་བདག་པོ་དང་། 
ཀླུའི་རྒྱལ་པོ་མགོ་བརྒྱ་པ་དང་། ཀླུའི་རྒྱལ་པོ་ཧུ་ལུ་ཏ་དང་། ཀླུའི་རྒྱལ་པོ་འཇོག་པོ་དང་། ཀླུའི་རྒྱལ་པོ་གླང་མགོ་དང་། ཀླུའི་རྒྱལ་པོ་རི་དགས་མགོ་དང་། ཀླུའི་རྒྱལ་པོ་དགའ་བོ་དང་། བསྙེན་དགའ་བོ་དང་། ཀླུའི་རྒྱལ་པོ་བད་སའི་རིགས་
ཀྱི་བུ་དང་། ཀླུའི་རྒྱལ་པོ་མ་དྲོས་པ་དང་། ཀླུའི་རྒྱལ་པོ་རྒྱ་མཚོ་མཆིང་རྣམ་དང་། དེ་ལྟ་བུ་དག་ལ་སོགས་པ་ཀླུའི་རྒྱལ་པོ་བརྒྱ་སྟོང་དུ་མ་དག་ཀྱང་ཚོགས་སོ། །དྲི་ཟའི་རྒྱལ་པོ་བརྒྱ་སྟོང་དུ་མ་དག་ཀྱང་ཚོགས་པ་འདི་ལྟ་སྟེ། དྲི་ཟའི་
རྒྱལ་པོ་རྔའི་དབྱངས་ཀྱི་རྒྱལ་པོ་དང་། དྲི་ཟའི་རྒྱལ་པོ་ཡིད་དུ་འོང་བའི་དབྱངས་དང་། དྲི་ཟའི་རྒྱལ་པོ་ལག་པ་སྟོང་པ་དང་། དྲི་ཟའི་རྒྱལ་པོ་བློ་གྲོས་ཆེན་པོ་དང་། དྲི་ཟའི་རྒྱལ་པོ་ལུས་སིམ་པར་བྱེད་པ་དང་། དྲི་ཟའི་རྒྱལ་པོ་སིལ་སྙན་སྒྲ་
བསྒྲགས་དང་། དྲི་ཟའི་རྒྱལ་པོ་རྒྱན་གྱིས་བརྒྱན་པ་དང་། དྲི་ཟའི་རྒྱལ་པོ་གཞོན་ནུར་སྣང་བ་དང་། དྲི་ཟའི་རྒྱལ་པོ་ལག་པ་བཟང་པོ་དང་ལྡན་པ་དང་། དྲི་ཟའི་རྒྱལ་པོ་ཆོས་དགའ་དང་དེ་ལྟ་བུ་ལ་སོགས་པ་དྲི་ཟའི་རྒྱལ་པོ་བརྒྱ་སྟོང་དུ་མ་དག་ཚོགས་

46-1-218a

སོ། །འཁོར་དེར་མི་འམ་ཅི་བརྒྱ་སྟོང་དུ་མ་ཚོགས་པ་འདི་ལྟ་སྟེ། མི་འམ་ཅིའི་རྒྱལ་པོ་བཞིན་བཟངས་དང་། མི་འམ་ཅིའི་རྒྱལ་པོ་ཅོད་པན་ཅན་དང་། མི་འམ་ཅིའི་རྒྱལ་པོ་ས་རིའི་བཞིན་དང་། མི་འམ་ཅིའི་རྒྱལ་པོ་རབ་
ཏུ་དགའ་བྱས་དང་། མི་འམ་ཅིའི་རྒྱལ་པོ་འཁོར་ལོ་བཀོད་པ་དང་། མི་འམ་ཅིའི་རྒྱལ་པོ་མེ་ཏོག་གཏོར་བ་དང་། མི་འམ་ཅིའི་རྒྱལ་པོ་ནོར་བུ་དང་། མི་འམ་ཅིའི་རྒྱལ་པོ་གསུས་ཤོལ་དང་། མི་འམ་ཅིའི་རྒྱལ་པོ་བརྩོན་འགྲུས་བརྟན་པ་
དང་། མི་འམ་ཅིའི་རྒྱལ་པོ་ཤིན་དུ་འཐད་པ་དང་། མི་འམ་ཅིའི་རྒྱལ་པོ་བཞིན་བརྒྱ་པ་དང་། མི་འམ་ཅིའི་རྒྱལ་པོ་ཤིང་རློན་དང་། དེ་ལྟ་བུ་ལ་སོགས་པ་མི་འམ་ཅིའི་རྒྱལ་པོ་བརྒྱ་སྟོང་དུ་མ་དག་ཚོགས་སོ། །ལྷའི་བུ་མོ་བརྒྱ་སྟོང་ཕྲག་
དུ་མ་དག་ཚོགས་པ་འདི་ལྟ་སྟེ། ལྷའི་བུ་མོ་ཏ་ལ་མཆོག་ཅེས་བྱ་བ་དང་། ལྷའི་བུ་མོ་ཤིན་དུ་བཀོད་པ་ཞེས་བྱ་བ་དང་། ལྷའི་བུ་མོ་གསེར་གྱི་སྐ་རགས་ཤེས་བྱ་བ་དང་། ལྷའི་བུ་མོ་རྒྱན་པ་ཞེས་བྱ་བ་དང་། ལྷའི་བུ་མོ་གདོས་
འཛིན་ཅེས་བྱ་བ་དང་། ལྷའི་བུ་མོ་བདུད་རྩིའི་ཐིགས་པ་ཞེས་བྱ་བ་དང་། ལྷའི་བུ་མོ་ལུས་ཡོངས་སུ་མཛེས་པ་ཞེས་བྱ་བ་དང་། ལྷའི་བུ་མོ་ནོར་བུའི་འོད་ཅེས་བྱ་བ་དང་། ལྷའི་བུ་མོ་གཙུག་ཕུད་ཅན་ཞེས་བྱ་བ་དང་། ལྷའི་བུ་མོ་ལྷའི་
བཞིན་སྟོན་པ་ཞེས་བྱ་བ་དང་། ལྷའི་བུ་མོ་སིལ་སྙན་ལྔ་མངོན་པ་ཞེས་བྱ་བ་དང་།  ལྷའི་བུ་མོ་གསེར་གྱི་ཕྲེང་བ་ཞེས་བྱ་བ་དང་། ལྷའི་བུ་མོ་མེ་ཏོག་ཨུད་པ་ལ་སྔོན་པོ་ཞེས་བྱ་བ་དང་། ལྷའི་བུ་མོ་ཆོས་མངོན་པ་ཞེས་བྱ་བ་དང་། ལྷའི་བུ་
མོ་ཤིན་དུ་རོལ་པ་ཞེས་བྱ་བ་དང་། ལྷའི་བུ་མོ་མ་ལུས་འབྱུང་གནས་ཤེས་བྱ་བ་དང་། ལྷའི་བུ་མོ་ཤིན་དུ་བཀོད་པའི་བློ་གྲོས་ཤེས་བྱ་བ་དང་། ལྷའི་བུ་མོ་དཔུང་རྒྱན་འཛིན་པ་ཞེས་བྱ་བ་དང་། ལྷའི་བུ་མོ་སྦྱིན་པ་སྦྱིན་བྱེད་ཅེས་བྱ་བ་དང་། ལྷའི་བུ་མོ་
ཟླ་བ་ཅན་དང་། དེ་ལྟ་བུ་ལ་སོགས་པ་ལྷའི་བུ་མོ་བརྒྱ་ཕྲག་དུ་མ་དག་ཚོགས་སོ། །ཀླུའི་བུ་མོ་བརྒྱ་ཕྲག་དུ་མ་དག་ཀྱང་ཚོགས་པ་འདི་ལྟ་སྟེ། ཀླུའི་བུ་མོ་རྒྱན་འཛིན་ཅེས་བྱ་བ་དང་། ཀླུའི་བུ་མོ་པུ་ལ་ནི་ད་ཞེས་བྱ་བ་དང་། ཀླུའི་བུ་མོ་རལ་པ་གསུམ་པ་ཞེས་

46-1-218b

བྱ་བ་དང་། ཀླུའི་བུ་མོ་ས་རིའི་བཞིན་ཞེས་བྱ་བ་དང་། ཀླུའི་བུ་མོ་རྒྱལ་བའི་དཔལ་ཞེས་བྱ་བ་དང་། ཀླུའི་བུ་མོ་གློག་གི་མིག་ཅེས་བྱ་བ་དང་། ཀླུའི་བུ་མོ་གློག་གི་འོད་ཅེས་བྱ་བ་དང་། ཀླུའི་བུ་མོ་ས་རི་ཞེས་བྱ་བ་དང་། ཀླུའི་བུ་མོ་གཡོག་བརྒྱ་པ་ཞེས་བྱ་
བ་དང་། ཀླུའི་བུ་མོ་སྨན་ཆེན་པོ་ཞེས་བྱ་བ་དང་། ཀླུའི་བུ་མོ་ཐིགས་པ་ཞེས་བྱ་བ་དང་། ཀླུའི་བུ་མོ་མགོ་གཅིག་མ་ཞེས་བྱ་བ་དང་། ཀླུའི་བུ་མོ་བཞོན་པ་བརྒྱ་པ་ཞེས་བྱ་བ་དང་། ཀླུའི་བུ་མོ་ཟ་བྱེད་ཅེས་བྱ་བ་དང་། ཀླུའི་བུ་མོ་མ་ལུས་འོངས་
ཤེས་བྱ་བ་དང་། ཀླུའི་བུ་མོ་ཤིན་ཏུ་བརྒྱན་མ་ཞེས་བྱ་བ་དང་། ཀླུའི་བུ་མོ་སྤྲིན་དཀར་མོ་ཞེས་བྱ་བ་དང་། ཀླུའི་བུ་མོ་དེ་བཞིན་དུ་ཆགས་པ་ཤེས་བྱ་བ་དང་། ཀླུའི་བུ་མོ་གཏོང་ལྡན་མ་ཞེས་བྱ་བ་དང་། ཀླུའི་བུ་མོ་འཁོར་མི་ཕྱེད་པ་ཞེས་བྱ་བ་དང་། 
ཀླུའི་བུ་མོ་པུ་ལིན་ད་ཞེས་བྱ་བ་དང་། ཀླུའི་བུ་མོ་རྒྱ་མཚོ་མཆིང་རྣམ་མངལ་ཞེས་བྱ་བ་དང་། ཀླུའི་བུ་མོ་གདུགས་ཀྱི་བཞིན་ཞེས་བྱ་བ་དང་། ཀླུའི་བུ་མོ་ཆོས་ལ་དགའ་བ་ཞེས་བྱ་བ་དང་། ཀླུའི་བུ་མོ་བདེ་བྱེད་ཅེས་བྱ་བ་དང་། ཀླུའི་བུ་མོ་བརྩོན་འགྲུས་
ཤེས་བྱ་བ་དང་། ཀླུའི་བུ་མོ་རྒྱ་མཚོ་མཆིང་རྣམ་ལྟར་ཟབ་པ་ཞེས་བྱ་བ་དང་། ཀླུའི་བུ་མོ་རི་རབ་ལྷུན་པོའི་དཔལ་ཞེས་བྱ་བ་དང་། དེ་ལྟ་བུ་ལ་སོགས་ཏེ་ཀླུའི་བུ་མོ་བརྒྱ་སྟོང་དུ་མ་དག་ཚོགས་སོ། །དྲི་ཟའི་བུ་མོ་བརྒྱ་སྟོང་དུ་མ་དག་ཀྱང་ཚོགས་པ་འདི་
ལྟ་སྟེ། དྲི་ཟའི་བུ་མོ་དགའ་བའི་བཞིན་ཞེས་བྱ་བ་དང་། དྲི་ཟའི་བུ་མོ་དགའ་བའི་སྦྱིན་བྱེད་ཅེས་བྱ་བ་དང་། དྲི་ཟའི་བུ་མོ་མི་སྟོན་པ་ཞེས་བྱ་བ་དང་། དྲི་ཟའི་བུ་མོ་རྡོ་རྗེའི་དཔལ་ཞེས་བྱ་བ་དང་། དྲི་ཟའི་བུ་མོ་རྡོ་རྗེའི་ཕྲེང་བ་ཞེས་བྱ་བ་དང་། དྲི་ཟའི་བུ་མོ་ཕྲེང་
བ་བཟང་པོ་ཅན་ཞེས་བྱ་བ་དང་། དྲི་ཟའི་བུ་མོ་ནགས་ཚལ་ཞེས་བྱ་བ་དང་། དྲི་ཟའི་བུ་མོ་མེ་ཏོག་བརྒྱ་པ་ཞེས་བྱ་བ་དང་། དྲི་ཟའི་བུ་མོ་མེ་ཏོག་འབུས་པ་ཞེས་བྱ་བ་དང་། དྲི་ཟའི་བུ་མོ་རིན་པོ་ཆེའི་ཕྲེང་བ་ཞེས་བྱ་བ་དང་། དྲི་ཟའི་བུ་མོ་དུས་པའི་མེ་ཏོག་ཅེས་བྱ་
བ་དང་། དྲི་ཟའི་བུ་མོ་མངལ་བཟང་མོ་ཞེས་བྱ་བ་དང་། དྲི་ཟའི་བུ་མོ་རྒྱལ་པོའི་དཔལ་ཞེས་བྱ་བ་དང་། དྲི་ཟའི་བུ་མོ་རྔ་ཞེས་བྱ་བ་དང་། དྲི་ཟའི་བུ་མོ་ཕྲེང་བ་བཟང་མོ་ཞེས་བྱ་བ་དང་། དྲི་ཟའི་བུ་མོ་རྒྱན་གྱིས་བརྒྱན་ཅེས་བྱ་བ་དང་། དྲི་ཟའི་བུ་མོ་མངོན་པར་བཏུད་པ་ཞེས་

46-1-219a

བྱ་བ་དང་། དྲི་ཟའི་བུ་མོ་ཆོས་འདོད་ཅེས་བྱ་བ་དང་། དྲི་ཟའི་བུ་མོ་ཆོས་སྦྱིན་ཞེས་བྱ་བ་དང་། དྲི་ཟའི་བུ་མོ་མེ་ཏོག་ཨུ་དུམ་བ་རའི་ལྟོ་བ་ཞེས་བྱ་བ་དང་། དྲི་ཟའི་བུ་མོ་རྣམ་པ་བརྒྱ་པ་ཞེས་བྱ་བ་དང་། དྲི་ཟའི་བུ་མོ་མེ་ཏོག་པད་མའི་དཔལ་ཞེས་
བྱ་བ་དང་། དྲི་ཟའི་བུ་མོ་མེ་ཏོག་པད་མའི་དམིགས་ཞེས་བྱ་བ་དང་། དྲི་ཟའི་བུ་མོ་ལུས་ཡོངས་སུ་མཛེས་པ་ཞེས་བྱ་བ་དང་། དྲི་ཟའི་བུ་མོ་ཆ་བས་དབང་པོ་བཞིན་དུ་འགྲོ་བ་ཞེས་བྱ་བ་དང་། དྲི་ཟའི་བུ་མོ་ས་སྦྱིན་ཞེས་བྱ་བ་དང་། དྲི་ཟའི་བུ་མོ་འབྲས་བུ་
སྦྱིན་ཞེས་བྱ་བ་དང་། དྲི་ཟའི་བུ་མོ་སེང་གེའི་འགྲོས་ཤེས་བྱ་བ་དང་། དྲི་ཟའི་བུ་མོ་མེ་ཏོག་ཀུ་མུ་ད་ཞེས་བྱ་བ་དང་། དྲི་ཟའི་བུ་མོ་ཡིད་དགའ་ཞེས་བྱ་བ་དང་། དྲི་ཟའི་བུ་མོ་སྦྱིན་བྱེད་ཅེས་བྱ་བ་དང་། དྲི་ཟའི་བུ་མོ་ལྷའི་ཚིག་ཅེས་བྱ་བ་དང་། དྲི་ཟའི་བུ་
མོ་བཟོད་དགའ་ཞེས་བྱ་བ་དང་། དྲི་ཟའི་བུ་མོ་མྱ་ངན་འདས་དགའ་ཞེས་བྱ་བ་དང་། དྲི་ཟའི་བུ་མོ་རིན་ཆེན་མྱུ་གུ་ཞེས་བྱ་བ་དང་། དྲི་ཟའི་བུ་མོ་དབང་པོའི་དཔལ་ཞེས་བྱ་བ་དང་། དྲི་ཟའི་བུ་མོ་སྐྱེ་དགུའི་བདག་མོའི་གནས་ཤེས་བྱ་བ་དང་། དྲི་ཟའི་བུ་མོ་རི་
དགས་ཀྱི་རྒྱལ་པོ་ཅན་ཞེས་བྱ་བ་དང་། དྲི་ཟའི་བུ་མོ་དཔལ་འདབ་ཞེས་བྱ་བ་དང་། དྲི་ཟའི་བུ་མོ་འབར་བའི་རྩེ་མོ་ཞེས་བྱ་བ་དང་། དྲི་ཟའི་བུ་མོ་འདོད་ཆགས་ལས་ཡོངས་སུ་གྲོལ་ཞེས་བྱ་བ་དང་། དྲི་ཟའི་བུ་མོ་ཞེ་སྡང་ལས་ཡོངས་སུ་གྲོལ་ཞེས་བྱ་བ་དང་། 
དྲི་ཟའི་བུ་མོ་གཏི་མུག་ལས་ཡོངས་སུ་གྲོལ་ཞེས་བྱ་བ་དང་། དྲི་ཟའི་བུ་མོ་འཁོར་བ་གྲུངས་མ་ཞེས་བྱ་བ་དང་། དྲི་ཟའི་བུ་མོ་རིན་པོ་ཆེའི་ཁྲིའུ་ཞེས་བྱ་བ་དང་། དྲི་ཟའི་བུ་མོ་འོང་བ་དང་འགྲོ་བ་ཞེས་བྱ་བ་དང་། དྲི་ཟའི་བུ་མོ་མེའི་འོད་ཅེས་བྱ་བ་དང་། དྲི་ཟའི་བུ་མོ་ཟླ་
བའི་གཟུགས་ཀྱི་འོད་ཅེས་བྱ་བ་དང་། དྲི་ཟའི་བུ་མོ་ཉི་མའི་མིག་ཅེས་བྱ་བ་དང་། དྲི་ཟའི་བུ་མོ་གསེར་ལྟར་སྣང་བ་ཞེས་བྱ་བ་དང་། དྲི་ཟའི་བུ་མོ་དམ་པའི་དཔལ་ཞེས་བྱ་བ་དང་། དེ་ལྟ་བུ་ལ་སོགས་པ་དྲི་ཟའི་བུ་མོ་བརྒྱ་ཕྲག་དུ་མ་དག་
ཚོགས་སོ། །འཁོར་དེར་མི་འམ་ཅིའི་བུ་མོ་བརྒྱ་ཕྲག་དུ་མ་དག་ཚོགས་པ་འདི་ལྟ་སྟེ། མི་འམ་ཅིའི་བུ་མོ་ཡིད་ཅེས་བྱ་བ་དང་། མི་འམ་ཅིའི་བུ་མོ་ཡིད་ལས་བྱུང་བ་ཞེས་བྱ་བ་དང་། མི་འམ་ཅིའི་བུ་མོ་རླུང་གི་ཤུགས་ཤེས་བྱ་བ་དང་། མི་འམ་ཅིའི་བུ་

46-1-219b

མོ་ནམཁའི་གཟིངས་ཤེས་བྱ་བ་དང་། མི་འམ་ཅིའི་བུ་མོ་མགྱོགས་པའི་ཤུགས་ཤེས་བྱ་བ་དང་། མི་འམ་ཅིའི་བུ་མོ་དཔལ་སྦྱིན་པ་ཞེས་བྱ་བ་དང་། མི་འམ་ཅིའི་བུ་མོ་མཆེ་བ་བཟང་མོ་ཞེས་བྱ་བ་དང་། མི་འམ་ཅིའི་བུ་མོ་མི་གཡོ་བའི་དཔལ་ཞེས་བྱ་བ་དང་། 
མི་འམ་ཅིའི་བུ་མོ་ཁམས་ལ་དགའ་བ་ཞེས་བྱ་བ་དང་། མི་འམ་ཅིའི་བུ་མོ་འབར་བ་ལ་དགའ་བ་ཞེས་བྱ་བ་དང་། མི་འམ་ཅིའི་བུ་མོ་ཤིན་དུ་དཔལ་ཞེས་བྱ་བ་དང་། མི་འམ་ཅིའི་བུ་མོ་རིན་པོ་ཆེ་འབྱུང་གནས་ཤེས་བྱ་བ་དང་། མི་འམ་ཅིའི་བུ་མོ་སྤྱན་
རས་གཟིགས་ཀྱི་དཔལ་ཞེས་བྱ་བ་དང་། མི་འམ་ཅིའི་བུ་མོ་སྟན་ཅན་ཞེས་བྱ་བ་དང་། མི་འམ་ཅིའི་བུ་མོ་རྡོ་རྗེའི་ཁུ་ཚུར་ཞེས་བྱ་བ་དང་། མི་འམ་ཅིའི་བུ་མོ་སེར་སྐྱ་ཞེས་བྱ་བ་དང་། མི་འམ་ཅིའི་བུ་མོ་རྒྱན་རབ་བརྒྱན་པ་ཞེས་བྱ་བ་དང་། 
མི་འམ་ཅིའི་བུ་མོ་འབྲལ་བ་འབྱེས་ཆེན་ཞེས་བྱ་བ་དང་། མི་འམ་ཅིའི་བུ་མོ་ངེས་པ་ཡོངས་སུ་བསྟེན་པ་ཞེས་བྱ་བ་དང་། མི་འམ་ཅིའི་བུ་མོ་བློ་གྲོས་ཆེན་མོ་ཞེས་བྱ་བ་དང་། མི་འམ་ཅིའི་བུ་མོ་ནམ་མཁའ་སྲུང་ཞེས་བྱ་བ་དང་། མི་འམ་ཅིའི་
བུ་མོ་བཀོད་པ་རྒྱལ་པོའི་དབང་ཞེས་བྱ་བ་དང་། མི་འམ་ཅིའི་བུ་མོ་གཙུག་ན་ནོར་བུ་ཞེས་བྱ་བ་དང་། མི་འམ་ཅིའི་བུ་མོ་ནོར་བུ་འཛིན་ཅེས་བྱ་བ་དང་། མི་འམ་ཅིའི་བུ་མོ་ནོར་བུ་འབར་མ་ཞེས་བྱ་བ་དང་། མི་འམ་ཅིའི་བུ་མོ་སྐྱེ་བོ་མཁས་པས་
བསྟེན་ཅེས་བྱ་བ་དང་། མི་འམ་ཅིའི་བུ་མོ་མདོག་མ་ཞེས་བྱ་བ་དང་། མི་འམ་ཅིའི་བུ་མོ་ཚེ་སྦྱིན་ཞེས་བྱ་བ་དང་། མི་འམ་ཅིའི་བུ་མོ་དེ་བཞིན་གཤེགས་པའི་མཛོད་ཡོངས་སུ་སྐྱོང་མ་ཞེས་བྱ་བ་དང་། མི་འམ་ཅིའི་བུ་མོ་ཆོས་ཀྱི་དབྱིངས་ཡོངས་སུ་སྲུང་བ་ཞེས་བྱ་
བ་དང་། མི་འམ་ཅིའི་བུ་མོ་རྐང་པའི་གདུབ་བུའི་རྔ་ཞེས་བྱ་བ་དང་། མི་འམ་ཅིའི་བུ་མོ་སྐད་ཅིག་སྒྲོལ་ཞེས་བྱ་བ་དང་། མི་འམ་ཅིའི་བུ་མོ་རྟག་ཏུ་ཆོས་ལེན་པར་འདོད་ཅེས་བྱ་བ་དང་། མི་འམ་ཅིའི་བུ་མོ་རྟག་ཏུ་དུས་དུས་སུ་སྟོན་མ་ཞེས་བྱ་བ་དང་། མི་འམ་ཅིའི་བུ་
མོ་དབུགས་འབྱིན་ཅེས་བྱ་བ་དང་། མི་འམ་ཅིའི་བུ་མོ་རྣམ་པར་ཐར་བྱེད་ཅེས་བྱ་བ་དང་། མི་འམ་ཅིའི་བུ་མོ་ཡོད་པ་མི་འཕྲོགས་པ་ཞེས་བྱ་བ་དང་། མི་འམ་ཅིའི་བུ་མོ་སྐྱོ་འཛིན་ཅེས་བྱ་བ་དང་། མི་འམ་ཅིའི་བུ་མོ་རལ་གྲི་འབར་ཞེས་བྱ་བ་དང་། མི་འམ་ཅིའི་བུ་མོ་ས་ལ་འགྲོ་

46-1-220a

ཞེས་བྱ་བ་དང་། མི་འམ་ཅིའི་བུ་མོ་ལྷ་དབང་ཕྲེང་བ་ཞེས་བྱ་བ་དང་། མི་འམ་ཅིའི་བུ་མོ་ལྷ་མ་ཡིན་གྱི་དབང་མོ་ཞེས་བྱ་བ་དང་། མི་འམ་ཅིའི་བུ་མོ་རུས་བཟོད་ཅེས་བྱ་བ་དང་། མི་འམ་ཅིའི་བུ་མོ་སྦྱིན་ལྡན་ཞེས་བྱ་བ་དང་། མི་འམ་ཅིའི་བུ་མོ་
མང་པོའི་གནས་ཤེས་བྱ་བ་དང་། མི་འམ་ཅིའི་བུ་མོ་ལག་ཆ་བརྒྱ་པ་ཞེས་བྱ་བ་དང་། མི་འམ་ཅིའི་བུ་མོ་རྒྱན་གྱིས་བརྒྱན་པ་ཅེས་བྱ་བ་དང་། མི་འམ་ཅིའི་བུ་མོ་ཡིད་འཕྲོག་ཅེས་བྱ་བ་དང་། དེ་ལྟ་བུ་ལ་སོགས་པ་མི་འམ་ཅིའི་བུ་མོ་བརྒྱ་ཕྲག་དུ་མ་དག་
ཚོགས་སོ། །དགེ་བསྙེན་དང་། དགེ་བསྙེན་མ་བརྒྱ་ཕྲག་དུ་མ་དག་ཚོགས་སོ། །མུར་འདུག་སྤྱོད་པ་དང་། ཀུན་དུ་རྒྱུ་བ་དང་། གཅེར་བུ་པ་བརྒྱ་ཕྲག་དུ་མ་དག་ཀྱང་ཚོགས་ཏེ་གང་གི་ཚེ་ན་འདུས་པ་ཆེར་གྱུར་པ་དེའི་ཚེ་སེམས་ཅན་དམྱལ་བ་ཆེན་
པོ་མནར་མེད་པར་འོད་ཟེར་བྱུང་ངོ་། །བྱུང་ནས་འཛེ་ཏའི་ཚལ་གྱི་གཙུག་ལག་ཁང་དུ་སོང་བ་དང་། དེ་དག་གིས་གཙུག་ལག་ཁང་དེ་ཡོངས་སུ་མཛེས་པར་སྣང་སྟེ། ཀ་བ་ནི་ལྷའི་ནོར་བུ་རིན་པོ་ཆེས་བརྒྱན་པར་སྣང་ངོ་། །རྩིག་པ་བརྒྱ་དག་
ཀྱང་གསེར་གྱིས་མཛེས་པར་བྱས་པར་སྣང་ངོ་། །གནས་ཁང་སོ་སོ་དག་ན་ནི་གསེར་དང་དངུལ་ལས་བྱས་པའི་སྒོ་དག་སྣང་ངོ་། །གནས་ཁང་སོ་སོ་ན་སྐས་གསེར་དང་། དངུལ་ལས་བྱས་པ་དག་ཀྱང་སྣང་ངོ་། །དངུལ་གྱི་ཁང་པ་དག་ན་ནི་
གསེར་གྱི་ཀ་བ་རིན་པོ་ཆེས་བརྒྱན། གསེར་གྱི་ཁང་པ་དག་ན་ནི་དངུལ་གྱི་ཀ་བ་རིན་པོ་ཆེས་བརྒྱན་པ་དང་། འཛེ་ཏའི་ཚལ་གྱི་ཕྱི་རོལ་ན་ཤིང་དཔག་བསམ་རྣམ་པ་སྣ་ཚོགས་དག་སྣང་སྟེ། གསེར་གྱི་སྡོང་པོ་དང་། དངུལ་གྱི་ལོ་མ་དང་། རྒྱན་
རྣམ་པ་སྣ་ཚོགས་རབ་ཏུ་འཕྱང་བ་དག་དང་། ཡུལ་ཀ་ཤི་ཀ་ནས་བྱུང་བའི་གོས་རབ་ཏུ་འཕྱང་བ་དག་དང་། རྒྱའི་གོས་བརྒྱ་སྟོང་རབ་ཏུ་འཕྱང་བ་དང་། མུ་ཏིག་གི་སེ་མོ་དོ་བརྒྱ་སྟོང་རབ་ཏུ་འཕྱང་བ་དང་། ཅོད་པན་དང་། རྣ་ཆ་དང་ཕྲེང་བའི་ལྡ་ལྡི་དང་། 
དཔུང་རྒྱན་དང་། རྐང་པའི་གདུ་བུ་རབ་ཏུ་འཕྱང་བ་དང་། ཕྱི་རོལ་ན་རིན་པོ་ཆེའི་གདུབ་བུ་སྟེང་རིན་པོ་ཆེ་ལས་བྱས་པ། དེ་ལ་འཕྱང་བའི་ཤིང་དབང་གི་བསམ་གྱི་ཤིང་དེ་ལྟ་བུ་བརྒྱ་དག་ཀྱང་བྱུང་ངོ་། །འཛེ་ཏའི་ཚལ་གྱི་གཙུག་ལག་ཁང་དེ་ཉིད་ན་སྐས་

46-1-220b

དག་ཀྱང་རྡོ་རྗེ་ལས་བྱས་པར་སྣང་ངོ་། །སྒོ་རྒྱབ་ན་མུ་ཏིག་དང་། དར་གྱི་ཚོགས་རབ་ཏུ་སྤྱངས་སོ། །རྫིང་བུ་དུ་མ་དག་ཀྱང་བྱུང་སྟེ། ལ་ལ་ནི་ཆུ་ཡན་ལག་བརྒྱད་དང་ལྡན་པས་ཡོངས་སུ་གང་། ལ་ལ་ནི་མེ་ཏོག་རྣམ་པ་སྣ་ཚོགས་ཀྱིས་ཡོངས་སུ་
གང་བ་དག་འདི་ལྟ་སྟེ། མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པུན་ད་རི་ཀ་དང་། མན་དཱ་ར་བ་དང་། མན་དཱ་ར་བ་ཆེན་པོ་དང་། ཨུ་དུམ་བ་ར་དག་གིས་ཡོངས་སུ་གང་ངོ་། །གཞན་ཡང་ཤིང་གི་མེ་ཏོག་རྣམ་པ་སྣ་ཚོགས་སྐྱེ་བ་འདི་
ལྟ་སྟེ། མེ་ཏོག་ཙམ་པ་ཀ་དང་། ཀ་ར་བི་ར་དང་། པ་ཏ་ལ་དང་། ཨ་ཏི་མུག་ཏ་ཀ་དང་། དབྱར་གྱི་དྲི་དང་། གཞན་ཡང་ཤིང་གི་མེ་ཏོག་ཡིད་དགའ་བ་དག་བྱུང་སྟེ། འཛེ་ཏའི་ཚལ་གྱི་གཙུག་ལག་ཁང་དེ་ཡོངས་སུ་མཛེས་པར་བྱས་པ་ཉིད་དུ་སྣང་ངོ་། །དེ་ནས་འཁོར་
དེ་ཉིད་ཀྱི་ནང་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་
སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་ཤིན་དུ་ངོ་མཚར་རྨད་དུ་བྱུང་བ་ཐོབ་བོ། །བཅོམ་ལྡན་འདས་འོད་ཟེར་ཆེན་པོ་འདི་དག་ག་ལས་མཆིས། རྫུ་འཕྲུལ་གྱི་ཡུལ་གྱི་མཐུ་འདི་
སུའི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་འདི་ནི་མནར་མེད་པའི་སེམས་ཅན་དམྱལ་བ་ཆེན་པོར་ཞུགས་ནས་སེམས་ཅན་རྣམས་ཡོངས་སུ་
སྨིན་པར་བྱེད་དེ། ཡོངས་སུ་སྨིན་པར་བྱས་ནས་ཡི་དགས་ཀྱི་གྲོང་ཁྱེར་དུ་འདུག་གོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་
མནར་མ་མཆིས་པའི་སེམས་ཅན་དམྱལ་བ་ཆེན་པོ་ན་མནར་མི་གདའ་ན། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་འཇུག་པར་བགྱིད། སེམས་ཅན་དམྱལ་བ་ཆེན་པོ་ལྕགས་

46-1-221a

ཀྱི་བརྩིག་པས་བསྐོར་ལ། ལྕགས་ཀྱི་དོག་ས་ལ་ཤིན་དུ་འབར་བ། མེ་ལྕེ་གཅིག་ཏུ་འདུས་པ། རྣམ་པར་གཡོ་བ་དེ་ན་འབོད་གྲོགས་པ་དག་གནས་པའི་སྣོད་ཟ་མ་ཏོག་འདྲ་བ་མཆིས་ཏེ། སྣོད་དེར་སེམས་ཅན་བྱེ་བ་ཁྲག་ཁྲིག་བརྒྱ་སྟོང་
ཕྲག་དུ་མ་བསྩལ་ཏོ། །ནམ་ཆུ་མང་པོ་མཆིས་པའི་སྣོད་ན་སྲན་ཆུང་དཀར་རུ་འམ། ན་གུ་གྱེན་དུ་མཆི་ན། ཡང་བྲེལ་བ་དང་། སྨིན་པར་འགྱུར། ཐུར་དུ་མཆི་ན་ཡང་བྲེལ་བ་དང་སྨིན་པར་འགྱུར་བ་དེ་བཞིན་དུ་སེམས་ཅན་དེ་དག་ཀྱང་མནར་མ་མཆིས་
པའི་སེམས་ཅན་དམྱལ་བ་ཆེན་པོ་དེར་ལུས་ཀྱི་སྡུག་བསྔལ་ཉམས་སུ་མྱོང་ན། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་མནར་མ་མཆིས་པའི་སེམས་ཅན་དམྱལ་བ་ཆེན་པོར་
འཇུག་པར་བགྱིད། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཇི་ལྟར་འཁོར་ལོས་སྒྱུར་བའི་རྒྱལ་པོ་ལྷའི་ནོར་བུ་རིན་པོ་ཆེ་ལས་བྱས་པའི་སྐྱེད་མོས་ཚལ་དུ་འཇུག་པ་དེ་བཞིན་དུ། རིགས་ཀྱི་བུ་བྱང་ཆུབ་སེམས་དཔའ་
སྤྱན་རས་གཟིགས་ཀྱི་དབང་པོ་ཡང་མནར་མེད་པའི་སེམས་ཅན་དམྱལ་བ་ཆེན་པོར་འཇུག་མོད་ཀྱི་དེའི་ལུས་ལ་གཞན་དུ་འགྱུར་བ་མེད་དོ། །ནམ་མནར་མེད་པའི་སེམས་ཅན་དམྱལ་བ་ཆེན་པོ་དང་ཉེ་བར་འགྲོ་བ་དེའི་ཚེ་མནར་
མེད་པའི་སེམས་ཅན་དམྱལ་བ་ཆེན་པོ་དེ་བསིལ་བར་འགྱུར་ཏེ། དེའི་ཚེ་གཤིན་རྗེའི་མི་དེ་དག་མནར་མེད་པའི་སེམས་ཅན་དམྱལ་བ་ཆེན་པོར་ཅི་མི་དགེ་བའི་ལྟས་ཤིག །ནམ་བྱང་ཆུབ་སེམས་དཔའ་སྤྱན་རས་གཟིགས་ཀྱི་
དབང་པོ་འོངས་པ་དེའི་ཚེ་མེ་ཏོག་པད་མ་ཤིང་རྟའི་འཁོར་ལོ་ཙམ་བྱུང་ཞིང་སྣོད་དེ་ཡང་གས་མེ་དེའི་འོབས་དེ་ཉིད་དུ་ཡང་རྫིང་བུ་བྱུང་བར་གྱུར་ཞེས་སྐྱོ་བར་གྱུར་ཏོ། །དེ་ནས་གཤིན་རྗེའི་སྐྱེས་བུ་དེ་དག་རལ་གྲི་དང་། གཏུན་དང་མཚོན་ཆ་བྷིཎྜི་པཱ་
ལ་དང་། ཏོ་མར་དང་། འགའ་ད་དང་། འཁོར་ལོ་དང་། རྩེ་གསུམ་པ་ལ་སོགས་པ་ཐོགས་ནས་གཤིན་རྗེའི་རྒྱལ་པོ་ག་ལ་བ་དེར་སོང་སྟེ། ཕྱིན་ནས་འདི་སྐད་ཅེས་སྨྲས་སོ། །ལྷ་བདག་ཅག་གི་སུག་ལས་ཀྱི་དོག་ས་དེ་ཡོངས་སུ་བས་པར་མཁྱེན་པར་

46-1-221b

མཛོད་ཅིག །ཅིའི་ཕྱིར་ཁྱེད་ཀྱི་ལས་ཀྱི་ས་ཡོངས་སུ་ཟད་དམ། ལྷ་ཅི་ལགས་མི་མཁྱེན་ཏམ། མནར་མ་མཆིས་པའི་སེམས་ཅན་དམྱལ་བ་དེར་ཐོག་མ་ཁོ་ནར་མི་དགེ་བའི་ལྟས་བྱུང་སྟེ། སྐྱེས་བུ་ཇི་ལྟར་འདོད་པའི་གཟུགས་ཅན་རལ་པའི་ཅོད་པན་
ཅན་ལུས་རྒྱན་ཐམས་ཅད་ཀྱིས་བརྒྱན་པ་ཕྱིན་པ་དང་བསིལ་བར་གྱུར་ཏོ། །གང་གི་ཚེ་དེ་ཕྱིན་པ་དེའི་ཚེ་མེ་ཏོག་པད་མ་ཤིང་རྟའི་འཁོར་ལོ་ཙམ་ཡང་བྱུང་། སྣོད་དེ་ཡང་གས། ཞུགས་ཀྱི་འོབས་དེར་ཡང་རྫིང་བུ་བྱུང་བར་གྱུར་ཏོ། །དེ་ནས་གཤིན་རྗེའི་
རྒྱལ་པོ་སེམས་པར་གྱུར་ཏེ། མཐུ་འདི་ལྷ་གང་གི་ཡིན་ཡང་ན་ལྷའི་བུ་དབང་ཕྱུག་ཆེན་པོ་དང་། མཐུ་བོ་ཆེ་ལས་དམ་པ་ཐོབ་པ་ཞིག་ས་འདིར་འོངས་སམ། ཡང་ན་སྲིན་པོ་མཐུ་བོ་ཆེ་ལྷའི་བལ་གླང་གི་སྟོབས་དང་འགྲན་པ་ཉིད་སྐྱེས་སམ་ཞེས་
དེས་ལྷའི་མིག་གིས་རྣམ་པར་བལྟས་ན་ལྷའི་སྡེའི་ནང་ན་དམ་པ་དེ་ལྟ་བུ་མ་མཐོང་ངོ་། །དེ་ནས་སླར་ཡང་མནར་མེད་པའི་སེམས་ཅན་དམྱལ་བ་ཆེན་པོར་བལྟས་སོ། །དེས་བལྟས་པ་དང་མནར་མེད་པའི་སེམས་ཅན་དམྱལ་བ་ཆེན་པོ་དེ་ན་བྱང་
ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་བཞུགས་པ་ཉིད་མཐོང་ངོ་། །དེ་ནས་གཤིན་རྗེའི་རྒྱལ་པོ་བྱང་ཆུབ་སེམས་དཔའ་སེམས་དཔའ་ཆེན་པོ་ག་ལ་བ་དེར་དོང་སྟེ་ཕྱིན་པ་དང་། ཞབས་ལ་མགོ་བོས་ཕྱག་འཚལ་ནས་བསྟོད་
པའི་ཁྱད་པར་བྱེད་པར་རྩོམ་པ། སྤྱན་རས་གཟིགས་ཀྱི་དབང་པོ་དབང་ཕྱུག་ཆེན་པོ། པད་མ་ལ་དགྱེས་པ། དམ་པ་སྩོལ་བ། དབང་དུ་མཛད་པ། སའི་སྤྱན་དམ་པ་མཛད་པ། དབུགས་འབྱིན་པར་མཛད་པ། ཕྱག་བརྒྱ་སྟོང་པ། སྤྱན་བྱེ་བ་
བརྒྱ་སྟོང་པ། དབུ་བཅུ་གཅིག་པ། རྒོད་མའི་བཞིན་ལྟ་བུའི་མཐར་ཕྱིན་པ། ཆོས་ལ་དགྱེས་པ། སེམས་ཅན་ཐམས་ཅད་ཡོངས་སུ་ཐར་བར་མཛད་པ་རུ་སྦལ་དང་། ཆུ་སྲིན་དང་། ཉ་རྣམས་དབུགས་འབྱིན་པར་མཛད་པ། ཡེ་ཤེས་
ཀྱི་ཕུང་པོ་དམ་པ་མཛད་པ། དགའ་བ་སྩོལ་བ། རིན་པོ་ཆེའི་དཔལ་དམ་པ། མནར་མེད་པ་ཀུན་སྐེམས་པར་མཛད་པ། ཡེ་ཤེས་ཀྱི་དཔལ་གྱིས་བརྒྱན་པ། ཡེ་ཤེས་ལ་དགྱེས་པ། ལྷ་ཐམས་ཅད་ཀྱིས་མཆོད་པ། ཕྱག་འཚལ་བ། བཀུར་སྟི་

46-1-222a

བགྱིས་པ། མི་འཇིགས་པ་སྩོལ་བ། ཕ་རོལ་དུ་ཕྱིན་པ་དྲུག་སྟོན་པར་མཛད་པ། ཉི་མ་ལྟ་བུའི་སྤྱན་མཆོག་མཛད་པ། ཆོས་ཀྱི་སྒྲོན་མ་མཛད་པ། ཇི་ལྟར་དགྱེས་པའི་གཟུགས་ཀྱི་གཟུགས་མཆོག །དྲི་ཟའི་གཟུགས་དང་
ལྡན་པ། གསེར་གྱི་རིའི་གཟུགས་དང་མཚུངས་པ། རྒྱ་མཚོ་མཆིང་རྣམ་གྱི་གློང་བཞིན་དུ་ཟབ་པ། དོན་དམ་པའི་རྣལ་འབྱོར་རྗེས་སུ་ཐོབ་པ། བདག་གི་ཞལ་སྟོན་པར་མཛད་པ། ཏིང་ངེ་འཛིན་བརྒྱ་སྟོང་དུ་མ་དང་ལྡན་པ། མངོན་པར་
དགྱེས་པར་མཛད་པ། སྐུ་རྒྱན་པ་སྐྱེས་བུའི་ཁྱུ་མཆོག །ཁུ་སྒོ་དང་། ཁོང་སྒྲིལ་དང་། འཁྲུལ་འཁོར་གྱི་ལམ་ལས་ཡོངས་སུ་ཐར་བར་མཛད་པ། སྲིད་པ་ཐམས་ཅད་དང་མ་འབྲེལ་བ། །འཁོར་མང་པོ་འབྱུང་བར་འགྱུར་བ་བསགས་པ། 
ཡིད་བཞིན་གྱི་ནོར་བུ་རིན་པོ་ཆེ་མཛད་པ། མྱ་ངན་ལས་འདས་པའི་ལམ་སྟོན་པར་མཛད་པ། ཡི་དགས་ཀྱི་གྲོང་ཁྱེར་སྐེམས་པར་མཛད་པ། སྐྱེ་བོ་ལ་གདུགས་སུ་གྱུར་པར་མཛད་པ། ནད་ལས་ཡོངས་སུ་ཐར་བར་མཛད་པ། ཀླུའི་རྒྱལ་པོ་དགའ་
བོ་དང་ཉེ་དགའ་བོའི་མཆོད་ཕྱིར་ཐོགས་པ། དོན་ཡོད་པར་འགྱུར་བའི་ཞགས་པ་སྟོན་པར་མཛད་པ། སྔགས་བརྒྱ་ཕྲག་དུ་མ་དང་ལྡན་པ། ལག་ན་རྡོ་རྗེ་སྐྲག་པར་མཛད་པ། འཇིག་རྟེན་གསུམ་པོ་སྐྲག་པར་མཛད་པ། གནོད་
སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་དང་ཕྲ་མེན་ཕ་དང་། ཕྲ་མེན་མ་དང་། རོ་ལངས་དང་། གྲུལ་བུམ་དང་། རྗེད་བྱེད་རྣམས་སྐྲག་པར་མཛད་པ། སྤྱན་ཨུད་པ་ལ་སྔོན་པོ་ལྟ་བུ། ཟབ་ཅིང་བརྟན་པར་མཛད་པ། རིག་པའི་བདག་པོ་ཉོན་
མོངས་པ་ཐམས་ཅད་ལས་རྣམ་པར་གྲོལ་བར་མཛད་པ། ལམ་སྣ་ཚོགས་བསགས་པ། ཐར་པའི་དམ་པ་ལ་ཞུགས་པ། སྐུ་ལ་བྱང་ཆུབ་ཀྱི་ལམ་བསགས་པ། ཡི་དགས་ཡོངས་སུ་ཐར་བར་མཛད་པ། ཏིང་ངེ་འཛིན་རྡུལ་ཕྲ་རབ་
ལྟ་བུ་བརྒྱ་སྟོང་དང་ལྡན་པ་ལ་ཕྱག་འཚལ་ལོ་ཞེས་དེ་ལྟར་གཤིན་རྗེའི་རྒྱལ་པོས་ཁྱད་པར་དམ་པའི་བསྟོད་པས་བསྟོད་ནས། སླར་ཡང་གཤིན་རྗེའི་རྒྱལ་པོས་ལན་གསུམ་བསྐོར་ཏེ་དེ་ཉིད་ནས་སོང་ངོ་། །དེ་ནས་བཅོམ་ལྡན་འདས་ལ་བྱང་ཆུབ་

46-1-222b

སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་མཆི་འམ། བཅོམ་ལྡན་འདས་ཀྱིས་བཀའ་སྩལ་
པ། རིགས་ཀྱི་བུ་དེ་ནི་མནར་མེད་པའི་སེམས་ཅན་དམྱལ་བ་ཆེན་པོ་ནས་བྱུང་སྟེ། ཡི་དགས་ཀྱི་གྲོང་ཁྱེར་དུ་སོང་ནས་མགལ་ཤིང་ལྟ་བུ་དང་། ཀེང་རུས་བསྒྲེང་བ་དང་། བདག་གི་སྐྲ་དང་སྤུས་གཡོགས་པ་དང་། ལྟོ་རི་དང་འདྲ་བ་དང་། 
ཁ་ཁབ་ཀྱི་མིག་ལྟ་བུའི་ཡི་དགས་བརྒྱ་སྟོང་དུ་མ་མདུན་ནས་རྒྱུག་གོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནམ་ཡི་དགས་ཀྱི་གྲོང་ཁྱེར་དུ་སོང་བ་དེའི་ཚེ་ཡི་དགས་ཀྱི་གྲོང་ཁྱེར་དེ་
བསིལ་བར་འགྱུར། རྡོ་རྗེའི་སེར་བ་དེ་ཡང་རབ་ཏུ་ཞི་བར་འགྱུར་རོ། །སྒོ་བ་དེ་ཡང་བྱིན་པ་ཐག་ཐུག་ཅན་ལ་མིག་དམར་ཞིང་ལག་ན་ཁར་བ་ཐོགས་པ་ལས་ཀྱི་ས་འདི་འདྲ་བ་ནི་བདག་གི་བྱ་བ་མ་ཡིན་ནོ་ཞེས་བྱམས་པའི་
སེམས་སྐྱེད་དོ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཕྱག་གི་སོར་མོ་བཅུ་ལས་ཆུ་བོ་ཆེན་པོ་བཅུ་བྱུང་། ཞབས་ཀྱི་སོར་མོ་བཅུ་ལས་ཆུ་བོ་ཆེན་པོ་བཅུ་བྱུང་སྟེ། བྱང་ཆུབ་སེམས་
དཔའ་སྤྱན་རས་གཟིགས་ཀྱི་དབང་པོ་ཤིན་དུ་ཐུགས་བརྩེ་བའི་ཟིལ་གྱིས་ནོན་ནས་བ་སྤུའི་ཁུང་བུ་ནས་ཆུ་བོ་བྱུང་ངོ་། །གང་གི་ཚེ་ན་དེ་དག་གིས་ཆུ་མྱོང་བ་དེའི་ཚེ་དེ་དག་མགྲིན་པ་ཡངས་པར་གྱུར། ལུས་ཀྱང་ཡོངས་སུ་རྫོགས་
པར་གྱུར། ལྷའི་ཟས་རོའི་ནང་ན་རོ་མཆོག་ཏུ་བྱུང་བ་དང་ལྡན་པས་ཚིམ་པར་གྱུར་ནས་དེའི་ཚེ་འཁོར་བའི་བསམ་པ་ལ་སེམས་ཏེ། ཀྱེ་མའོ་འཛམ་བུའི་གླིང་གི་མི་འདི་དག་ནི་གྲིབ་མ་བསིལ་བ་ལ་ཡོངས་སུ་བསྟེན་ཏོ། །ཡང་འཛམ་
བུའི་གླིང་གི་མི་འདི་དག་ནི་རྟག་ཏུ་ཕ་མ་ལ་ཡོངས་སུ་འཛིན་ཅིང་བསྙེན་བཀུར་བྱེད་དེ་བདེ་བ་དང་ལྡན་པའོ། །གང་རྟག་ཏུ་དགེ་བའི་བཤེས་གཉེན་དང་སྟེན་ཅིང་སྐྱོང་བའི་སྐྱེས་བུ་དེ་དག་ནི་བདེ་བ་དང་ལྡན་པའོ། །གང་རྟག་ཏུ་ཐེག་པ་ཆེན་པོ་རྟག་ཏུ་

46-1-223a

ཁོང་དུ་ཆུད་པར་བྱེད་པའི་སྐྱེས་བུ་དམ་པ་དེ་དག་ནི་བསམ་པ་དང་ལྡན་པའོ། །གང་འཕགས་པའི་ལམ་ཡན་ལག་བརྒྱད་པ་ལ་གནས་པར་བྱེད་པ་དེ་དག་ནི་སྐྱེས་བུ་དམ་པའོ། །གང་ཆོས་ཀྱི་གཎ་ཌི་རྡུང་བ་དེ་དག་ནི་སྐྱེས་བུ་
དམ་པའོ། །གང་གཙུག་ལག་ཁང་གས་པ་དང་གོགས་པ་རྣམས་སླར་འཆོས་པ་དེ་དག་ནི་སྐྱེས་བུ་དམ་པའོ། །གང་སྔོན་གྱི་མཆོད་རྟེན་གྱི་གཟུགས་གས་པ་དང་། གོགས་པ་རྣམས་སླར་འཆོས་པ་དེ་དག་ནི་སྐྱེས་བུ་དམ་པའོ། །གང་
ཆོས་སྨྲ་བ་དང་རྟེན་པ་དེ་དག་ནི་སྐྱེས་བུ་དམ་པའོ། །གང་དེ་བཞིན་གཤེགས་པ་འཆག་པ་མཐོང་བ་དེ་དག་ནི་སྐྱེས་བུ་དམ་པའོ། །གང་རང་སངས་རྒྱས་འཆག་པ་མཐོང་བ་དེ་དག་ནི་སྐྱེས་བུ་དམ་པའོ། །གང་བྱང་ཆུབ་སེམས་
དཔའ་འཆག་པ་མཐོང་བ་དེ་དག་ནི་སྐྱེས་བུ་དམ་པའོ་ཞེས་དེ་ལྟར་ལུས་ཀྱི་རྗེས་སུ་སེམས་པ་དང་། དེའི་ཚེ་ཐེག་པ་ཆེན་པོའི་མདོ་ཟ་མ་ཏོག་བཀོད་པ་དཀོན་མཆོག་གི་རྒྱལ་པོའི་སྒྲ་བྱུང་ངོ་། །དེའི་ཚེ་དེ་དག་གི་འཇིག་ཚོགས་ལ་ལྟ་བའི་
རིའི་རྩེ་མོ་ཉི་ཤུ་བྱུང་བ་ཡེ་ཤེས་ཀྱི་རྡོ་རྗེས་བཅོམ་ནས་དེ་དག་ཐམས་ཅད་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་སྟེ། བྱང་ཆུབ་སེམས་དཔའ་འདོད་པའི་བཞིན་ཞེས་བྱ་བར་སྐྱེས་ནས་གང་གི་ཚེ་དེས་སེམས་ཅན་ཡོངས་སུ་
སྨིན་པར་བྱས་པ་དེའི་ཚེ་སླར་ཡང་སོང་ངོ་། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་
གཟིགས་ཀྱི་དབང་པོ་མཆི་འམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཉི་མ་རེ་རེ་ཞིང་སེམས་ཅན་བྱེ་བ་ཁྲག་ཁྲིག་བརྒྱ་སྟོང་དུ་མ་ཡོངས་སུ་སྨིན་པར་བྱེད་དེ། རིགས་ཀྱི་བུ་ཇི་ལྟར་བྱང་ཆུབ་སེམས་དཔའ་
སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་སྤོབས་པ་དེ་འདྲ་བ་ནི་དེ་བཞིན་གཤེགས་པ་རྣམས་ལ་མེད་དོ། །སྒྲིབ་པ་ཐམས་ཅད་རྣམ་པར་སེལ་བས་གསོལ་པ། བཅོམ་ལྡན་འདས་ཅིའི་སླད་དུ། བཅོམ་ལྡན་འདས་ཀྱིས་

46-1-223b

བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྷག་མཐོང་ཞེས་བྱ་བ་རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་
ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སྔོན་འཇིག་རྟེན་དུ་འབྱུང་བར་གྱུར་ཏོ། །དེའི་ཚེ་དེའི་དུས་ན་སྒྲིབ་པ་ཐམས་ཅད་རྣམ་པར་སེལ་བ་ང་ནི་སྤོས་ཀྱི་བཞིན་ཞེས་བྱ་
བའི་ཚོང་པའི་བུར་གྱུར་ཏེ། དེའི་ཚེ་ངས་དེ་བཞིན་གཤེགས་པ་ལྷག་མཐོང་ལས་སྤྱན་རས་གཟིགས་ཀྱི་དབང་པོའི་ཡོན་ཏན་བརྗོད་པ་ཐོས་སོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་
འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཡོན་ཏན་བརྗོད་པ་ཇི་སྐད་དུ་གསན། བཅོམ་ལྡན་འདས་ཀྱིས་བཀའ་སྩལ་
པ། མིག་ལས་ནི་ཉི་མ་དང་ཟླ་བ་བྱུང་། འཕྲལ་བ་ལས་ནི་དབང་ཕྱུག་ཆེན་པོ། ཕྲག་པ་ལས་ནི་ཚངས་པ། སྙིང་ལས་ནི་མཐུ་བོ་ཆེ། མཆེ་བ་གཉིས་ལས་ནི་ལྷ་མོ། ཁ་ནས་ནི་རླུང་རྣམས་བྱུང་། རྐང་པ་ལས་ནི་ས། ལྟོ་བ་ལས་
ནི་ཆུའི་ལྷ་བྱུང་སྟེ། གང་གི་ཚེ་སྤྱན་རས་གཟིགས་ཀྱི་དབང་པོའི་ལུས་ལས་ལྷ་དེ་དག་བྱུང་བ་དེའི་ཚེ་བཅོམ་ལྡན་འདས་ཀྱིས་ལྷའི་བུ་དབང་ཕྱུག་ཆེན་པོ་ལ་འདི་སྐད་ཅེས་གསུངས་ཏེ། དབང་ཕྱུག་ཆེན་པོ་ཁྱོད་དུས་ངན་པའི་ཚེ་སེམས་ཅན་
གྱི་ཁམས་མ་རུངས་པ་དག་བྱུང་བ་ན་ཁྱོད་ཐོག་མར་བྱེད་པ་པོ། གཏོང་བ་པོའི་ལྷར་གྲགས་པར་འགྱུར་རོ། །སེམས་ཅན་དེ་དག་ནི་བྱང་ཆུབ་ཀྱི་ལམ་ཡོངས་སུ་སྤངས་པར་འགྱུར་རོ། །སོ་སོའི་སྐྱེ་བོའི་ནང་དུ་ནི་ནམ་མཁའ་
ནི་དེའི་རྟགས་སོ། །ས་ནི་དེའི་ཁྲིའོ། །སེམས་ཅན་ཐམས་ཅད་ཀྱི་ནི་གནས་སོ། །ཞུ་བར་འགྱུར་བས་ན་རྟགས་སོ་ཞེས་ཟེར་བར་འགྱུར་རོ་ཞེས་རིགས་ཀྱི་བུ་ངས་དེ་བཞིན་གཤེགས་པ་ལྷག་མཐོང་ལས་དེ་སྐད་ཐོས་སོ། །དེ་འདས་ནས་དེ་བཞིན་

46-1-224a

གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཙུག་ལྡན་ཞེས་བྱ་བ་རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་
མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་བྱུང་བར་གྱུར་ཏོ། །དེའི་ཚེ་དེའི་དུས་ན་སྒྲིབ་པ་ཐམས་ཅད་རྣམ་པར་སེལ་བ་ང་ནི་བྱང་ཆུབ་སེམས་དཔའ་སྦྱིན་པ་ཞེས་བྱ་བར་གྱུར་ཏེ། དེ་ལས་ཀྱང་ངས་བྱང་ཆུབ་སེམས་
དཔའ་སྤྱན་རས་གཟིགས་ཀྱི་དབང་པོའི་ཡོན་ཏན་བརྗོད་པ་ཐོས་སོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏེ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་
དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཡོན་ཏན་བརྗོད་པ་ཇི་སྐད་དུ་གསན། བཅོམ་ལྡན་འདས་ཀྱིས་བཀའ་སྩལ་པ། ལྷ་དང་ཀླུ་དང་གནོད་སྦྱིན་དང་།  ལྷ་མ་ཡིན་དང་།  ལྟོ་འཕྱེ་ཆེན་པོ་དང་། མི་ཐམས་ཅད་འདུས་པར་གྱུར་ཏེ། 
གང་གི་ཚེ་ན་བཅོམ་ལྡན་འདས་ཀྱིས་འདུས་པ་ཆེན་པོ་གཟིགས་ནས་འཁོར་དེའི་ནང་དུ་ཆོས་ཀྱི་གཏམ་བྱ་བར་བརྩམས་པ་དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་སྣ་ཚོགས་བྱུང་བ་སྔོན་པོ་དང་། 
སེར་པོ་དང་། དམར་པོ་དང་། དཀར་པོ་དང་། ཇ་ཧོང་དང་། ཤེལ་དང་དངུལ་གྱི་ཁ་དོག་རྣམས་བྱུང་སྟེ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་དུ་སྣང་བར་བྱས་ནས་སླར་འོངས་ཏེ་བསྐོར་ནས་བཅོམ་ལྡན་འདས་ཀྱི་ཞལ་གྱི་
སྒོར་སོང་ངོ་། །དེ་ནས་འཁོར་དེར་བྱང་ཆུབ་སེམས་དཔའ་ལག་ན་རིན་པོ་ཆེ་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་
ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་ལྟས་འདི་ལྟ་བུ་བསྟན་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་

46-1-224b

དཔའ་ཆེན་པོ་སྤྱན་རས་གཟིགས་ཀྱི་དབང་པོ་དེ་འཇིག་རྟེན་གྱི་ཁམས་བདེ་བ་ཅན་ནས་འོང་སྟེ། དེ་འོང་བའི་ཚེ་ལྟས་འདི་འདྲ་བ་སྟོན་ཏོ། །གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་འོང་བ་དེའི་ཚེ་
ཤིང་དཔག་བསམ་རྣམས་ཀྱང་འཕེལ་བར་འགྱུར། ཤིང་ཙུ་ཏ་ཀ་ཡང་འཕེལ་བར་འགྱུར། ཤིང་ཀུན་དའི་མེ་ཏོག་ཀྱང་འབྱུང་བར་འགྱུར། ཤིང་ཙམ་པ་ཀ་ཡང་འཕྱང་བར་འགྱུར། རྫིང་བུ་མེ་ཏོག་གིས་ཤིན་དུ་གང་བ་ཡང་འབྱུང་བར་འགྱུར། 
དེ་ལས་རིན་པོ་ཆེའི་ཤིང་རྣམས་ཀྱང་འབྱུང་བར་འགྱུར། ཆར་སྣ་ཚོགས་ཀྱང་འབབ་པར་འགྱུར་ཏེ། ནོར་བུ་དང་། མུ་ཏིག་དང་།  བཻ་དཱུརྱ་དང་། དུང་དང་མན་ཤེལ་དང་། བྱི་རུ་རིན་པོ་ཆེའི་ཆར་ཡང་འབབ། ལྷའི་གོས་ཀྱི་ཆར་ཡང་འབབ་པར་འགྱུར་
རོ། །ལྷ་གང་དེ་དང་ཉེ་བ་ཉིད་དུ་རིན་པོ་ཆེ་བདུན་ཡང་འབྱུང་བ་འདི་ལྟ་སྟེ། འཁོར་ལོ་རིན་པོ་ཆེ་དང་། བལ་གླང་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བློན་པོ་རིན་པོ་ཆེ་བདུན་རྣམས་
སོ། །དེ་དག་བྱུང་ནས་ས་གསེར་དུ་སྣང་ངོ་། །གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་འཇིག་རྟེན་གྱི་ཁམས་བདེ་བ་ཅན་ནས་བྱུང་བ་དེའི་ཚེ་ས་རྣམ་པ་དྲུག་ཏུ་རབ་ཏུ་གཡོས་སོ། །དེ་ནས་བཅོམ་ལྡན་
འདས་ལ་བྱང་ཆུབ་སེམས་དཔའ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་ལྟས་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་དེ་འོངས་སྟེ། 
དེའི་ལྟས་འདི་འདྲ་བ་དག་བྱུང་ངོ་། །གང་གི་ཚེ་ན་བསྐྱོད་པ་དེའི་ཚེ་ཡིད་དགའ་བའི་མེ་ཏོག་པད་མའི་ཆར་རབ་ཏུ་བབ་སྟེ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་མེ་ཏོག་པད་མ་འདབ་མ་སྟོང་པ་སྡོང་བུ་གསར་དུ་
སྣང་བ་ཐོགས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་མེ་ཏོག་འདི་དག་དེ་བཞིན་གཤེགས་པ་སྣང་བ་མཐའ་ཡས་ཀྱིས་བསྐུར་ཏོ་ཞེས་པད་མ་ཕུལ་ཏེ་བསྙུང་བ་མ་མཆིས་སམ། འོ་མ་

46-1-225a

བརྒྱལ་ཏམ། བཞེངས་པ་ཡང་ངམ། རེག་པར་གནས་སམ་ཞེས་ཀྱང་གསུང་ངོ་། ། དེ་ནས་པད་མ་དེ་བླངས་ཏེ་གཡོན་ཕྱོགས་སུ་བཞག་ནས་དེའི་ཚེ་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོའི་ཡོན་ཏན་རྗོད་པ་མཛད་དོ། །སྤྱན་རས་གཟིགས་ཀྱི་དབང་
པོའི་ལས་ཀྱི་ས་ཇི་ལྟ་བུར་བསྒྲུབས་པ་ཡིན། སེམས་ཅན་ཡི་དགས་དག་དང་། བསྟིར་མེད་པར་སྐྱེས་པ་དག་དང་། ཐིག་ནག་པོ་ཅན་དང་། འོ་དོད་འབོད་པ་དག་དང་། ཧ་ཧ་ཞེས་འབོད་པ་ཐམས་ཅད་དང་། གདུང་བའི་སེམས་ཅན་དམྱལ་བ་ཆེན་པོ་དང་། མེའི་བུམ་པའི་སེམས་ཅན་
དམྱལ་བ་ཆེན་པོ་དང་། སེམས་ཅན་དམྱལ་བ་ཆེན་པོ་ཤམ་བ་ལ་དང་། སེམས་ཅན་དམྱལ་བ་ཆེན་པོ་ཆུ་གྲང་བ་དང་། སེམས་ཅན་དམྱལ་བ་ཆེན་པོ་དེ་དག་ཏུ་སེམས་ཅན་གང་དག་སྐྱེས་པ་དག་ནི་བདག་གི་ལས་ཀྱི་ས་སྟེ། བདག་གིས་སེམས་ཅན་ཡོངས་སུ་སྨིན་པར་
བགྱིའོ། །བགྱིས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་དགོད་པར་བགྱིའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་དྲིས་པའི་ལན་བཏབ་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་
ཏེ་ཕྱོགས་གཅིག་ཏུ་སོང་ངོ་། །སོང་ནས་མེའི་ཕུང་པོ་འབར་བ་བཞིན་དུ་ས་དང་ནམ་མཁའ་ལ་མི་སྣང་བར་སོང་ངོ་། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལག་ན་རིན་པོ་ཆེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཞུ་བ་ལུང་བསྟན་པ་
བཤད་པ་བདག་ཞུ་ན། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་གང་གཱའི་ཀླུང་གི་བྱེ་མ་སྙེད་ལ་ལྷའི་བསྐལ་པར་ན་བཟའ་དང་། བཤོས་དང་། མལ་སྟན་དང་། ན་བའི་རྐྱེན་ཀྱི་སྨན་དང་། ཡོ་བྱད་རྣམས་ཀྱིས་བསྙེན་བཀུར་བྱས་ནས། གང་དེ་བཞིན་གཤེགས་པ་དེ་དག་ལས་བསོད་ནམས་འཕེལ་བར་གྱུར་པའི་བསོད་
ནམས་དེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བ་སྤུ་གཅིག་གི་རྩེ་མོ་ལ་གནས་སོ། །རིགས་ཀྱི་བུ་འདི་ལྟ་སྟེ་དཔེར་ན་གླིང་ཆེན་པོ་བཞིར་ཟླ་བ་བཅུ་གཉིས་ཀྱི་ལོར་ཉིན་མཚན་དུ་ཆར་པ་བབ་ཀྱང་ཐིགས་པ་རེ་རེ་ནས་བགྲང་ནུས་ཀྱི། 

46-1-225b

རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་ངས་བགྲང་བར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན་རྒྱ་མཚོ་མཆིང་རྣམ་ཆེན་པོ་ཟབས་དཔག་ཚད་བརྒྱད་ཁྲི་བཞི་སྟོང་ཡོད་ལ། ཞེང་
དུ་དཔག་ཏུ་མེད་ལ། རྟ་རྒོད་མའི་ཁ་ལྟ་བུའི་མཐར་ཐུག་པའི་ཐིགས་པ་རེ་རེ་ནས་ངས་བགྲང་ནུས་ཀྱི། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་ངས་བགྲང་བར་མི་ནུས་སོ། །རིགས་
ཀྱི་བུ་འདི་ལྟ་སྟེ་དཔེར་ན། གླིང་ཆེན་པོ་བཞི་ན་སེང་གེ་དང་སྟག་དང་དྲེད་དང་། ཏ་རཀྵ་དང་། རི་དགས་ལ་སོགས་པ་དང་། བ་ལང་དང་། བོང་བུ་དང་། ཕྱུགས་དང་། བལ་གླང་དང་། རྟ་དང་མ་ཧེ་དང་། བྱི་ལ་ལ་སོགས་པ་རྐང་པ་བཞི་པ་དེ་དག་གི་སྤུ་རེ་རེ་ནས་ནི་ངས་བགྲང་ནུས་ཀྱི། རིགས་ཀྱི་
བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་ངས་བགྲང་བར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན། རྡུལ་ཕྲ་རབ་ཀྱི་རྡུལ་སྙེད་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་རྣམས་ཀྱི་སྐུ་གཟུགས་ལྷའི་གསེར་རིན་པོ་ཆེ་ལས་བྱས་ནས་ཉིན་གཅིག་ཏུ་རིང་བསྲེལ་བཅུག་ན། རིགས་ཀྱི་བུ་དེའི་བསོད་ནམས་ཀྱི་ཕུང་པོ་ནི་ངས་བགྲང་ནུས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་
ཀྱི་དབང་པོའི་བསོད་ནམས་ཀྱི་ཚོགས་ནི་ངས་བགྲང་བར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན། ཤིང་ཤྲི་ཤ་པའི་ཚལ་གྱི་ལོ་མ་ནི་ངས་བགྲང་ནུས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་
ནི་ངས་བགྲང་བར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན། གླིང་ཆེན་པོ་བཞི་ན་གནས་པའི་བུད་མེད་དང་། སྐྱེས་པ་དང་། ཁྱེའུ་དང་། བུ་མོ་གནས་པ་དེ་དག་ཐམས་ཅད་རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་
བའི་འབྲས་བུ་དང་། དགྲ་བཅོམ་པ་ཉིད་དང་། རང་བྱང་ཆུབ་ལ་བཀོད་ན། གང་དེ་དག་གི་བསོད་ནམས་ཀྱི་ཕུང་པོ་ནི་སྔ་མ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བ་སྤུའི་རྩེ་མོའི་བསོད་ནམས་ཀྱི་ཕུང་པོ་དང་མཉམ་མོ། །

46-1-226a

དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལག་ན་རིན་པོ་ཆེས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཕུང་
པོ་ཅི་འདྲ་བ་དེ་ལྟ་བུ་དེ་བཞིན་གཤེགས་པ་རྣམས་ལ་ཡང་གང་ན་ཡང་མ་མཐོང་མ་ཐོས་ན་བྱང་ཆུབ་སེམས་དཔར་གྱུར་པ་ལྟ་ཅི་སྨོས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གང་ང་འདྲ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་རྣམས་སུ་གྱུར་ལ། དེ་དག་ཀྱང་གནས་གཅིག་ཏུ་གཞོག་ཅིང་ན་བཟའ་དང་། བཤོས་དང་། མལ་སྟན་དང་། ན་བའི་རྐྱེན་གྱི་སྨན་དང་། ཡོ་བྱད་རྣམས་ཀྱིས་བསྐལ་པར་གཞོག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཕུང་པོ་བགྲང་མི་ནུས་ན། རིགས་ཀྱི་བུ་ང་གཅིག་པུ་འཇིག་རྟེན་གྱི་ཁམས་འདི་ན་གནས་པས་ལྟ་ཅི་སྨོས། 
གང་འཇིག་རྟེན་ན་སྤྱན་རས་གཟིགས་ཀྱི་དབང་པོའི་མིང་དྲན་པ་དེ་དག་ནི་བདེ་བ་དང་ལྡན་པ་ཡིན་ནོ། །དེ་དག་ནི་རྒ་བ་དང་། འཆི་བ་དང་། ན་བ་དང་། སྡུག་བསྔལ་བ་ལས་ཡོངས་སུ་ཐར་བ་ཡིན་ནོ། །དེ་དག་ནི་འཁོར་བའི་ཐ་མ་གཞན་མེད་པའི་སྡུག་བསྔལ་ལས་
ཐར་བར་འགྱུར་རོ། །དེ་དག་ནི་གོས་དཀར་པོ་དང་སྐྱ་བོ་བཞིན་དུ་བྱ་ངང་པའི་རྒྱལ་པོ་མགྱོགས་པ་དང་རླུང་གི་ཤུགས་འོང་བ་བཞིན་དུ་བདེ་བ་ཅན་གྱི་འཇིག་རྟེན་གྱི་ཁམས་སུ་དེ་བཞིན་གཤེགས་པ་སྣང་བ་མཐའ་ཡས་ལས་ཆོས་མངོན་དུ་ཉན་པའི་ཕྱིར་འགྲོའོ་
ཐོས་ནས་ཀྱང་དེ་དག་གི་ལུས་ལ་འཁོར་བའི་སྡུག་བསྔལ་མི་འབྱུང་། འདོད་ཆགས་དང་ཞེ་སྡང་དང་། གཏི་མུག་མི་འབྱུང་རྒ་བ་དང་། ཤི་བར་མི་འགྱུར། དེ་དག་གི་ལུས་ལ་བཀྲེས་པར་མི་འགྱུར། མངལ་ན་གནས་པའི་སྡུག་བསྔལ་བ་ཤེས་པར་མི་འགྱུར་ཏེ། 
ཆོས་ཀྱི་རོས་བསྐྱོད་ནས་དེ་ཉིད་དུ་པད་མའི་ནང་དུ་སྐྱེ་བར་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཡིད་དམ་བརྟན་པོ་ཡོངས་སུ་རྫོགས་པ་དང་། སེམས་ཅན་ཐམས་ཅད་ཐར་པ་ལ་བཞག་གི་བར་དུ་འཇིག་རྟེན་

46-1-226b

གྱི་ཁམས་དེ་ན་རྟག་ཏུ་འཛིན་ཅིང་གནས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལག་ན་རིན་པོ་ཆེས་འདི་སྐད་གསོལ་ཏོ། །བཅོམ་ལྡན་འདས་གང་གི་དུས་ན་ཡིད་དམ་བརྟན་པ་དེ་ཡོངས་སུ་རྫོགས་པ་ལགས། བཅོམ་ལྡན་འདས་ཀྱིས་
བཀའ་སྩལ་པ། སེམས་ཅན་མང་པོ་འཁོར་བ་ན་འཁོར་བའི་སེམས་ཅན་དེ་དག་ཡོངས་སུ་སྨིན་པར་བྱེད་པ་དང་། བྱང་ཆུབ་ཀྱི་ལམ་སྟོན་པར་བྱེད་ཅིང་། གང་དང་གང་གི་གཟུགས་ཀྱིས་འདུལ་བའི་སེམས་ཅན་རྣམས་དུལ་བར་འགྱུར་བ་དེ་དང་དེའི་གཟུགས་
ཀྱིས་ཆོས་འཆད་དེ། དེ་བཞིན་གཤེགས་པས་འདུལ་བའི་སེམས་ཅན་རྣམས་ལ་ནི་དེ་བཞིན་གཤེགས་པའི་གཟུགས་ཀྱིས་ཆོས་འཆད་རང་སངས་རྒྱས་ཀྱིས་འདུལ་བའི་སེམས་ཅན་རྣམས་ལ་ནི། རང་སངས་རྒྱས་ཀྱི་གཟུགས་ཀྱིས་ཆོས་འཆད། 
དགྲ་བཅོམ་པས་འདུལ་བའི་སེམས་ཅན་རྣམས་ལ་ནི་དགྲ་བཅོམ་པའི་གཟུགས་ཀྱིས་ཆོས་འཆད། བྱང་ཆུབ་སེམས་དཔས་འདུལ་བའི་སེམས་ཅན་རྣམས་ལ་ནི་བྱང་ཆུབ་སེམས་དཔའི་གཟུགས་ཀྱིས་ཆོས་འཆད། དབང་ཕྱུག་ཆེན་པོས་འདུལ་
བའི་སེམས་ཅན་རྣམས་ལ་ནི་དབང་ཕྱུག་ཆེན་པོའི་གཟུགས་ཀྱིས་ཆོས་འཆད། མཐུ་བོ་ཆེས་འདུལ་བའི་སེམས་ཅན་རྣམས་ལ་ནི་མཐུ་བོ་ཆེའི་གཟུགས་ཀྱིས་ཆོས་འཆད། ཚངས་པས་འདུལ་བའི་སེམས་ཅན་རྣམས་ལ་ནི་ཚངས་པའི་གཟུགས་ཀྱིས་
ཆོས་འཆད། །དབང་པོས་འདུལ་བའི་སེམས་ཅན་རྣམས་ལ་ནི། དབང་པོའི་གཟུགས་ཀྱིས་ཆོས་འཆད། ཉི་མས་འདུལ་བའི་སེམས་ཅན་རྣམས་ལ་ནི་ཉི་མའི་གཟུགས་ཀྱིས་ཆོས་འཆད། ཟླ་བས་འདུལ་བའི་སེམས་ཅན་རྣམས་ལ་ནི་ཟླ་བའི་གཟུགས་ཀྱིས་ཆོས་
འཆད། མེ་ལྷས་འདུལ་བའི་སེམས་ཅན་རྣམས་ལ་ནི་མེ་ལྷའི་གཟུགས་ཀྱིས་ཆོས་འཆད། ཆུ་ལྷའི་གཟུགས་ཀྱིས་འདུལ་བའི་སེམས་ཅན་རྣམས་ལ་ནི་ཆུ་ལྷའི་གཟུགས་ཀྱིས་ཆོས་འཆད། རླུང་གི་ལྷའི་གཟུགས་ཀྱིས་འདུལ་བའི་སེམས་ཅན་རྣམས་ལ་ནི་
རླུང་ལྷའི་གཟུགས་ཀྱིས་ཆོས་འཆད། ཀླུས་འདུལ་བའི་སེམས་ཅན་རྣམས་ལ་ནི་ཀླུའི་གཟུགས་ཀྱིས་ཆོས་འཆད། བགེགས་མེད་པའི་བདག་པོས་འདུལ་བའི་སེམས་ཅན་རྣམས་ལ་ནི། བགེགས་མེད་པའི་བདག་པོའི་གཟུགས་ཀྱིས་ཆོས་འཆད། གནོད་སྦྱིན་གྱི་

46-1-227a

འདུལ་བའི་སེམས་ཅན་རྣམས་ལ་ནི་གནོད་སྦྱིན་གྱི་གཟུགས་ཀྱིས་ཆོས་འཆད། ངལ་བསོ་པོའི་གཟུགས་ཀྱིས་འདུལ་བའི་སེམས་ཅན་རྣམས་ལ་ནི་ངལ་བསོ་པོའི་གཟུགས་ཀྱིས་ཆོས་འཆད། རྒྱལ་པོའི་གཟུགས་ཀྱིས་འདུལ་བའི་
སེམས་ཅན་རྣམས་ལ་ནི་རྒྱལ་པོའི་གཟུགས་ཀྱིས་ཆོས་འཆད། ཕ་དང་མས་འདུལ་བའི་སེམས་ཅན་རྣམས་ལ་ནི་ཕ་དང་མའི་གཟུགས་ཀྱིས་ཆོས་འཆད་དེ་སེམས་ཅན་དག་ཇི་ལྟ་ཇི་ལྟར་འདུལ་བ་དེ་ལྟ་དེ་ལྟར་ཆོས་སྟོན་ཏོ། །རིགས་ཀྱི་བུ་བྱང་ཆུབ་
སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནི་དེ་ལྟར་སེམས་ཅན་ཡོངས་སུ་སྨིན་པར་བྱེད་ཅིང་མྱ་ངན་ལས་འདས་པའི་ཆོས་སྟོན་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལག་ན་རིན་པོ་ཆེས་འདི་སྐད་
ཅེས་གསོལ་ཏོ། །བཅོམ་ལྡན་འདས་བདག་ནི་ཤིན་དུ་ངོ་མཚར་ཐོབ་པར་གྱུར་ཏེ། བདག་ནི་ནམ་ཡང་འདི་འདྲ་བའི་ཡུལ་མཐོང་བ་འམ་ཐོས་པར་མ་གྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་
ཡུལ་ཇི་འདྲ་བ་དེ་འདྲ་བ་ནི་དེ་བཞིན་གཤེགས་པ་རྣམས་ལ་ཡང་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འཛམ་བུའི་གླིང་འདི་ཉིད་ན་རྡོ་རྗེའི་མངལ་ཞེས་བྱ་བའི་ཕུག་ཡོད་པ་དེ་ན་ལྷ་མ་ཡིན་བྱེ་བ་ཁྲག་
ཁྲིག་བརྒྱ་སྟོང་དུ་མ་གནས་ཏེ། དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལྷ་མ་ཡིན་རྣམས་ལ་ལྷ་མ་ཡིན་གྱི་གཟུགས་ཀྱིས་ཆོས་འཆད་དེ། ཐེག་པ་ཆེན་པོའི་མདོ་རིན་པོ་ཆེའི་རྒྱལ་པོ་ཟ་མ་ཏོག་བཀོད་པ་
འདི་ཉིད་འཆད་དོ། །ཁྱེད་ཅག་ཉོན་ཅིག །གང་ལྷ་མ་ཡིན་གཞན་པ་དེ་དག་ཀྱང་བྱམས་པའི་སེམས་དང་ཞི་བའི་སེམས་སུ་བྱས་ཤིང་། ལག་པའི་ཐལ་མོ་སྦྱར་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་
ལ་ཆོས་ཀྱི་རྣམ་གྲངས་འདི་ཉིད་ཉན་ཏོ། །གང་འཇིག་རྟེན་ན་མདོ་སྡེའི་རྒྱལ་པོ་འདི་ལྟ་བུ་མངོན་དུ་བྱེད་པ་དེ་དག་ནི་བདེ་བ་དང་ལྡན་པ་ཡིན་ནོ། །ཐོས་ནས་ཀྱང་མཚམས་མེད་པ་ལྔ་དག་ཟད་པར་བྱེད་དོ། །འཆི་བའི་ཚེ་ཡང་དེ་བཞིན་གཤེགས་པ་བཅུ་གཉིས་གཤེགས་

46-1-227b

ནས་རིགས་ཀྱི་བུ་མ་འཇིགས་ཤིག །ཁྱོད་ཀྱིས་ཐེག་པ་ཆེན་པོའི་མདོ་སྡེའི་རྒྱལ་པོ་ཟ་མ་ཏོག་བཀོད་པ་ཐོས་སོ། །བདེ་བ་ཅན་དུ་འགྲོ་བའི་ཕྱིར་ལམ་སྣ་ཚོགས་ཀྱང་། སྟ་གོན་བྱས་སོ། །གདུགས་སྣ་ཚོགས་དང་། ཅོད་པན་དང་། རྣ་ཆ་དང་། སེ་མོ་དོ་
རྣམས་ཀྱང་སྟ་གོན་བྱས་སོ་ཞེས་དབུགས་འབྱིན་པར་མཛད་དོ། །ལྟས་དེ་ལྟ་བུ་འབྱུང་ཞིང་འཆི་བའི་དུས་ཀྱི་ཚེ་བར་ཆད་མེད་པར་བདེ་བ་ཅན་དུ་འགྲོ་བར་འགྱུར་རོ། །ལག་ན་རིན་པོ་ཆེ་དེ་ལྟར་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་
དེ་ནི་ལྷ་མ་ཡིན་རྣམས་ལ་མྱ་ངན་ལས་འདའ་བའི་ཆོས་སྟོན་པར་བྱེད། སྒོ་སྟོན་པར་བྱེད་དོ། །དེ་ནས་བྱང་ཆུབ་སེམས་དཔའ་ལག་ན་རིན་པོ་ཆེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་དེ་ཉིད་ནས་སོང་ངོ་། །དེ་ཡང་འདས་ནས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་
བཅོམ་ལྡན་འདས་ཐམས་ཅད་སྐྱོབ་པ་ཞེས་བྱ་བ་སྔོན་བྱུང་བར་གྱུར་ཏོ། །དེའི་ཚེ་དེའི་དུས་ན་སྒྲིབ་པ་ཐམས་ཅད་རྣམ་པར་སེལ་བ་ང་ནི་མི་མི་རྒྱུ་བའི་སའི་ཕྱོགས་རི་ཁྲོད་ཀྱི་བར་རི་བྲགས་ཤིག་ན་གནས་ཤིང་བཟོད་པ་སྨྲ་བར་གྱུར་ཏེ། དེའི་ཚེ་དུས་
དུས་སུ་ངས་དེ་བཞིན་གཤེགས་པ་ལས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཡོན་ཏན་བརྗོད་པ་ཐོས་ཏེ། འདི་ལྟ་སྟེ། གསེར་གྱི་ས་ལ་སོང་ནས་སེམས་ཅན་སྤྱིའུ་ཚུགས་སུ་འདུག་པ་རྣམས་ལ་འཕགས་
པའི་ལམ་ཡན་ལག་བརྒྱད་པའི་ལམ་མྱ་ངན་ལས་འདའ་བ་སྟོན་པར་བྱེད་པ་དང་ལྡན་པའི་ཆོས་སྟོན་ཏོ། །དེ་ནས་གསེར་གྱི་ས་ལས་བྱུང་སྟེ། དངུལ་གྱི་ས་ལ་སོང་ནས། དེ་ན་སྐྱེས་བུ་གང་ཟག་རྐང་པ་བཞི་ཡོད་པ་དེ་དག་ལ་བྱང་ཆུབ་སེམས་དཔའ་
སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ཁྱེད་ཅག་བསམ་པ་དམ་པ་རབ་ཀྱིས་མྱ་ངན་ལས་འདའ་བའི་རྒྱགས་ཀྱི་རྗེས་སུ་སེམས་ཤིང་མངོན་པའི་ཆོས་ཀྱི་རྣམ་གྲངས་ཉོན་ཅིག་ཅེས་ཆོས་འཆད་དོ། །དེ་ནས་སྐྱེས་བུ་དེ་དག་སྤྱན་རས་གཟིགས་

46-1-228a

ཀྱི་དབང་པོའི་མདུན་དུ་འདུག་སྟེ་འདི་སྐད་ཅེས་སྨྲས་སོ། །ལོང་བ་རྣམས་ལ་ནི་ལམ་སྟོན་ཅིག་མགོན་མ་མཆིས་པ་རྣམས་ལ་ནི་མགོན་དང་སྐྱབས་མཛོད་ཅིག །ཕ་དང་མ་མ་མཆིས་པ་རྣམས་ལ་ནི་ཕ་དང་མར་མཛོད་ཅིག །
ངན་སོང་གསུམ་གྱི་མུན་པ་ལ་ནི་སྒྲོན་མེ་མཛོད་ཅིག །ཚོར་བར་བགྱིད་པའི་ཐར་པའི་ལམ་སྟོན་ཅིག །སེམས་ཅན་གང་དག་རྟག་ཏུ་ཁྱོད་ཀྱི་མཚན་རྗེས་སུ་དྲན་ཞིང་ཡོངས་སུ་ལེན་པ་དེ་དག་ལ་བདེ་བར་ལྡན་པ་ལགས་སོ། །བདག་ཅག་མྱོང་
བ་ལྟ་བུ་སྡུག་བསྔལ་ལས་ཀྱང་ཐར་བར་འགྱུར་རོ། །དེ་ནས་སེམས་ཅན་དེ་དག་གི་རྣ་བའི་བུ་གར་ཐེག་པ་ཆེན་པོའི་མདོ་སྡེ་ཟ་མ་ཏོག་བཀོད་པའི་སྒྲ་བྱུང་བ་དང་། སྐྱེས་བུ་དེ་དག་གིས་དེ་ཐོས་ནས་ཕྱིར་མི་ལྡོག་པའི་ས་བསྒྲུབ་ཤིང་ཤིན་དུ་
བདེ་བ་དང་ལྡན་པར་གྱུར་ཏོ།། །། བམ་པོ་གཉིས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་བྱུང་ནས་ས་གཞན་ལྕགས་ལས་བྱས་པར་སོང་སྟེ། གང་དུ་ལྷ་མ་ཡིན་གྱི་རྒྱལ་པོ་གཏོར་མ་ཞེས་བྱ་བ་
མཆིས་པ་དེར་སོང་བ་དང་། དེ་ནས་ལྷ་མ་ཡིན་གྱི་རྒྱལ་པོ་གཏོར་མས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་རྒྱང་མ་ནས་འོང་བ་མཐོང་ནས་སླས་དང་། འཁོར་དང་། ལྷ་མ་ཡིན་སྒུར་པོ་དང་། ཐུང་ངུ་ལ་སོགས་པ་
དུ་མ་དང་འགྲོགས་ཤིང་འཁོར་དང་བཅས་ཏེ་དོང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་རྐང་པ་ལ་ཕྱག་འཚལ་ཏེ་འདི་སྐད་ཅེས་སྨྲས་སོ། །དེ་རིང་དུ་ནི་བདག་གི་ཚེའི་འབྲས་བུ་མཆིས་སོ། །དེ་རིང་དུ་ནི་
བདག་གི་བསམ་པ་རྫོགས་སོ། །དེ་རིང་དུ་ནི་བདག་གི་བསམ་པ་ཡོངས་སུ་རྫོགས་ཏེ། གང་བདག་གིས་ཁྱོད་ཡང་དག་པར་མཐོང་བས་དེའི་ཚེ་ལུས་ཐམས་ཅད་བདེ་བ་དང་ལྡན་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་
ཆེན་པོ་སྤྱན་རས་གཟིགས་ཀྱི་དབང་པོ་ལ་རིན་པོ་ཆེའི་ཁྲི་ཕུལ་ཏེ། བཅོམ་ལྡན་འདས་སྡིག་པ་ལ་དགའ་བ། གཞན་གྱི་ཆུང་མ་ལ་ཆགས་པ། སྲོག་གཅོད་པ་ལ་བརྩོན་པ། ཕ་རོལ་གྱི་སྲོག་གཅོད་པ། རྒ་བ་དང་འཆི་བས་འཇིགས་པ་རྣམས་ལ་ཐུགས་

46-1-228b

རྗེ་གཟིགས་ཤིག །འཁོར་བས་སྐྱོ་བ་རྣམས་ལ་སྐྱབས་མཛོད་ཅིག །མགོན་པོ་ཁྱོད་ནི་ཕ་དང་མར་གྱུར་པ་ལགས་ཀྱིས་བདག་ཅག་བཅིང་བས་བཅིངས་པ་རྣམས་ལ་ལམ་སྟོན་ཅིག །རིགས་ཀྱི་བུ་འདི་ལྟ་སྟེ། དཔེར་ན་གང་དག་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བསོད་སྙོམས་འབུལ་བ་དེ་དག་གི་བསོད་ནམས་ཀྱི་ཕུང་པོ་འདི་བཤད་དོ། །རིགས་ཀྱི་བུ་འདི་ལྟ་སྟེ། དཔེར་ན་ང་དང་འདྲ་བའི་བྱང་ཆུབ་སེམས་དཔའ་གང་གཱའི་ཀླུང་གི་བྱེ་མ་སྙེད་བཅུ་གཉིས་
ཡོད་པར་གྱུར་ལ། དེ་དག་ཀྱང་གནས་གཅིག་ཏུ་བདེ་བའི་ཡོ་བྱད་ཐམས་ཅད་ཀྱིས་ལྷའི་བསྐལ་པར་གནས་སུ་བཅུག་ན་དེ་དག་གིས་ཀྱང་བསོད་ནམས་ཀྱི་ཕུང་པོ་དེ་བགྲང་བར་མི་ནུས་ན། ང་གཅིག་པུ་ལྷ་མ་ཡིན་གྱི་གནས་ན་གནས་པས་ལྟ་ཅི་སྨོས། 
རིགས་ཀྱི་བུ་འདི་ལྟ་སྟེ། དཔེར་ན་རྡུལ་ཕྲ་རབ་ཀྱི་ཚད་ནི་ངས་བགྲང་བར་ནུས་ཀྱི། རིགས་ཀྱི་བུ་བསོད་སྙོམས་ཀྱི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ། དཔེར་ན་རྒྱ་མཚོ་མཆིང་རྣམ་ཆེན་པོའི་ཐིགས་པ་ནི་
ངས་རེ་རེ་ནས་བགྲང་ནུས་ཀྱི། རིགས་ཀྱི་བུ་བསོད་སྙོམས་ཀྱི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ། དཔེར་ན་གླིང་ཆེན་པོ་བཞི་པའི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དེ་དག་ཐམས་ཅད་
རྣམས་ཀྱི་ལས་ལ་བརྩོན་པར་གྱུར་ལ། གླིང་ཆེན་པོ་བཞི་པའི་མི་དེ་དག་རྣམས་གཞན་ནི་མི་བྱེད་ཀྱི་ཡུངས་ཀར་འབའ་ཞིག་བྱེད་ལ་དུས་དུས་སུ་ཀླུའི་རྒྱལ་པོས་ཀྱང་ཆར་པའི་རྒྱུན་ཕབ་སྟེ། ཡུངས་ཀར་དེ་དག་ཀྱང་ལེགས་པར་གྲུབ་ནས་གཡུལ་
གཅིག་ཏུ་བྱས་ཏེ་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དེ་དག་ཐམས་ཅད་ཀྱིས་ཁུར་ཤིང་རྟ་དང་། བམ་པོ་དང་། སྐོན་པ་དང་། རྔ་མོ་དང་། བོང་བུ་དང་། བ་ལང་དང་། དེ་དག་ཐམས་ཅད་ལ་བཀལ་ཏེ་གཡུལ་ཆེན་པོ་དེར་སྤུངས་ནས་བོང་བུ་དག་དང་། 
བ་ལང་དག་གིས་བཅགས་ཏེ་ཕུང་པོ་ཆེན་པོར་བྱས་ཀྱང་། རིགས་ཀྱི་བུ་དེ་ནི་ངས་འབྲུ་རེ་རེ་ནས་བགྲང་ནུས་ཀྱི། རིགས་ཀྱི་བུ་བསོད་སྙོམས་ཀྱི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སྟེ། །རིགས་ཀྱི་བུ་འདི་ལྟ་སྟེ། དཔེར་ན་རི་རབ་ལྷུན་པོ་དཔག་

46-1-229a

ཚད་བརྒྱད་ཁྲི་བཞི་སྟོང་འོག་ཏུ་ནུབ་པ་དང་། འཕང་གི་སྲིད་དུ་དཔག་ཚད་བརྒྱད་ཁྲི་བཞི་སྟོང་ཡོད་པ་དེ་ནི་རིགས་ཀྱི་བུ་གྲོ་གའི་ཕུང་པོར་གྱུར་ལ། རྒྱ་མཚོ་མཆིང་རྣམ་ཆེན་པོ་ནི་སྣག་ཚས་ཡོངས་སུ་གང་བར་གྱུར། གླིང་བཞི་ན་གནས་པའི་སྐྱེས་
པ་དང་། བུད་མེད་དང་། ཁྱེའུ་དང་། བུ་མོ་དེ་དག་ཐམས་ཅད་ནི་ཡི་གེ་བར་གྱུར་ཏེ། རི་རབ་ལྷུན་པོ་དང་མཉམ་པ་མཐའ་ཡས་མུ་མེད་པ་དེ་ཡི་གེར་བྲིས་ཀྱང་རིགས་ཀྱི་བུ་ཡི་གེ་དེ་རེ་རེ་ནས་ངས་བགྲང་ནུས་ཀྱི། རིགས་ཀྱི་བུ་བསོད་སྙོམས་ཀྱི་བསོད་ནམས་
ཀྱི་ཕུང་པོ་དེ་ནི་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ། དཔེར་ན་ཡི་གེ་བ་དེ་དག་ཐམས་ཅད་བྱང་ཆུབ་སེམས་དཔའ་ས་བཅུ་ལ་གནས་པར་གྱུར་ན། གང་བྱང་ཆུབ་སེམས་དཔའ་ས་བཅུ་ལ་གནས་པ་རྣམས་ཀྱི་བསོད་ནམས་ཀྱི་ཕུང་
པོ་ཇི་ཙམ་པ་བསོད་སྙོམས་ཀྱི་བསོད་ནམས་ཀྱི་ཕུང་པོ་དེ་ཡང་དེ་ཙམ་མོ། །རིགས་ཀྱི་བུ་འདི་ལྟ་སྟེ། དཔེར་ན་རྒྱ་མཚོ་མཆིང་རྣམ་གྱི་བྱེ་མ་ནི་བྱེ་མ་རེ་རེ་ནས་ངས་བགྲང་ནུས་ཀྱི། རིགས་ཀྱི་བུ་བསོད་སྙོམས་ཀྱི་བསོད་ནམས་ཀྱི་ཕུང་པོ་ནི་ངས་བགྲང་
མི་ནུས་སོ། །དེ་ནས་ལྷ་མ་ཡིན་གཏོར་མ་མཆི་མ་དང་བཅས། ངོམ་ཟུང་གནགས་དབུགས་ཀྱིས་བརྣངས་ཤིང་སྐད་ར་ར་པོར་གྱུར་ལ། ཤུགས་འབྱིན་ཅིང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་འདི་
སྐད་ཅེས་གསོལ་ཏོ། །བདག་གཏོར་མ་སླས་དང་། འཁོར་དང་བཅས་པས་སྦྱིན་པ་ཇི་ལྟ་བུ་ཞིག་བགྱིས་ནས། ཚེ་འདི་ཉིད་ལ་བཅིངས་པ་ཐོབ་པར་གྱུར། བདག་གིས་ཞིང་ངན་པ་ལ་སྦྱིན་པ་བྱིན་ཏེ། ལས་དེའི་འབྲས་བུ་མྱོང་བ་འདི་ལགས་པ་ལྟ། 
ཐམས་ཅད་མཁྱེན་པའི་ཞིང་ལ་ནི་ཐལ་བ་སྤར་བ་གང་གཏོར་ཀྱང་བདུད་རྩི་འགྲུབ་པར་འགྱུར་ན། བདག་གིས་མ་འཚལ་བས་མཆོད་སྦྱིན་མཆོད་པའི་ཚེ་མིའུ་ཐུང་གི་གཟུགས་ཀྱིས་སློང་བ་མཆིས་ནས་བདག་གིས་བལ་གླང་དང་། རྟའི་ཐེག་པ་ཅོད་པན་
དང་རྣ་ཆ་དང་། སེ་མོ་དོ་མང་པོ་དང་། ལྡན་པ་ནི་བཤམས། གཡག་རྔའི་རྡུལ་ཡབ་རིན་པོ་ཆེས་སྤྲས་པ་ནི་སྤྱངས་མུ་ཏིག་གི་སེ་མོ་དོ་དག་དང་མུ་ཏིག་ལས་བགྱིས་པའི་མཇུག་མ་དག་ནི་མུ་ཏིག་གི་དྲ་བ་དག་གིས་གཡོགས། གསེར་གྱི་དྲིལ་བུ་དག་ནི་དངུལ་གྱིས་བརྒྱུས་ཏེ་

46-1-229b

སྒྲ་སིལ་སིལ་མཆི་ཞིང་། གཞན་ཡང་གླང་སེར་སྐྱ་སྟོང་དག་རྨིག་པ་ནི་དངུལ་ལས་བགྱིས། རྭ་ནི་གསེར་ལས་བགྱིས་ཤིང་མུ་ཏིག་གི་དྲ་བས་གཡོགས་ཏེ་མཆི་བ་དེ་འདྲ་བའི་གླང་སེར་སྐྱ་དག་དང་། གཞན་ཡང་བུད་མེད་གཞོན་ནུ་ཤིན་དུ་ཁ་དོག་བཟང་
ཞིང་ཤ་རྒྱས་པ་དང་ལྡན་པ། ཤིན་དུ་སྡུག་པ་ལྷའི་བུ་མོ་དང་འདྲ་ཞིང་འགྲན་པ། ལྷའི་རྒྱན་གྱིས་བརྒྱན་པ། ཅོད་པན་དང་། རྣ་ཆ་དང་། སེ་མོ་དོ་མང་པོ་ཐོགས་པ། དཔུང་རྒྱན་དང་། གདུབ་བུ་དང་། རྐང་པའི་གདུབ་བུ་དང་། རྐེད་པའི་སྐ་རགས་ཀྱི་རྒྱན་དང་། 
སོར་གདུབ་དང་། སེ་རལ་གྱི་རྒྱན་དང་། མཐེ་བོ་གཡོན་པ་སོར་གདུབ་དང་ལྡན་པ། སྒྲ་སིལ་སིལ་མཆི་བ་དང་ལྡན་པ། གོས་ཚོན་སྣ་ཚོགས་སུ་བཅོས་པ་གྱོན་པ་སྟོང་དག་དང་། གཞན་ཡང་རིན་པོ་ཆེའི་ཁྲིའུ་བརྒྱ་སྟོང་དག་དང་། གསེར་གྱི་ཕུང་པོ་དང་། 
དངུལ་གྱི་ཕུང་པོ་དང་། རིན་པོ་ཆེའི་ཕུང་པོ་དུ་མ་དག་ནི་བཞག །གོས་དང་རྒྱན་གྱི་ཕུང་པོ་དུ་མ་དག་ནི་བཞག །བ་ལང་གི་རིགས་བརྒྱ་སྟོང་དུ་མ་རྫི་དང་ལྡན་པ་དག་ནི་སྟ་གོན་བགྱིས། ཟས་དང་སྐོམ་མང་པོ་དག་ནི་བཞག །ལྷའི་ཟས་རོའི་རོ་མཆོག་
དང་ལྡན་པ་དག་ནི་སྟ་གོན་བགྱིས། གསེར་དང་དངུལ་གྱི་དྲིལ་བུ་རིན་པོ་ཆེས་སྤྲས་པ་དག་ནི་རྟག་ཏུ་བཞག །གསེར་དང་དངུལ་གྱི་སེང་གེའི་ཁྲིའུ་དུ་མ་དག་ནི་རིན་པོ་ཆེས་སྤྲས། ལྷའི་གཡག་རྔའི་རྡུལ་ཡབ་ཀྱི་རྩ་བ་དང་། གདུགས་དང་། 
ལྷ་མ་དག་ནི་གསེར་གྱིས་བརྒྱན། གསེར་གྱི་ཅོད་པན་སྟོང་ཕྲག་དུ་མ་དག་ནི་རིན་པོ་ཆེས་བརྒྱན་ཅིང་བཞག་པ་དང་། དེའི་ཚེ་རྒྱལ་པོ་ནི་སྟོང་ཚོགས། བྲམ་ཟེ་ནི་འབུམ་ཚོགས། རྒྱལ་རིགས་ནི་འབུམ་ཕྲག་དུ་མ་ཚོགས་ཏེ། དེའི་ཚེ་བདག་
གིས་སའི་གདུགས་གཅིག་ཏུ་བགྱིས་པ་བདག་ངོ་མཚར་དུ་གྱུར་ཏེ། དེ་བས་ན་ཐོག་མའི་སྡིག་པ་མཐོལ་ལོ་བཤགས་སོ། །རྒྱལ་རིགས་ཀྱི་ཆུང་མ་རྣམས་ནི་སྙིང་ཀར་དྲལ་ཏེ། ཁྱེའུ་དང་བུ་མོ་གཞོན་ནུ་དག་སྲོག་བཅད། རྒྱལ་རིགས་
ཆེན་པོ་དག་ཐམས་ཅད་ནི་ཁུ་སྒོ་དང་། ལྕགས་ཀྱིས་བཅིངས་ནས་ཟངས་ཀྱི་བྲག་ཕུག་ཏུ་ཁྲིད་དེ། རྒྱལ་རིགས་འབུམ་ཕྲག་དུ་མ་ནི་ཟངས་ཀྱི་བྲག་ཕུག་དེར་སྩལ། ཁ་ཤ་དང་པན་ད་པ་ལ་སོགས་པའི་རྒྱལ་རིགས་དེ་དག་ནི་ལྕགས་ཐག་ལྕགས་

46-1-230a

ཀྱི་ཕུར་པ་དང་ལྡན་པས་རྐང་ལག་བཅིངས་ནས་ཕུག་དེར་བཞག་སྟེ། དེའི་ཚེ་བདག་གིས་ཆབ་སྒོ་ཐམས་ཅད་ཀྱང་བཀུམ་མོ། །དང་པོ་ནི་ཤིང་གི་སྒོའོ། །གཉིས་པ་ནི་སེང་ལྡེང་གི་སྒོའོ། །གསུམ་པ་ནི་འཁར་བའི་སྒོའོ། །
བཞི་པ་ནི་ཟངས་ཀྱི་སྒོའོ། །ལྔ་པ་ནི་ལྕགས་ཀྱི་སྒོའོ། །དྲུག་པ་ནི་དངུལ་གྱི་སྒོའོ། །བདུན་པ་ནི་གསེར་གྱི་སྒོ་སྟེ། གསེར་གྱི་སྒོ་དེར་རི་བདུན་གཅིག་གི་སྟེང་དུ་གཅིག་བརྩེགས་ཏེ་བཞག་གོ། །དེ་ནས་བདག་གིས་ཤིང་རྟ་བཅུ་པའི་བུ་ཚོལ་
ཞིང་གདུགས་ལ་ལ་ལ་ནི་སྦྲང་བུའི་གཟུགས་ཀྱིས། གདུགས་ལ་ལ་ལ་ནི་བུང་བའི་གཟུགས་ཀྱིས། གདུགས་ལ་ལ་ལ་ནི་ཕག་གི་གཟུགས་ཀྱིས། གདུགས་ལ་ལ་ལ་ནི་མིའི་གཟུགས་ཀྱིས་དེ་ལྟར་བསྒྱུར་ཏེ། གདུགས་རེ་རེ་ཞིང་གཞན་
དང་གཞན་གྱི་གཟུགས་ཀྱིས་མཆི་ཡང་མངོན་དུ་མ་མཐོང་ནས། དེའི་ཚེ་བདག་གིས་རྗེས་སུ་བསམས་ཏེ་མཆོད་སྦྱིན་བགྱི་བར་བརྩམས་པ་དང་། དེའི་ཚེ་ཤིང་རྟ་བཅུ་པའི་བུ་གླགས་ཚོལ་བ་མཆིས་ཏེ། དེས་རི་བདུན་དྲལ་ཅིང་གཤེགས་ནས་
མྱུར་དུ་ཕྱོགས་གཞན་དུ་བོར་ཏེ་རྒྱལ་རིགས་དེ་དག་ལ་སྐད་ཆེར་སྨྲས་པ་དང་། རྒྱལ་པོ་དེ་དག་གིས་སྒྲ་དེ་ཐོས་སོ། །ཐོས་ནས་དབུགས་ཕྱིན་པར་གྱུར་ཏེ་གནས་པ་དང་། ཁྱེད་ཅག་གསོན་ནམ་ཤི་ཞེས་སྨྲས་པ་དང་། དེ་དག་གིས་བཅོམ་ལྡན་
འདས་བདག་ཅག་ནི་གསོན་ནོ་ཞེས་སྨྲས་སོ། །དེ་ནས་སྐྱེས་བུ་དཔའ་བོ་ཆེན་པོ་དེས་སྒོ་དེ་དག་ཐམས་ཅད་བཅོམ་ནས་ཟངས་ཀྱི་ཕུག་དེ་དག་མཐོང་བ་དང་། རྒྱལ་པོ་བཅིངས་པ་དེ་དག་ཐམས་ཅད་ཀྱིས་མཐུ་བོ་ཆེ་མཐོང་ནས་ཡང་ན་ནི་ལྷ་
མ་ཡིན་གཏོར་མ་ཤིའོ། །འཆི་བའི་དུས་བྱས་སོ། །ཡང་ན་ནི་བདག་ཅག་བསད་པའི་དུས་ལ་བབ་པ་ལྟ་ཞིག་ཅེས་ཕན་ཚུན་དུ་སེམས་པ་ལས། དེ་ནས་དེ་དག་གིས་བདག་ཅག་ནི་གཡུལ་གྱི་སར་ཤི་ན་ལེགས་ཀྱི་བཅིང་བས་བཅིངས་
བཞིན་དུ་ཤི་ན་མ་ལེགས་ཏེ། བདག་ཅག་ནི་བཅིང་བས་བཅིངས་བཞིན་དུ་ཤི་བའི་དུས་བྱས་པར་གྱུར་ན་རྒྱལ་རིགས་ཀྱི་ཆོས་ཀྱང་མེད་པར་འགྱུར་གྱི། གཡུལ་གྱི་སར་ཤི་བའི་དུས་བྱས་ན་ནི་བདག་ཅག་མཐོ་རིས་སུ་སྐྱེ་བར་འགྱུར་རོ། །

46-1-230b

ཞེས་གཅིག་ལ་གཅིག་དེ་སྐད་སྨྲའོ། །དེ་ནས་རྒྱལ་པོ་ཆེན་པོ་དེ་དག་ཐམས་ཅད་བདག་བདག་གི་ཁབ་ཏུ་དོང་སྟེ་ཤིང་རྟ་འདྲེན་པའི་རྟ་དུ་མ་སྟ་གོན་བགྱིས་སོ། །གང་གི་ཚེ་ན་དེ་དག་གིས་ཤིང་རྟ་དང་མཚོན་ཆ་རིན་པོ་ཆེ་ཆེན་པོ་དག་སྟ་གོན་
བགྱིས་པ་དེའི་ཚེ་ཤིང་རྟ་བཅུ་པའི་བུ་མིའུ་ཐུང་གི་གཟུགས་སུ་སྤྲུལ་ནས་རི་དགས་ཀྱི་ལྤགས་པ་སེ་རལ་དུ་ཐོགས། སྨིག་མའི་མཁར་བ་ཐོགས། ཁྲིའུ་འཚལ་ཏེ་བདག་གི་དྲུང་དུ་མཆིས་ནས་ཆབ་སྒོར་ཕྱིན་པ་དང་། སྒོ་བས་བྲམ་ཟེ་མིའུ་
ཐུང་མ་འགྲོ་ཤིག་ཅེས་བསྒྲགས་ན། དེས་བདག་ནི་ཤུལ་རིང་པོ་ནས་མཆིས་སོ་ཤེས་སྨྲས་སོ། །དེ་ནས་སྒོ་བས་དེ་ལ་བྲམ་ཟེ་ས་གང་ནས་འོངས་ཤེས་དེ་སྐད་སྨྲས་པ་དང་། བདག་ནི་ཟླ་བའི་གླིང་ནས་རྒྱལ་པོ་དྲང་སྲོང་གི་དྲུང་དུ་མཆིས་སོ། །
དེ་ནས་སྐྱེས་བུ་སྒོ་བ་དེ་སོང་སྟེ། གཏོར་མ་ལ་ལྷ་ཁྱོད་ཀྱི་ཞལ་སྔར་བྲམ་ཟེ་མིའུ་ཐུང་ཞིག་མཆིས་སོ་ཞེས་སྨྲས་སོ། །དེ་ནས་ལྷ་མ་ཡིན་གྱི་དབང་པོ་གཏོར་མས་ཅིའི་དངོས་པོ་ཞིག་སློང་ཞེས་དེ་སྐད་སྨྲས་པ་དང་། ལྷ་མ་འཚལ་ཏེ་ཞེས་སྨྲས་སོ། །
དེ་ནས་རྒྱལ་པོ་གཏོར་མས་ཁྱོད་སོང་ལ་བྲམ་ཟེ་དེ་ཁྲིད་དེ་ཤོག་ཤིག་ཅེས་དེ་སྐད་སྨྲས་པ་དང་། སྒོ་བ་དེས་དེ་བོས་ཏེ་བྲམ་ཟེ་ཆེན་པོ་བཞུད་ཅིག་ཅེས་སྨྲས་ནས་དེ་ནང་དུ་སོང་བ་དང་རིན་པོ་ཆེའི་ཁྲིའུ་ལ་བཞག་སྟེ། པ་བ་སངས་ཀྱང་དེའི་ཚེ་ན་དེ་ན་གནས་
སོ། །དེ་ཡང་དེའི་མཁན་པོར་གྲགས་ནས་དེས་གཏོར་མ་ལ་འདི་ནི་དུས་ཀྱི་སྐྱེས་བུ་འདྲ་བ་ཞིག་ཕྱིན་ཏེ་ཁྱོད་ལ་ངེས་པར་བར་ཆད་བྱེད་དོ་ཞེས་དེ་སྐད་སྨྲས་སོ། །བཅོམ་ལྡན་འདས་ཇི་ལྟར་མཁྱེན། ངས་ནི་ལྟས་དང་མཚན་མ་ལས་ཤེས་སོ། །
བདག་ཅག་གི་ཐབས་ཇི་ལྟ་བུ་ཞིག་བགྱི། དེ་ནས་མཐུ་བོ་ཆེས་ངེས་པར་སྦྱིན་པ་ལ་འགྱོད་པར་འགྱུར་རོ་སྙམ་དུ་བསམས་ནས་དེས་དེའི་ཁར་ས་ར་སྭ་ཏི་བཅུག་པ་དང་། དེའི་ཚེ་དེས་སྨྲས་པ། བྲམ་ཟེ་ཚུར་ཤོག །ཁྱོད་ཇི་ལྟ་བུར་སེམས། བྲམ་ཟེ་
དེས་དེ་ལ་འདི་སྐད་ཅེས་སྨྲས་སོ། །གོམ་པ་གཉིས་ཤིག་གསོལ་ཏོ། །བྲམ་ཟེ་ཆེན་པོ་ཁྱོད་ཀྱིས་ཇི་ལྟར་གོམ་པ་གཉིས་བླངས་ན་ངས་ནི་གོམ་པ་གསུམ་སྦྱིན་ནོ། །དེ་ནས་བླང་བ་བླངས་ནས་བཀྲ་ཤིས་སོ་ཞེས་སྨྲས་ཏེ། དེས་ཆུ་དང་

46-1-231a

ཏིལ་དང་གསེར་དུ་བཅས་པ་བླངས་སོ། །དེ་ནས་མིའུ་ཐུང་དེའི་གཟུགས་མི་སྣང་བར་བྱས་སོ། །དེ་ནས་པ་བ་སངས་དེས་འདི་སྐད་ཅེས་སྨྲས་སོ། །རྒྱལ་པོའི་དྲང་སྲོང་ཁོ་བོས་དུས་ཀྱི་སྐྱེས་བུ་འོངས་སོ་ཞེས་བྱས་ན་
ཁྱོད་ཀྱིས་ངའི་ཚིག་མ་མཉན་ཏེ། ལས་དེའི་འབྲས་བུ་མྱོང་བར་གྱིས་ཤིག །དེས་བདག་གི་ལུས་ཆེན་པོར་བསྒྱུར་བ་དང་ཉི་མ་དང་ཟླ་བ་ནི་དེའི་ཕྲག་པ་ལ་གནས། ལག་ན་ནི་རལ་གྲི་དང་། གཞུ་དང་། འཁོར་ལོ་དང་། མཚོན་ཆ་དག་ཐོགས་
སོ། །དེ་ནས་ལྷ་མ་ཡིན་གྱི་དབང་པོ་གཏོར་མ་ཁ་བུབ་ཏུ་འགྱེལ་ནས་དྲན་པ་ཉམས་ཏེ་འདར་འདར་པོར་བྱས་ནས་བདག་གིས་ཅི་བགྱིས་རང་གི་ལག་ནས་དུག་འཚལ་བ་ལྟ་ཞེས་སྨྲས་སོ། །གོམ་པ་གཉིས་ནི་ཚང་ན་གསུམ་པ་བྱིན་ཅིག་ཅེས་
སྨྲས་པ་དང་། གསུམ་པ་མ་མཆིས་སོ་ཞེས་དེས་སྨྲས་སོ། །ཁོ་བོས་བླང་བ་ཡང་བླངས་སོ། །བདག་གིས་ཐབས་ཇི་ལྟ་བུ་ཞིག་བགྱི། ངས་གར་བཞག་པ་དེར་ཁྱོད་ཀྱིས་འདུག་པར་གྱིས་ཤིག །དེ་ནས་ལྷ་མ་ཡིན་གྱི་དབང་པོ་
གཏོར་མས་འདི་སྐད་ཅེས་སྨྲས་སོ། །བདག་ནི་བཀའ་ཅི་སྩལ་པ་དེ་བཞིན་དུ་བགྱིད་དོ། །མེད་དོ་མེད་དོ་ཞེས་བགྱིས་དེས་སྨྲས་པ། མད་དོ་མད་པར་བགྱིད་དོ། །དེས་བདེན་པའི་ཞགས་པས་བཅིངས་ནས་མཆོད་སྦྱིན་གྱི་གནས་དེ་
ཡང་བཤིག་གོ། །སྣོད་དེ་དག་ཀྱང་ལྷག་མ་ཅན་དུ་བགྱིས་སོ། །བུ་མོ་གཞོན་ནུ་དེ་དག་ཀྱང་པན་ད་པ་དང་། ཀོའུ་ར་བ་དག་གིས་མནོལ་བར་བགྱིས་སོ། །སེང་གེའི་ཁྲི་དེ་དག་དང་། ལྷའི་གདུགས་དེ་དག་དང་། ལྷམ་
རིན་པོ་ཆེས་བརྒྱན་པ་དེ་དག་དང་། གོས་དང་རྒྱན་དེ་དག་དང་། གསེར་གྱི་དཔུང་རྒྱན་རིན་པོ་ཆེས་སྤྲས་པ་དེ་དག་དང་། གླང་སེར་སྐྱ་དེ་དག་ཀྱང་པན་ད་པ་དང་ཀོའུ་ར་བ་དེ་དག་གིས་འཚལ་ཏོ། །བདག་གིས་གཞི་དེ་དག་ཀྱང་བཅོམ་མོ། །
དེ་ནས་ལྷ་མ་ཡིན་གྱི་དབང་པོ་གཏོར་མ་ལུས་ལ་སེམས་ཤིང་གཏོར་མ་ནི་མཆོད་སྦྱིན་རྒྱ་ཆེར་བགྱིད་ན། ཐབས་མ་འཚལ་བས་དུས་མ་ལགས་པར་སྦྱིན་པ་བྱིན་པས་བཅིངས་པ་ཉིད་ཐོབ་པར་གྱུར་ཏེ། ལྷ་ལ་ཕྱག་འཚལ་ལོ་སྙམ་མོ། །

46-1-231b

དེ་ཁྲིད་ནས་བྱེད་པ་པོ་བཞིན་དུ་སླས་དང་འཁོར་དང་བཅས་ཏེ་སའི་འོག་ཏུ་བཞག་གོ། །བདག་གིས་སྔོན་ཞིང་ངན་པ་ལ་སྦྱིན་པ་བགྱིས་སོ་ཞེས་གསོལ་བ་ལགས་ཏེ། ཕྱག་ན་མེ་ཏོག་པད་མ་བཟང་པོ་ཐོགས་པས་སྐྱབས་མཛོད་ཅིག །
པད་མའི་དཔལ་གྱིས་བརྒྱན་པ། སྐྲའི་ཅོད་པན་ཐོགས་པ། ཐམས་ཅད་མཁྱེན་པ་དབུ་ན་བཞུགས་པ། སེམས་ཅན་མང་པོ་དབུགས་འབྱིན་པར་མཛད་པ། དམན་པ་དང་ཕོངས་པ་ལ་ཐུགས་རྗེ་བ། གདུགས་བཞིན་དུ་སྤྱན་
བཟང་བ། སའི་སྤྱན་དམ་པ། སྨན་གྱི་རྒྱལ་པོའི་མཆོག །སེམས་ཅན་ཤིན་དུ་དག་པ། རྣལ་འབྱོར་རབ་ཏུ་ཐོབ་པ། ཐར་པ་རབ་མཆོག་ཅན། ཐར་པ་ལ་དགྱེས་པ། ནོར་བུ་ཡིད་བཞིན་དང་འདྲ་བ་ཆོས་ཀྱི་མཛོད་
ཡོངས་སུ་སྐྱོང་བར་མཛད་པ། ཕ་རོལ་དུ་ཕྱིན་པ་དྲུག་སྟོན་པར་མཛད་པ། བསམ་པ་ལེགས་པར་མཛད་པ་ལ་བདག་གིས་བསྟོད་པ་འདི་བགྱིས་སོ། །གང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་
དབང་པོ་ཁྱོད་ཀྱི་མཚན་རྗེས་སུ་དྲན་པའི་སེམས་ཅན་དེ་དག་ནི་བདེ་བ་དང་ལྡན་པ་ལགས་སོ། །ཐིག་ནག་པོ་ཅན་དང་། འོ་དོད་འབོད་པ་དང་། སེམས་ཅན་དམྱལ་བར་སྐྱེས་པ་དང་། ཡི་དགས་ཀྱི་གྲོང་ཁྱེར་དུ་སྐྱེས་པ་གང་དག་
ཁྱོད་ཀྱི་མཚན་རྗེས་སུ་དྲན་པ་དེ་དག་ནི་ངན་སོང་གི་སྡུག་བསྔལ་ཆེན་པོ་ལས་ཐར་བ་ལགས་སོ། །གང་ཁྱོད་ཀྱི་མཚན་རྗེས་སུ་དྲན་པའི་སེམས་ཅན་དེ་དག་ནི་བསམ་པ་ལེགས་པ་དང་ལྡན་པ་ལགས་ཏེ། དེ་དག་ནི་བདེ་བ་ཅན་གྱི་
འཇིག་རྟེན་གྱི་ཁམས་སུ་མཆིས་ནས་དེ་བཞིན་གཤེགས་པ་སྣང་བ་མཐའ་ཡས་ལས་ཆོས་ཉན་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་ལྷ་མ་ཡིན་གྱི་དབང་
པོ་གཏོར་མ་ལ་ལུང་བསྟན་པ། ཁྱོད་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་

46-1-232a

ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ལྷ་མ་ཡིན་གྱི་དབང་པོའི་དཔལ་ཞེས་བྱ་བར་འགྱུར་ཏེ། ལྷ་མ་ཡིན་ཐམས་ཅད་འདུལ་བར་འགྱུར་རོ། །ཁྱོད་ཀྱི་སངས་རྒྱས་ཀྱི་ཞིང་ན་འདོད་
ཆགས་ཀྱི་སྒྲ་མེད། ཞེ་སྡང་གི་སྒྲ་མེད། གཏི་མུག་གི་སྒྲ་མེད་པར་འགྱུར་རོ། །ཡི་གེ་དྲུག་པའི་རིག་པ་ཆེན་པོ་འཐོབ་པ་ཐོབ་པར་འགྱུར་རོ། །དེས་དེ་ལ་ཆོས་ཀྱི་སྦྱིན་པ། མུ་ཏིག་གི་སེ་མོ་དོ་མདོམ་སྟོང་པ་རིན་བརྒྱ་སྟོང་རི་བ་དང་། ཅོད་པན་
རིན་པོ་ཆེ་སྣ་ཚོགས་ཀྱིས་བརྒྱན་པ་ཕུལ་ལོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ཆོས་འཆད་པར་རྩོམ་སྟེ། རྒྱལ་པོ་ཆེན་པོ་ཉོན་ཅིག །མི་མི་རྟག་པའི་ནང་ན་གང་རྟག་ཏུ་ཡོངས་སུ་ལེན་
པར་སེམས་པ་དང་། ལོངས་སྤྱོད་ཆེན་པོའི་རྗེས་སུ་སེམས་པ་དང་། བྲན་ཕོ་དང་། བྲན་མོ་དང་། ལས་བྱེད་པའི་མི་དང་། གང་ཡང་ནོར་དང་། འབྲུ་དང་། མཛོད་དང་། བང་བ་རིན་པོ་ཆེ་དག་དང་། གང་བུ་དང་། བུ་མོ་དང་། ཆུང་མ་དང་། ཕ་དང་མ་ལ་སེམས་པའི་སེམས་
ཅན་དེ་དག་ནི་མི་ཤེས་པ་ཡིན་ཏེ། གང་དངོས་པོ་དེ་དག་ལ་ཆགས་པའི་སེམས་ཅན་དེ་དག་ནི་རྨི་ལམ་ལྟ་བུར་སྣང་སྟེ། འཆི་བའི་དུས་ཀྱི་ཚེ་ཡང་སྐྱབས་བྱེད་པ་སུ་ཡང་མེད་པར་འགྱུར་རོ། །གང་གི་ཚེ་ན་སྲོག་དང་བྲལ་བ་དེའི་ཚེ་
འཛམ་བུའི་གླིང་ལ་ལོག་པར་མཐོང་བར་འགྱུར་རོ། །ཆུ་བོ་ཆེན་པོ་ལ་ཡང་ཁྲག་དང་རྣག་གིས་གང་བར་མཐོང་བར་འགྱུར་རོ། །གང་ཤིང་ཆེན་པོ་དེ་དག་ཀྱང་འབར་བ། རབ་ཏུ་འབར་བ། ཡང་དག་པར་ཤིན་དུ་འབར་བར་མཐོང་བར་འགྱུར་རོ། །
མཐོང་ནས་ཀྱང་སྐྲག་པར་འགྱུར་ཞིང་དེ་ནས་གཞན་གྱིས་ཞགས་པས་བཅིངས་ཏེ་ཁྲིད་པར་འགྱུར་རོ། །སྤུ་གྲིའི་སོའི་ལམ་ཆེན་པོར་རྐང་པ་ཡང་འཆད་པར་འགྱུར་རོ། །རྐང་པ་བཏེག་པ་དང་རྐང་པ་གཞན་འབྱུང་བར་འགྱུར་རོ། །
བྱ་རོག་དང་། བྱ་རྒོད་དང་། བྱ་ཀུ་ར་ར་དང་། ཁྱི་དུ་མ་དག་གིས་ཀྱང་ཟོས་ཤིང་སེམས་ཅན་དམྱལ་བའི་སྡུག་བསྔལ་གྱི་ཚོར་བ་ཆེན་པོ་མྱོང་བར་འགྱུར་རོ། །དེ་ནས་སྤུ་གྲིའི་སོའི་ལམ་ཆེན་པོ་ལས་བབས་ནས་རྐང་པ་རེ་རེ་ལ་ཡང་ཚེར་

46-1-232b

མ་སོར་བཅུ་དྲུག་ཙམ་ཡོད་པ་ལྔ་བརྒྱ་ལྔ་བརྒྱ་ཟུག་པར་འགྱུར་ཏེ། བདག་ཅག་གིས་སྡིག་པའི་ལས་ཅི་ཞིག་བྱས་ཤེས་འཁང་བར་འགྱུར་རོ། །དེ་ནས་གཤིན་རྗེའི་མི་དེ་དག་འདི་སྐད་ཅེས་ཟེར་ཏེ། གྲོགས་པོ་ཁྱེད་ཀྱིས་དེ་བཞིན་གཤེགས་
པ་ལ་བསོད་སྙོམས་མ་ཕུལ་ལོ། །ཁྱེད་ཀྱིས་གཎ་ཌི་རྡུང་བ་ཡང་མ་ཐོས་སོ། །ཁྱོད་ཀྱིས་ས་ཕྱོགས་གང་དུ་ཡང་མཆོད་རྟེན་གྱི་གཟུགས་ལ་མ་བསྐོར་ཏོ། །དེ་དག་གིས་སྨྲས་པ། བདག་ཅག་ནི་མ་དད་པ་སྡིག་པ་ཅན་སངས་རྒྱས་དང་། 
ཆོས་དང་། དགེ་འདུན་གྱིས་སྤངས་པར་གྱུར་པའོ། །དེ་དག་གིས་སྨྲས་པ། ལས་དེའི་འབྲས་བུ་འདི་མྱོང་བར་གྱིས་ཤིག་ཅེས་དེ་དག་གཤིན་རྗེའི་སྐྱོང་བས། གཤིན་རྗེའི་རྒྱལ་པོའི་དྲུང་དུ་ཁྲིད་དོ། །ཁྲིད་ནས་ཕུལ་ལོ། །
དེ་ནས་གཤིན་རྗེའི་རྒྱལ་པོས་སྨྲས་པ། ཁྱེད་དེང་ལ་ལས་ཀྱིས་འདི་སྟོན་ཅིག །དེ་ནས་གཤིན་རྗེ་སྐྱོང་བའི་སྐྱེས་བུ་དེ་དག་གིས་དེ་རྣམས་ཁྲིད་ནས་ཐིག་ནག་པོ་ཅན་གྱི་སེམས་ཅན་དམྱལ་བ་ཆེན་པོར་བཅུག་གོ། །བཅུག་ནས་
ལུས་ལ་མཚོན་ཤག་ཏི་བརྒྱས་བཏབ་ཀྱང་མི་འཆིའོ། །ལུས་ལ་མཚོན་ཤག་ཏི་བརྒྱ་པ་གཉིས་པས་བཏབ་ཀྱང་མི་འཆིའོ། །ལུས་ལ་མཚོན་ཤག་ཏི་བརྒྱ་པ་གསུམ་པས་བཏབ་ཀྱང་མི་འཆིའོ། །གང་གི་ཚེ་འཆི་བའི་དུས་མི་
བྱེད་པ་དེའི་ཚེ་མེའི་འོབས་སུ་འཇུག་སྟེ། འོན་ཀྱང་འཆི་བའི་དུས་མི་བྱེད་པ་དང་། དེ་དག་ཁ་ཕྱི་ནས་ལྕགས་ཀྱིས་ཐུ་ལུམ་བསྲེགས་པ་འཇུག་སྟེ། མཆུ་ཡང་ཚིག་སོ་ཡང་ལྷགས། རྐན་ཡང་གས། གྲེ་བ་དང་། ལྐོག་མ་དང་། སྙིང་དང་། 
གཞང་དག་ཀྱང་སྒྲ་འུར་འུར་ཟེར་ཞིང་ལུས་ཐམས་ཅད་ཀྱང་ཚིག་པར་འགྱུར་རོ། །དེ་ལྟ་བས་ན་རྒྱལ་པོ་ཆེན་པོ་འཇིག་རྟེན་གཞན་ན་སྐྱབས་བྱེད་པ་སུ་ཡང་མེད་ཀྱིས་རྒྱལ་པོ་ཆེན་པོ་ད་ནན་ཏན་དུ་བསོད་ནམས་གྱིས་ཤིག་ཅེས་དེ་ལྟར་འཐུན་
པའི་ཆོས་བསྟན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་དེ་ལ་རྒྱལ་པོ་ཆེན་པོ་དེ་རིང་འཛི་ཏའི་ཚལ་གྱི་གཙུག་ལག་ཁང་འདིར་ཕལ་ཆེར་འདུ་བར་འགྱུར་གྱིས་ང་ནི་འགྲོའོ་ཞེས་དེ་

46-1-233a

སྐད་སྨྲས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་འོད་ཟེར་ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ཤེལ་དང་། དངུལ་གྱི་ཁ་དོག་རྣམ་པ་དུ་མ་བཏང་བ་
དང་། དེ་དག་སོང་སྟེ་དེ་བཞིན་གཤེགས་པ་ཐམས་ཅད་སྐྱོབ་པའི་སྤྱན་སྔར་འདུག་གོ། །དེའི་ཚེ་ལྷ་དང་། ཀླུ་དང་། གནོད་སྦྱིན་དང་། ལྟོ་འཕྱེ་ཆེན་པོ་དང་། མི་དག་ཀྱང་འདུས་སོ། །དེ་ནས་བྱང་ཆུབ་སེམས་དཔའ་དེ་དག་གི་ནང་ནས། ནམ་
མཁའ་མཛོད་ཅེས་བྱ་བའི་བྱང་ཆུབ་སེམས་དཔའ་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་གཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། 
བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འོད་ཟེར་འདི་དག་ག་ལས་མཆིས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་
དབང་པོ་འདི་ལྷ་མ་ཡིན་གྱི་དབང་པོ་གཏོར་མའི་ཁང་པ་ན་གནས་ཏེ་དེ་ལ་འོད་ཟེར་འདི་དག་བྱུང་ངོ་། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ནམ་མཁའ་མཛོད་ཀྱིས་འདི་སྐད་ཅེས་གསོལ་ཏོ། །བདག་གིས་བྱང་ཆུབ་
སེམས་དཔའ་སྤྱན་རས་གཟིགས་ཀྱི་དབང་པོ་བལྟ་བའི་ཐབས་གང་ཞིག་མཆིས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ནི་འདི་ཉིད་དུ་འོང་ངོ་། །གང་གི་ཚེ་བྱང་ཆུབ་སེམས་དཔའ་སེམས་དཔའ་
ཆེན་པོ་སྤྱན་རས་གཟིགས་ཀྱི་དབང་པོ་ལྷ་མ་ཡིན་གཏོར་མའི་གནས་ནས་བྱུང་བའི་ཚེ་འཛེ་ཏའི་ཚལ་གྱི་གཙུག་ལག་ཁང་དུ་ལྷའི་མེ་ཏོག་དག་ལྷགས་སོ། །ལྷའི་ཤིང་དཔག་བསམ་ཤིན་དུ་མཛེས་པ་རྒྱན་བརྒྱ་
སྟོང་དུ་མས་སྤྱངས་པ། མུ་ཏིག་གི་སེ་མོ་དོ་བརྒྱ་སྟོང་སྤྱངས་པ། ཡུལ་ཀ་ཤི་ཀའི་གོས་དང་། རྒྱའི་གོས་དང་ཕྲེང་བའི་ཆུན་པོ་རབ་ཏུ་སྤྱངས་པ། སྡོང་པོ་ནི་དམར་པོ། །ལོ་མ་ནི་གསེར་དང་དངུལ་ལས་བྱས་པ་དག་དང་། བྱི་རུའི་ཤིང་དུ་མ་དག་དང་། 

46-1-233b

མེ་ཏོག་གི་ཤིང་དུ་མ་དག་དང་། རྫིང་བུ་མེ་ཏོག་གིས་ཡོངས་སུ་གང་བ་བརྒྱ་ཕྲག་དུ་མ་དག་བྱུང་བར་གྱུར་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ནམ་མཁའ་མཛོད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་
བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་མི་མཆི་འམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ནི་ལྷ་མ་ཡིན་གྱི་དབང་པོ་གཏོར་མའི་ཁང་པ་ནས་བྱུང་སྟེ། མི་མི་རྒྱུ་བའི་ས་ཕྱོགས་མུན་པ་
མུན་ནག་ཅེས་བྱ་བའི་སར་འགྲོ་སྟེ། རིགས་ཀྱི་བུ་དེ་ན་ཉི་མ་དང་ཟླ་བ་མི་སྣང་སྟེ། ནོར་བུ་ཡིད་བཞིན་རིན་པོ་ཆེ་དམ་པ་སྦྱིན་པ་ཞེས་བྱ་བ་དེ་སྣང་བར་བྱེད་དོ། །གླིང་དེ་ན་གནོད་སྦྱིན་དང་། སྲིན་པོ་བརྒྱ་སྟོང་དུ་མ་དག་གནས་
སོ་གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་སོང་བ་དེའི་ཚེ་དེ་དག་དགའ་མགུ་ཞིང་སྙིང་རབ་ཏུ་དགའ་བར་གྱུར་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་
གཟིགས་ཀྱི་དབང་པོའི་མདུན་དུ་རྒྱུག་གོ། །བརྒྱུགས་ནས་ཀྱང་རྐང་པ་ལ་ཕྱག་འཚལ་ཏེ། ཁྱོད་ནི་མཉེལ་ཏོ། །དུབ་བོ། །ཁྱོད་ནི་ཡུན་རིང་མོ་ཞིག་ནས་མུན་པ་མུན་ནག་གིས་འདྲིར་གཤེགས་སོ། །ཞེས་དེ་སྐད་སྨྲའོ། །
དེས་ཀྱང་ངས་སེམས་ཅན་དུ་མ་ཡོངས་སུ་སྨིན་པར་བྱས་སོ་ཞེས་སྨྲས་ནས་གནོད་སྦྱིན་དང་སྲིན་པོ་དེ་དག་གིས་དེ་ཁྲིད་ནས་ལྷའི་གསེར་དང་། རིན་པོ་ཆེའི་སེང་གེའི་ཁྲི་ལ་བཞག་སྟེ། ངལ་བསོས་ནས་གནོད་སྦྱིན་དང་། སྲིན་པོ་དེ་
དག་ལ་ཆོས་འཆད་པ་ཁྱེད་ཅག་ཉོན་ཅིག །གང་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་འཕགས་པ་ཟ་མ་ཏོག་བཀོད་པ་འདིའི་རྩ་བ་བཞི་པའི་ཚིགས་སུ་བཅད་པ་གཅིག་ཉན་པ་དང་། འཛིན་པ་དང་། ཀུན་ཆུབ་པར་བྱེད་པ་དང་། ཚུལ་
བཞིན་ཡིད་ལ་བྱེད་པ་དེ་དག་ནི་བསོད་ནམས་ཀྱི་ཕུང་པོ་ལ་སྐུལ་བར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། རྡུལ་ཕྲ་རབ་ཀྱི་ཚད་ནི་ངས་གཟུང་ནུས་ཀྱི། རིགས་ཀྱི་བུ་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པའི་བསོད་

46-1-234a

ནམས་ཀྱི་ཕུང་པོ་ནི་ངས་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ། དཔེར་ན་རྒྱ་མཚོ་མཆིང་རྣམ་ཆེན་པོ་ནི་ངས་ཐིགས་པ་རེ་རེ་ནས་བགྲང་ནུས་ཀྱི། རིགས་ཀྱི་བུ་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་
བགོད་པའི་ཚིགས་སུ་བཅད་པ་གཅིག་གི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་ཏེ། རིགས་ཀྱི་བུ་འདི་ལྟ་སྟེ། དཔེར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་
ཕྲག་བཅུ་གཉིས་སྙེད་གནས་གཅིག་ཏུ་བསྐལ་པ་བཅུ་གཉིས་སུ་ན་བཟའ་དང་། བཤོས་དང་མལ་སྟན་དང་། ན་བའི་རྐྱེན་ཀྱི་སྨན་དང་། ཡོ་བྱད་ཀྱིས་བཀུར་སྟི་བྱས་པ་དེ་དག་གིས་ཀྱང་དེ་ལྟར་མི་ནུས་ན་ང་གཅིག་པུ་མུན་ནག་གི་ནང་དུ་
འདུག་པས་ལྟ་ཅི་སྨོས་སོ། །རིགས་ཀྱི་བུ་འདི་ལྟ་སྟེ། དཔེར་ན་གླིང་ཆེན་པོ་བཞིར་ཁྱིམ་རེ་རེ་ཞིང་ཡང་ལྷའི་གསེར་དང་རིན་པོ་ཆེའི་གཙུག་ལག་ཁང་བརྩིགས་ལ། གཙུག་ལག་ཁང་དེར་མཆོད་རྟེན་སྟོང་བྱས་ལ་ཉིན་གཅིག་ཏུ་དེ་
དག་གི་ནང་དུ་རིང་བསྲེལ་བཅུག་ན། གང་དེ་དག་ཏུ་རིང་བསྲེལ་བཅུག་པའི་བསོད་ནམས་ཀྱི་ཕུང་པོ་དེ་བས་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པ་འདིའི་བསོད་ནམས་ཀྱི་ཕུང་པོ་ཤིན་དུ་མང་བར་འགྱུར་རོ། །
རིགས་ཀྱི་བུ་འདི་ལྟ་སྟེ། དཔེར་ན་ཆུ་བོ་ཆེན་པོ་ལྔ་བརྒྱ་མཚོ་མཆིང་རྣམ་ཆེན་པོར་འབབ་པ་དེ་བཞིན་དུ། རིགས་ཀྱི་བུ་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པའི་བསོད་ནམས་ཀྱི་ཕུང་པོ་ཡང་དེ་དང་
འདྲ་བར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་གནོད་སྦྱིན་དང་། སྲིན་པོ་དེ་དག་གིས་འདི་སྐད་ཅེས་སྨྲས་སོ། །སེམས་ཅན་གང་དག་ཐེག་པ་ཆེན་པོའི་མདོ་དཀོན་མཆོག་གི་
རྒྱལ་པོ་སྣོད་བཀོད་པ་འདི་འདྲི་བ་དེ་དག་གི་བསོད་ནམས་ཀྱི་ཕུང་པོ་ཇི་ལྟ་བུ་ལགས། རིགས་ཀྱི་བུ་དེ་དག་གི་བསོད་ནམས་ཀྱི་ཕུང་པོ་ནི་དཔག་ཏུ་མེད་པར་འགྱུར་རོ། །གང་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པ་འདྲིར་

46-1-234b

འཇུག་པ་དེ་དག་ནི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་འདྲིར་འཇུག་པར་འགྱུར་རོ། །འཁོར་ལོས་སྒྱུར་བའི་རྒྱལ་པོ་གླིང་བཞི་ལ་དབང་བ། བུ་དཔའ་བ། མཐུ་ཆེ་བ། གཟུགས་ཀྱི་ཡན་ལག་མཆོག་དང་ལྡན་པ། ཕ་རོལ་གྱི་སྡེ་འཇོམ་པར་
བྱེད་པ་སྟོང་དང་ལྡན་པར་འགྱུར་རོ། །གང་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པ་རྟག་ཏུ་འཛིན་ཅིང་མིང་གི་རྗེས་སུ་དྲན་པར་བྱེད་པ་དེ་དག་ནི་འཁོར་བའི་སྡུག་བསྔལ་ལས་ཡོངས་སུ་ཐར་བར་འགྱུར་རོ། །སྐྱེ་བ་དང་། 
རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ལས་ཡོངས་སུ་ཐར་བར་འགྱུར་རོ། །གང་ལ་ལར་སྐྱེ་བ་དེ་དང་དེ་དག་ཏུ་ཚེ་རབས་དྲན་པར་འགྱུར་རོ། །དེ་དག་གི་ལུས་
ལ་བ་ལང་གི་སྤོས་ཀྱི་ཙན་དན་སྣམ་པར་འགྱུར་རོ། །ཁ་ནས་མེ་ཏོག་ཨུད་པ་ལ་སྔོན་པོའི་དྲི་འབྱུང་བར་འགྱུར་རོ། །ལུས་ཡོངས་སུ་རྫོགས་པར་འགྱུར་རོ། །སྟོབས་པོ་ཆེའི་སྟོབས་ཀྱི་ཤུགས་དང་ལྡན་པར་འགྱུར་རོ་ཞེས་དེ་ལྟར་དེ་དག་ལ་
མཐུན་པའི་ཆོས་བསྟན་པ་དང་། གནོད་སྦྱིན་དང་། སྲིན་པོ་དེ་དག་ལས་ཁ་ཅིག་ནི་ལན་ཅིག་ཕྱིར་འོང་བའི་འབྲས་བུ་ལ་ཁ་ཅིག་ནི་ཕྱིར་མི་འོང་བའི་འབྲས་བུ་ལ་བཀོད་ནས། དེ་དག་གིས་སྨྲས་པ། གཙུག་ལག་ཁང་འདི་ཉིད་ན་བཞུགས་
ཤིག །གནས་གཞན་གང་དུ་ཡང་མ་བཞུད་ཅིག །མུན་པ་མུན་ནག་གི་ས་འདི་ཉིད་དུ་བདག་ཅག་གིས་ལྷའི་གསེར་གྱི་མཆོད་རྟེན་བགྱིའོ། །གསེར་གྱི་འཆག་ས་བགྱིའོ། །དེ་ནས་བྱང་ཆུབ་སེམས་དཔའ་སེམས་དཔའ་
ཆེན་པོ་སྤྱན་རས་གཟིགས་ཀྱི་དབང་པོས་དེ་དག་ལ་འདི་སྐད་ཅེས་སྨྲས་སོ། །ངས་སེམས་ཅན་དུ་མ་དག་བྱང་ཆུབ་ཀྱི་ལམ་ལ་དགོད་དགོས་སོ། །དེ་ནས་གནོད་སྦྱིན་དང་སྲིན་པོ་དེ་དག་ལག་པ་ལ་འགྲམ་པ་བརྟེན་ཏེ་སེམས་
ཤིང་འཁོད་ནས་གཅིག་ལ་གཅིག་འདི་སྐད་སྨྲའོ། །བདག་ཅག་གི་སྤྱན་རས་གཟིགས་ཀྱི་དབང་པོ་གཤེགས་པར་འགྱུར་བས་ཆོས་ཀྱི་གཏམ་སྤོང་བར་འགྱུར་རོ། །དེ་ནས་བྱང་ཆུབ་སེམས་དཔའ་སྤྱན་རས་གཟིགས་ཀྱི་

46-1-235a

དབང་པོ་སོང་བ་དང་། གནོད་སྦྱིན་དང་། སྲིན་པོ་དེ་དག་ཀྱང་ཕྱི་བཞིན་དུ་འབྲང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་དེ་དག་ལ་འདི་སྐད་ཅེས་སྨྲས་སོ། །ཁྱེད་ཤིན་
དུ་རིང་དུ་འོངས་ཀྱིས་སླར་ལོག་ཤིག །དེ་ནས་གནོད་སྦྱིན་དང་སྲིན་པོ་དེ་དག་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་རྐང་པ་ལ་ཕྱག་འཚལ་ཏེ་དེ་ཉིད་ནས་སླར་ལོག་གོ། །དེ་ནས་
སྤྱན་རས་གཟིགས་ཀྱི་དབང་ཕྱུག་མེའི་ཕུང་པོ་འབར་བ་བཞིན་དུ་ནམ་མཁའ་ལ་མི་སྣང་བར་གྱུར་ཏོ། །དེ་ནས་བྲམ་ཟེའི་གཟུགས་སུ་སྤྲུལ་ཏེ་གནས་གཙང་མའི་རིས་ཀྱི་ལྷའི་བུ་དག་གི་དྲུང་དུ་སོང་སྟེ་ཕྱིན་ནས། ལྷའི་
རིས་དེ་ན་ལྷའི་བུ་རྣ་ཆའི་མཆོག་ཅེས་བྱ་བ་དབུལ་པོ་སྡུག་བསྔལ་བ་ཞིག་འདུག་གོ། །དེ་ནས་སྤྱན་རས་གཟིགས་ཀྱི་དབང་པོ་བྲམ་ཟེ་དེའི་གཟུགས་ཀྱིས་ལྷའི་བུ་དེའི་དྲུང་དུ་སོང་སྟེ། ཕྱིན་ནས་འདི་སྐད་ཅེས་སྨྲས་སོ། །
བདག་ནི་བཀྲེས་སོ། །སྐོམ་མོ། །དེ་ནས་ལྷའི་བུ་དེས་བྲམ་ཟེ་དེ་ལ་འདི་སྐད་ཅེས་སྨྲས་སོ། །བྲམ་ཟེ་ཆེན་པོ་བདག་ལ་ནི་ཅུང་ཟད་ཀྱང་མ་མཆིས་སོ། །བདག་ལ་ཆུང་ཟད་ཅིག་ནི་ངེས་པར་སྩལ་འཚལ་ལོ། །
དེ་ནས་ལྷའི་བུ་གཞལ་མེད་ཁང་དུ་སོང་སྟེ་སྣོད་དག་བལྟས་པ་དང་། སྣོད་རྣམས་ལྷའི་ནོར་བུ་རིན་པོ་ཆེ་རིན་ཐང་མེད་པས་ཡོངས་སུ་གང་བ་དང་། སྣོད་གཞན་དག་ཀྱང་རོའི་རོ་མཆོག་གི་ཟས་དག་གིས་ཡོངས་སུ་གང་བ་
དང་། གཡོན་ཕྱོགས་ཀྱི་གཞལ་མེད་ཁང་ན་ཡང་གོས་དང་རྒྱན་གྱིས་ཡོངས་སུ་གང་བ་མཐོང་ངོ་། །དེ་ནས་ལྷའི་བུ་དེ་སེམས་པར་གྱུར་ནས་འདི་འདྲ་བའི་དཔལ་ཐོབ་པ་ལས་ན་བདག་གི་སྒོ་ན་ངེས་པར་སྣོད་བཟང་པོ་ཞིག་
འདུག་གོ་སྙམ་མོ། །དེ་ནས་དེས་བྲམ་ཟེ་དེ་བོས་ཏེ་གཞལ་མེད་ཁང་གི་ནང་དུ་སོང་ནས་ལྷའི་རིན་པོ་ཆེས་ཀྱང་བསྟབས། ལྷའི་རོ་མཆོག་གི་ཟས་ཀྱང་བྱིན་ཏེ་ཟོས་ནས་བཀྲ་ཤིས་པ་བྱས་སོ། །དེ་ནས་ལྷའི་བུ་དེས་དེ་

46-1-235b

ལ་འདི་སྐད་ཅེས་སྨྲས་སོ། །བྲམ་ཟེ་ཆེན་པོ་ཁྱོད་ས་ག་ལས་འོངས་བདག་ནི་འཛེ་ཏའི་ཚལ་ཞེས་བགྱི་བའི་གཙུག་ལག་ཁང་ནས་མཆིས་སོ། །དེ་ནས་ལྷའི་བུ་དེས་དེ་ལ་འདི་སྐད་ཅེས་སྨྲས་སོ། །ས་དེ་ཇི་ལྟ་བུ་ཞིག་དེ་ནས་བྲམ་ཟེ་དེས་དེ་
ལ་འདི་སྐད་ཅེས་སྨྲས་སོ། །ས་དེ་ནི་དགའ་བར་བྱེད་པ། ལྷའི་ནོར་བུ་རིན་པོ་ཆེས་ཡོངས་སུ་བརྒྱན་པ་ལྷའི་ཤིང་དཔག་བསམས་ཀྱིས་ཡོངས་སུ་མཛེས་པར་བྱས་པ། མེ་ཏོག་ཡིད་དུ་འོང་བ་དག་བྱུང་བ། རྫིང་བུ་རྣམ་པ་དུ་མ་གདའ་བ་ཚུལ་
ཁྲིམས་དང་ལྡན་པ་ཡོན་ཏན་དང་ལྡན་པའི་སྦྱིན་གནས་སྣ་ཚོགས་དག་གདའ་བ། དེ་བཞིན་གཤེགས་པ་ཐམས་ཅད་སྐྱོབ་ཀྱི་ཆོ་འཕྲུལ་དག་གདའ་བ་སྟེ། ལྷའི་བུ་ས་དེ་ནི་དེ་ལྟར་དགའ་བར་བགྱིད་པའོ། །དེ་ནས་ལྷའི་བུ་དེས་དེ་ལ་འདི་སྐད་ཅེས་
སྨྲས་སོ། །བྲམ་ཟེ་ཁྱོད་ཀྱིས་ངེས་པར་བདེན་པར་སྨྲོས་ཤིག །ཅི་ཁྱོད་ལྷ་ཡིན་ནམ་འོན་ཏེ་མི་མི་ལ་ནི་ཇི་ལྟར་ཁྱོད་ལ་ལྟས་སྣང་བ་དེ་འདྲ་བའི་ལྟས་མེད་དོ། །དེ་ནས་དེས་དེ་ལ་འདི་སྐད་ཅེས་སྨྲས་སོ། །ང་ནི་ལྷ་ཡང་མ་ཡིན། མི་ཡང་མ་ཡིན་ཏེ། 
ཕོངས་པ་དང་། བྲེལ་བ་ལ་ཐུགས་རྗེ་བར་བྱེད་པ་བྱང་ཆུབ་ཀྱི་ལམ་སྟོན་པར་བྱེད་པ་སྟེ། བྱང་ཆུབ་སེམས་དཔའོ། །དེ་ནས་ལྷའི་བུས་ཅོད་པན་དང་རྣ་ཆ་ཕུལ་ནས་ཚིགས་སུ་བཅད་དེ་སྨྲས་པ། ཀྱེ་མའོ་ཡོན་ཏན་དག་གི་ཞིང་། །ཉེས་པ་ཐམས་ཅད་
རྣམ་སྤངས་པ། །དེ་རིང་ཉིད་དུ་ས་བོན་བཏབ། །དེ་རིང་ཉིད་དུ་འབྲས་བུ་གྲུབ། །དེ་ནས་ལྷའི་བུ་དེས་ཚིགས་སུ་བཅད་པ་དེ་སྨྲས་ནས་དེ་ཉིད་དུ་སོང་ངོ་། །དེ་ནས་བྲམ་ཟེ་ཆེན་པོ་དེ་ལྷའི་རིས་དེ་ནས་བབས་ཏེ་སིང་གྷ་ལའི་གླིང་དུ་
སོང་ངོ་། །སོང་ནས་འདོད་པའི་གཟུགས་སུ་སྤྲུལ་ཏེ་སྲིན་མོ་རྣམས་ཀྱི་མདུན་དུ་འདུག་པ་དང་། གཟུགས་བཟང་པོ་མཐོང་ནས་དེའི་ཚེ་འདོད་པའི་སེམས་སྐྱེས་སོ། །གང་གི་ཚེ་ན་འདོད་པའི་སེམས་སྐྱེས་པ་དེའི་ཚེ་དེའི་དྲུང་དུ་
སོང་སྟེ་ཕྱིན་ནས་བདག་ཅག་དང་བསྟེན་ཅིག །བདག་ཅག་ནི་བུད་མེད་གཞོན་ནུའོ། །བདག་ཅག་ལ་ནི་ཁྱིམ་ཐབ་མ་མཆིས་སོ། །བདག་པོ་མ་མཆིས་པའི་ནི་བདག་པོར་གྱུར་ཅིག །མགོན་མ་མཆིས་པའི་ནི་མགོན་དུ་གྱུར་ཅིག །

46-1-236a

རྟེན་མ་མཆིས་པའི་ནི་རྟེན་དུ་གྱུར་ཅིག །འདི་ནི་ཁྱོད་ཀྱིས་ཟས་ཀྱི་ཁབ་བོ། །ན་བཟའི་ཁབ་བོ། །སྐྱེད་མོས་ཚལ་དགའ་བར་བགྱིད་པ་དག་ལགས་སོ། །རྫིང་བུ་དགའ་བར་བགྱིད་པ་དག་ལགས་སོ། །དེས་སྨྲས་པ། གལ་ཏེ་
བདག་གིས་བསྒོ་བ་བཞིན་དུ་བྱེད་ནའོ། །བདག་ཅག་བགྱིད་དོ། །དེས་དེ་དག་ལ་འཕགས་པའི་ཡན་ལག་བརྒྱད་དང་ལྡན་པའི་ལམ་ཡང་བསྟན། ཞལ་ནས་གསུངས་པ་བཞི་ཡང་ཁ་ཏོན་བྱེད་དུ་བཅུག་ནས་ལན་ཅིག་ཕྱིར་འོང་བའི་འབྲས་
བུ་ཡང་ཐོབ། ཕྱིར་མི་འོང་བའི་འབྲས་བུ་ཡང་ཐོབ་ནས་སྲིན་མོ་དེ་དག་ལ་འདོད་ཆགས་ཀྱི་སྡུག་བསྔལ་མི་ལྡང་སེམས་ཞེ་སྡང་བར་ཡང་མི་བྱེད། སུ་ལ་ཡང་སྲོག་གི་བར་ཆད་བྱེད་པར་མི་འདོད། ཆོས་ལ་མངོན་པར་དགའ་ཞིང་
གནས་ལ་སྡོམ་པ་བླངས་ཏེ་སླན་ཆད་བདག་ཅག་སྲོག་གཅོད་པར་མི་བགྱིད་དོ། །འཛམ་བུའི་གླིང་གི་མི་དག་ཇི་ལྟར་ཟས་དང་སྐོམ་གྱིས་འཚོ་བ་བདག་ཅག་ཀྱང་དེ་བཞིན་དུ་འཚོའོ། །སླན་ཆད་སྲིན་མོའི་ཚུལ་དུ་མི་བགྱིད་དོ་ཞེས་དེ་འདྲ་
བའི་བསླབ་ཚིག་གི་སྡོམ་པ་བླངས་ཏེ་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་སིང་ག་ལའི་གླིང་ནས་བྱུང་ནས་ཡུལ་ཁོར་མོར་འཇིག་གི་གྲོང་ཁྱེར་ཆེན་པོ་ན་བཤང་བ་དང་། 
གཅི་བའི་གནས་དེ་ན་སྲིན་བུའི་རིགས་བརྒྱ་སྟོང་དུ་མ་གནས་ནས། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་བུང་བའི་གཟུགས་སུ་སྤྲུལ་ནས་སྒྲ་བུང་བུང་དུ་ཕྱུང་སྟེ། སངས་རྒྱས་
ལ་ཕྱག་འཚལ་ལོ་ཞེས་བྱས་པ་དང་། དེ་དག་སངས་རྒྱས་ལ་ཕྱག་འཚལ་ལོ་ཞེས་བྱ་བ་ལ་རྗེས་སུ་དྲན་ནས་འཇིག་ཚོགས་སུ་ལྟ་བའི་རི་རྩེ་མོ་ཉི་ཤུ་བྱུང་བ་ཡེ་ཤེས་ཀྱི་རྡོ་རྗེས་བཅོམ་ནས། དེ་དག་ཐམས་ཅད་བྱང་ཆུབ་སེམས་
དཔའ་ཁ་ན་སྤོས་ཀྱི་དྲི་ཞེས་བྱ་བར་གྱུར་ཏེ་འཇིག་རྟེན་གྱི་ཁམས་བདེ་བ་ཅན་དུ་སྐྱེས་སོ། །དེའི་ཚེ་སེམས་ཅན་ཡོངས་སུ་སྨིན་པར་བྱས་ཏེ། ཁོར་མོར་འཇིག་གི་གྲོང་ཁྱེར་ཆེན་པོ་ནས་སོང་ནས་ཡུལ་མ་ག་དྷཱར་མངོན་དུ་ཕྱོགས་ཏེ་སོང་

46-1-236b

བ་དང་། ཡུལ་མ་ག་དྷཱར་ཕྱིན་ནས་ལོ་ཉི་ཤུར་དགོན་པ་ན་གནས་པའི་སེམས་ཅན་གཅིག་ལ་གཅིག་ཤ་ཟ་བ་དག་མཐོང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་བདག་གིས་ཐབས་
གང་གིས་སེམས་ཅན་འདི་དག་ཚིམ་པར་བྱ་སྙམ་དུ་སེམས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་ལྷའི་ཆར་པ་དབབ་པར་བརྩམས་ཏེ། ཐོག་མར་ནི་ཆུའི་ཆར་པའོ་གང་གི་
ཚེ་ན་ཆུས་ངོམས་པར་གྱུར་པ་དེའི་འོག་ཏུ་ལྷའི་ཞལ་ཟས་རོ་མཆོག་དང་ལྡན་པས་སྐོན་པ་ཡོངས་སུ་གང་བ་དག་བབ་པོ། །གང་གི་ཚེ་ན་ཟས་ཀྱིས་ཡོངས་སུ་ཚིམ་པར་གྱུར་པ་དེའི་ཚེ་འབྲས་ཀྱི་ཆར་བབ་པོ། །གཞན་ཡང་ཏིལ་དང་། འབྲས་རྨེའུ་དང་། 
ཀུ་ལད་ཏའི་འབྲུ་དང་། འབྲས་སོ་བ་དག་བབ་པོ། །གང་དང་གང་གི་ཚེ་ན་སེམས་ཅན་དེ་དག་གི་དགོས་པ་སེམས་པར་གྱུར་པ་དེའི་ཚེ་དེ་དག་གི་བསམ་པ་གྲུབ་པར་གྱུར་ཏོ། །དེ་ནས་ཡུལ་མ་ག་དྷཱའི་སེམས་ཅན་དེ་དག་ངོ་མཚར་དུ་གྱུར་ནས་
དེ་ཐམས་ཅད་གནས་གཅིག་ཏུ་ངལ་བསོས་སོ། །ངལ་བསོས་ནས་གཅིག་ལ་གཅིག་འདི་ལྷ་གང་གི་མཐུ་ཞིག་ཅེས་སྨྲས་པ་དང་། དེ་ནས་སྐྱེས་བུ་དེ་དག་གི་ནང་ན་རྙིས་པ། རྒན་པ། རྒས་པ། སྒུར་བ། བ་ལང་གི་སྣ་ལྟར་གུག་པ། 
ལོ་བརྒྱ་སྟོང་དུ་མ་ལོན་པ་ཞིག་ཡོད་པ་དེས་དེ་དག་ལ་སྨྲས་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་མ་གཏོགས་པར་ལྷ་གཞན་གང་གི་ཡང་མཐུ་འདི་འདྲ་བར་མི་འགྱུར་རོ། །
དེ་ནས་འཁོར་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་མཚན་མ་ཇི་ལྟ་བུ་ཞེས་དྲིས་སོ། །དེ་ནས་སྐྱེས་བུ་དེས་ཡོན་ཏན་བཤད་པར་བརྩམས་པ་མུན་པར་གྱུར་པ་རྣམས་
ཀྱི་ནི་སྒྲོན་མར་གྱུར་པའོ། །ཉི་མས་གདུངས་ཤིང་ཚིག་པ་རྣམས་ཀྱི་ནི་གདུགས་སུ་གྱུར་པའོ། །སྐོམ་གྱིས་གདུངས་པ་རྣམས་ཀྱི་ནི་ཆུ་བོར་གྱུར་པའོ། །འཇིགས་ཤིང་སྐྲག་པར་གྱུར་པ་

46-1-237a

རྣམས་ལ་ནི་མི་འཇིགས་པ་སྦྱིན་པར་བྱེད་པའོ། །ནད་ཀྱིས་བཏབ་པ་རྣམས་ལ་ནི་སྨན་པར་གྱུར་པའོ། །སེམས་ཅན་སྡུག་བསྔལ་བ་རྣམས་ཀྱི་ནི་ཕ་དང་མར་གྱུར་པའོ། །སེམས་ཅན་བསྟིར་མེད་པར་སྐྱེས་པ་རྣམས་ལ་ནི་
མྱ་ངན་ལས་འདས་པ་སྟོན་པར་བྱེད་པ་སྟེ། དེའི་ཡོན་ཏན་གྱི་ཁྱད་པར་ནི་འདི་ལྟ་བུའོ། །གང་དེའི་མཚན་གྱི་རྗེས་སུ་དྲན་པ་དེ་དག་ནི་འཇིག་རྟེན་ན་བདེ་བ་དང་ལྡན་པ་ཡིན་ནོ། །དེ་དག་ནི་འཁོར་བའི་སྡུག་བསྔལ་གྱི་ཐ་མ་ཡོངས་སུ་སྤོང་བའོ། །གང་
སྤྱན་རས་གཟིགས་ཀྱི་དབང་པོ་ལ་རྟག་ཏུ་མེ་ཏོག་དང་། པོག་བསྡུས་ཤིང་འབུལ་བའི་སྐྱེས་བུ་གང་ཟག་དེ་དག་ནི་སེམས་པ་དང་ལྡན་པ་ཡིན་ན། །གང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་མདུན་དུ་དཀྱིལ་
འཁོར་གྲུ་བཞི་བྱེད་པ་དེ་དག་ནི་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་ལྡན་པར་འགྱུར་ཏེ། འདི་ལྟ་སྟེ། འཁོར་ལོ་རིན་པོ་ཆེ་དང་། རྟ་རིན་པོ་ཆེ་དང་། བལ་གླང་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། 
ཁྱིམ་བདག་རིན་པོ་ཆེ་དང་། བློན་པོ་རིན་པོ་ཆེ་དང་། བདུན་ཏེ། རིན་པོ་ཆེ་དེ་བདུན་དང་ལྡན་པ་འགྱུར་རོ། །གང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་མེ་ཏོག་འབུལ་བ་དེ་དག་ནི་ལུས་དྲི་ཞིམ་
ཞིང་། གང་ལ་ལར་སྐྱེས་པར་ལུས་ཡོངས་སུ་རྫོགས་པར་འགྱུར་རོ། །ཞེས་སྐྱེས་བུ་དེས་དེ་ལྟར་ཡོན་ཏན་གྱི་ཁྱད་པར་བཤད་ནས་འཁོར་དེ་དག་བདག་བདག་གི་ཁང་པར་དོང་ངོ་། །དེ་ནས་སྐྱེས་བུ་རྙིས་པ་དེས་མཐུན་པའི་
ཆོས་བཤད་ནས་དེ་ཡང་བདག་གི་ཁང་པར་སོང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་དེ་ཉིད་དུ་ནམ་མཁའ་ལ་མི་སྣང་བར་གྱུར་ཏོ། །དེ་ནས་དེ་ནམ་མཁའ་ལ་གནས་བཞིན་
དུ་བདག་གིས་དེ་བཞིན་གཤེགས་པ་ཐམས་ཅད་སྐྱོབ་མ་མཐོང་ནས་ཡུན་རིང་ངོ་སྙམ་དུ་བསམས་ནས་དེ་མཐར་གྱིས་འཛེ་ཏའི་ཚལ་གྱི་གཙུག་ལག་ཁང་དུ་ཕྱིན་པ་དང་། འོང་བ་བཅོམ་ལྡན་འདས་ཀྱིས་གཟིགས་སོ། །

46-1-237b

བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་འཛེ་ཏའི་ཚལ་གྱི་གཙུག་ལག་ཁང་དུ་བྱིན་ནས་ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་
པོ་དང་མི་དང་མི་མ་ཡིན་པ་དག་དང་། བྱང་ཆུབ་སེམས་དཔའ་བརྒྱ་ཕྲག་དུ་མ་དག་ཚོགས་པ་ཡང་མཐོང་ངོ་། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ནམ་མཁའ་མཛོད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་
དཔའ་དེ་གང་ཞིག་མཆི་བཅོམ་ལྡན་འདས་ཀྱིས་བཀའ་སྩལ་པ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་དེ་འོང་ངོ་ནས་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོས་བཅོམ་ལྡན་འདས་ཀྱི་ཞབས་ལ་
མགོ་བོས་ཕྱག་འཚལ་ཏེ། ལན་གསུམ་བསྐོར་ནས་གཡོན་ཕྱོགས་སུ་ངལ་བསོས་སོ། །དེ་ནས་བཅོམ་ལྡན་འདས་ཀྱིས་ཁྱོད་ངལ་ལམ། འཆད་དམ། རིགས་ཀྱི་བུ་ཁྱོད་ཀྱིས་ལས་ཀྱི་ས་ཇི་ལྟ་བུ་ཞིག་བསྒྲུབས། 
དེས་སྔོན་ཇི་ལྟར་གྱུར་པ་གསོལ་ཏོ། །དེ་ནས་བྱང་ཆུབ་སེམས་དཔའ་ནམ་མཁའ་མཛོད་ཤིན་དུ་ངོ་མཚར་དུ་གྱུར་ཏོ། །བདག་གིས་བྱང་ཆུབ་སེམས་དཔའི་ཡུལ་འདི་ལྟ་བུ་མ་མཐོང་ངོ་། །དེ་བཞིན་གཤེགས་པ་དག་ལ་ཡང་
ཡུལ་འདི་ལྟ་བུ་མ་མཆིས་ན་བྱང་ཆུབ་སེམས་དཔར་གྱུར་པ་ལ་ལྟ་ཅི་སྨོས་སྙམ་མོ། །དེ་ནས་བྱང་ཆུབ་སེམས་དཔའ་ནམ་མཁའ་མཛོད་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་
དྲུང་དུ་སོང་སྟེ། མདུན་དུ་འདུག་གོ། །འདུག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་འདི་སྐད་ཅེས་སྨྲས་སོ། །ཁྱོད་ངལ་ལམ། འཆད་དམ། བདག་ནི་མི་ངལ་ལོ་ཉོན་མ་མོངས་
སོ་ཞེས་ཕན་ཚུན་དུ་གཏམ་བྱས་ནས་ཁ་རོག་སྟེ་འཁོད་དོ། །དེ་ནས་བཅོམ་ལྡན་འདས་ཀྱིས་ཕ་རོལ་དུ་ཕྱིན་པ་དྲུག་བཤད་པར་བརྩམ་པས་རིགས་ཀྱི་བུ་དག་ཉོན་ཅིག །བྱང་ཆུབ་སེམས་དཔར་གྱུར་པས་སྦྱིན་པའི་ཕ་

46-1-238a

རོལ་དུ་ཕྱིན་པ་ཡོངས་སུ་རྫོགས་པར་བྱའོ། །དེ་བཞིན་དུ་ཚུལ་ཁྲིམས་ཀྱི་ཕ་རོལ་དུ་ཕྱིན་པ་དང་། བཟོད་པའི་ཕ་རོལ་དུ་ཕྱིན་པ་དང་། བརྩོན་འགྲུས་ཀྱི་ཕ་རོལ་དུ་ཕྱིན་པ་དང་། བསམ་གཏན་གྱི་ཕ་རོལ་དུ་ཕྱིན་པ་དང་། ཤེས་
རབ་ཀྱི་ཕ་རོལ་དུ་ཕྱིན་པ་ཡོངས་སུ་རྫོགས་པར་བྱའོ། །ཞེས་ཆོས་དེ་བཤད་ནས་ཅང་མི་གསུང་བར་བཞུགས་སོ། །དེ་ནས་འཁོར་དེ་དག་བདག་བདག་གི་གནས་སུ་དོང་ངོ་། །བྱང་ཆུབ་སེམས་དཔའ་དེ་དག་ཀྱང་བདག་བདག་གི་
སངས་རྒྱས་ཀྱི་ཞིང་དུ་དོང་ངོ་། །འདི་ནི་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པའི་ལེའུ་དང་པོ་སྟེ་རྫོགས་སོ།། །། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྒྲིབ་
པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་སྔོན་ཏིང་ངེ་འཛིན་གང་དག་ལ་མཉམ་པར་བཞག་པར་
གྱུར་པ་བཤད་དུ་གསོལ། བཅོམ་ལྡན་འདས་ཀྱི་བཀའ་སྩལ་པ། རིགས་ཀྱི་བུ་འདི་ལྟ་སྟེ། རྣམ་པར་བྱེད་ཅེས་བྱ་བའི་ཏིང་ངེ་འཛིན་དང་། འོད་བྱེད་ཅེས་བྱ་བའི་ཏིང་ངེ་འཛིན་དང་། རྡོ་རྗེ་གྱེན་དུ་འཕགས་ཤེས་བྱ་བའི་
ཏིང་ངེ་འཛིན་དང་། ཉི་མའི་འོད་ཅེས་བྱ་བའི་ཏིང་ངེ་འཛིན་དང་། འཐོར་བ་ཞེས་བྱ་བའི་ཏིང་ངེ་འཛིན་དང་། དཔུང་རྒྱན་ཅེས་བྱ་བའི་ཏིང་ངེ་འཛིན་དང་། རྡོ་རྗེ་རྒྱལ་མཚན་མཆོག་ཅེས་བྱ་བའི་ཏིང་ངེ་འཛིན་དང་། རྒྱན་ཅེས་
བྱ་བའི་ཏིང་ངེ་འཛིན་དང་། བཀོད་པའི་རྒྱལ་པོ་ཞེས་བྱ་བའི་ཏིང་ངེ་འཛིན་དང་། ཕྱོགས་བཅུར་རྣམ་པར་ལྟ་ཞེས་བྱ་བའི་ཏིང་ངེ་འཛིན་དང་། ཡིད་བཞིན་གྱི་ནོར་བུ་ལྟ་བུ་སྤྱན་མཆོག་ཅེས་བྱ་བའི་ཏིང་ངེ་འཛིན་དང་། 
ཆོས་ཀྱི་རྒྱལ་པོ་ཞེས་བྱ་བའི་ཏིང་ངེ་འཛིན་དང་། ཤིན་དུ་གནས་པ་ཞེས་བྱ་བའི་ཏིང་ངེ་འཛིན་དང་། དགའ་བ་སྦྱིན་པར་བྱེད་ཅེས་བྱ་བའི་ཏིང་ངེ་འཛིན་དང་། རྡོ་རྗེ་རྒྱལ་མཚན་ཞེས་བྱ་བའི་ཏིང་ངེ་འཛིན་དང་། འཇིག་རྟེན་

46-1-238b

གྱི་ཁམས་ཐམས་ཅད་རྣམ་པར་ལྟ་བ་ཞེས་བྱ་བའི་ཏིང་ངེ་འཛིན་དང་། མ་ལུས་པར་འོངས་ཤེས་བྱ་བའི་ཏིང་ངེ་འཛིན་དང་། མངོན་པར་ཆུད་ཅེས་བྱ་བའི་ཏིང་ངེ་འཛིན་དང་། སྤྱི་བོར་འཁྱིལ་པ་ཞེས་བྱ་བའི་ཏིང་ངེ་འཛིན་དང་། ཟླ་བ་ལྟར་སྤྱན་མཆོག་
ཅེས་བྱ་བའི་ཏིང་ངེ་འཛིན་དང་། གཡོག་སྐྱེ་བོ་མང་པོ་ཞེས་བྱ་བའི་ཏིང་ངེ་འཛིན་དང་། ལྷའི་སྤྱན་ཞེས་བྱ་བའི་ཏིང་ངེ་འཛིན་དང་། བསྐལ་པའི་གླིང་ཞེས་བྱ་བའི་ཏིང་ངེ་འཛིན་དང་། ཆོ་འཕྲུལ་སྟོན་ཅེས་བྱ་བའི་ཏིང་ངེ་འཛིན་དང་། པད་མའི་བླ་ཞེས་
བྱ་བའི་ཏིང་ངེ་འཛིན་དང་། རྒྱལ་པོའི་དབང་པོ་ཞེས་བྱ་བའི་ཏིང་ངེ་འཛིན་དང་། བསྟིར་མེད་པ་སྐེམས་ཤེས་བྱ་བའི་ཏིང་ངེ་འཛིན་དང་། འབར་ཞེས་བྱ་བའི་ཏིང་ངེ་འཛིན་དང་། ལྷའི་རྣ་ཆ་ཞེས་བྱ་བའི་ཏིང་ངེ་འཛིན་དང་། བདུད་རྩི་ཐིགས་པ་
ཞེས་བྱ་བའི་ཏིང་ངེ་འཛིན་དང་། འོད་དཀྱིལ་འཁོར་ཞེས་བྱ་བའི་ཏིང་ངེ་འཛིན་དང་། རྒྱ་མཚོར་འཇུག་ཅེས་བྱ་བའི་ཏིང་ངེ་འཛིན་དང་། གཞལ་མེད་ཁང་གི་སྒོ་ཞེས་བྱ་བའི་ཏིང་ངེ་འཛིན་དང་། བྱ་ཀ་ལ་པིང་ཀའི་སྒྲ་ཞེས་བྱ་བའི་ཏིང་ངེ་འཛིན་དང་། 
ཨུད་པ་ལ་སྟོན་པོ་ཞེས་བྱ་བའི་ཏིང་ངེ་འཛིན་དང་། ཞོན་ཞེས་བྱ་བའི་ཏིང་ངེ་འཛིན་དང་། རྡོ་རྗེའི་གོ་ཆ་ཞེས་བྱ་བའི་ཏིང་ངེ་འཛིན་དང་། བལ་གླང་དགའ་ཞེས་བྱ་བའི་ཏིང་ངེ་འཛིན་དང་། སེང་གེ་རྣམ་པར་རོལ་ཅེས་བྱ་བའི་ཏིང་ངེ་འཛིན་དང་། 
བླ་ན་མེད་ཅེས་བྱ་བའི་ཏིང་ངེ་འཛིན་དང་། འདུལ་བ་ཞེས་བྱ་བའི་ཏིང་ངེ་འཛིན་དང་། ཟླ་བའི་བླ་ཞེས་བྱ་བའི་ཏིང་ངེ་འཛིན་དང་། སྣང་བར་བྱེད་ཅེས་བྱ་བའི་ཏིང་ངེ་འཛིན་དང་། འོད་ཟེར་བརྒྱ་པ་ཞེས་བྱ་བའི་ཏིང་ངེ་འཛིན་དང་། བསྐུས་པ་ཞེས་
བྱ་བའི་ཏིང་ངེ་འཛིན་དང་། འོད་བྱེད་ཅེས་བྱ་བའི་ཏིང་ངེ་འཛིན་དང་། རྣམ་པ་བཟང་པོ་ཞེས་བྱ་བའི་ཏིང་ངེ་འཛིན་དང་། ལྷ་མ་ཡིན་ལ་སྐུལ་བ་ཞེས་བྱ་བའི་ཏིང་ངེ་འཛིན་དང་། བསྒོམ་པ་ཞེས་བྱ་བའི་ཏིང་ངེ་འཛིན་དང་། མྱ་ངན་ལས་འདའ་བ་
སྐུལ་བ་ཞེས་བྱ་བའི་ཏིང་ངེ་འཛིན་དང་། གླིང་ཆེན་པོ་ཞེས་བྱ་བའི་ཏིང་ངེ་འཛིན་དང་། ཚོར་བ་རྣམ་པར་གྲོལ་ཞེས་བྱ་བའི་ཏིང་ངེ་འཛིན་དང་། རྣལ་འབྱོར་བྱེད་ཅེས་བྱ་བའི་ཏིང་ངེ་འཛིན་དང་། དོན་དམ་པ་སྟོན་ཅེས་བྱ་བའི་

46-1-239a

ཏིང་ངེ་འཛིན་དང་། གློག་ཅེས་བྱ་བའི་ཏིང་ངེ་འཛིན་དང་། ཀླུ་བཀོད་པ་ཞེས་བྱ་བའི་ཏིང་ངེ་འཛིན་དང་། སེང་གེ་གླལ་ཞེས་བྱ་བའི་ཏིང་ངེ་འཛིན་དང་། ས་རི་བཀོད་པ་ཞེས་བྱ་བའི་ཏིང་ངེ་འཛིན་དང་། འོང་བ་ཞེས་བྱ་བའི་ཏིང་ངེ་འཛིན་དང་། 
དྲན་པའི་དབང་པོ་འཕེལ་བ་ཞེས་བྱ་བའི་ཏིང་ངེ་འཛིན་དང་། མོས་པ་ཞེས་བྱ་བའི་ཏིང་ངེ་འཛིན་དང་། རྒྱལ་བའི་ཐེག་པ་ཞེས་བྱ་བའི་ཏིང་ངེ་འཛིན་དང་། ལམ་སྟོན་པ་ཞེས་བྱ་བའི་ཏིང་ངེ་འཛིན་དང་། རིགས་ཀྱི་བུ་བྱང་ཆུབ་སེམས་དཔའ་
སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནི་ཏིང་ངེ་འཛིན་དེ་དག་དང་ལྡན་ཏེ། དེའི་བ་སྤུའི་ཁུང་བུ་རེ་རེ་ན་ཡང་ཏིང་ངེ་འཛིན་བརྒྱ་སྟོང་དག་གནས་སོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་
སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་དཔག་ཏུ་མེད་དོ། །བསོད་ནམས་ཀྱི་ཚོགས་དེ་འདྲ་བ་དག་ནི་དེ་བཞིན་གཤེགས་པ་དག་ལ་ཡང་མེད་ན་བྱང་ཆུབ་སེམས་དཔའ་དག་ལ་ལྟ་ཅི་སྨོས།། །།
བམ་པོ་གསུམ་པ། རིགས་ཀྱི་བུ་སྔོན་བྱུང་བ་ང་བྱང་ཆུབ་སེམས་དཔར་གྱུར་པ་དེའི་ཚེ། ང་ཚོང་པ་ལྔ་བརྒྱ་དང་འགྲོགས་ནས་སིང་གྷ་ལའི་གླིང་དུ་སོང་སྟེ། ཤིང་རྟ་དང་། ཁུར་དང་། བམ་པོ་དང་། སྐོན་པ་དང་། རྔ་མོ་དང་། 
བ་ལང་དང་། བོང་བུ་ལ་སོགས་པས་ཟོང་མང་དུ་བསྐྱས་ཏེ་སིང་གྷ་ལའི་གླིང་དུ་སོང་བ་ལས། གྲོང་དང་། གྲོང་ཁྱེར་དང་། གྲོང་མདབ་དང་། གྲོང་ཡེའུ་དང་། ཚོང་དུས་དག་ཏུ་སོང་བ་ལས་སིང་གྷ་ལའི་གླིང་དུ་མ་ཕྱིན་པར་གྲུ་
བོ་ཆེ་བཟང་པོ་ཞིག་རྙེད་ནས། ངས་གདོས་འཛིན་པ་ལ་གླིང་གང་ལོགས་སུ་རླུང་ལངས། ཅི་རིན་པོ་ཆེའི་གླིང་དུ་རླུང་ལངས་སམ། ཡང་ན་ནི་ནས་ཀྱི་གླིང་དུ་རླུང་ལངས་སམ། འོན་ཏེ་སྲིན་མོའི་གླིང་དུ་རླུང་ལངས་ཤེས་
སྨྲས་པ་དང་། གདོས་འཛིན་པ་འདི་སྐད་ཅེས་ཟེར་ཏེ། བསེར་མ་ནི་སིང་གྷ་ལའི་གླིང་དུ་ལངས་ཀྱིས་ལྷ་མཁྱེན་པར་མཛོད་ཅིག །དེ་ནས་གྲུ་བོ་ཆེ་བཏང་སྟེ་སིང་གྷ་ལའི་གླིང་དུ་སོང་བ་ལས་སིང་གྷ་ལའི་གླིང་ན་གནས་

46-1-239b

པའི་སྲིན་མོ་དག་གིས་དུས་མ་ཡིན་པའི་རླུང་བཏང་བ་དང་གྲུ་བོ་ཆེ་དེ་དུམ་བུ་དུམ་བུར་ལྷགས་ནས་ཚོང་པ་དེ་དག་ཆུའི་ནང་དུ་ལྟུང་བ་དང་། བརྐྱལ་ནས་ཆུའི་འགྲམ་དུ་ཉེ་བར་ཕྱིན་ཏོ། །དེ་ནས་སྲིན་མོ་ལྔ་བརྒྱ་གཞོན་ནུའི་གཟུགས་སུ་
བསྒྱུར་ཏེ་སྒྲ་ཅ་ཅོ་ཟེར་ཞིང་བྱུང་ནས་ཆུ་འགྲམ་དེ་དང་ཉེ་བ་ཞིག་ཏུ་འོང་ཏེ་བླ་གོས་ཀྱི་རས་བྱིན་ནས་བསླང་བ་དང་། དེ་དག་བདག་བདག་གི་གོས་འཚིར་རོ། །བཙིར་ནས་དེ་དག་གནས་དེ་ནས་གནས་གཞན་དུ་ཤིང་ཙམ་པ་ཀ་
ཆེན་པོ་ཡོད་པ་དེའི་དྲུང་དུ་ངལ་བསོས་སོ། །ངལ་བསོས་ནས་བདག་ཅག་ལ་ཐབས་ཅི་ཡོད་ཅེས་གཏམ་བྱས་པ་དང་། དེ་དག་གིས་བདག་ཅག་ལ་ཐབས་མ་མཆིས་སོ་ཞེས་དེ་སྐད་སྨྲས་ནས་ཁ་རོག་སྟེ་འཁོད་དོ། །དེ་ནས་
སྲིན་མོ་དེ་དག་དེ་རྣམས་ཀྱི་མདུན་དུ་འདུག་ནས་ཁྱོ་མ་མཆིས་པའི་ཁྱོ་མཛོད་ཅིག །གནས་མ་མཆིས་པའི་ནི་གནས་མཛོད་ཅིག །རྟེན་མ་མཆིས་པའི་ནི་རྟེན་མཛོད་ཅིག །འདི་དག་ནི་ཁྱོད་ཀྱི་ཟས་ཀྱི་ཁྱིམ་མོ། །
སྐོམ་གྱི་ཁྱིམ་མོ། །སྐྱེད་མོས་ཚལ་དགའ་བར་བགྱིད་པའོ། །རྫིང་བུ་དགའ་བར་བགྱིད་པའོ། །ཞེས་དེ་སྐད་སྨྲས་ནས་སྲིན་མོ་དེ་དག་གིས་སྐྱེས་པ་རེ་རེ་ཁྲིད་དེ་བདག་བདག་གི་ཁྱིམ་དུ་སོང་ངོ་། །གང་སྲིན་མོ་དེ་དག་
ནང་ན་ཤིན་དུ་རྒན་པ་དེས་བདག་གི་ཁྱིམ་དུ་ང་ཁྱིད་ནས་ལྷའི་རོའི་རོ་མཆོག་དང་ལྡན་པས་ཚིམ་པར་བྱས་སོ། །ཚིམ་པར་བྱས་ནས་རྩེ་བར་རྩོམ་སྟེ། དེ་ལ་དེས་མིའི་བདེ་བས་ཚིམ་པར་བྱས་ནས་དེ་བཞིན་དུ་ཉི་མ་གཉིས་
གསུམ་ནས་བདུན་འདས་སོ། །རེ་ཤིག་ནུབ་མོ་ཉལ་ཏེ་གཉིད་ཀྱིས་ལོག་པ་དང་གད་མོ་སྙན་པར་རྒོད་པ་ངས་མཐོང་ནས་ང་ངོ་མཚར་དུ་གྱུར་ཏེ། གཉིད་ལོག་བཞིན་དུ་གད་མོ་སྙན་པར་རྒོད་པ་ངས་ནམ་ཡང་མ་མཐོང་། མ་ཐོས་
སོ། །སྙམ་ནས་དེའི་ཚེ་ངས་དེ་ལ་ཁྱོད་ཅིའི་ཕྱིར། རྒོད་ཅེས་སྨྲས་པ་དང་། མོ་ན་རེ་འདི་དག་ནི་སིང་གྷ་ལའི་གླིང་ན་གནས་པའི་སྲིན་མོ་ལགས་ཏེ། ཁྱེད་ཀྱི་སྲོག་བཅད་ད་རེ་ཞེས་ཟེར་ནས་དེའི་ཚེ་ངས་དེ་ལ་འདི་དག་སྲིན་མོ་ཡིན་

46-1-240a

པར་ཁོ་བོས་ཇི་ལྟར་ཤེས་པར་བྱ་ཞེས་དྲིས་པ་དང་། དེ་སྟེ་ཡིད་མི་ཆེས་ན་གཡས་ཕྱོགས་ཀྱི་ལམ་སྲང་ཟུང་སྟེ་བཞུད་ཅིག་དང་། དེ་ན་ལྕགས་ཀྱི་གྲོང་ཁྱེར་མཐོང་བ་བསྐོར་བ་སྐར་ཁུང་དང་རྟ་བབས་མེད་པ་ཞིག་
མཆིས་ཏེ། དེ་ན་ཚོང་པ་བརྒྱ་ཕྲག་དུ་མ་འཚལ་ཅིང་བོར་ནས་ལ་ལ་ནི་གསོན། ལ་ལ་ནི་གུམ་སྟེ། ཁྱོད་དེ་ལྟར་ཐུགས་མི་ཆེས་ན་ལམ་དེར་བཞུད་ཅིག །ལམ་དེར་བཞུད་ནས་རྟོགས་ཤིག་དང་། དེའི་ཚེ་ང་ལ་ཡིད་
ཆེས་པར་འགྱུར་རོ་ཞེས་ཟེར་ནས། དེའི་ཚེ་དེས་གླེན་པའི་དྲ་བ་ཞེས་བྱ་བའི་གཉིད་ཀྱིས་ནོན་པར་བྱས་སོ། །དེ་ནས་བྱང་ཆུབ་སེམས་དཔའ་དེ་ནུབ་མོའི་དུས་ཀྱི་ཚེ་སོང་ནས་རལ་གྲི་ཟླ་བ་ལྟར་སྣང་བ་བདག་འཚོ་
བར་བྱེད་པ་ཞེས་བྱ། ཐོགས་ནས་གཡས་ཕྱོགས་ཀྱི་ལམ་སྲང་བཟུང་སྟེ། སོང་བ་ལས་རིམ་གྱིས་ལྕགས་ཀྱི་གྲོང་ཁྱེར་དུ་ཕྱིན་ནས་ཁོ་ར་ཁོར་ཡུག་ཏུ་བསྐོར་ཀྱང་དེས་སྒོ་མ་མཐོང་ངོ་། །དེ་ནས་ལྕགས་ཀྱི་
གྲོང་ཁྱེར་ཆེན་པོ་དེ་ན་ཤིང་ཙམ་པ་ཀ་ཞིག་འདུག་པ་དེ་ལ་འཛེགས་ཏེ། དེ་ནས་ངས་ལུད་པའི་སྒྲ་བྱས་པ་དང་། སྐྱེས་བུ་ཚོང་པ་དེ་དག་ན་རེ་ཚོང་དཔོན་ཆེན་པོ་མཁྱེན་པར་མཛོད་ཅིག །བདག་ཅག་ནི་ལྕགས་ཀྱི་
གྲོང་ཁྱེར་དུ་སྩལ་ཏོ། །ཞེས་སྨྲས་ནས་དེའི་ཚེ་ཉི་མ་རེ་རེ་ཞིང་ཡང་མི་བརྒྱ་ཁྲིད་དེ་ཟའོ། །ཟོས་ནས་རུས་པ་རྣམས་ལྕགས་ཀྱི་གྲོང་ཁྱེར་དེ་ཉིད་དུ་འདོར་བ་ཡང་དེ་དག་གིས་ང་ལ་སྔོན་བྱུང་བ་བཞིན་དུ་སྨྲས་ནས་ངས་
ཚེ་ཤིང་ཙམ་པ་ཀ་ལས་བབས་ཏེ་གཡས་ཕྱོགས་ཀྱི་ལམ་སྲང་དེ་བཟུང་ནས་མྱུར་དུ་མྱུར་བར་སོང་བ་སྟེ། དེ་ནས་སླར་ཕྱིན་ཏོ། །དེ་ནས་སྙན་པར་བྱེད་པ་དེ་ན་རེ་དེད་དཔོན་ཆེན་པོ་ཁྱོད་ཀྱིས་གཟིགས་སམ་
ཞེས་ཟེར་ནས་ངས་མཐོང་ངོ་། །ཞེས་སྨྲས་སོ། །ཁྱོད་ལ་བདག་གིས་གཏམ་བགྱིས་པ་ཁྱོད་ཀྱིས་རྟགས་ལ་བབ་བམ། དེའི་ཚེ་ངས་དེ་ལ་དེ་ང་ལ་ཐབས་ཅི་ཡོད་ཅེས་དྲིས་ན། དེ་ནས་སྙན་པར་བྱེད་པ་དེས་འདི་

46-1-240b

སྐད་ཅེས་སྨྲས་ཏེ། ལྷ་ཐབས་གང་གིས་བདེ་བ་དང་། ཉོན་མོངས་པ་མེད་པར་སིང་གྷ་ལའི་གླིང་ནས་འབྱུང་ཞིང་སླར་འཛམ་བུའི་གླིང་མཐོང་བར་འགྱུར་བའི་ཐབས་མཆིས་སོ། །ངས་དེ་ལ་ལམ་གང་གིས་སིང་གྷ་ལའི་གླིང་ནས་
འབྱུང་བར་འགྱུར་བའི་ལམ་དེ་སྟོན་ཅིག་ཅེས་བྱས་པ་དང་། སྙན་པར་བྱེད་པ་དེས་འདི་སྐད་ཅེས་སྨྲས་སོ། །ལྷ་རྟའི་རྒྱལ་པོ་བ་ལ་ཧ་ཞེས་བགྱི་བ་དམན་པ་དང་ཕོངས་པ་ལ་སྨན་པ་ཞིག་མཆིས་ཏེ། རྟའི་རྒྱལ་པོ་བ་ལ་ཧ་
དེ་སྨན་སྦེད་ཐམས་ཅད་ཅེས་བགྱི་བ་འཚལ་ཏེ། གསེར་གྱི་བྱེ་མའི་ཐང་བུ་ལ་ཕར་འགྲེ་ཚུར་འགྲེ་བར་བགྱིད་དོ། །ཕར་འགྲེས་ཚུར་འགྲེས་ནས་ལུས་སྤྲུག་གོ། །སྤྲུགས་ནས་ཕ་རོལ་དུ་སུ་འགྲོ། ཕ་རོལ་དུ་སུ་འགྲོ་ཞེས་
སྨྲའོ། །ཁྱོད་ཀྱིས་ལྷ་བདག་ཕ་རོལ་དུ་མཆིའོ་ཞེས་བགྱིས་ཤིག་ཅེས་དེ་སྐད་བསྒོ་བ་ཐོས་ནས་དེ་སྲིན་མོའི་དྲུང་དུ་ཉེ་བར་སོང་ནས་ལྷན་ཅིག་ཏུ་ཉལ་བ་དང་། དེ་སད་ནས་འཕགས་པའི་སྲས་ལུས་རེ་གྲང་བ་ཞིག་ཅེས་
ཟེར་ནས་ངས་དེ་ལ་གྲོང་ཁྱེར་གྱི་ཕྱི་རོལ་དུ་བཤང་གཅི་བྱེད་དུ་སོང་བས། དེའི་ཕྱིར་ལུས་གྲང་མོ་གྲང་བར་གྱུར་ཏོ། །ཞེས་སྨྲས་སོ། །མོས་ཀྱང་སྨྲས་ནས་སླར་དེ་གཉིད་ཀྱིས་ལོག་སྟེ་ཉི་མ་ཤར་བའི་ཚེ་ལངས་སོ། །
དེ་ནས་སྐྱེས་བུ་ཚོང་པ་རྣམས་ལ་ཁྱེད་ཚུར་ཤོག་ཤིག །གྲོང་ཁྱེར་གྱི་ཕྱི་རོལ་དུ་འདོང་ངོ་ཞེས་བསྒོ་བ་དང་། དེ་དག་ཐམས་ཅད་གྲོང་ཁྱེར་གྱི་ཕྱི་རོལ་དུ་འདོང་ངོ་། །དེ་དག་གྲོང་ཁྱེར་གྱི་ཕྱི་རོལ་དུ་དོང་ནས་ངལ་
བསོས་སོ། །ངལ་བསོས་ནས་སུའི་ཆུང་མ་དག་ཇི་ལྟ་བུས་མཛའ་བར་གྱུར་ཅེས་དྲིས་པ་དང་། ཁ་ཅིག་གིས་ནི་བདག་ལ་ཤིན་དུ་མཛའ་བར་བྱེད་དོ་ཞེས་སྨྲས་སོ། །ཁ་ཅིག་གིས་ནི་བདག་ལ་ལྷའི་རོའི་རོ་མཆོག་དང་
ལྡན་པའི་ཟས་ཀྱིས་འཛིན་པར་བགྱིད་དོ་ཞེས་སྨྲས་སོ། །ཁ་ཅིག་གིས་ནི་གོས་རྣམ་པ་སྣ་ཚོགས་ཀྱིས་འཛིན་ཏོ་ཞེས་སྨྲས་སོ། །ཁ་ཅིག་གིས་ནི་བདག་ལ་ཅོད་པན་དང་། རྣ་ཆ་དང་སེ་མོ་དོའི་ཆུན་པོས་འཛིན་

46-1-241a

ཏོ་ཞེས་སྨྲས་སོ། །ཁ་ཅིག་གིས་ནི་བདག་གི་ལུས་ལ་བྲེལ་བ་མ་མཆིས་སོ་ཞེས་སྨྲས་སོ། །ཁ་ཅིག་གིས་ནི་བདག་ལ་ཙན་དན་དང་། གླ་རྩི་དང་། ག་པུར་གྱིས་འཛིན་ཏོ་ཞེས་སྨྲས་ཏེ། དེ་ལྟར་དེ་དག་གིས་གཏམ་བྱས་ནས་
ངས་དེའི་ཚེ་སྐྱེས་བུ་ཚོང་པ་དེ་དག་ལ་གང་བདག་ཅག་སྲིན་མོ་ལ་ཆགས་པར་བྱ་བའི་ནི་མི་རིགས་སོ་ཞེས་སྨྲས་པ་དང་། དེ་དག་མྱོས་ནས་ཚོང་དཔོན་ཆེན་པོ་སིང་གྷ་ལའི་གླིང་ན་གནས་པའི་སྲིན་མོ་ལགས་མད་མད་ཅེས་ཟེར་ནས། དེའི་ཚེ་ངས་དེ་དག་ལ་
སངས་རྒྱས་དང་། ཆོས་དང་། དགེ་འདུན་བདེན་ནོ་བདེན་ནོ། །འདི་ནི་མི་མ་ཡིན་ཏེ་སྲིན་མོའོ་ཞེས་སྨྲས་སོ། །དེ་ནས་སྐྱེས་བུ་ཚོང་པ་དེ་དག་གིས་བདག་ཅག་ལ་སྐྱབས་ཅི་ཡོད། རྟེན་ཅི་ཡོད་ཅེས་སྨྲས་པ་དང་། ངས་དེ་དག་ལ་སིང་གྷ་ལའི་གླིང་ན་རྟའི་
རྒྱལ་པོ་བ་ལ་ཧ་ཞེས་བྱ་བ་དམན་པ་དང་ཕོངས་པ་ལ་སྙིང་རྗེ་བར་བྱེད་པ་ཞིག་ཡོད་དེ། སྨན་སྦེད་ཐམས་ཅད་ཅེས་བྱ་བ་ཟོས་ནས་གསེར་གྱི་བྱེ་མའི་ཐང་བུ་ལ་ཕར་འགྲེ་ཚུར་འགྲེ་བྱས་ཏེ་ལུས་སྤྲུག་གོ། །ལུས་སྤྲུགས་ནས་དེའི་ཚེ་སུ་ཕ་རོལ་དུ་འགྲོ། 
སུ་ཕ་རོལ་དུ་འགྲོ་ཞེས་ཚིག་ལན་གསུམ་སྨྲ། བདག་ཅག་དེར་འདོང་ཞེས་སྨྲས་སོ། །དེ་ནས་སྐྱེས་བུ་ཚོང་པ་དེ་དག་ང་ལ་བདག་ཅག་ནམ་བཞུད་ཅེས་ཟེར་ནས། ངས་དེ་དག་ལ་ཉི་མ་གསུམ་ན་ངེས་པར་འདོང་གིས་སྐྱེས་བུ་སོ་སོ་ནས་རྒྱགས་
དང་ཆོས་ཤིག་ཅེས་དེ་བདག་དང་དམ་བཅས་ནས་སླར་གྲོང་ཁྱེར་དུ་དོང་སྟེ་བདག་བདག་གིས་ཁྱིམ་དུ་ཕྱིན་པ་དང་། དེ་དག་ལ་སྲིན་མོ་རྣམས་ཀྱིས་ངལ་ལམ། ཆད་དམ། ཁྱེད་ཀྱིས་སྐྱེད་མོས་ཚལ་དགའ་བར་བྱེད་པ་མཐོང་ངམ་ཞེས་སྨྲས་
པ་དང་། དེ་དག་གིས་ངེད་ཀྱིས་ཆུང་ཟད་ཀྱང་མ་མཐོང་ངོ་ཞེས་སྨྲས་སོ། །དེ་ནས་སྲིན་མོ་དེ་དག་གིས་འདི་སྐད་ཅེས་སྨྲས་སོ། །འཕགས་པའི་སྲས་སིང་གྷ་ལའི་གླིང་འདི་ན་སྐྱེད་མོས་ཚལ་དགའ་བར་བྱེད་པ་མེ་ཏོག་གིས་ཡོངས་སུ་གང་
བ་རྣམ་པ་སྣ་ཚོགས་དང་། རྫིང་བུ་བརྒྱ་ཕྲག་དུ་མ་མཆིས་སོ་ཞེས་སྨྲས་ནས། དེས་ཉི་མ་གསུམ་ན་སྐྱེད་མོས་ཚལ་གྱིས་དེ་དག་དང་རྫིང་བུ་མེ་ཏོག་གིས་ཡོངས་སུ་གང་བ་རྣམ་པ་སྣ་ཚོགས་དེ་དག་ལྟར་

46-1-241b

འགྲོའོ། །དེའི་ཚེ་མེ་ཏོག་བཟང་པོ་དག་ཀྱང་ཁྱེར་ཏེ་འོང་གིས་རྒྱགས་བཟང་དུ་གྱིས་ཤིག་ཅེས་སྨྲས་པ་དང་། དེས་འཕགས་པའི་སྲས་དེ་བཞིན་དུ་བགྱིའོ་ཞེས་སྨྲས་སོ། །དེ་ནས་དེས་ལུས་ལ་བསམས་ཏེ། སྲིན་མོ་འདི་དག་
གིས་རྒྱུས་ཤེས་པར་གྱུར་ན་ནི་བདག་ཅག་གི་སྲོག་གཅོད་དོ་སྙམ་དུ་དེ་ལྟར་ལུས་ཀྱི་རྗེས་སུ་བསམས་ནས་ཁ་རོག་སྟེ་འདུག་པ་དང་། མོས་ཟས་བཟང་པོ་བྱིན་ནས་ཟོས་ཏེ་ཤུགས་ཕྱུང་ནས། སྲིན་མོ་དེས་འཕགས་པའི་
སྲས་ཅིའི་སླད་དུ་ཤུགས་འབྱིན་ཅེས་སྨྲས་སོ། །དེ་ནས་དེས་མོ་ལ་འཛམ་བུའི་གླིང་གི་མི་དག་ནི་བདག་གི་ཡུལ་ལ་དགའ་འོ་ཞེས་སྨྲས་པ་དང་། འཕགས་པའི་སྲས་བདག་གི་ཡུལ་གྱིས་ཅི་ཞིག་བགྱི། སིང་གྷ་ལའི་གླིང་
འདི་ཉིད་ན་ཁྱོད་ཀྱི་ཟས་ཀྱི་ཁང་པ་དང་། སྐོམ་གྱི་ཁང་པ་དང་། གོས་ཀྱི་ཁང་པ་སྣ་ཚོགས་དང་། ཁྱེད་ཀྱི་སྐྱེད་མོས་ཚལ་དགའ་བར་བགྱིད་པ་སྣ་ཚོགས་མཆིས་ཀྱིས་ལྷའི་བདེ་བ་མྱོང་བར་མཛོད་ཅིག །འཛམ་བུའི་གླིང་ལ་མྱ་ངན་
བགྱིར་ཅི་མཆིས་ཤེས་ཟེར་ནས་དེའི་ཚེ་ང་ཁ་རོག་སྟེ་འདུག་གོ། །དེའི་ཉིན་མོ་འདས་ནས་ཕྱི་དེ་ཉིན་ཟས་བཟང་པོ་རྒྱགས་དང་ལྡན་པ། དེ་དག་ཐམས་ཅད་སྟ་གོན་བྱས་ནས་ཉི་མ་གསུམ་པ་ལ་ནང་པར་སྔར་དེ་དག་ཐམས་ཅད་དོང་
ནས་གྲོང་ཁྱེར་གྱི་སྒོར་བྱུང་ངོ་། །བྱུང་ནས་སླར་སུས་ཀྱང་སིང་གྷ་ལའི་གླིང་དུ་མི་བལྟ་བར་དམ་བཅས་སོ། །དེ་འདྲ་བའི་དམ་བཅས་ནས་མྱུར་བ་མྱུར་བར་སྐྱེན་པ་སྐྱེན་པར་དོང་བ་དང་། རིམ་གྱིས་རྟའི་རྒྱལ་པོ་བ་ལ་
ཧ་ག་ལ་བ་དེར་ཕྱིན་ནས། རྟའི་རྒྱལ་པོ་བ་ལ་ཧ་སྨན་སྦེད་ཐམས་ཅད་ཅེས་བྱ་བ་ལ་མྱངས་སོ། །སྨན་མྱངས་ནས་གསེར་གྱི་བྱེ་མའི་ཐང་བུ་ལ་ཕར་འགྲེ་ཚུར་འགྲེ་བར་བྱེད་དོ། །བྱས་ནས་ལུས་སྤྲུག་གོ །
གང་གི་ཚེ་ན་ལུས་སྤྲུགས་པ་དེའི་ཚེ་སིང་གྷ་ལའི་གླིང་ཡང་འགུལ་ལོ། །དེས་ཕ་རོལ་དུ་སུ་འགྲོ། ཕ་རོལ་དུ་སུ་འགྲོ་ཞེས་ཚིག་ལན་གསུམ་སྨྲས་པ་དང་། 

46-1-242a

དེ་ནས་སྐྱེས་བུ་ཚོང་པ་དེ་དག་གིས་བདག་ཅག་ཕ་རོལ་དུ་མཆིའོ་ཞེས་སྨྲས་སོ། །དེ་ནས་རྟའི་རྒྱལ་པོ་བ་ལ་ཧ་དེས་ཁྱེད་ལས་སུས་ཀྱང་སིང་གྷ་ལའི་གླིང་ལ་མི་བལྟ་བར་བྱའོ། །སུས་ཀྱང་མིག་གིས་མི་བརྟག་པར་
བྱའོ། །ཞེས་དེ་སྐད་སྨྲས་ཏེ་དེ་འདྲ་བའི་དམ་བཅས་ནས་དེའི་ཚེ་ཐོག་མ་ཁོ་ནར་ང་ཞོན་ནོ། །དེའི་འོག་ཏུ་ཚོང་པ་ལྔ་བརྒྱ་ཞོན་ནོ། །གང་གི་ཚེ་དེ་དག་ཞོན་པ་དེའི་ཚེ་སིང་གྷ་ལའི་གླིང་ན་གནས་པའི་སྲིན་མོ་དག་སྒྲ་ཅ་ཅོ་ཟེར་ཞིང་ཕྱིར་
བཞིན་དུ་སྙེག་གོ། །ངུ་ཞིང་སྙིང་རྗེ་རྗེ་ལྟར་སྨྲ་བ་དང་། དེ་ནས་དེ་དག་གིས་སླར་ལོག་སྟེ་བལྟས་སོ། །གང་གི་ཚེ་དེ་དག་གིས་བལྟས་པ་དེའི་ཚེ་དེ་དག་ཁ་བུབ་ཏུ་ལྷུང་ངོ་། །གང་གི་ཚེ་ན་དེ་དག་ཆུའི་ནང་དུ་ལྷུང་བ་དེའི་ཚེ་སྲིན་མོ་དག་གིས་
དྲངས་ཤིང་དྲངས་ཤིང་ཟོས་སོ། །དེའི་ཚེ་ང་གཅིག་པུས་འཛམ་བུ་གླིང་དུ་ཕྱིན་ཏེ། དེའི་ཚེ་འགྲམ་དུ་ཉེ་བ་དང་རྟའི་རྒྱལ་པོ་བ་ལ་ཧས་ང་ལ་ལན་གསུམ་བསྐོར་ཏེ། ཕྱག་བྱས་ནས་དེ་ཉིད་དུ་སོང་ངོ་། །དེ་ནས་ང་ཡང་སོང་ནས་རིམ་གྱིས་བདག་གི་
ཁྱིམ་དུ་ཕྱིན་ཏེ། དེའི་ཚེ་ཕ་དང་མས་ངའི་མགུལ་ནས་འཇུས་ནས་ངུས་པ་དང་། རླངས་པས་དེ་གཉིས་ཀྱི་མིག་རུགས་ནས་མཐོང་བར་གྱུར་ཏོ། །དེ་ནས་ཕ་མ་དང་ལྷན་ཅིག་ཏུ་ངལ་བསོས་ནས་དེ་དག་ལ་སྔོན་ཇི་ལྟར་བྱུང་བ་ཐམས་
ཅད་བཟླས་པ་དང་། ཕ་མས་དེ་ལ་སྨྲས་པ། བུ་ཁྱོད་གསོན་བཞིན་དུ་རྙེད་དེ། ངེད་ལ་ནོར་ནི་མི་དགོས་སོ། །རྒས་པའི་ཚེ་ཁར་བར་གྱུར་པའོ། །རྒས་པའི་ཚེ་ལམ་སྟོན་པའོ། །འཆི་བའི་ཚེ་ཟས་སྦྱིན་པར་བྱེད་པའོ། །ཤི་ནས་མགོན་
ཡོད་པར་བྱེད་པའོ། །བུ་ནི་རླུང་བསིལ་བར་བྱེད་པའོ། །ཞེས་ཕ་དང་མས་སྨྲས་ཏེ། སྒྲིབ་པ་ཐམས་ཅད་རྣམ་པར་སེལ་བ་ང་དེད་དཔོན་དུ་གྱུར་པའི་ཚེ་འདི་ལྟ་བུའི་སྡུག་བསྔལ་བ་མྱོང་ངོ་། །འདི་ལྟ་སྟེ་སྒྲིབ་པ་ཐམས་ཅད་
རྣམ་པར་སེལ་བ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་རྟ་བ་ལ་ཧར་གྱུར་པས་ང་འཆི་བའི་འཇིགས་པ་དེ་འདྲ་བ་ལས་ཡོངས་སུ་ཐར་བར་བྱས་སོ། །འདི་ལྟ་སྟེ་སྒྲིབ་པ་ཐམས་

46-1-242b

ཅད་རྣམ་པར་སེལ་བ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་ངས་བགྲང་མི་ནུས་ཏེ། བ་སྤུའི་ཁུང་བུ་རེ་རེའི་གཏམ་ཆུང་ཟད་ཅིག་བཤད་དོ། །འདི་ལྟ་སྟེ། 
སྒྲིབ་པ་ཐམས་ཅད་རྣམ་པར་སེལ་བ་གསེར་ཞེས་བྱ་བའི་བ་སྤུའི་ཁུང་བུ་དེ་ན་དྲི་ཟ་བྱེ་བ་ཁྲག་ཁྲིག་བརྒྱ་སྟོང་དག་གནས་ཏེ། དེ་དག་འཁོར་བའི་སྡུག་བསྔལ་བར་མི་འགྱུར་ཞིང་བདེ་བ་དམ་པ་དང་། ལྡན་པ་ཡིན་ཏེ། 
ལྷའི་དངོས་པོ་དག་འབྱུང་བར་འགྱུར་གྱི། འདོད་ཆགས་ཅན་དུ་མི་འགྱུར། ཞེ་སྡང་ཅན་དུ་མི་འགྱུར། ཁོང་ཁྲོ་བའི་སེམས་མི་སྐྱེད། དེ་དག་ལས་གང་ལ་ཡང་གསོད་པའི་སེམས་མི་སྐྱེད་དེ། དེ་དག་དུས་ཐམས་ཅད་དུ་འཕག་
པའི་ལམ་ཡན་ལག་བརྒྱད་ལ་གནས་པ་ཡིན་ཏེ། དུས་ཐམས་ཅད་དུ་ཆོས་འདོད་པ་ཡིན་ནོ། །འདི་ལྟ་སྟེ། སྒྲིབ་པ་ཐམས་ཅད་རྣམ་པར་སེལ་བ་གསེར་ཞེས་བྱ་བའི་བ་སྤུའི་ཁུང་བུ་ན་སྣང་བ་ཞེས་བྱ་བའི་ཡིད་བཞིན་
གྱི་ནོར་བུ་རིན་པོ་ཆེ་ཡོད་དེ། གང་དང་གང་གི་ཚེ་དྲི་ཟ་དེ་དག་བསམ་པ་སེམས་པ་དེའི་ཚེ་དེ་དག་གི་བསམ་པ་གྲུབ་པར་འགྱུར་རོ། །དེའི་ཚེ་གསེར་ཞེས་བྱ་བའི་བ་སྤུའི་ཁུང་བུ་ལས་འདས་ནས་ནག་པོ་ཞེས་བྱ་བའི་བ་
སྤུའི་ཁུང་བུ་དེ་ན་དྲང་སྲོང་བྱེ་བ་ཁྲག་ཁྲིག་བརྒྱ་སྟོང་དུ་མ་ཡོད་དེ། ལ་ལ་ནི་མངོན་པར་ཤེས་པ་གཅིག་པ་ལ་ལ་ནི་མངོན་པར་ཤེས་པ་གཉིས་པ་ལ་ལ་ནི་མངོན་པར་ཤེས་པ་གསུམ་པ་ལ་ལ་ནི་མངོན་པར་ཤེས་པ་བཞི་པ་ལ་ལ་ནི་མངོན་པར་ཤེས་པ་
ལྔ་པ། ལ་ལ་ནི་མངོན་པར་ཤེས་པ་དྲུག་པ། །བ་སྤུའི་ཁུང་བུ་དེ་ན་དངུལ་གྱི་ས་གཞི་ལ་གསེར་གྱི་རི་དངུལ་གྱི་རྩེ་མོ་པད་མོ་དམར་པོས་བརྒྱན་པ་དེ་འདྲ་བའི་རི་བདུན་བཅུ་རྩ་བདུན་ཡོད་དེ། རི་རེ་རེ་ཞིང་ཡང་དྲང་སྲོང་
བརྒྱད་ཁྲི་གནས་སོ། །དྲང་སྲོང་དེ་དག་གི་ཤིང་དཔག་བསམས་ནི་འདི་འདྲ་སྟེ། སྡོང་པོ་ནི་དམར་པོ་འདབ་མ་གསེར་དང་། དངུལ་ལས་བྱས་པ་རིན་པོ་ཆེར་སྣང་བའོ། །ཤིང་དཔག་བསམས་རེ་རེ་དང་། 

46-1-243a

ཉེ་བ་ན་རྫིང་བུ་བཞི་ཡོད་དེ། ལ་ལ་ནི་ཆུ་ཡན་ལག་བརྒྱད་དང་ལྡན་པས་ཡོངས་སུ་གང་བ། ལ་ལ་ནི་ལྷའི་མེ་ཏོག་གིས་ཡོངས་སུ་གང་བའོ། །ཕྱོགས་དེ་དང་ཉེ་བ་ན་ལྷའི་བྱི་རུའི་ཤིང་གིས་ཡོངས་སུ་མཛེས་པར་བྱས་པའི་
དཔག་བསམས་གྱི་ཤིང་དག་སྣང་སྟེ། ལྷའི་རྒྱན་དག་ནི་འཕྱང་ཅོད་པན་དང་རྣ་ཆ་དག་ཀྱང་རབ་ཏུ་འཕྱང་། སེ་མོ་དོ་དང་། སེ་མོ་དོའི་ཕྱེད་པ་དག་ཀྱང་རབ་ཏུ་འཕྱང་། །གདུབ་བུ་དག་ཀྱང་རབ་ཏུ་འཕྱང་སྟེ། ལོ་མ་ནི་རིན་པོ་ཆེ་དང་། གསེར་ལས་བྱས་པ་
འོ། །དེ་ན་ཤིང་དཔག་བསམས་རེ་རེ་ཞིང་ཡང་དྲི་ཟ་བརྒྱ་བརྒྱ་གནས་ཏེ། གང་གི་ཚེ་དེ་དག་གིས་སིལ་སྙན་དཀྲོལ་བ་དེའི་ཚེ་རི་དགས་དང་། བྱ་དག་ཀྱང་སེམས་ཅན་འདི་དག་ནི་སྡུག་བསྔལ་ཏེ། འཛམ་བུའི་གླིང་ན་ཇི་ལྟ་བུའི་སྡུག་
བསྔལ་དག་མྱོང་བར་གྱུར། སྐྱེ་བ་དང་། རྒ་བ་དང་། འཆི་བ་དག་ཀྱང་མཐོང་ངོ་། །སྡུག་ཅིང་མཛའ་བ་དང་། མི་མཛའ་བ་ལས་འདུ་བ་དང་བྲལ་བར་ཡང་མཐོང་ངོ་། །མི་དག་ཀྱང་སྡུག་བསྔལ་མང་དུ་མྱོང་ངོ་ཞེས་སྐྱོ་བར་
བྱེད་དོ། །དེ་ལྟར་རི་དགས་དང་། བྱ་དག་སྟོང་པའི་རྗེས་སུ་བསམས་པ་དང་། དེའི་ཚེ་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པ་འདི་རྗེས་སུ་དྲན་ནས་དེ་དག་ལ་ལྷའི་རོའི་རོ་
མཆོག་གི་ཟས་དག་ཀྱང་འབྱུང་བར་འགྱུར། ལྷའི་རྫས་དྲི་ཞིམ་པོ་དག་ཀྱང་འབྱུང་བར་འགྱུར། ལྷའི་གོས་དག་ཀྱང་འབྱུང་བར་འགྱུར་རོ། །གང་གི་ཚེ་ན་དེ་དག་བསམ་པ་སེམས་པ་དེའི་ཚེ་བསམ་པ་གྲུབ་པར་འགྱུར་རོ། །
དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་ཚེ་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པའི་མིང་གི་རྗེས་སུ་
དྲན་ན། དེའི་མིང་ཙམ་གྱིས་ཀྱང་འདི་འདྲ་བའི་རྫས་དག་འབྱུང་བར་འགྱུར་ན་གང་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པ་ཉན་པ་དང་། འཛིན་པ་དང་། ཀློག་པ་དང་། ཀུན་ཆུབ་པར་བགྱིད་

46-1-243b

པ་དང་། ཚུལ་བཞིན་དུ་ཡིད་ལ་བགྱིད་པའི་སེམས་ཅན་དེ་དག་ནི་བདེ་བ་དང་ལྡན་པ་ལགས་སོ། །གང་ཐེག་པ་ཆེན་པོའི་མདོ་ཟ་མ་ཏོག་བཀོད་པ་ལས་ཡི་གེ་གཅིག་ཀྱང་འདྲིར་འཇུག་པའི་སེམས་ཅན་དེ་དག་ནི་བདེ་བ་དང་ལྡན་པ་ལགས་ཏེ། 
དེ་དག་ནི་འཁོར་བའི་སྡུག་བསྔལ་འདི་དག་མཐོང་བར་མི་འགྱུར་རོ། །དེ་དག་ནི་ཕྱག་དར་པ་དང་། སྨེ་ཤ་ཅན་གྱི་རིགས་སུ་མི་སྐྱེ། དབང་པོ་ཉམས་པར་མི་འགྱུར། ཐེང་པོ་དང་། སྒུར་པོ་དང་། གུག་པ་དང་། པུས་མོའི་ནང་འཐབ་པ་དང་། 
ལུས་པོ་ཆེ་དང་། མཛེ་ཅན་དུ་མི་འགྱུར། དེ་དག་གི་ལུས་ལ་ནད་དག་གིས་བཏབ་པར་མི་འགྱུར་ཏེ། ནད་མེད་པ་དང་། མཐུ་ཆེ་བ་དང་། དབང་པོ་གསལ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་ལེགས་སོ་ཞེས་བྱ་བ་
བྱིན་ནས་སྒྲིབ་པ་ཐམས་ཅད་རྣམ་པར་སེལ་བ་ཁྱོད་འདི་འདྲ་བའི་སྤོབས་པ་དང་། ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་མི་འམ་ཅི་དང་། ལྟོ་འཕྱེ་ཆེན་པོ་དང་མི་དང་མི་མ་ཡིན་པ་
དང་། དགེ་བསྙེན་དང་། དགེ་བསྙེན་མ་འདུས་པ་ལ་ཁྱོད་ཀྱིས་འདི་འདྲ་བའི་ཆོས་ཀྱི་གཏམ་རྒྱ་ཆེན་པོ་བྱས་པ་ལེགས་སོ་ལེགས་སོ། །ཞེས་གསུངས་སོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་
འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་ཚེ་ན་བདག་གི་ཞུ་བ་འདི་བསྟན་པ་དེའི་ཚེ་ལྷའི་བུ་རྣམས་མི་ཕྱེད་པའི་དད་པ་སྐྱེས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ་
ཁྱོད་ཕྱི་ཕྱིར་ཞིང་གསོལ་བ་ལེགས་སོ་ལེགས་སོ་འདི་ལྟ་སྟེ། སྒྲིབ་པ་ཐམས་ཅད་རྣམ་པར་སེལ་བ་བ་སྤུའི་ཁུང་བུ་ནག་པོ་འདས་ནས་བ་སྤུའི་ཁུང་བུ་རིན་པོ་ཆེའི་རྣ་ཆ་ཞེས་བྱ་བ་དེ་ན་དྲི་ཟའི་བུ་མོ་བྱེ་བ་ཁྲག་ཁྲིག་བརྒྱ་སྟོང་ཕྲག་
དུ་མ་དག་གནས་ཏེ། དྲི་ཟའི་བུ་མོ་དེ་དག་ཀྱང་བྱད་བཟང་བ། མཛེས་པ། བལྟ་ན་སྡུག་པ། ཁ་དོག་ཤིན་དུ་བཟང་ཞིང་རྒྱས་པ་དང་ལྡན་པ། ལུས་ལྷའི་རྒྱན་གྱིས་བརྒྱན་པ། ལྷའི་བུ་མོ་འགྲན་པར་བྱེད་པ་དང་འདྲ་བ་དེ་ལྟ་བུར་ཤིན་

46-1-244a

དུ་བཟང་ཡང་འདོད་ཆགས་ཀྱི་སྡུག་བསྔལ་གྱིས་གཟིར་བར་མི་འགྱུར། ཞེ་སྡང་གི་སྡུག་བསྔལ་གྱི་གཟིར་བར་མི་འགྱུར། གཏི་མུག་གི་སྡུག་བསྔལ་གྱིས་གཟིར་བར་མི་འགྱུར། དེ་དག་གི་ལུས་ལ་མིའི་སྡུག་བསྔལ་ཡང་མེད་དེ་
དྲི་ཟའི་བུ་མོ་དེ་དག་དུས་གསུམ་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་མཚན་གྱི་རྗེས་སུ་དྲན་པར་བྱེད་དེ། དེའི་ཚེ་རྫས་དེ་དག་ཐམས་ཅད་འབྱུང་ངོ་། །དེ་ནས་བཅོམ་ལྡན་འདས་ལ་སྒྲིབ་པ་
ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་བ་སྤུའི་ཁུང་བུ་དེ་ལྟ་འཚལ་གྱིས་བདག་དེར་མཆིའོ། །བཅོམ་ལྡན་འདས་ཀྱི་བཀའ་སྩལ་པ། རིགས་ཀྱི་བུ་བ་སྤུའི་ཁུང་བུ་དེ་ནི་གཟུང་དུ་མི་རུང་སྟེ། 
ཇི་ལྟར་ནམ་མཁའི་ཁམས་གཟུང་དུ་མི་རུང་། རེག་པར་མི་རུང་བ་དེ་བཞིན་དུ་རིགས་ཀྱི་བུ་བ་སྤུའི་ཁུང་བུ་དེ་ཡང་གཟུང་དུ་མི་རུང་། རེག་པར་མི་རུང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་བ་སྤུའི་ཁུང་བུ་
དེར་ལོ་བཅུ་གཉིས་སུ་ཀུན་དུ་སོང་ཡང་བ་སྤུའི་ཁུང་བུ་དེ་མ་མཐོང་སྟེ། གང་བ་སྤུའི་ཁུང་བུ་རེ་རེ་ན་གནས་པ་དེས་ཀྱང་མ་མཐོང་ན་བྱང་ཆུབ་སེམས་དཔར་གྱུར་པ་གཞན་དག་གིས་ལྟ་ཅི་སྨོས། དེ་ནས་བཅོམ་ལྡན་འདས་ལ་སྒྲིབ་པ་ཐམས་
ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་ཚེ། བྱང་ཆུབ་སེམས་དཔའ་ཀུན་དུ་བཟང་པོ་ཡང་མ་མཐོང་ན་ཅི་བདག་མཆི་བར་བགྱི་འམ། རིགས་ཀྱི་བུ་ང་ནི་གཡོ་མེད་པ། སྒྱུ་མེད་པ། 
ཕྲ་བ་ཉིད་དུ་སྣང་སྟེ། བལྟར་མེད་པ། གཟུགས་མེད་པ། གཟུགས་ཆེ་བ། ལག་པ་བརྒྱ་སྟོང་པ། མིག་བྱེ་བ་བརྒྱ་སྟོང་པ། མགོ་བཅུ་གཅིག་པ། རྣལ་འབྱོར་ཆེན་པོ། རྣལ་འབྱོར་དམ་པ། མྱ་ངན་ལས་འདས་པའི་ས་
ལ་གནས་པ། སེམས་པ་མེད་པ། ཤེས་རབ་ཆེ་བ། སྲིད་པ་ལས་སྒྲོལ་བར་བྱེད་པ། རིགས་ཀྱི་དབང་པོ། བལྟར་མི་སྣང་བ་སྟོན་པ་ལ་ཤེས་རབ་དང་ལྡན་པ་དང་། ཆོས་ཐམས་ཅད་ལ་གྲིབ་མར་གྱུར་པའོ། །

46-1-244b

དེ་བཞིན་དུ་རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ཡང་སུས་ཀྱང་མི་མཐོང་སྟེ། དེའི་རང་བཞིན་གྱི་ལུས་ནི་དེ་བཞིན་གཤེགས་པ་ཉིད་ཀྱིས་ཀྱང་མི་གཟིགས་ན་ཀུན་དུ་བཟང་པོ་
ལ་སོགས་པ་བྱང་ཆུབ་སེམས་དཔའ་གཞན་གྱིས་ལྟ་ཅི་སྨོས། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི་ཆོ་འཕྲུལ་བསམ་གྱིས་མྱི་ཁྱབ་པ་དག་སྟོན་ཏེ། སེམས་ཅན་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་
མ་དག་ཡོངས་སུ་སྨིན་པར་བྱེད་དོ། །དེ་དག་ཐམས་ཅད་བྱང་ཆུབ་ཀྱི་ལམ་ལ་འཇོག་གོ། །བཞག་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་འགྲོ་ཞིང་དེ་བཞིན་གཤེགས་པ་སྣང་བ་མཐའ་ཡས་པ་ལ་ཆོས་ཉན་ཏོ། །དེ་ནས་
བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་ཐབས་གང་གིས་ན་བདག་གིས་མཐོང་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་
གལ་ཏེ་ང་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བའི་ཕྱིར་མི་མཛད་པའི་འཇིག་རྟེན་གྱི་ཁམས་འདི་ཉིད་དུ་འོང་ནའོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་
གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་མཆི་བར་གནང་བར་མཛོད་ཅིག །བཅོམ་ལྡན་འདས་ཀྱི་བཀའ་སྩལ་པ། རིགས་ཀྱི་བུ་གང་གི་ཚེ་ན་
སེམས་ཅན་ཡོངས་སུ་སྨིན་པར་འགྱུར་བ་དེའི་ཚེ་ཐོག་མ་ཁོ་ནར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་འོང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་
པ་ཐམས་ཅད་རྣམ་པར་སེལ་བ་བདག་སྟིག་པ་དང་། ལྡན་ཞིང་ཡུན་རིང་དུ་གསོན་ལ། སྤྱན་རས་གཟིགས་ཀྱི་དབང་པོ་མཐོང་བ་དང་འབྲལ་ཞིང་ལོང་བར་གྱུར། ལམ་གསུམ་དུ་འགྲོ་བར་གྱུར་པ་ལྟ་ཅི་རུང་སྙམ་དུ་

46-1-245a

སེམས་ཤིང་འདུག་གོ། །དེ་ནས་བཅོམ་ལྡན་འདས་ལ་ཡང་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་
གཟིགས་ཀྱི་དབང་པོ་གང་གི་ཚེ་ན་མཆི། དེ་ནས་བཅོམ་ལྡན་འདས་བཞད་ནས་རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་འོང་བའི་དུས་མ་ཡིན་ནོ། །འདི་ལྟ་སྟེ། རིགས་ཀྱི་བུ་
བ་སྤུའི་ཁུང་བུ་དེ་ནས་བབས་ནས་བདུད་རྩི་ཞེས་བྱ་བའི་བ་སྤུའི་ཁུང་བུ་དེ་ན་ལྷའི་བུ་བྱེ་བ་ཁྲག་ཁྲིག་བརྒྱ་སྟོང་དུ་མ་གནས་ཏེ། ཁ་ཅིག་ནི་ས་ཅིག་པ། ཁ་ཅིག་ནི་ས་གཉིས་པ། ཁ་ཅིག་ནི་ས་གསུམ་པ། ཁ་ཅིག་ནི་ས་བཞི་པ། 
ཁ་ཅིག་ནི་ས་ལྔ་པ། ཁ་ཅིག་ནི་ས་དྲུག་པ། ཁ་ཅིག་ནི་ས་བདུན་པ། ཁ་ཅིག་ནི་ས་བརྒྱད་པ། ཁ་ཅིག་ནི་ས་དགུ་པ། ཁ་ཅིག་ནི་བྱང་ཆུབ་སེམས་དཔའི་ས་བཅུ་པ་ཡིན་ནོ། །འདི་ལྟ་སྟེ། སྒྲིབ་པ་ཐམས་ཅད་རྣམ་པར་
སེལ་བ་བདུད་རྩིའི་ཐིགས་པའི་བ་སྤུའི་ཁུང་བུ་དེ་ན་གསེར་དང་དངུལ་གྱི་རི་དྲུག་བཅུ་ཡོད་དེ། རི་རེ་རེ་ཞིང་ཡང་འཕང་དུ་དཔག་ཚད་དྲུག་ཁྲི་ཡོད་དོ། །རི་རེ་རེ་ཞིང་ཡང་རྩེ་མོ་གསེར་གྱིས་བརྒྱན་པ་དགུ་ཁྲི་ཡོད་དོ། །ངོས་ངོས་དག་
ལ་ནི་བྱང་ཆུབ་སེམས་དཔའ་སེམས་དང་པོ་བསྐྱེད་པ་དག་གནས་སོ། །རིའི་རྒྱལ་པོ་དེ་དག་ལ་དྲི་ཟ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་གནས་ཏེ། དེ་དག་བ་སྤུའི་ཁུང་བུ་དེ་ན་རྟག་ཏུ་རྒྱུན་མི་འཆད་པར་སིལ་སྙན་གྱི་སྒྲ་གྲག་པར་
འཛིན་ཏོ། །འདི་ལྟ་སྟེ། སྒྲིབ་པ་ཐམས་ཅད་རྣམ་པར་སེལ་བ་བདུད་རྩིའི་ཐིགས་པའི་བ་སྤུའི་ཁུང་བུ་དེ་ན་གཞལ་མེད་ཁང་བརྒྱ་སྟོང་ཕྲག་དུ་མ་ལྷའི་ནོར་བུ་དང་མུ་ཏིག་གིས་ཡོངས་སུ་བརྒྱན་པ། ཤིན་དུ་མཛེས་པ་བལྟ་ན་
སྡུག་པ་རྣམ་པ་སྣ་ཚོགས་པ། མུ་ཏིག་གི་སེ་མོ་དོ་བརྒྱ་སྟོང་གིས་བརྒྱན་པ་དག་ཡོད་དེ། བྱང་ཆུབ་སེམས་དཔའ་དེ་དག་གཞལ་མེད་ཁང་དེར་ངལ་བསོས་ནས་ཆོས་ཀྱི་གཏམ་བྱེད་དོ། །དེ་ནས་གཞལ་མེད་ཁང་ནས་བྱུང་ནས་བདག་

46-1-245b

བདག་གི་འཆག་སར་འགྲོ་སྟེ། འཆག་ས་རེ་རེ་ཞིང་ཡང་རྫིང་བུ་བདུན་བཅུ་བདུན་བཅུ་ཡོད་པ་ལ་ལ་ནི་ཆུ་ཡན་ལག་བརྒྱད་དང་ལྡན་པས་ཡོངས་སུ་གང་ངོ་། །ལ་ལ་ནི་མེ་ཏོག་གིས་ཡོངས་སུ་གང་སྟེ། མེ་ཏོག་ཨུད་པ་ལ་དང་། པད་མ་དང་། 
ཀུ་མུ་ད་དང་། པུན་ད་རི་ཀ་དང་། དྲི་ཞིམ་པ་དང་། མན་དཱ་ར་བ་དང་། མན་དཱ་ར་བ་ཆེན་པོ་དག་གིས་ཡོངས་སུ་གང་ངོ་། །འཆག་ས་དེ་དག་ན་ཤིང་དཔག་བསམས་ཡིད་དུ་འོང་བ་སྡོང་པོ་ནི་དམར་པོ། ལོ་མ་ནི་གསེར་དང་དངུལ་ལས་བྱས་པ་
ལྷའི་རྒྱན་གྱིས་བརྒྱན་པ། ཅོད་པན་དང་རྣ་ཆ་དང་། ཕྲེང་བའི་ཆུན་པོ་རབ་ཏུ་འཕྱང་བ། སེ་མོ་དོ་དང་། སེ་མོ་དོ་ཕྱེད་པ་རབ་ཏུ་འཕྱང་བ་དཔུང་རྒྱན་རབ་ཏུ་འཕྱང་བ། གཞན་ཡང་རྒྱན་སྣ་ཚོགས་དག་འཕྱང་བ་ཡོད་དོ། །འཆག་
ས་དེ་ན་བྱང་ཆུབ་སེམས་དཔའ་དེ་དག་ནུབ་མོ་འཆག་ཅིང་ཐེག་པ་ཆེན་པོ་རྣམ་པ་སྣ་ཚོགས་ཀྱི་རྗེས་སུ་དྲན་པར་བྱེད། མྱ་ངན་ལས་འདའ་བའི་སའི་རྗེས་སུ་དྲན་པར་བྱེད། འཁོར་བའི་སྡུག་བསྔལ་ཀུན་ལ་སེམས་པར་བྱེད་དོ། །
བསམས་ནས་བྱམས་པ་ལ་སྒོམ་སྟེ། སྒྲིབ་པ་ཐམས་ཅད་རྣམ་པར་སེལ་བ་དེ་ལྟར་བ་སྤུའི་ཁུང་བུ་དེ་ན་དེ་འདྲ་བའི་བྱང་ཆུབ་སེམས་དཔའ་དག་ཡོད་དོ། །དེ་ལས་བབས་ནས་རྡོ་རྗེའི་སྒོ་ཞེས་བྱ་བའི་བ་སྤུའི་ཁུང་བུ་དེ་ན་
མིའམ་ཅི་བརྒྱ་སྟོང་ཕྲག་དུ་མ་གནས་པ། མགུལ་རྒྱན་དང་། རྣ་ཆ་དང་། ཕྲེང་བ་དང་། རྒྱན་སྣ་ཚོགས་དང་། བྱུག་པ་ཤིན་དུ་བཟང་བ་དག་སྣང་ངོ་། །དེ་དག་རྟག་ཏུ་སངས་རྒྱས་དང་། ཆོས་དང་། དགེ་འདུན་ལ་མངོན་པར་དད། ཆོས་ལ་
སེམས་རྩེ་གཅིག་པར་བྱེད་པ། བྱམས་པ་ལ་གནས་པར་བྱེད་པ། བཟོད་པ་སྒོམ་པར་བྱེད་པ། མྱ་ངན་ལས་འདའ་བ་སེམས་པར་བྱེད་ལ། མི་དག་གིས་སྐྱོ་བར་བྱེད་པ་སྟེ། རིགས་ཀྱི་བུ་དེ་འདྲ་བའི་མི་འམ་ཅི་མངོན་པར་དགའ་བ་
དག་གནས་སོ། །བ་སྤུའི་ཁུང་བུ་དེ་ཉིད་ན་རི་བརྒྱ་ཕྲག་དུ་མ་ཡོད་དོ་ཁ་ཅིག་ནི་རྡོ་རྗེའིའོ། །ཁ་ཅིག་ནི་དངུལ་གྱིའོ། །ཁ་ཅིག་ནི་གསེར་གྱིའོ། །ཁ་ཅིག་ནི་ཤེལ་གྱིའོ། །ཁ་ཅིག་ནི་མེ་ཏོག་པད་མ་དམར་པོའིའོ། །ཁ་ཅིག་ནི་རིན་པོ་ཆེ་ཨན་དྲི་ནཱི་ལའི་འོ། །

46-1-246a

ཁ་ཅིག་རིན་པོ་ཆེ་སྣ་བདུན་གྱི་སྟེ། རིགས་ཀྱི་བུ་བ་སྤུའི་ཁུང་བུ་དེ་ན་མཚན་མ་དེ་འདྲ་བ་དག་སྣང་ངོ་། །རིགས་ཀྱི་བུ་བ་སྤུའི་ཁུང་བུ་དེ་ན་ཤིང་དཔག་བསམས་དུ་མ་དང་། བྱི་རུའི་ཤིང་དང་། ཙན་དན་གྱི་ཤིང་དང་། སྤོས་ཀྱི་ཤིང་དུ་མ་དག་དང་། 
རྫིང་བུ་བརྒྱ་སྟོང་ཕྲག་དུ་མ་དག་དང་། ལྷའི་གཞལ་མེད་ཁང་ཤེལ་དང་དངུལ་དང་ལྡན་པ། ཤིན་དུ་བཟང་བ་ཡིད་དུ་འོང་བ་མཛེས་པ། དེ་འདྲ་བའི་གཞལ་མེད་ཁང་དག་ཏུ་མི་འམ་ཅི་རྣམས་ངལ་བསོའོ། །ངལ་བསོས་ནས་ཆོས་ཀྱི་གཏམ་བྱེད་དེ། འདི་
ལྟ་སྟེ། སྦྱིན་པའི་ཕ་རོལ་དུ་ཕྱིན་པའི་གཏམ་བྱེད། ཚུལ་ཁྲིམས་ཀྱི་ཕ་རོལ་དུ་ཕྱིན་པའི་གཏམ་བྱེད། བཟོད་པའི་ཕ་རོལ་དུ་ཕྱིན་པའི་གཏམ་བྱེད། བརྩོན་འགྲུས་ཀྱི་ཕ་རོལ་དུ་ཕྱིན་པའི་གཏམ་བྱེད། བསམ་གཏན་གྱི་ཕ་རོལ་དུ་ཕྱིན་པའི་གཏམ་བྱེད། 
ཤེས་རབ་ཀྱི་ཕ་རོལ་དུ་ཕྱིན་པའི་གཏམ་བྱེད་དེ། དེ་ལྟར་ཕ་རོལ་དུ་ཕྱིན་པ་དྲུག་གི་གཏམ་བྱས་ནས། བདག་བདག་གི་འཆག་སར་འཆག་སྟེ། འཆག་ས་ཁ་ཅིག་ནི་གསེར་གྱི་རིའོ། །འཆག་ས་ཁ་ཅིག་ནི་དངུལ་གྱི་རིའོ། །འཆག་ས་དེ་དག་གི་ཁོར་ར་
ཁོར་ཡུག་ན་དཔག་བསམས་ཀྱི་ཤིང་སྡོང་པོ་ནི་དམར་པོ། ལོ་མ་ནི་གསེར་དང་དངུལ་ལས་བྱས་པ། ལྷའི་བརྒྱན་རབ་ཏུ་འཕྱང་བ། ཅོད་པན་དང་། རྣ་ཆ་དང་ཕྲེང་བའི་ཆུན་པོ་རབ་ཏུ་འཕྱང་བ། དཔུང་རྒྱན་རབ་ཏུ་འཕྱང་བ། རྐང་པའི་གདུབ་བུ་རབ་ཏུ་འཕྱང་
བ། སེ་མོ་དོ་དང་སེ་མོ་དོ་ཕྱེད་པ་རབ་ཏུ་འཕྱང་བ། རིན་པོ་ཆེའི་སེ་མོ་དོ་རབ་ཏུ་འཕྱང་བ་དག་ཡོད་དེ་འཆག་ས་དེ་ན་ཤིང་དཔག་བསམས་དེ་དག་ཁང་པ་བརྩེག་མ་ལྟ་བུར་འདུག་སྟེ། འཆག་ས་དེ་ན་མི་འམ་ཅི་དག་འཆག་གོ། །འཆག་པའི་ཚེ་འཁོར་བ་ལ་སྐྱོ་བ་ལ་རྗེས་སུ་
སེམས་ཏེ། ཀྱེ་མའོ་སྡུག་བསྔལ་ལོ། ཀྱེ་མའོ་སྡུག་བསྔལ་ལོ། །འཆི་བ་སྡུག་བསྔལ་ལོ། །ཀྱེ་མའོ་སྡུག་བསྔལ་ལོ། །དབུལ་བ་དེ་ཡང་སྡུག་བསྔལ་ལོ། །ཀྱེ་མའོ་སྡུག་བསྔལ་ལོ་འདོད་ཅིང་མཛའ་བ་དང་བྲལ་བ་དང་། མི་འདོད་ཅིང་མི་མཛའ་བ་དང་ཕྲད་པ་
དེ་ཤིན་དུ་མི་ཟད་པར་སྡུག་བསྔལ་ལོ། །ཐིག་ནག་པོ་གདབ་པར་སྐྱེས་པ་དང་། འོ་དོད་འབོད་པར་སྐྱེས་པ་དང་། ཧ་ཧ་ཞེས་ཟེར་བའི་སེམས་ཅན་དམྱལ་བ་ཆེན་པོར་སྐྱེས་པ་དང་། མེའི་རྫ་མར་སྐྱེས་པ་དང་། རྡོ་རྗེའི་རི་ལ་སྐྱེས་པ་དང་། ཡི་དགས་ཀྱི་གྲོང་ཁྱེར་

46-1-246b

དུ་སྐྱེས་པའི་སེམས་ཅན་དེ་དག་ཤིན་དུ་སྡུག་བསྔལ་ལོ། །ཞེས་དེ་ལྟར་མི་འམ་ཅི་དེ་དག་ལུས་ལ་སེམས་སོ། །བསམས་ནས་མྱ་ངན་ལས་འདའ་བའི་དབྱིངས་ལ་སེམས་ཏེ། རིགས་ཀྱི་བུ་དེ་ལྟར་མི་འམ་ཅི་ཆོས་ལ་མངོན་པར་དགའ་བ་དག་ཏུ་བྱང་ཆུབ་སེམས་དཔའ་སེམས་
དཔའ་ཆེན་པོ་སྤྱན་རས་གཟིགས་ཀྱི་དབང་པོའི་མིང་གི་རྗེས་སུ་དྲན་པར་བྱེད་དེ། དེའི་ཚེ་དེ་དག་ལ་ཡོ་བྱད་ཐམས་ཅད་ཀྱིས་བསྙེན་བཀུར་བྱེད་དོ། །རིགས་ཀྱི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནི་དཀོན་པའོ། །
སེམས་ཅན་རྣམས་ཀྱི་ཕ་དང་མར་གྱུར་པའོ། །སེམས་ཅན་ཐམས་ཅད་ལ་མི་འཇིག་པ་སྦྱིན་པར་བྱེད་པའོ། །སེམས་ཅན་ཐམས་ཅད་ལ་ལམ་སྟོན་པར་བྱེད་པའོ། །སེམས་ཅན་ཐམས་ཅད་ལ་དགེ་བའི་བཤེས་གཉེན་དུ་གྱུར་པ་སྟེ། རིགས་ཀྱི་བུ་བྱང་ཆུབ་
སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནི་དེ་ལྟ་བུའོ། །དེའི་མིང་འཛིན་པ་ཡང་དཀོན་ཏེ། དེ་དག་དེའི་ཡི་གེ་དྲུག་པའི་རིག་སྔགས་ཀྱི་མིང་གི་རྗེས་སུ་དྲན་ན་དེའི་ཚེ་བ་སྤུའི་ཁུང་བུ་དེ་དག་ཏུ་སྐྱེའོ། །སླར་འཁོར་བར་མི་འཁོར་རོ། །བ་
སྤུའི་ཁུང་བུ་ནས་བ་སྤུའི་ཁུང་བུར་འགྲོའོ། །བ་སྤུའི་ཁུང་བུ་དེ་དག་ན་ཡང་མྱ་ངན་ལས་འདའ་བའི་ས་ཚོལ་བའི་བར་དུ་གནས་པར་འགྱུར་རོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་
ལྡན་འདས་ཡི་གེ་དྲུག་པའི་རིག་སྔགས་ག་ལས་བཙལ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་ནི་དེ་བཞིན་གཤེགས་པས་ཡང་མི་མཁྱེན་ན་བྱང་ཆུབ་སེམས་དཔས་ལྟ་ཅི་སྨོས། 
དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་ཀྱང་མི་མཁྱེན་ཏམ། བཀའ་སྩལ་པ། 
རིགས་ཀྱི་བུ་ཡི་གེ་དྲུག་པའི་རིག་སྔགས་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་སྙིང་པོ་དམ་པའོ། །གང་དག་སྙིང་པོ་དམ་པ་ཤེས་པ་དེ་དག་ནི་ཐར་པ་ཤེས་པའོ། །དེ་ནས་བཅོམ་ལྡན་འདས་ལ་སྒྲིབ་པ་

46-1-247a

ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་འགའ་ལ་ཡང་ཡི་གེ་དྲུག་པའི་རིག་སྔགས་འཚལ་བ་མ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་
ཡི་གེ་དྲུག་པའི་རིག་སྔགས་ཆེན་མོ་ནི་སུ་ཡང་མི་ཤེས་ཏེ། འདི་ནི་རྣལ་འབྱོར་དཔག་ཏུ་མེད་པའི་ཕྱིར་བསྒྲུབ་དཀའ་བའོ། །དེ་བཞིན་གཤེགས་པ་ཉིད་ཀྱང་མི་མཁྱེན་ན་བྱང་ཆུབ་སེམས་དཔར་གྱུར་པ་ལྟ་ཅི་སྨོས་རིགས་ཀྱི་བུ་
ཡི་གི་དྲུག་པའི་རིག་སྔགས་འདིའི་ཕྱིར་དེ་བཞིན་གཤེགས་པ་ཐམས་ཅད་ཀྱང་བསྐལ་པ་བཅུ་དྲུག་ཏུ་ཀུན་དུ་གཤེགས་ན་བྱང་ཆུབ་སེམས་དཔར་གྱུར་པས་ལྟ་ཅི་སྨོས་ཏེ་ག་ལ་ཞིག་ཤེས། འདི་ནི་བྱང་ཆུབ་སེམས་དཔའ་སེམས་
དཔའ་ཆེན་པོ་སྤྱན་རས་གཟིགས་ཀྱི་དབང་པོའི་སྙིང་པོ་དམ་པའོ། །འགྲོ་བའི་དཀྱིལ་འཁོར་ན་ཡོངས་སུ་འཁྱམ་ཡང་སུས་ཀྱང་ཡི་གེ་དྲུག་པའི་རིག་སྔགས་ཆེན་མོ་སུས་ཀྱང་མི་ཤེས་སོ། །གང་ཡང་ཡི་གེ་དྲུག་པའི་རིག་སྔགས་ཆེན་མོ་
འདི་རྟག་ཏུ་འཛིན་ཅིང་ཟློས་པ་ལ་བརྩོན་པའི་སེམས་ཅན་དེ་དག་ནི་བསོད་ནམས་དང་ལྡན་པ་ཡིན་ནོ་དེ་དག་ཟློས་པར་བྱེད་པའི་ཚེ་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་ཕྲག་དགུ་བཅུ་རྩ་དགུ་འདུ་བར་འགྱུར་རོ། །
བྱང་ཆུབ་སེམས་དཔའ་རྡུལ་ཕྲ་བ་དང་མཉམ་པ་དག་འདུ་བར་འགྱུར་རོ། །རོལད་ཕྱིན་པ་དྲུག་སྒོ་ན་གནས་པར་འགྱུར་རོ། །གཞན་ཡང་ལྷའི་སྡེ་སུམ་བཅུ་རྩ་གཉིས་ཀྱི་ལྷའི་བུ་དག་འདུ་བར་འགྱུར་རོ། །རྒྱལ་པོ་ཆེན་པོ་བཞི་པོ་དག་ཀྱང་
ཕྱོགས་བཞི་སྲུང་བར་འགྱུར་རོ། །ཀླུའི་རྒྱལ་པོ་རྒྱ་མཚོ་མཆིང་རྣམ་དང་། ཀླུའི་རྒྱལ་པོ་མ་དྲོས་པ་དང་། ཀླུའི་རྒྱལ་པོ་འཇོག་པོ་ལ་སོགས་ཏེ། ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་ནི་ས་ཡོངས་སུ་སྲུང་བར་བྱེད་དོ། །གཞན་ཡང་ས་བླའི་
གནོད་སྦྱིན་དག་ནི་བླ་གབ་མེད་པར་སྲུང་བར་བྱེད་དོ། །རིགས་ཀྱི་བུ་དེའི་བ་སྤུའི་ཁུང་བུ་རེ་རེ་ལ་ཡང་དེ་བཞིན་གཤེགས་པ་བྱེ་བ་དག་བཞུགས་སོ། །བཞུགས་ནས་རིགས་ཀྱི་བུ་ཁྱོད་འདི་འདྲ་བའི་ཡིད་བཞིན་གྱི་ནོར་བུ་རྙེད་པར་བྱ་བ་ཐོབ་པར་

46-1-247b

གྱུར་ཅིང་ཁྱོད་ཀྱིས་རུས་ཀྱིས་རིགས་བདུན་བརྒྱུད་དུ་ཐོབ་པར་བྱས་པ་ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱི་སྔོན་སྲོག་ཆགས་གནས་པ་དེ་ཐམས་ཅད་ཀྱང་བྱང་ཆུབ་སེམས་དཔའ་ཕྱིར་མི་ལྡོག་པར་འགྱུར་ཏེ་ལེགས་སོ་ཞེས་བྱ་བ་སྦྱིན་
པར་མཛད་དོ། །ཡི་གེ་དྲུག་པའི་རིག་སྔགས་ཆེན་མོ་འདི་ལ་ལ་ཞིག་གི་ལུས་ལ་འཆང་ན་རིགས་ཀྱི་བུ་དེའི་ལུས་ནི་རྡོ་རྗེའི་ལུས་སུ་རིག་པར་བྱའོ། །རིང་བསྲེལ་གྱི་མཆོད་རྟེན་དུ་རིག་པར་བྱའོ། །དེ་བཞིན་གཤེགས་པའི་ཡེ་ཤེས་བྱེ་བར་རིག་པར་བྱའོ། །
རིགས་ཀྱི་བུའམ་རིགས་ཀྱི་བུ་མོ་ལ་ལ་ཞིག་ཡི་གེ་དྲུག་པའི་རིག་སྔགས་ཆེན་མོ་འདི་ཟློས་པ་བྱེད་ན་དེ་ནི་སྤོབས་པ་མི་ཟད་པར་འགྱུར་རོ། །ཡེ་ཤེས་ཀྱི་ཕུང་པོ་རྣམ་པར་དག་པར་འགྱུར་རོ། །བྱམས་པ་ཆེན་པོ་དང་སྙིང་རྗེ་ཆེན་པོ་དང་ལྡན་པར་འགྱུར་རོ། །དེ་ཉི་མ་རེ་རེ་ཞིང་ཡང་
ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །དེ་རིག་འཛིན་གྱི་འཁོར་ལོས་སྒྱུར་བའི་དབང་ཐོབ་པར་འགྱུར་རོ། །ལ་ལ་ཞིག་ལ་དབུགས་ཕྱིར་འབྱུང་བ་དང་ནང་དུ་རྡུབ་པར་བྱེད་ན་བྱམས་པས་ཀྱང་རུང་ཞེ་སྡང་བས་ཀྱང་རུང་སྟེ། དེ་དག་ཐམས་ཅད་བྱང་ཆུབ་
སེམས་དཔའ་ཕྱིར་མི་ལྡོག་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མྱུར་དུ་མངོན་པར་རྫོགས་པར་འཚང་རྒྱ་བར་འགྱུར་རོ། །ལ་ལ་ཞིག་ལག་གིས་རེག་པས་ཀྱང་རེག་པར་བྱེད་ན་དེ་དག་ཐམས་ཅད་བྱང་ཆུབ་སེམས་
དཔའ་སྲིད་པ་ཐ་མ་པར་འགྱུར་རོ། །བུད་མེད་དང་སྐྱེས་པ་དང་ཁྱེའུ་དང་བུ་མོ་དག་གིས་མཐོང་བ་ཙམ་དང་། རི་དགས་དང་བྱ་དང་བ་ལང་དང་བོང་བུ་ལ་སོགས་པས་ཀྱང་མཐོང་ན་དེ་དག་ཐམས་ཅད་བྱང་ཆུབ་སེམས་དཔའ་སྲིད་པ་ཐ་མ་པར་འགྱུར་རོ། །སྐྱེ་བ་དང་
རྒ་བ་དང་ན་བ་དང་འཆི་བ་དང་མཛའ་བ་དང་བྲལ་བའི་སྡུག་བསྔལ་མེད་པར་འགྱུར་རོ། །རྣལ་འབྱོར་བསམ་གྱིས་མི་ཁྱབ་པ་དང་ལྡན་པར་འགྱུར་རོ། །དེ་ལྟར་ཡི་གེ་དྲུག་པའི་རིག་སྔགས་ཆེན་མོ་འདི་ཟློས་པར་བྱེད་ན་སྐུལ་བར་འགྱུར་རོ། །དེ་ནས་བཅོམ་ལྡན་འདས་ལ་
སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་ཡི་གེ་དྲུག་པའི་རིག་སྔགས་ཆེན་མོ་རྣལ་འབྱོར་བསམ་གྱིས་མི་ཁྱབ་པ་དང་བསམ་གཏན་དཔག་ཏུ་མ་མཆིས་པ་ཟིལ་གྱིས་གནོན་པར་བགྱིད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་

46-1-248a

ཏུ་མྱ་ངན་ལས་འདའ་བ་སྟོན་པར་བགྱིད་པ་ཐར་བར་འཇུག་པར་བགྱིད་པ། ཆོས་ཀྱི་མཛོད་ཡོངས་སུ་གང་བར་བགྱིད་པ། འཁོར་བ་རྩ་བ་ནས་འབྱིན་པར་བགྱིད་པ། འགྲོ་བ་ལྔ་སྐེམས་པར་བགྱིད་པ་སེམས་ཅན་དམྱལ་བ་དང་ཉོན་མོངས་པ་རྣམས་འཇོམས་པར་
བགྱིད་པ་དང་། བྱོལ་སོང་གི་སྐྱེ་གནས་སུ་གཏོགས་པ་རྣམས་སྒྲོལ་བར་བགྱིད་པ། ཆོས་ཀྱི་རོ་མྱོང་བར་བགྱིད་པ། ཐམས་ཅད་མཁྱེན་པའི་ཡེ་ཤེས་བཤད་པ་བས་མ་འཚལ་བ་བདག་གིས་ཇི་ལྟར་ཐོབ་པར་བགྱི། བཅོམ་ལྡན་འདས་གང་བདག་ལ་ཡི་གེ་དྲུག་པའི་རིག་
སྔགས་སྩོལ་བ་དེ་ལ་འཛམ་བུའི་གླིང་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ་དབུལ་བར་འཚལ་ལོ། །བཅོམ་ལྡན་འདས་གལ་ཏེ་བྲིར་གྲོ་ག་དང་སྨྱིག་གུ་མ་མཆིས་ན་བདག་གི་ཁྲག་ལས་སྣག་ཚར་བགྱིས། ལྤགས་པ་བཤུས་ཏེ་གྲོ་གར་བགྱིས། རུས་
པ་བཅོམ་སྟེ་སྨྱིག་གུར་བགྱིས་ཀྱང་། བཅོམ་ལྡན་འདས་བདག་གི་ལུས་ལ་སྐྱོ་བ་མ་མཆིས་ཏེ་དེ་ནི་ཕ་མ་དང་། བླ་མའི་ཡང་བླ་མར་འགྱུར་རོ་དེ་ནས་བཅོམ་ལྡན་འདས་ཀྱིས་སྒྲིབ་པ་ཐམས་ཅད་རྣམ་པར་སེལ་བ་ལ་འདི་སྐད་ཅེས་བཀའ་སྩལ་ཏོ་རིགས་ཀྱི་བུ་
ཡི་གེ་དྲུག་པའི་རིག་སྔགས་འདིའི་ཕྱིར་འཇིག་རྟེན་གྱི་ཁམས་རྡུལ་ཕྲ་རབ་དང་མཉམ་པའི་འཇིག་རྟེན་གྱི་ཁམས་སུ་སོང་བར་ང་དྲན་ཏེ། དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་ལ་བསྙེན་བཀུར་བྱས་པས་ཀྱང་ངས་དེ་བཞིན་
གཤེགས་པ་དེ་དག་ལས་མ་ཐོབ་མ་ཐོས་ནས། དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་རྐང་པར་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་
མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དམར་པོའི་མཆོག་ཅེས་བྱ་བ་དེའི་སྤྱན་སྔར་ངས་མཆི་མ་ཕྱུང་བ་དང་། དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་རིགས་ཀྱི་བུ་དེ་ལྟར་
སྙིང་རྗེ་རྗེ་ལྟར་མཆི་མ་མ་འབྱིན་པར་རིགས་ཀྱི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་པ་དེ་ཡི་གེ་དྲུག་པའི་རིག་སྔགས་ཆེན་མོ་འདི་མཁྱེན་གྱིས་སོང་ཞིག་

46-1-248b

ཅེས་བཀའ་སྩལ་ནས་རིགས་ཀྱི་བུ་དེ་བཞིན་གཤེགས་པ་པད་མ་དམ་པའི་དྲུང་དུ་སོང་ངོ་། །དེ་བཞིན་གཤེགས་པ་པད་མ་དམ་པའི་སངས་རྒྱས་ཀྱི་ཞིང་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་སྤྱན་སྔར་ཐལ་མོ་སྦྱར་ནས་བཅོམ་
ལྡན་འདས་ཡི་གེ་དྲུག་པའི་རིག་སྔགས་ཆེན་མོ་དེའི་མིང་གི་རྗེས་སུ་དྲན་པ་ཙམ་གྱིས་སྡིག་པ་ཐམས་ཅད་འབྱང་བར་འགྱུར་བ། བྱང་ཆུབ་སེམས་དཔའ་རྙེད་པར་དཀའ་བ་ཐོབ་པར་འགྱུར་བ་ཐོབ་པར་འཚལ་ལོ། །དེའི་སླད་ཏུ་བདག་འཇིག་རྟེན་གྱི་ཁམས་
ཉོན་མོངས་པ་ཅན་དུ་མར་ཕྱིན་ཏེ་འདིར་མཆིས་ཀྱང་དོན་མ་མཆིས་པའི་ཚེགས་སུ་གྱུར་ཏོ། །དེ་ནས་དེ་བཞིན་གཤེགས་པ་པད་མའི་མཆོག་ཡི་གེ་དྲུག་པའི་རིག་སྔགས་ཆེན་མོ་འདིའི་ཡོན་ཏན་བསྔགས་པ་གསུང་བ་རིགས་ཀྱི་བུ་འདི་ལྟ་སྟེ་དཔེར་ན་ངས་རྡུལ་
ཕྲ་རབ་ཀྱི་ཚད་ནི་གཟུང་ནུས་ཀྱི། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་ལན་ཅིག་ཟློས་པའི་བསོད་ནམས་ཀྱི་ཕུང་པོ་ནི་བགྲང་མི་ནུས་སོ། །རིགས་ཀྱི་བུ་རྒྱ་མཚོ་མཆིང་རྣམ་གྱི་བྱེ་མ་ནི་རེ་རེ་ནས་བགྲང་ནུས་ཀྱི། རིགས་ཀྱི་བུ་ཡི་གེ་དྲུག་པའི་རིག་
སྔགས་ཆེན་མོ་ལན་ཅིག་ཟློས་པའི་བསོད་ནམས་ཀྱི་ཕུང་པོ་ནི་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན་སྐྱེས་བུ་ལ་ལ་ཞིག་གིས་ཁྱིམ་དཔག་ཚད་བརྒྱ་ཐམ་པར་བྱས་ཏེ། འཕང་དུ་དཔག་ཚད་ལྔ་བརྒྱར་བྱས་ལ། དེ་ཏིལ་གྱི་འབྲས་བུས་ཡོངས་
སུ་གང་བར་བྱེད་དོ་དེ་ན་ཁབ་ཙམ་གྱི་བུ་ག་ཡང་མེད་ལ། དེའི་སྒོར་སྐྱེས་བུ་མི་རྒ་མི་འཆི་བ་ཞིག་གཞག་སྟེ། དེས་བསྐལ་པ་བརྒྱ་འདས་ཤིང་ཏིལ་གྱི་འབྲས་བུ་གཅིག་ཕྱིར་འདོར་ཏེ། རྣམ་གྲངས་དེས་ཁྱིམ་གྱི་རྨང་དང་གཞི་ཡན་ཆད་ཟད་ཅིང་
མེད་པར་འགྱུར་གྱི། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་ལན་ཅིག་ཟློས་པའི་བསོད་ནམས་ཀྱི་ཕུང་པོ་ནི་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན་གླིང་བཞིར་མི་རྣམས་ཀྱི་ལས་ནས་དང་། གྲོ་དང་འབྲས་དང་། 
རྒྱ་སྲན་དང་བལ་སྲན་ལ་སོགས་པ་དང་། རྒྱ་ཤུག་དང་། སྲན་ཆུང་ལ་སོགས་པ་རྣམ་པ་སྣ་ཚོགས་པ་བྱས་ཏེ། ཀླུའི་རྒྱལ་པོས་ཀྱང་དེར་དུས་དུས་སུ་ཆར་པའི་རྒྱུན་ཕབ་ནས་འབྲུ་དེ་དག་གྲུབ་པ་དང་སྨིན་ཅིང་སྨིན་ཅིང་བརྔས་ནས་

46-1-249a

འཛམ་བུའི་གླིང་དུ་གཡུལ་གཅིག་བྱས་ལ། ཤིང་རྟ་དང་ཁུར་དང་བམ་པོ་དང་སྐོན་པས་བསྐྱས་ཏེ་གཡུལ་དེའི་ནང་དུ་བཅུག་ནས་བ་ལང་དང་བོང་བུ་དག་གིས་བཅགས་ཏེ་ཕུང་པོ་ཆེན་པོར་བྱས་ཀྱང་། རིགས་ཀྱི་བུ་ངས་འབྲུ་རེ་རེ་ནས་བགྲང་
ནུས་སོ། །རིགས་ཀྱི་བུ་འདི་ལྟ་སྟེ། དཔེར་ན་ཆུ་བོ་ཆེན་པོ་འཛམ་བུའི་གླིང་དུ་ཉིན་མཚན་དུ་འབབ་པ་འདི་ལྟ་སྟེ། སི་ཏ་དང་གང་གཱ་དང་། ཡ་མུ་ན་དང་། སིན་དྷུ་དང་། པཀྵུ་དང་ཤ་ཏ་དྲུ་དང་ཙན་དྲ་བྷ་ག་དང་། ཨེའི་ར་བ་ཏི་དང་། སུ་མ་ག་ད་དང་། ཧི་མ་
ཀ་ལ་དང་། ཀོ་ད་པ་རི་རྣམས་ཆུ་བོ་རེ་རེ་ཞིང་འཁོར་ལྔ་བརྒྱ་ཡོད་པ་ཉིན་མཚན་དུ་རྒྱ་མཚོ་མཆིང་རྣམ་དུ་འབབ་བོ། །རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་ལན་ཅིག་ཟློས་པའི་བསོད་ནམས་ཀྱི་ཕུང་པོ་ཡང་དེ་བཞིན་དུ་
འཕེལ་ལོ། །དེ་བས་ན་ཆུ་བོ་ཆེན་པོ་དེ་དག་ནི་ངས་ཐིགས་པ་རེ་རེ་ནས་བགྲང་ནུས་ཀྱི། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་ལན་ཅིག་ཟློས་པའི་བསོད་ནམས་ཀྱི་ཕུང་པོ་ནི་ངས་བགྲང་བར་མི་ནུས་སོ། །རིགས་ཀྱི་བུ་འདི་ལྟ་
སྟེ་དཔེར་ན་རྐང་པ་བཞི་པའི་རིགས་བ་ལང་དང་། བོང་བུ་དང་མ་ཧེ་དང་། རྟ་དང་། བ་ལང་དང་ཁྱི་དང་ཝ་དང་ར་དང་ཕྱུགས་དེ་དག་དང་། དེ་བཞིན་དུ་སེང་གེ་དང་། སྟག་དང་ཏ་རཀྵ་དང་། རི་དགས་དང་སྤྲེའུ་དང་། རི་བོང་དང་ཕག་ལ་སོགས་པ་
དང་། བྱི་བ་དང་། བྱི་ལ་ལ་སོགས་པ་དེ་དག་གི་སྤུ་ནི་ངས་རེ་རེ་ནས་བགྲང་ནུས་ཀྱི། ཡི་གེ་དྲུག་པའི་རིག་སྔགས་ཆེན་མོ་ལན་ཅིག་ཟློས་པའི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན་
རྡོ་རྗེའི་ལྕགས་ཀྱུ་ཞེས་བྱ་བའི་རིའི་རྒྱལ་པོ་འཕང་དུ་དཔག་ཚད་དགུ་ཁྲི་དགུ་སྟོང་། འོག་ཏུ་དཔག་ཚད་བརྒྱད་ཁྲི་བཞི་སྟོང་ཡོད་དེ། རིའི་རྒྱལ་པོ་རྡོ་རྗེའི་ལྕགས་ཀྱུ་དེའི་ངོས་རེ་རེ་ཞིང་དཔག་ཚད་བརྒྱད་ཁྲི་བཞི་སྟོང་ཡོད་ལ་
རིའི་རྒྱལ་པོ་དེའི་ངོས་ལ་སྐྱེས་བུ་མི་རྒ་མི་འཆི་བ་ཞིག་ཡོད་ནས་དེས་བསྐལ་པ་གཅིག་འདས་ཤིང་ཡུལ་ཀ་ཤི་ཀ་ནས་བྱུང་བའི་གོས་ཀྱིས་ལན་ཅིག་ཕྱིས་ཏེ། དེ་ལྟར་བྱས་ཀྱང་དེ་ཟད་ཅིང་དེ་ངས་པར་འགྱུར་གྱི། ཡི་གེ་དྲུག་

46-1-249b

པའི་རིག་སྔགས་ཆེན་མོ་ལན་ཅིག་བཟློས་པའི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན་རྒྱ་མཚོ་མཆིང་རྣམ་ཆེན་པོ་ཟབས་སུ་དཔག་ཚད་བརྒྱད་ཁྲི་བཞི་སྟོང་ཞིང་དུ་རྟ་རྒོད་མའི་གདོང་གི་མཐའ་བར་དུ་
དཔག་ཏུ་མེད་པ་ངས་སྐྲའི་རྩེ་མོའི་བརྒྱའི་ཆས་ཐིགས་པ་རེ་རེ་ནས་བགྲང་ནུས་ཀྱི་རིགས་ཀྱི་བུ་འདི་ཡི་གེ་དྲུག་པའི་རིག་སྔགས་ཆེན་མོ་ལན་ཅིག་བཟླས་པའི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན་
ཤིང་ཤིར་ཤའི་ཚལ་གྱི་ལོ་མ་ནི་རེ་རེ་ནས་ངས་བགྲང་ནུས་ཀྱི་ཡི་གེ་དྲུག་པའི་རིག་སྔགས་ཆེན་མོའི་བསོད་ནམས་ཀྱི་ཕུང་པོ་ངས་བགྲང་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན་གླིང་ཆེན་པོ་བཞི་ན་གནས་པའི་སྐྱེས་པ་དང་བུད་མེད་དང་། 
ཁྱེའུ་དང་བུ་མོ་དེ་དག་ཐམས་ཅད་བྱང་ཆུབ་སེམས་དཔའ་ས་བདུན་པ་ལ་གནས་པར་གྱུར་ན། གང་བྱང་ཆུབ་སེམས་དཔའ་དེ་དག་གི་བསོད་ནམས་ཀྱི་ཕུང་པོ་དེ་བས་ཡི་གེ་དྲུག་པའི་རིག་སྔགས་ཆེན་མོ་ལན་ཅིག་བཟླས་པའི་བསོད་ནམས་ཀྱི་ཕུང་པོ་ཤིན་
དུ་ཆེའོ། །རིགས་ཀྱི་བུ་འདི་ལྟ་སྟེ་དཔེར་ན། ཟླ་བ་བཅུ་གཉིས་པའི་ལོ་འམ། ཟླ་བ་ལྷག་པ་དང་བགྲངས་པས་ཟླ་བ་བཅུ་གསུམ་གྱིས་ལོ་ཚང་བར་གྱུར་པར་ཉིན་མཚན་དུ་ཆར་པ་བབ་ན་རིགས་ཀྱི་བུ་ངས་ཐིགས་པ་རེ་རེ་ནས་བགྲང་ནུས་ཀྱི་རིགས་ཀྱི་
བུ་ཡི་གེ་དྲུག་པའི་རིག་སྔགས་ཆེན་མོ་ལན་ཅིག་བཟླས་པའི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །འདི་ལྟ་སྟེ་རིགས་ཀྱི་བུ་མང་དུ་བརྗོད་མི་དགོས་ཀྱི་ང་དང་འདྲ་བའི་དེ་བཞིན་གཤེགས་པ་བྱེ་བ་གནས་གཅིག་ཏུ་ལྷའི་བསྐལ་པར་ན་
བཟའ་དང་། བཤོས་དང་མལ་སྟན་དང་། ན་བའི་རྐྱེན་གྱི་སྨན་གྱི་ཡོ་བྱད་ཀྱིས་གནས་པར་བྱས་ཏེ། བསྙེན་བཀུར་ཐམས་ཅད་བྱས་ཀྱང་དེ་བཞིན་གཤེགས་པ་དེ་དག་གིས་ཡི་གེ་དྲུག་པའི་རིག་སྔགས་ཆེན་མོའི་བསོད་ནམས་
ཀྱི་ཕུང་པོ་བགྲང་མི་ནུས་ན། ང་གཅིག་པུ་འཇིག་རྟེན་གྱི་ཁམས་འདི་ན་གནས་པས་ལྟ་ཅི་སྨོས། བསམ་གཏན་གྱི་གནས་སུ་ལྡང་བ་ནི་བསམ་གྱིས་མི་ཁྱབ་སྟེ། རིགས་ཀྱི་བུ་ང་ནི་སྒོམ་པའི་བརྩོན་པ་ལ་བརྩོན་པར་

46-1-250a

གྱུར་པ་ཡིན། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཆོས་དེ་ཡང་ཕྲ་བ། མི་གསལ་བའི་ཆོས་མ་འོངས་པ། ཤིན་དུ་སྙིང་པོར་གྱུར་པའི་ཆོས་ཏེ་དེ་དགེ་བ་ལ་གནས་པ་དེ་བཞིན་དུ་རིགས་ཀྱི་
བུ་ཡི་གེ་དྲུག་པའི་རིག་སྔགས་ཆེན་མོ་ཡང་ཐབས་མཁས་པའོ། །རིགས་ཀྱི་བུ་ངས་ཀྱང་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་འཁྱམ་ཞིང་སོང་ནས་དེ་བཞིན་གཤེགས་པ་སྣང་བ་མཐའ་ཡས་ཀྱི་སྤྱན་སྔར་ཐལ་
མོ་སྦྱར་ཏེ་ཆོས་ཀྱི་ཤུགས་ཀྱིས་མཆི་མ་བྱུང་བ་དེའི་ཚེ་དེ་བཞིན་གཤེགས་པ་སྣང་བ་མཐའ་ཡས་པས་ད་ལྟར་དང་མ་འོངས་པ་མཁྱེན་ཏེ། དེས་ཀྱང་རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་པོའི་རིག་པའི་རྒྱལ་མོ་བསྒོམ་པའི་བརྩོན་
འགྲུས་བྱ་བར་འདོད་དམ་ཞེས་བཀའ་སྩལ་ནས། བཅོམ་ལྡན་འདས་བདག་འཚལ་ལོ། །བདེ་བར་གཤེགས་པ་བདག་འཚལ་ཏེ། ཇི་ལྟར་སྐོམ་གྱིས་གདུངས་ནས་ཆབ་ཚོལ་བ་དེ་བཞིན་དུ་བཅོམ་ལྡན་འདས་བདག་ཀྱང་ཡི་གེ་དྲུག་པའི་རིག་
སྔགས་ཆེན་མོ་ཚོལ་དུ་འཇིག་རྟེན་གྱི་ཁམས་སུ་མཆིས་ཏེ། དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མ་ལ་བསྙེན་བཀུར་བགྱིས་ཀྱང་གང་ལས་ཀྱང་ཡི་གེ་དྲུག་པའི་རིག་སྔགས་ཆེན་མོའི་རྒྱལ་མོ་མ་ཐོབ་ཀྱིས། བཅོམ་
ལྡན་འདས་ཁྱོད་ནི་མགོན་ནོ། །ཁྱོད་ནི་སྐྱབས་སོ། །རྟེན་ནོ། །དབང་པོ་ཉམས་པའི་ནི་མིག་ཏུ་གྱུར་ཅིག །ལམ་སྟོར་བའི་ནི་ལམ་དུ་གྱུར་ཅིག །ཉི་མ་ཚ་བས་ཚིག་པ་རྣམས་ཀྱི་ནི་གདུགས་སུ་གྱུར་ཅིག །ཤུལ་གྱི་བཞི་མདོ་ཆེན་པོར་
ནི་ཤིང་སཱ་ལ་ཆེན་པོ་བཞིན་དུ་གྱུར་ཅིག །ཆོས་ཀྱིས་ཡོངས་སུ་སྐོམ་པ་ལ་ནི་མཐའ་ཡས་པ་སྟོན་པར་གྱུར་ཅིག །སེམས་ཤིན་དུ་བརྟན་པའི་ནི་གོ་ཆར་གྱུར་ཅིག །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་སྣང་བ་མཐའ་ཡས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་བྱ་ཀ་ལ་པིང་ཀའི་དབྱངས་ཀྱིས་བཀའ་སྩལ་པ། རིགས་ཀྱི་བུ་ལྟོས་དེ་བཞིན་གཤེགས་པ་དགྲ་

46-1-250b

བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་མཆོག་ཡི་གེ་དྲུག་པའི་རིག་སྔགས་ཆེན་མོའི་ཕྱིར་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མར་གཤེགས་ཀྱིས་རིགས་ཀྱི་བུ་ཡི་གེ་དྲུག་པའི་རིག་སྔགས་
ཆེན་མོའི་རྒྱལ་མོ་གསོལ་ཅིག །དེ་བཞིན་གཤེགས་པར་གྱུར་བཞིན་དུ་ཀུན་དུ་གཤེགས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོས་འདི་སྐད་ཅེས་གསོལ་ཏོ། །དཀྱིལ་འཁོར་བརྒྱད་ཀྱིས་
སྩལ་བར་བགྱི་སྟེ། བཅོམ་ལྡན་འདས་ཇི་ལྟར་ན་མེ་ཏོག་པད་མ་ལྟ་བུའི་ཕྱག་རྒྱ་འཛིན་ཇི་ལྟར་ན་ནོར་བུ་འཛིན་པའི་ཕྱག་རྒྱ་རྟོགས་པར་འགྱུར། ཇི་ལྟར་ན་རྒྱལ་པོའི་དབང་པོ་ཐམས་ཅད་ཀྱི་ཕྱག་རྒྱ་རྟོགས་པར་འགྱུར། ཇི་ལྟར་ན་དཀྱིལ་འཁོར་ཡོངས་
སུ་དག་པ་རྟོགས་པར་འགྱུར་ཞེ་ན། དཀྱིལ་འཁོར་གྱི་མཚན་མ་ནི་འདི་ལགས་ཏེ། གྲུ་བཞི་ལ་ཁྲུ་ལྔ་ཁོར་ཡུག་ཙམ་དུ་བགྱིས་ཏེ། དཀྱིལ་འཁོར་གྱི་དབུས་སུ་ནི་སྣང་བ་མཐའ་ཡས་བྲིའོ། །དེ་བཞིན་གཤེགས་པ་སྣང་བ་མཐའ་
ཡས་ཀྱི་སྐུ་ལ་ནོར་བུ་རིན་པོ་ཆེ་ཨིན་དྲ་ནཱི་ལའི་ཕྱེ་མ་དང་། པད་མ་རཱ་གའི་ཕྱེ་མ་དང་། ཤེལ་གྱི་ཕྱེ་མ་དང་། གསེར་དང་དངུལ་གྱི་ཕྱེ་མ་གཏོར་བར་བགྱིའོ། །གཡས་ཕྱོགས་སུ་ནི་བྱང་ཆུབ་སེམས་དཔའ་ནོར་བུ་རིན་པོ་ཆེ་འཛིན་པར་བགྱིའོ། །
གཡོན་ཕྱོགས་སུ་ནི་ཡི་གེ་དྲུག་པའི་རིག་སྔགས་ཆེན་མོ་བགྱི་སྟེ། ཕྱག་བཞི་པ་ཁ་དོག་འདམ་བུའི་མདའ་བཞིན་དུ་དཀར་བ། རྒྱན་སྣ་ཚོགས་ཀྱིས་བརྒྱན་པ་ཕྱག་གཡོན་པར་པད་མ་བགྱིའོ། །པད་མའི་སྟེང་དུ་ནོར་བུ་བགྱིའོ། །
ཕྱག་གཡས་པར་སྔགས་ཀྱི་ནོར་བུ་བགྱིའོ། །ཕྱག་གཉིས་ཐལ་མོ་སྦྱར་བ་རྒྱལ་པོའི་དབང་པོ་ཐམས་ཅད་ཅེས་བྱ་བའི་ཕྱག་རྒྱ་བགྱིའོ། །ཡི་གེ་དྲུག་པའི་རིག་སྔགས་ཆེན་མོ་དེའི་ཞབས་ཀྱི་འོག་ཏུ་རིག་འཛིན་བགྱི་སྟེ། ལག་པ་གཡས་
པ་ན་པོག་ཕོར་ཐོགས་ཤིང་བདུག་པར་བགྱིའོ། །ལག་པ་གཡོན་པ་ན་རྒྱན་རྣམ་པ་སྣ་ཚོགས་ཀྱིས་གང་བའི་སྐོན་བུ་ཐོགས་པར་བགྱིའོ། །དཀྱིལ་འཁོར་དེའི་གྲྭ་བཞིར་རྒྱལ་པོ་ཆེན་པོ་བཞི་སྟེ་ལག་ཆ་སྣ་ཚོགས་ཐོགས་པར་བགྱིའོ། །དཀྱིལ་འཁོར་

46-1-251a

དེའི་གྲྭ་བཞིར་བུམ་པ་གང་བ་ནོར་བུ་རིན་པོ་ཆེ་སྣ་ཚོགས་སྩལ་བ་གཞག་གོ། །རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་དཀྱིལ་འཁོར་དུ་འཇུག་པར་འཚལ་ན་དེས་རུས་ཆགས་ཀྱི་རྒྱུད་ཐམས་ཅད་ཀྱི་མིང་བྲིས་ལ་ཐོག་མ་
ཁོ་ནར་དཀྱིལ་འཁོར་དེར་མིང་དེ་དག་སྩལ་བར་བགྱི་སྟེ། དེ་དག་ཐམས་ཅད་མིའི་སྡུག་བསྔལ་ཐམས་ཅད་སྤངས་ཤིང་སྲིད་པ་ཐ་མ་པའི་བྱང་ཆུབ་སེམས་དཔར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་
མྱུར་དུ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ལ་སློབ་དཔོན་གྱིས་གནས་མ་ལགས་པ་ལ་སྩལ་བར་མི་བགྱི་སྟེ། ཡང་ན་ནི་དད་པས་མོས་པ་ལ་སྩལ་བར་བགྱིའོ། །ཡང་ན་ནི་ཐེག་པ་ཆེན་པོ་ལ་དད་པས་མོས་པ་
དག་ལ་སྩལ་བར་བགྱིའོ། །མུ་སྟེགས་ཅན་ལ་སྩལ་བར་མི་བགྱིའོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣང་བ་མཐའ་ཡས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་
པོ་སྤྱན་རས་གཟིགས་ཀྱི་དབང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་གལ་ཏེ་ནོར་བུ་རིན་པོ་ཆེ་ཨིན་དྲ་ནི་ལའི་ཕྱེ་མ་དང་། མ་ར་ཀ་ཏ་དང་། གསེར་དང་དངུལ་གྱི་ཕྱེ་མ་དག་རིགས་ཀྱི་བུ་འམ་རིགས་ཀྱི་བུ་མོ་དབུལ་པོ་ལ་མེད་དོ། །
བཅོམ་ལྡན་འདས་ཕྱེ་མ་དེ་དག་ཚོན་སྣ་ཚོགས་ལས་སྦྱར་ཞིང་། མེ་ཏོག་སྣ་ཚོགས་དང་། བདུག་པ་སྣ་ཚོགས་སུ་བགྱིའོ། །རིགས་ཀྱི་བུ་གལ་ཏེ་ཡུལ་གཞན་དུ་སོང་ངམ། གནས་དང་ཐབས་ལས་བབས་པ་དག་ལ་མེད་དོ། །
དེའི་ཚེ་སློབ་དཔོན་གྱིས་ཡིད་ལ་དཀྱིལ་འཁོར་བགྱི་སྟེ། སློབ་དཔོན་གྱིས་ཕྱག་རྒྱའི་མཚན་མ་བསྟན་པར་བགྱིའོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་མཆོག་གིས་བྱང་
ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོའི་རྒྱལ་མོ་ང་ལ་བྱིན་ཅིག །ངས་སེམས་ཅན་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མ་དག་དེས་འཁོར་

46-1-251b

བ་ལས་ཡོངས་སུ་ཐར་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་མཆོག་ལ་བྱང་
ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་ཡི་གེ་དྲུག་པའི་རིག་སྔགས་འདི་བྱོན་ནོ། །ཨོཾ་མ་ཎི་པད་མེ་ཧཱུྃ།། །། བམ་པོ་བཞི་པ་སྟེ་ཐ་མ། གང་གི་ཚེ་ན་ཡི་གེ་དྲུག་པའི་རིག་སྔགས་ཆེན་
མོ་འདི་བྱིན་པ་དེའི་ཚེ་གླིང་བཞི་དང་ལྷའི་གནས་དང་བཅས་ཏེ། ཤིང་ཆུ་སྐྱེས་ཀྱི་འདབ་མ་བཞིན་དུ་འགུལ་ལོ། །རྒྱ་མཚོ་མཆིང་རྣམ་བཞི་ཡང་འཁྲུགས་སོ། །བགེགས་དང་བར་ཆད་བྱེད་པ་ཐམས་ཅད་ཀྱང་སྐྲག་གོ། །
གནོད་སྦྱིན་དང་། སྲིན་པོ་དང་། ནག་པོ་ཆེན་པོ་བུད་མེད་མང་པོ་དང་བཅས་པ་ཡང་བྲོས་སོ། །དེ་ནས་དེ་བཞིན་གཤེགས་པ་པད་མའི་མཆོག་གིས་བལ་གླང་གི་སྣ་དང་འདྲ་བའི་དཔུང་པ་ཕྱུང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་
སྤྱན་རས་གཟིགས་ཀྱི་དབང་པོ་ལ་མུ་ཏིག་གི་སེ་མོ་དོ་རིན་བརྒྱ་སྟོང་རི་བ་ཕུལ་ལོ། །དེས་ཀྱང་བླངས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣང་བ་མཐའ་ཡས་ལ་ཕུལ་ལོ། །དེས་ཀྱང་བླངས་
ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་མཆོག་ལ་ཕུལ་ལོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་མཆོག་གིས་ཡི་གེ་དྲུག་
པའི་རིག་སྔགས་ཆེན་མོ་འདི་བླངས་ནས་འཇིག་རྟེན་གྱི་ཁམས་པད་མ་ག་ལ་བ་དེར་གཤེགས་སོ། །རིགས་ཀྱི་བུ་དེ་ལྟར་ངས་སྔོན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་མཆོག་ལས་ཐོས་
སོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་ཡི་གེ་དྲུག་པའི་རིག་སྔགས་ཆེན་མོ་རྣལ་འབྱོར་སྤྱོད་པ་བདག་གིས་ཇི་ལྟར་ཐོབ་པར་

46-1-252a

བགྱི། བཅོམ་ལྡན་འདས་དཔེར་ན་བདུད་རྩི་ཐོབ་ན་རོ་མྱོང་བས་ཆོག་མ་འཚལ་བ་དེ་བཞིན་དུ། བཅོམ་ལྡན་འདས་བདག་ཀྱང་ཡི་གེ་དྲུག་པའི་རིག་སྔགས་ཆེན་པོ་ཐོས་པ་ཙམ་གྱིས་ཆོག་མ་འཚལ་ཏོ། །སེམས་ཅན་གང་
དག་ཡི་གེ་དྲུག་པའི་རིག་སྔགས་ཆེན་མོ་འདི་འཛབ་ཏུ་བགྱིད་པ་དང་། ཉན་པ་དང་། སེམས་པ་དང་། བསམ་པ་ལྷག་པས་འཛིན་པ་དེ་དག་ནི་བསོད་ནམས་དང་ལྡན་པ་ལགས་སོ། །བཀའ་སྩལ་པ། རིགས་ཀྱི་བུ་གང་ཡི་གེ་
དྲུག་པའི་རིག་སྔགས་ཆེན་མོ་འདི་འདྲིར་འཇུག་པ་དེས་ནི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་འདྲིར་འཇུག་པར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡུལ་ཕྲ་རབ་དང་མཉམ་
པ་ལྷའི་གསེར་རིན་པོ་ཆེ་ལས་བྱེད་ཅིང་བྱས་ནས་ཉིན་གཅིག་ཏུ་རིང་བསྲེལ་འཇུག་པ་དེའི་འབྲས་བུ་རྣམ་པར་སྨིན་པ་ནི་ཡི་གེ་དྲུག་པའི་རིག་སྔགས་ཆེན་མོའི་ཡི་གེ་འབྲུ་གཅིག་གི་འབྲས་བུ་རྣམ་པར་སྨིན་པ་སྟེ་ཡོན་ཏན་
བསམ་གྱིས་མི་ཁྱབ་བོ། །ཐར་པར་ཤིན་དུ་གནས་པའོ། །རིགས་ཀྱི་བུ་འམ་རིགས་ཀྱི་བུ་མོ་གང་ཡི་གེ་དྲུག་པའི་རིག་སྔགས་ཆེན་མོ་འདི་ཟློས་པར་བྱེད་པ་དེ་ནི་ཏིང་ངེ་འཛིན་འདི་དག་ཐོབ་པར་འགྱུར་རོ། །འདི་ལྟ་སྟེ། ནོར་བུ་
རིན་པོ་ཆེ་འཛིན་ཅེས་བྱ་བའི་ཏིང་ངེ་འཛིན་དང་། སེམས་ཅན་དམྱལ་བ་དང་བྱོལ་སོང་སྐེམས་ཤེས་བྱ་བའི་ཏིང་ངེ་འཛིན་དང་། རྡོ་རྗེའི་གོ་ཆ་ཞེས་བྱ་བའི་ཏིང་ངེ་འཛིན་དང་། རྐང་པ་ཤིན་དུ་གནས་པ་ཞེས་བྱ་བའི་ཏིང་ངེ་འཛིན་དང་ཐབས་
མཁས་པ་ཐམས་ཅད་ཅེས་བྱ་བའི་ཏིང་ངེ་འཛིན་དང་། འཐོར་བ་ཞེས་བྱ་བའི་ཏིང་ངེ་འཛིན་དང་། ཆོས་ཐམས་ཅད་འཇུག་པ་ཞེས་བྱ་བའི་ཏིང་ངེ་འཛིན་དང་། བསམ་གཏན་གྱི་རྒྱན་ཅེས་བྱ་བའི་ཏིང་ངེ་འཛིན་དང་། ཆོས་ཀྱི་ཤིང་རྟ་ལ་འཇུག་
པ་ཞེས་བྱ་བའི་ཏིང་ངེ་འཛིན་དང་། འདོད་ཆགས་དང་ཞེ་སྡང་ལས་ཡོངས་སུ་ཐར་བར་བྱེད་ཅེས་བྱ་བའི་ཏིང་ངེ་འཛིན་དང་། མཐའ་ཡས་བེའུ་ཞེས་བྱ་བའི་ཏིང་ངེ་འཛིན་དང་། ཕ་རོལ་དུ་ཕྱིན་པ་དྲུག་འཆང་ཅེས་བྱ་བའི་ཏིང་ངེ་འཛིན་དང་། རི་རབ་

46-1-252b

ཆེན་པོ་འཛིན་ཅེས་བྱ་བའི་ཏིང་ངེ་འཛིན་དང་། སེམས་ཅན་སྲིད་པ་ལས་སྒྲོལ་ཞེས་བྱ་བའི་ཏིང་ངེ་འཛིན་དང་། སངས་རྒྱས་ཀྱི་ཞིང་ཐམས་ཅད་སྟོན་ཅེས་བྱ་བའི་ཏིང་ངེ་འཛིན་དང་། དེ་བཞིན་གཤེགས་པ་ཐམས་ཅད་གཟིགས་ཤེས་བྱ་བའི་ཏིང་
ངེ་འཛིན་དང་། གནས་ཤིན་དུ་གནས་པ་ཞེས་བྱ་བའི་ཏིང་ངེ་འཛིན་རྣམས་ཏེ། རིགས་ཀྱི་བུ་གང་ཡི་གེ་དྲུག་པའི་རིག་སྔགས་ཆེན་པོའི་རྒྱལ་མོ་འཛིན་པ་ནི་དེ་ལྟ་བུ་ལ་སོགས་ཏེ་ཏིང་ངེ་འཛིན་བརྒྱ་རྩ་བརྒྱད་ཐོབ་པར་འགྱུར་རོ། །དེ་ནས་
བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གང་དུ་མཆི་བར་བགྱི། ཡི་གེ་དྲུག་པའི་རིག་སྔགས་ཆེན་མོ་གང་དུ་འཐོབ་པར་འགྱུར། རིགས་ཀྱི་བུ་ཡུལ་ཁོར་མོར་
འཇིག་པའི་གྲོང་ཁྱེར་ཆེན་པོ་ན་གང་ཡི་གེ་དྲུག་པའི་རིག་སྔགས་ཆེན་མོ་འཛིན་པར་བྱེད། ཀློག་པར་བྱེད། ཚུལ་བཞིན་ཡིད་ལ་བྱེད་པའི་ཆོས་སྨྲ་བ་ཡོད་དོ། །བཅོམ་ལྡན་འདས་ཡུལ་འཁོར་མོར་འཇིག་གི་གྲོང་ཁྱེར་ཆེན་
པོར་ཆོས་སྨྲ་བ་དེ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བའི་སླད་ཏུ་བདག་མཆིའོ། །ལེགས་སོ། །ལེགས་སོ། །རིགས་ཀྱི་བུ་དེ་ལྟར་གྱིས་ཤིག །གང་ཡི་གེ་དྲུག་པའི་རིག་སྔགས་ཆེན་མོ་འདི་འཛིན་པའི་ཆོས་སྨྲ་བ་དེ་དག་
ནི་དཀོན་པའོ། །ཆོས་སྨྲ་བ་དེ་དག་ནི་དེ་བཞིན་གཤེགས་པ་དང་མཉམ་པར་བལྟ་བར་བྱའོ། །འགྲོ་བའི་བསོད་ནམས་ཀྱི་འགྲམ་དང་འདྲ་བར་བལྟ་བར་བྱའོ། །ཕུང་པོ་བཞིན་དུ་བལྟ་བར་བྱའོ། །ཕྱིན་ཅི་ལོག་པར་གསུང་བ་བཞིན་དུ་བལྟ་
བར་བྱའོ། །རིན་པོ་ཆེའི་ཕུང་པོ་བཞིན་དུ་བལྟ་བར་བྱའོ། །དམ་པ་སྦྱིན་པར་བྱེད་པའི་ཡིད་བཞིན་གྱི་ནོར་བུ་བཞིན་དུ་བལྟ་བར་བྱའོ། །ཆོས་ཀྱི་མཛོད་བཞིན་དུ་བལྟ་བར་བྱའོ། །འགྲོ་བ་སྒྲོལ་བར་བྱེད་པ་བཞིན་དུ་བལྟ་བར་
བྱའོ། །རིགས་ཀྱི་བུ་ཆོས་སྨྲ་བ་དེའི་བྱེད་པ་མཐོང་ནས་ཐེ་ཙོམ་མི་སྐྱེ་བར་བྱའོ། །རིགས་ཀྱི་བུ་ཁྱོད་བྱང་ཆུབ་སེམས་དཔའི་ས་ནས་འཕོས་ཤིང་ངན་སོང་དུ་སྐྱེས་ས་རེ། ཆོས་སྨྲ་བ་དེ་ནི་ཚུལ་ཁྲིམས་ཉམས་པ། སྤྱོད་པ་ཉམས་

46-1-253a

པ། ཆུང་མ་དང་། བུ་དང་། བུ་མོས་ཡོངས་སུ་བསྐོར་བ། ངུར་སྨྲིག་ཀྱང་བཤང་བ་དང་གཅི་བས་ཡོངས་སུ་གང་བ། སྤྱོད་ལམ་མ་བསྡམས་པ་ཡིན་ནོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་
སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ་བཞིན་དུ་འཚལ་ལོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་བྱང་ཆུབ་སེམས་དཔའ་ཁྱིམ་
པ་དང་། རབ་ཏུ་བྱུང་བ་དང་། ཁྱེའུ་དང་། བུ་མོ་བརྒྱ་ཕྲག་སྟོང་དུ་མས་ཡོངས་སུ་བསྐོར་ཏེ་སོང་ནས་ཆོས་སྨྲ་བ་དེ་ལ་མཆོད་པའི་ལས་བྱ་བའི་ཕྱིར་ལྷའི་གདུགས་དང་། ལྷའི་ལྷམ་དང་། ཅོད་པན་དང་། རྣ་ཆ་དང་། ཕྲེང་བའི་ཆུན་པོ་དང་། 
དཔུང་རྒྱན་དང་། སེ་མོ་དོ་དང་། སེ་མོ་དོ་ཕྱེད་པ་ཕྲག་པ་ནས་འཕྱང་བ་དང་། སྙན་གྱི་གོང་རྒྱན་དང་། སོར་གདུབ་ཀྱི་རྣམ་པ་དང་། གཞན་ཡང་གོས་རྣམ་པ་སྣ་ཚོགས་པ་རྒྱའི་ཡུལ་ནས་བྱུང་བ་དང་། རིག་འཛིན་གྱིས་བསྐུལ་བ་དང་། 
ཡུལ་ཀ་ཤི་ནས་བྱུང་བའི་གོས་དང་། མེས་བཀྲུ་བའི་གོས་དང་། གཞན་ཡང་མེ་ཏོག་སྣ་ཚོགས་པ་འདི་ལྟ་སྟེ། མེ་ཏོག་ཨུད་པ་ལ་དང་། ཀུ་མུ་ད་དང་། པུན་ད་རི་ཀ་དང་། མན་དཱ་ར་བ་དང་། མན་དཱ་ར་བ་ཆེན་པོ་དང་། 
མན་འཛུ་ཥ་ཀ་དང་། མན་འཛུ་ཥ་ཀ་ཆེན་པོ་དང་། ཨུ་དུམ་བ་ར་དང་། གཞན་ཡང་ཤིང་གི་མེ་ཏོག་རྣམ་པ་སྣ་ཚོགས་པ་ཙམ་པ་ཀ་དང་། ཀ་ར་བི་ར་དང་། བད་ཏ་ལ་དང་། ཨ་ཏི་མུག་ཏ་དང་། པ་ར་ཤི་ཀ་དང་། ཀུན་ད་དྷྱ་ཤི་
ཏ་དང་། སུ་མ་ན་དང་། བི་མི་ནི་ཀ་ལ་སོགས་པ་དང་། མདབ་མ་བརྒྱ་པ་ངུར་པས་མཛེས་པར་བྱས་པ། བྱ་ཤ་རི་ཀ་དག་མོས་པར་བྱས་པ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། 
ཤེལ་གྱི་ཁ་དོག་དང་། གཞན་ཡང་འབྲས་བུ་དང་། མེ་ཏོག་གི་རྣམ་པ་སྣ་ཚོགས་དག་ཁྱེར་ནས་ཡུལ་ཁོར་མོར་འཇིག་གི་གྲོང་ཁྱེར་ཆེན་པོ་ག་ལ་བ་དེར་སོང་སྟེ། མཐར་གྱིས་འཁོར་མོར་འཇིག་གི་གྲོང་ཁྱེར་ཆེན་

46-1-253b

པོར་ཕྱིན་པ་དང་། ཆོས་སྨྲ་བ་ག་ལ་བ་དེར་སོང་སྟེ་ཕྱིན་ནས་རྐང་པ་ལ་མགོ་བོས་ཕྱག་འཚལ་ཏེ། དེས་དེ་ཚུལ་ཁྲིམས་ཉམས་པ། སྤྱོད་པ་ཉམས་པ། སྤྱོད་ལམ་མ་བསྡམས་པ་མཐོང་ནས་གདུགས་དང་། ལྷམ་དེ་དག་དང་། 
གོས་དང་། རྒྱན་དང་། དྲི་དང་། བྱུག་པ་དག་གིས་མཆོད་པ་ཆེན་པོ་བྱས་ནས་ཆོས་སྨྲ་བ་དེའི་མདུན་དུ་ཐལ་མོ་སྦྱར་ཏེ། ཀྱེ་མའོ་ཆོས་ཀྱི་གཏེར་མྱོང་བར་མཛད་པ། བདུད་རྩིའི་གཏེར་བསགས་པ་ལྟ་བུ་རྒྱ་མཚོ་དང་
མཉམ་པ་ཁྱོད་ལ་དཔག་མི་ནུས་སོ། །མིར་གྱུར་པ་ཐམས་ཅད་ཀྱི་སྣོད་དུ་གྱུར་པའོ། །ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་
ཡིན་པ་དག་ཁྱོད་ལས་ཆོས་ཉན་ཏེ། ཁྱོད་ལ་ཆོས་ཉན་པའི་ཚེ་ཐམས་ཅད་འདུ་བར་བགྱིད་དོ། །ཁྱོད་ནི་རྡོ་རྗེ་ཆེན་པོ་དང་མཉམ་པའི་ཆོས་ཀྱི་རྣམ་གྲངས་འཆད་པར་མཛད་དོ། །སེམས་ཅན་འཁོར་བས་བཅིངས་
པའི་བཅིངས་པ་མང་པོ་དག་ཡོངས་སུ་ཐར་བར་མཛད་དོ། །སེམས་ཅན་གང་ཁོར་མོར་འཇིག་གི་གྲོང་ཁྱེར་ཆེན་པོ་ན་གནས་ཤིང་རྟག་ཏུ་ཡོངས་སུ་སྡུད་པར་མཐོང་བ་དེ་དག་ནི་བསོད་ནམས་དང་ལྡན་པ་ལགས་སོ། །དེ་
མཐོང་མ་ཐག་ཏུ་སྡིག་པ་ཐམས་ཅད་འཕྲོག་པར་མཛད་པ་དཔེར་ན་མེས་ནགས་ཀྱི་འདབ་མ་མྱུར་དུ་འཚིག་པར་བགྱིད་པ་དེ་བཞིན་དུ་ཁྱོད་མཐོང་མ་ཐག་ཏུ་སྡིག་པ་ཐམས་ཅད་འཕྲོག་པར་མཛད་དོ། །དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀྱང་མཁྱེན་ཏོ། །གཞན་ཡང་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་། ཚངས་པ་དང་། འཇུག་སྲེད་དང་། 
དབང་ཕྱུག་ཆེན་པོ་དང་། ཉི་མ་དང་། ཟླ་བ་དང་། རླུང་གི་ལྷ་དང་། ཆུའི་ལྷ་དང་། མེའི་ལྷ་དང་། ཆོས་ཀྱི་རྒྱལ་པོ་གཤིན་རྗེ་དང་། རྒྱལ་པོ་ཆེན་པོ་བཞི་དག་ཀྱང་ཁྱོད་ལ་མཆོད་པའི་ལས་བྱ་བའི་ཕྱིར་མཆིའོ། །དེ་ནས་ཆོས་སྨྲ་བ་

46-1-254a

དེས་དེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་འགྱོད་པ་མ་སྐྱེད་ཅིག །གྲོགས་པོ་ཉོན་མོངས་པ་ནི་ཆགས་པའོ། །སྤྱད་པའོ། །འཁོར་བའི་མཚན་མའོ། །སྐྱེ་དགུའི་འཁོར་ལོ་སྐྱེད་པར་བྱེད་པའོ། །གང་ཡི་གེ་དྲུག་
པའི་རིག་སྔགས་ཆེན་མོ་ཤེས་པ་དེ་ནི་འདོད་ཆགས་དང་། ཞེ་སྡང་དང་། གཏི་མུག་གིས་མི་གོས་ཏེ། དཔེར་ན་འཛམ་བུའི་ཆུ་བོའི་གསེར་དྲི་མས་མི་གོས་པ་དེ་བཞིན་དུ་རིགས་ཀྱི་བུ་གང་གི་ལུས་ལ་ཡི་གེ་དྲུག་པའི་རིག་སྔགས་
ཀྱི་རྒྱལ་མོ་ཆེན་མོ་ཐོགས་པ་དེའི་ལུས་ལ་འདོད་ཆགས་དང་། ཞེ་སྡང་དང་གཏི་མུག་གིས་མི་གོས་སོ། །དེ་ནས་སྒྲིབ་པ་ཐམས་ཅད་རྣམ་པར་སེལ་བས་རྐང་པ་ལ་དམ་དུ་བཟུང་སྟེ་འདི་སྐད་ཅེས་གསོལ་ཏོ། །དབང་པོ་ཉམས་པའི་མིག་
ཏུ་གྱུར་ཅིག །ལམ་སྟོར་བ་ལ་ལམ་སྟོན་པར་མཛོད་ཅིག །བདག་ཆོས་ཀྱིས་སྐོམ་པ་ལ་ཆོས་ཀྱི་རོས་ངོམས་པར་མཛོད་ཅིག །བདག་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ས་བོན་སྩོལ་ཅིག །ཆོས་ཀྱི་སྐབས་
དང་། ཤིན་དུ་གནས་པའི་ཚུལ་གྱི་གནས་ཡོངས་སུ་དག་པ་སྩོལ་ཅིག །མི་ཕྱེད་པའི་དགེ་བ་ཐོབ་པའི་ཞེས་འགྲོ་བ་ཐམས་ཅད་མཆིའོ། །ཚིག་སྙན་པ་བླ་མས་བདག་ལ་ཡི་གེ་དྲུག་པའི་རིག་སྔགས་ཆེན་མོ་སྩོལ་ཅིག །དེས་
བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་བགྱིའོ། །ཆོས་ཀྱི་འཁོར་ལོ་རྣམ་པ་བཅུ་གཉིས་བསྐོར་བར་བགྱིའོ། །སེམས་ཅན་ཐམས་ཅད་འཁོར་བའི་སྡུག་བསྔལ་ལས་
ཡོངས་སུ་ཐར་བར་བགྱིའོ། །སྔོན་མ་ཐོས་པའི་ཆོས་ཐོས་པར་བགྱིའོ། །ཡི་གེ་དྲུག་པའི་རིག་སྔགས་ཆེན་མོའི་རྒྱལ་མོ་འཐོབ་པ་ཐོབ་པར་བགྱིའོ། །ཡི་གེ་དྲུག་པའི་རིག་སྔགས་ཆེན་མོའི་རྒྱལ་མོ་བདག་ལ་སྩོལ་ཅིག །
མགོན་དང་། སྐྱབས་དང་། རྟེན་དུ་གྱུར་ཅིག །གནས་མ་མཆིས་པ་རྣམས་ཀྱི་གནས་སུ་གྱུར་ཅིག །དེ་ནས་ཆོས་སྨྲ་བ་དེས་དེ་ལ་འདི་སྐད་ཅེས་སྨྲས་སོ། །ཡི་གེ་དྲུག་པའི་རིག་སྔགས་ཆེན་མོའི་རྒྱལ་མོ་ནི་དཀོན་པའི་ཚིག་སྟེ། 

46-1-254b

འདི་ནི་རྡོ་རྗེའི་ཚིག་གོ། །རྡོ་རྗེ་མི་ཕྱེད་པའི་ཚིག་གོ། །བླ་ན་མེད་པའི་ཡེ་ཤེས་ཀྱི་ཚིག་གོ། །མི་ཟད་པའི་ཡེ་ཤེས་ཀྱི་ཚིག་གོ། །ལྟག་ན་མེད་པའི་ཚིག་གོ། །ཐར་པར་འཇུག་པར་བྱེད་པའི་ཚིག་གོ། །དེ་བཞིན་གཤེགས་པའི་ཡེ་ཤེས་རྣམ་
པར་དག་པའི་ཚིག་གོ། །འདོད་ཆགས་དང་། ཞེ་སྡང་དང་། གཏི་མུག་དང་། འཁོར་བའི་སྡུག་བསྔལ་ཡོངས་སུ་སྤོང་བའི་ཚིག་གོ། །ཐབས་མཁས་པ་ཐམས་ཅད་ཀྱི་ཚིག་གོ། །བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་
དང་། སྙོམས་པར་གཞོག་པའི་ཚིག་གོ། །ཆོས་ཐམས་ཅད་ལ་འཇུག་པར་བྱེད་པའི་ཚིག་གོ། །རྟག་ཏུ་ལྷ་རྣམས་འདོད་པར་བྱེད་པའི་ཚིག་གོ། །རིགས་ཀྱི་བུ་གང་ཐར་བར་འདོད་པ་གནས་སྣ་ཚོགས་སུ་རབ་ཏུ་བྱུང་བ། བསྒོ་བ་
སྣ་ཚོགས་སུ་རབ་ཏུ་འབྱུང་བ་འདི་ལྟ་སྟེ། དབང་པོའི་བགོ་བ་དང་། དཀར་པོའི་བགོ་བ་དང་། བསྟེན་པའི་བགོ་བ་སྟེ། ཉི་མ་བརྟགས་ནས་དབང་ཕྱུག་ཆེན་པོ་ལ་རབ་ཏུ་འབྱུང་ངོ་། །འཇུག་སྲེད་དང་། ནམཁའ་ལྡིང་དང་། གཅེར་བུ་པ་དང་། 
རི་མི་དང་། གནས་དེ་དག་ཏུ་རབ་ཏུ་འབྱུང་སྟེ། དེ་དག་ལ་ཡང་ཐར་པ་མེད་དོ། །མགོན་ཡང་མ་ཡིན། །བརྟུལ་ཞུགས་ཅན་ཡང་མ་ཡིན་ནོ། །ལྷ་མང་པོ་དང་། ཚངས་པ་དང་། འཇུག་སྲེད་དང་། དབང་ཕྱུག་ཆེན་པོ་དང་། བརྒྱ་བྱིན་ལྷའི་དབང་
པོ་དང་། ཉི་མ་དང་། ཟླ་བ་དང་། རླུང་གྀ་ལྷ་དང་། ཆུའི་ལྷ་དང་། མེའི་ལྷ་དང་། ཆོས་ཀྱི་རྒྱལ་པོ་གཤིན་རྗེ་དང་། རྒྱལ་པོ་ཆེན་པོ་བཞི་དག་རྟག་ཏུ་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་སློང་ངོ་། །དེ་དག་ཡི་གེ་དྲུག་པའི་རིག་
སྔགས་ཀྱི་རྒྱལ་མོ་ཆེན་མོ་ཇི་ལྟར་བསླང་བར་བགྱི། བཅོམ་ལྡན་འདས་ཇི་ལྟར་ན་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་བདག་ཅག་གིས་ཐོབ་པར་འགྱུར། ཐར་པ་ལ་གཞོལ་བར་འགྱུར། །སྒྲིབ་པ་ཐམས་ཅད་རྣམ་པར་
སེལ་བ་འདི་ལྟ་སྟེ། དཔེར་ན་ཤེས་རབ་ཀྱི་ཕ་རོལ་དུ་ཕྱིན་པ་ནི་དེ་བཞིན་གཤེགས་པ་ཐམས་ཅད་སྐྱེད་པར་གྲགས་པ་སྟེ། དེ་ཡང་ཐལ་མོ་སྦྱར་ནས་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་ལ་ཕྱག་འཚལ་ན་དེ་བཞིན་གཤེགས་

46-1-255a

པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱང་ཆུབ་སེམས་དཔའ་མང་པོ་དང་བཅས་པ་ལྟ་ཅི་སྨོས། རིགས་ཀྱི་བུ་འདི་ནི་འབྲས་ལྟ་བུར་སྙིང་པོར་གྱུར་པ་ཡིན་ཏེ། རིགས་ཀྱི་བུ་འདི་ལ་ཆུང་ཟད་བཟླས་པས་
ཀྱང་ཐེག་པ་ཆེན་པོའི་རྣམ་པ་མང་པོ་མདོ་དང་། དབྱངས་ཀྱིས་བསྙད་པ་དང་། ལུང་བསྟན་པ་དང་། ཚིགས་སུ་བཅད་པ་དང་། ཆེད་ཏུ་བརྗོད་པ་དང་། གླེང་གཞི་དང་། རྟོགས་པ་བརྗོད་པ་དང་། འདི་ལྟ་བུ་འདས་པ་དང་སྐྱེས་པའི་རབས་དང་། 
ཤིན་དུ་རྒྱས་པ་དང་། ཆོས་རྨད་དུ་བྱུང་བ་དང་། གཏན་ལ་ཕབ་བ་བསྟན་པ་དང་། ཞི་བ་དང་། ཐར་པ་ཡང་ཐོབ་པར་འགྱུར་རོ། །མང་དུ་བཤད་ཅི་དགོས་ཏེ་གཞན་མ་བྱེད་ཅིག །སའི་ནང་དུ་གཏོགས་པ་ལ་སྙིང་པོར་འཛིན་པ་ཅི་ཡིན་
ཞེ་ན། དེ་ལྟར་འབྲས་ནི་སྙིང་པོར་འཛིན་ཏེ། ཁྱེར་ནས་བདག་གི་ཁྱིམ་དུ་སྣོད་རྣམས་ཡོངས་སུ་བཀང་སྟེ་འཇོག་གོ། །བཞག་ནས་ཉི་མའི་ཚུལ་བཞིན་དུ་ཉི་མ་ཚ་བ་ལ་སྐེམས་སོ། །བསྐམས་ནས་གཏུན་ལ་བརྡུངས་ཤིང་
ཕུབ་མ་རྣམས་སེལ་ཏོ། །དེའི་སྙིང་པོ་ནི་འབྲས་རྨེའུ་ཡིན་ནོ་ཞེས་དེ་ལྟར་འཇོག་སྟེ། དེ་བཞིན་དུ་རྣལ་འབྱོར་གཞན་དག་ཕུབ་མ་དང་འདྲའོ། །རྣལ་འབྱོར་ཐམས་ཅད་ཀྱི་ནང་ན་ཡི་གེ་དྲུག་པའི་རིག་སྔགས་ཀྱི་རྒྱལ་མོ་
ཆེན་མོ་འདི་ནི་འབྲས་རྨེའུར་གྱུར་པའོ། །རིགས་ཀྱི་བུ་དེའི་ཕྱིར་བྱང་ཆུབ་སེམས་དཔའ་སྦྱིན་པའི་ཕ་རོལ་དུ་ཕྱིན་པའི་ཕྱིར། ཚུལ་ཁྲིམས་ཀྱི་ཕ་རོལ་དུ་ཕྱིན་པའི་ཕྱིར། བཟོད་པའི་ཕ་རོལ་དུ་ཕྱིན་པའི་ཕྱིར། བརྩོན་
འགྲུས་ཀྱི་ཕ་རོལ་དུ་ཕྱིན་པའི་ཕྱིར། བསམ་གཏན་གྱི་ཕ་རོལ་དུ་ཕྱིན་པའི་ཕྱིར། ཤེས་རབ་ཀྱི་ཕ་རོལ་དུ་ཕྱིན་པའི་ཕྱིར་ཚོགས་འབྱིན་ཏོ། །རིགས་ཀྱི་བུ་བཟླས་པ་གཅིག་བྱས་པས་ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་
འགྱུར་རོ། །ལ་ལ་ཞིག་གིས་ལག་པས་རེག་པས་རེག་ན་དེ་དག་ཀྱང་ཕྱིར་མི་ལྡོག་པའི་ས་འཐོབ་པར་འགྱུར་རོ། །རིགས་ཀྱི་བུ་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་འདི་ཡང་དེ་ལྟ་བུ་སྟེ། དེའི་མིང་འཛིན་པ་ཡང་དཀོན་ནོ། །མིང་

46-1-255b

ལན་ཅིག་བཟུང་ན་དེ་བཞིན་གཤེགས་པ་ཐམས་ཅད་ལ་ན་བཟའ་དང་། བཤོས་དང་། མལ་སྟན་དང་། ན་བའི་རྐྱེན་གྱི་སྨན་གྱི་ཡོ་བྱད་དང་། ཡོ་བྱད་ཐམས་ཅད་ཀྱིས་བཀུར་སྟིར་བྱས་པར་འགྱུར་རོ། །དེ་ནས་ཆོས་སྨྲ་བ་དེ་ལ་སྒྲིབ་པ་
ཐམས་ཅད་རྣམ་པར་སེལ་བས་འདི་སྐད་ཅེས་སྨྲས་སོ། །ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་བདག་ལ་སྩོལ་ཅིག་དེ་ནས་ཆོས་ཀྱི་མཁན་པོ་དེ་སེམས་ཤིང་འདུག་པ་ལས་དེ་ལ་ནམ་མཁའ་ལས་ཡི་གེ་དྲུག་པའི་རིག་
སྔགས་ཀྱི་རྒྱལ་མོ་ཆེན་མོ་བྱིན་ཅིག་ཅེས་སྒྲ་བྱུང་ངོ་། །དེ་ནས་ཆོས་སྨྲ་བ་དེ་སྒྲ་ག་ལས་བྱུང་ཞེས་བསམས་པ་དང་། དེ་ནས་ཡང་ནམ་མཁའ་ལས་བྱང་ཆུབ་སེམས་དཔའ་འདིས་དཀའ་བ་སྤྱོད་པ་དུ་མ་ལ་བརྩོན་པར་བྱས་ཀྱིས་ཡི་གེ་
དྲུག་པའི་རིག་སྔགས་ཀྱི་རྒྱལ་མོ་ཆེན་མོ་བྱིན་ཅིག་ཅེས་སྒྲ་བྱུང་ངོ་། །དེ་ནས་ཆོས་སྨྲ་བ་དེས་ནམ་མཁའ་ལ་བལྟས་པ་དང་། འདམ་བུའི་མདའ་བཞིན་དུ་ཁ་དོག་དཀར་བ། རལ་པའི་ཅོད་པན་འཆང་བ། ཐམས་ཅད་མཁྱེན་པ་མགོ་ལ་
བཞག་པ། ལག་པ་ན་མེ་ཏོག་པད་མ་བཟང་པོ་ཐོགས་པ། པད་མའི་དཔལ་གྱིས་བརྒྱན་པ་དེ་འདྲ་བའི་གཟུགས་མཐོང་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ལ་རིགས་ཀྱི་བུ་བྱང་ཆུབ་སེམས་དཔའ་
སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་ཁྱོད་ལ་སྦྱིན་པར་གནང་ངོ་ཞེས་སྨྲས་པ་དང་། གུས་ཤིང་ཐལ་མོ་སྦྱར་ཏེ་ལེན་པར་རྩོམ་མོ། །ཨོཾ་མ་ཎི་པད་མེ་ཧཱུྃ། འདི་
བྱིན་མ་ཐག་ཏུ་ས་རྣམ་པ་དྲུག་ཏུ་གཡོས་སོ། །ཏིང་ངེ་འཛིན་འདི་དག་ཀྱང་སྒྲིབ་པ་ཐམས་ཅད་རྣམ་པར་སེལ་བས་ཐོབ་སྟེ། མི་ཟད་པའི་ཆོས་ཉིད་ཅེས་བྱ་བའི་ཏིང་ངེ་འཛིན་དང་། བྱམས་པ་དང་། སྙིང་རྗེ་དང་། དགའ་བ་
ཞེས་བྱ་བའི་ཏིང་ངེ་འཛིན་དང་། རྣལ་འབྱོར་སྤྱོད་ཅེས་བྱ་བའི་ཏིང་ངེ་འཛིན་དང་། ཐར་པ་ལ་འཇུག་པར་འཇོག་ཅེས་བྱ་བའི་ཏིང་ངེ་འཛིན་དང་། ཐམས་ཅད་སྣང་བར་བྱེད་ཅེས་བྱ་བའི་ཏིང་ངེ་འཛིན་དང་། བཀོད་པའི་རྒྱལ་པོ་ཞེས་བྱ་བའི་ཏིང་ངེ་

46-1-256a

འཛིན་དང་། ཆོས་འཛིན་པ་ཞེས་བྱ་བའི་ཏིང་ངེ་འཛིན་དང་། ཏིང་ངེ་འཛིན་དེ་དག་ཐོབ་བོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བས་བླངས་མ་ཐག་ཏུ་མཁན་པོ་ལ་ཡོན་དུ་གླིང་བཞི་རིན་
པོ་ཆེ་སྣ་བདུན་གྱིས་ཡོངས་སུ་གང་བ་འབུལ་བར་རྩོམ་པ་དང་། དེ་ནས་ཆོས་ཀྱི་མཁན་པོ་དེས་དེ་ལ་འདི་སྐད་ཅེས་སྨྲས་སོ། །ཡི་གེ་གཅིག་གི་ཡོན་དུ་ཡང་མེད་ན་ཡི་གེ་དྲུག་པའི་རིག་སྔགས་ཆེན་མོའི་ལྟ་ཅི་སྨོས། རིགས་ཀྱི་བུ་ང་ནི་ཁྱོད་
ལས་ལེན་པ་ཡང་མེད་དོ། །ཁྱོད་ཀྱང་བྱང་ཆུབ་སེམས་དཔར་གྱུར་པ་སྟེ། ཁྱོད་ནི་འཕགས་པ་ཡིན་གྱི་མ་འཕགས་པ་མ་ཡིན། རིགས་ཀྱི་བུ་ཁྱོད་ནི་ངས་འདུལ་བ་ཡིན་ནོ། །དེས་དེ་ལ་མུ་ཏིག་གི་ཕྲེང་བ་རིན་བརྒྱ་སྟོང་རི་བ་ཕུལ་བ་
དང་། དེས་སྨྲས་པ། རིགས་ཀྱི་བུ་ངའི་ཚིག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕུལ་ཅིག །དེ་ནས་སྒྲིབ་པ་ཐམས་ཅད་རྣམ་པར་སེལ་བས་ཆོས་སྨྲ་བ་དེའི་རྐང་པ་ལ་མགོ་
བོས་ཕྱག་འཚལ་ཏེ་སོང་ངོ་། །རྙེད་པར་བྱ་བ་རྙེད་ཅིང་བསམ་པ་ཡོངས་སུ་རྫོགས་ནས་འཛེ་ཏའི་ཚལ་གྱི་གཙུག་ལག་ཁང་ག་ལ་བ་དེར་སོང་སྟེ་ཕྱིན་པ་དང་བཅོམ་ལྡན་འདས་ཤཱཀྱ་ཐུབ་པའི་ཞབས་ལ་ཕྱག་འཚལ་ནས་ཕྱོགས་གཅིག་ཏུ་
འདུག་གོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཀྱིས་རྙེད་པ་རྙེད་དམ། བཅོམ་ལྡན་འདས་དེ་བཞིན་ཏེ། 
ཇི་ལྟར་བཅོམ་ལྡན་འདས་ཀྱིས་མཁྱེན་པ་བཞིན་ནོ། །དེ་ནས་ཡང་དག་པར་རྫོགས་པའི་སངས་རྒྱས་བྱེ་བ་ཕྲག་བདུན་བཅུ་རྩ་བདུན་ཚོགས་ཏེ། དེ་བཞིན་གཤེགས་པ་དེ་དག་གིས་གཟུངས་སྔགས་འདི་གསུངས་སོ། །ན་མཿ་སབ་ཏ་ནཱྃ། 
སྃ་མྱག་སྃ་བུད་དྷ་ཀོ་ཊི་ནཱྃ། ཏད་ཡ་ཐཱ་ཨོཾ་ཙ་ལེ་ཙུན་དེ་སྭཱ་ཧཱ། གཟུངས་སྔགས་འདི་ནི་ཡང་དག་པར་རྫོགས་པའི་སངས་རྒྱས་བྱེ་བ་ཕྲག་བདུན་བཅུ་རྩ་བདུན་གྱིས་གསུངས་སོ། །བ་སྤུའི་ཁུང་བུ་དེ་འདས་ནས་ཉི་མའི་འོད་ཅེས་བྱ་བའི་བ་སྤུའི་ཁུང་

46-1-256b

བུ་དེ་ན་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དུ་མ་གནས་ཏེ། ཉི་མའི་འོད་ཅེས་བྱ་བའི་བ་སྤུའི་ཁུང་བུ་དེ་ན་གསེར་གྱི་རི་ཁྲི་ཡོད་དེ། རི་རེ་རེ་ཞིང་ཡང་རྩེ་མོ་ཁྲི་ཉིས་སྟོང་ཉི་ཁྲི་ཉིས་སྟོང་ཡོད་ལ། རི་དེ་རེ་རེའི་ངོས་ནི་རིན་པོ་ཆེ་པད་མ་
རཱ་གས་བརྒྱན། ངོས་རེ་རེ་ཞིང་ཡང་ལྷའི་ནོར་བུ་རིན་པོ་ཆེའི་སྐྱེད་མོས་ཚལ་ཤིན་དུ་མཛེས་པ། ཤིན་དུ་དགའ་བར་བྱེད་པ་རྣམ་པ་སྣ་ཚོགས་དང་ལྷའི་རྫིང་བུས་བརྒྱན། ཁང་པ་བརྩེག་མ་བརྒྱ་ཕྲག་སྟོང་དུ་མ་ནི་ལྷའི་གསེར་དང་རིན་པོ་ཆེ་ལས་བྱས་ཤིང་མུ་ཏིག་
དང་དར་གྱི་ལྡ་ལྡི་ནི་བྲེས། མུ་ཏིག་གི་སེ་མོ་དོ་བརྒྱ་དག་ནི་འཕྱང་ངོ་། །ཁང་པ་བརྩེག་མ་དེའི་ནང་ན་ཡིད་བཞིན་གྱི་ནོར་བུ་རིན་པོ་ཆེ་ཤ་རི་ད་ཀ་ཡོད་པས་ནི་བྱང་ཆུབ་སེམས་དཔའ་དེ་དག་ལ་ཡོ་བྱད་ཐམས་ཅད་ཀྱིས་བསྙེན་བཀུར་བྱེད་དོ། །དེའི་ཚེ་
བྱང་ཆུབ་སེམས་དཔའ་དེ་དག་ཁང་པ་བརྩེགས་མ་དེར་འགྲོའོ། །དེར་སོང་ནས་ཀྱང་ཡི་གེ་དྲུག་པའི་རིག་སྔགས་ཀྱང་རྗེས་སུ་དྲན་ནོ། །གང་གི་ཚེ་ན་རྗེས་སུ་དྲན་པ་དེའི་ཚེ་མྱ་ངན་ལས་འདའ་བ་རྟོགས་པར་འགྱུར་རོ། །མྱ་ངན་ལས་འདའ་བའི་ས་དེ་ལ་
དེ་བཞིན་གཤེགས་པ་བདུན་མཐོང་ངོ་། །བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་དེ་ཡང་མཐོང་ངོ་། །མཐོང་ནས་ཀྱང་སེམས་དད་པ་སྐྱེད་དོ། །བསྐྱེད་ནས་དེའི་ཚེ་བྱང་ཆུབ་སེམས་དཔའ་དེ་དག་ཁང་
པ་བརྩེག་མ་དེ་ནས་འབྱུང་ངོ་། །བྱུང་ནས་ཁ་ཅིག་ནི་འཆག་སར་འགྲོའོ། །ཁ་ཅིག་ནི་ཡིད་བཞིན་གྱི་ནོར་བུ་རིན་པོ་ཆེའི་སྐྱེད་མོས་ཚལ་དུ་འགྲོའོ། །ཁ་ཅིག་ནི་རྫིང་བུ་དག་ཏུ་འགྲོའོ། །ཁ་ཅིག་ནི་ནོར་བུ་རིན་པོ་ཆེ་པད་མ་རཱ་གའི་རིའི་ངོས་ལ་
འགྲོའོ། །དོང་ནས་སྐྱིལ་མོ་ཀྲུང་བཅས། ལུས་དྲང་པོར་བསྲང་སྟེ་དྲན་པ་མངོན་པར་གཞག་ནས་འཁོད་དོ། །རིགས་ཀྱི་བུ་བ་སྤུའི་ཁུང་བུ་དེ་ན་བྱང་ཆུབ་སེམས་དཔའ་དེ་ལྟ་བུ་དག་གནས་སོ། །རིགས་ཀྱི་བུ་དེ་འདས་ནས་དབང་པོའི་
རྒྱལ་པོ་ཞེས་བྱ་བའི་བ་སྤུའི་ཁུང་བུ་དེ་ན་བྱང་ཆུབ་སེམས་དཔའ་ཕྱིར་མི་ལྡོག་པ་བརྒྱ་ཕྲག་སྟོང་དུ་མ་གནས་ཏེ། དབང་པོའི་རྒྱལ་པོའི་བ་སྤུའི་ཁུང་བུ་དེ་ན་ལྷའི་གསེར་གྱི་རི་བརྒྱད་ཁྲི་ཡོད་དོ། །རི་དེ་དག་གི་དབུས་ན་ནོར་བུ་རིན་

46-1-257a

པོ་ཆེ་མེ་ཏོག་པད་མ་ལྟར་སྣང་བ་ཞེས་བྱ་བ་ཞིག་ཡོད་དེ། གང་གི་ཚེ་བྱང་ཆུབ་སེམས་དཔའ་དེ་དག་སེམས་པར་གྱུར་པ་དེའི་ཚེ་དེ་དག་གི་བསམ་པ་གྲུབ་པར་འགྱུར་རོ། །དེ་ལྟར་བྱང་ཆུབ་སེམས་དཔའ་དེ་དག་རིའི་རྒྱལ་པོ་
དེ་ལ་གནས་ཤིང་ཟས་དང་སྐོམ་གྱི་དྲན་པ་མི་སྒོམ་མོ། །དེ་དག་འཁོར་བའི་སྡུག་བསྔལ་གྱིས་གཟིར་བར་ཡང་མི་འགྱུར་རོ། །དེ་དག་འཁོར་བའི་སྡུག་བསྔལ་གྱིས་གོས་པར་ཡང་མི་འགྱུར་རོ། །དུས་ཐམས་ཅད་དུ་མྱ་ངན་
ལས་འདས་པ་ལ་སེམས་ཤིང་གནས་ཀྱི། དེ་དག་གི་ལུས་ལ་གཞན་སེམས་པ་མེད་དོ། །རིགས་ཀྱི་བུ་དེ་འདས་ནས་སྨན་ཆེན་པོ་ཞེས་བྱ་བའི་བ་སྤུའི་ཁུང་བུ་དེ་ན་བྱང་ཆུབ་སེམས་དཔའ་སེམས་ཐོག་མ་བསྐྱེད་པ་བྱེ་བ་ཁྲག་
ཁྲིག་བརྒྱ་ཕྲག་སྟོང་དུ་གནས་སོ། །རིགས་ཀྱི་བུ་བ་སྤུའི་ཁུང་བུ་དེ་ན་རི་དགུ་ཁྲི་ཡོད་དེ། ལ་ལ་ནི་རྡོ་རྗེའོ། ལ་ལ་ནི་དངུལ་གྱིའོ། །ལ་ལ་ནི་གསེར་གྱིའོ། །ལ་ལ་ནི་ནོར་བུ་རིན་པོ་ཆེ་ཨིན་དྲ་ནཱི་ལའིའོ། །ལ་ལ་ནི་པད་མ་ར་གའིའོ། །
ལ་ལ་ནི་མ་ར་ཀ་ཏའིའོ། །ལ་ལ་ནི་ཤེལ་གྱིའོ། །རིའི་རྒྱལ་པོ་དེ་ལྟ་བུ་དག་ཡོད་དོ། །རི་རེ་རེ་ཞིང་ཡང་རྩེ་མོ་བརྒྱད་ཁྲི་ཡོད་དེ། རིན་པོ་ཆེ་སྣ་ཚོགས་ཀྱིས་བརྒྱན་པ། ཤིན་དུ་མཛེས་པར་བྱས་པ་རྣམ་པ་སྣ་ཚོགས་པ་ཡིད་ཏུ་འོང་
བ་དག་གོ། །རྩེ་མོ་དེ་དག་ལ་དྲི་ཟ་དག་གནས་ཏེ། དེ་དག་དུས་ཐམས་ཅད་དུ་བ་སྤུའི་ཁུང་བུ་ནས་སིལ་སྙན་འབྱུང་བ་འཛིན་ཏོ། །གང་སེམས་ཐོག་མ་བསྐྱེད་པའི་བྱང་ཆུབ་སེམས་དཔའ་དེ་དག་ཀྱང་སྟོང་པ་ཉིད་དང་
མཚན་མ་མེད་པ་ལ་སེམས་ཏེ། ཀྱེ་མའོ་སྡུག་བསྔལ་ལོ། །སྐྱེ་བ་དང་། རྒ་བ་དང་། ན་བ་དང་། འཆི་བ་སྡུག་བསྔལ་ལོ། །སྡུག་ཅིང་མཛའ་བ་དང་བྲལ་ཞིང་མི་སྡུག་ཅིང་མི་མཛའ་བ་དང་ཕྲད་པ་ནི་སྡུག་བསྔལ་ལོ། །
བསྟིར་མེད་པར་སྐྱེས་པ་ནི་སྡུག་བསྔལ་ལོ། །ཐིག་ནག་པོ་འདེབས་པར་སྐྱེས་པ་ནི་སྡུག་བསྔལ་ལོ། །སེམས་ཅན་ཡི་དགས་ཀྱི་གྲོང་ཁྱེར་དུ་སྐྱེས་པ་རྣམས་ནི་སྡུག་བསྔལ་ལོ་ཞེས་དེ་ལྟ་བུའི་ལུས་ལ་སྐྱོ་བ་དག་བསམས་

46-1-257b

ནས་དེའི་ཚེ་སྐྱིལ་མོ་ཀྲུང་བཅས་ཏེ། ལུས་དྲང་པོར་བསྲང་ནས་དྲན་པ་མངོན་པར་གཞག་སྟེ་རི་དེ་དག་ལ་གནས་སོ། །རིགས་ཀྱི་བུ་དེ་འདས་ནས་སྣ་ཚོགས་ཀྱི་རྒྱལ་པོ་ཞེས་བྱ་བའི་བ་སྤུའི་ཁུང་བུ་དེ་ན་རང་སངས་རྒྱས་བྱེ་བ་ཁྲག་ཁྲིག་
བརྒྱ་ཕྲག་སྟོང་དུ་མ་གནས་ཏེ་རབ་དེ་དག་ནི་འབ་དང་། གདུང་བ་དང་། ཆར་འབེབས་པ་དང་། གློག་གཏོང་བའི་ཆོ་འཕྲུལ་དག་བྱེད་དེ། བ་སྤུའི་ཁུང་བུ་དེ་ན་རིའི་རྒྱལ་པོ་བརྒྱ་ཕྲག་སྟོང་དག་ཡོད་དོ། །རིའི་རྒྱལ་པོ་དེ་དག་ཐམས་ཅད་
ཀྱང་རིན་པོ་ཆེ་སྣ་བདུན་ལས་བྱས་པའོ། །རིའི་རྒྱལ་པོ་དེ་དག་ལ་ཤིང་དཔག་བསམ་རྣམ་པ་སྣ་ཚོགས་པར་ཡོད་དེ། སྡོང་པོ་ནི་མུ་ཏིག་དམར་པོ་དང་། ལོ་མ་ནི་གསེར་དང་། དངུལ་ལས་བྱས་པའོ། །རིན་པོ་ཆེ་རྣམ་
པ་དུ་མ་དང་རྒྱན་རྣམ་པ་སྣ་ཚོགས་པ་དག་ནི་འཕྱང་ངོ་། །ཅོད་པན་དང་། རྣ་ཆ་དང་། ཕྲེང་བའི་ཆུན་པོ་དང་། དཔུང་རྒྱན་དང་། སེ་མོ་དོ་དང་། སེ་མོ་དོ་ཕྱེད་པ་དག་ཀྱང་རབ་ཏུ་འཕྱང་ངོ་། །ཡུལ་ཀ་ཤི་ཀ་ནས་བྱུང་བའི་གོས་དག་ཀྱང་རབ་ཏུ་
འཕྱང་ངོ་། །གསེར་དང་དངུལ་གྱི་དྲིལ་བུ་དག་ཀྱང་སྒྲ་སིལ་གྲག་སྟེ། དེ་འདྲ་བའི་རིའི་རྒྱལ་པོ་དེ་དག་ལ་རང་སངས་རྒྱས་དེ་དག་གནས་ཏེ། མདོ་དང་། དབྱངས་ཀྱིས་བསྙད་པ་དང་། ལུང་བསྟན་པ་དང་། ཚིགས་སུ་བཅད་པ་དང་། 
ཆེད་དུ་བརྗོད་པ་དང་། གླེང་གཞི་དང་། རྟོགས་པ་བརྗོད་པ་དང་། དེ་ལྟ་བུ་འདས་པ་དང་། སྐྱེས་པའི་རབས་དང་། ཤིན་དུ་རྒྱས་པ་དང་། ཆོས་རྨད་ཏུ་བྱུང་བ་དང་། ཆོས་གཏན་ལ་དབབ་པ་བསྟན་པའི་གཏམ་རྣམ་པ་དུ་མ་དག་ཕན་
ཚུན་དུ་སྨྲ་སྟེ། དེའི་ཚེ་སྒྲིབ་པ་ཐམས་ཅད་རྣམ་པར་སེལ་བ་བ་སྤུའི་ཁུང་བུ་དེ་འདས་ནས་ཐམས་ཅད་ཀྱི་ཐ་མ་ན་བ་སྤུའི་ཁུང་བུ་རྒྱལ་མཚན་གྱི་རྒྱལ་པོ་ཞེས་བྱ་བ་ཞིག་ཡོད་དེ། བ་སྤུའི་ཁུང་བུ་དེ་ཡང་དཔག་ཚད་བརྒྱད་ཁྲི་བཞི་
སྟོང་ཡོད་དོ། བ་སྤུའི་ཁུང་བུ་དེ་ན་རི་བརྒྱད་ཁྲི་བཞི་སྟོང་ཡོད་དེ། །རིན་པོ་ཆེ་སྣ་ཚོགས་ཀྱིས་བརྒྱན་པ་ཡིད་ཏུ་འོང་བ་རྣམ་པ་སྣ་ཚོགས་པའོ། །རིའི་རྒྱལ་པོ་དེ་ལ་ཤིང་དཔག་བསམས་བརྒྱ་ཕྲག་སྟོང་དུ་མ་ཡོད་དོ། །

46-1-258a

ཙན་དན་གྱི་ཤིང་བརྒྱ་ཕྲག་སྟོང་དུ་མ་ཡོད་དོ། །བྱི་རུའི་ཤིང་བརྒྱ་ཕྲག་སྟོང་དུ་མ་དག་ཡོད་དོ། །བ་སྤུའི་ཁུང་བུ་དེ་ནས་ནི་རྡོ་རྗེ་ལས་བྱས་པའོ། །བ་སྤུའི་ཁུང་བུ་དེ་ན་གསེར་དང་རིན་པོ་ཆེ་ལས་བྱས་པའི་ཁང་པ་
བརྩེག་མ་དགུ་ཁྲི་དགུ་སྟོང་ཡོད་དེ། མུ་ཏིག་དང་དར་གྱི་ལྡ་ལྡི་ནི་བྲེས། མུ་ཏིག་གི་སེ་མོ་དོ་ནི་སྤྱངས། དྲིལ་བུའི་ཕྲེང་བ་ནི་སྤྱངས། ཟླ་བ་བཞིན་དུ་བཟང་བའི་རིན་པོ་ཆེས་ནི་སྣང་བར་བྱས་ཏེ། ཁང་པ་བརྩེག་མ་དེ་ན་
གསེར་གྱི་སྐས་རིན་པོ་ཆེས་ཡོངས་སུ་སྤྲས་པ་རྣམ་པ་སྣ་ཚོགས་པ་དགའ་བར་བྱེད་པ་དག་ཀྱང་ཡོད་དོ། །ཁང་པ་བརྩེག་མ་དེ་དག་ན་དེ་བཞིན་གཤེགས་པའི་སྐུ་འཛམ་བུའི་གླིང་དུ་མངོན་པར་ཕྱོགས་ཤིང་ཆོས་འཆད་
པ་ཡང་བཞུགས་ཏེ། འདི་ལྟ་སྟེ། ཕ་རོལ་ཏུ་ཕྱིན་པ་དྲུག་བསྟན་པ་སྟོན་པར་མཛད་དེ། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་བསྟན་པ་སྟོན་པར་མཛད། ཚུལ་ཁྲིམས་ཀྱི་ཕ་རོལ་དུ་ཕྱིན་པ་བསྟན་པ་སྟོན་པར་
མཛད། བཟོད་པའི་ཕ་རོལ་དུ་ཕྱིན་པ་བསྟན་པ་སྟོན་པར་མཛད། བརྩོན་འགྲུས་ཀྱི་ཕ་རོལ་དུ་ཕྱིན་པ་བསྟན་པ་སྟོན་པར་མཛད། བསམ་གཏན་གྱི་ཕ་རོལ་དུ་ཕྱིན་པ་བསྟན་པ་སྟོན་པར་མཛད་ཤེས་རབ་ཀྱི་ཕ་རོལ་དུ་
ཕྱིན་པ་བསྟན་པ་སྟོན་པར་མཛད་དེ། དེ་ལྟར་དེ་དག་འཛམ་བུའི་གླིང་ན་གནས་པའི་མི་རྣམས་ལ་ཆོས་རྣམ་པ་སྣ་ཚོགས་དག་དུས་སུ་འཆད་དོ། །དེ་ལྟར་རིགས་ཀྱི་བུ་དེ་དག་གིས་བྱང་ཆུབ་སེམས་དཔའ་སེམས་དཔའ་
ཆེན་པོ་སྤྱན་རས་གཟིགས་ཀྱི་དབང་པོའི་བ་སྤུའི་ཁུང་བུ་དེ་དག་འཛེ་ཏའི་ཚལ་གྱི་གཙུག་ལག་ཁང་དུ་ཕྱིན་པའི་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། མི་དང་། མི་མ་ཡིན་
པ་དང་། དབང་ཕྱུག་ཆེན་པོ་དང་། མཐུ་བོ་ཆེ་ལ་སོགས་ཏེ་ལྷའི་བུ་ཚོགས་པ་དག་དང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མ་དག་གིས་མཐོང་ངོ་། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་

46-1-258b

རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བ་སྤུའི་ཁུང་བུ་གཞན་དག་མཆིས་སམ་མ་མཆིས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་འདས་ནས་བྱང་ཆུབ་སེམས་དཔའ་སེམས་དཔའ་
ཆེན་པོ་སྤྱན་རས་གཟིགས་ཀྱི་དབང་པོའི་རྐང་པ་གཡས་པའི་མཐེ་བོ་དེ་ལས་མཚོ་ཆེན་པོ་བཞི་འབྱུང་སྟེ་གཏིང་དཔོག་མི་ནུས་སོ། །གང་གི་ཚེ་ན་རྐང་པ་གཡས་པའི་མཐེ་བོ་ལས་ཆུ་འབྱུང་བ་དེའི་ཚེ་རྟ་གོད་མའི་གདོང་ལྟ་བུར་འབབ་སྟེ། དེའི་ཚེ་
ཐལ་བའི་ཕུང་པོར་འགྲོའོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བྱིན་གྱིས་བརླབས་ནི་དེ་འདྲའོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་
བས་འདི་སྐད་ཅེས་གསོལ་ཏོ། །བཅོམ་ལྡན་འདས་བ་སྤུའི་ཁུང་བུ་དེ་ཡང་མ་མཆིས་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ཡང་མེད་པ་ཡིན་ནོ། །དེ་ནས་བཅོམ་ལྡན་འདས་ལ་སྒྲིབ་པ་
ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་མཆི་འམ། བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་
རས་གཟིགས་ཀྱི་དབང་པོ་ནི་འཛེ་ཏའི་ཚལ་གྱི་གཙུག་ལག་ཁང་འདི་ཉིད་ཏུ་ང་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། དབང་ཕྱུག་ཆེན་པོ་རྒྱུ་དང་བཅས་ཏེ་ལུང་བསྟན་པའི་ཕྱིར་འོང་ངོ་། །དེ་ནས་བྱང་ཆུབ་སེམས་དཔའ་
སེམས་དཔའ་ཆེན་པོ་འཕགས་པ་སྤྱན་རས་གཟིགས་ཀྱི་དབང་པོས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ཤེལ་གྱི་ཁ་དོག་དང་། དངུལ་གྱི་ཁ་དོག་བཏང་ནས་ཁ་དོག་དེ་དག་འཛེ་ཏའི་ཚལ་གྱི་གཙུག་ལག་ཁང་དུ་
སོང་ངོ་སོང་ནས་བཅོམ་ལྡན་འདས་ལ་ལན་གསུམ་བསྐོར་ཏེ། བསྟིར་མེད་པའི་སེམས་ཅན་དམྱལ་བ་ཆེན་པོར་སོང་ངོ་། །སོང་ནས་བསྟིར་མེད་པའི་སེམས་ཅན་དམྱལ་བ་ཆེན་པོ་བསིལ་བར་གྱུར་ཏོ། །དེའི་ཚེ་འཛེ་ཏའི་ཚལ་གྱི་གཙུག་ལག་ཁང་དུ་

46-1-259a

ལྟས་བཟང་པོ་བྱུང་བར་གྱུར་པ་འཛེ་ཏའི་ཚལ་གྱི་གཙུག་ལག་ཁང་དེ་ལྷའི་གསེར་རིན་པོ་ཆེར་སྣང་བར་གྱུར་ཏེ། འཛེ་ཏའི་ཚལ་གྱི་གཙུག་ལག་ཁང་དེ་ལྟར་སྣང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་
དབང་པོ་བདེ་བ་ཅན་གྱི་འཇིག་རྟེན་གྱི་ཁམས་ནས་བྱུང་སྟེ། འཛེ་ཏའི་ཚལ་གྱི་གཙུག་ལག་ཁང་ག་ལ་བ་དེ་ལོགས་སུ་སོང་ནས་རིམ་གྱིས་འཛེ་ཏའི་ཚལ་གྱི་གཙུག་ལག་ཁང་ག་ལ་བ་དེར་ཕྱིན་ཏོ། །དེ་ནས་འཛེ་ཏའི་ཚལ་
གྱི་གཙུག་ལག་ཁང་དུ་སོང་བ་དང་། དེའི་ཚེ་བཅོམ་ལྡན་འདས་ཀྱིས་བྱ་ཀ་ལ་པིང་ཀའི་དབྱངས་ཀྱིས་བཀའ་སྩལ་པ། རིགས་ཀྱི་བུ་ཁྱོད་ང་ལ་ལམ། ཁྱོད་ཉོན་མོངས་སམ། ཁྱོད་ཀྱིས་སེམས་ཅན་ཡོངས་སུ་སྨིན་པར་བྱས་སམ་དེ་ནས་
བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཇི་ལྟར་བཀའ་སྩལ་པ་བཞིན་ཏེ། བདག་གིས་དེ་ལྟ་བུའི་ལས་ཀྱིས་བསྒྲུབས་
སོ། །དེ་ནས་བཅོམ་ལྡན་འདས་ཀྱིས་རིགས་ཀྱི་བུ་གང་ཁྱོད་ཀྱིས་དེ་འདྲ་བའི་ལས་ཀྱིས་བསྒྲུབས་པ་ལེགས་སོ་ལེགས་སོ། །ཞེས་བྱ་བ་བྱིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་
བཅོམ་ལྡན་འདས་ལ་མེ་ཏོག་པད་མ་ཕུལ་ནས། བཅོམ་ལྡན་འདས་ལ་དེ་བཞིན་གཤེགས་པ་སྣང་བ་མཐའ་ཡས་པས་མེ་ཏོག་པད་མ་འདི་དག་གསོལ་ཏེ་བསྙུང་བ་མ་མཆིས་སམ། འོ་བརྒྱལ་བ་མ་མཆིས་སམ། བཞེངས་པ་ཡང་ངམ་བདེ་
བ་ལ་རེག་པར་གནས་སམ་ཞེས་ཀྱང་གསུང་ངོ་ཞེས་སྨྲས་ནས། བཅོམ་ལྡན་འདས་ཀྱིས་བཞེས་ཏེ་གཡོན་ཕྱོགས་སུ་བཞག་གོ། །དེ་ནས་ལྷའི་བུ་དབང་ཕྱུག་ཆེན་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་
ཀྱི་ཞབས་ལ་མགོ་བོས་ཕྱག་འཚལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ལུང་སྟོན་པའི་བཤད་པ་ཐོབ་པར་མཛད་ཏུ་གསོལ། བཅོམ་ལྡན་འདས་ཀྱིས་བཀའ་སྩལ་པ། སོང་ཤིག་དང་ཁྱོད་ལ་བྱང་ཆུབ་སེམས་

46-1-259b

དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་ལུང་སྟོན་པར་འགྱུར་རོ། །དེ་ནས་ལྷའི་བུ་དབང་ཕྱུག་ཆེན་པོ་སོང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་རྐང་པ་ལ་ཕྱག་
འཚལ་ནས་སྤྱན་རས་གཟིགས་ཀྱི་དབང་ཕྱུག་ཆེན་པོ་ཆོས་འཛིན་པ། པད་མའི་ཞལ། པད་མ་ལ་དགྱེས་པ། ཕྱག་ན་མེ་ཏོག་པད་མ་བཟང་པོ་མངའ་བ། པད་མའི་དཔལ་དང་ལྡན་པ། ཡོངས་སུ་བསྐོར་བ་འགྲོ་བ་དབུགས་འབྱིན་
པར་མཛད་པ། སའི་སྤྱན་མཆོག་མཛད་པ། སིམ་པར་མཛད་པ་ལ་ཕྱག་འཚལ་ལོ་ཞེས་ལྷའི་བུ་དབང་ཕྱུག་ཆེན་པོས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་དེ་ལྟར་བསྟོད་ནས་ཁ་རོག་སྟེ་འདུག་པ་དང་། 
དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་དབང་ཕྱུག་ཆེན་པོ་དེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཅིའི་ཕྱིར་ཁ་རོག་སྟེ་འདུག །དེ་ནས་ལྷའི་བུ་དབང་ཕྱུག་ཆེན་པོས་འདི་སྐད་
ཅེས་སྨྲས་སོ། །བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་སྩལ་དུ་གསོལ། །དེ་ནས་བཅོམ་ལྡན་འདས་ཀྱིས་གསུངས་པ། རིགས་ཀྱི་བུ་ཁྱོད་འཇིག་རྟེན་གྱི་ཁམས་ཕྱེ་བ་ཞེས་བྱ་བར་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། 
སངས་རྒྱས་བཅོམ་ལྡན་འདས་དབང་ཕྱུག་ཅེས་བྱ་བར་འགྱུར་རོ། །དེ་ནས་ལྷ་མོ་ཨུ་མ་སོང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་རྐང་པ་ལ་མགོ་བོས་ཕྱག་འཚལ་ནས། 
བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་བསྟོད་པར་རྩོམ་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ཆེན་པོ་སྲོག་སྦྱིན་པར་མཛད་པ། སའི་སྤྱན་མཆོག་མཛད་

46-1-260a

པ། པད་མ་བཟང་པོ་ཕྱག་ན་མངའ་བ། པད་མའི་དཔལ་དང་ལྡན་པ། ཡོངས་སུ་བསྐོར་བ། མྱ་ངན་ལས་འདའ་བའི་ས་སྟོན་པ། ལེགས་པར་དགོངས་པར་མཛད་པ། ཆོས་འཛིན་པ། ལ་ཕྱག་འཚལ་ལོ་ཞེས་དེ་ལྟར་ལྷ་མོ་ཨུ་
མས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་བསྟོད་དེ་གསོལ་པ། བུད་མེད་ཀྱི་ལུས་སྨད་པ་ལས་བདག་ཡོངས་སུ་ཐར་བར་མཛད་དུ་གསོལ། མངལ་ན་གནས་ཤིང་ཤ་མ་གང་བའི་སྡུག་བསྔལ་བ་
དང་རྟག་ཏུ་འཛིན་པ་ལས་བདག་ཡོངས་སུ་ཐར་བར་མཛད་དུ་གསོལ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་དེ་ལ་འདི་སྐད་ཅེས་སྨྲས་སོ། །སྲིང་མོ་ཁྱོད་འཇིག་རྟེན་གྱི་ཁམས་གངས་ཀྱི་རིའི་གཡས་
ཕྱོགས་ཀྱི་ངོས་སུ་ཨུ་མའི་དབང་ཕྱུག་ཅེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་
སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་འབྱུང་བར་འགྱུར་རོ། །དེ་ནས་ལྷ་མོ་ཨུ་མས་ལུང་བསྟན་པ་ཐོབ་བོ། །ལྟོས་ཤིག་སྒྲིབ་པ་ཐམས་ཅད་རྣམ་པར་སེལ་བ་བྱང་ཆུབ་སེམས་དཔའ་སེམས་དཔའ་
ཆེན་པོ་སྤྱན་རས་གཟིགས་ཀྱི་དབང་པོས་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏེ། དབང་ཕྱུག་ཆེན་པོའི་ལེའུ་འདི་ཡང་བཤད་དོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་
སྐད་ཅེས་གསོལ་ཏོ། །བཅོམ་ལྡན་འདས་སྤྱན་རས་གཟིགས་ཀྱི་དབང་པོ་མཆིས་ཏེ། ལོང་བ་དག་གིས་ནི་མིག་ཐོབ་བོ། །དེ་རིང་བདག་ནི་ཚེའི་འབྲས་བུ་མཆིས་པར་གྱུར་ཏོ། །བདག་དེ་རིང་ནི་བསམ་པ་བཞིན་དུ་གྲུབ་བོ། །བདག་དེ་རིང་ནི་བསམ་པ་ཡོངས་
སུ་རྫོགས་སོ། །བདག་དེ་རིང་ནི་བྱང་ཆུབ་ཀྱི་ལམ་ལ་བར་ཆད་མ་མཆིས་པར་གྱུར་ཏོ། །ལེགས་པར་དགོངས་པ་ཆོས་ཀྱི་སྐུ་མྱ་ངན་ལས་འདས་པ་སྟོན་ཏོ། །དེ་ནས་བཅོམ་ལྡན་འདས་ལ་ཡང་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ་བཅོམ་

46-1-260b

ལྡན་འདས་དེ་རིང་བདག་ལ་སྤྱན་རས་གཟིགས་ཀྱི་དབང་པོའི་ཡོན་ཏན་གྱི་བྱེ་བྲག་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། སྒྲིབ་པ་ཐམས་ཅད་རྣམ་པར་སེལ་བ་འདི་ལྟ་སྟེ། དཔེར་ན་རིའི་རྒྱལ་པོ་ཁོར་ཡུག་དང་། ཁོར་ཡུག་ཆེན་པོ་
དང་། རིའི་རྒྱལ་པོ་མུ་ཙ་དི་དང་། རིའི་རྒྱལ་པོ་ཆེན་པོ་དང་། རིའི་རྒྱལ་པོ་གསུས་ཤོལ་དང་། རིའི་རྒྱལ་པོ་མི་སྟོན་པ་དང་། རིའི་རྒྱལ་པོ་ཐམས་ཅད་དུ་གཏོགས་པ་དང་། རིའི་རྒྱལ་པོ་འབར་བའི་ཁ་དང་། རིའི་རྒྱལ་པོ་རྩེ་མོ་བརྒྱ་པ་དང་། རིའི་རྒྱལ་པོ་ཁང་པ་དང་། 
རའི་རྒྱལ་པོ་ནོར་བུ་རིན་པོ་ཆེ་ཆེན་པོ་དང་། རིའི་རྒྱལ་པོ་སྟོན་པ་དང་། རིའི་རྒྱལ་པོ་དུས་མ་ཡིན་པར་སྟོན་པ་དང་། རིའི་རྒྱལ་པོ་དེ་དག་སྲང་གཅིག་ལ་བཏབ་ན། རིགས་ཀྱི་བུ་ངས་རིའི་རྒྱལ་པོ་དེ་དག་སྲང་འདི་སྙེད་ཅིག་གོ་ཞེས་སམ། སྲང་བརྒྱའོ་ཞེས་
སམ་སྲང་སྟོང་ངོ་ཞེས་སམ། བྱེ་བ་ཁྲག་ཁྲིག་བརྒྱ་ཕྲག་སྟོང་ཞེས་སམ། གྲངས་སུ་ཡང་། ཆར་ཡང་། བགྲང་བར་ཡང་ནུས་ཀྱི། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་བསོད་ནམས་ཀྱི་ཕུང་པོ་བགྲང་
མི་ནུས་སོ། །རིགས་ཀྱི་བུ་འདི་ལྟ་སྟེ། དཔེར་ན་རྡུལ་ཕྲ་རབ་ཀྱི་ཚད་ནི་ངས་བགྲང་ནུས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་ངས་བགྲང་བར་མི་ནུས་སོ། །རིགས་ཀྱི་བུ་
འདི་ལྟ་སྟེ། དཔེར་ན་རྒྱ་མཚོ་མཆིང་རྣམ་ཆེན་པོ་ནི་ངས་ཐེགས་པ་རེ་རེ་ནས་བགྲང་ནུས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་བགྲང་མི་ནུས་སོ། །རིགས་
ཀྱི་བུ་འདི་ལྟ་སྟེ་དཔེར་ན་ཤིང་ཤིར་ཤའི་ཚལ་ནི་ངས་འདབ་མ་རེ་རེ་ནས་བགྲང་ནུས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་བགྲང་བར་མི་ནུས་སོ། །སྒྲིབ་པ་ཐམས་ཅད་རྣམ་
པར་སེལ་བ་འདི་ལྟ་སྟེ། དཔེར་ན་རི་རབ་རིའི་རྒྱལ་པོ་ནི་གྲོ་གའི་ཕུང་པོར་གྱུར། རྒྱ་མཚོ་མཆིང་རྣམ་ཆེན་པོ་ན་སྣག་ཚར་གྱུར། གླིང་ཆེན་པོ་བཞི་ནི་གནས་པའི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དེ་དག་ཐམས་ཅད་ནི་ཡི་གེ་པར་གྱུར་ཏེ། 

46-1-261a

རིའི་རྒྱལ་པོ་མཐའ་ཡས་མུ་མེད་པ་ཡི་གེར་བྲིས་ཀྱང་ཡི་གེ་འབྲུམ་བུ་རེ་རེ་ནས་བགྲང་ནུས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་བགྲང་
མི་ནུས་སོ། །རིགས་ཀྱི་བུ་འདི་ལྟ་སྟེ། དཔེར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་ཕྲག་བཅུ་གཉིས་དང་མཉམ་པའི་ན་བཟའ་དང་། བཤོས་དང་། མལ་སྟན་དང་། ན་བའི་
རྐྱེན་གྱི་སྨན་གྱི་ཡོ་བྱད་ཐམས་ཅད་ཀྱིས་དེ་བཞིན་གཤེགས་པ་དེ་དག་ལ་བསྙེན་བཀུར་བྱས་ན། དེ་བཞིན་གཤེགས་པ་དེ་དག་ལ་བསྙེན་བཀུར་བྱས་པའི་བསོད་ནམས་ཀྱི་ཕུང་པོ་དེ་ནི་རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་
ཆེན་པོ་སྤྱན་རས་གཟིགས་ཀྱི་དབང་པོའི་སྐྲའི་ཉག་མ་གཅིག་གི་རྩེ་མོ་ལ་གནས་པའི་བསོད་ནམས་དང་མཉམ་མོ། །སྒྲིབ་པ་ཐམས་ཅད་རྣམ་པར་སེལ་བ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་
གཟིགས་ཀྱི་དབང་པོ་ནི་ཏིང་ངེ་འཛིན་བརྒྱ་ཕྲག་ཏུ་མ་དང་ལྡན་ཏེ། འདི་ལྟ་སྟེ། རབ་ཏུ་འཇོམ་ཞེས་བྱ་བའི་ཏིང་ངེ་འཛིན་དང་། རྒྱན་པར་བྱེད་ཅེས་བྱ་བའི་ཏིང་ངེ་འཛིན་དང་། རྒྱན་པར་མི་བྱེད་ཅེས་བྱ་བའི་ཏིང་ངེ་འཛིན་དང་། གློག་གི་སྤྱན་ཞེས་
བྱ་བའི་ཏིང་ངེ་འཛིན་དང་། བཟོད་པར་བྱེད་ཅེས་བྱ་བའི་ཏིང་ངེ་འཛིན་དང་། གཟི་ཅན་ཆེན་པོ་ཞེས་བྱ་བའི་ཏིང་ངེ་འཛིན་དང་། རྣམ་པར་བྱེད་ཅེས་བྱ་བའི་ཏིང་ངེ་འཛིན་དང་། རྡོ་རྗེའི་ཕྲེང་བ་ཞེས་བྱ་བའི་ཏིང་ངེ་འཛིན་དང་། དམ་པ་སྦྱིན་བྱེད་ཅེས་
བྱ་བའི་ཏིང་ངེ་འཛིན་དང་། མཐུ་བརྒྱ་པ་ཞེས་བྱ་བའི་ཏིང་ངེ་འཛིན་དང་། བཀོད་པ་མཐའ་ཡས་པ་ཤེས་བྱ་བའི་ཏིང་ངེ་འཛིན་དང་། སྤོབས་པའི་ཕུང་པོ་ཞེས་བྱ་བའི་ཏིང་ངེ་འཛིན་དང་། རྒྱལ་པོའི་དབང་པོ་ཞེས་བྱ་བའི་ཏིང་ངེ་འཛིན་དང་རྣམ་པ་
མང་པོ་ཞེས་བྱ་བའི་ཏིང་ངེ་འཛིན་དང་། རྡོ་རྗེའི་སྒོ་ཞེས་བྱ་བའི་ཏིང་ངེ་འཛིན་དང་། རྟག་ཏུ་དམ་པའི་སྦྱིན་བྱེད་ཅེས་བྱ་བའི་ཏིང་ངེ་འཛིན་དང་། དབང་པོ་ཡོངས་སུ་ཐར་བྱེད་ཅེས་བྱ་བའི་ཏིང་ངེ་འཛིན་དང་། ཞེ་སྡང་ཡོངས་སུ་ཐར་བྱེད་ཅེས་བྱ་བའི་

46-1-261b

ཏིང་ངེ་འཛིན་དང་། དབང་པོ་དམ་པའི་མིག་ཅེས་བྱ་བའི་ཏིང་ངེ་འཛིན་དང་། ཉིན་བྱེད་དམ་པའི་མིག་ཅེས་བྱ་བའི་ཏིང་ངེ་འཛིན་དང་། ཆོས་ལ་མངོན་པ་ཞེས་བྱ་བའི་ཏིང་ངེ་འཛིན་དང་། རྡོ་རྗེ་མངལ་ཞེས་བྱ་བའི་ཏིང་ངེ་འཛིན་དང་ཤིན་
དུ་སྟོན་པ་ཞེས་བྱ་བའི་ཏིང་ངེ་འཛིན་དང་། མྱ་ངན་འདའ་བྱེད་ཅེས་བྱ་བའི་ཏིང་ངེ་འཛིན་དང་། འོད་ཟེར་མཐའ་ཡས་སྒྲུབ་ཅེས་བྱ་བའི་ཏིང་ངེ་འཛིན་དང་། རྣལ་འབྱོར་ཅེས་བྱ་བའི་ཏིང་ངེ་འཛིན་དང་། འཐོར་བ་ཞེས་བྱ་བའི་ཏིང་ངེ་འཛིན་དང་། 
འཛམ་བུའི་གླིང་གི་དམ་པའི་མིག་ཅེས་བྱ་བའི་ཏིང་ངེ་འཛིན་དང་། སངས་རྒྱས་ཀྱི་ཞིང་གི་དམ་པའི་མིག་ཅེས་བྱ་བའི་ཏིང་ངེ་འཛིན་དང་། བྱ་བ་བྱས་པ་ལ་མངོན་པ་ཞེས་བྱ་བའི་ཏིང་ངེ་འཛིན་དང་། སྐྱེ་དགུའི་གནས་ཤེས་བྱ་བའི་ཏིང་ངེ་འཛིན་
དང་། མི་ཟད་པར་བྱེད་ཅེས་བྱ་བའི་ཏིང་ངེ་འཛིན་དང་། བསྟིར་མེད་སྐེམས་ཤེས་བྱ་བའི་ཏིང་ངེ་འཛིན་དང་། རྒྱ་མཚོ་ལྟར་ཟབ་པ་ཞེས་བྱ་བའི་ཏིང་ངེ་འཛིན་དང་། འཁོར་བརྒྱ་པ་ཞེས་བྱ་བའི་ཏིང་ངེ་འཛིན་དང་། རིགས་ཀྱི་བུ་བྱང་ཆུབ་སེམས་
དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནི་ཏིང་ངེ་འཛིན་དེ་དག་དང་ལྡན་ནོ། །སྒྲིབ་པ་ཐམས་ཅད་རྣམ་པར་སེལ་བ་འདི་ལྟ་སྟེ། ལོག་པར་དད་སེལ་ཅེས་བྱ་བའི་དེ་བཞིན་གཤེགས་པ་རིག་པ་དང་རྐང་པར་ལྡན་པ། བདེ་བར་
གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་བ་དེའི་ཚེ་དེའི་དུས་ནས་བྱང་ཆུབ་སེམས་དཔར་གྱུར་ཏེ། དེའི་ཚེ་དེ་
བཞིན་གཤེགས་པ་དེའི་སྤྱན་སྔར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཡོན་ཏན་བརྗོད་པ་དེ་ལྟ་བུ་ངས་ཐོས་སོ། །བྱང་ཆུབ་སེམས་དཔའ་ཀུན་དུ་བཟང་པོ་ལ་སོགས་པ་དང་འདི་འདྲ་བར་ཏིང་ངེ་
འཛིན་གྱིས་འགྱེས་པ་ཡང་ངས་མཐོང་ངོ་། །གང་གི་ཚེ་ན་ཀུན་དུ་བཟང་པོ་རྡོ་རྗེ་གྱེན་དུ་འཕགས་པའི་ཏིང་ངེ་འཛིན་ལ་ཞུགས་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་འཐོར་བ་ཞེས་བྱ་བའི་

46-1-262a

ཏིང་ངེ་འཛིན་ལ་ཞུགས་སོ། །གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་ཟླ་བ་དམ་པའི་མིག་ཅེས་བྱ་བའི་ཏིང་ངེ་འཛིན་ལ་ཞུགས་པ་དེའི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་
རས་གཟིགས་ཀྱི་དབང་པོ་ཉི་མ་དམ་པའི་མིག་ཅེས་བྱ་བའི་ཏིང་ངེ་འཛིན་ལ་ཞུགས་སོ། །གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་བྱུགས་པ་ཞེས་བྱ་བའི་ཏིང་ངེ་འཛིན་ལ་ཞུགས་པ་དེའི་ཚེ་བྱང་ཆུབ་སེམས་དཔའ་སེམས་
དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནམ་མཁའ་མཛོད་ཅེས་བྱ་བའི་ཏིང་ངེ་འཛིན་ལ་ཞུགས་སོ། །གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་རྣམ་པར་བྱེད་ཅེས་བྱ་བའི་ཏིང་ངེ་འཛིན་ལ་ཞུགས་པ་དེའི་ཚེ་བྱང་ཆུབ་སེམས་
དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་རྡོ་རྗེའི་ལྕགས་ཀྱུ་ཞེས་བྱ་བའི་ཏིང་ངེ་འཛིན་ལ་ཞུགས་སོ། །གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་དབང་པོའི་འགྲོས་ཤེས་བྱ་བའི་ཏིང་ངེ་
འཛིན་ལ་ཞུགས་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་རྒྱ་མཚོ་ལྟར་ཟབ་ཅེས་བྱ་བའི་ཏིང་ངེ་འཛིན་ལ་ཞུགས་སོ། །གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་
བཟང་པོ་སེང་གེ་གླལ་ཅེས་བྱ་བའི་ཏིང་ངེ་འཛིན་ལ་ཞུགས་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་སེང་གེ་རྣམ་པར་རོལ་ཅེས་བྱ་བའི་ཏིང་ངེ་འཛིན་ལ་ཞུགས་སོ། །གང་གི་ཚེ་ན་བྱང་ཆུབ་
སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་དམ་པ་སྦྱིན་པར་བྱེད་ཅེས་བྱ་བའི་ཏིང་ངེ་འཛིན་ལ་ཞུགས་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་བསྟིར་མེད་པ་སྐེམས་
ཤེས་བྱ་བའི་ཏིང་ངེ་འཛིན་ལ་ཞུགས་སོ། །གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་བ་སྤུའི་ཁུང་བུ་ཐམས་ཅད་འབྱེད་པར་བྱེད་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་

46-1-262b

གཟིགས་ཀྱི་དབང་པོ་ཡང་བ་སྤུའི་ཁུང་བུ་ཐམས་ཅད་འབྱེད་པར་བྱེད་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་སྤྱན་རས་
གཟིགས་ཀྱི་དབང་པོ་ཁྱོད་ཀྱི་སྤོབས་པ་དེ་འདྲ་བ་ལེགས་སོ་ལེགས་སོ་ཞེས་སྨྲས་སོ། །དེ་ནས་དེ་བཞིན་གཤེགས་པ་ལོག་པར་དད་སེལ་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་ལ་འདི་སྐད་ཅེས་བཀའ་སྩལ་
ཏོ། །རིགས་ཀྱི་བུ་ཁྱོད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་སྤོབས་པ་ཆུང་ཟད་ཅིག་མཐོང་དུ་ཟད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་
ཀྱི་དབང་པོའི་སྤོབས་པ་ཅི་འདྲ་བ་དེ་ལྟ་བུ་ནི་དེ་བཞིན་གཤེགས་པ་དག་ལ་ཡང་མི་མངའོ་ཞེས་ངས་ལོག་པར་དད་སེལ་ལས་དེ་སྐད་ཐོས་སོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །
བཅོམ་ལྡན་འདས་ཐེག་པ་ཆེན་པོའི་མདོའི་རྒྱལ་པོ་ཟ་མ་ཏོག་བཀོད་པ་བཤད་དུ་གསོལ། །དེའི་སླད་དུ་བདག་ཅག་ཆོས་ཀྱི་རོས་ངོམས་ཤིང་དགའ་བར་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། 
རིགས་ཀྱི་བུ་གང་དག་ཐེག་པ་ཆེན་པོའི་མདོའི་རྒྱལ་པོ་ཟ་མ་ཏོག་བཀོད་པའི་མིང་ཐོས་པ་དེ་དག་ལ་སྔོན་གྱི་ལས་ཀྱི་སྒྲིབ་པ་མེད་དོ། །གང་དག་ཕ་རོལ་ཀྱི་བུད་མེད་ལ་ཆགས་ཤིང་ཞེན་པའི་ལས་ལ་བརྩོན་པ་དང་། གང་ཕ་དང་མ་
གསོད་པ་དང་། དགྲ་བཅོམ་པ་གསོད་པ་དང་། མཆོད་རྟེན་འཇོམ་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་དང་། དེ་ལྟ་བུའི་སྡིག་པ་ལ་དགའ་བ་དག་ལ་ཡང་ཐེག་པ་ཆེན་པོའི་མདོའི་རྒྱལ་
པོ་ཟ་མ་ཏོག་བཀོད་པས་སྡིག་པ་ལས་ཐར་བར་བྱེད་དོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཇི་ལྟར་ཐེག་པ་ཆེན་པོའི་

46-1-263a

མདོ་ཟ་མ་ཏོག་བཀོད་པ་སྡིག་པ་ཐམས་ཅད་ལས་ཐར་བར་བགྱིད་པ་འཚལ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་རི་རབ་རིའི་རྒྱལ་པོའི་གཡས་ཕྱོགས་ཀྱི་ངོས་ལ་ཡང་དག་པར་རྫོགས་པའི་སངས་
རྒྱས་དྲུག་གིས་དྲི་མ་མེད་པའི་མཐར་བརྟགས་པ་ཡོད་དེ། དེ་ལྟར་ངས་ཀྱང་བརྟགས་སོ། །གང་གོས་དཀར་པོ་སྔོན་པོར་འགྱུར་བ་དང་། གང་གོས་སྔོན་པོ་དཀར་པོར་འགྱུར་བ་ནི། གང་གོས་དཀར་པོ་དེ་སྔོན་པོར་འགྱུར་བ་དེ་ནི་སྡིག་པའི་ཕུང་པོར་བལྟའོ། །
གང་གོས་སྔོན་པོ་དེ་དཀར་པོར་འགྱུར་བ་དེ་ནི་ཆོས་ཀྱི་ཕུང་པོར་བལྟའོ། །རིགས་ཀྱི་བུ་དེ་བཞིན་དུ་ཐེག་པ་ཆེན་པོའི་མདོའི་རྒྱལ་པོ་ཟ་མ་ཏོག་བཀོད་པ་དེ་ནི་སྡིག་པ་ཐམས་ཅད་སྲེག་ཅིང་དཀར་པོར་བྱེད་དོ། །སྒྲིབ་པ་ཐམས་ཅད་རྣམ་པར་
སེལ་བ་འདི་ལྟ་སྟེ། དཔེར་ན་དབྱར་ཀྱི་དུས་ཀྱི་ཚེ་རྩྭ་དང་ནགས་ཚལ་དག་ཤིན་དུ་སྔོ་བར་འགྱུར་ཏེ། དེ་ནས་ཀླུའི་རྒྱལ་པོ་ཁ་བརྒྱ་པ་ཞེས་བྱ་བ་གནས་ནས་ལངས་ཏེ་རྩྭ་དང་ཤིང་གེལ་པ་དང་སྨན་དང་ནགས་ཚལ་དག་སྲེག་པར་བྱེད་དོ། །རིགས་ཀྱི་བུ་
དེ་བཞིན་དུ་ཐེག་པ་ཆེན་པོའི་མདོའི་རྒྱལ་པོ་ཟ་མ་ཏོག་བཀོད་པ་འདི་ནི་སྡིག་པ་ཐམས་ཅད་སྲེག་པར་བྱེད་དོ། །གང་ཐེག་པ་ཆེན་པོའི་མདོའི་རྒྱལ་པོ་ཐོས་པའི་སེམས་ཅན་དེ་དག་ནི་བདེ་བ་དང་ལྡན་པ་ཡིན་ཏེ། རིགས་ཀྱི་བུ་དེ་དག་ནི་སོ་སོའི་
སྐྱེ་བོ་མ་ཡིན་པར་རིག་པར་བྱའོ། །བྱང་ཆུབ་སེམས་དཔའ་ཕྱིར་མི་ལྡོག་པ་དང་འདྲ་བར་བལྟའོ། །དེ་དག་འཆི་བའི་དུས་ཀྱི་ཚེ་དེ་བཞིན་གཤེགས་པ་བཅུ་གཉིས་གཤེགས་ཏེ། རིགས་ཀྱི་བུ་མ་འཇིགས་ཤིག་མ་འཇིགས་ཤིག །ཁྱོད་ཀྱིས་
ཐེག་པ་ཆེན་པོའི་མདོའི་རྒྱལ་པོ་ཐོས་སོ། །ཁྱོད་སླར་འཁོར་བར་མི་འཁོར་བར་འགྱུར་རོ། །སླར་སྐྱེ་བ་དང་རྒ་བ་དང་འཆི་བ་མི་མཐོང་བར་འགྱུར་རོ། །འགའ་ཞིག་འདོད་པ་དང་བྲལ་ལ་མི་དགའ་ཞིང་མི་འདོད་པ་དང་ཕྲད་པར་མི་འགྱུར་རོ། །
རིགས་ཀྱི་བུ་བདེ་བ་ཅན་གྱི་འཇིག་རྟེན་གྱི་ཁམས་སུ་སོང་ཞིང་དེ་བཞིན་གཤེགས་པ་སྣང་བ་མཐའ་ཡས་པ་ལས་དམ་པའི་ཆོས་ཐོས་པར་འགྱུར་རོ་ཞེས་དབུགས་འབྱིན་པར་མཛད་དེ། རིགས་ཀྱི་བུ་དེ་ལྟར་སེམས་ཅན་དེ་དག་

46-1-263b

བདེ་བར་མཆི་བར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་སོང་ངོ་། །དེ་ནས་སྒྲིབ་པ་ཐམས་ཅད་རྣམ་པར་སེལ་བ་
ཅང་མི་ཟེར་བར་འདུག་གོ། །ལྷ་དང་ཀླུ་དང་གནོད་སྦྱིན་དང་། ལྷ་མ་ཡིན་དང་ནམ་མཁའ་ལྡིང་དང་། མི་འམ་ཅི་དང་ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དེ་དག་ཐམས་ཅད་ཀྱང་དོང་ངོ་། །གང་གི་ཚེ་ན་དེ་དག་དོང་བ་དེའི་ཚེ་བཅོམ་ལྡན་འདས་ལ་ཚེ་
དང་ལྡན་པ་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གི་བསླབ་པའི་སྡོམ་པ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གང་དག་བསྙེན་པར་རྫོགས་པར་བྱེད་འདོད་པ་དེས་ཐོག་མ་ཁོ་
ནར་སོང་སྟེ་སྣ་ཚོགས་པ་དག་གི་གནས་བརྟག་པར་བྱའོ། །བརྟགས་ནས་དགེ་སློང་དག་ལ་བཙུན་པ་སྣ་ཚོགས་ཀྱི་གནས་ནི་དག་སྟེ། སྣ་ཚོགས་ཀྱི་གནས་དེ་ན་རུས་པ་ཡང་མ་མཆིས་སོ། །བཤང་གཅི་ཡང་མ་མཆིས་ཏེ། སྣ་ཚོགས་ཀྱི་
གནས་དེ་ནི་ཡོངས་སུ་དག་གོ། །དགེ་སློང་དག་ཀྱང་བསྙེན་པར་རྫོགས་པར་བགྱིར་རུང་ངོ་ཞེས་སྦྲན་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཚུལ་ཁྲིམས་དང་མི་ལྡན་པས་ནི་བསྙེན་པར་རྫོགས་པར་མི་བྱའོ། །གསོལ་པ་དང་
བཞི་པ་ཡང་སྦྱིན་པར་མི་བྱའོ། །བར་གྱི་གསོལ་བ་ཡང་མི་བྱའོ། །མང་དུ་བཤད་ཅི་དགོས་ཏེ། དགེ་སློང་དག་ཚུལ་ཁྲིམས་དང་མི་ལྡན་པའི་དགེ་སློང་གིས་ནི་སྣ་ཚོགས་ཀྱི་གནས་སུ་ཡང་འགྲོ་བར་མི་བྱ་ན་གསོལ་བ་དང་བཞི་བ་
བ་བལྟ་ཅི་སྨོས་ཏེ། དེ་དག་ནི་སྟོན་པའི་བསྟན་པ་འཇིག་པར་བྱེད་པའོ། །ཚུལ་ཁྲིམས་དང་མི་ལྡན་པ་དེ་དག་ནི་སྦྱིན་གནས་དག་གི་ནང་དུ་གནས་སྦྱིན་པར་མི་བྱའོ། །དེ་དག་ནི་གཙུག་ལག་ཁང་གི་ཕྱི་རོལ་དུ་གནས་སུ་གཞུག་
སྟེ། དེ་དག་ལ་དགེ་འདུན་གྱི་ཟས་ཀྱང་མི་སྦྱིན་ནོ། །དེ་དག་ལ་དགེ་འདུན་གྱིས་ཡང་འོས་པ་མ་ཡིན་ནོ། །དེ་དག་ལ་ནི་དགེ་སློང་གི་དངོས་པོ་ཆུང་ཟད་ཀྱང་མེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་དགའ་བོས་འདི་

46-1-264a

སྐད་ཅེས་གསོལ་ཏོ། །བཅོམ་ལྡན་འདས་གང་གི་ཚེ་ན་དེ་འདྲ་བའི་སྦྱིན་གནས་དག་འབྱུང་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ང་མྱ་ངན་ལས་འདས་ནས་ལོ་སུམ་བརྒྱ་ན་དེ་འདྲ་བའི་སྦྱིན་གནས་དག་འབྱུང་སྟེ། 
གང་གཙུག་ལག་ཁང་ལ་ཁྱིམ་དུ་འདུ་ཤེས་པར་འཛིན་པ་དེ་དག་ནི་བུ་ཕོ་དང་བུ་མོ་དག་གིས་ཡོངས་སུ་བསྐོར་བར་འགྱུར་རོ། །དེ་དག་ནི་དགེ་འདུན་གྱི་ཁྲི་དང་། ཁྲིའུ་དང་ཚང་ཐུར་དང་སྔས་དང་། མལ་སྟན་དག་ལ་སྤྱོད་པར་མ་འོས་པ་
ལ་སྤྱོད་པར་བྱེད་དོ། །དགེ་འདུན་དག་གི་ཉེ་བར་སྤྱོད་པ་ལ་བཤང་བ་དང་གཅི་བར་བྱེད་དོ། །མཆིལ་མ་དག་ཀྱང་འདོར་ཞིང་ལས་ཀྱི་རྣམ་པར་སྨིན་པ་མི་ཤེས་སོ། །གང་དགེ་འདུན་གྱི་ཉེ་བར་སྤྱོད་པ་ལ་མཆིལ་མ་འདོར་བ་དེ་དག་ནི་ལོ་བཅུ་གཉིས་
སུ་ཤིང་སཱ་ལའི་ཚལ་དུ་ཁ་ཁབ་ཀྱི་མིག་ཙམ་གྱི་སྲོག་ཆགས་སུ་སྐྱེའོ། །གང་དགེ་འདུན་གྱི་སོ་ཤིང་ལ་སྤྱོད་དུ་མ་འོས་པ་ལ་སྤྱོད་པ་དེ་དག་ནི་རུ་སྦལ་དང་། ཆུ་སྲིན་དང་ཉའི་ནང་དུ་སྐྱེའོ། །གང་དགེ་འདུན་གྱི་ཏིལ་དང་འབྲས་དང་རྒྱ་ཤུག་
དང་། ཀུ་ལན་ཐ་ལ་སོགས་པ་གང་སྤྱོད་པར་མ་འོས་པ་ལ་སྤྱོད་པ་དེ་དག་ནི་ཡི་དགས་ཀྱི་གྲོང་ཁྱེར་དུ་སྐྱེ་སྟེ། མགལ་བ་འདྲ་ཞིང་ཀིང་རུས་བསྒྲེང་བ་ལྟ་བུ་བདག་གི་སྐྲ་དང་སྤུས་ཁེབས་པ། ཁ་ཁབ་ཀྱི་མིག་ཙམ་དུ་གྱུར་པའི་སྡུག་
བསྔལ་དེ་དག་ལུས་ལ་མྱོང་བར་འགྱུར་རོ། །གང་དགེ་འདུན་གྱི་ཟས་ཀྱིས་ཁྱི་གསོ་བར་བྱེད་པ་དེ་དག་ནི་རིགས་དམའ་བར་སྐྱེ་བར་འགྱུར་རོ། །དབང་པོ་ཉམས་པར་འགྱུར་རོ། །སྒུར་པོ་དང་ཁྱོར་པོར་སྐྱེའོ། །གཞན་གྱི་བཞིན་ལ་ལྟ་
ཞིང་སློངས་མོ་བྱེད་པར་འགྱུར་རོ། །དེ་ནས་ཤི་འཕོས་ནས་ཀྱང་ནད་བུ་ཅན་དུ་འགྱུར་རོ། །ལུས་ལས་རྣག་དང་ཁྲག་འཛག་པར་འགྱུར་རོ། །ཆུ་བ་རྣམས་འཁུམས་པར་འགྱུར་རོ། །གང་གི་ཚེ་ན་ལངས་པ་དེ་ན་ཤ་རྣམས་ས་ལ་
ལྷགས་ཤིང་རུས་པ་རྣམས་སྣང་བར་འགྱུར་ཏེ། དེ་ལྟར་དེ་དག་ལོ་མང་པོར། ལོ་བརྒྱ་སྟོང་མང་པོར་ལུས་ཀྱི་སྡུག་བསྔལ་མྱོང་བར་འགྱུར་རོ། །གང་དགེ་འདུན་གྱི་ས་ལ་མི་འོས་པར་སྤྱོད་པ་དེ་དག་ནི་བསྐལ་པ་བཅུ་

46-1-264b

གཉིས་སུ་འོ་དོད་འབོད་པའི་སེམས་ཅན་དམྱལ་བ་ཆེན་པོར་སྐྱེ་སྟེ། ལྕགས་ཀྱི་ཐུ་ལུམ་བསྲེགས་པ་ཁར་བཅུག་ནས་མཆུ་དང་སོ་དག་ཀྱང་ལྷགས། རྐན་ཡང་གས་མགུལ་པ་ཡང་ཚིག །སྙིང་དང་རྒྱུ་མ་དག་ཀྱང་ཐམས་ཅད་དུ་ཐམས་
ཅད་ཚིག་ནས་རུས་པའི་ལྷག་མ་ལུས་པར་འགྱུར་ཏེ། དགེ་སློང་དག་དེའི་ཚེ་ལས་ཀྱི་རླུང་ལངས་ནས་ཤི་ནས་ཀྱང་སླར་འཚོའོ། །དེ་ནས་སླར་ཡང་གཤིན་རྗེ་སྐྱོང་བའི་སྐྱེས་བུས་བཟུང་ངོ་། །དེ་ནས་དེ་དག་གི་ལས་བདག་གིས་བྱ་བའི་ལས་
ཀྱི་དབང་གིས་ལྕེ་ཆེན་པོ་འབྱུང་བར་འགྱུར་ཞིང་ལྕེ་དེའི་སྟེང་དུ་གཤོལ་བརྒྱ་སྟོང་གིས་རྨོ་བར་འགྱུར་ཏེ། དེ་ལྟར་ལོ་བརྒྱ་ཕྲག་སྟོང་དུ་སེམས་ཅན་དམྱལ་བའི་སྡུག་བསྔལ་མྱོང་བར་འགྱུར་རོ། །དེ་ནས་ཤི་འཕོས་ནས་མེའི་རྫ་མའི་སེམས་
ཅན་དམྱལ་བ་ཆེན་པོར་སྐྱེས་ཏེ། དེ་ནས་གཤིན་རྗེ་སྐྱོང་བའི་སྐྱེས་བུ་དག་གིས་བཟུང་ནས་ལྕེ་དེ་ཉིད་ལ་ཁབ་བརྒྱ་སྟོང་གིས་འབིགས་པར་བྱེད་དོ། །དེ་ནས་ཀྱང་ལས་ཀྱི་དབང་གིས་སོས་ནས་མེའི་འོབས་སུ་འདོར་རོ། །མེའི་འོབས་
དེ་ནས་ཀྱང་ཕྱུང་ནས་ཆུ་བོ་བེའི་ད་ར་ནི་ཆེན་པོར་འདོར་རོ། །དེ་ནས་འཆི་བའི་དུས་བྱས་ནས་སེམས་ཅན་དམྱལ་བ་གཞན་དག་ཏུ་སྐྱེས་ཏེ། དེ་ལྟར་འཁྱམ་པ་ལས་བསྐལ་པ་གསུམ་ཟད་ནས་ཤི་འཕོས་ཏེ་འཛམ་བུ་གླིང་དུ་དབུལ་པོ་དང་། 
དམུས་ལོང་གི་ནང་དུ་སྐྱེ་བར་འགྱུར་རོ། །དགའ་བོ་དེ་ལྟ་བས་ན་དགེ་འདུན་དག་གི་རྫས་ནི་བསྲུང་བར་བྱའོ། །དགེ་སློང་དག་གང་བསླབ་པ་སྡོམ་པས་ཆོས་གོས་གསུམ་བཅང་བར་བྱ་སྟེ། ཆོས་གོས་གཅིག་ནི་དགེ་འདུན་ལ་ཡིད་
བརྟན་ཅིང་དགེ་འདུན་གྱིས་སྤྱད་པའི་ཕྱིར་རོ། །ཆོས་གོས་གཉིས་པ་ནི་རྒྱལ་པོའི་ཕོ་བྲང་དུ་འགྲོ་བའི་ཕྱིར་རོ། །ཆོས་གོས་གསུམ་པ་ནི་གྲོང་དང་། གྲོང་ཁྱེར་དང་གྲོང་འདབ་དང་། ཡེ་འུར་འཁོད་པ་དང་ཚོང་འདུས་དག་གི་ཕྱིར་ཏེ། 
དགེ་སློང་དག་གིས་ཆོས་གོས་དེ་གསུམ་བཅང་བར་བྱའོ། །གང་ཚུལ་ཁྲིམས་དང་ལྡན་པ་དང་ཡོན་ཏན་དང་ལྡན་པའི་དགེ་སློང་དག་གིས་ནི་དེས་བསླབ་ཚིགས་བཅས་པ་འདི་གཟུང་བར་བྱའོ། །དགེ་སློང་དག་དགེ་འདུན་གྱི་རྫས་ལ་

46-1-265a

སྤྱོད་པར་མི་འོས་པ་དག་གིས་ནི་ཡོངས་སུ་སྤྱད་པར་མི་བྱའོ། །དགེ་འདུན་གྱི་ནི་མེའི་འོབས་ལྟ་བུའོ། །དགེ་འདུན་གྱི་ནི་དུག་ལྟ་བུའོ། །དགེ་འདུན་གྱི་ནི་རྡོ་རྗེ་ལྟ་བུའོ། །དགེ་འདུན་གྱི་ནི་ཁུར་ལྟ་བུའོ། །དུག་ལ་ནི་གཉེན་པོ་བྱ་ནུས་
ཀྱི་དགེ་འདུན་གྱི་ལ་ནི་གཉེན་པོ་བྱ་མི་ནུས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པའི་བསླབ་ཚིགས་ལ་དགེ་སློང་གང་དག་འཛིན་པར་བགྱིད་
པ་ནི་སོ་སོར་ཐར་པའི་སྡོམ་པས་བསྡམས་པ་ལགས་སོ། །འདུལ་བ་ལ་མངོན་པ་ལགས་སོ། །བཅོམ་ལྡན་འདས་ཀྱི་བསླབ་ཚིགས་ཀྱི་རྗེས་སུ་བསྲུངས་པ་ལགས་སོ། །དེ་ནས་ཚེ་དང་ལྡན་པ་དགའ་བོས་བཅོམ་ལྡན་འདས་ཀྱི་
ཞབས་ལ་མགོ་བོས་ཕྱག་འཚལ་ཏེ་སོང་ངོ་། །དེ་ནས་ཉན་ཐོས་ཆེན་པོ་དེ་དག་བདག་བདག་གི་སངས་རྒྱས་ཀྱི་ཞིང་དུ་དོང་ངོ་། །ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་ནམ་མཁའ་ལྡིང་དང་། མི་འམ་ཅི་དང་ལྟོ་འཕྱེ་ཆེན་པོ་དང་། 
མི་དང་མི་མ་ཡིན་པ་དེ་དག་ཀྱང་དོང་ངོ་། །བཅོམ་ལྡན་འདས་དགྱེས་ཤིང་དེ་སྐད་ཅེས་བཀའ་སྩལ་པ་དང་། ཐམས་ཅད་ཡོད་པའི་འཁོར་དེ་དང་ལྷ་དང་མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་རྣམས་བཅོམ་
ལྡན་འདས་ཀྱིས་བཀའ་སྩལ་པ་ལ་མངོན་པར་དགའོ། །འཕགས་པ་ཟ་མ་ཏོག་བཀོད་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། རྒྱ་གར་སྐད་དུ།  ཨཱརྱ་རད་ན་ཀ་རཎ་ཌ་ནཱ་མ་མ་ཧཱ་ཡཱ་ན་སཱུ་ཏྲ།  
བོད་སྐད་དུ།  འཕགས་པ་དཀོན་མཆོག་གི་ཟ་མ་ཏོག་ཅེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། ཐམས་ཅད་མཁྱེན་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་ཡོད་
ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གིས་དགེ་འདུན་ཆེན་པོ་དང་བྱང་ཆུབ་སེམས་དཔའ་ཁྲི་དང་ཐབས་གཅིག་ཏུ་བཞུགས་ཏེ། ཡང་དེའི་ཚེ་བཅོམ་

46-1-265b

ལྡན་འདས་སྨིག་མའི་ལྡུམ་བུའི་འཁོར་གྱི་ཁྱམས་ན་འཁོར་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ཏེ་ཆོས་སྟོན་ཏོ། །དེ་ནས་འཇམ་དཔལ་གཞོན་ནུར་གྱུར་པ་བྱང་ཆུབ་སེམས་དཔའ་ལྔ་སྟོང་དང་ལྷན་ཅིག་
ཏུ་བརྒྱ་བྱིན་དང་ཚངས་པ་དང་། འཇིག་རྟེན་སྐྱོང་བ་རྣམས་ཀྱིས་ཡོངས་སུ་བསྐོར་ཅིང་མདུན་དུ་བདར་ཏེ། སྨིག་མའི་ལྡུམ་བུའི་འཁོར་གྱི་ཁྱམས་ག་ལ་བ་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་པ་དང་། བཅོམ་ལྡན་
འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བྱང་ཆུབ་སེམས་དཔའ་དེ་དག་དང་། བརྒྱ་བྱིན་དང་ཚངས་པ་དང་། འཇིག་རྟེན་སྐྱོང་བ་རྣམས་དང་ལྷན་ཅིག་ཏུ་
ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ད་ལྟར་ཅིའི་བཀའ་མཆིད་ཅིག་མཛད། བཅོམ་ལྡན་
འདས་བཀའ་མཆིད་དེ་ཉིད་ཀྱི་རྗེས་རྒྱུན་མི་འཆད་པར་མཛད་ཏུ་གསོལ། དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་རབ་འབྱོར་གྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ད་ལྟར་ནི་ཉན་
ཐོས་དང་ལྡན་པའི་བཀའ་མཆིད་མཛད་ན། འཇམ་དཔལ་བདག་གིས་ཁྱོད་ལ་བསྐུལ་གྱིས་བྱང་ཆུབ་སེམས་དཔའ་དང་ལྡན་པའི་བཀའ་མཆིད་བརྩམ་པར་ཁྱོད་སྤོབས་པར་གྱིས་ཤིག །འཇམ་དཔལ་གྱིས་སྨྲས་པ་ཚེ་དང་ལྡན་པ་རབ་
འབྱོར་ཉན་ཐོས་དང་། རང་སངས་རྒྱས་ཐམས་ཅད་ནི་བྱང་ཆུབ་སེམས་དཔའ་དང་ལྡན་པའི་གཏམ་གྱི་སྣོད་དུ་གྱུར་པ་མ་ཡིན་ན། བཙུན་པ་རབ་འབྱོར་བྱང་ཆུབ་སེམས་དཔའ་དང་ལྡན་པའི་གཏམ་ཅིར་དགོས། རབ་འབྱོར་གྱིས་སྨྲས་པ། འཇམ་དཔལ་འདིར་
གང་སྣོད་དུ་གྱུར་པ་འབྱུང་བ་དེ་དག་ལ་ཁྱོད་ཀྱིས་ཤོད་ཅིག །འཇམ་དཔལ་གྱིས་སྨྲས་པ། ཚེ་དང་ལྡན་པ་རབ་འབྱོར་འདི་ན་སྣོད་དུ་གྱུར་པ་ནི་གང་དག་ཡིན། སྣོད་དུ་མ་གྱུར་པ་ནི་གང་དག་ཡིན་ཤེས་སམ། རབ་འབྱོར་གྱིས་སྨྲས་པ། འཇམ་

46-1-266a

དཔལ་བདག་ནི་གཞན་གྱི་སྒྲའི་རྗེས་སུ་འབྲང་བ་ཡིན་པས་སྣོད་དང་སྣོད་མ་ཡིན་པ་ལྟ་ཅི་ཤེས་མོད་ཀྱི་འོན་ཀྱང་འཇམ་དཔལ་ཁྱོད་བྱང་ཆུབ་སེམས་དཔའ་དང་ལྡན་པའི་གཏམ་བརྩམ་པར་སྤོབས་པར་གྱིས་
ཤིག །འཇམ་དཔལ་གྱིས་སྨྲས་པ། བཙུན་པ་རབ་འབྱོར་གང་སུ་དག་སྐྱོན་མེད་པ་ལ་ཞུགས་པ་དེ་དག་ཐམས་ཅད་ནི་སངས་རྒྱས་ཀྱི་ཆོས་རྣམས་ཀྱི་སྣོད་དུ་མ་གྱུར་པའོ། །བཙུན་པ་རབ་འབྱོར་གང་དག་སྐྱོན་
མེད་པ་ལ་ཡང་རྟོག་ཅིང་སེམས་ཅན་རྣམས་ལ་ཡང་ལྟ་ལ་སྐྱོན་མེད་པར་ཡང་མི་ལྟུང་ཞིང་སྐྱོན་དང་ཡང་ལྷན་ཅིག་མི་གནས་པ་དེ་དག་ནི་སངས་རྒྱས་ཀྱི་ཆོས་རྣམས་ཀྱི་སྣོད་དུ་གྱུར་པའོ། །བཙུན་པ་རབ་འབྱོར་གཞན་ཡང་
གང་དག་མཚམས་ལ་གནས་པར་གྱུར་པ། སློབ་པ་དང་མི་སློབ་པའི་ཆོས་ལ་ཞུགས་པ། སེམས་ཅན་ཐམས་ཅད་ལ་བཏང་སྙོམས་པ། སྲིད་པ་ལ་མེ་འབར་བ་ལྟ་བུར་ལྟ་བ། ཡིད་ཡོངས་སུ་སྐྱོ་བ། ཁམས་གསུམ་
ཐམས་ཅད་ཀྱིས་སྐྲག་པ། སྐད་ཅིག་ཙམ་ཡང་སྲིད་པ་མངོན་པར་འགྲུབ་པར་མི་དགའ་བ་དེ་དག་ནི་སངས་རྒྱས་ཀྱི་ཆོས་རྣམས་ཀྱི་སྣོད་དུ་མ་གྱུར་པའོ། ། བཙུན་པ་རབ་འབྱོར་གང་དག་ཕྱི་མའི་མཐའི་བསྐལ་པ་བྱེ་བར་
གོ་ཆ་བགོས་པ། སྲིད་པ་ཐམས་ཅད་ཀྱིས་མི་འཇིག་མི་དངང་བ། ཁམས་གསུམ་སྤྱོད་ཡུལ་བ། དྲི་མ་གསུམ་དང་བྲལ་བ། འཁོར་བ་ལ་སྐྱེད་མོས་ཚལ་དང་གཞལ་མེད་ཁང་དུ་འདུ་ཤེས་པ། སྲིད་པ་འདོད་ཅིང་སྲིད་པ་
ཐམས་ཅད་ལ་ཆགས་པ་དང་བྲལ་བ་དེ་དག་ནི་སངས་རྒྱས་ཀྱི་ཆོས་རྣམས་ཀྱི་སྣོད་དུ་གྱུར་པའོ། །བཙུན་པ་རབ་འབྱོར་གཞན་ཡང་གང་དག་འདོད་ཆགས་དང་། ཞེ་སྡང་དང་། གཏི་མུག་དང་། བག་ལ་ཉལ་བ་དང་། ཀུན་ཏུ་དཀྲིས་ཏེ་
འདུག་པ་དང་། ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་སྤངས་པ་དེ་དག་ནི་སངས་རྒྱས་ཀྱི་ཆོས་རྣམས་ཀྱི་སྣོད་དུ་མ་གྱུར་པའོ། །བཙུན་པ་རབ་འབྱོར་གང་དག་འདོད་ཆགས་ཀྱིས་ཆགས་པ་ཡང་མ་ཡིན་ལ་འདོད་

46-1-266b

ཆགས་སྤྱོད་པར་ཡང་སྟོན་པ། ཞེ་སྡང་གིས་སྡང་བ་ཡང་མ་ཡིན་ལ་ཞེ་སྡང་སྤྱོད་པར་ཡང་སྟོན་པ། གཏི་མུག་གིས་རྨོངས་པ་ཡང་མ་ཡིན་ལ་གཏི་མུག་སྤྱོད་པར་ཡང་སྟོན་པ། ཉོན་མོངས་པ་དང་ཡང་བྲལ་ལ་ཁམས་གསུམ་དུ་ཡང་
སྣང་བ། སམས་ཅན་ཐམས་ཅད་ལ་བྱམས་པ། མ་ཁེངས་པ། མ་ཞུམ་པ། སེམས་ཅན་ཐམས་ཅད་ཀྱི་ཁུར་ཁྱེར་བ། དེ་བཞིན་ཉིད་ཀྱི་རྗེས་སུ་སོང་བ། དཀོན་མཆོག་གསུམ་གྱི་གདུང་མི་འཆད་པར་བྱ་བའི་ཕྱིར་ཞུགས་
པ། རིག་པ་གསུམ་དང་ལྡན་པ། རིག་པ་མངོན་དུ་གྱུར་པ་དེ་དག་ནི་སངས་རྒྱས་ཀྱི་ཆོས་རྣམས་ཀྱི་སྣོད་དུ་གྱུར་པའོ། །རབ་འབྱོར་གྱིས་སྨྲས་པ། འཇམ་དཔལ་གལ་ཏེ། ཆོས་ཀྱི་དབྱིངས་ཀྱང་གཅིག །དེ་བཞིན་ཉིད་ཀྱང་གཅིག །ཡང་
དག་པའི་མཐའ་ཡང་གཅིག་ན་སྣོད་དམ་སྣོད་མ་ཡིན་པ་དེ་ཇི་ལྟར་མངོན། འཇམ་དཔལ་གྱིས་སྨྲས་པ། བཙུན་པ་རབ་འབྱོར་འདི་ལྟ་སྟེ། དཔེར་ན་རྫ་མཁན་གྱིས་འཇིམ་པའི་གོང་བུ་གཅིག་ལས་སྣོད་རྣམ་པ་སྣ་ཚོགས་བྱས་ཏེ། སྣོད་དེ་ཐམས་ཅད་སོ་
གཅིག་ཏུ་བཏང་ན། དེ་ལ་ཁ་ཅིག་ནི་འབྲུ་མར་དང་མར་གྱི་སྣོད་དུ་འགྱུར། ཁ་ཅིག་ནི་སྦྲང་རྩི་དང་ལི་ཁ་རའི་སྣོད་དུ་འགྱུར། ཁ་ཅིག་ནི་ངན་པ་མི་གཙང་བའི་སྣོད་དུ་འགྱུར་ཏེ། འཇིམ་པའི་གོང་བུ་དེ་དང་སོ་བཏང་བ་ལ་ནི་ཐ་དད་པ་ཆུང་ཟད་ཀྱང་མེད་དོ། །བཙུན་
པ་རབ་འབྱོར་དེ་བཞིན་དུ་ཆོས་ཀྱི་དབྱིངས་ཀྱང་གཅིག །དེ་བཞིན་ཉིད་ཀྱང་གཅིག །ཡང་དག་པའི་མཐའ་ཡང་གཅིག་མོད་ཀྱི། ཇི་ལྟར་ལས་མངོན་པར་འདུ་བྱས་པ་བཞིན་དུ་སྣོད་ཀྱི་ཁྱད་པར་དུ་འགྱུར་རོ། །དེ་ལ་སྦྲང་རྩི་དང་། ལི་ཁ་རའི་སྣོད་ཇི་ལྟ་བ་དེ་
བཞིན་དུ་བྱང་ཆུབ་སེམས་དཔའ་ཐམས་ཅད་ལ་བལྟའོ། །འབྲུ་མར་དང་མར་གྱི་སྣོད་ཇི་ལྟ་བ་དེ་བཞིན་དུ་ཉན་ཐོས་དང་རང་སངས་རྒྱས་ཐམས་ཅད་ལ་བལྟའོ། །ངན་པ་མི་གཙང་བའི་སྣོད་ཇི་ལྟ་བ་དེ་བཞིན་དུ་བྱིས་པ་སོ་སོའི་སྐྱེ་བོ་ཐམས་ཅད་ལ་བལྟའོ། །
རབ་འབྱོར་གྱིས་སྨྲས་པ། འཇམ་དཔལ་རྣམ་གྲངས་གང་གིས་གང་དག་སྣོད་དུ་གྱུར་པ་དེ་དག་སྣོད་མ་ཡིན་པར་འགྱུར་བ་དང་། གང་དག་སྣོད་མ་ཡིན་པ་དེ་དག་སྣོད་དུ་གྱུར་པའི་རྣམ་གྲངས་ཡོད་དམ། འཇམ་དཔལ་གྱིས་སྨྲས་པ། བཙུན་པ་རབ་འབྱོར་

46-1-267a

ཡོད་དོ། །རབ་འབྱོར་གྱིས་སྨྲས་པ། རྣམ་གྲངས་གང་གིས་ན་གང་དག་སྣོད་དུ་གྱུར་པ་དེ་དག་སྣོད་མ་ཡིན་པར་འགྱུར་བ་དང་། གང་དག་སྣོད་མ་ཡིན་པ་དེ་དག་སྣོད་དུ་གྱུར་པ་ཡིན། འཇམ་དཔལ་གྱིས་སྨྲས་པ། བཙུན་པ་རབ་
འབྱོར་གང་ལ་ལ་ཉོན་མོངས་པ་ཐམས་ཅད་ཀྱི་སྣོད་དུ་གྱུར་པ་བག་ཆགས་ཀྱི་མཚམས་སྦྱོར་བ་མ་བཅོམ་པ་དེ་དག་ནི་སངས་རྒྱས་ཀྱི་ཆོས་རྣམས་ཀྱི་སྣོད་དུ་མ་གྱུར་པའོ། །བཙུན་པ་རབ་འབྱོར་གང་དག་ཉོན་མོངས་པ་ཐམས་ཅད་ཀྱི་སྣོད་
དུ་མ་གྱུར་པ་བག་ཆགས་ཀྱི་མཚམས་སྦྱོར་བ་བཅོམ་པ་དེ་དག་ནི་སངས་རྒྱས་ཀྱི་ཆོས་རྣམས་ཀྱི་སྣོད་དུ་གྱུར་པའོ། །རབ་འབྱོར་གྱིས་སྨྲས་པ། འཇམ་དཔལ་སྣོད་དུ་ཅི་ཞིག་གཞུག་པར་བྱ། འཇམ་དཔལ་གྱིས་སྨྲས་པ། བཙུན་པ་
རབ་འབྱོར་ཅི་ཡང་མ་ཡིན་ནོ། །དེ་ཅིའི་ཕྱིར་ཞེ་ན། གང་གི་ཚེ་བྱང་ཆུབ་སེམས་དཔའ་གཞུག་པ་མེད་པ་དང་། དབྱུང་བ་མེད་པ་ལ་སྤྱོད་པ་དེའི་ཚེ་སྣོད་ཀྱི་སྙིང་པོར་རིག་པར་བྱའོ། །གང་གི་ཚེ་གཞུག་པ་དང་དབྱུང་བ་ལ་སྤྱོད་པ་དེའི་ཚེ་སྣོད་ཆག་པར་
རིག་པར་བྱའོ། །བཙུན་པ་རབ་འབྱོར་འདི་ལྟ་སྟེ། དཔེར་ན་ནམཁའ་ནི་རྩྭ་དང་། ཤིང་གེལ་པ་དང་། སྨན་དང་། ནགས་ཚལ་ཐམས་ཅད་ཀྱི་སྣོད་ཅེས་ཀྱང་བྱ་ལ་གང་གི་སྣོད་ཀྱང་མ་ཡིན་ནོ། །བཙུན་པ་རབ་འབྱོར་དེ་བཞིན་དུ་བྱང་ཆུབ་སེམས་དཔའ་ཡང་
སངས་རྒྱས་ཀྱི་ཆོས་ཐམས་ཅད་ཀྱི་སྣོད་ཅེས་ཀྱང་བྱ་ལ་གང་གི་སྣོད་ཀྱང་མ་ཡིན་ནོ། །བཙུན་པ་རབ་འབྱོར་འདི་ལྟ་སྟེ། དཔེར་ན་ས་ལས་སྐྱེས་པའི་ཤིང་རྣམས་ནི་སྣོད་ནམ་མཁའ་ཡིན་པས་རྣམ་པར་སྐྱེའོ། །བཙུན་པ་རབ་འབྱོར་དེ་བཞིན་དུ་ལྷག་
པའི་བསམ་པ་ལས་སྐྱེས་པའི་བྱང་ཆུབ་སེམས་དཔའ་རྣམས་ཀྱང་སྣོད་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་པས་རྣམ་པར་སྐྱེའོ། །རབ་འབྱོར་གྱིས་སྨྲས་པ། འཇམ་དཔལ་ཅི་བྱང་ཆུབ་སེམས་དཔའ་རྣམ་པར་སྐྱེ་འམ། འཇམ་དཔལ་
གྱིས་སྨྲས་པ། བཙུན་པ་རབ་འབྱོར་གལ་ཏེ་ནམ་མཁའ་རྣམ་པར་སྐྱེ་ན། དེའི་ཕྱིར་བྱང་ཆུབ་སེམས་དཔའ་རྣམས་ཀྱང་རྣམ་པར་སྐྱེ་བ་ཞིག་ན། ནམ་མཁའ་ནི་རྣམ་པར་སྐྱེ་བ་འམ། ཡོངས་སུ་ཉམས་པར་མི་འགྱུར་ཏེ། བཙུན་པ་

46-1-267b

རབ་འབྱོར་དེ་བཞིན་དུ་བྱང་ཆུབ་སེམས་དཔའ་རྣམས་ཀྱང་རྣམ་པར་སྐྱེ་བར་ཡང་མི་འགྱུར། ཡོངས་སུ་ཉམས་པར་ཡང་མི་འགྱུར་རོ། །རབ་འབྱོར་གྱིས་སྨྲས་པ། འཇམ་དཔལ་བྱང་ཆུབ་སེམས་དཔའ་རྣམས་རྣམ་པར་
སྐྱེ་བར་ཡང་མི་འགྱུར། ཡོངས་སུ་ཉམས་པར་ཡང་མི་འགྱུར་ཞེས་བྱ་བ་ཅི་ལས་བསམས་ཏེ་དེ་སྐད་སྨྲས། འཇམ་དཔལ་གྱིས་སྨྲས་པ། ཉོན་མོངས་པ་རྣམ་པར་སྐྱེ་བར་ཡང་མི་འགྱུར། སངས་རྒྱས་ཀྱི་ཆོས་རྣམས་
ལས་ཡོངས་སུ་ཉམས་པར་ཡང་མི་འགྱུར་རོ། །རབ་འབྱོར་གྱིས་སྨྲས་པ། འཇམ་དཔལ་ཉོན་མོངས་པ་རྣམས་དང་། སངས་རྒྱས་ཀྱི་ཆོས་རྣམས་ལ་ཐ་དད་དུ་བྱ་བ་ཅི་ཡོད་འཇམ་དཔལ་གྱིས་སྨྲས་པ། བཙུན་པ་རབ་འབྱོར་
ཉོན་མོངས་པ་རྣམས་དང་། སངས་རྒྱས་ཀྱི་ཆོས་རྣམས་ལ་ཐ་དད་པར་བྱ་བ་ནི་ཆུང་ཟད་ཀྱང་མེད་དོ། །བཙུན་པ་རབ་འབྱོར་འདི་ལྟ་སྟེ། དཔེར་ན་རིའི་རྒྱལ་པོ་རི་རབ་ཀྱི་འོད་ཀྱིས་རེག་ན་གཟུགས་ཐམས་ཅད་འདི་ལྟ་སྟེ། གསེར་གྱི་ཁ་
དོག་དུ་ཁ་དོག་གཅིག་པར་འགྱུར་རོ། །བཙུན་པ་རབ་འབྱོར་དེ་བཞིན་དུ་ཤེས་རབ་དང་ཡེ་ཤེས་ཀྱི་སྣང་བར་བྱས་པའི་ཉོན་མོངས་པ་རྣམས་ཀྱང་འདི་ལྟ་སྟེ། སངས་རྒྱས་ཀྱི་ཆོས་རྣམས་ཀྱི་ཁ་དོག་དུ་ཁ་དོག་གཅིག་པར་འགྱུར་རོ། །
བཙུན་པ་རབ་འབྱོར་དེ་བས་ན་ཤེས་རབ་དང་ཡེ་ཤེས་ཀྱིས་སྣང་བར་བྱས་པའི་ཉོན་མོངས་པ་རྣམས་དང་། སངས་རྒྱས་ཀྱི་ཆོས་རྣམས་ལ་ནི་ཐ་དད་པ་ཆུང་ཟད་ཀྱང་མེད་དེ། དེ་བས་ན་ཆོས་ཐམས་ཅད་སངས་རྒྱས་ཀྱི་ཆོས་ཤེས་བྱའོ། །
རབ་འབྱོར་གྱིས་སྨྲས་པ། འཇམ་དཔལ་ཅིའི་ཕྱིར་ན་ཆོས་ཐམས་ཅད་སངས་རྒྱས་ཀྱི་ཆོས་ཤེས་བྱ། འཇམ་དཔལ་གྱིས་སྨྲས་པ། བཙུན་པ་རབ་འབྱོར་ཇི་ལྟ་བ་བཞིན་དུ་རྟོགས་པའི་ཕྱིར་རོ། །རབ་འབྱོར་གྱིས་སྨྲས་པ། འཇམ་
དཔལ་ཇི་ལྟ་བ་བཞིན་ཞེས་བྱ་བས་ཅི་ཞིག་བསྟན་པར་འགྱུར། འཇམ་དཔལ་གྱིས་སྨྲས་པ། ཐོགས་མ་ཇི་ལྟ་བར་ཐ་མར་ཡང་དེ་བཞིན་དུ་དེ་བཞིན་ཉིད་ལས་ཕྱིར་མི་ལྡོག་པས་དེའི་ཕྱིར་ཇི་ལྟ་བ་བཞིན་ཞེས་བྱའོ། །རབ་འབྱོར་

46-1-268a

གྱིས་སྨྲས་པ། འཇམ་དཔལ་ཐོག་མ་དང་ཐ་མ་ཞེས་བྱ་བས་ཅི་ཞིག་བསྟན་པར་འགྱུར། འཇམ་དཔལ་གྱིས་སྨྲས་པ། ཐོག་མ་ནི་སྟོང་པ་ཉིད། ཐ་མ་ནི་སྟོང་པ་ཉིད་དེ་བས་ན་ཐོག་མ་དང་ཐ་མ་ཞེས་བྱའོ། །རབ་འབྱོར་གྱིས་སྨྲས་
པ། འཇམ་དཔལ་སྟོང་པ་ཉིད་དང་། དབེན་པ་ཉིད་ལ་ཐ་དད་དུ་བྱ་བ་ཅི་ཡོད། འཇམ་དཔལ་གྱིས་སྨྲས་པ། བཙུན་པ་རབ་འབྱོར་འདི་ཇི་སྙམ་དུ་སེམས། གསེར་དང་ས་ལེ་སྦྲམ་ལ་ཐ་དད་དུ་བྱ་བ་ཡོད་དམ། རབ་འབྱོར་གྱིས་སྨྲས་པ། །འཇམ་དཔལ་མིང་དུ་
བཏགས་པ་ལ་ནི་ཐ་དད་པ་ཡོད་དོ། །འཇམ་དཔལ་གྱིས་སྨྲས་པ། །བཙུན་པ་རབ་འབྱོར་དེ་བཞིན་དུ་འདི་ལྟ་སྟེ། སྟོང་པ་ཉིད་དང་། དབེན་པ་ཉིད་འདི་ནི་མིང་དང་བརྡ་ཙམ་དུ་ཟད་དེ། མིང་དང་བརྡ་ལ་ནི་མཁས་པ་རྣམས་མངོན་པར་ཞེན་པ་མེད་ཀྱི། བྱིས་པ་རྣམས་
མངོན་པར་ཞེན་ཏོ། །རབ་འབྱོར་གྱིས་སྨྲས་པ། འཇམ་དཔལ་བྱིས་པའི་མཚན་ཉིད་ནི་ཇི་ལྟ་བུ། མཁས་པ་ཞེས་བྱ་བའི་མཚན་ཉིད་ནི་ཇི་ལྟ་བུ་ཡིན། འཇམ་དཔལ་གྱིས་སྨྲས་པ། བཙུན་པ་རབ་འབྱོར་བཅོམ་ལྡན་འདས་ཀྱིས་བྱིས་པ་ནི་ལས་ཀྱི་མཚན་
ཉིད་དོ། །མཁས་པ་ནི་ཆོས་ཀྱི་མཚན་ཉིད་དོ་ཞེས་གསུངས་སོ། །རབ་འབྱོར་གྱིས་སྨྲས་པ། འཇམ་དཔལ་ལས་ཀྱི་མཚན་ཉིད་ཇི་ལྟ་བུ་ཡིན། འཇམ་དཔལ་གྱིས་སྨྲས་པ། བཙུན་པ་རབ་འབྱོར་རྟེན་ཅིང་འབྲེལ་བར་འབྱུང་བའི་མཚན་ཉིད་ནི་ལས་ཏེ། 
དེ་ལ་གང་དག་མངོན་པར་འདུ་བྱེད་པ་དེ་དག་གི་ནི་ཡོད་པར་མངོན་ནོ། །གང་དག་མངོན་པར་འདུ་མི་བྱེད་པ་དེ་དག་གི་ནི་མེད་པར་མངོན་ནོ། །དེ་ལ་བྱིས་པ་རྣམས་ནི་མངོན་པར་འདུ་བྱེད་པས་དེ་དག་གི་ནི་ཡོད་པར་མངོན་ནོ། །མཁས་པ་རྣམས་ནི་
མངོན་པར་འདུ་མི་བྱེད་པས་དེ་དག་གི་ནི་མེད་པར་མངོན་ཏེ། དེ་ལ་གང་ཡོད་པ་དང་། གང་མེད་པའི་དབུས་དེ་ནི་འཕགས་པ་རྣམས་ཀྱི་སྤྱོད་ཡུལ་ལོ། །འཕགས་པའི་སྤྱོད་ཡུལ་གང་ཡིན་པ་དེ་ནི་འཕགས་པ་མ་ཡིན་པ་
རྣམས་ཀྱི་སྤྱོད་ཡུལ་མ་ཡིན་ནོ། །རབ་འབྱོར་གྱིས་སྨྲས་པ། འཇམ་དཔལ་འཕགས་པ་ཞེས་བྱ་བས་ཅི་ཞིག་བསྟན་པར་འགྱུར། འཇམ་དཔལ་གྱིས་སྨྲས་པ། བཙུན་པ་རབ་འབྱོར་འཕགས་པ་ཞེས་བྱ་བ་དེ་ནི་

46-1-268b

རྡུལ་མེད་ཅིང་ཉོན་མོངས་པ་མེད་པ་ལ་ཡང་དག་པར་འདུ་བའི་གཞིའོ། །རབ་འབྱོར་གྱིས་སྨྲས་པ། འཇམ་དཔལ་རྣམ་གྲངས་གང་གིས་ཆོས་ཐམས་ཅད་རྡུལ་མེད་ཅིང་། ཉོན་མོངས་པ་མེད་པ་ལ་ཡང་དག་པར་འདུ་བར་འགྱུར་
བའི་རྣམ་གྲངས་ཡོད་དམ། འཇམ་དཔལ་གྱིས་སྨྲས་པ། བཙུན་པ་རབ་འབྱོར་ཡོད་དོ། །རབ་འབྱོར་གྱིས་སྨྲས་པ། རྣམ་གྲངས་གང་ཡིན། འཇམ་དཔལ་གྱིས་སྨྲས་པ། བཙུན་པ་རབ་འབྱོར་འདི་ལྟ་སྟེ། དཔེར་ན་རྒྱ་མཚོ་
ཆེན་པོར་ཆུ་ཐམས་ཅད་ཡང་དག་པར་འདུ་སྟེ། དེ་ཡང་འདི་ལྟ་སྟེ། ལན་ཚྭའི་རོར་རོ་གཅིག་གོ། །བཙུན་པ་རབ་འབྱོར་དེ་བཞིན་དུ་ཆོས་ཐམས་ཅད་ཀྱང་རྡུལ་མེད་ཅིང་ཉོན་མོངས་པ་མེད་པ་ཡང་དག་པར་འདུ་ཞིང་། དེ་ཡང་འདི་ལྟ་སྟེ་
རྣམ་པར་གྲོལ་བའི་རོར་རོ་གཅིག་གོ། །རབ་འབྱོར་གྱིས་སྨྲས་པ། འཇམ་དཔལ་གང་ལས་རྣམ་པར་ཐར་བར་བྱ་བའི་ཕྱིར་རྣམ་པར་གྲོལ་བ་སྟོན། འཇམ་དཔལ་གྱིས་སྨྲས་པ། བཙུན་པ་རབ་འབྱོར་འདི་ཇི་སྙམ་དུ་སེམས། 
གང་ཡོད་ན་འཆིང་བར་འགྱུར། རབ་འབྱོར་གྱིས་སྨྲས་པ། འཇམ་དཔལ་མི་ཤེས་པ་ཡོད་ན་འཆིང་བར་འགྱུར་རོ། །འཇམ་དཔལ་གྱིས་སྨྲས་པ། བཙུན་པ་རབ་འབྱོར་དེ་བས་ན་མི་ཤེས་པ་ལས་རྣམ་པར་ཐར་བར་བྱ་བའི་ཕྱིར་
རྣམ་པར་གྲོལ་བ་བསྟན་ཏོ། །རབ་འབྱོར་གྱིས་སྨྲས་པ། འཇམ་དཔལ་ཆོས་ཐམས་ཅད་ལ་ཐ་དད་པར་བྱ་བ་མེད་ན་ཤེས་པ་འམ་མི་ཤེས་པར་ཇི་ལྟར་བསྟན། འཇམ་དཔལ་གྱིས་སྨྲས་པ། བཙུན་པ་རབ་འབྱོར་འདི་ལྟ་སྟེ། 
དཔེར་ན་དཔྱིད་ཀྱིས་བསྲོས་པའི་ཆུ་ལ་ནི་དྲོ་བ་ཞེས་བསྟན་ཏོ། །ཆུ་དེ་ཉིད་གྲང་བའི་དུས་སུ་ནི་གྲངས་ཞེས་བསྟན་ཏེ། །ཆུ་དེ་ལ་ནི་ཐ་དད་དུ་བྱ་བ་ཅུང་ཟད་ཀྱང་མེད་དོ། །བཙུན་པ་རབ་འབྱོར་དེ་བཞིན་དུ་ཚུལ་བཞིན་མ་ཡིན་
པའི་ཡིད་ལ་བྱེད་པས་བསྲོས་པའི་སེམས་ལ་ནི་མི་ཤེས་པ་ཞེས་བསྟན་ཏོ། །ཚུལ་བཞིན་ཡིད་ལ་བྱེད་པ་ལ་ནི་ཤེས་པ་ཞེས་བསྟན་ཏེ། དེ་ལ་ནང་གི་བྱེད་པའི་སྐྱེས་བུ་དེའི་ཤེས་པ་འམ། མི་ཤེས་པར་བསྟན་པ་ནི་གང་ཡང་མེད་དོ། །

46-1-269a

རབ་འབྱོར་གྱིས་སྨྲས་པ། འཇམ་དཔལ་དོན་དེ་ནི་རྟོགས་པར་དཀའ་བའོ། །འཇམ་དཔལ་གྱིས་སྨྲས་པ། བཙུན་པ་རབ་འབྱོར་གཉིས་ལ་སྤྱོད་པ་རྣམས་ཀྱིས་སོ། །རབ་འབྱོར་གྱིས་སྨྲས་པ། འཇམ་དཔལ་དོན་དེ་ནི་མཐོང་བར་
དཀའོ། །འཇམ་དཔལ་གྱིས་སྨྲས་པ། བཙུན་པ་རབ་འབྱོར་ཤེས་རབ་ཀྱི་མིག་དང་བྲལ་བ་རྣམས་ཀྱིས་སོ། །རབ་འབྱོར་གྱིས་སྨྲས་པ། འཇམ་དཔལ་དོན་དེ་ནི་གཏིང་དཔག་དཀའ་བའོ། །འཇམ་དཔལ་གྱིས་སྨྲས་པ། །
བཙུན་པ་རབ་འབྱོར་གཏིང་མ་རྙེད་པ་རྣམས་ཀྱིས་སོ། །རབ་འབྱོར་གྱིས་སྨྲས་པ། འཇམ་དཔལ་དོན་དེ་ནི་ཤེས་པར་དཀའ་བའོ། །འཇམ་དཔལ་གྱིས་སྨྲས་པ། བཙུན་པ་རབ་འབྱོར་ལྷག་པའི་ང་རྒྱལ་ཅན་རྣམས་ཀྱིས་
སོ། །རབ་འབྱོར་གྱིས་སྨྲས་པ། འཇམ་དཔལ་དོན་དེ་ནི་གོ་བར་དཀའ་བའོ། །འཇམ་དཔལ་གྱིས་སྨྲས་པ། བཙུན་པ་རབ་འབྱོར་བྱང་ཆུབ་ཀྱི་ཡན་ལག་དང་བྲལ་བ་རྣམས་ཀྱིས་སོ། །རབ་འབྱོར་གྱིས་སྨྲས་པ་འཇམ་
དཔལ་དོན་དེ་ནི་མོས་པར་དཀའ་བའོ། །འཇམ་དཔལ་གྱིས་སྨྲས་པ། བཙུན་པ་རབ་འབྱོར་ཀུན་གཞི་ལ་དགའ་བ་རྣམས་ཀྱིས་སོ། །རབ་འབྱོར་གྱིས་སྨྲས་པ། འཇམ་དཔལ་དོན་དེ་ནི་བརྟག་མི་ནུས་པའོ། །འཇམ་དཔལ་གྱིས་
སྨྲས་པ། འདི་ལྟར་དེར་མཚན་མ་ཀུན་དུ་མི་འབྱུང་ངོ་། །རབ་འབྱོར་གྱིས་སྨྲས་པ། འཇམ་དཔལ་དོན་དེ་ནི་རྟོག་གེའི་སྤྱོད་པ་མ་ཡིན་པའོ། །འཇམ་དཔལ་གྱིས་སྨྲས་པ། འདི་ལྟར་དེ་ལ་སོ་སོར་རྣམ་པར་རིག་པ་མེད་དོ། །རབ་
འབྱོར་གྱིས་སྨྲས་པ། འཇམ་དཔལ་དོན་དེ་ནི་མཆོག་ཏུ་འཕགས་པའོ། །འཇམ་དཔལ་གྱིས་སྨྲས་པ། འདི་ལྟར་དེ་ནི་བསྔོ་བའི་འདུ་ཤེས་དང་བྲལ་བའོ། །རབ་འབྱོར་གྱིས་སྨྲས་པ། འཇམ་དཔལ་དོན་དེ་ནི་མཁས་པ་དང་འཛངས་
པས་རིགས་པའོ། །འཇམ་དཔལ་གྱིས་སྨྲས་པ། འདི་ལྟར་དེ་ནི་བདག་ཉིད་ཀྱིས་རིག་པའོ། །རབ་འབྱོར་གྱིས་སྨྲས་པ། འཇམ་དཔལ་དེ་བཞིན་གཤེགས་པས་གང་དོན་དུ་ན་དོན་ནི་དོན་མ་ཡིན་པའོ་ཞེས་དེ་སྐད་བཤད་པ་ཚིག་དེའི་དགོངས་

46-1-269b

པའི་ཚིག་བཤད་པ་ཇི་ལྟ་བུ་ཡིན། འཇམ་དཔལ་གྱིས་སྨྲས་པ། བཙུན་པ་རབ་འབྱོར་དོན་ཅེས་བྱ་བ་ནི་བརྗོད་ཏུ་མེད་པའི་དོན་ཏོ། །དེ་ལ་གང་དག་བརྗོད་ཏུ་ཡོད་པའི་དོན་ལ་སྤྱོད་པ་དེ་དག་གི་དོན་ནི་དོན་མ་ཡིན་ཏེ། དེ་བས་ན་བཅོམ་ལྡན་འདས་ཀྱིས་དོན་དུ་ན་དོན་དེ་ནི་དོན་མ་
ཡིན་པའོ་ཞེས་དེ་སྐད་བཀའ་སྩལ་ཏོ། །གཞན་ཡང་བཙུན་པ་རབ་འབྱོར་དོན་ཅེས་བྱ་བ་ནི་དབེན་པའི་དོན་ཏོ། །དེ་ལ་གང་དག་ལུས་དང་། ངག་དང་། སེམས་དང་མཚུངས་པར་ལྡན་པའི་དོན་ལ་སྤྱོད་པ་དེ་དག་གི་དོན་ནི་དོན་མ་ཡིན་ཏེ། དེ་བས་ན་བཅོམ་ལྡན་འདས་
ཀྱི་དོན་དུ་ན་དོན་ནི་དོན་མ་ཡིན་པའོ་ཞེས་དེ་སྐད་ཅེས་བཀའ་སྩལ་ཏོ། །རབ་འབྱོར་གྱིས་སྨྲས་པ། འཇམ་དཔལ་ཆོས་ཐམས་ཅད་ཆོས་མ་ཡིན་པའོ་ཞེས་བཅོམ་ལྡན་འདས་ཀྱིས་ཅི་ལས་དགོངས་ཏེ་དེ་སྐད་བཀའ་སྩལ། འཇམ་
དཔལ་གྱིས་སྨྲས་པ། བཙུན་པ་རབ་འབྱོར་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་གཟིངས་དང་འདྲ་བར་ཤེས་པ་རྣམས་ཀྱིས་ཆོས་ཉིད་ཀྱང་སྤང་བར་བྱ་ན་ཆོས་མ་ཡིན་པ་ལྟ་ཅི་སྨོས་ཤེས་དེ་སྐད་ཅེས་བཀའ་སྩལ་ཏེ། གང་སྤང་བར་
བྱ་བ་དེ་ནི་ཆོས་དང་ཆོས་མ་ཡིན་པ་ཞེས་མི་བྱའོ། །རབ་འབྱོར་གྱིས་སྨྲས་པ། འཇམ་དཔལ་ཅི་སངས་རྒྱས་ཀྱི་ཆོས་རྣམས་ཀྱང་ཆོས་མ་ཡིན་ནམ། འཇམ་དཔལ་གྱིས་སྨྲས་པ། བཙུན་པ་རབ་འབྱོར་སངས་རྒྱས་ཀྱི་ཆོས་རྣམས་ལ་ནི་
ཡང་དག་པར་གྲུབ་པ་གང་ཡང་མེད་དོ། །གང་ཡང་དག་པར་གྲུབ་པ་མ་ཡིན་པ་དེ་ནི་ཆོས་དང་ཆོས་མ་ཡིན་པ་ཞེས་མི་བྱའོ། །དེ་བས་ན་བཅོམ་ལྡན་འདས་ཀྱིས་ཀྱང་ཆོས་ཐམས་ཅད་ནི་ཆོས་མ་ཡིན་པའོ་ཞེས་དེ་སྐད་ཅེས་བཀའ་
སྩལ་ཏོ། །རབ་འབྱོར་གྱིས་སྨྲས་པ། འཇམ་དཔལ་ལས་དང་པོ་པའི་བྱང་ཆུབ་སེམས་དཔའ་དག་བཤད་པ་འདི་ཐོས་ནས་མི་སྐྲག་མི་དངང་དངང་བར་མི་འགྱུར་བ་ནི་ངོ་མཚར་ཏོ། །འཇམ་དཔལ་གྱིས་སྨྲས་པ། བཙུན་པ་རབ་འབྱོར་འདི་ཇི་སྙམ་དུ་
སེམས། བརྒྱ་ལ་སེང་གེའི་ཕྲུ་གུས་སེང་གེའི་སྒྲ་ཐོས་ནས་སྐྲག་གམ། དངང་ངམ། །དངང་བར་འགྱུར་རམ། ངང་པའི་རྒྱལ་པོའི་ཕྲུ་གུ་ནམ་མཁའི་དཀྱིལ་ན་འཕུར་བ་ན་ངང་པའི་སྒྲ་ཐོས་ནས་སྐྲག་གམ། དངང་ངམ། །དངང་བར་འགྱུར་རམ། 

46-1-270a

རབ་འབྱོར་གྱིས་སྨྲས་པ། འཇམ་དཔལ་དེ་ནི་མ་ཡིན་ཏེ། སེང་གེའི་ཕྲུ་གུ་རང་གི་སྒྲ་དང་། ངང་པའི་རྒྱལ་པོའི་ཕྲུ་གུ་རང་གི་སྤྱོད་ཡུལ་གྱིས་མི་སྐྲག་གོ། །འཇམ་དཔལ་གྱིས་སྨྲས་པ། བཙུན་པ་རབ་འབྱོར་དེ་བཞིན་
དུ་དེ་བཞིན་གཤེགས་པའི་རིགས་དང་། གདུང་ལས་སྐྱེས་པའི་བྱང་ཆུབ་སེམས་དཔའ་དེ་བཞིན་ཉིད་དང་། སྟོང་པ་ཉིད་ལས་ངེས་པར་བྱུང་བ་དེ་རྣམས་ནི་ཆོས་ཐམས་ཅད་དང་། སྒྲ་ཐམས་ཅད་དང་། བཤད་པ་ཐམས་ཅད་
ཀྱིས་མི་སྐྲག་མི་དངང་དངང་བར་མི་འགྱུར་མོད་ཀྱི། བཙུན་པ་རབ་འབྱོར་འོན་ཀྱང་གང་ཡོད་ན་སྐྲག་པར་འགྱུར་ཤེས་སམ། རབ་འབྱོར་གྱིས་སྨྲས་པ། འཇམ་དཔལ་འཇིག་ཚོགས་ལ་ལྟ་བ་ཡོད་ན་སྐྲག་པར་འགྱུར་རོ། །
འཇམ་དཔལ་གྱིས་སྨྲས་པ། བཙུན་པ་རབ་འབྱོར་འཇིག་ཚོགས་ལ་ལྟ་བ་དེ་བྱང་ཆུབ་སེམས་དཔས་ཡོངས་སུ་ཤེས་ཏེ། དེ་བས་ན་ཆོས་ཐམས་ཅད་ཀྱིས་མི་སྐྲག་གོ། །དེ་སྒྲ་ཐམས་ཅད་དང་། བཤད་པ་ཐམས་ཅད་ཀྱིས་
མི་སྐྲག་མི་དངང་དངང་བར་མི་འགྱུར་རོ། །རབ་འབྱོར་གྱིས་སྨྲས་པ། འཇམ་དཔལ་གལ་ཏེ་བྱང་ཆུབ་སེམས་དཔས་འཇིག་ཚོགས་ལ་ལྟ་བ་ཡོངས་སུ་ཤེས་ན་དེ་ཇི་ལྟར་འབྲས་བུ་མ་ཐོབ། འཇམ་དཔལ་གྱིས་སྨྲས་པ། བཙུན་པ་
རབ་འབྱོར་བྱང་ཆུབ་སེམས་དཔའ་ནི་འབྲས་བུ་ཐོབ་པར་འདོད་པའི་ཕྱིར་འཇིག་ཚོགས་ལ་ལྟ་བ་ཡོངསུ་ཤེས་པ་མ་ཡིན་གྱི། འབྲས་བུ་འཐོབ་པ་ལ་བཏང་སྙོམས་སུ་བྱ་བ་དང་། སངས་རྒྱས་ཀྱི་ཆོས་ཐོབ་པར་འདོད་པའི་ཕྱིར་སེམས་
ཅན་ཐམས་ཅད་ལ་སྙིང་རྗེ་ཆེན་པོས་སྦྱོར་བའི་བྱང་ཆུབ་སེམས་དཔས་འཇིག་ཚོགས་ལ་ལྟ་བ་ཡོངས་སུ་ཤེས་ཏེ། དེ་བས་ན་འབྲས་བུ་མི་འཐོབ་བོ། །རབ་འབྱོར་གྱིས་སྨྲས་པ། འཇམ་དཔལ་བྱང་ཆུབ་སེམས་དཔའི་ཐབས་གང་གིས་བྱང་ཆུབ་སེམས་
དཔས་འཇིག་ཚོགས་ལ་ལྟ་བ་ཡོངས་སུ་ཤེས་ལ་འབྲས་བུ་ཡང་མི་འཐོབ་པ་དེ་ནི་ཐབས་ཆེན་པོ་ཡིན་ནོ། །འཇམ་དཔལ་གྱིས་སྨྲས་པ། བཙུན་པ་རབ་འབྱོར་འདི་ལྟར་བྱང་ཆུབ་སེམས་དཔའི་ཡེ་ཤེས་ཀྱི་དབྱིངས་ན་ཐབས་དང་ཤེས་རབ་

46-1-270b

ཀྱིས་ཡང་དག་པར་ཟིན་པ་སྟེ། དེ་བས་ན་བྱང་ཆུབ་སེམས་དཔའ་དེ་འཇིག་ཚོགས་ལ་བལྟ་བ་ཡང་ཡོངས་སུ་ཤེས་ལ་འབྲས་བུ་ཡང་མི་ཐོབ་བོ། །བཙུན་པ་རབ་འབྱོར་འདི་ལྟ་སྟེ། དཔེར་ན་སྐྱེས་བུ་ཆེན་པོ་ཆེ་ཞིག་གིས་མཚོན་ཆ་རྣོན་པོས་ཤིང་སཱ་
ལ་ཆེན་པོ་བཅད་ན། དེ་རིལ་གྱིས་ཆད་བཞིན་དུ་དེ་ཉིད་ན་འདུག་སྟེ་མི་འགྱེལ་ལོ། །བཙུན་པ་རབ་འབྱོར་དེ་བཞིན་དུ་བྱང་ཆུབ་སེམས་དཔའི་ཡེ་ཤེས་ཀྱི་དབྱིངས་ཀྱང་ཐབས་དང་ཤེས་རབ་ཀྱིས་ཡང་དག་པར་ཟིན་ཏེ། དེ་བས་ན་བྱང་ཆུབ་སེམས་དཔའ་
དེ་འཇིག་ཚོགས་ལ་ལྟ་བ་ཡང་ཡོངས་སུ་ཤེས་ལ་འབྲས་བུ་ཡང་མི་འཐོབ་བོ། །བཙུན་པ་རབ་འབྱོར་གང་ཤིང་སཱ་ལ་ཆེན་པོ་དེ་ཆར་པ་ཆེན་པོ་བབ་སྟེ་གཤེར་ཅིང་རླན་པར་གྱུར་ན་སླར་ཡང་སྐྱེ་ཞིང་ཡལ་ག་དང་། ལོ་མ་དང་། 
མེ་ཏོག་དང་། འབྲས་བུ་དག་ཀྱང་འབྱུང་ལ། གང་སེམས་ཅན་ཐམས་ཅད་ཀྱི་ཉེ་བར་འཚོ་བར་འགྱུར་བ་དེ་ལྟ་བུའི་དུས་དང་། དེ་ལྟ་བུའི་སྐབས་ཀྱང་ཡོད་དོ། །བཙུན་པ་རབ་འབྱོར་དེ་བཞིན་དུ་བྱམས་པ་ཆེན་པོ་དང་། སྙིང་རྗེ་ཆེན་པོས་
གཤེར་ཅིང་རླན་པའི་བྱང་ཆུབ་སེམས་དཔའ་ཡང་འཇིག་ཚོགས་ལ་བལྟ་བ་ཡང་ཡོངས་སུ་ཤེས་ལ་ཁམས་གསུམ་དུ་ཡང་སྐྱེ་ཞིང་གང་སེམས་ཅན་ཐམས་ཅད་ཀྱི་ཉེ་བར་འཚོ་བར་འགྱུར་བ་ཚེ་དང་། རིགས་དང་། སྐྱེ་བར་ཡང་སྟོན་པར་བྱེད་
དོ། །བཙུན་པ་རབ་འབྱོར་གང་ཤིང་སཱ་ལ་ཆེན་པོ་དེ་རླུང་ཆེན་པོའི་ཤུགས་ཀྱིས་ཕུལ་ན་ས་ལ་ལྟུང་བར་འགྱུར་བ་དེ་ལྟ་བུའི་དུས་དང་། དེ་ལྟ་བུའི་སྐབས་ཀྱང་ཡོད་དོ། །བཙུན་པ་རབ་འབྱོར་དེ་བཞིན་དུ་ཡེ་ཤེས་ཆེན་པོའི་རླུང་གི་ཤུགས་ཀྱིས་
ཕུལ་ན་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་འགོག་པར་ལྟུང་ངོ་། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ་ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་ཐབས་དང་ཤེས་
རབ་ཀྱིས་ཡང་དག་པར་ཟིན་པའི་ཡེ་ཤེས་ཀྱི་དབྱིངས་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་ལྡན་པའི་ཆོས་བསྟན་པ་དེ་ནི་ལེགས་པར་བཤད་དེ། ལེགས་སོ་ལེགསོ། །འཇམ་དཔལ་འོན་ཀྱང་དཔེ་གང་དག་བསྟན་པས་བྱང་ཆུབ་སེམས་དཔའི་ཐབས་

46-1-271a

དང་ཤེས་རབ་ཤེས་པར་འགྱུར་བའི་དཔེ་ངས་ཀྱང་བསྟན་གྱིས་ཉོན་ཅིག །འཇམ་དཔལ་འདི་ལྟ་སྟེ། དཔེར་ན་ཀླུའི་རྒྱལ་པོ་མཐུ་དང་ལྡན་པས་སེམས་པའི་དབང་གིས་སྤྲིན་གྱི་ཕུང་པོ་གཅིག་ལས་ཆར་པའི་བདག་ཉིད་དང་གློག་གི་
ཕྲེང་བ་ཡང་གཏོང་ངོ་། །སྐྱེ་བར་བྱེད་པའི་བདག་ཉིད་ཆུའི་རྒྱུན་ཀྱང་གཏོང་ངོ་། །འཇམ་དཔལ་དེ་བཞིན་དུ་བྱང་ཆུབ་སེམས་དཔའང་ཐབས་དང་ཤེས་རབ་དང་། ཡེ་ཤེས་ཀྱི་སྤྲིན་གཅིག་ལས་སེམས་ཅན་སོ་སོའི་སྐྱེ་བོ་རྣམས་
ཡོངས་སུ་སྨིན་པར་བྱ་བའི་ཕྱིར་བྱིས་པ་སོ་སོའི་སྐྱེ་བོ་ཐམས་ཅད་ཀྱི་སྤྱོད་པ་ཡང་སྟོན་ཏོ། །གདུལ་བར་བྱ་བའི་སེམས་ཅན་རྣམས་གདུལ་བའི་ཕྱིར་འཕགས་པ་ཐམས་ཅད་ཀྱི་སྤྱོད་པ་ཡང་སྟོན་ཏོ། །འཇམ་དཔལ་འདི་ལྟ་སྟེ། 
དཔེར་ན་རིའི་རྒྱལ་པོ་གངས་རི་ལ་དྲིའི་ཤིང་ཞིག་ཡོད་དེ། དེའི་རྩ་བའི་དྲི་ཡང་གཞན་སྡོང་པོའི་དྲི་ཡང་གཞན། ཡལ་གའི་དྲི་ཡང་གཞན། ལོ་མའི་དྲི་ཡང་གཞན། མེ་ཏོག་གི་དྲི་ཡང་གཞན། འབྲས་བུའི་དྲི་ཡང་གཞན་ནོ། །
འཇམ་དཔལ་དེ་བཞིན་དུ་དྲིའི་ཤིང་ལྟ་བུའི་བྱང་ཆུབ་སེམས་དཔའི་ལུས་དེ་ཡང་སེམས་ཅན་རྣམས་ཇི་ལྟར་མོས་པ་བཞིན་དུ་སོ་སོ་ཅི་རིགས་པར་ཆོས་ཀྱི་དྲི་གཏོང་སྟེ། སྙིང་རྗེ་ཆེན་པོའི་རྩ་བའི་དྲི་དེ་ལས་ཀྱང་མི་གཡོའོ། །འཇམ་
དཔལ་འདི་ལྟ་སྟེ། དཔེར་ན་བརྒྱ་བྱིན་ཐོགས་པའི་ནོར་བུ་རིན་པོ་ཆེ་ལྷ་རྣམས་ཀྱི་དབང་པོ་བརྒྱ་བྱིན་གྱི་མགུལ་དུ་ཐོགས་ན། དེ་ལ་སུམ་བཅུ་རྩ་གསུམ་གྱི་གནས་ཐམས་ཅད་དང་། ལྷ་རྣམས་ཀྱི་དབང་པོ་བརྒྱ་བྱིན་གྱི་དགའ་བ་དང་། 
རྩེ་བའི་ཚོགས་ཐམས་ཅད་སྣང་ཡང་ནོར་བུ་རིན་པོ་ཆེ་དེ་ནི་རྣམ་པར་མི་རྟོག་གོ། །འཇམ་དཔལ་དེ་བཞིན་དུ་ནོར་བུ་རིན་པོ་ཆེ་དག་པ་ལྟ་བུའི་བྱང་ཆུབ་སེམས་དཔའི་ཡེ་ཤེས་ཀྱི་དབྱིངས་དེ་ཡང་བྱ་བ་ཐམས་ཅད་ཀྱང་སྟོན་ལ། ཐམས་ཅད་དུ་ཡང་རྣམ་པར་
མི་རྟོག་གོ། །འཇམ་དཔལ་འདི་ལྟ་སྟེ། དཔེར་ན་ནོར་བུ་རིན་པོ་ཆེ་ཡིད་བཞིན་དུ་འགྲོ་བ་ཞེས་བྱ་བ་ཞིག་ཡོད་དེ། དེ་ནི་སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་ཡོངས་སུ་རྫོགས་པར་བྱེད་ཀྱང་ནོར་བུ་རིན་པོ་ཆེ་དེ་ནི་རྣམ་པར་མི་རྟོག་གོ། །འཇམ་

46-1-271b

དཔལ་དེ་བཞིན་དུ་ནོར་བུ་རིན་པོ་ཆེ་ལྟ་བུར་ལྷག་པའི་བསམ་པ་དག་པའི་བྱང་ཆུབ་སེམས་དཔའ་ཡང་སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་ཡོངས་སུ་རྫོགས་པར་བྱེད་ཀྱང་བྱང་ཆུབ་སེམས་དཔའ་དེ་ནི་རྣམ་པར་མི་རྟོག་གོ། །
འཇམ་དཔལ་འདི་ལྟ་སྟེ། དཔེར་ན་ནམ་མཁའ་ལ་མེ་ཡང་འབར་ཞིང་ཆར་པ་ཡང་འབབ་མོད་ཀྱི། ནམ་མཁའ་ལ་ནི་ཚ་བའང་མེད་གྲང་བར་འགྱུར་བ་འང་མེད་དོ། །འཇམ་དཔལ་དེ་བཞིན་དུ་ཐབས་མཁས་པའི་བྱང་ཆུབ་སེམས་དཔའ་ཡང་ཀུན་དུ་
འབར་བའི་ཁམས་གསུམ་ན་ཡང་གནས་ཤིང་མྱ་ངན་ལས་འདས་པའི་ཞི་བ་ལ་འང་སྤྱོད་མོད་ཀྱི། ཚ་བ་འང་མེད། གྲང་བར་འགྱུར་བའང་མེད་དོ། །འཇམ་དཔལ་འདི་ལྟ་སྟེ། དཔེར་ན་ནམ་མཁའ་ལ་དུག་གི་ཤིང་ཡང་སྐྱེ། སྨན་གྱི་ཤིང་ཡང་
སྐྱེ་མོད་ཀྱི། ནམ་མཁའ་ལ་ནི་དུག་གི་ཤིང་གིས་ཉོན་མོངས་པར་ཡང་མི་འགྱུར། སྨན་གྱི་ཤིང་གིས་རྣམ་པར་བྱང་བར་ཡང་མི་འགྱུར་རོ། །འཇམ་དཔལ་དེ་བཞིན་དུ་ཐབས་མཁས་པའི་བྱང་ཆུབ་སེམས་དཔའ་ཡང་དུག་གི་ཤིང་ལྟ་
བུའི་ཕུང་པོ་ཡང་འཆང་། སྨན་གྱི་ཤིང་ལྟ་བུའི་དབང་པོ་ཡང་འཆང་མོད་ཀྱི། ཕུང་པོའི་ཉོན་མོངས་པས་ཉོན་མོངས་པར་ཡང་མི་འགྱུར། རྣམ་པར་དག་པའི་དབང་པོས་རྣམ་པར་བྱང་བར་ཡང་མི་འགྱུར་ལ། གཉི་གའི་བྱ་བ་ཡང་བྱེད་དོ། །འཇམ་
དཔལ་འདི་ལྟ་སྟེ་དཔེར་ན་ཆུའི་སྣོད་བུ་གུ་བརྒྱ་ཡོད་པ་ལ། བུ་གུ་གཅིག་བཀག་ན་ཐམས་ཅད་ནས་མི་འཛག་གོ། །བུ་གུ་གཅིག་ཕྱེ་ན་ཐམས་ཅད་ནས་ཀྱང་འཛག་གོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་
མཉམ་པར་བཞག་པའི་ཚེ་མངོན་པར་ཤེས་པ་ཆེན་པོ་ལ་ཡོངས་སུ་རྫོགས་པར་བྱེད་ཀྱི་ཡུལ་ལ་མི་འཛག་གོ། །ཡང་ལངས་པ་ན་འདི་ལྟ་སྟེ། སེམས་ཅན་ཐམས་ཅད་ལ་སོ་སོ་ཇི་ལྟར་འོས་པར་ཆོས་བསྟན་པའི་ཕྱིར་ཡུལ་
ཐམས་ཅད་དུ་ཟག་གོ། །འཇམ་དཔལ་འདི་ལྟ་སྟེ་དཔེར་ན་མཆོག་ཏུ་མཐུ་དང་ལྡན་པའི་རྟ་ཅང་ཤེས་ནི་རྟ་ཞོན་པ་ལ་སྲུང་བར་བྱེད་དེ། བདག་ལ་ནི་དེ་ལྟ་མ་ཡིན་ནོ། །འཇམ་དཔལ་དེ་བཞིན་དུ་སྙིང་རྗེ་ཆེན་པོ་ཐོབ་པའི་བྱང་ཆུབ་སེམས་དཔའ་མཆོག་

46-1-272a

ཏུ་མཐུ་དང་ལྡན་པ་དག་ནི་སེམས་ཅན་རྣམས་ལ་སྲུང་བར་བྱེད་དེ། བདག་ལ་ནི་དེ་ལྟ་མ་ཡིན་ནོ། །འཇམ་དཔལ་འདི་ལྟ་སྟེ། དཔེར་ན་རི་དགས་ཀྱི་རྒྱལ་པོ་སེང་གེ་ནི་མེ་འབར་བ་མ་གཏོགས་པར་ཅིས་ཀྱང་མི་
འཇིགས་སོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་ཡང་ཉན་ཐོས་དང་། རང་སངས་རྒྱས་ཀྱི་སར་ལྟུང་བ་མ་གཏོགས་པར་ཅིས་ཀྱང་མི་འཇིགས་སོ། །འཇམ་དཔལ་འདི་ལྟ་སྟེ་དཔེར་ན་བལ་གླང་གི་
རྒྱལ་པོ་ས་སྲུང་གི་བུ་ནི་དུད་འགྲོའི་སྐྱེ་གནས་སུ་གཏོགས་མོད་ཀྱི། སུམ་བཅུ་རྩ་གསུམ་པའི་ལྷ་རྣམས་དང་། ལྷ་རྣམས་ཀྱི་དབང་པོ་བརྒྱ་བྱིན་གྱི་བསོད་ནམས་བསགས་པའི་ཕྱིར་དགའ་བ་དང་རྩེ་བའི་ཚོགས་
ཐམས་ཅད་སོ་སོ་ཅི་རིགས་པར་སྟོན་ཏོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་དུད་འགྲོའི་སྐྱེ་གནས་སུ་སོང་ཡང་འདི་ལྟ་སྟེ། སེམས་ཅན་རྣམས་སོ་སོ་ཅི་རིགས་པར་ཡོངས་སུ་སྨིན་པར་བྱ་བའི་
ཕྱིར་ཆོས་ཀྱི་ཚོགས་ཐམས་ཅད་སྟོན་ཏོ། །འཇམ་དཔལ་འདི་ལྟ་སྟེ། དཔེར་ན་གང་གཙུབ་སྟན་ལས་བྱུང་བ་དང་། གང་ནོར་བུ་རིན་པོ་ཆེ་ལས་བྱུང་བའི་མེ་དེ་གཉི་ག་ཡང་ཚ་བའི་བདག་ཉིད་དོ། །འཇམ་དཔལ་དེ་བཞིན་དུ་བྱང་
ཆུབ་སེམས་དཔའ་གང་སེམས་དང་པོ་བསྐྱེད་པ་དང་། གང་བྱང་ཆུབ་ཀྱི་སྙིང་པོ་ལ་འདུག་པའི་སེམས་ཐ་མ་བསྐྱེད་པ་དེ་གཉི་ག་ཡང་སེམས་ཅན་རྣམས་ཀྱི་ཉོན་མོངས་པ་སྲེག་པའི་བདག་ཉིད་དོ། །འཇམ་དཔལ་འདི་ལྟ་སྟེ་དཔེར་ན་དྲི་
འི་ཤིང་སྣ་ཚོགས་རྣམས་ནི་དེ་དག་ཐམས་ཅད་ཁམས་བཞིས་ཡོངས་སུ་བཟུང་སྟེ་སྐྱེའོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་སྣ་ཚོགས་ཀྱི་ཚོགས་བསགས་པ་དེ་དག་ཐམས་ཅད་ཀྱང་། བྱང་ཆུབ་
ཀྱི་སེམས་ཀྱིས་ཡོངས་སུ་བཟུང་ཞིང་ཐམས་ཅད་མཁྱེན་པ་ཉིད་དུ་བསྔོས་ན་སྐྱེའོ། །འཇམ་དཔལ་འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོའི་འཁོར་ལོ་རིན་པོ་ཆེ་གང་དུ་འགྲོ་བ་དེར་འཁོར་ལོས་སྒྱུར་བའི་རྒྱལ་པོའི་དཔུང་གི་

46-1-272b

ཚོགས་ཐམས་ཅད་འདོང་ངོ་། །འཇམ་དཔལ་དེ་བཞིན་དུ་བྱང་ཆུབ་སེམས་དཔའི་ཐབས་དང་ལྡན་པའི་ཤེས་རབ་ཀྱི་ཕ་རོལ་ཏུ་ཕྱིན་པ་གང་དུ་འགྲོ་བ་དེར་བྱང་ཆུབ་སེམས་དཔའི་བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་འདོང་ངོ་། །
འཇམ་དཔལ་འདི་ལྟ་སྟེ། དཔེར་ན་བྱའི་རྒྱལ་པོ་ཀ་ལ་པིང་ཀའི་ཕྲུ་གུ་སྒོང་ངའི་སྦུབས་ན་འདུག་པ་སྒོང་ང་མ་ཆག་ཅིང་སྦུབས་ནས་མ་བྱུང་ཡང་འདི་ལྟ་སྟེ། སྒྲ་ཡིད་ཏུ་འོང་བ་ཀ་ལ་པིང་ཀའི་སྒྲ་ཉིད་སྒྲོགས་སོ། །འཇམ་དཔལ་དེ་
བཞིན་དུ་བྱང་ཆུབ་སེམས་དཔའ་མ་རིག་པའི་སྒོ་ངའི་སྦུབས་སུ་ཞུགས་པ། འཇིག་ཚོགས་ལ་ལྟ་བ་མ་བཅོམ་པ། ཁམས་གསུམ་ནས་མངོན་པར་མ་བྱུང་ཡང་འདི་ལྟ་སྟེ། སྒྲ་སྟོང་པ་ཉིད་དང་། མཚན་མ་མེད་པ་དང་། སྨོན་པ་
མེད་པ་དང་། མངོན་པར་འདུ་བྱ་བ་མེད་པ་དང་། སངས་རྒྱས་ཀྱི་ཆོས་ཀྱི་སྒྲ་ཉིད་སྒྲོགས་སོ། །འཇམ་དཔལ་འདི་ལྟ་སྟེ་དཔེར་ན་ཀ་ལ་པིང་ཀ་རྨ་བྱའི་ནང་དུ་སོང་ན་ཀ་ལ་པིང་ཀའི་སྒྲ་མི་སྒྲོགས་སོ། །ཀ་ལ་པིང་ཀའི་ནང་དུ་སོང་ན་ནི་ཀ་ལ་པིང་ཀའི་
སྒྲ་སྒྲོགས་སོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་ཉན་ཐོས་དང་། རང་སངས་རྒྱས་ཀྱི་ནང་དུ་སོང་ན་སངས་རྒྱས་ཀྱི་ཆོས་བསམ་གྱིས་མི་ཁྱབ་པའི་སྒྲ་མི་སྒྲོགས་སོ། །བྱང་ཆུབ་སེམས་དཔའི་ནང་དུ་སོང་ན་ནི་སངས་རྒྱས་ཀྱི་ཆོས་
བསམ་གྱིས་མི་ཁྱབ་པའི་སྒྲ་སྒྲོགས་སོ། །འཇམ་དཔལ་འདི་ལྟ་སྟེ། དཔེར་ན་རྣམ་པར་འཐོར་རླུང་ནི་འཛམ་བུའི་གླིང་གི་ཤིང་ངམ། ཁང་པ་འམ། གཞལ་མེད་ཁང་ངམ། ས་ཕྱོགས་རྣམས་ཀྱིས་བཟོད་པར་མི་ནུས་སོ། །འཇམ་དཔལ་དེ་བཞིན་དུ་
སངས་རྒྱས་ཀྱི་ཆོས་བསམ་གྱིས་མི་ཁྱབ་པ་བྱང་ཆུབ་སེམས་དཔའ་རྣམས་ཡོངས་སུ་སྒྲོགས་པ་ན་སངས་རྒྱས་ཀྱི་བྱིན་གྱི་བརླབས་ཀྱིས་བྱིན་གྱིས་མ་བརླབས་པའི་ཉན་ཐོས་དང་། རང་སངས་རྒྱས་རྣམས་ཀྱིས་མོས་པའམ། དད་པར་མི་ནུས་
ཏེ་གང་དག་སངས་རྒྱས་ཀྱིས་བྱིན་གྱིས་བརླབས་པ་དེ་དག་ནི་མོས་ཤིང་ཡིད་ཆེས་སོ། །འཇམ་དཔལ་འདི་ལྟ་སྟེ། དཔེར་ན་ཉི་མའི་འོད་ནི་གཙང་བ་དང་མི་གཙང་བ་གཉི་ག་ལ་འཆར་མོད་ཀྱི། གཙང་བ་ལ་ཡང་རྗེས་སུ་ཆགས་པར་མི་བྱེད། མི་གཙང་བ་

46-1-273a

ལ་ཡང་ཁོང་ཁྲོ་བར་མི་བྱེད་དེ། ཉི་མའི་དཀྱིལ་འཁོར་ནི་གང་དུ་ཡང་བརྗོད་པར་བྱ་བ་མ་ཡིན་ནོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའི་ཡེ་ཤེས་ཀྱི་འོད་ཟེར་ཀྱང་ཉན་ཐོས་དང་། སོ་སོའི་སྐྱེ་བོ་ལ་འཆར་མོད་ཀྱི། ཉན་ཐོས་རྣམས་
ལ་རྗེས་སུ་ཆགས་པར་ཡང་མི་བྱེད། སོ་སོའི་སྐྱེ་བོ་རྣམས་ལ་ཁོང་ཁྲོ་བར་ཡང་མི་བྱེད། བྱང་ཆུབ་སེམས་དཔའ་ནི་གང་དུ་ཡང་བརྗོད་པར་བྱ་བ་མ་ཡིན་ནོ། །འཇམ་དཔལ་འདི་ལྟ་སྟེ། དཔེར་ན་ནམ་ཤིང་ཡོངས་འདུ་ས་བརྟོལ་གྱི་ལོ་མ་ལྷགས་པར་
གྱུར་པ་དེའི་ཚེ་སུམ་བཅུ་རྩ་གསུམ་པའི་ལྷ་རྣམས་རིང་པོར་མི་ཐོགས་པར་ཤིང་ཡོངས་འདུ་ས་བརྟོལ་འདི་མེ་ཏོག་དང་། འབྲས་བུ་དང་ལྡན་པར་འགྱུར་རོ་སྙམ་ནས་ཡིད་དགའ་བར་འགྱུར་རོ། །འཇམ་དཔལ་དེ་བཞིན་དུ་ནམ་བྱང་ཆུབ་སེམས་དཔའ་
བདོག་པ་ཐམས་ཅད་ཡོངས་སུ་གཏོང་བར་གྱུར་པ་དེའི་ཚེ་རིང་པོར་མི་ཐོགས་པར་བྱང་ཆུབ་སེམས་དཔའ་འདི་ནི་སེམས་ཅན་ཐམས་ཅད་ལ་སངས་རྒྱས་ཀྱི་ཆོས་ཀྱི་མེ་ཏོག་དང་། འབྲས་བུ་སྦྱིན་པར་འགྱུར་རོ་ཞེས་སངས་རྒྱས་བཅོམ་ལྡན་འདས་རྣམས་བསྟོད་
པར་འགྱུར་རོ། །འཇམ་དཔལ་འདི་ལྟ་སྟེ། དཔེར་ན་ཤིང་གང་དག་རླུང་གིས་བཏུད། ཀུན་དུ་བཏུད། རབ་ཏུ་བཏུད་པ་དེ་དག་འགྱེལ་བར་འཇིགས་པར་མེད་དོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་གང་དག་སེམས་ཅན་ཐམས་ཅད་ལ་འདུད། ཀུན་དུ་འདུད། 
རབ་ཏུ་འདུད་པ་དེ་དག་ཉན་ཐོས་དང་། རང་སངས་རྒྱས་ཀྱི་སར་ལྟུང་བར་འཇིགས་པ་མེད་དོ། །འཇམ་དཔལ་འདི་ལྟ་སྟེ། དཔེར་ན་ཆུ་ནི་གང་དུ་དམའ་བ་དེར་འབབ་བོ། །འཇམ་དཔལ་དེ་བཞིན་དུ་ང་རྒྱལ་མེད་པའི་བྱང་ཆུབ་སེམས་དཔའང་ཐམས་ཅད་མཁྱེན་པ་ཉིད་ག་ལ་བ་དེར་
འགྲོའོ། འཇམ་དཔལ་འདི་ལྟ་སྟེ། དཔེར་ན་ནམ་རྒྱ་མཚོ་ཆེན་པོ་དང་པོ་གནས་པ་དེའི་ཚེ་ས་ཆེན་པོ་ཐམས་ཅད་ཀྱི་ནང་ན་དམའ་བའི་ས་ཕྱོགས་དེར་དང་པོར་གནས་ཏེ། དེ་ནས་འབབ་ཆུའི་རྒྱུན་ཐམས་ཅད་ཚེགས་ཆུང་ངུས་དེར་མངོན་དུ་འབབ་པར་
འགྱུར་རོ། །འཇམ་དཔལ་དེ་བཞིན་དུ་ང་རྒྱལ་མེད་པའི་བྱང་ཆུབ་སེམས་དཔའ་དེ་ལ་ཚེགས་ཆུང་ངུས་སངས་རྒྱས་ཀྱི་ཆོས་ཐམས་ཅད་ཐམས་ཅད་དུ་མངོན་སུམ་དུ་འགྱུར་རོ། །འཇམ་དཔལ་འདི་ལྟ་སྟེ་དཔེར་ན་ནོར་བུ་རིན་པོ་ཆེ་རྡོ་རྗེས་ནོར་བུ་རིན་པོ་ཆེ་

46-1-273b

ཐམས་ཅད་འབིགས་མོད་ཀྱི། ནོར་བུ་རིན་པོ་ཆེ་རྡོ་རྗེ་དེ་ནི་དེ་དག་གིས་མི་ཕིགས་སོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་ཉན་ཐོས་དང་། རང་སངས་རྒྱས་རྣམས་འདུལ་མོད་ཀྱི་དེ་དག་གི་གདུལ་བ་དེར་ཡང་མི་ལྟུང་ངོ་། །འཇམ་དཔལ་འདི་ལྟ་
སྟེ་དཔེར་ན་མེ་ཏོག་མན་དཱ་ར་བ་རླུང་གིས་བསྐྱོད་ན་དཔག་ཚད་བརྒྱ་ཁོ་ར་ཁོར་ཡུག་ཏུ་དྲིས་ཁྱབ་བོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་འཕགས་པའི་ཡེ་ཤེས་ཀྱིས་བསྐྱོད་པ་ཡང་སེམས་ཅན་ཐམས་ཅད་ལ་བྱམས་པ་ཆེན་པོ་དང་། སྙིང་རྗེ་ཆེན་པོའི་
དྲིས་ཁྱབ་པར་བྱེད་དོ། །འཇམ་དཔལ་འདི་ལྟ་སྟེ་དཔེར་ན་གང་དག་མེ་ཏོག་མན་དཱ་ར་བའི་དྲི་བསྣོམ་པ་དེ་དག་ནི་ནད་ཐམས་ཅད་ཀྱིས་མི་འདེབས་སོ། །འཇམ་དཔལ་དེ་བཞིན་དུ་གང་དག་བྱང་ཆུབ་སེམས་དཔའི་བྱམས་པ་ཆེན་པོ་དང་སྙིང་རྗེ་ཆེན་པོའི་དྲི་བསྣོམ་པ་དེ་དག་
ཉོན་མོངས་པའི་ནད་ཐམས་ཅད་ཀྱིས་མི་ཚུགས་པར་འགྱུར་རོ། །འཇམ་དཔལ་འདི་ལྟ་སྟེ་དཔེར་ན་སངས་རྒྱས་འབྱུང་བ་མེད་ན་ཨུ་དུམ་བ་རའི་མེ་ཏོག་མི་འབྱུང་ངོ་། །འཇམ་དཔལ་དེ་བཞིན་དུ་བྱང་ཆུབ་ཏུ་སེམས་བསྐྱེད་པ་མེད་ན་སངས་
རྒྱས་ཀྱི་ཆོས་རྣམས་ཀྱི་མེ་ཏོག་ཀྱང་མི་འབྱུང་ངོ་། །འཇམ་དཔལ་འདི་ལྟ་སྟེ་དཔེར་ན་ནམ་ཀླུའི་རྒྱལ་པོ་མ་དྲོས་པ་ཆར་འབེབས་པ་དེའི་ཚེ། འཛམ་བུའི་གླིང་ཐམས་ཅད་ཁྱབ་པར་ཆར་འབེབས་སོ། །འཇམ་དཔལ་དེ་བཞིན་དུ་ནམ་བྱང་ཆུབ་སེམས་དཔའ་
དམ་པའི་ཆོས་ཀྱི་ཆར་འབེབས་པ་དེའི་ཚེ་སེམས་ཅན་ཐམས་ཅད་ཀྱི་སེམས་ཀྱི་རྒྱུད་ལ་མཉམ་པར་འབེབས་སོ། །འཇམ་དཔལ་འདི་ལྟ་སྟེ། དཔེར་ན་མཚོ་ཆེན་པོ་མ་དྲོས་པ་ལས་ཀླུང་གི་རྒྱུན་བཞི་འབབ་སྟེ། རྒྱ་མཚོ་ཆེན་པོ་བཞི་ཡོངས་སུ་འགེངས་
སོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་ཡང་བསྡུ་བའི་དངོས་པོ་བཞི་འབབ་པས་ཡེ་ཤེས་ཀྱི་རྒྱ་མཚོ་ཆེན་པོ་ཡོངས་སུ་རྫོགས་པར་བྱེད་དོ། །འཇམ་དཔའ་འདི་ལྟ་སྟེ། དཔེར་ན་རྒྱ་མཚོ་ཆེན་པོ་མེད་ན་འཛམ་བུའི་གླིང་གི་མི་རྣམས་ནོར་
བུ་རིན་པོ་ཆེ་ལ་སྤྱོད་པར་མི་འགྱུར་རོ། །འཇམ་དཔལ་དེ་བཞིན་དུ་སངས་རྒྱས་འབྱུང་བ་མེད་ན་ཉན་ཐོས་དང་རང་སངས་རྒྱས་ཐམས་ཅད་རྣམ་པར་གྲོལ་བའི་ཆོས་རིན་པོ་ཆེ་ལ་སྤྱོད་པར་མི་འགྱུར་རོ། །འཇམ་དཔལ་འདི་ལྟ་སྟེ་དཔེར་ན་གཟུགས་གང་ཅི་ཡང་རུང་སྟེ། 

46-1-274a

དེ་དག་ཐམས་ཅད་འབྱུང་བ་ཆེན་པོ་བཞིས་ཡོངས་སུ་བཟུང་ངོ་། །འཇམ་དཔལ་དེ་བཞིན་དུ་གང་བྱང་ཆུབ་སེམས་དཔའི་ཆོས་གང་ཅི་ཡང་རུང་སྟེ། དེ་དག་ཐམས་ཅད་བྱིན་གྱི་བརླབས་བཞིས་ཡོངས་སུ་བཟུང་ངོ་། །འཇམ་དཔལ་འདི་ལྟ་སྟེ་དཔེར་ན་
གཡང་ས་ཉམ་ང་བ་ན་འདུག་པའི་སྨན་གྱི་ཤིང་སྐྱེ་བོ་མང་པོའི་ཉེ་བར་འཚོ་བར་མི་འགྱུར་རོ། །འཇམ་དཔལ་དེ་བཞིན་དུ་ཉན་ཐོས་འཁོར་བས་འཇིགས་པའི་གཡང་ས་ཉམ་ང་བར་གནས་པ་རྣམས་ནི་སྐྱེ་བོ་མང་པོའི་ཉེ་བར་འཚོ་བར་མི་འགྱུར་རོ། །
འཇམ་དཔལ་འདི་ལྟ་སྟེ། དཔེར་ན་གྲོང་ཁྱེར་གྱི་ནང་ན་འདུག་པའི་སྨན་གྱི་ཤིང་ནི་སྐྱེ་བོ་མང་པོའི་ཉེ་བར་འཚོ་བར་འགྱུར་རོ། །འཇམ་དཔལ་དེ་བཞིན་དུ་བྱམས་པ་ཆེན་པོ་དང་སྙིང་རྗེ་ཆེན་པོའི་ནང་དུ་སོང་བའི་བྱང་ཆུབ་སེམས་དཔའ་ནི་ཐམས་ཅད་མཁྱེན་
པ་ཉིད་ཀྱི་སེམས་བསྐྱེད་པས་སེམས་ཅན་ཐམས་ཅད་ཀྱི་ཉེ་བར་འཚོ་བར་འགྱུར་རོ། །འཇམ་དཔལ་འདི་ལྟ་སྟེ་དཔེར་ན་གང་དབྱར་བྱུང་བའི་ཆུ་མིག་དེ་དག་ནི་ཡུན་རིང་དུ་གནས་པར་མི་འགྱུར་རོ། །འཇམ་དཔལ་དེ་བཞིན་དུ་གང་ཉན་ཐོས་
རྣམས་ཀྱིས་ཆོས་བསྟན་པ་དེ་ནི་ཡུན་རིང་དུ་གནས་པར་མི་འགྱུར་རོ། །འཇམ་དཔལ་འདི་ལྟ་སྟེ་དཔེར་ན་གང་དཔྱིད་བྱུང་བའི་ཆུ་མིག་དེ་ནི་ཡུན་རིང་དུ་གནས་པར་འགྱུར་རོ། །འཇམ་དཔལ་དེ་བཞིན་དུ་གང་བྱང་ཆུབ་སེམས་དཔའ་རྣམས་ཀྱི་ཆོས་བསྟན་པ་དེ་ནི་ཡུན་
རིང་དུ་གནས་པར་འགྱུར་རོ། །འཇམ་དཔལ་འདི་ལྟ་སྟེ་དཔེར་ན་རིའི་རྒྱལ་པོ་གངས་རིའི་ཤིང་གང་དག་བཅད་པ་དེ་དག་ནི་སླར་ཡང་མྱུར་དུ་སྐྱེའོ། །འཇམ་དཔལ་དེ་བཞིན་དུ་ནམ་དེ་བཞིན་གཤེགས་པས་བྱ་བ་བྱས་ཏེ་ཡོངས་སུ་མྱ་ངན་ལས་འདས་ཀྱང་དཀོན་
མཆོག་གསུམ་གྱི་གདུང་རྒྱུན་མི་འཆད་པར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་ལྟར་བྱང་ཆུབ་སེམས་དཔའི་ཡོན་ཏན་བསྔགས་པ་ཚད་མ་མཆིས་པ་དང་ལྡན་པ་དེ་དག་གི་
ཡང་དག་པའི་ཡོན་ཏན་བསྔགས་པ་འདི་ལྟ་བུ་འདི་དག་དེ་བཞིན་གཤེགས་པས་གསུངས་པ་ངོ་མཚར་ཏོ། །བཅོམ་ལྡན་འདས་བྱང་ཆུབ་སེམས་དཔའ་དེ་དག་ཡང་དག་པའི་ཡོན་ཏན་བསྔགས་པ་དེ་ལྟ་བུ་དེ་དག་ཐོས་ནས་དགའ་བར་མི་འགྱུར། རྒྱགས་པར་

46-1-274b

མི་འགྱུར་བ་དེ་འང་མཆོག་ཏུ་ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་བྱང་ཆུབ་སེམས་དཔའ་དེ་དག་ཐམས་ཅད་ནི་རྩ་བ་དག་པ་སྟེ། ཡང་དག་པའི་ཡོན་ཏན་དང་བསྔགས་པ་བརྗོད་པས་དགའ་བར་ཡང་མི་འགྱུར། རྒྱགས་
པར་ཡང་མི་འགྱུར་རོ། །རབ་འབྱོར་གྱིས་གསོལ་པ། བཅོམ་ལྡན་འདས་བྱང་ཆུབ་སེམས་དཔའ་རྣམས་རྩ་བ་གང་ལས་དག་པ་ལགས། བཀའ་སྩལ་པ། རབ་འབྱོར་བྱང་ཆུབ་སེམས་དཔའ་རྣམས་ནི་བདག་མེད་པའི་རྩ་བ་དང་། སེམས་ཅན་མེད་
པ་དང་། སྲོག་མེད་པ་དང་། གསོ་བ་མེད་པ་དང་། གང་ཟག་མེད་པའི་རྩ་བ་དང་། འཇིག་ཚོགས་ལ་ལྟ་བའི་རྩ་བ་དང་། མ་རིག་པ་དང་སྲིད་པའི་སྲེད་པའི་རྩ་བ་དང་། ང་དང་ངའི་ཞེས་བྱ་བའི་རྩ་བ་ལས་དག་གོ། །གསོལ་པ་བཅོམ་ལྡན་འདས་དག་པ་ཞེས་བགྱི་
བས་ཅི་ཞིག་བསྟན་པ་ལགས། བཀའ་སྩལ་པ། མ་བཟུང་མ་བཏང་བ་སྟེ། དེ་བས་ན་དག་པ་ཞེས་བྱའོ། །མ་སྐྱེས། མ་འགགས་མ་བརྟགས། རྣམ་པར་མ་བརྟགས། མ་ཕྱུང་མ་བཅུག །མ་བྱས་རྣམ་པར་མ་བྱས། མུན་པ་མ་ཡིན། སྣང་བ་མ་
ཡིན། ཀུན་ནས་ཉོན་མོངས་པ་མ་ཡིན། རྣམ་པར་བྱང་བ་མ་ཡིན། བཅིངས་པ་མ་ཡིན། ཐར་བ་མ་ཡིན། འཁོར་བ་མ་ཡིན། མྱ་ངན་ལས་འདས་པ་མ་ཡིན་ཏེ། དེ་བས་ན་དག་པ་ཞེས་བྱའོ། །གསོལ་པ་བཅོམ་ལྡན་འདས་གལ་ཏེ་འཁོར་བ་
ཡང་མ་ལགས། མྱ་ངན་ལས་འདས་པ་ཡང་མ་ལགས་ན་དེ་ལ་དག་པ་དེ་གང་ལགས། བཀའ་སྩལ་པ། རབ་འབྱོར་གང་མྱ་ངན་ལས་འདས་པར་ཡང་རློམ་སེམས་མེད་ལ་འཁོར་བ་ལ་མངོན་པར་ཞེན་པ་འང་མེད་པ་དེ་ཉིད་འདིར་དག་པའོ། །
རབ་འབྱོར་འདི་ལྟ་སྟེ། དཔེར་ན་ནམ་མཁའ་དག་པ་ཞེས་བྱ་ཡང་ནམ་མཁའ་ནི་དག་པ་ཡང་མ་ཡིན་ཀུན་ནས་ཉོན་མོངས་པ་འང་མ་ཡིན་ཏེ་འོན་ཀྱང་ནམ་མཁའ་ནི་དག་པ་ཞེས་བྱའོ། །རབ་འབྱོར་དེ་བཞིན་དུ་མྱ་ངན་ལས་འདས་པ་དག་པ་ཞེས་
བྱ་ཡང་མྱ་ངན་ལས་འདས་པ་ནི་དག་པ་འང་མ་ཡིན་ཀུན་ནས་ཉོན་མོངས་པ་འང་མ་ཡིན་ཏེ་འོན་ཀྱང་མྱ་ངན་ལས་འདས་པ་དག་པ་ཞེས་བྱའོ། །རབ་འབྱོར་འདི་ཅི་སྙམ་དུ་སེམས། ཁྱོད་ཅི་དག་པ་ཡིན་ནམ། གསོལ་པ་བཅོམ་ལྡན་འདས་ནམ་

46-1-275a

ཀུན་ནས་ཉོན་མོངས་པ་མ་མཆིས་པ་དེའི་ཚེ་བདག་དག་པའོ། །བཀའ་སྩལ་པ། རབ་འབྱོར་ཁྱོད་ཀྱི་ཀུན་ནས་ཉོན་མོངས་པ་མེད་པའི་རྣམ་པར་དག་པ་གང་ཡིན། རབ་འབྱོར་གྱིས་གསོལ་པ། བཅོམ་ལྡན་འདས་ཆོས་ཀྱི་དབྱིངས་ནི་རང་
བཞིན་གྱིས་ཡོངས་སུ་དག་པ་སྟེ། བདག་གིས་དེ་ཡོངས་སུ་རྟོགས་པས་དེའི་སླད་དུ་ཡོངས་སུ་དག་གོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་ཆོས་ཀྱི་དབྱིངས་ཡོངས་སུ་ཤེས་པར་ནུས་སམ། རབ་འབྱོར་གྱིས་གསོལ་པ། བཅོམ་
ལྡན་འདས་གལ་ཏེ་ཆོས་ཀྱི་དབྱིངས་མ་གཏོགས་པར་ཆོས་གཞན་འགའ་ཞིག་མཆིས་ན་ནི་དེས་ཆོས་ཀྱི་དབྱིངས་ཡོངས་སུ་འཚལ་བར་འགྱུར་གྱི། ཆོས་ཀྱི་དབྱིངས་ཉིད་ཀྱིས་ནི་ཆོས་ཀྱི་དབྱིངས་ཡོངས་སུ་མི་འཚལ་ཏོ། །བཅོམ་ལྡན་འདས་ཀྱིས་
བཀའ་སྩལ་པ། རབ་འབྱོར་གལ་ཏེ་ཆོས་ཀྱི་དབྱིངས་མ་གཏོགས་པར་གང་ཆོས་ཀྱི་དབྱིངས་ཡོངས་སུ་ཤེས་པའི་ཆོས་དེ་ཡང་མེད་ན་ཆོས་ཀྱི་དབྱིངས་དེ་ཁྱོད་ཀྱིས་ཇི་ལྟར་ཡོངས་སུ་ཤེས། དེ་སྐད་ཅེས་བཀའ་སྩལ་པ་དང་ཚེ་དང་ལྡན་པ་རབ་འབྱོར་ཅང་མི་
སྨྲ་བར་གྱུར་ཏོ།། །། བམ་པོ་གཉིས་པ། དེ་ནས་འཇམ་དཔལ་གཞོན་ནུར་གྱུར་པས་ཚེ་དང་ལྡན་པ་རབ་འབྱོར་ཅང་མི་སྨྲ་བར་གྱུར་པ་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར་ཁྱོད་ཅིའི་ཕྱིར་བཅོམ་ལྡན་འདས་ཀྱིས་རྨས་པའི་
ལན་གླན་པ་ལས་འདུག་པར་གྱུར། རབ་འབྱོར་གྱིས་སྨྲས་པ། འཇམ་དཔལ་གང་གི་ཚེ་སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མ་ཞུགས་པ་དེའི་ཚེ་ཁོ་བོ་འདུག་གོ། །དེ་ཅིའི་ཕྱིར་ཞེ་ན། ཉན་ཐོས་རྣམས་ཀྱི་སྤོབས་པ་ནི་ཐོགས་པ་
དང་བཅས་པ། བར་ཆད་དང་བཅས་པའོ། །བྱང་ཆུབ་སེམས་དཔའ་རྣམས་ཀྱི་སྤོབས་པ་ནི་ཐོགས་པ་མེད་པ། བར་ཆད་མེད་པའོ། །འཇམ་དཔལ་གྱིས་སྨྲས་པ། ཅི་བཙུན་པ་རབ་འབྱོར་ཆོས་ཀྱི་དབྱིངས་ལ་ཐོགས་པ་འམ། བར་ཆད་པ་གང་ཡང་
དམིགས་སམ། སྨྲས་པ། འཇམ་དཔལ་དེ་ནི་མ་ཡིན་ཏེ། ཆོས་ཀྱི་དབྱིངས་ལ་ནི་ཐོགས་པ་འམ། བར་ཆད་པ་མི་དམིགས་སོ། །སྨྲས་པ། འོ་ན་ཅིའི་ཕྱིར་ཚེ་དང་ལྡན་པ་རབ་འབྱོར་འཆད་པ་ལས་བར་ཆད་དུ་གྱུར། སྨྲས་པ། འཇམ་དཔལ་གང་གིས་

46-1-275b

ཆོས་ཀྱི་དབྱིངས་ལ་ཡོངས་སུ་ཆད་པའི་ཚུལ་གྱིས་ཡོངས་སུ་ཤེས་པ་དེ་དག་ནི་འཆད་པ་བར་ཆད་པ་ཡིན་གྱིས་གང་ཡང་ཆོས་ཀྱི་དབྱིངས་ལ་ཚད་མེད་པའི་ཚུལ་གྱིས་ཡོངས་སུ་ཤེས་པ་དེ་དག་ནི་ཆད་པར་མི་འཆད་དོ། །སྨྲས་པ་བཙུན་པ་རབ་འབྱོར་ཅི་ཆོས་ཀྱི་
དབྱིངས་ལ་ཡོངས་སུ་ཆད་པ་གང་ཡང་ཡོད་དམ། སྨྲས་པ། འཇམ་དཔལ་དེ་ནི་མ་ཡིན་ཏེ། ཆོས་ཀྱི་དབྱིངས་ནི་ཀུན་གྱི་སྒོ་སྟེ། ཆོས་ཀྱི་དབྱིངས་ལ་ཡོངས་སུ་ཆད་པ་གང་ཡང་མེད་དོ། །སྨྲས་པ། འོ་ན་ཅིའི་ཕྱིར་བཙུན་པ་རབ་འབྱོར་ཆོས་ཀྱི་དབྱིངས་
ལ་ཡོངས་སུ་ཆད་པར་སྟོན། སྨྲས་པ། འཇམ་དཔལ་ཉན་ཐོས་ཀྱི་ཡུལ་ཚད་མར་བྱས་ཏེ་ཆོས་ཀྱི་དབྱིངས་ཡོངས་སུ་ཆད་པར་སྟོན་ཏོ། །སངས་རྒྱས་ཀྱི་ཡུལ་ཚད་མར་བྱས་ཏེ། དེ་ནི་ཆོས་ཀྱི་དབྱིངས་ཚད་མེད་པར་སྟོན་ཏོ། །འཇམ་དཔལ་གྱིས་སྨྲས་པ། 
བཙུན་པ་རབ་འབྱོར་ཆོས་ཀྱི་དབྱིངས་ཡུལ་ལས་བྱུང་ངམ། རབ་འབྱོར་གྱིས་སྨྲས་པ། འཇམ་དཔལ་ཆོས་ཀྱི་དབྱིངས་ཡུལ་ལས་བྱུང་བ་མ་ཡིན་ཏེ། འཇམ་དཔལ་དེ་ཅིའི་ཕྱིར་ཞེ་ན། ཆོས་ཀྱི་དབྱིངས་ནི་ཡུལ་མེད་པ། ཡུལ་དང་བྲལ་བའོ། །འཇམ་
དཔལ་གྱིས་སྨྲས་པ། འོ་ན་ཅིའི་ཕྱིར་ཚེ་དང་ལྡན་པ་རབ་འབྱོར་ཡུལ་ཐ་དད་པར་སྟོན། རབ་འབྱོར་གྱིས་སྨྲས་པ། འཇམ་དཔལ་ཉན་ཐོས་རྣམས་ཀྱི་སྤོབས་པ་ནི་ཐོགས་པ་དང་བཅས་པ། བར་ཆད་དང་བཅས་པའོ། །བྱང་ཆུབ་སེམས་དཔའ་རྣམས་ཀྱི་
སྤོབས་པ་ནི་ཐོགས་པ་མེད་པ། བར་ཆད་མེད་པའོ་ཞེས་དང་པོ་ཉིད་ཏུ་ཁོ་བོས་མ་སྨྲས་སམ། འཇམ་དཔལ་གྱིས་སྨྲས་པ། བཙུན་པ་རབ་འབྱོར་ཁྱོད་ཀྱིས་སོ་སོ་ཡང་དག་པར་རིག་པ་མ་ཐོབ་བམ། རབ་འབྱོར་གྱིས་སྨྲས་པ། འཇམ་དཔལ་
ཁོ་བོས་སོ་སོ་ཡང་དག་པར་རིག་པ་ཐོབ་བོ། །འཇམ་དཔལ་གྱིས་སྨྲས་པ། འོ་ན་ཅིའི་ཕྱིར་ཚེ་དང་ལྡན་པ་རབ་འབྱོར་འཆད་པ་བར་ཆད་རབ་འབྱོར་གྱིས་སྨྲས་པ། འཇམ་དཔལ་ཉན་ཐོས་རྣམས་ཀྱི་སོ་སོ་ཡང་དག་པར་རིག་པ་ནི་སེམས་ཅན་
གྱི་དབང་པོ་མཆོག་དང་མཆོག་མ་ཡིན་པ་ཤེས་པ་དང་བྲལ་བ་སྟེ། དེ་བས་ན་འཆད་པ་བར་ཆད་དོ། །བྱང་ཆུབ་སེམས་དཔའ་རྣམས་ཀྱི་སོ་སོ་ཡང་དག་པར་རིག་པ་ནི། སེམས་ཅན་ཐམས་ཅད་ཀྱི་དབང་པོ་མཆོག་དང་མཆོག་མ་ཡིན་པ་ཤེས་

46-1-276a

པས་བསྐྱེད་པ་སྟེ། དེ་བས་ན་འཆད་པ་བར་མི་འཆད་དོ། །འཇམ་དཔལ་གྱིས་སྨྲས་པ། ཅི་ཡེ་ཤེས་ཀྱི་དབྱིངས་གང་གིས་ཚེ་དང་ལྡན་པ་རབ་འབྱོར་གྱི་སོ་སོ་ཡང་དག་པར་རིག་པའི་ཡེ་ཤེས་བསྐྱེད་པའི་ཡེ་ཤེས་ཀྱི་དབྱིངས་དེ་བར་ཆད་
པའི་མཚན་ཉིད་ཡིན་ནམ། རབ་འབྱོར་གྱིས་སྨྲས་པ། འཇམ་དཔལ་དེ་ནི་མ་ཡིན་ཏེ། ཡེ་ཤེས་ཀྱི་དབྱིངས་ནི་ཐོགས་པ་མེད་པའི་མཚན་ཉིད་བར་ཆད་པ་མེད་པའི་རང་བཞིན་ཅན་ནོ། །འཇམ་དཔལ་གྱིས་སྨྲས་པ་ཚེ་དང་ལྡན་པ་རབ་འབྱོར་
གལ་ཏེ་ཡེ་ཤེས་ཀྱི་དབྱིངས་ཐོགས་པ་མེད་པའི་མཚན་ཉིད་བར་ཆད་པ་མེད་པའི་རང་བཞིན་ཅན་ཡིན་ན། འོ་ན་ཅིའི་ཕྱིར་འཆད་པ་བར་ཆད། རབ་འབྱོར་གྱིས་སྨྲས་པ། འཇམ་དཔལ་ཚེ་དང་ལྡན་པ་ཤཱ་རིའི་བུ་འདི་ཉན་ཐོས་རྣམས་ཀྱི་ནང་ན་
ཤེས་རབ་ཆེ་བའི་མཆོག་ཏུ་བཅོམ་ལྡན་འདས་ཀྱིས་གསུངས་ཀྱིས། འདི་ལ་དྲིས་ཤིག་དང་། འདི་ཉིད་ཁྱོད་ལ་འཆད་པར་འགྱུར་རོ། །ཚེ་དང་ལྡན་པ་ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར་ཉིད་ཀྱིས་ཤོད་ཅིག །ཁོ་བོ་ནི་
འཇམ་དཔལ་གཞོན་ནུར་གྱུར་པས་ཆོས་བསྟན་པ་ཉན་པར་འདོད་ཀྱི། འཆད་པར་ནི་མི་འདོད་དོ། །དེ་ཅིའི་ཕྱིར་ཞེ་ན། འཇམ་དཔལ་གཞོན་ནུར་གྱུར་པ་འདི་སྔོན་སངས་རྒྱས་བརྒྱ་སྟོང་ཕྲག་མང་པོའི་སྤྱན་སྔ་ན་ཆོས་འཆད་ཅིང་། 
ཉན་ཐོས་ཆེན་པོ་དག་ཀྱང་ཅང་མི་སྨྲ་བར་གཞོག་པ་ཁོ་བོས་མཐོང་ངོ་། །ཚེ་དང་ལྡན་པ་རབ་འབྱོར་ཤར་ཕྱོགས་ལོགས་སུ་སངས་རྒྱས་ཀྱི་ཞིང་བརྒྱ་སྟོང་ཕྲག་མང་པོ་འདས་པ་ན་འཇིག་རྟེན་གྱི་ཁམས་དང་བ་ཅན་ཞེས་བྱ་བ་ཞིག་ཡོད་དེ། 
དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཀྱི་ཏོག་ཅེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །དེ་ན་ཉན་ཐོས་ཆེན་པོ་ཤེས་རབ་སྒྲོན་མ་ཞེས་བྱ་བ་ཉན་ཐོས་རྣམས་ཀྱི་ནང་ན་ཤེས་
རབ་ཆེ་བའི་མཆོག་ཏུ་བཅོམ་ལྡན་འདས་དེས་གསུངས་སོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཀྱི་ཏོག་དེ་ནམ་ནང་དུ་ཡང་དག་འཇོག་པར་གྱུར་པ་དེའི་ཚེ་ཉན་ཐོས་ཆེན་པོ་ཤེས་

46-1-276b

རབ་སྒྲོན་མ་དེ་ཚངས་པའི་འཇིག་རྟེན་མན་ཆད་དུ་མངོན་པར་སོང་སྟེ། ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདུན་པར་བྱས་ནས་ཆོས་སྟོན་ཏོ། །ཁོ་བོ་དང་འཇམ་དཔལ་གཞོན་ནུར་གྱུར་པ་ཡང་འཇིག་རྟེན་གྱི་
ཁམས་དེར་ཕྱིན་ཏེ། གཞན་ཡང་བྱང་ཆུབ་སེམས་དཔའ་བརྒྱ་སྟོང་ཕྲག་མང་པོ་དང་། ལྷའི་བུ་བརྒྱ་ཕྲག་སྟོང་ཡང་ཆོས་ཉན་པར་འདོད་པའི་ཕྱིར་འཇམ་དཔལ་གཞོན་ནུར་གྱུར་པའི་ཕྱིར་འབྲང་བར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་
པ་འོད་གསལ་གྱི་ལྷའི་རིས་སུ་འདུག་སྟེ། མགུལ་བསལ་བའི་སྒྲ་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་སྒྲས་གོ་བར་འགྱུར་བ་དང་། བདུད་ཀྱི་གནས་ཐམས་ཅད་སྤ་གོང་བར་འགྱུར་བ་དེ་ལྟ་བུའི་
མགུལ་བསལ་བའི་སྒྲ་ཕྱུང་ངོ་། །དེ་ནས་ཉན་ཐོས་ཆེན་པོ་དེས་མགུལ་བསལ་བའི་སྒྲ་དེ་ཐོས་པ་དང་། མགུལ་བསལ་བའི་སྒྲ་དེའི་ཤུགས་མ་བཟོད་པས་རྣམ་པར་འཐོར་རླུང་གིས་བུས་པའི་བྱ་བཞིན་དུ་ས་ལ་ལྷུང་སྟེ། དེ་དངངས་ཏེ་
སྤུ་ཟིང་ཞེས་བྱེད་པར་གྱུར་ནས། ངོ་མཚར་དུ་བཟུང་སྟེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཀྱི་ཏོག་དེ་ག་ལ་བ་དེར་སོང་ནས་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་
མགོ་བོས་ཕྱག་འཚལ་ནས། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མགུལ་བསལ་བའི་སྒྲ་གང་ཐོས་པས་བདག་མགུལ་བསལ་བའི་སྒྲའི་ཤུགས་དེ་མ་བཟོད་པས་རྣམ་པར་འཐོར་རླུང་གིས་བུས་པ་
འི་བྱ་བཞིན་དུ་དོག་ས་ལ་ལྷུང་བར་གྱུར་པའི་མགུལ་བསལ་བའི་སྒྲ་ཟབ་མོ་འདི་ལྟ་བུ་འདི་སུས་བགྱིས། བཅོམ་ལྡན་འདས་དེས་བཀའ་སྩལ་པ། དགེ་སློང་འཇམ་དཔལ་གཞོན་ནུར་གྱུར་པ་ཞེས་བྱ་བ་ཕྱིར་མི་ལྡོག་པ་སྐྱེ་བ་གཅིག་
གིས་ཐོགས་པའི་བྱང་ཆུབ་སེམས་དཔའ་དེ་ང་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། ཡོངས་སུ་ཞུ་བ་དང་། ཡོངས་སུ་ལེགས་པར་ཞུ་བར་བྱ་བའི་ཕྱིར་ཆགས་པ་མེད་པའི་རྫུ་འཕྲུལ་གྱི་སྟོབས་ཀྱིས་རྣམ་པར་

46-1-277a

རྩེ་ཞིང་འཇིག་རྟེན་གྱི་ཁམས་འདིར་འོངས་ཏེ། འཇམ་དཔལ་གཞོན་ནུར་གྱུར་པ་དེ་འོད་གསལ་གྱི་ལྷའི་རིས་སུ་འདུག་ནས་མགུལ་བསལ་བའི་སྒྲ་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་སྒྲས་
གོ་བར་འགྱུར་བ་དང་། བདུད་ཀྱི་གནས་ཐམས་ཅད་སྤ་གོང་བར་འགྱུར་བ་དེ་ལྟ་བུའི་མགུལ་བསལ་བའི་སྒྲ་ཕྱུང་ངོ་། །དེས་གསོལ་པ། བཅོམ་ལྡན་འདས་སྐྱེས་བུ་དམ་པ་དེ་ལྟ་བུ་དག་མཐོང་ན་ལེགས་པར་འགྱུར་གྱིས། འཇམ་དཔལ་གཞོན་ནུར་
གྱུར་པ་དེ་བདག་ཅག་གིས་ཀྱང་བལྟ་བར་བགྱིའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཀྱི་ཏོག་གིས་འཇམ་དཔལ་གཞོན་ནུར་གྱུར་པ་འོང་བར་བྱ་བའི་ཕྱིར་མཚན་མ་མཛད་དོ། །
དེ་ནས་འཇམ་དཔལ་གཞོན་ནུར་གྱུར་པ་བྱང་ཆུབ་སེམས་དཔའ་དེ་དག་དང་ལྷན་ཅིག་ཏུ་བར་སྣང་དེ་ལས་བབས་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཀྱི་ཏོག་ག་ལ་བ་དེར་དོང་སྟེ་
ལྷགས་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་ནས་འཁོར་དང་བཅས་ཏེ་ཇི་ལྟར་རང་གི་སྨོན་ལམ་དང་། རྫུ་འཕྲུལ་གྱི་མཐུས་སྤྲུལ་པའི་སྟན་ལ་ཕྱོགས་གཅིག་ཏུ་འཁོད་དོ། །
དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཀྱི་ཏོག་གིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་དོན་གྱི་དབང་ཅི་ཞིག་མཐོང་ནས་
འཇིག་རྟེན་གྱི་ཁམས་དང་བ་ཅན་འདིར་འོངས། འཇམ་དཔལ་གྱིས་གསོལ་པ། བཅོམ་ལྡན་འདས་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བ་དང་། ཡོངས་སུ་ཞུ་བ་དང་། ཡོངས་སུ་ལེགས་པར་ཞུ་བའི་སླད་དུའོ། །བཅོམ་ལྡན་
འདས་དེས་བཀའ་སྩལ་པ། འཇམ་དཔལ་ཇི་ལྟར་ན་དེ་བཞིན་གཤེགས་པ་བལྟ་བ་ཤིན་ཏུ་རྣམ་པར་དག་པར་འགྱུར། ཇི་ལྟར་ན་དེ་བཞིན་གཤེགས་པ་ལ་ཕྱག་བྱས་པར་འགྱུར། ཇི་ལྟར་ན་བསྙེན་བཀུར་བྱས་པར་འགྱུར། ཇི་ལྟར་ན་ཡོངས་སུ་

46-1-277b

ཞུས་པར་འགྱུར། ཇི་ལྟར་ན་ཡོངས་སུ་ལེགས་པར་ཞུས་པར་འགྱུར། འཇམ་དཔལ་གྱིས་གསོལ་པ། བཅོམ་ལྡན་འདས་ནམ་ཆོས་མཐོང་བ་ཤིན་ཏུ་རྣམ་པར་དག་པ་དེ་ལྟ་བུ་ནི་དེ་བཞིན་གཤེགས་པ་མཐོང་བ་ཤིན་ཏུ་རྣམ་པར་དག་པ་ལགས་སོ། །
བཅོམ་ལྡན་འདས་ནམ་ལུས་དང་སེམས་ཀྱིས་འདུད་པར་མི་བགྱིད། རབ་ཏུ་འདུད་པར་མི་བགྱིད་ཅིང་བགྱིད་པ་མ་མཆིས། ཞུམ་པ་མ་མཆིས་པར་གནས་པ། མི་གཡོ་བ་ཐོབ་པ། སེམས་དབེན་པའི་ངང་ཚུལ་དུ་སྤྱོད་པ། དྲན་པ་དང་ལྡན་ཞིང་ཤེས་བཞིན་དུ་
བགྱིད་པ་དེ་ལྟ་བུས་ནི་དེ་བཞིན་གཤེགས་པ་ལ་ཕྱག་བགྱིས་པར་འགྱུར་རོ། །བཅོམ་ལྡན་འདས་ནམ་བདག་ཏུ་སྒྲོ་འདོགས་པར་མི་བགྱིད། གཞན་དུ་སྒྲོ་འདོགས་པར་མི་བགྱིད། མཉམ་པ་ཉིད་ལ་མཉམ་པར་མི་བགྱིད། མི་མཉམ་པ་ཉིད་ལ་མི་མཉམ་
པར་མི་བགྱིད་ཅིང་། བགྱིད་པ་མ་མཆིས། རྣམ་པར་བགྱིད་པ་མ་མཆིས། སངས་རྒྱས་བཅོམ་ལྡན་འདས་རྣམས་དང་ཡང་སྤྱོད་པ་གཅིག་ཏུ་གྱུར་པ། སངས་རྒྱས་ཀྱི་སྐུ་དང་། ཆོས་ཀྱི་སྐུའི་རྗེས་སུ་འཇུག་པ། གང་གི་ལུས་ཀྱང་ཆོས་ཀྱི་དབྱིངས་ཀྱི་རྗེས་སུ་
ཞུགས་པར་མཐོང་བ། མཐོང་བ་ལ་མཐོང་བར་མི་མཐོང་བ། ལོག་པར་མི་མཐོང་བ། གང་ལ་ཡང་རིང་པོར་མི་འགྱུར་བ། ཉེ་བར་མི་འགྱུར་བ་དེ་ལྟ་བུ་ནི་དེ་བཞིན་གཤེགས་པ་ལ་བསྙེན་བཀུར་བགྱིས་པར་འགྱུར་རོ། །བཅོམ་ལྡན་འདས་ནམ་ཚུལ་བཞིན་
མ་ལགས་པར་ནི་མ་ལགས་ཀྱི། ནམ་ཚུལ་བཞིན་དུ་ཞུ་བ། ཚུལ་བཞིན་མ་ལགས་པ། ཅི་འང་མི་མཐོང་བ། བདག་གི་ཚུལ་བཞིན་གྱིས་ཆོས་ཐམས་ཅད་ཀྱི་ཚུལ་བཞིན་གྱི་རྗེས་སུ་མཆི་བ་གཡེངས་པའི་སེམས་ཀྱིས་མ་ལགས་ཀྱི། མཉམ་པར་
བཞག་པས་ཞུ་བ། གང་ཞུ་བ་དང་། གང་གི་སླད་དུ་ཞུ་བ་དང་། གང་ལ་ཞུ་བ་དེ་དུས་གསུམ་ཡོངས་སུ་ཚོལ་ཞིང་། འཁོར་གསུམ་ཡོངས་སུ་དག་པས་ཞུ་བ་དེ་ལྟ་བུ་ནི་དེ་བཞིན་གཤེགས་པ་ལ་ཡོངས་སུ་ཞུས་པར་འགྱུར་རོ། །བཅོམ་ལྡན་
འདས་ནམ་ཞུ་བ་མཆིས་པ་ལ་རྟོགས་པར་མི་བགྱིད་པ། ཇི་སྐད་གསུངས་པའི་རྗེས་སུ་འཐུན་པར་བགྱིད་པ། དེ་བཞིན་གཤེགས་པ་མཉེས་པར་བགྱིད་པ། འཁོར་ཐམས་ཅད་མགུ་བར་བགྱིད་པ། ཡོངས་སུ་ཞུ་བ་ལ་མི་ཆགས་པ། ཡོངས་སུ་

46-1-278a

ཞུ་བ་དེས་ཀྱང་སེམས་ཅན་ཚད་མ་མཆིས་པ་རྣམས་བྱང་ཆུབ་ཏུ་གོ་ཆ་སྐོན་ཞིང་། གོ་ཆ་དེ་ཡང་ནམ་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་མི་འདོར་བ་དེ་ལྟ་བུ་ནི་དེ་བཞིན་གཤེགས་པ་ལ་ཡོངས་སུ་ལེགས་པར་ཞུ་བ་བགྱིད་པར་འགྱུར་རོ། །དེ་ནས་
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཀྱི་ཏོག་དེས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ་དེ་བཞིན་གཤེགས་པ་ལ་དེ་ལྟར་བལྟ་བར་བྱའོ། །
དེ་ལྟར་ཕྱག་བྱའོ། །དེ་ལྟར་བསྙེན་བཀུར་བྱའོ། །དེ་ལྟར་ཡོངས་སུ་ཞུ་བར་བྱའོ། །དེ་ལྟར་ཡོངས་སུ་ལེགས་པར་ཞུ་བར་བྱའོ་ཞེས་སྨྲས་པ་དེ་ནི་ཁྱོད་ཀྱིས་ལེགས་པར་བཤད་དེ་ལེགས་སོ་ལེགས་སོ། །དེ་ནས་འཇམ་དཔལ་གཞོན་ནུར་གྱུར་
པས་ཉན་ཐོས་ཆེན་པོ་ཤེས་རབ་སྒྲོན་མ་ལ་འདི་སྐད་ཅེས་སྨྲས་སོ། །ཚེ་དང་ལྡན་པས་དེ་བཞིན་གཤེགས་པ་ལ་ཇི་ལྟར་མཐོང་། ཇི་ལྟར་ཕྱག་འཚལ། ཇི་ལྟར་བསྙེན་བཀུར་བྱེད། ཇི་ལྟར་ཡོངས་སུ་ཞུ། ཇི་ལྟར་ཡོངས་སུ་ལེགས་པར་ཞུ། དེས་སྨྲས་པ། 
འཇམ་དཔལ་བསྟན་པ་འདི་ལྟ་བུ་ནི་ཁོ་བོ་ཅག་ལྟ་བུ་ཉན་ཐོས་གཞན་གྱི་སྒྲའི་རྗེས་སུ་མོས་པ་རྣམས་ཀྱི་ཡུལ་མ་ཡིན་ནོ། །སྨྲས་པ། འོ་ན་གང་མངོན་པར་རྟོགས་པས་ཚེ་དང་ལྡན་པ་ཤེས་རབ་སྒྲོན་མའི་སེམས་རྣམ་པར་གྲོལ། སྨྲས་པ། འཇམ་དཔལ་བདེན་པ་
མངོན་པར་རྟོགས་པས་སེམས་རྣམ་པར་གྲོལ་ལོ། །སྨྲས་པ། ཚེ་དང་ལྡན་པ་བདེན་པ་ཞེས་བྱ་བས་ཅི་བསྟན་པར་འགྱུར། དེས་སྨྲས་པ། འཇམ་དཔལ་གཉེན་པོ་མེད་པས་རབ་ཏུ་ཕྱེ་བ་ནི་བདེན་པའོ། །སྨྲས་པ། འོ་ན་ཇི་ལྟར་བདེན་པ་མངོན་པར་རྟོགས་
པས་ཚེ་དང་ལྡན་པའི་སེམས་རྣམ་པར་གྲོལ། སྨྲས་པ། འཇམ་དཔལ་ཀུན་རྫོབ་ཉེ་བར་བཟུང་སྟེ་དེ་སྐད་ཅེས་སྟོན་གྱི་དོན་དམ་པར་ནི་མ་ཡིན་ནོ། །སྨྲས་པ། ཅི་ཀུན་རྫོབ་དོན་དམ་པར་འདུ་འམ། སྨྲས་པ། གལ་ཏེ་མི་འདུ་ན་དོན་དམ་པ་མེད་པར་
འགྱུར་རོ། །སྨྲས་པ། འོ་ན་ཇི་ལྟར་ཀུན་རྫོབ་ཉེ་བར་བཟུང་སྟེ་སྟོན་གྱི། དོན་དམ་པར་མ་ཡིན། གལ་ཏེ་ཀུན་རྫོབ་དོན་དམ་པར་འདུ་ན་ནི་འདི་ལྟ་སྟེ། དོན་དམ་པའི་བདེན་པར་བདེན་པ་གཅིག་པུར་མི་འགྱུར་རམ། སྨྲས་པ། འཇམ་དཔལ་བཤད་པ་

46-1-278b

འདི་ཐོས་ན་ལས་དང་པོ་པའི་བྱང་ཆུབ་སེམས་དཔའ་རྣམས་སྐྲག་པར་འགྱུར་རོ། །སྨྲས་པ། བཙུན་པ་ཉིད་ཀྱང་སྐྲག་ན་ལས་དང་པོ་པའི་བྱང་ཆུབ་སེམས་དཔའ་རྣམས་ལྟ་ཅི་སྨོས། སྨྲས་པ། འཇམ་དཔལ་ཁོ་བོ་སྐྲག་པར་བྱེད་མི་ནུས་སོ། །སྨྲས་པ། 
ཚེ་དང་ལྡན་པ་ཅི་སྐྲག་པ་མེད་པ་དང་། སྐྱོ་བ་མེད་པས་ཉེ་བར་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལམ། སྨྲས་པ། འཇམ་དཔལ་ཉན་ཐོས་རྣམས་ནི་སྐྲག་པ་མེད་པ་དང་། སྐྱོ་བ་མེད་པར་རྣམ་པར་མི་གྲོལ་ལོ། །སྨྲས་པ་ཚེ་དང་ལྡན་པ་
དེ་བས་ན་སྔོན་སྐྲག་པ་དེ་ཉིད་ལ་བསམས་ནས་བཙུན་པ་ཉིད་ཀྱང་སྐྲག་ན་ལས་དང་པོ་པའི་བྱང་ཆུབ་སེམས་དཔའ་རྣམས་ལྟ་ཅི་སྨོས་ཤེས་དེ་སྐད་སྨྲས་སོ། །སྨྲས་པ། འཇམ་དཔལ་བྱང་ཆུབ་སེམས་དཔའ་ཇི་ལྟར་རྣམ་པར་གྲོལ། སྨྲས་པ། 
བཙུན་པ་བྱང་ཆུབ་སེམས་དཔའ་ནི་སྐྲག་པ་མེད་པ་དང་། སྐྱོ་བ་མེད་པས་རྣམ་པར་གྲོལ་ལོ། །སྨྲས་པ། འཇམ་དཔལ་ཇི་ལ་བསམས་ཏེ་དེ་སྐད་སྨྲ་སྨྲས་པ། བདུད་ཀྱི་སྡེ་བྱེ་བ་ཕྲག་བརྒྱས་མི་སྐྲག་ཅིང་སེམས་ཅན་རྣམས་ལ་ཆོས་བཤད་པས་མི་སྐྱོ་ལ། 
བསོད་ནམས་ཀྱི་ཚོགས་ཚད་མེད་པ་བསགས་པས་མི་སྐྲག་ཅིང་ཡེ་ཤེས་ཀྱི་ཚོགས་ཚད་མེད་པ་བསགས་པས་མི་སྐྱོའོ། །དེ་ནས་འཁོར་དེར་ལྷའི་བུ་གང་དག་འདུས་པར་གྱུར་པ་དེ་དག་གིས་མེ་ཏོག་སྣ་ཚོགས་ཀྱིས་འཇམ་དཔལ་གཞོན་ནུར་གྱུར་
པ་ལ་གཏོར་ཏོ། །གང་ན་འཇམ་དཔལ་གཞོན་ནུར་གྱུར་པ་སྣང་བ་དེར་ནི་དེ་བཞིན་གཤེགས་པ་མངོན་སུམ་དུ་མཐོང་བ་ཡིན་ནོ། །འཇམ་དཔལ་གཞོན་ནུར་གྱུར་པ་གང་དུ་གནས་པའི་ས་ཕྱོགས་དེ་འང་མཆོད་རྟེན་དུ་འགྱུར་རོ། །གང་གིས་འཇམ་དཔལ་
གཞོན་ནུར་གྱུར་པའི་ཆོས་བསྟན་པ་ཀུན་དུ་ཤེས་སམ། ཀུན་དུ་ཤེས་པར་འགྱུར་བའི་སེམས་ཅན་དེ་དག་གིས་ཀྱང་བསོད་ནམས་ཐམས་ཅད་ཡོངས་སུ་བཟུང་བ་ཡིན་ནོ་ཞེས་དེ་སྐད་ཀྱི་ཚིག་སྨྲས་སོ། །དེ་ནས་ཡང་འཇམ་དཔལ་གཞོན་
ནུར་གྱུར་པས་ཉན་ཐོས་ཆེན་པོ་ཤེས་རབ་སྒྲོན་མ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཉན་ཐོས་རྣམས་ཀྱི་ནང་ན་ཤེས་རབ་ཆེ་བའི་མཆོག་ཏུ་བཅོམ་ལྡན་འདས་ཀྱིས་གསུངས་ན། ཅི་ཤེས་རབ་དེ་འདུས་བྱས་ཀྱི་མཚན་ཉིད་དམ་འོན་ཏེ་

46-1-279a

འདུས་མ་བྱས་ཀྱི་མཚན་ཉིད། གལ་ཏེ་དེ་འདུས་བྱས་ཀྱི་མཚན་ཉིད་ཡིན་ན་ནི་སྐྱེ་ཞིང་འཇིག་པ་དང་ལྡན་པར་འགྱུར་རོ། །ཇི་སྟེ་འདུས་མ་བྱས་པའི་མཚན་ཉིད་ཡིན་ན་ནི་མཚན་ཉིད་གསུམ་ལས་ལྡོག་པར་འགྱུར་རོ། །སྨྲས་པ། འཇམ་
དཔལ་འཕགས་པ་རྣམས་ནི་འདུས་མ་བྱས་ཀྱིས་རབ་ཏུ་ཕྱེ་བར་སྟོན་ཏོ། །སྨྲས་པ། ཚེ་དང་ལྡན་པ་འདུས་མ་བྱས་པ་གདགས་པར་ནུས་སམ། སྨྲས་པ། འཇམ་དཔལ་དེ་ནི་མ་ཡིན་ཏེ། འདུས་མ་བྱས་ལ་གདགས་པ་གང་ཡང་མེད་དོ། །སྨྲས་པ། འོ་ན་
ཇི་ལྟར་འཕགས་པ་རྣམས་འདུས་མ་བྱས་ཀྱིས་རབ་ཏུ་ཕྱེ་བ་སྟོན། དེ་སྐད་སྨྲས་པ་དང་། ཉན་ཐོས་ཆེན་པོ་ཤེས་རབ་སྒྲོན་མ་དེ་ཅང་མི་སྨྲ་བར་གྱུར་ཏོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཀྱི་ཏོག་དེས་
འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཆོས་གང་ཐོས་པས་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བའི་ཆོས་ཀྱི་སྒོ་
འགའ་ཞིག་རྩོམས་ཏེ། འཁོར་འདིར་ཁྱོད་ཀྱིས་སྟོན་ཅིག །འཇམ་དཔལ་གྱིས་གསོལ་པ། བཅོམ་ལྡན་འདས་ཆོས་ཐམས་ཅད་ཀྱི་སྒོ་རྣམས་ཀྱི་བསྟན་པ་ཐམས་ཅད་ཀྱང་དབེན་པའི་སྒོ་སྟེ། དབེན་པའི་སྒོ་དེ་དག་དབེན་པ་ཉིད་དུ་སྟོན་ཏོ། །ཡང་དེའི་ཚེ་བྱང་ཆུབ་
སེམས་དཔའ་ཆོས་ཀྱི་བློ་གྲོས་ཤེས་བྱ་བ་འཁོར་དེར་འདུས་པར་གྱུར་ཏེ་འདུག་པ་དེས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་གང་དེ་བཞིན་གཤེགས་པས་འདོད་ཆགས་དང་། ཞེ་སྡང་དང་། གཏི་མུག་བསྟན་པ་དེ་དག་ཅི་
དབེན་པའི་སྒོ་སྟེ། དབེན་པའི་སྒོ་ཉིད་དུ་སྟོན་པ་ཡིན་ནམ། སྨྲས་པ། རིགས་ཀྱི་བུ་འདི་ཇི་སྙམ་དུ་སེམས། འདོད་ཆགས་དང་། ཞེ་སྡང་དང་། གཏི་མུག་གང་ནས་བྱུང་སྨྲས་པ། འཇམ་དཔལ་འདོད་ཆགས་དང་། ཞེ་སྡང་དང་། གཏི་མུག་ནི་རྟོག་པ་དང་། རྣམ་པར་
རྟོག་པ་ལས་བྱུང་ངོ་། །སྨྲས་པ། རིགས་ཀྱི་བུ་རྟོག་པ་དང་། རྣམ་པར་རྟོག་པ་དེ་ཡང་གང་ནས་བྱུང་སྨྲས་པ། འཇམ་དཔལ་རྟོག་པ་དང་། རྣམ་པར་རྟོག་པ་ནི་ཕྱིན་ཅི་ལོག་ལས་བྱུང་ངོ་། །སྨྲས་པ། རིགས་ཀྱི་བུ་ཕྱིན་ཅི་ལོག་ཀྱང་གང་ནས་

46-1-279b

བྱུང་། སྨྲས་པ། འཇམ་དཔལ་ཕྱིན་ཅི་ལོག་ནི་ངར་འཛིན་པ་དང་། ང་ཡིར་འཛིན་པ་ལས་བྱུང་ངོ་། །སྨྲས་པ། རིགས་ཀྱི་བུ་ངར་འཛིན་པ་དང་། ང་ཡིར་འཛིན་པ་ཡང་གང་ནས་བྱུང་། སྨྲས་པ། འཇམ་དཔལ་ངར་འཛིན་པ་དང་། ང་ཡིར་འཛིན་པ་ནི་འཇིག་
ཚོགས་ལ་ལྟ་བ་ལས་བྱུང་ངོ་། །སྨྲས་པ་རིགས་ཀྱི་བུ་འཇིག་ཚོགས་ལ་ལྟ་བ་ཡང་གང་ནས་བྱུང་། སྨྲས་པ། འཇམ་དཔལ་འཇིག་ཚོགས་ལ་ལྟ་བ་ནི་བདག་ལས་བྱུང་ངོ་། །སྨྲས་པ། རིགས་ཀྱི་བུ་བདག་ཀྱང་གང་ནས་བྱུང་། སྨྲས་པ། འཇམ་
དཔལ་བདག་ནི་གང་ནས་ཀྱང་མ་བྱུང་སྟེ། འབྱུང་བ་མེད་པ་ནི་བདག་འབྱུང་བའོ། །དེ་ཅིའི་ཕྱིར་ཞེ་ན། འདི་ལྟར་བདག་ནི་ཕྱོགས་བཅུར་ཡོངས་སུ་བཙལ་ཀྱང་མི་དམིགས་སོ། །སྨྲས་པ་རིགས་ཀྱི་བུ་ཆོས་གང་དག་ཕྱོགས་བཅུར་ཡོངས་སུ་བཙལ་ཀྱང་མི་
དམིགས་པ་དེའི་སྒོ་ཅི་ཞིག་ཡོད། སྨྲས་པ། འཇམ་དཔལ་དབེན་པ་ཉིད་དེའི་སྒོའོ། །སྨྲས་པ་རིགས་ཀྱི་བུ་དབེན་པའི་སྒོ་ཅི་ཡིན། སྨྲས་པ་འཇམ་དཔལ་སྒོ་མེད་པ་ཉིད་དབེན་པའི་སྒོའོ། །སྨྲས་པ། རིགས་ཀྱི་བུ་ཁོ་བོས་དེ་ལས་བསམས་ཏེ། ཆོས་ཐམས་
ཅད་ཀྱི་སྒོ་རྣམས་ཀྱི་བསྟན་པ་ཐམས་ཅད་ཀྱང་དབེན་པའི་སྒོ་སྟེ། དེ་དག་དབེན་པའི་སྒོ་ཉིད་དུ་སྟོན་ཏོ་ཞེས་དེ་སྐད་སྨྲས་སོ། །བསྟན་པ་འདི་བཤད་པའི་ཚེ་བྱང་ཆུབ་སེམས་དཔའ་བརྒྱད་བརྒྱས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་འཇམ་
དཔལ་གཞོན་ནུར་གྱུར་པས་དེར་རྒྱ་ཆེར་ཆོས་བསྟན་པ་བྱས་ནས་སྟན་ལས་ལངས་ཏེ་སོང་ངོ་། །ཚེ་དང་ལྡན་པ་རབ་འབྱོར་རྣམ་གྲངས་དེས་ཀྱང་ཉན་ཐོས་སམ། རང་སངས་རྒྱས་གང་གིས་ཀྱང་འཇམ་དཔལ་གཞོན་ནུར་གྱུར་པ་དེའི་སྤོབས་པའི་རྒྱུན་
གཅོད་ནུས་པ་མེད་ན། སྐབས་མ་ཕྱེ་བར་བདག་ཅག་ལྟ་བུས་འཇམ་དཔལ་གཞོན་ནུར་གྱུར་པ་དང་ལྷན་ཅིག་ཏུ་སྨྲ་བར་ག་ལ་ནུས། དེ་ནས་ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་
པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུས་འཇམ་དཔལ་གཞོན་ནུར་གྱུར་པ་སངས་རྒྱས་ཀྱི་ཞིང་དུ་སྤྱད་

46-1-280a

པ་སྤྱོད་པ་ན་རྫུ་འཕྲུལ་གྱི་སྟོབས་དང་། ཆོ་འཕྲུལ་གྱི་རྣམ་པར་འཕྲུལ་པ་ཇི་སྙེད་ཅིག་མཐོང་། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར་ཁོ་བོས་མངོན་པར་ཤེས་ཏེ། འཇམ་དཔལ་གཞོན་ནུར་གྱུར་པ་དང་ལྷན་ཅིག་སངས་རྒྱས་
ཀྱི་ཞིང་དུ་སྤྱད་པ་སྤྱོད་པ་ན་སངས་རྒྱས་ཀྱི་ཞིང་གང་ཚིག་པ་དེ་དག་ནི་འཇམ་དཔལ་གཞོན་ནུར་གྱུར་པ་སོང་བ་དང་ཆུས་ཡོངས་སུ་གང་ཞིང་། པད་མ་མང་པོས་ཡོག་པར་གནས་པར་གྱུར་ཏོ། །གང་དག་ཆུས་ཡོངས་སུ་གང་བ་དེ་དག་ནི་མེས་
ཡོངས་སུ་གང་བར་གནས་པར་གྱུར་ཏེ། མེ་དེ་ཡང་རེག་ན་འདི་ལྟ་སྟེ་དཔེར་ན་ཙན་དན་སྦྲུལ་གྱི་སྙིང་པོ་འམ། ཀ་ཙ་ལིན་འདིའི་གོས་ལྟ་བུར་གྱུར་ཏོ། །གང་དག་སྟོང་པ་ནམ་མཁར་གྱུར་པ་དེ་དག་ནི་ཚངས་པའི་གཞལ་མེད་ཁང་གིས་བརྒྱན་ཅིང་བསམ་
གཏན་ལ་སྙོམས་པར་ཞུགས་པའི་བྱང་ཆུབ་སེམས་དཔས་ཡོངས་སུ་གང་བར་གནས་པར་གྱུར་ཏོ། །གང་དག་འཆགས་པ་དེ་དག་ནི་འཇིག་པར་སྣང་ངོ་། །གང་དག་ངན་སོང་གིས་ཡོངས་སུ་གང་བ་དེ་དག་ནི་ངན་སོང་ཐམས་ཅད་དང་བྲལ་བར་སྣང་སྟེ། 
སེམས་ཅན་དེ་དག་ཀྱང་བྱང་ཆུབ་ཀྱི་ཡན་ལག་གི་རྣམ་པས་བསྐྱེད་པའི་བྱམས་པ་ཐོབ་པར་གྱུར་ཏོ། །བྱང་ཆུབ་ཀྱི་ཡན་ལག་གི་རྣམ་པས་བསྐྱེད་པའི་བྱམས་པ་གང་ཞེ་ན། གང་ལ་སྙོམས་པར་ཞུགས་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་སངས་རྒྱས་ཏེ། སེམས་ཅན་གང་དག་ཉོན་མོངས་པ་འདོད་ཆགས་དང་། ཞེ་སྡང་དང་། གཏི་མུག་གིས་གཟིར་བ་དེ་དག་གི་འདོད་ཆགས་དང་། ཞེ་སྡང་དང་། གཏི་མུག་ཤིན་དུ་སྤང་བར་བྱ་བའི་ཕྱིར་ཆོས་བསྟན་ཏོ་སྙམ་སེམས་པ་སྟེ། གང་དེ་
ལྟར་བྱམས་པའི་ཏིང་ངེ་འཛིན་ལ་སྙོམས་པར་འཇུག་པ་དེ་ནི་བྱང་ཆུབ་ཀྱི་ཡན་ལག་གི་རྣམ་པས་བསྐྱེད་པའི་བྱམས་པ་ཞེས་བྱའོ། །ཚེ་དང་ལྡན་པ་རབ་འབྱོར་དེའི་ཚེ་དེའི་དུས་ན་ཁོ་བོའི་སེམས་ལ་སེམས་ཀྱི་རྣམ་པར་རྟོག་པ་འཇམ་དཔལ་གཞོན་ནུར་གྱུར་པའི་རྫུ་འཕྲུལ་
གང་ཡིན་པ་དང་། བདག་གི་གང་ཡིན་པ་དེ་གཉིས་ནི་མཉམ་མོ་སྙམ་དུ་གྱུར་པ་དང་། འཇམ་དཔལ་གཞོན་ནུར་གྱུར་པའི་སེམས་ཀྱིས་ཁོ་བོའི་སེམས་ཀྱི་རྣམ་པར་རྟོག་པ་དེ་ཤེས་ནས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་མེ་

46-1-280b

འབར་བ་ན་འཇིག་རྟེན་གྱི་བར་དུ་འདུག་སྟེ་ཁོ་བོ་ལ་འདི་སྐད་ཅེས་ཟེར་རོ། །ཅི་ཚེ་དང་ལྡན་པ་ཤཱ་རིའི་བུའི་རྫུ་འཕྲུལ་གྱི་མཐུས་འཇིག་རྟེན་གྱི་ཁམས་འདི་ལས་རྒལ་བར་བྱ་འམ། འོན་ཏེ་ཁོ་བོའི་རྫུ་འཕྲུལ་གྱི་མཐུས་རྒལ་བར་བྱ། ཁོ་བོས་དེ་ལ་འདི་སྐད་ཅེས་སྨྲས་སོ། །
ཁོ་བོའི་རྫུ་འཕྲུལ་གྱི་མཐུའི་མགྱོགས་པས་འཇིག་རྟེན་གྱི་ཁམས་འདི་ལས་རྒལ་བར་བྱའོ་ཞེས། ཚེ་དང་ལྡན་པ་རབ་འབྱོར་ཁོ་བོས་རྫུ་འཕྲུལ་གྱི་མཐུའི་མགྱོགས་པའི་ཆོ་འཕྲུལ་ཐམས་ཅད་བསྟན་ཏེ། མདོམ་གང་ཙམ་ཁོར་ཡུག་ཏུ་མེ་དེ་ཞི་བར་བྱས་ནས་འཇམ་
དཔལ་གཞོན་ནུར་གྱུར་པ་དང་ལྷན་ཅིག་ཏུ་ཉིན་ཞག་བདུན་གྱིས་འཇིག་རྟེན་གྱི་ཁམས་དེ་རྒལ་ཏོ། །དེ་ནས་དུས་གཞན་ཞིག་ན་དེ་བས་ཀྱང་ཤིན་དུ་རྒྱ་ཆེ་ཞིང་ཡངས་པའི་འཇིག་རྟེན་གྱི་ཁམས་སུ་མེ་འབར་བ་ན་འཇིག་རྟེན་གྱི་བར་དུ་འཇམ་དཔལ་གཞོན་ནུར་གྱུར་
པ་འདུག་སྟེ། ཁོ་བོ་ལ་འདི་སྐད་ཅེས་ཟེར་རོ། །བཙུན་པ་ཤཱ་རིའི་བུ་སུའི་རྫུ་འཕྲུལ་གྱི་མཐུས་འཇིག་རྟེན་གྱི་ཁམས་འདི་ལས་རྒལ་བར་བྱ། ཁོ་བོས་དེ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱི་རྫུ་འཕྲུལ་གྱི་མཐུས་འཇིག་རྟེན་གྱི་ཁམས་འདི་ལས་བརྒལ་བར་
བྱའོ། །དེ་ནས་འཇམ་དཔལ་གཞོན་ནུར་གྱུར་པས་མངོན་པར་འདུ་བྱེད་པའི་མངོན་སུམ་གྱི་རྫུ་འཕྲུལ་སེམས་བསྐྱེད་པ་གཅིག་གིས་འཇིག་རྟེན་གྱི་ཁམས་དེ་པད་མའི་དྲ་བས་གཡོགས་ཏེ་རྒལ་བར་གྱུར་ཏོ། །བརྒལ་ནས་ཁོ་བོ་ལ་འདི་སྐད་ཅེས་ཟེར་རོ། །
བཙུན་པ་ཤཱ་རིའི་བུ་བདག་ཅག་གཉིས་ལས་སུའི་མཐུ་དང་ལྡན་པའི་རྫུ་འཕྲུལ་གྱི་ཤུགས་མགྱོགས། ཁོ་བོས་དེ་ལ་འདི་སྐད་ཅེས་སྨྲས་སོ། །འཇམ་དཔལ་འདི་ཇི་སྙམ་དུ་སེམས། བྱ་ལང་འགུ་ལི་དང་། བྱའི་རྒྱལ་པོ་ནམ་མཁའ་ལྡིང་གཉིས་
གང་གི་མཐུ་ཤིན་ཏུ་མགྱོགས། སྨྲས་པ། བཙུན་པ་ཤཱ་རིའི་བུ་བྱའི་རྒྱལ་པོ་ནམ་མཁའ་ལྡིང་གི་མཐུའི་མགྱོགས་པ་ནི་ཚད་མེད་པ་སྟེ་དཔེ་བླང་དུ་སླ་བ་མ་ཡིན་ནོ། །དེ་ལ་ཁོ་བོས་འདི་སྐད་ཅེས་སྨྲས་སོ། །འཇམ་དཔལ་བྱ་ལང་འགུ་ལིའི་མགྱོགས་པ་
ལྟ་བུར་ནི་ཁོ་བོའི་རྫུ་འཕྲུལ་གྱི་མགྱོགས་པ་བལྟ་བར་བྱའོ། །ཇི་ལྟར་བྱའི་རྒྱལ་པོ་ནམ་མཁའ་ལྡིང་གི་མཐུའི་མགྱོགས་པ་དེ་བས་ཀྱང་བརྒྱ་སྟོང་གིས་ཤིན་ཏུ་ལྷག་པར་ཁྱོད་ཀྱི་རྫུ་འཕྲུལ་མགྱོགས་པར་བལྟའོ། །དེས་སྨྲས་པ། བཙུན་པ་ཤཱ་རིའི་

46-1-281a

བུ་ཁྱོད་ཀྱི་སེམས་ཀྱི་རྣམ་པར་རྟོག་པ་འཇམ་དཔལ་གཞོན་ནུར་གྱུར་པའི་རྫུ་འཕྲུལ་གང་ཡིན་པ་དང་། བདག་གི་གང་ཡིན་པ་དེ་གཉིས་ནི་མཉམ་མོ་སྙམ་དུ་མ་གྱུར་ཏམ་ཁོ་བོས་དེ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་
སྐད་སྨྲས་པ་བཞིན་ཏེ། ཁོ་བོ་དེ་སྙམ་དུ་གྱུར་ཏོ། །དེས་སྨྲས་པ། ཅིའི་ཕྱིར་དེ་སྙམ་དུ་གྱུར། ཁོ་བོས་དེ་ལ་འདི་སྐད་ཅེས་སྨྲས་སོ། །ཉན་ཐོས་རྣམས་ནི་བག་ཆགས་ཀྱི་མཚམས་སྦྱོར་བ་མ་བཅད་པའི་ཕྱིར་མི་མཉམ་དུ་ཟིན་ཀྱང་མཉམ་དུ་བདག་ཉིད་ཀྱིས་
ཤེས་སོ། །དེས་སྨྲས་པ། བཙུན་པ་ཤཱ་རིའི་བུ་ལེགས་སོ། །ལེགས་སོ། །ཇི་སྐད་སྨྲས་པ་དེ་བཞིན་ནོ། །དེ་ཅིའི་ཕྱིར་ཞེ་ན། བཙུན་པ་ཤཱ་རིའི་བུ་སྔོན་བྱུང་བ་འདས་པའི་དུས་ན་རྒྱ་མཚོ་ཆེན་པོའི་འགྲམ་ན་དྲང་སྲོང་ཆོས་འདོད་ཅེས་བྱ་བ་དང་། ཀུན་
བྱིན་ཞེས་བྱ་བ་གཉིས་ཤིག་འཁོད་དེ་དེ་ལ་ཆོས་འདོད་ནི་ལྔ་མངོན་པར་ཤེས་ཤིང་མངོན་པར་ཤེས་པས་རྣམ་པར་རྩེ་བར་གྱུར་ཏོ། །ཀུན་བྱིན་ནི་རིག་པ་དང་སྔགས་ཀྱི་མཐུས་སྟེང་གི་བར་སྣང་ལ་འགྲོ་བར་གྱུར་ཏོ། །དེ་ནས་དེ་གཉིས་དུས་དུས་སུ་སྤྱོད་
པའི་ཕྱིར་རྒྱ་མཚོའི་ཚུ་རོལ་ནས་ཕ་རོལ་དུ་འདོང་ངོ་། །དོང་ནས་སླར་ལོག་ཅིང་རང་རང་གི་གནས་སུ་འཁོད་དོ། །དེ་ནས་དྲང་སྲོང་ཀུན་བྱིན་དེ་ཁོ་བོའི་རྫུ་འཕྲུལ་གང་ཡིན་པ་དང་། ཆོས་འདོད་ཀྱི་གང་ཡིན་པ་དེ་གཉིས་ནི་མཉམ་མོ་སྙམ་དུ་གྱུར་ཏོ། །དེ་ནས་
དུས་གཞན་ཞིག་ན་རྒྱ་མཚོའི་ཚུ་རོལ་ནས་ཕ་རོལ་དུ་དོང་སྟེ། སྲིན་མོའི་གླིང་དུ་ཕྱིན་པ་དང་། དེར་སྲིན་མོ་དེ་དག་གིས་ཡིད་དུ་འོང་བའི་རོལ་མོའི་སྒྲ་བྱས་པར་གྱུར་པ་ཡང་དྲང་སྲོང་ཀུན་བྱིན་གྱིས་ཐོས། སྲིན་མོ་དེ་དག་ཀྱང་མཐོང་ནས། ནམ་
མཁའི་དཀྱིལ་ནས་སའི་སྟེང་དུ་ལྷུང་ངོ་། །དེའི་རིག་པ་དང་སྔགས་ཀྱང་མ་རུང་བར་གྱུར་ཏོ། །དེ་ནས་དྲང་སྲོང་ཆོས་འདོད་སྙིང་རྗེ་བའི་སེམས་སྐྱེས་ནས་ལག་པ་གཡས་པས་བཟུང་སྟེ། སླར་རང་གི་གནས་སུ་ཁྲིད་ནས་བཞག་གོ། །
བཙུན་པ་ཤཱ་རིའི་བུ་དེའི་ཚེ་དེའི་དུས་ན་དྲང་སྲོང་ཆོས་འདོད་ཅེས་བྱ་བ་དེ་གཞན་ཞིག་ཡིན་པ་སྙམ་དུ་ཁྱོད་ཐེ་ཙོམ་འམ། ཡིད་གཉིས་སུ་གྱུར་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཁོ་བོ་ཉིད་དེའི་ཚེ་དེའི་དུས་ན་དྲང་སྲོང་ཆོས་

46-1-281b

འདོད་ཅེས་བྱ་བར་གྱུར་ཏོ། །བཙུན་པ་ཤཱ་རིའི་བུ་དེའི་ཚེ་དེའི་དུས་ན་དྲང་སྲོང་ཀུན་བྱིན་ཞེས་བྱ་བ་དེ་གཞན་ཞིག་ཡིན་པ་སྙམ་དུ་ཁྱོད་ཐེ་ཙོམ་འམ། ཡིད་གཉིས་སུ་གྱུར་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཁྱོད་ཉིད་དེའི་ཚེ་
དེའི་དུས་ན་དྲང་སྲོང་ཀུན་བྱིན་ཞེས་བྱ་བར་གྱུར་ཏེ། ཚེ་དང་ལྡན་པ་ཤཱ་རིའི་བུ་དེའི་ཚེ་ཡང་མི་མཉམ་པར་བདག་དང་མཉམ་པ་ཉིད་དུ་བཞག་གོ། །དེ་ལྟར་དེ་ཕྱོགས་གཅིག་པའི་ཡེ་ཤེས་དང་ལྡན་པའི་ཕྱིར་ད་ལྟར་ཡང་མི་མཉམ་བཞིན་དུ་བདག་
དང་མཉམ་པར་བཞག་གོ། །ཚེ་དང་ལྡན་པ་ཤ་ར་དྭ་ཏིའི་བུས་ཚེ་དང་ལྡན་པ་རབ་འབྱོར་ལ་ཡང་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར་ཁོ་བོས་མངོན་པར་ཤེས་ཏེ། འཇམ་དཔལ་གཞོན་ནུར་གྱུར་པ་དང་ལྷན་ཅིག་ཏུ་ལྷོ་ཕྱོགས་སུ་སངས་རྒྱས་
ཀྱི་ཞིང་དུ་སྤྱད་པ་སྤྱོད་པའི་ཚེ། སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་མང་པོ་འདས་པ་ན་འཇིག་རྟེན་གྱི་ཁམས་རྒྱན་ཐམས་ཅད་ཀྱིས་ཀླུབས་པ་ཞེས་བྱ་བ་ན། བཅོམ་ལྡན་འདས་དེ་བཞིན་གཤེགས་པ་རིན་ཆེན་སྲོག་ཤིང་ཞེས་བྱ་བའི་
སངས་རྒྱས་ཀྱི་ཞིང་དུ་བཅོམ་ལྡན་འདས་དེ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་ཏེ། དེ་ནས་ཡང་འཇམ་དཔལ་གཞོན་ནུར་གྱུར་པ་ཁོ་བོ་ལ་འདི་སྐད་ཅེས་ཟེར་རོ། །བཙུན་པ་ཤཱ་རིའི་བུ་ཁྱོད་ཀྱིས་གང་བདག་ཅག་རྒལ་
བའི་སངས་རྒྱས་ཀྱི་ཞིང་དེ་དག་མཐོང་ངམ། ཁོ་བོས་དེ་ལ་འདི་སྐད་ཅེས་སྨྲས་སོ། །འཇམ་དཔལ་མཐོང་ངོ་། །དེས་སྨྲས་པ། ཚེ་དང་ལྡན་པ་ཤ་ར་དྭ་ཏིའི་བུ་སངས་རྒྱས་ཀྱི་ཞིང་དེ་དག་ཅི་འདྲ་བར་མཐོང་། དེ་ལ་ཁོ་བོས་འདི་སྐད་ཅེས་
སྨྲས་སོ། །ཁ་ཅིག་ནི་མེས་ཡོངསུ་གང་བའོ། །ཁ་ཅིག་ནི་ཆུས་ཡོངས་སུ་གང་བའོ། །ཁ་ཅིག་ནི་ནམ་མཁར་གྱུར་པའོ། །ཁ་ཅིག་ནི་འབྱོར་ཅིང་རྒྱས་པའོ། །ཁ་ཅིག་ནི་འཇིག་པའོ། །ཁ་ཅིག་ནི་འཆགས་པའོ། །ཁ་ཅིག་ནི་ངན་
སོང་གིས་ཡོངསུ་གང་བའོ། །ཁ་ཅིག་ནི་ངན་སོང་དང་བྲལ་བའོ། །སྨྲས་པ། ཚེ་དང་ལྡན་པ་ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་དག་ཇི་ལྟར་བལྟ་བར་བྱ། དེ་ལ་ཁོ་བོས་འདི་སྐད་ཅེས་སྨྲས་སོ། །གང་དག་མེས་ཡོངས་སུ་གང་བ་

46-1-282a

དེ་དག་ནི་མེས་ཡོངས་སུ་གང་བ་ཉིད་དུ་བལྟ་བར་བྱའོ། །གང་དག་ཆུས་ཡོངས་སུ་གང་བ་དེ་དག་ནི་ཆུས་ཡོངས་སུ་གང་བ་ཉིད་དུ་བལྟ་བར་བྱའོ། །གང་དག་ནམ་མཁར་གྱུར་པ་དེ་དག་ནི་ནམ་མཁར་གྱུར་པ་ཉིད་དུ་བལྟ་བར་བྱའོ། །གང་
དག་འབྱོར་ཅིང་རྒྱས་པ་དེ་དག་ནི་འབྱོར་ཅིང་རྒྱས་པ་ཉིད་དུ་བལྟ་བར་བྱའོ། །གང་དག་འཇིག་པ་དེ་དག་ནི་འཇིག་པ་ཉིད་དུ་བལྟ་བར་བྱའོ། །གང་དག་འཆགས་པ་དེ་དག་ནི་འཆགས་པ་ཉིད་དུ་བལྟ་བར་བྱའོ། །གང་དག་ངན་སོང་གིས་ཡོངས་སུ་གང་བ་དེ་
དག་ནི་ངན་སོང་གིས་ཡོངས་སུ་གང་བ་ཉིད་དུ་བལྟ་བར་བྱའོ། །གང་དག་ངན་སོང་དང་བྲལ་བ་དེ་དག་ནི་ངན་སོང་དང་བྲལ་བ་ཉིད་དུ་བལྟ་བར་བྱའོ། །དེས་སྨྲས་པ། ཚེ་དང་ལྡན་པ་ཤཱ་ར་དྭ་ཏིའི་བུའི་ཡེ་ཤེས་ཀྱི་ཡུལ་ཇི་ལྟ་བ་བཤད་པ་འང་དེ་བཞིན་ནོ། །
དེ་ལ་ཁོ་བོས་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱི་སངས་རྒྱས་ཀྱི་ཞིང་དེ་དག་ཇི་ལྟར་མཐོང་། དེས་སྨྲས་པ། ཚེ་དང་ལྡན་པ་ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་ཐམས་ཅད་ནི་ནམ་མཁའི་ཞིང་དུ་མཐོང་ངོ་། །དེ་ཅིའི་ཕྱིར་ཞེ་ན། འདི་ལྟ་སྟེ། 
མེས་ཡོངས་སུ་གང་བ་འམ། ཆུས་ཡོངས་སུ་གང་བ་འམ། འབྱོར་པ་རྒྱས་པ་འམ། འཇིག་པ་འམ། འཆགས་པ་འམ། ངན་སོང་གིས་ཡོངསུ་གང་བ་འམ། ངན་སོང་དང་བྲལ་བ་དེ་དག་ནི་ཡང་དག་པ་མ་ཡིན་པའོ། །རྐྱེན་དེ་དག་ནི་གློ་བུར་དུ་
བྱུང་བ་སྟེ། སྐྱེ་ཞིང་འཇིག་པ་དང་ལྡན་པའོ། །ནམ་མཁའ་ནི་རྐྱེན་གྱིས་བྱུང་བ་མ་ཡིན་ཏེ། རང་བཞིན་དུ་གནས་པ་ཉིད་དོ། །དེ་བཞིན་དུ་གློ་བུར་གྱི་ཉེ་བར་ཉོན་མོངས་པས་སེམས་ཉོན་མོངས་པར་གྱུར་པ་ཞེས་བྱ་སྟེ། སེམས་ཀྱི་རང་བཞིན་ནི་ནམ་
ཡང་ཉོན་མོངས་པར་གྱུར་པ་མེད་དོ། །ཚེ་དང་ལྡན་པ་ཤཱ་ར་དྭ་ཏིའི་བུ་འདི་ལྟ་སྟེ་དཔེར་ན་འདས་པའི་དུས་ན་གང་གཱའི་ཀླུང་གི་བྱེ་མ་སྙེད་ཀྱི་བསྐལ་པས་སྲེག་པ་བྱུང་ཡང་ནམ་མཁའ་ལ་སྔོན་ནམ་ཡང་ཚིག་པ་མེད་དོ། །ཚེ་དང་ལྡན་པ་ཤ་ར་དྭ་ཏིའི་བུ་དེ་བཞིན་དུ་
སེམས་ཅན་རེ་རེས་ཀྱང་གང་གཱའི་ཀླུང་གི་བྱེ་མ་སྙེད་ཀྱི་མི་དགེ་བའི་ལས་མངོན་པར་འདུ་བྱས་ཀྱང་སེམས་ཀྱི་རང་བཞིན་ནི་ནམ་ཡང་དེ་བཞིན་དུ་ཉོན་མོངས་པར་གྱུར་པ་མེད་དོ། །ཚེ་དང་ལྡན་པ་ཤཱ་ར་དྭ་ཏིའི་བུ་རིགས་ཀྱི་བུ་དང་། རིགས་ཀྱི་བུ་

46-1-282b

མོ་གང་ལ་ལ་རང་བཞིན་གྱིས་ཡོངས་སུ་དག་པའི་ཆོས་ཀྱི་དབྱིངས་དེ་ལྟ་བུ་ལ་འཇུག་པ་དེ་དག་ནི་ཀུན་ནས་ལྡང་བ་འམ། སྒྲིབ་པ་འམ། མངོན་པར་འདུ་བྱེད་པས་ཀུན་ནས་ལྡང་བར་འགྱུར་བ་ཆུང་ཟད་ཀྱང་མེད་དེ། འདི་ནི་ཀུན་ནས་ལྡང་བ་མེད་པའི་ཆོས་ཀྱི་
སྒོའོ། །ཆོས་ཀྱི་སྒོ་དེ་ལ་བརྟེན་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ཀྱི་རང་བཞིན་ཡོངས་སུ་དག་པར་ཞུགས་ནས། ཉེས་པ་ལས་འབྱུང་བ་ལ་མཁས་པར་ཤེས་ཤིང་། དེའི་སེམས་ནམས་ཀྱང་སྒྲིབ་པའི་ཆོས་
རྣམས་ཀྱིས་སྒྲིབས་པར་མི་འགྱུར་རོ། །ཚེ་དང་ལྡན་པ་རབ་འབྱོར་འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་པ་དང་། ཆོས་བསྟན་པ་རྣམ་པར་འཕྲུལ་པ་ལས་གང་ཁོ་བོས་ཕྱོགས་ཙམ་ཞིག་མངོན་སུམ་དུ་གྱུར་པ་ནི་
དེ་ལྟ་བུ་དེ་དག་ཡིན་ནོ། །དེ་ནས་ཚེ་དང་ལྡན་པ་ཀུན་དགའ་བོས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ་ཁོ་བོས་ཀྱང་འཇམ་དཔལ་གཞོན་ནུར་གྱུར་པའི་རྫུ་འཕྲུལ་གྱི་ཆོ་འཕྲུལ་ཁ་ཅིག་མངོན་སུམ་དུ་གྱུར་
ཏོ། །ཚེ་དང་ལྡན་པ་ཤཱ་རིའི་བུ་ཁོ་བོས་མངོན་པར་ཤེས་ཏེ། དུས་གཅིག་ན་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་འདི་ཉིད་ན་དགེ་སློང་བརྒྱད་བརྒྱའི་དགེ་སློང་གི་དགེ་འདུན་ཆེན་པོ་དང་
བྱང་ཆུབ་སེམས་དཔའ་ཁྲི་ཉིས་སྟོང་དང་ཐབས་གཅིག་ཏུ་བཞུགས་སོ། །དེའི་ཚེ་ན་མཉན་ཡོད་དུ་དུས་མ་ཡིན་པའི་སྤྲིན་ཆེན་པོ་ཞིག་བྱུང་སྟེ། དེ་ལ་ཉིན་ཞག་བདུན་དུ་རྒྱུན་མ་ཆད་པར་དུས་མ་ཡིན་པའི་ཆར་ཆེན་པོ་བབ་བོ། །དེ་ན་དགེ་སློང་གང་
དག་རྫུ་འཕྲུལ་ཆེ་བ། མཐུ་ཆེ་བ་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ཐོབ་པ་དེ་དག་ནི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པས་དུས་འདའ་བར་བྱས་ཀྱི། 
གང་དག་མ་ཐོབ་པ་དེ་དག་ནི་ཉིན་ཞག་བདུན་དུ་ཟས་ཆད་པར་གྱུར་ཏོ། །དེ་ནས་དགེ་སློང་དེ་དག་ཉམ་ཆུང་བ་དང་ལྡན་ཏེ། བཅོམ་ལྡན་འདས་བལྟ་བའི་ཕྱིར་འདོང་ཡང་མ་ནུས་ནས་དེ་ལ་ཁོ་བོ་འདི་སྙམ་དུ་གྱུར་ཏེ། ཨེ་མའོ་དགེ་སློང་

46-1-283a

འདི་དག་ནི་རྗུད་པར་གྱུར་ན་བདག་བཅོམ་ལྡན་འདས་ཀྱི་དྲུང་དུ་སོང་སྟེ། ཚུལ་དེ་དག་བཅོམ་ལྡན་འདས་ལ་གསོལ་ལོ་སྙམ་དུ་གྱུར་ནས། ཁོ་བོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་
གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཨེ་མའོ་དགེ་སློང་འདི་དག་ཉིན་ཞག་བདུན་དུ་ཚལ་མ་ཆད་དེ་བཀྲེས་པས་ཉམ་ཆུང་བ་དང་ལྡན་ནས་རྗུད་དེ། ཁྲི་དང་ཁྲིའུ་ལས་
ལྡང་བ་དང་། བཅོམ་ལྡན་འདས་བལྟ་བའི་སྲད་དུ་མཆི་བའི་རྔོ་ཡང་མི་ཐོག་གོ། །དེ་ནས་བཅོམ་ལྡན་འདས་ཀྱིས་ཁོ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་སོང་སྟེ་འཇམ་དཔལ་གཞོན་ནུར་གྱུར་པ་ལ་ཚུལ་དེ་དག་
སྨྲོས་ཤིག་དང་། དེས་དགེ་སློང་གི་དགེ་འདུན་རྟས་པར་བྱེད་པར་འགྱུར་རོ། །ཁོ་བོས་བཅོམ་ལྡན་འདས་ཀྱི་ལྟར་མཉན་ནས་འཇམ་དཔལ་གཞོན་ནུར་གྱུར་པའི་གནས་ཁང་ག་ལ་བ་དེར་སོང་སྟེ་ཕྱིན་པ་དང་། དེའི་ཚེ་འཇམ་དཔལ་གཞོན་ནུར་
གྱུར་པ་རང་གི་གནས་ཁང་ན་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་ལ་ཆོས་སྟོན་པ་མཐོང་ངོ་། །འཇམ་དཔལ་གཞོན་ནུར་གྱུར་པ་དེས་ཀྱང་ཁོ་བོ་གནས་ཁང་གི་ནང་དུ་འོངས་པ་མཐོང་སྟེ། མཐོང་ནས་འདི་སྐད་ཅེས་
ཟེར་རོ། །བཙུན་པ་ཀུན་དགའ་བོ་ཁྱོད་ཅིའི་ཕྱིར་རླུང་དང་ཆར་གྱི་ནང་ན་འདིར་འོངས། ཁོ་བོས་འཇམ་དཔལ་གཞོན་ནུར་གྱུར་པ་ལ་ཚུལ་དེ་དག་སྨྲས་སོ། །དེ་ཁོ་བོ་ལ་ཀུན་དགའ་བོ་སོང་སྟེ་སྟན་ཐིང་ལ། གདུགས་ཚོད་བབ་ན་འགཎ་
ཌི་རྡུངས་ཤིག་དེ་སྐད་ཅེས་ཟེར་ནས། ཁོ་བོ་འཇམ་དཔལ་གཞོན་ནུར་གྱུར་པའི་གནས་ཁང་ནས་བྱུང་སྟེ། དགེ་འདུན་གྱི་ཀུན་དགའ་ར་བར་སོང་ནས་སྟན་བཏིང་སྟེ། འཇམ་དཔལ་གཞོན་ནུར་གྱུར་པ་ཅི་གནས་ཁང་ནས་བྱུང་ངམ་
ཞེས་འཇམ་དཔལ་གཞོན་ནུར་གྱུར་པའི་གནས་ཁང་དུ་ལྟ་ཞིང་ཕྱོགས་གཅིག་ཏུ་འདུག་གོ། །དེ་ནས་འཇམ་དཔལ་གཞོན་ནུར་གྱུར་པས་ལུས་ཐམས་ཅད་རྣམ་པར་འཇིག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་

46-1-283b

སྤྲུལ་པ་གཞན་ཞིག་སྤྲུལ་ཏེ། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དེ་དག་ལ་ཆོས་སྟོན་ཏོ། །དེ་གནས་ཁང་ནས་བྱུང་སྟེ་མཉན་ཡོད་ཀྱི་གྲོང་ཁྱེར་ཆེན་པོར་བསོད་སྙོམས་ཀྱི་ཕྱིར་ཞུགས་ན་ཁོ་བོས་ནི་མ་
མཐོང་ངོ་། །དེ་ནས་བདུད་སྡིག་ཅན་འདི་སྙམ་དུ་གྱུར་ཏེ། འཇམ་དཔལ་གཞོན་ནུར་གྱུར་པ་འདིས་སེང་གེའི་སྒྲ་བསྒྲགས་ནས་མཉན་ཡོད་ཀྱི་གྲོང་ཁྱེར་ཆེན་པོར་བསོད་སྙོམས་ཀྱི་ཕྱིར་ཞུགས་ན་བདག་གིས་འདི་
མིག་གིས་མི་རྩོལ་བར་བྱའོ་སྙམ་དུ་བསམས་ནས། དེས་དེ་ཉིད་ཀྱི་ཚེ་མཉན་ཡོད་ཀྱི་གྲོང་ཁྱེར་ཆེན་པོའི་བྲམ་ཟེ་དང་། ཁྱིམ་བདག་དང་། གྲོང་འདབ་དང་། ཡུལ་མི་གང་གིས་ཀྱང་འཇམ་དཔལ་
གཞོན་ནུར་གྱུར་པ་མི་མཐོང་བ་དང་། གང་ཡང་བསུར་མི་འོང་བ་དང་། སུ་ཡང་བསོད་སྙོམས་མི་འབུལ་བ་དེ་ལྟ་དེ་ལྟར་བྱིན་གྱིས་བརླབས་སོ། །དེ་ནས་འཇམ་དཔལ་གཞོན་ནུར་གྱུར་པ་གང་དང་
གང་དུ་སོང་བ་དེ་དག་ཐམས་ཅད་ན་སྒོ་དག་ཀྱང་བཅད་པར་སྣང་སྟེ། གང་ཡང་མི་བསུ་བར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་བསམས་ན། 
ཨེ་མའོ་བྲམ་ཟེ་དང་། ཁྱིམ་བདག་འདི་དག་ནི་ཅི་ནས་ཀྱང་བདག་མི་མཐོང་བ་དང་། གཏམ་མི་བྱ་བར་བདུད་ཀྱིས་བྱིན་གྱིས་བརླབས་སོ་སྙམ་དུ་བསམས་ནས། 
དེས་དེའི་ཚེ་གང་བདེན་པ་དང་། བདེན་པའི་ཚིག་དང་། བསོད་ནམས་དང་ཡེ་ཤེས་ཀྱི་ཚོགས་གང་དག་གིས་བདག་གིས་སྤུའི་ཁུང་བུ་གཅིག་ལུས་ལ་སྐྱེས་
པའི་བསོད་ནམས་ཀྱི་ཕུང་པོ་དེ་ཡང་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་ཀྱི་བདུད་སྡིག་ཅན་རྣམས་ལ་མེད་པའི་བདེན་པ་དང་། 

46-1-284a

བདེན་པའི་ཚིག་དེས་བདུད་ཀྱི་བྱིན་ཀྱི་བརླབས་འདི་དག་མེད་པར་གྱུར་ཅིག །བདུད་སྡིག་ཅན་ཉིད་ཀྱང་ཁྱིམ་བདག་གི་ཚུལ་དུ་སྲང་དང་། སུམ་མདོ་དང་། བཞི་མདོ་དག་ན་འཇམ་དཔལ་གཞོན་ནུར་གྱུར་པ་ལ་བསོད་སྙོམས་ཕུལ་
ཅིག །ཕུལ་ཅིག །འདི་ལ་ཕུལ་ན་འབྲས་བུ་ཆེ་བར་འགྱུར་རོ། །གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ཐམས་ཅད་ལ་ལོ་འབུམ་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་
བྱས། གུས་པར་བྱས། ཕུ་དུད་དུ་བྱས་པ་བས། གང་གིས་འཇམ་དཔལ་གཞོན་ནུར་གྱུར་པ་ལ་བསོད་སྙོམས་སེན་མོའི་རྩེ་མོ་གང་ཙམ་ཕུལ་ན་དེའི་བསོད་ནམས་ཀྱི་ཕུང་པོ་ཆེས་མང་དུ་བསྐྱེད་པར་འགྱུར་རོ་ཞེས་སྒྲོགས་པར་གྱུར་ཅིག་
ཅེས་བདེན་པའི་བྱིན་གྱི་བརླབས་བྱས་སོ། །འཇམ་དཔལ་གཞོན་ནུར་གྱུར་པས་བྱིན་གྱི་བརླབས་དེ་བྱས་མ་ཐག་ཏུ་དེ་ནས་དེ་ཉིད་ཀྱི་ཚེ་སྒོ་ཐམས་ཅད་ཀྱང་བྱེ་བར་གྱུར་ཏོ། །སྐྱེ་བོ་མང་པོ་ཐམས་ཅད་ཀྱང་བསུ་ཞིང་འཇམ་དཔལ་གཞོན་
ནུར་གྱུར་པ་བདེ་བར་འོངས་སོ་ཞེས་ཀྱང་རྗོད་དོ། །བདུད་སྡིག་ཅན་ཉིད་ཀྱང་ཁྱིམ་བདག་གི་ཚུལ་དུ་སྲང་དང་། སུམ་མདོ་དང་། བཞི་མདོ་དག་ན་འཇམ་དཔལ་གཞོན་ནུར་གྱུར་པ་ལ་བསོད་སྙོམས་ཕུལ་ཅིག །ཕུལ་ཅིག །འདི་ལ་ཕུལ་ན་
འབྲས་བུ་ཆེ་བར་འགྱུར་རོ། །གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ཐམས་ཅད་ལ་ལོ་འབུམ་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས། གུས་པར་བྱས། ཕུ་དུད་དུ་བྱས་པ་
བས། གང་གིས་འཇམ་དཔལ་གཞོན་ནུར་གྱུར་པ་ལ་བསོད་སྙོམས་སེན་མོ་གང་ཙམ་ཕུལ་ན་དེའི་བསོད་ནམས་ཀྱི་ཕུང་པོ་ཆེས་མང་དུ་བསྐྱེད་པར་འགྱུར་རོ་ཞེས་སྒྲོགས་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་ཅི་ནས་ཀྱང་ལྷུང་བཟེད་
དེར་བསོད་པའི་བཟའ་བ་དང་། བཅའ་བ་དང་། མྱང་བ་ཕལ་ཆེར་བཅུག་པ་དེ་དག་ཐམས་ཅད་ཇི་ལྟར་སྣོད་སོ་སོར་བཅུག་པ་བཞིན་དུ་མ་འདྲེས་པར་འདུག་པ་དང་། གང་དགེ་སློང་བརྒྱད་བརྒྱ་པོ་དེ་དག་དང་། བྱང་ཆུབ་སེམས་དཔའ་ཁྲི་ཉིས་སྟོང་པོ་དེ་དག་ལ་ཁ་

46-1-284b

ཟས་ཇི་ཙམ་གྱིས་ཆོག་པ་ལྷུང་བཟེད་དེས་བླངས་པར་འགྱུར་བ་དེ་ལྟ་དེ་ལྟར་རང་གི་ལྷུང་བཟེད་དེ་བྱིན་གྱིས་བརླབས་སོ། །དེ་ནས་འཇམ་དཔལ་གཞོན་ནུར་གྱུར་པས་མཉན་ཡོད་ཀྱི་གྲོང་ཁྱེར་ཆེན་པོར་བསོད་སྙོམས་ཀྱི་ཕྱིར་སྤྱད་ནས་མཉན་ཡོད་ཀྱི་
གྲོང་ཁྱེར་གྱི་ཕྱི་རོལ་དུ་བྱུང་སྟེ། ལམ་ལས་བྱོལ་ནས་ལྷུང་བཟེད་དེ་སའི་སྟེང་དུ་བཞག་སྟེ་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན་ལྷུང་བཟེད་འདི་ཁྱེར་ལ་མདུན་དུ་སོང་ཤིག །དེ་ནས་བདུད་སྡིག་ཅན་གྱིས་ལྷུང་བཟེད་དེ་ས་དེ་ལས་གདེག་པར་
བྱས་ན་གདེགས་མ་ནུས་ནས། དེས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ལྷུང་བཟེད་འདི་སའི་སྟེང་ནས་གདེག་པར་མ་ནུས་སོ། །སྨྲས་པ། སྡིག་ཅན་ཁྱོད་ཀྱང་རྫུ་འཕྲུལ་ཆེ་ཞིང་མཐུ་ཆེན་པོ་དང་ལྡན་པ་ཡིན་ན་རྫུ་འཕྲུལ་གྱི་
སྟོབས་ཀྱིས་ལྷུང་བཟེད་འདི་སའི་སྟེང་ནས་གདེག་པར་གྱིས་ཤིག །དེ་ནས་བདུད་སྡིག་ཅན་གྱིས་རྫུ་འཕྲུལ་གྱི་སྟོབས་ཀྱི་ཆོ་འཕྲུལ་ཐམས་ཅད་བསྟན་ཀྱང་ལྷུང་བཟེད་དེས་དེ་ལས་ཐ་ན་སྐྲའི་རྩེ་མོའི་ཆ་ཙམ་ཡང་གདེག་པར་མ་ནུས་ནས། དེ་ངོ་མཚར་
དུ་གྱུར་ཏེ་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁོ་བོ་ནི་འདོད་ན་རི་གཤོལ་མདའ་འཛིན་ཀྱང་ལག་མཐིལ་དུ་བླངས་ཏེ་ནམ་མཁའ་ལ་འདོར་ན་ཁོ་བོས་ལྷུང་བཟེད་ཆུང་ངུ་འདི་ལྟ་བུ་འདིས་འདིའི་སྟེང་ནས་གདེག་པར་མ་
ནུས་ན་དེ་ཅིའི་ཕྱིར་དེ་ལྟར་གྱུར། འཇམ་དཔལ་གྱིས་སྨྲས་པ། སེམས་ཅན་ཆེན་པོ་རྣམས་དང་། གང་ཟག་ཆེན་པོ་རྣམས་ཀྱི་སྟོབས་དྲངས་པ་ལྷུང་བཟེད་འདིར་བཅུག་སྟེ། དེའི་ཕྱིར་ཁྱོད་ཀྱིས་གདེག་པར་མ་ནུས་སོ། །དེ་ནས་འཇམ་དཔལ་གཞོན་
ནུར་གྱུར་པ་ཉིད་ཀྱིས་ལྷུང་བཟེད་དེ་ས་ལས་བླངས་ནས་བདུད་སྡིག་ཅན་ལ་བྱིན་ཏེ་འདི་སྐད་ཅེས་སྨྲས་སོ། །སྡིག་ཅན་ལྷུང་བཟེད་འདི་ཁྱེར་ལ་མདུན་དུ་སོང་ཤིག །དེ་ནས་བདུད་སྡིག་ཅན་དེ་སློབ་མ་བཞིན་དུ་ལྷུང་བཟེད་ཁྱེར་ཏེ་འཇམ་དཔལ་གཞོན་ནུར་གྱུར་པའི་
མདུན་དུ་སོང་ངོ་། །དེ་ནས་ལྷའི་བུ་དབང་སྒྱུར་ལྷའི་བུ་ཁྲི་ཉིས་སྟོང་གིས་ཡོངས་སུ་བསྐོར་ཅིང་མདུན་དུ་བདར་ཏེ་འཇམ་དཔལ་གཞོན་ནུར་གྱུར་པ་ག་ལ་བ་དེར་དོང་ནས་ལྷགས་པ་དང་། འཇམ་དཔལ་གཞོན་ནུར་གྱུར་པའི་རྐང་པ་གཉིས་ལ་མགོ་བོས་

46-1-285a

ཕྱག་འཚལ་ནས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན་བྲན་བཞིན་དུ་འཇམ་དཔལ་གཞོན་ནུར་གྱུར་པའི་ལྷུང་བཟེད་ཁྱེར་ཏེ་མདུན་དུ་འགྲོ་བ་འདི་ཅི་ཞིག །བདུད་ཀྱིས་སྨྲས་པ། ལྷའི་བུ་མཐུ་དང་ལྡན་པ་རྣམས་དང་འགྲིན་པ་ཅི་འང་མེད་དོ། །
ལྷའི་བུས་སྨྲས་པ། སྡིག་ཅན་ཁྱོད་ཀྱང་རྫུ་འཕྲུལ་ཆེ་བ་མཐུ་ཆེན་པོ་དང་ལྡན་པའོ། །དེ་ནས་འཇམ་དཔལ་གཞོན་ནུར་གྱུར་པའི་བྱིན་གྱི་བརླབས་ཀྱིས་བདུད་སྡིག་ཅན་གྱིས་ལྷའི་བུ་དབང་སྒྱུར་ལ་འདི་སྐད་ཅེས་སྨྲས་སོ། །ལྷའི་བུ་འདི་ལྟ་སྟེ། བདུད་ཀྱི་སྟོབས་
ནི་གཏི་མུག་གི་སྟོབས་སོ། །བྱང་ཆུབ་སེམས་དཔའི་སྟོབས་ནི་ཤེས་རབ་ཀྱི་སྟོབས་སོ། །བདུད་ཀྱི་སྟོབས་ནི་ང་རྒྱལ་གྱི་སྟོབས་སོ། །བྱང་ཆུབ་སེམས་དཔའི་སྟོབས་ནི་ཡེ་ཤེས་ཀྱི་སྟོབས་སོ། །བདུད་ཀྱི་སྟོབས་ནི་ལྟ་བ་འབྱུང་བའི་སྟོབས་སོ། །བྱང་
ཆུབ་སེམས་དཔའི་སྟོབས་ནི་སྟོང་པ་ཉིད་ཀྱི་སྟོབས་སོ། །བདུད་ཀྱི་སྟོབས་ནི་ཕྱིན་ཅི་ལོག་གི་སྟོབས་སོ། །བྱང་ཆུབ་སེམས་དཔའི་སྟོབས་ནི་བདེན་པའི་སྟོབས་སོ། །བདུད་ཀྱི་སྟོབས་ནི་ང་དང་ངའི་ཞེས་བྱ་བའི་སྟོབས་སོ། །བྱང་ཆུབ་སེམས་
དཔའི་སྟོབས་ནི་བྱམས་པ་ཆེན་པོ་དང་སྙིང་རྗེ་ཆེན་པོའི་སྟོབས་སོ། །བདུད་ཀྱི་སྟོབས་ནི་འདོད་ཆགས་དང་ཞེ་སྡང་དང་གཏི་མུག་གི་སྟོབས་སོ། །བྱང་ཆུབ་སེམས་དཔའི་སྟོབས་ནི་རྣམ་པར་ཐར་པའི་སྒོ་གསུམ་གྱི་སྟོབས་སོ། །བདུད་ཀྱི་
སྟོབས་ནི་སྐྱེ་བ་དང་འཆི་བ་དང་། འབྱུང་བའི་སྟོབས་སོ། །བྱང་ཆུབ་སེམས་དཔའི་སྟོབས་ནི་སྐྱེ་བ་མེད་པ་དང་། འབྱུང་བ་མེད་པའི་ཆོས་ལ་བཟོད་པ་རབ་ཏུ་ཐོབ་པའི་སྟོབས་སོ། །བདུད་སྡིག་ཅན་གྱིས་བསྟན་པ་འདི་བཤད་པའི་ཚེ་ལྷའི་བུའི་འཁོར་
དེ་ལས་ལྷའི་བུ་ལྔ་བརྒྱ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའ་ཉིས་བརྒྱས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ།། །། བམ་པོ་གསུམ་པ། དེ་ནས་འཇམ་དཔལ་གཞོན་ནུར་
གྱུར་པ་བདུད་སྡིག་ཅན་དང་ལྷན་ཅིག་ཏུ་ལྷུང་བཟེད་དེ་འཁོར་གྱི་ཁྱམས་སུ་བཞག་སྟེ་སོང་ཡང་ཁོ་བོས་མ་མཐོང་མ་ཐོས་ནས། གདུགས་ཚོད་ལ་བབ་པར་གྱུར་ཀྱང་འཇམ་དཔལ་གཞོན་ནུར་གྱུར་པ་གནས་ཁང་དེ་ནས་བྱུང་བ་འམ་ཞུགས་

46-1-285b

པར་ཡང་མ་མཐོང་ནས། དེ་ལ་ཁོ་བོ་འདི་སྙམ་དུ་གྱུར་ཏེ། འཇམ་དཔལ་གཞོན་ནུར་གྱུར་པས་དགེ་སློང་གི་དགེ་འདུན་མ་བསླུས་སམ། བདག་བཅོམ་ལྡན་འདས་ཀྱི་དྲུང་དུ་སོང་སྟེ་ཚུལ་དེ་དག་གསོལ་ལོ་སྙམ་དུ་གྱུར་ནས། ཁོ་བོ་བཅོམ་
ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གདུགས་ཚོད་ལ་བབ་ན་འཇམ་དཔལ་གཞོན་
ནུར་གྱུར་པ་ནི་གནས་ཁང་དེ་ནས་མ་བྱུང་ངོ་། །བཅོམ་ལྡན་འདས་ཀྱིས་ཁོ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ཀྱིས་འཁོར་གྱི་ཁྱམས་ཟླུམ་པོར་དེར་ཅི་ཡང་མ་མཐོང་ངམ། བཅོམ་ལྡན་འདས་ལ་ཁོ་བོས་
འདི་སྐད་ཅེས་གསོལ་ཏོ། །བཅོམ་ལྡན་འདས་དེ་ན་ལྷུང་བཟེད་ཟས་ཀྱིས་གང་བ་གཅིག་ཅིག་གདའོ། །བཅོམ་ལྡན་འདས་ཀྱིས་ཁོ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་སོང་ལ་འགཎ་ཌི་རྡུངས་ཏེ་དགེ་སློང་གི་དགེ་འདུན་
སྡུས་ཤིག །བཅོམ་ལྡན་འདས་ལ་ཁོ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་འདི་དག་མང་པོ་ཞིག་མཆིས་ན་ལྷུང་བཟེད་གཅིག་གང་བའི་ཟས་ཀྱིས་ཇི་ལྟར་བགྱི། བཅོམ་ལྡན་འདས་ཀྱིས་བཀའ་སྩལ་པ། 
ཀུན་དགའ་བོ་ཁྱོད་སྙིང་ལས་ཆུང་བར་བྱོས་ཤིག །ཀུན་དགའ་བོ་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ཐམས་ཅད་ཀྱིས་ལོ་འབུམ་དུ་ལྷུང་བཟེད་གཅིག་པོ་དེ་ལས་ཟོས་ཀྱང་ལྷུང་བཟེད་དེ་ནི་
ཡོངས་སུ་ཟད་པར་མི་འགྱུར་རོ། །དེ་ཅིའི་ཕྱིར་ཞེ་ན། ལྷུང་བཟེད་དེ་ནི་འཇམ་དཔལ་གཞོན་ནུར་གྱུར་པས་བྱིན་གྱིས་བརླབས་ཀྱི་བྱིན་གྱིས་བརླབས་ཏེ། འཇམ་དཔལ་གཞོན་ནུར་གྱུར་པའི་སྦྱིན་པའི་ཕ་རོལ་དུ་ཕྱིན་པ་ནི་ཟད་མི་ཤེས་པའི་བསོད་ནམས་
ལས་བྱུང་བའོ། །བཅོམ་ལྡན་འདས་ཀྱི་ལྟར་ཁོ་བོས་མཉན་ནས་སེམས་དགའ་བས་འགཎ་ཌི་བརྡུངས་ཏེ་དགེ་སློང་གི་དགེ་འདུན་ཡང་བསོགས་སོ། །དེ་ནས་འཇམ་དཔལ་གཞོན་ནུར་གྱུར་པས་འགཎ་ཌིའི་སྒྲ་ཐོས་ནས། ལྷའི་བུ་དེ་དག་དང་། 

46-1-286a

བྱང་ཆུབ་སེམས་དཔའ་རྣམས་དང་འགྲོགས་ཏེ། རང་གི་གནས་ཁང་ནས་བྱུང་སྟེ། ཁྱམས་ཟླུམ་པོར་སོང་ནས་ལྷུང་བཟེད་དེ་ལས་བསོད་པའི་བཟའ་བ་དང་། བཅའ་བ་དང་། མྱང་བ་དང་། ཇི་ལྟར་སྣོད་སོ་སོ་ན་བཞག་བཞག་པ་ལྟ་བུར་ཕན་
ཚུན་མ་འདྲེས་པ་ཕལ་ཆེར་ཕྱུང་སྟེ་དགེ་སློང་མང་པོ་ཐམས་ཅད་ཀྱང་བརྟས་པར་བྱས་སོ། །བྱང་ཆུབ་སེམས་དཔའ་མང་པོ་ཐམས་ཅད་ཀྱང་ཚིམ་པར་བྱས་ཀྱང་ཟས་དེ་ནི་ཡོངས་སུ་ཟད་པའམ་གཏུགས་པར་མ་གྱུར་ཏོ། །དེ་ནས་བདུད་སྡིག་
ཅན་གྱིས་འཇམ་དཔལ་གཞོན་ནུར་གྱུར་པ་ལ་བར་ཆད་བྱ་བའི་ཕྱིར་ཤམ་ཐབས་ལེགས་པར་མ་བགོས་པ། བླ་གོས་ལེགས་པར་མ་གྱོན་པ། ཤ་ཚུགས་མ་ལེགས་པ། ལྷུང་བཟེད་རྡོལ་ཅིང་ཆག་པ། གོས་ངན་པ། སྣ་ལེབ་ལེབ་པོ་དང་། 
ཞར་བ་དང་། ཐེང་པོ་དང་། ཞ་བོ་དང་དེ་ལས་ཁ་ཅིག་ནི་ཧ་ཅང་ཡང་རིང་བ། ཁ་ཅིག་ནི་ཧ་ཅང་ཐུང་བ། ཁ་ཅིག་ནི་ཧ་ཅང་གནག་པ། ཁ་ཅིག་ནི་ཧ་ཅང་དཀར་བ། ཁ་ཅིག་ནི་ཧ་ཅང་སྐེམ་པ། ཁ་ཅིག་ནི་ཧ་ཅང་སྦོམ་པ། ཁ་ཅིག་ནི་སྒུར་པོ། ཁ་ཅིག་ནི་མིའུ་ཐུང་
སྟེ། དེ་དག་གཞོན་པའི་མཐའ་ནས་ཕྱག་འཚལ་ཞིང་རྒན་པའི་མཐར་འདུག་སྟེ། སྐྱེ་བོ་མང་པོའི་ཚོགས་གང་གིས་མཐོང་བའི་སེམས་སྐྱོ་བར་འགྱུར་བའི་དགེ་སློང་བཞི་ཁྲི་སྤྲུལ་པར་གྱུར་ཏེ། དེ་དག་ལ་ཡང་ལྷུང་བཟེད་དེ་ནས་བསོད་པའི་བཟའ་
བ་དང་། བཅའ་བ་དང་། མྱང་བ་ཕལ་ཆེར་ཕྱུང་སྟེ། བྱིན་ཀྱང་ལྷུང་བཟེད་དེ་ཟད་པར་མ་གྱུར་ཏོ། །དེ་ནས་བདུད་སྡིག་ཅན་གྱིས་སྤྲུལ་པའི་དགེ་སློང་དེ་དག་རེ་རེས་ཀྱང་འབྲས་ཅན་ཡུལ་མ་ག་དྷཱའི་བྲེ་བོ་བཅུ་བཅུ་ཟོས་ཀྱང་ཚིམ་པར་མ་གྱུར་པ་དེ་ལྟར་
བྱིན་གྱིས་བརླབས་སོ། །དེ་ན་རུང་བྱེད་རྣམས་ཐམས་ཅད་ཡོངས་སུ་སྐྱོ་བར་གྱུར་ཀྱང་དེ་དག་ཚིམ་པར་བྱེད་མ་ནུས་སོ། །དེ་ནས་འཇམ་དཔལ་གཞོན་ནུར་གྱུར་པས་གང་དགེ་སློང་དེ་དག་ལྷུང་བཟེད་རྣམས་ཀྱང་ཡོངས་སུ་གང་ལ་
ལག་པ་ན་ཡང་ཁམ་ཐོགས་ཤིང་ཁར་བཅུག་པའི་ཁམ་ཡང་མིད་མི་ནུས་ལ། དེ་དག་འགྲིན་པ་བཙིར་བ་བཞིན་དུ་མིག་ལོག་སྟེ་ས་ལ་ལྷུང་བ་དེ་ལྟར་བྱིན་གྱིས་བརླབས་སོ། །དེ་ནས་འཇམ་དཔལ་གཞོན་ནུར་གྱུར་པས་བདུད་སྡིག་ཅན་ལ་

46-1-286b

འདི་སྐད་ཅེས་སྨྲས་སོ། །སྡིག་ཅན་ཁྱོད་ཀྱི་དགེ་སློང་འདི་དག་ཅིའི་ཕྱིར་ཟས་མི་ཟ་བདུད་ཀྱིས་སྨྲས་པ། འཇམ་དཔལ་བདག་གི་དགེ་སློང་འདི་དག་ནི་ཤི་ལ་ཐུག་པར་གྱུར་ན་ཁྱོད་ཀྱིས་དུག་དང་བསྲེས་པའི་ཟས་མ་བྱིན་གྲང་། འཇམ་དཔལ་གྱིས་སྨྲས་པ། 
སྡིག་ཅན་དུག་མེད་པ་རྣམས་དུག་སྦྱིན་པར་ག་ལ་འགྱུར། གང་དག་དུག་སྲེལ་བ་དེ་དག་ནི་དུག་སྦྱིན་པར་བྱེད་ཀྱི། གང་དག་དུག་མི་སྲེལ་བ་དེ་དག་ནི་དུག་སྦྱིན་པར་མི་བྱེད་དོ། །སྡིག་ཅན་དུག་ཅེས་བྱ་བ་ནི་འདི་ལྟ་སྟེ། འདོད་ཆགས་དང་། ཞེ་སྡང་དང་གཏི་མུག་
སྟེ། དེ་དག་ཀྱང་ལེགས་པར་གསུངས་པའི་ཆོས་འདུལ་བ་ལ་མེད་དོ། །དུག་ཅེས་བྱ་བ་ནི་མ་རིག་པ་དང་། སྲིད་པའི་སྲེད་པ་དང་། ང་དང་ངའི་ཞེས་བྱ་བ་དང་། རྒྱུ་དང་། ལྟ་བ་དང་། མིང་དང་གཟུགས་དང་། རྗེས་སུ་ཆགས་པ་དང་། ཁོང་ཁྲོ་བ་དང་། བདག་ཏུ་ལྟ་བ་
དང་། གཞན་དུ་ལྟ་བ་དང་། སྒྲིབ་པ་དང་། ཀུན་ནས་ལྡང་བ་དང་། ཕུང་པོ་ལ་མངོན་པར་ཞེན་པ་དང་། ཁམས་ལ་རློམ་སེམས་སུ་བྱེད་པ་དང་། སྐྱེ་མཆེད་ལ་ཡོངས་སུ་འཛིན་པ་དང་། ཡུལ་ལ་ཆགས་པ་དང་། ཁམས་གསུམ་ལ་ཞེན་པ་དང་། བསྡུས་པ་དང་། གཡེངས་
པ་དང་། གཞག་པ་དང་། གདེག་པ་དང་། ཤི་འཕོ་བ་དང་། སྐྱེ་བ་དང་། འོང་བ་དང་། འགྲོ་བ་དང་། ལུས་ལ་མངོན་པར་ཆགས་པ་དང་། སྲོག་ལ་ཞེན་པ་དང་། སྡུག་པ་ཡིད་ལ་བྱེད་པ་དང་། ཕྱིན་ཅི་ལོག་ཏུ་གནས་པ་དང་། རྟེན་ཅིང་འབྲེལ་བར་འབྱུང་བ་དང་མི་
མཐུན་པ་དང་། ཆད་པར་ལྟ་བ་དང་། ཐེར་ཟུག་ཏུ་ལྟ་བ་དང་། འབྱུང་བར་ལྟ་བ་དང་། འཇིག་པར་ལྟ་བ་དང་། གཡོ་བ་དང་། རློམ་སེམས་དང་། རྟོག་པ་དང་། རྣམ་པར་རྟོག་པ་དང་། སོགས་པ་དང་། མདུད་པ་དང་། ཀུན་གཞི་དང་། ངེས་པའི་གཞི་དང་
ཞེན་པ་དང་། ཁྱིམ་གྱི་གནས་ལ་དགའ་བ་དང་། ལེན་པ་དང་། འདོར་བ་དང་། སྟོང་པ་ཉིད་ཀྱིས་སྐྲག་པ་དང་། མཚན་མ་མེད་པ་ལ་གཡང་སར་འདུ་ཤེས་པ་དང་། སྨོན་པ་མེད་པ་ལ་གཤེད་མར་འདུ་ཤེས་པ་དང་། དམིགས་སུ་མེད་པ་ལ་དངོས་པོར་འདུ་
ཤེས་པ་དང་། ངེས་པར་འབྱུང་བའི་ཁམས་ལ་ཁ་ན་མ་ཐོ་བར་ལྟ་བ་དང་། ཆུ་བོ་ལས་རྒལ་བར་འདུ་ཤེས་པ་དང་། བྱང་ཆུབ་ཀྱི་ཕྱོགས་ཀྱི་ཆོས་ལ་ཆོས་མ་ཡིན་པར་འདུ་ཤེས་པ་དང་། ཡང་དག་པའི་ལྟ་བ་ལ་ལོག་པར་ལྟ་བར་འདུ་ཤེས་པ་དང་། ལོག་པར་

46-1-287a

ལྟ་བ་ལ་ཡང་དག་པར་ལྟ་བར་འདུ་ཤེས་པ་དང་། དགེ་བའི་བཤེས་གཉེན་ལ་སྡིག་པའི་གྲོགས་པོར་འདུ་ཤེས་པ་དང་། སྡིག་པའི་གྲོགས་པོ་ལ་དགེ་བའི་བཤེས་གཉེན་དུ་འདུ་ཤེས་པ་དང་། སངས་རྒྱས་དང་མི་འཐུན་པ་དང་། ཆོས་
སྤོང་བ་དང་། དགེ་འདུན་ལ་མ་གུས་པ་དང་། དགོན་པའི་གནས་ལ་མངོན་པར་མི་དགའ་བ་དང་། ང་རྒྱལ་དང་། ལྷག་པའི་ང་རྒྱལ་དང་། ངའོ་སྙམ་པའི་ང་རྒྱལ་མ་སྤངས་པ་དང་། རབ་ཏུ་འཛིན་པ་དང་། རྩོད་པ་འབར་བར་བྱེད་པ་དང་། བདེན་པ་ལ་བརྫུན་པར་
འདུ་ཤེས་པ་དང་། བརྫུན་པ་ལ་བདེན་པར་འདུ་ཤེས་པ་དང་། འདོད་པ་ལ་ཡོན་ཏན་དུ་འདུ་ཤེས་པ་དང་། འདུས་བྱས་ལ་བདེན་པར་འདུ་ཤེས་པ་དང་། འཁོར་བ་ལ་ཕན་ཡོན་རྣམ་པ་བཅུར་འདུ་ཤེས་པ་དང་། མྱ་ངན་ལས་འདས་པ་ལ་འཇིག་པ་རྣམ་
པ་བཅུར་འདུ་ཤེས་པའི་ཆོས་དེ་ལྟ་བུ་དེ་དག་ནི་དུག་ཡིན་ཏེ། སྡིག་ཅན་དེ་དག་ནི་ལེགས་པར་གསུངས་པའི་ཆོས་འདུལ་བ་ལ་མེད་དོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་བསྟན་པ་ནི་བདུད་རྩི་བསྟན་པའོ། །སངས་རྒྱས་ཀྱི་བསྟན་པ་ནི་བདེ་བ་བསྟེན་
པའོ། །སངས་རྒྱས་ཀྱི་བསྟན་པ་ནི་སྤྲོས་པ་མེད་པ་བསྟན་པའོ། །སངས་རྒྱས་ཀྱི་བསྟན་པ་ནི་མ་སྨད་པ་བསྟན་པའོ། །སངས་རྒྱས་ཀྱི་བསྟན་པ་ནི་ཀུན་ནས་ལྡང་བ་མེད་པ་བསྟན་པའོ། །སངས་རྒྱས་ཀྱི་བསྟན་པ་ནི་འབྱུང་བ་བསྟན་པའོ། །སངས་
རྒྱས་ཀྱི་བསྟན་པ་ནི་འཐབ་པ་མེད་པ་བསྟན་པའོ། །སངས་རྒྱས་ཀྱི་བསྟན་པ་ནི་རྩོད་པ་མེད་པ་བསྟན་པའོ། །སངས་རྒྱས་ཀྱི་བསྟན་པ་ནི་བདག་དང་གཞན་ལ་མི་གདུང་བ་བསྟན་པའོ། །སངས་རྒྱས་ཀྱི་བསྟན་པ་ནི་བྱམས་པ་དང་ལྡན་པའི་བསྟན་
པའོ། །སངས་རྒྱས་ཀྱི་བསྟན་པ་ནི་གནས་དང་། སྐྱབས་དང་། གླིང་དང་། དཔུང་གཉེན་བསྟན་པའོ། །སངས་རྒྱས་ཀྱི་བསྟན་པ་ནི་དུལ་བ་དང་། ཞི་བ་དང་། རབ་ཏུ་ཞི་བ་དང་། ཉེ་བར་ཞི་བ་བསྟན་པའོ། །སངས་རྒྱས་ཀྱི་བསྟན་པ་ནི་དག་པ་དང་། རྣམ་
པར་དག་པ་དང་། ཡོངས་སུ་དག་པ་དང་། འོད་གསལ་བ་བསྟན་པའོ། །སངས་རྒྱས་ཀྱི་བསྟན་པ་ནི་ཡང་དག་པའི་ནན་ཏན་བསྟན་པའོ། །སངས་རྒྱས་ཀྱི་བསྟན་པ་ནི་མི་དཀྲུག་པ་བསྟན་པའོ། །སངས་རྒྱས་ཀྱི་བསྟན་པ་ནི་ཤིན་དུ་དུལ་བ་

46-1-287b

བསྟན་པའོ། །སངས་རྒྱས་ཀྱི་བསྟན་པ་ནི་ཤིན་དུ་རྣམ་པར་དག་པ་བསྟན་པའོ། །སངས་རྒྱས་བསྟན་པ་ནི་བསྟོད་ཅིང་བསྔགས་པ་བསྟན་པའོ། །སངས་རྒྱས་ཀྱི་བསྟན་པ་ནི་ཞི་བ་དང་། རབ་ཏུ་ཞི་བ་དང་། ཤིན་ཏུ་ངེས་པར་བསྟན་པའོ། །སངས་རྒྱས་
ཀྱི་བསྟན་པ་ནི་གྲོལ་བ་དང་། རྣམ་པར་གྲོལ་བ་དང་། ཡོངས་སུ་གྲོལ་བ་བསྟན་པའོ། །སངས་རྒྱས་ཀྱི་བསྟན་པ་ནི་ཕས་ཀྱི་རྒོལ་བ་ཐམས་ཅད་ཆོས་དང་འཐུན་པས་ཚར་གཅོད་པ་བསྟན་པའོ། །སངས་རྒྱས་ཀྱི་བསྟན་པ་ནི་བདུད་ཐམས་ཅད་
འཇོམས་པ་བསྟན་པའོ། །སངས་རྒྱས་ཀྱི་བསྟན་པ་ནི་སྐྱེ་བ་དང་ཤི་འཕོ་དང་། འབྱུང་བ་ལས་ངེས་པར་འབྱུང་བ་བསྟན་པའོ། །དྲན་པ་ཉེ་བར་བཞོག་པས་དྲན་པ་བསྟན་པའོ། །སྡིག་པ་ཐམས་ཅད་མི་བྱེད་པས་ཡང་དག་པར་སྤོང་བ་བསྟན་པའོ། །
ལུས་དང་སེམས་ཡང་བས་རྫུ་འཕྲུལ་གྱི་རྐང་པ་བསྟན་པའོ། །དད་པ་སྔོན་དུ་འགྲོ་བས་དབང་པོ་བསྟན་པའོ། །ཉོན་མོངས་པ་ཐམས་ཅད་ཀྱིས་མི་རྫི་བས་སྟོབས་བསྟན་པའོ། །འཐུན་པར་ཁོང་དུ་ཆུད་པས་བྱང་ཆུབ་ཀྱི་ཡན་ལག་བསྟན་པའོ། །
འབྱུང་བས་ལམ་བསྟན་པའོ། །སེམས་ཞི་བས་ཞི་གནས་བསྟན་པའོ། །རྣམ་པར་གྲོལ་བ་བསྐྱེད་པས་ལྷག་མཐོང་བསྟན་པའོ། །སླུ་བར་མི་བྱེད་པས་བདེན་པ་བསྟན་པའོ། །དོན་དང་། ཆོས་དང་། ངེས་པའི་ཚིག་དང་། སྤོབས་པ་དང་མི་འགལ་
བས་སོ་སོ་ཡང་དག་པར་རིག་པ་བསྟན་པའོ། །འདུས་བྱས་ལ་སྨོན་པས་མི་རྟག་པ་དང་། སྡུག་བསྔལ་བ་ཡོངས་སུ་བརྗོད་པ་བསྟན་པའོ། །ཡ་མཚན་ཅན་ཐམས་ཅད་སྤོང་བས་བདག་མེད་པ་བསྟན་པའོ། །མྱ་ངན་ལས་འདའ་བར་འགྲོ་
བས་ཞི་བ་བསྟན་པའོ། །ཕ་རོལ་དུ་འགྲོ་བས་ཕ་རོལ་དུ་ཕྱིན་པ་བསྟན་པའོ། །སེམས་ཅན་ཡང་དག་པར་སྡུད་པས་ཐབས་བསྟན་པའོ། །ཞེ་འགྲས་པའི་སེམས་མེད་པས་བྱམས་པ་བསྟན་པའོ། །འཚེ་བ་མེད་པས་སྙིང་རྗེ་བསྟན་པའོ། །མི་
དགའ་བ་སེལ་བས་དགའ་བ་བསྟན་པའོ། །བྱ་བ་བྱས་པས་བཏང་སྙོམས་བསྟན་པའོ། །ང་རྒྱལ་མེད་པས་ཡེ་ཤེས་བསྟན་པའོ། །བྱང་ཆུབ་ཀྱི་སེམས་བསྐྱེད་པས་དཀོན་མཆོག་གསུམ་གྱི་གདུང་མི་འཆད་པ་བསྟན་པའོ། །ཡང་འབྱུང་བ་མེད་

46-1-288a

པས་བདེ་བ་ཐམས་ཅད་དང་འཐུན་པ་བསྟན་པའོ། །བསྟན་པའི་བཤད་པ་འདི་བསྟན་པའི་ཚེ་གང་བདུད་སྡིག་ཅན་དང་ལྷན་ཅིག་ཏུ་ལྷའི་བུ་གང་དག་ལྷགས་པ་དེ་ལས་ལྷའི་བུ་ལྔ་བརྒྱ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
སེམས་སྐྱེས་ཏེ། དེ་དག་གིས་བཅོམ་ལྡན་འདས་བདག་ཅག་ཀྱང་སངས་རྒྱས་ཀྱི་བསྟན་པ་དེ་ལྟ་བུ་དང་འཐུན་པར་གྱུར་ཅིག་ཅེས་དེ་སྐད་ཀྱི་ཚིག་སྨྲས་སོ། །བཅོམ་ལྡན་འདས་ཀྱིས་ཀྱང་འཛུམ་པ་མཛད་དེ། ཁོ་བོས་འཛུམ་པའི་ཕྱིར་ཞུས་སོ། །ཞུས་ནས་
བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་བདུད་ཀྱི་སྤྲུལ་པའི་དགེ་སློང་འདི་དག་ཁྱོད་ཀྱིས་མཐོང་ངམ། བཅོམ་ལྡན་འདས་ལ་ཁོ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་མཐོང་ངོ་། །བདེ་བར་གཤེགས་པ་མཐོང་ངོ་། །
བཅོམ་ལྡན་འདས་ཀྱིས་ཁོ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཕྱི་མའི་དུས་ཕྱི་མའི་ཚེ་ལྔ་བརྒྱ་ཐ་མ་ལ་དམ་པའི་ཆོས་འཇིག་པའི་ཚེ་ངའི་བསྟན་པ་ལ་དགེ་སློང་དག་ཕལ་ཆེར་འདི་བཞིན་དུ་ཤམ་ཐབས་ལེགས་པར་མ་གྱོན་པ། 
བླ་གོས་ལེགས་པར་མ་བགོས་པ། གོས་བརྟུལ་ཏེ་གྱོན་པ། ལྷུང་བཟེད་ཆག་པ། ཤེས་བཞིན་མེད་པ། སྤྱོད་ལམ་མི་སྡུག་པ། ལག་ན་མཁར་བ་ཐོགས་པ། སྣ་ལེབ་ལེབ་པོ་དང་། ཞར་བ་དང་། འཐེང་པོ་དང་། ཞ་བོ་དང་། ལུས་ཀྱི་ཤ་ཚུགས་
མ་ལེགས་པ་དང་། ནད་སྣ་ཚོགས་ཀྱིས་བཏབ་པ་དག་འབྱུང་བར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་དེའི་ཚེ་དགེ་སློང་དག་ཕལ་ཆེར་བསྙེན་བཀུར་ལ་ཆེད་ཆེ་བར་བྱེད་པ་རྙེད་པ་དང་བཀུར་སྟི་ལ་རྟེན་པ་དང་། བྱ་བ་སྣ་ཚོགས་ཀྱི་མི་ཁོམ་
པས་བྲེལ་བ་དང་། འདུལ་བ་བོར་བ་དང་། སོ་སོར་ཐར་པ་འདྲལ་བ་དང་། མཚམས་ལས་འདའ་བ་དང་། ཚེ་འདི་ཆེད་ཆེ་བར་བྱེད་པ་དང་། ཚེ་རབས་གཞན་ཆེད་མི་ཆེ་བར་བྱེད་པར་འགྱུར་ཏེ། དེ་དག་འདི་ལྟ་སྟེ། ཆོས་ཀྱི་ཕྱིར་ནི་མ་ཡིན་གྱི། བསྙེན་
བཀུར་གྱི་ཕྱིར་ཞར་བ་དང་། འཐེང་པོ་དང་། ཞ་བོ་དང་། ལུས་ཀྱི་ཤ་ཚུགས་མ་ལེགས་པ་དང་། ནད་སྣ་ཚོགས་ཀྱིས་བཏབ་པ་འོངས་ཤིང་ལྷགས་པ་རྣམས་རབ་ཏུ་འབྱུང་བར་བྱེད་དོ། །བསྙེན་པར་རྫོགས་པར་བྱེད་དོ། །ཀུན་དགའ་བོ་དེའི་ཚེ་

46-1-288b

དེའི་དུས་ན་ངའི་བསྟན་པ་འདི་ལ་བལྟར་མི་རུང་བ་དང་མཉན་དུ་མི་རུང་བར་འགྱུར་རོ། །ལྷ་རྣམས་ཀྱང་ཡིད་མི་དགའ་བར་འགྱུར་རོ། །བདུད་རྣམས་ཡིད་རངས་ཤིང་དགའ་བ་དང་བཏང་སྙོམས་སུ་འགྱུར་རོ། །བཅོམ་ལྡན་འདས་ལ་ཁོ་བོས་འདི་
སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་ན་བདུད་སྡིག་ཅན་རྣམས་ཡི་རངས་ཤིང་དགའ་བ་དང་བཏང་སྙོམས་སུ་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་འདི་ལྟར་སྐྱེས་བུ་བླུན་པོ་དེ་དག་བདག་ཉིད་བདུད་ཀྱི་ལས་
བྱེད་པར་འགྱུར་ཏེ། དེ་ལ་བར་ཆད་བྱ་བའི་ཕྱིར་ཕྱིར་ཞིང་བདུད་སྡིག་ཅན་བརྩོན་པར་མི་འགྱུར་རོ། །དེ་ཅིའི་ཕྱིར་ཞེ་ན། བདུད་སྡིག་ཅན་ནི་མི་བརྩོན་པ་རྣམས་ལ་གླགས་མི་ཚོལ་གྱི། བདུད་སྡིག་ཅན་ནི་དགེ་སློང་གང་དག་ཡང་འབྱུང་བ་
མེད་པར་བྱ་བའི་ཕྱིར་མགོ་དང་གོས་ལ་མེ་འབར་བ་བཞིན་དུ་བརྩོན་པར་གནས་པ་དེ་དག་ལ་བདུད་གླགས་ཚོལ་ཏེ། ཀུན་དགའ་བོ་དེ་ལྟ་བས་ན་མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མངོན་དུ་མ་བྱས་པ་མངོན་
དུ་བྱ་བའི་ཕྱིར་སྦྱོར་བར་བྱོས་ཤིག །བརྩལ་བར་བྱོས་ཤིག །འབད་པར་བྱོས་ཤིག །བདུད་ཀྱི་ཕྱོགས་ཚར་ཆོད་ཅིག །དེ་བཞིན་གཤེགས་པའི་བསྟན་པ་འབར་བར་བྱོས་ཤིག །དམ་པའི་ཆོས་ཡོངས་སུ་ཟུང་ཤིག །ང་ལ་ཆོས་ཀྱི་མཆོད་པས་
མཆོད་ཅིག །འདི་ནི་ཁྱོད་ལ་རྗེས་སུ་བསྟན་པ་ཡིན་ནོ། །བསྟན་པ་འདི་བཤད་པའི་ཚེ་དགེ་སློང་ལྔ་སྟོང་གིས་ཚེའི་འདུ་བྱེད་སྤངས་པར་གྱུར་ཏེ། བདག་ཅག་གིས་བཅོམ་ལྡན་འདས་ཀྱི་དམ་པའི་ཆོས་རྣམ་པར་འཇིག་པ་མཐོང་བར་མ་གྱུར་ཅིག་ཅེས་དེ་
སྐད་ཀྱི་ཚིག་སྨྲས་ནས། དེ་དག་སྟེང་གི་བར་སྣང་ལ་མངོན་པར་འཕགས་ཏེ། རང་གི་མེའི་ཁམས་ཀྱིས་བདག་ཉིད་བསྲེགས་སོ། །ལྷའི་བུ་འབུམ་གྱིས་ཀྱང་དེ་དག་ལ་མཆོད་པ་བྱས་པར་གྱུར་ཏོ། །དགེ་སློང་ཉིས་བརྒྱ་ནི་ཆོས་ལ་ཆོས་ཀྱི་མིག་རྡུལ་
མེད་ཅིང་དྲི་མ་དང་བྲལ་བ་རྣམ་པར་དག་གོ། །དགེ་སློང་ཉིས་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །བྱང་ཆུབ་སེམས་དཔའ་སུམ་ཁྲི་ཉིས་སྟོང་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བརྒྱ་བྱིན་དང་

46-1-289a

ཚངས་པ་དང་། འཇིག་རྟེན་སྐྱོང་བ་དག་ཀྱང་འཁོར་དང་བཅས་ཏེ་བཅོམ་ལྡན་འདས་ཀྱི་སྤྱན་སྔ་ན་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་བཅོམ་ལྡན་འདས་ཀྱི་དམ་པའི་ཆོས་རྣམ་
པར་འཇིག་པ་མི་མཐོང་བར་བགྱི་བ་དང་། བཅོམ་ལྡན་འདས་ཆོས་ཀྱི་རྣམ་གྲངས་འདི་གང་དག་གི་རྣ་ལམ་དུ་གྲགས་པར་གྱུར་པ་དེ་དག་ནམས་ཀྱང་སེམས་ལེ་ལོའི་དྲི་མས་ཀུན་ནས་མི་གནས་པར་བགྱི་བ་དང་། དེ་དག་བདུད་ཀྱི་ལས་བྱུང་ཞིང་བྱུང་བ་
རྣམས་ཀྱི་དབང་དུ་མི་འགྱུར་བར་བཅོམ་ལྡན་འདས་སྐུ་ཚེ་རིང་དུ་བཞུགས་ཤིང་བསྐྱང་བར་གསོལ་ཞེས་སྨྲས་སོ། །ཚེ་དང་ལྡན་པ་ཤཱ་རིའི་བུ་འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་པ་དང་། ཆོས་སྟོན་པ་རྣམ་པར་འཕྲུལ་པ་ལས་
གང་ཁོ་བོས་ཕྱོགས་ཙམ་ཞིག་མངོན་སུམ་དུ་གྱུར་པ་ནི་དེ་ལྟ་བུ་དེ་དག་ཡིན་ནོ། །དེ་ནས་ཚེ་དང་ལྡན་པ་འོད་སྲུང་ཆེན་པོས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ་ཁོ་བོས་ཀྱང་འཇམ་དཔལ་གཞོན་ནུར་གྱུར་པའི་རྫུ་འཕྲུལ་
གྱི་ཆོ་འཕྲུལ་ཁ་ཅིག་མངོན་སུམ་དུ་གྱུར་ཏོ། །ཚེ་དང་ལྡན་པ་ཤཱ་རིའི་བུ་ཁོ་བོས་མངོན་པར་ཤེས་ཏེ། བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པ། ཁོ་བོ་ཡང་རབ་ཏུ་བྱུང་ནས་རིང་པོ་མ་ལོན་པ་ཞིག་ན་འཇམ་དཔལ་གཞོན་ནུར་
གྱུར་པ་བཅོམ་ལྡན་འདས་དེ་བཞིན་གཤེགས་པ་རིན་ཆེན་སྲོག་ཤིང་གི་སངས་རྒྱས་ཀྱི་ཞིང་ནས་བཅོམ་ལྡན་འདས་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་འཇིག་རྟེན་གྱི་ཁམས་འདིར་དང་པོ་འོངས་པར་གྱུར་ཏེ་བཅོམ་ལྡན་འདས་ཀྱི་
དྲུང་མཉན་ཡོད་ཀྱི་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་འདིར་གནས་པར་དམ་བཅའ་མཛད་དོ། །འཇམ་དཔལ་གཞོན་ནུར་གྱུར་པ་འང་དེར་དབྱར་ཟླ་བ་གསུམ་གནས་པར་དམ་བཅས་ནས། བཅོམ་ལྡན་འདས་ཀྱི་
སྤྱན་སྔ་དང་། དགེ་འདུན་གྱི་ནང་དང་བཀད་ས་དང་། གསོ་སྦྱོང་དང་། ཕྱག་འཚལ་བའི་ལས་ལ་ཁོ་བོ་ཅག་གིས་ཕྱིར་ནམ་ཡང་མ་མཐོང་བར་གྱུར་ཏོ། །དེ་ནས་དབྱར་ཟླ་བ་གསུམ་ཟད་དེ་འདས་པ་དང་། གསོ་སྦྱོང་དང་། དགག་དབྱེའི་ཚེ་འཇམ་དཔལ་གཞོན་

46-1-289b

ནུར་གྱུར་པས་བཞིན་བསྟན་ཏོ། །དེ་ལ་ཁོ་བོས་འདི་སྐད་ཅེས་སྨྲས་སོ། །འཇམ་དཔལ་ཁྱོད་དབྱར་གྱི་ཟླ་བ་དེ་གསུམ་གྱི་ཚེ་གང་ན་འདུག་འདུག་དེས་སྨྲས་པ། བཙུན་པ་འོད་སྲུང་ཆེན་པོ་མཉན་ཡོད་ཀྱི་གྲོང་ཁྱེར་ཆེན་པོ་འདི་ཉིད་ན་རྒྱལ་པོ་གསལ་
རྒྱལ་གྱི་བཙུན་མོའི་ནང་ནའོ། །དེ་ལ་ཁོ་བོ་འདི་སྙམ་དུ་གྱུར་ཏེ། སེམས་དཔའ་འདི་ལྟ་བུ་ལྟུང་བ་དང་བཅས་པ་དང་ཡོངས་སུ་དག་པའི་དགེ་སློང་གི་དགེ་འདུན་དང་ལྷན་ཅིག་དགག་དབྱེ་བྱར་མི་རུང་ངོ་སྙམ་དུ་གྱུར་ནས། ཁོ་བོ་འཁོར་གྱི་ཁྱམས་དེ་ནས་བྱུང་
སྟེ། འཇམ་དཔལ་གཞོན་ནུར་གྱུར་པ་བསྐྲད་པའི་ཕྱིར་འགཎ་ཌི་བརྡུངས་སོ། །དེར་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་གནས་བརྟན་འོད་སྲུང་ཆེན་པོ་ཅིའི་ཕྱིར་འགཎ་ཌི་
རྡུངས་པ་སོམས་ཤིག །དེས་གསོལ་པ། བཅོམ་ལྡན་འདས་བསམས་ན་བདག་བསྐྲད་པའི་སླད་དུའོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ལ་མ་དད་པ་ཆེན་པོ་བྱེད་པར་མི་འགྱུར་བར་བདག་ཉིད་ཚངས་པར་བྱོས་ཤིག །
རང་གི་སྤྱོད་ཡུལ་སྟོན་ཅིག །ཉན་ཐོས་ཆེན་པོ་རྣམས་མགུ་བར་བྱོས་ཤིག །དེ་ནས་འཇམ་དཔལ་གཞོན་ནུར་གྱུར་པས་དེའི་ཚེ་བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཞིང་ཐམས་ཅད་ཡང་དག་པར་སྟོན་པ་ཞེས་བྱ་བ་ལ་སྙོམས་
པར་ཞུགས་སོ། །འཇམ་དཔལ་གཞོན་ནུར་གྱུར་པས་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་དེ་ནས་དེའི་ཚེ་ཕྱོགས་བཅུ་ན་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་ན་སྦྱངས་པའི་ཡོན་ཏན་སྨྲ་བའི་དགེ་སློང་འོད་སྲུང་ཆེན་པོ་
འདྲ་བ་ཤ་སྟག་འཇམ་དཔལ་གཞོན་ནུར་གྱུར་པ་བསྐྲད་པའི་ཕྱིར་འགཎ་ཌི་རྡུང་བར་སྣང་བར་གྱུར་ཏོ། །བཅོམ་ལྡན་འདས་ཀྱིས་ཁོ་བོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་ཅིའི་ཕྱིར་འགཎ་ཌི་རྡུང་། བཅོམ་ལྡན་འདས་ལ་ཁོ་བོས་འདི་
སྐད་ཅེས་གསོལ་ཏོ། །བཅོམ་ལྡན་འདས་འཇམ་དཔལ་གཞོན་ནུར་གྱུར་པ་དེ་དབྱར་ཟླ་གསུམ་དུ་བཙུན་མོའི་འཁོར་དུ་གནས་ནས་ཡོངས་སུ་དག་པའི་དགེ་སློང་གི་དགེ་འདུན་དང་ལྷན་ཅིག་དགག་དབྱེ་བགྱིད་པར་འཚལ་ཏེ། དེ་བསྐྲད་པའི་

46-1-290a

སླད་དུ་བདག་འགཎ་ཌི་རྡུང་ངོ་། །དེ་ནས་བཅོམ་ལྡན་འདས་ཀྱིས་སྐུ་ཐམས་ཅད་ལས་འོད་ཕྱུང་སྟེ། ཁོ་བོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་ཕྱོགས་བཅུ་ན་ཅི་སྣང་བ་ཇེ་ལྟོས་ཤིག །ཁོ་བོས་དེའི་ཚེ་བལྟས་ན་ཕྱོགས་བཅུ་ན་
འཇིག་རྟེན་གྱི་ཁམས་ཚད་མེད་གྲངས་མེད་པ་གང་གཱའི་ཀླུང་གི་བྱེ་མ་སྙེད་ན། གནས་བརྟན་བདག་འདྲ་བ་ཤ་སྟག་འཇམ་དཔལ་གཞོན་ནུར་གྱུར་པ་བསྐྲད་པའི་ཕྱིར་འགན་འདེ་རྡུང་བར་མཐོང་ངོ་། །འཇིག་རྟེན་གྱི་ཁམས་དེ་དག་ཐམས་ཅད་
ན་ཡང་འཇམ་དཔལ་གཞོན་ནུར་གྱུར་པ་སངས་རྒྱས་བཅོམ་ལྡན་འདས་དེ་དག་གི་ཞབས་ཀྱི་དྲུང་ན་འདུག་པར་མཐོང་ངོ་། །བཅོམ་ལྡན་འདས་ཀྱིས་ཁོ་བོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་ཆེན་པོ་ཁྱོད་ཅི་འཇམ་དཔལ་གཞོན་ནུར་གྱུར་
པ་གང་ངའི་མདུན་ན་འདུག་པ་འདི་འམ། འོན་ཏེ་གང་དག་ཕྱོགས་བཅུའི་འཇིག་རྟེན་གྱི་ཁམས་གྲངས་མེད་ཚད་མེད་པ་ན། སངས་རྒྱས་བཅོམ་ལྡན་འདས་ཀྱི་ཞབས་ཀྱི་དྲུང་ན་འདུག་པ་འམ་གང་བསྐྲད་པར་འདོད། དེའི་ཚེ་ཁོ་བོ་ངོ་ཚ་བའི་ཚུལ་གྱིས་འགཎ་ཌི་དེ་ས་ལ་དོར་
རོ་སྙམ་ན། དོར་ཡང་མ་ནུས་ནས་རྒྱུན་མ་ཆད་པར་སྒྲ་བྱུང་སྟེ། རྒྱལ་བུ་རྒྱལ་བྱེད་ཀྱི་ཚལ་ན་ཇི་ལྟ་བ་དེ་བཞིན་དུ་སངས་རྒྱས་ཀྱི་ཞིང་ཐམས་ཅད་ན་འང་ཆད་པ་མེད། ལྷག་པ་མེད། སྐྱེས་པ་མེད་པར་དེ་བཞིན་དུ་བྱེད་པར་སྣང་ངོ་། །ཁོ་བོས་དེའི་ཚེ་བཅོམ་
ལྡན་འདས་ཀྱི་ཞབས་གཉིས་ལ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་ཤེས་པ་ཕྱོགས་གཅིག་པ་དང་ལྡན་པ་སྟེ། བྱང་ཆུབ་སེམས་དཔའ་ཡུལ་ཚད་མ་མཆིས་པ་རྣམས་ཀྱི་སྤྱོད་ཡུལ་མ་
འཚལ་ནས་འགཎ་ཌི་བརྡུངས་པ་འཇམ་དཔལ་གཞོན་ནུར་གྱུར་པ་ལ་བཟོད་པ་གསོལ་ལོ། །བཅོམ་ལྡན་འདས་ཀྱིས་ཁོ་བོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་ཆེན་པོ་ཁྱོད་ཀྱིས་སངས་རྒྱས་ཀྱི་ཞིང་ན་འཇམ་དཔལ་གཞོན་ནུར་
གྱུར་པ་འདི་སྙེད་མཐོང་བ་ཐམས་ཅད་དུ་ཁྱིམ་པའི་ཁྱིམ་དུ་སེམས་ཅན་ཡོངས་སུ་སྨིན་པར་བྱ་བའི་ཕྱིར་དབྱར་ཟླ་གསུམ་དུ་གནས་སོ། །འོད་སྲུང་ཆེན་པོ་འཇམ་དཔལ་གཞོན་ནུར་གྱུར་པ་འདི་མཉན་ཡོད་ཀྱི་གྲོང་ཁྱེར་ཆེན་པོ་

46-1-290b

འདིར་བཙུན་མོའི་འཁོར་དུ་དབྱར་གནས་པར་དམ་བཅས་པས་ཀྱང་རྒྱལ་པོ་གསལ་རྒྱལ་གྱི་བཙུན་མོའི་འཁོར་ལས་བུད་མེད་ལྔ་བརྒྱ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ཡོངས་སུ་སྨིན་པར་བྱས་སོ། །
སྐྱེས་པ་ལྔ་བརྒྱ་དང་། ཁྱེའུ་ལྔ་བརྒྱ་དང་། བུ་མོ་ལྔ་བརྒྱ་དང་། སྨད་འཚོང་མ་ལྔ་བརྒྱ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བཞག་གོ། །སེམས་ཅན་མང་པོ་དག་ཀྱང་ཉན་ཐོས་ཀྱི་ཐེག་པར་བརྟུལ་ཏེ་མཐོ་རིས་སུ་འགྲོ་བར་
བྱས་སོ་བཅོམ་ལྡན་འདས་ལ་ཁོ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཇི་ལྟ་བུ་ཞིག་བཤད་པས་འཇམ་དཔལ་གཞོན་ནུར་གྱུར་པས་སེམས་ཅན་དེ་སྙེད་ཅིག་ཡོངས་སུ་སྨིན་པར་བགྱིས། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཆེན་
པོ་འཇམ་དཔལ་གཞོན་ནུར་གྱུར་པ་དེ་ཉིད་ལ་ཆོས་ཇི་ལྟ་བུ་ཞིག་བཤད་པས་སེམས་ཅན་དེ་སྙེད་ཡོངས་སུ་སྨིན་པར་བྱས་ཤེས་ཁྱོད་ཀྱིས་དྲིས་ཤིག་དང་། དེ་ཉིད་ཁྱོད་ལ་ལན་ལྡོན་པར་འགྱུར་རོ། །ཁོ་བོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་
སོ། །འཇམ་དཔལ་ཁྱོད་ཀྱིས་ཆོས་ཇི་ལྟ་བུ་ཞིག་བཤད་པས་སེམས་ཅན་དེ་སྙེད་ཡོངས་སུ་སྨིན་པར་བྱས། འཇམ་དཔལ་གྱིས་སྨྲས་པ། བཙུན་པ་འོད་སྲུང་ཆེན་པོ་སེམས་ཅན་དེ་ལྟ་བུ་དེ་དག་ནི་ཆོས་བཤད་པས་ཡོངས་སུ་སྨིན་པར་མི་འགྱུར་ཏེ། དེ་ཅིའི་ཕྱིར་ཞེ་ན། 
བཙུན་པ་འོད་སྲུང་ཆེན་པོ་སེམས་ཅན་གང་དག་དགའ་བའི་རྩེད་མོས་ཡོངས་སུ་སྨིན་པར་འགྱུར་བ་ཡང་ཡོད། རབ་ཏུ་གཟུང་བ་དང་། ཚར་གཅད་པ་དང་། སྦྱིན་པ་རབ་ཏུ་སྦྱིན་པ་དང་། ཕོངས་ཤིང་དབུལ་བ་དང་། བཀོད་པ་ཆེན་པོ་དང་། ཀུན་རྗོད་པའི་ཆོ་འཕྲུལ་
དང་། རྗེས་སུ་བསྟན་པའི་ཆོ་འཕྲུལ་དང་། རྫུ་འཕྲུལ་གྱི་ཆོ་འཕྲུལ་དང་། བརྒྱ་བྱིན་གྱི་གཟུགས་དང་། ཚངས་པའི་གཟུགས་དང་། འཇིག་རྟེན་སྐྱོང་བའི་གཟུགས་དང་། འཁོར་ལོས་སྒྱུར་བའི་གཟུགས་དང་། སངས་རྒྱས་ཀྱི་སྐུ་དང་། རང་སངས་རྒྱས་
ཀྱི་གཟུགས་དང་། ཉན་ཐོས་ཀྱི་གཟུགས་དང་། འཇིགས་པས་བསྡིགས་པ་དང་། ཚིག་རྩུབ་པོ་དང་། ཚིག་འཇམ་པོ་དང་། ཕན་གདགས་པས་ཡོངས་སུ་སྨིན་པར་འགྱུར་བ་ཡང་ཡོད་དོ། །དེ་ཅིའི་ཕྱིར་ཞེ་ན། བཙུན་པ་འོད་སྲུང་ཆེན་པོ་སེམས་

46-1-291a

ཅན་གྱི་སྤྱོད་པ་ནི་སྣ་ཚོགས་པ་སྟེ། དེ་དག་བྱ་བ་ཡང་སྣ་ཚོགས་པ་ཉིད་ཀྱིས་ཡོངས་སུ་སྨིན་པར་འགྱུར་ཏེ། བཙུན་པ་འོད་སྲུང་ཆེན་པོ་དེ་ལྟར་ཡོངས་སུ་སྨིན་པའི་སེམས་ཅན་རྣམས་ཕྱིས་ཆོས་བཤད་པས་ཤིན་ཏུ་དུལ་བར་འགྱུར་རོ། །དེ་ལ་ཁོ་
བོས་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་སེམས་ཅན་གྱི་ཁམས་ཇི་སྙེད་ཅིག་སྤྱོད་པ་འདིས་ཡོངས་སུ་སྨིན་པར་བྱས། དེས་སྨྲས་པ། བཙུན་པ་འོད་སྲུང་ཆེན་པོ་ཆོས་ཀྱི་དབྱིངས་ཇི་སྙེད་པའོ། །སྨྲས་པ། འཇམ་དཔལ་ཆོས་ཀྱི་དབྱིངས་
ཀྱང་ཇི་སྙེད། སྨྲས་པ། ནམ་མཁའི་ཁམས་ཇི་ཙམ་པའོ། །སྨྲས་པ། ནམ་མཁའི་ཁམས་ཀྱང་ཇི་ཙམ། སྨྲས་པ། སེམས་ཅན་གྱི་ཁམས་ཇི་སྙེད་པ་སྟེ། བཙུན་པ་འོད་སྲུང་ཆེན་པོ་དེ་ལྟར་ན་ཆོས་ཀྱི་དབྱིངས་དང་། ནམ་མཁའི་ཁམས་དང་། 
སེམས་ཅན་གྱི་ཁམས་ཀྱི་དེ་ནི་གཉིས་སུ་མེད་དེ་གཉིས་སུ་དབྱེར་མེད་དོ། །དེ་ལ་ཁོ་བོས་འདི་སྐད་ཅེས་སྨྲས་སོ། །འཇམ་དཔལ་འདི་ལྟར་སེམས་ཅན་གང་ཡང་ཡོངས་སུ་མྱ་ངན་ལས་འདས་པ་མེད་ན་འོ་ན་སངས་རྒྱས་འབྱུང་བ་དོན་མེད་
པར་མི་འགྱུར་རམ། དེས་སྨྲས་པ། བཙུན་པ་འོད་སྲུང་ཆེན་པོ་དཔེར་ན་སྐྱེས་བུ་ལ་ལ་ཞིག་མཁྲིས་པའི་རིམས་ཀྱིས་བཏབ་སྟེ། རྣམ་པ་སྣ་ཚོགས་སུ་བླ་བར་གྱུར་པ་དང་། དེ་ལ་ཁ་ཅིག་སྐྱེས་བུ་འདི་ནི་གདོན་གྱིས་བཏབ་བོ་སྙམ་
དུ་གྱུར་ཏོ། །དེ་ནས་སྨན་པ་མཁས་པ་ཞིག་འོངས་ཏེ། སྐྱེས་བུ་དེ་ལ་མར་བླུད་པ་ལ་སོགས་པའི་བྱ་བས་མཁྲིས་པའི་རིམས་དེ་ཞི་བར་བྱས་ནས། དེ་ཕྱིས་རྣམ་པ་སྣ་ཚོགས་སུ་མི་བླ་བར་གྱུར་ན། བཙུན་པ་འོད་སྲུང་ཆེན་པོ་འདི་
ཇི་སྙམ་དུ་སེམས། དེ་ལས་ལྷ་འམ། ཀླུ་འམ། གནོད་སྦྱིན་བྱུང་བར་གྱུར་པ་ཡོད་དམ། དེ་ལ་ཁོ་བོས་འདི་སྐད་ཅེས་སྨྲས་སོ། །འཇམ་དཔལ་དེ་ནི་མ་ཡིན་ཏེ། འོན་ཀྱང་མར་བླུད་པ་ལ་སོགས་པའི་བྱ་བས་མཁྲིས་པ་དེ་ཞི་བར་གྱུར་ཏོ། །
འཇམ་དཔལ་གྱིས་སྨྲས་པ། བཙུན་པ་འོད་སྲུང་ཆེན་པོ་སྐྱེས་བུ་དེ་ལ་སྨན་པ་དེས་ཕན་པ་ཆེན་པོ་བྱས་པ་མ་ཡིན་ནམ། ཁོ་བོས་དེ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་སྐད་སྨྲས་པ་དེ་བཞིན་ནོ། །དེས་སྨྲས་པ། བཙུན་པ་འོད་སྲུང་ཆེན་པོ་

46-1-291b

དེ་བཞིན་དུ། འཇིག་རྟེན་གནས་པ་ཕྱིན་ཅི་ལོག་གི་རིམས་ཀྱིས་བཏབ་པ་དག་བདག་མེད་ལ་བདག་ཏུ་འདུ་ཤེས་ཤིང་བདག་མེད་པ་ལ་བདག་ཏུ་མངོན་པར་ཞེན་ནས་འཁོར་བ་ན་འཁོར་རོ། །དེ་ལ་སངས་རྒྱས་བཅོམ་ལྡན་འདས་ཐུགས་
རྗེ་ཆེན་པོ་དང་ལྡན་པ་དག་འཇིག་རྟེན་དུ་བྱུང་སྟེ། དཔེ་བསྟན་པ་དེ་དང་དེ་དག་དང་། ཆོས་ལ་གཞུག་པའི་སྒོ་དེ་དང་དེ་དག་གིས་བདག་ཏུ་འདུ་ཤེས་པ་ཡོངས་སུ་ཤེས་པ་དང་། ཕྱིན་ཅི་ལོག་སྤང་བར་བྱ་བའི་ཕྱིར་སེམས་ཅན་དེ་དག་ལ་ཆོས་
འཆད་དོ། །དེ་དག་ཆོས་ཐོས་ནས་འདུ་ཤེས་ཐམས་ཅད་དང་བྲལ་ཞིང་ཕྱི་ཕྱིར་ཞིང་མངོན་པར་མི་ཆགས་ཏེ། དེ་དག་བདག་ཏུ་འདུ་ཤེས་པ་སྤངས་ནས་ཆུ་བོ་ལས་རྒལ་ཏེ། དེ་དག་རྒལ་བ་དང་། ཕ་རོལ་དུ་ཕྱིན་པ་དང་། ཡོངས་སུ་མྱ་ངན་ལས་
འདས་པ་ཞེས་བྱ་བའི་གྲངས་སུ་འགྲོའོ། །བཙུན་པ་འོད་སྲུང་ཆེན་པོ་འདི་ཇི་སྙམ་དུ་སེམས། དེ་ལ་བདག་གམ་སེམས་ཅན་ནམ། སྲོག་གམ་སྐྱེ་བ་པོ་འམ། གང་ཟག་གང་ཡོངས་སུ་མྱ་ངན་ལས་འདས་པར་གྱུར་པ་ཡོད་དམ། ཁོ་བོས་
དེ་ལ་སྨྲས་པ། འཇམ་དཔལ་དེ་ནི་མ་ཡིན་ཏེ། འོན་ཀྱང་མཉམ་པ་ཉིད་ཡང་དག་པར་བསྟན་པས་ཕྱིན་ཅི་ལོག་སྤོང་ངོ་། །འཇམ་དཔལ་གྱིས་སྨྲས་པ། བཙུན་པ་འོད་སྲུང་ཆེན་པོ་འདི་ལྟ་བུའི་ཕྱིར་སངས་རྒྱས་འབྱུང་སྟེ། འདི་ལྟ་སྟེ། མཉམ་
པ་ཉིད་ཡང་དག་པར་བསྟན་པའི་ཕྱིར་ཏེ། སྐྱེ་བའི་ཕྱིར་མ་ཡིན། འགག་པའི་ཕྱིར་མ་ཡིན་གྱི། ཀུན་ནས་ཉོན་མོངས་པ་མེད་པ་འབའ་ཤིག་རྟོགས་པར་བྱ་བའི་ཕྱིར་རོ། །ཁོ་བོས་དེ་ལ་འདི་སྐད་སྨྲས་སོ། །འཇམ་དཔལ་བྱང་ཆུབ་སེམས་
དཔའ་གང་དག་རང་བཞིན་དེ་ལྟ་བུའི་ཆོས་ཀྱི་དབྱིངས་ལ་འང་རྟོག་ཅིང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་གོ་ཆ་ཡང་མི་འདོར་ལ། ཞུམ་པར་མི་འགྱུར། རངས་པར་མི་འགྱུར་ཞིང་རང་བཞིན་གྱིས་ཡོངསུ་མྱ་ངན་ལས་
འདས་པའི་སེམས་ཅན་རྣམས་ཀྱི་ཕྱིར་གོ་ཆ་བགོས་པ་ནི་དཀའ་བ་བྱེད་པ་མ་ཡིན་ནོ། །དེས་སྨྲས་པ། བཙུན་པ་འོད་སྲུང་ཆེན་པོ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ནི་གོ་ཆ་ཆེན་པོ་བགོས་པ་ཡིན་ནོ། །དེ་ལ་ཁོ་བོས་

46-1-292a

འདི་སྐད་ཅེས་སྨྲས་སོ། །འཇམ་དཔལ་ཁྱོད་བྱང་ཆུབ་སེམས་དཔའི་གོ་ཆ་བརྩམ་པར་སྤོབས་པར་གྱིས་ཤིག །འཇམ་དཔལ་གྱིས་སྨྲས་པ། བཙུན་པ་འོད་སྲུང་ཆེན་པོ་བྱང་ཆུབ་སེམས་དཔའི་གོ་ཆ་ཆེན་པོ་ནི་སུམ་བཅུ་རྩ་གཉིས་
ཏེ། གོ་ཆ་དེ་དག་བགོས་པའི་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་སྤྱད་པ་སྤྱོད་དོ། །སུམ་བཅུ་རྩ་གཉིས་གང་ཞེ་ན། བཙུན་པ་འོད་སྲུང་ཆེན་པོ་རྨི་ལམ་གྱི་རང་བཞིན་གྱི་མཚན་ཉིད་ཀྱིས་འཁོར་བ་ཚད་མེད་པ་ཡོངས་སུ་
འཛིན་པ་ན་བྱང་ཆུབ་སེམས་དཔའི་གོ་ཆའོ། །བདག་མེད་པའི་མཚན་ཉིད་ཀྱིས་སེམས་ཅན་ཚད་མེད་པ་ཡོངས་སུ་སྨིན་པར་བྱེད་པ་ནི་བྱང་ཆུབ་སེམས་དཔའི་གོ་ཆའོ། །ཆོས་ཀྱི་སྐུའི་མཚན་ཉིད་ཀྱིས་སངས་རྒྱས་ཚད་མེད་པ་ལ་མཆོད་
པ་དང་རིམ་གྲོ་བྱེད་པ་ནི་བྱང་ཆུབ་སེམས་དཔའི་གོ་ཆའོ། །བྲག་ཆ་དང་མཉམ་པ་ཉིད་ཀྱི་མཚན་ཉིད་ཀྱིས་སངས་རྒྱས་ཀྱིས་གསུངས་པ་ཐམས་ཅད་ཉན་ཅིང་འཛིན་པ་ནི་བྱང་ཆུབ་སེམས་དཔའི་གོ་ཆའོ། །ཆོས་ཀྱི་དབྱིངས་སུ་ཡང་
དག་པར་འདུ་བའི་མཚན་ཉིད་ཀྱིས་སངས་རྒྱས་ཀྱི་ཆོས་ཐམས་ཅད་སྲུང་བ་ནི་བྱང་ཆུབ་སེམས་དཔའི་གོ་ཆའོ། །ཉོན་མོངས་པ་ཐམས་ཅད་རང་བཞིན་གྱིས་ཡོངས་སུ་དག་པའི་མཚན་ཉིད་ཀྱིས་བདུད་ཐམས་ཅད་འདུལ་བ་ནི་བྱང་
ཆུབ་སེམས་དཔའི་གོ་ཆའོ། །ཡོད་པ་དང་མེད་པ་སེལ་བའི་རྟེན་ཅིང་འབྲེལ་བར་འབྱུང་བ་ལ་འཇུག་པའི་མཚན་ཉིད་ཀྱིས་ཕས་ཀྱི་རྒོལ་བ་ཐམས་ཅད་ཆོས་དང་མཐུན་པས་ཤིན་དུ་ཚར་གཅོད་པ་ནི་བྱང་ཆུབ་སེམས་དཔའི་གོ་ཆའོ། །
ཕུང་པོ་ཐམས་ཅད་སྤོང་བའི་མཚན་ཉིད་ཀྱིས་བདོག་པ་ཐམས་ཅད་ཡོངས་སུ་གཏོང་བ་ནི་བྱང་ཆུབ་སེམས་དཔའ་གོ་ཆའོ། །མངོན་པར་འདུ་བྱ་བ་མེད་པའི་མཚན་ཉིད་ཀྱིས་ཚུལ་ཁྲིམས་དང་། བསླབ་པ་དང་། སྦྱངས་པའི་ཡོན་ཏན་གྱིས་ཡོ་བྱད་
བསྙུངས་པ་ཐམས་ཅད་ཡང་དག་པར་ལེན་པ་ནི་བྱང་ཆུབ་སེམས་དཔའི་གོ་ཆའོ། །ཁོང་ཁྲོ་བ་མེད་པའི་མཚན་ཉིད་ཀྱིས་བཟོད་པ་དང་། དུལ་བ་དང་། དེས་པ་ནི་བྱང་ཆུབ་སེམས་དཔའི་གོ་ཆའོ། །ལུས་དང་སེམས་དབེན་པའི་མཚན་ཉིད་ཀྱིས་བླང་བ་

46-1-292b

མེད་པ་དང་། དོར་བ་མེད་པའི་བརྩོན་འགྲུས་ནི་བྱང་ཆུབ་སེམས་དཔའི་གོ་ཆའོ། །རྟེན་ཐམས་ཅད་དབེན་པའི་མཚན་ཉིད་ཀྱིས་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ཐམས་ཅད་ནི་བྱང་ཆུབ་སེམས་དཔའི་
གོ་ཆའོ། །མ་རིག་པའི་གཏི་མུག་གི་ལྟ་བ་ཡོངས་སུ་དག་པའི་མཚན་ཉིད་ཀྱིས་ཐོགས་པ་མེད་པའི་ཤེས་རབ་ཀྱི་ཕ་རོལ་དུ་ཕྱིན་པ་ནི་བྱང་ཆུབ་སེམས་དཔའི་གོ་ཆའོ། །བྱ་བ་ཐམས་ཅད་སྟོན་པའི་མཚན་ཉིད་ཀྱིས་ཐབས་ཆེན་པོ་ནི་བྱང་ཆུབ་
སེམས་དཔའི་གོ་ཆའོ། །ཞེ་འགྲས་པ་མེད་པའི་མཚན་ཉིད་ཀྱིས་བྱམས་པ་ཆེན་པོ་ནི་བྱང་ཆུབ་སེམས་དཔའི་གོ་ཆའོ། །སོར་མོ་ལྔ་དང་ནམ་མཁའ་མཉམ་པའི་མཚན་ཉིད་ཀྱིས་སྙིང་རྗེ་ཆེན་པོ་ནི་བྱང་ཆུབ་སེམས་དཔའི་གོ་ཆའོ། །ཡོངས་
སུ་མི་སྐྱོ་བའི་མཚན་ཉིད་ཀྱིས་དགའ་བ་ཆེན་པོ་ནི་བྱང་ཆུབ་སེམས་དཔའི་གོ་ཆའོ། །བདེ་བ་དང་སྡུག་བསྔལ་བར་མི་བྱེད་པའི་མཚན་ཉིད་ཀྱིས་བཏང་སྙོམས་ཆེན་པོ་ནི་བྱང་ཆུབ་སེམས་དཔའི་གོ་ཆའོ། །རྣམ་པར་གྲོལ་བ་ལག་མཐིལ་དུ་འོངས་ཀྱང་
ཐོབ་པར་མི་བྱེད་པའི་མཚན་ཉིད་ཀྱིས་བསམ་པ་ཐམས་ཅད་ཡོངས་སུ་རྫོགས་པར་བྱེད་པའི་མཚན་ཉིད་ནི་བྱང་ཆུབ་སེམས་དཔའི་གོ་ཆའོ། །སྐྱོན་མེད་པར་མི་ལྟུང་བའི་མཚན་ཉིད་ཀྱིས་ཐམས་ཅད་ཡིད་ལ་མི་བྱེད་པ་ནི་བྱང་ཆུབ་སེམས་དཔའི་གོ་ཆ་
འོ། །སྒྱུ་མ་ལྟ་བུའི་ཆོས་ལེགས་པར་ཤེས་པའི་མཚན་ཉིད་ཀྱིས་ཕུང་པོ་ལྔ་གཤེད་མ་ལྟ་བུར་གྱུར་པ་ཡོངས་སུ་སྲུང་བ་ནི་བྱང་ཆུབ་སེམས་དཔའི་གོ་ཆའོ། །ཆོས་ཀྱི་དབྱིངས་མཉམ་པ་ཉིད་ཀྱིས་ཁམས་བཞི་ལ་སྦྲུལ་གདུག་པ་ལྟ་བུར་འཛིན་པ་ནི་བྱང་ཆུབ་
སེམས་དཔའི་གོ་ཆའོ། །ཡུལ་ཐམས་ཅད་ལ་མི་ཆགས་པའི་མཚན་ཉིད་ཀྱིས་སྐྱེ་མཆེད་དྲུག་ལ་གྲོང་སྟོང་པ་ལྟ་བུར་རྟོག་པ་ནི་བྱང་ཆུབ་སེམས་དཔའི་གོ་ཆའོ། །ཀུན་གཞི་མེད་པའི་མཚན་ཉིད་ཀྱིས་ཁམས་གསུམ་དང་མི་འདྲེ་བ་ནི་བྱང་ཆུབ་སེམས་དཔའི་
གོ་ཆའོ། །སྲིད་པ་སེལ་བའི་མཚན་ཉིད་ཀྱིས་ཆེད་ཏུ་སྲིད་པ་ལེན་པ་ནི་བྱང་ཆུབ་སེམས་དཔའི་གོ་ཆའོ། །ཕྱིར་མི་ལྡོག་པའི་མཚན་ཉིད་ཀྱིས་དཔའ་བ་ཆེན་པོ་ནི་བྱང་ཆུབ་སེམས་དཔའི་གོ་ཆའོ། །སེམས་ཅན་ཐམས་ཅད་ལ་སོ་སོ་ཇི་ལྟར་འོས་པར་ཆོས་ཀྱི་

46-1-293a

སྨན་སྦྱིན་པའི་མཚན་ཉིད་ཀྱིས་སྨན་པ་ཆེན་པོ་ནི་བྱང་ཆུབ་སེམས་དཔའི་གོ་ཆའོ། །ཐེག་པ་གསུམ་གྱི་ལམ་སྟོན་པའི་མཚན་ཉིད་ཀྱིས་དེད་དཔོན་ཆེན་པོ་ནི་བྱང་ཆུབ་སེམས་དཔའི་གོ་ཆའོ། །སངས་རྒྱས་ཐམས་ཅད་ལ་བྱས་པ་ཤེས་ཤིང་བྱས་པ་གཟོ་
བའི་མཚན་ཉིད་ཀྱིས་དཀོན་མཆོག་གསུམ་གྱི་གདུང་མི་གཅོད་པ་ནི་བྱང་ཆུབ་སེམས་དཔའི་གོ་ཆའོ། །མི་སྐྱེ་བའི་ཆོས་ལ་བཟོད་པ་ཐོབ་པའི་མཚན་ཉིད་ཀྱིས་ཆོས་ཐམས་ཅད་རང་བཞིན་གྱིས་སྐྱེ་བ་མེད་པའི་མཚན་ཉིད་ནི་བྱང་ཆུབ་སེམས་དཔའི་གོ་ཆའོ། །ཉན་ཐོས་
དང་། རང་སངས་རྒྱས་ཐམས་ཅད་ཀྱི་ས་ལས་འདའ་བའི་མཚན་ཉིད་ཀྱིས་ཕྱིར་མི་ལྡོག་པའི་ས་ཐོབ་པ་ནི་བྱང་ཆུབ་སེམས་དཔའི་གོ་ཆའོ། །སེམས་ཀྱི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་སངས་རྒྱས་ཀྱི་ཆོས་ཐམས་ཅད་ཇི་ལྟ་བ་བཞིན་དུ་རྟོགས་པའི་མཚན་ཉིད་ཀྱིས་
བྱང་ཆུབ་ཀྱི་སྙིང་པོ་རྒྱན་པ་ནི་བྱང་ཆུབ་སེམས་དཔའི་གོ་ཆའོ། །བཙུན་པ་འོད་སྲུང་ཆེན་པོ་བྱང་ཆུབ་སེམས་དཔའི་གོ་ཆ་ཆེན་པོ་སུམ་བཅུ་རྩ་གཉིས་ནི་དེ་དག་ཡིན་ཏེ། གོ་ཆ་དེ་དག་བགོས་ན་འབྱུང་བ་ཆེན་པོ་བཞི་ནི་གཞན་དུ་འགྱུར་ཡང་སྲིད་ཀྱི། བྱང་ཆུབ་སེམས་
དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པའི་འཇིགས་པ་ནི་མེད་དོ། །དེ་ལ་ཁོ་བོས་འདི་སྐད་ཅེས་སྨྲས་སོ། །འཇམ་དཔལ་གོ་ཆ་དེ་དག་ལས་འགའ་ཡང་ཉན་ཐོས་དང་། རང་སངས་རྒྱས་རྣམས་ལ་མེད་དོ། །དེས་སྨྲས་པ། བཙུན་
པ་འོད་སྲུང་ཆེན་པོ་དེ་བས་ན་ཉན་ཐོས་དང་རང་སངས་རྒྱས་རྣམས་ནི་གོ་ཆ་ཆེན་པོ་བགོས་པ་ཞེས་བྱའོ། །བཙུན་པ་འོད་སྲུང་ཆེན་པོ་འདི་ཇི་སྙམ་དུ་སེམས། གོ་ཆ་གང་མཐུ་དང་ལྡན་པའི་འཕོང་གི་སློབ་དཔོན་གྱིས་བགོ་བར་བྱ་བའི་གོ་ཆ་དེ་མི་ཕལ་གྱིས་བགོ་བར་བྱ་འམ། 
ཁོ་བོས་དེ་ལ་འདི་སྐད་ཅེས་སྨྲས་སོ། །འཇམ་དཔལ་དེ་ནི་མ་ཡིན་ཏེ། མི་ཕལ་གྱིས་གོ་ཆ་དེ་བགོ་བར་མི་ནུས་སོ། །སྨྲས་པ་བཙུན་པ་འོད་སྲུང་ཆེན་པོ་དེ་བཞིན་དུ་གོ་ཆ་གང་བྱང་ཆུབ་སེམས་དཔས་བགོ་བར་བྱ་བ་དེ་དག་ཉན་ཐོས་དང་རང་སངས་རྒྱས་ཐམས་ཅད་མི་
གྱོན་ནོ། །བྱང་ཆུབ་སེམས་དཔའི་གོ་ཆ་འདི་བཤད་པའི་ཚེ་ལྷའི་བུ་ཁྲི་ཉིས་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །ཚེ་དང་ལྡན་པ་ཤཱ་རིའི་བུ་འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་པ་དང་། ཆོས་

46-1-293b

སྟོན་པ་རྣམ་པར་འཕྲུལ་པ་གང་ཁོ་བོས་ཕྱོགས་ཙམ་ཞིག་མངོན་སུམ་དུ་གྱུར་པ་ནི་དེ་ལྟ་བུ་དེ་དག་ཡིན་ནོ། །དེ་ནས་ཚེ་དང་ལྡན་པ་བྱམས་མའི་བུ་གང་པོས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ་ཁོ་བོས་འཇམ་དཔལ་གཞོན་
ནུར་གྱུར་པའི་རྫུ་འཕྲུལ་གྱི་ཆོ་འཕྲུལ་ཁ་ཅིག་མངོན་སུམ་དུ་གྱུར་ཏེ། ཚེ་དང་ལྡན་པ་ཤཱ་རིའི་བུ་ཁོ་བོས་མངོན་པར་ཤེས་པ་དུས་གཅིག་ན་བཅོམ་ལྡན་འདས་ཡངས་པ་ཅན་གྱི་གྲོང་ཁྱེར་གྱི་ཚལ་ཆེན་པོའི་ཁང་པ་བརྩེགས་པའི་ཁང་པ་ན། དགེ་
སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་སོ། །ཚེ་དང་ལྡན་པ་ཤཱ་ར་དྭ་ཏིའི་བུ་དེའི་ཚེ་གཅེར་བུ་མའི་བུ་བདེན་པ་པོ་ཞེས་བྱ་བ་གཅེར་བུ་པ་དྲུག་ཁྲིས་ཡོངས་སུ་བསྐོར་ཅིང་མདུན་གྱིས་བལྟས་ཏེ། སྟི་སྟང་བྱས། 
བླ་མར་བྱས། རི་མོ་བྱས། མཆོད་པ་བྱས་ཤིང་ཡངས་པ་ཅན་གྱི་གྲོང་ཁྱེར་ན་འདུག་གོ། །ཁོ་བོ་ཏིང་ངེ་འཛིན་ལ་སྙོམས་པར་ཞུགས་ཏེ། གཞན་མུ་སྟེགས་ཅན་དེ་དག་གི་དགེ་བའི་རྩ་བ་ལ་བལྟས་ན། དེར་ཁོ་བོས་སེམས་ཅན་མུ་སྟེགས་ཅན་གདུལ་
བར་བྱ་བ་བརྒྱ་ཕྲག་མང་པོ་མཐོང་ནས། ཁོ་བོ་དེར་སོང་སྟེ་དེ་དག་ལ་ཆོས་བཤད་དོ། །དེ་དག་ཁོ་བོས་ཆོས་བཤད་པ་ལ་སྲི་ཞུ་མི་བྱེད། རྣ་བླགས་ཏེ་མི་ཉན། ཀུན་དུ་ཤེས་པར་བྱ་བའི་སེམས་ཀྱིས་མི་གནས་པའི་སྟེང་དུ་ཁོ་བོ་ལ་འཕྱ་སྨོད་
གད་མོས་འདེབས་ཤིང་ཚིག་རྩུབ་པོ་དག་ཀྱང་རྗོད་དོ། །དེར་ཁོ་བོས་ཟླ་བ་གསུམ་དུ་སེམས་ཅན་དེ་དག་ལས་འགའ་ཡང་ཡོངས་སུ་སྨིན་པར་བྱ་མ་ནུས་ཏེ་སྐྱོ་བར་གྱུར་ཏོ། །ཁོ་བོ་སྐྱོ་བར་གྱུར་ནས་སླར་སོང་ངོ་། །དེ་ལ་འཇམ་དཔལ་གཞོན་ནུར་གྱུར་
པས་མུ་སྟེགས་ཅན་ལྔ་བརྒྱ་སྤྲུལ་ཏེ། བདག་ཉིད་སློབ་དཔོན་དུ་བཞག་ནས་འཁོར་ལྔ་བརྒྱ་དང་། གཅེར་བུ་མའི་བུ་བདེན་པ་པོ་གང་ན་བ་དེར་དོང་སྟེ་ལྷགས་པ་དང་། གཅེར་བུ་མའི་བུ་བདེན་པ་པོའི་རྐང་པ་གཉིས་ལ་མགོ་བོས་ཕྱག་འཚལ་ནས་མདུན་
དུ་འདུག་སྟེ། གཅེར་བུ་མའི་བུ་བདེན་པ་པོ་ལ་འདི་སྐད་ཅེས་སྨྲས་སོ། །བདག་ཅག་གིས་འཕགས་པའི་གྲགས་པའི་སྒྲ་དང་ཚིགས་སུ་བཅད་པ་རྒྱ་ཆེན་པོ་ཐོས་ནས་ལྗོངས་གཞན་ནས་ཡངས་པ་ཅན་གྱི་གྲོང་ཁྱེར་འདིར་མཆིས་ཏེ། ཁྱོད་ནི་ཁོ་བོ་

46-1-294a

ཅག་གི་སྟོན་པའོ། །ཁོ་བོ་ཅག་ནི་ཁྱོད་ཀྱི་སློབ་མའོ། །ཁོ་བོ་ཅག་ཁྱོད་ལས་རྗེས་སུ་བསྟན་པ་ནོད་དོ། །ཅི་ནས་ཀྱང་དགེ་སྦྱོང་གཽ་ཏ་མ་དེ་དང་། དེའི་ཉན་ཐོས་རྣམས་མི་མཐོང་བ་དང་། ཅི་ནས་ཀྱང་དེ་ལས་མི་མཐུན་པའི་ཆོས་མི་ཐོས་པ་དེ་ལྟར་ཁོ་བོ་
ཅག་ལ་མཛོད་ཅིག །གཅེར་བུ་མའི་བུ་བདེན་པ་པོས་སྨྲས་པ། སྐྱེས་བུ་དམ་པ་དག་ལེགས་སོ། །ལེགས་སོ། །དད་པ་དང་ལྡན་པ། དང་བ་དང་ལྡན་པ་ཁྱོད་རིང་པོ་མི་ཐོགས་པར་ངའི་ཆོས་བསྟན་པ་འདི་ཤེས་པར་འགྱུར་རོ། །དེ་ནས་གཅེར་བུ་མའི་བུ་བདེན་
པ་པོས་རང་གི་འཁོར་རྣམས་ལ་སྨྲས་པ། ཚུར་ཤོག་ཁྱེད་ཅག་བྲམ་ཟེའི་བུ་ལྔ་བརྒྱ་པོ་འདི་དག་དང་ལྷན་ཅིག་ཏུ་ཀུན་དུ་དགའ་བ་དང་། འཐུན་པ་དང་། ཕན་ཚུན་ཆོས་ལ་དཔྱད་པ་དཔྱོད་ཅིང་ལྷན་ཅིག་ཏུ་གནས་པར་གྱིས་ཤིག །འདི་དག་གིས་གང་ཆུང་
ཟད་ཅི་སྨྲས་པ་དེང་ཁྱེད་ཀྱིས་ཤིན་དུ་ལེགས་པར་ཟུང་ཤིག །དེ་ནས་འཇམ་དཔལ་གཞོན་ནུར་གྱུར་པ། འཁོར་གཅེར་བུ་པ་ལྔ་བརྒྱ་སྤྲུལ་པ་དང་། གཞན་མུ་སྟེགས་ཅན་གྱི་ཉན་ཐོས་རྣམས་དང་ལྷན་ཅིག་ཏུ་འདུག་ནས། དེ་དག་གི་དཀའ་ཐུབ་དང་། བརྟུལ་
ཞུགས་དང་། སྤྱོད་ལམ་དང་། བསླབ་པའི་ཚིག་ཇི་ཙམ་དུ་རྒྱུན་མི་འཆད་པ་དེ་བས་ཀྱང་བདག་དང་འཁོར་ལ་ལྷག་པར་སྟོན་ཏོ། །སྐབས་སྐབས་སུ་དཀོན་མཆོག་གསུམ་གྱི་བསྔགས་པ་རྗོད་དོ། །སྐབས་སྐབས་ནི་གཅེར་བུ་མའི་བུ་བདེན་པ་པོའི་ཡང་དག་པ་
འི་ཡོན་ཏན་བསྔགས་པ་བརྗོད་དེ། དེས་དེ་དག་ཡིད་ཆེས་པར་བྱས་ནས་དུས་གཞན་དང་། ཚོད་གཞན་ཞིག་ན་མུ་སྟེགས་ཅན་གཞན་ཚོགས་པ་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་སྨྲས་སོ། །ཚེ་དང་ལྡན་པ་དག་བདག་ཅག་གི་བསྟན་བཅོས་པ་
དང་། སྔགས་དང་། རིག་བྱེད་དང་། གཞུང་ལས་འབྱུང་བ་བཞིན་དགེ་སྦྱོང་གཽ་ཏ་མ་དེའི་ཡང་དག་པའི་ཡོན་ཏན་བསྔགས་པ་ཡོད་དོ། །དེ་ཅིའི་ཕྱིར་ཞེ་ན། འདི་ལྟར་དགེ་སྦྱོང་གཽ་ཏ་མ་ནི་རིགས་ཕུན་སུམ་ཚོགས་པ་ཕ་དང་མ་དག་པ། འཁོར་ལོས་སྒྱུར་བའི་
རྒྱལ་པོའི་རིགས་སུ་སྐྱེས་པ། བསོད་ནམས་བརྒྱའི་མཚན་དང་ལྡན་པ་སྟེ། བཙས་པ་ཙམ་ན་བརྒྱ་བྱིན་དང་། ཚངས་པས་ཡོངས་སུ་བླངས་ཤིང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམ་པ་དྲུག་ཏུ་གཡོས། མ་

46-1-294b

བཟུང་བར་གོམ་པ་བདུན་བོར་ཏེ། ཚིག་ཀྱང་ང་ནི་འཇིག་རྟེན་གྱི་ཐུ་བོ་སྟེ། སྐྱེ་བ་དང་འཆི་བ་མཐར་བྱའོ་ཞེས་དེ་སྐད་སྨྲ་ཞིང་། ཆུའི་རྒྱུན་གཉིས་བྱུང་སྟེ། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བས་ཁྲུས་བྱས། ལྷའི་དང་མིའི་
རོལ་མོ་དག་ཀྱང་མ་བརྡུངས་པར་སྒྲ་བྱུང་། དེས་འོད་གང་གིས་ངན་སོང་ཐམས་ཅད་སོ་སོར་ཐར་པ་དང་། བདུད་ཀྱི་གནས་ཐམས་ཅད་ཟིལ་གྱིས་གནོན་པ་དེ་ལྟ་བུའི་འོད་ཀྱང་བཏང་སྟེ། དབང་པོ་ཉམས་པ་ཐམས་ཅད་ཀྱང་དབང་པོ་མ་ཉམས་པར་གྱུར། 
ཡུད་ཙམ་དེ་ལ་སེམས་ཅན་ཐམས་ཅད་ཀྱི་ཉོན་མོངས་པ་ཐམས་ཅད་ཞི་སྟེ་མཆོག་ཏུ་བདེ་བ་ཐོབ་པར་གྱུར། བྲམ་ཟེ་རིག་བྱེད་ཀྱི་ཆོ་ག་ཤེས་པ་རྣམས་ཀྱིས་ཀྱང་དེ་སྟེ་ཁྱིམ་ན་འདུག་ན་འཁོར་ལོས་སྒྱུར་བའི་རྒྱལ་པོར་འགྱུར་རོ། །དེ་སྟེ་ནགས་སུ་སོང་ན་ཆོས་ཀྱི་
རྒྱལ་པོ་སངས་རྒྱས་སུ་འགྱུར་རོ་ཞེས་བསྒོ་སྟེ། དེའི་འཁོར་ལོས་སྒྱུར་བའི་རྒྱལ་པོ་བོར་ནས་རབ་ཏུ་བྱུང་སྟེ། དེས་བྱང་ཆུབ་ཀྱི་སྙིང་པོར་བདུད་ཀྱི་སྡེ་བྱེ་བ་ཕྲག་བརྒྱ་པ་བཏུལ་ཏེ་བྱང་ཆུབ་ཐོབ། དེས་འཇིག་རྟེན་ན་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་
དམ། ཚངས་པ་འམ། སུས་ཀྱང་ཆོས་དང་འཐུན་པར་བསྐོར་བར་མི་ནུས་པའི་ཆོས་ཀྱི་འཁོར་ལོ་བསྐོར། དེ་ཆོས་ཀྱང་སྟོན་ཏེ། ཚངས་པར་སྤྱོད་པ་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། 
ཡོངས་སུ་དག་པ། ཡོངས་སུ་བྱང་བ་ཡང་དག་པར་རབ་ཏུ་སྟོན་ཏོ། །དེ་ལ་དེའི་ཉན་ཐོས་དག་གི་ཐོག་མར་དགེ་བ་དེ་ནི་འདི་ལྟ་སྟེ། ལུས་ཀྱི་ལེགས་པར་སྤྱོད་པ་དང་། ངག་གི་ལེགས་པར་སྤྱོད་པ་དང་། ཡིད་ཀྱི་ལེགས་པར་སྤྱོད་པའོ། །བར་དུ་དགེ་བ་ནི་ལྷག་པའི་ཚུལ་
ཁྲིམས་དང་། སེམས་དང་། ཤེས་རབ་ལ་བསླབ་པར་བྱའོ། །ཐ་མར་དགེ་བ་ནི་རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའོ། །གཞན་ཡང་ཐོག་མར་དགེ་བ་ནི་འདུན་པ་དང་། བརྩོན་འགྲུས་དང་། བག་
ཡོད་པའོ། །བར་དུ་དགེ་བ་ནི་དྲན་པ་དང་། ཏིང་ངེ་འཛིན་དང་། སེམས་རྩེ་གཅིག་པའོ། །ཐ་མར་དགེ་བ་ནི་ཤེས་རབ་དང་། ལྷག་མཐོང་དང་། ཡེ་ཤེས་སོ། །

46-1-295a

གཞན་ཡང་ཐོག་མར་དགེ་བ་ནི་སངས་རྒྱས་ལ་མི་ཕྱེད་པར་དད་པའོ། །བར་དུ་དགེ་བ་ནི་ཆོས་ལ་མི་ཕྱེད་པར་དད་པའོ། །ཐ་མར་དགེ་བ་ནི་དགེ་འདུན་ལ་མི་ཕྱེད་པར་དད་པས་འབྲས་བུ་ཐོབ་པའོ། །གཞན་ཡང་ཐོག་མར་དགེ་བ་ནི་གཞན་
ལས་ཉན་པའོ། །བར་དུ་དགེ་བ་ནི་ཚུལ་བཞིན་ཡིད་ལ་བྱེད་པའོ། །ཐ་མར་དགེ་བ་ནི་འཕགས་པའི་ཡང་དག་པར་ལྟ་བའོ། །གཞན་ཡང་ཐོག་མར་དགེ་བ་ནི་སྡུག་བསྔལ་ཡོངས་སུ་ཤེས་པ་དང་། ཀུན་འབྱུང་བ་སྤང་བའོ། །བར་དུ་དགེ་བ་ནི་
ལམ་བསྒོམ་པའོ། །ཐ་མར་དགེ་བ་ནི་འགོག་པ་མངོན་སུམ་དུ་བྱེད་པ་སྟེ། འདི་དག་ནི་ཉན་ཐོས་རྣམས་ཀྱི་ཐོག་མར་དགེ་བ་དང་། བར་དུ་དགེ་བ་དང་། ཐ་མར་དགེ་བའོ། །དེ་ལ་བྱང་ཆུབ་སེམས་དཔའ་རྣམས་ཀྱི་ཐོག་མར་དགེ་བ་དང་། བར་དུ་
དགེ་བ་དང་། ཐ་མར་དགེ་བ་གང་ཞེ་ན། དེ་ལ་ཐོག་མར་དགེ་བ་ནི་བྱང་ཆུབ་ཀྱི་སེམས་མི་གཏོང་བའོ། །བར་དུ་དགེ་བ་ནི་ཐེག་པ་དམན་པ་མི་འདོད་པའོ། །ཐ་མར་དགེ་བ་ནི་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བའོ། །གཞན་ཡང་ཐོག་མར་
དགེ་བ་ནི་སེམས་ཅན་ཐམས་ཅད་ལ་སེམས་སྙོམས་པས་བྱམས་པ་ཆེན་པོའོ། །བར་དུ་དགེ་བ་ནི་སེམས་ཅན་ཐམས་ཅད་ལ་བྱ་བ་ཇི་ཡོད་སྙམ་པས་སྙིང་རྗེ་ཆེན་པོའོ། །ཐ་མར་དགེ་བ་ནི་དགའ་བ་དང་། བཏང་སྙོམས་མཉམ་པའི་སེམས་
ཀྱིས་ངེས་པར་སེམས་པའོ། །གཞན་ཡང་ཐོག་མར་དགེ་བ་ནི་སེར་སྣའི་སེམས་ཚར་གཅོད་པ་དང་། འཆལ་བའི་ཚུལ་ཁྲིམས་སྤོང་བ་དང་། གནོད་སེམས་སེལ་བ་དང་། ལེ་ལོ་སྤོང་བ་དང་། རྣམ་པར་གཡེང་བ་ཀུན་དུ་མི་སྤྱོད་པ་དང་། 
འཆལ་བའི་ཤེས་རབ་སྤོང་བའོ། །བར་དུ་དགེ་བ་ནི་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་ཚོགས་ཡོངས་སུ་རྫོགས་པར་བྱེད་པའོ། །ཐ་མར་དགེ་བ་ནི་ཕ་རོལ་དུ་
ཕྱིན་པ་དྲུག་ཡོངས་སུ་རྫོགས་པ་དང་། ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བའོ། །གཞན་ཡང་ཐོག་མར་དགེ་བ་ནི་བསྡུ་བའི་དངོས་པོ་བཞིས་སེམས་ཅན་ཡོངས་སུ་སྨིན་པར་བྱེད་པའོ། །བར་དུ་དགེ་བ་ནི་ལུས་དང་སྲོག་ལ་

46-1-295b

མི་ལྟ་བར་དམ་པའི་ཆོས་ཡོངས་སུ་འཛིན་པའོ། །ཐ་མར་དགེ་བ་ནི་སྐྱོན་མེད་པར་ལྟུང་བའི་འཇིགས་པ་ལས་སྲུང་བའོ། །གཞན་ཡང་ཐོག་མར་དགེ་བ་ནི་སེམས་དང་མཚུངས་པ་མི་བཏོང་བས་བྱང་ཆུབ་སེམས་དཔའི་སྤྱོད་པའོ། །
བར་དུ་དགེ་བ་ནི་འཇུག་པ་དང་ལྡོག་པའི་ཤེས་པས་ཕྱིར་མི་ལྡོག་པའི་སའོ། །ཐ་མར་དགེ་བ་ནི་དབང་ཐོབ་པས་སྐྱེ་བ་གཅིག་གིས་ཐོགས་པ་སྟེ། འདི་དག་ནི་བྱང་ཆུབ་སེམས་དཔའ་རྣམས་ཀྱི་ཐོག་མར་དགེ་བ་དང་། བར་དུ་དགེ་
བ་དང་། ཐ་མར་དགེ་བའོ། །དེ་ལྟར་འཇམ་དཔལ་གཞོན་ནུར་གྱུར་པ་གཞན་མུ་སྟེགས་ཅན་གྱི་འཁོར་དེ་ན། དེ་ལྟ་དེ་ལྟར་ཆོས་སྟོན་ཏེ། གཞན་མུ་སྟེགས་ཅན་ལྔ་བརྒྱ་ནི་ཆོས་ཀྱི་མིག་རྡུལ་མེད་ཅིང་དྲི་མ་དང་
བྲལ་བ་རྣམ་པར་དག་གོ། །གཞན་མུ་སྟེགས་ཅན་བརྒྱད་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །དེ་ནས་སྤྲུལ་པ་ལྔ་བརྒྱ་པོ་དེ་དག་གིས་ཡན་ལག་ལྔ་ས་
ལ་གཏུགས་ཏེ་ཕྱག་འཚལ་ནས། ཚིག་ཏུ་ཡང་སངས་རྒྱས་ལ་ཕྱག་འཚལ་ལོ། །སངས་རྒྱས་ལ་ཕྱག་འཚལ་ལོ་ཞེས་རྗོད་དོ། །དེ་དག་གི་རྗེས་སུ་སློབ་པའི་ཚུལ་གྱིས་གཞན་མུ་སྟེགས་
ཅན་གྱི་འཁོར་དེ་དག་ཐམས་ཅད་ཀྱིས་ཀྱང་ཡན་ལག་ལྔ་ས་ལ་གཏུགས་ཏེ་ཕྱག་འཚལ་ནས། ཚིག་ཏུ་འང་སངས་རྒྱས་ལ་ཕྱག་འཚལ་ལོ། །སངས་རྒྱས་ལ་
ཕྱག་འཚལ་ལོ་ཞེས་རྗོད་དོ། །ལྷ་རྣམས་ཀྱི་དབང་པོ་བརྒྱ་བྱིན་གྱིས་ཀྱང་དེ་དག་ལ་ཁྱེད་འདིས་བཅོམ་ལྡན་འདས་ལ་མཆོད་པ་བྱོས་ཤིག་ཅེས་
མེ་ཏོག་མན་དཱ་ར་བ་དག་བྱིན་ནོ།། །། བམ་པོ་བཞི་པ་སྟེ་ཐ་མ། 

46-1-296a

དེ་ནས་འཇམ་དཔལ་གཞོན་ནུར་གྱུར་པ་འཁོར་མང་པོས་ཡོངས་སུ་བསྐོར་ཅིང་མདུན་དུ་བདར་ཏེ། སྨིག་མའི་ལྡུམ་བུའི་འཁོར་གྱི་ཁྱམས་ག་ལ་བ་དང་། བཅོམ་ལྡན་འདས་ག་ལ་བ་དེར་དོང་ནས་ལྷགས་པ་དང་། བཅོམ་ལྡན་
འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ། །གཞན་མུ་སྟེགས་ཅན་གྱི་འཁོར་དེ་དག་གིས་ཀྱང་མེ་ཏོག་མན་དཱ་ར་བ་དེ་དག་གིས་བཅོམ་ལྡན་འདས་ལ་མཆོད་པ་བྱས་ནས་བཅོམ་
ལྡན་འདས་ལ་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འཁོད་དོ། །དེ་ནས་འཇམ་དཔལ་གཞོན་ནུར་གྱུར་པའི་བྱིན་གྱི་བརླབས་ཀྱིས་སྤྲུལ་པ་ལྔ་བརྒྱ་པོ་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
བཅོམ་ལྡན་འདས་དེ་བཞིན་གཤེགས་པ་ནི་ཆོས་ཀྱི་སྐུ་སྟེ། བདག་ཅག་སངས་རྒྱས་ལ་བལྟ་བ་དོན་དུ་མི་གཉེར་རོ། །བཅོམ་ལྡན་འདས་ཆོས་ནི་བརྗོད་དུ་མ་མཆིས་པ་སྟེ། བདག་ཅག་བཅོམ་ལྡན་འདས་ཀྱི་ཆོས་ཉན་པ་དོན་
དུ་མི་གཉེར་རོ། །བཅོམ་ལྡན་འདས་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་འདུས་མ་བྱས་ཀྱིས་རབ་ཏུ་ཕྱེ་བ་སྟེ། བདག་ཅག་དགེ་འདུན་ལ་བསྙེན་བཀུར་བགྱིད་པ་དོན་དུ་མི་གཉེར་རོ། །བཅོམ་ལྡན་འདས་
ཆོས་ཀྱི་དབྱིངས་ནི་ཡོན་ཏན་དང་ཕན་ཡོན་མ་མཆིས་པ་སྟེ། བདག་ཅག་ཡོན་ཏན་དོན་དུ་མི་གཉེར་རོ། །བཅོམ་ལྡན་འདས་ཆོས་ཐམས་ཅད་ནི་ཤིན་དུ་མ་བྱུང་བ་སྟེ། བདག་ཅག་འབྱུང་བ་དོན་དུ་མི་གཉེར་རོ། །བཅོམ་ལྡན་
འདས་རྣམ་པར་གྲོལ་བ་ནི་ལོ་མ་དང་། མེ་ཏོག་དང་། འབྲས་བུ་དང་བྲལ་བ་སྟེ། བདག་ཅག་ཐོབ་པ་དོན་དུ་མི་གཉེར་རོ། །བཅོམ་ལྡན་འདས་ཡོངས་སུ་ཤེས་པ་ནི་གཉིས་དང་བྲལ་བ་སྟེ། བདག་སྡུག་བསྔལ་ཡོངས་སུ་འཚལ་
བ་དོན་དུ་མི་གཉེར་རོ། །བཅོམ་ལྡན་འདས་ཆོས་ཐམས་ཅད་ནི་ཤིན་དུ་མ་བྱུང་བ་སྟེ། བདག་ཅག་ཀུན་འབྱུང་སྤོང་བ་དོན་དུ་མི་གཉེར་རོ། །བཅོམ་ལྡན་འདས་ཆོས་ཐམས་ཅད་ནི་ཤིན་དུ་འགགས་པ་སྟེ། བདག་ཅག་

46-1-296b

འགོག་པ་མངོན་དུ་བགྱི་བ་དོན་དུ་མི་གཉེར་རོ། །བཅོམ་ལྡན་འདས་ལམ་ནི་མཆིས་པ་དང་། མ་མཆིས་པ་དང་། མ་མཆིས་པ་བྲལ་བ་སྟེ། བདག་ཅག་ལམ་བསྒོམ་པ་དོན་དུ་མི་གཉེར་རོ། །བཅོམ་ལྡན་འདས་ཆོས་ཐམས་
ཅད་ནི་གནས་ན་མི་གནས་པ་སྟེ། བདག་ཅག་དྲན་པ་ཉེ་བར་བཞག་པ་དོན་དུ་མི་གཉེར་རོ། །བཅོམ་ལྡན་འདས་རྣམ་པར་གྲོལ་བ་ནི་བསོད་ནམས་དང་། བསོད་ནམས་མ་ལགས་པ་དང་། མི་གཡོ་བའི་འདུ་བྱེད་དང་བྲལ་བ་སྟེ། 
བདག་ཅག་ཡང་དག་པར་སྤོང་བ་དོན་དུ་མི་གཉེར་རོ། །བཅོམ་ལྡན་འདས་གང་ནས་ཀྱང་མཆི་བ་མ་མཆིས་པ། གང་དུ་ཡང་མ་མཆིས་པ་ཚད་མར་བགྱིས་ཏེ། བདག་ཅག་རྫུ་འཕྲུལ་གྱི་རྐང་པ་དོན་དུ་མི་གཉེར་རོ། །བཅོམ་ལྡན་འདས་དོན་ནི་དབང་པོ་བྲལ་བ་སྟེ། བདག་ཅག་དབང་
པོ་དོན་དུ་མི་གཉེར་རོ། །བཅོམ་ལྡན་འདས་ཆོས་ཐམས་ཅད་ནི་སྟོབས་མ་མཆིས་ཤིང་ཉམ་ཆུང་བ་སྟེ། བདག་ཅག་སྟོབས་དོན་དུ་མི་གཉེར་རོ། །བཅོམ་ལྡན་འདས་འདི་ལ་དོན་དམ་པར་ན་བྱང་ཆུབ་པ་ནི་གང་ཡང་མ་མཆིས་ཏེ། བདག་
ཅག་བྱང་ཆུབ་ཀྱི་ཡན་ལག་དོན་དུ་མི་གཉེར་རོ། །བཅོམ་ལྡན་འདས་འགྲོ་བས་འཇིག་རྟེན་གྱི་མཐར་འགྲོ་བ་མ་མཆིས་ཏེ། བདག་ཅག་ལམ་དོན་དུ་མི་གཉེར་རོ། །བཅོམ་ལྡན་འདས་ཞི་བའི་དབྱིངས་ལ་གཡེང་བ་མ་མཆིས་
ཏེ། བདག་ཅག་ཞི་གནས་དོན་དུ་མི་གཉེར་རོ། །བཅོམ་ལྡན་འདས་འཇིག་རྟེན་ལས་འདས་པའི་ཤེས་རབ་ཀྱིས་ཆུང་ཟད་ཀྱང་མི་མཐོང་བ་སྟེ། བདག་ཅག་ལྷག་མཐོང་དོན་དུ་མི་གཉེར་རོ། །བཅོམ་ལྡན་འདས་དེ་ལྟར་བླང་བ་
དང་དོར་བ་ཤིན་དུ་མ་མཆིས་ཏེ། བདག་ཅག་རྩོལ་བ་དོན་དུ་མི་གཉེར་རོ། །བཅོམ་ལྡན་འདས་ཆོས་ཀྱི་དབྱིངས་ནི་ཡང་དག་པར་སངས་མ་རྒྱས་པ་སྟེ། བདག་ཅག་རྣམ་པར་གྲོལ་བ་དོན་དུ་མི་གཉེར་རོ། །བཅོམ་ལྡན་འདས་དགེ་སྦྱོང་ནི་
ཆགས་པ་ཐམས་ཅད་དང་བྲལ་བ་སྟེ། བདག་ཅག་དགེ་སྦྱོང་དོན་དུ་མི་གཉེར་རོ། །བཅོམ་ལྡན་འདས་བྲམ་ཟེ་ནི་སྡིག་པ་ཐམས་ཅད་དང་བྲལ་བ་སྟེ། བདག་ཅག་བྲམ་ཟེ་དོན་དུ་མི་གཉེར་རོ། །བཅོམ་ལྡན་འདས་ཆོས་ཀྱི་རང་

46-1-297a

བཞིན་ནི་ཐ་མི་དད་པ་སྟེ། བདག་ཅག་དགེ་སློང་གི་དངོས་པོ་དོན་དུ་མི་གཉེར་རོ། །བཅོམ་ལྡན་འདས་འདི་ལྟར་སྐྱེ་མཆེད་དྲུག་ཉིད་འགགས་པ་སྟེ། བདག་ཅག་ཕ་རོལ་དུ་མཆི་བ་དོན་དུ་མི་གཉེར་རོ། །བཅོམ་ལྡན་འདས་འདི་
ལྟར་འཇིག་པ་ཇི་ཙམ་ཆུ་ངུ་ལ་ཡང་མི་སྟོད་པ་སྟེ། བདག་ཅག་འདོད་པ་ཆུང་བ་མ་ལགས་སོ། །བཅོམ་ལྡན་འདས་འདི་ལྟར་ཆོས་གང་ཡང་མི་ཚོལ་བ་སྟེ། བདག་ཅག་ནི་ཆོག་ཤེས་པ་མ་ལགས་སོ། །བཅོམ་ལྡན་འདས་འདི་ལྟར་ལུས་
དང་། སེམས་ཀྱིས་བརྗོད་པར་མི་བགྱི་བ་སྟེ། བདག་ཅག་དབེན་པ་མ་ལགས་སོ། །བཅོམ་ལྡན་འདས་འདི་ལྟར་ཁམས་གསུམ་དུ་མི་གནས་པ་སྟེ། བདག་ཅག་ཟག་པ་མེད་པ་མ་ལགས་སོ། །བཅོམ་ལྡན་འདས་འདི་ལྟར་གཉིས་
པོ་ཡང་དག་པར་རྗེས་སུ་མི་མཐོང་སྟེ། བདག་ཅག་མ་འདྲེས་པ་མ་ལགས་སོ། །བཅོམ་ལྡན་འདས་འདི་ལྟར་ཁམས་གསུམ་ཐམས་ཅད་ནི་རྣལ་འབྱོར་པའི་དགོན་པ་སྟེ། བདག་ཅག་དགོན་པ་དོན་དུ་མི་གཉེར་རོ། །བཅོམ་ལྡན་
འདས་འདི་ལྟར་གཉེན་པོ་མ་མཆིས་པས་རྩོད་པ་མ་མཆིས་པ་སྟེ། བདག་ཅག་ཉོན་མོངས་པ་མེད་པར་གནས་པ་མ་ལགས་སོ། །བཅོམ་ལྡན་འདས་འདི་ལྟར་བསོད་སྙོམས་ཀྱི་འདུ་ཤེས་སྤངས་པ་སྟེ། བདག་ཅག་བསོད་སྙོམས་
པ་མ་ལགས་སོ། །བཅོམ་ལྡན་འདས་འདི་ལྟར་འཁོར་བ་ཉིད་ཡང་དག་པར་ན་མི་མཐོང་སྟེ། བདག་ཅག་འཁོར་བས་མི་སྐྲག་གོ། །བཅོམ་ལྡན་འདས་འདི་ལྟར་རྟོག་པར་མི་བགྱིད། རྣམ་པར་རྟོག་པར་མི་བགྱིད་དེ། བདག་ཅག་
འདོད་ཆགས་དང་། ཞེ་སྡང་དང་། གཏི་མུག་སྤོང་བར་མི་བགྱིད་དོ། །བཅོམ་ལྡན་འདས་འདི་ལྟར་ཆོས་རྣམས་ཀྱི་རང་བཞིན་ཉོན་མོངས་པ་མ་མཆིས་པ་སྟེ། བདག་ཅག་ཉོན་མོངས་པ་སྤོང་བ་ལ་མི་བརྩོན་ནོ། །བཅོམ་ལྡན་འདས་འདི་
ལྟར་རང་གི་ལུས་ནི་ལུས་མ་ལགས་པ་སྟེ། བདག་ཅག་རང་གི་ལུས་ལས་མི་གཡོ་བར་བགྱིའོ། །བཅོམ་ལྡན་འདས་འདི་ལྟར་དེ་བཞིན་ཉིད་མི་བསྐྱོད་པའི་མཚན་ཉིད་དེ། བདག་ཅག་ལྟ་བས་བགྱིས་པ་མི་བསྐྱོང་བར་བགྱིའོ། །

46-1-297b

བཅོམ་ལྡན་འདས་འདི་ལྟར་རྣམ་པར་གྲོལ་བ་ནི་རྟག་པ་དང་། བདེ་བ་དང་། བདག་དང་། གཙང་བའི་ངོ་བོ་ཉིད་དེ། བདག་ཅག་ཕྱིན་ཅི་ལོག་སྤོང་བར་མི་བགྱིད་དོ། །བཅོམ་ལྡན་འདས་འདི་ལྟར་ཚུ་རོལ་ནས་ཕ་རོལ་རྗེས་སུ་མི་མཐོང་བས་
བདག་ཅག་ཆུ་བོ་ལས་རྒལ་བར་མི་བགྱིད་དོ། །བཅོམ་ལྡན་འདས་འདི་ལྟར་རྣམ་པར་གྲོལ་བ་ནི་སྒྲིབ་པ་མ་མཆིས་ཤིང་རྣམ་པར་མ་བརྟགས་པ་སྟེ། བདག་ཅག་སྒྲིབ་པ་རྣམས་སྤོང་བར་མི་བགྱིད་དོ། །བཅོམ་ལྡན་འདས་འདི་ལྟར་ཡང་
དག་པའི་མཐའ་ནི་ཀུན་ནས་ལྡང་བ་མ་མཆིས་པ་སྟེ། བདག་ཅག་ཀུན་ནས་ལྡང་བ་རྣམ་པར་གནོན་པར་མི་བགྱིད་དོ། །བཅོམ་ལྡན་འདས་འདི་ལྟར་དགེ་སྦྱོང་ནི་ནོངས་པ་མ་མཆིས་པ་སྟེ། བདག་ཅག་འགྱོད་པ་བསལ་བར་
མི་བགྱིད་དོ། །བཅོམ་ལྡན་འདས་འདི་ལྟར་ཐོག་མ་ནས་མོས་ཤིང་དད་པ་སྟེ། བདག་ཅག་ཐེ་ཙོམ་སེལ་བར་མི་བགྱིད་དོ། །བཅོམ་ལྡན་འདས་འདི་ལྟར་མོས་པས་རྣམ་པར་གྲོལ་བ་རྟོགས་པ་སྟེ། བདག་ཅག་ནེམ་ནུར་སེལ་བར་མི་བགྱིད་དོ། །
བཅོམ་ལྡན་འདས་འདི་ལྟར་ཆོས་ཐམས་ཅད་ནི་ཤིན་དུ་ཡོངས་སུ་མྱ་ངན་ལས་འདས་པ་སྟེ། བདག་ཅག་ཡོངས་སུ་མྱ་ངན་ལས་འདས་པ་དོན་དུ་མི་གཉེར་རོ། །བསྟན་པ་འདི་བཤད་པའི་ཚེ་དགེ་སློང་ཉིས་བརྒྱ་ནི་ཉེ་བར་ལེན་པ་མེད་པར་
ཟག་པ་རྣམས་ལས་སེམས་རྣམ་པར་གྲོལ་ལོ། །དགེ་སློང་བསམ་གཏན་བཞི་ཐོབ་པ་སྲིད་པ་ཐ་མ་པ། མ་ཐོབ་པ་ཐོབ་པའི་ང་རྒྱལ་ཅན་ཉིས་བརྒྱ་ནི་སྟན་ལས་ལངས་ཏེ། ཀྱེ་མའོ་འདི་དག་ནི་འཇིག་རྟེན་ཐམས་ཅད་དང་འགལ་བར་ཆོས་
འཆད་དེ། སྔོན་བདག་ཅག་གིས་རྗེས་སུ་མཐུན་པར་ཆོས་འཆད་པར་ཐོས་ན། ད་ལྟར་ནི་ཆོས་མ་ཡིན་པ། འདུལ་བ་མ་ཡིན་པ། སྟོན་པའི་བསྟན་པ་མ་ཡིན་པ་འཆད་དོ་ཞེས་ཚིག་དེ་སྐད་སྨྲས་ཏེ་དོང་ངོ་། །ཚེ་དང་ལྡན་པ་ཤཱ་རིའི་བུ་ཁོ་བོས་འཇམ་དཔལ་
གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་དགེ་སློང་ཉིས་བརྒྱ་པོ་འདི་དག་སྟན་ལས་ལངས་ཏེ། ཆོས་བཤད་པ་འདི་ནི་འཇིག་རྟེན་ཐམས་ཅད་དང་འགལ་བ་ཡིན་ནོ་ཞེས་ཚིག་དེ་སྐད་སྨྲས་ཏེ་དོང་ངོ་། །འཇམ་དཔལ་གྱིས་

46-1-298a

སྨྲས་པ། བཙུན་པ་གང་པོ་རྣམ་གྲངས་གང་གིས་ཆོས་བཤད་པ་འདི་འཇིག་རྟེན་ཐམས་ཅད་དང་འགལ་བར་འགྱུར་བ་ཡོད་དོ། །དེ་ཅིའི་ཕྱིར་ཞེ་ན། བཙུན་པ་གང་པོ་འཇིག་རྟེན་ནི་ཕུང་པོ་དང་། ཁམས་དང་། སྐྱེ་མཆེད་ལ་
མངོན་པར་ཞེན་པ་སྟེ། འཁོར་བ་སྤངས་པས་མྱ་ངན་ལས་འདས་པ་ཚོལ་ཞིང་འཁོར་བ་རང་བཞིན་གྱི་མི་དམིགས་པ་ཉིད་མྱ་ངན་ལས་འདས་པ་ཡིན་པར་དེ་ལྟར་ནི་མི་ཤེས་སོ། །འདི་ལ་གང་འཁོར་བ་འམ་མྱ་ངན་ལས་འདས་པ་ནི་གང་
ཡང་མེད་དེ། གང་དེ་ལྟ་བུའི་བཟོད་པ་དེ་ནི་མི་འགལ་བའོ། །བདེན་པ་བཞི་རྣམ་པར་གཞག་པ་བསྟན་པ་ལ་མངོན་པར་ཞེན་པ་དེ་ནི་འགལ་བའི་གནས་ཉིད་དོ། །དོན་དམ་པའི་བདེན་པ་ལ་ནི་བདེན་པ་བཞི་རྣམ་པར་གཞག་པ་འང་
མེད་དེ། དེ་ནི་མི་འགལ་བའོ། །ལམ་གྱི་རྒྱུ་འཐུན་པ་དང་། འབྲས་བུ་ཐོབ་ཅེས་བྱ་བ་དེ་ནི་གཉིས་ཏེ། གཉིས་གང་ཡིན་པ་དེ་ནི་འགལ་བའོ། །ལམ་མཉམ་པ་ཉིད་ཀྱིས་ཆོས་ཐམས་ཅད་མཉམ་པ་ཉིད་འདི་ནི་གཉིས་སུ་མེད་
པ་སྟེ། གཉིས་སུ་མེད་པ་གང་ཡིན་པ་དེ་ནི་མི་འགལ་བའོ། །ཇི་སྲིད་དུ་ངར་འཛིན་པ་དང་། ང་ཡིར་འཛིན་པ་ལ་མངོན་པར་བརྩོན་པ་དེ་སྲིད་དུ་མངོན་པའི་ང་རྒྱལ་ལོ། །ཇི་སྲིད་དུ་མངོན་པའི་ང་རྒྱལ་བ་དེ་སྲིད་དུ་འགལ་བའོ། །གང་
ཡང་ཆད་པར་མི་བྱེད། ལྷག་པར་མི་བྱེད། མཉམ་པ་ཉིད་དང་མཉམ་པར་མི་བྱེད། མི་མཉམ་པ་ཉིད་དང་མི་མཉམ་པར་མི་བྱེད་ཅིང་། བྱེད་པ་མ་ཡིན་པ། རྣམ་པར་བྱེད་པ་མ་ཡིན་པ་དེ་ནི་མངོན་པའི་ང་རྒྱལ་མེད་པ་སྟེ། གང་ལྷག་པའི་ང་རྒྱལ་
མེད་པ་དེ་ནི་མི་འགལ་བའོ། །གང་མི་འགལ་བ་དེ་ནི་གཉིས་སུ་མེད་པ་སྟེ། དེ་ལ་དགོངས་ནས་བཅོམ་ལྡན་འདས་ཀྱིས་ཀྱང་ང་ནི་འཇིག་རྟེན་དང་ལྷན་ཅིག་ཏུ་མི་རྩོད་དོ། །འཇིག་རྟེན་ནི་ང་དང་ལྷན་ཅིག་ཏུ་རྩོད་པར་བྱེད་དོ་ཞེས་དེ་སྐད་
ཅེས་གསུངས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་ནི་རྩོད་པའི་རྩ་བ་བཅད་དོ། །རྩོད་པའི་རྩ་བ་དེ་བཞིན་གཤེགས་པས་བཅད་པ་གང་ཞེ་ན། འདི་ལྟ་སྟེ། འདི་ནི་བདེན་པའོ། །འདི་ནི་བརྫུན་པའོ་ཞེས་བྱའོ། །དེ་ལ་

46-1-298b

བཅོམ་ལྡན་འདས་ཀྱིས་ཀྱང་འདི་སྐད་ཅེས་བཀའ་སྩལ་ཏོ། །བྲམ་ཟེ་བདེན་པ་ཞེས་བྱ་བའི་ཚིག་ཀྱང་ཅི། ཅིའི་ཕྱིར་ན་བརྫུན་པ་ཞེས་ཀྱང་བརྗོད། གང་ལ་མཉམ་པ་དང་མི་མཉམ་པ་མེད་ན། དེ་ལ་སུ་ཞིག་རྩོད་པ་སྦྱོར་བར་བྱེད་ཅེས་གསུངས་
སོ། །དེ་ནས་འཇམ་དཔལ་གཞོན་ནུར་གྱུར་པས་དགེ་སློང་དེ་དག་ལམ་གང་ནས་དོང་བ་དེ་ཐམས་ཅད་མེས་ཡོངས་སུ་གང་བར་བྱིན་གྱིས་བརླབས་ནས། དེ་དག་ཕྱོགས་གང་དང་གང་དུ་དོང་བ་དེ་དང་དེ་དག་ཐམས་ཅད་མེས་ཡོངས་སུ་གང་བར་མཐོང་སྟེ། 
མེའི་ཕུང་པོ་དེ་ལས་རྒལ་བར་མ་ནུས་སོ། །དེ་དག་རྫུ་འཕྲུལ་གྱི་སྟོབས་ཀྱིས་སྟེང་གི་བར་སྣང་ལ་དོང་བ་དང་། ལྕགས་ཀྱི་དྲ་བས་ནམ་མཁའི་དཀྱིལ་ཐམས་ཅད་ཡོག་པར་མཐོང་ངོ་། །འོག་ཏུ་བལྟས་ན་ཡང་ཆུའི་ཕུང་པོ་ཆེན་པོ་མཐོང་སྟེ། 
དེ་དག་ཕྱོགས་བསླད་ཅིང་སྤུའི་ཁུང་བུ་ཟིང་ཞེས་བྱེད་པར་གྱུར་ནས། རྒྱལ་བུ་རྒྱལ་བྱེད་ཀྱི་ཚལ་གྱི་ལམ་དུ་བལྟས་ན་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོས་ཡོག་ཅིང་། ལམ་དེ་ནས་སྐྱེ་བོའི་ཚོགས་མང་པོ་དག་
བཅོམ་ལྡན་འདས་ལས་ཆོས་མཉན་པའི་ཕྱིར་དོང་བ་མཐོང་ངོ་། །མཐོང་ནས་དེ་ནས་དེ་དག་ཀྱང་ཕྱིར་ལོག་སྟེ། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ག་ལ་བ་དང་། སྨིག་མའི་ལྡུམ་བུའི་འཁོར་གྱི་ཁྱམས་
ག་ལ་བ་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་
གཅིག་ཏུ་འཁོད་པ་དང་། དེ་དག་ལ་ཁོ་བོས་འདི་སྐད་ཅེས་སྨྲས་སོ། །ཚེ་དང་ལྡན་པ་དག་གར་དོང་དོང་། གང་ནས་འོངས། དེ་དག་གིས་སྨྲས་པ། ཚེ་དང་ལྡན་པ་གང་པོ་ཁོ་བོ་ཅག་ནི་དགྲ་བཅོམ་པ་ཟག་པ་ཟད་པ། བསམ་གཏན་ཐོབ་
པ། རྫུ་འཕྲུལ་གྱི་རྐང་པའི་ཕ་རོལ་དུ་སོན་པ་སྟེ། ཁོ་བོ་ཅག་འཇམ་དཔལ་གཞོན་ནུར་གྱུར་པ་འདི་ལས་མི་མཐུན་པའི་ཆོས་བཤད་པ་ཐོས་ནས་སྟན་ལས་ལངས་ཏེ་དོང་ན། ཁོ་བོ་ཅག་གིས་སངས་རྒྱས་ཀྱི་ཞིང་འདི་ཐམས་ཅད་

46-1-299a

མེས་ཡོངས་སུ་གང་བར་མཐོང་སྟེ། མེའི་ཕུང་པོ་དེ་ལས་རྒལ་བར་མ་ནུས་སོ། །ཁོ་བོས་བཅོམ་ལྡན་འདས་ལ་ཞུས་པ། དགྲ་བཅོམ་པ་ཟག་པ་ཟད་པའི་ས་དེ་གང་ལགས། དེ་ལ་བཅོམ་ལྡན་འདས་ཀྱིས་ཁོ་བོ་ལ་འདི་སྐད་ཅེས་བཀའ་
སྩལ་ཏོ། །གང་པོ་གང་འདོད་ཆགས་དང་། ཞེ་སྡང་དང་། གཏི་མུག་གི་མེ་ལ་སྤྱོད་པས་མེའི་ཕུང་པོ་ལས་འདའ་བ་ནི་གནས་མ་ཡིན་ནོ། །ལྟ་བའི་དྲ་བས་བསྒྲིབས་པས་ལྕགས་ཀྱི་དྲ་བ་བཅད་པ་དང་། སྲེད་པའི་ཆུར་ཞུགས་པས་ཆུའི་ཕུང་པོ་ལས་
རྒལ་བ་ནི་གནས་མ་ཡིན་ནོ། །དེ་ཅིའི་ཕྱིར་ཞེ་ན། གང་པོ་འདི་ལྟར་དགེ་སློང་འདི་དག་འདོད་ཆགས་དང་། ཞེ་སྡང་དང་། གཏི་མུག་གི་མེ་ལ་སྤྱོད་དེ། དེ་དག་མེའི་ཕུང་པོ་ཆེན་པོ་ལས་འདའ་བར་མི་ནུས་སོ། །དེ་དག་ལྟ་བའི་དྲ་བས་བསྒྲིབས་
ཏེ། ལྕགས་ཀྱི་དྲ་བ་གཅད་པར་མི་ནུས་སོ། །དེ་དག་སྲེད་པའི་ཆུ་བོར་ཞུགས་ཏེ། ཆུའི་ཕུང་པོ་ལས་རྒལ་བར་མི་ནུས་སོ། །གང་པོ་འདི་ལྟ་སྟེ་དཔེར་ན་མེའི་ཕུང་པོ་གང་ཡིན་པ་དང་། ལྕགས་ཀྱི་དྲ་བ་གང་ཡིན་པ་དང་། ཆུའི་ཕུང་པོ་
གང་ཡིན་པའི་ཆོས་དེ་དག་ཐམས་ཅད་གང་ནས་ཀྱང་མ་འོངས། གང་དུ་ཡང་མ་སོང་སྟེ། གཞན་དུ་ན་འཇམ་དཔལ་གཞོན་ནུར་གྱུར་པའི་བྱིན་གྱི་བརླབས་ཀྱིས་སྣང་ངོ་། །གང་པོ་དེ་བཞིན་དུ་འདོད་ཆགས་དང་། ཞེ་སྡང་དང་། 
གཏི་མུག་གང་ཡིན་པ་དང་། ལྟ་བར་བྱས་པ་གང་ཡིན་པ་དང་སྲིད་པའི་སྲེད་པ་གང་ཡིན་པའི་ཆོས་དེ་དག་གང་ནས་ཀྱང་མ་འོངས། གང་དུ་ཡང་མ་སོང་སྟེ། གཞན་དུ་ན་ཕྱིན་ཅི་ལོག་སྔོན་དུ་འགྲོ་བའི་རྟོག་པ་དང་། རྣམ་པར་
རྟོག་པ་དང་། ཡོངས་སུ་རྟོག་པ་ལས་བདག་པོ་མེད་པ། བདག་གི་མེད་པ། ཡོངས་སུ་གཟུང་བ་མེད་པའི་བདག་དང་གཞན་དུ་སྒྲོ་འདོགས་པར་འབྱུང་ངོ་། །དེ་ལ་རྣལ་འབྱོར་པ་རྣལ་འབྱོར་སྤྱོད་པས་རྣམ་པར་གཡེངས་པའི་
སེམས་རྩེ་གཅིག་དུ་བྱེད་དོ། །སེམས་རྩེ་གཅིག་པས་ཞིག་ནས་སྒྲུབ་པར་བྱེད་དོ། །ཞི་གནས་ཀྱི་ཚོགས་ཀྱིས་བསམ་གཏན་སྐྱེད་པར་བྱེད་དོ། །བསམ་གཏན་ཐོབ་པས་ཀྱང་རློམས་སེམས་སུ་མི་བྱེད། མངོན་པར་ཞེན་པར་མི་

46-1-299b

བྱེད་དོ། །བསམ་གཏན་ལས་སུ་རུང་བར་བྱས་པའི་སེམས་ཀྱིས་ཀྱང་ཆོས་རྣམས་ལ་རྣམ་པར་ལྟ་སྟེ། ཆོས་གང་གི་རྒྱུ་དང་། རྐྱེན་དུ་འགྱུར་ཞེས་དེ་སོ་སོར་རྟོག་པ་ན་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པར་བྱེད་དེ། འདི་ལྟ་
སྟེ། མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་ཀྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་ཀྱིས་རེག་པ། 
རེག་པའི་རྐྱེན་ཀྱིས་ཚོར་བ། ཚོར་བའི་རྐྱེན་ཀྱིས་སྲེད་པ། སྲེད་པའི་རྐྱེན་ཀྱིས་ལེན་པ། ལེན་པའི་རྐྱེན་ཀྱིས་སྲིད་པ། སྲིད་པའི་རྐྱེན་ཀྱིས་སྐྱེ་བ། སྐྱེ་བའི་རྐྱེན་ཀྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་
བ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་སྟེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཤིག་འབྱུང་བར་འགྱུར་ཏེ། འདི་ནི་ལོག་པར་བསྒྲུབ་པའི་འདུ་བྱེད་ཀྱི་ལམ་ཞེས་བྱའོ། །མ་རིག་པ་འགགས་པས་འདུ་
བྱེད་རྣམས་འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་འགག །སྐྱེ་མཆེད་དྲུག་འགགས་པས་
རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །
སྐྱེ་བ་འགགས་པས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འགག་སྟེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཤིག་འགག་པར་འགྱུར་ཏེ། འདི་ནི་ཡང་
དག་པར་སྒྲུབ་པ་འདུས་མ་བྱས་སུ་ངེས་པར་འཇུག་པའོ། །དེ་ལ་མ་རིག་པ་འགགས་པ་ནི་འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན་མོད་ཀྱི་འོན་ཀྱང་གང་ཚུལ་བཞིན་མ་ཡིན་པ་ཡིད་ལ་བྱེད་པ་བྱུང་བས་མ་རིག་པ་འབྱུང་སྟེ། 

46-1-300a

དེ་ཚུལ་བཞིན་ཡིད་ལ་བྱེད་པས་སོ་སོར་རྟོག་པ་ཡིད་ལ་བྱེད་ན་འབྱུང་བར་མི་འགྱུར་རོ། །མི་འབྱུང་བ་དེ་ནི་ཤིན་དུ་འགགས་པ་སྟེ། དེ་བས་ན་མ་རིག་པ་འགག་ཅེས་བྱའོ། །དེ་ལ་ཚུལ་བཞིན་ཡིད་ལ་བྱེད་པ་ནི་འབྱུང་བ་ཆེན་པོ་བཞི་ལས་
བྱུང་བའི་ཡུལ་འདི་ལ་འདི་ལྟ་སྟེ། ལུས་འདི་ནི་བེམས་པོ་སྟེ། རྩྭ་དང་། ཤིང་དང་། བརྩིག་པ་དང་། རྡོ་ལྟར་སྣང་བར་སོ་སོར་རྟོག་གོ། །གང་སེམས་སམ། ཡིད་དམ། རྣམ་པར་ཤེས་པ་ཞེས་བྱ་བ་དེང་གཟུགས་མེད་པ། བསྟན་དུ་མེད་པ། ཐོགས་
པ་མེད་པ། རྣམ་པར་མི་རིག་པ། སྒྱུ་མ་དང་། རྨི་ལམ་ལྟ་བུ་སྟེ། ནང་དང་། ཕྱི་དང་། གཉི་ག་མ་ཡིན་པར་ཡང་མི་དམིགས་སོ་ཞེས་དེ་ལྟར་ཚུལ་བཞིན་ཡིད་ལ་བྱེད་པ་ལ་བརྩོན་པའི་དགེ་སློང་གི་ཆོས་ཐམས་ཅད་རང་བཞིན་གྱིས་མ་སྐྱེས་པར་རྟོགས་
པར་འགྱུར་ཏེ། གང་མ་སྐྱེས་པ་དེ་ནི་དོན་དམ་པའོ། །བསྟན་པ་འདི་བཤད་པའི་ཚེ་དགེ་སློང་ཉིས་བརྒྱ་པོ་དེ་དག་གིས་ཉེ་བར་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་ནས་གཅེར་བུ་མའི་བུ་བདེན་པ་པོ་འཁོར་
དམས་པར་གྱུར་ཏེ། གཡོག་ལྔ་བརྒྱ་ཞིག་དང་སྤ་གོང་བར་གྱུར་ཅིང་། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ག་ལ་བ་དང་། སྨིག་མའི་ཚལ་ལྡུམ་བུའི་འཁོར་གྱི་ཁྱམས་ག་ལ་བ་དང་། བཅོམ་ལྡན་འདས་
ག་ལ་བ་དེར་དོང་སྟེ་ལྷགས་པ་དང་། བཅོམ་ལྡན་འདས་དང་ལྷན་ཅིག་ཀུན་དགའ་བ་དང་། མགུ་བར་འགྱུར་བ་དང་། དགའ་བར་འགྱུར་བའི་གཏམ་སྣ་ཚོགས་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་གཽ་ཏ་མ་དགེ་སྦྱོང་གཽ་
ཏ་མ་ནི་གཞན་གྱི་འཁོར་ཁ་འདྲེན་པའི་སྒྱུས་ཁ་འདྲེན་ཏོ་ཞེས་ཡང་དང་ཡང་དུ་ཐོས་ན། དེ་ད་ནི་མངོན་སུམ་དུ་གྱུར་ཏེ། འདི་ལྟར་འཇམ་དཔལ་གཞོན་ནུར་གྱུར་པས་ཁོ་བོའི་འཁོར་ཕྱེ་སྟེ་དགེ་སྦྱོང་གཽ་ཏ་མ་ལ་ཕུལ་ལོ། །དགེ་སྦྱོང་གཽ་ཏ་མས་
ཀྱང་ལོག་པའི་གཟུང་བས་བཟུང་སྟེ། དེ་དག་སླར་ཁོ་བོའི་དྲུང་དུ་མི་འོང་། བསྙེན་བཀུར་མི་བྱེད། རྣ་བླགས་ཏེ་མི་ཉན། ཀུན་ཤེས་པར་བྱ་བའི་སེམས་ཉེ་བར་མི་འཇོག་གོ། །དེའི་ཚེ་ཀུན་དུ་རྒྱུ་ཟླ་བ་ཅན་ཞེས་བྱ་བའི་སྣག་གི་གཉེན་

46-1-300b

མཚམས་ཀུན་དུ་རྒྱུ་རྒྱལ་བའི་བློ་གྲོས་ཤེས་བྱ་བ་འཁོར་དེར་འདུས་ཏེ་འདུག་པར་གྱུར་པ་དེས་གཅེར་བུ་མའི་བུ་བདེན་པ་པོ་ལ་འདི་སྐད་ཅེས་སྨྲས་སོ། །གཅེར་བུ་མའི་བུ་བདེན་པ་པོ་བཅོམ་ལྡན་འདས་དང་། བཅོམ་ལྡན་འདས་ཀྱི་ཉན་ཐོས་
རྣམས་དང་། འཇམ་དཔལ་གཞོན་ནུར་གྱུར་པ་ལ་མ་དད་པར་མ་བྱེད་ཅིག །ཁྱོད་ལ་ཡུན་རིང་པོར་དོན་མེད་པ་དང་། མི་ཕན་པ་དང་། སྡུག་བསྔལ་བ་དང་། རྣམ་པར་ལྟུང་བར་གྱུར་ཏ་རེ། གཅེར་བུ་པ་འདི་ལྟ་སྟེ་ངས་དཔེ་བྱ་བར་སྤོབས་སོ། །
གཅེར་བུ་པ་འདི་ལྟ་སྟེ་དཔེར་ན་སྐྱེས་བུ་བྱིས་པའི་རང་བཞིན་ཅན། ཤེས་རབ་འཆལ་པའི་རང་བཞིན་ཅན་ལ་ལ་ཞིག་མར་གྱི་སྙིང་ཁུ་འདོད་ཅིང་མར་ཚོལ་ལ་དེས་ཆུ་བུམ་པའི་ནང་དུ་བླུགས་ཏེ་བསྲུབས་ནས་དེ་ཇི་ཙམ་ན་དོན་མེད་པ་དང་ཆད་པའི་སྐལ་
བ་ཅན་དུ་གྱུར་ཀྱང་དེའི་རྒྱུས་མར་རམ་མར་གྱི་སྙིང་ཁུ་ནི་མི་རྙེད་དོ། །གཅེར་བུ་པ་དེ་བཞིན་དུ་འདི་ལས་ཕྱི་རོལ་གྱི་ཡ་མཚན་ཅན་ཐམས་ཅད་རྣལ་འབྱོར་དང་། སྒོམ་པ་དང་། དཀའ་བ་དང་། བརྟུལ་ཞུགས་དེ་དག་ཐམས་ཅད་ནི་ལོག་པར་བཟུང་བ་སྟེ། 
དེ་དག་ནི་ཆུའི་བུམ་པ་བསྲུབས་པ་ལྟ་བུའོ་ཞེས་ང་སྨྲའི་སྟེང་དུ། དེ་བཞིན་གཤེགས་པས་གསུངས་པའི་ཆོས་འདུལ་བ་ལ་སེམས་གདུག་པར་བྱས་པས་སེམས་ཅན་དམྱལ་བའི་གཡང་སར་ལྟུང་བར་འགྱུར་རོ། །གཅེར་བུ་པ་འདི་ལྟ་སྟེ་
དཔེར་ན་སྐྱེས་བུ་མཁས་པའི་རང་བཞིན་ཅན་ཤེས་རབ་དང་ལྡན་པའི་རང་བཞིན་ཅན་ལ་ལ་ཞིག་མར་གྱི་སྙིང་ཁུ་འདོད་ཅིང་མར་ཚོལ་ལ་དེས་འོ་མ་བུམ་པའི་ནང་དུ་བླུགས་ཏེ་བསྲུབས་ན་དེ་ཚེགས་ཆུང་ངུས་མར་སར་འབྱིན་པར་འགྱུར་ཏེ། 
མར་སར་ལས་མར་རོ། །མར་ལས་མར་གྱི་སྙིང་ཁུ་འཐོབ་པོ། །གཅེར་བུ་པ་དེ་བཞིན་དུ་ཁྱིམ་ན་གནས་པར་འགྱུར་བ་འམ། རབ་ཏུ་བྱུང་བ་ཡང་རུང་དེ་བཞིན་གཤེགས་པས་གསུང་པའི་ཆོས་འདུལ་བ་འདི་ལ་དད་པ་དང་ལྡན་ཞིང་མོས་
པ་མང་བས་སྦྱོར་བར་བྱེད། རྩོལ་བར་བྱེད། འབད་པར་བྱེད་ན་མར་འདོད་པའི་འོ་མའི་བུམ་པ་ལས་མར་གྱི་སྙིང་ཁུ་ཐོབ་པ་བཞིན་དེ་དག་མྱུར་དུ་འཕགས་པའི་རྣམ་པར་གྲོལ་བ་ཐོབ་བོ། །གཅེར་བུ་པ་འདི་ལྟ་སྟེ། སྐྱེས་བུ་ཞིག་གིས་

46-1-301a

སྐྱེས་བུ་གཉིས་པའི་འཇིམ་པ་ལས་བྱས་པའི་སྣོད་བརྒྱ་སྟོང་བཅག་སྟེ། དེ་ཉིད་ཀྱི་རིན་པོ་ཆེའི་སྣོད་བྱིན་ན་གཅེར་བུ་པ་འདི་ཇི་སྙམ་དུ་སེམས། ཅི་སྐྱེས་བུ་དེས་སྐྱེས་བུ་དེ་བསླུས་པ་ཡིན་ནམ། སྨྲས་པ། རྒྱལ་བའི་བློ་གྲོས་
དེ་ནི་མ་ཡིན་ནོ། །སྨྲས་པ། གཅེར་བུ་པ་དེ་བཞིན་དུ་འཇིམ་པ་ལས་བྱས་པའི་སྣོད་ལྟ་བུའི་མུ་སྟེགས་ཅན་གྱི་ཉན་ཐོས་རྣམས་བཅོམ་སྟེ། དེ་བཞིན་གཤེགས་པའི་བསྟན་པ་ལ་ཆོས་རིན་པོ་ཆེའི་སྣོད་དུ་བྱེད་ན་དེས་མུ་སྟེགས་རྣམས་གང་
ཡང་བསླུས་པར་མི་འགྱུར་རོ། །གཅེར་བུ་པ་འདི་ལྟ་སྟེ་དཔེར་ན་སྐྱེས་བུ་དེད་དཔོན་ཐབས་ལ་མི་མཁས་པ་མངོན་པའི་ང་རྒྱལ་ཅན་ཞིག་གིས་འདྲོན་པ་མང་པོ་ལམ་ངན་པར་བཙུད་པ་ལས། དེད་དཔོན་ཐབས་ལ་མཁས་པ་ལམ་ཤེས་པ་ལམ་
མཐོང་བ་ཞིག་གིས་ལམ་ངན་པ་དེ་ནས་བཟློག་སྟེ། ཡང་དག་པའི་ལམ་དུ་བཙུད་པ་དེ་བཞིན་དུ། གཅེར་བུ་པ་ཁྱེད་ཀྱི་སྟོན་པ་དྲུག་པོ་ཐམས་ཅད་ཀྱང་ལམ་མི་ཤེས་པ། ལམ་མི་མཁས་པ་སྟེ། དེས་ཁྱེད་ཅག་སེམས་ཅན་མང་པོ་རྣམས་ལམ་
ངན་པར་བཙུད་དོ། །དེ་བཞིན་གཤེགས་པ་ནི་ལམ་མཁྱེན་པ། ལམ་ལ་མཁས་པ་སྟེ། དེས་སེམས་ཅན་དེ་དག་ལམ་ངན་པ་དེ་ལས་བཟློག་ནས་ཡང་དག་པའི་ལམ་དུ་འཛུད་དོ། །གཅེར་བུ་པ་དེ་ལྟ་མོད་ཀྱི་ཁྱོད་ཀྱི་འཁོར་འདི་དག་ཁྲིད་དེ་སོང་
ཤིག །དེ་ནས་ཡང་གཅེར་བུ་པ་ཁྲི་ཉིས་སྟོང་གཅེར་བུ་མའི་བུ་བདེན་པ་པོ་དང་ལྷན་ཅིག་ཏུ་དོང་ངོ་། ལྷག་མ་རྣམས་ནི་མངོན་པར་ཤེས་པ་ཐོབ་ནས་དེ་དག་བཅོམ་ལྡན་འདས་ཀྱིས་དགེ་སློང་ཚུར་ཤོག་ཅེས་བྱ་བས་རབ་ཏུ་བྱུང་བར་གྱུར་ཏོ། །དེ་ལ་
བཅོམ་ལྡན་འདས་ཀྱིས་ཀུན་དུ་རྒྱུ་རྒྱལ་བའི་བློ་གྲོས་ལ་འདི་སྐད་ཅེས་བཀའ་སྩལ་ཏོ། །རྒྱལ་བའི་བློ་གྲོས་ཁྱོད་ཀྱིས་གང་དག་གཅེར་བུ་མའི་བུ་བདེན་པ་པོ་དང་ལྷན་ཅིག་ཏུ་དོང་བའི་གཅེར་བུ་པ་ཁྲི་ཉིས་སྟོང་པོ་དེ་དག་མཐོང་ངམ། གསོལ་
པ། བཅོམ་ལྡན་འདས་མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་བའི་བློ་གྲོས་དེ་དག་ཐམས་ཅད་དེ་བཞིན་གཤེགས་པ་བྱམས་པའི་འདུས་པ་དང་པོའི་གྲངས་སུ་གཏོགས་པར་འགྱུར་རོ། །དེ་ཅིའི་ཕྱིར་

46-1-301b

ཞེ་ན། དེ་ལྟར་དེ་དག་གིས་ཆོས་ཟབ་མོ་འདི་བཤད་པ་ཐོས་སོ། །གཅེར་བུ་མའི་བུ་བདེན་པ་པོ་ནི་འདི་ལྟ་སྟེ་དཔེར་ན་ད་ལྟར་ངའི་དགེ་སློང་ཤཱ་རིའི་བུ་བཞིན་དུ། དེ་བཞིན་གཤེགས་པ་བྱམས་པའི་བསྟན་པ་ལ་ཉན་ཐོས་རྣམས་ཀྱི་ནང་ན་ཤེས་རབ་
ཆེ་བའི་མཆོག་ཏུ་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་ནིང་ལ་མོས་པ་ཡོད་དོ། །ལྷག་པའི་ང་རྒྱལ་གྱིས་ནི་ལྟ་བ་ཡོངས་སུ་མི་གཏོང་ངོ་། །དེ་ནས་འཇམ་དཔལ་གཞོན་ནུར་གྱུར་པ་ལ་ཀུན་དུ་རྒྱུ་རྒྱལ་བའི་བློ་གྲོས་ཀྱིས་འདི་སྐད་ཅེས་
སྨྲས་སོ། །འཇམ་དཔལ་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མ་ལ་དགེ་སློང་མངོན་པའི་ང་རྒྱལ་ཅན་ཇི་སྙེད་ཅིག་འབྱུང་བར་འགྱུར། འཇམ་དཔལ་གྱིས་སྨྲས་པ། རིགས་ཀྱི་བུ་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མ་ལ་དགེ་
སློང་མངོན་པའི་ང་རྒྱལ་ཅན་འབྱུང་བ་ནི་དཀོན་ནོ། །དེ་ཅིའི་ཕྱིར་ཞེ་ན། རིགས་ཀྱི་བུ་བསམ་གཏན་བཞི་མ་བསྐྱེད་པར་མངོན་པའི་ང་རྒྱལ་དུ་ལྟུང་བར་མི་ནུས་སོ། །དེ་ཅིའི་ཕྱིར་ཞེ་ན། དེ་ལྟར་དེའི་ཚེ་དགེ་སློང་དེ་དག་སེམས་གནས་པ་ཡང་དཀོན་
ནོ་གང་བསམ་གཏན་བཞི་ལ་སྙོམས་པར་འཇུག་པ་དེ་དག་ཅི་སྨོས། རིགས་ཀྱི་བུ་དེ་ལྟ་བས་ན་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མ་ལ་དགེ་སློང་མངོན་པའི་ང་རྒྱལ་ཅན་འབྱུང་བ་ནི་དཀོན་ནོ། །རིགས་ཀྱི་བུ་འོན་ཀྱང་འདི་གཉིས་ནི་
མངོན་པའི་ང་རྒྱལ་ཅན་ཏེ། གཉིས་གང་ཞེ་ན། ལྟ་བ་ལ་ཆགས་པས་བསམ་གཏན་གྱི་མངོན་པའི་ང་རྒྱལ་ཅན་དང་། རྙེད་པ་དང་བཀུར་སྟིའི་ཕྱིར་འཕགས་པའི་རིགས་དང་། ཚུལ་ཁྲིམས་དང་། ཐོས་པ་དང་། སྦྱངས་པའི་ཡོན་ཏན་དང་། 
ཡོན་ཏན་བསྙུངས་པ་ཙམ་གྱིས་མངོན་པའི་ང་རྒྱལ་དུ་ལྟུང་བ་སྟེ། དེ་གཉིས་ནི་མངོན་པའི་ང་རྒྱལ་ཅན་ནོ། །གང་ཡང་མངོན་པའི་ང་རྒྱལ་ཅན་དུ་གྱུར་ཏེ། དེ་བཞིན་གཤེགས་པས་གསུངས་པའི་ཆོས་འདུལ་བ་སྤོང་བ་དེ་
དག་ནི་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་འགྲོ་བར་འགྱུར་རོ། །སྨྲས་པ། འཇམ་དཔལ་ཕ་རོལ་གྱི་སེམས་མི་ཤེས་པར་འདི་ནི་མངོན་པའི་ང་རྒྱལ་ཅན་ནོ་ཞེས་ཇི་ལྟར་ཤེས་པར་བྱ། 

46-1-302a

སྨྲས་པ། གལ་ཏེ་སོ་སོའི་སྐྱེ་བོ་རྣམས་མྱ་ངན་ལས་འདའ་བར་འགྱུར་གྱི། དགྲ་བཅོམ་པ་རྣམས་ནི་མ་ཡིན་ནོ་ཞེས་དེ་སྐད་ཐོས་ནས་སྐྲག་པར་གྱུར་ན་མངོན་པའི་ང་རྒྱལ་ཅན་དུ་རིག་པར་བྱའོ། །གལ་ཏེ་སོ་སོའི་སྐྱེ་བོ་རྣམས་
ཀྱིས་དེ་བཞིན་གཤེགས་པ་མཐོང་གི། །དགྲ་བཅོམ་པ་རྣམས་ཀྱིས་ནི་མ་ཡིན་ནོ་ཞེས་དེ་སྐད་ཐོས་ནས་སྐྲག་པར་གྱུར་ན་མངོན་པའི་ང་རྒྱལ་ཅན་དུ་རིག་པར་བྱའོ། །གལ་ཏེ་སོ་སོའི་སྐྱེ་བོ་རྣམས་ཀྱིས་སྦྱིན་པ་ཡོངས་སུ་སྦྱོང་བར་བྱེད་ཀྱི། དགྲ་
བཅོམ་པ་རྣམས་ཀྱིས་ནི་མ་ཡིན་ནོ་ཞེས་དེ་སྐད་ཐོས་ནས་སྐྲག་པར་གྱུར་ན་མངོན་པའི་ང་རྒྱལ་ཅན་དུ་རིག་པར་བྱའོ། །གལ་ཏེ་སོ་སོའི་སྐྱེ་བོ་རྣམས་ཀྱིས་དེ་བཞིན་གཤེགས་པ་མཉེས་པར་བྱེད་ཀྱི། དགྲ་བཅོམ་པ་རྣམས་ཀྱིས་
ནི་མ་ཡིན་ནོ་ཞེས་དེ་སྐད་ཐོས་ནས་སྐྲག་པར་གྱུར་ན་མངོན་པའི་ང་རྒྱལ་ཅན་དུ་རིག་པར་བྱའོ། །གང་དག་ཉོན་མོངས་པ་ཐམས་ཅད་ལས་མི་གཡོ་བ་དེ་དག་ནི་མི་རྟེན་པའོ། །གང་དག་མི་རྟེན་པ་དེ་དག་ནི་འཇིག་རྟེན་ན་སྦྱིན་པའི་
གནས་སོ། །གང་ཡང་ཉོན་མོངས་པ་ལས་གཡོ་བ་དེ་དག་ནི་རྟེན་པའོ། །གང་དག་རྟེན་པ་དེ་དག་ནི་འཇིག་རྟེན་ན་སྦྱིན་པའི་གནས་མ་ཡིན་ནོ། །དེ་ལ་གང་དག་རྩོད་པར་བྱེད་པ་དེ་དག་ནི་མངོན་པའི་ང་རྒྱལ་ཅན་དུ་རིག་པར་བྱའོ། །
ཆོས་ཐམས་ཅད་ནི་འབྱུང་བའོ་ཞེས་བྱ་བའི་ཆོས་ཟབ་མོའི་ཚུལ་འདི་གང་གིས་མི་རྟོགས་པ་དེ་དག་ནི་མངོན་པའི་ང་རྒྱལ་ཅན་དུ་རིག་པར་བྱའོ། །ཆོས་ཐམས་ཅད་ཡོངས་སུ་ཤེས་པར་མི་བྱའོ། །སྤང་བར་མི་བྱའོ། །བསྒོམ་པར་
མི་བྱའོ། །མངོན་དུ་མི་བྱའོ་ཞེས་བྱ་བའི་བདེན་པའི་ཚུལ་འདི་ལ་གང་མི་འཇུག་པ་དེ་དག་ནི་མངོན་པའི་ང་རྒྱལ་ཅན་དུ་རིག་པར་བྱའོ། །སྨྲས་པ། འཇམ་དཔལ་མངོན་པའི་ང་རྒྱལ་མེད་པའི་ཕྱག་རྒྱ་ཇི་
ལྟ་བུ་ཡིན། སྨྲས་པ། འགལ་བ་མེད་པ་དང་། རྩོད་པ་མེད་པ་ནི་མངོན་པའི་ང་རྒྱལ་མེད་པའོ། །རིགས་ཀྱི་བུ་འདི་ལྟ་སྟེ། དཔེར་ན་རི་དགས་ཀྱི་རྒྱལ་པོ་སེང་གེ་ནི་སྒྲ་ཐམས་ཅད་ཀྱིས་མི་སྐྲག་གོ། །

46-1-302b

དེ་བཞིན་དུ་རིགས་ཀྱི་བུ་དགེ་སློང་མངོན་པའི་ང་རྒྱལ་མེད་པ་ནི་སྒྲ་ཐམས་ཅད་ཀྱིས་མི་སྐྲག་གོ། །དེ་ཅིའི་ཕྱིར་ཞེ་ན། འདི་ལྟར་དེས་ཆོས་ཐམས་ཅད་སྒྲ་བརྙན་ལྟ་བུར་རིག་སྟེ། སྒྲ་བརྙན་ལ་ནི་སེམས་མེད། ཡིད་མེད། 
རྣམ་པར་ཤེས་པ་མེད་ཀྱང་དེ་ལ་རྟེན་ཅིང་སྒྲ་འབྱུང་བར་འགྱུར་རོ། །དེ་བཞིན་དུ་དེས་སེམས་དང་ཡིད་ཀྱང་ཡང་དག་པ་ཇི་ལྟ་བ་བཞིན་དུ་ཤེས་ཏེ། དེ་སྒྲ་ཐམས་ཅད་རྐྱེན་ལ་རག་ལས་པར་རྟོགས་ནས་དེ་སྒྲ་ཐམས་ཅད་ལ་དགའ་
བ་ཡང་མི་སྐྱེད་དོ། །དེ་སངས་རྒྱས་ཀྱི་སྒྲ་ལ་ཡང་རྗེས་སུ་ཆགས་པར་མི་བྱེད། མུ་སྟེགས་ཅན་གྱི་སྒྲ་ལ་ཡང་ཁོང་ཁྲོ་བར་མི་བྱེད། རྣམ་པར་བྱང་བའི་སྒྲ་ལ་ཡང་རྗེས་སུ་ཆགས་པར་མི་བྱེད། ཉོན་མོངས་པའི་
སྒྲ་ལ་ཡང་ཁོང་ཁྲོ་བར་མི་བྱེད་ཅིང་དེས་སྒྲ་ཐམས་ཅད་ཀྱི་སྔོན་གྱི་མཐའ་དང་། ཕྱི་མའི་མཐའ་རྟོགས་པར་གྱུར་པ་འདི་ནི་རིགས་ཀྱི་བུ་མངོན་པའི་ང་རྒྱལ་མེད་པའི་ཕྱག་རྒྱ་ཞེས་བྱ་སྟེ། གཞག་པ་མེད་པ་དང་། 
གདེག་པ་མེད་པའི་ཕྱག་རྒྱའོ། །ཇི་ལྟ་བ་བཞིན་གྱི་ཕྱག་རྒྱའོ། །ཡང་དག་པར་བསྒྲུབ་པའི་ཕྱག་རྒྱའོ། །རང་བཞིན་གྱི་མཚན་ཉིད་ཀྱི་ཕྱག་རྒྱའོ། །ཚུལ་གཅིག་དུ་འཇུག་པའི་ཕྱག་རྒྱའོ། །ཆོས་
ཀྱི་དབྱིངས་སུ་ཡང་དག་པར་འདུ་བའི་ཕྱག་རྒྱའོ། །དེ་བཞིན་ཉིད་ཐ་མི་དད་པའི་ཕྱག་རྒྱའོ། །ཡང་དག་པའི་མཐའི་གནས་ཀྱི་ཕྱག་རྒྱའོ། །དོན་དམ་པ་སྟོང་པ་ཉིད་ཀྱི་ཕྱག་རྒྱའོ། །དུས་གསུམ་མཉམ་པ་ཉིད་ཀྱི་
ཕྱག་རྒྱའོ། །གཟོད་མ་ནས་མ་སྐྱེས་པའི་ཕྱག་རྒྱའོ། །རང་བཞིན་ལ་སོ་སོར་རྟོག་པའི་ཕྱག་རྒྱ་སྟེ། རིགས་ཀྱི་བུ་ཕྱག་རྒྱ་དེ་དག་གིས་བཏབ་པའི་ཆོས་ཐམས་ཅད་མངོན་པའི་ང་རྒྱལ་མེད་པའི་དགེ་
སློང་གིས་ཐོས་ན་ནེམ་ནུར་དུ་མི་འགྱུར། ཐེ་ཙོམ་དུ་མི་འགྱུར་ཏེ། བདག་མི་དམིགས་པར་རྟོགས་པར་འགྱུར་རོ། །དེ་ནས་བཅོམ་ལྡན་འདས་ལ་ཀུན་དུ་རྒྱུ་རྒྱལ་བའི་བློ་གྲོས་ཀྱིས་འདི་སྐད་ཅེས་

46-1-303a

གསོལ་ཏོ། །བཅོམ་ལྡན་འདས་བདག་གིས་སྔོན་ཡང་ཀུན་དུ་རྒྱུ་ལྷག་སྤྱོད་དང་། སྣག་གི་གཉེན་མཚམས་ཀུན་དུ་རྒྱུ་ཟླ་བ་ཅན་ལས་ཐེག་པ་ཆེན་པོ་འདིའི་ཡོན་ཏན་བསྔགས་པ་བརྗོད་པ་ཁ་ཅིག་ཐོས་པར་གྱུར་ཏོ། །
བཅོམ་ལྡན་འདས་བདག་གིས་ད་ལྟར་ཡང་འཇམ་དཔལ་གཞོན་ནུར་གྱུར་པ་ལས་དམ་པའི་ཆོས་བཤད་པ་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་དོ། །བཅོམ་ལྡན་འདས་ཀྱིས་ཀྱང་བདག་ལ་ཅི་ནས་
ཀྱང་བདག་གིས་བྱང་ཆུབ་ཀྱི་ཕྱོགས་ཀྱི་ཆོས་རྣམས་བསགས་ཏེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་ཚད་མ་མཆིས་པ་རྣམས་ཀྱི་དོན་བགྱིད་པར་འགྱུར་
བ་དེ་ལྟར་ཆོས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་བའི་བློ་གྲོས་བྱང་ཆུབ་སེམས་དཔའ་རྣམས་ཀྱི་ཆོས་འདི་གཉིས་ནི་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་ཤེས་པར་བྱེད་
པའོ། །གཉིས་གང་ཞེ་ན། འདི་ལྟ་སྟེ། བརྩོན་འགྲུས་དང་། བག་ཡོད་པའོ། །དེ་ལ་རྩོན་འགྲུས་གང་ཞེ་ན། གང་ཆོས་ཀྱིས་བཙལ་བའི་ལོངས་སྤྱོད་བདོག་པ་ཐམས་ཅད་ཡོངས་སུ་གཏོང་བའོ། །བག་ཡོད་པ་གང་ཞེ་ན། 
གང་རྣམ་པར་སྨིན་པ་ལ་མི་རེ་བས་བྱང་ཆུབ་ཏུ་ཡོངས་སུ་སྔོའོ། །དེ་ལ་བརྩོན་འགྲུས་ནི་གང་མི་དགེ་བའི་ཆོས་ཐམས་ཅད་སྤང་བ་དང་། དགེ་བའི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཡང་དག་པར་རྩོལ་བའོ། །
བག་ཡོད་པ་ནི་ཚུལ་ཁྲིམས་ཡོངས་སུ་དག་ཅིང་སྐྱེ་བ་ཐམས་ཅད་མི་འདོད་པས་བྱང་ཆུབ་ཏུ་ཡོངས་སུ་སྔོའོ། །དེ་ལ་བརྩོན་འགྲུས་ནི་གང་ལུས་དང་སེམས་ལ་མི་ལྟ་བས་བཟོད་ཅིང་དེས་པའོ། །བག་ཡོད་པ་ནི་གང་ཁོང་ཁྲོ་བ་མེད་པའི་
སེམས་ཀྱིས་སེམས་ཅན་ཐམས་ཅད་ཀུན་དུ་བསྲུང་བའོ། །དེ་ལ་བརྩོན་འགྲུས་ནི་གང་དགེ་བའི་ཆོས་ཡང་དག་པར་སྒྲུབ་པས་ཡོངས་སུ་མི་སྐྱོ་བའོ། །བག་ཡོད་པ་ནི་གང་དགེ་བའི་ཆོས་ཡང་དག་པར་བསྒྲུབས་པ་རྣམས་ཐམས་ཅད་མཁྱེན་པ་

46-1-303b

ཉིད་དུ་ཡོངས་སུ་སྔོ་བའོ། །དེ་ལ་བརྩོན་འགྲུས་ནི་གང་བསམ་གཏན་གྱི་ཡན་ལག་ཡང་དག་པར་བསྒྲུབས་པས་ཡོངས་སུ་མི་སྔོ་བའོ། །བག་ཡོད་པ་ནི་གང་བསམ་གཏན་གྱི་རོ་མྱོང་བར་བྱེད་པ་ལས་ལྡོག་པའི་ཤེས་པའོ། །དེ་ལ་
བརྩོན་འགྲུས་ནི་གང་མང་དུ་ཐོས་པ་ཚོལ་བས་ཆོག་མི་ཤེས་པའོ། །བག་ཡོད་པ་ནི་གང་ཚུལ་བཞིན་ཡིད་ལ་བྱེད་པ་ལ་གནས་པའི་འཕགས་པའི་ཤེས་རབ་དང་ཡེ་ཤེས་སོ། །དེ་ལ་བརྩོན་འགྲུས་ནི་གང་བསྡུ་བའི་དངོས་པོ་རྣམས་མི་འདོར་
བའོ། །བག་ཡོད་པ་ནི་གང་སེམས་ཅན་ཡོངས་སུ་སྨིན་པར་བྱ་བའི་ཐབས་སོ། །དེ་ལ་བརྩོན་འགྲུས་ནི་གང་ལུས་དང་སེམས་རབ་ཏུ་འཛིན་པའོ། །བག་ཡོད་པ་ནི་ལུས་དང་སེམས་དབེན་པའོ། །དེ་ལ་བརྩོན་འགྲུས་ནི་གང་སེམས་
ཅན་ལ་དམིགས་པའི་བྱམས་པས་སེམས་ཅན་ཐམས་ཅད་ལ་སེམས་མཉམ་པའོ། །བག་ཡོད་པ་ནི་གང་ཆོས་ལ་དམིགས་པའི་བྱམས་པས་ཆོས་ཐམས་ཅད་མི་དམིགས་པའོ། །དེ་ལ་བརྩོན་འགྲུས་ནི་གང་སེམས་ཅན་
གཞན་དང་གང་ཟག་གཞན་དག་བྱང་ཆུབ་ཀྱི་སེམས་ལ་སྦྱོར་བའོ། །བག་ཡོད་པ་ནི་གང་སྒྱུ་མ་ལྟ་བུའི་ཆོས་ལ་སོ་སོར་རྟོག་པས་བྱང་ཆུབ་ཀྱི་སེམས་མི་རྗེད་པའོ། །དེ་ལ་བརྩོན་འགྲུས་ནི་གང་མངོན་པར་ཤེས་པའི་ཡེ་ཤེས་
སྐྱེད་པའོ། །བག་ཡོད་པ་ནི་གང་ཟག་པ་ཟད་པར་བྱེད་པས་ཀུན་དུ་བསྲུང་བའོ། །དེ་ལ་བརྩོན་འགྲུས་ནི་གང་མགོ་དང་གོས་ལ་མེ་འབར་བ་ལྟ་བུས་བདེན་པ་ཚོལ་བའོ། །བག་ཡོད་པ་ནི་གང་འགོག་པ་གསུམ་དུ་བྱ་བར་མི་ལྟུང་བའོ། །
དེ་ལ་བརྩོན་འགྲུས་ནི་གང་མཚན་དང་དཔེ་བྱད་བཟང་པོ་ཡོངས་སུ་རྫོགས་པར་བྱ་བའི་ཕྱིར་དགེ་བའི་རྩ་བས་ཆོག་མི་ཤེས་པའོ། །བག་ཡོད་པ་ནི་གང་ཆོས་ཀྱི་སྐུ་ལ་སོ་སོར་རྟོག་པའོ། །དེ་ལ་བརྩོན་འགྲུས་ནི་གང་སངས་
རྒྱས་ཀྱི་ཞིང་ཡོངས་སུ་དག་པའོ། །བག་ཡོད་པ་ནི་གང་སེམས་ཅན་ཀྱི་ཞིང་ཡོངས་སུ་དག་པའོ། །དེ་ལ་བརྩོན་འགྲུས་ནི་གང་བྱང་ཆུབ་ཀྱི་ཕྱོགས་ཀྱི་ཆོས་སུམ་བཅུ་རྩ་བདུན་ཡོངས་སུ་རྫོགས་པའོ། །བག་ཡོད་པ་ནི་

46-1-304a

གང་ཉེ་བར་ཞི་བའི་རྣམ་པར་གྲོལ་བས་རྣམ་པར་གྲོལ་བའོ། །རིགས་ཀྱི་བུ་མདོར་ན་བྱང་ཆུབ་སེམས་དཔའི་ཐབས་ལ་མཁས་པའི་ལས་ཇི་སྙེད་པ་དེ་དག་ཐམས་ཅད་ནི་བརྩོན་འགྲུས་དང་ལྡན་པར་བལྟ་བར་བྱའོ། །
ཤེས་རབ་ཀྱི་ཕ་རོལ་དུ་ཕྱིན་པའི་ལས་ཇི་སྙེད་པ་དེ་དག་ཐམས་ཅད་ནི་བག་ཡོད་པ་དང་ལྡན་པར་བལྟ་སྟེ། དེ་བས་ན་ཐབས་དང་ཤེས་རབ་ཀྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ལ་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ལས་ཕྱིར་ལྡོག་པའི་འཇིགས་པ་ཆུང་ཟད་ཀྱང་མེད་དོ་ཞེས་བྱའོ། །བསྟན་པ་འདི་བཤད་པའི་ཚེ་ཀུན་དུ་རྒྱལ་བའི་བློ་གྲོས་ཀྱིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་སེམས་དགའ་བ་དང་། མགུ་བ་དང་། རངས་པ་
དེ་ཉིད་ཀྱིས་དེ་ཤིང་ཏ་ལ་བདུན་ཙམ་དུ་སྟེང་གི་བར་སྣང་ལ་མངོན་པར་འཕགས་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་གཡོས་སོ། །སྣང་བ་ཆེན་པོས་ཀྱང་འཇིག་རྟེན་ཁྱབ་པར་
གྱུར་ཏོ། །སྟེང་གི་བར་སྣང་ལས་མེ་ཏོག་གི་ཆར་ཆེན་པོ་ཡང་མངོན་པར་བབ་བོ། །སིལ་སྙན་དང་གླུ་དབྱངས་ཀྱི་སྒྲ་ཡང་བྱུང་བར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་འཛུམ་པ་མཛད་དོ། །སངས་རྒྱས་བཅོམ་ལྡན་འདས་
རྣམས་ཀྱི་ཆོས་ཉིད་ཀྱིས་ནམ་འཛུམ་པ་མཛད་པ་དེའི་ཚེ། བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་དུ་མ་ཁ་དོག་སྣ་ཚོགས་པ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བ་
རྒན་དང་། ཤེལ་གྱི་ཁ་དོག་དང་། དངུལ་གྱི་ཁ་དོག་ལྟ་བུ་དག་བྱུང་སྟེ། དེས་འཇིག་རྟེན་གྱི་ཁམས་མཐའ་དང་མུ་མེད་པ་དག་སྣང་བས་ཁྱབ་པར་བྱས་ནས་ཚངས་པའི་འཇིག་རྟེན་མན་ཆད་དུ་མངོན་པར་བྱུང་ཞིང་ཉི་མ་དང་། 
ཟླ་བའི་འོད་ཀྱང་ཟིལ་གྱིས་མནན་ནས་ཡང་སླར་ལོག་སྟེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་

46-1-304b

བླ་གོས་ཕྲག་པ་གཅིག་ཏུ་བཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་འཛུམ་པའི་
དོན་ཡོངས་སུ་ཞུས་པ། བསོད་ནམས་ཡེ་ཤེས་སྟོབས་དཔལ་དཔེ་མེད་འདོམ་གང་འོད་ཀྱིས་བརྒྱན། །མཚན་མཆོག་སུམ་བཅུ་རྩ་གཉིས་བརྒྱན་ཅིང་དཔེ་བྱད་དག་གིས་སྤྲས། །སེང་གེ་དང་མཆོག་འགྱིང་འགྲོ་ལྟར་ནི་བརྩོན་
འགྲུས་སྟོབས་ཀྱིས་བྱུང་། །ཅི་སླད་འཛུམ་མཛད་དེ་ནི་བཅོམ་ལྡན་འདས་ཀྱིས་བསྟན་པར་གསོལ། །ཐུབ་པ་དབྱར་གྱི་སྤྲིན་དང་རྔ་སྒྲ་སེང་གེའི་སྒྲ་བས་ལྷག །ཀ་ལ་པིང་ཀའི་སྒྲ་དང་དྲིལ་སྒྲ་ཚངས་པའི་སྒྲ་བས་ལྷག །ལྷ་འམ་
དེ་བཞིན་མི་ཡི་སྒྲ་གང་སྟོང་གསུམ་དག་ན་སྙན། །དེ་ཀུན་ཆར་ཡང་མི་འགྲོ་བཅོམ་ལྡན་ཐུབ་པའི་གསུང་མཆོག་གོ། །དགྲ་བཅོམ་མཆོག་རབ་རང་རྒྱལ་ཡང་དག་བྱང་ཆུབ་སེམས་དཔས་ཀྱང་། །དཔེ་མེད་ཐུབ་དབང་ཡེ་ཤེས་རྨད་བྱུང་
ཡུལ་ནི་མི་རྟོགས་པ། །ལྷ་མི་ལྷ་མིན་ཀླུ་གང་ཐོས་ནས་བྱང་ཆུབ་མཆོག་འཚལ་བར། །ཡེ་ཤེས་དེ་ཡི་སྟོབས་ཀྱིས་ཅི་ཕྱིར་འཛུམ་བསྟན་བཤད་དུ་གསོལ། །མཐར་འཛིན་ཀུན་ལས་ཐུགས་གྲོལ་བློ་བཟང་དབུས་སུ་ཁྱོད་མི་
ཆགས། །ཆགས་མེད་ཉེས་མེད་སྤྱོད་པ་གནས་མེད་ནམ་མཁའ་ཚད་མེད་བཞིན། །དཔེ་མཆོག་གང་ཡང་མེད་ཅིང་འཇིག་རྟེན་མཆོག་འདྲར་བགྲང་བ་མེད། །མཁའ་འདྲའི་བློ་མངའ་སྡིག་མེད་ཁྱོད་ལ་ཅི་སླད་འཛུམ་བསྟན་ཞུའོ། །
ཁྱོད་ཀྱི་ཞལ་ནས་འོད་ཟེར་སྣ་ཚོགས་སྔོ་དང་དམར་དང་དཀར། །དྲི་མེད་གསེར་ལྟར་འཚེར་ཞིང་དམར་བ་གང་གཱའི་བྱེ་སྙེད་བྱུང་། །གྲངས་མེད་ནམ་མཁའི་ཁམས་མཉམ་ཕྱོགས་ཀྱི་འཇིག་རྟེན་དེས་སྣང་བྱས། །ཐུབ་པའི་འོད་
ཀྱིས་རེག་པའི་ངན་སོང་མ་ལུས་ཞི་ཞིང་བདེ་དང་ལྡན། །གལ་ཏེ་འོད་ཟེར་པུས་མོར་ནུབ་ན་དགྲ་བཅོམ་ཁྱོད་ལུང་བསྟན། །འོད་ཟེར་ཁྱོད་ཀྱི་དཔུང་པར་ནུབ་ན་རང་སངས་རྒྱས་སུ་བསྟན། །དེང་ནི་ཕན་མཛད་ཐུབ་ཁྱོད་གཙུག་ཏུ་དྲི་མེད་འོད་

46-1-305a

ནུབ་ཀྱིས། །ཀུན་མཁྱེན་མཉམ་ཉིད་ཐེག་པར་ངེས་པར་ཁྱོད་ནི་ལུང་སྟོན་ཏོ། །དེ་བས་ལེགས་པ་ལྷ་ལྷག་ལྷས་མཆོད་འཇིག་རྟེན་གསུམ་མཆོད་འོས། །སྲོག་ཆགས་མང་པོ་གང་ཐོས་དགའ་ཞིང་སེམས་ཀྱང་མགུ་
འགྱུར་བར། །ཡང་དག་བདེན་ཚིག་ངེས་པར་གསུང་དག་དེ་ནི་རྒྱལ་བས་ཤོད། །ཅི་ཕྱིར་འཛུམ་མཛད་ཐེ་ཙོམ་ཆོད་དེ་སློབ་མ་མགུ་བར་མཛོད། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་
ཅེས་བཀའ་སྩལ་ཏོ། །ཀུན་དགའ་བོ་རིགས་ཀྱི་བུ་རྒྱལ་བའི་བློ་གྲོས་ཤེས་བྱ་བ་བཟོད་པ་ཐོབ་པ་སྟེང་གི་བར་སྣང་ལ་ཏ་ལ་བདུན་ཙམ་ན་འདུག་སྟེ། ཐལ་མོ་སྦྱར་ནས་ང་ལ་ཕྱག་འཚལ་བ་ལྷ་བརྒྱ་སྟོང་དག་གིས་མཆོད་པ་འདི་ཁྱོད་
ཀྱིས་མཐོང་ངམ། གསོལ་པ་བཅོམ་ལྡན་འདས་མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་རིགས་ཀྱི་བུ་རྒྱལ་བའི་བློ་གྲོས་འདིས་འཁོར་ལོས་སྒྱུར་བའི་རྒྱལ་པོར་གྱུར་པ་ན་སངས་རྒྱས་བྱེ་བ་ཕྲག་བདུན་
བཅུ་རྩ་གཉིས་ལས་དགེ་བའི་རྩ་བ་བསྐྱེད་དེ། སངས་རྒྱས་བཅོམ་ལྡན་འདས་དེ་དག་ཐམས་ཅད་བཞུགས་པ་དང་། ཡོངས་སུ་མྱ་ངན་ལས་འདས་པ་ལ་ཡང་མཆོད་དོ། །སངས་རྒྱས་བྱེ་བ་ཕྲག་བདུན་བཅུ་རྩ་གཉིས་ལས་ཚངས་པར་
སྤྱོད་པ་སྤྱད་དེ། ཐམས་ཅད་དུ་ཡང་དམ་པའི་ཆོས་ཡོངས་སུ་བཟུང་ངོ་། །ཀུན་དགའ་བོ་རིགས་ཀྱི་བུ་རྒྱལ་བའི་བློ་གྲོས་འདི་ད་ཕྱིན་ཆད་ཀྱང་དེ་བཞིན་གཤེགས་པ་བགྲང་བ་ལས་འདས་པ་རྣམས་མཉེས་པར་བྱེད་པར་འགྱུར། གུས་
པར་བྱེད་པར་འགྱུར། བཙུན་པར་བྱེད་པར་འགྱུར། ཕུ་དུད་དུ་བྱེད་པར་འགྱུར། མཆོད་པ་བྱེད་པར་འགྱུར། ཚངས་པར་སྤྱད་པ་ཡང་སྤྱོད་པར་འགྱུར། སེམས་ཅན་ཚད་མེད་གྲངས་མེད་པ་དག་ཀྱང་བྱང་ཆུབ་ཏུ་ཡོངས་སུ་སྨིན་པར་བྱེད་པར་
འགྱུར་རོ། །དེ་ཕྱི་མའི་དུས་ན་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡང་དག་པར་བསྒྲུབས་ནས་བསྐལ་པ་གྲངས་མེད་པ་ན་བསྐལ་པ་རིན་པོ་ཆེ་གཅིག་བཀོད་པ་ཞེས་བྱ་བ་ལ་འཇིག་རྟེན་གྱི་ཁམས་བལྟ་ན་སྡུག་པ་ཞེས་བྱ་བར་དེ་བཞིན་

46-1-305b

གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་ཕུང་པོ་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་
ཀྱི་སྟོན་པ། སངས་རྒྱས་བཅོམ་ལྡན་འདས་སུ་འཇིག་རྟེན་དུ་འབྱུང་བར་འགྱུར་རོ། །ཀུན་དགའ་བོ་འཇིག་རྟེན་གྱི་ཁམས་བལྟ་ན་སྡུག་པ་དེའི་ལོངས་སྤྱོད་ནི་གཞན་འཕྲུལ་དབང་བྱེད་ཀྱི་ལྷའི་དང་འདྲ་བར་འགྱུར་རོ། །སེམས་ཅན་དེ་
དག་གི་མདུན་དུ་ཡུལ་དྲུག་ལས་ཡིད་དུ་མི་འོང་བའི་ཆོས་གང་ཡང་འབྱུང་བར་མི་འགྱུར་རོ། །སེམས་ཅན་དེ་དག་ཐམས་ཅད་གཅིག་གིས་མཐོང་ན་དགའ་བ་དང་ཡིད་བདེ་བ་སྐྱེ་བར་འགྱུར་རོ། །སེམས་ཅན་དེ་དག་ཐམས་ཅད་རྨི་ལམ་
དུ་འང་དེ་བཞིན་གཤེགས་པ་ཡེ་ཤེས་ཕུང་པོ་དེ་མཐོང་ཞིང་དེ་དག་སངས་རྒྱས་རྗེས་སུ་དྲན་པ་དང་མི་འབྲལ་བར་འགྱུར་ཏེ། དེ་བས་ན་འཇིག་རྟེན་གྱི་ཁམས་དེ་བལྟ་ན་སྡུག་པ་ཞེས་བྱའོ། །བསྐལ་པ་དེ་ལ་དེ་བཞིན་གཤེགས་པ་དེ་
གཅིག་པུ་འབྱུང་ཞིང་། དེ་བཞིན་གཤེགས་པའི་ཚེའི་ཚད་ཀྱང་བསྐལ་པར་ཐུབ་པར་འགྱུར་ཏེ། དེ་བས་ན་བསྐལ་པ་དེ་ཡང་རིན་པོ་ཆེ་གཅིག་བཀོད་པ་ཞེས་བྱ་བར་འགྱུར་རོ། །བཅོམ་ལྡན་འདས་དེའི་དགེ་འདུན་ནི་བྱང་ཆུབ་སེམས་
དཔའ་འབའ་ཤིག་སྟེ། བྱང་ཆུབ་སེམས་དཔའ་བྱེ་བ་ཕྲག་དགུ་བཅུ་རྩ་གཉིས་སུ་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱང་ཕྱིར་མི་ལྡོག་པ། སྤོབས་པ་ཐོགས་པ་མེད་པ། ཚིག་དབྱེ་བ་ལ་མཁས་
པ་ཤ་སྟག་གོ། །དེ་བཞིན་གཤེགས་པ་ཡེ་ཤེས་ཕུང་པོ་དེ་ནམ་ཡོངས་སུ་མྱ་ངན་ལས་འདའ་བ་དེའི་ཚེ་ཡང་། བྱང་ཆུབ་སེམས་དཔའ་སེང་གེའི་རྩལ་གྱིས་འགྲོ་བ་དེ་ལ་རིགས་ཀྱི་བུ་བྱང་ཆུབ་སེམས་དཔའ་སེང་གེའི་རྩལ་གྱིས་འགྲོ་
བ་འདི་ངའི་འོག་ཏུ། དེ་བཞིན་གཤེགས་པ་སེང་གེའི་སྒྲ་སྒྲོགས་པ་ཞེས་བྱ་བར་འགྱུར་རོ་ཞེས་ལུང་བསྟན་ནས་ཡོངས་སུ་མྱ་ངན་ལས་འདའོ། །དེ་བཞིན་གཤེགས་པ་ཡེ་ཤེས་ཀྱི་

46-1-306a

ཕུང་པོ་དེ་ཡོངས་སུ་མྱ་ངན་ལས་འདས་ནས་བར་གྱི་བསྐལ་པ་བཅུར་དམ་པའི་ཆོས་གནས་པར་འགྱུར་རོ། །བཅོམ་ལྡན་འདས་དེའི་སྐུ་ཡང་མི་འཇིག་པར་འགྱུར་ཏེ། གང་ལ་སེམས་ཅན་དེ་དག་མཆོད་པར་
བྱེད་པའི་མཆོད་རྟེན་རིན་པོ་ཆེ་ལས་བྱས་པ་རྒྱར་དཔག་ཚད་དྲུག་བཅུ་རྩ་བཞི་པ། འཕང་དུ་དཔག་ཚད་བརྒྱད་བཅུ་པ་རིན་པོ་ཆེ་ཐམས་ཅད་ཀྱིས་སྨྲས་པ་གཅིག་ཅིག་ཡོད་པར་འགྱུར་རོ། །དེ་ནས་རིགས་ཀྱི་བུ་རྒྱལ་བའི་
བློ་གྲོས་བར་སྣང་དེ་ལས་བབས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ལ་ཆོས་ཀྱི་དབྱིངས་དང་ཐ་མི་དད་
པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །བདག་གི་དབྱིངས་དང་སེམས་ཅན་དབྱིངས། །ཆོས་ཀྱི་དབྱིངས་དང་དེ་དག་མཉམ། །དེ་ཡི་དབྱིངས་ལྡན་ཡེ་ཤེས་དབྱིངས། །དེ་བས་ཁྱོད་ཀྱིས་བདག་
ལུང་བསྟན། །ཆོས་ཀྱི་དབྱིངས་དང་ཉོན་མོངས་ཁམས། །སྟོང་པའི་དབྱིངས་དང་དེ་དག་མཉམ། །ཆོས་ཀུན་དེ་ཡི་དབྱིངས་ལྡན་ཏེ། །དེ་བས་ཁྱོད་ཀྱིས་བདག་ལུང་བསྟན། །འདོད་ཆགས་ཞེ་སྡང་གཏི་
མུག་དང་། །གང་གཞན་ཁམས་ཀྱང་གསུམ་པོ་དག །ནམ་མཁའི་ཁམས་དང་མཉམ་པ་སྟེ། །དེ་བས་ཁྱོད་ཀྱིས་བདག་ལུང་བསྟན། །འཁོར་བ་དང་ནི་མྱ་ངན་འདས། །ཆོས་ཀྱི་དབྱིངས་དང་དེ་དག་མཉམ། །
རླུང་གི་ཁམས་དང་ཆུ་དང་མེ། །ས་རྣམས་དེ་ཡི་ཁམས་ལྡན་ནོ། །ཕུང་པོའི་ཁམས་དང་མཉམ་པ་སྟེ། །མིག་ལ་སོགས་པའི་ཁམས་རྣམས་དང་། །ཡིད་ཀྱི་ཁམས་དང་ཆོས་ཁམས་དང་། །དེ་དག་
དབྱིངས་ཀུན་མཉམ་པའོ། །འདུས་བྱས་དབྱིངས་ནི་གང་ཡིན་དང་། །འདུས་མ་བྱས་དབྱིངས་གང་ཡིན་པ། །དེ་དག་ཆོས་དབྱིངས་གཉིས་མེད་དེ། །དེ་བས་ཁྱོད་ཀྱིས་བདག་ལུང་བསྟན། །ཕུང་པོ་རྣམས་ནི་ཤེས་

46-1-306b

དང་བྲལ། །ཁམས་དང་སྐྱེ་མཆེད་རྣམས་ཀྱང་སྟེ། །མིང་ལ་མེད་ཅིང་གཟུགས་ལ་འང་མེད། །ནང་ན་མེད་ཅིང་ཕྱི་ན་འང་མེད། །སྒྲ་གང་དག་གིས་རིག་འགྱུར་བའི། །ཐུབ་པས་བདག་ནི་ལུང་བསྟན་པ། །ཇི་ལྟ་བུར་ནི་སྒྲ་གསུངས་
པ། །དེ་ལྟར་བདག་ནི་ལུང་བསྟན་ཏོ། །གང་གིས་བདག་ནི་ལུང་བསྟན་པའི། །སེམས་ནི་སངས་རྒྱས་མི་མངའ་སྟེ། །བདག་ལའང་ཡང་དག་བྱང་ཆུབ་ཏུ། །ལུང་བསྟན་རྣམ་ཤེས་མ་མཆིས་སོ། །ཇི་ལྟར་སངས་རྒྱས་
བདག་དེ་བཞིན། །བདག་ལྟར་བདེ་གཤེགས་དེ་བཞིན་ཏེ། །སེམས་ཅན་ཀུན་ཀྱང་དེ་དང་འདྲ། །དེ་བས་ཁྱོད་ཀྱིས་བདག་ལུང་བསྟན། །ལུང་བསྟན་འདི་ནི་ཡང་དག་པ། །དེ་བཞིན་ཉིད་དང་ལྡན་པ་སྟེ། །ཡང་དག་མཐའ་ལ་གནས་
པས་ན། །ཆོས་ཀྱི་དབྱིངས་ལ་ཐ་དད་མེད། །ཆོས་ཀྱི་དབྱིངས་ལས་ཡང་དག་བྱུང་། །ནམ་མཁའ་ལྟ་བུར་ཡེ་ཤེས་ཟབ། །ཐབས་ལ་མཁས་ཤིང་ལེགས་སྦྱངས་པ། །བཅོམ་ལྡན་ཁྱོད་ལ་བདག་ཕྱག་འཚལ། །དེ་ནས་བཅོམ་
ལྡན་འདས་ལ་རིགས་ཀྱི་བུ་རྒྱལ་བའི་བློ་གྲོས་ཀྱིས་ཆོས་ཀྱི་དབྱིངས་དང་ཐ་མི་དད་པའི་ཚིགས་སུ་བཅད་པ་དེ་དག་གིས་མངོན་པར་བསྟོད་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས། བཅོམ་ལྡན་
འདས་ལ་ལན་གསུམ་བསྐོར་བ་བྱས་ཏེ། ཕྱོགས་གཅིག་ཏུ་འདུག་གོ། །ཚེ་དང་ལྡན་པ་ཤཱ་རིའི་བུ་འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་པའི་ཆོ་འཕྲུལ་དང་། ཆོས་སྟོན་པ་རྣམ་པར་འཕྲུལ་པའི་ཆོ་འཕྲུལ་
ལས་གང་ཁོ་བོས་ཕྱོགས་ཙམ་ཞིག་མངོན་སུམ་དུ་གྱུར་པ་ནི་དེ་ལྟ་བུ་དེ་དག་ཡིན་ནོ། །དེ་བཞིན་དུ་བཅོམ་ལྡན་འདས་ཀྱི་སྤྱན་སྔ་ན་འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་རྩེ་བའི་ཆོ་འཕྲུལ་དང་། ཆོས་བསྟན་པ་རྣམ་
པར་འཕྲུལ་པའི་ཆོ་འཕྲུལ་ཇི་ལྟར་མངོན་སུམ་དུ་གྱུར་པ་དག་ཕན་ཚུན་དུ་རྗོད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཆོས་ཀྱི་རྣམ་གྲངས་འདི་ཟུང་ཤིག །ལོང་ཤིག །

46-1-307a

ལྷོགས་ཤིག །ཀུན་ཆུབ་པར་གྱིས་ཤིག །གཞན་དག་ཡང་རྒྱ་ཆེར་ཡང་དག་པར་ཤོད་ཅིག །གསོལ་པ། བཅོམ་ལྡན་འདས་བདག་གིས་ཆོས་ཀྱི་རྣམ་གྲངས་འདི་གཟུང་ན། བཅོམ་ལྡན་འདས་ཆོས་ཀྱི་རྣམ་གྲངས་
འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། དེ་བས་ན་ཀུན་དགའ་བོ་ཆོས་ཀྱི་རྣམ་གྲངས་འདི་འཇམ་དཔལ་གཞོན་ནུར་གྱུར་པའི་བྱིན་གྱི་བརླབས་རྣམ་པར་འཕྲུལ་པ་དང་། བདུད་དང་
ཕས་ཀྱི་རྒོལ་བ་ཐམས་ཅད་ཆོས་དང་མཐུན་པས་འཇོམས་ཤིང་ཚར་གཅོད་པ་དང་། དཀོན་མཆོག་འབྱུང་གནས་བསྟན་པ་དང་། དཀོན་མཆོག་གི་ཟ་མ་ཏོག་ཅེས་བྱ་བར་ཟུང་ཤིག །བཅོམ་ལྡན་འདས་ཀྱིས་བཀའ་སྩལ་ནས། 
འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་རྒྱལ་བའི་བློ་གྲོས་དང་། ཚེ་དང་ལྡན་པ་ཀུན་དགའ་བོ་དང་། བྱང་ཆུབ་སེམས་དཔའ་དེ་དག་དང་། ཉན་ཐོས་ཆེན་པོ་དེ་དག་དང་། ལྷ་དང་། མི་དང་། ལྷ་མ་ཡིན་དང་། 
དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །དཀོན་མཆོག་གི་ཟ་མ་ཏོག་ཅེས་བྱ་བ་ཐེག་པ་ཆེན་པོའི་མདོ། རྫོགས་སོ།། །།
ཞུ་ཆེན་གྱི་ལོ་ཙྪ་བ་བན་དྷེ་རད་ན་རཀྵི་ཏས་ཞུས་ཏེ་སྐད་གསར་ཀྱིས་ཀྱང་བཅོས་ནས་གཏན་ལ་ཕབ་པ།། །།

46-1-307b



46-1-308a

༄༅༅།   །རྒྱ་གར་སྐད་དུ།  ཨཱརྱ་རད་ན་ཀོ་ཊི་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ།  འཕགས་པ་རིན་པོ་ཆེའི་མཐའ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །
འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་ལྔ་བརྒྱ་ཐམ་པའི་དགེ་སློང་གི་དགེ་འདུན་ཆེན་པོ་དང་ཐབས་གཅིག་དུ་བཞུགས་ཏེ། དེ་ནས་འཇམ་དཔལ་གཞོན་
ནུར་གྱུར་པ་མཚན་མོ་སྲོད་ལ་བཅོམ་ལྡན་འདས་ཀྱི་བཞུགས་ཁང་ག་ལ་བ་དེར་སོང་སྟེ་ཕྱིན་ནས་བཞུགས་ཁང་གི་སྒོ་དྲུང་ན་འགྲེང་སྟེ་བཅོམ་ལྡན་འདས་ལ་སྡོད་དོ། །དེའི་ཚེ་བཅོམ་ལྡན་འདས་རིན་པོ་ཆེའི་མཐའ་ཞེས་བྱ་བའི་ཏིང་
ངེ་འཛིན་ལ་སྙོམས་པར་བཞུགས་སོ། །དེ་ནས་བཅོམ་ལྡན་འདས་དྲན་པ་དང་མཁྱེན་བཞིན་དུ་ཏིང་ངེ་འཛིན་དེ་ལས་བཞེངས་ནས་འཇམ་དཔལ་གཞོན་ནུར་གྱུར་པ་སྒོ་ན་འདུག་པ་གཟིགས་སོ། །གཟིགས་ནས་ཀྱང་འཇམ་
དཔལ་ཁྱོད་ནང་དུ་ཤོག་ཅེས་དེ་སྐད་ཅེས་བཀའ་སྩལ་ཏོ། །བཅོམ་ལྡན་འདས་ལེགས་སོ་ལེགས་སོ་ཞེས་གསོལ་ཏེ། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ཀྱི་ལྟར་མཉན་ནས་བཅོམ་ལྡན་འདས་ག་ལ་བ་
དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འགྲེང་ངོ་། །འཇམ་དཔལ་གཞོན་ནུར་གྱུར་པ་ཕྱོགས་གཅིག་ཏུ་འགྲེང་བ་དང་། བཅོམ་ལྡན་འདས་ཀྱིས་སྟན་ལ་འདུག་ཅེས་
གནང་བ་མཛད་དོ། །བཅོམ་ལྡན་འདས་ཀྱིས་གནང་བས་དེ་ནས་འཇམ་དཔལ་གཞོན་ནུར་གྱུར་པ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་ཕྱོགས་གཅིག་དུ་འདུག་གོ། །ཕྱོགས་གཅིག་དུ་
འདུག་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ད་གདོད་ཏིང་ངེ་འཛིན་གང་གིས་བཞུགས་བཞུགས་པ་ལས་བཞེངས་ལགས། དེ་སྐད་

46-1-308b

ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་རིན་པོ་ཆེའི་མཐའ་ཞེས་བྱ་བའི་ཏིང་ངེ་འཛིན་ཡོད་དོ། །ཏིང་ངེ་འཛིན་དེས་ང་ད་གདོད་གནས་
གནས་པ་ལས་ལངས་སོ། །གསོལ་པ། བཅོམ་ལྡན་འདས་ཅིའི་སླད་དུ་དེ་ལ་རིན་པོ་ཆེའི་མཐའ་ཞེས་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ལྟ་སྟེ། དཔེར་ན་ནོར་བུ་རིན་པོ་ཆེ་ཤིན་དུ་དག་
ཅིང་ཤིན་དུ་བྱི་དོར་བྱས་པ་ས་ཕྱོགས་མཉམ་པ་ལ་བཞག་ན་དེ་གང་དང་གང་ཁོ་ནར་བཞག་པ་དེ་དང་དེར་རིན་པོ་ཆེ་བྱེ་བ་གནས་པར་འགྱུར་རོ། །འཇམ་དཔལ་དེ་བཞིན་དུ་ང་ཏིང་ངེ་འཛིན་དེ་ལ་གནས་ནས་ཤར་ཕྱོགས་སུ་བལྟས་
ཏེ། ཤར་ཕྱོགས་སུ་བལྟས་ན་ངས་འཇིག་རྟེན་གྱི་ཁམས་དཔག་ཏུ་མེད་གྲངས་མེད་པ་དག་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་སྟོན་ཅིང་བཞུགས་པ་དག་མཐོང་ངོ་། །དེ་བཞིན་
དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། འོག་དང་། སྟེང་ནས་ཕྱོགས་བཅུའི་བར་དུ་བལྟས་ན་ངས་འཇིག་རྟེན་གྱི་ཁམས་དཔག་ཏུ་མེད་པ་དག་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་ཆོས་སྟོན་ཅིང་བཞུགས་པ་དག་མཐོང་ངོ་། །འཇམ་དཔལ་ངས་ཏིང་ངེ་འཛིན་འདི་ལ་གནས་ནས་གང་ཡང་དག་པའི་མཐའ་མ་ཡིན་པའི་ཆོས་དེ་གང་ཡང་ཡང་དག་པར་རྗེས་སུ་མ་མཐོང་ངོ་། །འཇམ་དཔལ་ཡང་དག་པའི་མཐའི་
ཕྱག་རྒྱ་འདི་ངས་ཕྱག་རྒྱར་བཞག་སྟེ། དད་པ་ཅན་གྱི་རིགས་ཀྱི་བུ་རྣམས་དང་། རིགས་ཀྱི་བུ་མོ་རྣམས་ཀྱིས་ཕྱག་རྒྱ་འདི་ལ་སྤྱད་ན་སྤོབས་པ་མི་ཆོད་པ་འཛིན་པར་འགྱུར་རོ། །གསོལ་པ། བཅོམ་ལྡན་འདས་བདག་སྤོབས་
ལགས་སོ། །བདེ་བར་གཤེགས་པ་སྤོབས་ལགས་སོ། །བཀའ་སྩལ་པ། འཇམ་དཔལ་ཁྱོད་སྤོབས་པར་གྱིས་ཤིག །གསོལ་པ། བཅོམ་ལྡན་འདས་དཔེར་བགྱི་ན་ནོར་བུ་རིན་པོ་ཆེ་དེ་ཉིད་ངོས་གང་དང་གང་ཁོ་ནས་

46-1-309a

ཕབ་སྟེ་གཞག་པའི་རིན་པོ་ཆེའི་ངོས་དེ་དང་དེ་ཁོ་ན་འབབ་ཅིང་གནས་པར་འགྱུར་ལགས་སོ། །བཅོམ་ལྡན་འདས་དེ་བཞིན་དུ་ཆོས་ཐམས་ཅད་ནི་ཡང་དག་པའི་མཐའ་ཁོ་ནས་གནས་ལགས་སོ། །བཀའ་སྩལ་པ། འཇམ་
དཔལ་ཁྱོད་ཀྱིས་ཡང་དག་པའི་མཐའ་ཤེས་སམ། གསོལ་པ། བཅོམ་ལྡན་འདས་འཚལ་ལགས་སོ། །བཀའ་སྩལ་པ། འཇམ་དཔལ་འོ་ན་ཡང་དག་པའི་མཐའ་གང་ན་འདུག །གསོལ་པ། བཅོམ་ལྡན་འདས་ཡང་དག་པའི་མཐའ་ནི་
བདག་གི་མཐའ་གང་ན་མཆིས་པ་དེ་ན་མཆིས་ལགས་སོ། །ཡང་དག་པའི་མཐའ་ནི་སོ་སོའི་སྐྱེ་བོའི་ཆོས་རྣམས་གང་ན་མ་མཆིས་པ་དེ་ན་མཆིས་ལགས་སོ། །ཡང་དག་པའི་མཐའ་ནི་ལས་སམ། རྣམ་པར་སྨིན་པ་ཡང་མ་
ལགས་ལ་ཆོས་ཐམས་ཅད་ཀྱི་མཐའ་ཡང་དེ་ཁོ་ན་ལགས་སོ། །བཅོམ་ལྡན་འདས་གང་དག་དེ་ལྟར་མོས་པ་དེ་དག་ནི་གང་ལས་ཀྱང་རྣམ་པར་གྲོལ་བ་མ་མཆིས་ལགས་སོ། །གང་དག་གང་ལས་ཀྱང་གྲོལ་བ་མ་མཆིས་པ་དེ་དག་ནི་ལོག་པ་
ལས་རྣམ་པར་གྲོལ་བ་ལགས་སོ། །གང་དག་ལོག་པ་ལས་རྣམ་པར་གྲོལ་བ་དེ་དག་ནི་ཡང་དག་པར་རྣམ་པར་གྲོལ་བ་ལགས་སོ། །གང་དག་ཡང་དག་པར་རྣམ་པར་གྲོལ་བ་དེ་དག་ནི་སྤྱོད་ཡུལ་མ་ལགས་པ་ལ་ཞུགས་པ་ལགས་
སོ། །གང་དག་སྤྱོད་ཡུལ་མ་ལགས་པ་ལ་ཞུགས་པ་དེ་དག་ནི་ཡང་དག་པར་ཞུགས་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་སྤྱོད་ཡུལ་མ་ལགས་པ་ཞེས་བགྱི་བ་ནི་སྤྱོད་ཡུལ་དེས་བགྱིས་ལགས་པ་སྟེ། 
དེའི་སླད་དུ་སྤྱོད་ཡུལ་མ་ལགས་པ་ཞེས་འདོགས་ལགས་སོ། །བཀའ་སྩལ་པ། འཇམ་དཔལ་སྤྱོད་ཡུལ་མ་ཡིན་པ་ཞེས་བྱ་བ་དེ་གང་གི་ཚིག་བླ་དགས་ཡིན། གསོལ་པ། བཅོམ་ལྡན་འདས་སྤྱོད་ཡུལ་མ་ལགས་པ་ཞེས་བགྱི་བ་དེ་
ནི་ཡང་དག་པའི་མཐའི་ཚིག་བླ་དགས་ལགས་སོ། །བཀའ་སྩལ་པ། འཇམ་དཔལ་ལམ་སྒོམ་པ་ཞེས་བྱ་བ་དེ་གང་གི་ཚིག་བླ་དགས་ཡིན། གསོལ་པ། བཅོམ་ལྡན་འདས་ལམ་བསྒོམ་པ་ཞེས་བགྱི་བ་དེ་ནི་ལམ་སྒོམ་པ་མ་

46-1-309b

མཆིས་པའི་ཚིག་བླ་དགས་ལགས་སོ། །བཀའ་སྩལ་པ། འཇམ་དཔལ་ཁྱོད་ལས་དང་པོ་པའི་རིགས་ཀྱི་བུ་རྣམས་དང་། རིགས་ཀྱི་བུ་མོ་རྣམས་ལ་ཆོས་ཇི་ལྟར་སྟོན། གསོལ་པ། བཅོམ་ལྡན་འདས་བདག་ནི་ལས་དང་པོ་པའི་
རིགས་ཀྱི་བུ་རྣམས་དང་། རིགས་ཀྱི་བུ་མོ་རྣམས་ལ་འཇིག་ཚོགས་དོར་དུ་མ་མཆིས་པར་ཆོས་སྟོན་ལགས་སོ། །བདག་ནི་འདོད་ཆགས་དང་། ཞེ་སྡང་དང་། གཏི་མུག་རྣམས་སྤང་དུ་མ་མཆིས་པར་ཆོས་སྟོན་པ་ལགས་སོ། །དེ་ཅིའི་སླད་དུ་
ཞེ་ན། བཅོམ་ལྡན་འདས་ཆོས་འདི་རྣམས་ཀྱི་རང་བཞིན་གང་ལགས་པ་དེ་ནི་སྤང་བར་རྔོ་མི་ཐོག་པའི་སླད་དུ་ལགས་སོ། །བཅོམ་ལྡན་འདས་འཇིག་ཚོགས་སམ། །འཇིག་ཚོགས་ཀུན་འབྱུང་བ་སྤོང་བར་འཚལ་བ་དེ་ནི་ཡང་དག་པའི་མཐའ་སྤོང་
བར་བས་ཏེ། བཅོམ་ལྡན་འདས་བདག་ནི་ལས་དང་པོ་པའི་རིགས་ཀྱི་བུ་རྣམས་དང་། རིགས་ཀྱི་བུ་མོ་རྣམས་ལ་མངོན་པར་ཞེན་པ་མ་མཆིས་པའི་ཚུལ་གྱིས་སངས་རྒྱས་ཀྱི་ཆོས་རྣམས་གཟུང་བར་མི་བགྱི་བ་འམ། མངོན་སུམ་དུ་མི་བགྱི་བ་དང་། 
སོ་སོའི་སྐྱེ་བོའི་ཆོས་རྣམས་ལྷག་པར་མི་དམིགས་པ་འམ། སྤང་བར་མི་བགྱི་བ་དེ་ལྟ་བུར་ཆོས་སྟོན་ལགས་ན་གདུལ་བ་ལས་དང་པོ་པ་རྣམས་ལ་བཅོམ་ལྡན་འདས་ཇི་ལྟར་ཆོས་སྟོན་པར་མཛད་ལགས། བཀའ་སྩལ་པ། འཇམ་དཔལ་
ང་ནི་གཟུགས་རྣམ་པར་འཇིག་པ་མེད་པ་དང་། སྐྱེ་བ་མེད་པར་ཆོས་སྟོན་ཏོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རྣམ་པར་འཇིག་པ་མེད་པ་དང་། སྐྱེ་བ་མེད་པར་ཆོས་སྟོན་ཏོ། །འདོད་ཆགས་དང་། ཞེ་སྡང་དང་། 
གཏི་མུག་རྣམས་རྣམ་པར་འཇིག་པ་མེད་པ་དང་། སྐྱེ་བ་མེད་པ་དང་། བསམ་གྱིས་མི་ཁྱབ་པའི་ཆོས་རྣམས་ཀྱང་ཐོབ་པ་མེད་པར་ཆོས་སྟོན་ཏོ། །ངས་ནི་འདི་ལྟར་ཆོས་གང་ཡང་མ་བཤིག་མ་བསྐྱེད་པ་དེ་ལྟར་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །འཇམ་དཔལ་སངས་རྒྱས་ཉིད་ཅེས་བྱ་བ་དེ་ནི་ཆོས་ཀྱི་དབྱིངས་ཀྱི་ཚིག་བླ་དགས་ལགས་སོ། །སྟོབས་རྣམས་དང་། མི་འཇིགས་པ་རྣམས་དང་། མ་འདྲེས་པ་ལ་ཐུག་པའི་སངས་

46-1-310a

རྒྱས་ཀྱི་ཆོས་གང་དག་ཡིན་པ་དེ་དག་ཀྱང་ཆོས་ཀྱི་དབྱིངས་ཁོ་ན་ཡིན་པར་ཁོང་དུ་ཆུད་པར་བྱའོ། །ངས་ནི་ཆོས་ཀྱི་དབྱིངས་ལ་འདི་ལྟ་སྟེ། སོ་སོའི་སྐྱེ་བོའི་ཆོས་རྣམས་སམ། དགྲ་བཅོམ་པའི་ཆོས་རྣམས་སམ། རང་སངས་
རྒྱས་ཀྱི་ཆོས་རྣམས་སམ། སངས་རྒྱས་ཀྱི་ཆོས་རྣམས་ཀྱང་རུང་སྟེ། དེ་དག་ཐ་དད་པར་ཡང་དག་པར་རྗེས་སུ་མི་མཐོང་ངོ་། །དེ་ཅིའི་ཕྱིར་ཞེ་ན། འཇམ་དཔལ་དབྱིངས་དེ་ལ་ནི་བྱེ་བྲག་མེད་དེ། འདི་ལྟ་སྟེ། ཆོས་ཀྱི་དབྱིངས་སོ། །
ཆོས་ཀྱི་དབྱིངས་ནི་མ་འདྲེས་པའི་དབྱིངས་སོ། །འཇམ་དཔལ་འདི་ལྟ་སྟེ། དཔེར་ན་ཆུ་ཀླུང་མིང་ཐ་དད་པ་དང་། ཁ་དོག་ཐ་དད་པ་དང་། རོ་ཐ་དད་པ་རྒྱ་མཚོའི་ནང་དུ་བབ་པ་རྣམས་ལ་ནི་འདི་ལྟ་སྟེ། འདི་ནི་གང་གཱའོ་ཞེའམ་སི་ཏའོ་ཞེ་
འམ། །ཡ་མུ་ནའོ་ཞེས་བྱེ་བྲག་ཏུ་དབྱེ་བའམ་ཐ་དད་དུ་བྱར་མི་ནུས་སོ། །འཇམ་དཔལ་དེ་བཞིན་དུ་མིང་ཐ་དད་པའི་ཆོས་རྣམས་ཀྱང་ཆོས་ཀྱི་དབྱིངས་ལ་འདི་ནི་སོ་སོའི་སྐྱེ་བོའི་ཆོས་རྣམས་སོ་ཞེ་འམ། ཉན་ཐོས་དང་། རང་སངས་
རྒྱས་དང་། བྱང་ཆུབ་སེམས་དཔའ་དང་། སངས་རྒྱས་ཀྱི་ཆོས་རྣམས་སོ་ཞེས་ཐ་དད་པར་གདགས་པར་མི་ནུས་སོ། །འཇམ་དཔལ་འདི་ལྟ་སྟེ། དཔེར་ན་འབྲུའི་ཕུང་པོ་སྣ་ཚོགས་ལ་ནི་འདི་ནི་འབྲུ་ཆེ་གེ་མོ་ཞིག་གི་ཕུང་པོའོ། །
འདི་ནི་ཆེ་གེ་མོ་ཞིག་གོ་ཞེས་གདགས་སུ་ཡོད་པ་བཞིན་དུ་ཆོས་ཀྱི་དབྱིངས་ལ་ནི་འདི་དག་སོ་སོའི་སྐྱེ་བོའི་ཆོས་རྣམས་སོ་ཞེ་འམ། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། སངས་རྒྱས་
ཀྱི་ཆོས་རྣམས་སོ་ཞེས་ཐ་དད་པར་གདགས་པར་མི་ནུས་སོ། །འཇམ་དཔལ་འདི་ལྟ་སྟེ། དཔེར་ན་འབྲུའི་ཕུང་པོ་སྣ་ཚོགས་ལ་ནི་འདི་ནི་འབྲུ་ཆེ་གེ་མོ་ཞིག་གི་ཕུང་པོའོ། །འདི་ནི་ཆེ་གེ་མོ་ཞིག་གོ་ཞེས་གདགས་སུ་ཡོད་པ་བཞིན་
དུ་ཆོས་ཀྱི་དབྱིངས་ལ་ནི་འདི་དག་ནི་སོ་སོའི་སྐྱེ་བོའི་ཆོས་རྣམས་སོ། །འདི་དག་ནི་དགྲ་བཅོམ་པའི་ཆོས་རྣམས་སོ། །འདི་དག་ནི་རང་སངས་རྒྱས་ཀྱི་ཆོས་རྣམས་སོ། །འདི་དག་ནི་བྱང་ཆུབ་སེམས་དཔའི་ཆོས་རྣམས་སོ། །

46-1-310b

འདི་དག་ནི་སངས་རྒྱས་ཀྱི་ཆོས་རྣམས་སོ་ཞེས་ཐ་དད་པར་གདགས་པར་མི་ནུས་སོ། །འདི་ནི་ཆོས་ཀྱི་དབྱིངས་ཏེ་དེ་ནི་འདི་ན་འདུག་གོ་ཞེ་འམ། ག་གེ་མོ་ཞིག་ན་འདུག་གོ་ཞེས་དེ་ལྟར་བསྟན་པའམ་གདགས་པར་མི་ནུས་སོ། །དེ་ཅི་
འི་ཕྱིར་ཞེ་ན། འདི་ལྟར་ཆོས་ཀྱི་དབྱིངས་ནི་བལྟར་མི་མཐོང་ཞིང་བསྟན་དུ་མེད་དེ། གདགས་པར་བྱ་བ་མ་ཡིན་ཞིང་གདགས་པ་ལས་ཡང་དག་པར་འདས་པའི་ཕྱིར་རོ། །འགྲོ་བ་འདི་དེ་ལྟ་བུའི་དབྱིངས་ཡིན་པར་ངས་ཇི་སྐད་བསྟན་པ་
ལ་གལ་ཏེ་མཚམས་མེད་པ་བྱེད་པ་དེ་ལྟར་མོས་ཏེ། མཚམས་མེད་པ་ཡང་དེ་ལྟ་བུའི་དབྱིངས་ཡིན་པར་ཤེས་ན། དེ་ཀུན་ནས་ཉོན་མོངས་པ་ཅན་དུ་མི་འགྱུར་རོ། །དེ་ཅིའི་ཕྱིར་ཞེ་ན། འཇམ་དཔལ་མཚམས་མེད་པ་ནི་ཆོས་ཀྱི་
དབྱིངས་དང་མཚུངས་པར་མཉམ་པའི་ཕྱིར་ཏེ། འདི་ལྟར་མཚམས་མེད་པའི་དབྱིངས་དང་། ཆོས་ཀྱི་དབྱིངས་འདི་ནི་གཉིས་སུ་མེད་ཅིང་གཉིས་སུ་དབྱེར་མེད་དེ། འདི་ལ་ནི་འོང་བ་འམ། འགྲོ་བ་འམ། ཀུན་ནས་ལྡང་བ་མི་
དམིགས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་ཆོས་ཀྱི་དབྱིངས་ངན་
སོང་དུ་མཆི་བ་འམ། མཐོ་རིས་སུ་མཆི་བ་འམ། མྱ་ངན་ལས་འདས་པར་མཆི་བར་མ་མཐོང་ལགས་སོ། །བཀའ་སྩལ་པ། འཇམ་དཔལ་གལ་ཏེ། ལ་ལ་ཞིག་ཁྱོད་ལ་འདི་སྐད་དུ་འདྲི་སྟེ། ཁྱོད་ཀྱི་སྟོན་པ་འགྲོ་བ་དྲུག་དང་ལྡན་པ་
འི་འཁོར་བ་ཇི་ལྟར་འདོགས་ཤེས་དེ་སྐད་དྲིས་ན་འཇམ་དཔལ་ཁྱོད་ཀྱིས་ཇི་སྐད་ལན་གདབ། གསོལ་པ། བཅོམ་ལྡན་འདས་དེ་སྐད་དུ་སྨྲས་ན་བདག་གིས་འདི་སྐད་དུ་ལན་གདབ་པར་བགྱི་སྟེ། དཔེར་ན་མི་གཉིད་ཀྱིས་ལོག་པ་
འི་རྨི་ལམ་དུ་སེམས་ཅན་དམྱལ་བ་འམ། དུད་འགྲོའི་སྐྱེ་གནས་སམ། ཡི་དགས་ཀྱི་ཡུལ་ལམ། ལྷ་མ་ཡིན་གྱི་རིས་སམ། ལྷ་རྣམས་སམ། མི་རྣམས་མཐོང་ན། བཅོམ་ལྡན་འདས་ཇི་ལྟར་གཡར་ལམ་རྨི་བའི་མིས་སྣ་ཚོགས་མཐོང་ཡང་

46-1-311a

གཡར་ལམ་སྣ་ཚོགས་མ་མཆིས་པ་དེ་བཞིན་དུ་བདག་གིས་འགྲོ་བ་ཐ་དད་པ་བསྟན་ཀྱང་ཆོས་ཀྱི་དབྱིངས་ཀྱི་ངོ་བོ་ཉིད་ཐ་དད་པ་གདགས་པར་རྔོ་མི་ཐོག་སྟེ། དེ་ལྟ་ལགས་པས་བཅོམ་ལྡན་འདས་བདག་གིས་ནི་དེ་སྐད་འདྲི་བ་ལ་དེ་
སྐད་ཅེས་ལན་གདབ་པར་བགྱི་ལགས་སོ། །བཅོམ་ལྡན་འདས་དེ་བཞིན་དུ་སངས་རྒྱས་རྣམས་དང་། བྱང་ཆུབ་སེམས་དཔའ་རྣམས་དང་། རང་སངས་རྒྱས་རྣམས་དང་། ཉན་ཐོས་ཀྱི་ཡོངས་སུ་མྱ་ངན་ལས་འདས་པ་ཡང་ཐ་དད་པར་
གདགས་པར་རྔོ་མི་ཐོག་ལགས་སོ། །བཅོམ་ལྡན་འདས་དེ་དག་གིས་གནས་པ་དག་ཀྱང་ཐ་དད་པར་གདགས་པར་རྔོ་མི་ཐོག་ལགས་སོ། །དེ་ཅིའི་སླད་དུ་ཞེ་ན། འདི་ལྟར་ཆོས་ཀྱི་དབྱིངས་ལས་ཐ་མི་དད་པའི་སླད་དུ་ལགས་སོ། །
བཅོམ་ལྡན་འདས་དཔེར་བགྱི་ན་རྒྱ་མཚོ་ཆེན་པོའི་རིན་པོ་ཆེ་སྣ་ཚོགས་དུང་དང་། མན་ཤེལ་དང་། བྱི་རུ་ལ་སོགས་པ་ཐ་མ་དང་། འབྲིང་དང་། མཆོག་རྣམས་ལ་འདི་ནི་རིན་པོ་ཆེ་ཆེ་གེ་མོ་ཞིག་གོ། །འདི་ནི་རིན་པོ་ཆེ་ཆེ་གེ་མོ་ཞིག་
གོ་ཞེས་ཐ་དད་པར་གདགས་སུ་མཆིས་ལགས་ཀྱི། ཆོས་ཀྱི་དབྱིངས་ལ་ནི་དེ་ལྟར་ཐ་དད་པར་གདགས་པའི་རྔོ་མི་ཐོག་ལ། གདགས་པ་དེ་ལ་ཡང་ཐ་དད་པར་དབྱེར་མ་མཆིས་ལགས་སོ། །དེ་ལ་ནི་འཆི་འཕོ་བ་དང་། སྐྱེ་བ་
ཐ་དད་པར་གདགས་པའི་རྔོ་མི་ཐོག་ལགས་སོ། །དེ་ཅིའི་སླད་དུ་ཞེ་ན། ཆོས་ཀྱི་དབྱིངས་ལ་ནི་འཆི་འཕོ་འམ། སྐྱེ་བ་འམ། ཀུན་ནས་ཉོན་མོངས་པ་འམ། རྣམ་པར་བྱང་བ་མ་མཆིས་པའི་སླད་དུ་ལགས་སོ། །ཆོས་ཀྱི་དབྱིངས་ནི་
ཀུན་ནས་ཉོན་མོངས་པ་ཅན་མ་ལགས། ཆོས་ཀྱི་དབྱིངས་ནི་འདྲེས་པ་མ་ལགས་ཏེ། ཆོས་ཀྱི་དབྱིངས་ལ་ནི་གང་དག་སྤང་བར་བགྱི་བ་འམ། བསྐྱེད་པར་བགྱི་བའི་ཆོས་དེ་དག་མ་མཆིས་ལགས་སོ། །དེ་ནས་བཅོམ་ལྡན་འདས་
ཀྱིས་མཁྱེན་བཞིན་དུ་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་ཀྱིས་ཆོས་ཀྱིས་དབྱིངས་ཤེས་སམ། གསོལ་པ། གལ་ཏེ་དམིགས་ན་བདག་གིས་འཚལ་ལགས་སོ། །

46-1-311b

བཀའ་སྩལ་པ། འཇིག་རྟེན་གང་ལ་སྤྱོད་ཤེས་སམ། གསོལ་པ། བཅོམ་ལྡན་འདས་འཇིག་རྟེན་ནི་སྒྱུ་མ་སྤྲུལ་པའི་མི་གང་ཁོ་ན་ལ་སྤྱོད་པ་དེ་ལ་སྤྱོད་ལགས་སོ། །བཅོམ་ལྡན་འདས་འཇིག་རྟེན་ཞེས་བགྱི་བ་དེ་ནི་མིང་
ཙམ་དུ་པས་ཏེ། །བདག་གིས་ནི་གང་བསྟན་པར་བགྱི་བའི་འཇིག་རྟེན་གྱི་དངོས་པོ་དང་། འཇིག་རྟེན་གང་ལ་སྤྱོད་པ་ཡང་ཡང་དག་པར་རྗེས་སུ་མ་མཐོང་ལགས་ཏེ། བདག་གིས་ནི་འཇིག་རྟེན་གྱི་ཆོས་ཀྱི་དབྱིངས་ལས་ཐ་དད་པར་ཡང་
དག་པར་རྗེས་སུ་མ་མཐོང་ལགས་སོ། །དེ་ཅིའི་སླད་དུ་ཞེ་ན། མ་མཆིས་པའི་སླད་དུ་ལགས་སོ། །བཅོམ་ལྡན་འདས་ཀྱིས་འཇིག་རྟེན་གང་ལ་སྤྱོད་ཅེས་བཀའ་སྩལ་པ་དེ་ཡང་། གཟུགས་ཀྱི་ངོ་བོ་ཉིད་གང་ལགས་པ་དེ་ལ་ནི་
འཆི་འཕོ་དང་། སྐྱེ་བ་ཡང་མ་མཆིས། དེ་ལ་ནི་འཇིགས་པ་འམ། རབ་ཏུ་འཇིགས་པ་ཡང་མ་མཆིས་ན་གང་ལ་སྤྱོད་པར་འགྱུར་ལགས། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་རྣམས་ཀྱི་
ངོ་བོ་ཉིད་གང་ལགས་པ་དེ་ནི་གཏན་མ་མཆིས་པའི་སླད་དུ་སྐྱེ་བ་འམ་འགག་པ་མ་མཆིས་ལ། མཚན་ཉིད་གཅིག་ལས་མི་འདའ་སྟེ། འདི་ལྟ་སྟེ་མཚན་ཉིད་གཅིག་པ་ལགས་སོ། །བཀའ་སྩལ་པ། འཇམ་དཔལ་འདི་ཇི་སྙམ་
དུ་སེམས། ང་ད་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་བ་འདི་ལ་ཁྱོད་འདི་སྙམ་དུ་འདི་ཡོངས་སུ་མྱ་ངན་ལས་འདས་པར་འགྱུར་བ་འམ། མི་སྣང་བར་འགྱུར་རོ་སྙམ་དུ་སེམས་
སམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །དེ་ཅིའི་སླད་དུ་ཞེ་ན། ཆོས་ཀྱི་དབྱིངས་ནི་ཡང་དག་པར་གྲུབ་པ་མ་ལགས་པའི་སླད་དུ་ལགས་སོ། །བཅོམ་ལྡན་འདས་གལ་ཏེ་ཆོས་ཀྱི་དབྱིངས་ཡང་དག་པར་
གྲུབ་པ་ཞིག་ལགས་ན་ནི་དེའི་སླད་དུ་དེ་མི་འདའ་བར་ཡང་འགྱུར་བ་ཞིག་ན། དེ་ལ་ནི་ཡང་དག་པར་གྲུབ་པ་མི་དམིགས་པ་སྟེ། དེ་མི་གདའ་བ་འམ། ཡོངས་སུ་མྱ་ངན་ལས་འདའ་བར་ལྟ་ག་ལ་འགྱུར་ལགས། དེ་བཞིན་གཤེགས་པ་

46-1-312a

ནི་དེ་ལྟ་བུའི་དབྱིངས་ལགས་ཏེ། དེའི་སླད་དུ་བཅོམ་ལྡན་འདས་ནི་སྐྱེས་པ་ཡང་མ་ལགས། ཡོངས་སུ་མྱ་ངན་ལས་འདའ་བར་མི་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འོ་ན་ཁྱོད་
འདས་པའི་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་པོ་དེ་དག་ཡོངས་སུ་མྱ་ངན་ལས་འདས་སོ་ཞེས་དེ་ལ་ཁྱོད་ཇི་ལྟར་མོས། གསོལ་པ། གལ་ཏེ་དེ་དག་གི་སྐྱེ་བ་ཡང་དག་པར་རྗེས་སུ་མཐོང་ན་ནི་བདག་མོས་ལགས་སོ། །
བཀའ་སྩལ་པ། ཁྱོད་སོ་སོའི་སྐྱེ་བོ་ཤི་བ་རྣམས་ཉིང་མཚམས་སྦྱོར་བར་འདོད་དམ། གསོལ་པ། བཅོམ་ལྡན་འདས་སོ་སོའི་སྐྱེ་བོ་ཉིད་ཀྱང་བདག་གིས་ཡང་དག་པར་རྗེས་སུ་མ་མཐོང་མི་དམིགས་ན་དེའི་ཉིང་མཚམས་སྦྱོར་བ་ལྟ་ག་ལ་
དམིགས་ལགས། བཀའ་སྩལ་པ། འཇམ་དཔལ་དེ་བཞིན་གཤེགས་པ་ཆོས་གནས་པར་གཞེད་ཀྱིས་ཁྱོད་སྤོབས་པར་གྱིས་ཤིག་གསོལ་པ། ཅི་ཞིག་ལས་བརྩམས་ཏེ་སྤོབས་པར་བགྱིས་ལགས། བཀའ་སྩལ་པ། ཆོས་ཀྱི་
དབྱིངས་ལས་བརྩོམས་ཤིག གསོལ་པ། བཅོམ་ལྡན་འདས་གང་ཆོས་ཀྱི་དབྱིངས་མ་ལགས་པའི་ཆོས་དེ་བདག་གིས་ཡང་དག་པར་རྗེས་སུ་མ་མཐོང་ལགས་སོ། །བཀའ་སྩལ་པ། འཇམ་དཔལ་མངོན་པའི་ང་རྒྱལ་ཅན་རྣམས་སྐྲག་
པར་འགྱུར་རོ། །གསོལ་པ། བཅོམ་ལྡན་འདས་གལ་ཏེ་ཡང་དག་པའི་མཐའ་སྐྲག་པར་འགྱུར་ན་ནི་དེའི་སླད་དུ་མངོན་པའི་ང་རྒྱལ་ཅན་ཡང་སྐྲག་པར་འགྱུར་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཡང་དག་པའི་མཐའ་
ཡང་གཞན་ལ་མངོན་པའི་ང་རྒྱལ་ཅན་ཡང་གཞན་པ་ནི་མ་ལགས་ཀྱི། མངོན་པའི་ང་རྒྱལ་ཅན་རྣམས་ཀྱི་མཐའ་གང་ལགས་པའི་མཐའ་དེ་ཉིད་ཡང་དག་པའི་མཐའ་ལགས་ལ། ཡང་དག་པའི་མཐའ་གང་ལགས་པ་དེ་ཡང་ཆོས་ཐམས་
ཅད་ཀྱི་མཐའ་ལགས་ཏེ། དེའི་སླད་དུ་མི་སྐྲག་ལགས་སོ། །ཆོས་ཐམས་ཅད་ཡང་དག་པར་མ་བསྒྲུབས་པ་ཞེས་བགྱི་བ་འདི་ནི་རྡོ་རྗེའི་གཞི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཅིའི་ཕྱིར་ན་འདི་རྡོ་རྗེའི་གཞི་

46-1-312b

ཞེས་བྱ། གསོལ་པ། བཅོམ་ལྡན་འདས་ཆོས་ཐམས་ཅད་ནི་མི་ཕྱེད་པ་ལགས་ཏེ། དེའི་སླད་དུ་འདི་རྡོ་རྗེའི་གཞི་ལགས་སོ། །དེ་བཞིན་གཤེགས་པ་བསམ་གྱིས་མི་ཁྱབ་པའི་སླད་དུ་ཆོས་ཐམས་ཅད་བསམ་གྱིས་མི་ཁྱབ་པ་འདི་ནི་རྡོ་རྗེ་
འི་གཞི་ལགས་ཏེ། ཅིའི་སླད་དུ་རྡོ་རྗེའི་གཞི་ཞེས་བགྱི་ཞེ་ན། ཆོས་ཐམས་ཅད་སེམས་མ་མཆིས་པའི་སླད་དུ་ལགས་སོ། །ཆོས་ཐམས་ཅད་བྱང་ཆུབ་ཅེས་བགྱི་བ་འདི་ནི་རྡོ་རྗེའི་གཞི་ལགས་ཏེ། དེ་ཅིའི་སླད་དུ་ཞེ་ན། ཆོས་ཐམས་ཅད་བརྗོད་
པ་མ་མཆིས་པའི་སླད་དུ་སྟེ། འདི་ན་མིང་གང་དང་གང་གིས་ཆོས་གང་དང་གང་བརྗོད་པའི་ཆོས་དེ་དང་དེ་ཆོས་དེ་དང་དེ་ལ་མ་མཆིས་ལགས་སོ། །གང་མ་མཆིས་པ་དེ་ནི་སྟོང་པ་ལགས་སོ། །གང་སྟོང་པ་དེ་ནི་མེད་པ་ལགས་སོ། །གང་མེད་པ་དེ་ནི་བརྗོད་པའི་
རྔོ་མི་ཐོག་པ་ལགས་སོ། །བརྗོད་དུ་མ་མཆིས་པ་དེ་ནི་བྱང་ཆུབ་ལགས་ཏེ། དེའི་སླད་དུ། འདི་ནི་རྡོ་རྗེའི་གཞི་ལགས་སོ། །ཆོས་ཐམས་ཅད་ནི་དེ་བཞིན་གཤེགས་པའི་ཡུལ་ལགས་ཏེ། འདི་ནི་རྡོ་རྗེའི་གཞི་ལགས་སོ། །བཀའ་སྩལ་པ། 
ཅིའི་ཕྱིར་རྡོ་རྗེའི་གཞི་ཞེས་བྱ། གསོལ་པ། བཅོམ་ལྡན་འདས་ཆོས་ཐམས་ཅད་ནི་རང་གི་ཡུལ་ལས་དབེན་པ་ལགས་སོ། དེའི་སླད་དུ་འདི་རྡོ་རྗེའི་གཞི་ལགས་སོ། །བཀའ་སྩལ་པ། འཇམ་དཔལ་དགེ་སློང་ཀུན་དགའ་བོ་དེ་ཡང་ཆོས་ཀྱི་
རྣམ་གྲངས་འདི་ཀུན་འཛིན་པར་འགྱུར་ན། འདིར་འོངས་པའི་མཚན་མ་ངས་བྱ་འམ། གསོལ་པ། བཅོམ་ལྡན་འདས་འདི་ནི་ཆོས་བརྗོད་པ་འམ། བསྟན་པ་མཆིས་ལགས་སམ། བདག་གིས་ནི་ཡི་གེ་གཅིག་ཀྱང་བསྟན་
པར་ཡང་དག་པར་རྗེས་སུ་མ་མཐོང་ལགས་ན། མང་པོ་ལྟ་ག་ལ་མཐོང་ལགས། བཀའ་སྩལ་པ། འཇམ་དཔལ་ལེགས་སོ་ལེགས་སོ། །འཇམ་དཔལ་ཁྱོད་འདི་སྐད་དུ་འཆད་པ་ནི་ཁྱོད་ཀྱི་ཚིག་འདི་ལེགས་པར་སྨྲས་པ་ཡིན་ཏེ་
འཇམ་དཔལ་ཁྱོད་ལེགས་སོ། །འཇམ་དཔལ་ངས་ནི་ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མེད་གྲངས་མེད་པ་དག་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཆོས་ཉིད་འདི་ཁོ་ན་

46-1-313a

སྟོན་ཅིང་བཞུགས་པ་དག་མཐོང་ངོ་། །དེ་ནས་ཚེ་དང་ལྡན་པ་ཤཱ་རིའི་བུ་རང་གི་གནས་ཁང་ནས་བྱུང་ནས། འཇམ་དཔལ་གཞོན་ནུར་གྱུར་པའི་གནས་ཁང་ག་ལ་བ་དེར་སོང་སྟེ་ཕྱིན་ནས་འཇམ་དཔལ་གཞོན་ནུར་གྱུར་པ་མ་
མཐོང་སྟེ། བཅོམ་ལྡན་འདས་ཀྱི་བཞུགས་ཁང་ག་ལ་བ་དེར་སོང་ནས། བཞུགས་ཁང་གི་ཕྱི་སྒོ་ན་འགྲེང་བ་དང་། གསུང་བའི་གསུང་ཐོས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་
བཀའ་སྩལ་ཏོ། །འཇམ་དཔལ་དགེ་སློང་ཤཱ་རིའི་བུ་འདི་གནས་ཁང་གི་ཕྱི་སྒོ་ན་འགྲེང་སྟེ། ཆོས་ཉན་པར་འདོད་ན་འཇམ་དཔལ་ཤཱ་རིའི་བུ་ཆོས་ཉན་པར་ནང་དུ་འོང་བར་གྱིས་ཤིག །གསོལ་པ། མཐའ་འདི་ནི་ཡང་དག་པའི་མཐའ་
ལགས་ན། གང་གི་སླད་རོལ་དང་། ནང་དང་གཉིས་ཀ་མ་མཆིས་པར་གདའ་ལགས་སམ། བཀའ་སྩལ་པ། འཇམ་དཔལ་དེ་ནི་མ་ཡིན་ནོ། །གསོལ་པ། བཅོམ་ལྡན་འདས་དེ་ལྟ་ལགས་པས་ཡང་དག་པའི་མཐའ་ནི་མཐའ་མ་
མཆིས་པ་ལགས་ཏེ། དེ་ལྟ་བུའི་མཐའ་གང་ལགས་པ་དེ་ལ་ནི་ཚུར་མཆི་བ་འམ། ཕར་མཆི་བ་མ་མཆིས་ཏེ། བཅོམ་ལྡན་འདས་དེ་ལྟ་བུའི་མཐའ་ཅན་གྱི་བཙུན་པ་ཤཱ་རིའི་བུ་དེ་ནི་ཚུར་མཆི་བ་འམ། ནང་དུ་མཆི་བའི་མི་རིགས་
ལགས་སོ། །བཀའ་སྩལ་པ། འཇམ་དཔལ་གལ་ཏེ་ང་གནས་ཁང་གི་ནང་ན་ཉན་ཐོས་དག་དང་ལྷན་ཅིག་ཏུ་གཏམ་ཟེར་ཤིང་འདུག་ལ། ཁྱོད་ནི་ཕྱི་རོལ་ན་འདུག་སྟེ། ནང་དུ་འོང་དུ་ཡང་མི་དབང་ན་ཅི་ཁྱོད་སྡུག་བསྔལ་བར་མི་
འགྱུར་རམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། ཆོས་ཐམས་ཅད་ནི་ཆོས་ཀྱི་དབྱིངས་སུ་ཡང་དག་པར་འདུ་བའི་སླད་དུ་སྟེ། འདི་ནི་དེ་བཞིན་གཤེགས་པ་ཞེས་བརྗོད་པ་གང་ལགས་པ་
འདི་ཡང་ཆོས་ཀྱི་དབྱིངས་ལགས་ཏེ། མཚན་ཉིད་གཅིག་པའི་སླད་དུ་དེ་བཞིན་གཤེགས་པ་ཡང་གཞན་ལ་ཆོས་ཀྱི་དབྱིངས་ཀྱང་གཞན་མ་ལགས་སོ། །ཆོས་སམ་ཆོས་བསྟན་པ་ཞེས་བགྱི་བ་འམ། ཆོས་ཉན་པ་ཞེས་བགྱི་

46-1-313b

བའི་ཆོས་འདི་དག་ཀྱང་གཉིས་སུ་མ་མཆིས་པའི་སླད་དུ་ཐ་དད་པ་མ་མཆིས་ཏེ། དེའི་སླད་དུ་ཡང་ཆོས་ཀྱི་དབྱིངས་ལས་ཐ་དད་པ་མ་ལགས་སོ། །འཇམ་དཔལ་ཞེས་བགྱི་བའི་ཡི་གེ་གང་ལགས་པ་འདི་དག་ཀྱང་ཆོས་ཀྱི་དབྱིངས་སུ་གཏོགས་
ཏེ། བཅོམ་ལྡན་འདས་རྣམ་གྲངས་དེས་ན་བདག་ཆུང་ཟད་ཀྱང་གདུང་བ་མ་མཆིས་ལགས་སོ། །བཅོམ་ལྡན་འདས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་ཆོས་སྟོན་དུ་ལགས་ཀྱང་བདག་དེར་མཆི་ཡང་མི་མཆི། དེར་མཆིར་དགའ་
བ་འམ། ཡོངས་སུ་གདུང་བ་ཡང་མི་སྐྱེད་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གཉིས་ཤིག་མཆིས་ན་ནི་དགའ་བ་འམ། ཡོངས་སུ་གདུང་བ་སྐྱེད་པར་འགྱུར་ན་ཆོས་ཀྱི་དབྱིངས་དེ་ནི་གཉིས་སུ་མ་མཆིས་ཏེ། དེའི་སླད་དུ་
བདག་དགའ་བ་འམ། ཡོངས་སུ་གདུང་བར་མི་འགྱུར་ལགས་སོ། །བཅོམ་ལྡན་འདས་ཆོས་སྟོན་པ་མཛད་པའི་ཆོས་བསྟན་པ་དེས་ཀྱང་ཆོས་གང་ཡང་སོགས་པ་འམ། འབྲི་བ་འམ། འཕེལ་བ་འམ། འགྲིབ་པར་མི་བགྱིད་དེ། འདི་ལྟར་
ཆོས་བསྟན་པ་དེ་ནི་ཆོས་གང་ཡང་དམིགས་པས་ཉེ་བར་གནས་པ་མ་ལགས་ཏེ། བཅོམ་ལྡན་འདས་དེའི་སླད་དུ་ཡང་བདག་དགའ་བར་མི་འགྱུར་ཞིང་ཡོངས་སུ་གདུང་བར་མི་འགྱུར་ལགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་
ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་ཁྱོད་ཀྱིས་འཇམ་དཔལ་གཞོན་ནུར་གྱུར་པའི་སྤོབས་པ་ཐོས་སམ། གསོལ་པ། བཅོམ་ལྡན་འདས་ཐོས་ལགས་ཏེ། བཅོམ་ལྡན་འདས་བདག་ནི་བཅོམ་ལྡན་འདས་དང་འཇམ་དཔལ་
གཞོན་ནུར་གྱུར་པའི་སྤོབས་པ་ཐོས་ཀྱང་ཅི་མ་རུང་སྙམ་སྟེ། དེའི་སླད་དུ་བདག་འདི་ན་མཆིས་ལགས་སོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་
ཚེ་དང་ལྡན་པ་ཤཱ་རིའི་བུ་ནང་དུ་མཆི་བར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་དུ་ཤཱ་རིའི་བུ་ཁྱོད་གནས་ཁང་གི་ནང་དུ་ཤོག་ཅེས་བཀའ་སྩལ་ཏོ། །དེ་ནས་ཚེ་དང་ལྡན་པ་

46-1-314a

ཤཱ་རིའི་བུ་གནས་ཁང་དུ་འོངས་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང་། ཚེ་དང་ལྡན་པ་ཤཱ་རིའི་བུ་ལ་འཇམ་དཔལ་གཞོན་ནུར་གྱུར་པས་
འདི་སྐད་ཅེས་སྨྲས་སོ། །བཙུན་པ་ཤཱ་རིའི་བུ་ཁྱོད་དོན་གྱི་དབང་གང་མཐོང་བས་འདིར་འོངས། སྨྲས་པ། འཇམ་དཔལ་ཁོ་བོ་ནི་ཆོས་ཉན་པར་འདོད་པའི་ཕྱིར་འདིར་འོངས་ཏེ། འདི་ལྟར་གང་ན་བཅོམ་ལྡན་འདས་དང་། སྐྱེས་བུ་དམ་པ་
ཁྱོད་ལྟ་བུ་གནས་པ་དེ་ན་བསྟན་པ་ཟབ་མོ་ཡང་དག་པར་ཕུལ་དུ་བྱུང་བ་ཡོད་དེ། དེའི་ཕྱིར་ཁོ་བོ་འོངས་སོ། སྨྲས་པ། བཙུན་པ་ཤཱ་རིའི་བུ་དེ་ནི་དེ་བཞིན་ཏེ་བསྟན་པ་འདི་ནི་ཟབ་བོ། །སྨྲས་པ། བཅོམ་ལྡན་འདས་ཉིད་དང་ཐབས་གཅིག་ཏུ་
བརྩམས་པའི་ཆོས་བསྟན་པ་དེ་ཇི་ཙམ་དུ་ཟབ། སྨྲས་པ། དེ་ནི་བཙུན་པ་ཤཱ་རིའི་བུས་རྟོགས་པར་མི་འགྱུར་ཏེ། དགྲ་བཅོམ་པ་ཟག་པ་ཟད་པ་ཆོས་བསྟན་པ་འདིའི་སྣོད་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་ཆོས་
བསྟན་པ་འདི་ནི་སོ་སོའི་སྐྱེ་བོའི་ཆོས་ལ་ཞུགས་པ་མ་ཡིན། དགྲ་བཅོམ་པ་ཉིད་ཀྱི་ཆོས་ལ་ཞུགས་པ་མ་ཡིན། རང་སངས་རྒྱས་ཀྱི་ཆོས་ལ་ཞུགས་པ་མ་ཡིན། དེ་བཞིན་གཤེགས་པའི་ཆོས་ལ་ཞུགས་པ་མ་ཡིན་པའི་ཕྱིར་རོ། །འདི་ནི་ཆོས་གང་དམིགས་པའི་
ཕྱིར་ཡང་ཞུགས་པ་མ་ཡིན་ནོ། །འདི་ནི་གང་དུ་ཞུགས་པ་འམ་ལྡོག་པ་ཡང་མེད་དེ། ཆོས་ཐམས་ཅད་ཤིན་ཏུ་དབེན་པའི་ཕྱིར་རོ། །སྨྲས་པ། འཇམ་དཔལ་ཁྱོད་ཀྱིས་ཅི་ལས་བསམས་ཏེ། དགྲ་བཅོམ་པ་ཟག་པ་
ཟད་པ་ཆོས་བསྟན་པ་འདིའི་སྣོད་མ་ཡིན་ཞེས་དེ་སྐད་སྨྲ། སྨྲས་པ། བཙུན་པ་ཤཱ་རིའི་བུ་དགྲ་བཅོམ་པ་ཉིད་ནི། འདོད་ཆགས་དང་། ཞེ་སྡང་དང་། གཏི་མུག་ཟད་པ་ཡིན་ན་དེ་གང་གི་སྣོད་ཡིན་ཞིང་དག་གི་ཇི་ལྟ་བུ་
ཞིག་གི་སྣོད་དུ་འགྱུར་སྙམ་སྟེ། དེ་ལས་བསམ་ནས་དགྲ་བཅོམ་པ་ཟག་པ་ཟད་པ། ཆོས་བསྟན་པ་འདིའི་སྣོད་མ་ཡིན་ནོ་ཞེས་ཁོ་བོ་དེ་སྐད་སྨྲའོ། །སྨྲས་པ། འཇམ་དཔལ་ཁོ་བོ་ནི་ཆོས་བསྟན་

46-1-314b

པ་འདིའི་དོན་དུ་གཙུག་ལག་ཁང་ནས་གཙུག་ལག་ཁང་དང་། གནས་ཁང་ནས་གནས་ཁང་དང་། ཕུག་ནས་ཕུག་ཏུ་ཁྱོད་ཚོལ་ཏེ། བདག་གིས་ཁྱོད་ལས་ཟབ་པ་ཟབ་པ་ཡང་དག་པའི་སྤོབས་པ་འདི་ལྟ་བུ་འདི་དག་ཐོས་ཀྱང་
ཅི་མ་རུང་སྙམ་སྟེ། འཇམ་དཔལ་ཁོ་བོ་ནི་བཅོམ་ལྡན་འདས་དང་། ཁྱོད་ཀྱི་ཆོས་བསྟན་པ་ལ་ཆོག་མི་ཤེས་སོ། །སྨྲས་པ། བཙུན་པ་ཤཱ་རིའི་བུ་ཁྱོད་ཆོས་བསྟན་པས་ཆོག་མི་ཤེས་སམ། སྨྲས་པ། ཁོ་བོ་ཆོག་མི་ཤེས་སོ། །
སྨྲས་པ། བཙུན་པ་ཤཱ་རིའི་བུ་ཅི་ཆོས་ཀྱི་དབྱིངས་ཆོས་ཚོལ་བར་བྱེད་དམ། སྨྲས་པ། འཇམ་དཔལ་མི་བྱེད་དོ། །སྨྲས་པ། ཆོས་ཀྱི་དབྱིངས་ཀྱང་གཞན་ལ། ཚེ་དང་ལྡན་པ་ཤཱ་རིའི་བུ་ནི་གཞན་པ་ནི་མ་ཡིན་ན་ཅིའི་ཕྱིར་ཚེ་དང་ལྡན་པ་
ཤཱ་རིའི་བུ་ཆོས་མཉན་པ་ལ་ཆོག་མི་ཤེས། དེ་ཅིའི་ཕྱིར་ཞེ་ན། བཙུན་པ་ཤཱ་རིའི་བུ་ཆོས་ཀྱི་དབྱིངས་ནི་ཆོས་ཚོལ་བར་མི་བྱེད་པའི་ཕྱིར་རོ། །གལ་ཏེ་དེ་ཚོལ་བར་བྱེད་ན་ནི་དེའི་ཕྱིར་དེ་ཆོག་ཤེས་པར་འགྱུར་བ་ཞིག་ན་གང་གི་ཕྱིར་ཚོལ་
བར་མི་བྱེད་པ་དེའི་ཕྱིར་ཆོག་མི་ཤེས་སོ། །སྨྲས་པ། འཇམ་དཔལ་དེ་བཞིན་གཤེགས་པ་མ་གཏོགས་པར་ཁོ་བོ་ལྟ་བུ་ཆོས་ཉན་པ་དེ་ལྟ་བུ་ཁྱོད་ཀྱིས་ག་ལ་རྙེད། སྨྲས་པ། བཙུན་པ་ཤཱ་རིའི་བུ་ཁྱོད་ཤཱ་རིའི་བུ་ཡོངས་
སུ་མྱ་ངན་ལས་མི་འདའ་བའི་ཆོས་ཅན་ཡིན་པར་མོས་སམ། སྨྲས་པ། མོས་སོ། །སྨྲས་པ། ཇི་ལྟར་མོས། སྨྲས་པ། ཆོས་ཐམས་ཅད་ཡོངས་སུ་མ་གྲུབ་པས་ན་ཁོ་བོ་ཡང་ཡོངས་སུ་མྱ་ངན་ལས་
མི་འདའ་བའི་ཆོས་ཅན་ཡིན་ནོ་སྙམ་དུ་དེ་ལྟར་མོས་སོ། །སྨྲས་པ། བཙུན་པ་ཤཱ་རིའི་བུ་ཁྱོད་ཤི་འཕོ་མེད་པ་དང་། སྐྱེ་བ་མེད་པའི་ཆོས་ཅན་ཡིན་པར་མོས་སམ། སྨྲས་པ། མོས་སོ། །
སྨྲས་པ། ཇི་ལྟར་མོས་སྨྲས་པ། ཆོས་ཀྱི་དབྱིངས་སུ་གཏོགས་པའི་ཕྱིར་ཏེ། ཆོས་ཀྱི་དབྱིངས་ལ་འཆི་འཕོ་འམ་སྐྱེ་བ་མེད་པ་དེ་ལྟར་མོས་སོ། །སྨྲས་པ། བཙུན་པ་ཤཱ་རིའི་བུ་

46-1-315a

ཁྱོད་དགྲ་བཅོམ་པ་ཟག་པ་ཟད་པ་མི་ཤེས་པ་དང་ལྡན་པར་མོས་སམ། སྨྲས་པ། མོས་སོ། །སྨྲས་པ། ཇི་ལྟར་མོས། སྨྲས་པ། ཤེས་པ་དང་། མི་ཤེས་པ་མཉམ་པ་ཉིད་ཀྱི་ཕྱིར་དགྲ་བཅོམ་པ་ཟག་པ་ཟད་པ་མི་ཤེས་པ་དང་ལྡན་ཏེ་འདི་ལྟར་མི་
ཤེས་པ་དང་། ཤེས་པ་ནི་མི་ཟད་པའི་ཆོས་ཅན་ཡིན་པའི་ཕྱིར་དབེན་པ་སྟེ། དེ་བས་ན་མི་ཤེས་པ་དང་། ཤེས་པར་རྣམ་པར་མི་རྟོགས་པའི་ཕྱིར་དགྲ་བཅོམ་པ་ཟག་པ་ཟད་པ་མི་ཤེས་པ་དང་ལྡན་པར་མོས་སོ། །སྨྲས་པ། བཙུན་པ་ཤཱ་རིའི་བུ་ཁྱོད་
དགྲ་བཅོམ་པ་ཟག་པ་ཟད་པ། ཤེས་པ་དང་བྲལ་བར་མོས་སམ། སྨྲས་པ། མོས་སོ། །སྨྲས་པ། ཇི་ལྟར་མོས། སྨྲས་པ། འདི་ལྟར་ཆོས་ཐམས་ཅད་ནི་ངོ་བོ་ཉིད་དང་བྲལ་བ་སྟེ། དེ་བས་ན་དགྲ་བཅོམ་པ་ཟག་པ་ཟད་པ་ཤེས་པ་དང་བྲལ་བར་
མོས་སོ། །སྨྲས་པ། བཙུན་པ་ཤཱ་རིའི་བུ་ཁྱོད་དགྲ་བཅོམ་པ་ཟག་པ་ཟད་པ། རྣམ་པར་མ་གྲོལ་བའི་ཆོས་ཅན་དུ་མོས་སམ། སྨྲས་པ། མོས་སོ། །སྨྲས་པ། ཇི་ལྟར་མོས། སྨྲས་པ། ཉོན་མོངས་པ་མེད་པའི་ཕྱིར་ཏེ། འདི་ལྟར་ཉོན་མོངས་པ་མེད་ན་
གང་དག་ལས་རྣམ་པར་གྲོལ་བར་འགྱུར་ཏེ། དེ་ལྟར་མོས་སོ། །སྨྲས་པ། བཙུན་པ་ཤཱ་རིའི་བུ་ཁྱོད་སྔོན་གྱི་དེ་བཞིན་གཤེགས་པ་རྣམས་མ་བྱུང་ཞིང་ཡོངས་སུ་མྱ་ངན་ལས་མ་འདས་པར་མོས་སམ། སྨྲས་པ། མོས་སོ། །སྨྲས་པ། ཇི་ལྟར་མོས། སྨྲས་པ། 
འཇམ་དཔལ་བསམ་གྱིས་མི་ཁྱབ་པའི་དབྱིངས་ལ་ནི་སྐྱེ་བ་མེད་དེ། གང་མི་སྐྱེ་བ་དེ་ལ་མི་སྣང་བར་འགྱུར་བ་འམ། ཡོངས་སུ་མྱ་ངན་ལས་འདའ་བར་འགྱུར་བ་ག་ལ་ཡོད་དེ་དེ་ལྟར་མོས་སོ། །སྨྲས་པ། བཙུན་པ་ཤཱ་རིའི་བུ་ཁྱོད་སངས་རྒྱས་ཐམས་ཅད་གཅིག་
ཡིན་པར་མོས་སམ། སྨྲས་པ། མོས་སོ། །སྨྲས་པ། ཇི་ལྟར་མོས། སྨྲས་པ། འཇམ་དཔལ་ཆོས་ཀྱི་དབྱིངས་ལ་ནི་ཐ་དད་པ་མེད་པ་དེ་དེ་ལྟར་མོས་སོ། །སྨྲས་པ། བཙུན་པ་ཤཱ་རིའི་བུ་ཁྱོད་སངས་རྒྱས་ཀྱི་ཞིང་ཐམས་ཅད་སངས་རྒྱས་ཀྱི་ཞིང་གཅིག་ཡིན་པར་
མོས་སམ། སྨྲས་པ། མོས་སོ། །སྨྲས་པ། ཇི་ལྟར་མོས། སྨྲས་པ། འཇམ་དཔལ་སངས་རྒྱས་ཀྱི་ཞིང་ཐམས་ཅད་ནི་མི་ཟད་པ་ཉིད་ཀྱི་ཞིང་ཡིན་ཏེ་དེ་ལྟར་མོས་སོ། །སྨྲས་པ། བཙུན་པ་ཤཱ་རིའི་བུ་ཁྱོད་ཆོས་ཐམས་ཅད་ཡོངས་སུ་ཤེས་པར་བྱ་བ་མ་

46-1-315b

ཡིན་པ་དང་། སྤང་བར་བྱ་བ་མ་ཡིན་པ་དང་། མངོན་སུམ་དུ་བྱ་བ་མ་ཡིན་པ་དང་། བསྒོམ་པར་བྱ་བ་མ་ཡིན་པར་མོས་སམ། སྨྲས་པ། མོས་སོ། །སྨྲས་པ། ཇི་ལྟར་མོས། སྨྲས་པ། འཇམ་དཔལ་ངོ་བོ་ཉིད་ཀྱིས་ངོ་བོ་ཉིད་ཡོངས་སུ་མི་ཤེས་པ་དང་། རང་བཞིན་
གྱིས་རང་བཞིན་སྤོང་བ་དང་། མངོན་སུམ་དུ་མི་བྱེད་པ་དང་། སྒོམ་པར་མི་བྱེད་པ་དང་། སྐྱེད་པར་མི་བྱེད་པ་དང་། འགག་པར་མི་བྱེད་པ་དང་། ལེན་པར་མི་བྱེད་པ་དང་། འདོར་བར་མི་བྱེད་པ་དང་། མཐའ་དེ་ནི་མི་གནས་པ་ཉིད་དེ། དེ་ལྟར་མོས་སོ། །སྨྲས་པ། བཙུན་
པ་ཤཱ་རིའི་བུ་ཁྱོད་ཆོས་ཀྱི་དབྱིངས་ནི་ཕུང་པོར་མི་འདུག་པའི་དབྱིངས་ཡིན་པ་དང་། ཆོས་གང་ཡང་སྐྱེ་བ་འམ། འགག་པ་མེད་པ་དང་། ཆོས་གང་ཡང་ཕུང་པོར་འདུག་པ་མེད་པར་མོས་སམ། སྨྲས་པ་མོས་སོ། །སྨྲས་པ། ཇི་ལྟར་མོས། སྨྲས་པ། འཇམ་དཔལ་
ཆོས་གང་སྐྱེ་བ་འམ། འགག་པ་འམ། ཕུང་པོར་འདུག་པ་དེ་མི་དམིགས་ཏེ་དེ་ལྟར་མོས་སོ། །སྨྲས་པ། བཙུན་པ་ཤཱ་རིའི་བུ་ཁྱོད་ཤེས་རབ་གང་ཡིན་པ་དེ་ཆོས་ཀྱི་དབྱིངས་ཡིན་ལ། ཆོས་ཀྱི་དབྱིངས་གང་ཡིན་པ་དེ་ཤེས་རབ་ཡིན་ཏེ། ཆོས་ཀྱི་དབྱིངས་ཤེས་བྱ་བའི་མིང་
ཡང་ཐོབ་པ་དང་། དེའི་ཕྱིར་ཡང་དགྲ་བཅོམ་པ་ཞེས་བྱ་བར་མོས་སམ། སྨྲས་པ། མོས་སོ། །སྨྲས་པ། ཇི་ལྟར་མོས། སྨྲས་པ། འཇམ་དཔལ་རྟོགས་པར་འགྱུར་བའི་ཤེས་རབ་ཀྱིས་དགྲ་བཅོམ་པ་ཉིད་དུ་འགྱུར་བ་དེ་བཞིན་དུ་ཆོས་ཀྱི་དབྱིངས་ཡོངས་སུ་ཤེས་པར་ཟད་ཀྱི་ཆོས་
ཀྱི་དབྱིངས་ནི་འདོད་ཆགས་ཀྱི་བདག་ཉིད་དམ། ཞེ་སྡང་གི་བདག་ཉིད་དམ། གཏི་མུག་གི་བདག་ཉིད་ཀྱང་མ་ཡིན་ལ། ཆོས་ཀྱི་དབྱིངས་ལས་ཀྱང་དགྲ་བཅོམ་པ་གུད་ན་མེད་དེ་དེ་ལྟར་མོས་སོ། །སྨྲས་པ། བཙུན་པ་ཤཱ་རིའི་བུ་ཁྱོད་ཆོས་ཐམས་ཅད་སངས་རྒྱས་ཀྱི་
ཁྱུ་མཆོག་དང་མཉམ་པར་མོས་སམ། སྨྲས་པ། མོས་སོ། །སྨྲས་པ། ཇི་ལྟར་མོས། སྨྲས་པ། འཇམ་དཔལ་འདི་ལྟར་བཅོམ་ལྡན་འདས་ཀྱིས་ནི་ཆོས་ཐམས་ཅད་རང་བཞིན་གྱིས་དབེན་པར་མངོན་པར་རྫོགས་པར་སངས་རྒྱས་ཏེ། དེ་ལྟར་མོས་སོ། །སྨྲས་
པ། བཙུན་པ་ཤཱ་རིའི་བུ་ཁྱོད་ཀྱི་ཡུལ་ཇི་ཙམ་པ་དེ་ཙམ་དུ་ཁྱོད་ཀྱིས་ལན་བཏབ་པ་ལེགས་སོ་ལེགས་སོ། །དེ་ཙམ་ཞིག་ཁྱོད་ལ་དྲིས་ཀྱིས་ད་ནི་རང་གི་གནས་སུ་སོང་ཤིག །ཤཱ་རིའི་བུས་སྨྲས་པ། འཇམ་དཔལ་འདི་ལྟར་འདི་ཉིད་ནི་བདག་གི་ཇི་

46-1-316a

སྲིད་འཚོའི་བར་གྱི་གནས་ཡིན་ནོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཆོས་ཀྱི་རྣམ་གྲངས་འདི་འཛིན་པ་འམ། འཆང་བ་འམ། ཀློག་པ་
འམ། ཀུན་ཆུབ་པར་བྱེད་པ་དེས་ནི་སྤོབས་པ་མྱུར་དུ་ཐོབ་པར་འགྱུར་རོ། །གསོལ་པ། བཅོམ་ལྡན་འདས་དེ་ནི་དེ་ལྟ་ལགས་ཏེ། ཇི་སྐད་བཀའ་སྩལ་པ་བཞིན་དུ་རིགས་ཀྱི་བུ་འམ། རིགས་ཀྱི་བུ་མོ་གང་དག་གི་སླད་དུ་ཆོས་ཀྱི་ཕྱག་རྒྱ་འདི་བཞག་པ་དེ་དག་
ནི་སྔོན་གྱི་རྒྱལ་བ་རྣམས་ལ་བགྱི་བ་བགྱིས་པ་ལགས་ཏེ། དེ་དག་དེ་ལྟར་རིག་པར་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་
བར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་འཇམ་དཔལ་གཞོན་ནུར་གྱུར་པས་ཞུས་ནས་ངས་ལན་བཏབ་པ་ཞེས་བྱ་བར་
ཟུང་ཤིག ཆོས་ཀྱི་དབྱིངས་ཤེས་བྱ་བར་ཡང་ཟུང་ཤིག །ཡང་དག་པའི་མཐའ་ཞེས་བྱ་བ་དང་། རིན་པོ་ཆེའི་མཐའ་ཞེས་བྱ་བར་ཡང་ཟུང་ཤིག །ཤཱ་རིའི་བུ་རིགས་ཀྱི་བུ་འམ། རིགས་ཀྱི་བུ་མོ་གང་དག་ཆོས་ཀྱི་རྣམ་གྲངས་འདི་འཛིན་པ་དང་། འཆང་བ་དང་། ཀློག་པ་དང་། 
ཀུན་ཆུབ་པར་བྱེད་པ་དང་། སྒོམ་པ་དང་། སྦྱོར་བ་ལ་བརྩོན་པར་གནས་པ་དེ་དག་ནི་རིན་པོ་ཆེ་དང་འདྲ་བ་ཡིན་ཏེ། མི་སྐྱེ་བའི་ཆོས་རྣམས་ལ་ཡང་བཟོད་པ་མྱུར་དུ་ཐོབ་པར་འགྱུར་རོ། །གཞན་དག་ལ་ཡང་དགེ་བའི་རྩ་བ་རྣམས་ཡང་དག་པར་བསྐྱེད་པར་འགྱུར་རོ། །ཆོས་ཉུང་ངུ་
ཀུན་ཆུབ་པར་བྱས་པས་ཀྱང་ཆོས་མང་པོ་སྟོན་པར་འགྱུར་རོ། །སྤོབས་པ་མི་ཆོད་པར་ཡང་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། འཇམ་དཔལ་གཞོན་ནུར་གྱུར་པ་དང་། ཚེ་དང་ལྡན་པ་ཤཱ་རིའི་བུ་དང་། ལྷ་དང་མི་དང་ལྷ་མ་ཡིན་དང་། དྲི་ཟར་བཅས་པ་
འི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་རིན་པོ་ཆེའི་མཐའ་ཞེས་བྱ་བ་ཐེག་པ་ཆེན་པོའི་མདོ། །རྫོགས་སོ།། །། རྒྱ་གར་གྱི་མཁན་པོ་པྲཛྙཱ་བརྨ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།